ܡܺܐܡܪܳܐ ܕܰܬܠܳܬܰܥܣܰܪ
ܥܰܠ ܫܦܺܝܥܽܘܬ݂ ܡܰܘܗܰܒܬܶܗ ܕܡܰܠܟܳܐ ܫܰܦܺܝܪ ܕܶܚܠܬܳܐ܆ ܗܳܝ ܕܰܒܝ̈ܰܕܶܝܗ̇ ܫܒܰܩ ܫܰܪ̈ܟܳܢܶܐ ܡܶܕܶܡ ܡܶܕܶܡ ܕܦܰܐܺܝܫܺܝܢ ܗ̱ܘܰܘ ܡܶܢ ܡܰܕ̈ܰܐܬܶܐ ܘܫܶܩ̈ܠܶܐ ܕܕܺܝܡܽܘܣܝܽܘܢ.
1: ܕܣܰܓܺܝܳܐܐ ܘܰܥܣܶܩ ܠܬܶܐܽܘܪܺܝܰܐ ܐܺܝܬܰܘܗ̱ܝ ܥܽܘܡܩܳܐ ܕܰܡܕܰܒܪܳܢܽܘܬܳܐ܆ ܗܳܝ ܕܰܠܘܳܬ݂ ܓܶܢܣܳܐ ܕܺܝܠܰܢ ܚܰܘܺܝ ܡܶܠܬܶܗ ܕܰܐܠܳܗܳܐ ܘܦܳܪܽܘܩܳܐ ܝܶܫܽܘܥ ܡܫܺܝܚܳܐ܆ ܒܝܰܕ ܡܶܐܬܺܝܬܳܐ ܕܺܝܠܶܗ ܕܒܰܒܣܰܪ܆ ܘܰܕܗܳܢܳܐ ܟܽܠܑܶܗ ܡܶܬܺܝܕܰܥ ܠܰܢ܆ ܟܡܳܐ ܕܰܢܫܰܒܚܺܝܘܗ̱ܝ ܒܰܠܚܽܘܕ ܐܰܝܟ ܕܠܰܡܥܰܕܪܳܢܳܐ܆ ܘܰܐܝܟ ܕܰܠܓܳܒܽܘܠܳܐ ܢܶܫܬܰܘܕܥܺܝܘܗ̱ܝ܆ ܘܢܶܣܓܽܘܕ ܠܶܗ ܡܶܟܺܝܠ. ܐܰܝܟ ܡܰܢ ܕܡܶܢ ܒܳܬܰܪ ܓܒܺܝܠܬܰܢ ܠܘܳܬ݂ ܗܳܝ ܕܰܡܝܰܬܪܳܐ ܡܶܢ ܕܪܺܝܫ ܓܰܒܠܰܢ܆ ܘܰܠܬܰܚܬ ܢܚܽܘܪ ܒܥܰܝܢ̈ܶܐ ܕܬܰܪܥܺܝܬܰܢ܆ ܘܰܢܫܰܒܚܺܝܘܗ̱ܝ ܒܫܶܬܩܳܐ܆ ܠܗܰܘ ܕܰܠܗܰܠ ܡܶܢ ܟܽܠ ܡܰܚܫܰܒܬܳܐ ܘܩܳܠܳܐ.
2: ܕܡܰܢܽܘ ܓܶܝܪ ܕܠܳܐ ܢܶܬܡܰܗ܆ ܟܰܕ ܠܡܰܠܟܳܐ ܕܚܰܝ̈ܠܰܘܳܬܳܐ ܥܶܠܳܝ̈ܶܐ ܚܳܙܶܐ܆ ܕܰܠܡܰܠ̈ܟܶܐ ܗܳܢܽܘܢ ܕܥܰܠ ܐܰܪܥܳܐ ܝܳܗܶܒ ܫܶܩ̈ܠܶܐ܆ ܘܰܐܝܟ ܡܫܰܥܒܰܕ ܠܫܶܩ̈ܠܶܐ ܘܕܰܬܚܶܝܬ ܡܰܕܰܐܬܳܐ܆ ܥܰܡ ܗܳܠܶܝܢ ܐ̱ܚܪ̈ܳܢܶܐ ܐܳܦ ܗܽܘ ܡܶܬܟܬܶܒ܆ ܘܗܳܝ ܟܺܝܬ ܕܝܰܬܺܝܪ ܪܰܒܳܐ ܟܰܕ ܥܕܰܟܺܝܠ ܒܟܰܪܣܳܐ ܕܰܒܬܽܘܠܬܳܐ ܝܳܠܕܰܬ ܐܰܠܳܗܳܐ ܥܽܘܠܳܐ ܐܺܝܬܰܘܗ̱ܝ ܗ̱ܘܳܐ. ܘܗܳܝ ܡܰܢ ܕܰܗܘܳܬ݂܆ ܡܶܣܬܰܒܪܳܐ ܕܡܰܟܺܝܟܬܳܐ ܐܺܝܬܶܝܗ̇ ܐܰܝܟܰܢ ܕܗܽܘ܆ ܘܕܰܠܡܽܘܫ̈ܚܳܬܳܐ ܕܣܽܘܪܳܩܳܐ ܘܡܶܣܟܺܢܽܘܬܳܐ ܕܺܝܠܶܗ ܨܶܒܝܳܢܳܝܬܳܐ ܠܳܚܡܳܐ. ܐ̱ܢܳܫܳܝܬܳܐ ܓܶܝܪ ܒܕܽܘܟ ܐܺܝܬܶܝܗ̇ ܗܺܝ ܗܳܝ ܕܢܶܬܟܬܶܒ܆ ܒܳܗ̇ ܒܗܳܝ ܕܡܶܬܚܰܙܝܳܐ. ܒܪܰܡ. ܐܺܝܬܶܝܗ̇ ܟܽܠܳܗ̇ ܦܰܐܺܝܬ ܠܰܐܠܳܗܳܐ.
3: ܗܰܘ ܓܶܝܪ ܕܒܰܕܡܽܘܬܳܐ ܕܰܐܠܳܗܳܐ ܐܺܝܬܰܘܗ̱ܝ܆ ܘܡܶܛܽܠ ܪܶܚܡܰܬ ܐ̱ܢܳܫܽܘܬܳܐ ܢܣܰܒ ܕܡܽܘܬܳܐ ܕܥܰܒܕܳܐ[1]܆ ܒܗܳܝ ܕܰܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܒܰܪܢܳܫܳܐ܆ ܗܳܝ ܓܶܝܪ ܕܺܐܝܬܰܘܗ̱ܝ. ܠܠܳܐ ܡܶܫܬܰܚܠܦܳܢܽܘܬܳܐ ܕܽܐܘܣܺܝܰܐ ܐܰܠܳܗܳܝܬܳܐ ܡܘܰܕܥܳܐ܆ ܘܰܠܠܳܐ ܡܶܬܬܙܺܝܥܳܢܽܘܬܳܐ ܕܰܒܗܳܝ ܕܺܐܝܬܰܘܗ̱ܝ ܘܰܫܟܺܝܚ ܐܰܡܺܝܢܳܐܺܝܬ܆ ܗܽܘ ܟܰܕ ܠܥܰܒܕܽܘܬܳܐ ܕܺܝܠܰܢ ܨܳܒܶܐ ܕܢܰܕܥܶܟ܆ ܗܳܝ ܕܶܐܬܥܰܒܕܕܰܬ݂ ܡܶܢ ܚܛܺܝܬܳܐ ܟܰܕ ܡܶܬܟܬܶܒ[2] ܛܽܘܦܣܳܢܳܐܺܝܬ ܐܰܝܟ ܚܰܕ ܡܶܢ ܡܫܰܥܒ̈ܕܶܐ܆ ܟܰܕ ܦܳܣܶܩ ܠܰܐܣܽܘܪ̈ܶܝܗ̇ ܕܗܳܝ܆ ܘܬܳܠܰܚ ܠܶܐܫܛܳܪܳܐ ܗܰܘ ܕܥܰܠ ܓܶܢܣܳܐ ܕܺܝܠܰܢ[3]. ܡܰܢܽܘ ܗܳܟܺܝܠ ܐܺܝܬܰܘܗ̱ܝ ܗ̱ܘܳܐ ܕܣܳܦܶܩ ܗܳܕܶܐ ܠܰܡܬܰܪܳܨܽܘ. ܗܰܘ ܕܒܰܟܝܳܢܳܐ ܒܰܪ ܚܺܐܪ̈ܶܐ. ܡܰܢܽܘ ܕܶܝܢ ܐܺܝܬܰܘܗ̱ܝ ܗܰܘ ܕܒܰܟܝܳܢܳܐ ܒܰܪ ܚܺܐܪ̈ܶܐ. ܒܪܳܐ ܝܺܚܺܝܕܳܝܳܐ ܘܡܶܠܬܳܐ ܕܰܐܠܳܗܳܐ. ܗܰܘ ܠܳܐ…
20: ܠܬܽܘܪܣܳܝܳܐ ܐܺܝܬ ܠܶܗ܆ ܘܰܠܘܳܬ ܢܰܚܬܳܐ ܒܰܠܝܳܐ ܗܰܘ ܕܰܡܟܰܣܰܝ ܚܳܐܰܪ܆ ܘܨܳܒܶܐ ܕܰܠܗܳܢܳܐ ܠܘܳܬ ܒܶܝܬ ܙܰܒܢܳܐ ܢܰܝܬܶܐ ܐܰܝܟܰܢܳܐ ܕܰܠܟܰܪܣܶܗ ܕܳܘܺܝܬܳܐ ܢܣܰܒܰܥ܆ ܘܡܶܬܚܰܫܰܒ ܕܠܰܒܢܰܘ̈ܗ̱ܝ ܒܰܕܡܽܘܬ݂ ܥܰܒ̈ܕܶܐ ܠܗܳܢܽܘܢ ܕܙܳܒܢܺܝܢ ܢܙܰܒܶܢ܆ ܘܰܠܛܺܝ̈ܡܶܐ ܕܰܟܝܳܢܳܐ. ܬܽܘܪܣܳܝܳܐ ܢܶܥܒܶܕ܆ ܝܳܬܶܒ ܡܰܘܙܦܳܢܳܐ ܫܰܒܗܪܳܢܳܐ. ܗܰܘ ܕܝܰܬܺܝܪ ܡܶܢ ܟܽܠ ܚܰܝܘܰܬ݂ ܫܶܢܳܐ ܐܺܝܬܰܘܗ̱ܝ ܒܺܝܫܳܐ ܘܩܰܫܝܳܐ܆ ܟܰܕ ܓܳܚܶܟ ܥܠܰܘܗ̱ܝ ܕܕܳܘܝܳܐ܆ ܐܰܝܟ ܡܰܢ ܕܰܠܚܰܣܺܝܪܽܘܬܳܐ ܟܶܐܡܰܬ݂ ܗܳܝ ܕܠܳܐ ܐܺܝܬܶܝܗ̇ ܒܨܰܕܘܳܐ ܡܚܰܘܶܐ܆ ܘܟܰܕ ܠܨܶܒ̈ܥܳܬܶܗ ܡܙܺܝܥ ܘܰܠܪ̈ܶܒܝܳܬܳܐ ܡܳܢܶܐ܆ ܘܰܡܚܰܫܶܒ ܠܙܶܒܢܳܐ ܕܶܐܫܛܳܪܳܐ ܘܩܳܪܶܐ ܠܶܗ ܒܩܳܠܳܐ ܪܰܒܳܐ܆ ܘܓܳܙܶܡ ܕܰܠܒܶܝܬ ܚܒܽܘܫܝܳܐ ܢܰܫܠܡܶܗ܆ 222ܘܕܰܢܥܰܬܰܪ ܕܢܶܚܰܫ ܗܳܠܶܝܢ ܕܩܰܫ̈ܝܳܢ ܘܠܳܐ ܡܶܣܬܰܝܒܪ̈ܳܢ܆ ܐܶܢ ܗܽܘ ܕܠܰܘ ܡܶܚܕܳܐ ܒܰܥܓܰܠ ܢܶܦܪܽܘܥ ܚܰܘܒܬܶܗ.
21: ܐܰܘ ܐܳܦ ܐܺܝܬ ܐܶܡܬܰܝ ܕܟܰܕ ܬܰܘܬܳܒܳܐ ܐܺܝܬܰܘܗ̱ܝ ܐ̱ܢܳܫ ܡܶܣܟܺܢܳܐ܆ ܟܰܕ ܡܨܰܥܬܶܗ ܕܙܰܒܢܳܐ ܕܣܰܬܘܳܐ ܐܺܝܬܰܘܗ̱ܝ܆ ܕܳܚܶܩ ܠܶܗ ܡܶܢ ܒܰܝܬܶܗ. ܘܛܳܪܶܕ ܠܶܗ܆ ܘܒܰܪܫܳܥܬܶܗ ܬܳܒܰܥ ܠܶܗ ܐܰܓܪܳܐ. ܡܶܚܕܳܐ ܕܶܝܢ ܕܳܘܝܳܐ ܗܰܘ܆ ܟܰܕ ܡܶܢ ܩܽܘܪܫܳܐ ܝܰܒܺܝܫ. ܘܰܠܡܳܐܢ̈ܶܐ ܗܳܠܶܝܢ ܕܚܰܝ̈ܶܐ ܕܡܶܣܟܺܢܽܘܬܳܐ ܘܦܰܚܺܝ̈ܚܶܐ ܕܰܩܢܶܐ ܗ̱ܘܳܐ܆ ܘܰܠܪ̈ܽܘܩܥܽܘܢܝܳܬܳܐ ܗܳܠܶܝܢ ܕܣܰܓܺܝ ܫܺܝ̈ܛܳܢ܆ ܕܺܐܝܬܰܝܗܶܝܢ ܗ̱ܘܰܝ̈ ܕܫܳܘ̈ܝܳܢ ܠܫܳܡܽܘ̈ܢܶܐ[4] ܙܥܽܘܪ̈ܶܐ܆ ܟܰܕ ܚܳܙܶܐ ܠܗܶܝܢ ܕܰܒܫܽܘܩܳܐ ܫܰܕ̈ܝܳܢ܆ ܘܚܰܘܒܬܳܐ ܡܶܬܬܒܰܥ. ܘܰܠܘܳܬ݂ ܦܽܘܪܥܳܢܽܘܬܳܐ ܚܰܣܺܝܪ܆ ܘܒܰܙܢܳܐ ܡܶܕܶܡ ܡܶܢ ܟܽܠܕܽܘܟ ܡܶܬܶܐܠܶܨ܆ ܕܶܡܥܬܳܐ ܚܰܡܺܝܡܬܳܐ ܡܰܛܶܦ ܥܰܠ ܚܰܫܰܘ̈ܗ̱ܝ܆ ܘܰܕܫܳܪܶܐ ܠܳܗ̇ ܠܚܰܣܺܝܪܽܘܬܶܗ ܘܠܳܐ ܐ̱ܢܳܫ ܐܺܝܬ.
22: ܐܰܝܟܰܢܳܐ ܗܳܟܺܝܠ ܬܺܐܡܰܪ ܠܰܐܠܳܗܳܐ ܥܰܡ ܦܰܪܶܗܣܺܝܰܐ ܐܳܘ ܒܰܪܢܳܫܳܐ܆ ܗܳܝ ܕܰܫܒܽܘܩ ܠܺܝ܆ ܟܰܕ ܠܳܐ ܡܶܕܶܡ ܫܒܰܩܬ݁ ܐܰܢ̱ܬ[5]܆ ܗܰܘ ܕܰܕܚܰܘ̈ܒܳܬܳܐ ܣܰܓܺܝ̈ܳܐܬܳܐ ܘܰܕܪܶܒܽܘ ܚܛܳܗ̈ܶܐ ܐܺܝܬܰܝܟ ܡܚܰܝܒܳܐ܆ ܘܰܠܘܳܬ݂ ܒܰܪ ܓܶܢܣܳܟ ܘܰܐܚܽܘܟ. ܩܰܫܝܽܘܬܳܐ[6] ܕܪ̈ܰܚܡܶܐ ܟܺܐܦܳܝ̈ܶܐ ܚܰܘܺܝܬ݁. ܠܡܳܢܳܐ ܕܶܝܢ ܡܶܛܽܠ ܚܰܘܒܬܳܐ ܐܺܝܬܶܝܗ̇ ܠܺܝ ܡܶܠܬܳܐ. ܙܰܒܢܺܝ̈ܢ ܣܰܓܺܝ̈ܳܐܢ ܠܡܶܠܬܳܐ ܕܨܽܘܚܺܝܬܳܐ ܐܰܘ ܨܰܥܪܳܐ܆ ܐܰܘ ܕܩܰܫܝܽܘܬܳܐ[7] ܐ̱ܚܪܺܬܳܐ ܐܰܝܕܳܐ ܕܗܺܝ ܕܣܰܓܺܝ ܫܺܝܛܳܐ܆ ܠܳܐ ܡܶܬܪܡܶܝܢ ܚ̱ܢܰܢ ܠܡܶܫܒܰܩ ܠܩܰܪܝܒܰܢ. ܘܰܐܝܟ ܐܰܝܠܶܝܢ ܕܰܠܒܰܪ ܡܶܢ ܐܺܝܩܳܪܰܢ[8] ܐܶܨܛܰܥܰܪܢܰܢ܆ ܘܟܽܠ ܒܺܝ̈ܫܳܢ ܚܰܫܢܰܢ܆ ܠܳܛܫܺܝܢ ܚ̱ܢܰܢ ܠܥܽܘܩܣܳܐ ܕܪܽܘܓܙܳܐ ܒܰܕܡܽܘܬ ܥܶܩܰܪ̈ܒܶܐ܆ ܘܰܐܝܟ ܓܰܡ̈ܠܶܐ ܐܰܟܬܳܐ ܒܬܰܪܥܺܝܬܰܢ ܠܳܒܟܺܝܢܰܢ܆ ܘܠܳܐ ܢܳܝܚܺܝܢ ܚ̱ܢܰܢ ܥܕܰܡܳܐ ܕܒܺܝܫܬܳܐ ܡܶܕܶܡ ܚܠܳܦ ܨܰܥܪܳܐ ܗܰܘ ܢܶܦܪܽܘܥ܆ ܘܟܰܕ ܡ̈ܶܠܶܐ ܒܰܠܚܽܘܕ ܐܶܬܥܰܘܰܠܢܰܢ ܐܰܝܟܰܢܳܐ ܕܡܰܣܒܪܺܝܢܰܢ܆ ܒܗܽܘܢ ܒܰܥܒܳܕ̈ܶܐ ܢܣܰܓܶܦ.
23: ܐܰܝܟܰܢܳܐ ܗܳܟܺܝܠ ܢܺܐܡܰܪ ܥܰܡ ܦܰܪܶܗܣܺܝܰܐ. ܗܳܝ ܕܰܫܒܽܘܩ ܠܰܢ܆ ܠܳܗ̇ ܓܶܝܪ ܟܰܕ ܠܳܗ̇ ܙܰܒܢܺܝ̈ܢ ܣܰܓܺܝ̈ܳܐܢ ܐܳܡܰܪ: ܐܰܘ ܐܰܝܟܳܐ ܟܺܐܢܳܐ ܗܳܕܶܐ܆ ܕܢܶܫܬܘܶܐ ܠܗܳܝ ܕܰܚܢܰܢ ܠܩܰܪܝܒܳܐ ܠܳܐ ܫܰܘܬܶܦܢܰܢ ܒܳܗ̇܆ ܗܳܝ ܟܺܝܬ ܕܳܐܦ ܐ̱ܢܳܫ ܚܰܟܺܝܡܳܐ ܟܰܕ ܡܶܬܕܰܡܰܪ ܒܳܗ̇ ܐܳܡܰܪ܆ ܕܟܰܕ ܒܶܣܪܳܐ ܐܺܝܬܰܘܗ̱ܝ ܗܽܘ. ܢܳܛܰܪ ܐܰܟܬܳܐ܆ ܘܡܶܢ ܡܳܪܝܳܐ ܒܳܥܶܐ ܐܳܣܝܽܘܬܳܐ.
24: ܐܶܠܳܐ ܢܶܬܥܰܗܰܕ ܠܝܰܘܡܳܐ ܕܕܺܝܢܳܐ. ܘܟܰܕ ܥܰܠ ܪ̈ܰܚܡܶܐ ܣܢܺܝܩܺܝܢ ܚ̱ܢܰܢ܆ ܢ݀ܩܰܕܶܡ ܢ݀ܛܰܝܶܒ ܠܰܢ ܪ̈ܰܚܡܶܐ. ܘܰܫܦܺܝܥܳܐܺܝܬ ܢܶ݀ܫܒܽܘܩ܆ ܐܰܝܟܰܢܳܐ ܠܫܽܘܒܩܳܢܳܐ ܕܝܰܬܺܝܪ ܫܦܺܝܥ ܢܶ݀ܫܬܘܶܐ. ܘܰܒܝܰܕ ܫܽܘܟܳܢܳܐ ܕܫܰܦܺܝܪ ܕܶܚܠܬܳܐ ܡܳܠܟܳܐ܆ ܠܘܳܬ݂ ܪܶܚܡܰܬ݂ ܐ̱ܢܳܫܽܘܬܳܐ ܢܶ݀ܫܬܰܚܠܰܦ. ܘܰܚܠܳܦܰܘܗ̱ܝ. ܘܰܚܠܳܦ ܡܫܰܝܰܢܬܳܐ ܘܪܳܚܡܰܬ݂ ܠܰܡܫܺܝܚܳܐ ܡܰܠܟܬܳܐ. ܢ݀ܨܰܠܶܐ ܟܰܕ ܐܳܡܪܺܝܢܰܢ: ܦܪܽܘܩ ܡܳܪܝܳܐ ܠܡܰܠܟܳܐ ܕܺܝܠܳܟ. ܘܳܐܦ ܠܳܗ̇܆ ܘܰܥܢܺܝ ܠܰܢ ܒܝܰܘܡܳܐ ܗܰܘ ܕܢܶ݀ܩܪܶܝܟ ܒܶܗ. ܡܶܛܽܠ ܕܠܳܟ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܗܳܫܳܐ ܘܰܒܟܽܠܙܰܒܢ. ܘܰܠܥܳܠܰܡ ܥܳܠܡܺܝܢ. ܐܰܡܺܝܢ.
ܫܠܶܡ ܡܺܐܡܪܳܐ ܕܰܬܠܳܬܰܥܣܰܪ.
ܘܠܳܐ ܡܶܕܶܡ ܓܶܝܪ ܐܺܝܬܰܘܗ̱ܝ ܕܰܡܛܰܘܶܫ ܠܗܳܠܶܝܢ ܩܰܕܺܝ̈ܫܳܬܳܐ܆ ܐܶܠܳܐ ܐܶܢ ܚܛܺܝܬܳܐ ܒܰܠܚܽܘܕ ܘܥܶܕܠܳܝܳܐ ܕܡܶܢ ܬܺܐܪܬܳܐ ܕܺܝܠܶܗ܆ ܗܰܘ ܕܡܰܓ̈ܥܠܳܢ ܠܰܢ ܒܶܝܬ݂ ܐܺܝܕܰܘ̈ܗ̱ܝ ܗܳܠܶܝܢ ܩܰܕܺܝ̈ܫܳܬܳܐ.