ܡܺܐܡܪܳܐ ܕܰܬܡܳܢܬܰܥܣܰܪ

ܕܺܝܠܶܗ ܟܰܕ ܕܺܝܠܶܗ ܕܩܰܕܺܝܫܳܐ ܣܶܐܘܺܝܪܶܐ܆ ܡܺܐܡܪܳܐ ܕܒܰܐܝܢܳܐ ܙܢܳܐ ܣܝܳܡܳܐ ܕܩܳܢܽܘ̈ܢܶܐ ܩܰܕܺܝ̈ܫܶܐ ܡܦܰܩܶܕ ܕܙܳܕܶܩ ܠܰܢ ܠܡܶܥܒܰܕ ܒܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ. ܕܥܽܘܗܕܳܢܰܝ̈ܗܽܘܢ ܕܣܳܗ̈ܕܶܐ ܩܰܕܺܝ̈ܫܶܐ. ܘܡܶܛܽܠ ‌ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܆ ܐܶܬܶܐܡܰܪ ܕܶܝܢ ܒܝܰܘܡܳܐ ܕܫܰܒܬܳܐ.

ܠܳܐ ܐ̱ܢܳܫ ܡܶܢܟܽܘܢ ܢܶܬܕܰܡܰܪ ܡܶܛܽܠ ܕܰܠܘܳܬ݂ ܗܰܝܟܠܳܐ ܗܳܢܳܐ ܕܣܳܗ̈ܕܶܐ ܪ̈ܰܒܰܝ ܙܳܟܽܘܬܳܐ ܐܰܦܶܩܟܽܘܢ ܥܰܠ ܕܦܰܩܶܕܘ ܐܰܒܳܗܰܝ̈ܢ ܒܪ̈ܺܝܫܰܝ ܒܩܳܢܽܘ̈ܢܶܐ ܕܙܳܕܶܩ ܕܰܒܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܕܨܰܘܡܳܐ ܠܳܐ ܢܶܥܒܶܕ ܟܶܢܫܳܐ ܠܙܳܟܽܘܬܳܐ ܕܣܳܗ̈ܕܶܐ. ܐܶܢ ܓܶܝܪ ܥܒܰܕܢܰܢ܆ ܠܰܘ ܓܶܝܪ ܪܳܕܶܝܢܰܢ ܒܕܰܠܩܽܘܒܠܳܐ ܕܢܳܡܽܘ̈ܣܶܐ. ܡܦܳܤ ܗ̱ܘ̣ ܓܶܝܪ ܕܰܒܫܰܒܬܳܐ ܘܰܒܚܰܕܒܫܰܒܳܐ. ܕܶܐܢ ܢܣܛܝܘ^[1] ܡܫܰܡܠܰܝܬܳܐ ܥܰܠ ܕܶܒܚܬܳܐ ܕܠܳܐ ܕܡܳܐ ܠܰܡܩܰܪܳܒܽܘ. ܘܰܠܡܶܥܒܰܕ ܕܽܘܟܪܳܢܳܐ ܕܣܳܗ̈ܕܶܐ ܩܰܕܺܝ̈ܫܶܐ. ܒܪܰܡ ܐܳܦ ܗܳܝ ܡܶܢ ܝܰܬܺܝܪܽܘ ܐܳܡܰܪ ܐ̱ܢܳܐ: ܕܥܰܠ ܢܳܡܽܘܣܳܐ ܠܰܘ ܡܶܢ ܡ̈ܶܠܶܐ܆ ܐܶܠܳܐ ܝܰܬܺܝܪܳܐܺܝܬ ܡܰܢ ܨܶܒܝܳܢܳܐ ܡܶܬܬܕܺܝܢ. ܨܶܒܝܳܢܶܗ ܕܶܝܢ ܕܗܳܢܳܐ ܢܳܡܽܘܣܳܐ ܗܳܢܳܐ ‌ܐܺܝܬܰܘܗ̱ܝ܆ ܗܳܝ ܘܠܳܐ ܒܥܶܠܬܳܐ ܕܕܽܘܟܪܳܢܳܐ ܕܣܳܗ̈ܕܶܐ ܢܬܪܦ^[2] ܠܘܳܬ ܪܶܓܬܳܐ܆ ܘܰܠܒܶܝܬ ܡܰܫܬܝܳܐ ܘܰܠܘܳܬ ܪܰܒܽܘܬ݂ ܟܰܪܣܳܐ ܢܶܦܽܘܩ ܘܢܶܦܣܽܘܩ ܠܰܡܚܰܡܣܢܳܢܽܘܬܳܐ ܕܥܰܠ ܨܰܘܡܳܐ. ܗܳܢܽܘܢ ܓܶܝܪ ܕܣܳܝܡܺܝܢ ܢܳܡܽܘܣܳܐ܆ ܠܰܘ ܒܰܠܚܽܘܕ ܗܳܝ ܕܢܳܡܽܘܣܳܐ ܡܰܦܩܺܝܢ ܐܶܠܳܐ ܘܩܳܕܡܺܝܢ ܚܳܝܪܺܝܢ ….. ܣܩܝܢ ܠܒܽܘܛܳܠܰܢ ܕܰܥܬܺܝܕ ܕܢܶܬܦܪܶܩ ܥܠܰܘܗ̱ܝ ܟܰܕ ܠܳܐ … ܗܳܟܺܝܠ ‌ܐܺܝܩܳܪܶܗ …. ܐܰܒܺܝܕ … ܠܰܚܡܳܐ ܡܶܐܟܽܘܠܬܳܐ. … ܬܐ ܚܰܡܣܢܳܢܽܘܬܳܐ ܠܚܡܐ ܢܝܰܩܰܪ ܠܳܐ ܗܳܢܽܘܢ ܚܰܡܣܢܳܢܽܘܬܳܐ.

ܠܳܐ ܓܶܝܪ ܠܳܚܶܡ ܡܶܕܶܡ ܐ̱ܚܪܺܢܳܐ ܠܨܰܘܡܳܐ ܐܰܝܟ ܢܶܨܚܳܢ̈ܶܐ ܕܣܳܗ̈ܕܶܐ ܘܠܰܝܬ ܡܕܰܡܰܪ ܗܳܟܰܢܳܐ ܪܚܺܝܡ ܠܣܳܗ̈ܕܶܐ܆ ܐܰܝܟ ܨܰܘܡܳܐ ܘܰܓܠܺܝܙܽܘܬܳܐ ܕܡܶܢ ܡܶܐܟ̈ܠܳܬܳܐ܆ ܘܥܰܡ̈ܠܶܐ ܗܳܠܶܝܢ ܕܫܰܪܟܳܐ ܕܰܡܚܰܡܣܢܳܢܽܘܬܳܐ܆ ܗܳܠܶܝܢ ܕܺܐܝܬܰܝܗܽܘܢ ܩܰܕܺܝܡܽܘܬ݂ ܕܽܘܪ̈ܳܫܶܐ ܫܰܦܺܝܪ̈ܳܬܳܐ^[3] ܕܰܐܬܠܺܝܣܽܘܬܗܽܘܢ. ܘܣܰܓܺܝ ܟܺܝܬ ܚܳܕܶܝܢ ܗ̱ܘܰܘ ܘܡܶܬܬܢܺܝܚܺܝܢ ܗ̱ܘܰܘ܆ ܐܶ‎ܠܽܘ ܠܟܽܠܗܽܘܢ ܕܽܘܟܪ̈ܳܢܰܝܗܽܘܢ ܡܫܰܡܠܶܝܢ ܗ̱ܘܰܝܢ܆ ܥܰܡ ܕܰܐܝܟ ܗܳܕܶܐ ܢܙܺܝܪܽܘܬܳܐ. ܐܶܠܳܐ ܡܶܛܽܠ ܕܡܶܬܥܰܣܩܺܝܢ ܗ̱ܘܰܝܢ ܠܘܳܬ ܥܰܡ̈ܠܶܐ ܕܰܡܝܰܬܪܽܘܬܳܐ܆ ܘܠܰܘ ܣܰܓܺܝ̈ܶܐܐ ܪܳܗܛܺܝܢ ܗ̱ܘܰܘ ܠܡܶܬܟܰܢܳܫܽܘ ܠܚܰܓܳܐ ܕܣܳܗ̈ܕܶܐ܆ ܐܶ‎ܠܽܘ ܐܳܦ ܒܗܳܢܳܐ ܕܰܢܨܽܘܡܽܘܢ ܡܶܬܦܩܶܕ ܗ̱ܘܳܐ ܠܗܽܘܢ܆ ܡܶܛܽܠܗܳܕܶܐ ܕܢܶܚܕܶܐ ܘܰܢܥܰܕܥܶܕ ܒܥܽܘܗܕܳܢܳܐ ܕܰܐܬܠܺܝܣܽܘܬܗܽܘܢ ܫܒܰܩܘ ܠܰܢ܆ ܟܰܕ ܥܰܡ ܡܚܺܝܠܽܘܬܳܐ ܕܰܟܝܳܢܳܐ ܕܺܝܠܰܢ ܡܶܬܢܰܚܬܺܝܢ܆ ܘܰܒܡܳܪܗܽܘܢ ܡܶܬܕܰܡܶܝܢ܆ ܗܰܘ ܕܰܨܠܺܝܒܳܐ ܣܒܰܠ܆ ܐܰܝܟܰܢܳܐ ܕܰܢܫܰܟܶܢ ܠܰܢ ܚܺܐܪܽܘܬܳܐ.

ܘܳܐܦ ܗܺܝ ܕܶܝܢ ܗܳܕܶܐ ܕܢܶܚܕܶܐ ܘܰܢܥܰܕܥܶܕ ܒܕܽܘܟܪܳܢܳܐ ܕܣܳܗ̈ܕܶܐ܆ ܠܰܘ ܠܒܰܪ ܡܶܢ ܢܳܡܽܘ̈ܣܶܐ ܕܪܽܘܚܳܐ ܐܺܝܬܶܝܗ̇. ܩܕܳܡ ܡܰܢ ܓܶܝܪ ܕܣܰܒܪܳܐ ܓܰܠܝܳܐ^[4] ܢܩܰܒܶܠ^[5]܆ ܡܰܠܽܘܢ ܕܶܝܢ ܪܰܗܒܽܘܢܳܐ ܕܰܩܝܳܡܬܳܐ܆ ܗܰܘ ܕܺܐܝܬܰܘܗ̱ܝ ܩܝܳܡܬܳܐ ܬܠܺܝܬܳܝܰܬ̣ ܝܰܘ̈ܡܶܐ ܕܰܡܫܺܝܚܳܐ ܕܡܶܢ ܒܶܝܬ݂ ܡܺܝ̈ܬܶܐ܆ ܡܰܘܬܳܐ ‌ܐܺܝܬܰܘܗ̱ܝ ܗ̱ܘܳܐ ܡܰܘܬܳܐ. ܘܶܐܒܠܳܐ ܕܰܥܠܰܘܗ̱ܝ ܘܳܐܦܠܳܐ ܚܰܕ ܒܽܘܝܳܐܳܐ ܐܺܝܬ ܗ̱ܘܳܐ ܠܶܗ. ܟܰܕ ܕܶܝܢ ܗܽܘ ܐܰ‎ܠܳܗܳܐ ܘܡܶܠܬܳܐ ܒܝܰܕ ܡܶܐܬܺܝܬܶܗ ܗܳܝ ܕܒܰܒܣܰܪ ܕܢܰܚ ܠܰܢ܆ ܘܫܰܡܠܺܝ ܠܰܡܕܰܒܪܳܢܽܘܬܳܐ ܗܳܝ ܕܰܚܠܳܦܰܝܢ܆ ܘܰܫܪܳܐ ܠܰܐܣܽܘܪ̈ܶܐ ܗܳܠܶܝܢ ܕܒܰܫܝܽܘܠ܆ ܫܶܢܬܳܐ ܗ̣ܘܳܐ ܗܽܘ ܡܰܘܬܳܐ. ܘܥܺܐܕܳܐ ܝܰܬܺܝܪܳܐܺܝܬ ܘܠܰܘ ܐܶܒܠܳܐ܆ ܗܺܝ ܡܰܦܰܩܬܳܐ ܕܡܶܢ ܥܳܠܡܳܐ. ܘܗܰܘ ܕܰܠܝܽܗ̱ܘܕܳܝ̈ܶܐ ܛܳܠܽܘ̈ܡܶܐ ܓܙܰܡ ܒܝܰܕ ܢܒܺܝܳܐ ܘܶܐܡܰܪ܆ ܐܰ݀ܗܦܶܟ ܥܰܐܕܥܺܕܰܝ̈ܟܽܘܢ ܠܶܐܒܠܳܐ^[6]܆ ܠܶܐܒ̈ܠܶܐ ܕܺܝܠܰܢ ܚܰܓ̈ܶܐ ܥܒܰܕ ܐܶܢܽܘܢ. ܘܝܰܬܺܝܪܳܐܺܝܬ܆ ܗܳܢܽܘܢ ܐܰܝܠܶܝܢ ܕܰܒܝܰܕ ܕܽܘܒܳܪܳܐ ܛܳܒܳܐ ܘܰܡܝܰܬܪܳܐ ܠܘܳܬ ܩܝܳܡܬܳܐ ܐܶܬܥܰܬܰܕܘ܆ ܐܰܟܙܢܳܐ ܕܣܳܗ̈ܕܶܐ܆ ܡܶܛܽܠܗܳܕܶܐ. ܚܰܕܳܝ̈ܶܐ ܘܟܰܕ ܡܠܶܝܢ ܚ̱ܢܰܢ ܟܽܠܳܗ̇ ܚܰܕܽܘܬܳܐ܆ ܒܰܟܪܽܘܟܝܳܐ ܕܟܽܠ ܚܕܳܐ ܫܰܢ̱ܬܳܐ܆ ܠܡܰܘܬܳܐ ܕܣܳܗ̈ܕܶܐ ܡܥܰܕܥܕܺܝܢܰܢ ܚ̱ܢܰܢ. ܟܰܕ ܕܳܝܨܺܝܢܰܢ ܘܰܡܙܰܡܪܺܝܢܰܢ ܥܰܡ ܢܒܺܝܳܐ ܕܰܘܺܝܕ܆ ܘܥܰܡ ܗܰܝܡܳܢܽܘܬܳܐ ܫܰܪܺܝܪܬܳܐ ܐܳܡܪܺܝܢ ܚ̱ܢܰܢ܆ ܡܝܰܩܰܪ ܗ̱ܘ ܩܕܳܡ ܡܳܪܝܳܐ ܡܰܘܬܳܐ ܕܰܚܣܰܝ̈ܳܐ ܕܺܝܠܶܗ^[7].

ܙܳܕܶܩ ܗܳܟܺܝܠ ܕܳܐܦ ܠܢܺܝܫܳܐ ܘܳܐܦ ܠܡ̈ܶܠܶܐ܆ ܘܳܐܦ ܠܬܰܪܥܺܝܬܳܐ ܕܩܳܢܽܘ̈ܢܶܐ ܘܰܕܢܳܡܽܘ̈ܣܶܐ ܕܥܺܕܬܳܐ ܢܶܕܰܥ܆ ܘܗܳܟܰܢܳܐ ܢܶܬܒܰܝܰܢ܆ ܕܶܐܢ ܫܳܠ̈ܡܳܢ ܠܣܳܝܽܘܡܽܘܬ݂ ܢܳܡܽܘܣܳܐ܆ ܗܳܠܶܝܢ ܕܡܶܢܰܢ ܡܶܣܬܰܥܪ̈ܳܢ ܐܰܘ ܡܶܬܡܰܠ̈ܠܳܢ܆ ܘܠܳܐ ܐܰܝܟ ܝܽܗ̱ܘ̈ܕܳܝܶܐ ܢܶܣܬܰܡܶܐ܆ ܘܥܰܠ ܟܬܳܒܳܐ ܢܶܣܬܰܡܰܟ ܒܰܠܚܽܘܕ ܘܢܶܣܪܰܟ܆ ܘܰܠܥܰܝܢܳܐ ܢܚܰܦܶܐ܆ ܒܫܽܘܦܪܳܐ ܕܣܽܘ̈ܟܳܠܶܐ ܗܰܘ ܕܡܶܢ ܠܓܰܘ܆ ܗܳܢܽܘܢ ܕܰܒܡܳܪܰܢ ܘܰܐ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ ܡܶܬܥܰܕܠܺܝܢ ܗ̱ܘܰܘ ܐܰܝܟ ܕܰܒܡܰܢ ܕܫܰܒܬܳܐ ܫܳܪܶܐ ܗ̱ܘܳܐ܆ ܡܶܛܽܠ ܕܰܠܗܳܢܽܘܢ ܕܰܡܚܺܝܠܳܐܺܝܬ ܘܰܟܪܺܝܗܳܐܺܝܬ ܣܺܝܡܺܝܢ ܗ̱ܘܰܘ܆ ܒܶܗ ܒܝܰܘܡܳܐ ܡܰܫܘܶܐ ܗ̱ܘܳܐ ܠܡܰܚܠܳܡܽܘ܆ ܟܰܕ ܘܠܳܐ ܠܗܶܝܢ ܠܡ̈ܶܠܶܐ ܝܳܕܥܺܝܢ ܗ̱ܘܰܘ ܚܰܬܺܝܬܳܐܺܝܬ. ܘܳܐܦܠܳܐ ܠܳܗ̇ ܠܬܰܪܥܺܝܬܳܐ ܕܢܳܡܽܘܣܳܐ.

ܗܽܘ ܓܶܝܪ ܢܳܡܽܘܣܳܐ. ܟܰܕ ܡܶܛܽܠ ܥܺܐܕܳܐ ܕܦܰܛܺܝܪ̈ܶܐ ܡܦܰܩܶܕ ܗ̱ܘܳܐ܆ ܘܰܠܡܶܒܛܰܠ ܦܳܩܶܕ ܗ̱ܘܳܐ ܒܗܳܠܶܝܢ ܫܰܒܥܳܐ ܝܰܘ̈ܡܳܬܳܐ ܕܥܺܐܕܳܐ. ܐܰܝܟ ܡܳܐ ܕܳܐܦ ܒܫܰܒܬܳܐ܆ ܒܗܰܘ ܡܰܢ ܕܠܶܘܳܝ̈ܶܐ ܐܳܡܰܪ: ܕܟܽܠ ܥܒܳܕܳܐ ܕܦܽܘܠܚܳܢܳܐ ܠܳܐ ܬܶܥܒܕܽܘܢ^[8]. ܒܡܰܦܰܩܬܳܐ ܕܶܝܢ ܘܰܒܬܶܢܝܳܢ ܢܳܡܽܘܣܳܐ: ܟܰܕ ܐܰܝܟ ܗܰܘ ܕܰܡܚܰܘܶܐ ܠܚܰܝܠܳܗ̇ ܕܗܳܕܶܐ ܡܶܠܬܳܐ܆ ܐܳܡܰܪ ܒܗܳܢܳܐ ܙܢܳܐ. ܕܟܽܠ ܥܒܳܕܳܐ ܠܳܐ ܬܶܥܒܕܽܘܢ ܒܗܽܘܢ. ܒܪܰܡ ܟܽܠܗܶܝܢ ܗܳܠܶܝܢ ܕܢܶܬܥܰܒ̈ܕܳܢ ܠܢܰܦܫܳܐ܆ ܗܳܠܶܝܢ ܒܰܠܚܽܘܕ ܢܶܬܥܰܒ̈ܕܳܢ ܠܟܽܘܢ. ܐܰܝܟܰܢܳܐ ܕܺܝܕܺܝܥܬܳܐ ܬܶܗܘܶܐ ܐܺܝܬܶܝܗ̇܆ ܕܰܥܒܳܕܳܐ ܕܦܽܘܠܚܳܢܳܐ ܗܳܢܳܐ ‌ܐܺܝܬܰܘܗ̱ܝ܆ ܗܰܘ ܕܠܰܘ ܠܘܳܬ ܝܽܘܬܪܳܢܳܐ ܘܳܐܣܝܽܘܬܳܐ ܕܢܰܦܫܳܐ ܚܳܐܰܪ܆ ܐܶܠܳܐ ܠܘܳܬ ܬܶܫܡܶܫܬܳܐ ܕܗܰܢܺܝܽܐܘܬܳܐ ܒܶܣܪܳܢܳܝܬܳܐ ܟܺܝܬ ܘܰܕܒܳܣܡܳܐ܆ ܐܰܘ ܫܽܘܡܠܳܝܳܐ ܕܽܐܘܡܳܢܽܘܬܳܐ ܐܰܘ ܕܦܳܠܚܽܘܬܳܐ ܐܰܘ ܕܬܶܐܓܽܘܪܬܳܐ܆ ܐܰܘ ܕܰܐ̱ܚܪ̈ܳܢܝܳܬܳܐ ܕܕܳܡ̈ܝܳܢ ܠܗܶܝܢ܆ ܗܳܠܶܝܢ ܕܒܺܐܝ̈ܕܰܝܗܶܝܢ ܚܰܝ̈ܶܐ ܗܳܠܶܝܢ ܕܺܝܠܰܢ ܡܶܬܕܰܒܪܺܝܢ܆ ܗܳܝ ܟܺܝܬ ܕܰܒܫܰܒܬܳܐ ܠܡܶܥܒܰܕ ܟܰܠܝܳܐ ܗ̱ܘܳܬ.

ܗܳܝ ܕܶܝܢ ܕܠܰܡܫܰܪܝܽܘܬܳܐ ܕܦܰܓܪܳܐ. ܐܰܘ ܠܓܰܪܒܳܐ ܢܰܐܣܶܐ܆ ܐܰܝܟܰܢܳܐ ܠܰܘ ܠܘܳܬ݂ ܦܽܘܪܩܳܢܳܐ ܕܢܰܦܫܳܐ ܚܳܝܪܳܐ܆ ܕܡܶܬܟܰܦܦܳܐ ܡܶܬܚܰܢܳܢܳܐܺܝܬ^[9] ܒܚܰܫܳܐ ܕܦܰܓܪܳܐ^[10]. ܡܶܛܽܠܗܳܕܶܐ ܐܳܦ ܗܽܘ ܝܶܫܽܘܥ ܗܰܘ ܣܳܐܶܡ ܢܳܡܽܘܣܳܐ ܘܳܐܣܝܳܐ܆ ܘܰܕܝܰܬܺܝܪ ܡܶܢ ܗܰܘ ܕܺܝܠܶܗ܆ ܠܗܰܘ ܕܗܽܘ ܣܳܡܶܗ ܘܬܰܚܡܶܗ܆ ܠܝܽܗ̱ܘ̈ܕܳܝܶܐ ܗܳܢܽܘܢ ܕܠܳܐ ܗܰܘܢܳܐ. ܡܰܒܗܬܳܢܳܐܺܝܬ ܡܫܰܐܶܠ ܗ̱ܘܳܐ ܟܰܕ ܐܳܡܰܪ܆ ܐܶ݀ܫܰܐܶܠܟܽܘܢ ܡܳܢܳܐ ܫܰܠܺܝܛ ܒܫܰܒܬܳܐ. ܛܳܒܬܳܐ ܠܡܶܥܒܰܕ. ܐܰܘ ܒܺܝܫܬܳܐ ܠܡܶܥܒܰܕ. ܢܰܦܫܳܐ ܠܡܶܩܛܰܠ ‌ܐܰܘ ܠܡܶܦܪܰܩ^[11].

ܠܳܐ ܐ̱ܢܳܫ ܗܳܟܺܝܠ ܝܽܗ̱ܘܕܳܐܺܝܬ ܢܶܬܥܰܕܰܠ ܒܰܢ܆ ܕܰܠܕܽܘܟܪܳܢܳܐ ܕܰܐܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ ܒܗܳܠܶܝܢ ܝܰܘ̈ܡܳܬܳܐ ܕܨܰܘܡܳܐ ܫܰܡܠܺܝܢܰܢ. ܗܳܝ ܟܺܝܬ ܕܳܐܦܶܢ ܠܳܐ ܫܰܠܺܝܛ ܗ̱ܘܳܐ ܠܰܢ ܕܡܶܛܽܠ ܣܳܗ̈ܕܶܐ ܐ̱ܚܪ̈ܳܢܶܐ ܢܶܥܒܕܺܝܗ̇܆ ܐܶܠܳܐ ܒܪܰܡ ܡܶܛܽܠ ܗܳܠܶܝܢ ܐܰܪܒܥܺܝܢ ܣܳܗ̈ܕܶܐ܆ ܢܳܡܽܘܣܳܝܬܳܐ ܐܺܝܬܶܝܗ̇ ܗܳܕܶܐ. ܒܢܰܝ̈ܳܐ ܓܶܝܪ ܐܺܝܬܰܝܗܽܘܢ ܕܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܕܨܰܘܡܳܐ. ܟܰܕ ܟܽܠ ܚܰܕ ܝܰܘܡܳܐ ܚܰܕ ܐܰܬܠܺܝܛܳܐ ܘܣܳܗܕܳܐ ܝܺܠܶܕ ܠܰܢ. ܐܳܦ ܓܶܝܪ ܒܗܽܘܢ ܐܶܬܟܰܬܰܫܘ܆ ܘܰܒܝܰܕ ܩܰܕܺܝܫܽܘܬܳܐ ܘܚܰܝܠܳܐ ܕܺܝܠܗܽܘܢ ܐܶܬܚܰܝܰܠܘ܆ ܘܰܣܦܰܩܘ ܠܘܳܬ ܐܰܓܽܘܢܳܐ ܕܕܰܐܝܟ ܗܳܢܳܐ. ܟܺܐܢܳܐ ܗܳܟܺܝܠ ܕܰܐܒܳܗ̈ܶܐ ܥܰܠ ܬܰܟܬܽܘ̈ܫܶܐ ܕܰܒܢܰܝ̈ܗܽܘܢ ܢܶܚܕܽܘܢ܆ ܘܠܳܐ ܢܰܥܘܶܠ ܒܗܽܘܢ܆ ܘܰܠܝܰܘ̈ܡܳܬܳܐ ܐ̱ܚܪ̈ܳܢܶܐ ܢܶܬܶܠ ܕܽܘܟܪܳܢܗܽܘܢ ܕܗܳܠܶܝܢ.

ܢܺܐܠܦܽܘܢ ܟܽܠܗܽܘܢ ܒܢܰܝ̈ܢܳܫܳܐ܆ ܕܡܰܪܕܽܘܬܳܐ ܕܨܰܘܡܳܐ܆ ܘܰܠܘܳܬ ܣܳܗܕܽܘܬܳܐ ܝܳܕܥܳܐ ܠܰܡܢܰܦܳܩܽܘ ܘܰܠܡܶܪܕܳܐ ܠܰܛܠܳܝ̈ܶܐ܆ ܘܠܰܘ ܠܚܰܕ ܐܰܘ ܠܰܬܪܶܝܢ܆ ܐܶܠܳܐ ܠܥܺܕܬܳܐ ܟܽܠܳܗ̇ ܟܢܺܝܫܳܐܺܝܬ. ܘܰܠܟܶܢܫܳܐ ܕܦܳܠ̈ܚܶܐ܆ ܘܠܰܦܠܰܓܳܐ ܕܰܡܙܰܝ̈ܢܶܐ ܒܟܽܘܠܳܝܽܘܬ݂ ܙܰܝܢܳܐ ܗܳܝ ܡܶܬܗܰܘܢܳܢܺܝܬܳܐ. ܗܳܢܽܘܢ ܟܺܝܬ ܕܶܐܬܰܘ ܠܰܡܨܰܥܬܳܐ܆ ܟܰܕ ܗܰܘ ܕܗܳܝܕܶܝܢ ܕܳܐܶܢ ܗ̱ܘܳܐ ܐܰܝܬܺܝ ܐܰܩܺܝܡ ܐܶܢܽܘܢ ܩܕܳܡܰܘ̈ܗ̱ܝ. ܕܰܡܫܰܚ̈ܠܦܶܐ ܡܰܢ ܐܺܝܬܰܝܗܽܘܢ ܗ̱ܘܰܘ ܒܓܶܢܣܳܐ ܘܰܒܦܰܓܪ̈ܶܐ. ܫܘܰܝ̈ܳܐ ܕܶܝܢ ܒܩܰܘܡܬܳܐ ܗܳܝ ܕܪܽܘܚܳܐ܆ ܘܰܕܡܰܛܺܝ̣̈ܺܝ̣ܢ^[12] ܗ̱ܘܰܘ ܠܓܰܒܪܳܐ ܡܫܰܡܠܝܳܐ ܐܰܝܟ ܡܶܠܬܶܗ ܕܦܰܘܠܽܘܣ^[13].

ܡܶܛܽܠܗܳܕܶܐ. ܐܳܦ ܒܰܚܘܺܝܚܽܘܬܳܐ܆ ܫܰܘ̈ܝ݂ܰܝ݂ ܒܬܰܟܬܽܘܫܳܐ ܐܺܝܬܰܝܗܽܘܢ ܗ̱ܘܰܘ. ܘܝܰܨܺܝܦܳܐܺܝܬ ܐܰܝܟ ܡܙܰܝܢ̈ܶܐ܆ ܘܚܰܬܺܝܬܳܐܺܝܬ ܐܰܝܟ ܛܰܪ̈ܩܶܐ܆ ܕܝܳܕܥܺܝܢ ܛܶܟ̈ܣܶܐ ܕܰܩܪܳܒܳܐ܆ ܘܕܰܐܝܟܰܢܳܐ ܙܳܕܶܩ ܠܡܶܦܰܩ ܥܰܠ ܡܰܩܪ̈ܒܳܢܶܐ܆ ܘܰܕܝܰܠܺܝܦܺܝܢ ܫܠܺܝܚܳܐܺܝܬ ܠܡܶܫܒܳܐ ܠܟܽܠ ܣܽܘܟܳܠܳܐ ܠܰܡܫܺܝܚܳܐ܆ ܘܠܰܡܢܰܣܝܽܘܬܳܐ ܕܰܩܪ̈ܳܒܶܐ܆ ܠܘܳܬ݂ ܣܶܕܪܳܐ ܪܽܘܚܳܢܳܝܳܐ ܐܰܥܒܰܪܘ ܣܳܡܘ.

ܘܟܰܕ ܠܗܰܘ ܕܰܛܪܽܘܢܳܐܺܝܬ ܝܳܬܶܒ ܗ̱ܘܳܐ ܒܪܺܝܫܳܐ ܡܡܰܠܠܺܝܢ ܗܘܰܘ܆ ܬܪܶܝܢ ܐ̱ܢܳܫܺܝ̈ܢ ܡܶܢܗܽܘܢ ܥܳܒܕܺܝܢ ܗ̱ܘܰܘ ܪ̈ܺܝܫܳܢܶܐ ܕܡܶܠܬܳܐ܆ ܟܰܕ ܐܰܝܟ ܕܰܩܕܳܡ ܦܰܪܨܽܘܦܳܐ ܕܟܽܠܳܗ̇ ܦܠܰܓܳܐ ܐܰܩܺܝܡܘ ܐܶܢܽܘܢ܆ ܟܰܕ ܗܶܢܽܘܢ ܠܗܽܘܢ ܛܰܟܶܣܘ ܒܶܣܬܰܪܗܽܘܢ܆ ܘܗܳܟܰܢܳܐ ܝܳܗܒܺܝܢ ܗ̱ܘܰܘ ܠܒܺܝܒܽܘܬܳܐ ܠܗܳܠܶܝܢ ܕܡܶܬܰܐܡܪ̈ܳܢ ܗ̱ܘܰܝ̈. ܫܡܳܐ ܠܚܰܕ ܡܰܢ ܐܺܝܬ ܗ̱ܘܳܐ ܩܐܢܕܝܘܤ. ܠܗܰܘ ܕܶܝܢ ܐ̱ܚܪܺܢܳܐ ܩܘܪܝܘܢ. ܬܪ̈ܰܝܗܽܘܢ ܕܶܝܢ ܗܳܢܽܘܢ܆ ܠܰܡܕܰܒܳܪܽܘ ܦܳܠ̈ܚܶܐ ܪܽܘܚܳܢܳܐܺܝܬ ܪܳܕܶܝܢ ܗ̱ܘܰܘ.

ܐܶܡܰܬܝ ܡܰܢ ܕܰܡܫܰܓܶܫ ܗ̱ܘܳܐ ܗܰܘ ܕܕܳܐܶܢ ܗ̱ܘܳܐ܆ ܝܰܬܺܝܪ ܡܳܪ̈ܳܢܳܝܶܐ ܥܳܒܕܺܝܢ ܗ̱ܘܰܘ ܠܗܽܘܢ ܠܦܽܘܢܳܝ ܦܶܬܓܳܡ̈ܶܐ. ܟܰܕ ܕܳܚܠܺܝܢ ܗ̱ܘܰܘ܆ ܕܕܰܠܡܳܐ ܗܽܘ ܫܽܘܓܳܫܳܐ ܠܚܺܝܨܽܘܬܳܐ ܕܓܰܢ̱ܒܳܪܽܘܬܗܽܘܢ ܢܪܰܦܶܐ ܗ̱ܘܳܐ. ܐܶܡܰܬܝ ܕܶܝܢ ܬܽܘܒ ܕܢܶܬܒܰܥܪܰܪ ܗ̱ܘܳܐ ܟܰܕ ܡܶܫܬܰܚܠܰܦ܆ ܟܰܕ ܡܶܬܥܰܙܰܙ ܒܓܰܪ̈ܡܶܐ܆ ܐܰܟܚܕܳܐ ܕܶܝܢ ܘܟܰܕ ܡܰܚ̈ܘܳܬܳܐ ܠܳܐ ܡܶܬܰܐܣܝܳܢ̈ܝܳܬܳܐ ܚܠܰܛ ܗ̱ܘܳܐ܆ ܘܰܒܟܺܐܦ̈ܶܐ ܦܳܩܶܕ ܗ̱ܘܳܐ ܕܰܢܬܰܒܪܽܘܢ ܐܰܦܰܝ̈ܗܽܘܢ܆ ܗܳܝܕܶܝܢ ܬܽܘܒ ܗܳܠܶܝܢ ܟܰܕ ܗܳܦܟܺܝܢ ܗ̱ܘܰܘ ܡܶܬܠܰܚܡܺܝܢ܆ ܥܰܡ ܢܺܝܚܽܘܬܳܐ ܕܦܰܐܝܳܐ ܡܰܦܩܺܝܢ ܗ̱ܘܰܘ ܠܗܶܝܢ ܠܡ̈ܶܠܶܐ. ܟܰܕ ܡܶܬܕܰܡܶܝܢ ܗ̱ܘܰܘ܆ ܠܰܐܠܳܗܰܢ ܘܡܰܠܦܳܢܳܐ ܗܰܘ ܕܶܐܬܒܰܣܰܪ܆ ܗܰܘ ܕܳܐܡܰܪ ܠܥܰܒܕܳܐ ܗܰܘ ܕܰܡܚܳܝܗ̱ܝ ܥܰܠ ܦܰܟܶܗ܆ ܕܶܐܢ ܡܰܢ ܒܺܝܫܳܐܺܝܬ ܡܰܠܠܶܬ݂ ܐܰܣܗܶܕ ܥܰܠ ܒܺܝܫܬܳܐ܆ ܐܶܢ ܕܶܝܢ ܛܳܒܳܐܺܝܬ܆ ܠܡܳܢܳܐ ܡܳܚܶܐ ܐܰܢ̱ܬ ܠܺܝ^[14]؟

ܐܳܘ ܠܛܽܘܦܣܳܐ ܕܢܰܓܺܝܪܽܘܬ݂ ܪܽܘܚܳܐ܆ ܕܣܳܦܶܩ ܡܰܢ ܕܢܳܓܶܕ ܠܘܳܬ ܕܽܘܡܝܳܐ܆ ܙܳܟܶܐ ܕܶܝܢ ܠܟܽܠܳܗ̇ ܡܕܰܡܝܳܢܽܘܬܳܐ. ܐܳܦܶܢ ܓܶܝܪ ܐ̱ܢܳܫ ܚܰܬܺܝܬܳܐܺܝܬ ܒܟܽܠ. ܢܕܰܡܶܐ ܒܶܗ܆ ܗܳܝ ܕܰܡܝܰܬܪܳܐ ܠܗܰܘ ܬܶܗܘܶܐ܆ ܒܗܳܝ ܕܰܐ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ܆ ܘܰܠܗܳܠܶܝܢ ܕܰܐܝܟ ܗܳܟܰܢ ܨܶܒܝܳܢܳܐܺܝܬ ܡܶܬܪܡܶܐ ܗ̱ܘܳܐ.

ܘܳܐܦ ܚܢܰܢ ܗܳܟܺܝܠ܆ ܟܰܕ ܠܰܡܕܰܒܪܳܢܽܘܬ ܦܳܠ̈ܚܶܐ ܕܣܳܗ̈ܕܶܐ ܝܺܠܶܦܢܰܢ܆ ܠܘܳܬ ܡܰܢ ܙܳܢܝܽܘܬܳܐ ܕܰܡܪܰܦܝܳܐ܆ ܢܶܪܓܰܙ. ܠܘܳܬ ܕܶܝܢ ܚܶܡܬܳܐ ܗܳܝ ܕܥܳܒܕܳܐ ܠܰܢ ܒܰܥܪܺܝܪ̈ܳܝܶܐ ܐܰܝܟ ܚܰܝ̈ܘܳܬ ܫܶܢܳܐ܆ ܢܺܝܚܽܘܬܳܐ ܢܶ݀ܬܥܰܢܘܶܐ. ܐܺܝܬܰܘܗ̱ܝ ܓܶܝܪ ܐܳܦ ܗܳܫܳܐ ܙܰܒܢܳܐ ܕܣܳܗܕܽܘܬܳܐ ܐܶܢ ܢܶܨܒܶܐ.

ܗܳܝܕܶܝܢ ܡܰܢ ܗܳܟܺܝܠ ܗܰܘ ܕܕܳܐܶܢ ܗ̱ܘܳܐ܆ ܟܰܕ ܚܙܳܐ ܕܠܳܐ ܒܰܥܪܺܝܪܳܝܽܘܬܳܐ ܣܶܪܕܰܬ݂ ܐܶܢܽܘܢ܆ ܘܳܐܦܠܳܐ ܫܽܘܓܳܫܳܐ ܓܢܰܒ ܐܶܢܽܘܢ ܠܣܳܗ̈ܕܶܐ܆ ܐܶܠܳܐ ܐܰܪܓܶܫܘ ܗ̱ܘܰܘ ܒܰܟܡܺܐܢܶܗ ܘܓܳܚܟܺܝܢ ܗ̱ܘܰܘ ܥܰܠ ܫܟܳܚܬܳܐ ܕܬܰܪܥܺܝܬܶܗ܆ ܘܩܳܪܶܝܢ ܗ̱ܘܰܘ ܠܶܗ ܐܰܓܪܺܝܩܽܘܠܰܐܘܳܤ ܕܰܐܝܟ ܒܠܶܫܳܢܳܐ ܪܽܘܡܳܝܳܐ ܡܶܫܬܰܡܰܗ܆ ܕܢܶܫܬܰܡܰܗ ܗܳܟܰܢܳܐ ܠܳܚܡܳܐܺܝܬ ܐܰܝܟ ܕܰܒܡܰܡܠ̱ܠܳܐ ܝܰܘܢܳܝܳܐ܆ ܡܶܛܽܠ ܗܳܝ ܕܒܰܥܪܺܝܪܳܝܳܐ ‌ܐܺܝܬܰܘܗ̱ܝ ܗ̱ܘܳܐ ܘܫܰܓܽܘܫܬܳܢܳܐ܆ ܟܰܕ ܣܰܓܺܝ ܐܶܬܓܰܘܙܰܠ ܒܚܶܡܬܳܐ܆ ܘܰܠܟܽܠܗܽܘܢ ܡܰܢ ܐܽܘܪ̈ܓܰܢܶܐ ܕܫܶܢ̈ܕܶܐ ܫܰܡܰܗ ܗܳܢܽܘܢ ܡܫܰܚܠ̈ܦܶܐ ܘܕܰܥܝܳܕܳܐ܆ ܠܟܽܠܗܶܝܢ ܕܶܝܢ ܚܳܙܶܐ ܗ̱ܘܳܐ ܕܒܳܗ̇ ܒܰܕܡܽܘܬܳܐ ܡܶܬܓܰܚ̈ܟܳܢ ܗ̱ܘܰܝ̈ ܘܡܶܬܒܰܣ̈ܝܳܢ܆ ܠܘܳܬ ܐܳܕܫܳܐ ܡܶܕܶܡ ܐܰܟܣܢܳܝܳܐ ܕܬܰܫܢܺܝܩܳܐ ܐܶܬܗܰܦܰܟ ܒܗܰܘܢܶܗ܆ ܐܰܝܟܰܢܳܐ ܕܰܟܠܺܝܠܳܐ ܥܦܺܝܦܳܐ ܡܶܢ ܗܳܕܶܐ ܠܣܳܗ̈ܕܶܐ ܢܶܓܕܽܘܠ. ܚܰܕ ܡܰܢ܆ ܒܗܳܝ ܕܫܶܢ̈ܕܶܐ ܗܳܢܽܘܢ ܕܰܡܥܰܝܕܺܝܢ ܗ̱ܘܰܘ܆ ܒܨܺܝܪ̈ܶܐ ܐܶܬܚܙܺܝܘ ܡܶܢ ܓܰܢ̱ܒܳܪܽܘܬܗܽܘܢ ܘܰܡܝܰܬܪܽܘܬܗܽܘܢ. ܐ̱ܚܪܺܢܳܐ ܕܶܝܢ܆ ܒܗܳܝ ܕܫܶܢܕܳܐ ܗܰܘ ܕܠܳܐ ܡܥܰܝܰܕ ܗ̱ܘܳܐ ܡܥܰܙܝܳܢܳܐܺܝܬ ܘܚܰܝܠܬܳܢܳܐܺܝܬ ܣܰܝܒܰܪܘ.

ܬܚܶܝܬ ܫܡܰܝܳܐ ܓܶܝܪ ܘܟܰܕ ܥܰܪ̈ܛܶܠܳܝ݂ܺܝ݂ܢ ܟܽܠܶܗ ܠܺܠܝܳܐ ܠܰܡܫܰܡܠܳܝܽܘ ܐܶܬܦܰܩܰܕܘ. ܘܰܒܡܰܫܒܳܐ ܡܰܢ ܗܰܘ ܕܝܰܬܺܝܪ ܚܰܪܺܝܦ ܗ̱ܘܳܐ ܕܡܶܢ ܓܰܪܒܝܳܐ. ܡܶܬܢܰܫܒܺܝܢ ܗ̱ܘܰܘ. ܒܰܓܠܺܝܕܳܐ ܕܶܝܢ ܘܰܒܬܰܠܓܳܐ ܗܰܘ ܕܩܺܝܩܳܐ ܡܶܬܛܰܡܪܺܝܢ^[15]. ܒܝܰܡܬܳܐ ܕܶܝܢ ܡܚܰܡܣܢܺܝܢ ܗ̱ܘܰܘ. ܟܰܕ ܛܳܪܶܝܢ ܗ̱ܘܰܘ ܒܗܽܘܢ ܓܰܠ̈ܠܶܐ ܕܡܰܝ̈ܳܐ. ܒܰܓܠܺܝܕܳܐ ܡܰܢ ܡܶܬܩܰܒܥܺܝܢ ܗ̱ܘܰܘ. ܟܽܠܗܶܝܢ ܕܶܝܢ܆ ܠܘܳܬ݂ ܡܰܘܬܳܐ ܩܛܺܝܪܳܝܳܐ ܐܰܟܚܕܳܐ ܪ̈ܳܕܦܳܢ ܗ̱ܘܰܝ̈ ܠܗܽܘܢ. ܗܳܠܶܝܢ ܕܰܚܕܳܐ ܡܶܢܗܶܝܢ ܒܰܠܚܽܘܕ܆ ܕܣܳܦܩܳܐ ܐܺܝܬܶܝܗ̇ ܗ̱ܘܳܬ݂܆ ܠܡܰܝܬܳܝܽܘ ܐܶܢܽܘܢ ܠܰܐܒܕܳܢܳܐ ܡܫܰܡܠܝܳܐ ܘܠܰܚܒܳܠܳܐ.

ܐܷܠܳܐ ܐܰܝܟ ܕܥܰܠ ܥܰܪܣܳܐ ܪܰܟܺܝܟܬܳܐ ܣܳܒܪܺܝܢ ܗ̱ܘܰܘ ܕܺܐܝܬܰܝܗܽܘܢ ܗܳܢܽܘܢ ܚܰܝܠ̈ܬܳܢܶܐ܆ ܥܰܠ ܬܰܠܓܳܐ ܗܰܘ ܘܥܰܠ ܝܰܡܬܳܐ. ܘܟܰܕ ܪ̈ܺܝܫܰܝ ܗܰܕܳܡܰܝ̈ܗܽܘܢ ܡܶܬܦܰܣܩܺܝܢ ܗ̱ܘܰܘ ܘܚܳܡܺܝܢ ܗ̱ܘܰܘ ܒܩܽܘܪܳܐ܆ ܘܫܰܚܺܝܢܽܘܬܶܗ ܕܦܰܓܪܳܐ ܠܘܳܬ݂ ܗܳܠܶܝܢ ܕܰܠܓܰܘ. ܘܰܠܥܽܘܡܩܳܐ ܥܳܪܩܳܐ ܗ̱ܘܳܬ݂܆ ܗܶܢܽܘܢ ܠܪܶܬܚܳܐ ܕܪܽܘܚܳܐ. ܠܒܰܪ ܡܫܰܕܪܺܝܢ ܗ̱ܘܰܘ܆ ܘܚܳܒܫܺܝܢ ܗ̱ܘܰܘ ܠܦܰܓܪܳܐ ܟܰܕ ܗܳܘܶܐ ܗ̱ܘܳܐ ܡܺܝܬܳܐ. ܘܚܰܡܺܝܡܽܘܬܳܗ̇ ܕܗܰܝܡܳܢܽܘܬܳܐ. ܟܰܕ ܠܽܘܩܒܰܠ ܗܳܠܶܝܢ ܕܡܰܩܪ̈ܳܢ ܗ̱ܘܰܝ̈ ܡܶܩܬܰܪܬܚܳܐ^[16] ܗ̱ܘܳܬ݂܆ ܡܳܫܚܳܐ ܗ̱ܘܳܬ ܠܗܽܘܢ ܣܰܓܺܝ ܠܰܐܬܠܺܝ̈ܛܶܐ. ܡܶܬܚܰܫܒܺܝܢ ܗ̱ܘܰܘ ܒܪܶܥܝܳܢܗܽܘܢ܆ ܠܚܽܘܪܳܩܳܐ ܕܫܶܢ̈ܶܐ ܗܰܘ ܕܰܓܙܺܝܡ ܗ̱ܘܳܐ. ܕܬܰܫܢܺܝܩܳܐ ܗܰܘ ܕܰܠܥܳܠܰܡ܆ ܘܰܠܚܰܪܺܝܦܽܘܬܶܗ ܕܥܰܪܝܳܐ ܕܰܡܠܶܐ ܙܰܒܢܳܐ܆ ܘܠܳܐ ܡܶܕܶܡ ܚܳܫܒܺܝܢ ܗ̱ܘܰܘ.

ܘܶܐܢ ܐ̱ܢܳܫ ܡܶܢܗܽܘܢ ܒܕܽܘܟ ܡܶܢ ܟܺܐܒܳܐ ܡܶܬܢܓܶܕ ܗ̱ܘܳܐ ܠܘܳܬ݂ ܚܰܫܳܐ ܐܰܘ ܬܶܢܰܚܬܳܐ܆ ܫܳܡܰܥ ܗ̱ܘܳܐ ܠܩܰܪܺܝܒܶܗ ܕܦܺܝܠܳܣܽܘܦܺܝܣܳܐ ܥܳܒܶܕ ܗ̱ܘܳܐ ܠܽܘܩܒܰܠ ܟܺܐܒ̈ܶܐ ܒܙܽܘܡܳܪܳܐ ܘܒܰܨܠܽܘܬܳܐ܆ ܘܰܡܙܰܡܰܪ ܗ̱ܘܳܐ ܥܰܡܶܗ ܡܶܚܕܳܐ܆ ܘܰܐܟܚܕܳܐ ܦܺܝܠܳܣܽܘܦܺܝܣܳܐ ܥܳܒܶܕ ܗ̱ܘܳܐ ܥܰܡܶܗ܆ ܘܰܠܘܳܬ ܬܰܘܕܺܝܬܳܐ ܡܶܬܗܦܶܟ ܗ̱ܘܳܐ. ܗܳܟܰܢܳܐ ܐܳܚܕܺܝܢ ܗ̱ܘܰܘ ܗܶܢܽܘܢ ܠܗܽܘܢ܆ ܦܳܠ̈ܚܶܐ ܗܳܢܽܘܢ. ܛܳܒ̈ܶܐ ܘܡܶܬܟܰܬܫܳܢ̈ܶܐ ܕܰܐܟܚܕܳܐ܆ ܘܰܠܣܽܘܝܳܥܳܐ^[17]܆ ܕܰܐܟܚܕܳܐ. ܐܰܝܟ ܕܥܰܠ ܣܶܕܪܳܐ ܕܰܩܪܳܒܳܐ܆ ܠܳܐ ܡܶܣܬܰܕܩܳܢܳܐ ܢܳܛܪܺܝܢ ܗ̱ܘܰܘ ܠܶܗ.

ܡܶܢ ܫܡܰܝܳܐ ܕܶܝܢ ܚܳܐܰܪ ܗ̱ܘܳܐ ܒܗܽܘܢ ܣܳܐܶܡ ܐܰܓܽܘܢܳܐ܆ ܟܰܕ ܚܳܕܝܳܐ ܗ̱ܘܳܬ ܐܰܟܚܕܳܐ ܓܽܘܕܳܐ ܕܡܰܠܰܐܟ̈ܶܐ܆ ܘܰܠܘܳܬ݂ ܐܽܘܪܳܥܳܐ ܕܺܝܠܗܽܘܢ ܡܶܬܛܰܝܒܳܐ ܗ̱ܘܳܬ݂܆ ܘܰܡܛܰܝܒܳܐ ܗ̱ܘܳܬ ܠܗܽܘܢ ܠܰܐܬܠܺܝ̈ܛܶܐ ܬܶܫܒ̈ܚܳܬܳܐ ܕܥܰܠ ܙܳܟܽܘܬܳܐ܆ ܘܢܽܘܗܪܳܐ ܟܰܕ ܡܶܢ ܠܥܶܠ ܢܳܚܶܬ݂ ܗ̱ܘܳܐ܆ ܠܶܣܛܰܕܺܝܽܘܢ ܕܰܐܓܽܘܢܳܐ ܡܰܒܪܶܩ ܗ̱ܘܳܐ ܘܡܰܢܗܰܪ܆ ܐܰܚܽܘܗ̱ܝ ܕܗܰܘ ܢܽܘܗܪܳܐ܆ ܗܰܘ ܟܺܝܬ ܕܗܽܘ ܡܳܪܰܢ ܚܰܘܺܝ ܥܰܠ ܛܽܘܪܳܐ ܠܬܰܠܡܺܝ̈ܕܶܐ܆ ܐܶܡܰܬܝ ܕܦܰܪܨܽܘܦܳܐ ܕܺܝܠܶܗ ܐܰܢܗܰܪ ܐܰܝܟ ܫܶܡܫܳܐ܆ ܘܢܰܚܬܰܘ̈ܗ̱ܝ ܗܘ̣ܰܘ ܚܶܘܳܪ̈ܶܐ ܐܰܝܟ ܢܽܘܗܪܳܐ^[18]. ܪܚܺܝܡܳܐ ܠܶܗ ܓܶܝܪ ܕܰܢܫܰܒܰܚ ܠܥܰܒܕܰܘ̈ܗ̱ܝ ܫܰܪܺܝܪ̈ܶܐ ܐܰܝܟ ܕܰܠܢܰܦܫܶܗ.

ܐܳܦ ܟܺܝܬ ܘܰܟܠܺܝ̈ܠܶܐ ܢܳܚܬܺܝܢ ܗ̱ܘܰܘ ܠܗܳܢܽܘܢ ܕܡܶܬܟܰܬܫܺܝܢ ܗ̱ܘܰܘ. ܕܰܫܘܶܝܢ ܒܡܶܢܝܳܢܗܽܘܢ܆ ܟܰܕ ܚܰܕ ܒܰܠܚܽܘܕ ܚܰܣܺܝܪܺܝܢ ܗ̱ܘܰܘ. ܚܰܕ ܓܶܝܪ ܡܶܢܗܽܘܢ ܟܰܕ ܠܘܳܬ݂ ܥܰܡ̈ܠܶܐ^[19] ܐܰܫܦܶܠ ܘܶܐܫܬܐܶܠ܆ ܠܒܰܠܰܢܺܐ ܕܰܒܩܽܘܪܒܳܐ ܐܺܝܬܶܝܗ̇ ܗ̱ܘܳܬ ܪܗܶܛ ܐܶܙܰܠ. ܘܡܶܚܕܳܐ ܥܰܡܳܗ̇ ܕܗܳܝ ܕܰܐܪܓܶܫ ܒܪܶܬܚܳܐ ܕܡܶܢ ܒܰܠܰܢܺܐ܆ ܡܺܝܬܳܐ ‌ܐܺܝܬܰܘܗ̱ܝ ܗ̱ܘܳܐ ܟܰܕ ܒܶܣܪܶܗ ܐܶܫܬܪܺܝ܆ ܘܡܰܘܬܳܐ ܥܦܺܝܦܳܐ ܡܺܝܬ. ܚܰܕ ܡܰܢ ܘܩܰܕܡܳܝܳܐ܆ ܗܰܘ ܕܰܚܛܺܝܬܳܐ. ܗܰܘ ܕܰܠܥܳܠܰܡ ܘܰܒܗܰܘ ܕܢܰܦܫܳܐ ܡܳܝܬܳܐ. ܕܰܬܪܶܝܢ ܕܶܝܢ܆ ܗܰܘ ܕܡܰܓܗܶܐ ܡܶܢ ܚܰܝ̈ܶܐ ܗܳܠܶܝܢ ܣܪ̈ܺܝܩܶܐ ܘܕܰܡܠܶܐ ܙܰܒܢܳܐ.

ܡܶܬܬܥܺܝܩܺܝܢ ܗ̱ܘܰܘ ܡܰܢ ܗܳܟܺܝܠ ܗܳܢܽܘܢ ܒܢܰܝ̈ ܦܳܠܚܽܘܬܶܗ ܘܟܰܕ ܡܶܢ ܟܰܪܝܽܘܬܳܐ ܡܕܰܘܕܺܝܢ ܗ̱ܘܰܘ܆ ܒܰܚܙܳܬܳܐ ܕܢܽܘܗܪܳܐ ܗܰܘ ܫܡܰܝܳܢܳܐ ܠܳܐ ܚܳܕܶܝܢ ܗ̱ܘܰܘ. ܘܰܠܘܳܬ ܟܠܺܝ̈ܠܶܐ ܠܳܐ ܐܶܬܦܨܰܚܘ. ܐܶܠܳܐ ܟܰܕ ܬܰܠܡܺܝ̈ܕܶܐ ܕܰܡܫܺܝܚܳܐ ܐܺܝܬܰܝܗܽܘܢ ܗ̱ܘܰܘ ܘܪ̈ܳܚܡܰܝ ܐܰܚ̈ܶܐ܆ ܥܰܠ ܡܰܦܰܩܬܳܐ ܘܚܽܘܣܪܳܢܳܐ ܕܰܐܚܽܘܗܽܘܢ ܒܳܟܶܝܢ ܗ̱ܘܰܘ܆ ܘܥܰܠ ܦܣܳܩܳܐ ܕܟܶܢܫܳܐ ܘܡܶܢܝܳܢܳܐ ܡܝܰܩܪܳܐ ܗܰܘ ܕܰܐܪܒܥܺܝܢ.

ܐܷܠܳܐ ܐܰܒܳܗ̈ܶܐ^[20] ܗܳܢܽܘܢ ܪ̈ܳܚܡܰܝ ܒܢܰܝ̈ܳܐ܆ ܝܰܘ̈ܡܳܬܳܐ ܐܰܪܒܥܺܝܢ ܐܳܡܰܪ ܐ̱ܢܳܐ. ܗܳܢܽܘܢ ܕܨܰܘܡܳܐ܆ ܟܰܕ ܡܶܕܶܡ ܪܰܒܳܐ ܡܶܫܟܚܺܝܢ^[21]܆ ܡܶܛܽܠ ‌ܐܰ‎ܠܳܗܳܐ ܕܶܐܬܒܰܣܰܪ ܗܰܘ ܕܨܳܡ ܐܶܢܽܘܢ ܠܗܳܠܶܝܢ܆ ܡܶܢ ܟܺܐܒܳܐ ܘܕܽܘܘܳܢܳܐ ܕܰܒܢܰܝ̈ܗܽܘܢ ܠܳܐ ܐܰܗܡܺܝܘ܆ ܠܗܳܠܶܝܢ ܕܰܒܝܰܕ ܓܠܺܝܕܳܐ ܘܬܰܠܓܳܐ ܒܛܶܢܘ ܐܶܢܽܘܢ. ܐܶܠܳܐ ܡܶܚܕܳܐ ܒܰܪܫܳܥܬܶܗ ܒܛܶܢܘ ܘܺܝܠܶܕܘ ܘܰܐܥܶܠܘ ܐ̱ܚܪܺܢܳܐ ܚܠܳܦ ܗܰܘ ܕܶܐܒܰܕ.

ܕܰܐܝܟ ܗܳܟܰܢܳܐ ܓܶܝܪ ‌ܐܺܝܬܰܘܗ̱ܝ ܝܰܠܕܳܐ ܪܽܘܚܳܢܳܝܳܐ. ܕܰܩܕܳܡ ܕܢܶܚܰܛ ܡܶܢܫܶܠܝ ܒܳܛܶܢ ܘܰܐܟܚܕܳܐ ܝܳܠܶܕ܆ ܘܠܶܗ ܟܰܕ ܠܶܗ ܙܰܒܢܺܝ̈ܢ ܣܰܓܺܝ̈ܳܐܢ ܬܽܘܒ ܚܳܒܶܠ. ܐܰܝܟ ܐܰܝܢܳܐ ܕܺܐܝܬܰܘܗ̱ܝ ܗ̱ܘܳܐ ܦܰܘܠܽܘܤ ܕܰܠܓܰܠܳܛܳܝ̈ܶܐ ܟܳܬܶܒ ܗ̱ܘܳܐ: ܒܢܰܝ̈ ܗܳܠܶܝܢ ܕܡܶܢ ܕܪܺܝܫ ܚܳܒܶܠ ‌ܐ̱ܢܳܐ܆ ܥܕܰܡܳܐ ܕܬܶܬܨܺܝܪ ܒܟܽܘܢ ܕܡܽܘܬܳܐ ܕܰܡܫܺܝܚܳܐ^[22]. ܠܗܳܢܳܐ ܐܳܕܫܳܐ ܕܚܶܒ̈ܠܶܐ ܕܛܳܒ ܩܰܠܺܝܠܳܐܺܝܬ ܡܛܰܝܒܺܝܢ. ܐܳܦ ܐܶܫܰܥܝܳܐ ܢܒܺܝܳܐ ܡܚܰܘܶܐ ܠܶܗ ܟܰܕ ܐܳܡܰܪ: ܡܶܛܽܠ ܕܶܚܠܬܳܟ ܡܳܪܝܳܐ ܒܛܶܢܢ ܘܰܚܒܰܠܢܰܢ܆ ܘܺܝܠܶܕܢܰܢ ܪܽܘܚܳܐ ܕܦܽܘܪܩܳܢܳܐ ܕܺܝܠܳܟ ܗܰܘ ܕܰܥܒܰܕܬ ܥܰܠ ‌ܐܰܪܥܳܐ^[23].

ܐܷܠܳܐ ܢܶܚܙܶܐ ܡܳܢܳܐ ‌ܐܺܝܬܰܘܗ̱ܝ ܗܳܢܳܐ ܚܶܒܠܳܐ ܬܡܺܝܗܳܐ ܕܨܰܘ̈ܡܶܐ܆ ܗܰܘ ܕܒܰܝܰܐ ܐܶܢܽܘܢ ܠܣܳܗ̈ܕܶܐ. ܓܰܒܪܳܐ ܐ̱ܢܳܫ ܝܳܬܶܒ ܗ̱ܘܳܐ ܠܒܰܪ܆ ܘܰܡܚܰܡܣܶܢ ܗ̱ܘܳܐ ܒܡܰܛܰܪܬܳܐ ܕܗܳܝ ܒܰܠܰܢܺܐ܆ ܘܰܠܘܳܬ ܤܛܰܐܕܺܝܽܘܢ ܕܶܐܬܠܺܝ̈ܛܶܐ ܗܰܘ ܡܰܘܒܫܳܢܳܐ ܚܳܐܰܪ ܗ̱ܘܳܐ܆ ܐܰܝܟܰܢܳܐ ܕܰܠܥܳܪ̈ܽܘܩܶܐ ܗܳܢܽܘܢ ܕܡܶܢ ܐܰܓܽܘܢܳܐ ܘܰܕܫܳܒܩܺܝܢ ܠܛܶܟܣܳܐ ܒܒܽܘܝܳܐܳܐ ܕܡܰܝ̈ܳܐ ܫܰܚܺܝ̈ܢܶܐ ܢܩܰܒܶܠ ܗ̱ܘܳܐ. ܘܟܰܕ ܗܳܕܶܐ ܡܶܬܚܰܫܰܒ ܗ̱ܘܳܐ܆ ܘܰܢܛܺܝܪܳܐܺܝܬ ܡܶܬܒܰܩܶܐ ܗ̱ܘܳܐ܆ ܟܰܕ ܠܢܽܘܗܪܳܐ ܚܙܳܐ. ܘܒܰܟܠܺܝ̈ܠܶܐ ܕܢܳܚܬܺܝܢ ܗ̱ܘܰܘ ܐܶܬܒܰܩܺܝ܆ ܒܠܰܥ ܒܢܰܦܫܶܗ܆ ܘܟܽܠܶܗ ܕܫܽܘܦܪܳܐ ܗܰܘ ܕܶܐܬܚܙܺܝ ܗ̱ܘܳܐ. ܘܟܰܕ ܟܪܺܝܣܛܝܳܢܳܐ ܡܰܟܪܶܙ ܗ̱ܘܳܐ ܗܽܘ ܠܶܗ܆ ܘܒܰܡܨܰܥܬܗܽܘܢ ܕܣܳܗܕ̈ܶܐ ܐܰܪܡܺܝ ܢܰܦܫܶܗ܆ ܘܰܒܝܰܡܬܳܐ ܘܒܰܓܠܺܝܕܳܐ ܥܰܡ ܪܶܓܬܳܐ ܡܟܰܬܰܪ ܗ̱ܘܳܐ܆ ܘܰܐܝܟ ܕܰܠܡܺܐܡܰܪ ܬܰܘܣܶܦܬܳܐ ܕܩܽܘܪܳܐ ܕܝܰܬܺܝܪ ܚܰܪܺܝܦ ܒܳܥܶܐ ܗ̱ܘܳܐ܆ ܕܢܶܒܠܥܶܗ ܠܡܰܘܬܳܐ ܕܫܰܦܺܝܪܽܘܬ݂ ܕܶܚܠܬܳܐ ܥܰܡ ܦܰܩܪܽܘܬܳܐ ܡܶܕܶܡ ܢܰܟܦܬܳܐ ܚܦܺܝܛ ܗ̱ܘܳܐ. ܟܰܕ ܗܳܠܶܝܢ ܕܦܰܘܠܽܘܤ ܡܶܬܚܰܫܰܒ ܗ̱ܘܳܐ܆ ܕܠܳܐ ܫܳܘܶܝܢ ܚܰܫܰܘ̈ܗ̱ܝ ܕܙܰܒܢܳܐ ܗܳܢܳܐ ܕܗܳܫܳܐ܆ ܠܘܳܬ ܬܶܫܒܽܘܚܬܳܐ ܗܳܝ ܕܰܥܬܺܝܕܳܐ ܕܬܶܬܓܠܶܐ ܒܰܢ^[24]. ܡܶܢ ܗܳܪܟܳܐ܆ ܐܳܦ ܐܶܫܬܘܺܝ ܠܪܶܓܬܳܐ ܗܳܝ ܐܰ‎ܠܳܗܳܝܬܳܐ. ܘܟܰܕ ܒܰܐܓܽܘܢ̈ܶܐ ܕܰܚܠܳܦ ܫܰܦܺܝܪܽܘܬ݂ ܕܶܚܠܬܳܐ ܐܶܨܛܰܒܰܥ ܘܶܐܫܬܰܡܠܺܝ܆ ܦܪܰܚ ܥܰܡ ܣܳܗ̈ܕܶܐ ܣܳܗܕܳܐ܆ ܘܰܚܙܳܐ ܩܰܠܺܝܠܳܐܺܝܬ ܠܗܰܘ ܕܚܰܪܺܝܦܳܐܺܝܬ ܪܚܶܡ.

ܗܳܫܳܐ ܒܙܰܒܢܳܗ̇ ܢܙܰܡܰܪ ܕܰܘܺܝܕ܆ ܠܗܳܝ ܕܗܳܢܳܐ ܫܽܘܚܠܳܦܳܐ ܕܝܰܡܺܝܢܶܗ ܕܰܡܪܰܝܡܳܐ. ܐܰܝܟܰܢܳܐ ܓܶܝܪ ܠܰܘ ܫܽܘܚܠܳܦܰܐ ܗ̱ܘ܆ ܕܗܰܘ ܕܰܠܘܳܬ ܫܰܪܝܽܘܬܳܐ ܕܒܰܠܰܢܺܐ ܡܶܬܚܰܦܰܛ ܗ̱ܘܳܐ܆ ܘܰܡܫܰܡܫܳܢܳܐ ܕܪܰܦܝܽܘܬܳܐ ‌ܐܺܝܬܰܘܗ̱ܝ ܗ̱ܘܳܐ܆ ܗܘ̣ܳܐ ܐܰܓܽܘܢܺܝܣܛܳܐ ܕܰܡܚܰܡܣܢܳܢܽܘܬܳܐ. ܗܰܘ ܕܪܳܐܶܓ ܗ̱ܘܳܐ ܠܰܡܩܰܒܳܠܽܘ ܠܥܳܪ̈ܽܘܩܶܐ. ܗܳܐ ܒܛܰܪ̈ܩܶܐ ܟܬܺܝܒ. ܢܰܘܣܶܦ ܢܙܰܡܰܪ ܥܰܠ ܗܳܠܶܝܢ ܐܳܦ ܡܽܘܫܶܐ. ܟܰܕ ܐܳܡܰܪ܆ ܝܰܡܺܝܢܳܟ ܡܳܪܝܳܐ ܡܫܰܒܚܳܐ ܒܚܰܝܠܳܐ^[25]. ܡܫܺܝܚܳܐ ܕܶܝܢ ‌ܐܺܝܬܰܘܗ̱ܝ ܝܰܡܺܝܢܳܐ ܕܰܡܪܰܝܡܳܐ܆ ܗܳܝ ܕܟܽܠܡܶܕܶܡ ܡܶܫܟܚܳܐ܆ ܗܺܝ ܥܳܒܽܘܕܬܳܐ ܕܬܶܕܡܪ̈ܳܬܳܐ ܗܳܠܶܝܢ ܕܗܳܟܰܢܳܐ ܪܰܘܪ̈ܒܳܢ.

ܐܷܠܳܐ ܢܫܰܟܶܢ ܩܰܠܺܝܠ ܡܶܕܶܡ ܥܰܠ ܗܰܒܳܒܳܗ̇ ܕܗܳܝ ܒܰܠܰܢܺܐ܆ ܒܰܕܡܽܘܬ ܕܶܒܽܘܪ̈ܝܳܬܳܐ ܪ̈ܳܚܡܳܬ ܥܰܡܠܳܐ. ܐܰܝܟܰܢܳܐ ܕܟܰܕ ܡܶܕܶܡ ܡܰܘܬܪܳܢܳܐ ܡܶܢܳܗ̇ ܢܶܥܦܶܐ܆ ܟܰܟܳܪܺܝܬܳܐ ܪܽܘܚܳܢܳܝܬܳܐ ܐܽܘܡܳܢܳܐܺܝܬ ܡܶܢܳܗ̇ ܢܥܰܬܶܕ. ܗܳܕܶܐ ܓܶܝܪ. ܗܰܘ ܕܗܳܝܕܶܝܢ ܕܳܐܶܢ ܗ̱ܘܳܐ ܐܶܬܦܰܪܰܤ ܒܨܶܒܝܳܢܽܘܬ݂ ܒܺܝܫܽܘܬܳܐ܆ ܕܰܒܩܽܘܪܒܳܐ ܢܶܗܘܶܐ ‌ܐܺܝܬܰܘܗ̱ܝ ܒܽܘܝܳܐܳܐ ܗܰܘ ܕܒܰܠܰܢܺܐ ܐܰܝܟ ܫܶܕܠܳܐ. ܗܳܝ ܕܝܰܬܺܝܪܳܐܺܝܬ ܡܚܰܘܝܳܐ ܗ̱ܘܳܬ ܠܪܰܒܽܘܬ݂ ܦܰܐܝܽܘܬܳܐ ܕܰܡܚܰܡܣܢܳܢܽܘܬܗܽܘܢ ܕܣܳܗ̈ܕܶܐ.

ܗܰܘ ܡܰܢ ܓܶܝܪ ܕܰܦܣܰܩ ܣܰܒܪܳܐ ܒܪܶܥܝܳܢܶܗ܆ ܘܕܳܐܦܠܳܐ ܠܘܳܬ ܚܰܕ ܒܶܝܬ ܥܪܽܘܩܝܳܐ ܚܳܐܰܪ܆ ܟܒܰܪ ܟܺܝܬ ܐܳܦ ܟܰܕ ܠܳܐ ܨܳܒܶܐ܆ ܢܥܰܙܶܐ ܘܰܢܟܰܬܰܪ ܒܰܡܥܺܝ̈ܩܳܢܝܳܬܳܐ. ܗܰܘ ܕܶܝܢ ܕܠܰܢܝܳܚܳܐ. ܒܩܽܘܪܒܳܐ ܐܺܝܬ ܠܶܗ ܐܶܢ ܢܶܨܒܶܐ ܕܢܶܫܬܰܚܠܰܦ܆ ܘܓܳܒܶܐ ܠܶܗ ܗܳܝ ܕܢܶܚܰܫ ܝܰܬܺܝܪ ܡܶܢ ܦܫܺܝܩܽܘܬܳܐ. ܗܳܢܳܐ܆ ܡܳܪܳܢܳܐܺܝܬ ‌ܐܺܝܬܰܘܗ̱ܝ ܡܚܰܡܣܢܳܢܳܐ܆ ܘܠܰܘ ܗܰܘ ܕܡܶܛܽܠ ܠܳܐ ܫܟܺܝܚܽܘܬܗܽܘܢ ܘܚܰܣܺܝܪܽܘܬܗܽܘܢ ܕܣܽܘܥܪ̈ܳܢܶܐ܆ ܠܳܐ ܨܶܒܝܳܢܳܐܺܝܬ ܦܺܝܠܳܣܽܘܦܺܝܣܳܐ ܥܳܒܶܕ.

ܡܶܛܽܠܗܳܕܶܐ ܘܳܐܦܠܳܐ ܚܰܕ ܡܰܦܰܩ ܒܪܽܘܚܳܐ ܐܺܝܬ ܠܶܗ ܠܐ̱ܢܳܫ ܟܰܕ ܐܳܡܰܪ: ܕܙܳܕܶܩ ܠܡܺܐܙܰܠ ܠܘܳܬ݂ ܚܙܳܬܳܐ ܕܰܐܓܽܘ̈ܢܶܐ ܗܳܢܽܘܢ ܕܪ̈ܰܟܫܳܐ܆ ܡܶܛܽܠ ܟܺܝܬ ܕܚܰܕܬܳܐܺܝܬ ܐܶܫܬܰܟܢܰܬ ܠܰܢ. ܗܳܫܳܐ ܓܶܝܪ ܝܰܬܺܝܪܳܐܺܝܬ܆ ܚܰܘܳܐ ܠܺܝ ܡܝܰܬܪܽܘܬܳܟ. ܐܶܢ ܕܶܝܢ. ܡܶܛܽܠ ܠܳܐ ܫܟܺܝܚܽܘܬܳܗ̇ ܕܰܦܨܺܝܚܽܘܬܳܐ܆ ܠܳܐ ܐܺܝܬܰܝܟ ܗ̱ܘܰܝܬ ܡܶܢ ܩܕܺܝܡ ܚܰܙܳܝܳܐ ܕܒܺܝ̈ܫܳܬܳܐ܆ ܠܠܳܐ ܫܟܺܝܚܽܘܬܳܐ ܗܳܝ ܕܗܳܝܕܶܝܢ ܡܰܘܕܶܐ ܐ̱ܢܳܐ ܛܰܝܒܽܘܬܳܐ. ܠܳܟ ܕܶܝܢ ܐܳܦ ܟܰܕ ܠܳܐ ܚܳܙܶܐ ܐܰܢ̱ܬ ܠܶܗ ܠܰܐܓܽܘܢܳܐ. ܪܳܚܶܡ ܚܶܙܘܳܢ̈ܶܐ ܝܳܕܰܥ ܐ̱ܢܳܐ ܠܳܟ܆ ܘܕܰܒܟܽܠܙܒܰܢ ܡܰܪܓܶܙ ܐܰܢ̱ܬ ܠܰܐܠܳܗܳܐ ܒܨܶܒܝܳܢܳܟ. ܘܗܳܝ ܕܙܺܝܥܳܐ܆ ܕܰܒܝܰܘ̈ܡܳܬܳܐ ܗܳܠܶܝܢ ܩܰܕܺܝ̈ܫܶܐ ܕܨܰܘܡܳܐ܆ ܐܶܡܰܬܝ ܕܢܶܬܩܦܶܤ ܙܳܕܶܩ ܗ̱ܘܳܐ ܘܒܰܬܘܳܬ݂ ܢܰܦܫܳܐ ܢܺܚܶܐ܆ ܡܶܛܽܠ ܗܰܘ ܕܚܰܫ ܚܠܳܦܰܝܢ ܒܰܒܣܰܪ. ܫܳܒܶܩ ܐ̱ܢܳܐ ܓܶܝܪ ܠܡܺܐܡܰܪ܆ ܕܳܐܦ ܒܟܽܠܗܽܘܢ ܚܰܝ݂ܰܝ݂̈ܢ܆ ܗܳܕܶܐ ܙܳܕܶܩ ܗ̱ܘܳܐ ܠܰܢ ܠܡܶܣܥܰܪ.

ܗܳܫܳܐ ܕܶܝܢ. ܚܢܰܢ ܡܰܢ ܨܠܰܘ̈ܳܬܳܐ ܗܳܠܶܝܢ ܐ̱ܪ̈ܙܳܢܳܝܳܬܳܐ ܡܨܰܠܶܝܢ ܚ̱ܢܰܢ܆ ܬܶܐܰܛܪܽܘܢ ܕܶܝܢ܆ ܝܰܬܺܝܪ ܢܰܨܺܝܚܳܐܺܝܬ ܡܰܨܪܚܳܐ^[26] ܘܰܡܪܳܡܳܐ ܩܳܠܳܐ ܠܩܽܘܒܠܰܢ܆ ܐܳܦ ܥܕܰܡܳܐ ܠܠܰܝ̈ܠܰܘܳܬܳܐ܆ ܒܰܐܒܽܘ̈ܒܶܐ ܘܰܒܨܶܨ̈ܠܶܐ ܘܒܰܙܡܳܪ̈ܶܐ ܙܢܰܝ̈ܳܐ ܘܤܳܛܳܢܳܝ̈ܶܐ. ܐܰܝܟܰܢܳܐ ܗܳܟܺܝܠ ܠܰܘ ܐܳܦ ܝܰܬܺܝܪ ܡܶܢ ܟܺܐܦ̈ܶܐ ‌ܐܺܝܬܰܘܗ̱ܝ ܠܳܐ ܡܰܪܓܫܳܢܳܐ ܗܰܘ ܕܗܳܠܶܝܢ ܚܳܙܶܐ܆ ܘܡܶܬܦܰܫܰܟ ܕܡܶܛܽܠ ܡܳܢܳܐ ܟܠܳܐ ܐܰ‎ܠܳܗܳܐ ܡܶܛܪܳܐ. ܠܳܐ ܚܰܒܺܝܒܳܐ ܓܶܝܪ܆ ܕܟܰܕ ܗܳܠܶܝܢ ܕܰܐܝܟ ܗܳܟܰܢ ܣܳܥܪܺܝܢܰܢ܆ ܚܰܝ݂ܺܝ݂ܢܰܢ ܘܰܠܫܶܡܫܳܐ ܚܳܙܶܝܢ ܚ̱ܢܰܢ.

ܐܷܠܳܐ ܠܘܳܬܗܽܘܢ ܕܣܳܗ̈ܕܶܐ ܢܶ݀ܦܢܶܐ ܢܺܐܬܶܐ. ܡܨܶܝܢ ܐܶܢܽܘܢ ܓܶܝܪ. ܕܟܰܕ ܡܶܬܟܰܫܦܺܝܢ܆ ܕܳܐܦ ܠܰܢ ܡܶܢ ܒܺܝܫܽܘܬܳܐ ܢܫܰܚܠܦܽܘܢ܆ ܐܳܦ ܠܰܐܪܥܳܐ ܒܡܶܛܪܳܐ ܢܰܪܘܽܘܢ܆ ܘܕܰܠܟܽܠ ܡܰܪܥܳܐ ܘܟܽܘܪܗܳܢܳܐ ܢܶܛܪܕܽܘܢ ܡܶܢ ܢܰܦ̈ܫܳܬܰܢ ܘܡܶܢ ܦܰܓܪ̈ܰܝܢ. ܗܳܠܶܝܢ ܓܶܝܪ ܗܳܠܶܝܢ܆ ܟܰܕ ܐܰܓܽܘܢܳܐ ܫܰܦܺܝܪܳܐ ܐܶܬܟܰܬܰܫܘ ܘܒܰܫܘܳܪܳܐ222 ܐܶܫܬܰܡܠܺܝܘ܆ ܘܰܠܘܳܬ݂ ܡܫܺܝܚܳܐ ܒܪ̈ܽܘܚܳܬܗܽܘܢ ܥܢܰܕܘ܆ ܗܰܘ ܐܰ‎ܠܳܗܳܐ ܕܪ̈ܽܘܚܳܬܳܐ ܘܰܕܟܽܠ ܒܣܰܪ܆ ܕܰܒܢܽܘܪܳܐ ܢܺܐܩܕܽܘܢ ܐܶܬܦܰܩܰܕܘ ܡܶܢ ܗܰܘ ܕܕܳܐܶܢ ܗ̱ܘܳܐ܆ ܟܰܕ ܚܳܣܶܡ ܗ̱ܘܳܐ ܒܰܢ ܡܶܛܽܠ ܒܽܘܪܟܬܳܐ ܕܡܶܢ ܗܰܕܳܡܰܝ̈ܗܽܘܢ ܩܰܕܺܝ̈ܫܶܐ. ܐܳܦ ܟܺܝܬ ܡܫܰܡ̈ܫܳܢܶܐ. ܠܦܰܓܪ̈ܰܝܗܽܘܢ ܡܰܢ ܕܟܽܠܗܽܘܢ ܩܰܕܺܝ̈ܫܶܐ ܥܰܠ ܥܓܶܠܬܳܐ ܡܰܝܬܶܝܢ ܗ̱ܘܰܘ. ܚܰܕ ܕܶܝܢ ܒܰܠܚܽܘܕ ܫܒܰܩܘ܆ ܕܰܥܕܰܟܺܝܠ ‌ܐܺܝܬ ܗ̱ܘܳܐ ܒܶܗ ܢܫܰܡܬܳܐ܆ ܡܶܢ ܒܳܬܰܪ ܗܳܠܶܝܢ ܟܽܠܗܽܘܢ ܐܽܘܠ̈ܨܳܢܶܐ܆ ܟܰܕ ܡܶܫܬܪܰܓܪܓܺܝܢ ܗ̱ܘܰܘ ܕܡܰܗܦܟܺܝܢ ܠܶܗ ܡܶܢ ܬܰܪܥܺܝܬܶܗ ܛܳܒܬܳܐ.

ܐܶܡܶܗ ܓܶܝܪ ܕܗܳܢܳܐ. ܟܰܕ ܚܙܳܬ ܕܗܳܕܶܐ ܓܶܕܫܰܬ݂܆ ܘܰܒܕܶܚܠܬܳܐ ܗܘ̣ܳܬ݂܆ ܘܰܛܥܳܬ݂ ܠܰܡܚܺܝܠܽܘܬܳܐ ܢܶܫܳܝܬܳܐ܆ ܘܥܰܠ ܩܰܫܝܽܘܬܳܐ ܕܗܳܢܽܘܢ ܕܪܳܕܦܺܝܢ ܐܰܡܣܪܰܬ݂܆ ܘܰܠܘܳܬ ܚܕܳܐ ܒܰܠܚܽܘܕ ܚܳܪܰܬ݂܆ ܗܳܝ ܕܠܳܐ ܬܶܚܣܪܺܝܘܗ̱ܝ ܠܰܒܪܳܗ̇܆ ܚܽܘܣܪܳܢܳܐ ܓܶܝܪ ܕܳܝܢܳܐ ܗ̱ܘܳܬ ܕܺܐܝܬܶܝܗ̇ ܗܳܝ ܕܰܒܗܳܠܶܝܢ ܚܰܝ̈ܶܐ ܢܩܰܘܶܐ. ܟܰܕ ܒܺܐܝ̈ܕܶܝܗ̇ ܐܰܪܺܝܡܬ̣ܶܗ ܘܥܰܠ ܟܰܬܦ̈ܳܬܳܗ̇ ܣܳܡܬ̣ܶܗ܆ ܠܘܳܬ݂ ܗܳܝ ܥܓܶܠܬܳܐ ܪܶܗܛܰܬ̣. ܘܥܰܠ ܒ̈ܢܰܝ ܦܳܠܚܽܘܬܶܗ ܫܕܳܬ̣ܶܗ ܟܰܕ ܐܳܡܪܳܐ: ܬܶܛܥܰܢ ܥܓܶܠܬܳܐ ܐܳܦ ܠܫܶܒܠܳܐ ܕܺܝܠܝ ܗܳܝ ܕܰܛܥܶܢܬܳܗ̇ ܡܰܢ ܒܟܰܪܣܳܐ ܘܰܐܝܬܺܝܬܳܗ̇ ܠܗܳܢܳܐ ܥܳܠܡܳܐ܆ ܗܳܫܳܐ ܕܶܝܢ ܟܰܕ ܥܰܠ ܟܰܬܦ̈ܳܬܝ ܛܥܶܢܬܳܗ̇ ܫܰܕܰܪܬܳܗ̇ ܠܰܩܝܳܡܬܳܐ. ܠܗܳܢܳܐ ܬܰܡܳܢ. ܒܳܬܰܪ ܩܰܠܺܝܠ ‌ܐܶ݀ܚܙܶܐ. ܘܠܳܐ ܛܽܘܒ ܢܶܫܒܩܰܢܝ܆ ܟܰܕ ܒܰܡ̈ܛܰܠܠܶܐ ܗܳܢܶܝܢ ܕܰܠܥܳܠܰܡ ܡܕܰܝܰܪ.

ܢܶܫܡ̈ܥܳܢ ܐܶܡ̈ܗܳܬܳܐ ܗܳܠܶܝܢ ܪ̈ܳܚܡܳܬ ܒܶܣܪܳܐ. ܘܠܰܘ ܪ̈ܳܚܡܳܬ ܒܢܰܝ̈ܳܐ܆ ܘܢܶܬܪ̈ܰܕܝܳܢ ܘܢܺܐܠ̈ܦܳܢ ܠܣܰܒܪܳܗ̇ ܕܶܐܡܳܐ܆ ܗܰܘ ܓܰܢ̱ܒܳܪܳܐ ܘܰܕܠܰܟܪ̈ܺܝܣܛܝܳܢܶܐ ܦܐܶܐ܆ ܘܰܠܘܳܬ ܗܳܠܶܝܢ ܕܰܥܬܺܝܕܺܝܢ ܢܶܣܬܰܪ̈ܗܒܳܢ.

ܐܰܝܟܰܢܳܐ ܕܶܝܢ ܕܰܠܟܽܠܳܗ̇ ܒܪܺܝܬܳܐ ܕܡܶܬܚܰܙܝܳܐ ܢܩܰܕܫܽܘܢ ܣܳܗ̈ܕܶܐ܆ ܠܕܰܚܺܝܚܳܐ ܗܰܘ ܕܡܶܢ ܓܰܘܙܰܠܬܳܐ܆ ܘܰܠܗܳܢܽܘܢ ܕܰܡܫܰܘܙܒܺܝܢ ܗ̱ܘܰܘ ܡܶܢ ܓܰܪ̈ܡܰܝܗܽܘܢ ܕܺܐܝܬܰܝܗܽܘܢ ܗ̱ܘܰܘ ܦܶܠܓܽܘ ܝܰܩܺܝ̈ܕܶܐ܆ ܣܽܘܥܪܳܢܳܐ ܟܺܝܬ ܗܰܘ ܝܰܬܺܝܪ ܩܰܫܝܳܐ ܘܚܰܪܺܝܦܳܐ ܕܗܰܘ ܕܪܳܕܶܦ ܗ̱ܘܳܐ܆ ܕܢܶܫܬܕܽܘܢ ܒܢܰܗܪܳܐ ܗܰܘ܆ ܡܶܢ ܩܽܘܪܒܳܐ ܪܳܕܶܐ ܗ̱ܘܳܐ ܦܩܰܕ. ܘܟܰܕ ܐܶܫܬܕܺܝܘ܆ ܢܛܰܪܘ ܐܶܢܽܘܢ ܡܰܝ̈ܳܐ ܗܳܠܶܝܢ ܕܩܰܒܶܠܘ ܐܶܢܽܘܢ܆ ܘܒܰܕܡܽܘܬ ܐܶ‌ܠܦܳܐ ܠܕܽܘܟܬܳܐ ܡܶܕܶܡ ܝܺܕܺܝܥܬܳܐ ܐܰܚܺܝܪܘ ܐܶܢܽܘܢ ܟܰܕ ܐܰܟܚܕܳܐ ܐܶܬܟܰܢܰܫܘ܆ ܠܫܰܪ̈ܟܳܢܶܐ ܡܝܰܩܪ̈ܶܐ ܗܳܠܶܝܢ ܕܶܐܬܒܰܕܰܪܘ܆ ܗܳܢܽܘܢ ܕܳܐܦ ܡܶܢ ܩܕܺܝܡ ܟܰܕ ܐܶܬܦܣܶܩܘ܆ ܠܺܐܝܣܪܳܐܶܝܠ ‌ܐܰܝܟ ܕܰܒܝܰܕ ܝܰܒܺܝܫܬܳܐ ܐܰܥܒܰܪܘ܆ ܘܰܠܡܰܥܒܰܪܬܳܗ̇ ܕܩܺܒܽܘܬܳܐ܆ ܠܚܺܐܦܳܐ ܘܰܠܡܰܪܕܺܝܬܳܐ ܕܰܟܝܳܢܳܐ ܕܺܝܠܗܽܘܢ ܦܰܓܶܕܘ. ܠܗܳܢܳܐ ܕܚܺܝܩܳܐ ܡܝܰܩܪܳܐ ܕܣܳܗ̈ܕܶܐ܆ ܡܶܠܬܳܐ ܗܳܝ ܕܶܐܫܰܥܝܳܐ ܢܒܺܝܳܐ ܙܰܕܶܩ ܠܰܢ ܠܰܡܠܰܚܳܡܽܘ܆ ܗܳܝ ܕܶܐܢ ܬܶܥܒܰܪ ܒܝܰܕ ܢܽܘܪܳܐ ܫܰܠܗܶܒܺܝܬܳܐ ܠܳܐ ܬܰܘܚܕܳܟ܆ ܘܢܰܗܪ̈ܰܘܳܬܳܐ ܠܳܐ ܢܶܓܪܦܽܘܢܳܟ^[27]. ܗܰܘ ܟܺܝܬ ܕܟܰܕ ܐܶܬܦܰܠܰܓ܆ ܠܘܳܬ ܟܽܠܗܽܘܢ ܣܰܘ̈ܦܶܐ ܥܒܰܪ^[28] ܘܶܐܢ ܐ̱ܢܳܫ ܢܶܫܬܟܰܚ ܕܺܐܝܬ ܠܶܗ ܡܶܢܶܗ ܡܢܳܬܳܐ ܕܝܰܬܺܝܪ ܙܥܽܘܪܝܳܐ܆ ܘܰܐܝܟ ܙܢܳܐ ܕܰܦܪܶܕܬܳܐ ܡܶܕܶܡ ܙܥܽܘܪܬܳܐ܆ ܠܗܽܘܢ ܠܰܐܪܒܥܺܝܢ ܣܳܗ̈ܕܶܐ ܐܰܝܟ ܠܶܗ ܠܘܳܬܶܗ܆ ܟܰܕ ܚܰܘܪܳܐ ܦܠܺܝܚܳܐ ܘܰܕܚܺܝܠܳܐ ܠܽܘܩܒܰܠ ܫ̈ܺܐܕܶܐ ܚܳܝܪܺܝܢ. ܐܳܣܝ̣ܳܝ̣ܳܐ ܠܘܳܬ ܗܳܢܽܘܢ ܕܰܡܚܺܝܠܺܝܢ. ܪܳܕܽܘܝܳܐ ܘܡܰܠܦܳܢܝܳܐ ܠܘܳܬ ܗܳܢܽܘܢ ܕܥܰܠ ܡܰܠܦܳܢܽܘܬܳܐ ܣܢܺܝܩܺܝܢ. ܠܘܳܬ݂ ܗܳܢܽܘܢ ܕܰܒܥܶܠܕܒܳܒܺܝܢ ܚܰܕ ܠܚܰܕ ܘܒܰܐܟܬܳܐ ܣܺܝܡܺܝܢ܆ ܡܪܰܥܝܳܢܳܐ ܠܘܳܬ ܗܳܢܽܘܢ ܕܫܳܐܠܺܝܢ ܘܡܶܬܟܰܫܦܺܝܢ. ܕܢܶܫܬܘܽܘܢ ܠܺܐܝܙܓܰܕܽܘܬܗܽܘܢ܆ ܡܫܰܝܢܳܐ ܘܪܳܚܶܡ ܐ̱ܢܳܫ. ܠܟܽܠܢܳܫ ܓܶܝܪ. ܟܽܠ ܗܳܘܶܝܢ܆ ܟܰܕ ܠܟܽܠܢܳܫ ܨܳܒܶܝܢ ܕܢܺܐܬܪܽܘܢ^[29].

ܠܗܳܠܶܝܢ ܫܰܘܝܳܐܺܝܬ ܩܰܠܶܤ ܚܰܟܺܝܡܳܐ ܘܪܰܒܳܐ ܒܰܣܶܝܠܺܝܽܘܤ܆ ܗܰܘ ܡܰܠܦܳܢܳܐ ܕܟܽܠܳܗ̇ ܥܺܕܬܳܐ ܗܳܝ ܕܰܬܚܶܝܬ ܫܡܰܝܳܐ܆ ܟܰܕ ܡܩܰܠܶܤ ܗ̱ܘܳܐ ܠܰܐܬܠܺܝ̈ܛܶܐ ܕܰܐܬܪܳܐ ܕܺܝܠܶܗ. ܗܰܘ ܟܺܝܬ ܕܰܐܝܬܰܝ ܐܳܦ ܡܰܠܦܳܢ̈ܶܐ ܡܝܰܬܪ̈ܶܐ ܐܳܦ ܣܳܗ̈ܕܶܐ܆ ܟܰܕ ܗܳܕܶܐ ܫܩܰܠ ܒܽܘܪܟܬܳܐ ܡܶܢ ܐܰ‎ܠܳܗܳܐ. ܟܰܕ ܗܳܟܺܝܠ ܠܘܳܬ ܗܳܠܶܝܢ ܕܰܐܡܺܝܪ̈ܳܢ ܠܶܗ ܠܡܰܠܦܳܢܳܐ ܐܳܙܺܠ̱ܝܢ ܐܢ̱ܬܽܘܢ܆ ܒܗܶܝܢ ܐܶܬܒܰܣܰܡܘ. ܐܳܦ ܓܶܝܪ ܘܰܚܢܰܢ ܡܶܢ ܗܳܠܶܝܢ ܕܗܰܘ܆ ܗܳܠܶܝܢ ܙܥܽܘܪ̈ܝܳܬܳܐ ܐܶܡܰܪܢܰܢ. ܘܟܰܕ ܒܗܰܢܝܳܐ ܘܰܒܒܽܘܣܳܡܳܐ. ܗܳܘܶܝܢ ܐܢ̱ܬܽܘܢ܆ ܫܰܒܰܚܘ ܠܰܡܫܺܝܚܳܐ ܗܰܘ ܕܺܐܝܬܰܘܗ̱ܝ ܡܰܒܽܘܥܳܐ ܕܟܽܠܳܗ̇ ܝܺܕܰܥܬܳܐ ܘܚܶܟܡܬܳܐ. ܗܰܘ ܕܠܶܗ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܰܬܡܳܢܬܰܥܣܰܪ.

[1]ܡܠܬܐ ܠܐ ܩܪܺܝܚܬܐ ܐܺܝܬܶܝܗ̇. jejunium ܒܠܰܬܺܝܢܳܝܳܐ. ܢܨܘܡ ܡ̣ܢ ܨܘܡܐ

[2]ܣܺܝܡܬܐ ܕܬܐܘܡܐ ܐܘܕܘ. ܦܐܬܐ 637 ܡܶܠܰܬ ܬܪܰܦ. ܢܶܬ̣ܪܽܘܦ. ܬܪܳܦܳܐ. ܕܰܟܺܝ. ܟܰܦܰܪ. ܘܕܰܒܺܝܩܬܐ. ܫܢܰܛ.

ܫܰܦܺܝܪ̈ܶܐ؟[3]

ܫܰܪܺܝܪܳܐ[4]

 ܢܚܰܒܶܠ[5]

ܥܡܘܣ. 8: 10 [6]

ܡܙܡܘܪ̈ܐ. 115: 15 [7]

ܣܦܪܐ ܕܟܳܗ̈ܢܐ. 23: 7 ـ 8 ܣܦܪܐ ܕܡܦܩܢܐ. 12: 16. [8]

ܕܳܘܝܳܐܝܬ[9]

ܠܘܩܐ. 13: 11 [10]

ܠܘܩܐ. 6: 9  ܐܦ ܡܰܪܩܘܣ. 3: 4 [11]

ܡܡܰܢܥܺܝܢ[12]

  ܐܦܣ̈ܝܐ. 4: 13[13]

ܝܘܚܢܢ. 18: 23 [14]

ܡܶܬܪܰܛܒܺܝܢ ܗ̱ܘܰܘ[15]

ܗܳܦܟܳܐ ܗ̱ܘܳܬ ܡܶܫܬܰܟܢܳܐ ܠܗܽܘܢ[16]

ܚܘܦܝܐ ܕܡܶܢ ܣܟܪ̈ܐ[17]

ܡܬܝ. 17: 2 [18]

 ܟܺܐܒ̈ܶܐ[19]

[20]ܒܠܶܫܳܢܳܐ ܝܰܘܢܳܝܳܐ ܢܶܩܒܳܐܺܝܬ ܡܶܬܩܪܝܢ ܝܰܘ̈ܡܳܬܳܐ. ܡܶܛܽܠ ܗܳܕܶܐ܆ ܐܰܝܟ ܐܶܡ̈ܗܬܳܐ ܕܒܳܛ̈ܢܳܢ ܘܝܳܠ̈ܕܳܢ܆ ܐܶܬܢܰܚܰܡ ܡܰܢ ܡܰܠܦܳܢܳܐ ܠܳܚܡܳܐܺܝܬ܆ ܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܩܰܕܺܝ̈ܫܶܐ ܕܨܰܘܡܳܐ܆ ܠܗܳܠܶܝܢ ܐܰܪܒܥܺܝܢ ܣܳܗ̈ܕܶܐ܆ ܘܠܰܘ ܐܰܝܟ ܐܰܒܳܗ̈ܶܐ ܐܰܝܟ ܡܳܐ ܕܣܳܡܶܬ ܐܶܢܽܘܢ ܒܠܶܫܳܢܳܐ ܣܽܘܪܝܳܝܳܐ.

ܡܨܶܝܢ[21]

ܓܠ̈ܛܝܐ. 4: 19 [22]

  ܐܫܥܝܐ. 26: 17 ـ 18 [23]

  ܪ̈ܗܘܡܝܐ. 8: 18[24]

ܡܦܩܢܐ. 15: 6 [25]

ܡܶܢ ܡܶܠܰܬ ܡܰܨܪܚܳܢܽܘܬܳܐ. ܐܰܦܪܰܚ. ܐܰܥܪܶܩ. ܐܰܙܢܶܩ ܐܰܝܟ ܓܶܐܪܳܐ.[26]

ܐܫܥܝܐ. 43: 2 [27]

ܡܛܳܐ[28]

ܐ. ܩܘܪ̈ܝܢܬܝܐ. 9: 22[29]