ܡܺܐܡܪܳܐ ܕܰܐܪܒܰܬܰܥܣܰܪ

ܕܶܐܬܶܐܡܰܪ ܒܕܽܘܟܪܳܢܳܗ̇ ܕܩܰܕܺܝܫܬܳܐ ܝܳܠܕܰܬ ܐܰ‎ܠܳܗܳܐ ܘܰܒܬܽܘܠܬܳܐ ܒܟܽܠܙܒܰܢ ܡܰܪܝܰܡ^[1]

1: ܦܐܺܝܬܳܐ ܡܰܢ ܐܺܝܬܶܝܗ̇ ܘܰܚܣܺܝܬܳܐ܆ ܕܰܠܟܽܠܗܽܘܢ ܩܰܕܺܝ̈ܫܶܐ ܢܩܰܪܶܒ ܬܶܫ̈ܒܚܳܬܳܐ^[2] ܕܡܶܢ ܡ̈ܶܠܶܐ. ܢ݀ܝܰܩܰܪ ܕܶܝܢ ܠܗܳܠܶܝܢ ܒܡܺܐܡܪ̈ܶܐ ܡܩܰܠܣܳܢ̈ܶܐ ܘܰܒܚܰܓ̈ܶܐ܆ ܐܰܝܟ ܕܠܰܐܝܠܶܝܢ ܕܫܰܪܺܝܪܳܐܺܝܬ^[3] ܫܰܡܶܫܘ ܠܡܳܪܳܐ ܕܺܝܠܗܽܘܢ܆ ܘܰܠܘܳܬ݂ ܡܕܰܒܪܳܢܽܘܬܳܐ ܕܦܽܘܪܩܳܢܳܐ ܕܺܝܠܰܢ ܡܗܰܝܡܢܳܐܺܝܬ ܕܰܝܶܠܘ. ܘܠܰܢܒܺܝ̈ܶܐ ܡܰܢ ܢ݀ܩܰܠܶܤ܆ ܐܰܝܟ ܕܠܰܐܝܠܶܝܢ ܕܣܳܦܩܳܐܺܝܬ ܒܝܰܕ ܡܝܰܬܪܽܘܬܳܐ ܒܰܝܬܳܝܬܳܐ ܐܶܬܚܙܺܝܘ܆ ܕܰܢܩܰܕܡܽܘܢ ܢܺܐܡܪܽܘܢ ܠܐ̱ܪܳܙܳܐ ܪܰܒܳܐ^[4] ܕܫܰܦܺܝܪܽܘܬ݂ ܕܶܚܠܬܳܐ. ܠܰܫܠܺܝ̈ܚܶܐ ܕܶܝܢ܆ ܐܰܝܟ ܕܠܰܐܝܠܶܝܢ ܕܰܠܗܳܢܳܐ ܐܰܟܪܶܙܘ. ܠܣܳܗ̈ܕܶܐ ܕܶܝܢ܆ ܐܰܝܟ ܕܠܰܐܝܠܶܝܢ ܕܠܰܢܒܺܝܰܘ̈ܳܬܳܐ ܡܰܢ ܕܗܳܢܽܘܢ܆ ܠܟܳܪܽܘܙܽܘܬܳܐ ܕܶܝܢ ܕܗܳܠܶܝܢ܆ ܒܝܰܕ ܕܡܳܐ ܕܺܝܠܗܽܘܢ ܫܰܪܰܪܘ. ܡܶܢ ܗܳܪܟܳܐ ܐܳܦ ܠܶܗ ܠܟܽܘܢܳܝܳܐ ܗܳܢܳܐ܆ ܡܶܢܶܗ ܕܰܫܪܳܪܳܐ ܢܣܰܒܘ. ܣܳܗ̈ܕܶܐ ܓܶܝܪ ܐܺܝܬ ܥܝܳܕܳܐ ܠܡܶܩܪܳܐ܆ ܠܗܳܢܽܘܢ ܕܰܠܣܽܘܥܪ̈ܳܢܶܐ ܠܳܐ ܡܶܬܚܰܘܝܳܢ̈ܶܐ ܐܰܘ ܕܰܐ̱ܚܪܳܢܝܳܐܺܝܬ ܐܰܝܟܰܢ ܕܗܽܘ ܠܳܐ ܡܶܬܗܰܝܡܢܺܝܢ܆ ܡܶܬܗܰܝܡܢܳܢܽܘܬܳܐ ܝܳܗܒܺܝܢ ܒܝܰܕ ܒܰܪ̱ܬ݂ܩܳܠܳܐ ܕܺܝܠܗܽܘܢ.

2: ܒܰܪ̱ܬ ܩܳܠܳܐ ܕܶܝܢ ܕܣܳܗ̈ܕܶܐ ܕܰܡܫܺܝܚܳܐ ܐܺܝܬܶܝܗ̇܆ ܡܶܫܬܰܦܥܳܢܽܘܬܳܐ ܕܰܕܡܳܐ ܕܺܝܠܗܽܘܢ܆ ܗܳܝ ܕܢܶܩܦܰܬ݂ ܠܡܶܫܬܰܦܥܳܢܽܘܬܳܐ ܩܰܕܡܳܝܬܳܐ ܘܰܐ‌ܠܳܗܳܝܬܳܐ܆ ܕܰܕܡܳܐ ܗܰܘ ܕܶܐܫܰܕ ܚܠܳܦܰܝܢ ܐܶܡܪܶܗ ܕܰܐ‎ܠܳܗܳܐ ܗܰܘ ܕܫܳܩܶܠ ܚܛܺܝܬܶܗ ܕܥܳܠܡܳܐ^[5]܆ ܗܰܘ ܕܰܐܣܗܶܕ ܗܽܘ ܠܢܰܦܫܶܗ ܩܕܳܡ ܗܳܠܶܝܢ ܐ̱ܚܪ̈ܳܢܶܐ. ܐܳܦ ܓܶܝܪ ‌ܐܺܝܬܰܘܗ̱ܝ ܐܳܦ ܒܗܳܕܶܐ ܠܳܐ ܣܢܺܝܩܳܐ܆ ܗܰܘ ܕܰܐܣܗܶܕ ܩܕܳܡ ܦܽܘܢܛܺܝܽܘܤ ܦܺܝܠܰܐܛܽܘܤ ܬܰܘܕܺܝܬܳܐ^[6] ܫܰܦܺܝܪܬܳܐ^[7]܆ ܐܰܝܟܰܢܳܐ ܕܰܫܠܺܝܚܳܐ ܦܰܘܠܽܘܤ ܐܳܡܰܪ. ܘܛܳܒ ܟܺܐܢܳܐܺܝܬ. ܥܰܠ ܡܰܢܽܘ ܓܶܝܪ ܐ̱ܚܪܺܢܳܐ ܣܳܗܕܳܐ ܕܝܰܬܺܝܪ ܡܗܰܝܡܰܢ ܛܳܒ ܡܶܢܶܗ. ܥܬܺܝܕ ܗ̱ܘܳܐ ܠܡܶܣܬܢܳܩܽܘ ܗܰܘ ܕܗܽܘ ܫܪܳܪܳܐ ‌ܐܺܝܬܰܘܗ̱ܝ. ܐܶܠܳܐ ܟܰܕ ܠܫܰܦܺܝܪܽܘܬ݂ ܬܰܪܥܺܝܬܳܐ ܕܨܶܒܝܳܢܳܐ ܕܥܰܒ̈ܕܶܐ^[8] ܒܰܝܬܳܝ̈ܶܐ ܕܺܝܠܶܗ ܡܩܰܒܶܠ܆ ܫܰܘܬܶܦ ܐܶܢܽܘܢ ܒܟܽܘܢܳܝܳܐ ܗܰܘ ܕܺܝܠܶܗ܆ ܘܰܕܢܶܬܩܪܽܘܢ ܣܳܗ̈ܕܶܐ ܥܒܰܕ ܐܶܢܽܘܢ.

3: ܠܝܳܠܕܰܬ݂ ܐܰ‎ܠܳܗܳܐ ܕܶܝܢ ܘܰܐܝܟ ܕܒܰܫܪܳܪܳܐ ܩܰܕܺܝܫܬܳܐ ܘܰܒܬܽܘܠܰܬ݂ ܒܟܽܠܙܒܰܢ ܡܰܪܝܰܡ܆ ܐܰܝܟܰܢܳܐ ܠܰܘ ܐܰܝܟ ܕܠܰܢܒܺܝܬܳܐ ܢܝܰܩܰܪ ܐ̱ܢܳܫ܆ ܘܰܐܝܟ ܕܠܰܫܠܺܝܚܳܐ ܘܣܳܗܕܳܐ. ܘܰܐܝܟ ܕܠܰܢܒܺܝܬܳܐ ܡܰܢ܆ ܐܰܝܟ ܢܒܺܝܽܘܬܳܐ ܕܶܐܫܰܥܝܳܐ ܗܳܝ ܕܰܥܠܶܝܗ̇ ܕܳܐܡܪܳܐ܆ ܘܩܶܪܒܶܬ ܠܘܳܬ ܢܒܺܝܬܳܐ ܘܒܶܛܢܰܬ݂ ܘܝܶܠܕܰܬ ܒܪܳܐ܆ ܘܶܐܡܰܪ ܠܺܝ ܡܳܪܝܳܐ: ܩܪܺܝ ܫܡܶܗ ܩܰܠܺܝܠܳܐܺܝܬ ܒܽܘܙ ܘܚܰܪܺܝܦܳܐܺܝܬ ܫܒܰܪ. ܡܶܛܽܠ ܕܰܩܕܳܡ ܕܢܶܕܰܥ ܛܰܠܝܳܐ ܠܡܶܩܪܳܐ ܐܰܒܳܐ ܐܰܘ ܐܶܡܳܐ܆ ܢܳܣܶܒ ܠܚܰܝܠܳܐ ܕܕܰܡܰܣܩܽܘܤ ܘܰܠܒܶܙܬܳܐ ܕܫܳܡܪܺܝܢ܆ ܩܕܳܡ ܡܰܠܟܳܐ ܕܰܐܬܽܘܪ̈ܳܝܶܐ^[9].

4: ܡܰܢ ܗܺܝ ܕܶܝܢ ܢܒܺܝܬܳܐ ܕܶܐܬܬܰܢܝܰܬ݂ ܒܰܟܬܳܒ̈ܶܐ ܐܰ‎ܠܳܗܳܝ̈ܶܐ܆ ܕܝܶܠܕܰܬ ܒܪܳܐ ܕܡܶܬܩܪܶܐ ܩܰܠܺܝܠܳܐܺܝܬ ܒܽܘܙ ܚܰܪܺܝܦܳܐܺܝܬ ܫܒܰܪ܆ ܘܥܰܡܳܗ̇ ܕܗܳܝ ܕܡܶܬܺܝܠܶܕ ܡܶܚܕܳܐ܆ ܘܰܩܕܳܡ ܕܢܶܕܰܥ ܠܡܶܩܪܳܐ ܐܰܒܳܐ ܐܰܘ ܐܶܡܳܐ܆ ܒܳܐܶܙ ܠܡܰܩܪ̈ܒܳܢܶܐ ܘܫܳܒܶܐ ܠܗܽܘܢ܆ ܐܶܠܳܐ ܐܶܢ ܝܳܠܕܰܬ ܐܰ‎ܠܳܗܳܐ ܒܬܽܘܠܬܳܐ ܕܰܠܥܰܡܰܢܽܘܐܶܝܠ ܝܶܠܕܰܬ܆ ܕܡܶܢܗܽܘܢ ܕܫܽܘܪ̈ܳܝܶܐ ܕܺܝܠܺܝܕܽܘܬܳܐ ܕܒܰܒܣܰܪ ܣܰܚܦܶܗ ܠܳܐܟܶܠܩܰܪܨܳܐ܆ ܒܝܰܕ ܗܳܝ ܕܰܢܣܰܒ ܠܚܰܝܠܳܐ ܕܕܰܡܰܣܩܽܘܤ ܘܰܫܩܰܠ ܒܶܙ̈ܬܶܐ ܕܫܳܡܪܺܝܢ.

5: ܗܳܠܶܝܢ ܕܶܝܢ ܛܽܘܦܣܳܢܳܐܺܝܬ ܒܰܙܢܳܐ ܡܶܕܶܡ ܕܰܐ̱ܚܪܳܢܝܽܘܬ ܡܶܠܬܳܐ܆ ܠܕܶܚܠܰܬ݂ ܦܬܰܟܪ̈ܶܐ ܪ̈ܳܫܡܳܢ. ܕܰܐܡܣܩܘܤ ܡܰܢ ܓܶܝܪ ܕܡܳܢܳܝܬܳܐ ܡܶܬܦܰܫܩܳܐ. ܫܳܡܪܺܝܢ ܕܺܝܢ ܐܺܝܬܶܝܗ̇܆ ܗܳܝ ܕܰܠܥܶܓ̈ܠܶܐ ܗܳܢܽܘܢ ܕܕܰܗܒܳܐ ܚܶܫܠܰܬ݂^[10]܆ ܘܰܠܘܳܬܗܽܘܢ ܐܰܥܒܪܰܬ݂ ܠܦܽܘܠܚܳܢܳܐ ܟܺܝܬ ܘܰܠܣܶܓܕܬܳܐ ܕܗܰܘ ܕܒܰܠܚܽܘܕܰܘܗ̱ܝ ܐܰ‎ܠܳܗܳܐ. ܠܟܽܠ ‌ܐ̱ܢܳܫ ܕܶܝܢ ܩܰܕܺܝܡܳܐ ܝܺܕܺܝܥܳܐ܆ ܕܰܒܗܳܠܶܝܢ ܬܪܶܝܢ ܣܽܘܥܪ̈ܳܢܶܐ ܡܶܬܝܰܕܥܳܐ ܕܶܚܠܰܬ݂ ܦܬܰܟܪ̈ܶܐ. ܒܗܳܝ ܕܠܰܥ̈ܒܺܝܕܰܝ ܒܺܐܝܕܰܝ̈ܳܐ. ܐܰ‌ܠܳܗ̈ܶܐ ܢܫܰܡܰܗ ܘܢܶܣܓܽܘܕ ܠܗܽܘܢ܆ ܘܰܒܗܳܝ ܕܕܶܒܚ̈ܶܐ ܕܰܒܝܰܕ ܕܡ̈ܶܐ ܘܰܣܘ̈ܳܬܶܐ ܢܶܕܒܽܘܚ. ܕܗܳܕܶܐ ܗܳܟܺܝܠ ܥܰܡܰܢܽܘܐܶܝܠ܆ ܥܰܡܳܗ̇ ܡܶܚܕܳܐ ܕܗܳܝ ܕܶܐܬܺܝܠܶܕ ܒܰܒܣܰܪ ܢܳܣܶܒ ܠܒܶܙ̈ܬܶܐ܆ ܟܰܕ ܠܰܡܓܽܘ̈ܫܶܐ^[11] ܡܰܢ ܢܳܓܶܕ ܗ̱ܘܳܐ ܠܣܶܓܕܬܳܐ ܒܗܽܘܢ ܒܥܰܙܪܽܘܪ̈ܶܐ ܕܩܰܘܡܬܳܐ ܫܰܒܪܳܝܬܳܐ܆ ܠܡܶܨܪܶܝܢ ܕܶܝܢ ܐܳܙܶܠ ܗ̱ܘܳܐ ܡܶܛܽܠ ܩܳܛܽܘܠܽܘܬ݂ ܛܠܳܝ̈ܶܐ ܕܗܶܪܽܘܕܺܝܤ܆ ܘܰܡܙܺܝܥ ܠܰܥ̈ܒܺܝܕܰܝ ܒܺܐܝܕܰܝ̈ܳܐ ܕܺܝܠܳܗ̇ ܐܰܝܟ ܡܳܐ ܕܳܐܦ ܐܶܫܰܥܝܳܐ ܡܶܬܢܰܒܶܐ^[12]. ܘܗܳܕܶܐ ܡܰܥܒܶܕ ܗ̱ܘܳܐ܆ ܘܰܠܗܳܠܶܝܢ ܒܶܙ̈ܬܶܐ ܢܳܣܶܒ ܗ̱ܘܳܐ ܩܕܳܡ ܡܰܠܟܳܐ ܕܳܐܬܽܘܪ̈ܳܝܶܐ. ܡܰܠܟܳܐ ܕܶܝܢ ܕܳܐܬܽܘܪ̈ܳܝܶܐ܆ ܠܳܐܟܶܠܩܰܪܨܳܐ ܩܳܪܝܳܐ ܢܒܺܝܽܘܬܳܐ. ܒܕܽܘܟ̈ܝܳܬܳܐ ܓܶܝܪ ܣܰܓܺܝ̈ܳܐܬܳܐ܆ ܘܰܟܢܺܝܫܳܐܺܝܬ ܠܡܺܐܡܰܪ܆ ܒܟܽܠ ܕܽܘܟ ܐܺܝܬ ܠܡܶܫܟܚܽܘܬܶܗ ܠܘܳܬ݂ ܢܒܺܝ̈ܶܐ܆ ܕܗܳܟܰܢܳܐ ܡܶܫܬܰܡܰܗ.

6: ܠܕܰܐܝܟ ܗܳܢܳܐ ܛܰܠܝܳܐ ܝܶܠܕܰܬ݂ ܠܰܢ ܡܰܪܝܰܡ ܢܒܺܝܬܳܐ܆ ܕܡܶܢ ܫܰܒܪܽܘܬܶܗ ܘܡܶܢܶܗ ܕܝܰܠܕܶܗ ܡܶܚܕܳܐ܆ ܥܰܩܪܶܗ ܠܚܶܣܢܳܐ ܕܰܛܪܽܘܢܽܘܬܶܗ ܕܳܐܟܶܠܩܰܪܨܳܐ. ܘܠܳܐ ܬܶܬܕܰܡܰܪ ܐܳܡܰܪ ܐܶܫܰܥܝܳܐ. ‌ܐܺܝܬܰܘܗ̱ܝ ܗ̱ܘܳܐ ܓܶܝܪ ܗܽܘ ܛܰܠܝܳܐ܆ ܐܰ‎ܠܳܗܳܐ ܚܰܝܠܬܳܢܳܐ^[13]. ܡܰܠܰܐܟܳܐ ܕܬܰܪܥܺܝܬܳܐ ܪܰܒܬܳܐ܆ ܐܰܝܟ ܡܰܢ ܕܡܰܘܕܰܥ ܗܽܘ ܒܶܗ ܘܰܡܝܰܩܶܢ ܐܰܝܟ ܡܶܠܬܳܐ ܚܰܝܳܐ܆ ܠܰܐܒܳܐ ܗܰܘ ܕܺܐܝܬܰܘܗ̱ܝ ܗܰܘܢܳܐ ܗܰܘ ܕܰܠܗܰܠ ܡܶܢ ܟܽܠ. ܡܳܠܽܘܟܳܐ ܬܡܺܝܗܳܐ܆ ܐܰܝܟ ܡܰܢ ܕܰܥܒܰܕ ܐܰܟܚܕܳܐ ܥܰܡ ܐܰܒܳܐ ܠܰܒܪܺܝܬܳܐ ܡܶܬܗܰܘܢܳܢܺܝܬܳܐ ܘܰܠܗܳܢܳܐ ܥܳܠܡܳܐ ܡܶܬܚܰܙܝܳܢܳܐ܆ ܘܫܳܡܰܥ ܗ̱ܘܳܐ ܐܰܝܟ ܒܰܪ ܡܰܠܟܳܐ ܘܰܫܘܶܐ ܒܺܐܝܩܳܪܳܐ^[14]. ܢܶ݀ܥܒܶܕ ܒܰܪܐ̱ܢܳܫܳܐ ܒܨܰܠܡܳܐ ܕܺܝܠܰܢ ܘܒܰܕܡܽܘܬܳܐ^[15]. ܫܰܠܺܝܛܳܐ܆ ܐܰܝܟ ܐܰܝܢܳܐ ܕܺܐܝܬܰܘܗ̱ܝ ܚܰܝܠܳܐ ܕܰܐܒܳܐ ܠܳܐ ܡܶܬܚܰܙܝܳܢܳܐ. ܡܫܺܝܚܳܐ ܓܶܝܪ ܚܰܝܠܳܐ ܕܰܐ‎ܠܳܗܳܐ ܘܚܶܟܡܬܳܐ ܕܰܐ‎ܠܳܗܳܐ^[16]. ܘܬܽܘܒ ܕܟܺܐܢܳܐܺܝܬ ܫܳܡܰܥ܆ ܟܽܘܪܣܝܳܐ ܕܺܝܠܳܟ ܐܰ‎ܠܳܗܳܐ ܠܥܳܠܡܳܐ ܥܳܠܡܺܝܢ܆ ܫܰܒܛܳܐ ܕܰܬܪܺܝܨܽܘܬܳܐ ܫܰܒܛܳܐ ܕܡܰܠܟܽܘܬܳܐ ܕܺܝܠܳܟ ܪܺܝܫܝܢܐ222 ܕܫܰܝܢܳܐ܆ ܐܰܝܟ ܐܰܝܢܳܐ ܕܰܐ‌ܠܘܶܬ ܐܰܪ̈ܥܳܢܳܝܶܐ ܠܘܳܬ ܫܡܰܝܳܢ̈ܶܐ܆ ܘܫܰܝܶܢ ܠܟܽܠ ܒܝܰܕ ܕܡܳܐ ܕܰܨܠܺܝܒܶܗ^[17] ܐܰܝܟܰܢܳܐ ܕܳܐܡܰܪ ܦܰܘܠܽܘܤ. ܐܰܒܳܐ ܕܥܳܠܡܳܐ ܕܰܥܬܺܝܕ܆ ܐܰܝܟ ܪܺܝܫܳܐ ܘܰܕܪܳܡܶܐ ܗ̱ܘܳܐ ܙܰܪܥܳܐ ܕܚܰܝ̈ܶܐ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ܆ ܘܰܕܣܶܒܪ̈ܶܐ ܕܰܠܥܳܠܰܡ ܘܰܕܠܳܐ ܫܽܘܠܳܡ܆ ܗܳܢܽܘܢ ܐܰܝܠܶܝܢ ܕܺܐܝܬܰܝܗܽܘܢ ܡܰܠܟܽܘܬܳܐ ܕܰܫܡܰܝܳܐ ܗܳܝ ܕܡܰܟܪܶܙ ܗ̱ܘܳܐ.

7: ܡܶܛܽܠܗܳܕܶܐ ܗܺܝ ܒܬܽܘܠܬܳܐ ܘܶܐܡܳܐ܆ ܐܰܝܟ ܐܰܝܕܳܐ ܕܰܠܕܰܐܝܟ ܗܳܢܳܐ ܛܰܠܝܳܐ ܝܶܠܕܰܬ݂܆ ܗܰܘ ܕܺܐܝܬܰܘܗ̱ܝ ܡܳܪܳܐ ܐܰܟܚܕܳܐ ܐܳܦ ܕܰܢܒܺܝ̈ܶܐ ܐܳܦ ܕܺܝܠܳܗ̇܆ ܡܶܬܢܰܒܝܳܐ ܗ̱ܘܳܬ ܡܶܢ ܒܳܬܰܪ ܫܠܳܡܳܐ ܕܶܐ‌ܠܺܝܫܒܰܥ ܟܰܕ ܐܳܡܪܳܐ: ܗܳܐ ܓܶܝܪ ܡܶܢ ܗܳܫܳܐ. ܛܽܘܒܳܐ ܢܶܬ̈ܠܳܢ ܠܺܝ ܟܽܠܗܶܝܢ ܫܰܪ̈ܒܳܬܳܐ܆ ܡܶܛܽܠ ܕܰܥܒܰܕ ܠܘܳܬܝ ܪܰܘܪ̈ܒܳܬܳܐ ܗܰܘ ܚܰܝܠܬܳܢܳܐ܆ ܘܩܰܕܺܝܫܳܐ ܫܡܳܐ ܕܺܝܠܶܗ܆ ܘܪ̈ܰܚܡܶܐ ܕܺܝܠܶܗ ܠܕܳܪܳܐ ܘܰܠܕܳܪܳܐ ܠܗܳܢܽܘܢ ܕܕܳܚܠܺܝܢ ܠܶܗ^[18].

8: ܫܠܺܝܚܳܐ ܕܶܝܢ ܐܶܢ ܐ̱ܢܳܫ ܢܺܐܡܪܺܝܗ̇܆ ܘܕܰܠܥܶܠ ܡܶܢ ܟܽܠܗܽܘܢ ܫܠܺܝ̈ܚܶܐ܆ ܟܺܐܢܳܐܺܝܬ ܢܺܐܡܰܪ. ܝܰܬܺܝܪܳܐܺܝܬ ܡܰܢ ܓܶܝܪ܆ ܕܳܐܦ ܒܗܽܘܢ ܒܰܫܠܺܝ̈ܚܶܐ ܐܰܟܚܕܳܐ ܡܰܢܝܳܐ ܗ̱ܘܳܬ݂܆ ܐܰܝܟܰܢܳܐ ܕܳܐܦ ܟܬܳܒܳܐ ܕܦܰܪ̈ܰܐܟܣܺܝܤ ܡܶܫܬܰܥܶܐ ܟܰܕ ܐܳܡܰܪ^[19]: ܕܡܶܬܟܰܢܫܺܝܢ ܗ̱ܘܰܘ ܗܳܠܶܝܢ ܘܒܰܨܠܽܘܬܳܐ ܡܶܬܐܰܡܢܺܝܢ ܗ̱ܘܰܘ܆ ܥܰܡ ܡܰܪܝܰܡ ܐܶܡܶܗ ܕܝܶܫܽܘܥ. ܒܳܬܰܪܟܶܢ ܕܶܝܢ܆ ܐܶܢܗܽܘ ܕܗܳܕܶܐ ܥܶܒܕܰܬ ܐܶܢܽܘܢ ܠܰܫܠܺܝ̈ܚܶܐ ܠܗܳܢܽܘܢ܆ ܗܳܝ ܕܰܫܡܰܥܘ ܡܶܢ ܡܳܪܰܢ: ܕܙܶܠܘ ܬܰܠܡܶܕܘ ܠܟܽܠܗܽܘܢ ܥܰܡ̱ܡ̈ܶܐ^[20]܆ ܠܰܐܝܢܳܐ ܥܰܡܳܐ ܠܳܐ ܐܰ‌ܠܦܰܬ݂ ܗܳܕܶܐ܆ ܘܠܺܝܕܰܥܬܳܐ ܕܰܐ‎ܠܳܗܳܐ ܐܰܝܬܝܰܬ݂ ܘܳܐܦ ܟܰܕ ܫܰܬܺܝܩܳܐ܆ ܒܝܰܕ ܝܰܠܕܳܐ ܗܰܘ ܛܒܺܝܒܳܐ ܘܰܫܡܺܝܥܳܐ ܘܡܶܛܽܠ ܗܳܕܶܐ ܪܰܒ ܩܳܠܳܐ܆ ܘܰܒܝܰܕ ܒܰܛܢܳܐ ܗܰܘ ܛܒܺܝܒܳܐ܆ ܘܰܐܝܟ ܐܰܝܕܳܐ ܕܺܐܝܬܶܝܗ̇ ܐܶܡܳܐ ܘܥܶܩܳܪܳܐ ܐܳܦ ܕܺܝܠܳܗ̇ ܕܟܳܪܽܘܙܽܘܬܳܐ ܐܶܘܰܢܓܶܠܳܝܬܳܐ.

9: ܣܳܗܕܳܐ ܕܶܝܢ 222ܒܦܣ̈ܩܶܐ ܣܰܓܺܝ̈ܶܐܐ܆ ܠܳܐ ܡܰܡܶܐܢ ܐ̱ܢܳܫ ܕܢܺܐܡܪܺܝܗ̇. ܘܟܰܕ ܠܡܰܟܠܳܢܽܘܬܶܗ ܕܝܰܘܣܶܦ ܣܰܝܒܪܰܬ݂ ܚܰܝܠܬܳܢܳܐܺܝܬ^[21]܆ ܟܰܕ ܡܶܢ ܙܳܢܝܽܘܬܳܐ ܡܰܣܒܰܪ ܗ̱ܘܳܐ ܕܰܗܘ̣ܳܐ ܗܽܘ ܒܰܛܢܳܐ܆ ܩܕܳܡ ܕܰܒܝܰܕ ܓܶܠܝܳܢܳܐ ܕܡܰܠܰܐܟܳܐ ܢܶܕܥܶܗ ܠܐܪܳܙܶܗ ܕܝܰܠܕܳܐ܆ ܘܳܐܦ ܟܰܕ ܡܶܛܽܠ ܫܳܢܝܽܘܬܶܗ ܕܗܶܪܽܘܕܺܝܤ ܥܳܪܩܳܐ ܗ̱ܘܳܬ ܠܡܶܨܪܶܝܢ^[22]܆ ܘܬܽܘܒ ܟܰܕ ܡܶܛܽܠ ܕܶܚܠܬܳܐ ܕܰܐܪܟܶܠܰܐܘܽܤ܆ ܦܢܳܬ݂ ܡܰܢ ܡܶܢ ܡܶܨܪܶܝܢ܆ ܫܰܢܝܰܬ ܕܶܝܢ ܠܢܳܨܪܰܬ݂܆ ܘܥܰܡ ܝܽܗܘܕܳܝ̈ܶܐ ܩܳܛܽܘܠܳܐ ܒܟܽܠܝܽܘܡ ܡܶܬܗܰܦܟܳܐ ܗ̱ܘܳܬ݂܆ ܘܚܰܝ̈ܶܐ ܕܩܰܪܺܝܒܺܝܢ ܠܡܰܘܬܳܐ ܚܳܝܳܐ ܗ̱ܘܳܬ݂.

10: ܐܰܝܟܰܢܳܐ ܗܳܟܺܝܠ ܠܰܘ ܟܺܐܢܳܐܺܝܬ ܢܝܰܩܪܺܝܗ̇ ܠܗܳܕܶܐ܆ ܠܗܳܝ ܕܰܡܝܰܩܪ̈ܳܢ ܠܳܗ̇ ܗܳܫܳܐ ܪ̈ܽܘܚܳܬܳܐ ܕܙܰܕܺܝ̈ܩܶܐ. ܪ̈ܺܝܫܰܝ ܐܰܒܳܗ̈ܳܬܳܐ ܡܰܢ܆ ܐܰܝܟ ܕܠܰܐܝܕܳܐ ܕܰܠܣܰܒܪܳܐ ܗܰܘ ܕܡܶܢ ܙܰܒܢܳܐ ܣܰܓܺܝܳܐܐ ܡܶܣܬܰܟܶܐ ܗ̱ܘܳܐ ܠܗܽܘܢ ܡܰܠܝܰܬ݂܆ ܘܰܠܒܽܘܪܟܬܳܐ ܗܳܝ ܕܙܰܪܥܶܗ ܕܰܐܒܪܳܗܳܡ ܐܰܝܬܝܰܬ ܗܳܝ ܕܺܐܝܬܶܝܗ̇ ܡܫܺܝܚܳܐ܆ ܗܳܝ ܕܰܒܟܽܠܗܽܘܢ ܥܰܡ̱ܡ̈ܶܐ ܘܰܒܟܽܠܗܽܘܢ ܣܰܘ̈ܦܶܐ ܥܶܒܪܰܬ݂. ܢܒܺܝ̈ܶܐ ܕܶܝܢ܆ ܐܰܝܟ ܕܠܰܐܝܕܳܐ ܕܠܰܢܒܺܝ̈ܰܘܳܬܳܐ ܕܺܝܠܗܽܘܢ ܢܰܗܪܰܬ݂܆ ܘܰܠܫܶܡܫܳܐ ܕܙܰܕܺܝܩܽܘܬܳܐ ܝܶܠܕܰܬ݂^[23]܆ ܗܰܘ ܕܰܓܠܳܐ ܠܟܰܣ̈ܝܳܬܳܐ ܘܰܡܛܰܫ̈ܝܳܬܳܐ ܘܠܳܐ ܝܺܕܺܝ̈ܥܳܬܳܐ. ܫܠܺܝ̈ܚܶܐ ܕܶܝܢ ܐܰܝܟ ܡܰܢ ܕܶܐܫܬܰܘܕܥܽܘܗ̇ ܪܺܝܫܳܐ ܕܟܳܪܽܘܙܽܘܬܳܐ ܕܺܝܠܗܽܘܢ. ܣܳܗ̈ܕܶܐ܆ ܐܰܝܟ ܕܠܰܐܝܕܳܐ ܕܩܰܕܡܰܬ ܐܰܝܬܝܰܬ݂ ܠܗܽܘܢ ܠܗܘܦܘܬܣܝܣ^[24] ܕܰܐܓܽܘ̈ܢܶܐ ܘܕܰܟܠܺܝ̈ܠܶܐ. ܡܰܠܦܳܢ̈ܶܐ ܕܶܝܢ ܕܥܺܕܬܳܐ܆ ܘܪ̈ܳܥܰܘܳܬܳܐ ܕܥܶܪ̈ܒܶܐ ܡܠܺܝ̈ܠܶܐ ܕܰܡܫܺܝܚܳܐ܆ ܐܰܝܟ ܕܠܰܐܝܕܳܐ ܕܣܳܟܪܳܐ ܠܦܽܘܡܳܐ ܕܗܶܪܶܣܺܝܤ܆ ܘܒܰܕܡܽܘܬ ܡܥܺܝܢܳܐ ܡܶܫܬܰܬܝܳܢܺܝܬܳܐ ܘܰܕܟܺܝܬܳܐ܆ ܡܰܒܥܳܐ ܠܰܢ ܫܶܦ̈ܥܶܐ ܕܳܐܪܬܳܘܕܳܘܟܣܺܝܰܐ܆ ܘܩܰܕܡܳܐܺܝܬ ܘܝܰܬܺܝܪܳܐܺܝܬ ܛܳܒ ܡܶܢ ܟܽܠܗܶܝܢ܆ ܛܳܪܕܳܐ ܠܚܶܫܽܘܟܳܐ ܕܡܰܢܺܝ̈ܢܳܝܶܐ.

11: ܟܰܕ ܓܶܝܪ ܐܶܬܒܰܣܰܪ ܡܶܢܳܗ̇ ܠܳܐ ܡܶܫܬܰܚܠܦܳܢܳܐܺܝܬ ܡܶܠܬܳܐ ܕܰܐ‎ܠܳܗܳܐ܆ ܚܰܘܺܝ ܕܚܰܕ ‌ܐܺܝܬܰܘܗ̱ܝ ܥܳܒܽܘܕܳܐ ܘܓܳܒܽܘܠܳܐ ܕܬܽܘܩܳܢܳܐ ܕܺܝܠܰܢ. ܐܶܢ ܓܶܝܪ ܐܰܝܟ ܡܡܰܠܠܽܘܬ݂ ܡ̈ܰܬܠܶܐ ܡܓܰܕܦܳܢ̈ܝܳܬܳܐ ܕܗܳܢܽܘܢ܆ ܐܰ‎ܠܳܗܳܐ ܡܰܢ ܗܰܘ ܛܳܒܳܐ ܕܢܰܦܫܳܐ ‌ܐܺܝܬܰܘܗ̱ܝ ܥܳܒܽܘܕܳܐ܆ ܪܺܝܫܳܢܽܘܬܳܐ ܕܶܝܢ ܗܳܝ ܒܺܝܫܬܳܐ ܘܚܶܫܽܘܟܳܐ ܗܳܝ ܠܳܐ ܝܺܠܺܝܕܳܐ^[25] ܕܦܰܓܪܳܐ܆ ܐܰܝܟܰܢܳܐ ܥܬܺܝܕ ܗ̱ܘܳܐ ܒܪܶܗ ܕܰܐܒܳܐ ܘܰܐ‌ܠܳܗܳܐ ܗܰܘ ܛܳܒܳܐ܆ ܕܒܰܕܡܽܘܬܰܢ ܐܰܝܟܰܢܳܐ ܕܰܟܬܺܝܒ ܢܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ^[26]. ܐܶܠܳܐ ܟܰܕ ܠܳܐ ܡܣܰܝܒܪܺܝܢ ܠܡܶܣܟܺܢܽܘܬܳܐ ܕܡܶܢ ܗܳܪܟܳܐ܆ ܠܘܳܬ ܣܒܺܝܪܽܘܬܳܐ ܪܳܗܛܺܝܢ ܡܶܬܓܰܘܣܺܝܢ܆ ܠܗܳܝ ܕܰܐܝܟ ܝܽܘܬܪܳܢܳܐ ܐܰܒܳܗܳܝܳܐ ܩܰܒܠܳܗ̇ ܘܝܰܪܬܳܗ̇ ܐܶܘܛܶܘܟ̥ܶܐ ܗܰܘ ܛܰܢܦܳܐ. ܐܳܡܪܺܝܢ ܓܶܝܪ܆ ܕܡܶܣܬܰܒܳܪܽܘ ܡܰܠܽܘܢ ܐܶܣܬܰܒܰܪ ܒܦܰܢܛܰܣܺܝܰܐ܆ ܘܠܰܘ ܕܒܰܫܪܳܪܳܐ ܗܘ̣ܳܐ ܒܰܪܢܳܫܳܐ ܗܽܘ ܥܰܡܰܢܽܘܐܶܝܠ. ܟܰܕ ܠܽܘܩܒܰܠ ܟܬܳܒ̈ܶܐ ܐܰ‎ܠܳܗܳܝ̈ܶܐ ܐܳܡܪܺܝܢ܆ ܘܠܽܘܩܒܠ ܟܳܬܒܳܐ ܟܳܗܢܳܝܳܐ ܕܶܐܘܰܢܓܶܠܺܝ̈ܰܐ܆ ܗܰܘ ܕܡܶܢܶܗ ܗܺܝ ܒܬܽܘܠܬܳܐ ܩܰܕܺܝܫܬܳܐ܆ ܟܰܕ ܡܶܨܥܳܝܬܳܐ ܡܶܬܚܰܘܝܳܐ ܕܐ̱ܪܳܙܳܐ ܕܡܶܬܒܰܪܢܫܳܢܽܘܬܳܐ ܐܰ‎ܠܳܗܳܝܬܳܐ܆ ܠܟܽܠܶܗ ܓܒܽܘܠܝܳܐ ܕܥܳܒܽܘܕܽܘܬ݂ ܨܒܳܪ̈ܶܐ ܕܺܝܠܗܽܘܢ ܫܳܪܝܳܐ.

12: ܠܰܘ ܓܶܝܪ ܡܶܛܽܠܗܳܕܶܐ ܢܰܣܒܳܗ̇ ܡܫܰܡܫܳܢܺܝܬܳܐ ܕܰܡܕܰܒܪܳܢܽܘܬܳܐ܆ ܐܰܝܟܰܢܳܐ ܕܝܳܗܽܘܒܬܳܐ ܕܛܶܠܳܢܺܝܬܳܐ ܘܰܕܦܰܢܛܰܣܺܝܰܐ ܬܶܗܘܶܐ܆ ܐܶܠܳܐ ܕܒܶܣܪܳܐ ܫܰܪܺܝܪܳܐ ܘܰܫܘܶܐ ܒܽܐܘܣܺܝܰܐ ܕܺܝܠܰܢ܆ ܠܗܳܢܽܘܢ ܕܰܚܦܺܝܛ ܗ̱ܘܳܐ ܕܢܰܐܣܶܐ ܘܰܢܚܰܕܶܬ. ܐܶܢ ܓܶܝܪ ܕܢܶܫܬܪܰܓܪܰܓ ܨܳܒܶܐ ܗ̱ܘܳܐ܆ ܐܰܝܟܳܐ ܣܽܘܢܩܳܢܳܐ ܥܰܠ ܡܰܪܝܰܡ ܐܺܝܬ ܗ̱ܘܳܐ. ܐܰܝܟܳܐ ܕܶܝܢ ܐܳܦ ܕܰܢܣܺܝܒܽܘܬܳܐ ܕܰܒܟܰܪܣܳܐ܆ ܐܰܘ ܕܒܰܛܢܳܐ ܕܬܶܫܥܳܐ ܝܰܪ̈ܚܺܝܢ ܐܰܘ ܕܝܰܠܕܳܐ܆ ܕܥܰܙܪܽܘܪ̈ܶܐ ܟܺܝܬ ܘܕܰܬܕܳܐ ܐܶܡܗܳܝܳܐ܆ ܘܰܕܚܰܠܒܳܐ ܘܰܕܩܰܘܡܬܳܐ ܫܰܒܪܳܝܬܳܐ ܘܰܕܬܰܪܒܺܝܬܳܐ܆ ܠܗܳܠܶܝܢ ܟܺܝܬ ܕܡܶܛܽܠܳܬܰܢ ܟܽܠܗܶܝܢ ܩܰܒܶܠ ܥܠܰܘܗ̱ܝ ܗܰܘ ܠܳܐ ܒ̣ܰܪܝܳܐ܆ ܘܶܐܫܬܰܥܒܰܕ ܨܶܒܝܳܢܳܐܺܝܬ ܠܢܳܡܽܘ̈ܣܶܐ ܕܰܟܝܳܢܳܐ ܐ̱ܢܳܫܳܝܳܐ ܗܳܢܽܘܢ ܕܗܽܘ ܩܒܰܥ܆ ܘܶܐܬܳܐ ܒܝܰܕ ܟܽܠܗܶܝܢ ܗܳܠܶܝܢ ܕܺܝܠܰܢ ܤܛܰܪ ܡܶܢ ܚܛܺܝܬܳܐ^[27]܆ ܐܰܝܟܰܢܳܐ ܕܟܰܕ ܠܚܺܐܪܽܘܬܳܐ ܗܳܝ ܕܺܝܠܶܗ ܘܒܽܘܪܟܬܳܐ ܣܳܐܶܡ ܒܟܽܠܰܢ܆ ܢܶܥܛܶܐ ܠܰܚܛܺܝܬܳܐ ܗܳܝ ܕܥܰܠ ܓܶܢܣܳܐ ܕܺܝܠܰܢ܆ ܘܰܠܥܰܒܕܽܘܬܳܐ ܟܺܝܬ ܗܳܝ ܕܡܶܢ ܗܳܕܶܐ ܘܰܠܠܰܘܛܬܳܐ.

13: ܗܳܝ ܟܺܝܬ ܕܳܐܦ ܡܽܘܫܶܐ ܓܰܠܝܳܐܺܝܬ ܐܰܘܕܥܳܗ̇܆ ܗܰܘ ܡܰܩܪܒܳܢܳܐ ܘܰܒܥܶܠܕܒܳܒܳܐ ܕܡܰܢܺܝ̈ܢܳܝܶܐ ܪ̈ܰܫܺܝܥܰܝ ܡܶܢ ܟܽܠ. ܣܰܢܝܳܐ ܓܶܝܪ ܚܙܳܐ ܕܡܶܬܓܰܘܙܰܠ ܗ̱ܘܳܐ. ܘܰܕܠܳܐ ܝܳܩܶܕ܆ ܕܩܰܕܶܡ ܗ̱ܘܳܐ ܡܛܰܦܶܤ ܠܰܚܕܳܝܽܘܬܳܐ ܠܳܐ ܡܶܬܦܰܠܓܳܢܺܝܬܳܐ ܕܰܐ‎ܠܳܗܳܐ ܡܶܠܬܳܐ ܕܰܠܘܳܬ ܓܒܺܝܠܬܳܐ ܐ̱ܢܳܫܳܝܬܳܐ܆ ܕܺܐܝܬܶܝܗ̇ ܗ̱ܘܳܬ ܡܶܣܬܰܝܒܪܳܢܺܝܬܳܐ ܡܶܛܽܠ ܪܶܚܡܰܬ݂ ܐ̱ܢܳܫܽܘܬܳܐ ܘܠܳܐ ܡܶܫܬܰܚܠܦܳܢܺܝܬܳܐ. ܗܽܘ ܕܶܝܢ ܣܰܢܝܳܐ ‌ܐܺܝܬܰܘܗ̱ܝ. ܢܶܨܒܬܳܐ ܟܽܘܒܳܢܳܝܬܳܐ. ܕܡܰܘܕܥܳܐ܆ ܕܒܰܟܝܳܢܳܐ ܗܰܘ ܟܽܘܒܳܢܳܝܳܐ ܘܕܰܬܚܶܝܬ݂ ܚܛܺܝܬܳܐ ܗ̱ܘܳܐ ܡܶܛܽܠ ܥܒܳܪ ܦܽܘܩܕܳܢܳܐ ܕܳܐܕܳܡ܆ ܐܶܫܬܰܘܬܰܦ ܤܛܰܪ ܡܶܢ ܚܛܺܝܬܳܐ܆ ܡܶܛܽܠ ܕܳܐܦ ܠܘܳܬܰܢ ܢܫܰܕܰܪ ܐܽܘܚܕܳܢܳܐ ܕܠܽܘܩܒܰܠ ܚܛܺܝܬܳܐ܆ ܟܰܕ ܐܶܫܬܰܡܰܗ ܐܳܕܳܡ ܬܪܰܝܳܢܳܐ܆ ܘܗܘ̣ܳܐ ܪܺܝܫܺܝܬܳܐ ܕܰܓܒܺܝܠܬܳܐ ܕܡܶܢ ܕܪܺܝܫ܆ ܐܰܝܟܰܢܳܐ ܕܕܰܓܒܺܝܠܬܳܐ ܗܰܘ ܩܰܕܡܳܝܳܐ.

14: ܕܳܚܩܳܐ ܕܶܝܢ ܗܺܝ ܒܬܽܘܠܬܳܐ܆ ܘܡܶܢ ܕܳܪ̈ܳܬܳܐ ܟܳܗ̈ܢܳܝܳܬܳܐ ܐܰܝܟ ܕܠܰܡܣܰܝܰܒܬܳܐ ܛܳܪܕܳܐ܆ ܐܳܦ ܠܚܰܣܺܝܪܽܘܬ݂ ܗܰܘܢܳܐ ܕܐܰܦܽܘܠܺܝܢܰܪܺܝܽܘܤ܆ ܗܰܘ ܕܰܕܠܳܐ ܗܰܘܢܳܐ ܐܳܡܰܪ ܠܶܗ ܠܦܳܪܽܘܩܰܢ ܡܫܺܝܚܳܐ. ܟܰܕ ܓܶܝܪ ܚܰܝܽܘܬܳܐ ܡܠܺܝܠܬܳܐ ܐܺܝܬܶܝܗ̇ ܗܺܝ ܒܬܽܘܠܬܳܐ܆ ܡܩܰܒܠܳܢܺܝܬܳܐ ܕܗܰܘܢܳܐ ܘܕܺܝܕܰܥܬܳܐ܆ ܗܳܕܶܐ ܓܶܝܪ ܐܰܝܬܰܘܗ̱ܝ ܒܰܪܢܳܫܳܐ܆ ܫܒܰܪܳܐ ܡܠܺܝܠܳܐ ܘܰܡܗܰܘܢܳܢܳܐ222 ܝܺܠܶܕܬܶܗ ܠܰܐܠܳܗܳܐ ܗܰܘ ܕܠܳܐ ܡܶܫܬܰܓܢܝܳܢܳܐܺܝܬ ܐܶܬܒܰܣܰܪ܆ ܐܰܝܟܰܢܳܐ ܕܦܽܘܪܩܳܢܳܐ ܡܫܰܡܠܝܳܐ ܠܰܢ ܠܰܡܠܺܝ̈ܠܶܐ ܢܫܰܟܶܢ. ܒܰܫܪܳܪܳܐ ܓܶܝܪ܆ ܩܛܺܝܓܪܳܢܽܘܬܳܐ ܕܠܳܐ ܡܠܺܝܠܽܘܬܳܐ ܡܰܝܬܝܳܐ ܗ̱ܘܳܬ ܗܳܕܶܐ ܐܳܦ ܠܶܗ ܠܰܐܠܳܗܳܐ ܡܶܠܬܳܐ܆ ܐܶ‎ܠܽܘ ܠܨܰܠܡܳܐ ܕܺܝܠܶܗ ܗܳܢܰܘ ܕܶܝܢ ܠܰܡܠܺܝܠܽܘܬܳܐ ܕܺܝܠܰܢ ܐܰܪܦܝܶܗ ܠܳܐ ܡܶܬܰܐܣܝܳܢܳܐ܆ ܟܰܕ ܢܰܟܪܝܶܗ ܡܶܢ ܚܕܳܝܽܘܬܳܐ ܐܰ‎ܠܳܗܳܝܬܳܐ܆ ܠܒܶܣܪܳܐ ܕܶܝܢ ܕܠܳܐ ܡܶܠܬܳܐ ܢܣܰܒ܆ ܘܰܠܗܳܢܳܐ ܠܚܽܘܕܰܘܗ̱ܝ ܐܰܫܘܺܝ ܠܦܽܘܪܩܳܢܳܐ.

15: ܐܶܠܳܐ ܐܳܦܠܳܐ ܠܫܳܢܝܽܘܬܶܗ ܕܢܶܣܛܽܘܪܺܝܽܘܤ ܡܶܬܪܰܡܝܳܐ ܗܺܝ ܒܬܽܘܠܬܳܐ ܝܳܠܕܰܬ ܐܰ‎ܠܳܗܳܐ ܠܰܡܣܰܝܒܳܪܽܘ. ܐܰܝܟܰܢܳܐ ܓܶܝܪ ܠܰܘ ܝܳܠܕܰܬ݂ ܐܰ‎ܠܳܗܳܐ ܗ̱ܝ܆ ܗܳܝ ܕܛܰܠܝܳܐ ܝܳܠܕܰܬ ܠܰܐܠܳܗܳܐ ܚܰܝܠܬܳܢܳܐ܆ ܠܡܰܠܳܐܟܳܐ ܕܬܰܪܥܺܝܬܳܐ ܪܰܒܬܳܐ܆ ܠܡܳܠܽܘܟܳܐ ܬܡܺܝܗܳܐ܆ ܠܫܰܠܺܝܛܳܐ܆ ܠܪܺܝܫܳܢܳܐ ܕܫܰܝܢܳܐ܆ ܠܰܐܒܳܐ ܕܥܳܠܡܳܐ ܕܰܥܬܺܝܕ. ܐܶܠܳܐ ܠܰܘ ܕܺܝܠܳܝܬܳܐ ܗ̱ܝ ܕܰܐܢ̱ܬܬܳܐ ܐܳܡܰܪ: ܗܳܝ ܕܬܺܐܠܰܕ ܠܰܐܠܳܗܳܐ. ܐܶܢ ܡܰܢ ܕܠܳܐ ܓܽܘܫܡܳܐ ܐܳܡܰܪ ܐܰܢ̱ܬ܆ ܐܳܡܰܪ ܐ̱ܢܳܐ ܥܰܡܳܟ ܐܳܦ ܐܶܢܳܐ. ܐܶܢ ܕܶܝܢ ܕܰܡܒܰܣܰܪ܆ ܠܳܐ ܬܶܬܦܰܠܰܓ ܥܰܠ ܬܶܕܡܽܘܪܬܳܐ. ܐܳܦ ܓܶܝܪ܆ ܐܳܦܠܳܐ ܠܳܗ̇ ܠܢܰܦܫܳܐ ܕܠܳܐ ܓܫܽܘܡ ܥܰܪܛܶܠܳܝܬܳܐ ܘܡܶܢܳܗ̇ ܘܠܳܗ̇܆ ܡܟܳܢܳܐ ܐܰܢ̱ܬܬܳܐ ܠܡܺܐܠܰܕ. ܟܰܕ ܡܶܬܥܰܪܙܠܳܐ ܕܶܝܢ. ܘܚܰܕ ܡܶܕܶܡ ܗܳܘܝܳܐ ܥܰܡ ܦܰܓܪܳܐ. ܒܡܶܠܬܳܐ ܕܰܫܘܺܝܚܽܘܬܳܐ ܕܰܐܟܚܕܳܐ܆ ܝܳܠܕܳܐ ܠܳܗ̇ ܐܰܟܚܕܳܐ ܥܰܡܶܗ ܕܦܰܓܪܳܐ. ܘܡܶܟܺܝܠ ܙܳܕܩܳܐܺܝܬ ܘܫܰܪܺܝܪܳܐܺܝܬ܆ ܠܰܘ ܕܒܶܣܪܳܐ ܒܰܠܚܽܘܕܰܘܗ̱ܝ܆ ܐܶܠܳܐ ܕܒܰܪܢܳܫܳܐ ܡܠܺܝܠܳܐ ܡܶܬܰܐܡܪܳܐ ܐܶܡܳܐ. ܗܺܝ ܟܰܕ ܗܺܝ ܗܳܕܶܐ ܐܶܬܚܰܫܰܒ܆ ܐܳܦ ܥܰܠ ܝܺܠܺܝܕܽܘܬܳܐ ܕܒܰܒܣܰܪ ܥܰܡܰܢܽܘܐܶܝܠ. ܗܳܟܰܢܳܐ ܓܶܝܪ ܡܰܐܪܶܙ^[28] ܠܰܢ ܟܬܳܒܳܐ ܟܳܗܢܳܝܳܐ ܟܰܕ ܐܳܡܰܪ: ܡܶܛܽܠ ܗܳܟܺܝܠ ܕܰܛܠܳܝ̈ܶܐ ܐܶܫܬܰܘܬܰܦܘ ܒܰܕܡܳܐ ܘܰܒܒܶܣܪܳܐ܆ ܐܳܦ ܗܽܘ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦ ܒܗܶܝܢ ܟܰܕ ܒܗܶܝܢ^[29].

16: ܠܰܘ ܓܶܝܪ ܫܽܘܪܳܝܳܐ ܕܰܐ‎ܠܳܗܽܘܬܶܗ܆ ܩܢܳܐ ܡܶܢ ܡܰܪܝܰܡ ܐܰ‎ܠܳܗܳܐ ܡܶܠܬܳܐ. ‌ܐܺܝܬܰܘܗ̱ܝ ܗ̱ܘܳܐ ܓܶܝܪ ܕܠܳܐ ܫܽܘܪܳܝ܆ ܘܥܳܒܽܘܕܳܐ ܕܟܽܠ ܥܳܠܡܳܐ ܘܙܰܒܢܳܐ. ܟܰܕ ܕܶܝܢ ܕܢܶܬܒܰܣܰܪ ܘܢܶܬܒܰܪܢܰܫ ܓܒܳܐ ܠܶܗ܆ ܗܳܢܰܘ ܕܶܝܢ ܕܰܢܚܰܝܶܕ ܠܶܗ ܩܢܽܘܡܳܐܺܝܬ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܕܰܡܢܰܦܰܫ ܒܢܰܦܫܳܐ ܡܠܺܝܠܬܳܐ ܘܡܶܬܗܰܘܢܳܢܺܝܬܳܐ܆ ܗܳܠܶܝܢ ܐܰܟܚܕܳܐ ܐܰܥܠܰܬ݂ ܗܺܝ ܒܬܽܘܠܬܳܐ ܡܶܢ ܓܒܺܝܠܬܳܐ ܕܺܝܠܳܗ̇܆ ܟܽܠܗܶܝܢ ܗܳܠܶܝܢ ܕܺܐܝܬܰܝܗܶܝܢ ܗ̱ܘܰܝ̈ ܕܰܐܢ̱ܬܬܳܐ ܠܡܰܥܳܠܽܘ ܐܰܟܚܕܳܐ^[30] ܥܰܡܶܗ ܕܰܟܝܳܢܳܐ. ܪܽܘܚܳܐ ܕܶܝܢ ܩܰܕܺܝܫܳܐ ܟܰܕ ܚܽܘܠܛܳܢܳܐ ܕܓܰܒܪܳܐ ܠܰܝܬ ܗ̱ܘܳܐ܆ ܥܳܒܽܘܕܳܐܺܝܬ ܡܰܥܒܶܕ ܗ̱ܘܳܐ܆ ܘܰܡܫܰܡܠܶܐ ܗ̱ܘܳܐ ܠܶܗ ܠܝܰܠܕܳܐ܆ ܗܳܟܰܢܳܐ ܗܽܘ ܡܶܠܬܳܐ ܐܰ‎ܠܳܗܳܐ. ܟܰܕ ܒܰܒܣܰܪ ܐܶܬܒܛܶܢ ܘܶܐܬܺܝܠܶܕ܆ ܝܳܠܕܰܬ ܐܰ‎ܠܳܗܳܐ ܚܰܘܝܳܗ̇ ܠܡܰܪܝܰܡ܆ ܐܰܝܟ ܡܰܢ ܕܰܠܡܶܠܬܳܐ ܡܓܰܫܡܳܐ ܝܶܠܕܰܬ݂܆ ܘܡܶܢ ܗܳܝ ܕܰܡܝܰܬܪܳܐ ܘܰܬܡܺܝܗܳܐ ܡܶܫܬܰܡܗܳܐ. ܠܘܳܬ ܗܳܕܶܐ ܓܶܝܪ ܚܳܐܰܪ ܗ̱ܘܳܐ ܗܽܘ ܐ̱ܪܳܙܳܐ܆ ܠܘܳܬ ܐܽܘܚܕܳܢܳܐ ܕܗܳܝ ܕܰܡܝܰܬܪܳܐ܆ ܘܰܠܘܳܬ݂ ܡܶܬܥܰܠܝܳܢܽܘܬܳܐ ܕܡܶܢ ܗܳܪܟܳܐ ܕܓܶܢܣܳܐ ܕܺܝܠܰܢ܆ ܘܫܽܘܚܠܳܦܳܐ ܕܰܠܘܳܬ݂ ܗܳܝ ܕܰܡܝܰܬܪܳܐ.

17: ܡܶܢ ܗܳܪܟܳܐ ܐܳܦ ܥܰܡܰܢܽܘܐܶܝܠ‌ܐܶܬܟܰܢܺܝ ܗܰܘ ܕܶܐܬܺܝܠܶܕ܆ ܟܰܕ ܚܰܕ^[31] ‌ܐܺܝܬܰܘܗ̱ܝ ܠܳܐ ܡܶܬܦܰܠܓܳܢܳܐܺܝܬ ܘܠܳܐ ܒܠܺܝܠܳܐܺܝܬ ܡܶܢ ܬܪܶܝܢ ܟܝܳܢ̈ܶܐ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ. ܗܰܘ ܕܟܰܕ ܠܟܽܠܗܶܝܢ ܐܺܝܬ ܠܶܗ ܝܺܚܺܝ̈ܕܳܝܳܬܳܐ^[32] ܘܠܳܐ ܡܶܬܦܰܠܓܳܢ̈ܝܳܬܳܐ܆ ܝܺܠܺܝܕܽܘܬܳܐ ܕܠܳܐ ܓܫܽܘܡ ܕܡܶܢ ܐܰܒܳܐ܆ ܘܗܳܝ ܕܗܺܝ ܟܰܕ ܗܺܝ^[33] ܕܰܐ‎ܠܳܗܽܘܬܳܐ܆ ܒܰܠܚܽܘܕܰܘܗ̱ܝ ܓܶܝܪ ܡܶܢ ܠܚܽܘܕܳܝܳܐ ܐܶܬܺܝܠܶܕ܆ ܘܰܐ‌ܠܳܗܳܐ ܡܶܢ ܐܰ‎ܠܳܗܳܐ܆ ܠܝܰܠܕܳܐ ܕܡܶܢ ܒܬܽܘܠܬܳܐ܆ ܒܰܠܚܽܘܕܰܘܗ̱ܝ ܓܶܝܪ ܡܶܢ ܠܳܐ ܡܙܰܘܰܓܬܳܐ ܘܰܠܚܽܘܕܳܝܬܳܐ ܟܰܕ ܒܰܒܣܰܪ ܐܶܬܺܝܠܶܕ܆ ܠܰܒܬܽܘܠܽܘܬܳܐ ܕܶܐܡܶܗ ܠܳܐ ܫܪܳܐ܆ ܐܰܝܟܰܢܳܐ ܗܽܘ ܥܬܺܝܕ ܗ̱ܘܳܐ܆ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ܆ ܠܡܶܬܦܰܠܳܓܽܘ ܘܰܠܡܶܫܬܪܳܝܽܘ ܠܰܬܪܳܝܳܢܽܘܬܳܐ ܕܰܟܝܳܢ̈ܶܐ܆ ܐܰܝܟܰܢܳܐ ܕܣܽܘܢܶܗܕܽܘܤ ܗܳܝ ܕܰܒܟܰܠܩܺܝܕܽܘܢܺܐ ܐܰ‌ܠܦܰܬ܆ ܟܰܕ ܢܰܩܦܶܬ݂ ܠܫܳܛܽܘܪ̈ܘܳܬܶܗ ܕܢܶܣܛܽܘܪܺܝܽܘܤ. ܐܶܠܳܐ ‌ܐܺܝܬܰܘܗ̱ܝ ܚܰܕ ܒܝܰܕ ܟܽܠܗܶܝܢ ܘܰܠܚܽܘܕܳܝܳܐ܆ ܡܶܛܽܠܗܳܕܶܐ܆ ܐܳܦ ܠܰܢ ܕܰܦܪܺܝܫܺܝܢ ܗ̱ܘܰܝܢ ܡܶܢ ܐܰ‎ܠܳܗܳܐ܆ ܩܪܳܐ ܠܰܚܕܳܝܽܘܬܳܐ ܘܰܠܫܰܝܢܳܐ܆ ܟܰܕ ܗܘ̣ܳܐ ܡܶܨܥܳܝܳܐ ܕܰܐ‎ܠܳܗܳܐ ܘܕܰܒܢܰܝ̈ܢܳܫܳܐ^[34].

18: ܡܶܛܽܠܳܬܳܗ̇ ܕܗܳܕܶܐ ܐܳܦ ܠܳܗ̇ ܠܩܰܕܺܝܫܬܳܐ ܝܳܠܕܰܬ ܐܰ‎ܠܳܗܳܐ ܘܰܒܬܽܘܠܰܬ ܒܟܽܠܙܒܰܢ ܡܰܪܝܰܡ܆ ܒܺܐܝܩܳܪ̈ܶܐ ܕܝܰܬܺܝܪ ܪܰܘܪ̈ܒܺܝܢ ܡܝܰܩܪܺܝܢ ܚ̱ܢܰܢ܆ ܐܰܝܟ ܕܠܰܐܝܕܳܐ ܕܺܐܝܬܶܝܗ̇ ܕܣܳܦܩܳܐ ܝܰܬܺܝܪ ܡܶܢ ܟܽܠܗܽܘܢ ܩܰܕܺܝ̈ܫܶܐ ܗܳܢܽܘܢ ܐ̱ܚܪ̈ܳܢܶܐ܆ ܕܰܠܬܰܟܫ̈ܦܳܬܳܐ ܕܰܚܠܳܦܰܝܢ ܬܰܣܶܩ. ܗܳܝ ܕܳܐܦ ܡܶܫܬܰܒܗܪܺܝܢܰܢ ܒܳܗ̇. ܟܰܕ ܩܢ̣ܰܝܢܰܢ ܠܳܗ̇ ܨܶܒܬܳܐ ܕܓܶܢܣܳܐ ܕܺܝܠܰܢ܆ ܐܰܪܥܳܐ ܡܠܺܝܠܬܳܐ܆ ܗܳܝ ܕܡܶܢܳܗ̇ ܓܒܰܠ ܗܽܘ ܠܶܗ ܒܰܒܣܰܪ ܐܳܕܳܡ ܗܰܘ ܬܪܰܝܳܢܳܐ܆ ܗܰܘ ܠܳܐ ܓܒܺܝܠܳܐ ܘܠܳܐ ܥܒܺܝܕܳܐ. ܢܶܨܒܬܳܐ ܕܰܒܬܽܘܠܬܳܐ܆ ܗܳܝ ܕܡܶܢܳܗ̇ ܡܫܺܝܚܳܐ ܗܰܘ ܣܶܒܠܬܳܐ ܫܡܰܝܳܢܺܝܬܳܐ ܐܶܬܬܰܩܰܢ ܒܰܒܣܰܪ ܒܝܰܕ ܪܽܘܚܳܐ܆ ܐܰܝܟܰܢܳܐ ܕܰܚܢܰܢ ܟܰܕ ܥܠܶܝܗ̇ ܠܥܶܩܒܳܐ ܡܫܰܪܪܺܝܢܰܢ. ܢܶܬܡܨܶܐ ܠܡܶܣܰܩ ܠܘܳܬ ܫܡܰܝܳܐ. ܛܽܘܪܳܐ ܕܣܺܝܢܰܝ ܡܶܬܗܰܘܢܳܢܳܐ܆ ܗܰܘ ܕܠܳܐ ܡܶܬܬܰܢܰܢ܆ ܐܶܠܳܐ ܒܫܶܡܫܳܐ ܕܙܰܕܺܝܩܽܘܬܳܐ ܡܶܬܬܰܨܡܰܚ܆ ܘܠܰܘ ܒܰܠܚܽܘܕ ܢܳܡܽܘܣܳܐ ܕܥܶܣܪܳܐ ܦܽܘܩ̈ܕܳܢܶܐ ܡܫܰܟܶܢ܆ ܐܶܠܳܐ ܠܶܗ ܠܣܳܐܶܡ ܢܳܡܽܘܣܳܐ ܟܰܕ ܥܰܠ ‌ܐܰܪܥܳܐ ܡܶܬܚܙܶܐ ܘܥܰܡܰܢ ܒܢܰܝ̈ܢܳܫܳܐ ܡܶܬܗܰܦܰܟ܆ ܘܠܰܘ ܠܚܰܕ ܥܰܡܳܐ ܘܠܳܐ ܠܺܐܝܣܪܳܐܶܝܠ܆ ܐܶܠܳܐ ܠܟܽܠ ܥܰܡܳܐ ܘܓܶܢܣܳܐ ܪܳܕܶܐ ܒܶܐܘܰܢܓܶܠܺܝܽܘܢ. ܘܒܰܡܦܺܝܣܳܢܽܘܬܳܐ ܨܳܐܶܕ.

19: ܐܰܝܢܳܐ ܗܳܟܺܝܠ ‌ܐܺܝܩܳܪܳܐ ܢܶ݀ܦܪܽܘܥ ܚܢܰܢ ܠܝܳܠܕܰܬ ܐܰ‎ܠܳܗܳܐ܆ ܡܰܠܽܘܢ ܕܶܝܢ ܠܰܐܠܳܗܳܐ ܗܰܘ ܕܡܶܢܳܗ̇ ܐܶܬܒܰܣܰܪ. ܠܦܽܘܪܩܳܢܳܐ ܗܰܘ ܕܺܝܠܰܢ ܗܰܘ ܕܺܝܠܰܢ ܕܢܰܦܫܰܢ ܗܳܢܳܐ ܓܶܝܪ ܐܺܝܬܰܘܗ̱ܝ ܠܶܗ ܠܺܐܝܩܳܪܳܐ ܘܕܶܒܚܳܐ ܘܝܰܩܕܳܐ ܫܰܠܡܳܐ. ܐܰܝܟܰܢܳܐ ܓܶܝܪ ܠܳܐ ܫܰܦܺܝܪܳܐ܆ ܕܰܒܝܰܕ ܡܶܐܬܺܝܬܶܗ ܡܰܢ ܒܶܣܪܳܢܳܝܬܳܐ ܐܰܪܥܳܐ ܫܡܰܝܳܐ ܗ̱ܘܳܬ̥ ܐܰܝܟܰܢܳܐ ܕܳܐܦ ܡܰܠܰܐܟ̈ܶܐ ܢܕܰܝܪܽܘܢ ܥܠܶܝܗ̇ ܐܰܝܟ ܡܳܐ ܕܳܐܦ ܗܽܘ ܒܶܐܘܰܢܓܶܠܺܝܽܘܢ ܐܶܡܰܪ: ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܡܶܢ ܗܳܫܳܐ ܬܶܚܙܽܘܢ ܠܰܫܡܰܝܳܐ ܕܰܦܬܺܝܚܺܝܢ܆ ܘܰܠܡܰܠܰܐܟ̈ܶܐ ܕܰܐ‎ܠܳܗܳܐ ܟܰܕ ܣܳܠܩܺܝܢ ܘܢܳܚܬܺܝܢ^[35].

20: ܚܢܰܢ ܕܶܝܢ ܗܳܢܽܘܢ ܕܚܰܝܳܒܺܝܢ ܗ̱ܘܰܝܢ ܕܕܽܘܒܳܪܳܐ ܕܫܳܘܶܐ ܠܰܫܡܰܝܳܐ ܢܚܰܘܶܐ܆ ܐܳܦܠܳܐ ܗܳܠܶܝܢ ܕܫܳܘ̈ܝܳܢ ܠܰܐܪܥܳܐ ܣܳܥܪܺܝܢܰܢ܆ ܐܶܠܳܐ ܠܳܗ̇ ܠܰܫܝܽܘܠ ܘܰܠܓܽܘܡܳܨܳܐ ܕܰܐܒܕܳܢܳܐ ܘܟܰܕ ܙܳܕܶܩ ܗ̱ܘܳܐ ܠܰܢ ܕܰܒܬܽܘܠܽܘܬܳܐ ܢܶ݀ܬܥܰܢܘܶܐ ܘܢܶ݀ܛܰܪ܆ ܡܶܛܽܠ ‌ܐܰ‎ܠܳܗܳܐ ܗܰܘ ܕܡܶܢ ܒܬܽܘܠܬܳܐ ܐܶܬܺܝܠܶܕ܆ ܐܳܦܠܳܐ ܒܙܽܘܘܳܓܳܐ ܢܰܟܦܳܐ ܡܦܰܓܕܺܝܢܰܢ ܠܰܪ̈ܓܺܝܓܳܬܳܐ܆ ܗܳܠܶܝܢ ܕܰܐܩܗܺܝ ܘܕܰܠܺܝ̈ܠܳܬ ܠܡܶܙܕܰܟܝܳܢܽܘܬܳܐ ܥܒܰܕ ܐܶܢܶܝܢ ܨܠܺܝܒܶܗ ܕܰܡܫܺܝܚܳܐ܆ ܟܰܕ ܐܰܩܗܝܳܗ̇ ܠܰܚܛܺܝܬܳܐ܆ ܗܳܝ ܕܺܐܝܬܶܝܗ̇ ܥܽܘܩܣܳܐ ܕܡܰܘܬܳܐ^[36]. ܐܶܠܳܐ ܒܙܳܢܝܽܘܬܳܐ ܠܗܰܝܟܠܳܐ ܕܰܐ‎ܠܳܗܳܐ ܡܨܰܥܪܺܝܢܰܢ^[37]܆ ܘܪ̈ܰܟܫܳܐ ܦܩܺܝܪ̈ܰܝ ܥܰܠ ܢܶܩ̈ܒܳܬܳܐ ܗܳܘܶܝܢ ܚ̱ܢܰܢ܆ ܐܰܝܟܰܢܳܐ ܕܳܐܡܰܪ ܢܒܺܝܳܐ^[38].

21: ܐܶܠܳܐ ܒܳܥܶܐ ܐ̱ܢܳܐ ܡܶܢܟܽܘܢ ܘܡܶܬܟܰܫܰܦ ܐ̱ܢܳܐ܆ ܠܳܐ ܒܗܰܢܺܝܽܐܘܬܳܐ ܙܥܽܘܪܬܳܐ܆ ܘܕܶܡܚܕܳܐ ܥܰܡܳܗ̇ ܕܡܶܫܬܰܡܠܝܳܐ ܥܳܒܪܳܐ ܘܰܡܥܺܝܩܳܐ^[39] ܠܫܰܠܗܶܒܺܝܬܳܐ ܗܳܝ ܕܠܳܐ ܕܳܥܟܳܐ ܘܰܠܬܰܫܢܺܝܩܳܐ ܕܠܳܐ ܫܽܘܠܳܡ ܢܚܰܠܶܦ. ܐܶܠܳܐ ܢܶܩܢܶܐ ܟܽܠ ܚܰܕ ܡܶܢܰܢ ܠܡܳܐܢܳܐ ܕܺܝܠܶܗ ܒܩܰܕܺܝܫܽܘܬܳܐ ܘܒܺܐܝܩܳܪܳܐ^[40]܆ ܐܰܝܟܰܢܳܐ ܕܦܰܘܠܽܘܤ ܗܰܘ ܚܰܟܺܝܡ ܒܟܽܠ ‌ܐܳܡܰܪ: ܐܰܝܟܰܢܳܐ ܕܰܠܛܳܒ̈ܳܬܳܐ ܗܳܠܶܝܢ ܕܰܠܥܳܠܰܡ ܢܶܫܬܘܶܐ. ܒܛܰܝܒܽܘܬܳܐ ܘܰܒܪܶܚܡܰܬ݂ ܐ̱ܢܳܫܽܘܬܳܐ ܕܰܐ‎ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܩܰܕܺܝܫܳܐ܆ ܠܥܳܠܰܡ ܥܳܠܡܺܝܢ. ܐܰܡܺܝܢ.

ܫܠܶܡ ܡܺܐܡܪܳܐ ܕܰܐܪܒܥܣܪ ܕܥܠ ܝܳܠܕܰܬ ܐܰ‌ܠܳܗܳܐ.

[1]ܡܺܐܡܪܳܐ ܕܰܐܪ̈ܒܰܬܰܥܣܰܪ ܕܐܦܝܬܪ̈ܘܢܝܘ ܕܥܰܠ ܩܰܕܺܝܫܬܳܐ ܝܳܠܕܰܬ ܐܰ‌ܠܳܗܳܐ ܡܰܪܝܰܡ ܕܩܰܕܺܝܫܳܐ ܣܶܐܘܺܝܪܶܐ ܪܺܝܫ ܐܶܦܶܝܣ̈ܩܘܦܶܐ ܕܐܢܛܝܘܟܝܐ ܘܦܛܪܝܪܟܝܣ.

. ܡܺܐܡܪܳܐ ܕܣܺܝܡ ܠܩܰܕܺܝܫܳܐ ܡܳܪܝ ܣܶܐܘܝܪܶܐ ܦܛܪܝܪܟܐ ܥܠ ܩܰܕܺܝܫܬܳܐ ܝܳܠܕܰܬ ܐܰ‌ܠܳܗܳܐ ܘܰܒܬܽܘܠܰܬ ܒܟܽܠܙܒܰܢ.

ܩܽܘܠܳܣܳܐ[2]

ܚܰܬܺܝܬܳܐܝܬ[3]

ܐ. ܛܝܡܬܐܘܣ. 3: 16 [4]

ܝܘܚܢܢ. 1: 29 [5]

 ܣܳܗܕܽܘܬܳܐ[6]

ܐ. ܛܝܡܬܐܘܣ. 6: 13 [7]

ܥ̈ܒܳܕܶܐ[8]

ܐܫܥܝܐ. 8: 3 ـ 4 [9]

ܐ. ܡܠ̈ܟܶܐ. 12: 26 ـ 28 [10]

ܡܬܝ. 2: 11 [11]

ܐܫܥܝܐ. 19: 1 [12]

ܐܫܥܝܐ. 9: 6 [13]

ܫܘܶܐ ܒܬܰܪܥܺܝܬܳܐ[14]

ܣܦܪܐ ܕܒܪܝܬܐ. 1: 26 [15]

ܐ. ܩܘܪ̈ܝܢܬܝܐ. 1: 24 [16]

ܩܘܠ̈ܣܝܐ. 1: 20  ܐܦܣ̈ܝܐ. 1: 10 [17]

ܠܘܩܐ. 1: 48 ـ 50 [18]

ܦܪܟܣܝܣ. 1: 14 [19]

ܡܬܝ. 28: 19 [20]

ܡܬܝ. 1: 19 [21]

ܡܬܝ. 2: 13 ܐܦ. ܡܢ 21 ـ 23 [22]

ܡܰܠܰܐܟܺܝ. 4: 2 [23]

ܗܳܢܰܘ ܥܶܠܬܳܐ[24]

ܠܐ ܒ̣ܰܪܝܳܐ[25]

ܥܒܪ̈ܝܐ. 2: 14[26]

ܥܒܪ̈ܝܐ. 4: 15 [27]

ܗܳܕܶܐ[28]

ܥܒܪ̈ܝܐ. 2: 14 [29]

ܕܰܐܢ̱ܬܬܳܐ[30]

 ܦܶܢܩܺܝܬܳܐ ܕܡܺܐܡܪ̈ܶܐ ܡܥܰܕܥ̈ܕܳܢܶܐ[31]

 ܠܚܽܘܕܳܝܽܘܬ ܙܢܳܐ[32]

 ܗܺܝܟܰܕܗܝܘܬܐ[33]

ܐ. ܛܝܡܬܐܘܣ. 2: 5[34]

ܝܘܚܢܢ. 1: 51[35]

ܐ. ܩܘܪ̈ܝܢܬܝܐ. 15: 56[36]

ܐ. ܩܘܪ̈ܝܢܬܝܐ. 6: 19 [37]

ܐܶܪܰܡܝܳܐ. 5: 8[38]

ܘܰܡܕܰܘܝܳܐ[39]

ܐ. ܬܣܠ̈ܘܢܝܩܝܐ. 4: 4[40]