ܥܰܠ ܣܽܘܠܳܩܳܐ ܕܰܐܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ[1]܆ ܘܥܰܠ ܢܰܚܬܳܐ ܕܰܐܪܓܘܳܢܳܐ ܗܰܘ ܕܶܐܫܬܰܟܰܢ ܡܶܢ ܫܰܦܺܝܪ ܕܶܚܠܬܳܐ ܡܰܠܟܳܐ ܕܺܝܠܰܢ ܐܰܢܶܣܛܰܐܣܺܝܤ.
24: ܝܰܘܡܳܢܳܐ ܝܶܫܽܘܥ ܡܫܺܝܚܳܐ ܗܰܘ ܕܡܶܢ ܡܰܪܝܰܡ܆ ܗܰܘ ܕܒܶܝܬ ܠܚܶܡܳܝܳܐ܆ ܗܰܘ ܕܢܳܨܪܳܝܳܐ܆ ܗܰܘ ܕܰܒܪܶܗ ܕܐ̱ܢܳܫܳܐ ܐܶܫܬܰܡܰܗ܆ ܣܠܶܩ ܠܰܫܡܰܝܳܐ. ܐܳܘ ܠܬܶܕܡܽܘܪܬܳܐ ܘܰܠܪܶܚܡܰܬ ܐ̱ܢܳܫܽܘܬܳܐ ܗܳܝ ܡܥܰܠܰܝܬܳܐ. ܣܠܶܩ ܓܶܝܪ ܐܰܟܣܢܳܐܺܝܬ. ܘܠܰܘ ܐܰܟܣܢܳܐܺܝܬ܆ ܟܰܕ ܗܘ̣ܳܐ ܒܰܐܬܪ̈ܰܘܳܬܳܐ ܕܚܰܝ̈ܠܰܘܳܬܳܐ ܡܶܬܗܰܘܢܳܢ̈ܶܐ ܘܰܕܠܳܐ ܓܫܽܘܡ. ܘܰܐܟܣܢܳܐܺܝܬ ܡܰܢ܆ ܡܶܛܽܠ ܟܺܝܬ ܕܗܳܫܳܐ ܩܰܕܡܳܐܺܝܬ ܝܺܬܶܒ ܟܰܕ ܡܒܰܣܰܪ ܥܰܠ ܬܪܽܘܢܽܘܤ. ܗܰܘ ܕܝܰܬܺܝܪ ܐܺܝܬܰܘܗ̱ܝ ܡܰܠܟܳܝܳܐ܆ ܘܕܰܠܗܰܠ ܡܶܢ ܟܽܠ ܪܺܝܫܳܢܽܘܬܳܐ. ܠܰܘ ܐܰܟܣܢܳܐܺܝܬ ܕܶܝܢ܆ ܡܶܛܽܠ ܟܺܝܬ ܕܳܐܦ ܟܰܕ ܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܒܰܪܢܳܫܳܐ ܡܶܛܽܠܳܬܰܢ ܠܡܰܘܬܒܳܐ ܗܰܘ. ܘܠܰܫܡܰܝܳܐ ܠܳܐ ܫܒܰܩ. ܐܶܠܳܐ ܐ̱ܢܳܫܳܐܺܝܬ ܡܰܢ܆ ܥܰܡ ܒܢܰܝ̈ܢܳܫܳܐ ܡܶܬܗܰܦܰܟ ܗ̱ܘܳܐ[2]܆ ܐܰܠܳܗܳܐܺܝܬ ܕܶܝܢ ܒܪܰܡ ܠܟܽܠ ܡܳܠܶܐ ܗ̱ܘܳܐ.
ܕܳܐܙܶܠ ܕܶܝܢ ܐ̱ܢܳܫ ܐܰܟܣܢܳܐܺܝܬ ܠܰܐܬܪܳܐ. ܡܶܬܶܐܡܰܪ ܟܺܐܢܳܐܺܝܬ܆ ܠܗܰܘ ܐܰܝܢܳܐ ܕܟܰܕ ܡܶܢ ܩܕܺܝܡ ܠܳܐ ܐܺܝܬܰܘܗ̱ܝ ܗ̱ܘܳܐ ܒܶܗ܆ ܠܚܰܪܬܳܐ ܚܙܰܩ ܠܶܗ. ܐܶܠܳܐ ܐܰܟܙܢܳܐ ܕܰܩܕܳܡ ܡܶܬܒܰܪܢܫܳܢܽܘܬܳܐ. ܟܰܕ ܠܰܐܪܥܳܐ ܡܳܠܶܐ ܗ̱ܘܳܐ܆ ܕܶܐܬܳܐ ܠܰܐܪܥܳܐ ܡܶܬܶܐܡܰܪ ܘܡܶܬܗܰܝܡܰܢ ܒܝܰܕ ܡܶܐܬܺܝܬܶܗ ܕܒܰܒܣܰܪ܆ ܐܰܝܟ ܗܰܘ ܕܰܠܒܰܪ ܡܶܢ ܗܳܕܶܐ ܐܺܝܬܰܘܗ̱ܝ ܗ̱ܘܳܐ܆ ܗܳܟܰܢܳܐ ܐܳܦ ܗܳܫܳܐ ܐܳܙܶܠ ܠܰܫܡܰܝܳܐ ܒܰܒܣܰܪ܆ ܟܰܕ ܠܟܽܠ ܡܳܠܶܐ܆ ܘܡܶܢ ܟܽܠ ܠܳܐ ܡܶܬܥܪܶܐ. ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܫܽܘܠܳܡܳܐ ܕܐ̱ܪܳܙܳܐ. ܠܘܳܬ ܗܳܕܶܐ ܚܳܐܰܪ ܗ̱ܘܳܐ ܟܽܠܶܗ ܐ̱ܪܳܙܳܐ ܗܰܘ ܕܰܡܕܰܒܪܳܢܽܘܬܳܐ܆ ܐܰܝܟܰܢܳܐ ܕܠܰܢ ܗܳܢܽܘܢ ܕܶܐܬܚܙܺܝܢܰܢ ܕܠܳܐ ܫܳܘܶܝܢܰܢ ܠܰܐܪܥܳܐ܆ ܗܽܘ ܒܶܗ ܠܘܳܬ ܫܡܰܝܳܐ ܢܥܰܠܶܐ ܢܰܣܶܩ.
ܡܶܛܽܠܗܳܕܶܐ ܦܰܘܠܽܘܤ: ܟܰܕ ܡܶܛܽܠ ܚܽܘܒܳܐ ܕܰܠܘܳܬܰܢ ܕܰܐܠܳܗܳܐ ܘܰܐܒܳܐ ܡܡܰܠܶܠ ܟܳܬܶܒ ܗ̱ܘܳܐ܆ ܕܰܐܩܺܝܡ ܠܰܢ ܐܰܟܚܕܳܐ ܥܰܡܶܗ܆ ܘܰܐܟܚܕܳܐ ܥܰܡܶܗ ܐܰܘܬܶܒ ܠܰܢ ܒܗܳܠܶܝܢ ܕܰܠܥܶܠ ܡܶܢ ܫܡܰܝܳܐ ܒܰܡܫܺܝܚܳܐ ܝܶܫܽܘܥ܆ ܐܰܝܟܰܢܳܐ ܕܰܢܚܰܘܶܐ ܒܥܳܠ̈ܡܶܐ ܗܳܢܽܘܢ ܕܰܥܬܺܝܕܺܝܢ ܠܥܽܘܬܪܳܐ ܫܦܺܝܥܳܐ ܕܛܰܝܒܽܘܬܶܗ܆ ܒܒܰܣܺܝܡܽܘܬܶܗ ܕܰܥܠܰܝܢ ܒܰܡܫܺܝܚܳܐ ܝܶܫܽܘܥ[3].
ܐܰܝܢܳܐ ܦܽܘܬܝܳܐ ܕܬܰܪܥܺܝܬܳܐ ܢܶܬܡܨܶܐ ܠܡܶܣܰܒ ܒܡܰܚܫܰܒܬܳܐ܆ ܠܪܰܒܽܘܬܳܐ ܕܐ̱ܪܳܙܳܐ ܗܳܢܳܐ܆ ܐܰܘ ܐܰܝܕܳܐ ܡܶܠܬܳܐ ܐܰܝܟ ܕܫܳܘܝܳܐ ܬܦܰܫܶܩ ܠܗܳܝ 222ܕܶܐܬܟܠܬ. ܗܳܐ ܓܶܝܪ ܗܰܘ ܟܳܪܽܘܙܳܐ ܘܰܫܠܺܝܚܳܐ ܕܥܰܡ̱ܡ̈ܶܐ܆ ܟܰܕ ܐܳܦ ܛܰܝܒܽܘܬܳܐ ܩܪܳܗ̇܆ ܘܥܽܘܬܪܳܐ ܫܦܺܝܥܳܐ. ܘܒܰܣܺܝܡܽܘܬܳܐ܆ ܘܟܽܠܗܽܘܢ ܫܡܳܗ̈ܶܐ ܟܰܢܶܫ ܐܰܟܚܕܳܐ ܗܳܠܶܝܢ ܡܝܰܬܪ̈ܶܐ ܘܰܡܫܰܘܕ̈ܥܳܢܶܐ ܕܪܶܚܡܰܬ ܐ̱ܢܳܫܽܘܬܳܐ ܕܕܰܐܝܟ ܗܳܕܶܐ܆ ܠܚܰܪܬܳܐ. ܟܰܕ ܡܶܣܟܺܢܽܘܬܗܶܝܢ ܕܠܶܟܣܺܝ̈ܤ ܫܒܰܩܬܶܗ܆ ܐܶܙܕܟܺܝ ܡܶܢ ܬܶܕܡܽܘܪܬܳܐ. ܘܰܐܘܣܶܦ ܟܰܕ ܐܳܡܰܪ: ܘܗܳܕܶܐ܆ ܠܰܘ ܡܶܢܟܽܘܢ܆ ܕܰܐܠܳܗܳܐ ܗ̱ܝ ܡܰܘܗܰܒܬܳܐ[4]. ܠܡܳܢܳܐ ܐܳܡܰܪ ܡܶܬܶܐܡܶܢ ܐ̱ܢܳܐ ܒܗܳܠܶܝܢ܆ ܟܰܕ ܒܡܶܠܬܳܐ ܠܕܰܐܝܟ ܗܳܕܶܐ ܫܦܺܝܥܽܘܬ ܛܳܒܽܘܬܳܗ̇ ܕܡܰܘܗܰܒܬܳܐ ܨܳܒܶܐ ܐ̱ܢܳܐ ܕܶܐ݀ܚܰܘܶܐ. ܡܰܘܗܰܒܬܳܐ ܕܰܐܠܳܗܳܐ ܐܺܝܬܶܝܗ̇܆ ܡܕܶܝܢ ܐܳܦ ܠܗܰܠ ܡܶܢ ܟܽܠ ܡܶܠܬܳܐ ܐܺܝܬܶܝܗ̇.
ܡܰܢܽܘ ܓܶܝܪ ܕܠܳܐ ܢܶܬܗܰܪ܆ ܟܰܕ ܠܓܶܢܣܳܐ ܕܰܒ̈ܢܰܝ ܐ̱ܢܳܫܳܐ܆ ܠܗܰܘ ܕܰܛܪܺܝܕܳܐ ܡܶܢ ܦܰܪܕܰܝܣܳܐ ܗ̱ܘܳܐ܆ ܘܠܳܐܟܶܠܩܰܪܨܳܐ ܘܰܠ̈ܫܺܐܕܶܐ ܘܰܠܚܰܫ̈ܶܐ ܕܒܶܣܪܳܐ ܐܶܬܪܟܶܢ܆ ܘܰܠܩܰܝ̈ܣܶܐ ܘܰܠܟܺܐܦ̈ܶܐ ܐܰܠܳܗ̈ܶܐ ܚܫܰܒ܆ ܚܳܙܶܐ ܠܶܗ ܝܳܬܶܒ ܒܰܬܪܽܘܢܽܘܤ ܗܰܘ ܕܰܠܥܶܠ ܡܶܢ ܡܰܠܟܽܘܬܳܐ ܒܝܰܕ ܪܺܝܫܺܝܬܳܐ ܗܳܝ ܕܡܶܢܰܢ ܗܳܝ ܟܺܝܬ ܕܺܐܝܬܶܝܗ̇ ܐܰܠܳܗܳܐ ܗܰܘ ܕܶܐܬܒܰܣܰܪ ܘܶܐܬܒܰܪܢܰܫ܆ ܠܳܐ ܡܶܫܬܰܚܠܦܳܢܳܐܺܝܬ ܡܶܛܽܠܳܬܰܢ. ܗܰܘ ܐܳܕܳܡ ܬܪܰܝܳܢܳܐ܆ ܗܰܘ ܒܪܳܐ ܝܺܚܺܝܕܳܝܳܐ܆ ܗܰܘ ܡܶܠܬܳܐ ܕܰܩܕܳܡ ܥܳܠ̈ܡܶܐ܆ ܗܰܘ ܕܚܰܕ ܝܳܬܶܒ ܐܰܟܚܕܳܐ ܥܰܡ ܐܰܒܳܐ ܘܥܰܡ ܪܽܘܚܳܐ ܩܰܕܺܝܫܳܐ܆ ܘܰܩܕܳܡ ܡܶܬܒܰܣܪܳܢܽܘܬܳܐ ܘܡܶܢ ܒܳܬܰܪ ܡܶܬܒܰܣܪܳܢܽܘܬܳܐ. ܐܶܠܳܐ ܩܕܳܡ ܡܶܬܒܰܣܪܳܢܽܘܬܳܐ ܡܰܢ܆ ܦܫܺܝܛܳܐ܆ ܘܠܳܐ ܡܪܰܟܒܳܐ. ܐܰܝܟ ܠܳܐ ܦܰܓܪܳܢܳܐ. ܡܶܢ ܒܳܬܰܪ ܡܶܬܒܰܣܪܳܢܽܘܬܳܐ ܕܶܝܢ܆ ܚܰܕ ܡܶܢ ܬܰܪܬܶܝܢ܆ ܡܶܢ ܐܰܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ.
ܚܰܝܶܕ ܠܶܗ ܓܶܝܪ ܗܽܘ ܡܶܠܬܳܐ ܩܢܽܘܡܳܐܺܝܬ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܝܳܠܕܰܬ ܐܰܠܳܗܳܐ ܡܰܪܝܰܡ܆ ܦܰܓܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܘܕܳܡܶܐ ܠܰܢ ܒܟܽܠܡܶܕܶܡ ܤܛܰܪ ܡܶܢ ܚܛܺܝܬܳܐ[5]܆ ܕܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ. ܘܺܐܝܬܰܘܗ̱ܝ ܐܳܦ ܗܳܟܰܢܳܐ ܚܰܕ ܒܪܳܐ. ܟܰܕ ܘܠܳܐ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰܠܳܗܳܐ ܫܕܳܐ܆ ܘܟܰܕ ܕܠܳܐ ܒܽܘܠܒܳܠܳܐ ܗܘ̣ܳܐ ܒܰܪܢܳܫܳܐ܆ ܘܡܶܛܽܠܗܳܕܶܐ ܐܶܫܬܰܡܰܗ ܥܰܡܰܢܽܘܐܶܝܠ. ܘܰܠܟܽܘܢܳܝܳܐ ܗܳܢܳܐ ܩܰܒܶܠ ܕܢܶܬܟܬܶܒ ܥܠܰܘܗ̱ܝ܆ ܐܺܝܬܰܘܗ̱ܝ ܡܫܰܘܕܥܳܢܳܐ ܕܚܰܕ ܩܢܽܘܡܳܐ ܕܡܶܢ ܬܪܶܝܢ ܟܝܳܢ̈ܶܐ. ܐܶܢ ܕܶܝܢ ܕܚܰܕ ܩܢܽܘܡܳܐ܆ ܐܳܦ ܕܚܰܕ ܦܰܪܨܽܘܦܳܐ܆ ܐܳܦ ܕܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܰܐܠܳܗܳܐ ܡܶܠܬܳܐ. ܕܡܶܢ ܗܳܪܟܳܐ. ܬܠܺܝܬܳܝܽܘܬܳܐ ܣܓܺܝܕܬܳܐ܆ ܡܶܢܝܳܢܳܐ ܝܰܬܺܝܪܳܐ. ܠܳܐ ܩܰܒܠܰܬ̣.
ܡܕܰܓܠܳܐ ܓܶܝܪ. ܘܠܳܐ ܣܳܟ܆ ܟܰܕ ܒܝܰܕ ܢܒܺܝܳܐ ܡܰܙܥܶܩ: ܕܫܽܘܒܚܳܐ ܕܺܝܠܝ ܠܰܐ̱ܚܪܺܢܳܐ ܠܳܐ ܐܶ݀ܬܶܠ[6]. ܡܶܛܽܠܗܳܕܶܐ: ܐܳܦ ܗܰܘ ܚܰܕ ܡܶܢ ܬܠܺܝܬܳܝܽܘܬܳܐ ܐܶܨܛܠܶܒ܆ ܟܰܕ ܨܠܺܝܒܳܐ ܕܰܚܠܳܦܰܝܢ ܣܰܝܒܰܪ[7]܆ ܟܰܕ ܐܺܝܬܰܘܗ̱ܝ ܡܳܪܳܗ̇ ܕܬܶܫܒܽܘܚܬܳܐ. ܐܶܢ ܓܶܝܪ ܡܶܢ ܒܳܬܰܪ ܚܕܳܝܽܘܬܳܐ ܠܰܬܪܳܝܳܢܽܘܬܳܐ ܡܦܰܠܶܓ܆ ܟܽܠܳܗ̇ ܐܰܢܰܢܩܺܐ. ܕܰܟܝܳܢܳܐ ܐ̱ܢܳܫܳܝܳܐ܆ ܠܳܐ ܡܶܣܬܰܓܕܳܢܳܐ ܢܶܗܘܶܐ ܐܺܝܬܰܘܗ̱ܝ܆ ܟܰܕ ܠܰܘ ܟܝܳܢܳܐܺܝܬ ܡܚܰܝܰܕ ܠܗܰܘ ܕܒܰܟܝܳܢܳܐ ܐܺܝܬܰܘܗ̱ܝ ܡܶܣܬܰܓܕܳܢܳܐ܆ ܐܳܦܠܳܐ ܚܰܕ ܡܶܕܶܡ ܚܫܺܝܒ܆ ܠܘܳܬ ܗܰܘ ܕܠܰܘ ܚܛܽܘܦܝܳܐ ܚܰܫܒܳܗ̇ ܠܗܳܝ ܕܢܶܗܘܶܐ ܫ̇ܘܶܐ̣ ܠܰܐܠܳܗܳܐ[8].
ܗܰܘ ܕܳܐܦ ܟܰܕ ܩܳܡ ܡܶܢ ܡܺܝ̈ܬܶܐ܆ ܠܰܢ ܕܡܰܝ̣ܺܝ̣ܬ̣ܺܝܢ ܗ̱ܘܰܝܢ ܡܶܢ ܚܛܺܝܬܳܐ܆ ܐܰܟܚܕܳܐ ܥܰܡܶܗ ܐܰܩܺܝܡ. ܘܰܡܚܰܘܶܐ ܗ̱ܘܳܐ ܐܺܝܕܰܘ̈ܗ̱ܝ ܘܪ̈ܶܓܠܰܘܗ̱ܝ ܠܬܰܠܡܺܝܕܰܘ̈ܗ̱ܝ[9]. ܐܳܦ ܒܽܘܙܳܥܳܐ ܕܨܶܨ̈ܶܐ܆ ܘܕܰܢܓܽܘܫܽܘܢܳܝܗ̱ܝ ܝܳܗܶܒ ܗ̱ܘܳܐ ܗܽܘ ܠܶܗ ܟܰܕ ܐܳܡܰܪ܆ ܓܽܘܫܘ ܘܰܚܙܰܘ ܕܰܠܪܽܘܚܳܐ ܒܶܣܪܳܐ ܘܓܰܪ̈ܡܶܐ ܠܳܐ ܐܺܝܬ ܠܶܗ܆ ܐܰܝܟܰܢܳܐ ܕܠܺܝ ܚܳܙܶܝܢ ܐܢ̱ܬܽܘܢ. ܕܺܐܝܬ ܠܺܝ[10]. ܟܰܕ ܣܳܟܰܪ ܠܦܽܘ̈ܡܶܐ ܓܽܘܡܕܳܢ̈ܶܐ ܘܰܬܪ̈ܺܝܦܶܐ ܕܗܳܢܽܘܢ ܕܳܐܡܪܺܝܢ ܕܒܰܣܒܺܝܪܽܘܬܳܐ ܐܶܬܒܰܣܰܪ. ܗܶܓܓܳܐ ܓܶܝܪ܆ ܐܰܝܢܳܐ ܠܒܽܘܟܝܳܐ ܐܰܘ ܓܶܫܬܳܐ ܡܩܰܒܶܠ. ܘܠܰܘ ܒܗܳܕܶܐ ܒܰܠܚܽܘܕ ܩܰܕܶܡ ܐܰܪܺܝܡܶܗ ܠܪܽܘܫܥܗܽܘܢ܆ ܐܶܠܳܐ ܐܳܦ ܟܰܕ ܗܳܝ ܐܰܘܣܶܦ ܘܶܐܡܰܪ: ܡܶܚܕܳܐ ܠܬܰܠܡܺܝܕܰܘ̈ܗ̱ܝ܆ ܐܺܝܬ ܠܟܽܘܢ ܡܶܕܶܡ ܕܡܶܐܟܽܘܠܬܳܐ ܗܳܪܟܳܐ܆ ܘܟܰܕ ܐܰܘܫܶܛܘ ܠܶܗ ܗܳܢܽܘܢ ܡܢܳܬܳܐ ܡܶܢ ܢܽܘܢܳܐ ܕܰܡܛܰܘܰܝ ܘܟܰܟܳܪܺܝܬܳܐ ܡܶܢ ܟܘܳܪܳܐ܆ ܘܰܢܣܰܒ ܘܶܐܟܰܠ[11]. ܗܳܕܶܐ ܓܶܝܪ܆ ܘܠܳܐ ܡܶܛܽܠ ܡܶܕܶܡ ܐ̱ܚܪܺܝܢ ܣܰܥܪܳܗ̇܆ ܐܶܠܳܐ ܕܰܢܚܰܘܶܐ ܓܰܠܝܳܐܺܝܬ܆ ܕܗܽܘ ܐܺܝܬܰܘܗ̱ܝ ܗܰܘ ܕܩܳܡ ܡܶܢ ܡܺܝ̈ܬܶܐ. ܗܰܘ ܕܳܐܦ ܩܕܳܡ ܨܠܺܝܒܳܐ ܘܰܒܟܽܠܶܗ ܙܰܒܢܳܐ ܗܰܘ ܕܰܡܕܰܒܪܳܢܽܘܬܳܐ܆ ܐܳܟܶܠ ܗ̱ܘܳܐ ܘܫܳܬܶܐ ܥܰܡܗܽܘܢ ܘܡܶܬܗܰܦܰܟ ܗ̱ܘܳܐ ܥܰܡܗܽܘܢ ܐ̱ܢܳܫܳܐܺܝܬ܆ ܐܰܝܟ ܒܰܪ̱ܬ ܩܳܠܳܐ ܕܰܢܒܺܝܳܐ.
ܐܺܝܬ ܠܳܗ̇ ܕܶܝܢ܆ ܐܳܦ ܬܶܐܽܘܪܺܝܰܐ ܡܶܕܶܡ ܡܥܰܠܰܝܬܳܐ܆ ܠܗܳܝ ܕܳܐܟܶܠ ܡܢܳܬܳܐ ܕܢܽܘܢܳܐ ܕܰܡܛܰܘܰܝ܆ ܗܳܝ ܟܺܝܬ ܕܰܠܫܽܘܠܳܡܳܐ ܕܰܡܕܰܒܪܳܢܽܘܬܳܐ ܡܰܘܕܥܳܐ. ܫܽܘܠܳܡܳܐ ܕܶܝܢ ܕܰܡܕܰܒܪܳܢܽܘܬܳܐ ܐܺܝܬܰܘܗ̱ܝ. ܦܽܘܪܩܳܢܳܐ ܕܺܝܠܝ. ܟܰܕ ܓܶܝܪ ܠܰܟܝܳܢܳܐ ܐ̱ܢܳܫܳܝܳܐ. ܗܰܘ ܕܛܰܒܺܝܥ ܗ̱ܘܳܐ ܒܪܰܛܺܝܒܽܘܬܳܐ ܕܚܰܝ̈ܶܐ ܕܳܐܣܽܘܛܽܘܬܳܐ ܐܰܝܟ ܕܢܽܘܢܳܐ܆ ܒܝܰܕ ܡܶܬܒܰܣܪܳܢܽܘܬܳܐ ܗܳܝ ܠܳܐ ܡܶܬܡܰܠܠܳܢܺܝܬܳܐ ܚܰܝܶܕ ܠܶܗ ܗܽܘ ܡܶܠܬܳܐ ܕܰܐܠܳܗܳܐ܆ ܗܰܘ ܢܽܘܪܳܐ ܡܶܬܗܰܘܢܳܢܺܝܬܳܐ ܘܠܳܐ ܡܶܬܩܰܪܒܳܢܺܝܬܳܐ܆ ܐܰܝܟ ܗܰܘ ܕܰܡܛܰܘܝܳܐ ܘܪܰܬܺܝܚܳܐ[12] ܥܰܒܕܶܗ܆ ܘܰܐܓܗܝܶܗ ܡܶܢ ܐܰܫܺܝܕܽܘܬܗܽܘܢ ܕܚܰܫ̈ܶܐ܆ ܘܰܠܗܳܕܶܐ ܡܕܰܒܪܳܢܽܘܬܳܐ ܗܳܟܰܢܳܐ ܗܰܢܺܝܳܐܺܝܬ ܫܰܡܠܝܳܗ̇܆ ܐܰܝܟ ܕܳܐܦ ܡܶܐܟܽܘܠܬܳܐ ܒܰܝܬܳܝܬܳܐ ܕܺܝܠܶܗ ܢܶܥܒܕܺܝܗ̇.
ܦܽܘܪܩܳܢܳܐ ܓܶܝܪ ܕܰܒܢܰܝ̈ܢܳܫܳܐ܆ ܐܺܝܬܶܝܗ̇ ܡܶܐܟܽܘܠܬܳܐ ܕܰܐܠܳܗܳܐ. ܘܰܠܗܳܕܶܐ ܗܽܘ ܢܰܗܺܝܪܳܐܺܝܬ ܚܰܘܝܳܗ̇ ܒܶܐܘܰܢܓܶܠܺܝ̈ܰܐ. ܟܰܕ ܓܶܝܪ ܬܰܠܡܺܝܕܰܘ̈ܗ̱ܝ ܒܚܰܕ ܡܶܢ ܥܶܕܳܢ̈ܶܐ ܡܦܺܝܣܺܝܢ ܗܘܰܘ ܠܶܗ ܕܢܶܐܟܽܘܠ܆ ܐܶܡܰܬܝ ܕܰܥܬܺܝܕ ܗ̱ܘܳܐ ܕܰܠܗܳܝ ܫܳܡܪܳܝܬܳܐ ܢܡܰܠܶܠ܆ ܟܰܕ ܠܦܽܘܪܩܳܢܳܗ̇ ܕܗܳܝ ܗܰܘ ܕܰܒܝܰܕ ܗܰܝܡܳܢܽܘܬܳܐ ܡܩܰܕܶܡ ܗ̱ܘܳܐ ܝܳܕܰܥ ܗ̱ܘܳܐ܆ ܐܳܡܰܪ ܗ̱ܘܳܐ: ܠܺܝ܆ ܡܶܐܟܽܘܠܬܳܐ ܐܺܝܬ ܠܺܝ ܠܡܶܐܟܰܠ܆ ܗܳܝ ܕܰܐܢ̱ܬܘܢ ܠܳܐ ܝܳܕܥܺܝܢ ܐܢ̱ܬܽܘܢ ܠܳܗ̇. ܘܡܶܐܟܽܘܠܬܳܐ ܕܺܝܠܝ ܐܺܝܬܶܝܗ̇܆ ܕܶܐ݀ܥܒܶܕ ܨܶܒܝܳܢܳܐ ܕܗܰܘ ܕܫܰܕܪܰܢܝ܆ ܘܶܐܫܰܡܠܶܝܘܗ̱ܝ ܠܰܥܒܳܕܶܗ[13].
ܐܶܟܰܠ ܕܶܝܢ ܐܰܟܚܕܳܐ. ܥܰܡ ܢܽܘܢܳܐ ܡܛܰܘܝܳܐ܆ ܐܳܦ ܟܰܟܳܪܺܝܬܳܐ ܕܕܶܒܫܳܐ ܟܰܕ ܡܰܘܕܰܥ܆ ܕܗܳܢܽܘܢ ܕܶܐܬܢܰܝܰܪܘ[14] ܒܝܰܕ ܡܶܬܒܰܪܢܫܳܢܽܘܬܳܐ ܐܰܠܳܗܳܝܬܳܐ ܘܶܐܫܬܰܘܬܰܦܘ ܒܰܐܠܳܗܽܘܬܶܗ܆ ܐܰܝܟ ܕܶܒܫܳܐ ܡܰܢ ܥܰܡ ܪܶܓܬܳܐ. ܢܩܰܒܠܽܘܢ ܠܦܽܘܩܕܳܢ̈ܶܐ ܕܺܝܠܶܗ. ܐܰܝܟ ܕܰܒܩܺܪܽܘܬܳܐ ܕܶܝܢ ܠܢܳܡܽܘܣ̈ܶܐ ܕܺܝܠܶܗ ܗܳܢܽܘܢ ܒܗܽܘܢ ܢܶܟܬܒܽܘܢ.
ܟܰܕ ܗܳܠܶܝܢ ܘܕܰܐܝܟ ܗܳܠܶܝܢ ܐ̱ܪ̈ܳܙܶܐ. ܕܰܒܰܪ ܗܰܘ ܕܩܳܡ ܡܶܢ ܡܺܝ̈ܬܶܐ܆ ܗܰܘ ܕܰܒܠܰܥ ܒܕܰܦܢܶܗ ܒܠܽܘܟܳܝܬܳܐ[15]. ܘܒܺܐܝܕܰܘ̈ܗ̱ܝ ܘܰܒܪ̈ܶܓܠܰܘܗ̱ܝ ܘܰܒܨܶܨ̈ܶܐ܆ ܣܠܶܩ ܠܰܫܡܰܝܳܐ܆ ܟܰܕ ܛܥܺܝܢ ܫܽܘ̈ܘܕܳܥܶܐ ܕܙܳܟܽܘܬܳܐ ܘܓܰܢܒܳܪܽܘܬܳܐ ܕܥܰܠ ܡܰܘܬܳܐ܆ ܗܳܠܶܝܢ ܕܰܡܚܰܘܶܝܢ ܗ̱ܘܰܘ ܠܚܰܝ̈ܠܰܘܴܬܳܐ ܗܳܢܽܘܢ ܕܰܠܥܶܠ܆ ܕܡܶܛܽܠ ܡܳܢܳܐ ܐܶܬܒܰܪܢܰܫ܆ ܗܰܘ ܩܛܺܝܠܳܐ ܨܶܒܝܳܢܳܝܳܐ܆ ܗܰܘ ܡܺܝܬܳܐ ܚܰܝܳܐ܆ ܗܰܘ ܕܒܰܚܒܳܠܳܐ ܘܰܠܥܶܠ ܡܶܢ ܚܒܳܠܳܐ. ܐܺܝܬܰܘܗ̱ܝ ܗ̱ܘܳܐ ܓܶܝܪ ܗܽܘ ܦܰܓܪܳܐ܆ ܕܰܡܟܳܢ ܗ̱ܘܳܐ ܠܡܶܬܚܰܒܳܠܽܘ. ܐܶܠܳܐ ܟܰܕ ܕܺܝܠܳܢܳܝܳܐ ܐܺܝܬܰܘܗ̱ܝ ܗ̱ܘܳܐ. ܕܗܰܘ ܠܳܐ ܡܶܬܚܰܒܠܳܢܳܐ ܒܰܟܝܳܢܳܐ܆ ܐܳܦ ܠܳܐ ܡܶܬܟܰܒܫܳܢܳܐ ܐܺܝܬܰܘܗ̱ܝ ܗ̱ܘܳܐ ܠܰܚܛܺܝܬܳܐ. ܘܟܰܕ ܛܥܶܡ ܡܰܘܬܳܐ. ܠܳܐ ܚܙܳܐ ܚܒܳܠܳܐ. ܗܰܘ ܐܰܪܥܳܢܳܝܳܐ ܘܰܫܡܰܝܳܢܳܐ. ܗܰܘ ܣܽܘܡܳܩܳܐ ܘܰܕܡܰܣ̣ܡܰܩ ܒܰܕܡܳܐ ܘܫܰܦܺܝܪܳܐ܆ ܒܙܰܠܺܝ̈ܩܶܐ ܕܰܐܠܳܗܽܘܬܳܐ ܡܰܢܗܰܪ.
ܡܶܛܽܠܗܳܕܶܐ. ܪ̈ܽܘܚܶܐ ܡܶܬܗܰܘܢܳܢ̈ܝܳܬܳܐ. ܟܰܕ ܚܳܙ̈ܝܳܢ ܗ̱ܘܰܝ̈ ܠܶܗ ܐܰܝܟ ܢܒܺܝܽܘܬܳܐ ܕܶܐܫܰܥܝܳܐ܆ ܡܰܙܥ̈ܩܳܢ ܗ̱ܘܰܝ̈܆ ܡܰܢܽܘ ܗܳܢܳܐ ܕܳܐܬܶܐ ܡܶܢ ܐܰܕܽܘܡ[16]. ܗܳܝ ܕܶܝܢ ܕܡܶܢ ܐܰܕܽܘܡ܆ ܡܶܢ ܐܰܪ̈ܥܳܢܳܝܳܬܳܐ ܡܶܬܦܰܫܩܳܐ. ܣܽܘܡܳܩܽܘܬܳܐ ܕܢܰܚ̈ܬܶܐ ܡܶܢ ܒܽܘܣܽܘܪ܆ ܗܳܢܳܐ ܫܰܦܺܝܪܳܐ ܒܶܐܤܛܠܳܐ ܕܺܝܠܶܗ. ܗܳܝ ܕܡܶܢ ܒܽܘܣܽܘܪ ܬܽܘܒ܆ ܟܰܕ ܡܶܢ ܥܶܒܪܳܝܳܐ ܠܠܶܫܳܢܳܐ ܝܰܘܢܳܝܳܐ ܥܳܒܪܳܐ܆ ܡܶܢ ܒܶܣܪܳܐ ܡܰܘܕܥܳܐ. ܐܺܝܬ ܕܶܝܢ ܐܶܡܰܬܝ܆ ܕܳܐܦ ܒܶܣܪܳܐ ܡܶܫܬܰܡܰܗ ܢܰܚܬܳܐ܆ ܘܗܳܕܶܐ ܟܰܕ ܟܝܳܢܳܐܺܝܬ ܡܚܰܝܰܕ ܠܰܢ܆ ܐܰܝܟܰܢܳܐ ܕܰܡܚܰܘܶܐ ܐܺܝܽܘܒ ܟܰܕ ܐܶܡܰܪ: ܡܶܫܟܳܐ ܘܒܶܣܪܳܐ ܐܰܠܒܶܫܬܳܢܝ܆ ܒܓܰܪ̈ܡܶܐ ܘܒܰܓ̈ܝܳܕܶܐ ܚܪܰܙܬܳܢܝ[17]. ܗܳܕܶܐ ܗܳܟܺܝܠ ܐܺܝܬܶܝܗ̇ ܗܳܝ ܕܳܐܡܪܺܝܢ: ܡܶܢ ܐܰܪܥܳܐ ܡܰܢ. ܚܳܙܶܝܢ ܚ̱ܢܰܢ ܠܶܗ ܕܳܐܬܶܐ. ܣܽܘܡܳܩܳܐ ܕܶܝܢ ܠܶܗ ܟܰܕ ܠܶܗ ܘܫܰܦܺܝܪܳܐ. ܘܣܽܘܡܳܩܳܐ ܡܰܢ܆ ܐܰܝܟ ܡܕܰܡܕܡܳܐ[18]. ܫܰܦܺܝܪܳܐ ܕܶܝܢ ܒܫܽܘܦܪܳܐ ܝܰܬܺܝܪ ܡܶܢ ܒܢܰܝ̈ܢܳܫܳܐ. ܐܰܝܟܰܢܳܐ ܕܳܐܡܰܪ ܕܰܘܺܝܕ: ܠܳܐ ܡܶܬܦܰܚܡܳܢܳܐ ܓܶܝܪ ܐܺܝܬܰܘܗ̱ܝ ܒܫܰܦܺܝܪܽܘܬ ܦܰܐܝܽܘܬܳܐ ܕܰܐܠܳܗܽܘܬܳܐ܆ ܟܰܕ ܒܫܽܘܒܚܳܐ ܗܰܘ ܕܰܡܥܰܠܰܝ ܡܶܢ ܟܽܠ ܐܳܦ ܠܒܶܣܪܳܐ ܡܗܰܕܰܪ ܦܰܐܝܽܘܬ ܐܰܠܳܗܳܐܺܝܬ[19].
ܗܳܕܶܐ ܐܺܝܬܶܝܗ̇ ܗܳܝ ܕܦܰܘܠܽܘܤ ܐܳܡܰܪ ܗ̱ܘܳܐ: ܟܰܕ ܚܳܙܶܐ ܗ̱ܘܳܐ ܠܚܰܝ̈ܠܰܘܳܬܳܐ ܕܒܰܫܡܰܝܳܐ ܕܺܝܠܶܦܘ ܘܶܐܬܶܐܪܶܙܘ ܒܝܰܕ ܡܕܰܒܪܳܢܽܘܬܳܐ ܗܳܝ ܕܰܠܘܳܬܰܢ܆ ܐܰܝܟܰܢܳܐ ܕܬܶܬܺܝܕܰܥ ܗܳܫܳܐ ܠܪ̈ܺܝܫܳܢܘܳܬܳܐ ܘܰܠܫܽܘܠ̈ܛܳܢܶܐ ܒܗܳܠܶܝܢ ܫܡܰܝܳܢ̈ܝܳܬܳܐ ܒܝܰܕ ܥܺܕܬܳܐ܆ ܚܶܟܡܬܳܐ ܕܰܐܠܳܗܳܐ ܗܳܝ ܣܰܓܺܝܰܐܬ ܦܽܘܪ̈ܫܳܢܶܐ[20]܆ ܒܝܽܘܒܳܠܗܽܘܢ ܕܥܳܠ̈ܡܶܐ܆ ܗܳܝ ܕܰܥܒܰܕ ܒܰܡܫܺܝܚܳܐ ܝܶܫܽܘܥ ܡܳܪܰܢ. ܒܳܬܰܪܟܶܢ. ܗܰܘ ܡܰܢ ܠܳܐ ܚܳܫܽܘܫܳܐ ܗܽܘ ܒܶܗ ܡܰܝܬܶܐ ܗ̱ܘܳܐ ܛܽܘܦ̈ܣܶܐ ܕܚܰܫܳܐ. ܡܶܛܽܠ ܕܰܡܒܰܣܰܪ ܗ̱ܘܳܐ܆ ܘܰܒܗܳܠܶܝܢ ܡܶܨܛܰܒܰܬ ܗ̱ܘܳܐ. ܟܰܕ ܠܘܳܬ ܪ̈ܽܘܚܶܐ ܗܳܠܶܝܢ ܡܰܠܰܐܟܳܝ̈ܳܬܳܐ ܘܰܫܡܰܝܳܢ̈ܝܳܬܳܐ ܐܳܙܶܠ ܗ̱ܘܳܐ܆ ܘܟܰܕ ܒܦܽܘܪܩܳܢܳܐ ܕܰܒܢܰܝ̈ܢܳܫܳܐ ܘܰܒܫܽܘܘܙܳܒܳܐ[21] ܕܗܳܢܽܘܢ ܕܰܐܒܺܝܕܺܝܢ ܗ̱ܘܰܘ ܡܶܫܬܰܒܗܰܪ ܗ̱ܘܳܐ.
ܚܢܰܢ ܕܶܝܢ܆ ܠܳܐ ܢܶ݀ܬܪܰܥܶܐ ܗܳܠܶܝܢ ܕܰܠܥܶܠ܆ ܘܠܳܐ ܡܶܢ ܐܰܪܥܳܐ ܢܰ݀ܪܚܶܩ ܠܗܰܘܢܰܢ܆ ܘܠܳܐ ܒܓܶܦܳܐ ܕܬܰܪܥܺܝܬܳܐ ܢܶܦܪܰܚ ܘܢܶܬܥܰܠܶܐ ܠܘܳܬ ܬܪܽܘܢܽܘܤ ܗܰܘ ܡܰܠܟܳܝܳܐ܆ ܗܰܘ ܕܒܶܗ ܥܰܡ ܐܰܒܳܐ ܐܰܟܚܕܳܐ ܝܳܬܒܺܝܢ ܚ̱ܢܰܢ ܒܝܰܕ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ܆ ܗܳܝ ܕܺܐܝܬܶܝܗ̇ ܡܫܺܝܚܳܐ܆ ܘܠܳܐ ܣܳܥܽܘܪ̈ܘܳܬܳܐ ܕܦܰܐܝ̈ܳܢ ܠܰܫܡܰܝܳܐ ܢܶܣܥܽܘܪ܆ ܠܗܰܘ ܕܶܐܫܬܰܢܺܝܢܰܢ ܠܡܶܥܒܰܪ ܒܶܗ.
ܐܶܡܰܬܝ ܕܰܡܚܰܬ̣ܚܬ̣ܳܐ ܠܳܟ ܦܰܩܪܽܘܬܳܐ ܕܙܳܢܝܽܘܬܳܐ܆ ܐܰܘ ܕܪܶܚܡܰܬ ܟܶܣܦܳܐ. ܐܰܘ ܕܗܳܠܶܝܢ ܚܰܫ̈ܶܐ ܐ̱ܚܪ̈ܳܢܶܐ܆ ܐܶܡܰܪ ܠܘܳܬܳܗ̇: ܡܶܬܚܰܡܰܨ ܐ̱ܢܳܐ ܡܶܢ ܪܺܝܫܺܝܬܳܐ ܕܺܝܠܝ ܕܰܠܥܶܠ ܝܳܬܒܳܐ. ܪܳܐܶܬ ܐ̱ܢܳܐ ܡܶܢ ܐܺܝܩܳܪܳܐ ܗܰܘ ܕܶܐܬܝܰܩܪܶܬ. ܘܕܳܚܶܠ ܐ̱ܢܳܐ܆ ܕܕܰܠܡܳܐ ܙܘܳܕ̈ܶܐ ܢܶܗܘܶܐ ܠܺܝ܆ ܕܫܽܘܢܳܩܳܐ ܕܝܰܬܺܝܪ ܪܰܒ ܘܰܕܠܰܝܬ ܠܡܶܫܬܳܐܠܽܘ ܡܶܢܶܗ. ܘܡܶܚܕܳܐ ܒܰܪܫܳܥܬܶܗ. ܢܶܥܪܽܘܩ ܚܰܫܳܐ܆ ܘܰܠܘܳܬ ܒܗܺܝܠܽܘܬܳܐ ܕܠܳܐ ܚܳܫܽܘܫܽܘܬܳܐ ܬܶܣܰܒ ܚܺܐܦܳܐ ܐܶܠܦܳܐ ܕܬܰܪܥܺܝܬܳܟ. ܘܢܰܡܠܶܟ ܡܶܟܺܝܠ ܒܗܰܕܳܡܰܝ̈ܢ ܡܳܪܳܗ̇ ܕܙܰܕܺܝܩܽܘܬܳܐ ܘܠܰܘ ܚܛܺܝܬܳܐ. ܘܥܰܠ ܟܽܠܗܶܝܢ ܗܳܠܶܝܢ ܕܺܐܝܬ ܠܰܢ ܢܶܒܣܶܐ܆ ܘܰܠܡܳܪܳܐ ܕܗܳܠܶܝܢ ܢܰܫܶܦ ܢܶܬܶܠ ܐܶܢܶܝܢ[22].
ܗܳܐ ܓܶܝܪ ܐܳܦ ܫܰܦܺܝܪ ܕܶܚܠܬܳܐ. ܘܰܐܝܟ ܕܒܰܫܪܳܪܳܐ ܪܳܚܶܡ ܠܰܡܫܺܝܚܳܐ ܡܰܠܟܳܐ ܕܺܝܠܰܢ܆ ܠܰܐܪ̈ܓܘܳܢܶܐ ܕܺܝܠܶܗ ܘܰܠܬܰܟܣܺܝܬܳܐ ܡܰܠܟܳܝܬܳܐ ܩܰܪܶܒ ܠܶܗ ܚܶܪܡܳܐ܆ ܘܟܰܕ ܗܳܘܶܐ ܛܽܘܦܣܳܐ ܕܣܳܥܽܘܪ̈ܘܳܬܳܐ ܛܳܒ̈ܳܬܳܐ ܕܺܝܠܰܢ܆ ܘܟܰܕ ܠܗܰܘ ܕܝܰܗ̱ܒ ܠܶܗ ܡܰܠܟܽܘܬܳܐ ܦܳܪܰܥ ܒܫܰܦܺܝܪܽܘܬ ܬܰܪܥܺܝܬܳܐ ܕܨܶܒܝܳܢܶܗ܆ ܘܰܡܕܰܡܶܐ ܒܗܳܢܽܘܢ ܕܫܰܘܺܝܘ ܘܰܦܪܰܣܘ ܢܰܚܬܰܝ̈ܗܽܘܢ ܬܚܽܘܬܰܘܗ̱ܝ ܒܽܐܘܪܚܳܐ܆ ܐܶܡܰܬܝ ܕܟܰܕ ܥܰܠ ܥܺܝܠܳܐ ܕܰܐܬܳܢܳܐ ܦܰܐܝܽܘܬ ܐܰܠܳܗܳܐܺܝܬ ܐܰܟܚܕܳܐ ܘܰܡܕܰܒܪܳܢܳܐܺܝܬ ܡܶܙܕܰܝܰܚ ܗ̱ܘܳܐ܆ ܒܣܰܘ̈ܟܶܐ ܕܕܶܩ̈ܠܶܐ ܡܶܢ ܟܶܢܫܳܐ ܡܶܬܝܰܩܰܪ ܗ̱ܘܳܐ ܘܡܶܬܠܰܘܶܐ ܗ̱ܘܳܐ܆ ܟܰܕ ܐܳܙܺܠ̱ܝܢ ܩܕܳܡܰܘ̈ܗ̱ܝ ܘܳܐܬܶܝܢ ܒܳܬܪܶܗ.
ܘܟܰܕ ܡܰܘܕܶܐ ܝܰܘܡܳܢܳܐ ܥܰܡ ܚܰܝ̈ܠܰܘܳܬܳܐ ܗܳܢܽܘܢ ܕܰܠܥܶܠ܆ ܕܗܽܘ ܐܺܝܬܰܘܗ̱ܝ ܡܰܠܟܳܐ ܕܬܶܫܒܽܘܚܬܳܐ܆ ܗܰܘ ܕܒܺܐܝܕܰܘ̈ܗ̱ܝ ܡܰܠ̈ܟܶܐ ܡܰܡܠܟܺܝܢ܆ ܘܚܰܝܠ̈ܬܳܢܶܐ ܟܳܬܒܺܝܢ ܙܰܕܺܝܩܽܘܬܳܐ[23]܆ ܘܚܳܐܰܪ ܠܘܳܬ ܗܰܘ ܪܳܡܳܐ ܘܠܳܐ ܡܶܬܩܰܪܒܳܢܳܐ܆ ܘܰܕܡܶܛܽܠܳܬܰܢ ܨܶܒܝܳܢܳܐܺܝܬ ܗܽܘ ܠܶܗ ܡܰܟܶܟ܆ ܡܰܟܺܝܟܽܘܬܳܐ ܘܢܰܓܺܝܪܽܘܬ ܪܽܘܚܳܐ ܕܬܰܪܥܺܝܬܳܐ ܝܳܠܶܦ ܘܡܶܬܪܕܶܐ܆ ܘܠܶܗ ܚܳܫܶܒ ܥܶܠܬܳܐ ܕܬܽܘܪ̈ܳܨܶܐ܆ ܟܰܕ ܐܺܝܬ ܠܶܗ ܕܰܐܟܚܕܳܐ ܥܳܡܠܳܐ ܥܰܡܶܗ ܘܰܐܟܚܕܳܐ ܡܪܰܒܝܳܐ ܠܗܶܝܢ ܠܰܡܝܰܬܪ̈ܳܬܳܐ ܕܰܐܝܟ ܗܳܠܶܝܢ܆ ܗܳܝ ܕܺܐܝܬܶܝܗ̇ ܠܰܢ ܫܰܘܬܳܦܬܳܐ ܕܡܰܠܟܽܘܬܶܗ ܘܒܰܪ̱ܬ ܙܰܘܓܶܗ. ܐܰܝܟܰܢܳܐ ܕܗܳܢܽܘܢ ܕܰܬܚܶܝܬ ܪܺܝܫܳܢܳܝܽܘܬܗܽܘܢ ܢܶܬܕܰܡܪܽܘܢ܆ ܘܰܢܫܰܒܚܽܘܢ ܠܗܰܘ ܕܰܒܝܰܕ ܙܽܘܘܳܓܳܐ ܐܰܙܘܶܓ ܐܰܟܚܕܳܐ ܠܢܰܦ̈ܫܳܬܳܐ ܫܰܦܺܝܪ̈ܳܬ ܕܶܚܠܬܳܐ ܐܰܘ ܠܦܰܓܪ̈ܶܐ. ܘܢܺܐܡܪܽܘܢ ܫܰܪܺܝܪܳܐܺܝܬ ܕܥܰܠ ܗܳܠܶܝܢ ܢܺܐܡܪܺܝܗ̇ ܐ̱ܢܳܫ ܟܺܐܢܳܐܺܝܬ ܠܡܶܠܬܳܐ ܗܳܝ ܟܳܗܢܳܝܬܳܐ܆ ܗܳܝ ܕܡܶܢ ܡܳܪܝܳܐ ܡܶܬܠܰܚܡܳܐ ܐܰܢ̱ܬܬܳܐ ܠܓܰܒܪܳܐ[24].
ܟܽܠ ܫܰܘܬܳܦܽܘܬܳܐ ܡܰܢ ܓܶܝܪ ܘܙܽܘܘܳܓܳܐ ܡܶܢ ܐܰܠܳܗܳܐ ܐܺܝܬܰܝܗܽܘܢ܆ ܘܠܳܐ ܐܺܝܬ ܡܶܕܶܡ ܠܒܰܪ ܡܶܢ ܒܛܺܝܠܽܘܬܳܐ ܕܺܝܠܶܗ. ܗܳܝ ܕܶܝܢ ܕܠܳܚܡܳܐܺܝܬ ܘܰܒܫܰܘܝܽܘܬ ܙܢܳܐ. ܢܶܗܘܶܐ ܐܺܝܬ ܠܳܗ̇ ܠܰܐܢ̱ܬܬܳܐ ܠܘܳܬ ܓܰܒܪܳܐ܆ ܡܰܘܗܰܒܬܳܐ ܐܺܝܬܶܝܗ̇ ܐܰܠܳܗܳܝܬܳܐ܆ ܕܰܠܕܰܠܻ̈ܝܠܶܐ ܘܰܠܗܳܢܽܘܢ ܒܰܠܚܽܘܕܰܝܗܽܘܢ ܕܒܰܡܝܰܬܪܽܘܬܳܐ ܚܳܐܶܝܢ ܡܶܫܬܰܟܢܳܐ܆ ܘܡܶܢ ܛܰܝܒܽܘܬܶܗ ܘܚܰܝܠܶܗ ܡܶܫܬܰܪܪܳܐ.
ܐܰܝܕܳܐ ܓܶܝܪ ܡܶܢ ܡܰܠ̈ܟܳܬܳܐ ܗܳܟܰܢܳܐ ܚܝܳܬ݂܆ ܟܰܕ ܘܠܳܐ ܥܰܠ ܐ̱ܢܳܫ ܡܶܢ ܡܶܫܬܰܡ̈ܥܳܢܶܐ ܒܰܪ̈ܓܺܝܓܳܬܳܐ ܗܳܠܶܝܢ ܢܶܫܳܝ̈ܳܬܳܐ[25] ܐܰܘܩܪܰܬ܆ ܐܳܦܠܳܐ ܠܗܰܢܺܝܽܐܘܬܳܐ ܒܰܝܬܳܝܬܳܐ ܕܺܝܠܳܗ̇ ܥܶܒܕܰܬ ܡܰܕܰܐܬܳܐ ܥܰܠ ܡܫܰܥܒ̈ܕܶܐ܆ ܐܶܠܳܐ ܒܚܽܘܫܳܒܳܐ ܓܰܒܪܳܢܳܝܳܐ ܡܶܢ ܗܳܠܶܝܢ ܡܰܗܡܝܳܐ ܗ̱ܘܳܬ܆ ܘܥܳܪܩܳܐ ܗ̱ܘܳܬ ܝܰܬܺܝܪܳܐܺܝܬ܆ ܐܳܦ ܡܶܢܳܗ̇ ܕܗܳܝ ܕܶܐܣܬܒܰܪ ܕܺܐܝܬܶܝܗ̇ ܗ̱ܘܳܬ ܐܰܢ̱ܬܬܳܐ. ܘܛܳܒ ܟܺܐܢܳܐܺܝܬ. ܗܳܢܶܝܢ ܡܰܢ ܓܶܝܪ ܕܡܶܢ ܩܕܺܝܡ ܠܡܰܠ̈ܟܶܐ ܐܶܬܢܰܩ̈ܰܦܶܝܢ ܠܘܳܬ ܙܽܘܘܳܓܳܐ܆ ܟܰܕ ܢܶܫ̈ܶܐ ܐܰܟܣ̈ܢܳܝܳܬܳܐ ܐܺܝܬܰܝܗܶܝܢ ܗ̱ܘܰܝ̈܆ ܘܰܕܠܳܐ ܣܽܘܟܳܝ ܥܒܰܪ̈ܶܝܢ ܠܘܳܬ ܐܺܝܩܳܪܳܐ ܡܰܠܟܳܝܳܐ܆ ܘܰܒܠܳܐ ܡܢܰܣܝܽܘܬܳܐ ܕܛܳܒܬܳܐ ܐܺܝܬܰܝܗܶܝܢ[26]ܗ̱ܘܰܝ̈. ܠܘܳܬ ܢܰܨܺܝܚܽܘܬܳܐ ܕܡܶܢ ܗܳܪܟܳܐ ܡܶܬܦܰܢ̈ܩܳܢ ܗ̱ܘܰܝ̈܆ ܘܫܽܘܠܛܳܢܳܐ ܗܽܘܠܶܐ[27] ܕܰܪ̈ܓܺܝܓܳܬܳܐ ܐܺܝܬܰܘܗ̱ܝ ܗ̱ܘܳܐ ܠܗܶܝܢ.
ܗܳܕܶܐ ܕܶܝܢ ܟܰܕ ܡܶܢ ܡܰܠܟܳܐ ܫܰܦܺܝܪ ܕܶܚܠܬܳܐ ܐܶܬܝܰܠܕܰܬ܆ ܘܒܶܝܬ ܡܰܠܟܽܘܬܳܐ ܐܶܬܪܰܒܝܰܬ ܘܶܐܬܥܰܠܡܰܬ̣ ܘܰܚܝܳܬ̣܆ ܘܥܰܡ ܓܰܒܪܳܐ ܥܳܡܪܳܐ ܗܳܫܳܐ ܪܳܚܶܡ ܐܰܠܳܗܳܐ ܘܰܕܝܰܬܺܝܪ ܡܰܠܟܳܝܳܐ ܐܺܝܬܰܘܗ̱ܝ ܒܬܰܪܥܺܝܬܳܐ܆ ܗܳܢܳܐ ܒܽܘܣܳܡܳܐ ܕܡܰܠܟܽܘܬܳܐ. ܕܰܝܳܢܳܐ ܕܺܐܝܬܰܘܗ̱ܝ܆ ܗܳܝ ܕܬܶܒܣܶܐ ܥܰܠ ܫܽܘܠܛܳܢܳܐ܆ ܘܠܳܐ ܬܶܬܬܚܶܕ ܡܶܢ ܗܳܠܶܝܢ ܕܡܶܬܚܰܙ̈ܝܳܢ ܕܺܐܝܬܰܝܗܶܝܢ ܪ̈ܓܺܝܓܳܬܳܐ ܘܝܰܩܺܝܪ̈ܳܬ ܕܡܰܝ̈ܳܐ܆ ܐܶܠܳܐ ܕܬܶܕܰܥ ܕܗܺܝ ܬܶܐܚܽܘܕ ܠܗܳܠܶܝܢ܆ ܒܗܳܝ ܕܥܰܠ ܟܽܠܗܶܝܢ ܬܶܒܣܶܐ.
ܡܶܛܽܠ ܗܳܕܶܐ. ܠܡܰܠܟܽܘܬܳܐ ܕܺܝܠܳܗ̇ ܟܺܝܬ ܘܰܕܫܰܦܺܝܪ ܕܶܚܠܬܳܐ ܡܳܠܟܳܐ܆ ܘܰܒܙܰܒܢܳܐ ܘܰܒܣܰܝܒܽܘܬܳܐ ܫܰܡܺܝܢܬܳܐ ܝܰܩܰܪ ܦܳܪܽܘܩܳܐ ܕܟܽܠ܆ ܟܰܕ ܡܟܰܠܶܠ ܠܫܰܘܝܽܘܬ ܬܰܪܥܺܝܬܗܽܘܢ ܘܠܰܬܪܺܝܨܽܘܬ ܫܽܘܒܚܳܐ ܕܺܝܠܗܽܘܢ ܕܰܒܗܰܝܡܳܢܽܘܬܳܐ܆ ܗܳܝ ܕܳܐܦ ܠܡܰܠܟܽܘܬܳܐ ܕܰܫܡܰܝܳܐ ܬܙܰܡܶܢ ܠܗܽܘܢ. ܠܗܳܝ ܕܬܶܗܘܶܐ. ܕܟܽܠܰܢ ܢܶ݀ܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫ ܒܟܽܠ ܘܛܳܒܳܐ ܘܡܰܥܒܶܕ ܚܰܝ̈ܶܐ܆ ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܰܠܡܺܝܢ. ܐܰܡܺܝܢ܀
ܫܠܶܡ ܡܺܐܡܪܳܐ ܕܥܶܣܪܺܝܢ ܘܰܐܪܒܥܳܐ.