ܡܺܐܡܪܳܐ ܕܥܶܣܪܺܝܢ ܘܰܬܠܳܬܳܐ

ܕܶܐܬܶܐܡܰܪ ܒܥܺܕܬܳܐ ܪܰܒܬܳܐ. ܥܰܠ ܗܳܝ ܕܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ¹. ܘܰܕܙܳܕܶܩ ܠܡܺܐܨܰܦ ܕܡܶܣ̈ܟܺܢܶܐ. ܘܟܰܕ ܚܰܝ݂ܺܝ݂ܢܰܢ܆ ܘܟܰܕ ܗܳܠܶܝܢ ܐ̱ܚܪ̈ܳܝܳܬܳܐ ܡܦܰܩܕܺܝܢܰܢ.

23: ܥܰܗܺܝܕ ܐ̱ܢܳܐ. ܕܰܠ̱ܐܢܳܫܺܝ̈ܢ ܡܶܢܟܽܘܢ. ܚܰܘܒܬܳܐ ܡܶܕܶܡ ܕܺܝܠܳܢܳܝܬܳܐ ܚܰܝܳܒ. ܗܳܝ ܟܺܝܬ ܕܶܐܬܚܰܙܝܰܬ ܠܺܝ܆ ܕܓܰܘܳܢܳܐܺܝܬ ܠܟܽܠܳܗ̇ ܥܺܕܬܳܐ ܐܰܪܡܶܝܗ̇. ܐܶܫܬܰܘܕܺܝܬ̣ ܓܶܝܪ ܠܡܺܐܡܰܪ: ܕܰܐܝܟܰܢܳܐ ܙܳܕܶܩ ܠܡܶܣܬܰܟܳܠܽܘ ܗܳܝ ܕܰܐܡܺܝܪܳܐ ܠܝܽܘܚܰܢܳܢ ܗܰܘ ܡܡܰܠܶܠ ܐܰ‎ܠܳܗܳܝ̈ܳܬܳܐ ܕܶܐܘܰܢܓܶܠܺܝ̈ܣܛܶܐ܆ ܗܳܝ ܕܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ^[1]. ܘܟܰܕ ܗܳܕܶܐ ܥܳܒܶܕ ܐ̱ܢܳܐ܆ ܠܳܐ ܡܒܰܨܰܪ ܐ̱ܢܳܐ ܠܫܽܘܘܕܳܝܳܐ ܗܰܘ ܕܰܗܘܳܐ ܕܺܝܠܳܢܳܐܺܝܬ ܠܘܳܬ ܐ̱ܢܳܫܺܝ̈ܢ܆ ܒܗܳܝ ܕܟܽܠܗܽܘܢ ܡܶܫܬܰܘܬܦܺܝܢ ܒܰܪܡܳܝܳܗ̇ ܕܚܰܘܒܬܳܐ. ܠܳܐ ܡܶܬܒܰܨܪܳܢܰܐ ܗ̱ܘ ܓܶܝܪ ܝܽܘܬܪܳܢܳܐ ܕܗܳܠܶܝܢ ܪ̈ܽܘܚܳܢܳܝܳܬܳܐ ܝܰܬܺܝܪܳܐܺܝܬ ܕܡ̈ܶܠܶܐ. ܐܰܝܟܰܢܳܐ ܕܟܽܠ ܚܰܕ ܡܶܢ ܗܳܢܽܘܢ ܕܫܳܡܥܺܝܢ܆ ܐܳܦ ܡܫܰܡܠܝܳܐ ܢܶܗܘܶܐ ‌ܐܺܝܬܰܘܗ̱ܝ ܠܶܗ ܠܘܳܬܶܗ܆ ܐܳܦ ܟܽܠܶܗ ܠܘܳܬ ܩܰܪܺܝܒܶܗ ܢܶܫܒܽܘܩ.

ܐܳܡܪܺܝܢ ܚ̱ܢܰܢ ܗܳܟܺܝܠ. ܕܰܐ‎ܠܳܗܳܐ ܡܶܠܬܳܐ. ܗܰܘ ܕܡܶܢ ܐܰܒܳܐ ܠܳܐ ܡܶܬܡܰܠܠܳܢܳܐܺܝܬ ܐܶܬܺܝܠܶܕ ܩܕܳܡ ܥܳܠ̈ܡܶܐ܆ ܗܰܘ ܕܒܽܐܘܣܺܝܰܐ ܘܰܒܫܽܘܒܚܳܐ ܘܰܒܡܰܠܟܽܘܬܳܐ ܘܰܒܚܰܝܠܳܐ ܘܒܰܡܬܽܘܡܳܝܽܘܬܳܐ. ܠܳܐ ܡܶܕܶܡ ܡܫܰܚܠܰܦ ܡܶܢ ܗܰܘ ܕܝܰܠܕܶܗ܆ ܕܗܳܢܳܐ ܐܶܬܳܐ ܠܣܽܘܪܳܩܳܐ ܨܶܒܝܳܢܳܝܳܐ܆ ܘܶܐܬܒܰܣܰܪ ܡܶܢ ܪܽܘܚܳܐ ܩܰܕܺܝܫܳܐ܆ ܘܡܶܢ ܡܰܪܝܰܡ ܝܳܠܕܰܬ ܐܰ‎ܠܳܗܳܐ ܒܬܽܘܠܬܳܐ. ܡܶܚܕܳܐ ܓܶܝܪ ܥܰܡܳܗ̇ ܕܗܳܝ ܕܶܐܡܰܪ ܓܰܒܪܺܐܝܠ: ܚܕܳܝ ܡܰܠܝܰܬ ܛܰܝܒܽܘܬܳܐ. ܡܳܪܝ ܥܰܡܶܟܝ^[2]܆ ܕܶܐܬܒܰܣܰܪ. ܡܶܚܕܳܐ ܗܽܘ ܡܶܠܬܳܐ ܡܗܰܝܡܢܺܝܢ ܚ̱ܢܰܢ܆ ܒܶܗ ܒܥܶܕܳܢܳܐ ܗܰܘ ܙܥܽܘܪܳܐ ܘܰܪܦܳܦܳܐ ܠܳܐ ܡܶܬܦܰܣܩܳܢܳܐ ܕܙܰܒܢܳܐ܆ ܠܳܐ ܡܶܬܦܰܫܩܳܢܳܐܺܝܬ ܘܰܐܝܟ ܕܗܽܘ ܝܳܕܰܥ܆ ܒܟܰܪܣܳܗ̇ ܕܰܒܬܽܘܠܬܳܐ. ܠܰܘ ܓܶܝܪ ܡܶܠܬܳܐ ܫܚܺܝܡܬܳܐ܆ ܐܶܠܳܐ ܫܽܘܘܕܳܥܳܐ ܕܰܥܒܳܕܳܐ ‌ܐܺܝܬܰܘܗ̱ܝ ܗ̱ܘܳܐ܆ ܣܽܘܒܳܪܳܐ ܗܰܘ ܕܰܒܝܰܕ ܪܺܝܫ ܡܰܠܰܐܟ̈ܶܐ ܐܶܬܶܐܡܰܪ܆ ܕܶܐܬܒܰܣܰܪ ܕܶܝܢ ܐܳܡܪܺܝܢܰܢ: ܠܰܘ ܟܰܕ ܠܒܶܣܪܳܐ ܐܶܫܬܰܚܠܰܦ. ܙܶܠ ܠܗܰܠ܆ ܪܳܡ ܗ̱ܘ̣ ܓܶܝܪ ܐܰܝܟ ܐܰ‎ܠܳܗܳܐ ܡܶܢ ܟܽܠܶܗ ܫܽܘܚܠܳܦܳܐ܆ ܐܶܠܳܐ ܕܚܰܝܶܕ ܠܶܗ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ ܡܢܰܦܫܳܐ ܟܺܝܬ ܘܡܶܬܗܰܘܢܳܢܳܐ. ܒܰܚܕܳܝܽܘܬܳܐ ܗܳܝ ܩܢܽܘܡܳܝܬܳܐ.

ܠܰܘ ܓܶܝܪ ܟܰܕ ܦܪܺܝܫ ܒܶܣܪܳܐ ܡܶܢ ܡܶܠܬܳܐ܆ ܩܢܳܐ ܩܽܘܝܳܡܳܐ. ܐܶܠܳܐ ܡܶܚܕܳܐ ܐܰܟܚܕܳܐ ܡܶܬܩܰܝܰܡ ܗ̱ܘܳܐ܆ ܘܰܐܟܚܕܳܐ ܠܡܶܠܬܳܐ ܗܰܘ ܕܠܳܐ ܫܽܘܪܳܝ ܘܕܰܩܕܳܡ ܥܳܠ̈ܡܶܐ ܡܶܬܚܰܝܰܕ ܗ̱ܘܳܐ. ܥܰܡ ܩܽܘܝܳܡܳܐ ܓܶܝܪ ܗܰܘ ܕܺܝܠܶܗ܆ ܚܕܳܝܽܘܬܳܐ ܗܳܝ ܕܰܠܘܳܬ ܡܶܠܬܳܐ ܐܰܟܚܕܳܐ ܪܳܗܛܳܐ ܗ̱ܘܳܬ݂܆ ܘܗܳܕܶܐ ܐܺܝܬܶܝܗ̇ ܐܰܝܟ ܕܡܰܨܝܳܐ ܠܒܰܪܢܳܫܳܐ ܠܡܺܐܡܰܪ܆ ܚܕܳܝܽܘܬܳܐ ܗܳܝ ܕܒܰܩܢܽܘܡܳܐ^[3] ܠܰܘ ܕܥܽܘܠܳܐ ܕܩܰܕܡܳܝܰܬ ܐܶܬܓܒܶܠ܆ ܗܘ̣ܳܬ ܢܰܩܺܝܦܽܘܬܳܐ ܡܶܕܶܡ ܕܰܐ̱ܚܝܳܢܽܘܬܳܐ ܘܰܕܡܶܢ ܪܶܚܡܬܳܐ ܚܽܘܒܳܢܳܝܬܳܐ ܕܺܝܠܶܗ ܕܡܶܠܬܳܐ܆ ܐܶܠܳܐ. ܗܳܝ ܕܒܰܟܢܺܝܫܽܘܬܳܐ ܘܰܒܪܶܗܛܳܐ ܕܰܐܟܚܕܳܐ ܟܝܳܢܳܝܳܐ܆ ܐܰܝܟ ܐܰܝܕܳܐ ܕܺܐܝܬ ܠܡܶܚܙܳܐ ܐܳܦ ܥܰܠ ܒܰܪܢܳܫܳܐ ܕܺܝܠܰܢ.

ܗܘܰܝܢܰܢ ܓܶܝܪ ܡܶܢ ܢܰܦܫܳܐ ܟܺܝܬ ܘܦܰܓܪܳܐ܆ ܟܝܳܢ̈ܶܐ ܕܠܳܐ ܕܳܡܶܝܢ܆ ܘܰܕܠܳܐ ܫܘܶܝܢ ܒܽܐܘܣܺܝܰܐ ܠܰܚ̈ܕܳܕܶܐ܆ ܒܪܰܡ ܡܶܠܬܳܐ ܕܰܫܘܺܝܚܽܘܬܳܐ ܕܰܐܟܚܕܳܐ܆ ܚܰܕ ܟܝܳܢܳܐ ܫܰܡܠܝܰܬ ܠܳܐ ܡܶܫܬܰܚܠܦܳܢܳܐܺܝܬ. ܡܪܰܟܒܳܐ ܡܰܢ ܟܺܝܬ ܗܺܝ. ܟܢܺܝܫܽܘܬ ܬܪ̈ܰܝܗܽܘܢ܆ ܘܰܚܕܳܐ ܚܰܝܽܘܬܳܐ ܡܶܢ ܬܪ̈ܰܝܗܽܘܢ ܒܰܪܢܳܫܳܐ܆ ܘܕܰܡܚܰܝܰܕ ܡܰܢ ܟܝܳܢܳܐܺܝܬ. ܝܳܕܥܺܝܢܰܢ. ܠܰܙܢܳܐ ܕܶܝܢ ܕܺܝܠܳܗ̇ ܕܰܚܕܳܝܽܘܬܳܐ ܐܰܘܟܺܝܬ ܡܶܠܬܳܐ܆ ܠܡܶܣܬܰܟܳܠܽܘ ܐܰܘ ܠܡܺܐܡܰܪ܆ ܠܳܐ ܡܶܫܟܚܳܐ.

ܘܰܠܗܳܢܳܐ ܝܽܘܩܢܳܐ܆ ܠܬܽܘܩܳܢܳܐ ܗܰܘ ܕܺܝܠܰܢ ܐܳܡܰܪ ܐ̱ܢܳܐ: ܐܰܝܬܺܝ ܦܰܘܠܽܘܤ ܠܬܰܚܘܺܝܬܳܐ ܕܡܶܬܒܰܪܢܫܳܢܽܘܬܳܐ ܐܰ‎ܠܳܗܳܝܬܳܐ ܟܰܕ ܐܳܡܰܪ: ܡܶܛܽܠ ܗܳܟܺܝܠ ܕܰܛܠܳܝ̈ܶܐ ܐܶܫܬܰܘܬܰܦܘ ܒܰܕܡܳܐ ܘܰܒܒܶܣܪܳܐ܆ ܐܳܦ ܗܽܘ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦ ܒܗܶܝܢ ܟܰܕ ܒܗܶܝܢ^[4]܆ ܟܰܕ ܒܝܰܕ ܕܡܽܘܬܳܐ ܡܶܕܶܡ ܠܳܐ ܡܶܬܡܰܠܠܳܢܺܝܬܳܐ܆ ܐ̱ܪܳܙܳܐ ܗܰܘ ܕܝܰܬܺܝܪ ‌ܐܺܝܬܰܘܗ̱ܝ ܠܳܐ ܡܶܬܡܰܠܠܳܢܳܐ ܨܒܳܐ ܕܰܢܚܰܘܶܐ.

ܐܰܟܙܢܳܐ ܓܶܝܪ ܕܛܰܠܝܳܐ܆ ܘܒܰܪܢܳܫܳܐ ܡܠܺܝܠܳܐ ܗܰܘ ܕܺܝܠܰܢ܆ ܗܰܘ ܕܺܐܝܬܰܘܗ̱ܝ ܢܰܦܫܳܐ ܡܶܬܗܰܘܢܳܢܺܝܬܳܐ܆ ܗܳܕܶܐ ܓܶܝܪ ܐܺܝܬܶܝܗ̇ ܡܳܪܳܢܳܐܺܝܬ ܒܰܪܢܳܫܳܐ܆ ܐܺܝܬܰܝܢ ܓܶܝܪ ܚܢܰܢ ܢܰܦܫܳܐ ܘܗܰܘܢܳܐ܆ ܦܰܓܪܳܐ ܕܶܝܢ. ܠܰܘ ܚܢܰܢ. ܐܶܠܳܐ ܕܺܝܠܰܢ܆ ܡܫܰܘܬܰܦ ܒܒܶܣܪܳܐ ܘܰܕܡܳܐ܆ ܘܰܟܝܳܢܳܐܺܝܬ ܡܚܰܝܰܕ ܠܘܳܬܗܽܘܢ܆ ܒܳܗ̇ ܒܰܕܡܽܘܬܳܐ ܐܳܦ ܡܶܠܬܳܐ ܕܰܐ‎ܠܳܗܳܐ܆ ܒܗܶܝܢ ܟܰܕ ܒܗܶܝܢ ܐܶܫܬܰܘܬܰܦ܆ ܟܰܕ ܐܶܬܚܰܝܰܕ ܠܰܕܡܳܐ ܘܰܠܒܶܣܪܳܐ܆ ܕܢܰܦܫܳܐ ܐܺܝܬ ܠܶܗ ܡܠܺܝܠܬܳܐ.

ܐܰܝܟܰܢܳܐ ܕܡܶܢ ܬܪܶܝܢ ܟܝܳܢ̈ܶܐ. ܐܰ‎ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ܆ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ. ܐܰܝܟ ܡܶܠܬܳܐ ܕܺܝܠܗܶܝܢ܆ ܚܰܕ ܡܫܺܝܚܳܐ ܢܶܣܬܰܟܰܠ. ܚܰܕ ܦܰܪܨܽܘܦܳܐ. ܚܰܕ ܩܢܽܘܡܳܐ. ܚܰܕ ܟܝܳܢܳܐ ܕܰܡܒܰܣܰܪ ܕܰܐ‎ܠܳܗܳܐ ܡܶܠܬܳܐ. ܒܗܳܕܶܐ ܓܶܝܪ. ܐܳܦ ܕܶܐܬܒܛܶܢ ܘܶܐܬܺܝܠܶܕ ܐܳܡܪܺܝܢ ܚ̱ܢܰܢ: ܡܶܛܽܠ ܟܺܝܬ ܕܦܰܓܪܳܐ ܕܰܡܟܳܢ ܕܢܶܬܒܛܶܢ ܘܢܶܬܺܝܠܶܕ ܚܰܝܶܕ ܠܶܗ. ܗܳܟܰܢܳܐ. ܐܳܦ ܝܳܠܕܰܬ ܐܰ‎ܠܳܗܳܐ ܡܶܬܗܰܝܡܢܳܐ ܡܶܢܰܢ ܘܡܶܬܬܰܘܕܝܳܐ ܗܳܝ ܒܬܽܘܠܬܳܐ ܩܰܕܺܝܫܬܳܐ. ܗܳܟܰܢܳܐ ܗܰܘ ܕܶܐܬܺܝܠܶܕ܆ ܥܰܡܰܢܽܘܐܶܝܠ‌ܐܶܬܟܰܢܺܝ.

ܒܬܰܚܘܺܝܬܳܐ ܕܶܝܢ ܗܳܝ ܕܛܰܠܝܳܐ. ܘܰܕܒܰܪܢܳܫܳܐ ܗܰܘ ܕܺܝܠܰܢ. ܙܳܕܶܩ ܠܡܶܬܚܰܫܳܚܽܘ ܒܰܠܚܽܘܕ܆ ܠܘܳܬ ܡܰܚܝܳܢܽܘܬܳܐ ܘܡܰܘܕܥܳܢܽܘܬܳܐ ܕܰܚܕܳܝܽܘܬܳܐ. ܕܰܐܝܟ ܗܳܟܰܢܳܐ ܗ̱ܘ ܓܶܝܪ ܚܰܝܠܳܐ ܕܬܰܚ̈ܘܝܳܬܳܐ܆ ܕܰܒܡܶܕܶܡ ܡܰܢ ܢܶܗܘ̈ܝܳܢ ܕܳܡ̈ܝܳܢ ܠܗܰܘ ܡܳܐ ܕܣܺܝܡ܆ ܒܡܶܕܶܡ ܕܶܝܢ ܐܰܘ ܒܰܡܢܳܬܳܐ ܣܰܓܺܝܐܬܳܐ܆ ܢܦܽܘ̈ܫܳܢ ܡܶܢ ܕܳܡܝܽܘܬܳܐ. ܐܳܦ ܓܶܝܪ ܥܰܠ ܒܰܪܢܳܫܳܐ ܗܳܢܳܐ ܕܺܝܠܝ܆ ܠܢܰܦܫܳܐ. ܠܳܐ ܐ̱ܢܳܫ ܚܳܙܶܐ ܠܳܗ̇܆ ܕܰܤܛܰܪ ܡܶܢ ܦܰܓܪܳܐ ܡܶܬܬܰܝܬܝܳܐ ܠܰܗܘܳܝܳܐ܆ ܐܰܘ ܬܽܘܒ ܠܦܰܓܪܳܐ ܒܶܠܥܳܕ ܡܶܢ ܢܰܦܫܳܐ.

ܥܰܠ ܕܶܝܢ ܥܰܡܰܢܽܘܐܶܝܠ܆ ܓܽܘܕܳܦܳܐ ܗ̱ܝ ܕܡܶܕܶܡ ܕܰܐܝܟ ܗܳܢܳܐ ܢܶܬܪܰܥܶܐ ܐܰܘ ܢܺܐܡܰܪ. ܠܰܐܠܳܗܳܐ ܓܶܝܪ ܡܶܠܬܳܐ܆ ܠܰܘ ܡܶܬܒܰܣܪܳܢܽܘܬܳܐ ܗܘ̣ܳܬ ܠܶܗ ܥܶܠܬܳܐ ܕܝܳܬܳܐ. ܐܺܝܬܰܘܗ̱ܝ ܗ̱ܘܳܐ ܓܶܝܪ܆ ܕܺܐܝܬܰܘܗ̱ܝ ܩܕܳܡ ܥܳܠ̈ܡܶܐ܆ ܠܥܶܠ ܡܶܢ ܥܶܠܬܳܐ ܘܡܶܠܬܳܐ ܘܙܰܒܢܳܐ܆ ܟܰܕ ‌ܐܺܝܬܰܘܗ̱ܝ ܗ̱ܘܳܐ ܐܰܟܙܢܳܐ ܕܳܐܦ ܐܰܒܳܐ ܘܪܽܘܚܳܐ ܩܰܕܺܝܫܳܐ܆ ܥܶܠܬܳܐ ܠܟܽܠܗܶܝܢ ܒܶܪ̈ܝܳܬܳܐ ܕܗܳܝ ܕܢܶܗܘ̈ܝܳܢ ܐܺܝܬܰܝܗܽܘܢ ܘܢܶܗܘ̈ܝܳܢ ܚܰܝ̈ܳܢ܆ ܘܕܳܐܦ ܠܰܢ ܥܰܡ ܗܳܝ ܕܰܗܘܰܝܢ ܐܺܝܬܰܝܢ܆ ܐܳܦ ܗܳܝ ܕܫܰܦܺܝܪ ܢܶܗܘܶܐ ܐܺܝܬܰܝܢ ܒܝܰܕ ܡܶܬܒܰܪܢܫܳܢܽܘܬܶܗ ܫܰܟܶܢ.

ܗܳܝ ܗܳܟܺܝܠ ܕܰܗܘܳܐ ܡܶܠܬܳܐ ܒܶܣܪܳܐ. ܗܳܕܶܐ ܐܺܝܬܶܝܗ̇܆ ܗܳܝ ܕܒܰܪܢܳܫܳܐ ܠܳܐ ܡܶܫܬܰܚܠܦܳܢܳܐܺܝܬ ܢܶܗܘܶܐ܆ ܥܰܡ ܗܳܝ ܕܩܰܘܺܝ ܐܰ‎ܠܳܗܳܐ. ܝܳܕܰܥ ܗܽܘ ܓܶܝܪ ܟܬܳܒܳܐ ܐܰ‎ܠܳܗܳܝܳܐ ܕܒܶܣܪܳܐ ܢܫܰܡܰܗ ܠܒܰܪܢܳܫܳܐ܆ ܘܬܽܘܒ ܕܢܰܦܫܳܐ ܒܰܠܚܽܘܕ܆ ܕܡܶܢ ܚܕܳܐ ܡܢܳܬܳܐ ܠܟܽܠܳܗ̇ ܚܰܝܽܘܬܳܐ ܢܫܰܘܕܰܥ. ܐܰܝܟ ܐܰܝܟܳܐ ܕܳܐܡܰܪ: ܫܡܰܥ ܨܠܽܘܬܝ^[5]܆ ܠܘܳܬܳܟ ܟܽܠ ܒܣܰܪ ܢܺܐܬܶܐ܆ ܘܰܢܒܰܪܶܟ ܟܽܠ ܒܶܣܪܳܐ ܠܰܫܡܳܐ ܩܰܕܺܝܫܳܐ ܕܺܝܠܶܗ^[6]. ܘܡܶܢ ܗܳܝ ܕܰܠܩܽܘܒܠܳܐ܆ ܡܽܘܫܶܐ ܟܰܕ ܠܗܳܢܽܘܢ ܕܡܶܢ ܐܺܝܣܪܳܐܶܝܠ ܡܡܰܠܶܠ ܗ̱ܘܳܐ܆ ܐܳܡܰܪ: ܒܫܰܒܥܺܝܢ ܘܚܰܡܶܫ ܢܰܦ̈ܫܳܢ܆ ܢܚܶܬܘ ܐܰܒܳܗܰܝ̈ܟ ܠܡܶܨܪܶܝܢ^[7].

ܘܠܰܘ ܦܫܺܝܛܳܐܺܝܬ ܐܰܡܪܳܗ̇ ܐܶܘܰܢܓܶܠܺܝܣܛܳܐ ܠܗܳܝ ܕܡܶܠܬܳܐ ܒܶܣܪܳܐ ܗܘ̣ܳܐ^[8]܆ ܐܶܠܳܐ ܟܰܕ ܨܳܒܶܐ ܕܰܠܪܶܚܡܰܬ ܐ̱ܢܳܫܽܘܬܶܗ ܠܳܐ ܡܶܬܡܰܠܠܳܢܺܝܬܳܐ ܢܚܰܘܶܐ. ܐܶ‎ܠܽܘ ܡܰܢ ܓܶܝܪ ܢܰܦܫܳܐ ܒܰܠܚܽܘܕܶܝܗ̇ ܚܰܝܶܕ ܠܶܗ܆ ܗܳܝ ܡܶܬܗܰܘܢܳܢܺܝܬܳܐ ܘܰܕܠܳܐ ܓܫܽܘܡ܆ ܘܕܰܒܨܰܠܡܳܐ ܕܺܝܠܶܗ ܗܘ̣ܳܬ܆ ܠܰܘ ܗܳܟܰܢܳܐ ‌ܐܺܝܬܰܘܗ̱ܝ ܗ̱ܘܳܐ ܬܡܺܝܗܳܐ ܗܽܘ ܙܢܳܐ ܕܰܡܕܰܒܪܳܢܽܘܬܳܐ. ܒܰܝܬܳܝܰܐ ܗ̱ܘ ܓܶܝܪ ܒܕܽܘܟ ܐܰܝܟܰܢ ܕܗܽܘ ܕܰܐ‎ܠܳܗܽܘܬܳܐ܆ ܘܰܕܠܰܘ ܒܟܽܠ ܡܶܕܶܡ ܐܰܟܣܢܳܝ ܥܕܰܡܳܐ ܠܒܰܪ܆ ܗܰܘ ܡܳܐ ܕܺܐܝܬܰܘܗ̱ܝ ܡܶܬܗܰܘܢܳܢܳܐ ܘܰܕܠܳܐ ܓܫܽܘܡ.

ܗܳܝ ܕܶܝܢ ܕܥܰܡ ܢܰܦܫܳܐ. ܐܳܦ ܠܥܰܒܝܽܘܬܳܐ ܕܒܶܣܪܳܐ ܢܩܰܒܶܠ ܥܠܰܘܗ̱ܝ܆ ܘܰܥܕܰܡܳܐ ܠܗܳܕܶܐ ܢܶܚܽܘܬ܆ ܐܰܝܟܰܢܳܐ ܕܦܽܘܪܩܳܢܳܐ ܡܫܰܡܠܝܳܐ ܢܫܰܟܶܢ ܠܰܢ܆ ܗܳܕܶܐ ܐܺܝܬܶܝܗ̇ ܕܝܰܬܺܝܪ ܬܡܺܝܗܳܐ܆ ܘܰܕܫܰܪܺܝܪܳܐܺܝܬ ܥܳܒܪܳܐ ܠܟܽܠ ܬܶܕܡܽܘܪܬܳܐ. ܟܰܕ ܒܗܳܕܶܐ ܗܳܟܺܝܠ ‌ܐܶܬܕܰܡܰܪ ܗܽܘ ܐܶܘܰܢܓܶܠܺܝܣܛܳܐ܆ ܗܳܝ ܕܰܐܝܟ ܕܒܰܫܪܳܪܳܐ. ܠܟܽܠ ܬܰܪܥܺܝܬܳܐ ܡܰܬܡܗܳܐ܆ ܡܶܬܕܰܡܪܳܢܳܐܺܝܬ ܐܰܙܥܩܳܗ̇܆ ܠܗܳܝ ܕܡܶܠܬܳܐ ܒܶܣܪܳܐ ܗ̱ܘܳܐ.

ܐܺܝܢ ܐܳܡܰܪ. ܐܶܠܳܐ ܗܰܘ ܕܡܶܬܶܐܡܰܪ ܕܗܳܘܶܐ ܡܶܕܶܡ܆ ܢܳܦܶܩ ܠܶܗ ܡܶܢ ܟܝܳܢܶܗ ܒܰܝܬܳܝܳܐ܆ ܟܰܕ ܡܶܫܬܰܚܠܰܦ ܠܶܗ ܠܗܰܘ ܡܳܐ ܕܡܶܬܶܐܡܰܪ ܕܗܳܘܶܐ. ܐܰܡܺܝܪܳܐ ܓܶܝܪ ܒܕܽܘܟ ܒܰܟܬܳܒܳܐ ܢܦܺܝܚ ܡܶܢ ܪܽܘܚܳܐ܆ ܕܰܐܢ̱ܬܬܶܗ ܕܠܽܘܛ ܟܰܕ ܠܘܳܬ ܗܦܽܘܟܝܳܐ ܗܰܘ ܕܰܣܕܽܘܡ ܐܶܬܦܰܢܝܰܬ݂܆ ܩܳܝܶܡܬܳܐ ܕܡܶܠܚܳܐ ܗܘ̣ܳܬ^[9]. ܘܡܶܛܽܠ ܚܽܘܛܪܶܗ ܕܡܽܘܫܶܐ ܕܰܫܕܳܝܗ̱ܝ ܥܰܠ ‌ܐܰܪܥܳܐ܆ ܘܕܰܗܘܳܐ ܚܶܘܝܳܐ^[10]. ܡܳܕܶܝܢ ܐܳܦ ܐܶܡܰܬܝ ܕܰܗܘܳܐ ܡܶܠܬܳܐ ܒܶܣܪܳܐ ܐܳܡܪܺܝܢ ܚ̱ܢܰܢ܆ ܟܽܠܳܗ̇ ܐܰܢܰܢܩܺܐ. ܕܬܰܪܥܺܝܬܳܐ ܕܫܽܘܚܠܳܦܳܐ ܢܶܥܽܘܠ.

ܡܳܢܳܐ ܗܳܟܺܝܠ ܬܺܐܡܪܽܘܢ܆ ܐܳܦ ܐܶܡܰܬܝ ܕܫܳܡܥܺܝܢ ܐܢ̱ܬܽܘܢ ܠܶܗ ܠܕܰܘܺܝܕ ܕܰܡܙܰܡܰܪ: ܡܳܪܝܳܐ ܒܶܝܬ ܓܰܘܣܳܐ ܗܘ̣ܰܝܬ ܠܰܢ ܠܕܳܪܳܐ ܘܰܠܕܳܪܳܐ^[11]܆ ܘܰܗܘܳܐ ܠܺܝ ܡܳܪܝܳܐ ܠܒܶܝܬ ܓܰܘܣܳܐ. ܐܰܪܰܐ ܫܽܘܚܠܳܦܳܐ ܣܒܰܠ ‌ܐܰ‎ܠܳܗܳܐ܆ ܡܶܢ ܟܝܳܢܳܐ ܒܰܝܬܳܝܳܐ ܕܺܝܠܶܗ܆ ܟܰܕ ܫܰܢܺܝ ܡܶܢ ܗܳܝ ܕܺܐܝܬܰܘܗ̱ܝ ܐܰ‎ܠܳܗܳܐ܆ ܠܗܳܝ ܕܢܶܗܘܶܐ ܒܶܝܬ ܓܰܘܣܳܐ^[12]܆ ܐܰܘ ܬܽܘܒ ܟܰܕ ܩܳܪܶܝܢ ܐܢ̱ܬܽܘܢ܆ ܗܳܝ ܕܰܗܘ̣ܳܐ ܕܶܝܢ ܗܳܒܶܝܠ ܪܳܥܝܳܐ ܕܥܶܪ̈ܒܶܐ^[13]܆ ܕܶܐܫܬܰܚܠܰܦ ܗܳܒܶܝܠ ܡܶܣܬܰܟܠܺܝܢ ܐܢ̱ܬܽܘܢ܆ ܘܕܰܫܒܰܩ ܠܰܟܝܳܢܶܗ ܒܰܝܬܳܝܳܐ܆ ܐܰܘ ܕܰܐܘܣܶܦ ܢܣܰܒ. ܡܰܠܽܘܢ ܥܰܡ ܗܳܝ ܕܢܶܗܘܶܐ ܪܳܥܝܳܐ܆ ܥܰܡ ܗܳܝ ܕܺܐܝܬܰܘܗ̱ܝ ܒܰܪܢܳܫܳܐ܆ ܗܳܝ ܟܺܝܬ ܕܺܐܝܬܰܘܗ̱ܝ ܗ̱ܘܳܐ. ܗܳܟܰܢܳܐ ܒܰܪ̱ܬ ܩܳܠܳܐ ܕܗܳܝ ܕܰܗܘܳܐ܆ ܠܰܘ ܕܫܽܘܚܠܳܦܳܐ ܐܺܝܬܶܝܗ̇ ܡܫܰܘܕܥܳܢܺܝܬܳܐ ܡܶܢ ܟܽܠ ܦܪܽܘܤ܆ ܐܶܠܳܐ ܟܺܝܬ. ܥܰܡ ܗܳܕܶܐ܆ ܐܳܦ ܕܗܳܝ ܕܢܰܘܣܶܦ ܢܶܣܰܒ ܐ̱ܢܳܫ ܡܶܕܶܡ ܕܠܰܝܬ ܗ̱ܘܳܐ ܠܶܗ. ܘܗܳܠܶܝܢ ܡܰܢ܆ ܥܰܡ ܕܢܰܘܕܰܥ ܠܚܰܝܠܳܗ̇ ܕܺܝܠܳܗ̇ ܕܠܶܟܣܺܝܤ܆ ܘܰܢܚܰܘܶܐ ܕܠܰܘ ܫܽܘܘܕܳܥܳܐ ܠܚܽܘܕܳܝ ܐܳܕܫܳܐ ܐܺܝܬ ܠܳܗ̇܆ ܐܶܠܳܐ ܡܚܰܘܝܳܢܽܘܬܳܐ ܕܬܰܪ̈ܥܝܳܬܳܐ ܡܫܰܚ̈ܠܦܳܬܳܐ ܐܺܝܬܶܝܗ̇.

ܡܶܛܽܠ ܕܠܰܢܣܺܝܒܽܘܬܳܐ ܕܒܶܣܪܳܐ ܗܰܘ ܕܰܐ‎ܠܳܗܳܐ ܡܶܠܬܳܐ ܚܰܝܶܕ ܠܶܗ܆ ܠܰܘ ܗܳܟܰܢܳܐ ܐܺܡܪܺܝܢܰܢ: ܐܰܝܟ ܢܣܺܝܒܽܘܬܳܐ ܕܽܐܘܡܳܢܽܘܬܳܐ܆ ܐܰܝܟܰܢܳܐ ܟܺܝܬ ܕܗܳܒܶܝܠ ‌ܐܰܘܣܶܦ ܢܣܰܒ ܠܪܳܥܝܽܘܬܳܐ܆ ܐܰܘ ܐܰܝܟ ܬܰܘܣܶܦܬܳܐ ܕܫܽܘܠܛܳܢܳܐ^[14]. ܐܰܝܟܰܢܳܐ ܕܰܟܬܺܝܒ: ܘܶܐܬܗܰܝܡܰܢ ܫܡܽܘܐܺܝܠ ܕܢܶܗܘܶܐ ܢܒܺܝܳܐ ܕܡܳܪܝܳܐ ܒܟܽܠܶܗ ܐܺܝܣܪܳܐܶܝܠ^[15]. ܐܶܠܳܐ ܒܰܚܕܳܝܽܘܬܳܐ ܟܝܳܢܳܝܬܳܐ ܘܰܕܒܰܩܢܽܘܡܳܐ܆ ܐܰܝܟܰܢܳܐ ܕܡܶܢ ܠܥܶܠ ܩܰܕܶܡܢܰܢ ܐܶܡܰܪܢܰܢ. ܡܶܛܽܠ ܕܳܐܦ ܠܰܘܛܬܳܐ ܡܶܬܶܐܡܰܪ ܕܰܗܘܳܐ܆ ܟܰܕ ܫܪܳܐ ܠܠܰܘܛܬܳܐ܆ ܒܝܰܕ ܗܳܝ ܕܡܰܘܬܳܐ ܠܺܝܛܳܐ ܩܰܒܶܠ ܥܠܰܘܗ̱ܝ ܚܠܳܦܰܝܢ^[16]. ܐܰܝܟܰܢܳܐ ܕܳܐܦ ܦܰܘܠܽܘܤ ܐܳܡܰܪ: ܗܘܺܝܬ̣ ܠܗܳܢܽܘܢ ܕܰܬܚܶܝܬ ܢܳܡܽܘܣܳܐ ܐܰܝܟ ܕܰܬܚܶܝܬ ܢܳܡܽܘܣܳܐ܆ ܟܰܕ ܠܳܐ ܐܺܝܬܰܝ ܐܶܢܳܐ ܬܚܶܝܬ ܢܳܡܽܘܣܳܐ܆ ܐܰܝܟܰܢܳܐ ܕܰܠܗܳܢܽܘܢ ܕܰܬܚܶܝܬ ܢܳܡܽܘܣܳܐ ܐܰ݀ܥܬܰܪ^[17]܆ ܝܺܕܺܝܥܳܐ ܕܶܝܢ. ܕܟܰܕ ܡܒܰܛܶܠ ܠܢܳܛܽܘܪ̈ܳܬܳܐ ܛܶܠܳܢܳܝ̈ܳܬܳܐ ܕܢܳܡܽܘܣܳܐ. ܗܳܟܰܢܳܐ ܐܳܦ ܡܳܪܰܢ ܗܘ̣ܳܐ ܠܰܘܛܬܳܐ܆ ܟܰܕ ܠܳܐ ‌ܐܺܝܬܰܘܗ̱ܝ ܗܽܘ ܬܚܶܝܬ ܠܰܘܛܬܳܐ܆ ܐܰܝܟܰܢܳܐ ܕܰܠܗܳܢܽܘܢ ܕܰܐܝܬܰܝܗܽܘܢ ܬܚܶܝܬ ܠܰܘܛܬܳܐ ܢܰܥܬܰܪ.

ܐܶܬܚܰܘܝܰܬ ܗܳܟܺܝܠ ‌ܐܳܦ ܡܶܢ ܗܳܪܟܳܐ ܕܠܶܟܣܺܝܤ ܗܳܝ ܕܰܗܘܳܐ܆ ܬܰܪ̈ܥܝܳܬܳܐ ܡܫܰܚ̈ܠܦܳܬܳܐ ܡܚܰܘܝܳܐ. ܠܰܘ ܓܶܝܪ ܐܰܟܙܢܳܐ ܕܰܠܒܽܘܛܳܠܳܗ̇ ܘܠܰܥܛܳܝܳܗ̇ ܕܠܰܘܛܬܳܐ ܗܘ̣ܳܐ ܠܰܘܛܬܳܐ܆ ܗܳܟܰܢܳܐ ܐܳܦ ܠܒܽܘܛܳܠܶܗ ܘܠܰܥܛܳܝܶܗ ܕܒܶܣܪܳܐ ܗܘ̣ܳܐ ܒܶܣܪܳܐ܆ ܗܳܝ ܕܳܐܦ ܕܢܺܐܡܪܺܝܗ̇܆ ܕܪܰܫܺܝܥܽܘܬܳܐ ܗܳܝ ܐ̱ܚܪܳܝܬܳܐ ܕܟܽܠܗܶܝܢ ܐܺܝܬܶܝܗ̇. ܐܶܠܳܐ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ܆ ܥܰܡ ܗܳܝ ܕܩܰܘܺܝ ܐܰ‎ܠܳܗܳܐ. ܐܰܝܟܰܢܳܐ ܕܳܐܦ ܠܺܝ ܠܳܐ ܡܶܫܬܰܚܠܦܳܢܳܐ ܢܶܥܒܶܕ ܠܘܳܬ ܚܛܺܝܬܳܐ܆ ܟܰܕ ܣܳܐܶܡ ܡܫܰܪܪܽܘܬܳܐ ܒܰܝܬܳܝܬܳܐ ܕܺܝܠܶܗ܆ ܒܰܟܝܳܢܳܐ ܗܰܘ ܡܫܰܚܠܦܳܢܳܐ ܘܰܡܚܺܝܠܳܐ.

ܡܶܛܽܠܗܳܕܶܐ ܓܶܝܪ܆ ܐܳܦ ܗܽܘ ܐܶܘܰܢܓܶܠܺܝܣܛܳܐ ܐܰ‎ܠܳܗܳܝܳܐ ܐܰܝܬܺܝ ܒܳܬܰܪܟܶܢ܆ ܗܳܝ ܕܳܐܦ ܐܰܓܶܢ ܒܰܢ^[18]. ܐܰܝܟܰܢܳܐ ܕܰܢܚܰܘܶܝܘܗ̱ܝ ܠܡܶܠܬܳܐ܆ ܕܠܳܐ ܚܰܫ ܫܽܘܚܠܳܦܳܐ ܠܘܳܬ ܒܶܣܪܳܐ. ܐ̱ܚܪܺܢܳܐ ܓܶܝܪ ܡܶܕܶܡ ‌ܐܺܝܬܰܘܗ̱ܝ ܗܰܘ ܕܫܳܪܶܐ^[19]܆ ܠܒܰܪ ܡܶܢ ܗܰܘ ܕܒܶܗ ܫܳܪܶܐ. ܐܶܠܳܐ ܠܰܘ ܡܶܛܽܠ ܗܳܕܶܐ܆ ܥܳܡܽܘܪܽܘܬܳܐ ܡܶܕܶܡ ܫܚܺܝܡܬܳܐ ܡܣܰܒܪܺܝܢ ܚ̱ܢܰܢ ܠܡܶܬܒܰܪܢܫܳܢܽܘܬܶܗ ܕܡܶܠܬܳܐ܆ ܐܰܝܟܰܢܳܐ ܕܰܐܝܟ ܫܳܢܝܳܐ ܢܶܣܛܽܘܪܺܝܽܘܤ. ܢܺܐܡܰܪ: ܠܰܟܝܳܢܳܐ ܕܺܝܠܰܢ ܠܒܶܫ. ܡܰܫܟܢܳܐ ܓܶܝܪ ܗܘ̣ܳܬ ܠܶܗ ܗܺܝ ܐ̱ܢܳܫܽܘܬܳܐ ܠܡܶܠܬܳܐ. ܘܬܽܘܒ܆ ܡܶܛܽܠ ܗܰܘ ܕܰܠܒܺܝܫ ܠܗܰܘ ܕܡܶܬܠܒܶܫ ܡܝܰܩܰܪ ܐ̱ܢܳܐ܆ ܡܶܛܽܠ ܗܰܘ ܕܰܡܛܰܫܰܝ ܣܳܓܶܕ ܐ̱ܢܳܐ ܠܗܰܘ ܕܡܶܬܚܙܶܐ^[20]܆ ܐܰܝܟ ܕܥܰܠ ܒܶܢܝܳܢ̈ܶܐ ܘܥܰܠ ܗܰܝܟ̈ܠܶܐ ܕܒܽܐܘܡܳܢܽܘܬܳܐ܆ ܐܰܘ ܐܰܝܟ ܕܥܰܠ ‌ܐܰܪܓܘܳܢܳܐ ܡܰܠܟܳܝܳܐ ܘܥܰܠ ܬܰܟܣܺܝܬܳܐ ܕܢܰܚ̈ܬܶܐ. ܕܰܫܡܳܐ ܓܶܝܪ ܗܳܢܳܐ ܕܡܰܓܢܳܢܽܘܬܳܐ^[21]܆ ܐܳܦ ܥܰܠ ܗܳܢܽܘܢ ܕܒܰܩܢܽܘܡܳܐ ܡܚܰܝܕܺܝܢ ܐܰܡܺܝܪ܆ ܣܳܗܶܕ ܦܰܘܠܽܘܤ: ܕܡܶܛܽܠ ܦܰܓܪܳܐ ܕܺܝܠܰܢ ܐܳܡܰܪ: ܐܶܢ ܒܺܝܬܳܐ ܕܺܝܠܰܢ ܐܰܪܥܳܢܳܝܳܐ ܕܡܰܫܟܢܳܐ ܢܶܫܬܪܶܐ^[22]. ܘܬܽܘܒ܆ ܐܳܦ ܓܶܝܪ ܚܢܰܢ ܗܳܢܽܘܢ ܕܺܐܝܬܰܝܢ ܒܡܰܫܟܢܳܐ ܗܳܢܳܐ܆ ܡܶܬܬܰܢܚܺܝܢ ܚ̱ܢܰܢ ܟܰܕ ܛܥܺܝܢܺܝܢ ܚ̱ܢܰܢ ܝܽܘܩܪܳܐ^[23].

ܐܰܟܙܢܳܐ ܗܳܟܺܝܠ. ܕܢܰܦܫܳܐ ܟܰܕ ܡܰܫܟܢܳܐ ‌ܐܺܝܬܰܘܗ̱ܝ ܠܳܗ̇ ܦܰܓܪܳܐ ܒܰܝܬܳܝܳܐ ܗܰܘ ܕܺܝܠܳܗ̇܆ ܒܰܟܝܳܢܳܐ ܘܒܰܩܢܽܘܡܳܐ ܡܚܰܝܕܳܐ ܠܘܳܬܶܗ܆ ܘܚܰܕ ܒܰܪܢܳܫܳܐ ܐܺܝܬܶܝܗ̇ ܗܳܝ ܟܢܺܝܫܽܘܬ ܬܪ̈ܰܝܗܽܘܢ܆ ܗܳܟܰܢܳܐ ܐܳܦ ܐܰ‎ܠܳܗܳܐ ܡܶܠܬܳܐ܆ ܟܰܕ ܒܶܣܪܳܐ ܗܘ̣ܳܐ ܘܰܫܪܳܐ ܒܰܓܒܺܝܠܬܳܐ ܕܺܝܠܰܢ܆ ܘܰܒܟܽܠ ܡܶܕܶܡ ܐܶܬܕܰܡܺܝ ܠܰܢ ܤܛܰܪ ܡܶܢ ܚܛܺܝܬܳܐ^[24]܆ ܚܰܕ ‌ܐܺܝܬܰܘܗ̱ܝ ܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܦܰܠܰܓ. ܐܰܝܟܰܢܳܐ ܕܰܐ̱ܚܪܺܢܳܐ ܢܶܗܘܶܐ ‌ܐܺܝܬܰܘܗ̱ܝ ܗܰܘ ܕܠܳܒܶܫ܆ ܘܰܐ̱ܚܪܺܢܳܐ ܗܰܘ ܕܡܶܬܠܒܶܫ܆ ܐܰܝܟ ܪܰܫܺܝܥܽܘܬܳܐ ܕܢܶܣܛܽܘܪܺܝܽܘܤ.

ܐ̱ܢܳܫܺܝ̈ܢ ܕܶܝܢ ܐܳܦ ܦܽܘܫܳܩܳܐ ܐ̱ܚܪܺܢܳܐ ܝܰܗܒܘ^[25] ܥܰܠ ܕܽܘܟܬܳܐ ܗܳܕܶܐ. ܗܳܝ ܓܶܝܪ ܕܰܐܓܶܢ ܒܰܢ܆ ܕܗܺܝ ܟܰܕ ܗܺܝ ܐܺܝܬܶܝܗ̇ ܐܳܡܪܺܝܢ: ܠܗܳܝ ܐܰܝ̇ܕܳܐ ܕܶܐܪܰܡܝܳܐ ܢܒܺܝܳܐ ܒܝܰܕ ܒܪܽܘܟ܆ ܐܶܬܢܰܒܺܝ ܟܰܕ ܐܳܡܰܪ: ܗܳܢܰܐ ܗ̱ܘ ܐܰ‎ܠܳܗܳܐ ܕܺܝܠܰܢ܆ ܠܳܐ ܢܶܬܚܫܶܒ ܐ̱ܚܪܺܢܳܐ ܠܘܳܬܶܗ܆ ܐܶܫܟܰܚ ܟܽܠܳܗ̇ ܐܽܘܪܚܳܐ ܕܺܝܕܰܥܬܳܐ܆ ܘܝܰܗܒܳܗ̇ ܠܝܰܥܩܽܘܒ ܥܰܒܕܶܗ ܘܠܺܐܝܣܪܳܐܶܝܠ ܚܰܒܺܝܒܶܗ܆ ܒܳܬܰܪ ܗܳܠܶܝܢ ܥܰܠ ‌ܐܰܪܥܳܐ ܐܶܬܚܙܺܝ܆ ܘܥܰܡ ܒܢܰܝ̈ܢܳܫܳܐ ܐܶܬܗܰܦܰܟ^[26].

ܗܳܝ ܗܳܟܺܝܠ ܕܶܐܡܰܪ ܐܶܘܰܢܓܶܠܺܝܣܛܳܐ ܕܰܐܓܶܢ^[27] ܒܰܢ. ܗܳܕܶܐ ܐܺܝܬܶܝܗ̇܆ ܕܡܰܥܡܪܳܐ ܕܥܰܡܰܢ ܩܰܒܶܠ ܥܠܰܘܗ̱ܝ܆ ܘܶܐܬܗܰܦܰܟ ܥܰܡ ܒܢܰܝ̈ܢܳܫܳܐ܆ ܟܰܕ ܒܰܫܪܳܪܳܐ ܗܘ̣ܳܐ ܒܰܪܢܳܫܳܐ. ܠܳܐ ܓܶܝܪ ܣܢܺܝܩ ܗ̱ܘܳܐ ܐܳܡܪܺܝܢ222 ܥܰܠ ܬܰܘܣܶܦܬܳܐ ܗܳܕܶܐ ܝܽܘܚܰܢܳܢ ܐܶܘܰܢܓܶܠܝܺܣܛܳܐ܆ ܠܘܳܬ ܗܳܝ ܕܰܢܪܺܝܡ ܠܡܰܣܒܪܳܢܽܘܬܳܐ ܕܫܽܘܚܠܳܦܳܐ. ܩܰܕܺܝܡܳܐ ܗ̱ܘܳܬ ܓܶܝܪ 222ܡܰܪܡܳܐ. ܗܽܘ ܓܶܝܪ ܫܽܘܪܳܝܳܐ ܗܰܘ ܕܬܶܐܽܘܠܽܘܓܺܝܰܐ܆ ܗܰܘ ܕܒܶܗ ܠܟܽܠܳܗ̇ ܗܳܝ ܕܰܬܚܶܝܬ ܫܡܰܝܳܐ ܐܰܪܥܶܡ܆ ܫܶܬܶܐܣܬܳܐ ‌ܐܺܝܬܰܘܗ̱ܝ ܠܘܳܬ ܟܽܠܶܗ ܐ̱ܪܳܙܳܐ ܗܰܘ ܕܫܰܦܺܝܪܽܘܬ ܕܶܚܠܬܳܐ. ܠܰܘ ܓܶܝܪ ܒܰܠܚܽܘܕ ܠܝܳܬܶܗ ܕܺܝܚܺܝܕܳܝܳܐ ܗܰܘ ܕܰܩܕܳܡ ܥܳܠ̈ܡܶܐ ܡܚܰܘܶܐ^[28]܆ ܐܶܠܳܐ ܐܳܦ ܡܰܠܦܳܢܽܘܬܳܐ ܕܡܶܛܽܠ ܡܶܬܒܰܪܢܫܳܢܽܘܬܳܐ ܩܰܕܶܡ 222ܡܰܪܡܳܐ.

ܟܰܕ ܓܶܝܪ ܐܶܡܰܪ: ܗܳܝ ܕܰܒܪܺܝܫܳܐ ‌ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ^[29]. ܒܝܰܕ ܡܰܢ ܗܳܝ ܕܰܒܪܺܝܫܳܐ܆ ܐܰܪܺܝܡ ܠܪܰܫܺܝܥܽܘܬܳܐ ܕܗܳܢܽܘܢ ܕܳܐܡܪܺܝܢ: ܕܺܐܝܬ ܗ̱ܘܳܐ ܐܶܡܰܬܝ ܕܠܳܐ ‌ܐܺܝܬܰܘܗ̱ܝ ܗ̱ܘܳܐ. ‌ܐܺܝܬܰܘܗ̱ܝ ܗ̱ܘܳܐ ܓܶܝܪ ܒܪܺܝܫܳܐ. ܕܰܩܕܳܡ ܪܺܝܫܳܐ ܕܶܝܢ ܗܰܘ ܕܠܳܐ ܙܰܒܢܳܐ܆ ܢܶܬܚܰܫܰܒ ܐ̱ܢܳܫ ܡܶܕܶܡ܆ ܡܶܢ ܠܳܐ ܡܶܬܡܰܨ̈ܝܳܢܝܳܬܳܐ ܐܺܝܬܶܝܗ̇. ܒܝܰܕ ܕܶܝܢ ܗܳܝ ܕܶܐܡܰܪ: ܘܡܶܠܬܳܐ ‌ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰ‎ܠܳܗܳܐ^[30]܆ ܚܰܘܺܝ ܕܰܐ̱ܚܪܺܢܳܐ ‌ܐܺܝܬܰܘܗ̱ܝ. ܡܶܠܬܳܐ ܒܰܩܢܽܘܡܳܐ ܠܒܰܪ ܡܶܢ ܗܰܘ܆ ܕܗܰܘ ܐܰܝܢܳܐ ܕܺܐܝܬܰܘܗ̱ܝ ܡܶܠܬܶܗ. ܒܗܳܝ ܕܶܝܢ ܕܶܐܡܰܪ: ܘܰܐ‌ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ ܗܽܘ ܡܶܠܬܳܐ. ܐܰܘܕܰܥ ܕܒܰܩܢܽܘܡܳܐ ‌ܐܺܝܬܰܘܗ̱ܝ܆ ܘܰܕܠܰܘ ܐܰܝܟ ܡܶܠܬܳܐ ܗܳܕܶܐ ܕܺܝܠܰܢ ‌ܐܺܝܬܰܘܗ̱ܝ ܕܡܶܢ ܡܰܦܩܳܗ̇ ܕܒܰܪ̱ܬ ܩܳܠܳܐ ܠܳܐܐܰܪ ܡܶܫܬܰܪܝܳܐ.

ܟܰܕ ܕܶܝܢ ܐܶܡܰܪ: ܕܰܐ‎ܠܳܗܳܐ ‌ܐܺܝܬܰܘܗ̱ܝ ܡܶܠܬܳܐ܆ ܘܰܠܘܳܬ ܐܰ‎ܠܳܗܳܐ ‌ܐܺܝܬܰܘܗ̱ܝ^1. ܓܰܠܝܳܐܺܝܬ ܚܰܘܺܝ܆ ܕܕܰܚܕܳܐ ܐܽܘܣܺܝܰܐ ܐܺܝܬܰܝܗܽܘܢ ܬܪ̈ܰܝܗܽܘܢ܆ ܐܳܦܶܢ ܠܰܘ ܕܚܰܕ ܩܢܽܘܡܳܐ. ܕܗܳܢܽܘܢ ܓܶܝܪ. ܕܰܐ‎ܠܳܗܽܘܬܳܐ. ܚܕܳܐ ܗ̱ܝ܆ ܕܗܳܢܽܘܢ ܐܳܦ ܐܽܘܣܺܝܰܐ ܗܺܝ ܟܰܕ ܗܺܝ܆ ܟܰܕ ܕܶܝܢ ܐܰܝܟ ܗܰܘ ܕܰܒܩܶܦܰܠܶܐܘܳܢ ܡܟܰܢܶܫ ܠܗܶܝܢ ܠܟܽܠܗܶܝܢ ܗܳܠܶܝܢ ܕܶܐܬܶܐܡܰܪ̈ܝ̱܆ ܟܢܺܝܫܳܐܺܝܬ ܐܶܡܰܪ: ܟܰܕ ܐܰܝܬܺܝ ܒܳܬܰܪܟܶܢ܆ ܗܳܢܳܐ ‌ܐܺܝܬܰܘܗ̱ܝ ܗ̱ܘܳܐ ܒܪܺܝܫܳܐ. ܠܘܳܬ ܐܰ‎ܠܳܗܳܐ².

ܐܷܠܳܐ ܗܳܝ ܟܺܝܬ ܕܶܐܡܪܶܬ ܗܳܫܳܐ܆ ܠܰܘ ܠܘܳܬ ܡܡܰܠܠܽܘܬ ܐܰ‎ܠܳܗܽܘܬܳܐ ܒܰܠܚܽܘܕ ܡܰܘܬܪ̈ܳܢ ܠܰܢ ܡ̈ܶܠܶܐ ܗܳܠܶܝܢ܆ ܐܶܠܳܐ ܐܳܦ ܠܘܳܬ ܡܶܠܬܳܐ ܕܡܶܬܒܰܪܢܫܳܢܽܘܬܳܐ. ܟܰܕ ܓܶܝܪ ܝܺܕܰܥ ܗܽܘ ܐܶܘܰܢܓܶܠܺܝܣܛܳܐ. ܡܰܠܽܘܢ ܕܶܝܢ ܪܽܘܚܳܐ ܩܰܕܺܝܫܳܐ ܗܰܘ ܕܰܒܝܰܕ ܗܰܘ ܡܡܰܠܶܠ ܗ̱ܘܳܐ܆ ܠܰܡܚܺܝܠܽܘܬܳܐ ܕܬܰܪܥܺܝܬܳܐ ܐ̱ܢܳܫܳܝܬܳܐ܆ ܕܠܳܐ ܡܶܫܟܚܳܐ ܕܦܰܐܝܽܘܬ ܐܰ‎ܠܳܗܳܐܺܝܬ ܬܩܰܒܠܺܝܗ̇ ܠܗܳܝ: ܕܡܶܠܬܳܐ ܒܶܣܪܳܐ ܗܘ̣ܳܐ^[31]. ܟܰܕ ܠܳܐ ܩܰܕܡܰܬ̣ ܐܶܬܰܐܪܙܰܬ ܡܰܫܡܰܥܬܳܗ̇ ܒܝܰܕ ܬܶܐܽܘܠܽܘܓܺܝܰܐ^[32]. ܐܶܠܳܐ ܡܶܢ ܟܽܠ ܦܪܽܘܤ ܠܘܳܬ ܡܰܚܫ̈ܒܳܬܳܐ ܛܥܳܬ ܒܰܐܪܥܳܐ܆ ܘܫܺܝ̈ܛܳܬܳܐ ܫܳܪܥܳܐ܆ ܟܰܕ ܫܽܘܚܠܳܦܳܐ. ܡܶܛܽܠ ܗܰܘ ܠܳܐ ܡܶܫܬܰܚܠܦܳܢܳܐ ܡܶܬܚܰܫܒܳܐ.

ܡܶܛܽܠ ܗܳܕܶܐ܆ ܗܳܝ ܕܰܒܪܺܝܫܳܐ ‌ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ ܩܰܕܶܡ ܐܰܪܡܺܝ. ܘܕܰܐ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ ܘܕܰܠܘܳܬ ܐܰ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ^[33]. ܐܰܝܟܰܢܳܐ ܕܗܰܘ ܕܰܗܘܳܐ܆ ܠܰܘ ܠܰܗܦܽܘܟܝܳܐ ܕܗܳܝ ܕܺܐܝܬܰܘܗ̱ܝ ܗ̱ܘܳܐ ܬܶܣܬܰܟܠܺܝܗ̇. ܗܰܘ ܓܶܝܪ ܕܰܕܠܳܐ ܫܽܘܪܳܝ ‌ܐܺܝܬܰܘܗ̱ܝ. ܒܗܳܝ ܕܺܐܝܬܰܘܗ̱ܝ ܠܳܐ ܡܶܫܬܰܚܠܦܳܢܺܝܬܳܐ ܘܰܩܒܺܝܥܬܳܐ ܐܺܝܬ ܠܶܗ ܗܳܝ ܕܺܐܝܬܰܘܗ̱ܝ. ܡܶܛܽܠܗܳܕܶܐ ܐܳܦ ܠܘܳܬ ܡܽܘܫܶܐ ܐܳܡܰܪ: ܐܶܢܳܐ ܐܺܝܬܰܝ ܗܰܘ ܕܺܐܝܬܰܘܗ̱ܝ^[34]. ܐܶܡܰܬܝ ܗܳܟܺܝܠ ܕܫܳܡܰܥ ܐܰܢ̱ܬ܆ ܕܗܰܘ ܕܺܐܝܬܰܘܗ̱ܝ܆ ܗܘ̣ܳܐ ܒܶܣܪܳܐ܆ ܕܠܳܐ ܚܶܪܝܳܢܳܐ ܡܶܣܬܰܟܰܠ ‌ܐܰܢ̱ܬ܆ ܕܠܰܘ ܟܰܕ ܫܰܢܺܝ ܐܰܘ ܢܦܰܩ ܡܶܢ ܗܳܝ ܕܢܶܗܘܶܐ ‌ܐܺܝܬܰܘܗ̱ܝ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܒܰܚܕܳܝܽܘܬܳܐ ܫܰܪܺܝܪܬܳܐ ܘܰܩܢܽܘܡܳܝܬܳܐ. ܫܰܘܝܳܐ ܓܶܝܪ ܕܰܩܢܽܘܡ ܐܳܦ ܥܰܠ ܗܳܕܶܐ܆ ܕܡܶܛܽܠ ܡܳܢܳܐ ܘܠܳܐ ܐ̱ܢܳܫ ܐ̱ܚܪܺܢܳܐ ܡܶܢ ܐܶܘܰܢܓܶܠܺܝ̈ܣܛܶܐ ܐܶܠܳܐ ܐܶܢ ܝܽܘܚܰܢܳܢ ܒܰܠܚܽܘܕܰܘܗ̱ܝ ܐܶܡܰܪ: ܗܳܝ ܕܡܶܠܬܳܐ ܒܶܣܪܳܐ ܗܘ̣ܳܐ^[35]. ܘܟܰܕ ܛܳܒ ܗܰܝܡܶܢܢ܆ ܕܰܒܟܽܠܗܽܘܢ ܪܽܘܚܳܐ ܩܰܕܺܝܫܳܐ ܐܰܙܥܶܩ. ܐܶܠܳܐ ܫܰܦܺܝܪ ܝܺܕܺܝܥܳܐ܆ ܕܳܐܦ ܠܗܳܕܶܐ. ܡܶܢ ܬܰܡܳܢ ܢܰܓܕܳܗ̇܆ ܡܶܢ ܐܰܝܟܳܐ ܕܳܐܦ ܠܬܶܐܽܘܠܽܘܓܺܝܰܐ ܕܠ̣ܳܐ܆ ܗܰܘ ܕܥܰܠ ܚܰܕܝܳܗ̇ ܕܚܶܟܡܬܳܐ ܓܢ̣ܳܐ.

ܗܰܘ ܓܶܝܪ ܕܶܐܡܰܪ. ܗܳܝ ܕܰܒܪܺܝܫܳܐ. ‌ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ^5: ܡܶܚܕܳܐ ܬܪܺܝܨܳܐܺܝܬ ܒܰܪ ܫܳܥܬܶܗ ܐܰܝܬܺܝ ܒܳܬܪܳܗ̇܆ ܗܳܝ: ܕܡܶܠܬܳܐ ܒܶܣܪܳܐ ܗܘ̣ܳܐ⁷. ܟܰܕ ܡܰܘܕܰܥ. ܕܙܳܕܶܩ ܠܰܢ܆ ܕܠܰܘ ܟܰܕ ܛܳܥܶܝܢ ܚ̱ܢܰܢ ܠܳܗ̇ ܠܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܗܳܟܰܢܳܐ ܢܶܣܬܰܟܠܺܝܗ̇ ܠܗܳܝ ܕܰܗܘܳܐ. ܐܰܟܙܢܳܐ ܓܶܝܪ ܕܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܡܰܘܕܥܳܐ ܠܰܐܠܳܗܽܘܬܳܐ ܕܒܰܟܝܳܢܳܐ ܗܳܝ ܕܺܝܚܺܝܕܳܝܳܐ܆ ܗܳܟܰܢܳܐ ܐܳܦ ܗܳܝ ܕܰܗܘܳܐ܆ ܠܡܶܬܒܰܪܢܫܳܢܽܘܬܳܐ ܫܰܪܺܝܪܬܳܐ ܘܰܕܠܳܐ ܦܰܢܛܰܣܺܝܰܐ ܡܚܰܘܝܳܐ܆ ܘܕܳܐܦ ܠܺܝܠܺܝܕܽܘܬܳܐ ܐ̱ܢܳܫܳܝܬܳܐ ܡܶܛܽܠ ܪܶܚܡܰܬ ܐ̱ܢܳܫܽܘܬܳܐ ܐܶܬܪܡܺܝ ܗܽܘ ܡܶܠܬܳܐ܆ ܐܳܦܶܢ ܕܠܳܐ ܙܰܪܥܳܐ ܐܺܝܬܶܝܗ̇.

ܗܳܕܶܐ ܓܶܝܪ ܡܶܠܬܳܐ܆ ܡܶܢ ܫܶܪ̈ܫܶܝܗ̇ ܬܳܠܫܳܐ ܠܳܗ̇ ܠܫܳܛܽܘܪܽܘܬܳܐ ܡܰܣܠܰܝܬܳܐ ܕܦܰܢܛܰܣܺܝܰܐ܆ ܗܳܝ ܕܐ̱ܢܳܫܺܝ̈ܢ ܥܰܠ ܡܶܬܒܰܪܢܫܳܢܽܘܬܳܐ ܐܰ‎ܠܳܗܳܝܬܳܐ ܡܶܫܬܪܰܓܪܓܺܝܢ ܕܰܓܳܠܳܐܺܝܬ. ܐܶܢ ܓܶܝܪ ܡܶܠܬܳܐ ܠܳܐ ܐܶܫܬܰܚܠܰܦ܆ ܐܰ‎ܠܳܗܳܐ ܓܶܝܪ ‌ܐܺܝܬܰܘܗ̱ܝ ܗ̱ܘܳܐ܆ ܘܰܠܘܳܬ ܐܰ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ܆ ܘܺܐܝܬܰܘܗ̱ܝ ܐܰܡܺܝܢܳܐܺܝܬ܆ ܐܰܝܟܰܢܳܐ ܗܘܳܐ ܒܶܣܪܳܐ؟ ܠܳܐ ܓܶܝܪ ܐܶܡܰܪ ܕܶܐܬܚܙܺܝ ܐܰܘ ܕܶܐܬܓܠܺܝ܆ ܐܰܝܟܰܢܳܐ ܕܬܶܚܠܰܕ ܬܰܥܶܠ ܠܰܣܒܺܝܪܽܘܬܳܐ. ܐܶܠܳܐ ܐܶܡܰܪ ܗ̱ܘܳܐ. ܗܳܢܰܘ ܕܶܝܢ. ܕܟܰܕ ܩܢܽܘܡܳܐܺܝܬ ܢܣܰܒ ܒܶܣܪܳܐ ܕܰܡܢܰܦܰܫ ܡܶܬܗܰܘܢܳܢܳܐܺܝܬ܆ ܗܘ̣ܳܐ ܒܰܪܢܳܫܳܐ܆ ܥܰܡ ܗܳܝ ܕܩܰܘܺܝ ܐܰ‎ܠܳܗܳܐ. ܐܰܟܙܢܳܐ ܗܳܟܺܝܠ ܕܰܗܘ̣ܳܐ ܒܶܣܪܳܐ܆ ܗܳܟܰܢܳܐ ܐܳܦ ܐܶܬܓܠܺܝ ܒܰܒܣܰܪ܆ ܐܶܬܚܙܺܝ ܠܡܰܠܰܐܟ̈ܶܐ܆ ܐܰܝܟܰܢܳܐ ܕܚܰܟܺܝܡܳܐ ܦܰܘܠܽܘܤ ܟܬܰܒ^[36]. ܬܶܩܕܽܘܡ ܓܶܝܪ ܬܶܥܽܘܠ ܠܬܰܪܥܺܝܬܳܟ ܗܳܝ ܕܰܗܘܳܐ܆ ܐܰܝܟܰܢܳܐ ܕܟܰܕ ܛܳܒܳܐܺܝܬ ܡܩܰܒܶܠ ‌ܐܰܢ̱ܬ. ܠܗܳܝ ܕܶܐܬܚܙܺܝ ܘܶܐܬܓܠܺܝ܆ ܠܳܐ ܬܶܫܪܰܥ ܬܶܦܶܠ ܡܶܢ ܚܽܘܫܳܒܳܐ ܫܰܦܺܝܪ ܕܶܚܠܬܳܐ.

ܟܰܕ ܗܳܟܰܢܳܐ ܗܳܟܺܝܠ ܣܳܦܩܳܐܺܝܬ ܐܺܝܬ ܠܳܗ̇ ܠܬܶܐܽܘܠܽܘܓܺܝܰܐ܆ ܘܰܠܪܽܘܚܩܳܐ ܛܳܪܕܳܐ ܠܡܰܣܒܪܳܢܽܘܬܳܐ ܕܫܽܘܚܠܳܦܳܐ܆ ܘܗܳܝ: ܕܡܶܠܬܳܐ ܒܶܣܪܳܐ ܗܘ̣ܳܐ܆ ܐܳܦ ܠܦܰܢܛܰܣܺܝܰܐ ܫܰܘܝܳܐܺܝܬ ܙܳܢܩܳܐ. ܐܳܦ ܠܦܽܘܠܳܓܳܐ܆ ܠܳܐ ܣܢܺܝܩ ܗ̱ܘܳܐ ܗܽܘ ܐܶܘܰܢܓܶܠܺܝܣܛܳܐ ܥܰܠ ܬܰܘܣܶܦܬܳܐ ܕܗܳܝ ܕܰܐܓܶܢ ܒܰܢ܆ ܠܘܳܬ ܗܳܝ ܕܢܶܥܪܽܘܩ ܡܶܢ ܫܽܘܚܠܳܦܳܐ. ܐܶ‎ܠܽܘ ܓܶܝܪ ܗܳܕܶܐ ܐܺܝܬܶܝܗ̇ ܗ̱ܘܳܬ ܐܳܡܪܺܝܢ: ܗܳܟܰܢܳܐ ܐܳܡܰܪ ܗ̱ܘܳܐ. ܕܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܶܗ. ܐܶܠܳܐ ܟܰܕ ܐܶܡܰܪ ܒܰܢ: ܐܰܘܕܰܥ ܕܥܰܡ ܒܢܰܝ̈ܢܳܫܳܐ ܐܶܬܗܰܦܰܟ܆ ܐܰܝܟ ܒܰܪ̱ܬ ܩܳܠܶܗ ܕܰܢܒܺܝܳܐ^[37].

ܟܰܕ ܗܳܟܺܝܠ ‌ܐܺܝܬ ܠܰܢ ܥܰܠ ܦܶܬܓܳܡܳܐ ܗܰܘ ܕܩܰܕܶܡ ܐܶܬܬܣܺܝܡ܆ ܦܽܘܫܳܩܳܐ ܗܳܢܳܐ ܥܦܺܝܦܳܐ. ܐܳܦܠܳܐ ܠܚܰܕ ܡܶܢܗܽܘܢ ܢܫܺܝܛ. ܟܰܕ ܚܰܕ ܡܶܢܗܽܘܢ ܓܶܝܪ. ܦܐܶܐ ܠܰܐܠܳܗܳܐ ‌ܐܺܝܬܰܘܗ̱ܝ܆ ܟܰܕ ܠܳܐ ܡܫܰܢܶܐ ܘܥܳܒܰܪ ܡܶܢܳܟ ܗܳܝ ܕܰܟܬܺܝܒܳܐ܆ ܠܰܬܚܽܘ̈ܡܶܐ^[38] ܕܫܰܦܺܝܪܽܘܬ ܕܶܚܠܬܳܐ ܗܳܠܶܝܢ ܕܣܳܡܘ ܐܳܒܳܗ̈ܳܬܳܐ ܕܺܝܠܰܢ.

ܐܰܝܢܳܐ ܗܳܟܺܝܠ ܡܰܦܰܩ ܒܪܽܘܚܳܐ ܢܶܗܘܶܐ ܠܰܢ܆ ܐܶܢܗܽܘ ܕܡܶܠܬܳܐ ܡܰܢ ܡܶܛܽܠ ܚܰܘܣܳܢܳܐ ܕܰܥܠܰܝܢ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ^[39]܆ ܐܰܝܟܰܢܳܐ ܕܪ̈ܽܘܚܳܢܶܐ ܚܠܳܦ ܒܶܣܪ̈ܳܢܶܐ ܢܶܥܒܶܕ ܠܰܢ ܘܟܰܕ ܦܳܪܚܺܝܢ ܚ̱ܢܰܢ ܢܥܰܠܶܐ ܠܰܢ ܠܘܳܬ ܫܡܰܝܳܐ. ܚܢܰܢ ܕܶܝܢ ܒܰܪ̈ܓܺܝܓܳܬܳܐ ܡܥܰܒܶܝܢ ܚ̱ܢܰܢ ܠܶܗ ܠܗܰܘܢܳܐ܆ ܘܰܦܥܺܝܪ ܚܶܟܰܢ ܠܘܳܬ ܩܶܢܝܳܢ̈ܶܐ ܗܳܠܶܝܢ ܕܰܥܠ ‌ܐܰܪܥܳܐ܆ ܕܗܳܢܽܘܢ ܕܶܝܢ ܫܡܰܝܳܢ̈ܶܐ ܒܰܠܚܽܘܕܰܝܗܽܘܢ ܘܳܐܦܠܳܐ ܚܕܳܐ ܡܶܠܬܳܐ ܥܳܒܕܺܝܢ ܚ̱ܢܰܢ܆ ܗܳܠܶܝܢ ܕܫܰܠܺܝܛ ܠܰܢ ܠܡܶܙܒܰܢ ܐܶܢܽܘܢ܆ ܘܰܒܛܺܝ̈ܡܶܐ ܕܣܰܓܺܝ ܙܥܽܘܪ̈ܺܝܢ. ܐܶܢ ܓܶܝܪ ܬܬܰܪܣܶܝܘܗ̱ܝ ܠܰܐܚܽܘܟ ܟܰܕ ܟܦܶܢ܆ ܘܟܰܕ ܨ̇ܗܶܐ̣ ܬܰܫܩܶܝܘܗ̱ܝ܆ ܘܒܺܐܝܕܰܘ̈ܗ̱ܝ ܠܰܡܫܺܝܚܳܐ܆ ܬܶܫܬܰܘܬܰܦ ܠܟܳܪܽܘܙܽܘܬܳܐ ܗܳܝ ܪܳܚܡܰܬ ܐ̱ܢܳܫܳܐ ܕܳܐܡܪܳܐ: ܬܰܘ ܒܪ̈ܺܝܟܰܘ̈ܗ̱ܝ ܕܳܐܒܝ ܝܺܪܰܬܘ ܡܰܠܟܽܘܬܳܐ ܗܳܝ ܕܰܡܛܰܝܒܳܐ ܠܟܽܘܢ ܡܶܢ ܬܰܪ̈ܡܝܳܬܶܗ ܕܥܳܠܡܳܐ^[40].

ܐܷܠܳܐ ܐܺܝܬ ܐ̱ܢܳܫܺܝ̈ܢ܆ ܕܗܳܟܰܢܳܐ ܕܰܘܝܳܐܺܝܬ ܘܡܶܬܚܰܢܳܢܳܐܺܝܬ ܣܺܝܡܺܝܢ܆ ܗܳܢܽܘܢ ܕܳܐܦܠܳܐ ܒܢܰܝ̈ܳܐ ܩܢܶܝܢ܆ ܘܳܐܦܠܳܐ ܥܶܠܬܳܐ ܕܡܶܢ ܟܝܳܢܳܐ ܕܺܐܝܬ ܠܳܗ̇ ܫܰܦܺܝܪܽܘܬ ܦܰܪܨܽܘܦܳܐ ܐܺܝܬ ܠܗܽܘܢ܆ ܐܶܡܰܬܝ ܕܳܐܦܠܳܐ ܗܳܕܶܐ ܐܺܝܬܶܝܗ̇ ܕܣܳܦܩܳܐ ܠܡܶܫܬܰܐܠܳܢܽܘܬܳܐ ܕܡܶܢ ܗܳܝ ܕܢܶܬܠܽܘܢ ܠܡܶܣ̈ܟܺܢܶܐ܆ ܐܺܝܬ ܠܗܽܘܢ ܓܶܝܪ ܠܗܳܢܽܘܢ ܕܶܐܬܺܝܠܶܕܘ ܐܰܒܳܐ ܥܰܬܺܝܪܳܐ ܘܪܳܚܶܡ ܒܢܰܝ̈ܳܐ ܒܰܫܡܰܝܳܐ܆ ܗܰܘ ܕܳܐܦ ܕܺܝܠܗܽܘܢ ܕܚܰܝ̈ܶܐ ‌ܐܺܝܬܰܘܗ̱ܝ ܝܳܗܽܘܒܳܐ܆ ܘܰܒܪܰܡ ܪ̈ܰܚܡܶܐ ܕܰܐܕܰܐܡܽܘܤ ܡܚܰܘܶܝܢ ܠܘܳܬ ܡܶܣ̈ܟܺܢܶܐ܆ ܘܠܰܘ ܒܰܠܚܽܘܕ ܟܰܕ ܚܰܝ݂ܺܝ݂ܢ܆ ܐܶܠܳܐ ܡܶܢ ܟܰܕܽܘ ܘܳܐܦ ܟܰܕ ܡܫܰܠܡܺܝܢ ܡܶܢ ܗܳܢܳܐ ܥܳܠܡܳܐ ܘܕܺܝܰܬܺܝ̈ܩܰܤ ܥܳܒܕܺܝܢ܆ ܐܰܝܟܰܢܳܐ ܕܳܐܦ ܟܰܕ ܡܺܝ̈ܬܶܐ ܐܺܝܬܰܝܗܽܘܢ܆ ܢܚܰܘܽܘܢ ܠܚܰܪܡܽܘܬܳܐ ܕܺܝܠܗܽܘܢ ܘܠܳܐ ܡܫܰܝܢܽܘܬܳܐ ܗܳܝ ܕܰܠܘܳܬ ܒܢܰܝ̈ ܓܶܢܣܗܽܘܢ.

ܘܕܰܒܗܳܝ ܡܰܢ ܕܫܰܦܺܝܪ ܢܶܣܥܪܽܘܢ܆ ܐܳܦ ܟܰܕ ܚܰܝ݂ܺܝ݂̈ܢ ܡܰܝ̣ܺܝ̣ܬܺܝܢ ܗ̱ܘܰܘ. ܡܰܥܘܠܺܝܢ ܕܶܝܢ. ܐܳܦ ܟܰܕ ܡܰܝ݂ܺܝ̣ܬܺܝܢ܆ ܕܳܐܦ ܟܰܕ ܚܰܝ݂ܺܝ݂ܢ ܗ̱ܘܰܘ. ܟܳܬܒܺܝܢ ܓܶܝܪ ܝܳܪܽܘܬܳܐ. ܠܰܘ ܠܰܡܫܺܝܚܳܐ܆ ܐܶܠܳܐ ܠܐ̱ܢܳܫ ܡܶܢ ܗܳܢܽܘܢ ܕܰܒܗܳܢܳܐ ܥܳܠܡܳܐ ܐܺܝܬܰܝܗܽܘܢ ܡܫܰܪ̈ܬܚܶܐ ܘܚܰܝ̈ܠܬܳܢܶܐ܆ ܕܰܒܫܽܘܓܳܫ̈ܶܐ ܡܚܰܪܟܶܫ ܠܗܽܘܢ܆ ܘܰܡܫܰܘܬܶܦ ܠܗܽܘܢ ܒܦܰܪܶܗܣܺܝܰܐ ܕܺܐܝܩܳܪܳܐ ܡܶܕܶܡ ܕܡܶܢ ܗܳܪܟܳܐ.

ܐܶܬܬܥܺܝܪ ܕܳܘܝܳܐ ܒܰܪܢܳܫܳܐ܆ ܘܰܗܘܺܝ ܕܚܽܘܫܳܒ̈ܶܐ ܚܠܺܝ̈ܡܶܐ܆ ܘܕܰܥ ܕܡܰܢܽܘ ‌ܐܺܝܬܰܘܗ̱ܝ ܡܳܪܳܐ ܕܬܶܫܒܽܘܚܬܳܐ ܘܕܺܐܝܩܳܪܳܐ ܫܰܪܺܝܪܳܐ ܘܠܳܐ ܡܶܬܬܪܺܝܡܳܢܳܐ. ܐܶ݀ܬܪܢܶܐ ܠܺܝ ܠܗܳܝ ܡܶܐܬܺܝܬܳܐ ܕܚܺܝܠܬܳܐ ܘܰܡܫܰܒܰܚܬܳܐ ܕܰܡܫܺܝܚܳܐ. ܠܡܰܚܰܬܬܳܐ ܕܡܶܢ ܫܡܰܝܳܐ. ܠܙܽܘܥܢܳܢܳܐ222 ܕܡܶܢ ܡܰܠܰܐܟ̈ܶܐ܆ ܘܡܶܢ ܗܳܢܽܘܢ ܚܰܝ̈ܠܰܘܳܬܳܐ ܐ̱ܚܪ̈ܳܢܶܐ ܕܠܳܐ ܓܫܽܘܡ. ܠܒܰܪ̱ܬ ܩܳܠܳܐ ܗܳܝ ܪܰܒܬܳܐ ܕܩܰܪܢܳܐ܆ ܗܳܝ ܕܰܒܚܰܛܳܝ̈ܶܐ ܡܰܢ ܪܬܺܝܬܳܐ ܘܪܶܥܠܳܐ ܠܳܐ ܡܶܬܡܰܠܠܳܢܳܐ ܡܰܥܒܕܳܐ܆ ܠܰܓܒܰܝ̈ܳܐ ܕܶܝܢ ܥܰܡ ܠܒܺܝܒܽܘܬܳܐ ܡܟܰܢܫܳܐ ܡܶܢ ܐܰܪܒܰܥ ܪ̈ܽܘܚܶܐ ܐܰܝܟ ܕܰܟܬܺܝܒ: ܘܡܶܢ ܪܺܝܫܗܽܘܢ ܕܰܫܡܰܝܳܐ ܥܕܰܡܳܐ ܠܪܺܝܫܗܽܘܢ^[41].

ܐܶܡܰܬܝ ܗܳܟܺܝܠ ܬܶܗܘܶܐ ܡܶܬܝܰܩܪܳܢܳܐ܆ ܚܣܺܝܡܳܐ ܘܛܽܘܒܬܳܢܳܐ. ܩܕܳܡ ܟܢܽܘܫܝܳܐ ܗܰܘ ܢܰܨܺܝܚܳܐ܆ ܘܰܩܕܳܡ ܟܽܠܳܗ̇ ܒܪܺܝܬܳܐ ܡܠܺܝܠܬܳܐ܆ ܐܰܘ ܒܩܰܝܛܽܘܢܶܗ ܕܥܰܬܺܝܪܳܐ܆ ܗܰܘ ܕܰܒܦܶܠ̈ܩܳܝ̈ܶܐ ܕܫܺܝܫܳܐ ܘܰܒܨܽܘܪܬܳܐ ܘܰܒܩܽܘ̈ܦܣܶܐ ܕܕܰܗܒܳܐ ܡܗܰܒܶܒ. ܩܕܳܡ ܡܰܠܰܐܟ̈ܶܐ ܕܒܰܚܕܳܪ̈ܰܝ ܕܡܰܠܟܳܐ ܩܳܝܡܺܝܢ܆ ܐܰܘ ܩܕܳܡ ܐܰܪܒܥܳܐ ܘܚܰܡܫܳܐ ܥܰܒ̈ܕܶܐ ܒܰܪܒܪ̈ܳܝܶܐ܆ ܘܰܕܒܰܟܡܳܝܽܘܬܳܐ ܙܥܽܘܪܬܳܐ ܕܟܶܣܦܳܐ ܙܒܺܝܢܺܝܢ. ܩܕܳܡ ܥܳܒܽܘܕܳܐ ܕܟܽܠܶܗ ܟܝܳܢܳܐ. ܗܰܘ ܕܰܡܟܰܠܰܠ܆ ܐܰܘ ܩܕܳܡ ܒܰܪܢܳܫܳܐ ܚܳܫܽܘܫܳܐ ܕܰܐܟܘܳܬܟ܆ ܕܡܶܛܽܠ ܣܰܒܪܳܐ ܕܝܳܪܬܽܘܬܳܟ ܒܡ̈ܶܠܶܐ ܡܰܛܥ̈ܝܳܢܝܳܬܳܐ ܡܫܰܓܶܫ ܘܡܰܛܥܶܐ܆ ܗܰܘ ܕܳܐܦ ܡܶܚܕܳܐ ܕܡܳܐܶܬ ܐܰܢ̱ܬ ܘܰܠܩܰܒܪܳܐ ܡܶܫܬܠܶܡ ܐܰܢ̱ܬ܆ ܓܳܚܶܟ ܥܠܰܝܟ ܡܶܛܽܠ ܫܳܢܝܽܘܬܳܟ܆ ܟܰܕ ܡܶܬܚܰܫܰܒ ܕܥܰܡ ܟܡܳܐ ܬܥܳܫ̈ܶܐ ܘܥܰܡ̈ܠܶܐ ܕܠܳܐ ܝܽܘܬܪܳܢ ܟܰܢܶܫܬ ܐܰܢ̱ܬ ܡܫܰܪܬܚܽܘܬܳܐ ܕܡܰܪ̈ܗܳܛܶܐ܆ ܗܽܘ ܕܶܝܢ ܣܰܓܺܝ ܡܶܬܦܰܢܩܳܢܳܐܺܝܬ ܒܳܣܶܡ ܒܗܳܠܶܝܢ ܕܺܝܠܳܟ܆ ܟܰܕ ܪܰܒܬܳܐ ܚܳܫܶܒ ܠܳܗ̇ ܠܗܳܝ ܕܡܶܛܽܠ ܢܝܳܚܬܳܐ ܕܢܰܦܫܳܟ ܚܰܕ ܫܳܡܽܘܢܳܐ ܢܰܘܫܶܛ ܠܡܶܣ̈ܟܺܢܶܐ.

ܘܶܐܫܬܽܘܦ ܕܬܶܬܓܚܰܟ ܒܰܠܚܽܘܕ ܐܺܝܬ ܗ̱ܘܳܐ ܠܳܟ. ܗܳܫܳܐ ܕܶܝܢ. ܟܰܕ ܗܳܠܶܝܢ ܕܫܳܘ̈ܝܳܢ ܠܕܶܡ̈ܥܶܐ ܣܥܰܪܬ܆ ܬܺܐܙܰܠ ܟܰܕ ܢܰܚܬܳܐ ܣܰܓܺܝ ܚܰܫ̈ܶܐ ܕܪܶܚܡܰܬ ܟܶܣܦܳܐ ܡܥܰܛܰܦ ܐܰܢ̱ܬ. ܘܟܰܕ ܢܰܦܫܳܟ ܡܶܢ ܒܶܣܪܳܐ ܩܛܺܝܪܳܐܺܝܬ ܬܶܣܬܕܶܩ܆ ܡܶܛܽܠ ܗܳܝ ܕܒܰܐܣܽܘܪ̈ܶܐ ܪ̈ܳܚܡܰܝ ܦܰܓܪܳܐ ܐܰܣܺܝܪܳܐ ܗ̱ܘܳܬ܆ ܠܘܳܬ ܐܳܐܰܪ. ܬܺܐܙܰܠ܆ ܘܽܐܘܪܚܳܐ ܗܳܝ ܐ̱ܚܪܳܝܬܳܐ ܬܶܪܕܶܐ. ܢܶܦܓܥܽܘܢ ܒܳܟ ܫܶܚܪ̈ܶܐ ܕܕܰܝ̈ܘܶܐ܆ ܕܥܰܠ ܣܰܪܝܽܘܬ ܪܺܝܚܳܐ ܕܚܰܫ̈ܶܐ ܪܳܗܛܺܝܢ܆ ܒܰܕܡܽܘܬ ܦܳܪ̈ܚܳܬܳܐ ܗܳܠܶܝܢ ܐܳܟ̈ܠܳܬ ܒܶܣܪܳܐ܆ ܕܥܰܠ ܦܰܓܪ̈ܶܐ ܡܺܝ̈ܬܶܐ ܛܳܝܪ̈ܳܢ. ܒܳܬܰܪܟܶܢ. ܟܰܕ ܒܚܶܫܽܘܟܳܐ ܕܪ̈ܽܘܚܶܐ ܗܳܠܶܝܢ ܒܺܝ̈ܫܳܬܳܐ ܡܶܬܟܰܪܟܳܐ ܘܦܳܗܝܳܐ܆ ܡܶܢ ܟܽܠܦܪܽܘܤ. ܠܳܐ ܚܳܙܝܳܐ. ܘܒܰܕܡܽܘܬ ܕܗܳܢܽܘܢ ܕܰܡܣܰܡܶܝܢ. ܠܰܘ ܒܽܐܘܪ̈ܚܳܬܳܐ ܕܢܽܘܗܪܳܐ ܬܶܪܕܶܐ܆ ܐܶܠܳܐ ܠܰܐܝܟܳܐ ܕܰܪܚܺܝܡ ܠܗܽܘܢ ܬܶܬܬܰܘܒܰܠ܆ ܘܒܰܐܬܪ̈ܰܘܳܬܳܐ ܚܶܫܽܘ̈ܟܶܐ ܬܕܰܝܰܪ܆ ܗܳܠܶܝܢ ܕܰܒܝܰܕ ܥܒܳܕ̈ܶܐ ܒܺܝ̈ܫܶܐ ܗܳܝ ܠܳܗ̇ ܩܰܕܡܰܬ ܛܰܝܒܰܬ܆ ܘܰܠܝܰܘܡܳܐ ܗܰܘ ܐ̱ܚܪܳܝܳܐ ܬܣܰܟܶܐ܆ ܗܰܘ ܕܒܶܗ ܟܰܕ ܠܦܰܓܪܳܐ ܕܺܝܠܳܗ̇ ܬܩܰܒܶܠ܆ ܬܩܽܘܡ ܩܕܳܡ ܗܰܘ ܕܕܳܐܶܢ.

ܗܳܝܕܶܝܢ ܒܰܐܝܠܶܝܢ ܥܰܝ̈ܢܶܐ ܐܶܡܰܪ ܠܺܝ. ܠܕܰܝܳܢܳܐ ܗܰܘ ܠܳܐ ܢܳܣܶܒ ܒܰܐܦ̈ܶܐ ܬܶܚܙܶܐ܆ ܠܗܰܘ ܕܠܳܐ ܬܰܪܣ̣ܺܝܬ܆ ܠܗܰܘ ܕܠܳܐ ܐܰܫܩ̣ܺܝܬ܆ ܠܗܰܘ ܕܠܳܐ ܐܰ‌ܠܒ̣ܶܫܬ܆ ܠܗܰܘ ܕܡܶܢ ܕܺܝܰܬܺܝܩܺܐ ܕܺܝܠܳܟ ܐܰܦܶܩܬܳܝܗ̱ܝ܆ ܐܰܝܟ ܕܠܰܒܢܰܝ̈ܳܐ ܗܳܢܽܘܢ ܛܳܠܽܘ̈ܡܶܐ ܘܡܰܨܰܥܪ̈ܳܢܶܐ ܘܠܳܐ ܡܩܰܒ̈ܠܰܝ ܛܰܝܒܽܘܬܳܐ.

ܘܟܰܕ ܕܺܝܢܳܐ ܡܰܢ ܐܰܘ ܬܒܰܥܬܳܐ ܡܶܕܶܡ ܥܬܺܝܕ ܐ̱ܢܳܫ ܕܢܶܬܟܰܬܰܫ ܗܳܪܟܳܐ܆ ܟܽܠܗܶܝܢ ܥܳܒܶܕ. ܗܳܠܶܝܢ ܕܰܠܕܰܝܳܢܳܐ ܡܢܺܝ̈ܚܳܢ܆ ܘܟܽܠ ‌ܐܳܕܫܳܐ ܕܡܰܦܰܩ ܒܪܽܘܚܳܐ ܡܶܬܦܰܪܰܤ ܘܰܡܟܰܢܶܫ ܠܳܗ̇ ܠܗܽܘܦܽܘܬܶܣܺܝܤ ܕܺܝܠܶܗ. ܐܰܢ̱ܬ ܕܶܝܢ ܟܰܕ ܚܙܽܘܩܝܳܐ ܗܰܘ ܐ̱ܚܪܳܝܳܐ ܚܳܙܶܩ ܐܰܢ̱ܬ܆ ܘܰܠܘܳܬ ܡܫܺܝܚܳܐ ܐܳܙܶܠ ‌ܐܰܢ̱ܬ܆ ܘܳܐܦܠܳܐ ܗܳܝܕܶܝܢ ܡܶܢ ܗܳܠܶܝܢ ܒܰܝ̈ܬܳܝܳܬܳܐ ܕܺܝܠܶܗ ܡܫܰܘܬܶܦ ܐܰܢ̱ܬ ܠܶܗ܆ ܘܠܰܕܡܳܐ ܘܰܠܒܶܣܪܳܐ ܡܩܰܕܶܡ ܐܰܢ̱ܬ ܡܝܰܩܰܪ ܐܰܢ̱ܬ ܡܶܢ ܩܕܳܡ ܥܳܒܽܘܕܳܟ܆ ܗܰܘ ܕܡܶܛܽܠܳܬܳܟ ܒܶܣܪܳܐ ܗܘ̣ܳܐ ܘܰܫܪܳܐ ܒܰܢ^[42]. ܒܡܳܢܳܐ ܐܶ݀ܬܕܰܡܰܪ ܝܰܬܺܝܪܳܐܺܝܬ؟ ܒܪܰܒܽܘܬܳܗ̇ ܕܠܳܐ ܦܳܪܽܘܫܽܘܬܳܐ ܘܛܳܠܽܘܡܽܘܬܳܐ܆ ܐܰܘ ܒܣܰܓܺܝܽܐܘܬܳܐ ܕܠܳܐ ܗܰܝܡܳܢܽܘܬܳܐ܆ ܬܶܗܘܶܐ ܓܶܝܪ ܕܰܐܝܟ ܕܠܰܡܥܰܕܪܳܢܳܟ. ܠܳܐ ܦܳܪܰܥ ܐܰܢ̱ܬ ܠܶܗ.

ܠܡܳܢܳܐ ܠܳܐ ܕܳܚܶܠ ‌ܐܰܢ̱ܬ ܡܶܢܶܗ ܐܰܝܟ ܕܡܶܢ ܕܰܝܳܢܳܐ. ܐܶ‎ܠܽܘ ܓܶܝܪ ܡܗܰܝܡܶܢ ܗ̱ܘܰܝܬ݁. ܠܡ̈ܶܠܶܐ ܗܳܠܶܝܢ ܕܡܶܛܽܠ ܕܺܝܢܳܐ܆ ܠܰܘ ܕܰܐܝܟ ܗܳܕܶܐ ܬܰܪܥܺܝܬܳܐ ܚܰܪܡܬܳܐ ܩܳܢܶܐ ܗ̱ܘܰܝܬ݁. ܬܶܣܰܒ ܗܳܟܺܝܠ ܢܶܣܝܳܢܳܐ ܕܢܽܘܪܳܐ ܕܠܳܐ ܕܳܥܟܳܐ܆ ܗܳܝ ܕܟܰܕ ܫܳܡܰܥ ܗ̱ܘܰܝܬ݁ ܠܳܐ ܕܚܶܠ̣ܬ. ܢܟܽܘܒ ܠܳܟ ܡܰܪܺܝܪܳܐܺܝܬ܆ ܐܶܡܰܬܝ ܕܡܶܢ ܬܰܘܠܥܳܐ ܗܳܝ ܕܠܳܐ ܡܳܝܬܳܐ ܡܶܬܢܟܶܬ ܐܰܢ̱ܬ܆ ܗܳܝ ܐܰܝܕܳܐ ܕܡܶܛܽܠ ܗܳܕܶܐ ܓܰܙܡܳܗ̇ ܗܰܘ ܕܪܳܚܶܡ ܐ̱ܢܳܫܳܐ܆ ܐܰܝܟܰܢܳܐ ܕܟܰܕ ܒܫܶܡܥܳܗ̇ ܡܰܕܚܶܠ܆ ܡܶܢ ܢܶܣܝܳܢܳܗ̇ ܢܫܰܘܙܶܒ. ܠܒܶܟܝܳܐ ܘܰܠܚܽܘܪܳܩܳܐ ܕܫܶܢ̈ܶܐ ܬܶܣܒܽܘܠ܆ ܐܶܡܰܬܝ ܕܰܕܠܳܐ ܝܽܘܬܪܳܢ ܐܺܝܬܶܝܗ̇ ܕܶܡܥܬܳܐ ܠܗܳܢܽܘܢ ܕܡܶܬܰܐܒܠܺܝܢ. ܐܶܡܰܬܝ ܕܰܕܡܶܬܬܰܘܝܳܢܽܘܬܳܐ ܠܳܐ ‌ܐܺܝܬܰܘܗ̱ܝ ܙܰܒܢܳܐ.

ܟܰܕ ܗܳܠܶܝܢ ܗܳܟܺܝܠ ܡܶܬܚܰܫܒܺܝܢܰܢ܆ ܠܘܳܬ ܢܰܦܫܰܢ ܢܶܬܦܢܶܐ܆ ܟܰܕ ܠܳܐ ܡܶܕܶܡ ܕܳܝܢܺܝܢ ܚ̱ܢܰܢ ܕܺܐܝܬܰܘܗ̱ܝ ܝܰܬܺܝܪ ܐܳ‌ܠܨܳܝܳܐ ܝܰܬܺܝܪ ܡܶܢ ܦܽܘܪܩܳܢܳܐ ܕܺܝܠܰܢ. ܐܳܦܠܳܐ ܠܰܡܕܰܒܪܳܢܽܘܬܳܐ ܕܗܳܠܶܝܢ ܕܺܐܝܬ ܠܰܢ ܠܰܐ̱ܚܪ̈ܳܢܶܐ ܡܗܰܝܡܢܺܝܢ ܚ̱ܢܰܢ܆ ܐܶܠܳܐ ܟܰܕ ܕܰܙܘܳܕ̈ܶܐ ܐ̱ܚܪ̈ܳܝܶܐ ܡܶܠܬܳܐ ܣܰܓܺܝܐܬܳܐ ܥܳܒܕܺܝܢ ܚ̱ܢܰܢ܆ ܘܫܰܪܺܝܪܳܐܺܝܬ ܚܢܰܢ ܠܰܢ ܡܫܰܡܫܺܝܢ ܚ̱ܢܰܢ܆ ܘܟܰܕ ܡܠܰܝ̈ܳܐ ܡܶܢ ܟܽܠ ܛܳܒܬܳܐ ܠܘܳܬ ܕܰܝܳܢܳܐ ܐܳܙܺܠ̱ܝܢ ܚ̱ܢܰܢ. ܐܶܢ ܕܶܝܢ ܐܳܦ ܕܡܰܪ̈ܗܳܛܶܐ ܝܳܨܦܺܝܢ ܚ̱ܢܰܢ ܟܰܕ ܚܰܝ݂ܺܝ݂ܢ ܚ̱ܢܰܢ܆ ܘܨܳܒܶܝܢ ܗ̱ܘܰܝܢ ܕܡܶܢ ܗܰܕܳܡ̈ܶܐ ܗܳܢܽܘܢ ܕܝܰܬܺܝܪ ܐܳ‌ܠܨܳܝ̈ܶܐ ܢܶܬܓܠܶܙ ܐܰܘ ܡܶܢ ܗܳܢܽܘܢ܆ ܐܶܠܳܐ ܐܶܡܰܬܝ ܕܰܥܬܺܝܕܺܝܢ ܕܢܶܫܒܽܘܩ ܐܶܢܽܘܢ. ܘܳܐܦ ܟܰܕ ܠܳܐ ܨܳܒܶܝܢ ܚ̱ܢܰܢ܆ ܗܳܝܕܶܝܢ ܗܳܟܺܝܠ. ܗܳܝܕܶܝܢ܆ ܢܰܫܶܦ ܕܢܶܬܶܠ ܠܡܳܪܳܐ ܡܫܺܝܚܳܐ ܡܶܢ ܩܶܢܝܳܢ̈ܶܐ ܒܰܝܬܳܝ̈ܶܐ ܕܺܝܠܶܗ. ܐܰܝܟܰܢܳܐ ܕܠܳܐ ܟܽܠ ܟܽܠܶܗ ܡܶܢ ܡܰܠܟܽܘܬܳܐ ܕܰܫܡܰܝܳܐ ܢܶܦܶܠ. ܠܗܳܝ. ܕܬܶܗܘܶܐ ܕܢܶܫܬܘܶܐ ܟܽܠܰܢ܆ ܒܝܰܕ ܪܶܚܡܰܬ ܐ̱ܢܳܫܽܘܬܶܗ ܘܛܰܝܒܽܘܬܶܗ. ܗܰܘ ܕܠܶܗ ܦܰܐܝܳܐ ܬܶܫܒܽܘܚܬܳܐ. ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܝܘܚܢܢ. 1: 14 [1]

ܠܘܩܐ. 1: 28 [2]

[3]ܝܰܘܢܳܝ̈ܶܐ ܐ̱ܚܕܳܝܽܘܬܳܐ ܩܢܽܘܡܳܝܬܳܐ܆ ܚܕܳܝܽܘܬܳܐ ܕܰܩܢܽܘܡܳܐ ܒܟܽܠ ܙܒܰܢ ܩܳܪܶܝܢ

ܠܳܗ̇.

ܥܒܪ̈ܝܐ. 2: 14 [4]

ܡܙܡܘܪ̈ܐ. 65: 2 [5]

ܡܙܡܘܪ̈ܐ. 144: 21 [6]

ܬܶܢܝܳܢ ܢܳܡܽܘܣܐ. 10: 22 [7]

ܝܘܚܢܢ. 1: 14 [8]

ܣܶܦܪܳܐ ܕܒܪܺܝܬܳܐ. 19: 26 [9]

ܡܦܩܢܐ. 4: 3 [10]

ܡܙܡܘܪ̈ܐ. 90: 1 [11]

ܡܙܡܘܪ̈ܐ. 59: 17 [12]

ܣܶܦܪܳܐ ܕܒܪܝܬܐ. 4: 2 [13]

ܕܺܐܝܩܳܪܳܐ[14]

ܐ. ܫܡܘܐܝܠ. 3: 20 [15]

ܓܠ̈ܛܝܐ. 3: 13 [16]

ܐ. ܩܘܪ̈ܝܢܬܝܐ. 9: 20 ـ 22 [17]

ܝܘܚܢܢ. 1: 14 [18]

ܕܡܰܓܶܢ.[19]

[20]ܡܶܛܽܠ ܠܒܽܘܫܳܐ܆ ܠܰܠܒܽܘܫܳܐ ܣܳܓܶܕ ܐ̱ܢܳܐ. ܡܶܛܽܠ ܟܰܣܝܳܐ ܠܓܶܠܝܳܐ.

[21] ܗܳܝ ܕܰܐܓܶܢ ܒܰܢ ܐܰܘܟܺܝܬ ܫܪܳܐ ܒܰܢ܆ ܐܰܝܟ ܕܰܒܠܶܫܳܢܳܐ ܝܰܘܢܳܝܳܐ܆ ܡܶܢ ܫܡܳܐ ܕܡܰܫܟܢܳܐ ܐܰܡܺܝܪܳܐ ܐܰܘܟܺܝܬ ܡܰܝܬܝܳܐ. ܡܶܛܽܠܗܳܕܶܐ ܐܰܝܬܺܝ ܡܰܠܦܳܢܳܐ ܬܰܚܘܺܝܬܳܐ ܠܡܶܠܬܶܗ܆ ܗܳܝ ܕܶܐܡܰܪ ܦܘܠܘܣ ܫܠܺܝܚܳܐ܆ ܡܰܫܟܢܳܐ ܐܰܪܥܳܢܳܝܳܐ ܕܒܰܝܬܳܐ ܕܺܝܠܰܢ.

ܒ. ܩܘܪ̈ܝܢܬܝܐ. 5: 1 [22]

ܒ. ܩܘܪ̈ܝܢܬܝܐ. 5: 4 [23]

ܥܒܪ̈ܝܐ. 4: 15 [24]

ܐܰܫܠܶܡܘ[25]

ܒܪܘܟ. 3: 36 ـ 38 [26]

 ܕܰܒܪܳܐ[27]

ܐ. ܛܝܡܬܐܘܣ. 3: 16 [28]

ܝܘܚܢܢ. 1: 1 [29]

ܝܘܚܢܢ. 1: 2 [30]

ܝܘܚܢܢ. 1: 14 [31]

 ܡܡܰܠܠܽܘܬ ܐܰ‌ܠܳܗܽܘܬܳܐ[32]

ܝܘܚܢܢ. 1: 1 [33]

ܣܦܪܐ ܕܡܦܩܳܢܐ. 3: 14 [34]

ܝܘܚܢܢ. 1: 14 [35]

ܐ. ܛܝܡܬܐܘܣ. 3: 16 [36]

ܣܶܦܪܳܐ ܕܒܰܪܽܘܟ̣. 3: 38 [37]

ܡܦܩܢܐ. 19: 14 [38]

ܝܘܚܢܢ. 1: 14 [39]

ܡܬܝ. 25: 34 [40]

ܡܬܝ. 24: 31 [41]

ܝܘܚܢܢ. 1: 14 [42]