ܡܺܐܡܪܳܐ ܕܥܶܣܪܺܝܢ ܘܰܬܪܶܝܢ

ܥܰܠ ܗܳܝ ܕܰܐ‌ܠܳܗܝ ܠܡܳܢܳܐ ܫܒܰܩܬܳܢܝ^[1]܆ ܘܥܰܠ ܗܳܝ ܕܶܐܬܰܐܡܪܰܬ ܡܶܢ ܡܳܪܰܢ ܠܘܳܬ ܗܰܘ ܓܰܝܳܣܳܐ܆ ܐܰܡܺܝܢ ܐܳܡܰܪ ܐ̱ܢܳܐ ܠܳܟ܆ ܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܳܝܣܳܐ^[2].

22: ܟܒܰܪ ܐ̱ܢܳܫܺܝ̈ܢ ܡܶܢ ܗܳܢܽܘܢ ܕܦܳܣܩܺܝܢ ܠܶܗ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ܆ ܠܗܰܘ ܚܰܕ ܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ. ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ܆ ܟܰܕ ܠܘܳܬ ܚܽܘܫܳܒ̈ܶܐ ܐ̱ܢܳܫܳܝ̈ܶܐ ܡܶܬܓܰܪܦܺܝܢ܆ ܡܫܰܐܠܺܝܢ ܟܰܕ ܦܽܘܫܳܟܳܐ ܣܳܒܪܺܝܢ ܠܡܶܥܒܰܕ ܠܫܰܦܺܝܪ̈ܰܝ ܕܶܚܠܬܳܐ܆ ܕܡܰܢܽܘ ‌ܐܺܝܬܰܘܗ̱ܝ ܗ̱ܘܳܐ ܗܰܘ ܕܥܰܠ ܨܠܺܝܒܳܐ ܩܥܳܐ܆ ܐܰ‌ܠܳܗܝ ܐܰ‌ܠܗܳܝ ܠܡܳܢܳܐ ܫܒܰܩܬܰܢܝ. ܚܢܰܢ ܕܶܝܢ ܚܰܟܺܝܡܳܐܺܝܬ ܐܳܡܪܺܝܢ ܚ̱ܢܰܢ: ܟܰܕ ܡܶܢ ܟܬܳܒ̈ܶܐ ܟܳܗܢܳܝ̈ܶܐ ܡܶܬܗܰܕܶܝܢ ܚ̱ܢܰܢ܆ ܕܰܐ‎ܠܳܗܳܐ ܡܶܠܬܳܐ ܗܰܘ ܕܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ܆ ‌ܐܺܝܬܰܘܗ̱ܝ ܗ̱ܘܳܐ ܗܰܘ ܕܗܳܕܶܐ ܩܥܳܐ܆ ܗܰܘ ܕܡܶܛܽܠܳܬܰܢ ܨܶܒܝܳܢܳܐܺܝܬ ܐܶܬܡܰܣܟܰܢ܆ ܘܰܒܗܳܝ ܕܰܗܘܳܐ ܒܰܪܢܳܫܳܐ܆ ܐܰ‎ܠܳܗܳܐ ܕܺܝܠܶܗ ܡܫܰܡܰܗ ܠܶܗ ܠܰܐܒܳܐ.

ܗܽܘ ܓܶܝܪ ܒܩܰܝܣܳܐ ܩܒܺܝܥ ܗ̱ܘܳܐ܆ ܟܰܕ ܦܰܓܪܳܐ ܩܒܺܝܥ ܗ̱ܘܳܐ܆ ܗܰܘ ܕܰܩܢܽܘܡܳܐܺܝܬ ܡܚܰܝܰܕ ܗ̱ܘܳܐ ܠܶܗ. ܒܗܳܕܶܐ^[3] ܓܶܝܪ ܘܳܐܦ ܟܰܬܰܪ ܠܳܐ ܚܳܫܽܘܫܳܐ ܐܰܝܟ ܐܰ‎ܠܳܗܳܐ. ܘܡܶܢ ܚܰܫܳܐ ܠܳܐ ܡܢܰܟܪܰܝ. ܕܺܝܠܳܢܳܝܳܐ ܓܶܝܪ ܕܺܝܠܶܗ ‌ܐܺܝܬܰܘܗ̱ܝ ܗ̱ܘܳܐ܆ ܘܠܰܘ ܕܐ̱ܢܳܫ ܐ̱ܚܪܺܝܢ܆ ܦܰܓܪܳܐ ܗܰܘ ܕܚܰܫ. ܡܳܕܶܝܢ܆ ܟܺܐܢܳܐܺܝܬ ܕܺܝܠܳܢܳܝܳܐ ܕܺܝܠܶܗ ܡܶܬܗܰܝܡܰܢ ܕܺܐܝܬܰܘܗ̱ܝ ܚܰܫܳܐ. ܐܰܘ ܓܶܝܪ ܟܰܕ ܡܰܪܫܰܥ ܐܰܢ̱ܬ܆ ܗܳܝ ܟܺܝܬ ܕܳܐܦ ܕܢܺܐܡܪܺܝܗ̇ ܥܣܺܝܩܬܳܐ ܗܳܝ 222ܐܶܫܠܚܺܝܘܗ̱ܝ ܡܶܢ ܒܶܣܪܳܐ ܗܰܘ ܕܶܐܬܚܰܝܰܕ ܠܶܗ܆ ܝܺܕܺܝܥܳܐ ܕܶܝܢ ܕܺܐܝܬ ܠܶܗ ܢܰܦܫܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ܆ ܐܰܘ ܠܳܐ ܬܶܫܟܰܚ ܠܰܡܢܰܟܪܳܝܽܘܬܶܗ ܡܶܢ ܚܰܫܳܐ.

ܐܶ‎ܠܽܘ ܠܳܐ ܓܶܝܪ ܕܝܳܕܰܥ ܗ̱ܘܳܐ ܓܰܠܝܳܐܺܝܬ ܦܶܛܪܽܘܤ ܗܰܘ ܩܳܝܽܘܡܳܐ ܩܰܕܡܳܝܳܐ ܕܰܫܠܺܝ̈ܚܶܐ ܩܰܕܺܝ̈ܫܶܐ ܕܚܰܕ ܡܫܺܝܚܳܐ ‌ܐܺܝܬܰܘܗ̱ܝ ܡܶܠܬܳܐ ܗܰܘ ܕܶܐܬܒܰܣܰܪ܆ ܗܰܘ ܕܳܐܦ ܚܰܫ ܚܠܳܦܰܝܢ܆ ܠܳܐ ܐܳܡܰܪ ܗ̱ܘܳܐ ܟܰܕ ܟܳܬܶܒ ܗ̱ܘܳܐ܆ ܡܫܺܝܚܳܐ ܚܰܫ ܚܠܳܦܰܝܢ ܒܰܒܣܰܪ^[4]. ܐܶܠܳܐ ܐܳܡܰܪ ܗ̱ܘܳܐ ܐܰܝܟ ܕܥܰܠ ܬܪܶܝܢ ܡܫܺܝ̈ܚܶܐ܆ ܕܰܡܫܺܝܚܳܐ ܗܳܟܺܝܠ ܚܰܫ ܚܠܳܦܰܝܢ܆ ܗܰܘ ܕܡܶܢ ܙܰܪܥܶܗ ܕܕܰܘܺܝܕ܆ ܠܳܐ ܐ̱ܢܳܫ ܓܶܝܪ ܟܰܕ ܡܡܰܠܶܠ ܡܶܛܽܠ ܒܰܪܢܳܫܳܐ ܕܠܳܐ ‌ܐܺܝܬܰܘܗ̱ܝ ܗܽܘ ܟܰܕ ܗܽܘ ܐܳܦ ܐܰ‎ܠܳܗܳܐ܆ ܐܳܡܰܪ ܠܳܚܡܳܐܺܝܬ ܕܚܰܫ ܗܳܢܳܐ ܚܠܳܦܰܝܢ ܒܰܒܣܰܪ܆ ܐܶ‎ܠܽܘ ܠܳܐ ܓܶܝܪ ܕܰܡܦܳܤ ܗ̱ܘܳܐ ܕܗܽܘ ܟܰܕ ܗܽܘ܆ ܒܗܳܝ ܡܰܢ ܕܰܐ‌ܠܳܗܰܐ ܗ̱ܘ. ܠܳܐ ܚܰܫܺܝܫܳܐ ‌ܐܺܝܬܰܘܗ̱ܝ܆ ܒܗܳܝ ܕܶܝܢ ܕܒܰܪܢܳܫܰܐ ܗ̱ܘ. ܚܳܫܽܘܫܳܐ ‌ܐܺܝܬܰܘܗ̱ܝ܆ ܠܳܐ ܡܰܘܣܶܦ ܗ̱ܘܳܐ ܗܳܝ ܕܒܰܒܣܰܪ܆ ܚܕܳܝܽܘܬܳܐ ܓܶܝܪ ܗܳܝ ܡܥܰܠܰܝܬܳܐ ܘܠܳܐ ܡܶܬܦܰܣܩܳܢܺܝܬܳܐ ܕܰܐ‎ܠܳܗܳܐ ܡܶܠܬܳܐ ܕܰܠܘܳܬ ܒܶܣܪܳܐ܆ ܐܳ‌ܠܨܳܝܳܐ ܥܒܰܕܬܶܗ ܠܶܗ ܠܗܰܘ ܦܪܽܘܣܕܺܝܽܘܪܺܝܣܡܽܘܤ܆ ܗܳܢܰܘ ܕܶܝܢ ܠܗܳܝ ܬܰܘܣܶܦܬܳܐ ܕܦܽܘܪܳܫܳܐ ܕܳܐܡܪܳܐ܆ ܒܰܒܣܰܪ.

ܡܶܛܽܠܗܳܕܶܐ܆ ܐܳܦ ܒܰܦܪܰܟܣܺܝܤ ܕܰܫܠܺܝ̈ܚܶܐ܆ ܗܽܘ ܟܰܕ ܗܽܘ ܦܶܛܪܽܘܤ. ܟܬܺܝܒ ܕܳܐܡܰܪ܆ ܝܶܫܽܘܥ ܓܰܒܪܳܐ ܢܳܨܪܳܝܳܐ܆ ܕܶܐܬܩܰܒܰܥ ܡܰܢ ܒܩܰܝܣܳܐ ܡܶܢ ܝܽܗ̱ܘܕܳܝ̈ܶܐ܆ ܕܩܳܡ ܕܶܝܢ ܡܶܢ ܐܰܒܳܐ܆ ܟܰܕ ܫܪܳܐ ܚܰܒ̈ܠܶܐ ܕܡܰܘܬܳܐ܆ ܒܗܳܝ ܕܠܳܐ ܐܺܝܬܶܝܗ̇ ܗ̱ܘܳܬ ܡܶܬܡܰܨܝܳܢܺܝܬܳܐ ܕܢܶܬܠܒܶܟ ܡܶܢܶܗ^[5]. ܚܙܺܝ ܕܓܰܠܝܳܐܺܝܬ ܝܳܕܰܥ ܠܶܗ ܟܰܕ ܠܶܗ ܕܺܐܝܬܰܘܗ̱ܝ ܐܳܦ ܒܰܪܢܳܫܳܐ ܫܰܪܺܝܪܳܐܺܝܬ܆ ܐܳܦ ܐܰ‎ܠܳܗܳܐ ܠܳܐ ܚܳܫܽܘܫܳܐ܆ ܕܠܳܐ ܡܰܨܝܳܐ ܕܢܶܬܠܒܶܟ ܡܶܢ ܡܰܘܬܳܐ. ܐܶ‎ܠܽܘܠܳܐ ܓܶܝܪ ܕܺܐܝܬܰܘܗ̱ܝ ܗ̱ܘܳܐ ܗܽܘ ܟܰܕ ܗܽܘ. ܠܳܐ ܡܳܝܽܘܬܳܐ ܒܰܟܝܳܢܳܐ܆ ܐܳܦܶܢ ‌ܐܺܝܬܰܘܗ̱ܝ ܗ̱ܘܳܐ ܡܳܝܽܘܬܳܐ ܒܗܳܝ ܕܰܗܘܳܐ ܒܰܣܪܳܐ ܠܳܐ ܐܳܡܰܪ ܗ̱ܘܳܐ܆ ܒܗܳܝ ܕܠܳܐ ܐܺܝܬܶܝܗ̇ ܗ̱ܘܳܬ ܡܶܬܥܰܨܝܳܢܺܝܬܳܐ ܕܢܶܬܠܒܶܟ ܡܶܢܶܗ.

ܘܬܽܘܒ ܠܝܽܗ̱ܘ̈ܕܳܝܶܐ ܐܳܡܰܪ ܗ̱ܘܳܐ. ܒܕܽܘܟܬܳܐ ܐ̱ܚܪܺܬܳܐ: ܕܰܠܪܺܝܫܳܐ ܕܚܰܝ̈ܶܐ ܩܛܰܠܬܽܘܢ^[6]. ܘܗܳܟܰܢܳܐ ܗܽܘ ܟܰܕ ܗܽܘ ‌ܐܺܝܬܰܘܗ̱ܝ ܐܳܦ ܚܳܫܽܘܫܳܐ ܒܰܒܣܰܪ܆ ܐܳܦ ܕܰܡܥܰܠܰܝ ܡܶܢ ܚܰܫܳܐ ܒܰܐܠܳܗܽܘܬܳܐ ܘܰܕܝܰܬܺܝܪ ܪܳܡ. ܘܰܒܗܳܝ ܡܰܢ ܕܒܰܪܢܳܫܳܐ ‌ܐܺܝܬܰܘܗ̱ܝ܆ ܕܩܳܡ ܡܶܢ ܐܰܒܳܐ ܡܶܬܶܐܡܰܪ. ܒܗܳܝ ܕܶܝܢ ܕܰܐ‎ܠܳܗܳܐ܆ ܕܠܳܐ ܡܶܫܟܚܳܐ ܕܢܶܬܠܒܶܟ ܒܡܰܘܬܳܐ.

 ܗܳܟܰܢܳܐ ܐܳܦ ܦܰܘܠܽܘܤ ܟܰܕ ܠܪ̈ܽܗ̱ܘܡܳܝܶܐ ܫܳܠܰܚ ܗ̱ܘܳܐ܆ ܡܶܢ ܝܽܗ̱ܘܕܳܝ̈ܶܐ ܐܳܡܰܪ ܠܶܗ ܠܰܡܫܺܝܚܳܐ ܕܺܐܝܬܰܘܗ̱ܝ ܒܰܒܣܰܪ^[7]܆ ܠܶܗ ܕܶܝܢ ܟܰܕ ܠܶܗ ܐܰ‎ܠܳܗܳܐ ܡܒܰܪܟܳܐ ܠܥܳܠܡܺܝܢ ܐܰܡܺܝܢ. ܟܳܬܶܒ ܕܶܝܢ. ܐܳܦ ܒܶܐܓܰܪܬܳܐ ܩܰܕܡܳܝܬܳܐ ܗܳܝ ܕܰܠܘܳܬ ܩܽܘܪ̈ܺܝܢܬܳܝܶܐ܆ ܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ܆ ܗܰܘ ܕܒܺܐܝܕܰܘ̈ܗ̱ܝ ܟܽܠ܆ ܘܰܚܢܰܢ ܒܺܐܝ̈ܕܰܘܗܝ^[8]. ܘܬܽܘܒ ܒܗܳܝ ܕܰܠܘܳܬ ܥܶܒܪ̈ܳܝܶܐ܆ ܝܶܫܽܘܥ ܡܫܺܝܚܳܐ܆ ܐܶܬܡܳܠܝ̱. ܘܝܰܘܡܳܢܳܐ. ܗܽܘ ܟܰܕ ܗܽܘ ܘܰܠܥܳܠܡܺܝܢ^[9]. ܒܳܗ̇ ܒܰܕܡܽܘܬܳܐ ܐܳܦ ܐܰ‎ܠܳܗܳܝܳܐ ܝܽܘܚܰܢܳܢ. ܟܰܕ ܟܳܬܶܒ ܗ̱ܘܳܐ ܐܶܓܰܪܬܳܐ ܐܳܡܰܪ: ܘܺܐܝܬܰܝܢ ܒܫܰܪܺܝܪܳܐ ܒܰܒܪܶܗ ܝܶܫܽܘܥ ܡܫܺܝܚܳܐ. ܗܳܢܳܐ ‌ܐܺܝܬܰܘܗ̱ܝ ܐܰ‎ܠܳܗܳܐ ܫܰܪܺܝܪܳܐ ܘܚܰܝ̈ܶܐ ܗܳܢܽܘܢ ܕܰܠܥܳܠܰܡ^[10].

ܘܳܐܦ ܗܽܘ ܕܶܝܢ ܡܳܪܰܢ ܡܰܙܥܶܩ ܒܶܐܘܰܢܓܶܠܺܝ̈ܰܐ܆ ܗܰܘ ܕܡܶܢ ܐܰܒܪܳܗܳܡ ܒܰܒܣܰܪ܆ ܩܕܳܡ ܕܰܐܒܪܳܗܳܡ ܢܶܗܘܶܐ܆ ܐܺܝܬܰܝ ܐܶܢܳܐ^[11]. ܘܬܽܘܒ. ܠܳܐ ܐ̱ܢܳܫ ܣܠܶܩ ܠܰܫܡܰܝܳܐ܆ ܐܶܠܳܐ ܐܶܢ ܗܰܘ ܕܡܶܢ ܫܡܰܝܳܐ ܢܚܶܬ܆ ܗܰܘ ܒܪܶܗ ܕܐ̱ܢܳܫܳܐ. ܐܳܦܶܢ ܓܶܝܪ ‌ܐܺܝܬܰܘܗ̱ܝ ܗ̱ܘܳܐ ܗܽܘ ܒܶܣܪܳܐ ܡܶܢ ܡܰܪܝܰܡ܆ ܘܕܰܫܘܶܐ ܠܰܢ ܒܽܐܘܣܺܝܰܐ܆ ܐܶܠܳܐ ܟܺܝܬ. ܡܶܛܽܠ ܚܕܳܝܽܘܬܳܐ ܗܳܝ ܕܰܠܘܳܬ ܫܡܰܝܳܢܳܐ܆ ܒܪܶܗ ܕܐ̱ܢܳܫܳܐ ܡܶܬܶܐܡܰܪ ܕܰܢܚܶܬ ܡܶܢ ܫܡܰܝܳܐ.

ܒܗܳܢܳܐ ܙܢܳܐ ܐܳܦ ܗܳܝ ܐܳܡܰܪ. ܗܰܘ ܕܳܐܟܶܠ ܒܶܣܪܳܐ ܕܺܝܠܝ. ܘܫܳܬܶܐ ܠܰܕܡܳܐ ܕܺܝܠܝ܆ ܒܺܝ ܡܩܰܘܶܐ. ܘܶܐܢܳܐ ܒܶܗ^[12]. ܐܰܝܟܰܢܳܐ ܕܫܰܕܪܰܢܝ ܐܰܒܳܐ ܗܰܘ ܚܰܝܳܐ܆ ܐܳܦ ܐܶܢܳܐ ܚܰܝ ܐ̱ܢܳܐ ܡܶܛܽܠ ‌ܐܰܒܳܐ. ܘܗܰܘ ܕܳܐܟܶܠ ܠܺܝ܆ ܐܳܦ ܗܽܘ ܢܺܚܶܐ ܡܶܛܽܠܳܬܝ. ܘܟܰܕ ܛܳܒ܆ ܠܰܘ ܠܡܶܠܬܳܐ ܐܳܟܠܺܝܢܰܢ܆ ܒܗܳܝ ܕܺܐܝܬܰܘܗ̱ܝ ܡܶܠܬܳܐ. ܐܰܝܟܰܢܳܐ ܓܶܝܪ ܠܗܰܘ ܠܳܐ ܡܶܬܓܰܫܫܳܢܳܐ ܘܰܕܠܳܐ ܓܫܽܘܡ܆ ܘܕܳܐܦܠܳܐ ܠܥܰܝ̈ܢܶܐ ‌ܐܺܝܬܰܘܗ̱ܝ ܡܶܬܚܰܙܝܳܢܳܐ܆ ܘܕܳܐܦܠܳܐ ܠܫܶܢ̈ܶܐ ܡܶܬܟܰܒܫܳܢܳܐ. ܐܶܠܳܐ ܡܶܛܽܠ ܟܺܝܬ ܕܰܠܘܳܬ ܒܶܣܪܳܐ ܚܕܳܝܽܘܬܳܐ ܗܳܝ ܪܺܝܫܳܝܬܳܐ ܡܚܰܝܰܕ܆ ܡܰܥܒܶܕ ܚܰܝ̈ܶܐ ‌ܐܺܝܬܰܘܗ̱ܝ ܐܳܦ ܗܽܘ ܒܶܣܪܳܐ܆ ܐܳܦܶܢ ܟܰܬܰܪ ܗܰܘ ܡܳܐ ܕܺܐܝܬܰܘܗ̱ܝ܆ ܘܠܳܐ ܫܰܢܺܝ ܘܰܥܒܰܪ ܠܰܟܝܳܢܳܐ ܕܺܝܠܶܗ ܕܡܶܠܬܳܐ. ܕܡܶܢ ܗܳܪܟܳܐ ܠܡܶܠܬܳܐ ܐܳܟܠܺܝܢܰܢ܆ ܟܕ ܠܒܶܣܪܳܐ ܗܽܘ ܡܰܥܒܶܕ ܚܰܝ̈ܶܐ ܕܺܝܠܶܗ ܕܡܶܠܬܳܐ ܐܳܟܠܺܝܢܰܢ. ܡܶܛܽܠܗܳܕܶܐ ܟܺܝܬ ܐܳܡܰܪ܆ ܘܳܐܦ ܗܰܘ ܕܳܐܟܶܠ ܠܺܝ܆ ܐܳܦ ܗܽܘ ܢܺܚܶܐ ܡܶܛܽܠܳܬܝ.

ܟܰܕ ܗܳܟܺܝܠ ܟܬܳܒ̈ܶܐ ܟܳܗ̈ܢܳܝܶܐ ܕܪܽܘܚܳܐ܆ ܚܰܕ ܝܳܕܥܺܝܢ ܠܶܗ ܠܰܒܪܳܐ܆ ܘܨܶܒܝܳܢܳܐܺܝܬ ܐܶܬܢܰܚܰܬ ܠܣܽܘܪܳܩܳܐ ܘܶܐܬܪܡܺܝ ܡܶܛܽܠܳܬܰܢ ܠܡܶܣܟܺܢܽܘܬܳܐ ܕܺܝܠܰܢ܆ ܘܕܳܐܦܠܳܐ ܒܡܶܕܶܡ ܡܶܬܦܰܠܰܓ ܡܶܢ ܒܶܣܪܳܐ ܗܰܘ ܕܶܐܬܚܰܝܰܕ ܠܶܗ ܕܠܳܐ ܒܽܘܠܒܳܠܳܐ ܘܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܶܫܬܰܓܢܝܳܢܳܐܺܝܬ܆ ܘܰܕܗܽܘ ܟܰܕ ܗܽܘ ܡܰܥܒܶܕ ܐܰ‎ܠܳܗܳܐܺܝܬ ܗܳܠܶܝܢ ܐܰ‎ܠܳܗܳܝ̈ܳܬܳܐ܆ ܘܚܳܐܶܫ ܐ̱ܢܳܫܳܐܺܝܬ ܗܳܠܶܝܢ ܐ̱ܢܳܫ̈ܳܝܶܐ܆ ܐܰܝܟܰܢܳܐ ܐܰܘ ܗܳܢܳܐ^[13]܆ ܟܒܰܪ ܒܕܽܘܟ ܐܰܝܟ ܫܳܢܝܽܘܬܳܐ ܗܳܝ ܕܚܰܢ̈ܦܶܐ܆ ܟܰܕ ܫܳܛܝܽܘܬܳܐ ܚܳܫܶܒ ܐܰܢ̱ܬ ܠܶܗ ܠܰܨܠܺܝܒܳܐ^[14]܆ ܘܟܰܕ ܕܠܳܐ ܦܰܐܝܳܐ ܡܰܣܒܰܪ ܐܰܢ̱ܬ ܕܺܐܝܬܶܝܗ̇܆ ܗܳܝ ܕܶܐܬܶܐܡܰܪ ܕܰܐ‎ܠܳܗܳܐ ‌ܐܺܝܬܰܘܗ̱ܝ ܗܰܘ ܕܶܐܨܛܠܶܒ܆ ܡܶܬܚܰܡܰܨ ܐܰܢ̱ܬ ܒܡ̈ܶܠܶܐ ܗܳܠܶܝܢ܆ ܟܰܕ ܙܳܕܶܩ ܗ̱ܘܳܐ ܠܳܟ ܕܬܶܬܕܰܡܰܪ ܒܗܳܠܶܝܢ ܕܰܠܟܽܠܳܗ̇ ܗܳܝ ܕܰܬܚܶܝܬ ܫܡܰܝܳܐ ܦܪ̈ܰܩܶܝܢ܆ ܘܰܡܫܰܐܶܠ ‌ܐܰܢ̱ܬ ܠܳܐ ܝܰܠܺܝܦܳܐܺܝܬ ܐܰܝܟ ܗܰܘ ܕܰܬܪܶܝܢ ܒܢܰܝ̈ܳܐ ܐܺܝܬܰܝܗܽܘܢ܆ ܘܠܰܘ ܚܰܕ ‌ܐܺܝܬܰܘܗ̱ܝ ܗܰܘ ܕܚܰܫ ܚܠܳܦܰܝܢ ܒܰܒܣܰܪ܆ ܕܡܰܢܽܘ ‌ܐܺܝܬܰܘܗ̱ܝ ܗܰܘ ܕܥܰܠ ܨܠܺܝܒܳܐ ܐܳܡܰܪ ܗ̱ܘܳܐ: ܐܰ‌ܠܳܗܝ ܐܰ‌ܠܳܗܝ ܠܡܳܢܳܐ ܫܒܰܩܬܳܢܝ^[15].

ܐܶܢ ܓܶܝܪ ܣܳܟ. ܡܶܬܪܡܶܐ ܗ̱ܘܳܐ܆ ܕܰܬܚܶܝܬ ܡܫܽܘܚܬܳܐ ܕܡܶܣܟܺܢܽܘܬܳܐ ܢܺܐܬܶܐ܆ ܘܒܶܣܪܳܐ ܢܶܗܘܶܐ ܗ̱ܘܳܐ ܐܰܝܟ ܒܰܪ̱ܬ ܩܳܠܳܐ ܕܝܽܘܚܰܢܳܢ^[16]܆ ܐܰܝܟܰܢܳܐ ܢܶܫܬܶܐܠ ܗ̱ܘܳܐ ܡܶܢ ܡ̈ܶܠܶܐ ܗܳܢܶܝܢ ܕܰܠܒܶܣܪܳܐ ܦܰܐܝ̈ܳܢ܆ ܗܳܠܶܝܢ ܕܡܶܛܽܠܳܬܗܶܝܢ ܣܒܰܠ ܨܠܺܝܒܳܐ܆ ܟܰܕ ܓܶܝܪ ܪܺܝܫܺܝܬܳܐ ܕܰܟܝܳܢܳܐ ܕܺܝܠܰܢ ܗܘ̣ܳܐ܆ ܒܳܥ̈ܘܳܬܳܐ ܕܰܚܠܳܦ ܟܽܠܳܗ̇ ܐ̱ܢܳܫܽܘܬܳܐ ܡܰܣܶܩ܆ ܟܰܕ ܥܰܠ ܟܽܠܶܗ ܓܶܢܣܳܐ ܢܳܓܶܕ ܠܗܽܘܢ ܠܪ̈ܰܚܡܶܐ ܕܡܶܢ ܠܥܶܠ.

ܚܢܰܢ ܓܶܝܪ ܐܺܝܬܰܝܢ ܗ̱ܘܰܝܢ܆ ܗܳܢܽܘܢ ܕܰܫܒܺܝܩܺܝܢ ܗ̱ܘܰܝܢ ܘܰܒܣܶܝܢ ܗ̱ܘܰܝܢ܆ ܘܕܰܒܝܰܕ ܥܒܳܪ ܦܽܘܩܕܳܢܳܐ ܕܳܐܕܳܡ ܐܺܝܬܰܝܢ ܗ̱ܘܰܝܢ ܡܰܩܪ̈ܒܳܢܶܐ ܠܘܳܬ ܐܰ‎ܠܳܗܳܐ܆ ܘܕܰܡܫܰܥ̈ܒܕܶܐ ܘܕܰܬܚܶܝܬ ܡܰܕܰܐܬܳܐ ܡܶܢ ܟܰܕܽܘ ܗܘ̣ܰܝܢܰܢ ܠܦܽܘܩܕܳܢ̈ܶܐ ܛܪ̈ܽܘܢܳܝܶܐ ܕܳܐܟܶܠܩܰܪܨܳܐ.

ܕܗܽܘ ܓܶܝܪ ܡܶܛܽܠ ܢܰܦܫܶܗ. ܠܳܐ ܐܳܡܰܪ ܗ̱ܘܳܐ ܗܳܠܶܝܢ܆ ܢܶܣܗܰܕ ܠܰܢ ܓܰܠܝܳܐܺܝܬ܆ ܐܳܦ ܡܰܙܡܽܘܪܳܐ ܗܰܘ ܕܥܶܣܪܺܝܢ ܘܚܰܕ܆ ܕܓܰܠܝܳܐܺܝܬ ܩܰܕܺܝܡ ܡܰܙܥܶܩ ܢܒܺܝܳܐܺܝܬ ܒܗܶܝܢ ܒܡ̈ܶܠܶܐ ܗܳܠܶܝܢ ܕܶܐܘܰܢܓܶܠܺܝܽܘܢ ܥܰܠ ܚܰܫܳܐ ܦܳܪܽܘܩܳܝܳܐ ܕܰܡܫܺܝܚܳܐ܆ ܘܗܳܟܰܢܳܐ ܐܺܝܬ ܒܶܗ. ܐܰ‎ܠܳܗܳܐ ܐܰ‎ܠܳܗܳܐ ܕܺܝܠܝ ܨܽܘܬܰܝܢܝ. ܠܡܳܢܳܐ ܫܒܰܩܬܳܢܝ܆ ܠܪܽܘܚܩܳܐ ܡܶܢ ܦܽܘܪܩܳܢܳܐ ܕܺܝܠܝ܆ ܒܡ̈ܶܠܶܐ ܕܣܰܟ̈ܠܘܳܬܝ^[17]. ܐܰܝܟܰܢܳܐ ܕܶܝܢ ܠܳܚܡܳܐܺܝܬ ܐܳܡܰܪ ܗ̱ܘܳܐ ܗܳܠܶܝܢ ܡܫܺܝܚܳܐ ܡܶܛܽܠ ܢܰܦܫܶܗ܆ ܐܰܘ ܡܶܛܽܠ ‌ܐܰܝܠܶܝܢ ܣܰܟ̈ܠܘܳܬܳܐ ܒܰܝܬܳܝ̈ܳܬܳܐ ܕܺܝܠܶܗ ܡܶܬܟܰܫܰܦ ܗ̱ܘܳܐ܆ ܗܰܘ ܕܰܚܛܺܝܬܳܐ ܠܳܐ ܥܒܰܕ܆ ܘܳܐܦܠܳܐ ܢܶܟܠܳܐ ܐܶܫܬܟܰܚ ܒܦܽܘܡܳܐ ܕܺܝܠܶܗ^[18].

ܐܰܪܰܐ. ܠܳܐ ܗ̱ܘܳܐ ܐܳܦ ܠܗܳܢܽܘܢ ܕܣܰܓܺܝ ܐܺܝܬܰܝܗܽܘܢ ܠܳܐ ܡܢܰܣܰܝ̈ܳܐ ܕܰܟܬܳܒ̈ܶܐ ܐܰ‎ܠܳܗܳܝ̈ܶܐ ܝܺܕܺܝܥܳܐ܆ ܕܡܶܛܽܠܳܬܰܢ ܕܺܝܠܰܢ ܗܳܢܽܘܢ ܕܰܚܛܰܝܢܰܢ܆ ܘܰܒܣܰܟ̈ܠܘܳܬܳܐ ܘܫܽܘܪ̈ܥܳܬܳܐ ܗܘ̣ܰܝܢܰܢ ܒܝܰܕ ܥܒܳܪ ܦܽܘܩܕܳܢܳܐ ܕܳܐܕܳܡ. ܗܳܠܶܝܢ ܐܳܡܰܪ ܗ̱ܘܳܐ܆ ܐܰܝܟܰܢܳܐ ܗܳܟܺܝܠ ܠܰܘ ܠܗܰܠ ܡܶܢ ܟܽܠܶܗ ܬܶܡܗܳܐ ܐܺܝܬܶܝܗ̇܆ ܪܰܒܽܘܬܳܗ̇ ܕܡܰܘܗܰܒܬܳܐ ܗܳܝ ܕܰܐܝܟ ܗܳܕܶܐ. ܣܠܶܩ ܥܰܠ ܨܠܺܝܒܳܐ. ܗܰܘ ܕܠܳܐ ܝܳܕܰܥ ܚܛܺܝܬܳܐ^[19]. ܒܗܳܕܶܐ^[20] ܟܺܝܬ܆ ܐܳܦ ܠܶܐܫܛܳܪܳܐ ܕܰܚܛܺܝܬܳܐ ܗܰܘ ܕܥܰܠ ܟܽܠܶܗ ܟܝܳܢܳܐ ܕܺܝܠܰܢ ܬܠ̣ܰܚ^[21]. ܙܟܳܐ ܠܳܐܟܶܠܩܰܪܨܳܐ. ܐܶܫܟܰܚ ܒܶܗ ܓܶܝܪ. ܡܶܢ ܗܳܠܶܝܢ ܕܺܝܠܶܗ. ܘܠܳܐ ܡܶܕܶܡ. ܪܰܥܺܝ ܠܰܢ ܠܰܐܒܳܐ܆ ܟܰܕ ܒܢ̈ܳܬ ܩ̈ܳܠܶܐ ܗܳܠܶܝܢ ܕܰܠܓܶܢܣܳܐ ܕܺܝܠܰܢ ܦܰܐܝ̈ܳܢ ܗ̱ܘܰܝ̈ ܡܰܣܶܩ ܗ̱ܘܳܐ: ܐܰ‌ܠܳܗܝ ܐܰ‌ܠܳܗܝ ܠܡܳܢܳܐ ܫܒܰܩܬܳܢܝ.

ܘܶܐܢ ܕܶܝܢ ܠܳܐ܆ ܐܰܝܟܰܢܳܐ ܡܶܨܥܳܝܳܐ ܕܰܐ‎ܠܳܗܳܐ ܘܕܰܒܢܰܝ̈ܢܳܫܳܐ ܐܶܫܬܰܡܰܗ ܥܰܡܰܢܽܘܐܶܝܠ^[22]. ܕܡܶܨܥܳܝܳܐ ܓܶܝܪ ܗܳܢܰܘ ܥܒܳܕܳܐ܆ ܕܰܠܗܳܠܶܝܢ ܕܪܰܚܺܝܩܺܝܢ ܢܰܠܘܶܬ. ܐܰܝܟܰܢܳܐ ܕܶܝܢ ܐܰ‌ܠܘܶܬ݂܆ ܐܶܢ ܠܰܘ ܠܘܳܬ ܟܽܠ ܚܕܳܐ ܡܢܳܬܳܐ ܕܗܳܢܽܘܢ ܕܰܦܠܺܝܓܺܝܢ ܗ̱ܘܰܘ܆ ܒܰܝܬܳܐܺܝܬ ܐܺܝܬ ܗ̱ܘܳܐ ܒܽܐܘܣܺܝܰܐ ܡܰܢ ܠܰܐܒܳܐ ܒܰܐܠܳܗܽܘܬܳܐ܆ ܫܘܶܐ ܒܽܐܘܣܺܝܰܐ ܕܶܝܢ ܠܰܢ ܗܽܘ ܟܰܕ ܗܽܘ ܒܐ̱ܢܳܫܽܘܬܳܐ܆ ܘܗܽܘ ܒܰܠܚܽܘܕܰܘܗ̱ܝ ‌ܐܺܝܬܰܘܗ̱ܝ ܕܣܳܦܶܩ ܘܰܐܝܟ ܕܒܰܫܪܳܪܳܐ ܡܶܫܟܰܚ ܗ̱ܘܳܐ܆ ܕܰܚܠܳܦ ܟܝܳܢܳܐ ܕܺܝܠܰܢ ܗܰܘ ܕܰܕܠܳܐ ܦܰܪܶܗ̱ܣܺܝܰܐ܆ ܡ̈ܶܠܶܐ ܗܳܠܶܝܢ ܕܰܡܙܰܡ̈ܢܳܢ ܠܰܢ ܬܰܪܥܽܘܬܳܐ ܢܡܰܠܶܠ ܗ̱ܘܳܐ܆ ܘܰܢܫܰܝܶܢ ܗܳܠܶܝܢ ܕܥܰܠ ‌ܐܰܪܥܳܐ ܠܘܳܬ ܗܳܠܶܝܢ ܕܒܰܫܡܰܝܳܐ ܒܝܰܕ ܨܠܺܝܒܶܗ^[23]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ.

ܗܳܝ ܓܶܝܪ ܕܠܳܟ ܙܥܽܘܪܬܳܐ ܡܶܬܚܰܙܝܳܐ܆ ܗܳܝ ܟܺܝܬ ܕܰܒ̈ܢܳܬ ܩ̈ܳܠܶܐ ܕܰܐܝܟ ܗܳܠܶܝܢ. ܢܰܙܥܶܩ ܚܠܳܦܰܝܢ ܥܰܠ ܨܠܺܝܒܳܐ܆ ܘܡܶܛܽܠ ܗܳܕܶܐ ܦܳܣܶܩ ܐܰܢ̱ܬ ܠܶܗ ܠܰܬܪܶܝܢ ܠܗܰܘ ܚܰܕ ܒܪܳܐ܆ ܐܰܝܟܰܢܳܐ ܕܰܠܗܰܘ ܕܡܶܢ ܙܰܪܥܶܗ ܕܕܰܘܺܝܕ ܐܰܝܟ ܕܺܐܝܬ ܠܗܽܘܢ ܥܝܳܕܳܐ ܠܡܺܐܡܰܪ ܠܗܳܢܽܘܢ ܕܰܠܩܽܘܒܠܳܐ ܬܩܰܪܶܒ^[24] ܐܶܢܶܝܢ܆ ܐܰܝܟ ܐܰܝܠܶܝܢ ܕܰܠܒܰܪܢܳܫܳܐ ܕܰܫܒܺܝܩ ܡܶܢ ܐܰ‎ܠܳܗܳܐ ܦܰܐܝ̈ܳܢ܆ ܗܳܕܶܐ܆ ܠܰܢ ܕܰܒܫܰܦܺܝܪܽܘܬ ܕܶܚܠܬܳܐ ܘܫܰܪܺܝܪܳܐܺܝܬ ܡܶܣܬܰܟܠܺܝܢܰܢ܆ ܦܰܐܺܝܬ ܠܰܐܠܳܗܳܐ ܡܶܬܚܰܘܝܳܐ. ܠܰܘ ܓܶܝܪ ܐܺܝܙܓܰܕܳܐ. ܘܠܳܐ ܡܰܠܰܐܟܳܐ. ܦܪܰܩ ܠܰܢ܆ ܐܶܠܳܐ܆ ܗܽܘ ܡܳܪܝܳܐ ܐܰ‎ܠܳܗܳܐ܆ ܗܰܘ ܕܓܰܠܝܳܐܺܝܬ ܐܶܬܳܐ^[25]܆ ܐܰܝܟܰܢܳܐ ܕܶܐܫܰܥܝܳܐ ܘܕܰܘܺܝܕ ܢܒܺܝܳܐ ܐܳܡܰܪ. ܒܶܗ ܓܶܝܪ ܐܰܝܟ ܕܰܒܪܺܝܫܺܝܬܳܐ ܕܓܶܢܣܳܐ ܕܺܝܠܰܢ܆ ܡܶܢ ܥܶܕܠܳܝ̈ܶܐ ܐܶܬܚܰܪܰܪܢܰܢ. ܒܺܐܝܕܰܘ̈ܗ̱ܝ ܡܶܟܺܝܠ ‌ܐܰܝܟ ܐܰܝܢܳܐ ܕܰܕܟܶܐ ܡܶܢ ܟܽܠܶܗ ܛܽܘܠܫܳܐ܆ ܠܡܰܙܥܳܩܽܘ ܐܰܡܪܰܚܢܰܢ ܠܘܳܬ ܐܰܒܳܐ ܕܒܰܫܡܰܝܳܐ. ܐܰ‌ܠܳܗܝ ܐܰ‌ܠܳܗܝ ܠܡܳܢܳܐ ܫܒܰܩܬܳܢܝ^[26].

ܠܳܐ ܗܳܟܺܝܠ܆ ܟܰܕ ܠܰܣܢܺܐܓܪܽܘܬܳܐ ܗܳܝ ܕܰܚܠܳܦܰܝܢ ܦܰܐܝܽܘܬ ܐܰ‎ܠܳܗܳܐܺܝܬ ܩܰܒܶܠ ܥܠܰܘܗ̱ܝ. ܠܳܐ ܡܶܣܬܰܟܰܠ ‌ܐܰܢ̱ܬ܆ ܥܶܠܬܳܐ ܬܶܥܒܶܕ ܕܓܽܘܕܳܦܳܐ܆ ܠܘܳܬ ܗܳܝ ܕܬܰܙܥܪܺܝܘܗ̱ܝ ܠܗܰܘ ܪܳܡܳܐ. ܪܳܡܳܐ ܓܶܝܪ ‌ܐܺܝܬܰܘܗ̱ܝ܆ ܐܳܦܶܢ ܡܶܛܽܠܳܬܳܟ ܡܡܰܠܶܠ ܗ̱ܘܳܐ ܡܰܟܺܝ̈ܟܳܬܳܐ. ܕܠܰܘ ܓܶܝܪ ܗܽܘ ܐܺܝܬܰܘܗ̱ܝ ܗ̱ܘܳܐ. ܕܰܒܙܰܒܢܳܐ ܗܰܘ ܕܚܰܫܳܐ ܫܒܺܝܩ ܗ̱ܘܳܐ ܡܶܢ ܐܰܒܳܐ܆ ܓܰܠܝܳܐܺܝܬ ܐܺܝܬ ܠܳܟ ܕܬܶܚܙܶܐ. ܕܰܠܬܰܠܡܺܝ̈ܕܶܐ ܕܺܝܠܶܗ ܐܳܡܰܪ ܗ̱ܘܳܐ܆ ܟܰܕ ܠܘܳܬ ܨܠܺܝܒܳܐ ܦܳܪܽܘܩܳܝܳܐ ܨܶܒܝܳܢܳܐܺܝܬ ܐܳܬܶܐ ܗ̱ܘܳܐ. ܗܳܐ ܐܳܬܝܳܐ ܫܳܥܬܳܐ. ܐܳܦ ܐܶܬ̣ܳܬ̣ ܠܳܗ̇^[27]܆ ܐܰܝܟܰܢܳܐ ܕܬܶܬܒܰܕܪܽܘܢ ܟܽܠܚܰܕ ܡܶܢܟܽܘܢ ܠܰܐܬܪܶܗ. ܘܠܺܝ ܒܰܠܚܽܘܕܰܝ ܬܶܫܒܩܽܘܢ. ܘܠܳܐ ܐܺܝܬܰܝ ܒܰܠܚܽܘܕܰܝ. ܡܶܛܽܠ ܕܰܐܒܳܐ ܥܰܡܝ ‌ܐܺܝܬܰܘܗ̱ܝ.

ܐܰܝܟܰܢܳܐ ܗܳܟܺܝܠ ܠܰܘ ܠܒܰܪ ܡܶܢ ܢܺܝܫܳܐ ܢܰܪܡܶܐ܆ ܘܚܽܘܝܳܒܳܐ ܕܪܰܫܺܝܥܽܘܬܳܐ ܟܺܐܢܳܐܺܝܬ ܢܶܣܒܽܘܠ܆ ܟܰܕ ܠܽܘܩܒܰܠ ܒܢ̈ܳܬ ܩ̈ܳܠܶܐ ܟܳܗܢܳܝ̈ܳܬܳܐ ܕܡܳܪܰܢ ܡܡܰܠܠܺܝܢ ܚ̱ܢܰܢ܆ ܘܳܐܡܪܺܝܢ ܚ̱ܢܰܢ ܠܶܗ ܕܰܫܒܺܝܩ ܡܶܢ ܐܰܒܽܘܗ̱ܝ܆ ܟܰܕ ܗܽܘ ܐܳܡܰܪ: ܘܠܳܐ ܐܺܝܬܰܝ ܒܰܠܚܽܘܕܰܝ܆ ܡܶܛܽܠ ܕܰܐܒܳܐ ܥܰܡܝ ‌ܐܺܝܬܰܘܗ̱ܝ. ܗܳܟܰܢܳܐ ܐܳܦ ܗܳܝ ܕܢܺܐܡܰܪ܆ ܐܳܒܝ ܐܶܢ ܡܰܨܝܳܐ. ܢܶܥܒܰܪ ܡܶܢܝ ܟܳܣܳܐ ܗܳܢܳܐ^[28]. ܠܰܘ ܐܰܝܟ ܕܕܰܐܝܢܳܐ ܕܕܳܚܶܠ ܡܶܢ ܡܰܘܬܳܐ ܐܺܝܬܶܝܗ̇ ܗܘܳܬ݂܆ ܐܶܠܳܐ ܐܰܝܟ ܕܰܐܝܢܳܐ ܕܰܡܕܰܒܪܳܢܽܘܬܳܐ ܡܡܰܠܶܠ܆ ܘܰܒܝܰܕ ܡ̈ܶܠܶܐ ܗܳܠܶܝܢ ܡܓܰܪܶܓ^[29] ܗ̱ܘܳܐ ܠܳܐܟܶܠܩܰܪܨܳܐ ܕܢܶܩܒܽܘܥ ܠܶܗ ܨܠܺܝܒܳܐ܆ ܗܰܘ ܕܰܥܬܺܝܕ ܗ̱ܘܳܐ ܕܢܶܗܘܶܐ ܦܽܘܪܩܳܢܳܐ ܠܟܽܠܶܗ ܥܳܠܡܳܐ. ܡܶܛܽܠ ܓܶܝܪ ܕܗܰܘ ܐܰܛܥܺܝ ܗ̱ܘܳܐ ܠܳܐܕܳܡ܆ ܒܣܰܒܪܳܐ ܕܗܳܝ ܕܢܶܗܘܶܐ ܐܰ‎ܠܳܗܳܐ܆ ܐܶܢ ܢܶܛܥܰܡ ܗ̱ܘܳܐ ܡܶܢ ܦܺܐܪܳܐ ܗܰܘ ܕܰܟܠܶܐ ܗ̱ܘܳܐ ܡܶܢܶܗ܆ ܟܰܕ ܣܰܟܺܝ ܗ̱ܘܳܐ ܕܰܐܝܟ ܕܰܠܒܰܪܢܳܫܳܐ ܢܶܟܒܽܘܫ܆ ܠܗܰܘ ܕܰܒܢܶܣܝܳܢܳܐ ܐܶܫܟܚܶܗ ܕܗܽܘ ܟܰܕ ܗܽܘ ‌ܐܺܝܬܰܘܗ̱ܝ ܐܰ‎ܠܳܗܳܐ ܒܰܟܝܳܢܳܐ. ܩܰܕܶܡܬ ܕܶܝܢ ܐܰܪܺܝܡܬ ܡܶܫܬܰܐܠܳܢܽܘܬܳܐ ܗܳܝ ܕܡܶܢ ܟܳܣܳܐ. ܐܳܦ ܠܡܰܦܰܩ ܒܪܽܘܚܳܐ ܡܰܪܳܚܳܐ ܕܝܽܗ̱ܘ̈ܕܳܝܶܐ. ܐܳܡܪܺܝܢ ܗ̱ܘܰܘ ܓܶܝܪ. ܐܶ‎ܠܽܘܠܳܐ ܚܰܘܺܝ ܕܡܶܫ̣ܬܶܐܠ ܗ̱ܘܳܐ܆ ܕܠܳܐ ܚܛܰܝܢܰܢ ܕܰܨܠܰܒܢܳܝܗ̱ܝ ܠܗܰܘ ܕܗܽܘ ܪܗܶܛ ܥܰܠ ܚܰܫܳܐ܆ ܘܨܶܒܝܳܢܳܐܺܝܬ ܚܰܛܦܶܗ ܠܗܳܢܳܐ.

ܫܟܺܝܚ ܕܶܝܢ ܒܡ̈ܶܠܐ ܗܳܠܶܝܢ܆ ܐܳܦ ܐܳܕܫܳܐ ܡܶܕܶܡ ܦܐܶܐ ܠܰܐܠܳܗܳܐ ܕܡܰܠܦܳܢܽܘܬܳܐ. ܠܘܳܬ ܝܽܘܬܪܳܢܳܐ ܓܶܝܪ. ܕܺܝܠܰܢ ܐܰܝܟ ܕܰܒܛܽܘܦܣܳܐ ܗܳܠܶܝܢ ܡܡܰܠܶܠ ܗ̱ܘܳܐ. ܟܰܕ ܡܰܠܶܦ ܠܰܢ. ܕܰܒܩܺܝ̈ܢܕܽܘܢܽܘ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ. ܠܳܐ ܢܶ݀ܬܬܟܶܠ ܥܰܠ ܢܰܦܫܰܢ ܘܢܶ݀ܫܘܰܪ ܥܰܠ ܒܺܝ̈ܫܳܬܳܐ. ܐܶܠܳܐ ܢ݀ܨܰܠܶܐ ܡܰܢ ܕܢܶܥܒܰܪ ܟܳܣܳܐ ܕܡܰܘܬܳܐ. ܟܰܕ ܠܳܐ ܕܶܝܢ ܥܳܒܰܪ܆ ܓܰܢ̱ܒܳܪܳܐܺܝܬ ܢ݀ܩܰܒܶܠ ܘܢܺ݀ܐܡܰܪ܆ ܒܪܰܡ ܠܰܘ ܐܰܝܟ ܕܶܐܢܳܐ ܨܳܒܶܐ ܐ̱ܢܳܐ܆ ܐܶܠܳܐ ܐܰܝܟ ܕܰܐܢ̱ܬ^[30]. ܕܡܰܠܦܳܢܽܘܬܳܐ ܓܶܝܪ ܐܺܝܬܰܝܗܶܝܢ ܗ̱ܘܰܝ̈ ܗܳܠܶܝܢ ܘܠܰܘ ܕܕܶܚܠܬܳܐ܆ ܢܶܣܗܰܕ ܓܰܠܝܳܐܺܝܬ܆ ܟܬܳܒܳܐ ܕܶܐܘܰܢܓܶܠܺܝ̈ܰܐ. ܐܰܝܟܰܢܳܐ ܓܶܝܪ ܥܬܺܝܕ ܗ̱ܘܳܐ ܕܢܶܕܚܰܠ. ܡܶܢ ܡܰܘܬܳܐ܆ ܗܰܘ ܕܥܰܡ ܪܶܓܬܳܐ ܪܺܝܫܳܝܬܳܐ ܠܘܳܬ ܗܳܢܳܐ ܐܳܬܶܐ ܘܳܐܡܰܪ: ܕܡܶܪܰܓ ܪܶܓܶܬ݂ ܠܡܶܐܟܰܠ ܦܶܣܟܳܐ ܗܳܢܳܐ^[31]. ܘܰܠܦܶܛܪܽܘܤ ܕܰܠܩܰܕܺܝܡܽܘܬ ܡܶܠܬܳܐ ܕܡܶܛܽܠ ܨܠܺܝܒܳܐ ܠܳܐ ܐܶܫܟܰܚ ܠܰܡܣܰܝܒܳܪܽܘ܆ ܘܶܐܡܰܪ ܚܳܤ ܠܳܟ ܡܳܪܝ! ܠܳܐ ܬܶܗܘܶܐ ܠܳܟ ܗܳܕܶܐ܆ ܥܰܡ ܟܳܐܬܳܐ ܕܛܳܒ ܣܰܓܺܝܳܐܐ ܐܶܡܰܪ: ܕܙܶܠ ܠܳܟ ܠܒܶܣܬܰܪܝ ܤܳܛܳܢܳܐ ܟܶܫܠܳܐ ܕܺܝܠܝ ܐܺܝܬܰܝܟ܆ ܡܶܛܽܠ ܕܠܳܐ ܡܶܬܪܰܥܶܐ ܐܰܢ̱ܬ ܗܳܠܶܝܢ ܕܰܐ‎ܠܳܗܳܐ܆ ܐܶܠܳܐ ܗܳܠܶܝܢ ܕܰܒ̈ܢܰܝ ܐ̱ܢܳܫܳܐ^[32].

ܗܳܝ ܗܳܟܺܝܠ ܕܰܢܫܰܐܶܠ ܟܽܠܚܰܕ ܡܫܺܝܚܳܐ܆ ܕܡܰܢܽܘ ܗܽܘ ܗܰܘ ܕܳܐܡܰܪ: ܐܳܒܝ ܐܶܢ ܡܰܨܝܳܐ ܢܶܥܒܰܪ ܡܶܢܝ ܟܳܣܳܐ ܗܳܢܳܐ^[33]܆ ܐܰܘ ܡܰܢܽܘ ܗܰܘ ܕܥܰܠ ܨܠܺܝܒܳܐ ܐܶܬܩܒܰܥ ܘܶܐܡܰܪ: ܐܰ‌ܠܳܗܝ ܐܰ‌ܠܳܗܝ ܠܡܳܢܳܐ ܫܒܰܩܬܳܢܝ^[34]܆ ܕܛܰܢܦܽܘܬܶܗ ܕܢܶܣܛܽܘܪܺܝܽܘܤ ܐܺܝܬܶܝܗ̇܆ ܘܰܕܗܳܢܽܘܢ ܕܦܳܣܩܺܝܢ ܠܶܗ ܠܰܬܪܶܝܢ ܟܝܳܢ̈ܶܐ ܘܰܩܢܽܘ̈ܡܶܐ ܘܦܰܪ̈ܨܽܘܦܶܐ ܠܗܰܘ ܚܰܕ ܡܫܺܝܚܳܐ. ܐܶܬܒܰܝܰܢ ܕܶܝܢ ܐܰܝܟܰܢܳܐ ܗܽܘ ܢܶܣܛܽܘܪܺܝܽܘܤ ܡܫܰܐܶܠ܆ ܐܰܝܟ ܗܰܘ ܟܶܐܡܰܬ ܕܳܐܚܶܕ ܥܶܠ̈ܠܳܬܳܐ ܕܕܳܚܶܠ ܡܶܢ ܡܽܘܙܳܓܳܐ܆ ܘܡܶܬܥܰܠܰܠ ܥܶܠ̈ܠܳܬܳܐ ܒܰܚܛܳܗ̈ܶܐ. ܡܰܢܽܘ ܕܶܝܢ ‌ܐܺܝܬܰܘܗ̱ܝ ܗܰܘ ܕܳܐܦ ܢܶܟܣܬܳܐ ܣܰܝܒܰܪ. ܡܶܬܶܐܠܶܨ ܐ̱ܢܳܐ ܠܡܶܬܚܰܫܳܚܽܘ ܒܡ̈ܶܠܶܐ ܕܝܰܬܺܝܪ ܬܰܚ̈ܬܳܝܳܢ܆ ܐܰܝܟܰܢܳܐ ܕܰܠܟܽܠܢܳܫ ܬܶܗܘܶܐ ܝܺܕܰܥܬܳܐ ܗܳܝ ܕܡܶܬܰܐܡܪܳܐ. ܠܘܳܬ ܡܰܢܽܘ ܓܕܰܫ̈ܝ̱ ܗܳܠܶܝܢ ܕܡܰܫܠܡܳܢܽܘܬܳܐ ܐܶܡܰܪ ܠܺܝ. ܐܶܢ ܡܰܢ ܓܶܝܪ ܠܘܳܬ ܟܝܳܢܳܐ ܕܰܐ‎ܠܳܗܽܘܬܳܐ܆ ܐܰܝܟܰܢܳܐ ܠܬܰܪ̈ܬܰܝܗܶܝܢ ܡܰܡܪܰܚ ܐܰܢ̱ܬ ܠܰܡܡܰܙܳܓܽܘ. ܘܟܰܕ ܛܳܒ ܩܰܘܺܝ ܠܳܐ ܡܶܬܬܰܚܕܳܢܳܐ ܠܝܽܗ̱ܘ̈ܕܳܝܶܐ ܐܰ‎ܠܳܗܳܐ ܡܶܠܬܳܐ܆ ܘܰܒܢܶܟܣܬܳܐ ܠܳܐ ܐܶܫܬܰܘܬܰܦ ܠܒܶܣܪܳܐ܆ ܡܶܢ ܐܰܝܟܳܐ ܐܶܡܰܪ ܠܺܝ ܡܰܥܶܠ ‌ܐܰܢ̱ܬ ܡܽܘܙܳܓܳܐ.

ܘܰܒܕܽܘܟܬܳܐ ܐ̱ܚܪܺܬܳܐ ܬܽܘܒ. ܗܽܘ ܟܰܕ ܗܽܘ ܢܶܣܛܽܘܪܺܝܽܘܤ. ܪܰܫܺܝܥܳܐܺܝܬ ܡܫܰܐܶܠ ܥܰܠ ܗܳܝ ܕܰܢܚܽܘܪܽܘܢ ܒܗܰܘ ܕܰܕܩܰܪܘ ܟܰܕ ܐܳܡܰܪ^[35]: ܡܳܢܘ̣ ܗܳܟܺܝܠ ‌ܐܺܝܬܰܘܗ̱ܝ ܗܳܝ ܕܶܐܬܕܰܘܰܕ܆ ܕܰܦܢܳܐ. ܕܰܦܢܳܐ ܕܶܝܢ. ܕܦܰܓܪܳܐ ܐܺܝܬܶܝܗ̇ ܘܠܰܘ ܕܰܐ‎ܠܳܗܽܘܬܳܐ. ܘܬܽܘܒ. ܫܡܰܥܳܝܗ̱ܝ ܠܛܽܘܒܬܳܢܳܐ ܦܰܘܠܽܘܤ ܕܓܰܠܝܳܐܺܝܬ ܒܳܥܶܐ܆ ܕܡܰܢܽܘ ‌ܐܺܝܬܰܘܗ̱ܝ ܗܰܘ ܕܶܐܨܛܠܶܒ. ܫܡܰܥ ܗܳܟܺܝܠ ܠܒܰܪ̱ܬ ܩܳܠܳܐ ܗܳܝ ܕܝܰܬܺܝܪ ܓܰܠܝܳܐ. ܐܳܦ ܓܶܝܪ ܐܶܨܛܠܶܒ ܡܶܢ ܡܚܺܝܠܽܘܬܳܐ܆ ܐܶܠܳܐ ܚܰܝ. ܡܶܢ ܚܰܝܠܳܐ ܕܰܐ‎ܠܳܗܳܐ^[36]. ܐܶܢ ܐܶܨܛܠܶܒ ܡܶܢ ܡܚܺܝܠܽܘܬܳܐ܆ ܡܰܢܽܘ ܐܶܬܡܚܶܠ ‌ܐܳܘ ܗܶܪܶܛܺܝܩܳܐ. ܐܰ‎ܠܳܗܳܐ ܡܶܠܬܳܐ.

ܒܳܗ̇ ܒܰܕܡܽܘܬܳܐ ܠܗܳܢܳܐ܆ ܐܳܦ ܕܳܘܝܳܐ ܬܶܐܽܘܕܽܘܪܺܝܛܽܘܤ ܡܫܰܐܶܠ܆ ܒܣܰܩܽܘܒܠܳܝܽܘܬ ܡܶܠܬܳܐ ܗܳܝ ܕܠܽܘܩܒܰܠ ܩܶܦܰܠܶܐܘܳܢ ܕܥܶܣܪܳܐ ܕܩܰܕܺܝܫܳܐ ܩܽܘܪܺܝܠܽܘܤ. ܡܰܢܽܘ ܗܳܟܺܝܠ ‌ܐܺܝܬܰܘܗ̱ܝ ܗܰܘ ܕܰܒܥܰܡ̈ܠܶܐ ܕܰܡܝܰܬܪܽܘܬܳܐ ܐܶܫܬܰܡܠܺܝ܆ ܘܠܰܘ ܒܰܟܝܳܢܳܐ ‌ܐܺܝܬܰܘܗ̱ܝ ܗ̱ܘܳܐ ܡܫܰܡܠܝܳܐ. ܡܰܢܽܘ ܗܰܘ ܕܰܒܢܶܣܝܳܢܳܐ ܝܰܠܦܳܗ̇ ܠܡܶܫܬܰܡܥܳܢܽܘܬܳܐ^[37]܆ ܘܰܠܗܳܕܶܐ ܠܳܐ ܝܳܕܰܥ ܗ̱ܘܳܐ ܠܳܗ̇ ܩܕܳܡ ܢܶܣܝܳܢܳܐ. ܡܰܢܽܘ ܗܰܘ ܕܥܰܡ ܩܶܢܛܳܐ ܚܝܳܐ܆ ܘܥܰܡ ܕܶܡ̈ܥܶܐ ܒܳܥ̈ܘܳܬܳܐ ܩܰܪܶܒ܆ ܘܰܕܢܶܦܪܽܘܩ ܗܽܘ ܠܶܗ ܠܳܐ ܡܰܨܝܳܐ ܗ̱ܘܳܬ܆ ܐܶܠܳܐ ܠܗܰܘ ܕܡܰܨܝܳܐ ܗ̱ܘܳܬ ܕܢܶܦܪܩܺܝܘܗ̱ܝ ܡܦܺܝܤ ܗ̱ܘܳܐ܆ ܘܰܓܗܳܝܬܳܐ ܕܡܶܢ ܡܰܘܬܳܐ ܫܳܐܶܠ ܗ̱ܘܳܐ^[38].

ܒܗܳܢܳܐ ܐܳܕܫܳܐ. ܕܰܡܫܰܐܠܳܢܽܘܬܳܐ ܪܰܫܺܝܥܬܳܐ. ܐܳܦ ܛܽܘܡܣܶܗ ܕܠܶܐܘܳܢ ܐܶܬܚܰܫܰܚ܆ ܗܰܘ ܕܫܰܪܰܪ ܟܢܽܘܫܝܳܐ ܗܰܘ ܕܰܣܪܺܝܩܽܘܬܳܐ ܕܗܳܢܽܘܢ ܕܰܒܟܰܠܩܺܝܕܽܘܢܺܐ ܐܰܟܚܕܳܐ ܐܶܬܟܰܢܰܫܘ. ܡܫܰܐܶܠ ܓܶܝܪ܆ ܕܰܐܝܢܳܐ ܟܝܳܢܳܐ ܟܰܕ ܡܒܰܙܰܥ ܒܨܶܨ̈ܶܐ܆ ܒܩܰܝܣܳܐ ܕܰܨܠܺܝܒܳܐ ܬܠܶܐ. ܕܳܐܦܠܳܐ ܕܶܝܢ ܚܰܕ ܫܽܘܚܠܳܦܳܐ ܐܺܝܬ܆ ܒܗܳܝ ܕܰܢܫܰܐܶܠ ܡܰܢܽܘ ܘܰܐܝܢܳܐ܆ ܐܶܠܳܐ ܗܺܝ ܟܰܕ ܗܺܝ ܐܺܝܬܶܝܗ̇ ܗܳܕܶܐ ܟܺܝܬ ܐܳܦ ܗܳܝ܆ ܠܗܳܢܽܘܢ ܕܰܬܪܶܝܢ ܟܝܳܢ̈ܶܐ ܐܳܡܪܺܝܢ ܡܶܢ ܡ̈ܶܠܶܐ ܕܪܰܫܺܝܥܳܐ ܬܶܐܽܘܕܽܘܪܺܝܛܽܘܤ ܬܶܗܘܶܐ ܓܠܺܝܬܳܐ. ܟܰܕ ܓܶܝܪ ܐܶܡܰܪ ܒܣܰܩܽܘܒܠܳܝܽܘܬ ܡܶܠܬܳܐ ܕܩܶܦܰܠܶܐܘܳܢ ܗܰܘ ܕܥܶܣܪܳܐ ܕܩܰܕܺܝܫܳܐ ܩܽܘܪܺܝܠܽܘܤ܆ ܒܢܶܣܝܳܢܳܐ ܕܶܝܢ ܗܘ̣ܳܐ ܕܚܰܫ̈ܶܐ ܕܺܝܠܰܢ܆ ܟܝܳܢܳܐ ܗܰܘ ܕܡܶܢܰܢ ܚܠܳܦܰܝܢ ܐܶܬܢܣܶܒ܆ ܠܰܘ ܗܰܘ ܕܰܠܗܳܢܳܐ ܢܣܰܒ ܡܶܛܽܠ ܦܽܘܪܩܳܢܳܐ ܕܺܝܠܰܢ܆ ܒܣܰܩܽܘܒܠܳܝܽܘܬ ܡܶܠܬܳܐ ܗܳܝ ܕܩܶܦܰܠܶܐܘܳܢ ܗܰܘ ܕ܏ܝܒ ܕܰܬܪܶܥܣܰܪ ܐܳܡܰܪ: ܡܳܕܶܝܢ܆ ܠܰܘ ܐܰ‎ܠܳܗܳܐ ‌ܐܺܝܬܰܘܗ̱ܝ ܗܰܘ ܕܚܰܫ܆ ܐܶܠܳܐ ܒܰܪܢܳܫܳܐ ܗܰܘ ܕܡܶܢܰܢ ܡܶܢ ܐܰ‎ܠܳܗܳܐ ܐܶܬܢܣܶܒ.

ܚܳܙܶܐ ܐܰܢ̱ܬ ܕܠܰܟܝܳܢܳܐ܆ ܒܰܪܢܳܫܳܐ ܕܶܐܬܢܣܶܒ ܟܝܳܢܶܗ܆ ܟܰܕ ܚܰܘܺܝ ܓܰܠܝܳܐܺܝܬ܆ ܕܗܳܢܽܘܢ ܕܰܬܪܶܝܢ ܟܝܳܢ̈ܶܐ ܐܳܡܪܺܝܢ ܠܶܗ ܠܰܡܫܺܝܚܳܐ܆ ܐܳܦ ܬܪܶܝܢ ܦܰܪ̈ܨܽܘܦܶܐ ܐܳܡܪܺܝܢ ܠܶܗ܆ ܘܟܰܕ ܠܰܝܬ ܠܗܽܘܢ ܫܽܘܚܠܳܦܳܐ ܥܠܰܝܗܽܘܢ܆ ܡܫܰܐܠܺܝܢ ܗܳܝ ܕܡܰܢܽܘ ܘܗܳܝ ܕܰܐܝܢܳܐ܆ ܕܳܐܦ ܛܽܘܡܣܳܐ ܕܶܝܢ ܕܠܶܐܘܳܢ ܗܰܘ ܕܰܒܟܰܠܩܺܝܕܽܘܢܺܐ ܐܶܫܬܰܪܰܪ܆ ܢܶܕܰܥ ܠܶܗ ܠܰܟܝܳܢܳܐ. ܐܳܦ ܦܰܪܨܽܘܦܳܐ܆ ܦܫܺܝܩܳܐ ܠܡܺܐܠܰܦ. ܐܳܦ ܡܶܢ ܗܳܪܟܳܐ. ܗܰܘ ܓܶܝܪ ܕܫܰܐܶܠ ܕܰܐܝܢܳܐ^[39] ܟܝܳܢܳܐ ܒܩܰܝܣܳܐ ܕܰܨܠܺܝܒܳܐ ܬܠܶܐ ܗ̱ܘܳܐ. ܐܶܡܰܪ ܠܥܶܠ܆ ܕܰܐܝܟ ܙܢܳܐ ܓܶܝܪ ܕܗܰܘ ܐܰ‎ܠܳܗܳܐ ܒܗܳܝ ܕܰܡܪܰܚܶܡ ܫܽܘܚܠܳܦܳܐ ܠܳܐ ܣܳܒܶܠ܆ ܗܳܟܰܢܳܐ ܗܰܘ ܒܰܪܢܳܫܳܐ܆ ܒܪܰܒܽܘܬܳܐ ܕܫܽܘܠܛܳܢܳܐ ܐܰ‎ܠܳܗܳܝܳܐ ܠܳܐ ܡܶܬܛܰܠܰܩ. ܠܗܳܢܽܘܢ ܡܰܢ ܗܳܟܺܝܠ ܕܦܳܣܩܺܝܢ ܠܶܗ ܠܰܐܠܳܗܳܐ ܗܰܘ ܕܡܶܛܽܠܳܬܰܢ ܐܶܬܒܰܣܰܪ܆ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ܆ ܕܰܥܝܳܕܳܐ ܗ̱ܝ ܠܰܡܫܳܐܳܠܽܘ܆ ܗܳܝ ܕܡܰܢܽܘ ܘܕܰܐܝܢܳܐ.

ܠܗܳܢܽܘܢ ܕܶܝܢ ܕܝܳܕܥܺܝܢ ܠܶܗ ܠܥܰܡܰܢܽܘܐܶܝܠ܆ ܚܰܕ ܦܰܪܨܽܘܦܳܐ. ܚܰܕ ܩܢܽܘܡܳܐ܆ ܚܰܕ ܟܝܳܢܳܐ ܕܰܡܒܰܣܰܪ ܕܰܐ‎ܠܳܗܳܐ ܡܶܠܬܳܐ܆ ܡܰܣܠܝܳܐ. ܘܰܥܕܺܝܠܳܐ ܡܗܰܝܡܰܢ^[40] ܠܗܽܘܢ. ܐܶܣܟܺܡܳܐ ܕܰܐܝܟ ܗܳܢܳܐ ܕܰܡܫܰܐܠܳܢܽܘܬܳܐ܆ ܕܰܡܦܰܠܶܓ ܠܶܬܪܶܝܢ ܠܗܰܘ ܚܰܕ ܡܫܺܝܚܳܐ ܘܠܳܐ ܡܶܬܦܰܠܓܳܢܳܐ. ܗܳܝ ܓܶܝܪ ܕܥܰܠ ܚܰܕ ܢܫܰܐܶܠ ܕܡܰܢܽܘ ܐܰܘ ܐܰܝܢܳܐ܆ ܫܳܢܝܽܘܬܳܐ ܓܠܺܝܬܳܐ ܐܺܝܬܶܝܗ̇. ܡܶܠܬܶܗ ܓܶܝܪ ܕܰܐ‎ܠܳܗܳܐ ܗܰܘ ܕܶܐܬܒܰܣܰܪ ܘܶܐܬܒܰܪܢܰܫ܆ ܬܠܶܐ ܗ̱ܘܳܐ ܥܰܠ ܩܰܝܣܳܐ ܘܰܡܩܰܒܰܥ ܒܨ̈ܶܨܶܐ܆ ܟܰܕ ܚܰܫ ܒܰܒܣܰܪ ܗܳܠܶܝܢ ܕܺܝܠܰܢ.

ܡܶܛܽܠܗܳܕܶܐ ܓܶܝܪ ܐܳܦ ܐܶܬܒܰܣܰܪ܆ ܟܰܕ ܠܳܐ ܡܩܰܒܠܳܢܳܐ ‌ܐܺܝܬܰܘܗ̱ܝ ܕܚܰܫܳܐ܆ ܒܗܳܝ ܕܰܐ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ ܘܺܐܝܬܰܘܗ̱ܝ. ܐܶ‎ܠܽܘ ܡܰܢ ܓܶܝܪ܆ ܐܳܦ ܡܶܢ ܒܳܬܰܪ ܡܶܬܒܰܪܢܫܳܢܽܘܬܳܐ ܠܳܐ ܓܽܘܫܡܳܢܳܐ ‌ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ ܕܰܐ‎ܠܳܗܳܐ܆ ܐܰܘ ܡܶܬܟܰܬܰܫ ܥܰܡ ܐܰ‎ܠܳܗܳܐ܆ ܛܳܒܳܐܺܝܬ ܐܳܡܰܪ ܗ̱ܘܰܝܬ܆ ܕܕܰܦܢܳܐ ܗܳܝ ܕܶܐܬܬܰܪܥܰܬ ܒܠܽܘܟܳܝܬܳܐ ܕܶܐܤܛܪܰܛܺܝܽܘܛܳܐ܆ ܕܦܰܓܪܳܐ ܐܺܝܬܶܝܗ̇ ܘܠܰܘ ܕܰܐ‎ܠܳܗܽܘܬܳܐ. ܐܶܢ ܕܶܝܢ ܗܰܘ ܕܰܕܠܳܐ ܓܫܽܘܡ ܗ̱ܘ̣ ܒܰܟܝܳܢܳܐ܆ ܗܘ̣ܳܐ ܒܰܡܕܰܒܪܳܢܽܘܬܳܐ ܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ ܦܰܓܪܳܢܳܐ܆ ܕܗܰܘ ܕܕܺܝܠܶܗ ‌ܐܺܝܬܰܘܗ̱ܝ ܦܰܓܪܳܐ܆ ܕܗܳܢܳܐ ܐܺܝܬܶܝܗ̇ ܡܶܢܟܽܠ ܦܪܽܘܤ܆ ܐܳܦ ܗܺܝ ܕܰܦܢܳܐ ܕܦܰܓܪܳܐ. ܠܡܳܢܳܐ ܗܳܟܺܝܠ ܡܦܰܠܶܓ ܐܰܢ̱ܬ ܠܶܗ ܠܒܶܣܪܳܐ ܡܶܢܶܗ ܘܠܶܗ܆ ܘܰܡܫܰܐܶܠ ‌ܐܰܢ̱ܬ ܣܽܘܦܺܝܣܛܳܐܺܝܬ܆ ܕܡܰܢܽܘ ܐܺܝܬܶܝܗ̇ ܕܰܦܢܳܐ܆ ܟܰܕ ܐܰܝܟ ܗܰܘ. ܕܺܐܝܬܰܘܗ̱ܝ ܠܳܐ ܦܰܓܪܳܢܳܐ ܐܳܦ ܡܶܢ ܒܳܬܰܪ ܡܶܬܒܰܪܢܫܳܢܽܘܬܳܐ ܡܶܛܽܠ ܡܶܠܬܳܐ ܐܰ‎ܠܳܗܳܐ ܡܡܰܠܶܠ ܐܰܢ̱ܬ.

ܗܽܘ ܗܳܟܺܝܠ ܗܰܘ ܕܶܐܬܒܰܣܰܪ ܡܶܛܽܠܳܬܰܢ܆ ܥܰܡ ܕܶܡ̈ܥܶܐ ܘܩܶܢܛܳܐ܆ ܠܒܳܥ̈ܘܳܬܳܐ ܕܰܚܠܳܦܰܝܢ ܩܰܪܶܒ ܟܰܕ ܐܳܡܰܪ ܗ̱ܘܳܐ: ܐܰ‌ܠܳܗܝ ܐܰ‌ܠܳܗܝ ܠܡܳܢܳܐ ܫܒܰܩܬܳܢܝ^[41]. ܐܶܢ ܓܶܝܪ ܕܡܶܨܛܰܥܰܪ ܘܰܕܙܳܥܰܪ ܡܣܰܒܰܪ ܐܰܢ̱ܬ ܠܶܗ ܡܶܛܽܠ ܗܳܠܶܝܢ ܡ̈ܶܠܶܐ܆ ܘܡܶܛܽܠ ܕܶܡܰܥܬܳܐ ܨܶܒܝܳܢܳܝܬܳܐ܆ ܨܰܥܪܳܐ ܡܳܕܶܝܢ ܐܺܝܬܶܝܗ̇ ܐܰܪܰܐ܆ ܐܳܦ ܗܺܝ ܡܶܬܒܰܣܪܳܢܽܘܬܳܐ ܐܰܘܟܺܝܬ ܡܶܬܒܰܪܢܫܳܢܽܘܬܳܐ܆ ܗܳܝ ܕܡܶܛܽܠܳܬܳܗ̇ ܐܳܦ ܗܳܠܶܝܢ ܡܡܰܠܶܠ ܗ̱ܘܳܐ. ܘܰܠܡܳܢܳܐ ܟܰܕ ܠܗܳܝ ܩܰܕܡܳܝܬܳܐ ܐܰܪܦܺܝܬ܆ ܠܗܳܠܶܝܢ ܬܪ̈ܰܝܳܢܝܳܬܳܐ ܡܩܰܛܪܶܓ ܐܰܢ̱ܬ. ܐܶܠܳܐ ܦܰܘܠܽܘܤ܆ ܟܰܕ ܝܳܕܰܥ ܗ̱ܘܳܐ ܕܰܐ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ ܕܗܳܠܶܝܢ ܨܶܒܝܳܢܳܐܺܝܬ ܣܰܝܒܰܪ܆ ܐܶܡܰܪ: ܗܰܘ ܕܰܒܝܰܘ̈ܡܳܬܳܐ ܕܒܶܣܪܶܗ܆ ܒܳܥ̈ܘܳܬܳܐ ܘܬܰܟܫ̈ܦܳܬܳܐ ܠܗܰܘ ܕܡܰܨܝܳܐ ܗ̱ܘܳܐ ܕܢܶܦܪܩܺܝܘܗ̱ܝ ܩܰܪܶܒ܆ ܘܠܰܘ ܡܶܛܽܠ ܒܰܪܢܳܫܳܐ ܕܠܳܐ ‌ܐܺܝܬܰܘܗ̱ܝ ܗܽܘ ܟܰܕ ܗܽܘ ܐܳܦ ܐܰ‎ܠܳܗܳܐ܆ ܗܳܕܶܐ ܐܶܡܰܪ ܗ̱ܘܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܗܰܘ ܕܰܩܕܳܡ ܝܰܘ̈ܡܳܬܳܐ ܕܒܶܣܪܶܗ ܕܠܳܐ ܒܶܣܪܳܐ ‌ܐܺܝܬܰܘܗ̱ܝ ܗ̱ܘܳܐ܆ ܡܶܛܽܠܳܬܰܢ ܒܗܳܠܶܝܢ ܝܰܘ̈ܡܳܬܳܐ ܗܳܠܶܝܢ ܠܡܺܐܡܰܪ ܘܰܠܡܶܚܰܫ ܩܰܒܶܠ ܥܠܰܘܗ̱ܝ܆ ܗܳܠܶܝܢ ܕܡܶܛܽܠܳܬܗܶܝܢ ܐܶܬܒܰܪܢܰܫ܆ ܘܟܰܕ ܩܰܒܶܠ ܥܠܰܘܗ̱ܝ ܚܰܫܳܐ ܕܰܡܚܺܝܠܽܘܬܳܐ܆ ܚܰܫܳܐ ܕܚܰܝܠܳܐ ܫܰܡܠܝܶܗ܆ ܐܰܝܟܰܢܳܐ ܕܗܽܘ ܟܰܕ ܗܽܘ ܢܶܗܘܶܐ ‌ܐܺܝܬܰܘܗ̱ܝ܆ ܗܰܘ ܕܨܶܒܝܳܢܳܐܺܝܬ ܐܶܬܡܚܶܠ ܒܰܒܣܰܪ܆ ܘܕܶܐܬܚܰܝܰܠ ‌ܐܰ‎ܠܳܗܳܐܺܝܬ.

ܐܷܠܳܐ ܒܳܗ̇ ܒܓܽܘܡܕܳܢܽܘܬܳܐ ܡܩܰܘܶܝܢ. ܘܰܡܫܰܐܠܺܝܢ ܬܽܘܒ ܟܰܕ ܣܳܒܪܺܝܢ ܕܰܒܦܽܘܫܳܟܳܐ ܘܰܒܠܳܐ ܡܰܦܩܳܢܳܐ ܚܳܒܫܺܝܢ ܠܰܢ܆ ܕܡܰܢܽܘ ܠܰܡ ‌ܐܺܝܬܰܘܗ̱ܝ ܗ̱ܘܳܐ ܗܰܘ ܕܰܠܓܰܝܳܣܳܐ ܐܰܥܶܠ ܠܦܰܪܕܰܝܣܳܐ. ܚܢܰܢ ܕܶܝܢ ܟܰܕ ܠܬܰܪܥܺܝܬܳܐ ܬܪܺܝܨܬܳܐ ܘܠܰܟܬܳܒܳܐ ܢܦܺܝܚ ܒܪܽܘܚܳܐ. ܐܳܚܕܺܝܢ ܚ̱ܢܰܢ܆ ܟܰܕ ܟܺܝܬ ܒܥܶܩ̈ܒܳܬܳܐ ܕܡܰܝ̈ܬܝ݂ܰܝ݂222 ܐ̱ܪ̈ܳܙܶܐ ܕܥܺܕܬܳܐ ܝܺܨܺܝܦܺܝܢܰܢ ܕܢܶ݀ܪܕܶܐ܆ ܗܳܝ ܕܳܐܡܪܺܝܢܰܢ. ܕܰܐ‎ܠܳܗܳܐ ܡܶܠܬܳܐ. ܟܰܕ ܨܳܒܶܐ ܕܰܡܫܰܡܠܝܳܐܺܝܬ ܢܶܦܪܽܘܩ ܠܰܢ܆ ܘܶܐܬܒܰܣܰܪ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܝܳܠܕܰܬ ܐܰ‎ܠܳܗܳܐ ܒܬܽܘܠܬܳܐ܆ ܠܰܘ ܒܶܣܪܳܐ ܒܰܠܚܽܘܕܰܘܗ̱ܝ ܚܰܝܶܕ ܠܶܗ܆ ܐܶܠܳܐ ܕܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ. ܡܶܛܽܠܗܳܕܶܐ ܟܺܝܬ. ܠܡܶܬܒܰܣܪܳܢܽܘܬܳܐ ܐܳܦ܆ ܡܶܬܒܰܪܢܫܳܢܽܘܬܳܐ ܐܳܡܪܺܝܢܰܢ ܠܳܗ̇. ܟܰܕ ܡܰܘܕܥܺܝܢܰܢ܆ ܕܠܳܐ^[42] ܡܶܕܶܡ ܡܶܢ ܐܽܘܣܺܝܰܐ ܐ̱ܢܳܫܳܝܬܳܐ ܫܒܰܩ. ܐܶܠܳܐ ܟܽܠܳܗ̇ ܚܰܝܶܕ ܠܶܗ܆ ܟܰܕ ܒܟܽܠ ܡܶܕܶܡ ܐܶܬܕܰܡܺܝ ܠܰܢ ܤܛܰܪ ܡܶܢ ܚܛܺܝܬܳܐ^[43]. ܠܰܘ ܓܶܝܪ ܟܰܕ ܕܠܳܐ ܢܰܦܫܳܐ. ܐܳܦܠܳܐ ܟܰܕ ܕܠܳܐ ܗܰܘܢܳܐ ‌ܐܺܝܬܰܘܗ̱ܝ ܗ̱ܘܳܐ ܐܳܕܳܡ܆ ܥܒܰܪ ܥܰܠ ܦܽܘܩܕܳܢܳܐ ܘܰܫܪܰܥ ܠܘܳܬ ܦܰܚܳܐ ܕܡܰܘܬܳܐ. ܗܰܘ ܡܳܐ ܗܳܟܺܝܠ ܕܰܣܢܺܝܩ ܗ̱ܘܳܐ ܥܰܠ ‌ܐܳܣܝܽܘܬܳܐ܆ ܣܢܺܝܩ ܗ̱ܘܳܐ ܕܶܝܢ. ܠܰܘ ܒܦܶܠܓܶܗ ܐܳܕܳܡ܆ ܐܶܠܳܐ ܟܽܠܳܗ̇ ܚܰܝܽܘܬܳܐ ܗܳܝ ܡܠܺܝܠܬܳܐ܆ ܕܗܳܢܳܐ. ܘܰܐܝܟܰܢܳܐ ܕܐ̱ܢܳܫ ܢܺܐܡܰܪ ܠܟܽܠܳܗ̇ ܓܒܺܝܠܬܳܐ܆ ܢܣܰܒ ܡܶܠܬܳܐ ܕܰܐ‎ܠܳܗܳܐ. ܒܰܚܕܳܝܽܘܬܳܐ ܗܳܝ ܩܢܽܘܡܳܝܬܳܐ܆ ܗܳܢܳܐ ܐܳܦ ܐܶܬܦܪܶܩ. ܐܰܝܟܰܢܳܐ ܕܰܐܟܙܢܳܐ ܕܒܳܐܕܳܡ ܟܽܠܗܽܘܢ ܡܺܝܬܘ܆ ܗܳܟܰܢܳܐ ܐܳܦ ܒܰܡܫܺܝܚܳܐ ܟܽܠܗܽܘܢ ܢܺܚܽܘܢ܆ ܐܰܝܟ ܒܰܪ̱ܬ ܩܳܠܶܗ ܕܚܰܟܺܝܡܳܐ ܦܰܘܠܽܘܣ^[44].

ܐܰ‎ܠܳܗܳܐ ܗܳܟܺܝܠ ܡܶܠܬܳܐ܆ ܟܰܕ ܢܳܚܶܬ ܗܽܘ ܠܶܗ ܠܣܽܘܪܳܩܳܐ ܨܶܒܝܳܢܳܝܳܐ܆ ܘܰܗܘܳܐ ܤܛܰܪ ܡܶܢ ܫܽܘܚܠܳܦܳܐ ܒܰܪܢܳܫܳܐ܆ ܘܶܐܬܳܐ ܒܝܰܕ ܟܽܠܗܶܝܢ ܗܳܠܶܝܢ ܕܰܡܙܰܡ̈ܢܳܢ ܗ̱ܘܰܝ̈ ܠܰܢ ܦܽܘܪܩܳܢܳܐ܆ ܩܰܒܶܠ ܥܠܰܘܗ̱ܝ܆ ܐܳܦ ܕܰܠܘܳܬ ܢܶܣܝܳܢܳܐ ܕܡܰܘܬܳܐ ܢܺܐܬܶܐ܆ ܗܰܘ ܕܰܚܢܰܢ ܡܶܛܽܠ ܚܛܺܝܬܳܐ ܐܶܬܚܰܝܰܒܢܰܢ܆ ܘܗܳܕܶܐ ܐܺܝܬܶܝܗ̇ ܗܳܝ ܕܦܰܘܠܽܘܤ ܡܶܛܽܠܳܬܳܗ̇ ܐܳܡܰܪ: ܗܰܘ ܡܳܐ ܓܶܝܪ ܕܡܺܝܬ܆ ܠܰܚܛܺܝܬܳܐ ܡܺܝܬ ܚܕܳܐ ܙܒܰܢ^[45]. ܠܰܘ ܓܶܝܪ ܡܶܛܽܠ ܚܛܺܝܬܳܐ ܒܰܝܬܳܝܬܳܐ ܡܺܝܬ܆ ܗܰܘ ܕܠܳܐ ܝܳܕܰܥ ܚܛܺܝܬܳܐ܆ ܐܶܠܳܐ ܚܰܘܒܬܳܐ ܗܳܝ ܕܰܚܠܳܦܰܝܢ ܦܪܰܥ^[46]. ܐܰܝܟܰܢܳܐ ܕܰܠܥܽܘܩܣܳܐ ܕܰܚܛܺܝܬܳܐ ܢܰܩܗܶܐ^[47]܆ ܘܰܐܝܟܰܢܳܐ ܕܠܽܐܘܚܕܳܢܳܐ ܕܡܰܘܬܳܐ ܢܶܫ̣ܪܶܐ. ܡܳܕܶܝܢ ܡܰܘܬܳܐ ܕܺܝܠܰܢ ܡܺܝܬ. ܡܰܘܬܳܐ ܕܶܝܢ ܕܺܝܠܰܢ܆ ܦܽܘܪܫܳܢܳܐ ܕܢܰܦܫܳܐ ܡܶܢ ܦܰܓܪܳܐ ‌ܐܺܝܬܰܘܗ̱ܝ. ܡܶܛܽܠܗܳܕܶܐ ܓܶܝܪ. ܐܳܦ ܥܰܡ ܫܽܘܠܛܳܢܳܐ ܦܐܶܐ ܠܰܐܠܳܗܳܐ. ܡܰܙܥܶܩ ܗ̱ܘܳܐ܆ ܢܰܦܫܳܐ ܕܺܝܠܝ ܣܳܐܶܡ ܐ̱ܢܳܐ ܚܠܳܦ ܥܶܪ̈ܒܶܐ. ܘܠܳܐ ܐ̱ܢܳܫ ܢܳܣܶܒ ܠܳܗ̇ ܡܶܢܝ܆ ܐܶܠܳܐ ܐܶܢܳܐ ܣܳܐܶܡ ܐ̱ܢܳܐ ܠܳܗ̇ ܡܶܢ ܨܶܒܝܳܢܝ. ܫܽܘܠܛܳܢܳܐ ܐܺܝܬ ܠܺܝ ܕܶܐ݀ܣܺܝܡܺܝܗ̇܆ ܘܫܽܘܠܛܳܢܳܐ ܐܺܝܬ ܠܺܝ ܕܬܽܘܒ ܐܶ݀ܣܒܺܝܗ̇^[48]. ܘܗܽܘ ܬܽܘܒ ܐܶܡܰܪ ܥܰܠ ܨܠܺܝܒܳܐ: ܐܰܒܳܐ ܒܺܐܝ̈ܕܰܝܳܐ ܕܺܝܠܳܟ ܡܰܓܥܶܠ ‌ܐ̱ܢܳܐ ܪܽܘܚܝ^[49]. ܘܟܰܕ ܗܳܕܶܐ ܐܶܡܰܪ: ܫܒܰܩ ܪܽܘܚܶܗ. ܟܰܕ ܐܳܦ ܒܗܳܕܶܐ ܠܳܐ ܫܳܛ ܠܰܡܫܽܘܚܬܳܐ ܕܰܙܥܽܘܪܽܘܬܳܐ ܐ̱ܢܳܫܳܝܬܳܐ. ܐܶܠܳܐ ܠܡܰܦܩܳܢܳܐ ܕܢܰܦܫܳܐ ܕܺܝܠܰܢ. ܒܝܰܕ ܡ̈ܶܠܶܐ ܗܳܠܶܝܢ ܨܳܒܶܐ ܗ̱ܘܳܐ ܠܰܡܩܰܕܳܫܽܘ܆ ܐܰܝܟܰܢܳܐ ܕܳܐܦ ܚܢܰܢ ܟܰܕ ܠܚܰܝ̈ܶܐ ܗܳܠܶܝܢ ܫܳܒܩܺܝܢܰܢ܆ ܠܺܐܝܕܰܝ̈ܳܐ ܕܰܐܒܳܐ ܫܡܰܝܳܢܳܐ ܠܪ̈ܽܘܚܳܬܳܐ ܕܺܝܠܰܢ ܢ݀ܫܰܕܰܪ܆ ܟܰܕ ܠܳܐ ܬܽܘܒ ܡܶܬܥܰܪܙܠܺܝܢ ܒܰܡܨܺܝ̈ܕܳܬܳܐ ܕܡܰܘܬܳܐ ܘܰܒܣܺܝܪ̈ܰܤ ܕܰܚܛܺܝܬܳܐ. ܟܽܠܗܶܝܢ ܓܶܝܪ ܛܳܒ̈ܳܬܳܐ ܗܘܳܐ ܠܰܢ ܪܺܝܫܺܝܬܳܐ܆ ܘܠܰܢ ܟܽܠܗܶܝܢ ܣܳܥܰܪ ܗ̱ܘܳܐ.

ܐܶܢ ܓܶܝܪ ܐܰܝܟ ܫܳܛܽܘܪ̈ܘܳܬܳܐ ܕܗܶܪ̈ܶܣܺܝܤ ܢܺ݀ܐܡܰܪ ܠܡܰܦܩܳܐ ܕܪܽܘܚܶܗ ܕܰܡܫܺܝܚܳܐ܆ ܕܠܰܘ ܦܽܘܪܫܳܢܳܐ ܕܢܰܦܫܳܐ ‌ܐܺܝܬܰܘܗ̱ܝ܆ ܐܶܠܳܐ ܦܽܘܪܫܳܢܳܐ ܕܰܐ‎ܠܳܗܽܘܬܳܐ܆ ܠܰܘ ܡܰܘܬܳܐ ܗܰܘ ܕܺܝܠܰܢ ܡܺܝܬ܆ ܐܶܠܳܐ ܡܰܘܬܳܐ ܕܺܝܠܶܗ. ܘܰܣܪܺܝܩܳܐܺܝܬ ܚܢܰܢ ܒܚܰܫܳܐ ܕܦܳܪܽܘܩܰܢ ܡܶܫܬܰܒܗܪܺܝܢ ܚ̱ܢܰܢ܆ ܐܶܢ ܒܡܰܘܬܳܐ ܡܶܕܶܡ ܐܰܟܣܢܳܝܳܐ ܘܠܰܘ ܒܗܰܘ ܕܺܝܠܰܢ ܙܟܳܝܗ̱ܝ ܠܳܐܟܶܠܩܰܪܨܳܐ. ܐܶܠܳܐ ܫܰܦܺܝܪ ܝܺܕܺܝܥܳܐ. ܕܰܒܝܰܕ ܐܰܝܠܶܝܢ ܕܰܒܗܶܝܢ ܐܶܙܕܟܺܝܢܰܢ܆ ܒܝܰܕ ܗܳܠܶܝܢ ܐܳܦ ܐܶܬܩܪܺܝܢ ܚ̱ܢܰܢ ܡܶܢ ܕܪܺܝܫ. ܘܠܳܐ ܓܶܝܪ ܢܰܦܫܶܗ ܐܶܫܬܰܒܩܰܬ̣ ܒܰܫܝܽܘܠ܆ ܘܳܐܦܠܳܐ ܒܶܣܪܶܗ ܚܙܳܐ ܚܒܳܠܳܐ^[50]܆ ܐܰܝܟܰܢܳܐ ܕܰܢܒܺܝܳܐ ܐܳܡܰܪ: ܐܶܠܳܐ ܢܰܦܫܳܐ ܡܰܢ. ܡܶܬܦܰܪܫܳܐ ܗ̱ܘܳܬ ܡܶܢ ܦܰܓܪܳܐ܆ ܒܨܶܒܝܳܢܳܐ ܕܗܰܘ ܕܗܳܠܶܝܢ ܡܕܰܒܰܪ ܗ̱ܘܳܐ܆ ܐܰ‎ܠܳܗܳܐ ܕܶܝܢ ܡܶܠܬܳܐ܆ ܗܳܢܳܐ ܓܶܝܪ ‌ܐܺܝܬܰܘܗ̱ܝ ܗ̱ܘܳܐ ܗܰܘ ܕܗܳܠܶܝܢ ܡܕܰܒܰܪ ܗ̱ܘܳܐ܆ ܠܟܽܠܚܰܕ ܡܶܢܗܽܘܢ. ܚܕܳܝܽܘܬܳܐ ܗܳܝ ܪܺܝܫܳܝܬܳܐ܆ ܘܰܩܢܽܘܡܳܐܺܝܬ ܡܚܰܝܰܕ ܗ̱ܘܳܐ܆ ܟܰܕ ܡܰܠܝܳܐ ‌ܐܺܝܬܰܘܗ̱ܝ ܘܰܕܠܳܐ ܒܕܽܘܟ ܡܶܬܦܰܠܰܓ܆ ܐܰܝܟ ܠܳܐ ܦܰܓܪܳܢܳܐ ܘܠܳܐ ܡܶܣܬܰܝܟܳܢܳܐ ܘܕܰܠܟܽܠ ܡܨܶܐ ܕܢܶܡܠܶܐ.

ܘܰܒܝܰܕ ܚܕܳܝܽܘܬܳܐ ܡܰܢ ܗܳܝ ܕܰܠܘܳܬ ܦܰܓܪܳܐ܆ ܟܰܕ ܡܒܰܛܶܠ ܠܰܚܒܳܠܳܐ܆ ܘܡܰܚܶܐ ܠܗܳܢܽܘܢ ܕܰܒܩܰܒܪ̈ܶܐ. ܦܰܓܪ̈ܶܐ ܓܶܝܪ. ܕܩܰܕܺܝ̈ܫܶܐ ܣܰܓܺܝ̈ܶܐܐ ܗܳܢܽܘܢ ܕܰܫܟܺܝܒܺܝܢ ܗ̱ܘܰܘ ܩܳܡܘ^[51]܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܟܳܗܢܳܝܳܐ. ܒܝܰܕ ܕܶܝܢ ܗܳܝ ܕܰܠܘܳܬ ܢܰܦܫܶܗ܆ ܟܰܕ ܦܳܬܰܚ ܠܦܰܪܕܰܝܣܳܐ ܘܡܰܥܶܠ ܥܰܡܶܗ ܠܓܰܝܳܣܳܐ܆ ܠܗܰܘ ܕܳܐܦ ܐܶܫܬܰܘܕܺܝ ܟܰܕ ܐܳܡܰܪ: ܝܰܘܡܳܢܳܐ ܬܶܗܘܶܐ ܒܦܰܪܕܰܝܣܳܐ^[52]. ܐܶܠܳܐ ܐܰܘܣܶܦ ܗܳܝ ܕܥܰܡܝ܆ ܘܛܳܒ ܟܺܐܢܳܐܺܝܬ. ܐܶܢ ܓܶܝܪ ܐܳܕܳܡ ܗܰܘ ܩܰܕܡܳܝܳܐ ܡܶܛܽܠ ܚܛܺܝܬܳܐ ܛܪܺܝܕ ܗ̱ܘܳܐ ܘܰܫܕܶܐ ܠܰܐܟܣܽܘܪܺܝܰܐ ܡܶܢ ܕܽܘܝܳܪܳܐ ܕܰܒܦܰܪܕܳܝܣܳܐ܆ ܠܳܐ ܐܺܝܬܶܝܗ̇ ܗ̱ܘܳܬ ܢܳܡܽܘܣܳܝܬܳܐ ܕܰܐ̱ܚܪܺܢܳܐ ܢܶܫܬܘܶܐ ܠܒܽܘܣܳܡܳܐ ܕܬܰܡܳܢ܆ ܩܕܳܡ ܐܳܕܳܡ ܗܰܘ ܬܪܰܝܳܢܳܐ ܢܩܽܘܡ ܥܠܰܘܗ̱ܝ܆ ܘܢܶܫܪܶܐ ܠܰܐܟܣܽܘܪܺܝܰܐ ܗܳܝ.

ܗܳܟܰܢܳܐ ܗܳܟܺܝܠ ‌ܐܰ‎ܠܳܗܳܐ ܡܶܠܬܳܐ܆ ܟܰܕ ܡܚܰܝܰܕ ܗ̱ܘܳܐ ܠܢܰܦܫܳܐ ܩܢܽܘܡܳܐܺܝܬ܆ ܘܳܐܦܠܳܐ ܠܦܰܓܪܳܐ ܫܰܒܩܶܗ ܣܦܺܝܩܳܐ܆ ܐܰܘ ܕܰܓܠܺܝܙ ܡܶܢ ܚܕܳܝܽܘܬܳܐ ܒܰܝܬܳܝܬܳܐ ܗܳܝ ܕܰܠܘܳܬܶܗ܆ ܦܬܰܚ ܠܶܗ ܦܰܪܕܰܝܣܳܐ ܠܓܰܝܳܣܳܐ. ܘܠܰܐܬܪ̈ܰܘܳܬܳܐ ܕܰܫܝܽܘܠ ‌ܐܶܬܳܐ܆ ܟܰܕ ܐܶܡܰܪ ܠܗܳܢܽܘܢ ܕܒܰܐܣܽܘܪ̈ܶܐ ܕܦܽܘܩܘ: ܘܰܠܗܳܢܽܘܢ ܕܰܒܚܶܫܽܘܟܳܐ ܐܶܬܓܠܰܘ^[53]. ܘܟܰܕ ܗܳܠܶܝܢ ܡܶܫܬܰܡܠܝܳܐܺܝܬ ܘܳܐܣܝܳܐܺܝܬ ܣܥܰܪ. ܘܬܽܘܒ ܠܳܗ̇ ܟܰܕ ܠܳܗ̇ ܐܰܝܬܺܝ ܐܶܢܶܝܢ ܠܗܳܠܶܝܢ ܕܨܶܒܝܳܢܳܐܺܝܬ ܦܪܰܫ܆ ܟܰܕ ܚܰܕ ‌ܐܺܝܬܰܘܗ̱ܝ ܡܶܢ ܬܰܪܬܶܝܢ܆ ܡܶܢ ܐܰ‎ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ. ܗܳܠܶܝܢ ܕܰܡܫܰܡܠܝܳܐܺܝܬ ܐܺܝܬ ܠܗܶܝܢ ܐܰܝܟ ܡܶܠܬܳܐ ܕܺܝܠܗܶܝܢ܆ ܐܰܕܢܰܚ ܠܰܢ ܙܰܠܺܝ̈ܩܶܐ ܕܰܩܝܳܡܬܳܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ.

ܙܳܕܶܩ ܕܶܝܢ. ܕܥܰܡ ܗܳܠܶܝܢ ܕܶܐܬܶܐܡܰܪ̈ܝ̱܆ ܐܳܦ ܐ̱ܚܪܺܬܳܐ ܕܡܶܬܒܰܥܝܳܐ ܕܦܶܬܓܳܡܳܐ ܗܳܢܳܐ ܢܶܫܪܶܐ. ܐ̱ܢܳܫܺܝ̈ܢ ܓܶܝܪ ܐܳܡܪܺܝܢ: ܕܰܐܝܟܰܢܳܐ ܢܺܐܡܰܪ ܕܥܰܠܺܝܠ ܓܰܝܳܣܳܐ ܠܦܰܪܕܳܝܣܳܐ܆ ܟܰܕ ܫܠܺܝܚܳܐ ܦܰܘܠܽܘܤ ܠܙܰܕܺܝ̈ܩܶܐ ܕܡܶܢ ܥܳܠܰܡ ܡܢ̣ܳܐ܆ ܒܶܐܓܰܪܬܳܐ ܗܳܝ ܕܰܠܘܳܬ ܥܶܒܪ̈ܳܝܶܐ ܕܶܐܙܕܰܕܰܩܘ ܒܝܰܕ ܗܰܝܡܳܢܽܘܬܳܐ. ܘܰܐܝܬܺܝ ܒܳܬܰܪܟܶܢ܆ ܘܗܳܠܶܝܢ ܟܽܠܗܽܘܢ ܕܶܐܣܬܗܶܕܘ ܒܝܰܕ ܗܰܝܡܳܢܽܘܬܳܐ ܠܳܐ ܩܰܒܶܠܘ ܐܶܢܽܘܢ ܠܡܽܘܠܟܳܢ̈ܶܐ܆ ܟܰܕ ܐܰ‎ܠܳܗܳܐ ܩܰܕܶܡ ܚܳܪ ܡܶܕܶܡ ܡܝܰܬܪܳܐ ܡܶܛܽܠܳܬܰܢ܆ ܕܠܳܐ ܒܶܠܥܳܕܰܝܢ ܢܶܫܬܰܡܠܽܘܢ^[54].

ܘܐ̱ܢܳܫܺܝ̈ܢ ܡܰܢ ܐܳܡܪܺܝܢ: ܕܰܫܠܺܝܚܳܐ. ܠܰܘ ܒܗܳܢܽܘܢ ܕܰܡܢ̣ܳܐ ܐܳܦ ܠܗܰܘ ܓܰܝܳܣܳܐ ܐܰܟܚܕܳܐ ܡܢ̣ܳܐ. ܐܶܠܳܐ ܫܰܬܩܶܗ܆ ܐܰܝܟ ܕܰܠܡܰܢ ܕܶܐܫܬܘܺܝ ܠܶܗ ܡܶܢ ܟܰܕܽܘ ܠܗܳܠܶܝܢ ܕܰܡܠܺܝ̈ܟܳܢ ܗ̱ܘܰܝ̈. ܘܡܶܛܽܠܗܳܕܶܐ. ܠܰܘ ܦܫܺܝܛܳܐܺܝܬ ܘܰܕܠܳܐ ܬܰܘܣܶܦܬܳܐ ܕܦܽܘܪܳܫܳܐ ܐܶܡܰܪ: ܕܟܽܠܗܽܘܢ ܗܳܢܽܘܢ ܕܶܐܣܬܗܶܕܘ ܒܝܰܕ ܗܰܝܡܳܢܽܘܬܳܐ ܠܳܐ ܢܣܰܒܘ ܐܶܢܽܘܢ ܠܡܽܘܠܟܳܢ̈ܶܐ. ܐܶܠܳܐ ܐܶܡܰܪ: ܘܗܳܠܶܝܢ ܟܽܠܗܽܘܢ܆ ܟܰܕ ܠܘܳܬ ܗܳܢܽܘܢ ܕܶܐܬܡܢܺܝܘ ܒܰܠܚܽܘܕ ܘܶܐܬܚܫܶܒܘ܆ ܡܚܰܘܝܳܢܳܐܺܝܬ ܡܰܣܶܩ ܗ̱ܘܳܐ ܠܳܗ̇ ܠܡܶܠܬܶܗ܆ ܗܳܢܽܘܢ ܕܰܒܗܽܘܢ ܗܰܘ ܓܰܝܳܣܳܐ ܠܳܐ ܡܳܢܶܐ ܗ̱ܘܳܐ.

ܐ̱ܚܪ̈ܳܢܶܐ ܕܶܝܢ ܐܳܡܪܺܝܢ: ܕܳܐܦܠܳܐ ܥܕܰܟܺܝܠ ‌ܐܶܫܬܘܺܝ ܗܰܘ ܓܰܝܳܣܳܐ ܠܕܽܘܝܳܪܳܐ ܕܰܒܦܰܪܕܰܝܣܳܐ. ܐܶܠܳܐ ܡܶܛܽܠ ܫܰܪܺܝܪܽܘܬܶܗ ܘܠܳܐ ܡܶܬܗܰܦܟܳܢܽܘܬܶܗ ܕܫܽܘܘܕܳܝܳܐ ܐܶܡܰܪ ܠܶܗ ܡܳܪܰܢ ܗܳܟܰܢܳܐ: ܗܳܝ «ܕܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ^[55]». ܗܽܘ ܓܶܝܪ ܐܶܡܰܪ: ܫܡܰܝܳܐ ܘܰܐܪܥܳܐ ܢܶܥܒܪܽܘܢ܆ ܡ̈ܶܠܶܐ ܕܶܝܢ ܕܺܝܠܝ ܠܳܐ ܢܶܥܒܪ̈ܳܢ^[56]. ܐܺܝܬ ܗܽܘ ܓܶܝܪ ܐܳܡܪܺܝܢ ܐܳܦ ܐܳܕܫܳܐ ܕܰܐܝܟ ܗܳܢܳܐ ܒܡܶܠܰܘ̈ܗ̱ܝ ܕܡܳܪܰܢ܆ ܒܗܳܢܶܝܢ ܕܥܰܠ ܗܳܠܶܝܢ ܕܰܥܬܺܝ̈ܕܳܢ ܕܢܶܗ̈ܘܝܳܢ ܥܕܰܟܺܝܠ ‌ܐܰܝܟ ܗܰܘ ܕܗܳܐ ܡܶܢ ܟܰܕܽܘ ܗܘ̣̈ܰܝ ܠܗܶܝܢ ܐܳܡܰܪ: ܐܰܝܟ ܐܰܝܟܳܐ ܕܳܐܡܰܪ܆ ܕܗܰܘ ܕܶܝܢ ܕܠܳܐ ܡܗܰܝܡܶܢ ܗܳܐ ܡܶܢ ܟܰܕܽܘ ܕܺܝܢܽ ܗ̱ܘ^[57]. ܘܬܽܘܒ: ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ. ܗܰܘ ܕܡܶܠܰܬܝ ܫܳܡܰܥ ܘܰܡܗܰܝܡܶܢ ܠܡܰܢ ܕܫܰܕܪܰܢܝ܆ ܐܺܝܬ ܠܶܗ ܚܰܝ̈ܶܐ ܕܰܠܥܳܠܰܡ. ܘܰܠܕܺܝܢܳܐ ܠܳܐ ܐܳܬܶܐ܆ ܐܶܠܳܐ ܫܰܢܺܝ ܠܶܗ ܡܶܢ ܡܰܘܬܳܐ ܠܚܰܝ̈ܶܐ^[58].

ܐ̱ܚܪ̈ܳܢܶܐ ܕܶܝܢ ܠܘܳܬ ܣܽܘܟܳܠܳܐ ܗܳܢܳܐ. ܐܳܦ ܠܶܗ ܠܦܶܬܓܳܡܳܐ ܕܳܒܪܺܝܢ ܒܰܩܛܺܝܪܳܐ. ܐܳܡܪܺܝܢ ܓܶܝܪ ܕܙܳܕܶܩ܆ ܕܟܰܕ ܣܳܝܡܺܝܢܰܢ ܒܶܗ ܢܽܘܩܙܳܐ ܬܰܚܬܳܝܳܐ ܒܰܡܨܰܥܬܶܗ ܢܶܩܪܶܝܘܗ̱ܝ: ܐܰܡܺܝܢ ܐܳܡܰܪ ܐ̱ܢܳܐ ܠܳܟ ܝܰܘܡܳܢܳܐ. ܘܗܳܟܰܢܳܐ ܒܳܬܰܪܟܶܢ ܢܰܝܬܶܐ܆ ܗܳܝ ܕܥܰܡܝ ܬܶܗܘܶܐ ܒܦܰܪܕܰܝܣܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܘܳܬ ܙܰܒܢܳܐ ܕܰܥܬܺܝܕ ܢܶܣܬܒܰܪ ܕܚܳܐܰܪ. ܗܽܘ ܫܽܘܘܕܳܝܳܐ. ܐܶܠܳܐ ܗܳܠܶܝܢ ܡܰܢ ܗܳܠܶܝܢ.

ܫܪܳܪܶܗ ܕܶܝܢ ܕܦܽܘܫܳܩܳܐ ܗܳܢܳܐ ‌ܐܺܝܬܰܘܗ̱ܝ. ܛܳܒ̈ܳܬܳܐ ܗܳܢܶܝܢ ܕܰܡܠܺܝ̈ܟܳܢ ܠܰܢ܆ ܡܰܠܟܽܘܬܳܐ ܕܰܫܡܰܝܳܐ ܐܺܝܬܰܝܗܶܝܢ܆ ܘܠܳܐ ܗ̱ܘܳܐ ܒܽܘܣܳܡܳܐ ܗܰܘ ܕܰܒܦܰܪܕܰܝܣܳܐ. ܟܰܕ ܓܶܝܪ ܡܰܟܪܶܙ ܗ̱ܘܳܐ ܡܳܪܰܢ܆ ܬܽܘܒܘ. ܡܶܛܽܠ ܕܩܶܪܒܰܬ̣ ܠܳܗ ܡܰܠܟܽܘܬܳܐ ܕܰܫܡܰܝܳܐ. ܐܳܡܰܪ ܗ̱ܘܳܐ^[59]. ܘܠܳܐ ܗ̱ܘܳܐ ܡܰܥܰܠܬܳܐ ܕܰܠܦܰܪܕܰܝܣܳܐ ܐܰܘ ܦܽܘܢܳܝܳܐ. ܘܠܰܡܨܰܠܳܝܽܘ ܘܰܠܡܺܐܡܰܪ ܦܩܰܕ ܠܰܢ: ܬܺܐܬܶܐ ܡܰܠܟܽܘܬܳܟ^[60]܆ ܘܠܳܐ ܗ̱ܘܳܐ ܕܽܘܝܳܪܳܐ ܗܰܘ ܕܰܒܦܰܪܕܰܝܣܳܐ.

ܐܠܳܐ ܟܒܰܪ. ܢܺܐܡܰܪ ܐ̱ܢܳܫ܆ ܕܗܽܘ ܟܰܕ ܗܽܘ ܡܶܕܶܡ ܐܺܝܬܶܝܗ̇ ܡܰܠܟܽܘܬܳܐ ܕܰܫܡܰܝܳܐ ܘܦܰܪܕܰܝܣܳܐ܆ ܟܰܕ ܬܪܶܝܢ ܟܽܘܢܳܝ̈ܶܐ ܐܺܝܬܰܝܗܽܘܢ ܥܰܠ ܚܰܕ ܣܽܘܥܪܳܢܳܐ ܕܣܺܝܡ. ܐܶܠܳܐ ܡܰܠܦܳܢܽܘܬܳܐ ܕܰܟܬܳܒ̈ܶܐ ܟܳܗܢܳܝ̈ܶܐ ܡܚܰܘܝܳܐ܆ ܕܠܰܘ ܗܽܘ ܟܰܕ ܗܽܘ ܡܶܕܶܡ ‌ܐܺܝܬܰܘܗ̱ܝ܆ ܐܶܠܳܐ ܣܰܓܺܝܳܐܐ ‌ܐܺܝܬܰܘܗ̱ܝ ܫܽܘܚܠܳܦܳܐ ܕܟܽܠܚܰܕ ܡܶܢܗܽܘܢ. ܠܛܳܒ̈ܳܬܳܐ ܡܰܢ ܓܶܝܪ ܗܳܠܶܝܢ ܕܰܒܡܰܠܟܽܘܬܳܐ ܕܰܫܡܰܝܳܐ ܡܛܰܝ̈ܒܳܢ ܠܗܳܢܽܘܢ ܕܡܰܚܒܺܝܢ ܠܡܳܪܰܢ. ܘܠܳܐ ܥܰܝܢܳܐ ܚܙܳܬ ܐܶܢܶܝܢ܆ ܘܠܳܐ ܐܶܕܢܳܐ ܫܶܡܥܰܬ̣܆ ܘܳܐܦܠܳܐ ܥܰܠ ܠܶܒܳܐ ܕܒܰܪܢܳܫܳܐ ܣܠ̣̈ܰܩܷܝܢ^[61]. ܐܰܝܟܰܢܳܐ ܕܳܐܦ ܐܰ‎ܠܳܗܳܝܳܐ ܦܰܘܠܽܘܤ ܟܬܰܒ. ܠܦܰܪܕܰܝܣܳܐ ܕܶܝܢ܆ ܘܳܐܦ ܥܰܝܢܳܐ ܗܳܝ ܕܳܐܕܳܡ ܚܙܳܬܶܗ܆ ܐܳܦ ܐܶܕܢܶܗ ܫܶܡܥܰܬ̣܆ ܫܳܡܰܥ ܗ̱ܘܳܐ ܓܶܝܪ ܕܡܶܢ ܟܽܠ ‌ܐܺܝܠܳܢܳܐ ܕܰܒܦܰܪܕܰܝܣܳܐ ܬܶܐܟܽܘܠ^[62]܆ ܐܳܦܶܢ ܕܚܰܕ ܐܺܝܠܳܢܳܐ ܚܙܳܬܶܗ ܡܰܢ ܐܺܝܬ ܗ̱ܘܳܐ ܠܶܗ܆ ܡܶܐܟܽܘܠܬܶܗ ܕܶܝܢ ܠܳܐ ܡܰܦܣܳܐ ܗ̱ܘܳܬ ܠܶܗ܆ ܘܳܐܦ ܥܰܠ ܠܶܒܳܐ ܕܺܝܠܶܗ ܣܠܶܩ܆ ܡܶܬܦܩܶܕ ܗ̱ܘܳܐ ܓܶܝܪ ܠܡܶܦܠܚܶܗ ܠܦܰܪܕܰܝܣܳܐ^[63]. ܦܽܘܠܚܳܢܶܗ ܓܶܝܪ ܕܦܰܪܕܰܝܣܳܐ܆ ܦܽܘܠܚܳܢ ܐܺܝܕܰܝ̈ܳܐ ܡܶܕܶܡ ܠܳܐ ‌ܐܺܝܬܰܘܗ̱ܝ ܗ̱ܘܳܐ. ܐܶܠܳܐ ܐܺܝܬ ܗ̱ܘܳܐ ܠܶܗ ܚܰܕܽܘܬܳܐ ܡܠܺܝܠܬܳܐ ܕܰܚܠܺܝܛܳܐ ܒܶܗ܆ ܘܒܽܘܣܳܡܳܐ ܕܣܽܘ̈ܟܳܠܶܐ ܐܰ‎ܠܳܗܳܝ̈ܶܐ. ܫܳܬܶܩ ܐ̱ܢܳܐ ܓܶܝܪ ܠܡܶܬܚܰܛܦܳܢܽܘܬܳܐ ܗܳܝ ܕܶܐܬܚܛܶܦ ܦܰܘܠܽܘܤ ܠܬܰܡܳܢ܆ ܡܶܛܽܠ ܟܺܝܬ ܕܗܽܘ ܐܶܡܰܪ: ܕܶܐܢ ܒܰܦܓܰܪ ܘܶܐܢ ܕܠܳܐ ܦܓܰܪ ܠܳܐ ܝܳܕܰܥ ܐ̱ܢܳܐ^[64].

ܐܰܝܟܰܢܳܐ ܟܺܝܬ ܕܗܰܘ ܓܰܝܳܣܳܐ܆ ܠܦܰܪܕܰܝܣܳܐ ܡܰܢ ܐܶܫܬܘܺܝ ܠܶܗ܆ ܠܳܐ ܕܰܓܳܠܰܐ ܗ̱ܘ ܓܶܝܪ ܗܰܘ ܕܶܐܡܰܪ ܕܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ^[65]܆ ܠܛܳܒ̈ܳܬܳܐ ܕܶܝܢ. ܗܳܠܶܝܢ ܕܰܒܣܰܒܪ̈ܶܐ ܐܺܝܬܰܝܗܶܝܢ. ܕܡܰܠܟܽܘܬܳܐ ܕܰܫܡܰܝܳܐ܆ ܥܰܡܗܽܘܢ ܕܙܰܕܺܝ̈ܩܶܐ ܗܳܢܽܘܢ ܕܡܶܢ ܥܳܠܰܡ ܕܠܳܐ ܢܣܰܒܘ ܠܡܽܘܠ̈ܟܳܢܶܐ܆ ܐܳܦ ܗܽܘ ܦܳܫ ܘܠܳܐ ܢܣܰܒ܆ ܟܰܕ ܐܰ‎ܠܳܗܳܐ ܩܰܕܶܡ ܕܳܩ ܡܶܕܶܡ ܕܰܡܝܰܬܰܪ ܡܶܛܽܠܳܬܰܢ܆ ܕܠܳܐ ܡܶܢ ܒܶܠܥܳܕܰܝܢ ܢܶܫܬܰܡܠܽܘܢ.

ܕܛܳܒ̈ܳܬܳܐ ܓܶܝܪ. ܗܳܠܶܝܢ ܕܰܒܡܽܘܠ̈ܟܳܢܶܐ ܢܛܺܝܪ̈ܳܢ ܠܰܢ܆ ܠܳܐ ܡܶܕܶܡ ܐ̱ܚܪܺܝܢ ܐܺܝܬܰܝܗܶܝܢ܆ ܐܶܠܳܐ ܐܶܢ ܗܺܝ ܡܰܠܟܽܘܬܳܐ܆ ܡܶܢ ܕܽܘܟ̈ܝܳܬܳܐ ܡܰܢ ܣܰܓܺܝ̈ܳܐܬܳܐ ܐܺܝܬ ܠܡܶܚܙܳܐ. ܝܰܬܺܝܪܳܐܺܝܬ ܕܶܝܢ܆ ܡܶܢ ܡ̈ܶܠܶܐ ܗܳܢܶܝܢ܆ ܐܰܝܠܶܝܢ ܕܗܽܘ ܡܳܪܰܢ ܒܶܐܘܰܢܓܶܠܺܝܽܘܢ ܗܰܘ ܕܠܽܘܩܳܐ ܟܬܺܝܒ ܕܳܐܡܰܪ ܗ̱ܘܳܐ ܠܬܰܠܡܺܝܕܰܘ̈ܗ̱ܝ: ܐܰܢ̱ܬܽܘܢ ܕܶܝܢ ܐܺܝܬܰܝܟܽܘܢ ܗܳܢܽܘܢ ܕܟܰܬܰܪܬܽܘܢ ܥܰܡܝ ܒܢܶܣܝܽܘܢܰܝ̈ܢ܆ ܘܶܐܢܳܐ ܡܶܫܬܰܘܕܶܐ^[66] ܐ̱ܢܳܐ ܠܟܽܘܢ ܐܰܝܟܰܢܳܐ ܕܶܐܫܬܰܘܕܺܝ ܠܺܝ ܐܳܒܝ ܡܰܠܟܽܘܬܳܐ܆ ܕܬܶܐܟܠܽܘܢ ܘܬܶܫܬܽܘܢ ܥܰܠ ܦܳܬܽܘܪܝ ܒܡܰܠܟܽܘܬܳܐ ܕܺܝܠܝ^[67].

ܐܺܝܬ ܠܰܢ ܕܶܝܢ. ܥܰܡ ܡܰܠܟܽܘܬܳܐ ܗܳܝ ܕܰܡܠܺܝܟܳܐ ܠܰܢ܆ ܐܳܦ ܕܰܢܝܳܚܬܳܐ ܪܽܘܚܳܢܳܝܬܳܐ. ܠܡܶܬܕܰܡܳܪܽܘ ܗܳܟܺܝܠ ‌ܐܺܝܬ ܒܰܡܕܰܒܪ̈ܳܢܘܳܬܶܗ ܚܰܟܺܝ̈ܡܳܬ ܒܟܽܠ ܕܡܳܪܰܢ܆ ܕܗܳܢܶܝܢ ܕܙܰܗܪ̈ܶܐ ܡܶܕܶܡ ܡܡܰܫ̈ܚܶܐ^[68] ܕܺܝܠܗܶܝܢ ܩܰܒܶܠܢܰܢ܆ ܟܰܕ ܠܡܶܠܬܳܐ ܕܰܥܠܰܝܗܶܝܢ ܠܡܺܐܡܰܪ ܡܫܰܡܠܝܳܐܺܝܬ ܠܰܝܬ ܠܰܢ. ܟܰܕ ܓܶܝܪ ܗܰܘ ܓܰܝܳܣܳܐ ܕܰܐܝܟ ܗܳܕܶܐ ܗܳܝܡܳܢܽܘܬܳܐ ܚܰܘܺܝ܆ ܘܥܰܠ ܟܺܐܒܳܐ ܡܰܢ ܕܨܶܨ̈ܶܐ ܐܰܒܣܺܝ܆ ܡܣܰܟܰܟ ܗ̱ܘܳܐ ܓܶܝܪ ܠܘܳܬ ܗܰܘ ܩܰܝܣܳܐ. ܘܒܺܐܝܕܰܘ̈ܗ̱ܝ ܘܰܒܪ̈ܶܓܠܰܘܗ̱ܝ܆ ܘܰܠܟܽܠ. ܡܶܢ ܟܽܠܗܶܝܢ ܗܳܠܶܝܢ ܕܰܩܕܳܡ ܪ̈ܶܓܠܶܐ ܥܒܰܪ܆ ܠܘܳܬ ܣܰܒܪ̈ܶܐ ܕܶܝܢ ܗܳܠܶܝܢ ܕܰܥܬܺܝܕܺܝܢ ܦܪܰܚ܆ ܘܰܩܥܳܐ ܠܒܰܪ̱ܬ ܩܳܠܳܐ ܗܳܝ ܪܰܒܬܳܐ ܘܰܬܡܺܝܗܬܳܐ. ܘܕܰܠܥܶܠ ܡܶܢ ܒܰܪܢܳܫܳܐ. ܐܶܬܕܰܟܪܰܝܢܝ ܡܳܪܝ ܐܶܡܰܬܝ ܕܳܐܬܶܐ ܐܰܢ̱ܬ ܒܡܰܠܟܽܘܬܳܟ^[69]. ܡܥܰܩܒܳܢܳܐ ܗܰܘ ܚܰܬܺܝܬ̣ܳܐܺܝܬ ܕܬܰܪ̈ܥܝܳܬܳܐ ܕܺܝܠܰܢ܆ ܟܰܕ ܐܶܬܕܰܡܰܪ ܒܪܰܒܽܘܬ ܦܰܣܬ̣ܳܐ ܘܰܡܥܰܠܝܽܘܬܳܐ ܕܗܰܝܡܳܢܽܘܬܶܗ܆ ܡܶܢ ܗܳܠܶܝܢ ܕܡܶܚܕܳܐ ܥܬܺܝ̈ܕܳܢ ܗ̱ܘܰܝ̈ ܕܢܶܗܘ̈ܝܳܢ܆ ܫܰܪܪܶܗ ܠܘܳܬ ܣܰܒܪܳܐ ܕܗܳܠܶܝܢ ܥܬܺܝ̈ܕܳܢ. ܟܰܕ ܐܶܡܰܪ: ܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ^[70].

ܗܳܢܽܘܢ ܡܰܢ ܓܶܝܪ ܐܳܡܰܪ. ܐ̱ܚܪ̈ܳܢܶܐ ܐܰܝܠܶܝܢ ܕܗܰܝܡܶܢܘ ܒܺܝ܆ ܒܳܐܬܘ̈ܳܬܳܐ ܘܰܒܡܰܠ̈ܦܳܢܘܳܬܳܐ ܐܶܬܒܰܣܰܡܘ܆ ܘܰܒܝܰܕ ܗܳܠܶܝܢ ܩܰܒܶܠܘ ܠܡܶܠܬܳܐ ܕܡܶܛܽܠ ܡܰܠܟܽܘܬܳܐ. ܗܳܢܳܐ ܕܶܝܢ. ܟܰܕ ܠܳܐ ܡܶܕܶܡ ܫܡܰܥ ܡܶܢ ܗܳܠܶܝܢ ܕܺܝܠܝ ܐܰܘ ܚܙܳܐ܆ ܐܶܠܳܐ ܐܶܢ ܡܰܘܬܳܐ ܫܺܝܛܳܐ ܕܰܒܝܰܕ ܨܠܺܝܒܳܐ܆ ܠܡܶܠܬܳܐ ܗܳܝ ܚܰܝܠܬܳܢܺܝܬܳܐ ܐܶܡܰܪ: ܗܳܝ ܕܶܐܬܕܰܟܪܰܝܢܝ ܡܳܪܝ ܐܶܡܰܬܝ ܕܳܐܬܳܐ ܐܰܢ̱ܬ ܒܡܰܠܟܽܘܬܳܟ³. ܡܳܢܳܐ ܗܳܟܺܝܠ. ܢܶܗܘܶܐ ܠܶܗ ܕܫܳܥܬܳܐ ܒܽܘܣܳܡܳܐ ܗܰܘ ܕܰܒܦܰܪܕܰܝܣܳܐ܆ ܐܰܝܟ ܡܶܫܟܳܢܳܐ ܘܪܰܗܒܽܘܢܳܐ ܕܡܶܛܽܠ ܗܰܝܡܳܢܽܘܬܶܗ؟ ܢܶܫܬܘܶܐ ܕܶܝܢ ܐܳܦ ܠܡܰܠܟܽܘܬܳܐ ܠܚܰܪܬܳܐ܆ ܗܳܝ ܕܒܳܗ̇ ܢܶܗܘܶܐ ܥܽܘܗܕܳܢܶܗ ܐܶܬܟܰܫܰܦ.

ܘܰܐܟܙܢܳܐ ܕܐ̱ܢܳܫ ܓܰܢ̱ܒܳܪܳܐ ܛܥܺܝܢ ܙܳܟܽܘܬܳܐ ܕܟܰܕ ܪܳܕܶܦ ܘܪܳܗܶܛ ܠܡܶܥܰܠ ܠܰܡܕܺܝܢ̱ܬܳܐ܆ ܗܳܠܶܝܢ ܢܰܨܺܝ̈ܚܳܬܳܐ ܘܪܰܘܪ̈ܒܳܬܳܐ ܕܡܶܢ ܒܶܙ̈ܬܶܐ ܛܳܥܶܢ ܥܠܰܘܗ̱ܝ܆ ܟܰܕ ܨܳܒܶܐ ܕܰܕܢܺܝܚܬܳܐ ܒܝܰܕ ܗܳܕܶܐ ܘܣܰܓܺܝ ܚܰܕܳܝܬܳܐ ܘܰܫܒܺܝܚܬܳܐ ܢܶܥܒܕܺܝܗ̇ ܠܙܳܟܽܘܬܶܗ܆ ܘܟܰܕ ܡܰܟܪܶܙ ܠܶܗ ܠܫܽܘܘܕܳܥܳܐ ܕܙܳܟܽܘܬܳܐ܆ ܗܳܟܰܢܳܐ ܐܳܦ ܡܳܪܰܢ ܟܰܕ ܪܳܕܶܦ ܗ̱ܘܳܐ ܘܳܐܙܶܠ ܠܡܶܥܰܠ ܠܰܐܬܪܶܗ ܩܰܕܡܳܝܳܐ ܕܒܰܪ ܐ̱ܢܳܫܳܐ܆ ܠܦܰܪܕܰܝܣܳܐ ܐܳܡܰܪ ܐ̱ܢܳܐ܆ ܠܗܰܘ ܓܰܝܳܣܳܐ ܛܥܺܝܢ ܗ̱ܘܳܐ܆ ܒܶܙܬܳܐ ܗܳܝ ܕܝܰܬܺܝܪ ܡܶܢ ܟܽܠ ܟܽܘܠܳܝܽܘܬ ܙܰܝܢܳܐ ܝܰܬܺܝܪ ܟܢܺܝܟܳܐ ܘܰܡܝܰܩܪܳܐ܆ ܘܡܶܢ ܗܳܠܶܝܢ ܕܡܶܢ ܐܳܟܶܠܩܰܪܨܳܐ ܐܶܬܚܛܶܦܶܝ̈ܢ܆ ܗܰܘ ܡܳܐ ܕܝܰܬܺܝܪ ܡܶܢ ܟܽܠ ܥܰܫܺܝܢ܆ ܟܰܕ ܒܶܗ ܒܰܥܒܳܕܳܐ ܡܰܘܕܰܥ ܗ̱ܘܳܐ. ܗܳܠܶܝܢ ܟܺܝܬ ܕܳܐܡܰܪ ܗ̱ܘܳܐ: ܕܟܰܕ ܐܰܣܪܶܗ ܠܚܰܣܺܝܢܳܐ ܡܳܐܢ̈ܶܐ ܕܒܰܝܬܳܐ ܕܺܝܠܶܗ ܒܰܙ^[71].

ܟܰܕ ܗܳܠܶܝܢ ܡ̈ܶܠܶܐ ܫܳܡ̈ܥܳܢ ܪ̈ܽܘܚܳܬܳܐ ܕܙܰܕܺܝ̈ܩܶܐ܆ ܗܳܢܽܘܢ ܕܕܰܚܺܝܚܗܽܘܢ ܡܝܰܩܪܳܐ ܗܳܪܟܳܐ ܣܺܝܡ܆ ܚܳܕ̈ܝܳܢ ܒܣܰܒܪܳܐ܆ ܘܥܰܡܟܽܘܢ ܕܺܐܝܬܰܝܟܽܘܢ ܥܕܺܬܳܐ ܕܰܐ‎ܠܳܗܳܐ ܐܰܟܚܕܳܐ ܪ̈ܳܘܙܳܢ. ܡܶܛܽܠܗܳܕܶܐ ܓܶܝܪ ܗܶܢܽܘܢ ܐܰܒܳܗ̈ܳܬܳܐ ܕܺܝܠܰܢ܆ ܐܳܦ ܒܶܗ ܒܝܰܘܡܳܐ ܡܳܪܳܢܳܝܳܐ ܕܦܶܣܟܳܐ܆ ܐܰܘ ܐܳܦ ܡܶܢ ܒܳܬܪܶܗ ܕܥܺܐܕܳܐ ܕܰܩܝܳܡܬܳܐ܆ ܬܰܚܶܡܘ ܕܢܶܬܟܰܢܰܫ ܒܩܰܕܡܳܐ܆ ܒܕܽܘܟܬܳܐ ܗܳܕܶܐ ܕܡܶܬܩܰܪܝܳܐ ܩܽܘܡܶܛܪܺܝܽܘܢ. ܟܰܕ ܒܺܐܝ̈ܕܰܝܗܽܘܢ ܕܺܝܠܗܽܘܢ ܕܣܽܘܥܪ̈ܳܢܶܐ ܡܰܙܥܩܺܝܢ ܗ̱ܘܰܘ܆ ܕܚܰܫܳܐ ܦܳܪܽܘܩܳܝܳܐ ܕܰܡܫܺܝܚܳܐ. ܘܰܩܝܳܡܬܳܐ܆ ܫܶܢܬܳܐ ܚܰܘܝܽܘܗ̱ܝ ܠܡܰܘܬܳܐ. ܗܰܘ ܕܳܐܦ ܟܰܕ ܐܳܬܶܐ ܬܽܘܒ܆ ܢܺܐܡܰܪ ܗܳܝ ܕܰܟܬܺܝܒܳܐ: ܠܟܽܠ ܚܰܕ ܡܶܢ ܗܳܢܽܘܢ ܕܰܫܟܺܝܒܺܝܢ ܗܳܪܟܳܐ. ܐܶܬܬܥܺܝܪ ܗܰܘ ܕܕܰܡܺܝܟ܆ ܘܩܽܘܡ ܡܶܢ ܡܺܝ̈ܬܶܐ܆ ܘܢܰܢܗܰܪ ܠܳܟ ܡܫܺܝܚܳܐ^[72]. ܗܳܢܽܘܢ ܕܟܰܕ ܐܳܦ ܗܳܫܳܐ. ܠܒܳܥ̈ܘܳܬܳܐ ܕܰܚܠܳܦܰܝܢ ܡܰܣܩܺܝܢ܆ ܢܩܺܝܡܽܘܢ^[73] ܠܪܽܘܓܙܳܐ ܗܳܢܳܐ ܕܣܺܝܡ ܥܠܰܝܢ܆ ܘܢܶܛܪܕܽܘܢ ܠܰܚܒܳܠܳܐ ܗܳܢܳܐ ܡܰܘܒܕܳܢܳܐ. ܘܢܶܬܟܰܫܦܽܘܢ ܐܳܦ ܕܢܶܫܬܘܶܐ ܥܰܡܗܽܘܢ ܠܡܰܠܟܽܘܬܳܐ ܕܰܫܡܰܝܳܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ. ܕܠܶܗ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܥܶܣܪܺܝܢ ܘܰܬܪܶܝܢ.

ܡܬܝ. 27: 46  ܡܪܩܘܣ. 15: 34 [1]

ܠܘܩܐ. 23: 43 [2]

ܗܳܟܰܢܳܐ[3]

ܐ. ܦܛܪܘܣ. 4: 1 [4]

ܦܪܟܣܝܣ. 2: 23 ـ 24 [5]

  ܦܪܟܣܝܣ. 3: 15 [6]

  ܪ̈ܗܘܡܝܐ. 9: 5 [7]

  ܐ. ܩܘܪ̈ܝܢܬܝܐ. 8: 6 [8]

  ܥܒܪ̈ܝܐ. 13: 8 [9]

  ܐ. ܝܘܚܢܢ. 5: 20 [10]

  ܝܘܚܢܢ. 8: 58[11]

  ܝܘܚܢܢ. 6: 56 ـ 57 [12]

  ܐܰܢ̱ܬ[13]

  ܐ. ܩܘܪ̈ܝܢܬܝܐ. 1: 18 [14]

ܡܬܝ. 27: 46 [15]

ܝܘܚܢܢ. 1: 14 [16]

ܡܙܡܘܪ̈ܐ. 22: 2 [17]

ܐ. ܦܛܪܘܣ. 2: 22  ܐܦ ܐܫܥܝܐ. 53: 9 [18]

ܒ. ܩܘܪ̈ܝܢܬܝܐ. 5: 21 [19]

 ܗܳܟܰܢܳܐ[20]

ܩܘܠܣ̈ܝܐ. 2: 14 [21]

ܐ. ܛܝܡܬܐܘܣ. 2: 5 [22]

ܩܘܠܣ̈ܝܐ. 1: 20 [23]

ܬܶܬܶܠ[24]

ܐܫܥܝܐ. 63: 9 [25]

ܡܬܝ. 27: 46 [26]

ܝܘܚܢܢ. 16: 32 [27]

ܠܘܩܐ. 22: 42 [28]

ܡܫܰܓܶܫ ܡܰܛܥܝܳܢܳܐܝܬ[29]

ܠܘܩܐ. 22: 42 [30]

ܠܘܩܐ. 22: 15 [31]

ܡܬܝ. 16: 22 ـ 23 [32]

ܠܘܩܐ. 22: 42 [33]

ܡܬܝ. 27: 46 [34]

ܙܟܪܝܐ. 12: 10  ܐܦ ܝܘܚܢܢ. 19: 37 [35]

ܒ. ܩܘܪ̈ܝܢܬܝܐ. 13: 4 [36]

ܥܒܪ̈ܝܐ. 5: 8 [37]

ܥܒܪ̈ܝܐ. 5: 7 [38]

[39]ܠܡܶܕܰܥ ܙܳܕܶܩ ܕܰܒܠܶܫܳܢܳܐ ܝܰܘܢܳܝܳܐ܆ ܢܶܩܒܳܐܝܬ ܡܶܬܶܐܡܰܪ ܟܝܳܢܳܐ. ܘܗܳܝ ܕܰܐܝܢܳܐ ܕܣܺܝܡܳܐ ܥܠܰܘܗܝ ܒܡ̈ܶܠܰܘܗܝ ܕܠܶܐܘܳܢ܆ ܢܶܩܒܳܐܝܬ ܣܺܝܡܳܐ ܐܳܦ ܗܳܝ܆ ܘܡܶܛܽܠ ܗܳܕܶܐ ܐܰܝܬܺܝ ܐܶܢܶܝܢ ܡܰܠܦܳܢܳܐ ܠܰܡܨܰܥܬܳܐ

ܚܫܺܝܒ[40]

ܡܬܝ. 27: 46 [41]

ܕܳܐܦܠܳܐ[42]

ܥܒܪ̈ܝܐ. 4: 15 [43]

ܐ. ܩܘܪ̈ܝܢܬܝܐ. 15: 22 [44]

ܪ̈ܗܘܡܝܐ. 6: 10 [45]

ܒ. ܩܘܪ̈ܝܢܬܝܐ. 5: 21 [46]

ܐ. ܩܘܪ̈ܝܢܬܝܐ. 15: 56 [47]

ܝܘܚܢܢ. 10: 17 ـ 18 [48]

ܠܘܩܐ. 23: 46 [49]

ܦܪܟܣܝܣ. 2: 27  ܐܦ 2: 32 ܡܙܡܘܪ̈ܐ. 16: 8 ـ 11 [50]

ܡܬܝ. 27: 52 [51]

ܠܘܩܐ. 23: 43 [52]

ܐܫܥܝܐ. 49: 9 [53]

ܥܒܪ̈ܝܐ. 11: 39 ـ 40 [54]

ܠܘܩܐ. 23: 43 [55]

ܡܪܩܘܣ. 13: 31  ܐܦ ܡܬܝ. 24: 35 [56]

ܝܘܚܢܢ. 3: 18 [57]

ܝܘܚܢܢ. 5: 24 [58]

ܡܬܝ. 3: 2 [59]

ܡܬܝ. 6: 10 ܐܦ ܠܘܩܐ. 11: 2 [60]

ܐ. ܩܘܪ̈ܝܢܬܝܐ. 2: 9  ܐܦ ܐܫܥܝܐ. 44: 4 [61]

ܣܶܦܪܳܐ ܕܰܒܪܺܝܬܳܐ. 2: 16 [62]

ܣܶܦܪܐ ܕܒܪܝܬܐ. 3: 23 [63]

ܒ. ܩܘܪ̈ܝܢܬܝܐ. 12: 2 [64]

ܠܘܩܐ. 23: 43 [65]

 ܡܩܺܝܡ ܐ̱ܢܳܐ ܠܟܽܘܢ ܩܝܳܡܳܐ[66]

ܠܘܩܐ. 22: 28 ـ 30 [67]

ܙܥܽܘܪ̈ܳܬ[68]

ܠܘܩܐ. 23: 42 [69]

ܠܘܩܐ. 22: 43 [70]

ܡܬܝ. 12: 29 [71]

ܐܦܣ̈ܝܐ. 5: 14 [72]

 ܢܶܟܠܽܘܢ[73]