ܡܺܐܡܪܳܐ ܕܡܐܐ ܘܥܶܣܪܺܝܢ ܘܚܰܡܫܳܐ

ܥܰܠ ܩܰܕܺܝܫܳܐ ܐܰ‌ܠܳܗܳܐ܆ ܩܰܕܺܝܫܐ ܚܰܝܠܬܳܢܳܐ܆ ܩܰܕܺܝܫܳܐ ܠܳܐ ܡܳܝܽܘܬܳܐ܆ ܗܰܘ ܕܶܐܨܛܠܶܒܬ ܡܶܛܽܠܳܬܰܢ܆ ܐܶܬܪܰܚܰܡ ܥܠܰܝܢ.

ܩܟܗܦܰܘܠܽܘܤ ܗܰܘ ܪܰܒܳܐ܆ ܗܰܘ ܫܠܺܝܚܳܐ܆ ܗܰܘ ܕܡܶܢ ܒܳܬܰܪ ܟܽܠܗܽܘܢ ܫܠܺܝܚ̈ܶܐ ܡܶܢ ܫܡܰܝܳܐ ܐܶܬܩܪܺܝ܆ ܘܗܳܟܰܢܳܐ ܫܰܪܺܝܪܳܐܺܝܬ ܠܬܶܫܡܶܫܬܳܐ ܕܶܐܘܰܢܓܶܠܺܝܽܘܢ ܩܰܒܶܠ^[1]܆ ܘܰܒܪܶܚܡܰܬ ܥܰܡܠܳܐ. ܡܰܠܽܘܢ ܕܶܝܢ ܒܪܶܚܡܰܬ ܩܺܝܢ̈ܕܘܢܘ ܥܒܰܪ ܒܳܗ̇܆ ܐܰܝܟܰܢܳܐ ܕܳܐܦ ܢܺܐܡܰܪ ܕܠܳܐ ܫܳܘܶܝܢ ܚܰܫܰܘ̈ܗ̱ܝ ܕܙܰܒܢܳܐ ܕܗܳܫܳܐ܆ ܠܘܳܬ ܬܶܫܒܽܘܚܬܳܐ ܗܳܝ ܕܰܥܬܺܝܕܳܐ ܕܬܶܬܓܠܶܐ ܒܰܢ^[2]܆ ܘܰܙܥܽܘܪܳܐ ܚܳܫܶܒ ܗ̱ܘܳܐ ܠܟܽܠ ܡܽܘܢ ܕܗܽܘ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܢܶܚܰܫ܆ ܘܟܽܠܶܗ ܗܳܢܳܐ ܦܬܰܚ ܦܽܘܡܳܐ ܕܬܰܪܥܺܝܬܶܗ ܘܰܢܓܰܕ ܪܽܘܚܳܐ^[3]܆ ܘܥܰܬܺܝܪܳܐܺܝܬ ܢܬܰܦ ܡܶܢ ܪܶܕܝܳܐ ܗܰܘ ܕܡܶܢ ܠܥܶܠ ܕܰܡܥܺܝܢܳܐ ܕܚܰܝ̈ܶܐ܆ ܐܰܝܟܰܢܳܐ ܕܰܐܝܟ ܫܽܘܘܕܳܝܳܐ ܗܰܘ ܫܰܪܺܝܪܳܐ ܕܺܝܠܶܗ ܕܦܳܪܽܘܩܰܢ܆ ܢܰܗܪ̈ܰܘܳܬܳܐ ܢܶܪܕܽܘܢ ܡܶܢ ܟܰܪܣܶܗ ܕܡܰܝ̈ܳܐ ܚܰܝ̈ܶܐ^[4]܆ ܟܰܪܣܳܐ ܕܶܝܢ ܐܺܝܬܶܝܗ̇ ܚܰܝܠܳܐ ܗܰܘ ܡܰܘܠܕܳܢܳܐ ܕܬܰܪܥܺܝܬܳܐ܆ ܕܡܰܘܠܶܕ ܘܰܕܠܳܐ ܚܣܳܡ ܡܰܫܦܰܥ ܠܣܽܘ̈ܟܳܠܶܐ ܕܡܶܢ ܡܰܥܒܕܳܢܽܘܬܳܐ ܐܰ‌ܠܳܗܳܝܬܳܐ ܒܰܕܡܽܘܬ ܪ̈ܶܕܝܶܐ ܡܶܫ̈ܬܰܬܝܳܢܶܐ܆ ܡܶܛܽܠܳܬܳܗ̇ ܓܶܝܪ ܕܗܳܕܶܐ ܐܳܦ ܠܰܫܡܳܐ ܗܰܘ ܓܰܘܳܢܳܝܳܐ ܕܰܫܠܺܝܚ̈ܶܐ ܕܺܝܠܳܢܳܝܳܐ ܕܺܝܠܶܗ ܥܰܒ̣ܕܶܗ܆ ܘܶܐܢ ܐ̱ܢܳܫ ܠܳܐ ܡܬܰܚܡܳܐܺܝܬ ܫܠܺܝܚܳܐ ܢܫܰܡܰܗ܆ ܗܳܢܽܘܢ ܕܫܳܡܥܺܝܢ ܦܰܘܠܽܘܤ ܘܠܰܘ ܐ̱ܚܪܺܢܳܐ ܡܣܰܒܪܺܝܢ܆ ܒܰܡܫܰܪܬܚܽܘܬܳܐ ܓܶܝܪ ܘܣܰܓܺܝܽܐܘܬܳܐ ܕܰܐܓܽܘ̈ܢܶܐ܆ ܕܰܐܬܠܺܝ̈ܣܘܳܬܳܐ ܕܡܰܠܦܳܢܽܘܬܳܐ܆ ܕܪܶܗܛܳܐ ܥܦܺܝܦܳܐ܆ ܕܪ̈ܶܓܠܶܐ ܟܺܝܬ ܘܰܕܡܶܠܬܳܐ܆ ܗܰܘ ܕܒܺܐܝܕܰܘ̈ܗ̱ܝ ܥܰܠ ܟܽܠܳܗ̇ ܟܢܺܝܫܳܐܺܝܬ ܗܳܝ ܕܰܬܚܶܝܬ ܫܶܡܫܳܐ ܪܗܶܛ܆ ܠܟܽܠܶܗ ܐܺܝܩܳܪܳܐ ܕܰܫܠܺܝܚܽܘܬܳܐ ܗܽܘ ܒܶܗ ܡܟܰܢܶܫ܆ ܟܰܕ ܨܰܠܡܳܐ ܐܺܝܬܰܘܗ̱ܝ ܫܰܪܺܝܪܳܐ܆ ܘܝܽܘܩܢܳܐ ܡܰܠ̣ܝܳܐ ܘܰܡܫܰܡܠܝܳܐ ܕܣܽܘܥܪ̈ܳܢܶܐ ܡܰܝܬܶܐ܆ ܗܳܢܳܐ ܗܳܟܺܝܠ ܗܰܘ ܟܳܪܽܘܙܳܐ ܕܟܽܠܶܗ ܗܳܢܳܐ ܘܰܕܕܰܐܝܟ ܗܳܢܳܐ ܕܫܰܦܺܝܪܽܘܬ ܕܶܚܠܬܳܐ܆ ܟܰܕ ܝܰܕܰܥ ܗ̱ܘܳܐ ܠܣܽܘܥܪܳܢܳܐ ܕܗܰܝܡܳܢܽܘܬܳܐ ܕܰܟܡܳܐ ܐܺܝܬܰܘܗ̱ܝ܆ ܘܥܰܠ ܕܰܐܝܟ ܐܰܝ̇ܕܳܐ ܝܰܨܺܝܦܽܘܬܳܐ ܘܰܢܛܽܘܪܬܳܐ ܣܰܓܺܝ ܝܰܬܺܝܪ ܚܦܺܝܛܬܳܐ ܣܢܺܝܩ܆ ܠܘܳܬ ܗܳܢܽܘܢ ܕܗܰܝܡܶܢܘ ܐܳܡܰܪ ܗ̱ܘܳܐ܆ ܐܢ̱ܬܽܘܢ ܠܟܽܘܢ ܢܰܣܰܘ܆ ܐܶܢ ܐܺܝܬܰܝܟܽܘܢ ܒܗܰܝܡܳܢܽܘܬܳܐ. ܐܢ̱ܬܽܘܢ ܠܟܽܘܢ ܒܩܰܘ܆ ܐܰܘ ܠܳܐ ܝܳܕܥܺܝܢ ܐܢ̱ܬܽܘܢ܆ ܕܝܶܫܽܘܥ ܡܫܺܝܚܳܐ ܒܟܽܘܢ ܐܺܝܬܰܘܗ̱ܝ܆ ܐܶܢ ܠܰܘ ܡܰܣ̈ܠܰܝܳܐ ܐܺܝܬܰܝܟܽܘܢ ܙܳܕܶܩ ܠܰܢ ܗܳܟܺܝܠ^[5]܆ ܐܳܦ ܕܰܢܗܰܝܡܶܢ ܐܳܦ ܕܢܶܣܝܳܢܳܐ ܕܢܰܦܫܰܢ ܢܶܣܰܒ. ܐܳܦ ܕܢܶܒܩܶܐ ܐܰܝܟ ܕܒܰܐܬܽܘܢܳܐ ܠܬܰܪܥܺܝܬܰܢ܆ ܘܕܰܢܦܰܪܶܫ ܕܡܳܢܰܐ ܗ̄ܘ ܣܽܘܠܳܢܳܐ܆ ܘܡܳܢܰܐ ܗ̄ܘ ܗܰܘ ܕܰܕܟܶܐ ܘܰܕܠܳܐ ܚܠܺܝܛܳܐܺܝܬ ܐܺܝܬ ܠܶܗ ܠܘܳܬ ܗܰܘ ܢܽܘܟܪܳܝܳܐ. ܐܰܝܟܰܢܳܐ ܕܰܒܚܺܝܪܳܐܺܝܬ ܢܗܰܝܡܶܢ܆ ܘܠܳܐ ܢܶܗܘܶܐ ܐܺܝܬܰܝܢ ܡܰܣ̈ܠܰܝܳܐ.

ܡܶܛܽܠܳܬܳܗ̇ ܕܗܳܕܶܐ ܟܰܕ ܡܶܢ ܩܕܺܝܡ ܩܰܠܺܝܠ ܡܡܰܠܶܠ ܗ̱ܘܺܝܬ ܠܟܽܘܢ܆ ܘܦܽܘܫܳܩܳܐ ܥܳܒܶܕ ܗ̱ܘܺܝܬ ܐܰܝܟ ܕܺܐܝܬܶܝܗ̇ ܗ̱ܘܳܬ ܠܺܝ ܡܶܫܟܚܳܢܺܝܬܳܐ܆ ܕܬܰܘܕܺܝܬܳܐ ܕܗܰܝܡܳܢܽܘܬܳܐ ܗܳܝ ܕܰܐܘܕܺܝ ܦܛܪܘܤ ܗܰܘ ܩܳܝܽܘܡܳܐ ܩܰܕܡܳܝܳܐ ܕܰܫܠܺܝ̈ܚܶܐ ܘܰܕܬܰܠ̈ܡܺܝܕܶܐ܆ ܟܰܕ ܐܶܡܰܪ ܠܘܳܬ ܡܳܪܰܢ ܝܶܫܽܘܥ܆ ܐܰܢ̱ܬ ܐܺܝܬܰܝܟ ܗܰܘ ܡܫܺܝܚܳܐ ܗܰܘ ܒܪܳܐ ܕܰܐ‌ܠܳܗܳܐ ܚܰܝܳܐ^[6]܆ ܐܳܦ ܠܫܰܪܺܝܪܽܘܬܳܗ̇ ܕܬܰܪܥܺܝܬܳܐ ܚܠܺܝܡܬܳܐ ܣܳܡܶܬ ܩܕܳܡܰܝܟܽܘܢ܆ ܘܳܐܦ ܠܗܳܝ ܕܰܓܳܠܬܳܐ ܫܳܕܺܝܬ̣ܳܐ ܘܰܐܟܣܢܳܝܬܳܐ ܚܰܘܺܝܬ̊ܳܗ̇ ܕܬܰܘܕܺܝܬܳܐ ܫܠܺܝܚܳܝܬܳܐ܆ ܘܳܐܦ ܥܽܘܗܕܳܢܳܐ ܗܳܢܳܐ ܐܰܝܬܺܝܬ̣ ܠܰܡܨܰܥܬܳܐ܆ ܐܶܢ ܙܳܕܶܩ ܕܗܳܝ ܕܝܰܬܺܝܪ ܫܰܪܺܝܪܳܐ ܐܺ݀ܡܰܪ܆ ܟܰܕ ܐܳܦ ܗܺܝ ܢܰܩܺܝܦܽܘܬܳܐ ܕܡܶܠܬܳܐ ܐܰܟܚܕܳܐ ܐܰܥܶܠܬܳ̊ܗ̇. ܕܗܳܢܽܘܢ ܕܰܒܦܠܐܤܛܝܢܝ ܪܰܫܺܝܥܳܐܺܝܬ ܨܒܰܘ ܠܡܶܦܣܰܩ ܡܶܢ ܬܶܫܒܽܘܚܬܳܐ ܗܰܘ ܬܠܺܝܬܳܝܰܬ ܩܽܘ̈ܕܫܶܐ܆ ܠܗܳܝ ܕܶܐܨܛܠܶܒܬ ܡܶܛܽܠܳܬܰܢ܆ ܘܰܣܥܰܘ ܡܰܢ܆ ܡܶܢ ܐ̱ܢܳܫܺܝ̈ܢ ܕܶܝܢ ܠܳܐ ܐܶܬܥܢܺܝܘ ܐܶܠܳܐ ܐܶܬܬܰܩܪܰܒܘ. ܡܶܢ ܚܶܪܝܳܢܳܐ܆ ܙܳܟܶܐ ܗ̱ܘܳܐ ܓܶܝܪ ܥܝܳܕܶܗ ܕܰܫܪܳܪܳܐ ܠܓܽܘܕܳܦܶܗ ܕܣܰܥܳܝܳܐ. ܒܕܽܘܟ̈ܝܳܬܳܐ ܕܶܝܢ ܚܰܕܚ̈ܕܳܢܝܳܬܳܐ ܐܳܦ ܐܶܬܡܨܺܝܘ ܒܡܰܪܳܚܽܘܬܶܗ ܕܪܽܘܫܥܳܐ.

ܐܶܠܳܐ ܐܰܝܟܰܢܳܐ ܕܠܳܐ ܐܶ݀ܣܬܒܰܪ ܕܰܡܩܰܛܪܶܓ ܐ̱ܢܳܐ ܒܰܠܚܽܘܕ܆ ܠܗܳܢܽܘܢ ܕܰܠܗܳܕܶܐ ܡܢܳܬܳܐ ܕܡܰܪܳܚܽܘܬܳܐ ܘܰܕܚܰܣܺܝܪܽܘܬ ܗܰܘܢܳܐ ܢܦܰܩܘ܆ ܠܳܐ ܕܶܝܢ ܡܚܰܘܶܐ ܐ̱ܢܳܐ ܕܒܰܐܝܢܳܐ ܙܢܳܐ܆ ܗܳܝ ܕܰܡܫܰܡܠܝܳܐ ܐܺܝܬ ܠܳܗ̇ ܠܬܶܫܒܽܘܚܬܳܐ ܗܳܕܶܐ܆ ܟܰܕ ܥܰܡ ܗܳܝ ܕܶܐܨܛܠܶܒܬ ܡܶܛܽܠܳܬܰܢ ܡܶܙܕܡܰܪܳܐ ܠܦܳܪܽܘܩܰܢ ܡܫܺܝܚܳܐ܆ ܠ̱ܐܢܳܫܺܝ̈ܢ ܓܶܝܪ ܫܶܡܥܶܬ̣ ܕܰܡܫܰܐܠܺܝܢ. ܕܡܶܛܽܠ ܡܳܢܳܐ ܥܳܕܠܺܝܢܰܢ ܠܶܗ ܠܦܳܣܩܳܐ܆ ܡܶܕܶܡ ܡܶܕܶܡ ܡܶܢ ܗܳܢܶܝܢ ܕܗܳܐ ܡܶܢ ܟܰܕܽܘ ܩܰܕܶܡ ܐܶܬܥܡܰܠ ܡܶܢܝ ܠܘܳܬ ܪܰܫܺܝܥܳܐ ܡܰܩܕܘܢܝܘܤ܆ ܕܗܽܘ ܟܰܕ ܗܽܘ ܠܗܳܠܶܝܢ ܣܽܘܓܦܳܢܳܐ ܘܰܚܒܳܠܳܐ ܐܶܬܟܪܰܗ ܘܰܐܡܪܰܚ ܡܰܪܳܚܽܘܬܳܐ ܐܶܡܰܬܝ ܕܒܰܡܕܺܝܢ̱ܬܳܐ ܗܳܝ ܡܰܠܟܳܝܬܳܐ ܟܰܘ̈ܫܶܐ ܥܳܒܶܕ ܗ̱ܘܺܝܬ܆ ܐܶ݀ܢܱܣܶܐ ܠܡܺܐܡܰܪ ܗܳܫܳܐ ܥܰܠ ܗܳܕܶܐ ܕܩܰܪܺܝܒܳܐ.

ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܕܰܬܠܳܬܳܐ ܩܢܽܘܡ̈ܶܐ ܐܺܝܬܰܝܗܽܘܢ ܡܦܰܪ̈ܫܶܐ ܘܠܳܐ ܒܠܻ̈ܝܠܶܐ ܒܰܚܕܳܐ ܐܽܘܣܺܝܰܐ܆ ܟܽܠܗܽܘܢ ܒܰܚܕܳܐ ܬܰܪܥܺܝܬܳܐ ܘܰܒܠܶܫܳܢܳܐ ܫܰܠܡܳܐ ܐܰܟܚܕܳܐ ܡܰܘܕܶܝܢ܆ ܗܳܢܽܘܢ ܕܫܽܘܒܚܳܐ ܬܪܺܝܨܳܐ ܡܶܬܪܰܥܶܝܢ. ܫܰܦܺܝܪܳܐ ܕܶܝܢ ܕܗܳܫܳܐ ܒܙܰܒܢܳܗ̇ ܐܶ݀ܦܰܫܶܩ ܠܟܽܘܢ܆ ܕܡܳܢܳܐ ܐܺܝܬܶܝܗ̇ ܐܽܘܣܺܝܰܐ. ܡܳܢܳܐ ܕܶܝܢ. ܩܢܽܘܡܳܐ. ܗܳܟܰܢܳܐ ܓܶܝܪ ܝܰܬܺܝܪܳܐܺܝܬ ܬܶܬܚܰܘܶܐ ܓܰܠܝܳܐܺܝܬ܆ ܗܳܕܶܐ ܕܣܺܝܡܳܐ ܩܕܳܡܰܝܢ܆ ܐܽܘܣܺܝܰܐ ܗܳܟܺܝܠ ܘܰܩܢܽܘܡܳܐ. ܐܳܡܪܺܝܢܰܢ ܕܺܐܝܬܰܝܗܽܘܢ܆ ܫܡܳܗ̈ܶܐ ܡܫܰܘ̈ܕܥܳܢܶܐ ܕܝܳܬܳܐ ܕܡܶܕܶܡ ܡܶܕܶܡ ܡܶܢ ܗܳܠܶܝܢ ܕܺܐܝܬܰܝܗܶܝܢ. ܐܽܘܣܺܝܰܐ ܡܰܢ ܓܶܝܪ ܡܰܘܕܥܳܐ ܕܺܐܝܬܰܘܗ̱ܝ ܗܰܘ ܕܣܺܝܡ. ܩܢܽܘܡܳܐ ܕܶܝܢ. ܕܰܡܩܰܝܰܡ. ܡܶܛܽܠ ܗܳܕܶܐ ܐܳܦ ܡܶܢܶܗ ܕܣܽܘܥܪܳܢܳܐ ܡܶܫܬܰܡܗܺܝܢ. ܐܽܘܣܺܝܰܐ ܡܰܢ ܡܶܢ ܗܳܝ ܕܺܐܝܬܶܝܗ̇܆ ܩܢܽܘܡܳܐ ܕܶܝܢ ܡܶܢ ܗܳܝ ܕܰܡܩܰܝܰܡ. ܘܰܒܗܳܕܶܐ ܟܺܝܬ ܘܠܳܐ ܡܶܕܶܡ ܡܫܰܚܠܦܺܝܢ ܡܶܢ ܚ̈ܕܳܕܶܐ. ܒܗܳܝ ܕܶܝܢ ܣܰܓܺܝ ܐܺܝܬܰܘܗ̱ܝ ܫܽܘܚܠܳܦܳܐ ܕܰܬܪ̈ܰܝܗܽܘܢ. ܐܽܘܣܺܝܰܐ ܡܰܢ ܓܶܝܪ ܕܓܰܘܳܢܳܝܽܘܬܳܐ ܐܺܝܬܶܝܗ̇ ܡܫܰܘܕܥܳܢܺܝܬܳܐ. ܩܢܽܘܡܳܐ ܕܶܝܢ ܕܕܺܝܠܳܢܳܝܽܘܬܳܐ.

ܙܳܕܶܩ ܕܶܝܢ. ܕܰܒܝܰܕ ܬܰܚܘܺܝܬܳܐ ܡܶܕܶܡ ܕܠܳܚܡܳܐ ܬܶܬܢܰܗܰܪ ܡܶܠܬܳܐ. ܫܡܳܐ ܒܰܪܢܳܫܳܐ܆ ܕܓܰܘܳܢܳܝܽܘܬܳܐ ܘܒܰܕܡܽܘܬ ܐܽܘܣܺܝܰܐ ܐܺܝܬܰܘܗ̱ܝ ܡܰܘܕܥܳܢܳܐ܆ ܐܰܝܟ ܗܳܝ ܕܰܟܬܺܝܒܳܐ܆ ܕܡܳܢܳܐ ܐܺܝܬܰܘܗ̱ܝ ܒܰܪܢܳܫܳܐ ܕܶܐܬܺܝܕܰܥܬ ܠܶܗ܆ ܐܰܘ ܒܪܶܗ ܕܐ̱ܢܳܫܳܐ ܕܚܳܫܶܒ ܐܰܢ̱ܬ ܠܶܗ^[7]. ܘܬܽܘܒ. ܒܰܪܢܳܫܳܐ. ܠܰܣܪܺܝܩܽܘܬܳܐ ܐܶܬܕܰܡܺܝ. ܗܳܪܟܳܐ ܓܶܝܪ ܠܰܘ ܠܚܰܕ ܓܰܒܪܳܐ ܐ̱ܢܳܫ܆ ܐܶܠܳܐ ܠܟܽܠܗܽܘܢ ܒܢܰܝ̈ܢܳܫܳܐ ܚܳܒܶܫ ܗܽܘ ܟܽܘܢܳܝܳܐ. ܘܰܡܚܰܘܶܐ ܓܰܘܳܢܳܐܺܝܬ ܠܫܰܘܝܽܘܬ ܐܺܝܩܳܪܳܐ ܟܺܝܬ ܘܰܠܗܺܝܟܰܕܗܺܝܽܘܬܳܐ ܕܝܳܬܳܐ܆ ܕܟܽܠܶܗ ܓܶܢܣܳܐ. ܐܳܦܠܳܐ ܓܶܝܪ ܐܺܝܬܰܘܗ̱ܝ ܦܠܳܢ ܝܰܬܺܝܪܳܐܺܝܬ ܡܠܺܝܠܳܐ ܝܰܬܺܝܪ ܡܶܢ ܦܠܳܢ܆ ܐܰܘ ܝܰܬܺܝܪܳܐܺܝܬ ܡܳܝܽܘܬܳܐ ܝܰܬܺܝܪ ܡܶܢ ܦܠܳܢ. ܟܽܠ ܓܶܝܪ ܒܰܪܢܳܫܐ ܚܰܝܽܘܬܳܐ ܐܺܝܬܰܘܗ̱ܝ ܡܠܺܝܠܬܳܐ ܘܡܳܝܽܘܬ̣ܬܳܐ. ܘܰܒܗܳܕܶܐ ܘܠܳܐ ܡܶܕܶܡ ܡܶܢ ܚ̈ܕܳܕܶܐ ܡܫܰܚܠܦܺܝܢܰܢ. ܐܶܠܳܐ ܐܺܝܬܰܝܢ ܟܽܠܰܢ܆ ܗܶܢܽܘܢ. ܟܰܕ ܗܶܢܽܘܢ. ܐܶܡܰܬܝ ܕܶܝܢ ܕܢܺܐܡܰܪ ܦܛܪܘܤ ܐܰܘ ܦܰܘܠܽܘܤ܆ ܒܰܪܢܳܫܳܐ ܡܰܢ ܢܶܣܰܒ ܒܗܰܘܢܶܗ ܡܶܢ ܟܽܠ ܦܪܽܘܤ ܗܰܘ ܕܫܳܡܰܥ. ܠܰܘ ܕܶܝܢ ܠܟܽܠ ܒܰܪܢܳܫܳܐ܆ ܐܶܠܳܐ ܠܰܦܠܳܢ. ܐܰܘ ܠܰܦܠܳܢ. ܘܡܶܢ ܕܺܝܠܳܝ̈ܳܬܳܐ ܗܳܠܶܝܢ ܕܡܶܬܚܰܙܝ̈ܳܢ ܥܰܠ ܟܽܠ ܚܰܕ. ܢܰܘܕܰܥ. ܠܗܰܘ ܕܡܶܫܬܰܘܕܰܥ. ܐ̱ܚܪܺܬܳܐ ܗܝ ܓܶܝܪ ܕܺܝܠܳܝܬܳܐ ܕܦܶܛܪܘܤ܆ ܕܰܐܝܟ ܐܰܝܟܰܢ܆ ܗܳܝ ܕܺܐܝܬܰܘܗ̱ܝ ܡܶܢ ܡܕܺܝܢ̱ܬܽܘܢܺܝܬܳܐ ܒܶܝܬ ܨܰܝܕܳܐ܆ ܘܰܒܪܶܗ ܕܝܰܘܢܰܐ. ܘܰܐܚܽܘܗ̱ܝ ܕܰܐܢܕܪܐܐ܆ ܘܨܰܝܳܕܳܐ ܒܽܐܘܡܳܢܽܘܬܳܐ܆ ܘܡܶܢ ܒܳܬܰܪ ܗܳܠܶܝܢ ܫܠܺܝܚܳܐ܆ ܘܰܕܡܶܛܽܠ ܚܠܺܝܡܽܘܬܳܐ ܟܺܝܬ ܘܫܰܪܺܝܪܽܘܬܳܐ ܕܗܰܝܡܳܢܽܘܬܶܗ ܗܦܰܟ ܐܶܫܬܰܡܰܗ ܫܽܘܥܳܐ ܡܶܢ ܡܫܺܝܚܳܐ܆ ܘܰܐܚܪܺܬܳܐ ܗܝ ܬܽܘܒ ܕܺܝܠܳܝܬܶܗ ܕܦܰܘܠܽܘܤ. ܗܳܝ ܕܡܶܢ ܩܺܝܠܺܝܩܺܝܰܐ ܢܶܗܘܶܐ. ܗܳܝ ܕܰܦܪܺܝܫܳܝܳܐ ܢܶܗܘܶܐ ܐܺܝܬܰܘܗ̱ܝ. ܗܳܝ ܕܶܐܬܪܕܺܝ ܘܺܝܠܶܦ ܠܢܳܡܽܘܣܳܐ ܐܰܒܳܗܳܝܳܐ ܠܘܳܬ ܪ̈ܶܓܠܰܘܗ̱ܝ ܕܓܰܐܡܰܠܝܐܝܠ. ܗܳܝ ܕܡܶܢ ܒܳܬܰܪ ܕܰܪܕܰܦ. ܐܰܟܪܶܙ ܐܶܘܰܢܓܶܠܺܝܽܘܢ. ܗܳܝ ܕܦܰܘܠܽܘܤ ܚܠܳܦ ܫܳܐܘܳܠ ܢܶܬܩܪܶܐ܆ ܘܟܽܠܗܶܝܢ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܗܳܢܶܝܢ ܕܰܟ̈ܬܺܝܒܳܢ ܥܠܰܘܗ̱ܝ ܒܬܰܫܥܺܝܬܳܐ. ܩܢܽܘܡܳܐ ܗܳܟܺܝܠ܆ ܒܗܺܝܟܰܕܗܺܝܽܘܬܳܐ ܡܰܢ ܕܓܶܢܣܳܐ ܘܰܕܝܳܬܳܐ^[8] ܠܳܐ ܟܳܦܰܪ܆ ܘܳܐܦܠܳܐ ܬܽܘܒ ܡܒܰܛܶܠ܆ ܦܳܪܶܫ ܕܶܝܢ ܘܰܡܬܰܚܶܡ ܒܝܽܘܩ̈ܢܶܐ ܕܺܝܠܳܢܳܝ̈ܶܐ ܠܗܰܘ ܕܣܺܝܡ. ܦܶܛܪܘܤ ܓܶܝܪ ܒܝܳܬܳܐ^[9] ܡܰܢ ܘܰܒܓܶܢܣܳܐ܆ ܒܰܪܢܳܫܳܐ ܐܺܝܬܰܘܗ̱ܝ ܐܰܝܟܰܢܳܐ ܟܺܝܬ ܕܳܐܦ ܦܰܘܠܽܘܤ. ܒܕܺܝܠܳܝܽܘܬܳܐ ܕܶܝܢ ܦܪܺܝܫ ܡܶܢ ܦܰܘܠܽܘܤ. ܘܠܳܐ ܦܛܪܘܤ ܢܶܣܬܒܰܪ ܦܰܘܠܽܘܤ܆ ܘܳܐܦܠܳܐ ܬܽܘܒ ܦܰܘܠܽܘܤ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܦܛܪܘܤ ܡܬܽܘܡ ܢܶܬܐܠܨ ܕܰܢܫܰܢܶܐ.

ܗܺܝ ܟܰܕ ܗܺܝ ܐܺܝܬ ܠܡܺܐܡܰܪ܆ ܐܳܦ ܥܰܠ ܬܠܺܝܬܳܝܽܘܬܳܐ ܩܰܕܺܝܫܬܳܐ. ܐܳܦ ܬܰܡܳܢ ܓܶܝܪ܆ ܐܽܘܣܺܝܰܐ ܡܰܢ܆ ܐܰ‌ܠܳܗܽܘܬܳܐ. ܐܰ‌ܠܳܗܳܐ ܓܶܝܪ ܐܺܝܬܰܘܗ̱ܝ ܐܰܒܳܐ܆ ܐܰ‌ܠܳܗܳܐ ܒܪܳܐ܆ ܐܰ‌ܠܳܗܳܐ ܪܽܘܚܳܐ ܩܰܕܺܝܫܳܐ܆ ܘܳܐܦܠܳܐ ܐܺܝܬܰܘܗ̱ܝ ܚܰܕ ܡܶܢܗܽܘܢ ܝܰܬܺܝܪܳܐܺܝܬ ܐܰ‌ܠܳܗܳܐ ܛܳܒ ܡܶܢ ܗܰܘ ܐ̱ܚܪܺܢܳܐ ܡܶܛܽܠ ܗܺܝܟܰܕܗܺܝܽܘܬܳܐ ܘܫܰܘܝܽܘܬ ܐܺܝܩܳܪܳܐ ܕܽܐܘܣܺܝܰܐ. ܩܢܽܘܡܐ ܕܶܝܢ܆ ܐ̱ܚܪܺܢܳܐ ܡܰܢ ܐܺܝܬܰܘܗ̱ܝ ܗܰܘ ܕܰܐܒܳܐ܆ ܐ̱ܚܪܺܢܳܐ ܕܶܝܢ ܕܰܒܪܳܐ܆ ܐ̱ܚܪܺܢܳܐ ܕܶܝܢ ܗܰܘ ܕܪܽܘܚܳܐ. ܟܽܠ ܚܰܕ ܡܶܢܗܽܘܢ ܕܶܝܢ܆ ܡܶܢ ܝܽܘܩܢܳܐ ܕܺܝܠܳܢܳܝܳܐ ܡܶܫܬܰܘܕܰܥ. ܕܺܝܠܳܝܬܳܐ ܡܰܢ ܓܶܝܪ ܕܰܐܒܳܐ ܐܰܝܟܰܢܳܐ ܕܗܳܟܰܢܳܐ ܢܺܐܡܰܪ ܐܺܝܬܶܝܗ̇ ܐܰܒܳܗܽܘܬܳܐ. ܗܳܢܰܘ ܕܶܝܢ ܗܳܝ ܕܠܰܘ ܡܶܢ ܡܶܕܶܡ ܝܺܠܺܝܕ ܐܶܠܳܐ ܠܳܐ ܝܺܠܺܝܕܳܐܺܝܬ ܐܺܝܬܰܘܗ̱ܝ. ܕܺܝܠܳܝܬܳܐ ܕܶܝܢ ܕܰܒܪܳܐ܆ ܗܳܝ ܕܡܶܢ ܐܰܒܳܐ ܝܺܠܺܝܕ܆ ܐܳܦܶܢ ܕܠܳܐ ܙܰܒܢܳܐ ܘܰܡܬܽܘܡܳܐܺܝܬ. ܕܺܝܠܳܝܬܳܐ ܕܶܝܢ ܕܪܽܘܚܳܐ ܩܰܕܺܝܫܳܐ܆ ܗܳܝ ܕܰܡܬܽܘܡܳܐܺܝܬ ܡܶܢ ܐܰܒܳܐ ܢܳܦܶܩ. ܟܬܺܝܒ ܓܶܝܪ ܒܶܐܘܰܢܓ̈ܶܠܺܝܰܐ܆ ܕܪܽܘܚܳܐ ܕܰܫܪܳܪܳܐ ܗܰܘ ܕܡܶܢ ܐܰܒܳܐ ܢܳܦܶܩ^[10]. ܘܠܳܐ ܐܰܒܳܐ ܒܪܳܐ ܐܺܝܬܰܘܗ̱ܝ ܐܰܘ ܪܽܘܚܳܐ ܩܰܕܺܝܫܳܐ܆ ܘܳܐܦ ܠܳܐ ܬܽܘܒ ܒܪܳܐ܆ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܪܽܘܚܳܐ ܐܰܘ ܐܰܒܳܐ ܢܶܥܒܰܪ ܢܫܰܢܶܐ܆ ܐܰܘ ܪܽܘܚܳܐ ܩܰܕܺܝܫܳܐ ܢܫܰܢܶܐ ܢܶܥܒܰܪ ܡܬܽܘܡ܆ ܠܘܳܬ ܕܺܝܠܳܝܽܘܬܳܐ ܗܳܝ ܕܰܒܪܳܐ ܐܰܘ ܕܰܐܒܳܐ. ܠܳܐ ܡܶܬܬܙܺܝܥܳܢ̈ܝܳܬܳܐ ܓܶܝܪ ܘܠܳܐ ܡܫܰܢ̈ܝܳܢܝܳܬܳܐ ܡܩܰܘ̈ܝܳܢ ܗܶܢܶܝܢ ܕܺܝܠ̈ܝܘܳܬܳܐ ܟܰܕ ܠܟܽܠ ܚܰܕ ܡܶܢ ܩܢܽܘܡ̈ܶܐ ܠܳܐ ܒܠܺܝܠܳܐܺܝܬ ܡܝܰܩ̈ܢܳܢ܆ ܘܟܰܕ ܠܳܐ ܡܦܰܠ̈ܓܳܢ ܠܓܰܘܳܢܳܝܽܘܬܳܐ ܕܽܐܘܣܺܝܰܐ. ܚܕܳܐ ܓܶܝܪ ܐܺܝܬܶܝܗ̇ ܐܰ‌ܠܳܗܽܘܬܳܐ ܕܰܬܠܳܬܰܝ̈ܗܽܘܢ ܩܢܽܘ̈ܡܶܐ. ܘܠܰܘ ܐܰ‌ܠܳܗܽܘܬܳܐ ܒܰܠܚܽܘܕ܆ ܐܶܠܳܐ ܐܳܦ ܬܶܫܒܽܘܚܬܳܐ ܘܳܐܦ ܡܰܠܟܽܘܬܳܐ ܘܚܰܝܠܳܐ܆ ܘܗܳܢܶܝܢ ܐ̱ܚܪ̈ܳܢܝܳܬܳܐ ܟܽܠܗܶܝܢ ܗܳܠܶܝܢ ܕܦܰܐܝ̈ܳܢ ܠܰܐܠܳܗܳܐ. ܐܺܝܬܰܘܗ̱ܝ ܓܶܝܪ ܒܪܳܐ ܟܽܠܗܶܝܢ ܕܺܐܝܬܰܘܗ̱ܝ ܐܰܒܳܐ܆ ܤܛܰܪ ܡܶܢ ܗܳܝ ܒܰܠܚܽܘܕ ܕܢܶܗܘܶܐ ܐܺܝܬܰܘܗ̱ܝ ܐܰܒܳܐ. ܗܽܘ ܗܳܟܘܳܬ ܕܶܝܢ ܐܳܦ ܠܪܽܘܚܳܐ ܩܰܕܺܝܫܳܐ܆ ܐܽܘܣܝܳܐܺܝܬ ܐܺܝܬ ܠܶܗ ܗܳܠܶܝܢ ܕܰܟܝܳܢܳܐܺܝܬ ܐܺܝܬܰܝܗܶܝܢ ܒܰܐܒܳܐ ܘܒܰܒܪܳܐ܆ ܤܛܰܪ ܡܶܢ ܐܰܒܳܗܽܘܬܳܐ ܘܰܒܪܽܘܬܳܐ. ܦܛܪܘܤ ܡܰܢ ܓܶܝܪ ܘܦܰܘܠܽܘܤ ܘܒܰܪܢܳܫܳܐ ܗܰܘ ܕܟܽܠܚܰܕ܆ ܠܰܘ ܒܰܠܚܽܘܕ ܒܰܩܢܽܘܡܳܐ܆ ܐܶܠܳܐ ܐܳܦ ܒܨܶܒܝܳܢܳܐ ܐܳܦ ܒܚܰܝܠܳܐ܆ ܘܳܐܦ ܒܙܰܒܢܳܐ ܘܳܐܦ ܒܕܽܘܟܬܳܐ ܡܶܬܦܰܠܓܺܝܢ܆ ܐܰܝܟ ܐܰܝܠܶܝܢ ܕܰܒܪ̈ܰܝܳܐ ܘܡܶܫܬܰܚ̈ܠܦܳܢܶܐ ܐܺܝܬܰܝܗܽܘܢ ܒܰܟܝܳܢܳܐ. ܬܠܺܝܬܳܝܽܘܬܳܐ ܕܶܝܢ ܩܰܕܺܝܫܬܳܐ܆ ܒܟܽܠܗܶܝܢ ܐܺܝܬܶܝܗ̇ ܠܳܐ ܡܫܰܚܠܦܳܐ ܤܛܰܪ ܡܶܢ ܗܳܝ ܕܰܡܦܰܪܫܳܐ ܒܰܩܢܽܘܡ̈ܶܐ܆ ܘܠܳܐ ܡܶܬܪܫܶܝܢ ܚ̱ܢܰܢ ܐܰܝܟ ܗܰܘ ܕܰܬܠܳܬ ܪ̈ܺܝܫܳܢܘܳܬܳܐ ܡܫܰܒܚܺܝܢ ܚ̱ܢܰܢ ܟܰܕ ܠܰܐܒܳܐ ܟܳܬܒܺܝܢ ܥܠܰܝܗܽܘܢ ܪܺܝܫܳܐ ܐܰܝܟ ܥܶܠܬܳܐ ܒܪܳܐ ܘܪܽܘܚܳܐ܆ ܘܰܠܘܳܬ ܗܰܘ ܡܶܬܥܰܠܶܝܢ. ܡܶܢܶܗ ܓܶܝܪ ܐܺܝܬܰܝܗܽܘܢ܆ ܐܳܦܶܢ ܠܰܘ ܡܶܢ ܒܳܬܰܪ ܗܰܘ ܐܺܝܬܰܝܗܽܘܢ.

ܘܠܳܐ ܐ̱ܢܳܫ ܟܰܕ ܗܳܠܶܝܢ ܫܳܡܰܥ ܢܺܐܡܰܪ܆ ܕܡܶܛܽܠ ܡܳܢܳܐ ܐܰܒܳܐ ܡܰܢ ܠܳܐ ܝܺܠܺܝܕ܆ ܒܪܳܐ ܕܶܝܢ ܝܺܠܺܝܕ܆ ܪܽܘܚܳܐ ܕܶܝܢ ܢܳܦܶܩ܆ ܘܰܕܡܳܢܳܐ ܗܝ ܗܺܝ ܝܺܠܺܝܕܽܘܬܳܐ܆ ܐܰܘ ܡܳܢܳܐ ܗܝ ܗܺܝ ܢܳܦܽܘܩܽܘܬܳܐ. ܗܳܠܶܝܢ ܓܶܝܪ܆ ܠܰܐܒܳܐ ܒܰܠܚܽܘܕܰܘܗ̱ܝ ܘܠܰܒܪܳܐ ܘܰܠܪܽܘܚܳܐ܆ ܗܰܘ ܕܟܽܘܠ ܒܳܨܶܐ܆ ܡܶܬܝܰܕܥ̈ܳܢ ܘܺܝܕܺܝ̈ܥܳܢ. ܚܢܰܢ ܕܶܝܢ ܒܰܠܚܽܘܕ ܡܶܢ ܗܳܠܶܝܢ ܫܡܳܗ̈ܶܐ܆ ܠܓܰܘܳܢܳܝܽܘܬܳܐ ܕܽܐܘܣܺܝܰܐ ܝܺܕܰܥܢ ܚ̱ܢܰܢ܆ ܘܰܠܗܳܝ ܠܚܽܘܕܳܝܬܳܐ ܕܰܩܢܽܘܡ̈ܶܐ. ܡܶܢ ܗܳܝ ܕܶܝܢ ܕܰܢܥܰܩܶܒ ܕܰܐܝܟܰܢܳܐ ܐܺܝܬܰܝܗܶܝܢ ܗܳܠܶܝܢ܆ ܐܰܝܟ ܡܰܢ ܠܳܐ ܡܶܬܩܰܕܡܳܢ̈ܝܳܬܳܐ ܡܶܫܬܰܐܠܺܝܢ ܚ̱ܢܰܢ.

ܐܶܢ ܗܳܟܺܝܠ ܦܰܪܨܽܘܦܳܐ ܡܰܢ ܕܺܝܠܶܗ ܐܰܚܺܝܕ ܐܰܒܳܐ܆ ܘܰܒܪܳܐ ܠܗܰܘ ܕܺܝܠܶܗ܆ ܘܪܽܘܚܳܐ ܩܰܕܺܝܫܳܐ ܠܗܰܘ ܕܺܝܠܶܗ܆ ܝܺܕܺܝܥܳܐ܆ ܕܠܳܐ ܐܰܒܳܐ ܐܳܦ ܠܳܐ ܪܽܘܚܳܐ ܩܰܕܺܝܫܳܐ ܐܶܬܒܰܣܰܪ ܘܶܐܬܒܰܪܢܰܫ ܡܶܛܽܘܠܳܬܰܢ܆ ܐܶܠܳܐ ܗܰܘ ܝܺܚܺܝܕܳܝܳܐ ܒܪܳܐ. ܗܰܘ ܡܶܠܬܳܐ ܐܰ‌ܠܳܗܳܐ. ܗܰܘ ܨܰܠܡܳܐ ܕܰܐ‌ܠܳܗܳܐ ܘܰܐܒܳܐ ܠܳܐ ܡܶܬܚܰܙܝܳܢܳܐ^[11]܆ ܨܰܠܡܳܐ ܕܶܝܢ܆ ܐ̱ܚܪܺܢܳܐ ܡܶܢ ܟܰܕܽܘ ܐܺܝܬܰܘܗ̱ܝ ܡܶܢ ܗܰܘ ܕܕܺܝܠܶܗ ܐܺܝܬܰܘܗ̱ܝ ܨܰܠܡܳܐ. ܡܶܠܬܐ ܓܶܝܪ ܒܶܣܪܳܐ ܗܘ̣ܳܐ܆ ܘܰܐܓܶܢ ܒܰܢ^[12] ܐܰܝܟ ܒܰܪ̱ܬ ܩܳܠܶܗ ܕܝܽܘܚܰܢܳܢ. ܟܰܕ ܕܫܳܠ̈ܡܳܢ ܠܰܕܗܳܢܳܐ ܟܳܬܶܒ ܗ̱ܘܳܐ ܦܰܘܠܽܘܤ ܐܳܡܰܪ. ܟܰܕ ܕܶܝܢ ܐܶܬܳܐ ܡܽܘܠܳܝܶܗ ܕܙܰܒܢܳܐ܆ ܫܰܕܰܪ ܐܰ‌ܠܳܗܳܐ ܠܰܒܪܶܗ ܘܰܗܘ̣ܳܐ ܡܶܢ ܐܰܢ̱ܬܬܳܐ. ܗܘ̣ܳܐ ܬܚܶܝܬ ܢܳܡܽܘܣܳܐ^[13]. ܡܶܛܽܠ ܗܳܟܺܝܠ ܕܟܰܕ ܗܽܘ ܒܪܳܐ܆ ܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܶܬܒܰܠܒܠܳܢܳܐܺܝܬ ܘܒܰܫܪܳܪܳܐ ܘܰܤܛܰܪ ܡܶܢ ܟܽܠܳܗ̇ ܦܰܢܛܰܣܺܝܰܐ ܗܘ̣ܳܐ ܒܰܪܢܳܫܳܐ܆ ܩܰܘܺܝ ܘܠܳܐ ܡܶܕܶܡ ܒܨܺܝܪ ܐܰ‌ܠܳܗܳܐ ܘܰܫܩܰܠ ܦܰܓܪܳܐ ܡܶܢ ܩܰܕܺܝܫܬܳܐ ܝܳܠܕܰܬ ܠܰܐܠܳܗܳܐ ܘܰܒܬܽܘܠܰܬ ܒܟܽܠ ܙܒܰܢ ܡܰܪܝܰܡ ܕܢܰܦܫܳܐ ܐܺܝܬ ܠܶܗ ܗܳܝ ܝܰܕܽܘܥܬܳܢܺܝܬܳܐ܆ ܘܶܐܬܚܰܝܰܕ ܠܶܗ ܩܢܽܘܡܳܐܺܝܬ܆ ܘܺܐܝܬܰܘܗ̱ܝ ܗܽܘ ܟܰܕ ܗܽܘ ܒܰܪ ܟܝܳܢܳܐ ܡܰܢ ܕܰܐܒܳܐ ܒܰܐܠܳܗܽܘܬܳܐ܆ ܒܰܪ ܟܝܳܢܳܐ ܕܶܝܢ ܕܺܝܠܰܢ ܗܽܘ ܟܰܕ ܗܽܘ ܒܐܢܳܫܽܘܬܳܐ܆ ܘܚܰܕ ܐܺܝܬܰܘܗ̱ܝ ܡܶܢ ܬܪܶܝܢ ܟܝܳܢ̈ܶܐ ܕܰܐ‌ܠܳܗܽܘܬܳܐ ܘܰܕܐ̱ܢܳܫܽܘܬܳܐ܆ ܡܶܛܽܠ ܗܳܢܳܐ ܟܰܕ ܡܰܘܕܶܝܢܰܢ ܘܰܡܫܰܒܚܺܝܢ ܚ̱ܢܰܢ ܠܶܗ܆ ܘܛܳܒ ܡܶܬܕܰܡܪܺܝܢ ܚ̱ܢܰܢ ܒܰܫܒܺܝܚܽܘܬܶܗ ܕܐ̱ܪܳܙܳܐ. ܕܳܐܦ ܟܰܕ ܐܶܬܢܰܚܰܬ ܒܡܶܬܒܰܪܢܫܳܢܽܘܬܳܐ ܘܣܰܪܶܩ ܗܽܘ ܠܶܗ^[14]܆ ܠܳܐ ܐܰܪܚܶܩ ܡܶܢ ܗܳܝ ܕܢܶܗܘܶܐ ܐܺܝܬܰܘܗ̱ܝ ܡܰܠܝܳܐ܆ ܘܠܳܐ ܐܰܘܒܶܕ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰ‌ܠܳܗܳܐ܆ ܐܶܠܳܐ ܝܰܬܺܝܪܳܐܺܝܬ ܚܰܘܺܝ ܕܺܐܝܬܰܘܗ̱ܝ ܗܳܕܶܐ ܒܝܰܕ ܗܳܝ ܕܰܗܘ̣ܳܐ ܠܳܐ ܡܶܫܬܰܚܠܦܳܢܳܐܺܝܬ ܒܰܪ ܐ̱ܢܳܫܐ܆ ܘܰܠܙܰܗܪ̈ܶܐ ܕܰܐ‌ܠܳܗܽܘܬܳܐ ܠܳܐ ܐܰܥܡܶܛ܆ ܐܶܠܳܐ ܕܡܰܥܒܶܕ ܐܰܝܠܶܝܢ ܕܦܰܐܝ̈ܳܢ ܠܰܐܠܳܗܳܐ܆ ܘܐ̱ܢܳܫܳܐܺܝܬ ܗܽܘ ܟܰܕ ܗܽܘ ܠܗܳܠܶܝܢ ܕܰܡܕܰܒܪܳܢܽܘܬܳܐ ܡܶܛܽܠ ܦܽܘܪܩܳܢܰܢ ܢܳܦܶܩ܆ ܡܰܣܩܺܝܢ ܚ̱ܢܰܢ ܠܶܗ ܫܽܘܒܚܳܐ ܘܳܐܡܪܺܝܢܰܢ܆ ܩܰܕܺܝܫ ܐܰܢ̱ܬ ܐܰ‌ܠܳܗܳܐ.

ܕܡܶܛܽܠ ܕܶܝܢ ܕܗܽܘ ܟܰܕ ܗܽܘ ܒܗܳܝ ܕܰܗܘ̣ܳܐ ܒܰܪܢܳܫܳܐ܆ ܠܟܽܘܪ̈ܗܳܢܰܘܗ̱ܝ ܕܒܶܣܪܳܐ ܨܶܒܝܳܢܳܐܺܝܬ ܩܰܒܶܠ܆ ܠܨܰܥܪ̈ܶܐ܆ ܠܫܽܘܩܳܦ ܦܰܟ̈ܶܐ܆ ܠܢܶܓ̈ܕܶܐ܆ ܠܰܙܩܺܝܦܳܐ܆ ܘܰܠܟܽܠܗܶܝܢ ܕܢܳܩ̈ܦܳܢ ܠܗܳܠܶܝܢ܆ ܘܕܰܬܚܶܝܬ ܩܛܺܐܓܪܳܢܽܘܬܳܐ ܠܳܐ ܢܳܦ̈ܠܳܢ. ܘܰܒܗܳܠܶܝܢ ܚܰܘܺܝ ܕܺܐܝܬܰܘܗ̱ܝ ܚܰܝܠܬܳܢܳܐ܆ ܒܗܳܠܶܝܢ ܕܕܳܡܝܳܐ ܗ̱ܘܳܬ ܕܺܐܝܬ ܠܡܶܬܟܪܳܗܽܘ܆ ܐܶܬܚܙܺܝ ܓܶܝܪ ܐܰܝܟ ܐܰܝܢܳܐ ܕܰܐ‌ܠܳܗܳܐ ܐܺܝܬܰܘܗ̱ܝ ܒܰܟܝܳܢܳܐ܆ ܠܳܐ ܡܶܬܬܨܺܝܕܳܢܳܐ ܡܶܢ ܚܰܫ̈ܶܐ܆ ܘܰܒܝܰܕ ܗܳܠܶܝܢ ܐܶܣܰܪ ܠܗܰܘ ܕܡܶܛܽܘܠ ‌ܐܽܘܚܕܳܢܳܐ ܕܰܚܛܺܝܬܳܐ ܚܰܝܠܬܳܢ ܗ̱ܘܳܐ. ܘܠܰܢ ܕܺܐܝܬܰܝܢ ܗ̱ܘܰܝܢ ܡܳܐܢܰܘܗ̱ܝ ܚܛܰܦ^[15]܆ ܐܰܝܟ ܦܪ̈ܺܝܩܶܐ ܡܶܟܺܝܠ ܕܡܶܢ ܫܽܘܥܒܳܕܶܗ ܕܳܐܟܶܠ ܩܰܪܨܳܐ܆ ܠܗܰܘ ܚܰܝܠܬܳܢܳܐ ܕܰܙܟܳܐ ܠܣܳܛܳܢܳܐ ܗܰܘ ܕܰܥܠܰܝܢ ܐܶܬܚܰܝܰܠ܆ ܘܡܶܢ ܫܶܒܝܳܐ ܚܰܪܰܪ ܠܰܢ܆ ܐܳܡܪܺܝܢ ܚ̱ܢܰܢ ܩܰܕܺܝܫ ܐܰܢ̱ܬ ܚܰܝܠܬܳܢܳܐ. ܠܗܰܘ ܕܳܐܦ ܐܶܫܰܥܝܳܐ ܗܰܘ ܪܳܡ ܩܳܠܳܐ ܕܰܢܒܺܝ̈ܶܐ܆ ܗܳܝܕܶܝܢ ܝܰܬܺܝܪܳܐܺܝܬ ܝܰܕܥܶܗ ܐܰ‌ܠܳܗܳܐ ܚܰܝܠܬܳܢܳܐ܆ ܟܰܕ ܠܰܡܚܺܝܠܽܘܬܳܐ ܕܡܶܛܽܠܳܬܰܢ ܩܰܒܶܠ܆ ܘܰܕܢܶܬܒܰܣܰܪ ܐܶܨܛܒܺܝ. ܡܳܢܳܐ ܓܶܝܪ ܐܶܡܰܪ. ܕܛܰܠܝܳܐ ܐܶܬܺܝܠܶܕ ܠܰܢ. ܒܪܳܐ ܘܶܐܬܺܝܗܶܒ ܠܰܢ. ܗܰܘ ܕܫܽܘܠܛܳܢܶܗ ܥܰܠ ܟܰܬܦܶܗ. ܘܡܶܬܩܪܶܐ ܫܡܶܗ܆ ܡܰܠܰܐܟܳܐ ܕܬܰܪܥܺܝܬܳܐ ܪܰܒܬܳܐ. ܡܳܠܽܘܟܳܐ ܬܗܺܝܪܳܐ. ܐܰ‌ܠܳܗܳܐ ܚܰܝܠܬܳܢܳܐ. ܫܰܠܺܝܛܳܐ. ܪܺܝܫܳܐ ܕܰܫܠܳܡܳܐ^[16]. ܐܰܒܳܐ ܕܥܳܠܡܳܐ ܕܰܥܬܺܝܕ ܗܳܢܳܐ.

ܘܟܰܕ ܒܒܶܣܪܳܐ ܐܶܬܥܰܪܙܰܠ ܥܰܡ ܡܰܘܬܳܐ܆ ܘܰܢܚܶܬ ܥܕܰܡܳܐ ܘܳܐܦ ܠܗܽܘܢ ܠܬܰܪ̈ܥܶܐ ܕܰܫܝܽܘܠ܆ ܩܳܡ ܠܝܰܘܡܳܐ ܕܰܬܠܳܬܳܐ ܟܰܕ ܫ̣ܪܳܐ ܚܒ̈ܳܠܰܘܗ̱ܝ ܕܡܰܘܬܳܐ܆ ܡܶܛܽܠ ܕܠܳܐ ܡܶܫܟܚܳܐ ܗ̱ܘܳܬ ܕܢܶܬܠܒܶܟ ܡܶܢܶܗ^[17] ܐܰܝܟܕܰܫܠܺܝܚܳܐ ܦܛܪܘܤ ܐܶܡܰܪ܆ ܐܺܝܬܰܘܗ̱ܝ ܗ̱ܘܳܐ ܓܶܝܪ ܠܳܐ ܡܳܝܽܘܬܳܐ ܒܰܟܝܳܢܳܐ܆ ܐܳܦܶܢ ܒܦܰܓܪܳܐ ܗܰܘ ܕܰܡ̣ܟܳܢ ܠܡܶܚܰܫ ܘܠܰܡܡܳܬ̣܆ ܠܗܳܝ ܕܢܶܚܰܫ ܩܰܒܶܠ܆ ܡܶܛܽܠ ܕܳܐܦܠܳܐ ܐܺܝܬ ܗ̱ܘܳܐ ܕܰܐ̱ܚܪܳܢܝܳܐܺܝܬ ܢܶܩܪܰܒ ܠܶܗ ܡܰܘܬܳܐ܆ ܠܗܰܘ ܗܳܟܺܝܠ ܕܰܒܢܶܣܝܳܢܳܐ ܚܙܰܝܢ ܕܠܳܐ ܡܳܝܽܘܬܳܐܺܝܬ ܒܡܰܘܬܳܐ ܗܘ̣ܳܐ܆ ܠܗܳܢܳܐ ܟܰܕ ܡܫܰܒܚܺܝܢ ܚ̱ܢܰܢ ܐܳܡܪܺܝܢ ܚ̱ܢܰܢ܆ ܗܳܝ ܕܩܰܕܺܝܫ ܐܰܢ̱ܬ ܠܳܐ ܡܳܝܽܘܬܳܐ.

ܐܰܝܟܰܢܳܐ ܕܶܝܢ ܕܒܰܐܓܽܘ̈ܢܶܐ ܗܳܢܽܘܢ ܕܰܒܕܰܐܪ̈ܶܐ܆ ܠܗܰܘ ܡܬܰܚܡܺܝܢ ܚ̱ܢܰܢ ܐܰܬܠܺܝܛܳܐ ܢܰܨܺܝܚܳܐ܆ ܠܗܰܘ ܕܝܰܗ̱ܒ ܠܒܽܘܟ̈ܝܶܐ ܠܗܰܘ ܒܥܶܠ ܕܰܪܶܗ܆ ܘܰܒܦܽܘܪ̈ܟܳܠܶܐ ܠܳܐ ܡܶܫܬܰܪ̈ܝܳܢܶܐ ܘܚܰܝ̈ܠܬܳܢܶܐ ܐܰܣܺܝܪ. ܘܡܶܣܬܒܰܪ ܕܗܳܐ ܡܶܢ ܟܰܕܽܘ ܢܰܚܺܝܬ̣ ܠܰܐܪܥܳܐ܆ ܘܒܰܡܫܰܪܬܚܽܘܬܳܐ ܕܽܐܘܡܳܢܽܘܬܶܗ ܟܺܝܬ ܘܰܕܚܰܝܠܶܗ ܫܳܪܶܐ ܠܗܽܘܢ ܠܰܐܣܽܘܪ̈ܶܐ܆ ܘܰܠܥܶܠ ܡܶܢ ܒܥܶܠܕܰܪܶܗ ܗܳܘܶܐ܆ ܗܳܟܰܢܳܐ ܐܳܦ ܒܥܰܡܰܢܽܘܐܶܝܠ ‌ܐܶܬܕܰܡܰܪܢܰܢ܆ ܕܟܰܕ ܒܰܨܠܺܝܒܳܐ ܐܶܬܩܒܰܥ ܘܰܡܣܰܟܰܟ ܗ̱ܘܳܐ ܒܺܐܝܕܰܘ̈ܗ̱ܝ ܘܰܒܪ̈ܶܓܠܰܘܗ̱ܝ ܘܰܠܡܰܘܬܳܐ ܐܶܫܬܠܶܡ܆ ܘܕܰܐܡܺܝܢܳܐܺܝܬ ܥܬܺܝܕ ܗ̱ܘܳܐ ܕܢܶܬܚܒܶܫ ܒܚ̈ܶܙܶܐ ܗܳܢܽܘܢ ܕܰܬܚܶܝܬ ܐܰܪܥܳܐ ܘܠܳܐ ܡܶܫܬܰܪܝܳܢܳܐܺܝܬ ܡܶܣܬܒܰܪ ܗ̱ܘܳܐ܆ ܡܶܢ ܐܳܟܶܠ ܩܰܪܨܳܐ ܘܡܶܢ ܚܰܝ̈ܠܰܘܳܬܳܐ ܒܺܝ̈ܫܶܐ ܗܳܢܽܘܢ ܕܰܬܚܽܘܬܰܘܗ̱ܝ܆ ܒܰܨܠܺܝܒܳܐ ܡܰܢ ܠܶܗ ܠܣܳܛܳܢܳܐ ܘܰܠܪ̈ܽܘܚܶܐ ܗܳܠܶܝܢ ܐܴܐܰܪ̈ܳܝܳܬܳܐ ܥܩܰܪ ܘܰܣܚܰܦ܆ ܒܰܫܝܽܘܠ ܕܶܝܢ ܠܬܰܪ̈ܥܶܐ ܕܰܢܚܳܫܳܐ ܬܰܒܰܪ ܘܰܠܡܽܘܟ̈ܠܶܐ ܕܦܰܪܙܠܳܐ ܪܰܥܪܰܥ^[18]܆ ܬܰܪ̈ܥܶܐ ܓܶܝܪ ܕܰܫܝܽܘܠ ‌ܐܰܝܟ ܕܰܟܬܺܝܒ ܟܰܕ ܚܙܰܐܘܗ̱ܝ ܪܥܶܠܘ. ܡܶܛܽܠ ܗܳܕܶܐ ܐܳܦ ܠܶܗ ܠܰܙܢܳܐ ܕܡܰܘܬܳܐ ܡܰܘܕܥܺܝܢ ܚ̱ܢܰܢ܆ ܠܗܰܘ ܕܰܒܝܰܕ ܨܠܺܝܒܳܐ ܐܳܡܰܪ ܐ̱ܢܳܐ܆ ܟܰܕ ܠܰܡܫܰܪܬܚܽܘܬܳܐ ܕܚܰܝܠܶܗ ܡܚܰܘܶܝܢ ܚ̱ܢܰܢ܆ ܘܥܰܡ ܦܰܪܶܗ̱ܣܺܝܰܐ ܐܳܡܪܺܝܢ ܚ̱ܢܰܢ܆ ܩܰܕܺܝܫܳܐ ܠܳܐ ܡܳܝܽܘܬܳܐ܆ ܗܰܘ ܕܶܐܨܛܠܶܒܬ ܡܶܛܽܠܳܬܰܢ ܐܶܬܪܰܚܰܡ ܥܠܰܝܢ. ܗܳܟܰܢܳܐ ܗܳܟܺܝܠ ܥܰܡ ܦܰܘܠܽܘܤ܆ ܕܦܰܪܣܺܝ ܠܪ̈ܺܝܫܳܢܘܳܬܳܐ ܒܺܝ̈ܫܳܬܳܐ ܘܰܠܫܽܘܠ̈ܛܳܢܶܐ^[19] ܐܳܡܰܪ ܠܶܗ܆ ܐܰܝܟ ܐܰܝܢܳܐ ܕܨܶܒܝܳܢܳܐܺܝܬ ܐܶܬܪܡܺܝ ܕܢܶܗܘܶܐ ܬܚܶܝܬ ܐܰܣܽܘܪ̈ܶܐ ܕܺܝܠܗܽܘܢ܆ ܘܠܰܐܣܽܘܪ̈ܶܐ ܣܰܕܶܩ.

ܗܳܕܶܐ ܗܳܟܺܝܠ ܬܶܫܒܽܘܚܬܳܐ ܥܰܠ ܝܺܚܺܝܕܳܝܳܐ ܕܰܐ‌ܠܳܗܳܐ ܡܶܠܬܳܐ ܗܰܘ ܕܡܶܛܽܠܳܬܰܢ ܐܶܬܒܰܣܰܪ ܘܶܐܬܒܰܪܢܰܫ ܡܶܬܐܰܡܪܳܐ. ܕܳܐܦ ܐܰܒܳܐ ܡܰܢ ܓܶܝܪ܆ ܐܺܝܬܰܘܗ̱ܝ ܒܰܟܝܳܢܳܐ ܐܰ‌ܠܳܗܳܐ ܘܚܰܝܠܬܳܢܳܐ ܘܠܳܐ ܡܳܝܽܘܬܳܐ܆ ܗܽܘ ܗܳܟܘܳܬ ܕܶܝܢ ܐܳܦ ܪܽܘܚܳܐ ܩܰܕܺܝܫܳܐ܆ ܠܟܽܠܢܳܫ ܝܺܕܺܝܥܳܐ. ܐܶܠܳܐ ܟܰܕ ܠܘܳܬ ܚܰܣܺܝܪܽܘܬ ܗܰܘܢܳܐ ܕܚܰܢ̈ܦܶܐ ܘܠܳܐ ܗܰܝܡܳܢܽܘܬܳܐ ܕܝܽܗ̱ܘ̈ܕܳܝܶܐ ܕܰܠܩܽܘܒܠܳܐܺܝܬ ܩܳܝܡܺܝܢܰܢ܆ ܗܳܢܽܘܢ ܕܫܳܛܝܽܘܬܳܐ ܘܟܶܫܠܳܐ ܐܺܝܬܰܘܗ̱ܝ ܠܗܽܘܢ ܨܠܺܝܒܳܐ^[20]܆ ܐܳܡܪܺܝܢ ܚ̱ܢܰܢ. ܩܰܕܺܝܫܳܐܐܰ‌ܠܳܗܳܐ ܗܰܘ ܕܡܶܛܽܠܳܬܰܢ ܗܘ̣ܳܐ ܒܰܪܢܳܫܳܐ ܠܳܐ ܡܶܫܬܰܚܠܦܳܢܳܐܺܝܬ܆ ܘܩܰܘܺܝ ܐܰ‌ܠܳܗܳܐ. ܩܰܕܺܝܫܳܐܚܰܝܠܬܳܢܳܐ܆ ܗܰܘ ܕܒܰܡܚܺܝܠܽܘܬܳܐ܆ ܠܰܡܥܰܠܝܽܘܬܳܐ ܕܚܰܝܠܬܳܢܽܘܬܳܐ ܚܰܘܺܝܬ̊. ܩܰܕܺܝܫܳܐ ܠܳܐ ܡܳܝܽܘܬܳܐ ܗܰܘ ܕܶܐܨܛܠܶܒܬ ܡܶܛܽܠܳܬܰܢ܆ ܗܰܘ ܕܰܠܡܰܘܬܳܐ ܕܰܒܝܰܕ ܨܠܺܝܒܳܐ ܣܰܝܒܰܪܬ ܒܰܒܣܰܪ܆ ܘܚܰܘܺܝܬ̊ ܕܳܐܦ ܟܰܕ ܒܡܰܘܬܳܐ ܗܘ̣ܰܝܬ ܐܺܝܬܰܝܟ ܠܳܐ ܡܳܝܽܘܬܳܐ.

ܣܰܓܺܝ ܗܳܟܺܝܠ ܚܳܫܚܳܐܺܝܬ ܡܶܛܽܠ ܠܳܐ ܡܗܰܝܡ̈ܢܶܐ܆ ܠܰܒܪܳܐ ܐܳܡܪܺܝܢܰܢ ܕܣܳܠܩܳܐ ܬܶܫܒܽܘܚܬܳܐ ܗܳܕܶܐ. ܐܰܒܳܐ ܓܶܝܪ ܘܪܽܘܚܳܐ ܩܰܕܺܝܫܳܐ܆ ܘܠܳܐ ܒܐܢܳܫܽܘܬܳܐ ܘܠܳܐ ܒܰܡܚܺܝܠܽܘܬܳܐ ܘܠܳܐ ܒܡܰܘܬܳܐ ܗܘ̣ܰܘ ܡܬܽܘܡ. ܝܺܚܺܝܕܳܝܳܐ ܕܶܝܢ ܡܶܠܬܶܗ ܕܰܐ‌ܠܳܗܳܐ ܗܰܘ ܕܶܐܬܒܰܣܰܪ܆ ܨܶܒܝܳܢܳܐܺܝܬ ܗܳܠܶܝܢ ܩܰܒܶܠ ܥܠܰܘܗ̱ܝ. ܘܟܰܕ ܒܗܳܠܶܝܢ ܕܰܠܩܽܘܒܠܳܐ ܗܘ̣ܳܐ܆ ܝܰܬܺܝܪ ܕܢܺܝܚܳܐܺܝܬ ܚܰܘܺܝ܆ ܕܺܐܝܬܰܘܗ̱ܝ ܐܰ‌ܠܳܗܳܐ ܠܳܐ ܚܳܫܽܘܫܳܐ ܘܚܰܝܠܬܳܢܳܐ ܘܠܳܐ ܡܳܝܽܘܬܳܐ. ܡܶܛܽܠ ܗܳܕܶܐ ܕܶܝܢ ܬܠܳܬ ܙܰܒ̈ܢܳܬܳܐ ܡܩܰܪܒܺܝܢܰܢ ܘܡܰܣܩܺܝܢ ܚ̱ܢܰܢ ܠܶܗ ܗܳܝ ܕܩܰܕܺܝܫܳܐ ܐܰܢ̱ܬ܆ ܐܰܝܟܰܢܳܐ ܕܰܢܚܰܘܶܐ ܕܠܰܘ ܐ̱ܚܪܺܢܳܐ ܐܺܝܬܰܘܗ̱ܝ ܠܒܰܪ ܡܶܢ ܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܕܰܐܝܟ ܚܕܳܐ ܡܶܢ ܒܶܪ̈ܝܳܬܳܐ ܒܰܡܫܰܘܬܦܽܘܬܳܐ ܥܰܬܪܳܗ̇ ܠܩܰܕܺܝܫܽܘܬܳܐ܆ ܒܗܳܝ ܕܒܟܰܝܳܢܳܐ ܐܺܝܬܰܘܗ̱ܝ ܩܰܕܺܝܫܳܐ ܐܰܝܟ ܐܰ‌ܠܳܗܳܐ܆ ܐܶܠܳܐ ܚܰܕ ܐܺܝܬܰܘܗ̱ܝ ܡܶܢ ܗܳܢܽܘܢ ܬܠܳܬܳܐ ܩܢܽܘܡ̈ܶܐ܆ ܗܳܢܽܘܢ ܕܡܶܢܗܽܘܢ ܐܺܝܬ ܠܰܐ̱ܚܪ̈ܳܢܶܐ ܗܳܝ ܕܢܶܬܩܰܕܫܽܘܢ܆ ܘܰܕܫܽܘܒܚܶܗ ܕܰܒܪܳܐ܆ ܫܽܘܒܚܳܐ ܕܰܐܒܳܐ ܘܰܕܪܽܘܚܳܐ ܩܰܕܺܝܫܳܐ ܐܺܝܬܰܘܗ̱ܝ. ܕܗܳܢܽܘܢ ܓܶܝܪ ܕܽܐܘܣܺܝܰܐ ܚܕܳܐ ܗܝ܆ ܕܗܳܠܶܝܢ ܐܳܦ ܫܽܘܒܚܳܐ ܚܰܕ ܐܺܝܬܰܘܗ̱ܝ. ܘܗܰܘ ܕܰܡܫܰܒܰܚ ܠܚܰܕ ܡܶܢ ܗܳܠܶܝܢ ܬܠܳܬܳܐ ܩܢܽܘܡ̈ܶܐ܆ ܘܠܳܐ ܣܳܟ ܠܗܳܢܽܘܢ ܬܪܶܝܢ ܐ̱ܚܪ̈ܳܢܶܐ ܡܶܢ ܡܡܰܠܠܽܘܬ ܫܽܘܒܚܳܐ ܦܪܰܫ. ܒܰܡܡܰܠܠܽܘܬ ܫܽܘܒܚܳܐ ܓܶܝܪ ܗܳܝ ܕܰܒܪܳܐ ܐܺܝܬܶܝܗ̇ ܡܡܰܠܠܽܘܬ ܫܽܘܒܚܳܐ ܗܳܝ ܕܰܐܒܳܐ܆ ܐܳܦ ܗܳܝ ܕܪܽܘܚܳܐ ܩܰܕܺܝܫܳܐ.

ܠܳܐ ܐ̱ܢܳܫ ܗܳܟܺܝܠ ܡܶܢ ܠܳܐ ܝܰܠܺܝܦܽܘܬܳܐ ܢܺܐܡܰܪ܆ ܕܗܳܝ ܡܰܢ ܕܩܰܕܺܝܫ ܐܰܢ̱ܬ ܐܰ‌ܠܳܗܳܐ ܠܳܚܡܳܐ ܠܰܐܒܳܐ܆ ܗܳܝ ܕܶܝܢ ܕܩܰܕܺܝܫ ܐܰܢ̱ܬ ܚܰܝܠܬܳܢܳܐ ܠܰܒܪܳܐ܆ ܗܳܝ ܕܶܝܢ ܕܩܰܕܺܝܫ ܐܰܢ̱ܬ ܠܳܐ ܡܳܝܽܘܬܳܐ ܠܪܽܘܚܳܐ ܩܰܕܺܝܫܳܐ܆ ܐܰܝܟܰܢܳܐ ܕܬܶܣܬܒܰܪ ܕܰܪܒܺܝܥܳܝܳܐ ܐ̱ܢܳܫ ܗܰܘ ܕܶܐܨܛܠܶܒ ܡܶܬܬܰܘܣܰܦ ܡܶܬܡܢܶܐ ܥܰܠ ܬܠܺܝܬܳܝܽܘܬܳܐ ܩܰܕܺܝܫܬܳܐ. ܐܶ‌ܠܽܘ ܓܶܝܪ ܒܕܰܐܝܟ ܗܳܕܶܐ ܬܰܪܥܺܝܬܳܐ ܡܶܬܰܐܡܪܳܐ ܗ̱ܘܳܬ ܡܶܢܰܢ ܗܳܕܶܐ܆ ܡܶܢ ܟܽܠ ܦܪܽܘܤ ܡܩܰܒܠܺܝܢ ܗ̱ܘܰܘ܆ ܐܳܦ ܡܥܰܕܪ̈ܳܢܶܐ ܗܳܢܽܘܢ ܕܕܽܘܓܡ̈ܰܐܛܰܐ ܡܣܰܝ̈ܒܶܐ ܕܢܶܣܛܽܘܪܺܝܽܘܤ܆ ܘܕܰܬܪܶܝܢ ܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ ܐܳܡܪܺܝܢ ܠܶܗ ܠܚܰܕ ܡܫܺܝܚܳܐ. ܐܶܠܳܐ ܟܰܕ ܝܳܕܥܺܝܢ ܚܰܬܺܝܬ̣ܳܐܺܝܬ ܕܰܠܗܰܘ ܕܶܐܨܛܠܶܒ ܡܫܰܒܚܺܝܢܰܢ ܐܰܝܟ ܕܰܠܠܳܐ ܡܳܝܽܘܬܳܐ܆ ܟܰܕ ܚܰܕ ܐܺܝܬܰܘܗ̱ܝ ܐܰܝܟܰܢܳܐ ܕܶܐܡܰܪܢܰܢ ܡܶܢ ܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܡܶܬܢܰܟܬܺܝܢ. ܘܡܶܬܥܰܣܩܺܝܢ܆ ܘܰܒ̈ܢܳܬ ܩ̈ܳܠܶܐ ܡܓܰܕܦܳܢ̈ܝܳܬܳܐ ܟܳܫܛܺܝܢ ܐܳܦ ܠܘܳܬܶܗ ܕܰܫܡܰܝܳܐ܆ ܘܚܰܕܬܳܐ ܩܳܪܶܝܢ ܠܶܗ ܠܣܽܘܥܪܳܢܳܐ܆ ܐܳܦ ܕܣܰܓܺܝ ܐܺܝܬ ܠܗܽܘܢ ܒܥܶܠܕܒܳܒܽܘܬܳܐ ܘܣܶܢܐܬܳܐ ܠܘܳܬ ܗܳܝ ܕܺܐܝܬܶܝܗ̇ ܚܕܰܬܳܐ ܐܳܡܪܺܝܢ. ܟܰܕ ܛܰܥܝܳܐ ܠܗܽܘܢ ܠܰܡ̈ܡܰܠܠܰܝ ܣܪ̈ܺܝܩܳܬܳܐ ܘܰܕܡܶܢ ܐܰܪܥܳܐ ܩܳܥܶܝܢ ܐܰܝܟܰܢܳܐ ܕܶܐܫܰܥܝܳܐ ܢܒܺܝܳܐ ܐܳܡܰܪ܆ ܕܠܰܘ ܟܽܠܗܽܘܢ ܥ̈ܝܳܕܶܐ ܕܥܺܕܬܳܐ܆ ܡܶܢ ܡܰܫ̈ܠܡܳܢܘܳܬܳܐ ܫܠܺܝ̈ܚܳܝܳܬܳܐ ܐܶܬܰܘ ܠܘܳܬܰܢ܆ ܐܶܠܳܐ ܐܺܝܬ ܐܰܝܠܶܝܢ ܕܳܐܦ ܒܰܫܟܳܚ̈ܳܬܳܐ ܟܺܝܬ ܕܒܺܐܝܕܳܐ ܒܺܐܝܕܳܐ ܘܰܒܫܽܘܘ̈ܫܳܛܶܐ܆ ܒܟܽܠܳܗ̇ ܗܳܝ ܕܰܬܚܶܝܬ ܫܡܰܝܳܐ ܥܒܰܪܘ܆ ܘܩܰܕܡܳܝܬܳܐ ܗܝ ܗܳܝ ܕܰܟܪ̈ܶܝܣܛܝܳܢܶܐ ܢܶܫܬܰܡܰܗ ܡܶܢ ܒܳܬܰܪ ܫܢܰܝ̈ܳܐ ܣܰܓܺܝ̈ܳܐܬܳܐ ܕܶܐܬܟܪܶܙ ܐܶܘܰܢܓܶܠܺܝܽܘܢ܆ ܕܟܰܕ ܡܶܢ ܗܳܕܶܐ ܥܺܕܬܳܐ ܕܰܐܢܛܝܘܟܳܝ̈ܶܐ ܫܰܪܝܰܬ܆ ܠܰܢ ܗܳܢܽܘܢ ܕܰܒܟܽܠ ܕܽܘܟ ܕܰܐܪܥܳܐ܆ ܠܥܰܡܳܐ ܩܰܕܺܝܫܳܐ ܚܶܒܫܰܬ.

ܘܰܐܝܟܰܢܳܐ ܕܰܠܣܰܓܺܝ̈ܳܐܬܳܐ ܐܶ݀ܫܒܽܘܩ܆ ܠܰܚܕܳܐ ܐܰܘ ܬܰܪܬܶܝܢ ܐܶܬܥܗܰܕ ܥܺܐܕܳܐ ܘܚܰܓܳܐ ܗܳܢܳܐ ܕܽܐܘܪܥܳܐ܆ ܗܰܘ ܕܰܡܥܰܕܥܕܺܝܢ ܒܽܐܘܪܫܠܶܡ ܘܰܒܟܽܠܳܗ̇ ܦܠܐܤܛܝܢܝ܆ ܟܰܕ ܥܽܘܗܕܳܢܳܐ ܡܫܰܡܠܶܝܢ ܕܝܰܘܡܳܐ ܗܰܘ ܕܒܶܗ ܫܶܡܥܽܘܢ ܠܰܡܫܺܝܚܳܐ ܥܰܠ ܕܪ̈ܳܥܰܘܗ̱ܝ ܩܰܒܶܠ܆ ܟܰܕ ܠܢܳܡܽܘܣܳܐ ܡܡܰܠܶܐ ܗ̱ܘܳܐ܆ ܘܰܠܕܶܒܚܬܳܐ ܗܳܝ ܕܰܒܝܰܕ ܡܽܘܫܶܐ ܦܩܺܝܕܳܐ ܗ̱ܘܳܬ ܡܩܰܪܶܒ ܗ̱ܘܳܐ܆ ܐܳܦ ܕܟܰܕ ܐܶܫܬܰܘܕܥܶܗ ܕܳܐܦ ܐܰ‌ܠܳܗܳܐ ܐܺܝܬܰܘܗ̱ܝ ܒܰܟܝܳܢܳܐ ܐܶܡܰܪ܆ ܗܳܫܳܐ ܫܳܪܶܐ ܐܰܢ̱ܬ ܠܶܗ ܠܥܰܒܕܳܟ ܡܳܪܝ ܐܰܝܟ ܡܶܠܬܳܟ ܒܫܰܝܢܳܐ^[21]܆ ܒܰܡܕܺܝܢ̱ܬܳܐ ܗܳܝ ܡܰܠܟܳܝܬܳܐ ܠܳܐ ܡܶܫܬܰܡܠܶܐ ܗ̱ܘܳܐ. ܗܳܫܳܐ ܕܶܝܢ ܒܪܰܡ ܐܳܦ ܗܳܝ ܒܰܥܝܳܕܳܐ ܗܰܘ ܕܰܠܘܳܬ ܐ̱ܚܪ̈ܳܢܶܐ ܫܰܦܺܝܪ ܐܶܬܠܒܶܟ ܛܶܢܰܬ܆ ܘܠܳܐ ܐܶܬܥܰܕܠܰܬ ܣܳܟ ܐܰܘ ܪܶܫܰܬ̣ ܚܰܕܬ̣ܽܘܬ̣ܳܐ. ܒܰܡܕܺܝܢ̱ܬܳܐ ܕܶܝܢ ܗܳܕܶܐ ܕܰܐܢܛܝܘܟܘܤ܆ ܝܳܕܥܺܝܢ ܐܢ̱ܬܽܘܢ ܕܳܐܕܫܳܐ ܕܥܺܐܕܳܐ ܗܳܢܳܐ ܕܶܐܬܶܐܡܰܪ ܠܳܐ ܝܺܕܺܝܥ. ܘܳܐܦ ܒܽܐܘܪܫܠܶܡ ܕܶܝܢ ܠܰܘ ܥܰܬܺܝܩܳܐ ܡܶܕܶܡ ܐܺܝܬܰܘܗ̱ܝ ܗ̱ܘܳܐ ܥܺܐܕܳܐ ܗܳܢܳܐ܆ ܐܶܠܳܐ ܕܰܠܚܰܪܬܳܐ ܐܶܫܬܟܰܚ܆ ܐܰܝܟܰܢܳܐ ܕܡܶܢ ܐ̱ܢܳܫܺܝ̈ܢ ܓܰܒܪ̈ܶܐ ܥܰܬܺܝ̈ܩܶܐ ܫܡܰܥܢܰܢ.

ܗܺܝ ܕܶܝܢ ܟܰܕ ܗܺܝ ܗܳܕܶܐ ܐܺܝܬ ܠܡܺܐܡܰܪ܆ ܐܳܦ ܡܶܛܽܠ ܥܺܐܕܳܐ ܗܰܘ ܕܗܳܢܽܘܢ ܕܡܶܬܩܪܶܝܢ ܒܰܐܰܝ̈ܶܐ܆ ܐܶܡܰܬܝ ܕܰܠܡܳܪܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ ܟܰܕ ܥܰܠ ܥܺܝܠܳܐ ܕܰܐܬܳܢܳܐ ܪܟܺܝܒ ܗ̱ܘܳܐ ܘܠܽܐܘܪܫܠܶܡ ܥܳܐܶܠ ܗ̱ܘܳܐ܆ ܟܰܕ ܣܰܘ̈ܟܶܐ ܕܕܶܩ̈ܠܶܐ ܒܺܐܝ̈ܕܰܝܗܽܘܢ ܛܥܺܝܢܺܝܢ ܗ̱ܘܰܘ܆ ܟܽܠܶܗ ܟܶܢܫܳܐ ܡܰܠܘܶܝܢ ܘܰܡܙܰܝܚܺܝܢ ܗ̱ܘܰܘ ܠܶܗ ܟܰܕ ܐܳܙܺܠ̱ܝܢ ܗ̱ܘܰܘ ܩܕܳܡܰܘܗܝ܆ ܐܶܡܰܬܝ ܕܳܐܦ ܛܠܳܝ̈ܶܐ ܡܩܰܠܣܺܝܢ ܗ̱ܘܰܘ ܠܶܗ ܐܰܝܟ ܕܒܰܫܪܳܪܳܐ ܕܰܐ‌ܠܳܗܳܐ ܡܪܰܝܡܳܐ ܐܺܝܬܰܘܗ̱ܝ܆ ܟܰܕ ܐܳܡܪܺܝܢ ܗ̱ܘܰܘ ܐܽܘܫܰܥܢܳܐ ܒܰܡܪ̈ܰܘܡܶܐ^[22]. ܐܳܦ ܓܶܝܪ ܝܰܘܡܳܐ ܕܥܺܐܕܳܐ ܗܳܢܳܐ܆ ܟܰܕ ܠܘܳܬ ܣܰܓܺܝ̈ܶܐܐ ܠܳܐ ܡܶܫܬܰܡܠܶܐ ܗ̱ܘܳܐ܆ ܗܳܫܳܐ ܕܶܝܢ ܟܢܺܝܫܳܐܺܝܬ ܠܡܺܐܡܰܪ ܠܘܳܬ ܟܽܠܗܽܘܢ ܒܢܰܝ̈ܢܳܫܳܐ ܡܶܫܬܰܡܠܶܐ܆ ܘܠܳܐ ܐ̱ܢܳܫ ܡܶܢ ܗܳܢܽܘܢ ܕܕܰܡܺܝܘ ܒܗܳܢܽܘܢ ܕܗܳܐ ܡܶܢ ܟܰܕܽܘ ܡܫܰܡܠܶܝܢ ܗ̱ܘܰܘ ܠܶܗ܆ ܐܰܝܟ ܕܠܰܫܟܳܚܬܳܐ ܚܕܰܬܳܐ ܐܰܣܠܝܶܗ.

ܣܰܓܺܝ̈ܳܐܬܳܐ ܕܶܝܢ ܐܳܦ ܐ̱ܚܪ̈ܳܢܝܳܬܳܐ ܐܳܦ ܒܰܨ̈ܠܰܘܳܬܳܐ ܐܳܦ ܒܬܶܫܒ̈ܚܳܬܳܐ܆ ܒܺܐܝܕܳܐ ܒܺܐܝܕܳܐ ܐܶܫܬܟܰܚ̈ܶܝܢ. ܐܶܢ ܕܶܝܢ ܐ̱ܢܳܫ ܠܗܳܝ ܕܗܰܘ ܕܶܐܨܛܠܶܒ ܡܶܛܽܠܳܬܰܢ܆ ܡܶܛܽܠ ܗܳܝ ܕܰܚܕܰܬܳܐ ܗܝ ܠܰܡ ܠܳܐ ܡܩܰܒܶܠ ܠܳܗ̇܆ ܢܰܣܠܶܐ ܐܳܦ ܠܟܽܠܳܗ̇ ܬܶܫܒܽܘܚܬܳܐ ܗܳܕܶܐ ܐܰܝܟ ܡܰܢ ܕܠܳܐ ܡܝܰܩܪܳܐ ܒܥܰܬܺܝܩܬܳܐ. ܐܶܠܳܐ ܩܕܳܡ ܩܰܠܺܝܠ ܙܰܒ̈ܢܶܐ ܫܰܪܝܰܬ܆ ܘܳܐܦܠܳܐ ܡܶܢ ܟܽܠ ‌ܐ̱ܢܳܫ ܡܶܬܰܐܡܪܳܐ. ܐܰ‌ܠܟ̈ܣܰܢܕܪ̈ܳܝܶܐ ܓܶܝܪ ܘܠܽܘܒܳܝ̈ܶܐ ܘܐܓܘܦ̈ܛܝܐ܆ ܠܗܳܕܶܐ ܬܶܫܒܽܘܚܬܳܐ ܒܥܺܕܬܳܐ ܟܽܠ ܟܽܠܶܗ ܠܳܐ ܡܙܰܡܪܺܝܢ܆ ܠܦܳܪܽܘܩܳܐ ܕܟܽܠ ܡܫܺܝܚܳܐ. ܗܳܝ ܡܰܢ ܓܶܝܪ ܕܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܨܒܰܐܘܽܬ^[23] ܕܡܶܢ ܣܪ̈ܳܦܶܐ ܡܶܬܰܐܡܪܳܐ. ܐܶܫܰܥܝܳܐ ܢܒܺܝܳܐ ܐܰܫܠܡܳܗ̇܆ ܟܰܕ ܐܶܫܬܘܺܝ ܠܡܶܚܙܳܐ. ܘܰܠܡܶܫܡܰܥ. ܗܳܝ ܕܶܝܢ ܕܩܰܕܺܝܫܳܐ ܐܰ‌ܠܳܗܳܐ ܩܰܕܺܝܫܳܐ ܚܰܝܠܬܳܢܳܐ ܩܰܕܺܝܫܳܐ ܠܳܐ ܡܳܝܽܘܬܳܐ ܒܳܬܰܪ ܙܰܒ̈ܢܶܐ ܣܰܓܺܝ̈ܶܐܐ ܐܶܬܬܰܘܣܦܰܬ. ܐܶܢ ܗܳܟܺܝܠ ܒܗܳܢܶܝܢ ܠܬܰܘܣܶܦܬܳܐ ܐܰܝܟ ܫܰܦܺܝܪܰܬ ܕܶܚܠܬܳܐ ܩܰܒܶܠܢܰܢ. ܘܰܠܗܰܘ ܕܶܐܨܛܠܶܒ ܐܰ‌ܠܳܗܳܐ ܫܰܪܺܝܪܳܐ ܡܰܘܕܶܝܢ ܚ̱ܢܰܢ܆ ܠܳܐ ܢܶܩܪܶܐ ܚܕܰܬܳܐ ܠܬܰܘܕܺܝܬܳܐ ܕܗܰܝܡܳܢܽܘܬܳܐ ܕܺܝܠܰܢ. ܟܰܕ ܫܰܦܺܝܪ ܥܰܠ ܗܳܝ ܬܶܫܒܽܘܚܬܳܐ ܐܶܬܬܰܘܣܦܰܬ ܕܥܰܡ ܫܳܢܝܽܘܬܳܐ ܝܺܗܽܘܕܳܝܬܳܐ ܕܢܶܣܛܽܘܪܺܝܽܘܤ ܢܳܨܝܳܐ. ܘܰܒ̈ܥܺܕܳܬܳܐ ܩܰܕܺܝ̈ܫܳܬܳܐ ܕܰܐ‌ܠܳܗܳܐ ܗܳܟܰܢܳܐ ܡܶܙܕܰܡܪܳܐ. ܘܡܶܢ ܡܕܺܝܢ̱ܬܳܐ ܡܰܢ ܗܳܕܶܐ ܕܺܝܠܰܢ ܕܰܐܢܛܝܘܟܘܤ ܫܰܪܝܰܬ܆ ܡܶܢ ܐܰܝܟܳܐ ܕܳܐܦ ܫܡܳܐ ܕܰܟܪ̈ܺܝܣܛܝܳܢܶܐ ܫܰܪܺܝ܆ ܡܶܢ ܟܰܕܽܘ ܕܶܝܢ ܐܳܦ ܠܘܳܬ ܥܻ̈ܕܳܬܳܐ ܕܰܐܣܝܰܐ ܐܶܬ̣ܳܬ̣܆ ܘܳܐܦ ܠܘܳܬ ܟܽܠܗܶܝܢ ܥܻ̈ܕܳܬܳܐ ܒܽܐܘܪܚܳܐ ܪܳܕܝܳܐ ܡܶܟܺܝܠ.

ܗܳܠܶܝܢ ܡܰܢ ܗܳܟܺܝܠ ‌ܐܰܡܶܕܢܰܢ ܡܶܛܽܠ ܙܽܘܗܳܪܳܐ ܕܺܝܠܟܽܘܢ. ܗܳܢܽܘܢ ܕܶܝܢ ܕܝܰܨܺܝܦܺܝܢ ܕܪܽܘܫܥܳܐ ܘܡܶܬܚܪܶܝܢ ܠܽܘܩܒܰܠ ܦܽܘܡܶܗ ܕܡܳܪܝܳܐ ܐܰܝܟ ܕܰܟܬܺܝܒ܆ ܘܡܶܬܪܰܘܪܒܺܝܢ ܕܠܽܐܘܪܫܠܶܡ ܠܒܺܝܟܺܝܢ܆ ܢܶܬܬܘܽܘܢ ܙܰܒ̈ܢܺܝܢ ܣܰܓܺܝ̈ܳܐܢ ܥܰܠ ܗܳܠܶܝܢ ܕܒܺܝܫܳܐܺܝܬ ܝܺܠܶܦܘ܆ ܐܶܡܰܬܝ ܕܢܶܒܠܥܽܘܢ ܡܶܢ ܝܰܡܺܝܢܳܐ ܕܡܶܢ ܠܥܶܠ܆ ܐܳܦ ܗܳܢܽܘܢ ܕܰܐܚܺܝܕܺܝܢ ܕܽܘܟܬܳܐ ܕܰܡܕܰܒܪ̈ܳܢܶܐ܆ ܐܳܦ ܗܳܢܽܘܢ ܕܰܠܗܳܠܶܝܢ ܢܳܩܦܺܝܢ. ܘܬܶܬܡܰܠܶܐ ܥܠܰܝܗܽܘܢ ܗܳܝ ܕܡܶܢ ܐܶܫܰܥܝܳܐ ܐܶܬܰܐܡܪܰܬ ܘܒܰܢܒܺܝܽܘܬܳܐ ܗܳܟܰܢܳܐ܆ ܘܥܰܡܳܐ ܠܳܐ ܐܶܬܦܢܺܝ ܥܕܰܡܳܐ ܕܰܒܠܰܥ܆ ܘܠܰܐܠܳܗܳܐ ܠܳܐ ܒܥܳܐ܆ ܘܰܢܪܺܝܡ ܡܳܪܝܳܐ ܡܶܢ ܐܽܘܪܶܫܠܶܡ ܪܺܝܫܐ ܘܰܕܢܽܘܒܬܳܐ^[24]܆ ܪܰܒܳܐ ܘܰܙܥܽܘܪܳܐ ܒܝܰܘܡܳܐ ܚܰܕ܆ ܠܣܳܒܳܐ ܘܰܠܗܳܢܽܘܢ ܕܰܒܦܰܪ̈ܨܽܘܦܶܐ ܡܶܬܕܰܡܪܺܝܢ ܗܳܢܰܘ ܪܺܝܫܳܐ. ܘܠܰܢܒܺܝܳܐ ܕܡܰܠܶܦ ܠܳܐ ܢܳܡܽܘ̈ܣܳܝܘܳܬܳܐ ܗܳܢܰܘ ܕܢܽܘܒܬܳܐ. ܡܰܢܽܘ ܓܶܝܪ ܣܒܰܪ ܕܬܶܐܽܘܕܽܘܪܺܝܛܽܘܤ ܢܶܣܛܽܘܪܺܝܽܘܤ ܐ̱ܚܪܺܢܳܐ܆ ܡܰܠܽܘܢ ܕܶܝܢ ܕܳܐܦ ܠܗܰܘ ܒܓܽܘ̈ܕܳܦܶܐ ܥܳܒܰܪ܆ ܒܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܕܰܡܫܺܝܚܳܐ ܡܶܬܩܪܶܐ܆ ܒܰܕܡܽܘܬ ܢܒܺܝܳܐ ܕܡܰܠܶܦ ܠܳܐ ܢܳܡܽܘܣܳܝ̈ܘܳܬܳܐ. ܘܗܶܕܶܐ ܐܶܬܬܰܦܣܰܬ̣ ܐܰܘܟܺܝܬ ܐܶܫܬܰܒܩܰܬ ܡܶܢ ܡܕܰܒܪ̈ܳܢܶܐ ܗܳܢܽܘܢ ܕܰܒܦܰܪ̈ܨܽܘܦܶܐ ܡܶܬܕܰܡܪܺܝܢ܆ ܘܡܶܢ ܐܰ‌ܠܳܗܳܐ ܠܳܐ ܒܳܗܬܺܝܢ. ܐܰܘ ܓܶܝܪ ܠܳܐ ܩܪܰܘ ܠܣܰܩܽܘܒܠܳܝܽܘܬ ܡ̈ܶܠܶܐ ܕܺܝܠܶܗ܆ ܗܳܠܶܝܢ ܕܰܥܒܰܕ ܠܽܘܩܒܰܠ ܬܪܶܥܣܰܪ ܩܶܦܱ̈ܠܶܐܐ ܕܩܰܕܺܝܫܐ ܩܽܘܪܝܠܘܤ܆ ܗܳܢܶܝܢ ܕܰܒܗܶܝܢ ܟܰܕ ܐܳܚܶܕ ܥܶܠ̈ܠܳܬܳܐ ܕܰܥܕܰܠ ܠܡܽܘܙܳܓܳܐ ܕܰܐ‌ܠܳܗܳܐ ܡܶܠܬܳܐ ܘܰܕܒܶܣܪܳܐ܆ ܐܰܡܪܰܚ ܓܰܠܝܳܐܺܝܬ ܠܡܶܬܟܰܬܳܫܽܘ ܠܽܘܩܒܰܠ ܒܰܪ̱ܬ ܩܳܠܳܐ ܕܶܐܘܰܢܓܶܠܺܝܽܘܢ ܘܰܠܡܺܐܡܰܪ܆ ܡܶܛܽܠ ܗܳܟܺܝܠ ܕܠܳܐ ܗܘ̣ܳܐ ܡܶܠܬܳܐ ܒܶܣܪܳܐ܆ ܐܰܘ ܟܰܕ ܡܣܰܟܪܺܝܢ ܐܶܕܢܰܝ̈ܗܽܘܢ܆ ܒܪܶܗܛܳܐ ܥܳܒܪܺܝܢ ܠܗܶܝܢ ܠܗܳܠܶܝܢ.

ܚܢܰܢ ܡܰܢ ܗܳܟܺܝܠ܆ ܐܳܦ ܠܢܰܦܫܰܢ ܢܛܽܘܪܬܳܐ ܕܗܰܝܡܳܢܽܘܬܳܐ ܚܠܺܝܡܬܳܐ ܢܨܰܠܶܐ܆ ܐܳܦ ܠܗܳܢܽܘܢ ܫܽܘܚ̈ܠܳܦܶܐ ܕܰܠܘܳܬ ܗܳܝ ܕܰܡܝܰܬܪܳܐ܆ ܠܰܡܡܰܠܳܠܽܘ ܫܽܘܥ̈ܝܳܬܳܐ ܕܶܝܢ ܫܳܛܽܘܪ̈ܳܬܳܐ ܗܳܠܶܝܢ ܕܰܒ̈ܢܰܝܳܐ ܕܢܶܣܛܽܘܪܺܝܽܘܤ ܟܽܠ ܟܽܠܶܗ ܢܶܪܚܰܩ ܘܢܰܣܠܶܐ܆ ܗܳܠܶܝܢ ܕܰܒܗܶܝܢ ܐܳܡܪܺܝܢ ܗܳܢܽܘܢ ܕܢܰܦܺܝܩܺܝܢ ܡܶܢ ܗܰܘܢܗܽܘܢ܆ ܟܰܕ ܒ̈ܢܳܬ ܩܴ̈ܠܶܐ ܡܶܕܶܡ ܠܳܐ ܟܬܺܝ̈ܒܳܬܳܐ ܘܰܕܠܳܐ ܣܳܗܕܽܘܬܳܐ ܓܳܒܠܺܝܢ܆ ܕܕܽܘܡܰܐܤ ܗܰܘ ܚܰܕ ܡܶܢ ܗܳܠܶܝܢ ܬܪܶܝܢ ܠܶܣ̈ܛܳܝܶܐ ܕܶܐܨܛܠܶܒ ܥܰܡ ܡܳܪܰܢ ܡܶܫܬܰܡܰܗ ܗ̱ܘܳܐ܆ ܘܰܠܗܳܢܳܐ ܐܰܝܟ ܕܳܐܡܪܺܝܢ ܡܫܰܒܚܺܝܢ܆ ܗܳܢܽܘܢ ܕܳܐܡܪܺܝܢ ܗܰܘ ܕܶܐܨܛܠܶܒܬ ܡܶܛܽܠܳܬܰܢ. ܩܰܕܡܳܐܺܝܬ ܡܰܢ ܗܳܟܺܝܠ ܢܦܰܢܽܘܢ ܦܶܬܓܳܡܳܐ܆ ܕܡܶܢ ܐܰܝܢܳܐ ܟܬܳܒܳܐ ܡܶܫܟܚܺܝܢ ܠܡܰܦܳܩܽܘ ܗܳܕܶܐ. ܒܳܬܰܪܟܶܢ ܕܶܝܢ܆ ܠܡܳܢܳܐ ܠܰܘ ܝܰܬܺܝܪܐܺܝܬ ܠܗܳܢܽܘܢ ܬܠܳܬܡܳܐܐ ܘܰܬܡܳܢܬܰܥܣܰܪ ܐܰܒܳܗ̈ܳܬܳܐ܆ ܘܰܠܗܳܢܽܘܢ ܡܳܐܐ ܘܚܰܡܫܺܝܢ܆ ܗܳܕܶܐ ܡܶܢ ܩܕܳܡܰܝܢ ܩܰܕܶܡܘ ܪܫܰܘ. ܗܳܢܽܘܢ ܓܶܝܪ ܐܶܡܰܪܘ܆ ܗܰܘ ܕܡܶܛܽܠܳܬܰܢ ܢܚܶܬ܆ ܐܶܬܒܰܣܰܪ܆ ܐܶܬܒܰܪܢܰܫ܆ ܚܰܫ܆ ܐܶܨܛܠܶܒ܆ ܒܝܰܘ̈ܡܰܝ ܦܽܘܢܛܝܘܤ ܦܝܠܐܛܘܤ. ܛܥܰܘ ܗܳܟܺܝܠ ܗܶܢܽܘܢ ܠܗܽܘܢ ܐܰܝܟ ܕܕܳܡܝܳܐ܆ ܕܠܰܘ ܠܰܡܫܺܝܚܳܐ܆ ܐܶܠܳܐ ܐܰܝܟ ܫܳܛܽܘܪ̈ܘܳܬܳܐ ܕܺܝܠܟܽܘܢ^[25]܆ ܟܰܕ ܡܓܰܕܦܳܢܳܐܺܝܬ ܘܠܳܐ ܪܰܕܝܳܐܺܝܬ ܡܒܰܪܒܪܺܝܢ܆ ܠܕܽܘܡܰܐܤ ܐܰ‌ܠܳܗܳܐ ܘܠܰܘ ܓܰܝܳܣܳܐ ܠܕܽܘܡܰܐܤ ܥܒܰܕܘ. ܛܐܟܐ^[26] ܕܶܝܢ ܦܰܘܠܽܘܤ ܕܝܰܬܺܝܪ ܩܰܪܺܝܒ ܠܰܥܫܽܘܩܝܳܐ ܕܺܝܠܟܽܘܢ ܢܶܫܬܟܰܚ ܘܠܰܘ ܚܢܰܢ܆ ܡܶܛܽܠ ܟܺܝܬ ܕܰܟܬܰܒ ܠܩܽܘܪ̈ܝܢܬܝܐ܆ ܝܳܕܥܺܝܢ ܐܢ̱ܬܽܘܢ ܓܶܝܪ ܠܛܰܝܒܽܘܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܕܡܶܛܽܠܳܬܟܽܘܢ ܐܶܬܡܰܣܟܰܢ ܟܰܕ ܥܰܬܺܝܪܳܐ ܐܺܝܬܰܘܗ̱ܝ^[27]. ܠܗܰܘ ܕܶܝܢ ܡܶܛܽܠܳܬܟܽܘܢ^[28] ܩܰܪܺܝܒ ܝܰܬܺܝܪܳܐܺܝܬ܆ ܕܽܘܡܰܐܤ ܗܰܘ ܕܺܝܠܟܽܘܢ ܕܡܶܢ ܫܶܠܝ ܐܶܬܒܕܺܝ܆ ܐܰܘ ܠܗܰܘ ܡܶܛܽܠܳܬܰܢ. ܐܶܠܳܐ ܗܳܠܶܝܢ ܓܽܘܚܟܳܐ ܐܺܝܬܰܝܗܶܝܢ ܘܶܐܫܬܥܶܢܝܳܐ ܕܒܳܒܽܘ̈ܣܶܐ ܘܡ̈ܶܠܶܐ ܕܗܰܘܢܳܐ ܕܰܪܘܶܐ. ܐܳܦ ܓܶܝܪ ܐܶܢܗܽܘ ܕܰܥܬܺܝܕܺܝܢܰܢ܆ ܕܰܒܫܽܘܚܠܳܦܳܐ ܕܰܟܬܺܝ̈ܒܳܬܳܐ ܘܰܒܒܽܘܨܳܪ̈ܶܐ ܢܶܓܒܽܘܠ ܫܡܳܗ̈ܶܐ܆ ܫܽܘܚܠܳܦܳܐ ܙܥܽܘܪܳܐ ܢܶܥܒܕܺܝܘܗ̱ܝ. ܦܰܘܠܽܘܤ ܗܳܢܰܘ ܕܶܝܢ ܠܦܰܘܠܽܘܤ܆ ܘܰܟܪܽܘܣܘܤ ܗܳܢܰܘ ܕܶܝܢ ܕܰܗܒܳܐ܆ ܚܠܳܦ ܟܪܺܝܣܛܘܤ ܗܳܢܰܘ ܕܶܝܢ ܡܫܺܝܚܳܐ܆ ܘܢܶܫܬܟܰܚ ܕܰܠܡܳܡܽܘܢܳܐ ܕܳܚܠܺܝܢ ܚ̱ܢܰܢ ܘܣܳܓܕܺܝܢܰܢ. ܫܰܪܺܝܪܳܐܺܝܬ ܫܳܛܝܳܐ ܫܳܛ̈ܝܳܬܳܐ ܢܡܰܠܶܠ܆ ܘܠܶܒܶܗ ܣܪ̈ܺܝܩܳܬܳܐ ܢܶܣܬܰܟܰܠ^[29]܆ ܐܰܝܟ ܒܰܪ̱ܬ ܩܳܠܳܐ ܕܶܐܫܰܥܝܳܐ. ܠܰܢ ܕܶܝܢ ܠܳܐ ܢܰܫܠܶܡ ܡܳܪܝܳܐ ܒܝܰܕ ܕܰܐܝܟ ܗܳܕܶܐ ܫܳܢܝܽܘܬܳܐ ܠܗܰܘܢܳܐ ܡܰܣܠܝܳܐ܆ ܐܶܠܳܐ ܢܶܦܪܽܘܩ ܠܰܢ ܒܝܰܕ ܛܰܝܒܽܘܬܶܗ.

ܘܳܐܦ ܗܳܢܽܘܢ ܕܶܝܢ ܕܗܳܫܳܐ ܒܽܐܘܪܫܠܶܡ ܢܶܬܥܰܗܕܽܘܢ ܕܗܳܢܽܘܢ ܕܬܰܡܳܢ ܡܶܢ ܩܕܺܝܡ܆ ܩܰܕܡܳܐܺܝܬ ܠܽܘܩܒܰܠܣܽܘܢܗܕܘܤ ܕܟܰܠܩܺܝܕܽܘܢܰܐ ܐܶܬܚܪܺܝܘ ܗ̱ܘܰܘ. ܘܟܰܕ ܦܢܳܐ ܝܘܒܢܠܐܘܤ ܐܶܦܝܣܩܽܘܦܳܐ ܕܺܝܠܗܽܘܢ܆ ܠܳܐ ܩܰܒܠܽܘܗܝ܆ ܘܰܐ̱ܚܪܺܢܳܐ ܟܺܝܪܽܘܛܘܢܝܣܐ ܥܒܰܕܘ ܘܗܰܘ ܐ̱ܚܪܺܢܳܐ ܐܶܦܝܣܩܽܘܦܐ ܐܰܣܪܰܚ܆ ܝܰܬܺܝܪ ܡܶܢ ܥܶܣܪܳܐ ܒܡܶܢܝܳܢܳܐ܆ ܟܰܕ ܗܦܰܟ ܕܶܝܢ ܗܽܘ ܟܰܕ ܗܽܘ ܝܘܒܢܠܐܘܤ ܥܰܡ ܣܽܘܓܳܐܐ ܕܦܳܠ̈ܚܶܐ ܥܳܐܶܠ ܗ̱ܘܳܐ ܠܽܐܘܪܫܠܶܡ܆ ܗܳܢܽܘܢ ܕܥܰܡܗܽܘܢ ܟܶܢܫܳܐ ܕܫܳܡܪ̈ܳܝܶܐ܆ ܫܶܬܡܳܐܐ ܕܰܝܪ̈ܳܝܶܐ ܓܰܒܪ̈ܶܐ ܩܰܕܺܝ̈ܫܶܐ ܢܟܰܣܘ܆ ܐܶܡܰܬܝ ܕܳܐܦ ܐܳܬܘ̈ܳܬܳܐ ܠܰܘ ܙܥܽܘܪ̈ܝܳܬܳܐ ܢܩ̈ܰܦܶܝܢ܆ ܠܗܳܠܶܝܢ ܟܺܝܬ ܕܰܒܨܶܒܝܳܢܝ ܫܳܬܶܩ ܐ̱ܢܳܐ ܠܗܶܝܢ܆ ܡܰܝܬܶܐ ܠܗܶܝܢ ܕܶܝܢ ܡܶܢ ܟܽܠ ܦܪܽܘܤ ܣܶܦܪܳܐ ܕܰܫܡܰܝܳܐ. ܐܰܪܰܐ܆ ܠܳܐ ܐܰܚܺܝܕܺܝܢ ܗ̱ܘܰܘ ܗܳܢܽܘܢ ܠܕܽܘܟ̈ܝܳܬܳܐ ܗܳܢܶܝܢ ܩܰܕܺܝ̈ܫܳܬܳܐ܆ ܠܰܘ ܡܶܛܽܠ ܗܰܝܡܳܢܽܘܬܳܐ ܛܳܢܶܝܢ ܗ̱ܘܰܘ. ܐܰܘ ܠܰܘ ܕܝܰܬܺܝܪ ܫܳܘ̈ܝܳܢ ܠܡܶܬܗܰܝܡܳܢܽܘ ܐܺܝܬܰܝܗܶܝܢ ܗܳܠܶܝܢ ܥܰܬܺܝ̈ܩܳܬܳܐ܆ ܝܰܬܺܝܪ ܡܶܢ ܗܳܠܶܝܢ ܕܗܳܫܳܐ ܚܰܕܬ̣ܳܐܺܝܬ ܡܶܬܦܰܣ̈ܩܳܢ. ܐܺܝܢ ܐܳܦܶܢ ܠܳܐ ܨܳܒܶܝܢ ܐܢ̱ܬܽܘܢ. ܣܳܗܶܕ ܓܶܝܪ ܐܰ‌ܠܳܗܳܐ ܕܰܫܪܳܪܳܐ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ. ܠܗܰܘ ܕܳܐܦ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫ ܒܟܽܠ ܘܡܰܥܒܶܕ ܚܰܝ̈ܶܐ ܘܕܰܫܘܶܐ ܠܶܗ ܒܽܐܘܣܺܝܰܐ܆ ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܶܡ ܡܺܐܡܪܳܐ ܕܡܳܐܐ ܘܥܶܣܪܺܝܢ ܘܚܰܡܫܐ.

ܦܪܟܣܝܣ. 20: 24 [1]

ܪ̈ܘܡܝܐ. 8: 18 [2]

 ܡܙܡܘܪܐ. 118: 131 [3]

 ܝܘܚܢܢ. 7: 38[4]

ܒ. ܩܘܪ̈ܝܢܬܝܐ. 13: 5[5]

ܡܬܝ. 16: 16 [6]

ܡܙܡܘܪ̈ܐ. 143: 3[7]

ܕܺܐܝܬܽܘܬܳܐ[8]

ܒܺܐܝܬܽܘܬܐ[9]

ܝܘܚܢܢ. 15: 26[10]

ܩܘܠ̈ܣܝܐ. 1: 15 [11]

ܝܘܚܢܢ. 1: 14 [12]

 ܓܠ̈ܛܝܐ. 4: 4 [13]

 ܦܝܠ̈ܝܦܣܝܐ. 2: 7 [14]

 ܠܘܩܐ. 11: 22[15]

ܐܫܥܝܐ. 9: 6 [16]

ܦܪܟܣܝܣ. 2: 24 [17]

ܡܙܡܘܪ̈ܐ. 107: 16 [18]

ܩܘܠܣ̈ܝܐ. 2: 15[19]

 ܐ. ܩܘܪ̈ܝܢܬܝܐ. 1: 23[20]

ܠܘܩܐ. 2: 29 [21]

 ܡܬܝ. 21: 9 [22]

ܐܫܥܝܐ. 6: 3 [23]

[24] ܕܽܘܢܒܬܳܐ. ܕܽܘܢ̈ܒܳܬܳܐ. ܣܝܡܬܐ ܕܬܐܘܡܰܐ ܐܘܕܘ. ܒܦܰܐܬܐ 183 ܗܳܟܰܢܳܐ ܟܳܬܶܒ. ܘܡܶܬܟܰܬܒܳܐ ܐܳܦ ܕܢܽܘܒܬܳܐ. ܕܢܽܘܒ̈ܳܬܳܐ. (ܘܩܰܕܡܳܝܬܳܐ ܝܰܬܺܝܪ ܚܰܬܺܝܬܳܐ)

 ܕܺܝܠܗܽܘܢ[25]

[26] ܬܐܘܡܐ ܐܘܕܘ. ܦܐܬܐ 399. ܛܳܟ: ܝܰܘܢܳܝܬܳܐ. ܣܽܘܪܝܝܬܐ ܟܒܪ. ܦܽܘܫܳܟ̣ܳܐ ܘܡܰܣܒܪܳܢܽܘܬܳܐ ܡܰܘܠܶܕ.

  ܒ. ܩܘܪ̈ܝܢܬܝܐ. 8: 9 [27]

[28]  ܡܶܛܽܠܳܬܰܢ ܝܰܘܢܳܐܝܬ܆ ܕܝܗܡܐܣ ܡܶܛܽܠܳܬܟܽܘܢ ܕܶܝܢ ܕܗܽܘܡܐܣ ܐܳܡܰܪ ܗܳܟܺܝܠ ܡܰܠܦܳܢܳܐ܆ ܕܗܳܝ ܕܡܶܛܽܠܳܬܟܽܘܢ ܝܰܬܺܝܪ ܕܳܡܝܳܐ ܠܗܰܘ ܕܽܘܡܰܐܣ ܕܺܝܠܟܽܘܢ܆ ܝܰܬܺܝܪ ܡܶܢ ܕܗܳܝ ܡܶܛܽܠܳܬܰܢ܆ ܕܣܺܝܡܳܐ ܒܩܰܕܺܝܫ ܐܰܢ̱ܬ ܐܰ‌ܠܳܗܳܐ.

  ܐܫܥܝܐ. 32: 6[29]