ܡܺܐܡܪܳܐ ܕܰܬܫܬܰܥܣܰܪ

ܥܰܠ ܟܰܘܪܳܢܳܐ ܗܰܘ ܕܰܗܘ̣ܳܐ ܐܰܘܟܺܝܬ ܚܰܣܺܝܪܽܘܬܳܐ ܕܡܶܛܪ̈ܶܐ܆ ܘܕܰܐܝܟܰܢܳܐ ܙܳܕܶܩ ܕܢܶܗܘܶܐ ܣܺܝܡܺܝܢܰܢ ܒܰܐܝܠܶܝܢ ܕܰܐܝܟ ܗܳܟܰܢ.

ܡܰܠܦܳܢܽܘܬܳܐ ܡܶܕܶܡ ܚܰܬܺܝܬܬܳܐ ܕܕܺܝܢܰܘ̈ܗ̱ܝ ܕܰܐ‎ܠܳܗܳܐ܆ ܘܰܕܚܶܟܡܬܶܗ ܘܕܰܒܛܺܝܠܽܘܬܶܗ ܗܳܝ ܕܥܳܒܪܳܐ ܒܟܽܠ܆ ܐܺܝܬܰܝܗܽܘܢ ܚܰܝ̈ܶܐ ܗܳܠܶܝܢ ܐ̱ܢܳܫܳܝ̈ܶܐ܆ ܠܰܘ ܒܰܠܚܽܘܕ ܡܶܢ ܗܳܠܶܝܢ ܕܓܰܘܳܢܳܐܺܝܬ ܠܘܳܬܰܢ ܡܶܬܦܰܪ̈ܢܣܳܢ܆ ܐܶܠܳܐ ܐܳܦ ܡܶܢ ܗܳܠܶܝܢ ܕܕܺܝܠܳܢܳܐܺܝܬ ܓܳܕ̈ܫܳܢ ܠܟܽܠܚܰܕ܆ ܘܡܰܪܕܽܘܬܳܐ ܕܣܳܦܩܳܐ. ܐܺܝܬܶܝܗ̇ ܗ̱ܘܳܬ ܠܰܢ܆ ܕܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ܆ ܘܡܰܕܪܟܳܢܽܘܬܳܐ ܡܡܰܫܰܚܬܳܐ ܕܬܰܪܥܺܝܬܳܐ ܐܰ‎ܠܳܗܳܝܬܳܐ ܘܪܳܚܡܰܬ ܐ̱ܢܳܫܳܐ܆ ܗܳܝ ܕܰܢܚܽܘܪ ܒܗܳܠܶܝܢ ܕܰܒܟܽܠܝܽܘܡ ܓܳܕ̈ܫܳܢ܆ ܘܰܢܫܰܒܰܚ ܘܢܶܕܰܥ ܡܶܢ ܡܢܳܬܳܐ ܠܡܰܠܳܚܳܐ ܚܰܟܺܝܡܳܐ ܘܰܡܕܰܒܪܳܢܳܐ. ܡܶܬܺܝܕܰܥ ܓܶܝܪ ܡܳܪܝܳܐ ܟܰܕ ܕܺܝ̈ܢܶܐ ܥܳܒܶܕ^[1]܆ ܐܰܝܟܰܢܳܐ ܕܗܰܘ ܕܰܡܙܰܡܰܪ ܐܳܡܰܪ.

ܐܶ‎ܠܽܘ ܓܶܝܪ. ܒܗܳܢܳܐ ܙܢܳܐ ܣܺܝܡܺܝܢ ܗ̱ܘܰܝܢ܆ ܘܰܒܪܶܚܡܰܬ݂ ܥܰܡܠܳܐ ܡܶܬܒܰܩܶܝܢ ܗ̱ܘܰܝܢ ܒܗܳܠܶܝܢ ܕܰܠܘܳܬܰܢ ܕܺܝܠܰܢ܆ ܘܠܽܘܩܒܰܠ ܚܛܳܗ̈ܶܐ ܕܺܝܠܰܢ. ܡܡܰܫܚܺܝܢ ܗ̱ܘܰܝܢ ܠܫܰܦܺܝܪ̈ܘܳܬ݂ ܣܳܥܽܘܪ̈ܘܳܬܳܐ ܗܳܠܶܝܢ ܕܡܶܢ ܠܥܶܠ܆ ܘܰܠܣܳܥܽܘܪ̈ܘܳܬܳܐ ܗܳܠܶܝܢ ܕܡܰܪܕܽܘܬܳܐ܆ ܠܳܐ ܓܶܝܪ ܐܳܡܰܪ ܐ̱ܢܳܐ. ܡܰܚ̈ܘܳܬܳܐ܆ ܥܰܠ ܗܳܠܶܝܢ ܡܰܢ ܕܝܰܡܺܝܢܳܐܺܝܬ. ܐܰܝܟ ܪܶܓܬܰܢ ܗܳܘ̈ܝܳܢ ܗ̱ܘܰܝ̈܆ ܠܡܰܘܕܳܝܽܘ ܕܠܳܐ ܡܫܽܘܚܬܳܐ ܥܬܺܝܕܺܝܢ ܗ̱ܘܰܝܢ܆ ܠܗܰܘ ܕܳܐܦ ܟܰܕ ܚܳܛܶܝܢ ܚ̱ܢܰܢ ܡܥܰܕܰܪ ܠܰܢ ܘܠܳܐ ܡܫܰܢܶܩ. ܟܰܕ ܕܶܝܢ ܡܥܺܝ̈ܩܳܢܝܳܬܳܐ ܡܶܕܶܡ ܡܶܕܶܡ ܦܳܓ̈ܥܳܢ ܗ̱ܘܰܝ̈ ܒܰܢ. ܘܥܰܣ̈ܩܳܬܳܐ܆ ܒܫܰܦܺܝܪܽܘܬ݂ ܬܰܪܥܺܝܬܳܐ ܥܬܺܝܕܺܝܢ ܗ̱ܘܰܝܢ ܠܰܡܣܰܝܒܳܪܽܘ܆ ܘܰܕܦܺܝܠܳܣܽܘܦܳܐܺܝܬ ܢܺܐܡܰܪ ܡ̈ܶܠܶܐ ܗܳܠܶܝܢ ܐܰ‎ܠܳܗܳܝ̈ܳܬܳܐ܆ ܘܰܠܘܳܬ݂ ܢܰܦܫܳܐ ܕܰܡܥܳܩܳܐ ܢܺܐܡܰܪ: ܡܶܢ ܡܰܪܕܽܘܬܶܗ ܕܰܐܚܺܝܕ ܟܽܠ ܠܳܐ ܬܰܗܦܟܺܝܢ ܐܰܦܰܝ̈ܟܝ܆ ܗܰܘ ܓܶܝܪ ܕܢܰܟܐܶܒ ܠܰܢ ܥܳܒܶܕ ܘܬܽܘܒ ܗܳܦܶܟ ܡܰܬܩܶܢ܆ ܢܶܡܚܶܐ ܘܺܐܝܕܰܘ̈ܗ̱ܝ ܢܰܐܣ̈ܝܳܢ^[2]܆ ܘܰܙܥܽܘܪ̈ܝܳܬܳܐ ܡܶܢ ܗܳܠܶܝܢ ܕܰܚܛܰܝܬܝ ܐܶܬܢܰܓܰܕܬܝ.

ܐܶܡܰܬܝ ܓܶܝܪ ܕܳܐܦ ܥܰܠ ܗܳܠܶܝܢ ܕܟܰܕ ܡܶܬܬܥܺܝܪܺܝܢ ܚ̱ܢܰܢ. ܡܰܕܪܟܺܝܢ ܚ̱ܢܰܢ ܘܡܶܣܬܰܟܠܺܝܢ ܚ̱ܢܰܢ ܠܗܶܝܢ܆ ܡܶܫܟܚܺܝܢ ܚ̱ܢܰܢ ܒܗܶܝܢ ܠܚܶܟܡܬܶܗ ܕܰܐ‎ܠܳܗܳܐ ܘܰܠܟܺܐܢܽܘܬܶܗ ܘܪܶܚܡܰܬ݂ ܐ̱ܢܳܫܽܘܬܶܗ܆ ܢܶܬܡܨܶܐ. ܕܳܐܦ ܥܰܠ ܗܳܠܶܝܢ ܕܠܳܐ ܡܶܣܬܰܟܠܺܝܢܰܢ ܠܗܶܝܢ܆ ܡܶܛܽܠ ܟܺܝܬ ܕܕܺܝ̈ܢܶܐ ܕܺܝܠܶܗ ܐܰܝܟ ܕܰܟܬܺܝܒ܆ ܬܗܽܘܡܳܐ ܪܰܒܳܐ܆ ܠܚܶܟܡܬܶܗ ܠܳܐ ܡܶܬܕܰܪܟܳܢܺܝܬܳܐ ܢܰܫܶܦ܆ ܘܢܶܬܬܦܺܝܤ ܕܳܐܦ ܗܳܠܶܝܢ܆ ܪܶܚܡܰܬ݂ ܐ̱ܢܳܫܳܐܺܝܬ ܘܡܰܘܬܪܳܢܳܐܺܝܬ ܐܶܬܦܰܪ̈ܢܰܣܶܝܢ. ܘܗܳܟܰܢܳܐ. ܬܶܗܘܶܐ ܗ̱ܘܳܬ ܠܰܢ܆ ܕܥܰܠ ܟܽܠܡܶܕܶܡ ܢܰܘܕܶܐ^[3]܆ ܐܰܝܟ ܡܰܪܬܝܳܢܽܘܬܶܗ ܕܰܫܠܺܝܚܳܐ.

ܗܳܠܶܝܢ ܕܶܝܢ܆ ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ ܐܶܬܶܐܡܰܪ̈ܶܝܢ܆ ܐܶܠܳܐ ܡܶܛܽܠ ܚܰܣܺܝܪܽܘܬܳܐ ܕܡܶܛܪܳܐ ܗܳܝ ܕܰܩܕܳܡ ܩܰܠܺܝܠ ܬܰܠܝܳܐ ܗ̱ܘܳܬ ܠܥܶܠ ܡܶܢܰܢ܆ ܘܳܐܐܰܪ ܢܰܒܺܝܫܳܐ ܗܰܘ ܕܰܠܥܶܠ ܡܶܢ ܪܺܝܫܰܢ܆ ܘܰܐܪܥܳܐ ܕܰܚܢܺܝܩܳܐ ܗ̱ܘܳܬ ܒܟܰܘܪܳܢܳܐ܆ ܘܡܶܛܽܠ ܡܶܛܪܳܐ ܫܦܺܝܥܳܐ ܗܰܘ ܕܡܶܢ ܒܳܬܰܪ ܗܳܠܶܝܢ܆ ܗܰܘ ܕܠܳܐ ܐܺܝܬ ܗ̱ܘܳܐ ܒܶܗ ܥܽܘܗܕܳܢܳܐ ܕܰܚܛܳܗ̈ܶܐ ܕܺܝܠܰܢ܆ ܗܰܘ ܕܡܶܛܽܠ ܗܳܕܶܐ ܐܶܬܟܠܺܝ ܗ̱ܘܳܐ܆ ܐܰܝܟܰܢܳܐ ܕܰܒܡܰܪܓܫܳܢܽܘܬܳܐ ܢܶܫܰܐܠ ܡܶܢ ܗܰܘ ܕܝܳܗܶܒ܆ ܘܶܐܬܺܝܗܶܒ ܩܕܳܡ ܕܰܚܢܰܢ ܛܳܒܳܐܺܝܬ ܢܶܫܰܐܠ܆ ܐܰܝܟܰܢܳܐ ܕܰܒܒܰܣܺܝܡܽܘܬܶܗ ܕܗܰܘ ܕܝܰܗ̱ܒ ܬܶܗܘܶܐ ܗ̱ܘܳܬ ܗܺܝ ܡܰܘܗܰܒܬܳܐ܆ ܘܠܳܐ ܗ̱ܘܳܐ ܐܰܓܪܳܐ ܕܫܶܐܠܬܳܐ.

ܗܽܘ ܓܶܝܪ ‌ܐܺܝܬܰܘܗ̱ܝ ܗܰܘ ܕܰܒܝܰܕ ܐܶܫܰܥܝܳܐ ܢܒܺܝܳܐ ܡܰܙܥܶܩ: ܘܢܶܗܘܶܐ ܕܰܩܕܳܡ ܕܢܶܩܪܽܘܢܳܢܝ ܐܶ݀ܥܢܶܐ ܐܶܢܽܘܢ^[4]. ܟܰܕ ܥܕܰܟܺܝܠ ܡܡܰܠܠܺܝܢ: ܐܳܡܰܪ ܡܰܢܽܘ. ܘܶܐܢܕܶܝܢ ܠܳܐ. ܐܶ‎ܠܽܘ ܠܳܐ ܕܩܰܕܶܡ ܠܪܽܘܓܙܳܐ ܗܰܘ ܕܰܬܠܶܐ ܗ̱ܘܳܐ ܠܥܶܠ ܡܶܢܰܢ܆ ܝܰܡܳܐ ܠܳܐ ܡܶܬܡܰܠܠܳܢܳܐ ܕܗܳܕܶܐ ܟܽܠܳܗ̇ ܪܶܚܡܰܬ݂ ܐ̱ܢܳܫܽܘܬܳܐ܆ ܠܰܐܝ̇ܕܳܐ ܦܰܩܪܽܘܬܳܐ ܠܳܐ ܢܳܦܩܺܝܢ ܗ̱ܘܰܘ ܕܶܒܽܘܪ̈ܶܐ ܒܰܥܪܺܝܪ̈ܳܝܶܐ ܕܗܶܪܶܣܺܝܤ ܢܶܣܛܽܘܪܝܳܢܳܝܬܳܐ܆ ܗܳܢܽܘܢ ܕܰܡܙܰܡܙܡܺܝܢ ܒܢ̈ܳܬ݂ ܩ̈ܳܠܶܐ ܠܳܐ ܗܰܢܺܝ̈ܳܐܬܳܐ ܘܰܡܣܰܝ̈ܒܳܬܳܐ܆ ܘܡܶܬܟܰܪܟܺܝܢ ܒܶܝܬ ܒ̈ܳܬܶܐ ܘܰܡܚܰܠܕܺܝܢ ܒܬܰܘ̈ܳܢܶܐ ܓܰܘܳܝ̈ܶܐ܆ ܘܒܰܚܕܳܐ ܒܕܽܘܟ ܐܰܢܬܬܽܘܢܺܝܬܳܐ ܐܰܘ ܬܰܪܬܶܝܢ ܕܫܳܢ̈ܺܝܝܳܢ ܒܗܰܘܢܗܶܝܢ ܓܰܪܒܗܽܘܢ ܫܳܝܦܺܝܢ܆ ܟܰܕ ܟܽܠܳܗ̇ ܡܕܺܝܢ̱ܬܳܐ ܚܠܺܝܡܳܐ܆ ܘܰܡܣܰܟܪܳܐ ܐܶܕܢܶܝ̈ܗ̇ ܡܶܢ ܡܶܠܰܝ̈ܗܽܘܢ ܒܝܰܕ ܛܰܝܒܽܘܬܳܐ ܕܰܐ‎ܠܳܗܳܐ.

ܐܳܦ ܓܶܝܪ ܐܳܡܪܺܝܢ ܗ̱ܘܰܘ ܟܺܝܬ܆ ܕܡܶܛܽܠܗܳܕܶܐ. ܒܨܶܗܝܳܐ. ܐܶܬܚܰܝܒܰܬ݂ ܐܰܪܥܳܐ܆ ܡܶܛܽܠ ܕܶܐܬܚܪܶܡܘ ܕܽܘܓ̈ܡܰܛܰܐ ܡܣܰܝ̈ܒܶܐ ܕܛܳܥܝܽܘܬܳܐ ܗܳܝ ܬܪܰܝܳܢܰܬ ܟܝܳܢ̈ܶܐ܆ ܘܰܐܒܳܗ̈ܶܐ ܕܗܳܠܶܝܢ ܘܡܰܟܬܒܳܢ̈ܶܐ ܪ̈ܰܫܺܝܥܶܐ܆ ܗܳܢܽܘܢ ܕܦܰܠܓܽܘܗ̱ܝ ܠܥܰܡܰܢܽܘܐܶܝܠ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ ܘܠܳܐ ܡܶܬܪܰܢܝܳܢܺܝܬܳܐ܆ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ. ܥܝܳܕܰܐ ܗ̱ܘ ܓܶܝܪ ܠܗܽܘܢ܆ ܕܕܰܐܝܟ ܗܳܠܶܝܢ ܢܶܓܒܠܽܘܢ ܘܡܰܬܠܳܢܳܐܺܝܬ ܢܶܒܕ̣ܽܘܢ. ܡܶܛܽܠ ܕܳܐܦ ܡܶܢ ܩܕܺܝܡ ܟܰܕ ܢܶܣܛܽܘܪܺܝܽܘܤ ܐܶܫܬܕܺܝ܆ ܒܰܦܣܳܩܳܐ ܕܕܺܝܢܳܐ ܕܡܶܢ ܫܡܰܝܳܐ ܘܰܕܡܶܢ ܠܥܶܠ܆ ܕܽܘܪܬܰܐܘܤ ܐ̱ܢܳܫ ܐܶܦܝܣܩܽܘܦܳܐ܆ ܟܰܕ ܗܺܝ ܟܰܕ ܗܺܝ ܦܰܩܪܽܘܬܳܐ. ܐܰܟܘܳܬܶܗ ܦܩܺܝܪ ܗ̱ܘܳܐ. ܟܳܬܶܒ ܗ̱ܘܳܐ܆ ܗܘ̣ܰܘ ܝܰܩܕܳܢ̈ܶܐ ܒܰܡܕܺܝܢܰܬ݂ ܡܰܠܟܽܘܬܳܐ܆ ܘܓܰܝܣ̈ܶܐ ܘܡܰܩܪ̈ܒܳܢܶܐ܆ ܘܰܚܒܳܠܳܐ ܕܦܽܘܠܺܝܛܺܝܰܐ ܕܪ̈ܽܘܡܳܝܶܐ.

ܠܗܳܠܶܝܢ ܓܶܝܪ܆ ܒܰܙܒܰܢ ܡܰܢ ܟܰܕ ܓܳܒܠܺܝܢ ܘܒܳܕ̣ܶܝܢ܆ ܡܶܢ ܠܶܒܳܐ ܫܥܺܝܢܳܝܳܐ ܡܰܒܥܺܝܢ^[5] ܠܗܶܝܢ. ܒܰܙܒܰܢ ܕܶܝܢ܆ ܟܰܕ ܠܘܳܬ݂ ܒܶܣܪܳܐ ܦܥܺܝܪ ܚܶܟܗܽܘܢ܆ ܘܗܳܠܶܝܢ ܕܰܠܘܳܬ݂ ܪ̈ܶܓܠܶܐ ܣܺܝ̈ܡܳܢ ܒܰܠܚܽܘܕ ܚܳܙܶܝܢ܆ ܘܰܠܘܳܬ ܣܶܒܪ̈ܶܐ ܕܺܥܬܺܝܕܺܝܢ. ܠܡܶܬܠܳܐ ܥܰܝܢܳܐ ܕܬܰܪܥܺܝܬܗܽܘܢ ܠܳܐ ܡܨܶܝܢ܆ ܘܰܠܘܳܬ݂ ܟܬܳܒ̈ܶܐ ܟܳܗ̈ܢܳܝܶܐ ܠܳܐ ܝܰܠܺܝܦܳܐܺܝܬ ܐܺܝܬ ܠܗܽܘܢ.

ܚܢܰܢ ܕܶܝܢ ܐܳܦܶܢ ܠܟܰܘܪܳܢܳܐ ܗܰܘ ܕܡܶܢ ܩܕܺܝܡ ܡܬܰܚ ܥܠܰܝܢ ܐܰ‎ܠܳܗܳܐ܆ ܘܰܠܪܶܕܝܳܐ ܕܡܶܢ ܥܢܳܢ̈ܶܐ ܟܠܳܐ ܗ̱ܘܳܐ ܘܬܰܗܺܝ܆ ܒܽܘܩܝܳܐ ܕܗܰܝܡܳܢܽܘܬܳܐ ܬܪܺܝܨܰܬ݂ ܫܽܘܒܚܳܐ ܗܳܝ ܕܗܳܫܳܐ ܢܰܨܺܝܚܳܐܺܝܬ ܥܰܠ ܟܽܠܗܽܘܢ ܗܳܢܽܘܢ ܕܰܒܡܰܕܢܚܳܐ ܐܰܒܪܩܰܬ݂^[6]. ܚܫܰܒܢܰܢ ܕܺܐܝܬܶܝܗ̇ ܗܺܝ ܡܰܪܕܽܘܬܳܐ܆ ܟܰܕ ܐܰܩܺܝܡܢܰܢ ܗܰܘܢܰܢ ܥܰܠ ܝܽܘܠ̈ܦܳܢܶܐ ܕܰܟܬܳܒܳܐ ܐܰ‎ܠܳܗܳܝܳܐ. ܕܰܥܝܳܕܳܐ ܗ̱ܝ ܓܶܝܪ ܠܰܐܠܳܗܳܐ܆ ܕܰܠܗܳܢܽܘܢ ܕܰܒܫܰܦܺܝܪܽܘܬ݂ ܣܳܥܽܘܪܽܘܬܳܐ ܡܶܕܶܡ ܐܶܬܒܰܣܰܡܘ܆ ܒܝܰܕ ܡܰܟܐܒܳܢܝ̈ܳܬܳܐ ܢܶܒܩܶܐ܆ ܐܰܝܟܰܢܳܐ ܕܢܶܕܰܥ܆ ܕܕܰܠܡܳܐ ܒܰܕܡܽܘܬ݂ ܥܰܒ̈ܕܶܐ ܗܳܢܽܘܢ ܡܶܬܢܰܓ̈ܕܳܢܶܐ ܘܛܳܠܽܘ̈ܡܶܐ܆ ܟܰܕ ܡܰܢ ܡܶܬܥܰܕܪܺܝܢܰܢ ܡܶܫܬܰܘܕܥܺܝܢܰܢ ܠܶܗ ܠܡܳܪܳܐ܆ ܟܰܕ ܕܶܝܢ ܡܶܬܪܕܶܝܢܰܢ ܟܳܦܪܺܝܢܰܢ ܒܶܗ.

ܗܳܟܰܢܳܐ ܟܬܺܝܒ ܕܰܪܕܳܐ ܠܰܒ̈ܢܰܝ ܐܺܝܣܪܳܐܶܝܠ. ܟܰܕ ܓܶܝܪ ܐܰܦܶܩ ܐܶܢܽܘܢ ܡܶܢ ܡܶܨܪܶܝܢ܆ ܘܚܰܪܰܪ ܐܶܢܽܘܢ ܡܶܢ ܥܰܒܕܽܘܬܳܐ ܩܫܺܝܬܳܐ^[7]܆ ܘܚܰܘܺܝ ܠܗܽܘܢ. ܕܗܽܘ ‌ܐܺܝܬܰܘܗ̱ܝ ܐܰ‎ܠܳܗܳܐ ܕܰܐܒܳܗܰܝ̈ܗܽܘܢ܆ ܐܰ‎ܠܳܗܳܐ ܕܰܐܒܪܳܗܳܡ ܘܰܐ‎ܠܳܗܳܐ ܕܺܐܝܣܚܳܩ ܘܰܐ‌ܠܳܗܳܐ ܕܝܰܥܩܽܘܒ܆ ܘܺܝܕܰܥܬܳܐ ܕܺܝܠܶܗ ܫܰܟܶܢ ܠܗܽܘܢ܆ ܘܚܰܘܺܝ ܠܗܽܘܢ ܚܰܝܠܶܗ ܠܳܐ ܡܶܙܕܰܟܝܳܢܳܐ. ܒܟܽܠܗܶܝܢ ܗܳܠܶܝܢ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܣܰܓܺܝ̈ܳܐܬܳܐ. ܡܶܚܕܳܐ ܒܝܰܕ ܢܶܣܝܳܢܳܐ ܡܰܝܬܶܐ ܗ̱ܘܳܐ ܠܗܽܘܢ܆ ܘܒܽܘܩܝܳܐ ܪܳܕܽܘܝܳܐ ܡܩܰܪܶܒ ܗ̱ܘܳܐ ܠܗܽܘܢ.

ܫܳܒܶܩ ܗ̱ܘܳܐ ܓܶܝܪ ܠܦܶܪܥܽܘܢ. ܕܥܰܡ ܣܽܘܓܳܐܐ ܡܰܪ̈ܟܒܳܬܳܐ ܘܦܰܪ̈ܳܫܶܐ ܢܶܪܕܽܘܦ ܐܶܢܽܘܢ܆ ܟܰܕ ܝܰܡܳܐ ܣܽܘܡܳܩܳܐ ܡܩܺܝܡ^[8] ܗ̱ܘܳܐ ܠܶܗ ܠܰܥܪܽܘܩܝܗܽܘܢ ܕܠܳܐ ܦܽܘܪܣܳܐ ܘܰܕܠܳܐ ܡܰܦܩܳܢܳܐ. ܟܰܕ ܕܶܝܢ ܒܰܡܨܰܥܬܳܐ ܐܶܬܬܚܶܕܘ ܗܘܰܘ܆ ܘܰܒܢܰܦ̈ܫܳܬܗܽܘܢ. ܠܰܘ ܒܨܺܝܪ ܐܰܘ ܒܦܰܓܪ̈ܰܝܗܽܘܢ ܡܶܬܛܰܪܦܺܝܢ ܗ̱ܘܰܘ ܘܡܶܬܰܐܠܨܺܝܢ܆ ܠܘܳܬ ܠܽܘܚܳܫܳܐ^[9] ܠܳܐ ܚܺܐܪܳܝܳܐ ܘܕܰܠܥܰܒ̈ܕܶܐ ܦܐܶܐ. ܐܶܫܬܰܪܓܰܠܘ ܗ̱ܘܰܘ܆ ܘܰܠܥܰܒܕܽܘܬܳܐ ܡܶܨܪܳܝܬܳܐ ܡܶܬܥܰܗܕܺܝܢ ܗ̱ܘܰܘ܆ ܘܰܒܚܽܘܫܳܒܰܝ̈ܗܽܘܢ ܠܘܳܬ ܢܺܝܠܽܘܤ ܐܺܝܬܰܝܗܽܘܢ ܗ̱ܘܰܘ܆ ܗܳܢܽܘܢ ܕܡܶܢ ܒܳܬܰܪ ܩܰܠܺܝܠ ܥܬܺܝܕܺܝܢ ܗ̱ܘܰܘ ܕܢܶܛܡܫܽܘܢ ܥܶܩܒܗܽܘܢ ܒܝܰܡܳܐ ܣܽܘܡܳܩܳܐ.

ܡܽܘܫܶܐ ܕܶܝܢ. ܗܰܘ ܪܰܒܳܐ ܠܳܐ ܡܶܫܬܰܚܠܦܳܢܳܐ ‌ܐܺܝܬܰܘܗ̱ܝ ܗ̱ܘܳܐ. ܘܟܰܕ ܕܚܺܝܠܳܐܺܝܬ ܚܳܪ ܐܰܝܟ ܕܰܒܫܰܒܪ̈ܶܐ. ܒܗܳܢܽܘܢ ܕܰܡܠܰܚܫܺܝܢ ܗ̱ܘܰܘ^[10]܆ ܘܪܺܝܫܳܢܳܐܺܝܬ ܟܐܳܐ ܒܗܽܘܢ܆ ܟܽܠܶܗ ܗܳܢܳܐ ܐܶܡܰܪ ܠܗܽܘܢ: ܟܡܳܐ ܟܺܝܬ ܕܡܰܦܶܤ ܗ̱ܘܳܐ ܙܰܒܢܳܐ ܠܡܺܐܡܰܪ܆ ܐܶܬܠܰܒܰܒܘ. ܩܽܘܡܘ ܘܰܚܙܰܘ ܦܽܘܪܩܳܢܳܐ ܕܡܶܢ ܡܳܪܝܳܐ܆ ܗܰܘ ܕܢܶܥܒܶܕ ܠܟܽܘܢ ܝܰܘܡܳܢܳܐ. ܒܗܰܘ ܓܶܝܪ ܙܢܳܐ ܕܰܚܙܰܝܬܽܘܢ ܠܡܶܨܪ̈ܳܝܶܐ ܝܰܘܡܳܢܳܐ܆ ܠܳܐ ܬܰܘܣܦܽܘܢ ܬܽܘܒ ܠܡܶܚܙܳܐ ܐܶܢܽܘܢ܆ ܒܙܰܒܢܳܐ ܕܡܶܢ ܗܳܫܳܐ ܘܰܠܥܳܠܰܡ. ܡܳܪܝܳܐ ܢܰܩܪܶܒ ܚܠܳܦܰܝܟܽܘܢ܆ ܘܰܐܢ̱ܬܽܘܢ ܬܶܗܘܽܘܢ ܫܠܶܝܢ. ܘܰܠܘܳܬ ܥܰܡܳܐ ܡܰܢ܆ ܗܳܠܶܝܢ ܐܶܡܰܪ ܗܰܘ. ܠܘܳܬ ܐܰ‎ܠܳܗܳܐ ܕܶܝܢ ܘܠܳܐ ܡܶܕܶܡ܆ ܐܶܠܳܐ ܐܳܦ ܟܰܕ ܫܰܬܺܝܩ. ܫܳܡܰܥ ܗ̱ܘܳܐ ܡܶܢܶܗ܆ ܡܳܢܳܐ ܓܳܥܶܐ ܐܰܢ̱ܬ ܠܘܳܬܝ.

ܕܓܰܒܪ̈ܶܐ ܓܶܝܪ ܠܒܺܝ̈ܫܰܝ ܠܰܐܠܳܗܳܐ ܘܩܰܕܺܝ̈ܫܶܐ܆ ܐܳܦܶܢ ܣܶܦ̈ܘܳܬܗܽܘܢ ܨܡܺܝ̈ܕܳܢ ܘܠܶܫܳܢܗܽܘܢ ܩܒܺܝܥ܆ ܬܰܪܥܺܝܬܗܽܘܢ ܓܳܥܝܳܐ ܠܘܳܬ݂ ܐܰ‎ܠܳܗܳܐ܆ ܘܗܳܕܶܐ ܐܺܝܬܶܝܗ̇ ܗܳܝ ܦܰܘܠܽܘܤ. ܟܰܕ ܫܳܠܰܚ ܠܪ̈ܽܘܡܳܝܶܐ ܐܳܡܰܪ ܗ̱ܘܳܐ܆ ܐܶܠܳܐ ܗܽܘ ܪܽܘܚܳܐ ܡܶܬܟܰܫܰܦ ܚܠܳܦܰܝܢ ܒܬܶܢ̈ܚܳܬܳܐ ܕܠܳܐ ܡܶܬܡܰܠ̈ܠܳܢ^[11]܆ ܗܰܘ ܕܶܝܢ ܕܒܳܨܶܐ ܠܶܒܰܘ̈ܳܬܳܐ ܝܳܕܰܥ ܡܳܢܳܐ ‌ܐܺܝܬܰܘܗ̱ܝ ܚܽܘܫܳܒܳܐ ܕܪܽܘܚܳܐ܆ ܕܒܰܐܠܳܗܳܐ ܡܶܬܟܰܫܰܦ ܚܠܳܦ ܩܰܕܺܝ̈ܫܶܐ. ܢܰܦܫܳܐ ܓܶܝܪ ܕܢܰܩܺܝܦܳܐ ܠܰܐܠܳܗܳܐ܆ ܠܘܳܬܶܗ ܡܡܰܠܠܳܐ ܐܰܡܺܝܢܳܐܺܝܬ. ܘܣܽܘܝܳܥܳܐ ܗܰܘ ܕܡܶܢܶܗ ܐܺܝܬ ܠܳܗ̇܆ ܐܰܝܟܰܢܳܐ ܕܳܐܡܰܪ ܐܳܦ ܢܒܺܝܳܐ ܕܰܘܺܝܕ ܢܶܩܦܰܬ݂ ܢܰܦܫܝ ܒܳܬܪܳܟ܆ ܠܺܝ ܕܶܝܢ ܣܰܝܥܰܬ݂ ܝܰܡܺܝܢܳܟ^[12].

ܒܗܳܢܳܐ ܙܢܳܐ܆ ܟܰܕ ܒܗܳܠܶܝܢ ܕܫܰܬܺܝܩ ܗ̱ܘܳܐ. ܓܳܥܶܐ ܗ̱ܘܳܐ ܡܽܘܫܶܐ܆ ܫܳܡܰܥ ܗ̱ܘܳܐ. ܘܡܶܬܦܰܩܰܕ ܗ̱ܘܳܐ ܡܶܚܕܳܐ. ܠܡܶܦܫܰܛ ܠܚܽܘܛܪܶܗ. ܠܡܶܡܚܳܐ ܠܝܰܡܳܐ. ܠܡܶܦܠܰܓ ܠܡܰܝ̈ܳܐ. ܠܡܰܥܒܳܪܽܘ ܠܺܐܝܣܪܳܐܶܝܠ. ܠܡܰܛܳܦܽܘ ܠܦܶܪܥܽܘܢ. ܘܟܰܕ ܐܶܬܦܠܶܓ ܩܶܒܝܶܗ ܕܝܰܡܳܐ܆ ܫܽܘܪܳܐ ‌ܐܺܝܬܰܘܗ̱ܝ ܗ̱ܘܳܐ ܡܶܢ ܝܰܡܺܝܢܳܐ܆ ܘܫܽܘܪܳܐ ܡܶܢ ܣܶܡܳܠܳܐ. ܒܗܶܝܢ ܓܶܝܪ ܒܡ̈ܶܠܶܐ ܕܰܟܬܳܒܳܐ ܐܰ‎ܠܳܗܳܝܳܐ. ܐܶܬܚܰܫܰܚ܆ ܡܶܛܽܠ ܕܗܽܘ ܒܰܠܚܽܘܕܰܘܗ̱ܝ ܗܰܘ ܕܗܳܠܶܝܢ ܣܥܰܪ܆ ‌ܐܺܝܬܰܘܗ̱ܝ ܕܫܳܘܶܐ ܠܡܶܬܩܰܒܳܠܽܘ܆ ܕܢܶܫܬܰܥܶܐ ܠܬܶܕܡܪ̈ܳܬܳܐ ܒܰܝܬܳܝ̈ܳܬܳܐ ܕܺܝܠܶܗ. ܘܳܐܦ ܒܗܳܕܶܐ. ܐܳܦ ܟܰܕ ܠܳܐ ܡܶܬܩܰܪܒܳܢܳܐ ‌ܐܺܝܬܰܘܗ̱ܝ܆ ܐܳܦܶܢ ܡܶܛܽܠܳܬܰܢ ܡܰܟܺܝܟܳܐܺܝܬ ܡܡܰܠܶܠ܆ ܐܰܝܟܰܢܳܐ ܕܰܦܫܺܝ̈ܩܰܝ ܠܡܶܬܕܰܪܟܳܢܽܘܬܳܐ ܐܰܝܟܰܢ ܕܗܽܘ ܢܶܗܘܽܘܢ ܠܗܰܘܢܰܢ ܕܡܶܢ ܐܰܪܥܳܐ ܐܺܝܬܰܝܗܽܘܢ܆ ܗܳܢܽܘܢ ܣܽܘ̈ܟܳܠܶܐ ܐܰ‎ܠܳܗܳܝ̈ܶܐ.

ܡܰܢܽܘ ܕܶܝܢ ‌ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܰܦܣܳܩܶܗ ܕܝܰܡܳܐ ܣܽܘܡܳܩܳܐ ܐܰܥܒܶܕ. ܡܫܺܝܚܳܐ ܗܰܘ ܕܡܶܢ ܚܽܘܛܪܳܐ ܩܰܕܶܡ ܐܶܬܛܰܦܰܤ܆ ܗܰܘ ܕܰܥܠܰܘܗ̱ܝ ܟܰܕ ܡܶܬܢܰܒܶܐ ܗ̱ܘܳܐ ܐܶܫܰܥܝܳܐ ܐܶܡܰܪ: ܘܢܶܦܽܘܩ ܚܽܘܛܪܳܐ ܡܶܢ ܥܶܩܳܪܶܗ ܕܺܐܝܫܰܝ^[13]. ܕܰܘܺܝܕ ܕܶܝܢ ܐܳܦ ܚܽܘܛܪܳܐ ܕܚܰܝܠܳܐ ܡܟܰܢܶܐ ܗ̱ܘܳܐ ܠܶܗ. ܟܰܕ ܐܳܡܰܪ܆ ܚܽܘܛܪܳܐ ܕܚܰܝܠܳܐ ܢܫܰܕܪܳܟ ܡܳܪܝܳܐ ܡܶܢ ܨܶܗܝܽܘܢ܆ ܘܬܶܫܬܰܠܰܛ ܒܡܶܨܥܰܬ݂ ܒܥܶܠ̈ܕܒܳܒܶܐ ܕܺܝܠܳܟ^[14].

ܡܰܝ̈ܳܐ ܗܳܟܺܝܠ ܕܝܰܡܳܐ ܣܽܘܡܳܩܳܐ܆ ܠܰܒ̈ܢܰܝ ܡܰܢ ܕܺܐܝܣܪܳܐܶܝܠ܆ ܫܽܘܪܳܐ ܐܺܝܬܰܝܗܽܘܢ ܗ̱ܘܰܘ ܡܶܢ ܬܪ̈ܰܝܗܽܘܢ ܓܰܒ̈ܶܐ^[15]. ܠܦܶܪܥܽܘܢ ܕܶܝܢ. ܘܰܠܡܶܨܪ̈ܳܝܶܐ܆ ܥܕܰܡܳܐ ܠܙܰܒܢܳܐ ܡܶܕܶܡ܆ ܟܡܳܐ ܕܗܳܢܽܘܢ ܕܡܶܬܪܰܕܦܺܝܢ ܗ̱ܘܰܘ܆ ܒܰܝܢܳܬ ܫܽܘܪ̈ܶܐ ܪ̈ܓܰܝܳܐ^[16] ܘܰܩܒܺܝ̈ܥܶܐ^[17] ܕܡܰܝ̈ܳܐ ܡܗܰܠܟܺܝܢ ܗ̱ܘܰܘ. ܟܰܕ ܕܶܝܢ ܥܒܰܪܘ ܗܳܢܽܘܢ܆ ܘܥܰܠ ‌ܐܰܪܥܳܐ ܝܰܒܺܝܫܬܳܐ ܩܳܡܘ܆ ܫܽܘܪܳܐ ܕܡܰܝ̈ܳܐ. ܟܰܕ ܐܶܬܬܪܰܥ ܘܰܪܕܳܐ ܘܶܐܬܶܐܫܶܕ ܐܰܝܟ ܟܝܳܢܳܐ ܒܰܝܬܳܝܳܐ ܕܺܝܠܶܗ܆ ܩܰܒܪܳܐ ܗܘ̣ܳܐ ܠܗܳܢܽܘܢ ܕܶܐܫܬܒܶܩܘ^[18] ܒܓܰܘ ܝܰܡܳܐ. ܘܰܠܗܳܢܽܘܢ ܕܪܳܕܦܺܝܢ ܗ̱ܘܰܘ ܟܰܣܺܝ܆ ܥܰܡ ܟܽܠܶܗ ܚܰܝܠܳܐ ܕܺܝܠܗܽܘܢ ܟܽܘܠܳܢܳܐܺܝܬ܆ ܥܰܡܗܽܘܢ ܕܪ̈ܰܟܫܳܐ ܕܺܝܠܗܽܘܢ ܘܡܰܪ̈ܟܒܳܬܳܐ. ܡܶܛܽܠܗܳܕܶܐ. ܡܫܰܒܚܺܝܢ ܗ̱ܘܰܘ ܗܳܢܽܘܢ ܕܶܐܬܦܪܶܩܘ܆ ܬܶܫܒܽܘܚܬܳܐ ܕܥܰܠ ܙܳܟܽܘܬܳܐ. ܟܰܕ ܐܳܡܪܺܝܢ ܗ̱ܘܰܘ: ܢܫܰܒܰܚ ܠܡܳܪܝܳܐ܆ ܡܫܰܒܚܳܐܺܝܬ ܓܶܝܪ ܡܫܰܒܰܚ. ܠܣܽܘܣܝܳܐ. ܘܳܐܦ ܠܪ̈ܰܟܫܳܐ ܫܕܳܐ ܒܝܰܡܳܐ^[19].

ܐܷܠܳܐ ܬܽܘܒ. ܠܦܽܘܪܩܳܢܳܐ ܗܳܢܳܐ ܬܡܺܝܗܳܐ܆ ܘܰܠܬܶܕܡܽܘܪܬܳܐ ܗܳܝ ܕܚܺܝܠܬܳܐ ܘܪܰܒܬܳܐ܆ ܢܶܣܝܳܢܳܐ ܘܥܰܡܠܳܐ. ܘܬܰܫܢܺܝܩܳܐ ܡܩܰܒܶܠ ܗ̱ܘܳܐ ܠܗܽܘܢ. ܟܰܕ ܓܶܝܪ ܬܠܳܬܳܐ ܝܰܘ̈ܡܺܝܢ ܗܰܠܶܟܘ ܒܡܰܕܒܪܳܐ܆ ܟܰܕ ܨܗܶܝܢ ܘܰܕܠܳܐ ܫܶܩܝܳܐ܆ ܡܶܢ ܒܳܬܰܪ ܝܰܩܕܳܢܳܐ ܕܨܶܗܝܳܐ. ܕܗܳܟܰܢܳܐ ܢܰܓܺܝܪ܆ ܒܡܰܝ̈ܐ ܗܳܢܽܘܢ ܕܛܳܒ ܡܰܪܺܝܪܺܝܢ ܕܡܽܘܪܬܳܐ ܦܓܰܥܘ܆ ܠܗܳܝ ܐܰܝܕܳܐ ܕܚܰܠܺܝ ܡܶܚܕܳܐ܆ ܗܰܘ ܕܰܠܡܽܘܫܶܐ ܦܳܩܶܕ ܗ̱ܘܳܐ ܠܡܶܥܒܰܕ ܬܶܕܡܪ̈ܳܬܳܐ. ܒܳܗ̇ ܒܰܕܡܽܘܬܳܐ. ܡܶܢ ܒܳܬܰܪ ܫܽܘܟܳܢܳܐ ܗܰܘ ܫܦܺܝܥܳܐ ܕܡܰܢܢܳܐ܆ ܘܠܰܚܡܳܐ ܗܰܘ ܫܡܰܝܳܢܳܐ܆ ܘܢܶܒܥܳܐ ܗܰܘ ܐܰܟܣܢܳܝܳܐ ܕܡܰܝ̈ܳܐ ܕܡܶܢ ܟܺܐܦܳܐ ܕܠܳܐ ܫܶܪܝܢܳܐ^[20] ܕܰܒܚܽܘܛܪܳܐ ܒܶܠܥܰܬ݂܆ ܕܰܥܨܳܒܳܐ ܘܳܐܣܝܽܘܬܳܐ ‌ܐܺܝܬܰܘܗ̱ܝ ܗ̱ܘܳܐ ܕܨܶܗܝܳܐ ܐ̱ܚܪܺܢܳܐ. ܩܪܳܒܳܐ ܗܰܘ ܕܰܠܘܳܬ ܥܡܳܠܺܝܩ ܒܳܩܶܐ ܗ̱ܘܳܐ ܠܗܽܘܢ. ܥܰܡܳܐ ܗܰܘ ܒܰܥܪܺܝܪܳܝܳܐ ܘܒܰܪܒܪܳܝܳܐ܆ ܠܗܰܘ ܕܳܐܦ ܒܥܽܘܫܢܳܐ ܘܽܐܘܚܕܳܢܳܐ ܟܒܰܫܘ ܘܣܰܚܦܽܘܗ̱ܝ.

ܟܰܕ ܕܶܝܢ ܠܘܳܬ ܛܽܘܪܳܐ ܕܣܺܝܢܰܝ ܐܶܬܰܘ܆ ܠܰܣܝܳܡ ܢܳܡܽܘܣܳܐ ܡܶܫܬܘܶܝܢ ܗ̱ܘܰܘ. ܘܡܽܘܫܶܐ ܒܪܺܝܫ ܛܽܘܪܳܐ ܠܥܶܠ܆ ܠܽܘܚ̈ܶܐ ܗܳܠܶܝܢ ܪ̈ܺܫܝܡܳܬ ܡܶܢ ܐܰ‎ܠܳܗܳܐ ܢܳܣܶܒ ܗ̱ܘܳܐ. ܘܫܺܐܕܳܐ ܚܰܣܳܡܳܐ. ܗܽܘ ܐܳܟܶܠܩܰܪܨܳܐ܆ ܟܰܕ ܠܳܐ ܣܰܝܒܰܪ ܠܪܰܒܽܘܬܶܗ ܕܺܐܝܩܳܪܳܐ܆ ܠܢܶܣܝܳܢܳܐ ܕܕܶܚܠܰܬ݂ ܦܬܰܟܪ̈ܶܐ. ܠܬܰܚܬ ܡܩܰܪܶܒ ܗ̱ܘܳܐ. ܘܥܶܓܠܳܐ ܡܩܺܝܡ ܗ̱ܘܳܐ. ܐܰ‎ܠܳܗܳܐ܆ ܕܰܠܛܳܥܝܽܘܬܳܐ ܡܶܨܪܳܝܬܳܐ ܡܰܥܗܶܕ.

ܘܰܦܫܺܝܛܳܐܺܝܬ ܠܡܺܐܡܰܪ܆ ܒܝܰܕ ܟܽܠܳܗ̇ ܐܽܘܪܚܳܐ ܘܰܟܪܽܘܟܝܳܐ ܕܰܐܪܒܥܺܝܢ ܫܢܺܝ̈ܢ܆ ܒܛܰܝܒܽܘܬܳܐ ܕܠܳܐ ܚܣܳܡ^[21] ܕܰܐ‎ܠܳܗܳܐ ܡܶܬܒܰܣܡܺܝܢ ܗ̱ܘܰܘ܆ ܘܰܒܡܰܪ̈ܕܘܳܬܳܐ ܡܶܬܒܩܶܝܢ^[22]܆ ܘܗܳܟܰܢܳܐ ܠܰܐܪܥܳܐ ܕܡܽܘܠܟܳܢܳܐ ܐܶܫܬܘܺܝܘ. ܗܰܘ ܕܳܐܦ ܡܽܘܫܶܐ ܠܚܰܪܬܳܐ ܡܰܠܦܳܢܳܐܺܝܬ ܘܡܰܘܬܪܳܢܳܐܺܝܬ܆ ܟܰܕ ܡܥܰܠܶܐ ܘܡܰܣܶܩ ܠܗܽܘܢ ܠܘܳܬ݂ ܥܽܘܗܕܳܢܳܐ ܕܗܳܠܶܝܢ. ܐܳܡܰܪ ܗ̱ܘܳܐ: ܘܬܶܬܕܟܰܪ ܠܟܽܠܳܗ̇ ܐܽܘܪܚܳܐ ܗܳܝ ܕܺܐܝܬܰܝܟ ܡܳܪܝܳܐ ܐܰ‎ܠܳܗܳܐ ܕܺܝܠܳܟ ܒܡܰܕܒܪܳܐ܆ ܐܰܝܟܰܢܳܐ ܕܰܢܩܰܦܚܳܟ ܘܰܢܢܰܣܶܝܟ܆ ܘܢܶܬܝܰܕ̈ܥܳܢ ܗܳܠܶܝܢ ܕܰܒܠܶܒܳܐ ܕܺܝܠܳܟ܆ ܕܶܐܢ ܢܳܛܰܪ ܐܰܢ̱ܬ ܦܽܘܩ̈ܕܳܢܶܐ ܕܺܝܠܶܗ ܐܰܘ ܠܳܐ^[23]. ܘܬܽܘܒ. ܘܬܶܕܰܥ ܒܠܶܒܳܟ܆ ܕܰܐܟܙܢܳܐ ܕܐ̱ܢܳܫ ܒܰܪܢܳܫܳܐ ܢܶܪܕܶܐ ܠܰܒܪܶܗ܆ ܗܳܟܰܢܳܐ ܡܳܪܝܳܐ ܐܰ‎ܠܳܗܳܐ ܕܺܝܠܳܟ ܢܶܪܕܶܝܟ.

ܕܢܳܩ̈ܦܳܢ ܠܗܳܠܶܝܢ. ܐܳܦ ܦܰܘܠܽܘܤ ܟܰܕ ܠܥܶܒܪ̈ܳܝܶܐ ܫܳܠܰܚ ܗ̱ܘܳܐ ܟܳܬܶܒ ܗ̱ܘܳܐ܆ ܟܰܕ ܗܳܠܶܝܢ ܕܰܒܡ̈ܰܬܠܶܐ ܦܺܝܠܳܣܽܘܦܺܝܣܳܐ ܥܒܺܝ̈ܕܳܢ ܠܶܗ ܠܰܫܠܶܡܽܘܢ ܐܳܡܰܪ ܗ̱ܘܳܐ: ܒܶܪܝ. ܠܳܐ ܬܙܰܥ̣ܰܪ ܢܰܦܫܳܟ ܒܡܰܪܕܽܘܬܶܗ ܕܡܳܪܝܳܐ܆ ܐܳܦܠܳܐ ܬܶܬܪܰܦܶܐ ܟܰܕ ܡܶܬܟܣܶܤ ܐܰܢ̱ܬ ܡܶܢܶܗ. ܠܗܰܘ ܓܶܝܪ ܕܡܰܚܶܒ ܠܶܗ ܡܳܪܝܳܐ ܪܳܕܶܐ ܠܶܗ^[24]. ܡܢܰܓܶܕ ܕܶܝܢ ܠܟܽܠ ܒܪܳܐ܆ ܠܗܰܘ ܕܰܡܩܰܒܶܠ^[25] ܠܶܗ.

ܐܰܝܟܰܢܳܐ ܗܳܟܺܝܠ ܚܢܰܢ܆ ܟܰܕ ܗܳܠܶܝܢ ܝܳܕܥܺܝܢܰܢ܆ ܟܰܕ ܒܚܰܣܺܝܪܽܘܬܳܐ ܕܡܶܛܪ̈ܶܐ ܘܰܒܟܰܘܪܳܢܳܐ ܐܰܝܟ ܒܢܰܝ̈ܳܐ ܡܶܬܪܕܶܝܢ ܗ̱ܘܰܝܢ܆ ܥܬܺܝܕܺܝܢ ܗ̱ܘܰܝܢ܆ ܕܝܰܩܺܝܪܳܐܺܝܬ ܢܣܰܝܒܪܶܗ ܠܒܽܘܩܝܳܐ ܐܰܒܳܗܳܝܳܐ ܘܢܶܬܬܥܺܝܩ܆ ܐܰܘ ܐܰܝܟܰܢܳܐ ܐ̱ܢܳܫ ܕܺܐܝܬ ܠܶܗ ܗܰܘܢܳܐ܆ ܘܒܰܟܬܳܒܳܐ ܐܰ‎ܠܳܗܳܝܳܐ ܐܳܦܶܢ ܡܡܰܫܚܳܐܺܝܬ ܡܫܰܘܬܰܦ ܗ̱ܘܳܐ܆ ܡܣܰܒܰܪ ܗ̱ܘܳܐ ܐܰܝܟ ܒܓܰܠܰܝ̈ܗܽܘܢ^[26] ܕܪ̈ܰܫܺܝܥܶܐ܆ ܕܡܶܛܽܠ ܟܳܪܽܘܙܽܘܬܳܐ ܕܗܰܝܡܳܢܽܘܬܳܐ ܬܪܺܝܨܬܳܐ ܪܳܓܶܙ ܗ̱ܘܳܐ ܐܰ‎ܠܳܗܳܐ܆ ܘܡܶܛܽܠ ܗܳܝ ܕܰܐܝܟ ܕܥܰܠ ܩܳܝܶܡܬܳܐ ܢܶܬܚܰܪܡܽܘܢ ܒܟܳܪܽܘܙܽܘܬܳܐ ܓܠܺܝܬܳܐ܆ ܒܢܰܝ̈ܳܐ ܘܬܰܠܡܺܝ̈ܕܶܐ ܕܰܢܕܺܝܕܽܘܬܶܗ ܕܢܶܣܛܽܘܪܺܝܽܘܤ. ܣܰܓܺܝ ܓܶܝܪ ܡܶܢ ܚܕܳܕ̈ܶܐ ܦܪܺܝܫܺܝܢ܆ ܡܣܳܡ ܒܪܺܝܫܳܐ ܘܒܽܘܩܝܳܐ^[27] ܪܳܕܽܘܝܳܐ. ܘܗܳܕܶܐ ܟܰܕ ܒܰܪܓܶܫܬܳܐ ܡܰܢ. ܘܒܳܗ̇ ܒܰܚܙܳܬܳܐ ܩܰܕܡܳܝܬܳܐ ܘܛܰܢܦܳܐܺܝܬ ܡܶܬܬܕܺܝ̈ܢܳܢ܆ ܡܶܣܬܰܒܪ̈ܳܢ ܗܳܠܶܝܢ ܐܰܝܟܰܢ ܕܗܽܘ܆ ܕܚܰܕ ܡܶܕܶܡ ܐܺܝܬܰܝܗܽܘܢ ܘܠܳܐ ܡܫܰܚ̈ܠܦܳܢ. ܟܰܕ ܕܶܝܢ ܠܘܳܬ ܐܳܕܫܳܐ ܕܗܳܠܶܝܢ ܕܣܺܝ̈ܡܳܢ ܡܶܬܬܕܺܝ̈ܩܳܢ܆ ܘܺܐܝܬ ܐܶܡܰܬܝ ܕܳܐܦ ܡܶܢܗܽܘܢ ܕܫܽܘܡܠܳܝ̈ܶܐ ܡܶܫܬܰܘ̈ܕܥܳܢ܆ ܣܰܓܺܝ ܫܽܘܚܠܳܦܳܐܺܝܬ ܠܗܶܝܢ.

ܡܶܛܽܠܗܳܕܶܐ. ܠܗܳܢܽܘܢ ܕܰܠܗܳܠܶܝܢ ܕܰܐܝܟ ܗܳܟܰܢ. ܠܳܐ ܡܶܫܟܚܺܝܢ ܠܰܡܦܰܪܳܫܽܘ܆ ܐܶܠܳܐ ܠܘܳܬ ܢܶܣܝܳܢ̈ܶܐ ܡܶܚܕܳܐ ܘܡܶܬܥܰܣܩܳܢ̈ܘܳܬܳܐ ܡܶܬܩܰܦܣܺܝܢ^[28]܆ ܘܰܠܫܽܘܠܳܡܳܐ ܠܳܐ ܡܟܰܬܪܺܝܢ܆ ܡܶܙܕܰܥܙܥܺܝܢ ܟܺܝܬ ܒܗܰܝܡܳܢܽܘܬܳܐ܆ ܘܡܶܬܬܰܚܠܦܺܝܢ ܒܡܶܬܗܰܦܟܳܢ̈ܘܳܬܳܐ ܣܰܩܽܘܒ̈ܠܳ̈ܝܳܬܳܐ܆ ܠܙܰܪ̈ܥܶܐ ܗܳܢܽܘܢ ܕܥܰܠ ܫܽܘ̈ܥܶܐ ܡܶܫܬܕܶܝܢ܆ ܕܰܡܺܝ ܐܶܢܽܘܢ ܡܳܪܰܢ ܒܶܐܘܰܢܓܶܠܺܝ̈ܰܐ. ܟܰܕ ܗܳܟܰܢܳܐ ܐܳܡܰܪ ܗ̱ܘܳܐ. ܗܰܘ ܕܶܝܢ ܕܥܰܠ ܫܽܘܥܳܐ ܐܶܙܕܪܰܥ. ܗܳܢܳܐ ‌ܐܺܝܬܰܘܗ̱ܝ܆ ܗܰܘ ܕܫܳܡܰܥ ܡܶܠܬܳܐ܆ ܘܡܶܚܕܳܐ ܥܰܡ ܚܰܕܽܘܬܳܐ ܡܩܰܒܶܠ ܠܳܗ̇܆ ܠܳܐ ܕܶܝܢ ܐܺܝܬ ܠܶܗ ܥܶܩܳܪܳܐ ܒܢܰܦܫܶܗ܆ ܐܶܠܳܐ ܕܰܡܠܶܐ ܙܰܒܢܳܐ ‌ܐܺܝܬܰܘܗ̱ܝ܆ ܟܰܕ ܕܶܝܢ ܗܳܘܶܐ ܐܽܘܠܨܳܢܳܐ ܐܰܘ ܪܕܽܘܦܝܳܐ ܡܶܛܽܠ ܡܶܠܬܳܐ܆ ܡܶܚܕܳܐ ܡܶܬܟܫܶܠ^[29].

ܕܰܐܝܟ ܗܳܢܳܐ ܒܽܘܩܝܳܐ܆ ܐܳܦ ܒܰܦܪܰܟܣܺܝܤ ܕܰܫܠܺܝ̈ܚܶܐ ܡܫܶܟܚܺܝܢܰܢ. ܕܰܟܬܺܝܒ ܗܳܟܰܢܳܐ: ܢܦܰܩ ܕܶܝܢ ܐܳܡܰܪ ܠܛܰܪܣܽܘܤ ܒܰܪܢܰܒܰܐ ܠܡܶܒܥܝܶܗ ܠܫܳܐܘܳܠ. ܘܟܰܕ ܐܶܫܟܚܶܗ܆ ܐܰܝܬܝܶܗ ܠܰܐܢܛܺܝܽܘܟܺܝܰܐ. ܗܘ̣ܳܬ ܠܗܽܘܢ ܕܶܝܢ܆ ܕܫܰܢ̱ܬܳܐ ܟܽܠܳܗ̇ ܢܶܬܟܰܢܫܽܘܢ ܒܥܺܕܬܳܐ ܗܳܝ܆ ܘܰܕܟܶܢܫܳܐ ܣܰܓܺܝܳܐܐ ܢܰܠܦܽܘܢ܆ ܘܰܕܢܶܫܬܰܡܗܽܘܢ ܬܰܠܡܺܝ̈ܕܶܐ ܩܰܕܡܳܐܺܝܬ ܒܰܐܢܛܺܝܽܘܟܺܝܰܐ ܟܪ̈ܺܝܣܛܝܳܢܶܐ. ܒܗܳܠܶܝܢ ܕܶܝܢ ܝܰܘ̈ܡܳܬܳܐ܆ ܢܚܶܬܘ ܡܶܢ ܐܽܘܪܶܫܠܶܡ ܢܒܺܝ̈ܐ ܠܰܐܢܛܺܝܽܘܟܺܝܰܐ. ܟܰܕ ܩܳܡ ܕܶܝܢ ܚܰܕ ܡܶܢܗܽܘܢ. ܕܰܫܡܶܗ ܐܰܓܰܐܒܽܘܤ܆ ܫܰܘܕܰܥ ܒܝܰܕ ܪܽܘܚܳܐ܆ ܕܰܥܬܺܝܕ ܕܢܶܗܘܶܐ ܟܰܦܢܳܐ ܪܰܒܳܐ ܥܰܠ ܟܽܠܳܗ̇ ܡܶܬܥܰܡܪܳܢܺܝܬܳܐ. ܗܰܘ ܟܺܝܬ. ܕܳܐܦ ܗܘ̣ܳܐ܆ ܒܝܰܘܡܰܝ̈ ܩܠܰܐܘܕܺܝܘܤ ܩܶܣܰܪ^[30].

ܟܰܕ ܗܳܠܶܝܢ ܕܶܝܢ. ܫܳܡܰܥ ܗ̱ܘܳܐ ܐ̱ܢܳܫ. ܡܶܢ ܗܳܢܽܘܢ ܕܗܳܠܶܝܢ ܕܥܳܠܡܳܐ ܗܳܢܳܐ ܡܶܬܪܰܥܶܝܢ. ܐܶܡܰܪ: ܡܳܢܳܐ ܐܳܡܰܪ ܐܰܢ̱ܬ. ܟܰܕ ܟܳܪܽܘܙܽܘܬܳܐ ܐܶܘܰܢܓܶܠܳܝܬܳܐ ܪܳܗܛܳܐ. ܘܟܶܢܫܳܐ ܕܠܳܐ ܣܳܟܳܐ ܚܳܒܫܳܐ܆ ܘܗܳܢܽܘܢ ܕܗܰܝܡܶܢܘ. ܗܳܝܕܶܝܢ ܩܰܕܡܳܐܺܝܬ ܐܶܫܬܰܡܰܗܘ ܟܪ̈ܺܝܣܛܝܳܢܶܐ. ܘܶܐܬܡܰܠܝܰܬ̣ ܢܒܺܝܽܘܬܳܐ ܕܶܐܫܰܥܝܳܐ ܗܳܝ ܕܳܐܡܪܳܐ. ܕܰܠܗܳܢܽܘܢ ܕܦܳܠܚܺܝܢ ܠܺܝ ܢܶܬܩܪܶܐ ܫܡܳܐ ܚܰܕܬܳܐ ܗܰܘ ܕܢܶܬܒܰܪܰܟ ܥܰܠ ‌ܐܰܪܥܳܐ^[31]. ܠܳܐ ܙܳܕܶܩ ܗ̱ܘܳܐ܆ ܕܠܰܫܡܳܐ ܗܳܢܳܐ. ܟܽܠܳܗ̇ ܒܽܘܪܟܬܳܐ ܠܡܰܥܳܠܽܘ܆ ܫܰܦܺܝܪܽܘܬ ܡܽܘܙܳܓܳܐ ܕܳܐܐܰܪ̈ܰܤ ܡܫܰܪܬܚܽܘܬܳܐ ܕܦܺܐܪ̈ܶܐ܆ ܫܰܝܢܳܐ ܥܰܡܺܝܩܳܐ܆ ܐܰܝܟܰܢܳܐ ܕܢܶܕܰܥ ܟܽܠܢܳܫ ܒܗܽܘܢ ܒܣܽܘܥܪ̈ܳܢܶܐ܆ ܕܰܫܡܳܐ ܗܰܘ ܕܰܟܪ̈ܺܝܣܛܝܳܢܶܐ ܒܰܫܪܳܪܳܐ ܡܰܘܠܕܳܢܳܐ ܕܒܽܘܪܟܬܳܐ ‌ܐܺܝܬܰܘܗ̱ܝ܆ ܐܰܝܟܰܢܳܐ ܕܣܰܓܺܝ ܝܰܬܺܝܪ ܣܰܓܺܝ̈ܶܐܐ ܢܗܰܝܡܢܽܘܢ܆ ܟܰܕ ܠܡܰܠܦܳܢܽܘܬܳܐ ܕܠܳܐ ܚܶܪܝܳܢ ܗܳܝ ܕܡܶܢܶܗ ܕܢܶܣܝܳܢܳܐ ܫܳܠܡܺܝܢ܆ ܐܶܠܳܐ ܟܰܦܢܳܐ ܡܶܚܕܳܐ ܡܶܬܢܰܒܶܐ ܐܰܢ̱ܬ ܠܰܢ ܕܗܳܘܶܐ܆ ܕܒܽܘܪ̈ܟܳܬܳܐ ܛܳܒ̈ܳܬܳܐ ܐܰܝܟ ܕܕܳܡܝܳܐ ܢܶܗܘܶܐ ܫܡܳܐ ܗܳܢܳܐ ܡܙܰܡܢܳܢܳܐ ܠܰܒܢܰܝ̈ܢܳܫܳܐ.

ܐܷܠܳܐ ܬܺܐܡܰܪ܆ ܕܰܠܗܳܢܽܘܢ ܕܪܳܕܦܺܝܢ. ܠܗܽܘܢ ܕܰܡܣܰܒܪܺܝܢ ܡܶܠܬܳܐ܆ ܙܳܕܶܩ ܕܰܢܫܰܢܶܩ. ܡܳܕܶܝܢ ܙܳܕܶܩ ܗ̱ܘܳܐ܆ ܕܠܰܘ ܟܽܠܳܗ̇ ܡܶܬܥܰܡܪܳܢܺܝܬܳܐ ܬܶܫܬܰܘܬܰܦ ܐܰܟܚܕܳܐ ܒܰܡܣܳܡ ܒܪܺܝܫܳܐ. ܘܝܰܬܺܝܪܳܐܺܝܬ ܬܰܠܡܺܝ̈ܕܶܐ ܕܫܰܦܺܝܪܽܘܬ݂ ܕܶܚܠܬܳܐ. ܐܶܠܳܐ ܗܳܝ. ܕܗܳܠܶܝܢ ܢܶܬܚܰܫܒܽܘܢ ܕܗܳܢܽܘܢ ܕܰܠܘܳܬ݂ ܒܶܣܪܳܐ ܚܳܝܪܺܝܢ ܐܺܝܬܶܝܗ̇. ܗܳܢܽܘܢ ܓܶܝܪ ܕܝܳܕܥܺܝܢ ܠܢܳܡܽܘ̈ܣܶܐ ܪ̈ܽܘܚܳܢܳܝܶܐ܆ ܡܦܳܣܺܝܢ ܚܰܬܺܝܬܳܐܝܬ. ܕܰܒܝܰܕ ܡܥܺܝܩܳܢܺܝܬܳܐ ܐܰܟܚܕܳܐ ܕܰܒܟܽܘܪܳܐ܆ ܐܺܝܬ ܥܝܳܕܳܐ ܠܰܐܠܳܗܳܐ ܠܡܶܒܩܳܐ ܠܰܒܢܰܝ̈ܢܳܫܳܐ ܘܡܶܬܬܦܺܝܣܺܝܢ ܠܚܰܟܺܝܡܳܐ ܦܰܘܠܽܘܤ ܕܳܐܡܰܪ: ܟܽܠ ܕܶܝܢ ܡܰܪܕܽܘܬܳܐ܆ ܒܙܰܒܢܳܐ ܡܰܢ ܗܳܢܳܐ ܕܩܰܪܺܝܒ ܠܳܐ ܡܶܣܬܰܒܪܳܐ ܕܰܕܚܰܕܽܘܬܳܐ ܐܺܝܬܶܝܗ̇ ܐܶܠܳܐ ܕܥܳܩܬܳܐ܆ ܠܚܰܪܬܳܐ ܕܶܝܢ ܦܺܐܪ̈ܶܐ ܕܫܰܝܢܳܐ ܘܰܕܙܰܕܺܝܩܽܘܬܳܐ ܝܳܗܒܳܐ ܠܗܳܢܽܘܢ ܕܒܺܐܝ̈ܕܶܝܗ̇ ܐܶܬܕܰܪܰܫܘ^[32].

ܡܶܢ ܗܳܪܟܳܐ ܡܰܢ. ܒܳܬܰܪ ܫܽܘܪ̈ܳܝܶܐ ܥܡܺܝ̈ܠܶܐ ܕܕܰܐܝܟ ܗܳܠܶܝܢ܆ ܕܽܘܪ̈ܳܫܶܐ ܟܺܝܬ ܘܰܐܓܽܘ̈ܢܶܐ ܠܟܽܠܳܗ̇ ܗܳܕܶܐ ܦܰܬܝܽܘܬܳܐ ܐܶܬܳܐ ܐ̱ܪܳܙܳܐ ܪܰܒܳܐ ܘܰܐ‌ܠܳܗܳܝܳܐ ܕܰܟܪ̈ܺܝܣܛܝܳܢܶܐ. ܚܢܰܢ ܗܳܟܺܝܠ. ܐܰܝܟܰܢܳܐ ܕܡܶܢ ܗܳܠܶܝܢ ܐܺܝܬ ܠܡܶܚܙܳܐ܆ ܐܳܦܠܳܐ ܐܶܫܬܘܺܝܢܰܢ ܐܰܝܟ ܡܚܺܝ̈ܠܶܐ ܠܒܽܘܩܝܳܐ ܡܫܰܡܠܝܳܐ. ܡܬܰܚ ܓܶܝܪ ܥܠܰܝܢ. ܠܡܰܪܕܽܘܬܳܐ ܒܰܠܚܽܘܕ܆ ܘܡܶܪܕܳܐ ܠܳܐ ܪܕܳܐ ܠܰܢ܆ ܓܙܰܡ܆ ܘܦܰܣܩܶܗ ܒܪܶܚܡܰܬ ܐ̱ܢܳܫܽܘܬܳܐ ܠܓܰܪܡܳܐ. ܓܥܰܝܢܰܢ ܠܘܳܬܶܗ. ܘܰܥܢܳܐ ܠܰܢ. ܠܳܐ ܓܶܝܪ ܛܥܳܐ ܠܒܰܪܬܩܳܠܳܐ ܕܺܝܠܶܗ ܗܰܘ ܕܶܐܡܰܪ: ܫܰܐܠܘ ܘܢܶܬܺܝܗܶܒ ܠܟܽܘܢ. ܝܰܗ̱ܒ ܗܳܟܺܝܠ܆ ܠܰܘ ܡܶܛܽܠ ܙܰܕܺܝܩܽܘܬܳܐ ܕܺܝܠܰܢ܆ ܗܳܝ ܟܺܝܬ ܕܡܶܢ ܐܽܘܪܩܰܥܬܳܐ ܕܟܶܦܣܳܢܺܝܬܳܐ^[33] ܠܳܐ ܦܪܺܝܫܳܐ. ܐܰܝܟܰܢܳܐ ܕܶܐܡܰܪ ܢܒܺܝܳܐ܆ ܐܶܠܳܐ. ܡܶܛܽܠ ܫܽܘܘܕܳܝܳܐ ܕܺܝܠܶܗ.

ܙܳܕܶܩ ܕܶܝܢ ܠܡܶܬܒܰܩܳܝܽܘ ܥܰܡ ܝܰܨܺܝܦܽܘܬܳܐ܆ ܕܠܳܐ ܐܶܡܰܪ ܒܰܠܚܽܘܕ ܕܫܰܐܠܘ ܘܢܶܬܺܝܗܶܒ ܠܟܽܘܢ܆ ܐܶܠܳܐ ܐܰܘܣܶܦ܆ ܩܽܘܫܘ ܘܢܶܬܦܬܰܚ ܠܟܽܘܢ^[34]. ܗܳܝ ܡܰܢ ܗܳܟܺܝܠ ܕܢܶܫܰܐܠ܆ ܩܳܠܳܐ ܕܰܒܝܰܕ ܠܶܫܳܢܳܐ ܢܳܦܶܩ ܡܶܫܟܰܚ ܠܳܗ̇. ܗܳܝ ܕܶܝܢ ܕܢܶܩܽܘܫ܆ ܥܒܳܕܳܐ ܕܺܐܝܕܳܐ ܐܺܝܬܶܝܗ̇. ܡܳܕܶܝܢ. ܟܽܠܚܕܳܐ ܣܳܥܽܘܪܽܘܬܳܐ. ܘܰܡܡܰܠܝܳܢܽܘܬܳܐ ܕܦܽܘܩܕܳܢܳܐ܆ ܐܺܝܕܳܐ ܐܺܝܬܶܝܗ̇ ܕܡܶܫܟܚܳܐ ܠܡܶܩܰܫ ܟܺܝܬ ܘܰܠܡܶܦܬܰܚ ܠܬܰܪܥܶܗ ܕܝܶܫܽܘܥ. ܗܰܘ ܗܳܟܺܝܠ ܗܺܝ ܒܰܝܬܳܝܬܳܐ ܕܺܝܠܶܗ ܥܒܰܕ. ܝܰܗ̱ܒ ܟܰܕ ܫܳܐܠܺܝܢ ܡܶܢܶܗ܆ ܐܰܝܟܰܢܳܐ ܕܰܠܡܶܩܰܫ ܒܬܰܪܥܶܗ ܢܚܰܦܶܛ ܠܰܢ ܒܝܰܕ ܨܰܘܡܳܐ܆ ܒܝܰܕ ܠܳܐ ܡܰܣܚܽܘܬܳܐ܆ ܒܝܰܕ ܡܰܓܣܳܐ ܕܥܰܠ ‌ܐܰܪܥܳܐ܆ ܢܰܟܦܽܘܬܳܐ ܟܺܝܬ ܘܕܰܟܝܽܘܬܳܐ܆ ܫܰܗܪܳܐ ܘܬܶܫܡܶܫܬܳܐ^[35]܆ ܘܒܳܬܰܪ ܟܽܠܗܶܝܢ܆ ܒܰܡܪܰܚܡܳܢܽܘܬܳܐ ܕܥܰܠ ܫܰܘ̈ܝ݂ܰܝ݂ ܒܓܶܢܣܳܐ܆ ܘܰܒܡܰܘܗܰܒܬܳܐ ܕܗܳܠܶܝܢ ܕܺܐܝܬ ܠܰܢ. ܗܳܕܶܐ ܓܶܝܪ ܐܺܝܕܳܐ ܝܰܬܺܝܪܳܐܺܝܬ܆ ܩܕܳܡ ܕܬܶܩܽܘܫ ܩܰܪܺܝܒܳܐܺܝܬ ܘܩܰܠܺܝܠܳܐܺܝܬ ܐܰܝܟ ܕܰܠܡܺܐܡܰܪ܆ ܡܫܶܟܚܳܐ ܠܶܗ ܕܰܦܬܺܝܚ ܠܬܰܪܥܳܐ܆ ܗܰܘ ܕܳܐܦܠܳܐ ܠܰܡܦܺܝܕܳܐ. ܕܰܒܬܽܘܠܽܘܬܳܐ ܐܶܫܟܰܚ ܠܡܶܦܬܚܶܗ܆ ܡܶܛܽܠ ܕܡܶܢ ܡܶܫܚܳܐ^[36] ܚܰܣܺܝܪ ܗ̱ܘܳܐ܆ ܐܰܝܟܰܢܳܐ ܕܡܰܘܕܥܳܐ ܬܰܚܘܺܝܬܳܐ ܕܗܳܢܽܘܢ ܒܬܽܘ̈ܠܳܬܳܐ ܣܰܟ̈ܠܳܬܳܐ^[37].

ܥܰܠ ܡܰܘܗܰܒܬܳܐ ܗܳܟܺܝܠ ܙܳܕܶܩ ܕܬܶܗܘܶܐ ܠܰܢ ܝܰܨܺܝܦܽܘܬܳܐ. ܗܳܝ ܕܰܡܥܰܕܪܳܐ ܠܡܶܣ̈ܟܺܢܶܐ. ܐܶܢ ܓܶܝܪ ܐܰܝܟܰܢܳܐ ܕܶܐܡܰܪ ܫܠܺܝܚܳܐ. ܐܰܝܟ ܓܒܰܝ̈ܳܐ ܕܰܐ‎ܠܳܗܳܐ ܩܰܕܺܝ̈ܫܶܐ ܘܚܰܒܺܝ̈ܒܶܐ^[38]܆ ܬܶܠܒܫܽܘܢ ܚܰܝܽܘܣܬܳܢܽܘܬܳܐ ܕܪ̈ܰܚܡܶܐ܆ ܠܳܐ ܬܶܒܣܽܘܢ܆ ܘܠܳܐ ܒܰܐܟܣܢܳܝܳܐ. ܘܠܳܐ ܒܥܰܪܛܶܠܳܝܳܐ. ܡܶܬܕܰܡܰܪ ܐ̱ܢܳܐ ܕܶܝܢ ܒܪܰܒܽܘܬܳܗ̇ ܕܡܶܠܬܳܐ ܫܠܺܝܚܳܝܬܳܐ ܘܰܕܬܰܪܥܺܝܬܳܐ܆ ܘܣܰܓܺܝ ܬܰܡܺܝܗ ܐ̱ܢܳܐ. ܐܶܬܒܰܩܳܐ ܓܶܝܪ ܕܰܐܝܟܰܢܳܐ ܐܶܡܰܪ. ܬܶܠܒܫܽܘܢ ܚܰܝܽܘܣܬܳܢܽܘܬܳܐ ܕܪ̈ܰܚܡܶܐ. ܠܚܰܘܣܳܢܳܐ. ܘܰܠܪ̈ܰܚܡܶܐ ܕܥܰܠ ܩܰܪ̈ܺܝܒܰܝܢ ܒܳܥܶܐ ܐ̱ܢܳܐ ܕܢܶܠܒܰܫ. ܐܰܝܟ ܕܰܠܢܰܚܬܳܐ. ܗܰܘ ܕܶܝܢ ܕܰܠܗܳܢܳܐ ܠܒܺܝܫ܆ ܟܽܠܗܶܝܢ ܗܳܠܶܝܢ ܕܺܐܝܬ ܠܶܗ ܝܳܗܶܒ ܠܡܶܣ̈ܟܺܢܶܐ. ܘܟܰܕ ܒܟܽܠܙܒܰܢ ܠܗܳܠܶܝܢ ܕܰܐܝܟ ܠܶܗ܆ ܠܗܳܢܽܘܢ ܕܰܣܢܺܝܩܺܝܢ. ܫܳܠܰܚ ܠܗܶܝܢ܆ ܘܠܳܐ ܣܳܟ ܚܳܫܶܒ ܗܽܘ ܠܶܗ ܥܰܪܛܶܠܳܝܳܐ܆ ܟܰܕ ܚܰܘܣܳܢܳܐ ܕܪ̈ܰܚܡܶܐ ܠܒܺܝܫ.

ܠܺܝ ܕܶܝܢ ܕܶܐܕܰܡܰܥ ܐܳܬܝܳܐ ܠܺܝ܆ ܟܰܕ ܡܶܬܚܰܫܰܒ ܐ̱ܢܳܐ܆ ܕܰܠܘܳܬ݂ ܐܰܝ̇ܕܳܐ ܡܫܽܘܚܬܳܐ ܘܪܰܘܡܳܐ ܕܰܡܝܰܬܪܽܘܬܳܐ ܡܶܬܩܪܶܝܢ ܚ̱ܢܰܢ܆ ܘܠܰܐܝܟܳܐ ܠܬܰܚܬ ܒܬܰܪܥܺܝܬܰܢ ܡܶܬܓܰܪܪܺܝܢܰܢ^[39]܆ ܘܰܠܘܳܬ ܕܰܐܝܟ ܐܰܝܕܳܐ ܩܰܫܝܽܘܬܳܐ ܘܰܙܢܳܐ ܒܰܥܪܺܝܪܳܝܳܐ ܕܚܰܝܘܰܬ݂ ܫܶܢܳܐ ܪܳܗܛܺܝܢ ܚ̱ܢܰܢ܆ ܐܳܦ ܠܘܳܬܗܽܘܢ ܕܗܳܢܽܘܢ ܕܦܳܠܚܺܝܢ ܐܰܪܥܳܐ. ܗܳܢܽܘܢ ܟܺܝܬ ܕܒܳܗ̇ ܒܰܕܡܽܘܬܳܐ. ܐܰܝܟ ܡܳܪ̈ܰܝܗܽܘܢ ܡܰܢ ܡܨܰܠܶܝܢ܆ ܕܰܪ̈ܣܺܝܣܶܐ ܕܡܶܛܪ̈ܶܐ ܥܰܬܺܝܪ̈ܶܐ ܘܠܳܐ ܡܣܰܓܦܳܢ̈ܶܐ ܢܶܚܬܽܘܢ܆ ܨܰܚܘܳܐ ܟܺܝܬ ܡܶܢ ܝܽܘܒܳܠܳܐ^[40] ܕܚܰܕ ܒܳܬܰܪ ܚܰܕ ܢܶܨܡܰܚ܆ ܘܙܰܠܺܝܩܳܐ ܕܫܶܡܫܳܐ ܕܰܠܙܰܪܥܳܐ ܡܫܰܚܶܢ܆ ܘܰܕܬܶܗܘܶܐ ܡܶܟܺܝܠ ܫܰܦܺܝܪܽܘܬ݂ ܡܽܘܙܳܓܳܐ ܕܳܐܐܰܪ̈ܰܤ. ܗܶܢܽܘܢ ܕܶܝܢ ܒܰܠܚܽܘܕܰܝܗܽܘܢ ܥܳܡܠܺܝܢ. ܟܰܕ ܗܳܢܽܘܢ ܡܶܫܬܰܘܬܦܺܝܢ ܠܗܽܘܢ. ܘܠܳܐ ܒܡܶܕܶܡ.

ܡܳܐ ܕܶܝܢ ܕܶܐܬܳܐ. ܙܰܒܢܳܐ ܕܩܰܝܛܳܐ܆ ܡܶܢ ܒܳܬܰܪ ܚܨܳܕܳܐ ܘܟܽܘܢܳܫܳܐ ܕܦܺܐܪ̈ܶܐ܆ ܥܰܠ ܟܽܠܚܰܕ ܡܶܢܗܽܘܢ ܦܰܠܳܚ̈ܶܐ. ܒܰܕܡܽܘܬ ܫܺܐܕܳܐ ܡܶܕܶܡ ܒܰܥܪܺܝܪܳܝܳܐ܆ ܐܶܦܛܪܽܘܦܳܐ. ܐܰܘ ܗܽܘ ܡܳܪܳܗ̇ ܕܰܐܪܥܳܐ ܐܶܬܳܐ ܩܳܐܶܡ ܥܠܰܘܗ̱ܝ܆ ܟܰܕ ܟܬܳܒܽܘܢܳܐ ܡܶܕܶܡ ܠܒܺܝܟ ܒܺܐܝܕܶܗ܆ ܕܰܡܨܰܥܨܰܥ ܘܰܟܬܺܝܒ ܡܥܰܩܡܳܐܺܝܬ܆ ܘܕܰܡܫܰܚܰܡ ܡܶܟܺܝܠ ‌ܐܰܝܟ ܕܡܶܢ ܙܰܒܢܳܐ ܘܰܡܥܰܬܰܩ ܒܝܰܘ̈ܡܳܬܳܐ ܒܺܝ̈ܫܶܐ^[41]. ܐܰܝܟܰܢܳܐ ܕܳܐܡܰܪ ܐܰ‎ܠܳܗܳܝܳܐ ܕܳܢܺܝܐܶܝܠ܆ ܐܰܘ ܐܳܦ ܦܶܢܩܺܝܬܳܐ ܡܶܕܶܡ ܕܰܛܥܺܝܢܳܐ ܚܰܠܳܐ ܘܡܰܠܝܳܐ ܓܘܳܓܰܝ. ܒܳܬܰܪܟܶܢ ܟܰܕ ܦܬܰܚ ܠܰܟܬܳܒܽܘܢܳܐ. ܘܥܰܝܢܰܘ̈ܗ̱ܝ ܐܰܩܶܬ݂ ܒܶܗ܆ ܘܰܩܪܳܐ ܗܳܠܶܝܢ ܡܠܰܚ̈ܝܳܬܳܐ ܘܠܳܐ ܡܶܬܚܰܙܝܳܢ̈ܝܳܬܳܐ ܘܥܰܣ̈ܩܳܬ݂ ܠܰܫܟܳܚܬܳܐ܆ ܘܰܕܠܶܗ ܒܰܠܚܽܘܕܰܘܗ̱ܝ ܡܶܬܝܰܕ̈ܥܳܢ ܗ̱ܘܰܝ̈ ܐܰܘ ܕܰܒܡܰܨܕܝܳܢܽܘܬܳܐ ܘܰܐܝܟ ܕܒܶܐܣܟܺܡܳܐ ܡܶܣܬܰܒܪ̈ܳܢ ܕܡܶܬܝܰܕ̈ܥܳܢ܆ ܘܰܐܙܺܝܥ ܨܶܒ̈ܥܳܬܶܗ ܠܚܽܘܫܒܳܢܳܐ܆ ܘܡܶܠܽܘܢ̈ܝܳܬܳܐ ܡܶܕܶܡ ܩܰܠܺܝܠ ܬܚܶܝܬ ܫܶܢܳܐ ܠܰܬܶܡ܆ ܘܰܪܗܶܛ ܠܕܽܘܟ ܪܗܺܝܒܳܐܺܝܬ. ܘܒܳܬܰܪ ܗܳܕܶܐ܆ ܩܽܘܛܦܳܐ ܡܶܕܶܡ ܗܰܘ ܕܠܳܐ ‌ܐܺܝܬܰܘܗ̱ܝ ܐܰܝܟ ܕܒܶܐܣܟܺܡܳܐ ܚܰܘܺܝ܆ ܘܚܰܟ ܒܨܶܕܥܰܘܗ̱ܝ. ܘܰܐܦܰܘܗ̱ܝ ܫܰܦ ܙܰܒܢܺܝ̈ܢ ܣܰܓܺܝ̈ܳܐܢ. ܘܶܐܬܦܰܫܰܟ ܥܰܠ ܗܳܠܶܝܢ܆ ܡܶܨܛܰܕܶܐ ܒܶܗ ܒܦܰܠܳܚܳܐ ܣܰܓܺܝ ܕܳܘܝܽܘܬܳܐ. ܘܳܐܡܰܪ: ܠܳܐ ܣܳܦܩܳܐ ܥܠܰܠܬܳܐ ܗܳܕܶܐ ܕܦܺܐܪ̈ܶܐ ܠܘܳܬ ܦܽܘܪܥܳܢܽܘܬܳܐ ܕܚܰܘ̈ܒܳܬܳܐ. ܥܕܰܟܺܝܠ. ܕܰܟܪܽܘܟܝܳܐ ܕܥܰܒܺܝܪ ܕܰܫܢܰܝ̈ܳܐ܆ ܕܰܬܠܳܬܳܐ ܐܰܘ ܕܰܐܪܒܰܥܬ ܐܶܢ ܬܶܓܕܰܫ ܦܰܝ̣ܺܝ̣ܫܺܝܢ ܫܰܪ̈ܟܳܢܶܐ ܠܘܳܬܳܟ. ܐܰܘ ܡܶܢ ܒܰܪ̱ܬ ܩܳܠܳܐ ܘܠܳܐ ܡܣܰܝܰܒܬܳܐ ܘܚܰܪܡܬܳܐ. ܠܳܐ ܚܳܫܶܒ ܕܣܳܦܩܳܐ ܠܶܗ. ܗܳܝ ܕܢܶܫܬܰܩܠܽܘܢ ܡܶܢܶܗ ܦܺܐܪ̈ܶܐ ܗܳܠܶܝܢ ܕܩܰܪܺܝܒܺܝܢ܆ ܐܶܠܳܐ ܒܝܰܕ ܥܽܘܗܕܳܢܳܐ ܕܫܰܪ̈ܟܳܢܶܐ ܕܚܰܘ̈ܒܳܬܳܐ܆ ܐܳܦ ܡܶܢ ܗܳܢܽܘܢ ܕܡܶܣܬܰܟܶܝܢ ܩܰܕܶܡ ܓܰܠܙܶܗ.

ܘܕܰܐܝܟ ܐܰܝܠܶܝܢ ܗܰܘ ܕܳܘܝܳܐ ܐܴܠܶܐ ܗܽܘ ܠܶܗ ܟܰܕ ܠܒܰܝܬܶܗ ܗܳܦܶܟ܆ ܒܒܰܪ̱ܬ ܩܳܠܳܐ ܩܽܘܪܝܳܝܬܳܐ222 ܘܒܰܪ̱ܬ ܐܰܬܪܳܐ. ܟܰܕ ܡܶܕܶܡ ܩܰܫܝܳܐ ܡܰܝܠܶܠ. ܘܝܰܩܺܝܪܳܐ܆ ܘܟܰܕ ܠܽܐܘܠܺܝܬܳܐ. ܝܰܬܺܝܪ ܪܰܥܽܘܡܬܳܐ ܥܒܰܕ ܠܳܗ̇܆ ܘܟܰܕ ܕܰܐܝܟ ܗܳܠܶܝܢ ܓܳܥܶܐ. ܘܳܝܠܺܝ ܥܰܠ ܥܰܡ̈ܠܰܝ. ܘܳܝܠܺܝ ܥܰܠ ܦܽܘܠܚܳܢܝ܆ ܗܰܘ ܕܰܕܠܳܐ ܝܽܘܬܪܳܢ ܬܶܥܫܶܬ ܒܶܗ. ܗܳܫܳܐ. ܡܶܬܥܰܗܰܕ ܐ̱ܢܳܐ ܠܬܰܘܪ̈ܰܝ܆ ܗܳܢܽܘܢ ܕܪܳܕܶܦ ܗ̱ܘܺܝܬ ܠܗܽܘܢ ܒܙܳܩܽܘܬܳܐ܆ ܘܰܠܡܶܨܪܳܐ ܚܛܽܘܛܳܐ ܡܣܰܪܗܰܒ ܗ̱ܘܳܬ ܠܗܽܘܢ. ܗܳܫܳܐ ܠܩܺܝܩ̈ܢܶܐ ܘܠܕܝܩܐܠܐ ܘܠܰܥܕܳܕܳܐ ܕܟܽܘ̈ܒܶܐ ܘܰܕܕܰܪܕܪ̈ܶܐ܆ ܘܰܠܡܰܓܠܳܐ ܗܳܝ ܕܒܳܗ̇ ܠܫܶܒ̈ܠܶܐ ܚܶܨܕܶܬ݂܆ ܘܰܠܗܳܝ ܕܒܳܗ̇ ܠܰܫܒܶܫ̈ܬܶܐ ܝܰܬܺܝܪ̈ܳܬܳܐ ܕܓܽܘ̈ܦܢܶܐ ܟܶܣܚܶܬ. ܐܳܬܘ̈ܳܬܳܐ ܕܗܳܠܶܝܢ ܥܰܡ̈ܠܶܐ ܝܰܬܺܝܪ̈ܳܬܳܐ ܐܺܝܕܰܝ̈ܳܐ ܕܺܝܠܝ܆ ܗܳܠܶܝܢ ܕܰܥܠܰܝܗܶܝܢ ܐܳܫܶܕ ܐ̱ܢܳܐ ܕܶܡ̈ܥܶܐ ܣܰܓܺܝ̈ܳܐܬܳܐ. ܦܽܘܝ ܡܶܢ ܥܠܰܠܬܐ ܕܦܺܐܪ̈ܶܐ ܕܺܝܠܝ܆ ܗܳܝ ܕܰܥܕܰܡܳܐ ܠܰܚܨܳܕܳܐ ܐܺܝܬܶܝܗ̇ ܗ̱ܘܳܬ ܠܺܝ ܪܚܺܝܡܬܳܐ ܘܫܳܘܝܰܬ ܠܰܨܠܽܘܬܳܐ܆ ܡܶܢ ܒܳܬܰܪ ܕܶܝܢ ܗܳܢܳܐ ܣܢܺܝܐܬܳܐ ܘܡܰܣܠܰܝܬܳܐ ܘܰܡܥܺܝܩܳܢܺܝܬܳܐ܆ ܗܳܢܽܘܢ ܕܟܰܕ ܡܶܙܕܰܪܥܺܝܢ ܗ̱ܘܰܘ ܡܰܢ ܒܪ̈ܶܓܠܰܝ ܡܕܰܝܶܫ ܗ̱ܘܺܝܬ̣ ܠܗܽܘܢ܆ ܟܰܕ ܕܶܝܢ ܡܶܬܚܰܨܕܺܝܢ ܗ̱ܘܰܘ ܒܺܐܝ̈ܕܰܝ ܠܳܒܶܟ ܗ̱ܘܺܝܬ ܠܗܽܘܢ܆ ܘܟܰܕ ܒܶܐܕܪܳܐ ܣܺܝܡܺܝܢ ܗ̱ܘܰܘ ܒܳܐܶܬ ܗ̱ܘܺܝܬ̣ ܠܘܳܬܗܽܘܢ ܡܶܛܽܠ ܢܛܽܘܪܬܳܐ܆ ܒܰܠܚܽܘܕ ܕܶܝܢ ܕܰܐ݀ܝܬܶܐ ܐܶܢܽܘܢ ܬܚܶܝܬ ܫܶܢܰܝ̈ ܐܶܬܟܠܺܝܬ݂܆ ܟܰܕ ܐܳܦܠܳܐ ܚܰܕ ܠܰܚܡܳܐ ܐܶܫܬܰܒܩܶܬ ܠܡܶܐܟܰܠ ܡܶܢܗܽܘܢ.

ܒܐܝܠܶܝܢ ܥܰܝ̈ܢܶܐ ܐܶ݀ܚܙܶܝܗ̇ ܠܰܐܢ̱ܬܰܬܝ܆ ܗܳܝ ܫܰܘܬܶܦܬܳܐ ܕܝܰܨܺܝ̈ܦܘܳܬܳܐ ܕܥܰܠ ܦܰܠܳܚܽܘܬܳܐ܆ ܗܳܝ ܡܣܰܝܥܳܢܺܝܬܳܐ ܕܥܰܡ̈ܠܶܐ܆ ܗܳܝ ܕܟܰܕ ܙܳܪܰܥ ܗܳܟܺܝܠ ܘܟܰܕ ܚܳܨܶܕ ܗܘܺܝܬ ܠܒܰܪ ܠܰܦܩܰܥܬܳܐ ܡܰܝܬܝܳܐ ܗ̱ܘܳܬ ܠܺܝ ܣܰܝܒܳܪܬܳܐ܆ ܗܳܝ ܕܥܰܠ ܥܰܪܣܳܐ ܡܰܢ ܥܰܡܝ ܣܳܠܩܳܐ ܗ̱ܘܳܬ ܠܡܶܫܟܰܒ܆ ܫܳܗܪܳܐ ܗ̱ܘܳܬ ܕܶܝܢ ܥܰܡܝ ܘܰܐܟܚܕܳܐ ܡܶܬܗܰܓܓܳܐ ܗ̱ܘܳܬ ܘܪܳܢܝܳܐ ܡܶܛܽܠ ܦܣܳܩܳܐ ܕܫܶܒ̈ܠܶܐ ܘܕܰܣܓܽܘ̈ܠܶܐ܆ ܗܳܢܽܘܢ ܕܗܳܫܳܐ܆ ܡܳܪܶܐ ܐܰܪܥܳܐ ܒܰܠܚܽܘܕ ܩܰܕܺܝ ܘܶܐܬܒܰܣܰܡ ܒܗܽܘܢ. ܐܰܝܟܰܢܳܐ ܐܶ݀ܚܰܡܣܶܢ ܟܰܕ ܚܳܙܶܐ ܐ̱ܢܳܐ ܠܳܗ̇ ܕܒܳܟܝܳܐ. ܐܰܝܟܰܢܳܐ ܕܶܝܢ ܟܰܕ ܣܳܪܟܳܐ ܘܡܶܬܬܣܺܝܡܳܐ ܥܠܰܝ ܘܰܐܟܚܕܳܐ ܥܰܡܝ ܡܶܬܰܐܒܠܳܐ܆ ܠܰܘ ܡܶܢ ܐܽܘܠ̈ܝܳܬܳܐ ܐܶܬܛܰܠܰܩ ܘܰܐ݀ܘܣܶܦ. ܟܰܕ ܐܰܝܕܳܐ ܕܶܝܢ ܥܶܠܬܳܐ ܕܬܽܘܪ̈ܣܳܝܶܐ ܡܰܘܫܶܛ ܐ̱ܢܳܐ ܠܳܗ̇܆ ܦܝܳܣܳܐ ܐܶ݀ܥܒܕܺܝܗ̇ ܕܚܰܝܠܬܳܢܳܐܺܝܬ ܬܣܰܝܒܰܪ܆ ܠܥܳܩܬܳܐ ܗܳܝ ܕܗܳܟܰܢܳܐ ܐܺܝܬܶܝܗ̇ ܕܠܳܐ ܒܽܘܝܳܐܳܐ.

ܐܰܝܟܰܢܳܐ ܕܶܝܢ ܥܰܠ ܒ̈ܢܰܝ ܕܺܝܠܝ ܐܰ݀ܝܬܶܐ ܠܥܰܝܢܳܐ ܕܺܝܠܝ. ܗܳܢܽܘܢ ܕܚܰܕ ܡܶܢܗܽܘܢ. ܕܺܐܝܬܰܘܗ̱ܝ ܗ̱ܘܳܐ ܒܩܰܘܡܬܳܐ. ܥܰܡܝ ܕܳܒܰܪ ܗ̱ܘܳܐ ܦܰܕܳܢܳܐ. ܠܘܳܬ ܬܥܳܫܳܐ ܕܶܝܢ ܕܒܕܝܩܐܠܐ ܠܽܘܩܒܰܠܝ ܡܡܰܪܶܐ ܗ̱ܘܳܐ. ܠܘܳܬ ܚܨܳܕܳܐ ܕܶܝܢ܆ ܚܘܺܝܚܳܐܺܝܬ ܠܳܛܶܫ ܗ̱ܘܳܐ ܐܰܘ ܡܰܓܠܳܐ. ܒܟܽܠܗܽܘܢ ܐܰܡ̈ܢܶܐ^[42] ܡܝܰܬܪ̈ܶܐ ܕܦܰܠܳܚܽܘܬܳܐ ܡܢܰܦܰܩ ܗ̱ܘܳܐ ܘܰܩܦܺܝܛ^[43]. ܡܶܢ ܗܳܠܶܝܢ ܕܶܝܢ ܬܪܶܝܢ ܙܥܽܘܪ̈ܶܐ܆ ܗܰܘ ܡܰܢ ܟܰܕ ܙܳܪܰܥ ܐ̱ܢܳܐ ܙܰܒܢܺܝ̈ܢ ܣܰܓܺܝ̈ܳܐܢ. ܟܰܕ ܒܥܽܘܒܶܗ^[44] ܡܰܝܬܶܐ ܗ̱ܘܳܐ ܙܰܪ̈ܥܶܐ ܝܳܗܶܒ^[45] ܗ̱ܘܳܐ ܠܺܝ܆ ܗܰܘ ܕܶܝܢ܆ ܟܰܕ ܟܺܐܦ̈ܶܐ ܡܰܩܠܰܥ ܗ̱ܘܳܐ ܒܦܳܪ̈ܚܳܬܳܐ ܡܠܰܩ̈ܛܳܬ ܙܰܪ̈ܥܶܐ. ܪܳܕܶܦ ܗ̱ܘܳܐ ܠܗܶܝܢ܆ ܐܰܘ ܛܳܪܶܕ ܗ̱ܘܳܐ ܟܰܕ ܡܰܕܚܶܠ ܗ̱ܘܳܐ ܠܗܶܝܢ ܒܦܽܘܪ̈ܣܶܐ ܐ̱ܚܪ̈ܳܢܶܐ.

ܒܙܰܒܢܳܐ ܕܶܝܢ ܕܩܰܝܛܳܐ܆ ܘܟܰܕ ܙܰܒܢܳܐ ܕܶܐܒܳܐ ܗܘ̣ܳܐ܆ ܬܪ̈ܰܝܗܽܘܢ ܒܚܰܩܠܳܐ ܘܰܠܘܳܬ ܡܛܰܠܬܳܐ^[46] ܝܳܬܒܺܝܢ ܗ̱ܘܰܘ܆ ܕܠܰܢܛܽܘܪܬܳܐ ܕܦܺܐܪ̈ܶܐ ܠܗܳܢܽܘܢ ܕܟܰܕ ܢܛܰܪܘ ܐܶܢܽܘܢ ܝܰܨܺܝܦܳܐܺܝܬ܆ ܛܰܥܝܳܐ ܗ̱ܘܳܬ ܠܗܽܘܢ ܕܳܐܦܠܳܐ ܒܰܡܢܳܬܳܐ ܡܶܕܶܡ ܙܥܽܘܪܬܳܐ ܠܗܳܠܶܝܢ ܢܳܛܪܺܝܢ ܗܘܰܘ ܠܢܰܦܫܗܽܘܢ. ܣܳܒܰܪ ܐ̱ܢܳܐ ܡܶܟܺܝܠ ܥܠܰܝܗܽܘܢ. ܐܰܝܟ ܡܰܢ ܕܰܛܠܶܝܢ ܒܬܰܪܥܺܝܬܗܽܘܢ܆ ܕܢܳܕܳܐ ܠܗܽܘܢ ܡܶܢ ܩܪܺܝܬܳܐ. ܘܳܐܦ ܡܶܢܳܗ̇ ܕܦܰܠܳܚܽܘܬܳܐ܆ ܐܰܝܟ ܐܰܝܕܳܐ ܕܬܶܢ̈ܚܳܬܳܐ ܘܕܶܡ̈ܥܶܐ ܒܰܠܚܽܘܕ ܡܰܝܬܝܳܐ ܠܗܽܘܢ.

ܗܳܠܶܝܢ ܗܳܟܺܝܠ. ܡܶܣܬܰܝܒܪ̈ܳܢܝܳܬܳܐ ܐܺܝܬܰܝܗܶܝܢ܆ ܗܳܠܶܝܢ ܠܳܐ ܟܳܦ̈ܳܢ^[47] ܐܳܦ ܠܢܰܦܫܳܐ ܗܳܝ ܕܩܰܫܝܳܐ ܝܰܬܺܝܪ ܡܶܢ ܐܰܕܰܡܰܐܤ܆ ܠܳܐ ܡܶܬܬܚܺܝܒ ܗ̱ܘܳܐ ܠܶܗ ܠܦܰܠܳܚܳܐ ܟܰܕ ܙܥܽܘܪ ܙܥܽܘܪ܆ ܕܢܳܣܶܒ ܐܳܦܶܢ ܐܰܓܪܳܐ ܕܥܰܡ̈ܠܰܘܗ̱ܝ܆ ܐܰܘ ܠܳܐ ܫܰܡܥܬܳܝܗ̱ܝ ܠܺܐܝܽܘܒ ܟܰܕ ܦܺܝܠܳܣܽܘܦܺܝܣܳܐ ܥܳܒܶܕ ܗ̱ܘܳܐ܆ ܘܒ̈ܳܥܽܘܠܳܐ ܪܰܘܪ̈ܒܶܐ ܠܗܳܕܶܐ ܡܳܢܶܐ ܗ̱ܘܳܐ ܘܳܐܡܰܪ: ܡܚ̈ܺܝܠܶܐ ܕܶܝܢ ܠܟܰܪ̈ܡܶܐ ܕܪ̈ܰܫܺܝܥܶܐ ܕܠܳܐ ܬܽܘܪܣܳܝܳܐ ܘܰܕܠܳܐ ܐܰܓܪܳܐ ܦܠܰܚܘ^[48]. ܝܰܥܩܽܘܒ ܕܶܝܢ. ܟܰܕ ܟܳܬܶܒ ܗ̱ܘܳܐ ܒܶܐܓܪ̈ܳܬܳܐ ܗܳܠܶܝܢ ܩܰܬܽܘ̈ܠܺܝܩܰܤ܆ ܚܰܕ ܡܶܢ ܬܰܠܡܺܝ̈ܕܶܐ ܕܶܝܢ ܕܦܳܪܽܘܩܰܢ. ‌ܐܺܝܬܰܘܗ̱ܝ ܗ̱ܘܳܐ ܗܳܢܳܐ܆ ܘܰܐܝܟ ܗܰܘ ܕܰܩܕܳܡ ܚܙܳܬܳܐ ܡܚܰܘܶܐ ܗ̱ܘܳܐ ܠܳܗ̇ ܠܪܰܒܽܘܬܳܗ̇ ܕܰܚܛܺܝܬܳܐ ܗܳܕܶܐ. ܐܳܡܰܪ ܗ̱ܘܳܐ܆ ܗܳܟܰܢܳܐ: ܗܳܐ ܐܰܓܪܳܐ ܕܦܳܥ̈ܠܶܐ ܗܳܢܽܘܢ ܕܰܚܨܰܕܘ ܚܰܩ̈ܠܳܬܟܽܘܢ܆ ܗܰܘ ܕܶܐܬܓܠܶܙ ܡܶܢܟܽܘܢ ܩܳܥܶܐ. ܘܰܓ̈ܥܳܬܳܐ ܕܗܳܢܽܘܢ ܕܰܚܨܰܕܘ܆ ܠܶܐܕܢܰܘ̈ܗ̱ܝ ܕܡܳܪܝܳܐ ܨܒܰܐܽܘܬ ܥܰܠܺܝ̈ܠܳܢ^[49].

ܒܳܬܰܪܟܶܢ ܐܳܘ ܡܳܪܳܐ ܒܰܣܺܝܡܳܐ ܕܛܺܝܢܳܐ ܘܕܰܐܪܥܳܐ܆ ܕܰܡܝܰܬܪܽܘܬܳܐ ܓܶܝܪ ܘܠܳܐ ܣܳܟ. ܡܰܠܽܘܢ ܕܶܝܢ܆ ܐܳܘ ܥܰܒܕܳܐ ܕܚܰܪܡܽܘܬܳܐ ܘܰܕܟܽܠܳܗ̇ ܩܰܫܝܽܘܬܳܐ ܗܳܝ ܕܚܰܝ̈ܘܳܬ ܫܶܢܳܐ܆ ܒܗܳܠܶܝܢ ܢܩ̈ܳܫܶܐ ܡܣܰܒܰܪ^[50] ܐܰܢ̱ܬ܆ ܠܡܶܦܬܰܚ ܠܬܰܪܥܶܗ ܕܝܶܫܽܘܥ܆ ܡܳܢܳܐ ܕܶܝܢ ܗܳܠܶܝܢ. ܘܕܰܐܝܟ ܗܳܠܶܝܢ܆ ܠܳܐ ܣܳܦ̈ܩܳܢ ܠܡܶܐܚܰܕ ܐܳܦ ܠܩܐܛܐܪ̈ܐܩܛܐ ܕܰܫܡܰܝܳܐ ܗܳܢܽܘܢ ܕܰܐܛܺܝܦܘ ܒܝܰܘ̈ܡܰܝ ܢܽܘܚ ܠܟܽܠܳܗ̇ ܐܰܪܥܳܐ^[51]܆ ܘܰܕܢܽܘܦܳܚ̈ܶܐ ܢܙܰܡ̈ܢܳܢ ܠܰܢ. ܘܚܽܘܒ̈ܠܶܐ ܕܰܐܝܟ ܗܳܢܳܐ ܙܢܳܐ܆ ܐܶܢܗܽܘ ܕܠܰܘ ܩܰܠܺܝܠܳܐܺܝܬ ܢܶܫܬܰܚܠܰܦ܆ ܡܶܛܽܠ ܗܳܕܶܐ. ܐܳܦ ܥܰܡܽܘܤ ܢܒܺܝܳܐ܆ ܐܳܡܰܪ: ܐܶܢܳܐ ܟܠܺܝܬ̣ ܡܶܢܟܽܘܢ ܡܶܛܪܳܐ ܩܕܳܡ ܬܠܳܬܳܐ ܝܰܪ̈ܚܺܝܢ ܕܰܚܨܳܕܳܐ. ܘܰܐ݀ܡܛܰܪ ܥܰܠ ܡܕܺܝܢ̱ܬܳܐ ܚܕܳܐ܆ ܥܰܠ ܡܕܺܝܢ̱ܬܳܐ ܕܶܝܢ ܚܕܳܐ ܠܳܐ ܐܰ݀ܡܛܰܪ. ܥܰܠ ܚܰܩܠܳܐ ܚܕܳܐ܆ ܢܶܚܽܘܬ ܡܶܛܪܳܐ܆ ܘܚܰܩܠܳܐ ܗܳܝ ܕܠܳܐ ܐܰ݀ܡܛܰܪ ܥܠܶܝܗ̇. ܬܺܐܒܰܫ^[52]. ܘܢܶܬܟܰܢ̈ܫܳܢ ܬܰܪܬܶܝܢ ܘܰܬܠܳܬ ܡܕܺܝܢ̈ܳܬܳܐ ܠܰܚܕܳܐ ܡܕܺܝܢ̱ܬܳܐ ܠܡܶܫܬܳܐ ܡܰܝ̈ܳܐ܆ ܘܠܳܐ ܢܶܣܒ̈ܥܳܢ. ܘܠܳܐ ܦܢܰܝܬܽܘܢ ܠܘܳܬܝ ܐܳܡܪ ܡܳܪܝܳܐ. ܡܚܺܝܬ̣ܟܽܘܢ ܒܚܽܘܡܳܐ^[53] ܘܰܒܝܰܪܩܳܢܳܐ܆ ܘܰܐܣܓܺܝܬܽܘܢ ܠܡܰܪܫܳܥܽܘ.

ܚܳܙܶܝܢ ܐܢ̱ܬܽܘܢ. ܕܰܠܕܰܐܝܟ ܗܳܠܶܝܢ ܩܽܘܦܳܚ̈ܶܐ ܡܰܝܬܶܐ ܐܰ‎ܠܳܗܳܐ܆ ܠܰܘ ܡܶܛܽܠ ܡܶܕܶܡ ܐ̱ܚܪܺܝܢ܆ ܐܶܠܳܐ ܡܶܛܽܠ ܕܠܰܢ ܢܰܦܢܶܐ ܠܘܳܬܶܗ. ܡܳܢܳܐ ܗܳܟܺܝܠ ܠܰܡ. ܗܳܟܰܢܳܐ ܐܰܢ̱ܬ ܦܳܩܶܕ ܐܰܢ̱ܬ܆ ܕܢܶܫܬܰܒ̈ܩܳܢ ܚܰܘ̈ܒܳܬܳܐ ܠܦܰܠܳܚ̈ܶܐ܆ ܐܰܝܟ ܐܳܡܰܪ ܐ̱ܢܳܐ. ܝܰܬܺܝܪܳܐܺܝܬ ܡܰܢ܆ ܐܶܢܗܽܘ ܕܰܠܗܳܕܶܐ ܟܽܠܳܗ̇ ܚܰܣܺܝܪܽܘܬܳܐ ܐ̱ܚܪܳܝܬܳܐ ܐܬܝ݂̈ܝܢ܆ ܘܥܰܠ ܗܳܝ ܕܢܶܫܬܒܶܩ ܠܗܽܘܢ ܣܢܺܝܩܺܝܢ. ܐܶܢ ܕܶܝܢ ܡܶܨܥܳܐܺܝܬ ܐܰܝܟܰܢ ܕܗܽܘ. ܐܺܝܬ ܠܗܽܘܢ܆ ܥܒܳܕܶܝ̈ܗ̇ ܠܰܬܒܰܥܬܳܐ. ܒܩܰܠܺܝܠ ܩܰܠܺܝܠ. ܐܳܦܠܳܐ ܓܶܝܪ ܐܰܢ̱ܬ ܐܶ‎ܠܽܘ ܕܰܬܬܽܘܒ ܥܰܠ ܚܛܳܗܰܝ̈ܟ ܒܳܥܶܐ ܗ̱ܘܰܝܬ܆ ܦܳܪܰܥ ܗ̱ܘܰܝܬ ܟܢܺܝܫܳܐܺܝܬ ܠܰܐܠܳܗܳܐ ܟܽܠܗܶܝܢ ܚܰܘ̈ܒܳܬܳܟ. ܒܪܰܡ ܩܢܺܝ ܠܳܟ ܢܺܝܫܳܐ ܛܳܒܳܐ ܘܪܳܚܶܡ ܐ̱ܢܳܫܳܐ܆ ܘܠܳܐ ܢܶܗܘܶܐ ܠܳܟ ܣܽܘܢܩܳܢܳܐ ܥܰܠ ܡ̈ܶܠܶܐ ܕܺܝܠܰܢ܆ ܐܶܠܳܐ ܗܽܘ ܢܶܗܘܶܐ ܠܳܟ ܡܰܠܦܳܢܳܐ ܕܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ.

ܚܳܙܶܐ ܐ̱ܢܳܐ ܕܶܝܢ. ܕܠܰܘ ܒܰܩܪܺܝܬܳܐ ܒܰܠܚܽܘܕ ܐܺܝܬܰܝܟ ܕܰܐܝܟ ܗܳܢܳܐ܆ ܐܰܝܟ ܐܰܝܢܳܐ ܕܡܶܠܬܳܐ ܪܫܰܡܬܳܟ ܗܳܫܳܐ. ܐܶܠܳܐ ܒܳܗ̇ ܒܰܕܡܽܘܬܳܐ ܐܳܦ ܒܫܽܘܩܳܐ ܕܰܡܕܺܝܢ̱ܬܳܐ. ܟܰܕ ܓܳܙܶܡ ܐܰܢ̱ܬ. ܟܰܕ ܕܳܚܶܐ^[54] ܐܰܢ̱ܬ. ܟܰܕ ܠܒܶܝܬ ܕܺܝ̈ܢܶܐ ܢܳܓܶܕ ܐܰܢ̱ܬ. ܟܰܕ ܡܢܰܬܶܦ ܐܰܢ̱ܬ. ܟܰܕ ܡܨܰܥܰܪ ܐܰܢ̱ܬ. ܟܰܕ ܡܳܚܶܐ ܐܰܢ̱ܬ. ܟܰܕ ܗܳܠܶܝܢ ܕܠܳܐ ܙܳܕ̈ܩܳܢ ܬܳܒܰܥ ܐܰܢ̱ܬ. ܟܰܕ ܠܗܳܢܽܘܢ ܕܒܽܐܘܪ̈ܚܳܬܳܐ ܩܳܝܡܺܝܢ ܘܺܐܝܕܰܝ̈ܳܐ ܦܳܫܛܺܝܢ ܘܫܳܡܽܘܢܳܐ^[55] ܚܰܕ ܫܳܐܠܺܝܢ܆ ܥܽܘܕܪܳܢܳܐ ܫܰܦܺܝܪ ܦܽܘܪܣܳܐ ܕܟܰܦܢܳܐ ܘܕܰܨܪܺܝܟܽܘܬܳܐ܆ ܐܰܝܟ ܕܰܠܟܺܐܦ̈ܶܐ ܕܠܳܐ ܢܰܦܫܳܐ ܠܳܐ ܡܪܰܚܡܳܢܳܐܺܝܬ ܥܳܒܰܪ ܐܰܢ̱ܬ ܟܰܕ ܪܰܗܺܝܛ ܐܰܢ̱ܬ.

ܕܡܶܢ ܗܳܪܟܳܐ. ܡܶܣܬܒܰܪ ܐܰܢ̱ܬ ܠܺܝ܆ ܐܳܦ ܕܠܳܐ ܡܶܬܰܐܣܝܳܢܳܐܺܝܬ ܐܺܝܬ ܠܳܟ. ܐܶܢ ܓܶܝܪ ܡܶܢ ܗܳܠܶܝܢ ܕܡܰܥܘܶܠ ܗ̱ܘܰܝܬ ܒܐܢܳܫܺܝ̈ܢ܆ ܟܰܕ ܥܰܠ ‌ܐ̱ܚܪ̈ܳܢܶܐ ܡܪܰܚܶܡ ܗ̱ܘܰܝܬ. ܐܰܓܪܳܐ ܡܰܢ ܘܠܳܐ ܚܰܕ ܐܺܝܬ ܗ̱ܘܳܐ ܠܳܟ܆ ܚܰܕ ܓܶܝܪ ܐܳܡܰܪ ܕܒܳܢܶܐ. ܘܚܰܕ ܕܣܳܬ̣ܰܪ ܐܰܝܟܰܢܳܐ ܕܐ̱ܢܳܫ ܚܰܟܺܝܡܳܐ ܐܶܡܰܪ: ܡܳܢܳܐ ܝܰܬܺܝܪܳܐ ܐܰܘܬܰܪ ܐܶܠܳܐ ܐܶܢ ܥܰܡ̈ܠܶܐ ܣܪ̈ܺܝܩܶܐ^[56]܆ ܟܰܕ ܗܳܟܰܢܳܐ ܒܟܽܠܳܫܥ ܡܰܥܘܶܠ ‌ܐܰܢ̱ܬ܆ ܐܰܝܢܳܐ ܣܰܒܪܳܐ ܢܶܗܘܶܐ ܐܺܝܬ ܠܳܟ. ܟܰܕ ܕܶܝܢ ܡܶܬܦܰܠܰܓ ܗ̱ܘܰܝܬ ܒܢܰܦܫܳܟ. ܠܚܰܪܡܽܘܬܳܐ ܘܰܠܪ̈ܰܚܡܶܐ܆ ܥܬܺܝܕ ܗ̱ܘܰܝܬ ܟܰܕ ܫܳܡܰܥ ܗ̱ܘܺܝܬ ܠܡ̈ܶܠܶܐ ܕܡܰܠܦܳܢܽܘܬܳܐ܆ ܕܰܠܗܳܝ ܡܰܢ ܕܰܠܒܰܪ ܡܶܢ ܟܝܳܢܳܐ ܐܺܝܬܶܝܗ̇ ܘܫܰܘܝܳܐ ܠܚܰܝܘܰܬ ܫܶܢܳܐ. ܬܶܫܒܽܘܩ ܗܘܰܝܬ܆ ܬܶܬܕܢܶܐ ܗܘܰܝܬ ܕܶܝܢ ܠܰܡܝܰܬܪܽܘܬܳܐ ܗܳܝ ܟܝܳܢܳܝܬܳܐ. ܡܶܫܟܰܚ ܗ̱ܘ ܓܶܝܪ ܐܰ‎ܠܳܗܳܐ ܕܰܢܫܰܚܠܶܦ ܠܰܢ܆ ܐܳܦ ܟܰܕ ܠܳܐ ܡܶܬܰܐܣܝܳܢܳܐܺܝܬ ܐܺܝܬ ܠܰܢ. ܗܳܠܶܝܢ ܓܶܝܪ ܕܰܠܘܳܬ ܒ̈ܢܰܝ ܐ̱ܢܳܫܳܐ ܐܺܝܬܰܝܗܶܝܢ ܠܳܐ ܡܶܬܡܨܰܝ̈ܳܢܝܳܬܳܐ. ܡܶܬܡܰܨܝ̈ܳܢܝܳܬܳܐ ܠܘܳܬ ܐܰ‎ܠܳܗܳܐ^[57]. ܕܠܶܗ ܫܽܘܒܚܳܐ ܠܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܬܫܰܬܥܣܰܪ.

ܡܙܡܘܪ̈ܐ. 9: 17 [1]

ܐܝܘܒ. 5: 17 ـ 18 [2]

ܐܦܣ̈ܝܐ. 5: 20 [3]

ܐܫܥܝܐ. 65: 24 [4]

ܓܳܣܶܝܢ[5]

ܐܰܢܗܪܰܬ[6]

ܡܦܩܢܐ. 14: 13 ـ 15[7]

 ܥܳܒܶܕ[8]

 ܒܽܘܓܳܢܳܐ[9]

ܕܰܡܒܰܓܢܺܝܢ[10]

ܪ̈ܗܘܡܝܐ. 8: 26 ـ 27 [11]

ܡܙܡܘܪ̈ܐ. 63: 9 [12]

ܐܫܥܝܐ. 11: 1 [13]

  ܡܙܡܘܪ̈ܐ. 110: 2 [14]

  ܡܦܩܢܐ. 14: 29 [15]

  ܪ̈ܰܛܺܝܒܶܐ[16]

  ܘܫܪ̈ܝܐ[17]

 ܕܶܐܫܬܚܰܪܘ[18]

  ܡܦܩܢܐ. 15: 1[19]

ܕܠܐ ܦܽܘܪܣܳܐ[20]

ܫܦܺܝܥܬܳܐ[21]

  ܡܶܬܒܰܚܪܺܝܢ[22]

  ܬܶܢܝܳܢ ܢܳܡܽܘܣܳܐ. 8: 2 ـ 5[23]

ܥܶܒܪ̈ܝܐ. 12: 5 ـ 6  ܐܦ. ܡ̈ܰܬܠܶܐ. 3: 11 ـ 12 [24]

 ܠܰܘ ܒܪܳܐ ܡܩܰܒܶܠ ܠܰܐܠܳܗܳܐ܆ ܐܰ‌ܠܳܗܳܐ ܡܩܰܒܶܠ ܠܰܒܪܳܐ.[25]

ܣܝܡܬܐ ܕܬܐܘܡܐ ܐܘܕܘ. ܡܶܠܰܬ ܒܓܰܠ. ܣܪܰܒ. ܦܰܩܶܩ. ܒܕ̥ܳܐ.[26]

ܒܽܘܚܪܳܢܳܐ[27]

 ܡܫܰܢܶܝܢ[28]

ܡܬܝ. 13: 20 ـ 21 [29]

ܦܪܟܣܝܣ. 11: 25 ـ 28 [30]

ܐܫܥܝܐ. 65: 15 ـ 16 [31]

  ܥܶܒܪ̈ܝܐ. 12: 11 [32]

  ܐܫܥܝܐ. 64: 5 [33]

  ܡܬܝ. 7: 7 [34]

ܘܙܽܘܡܳܪܳܐ[35]

[36]ܒܠܶܫܳܢܳܐ ܝܰܘܢܳܝܳܐ܆ ܡܶܫܚܳܐ ܘܪ̈ܰܚܡܶܐ܆ ܫܰܘܝܽܘܬ ܩܳܠܳܐܐܺܝܬ ܠܗܽܘܢ. ܒܳܐܬܘܴ̈ܬܳܐ ܕܶܝܢ܆ ܠܐ ܫܘܶܝܢ.

  ܡܬܝ. 25: 4 [37]

  ܩܘ̈ܠܣܝܐ. 3: 12 [38]

ܡܶܬܢܰܓܕܺܝܢܰܢ[39]

 ܚܰܕ ܝܰܘܡܳܐ ܡܶܛܪܳܐ ܘܚܰܕ ܨܰܚܘܳܐ.[40]

ܕܢܝܐܝܠ. 13: 52 [41]

 ܙܢܰܝ̈ܳܐ[42]

ܡܶܢ ܩܦܰܛ. ܗܳܢܰܘ ܕܶܝܢ ܫܘܰܪ.[43]

 ܒܚܰܢܶܗ[44]

 ܡܰܘܫܶܛ[45]

 ܚܽܘܠܳܐ[46]

 ܡܰܪ̈ܟܢܳܢ[47]

ܐܝܘܒ. 24: 6 [48]

ܝܥܩܘܒ. 5: 4 [49]

ܡܣܰܟܶܐ[50]

ܣܶܦܪܳܐ ܕܰܒܪܝܬܐ. 7: 11 [51]

ܥܡܘܣ. 4: 7 ـ 9 [52]

  ܚܘܠܐ[53]

ܡܪܥܦ[54]

 ܦܘܠܣܐ[55]

ܒܪ ܐܣܝܪܐ. 34: 23 [56]

ܠܘܩܐ. 18: 27 [57]