ܡܺܐܡܪܳܐ ܕܚܰܡܫܬܰܥܣܰܪ.

ܥܰܠ ܨܰܘܡܳܐ ܕܰܐܪܒܥܺܝܢ. ܐܶܬܶܐܡܰܪ ܕܶܝܢ ܒܰܥܪܽܘܒܬܳܐ ܗܳܝ ܕܡܶܢ ܩܕܳܡܰܘ̈ܗ̱ܝ. ܒܥܺܕܬܳܐ ܕܩܣܝܢܐ[1].

1: ܢܳܡܽܘܣܳܐ ܐܺܝܬ. ܐܳܦ ܥܰܠ ܕܰܪ̈ܶܐ ܦܰܓܪ̈ܳܢܳܝܶܐ܆ ܕܰܩܕܳܡ ܝܰܘܡܳܐ ܗܰܘ ܡܳܪܳܢܳܝܳܐ ܕܺܝܠܗܽܘܢ ܕܰܐܓܽܘܢ̈ܶܐ. ܐܰܝܟ ܕܰܒܩܰܕܺܝܡܽܘܬ݂ ܐܰܓܽܘ̈ܢܶܐ ܡܶܕܶܡ ܢܶܗܘܽܘܢ ܡܶܬܟܰܬܫܺܝܢ ܗܶܢܽܘܢ ܐܰܬܠܺܝ̈ܛܶܐ ܠܘܳܬ݂ ܚ̈ܕܳܕܶܐ. ܐܳܦ ܐܶܢܳܐ ܗܳܟܺܝܠ܆ ܩܰܕܺܝܡܽܘܬ݂ ܐܰܓܽܘܢܳܐ ܐܳܡܰܪ ܐ̱ܢܳܐ ܕܺܐܝܬܰܘܗ̱ܝ ܝܰܘܡܳܐ ܗܳܢܳܐ܆ ܘܪܺܝܫܺܝܬܳܐ ܕܨܰܘܡܳܐ ܕܝܰܘ̈ܡܳܬܳܐ ܐܰܪܒܥܺܝܢ. ܡܶܛܽܠ ܗܳܕܶܐ܆ ܐܳܦ ܕܝܰܬܺܝܪ ܦܰܐܝܳܐ ܚܳܫܶܒ ܐ̱ܢܳܐ ܕܺܐܝܬܶܝܗ̇܆ ܗܳܝ ܕܝܰܘܡܳܢܳܐ ܐܺܡܰܪ ܠܟܽܘܢ ܡܶܠܬܳܐ ܕܡܶܛܽܠ ܗܳܕܶܐ. ܘܝܰܬܺܝܪܳܐܺܝܬ ܒܥܺܕܬܳܐ ܗܳܕܶܐ܆ ܗܳܝ ܕܠܰܘ ܒܰܠܚܽܘܕ ܠܫܶܬܶܐܣܬܳܗ̇ ܪܽܘܚܳܢܳܝܬܳܐ܆ ܐܶܠܳܐ ܐܳܦ ܠܗܳܝ ܕܡܶܢ ܟܺܐܦ̈ܶܐ ܗܶܢܽܘܢ ܫܠܺܝ̈ܚܶܐ ܐܰܪܡܝܽܘܗ̇܆ ܗܳܢܽܘܢ ܕܡܶܢ ܒܳܬܰܪ ܡܫܺܝܚܳܐ ܣܳܝ̈ܡܰܝ ܢܳܡܽܘ̈ܣܶܐ ܐܺܝܬܰܝܗܽܘܢ ܘܢܳܛܽܘܪ̈ܶܐ ܕܨܰܘܡܳܐ ܗܳܢܳܐ. ܗܳܢܽܘܢ ܕܬܰܚܡܽܘܗ̱ܝ ܠܰܢ ܠܗܳܢܳܐ܆ ܠܰܘ ܐܰܝܟ ܐ̱ܢܳܫܺܝ̈ܢ ܩܫܰܝ̈ܳܐ ܘܚܰܪ̈ܡܶܐ܆ ܘܰܕܨܳܒܶܝܢ ܕܰܠܒܶܣܪܳܐ ܕܺܝܠܰܢ ܢܡܰܟܟܽܘܢ ܒܝܰܕ ܟܪܽܘܟܝܳܐ ܢܰܓܺܝܪܳܐ ܕܝܰܘ̈ܡܳܬܳܐ ܕܨܰܘܡܳܐ. ܐܶܠܳܐ ܕܰܢܕܰܟܽܘܢ ܠܢܰܦܫܳܐ ܘܢܶܡܪܩܽܘܢ ܠܨܰܠܡܳܐ ܕܰܒܚܰܫ̈ܶܐ ܕܨܰܥܪܳܐ ܡܶܬܚܰܫܰܟ܆ ܘܠܳܐ ܡܨܶܐ ܕܰܢܚܽܘܪ ܘܰܢܩܰܒܶܠ ܙܰܗܪܳܐ ܕܗܰܘ ܕܰܩܪܳܐ ܠܰܢ ܡܶܢ ܚܶܫܽܘܟܳܐ ܠܘܳܬ݂ ܢܽܘܗܪܳܐ ܕܺܝܠܶܗ ܬܡܺܝܗܳܐ܆ ܐܰܝܟܰܢܳܐ ܕܦܶܛܪܽܘܤ ܫܠܺܝܚܳܐ ܐܳܡܰܪ.

2: ܐܰܟܙܢܳܐ ܓܶܝܪ ܕܰܥܢܳܢܳܐ ܟܰܕ ܬܚܶܝܬ݂ ܫܶܡܫܳܐ ܪܳܗܛܳܐ ܡܚܰܦܝܳܐ ܠܢܰܨܺܝܚܽܘܬܳܐ ܕܙܰܠܺܝ̈ܩܶܐ ܘܬܶܢܳܢܳܐ ܕܩܳܪܶܒ ܠܥܰܝ̈ܢܶܐ ܕܶܡܥܬܳܐ ܚܰܪܺܝܦܬܳܐ ܡܥܺܝܪ܆ ܘܫܳܓܶܫ ܘܕܳܠܰܚ ܠܶܗ ܠܰܚܙܳܝܳܐ܆ ܒܶܗ ܟܰܕ ܒܶܗ ܒܰܙܢܳܐ ܥܶܛܪ̈ܶܐ ܬܶܢܳܢܳܝ̈ܶܐ ܕܰܪ̈ܓܺܝܓܳܬܳܐ ܕܒܶܣܪܳܐ܆ ܕܡܶܢ ܣܰܒܥܳܐ ܘܡܶܢ ܒܶܣܡܳܐ ܩܳܝܡܺܝܢ܆ ܥܢܳܢܳܐ ܘܬܶܢܳܢܳܐ ܗܳܘܶܝܢ ܠܢܰܦܫܳܐ܆ ܘܠܳܐ ܫܳܒܩܺܝܢ ܠܳܗ̇ ܒܥܰܝ̈ܢܶܐ ܡܶܬܗܰܘ̈ܢܳܢܝܳܬܳܐ ܠܘܳܬ ܗܳܠܶܝܢ ܕܰܠܥܶܠ ܬܚܽܘܪ ܟܰܕ ܡܶܢ ܠܥܶܠ ‌ܐܺܝܬܶܝܗ̇܆ ܘܰܠܡܶܫܬܰܘܕܳܥܽܘ ܠܫܰܦܺܝܪܽܘܬ݂ ܛܽܘܗܡܳܐ ܕܺܝܠܳܗ̇܆ ܘܰܠܡܺܐܡܰܪ ܐܰܝܟ ܗܳܝ ܕܰܟܬܺܝܒܳܐ܆ ܪܽܘܚܳܐ ܐܰ‎ܠܳܗܳܝܳܐ ܗܰܘ ܕܥܰܒ̣ܕܰܢܝ܆ ܢܫܰܡܬܳܐ ܕܶܝܢ ܕܰܐܚܝܺܕ ܟܽܠ ܗܳܝ ܕܡܰܠܦܳܐ ܠܺܝ^[2]܆ ܐܶܠܳܐ ܒܰܕܡܽܘܬ݂ ܟܶܒ̈ܠܶܐ ܕܰܐܒܳܪܳܐ ܡܰܘܩܪܺܝܢ ܘܰܠܬܰܚܬ ܢܳܬܥܺܝܢ܆ ܘܰܠܘܳܬ݂ ܐܰܪܥܳܐ ܡܶܬܕܰܒܩܺܝܢ ܠܳܗ̇. ܡܰܫܟܢܳܐ ܓܶܝܪ ܐܰܪܥܳܢܳܝܳܐ܆ ܡܰܘܩܰܪ ܠܗܰܘܢܳܐ ܣܰܓܺܝ ܨܶܦܬܳܐ܆ ܐܰܝܟܰܢܳܐ ܕܶܐܡܰܪ ܐ̱ܢܳܫ ܚܰܟܺܝܡܳܐ.

3: ܕܡܶܢ ܗܳܪܟܳܐ. ܗܰܘ ܐܳܣܝܳܐ ܕܢܰܦ̈ܫܳܬܳܐ ܕܺܝܠܰܢ܆ ܐܰܝܟ ܐܳܣܝܽܘܬܳܐ ܕܣܰܓܺܝ ܛܳܒ ܐܳ‌ܠܨܳܐ ܥܠܶܝܗ̇܆ ܦܰܩܕܶܗ ܠܨܰܘܡܳܐ ܠܰܢ ܠܰܐܝܠܶܝܢ ܕܰܟܪܺܝܗܺܝܢܰܢ. ܟܰܕ ܐܳܡܰܪ: ܐܰܢ̱ܬ ܕܶܝܢ ܟܰܕ ܨܳܐܶܡ ܐܰܢ̱ܬ ܡܫܽܘܚ ܪܺܝܫܳܟ^[3]. ܘܰܐܫܺܝܓ ܦܰܪܨܽܘܦܳܟ. ܩܰܕܡܳܐܺܝܬ ܡܰܢ. ܐܰܝܟ ܣܽܘܟܳܠܳܐ ܗܰܘ ܦܫܺܝܩܳܐ܆ ܟܰܕ ܡܰܪܚܶܩ ܠܰܢ ܡܶܢ ܫܽܘܒܚܳܐ ܣܪܺܝܩܳܐ܆ ܘܓܰܠܝܳܐܺܝܬ ܡܰܙܥܶܩ܆ ܠܳܐ ܬܶܗܘܽܘܢ ܟܡܺܝܪ̈ܶܐ ܐܰܝܟ ܢܳܣܒܰܝ̈ ܒܰܐܦ̈ܶܐ^[4]. ܒܳܬܰܪܟܶܢ ܕܶܝܢ܆ ܘܳܐܦ ܟܰܕ ܠܘܳܬ ܬܰܪܥܺܝܬܳܐ ܗܳܝ ܕܝܰܬܺܝܪ ܐܺܝܬܶܝܗ̇ ܐܰ‎ܠܳܗܳܝܬܳܐ ܡܥܰܠܶܐ ܡܰܣܶܩ ܠܰܢ. ܘܦܳܩܶܕ ܠܡܶܡܫܰܚ ܘܰܠܡܰܦܨܳܚܽܘ ܒܨܰܘܡܳܐ ܠܪܺܝܫܳܐ ܗܰܘ ܕܡܶܢ ܠܓܰܘ܆ ܗܰܘ ܕܺܐܝܬܰܘܗ̱ܝ 222ܪܝܫܝܢܝܳܐ ܕܢܰܦܫܳܐ܆ ܘܠܰܡܫܳܓܽܘ ܒܗܳܢܳܐ ܠܥܰܝ̈ܢܶܐ ܕܦܰܪܨܽܘܦܳܐ ܡܶܬܗܰܘܢܳܢܳܐ܆ ܐܰܝܟ ܗܳܝ ܕܰܐܡܺܝܪܳܐ ܠܩܽܘܗܠܰܬ܆ ܕܚܰܟܺܝܡܳܐ ܥܰܝܢܰܘ̈ܗ̱ܝ ܒܪܺܝܫܶܗ.

4: ܗܰܘ ܓܶܝܪ ܕܰܡܕܰܟܶܐ ܒܝܰܕ ܨܰܘܡܳܐ ܘܰܒܝܰܕ ܥܰܡ̈ܠܶܐ ܕܰܡܝܰܬܪܽܘܬܳܐ ܗܳܠܶܝܢ ܕܫܰܪܟܳܐ ܠܗܰܘܢܳܐ ܪܺܝܫܳܢܳܐ^[5]܆ ܡܚܰܪܶܦ ܠܗܶܝܢ ܠܡܰܥܒܕܳܢ̈ܘܳܬܳܐ ܡܶܬܗܰܘܢܳܢܳܝ̈ܳܬܳܐ ܐܰܝܟ ܕܰܠܥܰܝ̈ܢܶܐ܆ ܠܘܳܬ݂ ܬܶܐܽܘܪܺܝܰܐ ܕܗܳܠܶܝܢ ܕܰܡܝܰܬܪ̈ܳܢ ܘܛܳܒ ܡܥ̈ܰܠܝܳܢ܆ ܘܰܠܘܳܬ݂ ܡܶܬܒܰܩܝܳܢܽܘܬܳܐ ܕܺܝܠܶܗ ܕܰܐ‎ܠܳܗܳܐ. ܡܶܛܽܠ ܟܺܝܬ ܕܰܒܪܺܝܫܳܐ ܗܰܘ ܕܦܰܓܪܳܐ܆ ܐܳܦ ܚܰܟܺܝܡܳܐ. ܘܳܐܦ ܠܳܐ ܚܰܟܺܝܡܳܐ܆ ܥܰܝ̈ܢܶܐ ܕܕܳܡ̈ܝܳܢ ܐܺܝܬ ܠܗܽܘܢ. ܕܠܳܐ ܒܰܣܝܳܡܗܶܝܢ ܦܪ̈ܺܝܫܳܢ܆ ܘܳܐܦܠܳܐ ܒܡܰܥܒܕܳܢܽܘܬܳܐ ܡܫܰܚ̈ܠܦܳܢ. ܐܶܠܳܐ ܨܰܘܡܳܐ ܠܥܰܝ̈ܢܶܐ ܕܬܰܪܥܺܝܬܳܐ܆ ܕܽܘܟܬܳܐ ܘܚܰܝܠܳܐ ܕܡܶܫܚܳܐ ܘܰܕܡܰܝ̈ܳܐ ܐܰܚܺܝܕ. ܘܰܕܡܰܝ̈ܳܐ ܡܰܢ܆ ܟܰܕ ܡܫܺܝܓ ܘܓܳܪܶܦ ܐܰܝܟ ܫܶܦܥܳܐ ܕܢܰܗܪܳܐ ܠܝܰܨܺܝܦ̈ܘܳܬܳܐ ܐܰܪ̈ܥܳܢܳܝܳܬܳܐ܆ ܘܰܠܗܳܝ ܕܢܶܬܶܐܡܶܢ ܠܘܳܬ ܟܰܪܣܳܐ܆ ܘܰܠܒܺܝ̈ܫܳܬܳܐ ܕܡܶܢ ܗܳܕܶܐ. ܕܶܡܫܚܳܐ ܕܶܝܢ܆ ܐܰܝܟ ܐܰܝܢܳܐ ܕܳܐܦ ܡܰܢܗܰܪ ܠܗܰܠ̈ܟܳܬܰܢ ܒܰܕܡܽܘܬ ܫܪܳܓܳܐ܆ ܘܡܶܫܬܰܥܶܐ ܘܰܡܥܰܩܶܒ ܚܦܺܝܛܳܐܺܝܬ ܠܰܫܒܺܝ̈ܠܶܐ ܩܰܛܺܝ̈ܢܶܐ ܘܰܐ‌ܠܺܝ̈ܨܶܐ ܘܰܡܛܰܫܰܝ̈ܳܐ ܕܰܡܝܰܬܪܽܘܬܳܐ܆ ܘܰܐܝܟ ܕܰܠܘܳܬ݂ ܬܰܟܬܽܘܫܳܐ ܕܒܰܥ̈ܠܰܝ ܕܰܐܪܳܐ ܡܳܫܰܚ ܠܰܢ܆ ܘܰܠܘܳܬ ܡܰܩܪ̈ܒܳܢܶܐ ܕܠܳܐ ܡܶܐܟܽܘܠܬܳܐ ܫ̈ܺܐܕܶܐ ܗܳܢܽܘܢ ܕܠܳܐ ܐܳܟܠܺܝܢ ܐܳܦܠܳܐ ܫܳܬܶܝܢ܆ ܒܝܰܕ ܓܠܺܝܙܽܘܬܳܐ ܕܡܶܢ ܡܶܐܟ̈ܠܳܬܳܐ ܡܙܰܝܶܢ܆ ܘܰܠܘܳܬ݂ ܩܪܳܒܳܐ ܡܩܺܝܡ ܠܰܢ ܘܰܠܡܶܬܬܥܳܪܽܘ ܥܳܒܶܕ ܠܰܢ܆ ܘܥܰܡ ܦܰܘܠܽܘܤ ܡܰܙܥܶܩ܆ ܠܳܐ ‌ܐܺܝܬܰܘܗ̱ܝ ܠܰܢ ܕܰܐܪܳܐ ܠܘܳܬ݂ ܕܡܳܐ ܘܒܶܣܪܳܐ܆ ܐܶܠܳܐ ܠܘܳܬ݂ ܪ̈ܺܝܫܳܢܘܳܬܳܐ܆ ܠܘܳܬ݂ ܫܽܘܠ̈ܛܳܢܶܐ܆ ܠܘܳܬ݂ ܐܰܚܺܝ̈ܕܰܝ ܥܳܠܡܳܐ ܕܚܶܫܽܘܟܳܐ ܕܥܳܠܡܳܐ ܗܳܢܳܐ^[6]܆ ܠܘܳܬ݂ ܪ̈ܽܘܚܶܐ ܕܒܺܝܫܽܘܬܳܐ܆ ܒܗܳܠܶܝܢ ܫܡܰܝܳܢ̈ܝܳܬܳܐ.

5: ܐܶܠܳܐ ܗܳܕܶܐ. ܟܰܕ ܡܶܫܬܰܘܫܛܳܐ ܡܶܠܬܳܐ ܠܰܩܕܳܡܶܝܗ̇܆ ܝܺܠܶܦܬܳܗ̇ ܠܥܶܠܬܶܗ ܕܨܰܘܡܳܐ. ܗܳܕܶܐ ܕܶܝܢ ܐܺܝܬܶܝܗ̇܆ ܕܰܐܪܳܐ ܕܰܠܘܳܬ݂ ܫܶܐܕ̈ܶܐ ܘܰܠܘܳܬ݂ ܪ̈ܽܘܚܶܐ ܕܒܺܝܫܽܘܬܳܐ. ܒܡܳܢܳܐ ܕܶܝܢ ‌ܐܺܝܬܰܘܗ̱ܝ ܕܰܐܪܳܐ ܗܰܘ ܕܰܠܘܳܬܗܽܘܢ. ܒܗܳܠܶܝܢ ܫܡܰܝܳܢ̈ܝܳܬܳܐ. ܡܶܛܽܠ ܓܶܝܪ ܗܳܠܶܝܢ ܫܡܰܝܳܢ̈ܝܳܬܳܐ ܡܶܬܚܰܪܚܺܝܢ ܚ̱ܢܰܢ. ܟܰܕ ܚܢܰܢ ܡܰܢ ܡܶܬܚܪܶܝܢ ܚ̱ܢܰܢ܆ ܕܰܠܬܰܡܳܢ ܢܶܣܰܩ ܒܝܰܕ ܨܰܘܡܳܐ܆ ܘܰܒܝܰܕ ܕܽܘܥ̈ܬܶܐ ܕܡܝܰܬܪܽܘܬܳܐ. ܫ̈ܺܐܕܶܐ ܕܶܝܢ ܘܳܐܟܶܠܩܰܪܨܳܐ ܪܺܝܫܗܽܘܢ ܕܗܳܠܶܝܢ܆ ܟܰܕ ܐܳ‌ܠܨܺܝܢ ܩܛܺܝܪܳܐܺܝܬ ܕܢܰܚܬܽܘܢ ܠܰܢ ܡܶܢ ܬܰܡܳܢ܆ ܘܟܳܠܶܝܢ ܠܰܢ ܟܰܕ ܠܘܳܬ ܗܳܠܶܝܢ ܚܳܙܩܺܝܢ ܚ̱ܢܰܢ ܒܝܰܕ ܥܒܳܕ̈ܶܐ ܛܳܒ̈ܶܐ܆ ܘܰܠܪ̈ܶܓܠܰܝܢ ܡܛܰܥܫܺܝܢ.

6: ܟܰܕ ܓܶܝܪ ܡܠܰܐܟܳܐ ܐܺܝܬܰܗܝ ܗ̱ܘܳܐ. ܗܰܘ ܕܗܳܫܳܐ ܤܳܛܳܢܳܐ ܘܕܰܠܩܽܘܒܠܳܐ܆ ܗܳܕܶܐ ܓܶܝܪ ܡܰܘܕܥܳܐ ܡܶܠܬܳܐ ܥܶܒܪܳܝܬܳܐ ܗܳܝ ܕܰܤܛܰܢ܆ ܟܰܕ ܡܶܛܽܠ ܛܳܒܬܳܐ ܐܶܬܒܪܺܝ ܡܶܢ ܐܰ‎ܠܳܗܳܐ ܘܥܳܒܽܘܕܳܐ܆ ܗܰܘ ܕܒܰܠܚܽܘܕܰܘܗ̱ܝ ܛܳܒܳܐ ܘܕܰܥܒܰܕ ܠܟܽܠܗܶܝܢ ܫܰܦܺܝܪ̈ܳܬܳܐ ܘܰܕܛܳܒ ܫܰܦܺܝܪ̈ܳܢ^[7]܆ ܒܳܬܰܪܟܶܢ ܟܰܕ ܪܳܡܽܘܬܳܐ ܐܶܬܟܪܰܗ ܒܙܰܘܥܳܐ ܫܰܠܺܝܛ ܒܝܳܬܳܐ܆ ܘܰܐܪܺܝܡ ܨܰܘܪܶܗ ܐܰܝܟܰܢܳܐ ܕܰܟܬܺܝܒ ܠܽܘܩܒܰܠ ܡܳܪܝܳܐ ܐܰܚܺܝܕ ܟܽܠ܆ ܘܰܒܗܳܝ ܕܰܐܤܛܺܝ ܡܶܢ ܬܶܐܽܘܪܺܝܰܐ ܕܢܽܘܗܪܳܐ ܗܰܘ ܩܰܕܡܳܝܳܐ ܘܽܐܘܣܺܝ݂ܳܝ݂ܳܐ܆ ܘܥܰܡܶܨ ܠܥܰܝܢܶܗ ܡܶܬܗܰܘܢܳܢܺܝܬܳܐ܆ ܟܰܕ ܚܶܫܽܘܟܳܐ ܡܠܳܐ ܗܽܘ ܠܶܗ܆ ܘܰܐܝܟ ܗܰܘ ܕܰܗܘ̣ܳܐ ܡܩܰܒܠܳܢܳܐ ܕܟܽܠܳܗ̇ ܒܺܝܫܽܘܬܳܐ܆ ܘܡܶܛܽܠ ܗܳܢܳܐ. ܟܽܘܪܣܝܳܐ ܕܠܳܐ ܢܳܡܽܘܣܳܝܽܘܬܳܐ ܡܶܢ ܟܬܳܒ̈ܶܐ ܟܳܗܢܳܝ̈ܶܐ ܡܶܬܩܪܶܐ܆ ܐܰܝܟ ܐܰܝܢܳܐ ܕܺܐܝܬܰܘܗ̱ܝ ܢܝܳܚܬܳܐ ܕܟܽܠܳܗ̇ ܒܺܝܫܽܘܬܳܐ܆ ܢܦܰܠ ܡܶܢ ܛܶܟܣܳܐ ܗܰܘ ܩܰܕܡܳܝܳܐ ܘܪܳܡܳܐ܆ ܘܳܐܦ ܚܰܝ̈ܠܰܘܳܬܳܐ ܗܳܢܽܘܢ ܕܰܐܟܚܕܳܐ ܡܪܰܕܘ ܥܰܡܶܗ܆ ܕܗܽܘ ܗܳܟܘܳܬ݂ ܐܳܦ ܗܶܢܽܘܢ ܐܶܬܒܪܺܝܘ ܡܶܢ ܪ̈ܽܘܚܶܐ ܡܰܫܡ̈ܫܳܢܝܳܬܳܐ ܘܒܳܗ̇ ܒܰܕܡܽܘܬܳܐ ܛܳܒ̈ܳܬܳܐ܆ ܐܶܬܟܪܰܗܘ ܕܶܝܢ ܥܰܡܶܗ ܒܺܝܫܽܘܬܳܐ.

7: ܡܶܛܽܠܗܳܕܶܐ ܗܳܟܺܝܠ܆ ܘܡܶܛܽܠ ܥܽܘܩܣܳܐ ܕܰܚܣܳܡܳܐ. ܐܶܬܟܪܰܗܘ܆ ܘܠܰܘ ܡܶܣܬܰܝܒܪܳܢܺܝܬܳܐ ܚܳܫܒܺܝܢ ܠܳܗ̇܆ ܠܗܳܝ ܕܰܚܢܰܢ ܠܗܳܠܶܝܢ ܢܶܫܬܘܶܐ܆ ܠܗܳܢܶܝܢ ܕܡܶܢܗܶܝܢ ܗܶܢܽܘܢ ܢܦܰܠܘ ܡܶܛܽܠ ܟܽܘܪܗܳܢܳܐ ܕܺܝܠܗܽܘܢ. ܐܶܠܳܐ ܐܰ‎ܠܳܗܳܐ ܗܰܘ ܥܳܒܽܘܕܳܐ ܕܺܝܠܰܢ ܘܣܳܐܶܡ ܐܰܓܽܘܢܳܐ܆ ܗܰܘ ܫܰܦܺܝܪ ܦܽܘܪ̈ܣܶܐ ܘܚܰܟܺܝܡܳܐ܆ ܘܕܰܡܫܰܚܠܶܦ ܠܟܽܠܗܶܝܢ ܠܛܳܒܬܳܐ܆ ܒܒܺܝܫܽܘܬܳܐ ܕܗܳܠܶܝܢ ܐܶܬܚܰܫܰܚ܆ ܠܘܳܬ ܕܽܘܪܳܫܳܐ ܕܺܝܠܰܢ. ܐܰܟܚܕܳܐ ܡܰܢ. ܘܟܰܕ ܠܰܡܫܰܩܠܽܘܬܗܽܘܢ ܘܠܰܢܦܺܝܚܽܘܬܳܐ ܕܪܳܡܽܘܬܗܽܘܢ ܡܩܰܦܰܚ^[8]܆ ܟܰܕ ܚܢܰܢ ܗܳܢܽܘܢ ܕܡܶܢ ܐܰܪܥܳܐ ܐܺܝܬܰܝܢ ܡܰܨܠܚܺܝܢ ܚ̱ܢܰܢ ܝܰܬܺܝܪ ܡܶܢܗܽܘܢ ܕܺܝܠܗܽܘܢ܆ ܗܳܢܽܘܢ ܕܺܐܝܬܰܝܗܽܘܢ ܗ̱ܘܰܘ ܡܶܢ ܩܕܺܝܡ ܕܛܶܟܣܳܐ ܗܰܘ ܪܳܡܳܐ ܘܕܰܠܥܶܠ܆ ܐܰܟܚܕܳܐ ܕܶܝܢ܆ ܐܳܦ ܟܰܕ ܠܰܢ ܒܝܰܕ ܣܰܩܽܘܒܠܳܝܽܘܬ݂ ܩܰܘܡܳܐ ܕܰܒܥܶܠ̈ܕܒܳܒܶܐ ܥܰܣ̈ܩܰܝ ܠܬܰܟܬܽܘܫܳܐ܆ ܐܰܬܠܺܝ̈ܛܶܐ ܕܝܰܬܺܝܪ ܢܰܨܺܝܚܺܝܢ ܡܚܰܘܶܐ܆ ܘܩܳܪܶܐ ܠܘܳܬ ܟܠܺܝ̈ܠܶܐ ܕܝܰܬܺܝܪ ܪܰܘܪ̈ܒܺܝܢ ܘܝܰܬܺܝܪ ܫܒܺܝܚܺܝܢ^[9].

8: ܐܶܠܳܐ ܡܶܛܽܠ ܟܺܝܬ ܕܡܰܦܽܘܠܬܳܐ ܗܳܝ ܩܰܕܡܳܝܬܳܐ܆ ܟܰܕ ܠܳܐ ܙܳܕܶܩ ܗ̱ܘܳܐ ܢܦܰܠܢܰܢ܆ ܒܝܰܕ ܥܒܳܪ ܦܽܘܩܕܳܢܳܐ ܕܳܐܕܳܡ܆ ܡܶܠܬܳܐ ܕܰܐ‎ܠܳܗܳܐ܆ ܐܳܦ ܟܰܕ ܟܰܬܰܪ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܘܐܳܦ ܟܰܕ ܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ܆ ܒܰܝܬܝܶܗ ܠܶܗ ܠܕܰܐܪܳܐ ܗܰܘ ܕܺܝܠܰܢ܆ ܘܩܰܒܶܠ ܥܠܰܘܗ̱ܝ ܠܬܰܟܬܽܘܫܳܐ ܗܰܘ ܕܰܠܘܳܬ݂ ܒܥܶܠ ܕܰܪܳܐ ܕܺܝܠܰܢ. ܘܰܐܟܙܢܳܐ ܕܠܰܢ ܥܡܰܕ܆ ܠܰܘ ܟܰܕ ܣܢܺܝܩ ܗ̱ܘܳܐ ܥܰܠ ܕܽܘܟܳܝܳܐ܆ ܐܶܠܳܐ ܟܰܕ ܠܡܰܝ̈ܳܐ ܩܰܕܶܡ ܗ̱ܘܳܐ ܡܕܰܟܶܐ܆ ܘܗܽܘ ܗܳܘܶܐ ܣܚܳܬܳܐ ܠܝܽܘܪܕܢܳܢ܆ ܘܰܡܚܰܪܰܪ ܠܶܗ ܡܶܢ ܪܺܝܫܳܢܽܘܬܗܽܘܢ ܕܫ̈ܺܐܕܶܐ܆ ܘܡܰܪܰܨܶܨ ܐܰܝܟܰܢܳܐ ܕܰܟܬܺܝܒ ܠܪ̈ܺܝܫܰܝܗܽܘܢ ܕܬܰܢܺܝ̈ܢܶܐ ܥܰܠ ܡܰܝ̈ܳܐ܆ ܗܳܟܰܢܳܐ ܐܳܦ ܠܰܢ܆ ܢܶܣܝܳܢܳܐ ܕܳܐܟܶܠܩܰܪܨܳܐ ܩܰܒܶܠ ܥܠܰܘܗ̱ܝ܆ ܘܶܐܬܪܡܺܝ ܠܕܰܪܳܐ^[10]܆ ܟܰܕ ܩܰܕܶܡ ܡܫܰܗܶܐ ܠܶܗ ܠܰܐܓܽܘܢܳܐ ܗܰܘ ܕܰܠܘܳܬܶܗ܆ ܠܰܢ ܗܳܢܽܘܢ ܕܰܐܫܦܶܠܢܰܢ ܘܶܐܬܡܚܶܠܢܰܢ܆ ܘܥܳܒܶܕ ܠܶܗ ܕܠܺܝܠ ܠܡܶܬܟܒܳܫܽܘ܆ ܠܰܒܥܶܠܕܒܳܒܳܐ ܘܡܰܩܪܒܳܢܳܐ ܗܰܘ ܥܣܺܝܩ ܠܡܶܙܕܰܟܝܳܢܽܘܬܳܐ.

9: ܘܶܐ݀ܬܒܰܩܶܐ ܠܺܝ. ܕܰܟܡܳܐ ܐܺܝܬܶܝܗ̇ ܗ̱ܘܳܬ ܪܰܒܽܘܬܳܗ̇ ܕܪܶܚܡܰܬ ܐ̱ܢܳܫܽܘܬܳܐ܆ ܘܕܰܐܝܟ ܬܳܐܪܽܘܬܳܐ ܡܶܕܶܡ ܐܺܝܬܶܝܗ̇ ܗ̱ܘܳܬ ܕܓܶܢܣܳܐ ܕܺܝܠܰܢ ܗܺܝ ܡܕܰܒܪܳܢܽܘܬܳܐ܆ ܘܩܰܕܺܝܡܽܘܬ ܪܽܘܫܡܳܐ ܕܕܽܘܒܳܪܳܐ ܡܝܰܬܪܳܐ܆ ܘܰܡܛܰܦܣܳܢܽܘܬܳܐ ܕܫܰܦܺܝܪܽܘܬ݂ ܕܶܚܠܬܳܐ. ܡܳܢܳܐ ܓܶܝܪ ܐܳܡܰܪ ܟܬܳܒܳܐ ܟܳܗܢܳܝܳܐ ܕܰܐܘܰܢܓܶܠܺܝ̈ܰܐ. ܗܳܝܕܶܝܢ ܝܶܫܽܘܥ ܐܶܬܕܒܰܪ ܠܡܰܕܒܪܳܐ ܡܶܢ ܪܽܘܚܳܐ܆ ܕܢܶܬܢܰܣܶܐ ܡܶܢ ܐܳܟܶܠܩܰܪܨܳܐ^[11]. ܡܳܢܳܐ ܐܳܡܰܪ ܐܰܢ̱ܬ ܠܳܐ ܨܶܒܝܳܢܳܐܺܝܬ. ܡܶܬܬܰܝܬܶܐ ܗ̱ܘܳܐ ܡܶܢ ܪܽܘܚܳܐ܆ ܕܢܶܣܝܳܢܳܐ ܕܶܐܟܶܠܩܰܪܨܳܐ ܢܶܣܒܽܘܠ܆ ܘܰܚܢܰܢ ܡܰܢ ܒܨܶܒܝܳܢܳܐ ܫܰܠܺܝܛ ܒܝܳܬܶܗ ܠܚܰܝ̈ܶܐ ܕܺܝܠܰܢ ܡܦܰܪܢܣܺܝܢܰܢ܆ ܘܨܶܒܝܳܢܳܐܺܝܬ. ܘܰܒܫܽܘܠܛܳܢܳܐ ܚܺܐܪܳܝܳܐ ܐܳܬܶܝܢ ܚ̱ܢܰܢ ܠܘܳܬ݂ ܥܰܡ̈ܠܶܐ ܕܰܡܝܰܬܪܽܘܬܳܐ܆ ܘܰܠܢܶܣܝܳܢܳܐ ܕܰܚܠܳܦܰܝܗܽܘܢ ܡܣܰܝܒܪܺܝܢܰܢ܆ ܗܽܘ ܕܶܝܢ. ܠܳܐ ܨܶܒܝܳܢܳܐܺܝܬ ܠܘܳܬ ܗܳܕܶܐ ܡܶܬܢܓܶܕ ܗ̱ܘܳܐ܆ ܘܟܰܕ ܛܳܒ ܐܰܝܟܰܢܳܐ ܠܳܐ ܫܟܺܝܪܳܐ܆ ܗܳܝ ܕܰܐܝܟ ܗܳܕܶܐ ܐܳܦܶܢ ܕܢܶܬܚܰܫܒܺܝܗ̇ ܒܰܠܚܽܘܕ.

10: ܐܶܠܳܐ ܗܳܝ ܕܶܐܬܕܒܰܪ ܡܶܢ ܪܽܘܚܳܐ܆ ܗܳܢܳܐ ܣܽܘܟܳܠܳܐ ܐܺܝܬ ܠܳܗ̇. ܐܰܝܟ ܗܰܘ ܕܰܠܘܳܬ݂ ܕܽܘܒܳܪܳܐ ܡܥܰܠܝܳܐ ܘܪܽܘܚܳܢܳܝܳܐ ܐܶܬܳܐ܆ ܐܰܝܟܰܢܳܐ ܕܳܐܦ ܐܰܬܪܳܐ ܢܶܬܶܠ ܠܶܗ ܠܗܰܘ ܕܰܡܢܰܣܶܐ ܗ̱ܘܳܐ. ܘܳܐܦ ܗܳܕܶܐ ܕܶܝܢ܆ ܠܡܽܘܫ̈ܚܳܬܳܐ ܕܣܽܘܪܳܩܶܗ ܨܶܒܝܳܢܳܝܳܐ ܠܳܚܡܳܐ. ܒܗܳܝ ܓܶܝܪ ܕܩܰܒܶܠ ܥܠܰܘܗ̱ܝ ܕܢܶܗܘܶܐ ܠܳܐ ܡܶܫܬܰܚܠܳܦܳܢܳܐܺܝܬ ܒܰܪܢܳܫܳܐ. ܒܗܳܕܶܐ ܠܟܽܠܗܶܝܢ ܐ̱ܢܳܫܳܝ̈ܳܬܳܐ ܚܠܳܦܰܝܢ ܡܫܰܡܠܶܐ. ܟܰܕ ܡܚܰܘܶܐ܆ ܕܠܰܢ ܕܺܝܠܰܢ ܙܳܕܩܳܐ ܡܶܢ ܒܳܬܰܪ ܡܰܥܡܽܘܕܺܝܬܳܐ܆ ܟܰܕ ܥܬܰܪܢܰܢ ܫܽܘܟܳܢܳܐ ܕܣܳܝܽܘܡܽܘܬ݂ ܒܢܰܝ̈ܳܐ܆ ܗܳܝ ܕܰܢܫܰܢܶܐ ܠܘܳܬ݂ ܚܰܝ̈ܶܐ ܡܥܰܠܰܝ̈ܳܐ܆ ܘܢܶܬܕܒܰܪ ܡܶܢ ܪܽܘܚܳܐ ܘܠܰܘ ܡܶܢ ܨܶܒܝܳܢܳܐ ܕܒܶܣܪܳܐ܆ ܐܰܝܟ ܡܳܐ ܕܳܐܦ ܦܰܘܠܽܘܤ ܟܰܕ ܫܳܠܰܚ ܠܪ̈ܽܘܡܳܝܶܐ ܐܳܡܰܪ ܗ̱ܘܳܐ: ܟܽܠܗܽܘܢ ܓܶܝܪ ܗܳܢܽܘܢ ܕܰܒܪܽܘܚܳܐ ܡܶܬܕܰܒܪܺܝܢ܆ ܗܳܠܶܝܢ܆ ܒܢܰܝ̈ܳܐ ܕܰܐ‎ܠܳܗܳܐ ܐܺܝܬܰܝܗܽܘܢ^[12]. ܗܰܘ ܓܶܝܪ ܕܰܫܘܶܐ ܒܽܐܘܣܺܝܰܐ ‌ܐܺܝܬܰܘܗ̱ܝ ܠܶܗ ܪܽܘܚܳܐ ܩܰܕܺܝܫܳܐ܆ ܒܗܳܝ ܕܰܐ‎ܠܳܗܳܐ ‌ܐܺܝܬܰܘܗ̱ܝ ܗ̱ܘܳܐ ܘܰܫܘܶܐ ܒܽܐܘܣܺܝܰܐ ܠܰܐܒܳܐ܆ ܐܰܝܟܰܢܳܐ ܥܬܺܝܕ ܗ̱ܘܳܐ ܕܢܶܣܬܢܶܩ ܥܰܠ ܚܰܝ̈ܶܐ ܪ̈ܽܘܚܳܢܳܝܶܐ ܘܰܡܥܰܠܰܝ̈ܳܐ. ܐܶܠܳܐ ܐܰܝܟ ܡܳܐ ܕܶܐܡܪܶܬ݂܆ ܒܢܰܦܫܶܗ ܩܰܕܶܡ ܛܰܦܶܤ ܠܗܶܝܢ ܡܰܠܦܳܢܳܐܺܝܬ ܘܰܡܕܰܒܪܳܢܳܐܺܝܬ܆ ܠܗܳܠܶܝܢ ܕܠܰܢ ܚܳܫ̈ܚܳܢ ܘܠܳܚ̈ܡܳܢ.

11: ܐܰܝܟܳܐ ܕܶܝܢ ܡܶܬܒܥܶܐ ܗ̱ܘܳܐ ܢܶܣܝܳܢܳܐ. ܠܗܰܘ ܕܫܳܩܶܠ ܚܛܺܝܬܶܗ ܕܥܳܠܡܳܐ܆ ܘܫܳܡܰܥ ܗ̱ܘܳܐ ܡܶܢ ܝܽܘܚܰܢܳܢ. ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܥܡܰܕ ܘܰܐܢ̱ܬ ܐܳܬܶܐ ܐܰܢ̱ܬ ܠܘܳܬܝ. ܐܶ‎ܠܽܘ ܠܳܐ ܕܰܠܢܶܣܝܳܢܳܐ ܕܺܝܠܝ ܒܰܝܬܺܝ ܠܶܗ܆ ܐܰܝܟܰܢܳܐ ܕܠܺܝ ܢܰܟܦܺܝܘܗ̱ܝ^[13] ܠܰܡܢܰܣܝܳܢܳܐ ܗܰܘ ܠܳܐ ܡܶܬܟܰܟܦܳܢܳܐ. ܡܶܛܽܠܗܳܕܶܐ ܓܶܝܪ ܐܳܦ ܨܳܐܶܡ܆ ܘܡܶܢ ܒܳܬܰܪ ܐܰܪܒܥܺܝܢ ܝܰܘ̈ܡܺܝܢ ܠܟܰܦܢܳܐ ܨܶܒܝܳܢܳܐܺܝܬ ܩܰܒܶܠ ܥܠܰܘܗ̱ܝ^[14]. ܟܰܕ ܠܰܡܫܽܘܚܬܳܐ ܕܨܰܘܡܳܐ ܕܡܽܘܫܶܐ ܘܕܶܐ‌ܠܺܝܳܐ ܠܳܐ ܥܳܒܰܪ܆ ܗܳܝ ܕܳܐܦ ܠܗܳܢܽܘܢ ܗܽܘ ܝܰܗܒܳܗ̇܆ ܐܰܝܟܰܢܳܐ ܕܰܐܬܪܳܐ ܢܶܥܒܶܕ ܠܰܩܪܳܒܶܗ ܕܰܒܥܶܠܕܒܳܒܳܐ. ܐܶ‎ܠܽܘ ܓܶܝܪ ܥܰܒܪܶܗ ܠܡܶܢܝܳܢܳܐ ܗܰܘ ܕܰܐܪܒܥܺܝܢ ܝܰܘ̈ܡܳܬܳܐ܆ ܡܰܡܶܐܢ ܗ̱ܘܳܐ ܠܶܗ ܠܡܰܩܪܳܒܽܘ ܥܰܡܶܗ ܟܰܕ ܡܰܪܓܶܫ ܗ̱ܘܳܐ ܒܰܐܠܳܗܽܘܬܶܗ܆ ܘܠܰܝܬ ܗ̱ܘܳܐ ܠܶܗ ܕܰܢܚܽܘܪ ܒܬܰܚܘܺܝܬܳܐ ܐ̱ܢܳܫܳܝܬܳܐ.

12: ܡܶܛܽܠܗܳܕܶܐ܆ ܐܳܦ ܒܡ̈ܶܠܶܐ ܕܰܟܬܳܒܳܐ ܢܦܺܝܚ ܒܪܽܘܚܳܐ ܡܶܬܢܰܚܬܳܢܳܐܺܝܬ ܘܡܰܟܺܝܟܳܐܺܝܬ ܗܽܘ ܝܶܫܽܘܥ ܗܽܘ ܕܳܚܶܩ ܗ̱ܘܳܐ ܠܶܗ܆ ܟܰܕ ܠܘܳܬ݂ ܢܦܺܝܚܽܘܬܳܐ ܘܪܳܡܽܘܬܳܐ ܡܚܰܬ݂ܚܶܬ݂ ܗ̱ܘܳܐ܆ ܘܒܰܙܒܰܢ ܡܰܢ ܐܳܡܰܪ ܗ̱ܘܳܐ: ܕܶܐܢ ܒܪܳܐ ܐܺܝܬܰܝܟ ܕܰܐ‎ܠܳܗܳܐ ܐܶܡܰܪ ܕܗܳܠܶܝܢ ܟܺܐܦ̈ܶܐ ܠܰܚܡ̈ܶܐ ܢܶܗܘ̈ܝܳܢ^[15]. ܒܰܙܒܰܢ ܕܶܝܢ܆ ܐܰܪܡܳܐ ܐܰܢ̱ܬ ܠܳܟ ܡܶܢ ܗܳܪܟܳܐ ܠܬܰܚܬ. ܘܠܳܐ ܣܳܥܰܪ ܗ̱ܘܳܐ ܘܠܳܐ ܡܶܕܶܡ ܘܠܳܐ ܡܡܰܠܶܠ ܗ̱ܘܳܐ܆ ܡܶܢ ܫܽܘܒܚܳܐ ܟܝܳܢܳܝܳܐ ܘܫܽܘܠܛܳܢܳܐ ܦܐܶܐ ܠܰܐܠܳܗܳܐ ܕܗܰܘ ܕܺܐܝܬ ܗ̱ܘܳܐ ܠܶܗ. ܡܰܪܕܽܘܬܳܐ ܓܶܝܪ. ܘܝܽܘܠܦܳܢܳܐ ܕܺܝܠܰܢ ܐܺܝܬܶܝܗ̇ ܗ̱ܘܳܬ݂܆ ܗܳܝ ܕܰܒܝܰܕ ܗܳܠܶܝܢ ܕܩܰܕܺܝ̈ܡܳܢ ܣܺܝ̈ܡܳܢ ܡܶܬܕܰܒܪܳܐ ܗ̱ܘܳܬ݂܆ ܐܰܝܟܰܢܳܐ ܕܰܚܢܰܢ ܢܶ݀ܬܪܕܶܐ ܘܢܺ݀ܐܠܰܦ܆ ܕܰܐܝܟܰܢܳܐ ܙܳܕܶܩ ܠܰܡܩܰܪܳܒܽܘ ܠܘܳܬ ܒܥܶܠܕܳܪܳܐ ܘܡܶܬܟܰܬܫܳܢܳܐ ܕܰܠܩܽܘܒܠܳܐ. ܡܶܢ ܗܳܪܟܳܐ ܗܳܟܺܝܠ܆ ܟܰܕ ܗܳܕܶܐ ܠܘܳܬ ܫܽܘܠܳܡܳܐ ܐܶܬܳܬ܆ ܘܳܐܟܶܠܩܰܪܨܳܐ ܠܒܶܣܬܪܶܗ ܐܶܙܰܠ܆ ܡܶܚܕܳܐ ܠܰܡܥܰܠܝܽܘܬܳܐ ܕܺܝܠܶܗ ܘܰܠܠܳܐ ܡܶܬܩܰܪܒܳܢܽܘܬܳܐ ܕܰܠܘܳܬܶܗ ܡܚܰܘܶܐ ܗ̱ܘܳܐ. ܐܳܦ ܓܶܝܪ ܡܰܠܰܐܟ̈ܶܐ ܩܪܶܒܘ ܘܰܡܫܰܡܫܺܝܢ ܗ̱ܘܰܘ ܠܶܗ܆ ܐܰܝܟ ܕܰܠܡܳܪܳܐ ܘܕܺܐܝܬܰܘܗ̱ܝ ܐܰ‎ܠܳܗܳܐ ܒܰܟܝܳܢܳܐ.

13: ܡܶܢ ܗܳܕܶܐ ܡܰܠܦܳܢܽܘܬܳܐ ܫܘܰܚ ܠܰܢ܆ ܢܳܡܽܘܣܳܐ ܗܳܢܳܐ ܫܰܢ̱ܬܳܢܳܝܳܐ ܘܚܽܘܕܪܳܐ ܕܝܰܘ̈ܡܳܬܳܐ ܐܰܪܒܥܺܝܢ ܕܨܰܘܡܳܐ܆ ܕܡܶܢܝܳܢܳܐ ܐ̱ܪܳܙܳܢܳܝܳܐ ܘܰܕܐ̱ܪܳܙܳܐ ܡܛܰܫܝܳܐ ܐܺܝܬ ܠܶܗ ܒܶܗ. ܐܶܠܳܐ ܡܬܽܘܚܘ ܐܰܟܚܕܳܐ ܬܰܪܥܺܝܬܟܽܘܢ ܥܰܡܝ܆ ܐܰܝܟܰܢܳܐ ܕܢܺܐܠܰܦ ܕܡܶܛܽܠ ܡܳܢܳܐ ܐܰܪܒܥܺܝܢ ܝܰܘ̈ܡܳܬܳܐ ܨܳܝܡܺܝܢܰܢ ܒܰܠܚܽܘܕ܆ ܘܠܳܐ ܗ̱ܘܳܐ ܚܰܡܫܺܝܢ ܐܰܘ ܫܬܺܝܢ. ܝܺܕܰܥܢܰܢ ܗܳܟܺܝܠ ܡܶܢ ܡܰܟܬܒܳܢ̈ܘܳܬܶܗ ܕܡܽܘܫܶܐ ܕܳܐܡܰܪ: ܕܒܶܫܬܳܐ ܝܰܘ̈ܡܳܬܳܐ ܥܒܰܕ ܐܰ‎ܠܳܗܳܐ ܠܗܳܢܳܐ ܥܳܠܡܳܐ ܡܶܬܚܰܙܝܳܢܳܐ܆ ܘܰܒܝܰܘܡܳܐ ܫܒܺܝܥܳܝܳܐ ܐܶܬܬܢܺܝܚ^[16]܆ ܕܰܫܒܺܝܥܳܝܳܐ ‌ܐܺܝܬܰܘܗ̱ܝ ܟܽܠܶܗ ܙܰܒܢܳܐ ܕܚܰܝ̈ܶܐ ܗܳܠܶܝܢ. ܟܰܕ ܓܶܝܪ ܡܶܬܟܰܪܟܳܐ ܫܰܒܬܳܐ. ܗܺܝ ܥܠܶܝܗ̇ ܘܚܳܕܪܳܐ ܒܰܕܡܽܘܬ݂ ܓܺܝܓܠܳܐ܆ ܠܥܳܠܡܳܐ ܗܳܢܳܐ ܕܰܡܠܶܐ ܙܰܒܢܳܐ ܡܫܰܡܠܝܳܐ. ܗܰܘ ܕܟܰܕ ܢܶܫܬܰܠܰܡ܆ ܢܺܐܬܶܐ ܡܶܟܺܝܠ ܝܰܘܡܶܗ ܕܡܳܪܝܳܐ ܗܰܘ ܪܰܒܳܐ ܘܰܕܢܺܝܚܳܐ܆ ܗܰܘ ܟܺܝܬ ܕܰܬܡܺܝܢܳܝܳܐ ܡܰܢ ܡܶܬܡܢܶܐ܆ ܟܰܕ ܡܶܬܡܢܶܐ ܐܰܟܚܕܳܐ ܥܰܡ ܚܰܝ̈ܶܐ ܗܳܠܶܝܢ܆ ܩܰܕܡܳܝܳܐ ܕܶܝܢ ܘܰܠܚܽܘܕܳܝܳܐ ܠܘܳܬ ܥܳܠܡܳܐ ܗܰܘ ܕܰܥܬܺܝܕ.

14: ܘܠܳܐ ܓܶܝܪ ܠܺܠܝܳܐ ܡܒܰܛܶܠ ܠܶܗ ܠܗܳܢܳܐ. ܡܶܟܺܝܠ܆ ܘܳܐܦܠܳܐ ܝܰܘܡܳܐ ܡܶܕܶܡ ܐ̱ܚܪܺܢܳܐ ܬܽܘܒ ܡܝܰܒܶܠ ܡܩܰܒܶܠ ܠܶܗ܆ ܟܰܕ ܡܰܥܒܰܪ ܠܶܗ ܘܩܳܐܶܡ ܒܕܽܘܟܬܶܗ. ܐܶܠܳܐ. ܚܰܕ ‌ܐܺܝܬܰܘܗ̱ܝ ܘܠܳܐ ܡܶܫܬܰܪܝܳܢܳܐ܆ ܗܰܘ ܕܰܠܘܳܬܶܗ ܟܽܠܰܢ ܡܣܰܪܗܒܺܝܢܰܢ܆ ܕܗܽܘ ܟܰܕ ܗܽܘ ‌ܐܺܝܬܰܘܗ̱ܝ ܬܡܺܝܢܳܝܳܐ ܩܰܕܡܳܝܳܐ. ܗܰܘ ܕܠܶܗ ܡܣܰܟ̈ܝܳܢ ܪ̈ܽܘܚܳܬܳܐ ܕܙܰܕܺܝ̈ܩܶܐ܆ ܗܳܢܽܘܢ ܕܡܶܢ ܫܽܘܪܳܝܳܐ ܘܰܥܕܰܡܳܐ ܠܗܳܫܳܐ. ܟܰܕ ܠܗܳܢܳܐ ܡܨܰܠܶܝܢ ܚ̱ܢܰܢ ܕܢܶܫܬܘܶܐ. ܐܳܦ ܚܢܰܢ ܡܶܬܕܰܟܶܝܢ ܚ̱ܢܰܢ. ܗܽܘ ܕܶܝܢ ܕܽܘܟܳܝܳܐ ܕܺܝܠܰܢ. ܒܗܳܕܶܐ ‌ܐܺܝܬܰܘܗ̱ܝ܆ ܒܗܳܝ ܕܠܳܐ ܢܶܚܛܶܐ ܒܚܰܕ ܡܶܢ ܗܳܠܶܝܢ ܚܰܡܫܳܐ ܪ̈ܶܓܫܶܐ܆ ܫܶܡܥܳܐ܆ ܚܙܳܬܳܐ܆ ܓܶܫܬܳܐ܆ ܣܰܘܩܳܐ܆ ܛܥܳܡܬܳܐ. ܗܳܠܶܝܢ ܓܶܝܪ ܐܺܝܬܰܝܗܽܘܢ ܡܰܥ̈ܠܳܢܶܐ ܕܰܚܛܺܝܬܳܐ܆ ܗܳܠܶܝܢ ܕܒܺܐܝܕܰܝ̈ܗܽܘܢ ܡܰܫܬܰܡܠܝܳܐ ܟܽܠ ܪܶܓܬܳܐ ܕܰܠܘܳܬ݂ ܡܰܘܬܳܐ ܡܰܝܬܝܳܐ. ܗܳܝ ܕܶܐܦ ܐܶܪܰܡܝܳܐ ܢܒܺܝܳܐ ܟܰܕ ܐܴܠܶܐ ܠܗܳܢܽܘܢ ܕܚܳܛܶܝܢ ܗ̱ܘܰܘ ܐܳܡܰܪ ܗ̱ܘܳܐ: ܣܠܶܩ ܡܰܘܬܳܐ ܒܝܰܕ ܟܰܘܰܝ̈ܟܽܘܢ^[17].

15: ܡܶܛܽܠ ܗܳܟܺܝܠ ܕܗܳܠܶܝܢ ܐܶܬܢܰܗܰܪ̈ܶܝܢ ܠܰܢ܆ ܠܘܳܬ ܗܳܝ ܕܩܰܕܺܝܡܳܐ ܣܺܝܡܳܐ ܠܰܢ ܢܰܝܬܶܝܗ̇ ܠܡܶܠܬܳܐ. ܘܢܶܚܙܶܐ ܡܶܛܽܠ ܡܳܢܳܐ ܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܒܰܠܚܽܘܕ ܨܳܝܡܺܝܢܰܢ. ܡܶܛܽܠܡܳܢܳܐ؟ ܡܶܛܽܠ ܕܰܠܘܳܬ ܗܰܘ ܝܰܘܡܳܐ ܬܡܺܝܢܳܝܳܐ ܘܩܰܕܡܳܝܳܐ ܢܶܬܥܰܬܰܕ܆ ܗܰܘ ܪܰܒܳܐ ܘܰܕܢܺܝܚܳܐ ܗܰܘ ܝܰܘܡܶܗ ܕܡܳܪܝܳܐ. ܗܳܢܽܘܢ ܓܶܝܪ ܕܰܠܗܳܠܶܝܢ ܚܰܡܫܳܐ ܪ̈ܶܓܫܶܐ܆ ܗܳܢܽܘܢ ܕܒܺܐܝܕܰܝ̈ܗܽܘܢ ܫܳܩܠܳܐ ܚܛܺܝܬܳܐ ܡܰܥܰܠܬܳܐ܆ ܠܫܶܡܥܳܐ ܐܳܡܰܪ ܐ̱ܢܳܐ ܘܰܚܙܳܬܳܐ ܘܓܶܫܬܳܐ ܘܰܛܥܳܡܬܳܐ ܘܣܰܘܩܳܐ܆ ܬܡܳܢ̈ܶܐ ܙܰܒܢܺܝ̈ܢ ܡܕܰܟܶܝܢ܆ ܐܰܪܒܥܺܝܢ ܝܰܘ̈ܡܳܬܳܐ ܨܳܝܡܺܝܢ܆ ܐܰܝܟܰܢܳܐ ܕܰܠܝܰܘܡܳܐ ܗܰܘ ܛܽܘܒܬܳܢܳܐ ܢܶܫܬܘܽܘܢ܆ ܗܰܘ ܬܡܺܝܢܳܝܳܐ ܘܩܰܕܡܳܝܳܐ. ܡܶܢܝܳܢܳܐ ܓܶܝܪ ܗܰܘ ܕܚܰܡܫܳܐ. ܟܰܕ ܥܰܠ ܬܡܳܢ̈ܶܐ ܙܰܒܢܺܝ̈ܢ ܡܶܬܟܪܶܟ܆ ܠܡܶܢܝܳܢܳܐ ܗܰܘ ܕܰܐܪܒܥܺܝܢ ܝܰܘ̈ܡܳܬܳܐ ܡܫܰܡܠܶܐ.

16: ܠܗܳܠܶܝܢ ܐܳܦ ܡܽܘܫܶܐ ܗܰܘ ܣܳܐܶܡ ܢܳܡܽܘܣܳܐ ܨܳܡ. ܠܗܳܠܶܝܢ ܐܳܦ ܐܶ‌ܠܺܝܳܐ ܢܒܺܝܳܐ ܨܳܡ. ܠܗܳܠܶܝܢ ܐܳܦ ܝܶܫܽܘܥ ܗܰܘ ܡܳܪܶܗ ܕܢܳܡܽܘܣܳܐ ܘܕܰܢܒܺܝ̈ܶܐ܆ ܘܰܐ‌ܠܳܗܳܐ ܕܶܐܘܰܢܓܶܠܺܝ̈ܰܐ܆ ܘܡܰܠܦܳܢܳܐ ܘܟܳܪܽܘܙܳܐ ܕܚܰܝ̈ܶܐ ܗܳܠܶܝܢ ܕܰܥܬܺܝܕܺܝܢ. ܡܶܛܽܠܗܳܕܶܐ ܬܽܘܒ. ܗܽܘ ܡܽܘܫܶܐ܆ ܟܰܕ ܠܒܰܪ ܡܶܢ ܡܶܨܪܶܝܢ ܐܰܪܒܥܺܝܢ ܫܢܺܝ̈ܢ ܦܺܝܠܳܣܽܘܦܺܝܣܳܐ ܥܒܰܕ܆ ܗܳܝܕܶܝܢ ܡܩܰܒܶܠ ܠܰܡܕܰܒܪܳܢܽܘܬܳܐ ܕܺܐܝܣܪܳܐܶܝܠ. ܐܳܦ ܗܽܘ ܥܰܡܳܐ. ܟܰܕ ܐܰܪܒܥܺܝܢ ܫܢܰܝ̈ܳܐ ܟܰܬܰܪ ܒܡܰܕܒܪܳܐ ܘܶܐܬܪܕܺܝ܆ ܗܳܝܕܶܝܢ ܠܘܳܬ ܐܰܪܥܳܐ ܕܡܽܘܠܟܳܢܳܐ ܐܳܬܶܐ ܗ̱ܘܳܐ. ܗܳܠܶܝܢ ܕܶܝܢ ܛܽܘܦܣܳܢܳܐܺܝܬ. ܓܳܕ̈ܫܳܢ ܗ̱ܘܰܝ̈ ܠܗܳܢܽܘܢ܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ: ܐܶܬܟܬܶܒܶܝ̈ܢ ܕܶܝܢ ܠܘܳܬ ܝܽܘܠܦܳܢܳܐ ܕܺܝܠܰܢ^[18]܆ ܗܳܢܽܘܢ ܕܰܥܠܰܝܗܽܘܢ ܫܽܘܠܳܡܰܝ̈ܗܽܘܢ ܕܥܳܠ̈ܡܶܐ ܡܰܢܰܥܘ.

17: ܡܳܕܶܝܢ ܟܰܕ ܥܶܠ̈ܠܳܬܳܐ ܘܡ̈ܶܠܶܐ ܘܫܽܘܡܠܳܝܶܗ ܕܨܰܘܡܳܐ ܝܺܠܶܦܢܰܢ܆ ܚܘܺܝܚܳܐܺܝܬ ܢܚܰܘܶܐ ܦܽܘܠܚܳܢܶܗ. ܟܳܕ ܠܳܐ ܡܶܬܟܰܡܪܺܝܢ ܐܢ̱ܬܽܘܢ܆ ܐܳܦܠܳܐ ܒܳܟܶܝܢ ܐܢ̱ܬܽܘܢ ܡܶܛܽܠ ܓܠܺܝܙܽܘܬܳܐ ܕܰܢܝܳܚܳܐ ܒܶܣܪܳܢܳܝܳܐ܆ ܘܦܽܘܐܳܩܳܐ ܘܡܰܐܺܝܢܽܘܬܳܐ ܡܶܬܡܠܶܝܢ ܐܢ̱ܬܽܘܢ܆ ܘܺܐܝܕܰܝ̈ܟܽܘܢ ܠܥܶܠ ܡܶܢ ܪܺܝܫܟܽܘܢ ܡܪܺܝܡܺܝܢ ܐܢ̱ܬܽܘܢ ܘܡܶܬܦܰܫܠܺܝܢ^[19] ܐܢ̱ܬܽܘܢ܆ ܘܰܠܘܳܬ݂ ܐܶܣ̈ܶܐ ܡܶܣܬܰܡܟܺܝܢ ܐܢ̱ܬܽܘܢ܆ ܘܰܠܘܳܬ ܫܶܡܫܳܐ ܚܳܝܪܺܝܢ ܐܢ̱ܬܽܘܢ ܘܰܦܥܺܝܪ ܚܶܟܟܽܘܢ܆ ܘܰܠܪܰܡܫܳܐ ܕܰܐܝܟ ܕܰܠܐܳܪܚܳܝܳܐ ܗܰܘ ܕܡܶܢ ܙܰܒܢܳܐ ܚܰܙܺܝܩ ܡܣܰܟܶܝܢ ܐܢ̱ܬܽܘܢ܆ ܘܡܶܟܺܝܠ ܡܶܢ ܩܽܘܛܳܥ ܪܶܥܝܳܢܳܐ ܠܫܰܒ̈ܶܐ ܡܦܰܪܫܺܝܢ ܐܢ̱ܬܽܘܢ܆ ܘܰܠܗܳܝ ܡܰܢ ܩܰܕܡܳܝܬܳܐ܆ ܠܗܳܝ ܕܶܝܢ ܡܶܨܥܳܝܬܳܐ܆ ܠܗܳܝ ܕܶܝܢ ܐ̱ܚܪܳܝܬܳܐ ܡܫܰܡܗܺܝܢ ܐܢ̱ܬܽܘܢ܆ ܘܰܐܝܟ ܡܳܐ ܕܰܠܟܽܘܢ ܫܳܦܰܪ܆ ܠܗܳܠܶܝܢ ܡܰܢ ܐܰܝܟ ܩܰܕܺܝ̈ܫܳܬܳܐ ܠܨܰܘܡܳܐ ܝܳܗܒܺܝܢ ܐܢ̱ܬܽܘܢ܆ ܠܗܳܠܶܝܢ ܕܶܝܢ ܕܒܰܡܨܰܥܬܳܐ ܠܡܶܐܟܽܘܠܬܳܐ ܗܳܝ ܕܰܥܝܳܕܳܐ ܦܳܠܓܺܝܢ ܐܢ̱ܬܽܘܢ܆ ܘܰܐܝܟ ܙܢܳܐ ܕܒܰܡܨܰܥܬܳܐ ܕܰܬܪܶܝܢ ܩܪ̈ܳܒܶܐ܆ ܒܶܛܠܳܢܳܐ ܘܢܰܘܚܳܐ ܠܗܶܝܢ ܡܬܰܚܡܺܝܢ ܐܢ̱ܬܽܘܢ.

18: ܡܰܢܽܘ ܗܳܠܶܝܢ ܣܳܡ ܠܳܟ ܢܳܡܽܘܣܳܐ ܐܳܘ ܒܰܪܢܳܫܳܐ! ܐܶܢ ܨܳܒܶܐ ܐܰܢ̱ܬ ܕܬܺܐܡܰܪ ܗܳܝ ܕܫܰܪܺܝܪܳܐ܆ ܟܰܪܣܳܐ. ܐܶܠܳܐ ܐܶܡܰܪ ܐܳܦ ܐܰܢ̱ܬ ܠܘܳܬܳܗ̇܆ ܐܰܪܒܥܺܝܢ ܝܰܘ̈ܡܳܬܳܐ ܐܶܬܦܩܶܕܬܝ ܕܰܬܨܽܘܡܺܝܢ ܐܳܘ ܕܳܘܺܝܬܳܐ ܘܰܕܠܳܐ ܣܰܒܥܳܐ. ܘܣܳܝܡܳܐ ܐܰܢܬܝ ܢܳܡܽܘܣܳܐ ܠܽܘܩܒܰܠ ܗܰܘ ܕܰܦܩܰܕ܆ ܚܙܳܝ ܕܰܠܡܳܐ ܢܶܡܚܶܝܟܝ ܒܟܽܘܪܗܳܢܳܐ܆ ܘܗܳܝܕܶܝܢ ܬܶܟܦܢܺܝܢ ܟܰܦܢܳܐ ܐܳ‌ܠܨܳܝܳܐ܆ ܘܰܬܨܽܘܡܺܝܢ ܗܳܠܶܝܢ ܕܠܳܐ ܐܰܓܪܳܐ ܘܠܳܐ ܨܶܒܝܳܢܳܝ̈ܳܬܳܐ. ܨܽܘܡܝ ܗܳܟܺܝܠ ܠܟܽܠܗܶܝܢ ܨܶܒܝܳܢܳܐܺܝܬ܆ ܟܰܕ ܡܰܘܕܝܳܐ ܐܰܢ̱ܬܝ ܛܰܝܒܽܘܬܳܐ ܠܗܰܘ ܣܳܐܶܡ ܢܳܡܽܘܣܳܐ ܘܳܐܣܝܳܐ܆ ܘܚܳܕܝܳܐ ܐܰܢ̱ܬܝ ܒܒܶܣܪܳܐ܆ ܗܰܘ ܕܰܠܘܳܬܶܗ ܚܳܝܪܳܐ ܐܳܣܝܽܘܬܶܗ ܕܨܰܘܡܳܐ. ܘܶܐܢܗܽܘ ܕܨܳܒܶܐ ܐܰܢܬ ܕܠܳܐ ܬܰܪܓܶܫ ܒܡܶܬܚܶܗ ܕܝܰܘܡܳܐ܆ ܬܰܪܣܺܝܗ̇ ܠܢܰܦܫܳܐ ܒܣܽܘ̈ܟܳܠܶܐ ܐܰ‎ܠܳܗܳܝ̈ܶܐ܆ ܘܰܩܪܺܝ ܒܰܟܬܳܒ̈ܶܐ ܘܰܒܡܰܟܬܒܳܢ̈ܘܳܬܳܐ ܕܡܰܠ̈ܦܳܢܶܐ ܘܡܰܐܪ̈ܙܳܢܶܐ ܕܥܺܕܬܳܐ܆ ܗܳܢܽܘܢ ܕܰܠܗܳܠܶܝܢ ܦܰܫܶܩܘ.

19: ܐܶܠܳܐ ܐܽܘܡܳܢܽܘܬܳܐ ܦܳܠܚܰܬ ܒܺܐܝ̈ܕܰܝܳܐ ܐܰܚܺܝܕ ܐܰܢ̱ܬ܆ ܘܡܶܢܳܗ̇ ܐܺܝܬ ܠܳܟ ܠܥܶܠ̈ܠܳܬܳܐ ܕܚܰܝ̈ܶܐ܆ ܐܺܝܕܳܐ ܬܶܗܘܶܐ ܐܰܚܺܝܕܳܐ ܠܡܳܐܢ̈ܶܐ ܕܽܐܘܡܳܢܽܘܬܳܐ܆ ܘܬܶܗܘܶܐ ܥܳܒܕܳܐ ܗܰܘ ܡܳܐ ܕܰܡܥܰܝܰܕ ܠܽܐܘܡܳܢܽܘܬܳܐ. ܦܽܘܡܳܐ ܕܶܝܢ܆ ܢܙܰܡܰܪ ܡܰܙܡܽܘܪ̈ܶܐ܆ ܚܠܳܦ ܙܡܺܝܪ̈ܳܬܳܐ ܗܳܠܶܝܢ ܤܳܛܳܢܳܝ̈ܳܬܳܐ ܘܕܽܐܘܪܟܺܝܣܛܽܘܬܳܐ. ܘܚܰܝܠܳܐ ܕܗܳܠܶܝܢ ܕܡܶܙܕܰܡܪ̈ܳܢ܆ ܒܽܘܪܟܬܳܐ. ܘܛܰܝܒܽܘܬܳܐ ܢܟܺܝܠ ܘܢܰܫܦܰܥ ܥܰܠ ܟܽܠܗܽܘܢ ܥܒܳܕ̈ܶܐ ܕܺܝܠܳܟ. ܘܶܐܢܗܽܘ ܕܰܟܡܳܐ ܙܰܒܢܺܝ̈ܢ ܐ̱ܢܳܫ ܒܰܛܺܝܠܳܐ ܝܳܬܶܒ ܠܘܳܬܳܟ܆ ܐܰܘ ܐܳܦ ܒܪܳܐ ܕܺܝܠܳܟ ܕܰܥܕܰܟܺܝܠ ܠܘܳܬ ܡܰܠܶܦ ܣܶܦܪܳܐ ܡܶܬܪܕܶܐ. ܐܰܘ ܐܳܦ ܠܘܳܬ ܪ̈ܳܕܽܘܝܶܐ ܕܝܽܘܠ̈ܦܳܢܶܐ ܐ̱ܚܪ̈ܳܢܶܐ܆ ܡܶܢ ܒܳܬܰܪ ܕܰܡܙܰܡܰܪ ܐܰܢ̱ܬ ܡܰܙܡܽܘܪ̈ܶܐ ܗܳܠܶܝܢ ܕܝܳܕܰܥ ܐܰܢ̱ܬ܆ ܗܰܒ ܠܶܗ ܦܶܢܩܺܝܬܳܐ ܕܰܟܬܳܒܳܐ ܐܰ‎ܠܳܗܳܝܳܐ܆ ܘܰܬܒܰܥܳܝܗ̱ܝ ܕܢܶܩܪܶܐ. ܬܶܗܘܶܐ ܕܶܝܢ ܩܰܪܺܝܒܳܐ ܠܳܟ ܐܶܢ ܡܰܨܝܳܐ ܐܳܦ ܐܰܢ̱ܬܬܳܟ܆ ܘܬܶܗܘܶܐ ܐܰܢ̱ܬ ܠܳܗ̇ ܠܘܳܬܳܗ̇ ܩܰܠܬܳܗ̇ ܕܥܰܡܪܳܐ܆ ܘܬܶܗܘܶܐ ܨܳܝܬܳܐ. ܘܶܐܢ ܐܺܝܬ ܠܳܟ ܐܰܓܺܝܪܳܐ ܘܒܳܒܽܘܣܳܐ ܥܰܒܕܳܐ܆ ܐܰܘ ܐܳܦ ܥܰܡܬܳܐ܆ ܗܳܠܶܝܢ ܓܶܝܪ ܦܰܩܶܕ ܐܳܦ ܡܽܘܫܶܐ. ܠܗܳܢܽܘܢ ܕܰܥܕܰܟܺܝܠ ܡܶܢ ܬܪܐܽܘܬܳܐ ܕܢܳܡܽܘܣܳܐ ܡܶܬܗܰܕܶܝܢ ܘܥܰܠ ܚܰܠܒܳܐ ܣܢܺܝܩܺܝܢ^[20]܆ ܘܫܰܒܪܺܝܢ ܒܗܳܠܶܝܢ ܐܰ‎ܠܳܗܳܝ̈ܳܬܳܐ.

20: ܥܒܶܕܳܝܗ̱ܝ ܠܒܰܝܬܳܐ ܕܺܝܠܳܟ ܥܺܕܬܳܐ܆ ܗܰܘ ܕܰܠܝܽܘܠ̈ܦܳܢܶܐ ܗܳܠܶܝܢ ܕܝܰܬܺܝܪ ܡܫܰܡܠܶܝܢ ܘܶܐܘܰܢܓܶܠܺܝ̈ܰܐ ܐܶܫܬܘܺܝܬ. ܐܶܠܳܐ ܬܺܐܡܰܪ ܟܒܰܪ܆ ܕܠܳܐ ܝܳܕܰܥ ܐ̱ܢܳܐ ܠܰܡܙܰܡܳܪܽܘ܆ ܘܠܳܐ ܐܺܝܬ ܠܺܝ ܣܦܺܝܩܽܘܬܳܐ ܠܡܰܪܦܳܝܽܘ ܦܽܘܠܚܳܢܳܐ ܕܺܝܠܝ. ܘܰܒܟܰܦܢܳܐ ܐܶ݀ܡܽܘܬ݂܆ ܘܶܐ݀ܗܘܶܐ ܠܒܺܝܟ ܐ̱ܢܳܐ ܟܬܳܒܳܐ ܕܡܰܙܡܽܘܪ̈ܶܐ܆ ܘܬܳܢܶܐ ܐ̱ܢܳܐ ܘܝܳܠܶܦ ܐ̱ܢܳܐ ܡܰܙܡܽܘܪ̈ܶܐ. ܡܳܕܶܝܢ ܫܡܰܥܳܝܗ̱ܝ ܠܡܰܬܠܳܐ ܕܡܰܙܥܶܩ ܠܘܳܬܳܟ܆ ܥܕܰܡܳܐ ܠܶܐܡܰܬܝ ܚܒܰܢܳܢܳܐ ܡܰܓܶܤ ܐܰܢ̱ܬ܆ ܘܰܟܡܳܐ ܙܰܒܢܺܝ̈ܢ ܒܠܺܠܝܳܐ ܣܰܬܘܳܝܳܐ ܕܗܳܟܰܢܳܐ ܐܰܪܺܝܟ. ܐܶܬܬܥܺܝܪ ܩܰܠܺܝܠ. ܘܙܶܠ ܠܥܺܕܬܳܐ܆ ܘܣܺܝܡ ܡܰܫܡܰܥܬܳܟ ܠܘܳܬ ܬܶܫܡܶܫܬܳܐ ܕܙܽܘܡܳܪܳܐ܆ ܘܬܶܒܠܰܥ ܒܢܰܦܫܳܟ ܒܪܶܚܡܬܳܐ ܐܰ‎ܠܳܗܳܝܬܳܐ. ܘܬܶܓܒܶܐ ܠܳܟ ܫܰܗܪܳܐ ܚܠܳܦ ܫܶܢܬܳܐ܆ ܘܕܰܒܡܰܘܬܳܐ ܐܺܝܬܰܝܗܽܘܢ ܬܺܐܡܰܪ ܐܰܝܠܶܝܢ ܕܕܳܡܟܺܝܢ ܘܬܺܐܙܰܠ ܒܠܺܠܝܳܐ. ܘܰܬܙܰܡܰܪ ܠܡܳܪܝܳܐ. ܘܒܺܐܝܡܳܡܳܐ. ܒܶܗ ܟܰܕ ܒܶܗ ܒܕܶܒܫܳܐ ܬܚܰܠܶܐ ܠܦܽܘܡܳܐ ܕܺܝܠܳܟ܆ ܘܬܶܬܗܰܓܶܐ ܒܢܳܡܽܘܣܳܐ ܕܡܳܪܝܳܐ ܐܰܝܟܰܢܳܐ ܕܰܟܬܺܝܒ܆ ܒܺܐܝܡܳܡܳܐ ܟܺܝܬ ܘܰܒܠܺܠܝܳܐ.

21: ܐܶܠܳܐ ܐܺܝܬ ܐ̱ܢܳܫܺܝ̈ܢ. ܗܳܢܽܘܢ ܕܳܐܦܠܳܐ ܐܽܘܡܳܢܽܘܬܳܐ ܝܳܕܥܺܝܢ ܠܡܶܦܠܰܚ܆ ܘܰܡܗܰܠܟܺܝܢ ܠܳܐ ܡܛܰܟܣܳܐܺܝܬ܆ ܘܠܳܐ ܡܶܕܶܡ ܦܳܠܚܺܝܢ. ܐܶܠܳܐ ܡܥܰܩܒܺܝܢ ܐܰܝܟܰܢܳܐ ܕܦܰܘܠܽܘܤ ܐܳܡܰܪ^[21]܆ ܘܰܠܘܳܬ݂ ܚܙܳܬܳܐ ܕܪ̈ܰܟܫܳܐ ܡܡܰܪ̈ܝܳܢܶܐ ܐܳܙܺܠ̱ܝܢ. ܡܳܢܳܐ ܗܳܟܺܝܠ ‌ܐܳܡܰܪ ܥܰܠ ܡܰܘܗܰܒܬܶܗ ܚܕܰܬܳܐ ܕܡܰܠܟܰܢ ܫܰܦܺܝܪ ܕܶܚܠܬܳܐ ܗܳܝ ܕܗܳܟܰܢܳܐ ܫܦܺܝܥܳܐ܆ ܦܳܩܶܕ ܐ̱ܢܬ ܕܰܢܒܰܣܰܪ܆ ܐܶܢܳܐ ܕܶܝܢ ܐ݀ܶܦܢܶܐ ܠܩܽܘܒܠܳܟ. ܝܰܬܺܝܪ ܟܺܐܢܳܐܺܝܬ. ܡܶܛܽܠܗܳܕܶܐ. ܐܶܡܰܪ ܠܺܝ܆ ܫܰܟܢܳܗ̇ ܠܗܳܕܶܐ܆ ܐܰܝܟܰܢܳܐ ܕܥܰܠ ܥܺܕܬܳܐ ܬܒܰܣܰܪ܆ ܘܰܠܝܰܘ̈ܡܳܬܳܐ ܩܰܕܺܝ̈ܫܶܐ ܕܨܰܘܡܳܐ ܬܨܰܥܰܪ܆ ܘܠܳܐ ܟܽܠ ܟܽܠܶܗ. ܐܶܠܳܐ. ܐܰܝܟܰܢܳܐ ܕܒܽܘܛܳܠܳܐ ܕܒܺܝ̈ܫܳܬܳܐ ܗܳܠܶܝܢ ܕܝܰܬܺܝܪ ܪܰܘܪ̈ܒܳܢ ܢܶܥܒܶܕ܆ ܡܶܛܽܠ ܟܺܝܬ ܕܰܠܘܳܬ ܒܺܝܫܽܘܬܳܐ ܐܺܝܬ ܠܳܟ ܪܟܺܝܢܳܐܺܝܬ܆ ܠܗܳܝ ܕܠܳܐ ܡܶܫܟܰܚ ܠܡܶܟܠܝܳܗ̇ ܒܝܰܕ ܡܚܰܦܛܳܢܽܘܬܳܐ ܕܰܠܘܳܬ ܡܝܰܬܪܽܘܬܳܐ܆ ܟܰܕ ܡܶܬܕܰܡܶܐ ܐܳܦ ܒܗܳܕܶܐ ܒܰܐܒܳܗ̈ܶܐ ܪ̈ܳܚܡܰܝ ܒܢܰܝ̈ܳܐ܆ ܗܳܢܽܘܢ ܕܠܰܒܢܰܝ̈ܗܽܘܢ ܫܰܒܪ̈ܶܐ܆ ܓܰܘ̈ܙܶܐ ܘܩܽܘܦ̈ܣܶܐ ܕܶܐܫܬܥܶܢܝܳܐ ܝܳܗܒܺܝܢ ܠܗܽܘܢ ܘܰܕܢܶܫܬܥܽܘܢ ܦܳܩܕܺܝܢ ܠܗܽܘܢ܆ ܐܰܝܟܰܢܳܐ ܕܠܳܐ ܟܰܕ ܠܒܰܪ ܡܶܢ ܬܰܪܥܳܐ ܢܳܦܩܺܝܢ܆ ܢܶܦܠܽܘܢ ܒܒܺܐܪ̈ܳܬܳܐ^[22] ܐܰܘ ܒܩܰܒ̈ܝܳܬܳܐ ܕܡܰܝ̈ܳܐ܆ ܐܰܘ ܟܰܕ ܥܳܪܩܺܝܢ ܡܶܢ ܡܰܪܕܽܘܬܳܐ ܘܝܽܘܠܦܳܢܳܐ ܕܰܟܬܺܝ̈ܒܳܬܳܐ܆ ܢܶܦܓܥܽܘܢ ܒܗܳܢܽܘܢ ܕܓܳܢܒܺܝܢ ܡܳܐܢ̈ܶܐ ܐܰܘ ܒܫܰܒܳܝ̈ܶܐ ܓܳܢ̈ܒܰܝ ܐ̱ܢܳܫ̈ܳܐ.

22: ܘܰܐܢ̱ܬ ܗܳܟܺܝܠ. ܐܶܢܗܽܘ ܕܠܰܘ ܫܰܒܪܳܐܺܝܬ ܘܣܰܟܠܳܐܺܝܬ ܣܺܝܡ ܐܰܢ̱ܬ܆ ܫܒܽܘܩ ܕܢܶܫܬܰܡܠܶܐ ܪܶܗܛܳܐ ܕܪ̈ܰܟܫܳܐ. ܠܳܟ ܕܶܝܢ ܕܠܳܐ ܚܳܙܶܐ ܐܰܢ̱ܬ ܢܶܗܘܶܐ ܝܰܬܺܝܪܳܐ. ܘܰܕܠܳܐ ܝܽܘܬܪܳܢ. ܘܡܶܚܕܳܐ ܕܡܰܠܟܳܐ ܫܰܦܺܝܪ ܕܶܚܠܬܳܐ. ܢܶܚܙܶܝܗ̇ ܠܟܽܠܳܗ̇ ܡܕܺܝܢ̱ܬܰܢ ܐܰܘ ܠܰܡܢܳܬܳܗ̇ ܣܰܓܺܝܐܬܳܐ܆ ܕܰܡܫܰܡܠܝܳܐܺܝܬ ܣܺܝܡܳܐ܆ ܘܠܰܐܓܽܘܢܳܐ ܕܪ̈ܰܟܫܳܐ ܠܳܐ ܚܰܙܝܳܐ܆ ܠܳܐ ܗ̱ܘܳܐ ܐܰܝܟ ܕܰܠܫܰܒܪ̈ܶܐ ܡܶܟܺܝܠ܆ ܐܶܠܳܐ ܐܰܝܟ ܕܰܠܓܰܒܪ̈ܶܐ ܢܫܰܟܶܢ܆ ܡܰܘܗ̈ܒܳܬܳܐ ܗܳܠܶܝܢ ܕܝܰܬܺܝܪ ܡܶܢ ܟܽܠ ܛܳܒ ܪܰܘܪ̈ܒܳܢ. ܡܨܰܠܶܐ ܓܶܝܪ ܗܽܘ܆ ܕܰܠܟܽܠܗܽܘܢ ܒܢܰܝ̈ܢܳܫܳܐ ܢܶܚܙܶܐ ܕܡܶܬܟܰܢܫܺܝܢ ܒܥܺܕܬܳܐ܆ ܗܳܝ ܕܒܳܗ̇ ܒܟܽܠܗܽܘܢ ܚܰܝܰܘ̈ܗ̱ܝ ܐܶܬܶܐܡܶܢ܆ ܟܰܕ ܫܳܗܰܪ ܘܰܡܙܰܡܰܪ ܘܰܡܨܰܠܶܐ܆ ܗܳܠܶܝܢ ܟܺܝܬ ܕܳܐܦ ܥܰܡ ܣܩܺܝܦܶܛܪܽܘܢ ܘܰܟܠܺܝܠܳܐ ܦܺܝܠܳܣܽܘܦܺܝܣܳܐ ܥܳܒܶܕ܆ ܗܳܠܶܝܢ ܕܰܒܝܰܕܗܶܝܢ ܐܳܦ ܡܶܬܢܛܰܪ.

23: ܐܶܠܳܐ ܠܳܐ ܣܳܦ̈ܩܳܢ ܗܳܠܶܝܢ ܕܶܐܬܶܐܡܰܪ̈ܝ ܒܰܠܚܽܘܕܰܝܗܶܝܢ܆ ܕܢܳܛܪ̈ܳܢ ܠܺܝ ܠܗܰܘ ܕܨܳܐܶܡ. ܣܰܓܺܝ̈ܳܐܬܳܐ ܓܶܝܪ ܐܳܦ ܐ̱ܚܪ̈ܳܢܝܳܬܳܐ ܐܺܝܬ܆ ܗܳܠܶܝܢ ܕܡܶܛܽܠ ܙܪܺܝܒܽܘܬܶܗ ܕܥܶܕܳܢܳܐ ܠܡܺܐܡܰܪ ܐܶܢܶܝܢ ܠܳܐ ܡܶܫܬܒܶܩ ܐ̱ܢܳܐ. ܗܳܕܶܐ ܕܶܝܢ. ܒܰܠܚܽܘܕ ܚܠܳܦ ܟܽܠܗܶܝܢ ܐܳܡܰܪ܆ ܕܗܰܘ ܕܨܳܐܶܡ. ܙܳܕܶܩ ܠܶܗ܆ ܕܛܺܝ̈ܡܶܐ ܕܡܶܐܟ̈ܠܳܬܳܐ ܗܳܠܶܝܢ ܟܺܝܬ ܕܥܰܬܺܝܕ ܗ̱ܘܳܐ ܠܡܶܐܟܰܠ ‌ܐܶ‎ܠܽܘ ܐܰܥܪܺܝ܆ ܒܺܐܝܕܳܐ ܕܡܶܣܟܺܢܳܐ ܢܣܺܝܡ ܐܶܢܶܝܢ܆ ܘܰܒܝܰܕ ܨܰܘܡܶܗ ܕܺܝܠܶܗ ܢܬܰܪܣܶܝܘܗ̱ܝ ܠܰܡܫܺܝܚܳܐ ܕܰܟܦܶܢ. ܫܰܦܺܝܪܳܐ ܓܶܝܪ ܐܳܘ ܚܰܒܺܝܒܳܐ. ܘܣܰܓܺܝ ܡܰܘܬܪܳܐ܆ ܕܰܒܝܰܕ ܗܳܕܶܐ ܢܶܪܓܰܫ ܡܫܺܝܚܳܐ ܕܨܳܡܬ݁܆ ܘܰܒܪ̈ܰܚܡܶܐ^[23] ܕܰܡܫܰܘܬܦܽܘܬ݂ ܡܰܘܗܰܒܬܳܐ܆ ܐܰܢܗܰܪܬ ܠܰܫܪܳܓܳܐ ܕܰܡܚܰܡܣܢܳܢܽܘܬܳܐ. ܠܳܐ ܓܶܝܪ ܐܺܝܬܶܝܗ̇ ܠܶܗ ܡܩܰܒܰܠܬܳܐ ܟܽܠܳܗ̇ ܡܝܰܬܪܽܘܬܳܐ܆ ܐܳܦܶܢ ܚܰܬܺܝܬܳܐܺܝܬ ܬܶܗܘܶܐ܆ ܐܶܡܰܬܝ ܕܡܶܢ ܪ̈ܰܚܡܶܐ ܚܰܣܺܝܪܳܐ^[24]. ܗܳܕܶܐ ܗܳܟܺܝܠ ܥܰܡ ܗܳܠܶܝܢ ܐ̱ܚܪ̈ܳܢܝܳܬܳܐ ܢܶܬܬܰܓܰܪ ܥܰܬܺܝܪܳܐܺܝܬ܆ ܘܢܶܫܬܘܶܐ ܠܡܰܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‎ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܚܡܫܥܣܪ.

܏ܡـ ܏ܕܝܘ: ܤܛܐܕܝܘܢ ܘܠܳܐ ܬܫܘܪܘܢ ܡܬܬܰܠܫܺܝܢܢ ܬܚܝܬ ܚܒ̈ܠܐ ܡܢ ܥܰܒܕܽܘܬܳܐ ܕܰܚܒܳܠܳܐ. ܕܗܳܢܶܝܢ ܕܡܶܣܬܰܒܪ̈ܳܢ ܐܰܡܺܝܪ. ܪܺܝܫܶܗ ܢܨܠܐ. ܐܘܡܘܤ ܐܶܣܬܰܪܰܩܘ ܘܐܬܚܒܠܘ. ܐܰܝܟ ܕܰܠܠܳܐ ܫܘܰܝ̈ܳܐ. ܘܥܰܡ ܐܝܣܪܳܐܶܝܠ ܢܶܬܟܰܣܰܤ. ܘܰܣܥܪܬ ܠܥܠܘܠܘܬܐ ܕܝܠܗ܆ ܠܳܐ ܐܣܬܕܩ. ܬܛܐܠܝܐ. ܩܦܐܕܘܩܝܐ. ܘܦܝܘܛܘܬܐ ܐܘܪ̈ܓܢܐ ܕܡܘܣܝܩܪܘܬܐ. ܘܒܕܡܘܬ ܦܠܰܓܳܐ. ܗܳܢܽܘܢ ܕܰܡܨܐܝܢ ܕܰܠܒܽܘܪ̈ܟܰܘ̈ܗ̱ܝ ܟܰܦ ܕܡܰܗܦܶܟ ܨܰܘܪܶܗ.

[1]ܬܽܘܒ ܬܽܘܪܓܳܡܳܐ ܕܠܺܠܝܳܐ ܕܰܬܪܶܝܢ ܒܫܰܒܳܐ ܕܫܰܒܬܳܐ ܕܬܰܪܬܶܝܢ ܕܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ ܕ…. ܣܶܐܘܺܝܪܶܐ ܦܰܐܛܶܪܝܰܪܟܳܐ ܕܰܐܢܛܺܝܽܘܟܺܝܰܐ.

ܫܠܶܡ ܕܺܝܠܶܗ ܟܰܕ ܕܺܝܠܶܗ ܕܩܰܕܺܝܫܳܐ ܣܶܐܘܺܝܪܶܐ. ܡܺܐܡܪܳܐ ܕܒܰܐܝܢܳܐ ܙܢܳܐ ܣܝܳܡܳܐ ܕܩܳܢܽܘ̈ܢܶܐ ܩܰܕܺܝ̈ܫܶܐ ܡܦܰܩܶܕ ܕܙܳܕܶܩ ܠܰܢ ܠܡܶܥܒܰܕ ܒܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ ܕܽܘܟܪܳܢܳܐ ܕܣܳܗ̈ܕܶܐ ܩܰܕܺܝ̈ܫܶܐ ܘܡܶܛܽܠ ‌ܐܰܪܒܥܺܝܢ ܣܳܗ̈ܕܺܝܢ ܩܰܕܺܝ̈ܫܶܐ ܐܶܬܥܡܕܝܢ ܒܝܰܘܡܳܐ ܕܫܰܒܬܳܐ. ܕܩܰܕܺܝܫܳܐ ܣܶܐܘܺܝܪܶܐ ܦܐܛܪܝܐܪܟܣ ܡܺܐܡܪܳܐ ܕܚܡܫܬܥܣܪ ܕܥܰܠ ܨܡܐ ܩܰܕܺܝܫܳܐ ܕܰܐܪܒܥܺܝܢ. ܐܶܬܶܐܡܰܪ ܕܶܝܢ ܒܰܥܪܽܘܒܬ ܕܡܶܢ ܩܕܳܡܰܘܗܝ ܒܥܺܕܬܳܐ ܕܩܣܝܢܐ.

ܐܝܘܒ. 33: 4 [2]

ܡܬܝ. 6: 17 [3]

ܡܬܝ. 6: 16[4]

ܪܺܝܫܳܢܳܝܳܐ[5]

ܐܦܣ̈ܝܐ. 6: 12 [6]

ܣܦܪܐ ܕܒܪܝܬܐ. 1: 31 [7]

 ܡܫܰܢܶܩ[8]

ܡܫܰܡܠܝܢ[9]

ܡܬܝ. 4: 6 [10]

ܡܬܝ. 4: 1 [11]

ܪ̈ܗܘܡܝܐ. 8: 14 [12]

ܢܰܪܟܢܶܗ[13]

ܡܬܝ. 4: 1[14]

ܡܬܝ. 4: 3 ـ 11[15]

ܣܶܦܪܳܐ ܕܰܒܪܺܝܬܐ. 2: 2 [16]

ܐܶܪܡܝܐ. 9: 21 [17]

ܐ. ܩܘܪ̈ܝܢܬܝܐ. 10: 11[18]

ܡܶܬܡܰܙܪܺܝܢ[19]

ܥܒܪ̈ܝܐ. 5: 12  ܐ. ܩܘܪ̈ܝܢܬܝܐ. 3: 1 [20]

ܒ. ܬܣܠܘܢܝܩ̈ܝܐ. 3: 12 [21]

ܒܒܺܝܪ̈ܳܬܳܐ[22]

ܒܡܶܫܚܳܐ[23]

ܡܰܪܡܠܳܐ[24]