ܡܺܐܡܪܳܐ ܕܥܶܣܪܺܝܢ ܘܚܰܕ

ܡܰܪܬܝܳܢܽܘܬܳܐ ܕܶܐܬܰܐܡܪܰܬ ܐܰܝܟ ܥܝܳܕܳܐ ܒܰܐܪܒܥܳܐ ܒܫܰܒܳܐ ܕܫܰܒܬܳܐ ܪܰܒܬܳܐ ܕܦܶܣܟܳܐ ܐܰܘܟܺܝܬ ܕܚܰܫܳܐ܆ ܠܘܳܬ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܡܶܫܬܘܳܝܽܘ ܠܰܥܡܳܕܳܐ ܩܰܕܺܝܫܳܐ.

21:  ܡܶܠܬܳܐ ܕܡܰܪܬܝܳܢܽܘܬܳܐ. ܣܽܘܪܳܕܳܐ^[1] ܣܰܓܺܝܳܐܐ ܥܳܒܕܳܐ ܒܺܝ܆ ܘܛܳܒ ܟܺܐܢܳܐܺܝܬ. ܡܶܬܚܰܫܰܒ^[2] ܐ̱ܢܳܐ ܓܶܝܪ܆ ܠܰܘ ܗܳܢܳܐ ܟܽܠܶܗ܆ ܕܡܳܢܳܐ ܙܳܕܶܩ ܠܡܺܐܡܰܪ. ܐܰܝܟ ܟܡܳܐ܆ ܕܰܐܝܠܶܝܢ ܐܺܝܬܰܝܗܶܝܢ ܗܳܠܶܝܢ ܕܙܳܕܶܩ ܠܡܶܫܬܰܩ܆ ܘܠܳܐ ܐܶܬܬܟܶܠ ܥܰܠ ܡܰܫܡܰܥܬܳܐ ܚܕܰܬܳܐ ܘܰܕܠܳܐ ܡܕܰܪܫܳܐܺܝܬ ܠܳܗ̇ ܠܘܳܬ ܫܶܡܥܳܐ ܕܕܽܘܓ̈ܡܰܛܰܐ ܐܰ‎ܠܳܗܳܝ̈ܶܐ܆ ܘܰܕܥܰܠ ܚܰܠܒܳܐ ܥܕܰܟܺܝܠ ܣܢܺܝܩܳܐ ܘܠܰܘ ܡܶܐܟܽܘܠܬܳܐ ܚܠܺܝܡܬܳܐ^[3]܆ ܐܰܝܟܰܢܳܐ ܕܚܰܟܺܝܡܳܐ ܦܰܘܠܽܘܤ ܐܳܡܰܪ. ܡܶܛܽܠܗܳܕܶܐ ܓܶܝܪ ܗܰܘ ܗܳܢܳܐ ܐܳܕܫܳܐ ܕܗܳܕܶܐ ܡܰܠܦܳܢܽܘܬܳܐ܆ ܡܰܪܬܝܳܢܽܘܬܳܐ^[4] ܐܰܘܟܺܝܬ ܡܰܫܡܥܳܢܽܘܬܳܐ ܡܶܬܶܐܡܰܪ. ܡܥܰܝܶܕ ܠܗܶܝܢ ܓܶܝܪ ܠܶܐܕ̈ܢܶܐ ܕܗܳܢܽܘܢ ܕܫܳܡܥܺܝܢ܆ ܒܰܙܡܳܡܳܗ̇ ܐܰܘܟܺܝܬ ܒܩܳܠܳܗ̇ ܕܩܰܪܢܳܐ ܗܳܝ ܡܰܥܠܳܢܺܝܬܳܐ ܕܡ̈ܶܠܶܐ܆ ܐܰܝܟܰܢܳܐ ܕܠܳܐ ܟܰܕ ܠܪܰܥܡܳܐ ܕܰܡܡܰܠܠܽܘܬ ܐܰ‎ܠܳܗܽܘܬܳܐ ܠܳܐ ܡܕܰܪܫܳܐܺܝܬ ܡܶܬܩܰܪ̈ܒܳܢ ܘܝܰܬܺܝܪ ܡܶܬܬܙܺܝ̈ܥܳܢ ܒܩܳܠܳܐ ܕܗܳܟܰܢܳܐ ܐܳܡܰܪ: ܘܰܠܪܰܒܽܘܬܳܐ ܠܳܐ ܡܶܫܟ̈ܚܳܢ ܠܰܡܣܰܝܒܳܪܽܘ܆ ܢܶܬܬܙܺܝ̈ܥܳܢ ܘܢܶܬܗܪ̈ܳܢ.

ܘܗܳܕܶܐ ܐܺܝܬ ܠܡܶܫܟܳܚܽܘ. ܕܶܐܫܬܰܠܡܰܬ ܐܳܦ ܒܰܟܬܳܒ̈ܶܐ ܟܳܗ̈ܢܳܝܶܐ. ܟܰܕ ܓܶܝܪ ܥܬܺܝܕ ܗ̱ܘܳܐ ܡܽܘܫܶܐ ܕܰܠܢܳܡܽܘܣܳܐ ܗܰܘ ܐܰ‎ܠܳܗܳܝܳܐ ܢܩܰܒܶܠ ܡܶܢ ܐܰ‎ܠܳܗܳܐ܆ ܘܒܺܐܝܕܰܘ̈ܗ̱ܝ ܟܽܠܶܗ ܗܰܘ ܣܽܘܓܳܐܐ ܕܥܰܡܳܐ ܕܺܐܝܣܪܳܐܶܝܠ܆ ܠܛܽܘܪܳܐ ܡܰܢ ܗܽܘ ܒܰܠܚܽܘܕܰܘܗ̱ܝ ܣܳܠܶܩ ܗ̱ܘܳܐ܆ ܗܳܕܶܐ ܓܶܝܪ ܡܶܬܦܩܰܕ ܗ̱ܘܳܐ܆ ܠܥܰܡܳܐ ܕܶܝܢ. ܟܰܕ ܡܕܰܟܰܝ ܗ̱ܘܳܐ ܐܰܝܟ ܕܰܟܬܺܝܒ܆ ܘܰܐܝܟ ܕܡܰܨܝܳܐ ܗ̱ܘܳܬ ܩܰܕܶܡ ܕܰܟܺܝ ܗܽܘ ܠܶܗ܆ ܡܩܺܝܡ ܗ̱ܘܳܐ ܠܬܰܚܬ܆ ܠܘܳܬ ܫܦܽܘܠܰܘ̈ܗ̱ܝ ܕܛܽܘܪܳܐ ܗܰܘ ܕܣܺܝܢܰܝ. ܘܰܩܕܳܡ ܕܢܶܬܬܰܙܥ̈ܩܳܢ ܡ̈ܶܠܶܐ ܘܓܶܠܝܳܢ̈ܶܐ ܕܢܳܡܽܘܣܳܐ܆ ܫܺܝܦܽܘܪ̈ܶܐ ܡܶܕܶܡ ܡܰܙܡܺܝܢ ܗ̱ܘܰܘ. ܡܶܕܶܡ ܪܰܒܳܐ ܘܰܬܡܺܝܗܳܐ. ܥܰܡ ܗܳܝ ܕܳܐܦ ܗܽܘ ܛܽܘܪܳܐ ܒܰܥܢܳܢܳܐ ܥܰܪܦܶܠܳܝܬܳܐ ܡܶܬܟܰܣܶܐ ܗ̱ܘܳܐ܆ ܘܰܒܒܰܪ̈ܩܶܐ ܡܶܬܚܕܰܪ ܗ̱ܘܳܐ܆ ܘܕܶܚܠܬܳܐ ܥܳܒܶܕ ܗ̱ܘܳܐ ܒܗܳܢܽܘܢ ܕܚܳܙܶܝܢ ܗ̱ܘܰܘ ܟܺܝܬ ܘܫܳܡܥܺܝܢ.

ܕܰܐܝܟ ܗܳܢܳܐ ‌ܐܺܝܬܰܘܗ̱ܝ ܛܽܘܪܳܐ ܕܰܡܡܰܠܠܽܘܬ ܐܰ‎ܠܳܗܽܘܬܳܐ. ܡܶܬܕܰܪܟܳܢܳܐ ܡܰܢ. ܠܗܳܢܽܘܢ ܕܰܐܝܟ ܡܽܘܫܶܐ ܒܰܡܝܰܬܪܽܘܬܳܐ܆ ܘܗܳܕܶܐ. ܐܶܡܰܬܝ ܕܰܐ‎ܠܳܗܳܐ ܢܶܩܪܶܐ܆ ܟܰܕ ܓܶܝܪ ܩܰܪܢܬܳܐ ܐܰ‎ܠܳܗܳܝܬܳܐ. ܠܳܐ ܡܫܰܒܠܳܐ ܘܰܡܣܰܡܟܳܐ܆ ܘܳܐܦ ܠܗܳܢܽܘܢ ܕܰܐܝܟ ܗܰܘ ܠܳܐ ܡܶܬܕܰܪܟܳܢܰܐܗ̱ܘ^[5] ܟܽܠ ܟܽܠܶܗ܆ ܠܗܳܢܽܘܢ ܕܶܝܢ ܕܰܡܡܰܫܚܳܐܺܝܬ ܟܶܐܡܰܬ ܐܶܬܕܰܟܺܝܘ܆ ܐܰܟܙܢܳܐ ܕܗܳܝܕܶܝܢ ܠܰܒܢܰܝ̈ܳܐ ܕܺܐܝܣܪܳܐܶܝܠ ܕܒܰܡܠܶܐ ܙܰܒܢܳܐ ܡܕܰܟܶܝܢ ܗ̱ܘܰܘ^[6]܆ ܠܰܘ ܒܰܠܚܽܘܕ ܠܳܐ ܡܶܬܕܰܪܟܳܢܳܐ ‌ܐܺܝܬܰܘܗ̱ܝ܆ ܐܶܠܳܐ ܐܳܦ ܠܳܐ ܡܶܬܓܰܫܦܳܢܳܐ. ܘܠܳܐ ܡܶܬܩܰܪܒܳܢܳܐ.

ܒܪܰܡ. ܠܰܘ ܕܟܽܠ ܟܽܠܶܗ ‌ܐܺܝܬܰܘܗ̱ܝ ܠܳܐ ܡܶܬܓܰܫܦܳܢܳܐ. ܫܰܠܺܝܛ ܗܘ ܠܗܽܘܢ ܓܶܝܪ ܕܰܒܩܽܘܪܒܳܐ ܢܩܽܘܡܽܘܢ܆ ܘܢܶܫܡܥܽܘܢ ܠܩܰܪܢܳܐ ܗܳܝ ܕܰܡܥܰܬܕܳܐ ܠܘܳܬ ܫܶܡܥܳܐ ܕܡ̈ܶܠܶܐ ܡܥܰܠ̈ܝܳܬܳܐ ܕܒܺܐܝܕܳܐ ܒܺܐܝܕܳܐ ܐܰܘܟܺܝܬ ܕܕܽܘܓ̈ܡܰܛܰܐ܆ ܘܥܰܡܽܘܛܳܐܺܝܬ ܒܕܽܘܟ ܠܰܒ̈ܢܳܬ ܩ̈ܳܠܶܐ ܩܰܕܡܳܝ̈ܳܬܳܐ ܕܡܰܠܦܳܢܽܘܬܳܐ ܠܰܡܩܰܒܳܠܽܘ܆ ܐܰܝܟ ܕܰܠܒܰܪ̈ܩܶܐ ܕܡܶܢ ܥܢܳܢܳܐ ܐܰܟܚܕܳܐ ܡܰܢܗܪܺܝܢ ܘܪܳܗܛܺܝܢ܆ ܘܰܒܫܽܘܘ̈ܫܳܛܶܐ ܕܰܠܘܳܬ ܗܳܝ ܕܰܡܝܰܬܪܳܐ ܢܶܬܩܰܪܒܽܘܢ ܘܠܰܩܕܳܡܰܝܗܽܘܢ ܢܶܩܪܒܽܘܢ܆ ܘܰܐܟܚܕܳܐ ܢܶܬܥܰܠܽܘܢ ܒܡܰܫܡܰܥܬܳܐ. ܘܰܕܗܳܕܶܐ. ܗܳܟܰܢܳܐ ܐܺܝܬ ܠܳܗ̇܆ ܡܫܰܪܰܪ ܬܽܘܒ ܟܬܳܒܳܐ ܐܰ‎ܠܳܗܳܝܳܐ. ܟܰܕ ܐܳܡܰܪ: ܗܳܘܶܝܢ ܗ̱ܘܰܘ ܕܶܝܢ ܩ̈ܳܠܶܐ ܕܩܰܪܢܳܐ ܕܢܳܦܩܺܝܢ ܗ̱ܘܰܘ. ܕܝܰܬܺܝܪ ܬܰܩܺܝܦܺܝܢ ܗ̱ܘܰܘ ܣܰܓܺܝ. ܡܽܘܫܶܐ ܡܡܰܠܶܠ ܗ̱ܘܳܐ. ܐܰ‎ܠܳܗܳܐ ܕܶܝܢ. ܥܳܢܶܐ ܗ̱ܘܳܐ ܠܶܗ ܒܩܳܠܳܐ^[7].

ܙܳܕܶܩ ܠܰܢ ܗܳܟܺܝܠ. ܕܩܰܕܡܳܐܺܝܬ ܢܶܩܥܶܐ^[8] ܒܩܰܪܢܳܐ܆ ܘܒܳܬܰܪܟܶܢ ܢܦܽܘܚ ܚܰܨܺܝܦܽܘܬܳܗ̇ ܕܡܰܦܽܘܚܺܝܬܳܐ܆ ܘܗܳܟܰܢܳܐ ܢܫܰܐܶܠ ܠܰܐܠܳܗܳܐ ܘܰܢܡܰܠܶܠ ܠܘܳܬܶܗ܆ ܘܢܶܫܡܰܥ ܗܳܠܶܝܢ ܕܡܶܢ ܠܘܳܬܶܗ܆ ܘܰܢܝܰܒܶܠ ܢܰܥܒܰܪ ܐܶܢܽܘܢ ܠܩ̈ܳܠܶܐ ܨܶܝܕ ܐ̱ܚܪ̈ܳܢܶܐ. ܡܶܛܽܠ ܕܶܝܢ ܕܶܐܢܳܐ. ܐܳܦܠܳܐ ܕܶܐ݀ܩܥܶܐ ܒܩܰܪܢܳܐ ܣܳܦܶܩ ܐ̱ܢܳܐ܆ ܫܒܽܘܩ ܕܶܐ݀ܡܰܠܶܠ ܠܘܳܬ ܐܰ‎ܠܳܗܳܐ܆ ܘܰܠܡ̈ܶܠܶܐ ܕܗܰܘ ܐܶ݀ܫܰܡܶܫ܆ ܒܩܰܪܢܳܐ ܪܳܥܝ̣ܳܝ̣ܬܳܐ ܕܰܐܒܳܗ̈ܳܬܳܐ ܘܡܰܠ̈ܦܳܢܶܐ ܕܥܺܕܬܳܐ ܡܶܬܚܰܫܰܚ ܐ̱ܢܳܐ܆ ܒܰܕܡܽܘܬ ܒܪܳܐ ܕܪܳܥܝܳܐ ܡܢܰܣܝܳܐ܆ ܕܡܶܢ ܐܽܘܡܳܢܽܘܬܳܐ ܡܰܢ ܐܰܒܳܗܳܝܬܳܐ ܣܰܓܺܝ ܠܪܽܘܚܩܳܐ ܚܰܣܺܝܪ܆ ܕܽܐܘܪ̈ܓܰܢܶܐ ܕܶܝܢ ܐܽܘܡܳܢܳܝ̈ܶܐ ܗܘ̣ܳܐ ܝܳܪܬܳܐ܆ ܗܳܢܽܘܢ ܕܳܐܦ ܚܰܝ݂ܺܝܢ ܠܰܐܠܳܗܳܐ ܘܟܰܕ ܡܶܢ ܗܳܪܟܳܐ ܐܶܙܰܠܘ܆ ܘܗܳܫܳܐ ܩܳܝܡܺܝܢ ܚܕܳܪ̈ܰܝܢ ܘܚܳܝܪܺܝܢ ܒܰܢ܆ ܥܰܡ ܚܰܝ̈ܠܰܘܳܬܳܐ ܡܶܬܗܰܘ̈ܢܳܢܶܐ ܘܰܕܠܳܐ ܓܫܽܘܡ. ܘܡܶܢ ܝܽܘܠܦܳܢ̈ܶܐ ܗܳܠܶܝܢ ܕܰܠܗܳܢܽܘܢ ܥܡܺܝܠܺܝܢ. ܐܶ݀ܦܽܘܚ ܒܩܰܪܢܳܐ܆ ܘܺܐ݀ܡܰܪ ܗܳܠܶܝܢ ܕܰܠܗܽܘܢ ܐܶܬܶܐܡܰܪ̈ܶܝܢ ܡܶܢ ܐܰ‎ܠܳܗܳܐ.

ܐܳܦ ܓܶܝܪ ܗܶܢܽܘܢ. ܟܰܕ ܢܳܩܦܺܝܢ ܠܢܳܡܽܘܣܳܐ ܘܠܰܢܒܺܝ̈ܶܐ ܘܠܶܐܘܰܢܓܶܠܺܝ̈ܰܐ. ܘܠܰܫܠܺܝ̈ܚܶܐ܆ ܐܰܫܠܶܡܘ ܠܰܢ ܠܰܡܗܰܝܡܳܢܽܘ܆ ܒܚܰܕ ܐܰ‎ܠܳܗܳܐ ܐܰܒܳܐ ܐܰܚܺܝܕ ܟܽܠ܆ ܥܳܒܽܘܕܳܐ ܕܰܫܡܰܝܳܐ ܘܕܰܐܪܥܳܐ܆ ܘܰܕܟܽܠܗܶܝܢ ܗܳܠܶܝܢ ܕܡܶܬܚܰܙ̈ܝܳܢ ܘܰܕܠܳܐ ܡܶܬܚܰܙ̈ܝܳܢ. ܒܗܳܝ ܡܰܢ ܗܳܟܺܝܠ ܕܶܐܡܰܪܘ. ܚܰܕ ܐܰ‎ܠܳܗܳܐ܆ ܠܛܳܥܝܽܘܬܳܐ ܕܚܰܢ̈ܦܶܐ ܙܢܰܩܘ܆ ܘܰܠܟܶܢܫܳܐ ܣܰܓܺܝܳܐܐ ܕܰܐ‌ܠܳܗ̈ܶܐ ܕܰܓ̈ܳܠܶܐ ܫܕܰܘ ܠܬܰܚܬ܆ ܗܰܘ ܕܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܡܶܢ ܡ̈ܰܬܠܶܐ ܗܳܠܶܝܢ ܕܰܠܘܳܬ ܗܳܢܽܘܢ ܥ̣ܰܠ ‌ܐܶܬܬܰܥܡܰܪ ܒܰܫܡܰܝܳܐ. ܐܰܝܟ ܕܰܠܡܺܐܡܰܪ. ܟܰܕ ܥܰܡ ܢܒܺܝܳܐ ܐܶܪܰܡܝܳܐ ܐܳܡܪܺܝܢ: ܐܰ‎ܠܳܗ̈ܶܐ ܗܳܢܽܘܢ ܕܰܫܡܰܝܳܐ ܘܰܐܪܥܳܐ. ܠܳܐ ܥܒܰܕܘ܆ ܢܺܐܒܕܽܘܢ ܡܶܢ ܐܰܪܥܳܐ܆ ܘܡܶܢ ܬܚܶܝܬ ܫܡܰܝܳܐ ܗܳܢܳܐ^[9].

ܒܗܳܝ ܕܶܝܢ ܕܰܐܘܕܝܽܘܗ̱ܝ ܐܰܒܳܐ܆ ܓܰܠܝܳܐܺܝܬ ܚܰܘܺܝܘ܆ ܕܗܽܘ ‌ܐܺܝܬܰܘܗ̱ܝ ܪܺܝܫܺܝܬܳܐ ܘܰܡܥܺܝܢܳܐ ܕܰܗܘܳܝܳܐ ܘܩܽܘܝܳܡܳܐ ܕܗܳܠܶܝܢ ܕܺܐܝܬܰܝܗܶܝܢ. ܐܶܠܳܐ. ܠܰܘ ܤܛܰܪ ܡܶܢ ܒܪܳܐ ܗܰܘ ܫܘܶܐ ܒܰܡܬܽܘܡܳܝܽܘܬܳܐ܆ ܗܰܘ ܕܥܰܡܶܗ ܐܰܟܚܕܳܐ ܥܰܒ̣ܕܶܗ ܠܗܳܢܳܐ ܟܽܠ. ܐܰܝܟܰܢܳܐ ܓܶܝܪ ܡܳܪܳܢܳܐܺܝܬ ܐܶܬܩܪܺܝ ܐܰܒܳܐ܆ ܟܰܕ ܠܳܐ ‌ܐܺܝܬܰܘܗ̱ܝ ܒܪܳܐ ܚܰܬܺܝܬܳܐ ܘܫܰܪܺܝܪܳܐ܆ ܘܫܰܘܬܳܦܳܐ ܥܰܡܳܗ̇ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܘܕܰܟܝܳܢܳܐ܆ ܗܰܘ ܕܒܺܐܝܕܰܘ̈ܗ̱ܝ܆ ܐܳܦ ܕܺܝܠܗܶܝܢ ܕܒܶܪ̈ܝܳܬܳܐ ܟܽܠܗܶܝܢ ܡܶܬܶܐܡܰܪ ܐܰܒܳܐ܆ ܐܰܝܟ ܡܰܢ ܕܰܒܝܰܕ ܒܪܶܗ ܚܰܒܺܝܒܳܐ ܐܶܬܒܪ̈ܺܝܶܢ. ܕܗܰܘ ܡܰܢ ܓܶܝܪ. ܐܰܝܟ ܝܰܠܕܳܐ܆ ܒܰܟܝܳܢܳܐ ‌ܐܺܝܬܰܘܗ̱ܝ ܐܰܒܳܐ. ܕܗܳܢܶܝܢ ܕܶܝܢ. ܐܰܝܟ ܕܒܶܪ̈ܝܳܬܳܐ. ܒܛܰܝܒܽܘܬܳܐ ܡܶܬܶܐܡܰܪ ܐܰܒܳܐ܆ ܟܰܕ ܥܳܒܽܘܕܳܐܺܝܬ ܗܳܝ ܕܢܶܗܘ̈ܝܳܢ ܐܺܝܬܰܝܗܶܝܢ ܡܫܰܟܶܢ ܠܗܶܝܢ.

ܟܰܕ ܗܳܟܺܝܠ ܡܗܰܝܡܢܺܝܢ ܐܢ̱ܬܽܘܢ. ܒܚܰܕ ܐܰ‎ܠܳܗܳܐ ܐܰܒܳܐ܆ ܐܰܢ̱ܬܽܘܢ ܗܳܢܽܘܢ ܕܰܠܗܳܕܶܐ ܡܰܠܦܳܢܽܘܬܳܐ ܡܰܥܠܳܢܺܝܬܳܐ. ܐܰܘܟܺܝܬ ܕܫܽܘܪܳܝܳܐ ܕܡܰܥܰܠܬܳܐ. ܫܳܡܥܺܝܢ ܐܢ̱ܬܽܘܢ܆ ܐܰܘܣܶܦܘ ܐܰܘܕܰܘ ܕܺܐܝܬܰܘܗ̱ܝ ܗܳܢܳܐ. ܐܳܦ ܐܰܚܺܝܕ ܟܽܠ܆ ܘܰܟܦܽܘܪܘ̱ ܒܪܺܝܫܳܢܽܘܬܳܐ ܒܺܝܫܬܳܐ ܕܡܰܢܺܝܢܳܝ̈ܶܐ܆ ܘܰܗܘܳܝܳܐ ܕܒܺܝ̈ܫܳܬܳܐ ܐܰܝܟ ܡܶܠܬܗܽܘܢ܆ ܗܳܝ ܕܳܐܦ ܚܶܫܽܘܟܳܐ ܠܳܐ ܥܒܺܝܕܳܐ ܟܰܢܝܽܘܗ̇ ܗܳܢܽܘܢ ܙܰܝ̈ܳܥܶܐ܆ ܘܰܒܫܽܘܠܛܳܢܳܐ ܢܳܡܽܘܣܳܝ ܢܰܦܫܶܗ ܐܶܡܰܪܘ ܕܽܐܘܣܺܝܰܐ ܐܺܝܬܶܝܗ̇ ܟܰܕ ܕܠܳܐ ܝܳܬܳܐ ܐܺܝܬܶܝܗ̇ ܘܰܕܠܳܐ ܩܢܽܘܡܳܐ܆ ܘܠܽܘܩܒܰܠ ܗܳܝ ܕܰܚܕܳܐ ܪܺܝܫܳܢܽܘܬܳܐ ܐܺܝܬܶܝܗ̇ ܘܕܰܠܟܽܠ ‌ܐܰܚܺܝܕܳܐ܆ ܠܽܘܩܒܰܠ ܢܽܘܗܪܳܐ ܫܰܪܺܝܪܳܐ ܐܳܡܰܪ ܐ̱ܢܳܐ ܘܡܶܬܗܰܘܢܳܢܳܐ ܘܽܐܘܣܝ̣ܳܝ̣ܳܐ܆ ܒܰܕܡܽܘܬ ܛܪܽܘܢܳܐ ܡܶܕܶܡ ܐܰܩܺܝܡܽܘܗ̇܆ ܘܡܶܢܳܗ̇ ܐܰܝܟ ܕܡܶܢ ܡܥܺܝܢܳܐ ܣܪܺܝܬܳܐ܆ ܐܳܡܪܺܝܢ ܕܪ̈ܳܕܝܳܢ ܒܺܝ̈ܫܳܬܳܐ.

ܐܷܠܳܐ ܐܶܢܗܽܘ ܕܠܳܐ ܥܒܺܝܕܬܳܐ. ܘܰܕܠܳܐ ܪܺܝܫܳܐ. ܣܳܝܡܺܝܢ ܠܳܗ̇ ܕܺܐܝܬܶܝܗ̇܆ ܡܶܢ ܟܽܠܦܪܽܘܤ ܢܺܐܡܪܽܘܢ ܕܺܐܝܬܶܝܗ̇܆ ܐܳܦ ܠܳܐ ܡܶܣܬܰܝܟܳܢܺܝܬܳܐ. ܕܗܰܘ ܓܶܝܪ ܕܺܐܝܬܰܘܗ̱ܝ ܠܳܐ ܒ̣ܰܪܝܳܐ ܘܰܕܠܳܐ ܪܺܝܫܳܐ܆ ܕܺܝܠܳܝܬܳܐ ܗ̱ܝ ܗܳܝ ܕܠܳܐ ܡܶܣܬܰܝܟܳܢܳܐ ܢܶܗܘܶܐ ‌ܐܺܝܬܰܘܗ̱ܝ. ܐܰܝ̇ܕܳܐ ܗܳܟܺܝܠ ܕܽܘܟܬܳܐ ܬܶܗܘܶܐ ܕܺܝܠܳܗ̇܆ ܘܰܕܪܺܝܫܳܢܽܘܬܳܐ ܗܳܝ ܛܳܒܬܳܐ܆ ܟܰܕ ܠܳܐ ܡܶܣܬܰܝܟܳܢܺܝܬܳܐ ܐܺܝܬܶܝܗ̇ ܐܳܦ ܗܺܝ ܐܰܝܟ ܠܳܐ ܥܒܺܝܕܬܳܐ ܘܕܰܠܟܽܠ ܡܰܠܝܳܐ. ܐܰܘ ܓܶܝܪ ܟܽܠܚܕܳܐ ܡܶܢܗܶܝܢ. ܡܶܣܬܰܝܟܳܢܺܝܬܳܐ ܬܶܗܘܶܐ ܐܺܝܬܶܝܗ̇܆ ܘܢܶܦ̣̈ܠܳܢ ܠܗܶܝܢ ܡܶܢ ܗܳܝ ܕܢܶܗ̈ܘܝܳܢ ܐܺܝܬܰܝܗܶܝܢ ܐܰ‎ܠܳܗܳܐ܆ ܡܶܛܽܠ ܟܺܝܬ ܕܡܶܣܬܰܝܟܳܢܽܘܬܳܐ. ܢܽܘܟܪܳܝܬܳܐ ܗ̱ܝ ܕܰܐ‎ܠܳܗܽܘܬܳܐ܆ ܐܰܘ ܟܰܕ ܠܳܐ ܡܶܣܬܰܝܟܳܢ̈ܝܳܬܳܐ ܐܺܝܬܰܝܗܶܝܢ܆ ܠܳܐ ܡܰܨܝܳܐ ܕܰܐܟܚܕܳܐ ܢܶܗ̈ܘܝܳܢ܆ ܟܰܕ ܐܳܦ ܒܨܶܒܝܳܢܳܐ ܐܳܦ ܒܽܐܘܣܺܝܰܐ ܐܺܝܬܰܝܗܶܝܢ ܡܦܰܠ̈ܓܳܬܳܐ. ܐܳܦ ܓܶܝܪ ܘܠܳܐ ܚܕܳܐ ܫܰܘܬܳܦܽܘܬܳܐ ܐܺܝܬ ܠܢܽܘܗܪܳܐ ܠܘܳܬ ܚܶܫܽܘܟܳܐ^[10]܆ ܐܰܝܟܰܢܳܐ ܕܰܠܦܰܘܠܽܘܤ ܘܠܶܗ ܠܰܫܪܳܪܳܐ ܫܳܦܪܳܐ. ܐܶܢ ܕܶܝܢ ܢܶܬܶܠ. ܐܰܝܟ ܕܰܒܫܽܘܒܩܳܢܳܐ܆ ܕܳܐܦ ܠܳܐ ܡܶܣܬܰܝܟܳܢ̈ܝܳܬܳܐ. ܐܳܦ ܠܳܐ ܥܒܺܝ̈ܕܳܬܳܐ. ܐܺܝܬܰܝܗܶܝܢ܆ ܬܠܺܝܬܳܝܳܐ ܡܶܕܶܡ ܕܺܐܝܬܰܘܗ̱ܝ ܐܳܦ ܗܽܘ ܠܳܐ ܥܒܺܝܕܳܐ ܐܰܢܰܢܩܺܐ ܕܰܢܣܺܝܡ ܒܰܝܢܳܬ ܗܳܠܶܝܢ܆ ܗܰܘ ܕܰܐܟܙܢܳܐ ܕܰܒܡܶܨܥܰܬ ܬܚܽܘ̈ܡܶܐ ܣܺܝܡ܆ ܘܦܳܣܶܩ ܘܟܳܠܶܐ ܠܬܰܪ̈ܬܰܝܗܶܝܢ ܡܶܢ ܚ̈ܕܳܕܶܐ.

ܐܷܠܳܐ. ܐܳܡܪܺܝܢ ܗܳܢܽܘܢ ܕܗܳܠܶܝܢ ܛܰܡ̈ܐܘܳܬܳܐ ܣܳܒ̈ܬܳܢܳܝܳܬܳܐ ܘܛܰܢ̈ܦܳܬܳܐ ܓܳܒܠܺܝܢ܆ ܠܰܘ ܓܶܝܪ ܕܽܘܓ̈ܡܰܛܰܐ܆ ܕܶܐܬܪܰܓܪܓܰܬ ܪܺܝܫܳܢܽܘܬܳܐ ܗܳܝ ܒܺܝܫܬܳܐ ܠܗܳܝ ܛܳܒܬܳܐ܆ ܘܰܠܘܳܬ ܢܽܘܗܪܳܐ ܕܺܝܠܳܗ̇ ܪܚܽܘܡܳܐܺܝܬ ܪܶܗܛܰܬ܆ ܘܢܶܬܦܰܬ ܡܢܳܬܳܐ ܡܶܕܶܡ ܡܶܢܳܗ̇ ܘܰܒܠܰܥܬܳܗ̇܆ ܘܗܳܟܰܢܳܐ ܠܰܡ ܐܺܝܬܰܝܗܶܝܢ ܒܶܪ̈ܝܳܬܳܐ ܟܰܕ ܐܺܝܬ ܠܗܶܝܢ ܚܽܘܠܛܳܢܳܐ ܡܶܢ ܟܽܠ ܚܕܳܐ ܡܶܢܗܶܝܢ. ܐܰܘ ܡܶܢ ܒܶܕ̈ܝܶܐ ܠܳܐ ܡܶܬܩܺܝܡܳܢ̈ܶܐ^[11] ܘܫܳܛܽܘܪ̈ܶܐ܆ ܕܰܡܠܶܝܢ ܚܰܣܺܝܪܽܘܬ ܗܰܘܢܳܐ ܘܰܫܟܺܝܪܽܘܬܳܐ. ܐܰܝܟܰܢܳܐ ܓܶܝܪ ܒܺܝܫܬܳܐ ܗܳܝ ܕܒܽܐܘܣܺܝܰܐ܆ ܬܶܬܪܰܓܪܰܓ ܗ̱ܘܳܬ ܠܗܳܝ ܛܳܒܬܳܐ. ܗܳܠܶܝܢ ܓܶܝܪ ܕܽܐܘܣܺܝ̈ܰܐܤ܆ ܩܒܺܝ̈ܥܳܬܳܐ ܒܕܽܘܟ ܐܺܝܬܰܝܗܶܝܢ ܐܰܝܟܰܢ ܕܗܽܘ ܘܠܳܐ ܡܶܫܬܰܚܠܦܳܢ̈ܝܳܬܳܐ܆ ܘܗܳܕܶܐ. ܐܳܦ ܠܰܬܚܽܘ̈ܡܶܐ ܕܰܟܝܳܢܳܐ ܐܺܝܬܶܝܗ̇ ܝܺܕܺܝܥܬܳܐ. ܒܗܳܝ ܟܺܝܬ ܕܳܐܦ ܐܰ‎ܠܳܗܳܐ ܛܳܒܳܐ܆ ܟܰܕ ܒܽܐܘܣܺܝܰܐ ‌ܐܺܝܬܰܘܗ̱ܝ ܛܳܒܳܐ܆ ܩܒܺܝܥܳܐܺܝܬ ܘܰܡܫܰܪܪܳܐܺܝܬ ܐܺܝܬ ܠܶܗ܆ ܘܠܳܐ ܚܠܺܝܛܳܐܺܝܬ. ܘܠܳܐ ܡܶܨܛܰܠܝܳܢܳܐܺܝܬ ܠܘܳܬ ܗܳܝ ܕܣܰܩܽܘܒܠܳܝܳܐ.

ܡܳܢܳܐ ܕܶܝܢ ܐܰܪܰܐ ܐܺܝܬܶܝܗ̇ ܐܳܦ ܗܺܝ ܒܳܠܽܘܥܽܘܬܳܐ ܗܳܝ ܕܒܶܠܥܰܬ ܒܺܝܫܬܳܐ ܠܰܡܢܳܬܳܐ ܡܶܢ ܛܳܒܬܳܐ. ܟܰܝ܆ ܐܰܝܟ ܗܳܠܶܝܢ ܚܳܛܽܘ̈ܦܝܳܬܳܐ ܕܡܶܢ ܚܰܝ̈ܘܳܬ݂ ܫܶܢܳܐ. ܒܫܶܢ̈ܶܝܗ̇ ܠܗܳܕܶܐ ܦܶܣܩܰܬ܆ ܘܗܳܟܰܢܳܐ ܒܠܰܥܬܳܗ̇. ܐܰܝܟ ܩܪܽܘܢܽܘܤ ܗܰܘ ܕܡܰܬܠܳܐ܆ ܕܰܕܒܳܠܰܥ ܗ̱ܘܳܐ ܠܰܒܢܰܘ̈ܗ̱ܝ ܡܶܬܬܰܢܶܐ ܒܬܰܫܥܺܝܬܳܐ܆ ܥܫܺܝܡܳܐ ܕܶܝܢ ܐܰܝܟ ܡܚܺܝܠܬܳܐ. ܗܺܝ ܛܳܒܬܳܐ܆ ܘܰܦܣܺܝܩܰܬ ܡܶܢ ܦܶܠܓܳܐ ܐܺܝܬܶܝܗ̇܆ ܟܰܕ ܡܶܢ ܡܢܳܬܳܐ ܒܰܝܬܳܝܬܳܐ ܕܺܝܠܳܗ̇ ܓܠܺܝܙܳܐ܆ ܘܳܐܦܠܳܐ ܐܺܝܬܶܝܗ̇ ܚܠܺܝܡܬܳܐ ܘܰܕܡܰܠܝܳܐܺܝܬ ܐܺܝܬ ܠܳܗ̇܆ ܒܰܕܡܽܘܬܳܐ ܕܗܳܢܽܘܢ ܕܰܣܓܺܝܦܺܝܢ ܒܪܶܓܠܗܽܘܢ܆ ܐܰܘ ܦܣܺܝܩ ܕܪܳܥܗܽܘܢ.

ܐܷܠܳܐ: ܐܳܦ ܝܰܬܺܝܪܳܐܺܝܬ ܡܶܢ ܗܳܕܶܐ ܬܶܬܣܺܝܡ ܡܩܰܪܒܳܢܳܐܺܝܬ ܠܘܳܬ ܒܺܝܫܬܳܐ܆ ܗܳܝ ܚܳܛܽܘܦܬܳܐ ܘܳܐܟܽܘܠܬܳܐ܆ ܘܕܰܒܠܰܥܬܶܗ ܠܰܚܛܽܘܦܝܳܐ ܒܰܕܡܽܘܬ ܩܺܝܛܽܘܤ. ܠܳܐ ܣܳܥܽܘܪܬܳܐ ܗܳܟܺܝܠ. ܐܰܝܟ ܡܚܺܝܠܬܳܐ. ܬܶܗܘܶܐ ܗܺܝ ܛܳܒܬܳܐ܆ ܬܶܐܚܽܘܕ^[12] ܕܶܝܢ ܒܺܝܫܬܳܐ ܠܚܽܘܕܶܝܗ̇. ܘܬܶܒ̣ܪܶܐ ܘܰܬܩܰܕܡܺܝܘܗ̱ܝ ܠܥܳܠܡܳܐ ܗܳܢܳܐ ܡܶܬܚܰܙܝܳܢܳܐ. ܡܳܕܶܝܢ܆ ܬܚܶܝܬ ܚܕܳܐ ܪܺܝܫܳܢܽܘܬܳܐ ܗܳܝ ܕܚܶܣܢܰܬ̣ ܘܶܐܚܕܰܬ̣ ܐܺܝܬܰܝܢ܆ ܘܰܣܪܺܝܩܳܐ ܡܶܕܶܡ ܡܶܫܬܟܰܚ ܠܗܽܘܢ ܠܪ̈ܰܫܺܝܥܶܐ܆ ܓܒܽܘܠܝܳܐ ܗܰܘ ܡܰܬ̣ܠܳܢܳܝܳܐ ܕܬܰܪܬܶܝܢ ܪ̈ܺܝܫܳܢܘܳܬܳܐ.

ܘܳܐܦ ܪܺܝܫܳܢܽܘܬܳܐ ܕܶܝܢ ܗܳܝ ܒܺܝܫܬܳܐ. ܐܰܘܟܺܝܬ ܗܺܝ ܒܺܝܫܽܘܬܳܐ܆ ܘܚܶܫܽܘܟܳܐ ܗܰܘ ܠܳܐ ܥܒܺܝܕܳܐ܆ ܢܩܽܘܡ ܥܰܠ ܢܰܦܫܶܗ ܠܳܐ ܡܶܫܟܰܚ܆ ܟܰܕ ܐܺܝܬ ܠܶܗ ܡܶܢ ܠܓܰܘ ܕܫܳܓܫܳܐ ܡܢܳܬܳܐ ܗܳܝ ܕܶܐܬܒܰܠܥܰܬ ܕܡܶܢ ܛܳܒܬܳܐ. ܠܰܘ ܓܶܝܪ ܡܶܛܽܠ ܟܺܝܬ ܕܶܐܬܒܰܠܥܰܬ܆ ܗܳܐ ܐܶܫܬܰܚܠܦܰܬ̣ ܠܳܗ̇ ܠܘܳܬ ܐܽܘܣܺܝܰܐ ܗܳܝ ܕܒܺܝܫܬܳܐ. ܡܳܕܶܝܢ ܫܳܓܫܳܐ܆ ܘܕܰܠܩܽܘܒܠܳܐܺܝܬ ܐܺܝܬ ܠܳܗ̇. ܫܓܽܘܫܝܳܐ ܕܶܝܢ܆ ܠܳܐ ܡܬܽܘܡ ܢܶܗܘܶܐ ܐܶܡܳܐ ܕܩܽܘܝܳܡܳܐ ܕܗܳܠܶܝܢ ܕܺܐܝܬܰܝܗܶܝܢ. ܫ̣ܪܰܝܢ ܗܳܟܺܝܠ ܫܳܛܽܘܪ̈ܘܳܬܳܐ ܕܡܰܢܺܝܢܳܝ̈ܶܐ܆ ܒܰܕܡܽܘܬ ܢܰܘܠܳܐ ܘܰܙܩܽܘܪܳܐ ܕܰܓܘܳܓܰܝ܆ ܘܚܰܕ ܐܰ‎ܠܳܗܳܐ ܐܰܚܺܝܕ ܟܽܠ ܙܳܕܶܩ ܠܡܰܘܕܳܝܽܘ. ܢܽܘܗܪܳܐ ܐܽܘܣܝܳܝܳܐ ܘܛܳܒܽܘܬܳܐ ܡܩܰܝܰܡܬܳܐ܆ ܗܳܝ ܕܡܰܢܗܪܳܐ ܠܟܽܠ ܒܰܪܢܳܫܳܐ ܕܳܐܬܶܐ ܠܥܳܠܡܳܐ^[13]܆ ܐܰܝܟܰܢܳܐ ܕܰܟܬܺܝܒ.

ܡܶܢ ܐܰܝܟܳܐ ܗܳܟܺܝܠ ‌ܐܳܡܪܺܝܢ܆ ܐܺܝܬܰܝܗܶܝܢ ܒܺܝ̈ܫܳܬܳܐ؟ ܡܶܢ ܐܰܝܟܳܐ؟ ܡܶܢ ܨܶܒܝܳܢܳܐ ܫܰܠܺܝܛ ܒܝܳܬܶܗ. ܒܨܰܠܡܳܐ ܓܶܝܪ ܕܺܝܠܶܗ ܥܒܰܕ ܠܰܢ ܐܰ‎ܠܳܗܳܐ^[14]܆ ܟܰܕ ܝܰܗ̱ܒ ܢܰܦܫܳܐ ܡܠܺܝܠܬܳܐ܆ ܕܝܽܘܩ̈ܢܶܐ ܐܰ‎ܠܳܗܳܝ̈ܶܐ ܗܺܝ ܒܳܗ̇ ܡܰܝܬܝܳܐ܆ ܒܗܳܝ ܕܰܕܠܳܐ ܓܫܽܘܡ ܐܺܝܬܶܝܗ̇܆ ܒܗܳܝ ܕܰܒܡܰܥܒܕܳܢ̈ܘܳܬܳܐ ܡܶܬܗܰܘܢܳܢܳܝ̈ܳܬܳܐ ܠܘܳܬ ܟܽܠܗܶܝܢ ܗܳܠܶܝܢ ܕܶܐܢ ܬܶܨܒܶܐ ܐܰܝܟ ܕܡܰܨܝܳܐ ܡܶܬܦܰܫܛܳܐ ܘܡܶܬܡܰܬܚܳܐ ܘܰܒܕܽܘܟܬܳܐ ܠܳܐ ܣܳܟ ܡܶܣܬܰܝܟܳܐ܆ ܘܰܒܗܳܝ ܕܰܡܩܰܒܠܳܢܺܝܬܳܐ ܐܺܝܬܶܝܗ̇ ܕܰܡܝܰܬܪ̈ܳܬܳܐ܆ ܕܰܐܝܟ ܐܰܝܟܰܢ܆ ܕܙܰܕܺܝܩܽܘܬܳܐ ܘܰܕܗܳܠܶܝܢ ܕܫܰܪܟܳܐ.

ܒܽܐܘܣܺܝܰܐ ܡܰܢ ܓܶܝܪ܆ ܐܰ‎ܠܳܗܳܐ ܒܰܠܚܽܘܕܰܘܗ̱ܝ ‌ܐܺܝܬܰܘܗ̱ܝ ܙܰܕܺܝܩܳܐ ܘܗܺܝ ܙܰܕܺܝܩܽܘܬܳܐ. ܒܰܡܫܰܘܬܦܽܘܬܳܐ ܕܶܝܢ܆ ܚܢܰܢ ܟܰܕ ܠܘܳܬ ܡܕܰܡܝܳܢܽܘܬܳܐ ܕܗܰܘ ܡܶܬܥܰܠܶܝܢ ܚ̱ܢܰܢ. ܡܶܛܽܠܗܳܕܶܐ܆ ܐܳܦ ܒܪܺܝܫܳܢܽܘܬܳܐ ܗܳܝ ܕܥܰܠ ‌ܐܰܪܥܳܐ ܐܶܬܝܰܩܰܪܢܰܢ. ܫܡܰܥܢܰܢ ܓܶܝܪ܆ ܪܒ̣ܰܘ. ܘܰܣܓܰܘ. ܘܰܡ̣ܠܰܘ ܐܰܪܥܳܐ܆ ܘܶܐܫܬܰܠܰܛܘ ܥܠܶܝܗ̇. ܘܰܗܘ̣ܰܘ ܪ̈ܺܝܫܳܢܶܐ ܥܰܠ ܢܽܘ̈ܢܶܐ ܕܝܰܡܳܐ. ܘܥܰܠ ܦܳܪ̈ܚܳܬܳܐ ܕܰܫܡܰܝܳܐ. ܘܥܰܠ ܟܽܠܗܶܝܢ ܒܥܺܝܪ̈ܳܐ. ܘܥܰܠ ܟܽܠܳܗ̇ ܐܰܪܥܳܐ܆ ܘܥܰܠ ܟܽܠܳܗ̇ ܪܰܚܫܳܐ ܕܪܳܚܶܫ ܥܰܠ ‌ܐܰܪܥܳܐ^[15].

ܐܶܫܬܰܟܢܰܬ ܕܶܝܢ ܡܶܢ ܫܦܺܝܥܽܘܬܳܐ ܠܰܒܢܰܝ̈ܢܳܫܳܐ܆ ܐܳܦ ܗܳܝ ܕܢܶܗܘܽܘܢ ܐܰܚܺܝ̈ܕܰܝ ܗܶܢܽܘܢ ܠܗܽܘܢ ܘܫܰܠܺܝ̈ܛܰܝ ܒܝܳܬܗܽܘܢ. ܘܥܰܪ̈ܩܶܐ ܕܚܰܝ̈ܶܐ ܕܺܝܠܰܢ܆ ܠܰܢ ܗܰܝܡܶܢ ܐܶܢܶܝܢ ܐܰ‎ܠܳܗܳܐ. ܒܗܳܝ ܓܶܝܪ ܕܣܰܓܺܝ ܪܰܒܳܐ ܡܚܰܓܰܪ ܗ̱ܘܳܐ ܗܽܘ ܨܰܠܡܳܐ܆ ܐܶ‎ܠܽܘ ܡܶܢ ܩܛܺܝܪܳܐ ܡܶܕܶܡ ܡܶܬܕܰܒܪܺܝܢ ܗ̱ܘܰܝܢ܆ ܘܠܰܘ ܠܦܽܘܬ ܬܰܦܟܢܳܐ ܗܰܘ ܕܰܒܨܰܠܡܶܗ ܗܘܰܝܢܰܢ܆ ܥܳܬܪܺܝܢ ܗ̱ܘܰܝܢ ܠܫܰܠܺܝܛܽܘܬ ܒܝܳܬܳܐ ܘܰܠܚܺܐܪܽܘܬܳܐ. ܐܶܠܳܐ. ܒܺܐܝܩܳܪܳܐ ܗܳܢܳܐ. ܠܘܳܬ ܗܳܝ ܕܘܳܠܝܳܐ ܗ̱ܘܳܬ݂. ܠܳܐ ܐܶܬܚܰܫܰܚܢܰܢ. ܘܒܰܪܢܳܫܳܐ ܟܰܕ ܒܺܐܝܩܳܪܳܐ ‌ܐܺܝܬܰܘܗ̱ܝ ܗ̱ܘܳܐ. ܠܳܐ ܐܶܣܬܰܟܰܠ^[16]. ܐܰܝܟ ܕܰܟܬܺܝܒܳܐ.

ܐܳܦ ܓܶܝܪ ܚܰܝܳܒܺܝܢ^[17] ܗ̱ܘܰܝܢ. ܕܰܠܫܽܘܦܪܳܐ ܗܰܘ ܡܶܬܗܰܘܢܳܢܳܐ ܘܰܐ‌ܠܳܗܳܝܳܐ ܢܶܪܰܓ܆ ܘܰܠܢܳܡܽܘ̈ܣܶܐ ܕܗܰܘ ܢܶܬܬܦܺܝܤ܆ ܘܰܠܚܺܐܦܳܗ̇ ܕܬܰܪܥܺܝܬܳܐ ܗܰܘ ܫܰܠܺܝܛ ܒܝܳܬܶܗ. ܠܘܳܬ ܗܳܢܳܐ ܢܰܗܦܟܺܝܘܗ̱ܝ ܆ ܟܰܕ ܐܰܗܦܶܟܢܰܢ ܡܶܢ ܬܰܡܳܢ ܠܥܰܝܢܳܐ ܕܺܝܠܰܢ܆ ܠܘܳܬ ܚܛܺܝܬܳܐ ܗܳܝ ܕܺܐܝܬܶܝܗ̇ ܣܰܡܝܽܘܬܳܐ ܡܶܬܗܰܘܢܳܢܺܝܬܳܐ ܢܚܶܬܢܰܢ. ܐܰܟܙܢܳܐ ܗܳܟܺܝܠ. ܕܥܰܝܢܳܐ ܡܰܢ ܒ̣ܪܳܐ ܠܰܢ ܐܰ‎ܠܳܗܳܐ܆ ܡܩܰܒܠܳܢܺܝܬܳܐ ܕܢܽܘܗܪܳܐ ܘܰܡܬܰܪܨܳܢܺܝܬܳܐ ܕܗܰܠ̈ܟܳܬܳܐ ܕܪ̈ܶܓܠܰܝܢ܆ ܐܶܢ ܕܶܝܢ ܒܨܶܒܝܳܢܰܢ ܢܥܰܡܨܺܝܗ̇ ܠܗܳܕܶܐ܆ ܚܢܰܢ ܠܰܢ ܥܳܒܕܺܝܢ ܚ̱ܢܰܢ ܣܰܡܝܽܘܬܳܐ܆ ܒܶܗ ܟܰܕ ܒܶܗ ܒܰܙܢܳܐ܆ ܠܗܰܘܢܳܐ ܡܰܢ ܗܰܘ ܕܒܰܢ ܥܒܰܕ ܒܰܕܡܽܘܬ ܥܰܝܢܳܐ܆ ܕܡܶܫܟܰܚ ܠܡܶܣܬܰܟܳܠܽܘ ܗܳܠܶܝܢ ܐܰ‎ܠܳܗܳܝ̈ܳܬܳܐ ܘܢܶܬܢܰܨܰܚ^[18] ܒܢܽܘܗܪܳܐ ܕܡܶܢ ܬܰܡܳܢ܆ ܠܗܳܢܳܐ ܕܶܝܢ ܐܶܢ ܢܶܥܡܽܘܨ܆ ܡܶܚܕܳܐ ܚܶܫܽܘܟܳܐ ܗܰܘ ܕܰܚܛܺܝܬܳܐ ܗܳܘܶܐ ܒܰܢ ܒܰܕܡܽܘܬܳܐ ܕܣܰܡܝܽܘܬܳܐ. ܣܰܡܝܽܘܬܳܐ ܕܶܝܢ܆ ܓܠܺܝܙܽܘܬܳܐ ܕܢܽܘܗܪܳܐ ܐܺܝܬܶܝܗ̇. ܕܰܓܠܺܝܙܽܘܬܳܐ ܕܶܝܢ܆ ܠܳܐ ‌ܐܺܝܬܰܘܗ̱ܝ ܐܰ‎ܠܳܗܳܐ ܥܳܒܽܘܕܳܐ. ܕܽܐܘܣܺܝ̈ܰܐܤ ܓܶܝܪ ‌ܐܺܝܬܰܘܗ̱ܝ ܒܳܪܽܘܝܳܐ܆ ܘܠܰܘ ܕܠܳܐ ܐܺܝܬܽܘܬܳܐ ܘܠܳܐ ܫܟܺܝܚܽܘܬܳܐ. ܡܳܕܶܝܢ܆ ܕܠܳܐ ܝܳܬܳܐ. ܘܠܳܐ ܐܽܘܣܝܳܝܬܳܐ ܐܺܝܬܶܝܗ̇ ܚܛܺܝܬܳܐ ܘܒܺܝܫܽܘܬܳܐ. ܫܽܘܚܠܳܦܳܐ ܓܶܝܪ ܐܺܝܬܶܝܗ̇ ܕܨܶܒܝܳܢܳܐ ܛܳܒܳܐ.

ܐܷܠܳܐ ܙܳܕܶܩ ܗ̱ܘܐ ܠܰܡ. ܐܳܡܪܺܝܢ: ܕܠܳܐ ܡܶܫܬܰܚܠܦܳܢ̈ܶܐ ܠܘܳܬ ܚܛܺܝܬܳܐ ܢܶܬܒ̣ܪܶܐ. ܐܶܠܳܐ ܗܳܠܶܝܢ ܡܰܢ܆ ܕܗܳܢܽܘܢ ܕܣܳܝܡܺܝܢ ܢܳܡܽܘܣܳܐ ܝܰܬܺܝܪܳܐܺܝܬ ܐܺܝܬܰܝܗܶܝܢ܆ ܘܠܳܐ ܙܳܕܶܩ ܗ̱ܘܳܐ ܐܰܝܟܰܢܳܐ ܕܳܐܡܰܪ ܫܠܺܝܚܳܐ ܕܬܺܐܡܰܪ ܓܒܺܝܠܬܳܐ ܠܗܰܘ ܕܓܰܒܠܳܗ̇܆ ܕܰܠܡܳܢܳܐ ܥܒܰܕܬܳܢܝ ܗܳܟܰܢܳܐ^[19]. ܡܶܣܬܰܒܪܺܝܢ ܠܺܝ ܕܶܝܢ ܒܪܰܡ. ܗܳܢܽܘܢ ܕܗܳܠܶܝܢ ܐܳܡܪܺܝܢ܆ ܕܰܠܗܳܝ ܡܰܢ ܕܰܡܠܺܝܠܳܐ ܡܫܺܝܛܺܝܢ܆ ܕܩܰܝ̈ܣܶܐ ܕܶܝܢ ܡܰܠܽܘܢ ܘܟܺܐܦ̈ܶܐ ܚܠܳܦ ܒܢܰܝ̈ܢܳܫܳܐ܆ ܨܳܒܶܝܢ ܗ̱ܘܰܘ ܕܢܶܗܘܽܘܢ ܐܺܝܬܰܝܗܽܘܢ ܗ̱ܘܰܘ܆ ܕܰܠܘܳܬ ܚܛܺܝܬܳܐ ܠܳܐ ܡܶܬܬܙܺܝܥܳܢܳܐܺܝܬ ܐܺܝܬ ܠܗܽܘܢ.

ܐܷܠܳܐ ܨܳܒܶܝܢ ܗ̱ܘܰܝܢ. ܐܳܡܪܺܝܢ: ܘܕܰܡܠܺܝ̈ܠܶܐ ܡܶܕܶܡ ܢܶܗܘܶܐ ܐܺܝܬܰܝܢ ܗ̱ܘܰܝܢ܆ ܘܰܕܠܳܐ ܡܬܽܘܡ ܠܘܳܬ ܚܛܺܝܬܳܐ ܢܶܫܬܰܓܢܶܐ ܘܢܶܫܬܰܚܠܰܦ. ܗܳܕܶܐ ܡܶܟܺܝܠ܆ ܕܗܳܢܽܘܢ ܕܳܐܦ ܠܥܶܠ ܡܶܢ ܟܝܳܢܳܐ ܫܳܘܪܺܝܢ ܐܺܝܬܶܝܗ̇܆ ܘܨܳܒܶܝܢ ܠܡܶܣܰܩ ܠܘܳܬ ܐܽܘܣܺܝܰܐ ܐܰ‎ܠܳܗܳܝܬܳܐ. ܬܠܺܝܬܳܝܽܘܬܳܐ ܓܶܝܪ ܗܳܝ ܩܰܕܺܝܫܬܳܐ ܒܰܠܚܽܘܕܶܝܗ̇܆ ܗܳܝ ܠܳܐ ܒܪܺܝܬܳܐ ܘܰܕܠܳܐ ܪܺܝܫܳܐ ܘܠܳܐ ܥܒܺܝܕܬܳܐ܆ ܐܺܝܬܶܝܗ̇ ܠܳܐ ܡܶܫܬܰܚܠܦܳܢܺܝܬܳܐ ܒܰܟܝܳܢܳܐ ܘܠܳܐ ܡܶܫܬܰܓܢܝܳܢܺܝܬܳܐ. ܟܽܠ ܕܶܝܢ ܒܪܺܝܬܳܐ܆ ܠܫܽܘܚ̈ܠܳܦܶܐ ܡܫܰܥܒܕܳܐ ܘܰܠܫܽܘܓܢܳܝ̈ܶܐ.

ܠܚܰܝ̈ܠܰܘܳܬܳܐ ܕܶܝܢ ܡܰܠܰܐܟܳܝ̈ܶܐ܆ ܠܰܘ ܟܝܳܢܳܐ ܠܳܐ ܡܶܫܬܰܚܠܦܳܢܳܐ܆ ܐܶܠܳܐ. ܛܰܝܒܽܘܬܳܐ ܐܰ‎ܠܳܗܳܝܬܳܐ ܠܒܺܝܟܳܐ ܠܗܽܘܢ܆ ܘܬܶܐܽܘܪܺܝܰܐ ܐܰܡܺܝܢܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܡܰܠܽܘܢ ܕܶܝܢ ܕܡܶܬܢܰܗܪܳܢܽܘܬܳܐ ܕܡܶܢ ܬܰܡܳܢ. ܡܶܢ ܗܳܝ ܕܟܰܕ ܐܰܗܦܶܟ ܚܝܳܪܶܗ ܒܨܶܒܝܳܢܶܗ ܐܳܟܶܠܩܰܪܨܳܐ܆ ܟܰܕ ܚܰܕ ‌ܐܺܝܬܰܘܗ̱ܝ ܗ̱ܘܳܐ ܡܶܢ ܚܰܝ̈ܠܰܘܳܬܳܐ ܗܳܢܽܘܢ ܛܳܒ̈ܶܐ܆ ܡܙܰܡܢܳܢܳܐ ܕܚܶܫܽܘܟܳܐ ܗܘ̣ܳܐ ܗܽܘ ܠܶܗ. ܗܺܝ ܕܶܝܢ ܟܰܕ ܗܺܝ ܗܳܕܶܐ ܚܰܫ̈ܶܝܢ܆ ܐܳܦ ܪ̈ܽܘܚܶܐ ܡܶܬܗܰܘ̈ܢܳܢܳܝܳܬܳܐ ܗܳܠܶܝܢ ܕܰܐܟܚܕܳܐ ܥܰܡܶܗ ܡܰܪ̈ܕܝܳܢ܆ ܘܒܳܬܰܪܟܶܢ ܗܘ̣̈ܰܝ ܒܺܝ̈ܫܳܬܳܐ܆ ܗܳܢܶܝܢ ܟܺܝܬ ܕܡܶܛܽܠ ܚܣܳܡܳܐ܆ ܐܳܦ ܠܰܩܪܳܒܳܐ ܗܰܘ ܕܰܠܘܳܬ ܒܰܪܢܳܫܳܐ ܩܰܒܶܠ̈ܝ ܥܠܰܝܗܶܝܢ. ܐܶܠܳܐ ܐܺܝܬ ܠܰܢ ܠܡܺܐܡܰܪ ܐܺܝܟ ܦܰܘܠܽܘܤ: ܕܚܽܘܒܳܐ ܕܰܡܫܺܝܚܳܐ ܠܒܺܝܟ ܠܰܢ^[20]܆ ܘܰܒܝܰܕ ܩܪܳܒܳܐ ܗܰܘ ܕܰܠܘܳܬ ܗܳܢܶܝܢ܆ ܝܰܬܺܝܪ ܒܚܺܝܪ̈ܶܐ ܥܳܒܶܕ ܠܰܢ. ܒܰܠܚܽܘܕ܆ ܐܶܢܗܽܘ ܕܰܚܢܰܢ ܠܰܢ ܠܳܐ ܢܶܦܪܽܘܩ ܡܶܢ ܚܽܘܒܳܐ ܘܡܶܢ ܛܰܝܒܽܘܬܳܐ܆ ܗܳܝ ܟܺܝܬ ܕܟܰܕ ܥܒܰܕ ܐܳܕܳܡ܆ ܐܶܬܬܰܛܥܺܝ ܡܰܢ ܡܶܢ ܒܺܝܫܳܐ܆ ܗܘ̣ܳܐ ܕܶܝܢ ܛܪܺܝܕܳܐ ܡܶܢ ܦܰܪܕܰܝܣܳܐ.

ܠܰܡܗܰܝܡܳܢܽܘ ܗܳܟܺܝܠ ܙܳܕܶܩ܆ ܕܰܐܚܺܝܕ ܟܽܠ ‌ܐܺܝܬܰܘܗ̱ܝ ܐܰ‎ܠܳܗܳܐ ܐܰܒܳܐ܆ ܘܕܳܐܦܠܳܐ ܚܕܳܐ ܪܺܝܫܳܢܽܘܬܳܐ ܐܺܝܬ ܠܶܗ ܕܰܡܛܰܟܣܳܐ ܠܩܽܘܒܠܶܗ ܣܰܩܽܘܒܠܳܐܺܝܬ܆ ܐܰܝܟ ܪܰܫܺܝܥܽܘܬܳܐ ܕܡܰܢܺܝ̈ܢܶܐ. ܘܕܺܐܝܬܰܘܗ̱ܝ ܟܺܝܬ ܥܳܒܽܘܕܳܐ ܕܟܽܠܗܶܝܢ ܡܶܬܚܰܙܝܳܢ̈ܝܳܬܳܐ ܘܠܳܐ ܡܶܬܚܰܙܝܳܢ̈ܝܳܬܳܐ܆ ܘܠܳܐ ܥܰܠ ܣܰܩܽܘܒܠܳܝܽܘܬܳܐ ܕܶܐܤܛܽܘ̈ܟܣܶܐ ܗܳܠܶܝܢ ܕܡܶܬܚܙܶܝܢ܆ ܐܰ‌ܠܳܗ̈ܶܐ ܡܫܰܚܠ̈ܦܶܐ ܢܩܺܝܡ. ܘܰܐ̱ܚܪܺܢܳܐ ܡܰܢ ܢܶܣܒܰܪ ܕܺܐܝܬܰܘܗ̱ܝ ܥܳܒܽܘܕܳܐ ܕܢܽܘܪܳܐ. ܐ̱ܚܪܺܢܳܐ ܕܶܝܢ ܕܡܰܝ̈ܳܐ. ܐܶܠܳܐ ܢܶܬܒܰܝܰܢ܆ ܕܥܳܠܡܳܐ ܗܳܢܳܐ. ܡܶܢ ܗܳܠܶܝܢ ܕܣܰܩܽܘܒ̈ܠܳܝܳܢ܆ ܠܰܚܕܳܐ ܡܠܰܚܡܽܘܬܳܐ ܘܫܰܦܺܝܪܽܘܬ ܨܶܒܬܳܐ ܡܪܰܟܰܒ܆ ܘܡܶܛܽܠܗܳܕܶܐ ܨܶܒܬܳܐ^[21] ܡܶܬܩܪܶܐ܆ ܘܰܢܫܰܒܰܚ ܠܗܰܘ ܕܗܳܟܰܢܳܐ ܛܰܟܶܤ ܘܠܰܚܶܡ ܗܳܠܶܝܢ ܕܡܶܣܬܰܒܪ̈ܳܢ ܠܳܐ ܡܠܰܚ̈ܡܳܬܳܐ. ܐܳܦ ܓܶܝܪ ܟܰܕ ܠܠܽܘܪܳܐ ܚܳܙܶܐ ܐ̱ܢܳܫ ܕܛܰܪܩܳܐܺܝܬ ܡܬܰܩܢܳܐ ܡܶܢ ܡܶܢ̈ܶܐ ܣܰܩܽܘܒܠܳܝ̈ܳܬܳܐ܆ ܠܘܳܬ ܡܽܘܠܳܝܳܐ ܕܰܚܕܳܐ ܩܺܝܢܬܳܐ ܫܰܦܺܝܪܰܬ ܪܶܟܢܳܐ܆ ܠܩܺܝܬܳܪܽܘܕܳܐ ܢܩܰܠܶܤ.

ܟܰܕ ܕܶܝܢ ܡܗܰܝܡܢܺܝܢ ܐܢ̱ܬܽܘܢ ܒܚܰܕ ܐܰ‎ܠܳܗܳܐ ܐܰܒܳܐ܆ ܗܰܝܡܶܢܘ ܐܳܦ ܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ܆ ܒܪܶܗ ܝܺܚܺܝܕܳܝܳܐ܆ ܗܰܘ ܕܡܶܢ ܐܽܘܣܺܝܰܐ ܕܺܝܠܶܗ ܐܶܬܺܝܠܶܕ܆ ܗܰܘ ܫܘܶܐ ܒܐܽܘܣܺܝܰܐ ܠܰܐܒܳܐ܆ ܕܺܐܝܬܰܘܗ̱ܝ ܢܽܘܗܪܳܐ ܕܡܶܢ ܢܽܘܗܪܳܐ܆ ܘܡܶܢ ܐܰ‎ܠܳܗܳܐ ܫܰܪܺܝܪܳܐ ܐܰ‎ܠܳܗܳܐ ܫܰܪܺܝܪܳܐ܆ ܡܠܬܳܐ܆ ܚܰܝ̈ܶܐ܆ ܨܰܠܡܳܐ ܕܰܐ‎ܠܳܗܳܐ ܠܳܐ ܡܶܬܚܰܙܝܳܢܳܐ܆ ܝܽܘܩܢܳܐ ܕܰܩܢܽܘܡܳܐ ܐܰܒܳܗܳܝܳܐ^[22]. ܗܳܠܶܝܢ ܓܶܝܪ ܟܽܠܗܶܝܢ. ܡܶܬܟܰܢܶܐ ܒܰܕܠܳܐ ܡܶܫܟܰܚ ܚܰܕ ܟܽܘܢܳܝܳܐ ܕܢܶܚܒܽܘܫ ܠܗܳܠܶܝܢ ܕܺܐܝܬ ܠܶܗ܆ ܐܶܠܳܐ ܟܽܠ ܚܰܕ ܡܶܢܗܽܘܢ ܚܰܕ ܡܶܕܶܡ ܦܐܶܐ ܠܰܐܠܳܗܳܐ ܡܚܰܘܶܐ܆ ܘܳܐܦ ܟܰܕ ܠܘܳܬ ܗܳܠܶܝܢ ܐ̱ܚܪ̈ܳܢܝܳܬܳܐ ܠܳܐ ܡܶܫܟܚܳܢܳܐ ‌ܐܺܝܬܰܘܗ̱ܝ ܘܰܠܬܰܚܬ ܣܺܝܡ. ܐܶܡܰܬܝ ܓܶܝܪ ܕܫܳܡܰܥ ܐܰܢ̱ܬ ܒܪܳܐ܆ ܐܶܣܬܰܟܠܳܝܗ̱ܝ ܡܶܢ ܗܳܕܶܐ ܒܰܠܚܽܘܕ܆ ܕܰܫܘܶܐ ܒܽܐܘܣܺܝܰܐ ‌ܐܺܝܬܰܘܗ̱ܝ ܠܰܐܒܳܐ ܗܰܘ ܕܺܝܠܶܗ. ܟܽܠ ܓܶܝܪ ܒܪܳܐ܆ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܘܰܟܝܳܢܳܐ ‌ܐܺܝܬܰܘܗ̱ܝ ܒܳܗ̇ ܒܰܕܡܽܘܬܳܐ ܠܗܰܘ ܕܝܰܠܕܶܗ.

ܠܳܐ ܗܳܟܺܝܠ ܡܶܢ ܗܳܪܟܳܐ ܬܽܘܒ ܠܘܳܬ ܝܺܠܺܝ̈ܕܘܳܬܳܐ ܦܰܓܪ̈ܳܢܳܝܳܬܳܐ ܬܶܬܰܚܬܺܝܘܗ̱ܝ ܠܚܽܘܫܳܒܳܟ܆ ܘܰܠܘܳܬ ܚܽܘܠܛܳܢܳܐ ܕܦܰܓܪ̈ܶܐ ܬܚܽܘܪ ܘܪܶܕܝܳܐ ܘܚܰܫܳܐ. ܐܶܠܳܐ ܡܶܢ ܟܽܘܢܳܝܳܐ ܗܰܘ ܕܰܒܪܳܐ܆ ܠܘܳܬ ܗܰܘ ܕܡܶܠܬܳܐ ܥܒܰܪ܆ ܘܬܶܫܟܚܺܝܘܗ̱ܝ. ܕܰܕܠܳܐ ܪܶܕܝܳܐ. ܘܠܳܐ ܚܰܫܳܢܳܐܺܝܬ ܘܠܳܐ ܓܽܘܫܡܳܢܳܐܺܝܬ ܐܶܬܺܝܠܶܕ܆ ܒܰܕܡܽܘܬ ܡܶܠܬܳܐ. ܐܰܟܙܢܳܐ ܓܶܝܪ ܕܡܶܠܬܳܐ ܗܳܕܶܐ ܕܺܝܠܰܢ. ܡܶܢ ܗܰܘܢܳܐ ܗܰܘ ܕܒܰܢ ܡܶܬܝܰܠܕܳܐ ܠܳܐ ܚܰܫܳܢܳܐܺܝܬ܆ ܘܢܳܦܩܳܐ ܘܰܡܚܰܘܝܳܐ. ܘܡܰܘܕܥܳܐ ܒܝܰܕ ܡܰܦܩܶܗ ܕܩܳܠܳܐ܆ ܘܰܐܝܟ ܗܰܘ ܕܰܡܝܰܩܢܳܐ ܠܶܗ ܠܪܶܥܝܳܢܳܐ ܗܰܘ ܕܰܒܥܽܘܡܩܳܐ ܕܗܰܘܢܳܐ܆ ܗܳܟܰܢܳܐ ܐܳܦ ܠܰܐܠܳܗܳܐ ܐܰܒܳܐ ܠܳܐ ܡܶܬܡܰܠܠܳܢܳܐ܆ ܠܗܰܘ ܗܰܘܢܳܐ ܕܰܠܗܰܠ ܡܶܢ ܟܽܠ܆ ܡܶܠܬܳܐ ܗܰܘ ܕܡܶܢܶܗ ܝܺܠܺܝܕܳܐܺܝܬ ܢܦܰܩ ܡܝܰܩܰܢ^[23]. ܐܳܦ ܓܶܝܪ ܡܰܠܰܐܟܳܐ ܟܬܺܝܒ ܕܺܐܝܬܰܘܗ̱ܝ ܕܬܰܪܥܺܝܬܳܐ ܪܰܒܬܳܐ܆ ܘܨܰܠܡܳܐ ܕܰܐ‎ܠܳܗܳܐ ܠܳܐ ܡܶܬܚܰܙܝܳܢܳܐ^[24]܆ ܟܰܕ ܐܳܡܰܪ ܕܗܰܘ ܕܰܚܙܳܢܝ ܚܙܳܐ ܠܰܐܒܳܐ^[25]. ܡܶܛܽܠܗܳܕܶܐ ܓܶܝܪ ܐܳܦ ܝܺܚܺܝܕܳܝܳܐ ܐܰܡܺܝܪ܆ ܡܶܛܽܠ ܕܰܠܚܽܘܕܰܘܗ̱ܝ ܡܶܢ ܐܰܒܳܐ ܠܚܽܘܕܰܘܗ̱ܝ ܢܦܰܩ. ܘܒܰܠܚܽܘܕܳܝܽܘܬ ܙܢܳܐ܆ ܘܰܡܫܰܚܠܦܳܐܺܝܬ ܠܒܰܪ ܡܶܢ ܟܽܠܗܶܝܢ ܗܳܠܶܝܢ ܝܺܠܺܝܕ̈ܘܳܬܳܐ ܐ̱ܚܪ̈ܳܢܝܳܬܳܐ. ܐܺܝܬ ܠܶܗ ܓܶܝܪ ܠܳܐ ܡܫܰܘܬܦܽܘܬܳܐ. ܐܳܦ ܒܗܳܕܶܐ.

ܐܷܠܳܐ ܡܶܠܬܳܐ ܡܰܢ. ܗܳܝ ܕܺܝܠܰܢ܆ ܟܰܕ ܡܶܢ ܗܰܘܢܳܐ ܡܶܫܬܰܚܠܦܳܢܳܐ ܢܳܦܩܳܐ܆ ܒܳܐܐܰܪ ܡܶܬܰܐܫܕܳܐ ܘܡܶܫܬܰܪܝܳܐ. ܡܶܠܬܳܐ ܕܶܝܢ ܗܰܘ ܕܰܐܒܳܐ ܚܰܝܳܐ. ܘܗܰܘܢܳܐ ܠܳܐ ܡܶܫܬܰܚܠܦܳܢܳܐ ܘܕܰܠܗܰܠ ܡܶܢ ܟܽܠ܆ ܚܰܝܳܐ ‌ܐܺܝܬܰܘܗ̱ܝ ܐܳܦ ܗܽܘ. ܘܕܰܡܩܰܝܰܡ܆ ܘܰܕܗܽܘ ܗܳܟܘܳܬ݂ ܐܺܝܬ ܠܶܗ ܐܰܡܺܝܢܳܐܺܝܬ݂.

ܟܬܺܝܒ ܓܶܝܪ ܕܰܒܪܺܝܫܳܐ ‌ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ. ܘܡܶܠܬܳܐ ‌ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰ‎ܠܳܗܳܐ. ܘܰܐ‌ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ ܗܽܘ ܡܶܠܬܳܐ^[26]. ܕܰܒܪܺܝܫܳܐ ‌ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ. ܫܳܡܰܥ ܐܰܢ̱ܬ܆ ܘܕܰܐ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ܆ ܘܰܐܝܟܰܢܳܐ ܠܗܰܘ ܕܺܐܝܬܰܘܗ̱ܝ ܬܺܐܡܰܪ ܠܳܐ ܡܩܰܝܡܳܐ܆ ܒܰܕܡܽܘܬܳܐ ܕܗܳܕܶܐ ܡܶܠܬܳܐ ܢܳܦܽܘܩܬܳܐ ܕܺܝܠܰܢ. ܐܶܢܕܶܝܢ ܡܶܠܬܳܐ ‌ܐܺܝܬܰܘܗ̱ܝ ܗ̱ܘܳܐ܆ ܘܰܐ‌ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ܆ ܘܰܠܘܳܬ ܐܰ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ܆ ܐܰܡܺܝܢܳܐܺܝܬ ‌ܐܺܝܬܰܘܗ̱ܝ ܗ̱ܘܳܐ. ܒܪܺܝܫܳܐ ܓܶܝܪ ‌ܐܺܝܬܰܘܗ̱ܝ ܗ̱ܘܳܐ. ܕܪܺܝܫܳܐ ܕܶܝܢ ܕܠܳܐ ܙܰܒܢܳܐ܆ ܣܳܟܳܐ ܠܰܝܬ ܠܡܶܫܟܳܚܽܘ. ܒܝܰܕ ܒܪܳܐ ܓܶܝܪ ܐܰܝܟ ܕܰܟܬܺܝܒ ܐܳܦ ܠܥܳܠ̈ܡܶܐ ܥܒܰܕ ܐܰܒܳܐ. ܕܰܐ̱ܚܪܳܝ݂ܝ݂ ܕܶܝܢ ܡܶܢ ܙܰܒܢܳܐ ܢܺܐܡܰܪ ‌ܕܺܐܝܬܰܘܗ̱ܝ܆ ܥܳܒܽܘܕܳܐ ܕܥܳܠܡ̈ܶܐ ܘܰܕܙܰܒ̈ܢܶܐ܆ ܕܫܳܢܝܽܘܬܳܐ ܐܺܝܬܶܝܗ̇. ܫܘܶܐ ܒܰܡܬܽܘܡܳܝܽܘܬܳܐ ܗܳܟܺܝܠ. ‌ܐܺܝܬܰܘܗ̱ܝ ܒܪܳܐ ܠܰܐܒܳܐ܆ ܘܠܰܘ ܕܰܠܚܰܪܬܳܐ ܗܘ̣ܳܐ ܠܶܗ.

ܗܳܢܳܐ. ܐܶܬܒܰܣܰܪ ܡܶܛܽܠܳܬܰܢ. ܒܝܰܘ̈ܡܳܬܳܐ ܐ̱ܚܪ̈ܳܝܶܐ^[27]܆ ܘܶܐܬܒܰܪܢܰܫ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܩܰܕܺܝܫܬܳܐ ܝܳܠܕܰܬ ܐܰ‎ܠܳܗܳܐ ܘܰܒܬܽܘܠܰܬ ܒܟܽܠܙܒܰܢ ܡܰܪܝܰܡ. ܥܶܠܬܳܐ ܕܶܝܢ ܕܡܶܬܒܰܪܢܫܳܢܽܘܬܳܐ ܡܳܢܳܐ ܗ̱ܝ. ܒܰܪܢܳܫܳܐ ܗܰܘ ܕܰܒܨܰܠܡܳܐ ܕܺܝܠܶܗ ܗܘ̣ܳܐ܆ ܕܰܢܦܰܠ ܡܶܛܽܠ ܫܳܢܝܽܘܬܳܐ ܒܰܝܬܳܝܬܳܐ ܕܺܝܠܶܗ ܘܡܶܛܽܠ ܡܰܛܥܝܳܢܽܘܬܳܐ ܕܳܐܟܶܠܩܰܪܨܳܐ܆ ܐܰܝܟܰܢܳܐ ܕܡܶܢ ܠܥܶܠ ܩܰܕܺܝܡ ܐܰܡܺܝܪ: ܡܶܢ ܚܰܝ̈ܶܐ ܛܽܘ̈ܒܬܳܢܶܐ ܘܰܕܠܳܐ ܥܳܩܳܐ ܕܰܒܦܰܪܕܰܝܣܳܐ.

ܦܐܶܐ ܗ̱ܘܳܐ ܠܶܗ ܓܶܝܪ ܠܨܰܠܡܳܐ ܕܰܐܒܳܐ ܠܳܐ ܡܶܬܚܰܙܝܳܢܳܐ ܗܰܘ ܕܒܽܐܘܣܺܝܰܐ܆ ܠܡܶܠܬܳܐ ܚܰܝܳܐ܆ ܠܡܶܒܥܝܶܗ ܟܰܕ ܠܰܚܒܳܠܳܐ ܐܶܬܗܦܶܟ܆ ܠܒܰܪܢܳܫܳܐ ܗܰܘ ܡܠܺܝܠܳܐ ܘܕܰܐܝܟ ܕܰܒܡܶܫܬܰܘܬܳܦܽܘܬܳܐ ܘܰܒܛܰܝܒܽܘܬܳܐ ܗܘ̣ܳܐ ܒܨܰܠܡܳܐ ܕܰܐ‎ܠܳܗܳܐ܆ ܠܗܰܘ ܕܰܠܡܰܘܬܳܐ ܫܰܕܪܶܗ ܟܰܕ ܐܳܡܰܪ: ܐܰܪܥܳܐ ܐܺܝܬܰܝܟ ܘܠܰܐܪܥܳܐ ܬܺܐܙܰܠ^[28]܆ ܘܠܰܘ ܒܰܠܚܽܘܕ ܗܳܕܶܐ܆ ܐܶܠܳܐ ܐܳܦ ܠܰܗܘܳܝܶܗ ܕܳܢ ܘܚܰܝܒܶܗ ܟܰܕ ܥܰܠ ܚܰܘܳܐ ܦܣܰܩ܆ ܗܳܝ ܕܰܒܥܳܩ̈ܳܬܳܐ ܬܺܐܠܕܺܝܢ ܒܢܰܝ̈ܳܐ^[29].

ܡܶܛܽܠ ܗܳܕܶܐ܆ ܐܳܦ ܒܰܗܘܳܝܳܐ ܒܶܣܪܳܢܳܝܳܐ ܠܳܐ ܡܶܫܬܰܚܠܦܳܢܳܐܺܝܬ ܐܶܫܬܰܘܬܰܦ܆ ܘܰܠܡܰܘܬܳܐ ܗܰܘ ܕܰܚܠܳܦܰܝܢ ܣܒܰܠ ܒܰܒܣܰܪ܆ ܟܰܕ ܨܳܒܶܐ ܕܠܰܬܪ̈ܰܝܗܽܘܢ ܗܳܠܶܝܢ ܓܙܳܪ ܕܺܝ̈ܢܶܐ ܢܶܫܪܶܐ. ܠܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܕܐ̱ܢܳܫ ܡܶܢ ܒܢܰܝ̈ܢܳܫܳܐ܆ ܕܰܠܗܳܠܶܝܢ. ܠܳܐ ܣܳܥܽܘܪ̈ܝܳܬܳܐ^[30] ܢܩܺܝܡ܆ ܟܰܕ ܟܽܠܗܽܘܢ ܗܘ̣ܰܘ ܗ̱ܘܰܘ ܠܗܽܘܢ ܬܚܶܝܬ ܦܰܚܳܐ ܘܢܶܫܒܳܐ ܕܡܰܘܬܳܐ.

ܐܷܠܳܐ ܙܳܕܶܩ ܗ̱ܘܳܐ ܠܰܡ. ܐܳܡܪܺܝܢ: ܕܠܰܚܕܳܐ ܡܶܢ ܪ̈ܽܘܚܶܐ ܡܫܰܡܫܳܢ̈ܝܳܬܳܐ ܢܰܦܶܣ^[31]܆ ܕܠܰܡܕܰܒܪܳܢܽܘܬܳܐ ܕܰܐܝܟ ܗܳܕܶܐ ܬܡܰܠܶܐ܆ ܘܠܰܘ ܕܰܐ‎ܠܳܗܳܐ ܠܗܳܕܶܐ ܢܶܬܢܰܚܰܬ. ܐܶܠܳܐ ܩܰܕܡܳܐܺܝܬ ܡܰܢ܆ ܘܠܳܐ ܚܰܕ ܡܶܫܟܰܚ ܗ̱ܘܳܐ ܕܰܠܗܳܕܶܐ ܠܰܥܒܳܕܳܐ ܢܰܝܬܶܐ ܗ̱ܘܳܐ܆ ܘܠܰܐܣܽܘܪ̈ܰܘܗ̱ܝ ܕܰܚܒܳܠܳܐ ܢܶܫܪܶܐ ܗ̱ܘܳܐ܆ ܐܶܠܳܐ ܐܶܢ ܗܰܘ ܕܒܰܟܝܳܢܳܐ ‌ܐܺܝܬܰܘܗ̱ܝ ܠܳܐ ܡܶܬܚܰܒܠܳܢܳܐ ܘܠܳܐ ܡܳܝܽܘܬܳܐ܆ ܚܰܝܠܳܐ ܗܰܘ ܕܰܠܟܽܠ^[32] ܣܳܦܶܩ ܕܰܐ‌ܠܳܗܳܐ ܠܳܐ ܡܶܬܚܰܙܝܳܢܳܐ^[33]. ܐ̱ܚܪܳܢܝܳܐܺܝܬ ܕܶܝܢ܆ ܘܳܐܦܠܳܐ ܕܦܰܐܝܳܐ ܐܺܝܬܶܝܗ̇ ܗ̱ܘܳܬ݂܆ ܠܚܰܝܠܳܐ ܡܶܕܶܡ ܡܰܠܰܐܟܳܝܳܐ ܘܒ̣ܰܪܝܳܐ܆ ܕܬܽܘܪܳܨܳܐ ܕܗܳܟܰܢܳܐ ‌ܐܺܝܬܰܘܗ̱ܝ ܦܐܶܐ ܠܰܐܠܳܗܳܐ ܢܬܰܪܶܨ܆ ܐܰܝܟܰܢܳܐ ܕܠܳܐ ܬܽܘܒ ܡܶܢ ܕܪܺܝܫ ܗܶܢܽܘܢ ܒܢܰܝ̈ܢܳܫܳܐ ܢܶܫܪܥܽܘܢ ܘܢܶܦܕܽܘܢ ܡܶܢ ܫܪܳܪܳܐ܆ ܘܢܶܦܠܚܽܘܢ ܠܰܒܪܺܝܬܳܐ ܠܒܰܪ ܡܶܢ ܗܰܘ ܕܰܒܪܳܐ^[34].

ܐܷܠܳܐ ܠܗܰܘ ܕܰܡܨܶܐ ܗ̱ܘܳܐ܆ ܠܗܳܢܳܐ ܐܳܦ ܦܰܐܝܳܐ ܗܘܳܬ݂܆ ܕܰܡܕܰܒܪܳܢܽܘܬܳܐ ܡܶܛܽܠܳܬܰܢ ܢܶܣܒܽܘܠ. ܐܰܝܟܰܢܳܐ ܕܗܳܢܽܘܢ ܕܡܶܬܦܰܪܩܺܝܢ ܗ̱ܘܰܘ܆ ܠܗܰܘ ܕܺܐܝܬܰܘܗ̱ܝ ܗܽܘ ܟܰܕ ܗܽܘ ܦܳܪܽܘܩܳܐ ܘܰܐ‌ܠܳܗܳܐ ܡܶܣܬܰܓܕܳܢܳܐ ܒܰܟܝܳܢܳܐ ܢܶܣܓܕܽܘܢ ܗ̱ܘܰܘ. ܡܶܛܽܠܗܳܕܶܐ ܓܶܝܪ ܐܳܦ ܐܶܫܰܥܝܳܐ ܢܒܺܝܳܐ ܡܰܙܥܶܩ ܗ̱ܘܳܐ܆ ܕܠܳܐ ܐܺܝܙܓܰܕܳܐ ܘܠܳܐ ܡܰܠܰܐܟܳܐ܆ ܐܶܠܳܐ ܗܽܘ ܡܳܪܝܳܐ ܦܪܰܩ ܠܰܢ^[35].

ܠܳܐ ܗܳܟܺܝܠ ܢܦܰܠܓܺܝܘܗ̱ܝ ܡܶܢ ܒܳܬܰܪ ܚܕܳܝܽܘܬܳܐ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ. ܘܶܐܢ ܕܶܝܢ ܠܳܐ܆ ܬܚܶܝܬ ܥܶܕܠܳܝ̈ܶܐ ܕܕܶܚܠܰܬ ܦܬܰܟܪ̈ܶܐ ܢܶܬܬܣܺܝܡ܆ ܟܰܕ ܐܰܝܟ ܫܳܢܝܽܘܬܶܗ ܕܢܶܣܛܽܘܪܺܝܽܘܤ܆ ܠܒܰܪܢܳܫܳܐ ܕܕܺܝܠܳܢܳܐܺܝܬ ܡܶܢܶܗ ܘܠܶܗ ܡܩܰܝܰܡ ܣܳܓܕܺܝܢ ܚ̱ܢܰܢ ܐܰܟܚܕܳܐ ܥܰܡ ܐܰ‎ܠܳܗܳܐ. ܐܶܠܳܐ. ܚܰܕ ܘܗܽܘ ܟܰܕ ܗܽܘ ܢܰܘܕܶܝܘܗ̱ܝ ܡܶܢ ܬܪܶܝܢ ܟܝܳܢ̈ܶܐ܆ ܐܰ‎ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ. ܘܟܰܕ ܣܳܓܕܺܝܢܰܢ ܠܶܗ܆ ܠܒܰܪ ܡܶܢ ܟܽܠܶܗ ܥܶܕܠܳܝܳܐ ܢܶܗܘܶܐ. ܒܳܗ̇ ܒܰܕܡܽܘܬܳܐ ܓܶܝܪ ܠܰܢ ܐܶܫܬܰܘܬܰܦ ܡܶܠܬܳܐ ܕܰܐ‎ܠܳܗܳܐ ܒܰܕܡܳܐ ܘܰܒܒܶܣܪܳܐ^[36]܆ ܕܰܡܢܰܦܰܫ ܒܢܰܦܫܳܐ ܡܶܬܗܰܘܢܳܢܺܝܬܳܐ. ܐܶܢܕܶܝܢ ܒܳܗ̇ ܒܰܕܡܽܘܬܳܐ ܠܰܢ܆ ܡܩܺܝܡܳܐ ܠܶܗ ܠܬܰܟܬܽܘܫܳܐ ܚܶܪܝ݂ܳܝ݂ܳܐ܆ ܗܺܝ ܬܰܚܘܺܝܬܳܐ ܟܰܕ ܐܳܬܝܳܐ ܠܰܡܨܰܥܬܳܐ.

ܐܰܟܙܢܳܐ ܓܶܝܪ ܕܰܥܠܰܝܢ܆ ܟܰܕ ܢܰܦܫܳܐ ܩܢܽܘܡܳܐܺܝܬ ܐܶܬܚܰܝܕܰܬ ܠܦܰܓܪܳܐ܆ ܚܰܕ ܡܶܢ ܬܰܪܬܶܝܢ ܠܒܰܪܢܳܫܳܐ ܫܰܡܠܝܰܬ. ܟܰܕ ܠܳܐ ܗܺܝ ܢܰܦܫܳܐ ܐܶܫܬܰܚܠܦܰܬ ܠܦܰܓܪܳܐ܆ ܐܳܦܠܳܐ ܦܰܓܪܳܐ ܬܽܘܒ ܫܰܢܺܝ ܠܢܰܦܫܳܐ܆ ܘܚܰܕ ܟܝܳܢܳܐ ܡܶܬܰܐܡܪܳܐ ܘܡܶܣܬܰܟܠܳܐ ܗܺܝ ܚܰܝܽܘܬܳܐ܆ ܟܰܕ ܠܳܐ ܒܰܨܪܰܬ ܐܰܘ ܫܰܚܠܦܰܬ ܐܰܘ ܫܰܓܢܝܰܬ ܠܗܳܠܶܝܢ ܕܡܶܢܗܶܝܢ ܐܶܬܪܰܟܒܰܬ ܟܝܳܢܳܐܺܝܬ܆ ܗܳܟܰܢܳܐ ܐܳܦ ܡܶܠܬܳܐ ܕܰܐ‎ܠܳܗܳܐ܆ ܟܰܕ ܒܰܟܝܳܢܳܐ ܘܒܰܩܢܽܘܡܳܐ ܐܶܬܚܰܝܰܕ ܠܐܢܳܫܽܘܬܳܐ ܗܳܝ ܕܡܶܢܰܢ܆ ܕܰܡܫܰܡܠܝܳܐܺܝܬ ܐܺܝܬ ܠܳܗ̇ ܐܰܝܟ ܡܶܠܬܳܐ ܕܺܝܠܳܗ̇܆ ܘܶܐܬܺܝܠܶܕ ܒܰܒܣܰܪ ܡܶܢ ܩܰܕܺܝܫܬܳܐ ܒܬܽܘܠܬܳܐ ܘܶܐܫܬܰܡܰܗ ܥܰܡܰܢܽܘܐܶܝܠ܆ ܐܳܦ ܠܗܳܠܶܝܢ ܕܡܶܢܗܶܝܢ ܗܘ̣ܳܬ ܗܺܝ ܚܕܳܝܽܘܬܳܐ ܡܚܰܘܶܐ ܠܳܐ ܡܒܰܠܒ̈ܠܳܬܳܐ܆ ܟܰܕ ܟܰܬܰܪ̈ܶܝܢ ܡܰܢ ܒܰܐܝܢܳܝܽܘܬܳܐ ܟܝܳܢܳܝܬܳܐ ܗܳܝ ܕܺܝܠܗܶܝܢ܆ ܒܰܠܚܽܘܕܝ̈ܘܳܬܳܐ ܕܶܝܢ ܡܩܰܝ̈ܡܳܬ ܕܺܝܠܳܢܳܐܺܝܬ ܠܳܐ ܡܶܬܩܰܝ̈ܡܳܢ܆ ܐܰܝܟܰܢܳܐ ܕܢܶܫܬܰܪ̈ܝܳܢ ܬܽܘܒ ܠܰܬܪܰܝܳܢܽܘܬܳܐ܆ ܚܰܕ ܓܶܝܪ ‌ܐܺܝܬܰܘܗ̱ܝ ܩܢܽܘܡܳܐ ܡܶܢ ܬܰܪ̈ܬܰܝܗܶܝܢ.

ܡܳܕܶܝܢ܆ ܠܡܰܚܪܳܡܽܘ ܙܳܕܶܩ ܠܗܳܢܽܘܢ ܕܳܐܡܪܺܝܢ ܬܪܶܝܢ ܦܰܪ̈ܨܽܘܦܶܐ܆ ܐܰܘ ܬܪܶܝܢ ܩܢܽܘܡ̈ܶܐ ܐܰܘ ܬܪܶܝܢ ܟܝܳܢ̈ܶܐ ܠܗܰܘ ܚܰܕ ܡܫܺܝܚܳܐ܆ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ܆ ܘܡܰܥܒ̈ܕܳܢܘܳܬܳܐ ܕܗܳܠܶܝܢ ܘܕܺܝܠܳܝ̈ܘܳܬܳܐ܆ ܘܠܳܐ ܡܰܘܕܶܝܢ ܠܶܗ ܚܰܕ ܦܰܪܨܽܘܦܳܐ܆ ܚܰܕ ܩܢܽܘܡܳܐ܆ ܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܰܐ‎ܠܳܗܳܐ ܡܶܠܬܳܐ܆ ܐܰܘ ܟܳܦܪܺܝܢ ܕܶܐܬܒܰܣܰܪ ܒܶܣܪܳܐ ܫܰܪܺܝܪܳܐ ܘܕܰܫܘܶܐ ܠܰܢ ܒܽܐܘܣܺܝܰܐ܆ ܐܰܘ ܕܠܳܐ ܢܰܦܫܳܐ ܐܰܘ ܕܠܳܐ ܗܰܘܢܳܐ ܠܗܳܢܳܐ ܡܣܰܒܪܺܝܢ܆ ܘܰܠܦܽܘܪܩܳܢܳܐ ܕܺܝܠܰܢ܆ ܐܰܘ ܕܰܓܳܠܳܐ܆ ܐܰܘ ܠܳܐ ܡܫܰܡܠܝܳܐ ܡܩܺܝܡܺܝܢ ܒܝܰܕ ܗܳܠܶܝܢ.

ܗܰܝܡܶܢܘ ܗܳܟܺܝܠ. ܕܗܽܘ ܐܰ‎ܠܳܗܳܐ ܗܰܘ ܕܶܐܬܒܰܣܰܪ܆ ܠܰܨܠܺܝܒܳܐ ܕܰܚܠܳܦܰܝܢ ܣܰܝܒܰܪ ܒܰܒܣܰܪ. ܘܕܶܐܬܩܒܰܪ ܘܕܰܫܪܳܐ ܠܰܚܒܳܠܳܐ ܕܰܒܩܰܒܪ̈ܶܐ. ܘܕܰܢܚܶܬ ܠܰܫܝܽܘܠ. ܘܰܕܬܰܒܰܪ ܠܬܰܪ̈ܥܶܐ ܠܳܐ ܡܶܬܬܰܪ̈ܥܳܢܶܐ ܘܚܰܣܺܝ̈ܢܶܐ. ܘܕܰܫܪܳܐ ܠܰܐܣܽܘܪ̈ܶܐ ܠܳܐ ܡܶܬܥܰܪ̈ܩܳܢܶܐ܆ ܘܕܰܐܦܶܩ ܠܰܐܣܺܝܪ̈ܶܐ. ܘܰܕܩܳܡ ܡܶܢ ܡܺܝ̈ܬܶܐ ܒܝܰܘܡܳܐ ܬܠܺܝܬܳܝܳܐ܆ ܘܕܰܣܠܶܩ ܠܰܫܡܰܝܳܐ. ܘܕܺܝܬܶܒ ܡܶܢ ܝܰܡܺܝܢܳܐ ܕܰܐܒܳܐ. ܗܳܕܶܐ ܕܶܝܢ ܐܰܡܺܝܪܳܐ: ܠܰܘ ܡܶܛܽܠ ܕܺܐܝܬ ܡܶܕܶܡ ܕܰܐܒܳܐ܆ ܕܺܐܝܬܰܘܗ̱ܝ ܝܰܡܺܝܢܳܝܳܐ ܐܰܘ ܣܶܡܳܠܳܝܳܐ܆ ܐܰܝܟܰܢܳܐ ܓܶܝܪ ܗܳܠܶܝܢ ܢܶܗܘ̈ܝܳܢ ܕܗܰܘ ܠܳܐ ܡܶܣܬܰܝܟܳܢܳܐ ܘܰܕܠܳܐ ܓܫܽܘܡ ܘܕܰܠܟܽܠ ܡܳܠܶܐ. ܐܶܠܳܐ. ܡܶܢ ܫܡܳܗ̈ܶܐ ܗܳܠܶܝܢ ܕܰܠܘܳܬܰܢ ܡܥܰܝܕܺܝܢ ܡܚܰܘܶܐ ܟܬܳܒܳܐ ܐܰ‎ܠܳܗܳܝܳܐ܆ ܠܡܰܠܟܳܝܽܘܬܶܗ ܕܰܒܪܳܐ ܘܰܠܫܰܘܝܽܘܬ ܐܺܝܩܳܪܶܗ ܕܰܠܘܳܬ ܐܰܒܳܐ.

ܠܰܡܗܰܝܡܳܢܽܘ ܕܶܝܢ ܙܳܕܶܩ܆ ܐܳܦ ܒܪܽܘܚܳܐ ܩܰܕܺܝܫܳܐ܆ ܗܰܘ ܕܡܶܢ ܐܰܒܳܐ ܢܳܦܶܩ. ܗܳܟܰܢܳܐ ܓܶܝܪ. ܐܳܦ ܥܰܡ ܡܶܠܬܳܐ ܗܳܕܶܐ ܕܺܝܠܰܢ܆ ܪܽܘܚܳܐ ܐܰܟܚܕܳܐ ܢܳܦܩܳܐ. ܐܶܠܳܐ ܗܳܪܟܳܐ ܡܰܢ. ܕܒܳܐܐܰܪ ܬܽܘܒ ܡܶܬܰܐܫܕܳܐ. ܬܰܡܳܢ ܕܶܝܢ܆ ܚܰܝܳܐ. ܘܰܩܢܽܘܡܳܝܳܐ. ܪܽܘܚܳܐ ܓܶܝܪ ‌ܐܺܝܬܰܘܗ̱ܝ ܕܚܰܝ̈ܶܐ. ܘܕܰܫܘܶܐ ܒܽܐܘܣܺܝܰܐ ܠܰܐܒܳܐ. ܐܳܦ ܠܰܒܪܳܐ܆ ܘܰܕܡܶܬܡܢܶܐ ܐܰܟܚܕܳܐ ܡܶܛܽܠ ܗܳܕܶܐ܆ ܐܰܝܟ ܫܰܘܬܳܦܳܐ ܕܺܝܠܳܗ̇ ܟܰܕ ܕܺܝܠܳܗ̇ ܕܬܶܫܒܽܘܚܬܳܐ ܘܰܐ‌ܠܳܗܽܘܬܳܐ ܘܡܰܠܟܽܘܬܳܐ ܘܰܡܬܽܘܡܳܝܽܘܬܳܐ: ܙܶܠܘ ܠܰܡ ܐܳܡܰܪ ܬܰܠܡܶܕܘ ܠܟܽܠܗܽܘܢ ܥܰܡ̱ܡ̈ܶܐ܆ ܟܰܕ ܡܰܥܡܕܺܝܢ ܐܢ̱ܬܽܘܢ ܠܗܽܘܢ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ^[37]. ܗܳܢܳܐ ܐܳܦ ܥܰܡ ܐܰܒܳܐ ܘܰܒܪܳܐ܆ ܥܒܰܕ ܐܰܟܚܕܳܐ ܠܰܒܪܺܝܬܳܐ ܡܶܬܚܰܙܝܳܢܺܝܬܳܐ ܘܠܳܐ ܡܶܬܚܰܙܝܳܢܺܝܬܳܐ. ܟܬܺܝܒ ܓܶܝܪ܆ ܕܰܒܡܶܠܬܳܐ ܕܡܳܪܝܳܐ ܐܶܫܬܰܪܰܪܘ^[38] ܫܡܰܝܳܐ܆ ܘܰܒܪܽܘܚܳܐ ܕܦܽܘܡܶܗ ܟܽܠܶܗ ܚܰܝܠܗܽܘܢ^[39]܆ ܒܝܰܕ ܗܳܢܳܐ ܬܶܣܒܽܘܢ ܫܽܘܟܳܢܳܐ ܕܣܳܝܽܘܡܽܘܬ ܒܢܰܝ̈ܳܐ.

ܟܰܕ ܗܳܟܺܝܠ ܗܰܝܡܶܢܬܽܘܢ ܒܚܰܕ ܐܰ‎ܠܳܗܳܐ܆ ܕܒܰܚܕܳܐ ܐܽܘܣܺܝܰܐ ܒܰܬܠܳܬܳܐ ܩܢܽܘ̈ܡܶܐ ܡܶܬܚܙܶܐ^[40]܆ ܟܦܽܘܪܘ ܒܥܰܒܕܽܘܬܶܗ ܕܰܛܪܽܘܢܳܐ܆ ܕܤܳܛܳܢܳܐ ܐܳܡܰܪ ܐ̱ܢܳܐ: ܘܰܕܚܰܝ̈ܠܰܘܳܬܳܐ ܒܺܝ̈ܫܶܐ ܘܡܰܘܒܕܳܢ̈ܶܐ ܕܰܬܚܽܘܬܰܘܗ̱ܝ. ܟܰܕ ܐܳܡܪܺܝܢ ܐܢ̱ܬܽܘܢ: ܢܦܰܣܶܩ ܠܰܐܣܽܘܪ̈ܶܐ ܕܺܝܠܗܽܘܢ܆ ܘܢܶܫܕܶܐ ܡܶܢܰܢ ܠܢܺܝܪܳܐ ܕܺܝܠܗܽܘܢ^[41]. ܘܗܳܕܶܐ ܥܒܰܕܘ܆ ܟܰܕ ܠܘܳܬ ܡܰܥܪܒܳܐ ܚܳܝܪܺܝܢ ܐܢ̱ܬܽܘܢ. ܒܳܬܰܪܟܶܢ ܟܰܕ ܗܳܢܳܐ ܠܘܳܬ ܡܰܕܢܚܳܐ ܐܢ̱ܬܽܘܢ ܠܟܽܘܢ. ܡܰܟܪܟܺܝܢ ܐܢ̱ܬܽܘܢ܆ ܩܝ̈ܳܡܶܐ ܕܰܠܘܳܬ ܡܫܺܝܚܳܐ ܐܰܘܕܰܘ. ܠܰܘ ܡܶܛܽܠ^[42] ܕܰܦܢܺܝܬܳܐ ܡܰܥܪܒܳܝܬܳܐ. ܠܳܐܟܶܠܩܰܪܨܳܐ ܘܰܠܫ̈ܺܐܕܶܐ ܒܺܝ̈ܫܶܐ. ܒܦܶܣܳܐ ܡܳܛܚܳܐ 222ܡܰܛܝ̣ܳܝ̣ܳܐ܆ ܕܡܳܪܝܳܐ ܗ̱ܝ ܓܶܝܪ ܐܰܪܥܳܐ ܘܡܽܘܠܳܝܳܐ ܕܺܝܠܳܗ̇^[43]܆ ܐܶܠܳܐ. ܐܰܝܟܰܢܳܐ ܕܰܬܚܰܘܽܘܢ ܒܝܰܕ ܐܶܣܟܺܡܳܐ ܗܳܢܳܐ܆ ܕܡܶܢ ܚܶܫܽܘܟܳܐ ܡܰܢ ܕܰܚܛܺܝܬܳܐ ܥܪܰܩܬܽܘܢ܆ ܠܘܳܬ ܢܽܘܗܪܳܐ ܕܶܝܢ ܡܶܬܗܰܘܢܳܢܳܐ ܪܗܶܛܬܽܘܢ܆ ܘܕܰܠܘܳܬ ܒܶܝܬ ܡܰܥܡܪܳܐ ܐܰܒܳܗܳܝܳܐ ܕܺܝܠܟܽܘܢ ܡܣܰܪܗܒܺܝܢ ܐܢ̱ܬܽܘܢ܆ ܦܰܪܕܰܝܣܳܐ ܗܰܘ ܕܰܠܘܳܬ ܡܰܕܢܚܳܐ ܢܨܺܝܒ^[44].

ܡܶܛܽܠ ܗܳܟܺܝܠ. ܕܰܫܕܰܝܬܽܘܢ ܡܶܢܟܽܘܢ ܒܒܰܪ̱ܬ ܩܳܠܳܐ ܒܰܠܚܽܘܕܶܝܗ̇ ܥܕܰܟܺܝܠ܆ ܗܳܝ ܕܚܰܝܠܳܐ ܠܳܐ ܡܶܬܬܰܩܪܒܳܢܳܐ ܐܺܝܬ ܠܳܗ̇܆ ܠܰܛܪܽܘܢܽܘܬܳܐ ܕܫܺܐܕܳܐ ܒܺܝܫܳܐ ܘܡܳܪܽܘܕܳܐ܆ ܗܳܝ ܕܝܰܩܺܝܪܬܳܐ ܡܰܢ ܐܺܝܬܶܝܗ̇ ܗ̱ܘܳܬ ܡܶܛܽܠ ܒܺܝܫܽܘܬܳܐ܆ ܡܚܺܝܠܬܳܐ ܕܶܝܢ ܡܶܛܽܠ ܕܰܓܳܠܽܘܬܳܐ܆ ܘܶܐܬܚܰܘܺܝ ܥܳܪܽܘܩܳܐ. ܘܐܝܟ ܬܶܢܳܢܳܐ ܐܶܬܒܰܕܰܪ^[45] ܥܰܡ ܗܳܢܽܘܢ ܕܢܰܩܺܝܦܺܝܢ ܠܶܗ܆ ܘܰܠܘܳܬ ܝܰܡܺܝܢܳܐ ܠܳܐ ܡܶܙܕܰܟܝܳܢܺܝܬܳܐ ܕܰܡܫܺܝܚܳܐ ܐܶܬܓܰܘܰܣܬܽܘܢ܆ ܟܰܕ ܒܒܰܪ̱ܬ ܩܳܠܳܐ ܕܣܰܓܺܝ ܐܺܝܬܶܝܗ̇ ܠܳܐ ܛܳܠܽܘܡܬܳܐ ܘܰܕܫܰܦܺܝܪܽܘܬ ܨܶܒܝܳܢܳܐ. ܐܰܘܕܺܝܬܽܘܢ ܡܳܪܽܘܬܶܗ܆ ܡܶܟܺܝܠ ܗܽܘ ܡܳܪܶܗ ܗܰܘ ܕܰܒܫܽܘܪܳܝܳܐ ܡܶܢ ܛܺܝܢܳܐ ܓܒܰܠ܆ ܟܰܕ ܚܳܙܶܐ ܠܳܗ̇ ܠܰܓܒܺܝܠܬܶܗ ܕܰܡܨܰܐܳܐ ܡܶܢ ܥܒܳܪ ܦܽܘܩܕܳܢܳܐ ܕܳܐܕܳܡ܆ ܗܽܘ ܡܶܢ ܕܪܺܝܫ ܢܶܓܒܽܘܠ ܠܟܽܘܢ ܒܝܰܕ ܡܰܝ̈ܳܐ ܘܪܽܘܚܳܐ.

ܘܶܐܡܰܬܝ ܕܽܐܘܪܚܳܐ ܗܳܝ ܕܰܠܘܳܬ ܡܰܝ̈ܳܐ ܢܶܚܙܶܝܟܽܘܢ ܕܰܡܗܰܠܟܺܝܢ ܐܢ̱ܬܽܘܢ܆ ܐܳܟܶܠܩܰܪܨܳܐ ܚܰܣܳܡܳܐ ܘܓܽܘܡܕܳܢܳܐ܆ ܟܰܕ ܢܶܬܬܘܶܐ ܬܽܘܒ ܢܶܪܕܽܘܦ ܒܳܬܰܪܟܽܘܢ܆ ܘܰܠܫ̈ܺܐܕܶܐ ܕܺܝܠܶܗ ܢܺܐܡܰܪ. ܐܰܝܟܰܢܳܐ ܕܰܠܡܶܨܪ̈ܳܝܶܐ ܦܶܪܥܽܘܢ^[46]܆ ܠܡܳܢܳܐ ܗܳܕܶܐ ܥܒܰܕܢܰܢ܆ ܠܰܡܫܰܕܳܪܽܘ ܠܰܒ̈ܢܰܝ ܕܺܐܝܣܪܳܐܶܝܠ ܕܠܳܐ ܢܶܦܠܚܽܘܢ ܠܰܢ ܥܰܒܕܽܘܬܳܐ. ܐܶܠܳܐ. ܐܶܬܠܰܒܰܒܘ. ܢܩܰܕܡܽܘܢ ܢܰܕܪܟܽܘܢ ܡܰܝ̈ܳܐ܆ ܘܰܢܛܰܒܰܥ ܐܶܢܽܘܢ ܠܗܳܠܶܝܢ܆ ܗܰܘ ܕܪܰܨܶܨ ܐܶܢܽܘܢ ܠܪ̈ܺܝܫܶܐ ܕܬܰܢܺܝ̈ܢܶܐ ܥܰܠ ܡܰܝ̈ܳܐ^[47]. ܐܶܠܳܐ ܡܶܢ ܩܕܺܝܡ ܡܰܢ܆ ܡܡܺܝܬܳܢ̈ܶܐ ܘܡܰܪܺܝܪ̈ܶܐ ܐܺܝܬܰܝܗܽܘܢ ܗ̱ܘܰܘ ܡܰܝ̈ܳܐ܆ ܩܕܳܡ ܕܪ̈ܺܝܫܰܝܗܽܘܢ ܕܗܳܢܽܘܢ ܢܶܬܪܰܨܨܽܘܢ܆ ܗܳܢܽܘܢ ܕܰܠܡܶܪܬܳܐ ܛܥܺܝܢܰܬ ܡܰܘܬܳܐ ܡܬܺܝܒܺܝܢ ܗ̱ܘܰܘ. ܟܰܕ ܕܶܝܢ ܐܶܬܬܰܪܡܺܝ ܥܠܰܝܗܽܘܢ ܚܬܳܡܳܐ ܕܰܨܠܺܝܒܳܐ܆ ܚ̈ܠܰܝܳܐ ܠܗܳܠܶܝܢ ܘܡܰܚܝܳܢ̈ܶܐ ܥܒܰܕ ܐܶܢܽܘܢ.

ܘܰܠܗܳܕܶܐ ܝܰܬܺܝܪ ܓܰܠܝܳܐܺܝܬ. ܒܝܰܕ ܛܽܘܦܣܳܐ ܕܝܰܬܺܝܪ ܢܰܗܺܝܪ ܢܰܗܺܝܪ܆ ܡܽܘܫܶܐ ܡܶܢ ܩܕܺܝܡ ܩܰܕܶܡ ܪܰܫܡܳܗ̇. ܒܡܰܦܩܳܢܳܐ ܓܶܝܪ ܟܬܰܒ ܗܳܟܰܢܳܐ. ܐܶܬܰܘ ܕܶܝܢ ܠܡܽܘܪܰܬ܆ ܘܠܳܐ ܡܶܫܟܚܺܝܢ ܗܘܰܘ ܠܡܶܫܬܳܐ ܡܰܝ̈ܳܐ ܡܶܢ ܡܽܘܪܰܬ. ܡܰܪܺܝܪ̈ܶܐ ܓܶܝܪ ܐܺܝܬܰܝܗܽܘܢ ܗ̱ܘܰܘ. ܡܶܛܽܠܗܳܕܶܐ. ܐܶܫܬܰܡܰܗ ܫܡܳܐ ܕܕܽܘܟܬܳܐ ܗܳܝ ܡܰܪܺܝܪܽܘܬܳܐ. ܘܰܡܒܰܓܶܢ ܗ̱ܘܳܐ ܥܰܡܳܐ ܥܰܠ ܡܽܘܫܶܐ. ܟܰܕ ܐܳܡܪܺܝܢ ܗ̱ܘܰܘ: ܡܳܢܳܐ ܢܶ݀ܫܬܶܐ؟ ܓܥܳܐ ܕܶܝܢ ܡܽܘܫܶܐ ܠܘܳܬ ܡܳܪܝܳܐ܆ ܘܚܰܘܺܝ ܠܶܗ ܡܳܪܝܳܐ ܩܰܝܣܳܐ܆ ܘܰܐܪܡܝܶܗ ܒܡܰܝ̈ܳܐ ܘܶܐܬܚܰܠܺܝܘ ܡܰܝ̈ܳܐ^[48].

ܠܡܰܢܽܘ ܐܳܦ ܡܶܢ ܐܰܝܠܶܝܢ ܕܛܳܒ ܣܰܓܺܝ ܛܳܠܽܘܡܺܝܢ ܠܳܐ ܐܺܝܬܶܝܗ̇ ܝܺܕܺܝܥܬܳܐ܆ ܕܩܰܝܣܳܐ ܗܰܘ܆ ܠܰܨܠܺܝܒܳܐ ܡܰܥܒܶܕ ܚܰܝ̈ܶܐ ܩܰܕܶܡ ܗ̱ܘܳܐ ܡܛܰܦܶܤ܆ ܘܰܠܡܰܥܡܽܘܕܺܝܬܳܐ ܗܳܝ ܕܒܺܐܝܕܰܘ̈ܗ̱ܝ ܡܶܫܬܰܡܠܝܳܐ. ܗܳܝ ܓܶܝܪ ܕܶܐܡܰܪ. ܕܚܰܘܺܝ ܠܶܗ ܩܰܝܣܳܐ. ܡܰܘܕܥܳܐ܆ ܠܡܶܬܓܰܠܝܳܢܽܘܬܳܐ ܕܐ̱ܪܳܙܳܐ ܗܰܘ ܕܰܡܟܰܣܰܝ ܗ̱ܘܳܐ. ܘܗܳܝ ܕܶܝܢ ܕܰܐܝܬܺܝ ܒܳܬܰܪ ܗܳܠܶܝܢ ܕܶܐܬܶܐܡܰܪ̈ܝ܆ ܕܬܰܡܳܢ ܣܟ222 ܠܶܗ ܙܶܕ̈ܩܶܐ^[49] ܘܕܺܝ̈ܢܶܐ܆ ܘܠܳܐ ܡܶܕܶܡ ܐ̱ܚܪܺܢܳܐ ܩܳܕܡܳܐ ܡܚܰܘܝܳܐ܆ ܐܶܠܳܐ ܐܶܢ ܠܢܳܡܽܘ̈ܣܶܐ ܡܫܰܡܠܰܝ̈ܳܐ ܕܶܐܘܰܢܓܶܠܺܝܽܘܢ.

ܠܗܳܠܶܝܢ ܡܰܝ̈ܳܐ܆ ܐܳܦ ܚܰܙܩܺܝܐܶܝܠ ܢܒܺܝܳܐ ܩܰܕܶܡ ܚܙܳܐ܆ ܕܺܐܝܬܰܝܗܽܘܢ ܡܰܚܝܳܢ̈ܶܐ ܘܡܰܐܣ̈ܝܳܢܶܐ܆ ܘܝܳܗܽܘ̈ܒܶܐ ܕܚܽܘܠܡܳܢܳܐ ܪܽܘܚܳܢܳܝܳܐ܆ ܘܰܠܗܳܕܶܐ ܡܚܰܘܶܐ. ܟܰܕ ܗܳܟܰܢܳܐ ܟܳܬܶܒ. ܘܶܐܡܰܪ ܠܘܳܬܝ. ܡܰܝ̈ܳܐ ܗܳܠܶܝܢ܆ ܗܳܢܽܘܢ ܕܳܐܙܺܠ̱ܝܢ ܠܰܓܠܺܝܠܳܐ ܗܳܝ ܕܰܠܘܳܬ ܡܰܕܢܚܳܐ܆ ܘܢܳܚܬܺܝܢ ܠܘܳܬ ܐܰܪܥܳܐ ܗܳܝ ܕܠܳܐ ܡܶܬܕܰܡܪܳܐ܆ ܘܳܐܬܶܝܢ ܠܘܳܬ ܝܰܡܳܐ܆ ܠܘܳܬ ܡܰܝ̈ܳܐ ܕܡܰܦܩܳܢܳܐ ܕܝܰܡܳܐ ܢܰܚ̣ܠܡܽܘܢ ܐܶܢܽܘܢ ܠܡܰܝ̈ܳܐ^[50]. ܘܬܶܗܘܶܐ. ܕܟܽܠ ܢܰܦܫܳܐ ܕܚܰܝ̈ܘܳܬܳܐ ܗܳܠܶܝܢ ܕܪ̈ܳܬܚܳܢ܆ ܥܰܠ ܟܽܠܗܶܝܢ ܗܳܠܶܝܢ ܕܶܐܢ ܢܺܐܬܶܐ ܥܠܰܝܗܶܝܢ ܠܬܰܡܳܢ ܗܽܘ ܢܰܗܪܳܐ܆ ܬܰܚܶܐ. ܘܢܶܗܘܶܐ ܬܰܡܳܢ ܥܰܦܪܳܐ ܣܰܓܺܝܳܐܐ. ܣܰܓܺܝ. ܡܶܛܽܠ ܕܳܐܬܶܝܢ ܠܬܰܡܳܢ ܡܰܝ̈ܳܐ ܗܳܠܶܝܢ܆ ܘܢܶܬܰܐܣܶܐ܆ ܘܢܺܚܶܐ.

ܡܰܝ̈ܳܐ ܕܶܝܢ ܗܳܠܶܝܢ܆ ܕܰܒܝܰܡܳܐ ܗܰܘ ܕܰܓܠܺܝܠܳܐ ܢܳܦܩܺܝܢ ܘܥܳܒܪܺܝܢ܆ ܝܽܘܪܕܢܳܢ ܐܺܝܬܰܝܗܽܘܢ܆ ܗܰܘ ܕܒܶܗ ܙܰܪܥܳܐ ܕܡܰܥܡܽܘܕܺܝܬܳܐ ܩܰܕܺܝܫܬܳܐ ܐܶܬܪܡܺܝ ܡܶܢ ܦܳܪܽܘܩܰܢ܆ ܗܳܢܽܘܢ ܕܢܳܚܬܺܝܢ ܠܘܳܬ ܐܰܪܥܳܐ ܗܳܝ ܕܠܳܐ ܡܶܬܥܰܡܪܳܐ܆ ܗܳܝ ܕܺܐܝܬܶܝܗ̇ ܚܢܰܢ܆ ܗܳܢܽܘܢ ܕܡܶܢ ܟܽܠܳܗ̇ ܛܰܝܒܽܘܬܳܐ ܐܰ‎ܠܳܗܳܝܬܳܐ ܐܺܝܬܰܝܢ ܚܰܪ̈ܒܶܐ. ܘܠܳܐ ܡܶܬܥܰܡܪ̈ܳܢܶܐ܆ ܗܳܢܽܘܢ ܕܰܣܦܺܝܩܺܝܢ ܗ̱ܘܰܝܢ ܘܰܟܢܺܝܫܺܝܢ ܗ̱ܘܰܝܢ^[51] ܐܰܝܟ ܡܶܠܬܳܐ ܕܶܐܘܰܢܓܶܠܺܝܽܘܢ܆ ܗܳܢܽܘܢ ܕܰܒܗܽܘܢ ܥܡܰܪ̈ܝ̱ ܫܒܰܥ ܪ̈ܽܘܚܶܐ ܗܳܠܶܝܢ ܕܝܰܬܺܝܪ ܒܺܝ̈ܫܢ^[52].

ܐܳܦ ܗܳܝ ܕܶܝܢ ܕܢܳܚܬܺܝܢ܆ ܠܪ̈ܰܚܡܰܘ̈ܗ̱ܝ ܕܰܐ‎ܠܳܗܳܐ ܪܳܚܶܡ ܐ̱ܢܳܫܳܐ ܡܚܰܘܝܳܐ܆ ܗܳܠܶܝܢ ܕܰܒܝܰܕܰܝ̈ܗܽܘܢ ܢܶܚܬܰܬ̣ ܛܰܝܒܽܘܬܳܐ ܕܰܐܝܟ ܗܳܕܶܐ܆ ܥܠܰܝܢ ܗܳܢܽܘܢ ܕܠܳܐ ܫܳܘܶܝܢ ܗ̱ܘܰܝܢ. ܘܬܶܗܘܶܐ ܕܟܽܠ ܢܰܦܫܳܐ ܕܚܰܝ̈ܘܳܬܳܐ ܐܳܡܰܪ ܗܳܠܶܝܢ ܕܪ̈ܳܬܚܳܢ^[53]܆ ܥܰܠ ܟܽܠܗܶܝܢ ܗܳܠܶܝܢ ܕܶܐܢ ܢܺܐܬܶܐ ܥܠܰܝܗܶܝܢ ܠܬܰܡܳܢ ܗܽܘ ܢܰܗܪܳܐ ܬܺܚܶܐ. ܚܰܝ̈ܘܳܬܳܐ ܩܳܪܶܐ܆ ܠܗܳܢܽܘܢ ܕܰܒܝܰܕ ܡܦܰܬܟܽܘܬܳܐ ܕܚܰܫ̈ܶܐ ܚܰܝܽܘܬܳܢ̈ܶܐ܆ ܠܚܰܝ̈ܘܳܬܳܐ ܕܟܽܠ ܓܢܶܤ ܐܶܬܕܰܡܺܝܘ܆ ܠܗܳܢܽܘܢ ܕܝܰܡܳܐ ܡܰܠܺܝܚܳܐ ܘܡܳܓܽܘܫܳܐ ܕܚܰܝ̈ܶܐ ܗܳܠܶܝܢ ܛܰܪܛܰܥ ܐܶܢܽܘܢ. ܐܶܠܳܐ ܒܪܰܡ ܟܰܕ ܐܶܬܳܐ ܥܠܰܝܗܽܘܢ ܝܽܘܪܕܢܳܢ܆ ܐܳܦ ܠܗܳܢܽܘܢ ܫܰܟܶܢ ܚܰܝ̈ܶܐ܆ ܠܗܳܢܽܘܢ ܕܰܒܓܰܠ̈ܠܶܐ ܡܰܠܺܝ̈ܚܶܐ ܡܶܢ ܩܕܺܝܡ ܡܺܝܬܺܝܢ ܗܘܰܘ. ܐܰܝܬܺܝ ܕܶܝܢ ܒܳܬܰܪ ܗܳܠܶܝܢ ܗܽܘ ܢܒܺܝܳܐ܆ ܘܢܶܗܘܶܐ ܬܰܡܳܢ ܥܰܦܪܳܐ ܣܰܓܺܝܳܐܐ. ܣܰܓܺܝ. ܡܶܛܽܠ ܕܳܐܬܶܝܢ ܠܬܰܡܳܢ ܡܶܢ ܡܰܝ̈ܳܐ ܗܳܠܶܝܢ܆ ܘܢܶܬܰܐܣܶܐ. ܘܢܺܚܶܐ. ܟܽܠ ܗܰܘ ܡܳܐ ܕܶܐܢ ܢܺܐܬܶܐ ܥܠܰܘܗ̱ܝ ܢܰܗܪܳܐ ܬܰܡܳܢ ܢܺܚܶܐ. ܗܳܕܐ ܓܰܠܝܳܐܺܝܬ܆ ܠܚܽܘܕܳܬܳܐ ܘܰܓܒܺܝܠܬܳܐ ܕܡܶܢ ܕܪܺܝܫ ܕܒܰܪܢܳܫܳܐ ܥܰܬܺܝܩܳܐ ܘܥܰܦܪܳܢܳܐ ܡܚܰܘܝܳܐ. ܒܰܪܢܳܫܳܐ ܓܶܝܪ ܩܰܕܡܳܝܳܐ ܡܶܢ ܐܰܪܥܳܐ^[54]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܡܙܰܡܰܪ ܕܶܝܢ ܐܳܦ ܐܰ‎ܠܳܗܳܝܳܐ ܕܰܘܺܝܕ. ܡܶܛܽܠ ‌ܐܰ‎ܠܳܗܳܐ ܕܟܽܠ܆ ܕܶܐܬܕܟܰܪ܆ ܕܥܰܦܪܳܐ ܐܺܝܬܰܝܢ^[55]. ܟܰܕ ܓܶܝܪ ܒܛܺܝܢܳܐ ܠܨܰܠܡܳܐ ܡܠܺܝܠܳܐ ܕܢܰܦܫܳܐ ܛܡܰܪܢܰܢ܆ ܡܶܢ ܗܳܝ ܕܰܒܨܺܝܪܳܐ ܡܶܫܬܰܡܗܺܝܢܰܢ܆ ܥܰܦܪ̈ܳܢܶܐ ܡܰܠܽܘܢ. ܘܗܽܘ ܟܰܕ ܗܽܘ ܥܰܦܪܳܐ ܐܺܝܬܰܝܢ܆ ܐܰܘ^[56] ܡܠܺܝ̈ܠܶܐ.

ܐܷܠܳܐ ܢܒܺܝܳܐ ܚܰܙܩܺܝܐܶܝܠ܆ ܟܰܕ ܠܟܶܢܫܳܐ ܣܰܓܺܝܳܐܐ ܕܗܳܢܽܘܢ ܕܰܠܘܳܬ ܡܰܥܡܽܘܕܺܝܬܳܐ ܥܬܺܝܕܺܝܢ ܗ̱ܘܰܘ ܠܡܶܐܬܳܐ. ܡܶܢ ܪܽܘܚܩܳܐ ܚܳܙܶܐ ܗ̱ܘܳܐ܆ ܕܥܰܦܪ̈ܳܢܶܐ ܡܰܢ ܐܺܝܬܰܝܗܽܘܢ ܗ̱ܘܰܘ. ܘܰܒܛܺܝܢܳܐ ܡܰܝ̣ܺܝ̣ܬܺܝܢ ܗ̱ܘܰܘ܆ ܥܬܺܝܕܺܝܢ ܗ̱ܘܰܘ ܕܶܝܢ ܕܢܶܬܰܐܣܽܘܢ ܘܢܺܚܽܘܢ ܡܶܢ ܗܳܢܽܘܢ ܡܰܝ̈ܳܐ܆ ܐܶܡܰܪ: ܘܢܶܗܘܶܐ ܬܰܡܳܢ ܥܰܦܪܳܐ ܣܰܓܺܝܳܐܐ. ܡܶܛܽܠ ܕܳܐܬܶܝܢ ܠܬܰܡܳܢ ܡܰܝ̈ܳܐ ܗܳܠܶܝܢ܆ ܘܢܶܬܰܐܣܶܐ ܘܢܺܚܶܐ. ܟܽܠ ܗܰܘ ܡܳܐ ܕܶܐܢ ܢܺܐܬܶܐ ܥܠܰܘܗ̱ܝ ܢܰܗܪܳܐ ܬܰܡܳܢ ܢܺܚܶܐ.

ܣܰܓܺܝ̈ܳܐܬܳܐ ܡܰܢ ܗܳܟܺܝܠ ‌ܐܳܦ ܐ̱ܚܪ̈ܳܢܝܳܬܳܐ ܕܺܐܝܬܰܝܗܶܝܢ ܗ̱ܘܰܝ̈ ܐܳ‌ܠܨܳܝ̈ܳܬܳܐ ܫܳܒܶܩ ܐ̱ܢܳܐ܆ ܡܶܛܽܠ ܗܳܝ ܕܠܽܐܘܪܟܳܐ ܣܰܓܺܝܳܐܐ ܕܠܳܐ ܡܫܽܘܚܬܳܐ ܢܳܦܶܩ ܗ̱ܘܳܐ ܡܺܐܡܪܳܐ. ܐܢ̱ܬܽܘܢ ܕܶܝܢ ܟܰܕ ܠܘܳܬ ܢܰܗܪܳܐ ܗܰܘ ܡܰܥܒܶܕ ܚܰܝ̈ܶܐ ܐܳܙܺܠ̱ܝܢ ܐܢ̱ܬܽܘܢ܆ ܐܶܬܕܰܟܪܽܘܢܳܢܝ. ܒܳܥܶܐ ܐ̱ܢܳܐ ܡܶܢܟܽܘܢ. ܘܡܶܬܟܰܫܰܦ ܐ̱ܢܳܐ܆ ܥܕܰܟܺܝܠ ܓܶܝܪ ܒܓܰܠ̈ܠܶܐ ܡܰܠܺܝ̈ܚܶܐ ܕܚܰܫ̈ܶܐ ܡܶܬܛܰܒܰܥ ܐ̱ܢܳܐ܆ ܘܛܰܝܒܽܘܬܳܐ ܐ̱ܚܪܺܬܳܐ ܕܪܰܒܳܐ ܡܶܢ ܗܳܕܶܐ܆ ܠܳܐ ܐܺܝܬ ܠܟܽܘܢ ܠܰܡܫܰܟܳܢܽܘ ܠܺܝ. ܢܶܬܶܠ ܠܟܽܘܢ ܕܶܝܢ. ܟܽܠܗܶܝܢ ܗܳܠܶܝܢ ܕܶܐܢ ܬܶܫܶܐܠܽܘܢ܆ ܐܰ‎ܠܳܗܳܐ ܗܰܘ ܕܒܰܬܠܺܝܬܳܝܽܘܬܳܐ܆ ܕܚܰܕ ܡܶܬܗܰܘܢܰܢ ܟܺܝܬ ܘܡܶܫܬܰܒܰܚ܆ ܗܰܘ ܕܒܰܫܡܶܗ ܥܬܺܝܕܺܝܢ ܐܢ̱ܬܽܘܢ ܕܬܶܥܡܕܽܘܢ. ܠܗܰܘ ܕܳܐܦ ܦܰܐܝܳܐ ܬܶܫܒܽܘܚܬܳܐ. ܘܺܐܝܩܳܪܳܐ ܘܽܐܘܚܕܳܢܳܐ܆ ܗܳܫܳܐ ܘܰܒܟܽܠܙܒܰܢ. ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܥܶܣܪܺܝܢ ܘܚܰܕ.

ܫܚܳܩܳܐ ܕܚܽܘܫܳܒ̈ܶܐ[1]

ܡܶܬܒܰܝܰܢ[2]

ܥܒܪ̈ܝܐ. 5: 12 [3]

[4]ܡܰܪܬܝܳܢܽܘܬܳܐ ܗܳܝ ܕܗܳܘܝܳܐ ܠܘܳܬ ܡܶܬܬܰܪ̈ܬܝܳܢܶܐ ܐܰܘܟܺܝܬ ܫܳܡܽܘ̈ܥܶܐ ܗܳܢܽܘܢ ܕܰܥܬܺܝܕܺܝܢ ܕܢܶܬܩܰܪܒܽܘܢ ܠܰܥܡܳܕܳܐ ܩܰܕܺܝܫܳܐ܆ ܡܙܰܡܢܽܘܬܳܐ ܡܶܬܩܰܪܝܳܐ ܒܠܶܫܳܢܳܐ ܝܰܘܢܳܝܳܐ. ܡܶܛܽܠܗܳܕܶܐ ܐܶܡܰܪ ܡܰܠܦܳܢܳܐ܆ ܕܰܡܥܰܝܰܕ ܗܳܢܳܐ ܐܳܕܫܳܐ ܕܡܰܠܦܳܢܽܘܬܳܐ ܠܶܐܕܢ̈ܶܐ ܕܗܳܢܽܘܢ ܕܡܶܬܬܰܪܬܶܝܢ܆ ܒܰܙܡܳܡܳܐ ܕܩܰܪܢܳܐ ܡܰܥܠܳܢܺܝܬܳܐ܆ ܗܳܢܰܘ ܕܶܝܢ ܫܰܪܘܳܝܬܳܐ ܕܡ̈ܶܠܶܐ܆ ܐܰܝܟ ܕܡܶܢ ܡܰܥܰܠܬܳܐ.

ܡܶܬܬܕܺܝܫܳܢܳܐ[5]

ܡܦܩܢܐ. 19: 14 [6]

ܡܦܩܢܐ. 19: 18 [7]

ܢܶܙܰܡ ܪܰܟܺܝܟܳܐܝܬ[8]

ܐܶܪܰܡܝܳܐ. 10: 11 [9]

ܒ. ܩܘܪ̈ܝܢܬܝܐ. 6: 14 [10]

ܕܠܐ ܩܰܘܡܳܐ[11]

ܬܶܫܬܰܠܰܛ[12]

ܝܘܚܢܢ. 1: 9 [13]

ܣܶܦܪܳܐ ܕܰܒܪܺܝܬܳܐ. 1: 27 [14]

ܣܶܦܪܳܐ ܕܰܒܪܺܝܬܐ. 1: 28 ـ 30 [15]

ܡܙܡܘܪ̈ܐ. 85: 5 [16]

ܙܳܕܶܩ ܗ̱ܘܳܐ ܠܰܢ[17]

 ܘܢܨܡܚ[18]

ܪ̈ܗܘܡܝܐ. 9: 20  ܐܦ ܐܫܥܝܐ. 29: 16 ܐܫܥܝܐ. 45: 9 [19]

ܒ. ܩܘܪ̈ܝܢܬܝܐ. 5: 14 [20]

ܥܳܠܡܳܐ ܝܰܘܢܳܐܝܬ ܨܶܒܬܳܐ ܡܶܬܩܪܶܐ[21]

ܩܘܠܣ̈ܝܐ. 1: 15  ܐܦ ܥܒܪ̈ܝܐ. 1: 3 [22]

ܐܫܥܝܐ. 9: 5 [23]

ܩܘܠܣ̈ܝܐ. 1: 15 [24]

ܝܘܚܢܢ. 14: 9 [25]

ܝܘܚܢܢ. 1: 1 [26]

ܥܒܪ̈ܝܐ. 1: 2 [27]

ܣܶܦܪܳܐ ܕܰܒܪܺܝܬܳܐ. 3: 19 [28]

ܣܶܦܪܳܐ ܕܰܒܪܺܝܬܳܐ. 3: 16 [29]

ܡܰܥ̈ܒܕܳܢܝܬܐ[30]

ܥܒܪ̈ܝܐ. 1: 14 [31]

 ܚܰܝܠܬܳܢ ܒܟܽܠ[32]

ܩܘܠܣ̈ܝܐ. 1: 15 [33]

ܪ̈ܗܘܡܝܐ. 1: 25 [34]

ܐܫܥܝܐ. 63: 9 [35]

ܥܒܪ̈ܝܐ. 2: 14 [36]

ܡܬܝ. 28: 19 [37]

ܐܶܬܪܩܰܥܘ[38]

ܡܙܡܘܪ̈ܐ. 33: 6 [39]

ܡܶܬܗܰܘܢܰܢ[40]

ܡܙܡܘܪ̈ܐ. 2: 3 [41]

  ܐܰܝܟ ܡܰܢ[42]

  ܡܙܡܘܪ̈ܐ. 24: 1 [43]

  ܣܶܦܪܳܐ ܕܰܒܪܝܬܐ. 2: 8 [44]

  ܡܙܡܘܪ̈ܐ. 68: 2 ـ 3 [45]

  ܡܦܩܢܐ. 14: 5[46]

  ܡܙܡܘܪ̈ܐ. 74: 13 [47]

  ܡܦܩܢܐ. 15: 23 ـ 25 [48]

 ܦܽܘܩ̈ܕܳܢܶܐ[49]

  ܚܙܩܝܐܝܠ. 47: 8 ـ 9[50]

ܡܬܝ. 20: 3 [51]

ܡܬܝ. 12: 45 [52]

ܚܙܩܝܐܝܠ. 47: 9 [53]

ܐ. ܩܘܪ̈ܝܢܬܝܐ. 15: 47 [54]

ܡܙܡܘܪ̈ܐ. 103: 14 [55]

ܠܰܘ[56]