ܡܺܐܡܪܳܐ ܕܫܶܬܬܰܥܣܰܪ

ܕܡܶܛܽܠ ܡܳܢܳܐ ܒܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܕܨܰܘܡܳܐ܆ ܟܬܳܒܳܐ ܕܰܗܘܳܝܳܐ ܐܰܘܟܺܝܬ ܕܰܒܪܺܝܬܳܐ ܕܥܳܠܡܳܐ ܩܳܪܶܝܢ ܚ̱ܢܰܢ܆ ܘܡܶܛܽܠ ܫܰܦܺܝܪܽܘܬ݂ ܨܶܒܬܳܐ ܟܺܝܬ ܕܰܒܗܳܝ ܕܰܢܙܰܡܰܪ ܘܩܰܛܰܤܛܰܣܺܝܤ ܢܰܟܦܬܳܐ ܘܰܟܢܺܝܟܬܳܐ. ܐܶܬܶܐܡܰܪ ܕܶܝܢ ܒܥܺܕܬܳܐ ܪܰܒܬܳܐ.

1: ܐܰܪܰܐ ܐ̱ܢܳܫ ܡܶܢܟܽܘܢ ܡܶܢ ܐܰܝܠܶܝܢ ܕܗܳܪܟܳܐ ܡܶܬܟܰܢܫܺܝܢ܆ ܟܰܕ ܒܪܶܚܡܰܬ ܝܽܘܠܦܳܢܳܐ ܘܪܶܚܡܰܬ݂ ܥܰܡܠܳܐ ܐܺܝܬ ܠܶܗ ܠܘܳܬ ܫܶܡܥܳܐ ܕܡ̈ܶܠܶܐ ܐܰ‎ܠܳܗܳܝ̈ܳܬܳܐ܆ ܥܰܩܶܒ ܡܶܢܶܗ ܘܠܶܗ܆ ܐܰܘ ܠܘܳܬ ܩܰܪܺܝܒܶܗ ܐܶܬܥܢܰܝ ܘܰܐܟܚܕܳܐ ܒܰܚܶܢ܆ ܕܡܶܛܽܠ ܡܳܢܳܐ ܒܗܳܠܶܝܢ ܝܰܘ̈ܡܳܬܳܐ ܣܓܺܝ̈ܕܶܐ ܘܩܰܕܺܝܫ̈ܶܐ ܕܨܰܘܡܳܐ܆ ܠܰܥܒܺܝܕܽܘܬ݂ ܥܳܠܡܳܐ ܗܳܝ ܕܡܶܢ ܡܽܘܫܶܐ ܐܶܬܬܰܟܬܒܰܬ݂ ܠܰܢ ܩܳܪܶܝܢ ܚ̱ܢܰܢ܆ ܐܰܘ ܨܳܒܶܝܢ ܐܢ̱ܬܽܘܢ ܕܰܠܡܶܠܬܳܐ ܕܡܶܛܽܠ ܗܳܕܶܐ ܗܳܫܳܐ ܚܢܰܢ ܢܶܥܒܶܕ ܠܟܽܘܢ. ܬܺܐܡܪܽܘܢ ܡܶܢ ܟܽܠܦܪܽܘܤ ܕܨܳܒܶܝܢ ܐܢ̱ܬܽܘܢ܆ ܘܰܕܠܳܐ ܝܳܕܥܺܝܢ ܐܢ̱ܬܽܘܢ ܥܳܒܕܺܝܢ ܐܢ̱ܬܽܘܢ ܐܶܣܟܺܡܳܐ. ܘܟܽܠܗܶܝܢ ܬܶܓܒܽܘܢ. ܘܰܠܡܺܐܡܰܪ ܘܰܠܡܶܚܰܫ܆ ܐܰܝܟܰܢܳܐ ܕܒܰܠܚܽܘܕ܆ ܠܰܢ ܒܪܶܗܛܳܐ ܕܗܳܝ ܕܢܺܐܡܰܪ ܬܰܪܡܽܘܢ܆ ܘܰܠܘܳܬ ܤܛܰܕܺܝܽܘܢ ܕܡܰܠܦܳܢܽܘܬܳܐ ܬܰܝܬܽܘܢ. ܗܳܟܰܢܳܐ ܠܡ̈ܶܠܶܐ ܕܺܝܠܰܢ ܒܨܺܝܪ̈ܳܬܳܐ ܗܰܢܺܝܳܐܺܝܬ ܫܳܡܥܺܝܢ ܐܢ̱ܬܽܘܢ. ܡܶܢ ܗܳܪܟܳܐ ܐܳܦ ܐܶܢܳܐ. ܠܘܳܬ ܥܽܘܬܪܳܐ ܕܪܶܚܡܬܳܐ ܕܺܝܠܟܽܘܢ܆ ܟܰܕ ܡܶܣܟܺܢܳܐ ܐܺܝܬܰܝ. ܡܳܬܰܚ ܐ̱ܢܳܐ ܢܰܦܫܝ܆ ܘܰܠܡܰܬܠܳܐ ܒܨܶܒܝܳܢܝ ܛܳܥܶܐ ܐ̱ܢܳܐ ܗܰܘ ܕܳܐܡܰܪ: ܠܳܐ ܬܶܡܬܽܘܚ ܟܰܕ ܡܶܣܟܺܢܳܐ ܐܺܝܬܰܝܟ ܠܽܘܩܒܰܠ ܥܰܬܺܝܪܳܐ^[1]. ܘܰܠܘܳܬ݂ ܗܳܝ ܕܳܐܡܰܪ ܡܶܬܬܰܝܬܶܐ ܐ̱ܢܳܐ܆ ܟܰܕ ܐܳܦܠܳܐ ܚܰܕ ܥܽܘܬܳܕܳܐ ܐܺܝܬ ܠܺܝ ܠܘܳܬ݂ ܡܰܠܦܳܢܽܘܬܳܐ.

2: ܐܶܠܳܐ ܗܳܕܶܐ. ܫܰܟܶܢܘ ܠܺܝ܆ ܗܳܝ ܕܥܰܡ ܫܶܠܝܳܐ ܬܶܫܡܥܽܘܢ܆ ܘܰܬܩܽܘܡܽܘܢ ܟܺܝܬ ܒܰܟܢܺܝܟܽܘܬܳܐ܆ ܘܠܳܐ ܬܶܫܘܪܽܘܢ ܠܥܶܠ ܡܶܢ ܚܕܳܕ̈ܶܐ܆ ܘܰܠܗܳܢܽܘܢ ܕܰܒܩܽܘܪܒܳܐ ܩܳܝܡܺܝܢ ܬܶܬܚܪܽܘܢ ܠܡܶܕܚܰܩ܆ ܐܰܝܟ ܙܢܳܐ ܕܥܰܠ ܚܛܽܘܦܝܳܐ ܕܒܶܙ̈ܬܶܐ. ܘܶܐܢ ܕܶܝܢ ܠܳܐ܆ ܐܳܦ ܐܰܢ̱ܬܽܘܢ ܠܟܽܘܢ ܡܣܰܓܦܺܝܢ ܐܢ̱ܬܽܘܢ܆ ܟܰܕ ܒܝܰܕ ܗܳܝ ܕܫܳܓܫܺܝܢ ܐܢ̱ܬܽܘܢ ܚܳܣܪܺܝܢ ܐܢ̱ܬܽܘܢ ܠܶܗ ܠܫܶܡܥܳܐ܆ ܘܳܐܦ ܚܢܰܢ ܬܽܘܒ ܡܶܬܬܰܠܫܺܝܢ ܚ̱ܢܰܢ ܘܡܶܬܛܰܪܦܺܝܢ ܚ̱ܢܰܢ܆ ܟܰܕ ܡܶܬܰܐܠܨܺܝܢܰܢ ܕܗܶܢܶܝܢ ܟܰܕ ܗܶܢܶܝܢ ܢܺܐܡܰܪ ܙܰܒ̈ܢܳܬܳܐ ܣܰܓܺܝ̈ܳܐܬܳܐ܆ ܘܰܥܠܰܝܗܶܝܢ ܟܰܕ ܥܠܰܝܗܶܝܢ ܡܶܢ ܕܪܺܝܫ ܢܶܬܟܪܶܟ. ܙܳܕܶܩ ܕܶܝܢ. ܕܢܶܫܡܰܥ ܠܰܟܬܳܒܳܐ ܐܰ‎ܠܳܗܳܝܳܐ ܕܳܐܡܰܪ: ܕܡ̈ܶܠܶܐ ܕܚܰܟܺܝܡܳܐ ܒܢܺܝ̈ܚܶܐ ܡܶܫܬܰܡ̈ܥܳܢ^[2].

3: ܠܡܺܐܡܰܪ ܕܶܝܢ ܡܶܢ ܟܰܕܽܘ ܗܳܫܳܐ ܙܳܕܶܩ܆ ܗܳܝ ܕܩܰܕܡܰܬ ܐܶܬܬܣܺܝܡܰܬ ܠܰܢ ܠܒܽܘܚܳܢܳܐ. ܠܝܰܘ̈ܡܳܬܳܐ ܗܳܠܶܝܢ ܣܓܺܝ̈ܕܶܐ ܘܩܰܕܺܝ̈ܫܶܐ ܕܨܰܘܡܳܐ܆ ܠܺܐܝܩܳܪܳܐ ܕܚܰܫܳܐ ܦܳܪܽܘܩܳܝܳܐ ܡܫܰܡܠܶܝܢ ܚ̱ܢܰܢ ܠܗܽܘܢ܆ ܗܰܘ ܕܒܺܐܝܕܰܘ̈ܗ̱ܝ ܡܶܫܬܰܘܕܥܺܝܢ ܚ̱ܢܰܢ ܠܰܐܠܳܗܳܐ ܕܚܰܫ ܒܰܒܣܰܪ܆ ܘܠܰܢ ܙܰܡܶܢ ܠܳܐ ܚܳܫܽܘܫܽܘܬܳܐ܆ ܘܰܓܒܰܠ ܡܶܢܕܪܺܝܫ ܒܝܰܕ ܩܝܳܡܬܶܗ ܠܡܳܐܢܳܐ ܕܺܝܠܰܢ ܗܰܘ ܕܰܒܝܰܕ ܚܛܺܝܬܳܐ ܐܰܥܬܶܩ ܘܰܒܠܺܝ܆ ܘܰܠܘܳܬ ܚܰܝ̈ܶܐ ܚܰܕ̈ܬܶܐ ܩܳܪܶܐ ܠܰܢ܆ ܗܳܢܽܘܢ ܕܰܒܗܽܘܢ ܠܰܫܡܰܝ̈ܳܐ ܚ̈ܰܕܬܶܐ ܘܠܰܐܪܥܳܐ ܚܕܰܬܳܐ^[3] ܐܰܝܟ ܫܽܘܘܕܳܝܳܐ ܕܺܝܠܶܗ ܡܣܰܟܶܝܢ ܚ̱ܢܰܢ܆ ܐܰܝܟܰܢܳܐ ܕܶܐܫܰܥܝܳܐ ܢܒܺܝܳܐ ܘܦܶܛܪܽܘܤ ܫܠܺܝܚܳܐ ܟܰܕ ܟܳܬܶܒ ܐܳܡܰܪ: ܠܰܘ ܓܶܝܪ ܚܢܰܢ ܒܰܠܚܽܘܕܰܝܢ. ܡܣܰܟܶܝܢ ܚ̱ܢܰܢ ܠܫܽܘܚܠܳܦ ܗܘܳܝܳܐ ܕܰܠܘܳܬ ܗܳܝ ܕܰܡܝܰܬܪܳܐ. ܒܝܰܕ ܩܝܳܡܬܳܐ܆ ܐܶܠܳܐ ܐܳܦ ܠܟܽܠܳܗ̇ ܒܪܺܝܬܳܐ ܗܳܝ ܕܒܰܚܕܳܪ̈ܰܝܢ ܡܶܬܚܰܙܝܳܐ܆ ܫܽܘܚܠܳܦ ܐܶܣܟܺܡܳܐ ܕܕܳܡܶܐ^[4] ܠܫܽܘܒܚܳܐ ܕܺܝܠܰܢ ܢܶܗܘܶܐ ܠܳܗ̇܆ ܘܬܶܫܬܰܘܬܰܦ ܒܢܰܨܺܝܚܽܘܬܳܐ ܕܡܶܢ ܬܰܡܳܢ.

4: ܐܰܟܙܢܳܐ ܓܶܝܪ ܕܗܳܫܳܐ ܟܰܕ ܚܢܰܢ ܠܰܚܒܳܠܳܐ ܗܰܘ ܕܡܶܢ ܚܛܺܝܬܳܐ ܐܶܫܬܰܥܒܰܕܢܰܢ^[5]܆ ܐܳܦ ܐܶܤܛܽܘ̈ܟܣܶܐ ܗܳܠܶܝܢ ܕܰܠܘܳܬܰܢ ܬܚܶܝܬ ܚ̈ܒܳܠܶܐ ܡܶܕܶܡ ܘܫܽܘܚ̈ܠܳܦܶܐ ܟܕܺܝܢܺܝܢ܆ ܚܳܙܶܝܢܰܢ ܓܶܝܪ ܠܫܶܡܫܳܐ ܡܰܢ ܕܚܳܫܶܟ܆ ܠܣܰܗܪܳܐ ܕܶܝܢ ܕܡܰܘܦܶܐ܆ ܐܰܝܟܰܢܳܐ ܕܶܐܡܰܪ ܐܺܝܽܘܒ^[6]. ܗܰܘ ܪܰܒܳܐ ܕܦܺܝܠܳܣܽܘ̈ܦܶܐ. ܗܳܟܰܢܳܐ ܗܳܝܕܶܝܢ܆ ܟܰܕ ܠܳܐ ܡܳܝܽܘܬܽܘܬܳܐ ܘܠܳܐ ܡܶܬܚܰܒܠܳܢܽܘܬܳܐ ܥܬܺܝܕܳܐ ܕܰܬܗܰܒܶܒ ܥܰܠ ܦܰܓܪ̈ܶܐ ܕܺܝܠܰܢ ܡܶܢ ܡܰܪܓܳܐ ܕܗܰܒܳܒ̈ܶܐ. ܗܰܘ ܕܰܩܝܳܡܬܳܐ܆ ܐܳܦ ܥܳܠܡܳܐ ܗܳܢܳܐ ܡܶܬܚܰܙܝܳܢܳܐ ܕܒܰܚܕܳܪ̈ܰܝܢ܆ ܒܦܰܐܝܽܘܬܳܐ ܕܠܳܚܡܳܐ ܢܶܗܘܶܐ ܡܰܨܡܰܚ. ܟܰܕ ܡܚܰܘܶܐ ܒܝܰܕ ܗܳܕܶܐ. ܥܳܒܽܘܕܳܐ ܗ̱ܘ ܛܳܒܳܐ܆ ܘܰܡܫܰܚܠܦܳܢܳܐ ܕܰܠܘܳܬ ܗܳܝ ܕܝܰܬܺܝܪ ܫܰܦܺܝܪܳܐ܆ ܕܳܐܦ ܡܶܢ ܫܽܘܪܳܝܳܐ܆ ܡܶܛܽܠ ܥܰܒܕܽܘܬܳܐ ܕܺܝܠܰܢ ܘܬܶܫܡܶܫܬܳܐ܆ ܠܰܒܪܺܝܬܳܐ ܡܶܬܪܰܓܫܳܢܺܝܬܳܐ ܡܶܢ ܗܳܝ ܕܠܳܐ ܐܺܝܬܶܝܗ̇ ܗ̱ܘܳܬ ܠܗܳܝ ܕܬܶܗܘܶܐ ܐܺܝܬܶܝܗ̇ ܐܰܝܬܺܝ^[7]. ܘܰܠܚܰܪܬܳܐ ܬܽܘܒ܆ ܡܶܛܽܠܳܬܰܢ ܢܶܗܦܽܘܟ^[8] ܢܠܰܚܡܺܝܗ̇܆ ܠܘܳܬ ܩܰܛܰܤܛܰܣܺܝܤ ܗܳܝ ܫܒܺܝܚܬܳܐ ܘܰܕܠܳܐ ܣܰܝܒܽܘ.

5: ܗܳܝ ܕܳܐܦ ܐܶܫܰܥܝܳܐ ܗܰܘ ܢܒܺܝܳܐ ܟܰܕ ܩܰܕܶܡ ܗ̱ܘܳܐ ܚܳܙܶܐ ܐܳܡܰܪ ܗ̱ܘܳܐ܆ ܐܰܝܟ ܡܳܐ ܕܡܰܨܝܳܐ ܗ̱ܘܳܬ ܠܡܺܐܡܰܪ ܠܗܰܘ ܕܡܶܬܢܰܒܶܐ ܡܶܛܽܠ ܫܽܘܒܚܳܐ ܗܰܘ ܠܳܐ ܡܶܬܡܰܠܠܳܢܳܐ. ܠܗܰܘ ܕܳܐܦܠܳܐ ܥܰܝܢܳܐ ܚܙܳܬ݂ ܘܳܐܦܠܳܐ ܐܶܕܢܳܐ ܫܶܡܥܰܬ݂^[9]܆ ܘܳܐܦܠܳܐ ܬܰܪܥܺܝܬܳܐ ܐܰܝܟ ܕܺܐܝܬܰܘܗ̱ܝ ܐܶܫܟܚܰܬ݂ ܠܡܶܬܗܰܓܳܓܽܘ܆ ܘܢܶܗܘܶܐ ܢܽܘܗܪܳܐ ܕܣܰܗܪܳܐ ܐܰܝܟ ܢܽܘܗܪܳܐ ܕܫܶܡܫܳܐ܆ ܘܢܽܘܗܪܳܐ ܕܫܶܡܫܳܐ ܢܶܗܘܶܐ ܫܰܒܥܳܐ ܥܶܐܦܺܝ̈ܢ ܒܝܰܘܡܳܐ ܗܰܘ܆ ܐܶܡܰܬܝ ܕܢܰܐܣܶܐ ܡܳܪܝܳܐ ܬܒܳܪܳܐ ܕܥܰܡܳܐ ܕܺܝܠܶܗ܆ ܘܰܠܟܺܐܒܳܐ ܕܰܡܚܽܘܬܶܗ ܢܰܐܣܶܐ^[10].

6: ܡܚܽܘܬܳܐ ܕܶܝܢ ܗܳܝ ܕܡܶܢ ܚܛܺܝܬܳܐ ܒܠܰܥܢܰܢ܆ ܐܺܝܬܶܝܗ̇ ܡܰܘܬܳܐ. ܐܳܣܝܽܘܬܳܐ ܕܶܝܢ ܕܗܳܕܶܐ܆ ܡܳܢܳܐ ܐ̱ܚܪܺܢܳܐ ܐܶܠܳܐ ܐܶܢ ܩܝܳܡܬܳܐ ܢܶܬܚܰܫܰܒ ܐ̱ܢܳܫ ܕܺܐܝܬܶܝܗ̇. ܗܳܝ ܕܡܶܛܽܠܳܬܳܗ̇. ܐܳܦ ܫܶܡܫܳܐ. ܐܳܦ ܣܰܗܪܳܐ܆ ܐܳܦ ܒܪܺܝܬܳܐ ܗܳܝ ܕܫܰܪܟܳܐ ܕܶܐܤܛܽܘ̈ܟܣܶܐ܆ ܕܝܰܬܺܝܪ ܢܰܨܺܝܚܳܐ ܬܶܗܘܶܐ ܐܺܝܬܶܝܗ̇. ܘܰܕܡܶܬܥܰܠܡܳܐ ܐܰܡܺܝܢܳܐܺܝܬ. ܘܛܳܒ ܟܺܐܢܳܐܺܝܬ.

7: ܐܰܟܙܢܳܐ ܓܶܝܪ ܕܥܰܒܕܳܐ ܟܰܕ ܒܺܝܫܳܐܺܝܬ ܡܰܢ ܣܳܥܰܪ ܡܳܪܶܗ܆ ܡܶܫܬܰܘܬܰܦ ܥܰܡܶܗ ܐܳܦ ܗܽܘ ܒܣܳܥܽܘܪܽܘܬ ܒܺܝ̈ܫܳܬܳܐ܆ ܟܰܕ ܕܶܝܢ ܢܶܫܬܰܚܠܰܦ ܠܘܳܬ ܛܳܒܬܳܐ܆ ܫܰܦܺܝܪ ܢܶܗܘܶܐ ܣܺܝܡ ܐܳܦ ܗܽܘ܆ ܗܳܟܰܢܳܐ ܐܳܦ ܗܺܝ ܒܪܺܝܬܳܐ܆ ܟܰܕ ܐܶܬܛܰܟܣܰܬ݂ ܕܬܶܦܠܽܘܚ ܠܰܢ ܥܰܒܕܽܘܬܳܐ܆ ܐܶܫܬܰܘܬܦܰܬ݂ ܡܶܢ ܩܕܺܝܡ ܒܰܚܒܳܠܳܐ܆ ܟܰܕ ܕܶܝܢ ܢܶܦܢܶܐ ܠܘܳܬ݂ ܠܳܐ ܡܶܬܚܰܒܠܳܢܽܘܬܳܐ܆ ܬܶܫܬܰܘܬܰܦ ܬܽܘܒ ܐܰܟܚܕܳܐ ܥܰܡܰܢ܆ ܐܳܦ ܒܺܐܝܩܳܪܳܐ ܕܡܶܢ ܬܰܡܳܢ. ܗܳܝ ܟܺܝܬ. ܕܳܐܦ ܐܰ‎ܠܳܗܳܝܳܐ ܦܰܘܠܽܘܤ܆ ܟܰܕ ܠܪ̈ܽܘܡܳܝܳܐ ܟܳܬܶܒ ܐܳܡܰܪ ܗ̱ܘܳܐ ܗܳܟܰܢܳܐ. ܣܽܘܟܳܝܳܐ ܕܶܝܢ ܕܰܒܪܺܝܬܳܐ܆ ܠܓܶܠܝܳܢܳܐ ܕܰܒܢܰܝ̈ܳܐ ܕܰܐ‎ܠܳܗܳܐ ܡܣܰܟܶܐ ܘܰܡܩܰܘܶܐ. ܠܰܣܪܺܝܩܽܘܬܳܐ ܓܶܝܪ ܐܶܫܬܰܥܒܕܰܬ ܒܪܺܝܬܳܐ ܠܰܘ ܒܨܶܒܝܳܢܳܗ̇ ܐܶܠܳܐ ܡܶܛܽܠ ܗܰܘ ܕܫܰܥܒܕܳܗ̇ ܥܰܠ ܣܰܒܪܳܐ. ܡܶܛܽܠ ܕܳܐܦ ܗܺܝ ܒܪܺܝܬܳܐ܆ ܬܶܬܚܰܪܰܪ ܡܶܢ ܥܰܒܕܽܘܬܳܐ ܕܰܚܒܳܠܳܐ܆ ܒܚܺܐܪܽܘܬܳܐ ܕܫܽܘܒܚܳܐ ܕܰܒܢܰܝ̈ܳܐ ܕܰܐ‎ܠܳܗܳܐ^[11]. ܝܳܕܥܺܝܢ ܚ̱ܢܰܢ ܓܶܝܪ. ܕܟܽܠܳܗ̇ ܒܪܺܝܬܳܐ܆ ܐܰܟܚܕܳܐ ܡܶܬܬܰܢܚܳܐ܆ ܘܰܐܟܚܕܳܐ ܚܳܒܠܳܐ ܥܰܡܰܢ ܥܕܰܡܳܐ ܠܗܳܫܳܐ.

8: ܦܰܪܨܽܘܦܳܐ ܥܳܒܶܕ ܠܳܗ̇ ܠܰܒܪܺܝܬܳܐ ܗܽܘ ܟܳܪܽܘܙܳܐ ܕܰܫܪܳܪܳܐ܆ ܟܰܕ ܨܳܒܶܐ ܕܰܢܚܰܘܶܝܗ̇ ܓܰܠܝܳܐܺܝܬ ܠܪܰܒܽܘܬܶܗ ܕܣܽܘܥܪܳܢܳܐ. ܘܳܐܡܰܪ ܕܰܡܣܰܟܝܳܐ. ܗܳܢܰܘ ܕܶܝܢ. ܕܣܰܓܺܝ ܛܳܒ ܡܣܰܘܚܳܐ ܒܣܽܘܟܳܝܳܗ̇܆ ܠܘܳܬ ܝܰܘܡܳܐ ܕܰܩܝܳܡܬܳܐ܆ ܗܰܘ ܕܺܐܝܬܰܘܗ̱ܝ ܓܶܠܝܳܢܳܐ ܕܰܒܢܰܝ̈ܳܐ ܕܰܐ‎ܠܳܗܳܐ܆ ܘܡܶܬܚܰܘܝܳܢܽܘܬܳܐ ܕܙܰܕܺܝ̈ܩܶܐ. ܣܽܘܟܳܝܳܐ ܓܶܝܪ܆ ܢܛܽܘܪܬܳܐ ܡܬܺܝܚܬܳܐ ܕܗܳܢܶܝܢ ܕܡܶܣܬܰܒܪ̈ܳܢ ܐܰܡܺܝܪ. ܐܰܝܟܰܢܳܐ ܕܗܰܘ ܕܰܡܣܰܟܶܐ. ܐܰܝܟ ܕܰܠܡܺܐܡܰܪ܆ ܐܳܦ ܪܺܝܫܶܗ ܢܶܨܠܶܐ܆ ܐܳܦ ܥܰܝܢܰܘ̈ܗ̱ܝ ܢܶܡܬܽܘܚ܆ ܐܰܝܟ ܗܰܘ ܕܗܳܐ ܡܶܚܕܳܐ ܡܶܢ ܟܰܕܽܘ ܥܬܺܝܕ ܕܢܶܚܙܶܝܘܗ̱ܝ ܠܗܰܘ ܡܳܐ ܕܡܶܣܬܰܟܝܳܐ. ܘܟܰܕ ܡܟܰܬܰܪ ܗܽܘ ܫܠܺܝܚܳܐ. ܒܥܳܒܽܘܕܽܘܬ ܦܰܪܨܽܘܦܳܐ ܗܳܝ ܕܡܶܛܽܠ ܒܪܺܝܬܳܐ܆ ܕܶܐܫܬܰܥܒܕܰܬ ܒܪܺܝܬܳܐ ܠܰܣܪܺܝܚܽܘܬܳܐ ܐܳܡܰܪ ܠܰܘ ܒܨܶܒܝܳܢܳܗ̇܆ ܐܶܠܳܐ ܡܶܛܽܠ ܗܰܘ ܕܫܰܥܒܕܳܗ̇ ܥܰܠ ܣܰܒܪܳܐ܆ ܡܶܛܽܠ ܕܳܐܦ ܗܺܝ ܒܪܺܝܬܳܐ ܬܶܬܚܰܪܰܪ ܡܶܢ ܥܰܒܕܽܘܬܳܐ ܕܰܚܒܳܠܳܐ܆ ܒܚܽܘܪܳܪܳܐ ܕܫܽܘܒܚܳܐ ܕܰܒܢܰܝ̈ܳܐ ܕܰܐ‎ܠܳܗܳܐ.

9: ܟܰܕ ܓܶܝܪ ܒܰܚܛܺܝܬܳܐ ܐܶܬܬܰܛܥܺܝܢܰܢ ܚܢܰܢ܆ ܠܚܰܝ̈ܶܐ ܣܪ̈ܺܝܩܶܐ ܘܰܡܚܰܒ̈ܠܶܐ ܐܶܬܥܰܪܓܰܠܢܰܢ܆ ܒܪܰܡ ܕܶܝܢ ܐܳܦ ܟܰܕ ܗܳܟܰܢܳܐ ܐܺܝܬ ܠܰܢ܆ ܘܰܠܘܳܬ ܟܽܠ ܪܶܓܬܳܐ ܫܟܺܝܪܬܳܐ ܫܪܰܥܢܰܢ܆ ܘܳܐܦ ܠܘܳܬܶܗ ܕܓܽܘܡܳܨܳܐ ܕܰܐܒܕܳܢܳܐ܆ ܐܘܡܘܤ ܗ̱ܝ ܒܪܺܝܬܳܐ. ܐܶܫܬܰܥܒܕܰܬ ܠܰܢ܆ ܠܰܘ ܒܨܶܒܝܳܢܳܗ̇. ܗܳܢܰܘ ܕܶܝܢ܆ ܕܠܰܘ ܟܰܕ ܫܳܘܶܝܢ ܚ̱ܢܰܢ. ܠܗܳܢܽܘܢ ܓܶܝܪ ܕܫܳܘܶܝܢ܆ ܨܶܒܝܳܢܳܐܺܝܬ ܡܩܰܒܶܠ ‌ܐ̱ܢܳܫ ܥܠܰܘܗ̱ܝ ܕܢܶܦܠܽܘܚ ܥܰܒܕܽܘܬܳܐ. ܗܳܝ ܕܶܝܢ. ܕܰܠܗܳܢܽܘܢ ܕܠܳܐ ܫܳܘܶܝܢ ܢܶܫܬܰܥܒܰܕ ܐ̱ܢܳܫ܆ ܐܰܝܟ ܕܰܒܣܽܘܓܳܐܐ ܠܳܐ ܨܶܒܝܳܢܳܝܬܳܐ ܗ̱ܝ܆ ܐܶܠܳܐ ܡܶܛܽܠ ܗܰܘ ܕܫܰܥܒܕܳܗ̇܆ ܒܰܫܦܺܝܥܽܘܬܳܐ ܕܒܰܣܺܝܡܽܘܬܶܗ܆ ܘܰܒܥܽܘܬܪܳܐ ܕܛܳܒܽܘܬܶܗ܆ ܗܰܘ ܕܡܰܚܶܬ݂ ܡܰܢ ܡܶܛܪܳܐ ܥܰܠ ܙܰܕܺܝ̈ܩܶܐ ܘܥܰܠ ܥܰܘܴ̈ܠܶܐ܆ ܡܰܕܢܰܚ ܕܶܝܢ ܫܶܡܫܳܐ ܥܰܠ ܒܺܝ̈ܫܶܐ ܟܺܝܬ ܘܥܰܠ ܛܳܒ̈ܶܐ^[12]. ܘܠܰܘ ܦܫܺܝܛܳܐܺܝܬ. ܐܶܠܳܐ ܟܰܕ ܚܠܺܝܛܳܐ ܟܺܐܢܽܘܬܳܐ ܒܛܳܒܽܘܬܳܐ ܘܰܒܒܰܣܺܝܡܽܘܬܳܐ. ܠܗܳܢܽܘܢ ܕܰܚܕܳܐ ܙܒܰܢ ܐܶܣܬܰܪܰܩܘ ܘܶܐܬܚܰܒܰܠܘ^[13]܆ ܡܶܢ ܥܰܒܕܽܘܬܳܐ ܕܒܶܪ̈ܝܳܬܳܐ ܐܰܝܟ ܕܰܠܠܳܐ ܫܳܘܰܝ̈ܳܐ ܠܳܐ ܓܠܰܙ ܐܶܢܽܘܢ. ܐܶܠܳܐ ܥܰܠ ܣܰܒܪܳܐ ܕܗܳܝ ܕܳܐܦ ܗܶܢܶܝܢ ܡܶܫ̈ܬܰܘܝܳܢ ܠܚܺܐܪܽܘܬܳܐ܆ ܘܡܶܫܬܰܘ̈ܬܦܳܢ ܠܫܽܘܒܚܳܐ ܗܰܘ ܕܰܡܠܺܝܟ ܠܰܒܢܰܝ̈ܳܐ ܕܰܐ‎ܠܳܗܳܐ܆ ܐܳܦܶܢ ܗܳܫܳܐ ܐܰܟܚܕܳܐ ܥܰܡܰܢ ܡܶܬܬܰܢ̈ܚܳܢ ܘܰܐܟܚܕܳܐ ܚܳܒ̈ܠܳܢ܆ ܘܡܶܬܝ̈ܰܐܒܳܢ ܠܡܶܫܬܘܳܝܽܘ ܠܣܰܒܪܳܐ ܗܰܘ.

10: ܗܳܝ ܕܶܝܢ ܕܰܐܟܚܕܳܐ ܡܶܬܬܰܢܚܳܐ. ܘܰܐܟܚܕܳܐ ܚܳܒܠܳܐ܆ ܐܰܟܙܢܳܐ ܕܗܳܝ ܕܶܐܫܬܰܥܒܕܰܬ݂ ܒܪܺܝܬܳܐ ܠܰܘ ܒܨܶܒܝܳܢܳܗ̇܆ ܕܺܝܠܳܝܬܳܐ ܗ̱ܝ ܐܳܦ ܗܺܝ ܕܶܐܣܟܺܡܳܐ ܗܰܘ ܕܥܳܒܽܘܕܽܘܬ݂ ܦܰܪܨܽܘܦܳܐ. ܠܰܘ ܓܶܝܪ ܐܰܝܟܰܢܳܐ ܕܰܡܠܺܝܠܬܳܐ ܢܚܰܘܶܝܗ̇ ܠܰܒܪܺܝܬܳܐ ܗܳܝ ܠܳܐ ܡܰܪܓܫܳܢܺܝܬܳܐ܆ ܗܳܠܶܝܢ ܐܶܡܰܪ ܗܽܘ ܫܠܺܝܚܳܐ܆ ܐܶܠܳܐ ܐܰܝܟܰܢܳܐ ܕܰܒܝܰܕ ܗܳܝ ܕܥܳܒܕܳܐ ܦܰܪܨܽܘܦܳܐ ܠܰܒܪܺܝܬܳܐ ܗܺܝ ܡܶܠܬܳܐ܆ ܝܰܬܺܝܪ ܓܰܠܝܳܐܺܝܬ ܘܝܰܬܺܝܪ ܢܰܗܺܝܪܳܐܺܝܬ ܘܡܶܬܚܰܘܝܳܢܳܐܺܝܬ ܬܰܘܕܥܺܝܘܗ̱ܝ ܠܚܰܝܠܶܗ ܕܣܽܘܟܳܠܳܐ.

11: ܥܝܳܕܰܐ ܗ̱ܘ ܓܶܝܪ ܠܰܟܬܳܒܳܐ ܐܰ‎ܠܳܗܳܝܳܐ܆ ܕܰܢܣܺܝܡ ܦܰܪܨܽܘܦܳܐ ܥܰܠ ܠܳܐ ܡܢܰܦ̈ܫܶܐ ܘܠܳܐ ܡܰܪ̈ܓܫܳܢܶܐ܆ ܘܕܰܢܫܰܐܶܠ ܡ̈ܶܠܶܐ ܠܠܳܐ ܡܠܺܝ̈ܠܶܐ. ܘܒܰܙܒܰܢ ܡܰܢ ܢܺܐܡܰܪ: ܡܳܢܰܐ ܗ̱ܘ ܠܳܟ ܝܰܡܳܐ ܕܰܥܪܰܩܬ݁܆ ܘܠܳܟ ܝܽܘܪܕܢܳܢ ܕܰܗܦܰܟܬ݁ ܠܒܶܣܬܪܳܟ؟ ܛܽܘܪ̈ܶܐ ܕܕܰܝܶܨܬܽܘܢ ܐܰܝܟ ܕܶܟܪ̈ܶܐ܆ ܘܪ̈ܳܡܳܬܳܐ ܐܰܝܟ ܐܶܡܪ̈ܶܐ ܕܥܳܢ̈ܳܐ^[14]. ܒܰܙܒܰܢ ܕܶܝܢ ܬܽܘܒ ܒܝܰܕ ܡܺܝܟܳܐ ܢܒܺܝܳܐ ܠܡܰܙܥܳܩܽܘ: ܫܡܰܥ̈ܝ ܪ̈ܳܡܳܬܳܐ ܠܕܺܝܢܶܗ ܕܡܳܪܝܳܐ܆ ܘܢܰܚ̈ܠܶܐ ܫܶܬܶܐܣ̈ܶܐ ܕܰܐܪܥܳܐ^[15]܆ ܡܶܛܽܠ ܕܕܺܝܢܳܐ ܠܡܳܪܝܳܐ ܠܘܳܬ݂ ܥܰܡܳܐ ܕܺܝܠܶܗ܆ ܘܥܰܡ ܐܺܝܣܪܳܐܶܝܠ ܢܶܬܟܣܶܤ.

12: ܘܳܐܦ ܡܽܘܫܶܐ ܕܶܝܢ܆ ܟܰܕ ܡܶܢ ܟܽܠܶܗ ܚܽܘܠܛܳܢܳܐ ܫܟܺܝܪܳܐ ܘܠܳܐ ܢܳܡܽܘܣܳܝܳܐ ܘܙܽܘܘܳܓ̈ܶܐ ܕܰܠܒܰܪ ܡܶܢ ܢܳܡܽܘܣܳܐ܆ ܟܳܠܶܐ ܗ̱ܘܳܐ ܠܗܽܘܢ ܠܗܳܢܽܘܢ ܕܡܶܢܶܗ ܡܩܰܒܠܺܝܢ ܗ̱ܘܰܘ ܢܳܡܽܘܣܳܐ܆ ܘܰܐܝܟ ܗܰܘ ܕܕܰܢܕܰܚܶܠ ‌ܐܶܢܽܘܢ ܨܳܒܶܐ ܗ̱ܘܳܐ܆ ܕܰܗܘܳܬ ܗܺܝ ܐܰܪܥܳܐ ܕܡܽܘܠܟܳܢܳܐ ܒܥܶܠܕܒܳܒܬܳܐ ܠܥܰܡ̱ܡ̈ܶܐ ܗܳܢܽܘܢ ܕܩܰܕܺܝܡܺܝܢ ܗ̱ܘܰܘ ܐܰܚܺܝܕܺܝܢ ܠܳܗ̇ ܐܳܡܰܪ: ܘܕܰܐܝܟ ܗܰܘ ܕܡܶܬܬܰܢܳܚܽܘ ܡܶܬܬܰܢܚܳܐ ܗ̱ܘܳܬ݂܆ ܡܶܛܽܠ ܣܳܥܽܘܪ̈ܘܳܬܗܽܘܢ ܠܳܐ ܚܰܣ̈ܝܳܬܳܐ܆ ܘܡܶܛܽܠ ܣܰܓܺܝܽܐܘܬܳܗ̇ ܕܰܫܟܺܝܪܽܘܬܳܐ. ܟܳܕ ܟܳܬܶܒ ܗܳܟܰܢܳܐ. ܘܠܳܐ ܬܶܣܬܰܝܒܽܘܢ ܒܟܽܠܗܶܝܢ ܗܳܠܶܝܢ. ܡܶܛܽܠ ܕܰܒܟܽܠܗܶܝܢ ܗܳܠܶܝܢ ܐܶܣܬܰܝܰܒܘ ܥܰܡ̱ܡ̈ܶܐ ܗܳܠܶܝܢ ܕܶܐܢܳܐ ܡܰܘܒܶܕ ܐ̱ܢܳܐ ܡܶܢ ܩܕܳܡ ܦܰܪܨܽܘܦܳܐ ܕܺܝܠܟܽܘܢ. ܘܶܐܣܬܰܝܒܰܬ݂ ܐܰܪܥܳܐ܆ ܘܣܶܥܪܶܬ݂ ܠܥܰܘܳܠܽܘܬܳܐ ܕܺܝܠܳܗ̇ ܥܠܶܝܗ̇. ܘܢܶܕܰܬ݂ ܠܳܗ̇ ܠܰܐܪܥܳܐ ܡܶܢ ܗܳܢܽܘܢ ܕܝܳܬܒܺܝܢ ܥܠܶܝܗ̇.

13: ܡܶܛܽܠ ܗܳܟܺܝܠ ܕܰܒܝܰܕ ܨܰܘܡܳܐ. ܩܳܕܡܺܝܢܰܢ ܘܡܶܬܕܰܟܶܝܢ ܚ̱ܢܰܢ ܩܕܳܡ ܩܝܳܡܬܳܐ܆ ܗܳܝ ܕܪܰܗܒܽܘܢܳܗ̇ ܘܡܶܫܟܳܢܳܗ̇ ܝܰܗ̱ܒ ܠܰܢ ܥܰܡܰܢܽܘܐܶܝܠ ܟܰܕ ܩܳܡ ܡܶܢ ܒܳܬܰܪ ܩܒܽܘܪܬܳܐ ܬܠܺܝܬܳܝܰܬ ܝܰܘ̈ܡܶܐ܆

ܐܺܝܬ ܒܨܺܝܪܽܘܬܳܐ ܡܶܢ ܡܶܢܝܳܢܳܐ 13- 19

Lacune de la fin de l’homelie 17 et du debut de l’homelie 18

Add. 12.163, 29 v^o _a

20: ܕܣܐܘܪܐ ܡܶܢ ܏ܡ ܏ܕܝܘ ܏ܕܐܦ. ܥܣܶܩ ܠܫܽܘܚܠܳܦܳܐ ܓܶܝܪ ‌ܐܺܝܬܰܘܗ̱ܝ ܥܝܳܕܳܐ. ܘܠܳܐܣܝܽܘܬܳܐ ܕܡܶܢܫܶܠܝ ܠܳܐ ܡܶܬܪܡܶܐ. ܗܳܟܰܢܳܐ ܕܠܰܒ̈ܢܰܝ ܐܺܝܣܪܳܐܶܝܠ ܕܠܳܐ ܡܫܰܡܠܝܳܐܺܝܬ ܐܺܝܬܰܝܗܽܘܢ ܗ̱ܘܰܘ܆ ܘܰܠܘܳܬ ܕܶܚܠܰܬ ܦܬܰܟܪ̈ܶܐ ܡܶܨܛܠܶܝܢ ܗ̱ܘܰܘ܆ ܡܶܛܽܠ ܡܰܥܡܪܗܽܘܢ ܕܙܰܒܢܳܐ ܣܰܓܺܝܳܐܐ ܕܰܒܡܶܨܪܶܝܢ܆ ܒܰܨܒܽܘܬܳܐ ܕܕܳܡܝܳܐ ܗܳܢܰܘ ܕܶܝܢ ܒܝܰܕ ܕܡܳܐ܆ ܐܰܪܦܺܝ ܐܶܢܽܘܢ ܐܰ‎ܠܳܗܳܐ ܕܰܢܕܰܒܚܽܘܢ܆ ܕܰܕܢܶܟܠܶܐ ܐܶܢܽܘܢ ܡܫܰܡܠܝܳܐܺܝܬ ܡܶܢ ܗܳܕܶܐ ܠܳܐ ܡܨܶܐ ܗ̱ܘܳܐ. ܝܳܕܰܥ ܗ̱ܘܳܐ ܓܶܝܪ ܕܠܳܐ ܡܶܬܬܦܺܝܣܺܝܢ. ܠܶܗ ܕܶܝܢ ܠܚܽܘܕܰܘܗ̱ܝ ܕܰܢܕܰܒܚܽܘܢ ܦܩܰܕ܆ ܘܰܒܗܳܕܶܐ ܦܰܓܶܕ ܠܚܺܐܦ̈ܶܐ ܠܳܐ ܡܛܰܟ̈ܣܶܐ ܕܰܠܘܳܬ ܣܰܓܺܝܽܐܘܬ݂ ܐܰ‎ܠܳܗ̈ܶܐ. ܕܰܥܕܰܡܳܐ ܕܟܰܕ ܠܘܳܬ ܬܰܪܥܺܝܬܳܐ ܡܫܰܡܠܰܝܬܳܐ ܐܶܬܰܘ܆ ܐܶܡܰܪܘ ܗܶܢܽܘܢ ܐܰܝܟ ܕܰܘܺܝܕ: ܕܶܐ‌ܠܽܘ ܒܥܺܝܬ݂ ܕܶܒܚ̈ܶܐ ܝܳܗܶܒ ܗ̱ܘܰܝܬ݂. ܒܝܰܩܕ̈ܶܐ ܫܰܠܡ̈ܶܐ ܠܳܐ ܨܳܒܶܐ ܐܰܢ̱ܬ܆ ܕܶܒܚܳܐ ܠܰܐܠܳܗܳܐ ܪܽܘܚܳܐ ܫܚܺܝܩܬܳܐ^[16].

21: ܗܳܟܰܢܳܐ ܕܳܐܦ ܒܨܶܨ̈ܠܶܐ ܘܰܒܩܺܝܬܳܪ̈ܶܐ^[17]. ܘܰܒܡܳܐܢ̈ܶܐ ܗܳܠܶܝܢ ܐ̱ܚܪ̈ܳܢܶܐ ܕܡܽܘܣܺܝܩܳܪܽܘܬܳܐ ܦܳܩܶܕ ܠܡܶܙܡܰܪ. ܡܶܛܽܠ ܕܒܰܙܡܳܪ̈ܶܐ ܘܰܒܡܰܫܬܝ̈ܶܐ ܐܶܬܪܰܒܺܝܘ ܘܰܒܦܰܩܪܽܘܬܳܐ ܕܫ̈ܺܐܕܶܐ܆ ܘܰܒ̈ܥܺܐܕܶܐ ܘܰܒܚܰܓ̈ܶܐ ܘܰܒܪ̈ܶܩܕܶܐ. ܠܚܰܪܬܳܐ ܕܶܝܢ ܒܝܰܕ ܢܒܺܝܳܐ ܓܰܠܝܳܐܺܝܬ ܐܰܙܥܶܩ܆ ܐܰܪܚܶܩ ܡܶܢܝ ܩܳܠܳܐ ܕܰܙܡܳܪ̈ܰܝܟ܆ ܘܰܙܡܺܝܪ̈ܳܬܳܐ ܕܟܶܢܳܪ̈ܰܝܟ ܬܽܘܒ ܠܳܐ ܫܳܡܰܥ ܐ̱ܢܳܐ^[18]. ܘܬܽܘܒ. ܙܡܳܪܳܐ ܗܳܟܺܝܠ ܕܰܛܝܳܪܳܐ ܐܰ‎ܠܳܗܳܝܳܐ܆ ܚܢܺܝܓܳܐ ܘܡܰܥܒܕܳܢܳܐ ܕܶܐܒܠܳܐ ‌ܐܺܝܬܰܘܗ̱ܝ ܘܡܶܢ ܒܳܬܰܪ ܐܶܒܠܳܐ ܕܪܶܓܬܳܐ ܢܰܟܦܬܳܐ ܟܰܕ ܢܰܦܫܳܐ ܡܫܺܝܓܳܐ ܒܕܶܡ̈ܥܶܐ ܠܟܽܘ̈ܬܡܳܬܳܐ ܕܰܚ̈ܛܳܗܶܐ. ܫܠܶܡ ܗܳܠܶܝܢ ܕܡܶܢ ܟܬܳܒܳܐ ܕܬܶܢܝܳܢ ܢܳܡܽܘܣܳܐ.

25: ܡܳܢܳܐ ܓܶܝܪ ܢܨܰܠܶܐ ܐܰܟܡܳܐ ܕܘܠܳܐ ܠܳܐ ܝܳܕܥܺܝܢܰܢ. ܐܶܠܳܐ ܗܺܝ ܪܽܘܚܳܐ ܡܨܰܠܝܳܐ ܚܠܳܦܰܝܢ ܒܬܶܢ̈ܚܳܬܳܐ ܕܠܳܐ ܡܶܬܡܰܠ̈ܠܳܢ. ܕܡܳܐܶܫ ܕܶܝܢ ܠܶܒܰܘ̈ܳܬܳܐ܆ ܝܳܕܰܥ ܡܳܢܳܐܗ̱ܝ ܬܰܪܥܺܝܬܳܐ ܕܪܽܘܚܳܐ. ܕܰܐܝܟ ܨܶܒܝܳܢܶܗ ܗ̱ܘ ܕܰܐ‎ܠܳܗܳܐ ܡܨܰܠܝܳܐ ܚܠܳܦ ܩܰܕܺܝ̈ܫܶܐ^[19]܆ ܡܳܢܰܘ ܕܶܝܢ ܡܶܕܶܡ ܕܰܒܗܳܠܶܝܢ ܡ̈ܶܠܶܐ ܡܰܘܕܰܥ. ܕܰܥ ܗܳܟܺܝܠ ‌ܐܳܘ ܫܳܡܽܘܥܳܐ ܡܶܬܒܰܚܢܳܐ. ܕܛܰܝ̈ܒܘܳܬܳܐ ܣܰܓܺܝ̈ܳܐܬܳܐ ܡܶܬܝܰܗ̈ܒܳܢ ܗ̱ܘܰܝ̈ ܡܶܢ ܐܰ‎ܠܳܗܳܐ ܠܗܳܢܽܘܢ ܕܗܳܝܕܶܝܢ ܡܗܰܝܡܢܺܝܢ ܗ̱ܘܰܘ ܘܥܳܡܕܺܝܢ ܡܶܢ ܫܠܺܝ̈ܚܶܐ. ܘܫܽܘܟܳܢ̈ܶܐ ܡܫܰܚ̈ܠܦܶܐ. ܠܗܳܠܶܝܢ ܕܪܽܘܚܳܐ ܩܳܪܶܐ ܠܟܽܠܚܰܕ ܚܰܕ ܡܶܢܗܽܘܢ. ܫܠܺܝܚܳܐ ܐܰ‎ܠܳܗܳܝܳܐ ܟܰܕ ܚܳܒܶܫ ܪܽܘܚܳܐ ܘܳܐܡܰܪ ܕܰܠܗܳܢܳܐ ܡܰܢ ܕܡܶܬܝܰܗܒܳܐ. ܡܶܠܬܳܐ ܕܚܶܟܡܬܳܐ ܘܰܠܣܰܓܺܝ̈ܶܐܐ ܡܰܠܶܦ ܗ̱ܘܳܐ. ܠܗܰܘ ܕܶܝܢ ܡܶܠܬܳܐ ܕܰܢܒܺܝܽܘܬܳܐ. ܘܰܡܩܰܕܶܡ ܗ̱ܘܳܐ ܐܳܡܰܪ. ܗܳܠܶܝܢ ܕܰܥܬܺܝ̈ܕܳܢ. ܠܗܳܢܳܐ ܬܽܘܒ ܡܰܘܗܰܒܬܳܐ ܕܳܐܣܝܽܘܬܳܐ܆ ܘܰܠܣܰܓܺܝ̈ܶܐܐ ܡܰܐܣܶܐ ܗ̱ܘܳܐ. ܘܠܰܐ̱ܚܪܺܢܳܐ ܚܰܝ̈ܠܶܐ. ܘܰܠܡܺܝ̈ܬܶܐ ܡܩܺܝܡ ܗ̱ܘܳܐ. ܘܠܰܐ̱ܚܪܺܢܳܐ ܠܶܫܳܢ̈ܶܐ^[20]. ܘܒܰܒ̈ܢܳܬ ܩܴ̈ܠܶܐ ܡܫܰܚ̈ܠܦܳܬܳܐ ܡܡܰܠܶܠ ܗ̱ܘܳܐ.

26: ܥܰܡ ܗܳܠܶܝܢ ܕܶܝܢ ܐܺܝܬ ܗ̱ܘܳܐ ܡܰܘܗܰܒܬܳܐ ܕܰܨܠܽܘܬܳܐ. ܕܳܐܦ ܗܳܕܶܐ ܪܽܘܚܳܐ ܡܶܬܩܰܪܝܳܐ ܗ̱ܘܳܬ݂. ܘܗܰܘ ܕܺܐܝܬ ܗ̱ܘܳܐ ܠܶܗ ܗܳܕܶܐ. ܚܠܳܦ ܟܽܠܶܗ ܥܰܡܳܐ ܡܨܰܠܶܐ ܗ̱ܘܳܐ. ܡܶܛܽܠ ܕܣܰܓܺܝ̈ܳܐܬܳܐ ܕܠܳܐ ܥܳܕܪ̈ܳܢ ܠܰܢ ܠܳܐ ܝܳܕܥܺܝܢܰܢ. ܘܰܐܝܠܶܝܢ ܕܠܳܐ ܦܳܩ̈ܚܳܢ ܘܠܳܐ ܡܥܰܕܪ̈ܳܢ ܫܳܐܠܺܝܢܰܢ. ܐܳܬܝܳܐ ܗ̱ܘܳܬ ܗܳܝܕܶܝܢ ܡܰܘܗܰܒܬܳܐ ܕܰܨܠܽܘܬܳܐ ܠܘܳܬ ܗܰܘ ܕܰܠܗܳܕܶܐ ܡܗܰܝܡܶܢ ܗ̱ܘܳܐ܆ ܗܰܘ ܡܶܕܶܡ ܕܦܰܩܳܚ ܘܰܡܥܰܕܰܪ ܠܟܽܠܶܗ ܓܰܘܳܐ ܕܥܺܕܬܳܐ܆ ܗܰܘ ܩܳܐܶܡ ܗ̱ܘܳܐ ܘܳܐܡܰܪ: ܘܰܠܫܰܪܟܳܐ ܡܰܪܬܶܐ ܗ̱ܘܳܐ. ܪܽܘܚܳܐ ܗܳܟܺܝܠ ‌ܐܳܡܰܪ ܫܠܺܝܚܳܐ ܕܰܡܨܰܠܶܐ ܚܠܳܦܰܝܢ܆ ܠܗܳܕܶܐ ܡܰܘܗܰܒܬܳܐ ܐܶܡܰܪ܆ ܘܰܠܢܰܦܫܳܐ ܕܰܡܩܰܒܠܳܐ ܠܳܗ̇ ܠܗܳܕܶܐ ܡܰܘܗܰܒܬܳܐ܆ ܘܓܳܥܝܳܐ ܠܘܳܬ ܐܰ‎ܠܳܗܳܐ. ܘܡܶܬܬܰܢܚܳܐ. ܘܗܰܘ ܕܰܠܗܳܕܶܐ ܐܶܫܬܘܺܝ ܩܳܐܶܡ ܥܰܡ ܚܰܫܳܐ ܕܠܶܒܳܐ܆ ܘܥܰܡ ܬܶܢܚ̈ܳܝܳܬܳܐ ܐܰܝܠܶܝܢ ܕܰܒܬܰܪܥܺܝܬܶܗ ܩܕܳܡ ܐܰ‎ܠܳܗܳܐ ܢܳܦܶܠ܆ ܘܗܳܠܶܝܢ ܕܰܠܟܽܠ ܦܳܩ̈ܚܳܢ ܫܳܐܶܠ. ܘܰܡܫܰܘܕܥܳܢܶܗ ܕܗܳܕܶܐ ‌ܐܺܝܬܰܘܗ̱ܝ ܡܫܰܡܫܳܢܳܐ ܗܰܘ ܕܰܨܠܽܘܬܳܐ ܚܠܳܦ ܥܰܡܳܐ ܡܩܰܪܶܒ.

27: ܡܳܕܶܝܢ ܡܶܢ ܗܳܪܟܳܐ ܢܶ݀ܣܬܰܟܰܠ܆ ܕܰܠܠܶܒܳܐ ܪܽܘܚܳܢܳܐ ܩܳܪܶܐ ܫܠܺܝܚܳܐ ܪܽܘܚܳܐ ܕܰܡܨܰܠܶܐ ܚܠܳܦܰܝܢ ܘܠܰܘ ܠܦܰܪܰܩܠܺܝܛܳܐ. ܘܢ̣ܰܗܪܳܗ̇ ܒܗܳܝ ܕܶܐܡܰܪ: ܕܗܰܘ ܕܒܳܨܶܐ ܠܶܒܰܘ̈ܳܬܳܐ ܝܳܕܰܥ ܡܳܢܳܐ ܗ̱ܝ ܬܰܪܥܺܝܬܳܐ ܕܪܽܘܚܳܐ. ܗܳܢܰܘ ܕܶܝܢ ܕܒܰܪܢܳܫܳܐ ܪܽܘܚܳܢܳܐ܆ ܕܰܐܝܟ ܨܶܒܝܳܢܶܗ ܕܰܐ‎ܠܳܗܳܐ ܡܨܰܠܝܳܐ ܚܠܳܦ ܩܰܕܺܝ̈ܫܶܐ. ܘܗܳܕܶܐ ܠܰܘ ܟܰܕ ܠܳܐ ܝܳܕܰܥ ܐܰ‎ܠܳܗܳܐ ܡܰܠܶܦ ܠܶܗ. ܐܶܠܳܐ ܕܰܚܢܰܢ ܢܺ݀ܐܠܰܦ ܕܰܢܨܰܠܶܐ ܗܳܠܶܝܢ ܕܘܳܠܶܐ܆ ܘܢܶ݀ܫܰܐܠ ܡܶܢ ܐܰ‎ܠܳܗܳܐ ܗܳܠܶܝܢ ܕܫܰܦܺܝܪ̈ܳܢ.

28: ܡܨܶܐ ܗ̱ܘ ܓܶܝܪ ܐ̱ܢܳܫܳܐ ܕܰܕܠܳܐ ܩܳܠܳܐ ܢܙܰܡܰܪ. ܟܰܕ ܬܰܪܥܺܝܬܳܐ ܝܳܗܒܳܐ ܩܳܠܳܐ ܡܶܢ ܠܓܰܘ. ܠܰܘ ܓܶܝܪ ܠܰܒ̈ܢܰܝ ܐ̱ܢܳܫܳܐ ܡܙܰܡܪܺܝܢܰܢ. ܐܶܠܳܐ ܠܰܐܠܳܗܳܐ܆ ܗܰܘ ܕܡܶܫܟܰܚ ܕܰܢܨܰܠܶܐ ܠܠܶܒܳܐ ܘܰܠܛܰܫ̈ܝܳܬܳܐ ܕܢܰܦܫܰܢ ܝܳܕܰܥ. ܘܟܰܕ ܠܗܳܕܶܐ ܡܚܰܘܶܐ ܗ̱ܘܳܐ ܦܰܘܠܽܘܤ ܐܳܡܰܪ ܗ̱ܘܳܐ: ܕܗܽܘ ܪܽܘܚܳܐ ܡܨܰܠܶܐ ܚܠܳܦܰܝܢ ܒܬܶܢܚ̈ܳܬܳܐ ܕܠܳܐ ܡܶܬܡܰܠ̈ܠܳܢ. ܗܰܘ ܕܶܝܢ ܕܒܳܨܶܐ ܠܠܶܒܰܘ̈ܳܬܳܐ܆ ܗܽܘ ܝܳܕܰܥ ܡܳܢܳܐ ܗ̱ܝ ܬܰܪܥܺܝܬܳܐ ܕܪܽܘܚܳܐ. ܕܰܐܝܟ ܨܶܒܝܳܢܶܗ ܗ̱ܘ̣ ܕܰܐ‎ܠܳܗܳܐ. ܡܨܰܠܶܐ ܚܠܳܦ ܩܰܕܺܝ̈ܫܶܐ. ܗܳܕܶܐ ܕܶܝܢ ܕܶܐܡܰܪ: ܠܰܘ ܕܥܰܠ ܕܗܽܘ ܪܽܘܚܳܐ ܡܶܬܬܰܢܰܚ ܗ̱ܘܳܐ. ܐܶܠܳܐ ܕܐ̱ܢܳܫܳܐ ܪ̈ܽܘܚܳܢܶܐ܆ ܗܳܢܽܘܢ ܕܡܰܘܗ̈ܒܳܬܳܐ ܕܪܽܘܚܳܐ ܐܺܝܬ ܗ̱ܘܳܐ ܠܘܳܬܗܽܘܢ. ܗܳܕܶܐ ܣܳܥܪܺܝܢ ܗ̱ܘܰܘ. ܟܰܕ ܚܠܳܦ ܐܰܝܠܶܝܢ ܕܰܒܩܰܕܺܝܫܽܘܬܳܐ ܟܺܝܬ ܘܰܒܗܰܝܡܳܢܽܘܬܳܐ ܩܳܪܒܺܝܢ ܗ̱ܘܰܘ ܠܗܽܘܢ. ܡܩܰܪܒܺܝܢ ܗ̱ܘܰܘ ܨܠܰܘ̈ܳܬܳܐ ܘܬܰܟܫ̈ܦܳܬܳܐ ܒܰܬܘܳܬܳܐ ܘܰܒܬܶܢܚ̈ܳܬܳܐ. ܗܳܕܶܐ ܐܳܦ ܚܢܰܢ ܢܶ݀ܥܒܶܕ. ܘܟܽܠܝܽܘܡ ܢܶ݀ܒܥܶܐ ܡܶܢ ܐܰ‎ܠܳܗܳܐ ܘܢܶ݀ܬܟܰܫܰܦ. ܘܰܒܝܰܕ ܡܰܙܡܽܘܪ̈ܶܐ ܘܰܒܝܰܕ ܨܠܰܘ̈ܳܬܳܐ.

29: ܗܳܝ ܕܶܝܢ ܕܶܐܡܰܪ. ܕܰܡܨܰܠܶܐ ܚܠܳܦ ܩܰܕܺܝ̈ܫܶܐ܆ ܩܰܕܺܝ̈ܫܶܐ ܠܰܡܗܰܝܡ̈ܢܶܐ ܩܳܪܶܐ. ܟܽܠ ܓܶܝܪ ܡܗܰܝܡܢܳܐ ܩܰܕܺܝܫܳܐ ‌ܐܺܝܬܰܘܗ̱ܝ ܒܝܰܕ ܗܰܝܡܳܢܽܘܬܳܐ ܕܰܡܫܺܝܚܳܐ. ܠܰܐܝܠܶܝܢ ܕܩܰܕܶܡ ܬܰܚܶܡ ܕܢܶܗܘܽܘܢ ܩܪ̈ܰܝܳܐ܆ ܘܡܶܢ ܠܽܘܩܕܰܡ ܝܳܕܰܥ ܐܶܢܽܘܢ ܘܰܪܫܰܡ ܐܶܢܽܘܢ ܒܰܕܡܽܘܬܳܐ ܕܨܽܘܪܬܳܐ ܕܰܒܪܶܗ. ܕܗܽܘ ܢܶܗܘܶܐ ܒܽܘܟܪܳܐ ܒܰܐܚ̈ܶܐ ܣܰܓܺܝ̈ܶܐܐ. ܠܰܐܝܠܶܝܢ ܕܶܝܢ ܕܩܰܕܶܡ ܪܫܰܡ ܠܗܽܘܢ. ܘܠܰܐܝܠܶܝܢ ܕܰܩܪܳܐ ܠܗܽܘܢ ܙܰܕܶܩ. ܘܠܰܐܝܠܶܝܢ ܕܙܰܕܶܩ ܠܗܽܘܢ ܫܰܒܰܚ^[21].

30: ܡܰܢܽܘ ܡܨܶܐ ܕܢܺܐܡܰܪ ܥܰܘܠܳܐ ܥܰܠ ‌ܐܰ‎ܠܳܗܳܐ. ܘܳܐܦܶܢ ܟܽܠܶܗ ܗܳܢܳܐ ܢܶܗܘܶܐ ܣܰܟܠܳܐ. ܐܶܢ ܓܶܝܪ ܠܗܳܠܶܝܢ ܩܰܕܶܡ ܣܳܡ ܐܰܘ ܬܰܚܶܡ ܘܰܦܣܰܩ ܕܢܶܗܘܽܘܢ ܩܪ̈ܰܝܳܐ ܒܰܣܒܰܪܬܳܐ܆ ܘܰܠܗܳܢܽܘܢ ܐ̱ܚܪ̈ܳܢܶܐ ܠܳܐ܆ ܘܗܽܘ ܠܰܐܝܠܶܝܢ ܕܰܩܪܳܐ ܘܬܰܚܶܡ ܙܰܕܶܩ ܒܝܰܕ ܚܘܣܳܝܳܐ ܕܰܒܡܰܥܡܽܘܕܺܝܬܳܐ܆ ܘܠܰܐܝܠܶܝܢ ܕܙܰܕܶܩ ܒܝܰܕ ܗܽܘ ܫܰܒܰܚ ܒܝܰܕ ܣܳܥܽܘܪܽܘܬ݂ ܬܶܕܡܪ̈ܳܬܳܐ܆ ܘܠܰܘ ܒܨܶܒܝܳܢܗܽܘܢ ܢܓܰܕ ܐܶܢܽܘܢ ܠܰܩܪܳܝܬܳܐ. ܘܳܐܦܶܢ ܚܽܘܣܳܝܳܐ ܘܫܽܘܒܚܳܐ ܡܶܢ ܐܰ‎ܠܳܗܳܐ܆ ܐܰܝܟܰܢܳܐ ܠܰܘ ܥܰܘܠܳܐ ܐܺܝܬ ܠܘܳܬ݂ ܐܰ‎ܠܳܗܳܐ܆ ܘܝܰܬܺܝܪܳܐܺܝܬ ܕܡܰܛܶܐܒ ܠܥܳܠܰܡ ܠܗܳܢܽܘܢ ܕܰܬܚܽܘܡܶܗ ܥܒܰܕ ܐܶܢܽܘܢ ܩܪ̈ܰܝܳܐ ܘܠܰܘ ܚܺܐܪܽܘܬܗܽܘܢ܆ ܘܰܡܫܰܢܶܩ ܠܥܳܠܡܺܝܢ܆ ܠܰܐܝܠܶܝܢ ܕܡܶܛܽܠ ܕܠܳܐ ܬܰܚܶܡ ܕܢܶܗܘܽܘܢ ܩܪ̈ܰܝܳܐ ܠܳܐ ܗܘܰܘ܆ ܐܰܘ ܟܒܰܪ ܡܰܣܠܳܝܽܘ ܐܰܣܠܺܝ ܐܶܢܽܘܢ܆ ܘܗܳܟܰܢܳܐ ܡܰܢ ܩܪܳܝܬܳܐ ܡܶܢ ܗܰܝܡܳܢܽܘܬܳܐ܆ ܘܠܰܘ ܡܶܢ ܫܽܘܟܳܢ̈ܶܐ ܕܺܐܝܩܳܪܳܐ.

31: ܐܰܝܟܳܐ ܬܽܘܒ ܢܣܺܝܡ ܠܗܳܝ ܕܠܰܐܝܠܶܝܢ ܕܬܰܚܶܡ ܠܗܽܘܢ ܩܪܳܐ܆ ܟܰܕ ܛܳܒ ܟܽܠܢܳܫ ܐܶܬܩܪܺܝ. ܡܶܛܽܠ ܕܰܒܟܽܠܳܗ̇ ܐܰܪܥܳܐ ܢܶܦܩܰܬ݂ ܣܒܰܪܬܗܽܘܢ. ܘܰܒܣܰܘ̈ܦܶܝܗ̇ ܕܬܺܒܶܝܠ ܡܶܠܰܝ̈ܗܽܘܢ ܕܰܡܣܰܒܪ̈ܳܢܶܐ^[22]. ܘܳܐܦܶܢ ܠܰܘ ܟܽܠܢܳܫ ܢܩܶܦ ܘܶܐܙܕܰܕܰܩ ܘܶܐܫܬܰܒܰܚ. ܚܙܰܝܬ܆ ܕܠܰܐܝܠܶܝܢ ܕܰܥܬܺܝܕܺܝܢ ܗ̱ܘܰܘ ܕܰܒܨܶܒܝܳܢܗܽܘܢ ܘܰܒܚܺܐܪܽܘܬܗܽܘܢ ܢܶܗܘܽܘܢ ܩܪ̈ܰܝܳܐ܆ ܡܶܛܽܠ ܕܡܶܢ ܩܕܳܡ ܕܢܶܬܩܪܽܘܢ ܝܺܕܰܥ ܐܶܢܽܘܢ܆ ܕܬܰܚܶܡ ܐܶܢܽܘܢ ܐܰܣܗܶܕ ܫܠܺܝܚܳܐ܆ ܘܕܰܠܗܽܘܢ ܒܰܠܚܽܘܕܰܝܗܽܘܢ ܩܪܳܐ. ܘܟܰܕ ܛܳܒ ܩܪܳܐ܆ ܐܰܝܟ ܕܡܶܢ ܫܽܘܠܳܡܳܐ ܕܗܳܝ ܕܰܗܘܳܬ݂. ܘܠܰܘ ܐܰܝܟ ܕܡܶܢ ܢܺܝܫܳܐ.

32: ܡܨܰܠܶܐ ܗܘܺܝܬ݂ ܓܶܝܪ ܕܶܐܢܳܐ ܩܢܽܘܡܝ ܚܶܪܡܳܐ ܐܶܗܘܶܐ ܡܶܢ ܡܫܺܝܚܳܐ^[23]܆ ܚܠܳܦ ܐܰܚܰܝ̈ ܘܰܐ̱ܚ̈ܝܳܢܰܝ ܕܒܰܒܣܰܪ ܕܺܐܝܬܰܝܗܽܘܢ ܒܢܰܝ̈ ܐܺܝܣܪܳܐܶܝܠ. ܕܕܺܝܠܗܽܘܢ ܗ̱ܘܳܬ ܣܺܝܡܰܬ݂ ܒܢܰܝ̈ܳܐ ܘܬܶܫܒܽܘܚܬܳܐ ܘܰܩܝ̈ܳܡܶܐ ܘܢܳܡܽܘܣܳܐ. ܡܶܛܽܠ ܕܶܝܢ ܕܰܚܠܳܦ ܝܽܘܕܳܝ̈ܶܐ ܨܒܳܐ ܕܢܶܗܘܶܐ ܚܶܪܡܳܐ܆ ܗܳܝܕܶܝܢ ܝܰܬܺܝܪܳܐܺܝܬ ܐܶܬܚܰܘܺܝ܆ ܕܡܶܛܽܠ ܡܫܺܝܚܳܐ ܗܳܕܶܐ ܒܰܠܚܽܘܕ ܪܳܐܶܓ ܗ̱ܘܳܐ. ܕܕܺܝܠܗܽܘܢ ܣܺܝܡܰܬܒܢܰܝ̈ܳܐ ܘܬܶܫܒܽܘܚܬܳܐ ܘܦܽܘܠܚܳܢܳܐ ܘܡܽܘܠܟܳܢ̈ܶܐ. ܐܳܦ ܓܶܝܪ ܢܳܡܽܘܣܳܐ ܡܶܢ ܬܰܡܳܢ. ܗܰܘ ܕܡܶܛܽܠ ܠܰܡ ܡܫܺܝܚܳܐ ܐܳܡܰܪ ܗ̱ܘܳܐ. ܘܰܩܝ̈ܳܡܶܐ ܟܽܠܗܽܘܢ ܠܘܳܬܗܽܘܢ. ܘܗܽܘ ܡܫܺܝܚܳܐ ܡܶܢܗܽܘܢ. ܘܰܐܒܳܗ̈ܳܬܳܐ ܡܶܢܗܽܘܢ ܕܩܰܒܶܠܘ ܡܽܘܠ̈ܟܳܢܶܐ ܕܗܳܢܽܘܢ ܟܽܠܗܽܘܢ܆ ܐܶܠܳܐ ܒܪܰܡ ܗܳܝ ܕܰܠܩܽܘܒܠܳܐ ܗܘ̣ܳܬ݂. ܘܡܶܢ ܟܽܠܗܶܝܢ ܬܶܒ̈ܬܶܐ22 ܢܦܰܠܘ. ܘܡܶܛܽܠ ܗܳܕܶܐ ܐܳܡܰܪ. ܐܰܒܺܝܠ ‌ܐ̱ܢܳܐ. ܘܳܐܦܶܢ ܐܺܝܬ ܗ̱ܘܳܐ ܕܶܐ݀ܬܦܪܶܫ ܘܶܐ݀ܬܢܰܟܪܶܐ ܡܶܢ ܓܽܘܕܶܗ ܕܰܡܫܺܝܚܳܐ. ܠܰܘ ܕܶܝܢ ܡܶܢ ܚܽܘܒܶܗ.

33: ܚܳܤ. ܘܠܳܐ ܬܶܗܘܶܐ܆ ܡܶܛܽܠ ܕܳܐܦ ܗܳܕܶܐ ܡܶܛܽܠ ܚܽܘܒܶܗ ܥܳܒܶܕ ܗ̱ܘܳܐ. ܐܶܠܳܐ ܡܶܢ ܗܰܘ ܒܽܘܣܳܡܳܐ ܘܡܶܢ ܗܳܝ ܬܶܫܒܽܘܚܬܳܐ ܡܩܰܒܶܠ ܗܘܺܝܬ̣. ܡܶܛܽܠ ܕܠܳܐ ܢܶܬܓܰܕܰܦ ܡܳܪܝ܆ ܒܗܳܠܶܝܢ ܕܫܳܡܰܥ ܐ̱ܢܳܐ ܠ̱ܐܢܳܫܺܝ̈ܢ ܕܳܐܡܪܺܝܢ: ܕܒܶܐܣܟܺܡܳܐ ܗܘܰܘ ܗܳܠܶܝܢ ܣܽܘܥܪ̈ܳܢܶܐ܆ ܕܠܰܐ̱ܚܪ̈ܳܢܶܐ ܐܶܫܬܰܘܕܺܝ ܘܠܰܐ̱ܚܪ̈ܳܢܶܐ ܝܰܗܒ܆ ܘܡܶܢ ܐ̱ܚܪ̈ܳܢܶܐ ܐܶܬܺܝܠܶܕ܆ ܘܠܰܐ̱ܚܪ̈ܳܢܶܐ ܦܪܰܩ܆ ܘܠܰܐܒܳܗ̈ܶܐ ܕܝܽܘܕܳܝ̈ܶܐ ܡܠܰܟ ܘܠܰܒܢܰܝ̈ܳܐ ܕܗܳܠܶܝܢ ܫܒܰܩ܆ ܘܰܠܗܳܠܶܝܢ ܕܡܶܢ ܡܬܽܘܡ ܠܳܐ ܝܰܕܥܽܘܗ̱ܝ ܠܛܳܒ̈ܳܬܳܐ ܕܗܳܢܽܘܢ ܥܰܠܺܝ. ܕܠܳܐ ܗܳܟܺܝܠ ‌ܐܺܡܰܪ ܗܳܠܶܝܢ ܘܰܕܕܳܡ̈ܝܳܢ ܡܶܛܽܠ ܡܳܪܳܐ ܕܺܝܠܝ ܢܶܬܰܐܡܪ̈ܳܢ܆ ܘܳܐܦܶܢ ܥܰܘܳܠܳܐܺܝܬ ܡܶܬܰܐܡܪ̈ܳܢ܆ ܗܰܢܺܝ ܠܺܝ ܕܡܶܢ ܡܰܠܟܽܘܬܳܐ ܐܶ݀ܦܶܠ. ܘܡܶܢ ܬܶܫܒܽܘܚܬܳܐ ܗܳܝ ܠܳܐ ܡܶܬܡܰܠܠܳܢܺܝܬܳܐ܆ ܘܶܐ݀ܣܒܽܘܠ ܟܽܠܗܶܝܢ ܒܺܝ̈ܫܳܬܳܐ. ܘܒܽܘܝܳܐܳܐ ܪܰܒܳܐ ܕܟܺܐܒܝ ܡܶܬܚܫܶܒ ܠܺܝ ܕܺܐܝܬܰܘܗ̱ܝ. ܕܰܠܗܰܘ ܕܪܳܚܶܡ ܐ̱ܢܳܐ ܠܳܐ ܡܶܟܺܝܠ ‌ܐܶ݀ܫܡܥܺܝܘܗ̱ܝ ܕܡܶܬܓܰܕܰܦ܀

HOMELIE XVII

De L’homélie XVII de Sévére, nous ne connaissons que les deux fragments grecs relevcs infra, ct le passage de la `(massore) du B. M. Add.14684, 110 v^o , indiquant le titre܆ des songes, et le numéro d’ordre de l’homélie܆ 17: ܕ܏ܝܐ

ܕܚܶܠ̈ܡܶܐ. ܕܢܽܘܦܳܚ̈ܶܐ ܘܛܳܒܺܝܢ ܒܰܩܨܳܡ̈ܶܐ ܘܒܰܢܚܳܫ̈ܶܐ ܠܒܠܨܽܘܨܺܝܬܳܐ ܘܶܐܬܢܢܝܬ ܡܣܐܢ̈ܶܐ ܒܥܠܘܙ ܡܩܕܘܢܝܐ ܕܕܠܝܠܐ ܐܬܬܐܪܘ ܦܘܬܘܢ ܘܡܬܬܟܪܒܝܢ ܣܟܬܢܝ̈ܐ ܠܐܡܢ̈ܐ ܡܬܚ̇ܠܡ

A comparer avec le passage parallele de la (massore) de Paris syr.199 r^o a 14e l. ou l’on ne retrouve que quatre mots communs܆

ܡ̈ܬܠܐ. 23: 4[1]

ܩܽܘܗܠܰܬ. 9: 17 [2]

ܐܫܥܝܐ. 65: 17 ܐܦ ܐܫܥܝܐ. 66: 22[3]

ܕܠܳܚܶܡ[4]

ܪ̈ܗܘܡܝܐ. 8: 20 ـ 21 [5]

ܐܝܘܒ. 31: 26 [6]

ܐܰܥܒܰܪ[7]

ܢܫܰܚܠܶܦ[8]

ܐܫܥܝܐ. 64: 4 ܐܦ ܐ. ܩܘܪ̈ܝܢܬܝܐ. 2: 9 [9]

ܐܫܥܝܐ. 30: 26 [10]

ܪ̈ܗܘܡܝܐ. 8: 20 ـ 21 [11]

ܡܬܝ. 5: 45 [12]

ܣܶܦܪܳܐ ܕܟܳܗ̈ܢܶܐ. 18: 24 ـ 25 [13]

ܡܙܡܘܪ̈ܐ. 114: 5 ـ 6 [14]

ܡܺܝܟܐ. 6: 2 [15]

ܡܙܡܘܪ̈ܐ. 51: 18 ـ 19 [16]

ܡܙܡܘܪ̈ܐ. 150: 4 [17]

ܚܙܩܝܐܝܠ. 26: 13 [18]

ܪ̈ܗܘܡܝܐ. 8: 26 ـ 27 [19]

ܐ. ܩܘܪ̈ܝܢܬܝܐ. 12: 8  ـ 10 [20]

ܪ̈ܗܘܡܝܐ. 8: 27 ـ 30[21]

ܡܙܡܘܪ̈ܐ. 19: 5  ܐܦ. ܪ̈ܗܘܡܝܐ. 10: 19 [22]

ܪ̈ܗܘܡܝܐ. 9: 3 [23]