ܡܺܐܡܪܳܐ ܕܰܬܪܶܝܢ

ܕܩܰܕܺܝܫܳܐ ܡܳܪܝ ܣܶܐܘܺܝܪܶܐ ܕܥܰܠ ܣܰܟܽܘܠܬܳܢܽܘܬܳܐ ܕܫܳܡܽܘ̈ܥܶܐ. ܘܥܰܠ ܣܽܘܒܳܪܳܐ ܕܪܺܝܫ ܡܰܠܰܐܟ̈ܶܐ ܓܰܒܪܺܐܶܝܠ. ܗܰܘ ܕܣܰܒܪܳܗ̇ ܠܝܳܠܕܰܬ ܐܰ‎ܠܳܗܳܐ ܘܰܒܬܽܘܠܰܬ ܒܟܽܠܙܒܰܢ ܡܰܪܝܰܡ ܘܠܽܘܩܒܰܠ ܗܳܢܽܘܢ ܕܰܡܦܰܠܓܺܝܢ ܠܶܗ ܠܥܰܡܰܢܽܘܐܶܝܠ ܠܬܪܶܝܢ ܟܝܳܢܺܝ̈ܢ ܡܶܢ ܒܳܬܰܪ ܚܕܳܝܽܘܬܳܐ.

1: ܐܢ̱ܬܽܘܢ ܡܰܢ ܟܒܰܪ ܣܳܒܪܺܝܢ ܐܢ̱ܬܽܘܢ ܕܚܳܕܶܐ ܐ̱ܢܳܐ ܘܡܶܬܶܐܫܶܕ ܐ̱ܢܳܐ ܡܶܢ ܗܰܢܺܝܐܽܘܬܳܐ. ܡܶܛܽܠ ܕܰܒܡ̈ܶܠܶܐ ܕܺܝܠܝ ܗܳܠܶܝܢ ܒܨܺܝܪ̈ܳܬܳܐ ܚܳܕܶܝܢ ܐܢ̱ܬܽܘܢ. ܘܰܠܘܳܬ ܗܳܝ ܕܬܶܫܡܥܽܘܢ ܗܳܟܰܢܳܐ ܝܰܬܺܝܪ ܚܦܺܝܛܳܐܺܝܬ ܡܣܰܪܗܒܺܝܢ ܐܢ̱ܬܽܘܢ. ܐܶܢܳܐ ܕܶܝܢ ܡܕܰܡܰܥ ܐ̱ܢܳܐ ܘܡܶܬܬܰܢܰܚ ܐ̱ܢܳܐ. ܘܰܠܚܰܕܽܘܬܳܐ ܕܺܝܠܟܽܘܢ ܙܘ̈ܳܕܶܐ ܕܥܳܩܬܳܐ ܥܳܒܶܕ ܐ̱ܢܳܐ. ܡܶܬܚܰܫܰܒ

ܐ̱ܢܳܐ ܓܶܝܪ. ܕܶܐ‌ܠܽܘ ܠܳܐ ܕܰܒܚܰܣܺܝܪܽܘܬ݂ ܬܽܘܪܣܳܝܳܐ ܘܰܒܟܰܦܢܳܐ ܐܺܝܬܰܝܟܽܘܢ ܗܘܰܝܬܽܘܢ ܕܰܡܥܰܨܪܺܝܢ܆ ܘܡܶܢ ܡܰܠܦܳܢܽܘܬܳܐ ܬܪܺܝܨܰܬ ܫܽܘܒܚܳܐ ܘܰܚܠܺܝܡܬܳܐ ܠܳܐ ܡܶܬܬܰܪ̈ܣܝܳܢܶܐ ܗܘܰܝܬܽܘܢ. ܠܰܘ ܗܳܟܰܢܳܐ ܠܳܐ ܣܰܒܥܳܐܺܝܬ ܐܺܝܬ ܗ̱ܘܳܐ ܠܟܽܘܢ. ܠܘܳܬ ܗܳܠܶܝܢ ܫܺܝ̈ܛܳܬܳܐ ܘܰܕܢܶܬܪ̈ܰܩܩܳܢ ܫܳܘ̈ܝܳܢ. ܐܰܟܙܢܳܐ ܕܗܳܢܽܘܢ ܕܡܶܢ ܚܶܛ̈ܶܐ ܡܰܢ ܚܰܣܺܝܪܺܝܢ. ܠܡܶܫܬܰܘܬܳܦܽܘ ܕܶܝܢ ܡܶܢ ܠܰܚܡܳܐ ܗܰܘ ܕܡܶܢ ܣܥܳܪ̈ܶܐ ܡܶܬܪܰܓܪܓܺܝܢ.

2: ܗܳܢܳܐ ܐܰܪܰܐ ‌ܐܺܝܬܰܘܗ̱ܝ ܗ̱ܘܳܐ ܟܰܦܢܳܐ. ܗܰܘ ܕܰܢܒܺܝܳܐ ܥܰܡܽܘܣ^[1]. ܩܰܕܶܡ ܐܰܘܕܰܥ ܟܰܕ ܐܶܡܰܪ. ܗܳܐ ܝܰܘ̈ܡܳܬܳܐ ܐܳܬܶܝܢ ܐܳܡܰܪ ܡܳܪܝܳܐ. ܘܶܐ݀ܫܰܕܰܪ ܟܰܦܢܳܐ ܥܰܠ ‌ܐܰܪܥܳܐ. ܠܰܘ ܟܰܦܢܳܐ ܕܠܰܚܡܳܐ ܐܳܦ ܠܳܐ ܨܶܗܝܳܐ ܕܡܰܝ̈ܳܐ. ܐܶܠܳܐ ܟܰܦܢܳܐ ܗܳܝ ܕܢܶܫܡܰܥ ܡܶܠܬܶܗ ܕܡܳܪܝܳܐ. ܗܳܕܶܐ ܐܳܦ ܐܶܫܰܥܝܳܐ ܓܳܙܶܡ ܠܽܐܘܪܶܫܠܶܡ ܐܰܝܟ ܕܒܰܙܢܳܐ ܕܠܰܘܛܬܳܐ ܟܰܕ ܐܳܡܰܪ. ܕܢܶܬܬܪܺܝܡ ܡܶܢܳܗ̇ ܢܒܺܝܳܐ ܘܡܳܠܽܘܟܳܐ ܬܡܺܝܗܳܐ. ܘܪܺܝܫ ܢܰܓܳܪ̈ܶܐ ܚܰܟܺܝܡܳܐ^[2]. ܗܳܠܶܝܢ ܕܶܝܢ ܫܡܳܗ̈ܶܐ. ܠܡܰܠ̈ܦܳܢܶܐ ܕܡ̈ܶܠܶܐ ܐܰ‎ܠܳܗܳܝ̈ܳܬܳܐ ܡܚܰܘܶܝܢ ܓܰܠܝܳܐܺܝܬ. ܐܰܝܟܰܢܳܐ ܕܳܐܦ ܦܰܘܠܽܘܤ ܫܠܺܝܚܳܐ ܟܰܕ ܠܩܽܘܪ̈ܺܝܢܬܳܝܶܐ ܫܳܠܰܚ ܐܳܡܰܪ ܗ̱ܘܳܐ. ܐܰܝܟ ܛܰܝܒܽܘܬܳܐ ܕܰܐ‎ܠܳܗܳܐ ܗܳܝ ܕܶܐܬܝܰܗܒܰܬ ܠܺܝ^[3]. ܐܰܝܟ ܪܺܝܫ ܢܰܓܳܪ̈ܶܐ ܚܰܟܺܝܡܳܐ ܫܶܬܶܐܣܬܳܐ ܣܳܡܶܬ݂. ܟܰܕ ܡܰܘܣܶܦ ܕܶܝܢ ܥܠܰܘܗ̱ܝ ܕܰܓܙܳܡܳܐ ܕܠܰܘܛܬܳܐ ܗܽܘ ܢܒܺܝܳܐ. ܐܳܦ ܕܫܳܡܽܘܥܳܐ ܣܰܟܽܘܠܬܳܢܳܐ ܢܶܬܬܪܺܝܡ ܡܶܢ ܐܽܘܪܶܫܠܶܡ ܐܳܡܰܪ.

3: ܐܶܠܳܐ ܛܰܝܒܽܘ ܠܰܐܠܳܗܳܐ ܗܰܘ ܕܰܒܪܶܚܡܰܬ ܐ̱ܢܳܫܽܘܬܳܐ ܡܡܰܙܶܓ ܗܳܠܶܝܢ ܟܡܺܝܪ̈ܳܬܳܐ. ܗܰܘ ܕܡܶܢ ܐܽܘܪܶܫܠܶܡ ܕܺܝܠܝ. ܡܶܢ ܥܺܕܬܳܐ ܗܳܕܶܐ ܐܳܡܰܪ ܐ̱ܢܳܐ. ܠܫܳܡܽܘܥܳܐ ܣܰܟܽܘܠܬܳܢܳܐ ܠܳܐ ܐܰܪܺܝܡ. ܣܰܟܽܘܠܬܳܢܳܐܺܝܬ ܓܶܝܪ ܒܝܰܕ ܛܰܝܒܽܘܬܳܐ ܕܡܶܢ ܠܥܶܠ܆ ܠܝܽܘܠ̈ܦܳܢܶܐ ܫܠܺܝ̈ܚܳܝܶܐ ܫܳܡܥܺܝܢ ܐܢ̱ܬܽܘܢ܆ ܘܰܠܒܰܪ̱ܬ ܩܳܠܳܐ ܕܪܳܥܝܳܐ ܫܰܪܺܝܪܳܐ ܡܶܫܬܰܘܕܥܺܝܢ ܐܢ̱ܬܽܘܢ܆ ܘܡܶܢ ܒܰܪ̱ܬ ܩܳܠܳܐ ܢܽܘܟܪܳܝܬܳܐ ܫܳܘܪܺܝܢ ܐܢ̱ܬܽܘܢ ܘܡܶܬܒܰܥܪܪܺܝܢ ܐܢ̱ܬܽܘܢ. ܘܳܐܦ ܠܳܐ ܡܶܡܬܽܘܡ ܠܒܰܪ ܡܶܢ ܐܽܘܪܚܳܐ ܡܰܠܟܳܝܬܳܐ ܡܶܬܬܰܝܬܶܝܢ ܐܢ̱ܬܽܘܢ. ܘܡܶܛܽܠܗܳܕܶܐ. ܐܳܦ ܕܠܺܝ ܡܶܬܝܰܗܒܳܐ ܡܶܠܬܳܐ 222ܡܗܰܝܡܶܢ ܐ̱ܢܳܐ. ܕܡܶܢ ܡܰܫܡܰܥܬܳܐ ܕܺܝܠܟܽܘܢ ܣܰܟܽܘܠܬܳܢܺܝܬܳܐ. ܐܰܘ ܘܠܳܐ ܡܶܕܶܡ. ܐܰܘ ܩܰܠܺܝܠ ܡܶܕܶܡ ܙܥܽܘܪܳܐ ܒܨܺܝܪܳܐ.

4: ܗܳܐ ܓܶܝܪ ܡܶܢ ܟܰܕܽܘ ܐ̱ܢܳܫܺܝ̈ܢ ܠܗܳܕܶܐ ܪܰܫܺܝܥܽܘܬܳܐ ܐܶܬܰܘ. ܐܰܝܟܰܢܳܐ ܕܰܠܬܶܫܒܽܘܚܬܳܐ ܬܠܺܝܬܳܝܰܬ ܩܽܘ̈ܕܳܫܶܐ ܗܳܝ ܕܡܰܣܩܺܝܢܰܢ ܠܦܳܪܽܘܩܳܐ ܡܫܺܝܚܳܐ܆ ܟܰܕ ܐܳܡܪܺܝܢܰܢ ܩܰܕܺܝܫܳܐ ܐܰ‎ܠܳܗܳܐ܆ ܩܰܕܺܝܫܳܐ ܚܰܝܠܬܳܢܳܐ܆ ܩܰܕܺܝܫܳܐ ܠܳܐ ܡܳܝܽܘܬܳܐ. ܠܳܐ ܢܰܠܘܬܽܘܢ ܠܳܗ̇ ܠܗܳܝ ܕܗܰܘ ܕܶܐܨܛܠܶܒܬ݁ ܡܶܛܽܠܳܬܰܢ ܐܶܬܪܰܚܰܡ ܥܠܰܝܢ. ܟܰܕ ܒܶܗܬܬܳܐ ܚܳܫܒܺܝܢ ܠܳܗ̇ ܕܰܠܗܰܘ ܕܒܰܒܣܰܪ ܐܶܨܛܠܶܒ ܚܠܳܦܰܝܢ ܢܰܘܕܽܘܢ ܠܳܐ ܡܳܝܽܘܬܳܐ. ܘܟܰܕ ܠܳܐ ܝܺܠܶܦܘ ܕܰܐܝܟ ܦܰܘܠܽܘܤ ܢܺܐܡܪܽܘܢ. ܕܠܺܝ ܕܶܝܢ ܠܳܐ ܬܶܗܘܶܐ ܠܺܝ ܠܡܶܫܬܰܒܗܳܪܽܘ. ܐܶܠܳܐ ܐܶܢ ܒܰܨܠܺܝܒܳܐ ܕܝܶܫܽܘܥ ܡܫܺܝܚܳܐ^[4]. ܫܽܘܒܗܳܪܰܐ ܗ̱ܘ ܓܶܝܪ ܐܰܝܟ ܕܒܰܫܪܳܪܳܐ ܨܠܺܝܒܳܐ. ܘܙܰܝܢܳܐ ܠܳܐ ܡܶܙܕܰܟܝܳܢܳܐ. ܐܶܡܰܬܝ ܕܰܐ‎ܠܳܗܳܐ ܕܶܐܬܒܰܣܰܪ ܢܰܘܕܶܝܘܗ̱ܝ ܠܗܳܢܳܐ.

5: ܡܶܛܽܠܗܳܕܶܐ ܐܰܢ̱ܬܽܘܢ ܟܰܕ ܫܰܦܺܝܪ̈ܰܝ ܢܶܥ̈ܡܳܬܳܐ ܐܺܝܬܰܝܟܽܘܢ ܒܢܰܦ̈ܫܳܬܟܽܘܢ ܒܰܕܡܽܘܬ ܩܺܝܬܳܪܳܐ ܡܶܕܶܡ ܡܶܬܗܰܘܢܳܢܳܐ܆ ܘܟܰܕ ܘܡܶܢ ܪܽܘܚܳܐ ܩܰܕܺܝܫܳܐ ܡܶܬܢܰܩܫܺܝܢ ܐܢ̱ܬܽܘܢ. ܠܗܳܕܶܐ ܬܶܫܒܽܘܚܬܳܐ ܒܟܽܠܝܽܘܡ. ܡܠܰܚܡܳܐܺܝܬ ܡܰܣܩܺܝܢ ܐܢ̱ܬܽܘܢ ܠܰܡܫܺܝܚܳܐ ܐܰ‎ܠܳܗܳܐ ܚܰܝܳܐ. ܘܟܳܐܶܒ ܗ̱ܘܳܐ ܠܟܽܘܢ ܥܕܰܡܳܐ ܠܗܳܫܳܐ ܡܰܪܺܝܪܳܐܺܝܬ. ܠܽܘܩܒܰܠ ܗܳܢܽܘܢ ܕܦܳܣܩܺܝܢ ܗ̱ܘܰܘ ܠܶܗ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܦܰܫܩܳܢܺܝܬܳܐ. ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ.

6: ܐܶܢ ܓܶܝܪ ܗܰܘ ܕܶܐܬܒܰܣܰܪ ܘܗܳܟܰܢܳܐ ܐܶܨܛܠܶܒ ܡܶܛܽܠܳܬܰܢ܆ ܠܳܐ ܡܳܝܽܘܬܳܐ ‌ܐܺܝܬܰܘܗ̱ܝ. ܚܰܕ ܦܰܪܨܽܘܦܳܐ ܡܳܕܶܝܢ ‌ܐܺܝܬܰܘܗ̱ܝ ܘܚܰܕ ܩܢܽܘܡܳܐ. ܘܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܰܐ‎ܠܳܗܳܐ ܡܶܠܬܳܐ. ܐܶܢ ܕܶܝܢ ܡܶܢ ܒܳܬܰܪ ܚܕܳܝܽܘܬܳܐ ܒܰܬܪܶܝܢ ܟܝܳܢ̈ܶܐ ܢܶܬܺܝܕܰܥ܆ ܐܰܝܟ ܟܢܽܘܫܝܳܐ ܗܰܘ ܕܰܣܪܺܝܩܽܘܬܳܐ ܕܗܳܢܽܘܢ ܕܰܒܟܰܠܩܺܝܕܽܘܢܰܐ ܐܶܬܟܰܢܰܫܘ. ܫ̣ܰܪܝܳܐ ܡܰܢ ܗܺܝ ܚܕܳܝܽܘܬܳܐ܆ ܟܰܕ ܠܰܬܪܰܝܳܢܽܘܬܳܐ ܐܶܬܦܰܠܓܰܬ݂. ܢܶܬܦܰܠܰܓ ܕܶܝܢ ܗܽܘ ܐ̱ܪܳܙܳܐ. ܘܠܰܟܝܳܢܳܐ ܡܰܢ ܗܰܘ ܐܰ‎ܠܳܗܳܝܳܐ ܠܳܐ ܡܳܝܽܘܬܽܘܬܳܐ ܕܺܝܠܳܢܳܐܺܝܬ. ܠܰܟܝܳܢܳܐ ܕܶܝܢ ܗܰܘ ܐ̱ܢܳܫܳܝܳܐ. ܡܰܘܬܳܐ ܠܚܽܘܕܳܐܺܝܬ ܢܶܬܶܠ.

7: ܘܠܰܘ ܐܰܢ̱ܬܽܘܢ ܒܰܠܚܽܘܕ ܡܶܬܬܥܺܝܩܳܢܳܐܺܝܬ ܥܰܠ ܗܳܠܶܝܢ ܣܺܝܡܺܝܢ ܗܘܰܝܬܽܘܢ. ܐܶܠܳܐ ܐܳܦ ܗܶܢܽܘܢ ܚܰܝܠܰܘ̈ܳܬܳܐ ܡܰܠܰܐܟܳܝ̈ܶܐ. ܡܶܬܬܰܢܚܺܝܢ ܗ̱ܘܰܘ ܘܟܳܐܶܒ ܗ̱ܘܳܐ ܠܗܽܘܢ ܥܰܡܟܽܘܢ. ܟܰܕ ܚܳܙܶܝܢ ܗ̱ܘܰܘ ܕܰܒܓܽܘܕܳܦ̈ܶܐ ܡܶܬܦܰܣܩܳܐ ܗ̱ܘܳܬ ܢܰܩܺܝܦܽܘܬܳܐ ܕܗܳܢܶܝܢ ܐܰܪ̈ܥܳܢܝܳܬܳܐ ܕܰܠܘܳܬ ܫܡܰܝܳܢ̈ܝܳܬܳܐ. ܘܳܐܡܪܺܝܢ ܗ̱ܘܰܘ ܗܶܢܽܘܢ ܠܘܳܬ ܢܰܦܫܗܽܘܢ. ܕܰܚܢܰܢ ܟܰܕ ܥܰܠ ܝܰܠܕܶܗ ܕܥܰܡܰܢܽܘܐܶܝܠ ܕܳܝܨܺܝܢ ܗ̱ܘܰܝܢ܆ ܘܓܽܘ̈ܕܶܐ ܐܰܩܺܝܡܢܰܢ܆ ܘܰܒܪܶܚܡܰܬ݂ ܐ̱ܢܳܫܽܘܬܶܗ ܠܳܐ ܡܶܬܡܰܠܳܠܢܺܝܬܳܐ ܕܰܐ‎ܠܳܗܳܐ ܝܰܬܺܝܪ ܣܰܓܺܝܐܺܝܬ ܡܶܬܕܰܡܪܺܝܢ ܗ̱ܘܰܝܢ. ܠܘܳܬ ܩܽܘܠܳܣܳܐ ܐܶܬܗܰܦܰܟܢܰܢ. ܟܰܕ ܠܘܳܬ ܩܪܳܒܳܐ ܕܠܳܐ ܫܰܝܢܳܐ ܗܰܘ ܕܶܐܫܬܪܺܝ ܚܳܝܪܺܝܢ ܗ̱ܘܰܝܢ. ܘܩܳܠܳܐ ܗܰܘ ܩܰܕܡܳܝܳܐ ܕܬܰܪܥܽܘܬܳܐ ܥܰܠ ‌ܐܰܪܥܳܐ ܐܰܙܥܶܩܢܰܢ. ܫܽܘܒܚܳܐ ܒܰܡܪ̈ܰܘܡܶܐ ܠܰܐܠܳܗܳܐ. ܘܥܰܠ ‌ܐܰܪܥܳܐ ܫܰܝܢܳܐ. ܘܒܰܒܢܰܝ̈ܢܳܫܳܐ ܫܰܦܺܝܪܽܘܬ݂ ܨܶܒܝܳܢܳܐ^[5].

8: ܐܰܝܟܰܢܳܐ ܗܳܟܺܝܠ ‌ܐܺܝܬܰܝܗܶܝܢ ܗܳܠܶܝܢ ܕܫܰܝܢܳܐ. ܐܶܢܗܽܘ ܡܰܢ ܕܰܚܢܰܢ ܒܰܫܡܰܝܳܐ ܚܰܕ ܒܪܳܐ ܐܳܦ ܟܰܕ ܐܶܬܒܰܣܰܪ ܠܡܶܠܬܳܐ ܐܰ‎ܠܳܗܳܐ ܐܶܫܬܰܘܕܰܥܢܰܢ. ܘܬܰܘܣܶܦܬܳܐ ܐܳܦܠܳܐ ܚܕܳܐ ܠܬܶܫܒܽܘܚܬܳܐ ܬܠܺܝܬܳܝܰܬ ܩܽܘ̈ܕܳܫܶܐ ܥܒܰܕܢܰܢ. ܐܶܠܳܐ ܬܠܳܬ ܙܰܒܢܺܝ̈ܢ ܗܳܝ ܕܩܰܕܺܝܫ ܡܰܙܥܩܺܝܢܰܢ^[6]. ܟܕ ܒܚܰܕ ܡܳܪܝܳܐ ܨܒܰܐܽܘܬ݂ ܡܫܰܡܠܶܝܢܰܢ. ܘܟܰܕ ܡܶܫܬܰܘܕܥܺܝܢܰܢ^[7] ܠܰܚܕܳܐ ܡܳܪܽܘܬܳܐ ܕܰܐ‎ܠܳܗܽܘܬܳܐ ܗܳܝ ܕܒܰܬܠܳܬܳܐ ܩܢܽܘ̈ܡܶܐ. ܒܢܰܝ̈ܢܳܫܳܐ ܕܶܝܢ ܗܳܠܶܝܢ ܕܥܰܠ ‌ܐܰܪܥܳܐ. ܘܟܰܕ ܠܡܰܘܗܰܒܬܳܐ ܗܳܝ ܕܟܽܠܳܗ̇ ܗܳܕܶܐ ܘܰܠܫܰܦܺܝܪܽܘܬ݂ ܣܳܥܽܘܪܽܘܬܳܐ ܛܳܥܶܝܢ. ܡܦܰܠܓܺܝܢ ܠܶܗ ܠܚܰܕ ܡܳܪܝܳܐ ܘܦܳܪܽܘܩܳܐ ܝܶܫܽܘܥ ܡܫܺܝܚܳܐ. ܗܰܘ ܠܳܐ ܡܶܬܦܰܣܩܳܢܳܐ ܘܠܳܐ ܡܶܬܦܰܠܓܳܢܳܐ ܟܰܕ ܒܰܬܪܶܝܢ ܟܝܳܢܺܝ̈ܢ ܐܳܡܪܺܝܢ ܠܶܗ ܕܡܶܬܺܝܕܰܥ ܡܶܢ ܒܳܬܰܪ ܚܕܳܝܽܘܬܳܐ. ܘܡܶܢܝܳܢܳܐ ܝܰܬܺܝܪܳܐ ܡܰܥܠܶܝܢ. ܐܰܝܟܰܢܳܐ ܕܒܰܪܢܳܫܳܐ ܡܶܟܺܝܠ ܕܕܺܝܠܳܢܳܐܺܝܬ ܡܩܺܝܡ ܢܫܰܒܚܽܘܢ. ܘܰܐܟܚܕܳܐ ܥܰܡ ܬܠܺܝܬܳܝܽܘܬܳܐ ܪܒܺܝܥܳܝܽܘܬܳܐ ܢܰܫܠܡܽܘܢ. ܘܰܐܝܟ ܪܰܫܺܝܥܳܐ ܢܶܣܛܽܘܪܺܝܽܘܤ ܢܺܐܡܪܽܘܢ. ܕܠܳܐ ܒܠܺܝܠܬܳܐ ܗܳܟܺܝܠ ܢܶܛܰܪ ܠܢܰܩܺܝܦܽܘܬܳܐ ܕܰܟܝܳܢ̈ܶܐ. ܢܰܘܕܶܐ ܐܰ‎ܠܳܗܳܐ ܗܰܘ ܕܰܒܒܰܪܢܳܫܳܐ. ܢܝܰܩܰܪ ܠܒܰܪܢܳܫܳܐ ܗܰܘ ܕܰܒܢܰܩܺܝܦܽܘܬܳܐ ܐܰ‎ܠܳܗܳܝܬܳܐ ܥܰܡ ܐܰ‎ܠܳܗܳܐ ܐܰܚܺܝܕ ܟܽܠ ܐܰܟܚܕܳܐ ܡܶܣܬܓܶܕ. ܐܰܝܟܰܢܳܐ ܕܳܐܦ ܒܕܽܘܟܬܳܐ ܐ̱ܚܪܺܬܳܐ ܠܢܰܩܺܝܦܽܘܬܳܐ ܓܒܺܝܠܬܳܐ ܕܰܐܝܟ ܗܳܕܶܐ. ܚܕܳܝܽܘܬܳܐ ܣܳܥܶܐ ܠܰܡܫܰܡܳܗܽܘ ܟܰܕ ܐܳܡܰܪ. ܠܰܘ ܕܰܡܡܰܙܓܺܝܢ ܐܶܠܳܐ ܕܰܡܚܰܝܰܕ^[8] ܐܳܡܰܪ ܐ̱ܢܳܐ ܠܗܽܘܢ ܠܰܟܝܳܢ̈ܶܐ.

9: ܚܢܰܢ ܕܶܝܢ. ܐܳܦ ܟܰܕ ܡܶܢ ܩܰܒܪܳܐ ܡܰܠܽܘܢ ܕܶܝܢ ܐܳܦ ܡܶܢܗܽܘܢ ܕܰܐܬܪ̈ܰܘܳܬܳܐ ܗܳܢܽܘܢ ܬܰܚܬܳܝ̈ܶܐ ܕܰܐܪܥܳܐ ܠܰܫܡܰܝܳܐ ܣܠܶܩ^[9]. ܕܺܐܝܬܰܘܗ̱ܝ ܡܳܪܝܳܐ ܘܡܰܠܟܳܐ ܕܬܶܫܒܽܘܚܬܳܐ ܐܶܫܬܰܘܕܰܥܢܳܝܗ̱ܝ . ܟܰܕ ܡܶܬܦܰܫܟܺܝܢ ܗ̱ܘܰܝܢ ܡܰܢ ܐܶܡܰܬܝ ܕܰܫܡܰܥܢܰܢ ܡܶܢ ܚܰܝܠܰܘ̈ܳܬܳܐ ܐ̱ܚܪ̈ܳܢܶܐ܆ ܐܰܪܺܝܡܘ ܬܰܪ̈ܥܶܐ ܪ̈ܺܝܫܳܢܶܐ ܕܺܝܠܟܽܘܢ܆ ܘܶܐܬܬܪܺܝܡܘ ܬܰܪ̈ܥܶܐ ܕܡܶܢ ܥܳܠܰܡ܆ ܘܢܶܥܽܘܠ ܡܰܠܟܳܐ ܕܬܶܫܒܽܘܚܬܳܐ܆ ܘܰܡܫܰܐܠܺܝܢ ܗ̱ܘܰܝܢ. ܕܡܰܢܽܘ ‌ܐܺܝܬܰܘܗ̱ܝ ܗܳܢܳܐ ܡܰܠܟܳܐ ܕܬܶܫܒܽܘܚܬܳܐ^[10]܆ ܘܟܰܕ ܝܳܠܦܺܝܢ ܗ̱ܘܰܝܢ ܕܡܳܪܝܳܐ ‌ܐܺܝܬܰܘܗ̱ܝ ܗܰܘ ܥܰܫܺܝܢܳܐ ܘܚܰܝܠܬܳܢܳܐ ܒܰܩܪܳܒܳܐ ܕܰܐܪܡܺܝ ܠܰܐܟܶܠܩܳܪܨܳܐ܆ ܘܰܒܝܰܕ ܨܠܺܝܒܳܐ ܙܟܳܐ ܠܡܰܩܪܒܳܢܳܐ ܘܠܰܒܥܶܠܕܒܳܒܳܐ ܕܟܽܠܗܽܘܢ ܒܢܰܝ̈ܢܳܫܳܐ܆ ܘܡܶܢ ܫܶܒܝܳܐ ܕܡܶܢ ܙܰܒ̈ܢܶܐ ܘܡܶܢ ܛܪܽܘܢܽܘܬܳܐ ܚܰܪܰܪ ܠܗܳܢܽܘܢ ܕܰܡܫܥܒܕܺܝܢ ܗ̱ܘܰܘ ܬܚܶܝܬ ܐܺܝܕܶܗ. ܚܘܺܝܚܳܐܺܝܬ ܠܬܰܪ̈ܥܶܐ ܕܡܶܢ ܥܳܠܰܡ ܦܬܰܚܢܰܢ. ܠܰܘ ܐܰܝܟܰܢܳܐ ܕܠܰܐܠܳܗܳܐ ܚܰܕܬܳܐ ܘܰܥܒܺܝܕܳܐ܆ ܐܶܠܳܐ ܕܠܰܐ‎ܠܳܗܳܐ ܗܰܘ ܕܰܩܕܳܡ ܥܰܠ̈ܡܶܐ ܢܩܰܒܶܠ܆ ܘܡܳܪܝܳܐ ܘܡܰܠܟܳܐ ܕܟܽܠܗܽܘܢ ܚܰܝܠܰܘ̈ܳܬܳܐ ܫܡܰܝܳܢ̈ܶܐ. ܘܝܳܕܥܺܝܢ ܗ̱ܘܰܝܢ ܒܝܰܕ ܗܳܢܳܐ ܟܽܠܶܗ ܥܽܘܬܪܳܐ ܕܪܶܚܡܰܬ ܐ̱ܢܳܫܽܘܬܳܐ ܘܰܕܛܳܒܽܘܬܳܐ. ܘܕܰܡܕܰܒܪܳܢܽܘܬܳܐ ܗܳܝ ܕܰܠܘܳܬ݂ ܥܺܕܬܳܐ. ܠܚܶܟܡܬܳܐ ܗܳܝ ܡܦܰܬܰܟܬܳܐ ܘܣܰܓܺܝܰܐܬ̣ ܦܽܘܪ̈ܣܶܐ. ܕܰܐ‎ܠܳܗܳܐ ܗܰܘ ܕܒܰܠܚܽܘܕܰܘܗ̱ܝ ܚܰܟܺܝܡܳܐ ܘܣܳܥܰܪ ܛܳܒ̈ܳܬܳܐ܆

10: ܗܳܠܶܝܢ ܐܳܦ ܡܶܬܚܰܫܒܺܝܢ ܗ̱ܘܰܘ ܐܳܦ ܐܳܡܪܺܝܢ ܗ̱ܘܰܘ ܚܰܝܠܰܘ̈ܳܬܳܐ ܗܳܢܽܘܢ ܛܽܘܒ̈ܬܳܢܶܐ ܘܡܰܠܰܐܟܳܝ̈ܶܐ. ܟܰܕ ܠܳܐ ܡܣܰܝܒܪܺܝܢ ܗ̱ܘܰܘ ܠܓܽܘܕܳܦܳܐ ܕܰܒܢܰܝ̈ܢܳܫܳܐ. ܐܶܢ ܓܶܝܪ ܥܰܠ ܚܰܕ ܚܰܛܳܝܳܐ ܕܬܳܐܶܒ^[11]܆ ܚܕܽܘܬܳܐ ܗܳܘܝܳܐ ܒܰܫܡܰܝܳܐ܆ ܐܰܝܟ ܒܰܪ̱ܬ ܩܳܠܳܐ ܠܳܐ ܕܰܓܳܠܬܳܐ ܕܡܳܪܝܳܐ ܗܳܝ ܕܒܶܐܘܰܢܓܶܠܺܝܽܘܢ. ܟܡܳܐ ܣܳܒܰܪ ܐܰܢ̱ܬ ܕܚܰܫܺܝܫܳܐܺܝܬ ܡܶܬܬܣܺܝ̈ܡܳܢ ܪ̈ܽܘܚܶܐ ܗܳܠܶܝܢ ܡܶܬܗܰܘܢܳܢܳܝ̈ܳܬܳܐ ܘܠܳܐ ܗܽܘܠܳܢܳܝ̈ܳܬܳܐ. ܘܰܕܪܳܚܡܽܘܬܳܐ ܕܚܽܘܒܳܐ ܐܺܝܬ ܠܗܶܝܢ ܠܘܳܬ ܓܒܺܝܠܬܳܐ ܐ̱ܚܝܳܢܽܘܬܗܶܝܢ ܘܰܡܠܺܝܠܬܳܐ ܠܘܳܬ ܒܰܪܢܳܫܳܐ. ܥܰܠ ܟܽܠܶܗ ܗܳܢܳܐ ܐܰܒܕܳܢܳܐ ܕܢܰܦ̈ܫܳܬܳܐ. ܗܳܢܶܝܢ ܟܺܝܬ ܕܰܒܝܰܕ ܗܳܝ ܕܰܡܓܰܕ̈ܦܳܢ. ܕܰܒܫܰܦܺܝܪܽܘܬ݂ ܕܶܚܠܬܳܐ ܗܳܘ̈ܝܳܢ ܡܣܰܒܪܺܝܢ ܗ̱ܘܰܝ̈.

11: ܡܳܢܳܐ ܕܶܝܢ ܡܺܝܟܳܐܶܝܠ ܗܰܘ ܚܰܕ ܡܶܢ ܪ̈ܺܝܫܳܢܶܐ ܩܰܕܡܳܝ̈ܶܐ. ܗܰܘ ܕܥܰܠ ܢܰܓܺܝܪܽܘܬܳܐ ܕܫܶܒܝܳܐ ܕܺܐܝܣܪܳܐܶܝܠ ܕܰܒܒܳܒܶܠ ܗܳܟܰܢܳܐ ܚܰܫܺܝܫܳܐܺܝܬ ܣܺܝܡ ܗ̱ܘܳܐ. ܐܰܝܟܰܢܳܐ ܕܶܐܬܓܰܠܝܰܬ ܠܕܳܢܺܝܐܶܝܠ^[12] ܗܰܘ ܐܰ‎ܠܳܗܳܝܳܐ. ܘܰܬܡܺܝܗܳܐ ܕܰܢܒܺܝ̈ܶܐ. ܐܰܝܟܰܢܳܐ ܠܰܘ ܝܰܬܺܝܪܳܐܺܝܬ^[13] ܡܶܬܬܥܺܝܩ ܗ̱ܘܳܐ ܟܰܕ ܚܳܙܶܐ ܗ̱ܘܳܐ ܠܥܰܡܳܐ ܗܰܘ ܩܰܕܺܝܫܳܐ. ܠܓܶܢܣܳܐ ܗܰܘ ܓܰܒܝܳܐ. ܠܗܳܢܽܘܢ ܕܶܐܙܕܒܶܢܘ ܒܰܕܡܳܐ ܕܰܡܫܺܝܚܳܐ ܒܪܳܐ ܕܰܐ‎ܠܳܗܳܐ. ܘܡܶܢܶܗ ܡܶܬܟܰܢܶܝܢ ܟܪ̈ܺܝܣܛܝܳܢܶܐ. ܕܰܠܘܳܬ ܦܽܘܠܚܳܢ ܒܰܪܢܳܫܳܐ ܢܳܦܩܺܝܢ. ܘܰܠܕܶܚܠܰܬ ܐܰ‎ܠܳܗܳܐ ܡܨܰܥܪܺܝܢ.

ܓܰܒܪܺܐܶܝܠ ܕܶܝܢ ܗܰܘ ܕܒܶܗ ܟܰܕ ܒܶܗ ܒܛܶܟܣܳܐ ܘܰܒܣܶܕܪܳܐ ‌ܐܺܝܬܰܘܗ̱ܝ ܠܶܗ ܫܰܘܬܳܦܳܐ. ܘܡܶܫܬܰܘܬܰܦ ܗ̱ܘܳܐ ܠܶܗ ܐܳܦ ܒܥܳܩܬܳܐ ܘܰܒܪ̈ܰܚܡܶܐ ܕܰܥܠܰܝܢ ܘܰܒܚܰܝܽܘܣܬܳܢܽܘܬܳܐ. ܘܝܰܬܺܝܪܳܐܺܝܬ ܟܰܕ ܚܳܙܶܐ ܗ̱ܘܳܐ ܠܣܽܘܒܳܪܳܐ ܗܰܘ ܕܣܰܒܪܳܗ̇ ܠܩܰܕܺܝܫܬܳܐ ܝܳܠܕܰܬ݂ ܐܰ‎ܠܳܗܳܐ ܘܰܒܬܽܘܠܬܳܐ ܡܰܪܝܰܡ ܕܡܶܙܕܰܝܰܦ ܗ̱ܘܳܐ. ܩܰܕܡܳܐܺܝܬ ܡܰܢ ܓܶܝܪ ܐܶܡܰܪ܆ ܚܕܳܝ ܡܰܠܝܰܬ݂ ܛܰܝܒܽܘܬܳܐ ܡܳܪܰܢ ܥܰܡܶܟܝ^[14]. ܘܰܐܘܕܰܥ ܒܝܰܕ ܗܳܠܶܝܢ. ܠܡܶܠܬܳܐ ܐܰ‎ܠܳܗܳܐ ܗܰܘ ܕܠܳܐ ܪܺܝܫܳܐ ܘܕܰܩܕܳܡ ܥܳܠ̈ܡܶܐ. ܕܠܳܐ ܡܶܬܡܰܠܠܳܢܳܐܺܝܬ ܘܠܳܐ ܡܶܫܬܰܚܠܦܳܢܳܐܺܝܬ ܘܰܕܠܳܐ ܒܽܘܠܒܳܠܳܐ ܒܡܰܪܒܥܳܐ ܒܬܽܘܠܳܝܳܐ܆ ܡܰܓܶܢ ܟܺܝܬ ܘܡܶܬܒܰܣܰܪ. ܒܶܗ ܓܶܝܪ ܒܥܶܕܳܢܳܐ ܙܥܽܘܪܳܐ ܘܰܪܦܳܦܳܐ ܠܳܐ ܡܶܬܦܰܣܩܳܢܳܐ ܕܙܰܒܢܳܐ܆ ܒܰܪ̱ܬ ܩܳܠܳܐ ܕܪܺܝܫ ܡܰܠܰܐܟ̈ܶܐ ܢܶܦܩܰܬ݂. ܘܡܶܠܬܳܐ ܕܰܐ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ ܒܟܰܪܣܳܐ. ܫܽܘܘܕܳܥܳܐ ܓܶܝܪ ܕܰܥܒܳܕܳܐ ܬܡܺܝܗܳܐ ܐܺܝܬ ܗ̱ܘܳܐ ܠܶܗ ܠܰܫܠܳܡܳܐ. ܘܠܰܘ ܫܶܐܠܰܬ݂ ܫܠܳܡܳܐ ܫܚܺܝܡܳܐܺܝܬ.

12: ܟܰܕ ܕܶܝܢ ܗܺܝ ܛܽܘܒܳܢܺܝܬܳܐ ܒܬܽܘܠܬܳܐ ܐܶܫܬܰܓܫܰܬ݂܆ ܘܡܶܬܚܰܫܒܳܐ ܗ̱ܘܳܬ ܕܡܳܢܰܘ ܫܠܳܡܳܐ ܗܳܢܳܐ. ܓܰܒܪܺܐܶܝܠ ܗܰܘ ܕܶܐܬܗܰܝܡܰܢ ܬܶܫܡܶܫܬܳܐ ܗܳܝ ܐܰ‎ܠܳܗܳܝܬܳܐ. ܐܰܝܟܰܢܳܐ ܕܠܳܐ ܬܶܚܛܦܺܝܗ̇ ܘܰܬܫܰܓܫܺܝܗ̇ ܡܣܰܒܪܳܢܽܘܬܳܐ ܡܶܕܶܡ ܘܡܰܚܫܰܒܬܳܐ ܣܪܺܝܩܬܳܐ ܕܰܥܒܺܝܕܽܘܬ݂ ܡ̈ܶܠܶܐ ܡܰܬ̣ܠܳܝܬܳܐ ܘܕܰܓܳܠܬܳܐ܆ ܐܰܝܟ ܓܒܽܘܠ̈ܝܶܐ ܘܗܰܓܳܓ̈ܘܳܬܳܐ ܗܳܠܶܝܢ ܕܰܠܘܳܬ݂ ܦܽܘܐܺܝ̈ܛܶܐ. ܡܶܚܕܳܐ ܠܦܽܘܫܳܩܳܐ ܐܰܩܺܝܡ. ܟܰܕ ܐܰܝܬܺܝ ܒܳܬܰܪܟܶܢ. ܠܳܐ ܬܶܕܚܠܺܝܢ ܡܰܪܝܰܡ. ܐܶܫܬܟܰܚܬܝ ܓܶܝܪ ܛܰܝܒܽܘܬܳܐ ܠܘܳܬ݂ ܐܰ‎ܠܳܗܳܐ. ܘܗܳܐ ܐܰܢ̱ܬܝ ܬܶܒܛܢܺܝܢ ܘܬܺܐܠܕܺܝܢ ܒܪܳܐ. ܘܬܶܩܪܶܝܢ ܫܡܳܐ ܕܺܝܠܶܗ ܝܶܫܽܘܥ^[15].

13: ܡܶܛܽܠ ܟܺܝܬ ܕܠܶܟܝ ܐܺ݀ܡܰܪ ܡܶܐܬܺܝܬܳܐ ܕܰܐ‎ܠܳܗܳܐ ܣܰܒܪܶܬ݂܆ ܠܳܐ ܬܶܫܬܰܓܫܺܝܢ ܐܳܦ ܠܳܐ ܕܗܽܘ ܡܶܢ ܢܰܦܫܶܗ ܐܰܘ ܡܶܢܫܶܠܝ ܬܶܣܒܪܺܝܢ ܕܗܳܘܶܐ ܠܶܟܝ ܝܰܠܕܳܐ. ܘܰܐܝܟ ܡܰܥܒܰܪܬܳܐ ܕܒܰܪܩܳܐ ܒܟܰܪܣܳܐ ܕܺܝܠܶܟܝ ܪܳܗܶܛ. ܐܰܝܟ ܒܶܕ̣ܝ̈ܶܐ ܘܫܳܛܽܘܪ̈ܘܳܬܳܐ ܕܗܰܓ̈ܳܓܺܝܢ^[16]. ܒܰܛܢܳܐ ܓܶܝܪ ܢܶܗܘܶܐ ܠܳܚܡܳܐܺܝܬ ܐܰܝܟ ܛܶܟܣܳܐ ܕܰܟܝܳܢܳܐ. ܘܡܰܝܬܝܽܘܬ݂ ܒܰܛܢܳܐ ܕܠܳܐ ܙܰܪܥܳܐ ܘܝܰܠܕܳܐ. ܠܰܟܝܳܢܳܐ ܓܶܝܪ ܐ̱ܢܳܫܳܝܳܐ܆ ܘܠܺܝܠܺܝܕܽܘܬܳܐ ܕܺܝܠܶܗ ܐܳܬܶܐ ܠܰܡܬܰܪܳܨܽܘ ܡܶܠܬܳܐ ܕܰܐ‎ܠܳܗܳܐ. ܘܰܠܗܽܘܢ ܠܫܽܘܪ̈ܳܝܶܐ ܕܡܰܥܒܰܪܬܳܐ ܕܰܠܘܳܬ ܗܳܝ ܕܢܶܗܘܶܐ ‌ܐܺܝܬܰܘܗ̱ܝ.

14: ܡܶܛܽܠ ܗܳܕܶܐ ܐܳܡܰܪ. ܘܗܳܐ ܬܶܣܒܺܝܢ ܒܟܰܪܣܳܐ. ܐܰܝܟܰܢܳܐ ܕܗܽܘ ܡܳܪܝܳܐ ܡܶܢܳܗ̇ ܕܟܰܪܣܳܐ ܒܬܽܘܠܳܝܬܳܐ܆ ܘܡܶܢܳܗ̇ ܕܽܐܘܣܺܝܰܐ ܕܺܝܠܰܢ ܢܣܰܒ ܠܒܶܣܪܳܐ ܘܠܰܓܒܺܝܠܬܳܐ ܐ̱ܢܳܫܳܝܬܳܐ. ܘܒܰܪܟܳܗ̇ ܠܳܗ̇ ܠܡܰܘܥܺܝܬܳܐ ܩܰܕܡܳܝܬܳܐ ܕܺܝܠܺܝܕܽܘܬܳܐ ܕܺܝܠܰܢ. ܐܶ‎ܠܽܘ ܓܶܝܪ ܠܰܘ ܒܝܰܕ ܟܽܠܗܶܝܢ ܐܶܬܳܐ܆ ܤܛܰܪ ܡܶܢ ܚܛܺܝܬܳܐ^[17] ܒܝܰܕ ܟܽܠܗܶܝܢ ܗܳܠܶܝܢ ܕܰܚܢܰܢ ܘܰܤܛܰܪ ܡܶܢ ܙܰܪܥܳܐ ܐ̱ܢܳܫܳܝܳܐ܆ ܐܶܬܢܣܶܒ ܒܟܰܪܣܳܐ ܒܰܒܣܰܪ܆ ܘܙܰܒܢܳܐ ܕܬܶܫܥܳܐ ܝܰܪ̈ܚܺܝܢ ܐܶܬܒܛܶܢ ܘܶܐܬܺܝܠܶܕ. ܠܳܐ ܥܳܛܶܐ ܗ̱ܘܳܐ ܠܗܳܝ ܕܰܒܥܳܩ̈ܳܬܳܐ ܬܺܐܠܕܺܝܢ ܒܢܰܝ̈ܳܐ^[18]. ܠܰܓܙܳܪ ܕܺܝܢܳܐ ܗܰܘ ܕܥܰܠ ܚܰܘܳܐ.

15: ܡܶܛܽܠܗܳܕܶܐ ܐܶܡܰܪ. ܘܬܶܩܪܶܝܢ ܫܡܳܐ ܕܺܝܠܶܗ ܝܶܫܽܘܥ. ܗܰܘ ܓܶܝܪ ܕܡܶܛܽܠ ܦܽܘܪܩܳܢܳܐ ܕܓܶܢܣܳܐ ܕܺܝܠܰܢ ܐܶܬܳܐ. ܟܺܐܢܳܐܺܝܬ ܡܶܬܩܪܶܐ ܝܶܫܽܘܥ. ܗܽܘ ܕܶܝܢ ܫܡܳܐ ܕܝܶܫܽܘܥ܆ ܦܽܘܪܩܳܢܳܐ ܕܰܐ‎ܠܳܗܳܐ ‌ܐܺܝܬܰܘܗ̱ܝ ܘܳܐܣܝܽܘܬܳܐ܆ ܟܰܕ ܠܠܶܫܳܢܳܐ 222ܐ‌ܠܕܝܐ ܥܳܒܰܪ. ܝܰܐܗܽܘ ܓܶܝܪ ܡܶܬܶܐܡܰܪ ܠܘܳܬ ܥܶܒܪ̈ܳܝܶܐ ܗܽܘ ܐܰ‎ܠܳܗܳܐ ܕܥܰܠ ܟܽܠ. ܘܡܶܛܽܠ ܕܠܳܐ ܐܰܝܟܰܢ ܕܗܽܘ ܬܺܐܡܰܪܝ ܠܶܗ܆ ܕܳܐܦ ܟܺܝܬ ܘܰܠ̱ܐܢܳܫܺܝ̈ܢ ܡܶܢ ܒܢܰܝ̈ܢܳܫܳܐ ܐܶܬܬܣܺܝܡ ܗܽܘ ܫܡܳܐ ܕܝܶܫܽܘܥ. ܡܶܛܽܠܗܳܕܶܐ ܐܰܝܬܺܝ ܒܳܬܰܪܟܶܢ ܟܰܕ ܡܥܰܠܶܐ ܠܳܗ̇ ܠܬܰܪܥܺܝܬܳܗ̇. ܕܗܳܢܳܐ ܢܶܗܘܶܐ ܪܰܒܳܐ. ܘܰܒܪܶܗ ܕܰܡܪܰܝܡܳܐ ܢܶܬܩܪܶܐ. ܐܰܝܟ ܗܰܘ ܕܳܐܡܰܪ ܗ̱ܘܳܐ. ܕܠܰܘ ܐܰܝܟ ܕܰܠܚܰܕ ܡܶܢ ܒܢܰܝ̈ܢܳܫܳܐ ܣܰܓܺܝ̈ܶܐܐ ܬܶܩܪܶܝܢܳܝܗ̱ܝ ܝܶܫܽܘܥ܆ ܐܶܠܳܐ ܐܰܝܟ ܕܰܠܪܰܒܳܐ ܒܰܫܪܳܪܳܐ܆ ܪܰܒܳܐ ܓܶܝܪ ‌ܐܺܝܬܰܘܗ̱ܝ ܡܳܪܰܢ܆ ܘܪܰܒܳܐ ܚܰܝܠܳܐ ܕܺܝܠܶܗ ܐܰܝܟܰܢܳܐ ܕܰܡܙܰܡܰܪ ܕܰܘܺܝܕ. ܘܰܐܝܟ ܕܰܠܡܰܢ ܕܺܐܝܬܰܘܗ̱ܝ ܒܰܟܝܳܢܳܐ ܒܪܳܐ ܕܰܐܒܳܐ ܡܪܰܝܡܳܐ^[19].

16: ܗܳܝ ܕܶܝܢ ܕܢܶܗܘܶܐ ܘܢܶܬܩܪܶܐ. ܕܦܰܐܝܳܐ ܐܺܝܬܶܝܗ̇ ܠܰܡܕܰܒܪܳܢܽܘܬܳܐ ܕܒܰܒܣܰܪ. ܘܰܠܡܽܘܫ̈ܚܳܬܳܐ ܕܡܶܣܟܺܢܽܘܬܳܐ ܗܳܝ ܕܰܒܨܶܒܝܳܢܶܗ ܐܶܬܡܰܣܟܰܢ ܡܶܛܽܠܳܬܰܢ ܟܰܕ ܥܰܬܺܝܪܳܐ ‌ܐܺܝܬܰܘܗ̱ܝ. ܐܰܝܟܰܢܳܐ ܕܰܚܢܰܢ ܒܡܶܣܟܺܢܽܘܬܶܗ ܕܗܰܘ ܢܶ݀ܥܬܰܪ^[20]. ܗܰܘ ܡܳܐ ܓܶܝܪ ܕܺ‌ܐܝܬܰܘܗ̱ܝ ܗ̱ܘܳܐ ܒܰܟܝܳܢܳܐ ܘܳܐܦ ܡܶܬܩܪܶܐ ܗ̱ܘܳܐ ܩܕܳܡ ܥܳܠ̈ܡܶܐ܆ ܪܰܒܳܐ ܐܳܡܰܪ ܐ̱ܢܳܐ ܘܰܒܪܳܐ ܕܰܐ‎ܠܳܗܳܐ ܡܪܰܝܡܳܐ.

17: ܗܳܢܳܐ ܟܰܕ ܠܳܐ ܡܶܫܬܰܚܠܦܳܢܳܐܺܝܬ ܒܰܪܢܳܫܳܐ ܡܶܛܽܠܳܬܰܢ ܗ̣ܘܳܐ. ܘܳܐܦ ܕܗܳܘܶܐ ܘܳܐܦ ܕܡܶܬܩܪܶܐ ܡܶܬܶܐܡܰܪ. ܐܰܝܟܰܢܳܐ ܕܰܚܢܰܢ ܒܶܗ ܐܰܝܟ ܕܰܒܪܺܝܫܺܝܬܳܐ ܕܬܰܪܬܶܝܢ ܕܓܶܢܣܳܐ ܕܺܝܠܰܢ. ܐܰ‌ܠܳܗ̈ܶܐ ܘܰܒܢܰܝ̈ܳܐ ܕܰܐ‎ܠܳܗܳܐ ܢܶ݀ܫܬܰܡܰܗ. ܐܶܢܳܐ ܕܶܝܢ ܐܶܡܪܶܬ݂ ܐܳܡܰܪ ܒܝܰܕ ܢܒܺܝܳܐ ܕܰܘܺܝܕ. ܐܰ‌ܠܳܗ̈ܶܐ ܐܺܝܬܰܝܟܽܘܢ ܘܰܒܢܰܝ̈ܳܐ ܕܰܡܪܰܝܡܳܐ ܟܽܠܟܽܘܢ^[21].

18: ܘܰܐܝܬܺܝ ܒܳܬܰܪ ܗܳܠܶܝܢ ܬܽܘܒ. ܘܢܶܬܶܠ ܠܶܗ ܡܳܪܝܳܐ ܐܰ‎ܠܳܗܳܐ ܟܽܘܪܣܝܳܐ ܕܕܰܘܺܝܕ ܐܰܒܽܘܗ̱ܝ^[22]. ܗܳܕܶܐ ܕܶܝܢ ܘܠܳܐ ܡܶܛܽܠ ܡܶܕܶܡ ܐ̱ܚܪܺܝܢ ܐܰܡܺܝܪܳܐ ܠܓܰܒܪܺܐܶܝܠ. ܐܶܠܳܐ ܐܶܢ ܡܶܛܽܠ ܕܢܰܥܗܕܺܝܗ̇ ܠܰܒܬܽܘܠܬܳܐ ܠܰܢܒܺܝ̈ܶܐ. ܘܬܺܐܠܰܦ ܓܰܠܝܳܐܺܝܬ ܕܗܰܘ ܕܡܶܢܳܗ̇ ܥܬܺܝܕ ܕܢܶܬܺܝܠܶܕ. ܗܳܢܳܐ ‌ܐܺܝܬܰܘܗ̱ܝ ܡܫܺܝܚܳܐ ܗܰܘ ܕܡܶܢ ܗܳܢܽܘܢ ܐܶܬܶܐܡܰܪ ܒܰܢܒܺܝܽܘܬܳܐ. ܕܰܥܬܺܝܕ ܕܢܺܐܬܶܐ ܡܶܢ ܙܰܪܥܳܐ ܕܕܰܘܺܝܕ^[23].

19: ܬܽܘܒ ܕܶܝܢ ܟܰܕ ܠܪܰܘܡܳܐ ܡܥܰܠܶܐ ܠܳܗ̇ ܠܬܰܪܥܺܝܬܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ܆ ܘܠܳܐ ܫܳܒܶܩ ܠܳܗ̇ ܕܰܠܘܳܬ݂ ܬܰܪ̈ܥܝܳܬܳܐ ܐ̱ܢܳܫܳܝ̈ܳܬܳܐ 222ܘܛܳܢ̈ܳܬ݂ ܒܰܐܪܥܳܐ ܬܶܦܶܠ܆ ܘܬܶܣܒܰܪ ܕܙܰܒܢܳܝܬܳܐ ܐܺܝܬܶܝܗ̇ ܡܰܠܟܽܘܬܶܗ܆ ܐܰܟܙܢܳܐ ܕܚܰܕ ܡܶܢ ܗܳܠܶܝܢ ܒܢܰܝ̈ܳܐ ܕܕܰܘܺܝܕ܆ ܗܳܢܽܘܢ ܕܡܶܢ ܩܕܺܝܡ ܐܰܡܠܶܟܘ ܥܰܠ ‌ܐܺܝܣܪܳܐܶܝܠ. ܐܰ‌ܠܘܶܬ݂ ܐܳܦ ܗܳܠܶܝܢ ܠܗܳܢܶܝܢ ܕܩܰܕܶܡ̈ܝ̱ ܐܶܬܶܐܡܰܪ̈ܝ̱ ܘܶܐܡܰܪ܆ ܘܢܰܡܠܶܟ ܥܰܠ ܒܰܝܬܳܐ ܕܝܰܥܩܽܘܒ ܠܥܳܠܰܡ. ܘܰܕܡܰܠܟܽܘܬܳܐ ܕܺܝܠܶܗ ܠܳܐ ܢܶܗܘܶܐ ܫܽܘܠܳܡܳܐ^[24]. ܘܠܳܐ ܕܐ̱ܢܳܫ ܕܶܝܢ ܐܺܝܬܶܝܗ̇. ܗܳܝ ܕܢܰܡܠܶܟ ܠܥܳܠܰܡ ܡܰܠܟܽܘܬܳܐ ܕܫܽܘܠܳܡܳܐ ܠܳܐ ܐܺܝܬ ܠܶܗ܆ ܐܶܠܳܐ ܐܶܢ ܕܰܐ‌ܠܳܗܳܐ ܒܰܠܚܽܘܕܰܘܗ̱ܝ ܥܳܒܽܘܕܳܐ ܘܡܳܪܳܐ ܕܟܽܠ. ܐܰܝܟܰܢܳܐ ܟܺܝܬ ܕܳܐܦܶܢ ܕܢܳܣܶܒ ܟܽܘܪܣܝܳܐ ܕܕܰܘܺܝܕ ܡܶܬܶܐܡܰܪ ܡܶܛܽܠ ܡܕܰܒܪܳܢܽܘܬܳܐ ܐ̱ܢܳܫܳܐܺܝܬ. ܐܶܠܳܐ ܐܺܝܬܰܘܗ̱ܝ ܗܽܘ ܟܰܕ ܗܽܘ ܐܰ‌ܠܳܗܳܐܺܝܬ ܡܰܠܟܳܐ ܟܺܝܬ ܘܕܰܠܥܳܠܰܡ. ܘܰܕܠܳܐ ܐܺܝܬ ܠܶܗ ܫܽܘܠܳܡܳܐ.

20: ܕܫܰܦܺܝܪ ܕܶܝܢ ܘܣܰܓܺܝ ܦܰܐܝܽܘܬ݂ ܐܰ‎ܠܳܗܳܐܺܝܬ ܐܶܡܰܪ ܓܰܒܪܺܐܶܝܠ. ܕܢܰܡܠܶܟ ܥܰܠ ܒܰܝܬܳܐ ܕܝܰܥܩܽܘܒ. ܟܰܕ ܒܰܝܬܳܐ ܕܝܰܥܩܽܘܒ ܠܥܺܕܬܳܐ ܩܳܪܶܐ ܗ̱ܘܳܐ. ܘܰܠܬܰܫܥܺܝܬܳܐ ܥܰܬܺܝܩܬܳܐ ܡܰܥܗܶܕ ܗ̱ܘܳܐ. ܐܳܦ ܠܛܽܘܦܣܳܐ ܗܰܘ ܕܩܰܕܶܡ ܪܳܫܶܡ ܠܰܫܪܳܪܳܐ. ܟܰܕ ܓܶܝܪ ܐܺܝܬ ܗ̱ܘܳܐ ܠܳܗ̇ ܒܟܰܪܣܳܗ̇ ܠܪܰܦܩܰܐ ܠܥܺܣܽܘ ܟܺܝܬ ܘܰܠܝܰܥܩܽܘܒ. ܐܶܡܰܪ ܐܰ‎ܠܳܗܳܐ ܠܘܳܬܳܗ̇. ܕܗܳܐ ܬܪܶܝܢ ܥܰܡܡ̈ܶܐ ܒܟܰܪܣܶܟܝ. ܘܰܬܪܶܝܢ ܥܰܡ̱ܡ̈ܶܐ ܡܶܢ ܟܰܪܣܳܐ ܕܺܝܠܶܟܝ ܢܶܬܦܰܪܫܽܘܢ. ܘܥܰܡܳܐ ܡܶܢ ܥܰܡܳܐ ܢܶܗܘܶܐ ܥܰܫܺܝܢ. ܘܗܰܘ ܪܰܒܳܐ ܢܶܦܠܰܚ ܥܰܒܕܽܘܬܳܐ ܠܗܰܘ ܕܰܙܥܽܘܪ. ܘܶܐܬܡܰܠܺܝܘ ܝܰܘܡ̈ܳܬܳܗ̇ ܕܬܺܐܠܰܕ. ܘܰܠܗܳܕܶܐ ܐܺܝܬ ܗ̱ܘܳܐ ܠܳܗ̇ ܬܳܐܡ̈ܶܐ ܒܟܰܪܣܳܗ̇. ܢܦܰܩ ܕܶܝܢ ܒܪܳܐ ܗܰܘ ܒܽܘܟܪܳܐ ܣܡܰܩܪܳܝܳܐ. ܕܟܽܠܶܗ ܐܰܝܟ ܐܰܝܟ ܡܶܫܟܳܐ ܣܥܰܪ. ܫܰܡܗܰܬ݂ ܕܶܝܢ ܫܡܳܐ ܕܺܝܠܶܗ ܥܺܣܽܘ. ܘܡܶܢ ܒܳܬܰܪ ܗܳܕܶܐ ܢܦܰܩ ܐܰܚܽܘܗ̱ܝ. ܘܺܐܝܕܳܐ ܕܺܝܠܶܗ ܐܰܚܺܝܕܳܐ ܗ̱ܘܳܬ ܒܥܶܩܒܳܐ ܕܥܺܣܽܘ. ܘܰܩܪܳܬ݂ ܫܡܶܗ ܝܰܥܩܽܘܒ^[25].

21: ܐܰܝܟܰܢܳܐ ܟܺܝܬ ܕܗܳܠܶܝܢ ܬܪܶܝܢ ܛܠܳܝ̈ܶܐ. ܛܽܘܦܣܳܐ ܐܰܚܺܝܕܺܝܢ ܕܰܬܪܶܝܢ ܥܰܡ̱ܡ̈ܶܐ. ܐܰܝܟ ܒܰܪ̱ܬ ܩܳܠܶܗ ܕܡܳܪܝܳܐ. ܐܶܠܳܐ ܥܺܣܽܘ ܡܰܢ. ܠܥܰܡܳܐ ܕܰܟܢܽܘܫܬܳܐ ܩܳܕܶܡ ܗ̱ܘܳܐ ܡܛܰܦܶܤ. ܕܒܽܘܟܪܳܐ ܡܰܢ ‌ܐܺܝܬܰܘܗ̱ܝ. ܡܶܛܽܠ ܟܺܝܬ ܕܩܰܕܡܳܝܳܐ ܐܶܫܬܰܘܕܰܥ ܠܰܐܠܳܗܳܐ܆ ܡܶܛܽܠ ܗܳܕܶܐ ܓܶܝܪ ܐܳܦ ܣܡܰܩܪܳܝܳܐ ‌ܐܺܝܬܰܘܗ̱ܝ ܗ̱ܘܳܐ܆ ܘܦܰܐܝܳܐ ܘܰܗܕܺܝܪܳܐ ܘܰܦܨܺܝܚܳܐ܆ ܐܳܦ ܒܰܩܪܳܝܬܳܐ ܐܳܦ ܒܡܶܫܬܰܘܕܥܳܢܽܘܬܳܐ ܚܰܕܳܝܳܐ. ܥܒܺܝܛܳܐ ܕܶܝܢ ܘܣܰܥܪܳܐ. ܘܰܕܡܶܬܚܰܫܰܟ ܡܶܢ ܣܰܥܪܳܐ. ܘܰܕܠܳܐ ܡܶܫܬܒܶܩ ܡܶܢ ܗܳܪܟܳܐ ܕܰܢܚܽܘܪ ܕܰܟܝܳܐܺܝܬ ܘܰܡܫܰܡܠܝܳܐܺܝܬ ܠܘܳܬ ܐܰ‎ܠܳܗܳܐ. ܐܳܦ ܡܶܛܽܠ ܒܺܝܫܽܘܬܳܐ ܕܡܶܨܪܳܝܬܳܐ. ܗܳܝ ܕܰܚܝܳܐ ܥܰܡܳܗ̇ ܟܰܕ ܡܺܝܬܽܘܬܳܐ ܣܰܓܺܝܐܬܳܐ ܐܺܝܬ ܗ̱ܘܳܐ ܠܶܗ ܒܳܗ̇. ܣܰܥܪܳܐ ܓܶܝܪ ܡܢܳܬܳܐ ܡܰܢ ܕܦܰܓܪܳܐ ܡܶܣܬܒܰܪ ܕܺܐܝܬܰܘܗ̱ܝ. ܡܺܝܬܳܐ ܕܶܝܢ ‌ܐܺܝܬܰܘܗ̱ܝ ܒܗܳܝ ܕܣܰܓܺܝܳܐܐ ܘܠܳܐ ܡܰܪܓܫܳܢܳܐ. ܘܟܺܐܒܳܐ ܠܳܐ ܥܳܒܶܕ ܟܰܕ ܡܶܬܦܣܶܩ.

22: ܝܰܥܩܽܘܒ ܕܶܝܢ ܠܥܰܡܳܐ ܕܥܺܕܬܳܐ ܘܰܠܗܰܘ ܕܡܶܢ ܥܰܡ̱ܡ̈ܶܐ. ܗܽܘ ܒܶܗ ܡܩܰܕܶܡ ܗ̱ܘܳܐ ܘܨܳܐܰܪ. ܕܰܬܪܰܝܳܢܳܐܺܝܬ ܒܛܶܟܣܳܐ ܡܰܢ ܐܶܬܺܝܠܶܕ. ܘܡܶܢ ܒܳܬܰܪ ܟܢܽܘܫܬܳܐ ܐܶܫܬܰܘܕܰܥ ܠܰܐܠܳܗܳܐ. ܕܰܐܚܺܝܕ ܕܶܝܢ ܒܪܰܡ ܘܰܠܒܺܝܟ ܒܥܶܩܒܳܐ ܕܥܺܣܽܘ^[26]. ܟܰܕ ܓܶܝܪ ܒܳܬܰܪ ܢܳܡܽܘܣܳܐ ܘܰܢܒܺܝ̈ܶܐ ܪܕܳܬ݂ ܥܺܕܬܳܐ ܘܰܠܗܽܘܢ ܢܶܩܦܰܬ݂. ܡܫܺܝܚܳܐ ܡܳܪܳܗ̇ ܐܶܫܬܰܘܕܥܰܬ݂. ܠܗܰܘ ܕܰܟܢܽܘܫܬܳܐ ܟܰܕ ܣܰܥܪܳܐ ܡܰܚܫܶܟ ܗ̱ܘܳܐ ܒܰܐܦܶܝ̈ܗ̇. ܠܡܶܫܬܰܘܕܳܥܽܘ ܠܳܐ ܐܶܫܟܚܰܬ݂. ܡܶܛܽܠܗܳܕܶܐ ܐܳܦ ܐܶܫܬܰܥܒܕܰܬ݂ ܠܗܳܝ ܙܥܽܘܪܬܳܐ ܘܰܬܪܰܝܳܢܺܝܬܳܐ ܒܙܰܒܢܳܐ. ܐܶܢ ܡܰܢ ܫܽܘܥܒܳܕܳܐ ܗܰܘ ܦܰܓܪܳܢܳܝܳܐ ܬܺܐܡܰܪ. ܟܰܕ ܬܚܶܝܬ݂ ܐܺܝܕܳܐ ܕܪ̈ܽܘܡܳܝܶܐ ܗܘ̣ܳܬ݂. ܩܰܕܺܝܡܳܐ ܕܶܝܢ ܝܺܕܺܝܥܳܐ. ܕܽܐܘܚܕܳܢܳܐ ܕܪܺܝܫܳܢܽܘܬܳܐ ܕܪ̈ܽܘܡܳܝܶܐ ܡܫܺܝܚܳܐ ‌ܐܺܝܬܰܘܗ̱ܝ. ܐܶܢ ܕܶܝܢ ܫܽܘܥܒܳܕܳܐ ܗܰܘ ܡܶܬܝܰܕܥܳܢܳܐ ܘܪܽܘܚܳܢܳܝܳܐ ܬܶܬܚܰܫܰܒ. ܟܰܕ ܡܫܰܡܫܳܐ ܘܰܡܕܰܝܠܳܐ ܒܝܰܕ ܢܳܡܽܘܣܳܐ ܘܰܢܒܺܝ̈ܶܐ. ܠܘܳܬ݂ ܡܶܬܓܰܠܝܳܢܽܘܬܳܐ ܕܶܐܘܰܢܓܶܠܺܝܽܘܢ.

23: ܐܺܝܬܰܘܗ̱ܝ ܗ̱ܘܳܐ ܕܶܝܢ ܝܰܥܩܽܘܒ ܒܰܪܢܳܫܳܐ ܦܫܺܝܛܳܐ. ܐܰܝܟܰܢܳܐ ܕܣܽܘܡܰܐܟܽܘܤ ܦܰܫܶܩ ܕܠܳܐ ܡܽܘܡ. ܟܰܕ ܘܰܒܗܳܕܶܐ ܩܳܕܶܡ ܗ̱ܘܳܐ ܡܛܰܦܶܤ ܠܰܫܪܳܪܳܐ. ܐܺܝܬܶܝܗ̇ ܓܶܝܪ ܗܺܝ ܥܺܕܬܳܐ܆ ܗܳܝ ܕܛܽܘܦܣܳܐ ܕܺܝܠܳܗ̇ ‌ܐܺܝܬܰܘܗ̱ܝ ܗ̱ܘܳܐ ܝܰܥܩܽܘܒ ܩܰܕܺܝܫܬܳܐ ܘܰܕܠܳܐ ܡܽܘܡ. ܘܰܕܠܳܐ ܐܺܝܬ ܒܳܗ̇ ܛܽܘܠܫܳܐ ܐܰܘ ܩܶܡܛܳܐ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܕܰܐܝܟ ܗܳܟܰܢ^[27]. ܐܰܝܟܰܢܳܐ ܕܳܐܡܰܪ ܚܰܟܺܝܡܳܐ ܦܰܘܠܽܘܤ.

24: ܐܶܠܳܐ ܐܳܦ ܠܒܽܘܟܪܽܘܬܳܐ ܙܰܒܶܢ ܥܺܣܽܘ ܠܝܰܥܩܽܘܒ. ܟܰܕ ܫܩܰܠ ܛܺܝ̈ܡܶܐ ܠܰܚܡܳܐ ܘܒܽܘܫܳܠܳܐ ܕܰܛܠܰܦ̈ܚܶܐ. ܒܽܘܝܳܐܳܐ ܕܠܰܥܒܽܘܬ݂ ܟܰܪܣܳܐ. ܗܳܟܰܢܳܐ ܐܳܦ ܥܰܡܳܐ ܗܰܘ ܕܰܟܢܽܘܫܬܳܐ ܐܶܟܰܠ ܘܰܣܒܰܥ. ܘܰܫܡܶܢ ܘܶܐܬܥܰܒܺܝ ܘܶܐܬܦܰܬܺܝ. ܘܰܒܥܰܛ ܘܰܐܪܚܶܩ ܡܶܢ ܐܰ‎ܠܳܗܳܐ ܦܳܪܽܘܩܶܗ. ܘܰܠܥܺܕܬܳܐ ܩܰܕܺܝܡܽܘܬܶܗ ܘܒܽܘܟܪܽܘܬܶܗ ܗܳܝ ܕܡܶܢ ܗܳܪܟܳܐ ܐܰܫܶܦ ܘܝܰܗ̱ܒ. ܗܳܝ ܟܺܝܬ ܕܳܐܦ ܒܝܰܕ ܡܰܠܰܐܟܺܝ ܢܒܺܝܳܐ ܩܰܕܶܡ ܗ̱ܘܳܐ ܐܰܙܥܶܩ ܐܰ‎ܠܳܗܳܐ ܟܰܕ ܐܳܡܰܪ܆ ܕܰܠܝܰܥܩܽܘܒ ܪܶܚܡܶܬ݂. ܘܰܠܥܺܣܽܘ ܕܶܝܢ ܣܢܺܝܬ݂^[28].

25: ܕܰܕܥܰܠ ܥܺܕܬܳܐ ܕܶܝܢ ܡܰܡܠܶܟ ܠܥܳܠܡܺܝܢ܆ ܗܰܘ ܕܡܶܢ ܝܳܠܕܰܬ݂ ܐܰ‎ܠܳܗܳܐ ܡܰܪܝܰܡ ܥܬܺܝܕ ܕܢܶܬܺܝܠܶܕ ܣܰܒܰܪ ܓܰܒܪܺܐܶܝܠ. ܐܳܦ ܡܶܢ ܗܳܕܶܐ ܝܺܕܺܝܥܳܐ. ܠܳܐ ܓܶܝܪ ܐܶܡܰܪ ܕܢܰܡܠܶܟ ܥܰܠ ܝܰܥܩܽܘܒ ܠܥܳܠܡܺܝܢ^[29]. ܐܶܠܳܐ ܥܰܠ ܒܰܝܬܶܗ. ܒܰܝܬܳܐ ܕܶܝܢ ܕܰܐ‎ܠܳܗܳܐ ܗܰܘ ܕܺܐܝܬܰܘܗ̱ܝ ܛܽܘܦܣܶܗ ܝܰܥܩܽܘܒ ܥܺܕܬܳܐ ܐܺܝܬܶܝܗ̇^[30]. ܐܰܝܟܰܢܳܐ ܕܦܰܘܠܽܘܤ ܟܰܕ ܫܳܠܶܚ ܠܛܺܝܡܳܬܶܐܘܳܤ ܐܶܡܰܪ. ܐܰܝܟܰܢܳܐ ܕܬܶܕܰܥ ܕܰܐܝܟܰܢܳܐ ܙܳܕܶܩ ܒܒܰܝܬܳܐ ܕܰܐ‎ܠܳܗܳܐ ܠܡܶܬܗܰܦܳܟܽܘ. ܗܳܝ ܕܺܐܝܬܶܝܗ̇ ܥܺܕܬܳܐ ܕܰܐ‎ܠܳܗܳܐ ܚܰܝܳܐ. ܚܳܙܶܝܢ ܐܢ̱ܬܽܘܢ ܕܰܟܡܳܐ ܝܰܡܳܐ ܕܬܰܪ̈ܥܝܳܬܳܐ ܐܰ‎ܠܳܗܳܝ̈ܳܬܳܐ܆ ܚܳܒܶܫ ܒܡ̈ܶܠܶܐ ܙܥܽܘܪ̈ܝܳܬܳܐ܆ ܣܽܘܒܳܪܳܐ ܕܪܺܝܫ ܡܰܠܰܐܟ̈ܶܐ ܓܰܒܪܺܐܶܝܠ.

26: ܗܳܢܳܐ ܣܽܘܒܳܪܳܐ ܐܳܦ ܠܦܰܪܕܰܝܣܳܐ ܦܬܰܚ. ܗܰܘ ܕܡܶܢ ܐܳܕܳܡ ܗܳܐ ܚܰܡܫܳܐ ܐܰ‌ܠ̈ܦܺܝܢ ܫܢܰܝ̈ܳܐ ܘܝܰܬܺܝܪ ܐܰܚܺܝܕ ܗ̱ܘܳܐ. ܐܶ‎ܠܽܘ ܠܳܐ ܓܶܝܪ ܕܓܰܝܳܣܳܐ ܒܳܬܰܪ ܚܰܝܠܳܐ ܕܡܶܠܰܘܗ̱ܝ ܕܪܺܝܫ ܡܰܠܰܐܟ̈ܶܐ ܢܩܶܦ܆ ܘܗܰܝܡܶܢ ܕܰܕܡܰܠܟܽܘܬܶܗ ܕܰܡܫܺܝܚܳܐ ܠܳܐ ܢܶܗܘܶܐ ܫܽܘܠܳܡܳܐ. ܠܰܘ ܟܰܕ ܚܳܙܶܐ ܗ̱ܘܳܐ ܠܶܗ ܕܰܨܠܺܝܒ. ܘܰܐܟܡܳܐ ܕܳܐܦ ܠܳܐ ܡܬܽܘܡ ܥܬܺܝܕ ܠܰܡܡܳܬ݂ ܡܶܣܬܰܟܶܐ ܐܳܡܰܪ ܗ̱ܘܳܐ. ܐܶܬܕܰܟܪܰܝܢܝ ܐܶܡܰܬܝ ܕܬܺܐܬܶܐ ܒܡܰܠܟܽܘܬܳܟ^[31]. ܘܡܶܚܕܳܐ ܫܡܰܥ. ܐܰܡܺܝܢ ܐܳܡܰܪ ܐ̱ܢܳܐ ܠܳܟ. ܝܰܘܡܳܢܳܐ ܥܰܡܝ ܬܶܗܘܶܐ ܒܦܰܪܕܰܝܣܳܐ. ܘܰܠܫܽܘܘܕܳܝܳܐ ܡܶܫܬܘܶܐ ܗ̱ܘܳܐ. ܐܰܝܟܰܢܳܐ ܗܳܟܺܝܠ ܠܰܘ ܠܳܐ ܡܳܝܽܘܬܳܐ ‌ܐܺܝܬܰܘܗ̱ܝ ܗܰܘ ܕܶܐܨܛܠܶܒ ܘܡܰܠܟܳܐ ܕܠܳܐ ܫܽܘܪܳܝ ܘܰܕܠܳܐ ܫܽܘܠܳܡ. ܕܠܰܨܠܺܝܒܳܐ ܕܰܚܠܳܦܰܝܢ ܣܒܰܠ ܨܶܒܝܳܢܳܐܺܝܬ ܒܰܒܣܰܪ. ܘܰܠܡܰܘܬܳܐ ܡܰܥܒܶܕ ܚܰܝ̈ܶܐ ܛܥܶܡ^[32].

27: ܗܺܝ ܕܶܝܢ ܡܰܢ ܗܳܟܺܝܠ ܒܬܽܘܠܬܳܐ ܩܰܕܺܝܫܬܳܐ܆ ܟܰܕ ܡܶܬܒܰܩܝܳܐ ܗ̱ܘܳܬ ܒܰܨܒܽܘܬܳܐ ܦܰܐܝܳܐ ܠܰܐܠܳܗܳܐ ܕܺܝܠܶܗ ܕܣܽܘܒܳܪܳܐ. ܕܠܳܐ ܬܗܰܝܡܶܢ ܡܰܢ ܡܶܟܺܝܠ ܠܳܐ ܡܶܬܪܰܡܝܳܐ ܗ̱ܘܳܬ݂. ܠܘܳܬ ܙܢܳܐ ܕܶܝܢ ܕܝܰܠܕܳܐ ܒܪܰܡ ܡܶܬܦܰܫܟܳܐ ܗ̱ܘܳܬ݂. ܘܰܠܘܳܬ ܟܝܳܢܳܐ ܚܳܝܪܳܐ ܗ̱ܘܳܬ ܟܰܕ ܐܳܡܪܳܐ: ܕܰܐܝܟܰܢܳܐ ܬܶܗܘܶܐ ܠܺܝ ܗܳܕܶܐ܆ ܟܰܕ ܓܰܒܪܳܐ ܠܳܐ ܝܳܕܥܳܐ ܐ̱ܢܳܐ؟

28: ܘܟܰܕ ܥܢܳܐ ܡܰܠܰܐܟܳܐ ܐܶܡܰܪ ܠܳܗ̇: ܪܽܘܚܳܐ ܕܩܽܘܕܫܳܐ ܢܺܐܬܶܐ ܥܠܰܝܟܝ. ܘܚܰܝܠܳܐ ܕܰܡܪܰܝܡܳܐ ܢܰܓܶܢ ܥܠܰܝܟܝ. ܡܶܛܽܠܗܳܕܶܐ ܐܳܦ ܗܰܘ ܕܡܶܬܺܝܠܶܕ. ܩܰܕܺܝܫܳܐ ܢܶܬܩܪܶܐ ܒܪܳܐ ܕܰܐ‎ܠܳܗܳܐ. ܡܳܢܳܐ ܐܳܡܪܳܐ ܐܰܢ̱ܬܝ ܐܳܡܰܪ ܕܓܰܒܪܳܐ ܠܳܐ ܝܳܕܥܳܐ ܐܰܢ̱ܬܝ. ܠܳܐ ܠܘܳܬ ܟܝܳܢܳܐ ܬܚܽܘܪܺܝܢ. ܐܳܦܠܳܐ ܡܶܠܬܳܐ ܬܶܒܥܶܝܢ ܕܺܝܠܳܗ̇ ܕܬܶܕܡܽܘܪܬܳܐ. ܪܽܘܚܳܐ ܩܰܕܺܝܫܳܐ ܢܺܐܬܶܐ ܥܠܰܝܟܝ^[33]. ܫܡܰܥܬܝ ܩܰܕܺܝܫܳܐ. ܛܪܽܘܕܝ ܡܶܢ ܬܰܪܥܺܝܬܶܟܝ ܟܽܠܳܗ̇ ܦܰܢܛܰܣܺܝܰܐ ܕܚܽܘܠܛܳܢܳܐ ܘܰܕܪܶܓܬܳܐ. ܘܰܠܡܶܐܬܺܝܬܳܐ ܕܪܽܘܚܳܐ. ܕܕܰܟܝܳܐ ܡܶܢ ܟܽܠܳܗ̇ ܨܳܐܽܘܬܳܐ ܘܛܽܘܠܫܳܐ ܗܰܝܡܶܢܝ ܕܺܐܝܬܶܝܗ̇. ܥܳܒܽܘܕܳܐܺܝܬ ܓܶܝܪ ܢܰܥܒܶܕ ܒܰܛܢܳܐ. ܟܰܕ ܐܰܢ̱ܬܝ ܒܰܠܚܽܘܕ ܐܰܟܚܕܳܐ ܡܰܥܠܳܐ ܐܰܢ̱ܬܝ ܡܶܢ ܐܽܘܣܺܝܰܐ ܕܺܝܠܶܟܝ. ܟܽܠܗܶܝܢ ܐܰܝܠܶܝܢ ܕܶܐܡܗ̈ܳܬܳܐ ܡܟܳܢ̈ܳܢ ܠܡܰܥܳܠܽܘ ܐܰܟܚܕܳܐ ܠܝܰܠܕܳܐ.

29: ܗܰܘ ܕܶܝܢ ܕܡܶܬܒܛܶܢ ‌ܐܺܝܬܰܘܗ̱ܝ. ܗܰܘ ܕܶܐܡܪܶܬ݂ ܡܶܢ ܠܥܶܠ ܟܰܕ ܡܫܰܪܶܐ ܐ̱ܢܳܐ ܒܣܽܘܒܳܪܳܐ. ܫܠܳܡ ܠܶܟܝ ܡܰܠܝܰܬ݂ ܛܰܝܒܽܘܬܳܐ. ܡܳܪܝܳܐ ܥܰܡܶܟܝ. ܗܳܢܳܐ ܕܶܝܢ ܡܳܪܝܳܐ ‌ܐܺܝܬܰܘܗ̱ܝ. ܡܶܠܬܳܐ ܕܰܐ‎ܠܳܗܳܐ. ܚܰܕ ܡܶܢ ܬܠܳܬܳܐ ܩܢܽܘ̈ܡܶܐ. ܚܰܝܠܳܐ ܕܰܐܒܳܐ ܡܪܰܝܡܳܐ ܗܰܘ ܕܰܐܓܶܢ. ܡܫܺܝܚܳܐ ܓܶܝܪ ܚܰܝܠܳܐ ܘܚܶܟܡܬܳܐ ܕܰܐ‎ܠܳܗܳܐ ‌ܐܺܝܬܰܘܗ̱ܝ. ܗܰܘ ܕܰܕܠܳܐ ܫܽܘܪܳܝܳܐ ܡܰܢ ܘܰܡܬܽܘܡܳܐܺܝܬ ܘܠܳܐ ܦܰܓܪܳܢܳܐܺܝܬ ܐܰܝܟ ܡܶܠܬܳܐ ܡܶܢ ܐܰܒܳܐ ܐܶܬܺܝܠܶܕ. ܡܶܢܶܟܝ ܕܶܝܢ ܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܶܣܬܰܟܠܳܢܳܐܺܝܬ. ܘܰܕܠܳܐ ܒܽܘܠܒܳܠܳܐ ܡܶܬܒܰܣܰܪ. ܦܰܓܪܳܐ ܗܰܘ ܕܠܶܟܝ ܫܘܶܐ ܒܽܐܘܣܺܝܰܐ. ܗܰܘ ܕܰܡܟܳܢ ܠܡܶܬܒܛܳܢܽܘ ܘܰܠܡܶܬܺܝܠܳܕܽܘ. ܕܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܘܡܶܬܗܰܘܢܳܢܺܝܬܳܐ. ܕܟܽܠܶܗ ܓܶܝܪ ܩܽܘܝܳܡܳܐ ܕܓܶܢܣܳܐ ܐ̱ܢܳܫܳܝܳܐ. ܘܠܰܘ ܕܰܡܢܳܬܳܐ ܨܳܒܶܐ ܕܢܶܥܒܶܕ ܦܽܘܪܩܳܢܳܐ.

30: ܡܶܛܽܠܗܳܕܶܐ ܐܳܦ ܗܰܘ ܕܡܶܬܺܝܠܶܕ. ܩܰܕܺܝܫܳܐ ܢܶܬܩܪܶܐ ܒܪܳܐ ܕܰܐ‎ܠܳܗܳܐ. ܠܡܶܬܒܰܝܳܢܽܘ ܙܳܕܶܩ. ܕܰܐܝܟܰܢܳܐ ܚܰܕ ܝܳܕܰܥ ܠܶܗ ܓܰܒܪܺܐܶܝܠ ܠܥܰܡܰܢܽܘܐܶܝܠ. ܕܰܥܬܺܝܕ ܗ̱ܘܳܐ ܡܰܢ ܕܢܶܬܺܝܠܶܕ ܒܰܒܣܰܪ ܡܶܢ ܝܳܠܕܰܬ݂ ܐܰ‎ܠܳܗܳܐ ܘܰܒܬܽܘܠܰܬ݂ ܒܟܽܠܙܒܰܢ ܡܰܪܝܰܡ. ܢܶܬܩܪܶܐ ܕܶܝܢ ܩܰܕܺܝܫܳܐ. ܠܰܘ ܟܰܕ ܥܳܡܽܘܪܳܐ ܥܬܺܝܕ ܕܢܶܩܢܶܐ ܠܶܗ ܒܶܗ ܠܰܒܪܳܐ ܕܰܐ‎ܠܳܗܳܐ. ܘܰܕܡܶܢ ܫܰܘܬܳܦܽܘܬܳܐ ܥܬܺܝܕ ܕܢܶܬܩܰܕܰܫ. ܐܶܠܳܐ ܐܰܝܟ ܡܰܢ ܕܒܰܟܝܳܢܳܐ ‌ܐܺܝܬܰܘܗ̱ܝ ܩܰܕܺܝܫܳܐ. ܒܗܳܝ ܕܗܽܘ ܟܰܕ ܗܽܘ ‌ܐܺܝܬܰܘܗ̱ܝ ܒܪܳܐ ܕܰܐ‎ܠܳܗܳܐ. ܘܚܰܕ ܐܺܝܬܰܘܗ̱ܝ ܡܶܢ ܬܰܪܬܶܝܢ. ܡܶܢ ܐܰ‎ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ. ܐܶ‎ܠܽܘ ܓܶܝܪ ܒܰܬܪܶܝܢ ܟܝܳܢ̈ܶܐ ܐܳܡܰܪ ܗ̱ܘܳܐ ܠܶܗ ܕܢܶܬܺܝܕܰܥ܆ ܐܰܝܟ ܪ̈ܰܫܺܝܥܶܐ ܗܳܠܶܝܢ ܘܕܳܪ̈ܽܘܫܶܐ ܚܰܕ̈ܬܶܐ. ܐܳܡܰܪ ܗ̱ܘܳܐ. ܡܶܛܽܠܗܳܕܶܐ ܐܳܦ ܗܰܘ ܕܡܶܬܺܝܠܶܕ ܩܰܕܺܝܫܳܐ ܢܶܬܩܪܶܐ. ܒܶܗ ܓܶܝܪ ‌ܐܺܝܬܰܘܗ̱ܝ ܒܪܳܐ ܕܰܐ‎ܠܳܗܳܐ.

31: ܕܡܶܢ ܗܳܪܟܳܐ. ܐܳܦ ܙܳܕܶܩ ܠܰܢ 222ܕܢܶܫܬܰܐܰܠ ܡܶܢ ܗܳܝ ܕܗܳܟܰܢܳܐ ܢܶܩܪܶܐ܆ ܡܶܛܽܠ ܗܳܕܶܐ ܐܳܦ ܗܰܘ ܕܡܶܬܺܝܠܶܕ ܩܰܕܺܝܫܳܐ܆ ܒܳܬܰܪܟܶܢ ܢܶܦܣܽܘܩ ܢܽܘܩܙܳܐ ܬܰܚܬܳܝܳܐ܆ ܘܒܳܬܰܪܟܶܢ ܢܰܝܬܶܐ܆ ܢܶܬܩܪܶܐ ܒܪܳܐ ܕܰܐ‎ܠܳܗܳܐ. ܐܰܝܟܰܢܳܐ ܕܠܳܐ ܢܶ݀ܬܶܠ ‌ܐܰܬܪܳܐ ܠܪܰܫܺܝܥܳܐ ܢܶܣܛܽܘܪܺܝܽܘܤ ܘܰܠܡܰܠܦܳܢܰܘܗ̱ܝ ܕܗܰܘ ܕܳܐܡܪܺܝܢ: ܕܫܰܘܬܶܦ ܒܪܳܐ ܕܰܐ‎ܠܳܗܳܐ ܠܗܰܘ ܕܡܶܢ ܡܰܪܝܰܡ ܐܶܬܺܝܠܶܕ. ܒܰܩܪܳܝܬܳܐ ܘܒܰܫܡܳܐ ܘܰܒܫܽܘܠܛܳܢܳܐ ܕܰܒܪܳܐ.

32: ܟܬܰܒ ܓܶܝܪ ܕܺܝܽܘܕܽܘܪܽܘܤ ܗܰܘ ܕܝܽܘܕܳܐܺܝܬ ܪܘܶܐ ܗ̱ܘܳܐ ܗܳܟܰܢܳܐ. ܡܳܪܝܳܐ ܟܰܕ ܒܟܰܪܣܳܐ ܕܰܒܬܽܘܠܬܳܐ ‌ܐܺܝܬܰܘܗ̱ܝ ܗ̱ܘܳܐ܆ ܘܡܶܢ ܐܽܘܣܺܝܰܐ ܕܗܳܝ. ܠܳܐ ܐܺܝܬ ܗ̱ܘܳܐ ܠܶܗ ܐܺܝܩܳܪܳܐ ܕܰܒܪܽܘܬܳܐ. ܐܶܡܰܬܝ ܕܶܝܢ ܕܶܐܨܛܰܠܰܡ ܘܗܰܝܟܠܳܐ ܠܰܐܠܳܗܳܐ ܡܶܠܬܳܐ ܗ̣ܘܳܐ܆ ܘܠܶܗ ܠܺܝܚܺܝܕܳܝܳܐ ܩܰܒܶܠ. ܢܣܰܒ ܐܺܝܩܳܪܳܐ ܕܰܫܡܳܐ. ܘܶܐܫܬܰܘܬܰܦ ܐܳܦ ܒܶܗ ܒܺܐܝܩܳܪܳܐ.

33: ܬܶܐܽܘܕܽܘܪܽܘܤ ܕܶܝܢ܆ ܗܰܘ ܕܝܰܬܺܝܪ ܪܰܫܺܝܥ ܛܳܒ ܡܶܢ ܗܳܢܳܐ ܕܝܽܘܕܽܘܪܽܘܤ܆ ܗܳܢܳܐ ܓܶܝܪ ‌ܐܺܝܬܰܘܗ̱ܝ ܙܰܘܓܳܐ ܕܡܰܠܦܳܢܰܘܗ̱ܝ ܕܢܶܣܛܽܘܪܺܝܽܘܤ ܐܶܡܰܪ. ܕܰܒܛܰܝܒܽܘܬܳܐ ‌ܐܺܝܬܰܘܗ̱ܝ ܒܪܳܐ. ܒܰܪܢܳܫܳܐ ܗܰܘ ܕܡܶܢ ܡܰܪܝܰܡ. ܒܰܟܝܳܢܳܐ ܕܶܝܢ ܐܰ‎ܠܳܗܳܐ ܡܶܠܬܳܐ.

34: ܐܶܠܳܐ ܠܗܳܠܶܝܢ ܓܽܘ̈ܕܳܦܶܐ ܫܟܺܝܪ̈ܶܐ ܘܠܳܐ ܢܳܡܽܘܣܳܝ̈ܶܐ ܡܒܰܛܶܠ. ܣܽܘܒܳܪܳܐ ܕܪܺܝܫ ܡܰܠܰܐܟ̈ܶܐ ܓܰܒܪܺܐܶܝܠ. ܕܰܡܫܰܡܠܝܳܐܺܝܬ ܐܺܝܬ ܠܶܗ ܘܠܳܐ ܚܰܣܺܝܪܳܐܺܝܬ܆ ܠܰܘ ܟܰܕ ܒܺܝܫܳܐܺܝܬ ܡܶܬܩܪܶܐ. ܐܶܠܳܐ ܐܰܝܟܰܢܳܐ ܕܗܽܘ ܗܰܘ ܕܣܳܒܰܪ ܐܶܡܰܪ. ܘܶܐܬܗܰܝܡܰܢ ܐ̱ܪܳܙܳܐ ܗܰܘ ܕܰܠܥܶܠ ܡܶܢ ܡܶܠܬܳܐ ܘܶܐܡܰܪ: ܡܶܛܽܠܗܳܕܶܐ ܐܳܦ ܗܰܘ ܕܡܶܬܺܝܠܶܕ ܩܰܕܺܝܫܳܐ ܢܶܬܩܪܶܐ܆ ܘܗܳܟܰܢܳܐ ܐܰܝܬܺܝ ܒܳܬܰܪܟܶܢ ܒܪܳܐ ܕܰܐ‎ܠܳܗܳܐ. ܡܶܛܽܠ ܓܶܝܪ ܐܳܡܰܪ ܕܶܐܡܪܶܬ܆ ܕܩܰܕܺܝܫܳܐ ܢܶܬܩܪܶܐ. ܠܰܘ ܐܰܝܟ ܒܰܪܢܳܫܳܐ ܕܰܒܛܰܝܒܽܘܬܳܐ ܡܶܢ ܟܰܪܣܳܐ ܕܶܐܡܶܗ ܐܶܬܩܰܕܰܫ ܬܰܣܒܪܺܝܢ. ܐܰܝܟ ܐܶܪܰܡܝܳܐ^[34] ܘܝܽܘܚܰܢܳܢ ܡܰܥܡܕܳܢܳܐ. ܐܶܠܳܐ ܐܰܝܟ ܒܰܪܢܳܫܳܐ^[35] ܕܰܐ‎ܠܳܗܳܐ. ܕܰܟܝܳܢܳܝܬܳܐ ܘܽܐܘܣܝ̣ܳܝ̣ܬܳܐ ܐܺܝܬ ܠܳܗ̇ ܠܩܰܕܺܝܫܽܘܬܳܐ.

35: ܠܗܰܘ ܕܳܐܦ ܢܫܰܒܰܚ. ܕܰܠܗܳܕܶܐ ܟܽܠܳܗ̇ ܡܰܟܺܝܟܽܘܬܳܐ ܐܰܫܘܺܝ ܕܢܺܐܬܶܐ. ܐܰܝܟܰܢܳܐ ܕܠܰܢ ܗܳܢܽܘܢ ܕܶܐܬܡܰܟܰܟ̣ܢܰܢ ܒܰܚܛܺܝܬܳܐ. ܪ̈ܳܡܶܐ ܘܰܫܡܰܝܳܢ̈ܶܐ ܢܶܥܒܶܕ. ܢܫܰܒܰܚ ܕܶܝܢ ܠܰܘ ܒܠܶܫܳܢܳܐ ܒܰܠܚܽܘܕ܆ ܘܳܐܦܠܳܐ ܒܩܺܝ̈ܢܳܬܳܐ ܘܰܙܡܺܝܪ̈ܳܬܳܐ ܕܰܠܢܰܦܫܳܐ ܡܰܪ̈ܦܝܳܢ܆ ܘܪܶܓܬܳܐ ܝܰܬܺܝܪܳܐܺܝܬ ܡܟܳܢ̈ܳܢ ܠܡܶܥܒܰܕ ܐܰܘ ܚܽܘܫܳܒܳܐ ܢܰܟܦܳܐ^[36]. ܐܶܠܳܐ ܐܳܦ ܒܢܰܨܺܝܚܽܘܬܳܐ ܕܰܥܒܳܕ̈ܶܐ. ܐܰܝܟܰܢܳܐ ܕܰܐܦ ܦܰܘܠܽܘܤ ܗܰܘ ܚܰܟܺܝܡܳܐ ܐܳܡܰܪ. ܟܰܕ ܡܰܪܬܶܐ ܠܡܰܪܚܳܩܽܘ ܡܶܢ ܙܳܢܝܽܘܬܳܐ. ܫܰܒܰܚܘ ܗܳܟܺܝܠ ܠܰܐܠܳܗܳܐ ܒܦܰܓܪܟܽܘܢ^[37].

36: ܐܶܡܰܬܝ ܡܰܢ ܓܶܝܪ ܕܰܒܡܶܠܬܳܐ ܡܫܰܒܰܚ ܐܰܢ̱ܬ. ܒܚܰܕ ܦܽܘܡܳܐ ܘܰܒܚܰܕ ܠܶܫܳܢܳܐ ܗܳܕܶܐ ܥܒܰܕܬ. ܐܶܡܰܬܝ ܕܶܝܢ ܕܣܳܥܽܘܪ̈ܘܳܬܳܐ ܕܫܳܘ̈ܝܳܢ ܠܰܟܪܺܝܣܛܝܳܢܽܘܬܳܐ ܬܶܬܦܰܪܰܤ ܠܡܶܣܥܰܪ܆ ܒܪܶܒܽܘ ܦܽܘܡ̈ܶܐ ܐܰܣܶܩܬܳܝܗ̱ܝ ܠܩܽܘܠܳܣܳܐ. ܟܽܠܚܰܕ ܓܶܝܪ ܡܶܢ ܗܳܢܽܘܢ 222ܕܚܳܙܶܝܢ ܠܳܟ. ܡܫܰܒܰܚ ܠܰܐܠܳܗܳܐ ܗܰܘ ܕܡܶܛܽܠܳܬܰܢ ܐܶܬܒܰܣܰܪ. ܕܰܒܕܰܐܰܝܟ ܗܳܠܶܝܢ ܦܽܘܩܕܳܢ̈ܶܐ ܫܳܘ̈ܝ̣ܰܝ̣ ܠܬܶܕܡܽܘܪܬܳܐ. ܠܕܽܘܒܳܪܳܐ ܕܺܝܠܰܢ 222ܬܰܪܐܰܐ ܘܰܐ‎ܠܶܦ. ܘܶܐܢܗܽܘ ܡܰܢ ܕܦܳܠܰܚ ܐܰܢ̱ܬ ܢܰܟܦܽܘܬܳܐ ܢܶܚܙܶܝܟ. ܡܶܢ ܟܽܠܦܪܽܘܤ ܢܺܐܡܰܪ. ܫܽܘܒܚܳܐ ܠܰܐܠܳܗܳܐ ܗܰܘ ܕܡܶܢ ܒܬܽܘܠܬܳܐ ܒܰܒܣܰܪ ܐܶܬܺܝܠܶܕ. ܘܢܰܟܦܽܘܬܳܐ ܠܰܒܢܰܝ̈ܢܳܫܳܐ ܣܳܡ ܢܳܡܽܘܣܳܐ. ܐܶܢ ܕܶܝܢ ܕܰܩܦܺܝܤ ܐܰܢ̱ܬ ܢܶܚܙܶܝܟ܆ ܘܕܰܠܪܳܡܽܘܬܳܐ ܘܰܡܫܰܩܠܽܘܬܳܐ ܕܳܐܶܫ ܐܰܢ̱ܬ. ܠܥܶܠ ܠܘܳܬ ܫܡܰܝܳܐ ܢܚܽܘܪ. ܘܰܢܫܰܒܰܚ ܠܗܰܘ ܕܠܰܫܡܰܝܳܐ ܐܰܪܟܶܢ ܐܰܝܟܰܢܳܐ ܕܰܟܬܺܝܒ^[38]. ܘܨܶܒܝܳܢܳܐܺܝܬ ܗܽܘ ܠܶܗ ܡܰܟܶܟ. ܘܚܰܘܺܝ ܠܰܢ ܐܽܘܪܚܳܐ ܚܕܰܬܳܐ ܕܡܰܣܩܳܐ ܠܰܢ ܠܰܫܡܰܝܳܐ ܡܰܟܺܝܟܽܘܬܳܐ^[39].

37: ܐܶܢ ܕܶܝܢ ܕܡܰܗܡܶܐ ܐܰܢ̱ܬ ܒܩܶܢܝ̈ܳܢܶܐ ܢܶܬܒܰܩܶܐ ܒܳܟ܆ ܘܰܕܠܰܣܢܺܝ̈ܩܶܐ ܡܶܢ ܗܳܠܶܝܢ ܕܺܝܠܳܟ ܡܫܰܘܬܶܦ ܐܰܢ̱ܬ܆ ܠܘܳܬ ܡܽܘܠܟܳܢܳܐ ܕܚܰܝ̈ܶܐ ܕܰܥܬܺܝܕܺܝܢ ܢܶܪܗܰܛ ܒܬܰܪܥܺܝܬܶܗ. ܘܰܢܩܰܠܶܤ ܠܫܶܡܫܳܐ ܕܙܰܕܺܝܩܽܘܬܳܐ. ܗܰܘ ܕܺܐܝܬܰܘܗ̱ܝ ܡܫܺܝܚܳܐ. ܗܰܘ ܕܰܒܙܰܠܺܝ̈ܩܶܐ ܕܰܩܝܳܡܬܳܐ ܠܡܶܬܥܰܡܪܳܢܺܝܬܳܐ ܐܰܢܗܰܪ. ܘܰܐ‎ܠܶܦ ܕܥܰܠ ܗܳܠܶܝܢ ܙܰܒ̈ܢܳܝܳܬܳܐ ܢܶܒܣܶܐ܆ ܘܢܶܩܢܶܐ ܛܳܒ̈ܳܬܳܐ. ܗܳܠܶܝܢ ܕܠܳܐ ܡܶܙܕܰܥ̈ܙܥܳܢ ܘܠܳܐ ܡܰܘ̈ܦܝܳܢ. ܗܳܠܶܝܢ ܕܥܰܝܢܳܐ ܠܳܐ ܚܙܳܬ݂. ܘܶܐܕܢܳܐ ܠܳܐ ܫܶܡܥܰܬ݂. ܘܥܰܠ ܠܶܒܳܐ ܕܒܰܪܢܳܫܳܐ ܠܳܐ ܣܳܠ̈ܩܳܢ^[40]. ܐܰܝܟܰܢܳܐ ܕܳܐܡܰܪ ܟܬܳܒܳܐ ܐܰ‎ܠܳܗܳܝܳܐ.

38: ܐܶܢ ܕܶܝܢ ܡܶܢ ܗܳܠܶܝܢ ܬܶܡܐܰܢ ܠܰܢ܆ ܘܠܰܪ̈ܓܺܝܓܳܬܳܐ ܢܶ݀ܬܶܠ ܚܢܰܢ ܠܰܢ܆ ܘܰܠܘܳܬ ܗܽܘܠܶܐ ܢܶܬܶܐܣܰܪ. ܬܶܬܓܚܶܟ ܡܰܢ ܗܺܝ ܟܪܺܝܣܛܝܳܢܽܘܬܳܐ. ܡܰܣܠܰܝ̈ܳܐ ܕܶܝܢ ܣܰܒܪ̈ܶܐ ܗܳܢܽܘܢ ܕܰܩܝܳܡܬܳܐ ܢܶܬܚܙܽܘܢ. ܘܫܳܥܬܳܐ ܠܠܳܐ ܡܗܰܝܡ̈ܢܶܐ ܢܶܣܬܰܒܰܪ. ܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ݂ ܕܶܚܠܬܳܐ^[41]. ܘܢܶܬܓܰܕܰܦ ܫܡܳܐ ܕܰܐ‎ܠܳܗܳܐ ܡܶܛܽܠܳܬܰܢ ܒܶܝܬ ܥܰܡ̱ܡ̈ܶܐ^[42]. ܐܰܝܟ ܒܰܪ̱ܬ ܩܳܠܳܐ ܕܰܢܒܺܝܳܐ. ܗܳܝ ܕܠܳܐ ܬܶܗܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‎ܠܳܗܳܐ ܪܰܒܳܐ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ܆ ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܕܺܝܠܶܗ ܩܰܕܺܝܫܳܐ ܘܰܫܘܶܐ ܒܽܐܘܣܺܝܰܐ. ܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܕܩܰܕܺܝܫܳܐ ܡܳܪܝ ܣܶܐܘܺܝܪܶܐ ܕܥܰܠ ܣܽܘܒܳܪܳܐ.

ܥܡܘܣ. 8: 11[1]

ܐܫܥܝܐ. 3: 2 ـ 3 [2]

ܐ. ܩܘܪ̈ܝܢܬܝܐ. 3: 10 [3]

ܓܠ̈ܛܝܐ. 6: 14 [4]

ܠܘܩܐ. 2: 14 [5]

ܐܫܥܝܐ. 6: 3 [6]

ܡܫܰܘܕܥܺܝܢܰܢ[7]

ܕܰܡܚܰܝܕܺܝܢ[8]

ܐܦܣ̈ܝܐ. 4: 9 [9]

ܡܙܡܘܪܐ. 24: 7 ـ 8[10]

ܠܘܩܐ. 15: 7 [11]

ܕܢܝܐܝܠ. 10: 13 [12]

 ܝܬܝܪ ܪܘܪܒܐܝܬ[13]

ܠܘܩܐ. 1: 28 [14]

ܠܘܩܐ. 1: 29 ـ 31 [15]

ܕܗܓܓܝܐ[16]

ܥܒܪ̈ܝܐ. 4: 15 [17]

ܣܶܦܪܐ ܕܒܪܝܬܐ. 3: 16 [18]

ܡܙܡܘܪ̈ܐ. 82: 6 [19]

ܒ. ܩܘܪ̈ܝܢܬܝܐ. 8: 9 [20]

ܡܙܡܘܪܐ. 82: 6 [21]

ܠܘܩܐ. 1: 32 [22]

ܒ. ܫܡܘܐܝܠ. 7: 12 [23]

ܠܘܩܐ. 1: 33 [24]

ܣܶܦܪܳܐ ܕܰܒܪܺܝܬܳܐ. 25: 23 ـ 25 [25]

ܣܶܦܪܐ ܕܒܪܝܬܐ. 25: 26 [26]

ܐܦܣ̈ܝܐ. 5: 27[27]

ܡܠܐܟܝ. 1: 2[28]

  ܠܘܩܐ. 1: 33[29]

  ܐ. ܛܝܡܬܐܘܣ. 3: 15[30]

  ܠܘܩܐ. 23: 42 ـ 43[31]

  ܠܘܩܐ. 1: 34 ـ 35[32]

ܠܘܩܐ. 1: 28 ـ 35[33]

ܐܶܪܰܡܝܳܐ. 1: 5   ܠܘܩܐ. 1: 15 [34]

ܒܪܐ ܗܽܘ[35]

ܐܦܣ̈ܝܐ. 5: 19 [36]

ܐ. ܩܘܪ̈ܝܢܬܝܐ. 6: 20[37]

ܡܙܡܘܪ̈ܐ. 18: 10 [38]

ܦܝܠܝܦ̈ܣܝܐ. 2: 7 [39]

ܐ. ܩܘܪ̈ܝܢܬܝܐ. 2: 9[40]

 ܐ. ܛܝܡܬܐܘܣ. 3: 16[41]

ܪ̈ܗܘܡܝܐ. 2: 24  ܐܫܥܝܐ. 52: 5 [42]