ܡܺܐܡܪܳܐ ܕܡܐܐ ܘܥܶܣܪܺܝܢ ܘܰܐܪܒܥܳܐ

ܥܰܠ ܦܶܬܓܳܡܳܐ ܗܰܘ ܕܣܺܝܡ ܠܘܳܬ ܡܰܬܰܝ܆ ܡܰܢܽܘ ܐܳܡܪܺܝܢ ܒܢܰܝ̈ܢܳܫܳܐ ܕܺܐܝܬܰܝ ܒܪܶܗ ܕܐ̱ܢܳܫܐ^[1]. ܘܥܰܠ ܗܳܠܶܝܢ ܕܫܰܪܟܳܐ܆ ܘܰܕܙܳܕܶܩ ܕܫܽܘܒܚܳܐ ܬܪܺܝܨܳܐ ܕܗܰܝܡܳܢܽܘܬܳܐ܆ ܠܰܘ ܡܶܢ ܕܽܘܟ̈ܝܳܬܳܐ ܐܰܘ ܡܶܢ ܫܽܘܠ̈ܛܳܢܶܐ܆ ܐܶܠܳܐ ܡܶܢ ܬܰܘܕܺܝܬܳܐ ܚܠܺܝܡܬܳܐ ܘܰܫܠܺܝܚܳܝܬܳܐ܆ ܢܶܬܝܰܩܰܢ ܟܺܝܬ ܘܢܶܬܒܩܶܐ.

124: ܐܰ‌ܠܳܗܳܐ ܗܰܘ ܕܰܠܟܽܠܗܶܝܢ ܒܡܶܠܬܳܐ ܘܰܒܚܶܟܡܬܳܐ ܗܳܝ ܡܥܰܠܝܬܳܐ ܘܠܳܐ ܡܶܬܡܰܠܠܳܢܺܝܬܳܐ ܥܒܰܕ܆ ܟܰܕ ܡܶܢܳܗ̇ ܕܪܰܒܘܳܬܳܐ ܘܫܽܘܦܪܳܐ ܕܟܽܠ ܚܰܕ ܡܶܢ ܥ̈ܒܳܕܶܐ܆ ܘܡܶܢ ܡܶܬܬܙܺܝܥܳܢܽܘܬܳܐ ܡܬܰܩܰܢܬܳܐ ܘܰܡܠܰܚܰܡܬܳܐ ܗܳܝ ܕܰܡܫܰܘܙܒܺܝܢ ܠܘܳܬ ܚ̈ܕܳܕܶܐ܆ ܡܶܬܺܝܕܰܥ ܕܥܳܒܽܘܕܳܐ ܐܺܝܬܰܘܗ̱ܝ ܕܗܳܢܳܐ ܟܽܠ܆ ܟܰܕ ܫܰܬܺܝܩܺܝܢ ܓܶܝܪ ܗܶܢܽܘܢ ܥ̈ܒܳܕܶܐ܆ ܡܰܙܥܩܺܝܢ ܠܳܗ̇ ܠܡܰܥܒܕܳܢܽܘܬܳܐ܆ ܠܛܽܘܟܳܣܳܐ܆ ܠܩܽܘܝܳܡܳܐ܆ ܕܗܰܘ ܕܰܥܒܰܕ܆ ܕܗܰܘ ܕܛܰܟܶܤ܆ ܕܗܰܘ ܕܰܐܚܺܝܕ܆ ܙܰܒ̈ܢܺܝܢ ܣܰܓܺܝ̈ܳܐܢ ܐܳܦ ܒܫܽܘ̈ܐܴܠܶܐ ܡܶܬܚܰܫܰܚ܆ ܟܰܕ ܐܰܝܟ ܗܰܘ ܕܰܡܥܳܪܽܘ ܡܥܺܝܪ ܠܰܢ ܕܕܳܡܟܺܝܢܰܢ܆ ܘܒܰܒ̈ܢܳܬ ܩ̈ܳܠܶܐ ܐܰܝܟ ܕܰܒܙܳܩ̈ܽܘܬܶܐ ܕܳܒܶܨ ܠܰܢ ܘܬܳܒܰܥ ܠܰܢ ܠܰܡܚ̣ܳܪ ܒܒܶܪ̈ܝܳܬܳܐ ܒܗܰܘܢܰܢ ܘܰܒܩܽܘܝܳܡܳܐ ܫܰܦܺܝܪ ܡܛܰܟܣܽܘܬܳܐ ܕܥܳܠܡܳܐ܆ ܘܡܶܢ ܬܰܡܳܢ ܢܶ݀ܬܥܰܠܶܐ ܠܘܳܬ ܣܽܘܟܳܠܳܐ ܕܗܰܘ ܕܰܒ̣ܪܳܐ.

ܡܶܛܽܠ ܗܳܕܶܐ ܟܺܝܬ ܒܝܰܕ ܐܶܫܰܥܝܳܐ ܢܒܺܝܳܐ܆ ܟܰܕ ܐܰܝܟ ܕܠܰܛ̈ܠܳܝܶܐ ܡܡܰܠܶܠ܆ ܘܰܐܝܟ ܕܰܠܡܺܐܡܰܪ ܢܳܓܶܕ ܠܰܢ ܠܘܳܬ ܝܺܕܰܥܬܶܗ ܐܳܦ ܟܰܕ ܠܳܐ ܨܳܒܶܝܢ ܚ̱ܢܰܢ܆ ܨܳܒܶܐ ܓܶܝܪ ܕܟܽܠܗܽܘܢ ܒ̈ܢܰܝ ܐ̱ܢܳܫܳܐ ܢܶܬܦܰܪܩܽܘܢ ܘܠܺܝܕܰܥܬܳܐ ܕܰܫܪܳܪܳܐ ܢܺܐܬܽܘܢ^[2]܆ ܡܫܰܐܶܠ܆ ܕܡܰܢܽܘ ܐܰܟܺܝܠ ܒܺܐܝܕܶܗ ܠܡܰܝ̈ܳܐ܆ ܘܠܰܫܡܰܝܳܐ ܡܫܰܚ ܒܙܰܪܬܶܗ܆ ܘܰܠܟܽܠܳܗ̇ ܐܰܪܥܳܐ ܒܰܙܘܳܪܶܗ^[3]. ܘܬܽܘܒ ܠܡܰܢܽܘ ܕܰܡܺܝܬܽܘܢܳܝܗ̱ܝ ܠܡܳܪܝܳܐ܆ ܘܠܰܐܝ̇ܕܳܐ ܕܡܽܘܬܳܐ ܕܰܡܺܝܬܽܘܢܳܝܗ̱ܝ ܘܬܽܘܒ. ܠܳܐ ܬܶܕܥܽܘܢ ܘܠܳܐ ܬܶܫܡܥܽܘܢ܆ ܘܠܳܐ ܐܶܬܬܰܘܕܰܥ ܠܟܽܘܢ ܡܶܢ ܫܽܘܪܳܝܳܐ܆ ܠܳܐ ܝܺܕܰܥܬܽܘܢ ܫܶܬܶܐܣܶܝ̈ܗ̇ ܕܰܐܪܥܳܐ܆ ܗܰܘ ܕܰܐܚܺܝܕ ܠܚܽܘܕܪܳܗ̇ ܕܰܐܪܥܳܐ܆ ܘܰܠܗܳܢܽܘܢ ܕܥܳܡܪܺܝܢ ܒܳܗ̇ ܐܰܝܟ ܕܰܠܩܰܡ̈ܨܶܐ܆ ܗܰܘ ܕܰܐܩܺܝܡ ܠܰܫܡܰܝܳܐ ܐܰܝܟ ܟܦܳܬ̣ܳܐ܆ ܘܡܰܬܚܳܗ̇ ܐܰܝܟ ܡܰܫܟܢܳܐ ܠܡܶܥܡܰܪ^[4].

ܘܳܐܦ ܠܐܝܘܒ ܕܶܝܢ ܒܳܗ̇ ܒܰܕܡܽܘܬܳܐ ܡܶܬܚܙܶܐ ܕܰܡܫܰܐܶܠ܆ ܒܗܳܢܳܐ ܙܢܳܐ. ܐܶܠܳܐ ܠܰܘ ܐܰܝܟ ܕܰܠܛܳܠܽܘܡܳܐ܆ ܘܠܳܐ ܣܟܽܘܠܬܳܢܳܐ܆ ܐܶܠܳܐ ܐܰܝܟ ܕܠܰܐܝܢܳܐ ܕܘܠܳܐ ܠܶܗ ܕܢܶܕܰܥ ܒܨܺܝܪܽܘܬܳܐ ܕܣܽܘܟܳܠܳܐ ܐ̱ܢܳܫܳܝܳܐ܆ ܘܰܕܣܰܓܺܝ ܟܽܘܠܳܢܳܐܺܝܬ ܘܣܰܓܺܝ ܠܪܽܘܚܩܳܐ ܚܰܣܺܝܪ ܡܶܢ ܝܺܕܰܥܬܳܐ ܐܰ‌ܠܳܗܳܝܬܳܐ. ܐܶ݀ܫܰܐܠܳܟ ܕܶܝܢ ܐܶܢܳܐ. ܐܰܢ̱ܬ ܕܶܝܢ ܦܰܢܳܐ ܠܺܝ ܦܶܬܓܳܡܳܐ. ܐܰܝܟܳܐ ܐܺܝܬܰܝܟ ܗ̱ܘܰܝܬ ܟܰܕ ܡܫܰܬܶܐܤ ܗ̱ܘܺܝܬ ܐܰܪܥܳܐ. ܐܰܘܕܰܥܰܝܢܝ ܕܶܝܢ ܐܶܢ ܝܳܕܰܥ ܐܰܢ̱ܬ ܣܽܘܟܳܠܳܐ. ܡܰܢܽܘ ܣܳܡ ܡܽܘܫ̈ܚܳܬܳܗ̇ ܐܶܢ ܝܳܕܰܥ ܐܰܢ̱ܬ^[5]. ܐܳܦ ܒܶܐܪܰܡܝܳܐ ܕܶܝܢ ܗܽܘ ܗܳܟܘܳܬ. ܠܰܘ ܠܰܫܡܰܝܳܐ ܘܠܰܐܪܥܳܐ܆ ܐܶܢܳܐ ܡܳܠܶܐ ܐ̱ܢܳܐ ܐܳܡܰܪ ܡܳܪܝܳܐ^[6].

ܗܳܟܰܢܳܐ ܐܳܦ ܒܶܐܘܰܢܓ̈ܶܠܺܝܰܐ ܝܶܫܽܘܥ܆ ܗܰܘ ܒܪܳܐ܆ ܗܰܘ ܡܶܠܬܳܐ܆ ܗܰܘ ܐܰ‌ܠܳܗܳܐ ܕܡܶܢ ܐܰ‌ܠܳܗܳܐ܆ ܗܰܘ ܢܽܘܗܪܳܐ ܕܡܶܢ ܢܽܘܗܪܳܐ܆ ܗܰܘ ܕܒܺܐܝܕܰܘ̈ܗ̱ܝ ܗܘ̣ܳܐ ܟܽܠ^[7]܆ ܟܰܕ ܡܶܢ ܡܰܥ̈ܒܕܳܢܘܳܬܳܐ ܘܡܶܢ ܬܶܕܡܪ̈ܳܬܳܐ ܦܰܐܺܝܬ ܠܰܐܠܳܗܳܐ܆ ܡܶܬܬܰܙܥܰܩ ܗ̱ܘܳܐ ܕܰܐ‌ܠܳܗܳܐ ܫܰܪܺܝܪܳܐܐܺܝܬܰܘܗ̱ܝ܆ ܐܺܝܬ ܐܶܡܰܬܝ܆ ܕܳܐܦ ܒܰܒ̈ܢܳܬ ܩ̈ܳܠܶܐ ܡܶܬܚܰܫܰܚ ܗ̱ܘܳܐ. ܠܘܳܬ ܝܽܗ̱ܘ̈ܕܳܝܶܐ ܡܰܢ ܒܡܰܒ̈ܗܬܳܢܝܳܬܳܐ ܐܰܝܟ ܡܓܰܕܦܳܢ̈ܶܐ ܘܚܰܣܳܡ̈ܶܐ ܘܓܽܘܡ̈ܕܳܢܶܐ܆ ܘܒܰܙܒܰܢ ܡܰܢ ܟܰܕ ܡܚܰܘܶܐ ܠܡܰܟܺܝܟܽܘܬܳܐ ܘܠܰܡܕܰܒܪܳܢܽܘܬܳܐ ܒܗܳܠܶܝܢ܆ ܗܶܢܽܘܢ ܥ̈ܒܳܕܶܐ ܗܳܠܶܝܢ ܕܶܐܢܳܐ ܥܳܒܶܕ ܐ̱ܢܳܐ ܣܳܗܕܺܝܢ ܡܶܛܽܠܳܬܝ ܕܰܐܒܳܐ ܫܰܕܪܰܢܝ^[8]܆ ܒܰܙܒܰܢ ܕܶܝܢ ܓܰܠܝܳܐܺܝܬ ܟܰܕ ܡܚܰܘܶܐ ܠܫܰܘܝܽܘܬܳܐ ܕܰܠܘܳܬ ܐܰܒܳܐ܆ ܘܰܠܠܳܐ ܡܫܰܚܠܦܽܘܬܳܐ ܕܰܒܟܽܠ ܡܽܘܢ ܕܗܽܘ ܒܗܳܢܶܝܢ܆ ܐܶܢ ܠܳܐ ܥܳܒܶܕ ܐ̱ܢܳܐ ܥ̈ܒܳܕܶܐ ܕܳܐܒܝ ܠܳܐ ܬܗܰܝܡܢܽܘܢܳܢܝ܆ ܐܶܢ ܕܶܝܢ ܥܳܒܶܕ ܐ̱ܢܳܐ܆ ܐܳܦܶܢ ܠܺܝ ܠܳܐ ܡܗܰܝܡܢܺܝܢ ܐܢ̱ܬܽܘܢ ܠܰܥ̈ܒܳܕܶܐ ܗܰܝܡܶܢܘ܆ ܐܰܝܟܰܢܳܐ ܕܬܶܕܥܽܘܢ ܘܰܬܗܰܝܡܢܽܘܢ ܕܰܐܒܳܐ ܒܺܝ ܘܶܐܢܳܐ ܒܶܗ^[9]. ܠܘܳܬ ܬܰܠ̈ܡܺܝܕܶܐ ܕܶܝܢ ܡܫܰܐܠܳܢܳܐܺܝܬ ܘܰܡܕܰܪܫܳܢܳܐܺܝܬ܆ ܘܟܰܕ ܝܳܕܰܥ ܗ̱ܘܳܐ ܡܰܢ ܠܗܳܠܶܝܢ ܕܡܶܬܚܰܫܒܺܝܢ ܗ̱ܘܰܘ܆ ܘܰܠܗܳܠܶܝܢ ܟܺܝܬ ܕܰܥܬܺܝܕܺܝܢ ܗ̱ܘܰܘ ܠܡܺܐܡܰܪ. ܠܟܽܠܶܗ ܕܶܝܢ ܣܽܘܥܪܳܢܳܐ܆ ܥܰܠ ܦܽܘܢܳܝ ܦܶܬܓܳܡܳܐ ܕܗܳܢܽܘܢ ܣܳܐܶܡ ܗ̱ܘܳܐ ܠܶܗ. ܐܰܝܟܰܢܳܐ ܕܰܠܗܰܝܡܳܢܽܘܬܳܐ ܒܰܝܬܳܝܬܳܐ ܕܺܝܠܗܽܘܢ܆ ܘܗ̱ܝ ܕܡܶܢܗܽܘܢ ܐܶܬܬܰܘܕܝܰܬ̣ ܢܶܗܘܽܘܢ ܥܳܗܕܺܝܢ܆ ܘܕܰܟܬܺܝ̈ܒܳܢ ܒܗܽܘܢ ܢܶܗܘܽܘܢ ܐܺܝܬ ܠܗܽܘܢ ܒ̈ܢܳܬ ܩ̈ܳܠܶܐ ܕܺܝܠܳܢܳܝ̈ܳܬܳܐ ܗܳܠܶܝܢ ܕܺܝܠܗܶܝܢ. ܐܰܟܚܕܳܐ ܕܶܝܢ ܐܳܦ ܟܰܕ ܝܰܬܺܝܪ ܐܳܚܽܘ̈ܕܶܐ ܘܰܕܝܰܬܺܝܪ ܥܳܪܶܝܢ ܥܳܒܶܕ ܗ̱ܘܳܐ ܠܗܽܘܢ ܒܗܳܕܶܐ܆ ܘܟܰܕ ܡܥܰܬܶܕ ܗ̱ܘܳܐ ܠܗܽܘܢ ܕܰܒܗܳܠܶܝܢ ܕܡܶܢܶܗ ܡܶܬܰܐܡܪ̈ܳܢ ܐܰܘ ܡܶܣܬܰܥܪ̈ܳܢ܆ ܠܰܘ ܛܰܢܦܳܐܺܝܬ ܘܒܪܢܐܺܝܬ ܢܚܽܘܪܽܘܢ܆ ܐܶܠܳܐ ܝܰܬܺܝܪ ܥܰܡܺܝܩܳܐܺܝܬ ܢܩܺܝܡܽܘܢ ܗܰܘܢܗܽܘܢ܆ ܐܳܦ ܟܰܕ ܛܽܘܦܣܳܐ ܕܶܝܢ ܝܳܗܶܒ ܗ̱ܘܳܐ ܠܡܰܠ̈ܦܳܢܶܐ ܕܡܰܠܦܳܢܽܘܬܳܐ ܛܰܪܩܬܳܐ܆ ܠܗܳܝ ܕܰܢܟܰܬܪܽܘܢ ܘܰܢܣܰܟܽܘܢ ܠܰܦܣ̈ܳܩܶܐ ܕܬܰܠ̈ܡܺܝܕܶܐ ܘܰܕܠܰܘ ܗܶܢܽܘܢ ܠܗܽܘܢ ܢܬܰܚܡܽܘܢ ܪܰܘܪ̈ܒܶܐ. ܥܰܡ ܗܳܕܶܐ ܕܶܝܢ܆ ܐܳܦ ܟܰܕ ܗܳܕܶܐ ܪܳܫܶܡ ܗ̱ܘܳܐ܆ ܗܳܝ ܕܰܡܝܰܬܪ̈ܳܬܳܐ ܕܬܰܠ̈ܡܺܝܕܶܐ ܗܳܢܽܘܢ ܕܰܡܝܰܬܪܺܝܢ ܙܳܕܶܩ ܕܢܶܥܒܶܕ ܓܰܠ̈ܝܳܬܳܐ ܠܗܳܢܽܘܢ ܐ̱ܚܪ̈ܳܢܶܐ. ܐܰܝܟܰܢܳܐ ܕܶܐܡܰܬܝ ܕܩܽܘܒܳܠ ܛܰܝܒܽܘܬܳܐ ܘܩܰܕܺܝܡܽܘܬ ܐܺܝܩܳܪܳܐ ܬܶܩܰܦ ܠܗܳܢܽܘܢ ܕܝܰܬܺܝܪ ܒܚܺܝܪܺܝܢ܆ ܡܶܢ ܒܰܪ̱ܬ ܩܳܠܳܐ ܕܡܰܠ̈ܦܳܢܶܐ܆ ܢܶܕܥܽܘܢ ܗܳܢܽܘܢ ܕܫܰܪܟܳܐ܆ ܕܠܰܘ ܒܚܰܫܳܐ ܐܰܘ ܒܫܽܘܟܳܢܳܐ ܗܳܕܶܐ ܐܶܫܬܰܟܢܰܬ ܘܶܐܬܝܰܗܒܰܬ܆ ܒܕܺܝܢܳܐ ܕܶܝܢ ܡܰܠܽܘܢ ܬܪܺܝܨܳܐ ܘܕܰܡܝܰܩܰܪ ܠܗܳܝ ܕܟܺܐܢܳܐ. ܐܶ‌‌ܠܽܘ ܓܶܝܪ ܠܰܘ ܟܰܕ ܦܰܢܺܝ ܦܶܛܪܘܤ ܒܰܪ̱ܬ ܩܳܠܳܐ ܗܳܝ ܢܦܺܝܚܰܬ̣ ܡܶܢ ܐܰ‌ܠܳܗܳܐ܆ ܐܰܢ̱ܬ ܐܺܝܬܰܝܟ ܡܫܺܝܚܳܐ ܗܰܘ ܒܪܳܐ ܕܰܐ‌ܠܳܗܳܐ ܚܰܝܳܐ܆ ܗܺܝ ܡܶܢ ܢܰܦܫܳܗ̇ ܕܠܳܐ ܥܶܠܬܳܐ ܐܶܬܬܰܙܥܩܰܬ̣܆ ܗܳܝ ܕܛܽܘܒܰܝܟ ܫܶܡܥܽܘܢ ܒܪ ܝܰܘܢܳܐ܆ ܘܗ̱ܝ ܕܰܐܢ̱ܬ ܗ̱ܘ̣ ܦܛܪܘܤ܆ ܘܥܰܠ ܗܳܢܳܐ ܫܽܘܥܳܐ ܐܶ݀ܒܢܶܝܗ̇ ܠܥܺܕܬܝ^[10]܆ ܡܶܢ ܟܽܠ ܦܪܽܘܤ ܒܳܠܥܺܝܢ ܗ̱ܘܰܘ ܒܚܰܫܳܐ ܕܰܛܢܳܢܳܐ ܗܶܢܽܘܢ ܬܰܠ̈ܡܺܝܕܶܐ. ܐܳܦ ܓܶܝܪ ܟܰܕ ܝܰܬܺܝܪ ܠܳܐ ܡܫܰܡܠܝܳܐܺܝܬ ܣܺܝܡܺܝܢ ܗ̱ܘܰܘ ܡܶܢ ܫܽܘܪܳܝܳܐ܆ ܬܚܶܝܬ ܚܽܘܫܳܒ̈ܶܐ ܐ̱ܢܳܫܳܝ̈ܶܐ ܕܕܰܐܝܟ ܗܳܠܶܝܢ ܡܶܬܬܰܝܬܶܝܢ ܗ̱ܘܰܘ܆ ܘܰܠܗܳܠܶܝܢ ܕܩܰܕܡܳܝܽܘܬܳܐ ܟܽܠܚܰܕ ܡܶܢܗܽܘܢ ܪܳܐܶܓ ܗ̱ܘܳܐ. ܡܶܛܽܠ ܗܳܕܶܐ ܐܳܦ ܡܫܰܐܠܺܝܢ ܗ̱ܘܰܘ܆ ܕܡܰܢܽܘ ܐܰܪܰܐ ܐܺܝܬܰܘܗ̱ܝ ܕܝܰܬܺܝܪ ܪܰܒ ܒܡܰܠܟܽܘܬܳܐ ܕܰܫܡܰܝܳܐ^[11]. ܡܶܢ ܗܳܕܶܐ ܓܶܝܪ ܐܳܦ ܢܶܬܡܰܗ ܐ̱ܢܳܫ ܝܰܬܺܝܪܳܐܺܝܬ܆ ܒܰܐܠܳܗܳܝܽܘܬܳܗ̇ ܘܰܡܫܰܡܠܝܽܘܬܳܗ̇ ܕܡܰܠܦܳܢܽܘܬܳܐ ܗܳܝ ܕܦܳܪܽܘܩܰܢ ܕܟܰܕ ܕܕܰܐܝܟ ܗܳܠܶܝܢ ܐܺܝܬܰܝܗܽܘܢ ܗ̱ܘܰܘ ܬܰܠ̈ܡܺܝܕܶܐ ܠܳܐ ܦܠܺܝܚܳܐ ܒܰܙܢܳܐ܆ ܕܕܰܐܝܟ ܗܳܠܶܝܢ ܐܰܕܪܺܝܢܰܛܳܐ ܕܰܡܝܰܬܪܽܘܬܳܐ ܚܰܘܺܝ ܐܶܢܽܘܢ܆ ܘܛܽܘܦ̈ܣܶܐ ܕܦܝܠܘܣܘܦܝܰܐ ܩܕܳܡ ܟܽܠܳܗ̇ ܡܶܬܥܰܡܪܳܢܺܝܬܳܐ ܣܳܡ ܐܶܢܽܘܢ.

ܐܶܠܳܐ ܠܘܳܬ ܗܰܘ ܫܽܘܐܴܠܳܐ ܢܺܐܬܶܐ܆ ܗܰܘ ܕܫܰܐܶܠ ‌ܐܶܢܽܘܢ ܟܰܕ ܐܶܬܳܐ ܠܘܳܬ ܩܶܣܰܪܺܝܰܐ ܗܳܝ ܕܡܶܬܩܰܪܝܳܐ ܥܰܠ ܫܡܶܗ ܕܦܝܠܝܦܘܤ ܐ̱ܚܪܺܬܳܐ ܗܝ ܓܶܝܪ ܗܳܝ ܕܡܶܬܰܐܡܪܳܐ ܕܰܤܛܪܐܛܘܢ. ܐܳܦܶܢ ܐܺܝܬܶܝܗ̇ ܫܰܘܝܰܬ ܫܡܳܐ ܕܗܳܕܶܐ. ܘܶܐܬܒܰܩܰܘ ܕܰܐܝܟܰܢܳܐ ܕܽܘܪܳܫܳܐ ܡܰܠܦܳܢܳܝܳܐ ܐܺܝܬܰܘܗ̱ܝ ܗܰܘ ܫܽܘܐܴܠܳܐ܆ ܘܕܰܐܝܟ ܕܰܠܘܳܬ ܡܫܰܡ̈ܠܰܝܳܐ ܡܶܬܡܰܬܰܚ܆ ܘܰܒܝܰܕ ܒܢ̈ܳܬ ܩ̈ܳܠܶܐ ܚܳܦܰܪ܆ ܘܒܳܥܶܐ ܕܰܠܓܶܠܝܳܐ ܢܰܝܬܽܘܗ̱ܝ ܠܦܽܘܢܳܝ ܦܶܬܓܳܡܳܐ ܡܫܰܡܠܝܳܐ. ܐܶܡܰܪ ܓܶܝܪ܆ ܕܡܰܢܽܘ ܐܳܡܪܺܝܢ ܠܺܝ ܒܢܰܝ̈ܢܳܫܳܐ ܕܺܐܝܬܰܝ܆ ܠܰܒܪܶܗ ܕܐ̱ܢܳܫܳܐ^[12]. ܠܰܫܡܳܐ ܗܰܘ ܫܺܝܛܳܐ ܕܺܝܠܶܗ ܣܳܐܶܡ܆ ܘܠܳܐ ܐܶܡܰܪ ܕܡܰܢܽܘ ܐܳܡܪܺܝܢ ܠܺܝ܆ ܘܰܐܩܺܝܡܶܗ ܠܫܽܘܐܴܠܳܐ. ܐܶܠܳܐ ܐܰܘܣܶܦ܆ ܠܰܒܪܶܗ ܕܐ̱ܢܳܫܳܐ܆ ܗܳܝ ܟܺܝܬ ܕܺܐܝܬܶܝܗ̇ ܡܰܟܺܝܟܬܳܐ ܘܰܡܬܰܚܬܰܝܬܳܐ܆ ܘܕܰܠܡܽܘܫ̈ܚܳܬܳܐ ܕܣܽܘܪܳܩܳܐ ܗܰܘ ܨܶܒܝܳܢܳܝܳܐ ܣܰܓܺܝ ܠܳܚܡܳܐ. ܘܟܰܕ ܛܳܒ. ܡܰܨܝܳܐ ܗ̱ܘܳܬ ܕܢܺܐܡܰܪ܆ ܠܗܰܘ ܕܥܰܠ ܝܰܡܳܐ ܗܰܠܶܟ܆ ܠܗܰܘ ܕܰܟ̣ܐܳܐ ܒܪ̈ܽܘܚܶܐ܆ ܘܰܒܦܽܘܩܕܳܢܳܐ ܒܰܠܚܽܘܕܰܘܗ̱ܝ ܫܰܬܶܩ ܠܒܰܥܪܺܝܪܳܝܽܘܬܶܗ ܕܡܰܚܫܽܘܠܳܐ܆ ܠܗܰܘ ܕܠܰܣܓܺܝܦܽܘܬܳܐ ܕܟܽܠ ܓܢܶܤ ܕܗܰܕܳܡ̈ܶܐ ܘܠܳܐܕܫ̈ܶܐ ܡܫܰܚ̈ܠܦܶܐ ܕܟܽܘܪ̈ܗܳܢܶܐ ܐܰܟܚܕܳܐ ܥܰܡܳܗ̇ ܕܗܳܝ ܕܢܶܨܒܶܐ ܐܰܣܺܝ܆ ܐܰܝܟܰܢܳܐ ܕܳܐܦ ܒܰܢ̈ܒܺܝܶܐ ܡܶܬܚܙܶܐ ܕܳܐܡܰܪ܆ ܐܰܘ ܡܶܢܝ ܠܳܐ ܬܶܕܚܠܽܘܢ܆ ܗܰܘ ܕܣܳܡܶܬ̣ ܚܳܠܳܐ ܬܚܽܘܡܳܐ ܠܝܰܡܳܐ܆ ܘܦܽܘܩܕܳܢܳܐ ܕܰܠܥܳܠܰܡ ܘܠܳܐ ܢܶܥܒܪܺܝܘܗ̱ܝ^[13]. ܐܶܠܳܐ ܗܳܠܶܝܢ ܡܰܢ. ܠܳܐ ܐܳܡܰܪ. ܡܰܟܺܝܟܳܐ ܕܶܝܢ ܥܳܒܶܕ ܠܶܗ ܠܫܽܘܐܴܠܳܐ܆ ܟܰܕ ܦܽܘܢܳܝ ܦܶܬܓܳܡܳܐ ܦܐܶܐ ܠܰܐܠܳܗܳܐ ܘܰܬܡܺܝܗܳܐ ܬܳܒܰܥ. ܐܰܝܟܰܢܳܐ ܕܰܢܚܰܘܶܐ ܓܰܠܝܳܐܺܝܬ܆ ܕܗܰܘ ܕܡܶܬܚܙܶܐ ܘܒܰܫܪܳܪܳܐ. ܘܰܕܠܳܐ ܫܽܘܚܠܳܦܳܐ ܗܘ̣ܳܐ ܒܰܪ ܐ̱ܢܳܫܳܐ܆ ܗܘ ܟܰܕ ܗܽܘ ܐܺܝܬܰܘܗ̱ܝ ܐܳܦ ܐܰ‌ܠܳܗܳܐܫܰܪܺܝܪܳܐ܆ ܟܰܕ ܠܳܐ ܣܳܟ ܡܶܬܦܣܶܩ ܡܢܳܬܳܐܺܝܬ ܘܕܺܝܠܳܢܳܐܺܝܬ ܠܰܐܠܳܗܳܐ ܘܰܠܒܰܪܢܳܫܳܐ܆ ܟܰܕ ܚܰܕ ܐܺܝܬܰܘܗ̱ܝ ܘܠܳܐ ܡܶܬܦܰܠܓܳܢܳܐ. ܐܶܠܳܐ ܐܳܦܶܢ ܒܪܶܗ ܕܐ̱ܢܳܫܳܐ. ܢܟܰܢܽܘܗ̱ܝ ܐ̱ܢܳܫ܆ ܠܳܐ ܢܰܪܚܩܺܝܘܗ̱ܝ ܡܶܢ ܗܳܝ ܕܗܽܘ ܟܰܕ ܗܽܘ ܐܳܦ ܒܪܳܐ ܕܰܐ‌ܠܳܗܳܐ ܢܶܗܘܐ ܐܺܝܬܰܘܗ̱ܝ.

ܡܳܢܳܐ ܗܳܟܺܝܠ ܠܘܳܬ ܫܽܘܐܴܠܳܐ ܗܰܘ ܡܦܰܢܶܝܢ. ܩܰܕܡܳܐܺܝܬ ܐܶܡܰܪܘ܆ ܕܡܰܢܽܘ ܐܳܡܪܺܝܢ ܠܶܗ ܒܢܰܝ̈ܢܳܫܳܐ. ܗܳܕܶܐ ܓܶܝܪ ܐܳܦ ܐܶܫܬܰܐܰܠܘ. ܗܳܟܰܢܳܐ ܐܺܝܬܰܝܗܽܘܢ ܗ̱ܘܰܘ ܪ̈ܰܕܝܶܐ܆ ܕܰܠܦܽܘܢܳܝ ܦܶܬܓܳܡ̈ܶܐ܆ ܕܠܳܚܡܺܝܢ ܠܗܽܘܢ ܠܫܽܘ̈ܐܴܠܶܐ ܢܶܥܒܕܽܘܢ ܐܶܢܽܘܢ܆ ܘܰܕܠܳܐ ܡܠܶܝܢ ܝܰܬܺܝܪ̈ܳܬܳܐ. ܐܳܦ ܟܺܝܬ ܐܳܦ ܐܶܡܰܪܘ܆ ܕܗܳܢܽܘܢ ܡܰܢ ܐܳܡܪܺܝܢ. ܕܝܽܘܚܰܢܳܢ ܡܰܥܡܕܳܢܳܐ ܐܺܝܬܰܘܗ̱ܝ. ܐ̱ܚܪ̈ܳܢܶܐ ܕܶܝܢ. ܐܶ‌ܠܺܝܳܐ. ܐ̱ܚܪ̈ܳܢܶܐ ܕܶܝܢ. ܐܶܪܰܡܝܳܐ ܐܰܘ ܚܰܕ ܡܶܢ ܢܒܺܝ̈ܶܐ^[14]. ܘܬܽܘܒ ܡܰܠܦܳܢܳܐ ܗܰܘ ܚܰܟܺܝܡܳܐ ܕܬܰܠ̈ܡܺܝܕܶܐ ܣܰܟܽܘ̈ܠܬܳܢܶܐ܆ ܠܳܐ ܫܘܰܪ ܐܰܘ ܐܶܬܬܦܺܝܪ ܡܶܢ ܗܳܕܶܐ܆ ܘܳܐܦܠܳܐ ܐܶܡܰܪ ܙܶܠܘ ܠܗܰܠ܆ ܡܶܛܽܠ ܡܰܣܒܪܳܢܽܘܬܳܐ ܗܳܝ ܡܙܰܥܙܰܥܬܳܐ ܘܛܳܥܺܝܬܳܐ ܕܣܰܓܺܝ̈ܶܐܐ. ܐܶܠܳܐ ܡܟܰܬܰܪ ܘܰܡܣܰܟܶܐ ܠܒܰܪ̱ܬ ܩܠܐ ܕܗܳܢܽܘܢ܆ ܘܰܡܫܰܐܶܠ ܬܽܘܒ ܘܳܐܡܰܪ܆ ܐܢ̱ܬܽܘܢ ܕܶܝܢ. ܡܰܢܽܘ ܐܳܡܪܺܝܢ ܐܢ̱ܬܽܘܢ ܠܺܝ ܕܺܐܝܬܰܝ. ܟܰܕ ܦܰܢܺܝ ܕܶܝܢ ܫܶܡܥܽܘܢ ܦܶܛܪܘܤ. ܐܶܡܰܪ. ܐܰܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܗܰܘ ܒܪܳܐ ܕܰܐ‌ܠܳܗܳܐ ܚܰܝܳܐ³. ܐܰܢ̱ܬ ܐܳܡܰܪ܆ ܠܘܳܬ ܙܥܽܘܪܽܘܬܳܐ ܩܦܰܣܬܳܝܗ̱ܝ ܠܫܽܘܐܴܠܳܐ܆ ܘܰܕܡܰܢܽܘ ܡܶܣܬܒܰܪ ܐܰܢ̱ܬ ܠܘܳܬܰܢ ܕܺܐܝܬܰܝܟ ܐܰܢ̱ܬ ܒܪܶܗ ܕܐ̱ܢܳܫܳܐ ܡܫܰܐܶܠ ‌ܐܰܢ̱ܬ. ܐܶܢܳܐ ܕܶܝܢ ܒܡܰܟܺܝܟܽܘܬܳܐ ܘܒܰܡܕܰܒܪܳܢܽܘܬܳܐ ܕܫܽܘܐܴܠܳܟ܆ ܠܘܳܬ ܪܰܘܡܳܐ ܡܶܬܥܰܠܶܐ ܐ̱ܢܳܐ. ܘܟܰܕ ܡܶܬܚܰܫܰܒ ܐ̱ܢܳܐ ܕܟܰܕ ܡܰܢܽܘ ܐܺܝܬܰܝܟ ܒܰܟܝܳܢܳܐ܆ ܠܗܳܢܳܐ ܟܽܠܶܗ ܡܽܘܟܳܟܳܐ ܢܚܶܬ̣ܬ ܡܶܛܽܠ ܡܕܰܒܪܳܢܽܘܬܳܐ܆ ܝܰܬܺܝܪܳܐܺܝܬ ܡܰܘܕܶܐ ܐ̱ܢܳܐ ܠܳܟ ܕܺܐܝܬܰܝܟ ܒܪܶܗ ܕܰܐ‌ܠܳܗܳܐ ܚܰܝܳܐ.

ܘܰܚܙܺܝ ܠܚܰܬܺܝܬ̣ܽܘܬܶܗ ܕܦܶܛܪܘܤ܆ ܕܰܠܫܽܘܐܴܠܶܗ ܕܪܰܒܶܗ ܡܫܰܪܰܪ. ܠܳܐ ܓܶܝܪ ܐܶܡܰܪ ܐܰܢ̱ܬ ܐܺܝܬܰܝܟ ܒܪܶܗ ܕܰܐ‌ܠܳܗܳܐ ܚܰܝܳܐ. ܐܶܠܳܐ ܐܰܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܗܰܘ ܒܪܶܗ ܕܰܐ‌ܠܳܗܳܐ ܚܰܝܳܐ. ܡܶܛܽܠ ܓܶܝܪ ܐܳܡܰܪ ܕܰܗܘ̣ܰܝܬ ܒܪܶܗ ܕܐ̱ܢܳܫܳܐ ܡܶܛܽܠ ܦܽܘܪܩܳܢܳܐ ܕܺܝܠܰܢ܆ ܡܶܛܽܠܗܳܕܶܐ. ܡܫܺܝܚܳܐ ܐܺܝܬܰܝܟ. ܡܫܺܝܚܐܰܢ̱ܬܓܶܝܪܡܕܰܒܪܳܢܳܐܺܝܬܒܪܽܘܚܳܐ ܩܰܕܺܝܫܳܐ ܘܰܒܚܰܝܠܳܐ. ܡܶܢ ܐܰ‌ܠܳܗܳܐ ܘܰܐܒܳܐ܆ ܠܰܘ ܟܰܕ ܐܰܢ̱ܬ ܥܰܠ ܡܫܺܝܚܽܘܬܳܐ ܣܢܺܝܩ ܐܰܢ̱ܬ܆ ܐܺܝܬܰܝܟ ܓܶܝܪ ܒܪܶܗ ܕܰܐ‌ܠܳܗܳܐ ܚܰܝܳܐ܆ ܘܕܰܠܪܽܘܚܳܐ ܐܽܘܣܝܳܐܺܝܬ ܐܺܝܬ ܠܳܟ ܒܳܟ܆ ܘܰܕܠܰܐ̱ܚܪ̈ܳܢܶܐ ܐܺܝܬܰܝܟ ܝܳܗܽܘܒܳܐ ܕܫܰܘܬܳܦܽܘܬܳܐ ܕܗܳܢܳܐ܆ ܘܰܕܠܰܘ ܠܳܟ^[15] ܡܫܺܝܚ ܐܰܢ̱ܬ܆ ܐܶܠܳܐ ܠܰܢ ܫܰܪܺܝܪܳܐܺܝܬ. ܐܰܝܟܰܢܳܐ ܕܟܰܕ ܐܰܝܟ ܪܺܝܫܺܝܬܳܐ ܕܓܶܢܣܳܐ ܕܺܝܠܰܢ ܗܘ̣ܰܝܬ܆ ܠܘܳܬܰܢ ܬܫܰܕܪܺܝܗ̇ ܠܛܰܝܒܽܘܬܳܐ ܗܳܝ ܕܰܡܫܺܝܚܽܘܬܳܐ܆ ܘܰܠܫܰܘܬܳܦܽܘܬܳܐ ܗܳܝ ܕܪܽܘܚܳܐ ܩܰܕܺܝܫܳܐ. ܗܰܘ ܓܶܝܪ ܕܺܐܝܬܰܘܗ̱ܝ ܒܪܳܐ ܕܰܐ‌ܠܳܗܳܐ ܚܰܝܳܐ܆ ܐܰܝܟܰܢܳܐ ܢܶܣܬܢܶܩ ܥܰܠ ܡܫܺܝܚܽܘܬܳܐ ܐܰܘ ܕܢܶܫܬܰܘܬܰܦ ܒܪܽܘܚܳܐ܆ ܗܰܘ ܕܺܐܝܬܰܘܗ̱ܝ ܠܶܗ ܕܺܝܠܳܢܳܝܳܐ ܒܰܟܝܳܢܳܐ܆ ܘܠܰܐ̱ܚܪ̈ܳܢܶܐ ܡܫܰܟܶܢ ܛܰܝܒܽܘܬܳܐ ܕܗܳܢܳܐ.

ܐܳܦ ܟܺܝܬ ܠܘܳܬ ܗܳܕܶܐ ܬܰܘܕܺܝܬܳܐ ܚܰܬܺܝܬܬܳܐ ܘܦܰܐܺܝܬ ܠܰܐܠܳܗܳܐ ܕܦܛܪܘܤ܆ ܡܦܰܢܶܐ ܦܶܬܓܳܡܳܐ ܝܶܫܽܘܥ܆ ܛܽܘܒܰܝܟ ܫܶܡܥܽܘܢ ܒܰܪ ܝܰܘܢܳܐ܆ ܕܶܒܣܪܳܐ ܘܰܕܡܳܐ ܠܳܐ ܓ̣ܠܳܐ ܠܳܟ܆ ܐܶܠܳܐ ܐܰܒܳܐ ܕܺܝܠܝ ܗܰܘ ܕܒܰܫܡܰܝܳܐ^[16]. ܘܡܶܛܽܠ ܡܳܢܳܐ ܦܶܛܪܽܘܤ ܠܚܽܘܕܰܘܗ̱ܝ ܩܰܒܠܶܗ ܠܛܽܘܒܳܐ ܗܳܢܳܐ܆ ܘܗܳܕܶܐ ܟܰܕ ܢܰܐܬܰܐܢܐܝܠ ܠܳܗ̇ ܟܰܕ ܠܳܗ̇ ܠܬܰܘܕܺܝܬܳܐ ܩܰܕܶܡ ܐܰܘܕܺܝ ܘܶܐܡܰܪ ܓܰܠܝܳܐܺܝܬ܆ ܪܰܒܺܝ܆ ܐܰܢ̱ܬ ܐܺܝܬܰܝܟ ܒܪܳܐ ܕܰܐ‌ܠܳܗܳܐ܆ ܐܰܢ̱ܬ ܐܺܝܬܰܝܟ ܡܰܠܟܶܗ ܕܺܐܝܣܪܳܐܶܝܠ^[17]. ܡܶܛܽܠ ܟܺܝܬ ܕܳܐܦ ܡܶܢܗܶܝܢ ܕܰܒ̈ܢܳܬ ܩ̈ܳܠܶܐ. ܐܺܝܬ ܠܡܺܐܠܰܦ ܠܫܽܘܚܠܳܦܳܐ܆ ܘܳܐܦ ܡܶܢܳܗ̇ ܕܬܰܪܥܺܝܬܳܐ ܕܗܳܢܽܘܢ ܕܰܐܘܕܺܝܘ. ܗܳܝ ܓܶܝܪ ܕܶܐܡܰܪ ܪܰܒܺܝ܆ ܗܳܝ ܕܺܐܝܬܶܝܗ̇ ܡܰܠܦܳܢܳܐ܆ ܘܰܐܝܬܺܝ ܒܳܬܰܪܟܶܢ. ܐܰܢ̱ܬ ܐܺܝܬܰܝܟ ܡܰܠܟܶܗ ܕܺܐܝܣܪܳܐܶܝܠ܆ ܠܐܢܳܫܳܝܽܘܬܳܐ ܘܠܰܡܬܰܚܬܳܝܽܘܬܳܐ ܛܶܢܰܬ̣ ܒܰܐܪܥܳܐ ܕܬܰܪܥܺܝܬܶܗ ܕܗܰܘ ܕܰܐܡܪܳܗ̇ ܡܚܰܘܝܳܐ܆ ܘܰܕܠܳܐ ܡܶܕܶܡ ܐܰ‌ܠܳܗܳܝܳܐ ܐܶܬܗܰܓܰܓ ܡܶܛܽܠ ܝܶܫܽܘܥ. ܐܶܠܳܐ ܒܪܳܐ ܕܰܐ‌ܠܳܗܳܐ ܟܰܢ̣ܝܶܗ܆ ܐܰܝܟ ܕܰܠܐ̱ܢܳܫ ܡܰܠܦܳܢܳܐ ܘܡܰܠܟܳܐ ܕܺܐܝܣܪܳܐܶܝܠ܆ ܕܡܰܠܟܽܘܬܳܐ ܗܳܝ ܕܥܰܠ ‌ܐܰܪܥܳܐ ܡܰܡܠܶܟ܆ ܐܰܝܟ ܗܳܝ ܕܶܐܢܳܐ ܐܶܡܪܶܬ ܐܰ‌ܠܳܗ̈ܶܐ ܐܺܝܬܰܝܟܽܘܢ ܘܰܒ̈ܢܰܝܳܐ ܕܰܡܪܰܝܡܳܐ ܟܽܠܟܽܘܢ^[18].

ܦܶܛܪܘܤ ܕܶܝܢ. ܠܗܽܘܢ ܠܒܶܝܬ ܩܽܘ̈ܕܫܶܐ ܟܣܰܝ̈ܳܐ ܕܰܡܡܰܠܠܽܘܬ ܐܰ‌ܠܳܗܽܘܬܳܐ ܥ̣ܰܠ܆ ܟܰܕ ܒܢܰܦܫܶܗ ܐܶܬܬܰܘܒܰܠ ܘܶܐܬܥܰܠܺܝ ܒܝܰܕ ܓܶܠܝܳܢܳܐ ܕܰܐܒܳܐ ܫܡܰܝܳܢܳܐ. ܘܩܰܕܡܳܝܰܬ ܡܰܢ ܐܶܡܰܪ܆ ܕܰܐܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܘܠܰܘ ܕܰܐܢ̱ܬ ܐܺܝܬܰܝܟ ܡܫܺܝܚܳܐ܆ ܐܰܝܟ ܚܰܕ ܡܶܢ ܗܳܢܽܘܢ ܡܫܺܝ̈ܚܶܐ ܕܡܶܢ ܩܕܺܝܡ. ܗܳܢܽܘܢ ܕܛܽܘܦܣܳܢܳܐܺܝܬ ܒܡܶܫܚܳܐ ܡܶܬܡܰܫܚܺܝܢ ܗ̱ܘܰܘ܆ ܐܰܘ ܐܰܝܟ ܚܰܕ ܡܶܢ ܡܰܠ̈ܟܶܐ ܐܰܘ ܢܒܺܝ̈ܶܐ ܗܳܢܽܘܢ ܕܡܶܢ ܐܰ‌ܠܳܗܳܐ ܐܶܬܩܰܕܰܫܘ ܘܶܐܬܦܪܶܫܘ܆ ܐܰܝܟ ܗܳܝ ܕܰܒܡܰܙܡܽܘܪ̈ܶܐ ܐܰܡܺܝܪܳܐ܆ ܠܳܐ ܬܶܬܩܰܪܒܽܘܢ ܠܰܡܫܺܝ̈ܚܰܝ܆ ܘܒܰܢ̈ܒܺܝ̣ܰܝ̣ ܠܳܐ ܬܰܒܶܐܫܽܘܢ^[19]܆ ܐܰܝܟ ܗܳܝ ܕܣܺܝܡܳܐ ܠܘܳܬ ܚܰܒܩܽܘܩ܆ ܢܦܰܩܬ ܠܦܽܘܪܩܳܢܳܐ ܕܥܰܡܳܐ ܕܺܝܠܳܟ. ܠܡܶܦܪܰܩ ܠܰܡܫܺܝ̈ܚܶܐ ܕܺܝܠܳܟ^[20]. ܗܳܝ ܓܶܝܪ ܕܥܰܡ ܐܰܪ̈ܬܪܘܢ܆ ܗܳܢܰܘ ܕܶܝܢ. ܗܰܘ ܡܚܰܘܝܳܢܳܐܺܝܬ ܢܺܐܡܰܪ܆ ܐܰܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܠܕܺܝܠܳܢܳܝܽܘܬܳܐ. ܘܰܠܠܳܐ ܡܫܰܘܬܦܽܘܬܳܐ ܕܰܠܘܳܬ ܗܳܢܽܘܢ ܕܫܰܪܟܳܐ ܡܰܘܕܥܳܐ. ܐܰܢ̱ܬ ܐܺܝܬܰܝܟ ܗܰܘ ܡܫܺܝܚܳܐ. ܗܰܘ ܚܰܕ. ܗܰܘ ܝܺܕܺܝܥܳܐ ܘܰܦܪܺܝܫܳܐ. ܗܰܘ ܕܶܐܣܬܰܟܺܝ. ܗܰܘ ܕܩܰܕܶܡ ܐܶܫܬܰܘܕܰܥ. ܘܩܰܕܶܡ ܐܶܬܟܪܶܙ ܡܶܢ ܢܒܺܝ̈ܶܐ. ܗܰܘ ܕܰܠܘܳܬܶܗ ܘܡܶܛܽܠܳܬܶܗ ܕܰܘܺܝܕ ܐܳܡܰܪ ܗ̱ܘܳܐ܆ ܗܰܘ ܕܝܳܬܶܒ ܥܰܠ ܟܪ̈ܽܘܒܶܐ ܐܶܬܓܠܺܝ^[21]܆ ܘܰܐ‌ܠܳܗܳܐ ܓܰܠܝܳܐܺܝܬ ܢܺܐܬܶܐ܆ ܐܰ‌ܠܳܗܳܐ ܕܺܝܠܰܢ ܘܠܳܐ ܢܶܫܬܽܘܩ. ܒܳܬܰܪܟܶܢ ܕܶܝܢ. ܐܳܦ ܐܰܝܬܺܝ ܒܳܬܰܪ ܗܳܝ ܕܰܐܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܗܳܝ ܕܗܰܘ ܒܪܳܐ ܕܰܐ‌ܠܳܗܳܐ ܚܰܝܳܐ^[22]. ܠܰܘ ܦܫܺܝܛܳܐܺܝܬ ܒܪܳܐ ܕܰܐ‌ܠܳܗܳܐ ܒܛܰܝܒܽܘܬܳܐ܆ ܐܶܠܳܐ ܕܚܰܝܳܐ. ܐܰܝܟ ܚܰܝ̈ܶܐ ܕܡܶܢ ܚܰܝ̈ܶܐ. ܐܰܝܟ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܝܟ ܐܰ‌ܠܳܗܳܐ ܕܡܶܢ ܐܰ‌ܠܳܗܳܐ. ܡܶܢ ܡܡܰܠܠܽܘܬ ܐܰ‌ܠܳܗܽܘܬܳܐ ܓܶܝܪ ܗܳܝ ܕܣܰܓܺܝ ܡܥܰܠܝܳܐ ܐܺܝܬܶܝܗ̇ ܡܠ̣ܺܝܬܳܐ܆ ܗܳܝ ܕܰܒܪܳܐ ܢܶܬܬܰܘܕܶܐ ܗܰܘ ܕܰܐ‌ܠܳܗܳܐ ܚܰܝܳܐ. ܐܳܦ ܓܶܝܪ ܗܰܘ ܕܒܰܒܪܳܐ ܚܳܐܰܪ܆ ܒܨܰܠܡܳܐ ܗܰܘ ܚܰܝܳܐ ܘܰܡܩܰܝܡܳܐ ܕܗܰܘ ܕܝܰܠ̣ܕܶܗ܆ ܝܳܕܰܥ ܓܰܠܝܳܐܺܝܬ܆ ܕܡܶܢ ܗܰܘ ܕܰܐܡܺܝܢܳܐܺܝܬ ܚܰܝ ܘܰܡܩܰܝܰܡ ܝܺܠܺܝܕ܆ ܝܺܕܺܝܥܳܐ ܕܶܝܢ ܕܡܶܢ ܐܰܒܳܐ܆ ܘܰܒܪܳܐ ܐܺܝܬܰܘܗ̱ܝ ܕܰܐ‌ܠܳܗܳܐ ܚܰܝܳܐ. ܘܟܰܕ ܛܳܒ ܐܳܘ ܦܰܛܪܶܐ܆ ܕܡܰܢܽܘ ܡܰܣܒܰܪ ܐܰܢ̱ܬ ܕܺܐܝܬܰܘܗ̱ܝ ܗܰܘ ܒܪܶܗ ܕܐ̱ܢܳܫܳܐ܆ ܐܶܬܦ̣ܩܰܕܬ ܠܡܺܐܡܰܪ. ܘܰܐܝܟܰܢܳܐ ܠܘܳܬ ܡܡܰܠܠܽܘܬ ܐܰ‌‌ܠܳܗܽܘܬܳܐ ܦܪܰܚܬ ܣܠܶܩܬ. ܐܶܠܳܐ ܢܺܐܡܰܪ ܕܳܐܦ ܣܰܓܺܝ ܟܺܐܢܳܐܺܝܬ܆ ܡܶܛܽܠ ܟܺܝܬ ܕܠܶܗ ܠܗܰܘ ܒܪܶܗ ܕܐ̱ܢܳܫܳܐ ܬܐܘܠܘܓܝܣܐ ܥܳܒܶܕ ܐ̱ܢܳܐ܆ ܟܰܕ ܠܶܗ ܟܰܕ ܠܶܗ ܝܳܕܰܥ ܐ̱ܢܳܐ ܕܺܐܝܬܰܘܗ̱ܝ ܒܪܳܐ ܕܰܐ‌ܠܳܗܳܐ܆ ܕܠܳܐ ܡܶܬܦܰܠܰܓ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ^[23] ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ܆ ܐܳܦܶܢ ܓܶܝܪ ܡܶܢ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ܆ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ ܐܶܬܒܰܣܰܪ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܐܶܠܳܐ ܟܺܝܬ ܠܳܐ ܐܰܪܚܶܩ ܡܶܢ ܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ. ܚܰܕ ܓܶܝܪ ܠܳܐ ܡܒܰܨܪܳܐܺܝܬ ܘܠܳܐ ܡܶܫܬܰܚܠܦܳܢܳܐܺܝܬ ܡܶܢ ܬܰܪܬܶܝܢ ܡܶܬܚܙܶܐ ܥܰܡܰܢܽܘܐܶܝܠ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ. ܚܰܕ ܦܰܪܨܽܘܦܳܐ. ܚܰܕ ܩܢܽܘܡܳܐ. ܚܰܕ ܟܝܳܢܳܐ ܕܺܝܠܶܗ ܕܡܶܠܬܳܐ ܐܰ‌ܠܳܗܳܐ.

ܕܗܳܕܶܐ ܬܰܘܕܺܝܬܳܐ ܚܰܬܺܝܬ̣ܬܳܐ܆ ܘܠܰܘ ܦܫܺܝܛܳܐܺܝܬ ܩܰܒܠܶܗ ܦܶܛܪܘܤ ܠܗܰܘ ܛܽܘܒܳܐ܆ ܟܰܕ ܫܡܰܥ ܕܛܽܘܒܰܝܟ ܫܶܡܥܘܢ ܒܪܶܗ ܕܝܰܘܢܳܐ܆ ܕܒܶܣܪܳܐ ܘܰܕܡܳܐ ܠܳܐ ܓ̣ܠܳܐ ܠܳܟ ܐܶܠܳܐ ܐܳܒܝ ܕܺܝܠܝ ܗܰܘ ܕܒܰܫܡܰܝܳܐ^[24]. ܐܰܝܟܰܢܳܐ ܟܺܝܬ ܕܶܐܢ ܐ̱ܢܳܫ ܗܳܟܰܢܳܐ ܡܰܘܕܶܐ ܠܶܗ ܠܰܡܫܺܝܚܳܐ܆ ܐܰܝܟ ܕܰܐܘܕܝܶܗ ܦܶܛܪܘܤ܆ ܗܳܢܳܐ ܟܰܕ ܠܬܰܚܦܺܝܬܳܐ ܕܒܶܣܪܳܐ ܗܳܝ ܕܥܰܠ ܠܶܒܳܐ ܡܢܺܝܚ ܡܶܢܶܗ܆ ܢܳܩܶܦ ܠܓܶܠܝܳܢܳܐ ܕܰܐܒܳܐ ܫܡܰܝܳܢܳܐ. ܐܶܢ ܕܶܝܢ ܐ̱ܢܳܫ ܠܰܬܪܶܝܢ ܟܝܳܢ̈ܶܐ ܡܦܰܠܶܓ ܠܶܗ ܐܰܘ ܦܰܢܛܰܣܺܝܰܐ ܚܳܫܶܒ ܠܳܗ̇ ܠܡܶܬܒܰܣܪܳܢܽܘܬܳܐ ܟܺܝܬ ܫܰܪܺܝܪܬܳܐ ܗܳܝ ܕܡܶܢܰܢ ܘܰܠܡܶܬܒܰܪܢܫܳܢܽܘܬܳܐ܆ ܐܰܘ ܐ̱ܚܪܳܢܝܳܐܺܝܬ ܐܰܝܟܰܢ ܕܗܽܘ ܡܙܰܝܶܦ ܠܶܗ ܠܐ̱ܪܳܙܳܐ ܕܰܥܠܰܘܗ̱ܝ܆ ܗܳܢܳܐ ܘܠܳܐ ܡܶܕܶܡ ܡܶܢ ܠܥܶܠ܆ ܐܶܠܳܐ ܠܟܽܠܶܗ ܣܽܘܥܪܳܢܳܐ ܡܶܢ ܒܶܣܪܳܐ܆ ܘܡܶܢ ܕܡܳܐ ܡܡܰܠܶܠ ܠܶܗ.

ܣܰܓܺܝ ܕܶܝܢ ܛܳܒܳܐܺܝܬ ܘܰܒܙܰܒܢܳܗ̇ ܗܳܪܟܳܐ܆ ܐܰܙܥܩܳܗ̇ ܡܫܺܝܚܳܐ ܠܘܳܬ ܦܛܪܘܤ ܠܗܳܝ ܕܒܰܪ ܝܰܘܢܳܐ܆ ܗܳܝ ܟܺܝܬ ܕܺܐܝܬܶܝܗ̇ ܒܪܳܐ ܕܝܰܘܢܳܐ܆ ܘܗܳܕܶܐ܆ ܟܰܕ ܠܰܘ ܒܟܽܠ ܙܒܰܢ ܒܗܳܢܳܐ ܙܢܳܐ ܡܡܰܠܶܠ ܗ̱ܘܳܐ ܠܘܳܬܶܗ. ܡܶܛܽܠ ܓܶܝܪ ܕܗܰܘ ܒܪܳܐ ܕܰܐ‌ܠܳܗܳܐ ܚܰܝܳܐ ܐܶܡܰܪ ܕܺܐܝܬܰܘܗ̱ܝ܆ ܐܳܦ ܗܽܘ ܒܪܶܗ ܕܝܰܘܢܳܐ ܟܰܢ̣ܝܶܗ. ܟܰܕ ܒܝܰܕ ܗܳܕܶܐ ܓܰܠܝܳܐܺܝܬ ܡܚܰܘܶܐ ܘܰܐܝܟ ܕܰܠܡܺܐܡܰܪ ܐܳܡܰܪ܆ ܕܗܳܟܰܢܳܐ ܐܺܝܬܰܝ ܒܪܳܐ ܫܰܪܺܝܪܳܐ ܕܰܐ‌ܠܳܗܳܐ ܘܰܐܒܳܐ܆ ܘܰܕܠܶܗ ܟܰܕ ܠܶܗ ܠܰܟܝܳܢܳܐ ܡܫܰܘܬܰܦ ܐ̱ܢܳܐ ܥܰܡܶܗ ܘܰܫܘܶܐ ܒܽܐܘܣܺܝܰܐ܆ ܐܰܝܟܰܢܳܐ ܕܰܐܢ̱ܬ ܦܛܪܐ܆ ܒܪܳܐ ܫܰܪܺܝܪܳܐ ܐܺܝܬܰܝܟ ܕܝܰܘܢܳܐ܆ ܘܠܰܘ ܕܰܐ̱ܚܪܺܢܳܐ ܟܝܳܢܳܐ ܐܺܝܬܰܝܟ ܐܰܘ ܟܺܝܬ ܕܽܐܘܣܺܝܰܐ܆ ܐܶܠܳܐ ܐܶܢ ܕܗܳܝ ܕܺܐܝܬܰܘܗ̱ܝ ܐܳܦ ܐܰܒܳܐ ܗܰܘ ܕܝܰܠ̣ܕܳܟ. ܠܗܳܢܽܘܢ ܓܶܝܪ ܕܺܝܠܶܕܘ܆ ܫܰܘ̈ܝ̣ܰܝ̣ ܒܽܐܘܣܺܝܰܐ ܡܶܢ ܟܽܠ ܦܪܽܘܤ ܐܺܝܬܰܝܗܽܘܢ ܗܶܢܽܘܢ ܝܰܠ̈ܕܶܐ.

ܟܰܕ ܗܳܠܶܝܢ ܫܳܡܥܺܝܢ ܒܢܰܝ̈ܳܐ ܕܰܐܪܺܝܽܘܤ܆ ܢܶܒܗܬܽܘܢ ܐܳܦ ܒܗܳܝ܆ ܘܠܳܐ ܢܶܣܒܪܽܘܢ ܕܕܰܡܫܰܡܫܳܢܳܐ ܐ̱ܢܳܫ ܐܺܝܬܶܝܗ̇ ܘܕܰܒܨܺܝܪܳܐ ܗܳܝ ܕܢܺܐܡܰܪ ܒܪܳܐ܆ ܘܳܐܦܠܳܐ ܠܰܐܒܳܐ ܐ̱ܢܳܫ ܝܳܕܰܥ ܐܶܠܳܐ ܐܶܢ ܒܪܳܐ܆ ܘܗܰܘ ܕܶܐܢ ܢܶܨܒܶܐ ܒܪܳܐ ܕܢܶܓܠܶܐ^[25]܆ ܕܬܶܫܡܶܫܬܳܐ ܘܕܰܡܕܰܝܠܳܢܽܘܬܳܐ ܘܕܰܒܨܺܝܪܽܘܬܳܐ ܐܺܝܬܶܝܗ̇ ܡܰܣܒܪܺܝܢ ܠܳܐ ܝܰܠܺܝܦܳܐܺܝܬ. ܗܳܐ ܓܶܝܪ ܐܳܦ ܐܰܒܳܐ ܓܠܳܐ ܠܰܒܪܳܐ܆ ܐܰܝܟܰܢܳܐ ܕܗܽܘ ܒܪܳܐ ܐܳܡܰܪ܆ ܛܽܘܒܰܝܟ ܫܶܡܥܘܢ ܒܰܪ ܝܰܘܢܳܐ܆ ܕܒܶܣܪܐ ܘܰܕܡܳܐ ܠܳܐ ܓܠܳܐ ܠܳܟ܆ ܐܶܠܳܐ ܐܳܒܝ ܗܰܘ ܕܒܰܫܡܰܝܳܐ^[26]. ܗܳܟܰܢܐ ܐܳܦ ܦܰܘܠܽܘܤ ܟܰܕ ܠܓܰܠܰܛܳܝ̈ܶܐ ܫܳܠܰܚ ܗ̱ܘܳܐ ܐܳܡܰܪ ܗ̱ܘܳܐ܆ ܐܶܡܰܬܝ ܕܶܝܢ ܕܰܨܒܳܐ ܐܰ‌ܠܳܗܳܐ ܗܰܘ ܕܦܰܪܫܰܢܝ ܡܶܢ ܟܰܪܣܳܗ̇ ܕܶܐܡܝ܆ ܘܰܩܪܳܢܝ ܒܝܰܕ ܛܰܝܒܽܘܬܶܗ ܕܢܶܓܠܶܐ ܒܺܝ ܠܰܒܪܶܗ^[27]. ܗܳܝ ܕܓܶܠܝܳܢܳܐ ܐܪܐ^[28] ܕܫܰܘܝܽܘܬ ܐܺܝܩܳܪܳܐ ܚܰܘܝܳܗ̇܆ ܐܰܘ ܕܰܡܬܰܚܬܳܝܽܘܬܳܐ.

ܡܰܬܰܝ ܡܰܢ ܗܳܟܺܝܠ܆ ܗܳܟܰܢܳܐ ܟܬܰܒ ܕܰܐܘܕܺܝ ܦܛܪܘܤ܆ ܐܰܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܗܰܘ ܒܪܳܐ ܕܰܐ‌ܠܳܗܳܐ ܚܰܝܳܐ^[29]. ܝܽܘܚܰܢܳܢ ܕܶܝܢ ܒܗܶܝܢ ܟܰܕ ܒܗܶܝܢ ܒܡ̈ܶܠܶܐ ܐܳܬܶܐ܆ ܐܳܦܶܢ ܠܘܳܬ ܫܽܘܐܴܠܳܐ ܐ̱ܚܪܺܢܳܐ ܕܦܳܪܽܘܩܰܢ ܐܳܡܰܪ ܗܳܟܰܢܳܐ. ܐܶܡܰܪ ܗܳܟܺܝܠ ܝܶܫܽܘܥ ܠܰܬܪܶܥܣܰܪ. ܕܰܠܡܳܐ ܐܳܦ ܐܢ̱ܬܽܘܢ ܨܳܒܶܝܢ ܐܢ̱ܬܽܘܢ ܠܡܺܐܙܰܠ܆ ܦܰܢܺܝ ܠܶܗ ܦܶܬܓܳܡܳܐ ܫܶܡܥܽܘܢ ܦܛܪܘܤ. ܡ̈ܶܠܶܐ ܕܚܰܝ̈ܶܐ ܕܰܠܥܳܠܰܡ ܐܺܝܬ ܠܳܟ. ܘܰܚܢܰܢ ܗܰܝܡܶܢܰܢ ܘܺܝܕܰܥܢܰܢ܆ ܕܰܐܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܗܰܘ ܒܪܶܗ ܕܰܐ‌ܠܳܗܳܐ ܚܰܝܳܐ^[30]. ܠܽܘܩܳܐ ܕܶܝܢ. ܒܡ̈ܶܠܶܐ ܡܰܢ ܕܰܒܦܳܣܺܝ̈ܩܳܬܳܐ܆ ܒܬܰܪܥܺܝܬܳܐ ܕܶܝܢ ܠܰܘ ܐ̱ܚܪܺܬܳܐ܆ ܠܘܳܬܶܗ ܟܰܕ ܠܘܳܬܶܗ ܕܫܽܘܐܴܠܳܐ܆ ܟܬܰܒ ܕܦܰܢܺܝ ܦܶܬܓܳܡܳܐ ܦܶܛܪܽܘܤ. ܗܳܟܰܢܳܐ. ܐܳܡܰܪ ܠܗܽܘܢ ܕܶܝܢ. ܐܢ̱ܬܽܘܢ ܕܶܝܢ ܡܰܢܽܘ ܐܳܡܪܺܝܢ ܐܢ̱ܬܽܘܢ ܠܺܝ ܕܺܐܝܬܰܝ. ܟܰܕ ܦܰܢܺܝ ܕܶܝܢ ܦܶܬܓܳܡܳܐ ܦܛܪܘܤ. ܐܶܡܰܪ ܗܰܘ ܡܫܺܝܚܶܗ ܕܰܐ‌ܠܳܗܳܐ^[31]. ܡܰܪܩܽܘܤ ܕܶܝܢ ܒܳܗ̇ ܒܰܕܡܽܘܬܳܐ ܠܠܽܘܩܳܐ ܐܰܫܠܶܡ. ܟܰܕ ܦܰܢܺܝ ܦܶܬܓܳܡܳܐ ܦܶܛܪܘܤ ܐܳܡܰܪ ܠܶܗ. ܐܰܢ̱ܬ ܐܺܝܬܰܝܟ ܗܰܘ ܡܫܺܝܚܳܐ^[32].

ܗܳܠܶܝܢ ܕܶܝܢ ܠܰܘ ܕܣܰܩܽܘܒܠܳܝܽܘܬܳܐ ܐܺܝܬܰܝܗܶܝܢ. ܣܰܩܽܘܒܠܳܝܽܘܬܳܐ ܕܶܝܢ ܐܺܝܬܶܝܗ̇܆ ܗܳܝ ܕܰܒܝܰܕ ܗܳܠܶܝܢ ܕܗܰܘ ܚܰܕ ܟܬܰܒ܆ ܗܳܝ ܕܡܶܢ ܗܰܘ ܐ̱ܚܪܺܢܐ ܐܶܬܟܰܬܒܰܬ̣ ܬܶܬܗܦܰܟ܆ ܟܰܕ ܗܰܘ ܡܰܢ ܐܶܢ ܬܶܓܕܰܫ ܟܬܰܒ܆ ܕܗܳܢܳܐ ܡܶܕܶܡ ܗܘ̣ܳܐ ܐܰܘ ܐܶܬܶܐܡܰܪ ܡܶܢ ܦܳܪܽܘܩܰܢ ܡܫܺܝܚܳܐ܆ ܗܰܘ ܕܶܝܢ ܐܶܫܬܰܥܺܝ܆ ܕܠܳܐ ܗܘ̣ܳܐ ܗܳܢܳܐ ܡܶܕܶܡ ܘܠܳܐ ܐܶܬܶܐܡܰܪ܆ ܐܰܘ ܣܰܩܽܘܒܠܳܐܺܝܬ ܗܘ̣ܳܐ ܐܰܘ ܐܶܬܶܐܡܰܪ܆ ܘܠܰܘ ܐܰܝܟܰܢܳܐ ܕܗܰܘ ܐ̱ܚܪܺܢܳܐ ܐܰܟܬܶܒ. ܗܳܝ ܕܶܝܢ ܕܗܺܝ ܟܰܕ ܗܺܝ ܢܶܫܬܰܥܽܘܢ܆ ܗܰܘ ܡܰܢ ܝܰܬܺܝܪ ܦܰܬ̣ܝܳܐܺܝܬ܆ ܗܰܘ ܕܶܝܢ ܝܰܬܺܝܪ ܩܦܺܝܣܳܐܺܝܬ܆ ܠܰܘ ܕܣܰܩܽܘܒܠܳܝܽܘܬܳܐ ܐܺܝܬܶܝܗ̇܆ ܐܶܠܳܐ ܕܬܰܫܥܺܝܬܳܐ ܐܰܘ ܕܝܰܬܺܝܪ ܡܫܰܡܠܰܝܬܳܐ܆ ܐܰܘ ܕܝܰܬܺܝܪ ܚܰܣܺܝܪܬܳܐ. ܠܰܘ ܓܶܝܪ ܗܽܘ ܗܳܟܘܳܬ ܘܰܒܗܶܝܢ ܟܰܕ ܒܗܶܝܢ ܒܡ̈ܶܠܶܐ܆ ܗܶܢܶܝܢ ܟܰܕ ܗܶܢܶܝܢ ܠܡܶܫܬܰܥܳܝܽܘ ܡܟܰܢܶܝܢ ܚ̱ܢܰܢ ܟܽܠܰܢ. ܐܶܠܳܐ ܟܰܕ ܚܰܕ ܐܺܝܬܰܘܗ̱ܝ ܬܽܘܢܳܝܳܐ܆ ܗܰܘ ܡܰܢ ܝܰܬܺܝܪ ܐܳ‌ܠܨܳܐܺܝܬ ܘܰܩܦܺܝܣܳܐܺܝܬ܆ ܗܰܘ ܕܶܝܢ ܝܰܬܺܝܪ ܡܫܰܪܬܚܳܐܺܝܬ ܡܶܫܬܰܥܶܐ. ܘܙܰܒ̈ܢܺܝܢ ܣܰܓܺܝ̈ܳܐܢ ܗܳܝ ܕܡܶܢ ܐ̱ܚܪܺܢܳܐ ܐܶܫܬܰܒܩܰܬ܆ ܗܰܘ ܐ̱ܚܪܺܢܳܐ ܐܰܘܣܦܳܗ̇. ܘܗ̱ܝ ܕܶܐܬܬܰܘܣܦܰܬ̣ ܫܽܘܪܳܪܳܐ ܐܺܝܬܶܝܗ̇ ܕܗܳܝ ܕܶܐܬܰܐܡܪܰܬ. ܘܠܰܘ ܗܦܽܘܟܝܳܐ. ܡܰܘܣܶܦ ܗ̱ܘ̣ ܓܶܝܪ ܐ̱ܢܳܫ ܥܰܠ ܗܳܝ ܕܫܰܪܺܝܪܳܐ܆ ܗܳܠܶܝܢ ܕܺܐܝܬܰܝܗܶܝܢ ܕܺܝܠܳܗ̇ ܟܰܕ ܕܺܝܠܳܗ̇ ܕܬܰܪܥܺܝܬܳܐ. ܐܳܦ ܓܶܝܪ ܐܶ‌ܠܽܘ ܕܰܓܳܠܬܳܐ ܝܳܕܰܥ ܗ̱ܘܳܐ ܠܳܗ̇ ܠܗܳܝ ܕܶܐܬܰܐܡܪܰܬ܆ ܠܰܘ ܡܡܰܠܳܝܽܘ ܡܡܰܠܶܐ ܗ̱ܘܳܐ ܠܳܗ̇܆ ܐܶܠܳܐ ܡܶܗܦܰܟ ܗ̱ܘ̣ ܗܳܦܶܟ ܗ̱ܘܳܐ ܘܰܡܒܰܛܶܠ ܠܳܗ̇.

ܘܡܶܛܽܠ ܗܳܕܶܐ ܗܳܟܺܝܠ ‌ܐܰܝܟ ܙܢܳܐ ܗܳܢܳܐ ܕܩܰܕܺܝܡ ܣܺܝܡ܆ ܟܽܠܗܽܘܢ ܐܶܘܰܢܓ̈ܶܠܺܝܣܛܶܐ ܫܠܶܡܘ ܐܰܟܚܕܳܐ܆ ܟܰܕ ܐܶܡܰܪܘ ܕܶܐܡܰܪ ܦܛܪܘܤ܆ ܐܰܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܟܰܕ ܗܳܢܽܘܢ ܬܪܶܝܢ ܒܰܠܚܽܘܕ ܐܰܘܣܶܦܘ܆ ܗܳܝ ܕܗܰܘ ܒܪܳܐ ܕܰܐ‌ܠܳܗܳܐ ܚܰܝܳܐ^[33]. ܘܳܐܦ ܠܗܳܕܶܐ ܕܶܝܢ ܠܰܘ ܠܒܰܪ ܡܶܢ ܡܰܥܒܕܳܢܽܘܬܳܐ ܐܰ‌ܠܳܗܳܝܬܳܐ ܥܰܒܕܽܘܗ̇܆ ܗܳܝ ܕܗܳܢܽܘܢ ܡܰܢ ܢܺܐܡܪܽܘܢ ܗܳܢܽܘܢ ܕܶܝܢ ܠܳܐ ܢܺܐܡܪܽܘܢ. ܒܝܰܕ ܡܰܢ ܓܶܝܪ ܗܳܢܶܝܢ ܕܶܐܡܰܪܘ܆ ܡܫܰܡܠܝܽܘܬܳܐ ܕܬܰܘܕܺܝܬܳܐ ܝܺܠܶܦܢܰܢ. ܒܝܰܕ ܕܶܝܢ ܗܳܢܶܝܢ ܕܠܳܐ ܐܶܡܰܪܘ܆ ܐܶܠܳܐ ܣܶܦܩܰܬ̣ ܠܗܽܘܢ ܗܳܝ ܕܰܐܢ̱ܬ ܐܺܝܬܰܝܟ ܗܰܘ ܡܫܺܝܚܳܐ܆ ܐ̱ܚܪܺܢܳܐ ܝܽܘܠܦܳܢܳܐ ܒܳܗ̇ ܒܰܕܡܽܘܬܳܐ ܡܰܠܝܳܐ ܘܚܳܫܚܳܐ ܩܰܕܶܡܘ ܐܰܪܡܺܝܘ ܠܰܢ. ܟܕ ܡܰܠܦܺܝܢ܆ ܕܳܐܦܶܢ ܢܰܘܕܝܘܗ̱ܝ^[34] ܐ̱ܢܳܫ ܡܫܺܝܚܳܐ ܒܰܠܚܽܘܕ܆ ܠܰܘ ܡܒܰܨܪܳܐܺܝܬ ܦܰܢܺܝ. ܐܰܘܕܰܥ ܓܶܝܪ ܠܰܒܪܳܐ ܕܰܐ‌ܠܳܗܳܐ ܚܰܝܳܐ ܕܶܐܬܒܰܣܰܪ ܘܶܐܬܒܰܪܢܰܫ.

ܡܶܛܽܠ ܗܳܕܶܐ ܗܳܟܺܝܠ ܠܘܳܬ ܪܰܫܺܝܥܳܐ ܢܶܣܛܽܘܪܺܝܽܘܤ܆ ܕܠܰܫܡܳܐ ܕܰܡܫܺܝܚܳܐ ܡܦܰܠܶܓ ܗ̱ܘܳܐ ܘܦܳܣܶܩ܆ ܟܰܕ ܣܰܓܺܝ ܚܰܟܺܝܡܳܐܺܝܬ ܡܳܬܰܚ ܗ̱ܘܳܐ ܩܰܕܺܝܫܳܐ ܩܽܘܪܝܠܘܤ܆ ܒܛܽܘܡܣܳܐ ܕܰܬܠܳܬܳܐ ܕܗܳܢܶܝܢ ܕܠܽܘܩܒܰܠ ܓܽܘ̈ܕܳܦܰܘܗܝ܆ ܗܳܟܰܢܳܐ ܐܳܡܰܪ. ܐܶܡܰܬܝ ܕܢܶܫܡܰܥ ܕܡܶܢ ܩܰܕܺܝܫܬܳܐ ܒܬܽܘܠܬܐ ܐܶܬܺܝܠܶܕ ܡܫܺܝܚܳܐ܆ ܗܳܝܕܶܝܢ ܟܺܝܬ ܗܳܝܕܶܝܢ ܘܣܰܓܺܝ ܚܰܟܺܝܡܳܐܺܝܬ܆ ܘܟܰܕ ܒܰܬܪܺܝܨܽܘܬܶܗ ܕܰܫܪܳܪܳܐ ܝܰܨܺܝܦܺܝܢܰܢ ܠܡܶܪܕܳܐ܆ ܠܡܶܠܬܳܐ ܗܰܘ ܕܡܶܢ ܐܰ‌ܠܳܗܳܐ ܐܰܒܳܐ ܐܶܬܺܝܠܶܕ܆ ܐܳܡܪܺܝܢܰܢ ܕܶܐܬܒܰܪܢܰܫ ܟܺܝܬ ܘܶܐܬܚܰܝܰܕ ܠܒܶܣܪܳܐ ܩܢܽܘܡܳܐܺܝܬ܆ ܘܳܐܦ ܕܶܐܬܺܝܠܶܕ ܟܺܝܬ ܒܰܒܣܰܪ܆ ܘܠܰܒܓܳܠܳܐ ܕܺܝܠܳܟ ܕܰܒܗܳܕܶܐ ܠܳܐ ܡܶܬܪܡܶܝܢܰܢ܆ ܠܚܰܕ ܕܶܝܢ ܘܒܰܠܚܽܘܕܰܘܗ̱ܝ܆ ܠܰܒܪܳܐ ܗܰܘ ܕܒܰܟܝܳܢܳܐ܆ ܠܰܫܡܳܐ ܗܳܢܳܐ ܡܫܺܝܚܳܐ ܝܳܗܒܺܝܢܰܢ ܘܳܠܝܳܐܺܝܬ. ܘܡܶܢ ܒܳܬܰܪ ܐ̱ܚܪ̈ܳܢܝܳܬܳܐ ܬܽܘܒ. ܚܢܰܢ ܕܶܝܢ ܡܶܢ ܒܳܬܰܪ ܚܕܳܝܽܘܬܳܐ܆ ܐܳܦܶܢ ܐܰ‌ܠܳܗܳܐ ܡܶܠܬܳܐ ܢܫܰܡܰܗ ܐ̱ܢܳܫ܆ ܠܰܘ ܤܛܰܪ ܡܶܢ ܒܶܣܪܳܐ ܕܺܝܠܶܗ ܡܶܣܬܰܟܠܺܝܢܰܢ ܠܶܗ. ܐܳܦ ܢܺܐܡܰܪ ܡܫܺܝܚܳܐ܆ ܠܡܶܠܬܳܐ ܕܶܐܬܒܰܣܰܪ ܡܶܫܬܰܘܕܥܺܝܢܰܢ.

ܘܗܳܟܰܢܳܐ ܡܰܢ܆ ܗܰܘ ܟܳܪܽܘܙܳܐ ܕܰܫܪܳܪܳܐ܆ ܘܕܰܒܥܶܩ̈ܒܳܬܳܐ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ. ܪܳܕܶܐ. ܪܽܘܡܢܘܤ ܕܶܝܢ ܗܰܘ ܕܥܰܠ ܟܰܬܦ̈ܳܬܶܗ ܛܥܺܝܢ ܠܣܶܒܠܬܳܐ ܗܳܝ ܪܰܫܺܝܥܬܳܐ ܒܰܕܡܽܘܬ ܓܰܢܳܒܳܐ ܠܶܠܝܳܐ܆ ܐܰܝܟܰܢܳܐ ܕܠܰܘ ܒܝܰܕ ܬܰܪܥܳܐ ܕܕܳܪܬܳܐ ܢܶܥܽܘܠ ܗܰܘ ܕܒܶܗ ܥܳܐܠܺܝܢ ܪ̈ܳܥܰܘܳܬܳܐ܆ ܐܶܠܳܐ ܡܶܢ ܕܽܘܟܬܳܐ ܐ̱ܚܪܺܬܳܐ ܢܶܣܰܩ܆ ܟܰܕ ܨܳܒܶܐ ܠܰܡܚܰܠܳܨܽܘ ܠܗܰܘܢܳܐ ܚܠܺܝܡܳܐ ܕܡ̈ܶܠܶܐ ܟܳܗ̈ܢܳܝܳܬܳܐ^[35]܆ ܠܬܽܘܢܳܝܳܐ ܗܰܘ ܡܰܘܬܪܳܢܳܐ ܕܶܐܘܰܢܓ̈ܶܠܺܝܣܛܶܐ܆ ܘܰܡܫܰܚܠܦܳܐ ܐܰܟܚܕܳܐ^[36] ܘܫܰܠܡܳܐ. ܗܰܘ ܕܰܥܒܰܕܘ ܡܶܛܽܠ ܡܰܘܕܝܳܢܽܘܬܳܐ ܕܦܛܪܘܤ܆ ܝܽܘܩܢܳܐ ܘܛܽܘܦܣܳܐ ܕܒܺܝܫܽܘܬ ܫܽܘܒܚܳܐ ܡܦܰܬܰܟܬܳܐ ܕܗܶܪ̈ܛܝܩܘ ܐܶܡܰܪ ܕܺܐܝܬܰܘܗ̱ܝ܆ ܒܗܳܠܶܝܢ ܥܬܺܝܕܳܐ ܗ̱ܘܳܬ ܕܶܝܢ ܗܰܝܡܳܢܽܘܬܳܐ ܬܪܺܝܨܬܳܐ ܗܳܝ ܕܰܫܠܺܝ̈ܚܶܐ ܕܬܶܙܕܰܝܰܦ ܒܙܰܒ̈ܢܶܐ܆ ܡܶܢ ܚܰܕܬ̣ܽܘܬ̣ ܩܳܠܳܐ ܡܣܰܝܰܒܬܳܐ ܕܒܺܝ̈ܫܰܝ ܫܽܘܒܚܳܐ. ܡܶܛܽܠ ܗܳܕܶܐ ܐܶܘܰܢܓ̈ܶܠܺܝܣܛܶܐ ܟܰܕ ܒܪܽܘܚܳܐ ܢܒܺܝ̣ܳܝ̣ܳܐ ܡܶܬܥܰܠܶܝܢ܆ ܐܳܦ ܠܡܶܫܬܰܚܠܦܳܢܽܘܬܗܽܘܢ ܕܙܰܒ̈ܢܶܐ ܡܰܟܬܒܺܝܢ܆ ܐܳܦ ܠܡܶܫܬܰܓܢܝܳܢܽܘܬܗܽܘܢ ܕܗܳܢܽܘܢ ܕܡܶܬܬܰܠܡܕܺܝܢ ܡܫܰܘܕܥܺܝܢ. ܬܽܘܒ ܕܶܝܢ ܐܳܦ ܠܕܽܘܓ̈ܡܰܛܰܐ ܒܺܝ̈ܫܶܐ ܩܳܕܡܺܝܢ ܐܳܡܪܺܝܢ܆ ܕܗܳܢܽܘܢ ܕܡܶܢ ܒܳܬܰܪܗܽܘܢ ܩܛܺܝܪܳܐܺܝܬ ܚܳܛܦܺܝܢ ܠܺܐܝܩܳܪܳܐ ܕܩܰܕܺܝܡܽܘܬ ܡܰܘܬܒܳܐ. ܗܳܢܽܘܢ ܕܒܺܐܝ̈ܕܰܝܗܽܘܢ܆ ܠܳܐ ܢܳܡܽܘܣܳܝܽܘܬܳܐ ܡܰܢ ܗܶܪܛܝܩܝܬܐ ܬܶܣܓܶܐ܆ ܚܽܘܒܳܐ ܕܶܝܢ ܫܠܺܝܚܳܝܳܐ ܢܶܩ̣ܰܪ^[37].

ܘܡܰܢܽܘ ܐܶܡܰܪ ܠܺܝ ܢܶܬܪܡܶܐ ܠܗܳܢܳܐ ܓܽܘܕܳܦܳܐ܆ ܘܢܰܡܪܰܚ ܕܢܺܐܡܰܪ ܐܶܢܽܘܢ ܠܶܐܘܰܢܓ̈ܶܠܺܝܣܛܶܐ܆ ܕܩܰܕܡܳܝ̈ܶܐ ܚܰܫܘ ܫܽܘܚܠܳܦܳܐ ܘܫܽܘܓܢܳܝܳܐ ܘܰܦܠܺܝܓܽܘܬܳܐ ܡܦܰܬܰܟܬܳܐ܆ ܐܰܝܟܰܢܳܐ ܕܰܠܗܳܝ ܕܗܶܪ̈ܛܝܩܘ ܢܩܰܕܡܽܘܢ ܢܛܰܦܣܽܘܢ. ܐܰܝܟܰܢܳܐ ܕܶܝܢ ܠܥܶܠ ‌ܐܳܡܰܪ ܐܰܢ̱ܬ܆ ܐܶܠܳܐ ܢܰܡܪܰܚ ܐ̱ܢܳܫ ܠܡܺܐܡܰܪ܆ ܕܰܡܙܰܝܰܦ ܘܰܡܫܰܚܠܰܦ ܝܽܘܩܢܳܐ ܕܰܫܪܳܪܳܐ܆ ܘܰܦܠܺܝܓܺܝܢ ܘܠܳܐ ܫܳܠܡܺܝܢ ܠܘܳܬ ܢܰܦܫܗܽܘܢ ܗܶܢܽܘܢ ܐܶܘܰܢܓ̈ܶܠܺܝܣܛܶܐ܆ ܚܳܤ. ܘܡܳܢܳܐ ܐܺܝܬ ܕܝܰܬܺܝܪ ܫܟܺܝܪ ܘܝܰܬܺܝܪ ܓܽܘܡܕܳܢ ܡܶܢ ܗܳܕܶܐ ܦܠܺܝܓܽܘܬܳܐ܆ ܐܰܝܟܰܢܳܐ ܕܗܶܢܽܘܢ ܢܶܗܘܽܘܢ ܐܺܝܬܰܝܗܽܘܢ ܝܽܘܩ̈ܢܶܐ ܘܛܽܘܦܣ̈ܶܐ܆ ܕܛܳܥܝܽܘܬܳܐ ܣܰܓܺܝܰܐܬ̣ ܣܶܕܩ̈ܶܐ ܕܗܶܪ̈ܛܝܩܘ܆ ܘܡܶܛܽܠ ܗܳܕܶܐ ܢܶܗܘܽܘܢ ܡܦ̈ܰܬܟܶܐ. ܩܰܕܶܡܘ ܡܰܢ ܓܶܝܪ ܐܶܡܰܪܘ܆ ܐܳܦ ܐܶܘܰܢܓ̈ܶܠܺܝܣܛܶܐ ܐܳܦ ܫܠܺܝ̈ܚܶܐ ܓܰܠܝܳܐܺܝܬ܆ ܡܶܛܽܠ ܗܶܪ̈ܣܝܤ ܗܳܠܶܝܢ ܕܰܥܬܺܝ̈ܕܳܢ ܗ̱ܘܰܝ̈ ܠܡܶܗ̱ܘܳܐ܆ ܟܰܕ ܩܳܕܡܺܝܢ ܗ̱ܘܰܘ ܡܙܰܗܪܺܝܢ ܠܗܳܢܽܘܢ ܕܡܶܬܬܰܠܡܕܺܝܢ ܗ̱ܘܰܘ ܠܡܶܠܬܳܐ ܕܰܫܪܳܪܳܐ܆ ܐܰܝܟܰܢܳܐ ܕܦܰܘܠܽܘܤ ܟܰܕ ܠܩܽܘܪ̈ܺܝܢܬܝܐ ܫܳܠܰܚ ܐܳܡܰܪ܆ ܥ̈ܬܺܝܕܳܢ ܓܶܝܪ ܕܳܐܦ ܗܶܪ̈ܣܝܤ ܢܶܗܘ̈ܝܳܢ ܒܟܽܘܢ܆ ܐܰܝܟܰܢܳܐ ܕܗܳܢܽܘܢ ܒܚܺܝܪ̈ܶܐ ܓܠ̈ܰܝܳܐ ܢܶܗܘܽܘܢ ܒܟܽܘܢ^[38]܆ ܠܰܘ ܕܶܝܢ ܟܺܝܬ ܗܳܢܽܘܢ ܟܳܪ̈ܽܘܙܶܐ ܕܰܫܪܳܪܳܐ܆ ܗܘ̣ܰܘ ܩܰܕܡܳܝ̈ܶܐ ܐܰܝܟ ܕܰܐܢ̱ܬ ܐܳܡܰܪ ܐܰܢ̱ܬ܆ ܛܽܘܦ̈ܣܶܐ ܕܰܗܦܽܘܟܝܳܐ ܘܰܕܫܽܘܓܢܳܝܳܐ܆ ܟܰܕ ܡܫܰܚܠܦܳܐܺܝܬ ܐܰܟܬܶܒܘ. ܗܳܕܶܐ ܓܶܝܪ܆ ܘܠܳܐ ܡܶܕܶܡ ܐ̱ܚܪܺܢܳܐ ܐܺܝܬܶܝܗ̇܆ ܐܶܠܳܐ ܕܗܶܢܽܘܢ ܢܶܦܠܽܘܢ ܬܚܶܝܬ ܥܶܕܠܳܝܳܐ ܕܰܦܠܺܝܓܽܘܬܳܐ ܘܠܳܐ ܫܰܠܡܽܘܬܳܐ܆ ܘܰܢܩܰܕܡܽܘܢܢܶܥܒܕܽܘܢܡܰܦܰܩܒܪܽܘܚܳܐ ܚܠܳܦܰܝܗܶܝܢ ܕܗܶܪ̈ܣܝܤ. ܢܺܐܡܪܽܘܢ ܓܶܝܪ ܕܗܳܕܶܐ ܣܥܰܪܢܰܢ ܗܳܝ ܕܩܰܒܶܠܢܰܢ܆ ܘܠܰܘ ܡܶܕܶܡ ܪܰܒܳܐ ܐܺܝܬܶܝܗ̇܆ ܐܶܢ ܚܢܰܢ ܐܶܬܦܠܰܓܢܰܢ܆ ܟܰܕ ܗܳܢܽܘܢ ܕܰܗܘ̣ܰܘ ܚܰܙܳܝ̈ܶܐ ܘܰܡܫܰܡ̈ܫܳܢܶܐ ܕܡܶܠܬܳܐ^[39]܆ ܗܳܕܶܐ ܡܶܢ ܩܕܳܡܰܝܢ ܚܰܫܘ. ܐܶܠܳܐ ܘܠܳܐ ܐ̱ܢܳܫ ܡܬܽܘܡ ܡܶܢ ܗܳܢܽܘܢ ܕܦܰܫܶܩܘ ܠܶܐܘܰܢܓܶܠܺܝܽܘܢ܆ ܐܶܡܰܪܘ ܕܶܐܬܦܰܬܰܟܘ ܐܶܘܰܢܓ̈ܶܠܺܝܣܛܶܐ ܘܶܐܫܬܰܚܠܰܦܘ. ܐܶܠܳܐ ܐܳܦ ܠܗܳܠܶܝܢ ܕܡܶܣܬܰܒܪ̈ܳܢ ܕܰܡܫܰܚ̈ܠܦܳܢ. ܕܺܐܝܬ ܠܗܶܝܢ ܫܰܠܡܽܘܬܳܐ ܪܺܝܫܳܝܬܳܐ ܟܽܠܗܽܘܢ ܚܰܘܺܝܘ ܐܶܢܶܝܢ. ܠܦܘܪܦܘܪܝܘܤ ܓܶܝܪ ܘܰܠܝܽܘܠܝܐܢܘܤ ܗܳܢܽܘܢ ܕܠܳܐ ܐܰ‌ܠܳܗ ܘܕܰܫܢ̣ܰܘ ܠܽܘܩܒܰܠ ܫܪܳܪܳܐ܆ ܗܘ̣ܳܬ ܝܰܨܺܝܦܽܘܬܳܐ ܗܳܝ ܕܐ̱ܢܳܫܺܝ̈ܢ ܡܦ̈ܰܬܟܶܐ ܘܰܡܫܰܚ̈ܠܦܶܐ ܘܰܕܠܳܐ ܫܳܠܡܺܝܢ ܠܰܚ̈ܕܳܕܶܐ ܢܚܰܘܽܘܢ ܐܶܢܽܘܢ ܠܶܐܘܰܢܓ̈ܶܠܺܝܣܛܶܐ܆ ܘܰܒܪܰܡ ܟܺܝܬ ܡܶܢܶܗ ܕܰܫܪܳܪܳܐ ܐܶܬܟܣܶܣܘ܆ ܗܰܘ ܟܺܝܬ ܕܡܶܢ ܒܳܬܰܪ ܬܰܘܕܺܝܬܳܐ ܗܳܝ ܕܶܐܬܓܰܠܝܰܬ ܡܶܢ ܐܰܒܳܐ ܫܡܰܝܳܢܳܐ܆ ܠܘܳܬ ܦܶܛܪܽܘܤ ܐܶܡܰܪ܆ ܐܰܢ̱ܬ ܐܺܝܬܰܝܟ ܫܽܘܥܳܐ܆ ܘܥܰܠ ܗܳܢܳܐ ܫܽܘܥܳܐ ܐܶ݀ܒܢܶܝܗ̇ ܠܥܺܕܬܝ܆ ܘܬܰܪ̈ܥܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇^[40]. ܫܽܘܥܳܐ ܕܶܝܢ ܠܬܰܘܕܺܝܬܳܐ ܠܳܐ ܡܶܨܛܰܠܝܳܢܺܝܬܳܐ ܕܗܰܝܡܳܢܽܘܬܳܐ ܩܳܪܶܐ܆ ܗܳܝ ܕܦܛܪܘܤ ܫܰܦܺܝܪ ܐܰܘܕܺܝ. ܡܳܕܶܝܢ. ܗܳܢܽܘܢ ܕܥܰܠ ܗܳܢܳܐ ܫܽܘܥܳܐ ܡܶܬܒܢܶܝܢ܆ ܘܰܠܬܰܘܕܺܝܬܳܐ ܗܳܕܶܐ ܬܪܺܝܨܬܳܐ ܡܶܬܬܰܪܬܶܝܢ ܘܡܶܬܝܰܠܦܺܝܢ܆ ܐܳܦ ܥܺܕܬܳܐ ܡܶܬܰܐܡܪܺܝܢ ܡܳܪܳܢܳܐܺܝܬ. ܟܰܕ ܕܶܝܢ ܫܽܘܥܳܐ ܠܰܘ ܚܠܺܝܡܳܐܺܝܬ ܐܺܝܬ ܠܶܗ܆ ܐܰܢܰܢܩܺܐ ܕܳܐܦ ܗܽܘ ܫܡܳܐ ܕܥܺܕܬܳܐ ܢܕܰܓܶܠ. ܫܽܘܪܳܐ ܕܶܝܢ ܪܰܒܳܐ ܐܰܝܟ ܕܒܰܫܪܳܪܳܐ ܠܥܺܕܬܳܐ ܗܳܝ ܕܡܰܫܪܳܐ ܠܟܽܘܢܳܝܳܗ̇ ܐܺܝܬܶܝܗ̇܆ ܗܺܝ ܒܰܪ̱ܬ ܩܳܠܶܗ ܕܡܳܪܰܢ.

ܐܳܦ ܓܶܝܪ ܠܳܐ ܐܶܡܰܪ܆ ܘܚܺܐܦܳܐ ܘܰܩܪܳܒܳܐ ܠܳܐ ܢܶܚܣܢܽܘܢܳܗ̇. ܐܶܠܐ܆ ܘܬܰܪ̈ܥܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇². ܡܳܢܳܐ ܕܶܝܢ ܐܺܝܬܶܝܗ̇ ܗܳܕܶܐ. ܚܰܢ̈ܦܶܐ ܗܳܢܰܘ ܕܶܝܢ ܡܢܺܝ̈ܚܳܢܶܐ ܕܫ̈ܺܐܕܶܐ܆ ܘܡܶܢ ܒܳܬܰܪ ܗܳܢܽܘܢ ܐܰܪ̈ܝܐܢܘ܆ ܘܗܳܢܽܘܢ ܕܰܐܚ̈ܘܳܬܳܐ ܠܗܳܠܶܝܢ ܐܶܬܟܪܰܗܘ܆ ܗܳܟܰܢܳܐ ܚܰܣܺܝܢܳܐܺܝܬ ܪܰܕܦܽܘܗ̇ ܘܰܐܒܶܐܫܘ ܠܳܗ̇ ܘܡܰܟܟ̣ܽܘܗ̇܆ ܐܰܝܟܰܢܳܐ ܕܬܶܣܬܒܰܪ ܕܰܛܒܺܝܥܳܐ ܘܰܐܒܺܝܕܳܐ܆ ܘܰܠܘܳܬܗܽܘܢ ܕܬܰܪ̈ܥܶܐ ܕܰܫܝܽܘܠ ܡܳܛܝܝܳܐ. ܐܶܠܳܐ ܒܪܰܡ ܩܳܡܰܬ܆ ܘܰܠܪܺܝܫܳܗ̇ ܐܰܝܟ ܕܡܶܢ ܓܰܠ̈ܠܶܐ ܘܡܶܢܗܽܘܢ ܕܥܽܘܡ̈ܩܶܐ ܬܰܚ̈ܬܳܝܶܐ ܐܰܣܩܰܬ. ܐܰܩܺܝܡܬܳܗ̇ ܓܶܝܪ ܒܰܪ̱ܬ ܩܳܠܶܗ ܕܰܐ‌ܠܳܗܳܐ ܗܰܘ ܕܶܐܡܰܪ܆ ܘܬܰܪ̈ܥܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܘܳܬ ܡܬܺܝܚܳܝܽܘܬܳܐ ܘܢܰܓܺܝܪܽܘܬܳܐ ܕܢܶܣ̈ܝܽܘܢܶܐ܆ ܠܳܐ ܙܳܕܶܩ ܠܰܢ ܕܢܶܡܰܐܢ. ܐܶܠܳܐ ܐܶܢܗܽܘ ܕܥܰܠ ܗܰܝܡܳܢܽܘܬܳܐ ܬܪܺܝܨܬܳܐ ܘܥܰܠ ܫܽܘܥܳܐ ܕܪܺܝܟܺܝܢ ܚ̱ܢܰܢ܆ ܢܶ݀ܬܬܟܶܠ ܘܰܩܒܺܝܥܳܐܺܝܬ ܢܣܰܒܰܪ܆ ܥܰܠ ܗܰܘ ܕܶܐܡܰܪ܆ ܘܬܰܪ̈ܥܶܐ ܕܰܫܝܽܘܠ ܠܳܐ ܢܶܚܣܢܽܘܢܳܗ̇^[41].

ܠܗܳܢܽܘܢ ܕܰܒܪܺܝܫ ܥܺܕܬܳܐ ܕܕܰܐܝܟ ܗܳܕܶܐ ܩܳܝܡܺܝܢ܆ ܗܳܝ ܕܥܰܠ ܗܰܝܡܳܢܽܘܬܳܐ ܚܠܺܝܡܬܳܐ ܡܫܰܬܐܣܳܐ܆ ܝܰܗ̱ܒ ܩ̈ܠܺܝܕܶܐ ܕܡܰܠܟܽܘܬܳܐ ܕܰܫܡܰܝܳܐ ܐܰܝܟܰܢܳܐ ܕܰܠܦܶܛܪܘܤ. ܗܳܠܶܝܢ ܕܶܝܢ ܐܺܝܬܰܝܗܽܘܢ܆ ܒܢ̈ܳܬ ܩ̈ܳܠܶܐ ܕܟܳܗ̈ܢܶܐ ܗܳܢܽܘܢ ܕܢܳܩܦܺܝܢ ܠܗܰܝܡܳܢܽܘܬܶܗ ܕܦܛܪܘܤ܆ ܗܳܠܶܝܢ ܕܳܐܣܪ̈ܳܢ ܘܫܳܪ̈ܝܳܢ. ܥܰܡ ܗܳܠܶܝܢ ܓܶܝܪ܆ ܐܳܦ ܗܽܘ ܪܶܡܙܳܐ ܕܰܐ‌ܠܳܗܳܐ ܫܡܰܝܳܢܳܐ ܐܰܟܚܕܳܐ ܡܰܦܶܩ ܦܳܣܩܳܐ. ܕܗܳܢܽܘܢ ܕܶܝܢ ܕܰܠܒܰܪ ܡܶܢ ܫܽܘܥܳܐ ܩܳܝܡܺܝܢ܆ ܒܳܐܰܐܪ ܡܶܬܰܐܫ̈ܕܳܢ ܡܶܠܱ̈ܝܗܽܘܢ. ܘܣܳܥܪܺܝܢ ܘܠܳܐ ܡܶܕܶܡ. ܡܶܛܽܠܗܳܕܶܐ ܒܶܠܥܰܡ ܐܳܡܰܪ ܗ̱ܘܳܐ܆ ܡܳܢܳܐ ܐܶ݀‌ܠܽܘܛ ܠܗܰܘ ܕܠܳܐ ܠܴܐܶܛ ܠܶܗ ܡܳܪܝܳܐ܆ ܘܡܳܢܳܐ ܐ‌ܠܝ݀ܛ ܠܗܰܘ ܕܠܳܐ ܡ̇ܠܝܛ ܠܶܗ ܐܰ‌ܠܳܗܳܐ^[42].

ܐܰܝܟܳܐ ܐܺܝܬܰܝܗܽܘܢ ܗܳܢܽܘܢ ܕܠܽܐܘܪܫܠܶܡ ܗܳܝ ܡܶܬܪܰܓܫܳܢܺܝܬܳܐ ܘܡܶܬܚܰܙܝܳܢܺܝܬܳܐ ܐܰܚܺܝܕܺܝܢ܆ ܡܶܢ ܫܽܘܥܳܐ ܕܶܝܢ ܘܡܶܢ ܗܰܝܡܳܢܽܘܬܳܐ ܚܠܺܝܡܬܳܐ ܫܪܰܥܘ܆ ܘܰܒܚܶܪ̈ܡܶܐ ܣܪ̈ܺܝܩܶܐ ܠܗܳܢܽܘܢ ܕܰܬܪ̈ܺܝܨܳܬܳܐ ܡܶܬܪܰܥܶܝܢ. ܣܳܒܪܺܝܢ ܕܡܰܪܡܶܝܢ܆ ܘܠܰܟܬܳܒܳܐ ܕܬܶܐܽܘܕܽܘܪܺܝܛܽܘܤ ܗܰܘ ܢܕܺܝܕܳܐ ܩܳܪܶܝܢ܆ ܠܗܰܘ ܕܰܡܕܰܡܝܳܢܳܐ ܛܰܪܩܳܐ ܕܪܰܫܺܝܥܽܘܬܶܗ ܕܢܶܣܛܽܘܪܺܝܽܘܤ ܐܰܡܪܶܗ ܩܰܕܺܝܫܳܐ ܩܽܘܪܺܝܠܘܤ܆ ܘܡܶܢ ܬܶܫܒܽܘܚܬܳܐ ܗܳܝ ܬܠܺܝܬܳܝܰܬ̣ ܩܽܘ̈ܕܫܶܐ ܦܣܰܩܘ ܘܰܐܪܺܝܡܘ ܠܗܳܝ ܕܶܐܨܛܠܶܒܬ ܡܶܛܽܠܳܬܰܢ. ܘܚܰܘܺܝܘ ܕܡܶܛܽܠ ܡܳܢܳܐ ܠܣܽܘܢܶܗܕܘܤ ܕܰܒܟܰܠܩܺܝܕܽܘܢܰܐ ܗܳܝ ܡܰܟܪܰܙܬܳܐ ܘܰܡܣܰܝܰܒܬܳܐ ܒܦܶܢܩ̈ܝܳܬܳܐ ܟܳܗ̈ܢܳܝܳܬܳܐ ܣܳܡܘ. ܐܰܝܟܰܢܳܐ ܬܽܘܒ ܐܳܦ ܟܪ̈ܺܝܣܛܝܳܢܶܐ ܢܶܫܟܚܽܘܢ ܠܡܶܬܩܪܳܝܽܘ܆ ܟܰܕ ܥܰܡ ܓܒܺܝܢܳܐ ܠܰܫܡܳܐ ܟܢܺܝܟܳܐ ܕܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܡܰܟܪܟܺܝܢ ܠܗܳܢܶܝܢ ܕܶܐܚܰܕܘ ܐܶܢܶܝܢ ܒܰܙܒܰܢ ܐܳܦ ܡܥܰܕܪ̈ܳܢܶܐ ܕܫܳܢܝܽܘܬܶܗ ܕܰܐܪܺܝܽܘܤ. ܟܰܕ ܪܕܰܦܘ ܠܶܐܦܝܣܩܘܦܳܐ ܕܺܝܠܗܽܘܢ ܣܳܒܳܐ ܘܳܐܘܪܬܘܕܘܟܣܳܐ ܩܽܘܪܺܝܠܘܤ܆ ܐܶܡܰܬܝ ܕܰܠܘܳܬ ܡܕܺܝܢ̱ܬܳܐ ܕܛܰܐܪ̈ܣܳܝܶܐ ܐܶܙܰܠ ܗ̱ܘܳܐ ܥܳܪܽܘܩܳܐ ܗܰܘ ܫܰܦܺܝܪ ܕܶܚܠܬܳܐ. ܐܰܪܰܐ ܠܰܘ ܒܶܗܬܬܳܐ ܚܰܝܳܒܺܝܢ ܗ̱ܘܰܘ ܗܳܝܕܶܝܢ܆ ܗܳܢܽܘܢ ܕܰܐܪܝܢܝܣܐ ܡܰܢ ܥܳܒܕܺܝܢ ܗ̱ܘܰܘ܆ ܐܳܡܪܺܝܢ ܗ̱ܘܰܘ ܕܶܝܢ ܡܶܛܽܠ ܗܳܝ ܕܳܐܚ̈ܽܘܕܶܐ ܐܺܝܬܰܝܗܽܘܢ ܗ̱ܘܰܘ ܕܕܽܘܟ̈ܝܳܬܳܐ ܕܰܡܫܺܝܚܳܐ܆ ܐܳܦ ܕܗܰܝܡܳܢܽܘܬܳܐ ܕܰܡܫܺܝܚܳܐ ܐܰܚܺܝܕܺܝܢ܆ ܡܶܫܟܚܺܝܢ ܗ̱ܘܰܘ ܕܶܝܢ ܟܰܕ ܡܒܰܓܒܓܺܝܢ ܒܓܰܓܪ̈ܳܬܗܽܘܢ ܒܩܳܠܳܐ ܪܳܡܳܐ ܠܡܺܐܡܰܪ܆ ܐܰܝܟܰܢܳܐ ܕܗܳܫܳܐ ܐܢ̱ܬܽܘܢ ܐܳܘ ܛܳܒ̈ܶܐ܆ ܗܳܝ ܕܡܶܢ ܨܶܗܝܽܘܢ ܓܶܝܪ ܢܶܦܽܘܩ ܢܳܡܽܘܣܳܐ܆ ܘܡܶܠܬܳܐ ܕܡܳܪܝܳܐ ܡܶܢ ܐܽܘܪܶܫܠܶܡ^[43]܆ ܩܪܰܘ ܠܰܢܒܺܝ̈ܰܘܳܬܳܐ܆ ܘܕܰܥܘ ܕܡܰܢܽܘ ܐܺܝܬܰܝܟܽܘܢ ܛܰܢܳܢ̈ܶܐ. ܐܳܦ ܓܶܝܪ ܗܳܢܽܘܢ ܡܶܢ ܩܕܺܝܡ܆ ܟܰܕ ܠܒܰܪ ܡܶܢ ܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܐܶܬܺܝܗܶܒ܆ ܘܰܠܒܰܪ ܡܶܢ ܦܽܘ̈ܩܳܕܶܐ ܕܰܐ‌ܠܳܗܳܐ ܡܶܬܗܰܦܟܺܝܢ ܗ̱ܘܰܘ܆ ܘܟܰܕ ܢܒܺܝ̈ܶܐ ܡܬܰܪܨܺܝܢ ܗ̱ܘܰܘ ܘܓܳܙܡܺܝܢ ܗ̱ܘܰܘ ܠܗܽܘܢ. ܠܳܐ ܫܳܡܥܺܝܢ ܗ̱ܘܰܘ܆ ܐܶܠܳܐ ܒܽܐܘܪܫܠܶܡ ܘܰܒܗܰܝܟܠܳܐ ܐܰ‌ܠܳܗܳܝܳܐ ܡܶܬܪܰܘܪܒܺܝܢ ܗ̱ܘܰܘ܆ ܡܶܬܟܰܣܣܺܝܢ ܗ̱ܘܰܘ ܕܰܢܦܺܝܚܽܘܬܳܐ ܣܦܺܝܩܬܳܐ ܐܺܝܬ ܗ̱ܘܳܐ ܠܗܽܘܢ܆ ܡܶܢ ܐܶܪܰܡܝܳܐ ܢܒܺܝܳܐ ܟܰܕ ܐܳܡܰܪ ܗ̱ܘܳܐ܆ ܠܳܐ ܬܶܬܰܟܠܽܘܢ ܥܰܠ ܢܰܦܫܟܽܘܢ܆ ܐܰܘ ܥܰܠ ܡ̈ܶܠܶܐ ܕܰܓ̈ܳܠܳܬܳܐ. ܡܶܛܽܠ ܕܣܳܟ. ܠܳܐ ܢܰܘܬܪ̈ܳܢܳܟܽܘܢ ܕܳܐܡܪܺܝܢ ܐܢ̱ܬܽܘܢ܆ ܗܰܝܟܠܶܗ ܕܡܳܪܝܳܐ ܗܰܝܟܠܶܗ ܕܡܳܪܝܳܐ ܐܺܝܬܰܘܗ̱ܝ^[44]. ܘܬܽܘܒ. ܠܡܳܢܳܐ ܚܰܒܺܝܒܬܳܐ ܒܒܰܝܬܝ ܥܒ̣ܰܕܬܝ ܛܰܢܦܽܘܬܳܐ^[45]. ܘܬܽܘܒ. ܫܶܒܩܶܬ ܒܰܝܬܝ. ܐܰܪܦܺܝܬ ܝܳܪܬܽܘܬܝ^[46]. ܗܳܠܶܝܢ ܕܡܶܛܽܠܳܬܗܶܝܢ ܐܳܦ ܗܰܘ ܢܒܺܝܳܐ ܟܰܕ ܟܡܺܝܪ ܗ̱ܘܳܐ ܐܽܘܠܺܝܬܳܢܳܐܺܝܬ ܐܳܡܰܪ ܗ̱ܘܳܐ܆ ܡܰܢܽܘ ܢܚܽܘܤ ܥܠܰܝܟܝ ܐܽܘܪܶܫܠܶܡ. ܐܰܘ ܡܰܢܽܘ ܢܶܬܟܡܰܪ ܥܠܰܝܟܝ. ܐܰܘ ܡܰܢܽܘ ܢܶܬܦܰܢܶܐ ܢܶܫܰܐܠ ܫܠܳܡܶܟܝ. ܐܰܢ̱ܬܝ ܐܰܗܦܶܟܬܝ ܐܰܦܰܝ̈ܟܝ ܡܶܢܝ ܐܳܡܰܪ ܡܳܪܝܳܐ^[47]. ܡܳܕܶܝܢ. ܐܳܦܠܳܐ ܚܢܰܢ ܠܫܰܝܢܳܐ ܗܰܘ ܕܰܠܘܳܬ ܗܳܝ ܢܶܒܥܶܐ܆ ܟܰܕ ܒܝܰܕ ܕܽܘܓ̈ܡܰܛܰܐ ܗܶܪ̈ܛܝܩܳܝܶܐ ܐܰܗܦܟܰܬ ܐܰܦܶܝ̈ܗ̇ ܡܶܢ ܡܳܪܝܳܐ. ܕܡܶܢ ܗܳܪܟܳܐ. ܠܳܐ ܬܡܺܝܗܳܐ܆ ܐܶܢ ܟܰܕ ܗܳܟܰܢܳܐ ܐܺܝܬ ܠܗܽܘܢ ܪܰܫܺܝܥܳܐܺܝܬ܆ ܠܗܳܢܽܘܢ ܕܰܬܪܺܝܨܳܐܺܝܬ ܡܫܰܒܚܺܝܢ܆ ܒܚܶܪܡܳܐ ܐܰܣܒܰܪܘ ܕܡܳܚܶܝܢ. ܐܳܦ ܓܶܝܪ ܘܠܶܐܪܰܡܝܳܐ ܚܰܝܶܒܘ ܟܰܕ ܐܳܡܪܺܝܢ ܗ̱ܘܰܘ܆ ܕܺܝܢܳܐ ܕܡܰܘܬܳܐ ܠܒܰܪܢܳܫܳܐ ܗܳܢܳܐ܆ ܕܶܐܬܢܰܒܺܝ ܥܰܠ ܡܕܺܝܢ̱ܬܳܐ ܗܳܕܶܐ^[48]. ܐܰܝܟܰܢܳܐ ܟܺܝܬ ܕܙܳܕܶܩ ܗ̱ܘܳܐ ܠܗܽܘܢ. ܕܟܰܕ ܗܳܠܶܝܢ ܗܶܪ̈ܛܺܝܩܳܝܳܬܳܐ ܡܶܬܪܰܥܶܝܢ܆ ܠܰܘ ܡܶܢ ܕܽܘܟ̈ܝܳܬܳܐ ܢܶܬܟܰܢܟܽܘܢ ܘܢܶܫܬܰܒܗܪܽܘܢ܆ ܚܽܘܝܳܒ̈ܶܐ ܕܶܝܢ ܢܶܣܒܠܽܘܢ܆ ܥܰܠ ‌‌ܐܰܦ̈ܰܝ ܗܳܠܶܝܢ ܕܟܰܕ ܡܰܪܫܥܺܝܢ܆ ܠܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܡܨܰܥܪܺܝܢ܆ ܟܰܕ ܟܳܠܶܝܢ ܠܰܡܗܰܝܡ̈ܢܶܐ ܡܶܢ ܣܶܓܕܬܳܐ ܕܗܳܢܶܝܢ. ܡܰܢܽܘ ܓܶܝܪ ܕܺܐܝܬ ܠܶܗ ܗܰܘܢܳܐ ܢܶܓܒܶܐ ܠܶܗ ܕܰܒܥܶܠܬܳܐ ܕܕܽܘܟ̈ܝܳܬܳܐ ܣܓܺܝ̈ܕܳܬܳܐ܆ ܒܐܢܳܫܳܐ ܪ̈ܰܫܺܝܥܶܐ ܢܶܦܓܰܥ܆ ܟܰܕ ܒܰܪ̱ܬ ܩܳܠܶܗ ܕܡܳܪܝܳܐ ܐܳܡܪܳܐ܆ ܕܶܐܣܬܕܶܩܘ ܡܶܢ ܡܰܫܟ̈ܢܰܝܗܽܘܢ ܕܐ̱ܢܳܫܳܐ ܗܳܠܶܝܢ ܩܫܰܝ̈ܳܐ܆ ܘܠܳܐ ܬܶܓܫܦܽܘܢ ܒܡܶܕܶܡ ܡܶܢ ܟܽܠܗܶܝܢ ܗܳܠܶܝܢ ܕܺܐܝܬ ܠܗܽܘܢ ܕܠܳܐ ܬܺܐܒܕܽܘܢ ܐܰܟܚܕܳܐ ܒܟܽܠܳܗ̇ ܚܛܺܝܬܳܐ ܕܺܝܠܗܽܘܢ^[49]. ܕܙܳܕܶܩ ܓܶܝܪ ܕܰܒܗܰܝܡܳܢܽܘܬܳܐ ܚܠܺܝܡܬܳܐ ܒܰܠܚܽܘܕܶܝܗ̇ ܢܚܽܘܪ܆ ܘܥܰܡ ܗܳܕܶܐ ܢܶܬܛܰܟܰܤ. ܘܰܐܝܟ ܢܳܡܽܘܣܶܗ ܕܰܫܠܺܝܚܳܐ܆ ܒܟܽܠ ܕܽܘܟܳܐ ܢܪܺܝܡ ܐܺܝ̈ܕܰܝܳܐ ܚܰܣ̈ܝܳܬܳܐ^[50]. ܘܥܰܡ ܕܰܘܺܝܕ ܢܺܐܡܰܪ܆ ܒܟܽܠ ܕܽܘܟܳܐ ܕܡܳܪܽܘܬܶܗ܆ ܒܰܪܶܟܝ ܢܰܦܫܐ ܕܺܝܠܝ ܠܡܳܪܝܳܐ^[51]. ܘܶܐܢ ܕܶܝܢ ܠܳܐ܆ ܐܳܦ ܠܰܢ܆ ܐܺܝܬ ܗ̱ܘܳܐ ܠܰܢ ܫܽܘܒܗܳܪ̈ܶܐ ܚܰܝ̈ܠܬܳܢܶܐ܆ ܬܪܽܘܢܘܤ ܩܰܕܡܳܝܳܐ ܕܪܺܝܫܳܐ ܕܰܫ̈ܠܺܝܚܶܐ܆ ܫܡܳܐ ܗܰܘ ܪܰܒܳܐ܆ ܗܰܘ ܚܰܕܬܳܐ܆ ܗܰܘ ܕܶܐܬܒܰܪܰܟ ܥܰܠ ‌ܐܰܪܥܳܐ܆ ܗܰܘ ܕܰܟܪ̈ܺܝܣܛܝܳܢܶܐ܆ ܕܡܶܢ ܗܳܪܟܳܐ ܫܰܪܺܝ. ܐܶܠܳܐ ܗܳܠܶܝܢ܆ ܦܽܘܩܳܩܳܐ. ܒܰܠܚܽܘܕ ܐܺܝܬܰܝܗܶܝܢ ܕܰܢܦܺܝ̈ܚܘܳܬܳܐ ܘܰܕܪܽܘܪ̈ܳܒܶܐ܆ ܐܶܢ ܠܰܘ ܠܫܽܘܥܳܐ ܐܰܚܺܝܕܺܝܢܰܢ ܐܶܠܳܐ ܠܰܬܪܽܘܢܘܤ. ܕܰܥܠܰܘܗ̱ܝ ܕܫܽܘܥܳܐ. ܬܶܗܘܶܐ ܕܰܢܩܽܘܡ ܩܒܺܝܥܳܐܺܝܬ܆ ܘܠܰܘ ܒܚܽܘܟ̈ܡܶܐ ܕܰܒܢܰܝ̈ܢܳܫܳܐ. ܐܶܠܳܐ ܒܡܶܠܬܳܐ ܕܰܨܠܺܝܒܳܐ ܢܶܬܬܟܶܠ܆ ܘܰܐܝܟܰܢܳܐ ܕܦܰܘܠܽܘܤ ܐܳܡܰܪ܆ ܕܠܺܝ ܕܶܝܢ ܠܳܐ ܬܶܗܘܶܐ ܠܡܶܫܬܰܒܗܳܪܽܘ܆ ܐܶܠܳܐ ܐܶܢ ܒܰܨܠܺܝܒܶܗ ܕܡܳܪܰܢ ܝܶܫܽܘܥ ܡܫܺܝܚܳܐ^[52]. ܠܗܰܘ ܕܦܰܐܝܳܐ ܬܶܫܒܽܘܚܬܳܐ. ܘܽܐܘܚܕܳܢܳܐ܆ ܥܰܡ ܐܰܒܳܐ ܩܰܕܺܝܫ ܒܟܽܠ܆ ܘܪܽܘܚܳܐ ܡܰܥܒܶܕ ܚܰܝ̈ܶܐ ܘܰܫܘܶܐ ܒܽܐܘܣܺܝܰܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܡܳܐܐ ܘܥܶܣܪܺܝܢ ܘܰܐܪܒܥܳܐ.

ܡܬܝ. 16: 13 [1]

ܐ. ܛܝܡܬܐܘܣ. 2: 4 [2]

ܐܫܥܝܐ. 40: 12 [3]

ܐܫܥܝܐ. 40: 18 ـ 22[4]

ܐܝܘܒ. 38: 3 ـ 5 [5]

ܐܪܡܝܐ. 23: 24 [6]

ܝܘܚܢܢ. 1: 3 [7]

 ܝܘܚܢܢ. 5: 36 [8]

 ܝܘܚܢܢ. 10: 37 ـ 38 [9]

ܡܬܝ. 16: 13 ـ 18[10]

 ܡܬܝ. 18: 1[11]

ܡܬܝ. 16: 13 [12]

ܐܪܡܝܐ. 5: 22 [13]

 ܡܬܝ. 16: 14 ـ 17[14]

ܠܢܦܫܟ[15]

ܡܬܝ. 16: 17 [16]

 ܝܘܚܢܢ. 1: 49[17]

ܡܙܡܘܪ̈ܐ. 82: 6 [18]

 ܡܙܡܘܪ̈ܐ. 105: 15[19]

ܚܒܩܘܩ. 3: 12 [20]

ܡܙܡܘܪ̈ܐ. 80: 1 [21]

ܡܬܝ. 16: 16[22]

ܕܰܟܝܳܢܳܐ[23]

ܡܬܝ. 16: 17 [24]

ܡܬܝ. 11: 27 [25]

ܡܬܝ. 16: 17 [26]

 ܓܰܠܰܛܳܝ̈ܶܐ. 1: 15 ـ 16[27]

ܡܕܝܢ[28]

 ܡܬܝ. 16: 16 [29]

 ܝܘܚܢܢ. 6: 68 ـ 70[30]

 ܠܘܩܐ. 9: 20 [31]

ܡܪܩܘܣ. 8: 29 [32]

[33]ܡܬܝ. 16: 16  ܐܦ ܡܪܩܘܣ. 8: 29

ܐܦ ܠܘܩܐ.    9: 20  ܐܦ ܝܘܚܢܢ. 6: 70

ܢܰܘܕܽܘܗܝ[34]

ܝܘܚܢܢ. 10: 1 [35]

ܫܘܶܐ ܒܫܰܠܡܽܘܬܳܐ[36]

ܡܬܝ. 24: 12 [37]

 ܐ. ܩܘܪ̈ܝܢܬܝܐ. 11: 19[38]

 ܠܘܩܐ. 1: 2 [39]

 ܡܬܝ. 16: 18[40]

ܡܬܝ. 16: 18 [41]

ܡܢܝܢܐ. 23: 8 [42]

ܐܫܥܝܐ. 2: 3 [43]

ܐܪܡܝܐ. 7: 4 [44]

ܐܪܡܝܐ. 11: 15 [45]

ܐܪܡܝܐ. 12: 7 [46]

ܐܪܡܝܐ. 15: 5 ـ 6 [47]

ܐܪܡܝܐ. 26: 11 [48]

ܡܢܝܢܐ. 16: 26 [49]

ܐ. ܛܝܡܬܐܘܣ. 2: 8[50]

 ܡܙܡܘܪܐ. 103: 22[51]

ܓܠ̈ܛܝܐ. 6: 14[52]