ܡܺܐܡܪܳܐ ܕܥܶܣܪܺܝܢ

ܥܰܠ ‌ܐܽܘܪܥܳܐ ܕܦܳܪܽܘܩܰܢ܆ ܐܰܘܟܺܝܬ ܥܰܠ ܥܺܐܕܳܐ ܕܽܐܘ̈ܫܰܥܢܶܐ ܘܰܕܗܳܝ ܕܰܒܪܺܝܟ ܗܽܘ^[1].

20: ܟܰܕ ܥܬܺܝܕ ܗ̱ܘܳܐ ܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ܆ ܕܰܠܘܳܬ ܨܠܺܝܒܳܐ ܦܳܪܽܘܩܳܝܳܐ ܨܶܒܝܳܢܳܐܺܝܬ ܢܺܐܬܶܐ܆ ܘܰܠܟܽܠܳܗ̇ ܡܕܰܒܪܳܢܽܘܬܳܐ ܕܒܶܗ ܢܫܰܡܠܶܐ܆ ܘܰܠܟܽܠܳܗ̇ ܫܺܝܛܽܘܬܳܐ ܘܨܰܥܪܳܐ ܡܶܛܽܠܳܬܰܢ ܢܩܰܒܶܠ܆ ܘܰܢܡܰܟܶܟ ܗܽܘ ܠܶܗ ܥܕܰܡܳܐ ܠܡܰܘܬܳܐ܆ ܘܰܐܝܟ ܗܰܘ ܕܥܰܠ ܬܰܪܥܳܐ ܕܗܳܠܶܝܢ ܟܽܠܗܶܝܢ. ܩܳܐܶܡ ܗ̱ܘܳܐ܆ ܡܚܰܘܶܐ ܗ̱ܘܳܐ ܠܚܰܝܠܶܗ ܠܳܐ ܡܶܙܕܰܟܝܳܢܳܐ܆ ܟܰܕ ܠܰܡܚܺܝܠܽܘܬܳܐ ܕܬܰܪܥܺܝܬܳܐ ܕܺܝܠܰܢ ܣܳܡܶܟ ܗ̱ܘܳܐ܆ ܐܰܝܟܰܢܳܐ ܕܠܳܐ ܡܶܢ ܚܰܫ̈ܶܐ ܕܺܝܠܶܗ ܗܳܢܽܘܢ ܨܶܒܝܳܢܳܝ̈ܶܐ܆ ܠܘܳܬ ܗܰܘܢܳܐ ܠܳܐ ܒܚܺܝܪܳܐ^[2] ܢܶܫܪܰܥ ܚܢܰܢ.

ܘܳܐܦ ܟܺܝܬ ܟܰܕ ܠܒܶܝܬ ܥܰܢܝܳܐ ܢܚܶܬ܆ ܠܠܳܥܳܙܳܪ ܗܰܘ ܕܡܶܢ ܟܰܕܽܘ ܐܰܪܒܥܳܐ ܐܺܝܬ ܗ̱ܘܳܐ ܠܶܗ ܝܰܘ̈ܡܺܝܢ ܕܣܺܝܡ ܒܩܰܒܪܳܐ܆ ܐܰܩܺܝܡ. ܟܰܕ ܩܳܕܶܡ ܗ̱ܘܳܐ ܫܳܪܶܐ ܠܽܐܘܚܕܳܢܳܐ ܕܡܰܘܬܳܐ܆ ܠܗܰܘ ܕܰܥܬܺܝܕ ܗ̱ܘܳܐ ܕܰܡܫܰܡܠܝܳܐܺܝܬ ܢܶܩܛܠܺܝܘܗ̱ܝ܆ ܟܰܕ ܢܳܚܶܬ݂ ܗܽܘ ܠܰܫܝܽܘܠ܆ ܘܰܡܚܰܪܰܪ ܠܢܰܦ̈ܫܳܬܳܐ ܗܳܢܶܝܢ ܕܰܚܒܺܝ̈ܫܳܢ ܗ̱ܘܰܝ̈ ܬܰܡܳܢ^[3]. ܕܡܶܢ ܗܳܪܟܳܐ. ܐܰܝܟ ܡܰܢ ܕܰܐܝܟ ܕܡܶܢ ܫܶܢܬܳܐ. ܒܦܽܘܩܕܳܢܳܐ ܒܰܠܚܽܘܕ. ܥܬܺܝܕ ܗ̱ܘܳܐ ܕܰܢܩܺܝܡܺܝܘܗ̱ܝ܆ ܐܳܡܰܪ ܗ̱ܘܳܐ: ܠܳܥܳܙܳܪ ܪܳܚܡܰܢ ܫܟܶܒ. ܐܶܠܳܐ ܐܳܙܶܠ ‌ܐ̱ܢܳܐ ܕܰܐ݀ܥܺܝܪܺܝܘܗ̱ܝ^[4].

ܟܰܕ ܠܗܳܕܶܐ ܗܳܟܺܝܠ ܩܰܕܺܝܡܽܘܬ݂ ܐܰܓܽܘܢܳܐ ܕܙܳܟܽܘܬܳܐ ܕܥܰܠ ܡܰܘܬܳܐ܆ ܡܩܰܠܣܺܝܢ ܗ̱ܘܰܘ ܛܠܳܝ̈ܶܐ. ܘܟܶܢܫܳܐ ܗܰܘ ܕܥܰܡܗܽܘܢ܆ ܗܳܕܶܐ ܓܶܝܪ ܕܺܝܠܳܢܳܐܺܝܬ ܫܰܘܕܰܥ. ܐܶܘܰܢܓܶܠܺܝܣܛܳܐ ܝܽܘܚܰܢܳܢ^[5]܆ ܦܓܰܥܘ ܒܶܗ ܠܘܳܬ ܡܰܚܰܬܬܳܐ ܕܺܝܠܶܗ ܒܕܽܘܟ ܕܛܽܘܪܳܐ ܗܰܘ ܕܙܰܝ̈ܬܶܐ܆ ܘܰܠܘܳܬ ܬܰܪ̈ܥܶܝܗ̇ ܕܽܐܘܪܶܫܠܶܡ.

ܘܰܚܙܺܝ ܐܰܝܟܰܢܳܐ ܟܰܕ ܩܰܕܶܡ ܗ̱ܘܳܐ ܝܺܕܰܥ ܝܶܫܽܘܥ ܠܗܳܝ ܕܰܥܬܺܝܕܳܐ ܗ̱ܘܳܬ ܕܬܶܗܘܶܐ܆ ܘܺܝܕܰܥ ܕܰܥܬܺܝܕܺܝܢ ܕܢܶܦܓܥܽܘܢ ܒܶܗ܆ ܦܰܐܺܝܬ ܠܰܐܠܳܗܳܐ ܘܐ̱ܪܳܙܳܢܳܐܺܝܬ ܡܶܕܶܡ ܥܰܒܕܳܗ̇ ܠܡܰܥܰܠܬܶܗ܆ ܗܳܝ ܕܒ̈ܺܐܝܕܶܝܗ̇ ܩܰܕܶܡ ܛܰܦܶܤ ܠܰܢ ܐܳܦ ܠܡܶܐܬܺܝܬܳܐ ܕܺܝܠܶܗ ܗܳܝ ܕܬܰܪܬܶܝܢ ܘܰܡܫܰܒܰܚܬܳܐ܆ ܟܰܕ ܐܳܦܠܳܐ ܠܫܺܝܛܽܘܬܳܐ ܛܥܳܐ܆ ܗܳܝ ܕܰܒܟܽܠܳܗ̇ ܡܶܐܬܺܝܬܶܗ ܗܳܝ ܩܰܕܡܳܝܬܳܐ ܘܰܒܟܽܠܶܗ ܙܰܒܢܳܐ ܕܡܶܬܒܰܪܢܫܳܢܽܘܬܳܐ ܚܰܘܺܝ܆ ܟܰܕ ܒܫܽܘܘ̈ܫܳܛܶܐ ܕܰܒܩܰܠܺܝܠ ܩܰܠܺܝܠ ܓܳܠܶܐ ܗ̱ܘܳܐ ܡܕܰܒܪܳܢܳܐܺܝܬ ܠܰܐܠܳܗܽܘܬܶܗ.

ܥܺܝܠܳܐ ܓܶܝܪ ܕܰܚܡܳܪܳܐ ܦܰܩܶܕ ܗ̱ܘܳܐ ܠܬܰܠܡܺܝܕܰܘ̈ܗ̱ܝ ܠܡܰܝܬܳܝܽܘ ܠܶܗ. ܠܳܐ ܡܟܰܒܫܳܐ ܘܗܰܘ ܕܐ̱ܢܳܫ ܡܶܢ ܒܢܰܝ̈ܢܳܫܳܐ ܠܳܐ ܝܺܬܶܒ ܥܠܰܘܗ̱ܝ. ܥܰܠ ܗܰܘ ܕܳܐܦ ܟܰܕ ܝܺܬܶܒ܆ ܩܰܪܺܝܒ ܗ̱ܘܳܐ ܠܡܰܪܕܺܝܬܳܐ ܕܽܐܘܪܚܳܐ. ܥܺܝܠܳܐ ܕܶܝܢ ܗܰܘ ܕܰܚܡܳܪܳܐ܆ ܠܥܰܡܳܐ ܡܗܰܝܡܢܳܐ ܗܰܘ ܕܡܶܢ ܥܰܡ̱ܡ̈ܶܐ ܩܳܕܶܡ ܗ̱ܘܳܐ ܡܛܰܦܶܤ. ܛܰܡܳܐܐ ܓܶܝܪ ‌ܐܺܝܬܰܘܗ̱ܝ ܚܡܳܪܳܐ܆ ܘܠܳܐ ܡܶܬܰܐܟܠܳܢܳܐ ܠܢܳܡܽܘܣܳܐ ܕܡܽܘܫܶܐ܆ ܘܠܳܐ ܡܶܬܕܰܒܚܳܢܳܐ ܐܰܝܟ ܡܣܰܝܒܳܐ ܘܰܢܕܺܝܕܳܐ. ܘܕܳܐܦܠܳܐ ܦܰܪܣܬܶܗ ܦܨܺܝܠܳܐ܆ ܘܳܐܦܠܳܐ ܓܽܘܪܳܪܳܐ ܡܰܣܶܩ ܒܰܕܡܽܘܬ݂ ܬܰܘܪܳܐ ܘܥܶܪܒܳܐ^[6].

ܐܷܠܳܐ ܡܳܪܰܢ ܡܫܺܝܚܳܐ܆ ܡܶܢ ܥܰܡܳܐ ܡܰܢ. ܗܰܘ ܠܳܐ ܡܶܬܬܦܺܝܣܳܢܳܐ ܕܝܽܗ̱ܘܕܳܝ̈ܶܐ ܐܰܗܦܶܟ ܐܰܦܰܘ̈ܗ̱ܝ܆ ܘܗܳܕܶܐ ܟܰܕ ܕܰܟܝܳܐ ‌ܐܺܝܬܰܘܗ̱ܝ ܗ̱ܘܳܐ. ܘܕܰܦܨܺܝܠܳܐ ܦܰܪܣܬܶܗ܆ ܝܺܠܶܦ ܗ̱ܘܳܐ ܓܶܝܪ ܡܶܢ ܢܳܡܽܘܣܳܐ ܠܰܡܦܰܠܳܓܽܘ ܘܠܰܡܦܰܪܳܫܽܘ ܗܳܝ ܕܛܳܒܳܐ ܡܶܢ ܗܳܝ ܕܒܺܝܫܳܐ܆ ܘܳܐܦ ܡܰܣܶܩ ܗ̱ܘܳܐ ܓܽܘܪܳܪܳܐ܆ ܐܳܟܶܠ ܗ̱ܘܳܐ ܓܶܝܪ. ܘܡܰܠܥܶܤ ܗ̱ܘܳܐ ܠܗܽܘܢ ܠܦܽܘܩ̈ܕܳܢܶܐ ܕܡܽܘܫܶܐ. ܠܥܰܡܳܐ ܕܶܝܢ ܗܰܘ ܕܡܶܢ ܥܰܡ̱ܡ̈ܶܐ ܓܒܳܐ ܠܶܗ܆ ܗܰܘ ܕܠܳܐ ܡܶܢ ܢܳܡܽܘܣܳܐ ܝܺܗܺܝܒ ܡܶܢ ܐܰ‎ܠܳܗܳܐ ܐܶܬܬܰܐܪܰܐ ܗ̱ܘܳܐ ܘܺܝܠܶܦ ܠܦܽܘܪܳܫܳܐ ܗܰܘ ܕܛܳܒ̈ܳܬܳܐ ܘܰܕܒܺܝ̈ܫܳܬܳܐ܆ ܘܠܳܐ ܡܟܰܒܫܳܐ ‌ܐܺܝܬܰܘܗ̱ܝ ܗ̱ܘܳܐ ܘܕܶܐܨܛܰܪܺܝ^[7] ܡܶܢ ܚܰܫ̈ܶܐ ܕܨܰܥܪܳܐ ܘܰܗܘ̣ܳܐ ܥܣܶܩ ܠܰܐܣܽܘܪ̈ܶܐ܆ ܘܥܰܠܗܰܘ ܕܠܳܐ ܐ̱ܢܳܫ ܡܶܢ ܒܢܰܝ̈ܢܳܫܳܐ ܝܺܬܶܒ܆ ܠܳܐ ܓܶܝܪ ܕܰܝܳܢܳܐ ܗ̱ܘܳܐ ܠܗܳܝ ܡܶܢ ܐܰ‎ܠܳܗܳܐ ܐܶܬܬܰܣܪܰܚ ܘܠܳܐ ܢܒܺܝܳܐ ܘܠܳܐ ܡܰܠܦܳܢܳܐ. ܠܗܳܢܳܐ ܗܳܟܺܝܠ ܥܰܡܳܐ ܡܶܢ ܥܰܡ̱ܡ̈ܶܐ܆ ܗܰܘ ܕܰܐܝܟ ܚܡܳܪܳܐ ‌ܐܺܝܬܰܘܗ̱ܝ ܠܳܐ ܕܰܟܝܳܐ܆ ܦܳܩܶܕ ܗ̱ܘܳܐ ܠܬܰܠܡܺܝ̈ܕܶܐ ܕܺܝܠܶܗ܆ ܠܡܶܫܪܳܐ ܡܶܢ ܐܰܣܽܘܪ̈ܶܐ ܕܠܳܐ ܝܺܕܰܥܬܳܐ ܘܰܕܕܶܚܠܰܬ ܫ̈ܺܐܕܶܐ.

ܘܗܳܢܽܘܢ ܡܰܢ ܬܠܳܬܳܐ ܐܶܘܰܢܓܶܠܺܝܣ̈ܛܶܐ ܐ̱ܚܪ̈ܳܢܶܐ܆ ܠܥܺܝܠܳܐ ܒܰܠܚܽܘܕ ܐܶܬܥܰܗܰܕܘ ܕܰܐܣܺܝܪ ܗ̱ܘܳܐ. ܡܰܬܰܝ ܕܶܝܢ ܐܶܫܬܰܥܺܝ܆ ܕܳܐܦ ܐܶܡܳܐ ܗܳܝ ܕܺܝܠܶܕܬܶܗ ܠܥܺܝܠܳܐ ܐܰܣܺܝܪܳܐ ܗ̱ܘܳܬ^[8]. ܐܰܝܟܰܢܳܐ ܟܺܝܬ ܕܗܽܘ ܥܺܝܠܳܐ ܡܳܕܶܝܢ܆ ܒܰܐܣܳܪܳܐ ܥܦܺܝܦܳܐ ܐܰܣܺܝܪ ܗ̱ܘܳܐ. ܒܚܰܕ ܡܰܢ ܗܰܘ ܕܚܰܒܠܳܐ܆ ܒܰܐ̱ܚܪܺܢܳܐ ܕܶܝܢ ܗܰܘ ܕܰܟܝܳܢܳܐ ܢܳܩܶܦ ܗ̱ܘܳܐ ܓܶܝܪ ܠܶܐܡܶܗ܆ ܟܰܕ ܒܪܶܚܡܬܳܐ ܕܰܠܘܳܬܳܗ̇ ܐܰܣܺܝܪ ܗ̱ܘܳܐ. ܘܳܐܦ ܗܳܢܳܐ ܕܶܝܢ ܛܽܘܦܣܳܐ܆ ܒܠܶܨܽܘܨܺܝܬܳܐ ܪܰܒܬܳܐ ܕܰܫܪܳܪܳܐ ܩܰܕܶܡ ܡܚܰܘܶܐ ܠܰܢ. ܡܫܰܘܕܰܥ ܓܶܝܪ ܥܰܠ ܥܰܡܳܐ. ܗܰܘ ܕܡܶܢ ܥܰܡ̱ܡ̈ܶܐ܆ ܕܰܠܒܰܪ ܡܶܢ ܟܝܳܢܳܐ ܡܰܢ ܐܶܬܶܐܣܰܪ. ܒܣܺܝܪ̈ܰܐܤ ܕܰܚܛܺܝܬܳܐ܆ ܘܰܕܠܳܐ ܐܰ‎ܠܳܗܽܘܬܳܐ ܐܰܘܟܺܝܬ ܕܣܰܓܺܝܽܐܘܬ݂ ܐܰ‎ܠܳܗܽܘܬܳܐ܆ ܕܰܐܝܟ ܕܒܰܟܝܳܢܳܐ ܕܶܝܢ܆ ܒܰܥܝܳܕܳܐ ܢܰܓܺܝܪܳܐ ܐܰܣܺܝܪ ܗ̱ܘܳܐ܆ ܘܠܳܐ ܡܨܶܐ ܗ̱ܘܳܐ ܡܶܟܺܝܠ܆ ܕܠܶܐܣܳܪܳܐ ܗܰܘ ܠܳܐ ܡܶܬܦܰܣܩܳܢܳܐ ܘܕܰܐܝܟ ܗܰܘ ܕܰܟܝܳܢܳܐ ‌ܐܺܝܬܰܘܗ̱ܝ ܗ̱ܘܳܐ ܢܶܦܣܽܘܩ.

ܐܷܠܳܐ ܫܪܰܐܽܘܗ̱ܝ ܠܗܳܢܳܐ. ܘܣܰܓܺܝ ܦܫܺܝܩܳܐܺܝܬ. ܬܰܠ̈ܡܺܝܕܶܐ ܕܰܡܫܺܝܚܳܐ܆ ܘܩܰܪܒܽܘܗ̱ܝ ܠܡܰܠܦܳܢܗܽܘܢ܆ ܟܰܕ ܣܳܡܘ ܥܠܰܘܗ̱ܝ ܩܰܕܡܳܐܺܝܬ ܡܳܐܢ̈ܶܐ ܕܺܝܠܗܽܘܢ. ܘܟܰܕ ܚܙܳܐ ܝܶܫܽܘܥ ܕܗܳܕܶܐ ܗܘ̣ܳܬ܆ ܗܰܘ ܕܰܐܝܟ ܕܒܰܫܪܳܪܳܐ. ܐܰ‎ܠܳܗܳܐ ܕܐ̱ܪ̈ܳܙܶܐ ܪܰܘܪ̈ܒܶܐ܆ ܣܠܶܩ ܪܟܶܒ. ܘܺܝܬܶܒ ܠܥܶܠ ܡܶܢܶܗ. ܐܺܝܬ ܓܶܝܪ ܠܡܶܬܕܰܡܳܪܽܘ܆ ܐܳܦ ܒܶܗ ܒܫܽܘܘܕܳܥܳܐ ܓܰܠܝܳܐ ܕܺܝܠܗܶܝܢ ܕܠܶܟܣܺܝ̈ܤ܆ ܕܛܳܒ ܢܰܗܺܝܪܳܐܺܝܬ ܡܚܰܘܶܐ ܠܶܗ ܠܰܢ ܠܰܫܪܳܪܳܐ. ܡܶܚܕܳܐ ܓܶܝܪ ܕܗܳܢܽܘܢ ܕܡܶܢ ܥܰܡ̱ܡ̈ܶܐ ܗܰܝܡܶܢܘ܆ ܐܰܝܟ ܕܰܠܢܰܚ̈ܬܶܐ ܒܰܕܡܽܘܬ ܗܰܘ ܚܡܳܪܳܐ܆ ܠܒܶܫܘ ܠܰܡܝܰܬܪ̈ܳܬܳܐ ܫܠܺܝ̈ܚܳܝܳܬܳܐ܆ ܐܰܝܟܰܢܳܐ ܕܳܐܦ ܡܰܠܦܳܢ̈ܶܐ ܕܫܰܦܺܝܪܽܘܬ ܕܶܚܠܬܳܐ. ܘܣܳܗ̈ܕܶܐ ܢܰܫܘܚܽܘܢ ܡܶܢܗܽܘܢ. ܗܳܝܕܶܝܢ ܝܶܬܒܰܬ ܥܠܰܝܗܽܘܢ ܘܫܶܟܢܰܬ ܘܶܐܬܬܢܺܝܚܰܬ ܛܰܝܒܽܘܬܶܗ ܕܝܶܫܽܘܥ. ܡܰܠܽܘܢ ܕܶܝܢ ܗܽܘ ܝܶܫܽܘܥ܆ ܐܰܟܙܢܳܐ ܕܳܐܦ ܥܰܠ ܟܪ̈ܽܘܒܶܐ ܟܬܺܝܒ ܕܝܳܬܶܒ^[9]܆ ܡܶܛܽܠ ܗܳܝ ܕܡܶܬܬܢܺܝܚ ܒܗܽܘܢ ܒܗܳܢܽܘܢ ܚܰܝܠܰܘ̈ܳܬܳܐ ܩܰܕܺܝ̈ܫܶܐ. ܩܰܕܺܝܫ ܓܶܝܪ ‌ܐܺܝܬܰܘܗ̱ܝ^[10]. ܐܰܝܟܰܢܳܐ ܕܶܐܫܰܥܝܳܐ ܢܒܺܝܳܐ ܐܳܡܰܪ: ܘܕܰܒܩܰܕܺܝ̈ܫܶܐ ܡܶܬܬܢܺܝܚ.

ܘܳܐܦ ܢܒܺܝܽܘܬܳܐ ܕܶܝܢ. ܗܳܝ ܕܰܙܟܰܪܝܳܐ܆ ܐܰܝܟ ܡܳܐ ܕܳܐܦ ܟܬܳܒܳܐ ܗܰܘ ܕܡܰܬܰܝ܆ ܕܰܡܙܰܘܰܓ ܗ̱ܘܳܐ ܥܺܝܠܳܐ ܠܰܚܡܳܪܳܐ ܡܰܘܕܥܳܐ. ܐܳܡܰܪ ܓܶܝܪ ܗܳܟܰܢܳܐ. ܚܕܳܝ ܛܳܒ ܒܰܪ̱ܬ ܨܶܗܝܽܘܢ. ܐܰܟܪܶܙܝ ܒܰܪ̱ܬ ܐܽܘܪܶܫܠܶܡ. ܗܳܐ ܡܰܠܟܶܟܝ ܐܳܬܶܐ ܠܶܟܝ. ܙܰܕܺܝܩܳܐ ܘܰܕܦܳܪܶܩ. ܗܽܘ ܡܰܟܺܝܟ ܘܰܪܟܺܝܒ ܥܰܠ ܚܡܳܪܳܐ. ܘܥܰܠ ܥܺܝܠܳܐ ܚܰܕܬܳܐ^[11]. ܡܰܢܽܘ ܕܶܝܢ ܕܟܰܕ ܫܳܡܰܥ ܡܰܠܟܳܐ ܙܰܕܺܝܩܳܐ܆ ܠܰܘ ܡܶܚܕܳܐ ܠܰܡܫܺܝܚܳܐ ܡܶܣܬܰܟܰܠ܆ ܠܗܰܘ ܕܳܐܦ ܟܽܘܢܳܝܳܐ ܕܡܰܠܟܺܝܙܕܶܩ ܩܰܕܶܡ ܗ̱ܘܳܐ ܡܛܰܦܶܣ^[12]܆ ܟܰܕ ܡܰܠܟܳܐ ܕܙܰܕܺܝܩܽܘܬܳܐ ܒܝܰܕ ܦܽܘܫܳܩܳܐ ܡܰܟܪܶܙ. ܠܳܐ ܐܶܡܰܪ ܕܶܝܢ ܗܽܘ ܢܒܺܝܳܐ ܡܰܠܟܳܐ ܙܰܕܺܝܩܳܐ ܒܰܠܚܽܘܕ܆ ܐܶܠܳܐ ܘܰܕܦܳܪܶܩ. ܐܰܝܟܰܢܳܐ ܕܰܒܝܰܕ ܗܳܕܶܐ܆ ܠܰܫܡܳܐ ܕܝܶܫܽܘܥ ܢܰܘܣܶܦ ܢܫܰܘܕܰܥ. ܗܰܘ ܕܟܰܕ ܡܶܬܦܰܫܰܩ ‌ܐܺܝܬܰܘܗ̱ܝ܆ ܦܽܘܪܩܳܢܳܐ ܕܰܐ‎ܠܳܗܳܐ ܘܳܐܣܝܽܘܬܳܐ. ܐܰܝܬܺܝ ܕܶܝܢ ܒܳܬܰܪܟܶܢ܆ ܗܳܝ ܕܗܽܘ ܡܰܟܺܝܟ ܘܰܪܟܺܝܒ ܥܰܠ ܚܡܳܪܳܐ ܘܥܰܠ ܥܺܝܠܳܐ ܚܰܕܬܳܐ^4: ܐܰܝܟܰܢܳܐ ܕܰܢܩܰܕܶܡ ܢܚܰܘܶܐ܆ ܠܗܰܘ ܕܒܶܐܘܰܢܓܶܠܺܝ̈ܰܐ ܐܰܙܥܶܩ܆ ܝܺܠܰܦܘ ܡܶܢܝ ܕܢܺܝܚܳܐ ܐܺܝܬܰܝ ܘܡܰܟܺܝܟܳܐ ܒܠܶܒܳܐ^[13]. ܠܳܐ ܐ̱ܢܳܫ ܕܶܝܢ ܡܰܠܟܳܐ ܡܶܢ ܡܬܽܘܡ ܕܺܐܝܬܰܘܗ̱ܝ ܙܰܕܺܝܩܳܐ ܘܰܕܦܳܪܶܩ ܘܢܺܝܚܳܐ ܟܽܠܗܶܝܢ ܐܰܟܚܕܳܐ܆ ܘܰܕܝܳܬܶܒ ܥܰܠ ܚܡܳܪܳܐ ܠܽܐܘܪܶܫܠܶܡ ܐܶܬܳܐ܆ ܐܶܠܳܐ ܐܶܢ ܗܰܘ ܕܒܰܠܚܽܘܕܰܘܗ̱ܝ ܡܰܠܟܳܐ ܕܡܰܠ̈ܟܶܐ ܘܰܐ‌ܠܳܗܳܐ ܘܦܳܪܽܘܩܳܐ ܝܶܫܽܘܥ܆ ܗܰܘ ܒܰܣܺܝܡܳܐ ܘܢܺܝܚܳܐ ܘܣܰܓܺܝ ܪ̈ܰܚܡܶܐ ܠܟܽܠܗܽܘܢ ܐܰܝܠܶܝܢ ܕܩܳܪܶܝܢ ܠܶܗ ܐܰܝܟ ܕܰܟܬܺܝܒ^[14].

ܟܰܕ ܗܳܟܺܝܠ ܝܳܬܶܒ ܗ̱ܘܳܐ. ܥܰܠ ܥܺܝܠܳܐ ܕܰܐܬܳܢܳܐ܆ ܗܰܘ ܕܩܳܕܶܡ ܗ̱ܘܳܐ ܡܛܰܦܶܤ ܠܥܰܡܳܐ ܗܰܘ ܕܡܶܢ ܥܰܡ̱ܡ̈ܶܐ ܗܰܝܡܶܢ܆ ܟܶܢܫܳܐ ܣܰܓܺܝܳܐܐ ܡܠܰܘܶܝܢ ܗܘܰܘ ܠܶܗ܆ ܟܰܕ ܛܰܪ̈ܦܶܐ ܕܕܶܩ̈ܠܶܐ ܛܥܺܝܢܺܝܢ ܗ̱ܘܰܘ. ܘܠܰܘ ܗܳܕܶܐ ܒܰܠܚܽܘܕ܆ ܐܶܠܳܐ ܐܳܦ ܟܰܕ ܣܰܘ̈ܟܶܐ ܕܙܰܝܬܳܐ ܘܡܳܐܢ̈ܶܐ ܥܰܠ ‌ܐܽܘܪܚܳܐ ܡܫܰܘܶܝܢ ܗ̱ܘܰܘ. ܗܳܠܶܝܢ ܕܶܝܢ܆ ܠܳܐ ܡܶܫܬܰܒ̈ܩܳܢ ܗ̱ܘܰܝ̈ ܕܢܶܗܘ̈ܝܳܢ܆ ܐܶ‎ܠܽܘ ܠܳܐ ܕܪ̈ܶܡܙܶܐ ܕܐ̱ܪ̈ܳܙܶܐ ܪܰܘܪ̈ܒܶܐ ܐܺܝܬܰܝܗܶܝܢ ܗ̱ܘܰܝ̈.

ܗܳܝ ܡܰܢ ܓܶܝܪ ܕܥܰܠ ܣܰܘ̈ܟܶܐ ܘܥܰܠ ܛܰܪ̈ܦܶܐ ܕܕܶܩ̈ܠܶܐ. ܢܕܰܝܶܫ ܚܡܳܪܳܐ܆ ܡܰܘܕܥܳܐ ܗ̱ܘܳܬ ܓܰܠܝܳܐܺܝܬ܆ ܕܠܰܘ ܒܰܠܚܽܘܕ ܗܰܘ ܕܰܪܟܺܝܒ ܗ̱ܘܳܐ ܠܶܗ܆ ܐܶܠܳܐ ܐܳܦ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܰܡܗܰܝܡܳܢܽܘ ܒܶܗ܆ ܠܟܽܠܗܽܘܢ ܒܥܶܠ̈ܕܒܳܒܰܝܗܽܘܢ ܥܬܺܝܕܺܝܢ ܗ̱ܘܰܘ ܕܰܢܫܰܥܒܕܽܘܢ ܘܰܢܣܺܝܡܽܘܢ ܬܚܶܝܬ ܪ̈ܶܓܠܰܝܗܽܘܢ܆ ܘܢܶܙܟܽܘܢ ܙܳܟܽܘܬܳܐ ܫܒܺܝܚܬܳܐ. ܫܽܘܘܕܳܥܳܐ ܓܶܝܪ ܕܙܳܟܽܘܬܳܐ ܐܺܝܬܰܝܗܶܝܢ ܣܰܘ̈ܟܶܐ ܘܛܰܪ̈ܦܶܐ ܕܕܶܩ̈ܠܶܐ. ܗܳܝ ܕܶܝܢ ܕܰܒ̈ܢܰܝ ܐ̱ܢܳܫܳܐ ܟܰܕ ܫܳܠܚܺܝܢ ܢܰܚܬܰܝ̈ܗܽܘܢ ܢܶܫܕܽܘܢ ܐܶܢܽܘܢ܆ ܡܰܙܥܩܳܐ ܗ̱ܘܳܬ ܩܰܪܺܝܒܳܐܺܝܬ ܐܰܝܟ ܕܰܠܡܺܐܡܰܪ. ܘܓܰܠܝܳܐܺܝܬ܆ ܗܳܠܶܝܢ ܕܒܶܗ ܒܢܶܣܝܳܢܳܐ ܡܶܢ ܒܳܬܰܪܟܶܢ ܐܶܬܚ̈ܙ݂ܺܝܶܢ.

ܐܳܦ ܓܶܝܪ ܗܳܢܽܘܢ ܕܗܰܝܡܶܢܘ܆ ܟܰܕ ܡܶܢ ܟܽܠܗܶܝܢ ܗܳܠܶܝܢ ܕܺܐܝܬ ܗ̱ܘܳܐ ܠܗܳܢܽܘܢ ܡܶܫܬܰܠܚܺܝܢ ܗ̱ܘܰܘ܆ ܘܳܐܦ ܡܶܢܶܗ ܕܰܠܒܽܘܫܗܽܘܢ ܕܰܟܢܺܝܫܳܐܺܝܬ^[15] ܐܳܡܰܪ: ܢܳܩܦܺܝܢ ܗ̱ܘܰܘ ܠܶܐܘܰܢܓܶܠܺܝܽܘܢ ܕܛܰܝܒܽܘܬܳܐ. ܟܬܺܝܒ ܓܶܝܪ ܒܰܟܬܳܒܳܐ ܦܪ̈ܰܟܣܺܝܤ܆ ܕܟܽܠܗܽܘܢ ܗܳܢܽܘܢ ܕܩܳܢܳܝ̈ܰܐ ܕܩܽܘܪ̈ܝܳܐ ܘܰܕܒ̈ܳܬܶܐ ܐܺܝܬܰܝܗܽܘܢ ܗ̱ܘܰܘ܆ ܟܰܕ ܡܙܰܒܢܺܝܢ ܗ̱ܘܰܘ ܡܰܝܬܶܝܢ ܗ̱ܘܰܘ ܠܛܺܝ̈ܡܶܐ ܕܗܳܠܶܝܢ ܕܡܶܙܕܰܒ̈ܢܳܢ ܗ̱ܘܰܝ̈܆ ܘܣܳܝܡܺܝܢ ܗ̱ܘܰܘ ܩܕܳܡ ܪ̈ܶܓܠܰܝܗܽܘܢ ܕܰܫܠܺܝ̈ܚܶܐ. ܡܶܬܺܝܗܶܒ^[16] ܗ̱ܘܳܐ ܕܶܝܢ ܠܟܽܠܚܰܕ܆ ܐܰܝܟ ܡܶܕܶܡ ܕܺܐܝܬ ܗ̱ܘܳܐ ܠܐ̱ܢܳܫ ܣܽܘܢܩܳܢܳܐ. ܘܶܐܢܕܶܝܢ ܠܳܐ܆ ܐܶ‎ܠܽܘܠܳܐ. ܕܗܳܠܶܝܢ ܐܺܝܬܰܝܗܶܝܢ ܗ̱ܘܰܝ̈܆ ܕܰܒܝܰܕ ܐܰܝܠܶܝܢ ܕܗܳܝܕܶܝܢ ܡܶܫܬܰܡܠ̈ܝܳܢ ܗ̱ܘܰܝ̈܆ ܐ̱ܪܳܙܳܢܳܐܺܝܬ ܩܳܕ̈ܡܳܢ ܗ̱ܘܰܝ̈. ܡܶܬܛܰܦ̈ܣܳܢ܆ ܐܳܦ ܥܽܘܟܳܪܳܐ ܗܳܘ̈ܝܳܢ ܗ̱ܘܰܝ̈ ܣܰܘ̈ܟܶܐ ܘܡܳܐܢ̈ܶܐ ܠܰܗܠܰܟܬܶܗ ܕܗܰܘ ܚܡܳܪܳܐ܆ ܟܰܕ ܒܪ̈ܶܓܠܰܘܗ̱ܝ ܒܰܕܡܽܘܬ ܢܶܫ̈ܒܶܐ ܡܶܬܦܰܪܟܠܺܝܢ ܗܘܰܘ.

ܟܶܢܫܳܐ ܕܶܝܢ. ܕܗܳܢܽܘܢ ܕܳܐܙܺܠ̱ܝܢ ܗ̱ܘܰܘ ܩܕܳܡܰܘ̈ܗ̱ܝ ܘܰܕܗܳܢܽܘܢ ܕܳܐܬܶܝܢ ܗ̱ܘܰܘ ܒܳܬܪܶܗ ܡܰܙܥܶܩ ܗ̱ܘܳܐ܆ ܐܽܘܫܰܥܢܳܐ ܠܰܒܪܶܗ ܕܕܰܘܝܺܕ. ܗܳܕܶܐ ܕܶܝܢ. ܟܰܕ ܡܶܢ ܠܶܫܳܢܳܐ ܥܶܒܪܳܝܳܐ. ܠܠܶܫܳܢܳܐ ܝܰܘܢܳܝܳܐ ܡܶܬܚܰܠܦܳܐ ܐܰܘܟܺܝܬ ܥܳܒܪܳܐ ܐܰܝܟ ܬܶܫܒܽܘܚܬܳܐ ܐܰܘ ܡܰܙܡܽܘܪܳܐ ܠܰܒܪܶܗ ܕܕܰܘܺܝܕ^[17] ܡܶܬܦܰܫܩܳܐ. ܚܕܳܐ ܓܶܝܪ ܣܶܡܟܰܬ. ܬܚܶܝܬ ܫܶܢܳܐ ܓܳܢܒܺܝܢܰܢ ܒܝܰܕ ܡܰܦܩܳܗ̇ ܕܒܰܪ̱ܬ ܩܳܠܳܐ܆ ܐܰܝܟ ܕܢܶܣܬܒܰܪ ܕܳܐܡܪܺܝܢܰܢ: ܐܰܝܟ ܐܢܢܐ. ܗܳܝ ܕܶܝܢ ܕܢܶܫܬܰܒܰܚ. ܐܰܘ ܒܝܰܕ ܡܰܙܡܽܘܪܳܐ ܢܶܬܝܰܩܰܪ܆ ܠܰܘ ܠܐ̱ܢܳܫ ܡܶܢ ܒܢܰܝ̈ܢܳܫܳܐ ܠܳܚܡܳܐ܆ ܠܗܰܘ ܕܶܝܢ ܕܒܰܠܚܽܘܕܰܘܗ̱ܝ ܐܰ‎ܠܳܗܳܐ ܒܰܟܝܳܢܳܐ܆ ܐܰܝܟ ܗܰܘ ܕܳܐܡܰܪ: ܘܰܐܪܡܺܝ ܒܦܽܘܡܳܐ ܕܺܝܠܝ ܙܡܺܝܪܬܳܐ ܚܕܰܬܳܐ^[18]܆ ܬܶܫܒܽܘܚܬܳܐ ܠܰܐܠܳܗܳܐ ܕܺܝܠܰܢ. ܘܶܐܙܡܰܪ ܠܰܐܠܳܗܳܐ ܥܰܕ ܐܺܝܬܰܝ^[19].

ܡܰܘܣܦܺܝܢ ܗ̱ܘܰܘ ܕܶܝܢ ܗܳܢܽܘܢ ܕܡܰܙܥܩܺܝܢ ܗ̱ܘܰܘ ܐܳܦ ܗܳܕܶܐ܆ ܡܒܰܪܰܟ ܗ̱ܘ̣ ܗܰܘ ܕܳܐܬܶܐ ܒܰܫܡܶܗ ܕܡܳܪܝܳܐ. ܐܽܘܫܰܥܢܳܐ^[20] ܒܰܡܪ̈ܰܘܡܶܐ. ܐܳܦ ܟܺܝܬ ܙܳܕܶܩ ܗ̱ܘܳܐ ܕܢܺܐܡܪܽܘܢ ܗ̱ܘܰܘ ܗܳܢܽܘܢ ܕܰܡܩܰܠܣܺܝܢ ܗ̱ܘܰܘ ܐܰܝܟ ܥܝܳܕܳܐ܆ ܕܛܳܒܳܐܺܝܬ ܐܶܬܰܝܬ ܐܰܝܟ ܡܰܢ ܕܰܚܕܳܐ ܙܒܰܢ ܐܶܬܳܐ ܠܶܗ܆ ܐܰܘ ܐܰܝܟ ܕܰܡܫܰܠܡܺܝܢ ܗ̱ܘܰܘ ܠܶܗ ܠܰܢܒܺܝܳܐ ܫܡܽܘܐܺܝܠ ܗܳܢܽܘܢ ܕܡܶܢ ܩܕܺܝܡ ܟܰܕ ܐܳܡܪܺܝܢ ܗ̱ܘܰܘ: ܫܰܝܢܳܐ ܡܰܥܰܠܬܳܐ ܕܺܝܠܳܟ ܗܰܘ ܕܚܳܙܶܐ^[21].

ܗܳܝ ܕܶܝܢ ܕܢܰܙܥܩܽܘܢ ܒܪܺܝܟ ܗܽܘ ܗܰܘ ܕܳܐܬܶܐ ܒܰܫܡܶܗ ܕܡܳܪܝܳܐ܆ ܐܽܘܫܰܥܢܳܐ ܒܰܡܪ̈ܰܘܡܶܐ^[22]. ܘܰܐܝܟܰܢܳܐ ܕܰܐܘܣܶܦ ܠܽܘܩܳܐ܆ ܫܰܝܢܳܐ ܒܰܫܡܰܝܳܐ. ܘܫܽܘܒܚܳܐ ܒܰܡܪܰܘܡܳܐ^[23]܆ ܕܗܳܢܽܘܢ ܕܡܰܟܪܙܺܝܢ ܠܡܶܐܬܺܝܬܶܗ ܗܳܝ ܕܬܰܪܬܶܝܢ ܐܺܝܬܶܝܗ̇܆ ܗܳܝ ܕܒܳܗ̇ ܥܬܺܝܕ ܕܢܺܐܬܶܐ ܡܶܢ ܫܡܰܝܳܐ ܫܒܺܝܚܳܐܺܝܬ܆ ܡܶܢ ܒܳܬܰܪ ܕܡܰܩܶܦ ܒܫܰܝܢܳܐ ܠܰܐܪ̈ܥܳܢܝܳܬܳܐ ܠܘܳܬ ܫܡܰܝܳܢ̈ܝܳܬܳܐ^[24]܆ ܐܶܡܰܬܝ ܕܳܐܦ ܢܕܽܘܢ ܠܟܽܠܳܗ̇ ܡܶܬܥܰܡܪܳܢܺܝܬܳܐ ܒܙܰܕܺܝܩܽܘܬܳܐ܆ ܘܢܰܥܶܠ ܠܗܳܠܶܝܢ ܕܛܳܒܳܐܺܝܬ ܐܶܬܕܰܒܰܪܘ ܠܡܰܠܟܽܘܬܳܐ ܕܰܫܡܰܝܳܐ. ܡܶܛܽܠܗܳܕܶܐ ܓܶܝܪ܆ ܐܳܦ ܛܠܳܝ̈ܶܐ ܫܰܒܪ̈ܶܐ ܐܺܝܬܰܝܗܽܘܢ ܗ̱ܘܰܘ ܗܳܢܽܘܢ ܕܰܡܩܰܠܣܺܝܢ ܗ̱ܘܰܘ ܠܶܗ܆ ܘܗܳܠܶܝܢ ܩܳܥܶܝܢ ܗ̱ܘܰܘ܆ ܗܳܢܽܘܢ ܕܳܐܦ ܟܰܕ ܥܳܐܶܠ ܗ̱ܘܳܐ. ܥܰܠ̣ܘ ܥܰܡܶܗ ܠܗܰܝܟܠܳܐ. ܗܽܘ ܓܶܝܪ ܐܶܡܰܪ: ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ. ܕܶܐܢ ܠܳܐ ܬܶܬܗܰܦܟܽܘܢ ܘܬܶܗܘܽܘܢ ܐܰܝܟ ܛܠܳܝ̈ܶܐ܆ ܠܳܐ ܬܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ^[25].

ܢܶܬܒܰܩܶܐ ܕܶܝܢ܆ ܐܳܦ ܕܡܳܢܳܐ ܐܺܝܬܰܝܗܶܝܢ ܗ̱ܘܰܝ̈ ܣܰܘ̈ܟܶܐ ܛܺܥ̈ܝܢܳܬ ܙܳܟܽܘܬܳܐ܆ ܗܳܢܶܝܢ ܕܒܺܐܝ̈ܕܰܝܗܽܘܢ ܡܝܰܩܪܺܝܢ ܗ̱ܘܰܘ ܗܳܢܽܘܢ ܕܰܡܩܰܠܣܺܝܢ ܗ̱ܘܰܘ܆ ܠܗܰܘ ܕܦܰܐܝܽܘܬ݂ ܐܰ‎ܠܳܗܳܐܺܝܬ ܡܶܫܬܰܒܰܚ ܗ̱ܘܳܐ. ܐܶܘܰܢܓܶܠܺܝ̈ܣܛܶܐ ܡܰܢ ܗܳܟܺܝܠ ܕܰܟܬܰܒܘ܆ ܕܟܰܕ ܩܪܶܒ ܡܶܢ ܟܰܕܽܘ ܘܰܗܘ̣ܳܐ ܠܘܳܬ ܡܰܚܰܬܬܳܐ ܕܛܽܘܪܳܐ ܕܙܰܝ̈ܬܶܐ^[26]܆ ܫܰܪܺܝܘ ܗܳܢܽܘܢ ܕܟܶܢܫܳܐ ܕܰܢܩܰܒܠܽܘܢܳܝܗ̱ܝ ܆ ܘܢܺܐܙܽܠ̱ܘܢ ܩܕܳܡܰܘ̈ܗ̱ܝ ܘܰܢܩܰܠܣܽܘܢ܆ ܘܢܶܦܣܩܽܘܢ ܣܰܘ̈ܟܶܐ ܡܶܢ ܐܰܝܠܳܢ̈ܶܐ. ܡܚܰܘܶܝܢ ܓܰܠܝܳܐܺܝܬ܆ ܕܰܕܙܰܝ̈ܬܶܐ ܐܺܝܬܰܝܗܶܝܢ ܗ̱ܘܰܝ̈ ܗܶܢܶܝܢ ܣܰܘ̈ܟܶܐ. ܕܰܐܝܟ ܗܳܠܶܝܢ ܓܶܝܪ ܡܶܢ ܟܽܠܦܪܽܘܤ. ܐܺܝܬܰܝܗܶܝܢܗ̱ܘܰܝ̈܆ ܐܰܝܟ ܐܰܝܠܶܝܢ ܕܝܰܗ̱ܒ ܗ̱ܘܳܐ ܗܽܘ ܛܽܘܪܳܐ܆ ܗܰܘ ܕܳܐܦ ܕܙܰܝ̈ܬܶܐ ܡܶܫܬܰܡܰܗ ܗ̱ܘܳܐ.

ܢܶܨܒܬܳܐ ܕܶܝܢ ܕܙܰܝܬܳܐ܆ ܬܰܪܥܽܘܬܳܐ ܕܰܐ‎ܠܳܗܳܐ ܡܫܰܘܕܥܳܐ܆ ܘܡܶܐܬܺܝܬܶܗ ܪܳܚܡܰܬ ܐ̱ܢܳܫܳܐ ܕܰܠܘܳܬܰܢ܆ ܗܳܝ ܕܠܰܘ ܡܶܛܽܠ ܙܰܕܺܝܩܽܘܬܳܐ ܕܺܝܠܰܢ ܗܳܝ ܕܳܐܦܠܳܐ ܐܺܝܬܶܝܗ̇܆ ܐܶܠܳܐ ܡܶܛܽܠ ܪ̈ܰܚܡܰܘ̈ܗ̱ܝ ܥܰܒܕܳܗ̇. ܗܳܟܰܢܳܐ ܓܶܝܪ ܐܳܦ ܠܫܽܘܠܳܡܳܐ ܕܛܳܘܦܳܢܳܐ ܗܰܘ ܕܰܒܝܰܘ̈ܡܰܝ ܢܽܘܚ ܘܰܠܪܽܘܓܙܳܐ ܗܰܘ ܕܢ̣ܳܚ^[27] ܒܪ̈ܰܚܡܶܐ ܕܰܡܫܰܝܢܽܘܬܳܐ ܕܡܶܢ ܠܥܶܠ܆ ܝܰܘܢܳܐ ܡܶܕܶܡ ܐܰܘܕܥܰܬ̣܆ ܕܛܰܪ̈ܦܶܐ ܕܙܰܝܬܳܐ ܒܦܽܘܡܳܗ̇ ܐܰܚܺܝܕܳܐ ܛܥܺܝܢܳܐ ܗ̱ܘܳܬ݂^[28].

ܐܰܘܣܶܦ ܕܶܝܢ ܝܽܘܚܰܢܳܢ ܐܶܘܰܢܓܶܠܺܝܣܛܳܐ ܝܰܬܺܝܪ ܡܶܢ ܗܳܠܶܝܢ ܐ̱ܚܪ̈ܳܢܶܐ ܐܳܦ ܗܳܕܶܐ܆ ܟܰܕ ܫܡܰܥܘ ܐܳܡܰܪ ܝܶܫܽܘܥ ܐܳܬܶܐ ܠܽܐܘܪܶܫܠܶܡ܆ ܫܩܰܠܘ ܣܰܘ̈ܟܶܐ ܕܕܶܩ̈ܠܶܐ ܘܰܢܦܰܩܘ ܠܽܐܘܪܥܶܗ^[29]. ܐܳܘ ܠܒܰܪ̱ܬ ܩܳܠܳܐ ܛܽܘܒܬܳܢܳܐܺܝܬ ܘܰܕܝܰܬܺܝܪ ܡܶܢ ܟܽܠ ܡܥܰܠܝܳܐ ܘܪܳܡܳܐ ܕܝܽܘܚܰܢܳܢ. ܫܰܪܺܝܪܳܐܺܝܬ. ܒܪܳܐ ܕܪܰܥܡ ‌ܐܺܝܬܰܘܗ̱ܝ^[30]. ܪܳܥܶܡ ܠܰܢ ܓܶܝܪ ܕܽܘܓ̈ܡܰܛܰܐ ܕܰܡܡܰܠܠܽܘܬ ܐܰ‎ܠܳܗܽܘܬܳܐ܆ ܘܠܳܐ ܫܳܒܶܩ ܡܶܕܶܡ ܒܰܛܺܝܠܳܐ ܘܰܡܫܳܟ̣ܳܐ܆ ܐܳܦ ܟܰܕ ܬܰܫܥܺܝܬܳܐ ܒܰܠܚܽܘܕ ܡܶܫܬܰܥܶܐ.

ܕܶܩܠܳܐ ܓܶܝܪ܆ ܫܡܰܝܳܢܳܐ ܡܚܰܘܶܐ ܗ̱ܘܳܐ ܠܶܗ ܠܗܰܘ ܕܡܶܬܩܰܠܰܤ܆ ܘܰܕܡܶܢ ܪܰܘܡܳܐ ܐܰܬܺܝ. ܗܽܘ ܓܶܝܪ ܒܰܠܚܽܘܕܰܘܗ̱ܝ ܡܶܢ ܐܺܝܠܳܢ̈ܶܐ ܗܳܠܶܝܢ ܐ̱ܚܪ̈ܳܢܶܐ܆ ܡܶܬܥܰܠܶܐ ܡܰܢ ܠܘܳܬܶܗ ܕܰܫܡܰܝܳܐ܆ ܘܰܒܪܰܘܡܳܐ ܡܰܫܘܰܚ ܘܰܡܥܰܒܰܛ ܛܰܪ̈ܦܶܐ܆ ܟܰܕ ܣܰܘ̈ܟܶܐ ܚܶܘܳܪ̈ܳܬܳܐ ܛܳܥܶܢ ܥܰܠ ܪܺܝܫܶܗ܆ ܒܥܶܩܳܪܶܗ ܕܶܝܢ ܘܒܰܡܨܰܥܬܶܗ ܘܰܥܕܰܡܳܐ ܠܩܰܪܩܰܦܬܶܗ܆ ‌ܐܺܝܬܰܘܗ̱ܝ ܩܰܫܝܳܐ ܘܕܰܠܥܶܠ ܬܪܺܝܨܳܐܺܝܬ ܡܶܬܬܰܝܬܶܐ ܘܰܡܙܰܩܰܦ ܘܕܰܥܣܺܝܩ ܠܡܶܬܬܕܳܫܽܘ܆ ܘܰܕܡܰܣܪܰܚ ܠܰܛܠܳܝ̈ܶܐ ܗܳܠܶܝܢ ܕܥܰܠ ܣܰܘ̈ܟܶܐ ܕܺܝܠܶܗ. ܗܳܟܰܢܳܐ܆ ܐܳܦ ܗܰܘ ܕܰܠܘܳܬ ܝܺܕܰܥܬܳܐ ܕܰܡܫܺܝܚܳܐ ܪܳܕܶܦ ܐܽܘܪܚܳܐ ܥܰܣܩܬܳܐ ܘܰܡܙܰܩܰܦܬܳܐ ܢܶܫܟܰܚ܆ ܟܰܕ ܒܝܰܕ ܥܰܡ̈ܠܶܐ ܕܰܡܝܰܬܪܽܘܬܳܐ ܪܳܕܶܐ. ܟܰܕ ܕܶܝܢ ܠܘܳܬ ܪܰܘܡܳܐ ܕܺܝܠܳܗ̇ ܡܶܬܡܰܛܶܐ. ܐܰܝܟ ܕܡܰܨܝܳܐ ܠܰܒ̈ܢܰܝ ܐ̱ܢܳܫܳܐ. ܢܶܦܓܰܥ ܒܢܽܘܗܪܳܐ ܕܝܰܬܺܝܪ ܢܰܨܺܝܚ ܕܰܡܡܰܠܠܽܘܬ ܐܰ‎ܠܳܗܽܘܬܳܐ܆ ܘܰܒܓܶܠܝܳܢܳܐ ܕܠܳܐ ܡܶܬܡܰܠ̈ܠܳܢܝܳܬܳܐ܆ ܐܰܟܙܢܳܐ ܕܰܒܣܰܘ̈ܟܶܐ ܕܕܶܩ̈ܠܶܐ ܕܝܰܬܺܝܪ ܚܶܘܳܪ̈ܳܢ. ܡܶܛܽܠܗܳܕܶܐ. ܡܰܙܥܩܳܐ ܗ̱ܘܳܬ ܟܰܠܬܳܐ ܗܳܝ ܕܰܒܬܶܫܒܚܰܬ ܬܶܫܒ̈ܚܳܬܳܐ. ܗܳܝ ܟܺܝܬ ܕܺܐܝܬܶܝܗ̇ ܥܺܕܬܳܐ ܕܗܳܢܽܘܢ ܕܗܰܝܡܶܢܘ ܒܰܡܫܺܝܚܳܐ܆ ܐܶܡܪܶܬ. ܕܶܐ݀ܣܰܩ ܥܰܠ ܕܶܩܠܳܐ. ܐܶ݀ܚܽܘܕ ܒܪ̈ܰܘܡܶܐ ܕܺܝܠܶܗ^[31].

ܗܳܝ ܕܶܝܢ ܕܐ̱ܢܳܫܺܝ̈ܢ ܡܶܢ ܐܶܘܰܢܓܶܠܺܝ̈ܣܛܶܐ ܢܰܘܣܦܽܘܢ ܗܳܠܶܝܢ ܕܠܰܐ̱ܚܪ̈ܳܢܶܐ ܙܰܒ̈ܢܺܝܢ ܣܰܓܺܝ̈ܳܐܢ ܠܳܐ ܐܰܡܺܝܪ̈ܳܢ܆ ܕܣܰܩܽܘܒܠܳܝܽܘܬܳܐ ܡܰܢ. ܘܠܳܐ ܟܽܠ ܟܽܠܶܗ ܐܺܝܬܶܝܗ̇. ܐܺܝܬܶܝܗ̇ ܕܶܝܢ ܕܬܽܘܢܳܝܳܐ ܕܝܰܬܺܝܪ ܚܰܬܺܝܬ̣. ܣܰܩܽܘܒܠܳܝܽܘܬܳܐ ܓܶܝܪ܆ ܫܳܪܝܳܐ ܒܝܰܕ ܣܰܩܽܘܒܠܳܝ̈ܳܬܳܐ ܠܗܳܝ ܕܡܶܢ ܐ̱ܚܪܺܢܳܐ ܐܶܬܰܐܡܪܰܬ܆ ܘܠܰܘ ܗܺܝ ܟܰܕ ܗܺܝ ܒܝܰܕ ܚܰܬܺܝܬ̣ܽܘܬܳܐ ܡܩܰܝܡܳܐ.

ܗܳܠܶܝܢ ܐܺܝܬܰܝܗܽܘܢ ܐ̱ܪ̈ܳܙܶܐ ܕܥܺܐܕܳܐ ܗܳܢܳܐ ܕܩܰܪܺܝܒ ܠܰܢ܆ ܗܳܢܽܘܢ ܕܒܺܐܝ̈ܕܰܝܗܽܘܢ ܚܰܘܺܝ ܗܽܘ ܠܶܗ ܥܰܡܰܢܽܘܐܶܝܠ ‌ܐܰ‎ܠܳܗܳܐ ܫܰܪܺܝܪܳܐ. ܟܰܕ ܐܰܘܣܶܦ ܥܰܠ ܗܳܠܶܝܢ ܡܶܢ ܟܰܕܽܘ ܐܶܬܶܐܡܰܪ̈ܝ̱܆ ܐܳܦ ܗܳܠܶܝܢ. ܟܰܕ ܓܶܝܪ ܠܗܳܢܽܘܢ ܕܰܡܙܰܒܢܺܝܢ ܘܙܳܒܢܺܝܢ ܛܪܰܕ ܡܶܢ ܗܰܝܟܠܳܐ܆ ܕܒܰܝܬܳܐ ܕܺܝܠܶܗ ‌ܐܺܝܬܰܘܗ̱ܝ ܚܰܘܝܶܗ ܠܗܳܢܳܐ. ܟܰܕ ܐܳܡܰܪ: ܟܬܺܝܒ ܕܒܰܝܬܝ܆ ܒܶܝܬ ܨܠܽܘܬܳܐ ܢܶܬܩܪܶܐ^[32]. ܟܰܕ ܒܗܽܘܢ ܒܣܽܘܥܪ̈ܳܢܶܐ ܡܰܘܕܰܥ ܗ̱ܘܳܐ܆ ܕܟܽܠܗܶܝܢ ܗܳܠܶܝܢ ܕܺܐܝܬ ܠܶܗ ܠܰܐܒܳܐ ܕܺܝܠܶܗ ܐܺܝܬܰܝܗܶܝܢ^[33]܆ ܘܰܕܚܰܕ ‌ܐܺܝܬܰܘܗ̱ܝ ܐܰ‎ܠܳܗܳܐ ܕܕܺܝܰܬܺܝܩܺܐ ܚܕܰܬܳܐ ܘܥܰܬܺܝܩܬܳܐ. ܘܠܰܣܡܰܝ̈ܳܐ ܕܶܝܢ. ܘܠܰܚܓܺܝܪ̈ܶܐ ܕܰܩܪܶܒܘ ܠܘܳܬܶܗ ܒܗܰܝܟܠܳܐ ܐܰܣܺܝ ܐܶܢܽܘܢ^[34].

ܚܰܣܳܡ̈ܶܐ ܕܶܝܢ ܪ̈ܺܝܫܰܝ ܟܳܗ̈ܢܶܐ ܘܣܳܦܪ̈ܶܐ ܕܝܽܗ̱ܘ̈ܕܳܝܶܐ܆ ܟܰܕ ܫܳܡܥܺܝܢ ܗ̱ܘܰܘ ܠܗܽܘܢ ܠܰܛܠܳܝ̈ܶܐ ܕܳܐܡܪܺܝܢ ܗ̱ܘܰܘ. ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܆ ܡܶܬܚܰܡܬܺܝܢ ܗ̱ܘܰܘ. ܘܰܡܚܰܪܩܺܝܢ ܗ̱ܘܰܘ ܫܶܢܰܝ̈ܗܽܘܢ. ܣܰܓܺܝ ܓܶܝܪ ܡܳܚܝܳܐ ܗ̱ܘܳܬ ܠܗܽܘܢ܆ ܕܠܰܒܪܶܗ ܕܕܰܘܺܝܕ ܡܫܰܒܚܺܝܢ ܗ̱ܘܰܘ ܘܰܡܩܰܠܣܺܝܢ ܐܰܝܟ ܕܠܰܡܪܰܝܡܳܐ. ܐܰܟܙܢܳܐ ܕܳܐܦ ܗܳܫܳܐ ܠܗܳܢܽܘܢ ܕܦܳܣܩܺܝܢ ܠܶܗ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ. ܡܶܛܽܠܗܳܕܶܐ. ܐܳܦ ܐܶܡܰܪܘ ܠܶܗ: ܫܳܡܰܥ ܐܰܢ̱ܬ܆ ܡܳܢܳܐ ܐܳܡܪܺܝܢ ܗܳܠܶܝܢ؟ ܗܽܘ ܕܶܝܢ ܝܶܫܽܘܥ. ܐܶܡܰܪ ܠܗܽܘܢ܆ ܐܺܝܢ. ܠܳܐ ܡܬܽܘܡ ܩܪܰܝܬܽܘܢ܆ ܡܶܢ ܦܽܘܡܳܐ ܕܫܰܒܪ̈ܶܐ ܘܰܕܝܳܢܽܘ̈ܩܶܐ ܬܶܩܢܰܬ ܬܶܫܒܽܘܚܬܳܐ^[35].

ܐܳܦ ܟܺܝܬ ܐܶ‎ܠܽܘ ܐܰܝܟ ܡܶܠܬܳܐ ܕܪ̈ܰܫܺܝܥܶܐ. ܘܰܦܣܳܩܳܐ ܕܰܬܪܰܝܳܢܽܘܬܳܐ܆ ܐ̱ܚܪܺܢܳܐ ‌ܐܺܝܬܰܘܗ̱ܝ ܗ̱ܘܳܐ ܗܰܘ ܕܡܶܬܚܙܶܐ ܗ̱ܘܳܐ. ܠܒܰܪ ܡܶܢ ܗܰܘ ܕܰܡܛܰܫܰܝ ܗ̱ܘܳܐ܆ ܠܳܐ ܙܳܕܶܩ ܗ̱ܘܳܐ ܠܶܗ ܕܰܢܦܰܢܶܐ ܐܺܝܢ܆ ܘܰܢܒܰܝܬܶܐ ܠܶܗ ܗܰܘ ܡܳܐ ܕܣܳܟ ܠܳܐ ܙܳܕܶܩ ܠܶܗ. ܘܰܢܫܰܪܪܶܗ ܒܣܳܗܕܽܘܬܳܐ ܘܢܺܐܡܰܪ: ܠܳܐ ܡܬܽܘܡ ܩܪܰܝܬܽܘܢ ܡܶܢ ܦܽܘܡܳܐ ܕܫܰܒܪ̈ܶܐ ܘܰܕܝܳܢܽܘ̈ܩܶܐ ܬܶܩܢܰܬ ܬܶܫܒܽܘܚܬܳܐ. ܗܳܕܶܐ ܓܶܝܪ܆ ܠܘܳܬ ܥܳܒܽܘܕܳܐ ܕܟܽܠ ܘܰܐ‌ܠܳܗܳܐ ܡܙܰܡܰܪ ܠܳܗ̇ ܢܒܺܝܳܐ ܕܰܘܺܝܕ ܟܰܕ ܐܳܡܰܪ: ܡܳܪܝܳܐ ܡܳܪܰܢ. ܡܳܐ ܬܡܺܝܗ ܫܡܳܟ ܒܟܽܠܳܗ̇ ܐܰܪܥܳܐ܆ ܡܶܛܽܠ ܕܶܐܬܬܪܺܝܡܰܬ̣ ܪܰܒܽܘܬ ܦܰܐܝܽܘܬܳܐ ܕܺܝܠܳܟ ܠܥܶܠ ܡܶܢ ܫܡܰܝܳܐ܆ ܡܶܢ ܦܽܘܡܳܐ ܕܫܰܒܪ̈ܶܐ ܘܰܕܝܳܢܽܘ̈ܩܶܐ ܬܰܩܶܢܬ ܬܶܫܒܽܘܚܬܳܐ^[36].

ܘܠܳܗ̇ ܠܥܶܠܬܳܐ ܡܶܚܕܳܐ ܐܰܝܬܝܳܗ̇܆ ܕܡܶܛܽܠ ܡܳܢܳܐ ܡܶܢ ܦܽܘܡܳܐ ܕܫܰܒܪ̈ܶܐ ܘܰܕܝܳܢܽܘ̈ܩܶܐ ܬܰܩܶܢܬ ܬܶܫܒܽܘܚܬܳܐ ܡܶܛܽܠ ܒܥܶܠ̈ܕܒܳܒܰܝܟ ܐܳܡܰܪ: ܠܡܶܫܪܳܐ ܒܥܶܠܕܒܳܒܳܐ ܘܡܶܬܢܰܩܡܳܐ. ܗܳܕܶܐ ܝܰܬܺܝܪܳܐܺܝܬ ܡܚܰܘܝܳܐ ܠܶܗ ܠܡܰܙܡܽܘܪܳܐ܆ ܕܥܰܠ ܦܰܪܨܽܘܦܳܐ ܕܰܒܪܳܐ ܐܰܡܺܝܪ. ܠܡܰܟܣܳܢܽܘܬܳܐ ܓܶܝܪ. ܘܠܰܫܪܳܝܳܐ ܕܝܽܗ̱ܘ̈ܕܳܝܶܐ ܡܶܬܢܰܩ̈ܡܳܢܶܐ ܘܬܳܒܽܘ̈ܥܶܐ܆ ܩܰܒܳܠܗ̇ ܠܬܶܫܒܽܘܚܬܳܐ ܕܫܰܒܪ̈ܶܐ. ܗܳܢܽܘܢ ܟܺܝܬ. ܕܟܰܕ ܒܥܶܠܕܒܳܒܳܐܺܝܬ ܣܺܝܡܺܝܢ ܗ̱ܘܰܘ ܠܽܘܩܒܰܠ ܡܫܺܝܚܳܐ. ܡܶܛܽܠ ܚܣܳܡܳܐ܆ ܕܬܳܒܥܺܝܢ^[37] ܠܶܗ ܠܰܐܠܳܗܳܐ ܢܩܰܡܬܳܐ ܡܣܰܒܪܺܝܢ ܗ̱ܘܰܘ܆ ܟܰܕ ܓܽܘ̈ܕܳܦܶܐ ܡܩܰܛܪܓܺܝܢ ܗܘܰܘ ܥܠܰܘܗ̱ܝ.

ܐܷܠܳܐ. ܡܶܢ ܩܰܘܡܬܳܐ ܕܰܥܕܰܟܺܝܠ ܫܒܰܪܬܳܐ ܐܺܝܬܶܝܗ̇ ܬܰܩܶܢ ܠܶܗ ܡܫܺܝܚܳܐ ܬܶܫܒܽܘܚܬܳܐ܆ ܗܰܘ ܥܳܒܽܘܕܳܐ ܕܗܳܠܶܝܢ. ܗܳܝ ܕܶܝܢ ܕܬܰܩܶܢ ܗܳܕܶܐ ܐܺܝܬܶܝܗ̇. ܐܰܝܟ ܗܰܘ ܕܳܐܡܰܪ ܗ̱ܘܳܐ: ܕܠܳܐ ܡܫܰܡܠܝܰܐ ܗ̱ܘ ܡܰܢ ܙܰܒܢܳܐ ܕܰܛܠܳܝ̈ܶܐ ܗܳܢܽܘܢ ܕܰܡܫܰܒܚܺܝܢ܆ ܡܰܠܝܳܐ ܕܶܝܢ ܫܽܘܒܚܳܐ ܘܣܰܓܺܝ ܡܫܰܡܠܝܳܐ. ܐܰܝܟܰܢܳܐ ܓܶܝܪ ܠܰܘ ܡܫܰܡܠܝܰܐ ܗ̱ܘ܆ ܗܰܘ ܕܠܰܘ ܥܰܡ ܡܽܘܟܳܟܳܐ ܕܡܶܬܚܙܶܐ ܗ̱ܘܳܐ ܐܶܬܩܦܶܤ܆ ܐܶܠܳܐ ܕܰܡܫܰܒܰܚ ܗ̱ܘܳܐ ܠܗܰܘ ܕܥܰܠ ܥܺܝܠܳܐ ܝܳܬܶܒ ܗ̱ܘܳܐ܆ ܐܰܝܟ ܗܰܘ ܕܥܰܠ ܟܪ̈ܽܘܒܶܐ ܪܟܺܝܒ ܗ̱ܘܳܐ܆ ܘܠܶܗ ܟܰܕ ܠܶܗ ܡܰܘܕܶܐ ܗ̱ܘܳܐ ܒܪܶܗ ܕܕܰܘܺܝܕ ܘܰܐ‌ܠܳܗܳܐ ܡܪܰܝܡܳܐ ܫܰܪܺܝܪܳܐܺܝܬ.

ܗܰܘ ܓܶܝܪ ܕܺܐܝܬܰܘܗ̱ܝ ܒܰܟܝܳܢܶܗ ܒܪܶܗ ܕܰܐ‎ܠܳܗܳܐ܆ ܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܘܰܕܠܳܐ ܒܽܘܠܒܳܠܳܐ ܒܪܳܐ ܗܽܘ ܟܰܕ ܗܽܘ ܒܰܒܣܰܪ ܕܕܰܘܺܝܕ ܐܰ‎ܠܳܗܳܝܳܐ܆ ܟܰܕ ܒܶܣܪܳܐ ܗܰܘ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܝܳܠܕܰܬ ܐܰ‎ܠܳܗܳܐ ܒܬܽܘܠܬܳܐ ܚܰܝܶܕ ܠܶܗ܆ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܘܰܡܢܰܦܰܫ ܒܢܰܦܫܳܐ ܚܰܝܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ. ܚܰܕ ܓܶܝܪ ‌ܐܺܝܬܰܘܗ̱ܝ ܠܳܐ ܡܶܬܦܰܠܓܳܢܳܐܺܝܬ ܡܶܢ ܬܰܪܬܶܝܢ܆ ܡܶܢ ܐܰ‎ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ. ܘܡܶܛܽܠܗܳܕܶܐ܆ ܚܰܕ ܒܪܳܐ. ܚܰܕ ܡܫܺܝܚܳܐ. ܚܰܕ ܦܰܪܨܽܘܦܳܐ. ܚܰܕ ܩܢܽܘܡܳܐ. ܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܰܐ‎ܠܳܗܳܐ ܡܶܠܬܳܐ.

ܐܰܝܟܳܐ ܗܳܟܺܝܠ ‌ܐܺܝܬܰܝܗܽܘܢ܆ ܗܳܢܽܘܢ ܚܰܣܺܝܪ̈ܰܝ ܗܰܘܢܳܐ ܡܣܰܝ̈ܥܳܢܶܐ ܘܰܣܢܺܐܓܪ̈ܶܐ ܕܗܰܓܳܓܽܘܬܳܐ ܕܶܐܘܛܶܘܟ̥ܶܐ ܘܰܕܫܳܢܝܽܘܬܳܐ ܕܰܐܦܽܘܠܺܝܢܰܪܺܝܽܘܤ. ܕܰܠܡܳܐ ܐܶܣܬܰܢܩܶܬ ܡܶܕܶܡ ܥܰܠ ܥܳܒܽܘܕܽܘܬ ܐܳܬܘ̈ܳܬܳܐ ܡܰܛܥܝܳܢܺܝܬܳܐ ܗܳܝ ܚܶܠܡܳܢܳܝܬܳܐ܆ ܐܰܘ ܥܰܠ ܗܳܝ ܕܶܐ݀ܦܤܽܘܩ ܠܗܰܘܢܳܐ ܡܶܢ ܡܶܬܒܰܪܢܫܳܢܽܘܬܳܐ ܐܰ‎ܠܳܗܳܝܬܳܐ܆ ܐܰܝܟܰܢܳܐ ܕܶܐ݀ܚܰܘܶܐ ܠܠܳܐ ܥܕܺܝܠܽܘܬܳܗ̇ ܕܰܡܡܰܠܠܽܘܬ ܫܽܘܒܚܳܐ ܗܳܝ ܕܫܰܒܪ̈ܶܐ܆ ܐܰܘ ܕܰܠܡܳܐ ܟܽܘܬܡܳܐ ܡܶܕܶܡ ܘܨܳܐܽܘܬܳܐ ܒܕܽܘܟ ܡܶܣܬܒܰܪ ܕܛܳܐܶܫ ܒܥܰܡܰܢܽܘܐܶܝܠ ܥܺܝܠܳܐ ܗܰܘ ܕܰܐܬܳܢܳܐ܆ ܘܨܳܒܶܝܢ ܐܢ̱ܬܽܘܢ ܕܳܐܦ ܕܗܰܘ ܚܡܳܪܳܐ܆ ܗܰܓܳܓܽܘܬܳܐ ܬܶܓܒܠܽܘܢ ܐܶܡܳܐ.

ܟܰܕ ܓܶܝܪ ܠܫܽܘܪ̈ܳܝܶܐ ܩܰܕܡܳܝ̈ܶܐ ܕܡܶܬܒܰܣܪܳܢܽܘܬܳܐ ܠܳܐ ܡܶܫܬܰܚܠܦܳܢܺܝܬܳܐ ܕܡܶܠܬܳܐ. ܒܳܗܬܺܝܢ ܐܢ̱ܬܽܘܢ ܕܬܺܐܡܪܽܘܢ ܐܶܢܽܘܢ ܫܰܪܺܝܪ̈ܶܐ܆ ܡܶܢ ܟܽܠܗܶܝܢ ܒܳܗ̇ ܒܰܕܡܽܘܬܳܐ ܬܶܬܚܰܡܨܽܘܢ܆ ܘܦܰܢܛܰܣܺܝܰܐ ܬܶܗܘܶܐ ܠܟܽܘܢ ܬܰܚܦܺܝܬܳܐ ܕܒܶܗܬܬܳܐ. ܡܰܠܽܘܢ ܕܶܝܢ ܒܶܗܬܬܳܐ ܐ̱ܚܪܺܬܳܐ ܡܶܢ ܗܳܕܶܐ ܬܶܠܒܫܽܘܢ. ܡܰܢܽܘ ܓܶܝܪ ܕܺܐܝܬ ܠܶܗ ܗܰܘܢܳܐ܆ ܕܒܳܗܶܬ ܒܗܳܠܶܝܢ ܕܗܳܟܰܢܳܐ ܐܺܝܬܰܝܗܶܝܢ ܦܰܐܺܝܬ ܠܰܐܠܳܗܳܐ ܐܳܦܶܢ ܡܶܬܚܰܙ̈ܝܳܢ ܫܺܝ̈ܛܳܬܳܐ. ܘܗܳܠܶܝܢ ܕܺܐܝܬܰܝܗܶܝܢ ܦܳܪ̈ܽܘܩܳܝܳܬܳܐ ܕܓܶܢܣܳܐ ܕܺܝܠܰܢ ܠܳܐ ܢܰܘܕܶܐ܆ ܘܰܒܗܳܠܶܝܢ ܢܶܚܕܶܐ ܘܢܶܬܚܬܰܪ^[38].

ܐܳܦ ܓܶܝܪ ܡܰܢ ܕܡܶܫܟܰܚ ܗ̱ܘܳܐ ܥܰܡܰܢܽܘܐܶܝܠ. ܕܡܶܢ ܫܽܘܒܚܳܐ ܗܰܘ ܕܺܝܠܶܗ. ܐܳܦ ܠܺܝ ܢܶܬܶܠ܆ ܕܰܒܫܺܝܛܽܘܬܳܐ ܕܺܝܠܝ ܢܶܫܬܰܘܬܰܦ ܩܰܒܶܠ ܥܠܰܘܗ̱ܝ. ܡܶܛܽܠܗܳܕܶܐ ܗܳܟܺܝܠ. ܐܳܦ ܥܰܕܰܪ܆ ܟܰܕ ܠܳܐ ܒܰܨܰܪ ܠܡܰܠܝܽܘܬܳܐ ܘܠܳܐ ܣܢܺܝܩܽܘܬܳܐ ܒܰܝܬܳܝܬܳܐ ܕܺܝܠܶܗ ܘܰܕܒܰܟܝܳܢܳܐ. ܘܰܚܛܺܝܬܳܐ ܕܰܥܶܟ܆ ܘܠܰܘ ܚܛܺܝܬܳܐ ܢܣܰܒ. ܘܰܐܟܙܢܳܐ ܕܡܶܢ ܫܽܘܪܳܝܳܐ. ܕܠܳܐ ܚܛܺܝܬܳܐ ܤܛܰܪ ܡܶܢ ܛܽܘܠܫܳܐ ܒ̣ܪܳܝܗ̱ܝ ܠܒܰܪܢܳܫܳܐ܆ ܗܳܟܰܢܳܐ ܤܛܰܪ ܡܶܢ ܛܰܡܽܐܘܬܳܐ ܡܶܕܶܡ ܐܰܝܕܳܐ ܕܗܺܝ܆ ܒܝܰܕ ܡܶܬܒܰܪܢܫܳܢܽܘܬܳܐ ܠܶܗ ܟܰܕ ܠܶܗ ܚܰܕܶܬ܆ ܟܰܕ ܗܽܘ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ.

ܐܷܠܳܐ ܥܶܕܳܢܰܐ ܗ̱ܘ. ܕܰܢܢܺܝܚܺܝܘܗ̱ܝ ܠܡܺܐܡܪܳܐ܆ ܕܕܰܠܡܳܐ ܒܗܳܝ ܕܰܠܗܳܢܳܐ ܡܳܬܚܺܝܢܰܢ܆ ܠܰܙܥܽܘܪܽܘܬ ܡܶܠܬܳܐ ܕܠܽܘܓܠܳܓܳܐ ܕܰܡܡܰܠܠܽܘܬ ܐܰ‎ܠܳܗܽܘܬܳܐ ܕܰܛܠܳܝ̈ܶܐ ܢܥܺܝܩ ܠܗܳܝ ܕܳܐܦ ܐܢ̱ܬܽܘܢ ܝܰܩܰܪܘ܆ ܟܰܕ ܠܰܒܢܰܝ̈ܳܐ ܕܰܝܠܟܽܘܢ ܠܰܘ ܠܘܳܬ ܬܶܐܰܛܪ̈ܶܐ ܘܰܠܘܳܬ ܐܰܓܽܘܢܳܐ ܕܪ̈ܰܟܫܳܐ ܢܳܓܕܺܝܢ ܐܢ̱ܬܽܘܢ ܠܗܽܘܢ܆ ܘܦܽܘܪܓܳܝܳܐ ܡܰܘܒܕܳܢܳܐ ܕܢܰܦܫܳܐ ܠܗܽܘܢ ܡܶܫܟܚܺܝܢ ܐܢ̱ܬܽܘܢ܆ ܐܶܠܳܐ ܟܰܕ ܠܥܺܕܬܳܐ ܥܰܡܗܽܘܢ ܐܳܙܺܠ̱ܝܢ ܐܢ̱ܬܽܘܢ. ܘܳܐܡܪܺܝܢ ܐܢ̱ܬܽܘܢ ܠܶܗ ܠܰܡܫܺܝܚܳܐ ܥܳܒܽܘܕܳܐ ܕܟܽܠ ‌ܘܰܐ‌ܠܳܗܳܐ܆ ܕܳܐܦ ܡܶܢ ܦܽܘܡܳܐ ܕܫܰܒܪ̈ܶܐ ܕܺܝܠܰܢ ܘܰܕܝܳܢܽܘ̈ܩܶܐ ܬܰܩܶܢ̣ܬ ܬܶܫܒܽܘܚܬܳܐ^[39]. ܗܳܢܽܘܢ ܕܥܰܡܗܽܘܢ. ܐܳܦ ܢܶܬܶܠ ܠܰܢ ܐܰ‎ܠܳܗܳܐ܆ ܕܰܠܡܰܠܟܽܘܬܳܐ ܕܰܫܡܰܝܳܐ ܢܶ݀ܫܬܘܶܐ. ܡܶܛܽܠ ܕܕܺܝܠܶܗ ܐܺܝܬܶܝܗ̇ ܡܰܠܟܽܘܬܳܐ ܕܰܠܥܳܠܰܡ. ܘܰܕܠܳܐ ܫܽܘܠܳܡ܆ ܘܚܰܝܠܳܐ ܘܬܶܫܒܽܘܚܬܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ. ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܥܶܣܪܺܝܢ.

ܡܬܝ. 21: 9 [1]

ܡܰܣܠܝܳܐ[2]

ܥܒܪ̈ܝܐ. 2: 14  ܐܦ ܐ. ܦܛܪܘܣ. 3: 19 [3]

ܝܘܚܢܢ. 11: 11 [4]

ܝܘܚܢܢ. 12: 17 ـ 18 [5]

ܟܗ̈ܢܐ. 11: 3  ܐܦ ܬܶܢܝܳܢ ܢܳܡܘܣܐ. 14: 3 ـ 6 [6]

ܐܶܬܒܰܥܪܰܪ[7]

[8]ܡܬܝ. 21: 2  ܐܦ ܡܰܪܩܘܣ. 11: 2  ܐܦ ܠܘܩܐ. 19: 30  ܐܦ ܝܘܚܢܢ. 12: 14

[9]ܐܫܥܝܐ. 37: 16 ܐܦ ܕܢܝܐܝܠ. 3: 55  ܐܦ ܡܙܡܘܪ̈ܐ. 80: 1

ܐܫܥܝܐ. 57: 15 [10]

ܙܟܪܝܐ. 9: 9 [11]

ܣܶܦܪܐ ܕܒܪܝܬܐ. 14: 18 [12]

ܡܬܝ. 11: 29 [13]

ܡܙܡܘܪ̈ܐ. 86: 5 [14]

ܕܩܰܪܺܝܒܳܐܝܬ[15]

ܡܶܬܦܰܠܰܓ[16]

[17]ܦܽܘܫܳܩܳܐ ܗܳܢܳܐ ܕܗܳܪܟܳܐ. ܕܶܐܡܰܪ ܡܰܠܦܳܢܳܐ܆ ܠܰܘ ܕܒܰܪ̱ܬ ܩܳܠܳܐ ܗ̱ܝ ܕܰܠܘܳܬ ܥܶܒܪ̈ܳܝܶܐ ܕܡܶܬܶܐܡܰܪ ܐܽܘܫܰܥܢܳܐ ܐܺܝܬܰܘܗܝ܆ ܐܷܠܳܐ ܕܽܘܡܝܳܐ ܕܰܡܣܰܒܪܳܢܽܘܬܳܐ ܕܡܶܛܽܠ ܒܰܪ̱ܬ ܩܳܠܳܐ ܗܳܝ ܕܰܠܘܳܬ ܝܰܘܢܳܝ̈ܶܐ܆ ܗܳܝ ܕܰܗܘܳܬ ܒܚܽܘܠܳܦ ܐܰܬܘ̈ܳܬܳܐ ܡܶܢܶܗ ܡܶܢ ܫܡܳܐ ܗܳܢܳܐ ܕܽܐܘܫܰܥܢܳܐ܆ ܘܶܐܬܬܣܺܝܡܰܬ ܠܘܳܬ ܝܰܘܢܳܝ̈ܐ ܐܘܣܣܐܢܢܐ܆ ܟܰܕ ܐܺܝܬ ܠܳܗ̇ ܬܰܪܬܶܝܢ ܣܶܡܟܰܬ ܘܬܰܪܬܶܝܢ ܢܘܢ܆ ܡܶܛܽܠ ܕܠܳܐ ܡܶܫܟܚܺܝܢ ܝܰܘܢܳܝ̈ܶܐ ܕܢܺܐܡܪܽܘܢ܆ ܘܳܐܦܠܳܐ ܫܺܝܢ ܘܳܐܦܠܳܐ ܥܶܐ. ܠܗܳܕܶܐ ܓܶܝܪ ܒܰܪ̱ܬ ܩܳܠܳܐ ܕܐܘܣܣܐܢܢܐ: ܟܰܕ ܦܰܠܓܳܗ̇ ܡܰܠܦܳܢܳܐ ܠܬܰܪܬܶܝܢ܆ ܘܰܥܒܰܕ ܡܶܢܳܗ̇ ܐܘܣ ܡܶܢܶܗ …. ܘܠܶܗ ܕܡܶܬܦܰܫܰܩ ܐܰܝܟ ܡܰܢ ܗܳܝ ܐ̱ܚܪܺܬܳܐ ܕܫܶܪܟܰܬ ܕܺܐܝܬܶܝܗ̇ ܣܐܢܢܐ ܟܰܕ ܓܢܰܒ ܠܗܳܝ ܣܶܡܟܰܬ܆ ܐܢܢܐ ܒܰܠܚܽܘܕ ܐܶܡܰܪ ܕܦܳܐܶܫ. ܘܰܠܗܳܢܳܐ ܕܰܡܺܝ ܐܰܘܟܺܝܬ ܐܰܣܒܰܪ ܕܺܐܝܬܰܘܗܝ ܐܰܝܟ ܕܰܒܠܶܫܳܢܳܐ ܝܰܘܢܳܝܳܐ܆ ܬܶܫܒܽܘܚܬܳܐ. ܐܰܘ ܡܰܙܡܽܘܪܳܐ܀

  ܕܕܳܡܝܳܐ ܠܗܳܕܶܐ ܐܺܝܬ ܠܡܶܚܙܳܐ ܕܰܥܒܰܕ ܗܽܘ ܡܰܠܦܳܢܳܐ܆ ܐܳܦ ܥܰܠ ܫܡܳܐ ܕܝܶܫܽܘܥ. ܟܰܕ ܣܳܡ ܓܶܝܪ ܗܳܝ ܕܰܐܝܟ ܡܶܢ ܠܶܫܳܢܳܐ ܥܶܒܪܳܝܳܐ ܕܰܩܪܳܐ ܠܶܗ ܝܶܫܽܘܥ: ܘܦܰܫܶܩ ܥܠܰܘܗܝ ܦܽܘܪܩܳܢܳܐ ܕܰܐܠܳܗܳܐ܆ ܚܳܪ ܬܽܘܒ ܐܳܦ ܒܰܣܝܳܡܶܗ ܐܰܝܟ ܕܰܒܝܰܘܢܳܝܳܐ ܕܺܝܠܶܗ ܕܰܫܡܳܐ: ܕܡܶܬܩܪܶܐ ܝܰܘܢܳܐܺܝܬ ܐܺܝܣܽܘܣ  ܘܰܡܣܰܒܰܗ ܠܳܐܣܝܽܘܬܳܐ: ܘܰܐܘܣܶܦ ܐܶܡܰܪ ܒܦܽܘܫܳܩܳܐ. ܐܳܦ ܐܳܣܝܽܘܬܳܐ. ܐܳܣܝܽܘܬܳܐ ܓܶܝܪ ܐܺܝܣܺܝܣ ܡܶܬܩܰܪܝܳܐ ܝܰܘܢܳܐܝܬ. ܗܳܟܰܢܳܐ ܥܒܰܕ ܦܽܘܫܳܩܳܐ ܕܒܰܪ̱ܬ ܩܳܠܳܐ ܕܐܘܣܣܐܢܢܐ   ܦܽܘܫܳܩܳܐ ܕܶܝܢ ܕܒܰܪ̱ܬ ܩܳܠܳܐ ܗܳܝ ܕܥܶܒܪ̈ܳܝܶܐ ܕܳܐܡܪܳܐ ܐܽܘܫܰܥܢܳܐ. ܠܳܐ ܥܒܰܕ ܗܳܕܶܐ ܓܶܝܪ ܠܰܘ ܬܶܫܒܽܘܚܬܳܐ ܡܶܬܦܰܫܩܳܐ܆ ܐܷܠܳܐ ܦܽܘܪܩܳܢܳܐ. ܟܰܕ ܓܶܝܪ ܠܦܽܘܪܩܳܢܳܐ ܡܣܰܟܶܝܢ ܗܘܰܘ ܟܽܠܗܽܘܢ܆ ܐܰܝܟ ܕܡܶܢ ܢܒܺܝܽܘܬܳܐ ܕܰܙܟܰܪܝܳܐ ܕܳܐܡܰܪ: ܕܗܳܐ ܡܰܠܟܶܟܝ ܐܳܬܶܐ ܠܶܟܝ ܙܰܕܺܝܩܳܐ ܘܦܳܪܽܘܩܳܐ܆ ܟܰܕ ܢܦܰܩܘ ܠܽܐܘܪܥܶܗ ܕܡܳܪܰܢ܆ ܐܽܘܫܰܥܢܳܐ ܟܽܠܗܽܘܢ ܩܳܥܶܝܢ ܗܘܰܘ. ܕܺܐܝܬܶܝܗ̇ ܥܶܒܪܳܐܺܝܬ܆ ܐܰܘ ܦܽܘܪܩܳܢܳܐ. ܐܰܝܟ ܐ̱ܢܳܫ ܢܺܐܡܰܪ܆ ܐܰܘ ܦܽܘܪܩܳܢܳܐ. ܠܰܒܪܶܗ ܕܕܰܘܺܝܕ ܠܳܚܶܡ ܕܺܐܝܬܰܘܗܝ ܡܫܺܝܚܳܐ ܫܰܪܺܝܪܳܐ܆ ܘܠܰܘ ܠܐܢܳܫ ܐ̱ܚܪܺܝܢ ܡܶܢ ܗܳܢܽܘܢ ܕܫܰܪܟܳܐ. ܐܰܘ ܦܽܘܪܩܳܢܳܐ ܒܰܡܪ̈ܰܘܡܶܐ. ܐܰܘ ܦܽܘܪܩܳܢܳܐ ܠܰܒܪܳܐ ܕܕܰܘܺܝܕ܀

  ܐܳܦ ܓܶܝܪ ܫܡܳܐ ܕܝܶܫܽܘܥ. ܕܡܰܝܬܶܐ ܣܶܒܗܳܐ ܕܰܫܡܳܐ ܗܳܢܳܐ ܕܐܽܘܫܰܥܢܳܐ܆ ܦܳܪܽܘܩܳܐ ܡܶܬܦܰܫܰܩ܆ ܘܳܐܦ ܫܡܳܐ ܕܶܐܫܰܥܝܳܐ܆ ܦܽܘܪܩܳܢܳܐ ܕ܏ܝܗ܆ ܗܳܢܰܘ ܕܶܝܢ ܕܰܐܠܳܗܳܐ. ܗܳܝ ܕܶܝܢ ܦܳܪܽܘܩܽܘܬܳܐ. ܐܰܘܟܺܝܬ ܦܽܘܪܩܳܢܳܐ ܒܠܶܫܳܢܳܐ ܥܶܒܪܳܝܳܐ܆ ܝܶܫܽܘܥܬ ܡܶܬܰܐܡܪܳܐ܀

ܡܙܡܘܪ̈ܐ. 40: 3 [18]

ܡܙܡܘܪ̈ܐ. 104: 33 [19]

[20] ܙܳܕܶܩ ܠܡܶܕܰܥ܆ ܕܠܰܘ ܦܫܺܝܛܳܐܺܝܬ. ܘܠܰܘ ܕܠܳܐ ܥܶܠܬܳܐ ܘܰܐܝܟ ܡܶܕܶܡ ܕܳܐܬܳܐ ܠܦܽܘܡܳܐ܆ ܘܠܰܘ ܗܶܢܽܘܢ ܛܠܳܝ̈ܶܐ ܡܶܢ ܢܰܦܫܗܽܘܢ ܓܰܒܠܽܘܗ̇ ܠܒܰܪ̱ܬ ܩܳܠܳܐ ܗܳܝ ܕܽܐܘܫܰܥܢܳܐ. ܐܷܠܳܐ ܟܬܺܝܒܬܳܐ ܐܺܝܬܶܝܗ̇ ܗ̱ܘܳܬ݂܆ ܘܡܶܢ ܙܡܺܝܪ̈ܳܬܳܐ ܕܪܽܘܚܳܐ܆ ܐܳܦܶܢ ܠܰܘ ܠܟܽܠܢܳܫ ܝܺܕܺܝܥܳܐ ܗܳܕܶܐ܆ ܡܶܛܽܠ ܕܥܶܒܪܳܐܺܝܬ ܐܺܝܬܶܝܗ̇ ܗܺܝ ܒܰܪ̱ܬ ܩܳܠܳܐ. ܗܳܢܳܐ ܓܶܝܪ ܒܡܰܙܡܽܘܪܳܐ ܗܰܘ ܏ܕܩܝܙ 117 ܟܬܺܝܒ܆ ܐܰܝܟ ܕܰܒܡܰܫܠܡܳܢܽܘܬܳܐ ܡܰܢ ܕܣܽܘܪ̈ܳܝ݂ܳܝ݂ܶܐ܆ ܐܘ ܡܳܪܝܳܐ ܦܪܽܘܩܰܝܢܝ. ܐܰܘ ܡܳܪܝܳܐ ܦܰܨܳܢܝ. ܒܗܳܝ ܕܶܝܢ ܕܰܠܘܳܬ ܝܰܘܢܳܝ̈ܶܐ܆ ܐܳܘ ܡܳܪܝܳܐ ܦܪܽܘܩ ܟܺܝܬ܆ ܐܳܘ ܡܳܪܝܳܐ. ܐܰܨܠܰܚ ܟܺܝܬ. ܗܳܕܶܐ ܕܶܝܢ ܟܺܝܬ ܐܳܣܪܳܐ܆ ܠܳܐ ܡܶܬܶܐܡܰܪ ܒܠܶܫܳܢܳܐ ܥܶܒܪܳܝܳܐ. ܗܽܘ ܕܶܝܢ ܦܶܬܓܳܡܳܐ ܟܽܠܶܗ ܐܺܝܬܰܘܗ̱ܝ ܠܘܳܬ ܥܶܒܪ̈ܳܝܶܐ. ܗܳܟܰܢܳܐ܀ ܐܢܢܐ ܐܰܕܽܘܢܰܝ ܐܘܫܝܥܐܢܐ܆ ܐܢܢܐ ܐܰܕܘܢܰܝ. ܐܨܠܝ̣ܝ ܐܢܐ.

  ܠܗܳܢܳܐ ܗܳܟܺܝܠ ܦܶܬܓܳܡܳܐ ܩܳܥܶܝܢ ܗܘܰܘ ܛܠܳܝ̈ܶܐ ܘܳܐܦ ܣܰܓܺܝ̈ܶܐܐ ܡܶܢ ܗܰܘ ܟܶܢܫܳܐ܆ ܘܡܰܠܽܘܬܺܝܢ ܗ̱ܘܰܘ ܠܶܗ ܠܦܶܬܓܳܡܳܐ ܗܰܘ ܕܒܳܬܪܶܗ܆ ܒܪܺܝܟ ܗܽܘ ܗܰܘ ܕܳܐܬܶܐ ܒܰܫܡܶܗ ܕܡܳܪܝܳܐ. ܘܬܳܢܶܝܢ ܗܘܰܘ. ܘܰܡܬܰܠܬܺܝܢ ܠܳܗ̇ ܠܒܰܪ̱ܬ ܩܳܠܳܐ܆ ܒܰܙܢܰܝ̈ܳܐ ܣܰܓܺܝ̈ܶܐܐ. ܐܘܫܝܥܐܢܐ ܐܘܫܝܥܐܢܐ ܐܘܫܝܥܐܢܐ ܐܘܫܝܥܐܢܐ ܒܰܡܪܰܘܡܳܐ. ܐܘܫܝܥܐܢܐ ܠܰܒܪܶܗ ܕܕܰܘܺܝܕ. ܗܰܘ ܗܳܟܺܝܠ ܢܐ܆ ܕܐܝܬ ܒܫܽܘܠܳܡܶܗ ܕܰܫܡܳܐ܆ ܐܳܦܶܢ ܡܰܣܒܰܗ ܠܗܰܘ ܢܐ ܐܶܣܳܪܳܐ ܕܰܠܘܳܬ ܥܶܒܪ̈ܳܝܶܐ܆ ܠܰܘ ܗܽܘ ܐܺܝܬܰܘܗ̱ܝ܆ ܘܠܰܘ ܛܳܒܳܐܺܝܬ ܣܺܝܡ ܒܡܰܫܠܡܳܢܽܘܬܳܐ ܗܳܝ ܕܰܠܘܳܬ ܝܰܘܢܳܝ̈ܶܐ. ܐܷܠܳܐ܆ ܐܺܝܬܰܘܗ̱ܝ܆ ܐܳܘ ܡܳܪܝܳܐ ܦܪܽܘܩܰܝܢܝ܆ ܐܰܘ ܡܳܪܝܳܐ ܐܰܨܠܰܚܰܝܢܝ. ܐܘܫܝܥ ܓܶܝܪ ܐܺܝܬܰܘܗܝ. ܦܳܪܽܘܩ. ܗܰܘ ܕܶܝܢ ܢܐ ܐܺܝܬܰܘܗܝ ܝܢܝ. ܗܳܢܰܘ ܕܶܝܢ ܠܺܝ. ܘܰܐܟܚܕܳܐ ܟܽܠܶܗ܆ ܐܘܫܝܥܐܢܐ ܦܪܽܘܩܰܝܢܝ. ܘܗܳܟܰܢܳܐ ܣܒܺܝܣܳܐܺܝܬ. ܟܽܠܶܗ ܟܶܢܫܳܐ ܩܳܥܶܐ ܗܘܳܐ܆ ܦܪܽܘܩܰܝܢܝ. ܦܪܽܘܩܰܝܢܝ. ܐܘܫܝܥܐܢܐ ܐܘܫܝܥܐܢܐ. ܡܰܘܣܺܦܺܝܢ ܗ̱ܘܰܘ ܕܶܝܢ܆ ܦܪܽܘܩܰܝܢܝ ܒܪܶܗ ܕܕܰܘܺܝܕ ܡܰܘܣܦܺܝܢ ܗ̱ܘܰܘ ܕܶܝܢ ܐܳܦ ܗܳܕܶܐ ܦܪܽܘܩܰܝܢܝ ܡܪܰܝܡܳܐ. ܕܡ̇ܝܐ ܕܶܝܢ ܕܡܰܘܣܦܺܝܢ ܗ̱ܘܰܘ ܐܳܦ ܗܳܕܶܐ ܐ̱ܚܪܺܬܳܐ. ܦܪܽܘܩܰܝܢܝ ܝܶܫܽܘܥ. ܗܳܢܰܘ ܕܶܝܢ ܦܪܽܘܩܰܝܢܝ ܦܳܪܽܘܩܳܐ܀

ܐ. ܫܡܘܐܝܠ. 16: 4 [21]

ܡܬܝ. 21: 9 [22]

ܠܘܩܐ. 19: 38 [23]

ܩܘܠܣ̈ܝܐ. 1: 20 [24]

ܡܬܝ. 18: 3 [25]

ܠܘܩܐ. 19: 37 [26]

ܒܛܠ[27]

  ܣܶܦܪܳܐ ܕܰܒܪܝܬܐ. 8: 11 [28]

ܝܘܚܢܢ. 12: 13 [29]

  ܡܪܩܘܣ. 3: 17 [30]

  ܬܶܫܒ̈ܚܳܬ ܬܶܫܒ̈ܚܳܬܳܐ. 7: 9 [31]

  ܡܬܝ. 21: 13  ܐܦ ܐܶܫܰܥܝܳܐ. 56: 7 [32]

  ܝܘܚܢܢ. 16: 15  ܐܦ ܝܘܚܢܢ. 17: 10 [33]

  ܡܬܝ. 21: 14 [34]

  ܡܬܝ. 21: 16[35]

ܡܙܡܘܪ̈ܐ. 8: 2 ـ 3 [36]

ܕܡܶܬܢܰܩܡܺܝܢ[37]

ܘܢܶܨܛܰܒܰܬ[38]

ܡܬܝ. 21: 16 [39]