ܡܺܐܡܪܳܐ ܕܡܳܐܐ ܘܥܶܣܪܺܝܢ ܘܰܬܠܳܬܳܐ

ܡܺܐܡܪܳܐ ܕܡܰܪܬܝܳܢܽܘܬܳܐ. ܕܥܶܠܬܳܐ ܡܰܢ ܘܰܡܠܽܘܐܐ ܥܳܒܶܕ܆ ܬܰܘܕܺܝܬܳܐ ܕܗܰܝܡܳܢܽܘܬܳܐ ܬܪܺܝܨܬܳܐ. ܓܳܫܶܦ ܕܶܝܢ ܝܰܬܺܝܪܳܐܺܝܬ ܒܪܽܘܫܥܳܐ ܢܕܺܝܕܳܐ ܕܡܰܢܺܝ̈ܢܳܝܶܐ܆ ܘܩܳܕܶܡ ܡܙܰܗܰܪ ܠܘܳܬ ܗܳܝ ܕܠܳܐ ܐ̱ܢܳܫ ܢܶܦܶܠ ܒܢܶܫ̈ܒܰܝܗܽܘܢ ܕܗܳܢܽܘܢ܆ ܡܶܛܽܠ ܗܳܝ ܕܳܐܦ ܐ̱ܢܳܫܺܝ̈ܢ ܫܩܰܠܘ ܢܶܣܝܳܢܳܗ̇ ܕܛܳܥܝܽܘܬܳܐ ܡܰܘܒܕܳܢܺܝܬܳܐ ܗܳܝ ܕܕܰܐܝܟ ܗܳܕܶܐ.

ܩܟ ܓܟܰܕ ܥܬܺܝܕ ܐ̱ܢܳܐ ܕܰܒܡܺܐܡܪܳܐ ܕܡܰܪܬܝܳܢܽܘܬܳܐ ܐܶ݀ܓܫܽܘܦ܆ ܨܳܒܶܐ ܐ̱ܢܳܐ ܡܰܢ ܘܰܒܝܰܕ ܝܰܨܺܝܦܽܘܬܳܐ ܕܣܰܓܺܝ ܚܦܺܝܛܳܐ ܐܺܝܬܶܝܗ̇ ܠܺܝ܆ ܕܟܰܕ ܒܰܫܡܳܐ^[1] ܕܺܝܠܶܗ ܕܣܽܘܥܪܳܢܳܐ ܠܳܚܡܳܐܺܝܬ ܡܬܪܢܐ ܐ̱ܢܳܐ܆ ܒܰܙܡܳܡ̈ܶܐ ܡܶܕܶܡ ܒܰܠܚܽܘܕ ܐܶ݀ܓܫܽܘܦ ܘܶܐ݀‌ܠܒܽܘܟ܆ ܘܰܠܗܳܠܶܝܢ ܪܰܟܺܝܟܳܐܺܝܬ ܘܝܰܬܺܝܪ ܡܰܟܺܝܟܳܐܺܝܬ ܐܶ݀ܙܰܡ܆ ܘܰܐܝܟ ܗܰܘ ܕܡܰܠܚܶܫ ܐ̱ܢܳܐ܆ ܘܠܰܘ ܒܗܶܝܢ ܒܰܒ̈ܢܳܬ ܩ̈ܳܠܶܐ ܠܰܡܡܰܠܠܽܘܬ ܐܰ‌ܠܳܗܽܘܬܳܐ ܐܶ݀ܩܪܽܘܒ܆ ܠܘܳܬ ܗܳܝ ܕܥܳܨܝܳܐ ܠܺܝ ܕܺܐ݀ܬܶܐ ܐܰܝܟܰܢ ܕܗܽܘ ܗܺܝ ܬܰܘܕܺܝܬܳܐ ܕܗܰܝܡܳܢܽܘܬܳܐ܆ ܐܰܝܟܰܢܳܐ ܕܠܳܐ ܟܰܕ ܡܶܬܬܰܪܥܡܳܐ ܡܰܫܡܰܥܬܳܐ ܫܰܪܘܳܝܬܳܐ ܘܠܳܐ ܡܰܐܪܰܐܙܬܳܐ܆ ܐܰܘ ܕܰܐ̱ܚܪܳܢܝܳܐܺܝܬ ܐܺܝܬܶܝܗ̇ ܠܳܐ ܝܰܠܺܝܦܬܳܐ ܘܰܕܠܳܐ ܦܠܺܝܚܳܐ ܒܕܰܐܝܟ ܗܳܠܶܝܢ܆ ܐܶ݀ܛܥܶܐ ܠܺܝ ܕܡܶܣܟܰܪ ܣܳܟܰܪ ܐ̱ܢܳܐ ܠܳܗ̇ ܘܣܳܐܶܓ ܐ̱ܢܳܐ ܒܗܳܝ ܕܝܰܬܺܝܪ ܩܳܥܶܐ ܐ̱ܢܳܐ܆ ܐܰܘ ܦܳܬܰܚ ܐ̱ܢܳܐ ܠܳܗ̇ ܒܗܳܝ ܕܡܰܙܶܡ ܐ̱ܢܳܐ ܒܳܗ̇ ܩܰܠܺܝܠ ܩܰܠܺܝܠ ܪܰܟܺܝܟܳܐܺܝܬ܆ ܗܳܢܳܐ ܟܽܠܶܗ ܟܡܳܐ ܕܡܳܛܝܳܐ ܘܡܶܫܟܚܳܐ ܕܬܶܫܡܰܥ. ܝܳܕܰܥ ܐ̱ܢܳܐ ܕܶܝܢ ܝܳܕܰܥ ܐ̱ܢܳܐ ܓܰܠܝܳܐܺܝܬ܆ ܕܶܐܢܗܽܘ ܕܰܠܥܰܝܢܳܐ ܕܬܰܪܥܺܝܬܝ ܒܰܠܚܽܘܕ ܐܶ݀ܫܰܡܰܪ ܠܘܳܬ ܣܽܘܟܳܠܳܐ ܕܬܶܫܒܽܘܚܬܳܐ ܐܰ‌ܠܳܗܳܝܬܳܐ܆ ܘܬܶܚܙܶܐ ܡܶܕܶܡ ܡܶܢ ܗܳܠܶܝܢ ܠܳܐ ܡܶܬܚܰܙܝܳܢ̈ܝܳܬܳܐ ܘܰܕܢܳܦ̈ܠܳܢ ܬܚܶܝܬ ܡܰܕܪܟܳܢܽܘܬܳܐ ܕܺܝܠܰܢ܆ ܘܶܐ݀ܫܰܪܶܐ ܕܶܐ݀ܗܕܽܘܤ ܒܶܗ ܒܗܳܢܳܐ ܩܰܠܺܝܠ ܡܶܕܶܡ܆ ܐܶ݀ܬܥܰܠܶܐ ܘܶܐ݀ܬܬܪܺܝܡ ܒܰܪܫܳܥܬܶܗ ܘܶܐ݀ܬܚܛܶܦ܆ ܘܰܠܘܳܬ ܛܽܘܪܳܐ ܕܣܽܘ̈ܟܳܠܶܐ ܪ̈ܳܡܶܐ ܢܰܣܩܰܢܝ ܡܶܢ ܟܽܠ ܦܪܽܘܤ ܝܶܫܽܘܥ܆ ܗܰܘ ܡܶܠܬܶܗ ܕܰܐ‌ܠܳܗܳܐ܆ ܗܰܘ ܚܰܕ ܡܶܢ ܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܗܰܘ ܬܰܪܥܳܐ ܕܺܝܕܰܥܬܳܐ܆ ܗܰܘ ܕܰܙܗܺܝܪܳܐܺܝܬ ܡܰܥܶܠ܆ ܠܘܳܬ ܥܰܡܺܝ̈ܩܳܬܳܐ ܡܰܢ ܡܶܢ ܬܶܐܽܘܪܺܝܰܐܤ܆ ܡܶܬܕܰܪ̈ܟܳܢܝܳܬܳܐ ܕܶܝܢ ܒܪܰܡ܆ ܘܝܰܬܺܝܪ ܙܗܺܝܪܳܐܺܝܬ ܡܰܦܶܩ܆ ܡܶܢ ܗܳܝ ܕܰܠܡܰܠܳܦܽܘ ܗܳܠܶܝܢ ܕܠܳܐ ܙܳܕܶܩ ܠܡܶܓܫܰܦ ܒܗܶܝܢ܆ ܘܡܶܛܽܠܗܳܕܶܐ ܐܳܡܰܪ܆ ܐܶܢܳܐ ܐܺܝܬܰܝ ܬܰܪܥܳܐ܆ ܒܺܐܝ̈ܕܰܝ ܐܶܢ ܐ̱ܢܳܫ ܢܶܥܽܘܠ ܢܶܬܦܪܶܩ܆ ܘܢܶܥܽܘܠ ܘܢܶܦܽܘܩ ܘܪܶܥܝܳܐ ܢܶܫܟܰܚ^[2]. ܡܶܛܽܠ ܗܳܕܶܐ ܟܺܝܬ܆ ܐܳܦ ܢܚܶܬ ܠܘܳܬܰܢ܆ ܒܰܙܢܳܐ ܗܰܘ ܕܡܶܬܒܰܪܢܫܳܢܽܘܬܳܐ ܗܳܝ ܣܰܓܺܝ ܪܳܚܡܰܬ ܐ̱ܢܳܫܳܐ. ܟܰܕ ܐܰܝܟ ܕܰܠܡܺܐܡܰܪ܆ ܐܳܦ ܫܳܛܰܚ ܗ̱ܘܳܐ ܗܽܘ ܠܶܗ ܠܪܶܓܠܳܐ ܕܬܰܪܥܺܝܬܳܐ ܕܺܝܠܰܢ ܗܳܝ ܕܥܰܠ ‌ܐܰܪܥܳܐ ܡܗܰܠܟܳܐ܆ ܐܰܝܟܰܢܳܐ ܕܡܶܬܬܕܺܝܫܳܢܺܝܬܳܐ ܬܶܗܘܶܐ ܗܺܝ ܡܰܥܰܠܬܳܐ ܠܗܳܢܽܘܢ ܕܠܳܐ ܡܶܫܟܚܺܝܢ ܠܡܶܕܪܰܟ ܘܰܠܡܶܥܰܠ. ܥܰܡ ܬܰܪܥܳܐ ܗܳܟܺܝܠ ‌ܐܳܦ ܐܽܘܪܚܳܐ ܗܽܘ ܠܶܗ ܫܰܡܰܗ܆ ܟܰܕ ܥܰܡ ܫܽܘܚܠܳܦܗܽܘܢ ܕܣܽܘ̈ܟܳܠܶܐ ܘܬܰܪ̈ܥܝܳܬܳܐ ܣܳܐܶܡ ܐܰܟܚܕܳܐ ܘܰܡܠܰܚܶܡ ܫܡܳܗ̈ܶܐ. ܘܳܐܡܰܪ܆ ܐܶܢܳܐ ܐܺܝܬܰܝ ܐܽܘܪܚܳܐ ܘܰܫܪܳܪܳܐ ܘܚܰܝ̈ܶܐ. ܘܠܳܐ ܐ̱ܢܳܫ ܐܳܬܶܐ ܠܘܳܬ ܐܰܒܳܐ܆ ܐܶܠܳܐ ܐܶܢ ܒܺܐܝ̈ܕܰܝ^[3].

ܐܶܢ ܗܳܟܺܝܠ ‌ܐܶ݀ܗܰܠܶܟ ܒܝܰܕ ܐܽܘܪܚܳܐ܆ ܐܶܢ ܐܶ݀ܕܪܽܘܟ ܥܰܠ ܬܰܪܥܳܐ܆ ܐܳܦ ܠܘܳܬ ܛܽܘܪܳܐ܆ ܐܳܦ ܟܰܕ ܠܳܐ ܨܳܒܶܐ ܐ̱ܢܳܐ ܐܶ݀ܬܥܱܠܶܐ. ܐܳܦ ܓܶܝܪ ܠܰܘ ܒܰܠܚܽܘܕ ܠܗܳܢܽܘܢ ܕܰܐܝܟ ܦܶܛܪܽܘܤ ܘܝܰܥܩܽܘܒ ܘܝܽܘܚܰܢܳܢ ܪܚܺܝܡܳܐ ܠܶܗ ܠܡܰܣܳܩܽܘ܆ ܐܶܠܳܐ ܐܳܦ ܠܗܳܢܽܘܢ ܕܣܰܓܺܝ ܐܺܝܬܰܝܗܽܘܢ ܙܥܽܘܪ̈ܶܐ ܘܡܰܟܺܝ̈ܟܶܐ܆ ܠܦܽܘܬ ܡܫܽܘܚܬܳܐ ܕܚܰܝܠܳܐ ܕܟܠ ܚܰܕ ܡܶܢܗܽܘܢ. ܒܪܰܡ ܟܽܠܶܗ ܣܽܘܥܪܳܢܳܐ ܪܶܚܡܰܬ ܐ̱ܢܳܫܳܐܺܝܬ. ܘܠܰܘ ܒܗܳܝ ܕܰܚܢܰܢ ܩܰܪܺܝܒܺܝܢ ܚ̱ܢܰܢ܆ ܐܶܠܳܐ ܒܗܳܝ ܕܗܽܘ ܩܰܪܺܝܒ܆ ܠܗܳܢܽܘܢ ܕܠܰܘ ܒܟܽܠ ܡܶܕܶܡ ܪܰܚܺܝܩܺܝܢ܆ ܐܰ‌ܠܳܗܳܐ ܓܶܝܪ ܕܩܰܪܺܝܒ ܐܺܝܬܰܝ ܐܶܢܳܐ ܐܳܡܰܪ܆ ܘܠܰܘ ܐܰ‌ܠܳܗܳܐ ܕܡܶܢ ܪܽܘܚܩܳܐ^[4].

ܐܶܢ ܕܶܝܢ ܐܶ݀ܣܰܩ܆ ܐܳܦ ܬܶܫܬܰܚܠܰܦ ܕܡܽܘܬܶܗ ܐܶܢ ܬܶܓܕܰܫ^[5] ܩܕܳܡܰܝ܆ ܐܰܝܟ ܗܳܝ ܕܒܶܐܘܰܢܓ̈ܶܠܺܝܰܐ ܟܬܺܝܒܳܐ. ܠܳܐ ܬܽܘܒ ܓܶܝܪ ܐܰܝܟ ܐܽܘܪܚܳܐ ܐܰܘ ܬܰܪܥܳܐ ܗܳܢܽܘܢ ܕܰܡܗܰܕܶܝܢ ܘܰܐܝܟ ܗܰܘ ܕܡܰܥ̈ܠܳܢܳܝܶܐ ܐܺܝܬܰܝܗܽܘܢ ܕܣܽܘ̈ܟܳܠܶܐ ܢܶܓܠܶܐ܆ ܘܗܳܠܶܝܢ ܕܺܐܝܬܰܝܗܶܝܢ ܠܳܚ̈ܡܳܬܳܐ ܠܡܰܫܡܰܥܬܳܐ ܕܗܳܢܽܘܢ ܕܡܶܬܬܰܪܬܶܝܢ܆ ܐܶܠܳܐ ܡܶܢ ܗܳܢܶܝܢ ܕܩܰܪ̈ܺܝܒܳܢ܆ ܠܘܳܬ ܗܳܠܶܝܢ ܕܝܰܬܺܝܪ ܪ̈ܳܡܳܢ ܢܝܰܒܶܠ ܘܰܢܩܰܪܶܒ. ܘܗܳܕܶܐ ܐܺܝܬܰܘܗ̱ܝ ܗܰܘ ܫܽܘܚܠܳܦ ܕܡܽܘܬܳܐ ܡܰܣܰܩܬܳܐ ܘܕܽܘܪܳܓܳܐ ܕܣܽܘ̈ܟܳܠܶܐ.

ܢܶܢܗܰܪ ܕܶܝܢ ܐܳܦ ܦܰܪܨܽܘܦܶܗ ܕܺܝܠܶܗ ܐܰܝܟ ܫܶܡܫܳܐ ܘܢܰܚ̈ܬܰܘܗ̱ܝ ܢܶܗܘܽܘܢ ܚܶܘܳܪ̈ܶܐ܆ ܐܰܝܟ ܢܽܘܗܪܳܐ^[6]. ܡܶܢ ܓܶܝܪ ܫܽܘܒܚܳܐ ܗܰܘ ܕܒܰܚܕܳܪ̈ܰܘܗ̱ܝ܆ ܘܡܶܢ ܗܳܠܶܝܢ ܕܡܶܢ ܠܒܰܪ ܡܶܬܚܰܙ̈ܝܳܢ ܥܠܰܘܗ̱ܝ ܡܶܬܺܝܕܰܥ ܐܰ‌ܠܳܗܳܐ܆ ܐܰܝܟ ܙܢܳܐ ܕܡܶܢ ܢܰܚ̈ܬܶܐ ܢܰܨܺܝ̈ܚܶܐ܆ ܘܠܰܘ ܡܶܢ ܡܶܬܒܩܝܳܢܽܘܬܳܐ ܘܡܶܬܗܰܘܢܳܢܽܘܬܳܐ ܕܡܶܢ ܠܓܰܘ ܘܕܰܡܛܰܫܝܳܐ. ܕܰܐܝܟ ܐܰܝܟܰܢ. ܡܶܢ ܫܽܘܦܪܳܐ ܘܪܰܒܽܘܬܳܐ ܕܒܶܪ̈ܝܳܬܳܐ܆ ܘܡܶܢ ܡܛܰܟܣܽܘܬܳܐ ܘܰܡܠܰܚܡܽܘܬܳܐ ܗܳܝ ܕܡܶܬܚܰܙܝܳܐ ܒܗܶܝܢ. ܐܰܝܟܰܢܳܐ ܕܢܺܐܡܰܪ ܒܰܕܡܽܘܬ ܢܒܺܝܳܐ ܕܰܘܺܝܕ܆ ܡܳܐ ܪܰܘܪ̈ܒܺܝܢ ܥ̈ܒܳܕܰܝܟ ܡܳܪܝܳܐ. ܠܟܽܠܗܽܘܢ ܒܚܶܟܡܬܳܐ ܥܒܰܕܬ ܐܶܢܽܘܢ^[7]. ܘܡܶܢ ܗܳܠܶܝܢ ܕܗܽܘ ܠܥܰܒ̈ܕܶܐ ܒܰܝ̈ܬܳܝܶܐ ܕܺܝܠܶܗ ܡܰܠܶܠ܆ ܘܠܰܘ ܡܶܢ ܗܳܝ ܕܰܠܗܳܠܶܝܢ ܠܳܐ ܡܶܬܡܰܠ̈ܠܳܢܝܳܬܳܐ ܢܥܰܩܶܒ܆ ܘܢܶܒܥܶܐ ܕܡܳܢܳܐ ܐܺܝܬܰܘܗ̱ܝ ܒܽܐܘܣܺܝܰܐ ܗܰܘ ܕܰܠܗܰܠ ܡܶܢ ܟܽܠ.

ܒܳܬܰܪ ܗܳܠܶܝܢ ܢܳܩܦܳܐܺܝܬ܆ ܐܳܦ ܡܽܘܫܶܐ ܐܳܦ ܐܶ‌ܠܺܝܳܐ ܢܺܐܬܽܘܢ ܘܢܶܬܚܙܽܘܢ^[8]. ܟܰܕ ܕܢܳܡܽܘܣܳܐ ܡܰܢ ܡܽܘܫܶܐ܆ ܐܶ‌ܠܺܝܳܐ ܕܶܝܢ ܕܰܢܒܺܝ̈ܶܐ ܐܰܚܺܝܕ ܦܰܪܨܽܘܦܳܐ܆ ܕܰܡܫܰܪܪܺܝܢ ܒܝܰܕ ܗܳܠܶܝܢ ܕܩܰܕܶܡܘ ܐܶܡܰܪܘ܆ ܠܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ ܗܳܕܶܐ ܕܒܰܡܫܺܝܚܳܐ^[9]. ܐܶܠܳܐ ܐܳܦ ܢܡܰܠܠܽܘܢ ܐܰܟܚܕܳܐ ܥܰܡ ܝܶܫܽܘܥ܆ ܟܰܕ ܡܚܰܘܶܝܢ ܫܰܠܡܽܘܬܳܐ ܪܺܝܫܳܝܬܳܐ ܕܕܺܝܰܐܬܺܝܩܺܝ ܥܰܬܺܝܩܬܳܐ ܘܕܰܚܕܰܬܳܐ܆ ܕܛܶܠܳܢܺܝܬܳܐ ܘܕܰܫܪܳܪܳܐ܆ ܕܰܟܬܺܝܒܬܳܐ ܕܪܽܘܚܳܐ܆ ܕܛܽܘܦ̈ܣܶܐ ܘܰܕܗܳܢܽܘܢ ܕܡܶܬܛܰܦ̈ܣܳܢ܆ ܕܪ̈ܶܡܙܶܐ ܘܰܕܗܳܠܶܝܢ ܕܡܶܬܝܰܕܥ̈ܳܢ܆ ܕܩܰܕܺܝܡܽܘܬ ܡܶܠܬܳܐ ܘܰܕܗܳܠܶܝܢ ܕܰܥܬܺܝ̈ܕܳܢ܆ ܘܕܺܝܠܶܗ ܕܡܰܦܩܳܢܗܽܘܢ ܕܣܽܘܥܪ̈ܳܢܶܐ. ܗܳܕܐ ܗܝ ܓܶܝܪ ܗܳܝ ܕܰܐܟܚܕܳܐ ܢܡܰܠܠܽܘܢ ܥܰܡ ܝܶܫܽܘܥ ܢܳܡܽܘܣܳܐ ܘܰܢܒܺܝ̈ܶܐ܆ ܘܰܒܝܰܕ ܡܶܨܥܳܝܽܘܬܳܐ ܕܡܽܘܫܶܐ ܘܕܶܐ‌ܠܺܝܳܐ.

ܘܰܒܗܳܠܶܝܢ ܟܰܕ ܥܰܠ ܛܽܘܪܳܐ ܩܳܐܶܡ ܐ̱ܢܳܐ ܐܶܢ ܐܶ݀ܢܰܣܶܐ ܠܰܡܟܰܬܳܪܽܘ ܝܰܬܺܝܪ ܡܥܰܩܒܳܢܳܐܺܝܬ܆ ܘܶܐ݀ܬܗܰܓܰܓ ܠܡܘܬܒ^[10] ܘܰܠܡܶܣܪܰܟ ܘܠܰܡܩܰܘܳܝܽܘ ܒܗܳܠܶܝܢ ܕܡܶܬܚܰܙܝ̈ܳܢ ܘܰܠܡܺܐܡܰܪ܆ ܡܳܪܝ ܫܰܦܺܝܪ ܗ̄ܘ̣ ܠܰܢ ܕܰܬܢܳܢ ܢܶܗܘܶܐ ܐܺܝܬܰܝܢ܆ ܨܳܒܶܐ ܐܰܢ̱ܬ ܕܢܶܥܒܶܕ ܗܳܪܟܳܐ ܬܠܳܬ ܡܛܰܠ̈ܠܶܐ܆ ܠܳܟ ܚܕܳܐ ܘܰܠܡܽܘܫܶܐ ܚܕܳܐ ܘܠܶܐܠܺܝܳܐ ܚܕܳܐ^[11]܆ ܠܘܳܬܗܶܝܢ ܓܶܝܪ ܟܰܕ ܠܘܳܬܗܶܝܢ ܕܰܡܛܰܠ̈ܠܶܐ ܡܰܝܬܶܝܢ ܢܳܡܽܘܣܳܐ ܐܳܦ ܓܽܘܕܳܐ ܕܰܢܒܺܝ̈ܶܐ܆ ܟܰܕ ܠܶܐܘܰܢܓܶܠܺܝܽܘܢ ܡܶܬܥܰܠܶܝܢ ܘܰܒܝܰܕ ܗܰܘ ܡܶܬܟܰܢܫܺܝܢ ܐܰܝܟ ܕܰܒܩܶܦܰܠܶܐܘܳܢ ܪܽܘܚܳܢܳܐܺܝܬ܆ ܐܰܝܟܰܢܳܐ ܕܰܬܠܳܬܳܐ ܡܰܢ ܢܶܬܡܢܽܘܢ ܠܘܳܬ ܚܰܕ ܕܶܝܢ ܣܘܡܦܪܣܡܐ ܐܰܘܟܺܝܬ ܣܽܘܝܳܟܳܐ ܕܡܶܠܬܳܐ ܢܫܰܠܡܽܘܢ܆ ܥܢܳܢܳܐ ܢܽܘܗܪܳܢܳܝܬܳܐ ܬܰܐܛܶܠ ܡܶܟܺܝܠ܆ ܘܬܶܦܣܽܘܩ ܠܥܽܘܩܳܒܳܐ ܕܺܝܠܝ ܝܰܬܺܝܪܳܐ. ܡܶܛܽܠ ܕܳܐܦ ܟܰܕ ܦܳܣܩܳܐ܆ ܡܰܢܗܪܳܐ ܘܰܡܛܰܫܝܳܐ ܐܰܟܚܕܳܐ. ܐܳܦ ܓܶܝܪ ܠܰܘ ܒܰܚܣܳܡܳܐ ܗܳܕܶܐ ܥܳܒܶܕ܆ ܒܚܰܘܣܳܢܳܐ ܕܶܝܢ ܡܰܠܽܘܢ. ܢܺܝܫܳܐ ܓܝܪ ܐܺܝܬ ܠܶܗ܆ ܕܠܳܐ ܢܰܘܩܰܪ ܡܰܢ ܒܗܳܝ ܕܰܠܥܶܠ ܡܶܢ ܚܰܝܠܳܐ܆ ܢܰܢܗܰܪ ܕܶܝܢ ܒܗܳܝ ܕܡܶܫܟܚܳܐ ܕܬܶܬܥܪܶܐ ܠܰܢ ܗܳܢܽܘܢ ܕܥܰܡ ܒܶܣܪܳܐ ܟܕܺܝܢܺܝܢ ܚ̱ܢܰܢ܆ ܘܰܢܣܽܘܓ ܠܗܳܝ ܕܫܰܪܟܳܐ܆ ܒܗܳܝ ܕܠܳܐ ܢܩܰܗܶܐ ܘܰܢܛܺܝܦ ܒܰܡܫܰܪܬܚܽܘܬܳܐ ܘܒܰܫܦܺܝܥܽܘܬܳܐ ܝܰܬܺܝܪܬܳܐ܆ ܐܳܦ ܠܗܰܘ ܡܳܐ ܕܡܶܫܟܚܺܝܢܰܢ ܠܡܶܚܙܳܐ.

ܡܳܢܳܐ ܗܳܟܺܝܠ ܡܶܢ ܥܢܳܢܳܐ ܐܶ݀ܫܡܰܥ܆ ܗܳܝ ܕܳܐܦ ܡܰܢܗܪܳܐ ܐܳܦ ܦܳܣܩܳܐ ܡܰܘܬܪܳܢܳܐܺܝܬ. ܒܰܪ̱ܬ ܩܳܠܳܐ ܕܡܶܫܬܰܡܠܝܳܐ ܘܰܐܝܟ ܕܡܶܢ ܦܰܪܨܽܘܦܶܗ ܕܰܐܒܳܐ ܡܶܬܬܰܝܬܝܳܐ܆ ܗܳܢܳܐ ܐܺܝܬܰܘܗ̱ܝ ܒܪܳܐ ܕܺܝܠܝ ܗܰܘ ܚܰܒܺܝܒܳܐ܆ ܗܰܘ ܕܒܶܗ ܐܶܨܛܒܺܝܬ̣^[12]. ܟܰܕ ܠܗܳܕܶܐ ܒܰܪ̱ܬ ܩܳܠܳܐ ܡܩܰܒܶܠ ‌ܐ̱ܢܳܐ܆ ܗܳܝ ܕܡܶܢ ܒܶܝܬ ܩܽܘ̈ܕܫܶܐ ܟܣܰܝ̈ܳܐ ܗܳܢܽܘܢ ܕܰܠܥܶܠ ܢܶܚܬܰܬ̣܆ ܘܳܐܦܠܳܐ ܠܗܳܕܶܐ ܡܶܫܟܰܚ ܐ̱ܢܳܐ ܕܶܐ݀ܣܰܝܒܰܪ܆ ܐܶܢܳܐ ܠܘܳܬ ܢܰܦܫܝ ܐܶ݀ܚܽܘܪ܆ ܘܰܠܚܰܘܪܳܐ ܠܬܰܚܬ ܐ݀ܶܓܰܕ܆ ܐܳܦ ܓܶܝܪ ܟܰܕ ܫܡܰܥܘ ܐܳܡܰܪ ܬܰܠ̈ܡܺܝܕܶܐ ܢܦܰܠܘ ܥܰܠ ‌‌ܐܰܦܰܝ̈ܗܽܘܢ܆ ܘܰܕܚܶܠܘ ܣܰܓܺܝ^[13]. ܐܳܦ ܢܶܗܘܶܐ ܠܺܝ ܣܽܘܢܩܳܢܳܐ ܥܰܠ ܝܶܫܽܘܥ܆ ܕܳܐܦ ܒܛܽܘܪܳܐ ܩܳܪܶܒ ܠܘܳܬܝ ܘܓܳܫܶܦ ܒܺܝ ܘܰܡܩܺܝܡ ܠܺܝ܆ ܘܕܶܐ݀ܬܠܰܒܰܒ ܘܰܕܠܳܐ ܐܶ݀ܕܚܰܠ ܦܳܩܶܕ ܠܺܝ. ܟܬܺܝܒ ܓܶܝܪ܆ ܕܟܰܕ ܩܪܶܒ ܝܶܫܽܘܥ ܠܘܳܬܗܽܘܢ܆ ܓܫܰܦ ܒܗܽܘܢ ܘܶܐܡܰܪ ܠܗܽܘܢ܆ ܩܽܘܡܘ ܘܠܳܐ ܬܶܕܚܠܽܘܢ^[14].

ܘܗܳܟܰܢܳܐ ܟܰܕ ܡܩܰܒܶܠ ‌ܐ̱ܢܳܐ ܙܡܳܡܳܐ ܡܶܕܶܡ ܩܰܠܺܝܠ ܘܨܰܘܬܳܐ ܒܶܐܕܢܰܝ̈ ܡܶܢ ܒܰܪ̱ܬ ܩܳܠܳܐ ܗܳܝ ܕܶܐܫܬܰܡܥܰܬ܆ ܐܶ݀ܬܐܪܙ ܘܰܐ݀ܪܙ. ܠܰܡܗܰܝܡܳܢܽܘ ܒܚܰܕ ܐܰ‌ܠܳܗܳܐ ܐܰܒܳܐ ܐܰܚܺܝܕ ܟܽܠ܆ ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܒܪܳܐ ܝܺܚܺܝܕܳܝܳܐ ܘܰܫܘܶܐ ܒܽܐܘܣܺܝܰܐ ܠܰܐܒܳܐ. ܐܶܢ ܓܶܝܪ ܗܽܘ ܐܰܒܳܐ ܐܶܡܰܪ܆ ܗܳܢܳܐ ܐܺܝܬܰܘܗ̱ܝ ܒܪܳܐ ܕܺܝܠܝ^[15]܆ ܠܟܽܠܶܗ ܣܽܘܥܪܳܢܳܐ ܕܰܡܡܰܠܠܽܘܬ ܐܰ‌ܠܳܗܽܘܬܳܐ ܐܺܝܬ ܠܺܝ܆ ܕܒܰܙܥܽܘܪܽܘܬ ܡܰܡܠܠܳܐ ܕܡ̈ܶܠܶܐ ܡܰܒܪܶܩ܆ ܘܒܳܗ̇ ܡܶܬܦܬܶܐ. ܡܶܛܽܠ ܕܳܐܦ ܦܫܺܝܛܬܳܐ ܗܝ ܡܶܠܬܳܐ܆ ܘܕܰܦܫܺܝܩܳܐܺܝܬ ܡܰܝܬܝܳܐ ܠܛܳܠܽܘܡܳܐ ܠܘܳܬ ܫܰܠܡܽܘܬܳܐ. ܙܳܕܶܩ ܓܶܝܪ ܠܡܺܐܡܰܪ ܗܳܟܰܢܳܐ. ܐܶܢ ܒܪܰܐ ܗ̄ܘ܆ ܡܺܐܠܰܕ ܝܺܠܺܝܕ. ܘܶܐܢ ܐܺܝܬܰܘܗ̱ܝ ܠܰܘ ܡܶܥܒܰܕ ܥܒܺܝܕ. ܐܳܦ ܓܶܝܪ ܒܪܳܐ ܕܺܝܠܝ ܐܺܝܬܰܘܗ̱ܝ ܐܶܡܰܪ܆ ܘܠܰܘ ܗܘ̣ܳܐ. ܐܶ‌ܠܽܘ ܕܶܝܢ ܗܘ̣ܳܐ ܐܰܡܺܝܪܳܐ ܗ̱ܘܳܬ܆ ܗܰܘ ܕܰܗܘ̣ܳܐ ܢܳܩܦܳܐܺܝܬ ܡܶܬܡܢܶܐ ܗ̱ܘܳܐ ܥܰܡ ܥܒܺܝ̈ܕܶܐ. ܡܳܕܶܝܢ ܗܰܘ ܕܺܐܝܬܰܘܗ̱ܝ ܒܪܳܐ ܘܠܳܐ ܗܘ̣ܳܐ܆ ܥܰܡ ܗܰܘ ܕܺܐܝܬܰܘܗ̱ܝ ܐܰܒܳܐ ܘܠܳܐ ܗ̣ܘܳܐ ܢܶܬܛܰܟܰܤ܆ ܕܰܡܥܰܠܰܝ ܠܥܶܠ ܡܶܢ ܟܽܠܗܽܘܢ ܗܳܢܽܘܢ ܕܰܗܘ̣ܰܘ. ܐܰܟܙܢܳܐ ܓܶܝܪ ܕܗܰܘ ܐܺܝܬܰܘܗ̱ܝ ܐܰܡܺܝܢܳܐܺܝܬ ܐܰܒܳܐ܆ ܕܠܳܐ ܫܰܪܺܝ ܒܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰܒܳܐ ܐܳܦܠܳܐ ܦܳܐܶܫ܆ ܗܳܟܰܢܳܐ ܐܳܦ ܗܳܢܳܐ܆ ܒܪܳܐ ܐܺܝܬܰܘܗ̱ܝ ܐܰܡܺܝܢܳܐܺܝܬ܆ ܟܰܕ ܠܳܐ ܫܳܒܶܩ ܠܶܗ ܠܰܫܡܳܐ ܗܰܘ ܫܰܪܺܝܪܳܐ ܕܰܐܒܳܐ܆ ܕܰܣܦܺܝܩܳܐ ܢܶܗܘܶܐ ܐܺܝܬܰܘܗ̱ܝ ܡܬܽܘܡ ܡܶܢ ܒܪܳܐ ܫܰܪܺܝܪܳܐ܆ ܘܕܰܓܠܺܝܙ ܡܶܢ ܝܰܠܕܳܐ ܫܰܪܺܝܪܳܐ ܘܚܰܬܺܝܬ̣ܳܐ. ܨܶܡܚܳܐ ܓܶܝܪ ܐܺܝܬܰܘܗ̱ܝ ܕܬܶܫܒܽܘܚܬܶܗ܆ ܘܝܽܘܩܢܳܐ ܕܰܩܢܽܘܡܶܗ ܕܰܐܒܳܐ^[16]. ܨܶܡܚܳܐ ܕܶܝܢ ܡܶܢ ܗܰܘ ܕܡܰܨܡܰܚ ܠܶܗ܆ ܘܠܳܐ ܒܰܚܕܳܐ ܡܶܠܬܳܐ ܦܪܺܝܫ^[17]. ܡܰܢܽܘ ܓܶܝܪ ܠܫܶܡܫܳܐ܆ ܫܶܡܫܳܐ ܕܶܝܢ ܐܶܣܬܰܟܰܠ ܠܺܝ܆ ܠܗܰܘ ܕܒܰܕܡܽܘܬ ܓܺܝܓܠܳܐ ܐܰܘܟܺܝܬ ܐܶܣܟܺܡܳܐ ܓܠܺܝܠܳܐ ܘܢܽܘܪܳܢܳܝܳܐ܆ ܐܰܘ ܗܰܘ ܡܳܐ ܕܢܺܐܡܪܝܘܗ̱ܝ ܐ̱ܢܳܫ ܠܗܰܘ ܡܳܐ ܕܙܰܠܺܝܩܳܐ ܡܫܰܡܰܪ܆ ܡܶܢ ܢܽܘܗܪܳܐ ܗܰܘ ܕܡܶܢܶܗ ܡܶܫܬܰܕܰܪ ܘܡܶܬܬܰܨܡܰܚ܆ ܗܽܘ ܓܶܝܪ ܨܶܡܚܳܐ܆ ܐܳܦܶܢ ܒܢܽܘܩܰܙܬܳܐ ܡܶܕܶܡ ܐܰܘ ܡܢܳܬ ܡܢܳܬܳܐ ܡܶܕܶܡܙܥܽܘܪܬܳܐ ܐܰܘ ܕܙܰܒܢܳܐ ܐܰܘ ܕܕܽܘܟܬܳܐ ܢܶܪܚܰܩ. ܘܳܐܦܠܳܐ ܓܶܝܪ ܫܶܡܫܳܐ ܕܳܢܰܚ ܤܛܰܪ ܡܶܢ ܡܰܢܗܪܳܢܽܘܬܳܐ ܒܰܝܬܳܝܬܳܐ ܕܺܝܠܶܗ܆ ܘܳܐܦܠܳܐ ܗܰܘ ܡܳܐ ܕܡܶܬܬܰܨܡܰܚ ܘܡܰܢܗܰܪ ܦܪܺܝܫ ܡܶܢ ܗܰܘ ܕܡܶܢܶܗ ܐܰܨܡܰܚ ܘܰܐܢܗܰܪ. ܟܰܕ ܠܳܐ ܡܶܬܦܰܪܫܳܢܳܐܺܝܬ ܗܳܟܺܝܠ ܘܠܳܐ ܡܰܪܚܩܳܢܳܐܺܝܬ ܡܰܨܡܰܚ܆ ܢܽܘܗܪܳܐ ܐܺܝܬܰܘܗ̱ܝ ܕܡܶܢ ܢܽܘܗܪܳܐ܆ ܘܕܺܝܠܺܝܕ ܐܰܝܟ ܒܪܳܐ ܡܶܢ ܐܰܒܳܐ. ܐܰ‌ܠܳܗܳܐ ܐܺܝܬܰܘܗ̱ܝ ܡܶܢ ܐܰ‌ܠܳܗܳܐ. ܘܕܺܐܝܬܰܘܗ̱ܝ ܐܰܡܺܝܢܳܐܺܝܬ ܥܰܡ ܗܰܘ ܕܺܐܝܬܰܘܗ̱ܝ ܐܰܡܺܝܢܳܐܺܝܬ. ܕܺܐܝܬܰܘܗ̱ܝ ܡܶܢ ܗܰܘ ܕܺܐܝܬܰܘܗ̱ܝ^[18] ܢܶܬܬܰܘܕܶܐ ܘܛܳܒ ܟܺܐܢܳܐܺܝܬ܆ ܘܰܫܘܶܐ ܒܽܐܘܣܺܝܰܐ ܠܰܐܒܳܐ. ܕܺܝܠܳܗ̇ ܓܶܝܪ ܟܰܕ ܕܺܝܠܳܗ̇ ܕܽܐܘܣܺܝܰܐ ܘܕܰܟܝܳܢܳܐ܆ ܐܺܝܬܰܘܗ̱ܝ ܗܰܘ ܕܡܶܬܺܝܠܶܕ ܠܗܰܘ ܕܝܳܠܶܕ.

ܐܶܠܳܐ ܢܺܐܡܰܪ ܐ̱ܢܳܫ܆ ܐܳܦ ܟܺܝܬ ܒܺܐܝܘܒ ܐܺܝܬ ܠܡܶܫܡܰܥ ܠܶܗ ܠܰܐܠܳܗܳܐ ܕܳܐܡܰܪ܆ ܡܰܢܽܘ ܐܺܝܬܰܘܗ̱ܝ ܐܰܒܳܐ ܕܡܶܛܪܳܐ. ܡܰܢܽܘ ܕܶܝܢ ܐܺܝܬܰܘܗ̱ܝ ܗܰܘ ܕܺܝܠܶܕ ܛܽܘ̈ܦܶܐ ܕܛܰܠܳܐ. ܡܶܢ ܟܰܪܣܳܐ ܕܶܝܢ ܕܡܰܢܽܘ ܢܦܰܩ ܩܪܽܘܤܛܶܠܘܤ. ܓܠܺܝܕܳܐ ܕܶܝܢ ܕܒܰܫܡܰܝܳܐ ܡܰܢܽܘ ܝܺܠܶܕ^[19]. ܐܰܪܰܐ ܗܳܟܺܝܠ ‌ܐܳܦ ܠܡܶܛܪܳܐ ܫܘܶܐ ܒܽܐܘܣܺܝܰܐ ܢܺܐܡܪܝܘܗ̱ܝ ܠܰܐܠܳܗܳܐ ܐܳܦ ܠܰܩܪܽܘܤܛܐܠܘܤ܆ ܘܬܽܘܒ ܐܳܦ ܠܰܓܠܺܝܕܳܐ ܡܶܛܽܠ ܫܡܳܗ̈ܶܐ ܗܳܠܶܝܢ܆ ܗܰܘ ܕܰܐܒܳܐ܆ ܘܗܰܘ ܕܺܝܠܶܕ܆ ܘܗ̱ܝ ܕܡܶܢ ܟܰܪܣܳܐ ܢܳܦܶܩ.

ܐܶܠܳܐ ܩܰܕܡܳܐܺܝܬ ܡܰܢ܆ ܠܳܐ ܐܶܡܰܪ ܕܶܐܢܳܐ ܐܺܝܬܰܝ ܐܰܒܳܐ ܕܡܶܛܪܳܐ܆ ܐܰܘ ܕܝܶܠܕܶܬ ܛܰܠܳܐ܆ ܐܰܘ ܕܡܶܢ ܟܰܪܣܳܐ ܕܺܝܠܝ ܢܦܰܩ ܩܪܽܘܤܛܶܠܘܤ. ܐܶܠܳܐ ܟܰܕ ܠܐܝܘܒ ܕܣܳܒܰܪ ܗ̱ܘܳܐ ܕܦܺܝܠܳܣܽܘܦܺܝܣܳܐ ܥܳܒܶܕ ܗ̱ܘܳܐ ܒܚܰܫ̈ܶܐ ܘܰܒܡܰܡ̈ܠܠܶܐ ܕܰܥܠܰܝܗܽܘܢ܆ ܨܳܒܶܐ ܗ̱ܘܳܐ ܕܢܶܥܒܶܕ ܦܽܘܫܳܟܳܐ ܘܥܰܣܩܽܘܬܳܐ܆ ܘܰܢܚܰܘܶܐ ܠܶܗ ܕܥܰܠ ܝܺܕܰܥܬܳܐ ܐ̱ܢܳܫܳܝܬܳܐ܆ ܠܳܐ ܝܺܕܰܥܬܳܐ ܣܰܓܺܝܐܬܳܐ ܐܰܫܺܝܕܳܐ܆ ܡܦܰܫܟܳܢܳܐܺܝܬ ܡܫܰܐܶܠ ܘܳܐܡܰܪ. ܡܶܫܟܰܚ ܐܰܢ̱ܬ ܠܡܺܐܡܰܪ ܐܳܘ ܒܰܪ ܐ̱ܢܳܫܳܐ܆ ܕܡܰܢܽܘ ܐܰܒܳܐ ܕܡܶܛܪܳܐ܆ ܐܰܘ ܡܰܢܽܘ ܝܺܠܶܕ ܠܛܰܠܳܐ ܗܰܘ ܕܟܽܠܶܗ ܗܳܢܳܐ ܐܺܝܬܰܘܗ̱ܝ ܒܣܰܓܺܝܽܐܘܬܳܐ܆ ܠܳܐ ܗ̱ܘܳܐ ܐܰܝܟܰܢܳܐ ܕܝܰܠܕܳܐ ܕܗܳܠܶܝܢ ܢܚܰܘܶܐ ܐܰܘ ܝܺܠܺܝܕܽܘܬܳܐ. ܐܶܠܳܐ ܡܶܛܽܠ ܟܺܝܬ ܕܠܺܝ̈ܠܺܝܕܘܳܬܳܐ ܐ̱ܢܳܫܳܝ̈ܳܬܳܐ ܘܰܠܗܳܢܶܝܢ ܕܫܰܪܟܳܐ ܕܗܳܢܽܘܢ ܕܥܰܠ ‌ܐܰܪܥܳܐ ܐܰܘ ܠܝܰܠ̈ܕܶܐ܆ ܙܰܒܢܳܐ ܘܥܰܡܠܳܐ ܩܳܕܶܡ܆ ܡܶܛܽܠܗܳܕܶܐ ܐܶܡܰܪ܆ ܠܳܐ ܬܶܣܒܰܪ ܕܥܰܠ ܗܳܠܶܝܢ ܣܢܺܝܩ ܐ̱ܢܳܐ ܘܥܰܠ ܬܰܘܚܰܪܬܳܐ ܘܥܰܡܠܐ ܐܰܟܙܢܳܐ ܕܥܰܠ ܝܺܠܺܝܕܽܘܬܳܐ܆ ܠܘܳܬ ܗܳܝ ܕܰܐ݀ܝܬܶܐ ܛܰܠܳܐ ܘܡܶܛܪܳܐ ܘܰܓܠܺܝܕܳܐ ܘܰܩܪܽܘܤܛܶܠܘܤ܆ ܘܠܰܘ ܕܰܒܩܰܠܺܝܠܽܘܬܳܐ ܕܝܰܬܺܝܪ ܩܰܠܺܝܠܳܐ ܡܶܢ ܡܶܠܬܳܐ܆ ܒܨܶܒܝܳܢܳܐ ܕܡܰܥܒܕܳܢܽܘܬܳܐ ܐܰ‌ܠܳܗܳܝܬܳܐ ܗܳܠܶܝܢ ܡܶܬܩܰܝ̈ܡܳܢ܆ ܡܰܠܽܘܢ ܕܶܝܢ ܒܪܶܡܙܳܐ ܒܰܠܚܽܘܕ܆ ܐܰܘ ܐܶܢ ܡܶܕܶܡ ܐܺܝܬ ܠܡܺܐܡܰܪ ܐܰܝܟ ܕܥܰܠ ‌ܐܰ‌ܠܳܗܳܐ܆ ܕܝܰܬܺܝܪ ܩܰܠܺܝܠ ܡܶܢ ܗܳܠܶܝܢ.

ܒܳܬܰܪܟܶܢ ܕܶܝܢ. ܠܰܫ̈ܡܳܗܶܐ ܙܳܕܶܩ ܠܡܶܣܬܰܟܳܠܽܘ܆ ܠܦܽܘܬ ܐܰܝܢܳܝܽܘܬܳܐ ܕܣܽܘܥܪ̈ܳܢܶܐ ܗܳܠܶܝܢ ܕܣܺܝܡܺܝܢ ܠܡܶܠܬܳܐ܆ ܘܠܰܘ ܕܒܰܚܫܰܚܬܳܐ ܕܺܝܠܗܶܝܢ ܕܠܶܟܣܺܝ̈ܤ ܢܣܰܓܦܺܝܘܗ̱ܝ ܠܰܫܪܳܪܳܐ. ܐ̱ܚܪܳܢܝܳܐܺܝܬ ܓܶܝܪ ܫܡܰܥ ܐ̱ܢܳܫ ܐܰܒܳܐ ܕܡܶܛܪܳܐ ܠܰܐܠܳܗܳܐ܆ ܘܰܐ̱ܚܪܳܢܝܳܐܺܝܬ ܕܰܒܪܳܐ܆ ܘܰܕܗܳܢܳܐ ܝܺܚܺܝܕܳܝܳܐ. ܫܡܳܐ ܓܶܝܪ ܕܺܝܚܺܝܕܳܝܳܐ ܡܚܰܘܶܐ܆ ܕܡܶܢ ܐܰ‌ܠܳܗܳܐ ܐܰܒܳܐ ܐܰ‌ܠܳܗܳܐ ܡܶܠܬܳܐ ܝܺܠܺܝܕ. ܠܚܽܘܕܳܝܳܐ ܕܡܶܢ ܠܚܽܘܕܳܝܳܐ. ܘܰܠܒܰܪ ܡܶܢ ܟܽܠ ܙܢܳܐ ܘܰܫܟܳܚܬܳܐ ܕܡܰܚܫܰܒܬܳܐ ܕܟܽܠ ܝܺܠܺܝܕܽܘܬܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ ܫܡܳܐ ܗܰܘ ܕܺܝܚܺܝܕܳܝܳܐ܆ ܡܬܰܚܰܡ ܘܦܳܪܶܫ ܠܺܝܠܺܝܕܽܘܬܳܐ ܕܰܒܪܳܐ ܗܳܝ ܕܰܠܥܶܠ܆ ܡܶܢ ܝܺܠܻ̈ܝܕܘܳܬܳܐ ܗܳܠܶܝܢ ܕܰܠܬܰܚܬ ܘܰܕܡܶܢ ܒܳܬܰܪ ܗܳܝ ܐܰܘ ܕܺܐܝܬܰܝܗܶܝܢ ܐܰܘ ܕܡܶܬܰܐܡܪ̈ܳܢ ܡܶܢ ܚܫܰܚܬܳܐ.

ܐ̱ܚܪܳܢܝܳܐܺܝܬ ܟܺܝܬ܆ ܕܶܐ‌ܠܽܘ ܗܳܕܶܐ ܒܰܠܚܽܘܕ ܟܬܺܝܒܳܐ ܗ̱ܘܳܬ ܕܰܐܒܳܐ ܝܺܠܶܕ ܠܰܒܪܳܐ܆ ܘܰܐ̱ܚܪܺܬܳܐ ܘܠܳܐ ܚܕܳܐ܆ ܡܶܫܟܰܚ ܗ̱ܘܳܐ ܐ̱ܢܳܫ ܕܰܒܦܽܘܚܳܡܳܐ ܘܕܽܘܡܝܳܐ ܕܠܶܟܣ̈ܝܤ ܐ̱ܚܪ̈ܳܢܝܳܬܳܐ ܕܕܳܡ̈ܝܳܢ܆ ܕܠܺܝܠܺܝܕܽܘܬܳܐ ܠܰܘ ܫܰܪܺܝܪܳܐܺܝܬ ܘܡܶܢ ܐܽܘܣܺܝܰܐ ܕܰܐܒܳܐ܆ ܐܶܠܳܐ ܚܫܰܚܬܳܢܳܐܺܝܬ ܐܰܝܟ ܕܥܰܠ ܡܶܛܪܳܐ ܘܰܩܪܽܘܤܛܶܠܘܤ ܘܰܓܠܺܝܕܳܐ ܢܶܣܬܰܟܰܠ. ܡܶܛܽܠ ܕܶܝܢ ܕܠܰܘ ܥܕܰܡܳܐ ܠܗܳܕܶܐ ܒܰܠܚܽܘܕ ܗܳܠܶܝܢ ܕܡܶܛܽܠ ܝܺܠܺܝܕܽܘܬܳܐ ܕܰܒܪܳܐ ܩܳܝ̈ܡܳܢ܆ ܘܠܰܘ ܐܰܝܟܰܢܳܐ ܕܗܳܢܽܘܢ ܣܪ̈ܺܝܩܶܐ ܣܳܒܪܺܝܢ ܒܰܚܕܳܐ ܠܶܟܣܺܝܤ ܡܶܬܗܰܦܟܺܝܢ ܚ̱ܢܰܢ܆ ܐܰܝܟܰܢܳܐ ܕܰܒܦܽܘܫܳܩܳܐ ܙܠܺܝܡܳܐ ܕܗܳܕܶܐ܆ ܩܺܝܢܕܽܘܢܽܘܣܳܐ ܢܶܥ̈ܒܕܳܢ ܠܰܢ ܕܢܺܐܒ̈ܕܳܢ ܗܳܠܶܝܢ ܕܗܰܝܡܳܢܽܘܬܳܐ܆ ܢܢܰܘܚܽܘܢ܆ ܕܒܰܕܡܽܘܬ ܥܽܘܩܰܒܪ̈ܶܐ ܠܰܘ ܕܰܟܝܳܐܺܝܬ ܡܩܰܪܛܡܺܝܢ ܠܗܶܝܢ ܠܡܶܠܽܘܢ̈ܝܳܬܳܐ.

ܡܳܢܳܐ ܓܶܝܪ ܢܶܥܒܶܕ ܟܰܕ ܫܳܡܥܺܝܢܰܢ ܠܶܗ ܠܝܽܘܚܰܢܳܢ ܕܳܐܡܰܪ܆ ܒܪܺܝܫܺܝܬ̣ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ܆ ܘܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰ‌ܠܳܗܳܐ܆ ܘܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܡܶܠܬܳܐ^[20]. ܐܶܢ ܓܶܝܪ ܒܪܺܝܫܺܝܬܳܐ ܐܺܝܬܰܘܗ̱ܝ ܗ̱ܘܳܐ܆ ܐܰܝܟ ܗܰܘ ܕܺܐܝܬܰܘܗ̱ܝ ܠܘܳܬ ܗܰܘ ܕܺܐܝܬܰܘܗ̱ܝ܆ ܘܰܐܝܟ ܐܰ‌ܠܳܗܳܐ ܠܘܳܬ ܐܰ‌ܠܳܗܳܐ܆ ܐܰܝܟܰܢܳܐ ܡܶܫܟܚܺܝܢܰܢ܆ ܕܰܠܝܰܠܕܶܗ ܕܰܐ‌ܠܳܗܳܐ ܘܕܰܒܟܽܠܙܒܰܢ ܐܺܝܬܰܘܗ̱ܝ܆ ܠܰܘ ܫܰܪܺܝܪܳܐ ܘܰܩܢܽܘܡܳܝܳܐ܆ ܘܰܡܬܽܘܡܳܝܳܐ܆ ܘܡܶܢܳܗ̇ ܕܽܐܘܣܺܝܰܐ ܕܗܰܘ ܕܺܝܠܶܕ ܢܶܣܬܰܟܠܺܝܘܗ̱ܝ܆ ܐܶܠܳܐ ܠܡܶܛܪܳܐ ܢܕܰܡܝܘܗ̱ܝ ܠܗܳܢܳܐ ܘܠܰܩܪܽܘܤܛܶܠܘܤ. ܐܰܝܟܰܢܳܐ ܕܶܝܢ ܠܗܳܠܶܝܢ ܡ̈ܶܠܶܐ܆ ܥܰܠ ܩܪܽܘܤܛܶܠܘܤ ܘܡܶܛܪܳܐ ܢܣܺܝܡ ܐܶܢܶܝܢ܆ ܟܰܕ ܡܶܢ ܐܰ‌ܠܳܗܳܐ ܝܺܠܺܝܕܺܝܢ ܐܰܝܟ ܒܪܳܐ ܐܰܝܟܰܢܳܐ ܕܳܐܡܪܺܝܢ ܐܢ̱ܬܽܘܢ܆ ܘܰܐܝܟܰܢܳܐ ܬܶܠܚܰܡ ܠܚܰܕ ܡܶܢ ܗܳܠܶܝܢ ܠܡܺܐܡܰܪ܆ ܘܠܳܐ ܐ̱ܢܳܫ ܡܶܫܬܰܘܕܰܥ ܠܰܒܪܳܐ ܐܶܠܳܐ ܐܶܢ ܐܰܒܳܐ܆ ܘܳܐܦܠܳܐ ܐ̱ܢܳܫ ܡܶܫܬܰܘܕܰܥ ܠܰܐܒܳܐ ܐܶܠܳܐ ܐܶܢ ܒܪܳܐ^[21]܆ ܘܰܠܗܰܘ ܕܶܐܢ ܢܶܨܒܶܐ ܒܪܳܐ ܕܢܶܓܠܶܐ ܠܶܗ. ܐܰܝܟܰܢܳܐ ܕܶܝܢ ܢܶܣܬܒܰܪ ܩܪܽܘܤܛܶܠܘܤ܆ ܕܨܶܡܚܳܐ ܕܬܶܫܒܽܘܚܬܶܗ ܕܰܐ‌ܠܳܗܳܐ ܘܝܽܘܩܢܳܐ ܕܰܩܢܽܘܡܶܗ ܐܺܝܬܰܘܗ̱ܝ^[22]. ܥܒܳܕܳܐ ܓܶܝܪ ܕܢܶܗܘܶܐ ܐܺܝܬܰܘܗ̱ܝ ܨܰܠܡܳܐ ܕܗܰܘ ܕܥܰܒ̣ܕܶܗ ܠܳܐ ܡܶܫܟܰܚ. ܝܰܠܕܳܐ ܕܶܝܢ ܡܚܰܘܶܐ ܗܰܘ ܕܡܳܢܳܐ ܐܺܝܬܰܘܗ̱ܝ ܒܰܩܢܽܘܡܳܐ ܐܰܒܳܐ܆ ܡܶܛܽܠ ܫܰܘܬܳܦܽܘܬܳܐ ܕܰܟܝܳܢܳܐ.

ܚܳܙܶܝܢ ܐܢ̱ܬܽܘܢ ܐܰܝܟܰܢܳܐ ܒܢܰܝ̈ܳܐ ܗܳܢܽܘܢ ܕܰܐܪܺܝܽܘܤ܆ ܟܰܕ ܠܺܝܠܺܝܕܽܘܬܳܐ ܐܰ‌ܠܳܗܳܝܬܳܐ ܕܰܒܪܳܐ ܣܳܥܶܝܢ ܠܰܡܙܰܥܳܪܽܘ܆ ܐܰܝܟ ܩܰܠܻ̈ܝܠܶܐ ܥܰܠ ܕܽܘܡ̈ܝܶܐ ܣܦܺܝ̈ܩܶܐ ܕܡ̈ܶܠܶܐ ܘܰܕܚܰܪܒܺܝܢ ܡܶܢ ܣܽܘ̈ܟܳܠܶܐ ܣܳܚܶܝܢ܆ ܟܰܕ ܠܳܐ ܦܳܪܫܺܝܢ ܕܡܳܢܰܐ ܗ̄ܘ ܗܰܘ ܕܣܺܝܡ ܠܰܫܡܳܗ̈ܶܐ ܕܢܶܬܶܐܡܪܽܘܢ ܥܠܰܘܗ̱ܝ ܐܰܘ ܕܡܶܫܬܰܘܕܰܥ ܒܗܽܘܢ܆ ܘܰܠܠܳܐ ܡܠܺܝܠܽܘܬܐ ܗܳܝ ܐ̱ܚܪܳܝܬܳܐ ܢܳܦܩܺܝܢ ܢܳܦܠܺܝܢ܆ ܗܳܢܽܘܢ ܟܺܝܬ ܕܰܒܛܰܝܳܦܽܘܬܳܐ ܕܡܰܚܫ̈ܒܳܬܗܽܘܢ ܐܳܦ ܗܳܝ ܐܳܡܪܺܝܢ܆ ܡܳܢܳܐ ܬܡܺܝܗܳܐ ܐܶܢ ܡܫܺܝܚܳܐ ܐܰܡܺܝܪ ܚܶܟܡܬܳܐ ܕܰܐ‌ܠܳܗܳܐ ܘܚܰܝܠܳܐ ܕܰܐ‌ܠܳܗܳܐ^[23]܆ ܗܳܐ ܓܶܝܪ ܐܳܦ ܝܘܐܝܠ ܟܬܰܒ܆ ܩܰܡܨܳܐ ܘܙܳܚܠܳܐ ܘܨܰܪܨܽܘܪܳܐ ܘܡܳܫܽܘܛܳܐ܆ ܚܰܝܠܳܐ ܕܺܝܠܝ ܗܰܘ ܪܰܒܳܐ ܗܰܘ ܕܫܰܕܪܶܬ ܒܟܽܘܢ^[24]. ܐܰܪܰܐ ܗܳܟܺܝܠ܆ ܐܳܦ ܩܰܡܨܳܐ ܘܙܳܚܠܳܐ ܘܡܳܫܽܘܛܳܐ܆ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܕܰܐ‌ܠܳܗܳܐ ܐܺܝܬܰܝܗܽܘܢ܆ ܕܶܐܬܟܰܢܺܝܘ ܚܰܝܠܶܗ ܪܰܒܳܐ ܕܰܐ‌ܠܳܗܳܐ܆ ܗܳܢܽܘܢ ܕܰܠܘܳܬܗܽܘܢ ܬܶܬܶܐܡܰܪ ܣܰܓܺܝ ܒܙܰܒܢܳܗ̇܆ ܛܳܥܶܝܢ ܐܢ̱ܬܽܘܢ ܕܠܳܐ ܝܳܕܥܺܝܢ ܐܢ̱ܬܽܘܢ ܟ̈ܬܳܒܶܐ܆ ܐܳܦܠܐ ܚܰܝܠܶܗ ܕܰܐ‌ܠܳܗܳܐ^[25]. ܡܫܺܝܚܳܐ ܓܶܝܪ ܐܰܝܟ ܐܰ‌ܠܳܗܳܐ ܡܶܢ ܐܰ‌ܠܳܗܳܐ. ܘܕܰܐܡܺܝܢܳܐܺܝܬ ܐܺܝܬܰܘܗ̱ܝ ܡܶܢ ܗܰܘ ܕܰܐܡܺܝܢܳܐܺܝܬ ܐܺܝܬܰܘܗ̱ܝ. ܚܶܟܡܬܳܐ ܐܽܘܣܝ̣ܳܝ̣ܬܳܐ ܘܰܡܩܰܝܰܡܬܳܐ ܐܺܝܬܰܘܗ̱ܝ ܘܚܰܝܠܳܐ ܡܩܰܝܡܳܐ ܘܽܐܘܣܝ̣ܳܝ̣ܳܐ. ܡܰܚ̈ܘܳܬܳܐ ܕܶܝܢ ܕܩܰܡܨܳܐ ܘܰܕܡܳܫܽܘܛܳܐ܆ ܡܰܥ̈ܒܕܳܢܘܳܬܳܐ ܐܺܝܬܰܝܗܶܝܢ ܕܚܰܝܠܳܐ ܐܰ‌ܠܳܗܳܝܳܐ ܕܰܠܘܳܬ ܡܶܬܦܰܢܝܳܢܽܘܬܳܐ ܘܡܶܬܚܰܠܦܳܢܽܘܬܳܐ ܕܰܠܘܳܬ ܗܳܝ ܕܰܡܝܰܬܪܳܐ ܡܰܝ̈ܬܝܳܢ ܠܗܳܢܽܘܢ ܕܚܳܛܶܝܢ܆ ܕܒܺܐܝ̈ܕܰܝܗܶܝܢ ܪܰܒܽܘܬܳܐ ܕܚܰܝܠܳܐ ܗܰܘ ܕܡܰܥܒܶܕ ܡܶܬܚܰܘܝܳܐ܆ ܕܗܳܢܳܐ ܟܽܠܶܗ ܡܶܫܟܰܚ܆ ܐܳܦ ܒܝܰܕ ܩܰܡܨܳܐ ܘܡܳܫܽܘܛܳܐ ܗܳܢܶܝܢ ܫܺܝ̈ܛܶܐ. ܠܗܳܠܶܝܢ ܟܺܝܬ ܕܳܐܦ ܦܰܘܠܽܘܤ܆ ܒܰܙܒܰܢ ܡܰܢ ܡܰܥ̈ܒܕܳܢܘܳܬܳܐ ܕܚܰܝ̈ܠܶܐ܆ ܒܰܙܒܰܢ ܕܶܝܢ܆ ܗܽܘ ܫܡܳܐ ܚܰܝ̈ܠܶܐ ܩ̣ܪܳܐ ܐܶܢܶܝܢ܆ ܐܰܝܟ ܐܰܝܟܳܐ ܕܳܐܡܰܪ܆ ܠܗܰܘ ܡܰܢ ܓܶܝܪ ܡܶܬܝܰܗܒܳܐ ܒܝܰܕ ܪܽܘܚܳܐ ܡܶܠܬܳܐ ܕܚܶܟܡܬܳܐ܆ ܠܰܐ̱ܚܪܺܢܳܐ ܕܶܝܢ ܡܶܠܬܳܐ ܕܺܝܕܰܥܬܳܐ ܒܶܗ ܟܰܕ ܒܶܗ ܒܪܽܘܚܳܐ܆ ܠܰܐ̱ܚܪܺܢܳܐ ܕܶܝܢ ܗܰܝܡܳܢܽܘܬܳܐ ܒܶܗ ܟܰܕ ܒܶܗ ܒܪܽܘܚܳܐ܆ ܠܰܐ̱ܚܪܺܢܳܐ ܕܶܝܢ ܫܽܘܟܳܢܳܐ ܕܳܐܣܺܝ̈ܘܳܬܳܐ܆ ܠܰܐ̱ܚܪܺܢܳܐ ܕܶܝܢ ܡܰܥ̈ܒܕܳܢܘܳܬܳܐ ܕܚܰܝ̈ܠܶܐ^[26]܆ ܘܰܒܕܽܘܟܬܳܐ ܐ̱ܚܪܺܬܳܐ ܬܽܘܒ܆ ܐܳܦܶܢ ܘܠܳܐ ܡܶܕܶܡ ܐܰܝܬܺܝ܆ ܐܳܬܘ̈ܳܬܳܐ ܕܶܝܢ ܒܪܰܡ ܕܰܫ̈ܠܺܝܚܶܐ ܐܶܬܥ̈ܒܶܕܝ̱ ܒܟܽܘܢ ܒܟܽܠܳܗ̇ ܡܣܰܝܒܪܳܢܽܘܬܳܐ܆ ܒܳܐܬܘ̈ܳܬܳܐ ܘܰܒܬܶܕܡܪ̈ܳܬܳܐ ܘܰܒܚܰܝ̈ܠܶܐ^[27]. ܗܳܟܰܢܳܐ ܠܡܰܥ̈ܒܕܳܢܘܳܬܳܐ ܗܳܠܶܝܢ ܕܚܰܝܠܳܐ ܐܰ‌ܠܳܗܳܝܳܐ܆ ܚܰܝ̈ܠܶܐ ܐܺܝܬ ܥܝܳܕܳܐ ܠܡܶܩܪܳܐ ܠܰܟܬܳܒܳܐ ܐܰ‌ܠܳܗܳܝܳܐ܆ ܐܰܝܟܰܢܳܐ ܕܳܐܦ ܡܚܽܘܬܳܐ ܕܩܰܡܨܳܐ ܘܰܕܡܳܫܽܘܛܳܐ܆ ܚܰܝܠܳܐ ܪܰܒܳܐ ܐܰܡܺܝܪܳܐ.

ܒܗܳܢܳܐ ܓܶܝܪ ܙܢܳܐ܆ ܐܳܦ ܕܳܒܽܘܪ̈ܶܐ ܙܰܝܶܢ ܠܽܘܩܒܰܠ ܥܰܡ̱ܡ̈ܶܐ ܗܳܢܽܘܢ ܕܰܐܚܺܝܕܺܝܢ ܗ̱ܘܰܘ ܠܰܐܪܥܳܐ ܗܳܝ ܕܺܐܝܣܪܳܐܶܝܠ܆ ܘܟܰܕ ܒܝܰܕ ܗܳܠܶܝܢ ܕܣܰܓܺܝ ܙܥܽܘܪ̈ܺܝܢ ܡܚܰܘܶܐ ܗ̱ܘܳܐ ܠܰܡܥܰܠܝܽܘܬܳܐ ܘܠܳܐ ܡܶܙܕܰܟܝܳܢܽܘܬܳܐ ܕܚܰܝܠܳܐ ܒܰܝܬܳܝܳܐ ܕܺܝܠܶܗ. ܡܶܛܽܠܗܳܕܶܐ ܐܳܦ ܐܳܡܰܪ ܗ̱ܘܳܐ ܝܶܫܽܘܥ ܗܰܘ ܒܪܶܗ ܕܢܽܘܢ܆ ܗܰܘ ܕܡܶܢ ܒܳܬܰܪ ܡܽܘܫܶܐ ܪܰܒܳܐ܆ ܡܕܰܒܪܳܢܳܐ ܕܥܰܡܳܐ ܘܪܺܝܫ ܚܰܝܠܳܐ ܐܺܝܬܰܘܗ̱ܝ ܗ̱ܘܳܐ܆ ܟܰܕ ܡܰܥܗܶܕ ܗ̱ܘܳܐ ܠܰܒ̈ܢܰܝ ܫܰܪ̈ܒܳܬܶܗ܆ ܚܰܝ̈ܠܶܐ ܬܡܺܝ̈ܗܶܐ ܗܳܠܶܝܢ ܕܰܥܒܰܕ ܐܰ‌ܠܳܗܳܐ܆ ܘܫܰܕܰܪ ܩܕܳܡܰܝܟܽܘܢ ܟܶܢ̈ܫܶܐ ܕܕܳܒܽܘܪ̈ܶܐ^[28]. ܘܰܐܦܶܩ ܐܶܢܽܘܢ ܡܶܢ ܩܕܳܡ ܦܰܪܨܽܘܦܳܐ ܕܺܝܠܟܽܘܢ܆ ܠܰܬܪܶܥܣܰܪ ܡܰܠ̈ܟܶܐ ܕܳܐܡܽܘܪ̈ܝܶܐ. ܠܳܐ ܒܚܰܪܒܳܟ ܘܳܐܦܠܳܐ ܒܩܶܫܬܳܟ. ܡܶܣܬܰܟܰܠ ‌ܐܰܢ̱ܬ܆ ܕܰܐܝܟܰܢܳܐ ܐܺܝܬܰܘܗ̱ܝ ܢܺܝܫܳܐ ܗܳܢܳܐ܆ ܕܳܐܦ ܒܝܰܕ ܚܰܝ̈ܘܳܬܽܘܢܳܝܳܬܳܐ ܫܺܝ̈ܛܳܬܳܐ ܕܕܰܐܝܟ ܗܳܠܶܝܢ܆ ܠܳܐ ܡܶܣܬܰܝܟܳܢܽܘܬܳܐ ܕܚܰܝܠܶܗ ܕܰܐ‌ܠܳܗܳܐ ܬܶܬܚܙܶܐ܆ ܡܶܛܽܠ ܗܳܕܶܐ ܗܳܟܺܝܠ ‌ܐܳܦ ܟܰܕ ܠܦܶܪܥܽܘܢ ܒܽܐܘܪ̈ܕܥܶܐ ܘܰܒܒܰܪܕܳܐ ܘܰܒܩܰܡܨܳܐ ܡܫܰܢܶܩ ܗ̱ܘܳܐ ܐܳܡܰܪ ܗ̱ܘܳܐ܆ ܐܰܝܟܰܢܳܐ ܕܶܐ݀ܚܰܘܶܐ ܒܳܟ ܚܰܝܠܝ܆ ܘܰܐܝܟܰܢܳܐ ܕܢܶܬܟܪܶܙ ܫܶܡܝ ܒܟܽܠܳܗ̇ ܐܰܪܥܳܐ^[29].

ܒܪܰܡ ܠܰܘ ܡܶܛܽܠ ܗܳܕܶܐ ܗܰܘ ܟܰܕ ܗܽܘ ܡܶܕܶܡ ܢܶܚܫܒܺܝܘܗ̱ܝ ܠܰܡܫܺܝܚܳܐ ܚܰܝܠܳܐ ܘܥܽܘܫܢܳܐ ܐܽܘܣܝ̣ܳܝ̣ܳܐ ܕܰܐܒܳܐ܆ ܠܗܳܠܶܝܢ ܬܶܕܡܪ̈ܳܬܳܐ ܘܚܰܝ̈ܠܶܐ ܕܒܺܐܝܕܰܘ̈ܗ̱ܝ ܡܶܬܬܰܥܒܕܺܝܢ. ܐ̱ܚܪܺܢܳܐ ܓܶܝܪ ܡܶܕܶܡ ܒܕܽܘܟ ܐܺܝܬܰܘܗ̱ܝ ܗܰܘ ܕܡܰܥܒܶܕ ܠܒܰܪ ܡܶܢ ܗܰܘ ܕܡܶܬܬܰܥܒܰܕ܆ ܘܠܰܘ ܡܶܢ ܟܽܠ ܦܪܽܘܤ ܫܰܘܝܽܘܬ ܫܡܳܗ̈ܶܐ܆ ܐܳܦ ܠܰܟ̈ܝܳܢܶܐ ܕܺܝܠܗܽܘܢ ܕܣܽܘܥܪ̈ܳܢܶܐ ܡܰܩ̈ܦܳܢ ܐܰܟܚܕܳܐ܆ ܗܳܢܽܘܢ ܕܰܥܠܰܝܗܽܘܢ ܡܶܫ̈ܬܰܡܗܳܢ. ܒܰܕܓܽܘܢ ܪܽܘܚܳܐ ܡܟܰܢܰܝ ܐܰ‌ܠܳܗܳܐ܆ ܐܰܝܟܰܢܳܐ ܕܳܐܡܰܪ ܝܽܘܚܰܢܢ܆ ܪܽܘܚܰܐ ܗ̄ܘ ܐܰ‌ܠܳܗܳܐ^[30]܆ ܪ̈ܽܘܚܶܐ ܐܳܦ ܡܰܠܰܐܟ̈ܶܐ ܡܶܬܰܐܡܪܺܝܢ܆ ܡܙܰܡܰܪ ܓܶܝܪ ܢܒܺܝܳܐ ܕܰܘܺܝܕ܆ ܗܰܘ ܕܰܥܒܰܕ ܡܰܠܰܐܟ̈ܶܐ ܕܺܝܠܶܗ ܪ̈ܽܘܚܶܐ^[31]܆ ܐܶܠܳܐ ܠܰܘ ܡܶܢ ܗܳܪܟܳܐ ܗܽܘ ܟܰܕ ܗܽܘ ܡܶܕܶܡ ܢܶܣܒܰܪ ܠܡܰܠܰܐܟܳܐ ܘܠܰܐܠܳܗܳܐ. ܣܰܓܺܝ ܓܶܝܪ ܛܰܘܪܳܐ ܕܒܰܡܨܰܥܬܳܐ܆ ܘܳܐܦܠܳܐ ܐܺܝܬ ܠܡܺܐܡܰܪ ܕܰܟܡܰܐ ܗ̄ܘ܆ ܕܥܳܒܽܘܕܳܐ ܠܘܳܬ ܥܒܳܕܳܐ.

ܠܳܐ ܗܳܟܺܝܠ ܢܰܛܥܽܘܢ ܐܰܪ̈ܝܰܐܢܽܘ ܗܶܢܽܘܢ ܠܗܽܘܢ܆ ܟܰܕ ܠܝܰܠܕܳܐ ܘܠܺܝܠܺܝܕܽܘܬܳܐ. ܕܛܰܠܐ ܘܕܰܩܪܽܘܤܛܶܠܘܤ ܠܳܐ ܪܰܕܝܳܐܺܝܬ ܡܶܣܬܰܟܠܺܝܢ ܘܠܰܡܨܰܥܬܳܐ ܡܰܝܬܶܝܢ܆ ܘܣܳܒܪܺܝܢ ܕܰܒܦܽܘܚܳܡܳܐ ܕܗܳܠܶܝܢ ܕܰܐܝܟ ܗܳܟܰܢ܆ ܕܰܓܳܠܳܐ ܘܠܰܘ ܫܰܪܺܝܪܳܐ ܘܰܕܡܶܢ ܐܽܘܣܺܝܰܐ ܕܰܐܒܳܐ܆ ܡܚܰܘܶܝܢ ܠܶܗ ܠܝܰܠܕܶܗ ܠܳܐ ܡܶܬܡܰܠܠܳܢܳܐ ܕܰܒܪܳܐ܆ ܐܳܦܠܳܐ ܠܚܰܝܠܳܐ ܕܩܰܡܨܳܐ ܘܰܕܟܰܠܒܽܘܬܳܐ ܘܰܕܡܳܫܽܘܛܳܐ܆ ܠܚܶܟܡܬܳܐ ܘܰܠܚܰܝܠܳܐ ܐܽܘܣܝ̣ܳܝ̣ܳܐ ܘܺܝܚܺܝܕܳܝܳܐ ܕܰܐ‌ܠܳܗܐ ܢܦܰܚܡܽܘܢ. ܢܶܫܡܥܽܘܢ ܕܶܝܢ ܠܕܰܘܺܝܕ ܕܰܠܫܰܪܺܝܪܽܘܬܳܐ ܕܺܝܠܺܝܕܽܘܬܳܐ ܐܰ‌ܠܳܗܳܝܬܳܐ ܕܰܒܪܳܐ ܡܚܰܘܶܐ ܘܳܐܡܰܪ܆ ܐܶܡܰܪ ܡܳܪܝܳܐ ܠܡܳܪܝܳܐ ܕܺܝܠܝ ܬܶܒ ܡܶܢ ܝܰܡܺܝܢܝ^[32]. ܡܶܢ ܟܰܪܣܳܐ. ܩܕܳܡ ܟܰܘܟܰܒ^[33] ܢܽܘܓܗܳܐ ܝܺܠܶܕܬܳܟ. ܘܰܐܝܟܰܢܳܐ ܟܺܝܬ ܕܠܳܐ ܐ̱ܢܳܫ ܢܶܣܒܰܪ܆ ܕܡܶܛܽܠ ܡܳܪ̈ܰܝܳܐ ܗܳܢܽܘܢ ܕܰܚܫܰܚܬܳܢܳܐܺܝܬ ܡܶܬܐܰܡܪܺܝܢ ܡܶܬܰܐܡܪ̈ܳܢ ܗܳܠܶܝܢ܆ ܬܪܶܝܢ ܡܰܠ̈ܟܶܐ ܐܶܢ ܬܶܓܕܰܫ܆ ܕܰܐܝܟ ܗܳܠܶܝܢ ܓܶܝܪ ܬܽܘܢܳܝ̈ܶܐ ܕܒܶܕ̥ܝ̈ܶܐ ܘܰܕܫܽܘܥ̈ܝܳܬܳܐ܆ ܕܳܐܦܠܳܐ ܡܰܢ ܡܶܢ ܕܽܘܟ ܐܺܝܬ ܠܗܶܝܢ ܦܝܳܣܳܐ ܒܳܕ̥ܶܝܢ ܘܓܳܒܠܺܝܢ ܝܽܗ̱ܘ̈ܕܳܝܶܐ܆ ܟܰܕ ܒܠܶܫܳܢܳܐ ܥܶܒܪܳܝܳܐ ܫܡܳܗ̈ܶܐ ܣܰܓܺܝ̈ܶܐܐ ܡܝܰܩܪ̈ܶܐ ܘܰܦܪ̈ܺܝܫܶܐ ܐܺܝܬ܆ ܘܕܰܢܛܺܝܪܺܝܢ ܥܰܠ ‌ܐܰ‌ܠܳܗܐ܆ ܘܳܐܦܠܳܐ ܡܶܕܶܡ ܐ̱ܚܪܺܢܳܐ ܒܝܰܕ ܗܳܠܶܝܢ ܡܶܫܬܰܡܰܗ܆ ܕܰܐܝܟ ܐܰܝܟܰܢ܆ ܗܰܘ ܕܰܐ‌ܠܽܘܗܺܝܡ܆ ܘܗܰܘ ܕ^[34]IIIIII ܘܗܰܘ ܕܰܐܕܽܘܢܺܝ܆ ܠܗܳܠܶܝܢ ܕܳܐܦ ܝܰܨܺܝܦܳܐܺܝܬ ܗܳܢܽܘܢ ܕܦܰܫܶܩܘ܆ ܗܶܢܽܘܢ ܡܶܢ ܨܶܒܝܳܢܗܽܘܢ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܫܒܰܩܘ ܐܶܢܽܘܢ ܟܰܕ ܠܳܐ ܡܦܰܫܩܺܝܢ܆ ܟܰܕ ܒܝܰܕ ܗܳܕܶܐ ܠܕܺܝܠܳܢܳܝܽܘܬܗܽܘܢ ܘܰܠܠܳܐ ܫܰܘܬܳܦܽܘܬܗܽܘܢ ܕܺܝܠܗܽܘܢ ܕܰܫܡܳܗ̈ܶܐ ܗܳܠܶܝܢ ܡܚܰܘܶܝܢ ܗ̱ܘܰܘ ܐܳܦ ܗܳܪܟܳܐ. ܒܗܳܠܶܝܢ ܐܶܬܚܰܫܰܚ ܗܽܘ ܢܒܺܝܳܐ ܟܰܕ ܡܙܰܡܰܪ܆ ܐܶܡܰܪ^[35]IIIIII ܠܰܐܕܽܘܢܺܝ ܗܳܢܰܘ ܕܶܝܢ ܡܳܪܝܳܐ ܠܡܳܪܝܳܐ ܕܚܰܝ̈ܠܰܘܳܬܳܐ܆ ܗܳܠܶܝܢ ܓܶܝܪ ܐܺܝܬܰܝܗܽܘܢ ܡܫܰܘܕܥܳܢ̈ܶܐ܆ ܫܡܳܗ̈ܶܐ ܗܳܠܶܝܢ.

ܡܶܛܽܠ ܗܳܟܺܝܠ ܕܟܰܕ ܠܟܽܠܳܗ̇ ܡܕܰܒܪܳܢܽܘܬܳܐ ܕܡܶܬܒܰܪܢܫܳܢܽܘܬܳܐ ܡܰܠ̣ܺܝ ܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ܆ ܡܶܢ ܒܳܬܰܪ ܩܝܳܡܬܳܐ ܕܡܶܢ ܡܺܝ̈ܬܶܐ ܣܠܶܩ ܡܓܰܫܡܳܐ ܠܥܶܠ ܡܶܢ ܫܡܰܝܳܐ ܐܰܝܟ ܕܰܟܬܺܝܒ^[36]܆ ܟܰܕ ܐܰ‌ܠܳܗܳܐܺܝܬ ܘܠܳܐܓܽܘܫܡܳܢܳܐܺܝܬ ܠܟܽܠ ܡܳܠܶܐ܆ ܡܡܟܟ^[37] ܗ̱ܘܳܐ ܠܶܗ ܕܶܝܢ ܢܰܦܫܶܗ ܥܕܰܡܳܐ ܠܡܰܘܬܳܐ܆ ܘܡܰܘܬܳܐ ܗܰܘ ܕܰܒܝܰܕ ܨܠܺܝܒܳܐ܆ ܠܳܐ ܡܶܕܶܡ ܕܶܝܢ ܡܶܢ ܫܽܘܒܚܳܐ ܒܰܝܬܳܝܳܐ ܕܺܝܠܶܗ ܐܶܬܒܰܨܰܪ܆ ܐܶܠܳܐ ܐܳܦ ܒܗܽܘܢ ܒܚܰܫ̈ܶܐ ܘܒܰܡܚܺܝܠܽܘܬܳܐ ܗܳܝ ܕܒܰܒܣܰܪ܆ ܘܗ̱ܝ ܕܨܶܒܝܳܢܳܐܺܝܬ ܚܠܳܦܰܝܢ ܩܰܒܶܠ܆ ܠܚܰܝܠܬܳܢܽܘܬܳܐ ܘܰܠܠܳܐ ܚܳܫܽܘܫܽܘܬܳܐ ܚܰܘܺܝ܆ ܘܒܺܐܝ̈ܕܰܝܗܽܘܢ ܕܺܝܠܗܽܘܢ ܕܚܰܫ̈ܶܐ ܙܟܳܝܗ̱ܝ ܘܚܰܣܢܶܗ ܒܕܰܐܪܳܐ ܢܳܡܽܘܣܳܐܺܝܬ ܠܡܰܘܬܳܐ܆ ܟܰܕ ܩܳܕܶܡ ܗ̱ܘܳܐ ܚܳܙܶܐ ܗ̱ܘܳܐ ܠܶܗ ܡܶܢ ܠܥܶܠ ܗܽܘ ܢܒܺܝܳܐ ܠܐ̱ܪܳܙܳܐ ܟܳܬܶܒ ܗ̱ܘܳܐ܆ ܗܳܠܶܝܢ ܟܺܝܬ ܕܡܶܢ ܪܽܘܚܳܐ ܟܰܕ ܒܰܕܡܽܘܬ ܩܺܝܬܳܪܳܐ ܡܶܬܢܩܰܫ ܗ̱ܘܳܐ܆ ܡܶܬܦܩܰܕ ܗ̱ܘܳܐ ܠܡܺܐܡܰܪ. ܡܶܛܽܠܗܳܕܶܐ ܐܳܦ ܠܘܳܬ ܡܰܠܦܳܢܽܘܬܳܐ ܕܺܝܠܰܢ ܡܰܥܶܠ ܡܰܡܠܠܳܐ܆ ܐܰܝܟ ܗܰܘ ܕܡܶܢ ܐܰ‌ܠܳܗܳܐ ܘܰܐܒܳܐ ܠܘܳܬ ܒܪܳܐ ܗܳܘܶܐ ܗ̱ܘܳܐ. ܠܳܐ ܓܶܝܪ ܡܶܫܟܚܳܐ ܗ̱ܘܳܬ ܕܰܐ̱ܚܪܳܢܝܳܐܺܝܬ ܢܺܐܠܦܺܝܘܗ̱ܝ ܚܢܰܢ ܠܰܫܪܳܪܳܐ܆ ܐܶ‌ܠܽܘ ܠܳܐ ܕܐ̱ܢܳܫܳܐܺܝܬ ܟܬܺܝ̈ܒܳܢ ܗ̱ܘܰܝ̈ ܗܳܠܶܝܢ܆ ܘܰܠܦܽܘܬ ܡܚܺܝܠܽܘܬܳܐ ܕܺܝܠܰܢ. ܘܶܐܢܕܶܝܢ ܠܳܐ܆ ܩܰܕܺܝܡܳܐ ܝܺܕܺܝܥܳܐ܆ ܕܰܒܝܰܕ ܐܽܘܪ̈ܓܰܢܶܐ ܝܳܗ̈ܒܰܝ ܩܳܠܳܐ܆ ܠܳܐ ܡܡܰܠܶܠ ‌ܐܰ‌ܠܳܗܳܐ ܗܰܘ ܠܳܐ ܦܰܓܪܳܢܳܐ. ܗܺܝ ܓܶܝܪ ܗܳܝ ܕܢܶܨܒܶܐ ܒܰܠܚܽܘܕ܆ ܡܶܠܬܳܐ ܐܺܝܬܶܝܗ̇ ܕܰܐ‌ܠܳܗܳܐ. ܘܳܐܦ ܒܪܳܐ ܕܶܝܢ. ܐܰܝܟܰܢܳܐ ܠܘܳܬ ܗܳܝ ܕܢܶܫܡܰܥ܆ ܥܰܠ ܡ̈ܶܠܶܐ ܐܶܣܬܢܶܩ܆ ܗܰܘ ܕܗܶܢܶܝܢ ܟܰܕ ܗܶܢܶܝܢ ܐܳܦ ܝܳܕܰܥ ܐܳܦ ܨܳܒܶܐ^[38]܆ ܟܽܠܗܶܝܢ ܗܳܠܶܝܢ ܕܳܐܦ ܐܰܒܳܐ. ܕܗܳܢܽܘܢ ܓܶܝܪ ܕܽܐܘܣܺܝܰܐ ܚܕܳܐ ܐܺܝܬܶܝܗ̇܆ ܘܳܐܦ ܗܺܝܟܰܕܗܺܝܽܘܬܐ ܗܳܝ ܕܰܒܟܽܠܗܶܝܢ܆ ܤܛܰܪ ܗܳܝ ܕܗܰܘ ܡܰܢ ܐܰܒܳܐ ܐܺܝܬܰܘܗ̱ܝ. ܗܰܘ ܕܶܝܢ ܒܪܳܐ܆ ܡܶܢ ܟܽܠܦܪܽܘܤ. ܐܳܦ ܨܶܒܝܳܢܳܐ܆ ܚܰܕ ܘܗܽܘ ܟܰܕ ܗܽܘ ܐܺܝܬܰܘܗ̱ܝ.

ܡܳܢܳܐ ܗܳܟܺܝܠ ‌ܐܺܝܬܶܝܗ̇ ܗܳܝ ܕܰܒܝܰܕ ܢܒܺܝܳܐ ܪܳܫܡܳܐ ܡܶܠܬܳܐ ܟܰܕ ܥܳܒܕܳܐ ܦܰܪܨܽܘܦܳܐ܆ ܐܶܡܰܪ ܡܳܪܝܳܐ ܠܡܳܪܝܳܐ ܬܶܒ ܡܶܢ ܝܰܡܺܝܢܝ^[39]. ܗܳܕܶܐ ܕܶܝܢ܆ ܘܠܳܐ ܡܶܕܶܡ ܐ̱ܚܪܺܢܳܐ ܡܚܰܘܝܳܐ܆ ܐܶܠܳܐ ܐܶܢ ܫܰܘܝܽܘܬ ܐܺܝܩܳܪܳܐ ܕܰܐܒܳܐ ܘܕܰܒܪܳܐ. ܕܝܰܡܺܝܢܳܐ ܓܶܝܪ ܥܰܠ ‌ܐܰ‌ܠܳܗܳܐ ܘܰܐܒܳܐ ܗܰܘ ܠܳܐ ܓܽܘܫܡܳܢܳܐ ܘܠܳܐ ܡܶܣܬܰܝܟܳܢܳܐ ܢܶܬܪܢܶܐ܆ ܡܶܢ ܗܳܠܶܝܢ ܕܰܕܠܳܐ ܗܰܘܢܳܐ ܐܺܝܬܶܝܗ̇. ܐܶܠܳܐ ܡܶܛܽܠ ܟܺܝܬ ܕܰܠܘܳܬܰܢ܆ ܗܳܕܶܐ ܕܺܐܝܩܳܪܳܐ ܐܺܝܬܶܝܗ̇ ܡܫܰܘܕܥܳܢܺܝܬܳܐ܆ ܡܰܘܬܒܳܐ ܗܰܘ ܕܡܶܢ ܝܰܡܺܝܢܳܐ܆ ܒܝܰܕ ܥܝܳܕܳܐ ܐ̱ܢܳܫܳܝܳܐ ܡܫܰܘܕܰܥ ܠܣܽܘ̈ܟܳܠܶܐ ܗܳܢܽܘܢ ܡܥ̈ܰܠܰܝܳܐ. ܘܶܐܢ ܕܶܝܢ ܠܳܐ܆ ܐܶܢ ܐ̱ܢܳܫ ܒܡܰܡܠܠܳܐ ܗܳܢܳܐ ܒܰܪܳܝܳܐ ܘܛܰܝܳܦܳܐ ܕܺܝܠܗܶܝܢ ܕܠܶܟܣܺܝ̈ܤ ܐܰܘ ܟܺܝܬ ܡ̈ܶܠܶܐ ܢܩܰܘܶܐ܆ ܟܰܕ ܠܳܐ ܢܳܦܶܩ ܠܘܳܬ ܣܽܘ̈ܟܳܠܶܐ ܦܰܐܝ̣̈ܰܝ̣ ܠܰܐܠܳܗܳܐ܆ ܐܳܦ ܕܝܰܬܺܝܪ ܡܝܰܩܰܪ ܒܪܳܐ ܛܳܒ ܡܶܢ ܐܰܒܳܐ ܢܶܫܬܟܰܚ܆ ܐܰܝܟ ܐܰܝܢܳܐ ܕܡܶܢ ܝܰܡܺܝܢܶܗ ܝܳܬܶܒ. ܐܶܠܳܐ ܚܕܳܐ ܝܺܨܶܦ ܟܬܳܒܳܐ܆ ܕܰܒܝܰܕ ܡ̈ܶܠܶܐ ܘܣܽܘ̈ܟܳܠܶܐ ܗܳܢܽܘܢ ܕܰܠܘܳܬܰܢ ܡܶܬܗܰܦܟܺܝܢ ܐܰܝܟ ܕܶܐܡܪܶܬ܆ ܫܰܘܝܽܘܬ ܐܺܝܩܳܪܳܐ ܢܚܰܘܶܐ ܕܰܐܒܳܐ ܘܕܰܒܪܳܐ. ܐܳܦ ܓܶܝܪ ܝܳܕܰܥ ܗ̱ܘܳܐ ܓܰܠܝܳܐܺܝܬ܆ ܕܠܰܐܝܟܳܐ ܕܗܽܘ ܐܶܢ ܝܰܬܺܝܪ ܢܥܰܠܽܘܗ̱ܝ ܐ̱ܢܳܫ ܒܺܐܝܩܳܪܳܐ ܠܰܒܪܳܐ܆ ܠܳܐ ܢܣܺܝܡܺܝܘܗ̱ܝ ܠܗܳܢܳܐ ܠܥܶܠ ܡܶܢ ܐܰܒܳܐ ܗܰܘ ܕܝܰܠ̣ܕܶܗ.

ܘܰܠܗܳܢܳܐ ܣܽܘܟܳܠܳܐ܆ ܐܳܦ ܠܶܟ̈ܣܺܝܤ ܗܳܠܶܝܢ ܕܩܰܕܶܡ̈ܶܝܢ ܐܶܬܬܰܝ̈ܬܝܶܢ ܡܚܰܘ̈ܝܳܢ܆ ܐܰܝܟ ܡܰܡܠܠܳܐ ܕܥܶܒܪ̈ܳܝܶܐ. ܐܶܡܰܪ ܓܶܝܪ ܐܳܡܰܪ …^[40]…ܠܰܐܕܽܘܢܝ. ܡܳܪܝܳܐ ܠܡܳܪܝܳܐ^[41] ܕܚܰܝ̈ܠܰܘܳܬܳܐ. ܐܶ‌ܠܽܘ ܓܶܝܪ ܗܽܘ ܛܶܟܣܳܐ ܗܰܦܺܝܟ ܗ̱ܘܳܐ܆ ܘܺܐܝܬܰܘܗ̱ܝ ܗ̱ܘܳܐ ܐܶܡܰܪ ܡܳܪܝܳܐ ܕܚܰܝ̈ܠܰܘܳܬܳܐ ܠܡܳܪܝܳܐ܆ ܡܶܢ ܟܽܠ ܦܪܽܘܤ ܐܳܡܪܺܝܢ ܗ̱ܘܰܘ ܐ̱ܢܳܫܺܝ̈ܢ ܕܗܰܘ ܡܰܢ ܡܳܪܝܳܐ ܕܚܰܝ̈ܠܰܘܳܬܳܐ܆ ܐܰܝܟ ܕܠܰܐܝܢܳܐ ܕܰܡܥܰܠܰܝ܆ ܠܰܐܒܳܐ ܡܦܰܠܰܓ ܘܺܝܗ̱ܝ ܒ. ܗܰܘ ܕܶܝܢ ܡܳܪܝܳܐ ܕܡܶܨܥܳܐܺܝܬ ܐܺܝܬ ܠܶܗ܆ ܐܰܝܟ ܕܠܰܐܝܢܳܐ ܕܰܡܬܰܚܬܰܝ ܣܺܝܡ ܥܰܠ ܒܪܳܐ. ܗܳܫܐ ܕܶܝܢ܆ ܗܳܝ ܕܰܠܩܽܘܒܠܳܐ. ܥܰܠ ‌ܐܰܒܳܐ ܡܰܢ܆ ܗܰܘ ܫܡܳܐ ܕܡܶܣܬܒܰܪ ܕܡܶܨܥܳܐܺܝܬ ܐܺܝܬ ܠܶܗ ܣܺܝܡ܆ ܗܰܘ ܡܳܪܝܳܐ. ܗܰܘ ܕܶܝܢ ܕܰܕܠܳܐ ܚܶܪܝܳܢܳܐ ܗ̣ܘ ܐܺܝܬܰܘܗ̱ܝ ܕܰܡܥܰܠܰܝ܆ ܗܰܘ ܡܳܪܝܳܐ ܕܚܰܝ̈ܠܰܘܳܬܳܐ܆ ܥܰܠ ܒܪܳܐ ܐܰܡܺܝܪ. ܡܶܛܽܠ ܕܝܰܨܺܝܦܽܘܬܳܐ ܐܺܝܬ ܠܰܟ̈ܬܳܒܶܐ ܟܳܗ̈ܢܳܝܶܐ܆ ܕܠܰܘ ܕܰܒܨܺܝܪ ܡܶܢ ܐܰܒܳܐ ܢܚܰܘܽܘܢܳܝܗ̱ܝ ܠܰܒܪܳܐ܆ ܗܰܘ ܕܠܰܘܠܗܰܠܡܶܢܬܶܫܒܽܘܚܬܶܗܕܰܐܒܳܐ ܡܶܫܟܰܚ ܕܢܶܬܡܰܛܶܐ܆ ܒܝܰܕ ܡܫܰܘܕܥܳܢܽܘܬܳܐ ܡܥܰܠܰܝܬܳܐ ܕܠܶܟ̈ܣܺܝܤ. ܗܳܠܶܝܢ ܕܶܝܢ܆ ܐܰܝܟ ܕܰܠܘܳܬ ܦܽܘܫܳܩܳܐ^[42] ܗܰܘ ܕܠܶܫܳܢܳܐ ܝܰܘܢܳܝܳܐ ܐܰܡܺܝܪ̈ܳܢ. ܘܶܐܢ ܕܶܝܢ ܠܳܐ ܐܰܝܟ ܒܰܪ̱ܬ ܩܳܠܳܐ ܕܥܶܒܪ̈ܳܝܶܐ܆ ܐܰܝܟܰܢܳܐ ܕܩܰܕܶܡܢܰܢ ܐܶܡܰܪܢܰܢ܆ ܘܗܰܘ ܕ .^[43]… ܘܗܰܘ ܕܰܐܕܽܘܢܺܝ܆ ܒܰܙܢܳܐ ܫܰܘܝܳܐ܆ ܡܶܢ ܫܡܳܗ̈ܶܐ ܠܳܐ ܡܫܰܘ̈ܬܦܶܐ ܐܺܝܬܰܝܗܽܘܢ܆ ܘܰܕܒܰܠܚܽܘܕ ܥܰܠ ‌ܐܰ‌ܠܳܗܳܐ ܡܶܬܰܐܡܪܺܝܢ. ܡܶܛܽܠܗܳܕܶܐ ܗܳܟܺܝܠ ‌ܐܳܦ ܟܽܠܗܽܘܢ ܗܳܢܽܘܢ ܕܦܰܫܶܩܘ܆ ܒܳܗ̇ ܒܰܕܡܽܘܬܳܐ ܥܰܠ ܬܪ̈ܰܝܗܽܘܢ ܐܰܫܠܶܡܘ. ܐܶܡܰܪ ܡܳܪܝܳܐ ܠܡܳܪܝܳܐ ܕܺܝܠܝ. ܬܶܒ ܡܶܢ ܝܰܡܺܝܢܝ^[44].

ܘܡܶܛܽܠ ܕܠܳܐ ܬܶܣܬܒܰܪ ܐܰܝܟ ܫܳܛܽܘܪܽܘܬܳܐ ܗܳܝ ܕܨܳܒܶܝܢ ܒܢܰܝ̈ܳܐ ܕܢܶܣܛܽܘܪܺܝܽܘܤ܆ ܕܒܰܪܢܳܫܳܐ ܒܛܰܝܒܽܘܬܳܐ ܥ̣ܰܠ ‌ܐܶܬܟܬܶܒ ܒܰܒ̈ܢܰܝܳܐ܆ ܘܰܫܘܰܪ ܣܠܶܩ ܥܰܠ ܬܪܽܘܢܘܤ ܫܡܰܝܳܢܳܐ ܘܥܶܠܳܝܳܐ܆ ܘܰܚܛܽܘܦܝܳܐ ܚܰܫܒܳܗ̇^[45] ܐܰܝܟ ܡܶܠܬܶܗ ܕܦܰܘܠܽܘܤ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܒܫܰܘܝܽܘܬܳܐ ܠܰܐܠܳܗܳܐ܆ ܘܕܰܡܕܰܓܶܠ ܢܶܣܬܒܰܪ ܗܽܘ ܐܰܒܳܐ ܟܰܕ ܒܝܰܕ ܢܒܺܝܳܐ ܐܳܡܰܪ܆ ܕܬܶܫܒܽܘܚܬܝ ܠܰܐ̱ܚܪܺܢܳܐ ܠܳܐ ܐܶ݀ܬܶܠ^[46]܆ ܐܰܘܣܦܳܗ̇ ܠܥܶܠܬܳܐ ܟܰܕ ܐܰܝܬܺܝ ܒܳܬܰܪܟܶܢ܆ ܡܶܢ ܟܰܪܣܳܐ ܩܕܳܡ ܟܰܘܟܰܒ ܢܽܘܓܗܳܐ ܝܺܠܶܕܬܳܟ. ܟܰܕ ܐܰܝܟ ܕܰܠܡܺܐܡܰܪ ܡܰܙܥܶܩ܆ ܕܡܶܛܽܠ ܗܳܕܶܐ ܬܶܒ ܡܶܢ ܝܰܡܺܝܢܝ^[47]. ܐܳܦ ܟܰܕ ܡܒܰܣܰܪ ܐܰܢ̱ܬ܆ ܡܶܛܽܠ ܕܠܰܘ ܒܪܳܐ ܐ̱ܚܪܺܢܳܐ ܐܺܝܬܰܝܟ܆ ܠܒܰܪ ܡܶܢ ܗܰܘ ܕܡܶܢܝ. ܫܰܪܺܝܪܳܐܺܝܬ ܘܡܶܢ ܟܰܪܣܳܐ ܕܺܝܠܝ ܐܰܝܟ ܕܐ̱ܢܳܫ ܢܺܐܡܰܪ ܝܺܠܺܝܕ. ܐܶܠܳܐ ܚܰܕ ܟܺܝܬ ܘܗܽܘ ܟܰܕ ܗܽܘ. ܘܳܐܦ ܗܳܕܶܐ ܕܶܝܢ ܟܰܕ ܒܰܥܝܳܕܳܐ ܐ̱ܢܳܫܳܝܳܐ ܡܶܬܚܰܫܰܚ ܣܳܡܳܗ̇܆ ܠܰܡܚܰܘܝܳܢܽܘܬܳܐ ܕܺܝܠܺܝܕܽܘܬܳܐ ܫܰܪܺܝܪܬܳܐ. ܘܶܐܢ ܕܶܝܢ ܠܳܐ܆ ܠܗܰܘ ܕܠܳܐ ܓܫܽܘܡ܆ ܐܰܝ̇ܕܳܐ ܟܰܪܣܳܐ. ܐܶܠܳܐ ܐܰܟܙܢܳܐ ܕܥܰܠ ܥܳܒܽܘܕܽܘܬܳܐ. ܟܰܕ ܚܢܰܢ ܒܝܰܕ ܐܺܝ̈ܕܰܝܳܐ ܥܳܒܕܺܝܢ ܚ̱ܢܰܢ܆ ܗܽܘ ܕܶܝܢ ܟܰܕ ܒܡܶܠܬܳܐ ܠܟܽܠܗܶܝܢ ܥܳܒܶܕ܆ ܡܶܬܚܰܫܰܚ ܒܰܫ̈ܡܳܗܶܐ ܕܰܡܥܰܝܕܺܝܢ ܠܰܢ ܘܳܐܡܰܪ ܐ̱ܢܳܫܳܐܺܝܬ܆ ܐܶܢܳܐ ܒܺܐܝܕܳܐ ܕܺܝܠܝ ܪܰܩܥܶܬ̣ ܫܡܰܝܳܐ^[48]܆ ܘܳܐܦ ܚܢܰܢ ܠܘܳܬܶܗ܆ ܐܺܝ̈ܕܰܝܟ ܥܒ̣̈ܰܕܢܳܢܝ ܘܰܓܒܰܠ̈ܢܳܢܝ^[49]܆ ܒܶܗ ܟܰܕ ܒܶܗ ܒܰܙܢܳܐ܆ ܟܰܕ ܝܰܠ̈ܕܶܐ ܦܰܓܪ̈ܳܢܳܝܶܐ ܘܫܰܘ̈ܝ̣ܰܝ̣ ܒܽܐܘܣܺܝܰܐ ܗܳܢܽܘܢ ܕܰܠܘܳܬܰܢ܆ ܐܰܝܟ ܕܰܒܣܽܘܓܳܐܐ ܡܶܢ ܟܰܪܣܳܐ ܐܺܝܬܰܝܗܽܘܢ܆ ܐܰܝܟ ܗܳܝ ܕܰܠܘܬ ܐܶܫܰܥܝܳܐ ܣܺܝܡܳܐ܆ ܕܰܠܡܳܐ ܬܶܛܥܶܐ ܐܰܢ̱ܬܬܐ ܠܰܒܪܳܗ̇܆ ܐܰܘ ܕܠܳܐ ܬܪܰܚܶܡ ܥܰܠ ܒܢܰܝ̈ܳܐ ܕܟܰܪܣܳܗ̇^[50]܆ ܘܳܐܦ ܒܡ̈ܰܬܠܶܐ ܒܳܗ̇ ܒܰܕܡܽܘܬܳܐ܆ ܡܳܢܳܐ ܒܪܳܐ ܕܟܰܪܣܝ܆ ܡܳܢܳܐ ܒܪܳܐ ܕܢܶܕܪ̈ܶܐ ܕܺܝܠܝ^[51]܆ ܐܳܦ ܗܽܘ ܦܰܐܝܽܘܬ ܐ̱ܢܳܫܳܐܺܝܬ ܡܰܢ܆ ܝܰܬܺܝܪ ܕܶܝܢ ܡܫܰܘܕܥܳܢܳܐܺܝܬ ܡܰܢ ܒܪܰܡ ܐܶܡܰܪ܆ ܡܶܢ ܟܰܪܣܳܐ ܩܕܳܡ ܟܰܘܟܰܒ ܢܽܘܓܗܳܐ ܝܺܠܶܕܬܳܟ^[52]. ܡܶܛܽܠܗܳܕܶܐ܆ ܣܰܓܺܝ ܛܳܒܳܐܺܝܬ ܗܳܢܽܘܢ ܏ܫܝܚ^[53]܆ ܟܰܕ ܗܰܝܡܳܢܽܘܬܳܐ ܡܰܫܠܡܺܝܢ ܗ̱ܘܰܘ ܠܰܢ܆ ܘܠܰܟܬܳܒܐ ܢܦܺܝܚ ܡܶܢ ܐܰ‌ܠܳܗܳܐ ܢܳܩܦܺܝܢ ܗ̱ܘܰܘ܆ ܐܶܡܰܪܘ ܡܶܛܽܠ ܒܪܳܐ܆ ܕܺܝܚܺܝܕܳܝܳܐ ܐܶܬܺܝܠܶܕ ܡܶܢ ܐܰܒܳܐ܆ ܗܳܢܰܘ ܕܶܝܢ ܡܶܢ ܐܽܘܣܺܝܰܐ ܕܰܐܒܳܐ.

ܗܳܝ ܕܶܝܢ ܕܰܩܕܳܡ ܟܰܘܟܰܒ ܢܽܘܓܗܳܐ^10: ܐܰܘܟܺܝܬ ܛܥܺܝܢ ܢܽܘܗܪܳܐ ܝܺܠܶܕܬܴ̊ܟ ܡܰܘܕܥܳܐ܆ ܠܗܳܝ ܕܰܩܕܳܡ ܟܽܠ ܥܳܠܡܳܐ܆ ܘܰܩܕܳܡ ܟܽܠ ܒܪܺܝܬܳܐ ܡܶܬܗܰܘܢܳܢܺܝܬܳܐ܆ ܘܰܩܕܳܡ ܪ̈ܽܘܚܳܬܳܐ ܕܰܠܥܶܠ ܘܚܰܝ̈ܠܰܘܳܬܳܐ ܠܳܐ ܗܽܘ̈ܠܳܢܳܝܶܐ. ܢܽܘܗܪܳܐ ܡܰܢ ܓܶܝܪ ܒܽܐܘܣܺܝܰܐ ܐܺܝܬܰܘܗ̱ܝ܆ ܐܰ‌ܠܳܗܳܐ ܗܰܘ ܕܒܰܬܠܺܝܬܳܝܽܘܬܳܐ. ܡܰܠܰܐܟ̈ܶܐ ܕܶܝܢ ܟܰܕ ܡܶܢ ܙܰܗܪܳܐ ܕܡܶܢ ܬܰܡܳܢ ܡܶܫܬܰܘܬܦܺܝܢ܆ ܘܰܐܝܟܰܢܳܐ ܕܐ̱ܢܳܫ ܢܺܐܡܰܪ ܡܶܢ ܕ̥ܽܘܒܳܐ܆ ܘܰܠܡܶܛܥܰܢ ܠܗܳܢܳܐ ܡܶܫܟܚܺܝܢ ܘܰܠܡܰܝܬܳܝܽܘ ܠܰܢ ܦܽܘܩ̈ܕܳܢܶܐ ܕܰܡܠܶܝܢ ܢܽܘܗܪܳܐ ܘܺܝܕܰܥܬܳܐ܆ ܟܰܘܟ̈ܒܶܐ ܡܶܕܶܡ ܛܥܺܝ̈ܢܰܝ ܢܽܘܗܪܳܐ ܐܺܝܬܰܝܗܽܘܢ܆ ܐܰܝܟ ܐܰܝܢܳܐ ܕܶܐܬܚܙܺܝ ܓܰܒܪܐܝܠ ܟܰܕ ܫܳܪܶܐ ܗ̱ܘܳܐ ܠܶܗ ܠܕܳܢܝܐܝܠ ‌ܐܰܝܟ ܕܡܶܫܟܚܳܐ ܗ̱ܘܳܬ܆ ܘܓܳܠܶܐ ܗ̱ܘܳܐ ܠܗܳܠܶܝܢ ܠܳܐ ܝܺܕܺܝ̈ܥܳܬܳܐ ܕܪ̈ܶܡܙܶܐ ܢܒܺܝ̣ܳܝ̣̈ܶܐ ܘܳܐܡܰܪ ܗ̱ܘܳܐ܆ ܕܳܢܝܐܝܠ܆ ܗܳܫܳܐ ܢܶܦܩܶܬ ܕܰܐ݀‌ܠܦܳܟ ܣܽܘܟܳܠܳܐ܆ ܒܪܺܝܫܳܐ ܕܬܰܟܫܽܘܦܬܳܟ ܢܶܦܩܰܬ ܡܶܠܬܳܐ܆ ܘܶܐܢܳܐ ܐܶܬܺܝܬ ܕܰܐ݀ܘܕܥܳܟ܆ ܡܶܛܽܠ ܕܓܰܒܪܳܐ ܕܰܪ̈ܓܺܝܓܳܬܳܐ ܐܺܝܬܰܝܟ ܐܰܢ̱ܬ܆ ܘܶܐܣܬܰܟܠ ܒܡܶܠܬܳܐ^[54]. ܛܥܺܝܢ ܢܽܘܗܪܳܐ ܐܺܝܬܰܘܗ̱ܝ ܗ̱ܘܳܐ܆ ܐܳܦ ܟܰܕ ܠܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܐܰܘܕܰܥ ܣܽܘܒܳܪܳܐ ܗܰܘ܆ ܗܰܘ ܕܰܡܫܰܘܕܰܥ ܗ̱ܘܳܐ ܠܡܶܐܬܺܝܬܳܐ ܕܒܰܒܣܰܪ ܕܢܽܘܗܪܳܐ ܗܰܘ ܠܳܐ ܡܶܬܡܰܠܠܳܢܳܐ ܘܥܶܠܳܝܳܐ܆ ܗܰܘ ܕܰܕܢܰܚ ܠܗܳܢܽܘܢ ܕܰܒܚܶܫܽܘܟܳܐ ܘܰܒܛܶܠܳܠܳܐ ܕܡܰܘܬܳܐ ܝܳܬܒܺܝܢ ܗ̱ܘܰܘ^[55]. ܘܺܝܕܰܥܬܳܐ ܐܰ‌ܠܳܗܳܝܬܳܐ ܘܰܕܣܰܓܺܝ ܡܶܬܚܰܙܝܳܐ ܘܢܰܗܺܝܪܳܐ ܡܠܳܐ ܠܟܽܠܳܗ̇ ܡܶܬܥܰܡܪܳܢܺܝܬܳܐ.

ܡܶܢ ܟܰܪܣܳܐ ܗܳܟܺܝܠ ܘܡܶܢܳܗ̇ ܕܽܐܘܣܺܝܰܐ܆ ܘܳܐܦ ܩܕܳܡ ܟܽܠܳܗ̇ ܒܪܺܝܬܳܐ܆ ܘܰܩܕܳܡ ܟܽܠ ܛܥܺܝܢ ܢܽܘܗܪܳܐ ܝܰܠ̣ܕܶܗ ܐܰܒܳܐ ܠܰܿܒܪܳܐ. ܣܰܓܺܝ ܓܶܝܪ ܕܫܳܢܝܽܘܬܳܐ ܐܺܝܬܶܝܗ̇܆ ܕܡܶܛܽܠ ܛܥܺܝܢ ܢܽܘܗܪܳܐ ܐܰܘܟܺܝܬ ܟܰܘܟܰܒ ܢܽܘܓܗܳܐ ܗܳܢܳܐ ܡܶܬܪܰܓܫܳܢܳܐ ܘܰܕܡܶܬܚܙܶܐ܆ ܢܶܣܬܰܟܰܠ ܕܰܐܡܺܝܪܳܐ ܗܳܕܶܐ܆ ܐܰܝܟܳܐ ܟܺܝܬ ܕܡܶܢ ܒܳܬܰܪ ܥܒܺܝܕܽܘܬܳܐ ܕܰܫܡܰܝܳܐ ܘܕܰܐܪܥܳܐ܆ ܘܰܕܢܶܨ̈ܒܳܬܳܐ ܘܰܕܥܶܣܒܳܐ܆ ܒܝܰܘܡܳܐ ܗܰܘ ܕܰܐܪܒܥܳܐ ܗܘ̣ܰܘ ܫܶܡܫܳܐ ܘܣܰܗܪܳܐ ܘܟܽܠܗܽܘܢ ܟܰܘܟ̈ܒܶܐ.

ܐܶܠܳܐ ܐܰܟܙܢܳܐ ܕܗܳܝ ܕܰܒܪܳܐ܆ ܘܗ̱ܝ ܕܡܶܢ ܟܰܪܣܳܐ ܢܶܬܶܐܡܰܪ ܕܶܐܬܺܝܠܶܕ܆ ܘܟܽܠܗܽܘܢ ܫܡܳܗ̈ܶܐ ܕܕܰܐܝܟ ܗܳܠܶܝܢ܆ ܫܘܶܐ ܒܽܐܘܣܺܝܰܐܡܚܰܘܶܝܢ ܠܶܗ ܠܗܰܘ ܕܶܐܬܺܝܠܶܕ ܠܗܰܘܕܝܰܠ̣ܕܶܗ܆ ܗܳܟܰܢܳܐ ܐܳܦ ܗܳܝ ܕܡܶܠܬܳܐ ܢܶܫܬܰܡܰܗ ܒܪܳܐ܆ ܠܠܳܐ ܚܳܫܽܘܫܽܘܬܳܐ ܘܰܠܠܳܐ ܓܽܘܫܡܳܢܳܝܽܘܬܳܐ ܡܚܰܘܝܳܐ܆ ܘܰܠܗܳܝ ܕܠܳܐ ܪܶܕܝܳܐ ܘܕܰܡܚܰܪܪܳܐ ܡܶܢ ܟܽܠܗܶܝܢ ܗܳܠܶܝܢ ܕܰܠܘܳܬ ܝܺܠ̈ܺܝܕܘܳܬܳܐ ܦܰܓܪ̈ܳܢܝܬܐ ܡܶܬܚܰܙ̈ܝܳܢ. ܡܶܠܬܳܐ ܓܶܝܪ ܝܰܠܕܳܐ ܕܠܳܐ ܚܰܫܳܐ ܐܺܝܬܶܝܗ̇܆ ܕܡܶܢ ܗܰܘܢܳܐ ܘܠܰܘ ܡܶܢ ܚܽܘܠܛܳܢܳܐ ܐܰܘ ܥܽܘܪܙܳܠܳܐ ܕܦܰܓܪ̈ܶܐ ܢܶܦܩܰܬ܆ ܘܒܰܕܡܽܘܬ ܨܰܠܡܳܐ ܡܶܕܶܡ ܡܫܰܘܙܒܳܐ ܒܰܡܕܰܡܝܳܢܽܘܬܳܐ܆ ܠܟܽܠܶܗ ܙܰܘܥܳܐ ܡܶܬܗܰܘܢܳܢܳܐ ܗܰܘ ܕܣܺܝܡ ܒܬܰܪܥܺܝܬܳܐ܆ ܘܰܡܚܰܘܝܳܐ ܘܡܰܘܕܥܳܐ ܠܶܗ. ܘܰܐ̱ܚܪܺܬܳܐ ܡܰܢ ܐܺܝܬܶܝܗ̇ ܠܒܰܪ ܡܶܢ ܗܰܘ ܕܕܺܝܠܶܗ ܐܺܝܬܶܝܗ̇ ܨܰܠܡܳܐ܆ ܡܚܰܘܝܳܐ ܠܶܗ ܕܶܝܢ ܘܡܰܩܢܳܐ ܗܺܝ ܒܳܗ̇. ܥܰܡ ܡܶܠܬܳܐ ܕܶܝܢ ܟܰܕ ܢܳܦܩܳܐ܆ ܐܳܦ ܪܽܘܚܳܐ ܡܶܢ ܟܽܠ ܦܪܽܘܤ ܐܰܟܚܕܳܐ ܢܳܦܶܩ. ܐܶܠܳܐ ܡܶܠܬܳܐ ܡܰܢ ܗܳܕܶܐ ܕܺܝܠܰܢ܆ ܐܰܝܟ ܐܰܝ̇ܕܳܐ ܕܡܶܢ ܗܰܘܢܳܐ ܡܶܫܬܰܚܠܦܳܢܳܐ ܢܳܦܩܳܐ܆ ܘܰܒܝܰܕ ܡ̈ܢܰܘܳܬܳܐ ܦܰܓܪ̈ܳܢܝܳܬܳܐ ܡܶܬܢܰܩܫܳܐ܆ ܣܶܦ̈ܘܳܬܳܐ ܘܠܶܫܳܢܳܐ܆ ܥܰܡܳܗ̇ ܕܗܳܝ ܕܢܳܦܩܳܐ ܫܰܪܝܳܐ ܘܰܡܦܰܠܗܕܳܐ܆ ܘܳܐܦ ܗܺܝ ܠܶܗܬܳܐ ܗܳܝ ܕܦܽܘܡܳܐ ܐܰܘܟܺܝܬ ܢܫܰܡܬܳܐ܆ ܥܰܡܳܗ̇ ܕܡܰܦܰܩܬܳܐ ܐܰܦܫܰܬ ܘܶܐܬܚܰܒܠܰܬ.

ܕܰܐ‌ܠܳܗܳܐ ܐܰܒܳܐ ܕܶܝܢ܆ ܕܗܰܘܢܳܐ ܗܰܘ ܕܰܠܗܰܠ ܡܶܢ ܟܽܠ܆ ܕܗܰܘ ܕܺܐܝܬܰܘܗ̱ܝ܆ ܕܗܰܘ ܕܰܡܩܰܝܰܡ܆ ܗܰܘ ܕܳܐܦ ܠܗܳܠܶܝܢ ܐ̱ܚܪ̈ܳܢܶܐ ܝܳܗܶܒ ܗܳܝ ܕܢܶܗܘܽܘܢ ܐܺܝܬܰܝܗܽܘܢ ܕܰܐܝܟ ܗܳܢܳܐ ܐܺܝܬܰܘܗ̱ܝ܆ ܐܳܦ ܡܶܠܬܳܐ܆ ܐܳܦ ܪܽܘܚܳܐ. ܚܰܝ̈ܶܐ ܘܰܡܩܰܝ̈ܡܶܐ ܘܥܳܒ̈ܽܘܕܶܐ ܘܳܐܚܽܘ̈ܕܶܐ ܕܟܽܠ܆ ܘܕܰܠܟܽܠ ܡܶܕܶܡ ܕܺܐܝܬܰܘܗ̱ܝ ܒ̣ܰܪܝܳܐ ܚܳܒܫܺܝܢ܆ ܘܺܐܝܬܰܝܗܽܘܢ ܒܰܐܒܳܐ ܐܰܝܟܰܢܳܐ ܕܳܐܦ ܐܰܒܳܐ ܒܗܽܘܢ܆ ܠܳܐ ܡܶܣܬܰܝܟܳܢܳܐܺܝܬ ܘܠܳܐ ܓܽܘܫܡܳܢܳܐܺܝܬ܆ ܘܰܐܝܟ ܕܝܳܕܰܥ ܘܣܳܗܶܕ ܗܰܘ ܕܒܶܐܘܰܢܓ̈ܶܠܺܝܰܐ ܐܶܡܰܪ. ܐܶܢܳܐ ܒܰܐܒܳܐ ܘܰܐܒܳܐ ܒܺܝ ܐܺܝܬܰܘܗ̱ܝ^[56]. ܐܰܟܙܢܳܐ ܓܶܝܪ ܕܗܽܘ ܡܶܠܬܳܐ ܨܶܡܚܳܐ ܐܺܝܬܰܘܗ̱ܝ ܕܬܶܫܒܽܘܚܬܳܐ ܘܝܽܘܩܢܳܐ ܕܰܩܢܽܘܡܶܗ ܕܰܐܒܳܐ^[57]܆ ܗܳܟܰܢܳܐ ܐܳܦ ܪܽܘܚܳܐ ܩܰܕܺܝܫܳܐ ܪܽܘܚܳܐ ܐܺܝܬܰܘܗ̱ܝ ܕܰܫܪܳܪܳܐ܆ ܗܰܘ ܕܡܶܢ ܐܰܒܳܐ ܢܳܦܶܩ^[58]܆ ܘܡܶܢ ܟܽܠܦܪܽܘܤ ܗܽܘ ܒܶܗ ܡܚܰܘܶܐ ܠܗܰܘ ܕܕܺܝܠܶܗ ܐܺܝܬܰܘܗ̱ܝ ܪܽܘܚܳܐ܆ ܟܰܕ ܕܺܝܠܳܗ̇ ܕܽܐܘܣܺܝܰܐ ܐܺܝܬܰܘܗ̱ܝ ܠܗܰܘ ܕܰܐܣܪܚܶܗ^[59]܆ ܐܰܝܟܰܢܳܐ ܕܳܐܦ ܪܽܘܚܳܐ ܕܰܫܪܳܪܳܐ ܢܶܗܘܶܐ ܐܺܝܬܰܘܗ̱ܝ܆ ܕܠܳܐ ܡܕܰܓܶܠ ܒܝܰܕ ܐ̱ܚܪܳܢܝܽܘܬ ܐܽܘܣܺܝܰܐ܆ ܠܗܰܘ ܕܡܶܢܶܗ ܢܳܦܶܩ. ܡܶܛܽܠ ܗܳܕܶܐ ܓܶܝܪ ܥܰܡ ܐܰܒܳܐ ܘܥܰܡ ܒܪܐ ܐܰܟܚܕܳܐ ܡܶܬܡܢܶܐ ܘܡܶܫܬܰܒܰܚ ܘܒܰܐܒܳܐ ܘܒܰܒܪܳܐ܆ ܘܰܒܪܽܘܚܳܐ ܩܰܕܺܝܫܳܐ ܥܳܡܕܺܝܢܰܢ. ܐܶܢܗܽܘ ܓܶܝܪ ܕܠܰܘ ܡܬܽܘܡܳܐܺܝܬ ܡܩܰܝܰܡ ܗ̱ܘܳܐ ܐܰܟܚܕܳܐ ܥܰܡ ܐܰܒܳܐ ܘܥܰܡ ܒܪܳܐ܆ ܘܰܫܘܶܐ ܒܽܐܘܣܺܝܰܐ ܐܺܝܬܰܘܗ̱ܝ ܘܗܳܐ ܠܗܽܘܢ ܘܰܫܘܶܐ ܒܺܐܝܩܳܪܳܐ܆ ܙܳܕܶܩ ܗ̱ܘܳܐ ܕܥܰܡ ܒܪܺܝܬܳܐ ܐܰܟܚܕܳܐ ܢܶܬܛܰܟܰܤ. ܘܠܳܐ ܥܰܡ ܟܝܳܢܳܐ ܠܳܐ ܒܰܪܝܳܐ ܐܰܟܚܕܳܐ ܢܶܬܥܰܠܶܐ܆ ܐܳܦܠܳܐ ܕܰܢ݀ܗܰܝܡܶܢ ܒܶܗ ܚܢܰܢ܆ ܐܰܝܟܰܢܳܐ ܕܒܰܐܒܳܐ ܘܒܰܒܪܳܐ ܗܰܝܡܶܢܰܢ.

ܫܰܘܝܰܬ ܒܰܡܬܽܘܡܳܝܽܘܬܳܐ ܗܳܟܺܝܠ ‌ܐܺܝܬܶܝܗ̇ ܬܠܺܝܬܳܝܽܘܬܳܐ ܩܰܕܺܝܫܬܳܐ. ܠܳܐ ܒܪܺܝܬܳܐ ܟܺܝܬ ܘܫܰܘܝܰܬ ܒܽܐܘܣܺܝܰܐ. ܘܰܐܝܟܰܢܳܐ ܕܰܐ‌ܠܳܗܐ ܗܘ ܐܰܒܳܐ܆ ܐܰ‌ܠܳܗܰܐ ܗ̄ܘ ܐܳܦ ܒܪܳܐ܆ ܐܰ‌ܠܳܗܰܐ ܗ̱ܘ ܐܳܦ ܪܽܘܚܳܐ ܩܰܕܺܝܫܳܐ. ܘܰܐܝܟܰܢܳܐ ܕܢܽܘܗܪܰܐ ܗ̄ܘ ܐܰܒܳܐ܆ ܢܽܘܗܪܰܐ ܗܘ ܐܳܦ ܒܪܳܐ܆ ܢܽܘܗܪܰܐ ܗܘ ܐܳܦ ܪܽܘܚܳܐ ܩܰܕܺܝܫܳܐ. ܘܰܐܝܟܰܢܳܐ ܕܥܳܒܽܘܕܰܐ ܗܘ ܘܒܳܪܽܘܝܳܐ ܘܰܐܚܺܝܕ ܟܽܠ ‌ܐܰܒܳܐ܆ ܗܳܟܰܢܳܐ ܐܳܦ ܒܪܳܐ ܐܳܦ ܪܽܘܚܳܐ ܩܰܕܺܝܫܳܐ. ܐܶܠܳܐ ܠܰܘ ܡܶܛܽܠ ܗܳܕܶܐ ܬܠܳܬ ܪ̈ܺܝܫܳܢܘܳܬܳܐ. ܒܗܳܝ ܓܶܝܪ ܕܰܠܘܳܬ ܐܰܒܳܐ ܐܺܝܬ ܠܗܽܘܢ ܡܶܬܥܰܠܝܳܢܽܘܬܳܐ ܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܆ ܘܗܰܘ ܡܰܢ ܡܶܢܶܗ ܝܺܠܺܝܕ܆ ܗܰܘ ܕܶܝܢ ܢܰܦܺܝܩ܆ ܚܕܳܐ ܡܶܢ ܟܽܠ ܦܪܘܤ ܪܺܝܫܳܢܽܘܬܳܐ܆ ܘܚܰܕ ܐܰ‌ܠܳܗܳܐ. ܕܒܰܚܕܳܐ ܡܰܢ ܐܽܘܣܺܝܰܐ ܘܰܐ‌ܠܳܗܽܘܬܳܐ܆ ܒܰܬܠܳܬܐ ܕܶܝܢ ܩܢܽܘܡ̈ܶܐ ܠܳܐ ܒܠܺܝ̈ܠܶܐ ܡܶܬܚܙܶܐ. ܛܳܒܳܐ. ܟܺܐܢܳܐ ܕܰܠܘܳܬ ܟܽܠ ܡܳܛܶܐ ܒܝܰܨܺܝܦܽܘܬܳܐ ܘܰܒܛܳܒܽܘܬܳܐ. ܛܳܒܰܐ ܗ̄ܘ ܓܶܝܪ ܡܳܪܝܳܐ ܠܟܽܠܗܶܝܢ ܐܰܟܚܕܳܐ܆ ܘܪ̈ܰܚܡܰܘ̈ܗ̱ܝ ܥܰܠ ܟܽܠܗܽܘܢ ܥ̈ܒܕܰܘ̈ܗ̱ܝ. ܟܰܕ ܓܶܝܪ ܥܳܒܽܘܕܳܐ ܕܟܽܠܗܶܝܢ ܐܺܝܬܰܘܗ̱ܝ܆ ܟܺܐܢܳܐܺܝܬ ܠܟܽܠܗܶܝܢ ܝܳܨܶܦ ܘܰܡܦܰܪܢܶܤ.

ܡܶܢ ܐܰܝܟܳܐ ܗܳܟܺܝܠ ܣܶܠܩܰܬ ܥܰܠ ܒܳܠܳܐ ܕܡܰܢܺܝ̈ܢܳܝܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ‌ܐܺܝܬܰܝܗܽܘܢ ܥܰܢ̈ܳܬܶܐ܆ ܕܬܰܪܬܶܝܢ ܪ̈ܺܝܫܳܢܘܳܬܳܐ ܠܳܐ ܥܒܺܝ̈ܕܳܬܳܐ ܘܰܕܠܳܐ ܫܽܘܪܳܝ ܢܰܥܠܽܘܢ܆ ܛܳܒܳܐ ܘܒܺܝܫܳܐ܆ ܢܽܘܗܪܳܐ ܘܚܶܫܽܘܟܳܐ܆ ܠܗܰܘ ܟܺܝܬ ܕܳܐܦ ܗܽܘܠܶܐ ܫܰܡܗܽܘܗ̱ܝ. ܡܰܢܽܘ ܓܶܝܪ ܕܠܰܘ ܡܶܢܳܗ̇ ܘܒܳܗ̇ ܢܰܟܣܶܝܗ̇ ܠܠܳܐ ܡܠܺܝܠܽܘܬܳܐ. ܡܰܢܽܘ ܕܶܝܢ ܡܶܢ ܒܳܬܰܪ ܡܰܟܣܳܢܽܘܬܳܐ܆ ܠܳܐ ܢܶܒܟܶܝܗ̇ ܠܚܰܣܺܝܪܽܘܬ ܗܰܘܢܳܐ. ܪܺܝܫܳܐ ܓܶܝܪ ܕܟܽܠ ‌ܐܺܝܬܰܘܗ̱ܝ ܥܶܠܬܳܐ ܘܥܶܩܳܪܳܐ܆ ܟܰܕ ܠܳܐ ܡܶܕܶܡ ܐܺܝܬ ܠܶܗ ܕܥܳܒܰܪ ܠܶܗ ܠܥܶܠ܆ ܐܰܝܟܰܢܳܐ ܕܳܐܦ ܢܶܗܘܶܐ ܐܺܝܬܰܘܗ̱ܝ ܡܳܪܢܳܐܺܝܬ ܪܺܝܫܳܐ. ܐܰܝܢܳܐ ܗܳܟܺܝܠ ܡܶܢܗܽܘܢ ܐܺܝܬܰܘܗ̱ܝ ܥܶܠܬܳܐ ܕܗܰܘ ܐ̱ܚܪܺܢܳܐ ܢܺܐܡܰܪ ܚܢܰܢ܆ ܐܰܝܟܰܢܳܐ ܕܥܰܠ ܗܰܘ ܢܶܟܬܒܺܝܘܗ̱ܝ ܠܰܫܡܳܐ ܕܪܺܝܫܳܐ. ܐܰܝ̇ܕܳܐ ܡܶܢܗܶܝܢ. ܛܳܒܳܐ ܕܒܺܝܫܳܐ܆ ܐܰܘ ܗܳܝ ܕܰܠܩܽܘܒܠܳܐ܆ ܒܺܝܫܳܐ ܕܛܳܒܳܐ. ܘܰܐܝܟܰܢܳܐ ܡܰܨܝܳܐ ܕܗܰܘ ܕܒܽܐܘܣܺܝܰܐ ܐܺܝܬܰܘܗ̱ܝ ܛܳܒܳܐ܆ ܥܶܠܬܳܐ ܘܥܶܩܳܪܳܐ ܘܰܗܘܳܝܳܐ ܢܶܗܘܶܐ ܕܰܩܢܽܘܡܶܗ ܕܗܰܘ ܒܺܝܫܳܐ܆ ܐܰܘ ܕܒܺܝܫܳܐ ܬܽܘܒ܆ ܪܺܝܫܺܝܬܳܐ ܢܶܬܶܠ ܠܰܟܝܳܢܶܗ ܕܗܰܘ ܛܳܒܳܐ܆ ܗܰܘ ܕܰܒܟܽܠܡܶܕܶܡ ܐܰܟܣܰܢܳܝ ܘܣܰܩܽܘܒܠܳܝ ܠܶܗ. ܡܕܰܓܠܺܝܢ ܗܳܟܺܝܠ ܬܪ̈ܰܝܗܽܘܢ ܠܰܫܡܳܐ ܕܪܺܝܫܳܐ܆ ܒܗܳܝ ܕܗܰܘ ܐ̱ܚܪܺܢܳܐ ܡܶܢ ܗܰܘ ܐ̱ܚܪܺܢܳܐ܆ ܐܳܦܠܳܐ ܒܡܶܕܶܡ ܡܥܰܠܰܝ ܐܰܘ ܥܳܒܰܪ ܠܥܶܠ.

ܐܺܝܢ ܐܳܡܰܪ. ܟܽܠ ܚܰܕ ܡܶܢܗܽܘܢ ܓܶܝܪ. ܠܳܐ ܥܒܺܝܕܳܐ ܟܺܝܬ ܘܰܕܠܳܐ ܪܺܝܫܳܐ ܐܺܝܬܰܘܗ̱ܝ. ܐܳܦ ܛܳܒܳܐ ܗܰܘ ܟܺܝܬ ܕܺܐܝܬܰܘܗ̱ܝ ܢܽܘܗܪܳܐ܆ ܘܳܐܦ ܒܺܝܫܳܐ ܗܰܘ ܟܺܝܬ ܕܳܐܦ ܚܶܫܽܘܟܳܐ ܐܳܦ ܗܽܘܠܶܐ ܐܺܝܬܰܘܗ̱ܝ܆ ܘܠܳܐ ܡܫܰܘܬܦܳܐܺܝܬ ܐܺܝܬ ܠܗܽܘܢ ܠܘܳܬ ܚ̈ܕܳܕܶܐ. ܡܳܢܳܐ ܗܳܟܺܝܠ. ܐܶܡܰܪ ܠܺܝ ܕܰܡܫܰܐܶܠ ‌ܐ̱ܢܳܐ ܠܳܟ. ܐܳܦ ܕܠܳܐ ܡܶܣ̈ܬܰܝܟܳܢܶܐ ܐܺܝܬܰܝܗܽܘܢ܆ ܢܰܘܕܶܐ ܐܶܢܽܘܢ ܠܗܳܠܶܝܢ܆ ܠܗܰܘ ܓܶܝܪ ܕܺܐܝܬܰܘܗ̱ܝ ܠܳܐ ܥܒܺܝܕܳܐ ܘܰܕܠܳܐ ܪܺܝܫܳܐ܆ ܢܳܩܦܳܐ ܡܶܢ ܟܽܠ ܦܪܽܘܤ. ܐܳܦ ܗܳܝ ܕܠܳܐ ܡܶܣܬܰܝܟܳܢܳܐ. ܕܠܳܐ ܡܶܣ̈ܬܰܝܟܳܢܶܐ ܕܶܝܢ܆ ܐܳܦ ܗܳܝ ܕܠܳܐ ܓܫܽܘܡ ܕܺܝܠܳܢܳܝܬܳܐ ܗܝ. ܗܰܘ ܕܶܝܢ ܕܰܕܠܳܐ ܓܫܽܘܡ ܐܺܝܬܰܘܗ̱ܝ܆ ܝܺܕܺܝܥܳܐ ܗܝ. ܕܳܐܦ ܡܶܬܗܰܘܢܳܢܰܐ ܗܘ. ܘܰܐܝܟܰܢܳܐ ܠܰܘ ܕܫܳܢܝܽܘܬܳܐ ܗܝ ܐ̱ܚܪܳܝܬܳܐ ܓܰܠܝܳܐܺܝܬ܆ ܗܳܝ ܕܗܽܘܠܶܐ ܠܳܐ ܗܽܘܠܳܢܳܝܬܳܐ ܢܺܐܡܰܪ ܘܡܶܬܗܰܘܢܳܢܺܝܬܳܐ.

ܟܰܕ ܕܶܝܢ ܬܪ̈ܰܝܗܽܘܢ. ܠܳܐ ܡܶܣ̈ܬܰܝܟܳܢܶܐ ܐܺܝܬܰܝܗܽܘܢ܆ ܘܳܐܦܠܳܐ ܒܕܽܘܟ ܡܶܙܕܰܪܒܺܝܢ܆ ܟܽܠܳܗ̇ ܐܰܢܰܢܩܺܐ ܕܢܶܗ̈ܘܝܳܢ ܚ̈ܠܺܝܛܳܢ ܗܳܠܶܝܢ ܕܣܰܓܺܝ ܣܰܩܽܘܒ̈ܠܳܝܳܢ ܘܡܰܩܪ̈ܒܳܢܝܳܢ܆ ܘܗܳܠܶܝܢ ܕܒܰܟܝܳܢܳܐ ܠܳܐ ܫܳܠ̈ܡܳܢ ܠܰܚ̈ܕܳܕܶܐ܆ ܘܠܳܐ ܡܶܟܺܝܠ ܬܽܘܒ ܐܺܝܬܰܝܗܽܘܢ ܬܪܶܝܢ ܪ̈ܺܝܫܶܐ܆ ܚܰܕ ܕܶܝܢ ܪܺܝܫܳܐ ܡܶܕܶܡ ܕܰܐܟܚܕܳܐ ܡܡܰܙܰܓ ܘܰܡܚܰܠܰܛ. ܐܶܢ ܕܶܝܢ ܟܽܠ ܚܕ ܡܶܢܗܽܘܢ ܦܪܺܝܫ ܘܕܽܘܟܬܳܐ ܕܺܝܠܳܢܳܝܬܳܐ ܐܺܝܬ ܠܶܗ܆ ܡܣܰܝܰܟ. ܗܳܠܶܝܢ ܕܶܝܢ ܕܰܡܣܰܝܟܺܝܢ܆ ܐܳܦ ܒܦܰܓܪ̈ܶܐ ܡܶܢ ܟܽܠܦܪܽܘܤ ܐܺܝܬܰܝܗܽܘܢ. ܐܳܦܶܢ ܠܰܘ ܒܥܰܒ̈ܝܶܐ ܘܰܐܛܺܝ̈ܡܶܐ܆ ܐܶܠܳܐ ܒܩܰܛܺܝ̈ܢܶܐ ܡܶܕܶܡ. ܕܺܝܠܳܝܬܳܐ ܕܶܝܢ ܕܦܰܓܪ̈ܶܐ ܐܺܝܬܶܝܗ̇ ܡܣܰܝܟܽܘܬܳܐ. ܟܰܕ ܕܶܝܢ ܡܶܣ̈ܬܰܝܟܳܢܶܐ ܐܺܝܬܰܝܗܽܘܢ ܘܓܽܘܫ̈ܡܶܐ܆ ܐܰܝܟܰܢܳܐ ܐܺܝܬܰܝܗܽܘܢ ܠܳܐ ܥܒܺܝ̈ܕܶܐ ܟܺܝܬ ܘܰܕܠܳܐ ܪܺܝܫܳܐ. ܡܳܢܳܐ ܕܶܝܢ ܐܺܝܬܰܘܗ̱ܝ ܒܪܰܡ ܗܰܘ ܕܰܟܠܳܐ ܠܗܽܘܢ ܡܶܢ^[60] ܚ̈ܕܳܕܶܐ܆ ܠܘܳܬ ܗܳܝ ܕܠܳܐ ܡܶܬܚܰܠܛܳܢܳܐܺܝܬ ܢܶܗܘܽܘܢ ܐܺܝܬ ܠܗܽܘܢ. ܐܰܢܰܢܩܺܐ ܓܶܝܪ ܕܢܶܗܘܶܐ ܐܺܝܬ ܬܠܺܝܬܳܝܳܐ ܡܶܕܶܡ܆ ܘܗܳܢܳܐ ܕܠܳܐ ܪܺܝܫܳܐ ܘܠܳܐ ܥܒܺܝܕܳܐ܆ ܐܰܝܟܰܢܳܐ ܕܰܒܟܽܠ ܙܒܰܢ. ܘܰܐܡܺܝܢܳܐܺܝܬ ܢܶܗܘܽܘܢ ܟܠܶܝܢ ܡܶܢ ܚ̈ܕܳܕܶܐ܆ ܗܰܘ ܛܳܒܳܐ ܘܗܰܘ ܒܺܝܫܳܐ܆ ܟܝܳܢ̈ܶܐ ܗܳܢܽܘܢ ܡܰܩܪ̈ܒܳܢܶܐ ܘܒܰܥ̈ܠܰܝ ܕܰܐܪܳܐ ܕܰܚ̈ܕܳܕܶܐ܆ ܘܰܕܠܳܐ ܪܺܝܫܳܐ ܘܠܳܐ ܥܒܺܝ̈ܕܶܐ. ܡܳܕܶܝܢ ܬܠܳܬܳܐ ܪ̈ܺܝܫܶܐ ܘܠܰܘ ܬܪܶܝܢ. ܠܗܰܘ ܓܶܝܪ ܡܶܨܥܳܝܳܐ܆ ܕܕܰܟܝܳܢܳܐ ܡܶܕܶܡ ܐܰܟܣܢܳܝܳܐ ܐܺܝܬܰܘܗ̱ܝ ܙܳܕܶܩ ܕܰܢܣܺܝܡ ܠܒܰܪ ܡܶܢ ܗܳܠܶܝܢ ܬܪܶܝܢ܆ ܠܘܳܬ ܗܳܝ ܕܳܐܦ ܢܣܽܘܓ ܘܢܶܚܒܽܘܫ ܐܶܢܽܘܢ ܡܶܢ ܚ̈ܕܳܕܶܐ ܢܶܫܟܰܚ܆ ܠܗܳܢܽܘܢ ܕܗܳܟܰܢܳܐ ܐܺܝܬܰܝܗܽܘܢܡܰܩܪ̈ܒܳܢܶܐ. ܠܟܽܠ ܚܕ ܓܶܝܪ ܡܶܢ ܗܳܠܶܝܢ ܬܪܶܝܢ܆ ܐܶܢ ܢܒܰܝܬܶܝܘܗ̱ܝ ܠܗܰܘ ܡܶܨܥܳܝܳܐ܆ ܘܐܰܘ ܕܽܐܘܣܺܝܰܐ ܕܢܽܘܗܪܳܐ܆ ܐܰܘ ܕܗܳܝ ܕܚܶܫܽܘܟܳܐ ܢܶܦܣܽܘܩ ܕܺܐܝܬܰܘܗ̱ܝ܆ ܬܽܘܒ ܥܰܠ ‌ܐ̱ܚܪܺܢܳܐ ܡܶܨܥܳܝܳܐ ܢܶܗܘܶܐ ܣܽܘܢܩܳܢܳܐ܆ ܕܰܠܚܽܘܠܛܳܢܳܐ ܟܳܠܶܐ.

ܐܶܠܳܐ ܐܰܝܟ ܕܕܳܡܝܳܐ܆ ܫܰܠܺܝܛ ܗ̱ܘ̣ ܠܗܽܘܢ ܠܗܳܢܽܘܢ ܥܰܢ̈ܳܬܶܐ܆ ܕܰܠܗܳܠܶܝܢ ܫܳܛܽܘܪ̈ܘܳܬܳܐ ܘܰܡܓܰܕܦܳܢ̈ܘܳܬܳܐ ܘܰܕܠܳܐ ܒܕܽܘܟ ܣܳܟ ܡܶܫܟ̈ܚܳܢ ܕܰܢܩܽܘ̈ܡܳܢ܆ ܗܳܟܰܢܳܐ ܢܶܓܒܠܽܘܢ ܘܢܶܒܕܽܘܢ ܣܪܺܝܩܳܐܺܝܬ܆ ܘܕܰܒܢܳܡܽܘܣܳܐ ܕܡܶܢ ܢܰܦܫܶܗ ܘܡܰܪܳܚܳܐܺܝܬ܆ ܢܶܬܬܰܝܬܽܘܢ ܡܰܢ ܘܢܺܐܡܪܽܘܢܳܝܗ̱ܝ ܐܽܘܣܺܝܰܐ ܠܚܶܫܽܘܟܳܐ ܗܰܘ ܒܺܝܫܳܐ܆ ܘܰܢܙܰܝܢܽܘܢܳܝܗ̱ܝ ܥܰܠ ܢܽܘܗܪܳܐ ܗܰܘ ܛܳܒܳܐ ܘܰܡܬܽܘܡܳܝܳܐ܆ ܢܺܐܡܪܽܘܢ ܕܶܝܢ ܠܳܐ ܥܒܺܝܕܳܐ ܠܗܰܘ ܕܳܐܦܠܳܐ ܚܰܕ ܩܽܘܝܳܡܳܐ ܐܺܝܬ ܠܶܗ܆ ܟܕ ܗܽܘܠܶܐ ܕܶܝܢ ܐܺܝܬܰܘܗ̱ܝ܆ ܘܳܐܦ ܐܰܝܟ ܡܶܠܬܗܽܘܢ ܗܳܟܰܢܳܐ ܡܶܫܬܰܡܰܗ܆ ܢܶܦܣܩܽܘܢ ܘܢܶܩܪܽܘܢܳܝܗ̱ܝ ܠܳܐ ܗܽܘܠܳܢܳܝܳܐ ܘܡܶܬܗܰܘܢܳܢܳܐ܆ ܘܰܠܗܳܢܳܐ ܬܽܘܒ ܢܣܰܝܟܽܘܢ܆ ܘܰܒܕܽܘܟ̈ܝܳܬܳܐ ܢܚܰܒܫܽܘܢ ܒܳܗ̇ ܒܰܕܡܽܘܬܳܐ ܘܢܺܐܡܪܽܘܢ܆ ܕܗܰܘ ܡܰܢ ܛܳܒܳܐ܆ ܗܰܘ ܟܺܝܬ ܕܳܐܦ ܢܽܘܗܪܳܐ ܐܳܦ ܐܺܝܠܳܢܳܐ ܕܚܰܝ̈ܶܐ ܟܰܢܺܝܘܗ̱ܝ܆ ܠܰܐܬܪ̈ܰܘܴܬܳܐ ܗܳܠܶܝܢ ܕܰܠܘܳܬ ܡܰܕܢܚܳܐ ܘܡܰܥܪܒܳܐ ܘܓܰܪܒܝܳܐ ܐܰܚܺܝܕ܆ ܠܗܳܠܶܝܢ ܕܶܝܢ ܬܰܝܡ̈ܢܳܝܶܐ ܘܛܰܗܪ̈ܳܝܶܐ܆ ܐܺܝܠܳܢܳܐ ܗܰܘ ܕܡܰܘܬܳܐ܆ ܩܳܪܶܝܢ ܓܶܝܪ ܐܳܦ ܗܳܟܰܢܳܐ܆ ܠܗܽܘܠܶܐ ܗܳܝ ܕܣܰܓܺܝ ܒܺܝܫܬܳܐ ܘܠܳܐ ܥܒܺܝܕܬܳܐ.

ܘܟܰܕ ܗܳܟܰܢܳܐ ܪܰܫܺܝܥܳܐܺܝܬ ܘܰܡܓܰܕܦܳܢܳܐܺܝܬ ܬܶܐܘܳܠܘܓܝܰܐ ܐܰܘܟܺܝܬ ܡܡܰܠܠܽܘܬ ܐܰ‌ܠܳܗܽܘܬܳܐ ܥܒܰܕܘ܆ ܬܰܚ̈ܘܝܳܬܳܐ ܕܫܳܘ̈ܝܳܢ ܠܬܶܐܘܠܘܓܺܝܰܐ ܕܺܝܠܗܽܘܢ ܡܰܝܬܶܝܢ ܘܳܐܡܪܺܝܢ ܒܗܶܝܢ ܒܡ̈ܶܠܶܐ܆ ܕܟܽܠܶܗ ܗܳܢܳܐ ܐܺܝܬܰܘܗ̱ܝ ܫܽܘܚܠܳܦܳܐ ܘܡܶܨܥܳܝܽܘܬܳܐ ܕܗܳܠܶܝܢ ܬܪܶܝܢ ܪ̈ܺܝܫܶܐ܆ ܟܡܳܐ ܕܳܐܦ ܕܡܰܠܟܳܐ ܘܕܰܚܙܺܝܪܳܐ. ܘܰܕܗܰܘ ܡܰܢ ܐܰܝܟ ܕܰܒܒܶܝܬ ܡܰܠ̈ܟܶܐ ܡܶܬܕܰܒܰܪ ܒܕܽܘܟ̈ܝܳܬܳܐ ܒܰܝ̈ܬܳܝܳܬܳܐ ܕܺܝܠܶܗ܆ ܗܰܘ ܕܶܝܢ ܒܰܕܡܽܘܬ ܚܙܺܝܪܳܐ ܡܶܬܥܰܪܓܰܠ ܒܰܣܝܳܢܳܐ܆ ܘܰܒܣܰܪܝܽܘܬܳܐ ܡܶܬܬܰܪܣܶܐ ܟܺܝܬ ܘܚܳܕܶܐ܆ ܐܰܘ ܐܰܝܟ ܚܶܘܝܳܐ ܚܰܠܺܝܕ ܒܢܶܩܥܶܗ܆ ܘܟܰܕ ܫܰܘܺܝ̈ܚܝ ܡܶܢ ܢܰܦܫܗܽܘܢ ܐܰܘܣܶܦܘ ܐܶܡܰܪܘ ܐܶܢܽܘܢ܆ ܠܰܚܙܺܝܪܳܐ ܟܺܝܬ ܘܰܠܚܶܘܝܳܐ܆ ܐܰܝܟܰܢܳܐ ܕܠܳܐ ܒܕܽܘܟ ܒܝܰܕ ܬܰܚ̈ܘܝܳܬܳܐ ܗܳܠܶܝܢ ܬܺܐܒܰܕ ܠܗܽܘܢ ܗܳܝ ܠܳܐ ܥܒܺܝܕܬܳܐ܆ ܕܰܐܝܟ ܗܳܕܶܐ ܓܶܝܪ ܦܰܐܝܳܐ ܗ̱ܘܳܬ ܕܬܶܗܘܶܐ ܐܺܝܬܶܝܗ̇ ܘܰܠܕܰܐܝܟ ܗܳܠܶܝܢ ܬܶܬܕܰܡܶܐ܆ ܪܺܝܫܳܢܽܘܬܳܐ ܕܗܽܘܠܶܐ ܗܳܝ ܠܳܐ ܥܒܺܝܕܬܳܐ ܕܡܰܢܺܝ̈ܢܳܝܶܐ܆ ܗܳܝ ܕܡܶܢܳܗ̇ ܐܳܦ ܣܰܓܺܝ ܟܺܐܢܳܐܺܝܬ ܐܳܡܪܺܝܢ ܕܰܗܘ̣ܰܘ ܗܶܢܽܘܢ܆ ܟܰܕ ܒܳܪܽܘܝܬܳܐ ܓܳܒܠܺܝܢ ܠܳܗ̇ ܘܥܳܒܽܘܕܬܳܐ܆ ܗܳܢܽܘܢ ܕܶܐܬܚܰܙܰܪܘ^[61] ܒܗܰܘܢܗܽܘܢ.

ܐܶܠܳܐ ܐܰܝܟܰܢܳܐ ܕܟܰܕ ܠܗܳܠܶܝܢ ܓܚܺܝ̈ܟܳܬܳܐ ܕܫܳܥܬܳܐ ܫܳܒܶܩ ܐ̱ܢܳܐ܆ ܠܘܳܬ ܗܳܠܶܝܢ ܕܝܰܬܺܝܪ ܐܺܝܬܰܝܗܶܝܢ ܐܳ‌ܠ̈ܨܳܝܳܬܳܐ ܠܘܳܬ ܡܰܟܣܳܢܽܘܬܳܐ ܐ݀ܰܦܢܶܐ ܐܰ݀ܣܩܺܝܗ̇ ܠܡܶܠܬܳܐ܆ ܡܶܕܶܡ ܡܶܕܶܡ ܡܶܢ ܫܽܘܥ̈ܝܳܬܶܗ ܢܕܺܝ̈ܕܳܬܳܐ ܕܡܰܐܢܺܝ ܗܰܘ ܕܰܫ̣ܢܳܐ܆ ܗܰܘ ܕܡܶܢܶܗ ܡܶܫܬܰܡܗܺܝܢ ܡܰܢܺܝ̈ܢܳܝܶܐ܆ ܐܶ݀ܣܺܝܡ ܗܳܪܟܳܐ ܩܕܳܡܰܝܟܽܘܢ܆ ܗܳܠܶܝܢ ܕܒܺܐܝ̈ܕܰܝܗܶܝܢ ܬܶܕܥܽܘܢ܆ ܕܰܐܝܟܰܢܳܐ ܚܳܒܫܺܝܢ ܠܗܶܝܢ ܒܕܽܘܟ̈ܝܳܬܳܐ ܠܪ̈ܺܝܫܳܢܘܳܬܳܐ܆ ܗܳܠܶܝܢ ܠܳܐ ܥܒܺܝ̈ܕܳܬܳܐ ܕܺܝܠܗܽܘܢ.

ܐܳܡܰܪ ܓܶܝܪ ܒܚܰܕ ܡܶܢ ܟ̈ܬܳܒܶܐ ܕܺܝܠܶܗ ܗܳܠܶܝܢ ܠܳܐ ܡܶܬܡܰܠ̈ܠܳܢܶܐ܆ ܡܰܠܽܘܢ ܕܶܝܢ ܗܳܢܽܘܢ ܕܫܳܘܶܝܢ ܠܚܶܫܽܘܟܳܐ ܘܰܠܛܽܘܥܝ̣ܰܝ̣. ܗܳܟܰܢܳܐ. ܗܳܠܶܝܢ ܗܳܢܽܘܢ ܕܰܐܡܺܝܢܳܐܺܝܬ ܘܰܒܟܽܠܙܒܰܢ ܐܺܝܬܰܝܗܽܘܢ ܡܶܢ ܫܽܘܪܳܝܳܐ܆ ܐܳܡܰܪ ܕܝܢ ܡܶܛܽܠ ܗܽܘܠܶܐ ܘܡܶܛܽܠ ‌ܐܰ‌ܠܳܗܳܐ܆ ܟܽܠ ܚܰܕ ܡܶܢܗܽܘܢ܆ ܒܰܟܝܳܢܳܐ ܕܺܝܠܶܗ ܐܺܝܬܰܘܗ̱ܝ. ܘܗܳܟܰܢܳܐ ܐܺܝܬܰܘܗ̱ܝ ܐܺܝܠܳܢܳܐ ܗܰܘ ܕܚܰܝ̈ܶܐ܆ ܕܰܡܨܰܒܶܬ ܬܰܡܳܢ ܒܟܽܠܗܶܝܢ ܫܰܦܺܝܪ̈ܳܬܶܗ ܘܰܒܫܰܦܺܝܪ̈ܘܳܬ ܦܰܐܝ̈ܘܳܬܳܐ ܕܺܝܠܶܗ ܘܰܡܠܶܐ ܘܰܡܥܰܛܶܦ ܒܟܽܠܗܶܝܢ ܛܳܒ̈ܳܬܶܗ. ܘܰܡܫ̣ܰܪܰܪ ܘܰܩܒܺܝܥ ܒܰܟܝܳܢܳܐ ܕܺܝܠܶܗ. ܘܚܳܒܫܳܐ ܐܰܪܥܳܐ ܕܺܝܠܶܗ ܬܠܳܬ ܦܶܢ̈ܝܳܬܳܐ. ܗܳܝ ܕܓܰܪܒܝܳܐ. ܗܳܝ ܕܺܐܝܬܶܝܗ̇ ܠܒܰܪ ܟܺܝܬ ܘܰܠܬܰܚܬ܆ ܘܡܰܕܢܚܳܐ. ܘܡܰܥܪܒܳܐ. ܠܒܰܪ ܟܺܝܬ ܘܰܠܬܰܚܬ. ܘܡܶܢ ܠܬܰܚܬ. ܘܠܳܐ ܡܶܕܶܡ ܐܺܝܬ ܕܥܰܡܺܝܕ^[62] ܐܰܘ ܓܢܶܐ ܡܶܢܶܗ܆ ܘܳܐܦܠܳܐ ܒܰܚܕܳܐ ܡܶܢ ܦܶܢ̈ܝܳܬܳܐ. ܐܶܠܳܐ ܗܺܝ ܠܳܐ ܡܶܣܬܰܝܟܳܢܽܘܬܳܐ ܐܺܝܬܶܝܗ̇܆ ܠܒܰܪ ܟܺܝܬ. ܘܰܠܬܰܚܬ. ܓܽܘܫܡܳܐ ܡܶܕܶܡ ܢܽܘܟܪܳܝܳܐ ܠܳܐ ܐܺܝܬ܆ ܘܳܐܦܠܳܐ ܚܕܳܪ̈ܶܝܗ̇ ܘܳܐܦܠܳܐ ܬܚܶܝܬܶܝܗ̇܆ ܘܳܐܦܠܳܐ ܒܰܚܕܳܐ ܕܽܘܟܬܳܐ ܡܶܢ ܗܳܠܶܝܢ ܬܠܳܬ ܦܶܢ̈ܝܳܬܳܐ. ܐܶܠܳܐ ܕܺܝܠܶܗ ܐܺܝܬܰܘܗ̱ܝ ܠܬܰܚܬ ܟܺܝܬ ܘܰܠܒܰܪ܆ ܓܰܪܒܝܳܐܺܝܬ ܟܺܝܬ ܘܡܰܕܢܚܳܐܺܝܬ ܘܡܰܥܪܒܳܐܺܝܬ. ܘܠܰܝܬ ܡܶܕܡ ܕܚܳܕܰܪ ܘܚܳܒܶܫ ܠܶܗ ܒܗܳܠܶܝܢ ܬܠܳܬ ܦܶܢ̈ܝܳܬܳܐ. ܐܶܠܳܐ ܐܺܝܬܰܘܗ̱ܝ ܗܽܘ ܒܶܗ ܡܶܢܶܗ ܘܠܶܗ܆ ܟܰܕ ܡܥܰܛܶܦ ܗܽܘ ܒܶܗ ܦܺܐܪ̈ܶܐ ܕܺܝܠܶܗ܆ ܘܺܐܝܬܶܝܗ̇ ܒܶܗ ܡܰܠܟܽܘܬܳܐ.

ܘܒܳܬܰܪ ܗܳܠܶܝܢ ܟܰܕ ܫܳܛܽܘܪ̈ܘܳܬܳܐ ܣܰܓܺܝ̈ܳܐܬܳܐ ܘܰܕܠܳܐ ܣܳܟܳܐ ܐܶܬܬܰܝ̈ܬܶܝܶܢ܆ ܘܰܒܓ̈ܳܠܶܐ ܘܰܨܒܳܪ̈ܶܐ ܗܳܠܶܝܢ ܕܳܐܦܠܳܐ ܐܺܝܬܶܝܗ̇ ܦܫܺܝܩܬܳܐ ܕܰܒܙܰܒܢܳܐ ܣܰܓܺܝܳܐܐ ܢܶܕܠܳܐ ܐܶܢܽܘܢ܆ ܒܗܳܝ ܕܰܥܠܰܝܗܶܝܢ ܟܰܕ ܥܠܰܝܗܶܝܢ ܙܰܒ̈ܢܺܝܢ ܣܰܓܺܝ̈ܳܐܢ ܡܶܢ ܕܪܺܝܫ ܚܳܕܰܪ ܘܰܐܝܟ ܕܰܒܚܶܫܽܘܟܳܐ ܡܶܬܟܪܶܟ ܘܦܳܗܶܐ܆ ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ ܣܽܘ̈ܟܳܠܶܐ ܕܚܶܫܽܘܟܳܐ܆ ܐܳܡܰܪ ܡܶܛܽܠܛܳܒܳܐ܆ ܐܳܦ ܗܳܕܶܐ. ܘܠܳܐ ܡܶܬܚܙܶܐ ܐܳܡܰܪ ܒܰܦܢܺܝܬܳܐ ܗܳܝ ܬܰܝܡܢܳܝܬܳܐ. ܘܗܳܠܶܝܢ ܟܰܕ ܡܟܰܣܰܝ ܒܗܳܠܶܝܢ ܕܰܒܥܽܘܒܶܗ. ܐܰ‌ܠܳܗܳܐ ܓܶܝܪ ܐܰܚܕܰܪ ܫܽܘܪܳܐ ܠܗܳܝ ܕܽܘܟܬܳܐ.

ܘܟܰܕ ܕܝܰܬܺܝܪ ܣܰܓܺܝ̈ܳܐܢ ܬܽܘܒ ܐܶܬܒܰܓ̈ܠܶܝܢ ܒܰܡܨܰܥܬܳܐ܆ ܡܰܘܣܶܦ ܐ̱ܚܪ̈ܳܢܝܳܬܳܐ܆ ܕܡܶܢ ܗܳܠܶܝܢ ܘܠܳܐ ܡܶܕܶܡ ܡܫܰܚ̈ܠܦܳܢ ܐܰܘ ܪ̈ܰܚܺܝܩܳܢ ܒܪܰܫܺܝܥܽܘܬܳܐ ܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ. ܢܽܘܗܪܶܗ ܟܺܝܬ ܘܛܰܝܒܽܘܬܶܗ܆ ܐܰܝܟܰܢܳܐ ܕܠܳܐ ܢܶܬܶܠ ܥܶܠܬܳܐ ܕܪܶܓܬܳܐ ܠܺܐܝܠܳܢܳܐ ܗܰܘ ܒܺܝܫܳܐ܆ ܗܰܘ ܕܺܐܝܬ ܒܬܰܝܡܢܳܐ܆ ܘܢܶܗܘܶܐ ܥܶܠܬܳܐ ܠܗܰܘ ܠܗܳܝ ܕܢܶܬܗܰܪܗܰܪܘܢܶܫܬܚܶܩ܆ ܘܢܺܐܬܶܐ ܠܩܺܝܢܕܘܢܘܤ. ܐܶܠܳܐ ܗܰܘ ܚܒܺܝܫ ܒܫܽܘܒܚܳܐ܆ ܘܠܳܐ ܝܳܗܶܒ ܥܶܠܬܳܐ. ܡܶܛܽܠ ܛܳܒܽܘܬܳܐ ܕܺܝܠܶܗ. ܐܶܠܳܐ ܢܶܛܰܪ ܗܽܘ ܠܶܗ ܒܙܰܕܺܝܩܽܘܬܶܗ܆ ܘܺܐܝܬܰܘܗ̱ܝ ܒܗܳܢܳܐ ܫܽܘܒܚܳܐ. ܟܰܕ ܐܺܝܬܰܘܗ̱ܝ ܐܰܡܺܝܢܳܐܺܝܬ ܒܰܟܝܳܢܳܐ ܕܪܰܒܽܘܬܶܗ܆ ܒܗܳܠܶܝܢ ܬܠܳܬ ܦܶܢ̈ܝܳܬܳܐ. ܘܳܐܦ ܗܰܘ ܕܶܝܢ ܐܺܝܠܳܢܳܐ ܕܡܰܘܬܳܐ܆ ܠܰܝܬ ܠܶܗ ܚܰܝ̈ܶܐ ܒܰܟܝܳܢܳܐ ܕܺܝܠܶܗ܆ ܘܳܐܦܠܳܐ ܦܺܐܪ̈ܶܐ ܕܛܳܒܽܘܬܳܐ ܒܡܶܕܶܡ ܡܶܢ ܣܰܘ̈ܟܰܘ̈ܗ̱ܝ. ܘܗܽܘ ܐܺܝܬܰܘܗ̱ܝ ܐܰܡܺܝܢܳܐܺܝܬ܆ ܒܰܦܢܺܝܬܳܐ ܗܳܝ ܬܰܝܡܢܳܝܬܳܐ. ܘܳܐܦ ܠܶܗ ܐܺܝܬ ܠܶܗ. ܐܰܬܪܳܐ ܕܺܝܠܳܢܳܝܳܐ܆ ܗܰܘ ܕܰܥܠܰܘܗ̱ܝ ܐܺܝܬܰܘܗ̱ܝ.

ܚܳܙܶܝܢ ܐܢ̱ܬܽܘܢ ܕܒܰܟܡܳܐ ܚܶܣ̈ܕܶܐ ܘܚܰܫ̈ܶܐ ܡܰܡܪܚܺܝܢ ܕܢܰܪܡܽܘܢܳܝܗ̱ܝ ܠܰܐܠܳܗܳܐ ܗܰܘ ܕܒܰܠܚܽܘܕܰܘܗ̱ܝ ܛܳܒܳܐ܆ ܗܳܢܽܘܢ ܕܰܠܗܳܝ ܕܰܢܓܰܕܦܽܘܢ ܥܒܰܕܘ ܠܗܽܘܢ ܥܶܠܬܳܐ ܘܣܽܘܥܪܳܢܳܐ ܕܕܶܚܠܬܳܐ܆ ܘܕܳܐܦܠܳܐ ܗܳܢܶܝܢ ܕܫܳܠ̈ܡܳܢ ܠܗܽܘܢ ܕܺܝܠܗܽܘܢ ܐܳܡܪܺܝܢ.

ܐܳܦ ܓܶܝܪ ܗܰܘ ܕܰܒܗܳܠܶܝܢ ܡ̈ܶܠܶܐ ܕܗܳܫܳܐ ܐܶܬܬܣܺܝ̈ܡܶܝܢ ܗܳܪܟܳܐ ܕܠܳܐ ܣܳܟܳܐ ܐܰܡܪܶܗ܆ ܕܺܐܝܬ ܠܶܗ ܣܰܘܦܳܐ ܘܕܰܡܣܰܝܰܟ ܡܚܰܘܶܐ ܠܶܗ܆ ܟܰܕ ܒܗܳܠܶܝܢ ܬܠܳܬ ܦܶܢ̈ܝܳܬܳܐ ܚܳܒܶܫ ܠܶܗ܆ ܒܡܰܕܢܚܳܐ ܘܰܒܡܰܥܪܒܳܐ ܘܰܒܓܰܪܒܝܳܐ. ܘܳܐܡܰܪ ܕܠܳܐ ܡܶܬܚܙܶܐ ܡܰܢ ܒܰܦܢܺܝܬܳܐ ܬܰܝܡܢܳܝܬܳܐ܆ ܡܚܰܦܰܝ ܕܶܝܢ ܒܥܽܘ̈ܒܶܐ ܒܰܝ̈ܬܳܝܶܐ ܕܺܝܠܶܗ. ܘܰܒܪܰܡ ܠܕܽܘܟܬܳܐ ܒܰܝܬܳܝܬܳܐ ܗܳܝ ܕܺܝܠܶܗ܆ ܒܫܽܘܪܳܐ ܐܳܡܰܪ ܕܚܰܒܫܳܗ̇. ܐܶܠܳܐ ܐܶܢܗܽܘ ܕܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ ܗ̱ܘܳܐ ܒܰܟܝܳܢܳܐ܆ ܟܰܕ ܠܳܐ ܣܳܟ ܡܶܬܚܙܶܐ ܗ̱ܘܳܐ ܡܶܢ ܗܽܘܠܶܐ ܗܳܝ ܕܒܰܦܢܺܝܬܳܐ ܗܳܝ ܬܰܝܡܢܳܝܬܳܐ܆ ܐܺܝܬ ܗ̱ܘܳܐ ܗܽܘ ܠܶܗ ܡܥܰܕܪܳܢܽܘܬܳܐ ܗܳܝ ܕܡܶܢ ܟܝܳܢܳܐ ܒܰܝܬܳܝܳܐ ܗܰܘ ܕܺܝܠܶܗ܆ ܟܰܕ ܠܳܐ ܡܶܬܚܰܙܝܳܢܳܐ ܘܳܐ‌ܠܨܳܐܺܝܬ ܠܳܐ ܡܶܬܬܰܚܕܳܢܳܐ܆ ܡܰܠܽܘܢ ܕܶܝܢ ܠܳܐ ܡܶܬܟܰܒܫܳܢܳܐ ܐܺܝܬܰܘܗ̱ܝ ܗ̱ܘܳܐ ܠܗܰܘ ܒܺܝܫܳܐ. ܗܰܘ ܓܶܝܪ ܕܪܳܡܶܐ ܘܡܰܟ̣ܪܶܟ ܠܶܗ ܫܽܘܪܳܐ܆ ܠܘܳܬ ܢܛܽܘܪܬܳܐ ܕܢܰܦܫܶܗ ܪܳܡܶܐ ܠܶܗ܆ ܟܰܕ ܡܶܢ ܚܺܐܦܳܐ ܘܡܶܐܬܺܝܬܳܐ ܕܗܰܘ ܕܰܩܫܶܐ ܡܶܢܶܗ ܕܳܚܶܠ. ܡܳܕܶܝܢ ܘܰܡܚܺܝܠܰܐ ܗ̱ܘ ܘܕܳܚܽܘܠܳܐ. ܘܰܕܥܰܠ ܫܟܳܚ̈ܳܬܳܐ ܡܢܰܛܪ̈ܳܢܝܳܬܳܐ ܣܢܺܝܩ܆ ܘܠܰܘ ܠܳܐ ܣܢܺܝܩܳܐ ܐܰܝܟ ܐܰ‌ܠܳܗܳܐ. ܒܳܬܰܪܟܶܢ ܕܶܝܢ܆ ܐܶܢܗܽܘ ܕܰܠܕܽܘܟܬܳܐ ܗܳܝ ܐܶܟܰܪܶܟ ܫܽܘܪܳܐ܆ ܡܶܢ ܐܰܝ̇ܕܳܐ ܗܽܘܠܶܐ ܐܰܟܪܶܟ ܘܰܒܢܳܝܗ̱ܝ . ܘܶܐܢ ܐܰܟܪܶܟ ܫܽܘܪܳܐ܆ ܡܶܢ ܟܽܠ ܦܪܽܘܤ܆ ܟܰܕ ܡܶܢ ܠܰܘ ܩܕܳܡ ܠܳܐ ܐܺܝܬܰܘܗ̱ܝ ܗ̱ܘܳܐ ܥܰܒ̣ܕܶܗ ܠܫܽܘܪܳܐ. ܩܕܳܡ ܗܳܟܺܝܠ ܕܢܶܥܒܕܺܝܘܗ̱ܝ ܠܫܽܘܪܳܐ܆ ܠܳܐ ܢܛܺܝܪܳܐ ܐܺܝܬܰܘܗ̱ܝ ܗ̱ܘܳܐ. ܘܰܐܝܟܰܢܳܐ ܠܳܐ ܡܩܰܕܶܡ ܗ̱ܘܳܐ ܝܳܕܰܥ ܕܥܰܠ ܫܽܘܪܳܐ ܥܬܺܝܕ ܗ̱ܘܳܐ ܠܶܗ ܕܢܶܗܘܶܐ ܠܶܗ ܣܽܘܢܩܳܢܳܐ ܟܰܕ ܐܰ‌ܠܳܗܳܐ ܐܺܝܬܰܘܗ̱ܝ ܘܰܒܢܳܝܗ̱ܝ ܠܶܗ ܡܶܢ ܫܽܘܪ̈ܺܝܢ. ܐܰܝܟܰܢܳܐ ܕܶܝܢ ܠܳܐ ܣܳܥܽܘܪܬܳܐ ܐܺܝܬܶܝܗ̇ ܗ̱ܘܳܬ ܗܽܘܠܶܐ ܗܳܝܕܶܝܢ܆ ܟܰܕ ܠܳܐ ܐܳܬܝܳܐ ܗ̱ܘܳܬ ܥܳܠ ܛܳܒܳܐ܆ ܐܶܡܰܬܝ ܕܚܰܣܺܝܪܳܐ ܐܺܝܬܰܘܗ̱ܝ ܗ̱ܘܳܐ ܡܶܢ ܫܽܘܪܳܝܳܐ܆ ܐܰܘ ܟܰܕ ܡܶܢ ܒܳܬܰܪ ܕܶܐܬܚܰܣܢܰܬ̣ ܕܽܘܟܬܳܐ ܐܶܬ̣ܳܬ̣ ܥܠܰܘܗ̱ܝ ܐܝܟ ܫܳܛܽܘܪ̈ܘܳܬܳܐ ܕܺܝܠܳܟ ܐܳܘ ܗܳܢܳܐ܆ ܘܕܶܚܠܰܬ̣ ܘܶܐܬܚܰܝܠܰܬ̣ ܟܽܠܶܗ ܗܳܢܳܐ܆ ܐܰܝܟ ܕܳܐܦ ܡܢܳܬܳܐ ܬܪܺܝܡ ܡܶܢ ܛܳܒܳܐ.

ܘܰܐܝܟܰܢܳܐ ܗܽܘ ܛܳܒܳܐ ܟܰܕ ܡܶܫܟܰܚ ܗ̱ܘܳܐ ܠܡܶܒܢܳܐ ܫܽܘܪܳܐ ܡܶܢ ܗܽܘܠܶܐ ܡܶܕܶܡ ܕܝܰܬܺܝܪ ܛܳܒܳܐ܆ ܠܰܘ ܡܶܢܳܗ̇ ܟܰܕ ܡܶܢܳܗ̇ ܕܗܳܕܶܐ ܩܰܝܶܡ ܥܳܠܡܳܐ ܛܳܒܳܐ܆ ܕܠܳܐ ܚܠܺܝܛܳܐܺܝܬ ܐܺܝܬ ܠܶܗ ܥܰܡ ܒܺܝܫܬܳܐ. ܐܶܢ ܕܶܝܢ ܫܽܘܪܳܐ ܠܳܐ ܗܽܘܠܳܢܳܝܳܐ ܘܡܶܬܗܰܘܢܳܢܳܐ ܥܒܰܕ܆ ܕܽܘܡܳܪܳܐ ܕܰܐܝܟܰܢܳܐ ܗܰܘ ܕܡܶܫܟܰܚ ܕܠܽܐܘܣܺܝ̈ܰܐܤ ܠܳܐ ܗܽܘ̈ܠܳܢܳܝܳܬܳܐ ܡܶܢ ܗܳܝ ܕܠܳܐ ܐܺܝܬܰܝܗܶܝܢ ܠܗܳܝ ܕܢܶܗܘ̈ܝܳܢ ܐܺܝܬܰܝܗܶܝܢ ܢܰܝܬܶܐ܆ ܠܰܘ ܐܳܦ ܗܽܘ̈ܠܳܢܳܝܳܬܳܐ ܦܫܺܝܩܳܐܺܝܬ ܥܒܰܕ. ܐܶܢ ܕܶܝܢ ܐܳܦ ܗܽܘ ܗܳܢܳܐ ܫܽܘܪܳܐ܆ ܫܰܘܺܝܚ ܡܶܢ ܢܰܦܫܶܗ ܐܰܘܟܺܝܬ ܡܟ̣ܳܢ. ܡܶܢ ܢܰܦܫܶܗ ܐܺܝܬܰܘܗ̱ܝ ܗ̱ܘܳܐ܆ ܐܰܝܟ ܕܺܐܝܬ ܠܟܽܘܢ ܥܝܳܕܳܐ ܠܡܺܐܡܰܪ܆ ܥ̣ܰܠ ܠܶܗ ܠܰܢ ܐܳܦ ܬܠܺܝܬܳܝܳܐ ܕܠܳܐ ܪܺܝܫܳܐ ܘܠܳܐ ܥܒܺܝܕܳܐ. ܡܳܕܶܝܢ ܕܢܶܡܢܶܝܘܗ̱ܝ ܙܳܕܶܩ ܥܰܡ ܗܳܠܶܝܢ ܬܪܶܝܢ. ܘܰܚܠܳܦ ܬܪܶܝܢ܆ ܬܠܳܬܳܐ ܪ̈ܺܝܫܶܐ ܙܳܕܶܩ ܠܰܢ ܕܢܶܣܒܰܪ. ܐܶܢ ܕܶܝܢ ܡܶܢ ܐܽܘܣܺܝܰܐ ܗܳܝ ܕܺܝܠܶܗ܆ ܐܰ‌ܠܳܗܐ ܗܰܘ ܛܳܒܳܐ ܠܫܽܘܪܳܐ ܬܰܩܶܢ܆ ܒܰܐܝܢܳܐ ܙܢܳܐ ܒܰܨܰܪ ܐܰܘ ܦܰܠܶܓ ܗܽܘ ܠܶܗ ܗܰܘ ܠܳܐ ܓܽܘܫܡܳܢܳܐ. ܐܶܢ ܕܶܝܢ ܐܰܝܟ ܫܽܘ̈ܥܝܳܬܳܐ ܕܺܝܠܳܟ܆ ܥܬܺܝܕܳܐ ܗ̱ܘܳܬ ܒܺܝܫܬܳܐ ܕܬܶܙܕܰܝܰܢ ܥܰܠ ܛܳܒܳܐ ܒܰܩܪܳܒܳܐ܆ ܟܰܕ ܪܳܓܳܐ ܗ̱ܘܳܬ ܠܫܽܘܦܪܶܗ ܗܰܘ ܕܣܰܓܺܝ ܐܺܝܬܰܘܗ̱ܝ ܗܕܺܝܪܳܐ ܘܦܰܐܝܳܐ܆ ܗܽܘ ܕܶܝܢ ܫܽܘܪܳܐ܆ ܡܶܢܳܗ̇ ܕܺܝܠܳܗ̇ ܕܗܳܝ ܐܽܘܣܺܝܰܐ ܕܣܰܓܺܝ ܪܚܺܝܡܳܐ ܘܰܪܓܺܝܓܳܐ ܐܺܝܬܰܘܗ̱ܝ ܗ̱ܘܳܐ܆ ܡܶܢ ܟܝܳܢܳܐ ܐ̱ܚܪܺܢܳܐ ܙܳܕܶܩ ܗ̱ܘܳܐ ܠܡܰܟܪܳܟܽܘ ܫܽܘܪܳܐ ܠܘܳܬ ܢܛܽܘܪܬܳܐ. ܘܶܐܢ ܕܶܝܢ ܠܳܐ ܐܶܢ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܐܺܝܬܰܘܗ̱ܝ ܗ̱ܘܳܐ ܠܰܐܠܳܗܳܐ܆ ܣܳܦܩܳܐ ܗ̱ܘܳܬ ܠܳܗ̇ ܠܗܽܘܠܶܐ܆ ܕܡܶܢܶܗ ܡܶܢ ܫܽܘܪܳܐ ܬܶܦܣܽܘܩ ܗ̱ܘܳܬ ܡܢܳܬܳܐ܆ ܗܰܘ ܕܕܰܬܩܽܘܫ ܒܶܗ ܣܰܓܺܝ ܕܠܺܝܠܬܳܐ ܘܰܡܛܰܝܰܒܬܳܐ ܐܺܝܬܶܝܗ̇ ܗ̱ܘܳܬ܆ ܘܡܶܢ ܪܶܓܬܳܗ̇ ܬܶܬܡܰܠܶܐ܆ ܘܬܶܬܚܰܠܰܛ ܠܘܳܬ ܛܳܒܳܐ. ܐܰܝܟܰܢܳܐ ܗܳܟܺܝܠ ܡܶܢ ܟܽܠ ܕܽܘܟ ܠܛܳܒܳܐ ܚܳܒܶܫ ܐܰܢ̱ܬ܆ ܐܰܝܟ ܕܠܰܐܝܢܳܐ ܕܥܰܠ ܢܛܽܘܪܬܳܐ ܡܶܕܶܡ ܘܥܰܠ ܙܗܺܝܪܽܘܬܳܐ ܣܢܺܝܩ܆ ܘܳܐܡܰܪ ܐܰܢ̱ܬ ܕܠܰܐܪܥܳܐ ܗܳܝ ܕܙܳܕܩܳܐ ܠܶܗ ܐܰܚܺܝܕ ܬܠܳܬ ܦܶܢ̈ܝܳܬܳܐ܆ ܓܰܪܒܝ̣ܳܝ̣ܬܳܐ܆ ܡܰܕܢܚܳܝܬܳܐ܆ ܡܰܥܪܒܳܝܬܳܐ܆ ܘܳܐܦܠܳܐ ܡܶܕܶܡ ܘܳܐܦܠܳܐ ܡܶܢ ܠܬܰܚܬ ܠܒܽܘܫܳܐ ܬܰܚܬܳܝܳܐ ܐܺܝܬ܆ ܒܡܶܠܬܳܐ ܓܶܝܪ ܕܺܝܠܳܟ ܡܶܬܚܰܫܰܚ ܐ̱ܢܳܐ܆ ܟܰܕ ܐܰܝܟ ܕܡܶܛܽܠ ‌ܐ̱ܢܳܫ ܕܩܰܪܺܝܫ ܠܶܗ ܡܡܰܠܶܠ ‌ܐܰܢ̱ܬ܆ ܕܰܒܬܰܟܣ̈ܝܳܬܳܐ ܣܰܓܺܝ̈ܳܐܬܳܐ ܗܽܘ ܠܶܗ ܡܫܰܚܶܢ ܘܰܠܪ̈ܶܓܠܰܘܗ̱ܝ ܡܚܰܡܶܠ܆ ܐܰܝܟܰܢܳܐ ܕܠܳܐ ܡܶܕܶܡ ܕܡܰܩܰܪ܆ ܐܳܦܠܳܐ ܡܶܢ ܠܬܰܚܬ ܢܕܺܝܩ ܥܠܰܘܗ̱ܝ.

ܐܶܠܳܐ ܢ݀ܶܚܙܶܐ ܚܢܰܢ ܠܚܽܘܫܳܒܶܗ ܗܰܘ ܦܐܶܐ ܠܰܐܠܳܗܳܐ܆ ܗܰܘ ܕܡܶܛܽܠܳܬܶܗ ܗܳܟܰܢܳܐ܆ ܡܰܢ ܡܶܬܟܰܬܰܫ ܥܰܡ ܐܰ‌ܠܳܗܳܐ ܡܶܣܬܰܬܰܪ ܛܳܒܳܐ. ܐܰܝܟܰܢܳܐ ܕܠܳܐ ܢܶܬܶܠ ‌ܐܳܡܰܪ ܥܶܠܬܳܐ ܕܪܶܓܬܳܐ ܠܺܐܝܠܳܢܳܐ ܗܰܘ ܒܺܝܫܳܐ܆ ܗܰܘ ܕܺܐܝܬܰܘܗ̱ܝ ܒܬܰܝܡܢܳܐ܆ ܘܢܶܗܘܶܐ ܥܶܠܬܳܐ ܠܗܰܘ܆ ܠܘܳܬ ܗܳܝ ܟܺܝܬ ܕܢܶܬܗܰܪܗܰܪ ܘܢܶܫܬܚܶܩ ܘܢܺܐܬܶܐ ܠܩܺܝܢܕܽܘܢܽܘܤ. ܐܶܠܳܐ ܗܽܘ ܚܒܺܝܫ ܒܫܽܘܒܚܳܐ܆ ܘܠܳܐ ܝܳܗܶܒ ܥܶܠܬܳܐ ܡܶܛܽܠ ܛܳܒܽܘܬܶܗ.

ܡܰܢܽܘ ܓܶܝܪ ܕܰܠܗܳܠܶܝܢ ܙܩܽܘܪ̈ܶܐ ܓܘܳܓ̈ܳܝܶܐ ܡܶܫܟܰܚ ܕܰܢܣܰܝܒܰܪ. ܡܰܢܽܘ ܕܶܝܢ ܕܰܐܝܟ ܕܫܳܘܶܐ ܢܶܒܟܶܐ ܥܰܠ ܢܰܦ̈ܫܳܬܳܐ ܡܠܺܝ̈ܠܳܬܳܐ ܟܰܕ ܚܳܙܶܐ ܠܗܶܝܢ ܕܰܒܗܳܠܶܝܢ ܡܶܬܦܰܟܪ̈ܳܢ. ܕܶܐܒܠܳܐ ܓܶܝܪ ܘܰܕܥܳܩܬܳܐ ܐܺܝܬܶܝܗ̇ ܗ̱ܘܳܬ܆ ܐܶܢ ܐܳܦ ܟܰܕ ܠܰܚܡܳܪ̈ܶܐ ܘܰܠܬܰܘܪ̈ܶܐ ܗܳܠܶܝܢ ܐܳܡܪܺܝܢ ܗ̱ܘܰܘ܆ ܠܡܰܛܥܳܝܽܘ ܡܶܫܟܚܺܝܢ ܗ̱ܘܰܘ܆ ܫܒܽܘܩ ܠܰܒܢܰܝ̈ܢܳܫܳܐ ܕܠܰܘ ܟܽܠ ܟܽܠܶܗ ܐܰܘܒܶܕܘ ܠܗܳܝ ܕܢܶܗܘܽܘܢ ܐܺܝܬܰܝܗܽܘܢ ܗܺܝ ܗܳܕܶܐ܆ ܗܰܘ ܡܳܐ ܕܺܐܝܬܰܝܗܽܘܢ ܒܢܰܝ̈ܢܳܫܳܐ.

ܗܰܘ ܓܶܝܪ ܕܒܽܐܘܣܺܝܰܐ ܐܺܝܬܰܘܗ̱ܝ ܒܺܝܫܳܐ܆ ܐܰܝܟܰܢܳܐ ܢܶܪܰܓ ܠܛܳܒܳܐ. ܡܶܛܽܠ ܕܳܐܦ ܠܗܳܢܶܝܢ ܪܳܐܶܓ ܐ̱ܢܳܫ܆ ܠܗܳܠܶܝܢ ܕܺܐܝܬܰܘܗ̱ܝ ܡܩܰܒܠܳܢܗܶܝܢ. ܗܰܘ ܕܶܝܢ ܕܒܰܟܝܳܢܳܐ ܐܺܝܬܰܘܗ̱ܝ ܒܺܝܫܳܐ܆ ܠܡܶܫܬܰܘܬܳܦܽܘ ܠܛܳܒܬܳܐ܆ ܠܳܐ ܡܟܳܢ. ܗܳܠܶܝܢ ܓܶܝܪ ܕܽܐܘܣܺܝ̈ܐܤ ܐܰܘܟܺܝܬ ܕܰܟܝܳܢ̈ܶܐ܆ ܠܳܐ ܡܶܬܬܙܺܝܥܳܢ̈ܝܳܬܳܐ ܡܩܰܘ̈ܝܳܢ. ܩܒܺܝ̈ܥܳܬܳܐ ܘܰܡܫܰܪܪ̈ܳܬܳܐ܆ ܘܕܳܐܦܠܳܐ ܚܰܕ ܚܽܘܠܛܳܢܳܐ ܐܺܝܬ ܠܗܶܝܢ ܠܘܳܬ ܗܳܝ ܕܰܠܩܽܘܒܠܳܐ. ܐܰܝ̇ܕܳܐ ܓܶܝܪ ܫܰܘܬܳܦܽܘܬܳܐ ܠܢܽܘܗܪܳܐ ܠܘܳܬ ܚܶܫܽܘܟܳܐ^[63] ܐܳܦܦܰܘܠܽܘܤ ܐܰܙܥܶܩ܆ ܟܰܕ ܠܘܳܬ ܗܳܠܶܝܢ ܚܳܐܰܪ.

ܕܬܰܪܬܶܝܢ ܕܶܝܢ ܕܟܰܕ ܐܶܡܰܪ ܡܰܐܢܺܝ ܗܳܢܳܐ ܡܣܰܝܒܳܐ܆ ܕܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ ܛܳܒܳܐ ܠܰܦܢܺܝܬܳܐ ܗܳܝ ܬܰܝܡܢܳܝܬܳܐ܆ ܐܰܝܟܰܢܳܐ ܬܽܘܒ ܐܳܡܰܪ ܕܡܶܫܟܚܳܐ ܗܽܘܠܶܐ ܗܳܝ ܕܰܡܕܰܝܪܳܐ ܘܥܳܡܪܳܐ ܒܬܰܝܡܢܳܐ ܘܒܰܦܢܺܝܬܳܐ ܗܳܝ ܛܰܗܪܳܝܬܳܐ܆ ܬܶܐܪܰܓ ܠܗܰܘ ܕܠܳܐ ܡܶܬܚܙܶܐ. ܐܶܢ ܡܰܢ ܓܶܝܪ ܡܩܰܘܝܳܐ ܗ̱ܘܳܬ ܒܰܦܢܺܝܬܳܐ ܗܳܝ ܬܰܝܡܢܳܝܬܳܐ܆ ܬܶܚܙܶܝܘܗ̱ܝ ܠܗܰܘ ܕܪܳܓܳܐ܆ ܠܳܐ ܡܶܫܟܚܳܐ ܗ̱ܘܳܬ. ܟܰܕ ܕܶܝܢ ܢܳܦܩܳܐ ܗ̱ܘܳܬ܆ ܥܳܒܪܳܐ ܗ̱ܘܳܬ ܠܳܗ̇ ܬܚܽܘ̈ܡܶܐ ܕܝܳܪܬܽܘܬܳܗ̇ ܗܳܢܽܘܢ ܕܰܩܒܰܥ ܠܳܗ̇ ܡܶܢ ܫܽܘܪܳܝܳܐ܆ ܗܳܢܳܐ ܡܰܪܳܚܳܐ ܘܢܳܡܽܘܣܳܝ ܢܰܦܫܶܗ܆ ܘܰܕܫܰܪܺܝܪܳܐܺܝܬ ܐܳܡܰܪ ܠܳܐ ܢܳܡܽܘܣܳܝܳܐ. ܐܰܝܟܰܢܳܐ ܕܶܝܢ ܕܫܳܠܡܳܐ ܐܺܝܬܶܝܗ̇ ܠܰܫܟܳܚ̈ܳܬܶܗ ܡܣܰܝ̈ܒܳܬܳܐ ܕܗܳܢܳܐ܆ ܗܳܝ ܕܰܐ‌ܠܳܗܳܐ ܗܰܘ ܛܳܒܳܐ ܢܶܚܒܽܘܫ ܗܽܘ ܠܶܗ܆ ܐܰܝܟܰܢܳܐ ܕܠܳܐ ܟܰܕ ܚܳܙܶܐ ܠܶܗ ܐܺܝܠܳܢܳܐ ܗܰܘ ܒܺܝܫܳܐ܆ ܢܶܬܗܰܪܗܰܪ ܘܢܶܫܬܚܶܩ ܘܩܺܝܢܕܽܘܢܽܘܣܳܐ ܢܶܥܒܶܕ. ܐܰܝܢܳܐ ܓܶܝܪ ܩܺܝܢܕܽܘܢܽܘܤ ܐܺܝܬ ܒܳܗ̇܆ ܒܗܳܝ ܕܗܽܘܠܶܐ ܬܶܫܬܰܘܬܰܦ ܗ̱ܘܳܬ ܠܛܳܒܳܐ܆ ܐܶܢ ܟܺܝܬ ܡܟܳܢܳܐ ܗ̱ܘܳܬ ܠܡܶܫܬܰܘܬܳܦܽܘ. ܕܰܠܩܽܘܒܠܳܐ ܕܶܝܢ܆ ܕܳܐܦ ܥܽܘܕܪܳܢܳܐ ܐܺܝܬܶܝܗ̇ ܗ̱ܘܳܬ܆ ܐܰܝܟܰܢܳܐ ܕܰܠܗܳܕܶܐ ܢܶܫܒܽܘܩ܆ ܗܳܝ ܕܰܒܫܰܘܬܳܦܽܘܬܳܐ ܕܗܳܝ ܕܰܡܝܰܬܪܳܐ܆ ܢܫܰܚܠܶܦ ܠܗܳܝ ܕܗܳܟܰܢܳܐ ܐܺܝܬ ܠܳܗ̇ ܒܺܝܫܳܐܺܝܬ. ܐܳܦ ܗܽܘ ܕܶܝܢ ܐܰ‌ܠܳܗܳܐ܆ ܟܺܐܢܳܐܺܝܬ ܢܶܣܒܽܘܠ ܚܽܘܝܳܒܳܐ ܕܰܚܣܳܡܳܐ ܟܰܕ ܡܛܰܫܶܐ ܗܽܘ ܠܶܗ܆ ܗܰܘ ܕܰܒܝܰܕ ܫܽܘܦܪܶܗ ܒܰܝܬܳܝܳܐ ܡܶܫܟܰܚ ܕܢܳܓܶܕ ܠܘܳܬ ܛܳܒܬܳܐ܆ ܘܢܶܟܒܽܘܫ ܘܰܢܫܰܥܒܶܕ ܠܗܰܘ ܕܣܺܝܡ ܣܰܩܽܘܒܠܳܐܺܝܬ ܘܡܰܩܪܶܒ. ܗܰܘ ܓܶܝܪ ܕܰܒܪܶܓܬܳܐ ܐܶܬܪܟܶܢ܆ ܡܰܫܶܦ ܘܡܶܫܬܰܥܒܰܕ ܠܗܰܘ ܕܡܶܬܪܰܓܪܰܓ܆ ܘܳܐܦܠܳܐ ܒܡܶܕܶܡ ܥܳܨܶܐ ܠܶܗ.

ܐܶܠܳܐ ܗܰܘ ܡܳܐ ܕܳܐܡܰܪ ܗ̱ܘܳܐ ܕܰܐ‌ܠܳܗܳܐ ܡܶܛܽܠ ܛܳܒܽܘܬܶܗ ܚܳܒܶܫ ܗܽܘ ܠܶܗ܆ ܕܕܰܠܡܳܐ ܟܰܕ ܢܶܬܗܰܪܗܰܪ ܐܺܝܠܳܢܳܐ ܗܰܘ ܒܺܝܫܳܐ ܡܶܢ ܚܙܳܬܳܐ܆ ܢܶܬܬܨܺܝܕ ܒܪܶܓܬܳܐ ܘܩܺܝܢܕܽܘܢܽܘܣܳܐ ܢܶܥܒܶܕ܆ ܟܰܕܛܥܳܐ ܐܶܢܶܝܢ ܠܫܽܘܥ̈ܝܳܬܳܐ ܕܺܝܠܶܗ܆ ܠܟܽܠܶܗ ܩܺܝܢܕܽܘܢܽܘܤ܆ ܥܰܠ ܗܰܘ ܛܳܒܳܐ ܘܰܕܚܳܐܶܤ ܗ̱ܘܳܐ ܡܰܗܦܶܟ ܡܩܺܝܡ ܠܶܗ. ܡܥܰܬܶܕ ܓܶܝܪ ܘܰܡܙܰܝܶܢ ܥܠܰܘܗ̱ܝ ܡܰܪܺܝܪܳܐܺܝܬ ܠܒܺܝܫܽܘܬܳܐ. ܠܗܽܘܠܶܐ. ܠܺܐܝܠܳܢܳܐ ܒܺܝܫܳܐ ܗܰܘ ܕܡܰܘܬܳܐ. ܢܶܬܐܰܡܪܽܘܢ ܓܶܝܪ ܟܢܺܝܫܳܐܺܝܬ ܐܰܟܚܕܳܐ ܟܽܠܗܽܘܢ ܫܡܳܗ̈ܶܐ܆ ܘܢܰܐܠܦܽܘܢ ܟܽܠܗܽܘܢ ܒܢܰܝ̈ܢܳܫܳܐ܆ ܕܰܠܡܰܢܽܘ ܝܳܗܒܺܝܢ ܡܰܢܺܝ̈ܢܳܝܶܐ ܙܳܟ̈ܘܳܬܳܐ ܠܽܘܩܒܰܠ ‌ܐܰ‌ܠܳܗܳܐ ܗܰܘ ܛܳܒܳܐ.

ܘܩܰܕܡܳܐܺܝܬ ܡܶܛܽܠܳܬܳܗ̇ ܕܺܝܠܳܗ̇ ܕܗܽܘܠܶܐ ܗܳܠܶܝܢ ܐܳܡܪܺܝܢ. ܐܺܝܠܳܢܳܐ ܗܰܘ ܕܡܰܘܬܳܐ ܠܣܰܓܺܝ̈ܶܐܐ ܡ̇ܦܠܓ܆ ܘܕܰܩܪܳܒܳܐ ܘܡܰܪܺܝܪܽܘܬܳܐ ܐܺܝܬ ܒܗܽܘܢ. ܕܫܰܝܢܳܐ ܕܶܝܢ ܢܽܘܟܪ̈ܳܝܶܐ ܐܺܝܬܰܝܗܽܘܢ܆ ܘܡܰܠ̣̈ܝܐ ܕܟܽܠܳܗ̇ ܒܺܝܫܽܘܬܳܐ܆ ܘܳܐܦܠܳܐ ܡܬܽܘܡ ܦܺܐܪ̈ܶܐ ܛܳܒ̈ܶܐ ܐܺܝܬ ܠܗܽܘܢ. ܘܕܰܦܠܺܝܓ ܐܺܝܬܰܘܗ̱ܝ ܥܰܠ ܦܺܐܪ̈ܰܘܗ̱ܝ܆ ܘܳܐܦ ܗܶܢܽܘܢ ܦܺܐܪ̈ܶܐ ܥܰܠ ‌ܐܺܝܠܳܢܳܐ܆ ܘܠܳܐ ܡܶܬܐܰܘܶܝܢ ܠܗܰܘ ܕܺܝܠ̣ܶܕ ܐܶܢܽܘܢ. ܐܶܠܳܐ ܟܽܠܗܽܘܢ ܣܳܣܳܐ ܓܳܒܠܺܝܢ ܠܚܽܘܒܳܠܳܐ ܕܕܽܘܟܰܬܗܽܘܢ܆ ܘܠܳܐ ܡܶܫܬܰܥܒܕܺܝܢ ܠܗܰܘ ܕܺܝܠܶܕ ܐܶܢܽܘܢ. ܐܶܠܳܐ ܐܺܝܠܳܢܳܐ ܟܽܠܶܗ ܒܺܝܫܰܐ ܗ̱ܘ܆ ܘܕܳܐܦܠܳܐ ܡܬܽܘܡ ܥܳܒܶܕ ܡܶܕܶܡ ܛܳܒܳܐ. ܐܶܠܳܐ ܦܠܺܝܓ ܗ̱ܘ̣ ܒܶܗ܆ ܘܟܽܠܚܕܳܐ ܡܶܢ ܡ̈ܢܰܘܳܬܳܐ ܕܺܝܠܶܗ܆ ܠܗܰܘ ܡܳܐ ܕܩܰܪܺܝܒ ܠܳܗ̇ ܡܚܰܒܠܳܐ.

ܘܰܕܫܳܥܬܳܐ ܡܰܢ ܠܚܰܝܠܳܐ ܘܰܟܢܽܘܫܝܳܐ ܕܦܳܠ̈ܚܶܐ ܗܰܘ ܚܰܝܠܬܳܢܳܐ܆ ܡܰܠܽܘܢ ܕܶܝܢ ܫܽܘܥܺܝܬܳܢܳܝܳܐ ܘܰܕܠܳܐ ܩܰܘܡܳܐ܆ ܡܶܢ ܗܳܪܟܳܐ ܡܫܰܪܶܝܢ ܠܰܡܟܰܢܳܫܽܘ. ܘܕܰܢܦܰܠܓܽܘܢ ܠܗܽܘܠܶܐ ܠܰܡ̈ܢܰܘܳܬܳܐ ܣܰܓܺܝ̈ܳܐܬܳܐ. ܘܰܕܦܺܐܪ̈ܶܐ ܢܫܰܡܗܽܘܢ ܐܶܢܶܝܢ ܠܗܳܠܶܝܢ. ܘܕܰܡܚܰܒ̈ܠܳܢܶܐ ܕܰܚ̈ܕܳܕܶܐ ܐܺܝܬܰܝܗܽܘܢ ܐܳܡܪܺܝܢ܆ ܘܰܕܫܳܓܫܺܝܢ ܗܳܠܶܝܢ ܠܽܘܩܒܰܠ ‌ܐܺܝܠܳܢܳܐ ܗܰܘ ܕܺܝܠ̣ܶܕ ܐܶܢܽܘܢ ܣܳܝܡܺܝܢ܆ ܘܰܕܒܰܕܡܽܘܬ ܥܰܡܪܳܐ ܡܶܢ ܣܳܣܳܐ ܡܶܬܛܰܠܩܺܝܢ ܘܡܶܬܚܰܒܠܺܝܢ. ܠܳܗ̇ ܕܶܝܢ ܠܣܳܣܳܐ܆ ܠܰܘ ܕܝܳܥܝܳܐ ܡܰܢ ܐܰܘܟܺܝܬ ܢܳܒܥܳܐ܆ ܕܡܶܢܗܽܘܢ ܕܶܝܢ ܡܶܬܓܰܒܠܳܐ ܐܰܝܟܰܢܳܐ ܕܰܢܡܰܢܥܽܘܢ ܠܡܰܘܦܳܝܽܘ܆ ܘܰܕܡܶܢ ܚ̈ܕܳܕܶܐ ܢܶܬܛܰܠܩܽܘܢ܆ ܘܢܶܬܚܰܪܒܽܘܢ܆ ܩܕܳܡ ܕܢܺܐܬܽܘܢ ܠܘܳܬ ܣܳܥܽܘܪܽܘܬܳܐ ܗܳܝ ܕܠܽܘܩܒܰܠ ܛܳܒܳܐ.

ܟܕ ܠܗܳܠܶܝܢ ܕܶܝܢ ܒܪܰܡ ܠܳܐ ܐܶܣܬܰܟܰܠܘ܆ ܗܳܢܽܘܢ ܓܳܒ̈ܠܰܝ ܒܶܕ̥ܝ̈ܶܐ ܕܠܳܐ ܐܰ‌ܠܳܗ ܕܫܽܘܒܚܳܐ ܛܰܡܳܐܐ ܘܰܡܣܰܝܒܳܐ܆ ܘܰܕܡܶܚܕܳܐ ܐܰܟܚܕܳܐ ܐܳܡܪܺܝܢ ܠܳܐ ܡܒܰܚܢܳܢܳܐܺܝܬ ܗܳܝ ܕܫܳܦܪܳܐ ܠܗܽܘܢ܆ ܘܫܳܪܶܝܢ ܒܰܪ ܫܳܥܬܶܗ ܠܗܳܕܶܐ܆ ܘܒܶܕ̥ܝ̈ܶܐ ܠܒܶܕ̥ܝ̈ܶܐ ܡܰܠܘܬܺܝܢ ܝܰܬܺܝܪ ܠܳܐ ܡܦܺܝܣܳܢܳܐܺܝܬ܆ ܗܳܠܶܝܢ ܕܫܰܪܟܳܐ ܕܡܶܢ ܒܳܬܰܪ ܗܳܠܶܝܢ܆ ܡܰܠܘܬ̣ܺܝܢ ܚܳܪܙܺܝܢ.

ܟܰܕ ܓܶܝܪ ܐܶܡܰܪܘ ܕܡܶܫ̈ܬܰܓܫܳܢ ܗܳܠܶܝܢ ܕܗܽܘܠܶܐ܆ ܗܳܝ ܐܶܡܳܐ ܥܰܡ ܒܢܰܝ̈ܳܐ܆ ܘܟܽܠܗܽܘܢ ܡܚܰܠܛܳܐܺܝܬ ܡܒܰܠܒܠܺܝܢ ܗ̱ܘܰܘ܆ ܘܺܐܝܬܰܝܗܽܘܢ ܗ̱ܘܰܘ ܕܰܡܠܶܝܢ ܫܓܽܘܫܝܳܐ ܘܰܕܠܽܘܚܝܳܐ܆ ܟܰܕ ܟܽܠܗܽܘܢ ܩܳܡܘ ܥܰܠ ܚ̈ܕܳܕܶܐ܆ ܡܶܢ ܗܳܢܳܐ ܫܓܽܘܫܝܳܐ܆ ܕܠܳܐ ܡܶܨܥܳܝܽܘܬܳܐ ܘܠܳܐ ܡܦܺܝܣܳܢܳܐܺܝܬ܆ ܠܚܰܕ ܣܶܕܪܳܐ ܟܺܝܬ ܘܰܩܪܳܒܳܐ ܕܫܰܠܡܽܘܬܳܐ ܗܰܘ ܕܠܽܘܩܒܰܠ ܢܽܘܗܪܳܐ܆ ܟܰܢܶܫ ܐܶܢܽܘܢ ܠܗܳܢܽܘܢ ܕܫܳܓܫܺܝܢ ܗ̱ܘܰܘ܆ ܟܰܕ ܐܳܦ ܦܺܐܪ̈ܶܐ ܕܺܐܝܠܳܢܳܐ ܒܺܝܫܳܐ ܘܗܰܕܳܡ̈ܶܐ ܕܡܰܘܬܳܐ ܠܗܽܘܢ ܟܰܕ ܠܗܽܘܢ ܩܪܰܘ܆ ܘܰܡܙܰܝ̈ܢܶܐ ܥܒܰܕܘ ܐܶܢܽܘܢ. ܫܰܠܺܝܛ ܗ̱ܘ̣ ܠܗܽܘܢ ܓܶܝܪ ܘܕܽܐܘܣܺܝ̈ܰܐܤ ܢܶܓܒܠܽܘܢ. ܕܒܺܝܫܬܳܐ ܘܰܕܡܰܘܬܳܐ ܠܗܳܠܶܝܢ ܕܠܳܐ ܐܺܝܬܰܝܗܶܝܢ܆ ܘܰܠܗܳܠܶܝܢ ܠܣܰܓܺܝ̈ܳܐܬܳܐ ܢܦܰܠܓܽܘܢ ܐܶܢܶܝܢ܆ ܘܕܰܢܟܰܢܫܽܘܢ ܐܶܢܶܝܢ ܬܽܘܒ ܠܰܚܕܳܐ. ܘܕܰܫܓܽܘܫܝܳܐ ܘܰܐܘܝܽܘܬܳܐ ܐܰܟܚܕܳܐ ܢܣܺܝܡܽܘܢ܆ ܘܰܕܡܶܢ ܐܽܘܚ̈ܕܳܬܳܐ ܕܠܳܐ ܩܰܘܡܳܐ ܢܶܡܠܽܘܢ ܠܟܽܠ ܡܶܕܶܡ.

ܫܳܘܝܳܐ ܕܶܝܢ ܕܳܐܦ ܠܳܗ̇ ܠܰܡܡܰܠܠܽܘܬ ܥܰܬܺܝܩܽܘܬܳܐ ܕܰܩܪܳܒܳܐ ܗܰܘ ܬܡܺܝܗܳܐ ܢܣܺܝܡ ܩܕܳܡܰܝܟܽܘܢ܆ ܡܰܠܽܘܢ ܕܶܝܢ ܡܡܰܠܠܽܘܬ ܫܽܘܥ̈ܝܳܬܳܐ ܕܺܝܠܗܽܘܢ܆ ܟܰܕ ܡܶܢ ܒܓ̈ܳܠܶܐ ܘܰܨܒܳܪ̈ܶܐ ܗܳܢܽܘܢ ܣܰܓܺܝ̈ܶܐܐ ܘܕܰܒܦܳܣܺܝ̈ܩܳܬܳܐ ܠܡܺܐܡܰܪ ܕܠܳܐ ܣܳܟܳܐ܆ ܙܥܽܘܪ̈ܝܳܬܳܐ ܓܳܒܶܝܢܰܢ ܚܢܰܢ ܐܰܝܟ ܕܡܰܨܝܳܐ܆ ܗܳܠܶܝܢ ܕܡܶܢܗܶܝܢ ܚܰܣܺܝܪܽܘܬ ܗܰܘܢܳܐ ܕܓܽܘܕܳܦܗܽܘܢ܆ ܝܺܕܰܥܬܳܐ ܬܶܗܘܶܐ ܠܟܽܠܢܳܫ ܐܰܝܟܰܢܳܐ ܕܳܐܡܰܪ ܫܠܺܝܚܳܐ^[64].

ܟܬܺܝܒ ܠܗܽܘܢ ܓܶܝܪ ܐܳܦ ܗܳܠܶܝܢ ܟܺܝܬ ܚܰܝ̈ܠܬܳܢܝܳܬܳܐ. ܗܳܠܶܝܢ ܡܶܛܽܠ ܗܽܘܠܶܐ܆ ܘܡܶܛܽܠ ܦܺܐܪ̈ܶܐ ܘܗܰܕܳܡ̈ܶܐ ܕܺܝܠܳܗ̇. ܐܶܠܳܐ ܥܶܠܬܳܐ ܡܶܢ ܗܳܪܟܳܐ ܡܶܢ ܫܓܽܘܫܝܳܐ ܗܘ̣ܳܬ ܠܗܽܘܢ܆ ܠܘܳܬ ܗܳܝ ܕܢܶܣܩܽܘܢ ܐܳܦ ܥܕܰܡܳܐ ܠܥܳܠ̈ܡܶܐ ܕܢܽܘܗܪܳܐ. ܐܳܦܠܳܐ ܓܶܝܪ ܗܶܢܽܘܢ ܗܳܠܶܝܢ ܗܰܕܳܡ̈ܶܐ ܕܺܐܝܠܳܢܳܐ ܗܰܘ ܕܡܰܘܬܳܐ ܝܳܕܥܺܝܢ ܗ̱ܘܰܘ ܠܰܚ̈ܕܳܕܶܐ܆ ܐܰܘ ܐܺܝܬ ܗ̱ܘܳܐ ܠܗܽܘܢ ܡܰܪܓܫܳܢܽܘܬܳܐ ܕܰܚ̈ܕܳܕܶܐ ܟܽܠܚܰܕ ܡܶܢܗܽܘܢ ܓܶܝܪ܆ ܘܠܳܐ ܡܶܕܶܡ ܝܰܬܺܝܪܳܐ ܝܳܕܰܥ ܗ̱ܘܳܐ܆ ܐܶܠܳܐ ܐܶܢ ܩܳܠܳܐ ܕܺܝܠܶܗ. ܘܗ̱ܝ ܕܰܩܕܳܡ ܥܰܝ̈ܢܰܝܗܽܘܢ ܚܳܙܶܝܢ ܗ̱ܘܰܘ. ܘܟܰܕ ܩܳܥܶܐ ܗ̱ܘܳܐ ܡܶܕܶܡ ܫܳܡܥܺܝܢ ܗ̱ܘܰܘ. ܘܰܒܗܳܕܶܐ ܡܰܪܓܫܺܝܢ ܗ̱ܘܰܘ܆ ܘܥܰܡ ܚܺܐܦܳܐ ܢܳܦܩܺܝܢ ܗ̱ܘܰܘ ܠܘܳܬܩܳܠܳܐ. ܐ̱ܚܪܺܢܳܐ ܕܶܝܢ ܘܠܳܐ ܡܶܕܶܡ ܝܳܕܥܺܝܢ ܗ̱ܘܰܘ. ܘܗܳܟܰܢܳܐ ܐܶܬܗܰܪܗܰܪܘ ܘܶܐܬܓܰܪܰܓܘ ܡܶܢ ܚ̈ܕܳܕܶܐ ܠܘܳܬ ܗܳܝ ܕܢܶܦܩܽܘܢ܆ ܐܳܦ ܥܕܰܡܳܐ ܠܰܬܚܽܘ̈ܡܶܐ ܕܰܐܪܥܳܐ ܗܳܝ ܡܫܰܒܰܚܬܳܐ ܕܢܽܘܗܪܳܐ. ܘܶܐܡܰܬܝ ܕܰܚܙܰܘ ܠܚܶܙܘܳܐ ܗܰܘ ܬܡܺܝܗܳܐ ܘܫܰܦܺܝܪܦܰܐܝܽܘܬܳܐ܆ ܕܣܰܓܺܝ ܝܰܬܺܝܪܳܐܺܝܬ ܐܺܝܬܰܘܗ̱ܝ ܛܳܒ ܡܶܢ ܗܰܘ ܕܺܝܠܗܽܘܢ܆ ܗܳܝܕܶܝܢ ܐܶܬܟܰܢܰܫܘ܆ ܗܳܕܶܐ ܐܺܝܬܶܝܗ̇ ܗܽܘܠܶܐ ܗܳܝ ܚܶܫܽܘܟܬܳܐ܆ ܘܶܐܬܚܰܫܰܒܘ ܠܽܘܩܒܰܠ ܢܽܘܗܪܳܐ܆ ܐܰܝܟܰܢܳܐ ܕܰܢܡܰܙܓܽܘܢ ܗܶܢܽܘܢ ܠܗܽܘܢ ܒܗܰܘ. ܘܠܳܐ ܝܳܕܥܺܝܢ ܗ̱ܘܰܘ ܡܶܛܽܠ ܫܳܢܝܽܘܬܳܐ. ܕܰܐ‌ܠܳܗܳܐ ܥܰܫܺܝܢܳܐ ܘܚܰܝܠܬܳܢܳܐ ܫܪܶܐ ܒܶܗ. ܘܰܒܪܰܡ ܠܪܰܘܡܳܐ ܒܥܰܘ ܕܢܶܣܩܽܘܢ܆ ܡܶܛܽܠ ܕܳܐܦܠܳܐ ܡܬܽܘܡ ܛܶܒܳܐ ܕܰܐ‌ܠܳܗܽܘܬܳܐ ܝܺܕܺܝܥ ܗ̱ܘܳܐ ܠܗܽܘܢ܆ ܐܰܘ ܡܰܪܓܶܫ ܗ̱ܘܳܐ ܠܗܽܘܢ ܕܡܰܢܽܘ ܐܺܝܬܰܘܗ̱ܝ ܐܰ‌ܠܳܗܳܐ܆ ܐܶܠܳܐ ܫܳܢܝܳܐܺܝܬ ܚܙܰܘ܆ ܡܶܢ ܪܶܓܬܳܐ ܕܚܶܙܘܳܐ ܕܥܳܠ̈ܡܶܐ ܗܳܢܽܘܢ ܡܒܰܪ̈ܟܶܐ܆ ܘܰܣܒܰܪܘ ܕܕܺܝܠܗܽܘܢ ܢܶܗܘܶܐ. ܘܶܐܬܬܪܺܝܡܘ ܗܳܟܺܝܠ ܟܽܠܗܽܘܢ ܗܰܕܳܡ̈ܶܐ ܕܺܐܝܠܳܢܳܐ ܗܰܘ ܕܚܶܫܽܘܟܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܗܽܘܠܶܐ ܗܳܝ ܥܳܒܕܰܬ ܚܒܳܠܳܐ܆ ܘܰܣܠܶܩܘ ܥܰܡ ܚܰܝ̈ܠܶܐ ܣܰܓܺܝ̈ܶܐܐ܆ ܕܗܳܠܶܝܢ ܕܡܶܢܝܳܢܗܽܘܢ ܠܰܝܬ ܠܡܺܐܡܰܪ. ܘܗܽܘܠܶܐ ܕܢܽܘܪܳܐ ܠܒܺܝܫܺܝܢ ܗ̱ܘܰܘ ܟܽܠܗܽܘܢ. ܘܗܶܢܽܘܢ ܕܶܝܢ ܗܳܠܶܝܢ ܗܰܕܳܡ̈ܶܐ܆ ܡܫܰܚ̈ܠܦܶܐ ܐܺܝܬܰܝܗܽܘܢ ܗ̱ܘܰܘ. ܠܗܳܠܶܝܢ ܡܰܢ ܓܶܝܪ ܐܺܝܬ ܗ̱ܘܳܐ ܠܗܽܘܢ ܓܽܘܫ̈ܡܶܐ ܩܫܰܝ̈ܳܐ܆ ܘܰܒܪܰܒܘܳܬܳܐ ܐܺܝܬܰܝܗܽܘܢ ܗ̱ܘܰܘ ܕܠܳܐ ܣܳܟܳܐ. ܗܳܠܶܝܢ ܕܶܝܢ ܠܳܐ ܓܽܘܫ̈ܡܳܢܶܐ ܘܠܳܐ ܡܶܬܓܰܫ̈ܫܳܢܶܐ܆ ܕܓܶܫܬܳܐ ܩܰܛܺܝܢܬܳܐ ܐܺܝܬ ܠܗܽܘܢ܆ ܐܰܝܟ ܙܢܳܐ ܕܫ̈ܺܐܕܶܐ ܘܚ̈ܶܙܘܶܐ ܕܰܫܪܰܓܪ̈ܳܓܝܳܬܳܐ. ܘܟܰܕ ܐܶܬܬܪܺܝܡܰܬ ܣܶܠܩܰܬ ܟܽܠܳܗ̇ ܗܽܘܠܶܐ܆ ܥܰܡ ܪ̈ܽܘܚܶܐ ܕܺܝܠܳܗ̇ ܘܥܰܠ̈ܥܳܠܶܐ܆ ܘܡܰܝ̈ܳܐ ܘܢܽܘܪܳܐ ܘܫ̈ܺܐܕܶܐ ܕܺܝܠܳܗ̇ ܘܰܫܪܰܓܪ̈ܳܓܝܳܬܳܐ ܘܪ̈ܺܝܫܳܢܶܐ ܘܚܰܝ̈ܠܶܐ. ܘܟܰܕ ܟܽܠܗܽܘܢ ܒܥܽܘܡܩܳܐ ܐܺܝܬܰܝܗܽܘܢ ܗ̱ܘܰܘ܆ ܐܰܝܟܰܢܳܐ ܕܗܶܢܽܘܢ ܠܗܽܘܢ ܢܶܚܪܙܽܘܢ ܒܢܽܘܗܪܳܐ܆ ܘܡܶܛܽܠ ܗܳܢܳܐ ܕܠܽܘܚܝܳܐ ܗܰܘ ܕܶܐܬܥܰܬܰܕ ܡܶܢ ܥܽܘܡܩܳܐ܆ ܠܽܘܩܒܰܠ ‌ܐܰܪܥܶܗ ܕܢܽܘܗܪܳܐ܆ ܘܠܽܘܩܒܰܠ ܦܺܐܪ̈ܶܐ ܩܰܕܺܝ̈ܫܶܐ܆ ܐܰܢܰܢܩܺܐ ܗܘ̣ܳܬ܆ ܕܬܺܐܬܶܐ ܡܢܳܬܳܐ ܡܶܕܶܡ ܡܶܢ ܢܽܘܗܪܳܐ ܘܬܶܬܡܰܙܰܓ ܒܗܳܢܽܘܢ ܒܺܝ̈ܫܶܐ. ܐܰܝܟܰܢܳܐ ܕܰܒܝܰܕ ܡܽܘܙܳܓܳܐ ܢܶܬܬܨܺܝܕܽܘܢ ܗܶܢܽܘܢ ܒܥܶܠ̈ܕܒܳܒܶܐ. ܘܢܶܗܘܶܐ ܫܰܝܢܳܐ ܠܛܳܒ̈ܶܐ܆ ܘܢܶܬܢܛܰܪ ܟܝܳܢܶܗ ܕܛܳܒܳܐ܆ ܟܰܕ ܐܰܓܗܺܝ ܟܝܳܢܳܐ ܗܰܘ ܒܪܺܝܟܳܐ ܡܶܢ ܢܽܘܪܳܗ̇ ܕܗܽܘܠܶܐ܆ ܘܡܶܢ ܣܳܣܳܐ ܗܳܝ ܡܚܰܒܠܳܢܺܝܬܳܐ. ܘܬܽܘܒ ܗܶܢܽܘܢ ܢܽܘܗܪ̈ܳܢܳܝܶܐ ܢܶܫܬܰܚܠܽܘܢ ܡܶܢ ܗܽܘܠܶܐ܆ ܒܚܰܝܠܳܐ ܗܰܘ ܕܶܐܬܡܰܙܰܓ. ܐܰܝܟܰܢܳܐ ܕܗܽܘܠܶܐ ܬܶܬܥܛܶܐ ܡܶܢ ܡܨܰܥܬܳܐ܆ ܘܢܶܗܘܶܐ ܐܺܝܠܳܢܳܐ ܗܰܘ ܕܚܰܝ̈ܶܐ ܐܰ‌ܠܳܗܳܐ. ܒܟܽܠ ܘܥܰܠ ܟܽܠ. ܒܥܳܠܡܳܐ ܓܶܝܪ ܗܰܘ ܕܢܽܘܗܪܳܐ܆ ܠܳܐ ܐܺܝܬ ܢܽܘܪܳܐ ܡܰܘܩܕܳܢܺܝܬܳܐ܆ ܐܰܝܟܰܢܳܐ ܕܠܽܘܩܒܰܠ ܒܺܝܫܳܐ ܬܶܫܬܕܶܐ. ܘܠܳܐ ܦܰܪܙܠܳܐ ܗܰܘ ܦܳܣܽܘܩܳܐ܆ ܘܳܐܦܠܳܐ ܡܰܝ̈ܳܐ ܚܳܢܽܘܩ̈ܶܐ܆ ܐܰܘ ܡܶܕܶܡ ܐ̱ܚܪܺܢܳܐ ܒܺܝܫܳܐ ܕܕܳܡܶܐ ܠܶܗ. ܟܽܠ ܡܶܕܶܡ ܓܶܝܪ ܢܽܘܗܪܳܐ ܐܺܝܬܰܘܗ̱ܝ ܘܰܐܬܪܳܐ ܒܰܪ ܚܺܐܪ̈ܶܐ܆ ܘܠܳܐ ܐܺܝܬ ܣܽܘܪܚܳܢܳܐ ܠܩܽܘܒܠܶܗ. ܐܶܠܳܐ ܗܳܢܳܐ ܐܺܝܬܰܘܗ̱ܝ ܡܰܦܩܳܢܳܐ ܐܰܘܟܺܝܬ ܡܰܥܒܰܪܬܳܐ܆ ܐܰܝܟܰܢܳܐ ܕܰܒܝܰܕ ܡܢܳܬܳܐ ܗܳܝ ܕܡܶܢ ܢܽܘܗܪܳܐ ܐܶܬ̣ܳܬ̣܆ ܒܥܶܠ̈ܕܒܳܒܶܐ ܟܰܕ ܢܶܬܒܰܕܪܽܘܢ ܢܦܽܘܫܽܘܢ ܡܶܢ ܚܺܐܦܳܐ܆ ܘܢܶܬܬܨܺܝܕܽܘܢ ܒܝܰܕ ܡܽܘܙܳܓܳܐ.

ܡܰܢܽܘ ܕܟܰܕ ܠܫܶܩܝܳܐ ܕܚܰܣܺܝܪܽܘܬ ܗܰܘܢܳܐ ܗܳܕܶܐ ܩܰܒܶܠ ܥܠܰܘܗ̱ܝ ܕܢܶܫܬܶܐ܆ ܠܳܐ ܢܶܪܘܶܐ ܒܬܰܪܥܺܝܬܶܗ. ܡܰܢܽܘ ܕܶܝܢ ܕܗܰܘܢܳܐ ܐܺܝܬ ܠܶܗ܆ ܕܠܰܘ ܡܶܢ ܟܽܠ ܕܽܘܟ ܢܶܓܚܰܟ ܥܰܠ ܫܳܛܽܘܪܽܘܬܳܐ ܗܳܕܶܐ ܣܪܺܝܩܬܳܐ܆ ܕܰܠܟܽܠܗܶܝܢ ܗܳܠܶܝܢ ܕܠܳܐ ܛܶܟܣܳܐ ܘܠܳܐ ܫܰܘ̈ܝܳܬܳܐ ܘܕܰܐܝܟ ܕܳܐܬܝܳܐ ܡܬܬܰܝ̈ܬܝܳܢ ܚܳܒܫܳܐ. ܐܰܝܟܰܢܳܐ ܓܶܝܪ ܗܽܘܠܶܐ ܗܳܝ ܠܳܐ ܥܒܺܝܕܬܳܐ ܘܰܕܠܳܐ ܪܺܝܫܳܐ ܘܫܰܘܝܰܬ ܒܰܡܬܽܘܡܳܝܽܘܬܳܐ ܠܛܳܒܳܐ ܐܶܫܬܰܟܚܰܬ܆ ܕܰܒܟܠܗܽܘܢ ܗܳܠܶܝܢ ܦܺܐܪ̈ܶܐ ܒܺܝ̈ܫܶܐ ܥܰܒܺܝܛܳܐ܆ ܒܚܰܝ̈ܠܶܐ ܣܰܓܺܝ̈ܶܐܐ܆ ܘܗܳܠܶܝܢ ܕܠܳܐ ܐܺܝܬ ܡܶܢܝܳܢܗܽܘܢ ܠܡܺܐܡܰܪ ܐܰܝܟܰܢܳܐ ܕܶܐܡܰܪ ܡܰܟܬܒܳܢܳܐ ܪܰܫܺܝܥܳܐ܆ ܒܓܽܘܫ̈ܡܶܐ ܩܫܰܝ̈ܳܐ܆ ܕܗܳܢܽܘܢ ܕܶܐܡܰܪ ܕܰܕܠܳܐ ܣܳܟܳܐ ܗܝ ܪܰܒܽܘܬܗܽܘܢ. ܘܰܐܝ̇ܕܳܐ ܓܶܝܪ ܡܶܠܬܳܐ ܬܶܬܶܠ ܡܬܽܘܡ ܕܺܐܝܬ ܓܽܘܫ̈ܡܶܐ ܕܠܳܐ ܣܳܟܳܐ܆ ܒܓܽܘܫ̈ܡܶܐ ܩܰܛܺܝ̈ܢܶܐ܆ ܒܰܫܪܰܓܪ̈ܳܓܝܳܬܳܐ܆ ܒܪ̈ܽܘܚܶܐ܆ ܒܥܰܠ̈ܥܳܠܶܐ܆ ܒܡܰܝ̈ܳܐ܆ ܒܢܽܘܪܳܐ܆ ܒܫ̈ܺܐܕܶܐ܆ ܒܪ̈ܺܝܫܳܢܶܐ ܗܳܢܽܘܢ ܕܰܒܥܽܘܡܩܳܐ. ܗܳܠܶܝܢ ܓܶܝܪ ܟܽܠܗܶܝܢ ܚܫܰܒ܆ ܟܰܕ ܡܛܰܟܶܤ ܠܶܗ ܠܚܰܝܠܳܐ ܗܰܘ ܕܗܽܘܠܶܐ.

ܢܺܐܡܪܽܘܢ ܗܳܟܺܝܠ ‌ܐܶܢ ܗܳܠܶܝܢ ܦܺܐܪ̈ܶܐ ܫܰܘ̈ܝ̣ܰܝ̣ ܒܡܰܘܥܺܝܬܳܐ ܐܺܝܬܰܝܗܽܘܢ ܗ̱ܘܰܘ ܠܳܗ̇ ܡܶܢ ܠܥܶܠ ܘܡܶܢ ܫܽܘܪܳܝܳܐ܆ ܐܰܘ ܠܚܰܪܬܳܐ ܐܶܬܬܰܘܣܰܦܘ ܗ̱ܘܰܘ. ܘܶܐܢ ܡܰܢ ܡܶܢ ܠܥܶܠ܆ ܣܰܓܺܝ̈ܶܐܐ ܐܺܝܬܰܝܗܽܘܢ ܗܳܠܶܝܢ ܕܠܳܐ ܪܺܝܫܳܐ ܘܠܳܐ ܥܒܺܝ̈ܕܶܐ܆ ܘܰܕܥܳܒܪܺܝܢ ܠܡܶܢܝܳܢܳܐ. ܘܰܦܫܺܝܛܳܐܺܝܬ ܠܡܺܐܡܰܪ܆ ܟܽܠܶܗ ܗܰܘ ܟܢܽܘܫܝܳܐ ܕܗܳܠܶܝܢ ܕܶܐܫܬܰܡܰܗܘ. ܐܶܢ ܕܶܝܢ ܒܰܕܡܽܘܬ ܐܺܝܠܳܢܳܐ ܒܙܰܒܢܳܐ ܐܰܦܪܥܰܬ ܗܳܠܶܝܢ ܦܺܐܪ̈ܶܐ܆ ܘܟܽܠܶܗ ܗܳܢܳܐ ܛܰܥܢܳܐ ܕܒܺܝܫܽܘܬܳܐ ܐܰܝܬܝܰܬ܆ ܡܢܳܬܳܐ ܡܰܢ ܡܶܕܶܡ ܡܶܢܳܗ̇ ܬܶܗܘܶܐ ܐܺܝܬܶܝܗ̇ ܠܳܐ ܥܒܺܝܕܬܳܐ܆ ܣܰܓܺܝ̈ܳܐܬܳܐ ܕܶܝܢ ܥܒܺܝ̈ܕܳܬܳܐ ܘܰܕܡܶܢ ܒܳܬܰܪܟܶܢ ܐܶܬܩ̣̈ܢܶܝܢ. ܘܰܐܝܟܰܢܳܐ ܢܳܩܦܳܐ܆ ܕܠܳܗ̇ ܟܰܕ ܠܳܗ̇ ܠܽܐܘܣܺܝܰܐ ܢܶ݀ܣܬܰܟܰܠ ܥܒܺܝܕܬܳܐ ܘܠܳܐ ܥܒܺܝܕܬܳܐ. ܐܰܝܟܰܢܳܐ ܕܶܝܢ ܦܺܐܪ̈ܶܐ ܗܳܠܶܝܢ ܕܗܽܘܠܶܐ܆ ܟܰܕ ܫܳܢ̈ܝܶܐ ܡܶܕܶܡ ܐܺܝܬܰܝܗܽܘܢ ܘܠܳܐ ܡܰܪ̈ܓܫܳܢܶܐ܆ ܘܒܰܠܚܽܘܕ ܗܳܠܶܝܢ ܕܰܩܕܳܡ ܪ̈ܶܓܠܶܐ ܚܳܙܶܝܢ܆ ܘܩܳܠܐ ܕܗܳܢܽܘܢ ܕܡܶܢ ܩܽܘܪܒܳܐ ܠܡܰܚܣܶܢ ܡܶܫܟܚܺܝܢ ܠܡܶܫܡܰܥ܆ ܡܶܛܽܠ ܡܰܬܺܝܢܽܘܬܳܐ ܘܝܰܩܺܝܪܽܘܬܳܐ ܘܒܰܛܺܝܠܽܘܬܳܐ܆ ܘܫܳܓܫܺܝܢ ܠܘܳܬ ܚ̈ܕܳܕܶܐ܆ ܗܳܟܰܢܳܐ ܐܶܬܪܰܓܪܰܓܘ ܐܰܟܚܕܳܐ ܒܫܰܘܝܽܘܬ ܬܰܪܥܺܝܬܳܐ܆ ܘܰܥܕܰܡܳܐ ܠܰܬܚܽܘ̈ܡܶܐ ܕܰܐܪܥܶܗ ܕܢܽܘܗܪܳܐ ܫܰܠܡܳܐܺܝܬ ܐܶܙܰܠܘ܆ ܐܰܝܟ ܐܰܝܠܶܝܢ ܕܰܬܚܶܝܬ ܚܰܕ ܬܶܓܡܳܐ ܘܛܶܟܣܳܐ ܡܛܰܟܣܺܝܢ ܘܡܶܬܕܰܒܪܺܝܢ܆ ܘܰܚܙܰܘ ܠܚܶܙܘܳܐ ܕܢܽܘܗܪܳܐ܆ ܘܟܰܕ ܒܪܶܓܬܳܐ ܒܠܰܥܘ ܕܫܽܘܦܪܳܐ ܐܶܬܪܰܓܪܰܓܘ. ܗܳܠܶܝܢ ܓܶܝܪ ܘܠܳܐ ܣܳܟ ܐܺܝܬܰܝܗܶܝܢ ܕܫܳܢܝܽܘܬܳܐ ܘܰܕܠܳܐ ܡܰܪܓܫܳܢܽܘܬܳܐ. ܠܪܶܓܬܳܐ ܓܶܝܪ ܕܗܰܘ ܕܒܰܫܪܳܪܳܐ ܛܳܒܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܐܰ‌ܠܳܗܳܐ܆ ܣܰܟܽܘܠܬܳܢܽܘܬܳܐ ܪܺܝܫܳܝܬܳܐ ܟܺܐܢܳܐܺܝܬ ܢܬܰܚܶܡ ܐ̱ܢܳܫ ܕܺܐܝܬܶܝܗ̇܆ ܘܠܰܘ ܫܳܢܽܝܘܬܳܐ.

ܒܰܐܝܢܳܐ ܙܢܳܐ ܐܳܘ ܡܝܰܬܪܳܐ܆ ܟܰܕ ܟܝܳܢܳܐ ܕܫܳܢܝܽܘܬܳܐ ܘܰܕܠܳܐ ܡܰܪܓܫܳܢܽܘܬܳܐ ܐܺܝܬ ܠܗܽܘܢ܆ ܡܶܛܽܠ ܕܳܐܦ ܟܝܳܢܳܐ ܬܰܚܡܶܬܽܘܢܳܗ̇ ܠܒܺܝܫܬܳܐ܆ ܕܢܶܬܪܰܓܪܓܽܘܢ ܠܰܓܡܳܪ ܡܶܫܟܚܺܝܢ ܗ̱ܘܰܘ܆ ܠܫܽܘܒܚܳܐ ܗܰܘ ܛܽܘܒܬܳܢܳܐ ܕܛܳܒܳܐ. ܐܰܝܟܰܢܳܐ ܕܶܝܢ ܡܰܟܬܒܳܢܳܐ ܗܰܘ ܕܰܡܠܶܐ ܟܽܠܳܗ̇ ܚܰܣܺܝܪܽܘܬ ܗܰܘܢܳܐ܆ ܐܶܡܰܪ ܡܶܛܽܠܳܬܗܽܘܢ܆ ܕܰܚܙܰܘ ܠܚܶܙܘܳܐ ܕܢܽܘܗܪܳܐ ܗܰܘ ܬܡܺܝܗܳܐ ܘܫܰܦܺܝܪ ܦܰܐܝܽܘܬܳܐ܆ ܕܣܰܓܺܝ ܡܰܠܽܘܢ ܐܺܝܬܰܘܗ̱ܝ ܝܰܬܺܝܪ ܡܶܢ ܗܰܘ ܕܺܝܠܗܽܘܢ܆ ܘܗܳܝܕܶܝܢ ܐܶܬܟܰܢܰܫܘ܆ ܘܗܳܕܶܐ ܐܺܝܬܶܝܗ̇ ܗܽܘܠܶܐ ܗܳܝ ܚܶܫܽܘܟܬܳܐ. ܐܰܝ̇ܕܳܐ ܓܶܝܪ ܫܰܦܺܝܪܽܘܬ ܦܰܐܝܽܘܬܳܐ܆ ܐܰܘ ܐܰܝܢܳܐ ܢܽܘܗܪܳܐ ܬܡܺܝܗܳܐ ܐܺܝܬ ܗ̱ܘܳܐ ܣܳܟ ܒܗܽܘܠܶܐ ܗܳܝ ܚܶܫܽܘܟܬܳܐ܆ ܗܰܘ ܕܡܶܛܽܠܳܬܶܗ ܐܳܦ ܟܰܕ ܡܒܰܚܶܢ ܐܰܢ̱ܬ ܐܳܡܰܪ ܐܰܢ̱ܬ܆ ܕܟܰܕ ܚܙܰܘ ܦܺܐܪ̈ܶܐ ܕܗܽܘܠܶܐ ܠܚܶܙܘܳܐ ܕܢܽܘܗܪܳܐ ܗܰܘ ܬܡܺܝܗܳܐ ܘܫܰܦܺܝܪ ܦܰܐܝܽܘܬܐ ܕܣܰܓܺܝ ܡܰܠܽܘܢ ܝܰܬܺܝܪ ܡܶܢ ܗܰܘ ܕܺܝܠܗܽܘܢ ܐܺܝܬܰܘܗ̱ܝ.

ܐܺܝܬ ܗ̱ܘܳܐ ܓܶܝܪ ܐܶܡܰܪ ܠܺܝ܆ ܡܢܳܬܳܐ ܡܶܕܶܡ ܕܢܽܘܗܪܳܐ ܒܗܽܘܠܶܐ ܗܳܝ ܚܶܫܽܘܟܬܳܐ܆ ܝܰܬܺܝܪܳܐܺܝܬ ܗܳܟܺܝܠ ܡܳܕܶܝܢ ܡܶܢ ܫܽܘܪܳܝܳܐ ܚܒܺܝܟܳܐ ܗ̱ܘܳܬ ܒܢܽܘܗܪܳܐ܆ ܘܝܰܬܺܝܪܰܐ ܗ̱ܘ ܩܪܳܒܳܐ ܗܰܘ ܕܗܳܟܰܢܳܐ ܐܺܝܬܰܘܗ̱ܝ ܡܰܪܺܝܪܳܐ. ܙܳܕܶܩ ܗ̱ܘܳܐ ܓܶܝܪ܆ ܕܰܐܝܟ ܕܰܠܘܳܬ ܫܘܶܐ ܒܓܶܢܣܳܐ ܪܳܚܡܳܐܺܝܬ ܬܺܐܙܰܠ܆ ܘܺܐܝܙܓܰܕܽܘܬܳܐ ܕܫܰܝܢܳܐ ܬܫܰܕܰܪ܆ ܘܡܶܬܚܰܠܛܳܢܽܘܬܳܐ ܡܫܰܡܠܰܝܬܳܐ ܕܢܽܘܗܪܳܐ ܬܫ̣ܐܠ ܗ̱ܘܳܬ܆ ܕܗܳܝ ܕܰܡܢܳܬܳܗ̇ ܡܡܰܙܓܳܐ ܗ̱ܘܳܬ ܗܺܝ ܐܳܦ ܒܳܗ̇ ܒܗܽܘܠܶܐ ܗܳܝ ܚܶܫܽܘܟܬܳܐ.

ܘܳܐܦ ܒܗܳܝ ܕܶܝܢ ܙܳܕܶܩ ܕܰܢܚܽܘܪ܆ ܕܰܐܝܟܰܢܳܐ ܐܶܡܰܪ ܡܶܛܽܠ ܦܺܐܪ̈ܶܝܗ̇ ܕܗܽܘܠܶܐ ܐܰܘܟܺܝܬ ܗܰܕܳܡܶܝ̈ܗ̇܆ ܘܗܳܝܕܶܝܢ ܐܶܬܟܰܢܰܫܘ܆ ܘܗܳܕܶܐ ܐܺܝܬܶܝܗ̇ ܗ̱ܘܳܬ ܗܽܘܠܶܐ ܗܳܝ ܚܶܫܽܘܟܬܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܰܘ ܕܡܶܕܶܡ ܐ̱ܚܪܺܝܢ ܐܺܝܬܶܝܗ̇ ܗܽܘܠܶܐ ܢܶܣܬܰܟܰܠ܆ ܘܡܶܕܶܡ ܐ̱ܚܪܺܝܢ ܦܺܐܪ̈ܶܐ. ܐܶܢ ܕܶܝܢ ܒܗܳܠܶܝܢ ܗܽܘܠܶܐ܆ ܣܰܓܺܝ̈ܶܐܐ ܘܰܕܠܳܐ ܣܳܟܳܐ ܣܰܓܺܝ ܐܺܝܬܰܝܗܽܘܢ ܗ̱ܘܰܘ ܕܠܳܐ ܪܺܝܫܳܐ ܘܠܳܐ ܥܒܺܝܕܳܐ܆ ܘܠܰܘ ܬܪܶܝܢ ܒܰܠܚܽܘܕ ܪ̈ܺܝܫܶܐ܆ ܐܰܝܟܰܢܳܐ ܕܩܰܕܶܡܢܰܢ ܐܶܡܰܪܢܰܢ.

ܠܺܝ ܕܶܝܢ ܕܶܐ݀ܬܕܰܡܰܪ ܐܳܬܝܳܐ ܠܺܝ܆ ܕܰܐܝܟܰܢܳܐ ܠܦܺܐܪ̈ܶܐ ܗܽܘ̈ܠܳܢܳܝܶܐ ܐܺܝܬܰܘܗ̱ܝ ܗ̱ܘܳܐ ܡܶܬܚܰܙܝܳܢܳܐ܆ ܢܽܘܗܪܳܐ ܗܰܘ ܠܳܐ ܗܽܘܠܳܢܳܝܳܐ܆ ܘܡܶܬܗܰܘܢܳܢܳܐ ܘܠܳܐ ܡܶܬܚܰܙܝܳܢܳܐ ܕܰܐ‌ܠܳܗܳܐ ܗܰܘ ܛܳܒܳܐ. ܐܰܘ ܐܰܝܟܰܢܳܐ ܛܥܳܝܗ̱ܝ ܡܰܟܬܒܳܢܳܐ ܐܰܝܟܰܢܳܐ ܕܳܐܦ ܠܗܳܕܶܐ ܢܶܫܒܽܘܩ ܠܶܗ܆ ܠܫܽܘܪܳܐ ܗܰܘ ܕܰܐܟܪܶܟ ܠܶܗ ܠܢܽܘܗܪܳܐ. ܠܳܐ ܡܶܫܟܚܳܢܺܝܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ܆ ܕܗܳܢܽܘܢ ܕܰܥܕܰܡܳܐ ܠܰܬܚܽܘ̈ܡܶܐ ܕܰܐܪܥܳܐ ܗܳܝ ܡܫܰܒܰܚܬܳܐ ܐܶܬܰܘ ܘܬܰܡܳܢ ܒܕܽܘܟ ܩܳܡܘ܆ ܠܡܶܦܠܰܫ ܠܫܽܘܪܳܐ ܗܰܘ ܒܥܰܝ̈ܢܰܝܗܽܘܢ܆ ܘܰܠܢܽܘܗܪܐ ܗܰܘ ܕܰܠܓܰܘ ܚܒܺܝܫ ܗ̱ܘܳܐ ܘܰܩܦܺܝܤ ܢܶܚܙܽܘܢ܆ ܗܰܘ ܕܡܶܛܽܠܳܬܶܗ ܟܬܰܒ ܠܥܶܠ ܟܰܕ ܫܳܛܰܪ܆ ܗܰܘ ܒܰܪ ܐ̱ܪܳܙܳܐ ܚܰܟܺܝܡܳܐ ܕܗܳܠܶܝܢ ܕܠܳܐ ܚܟܝ̈ܡܳܢ ܘܰܡܣܰܝܒܳܐ܆ ܠܳܐ ܡܶܬܚܙܶܐ ܠܰܦܢܺܝܬܳܐ ܗܳܝ ܬܰܝܡܢܳܝܬܳܐ܆ ܘܗܳܠܶܝܢ ܕܟܰܕ ܡܟܰܣܰܝ ܒܗܳܠܶܝܢ ܕܰܒܥܽܘܒܶܗ܆ ܐܰ‌ܠܳܗܳܐ ܓܶܝܪ ܚܰܣܢܳܗ̇ ܒܫܽܘܪܳܐ ܠܕܽܘܟܬܳܐ܆ ܘܬܽܘܒ܆ ܐܶܠܳܐ ܗܽܘ ܚܒܺܝܫ ܒܫܽܘܒܚܳܐ.

ܡܰܢܽܘ ܗܳܟܺܝܠ ܡܶܠܬܳܐ ܣܰܩܽܘܒܠܳܝܬܳܐ ܢܣܺܝܡ ܠܽܘܩܒܰܠ ܗܳܢܶܝܢ ܕܗܳܟܰܢܳܐ ܚܕܳܐ ܠܰܚܕܳܐ ܣܰܩܽܘܒ̈ܠܳܝܳܢ܆ ܘܣܳܦ̈ܩܳܢ ܠܘܳܬ ܗܦܽܘܟܝܳܐ ܕܰܚ̈ܕܳܕܶܐ܆ ܡܶܛܽܠ ܗܳܝ ܕܳܐܦ ܥܰܡܶܗ ܕܺܝܠܳܗ̇ ܕܰܟܝܳܢܳܐ ܢܳܨ̈ܝܳܢ ܗܳܠܶܝܢ ܕܡܶܬܰܐܡܪ̈ܳܢ. ܡܳܢܳܐ ܓܶܝܪ ܠܳܐ ܐܶܡܰܪ ܡܶܢ ܗܳܠܶܝܢ ܠܳܐ ܡܶܫܟ̈ܚܳܢܝܳܬܳܐ܆ ܗܰܘ ܡܰܟܬܒ ܒܺܝܫܳܐ ܘܛܽܘܠܺܝܩܳܐ ܕܡܰܢܺܝ̈ܢܳܝܶܐ܆ ܘܪܺܝܫܳܐ ܕܕܽܘܓܡ̈ܰܐܛܰܐ ܢܕܺܝ̈ܕܶܐ܆ ܘܣܳܐܶܡ ܢܳܡܽܘܣܳܐ ܕܠܳܐ ܢܳܡܽܘܣܳܝܽܘܬܳܐ. ܠܰܘ ܟܝܢܳܐ ܣܳܡ ܠܳܗ̇ ܠܒܺܝܫܬܳܐ ܘܰܠܗܳܢܳܐ ܕܠܳܐ ܪܺܝܫܳܐ ܘܠܳܐ ܥܒܺܝܕܳܐ܆ ܠܳܐ ܛܰܟܣܳܗ̇ ܠܗܳܕܶܐ ܣܰܩܽܘܒܠܳܐܺܝܬ ܘܰܐܩܺܝܡܳܗ̇ ܠܽܘܩܒܰܠ ‌ܐܰ‌ܠܳܗܳܐ ܗܰܘ ܛܳܒܳܐ ܒܽܐܘܣܺܝܰܐ܆ ܠܰܘ ܟܰܕ ܡܦܰܠܶܓ ܠܳܗ̇ ܠܒܺܝܫܬܳܐ ܐܰܘ ܟܺܝܬ ܠܗܽܘܠܶܐ ܠܦܺܐܪ̈ܶܐ ܕܠܳܐ ܣܳܟܳܐ܆ ܣܰܓܺܝ̈ܶܐܐ ܥܒܰܕ ܐܶܢܽܘܢ ܠܠܳܐ ܥܒܺܝ̈ܕܶܐ܆ ܘܰܐ‌ܠܳܗ̈ܶܐ ܕܠܳܐ ܡܶܢܝܳܢ܆ ܘܰܠܗܳܠܶܝܢ ܕܠܳܐ ܪܺܝܫܳܐ ܐܰܥܶܠ ܠܰܢ܆ ܘܰܠܣܰܓܺܝܽܐܘܬ ܐܰ‌ܠܳܗ̈ܶܐ ܕܚܰܢ̈ܦܶܐ ܘܰܠܬܰܟܬܽܘܫ ܓܰܢ̱ܒܳܪ̈ܶܐ܆ ܕܰܡܡܰܫܚܺܝܢ ܘܰܙܥܽܘܪܺܝܢ ܠܘܳܬ ܓܽܘܕܳܦܳܐ ܚܰܘܺܝ ܐܶܢܽܘܢ܆ ܐܶܢ ܟܺܝܬ ܗܳܢܽܘܢ ܐܰܝܟ ܕܰܒܫܽܘܟܳܢܳܐ ܡܶܢ ܒܢܰܝ̈ܢܳܫܳܐ ܐܰܝܟ ܕܒܣܝܳܡܳܐ ܡܥܰܠܶܝܢ ܥܳܒܕܺܝܢ ܐܰ‌ܠܳܗ̈ܶܐ܆ ܘܰܠܗܳܠܶܝܢ ܙܳܟܽܘܬܳܐ ܠܽܘܩܒܰܠ ܓܰܢ̱ܒܳܪ̈ܶܐ ܝܳܗܒܺܝܢ܆ ܗܳܢܳܐ ܕܶܝܢ ܠܽܘܩܒܰܠ ܗܰܘ ܕܰܠܚܽܘܕܰܘܗ̱ܝ ܐܺܝܬܰܘܗ̱ܝ ܐܰ‌ܠܳܗܳܐ܆ ܠܽܘܩܒܰܠ ܥܶܠܬܳܐ ܕܗܳܠܶܝܢ ܕܺܐܝܬܰܝܗܶܝܢ܆ ܠܽܘܩܒܰܠ ܗܰܘ ܕܰܠܗܰܠ ܡܶܢ ܟܽܠ܆ ܚܰܝܠܳܐ ܒܺܝܫܳܐ ܘܗܽܘܠܶܐ ܣܳܕܰܪ ܣܰܩܽܘܒܠܳܐܺܝܬ܆ ܘܰܡܩ̣ܰܪܒܳܢܳܐ ܫܘܶܐ ܒܰܡܬܽܘܡܳܝܽܘܬܳܐ ܡܶܢ ܫܶܠܝ ܒܳܪܶܐ܆ ܕܦܺܐܪ̈ܶܐ ܫ̈ܰܘܝ̣ܰܝ̣ ܡܰܘܥܺܝܬܳܐ ܘܫܳܘ̈ܚܰܝ ܐܰܟܚܕܳܐ ܐܺܝܬ ܠܶܗ܆ ܟܶܢ̈ܫܶܐ ܕܕܰܝ̈ܘܶܐ ܘܰܕܚܰܝ̈ܠܰܘܳܬܳܐ ܣܰܩܽܘܒ̈ܠܳܝܶܐ܆ ܠܰܘ ܠܗܽܘܢ ܠܗܳܠܶܝܢ܆ ܟܰܕ ܠܳܐ ܡܰܪ̈ܓܫܳܢܶܐ ܘܫܳܢ̈ܝܶܐ ܐܺܝܬܰܝܗܽܘܢ ܒܰܟܝܳܢܳܐ܆ ܐܰܝܟ ܬܶܫܒܚܽܘܢ̈ܝܳܬܳܐ ܗܳܠܶܝܢ ܣܳܒܳܬܳܢ̈ܝܳܬܳܐ ܕܫܽܘܥ̈ܝܳܬܶܗ܆ ܝܰܗ̱ܒ ܪܶܓܬܳܐ ܕܢܽܘܗܪܳܐ ܗܰܘ ܥܶܠܳܝܳܐ܆ ܠܰܘ ܗܽܘܠܳܢܳܝܳܐ ܡܶܬܚܰܙܝܳܢܳܐ ܣܳܐܶܡ ܠܶܗ ܠܗܰܘ ܠܳܐ ܗܽܘܠܳܢܳܝܳܐ ܘܠܳܐ ܡܶܬܚܰܙܝܳܢܳܐ܆ ܠܰܘ ܫܽܘܪܳܐ ܒܳܢܶܐ܆ ܘܚܳܒܶܫ ܒܶܗ ܠܢܽܘܗܪܳܐ܆ ܘܕܰܐܝܟ ܐܰܝܢܳܐ ܕܠܰܝܬ ܠܶܗ ܫܽܘܪܳܐ܆ ܕܡܶܢ ܪܽܘܚܩܳܐ ܡܶܬܚܙܶܐ ܥܳܒܶܕ ܠܶܗ ܠܗܳܢܳܐ܆ ܘܟܰܕ ܡܶܢ ܫܳܢܝܽܘܬܳܐ ܕܶܝܢ ܐܶܡܰܪ ܠܦܺܐܪ̈ܶܐ ܕܗܽܘܠܶܐ܆ ܡܰܠܽܘܢ ܕܶܝܢ ܠܳܗ ܠܗܽܘܠܶܐ܆ ܕܒܰܕܡܽܘܬ ܫܰܪܒܬܳܐ ܡܶܕܶܡ ܕܺܐܝܬܶܝܗ̇ ܐܳܚܽܘܕܬܳܐ ܕܦܰܪ̈ܨܽܘܦܶܐ ܣܰܓܺܝ̈ܶܐܐ ܐܶܙܕܰܝܢܰܬ ܥܰܠ ܢܽܘܗܪܳܐ܆ ܥܒܰܕ ܕܰܠܘܳܬ ܣܰܟܽܘܠܬܳܢܽܘܬܳܐ ܪܺܝܫܳܝܬܳܐ ܢܶܦܽܘܩ ܠܶܗ ܗܽܘ ܣܥܳܝܳܐ܆ ܙܟܳܬ ܓܶܝܪ܆ ܡܶܛܽܠ ܟܺܝܬ ܕܰܐ‌ܠܳܗܳܐ ܗܰܘ ܛܳܒܳܐ ܟܰܕ ܒܰܐܓܽܘܢܳܐ ܣܰܓܺܝܳܐܐ ܩܳܡ ܘܰܒܕܶܚܠܬܳܐ ܗܘ̣ܳܐ܆ ܚܠܳܦ ܓܗܳܝܬܳܐ ܕܡܶܢ ܒܺܝ̈ܫܳܬܳܐ ܗܳܠܶܝܢ ܕܬܰܠ̣̈ܝܳܢ ܗ̱ܘܰܝ̈ ܠܥܶܠ ܡܶܢܶܗ܆ ܠܰܐܢܰܢܩܺܐ ܐܶܬܳܐ ܕܰܢܡܰܠܶܐ ܪܶܓܬܳܗ̇ ܕܗܽܘܠܶܐ ܘܢܶܟܠܶܐ ܠܫܳܢܝܽܘܬܳܗ̇܆ ܘܰܡܢܳܬܳܐ ܡܶܕܶܡ ܢܶܦܣܽܘܩ ܡܶܢ ܢܽܘܗܪܳܐ ܒܰܝܬܳܝܳܐ ܕܺܝܠܶܗ ܘܰܢܫܰܕܰܪ ܠܬܰܚܬ܆ ܗܳܝ ܟܺܝܬ ܕܳܐܡܰܪ ܕܳܐܦ ܐܶܬܡܰܙܓܰܬ ܒܒܺܝ̈ܫܶܐ܆ ܒܣܰܓܺܝܽܐܘܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܗܽܘܠܶܐ ܗܳܝ ܣܰܓܺܝܰܐܬ ܦܰܪ̈ܨܽܘܦܶܐ܆ ܟܰܕ ܒܟܽܠܗܽܘܢ ܗܳܠܶܝܢ ܦܺܐܪ̈ܶܐ ܡܶܬܢܰܬܥܳܐ ܗ̱ܘܳܬ܆ ܕܝܰܬܺܝܪ ܚܰܟܺܝܡܳܐ ܐܰܝܟ ܕܕܳܡܝܳܐ ܐܺܝܬܶܝܗ̇ ܗ̱ܘܳܬ ܪܶܐܰܐ ܗܳܝ ܕܰܠܘܳܬ ܚܰܢ̈ܦܶܐ܆ ܛܳܒ ܡܶܢ ܐܰ‌ܠܳܗܳܐ ܗܰܘ ܛܳܒܳܐ ܕܡܰܢܺܝ̈ܢܳܝܶܐ܆ ܐܳܦ ܓܶܝܪ ܕܺܝܠܗܽܘܢ ܐܺܝܬܰܘܗ̱ܝ ܗܳܢܳܐ܆ ܗܰܘ ܕܗܳܟܰܢܳܐ ܡܚܺܝܠܳܐ ܘܕܳܚܽܘܠܳܐ ܘܰܣܦܺܝܩܳܐ ܡܶܢ ܣܰܟܽܘܠܬܳܢܽܘܬܳܐ܆ ܘܠܰܘ ܕܐ̱ܢܳܫ ܡܶܢ ܗܳܢܽܘܢ ܕܫܰܦܺܝܪ ܡܶܬܪܰܥܶܝܢ܆ ܐܰܝܟܳܐ ܟܺܝܬ ܕܰܒܫܽܘܥ̈ܝܳܬܳܐ ܡܶܬܡܰܬ̣ܠܳܐ ܗܳܝ܆ ܕܰܠܓܰܒܪܳܐ ܒܰܝܬܳܝܳܐ ܕܺܝܠܳܗ̇ ܠܰܩܪܘܢܘܤ ܐܰܛܥܝܰܬ ܒܚܽܘܟܡ̈ܶܐ܆ ܕܠܰܒ̈ܢܰܝܳܐ ܕܺܝܠܳܗ̇ ܐܳܟܶܠ ܗ̱ܘܳܐ܆ ܘܟܺܐܦܳܐ ܚܠܳܦ ܒܳܒܽܘܣܳܐ ܗܰܘ ܕܫܰܪܺܝܟ ܗ̱ܘܳܐܠܳܗ̇ܘܗܳܫܳܐܝܺܠܺܝܕܗ̱ܘܳܐܟܰܣܝܰܬ ܒܥܰܙܪܽܘܪ̈ܶܐ܆ ܘܒܰܕܡܽܘܬ ܫܰܒܪܳܐ ܥܰܬܕܰܬ ܘܰܐܥܒܰܕܬܶܗ ܒܝܰܕ ܡܰܛܥܝܳܢܽܘܬܳܐ ܕܢܶܒܠܥܺܝܗ̇ ܠܟܺܐܦܳܐ.

ܘܶܐܬܒܰܩܰܘ ܠܺܝ ܒܦܠܘܐܪ̈ܝܐܤ ܐܰܘܟܺܝܬ ܒܓ̈ܰܠܰܘܗ̱ܝ^[65] ܕܡܰܐܢܺܝ ܗܳܢܽܘܢ ܛܰܠܝܽܘ̈ܣܳܝܶܐ. ܒܥܳܠܡܳܐ ܐܳܡܰܪ ܕܢܽܘܗܪܳܐ܆ ܠܳܐ ܐܺܝܬ ܢܽܘܪܳܐ ܕܡܰܘܩܕܳܐ܆ ܐܰܝܟܰܢܳܐ ܕܠܽܘܩܒܰܠ ܒܺܝܫܳܐ ܬܶܫܬܕܶܐ܆ ܘܳܐܦܠܳܐ ܦܰܪܙܠܳܐ ܗܰܘ ܦܳܣܽܘܩܳܐ܆ ܘܳܐܦܠܳܐ ܡܰܝ̈ܳܐ ܚܳܢܽܘܩ̈ܶܐ. ܥܰܠ ܗܳܠܶܝܢ ܓܶܝܪ ܐܺܝܬ ܗ̱ܘܳܐ ܣܽܘܢܩܳܢܳܐ ܠܰܐܠܳܗܳܐ܆ ܐܳܘ ܕܝܰܬܺܝܪ ܡܶܢ ܟܽܠܢܳܫ ܡܣܰܝܒܳܐ܆ ܡܳܢܳܐ ܕܶܝܢ. ܒܪܶܡܙܳܐ ܒܰܠܚܽܘܕܰܘܗ̱ܝ ܠܳܐ ܣܳܦܶܩ ܗ̱ܘܳܐ ܕܰܠܟܽܠ ܢܚܰܒܶܠ ܟܢܺܝܫܳܐܺܝܬ ܘܡܶܢ ܫܶܠܝ܆ ܗܰܘ ܕܡܰܝܬܶܐ ܠܟܽܠ ܒܡܶܠܬܳܐ ܕܦܽܘܡܶܗ^[66]܆ ܐܰܝܟ ܗܳܝ ܕܡܶܢ ܦܰܘܠܽܘܤ ܐܶܬܰܐܡܪܰܬ܆ ܐܶܠܳܐ ܘܠܳܐ ܡܶܕܶܡ ܐܰܟܣܢܳܝܳܐ ܥܒܰܕܬ܆ ܕܳܐܦ ܗܳܕܶܐ ܥܰܠ ܓܽܘܕܳܦ̈ܶܐ ܐܰܘܣܶܦܬ. ܐܰܢ̱ܬ ܓܶܝܪ ܗܰܘ ܕܶܐܡܰܪܬ ܕܒܰܐܓܽܘܢܳܐ ܩܳܡ܆ ܘܰܚܠܳܦ ܓܗܳܝܬܳܐ ܘܗ̱ܝ ܕܢܶܬܪܰܥܽܘܢ ܘܢܶܫܦܽܘܢ ܘܰܢܫܰܢܽܘܢ ܡܰܩܪ̈ܒܳܢܶܐ܆ ܡܢܳܬܳܐ ܡܶܕܶܡ ܢܶܬܶܠ ܡܶܢ ܢܽܘܗܪܳܐ ܒܰܝܬܳܝܳܐ܆ ܒܰܕܡܽܘܬ ܗܳܢܽܘܢ ܕܗܶܢܽܘܢ ܒܺܐܝ̈ܕܰܝܗܽܘܢ ܗܳܘܶܝܢ ܩܳܛܽܘܠܳܐ ܕܢܰܦܫܗܽܘܢ܆ ܐܰܝܟܰܢܳܐ ܕܠܳܐ ܫܶܒ̈ܝܶܐ ܢܶܬܕܰܒܪܽܘܢ܆ ܠܪ̈ܽܘܫܥܶܐ ܗܳܠܶܝܢ ܕܺܝܠܳܟ ܢܩܶܦܬ܆ ܕܰܐܣܒܰܪܬ ܥܠܰܘܗ̱ܝ ܕܳܐܦ ܥܰܠ ‌ܐܽܘܪ̈ܓܰܢܶܐ ܩܪ̈ܳܒܳܝܶܐ ܠܘܳܬ ܢܩܰܡܬ̣ܳܐ܆ ܘܳܐܦ ܒܡ̈ܶܠܶܐ ܕܶܝܢ ܟܢܺܝ̈ܟܳܬܳܐ ܠܰܡܚܺܝܠܽܘܬܶܗ ܘܰܠܕܽܘܘܳܕܳܐ ܕܡܶܨܛܰܪܟܳܢܽܘܬܶܗ ܡܚܰܦܶܐ ܐܰܢ̱ܬ ܟܰܕ ܐܳܡܰܪ ܐܰܢ̱ܬ܆ ܕܒܰܕܡܽܘܬ ܠܶܩܛܳܐ ܕܫܶܓܫܳܐ ܘܰܕܡܰܛܥܝܳܢܽܘܬܳܐ ܗܳܕܶܐ ܡܢܳܬܳܐ ܐܶܬܝܰܗܒܰܬ ܠܗܽܘܠܶܐ܆ ܐܰܝܟܰܢܳܐ ܕܡܶܢ ܒܳܬܰܪ ܗܳܠܶܝܢ ܗܽܘ ܡܽܘܙܳܓܳܐ ܐܰܝܟ ܕܰܐܢ̱ܬ ܐܳܡܰܪ ܐܰܢ̱ܬ ܢܶܫܬܰܚܰܠ܆ ܘܕܰܟܝܳܐ ܡܰܠܽܘܢ ܢܶܫܬܟܰܚ ܗܽܘ ܢܽܘܗܪܳܐ ܐܰܝܟ ܗܰܘ ܕܡܶܛܽܠ ܬܶܛܪܳܐ ܕܰܚܠܺܝܛ ܒܚܰܡܪܳܐ܆ ܘܠܰܘ ܡܶܛܽܠ ‌ܐܰ‌ܠܳܗܳܐ ܣܳܒܰܪ ܐܰܢ̱ܬ ܕܥܳܒܶܕ ܐܰܢ̱ܬ ܠܗܶܝܢ ܠܡ̈ܶܠܶܐ܆ ܘܡܶܢ ܒܳܬܰܪ ܫܽܘܚܳܠܳܐ ܐܰܝܟܰܢܳܐ ܕܳܐܦ ܗܳܕܶܐ ܐܺ݀ܡܰܪ ܐܰܟܘܳܬܳܟ܆ ܡܫܰܡܠܝܳܐܺܝܬ ܠܰܚܒܳܠܳܐ ܬܶܫܪܰܟ ܗܺܝ ܗܽܘܠܶܐ. ܒܗܶܝܢ ܓܶܝܪ ܒܡ̈ܶܠܶܐ܆ ܗܳܟܰܢܳܐ ܠܥܶܠ ܣܳܡܢܳܟ ܕܳܐܡܰܪ ܐܰܢ̱ܬ. ܐܰܝܟܰܢܳܐ ܟܺܝܬ ܕܗܺܝ ܗܽܘܠܶܐ ܬܶܬܥܛܶܐ ܡܶܢ ܡܨܰܥܬܳܐ.

ܠܡܳܢܳܐ ܗܳܟܺܝܠ ‌ܐܳܘ ܐܰܢ̱ܬ ܣܪܺܝܩܳܐ܆ ܟܽܠܗܶܝܢ ܗܳܠܶܝܢ ܡ̈ܶܠܶܐ ܢܳܨ̈ܝܳܬ̣ ܥܰܡ ܐܰ‌ܠܳܗܳܐ ܣܪܺܝܩܳܐܺܝܬ ܚܰܝܶܛܬ. ܠܘܳܬ ܚܰܣܺܝܪܽܘܬ ܗܰܘܢܳܐ ܓܶܝܪ ܐ̱ܚܪܳܝܬܳܐ ܫܪܶܟ ܘܢܦܰܩ ܠܳܟ܆ ܣܽܘܡܦܪܣܡܐ ܐܰܘܟܺܝܬ ܟܽܘܢܳܫܳܐ ܐ̱ܚܪܳܝܳܐ ܕܡܶܠܬܳܐ܆ ܕܰܟܪ̈ܽܘܟܝܶܐ ܗܳܢܽܘܢ ܡܦܰܬܟ̈ܶܐ. ܐܶܢ ܓܶܝܪ ܠܗܽܘܠܶܐ ܣܳܡܬ ܘܰܠܦܺܐܪ̈ܶܝܗ̇ ܕܰܡܚܰܒ̈ܠܳܢܶܐ ܕܰܚ̈ܕܳܕܶܐ ܐܺܝܬܰܝܗܽܘܢ܆ ܐܰܝܟܰܢܳܐ ܕܳܐܦ ܣܳܣܳܐ ܢܶܓܒܠܽܘܢ ܗܳܝ ܡܛܰܠܩܳܢܺܝܬܳܐ܆ ܙܳܕܶܩ ܗ̱ܘܳܐ ܕܰܠܗܳܝ ܕܡܶܢ ܒܳܬܰܪ ܩܰܠܺܝܠ ܗܺܝ ܡܶܢ ܢܰܦܫܳܗ̇ ܥܬܺܝܕܳܐ ܕܬܶܬܚܰܒܰܠ ܬܶܫܒܩܺܝܗ̇܆ ܘܠܳܐ ܕܰܒܝܰܕ ܫܽܘܥ̈ܝܳܬܳܟ ܬܥܰܪܙܠܺܝܗ̇ ܥܰܡ ܛܳܒܳܐ܆ ܘܰܠܗܳܝ ܕܡܶܢ ܣܳܣܳܐ ܡܶܬܐܰܟܠܳܐ܆ ܬܶܫܒܩܺܝܗ̇ ܕܠܽܘܩܒܰܠ ‌‌ܐܰ‌ܠܳܗܳܐ ܬܰܝܬܶܐ ܙܳܟ̈ܘܳܬܳܐ.

ܟܒܰܪ ܕܶܝܢ ܢܺܐܡܰܪ ܐ̱ܢܳܫ ܐ̱ܚܪܺܝܢ܆ ܐܶܠܳܐ ܙܳܕܶܩ ܗ̱ܘܳܐ ܕܬܶܬܡܰܙܰܓ ܐܰܟܚܕܳܐ ܥܰܡ ܗܽܘܠܶܐ ܡܢܳܬܳܐ ܡܶܕܶܡ ܡܶܢ ܢܽܘܗܪܳܐ܆ ܐܰܝܟܰܢܳܐ ܕܗܳܝ ܕܰܡܝܰܬܪܳܐ ܬܶܙܟܶܐ ܗܘܳܬ܆ ܘܰܠܗܽܘܠܶܐ ܬܫܰܚܠܶܦ ܬܰܥܒܰܪ ܘܬܶܓܰܕ ܠܘܳܬܳܗ̇. ܗܳܕܶܐ ܐܶ‌ܠܽܘ ܡܫܰܒܰܚ ܗ̱ܘܳܐ ܗܰܘ ܕܰܫ̣ܢܳܐ ܫܳܢܝܽܘܬܳܐ ܗܳܝ ܠܳܐ ܡܡܰܙܰܓܬܳܐ܆ ܟܒܰܪ ܐܺܝܬ ܗ̱ܘܳܐ ܠܗܽܘܢ ܓܰܘܢܳܐ ܠܰܓܒܽܘ̈ܠܝܘܗ̱ܝ܆ ܐܰܘ ܐܳܦܠܳܐ ܠܫܽܘܪܳܝܳܐ ܕܕܽܘܓܡܰܐ ܗܰܘ ܢܕܺܝܕܳܐ ܡܰܪܡܶܐ ܗ̱ܘܳܐ. ܟܽܠܶܗ ܓܶܝܪ ܐܰܓܽܘܢܳܐ ܠܶܗ܆ ܕܢܶܬܶܠ ‌ܐܽܘܚܕܳܢܳܐ ܠܒܺܝܫܬܳܐ܆ ܘܰܕܠܳܐ ܡܚܰܝܰܒܬܳܐ ܢܚܰܘܶܝܗ̇ ܠܰܚܛܺܝܬܳܐ܆ ܐܰܝܟ ܡܰܢ ܕܗܽܘܠܶܐ ܐܳ‌ܠܨܳܐ ܠܡܶܚܛܳܐ܆ ܗܳܝ ܕܓܳܒܠܳܐ ܣܳܣܳܐ ܗܳܝ ܡܛܰܠܩܳܢܺܝܬܳܐ܆ ܐܶܡܰܪ ܓܶܝܪ ܠܥܶܠ܆ ܕܡܶܛܽܠ ܗܳܕܶܐ ܐܶܬܝܰܗܒܰܬ ܡܢܳܬܳܐ ܡܶܢ ܢܽܘܗܪܳܐ ܠܗܽܘܠܶܐ ܟܰܕ ܐܶܙܕܰܝܢܰܬ ܥܠܰܘܗ̱ܝ ܒܰܩܪܳܒܳܐ܆ ܬܽܘܒ ܓܶܝܪ ܠܡ̈ܶܠܶܐ ܕܺܝܠܶܗ ܐܶ݀ܣܺܝܡ ܗܳܪܟܳܐ܆ ܐܰܝܟܰܢܳܐ ܕܢܶܬܢܛܰܪ ܟܝܳܢܶܗ ܕܛܳܒܳܐ܆ ܟܰܕ ܐܰܓܗܺܝ ܟܝܳܢܳܐ ܗܰܘ ܡܒܰܪܟܳܐ ܡܶܢ ܢܽܘܪܳܗ̇ ܕܗܽܘܠܶܐ܆ ܘܡܶܢ ܣܳܣܳܐ ܗܳܝ ܡܚܰܒܠܳܢܺܝܬܳܐ.

ܐܶܢ ܗܳܟܺܝܠ ܟܝܳܢܶܗ ܕܛܳܒܳܐ܆ ܦܽܘܪܩܳܢܳܐ ܝܰܗ̱ܒ ܢܰܦܫܶܗ ܡܢܳܬܳܐ ܒܰܝܬܳܝܬܳܐ ܠܗܽܘܠܶܐ܆ ܥܰܠ ‌ܐܰܦ̈ܰܝ ܗܳܝ ܕܠܳܐ ܢܶܣܰܒ ܢܶܣܝܳܢܳܐ ܕܢܽܘܪܳܐ ܘܰܕܣܳܣܳܐ ܗܳܝ ܡܚܰܒܠܳܢܺܝܬܳܐ܆ ܩܰܕܺܝܡܳܐ ܝܺܕܺܝܥܳܐ ܕܰܡܢܳܬܳܐ ܗܳܝ ܕܶܐܬܝܰܗܒܰܬ ܡܶܢ ܛܳܒܳܐ ܘܶܐܬܡܰܙܓܰܬ ܒܗܽܘܠܶܐ܆ ܠܘܳܬ ܗܳܝ ܕܬܶܬܛܰܠܰܩ ܘܬܺܐܩܰܕ ܐܶܬܝܰܗܒܰܬ܆ ܥܕܰܡܳܐ ܕܢܶܫܬܰܚܰܠ ‌ܐܰܝܟ ܫܳܛܽܘܪ̈ܘܳܬܶܗ ܕܡܰܐܢܺܝ܆ ܗܰܘ ܕܰܫ̣ܢܳܐ ܗܽܘ ܡܽܘܙܳܓܳܐ. ܡܳܕܶܝܢ܆ ܦܣܺܝܩ ܠܦܶܠܓܳܐ ܗܘ̣ܳܐ ܗܽܘ ܛܳܒܳܐ܆ ܘܰܡܢܳܬܳܐ ܗܳܝ ܕܶܐܬܬܰܠܫܰܬ ܡܶܢ ܢܽܘܗܪܳܐ܆ ܠܗܽܘܠܶܐ ܦܳܠܚܳܐ ܥܰܒܕܽܘܬܳܐ܆ ܘܡܶܬܪܰܡܝܳܐ ܠܣܳܣܳܐ ܗܳܝ ܡܛܰܠܩܳܢܺܝܬܳܐ܆ ܘܰܕܬܶܚܛܶܐ ܡܶܬܰܐܠܨܳܐ.

ܠܳܗ̇ ܠܗܳܕܶܐ ܡܢܳܬܳܐ ܕܢܽܘܗܪܳܐ ܕܰܒܗܽܘܠܶܐ ܐܶܬܡܰܙܓܰܬ܆ ܐܳܦ ܕܝܶܗܒܰܬ ܥܶܠܬܳܐ ܕܢܶܬܒܪܶܐ ܗܳܢܳܐ ܥܳܠܡܳܐ ܐܳܡܪܺܝܢ܆ ܘܕܶܐܬܶܐܠܶܨ ܟܺܝܬ ܐܰ‌ܠܳܗܳܐ܆ ܡܶܛܽܠ ܡܶܬܚܰܠܛܳܢܽܘܬܳܐ ܗܳܝ ܕܕܰܐܝܟ ܗܳܕܶܐ ܕܰܠܘܳܬ ܒܺܝܫܬܳܐ܆ ܕܢܶܥܒܶܕ ܠܟܽܠ. ܘܶܐܢ ܕܶܝܢ ܠܳܐ܆ ܠܡܳܢܳܐ ܐܳܡܪܺܝܢ ܐܺܝܬ ܗ̱ܘܳܐ ܠܶܗ ܠܰܐܠܳܗܳܐ ܣܽܘܢܩܳܢܳܐ ܥܰܠ ܥܳܠܡܳܐ܆ ܘܥܰܠ ܒܢܰܝ̈ܢܳܫܳܐ ܕܠܳܐ ܥܬܺܝܕܺܝܢܗ̱ܘܰܘܕܢܶܫܬܰܡܥܽܘܢܠܶܗ. ܟܽܠܗܶܝܢ ܓܶܝܪ ܡܶܢܚܽܘܠܛܳܢܳܐ ܗܳܢܐ ܐܶܬܩܰܝܡ̈ܶܝܢ ܕܥܰܡܗܶܝܢ ܐܳܦ ܒܰܪܢܳܫܳܐ. ܡܢܳܬܰܐ ܗ̱ܘ ܓܶܝܪ ܐܳܦ ܗܽܘ ܕܥܳܠܡܳܐ ܟܽܠܶܗ.

ܘܰܐܝܟܰܢܳܐ ܟܕ ܗܳܠܶܝܢ ܫܳܢܶܝܢ ܐܢ̱ܬܽܘܢ ܠܳܐ ܓܶܝܪ ܢܺܐܡܰܪ ܕܡܰܘܕܶܝܢ ܐܢ̱ܬܽܘܢ܆ ܢܣܰܝܒܰܪܟܽܘܢ ܐ̱ܢܳܫ. ܐܰܝܟܰܢܳܐ ܕܶܝܢ ܐܰ‌ܠܳܗܳܐ ܡܶܢ ܐܰܢܰܢܩܺܐ ܒܳܪܶܐ. ܐܰܝܟܰܢܳܐ ܗܰܘ ܕܶܐܬܥܫܶܡ ܛܪܽܘܢܳܐܺܝܬ ܡܶܢ ܗܽܘܠܶܐ܆ ܡܶܢܶܗ ܡܶܢ ܚܽܘܠܛܳܢܳܐ ܗܰܘ ܛܪܽܘܢܳܝܳܐ܆ ܡܠܰܚܡܽܘܬܳܐ ܕܥܳܠܡܳܐ ܢܶܫܟܰܚ ܠܰܡܩܰܝܳܡܽܘ. ܐܰܝܟܰܢܳܐ ܟܰܕ ܦܺܐܪ̈ܶܐ ܕܗܽܘܠܶܐ ܫܳܓܫܺܝܢ ܘܰܡܚܰܒܠܺܝܢ ܠܰܚ̈ܕܳܕܶܐ܆ ܐܳܦ ܡܶܢ ܩܪܳܒܳܐ ܘܰܫܓܽܘܫܝܳܐ ܘܡܰܨܽܘܬܳܐ ܚܛܰܦܘ ܡܢܳܬܳܐ ܡܶܢ ܛܳܒܳܐ܆ ܢܶܬܩܰܝܰܡ ܡܶܕܶܡ܆ ܘܠܳܐ ܗ̱ܘܳܐ ܡܰܠܽܘܢ ܢܶܫܬܪܶܐ. ܫܓܽܘܫܝܳܐ ܓܶܝܪ ܘܽܐܘܠܨܳܢܳܐ܆ ܐܶܡܳܐ ܕܰܫܪܳܝܳܐ ܘܠܰܘ ܕܩܽܘܝܳܡܳܐ.

ܡܶܢ ܐܰܝܟܳܐ ܗܳܟܺܝܠ ܒܫܰܦܺܝܪܽܘܬ ܛܶܟܣܳܐ ܡܶܬܬܰܝܬܶܐ ܘܡܶܬܡܰܠܰܚ ܗܳܢܳܐ ܟܽܠ܆ ܟܰܕ ܫܳܥ̈ܶܐ ܒܫܰܦܺܝܪܽܘܬ ܡܽܘܙܳܓܳܐ ܡܶܬܡܰܙ̈ܓܳܢ܆ ܐܺܝܡܳܡܳܐ ܘܠܶܠܝܳܐ܆ ܫܶܡܫܳܐ ܘܣܰܗܪܳܐ ܒܛܶܟܣܳܐ܆ ܐܳܦ ܡܰܘܣܦܺܝܢ ܐܳܬܶܝܢ ܐܳܦ ܫܳܦܶܝܢ ܐܳܙܺܠ̱ܝܢ ܒܝܽܘ̈ܒܳܠܶܐ ܘܩܽܘ̈ܒܳܠܶܐ ܡܠܰܚ̈ܡܶܐ ܕܡܶܢ ܚ̈ܕܳܕܶܐ܆ ܪ̈ܽܘܚܶܐ ܕܢܳܫ̈ܒܳܢ܆ ܐܰܪܥܳܐ ܕܡܶܙܕܰܪܥܳܐ ܘܶܡܬܚܰܨܕܳܐ܆ ܝܰܡܳܐ ܕܠܰܬܚܽܘ̈ܡܶܐ ܒܰܝ̈ܬܳܝܶܐ ܕܺܝܠܶܗ ܡܶܫܬܰܘܕܰܥ܆ ܘܰܒܚܴܠܳܐ ܡܶܬܦܰܓܰܕ ܘܟܳܠܶܐ ܘܬܳܟܶܤ ܠܪܶܕܝܳܐ ܕܫܶܦ̈ܥܰܘܗܝ܆ ܘܗܽܘ ܠܘܳܬ ܢܰܦܫܶܗ ܡܰܗܦܶܟ ܡܰܝܬܶܐ ܠܳܗ̇ ܠܰܢܦܺܝܚܽܘܬܳܐ ܘܰܙܩܺܝܦܽܘܬܳܐ ܕܓܰܠ̈ܠܰܘܗ̱ܝ ܡܶܢ ܟܽܠ ܦܪܽܘܤ܆ ܡܶܛܽܠ ܕܚܰܕ ܗ̱ܘ̣ ܥܳܒܽܘܕܳܐ ܘܰܡܕܰܒܪܳܢܳܐ܆ ܘܳܐܦ ܩܰܝܳܡ ܘܳܐܦ ܐܰܚܺܝܕ ܠܟܽܠ. ܐܶܢ ܕܶܝܢ ܐܰܝܟ ܡܶܠܬܟܽܘܢ ܫܓܺܝܫܽܘܬܳܐ ܘܰܐܢܰܢܩܺܐ ܐܺܝܬ ܗ̱ܘܳܐ ܕܩܰܕܺܝܡܳܐ ܗ̱ܘܳܬ ܠܥܳܒܽܘܕܽܘܬܳܐ ܘܗ̱ܝ ܫܰܠܺܝܛܳܐ ܗ̱ܘܳܬ܆ ܢܶܬܶܠ ܓܶܝܪ ܗܳܟܰܢܳܐ܆ ܘܠܳܐ ܡܶܕܶܡ ܐܺܝܬ ܗ̱ܘܳܐ ܕܰܒܛܶܟܣܳܐ ܡܶܬܬܙܺܝܥ. ܐܶܠܳܐ ܟܽܠ ܡܶܕܶܡ ܡܶܫܬܪܶܐ ܗ̱ܘܳܐ.

ܡܶܢ ܐܰܝܟܳܐ ܗܳܟܺܝܠ ‌ܐܳܡܪܺܝܢ ܐܢ̱ܬܽܘܢ ܕܠܰܦ̊ܠܰܐܛܘܢ ܢܳܩܦܺܝܢ ܐܢ̱ܬܽܘܢ ܐܳܘ ܕܝܰܬܺܝܪ ܡܶܢ ܟܽܠ ܡܣܰܝܒܺܝܢ. ܟܰܕ ܓܶܝܪ ܟܬܳܒܳܐ ܐܰ‌ܠܳܗܳܝܳܐ ܠܒܰܪ ܣܳܐܶܡ ܠܟܽܘܢ܆ ܘܰܐܝܟ ܕܰܠܒܰܪܒܪ̈ܳܝܶܐ ܘܕܰܒܟܽܠ ܡܶܕܶܡ ܠܳܐ ܡܰܪ̈ܐܙܶܐ ܕܡ̈ܶܠܶܐ ܟܳܗ̈ܢܳܝܳܬܳܐ ܐܺܝܬܰܝܟܽܘܢ ܫܳܕܶܐ ܠܟܽܘܢ ܡܶܢܶܗ܆ ܠܘܳܬ ܣܳܗ̈ܕܘܳܬܳܐ ܐܰܟܣ̈ܢܳܝܳܬܳܐ ܘܰܕܡܶܢ ܠܒܰܪ ܡܶܣܬܰܪܗܒܺܝܢ ܐܢ̱ܬܽܘܢ. ܘܗܳܕܶܐ ܟܰܕ ܬܰܪ̈ܥܶܐ ܐܳܚ̈ܕܳܢ ܒܰܐܦܰܝ̈ܟܽܘܢ. ܗܳܟܰܢܳܐ ܠܟܽܠ ‌ܐ̱ܢܳܫ ܐܺܝܬܰܝܟܽܘܢ ܐܳܦ ܣܰܩܽܘܒ̈ܠܳܝܶܐ ܐܳܦ ܒܥܶܠ̈ܕܒܳܒܶܐ ܘܰܣܢ̈ܺܝܐܶܐ. ܐܰܝܟܰܢܳܐ ܓܶܝܪ ܠܳܐ ܥܬܺܝܕܺܝܢ ܗ̱ܘܰܝܬܽܘܢ܆ ܕܳܐܦܠܳܐ ܕܫܳܠ̈ܡܳܢ ܠܢܰܦܫܟܽܘܢ ܐܳܡܪܺܝܢ ܐܢ̱ܬܽܘܢ. ܦ̊ܠܰܐܛܘܢ ܓܶܝܪ ܐܳܦܶܢ ܡܬܽܘܡܳܝܬܳܐ ܫܰܒܰܚ ܕܺܐܝܬܶܝܗ̇ ܗܽܘܠܶܐ܆ ܐܶܠܳܐ ܟܺܝܬ ܠܰܘ ܒܺܝܫܬܳܐ܆ ܐܳܦܠܳܐ ܕܰܟܝܳܢܳܐ ܒܺܝܫܳܐ܆ ܐܰܘ ܥܳܒܽܘܕܬܳܐ ܕܒܺܝܫܽܘܬܳܐ܆ ܐܰܘ ܕܣܺܝܡܳܐ ܣܰܩܽܘܒܠܳܐܺܝܬ ܠܽܘܩܒܰܠ ܛܳܒܳܐ܆ ܐܰܝܟܰܢܳܐ ܕܰܐܢ̱ܬܘܢ. ܐܰܝܟܰܢܳܐ ܟܺܝܬ ܕܗܽܘ ܐܳܦ ܕܡܶܢܳܗ̇ ܥܰܒܕܶܗ ܐܰ‌ܠܳܗܳܐ ܠܗܳܢܳܐ ܥܳܠܡܳܐ ܐܳܡܰܪ܆ ܘܡܶܢ ܗܳܪܟܳܐ ܐܳܦ ܐܶܡܳܐ ܐܳܦ ܡܪܰܒܝܳܢܺܝܬܳܐ ܘܰܡܩܰܒܠܰܬ ܠܟܽܠ ܩܳܪܶܐ ܠܳܗ̇܆ ܘܒܰܫܡ̈ܳܗܶܐ ܡܝܰܩܪ̈ܶܐ ܡܟܰܢܶܟ ܠܳܗ̇. ܐܶܠܐ. ܐܳܦܠܳܐ ܕܠܳܐ ܒܨܶܒܝܳܢܶܗ ܘܰܕܒܰܐܢܰܢܩܺܐ ܐܶܬܳܐ ܠܘܳܬ ܒܳܪܽܘܝܽܘܬܳܐ ܡܰܥܶܠ ܠܶܗ ܠܥܳܒܽܘܕܳܐ܆ ܐܰܝܟ ܠܶܫܳܢܟܽܘܢ ܘܬܰܪܥܺܝܬܳܐ ܕܺܝܠܟܽܘܢ ܗܳܝ ܢܳܨܝܰܬ ܥܰܡ ܐܰ‌ܠܳܗܳܐ. ܐܶܠܳܐ ܒܨܶܒܝܳܢܶܗ܆ ܘܡܶܛܽܠ ܛܳܒܽܘܬܶܗ ܒܰܠܚܽܘܕܶܝܗ̇ ܥܰܠ ܗܳܝ ܐܳܦ ܐܳܡܰܪ܆ ܐܳܡܪܺܝܢܰܢ ܕܶܝܢ ܠܥܶܠܬܳܐ ܗܳܝ ܕܡܶܛܽܠܳܬܳܗ̇ ܠܰܗܘܳܝܳܐ ܘܰܠܗܳܢܳܐ ܟܽܠ ܩܰܝܶܡ ܐܰ‌ܠܳܗܳܐ. ܛܳܒܳܐ ܐܺܝܬܰܘܗ̱ܝ ܗ̱ܘܳܐ. ܠܛܳܒܳܐ ܕܶܝܢ܆ ܘܠܳܐ ܚܰܕ ܚܣܳܡܳܐ ܗܳܘܶܐ܆ ܘܠܳܐ ܡܶܛܽܠ ܡܶܕܶܡ.

ܘܗܳܠܶܝܢ ܡܰܢ ܣܰܓܺܝ ܫܰܦܺܝܪ. ܠܗܳܝ ܕܶܝܢ ܕܰܡܬܽܘܡܳܝܬܳܐ ܐܺܝܬܶܝܗ̇ ܗܽܘܠܶܐ܆ ܗܳܝ ܕܡܶܢܳܗ̇ ܥܳܠܡܳܐ܆ ܠܳܐ ܫܳܠܡܺܝܢܰܢ. ܥܒܺܝܕܰܐ ܗ̄ܘ ܓܶܝܪ ܥܳܠܡܳܐ ܗܳܢܳܐ ܗܽܘܠܳܢܳܝܳܐ܆ ܥܒܺܝܕܳܐ ܕܶܝܢ܆ ܠܳܐ ܡܬܽܘܡܳܝܰܐ ܗ̄ܘ. ܐܰ‌ܠܳܗܳܐ ܓܶܝܪ ܗܰܘ ܠܳܐ ܥܒܺܝܕܳܐ ܐܺܝܬܰܘܗ̱ܝ ܒܰܠܚܽܘܕܰܘܗ̱ܝ ܡܬܽܘܡܳܝܳܐ. ܟܽܠ ܗܰܘ ܡܳܐ ܕܶܝܢ ܕܠܰܘ ܡܶܢ ܐܽܘܣܺܝܰܐ ܗܳܝ ܕܰܠܗܰܠ ܡܶܢ ܟܽܠ ‌ܐܺܝܬܰܘܗ̱ܝ܆ ܗܳܢܳܐ ܐܳܦ ܥܒܺܝܕܰܐ ܗ̄ܘ ܘܠܰܘ ܡܬܽܘܡܳܝܰܐ ܗ̄ܘ܆ ܐܰܝܟܰܢܳܐ ܕܡܶܠܬܳܐ ܕܫܰܦܺܝܪܽܘܬ ܕܶܚܠܬܳܐ ܡܚܰܘܝܳܐ.

ܡܶܢ ܐܰܝܟܳܐ ܗܳܟܺܝܠ ‌ܐܳܡܪܺܝܢ ܒܺܝ̈ܫܳܬܳܐ. ܗܳܢܰܘ ܓܶܝܪ ܫܽܘܐܴܠܳܐ ܚܰܝܠܬܳܢܳܐ ܕܡܰܢܺܝ̈ܢܳܝܶܐ܆ ܗܰܘ ܕܒܺܐܝܕܰܘ̈ܗ̱ܝ ܠܠܳܐ ܝܰܠܺܝ̈ܦܶܐ ܓܳܪܦܺܝܢ ܐܰܟܚܕܳܐ ܠܘܳܬ ܐܰܒܕܳܢܐ ܒܰܝܬܳܝܳܐ ܕܺܝܠܗܽܘܢ. ܐܶܢܳܐ ܕܶܝܢ ܐܳܡܰܪ ܐ̱ܢܳܐ܆ ܕܡܶܢܟܽܘܢ ܕܺܝܠܟܽܘܢ ܐܳܘ ܕܝܰܬܺܝܪ ܡܶܢ ܟܽܠ ܒܺܝܫܺܝܢ ܐܺܝܬܰܝܗܶܝܢ ܒܺܝ̈ܫܳܬܳܐ. ܘܟܰܕ ܠܟܽܘܢ ܩܢܽܘܡܟܽܘܢ ܐܺܝܬ ܠܟܽܘܢ ܫܪܳܝܶܗ ܕܦܽܘܫܳܟܳܐ܆ ܡܥܺܝܢܳܐ ܓܶܝܪ ܕܟܽܠܳܗ̇ ܒܺܝܫܽܘܬܳܐ ܥܳܒܕܰܬ ܟܽܘܪܗܳܢܳܐ ܐܺܝܬܰܝܟܽܘܢ܆ ܟܕ ܒܨܶܒܝܳܢܟܽܘܢ ܐܶܬܟܪܰܗܬܽܘܢ܆ ܒܕܽܘܟܬܳܐ ܐ̱ܚܪܺܬܳܐ ܠܳܐ ܬܶܒܥܽܘܢ ܐܶܢܶܝܢ ܠܒܺܝ̈ܫܳܬܳܐ. ܠܡܳܢܳܐ ܓܶܝܪ ܠܡܶܚܦܰܪ ܠܫܽܘ̈ܥܶܐ ܣܳܥܶܝܢ ܐܢ̱ܬܽܘܢ܆ ܘܰܠܡܶܒܥܳܐ ܠܣܺܝܡܬܳܐ ܕܒܺܝܫܽܘܬܳܐ܆ ܠܗܳܝ ܐܰܝ̇ܕܳܐ ܕܟܰܕ ܒܰܐܪܥܟܽܘܢ ܕܺܝܠܟܽܘܢ ܛܡܰܪܬܽܘܢܳܗ̇ ܐܺܝܬܶܝܗ̇ ܠܟܽܘܢ. ܒܺܝܫܬܳܐ ܓܶܝܪ ܠܰܘ ܐܽܘܣܺܝܰܐ܆ ܫܽܘܚܠܳܦܳܐ ܕܶܝܢ ܕܙܰܘܥܳܐ ܫܰܠܺܝܛ ܒܝܳܬܶܗ. ܐܰܟܙܢܳܐ ܓܶܝܪ ܕܰܐ‌ܠܳܗܳܐ ܡܰܢ ܒ̣ܪܳܐ ܥܰܝ̈ܢܶܐ ܕܦܰܓܪܳܐ܆ ܠܘܳܬ ܗܳܝ ܕܢܶܚܙܶܐ ܘܢܶܫܬܰܘܬܰܦ ܠܢܽܘܗܪܳܐ ܗܳܢܳܐ ܡܶܬܪܰܓܫܳܢܳܐ ܘܡܶܬܚܰܙܝܳܢܳܐ܆ ܠܣܰܡܝܽܘܬܳܐ ܕܶܝܢ ܠܳܐ ܩܰܝܶܡ܆ ܣܰܡܝܽܘܬܳܐ ܓܶܝܪ ܓܠܺܝܙܽܘܬܳܐ ܕܢܽܘܗܪܳܐ ܐܺܝܬܶܝܗ̇܆ ܐܶܢ ܕܶܝܢ ܐ̱ܢܳܫ ܒܨܶܒܝܳܢܶܗ ܢܥܰܡܶܨ ܥܰܝܢܰܘ̈ܗ̱ܝ܆ ܗܽܘ ܠܢܰܦܫܶܗ ܩܰܝܶܡ ܣܳܡ ܣܰܡܝܽܘܬܳܐ܆ ܘܠܳܐ ܢܶܥܕ̣ܽܘܠ ܥܰܠ ܗܳܕܶܐ ܠܰܐܠܳܗܳܐ܆ ܠܰܘ ܓܶܝܪ ܕܰܓܠܺܝܙܽܘܬܳܐ ܐܶܠܳܐ ܕܽܐܘܣܺܝ̈ܰܐܤ ܐܺܝܬܰܘܗ̱ܝ ܥܳܒܽܘܕܳܐ܆ ܗܳܟܰܢܳܐ ܐܳܦ ܠܗܰܘܢܳܐ ܗܰܘ ܕܒܰܢ ܒ̣ܪܳܐ ܒܰܕܡܽܘܬ ܥܰܝܢܳܐ ܡܶܕܶܡ ܡܶܬܗܰܘܢܳܢܺܝܬܳܐ܆ ܡܶܛܽܠ ܕܢܶܫܬܰܘܬܰܦ ܒܢܽܘܗܪܳܐ ܐܰ‌ܠܳܗܳܝܳܐ ܘܡܶܣܬܰܟܠܳܢܳܐ܆ ܘܢܶܬܥܢܶܐ ܒܬܶܐܽܘܪܺܝܰܐ ܕܗܳܠܶܝܢ ܕܡܶܬܚܰܙ̈ܝܳܢ܆ ܘܡܶܢ ܫܽܘܦܪܳܐ ܘܰܡܠܰܚܡܽܘܬܳܐ ܕܥܳܠܡܳܐ܆ ܢܶܬܚܰܫܰܒ ܡܣܰܩܡܳܐܺܝܬ ܠܗܰܘ ܕܰܥܒܰܕ ܘܛܰܟܶܤ ܠܰܡܛܰܟܣܽܘܬܳܐ ܗܳܕܶܐ܆ ܠܳܐ ܡܶܬܚܰܙܝܳܢ̈ܝܳܬܳܐ ܓܶܝܪ ܕܺܝܠܶܗ ܐܳܡܰܪ ܦܰܘܠܽܘܤ܆ ܡܶܢ ܒܪܺܝܬܶܗ ܕܥܳܠܡܳܐ܆ ܠܰܥܒܕܰܘ̈ܗ̱ܝ ܟܰܕ ܡܶܣ̈ܬܰܟܠܳܢ ܡܶܬܚܰܙ̈ܝܳܢ^[67]܆ ܘܰܐ̱ܚܪܺܢܳܐ ܐ̱ܢܳܫ ܚܰܟܺܝܡܳܐ܆ ܡܶܢ ܓܶܝܪ ܫܽܘܚܠܳܦܳܐ ܕܒܶܪ̈ܝܳܬܳܐ ܡܣܰܩܡܳܐܳܝܬ܆ ܒܳܪܽܘܝܳܐ ܕܺܝܠܗܶܝܢ ܡܶܬܚܙܶܐ. ܐܶܢ ܕܶܝܢ ܡܶܢ ܗܳܕܶܐ ܬܶܐܽܘܪܺܝܰܐ ܒܨܶܒܝܳܢܰܢ ܢܰܪܚܶܩ ܠܗܰܘܢܰܢ܆ ܘܰܠܘܳܬ ܗܰܢܺܝ̈ܐܘܳܬܳܐ ܚܰܫ̈ܳܢܳܝܳܬܳܐ ܢܰܗܦܟܺܝܘܗ̱ܝ܆ ܥܰܡܶܨܢܳܗ̇ ܟܰܕ ܨܒܰܝܢܰܢ ܠܥܰܝܢܳܐ ܡܶܬܗܰܘܢܳܢܺܝܬܳܐ܆ ܘܩܳܝܡܺܝܢܰܢ ܠܘܳܬܳܗ̇ ܠܣܰܡܝܽܘܬܳܐ܆ ܗܳܝ ܟܺܝܬ ܕܺܐܝܬܶܝܗ̇܆ ܡܫܰܢܝܳܢܽܘܬܳܐ ܕܰܐ‌ܠܳܗܳܐ. ܡܫܰܢܝܳܢܽܘܬܳܐ ܕܶܝܢ ܕܰܐ‌ܠܳܗܳܐ ܓܠܺܝܙܽܘܬܳܐ ܕܡܶܢ ܢܽܘܗܪܳܐ܆ ܘܗܳܕܶܐ ܐܺܝܬܶܝܗ̇ ܚܛܺܝܬܳܐ܆ ܗܳܝ ܕܰܓܠܺܝܙܽܘܬܳܐ ܐܺܝܬܶܝܗ̇ ܘܠܰܘ ܐܽܘܣܺܝܰܐ. ܗܳܝ ܐܰܝ̇ܕܳܐ ܕܠܳܐ ܡܶܬܩܰܝܡܳܐ ܗ̱ܘܳܬ܆ ܐܶ‌ܠܽܘ ܐܶܢܳܐ ܠܥܰܝܢܳܐ ܡܶܬܗܰܘܢܳܢܺܝܬܳܐ ܡܶܢ ܬܶܐܽܘܪܺܝܰܐ ܗܳܝ ܕܒܰܟܝܳܢܳܐ ܠܳܐ ܐܰܪܚܩܶܬ ܘܥܰܡܨܶܬ.

ܐܶܠܳܐ ܬܺܐܡܰܪ ܕܙܳܕܶܩ ܗ̱ܘܳܐ ܕܠܳܐ ܡܶܫܬܰܚ̈ܠܦܳܢܶܐ ܢܶܗܘܶܐ ܐܺܝܬܰܝܢ ܗ̱ܘܰܝܢ ܠܘܳܬ ܒܺܝܫܬܳܐ܆ ܘܠܳܐ ܡܩܰܒ̈ܠܳܢܶܐ ܣܳܟ ܕܗܳܝ ܕܢܶܚܛܶܐ. ܐܶܠܳܐ ܘܠܳܐ ܡܶܕܶܡ ܐ̱ܚܪܺܢܳܐ ܡܶܣܬܒܰܪ ܐܰܢܬ ܠܺܝ ܕܨܳܒܶܐ ܗ̱ܘܰܝܬ܆ ܐܶܠܳܐ ܕܰܚܠܳܦ ܒܰܪܢܳܫܳܐ ܟܺܐܦܳܐ ܢܶܗܘܶܐ ܐܺܝܬܰܝܟ ܗܘܰܝܬ ܐܰܘ ܩܰܝܣܳܐ܆ ܘܰܕܠܰܒܪܺܝܬܳܐ ܠܳܐ ܡܰܪܓܫܳܢܺܝܬܳܐ ܡܝܰܩܰܪ ܐܰܢ̱ܬ܆ ܩܕܳܡ ܗܳܝ ܨܶܒܝܳܢܳܝܬܳܐ ܘܰܡܠܺܝܠܬܳܐ. ܗܳܕܶܐ ܓܶܝܪ ܠܳܐ ܡܶܬܬܙܺܝܥܳܢܳܐܺܝܬ ܐܺܝܬ ܠܳܗ̇ ܠܘܳܬ ܚܛܺܝܬܳܐ. ܟܺܐܦܳܐ ܓܶܝܪ ܘܩܰܝܣܳܐ ܘܶܐܢ ܡܶܕܶܡ ܕܰܐܝܟ ܗܳܟܰܢ܆ ܡܩܰܒܠܳܢܳܐ ܕܰܚܛܺܝܬܳܐ ܘܠܳܐ ܣܳܟ ܐܺܝܬܰܘܗ̱ܝ. ܠܰܟ̈ܝܳܢܶܐ ܕܶܝܢ ܡܠܺܝ̈ܠܶܐ ܡܶܛܽܠ ܗܳܕܶܐ ܥܒܰܕ ܐܰ‌ܠܳܗܳܐ܆ ܐܰܝܟܰܢܳܐ ܕܢܶܫܬܰܘܬܦܽܘܢ ܒܛܳܒܽܘܬܶܗ. ܘܡܶܛܽܠ ܟܺܝܬ ܕܗܰܘ ܚܶܟܡܬܳܐ ܐܽܘܣܝ̣ܳܝ̣ܬܳܐ ܐܺܝܬܰܘܗ̱ܝ ܘܙܰܕܺܝܩܽܘܬܳܐ ܘܢܽܘܗܪܳܐ܆ ܐܳܦ ܚܢܰܢ ܒܝܰܕ ܡܶܬܬܙܺܝܥܽܘܬܳܐ ܡܶܬܗܰܘܢܳܢܺܝܬܳܐ܆ ܘܰܒܝܰܕ ܗܳܝ ܕܰܠܘܳܬܳܗ̇ ܡܶܬܥܰܠܶܝܢ ܚ̱ܢܰܢ ܘܡܶܫܬܰܘܬܦܺܝܢܰܢ ܒܺܝܕܰܥܬܶܗ ܘܰܒܢܽܘܗܪܐ ܗܰܘ ܕܡܶܢ ܗܳܕܶܐ ܗܳܘܶܐ ܒܰܢ܆ ܢܶܬܡܨܶܐ ܕܢܶܗܘܶܐ ܙܰܕܺܝ̈ܩܶܐ ܟܺܝܬ ܘܛܳܒ̈ܶܐ܆ ܘܰܕܢܰܗܺܝܪܺܝܢ ܒܺܝܕܰܥܬܳܐ ܕܰܫܡܰܝܳܢ̈ܝܳܬܳܐ ܐܰܝܟ ܡܶܕܶܡ ܕܡܶܬܕܪܶܟ ܠܰܢ. ܕܡܶܢ ܗܳܪܟܳܐ ܐܳܦ ܚܰܟܺܝ̈ܡܶܐ ܕܗܳܠܶܝܢ ܕܰܠܒܰܪ܆ ܐܳܦ ܗܳܢܳܐ ܬܚܽܘܡܳܐ ܐܶܡܰܪܘ ܕܦܝܠܘܣܘܦܝܰܐ.

ܦܺܝܠܘܣܘܦܝܰܐ ܕܶܝܢ ܐܺܝܬܶܝܗ̇܆ ܡܕܰܡܝܳܢܽܘܬܳܐ ܕܒܰܪܢܳܫܳܐ ܕܰܠܘܳܬ ܗܰܘ ܕܰܡܝܰܬܰܪ^[68] ܐܰܝܟ ܕܡܶܫܟܚܳܐ. ܠܗܳܕܶܐ ܕܶܝܢ ܠܰܘ ܡܶܢ ܕܽܘܟ ܐ̱ܚܪܺܝܢ ܡܶܢ ܐܰܝܟܳܐ܆ ܐܶܠܳܐ ܐܶܢ ܡܶܢ ܚܶܟܡܬܳܐ ܗܳܝ ܕܺܝܠܰܢ ܘܫܰܪܺܝܪܬܳܐ ܐܶܡܰܪܘ܆ ܕܡܰܠܦܳܐ ܕܰܒܨܰܠܡܳܐ ܘܒܰܕܡܽܘܬܳܐ ܕܰܐ‌ܠܳܗܳܐ ܗܘ̣ܳܐ ܒܰܪܢܳܫܳܐ^[69]܆ ܒܗܳܝ ܕܰܡܩܰܒܠܳܢܳܐ ܐܺܝܬܰܘܗ̱ܝ ܒܝܰܕ ܥܳܢܘܳܝܽܘܬܳܐ ܕܰܡܝܰܬܪ̈ܳܬܳܐ܆ ܕܨܰܠܡܳܐ ܐܰܘܟܺܝܬ ܡܣܰܒܗܽܘܬܳܐ^[70] ܘܕܳܡܝܽܘܬܳܐ ܐܰ‌ܠܳܗܳܝܬܳܐ. ܬܰܚܘܺܝܬܳܐ ܕܶܝܢ ܕܣܰܓܺܝ ܪܰܒܳܐ ܕܨܰܠܡܳܐ܆ ܫܰܠܺܝܛܽܘܬ ܒܝܳܬܳܐ ܐܺܝܬܶܝܗ̇. ܐܶ‌ܠܽܘ ܠܳܐ ܓܶܝܪ ܕܒܽܐܘܚܕܳܢ ܢܰܦܫܰܢ ܡܕܰܒܪܺܝܢ ܗ̱ܘܰܝܢ ܚܢܰܢ ܠܰܢ܆ ܐܶܠܳܐ ܡܶܢ ܐܰܢܰܢܩܺܐ ܡܶܕܶܡ ܡܶܬܕܰܒܪܺܝܢ ܗ̱ܘܰܝܢ܆ ܒܗܳܝ ܕܣܰܓܺܝ ܪܰܒܳܐ܆ ܒܳܗ̇ ܒܗܳܕܶܐ ܚܰܣܺܝܪܺܝܢ ܗ̱ܘܰܝܢ ܡܶܢ ܡܣܰܒܗܽܘܬܳܐ ܗܳܝ ܕܰܠܘܳܬ ܬܰܦܢܟܳܐ. ܘܒܰܡܢܳܬܳܐ ܡܶܕܶܡ ܪܺܝܫܳܝܬܳܐ܆ ܦܣܺܝܩܳܐ ܡܶܕܶܡ ܥܬܺܝܕ ܗ̱ܘܳܐ ܕܢܶܗܘܶܐ ܐܺܝܬܰܘܗ̱ܝ ܗܽܘ ܨܰܠܡܳܐ. ܟܰܕ ܗܳܟܺܝܠ ܕܰܢܕܰܒܰܪ ܚܢܰܢ ܠܰܢ ܐܶܬܗܰܝܡܰܢܰܢ܆ ܐܳܦ ܚܰܝܠܳܐ ܕܠܳܚܶܡ ܢܣܰܒܢܰܢ܆ ܘܚܰܝܠܬܳܢܽܘܬܳܐ ܕܣܰܓܺܝ ܣܳܦܩܳܐ܆ ܠܘܳܬ ܗܳܝ ܕܠܳܐ ܢܶܫܬܰܥܒܰܕ ܬܚܶܝܬ ܡܶܕܶܡ ܡܶܢ ܗܳܠܶܝܢ ܕܰܡܩܰܝ̈ܡܳܢ^[71] ܠܳܗ̇ ܠܰܚܛܺܝܬܳܐ. ܘܗܳܕܶܐ ܡܶܬܚܰܘܝܳܐ ܓܰܠܝܳܐܺܝܬ܆ ܡܶܢ ܗܳܢܽܘܢ ܕܰܬܪܰܨܘ ܡܝܰܬܪܽܘܬܳܐ. ܐܶ‌ܠܽܘ ܠܳܐ ܓܶܝܪ ܐܺܝܬ ܗ̱ܘܳܐ ܚܰܝܠܳܐ ܒܚܰܝܽܘܬܳܐ ܗܳܕܶܐ ܡܠܺܝܠܬܳܐ ܕܣܳܦܶܩ ܠܰܡܬܰܪܳܨܽܘ܆ ܡܶܢ ܟܽܠ ܦܪܽܘܤ܆ ܘܠܳܐ ܐ̱ܢܳܫ ܡܶܢ ܗܳܢܽܘܢ ܕܶܐܡܰܬܝ ܕܗܽܘ ܐܶܬܥܰܢܘܺܝܘ ܡܝܰܬܪܽܘܬܳܐ ܡܬܰܪܶܨ ܗ̱ܘܳܐ. ܐܶܢܕܶܝܢ ܣܰܓܺܝ̈ܶܐܐ ܛܳܒ ܡܶܬܚܙܶܝܢ ܕܬܰܪܶܨܘ܆ ܕܡܰܐܺܝܢܽܘܬܳܐ ܕܗܳܢܽܘܢ ܕܠܳܐ ܬܰܪܶܨܘ ܐܺܝܬܰܘܗ̱ܝ ܥܶܕܠܳܝܳܐ܆ ܘܠܰܘ ܕܰܐ‌ܠܳܗܳܐ ܗܰܘ ܕܰܒ̣ܪܳܐ. ܟܰܕ ܓܶܝܪ ܡܫܟܚܺܝܢ ܗ̱ܘܰܘ ܠܳܐ ܥܒܰܕܘ.

ܐܶܠܳܐ ܙܳܕܶܩ ܗ̱ܘܳܐ ܐܳܡܰܪ܆ ܕܠܳܐ ܢܶܗܘܶܐ ܟܕܺܝܢܳܐ ܗ̱ܘܳܬ ܢܰܦܫܳܐ ܥܰܡ ܦܰܓܪܳܐ ܗܳܢܳܐ܆ ܘܠܳܐ ܐܺܝܬ ܗ̱ܘܳܐ ܠܳܗ̇ ܠܘܳܬ ܚܛܺܝܬܳܐ ܪܟܺܝܢܳܐܺܝܬ. ܐܶܠܳܐ ܠܰܘ ܗܳܕܶܐ ܐܺܝܬܶܝܗ̇ ܥܶܠܬܳܐ ܕܗܳܝ ܕܢܶܚ̣ܛܶܐ ܐܳܘ ܛܳܒܳܐ܆ ܐܶܠܳܐ ܗܳܝ ܕܒܺܝܫܳܐܺܝܬ ܒܥܰܪ̈ܩܶܐ ܕܨܶܒܝܳܢܳܐ ܬܶܬܚܰܫܰܚ. ܒܰܕܓܽܘܢ ܟܰܕ ܟܝܳܢܳܐ ܕܡܰܠܰܐܟ̈ܶܐ ܡܚܰܪܪܳܐ ܐܺܝܬܰܘܗ̱ܝ ܡܶܢ ܐܰܣܳܪܳܐ ܕܰܠܘܳܬ ܒܶܣܪܳܐ܆ ܚܳܙܶܝܢ ܚ̱ܢܰܢ ܠܶܗ ܠܣܳܛܳܢܳܐ܆ ܕܡܶܢ ܩܕܺܝܡ ܡܰܢ܆ ܥܰܡ ܛܥܺܝ̈ܢܰܝ ܢܽܘܗܪܳܐ ܡܶܬܡܢܶܐ ܗ̱ܘܳܐ܆ ܕܰܢܦܰܠ ܕܶܝܢ ܡܶܛܽܠ ܗܳܝ ܕܗܳܠܶܝܢ ܕܰܠܥܶܠ ܡܶܢܶܗ ܐܶܬܗܰܓܰܓ܆ ܘܠܳܐ ܢܛܰܪ ܛܶܟܣܳܐ ܗܰܘ ܕܶܐܬܛܰܟܰܤ ܡܶܢ ܗܰܘ ܕܰܒ̣ܪܳܝܗ̱ܝ . ܕܡܶܢ ܗܳܪܟܳܐ ܡܶܛܽܠܳܬܶܗ ܘܡܶܛܽܠ ܗܳܢܽܘܢ ܕܗܽܘ ܟܰܕ ܗܽܘ ܫܽܘܚܠܳܦܳܐ ܐܶܬܟܪܰܗܘ ܐܰܟܘܳܬܶܗ܆ ܐܳܡܪܳܐ ܒܕܽܘܟ ܡܶܠܬܳܐ ܟܳܗܢܳܝܬܳܐ܆ ܕܰܠܡܰܠܰܐܟ̈ܶܐ ܟܺܝܬ ܗܳܢܽܘܢ ܕܠܳܐ ܢܛܰܪܘ ܪܺܝܫܳܢܽܘܬܳܐ ܕܺܝܠܗܽܘܢ ܐܶܠܳܐ ܫܒܰܩܘ ܒܶܝܬ ܡܰܥܡܪܳܐ ܕܺܝܠܗܽܘܢ܆ ܠܕܺܝܢܳܐ ܕܝܰܘܡܳܐ ܗܰܘ ܪܰܒܳܐ܆ ܒܰܐܣܽܘܪ̈ܶܐ ܕܰܠܥܳܠܰܡ ܬܚܶܝܬ ܚܶܫܽܘܟܳܐ ܢܛܰܪ^[72]. ܡܶܬܢܰܛܪܺܝܢ ܓܶܝܪ܆ ܐܰܝܟ ܕܢܶܦܠܽܘܢ ܒܢܽܘܪܳܐ ܗܳܝ ܐ̱ܚܪܳܝܬܳܐ܆ ܘܒܰܐܣܽܘܪ̈ܶܐ ܕܰܠܥܳܠܰܡ ܬܚܶܝܬ ܚܶܫܽܘܟܳܐ. ܗܳܝ ܓܶܝܪ ܕܢܶܛܰܪ܆ ܠܘܳܬ ܙܰܒܢܳܐ ܕܰܥܬܺܝܕ ܚܳܝܪܳܐ܆ ܐܰܝܟܰܢܳܐ ܕܳܐܦ ܦܛܪܘܤ ܟܳܬܶܒ ܗ̱ܘܳܐ܆ ܫܡܰܝܳܐ ܕܶܝܢ ܗܳܠܶܝܢ ܕܗܳܫܳܐ ܘܰܐܪܥܳܐ ܒܡܶܠܬܳܐ ܕܺܝܠܶܗ ܐܺܝܬܰܝܗܽܘܢ ܕܰܐܣܺܝܢܺܝܢ ܘܣܺܝܡܺܝܢ ܐܰܝܟ ܕܰܒܣܺܝܡܬܳܐ܆ ܟܰܕ ܡܶܬܢܰܛܪܺܝܢ ܠܢܽܘܪܳܐ ܠܝܰܘܡܳܐ ܕܕܺܝܢܳܐ ܘܕܰܐܒܕܳܢܳܐ ܕܰܒܢܰܝ̈ܢܳܫܳܐ ܪ̈ܰܫܺܝܥܶܐ^[73]. ܡܶܛܽܠ ܗܳܕܶܐ ܐܳܦ ܡܳܪܰܢ ܒܶܐܘܰܢܓ̈ܶܠܺܝܰܐ܆ ܟܰܕ ܩܳܕܶܡ ܪܳܫܶܡ ܘܰܡܛܰܦܶܤ ܠܝܰܘܡܳܐ ܗܰܘ ܕܕܺܝܢܳܐ܆ ܡܶܬܚܙܶܐ ܕܳܐܡܰܪ܆ ܙܶܠܘ ܠܟܽܘܢ ܠܺܝ̈ܛܶܐ ܠܢܽܘܪܐ ܗܳܝ ܕܰܠܥܳܠܰܡ܆ ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܰܠܡܰܠܰܐܟܰܘ̈ܗܝ^[74]. ܠܗܳܠܶܝܢ ܩܳܪܶܝܢ ܚ̱ܢܰܢ ܐܳܦ ܫ̈ܺܐܕܶܐ. ܠܰܘ ܕܰܟܝܳܢ̈ܶܐ ܒܺܝ̈ܫܶܐ ܐܶܬܒܪܺܝܘ ܡܶܢ ܐܰ‌ܠܳܗܳܐ܆ ܗܰܘ ܕܰܠܟܽܠܗܶܝܢ ܥܒܰܕ ܫܰܦܺܝܪ̈ܳܬܳܐ^[75]܆ ܐܶܠܳܐ ܟܰܕ ܨܶܒܝܳܢܳܐܺܝܬ ܠܘܳܬ ܨܶܒܝܳܢܳܐ ܒܝܫܐ ܐܰܝܟܰܢܳܐ ܕܚܰܘܝܰܬ ܡܶܠܬܳܐ ܗܶܢܽܘܢ ܡܶܢ ܢܰܦܫܗܽܘܢ ܐܶܙܰܠܘ܆ ܘܡܶܛܽܠ ܗܳܕܶܐ ܐܳܦ ܠܰܚܣܳܡܳܐ ܘܠܰܩܪܳܒܳܐ ܗܰܘ ܕܰܠܘܳܬܰܢ ܒܨܶܒܝܳܢ ܢܰܦܫܗܽܘܢ ܩܰܒܶܠܘ ܥܠܰܝܗܽܘܢ܆ ܘܰܒܪܰܡ ܡܶܙܕܟܶܝܢ܆ ܟܰܕ ܐܰ‌ܠܳܗܳܐ ܫܳܒܶܩ ܠܶܗ ܠܕܰܐܪܳܐ܆ ܡܶܛܽܠ ܕܗܳܢܽܘܢ ܒܝܰܕ ܡܶܙܕܰܟܝܳܢܽܘܬܳܐ ܡܶܛܽܠ ܡܫܰܩܠܽܘܬܳܐ ܘܪܳܡܽܘܬ ܪܽܘܚܳܐ ܢܶܫܬܰܢܩܽܘܢ܆ ܘܰܚܢܰܢ ܒܰܩ̈ܝܶܐ ܘܰܒܚܺܝܪ̈ܶܐ ܒܙܳܟܽܘܬܳܐ ܕܠܽܘܩܒܰܠܗܽܘܢ ܢܶܬܚܙܶܐ.

ܠܳܐ ܐ̱ܢܳܫ ܗܳܟܺܝܠ ܒܰܫܘܺܝܚܽܘܬܳܐ ܕܰܐܟܚܕܳܐ ܕܢܰܦܫܳܐ ܠܘܳܬ ܦܰܓܪܳܐ ܢܶܬܥܰܕܰܠ. ܟܰܕ ܓܶܝܪ ܠܰܡܥܰܠܝܽܘܬܳܐ ܕܚܶܟܡܬܶܗ ܐܰܝܟ ܐ̱ܢܳܫ ܢܺܐܡܰܪ ܡܚܰܘܶܐ ܐܰ‌ܠܳܗܳܐ܆ ܥܰܒ̣ܕܶܗ ܠܒܰܪܢܳܫܳܐ ܐܰܢܕܪܝܐܛܐ ܫܘܶܐ ܠܬܶܗܪܳܐ܆ ܡܠܺܝܠܳܐ ܘܡܶܬܪܰܓܫܳܢܳܐ ܠܶܗ ܟܰܕ ܠܶܗ. ܘܟܰܕ ܒܡܶܨܥܰܬ ܒܪܺܝܬܳܐ ܗܳܝ ܡܶܬܚܰܙܝܳܢܺܝܬܳܐ ܘܗ̱ܝ ܠܳܐ ܡܶܬܚܰܙܝܳܢܺܝܬܳܐ ܐܰܩܺܝܡܶܗ܆ ܒܗܳܝ ܕܰܒܝܰܕ ܗܰܘܢܳܐ ܠܗܳܢܽܘܢ ܕܰܠܥܶܠ ܢܰܩܺܝܦ. ܒܦܰܓܪܳܐ ܕܶܝܢ ܠܗܳܢܽܘܢ ܕܰܠܬܰܚܬ܆ ܠܘܳܬ ܗܳܠܶܝܢ ܕܰܠܥܶܠ ܡܫܰܢܶܐ ܠܶܗ ܠܟܽܠܶܗ ܒܦܽܘܠܚܳܢܳܐ ܕܰܡܝܰܬܪ̈ܳܬܳܐ. ܡܶܢ ܓܶܝܪ ܕܽܘܒܳܪܳܐ ܕܗܳܢܽܘܢ ܕܬܰܪܶܨܘ ܐܶܬܒܰܩܳܐ ܒܚܶܟܡܬܶܗ ܟܺܝܬ ܘܰܒܛܳܒܽܘܬܶܗ ܕܰܐ‌ܠܳܗܳܐ܆ ܘܠܳܐ ܒܡܰܐܺܝܢܽܘܬܳܐ ܕܣܰܓܺܝ̈ܶܐܐ ܥܶܕܠܳܝܳܐ ܬܛܽܘܫ ܒܗܰܘ ܕܰܒ̣ܪܳܐ. ܐܳܦ ܓܶܝܪ ܠܳܐ ܙܳܕܶܩ ܗ̱ܘܳܐ ܕܡܶܛܽܠ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܠܡܶܚܛܳܐ܆ ܘܡܶܛܽܠ ܫܳܢܝܽܘܬܗܽܘܢ ܕܺܝܠܗܽܘܢ ܢܶܦܠܽܘܢ ܡܶܢ ܐܰ‌ܠܳܗܳܐ܆ ܐܳܦܠܳܐ ܗܳܢܽܘܢ ܕܬܰܪܶܨܘ ܢܶܬܬܰܝܬܽܘܢ ܠܗܳܝ ܕܢܶܗܘܽܘܢ ܐܺܝܬܰܝܗܽܘܢ. ܒܝܰܕ ܬܪ̈ܰܝܗܽܘܢ ܓܶܝܪ ܡܶܬܚܰܘܝܳܐ ܛܳܒܽܘܬܶܗ ܕܗܰܘ ܕܰܥܒܰܕ܆ ܘܕܰܠܟܽܠܢܳܫ ܒܫܰܘܝܽܘܬ ܐܺܝܩܳܪܳܐ ܥܒܰܕ܆ ܘܠܰܘ ܠܗܳܢܽܘܢ ܡܰܢ ܕܗܳܢܳܐ. ܟܝܳܢܳܐ܆ ܠܗܳܢܽܘܢ ܕܶܝܢ ܕܗܳܢܳܐ. ܥܰܠ ܗܳܝ ܣܰܓܺܝ̈ܶܐܐ ܟܰܕ ܡܶܢ ܫܽܘܪܳܝܳܐ ܨܶܒܝܳܢܳܐ ܒܺܝܫܳܐ ܗܘ̣ܳܐ ܠܗܽܘܢ܆ ܘܒܰܪ̈ܓܺܝܓܳܬܳܐ ܐܶܬܥܰܪܓܰܠܘ܆ ܠܚܰܪܬܳܐ ܠܘܳܬ ܗܳܝ ܕܰܡܝܰܬܪܳܐ ܗܦܰܟܘ ܐܶܫܬܰܚܠܰܦܘ܆ ܘܰܠܗܳܝ ܕܰܠܩܽܘܒܠܳܐ ܐ̱ܚܪ̈ܳܢܶܐ. ܘܰܒܝܰܕ ܗܽܘܦܳܟܳܐ ܗܳܢܳܐ ܡܦܰܬܟܳܐ܆ ܠܰܐܠܳܗܳܐ ܛܳܒܳܐ܆ ܕܠܳܐ ܐܺܝܬܰܘܗ̱ܝ ܥܶܠܬܳܐ ܕܒܺܝ̈ܫܳܬܳܐ ܚܰܘܝܘܗ̱ܝ. ܐܶ‌ܠܽܘ ܓܶܝܪ ܦܰܓܪܳܐ ܐܰܝܟ ܡܶܠܬܗܽܘܢ ܕܡܰܢܺܝ̈ܢܳܝܶܐ܆ ܗܳܢܽܘܢ ܕܝܰܬܺܝܪ ܡܶܢ ܟܽܠ ‌ܐ̱ܢܳܫ ܐܺܝܬܰܝܗܽܘܢ ܡܣܰܝ̈ܒܶܐ܆ ܐܳ‌ܠܽܘܨܳܐ ܠܘܳܬ ܚܛܺܝܬܳܐ ܐܺܝܬܰܘܗ̱ܝ ܗ̱ܘܳܐ܆ ܘܠܳܐ ܐ̱ܢܳܫ ܟܰܕ ܥܰܡ ܒܶܣܪܳܐ ܐܰܣܺܝܪ ܗ̱ܘܳܐ ܦܳܠܰܚ ܗ̱ܘܳܐ ܙܰܕܺܝܩܽܘܬܳܐ. ܐܰܝܟܰܢܳܐ ܓܶܝܪ ܝܶܫܽܘܥ ܗܰܘ ܒܪܶܗ ܕܢܽܘܢ ܒܠܶܫܳܢܳܐ ܒܶܣܪܳܢܳܐ܆ ܠܢܰܗܺܝܪ̈ܶܐ ܕܒܰܫܡܰܝܳܐ ܦܳܩܶܕ ܗ̱ܘܳܐ܆ ܘܰܡܩܺܝܡ ܗ̱ܘܳܐ ܠܪܶܗܛܳܐ ܕܣܰܗܪܳܐ ܘܰܕܫܶܡܫܳܐ܆ ܐܰܝܟܰܢܳܐ ܕܠܽܘܩܒܰܠ ܡܰܩܪ̈ܒܳܢܶܐ ܢܩܺܝܡ ܗ̱ܘܳܐ ܢܺܝܫܳܐ ܕܙܳܟܽܘܬܳܐ܆ ܘܠܳܐ ܢܶܦܣܩܺܝܗ̇ ܗ̱ܘܳܐ ܠܶܠܝܐ ܠܙܳܟܽܘܬܳܐ. ܘܫܳܬܶܩ ܐ̱ܢܳܐ ܠܗܳܢܽܘܢ ܐ̱ܚܪ̈ܳܢܶܐ܆ ܗܳܢܽܘܢ ܕܕܳܡܶܝܢ ܗ̱ܘܰܘ ܠܗܳܢܳܐ ܒܰܡܝܰܬܪܽܘܬܳܐ܆ ܒܕܺܝܰܐܬ̣ܺܝܩܺܐ ܥܰܬܺܝܩܬܳܐ ܘܰܚܕܰܬܳܐ.

ܟܰܕ ܗܳܟܺܝܠ ܒܗܳܠܶܝܢ ܡ̈ܶܠܶܐ ܐܶܬܬܰܪܬܺܝܬܽܘܢ ܐܢ̱ܬܽܘܢ܆ ܘܗܰܝܡܶܢܬܽܘܢ ܒܚܰܕ ܐܰ‌ܠܳܗܳܐ ܐܰܚܺܝܕ ܟܽܠ܆ ܕܒܰܚܕܳܐ ܡܰܢ ܐܽܘܣܺܝܰܐ ܘܰܐ‌ܠܳܗܽܘܬܳܐ܆ ܒܰܬܠܳܬܳܐ ܕܶܝܢ ܩܢܽܘ̈ܡܶܐ ܡܶܬܚܙܶܐ܆ ܟܰܕ ܩܳܝܡܺܝܢ ܐܢ̱ܬܽܘܢ ܘܰܠܘܳܬ ܦܢܺܝܬܳܐ ܡܰܥܪܒܳܝܬܳܐ ܡܶܬܦܢܶܝܢ ܐܢ̱ܬܽܘܢ܆ ܒܚܶܫܽܘܟܳܐ ܗܰܘ ܕܡܰܢܺܝ̈ܢܳܝܶܐ ܟܦܽܘܪܘ. ܗܳܢܳܐ ܕܶܝܢ ܐܺܝܬܰܘܗ̱ܝ܆ ܐܳܟܶܠ ܩܰܪܨܳܐ ܗܰܘ ܕܟܰܕ ܐܶܬܬܪܺܝܡ ܥܰܠ ܗܰܘ ܕܰܒ̣ܪܳܝܗ̱ܝ . ܘܰܐܝܟ ܥܳܒܽܘܕܽܘܬ ܦܰܪܨܽܘܦܳܐ ܗܳܝ ܕܒܶܐܫܰܥܝܳܐ ܐܶܡܰܪ܆ ܠܥܶܠ ܡܶܢ ܟܰܘܟ̈ܒܶܐ ܕܰܫܡܰܝܳܐ ܐܶ݀ܣܺܝܡ ܟܽܘܪܣܝܳܐ ܕܺܝܠܝ^[76]܆ ܘܟܰܕ ܡܶܢ ܬܰܡܳܢ ܐܶܫܬܕܺܝ܆ ܗܳܫܳܐ ܒܝܰܕ ܠܶܫܳܢ̈ܶܐ ܕܡܰܢܺܝ̈ܢܳܝܶܐ ܥܰܠ ܪܺܝܫܳܐ ܕܫܳܢܝܽܘܬܳܐ ܗܳܝ ܡܶܬܥܰܠܶܐ܆ ܟܰܕ ܚܶܫܽܘܟܳܐ ܕܠܳܐ ܫܽܘܪܳܝܳܐ ܘܠܳܐ ܥܒܺܝܕܳܐ ܡܶܬܩܪܶܐ. ܘܰܕܡܶܣܬܕܰܪ ܣܰܩܽܘܒܠܳܐܺܝܬ ܠܽܘܩܒܰܠ ‌ܐܰ‌ܠܳܗܳܐ. ܐܶܬܦܢܰܘ ܕܶܝܢ ܘܰܠܘܳܬ ܡܰܕܢܚܳܐ. ܘܰܒܗܽܘܢ ܒܙܰܠܺܝ̈ܩܶܐ ܢܶܦ̣ܓܰܥ ܒܟܽܘܢ ܡܫܺܝܚܳܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ܆ ܗܰܘ ܕܡܰܙܥܶܩ ܓܰܠܝܳܐܺܝܬ܆ ܐܶܢܳܐ ܐܺܝܬܰܝ ܢܽܘܗܪܶܗ ܕܥܳܠܡܳܐ^[77]܆ ܗܰܘ ܕܒܶܗ ܡܚܰܘܶܐ ܠܰܐܒܳܐ܆ ܘܰܐܟܚܕܳܐ ܓܳܠܶܐ ܠܪܽܘܚܳܐ ܩܰܕܺܝܫܳܐ. ܗܽܘ ܢܰܚܶܬܟܽܘܢ ܠܘܳܬ ܡܰܝ̈ܳܐ܆ ܘܢܰܣܚܶܐ ܣܚܳܬܳܐ ܕܽܘܟܳܝܳܐ ܕܟܽܠܗܽܘܢ ܚܰܝ̈ܶܐ ܥܰܬܺܝ̈ܩܶܐ܆ ܘܰܠܘܳܬ ܚܰܝ̈ܶܐ ܚ̈ܰܕܬ̣ܶܐ ܢܗܰܕܶܐ. ܟܰܕ ܩܳܒܰܪ ܡܰܢ ܠܣܰܝܒܽܘܬܳܐ ܕܰܚܛܺܝܬܳܐ ܒܫܶܦ̈ܥܶܐ܆ ܥܰܡ ܓܶܝܪ ܩܒܽܘܪܬܳܐ ܕܺܝܠܶܗ ܐܰܟܚܕܳܐ ܐܶܬܩܒܰܪܘ܆ ܡܰܠܒܶܫ ܕܶܝܢ ܠܛܰܠܝܽܘܬܳܐ ܕܩܰܘܡܬܳܐ ܪܽܘܚܳܢܳܝܬܳܐ܆ ܘܚ̈ܰܕܬ̣ܶܐ ܒܗܳܕܶܐ ܚܠܳܦ ܥܰܬܺܝ̈ܩܶܐ ܡܚܰܘܶܐ. ܘܗܳܠܶܝܢ ܒܝܰܕ ܐܶܫܰܥܝܳܐ ܢܒܺܝܳܐ ܩܳܕܶܡ ܗ̱ܘܳܐ ܡܰܟܪܶܙ ܓܰܠܝܳܐܺܝܬ܆ ܟܰܕ ܡܚܰܘܶܐ ܠܪܰܒܽܘܬܳܐ ܕܛܰܝܒܽܘܬܳܐ ܘܰܕܡܰܘܗܰܒܬܳܐ ܘܳܐܡܰܪ. ܐܶܢܳܐ ܐܺܝܬܰܝ ܐܶܢܳܐ ܐܺܝܬܰܝ܆ ܘܗܰܘ ܕܥܳܛܶܐ ܠܠܳܐ ܢܳܡܽܘܣܳܝܽܘܬܳܐ ܕܺܝܠܳܟ ܡܶܛܽܠܳܬܝ. ܘܠܰܚ̈ܛܳܗܶܐ ܕܺܝܠܳܟ܆ ܘܠܳܐ ܐܶ݀ܬܕܟܰܪ^[78]. ܣܰܓܺܝ ܕܶܝܢ ܛܳܒܳܐܺܝܬ ܗܳܝ ܕܡܶܛܽܠܳܬܝ܆ ܐܶܡܰܪ. ܟܰܕ ܓܶܝܪ ܨܳܒܶܐ ܠܡܺܐܡܰܪ ܡܶܛܽܠܳܬܟܽܘܢ܆ ܡܶܬܥܰܣܰܩ ܘܡܶܬܦܰܫܰܟ ܐܰܝܟ ܗܰܘ ܕܠܰܝܬ ܠܶܗ ܡܳܢܳܐ ܢܺܐܡܰܪ܆ ܘܰܡܡܰܠܶܐ ܐܳܦ ܠܚܰܣܺܝܪܽܘܬܳܐ ܕܺܝܠܰܢ. ܟܰܕ ܐܳܡܰܪ ܡܶܛܽܠܳܬܝ. ܠܛܰܝܒܽܘܬܳܐ ܕܺܝܠܝ. ܐܳܡܰܪ܆ ܥܶܠܬܳܐ ܕܡܰܘܗܰܒܬܳܐ ܥܳܒܶܕ ܐ̱ܢܳܐ. ܡܶܛܽܠ ܗܳܕܶܐ ܓܶܝܪ ܒܛܰܝܒܽܘܬܳܐ ܗܳܝ ܕܦܰܐܝܳܐ ܠܰܐܠܳܗܳܐ܆ ܚܠܳܦ ܟܽܠܢܳܫ ܛܶܥܡܶܬ ܡܰܘܬܳܐ. ܘܩܳܡܶܬ ܐܰܝܟܰܢܳܐ ܕܰܠܕܰܐܝܟ ܗܳܠܶܝܢ ܐܶ݀ܫܰܟܶܢ. ܥܰܠ ܗܳܝ ܐܳܦ ܦܰܘܠܽܘܤ ܐܳܡܰܪ ܗ̱ܘܳܐ܆ ܠܰܘ ܡܶܢ ܥ̈ܒܳܕܶܐ ܕܰܒܙܰܕܺܝܩܽܘܬܳܐ ܗܳܠܶܝܢ ܕܰܥܒܰܕܢܰܢ܆ ܐܶܠܳܐ ܐܰܝܟ ܪ̈ܰܚܡܶܐ ܕܺܝܠܶܗ ܦܪܰܩ ܠܰܢ܆ ܒܝܰܕ ܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ܆ ܘܚܽܘܕܳܬܳܐ ܕܪܽܘܚܳܐ ܩܰܕܺܝܫܳܐ^[79]. ܘܳܐܦ ܐܶܫܰܥܝܳܐ ܕܶܝܢ ܬܽܘܒ ܢܒܺܝܳܐ ܟܰܕ ܡܰܟܪܶܟ ܘܡܰܙܥܶܩ ܠܳܗ̇ ܠܪܰܒܽܘܬܳܗ̇ ܕܡܰܘܗܰܒܬܳܐ܆ ܗܳܟܰܢܳܐ ܐܳܡܰܪ. ܢܶܪܽܘܙܽܘܢ ܡܶܣ̈ܟܺܢܶܐ ܡܶܛܽܠ ܡܳܪܝܳܐ ܒܚܰܕܽܘܬܳܐ^[80]. ܘܗܳܢܽܘܢ ܕܰܕܠܳܐ ܣܰܒܪܳܐ ܡܶܢ ܒܢܰܝ̈ܢܳܫܳܐ ܢܶܬܡܠܽܘܢ ܚܰܕܽܘܬܳܐ. ܕܡܳܢܳܐ ܗܝ ܕܶܝܢ ܡܶܣܟܺܢܽܘܬܳܐ ܘܰܓܠܺܝܙܽܘܬ ܣܰܒܪܳܐ ܠܦܰܘܠܽܘܤ ܫܡܰܥ ܕܡܰܠܶܦ܆ ܐܺܝܬܰܝܟܽܘܢ ܗ̱ܘܰܝܬܽܘܢ ܒܙܰܒܢܳܐܗܰܘ ܤܛܰܪ ܡܶܢ ܡܫܺܝܚܳܐ܆ ܕܰܡܢܰܟܪܺܝܢ ܠܕܽܘܒܳܪܳܐ ܕܺܐܝܣܪܳܐܶܝܠ܆ ܘܰܐܟܣ̈ܢܳܝܶܐ ܕܕܺܝܰܐܬ̣ܺܝܩ̈ܰܐܤ ܕܡܽܘܠܟܳܢܳܐ܆ ܕܣܰܒܪܳܐ ܠܰܝܬ ܠܗܽܘܢ܆ ܘܰܕܠܳܐܐܰ‌ܠܳܗ ܒܥܳܠܡܳܐ. ܗܳܫܳܐ ܕܶܝܢ ܒܰܡܫܺܝܚܳܐ ܝܶܫܽܘܥ܆ ܐܢ̱ܬܽܘܢ ܗܳܢܽܘܢ ܕܒܰܙܒܰܢ ܐܺܝܬܰܝܟܽܘܢ ܗ̱ܘܰܝܬܽܘܢ ܒܪܽܘܚܩܳܐ܆ ܗܘ̣ܰܝܬܽܘܢ ܒܩܽܘܪܒܳܐ ܒܰܕܡܶܗ ܕܰܡܫܺܝܚܳܐ^[81]. ܕܫܳܠ̈ܡܳܢ ܠܗܳܠܶܝܢ ܬܽܘܒ ܐܳܡܰܪ܆ ܐܳܦ ܗܽܘ ܡܫܺܝܚܳܐ܆ ܟܰܕ ܒܝܰܕ ܐܶܫܰܥܝܳܐ ܡܡܰܠܶܠ ܘܰܐ݀ܝܬܶܐ ܠܰܣܡܰܝ̈ܳܐ ܒܽܐܘܪܚܳܐ ܗܳܝ ܕܠܳܐ ܝܺܕܰܥܘ܆ ܘܒܰܫ̈ܒܺܝܠܶܐ ܗܳܢܽܘܢ ܕܠܳܐ ܝܳܕܥܺܝܢ ܗ̱ܘܰܘ ܠܗܽܘܢ܆ ܐܶ݀ܥܒܶܕ ܐܶܢܽܘܢ ܕܰܢܕܽܘܫܽܘܢ. ܐܶ݀ܥܒܶܕ ܠܗܽܘܢ ܚܶܫܽܘܟܐ ܠܢܽܘܗܪܳܐ܆ ܘܥܰܣ̈ܩܳܬܳܐ ܠܰܬܪܺܝܨܽܘܬܳܐ. ܗܳܠܶܝܢ ܡ̈ܶܠܶܐ ܐܶ݀ܥܒܶܕ ܠܗܽܘܢ. ܘܠܳܐ ܐܶ݀ܫܒܽܘܩ ܐܶܢܽܘܢ^[82].

ܚܳܙܶܝܢ ܐܢ̱ܬܽܘܢ ܠܰܫܦܺܝܥܽܘܬܳܐ ܕܡܰܘܗܰܒܬܳܐ ܕܥܽܘܬܪܳܐ ܗܰܘ ܕܺܝܠܶܗ ܗܳܢܳܐ܆ ܕܰܩܕܳܡ ܥܰܝ̈ܢܰܝܟܽܘܢ ܣܺܝܡܳܐ܆ ܠܗܳܕܶܐ ܟܰܕ ܢܳܣܒܺܝܢ ܐܢ̱ܬܽܘܢ ܛܰܪܘ. ܟܰܕ ܣܡܰܝ̈ܳܐ ܐܺܝܬܰܝܟܽܘܢ ܚܙܰܘ ܠܳܐ ܬܽܘܒ ܒܚܶܫܘܟܳܐ ܕܰܚܛܺܝܬܳܐ ܬܶܬܚܙܽܘܢ ܕܡܰܣܡܶܝܢ ܐܢ̱ܬܽܘܢ. ܠܘܳܬ ܐܽܘܪܚܳܐ ܬܪܺܝܨܬܳܐ ܐܶܬܩܪܺܝܬܽܘܢ. ܠܗܳܝ ܡܥܰܩܰܡܬܳܐ ܛܥܰܘ܆ ܘܰܡܫܰܡܠܝܳܐܺܝܬ ܠܥܶܩܒܬ̣ܳܐ ܕܺܝܠܟܽܘܢ ܠܪܽܘܚܩܳܐ ܡܶܢ ܗܳܕܶܐ ܥܰܒܶܕܘ.

ܡܶܢ ܟܽܠ ܓܰܒܺܝ̈ܢ ܛܰܝܒܽܘܬܳܐ ܕܡܰܥܡܽܘܕܺܝܬܳܐ ܬܶܗܘܶܐ ܟܪܺܝܟܳܐ ܠܟܽܘܢ܆ ܟܰܕ ܫܽܘܪܳܐ ܠܳܐ ܡܶܬܟܰܒܫܳܢܳܐ ܐܺܝܬܶܝܗ̇ ܠܡܰܩܪ̈ܒܳܢܶܐ. ܠܗܳܝ ܟܺܝܬ ܕܳܐܦ ܚܽܘܛܪܳܐ ܗܰܘ ܕܡܽܘܫܶܐ ܩܳܕܶܡ ܗ̱ܘܳܐ ܡܫܰܘܕܰܥ܆ ܕܛܽܘܦܣܳܐ ܐܰܚܺܝܕ ܗ̱ܘܳܐ ܕܰܨܠܺܝܒܳܐ܆ ܘܰܠܝܰܡܳܐ ܗܰܘ ܣܽܘܡܳܩܳܐ ܦܠ̣ܰܓ܆ ܐܰܝܟܰܢܳܐ ܕܢܺܐܡܰܪ ܟܬܳܒܳܐ ܗܰܘ ܟܳܗܢܳܝܳܐ ܘܡܰܝ̈ܳܐ ܐܺܝܬܰܝܗܽܘܢ ܗ̱ܘܰܘ ܠܗܽܘܢ ܫܽܘܪܳܐ ܡܶܢ ܝܰܡܺܝܢܳܐ ܘܫܽܘܪܳܐ ܡܶܢ ܣܶܡܳܠܳܐ^[83]. ܠܗܳܢܳܐ ܚܽܘܛܪܳܐ ܗܰܘ ܡܰܢ ܫܛܰܚ ܥܰܠ ܡܰܝ̈ܳܐ ܛܽܘܦܣܳܢܳܐܺܝܬ. ܚܢܰܢ ܕܶܝܢ ܪܽܘܚܳܢܳܐܺܝܬ ܢܣܺܝܡܝܘܗ̱ܝ ܥܠܰܝܗܽܘܢ. ܗܳܢܳܐ ܐܳܦ ܠܡܰܝ̈ܳܐ ܕܡܰܠܦܳܢܽܘܬܳܐ ܡܰܪܬܝܳܢܺܝܬܳܐ ܘܰܕܬܰܘܕܺܝܬܳܐ ܕܗܰܝܡܳܢܽܘܬܳܐ ܚܠܺܝܡܬܳܐ܆ ܡܶܢ ܫܽܘܥܳܐ ܕܺܝܠܝ ܗܰܘ ܕܝܰܬܺܝܪ ܡܶܢ ܟܽܠ ‌ܐܺܝܬܰܘܗ̱ܝ ܝܰܒܺܝܫܳܐ ܐܰܒܰܥ܆ ܘܟܰܕ ܥܰܠ ܢܰܗܪܳܐ ܡܶܨܪܳܝܳܐ ܘܦܳܠܰܚ ܠܫ̈ܺܐܕܶܐ ܕܪܽܘܫܥܳܐ ܡܰܢܺܝܢܳܝܳܐ ܐܳܦܶܢ ܠܰܘ ܥܰܠ ܟܽܠܶܗ ܐܶܬܬܰܝܬܺܝ ܘܰܡܚܳܐ ܒܡܰܟܣܳܢܽܘܬܳܐ܆ ܠܪܶܕܝܳܐ ܫܥܺܝܢܳܝܳܐ ܠܰܕܡܳܐ ܫܰܚܠܶܦ܆ ܐܰܝܟܰܢܳܐ ܕܠܳܐ ܢܶܫܟܰܚ ܐ̱ܢܳܫ ܠܡܶܫܬܳܐ ܡܶܢܶܗ. ܢܶ݀ܥܪܽܘܩ ܗܳܟܺܝܠ ܡܶܢ ܪܽܘܫܥܳܐ ܕܡܳܢܳܝܳܐ ܘܩܳܛܽܘܠܳܐ ܕܓܽܘܕܳܦ̈ܶܐ. ܘܝܰܬܺܝܪܳܐܺܝܬ ܟܽܠܗܶܝܢ ܗܳܠܶܝܢ ܕܺܐܝܬܰܝܗܶܝܢ ܕܠܺܝ̈ܠܳܬ ܠܨܰܝܕܳܐ ܡܶܢ ܢܶܫ̈ܶܐ. ܘܢܶ݀ܪܗܰܛ ܠܘܳܬ ܡܫܺܝܚܳܐ ܡܥܺܝܢܳܐ ܕܚܰܝ̈ܶܐ. ܠܶܗ ܬܶܫܒܽܘܚܬܳܐ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܡܐܐ ܘܥܶܣܪܝܢ ܘܰܬܠܳܬܐ.

[1]ܡܰܪܬܝܳܢܽܘܬܐ ܗܳܕܶܐ ܕܳܐܡܪܺܝܢܰܢ ܒܠܶܫܳܢܳܐ ܣܽܘܪܝ̣ܳܝ̣ܳܐ܆ ܡܙܰܡܢܽܘܬܳܐ ܡܶܬܩܰܪܝܳܐ ܒܠܶܫܳܢܳܐ ܝܰܘܢܳܝܐ܆ ܐܰܝܟ ܕܡܶܢ ܫܡܳܐ ܕܰܙܡܳܡܳܐ ܐܰܘܟܺܝܬ ܨܰܘܬܳܐ ܡܶܕܶܡ ܪܰܟܺܝܟܳܐ ܕܠܰܘ ܩܳܠܰܐ ܗ̄ܘ. ܘܗܳܕܶܐ ܕܳܡܝܳܐ ܕܶܐܬܰܐܡܪܰܬ܆ ܡܶܢ ܗܳܝ ܕܗܳܢܽܘܢ ܕܡܰܪܬܶܝܢ ܠܰܘ ܩܰܫܝܳܐܝܬ ܩܳܥܶܝܢ ܗ̱ܘܰܘ܆ ܘܠܐ ܐܰܝܟ ܢܳܨܶܝܢ ܘܪܳܫܶܝܢ܆ ܐܶܠܐ ܐܰܝܟ ܠܳܚܫܺܝܢ ܘܰܡܫܰܓܫܺܝܢ ܪܰܟܺܝܟܳܐܝܬ܆ ܘܟܰܕ ܐܰܝܟ ܗܰܘ ܕܡܳܠܟܺܝܢ ܐܳܡܪܺܝܢ ܗ̱ܘܰܘ. ܡܶܛܽܠ ܗܳܕܶܐ ܐܳܡܰܪ ܡܰܠܦܳܢܳܐ ܕܒܶܗ ܒܰܫܡܳܐ ܕܺܝܠܶܗ ܕܣܽܘܥܪܳܢܳܐ ܨܳܒܶܐ ܕܢܶܬܪܢܶܐ܆ ܘܒܰܙܡܳܡ̈ܶܐ ܢܶܬܚܰܫܰܚ ܘܠܰܘ ܒܰܒ̈ܢܳܬ ܩ̈ܳܠܶܐ. ܥܠܶܝܗ̇ ܕܗܳܕܶܐ ܣܟܽܘܠܝܘܢ ܡܫܰܘܕܥܳܢܳܐ ܥܒܺܝܕ ܠܺܝ܆ ܐܳܦ ܒܡܺܐܡܪܳܐ ܗܰܘ ܕܥܶܣܪܺܝܢ ܩܰܕܡܳܝܬܳܐ ܘܚܰܕ܆ ܕܺܐܝܬܰܘܗ̱ܝ ܡܰܪܬܝܳܢܽܘܬܳܐ

ܝܘܚܢܢ. 10: 9 [2]

 ܝܘܚܢܢ. 14: 6 [3]

ܐܪܡܝܐ. 23: 23 [4]

ܟܒܰܪ[5]

ܡܬܝ. 17: 2  ܡܪܩܘܣ. 9: 1[6]

ܡܙܡܘܪ̈ܐ. 104: 24 [7]

 ܠܘܩܐ. 9: 31 [8]

ܐ. ܛܝܡܬܐܘܣ. 3: 16 [9]

[10]ܒܦܪܢܫܝܐ ܗܳܟܰܢ ܟܳܬܶܒ ܗ̱ܘܳܐ. Lecture difficileܐܘܟܝܬ ܡܠܬܐ ܦܫܝܩܐܝܬ ܠܳܐ ܡܬܩܪܝܐ ܗ̱ܘܳܬ.

[11]ܡܬܝ. 17: 4  ܐܦ ܡܪܩܘܣ. 9: 4 ـ 5  ܐܦ ܠܘܩܐ. 9: 33

 ܡܬܝ. 17: 5.[12]

ܡܬܝ. 17: 6 [13]

ܡܬܝ. 17: 7[14]

[15]ܡܬܝ. 17: 5  ܐܦ ܡܪܩܘܣ. 17: 7  ܐܦ ܠܘܩܐ. 9: 35

ܥܒܪ̈ܝܐ. 1: 3 [16]

[17]ܦܪܺܝܫ ܗܳܪܟܳܐ܆ ܠܰܘ ܚܠܳܦ ܡܫܚܠܦ ܣܺܝܡ܆ ܐܶܠܐ ܐܰܝܟ ܦܣܺܝܩ ܐܰܘ ܦܠܺܝܓ. ܡܫܰܚܠܰܦ ܗ̱ܘ̣ ܓܶܝܪ ܨܶܡܚܳܐ ܡܶܢ ܗܰܘ ܕܡܰܨܡܰܚ ܠܶܗ܆ ܡܶܛܽܠ ܕܠܐ ܡܰܨܡܰܚ ܗܽܘ ܠܗܰܘ܆ ܐܰܝܟܰܢܳܐ ܕܡܰܨܡܰܚ ܗܰܘ ܠܗܳܢܳܐ܆ ܠܰܘ ܓܶܝܪ ܐܰܝܟܰܢܳܐ ܕܰܒܪܳܐ ܡܶܢ ܐܰܒܳܐ܆ ܗܳܟܰܢܳܐ ܐܦ ܐܰܒܳܐ ܡܶܢ ܒܪܳܐ. ܒܗܳܕܶܐ ܡܫܰܚܠܰܦ ܗ̄ܘ̣ ܐܰܒܳܐ ܡܶܢ ܒܪܳܐ ܘܰܒܪܳܐ ܡܶܢ ܐܰܒܳܐ܆ ܠܐ ܕܶܝܢ ܦܪܺܝܫ ܐܰܘ ܦܣܺܝܩ ܐܰܘ ܦܠܺܝܓ ܡܶܢܶܗ܆ ܡܶܛܽܠ ܕܳܐܦܠܳܐ ܡܶܢ ܫܶܡܫܳܐ ܡܰܨܝܳܐ ܕܢܶܬܦܪܶܫ ܐܰܘ ܢܶܬܦܣܶܩ ܙܰܠܺܝܩܶܗ ܐܰܘ ܨܶܡܚܶܗ.

[18]ܣܰܓܺܝ ܫܰܦܺܝܪܳܐ ܗ̱ܘܳܬ ܕܬܶܬܶܐܡܰܪ ܗܳܪܟܳܐ܆ ܚܠܳܦ ܗܰܘ ܕܺܐܝܬܰܘܗ̱ܝ ܡܶܢ ܗܰܘ ܕܺܐܝܬܰܘܗ̱ܝ ܢܶܬܬܰܘܕܶܐ܆ ܐܺܝܬܝܳܐ ܡܶܢ ܐܺܝܬܝܳܐ ܢܶܬܬܰܘܕܶܐ. ܡܶܛܽܠ ܕܶܝܢ ܕܠܰܝܬ ܒܠܶܫܳܢܳܐ ܝܰܘܢܳܝܳܐ ܕܢܺܐܡܰܪ ܐ̱ܢܳܫ ܗܳܟܰܢܳܐ܆ ܘܠܐ ܡܰܠܦܳܢܳܐ ܐܶܡܰܪ ܡܶܛܽܠ ܕܠܐ ܡܨܶܐ ܗ̱ܘܳܐ܆ ܐܳܦܠܐ ܐܶܢܳܐ ܦܰܫܩܶܬ ܘܣܳܡܶܬ ܗܳܟܰܢܳܐ: ܡܶܛܽܠ ܕܠܐ ܨܒܺܝܬ. ܒܪܰܡ ܐܳܦ ܠܝܰܘ̈ܢܳܝܶܐ ܐܺܝܬ ܠܗܽܘܢ ܡܶܕܶܡ ܐ̱ܚܪܺܢܳܐ ܗܳܪܟܳܐ: ܕܠܐ ܡܶܬܶܐܡܰܪ ܣܽܘܪܝܳܐܝܬ܆ ܕܠܰܘ ܡܶܠܬܳܐ ܐܺܝܬܶܝܗ̇ ܗܳܝ ܕܶܐܡܰܪ ܡܰܠܦܳܢܳܐ ܗܳܪܟܳܐ: ܗܳܢܰܘ ܕܶܝܢ ܐܺܝܬܰܘܗ̱ܝ. ܐܶܠܐ ܡܫܰܘܬܦܽܘܬܳܐ. ܗܳܢܰܘ ܕܶܝܢ܆ ܕܺܐܝܬܰܘܗ̱ܝ. ܠܰܘ ܓܶܝܪ ܐܺܝܬܰܘܗ̱ܝ ܡܶܢ ܐܺܝܬܰܘܗ̱ܝ ܐܶܡܰܪ܆ ܐܶܠܐ ܕܺܐܝܬܰܘܗ̱ܝ ܡܶܢ ܕܺܐܝܬܰܘܗ̱ܝ. ܗܳܢܰܘ ܕܶܝܢ. ܐܺܝܬܝܳܐ ܕܡܶܢ ܐܺܝܬܝܳܐ.

ܐܝܘܒ. 38: 28 ـ 29[19]

ܝܘܚܢܢ. 1: 1 [20]

ܡܬܝ. 11: 27[21]

 ܥܶܒܪ̈ܝܐ. 1: 3 [22]

ܐ. ܩܘܪ̈ܝܢܬܝܐ. 1: 24 [23]

ܝܘܐܝܠ. 2: 25 [24]

 ܡܬܝ. 22: 29[25]

.ܐ. ܩܘܪ̈ܝܢܬܝܐ. 12: 8 ـ 10.[26]

ܒ. ܩܘܪ̈ܝܢܬܝܐ. 12: 11 ـ 12 [27]

ܝܫܘܥ ܒܪܢܘܢ. 24: 12 [28]

ܡܦܩܢܐ. 9: 16  ܐܦ ܪ̈ܗܘܡܝܐ. 9: 17 [29]

 ܝܘܚܢܢ. 4: 24 [30]

ܡܙܡܘܪ̈ܐ. 104: 4 [31]

 ܡܙܡܘܪܐ. 10: 1[32]

ܛܥܺܝܢ ܢܽܘܗܪܳܐ[33]

 ܝܗܝܗ[34]

 ܝܗܝܗ[35]

ܐܦܣ̈ܝܐ. 4: 10 [36]

 ܐܺܝܬܰܘܗ̱ܝ ܗ̱ܘܳܐ ܕܶܝܢ ܕܰܡܡܰܟܶܟ ܗܽܘ ܠܶܗ ܥܕܰܡܳܐ ܠܡܰܘܬܳܐ.[37]

 ܨܒܐ[38]

ܡܙܡܘܪ̈ܐ. 110 1 [39]

[40]ܗܳܪܟܳܐ ܠܥܶܠ ܟܬܺܝܒ ܗ̱ܘܳܐ ܒܳܐܬܘ̈ܳܬܳܐ ܥܶܒܪ̈ܳܝܳܬܳܐ ܫܡܳܐ ܠܐ ܐܶܬܡܰܨܝܬ ܠܺܝ ܕܶܐ݀ܟܬܒܺܝܘܗܝ. ܟܡܐ ܕܢܰܣܺܝܬ̣. ܝܗܝܗ.

[41] ܐܰܝܟ ܡܰܢ ܕܠܰܫܡܳܐ ܗܰܘ ܕܰܐܕܽܘܢܺܝ: ܗܳܢܰܘ ܕܶܝܢ ܡܳܪܝܳܐ: ܢܰܩܺܝܦ ܒܰܟ̈ܬܳܒܶܐ ܒܕܽܘܟ̈ܝܳܬܳܐ ܣܰܓܺܝ̈ܐܬܐ: ܗܰܘ ܫܡܳܐ ܕܰܨܒܰܐܘܽܬ ܕܺܐܝܬܰܘܗ̱ܝ ܐܰܘ ܕܚܰܝ̈ܠܰܘܳܬܳܐ ܐܰܘ ܕܦܳܠܰܚ̈ܘܳܬܳܐ: ܟܰܪ ܐܳܡܪܺܝܢ ܐܰܕܽܘܢܺܝ ܨܒܰܐܘܽܬ ܗܳܢܰܘ ܕܶܝܢ ܡܳܪܝܳܐ ܕܚܰܝ̈ܠܰܘܳܬܳܐ܆ ܐܰܝܟ ܡܰܢ ܕܡܶܢ ܗܳܕܶܐ ܕܳܢ ܡܰܠܦܳܢܳܐ ܕܰܫܡܳܐ ܗܳܢܳܐ ܡܳܪܳܢܳܝܳܐ ܐܺܝܬܰܘܗ̱ܝ ܥܰܠ ‌ܐܰ‌ܠܳܗܳܐ: ܘܥܰܠ ܒܢܰܝ̈ܢܳܫܳܐ ܐܶܢ ܡܶܬܬܣܺܝܡ ܚܫܰܚܬܳܢܳܐܝܬ ܡܶܬܶܐܡܰܪ ܘܠܰܘ ܡܳܪܳܢܳܐܝܬ: ܘܡܶܢ ܫܡܳܗ̈ܶܐ ܗܳܢܽܘܢ ܠܐ ܡܫܰܘ̈ܬܦܶܐ ܘܠܐ ܚ̈ܠܺܝܛܶܐ ܐܺܝܬܰܘܗ̱ܝ܆ ܟܽܠ ‌ܐܰܝܢܳܐ ܕܣܳܡܶܗ ܠܦܶܬܓܳܡܳܐ ܗܳܢܳܐ ܕܕܰܘܺܝܕ܆ ܐܳܦܶܢ ܠܰܝܬ ܗ̱ܘܳܐ ܒܶܗ ܕܚܰܝ̈ܠܰܘܳܬܳܐ. ܡܳܪܝܳܐ ܕܚܰܝ̈ܠܰܘܳܬܳܐ ܣܳܡܶܗ ܗܽܘ. ܟܰܕ ܐܶܡܰܪ ܐܰܝܟ ܕܡܶܢ ܕܰܘܺܝܕ܆ ܐܶܡܰܪ. ܡܳܪܝܳܐ ܠܡܳܪܝܳܐ ܕܚܰܝ̈ܠܰܘܳܬܳܐ܆ ܬܶܒ ܡܶܢ ܝܰܡܺܝܢܝ. ܐܰܝܟܰܢܳܐ ܕܰܢܚܰܘܶܐ ܟܰܕ ܡܰܒܗܶܬ ܠܝܗܘ̈ܕܝܐ ܘܰܠܢܶܣܛܘܪ̈ܝܢܐ ܕܒܳܥܶܝܢ ܕܢܺܐܡܪܽܘܢ ܕܰܠܒܰܪܢܳܫܳܐ ܐܶܬܰܐܡܪܰܬ. ܕܰܐ‌ܠܳܗܳܐ ܗܰܘ ܫܰܪܺܝܪܳܐ ܡܫܺܝܚܳܐ܆ ܘܡܳܪܝܳܐ ܕܚܰܝ̈ܠܰܘܳܬܳܐ܆ ܗܳܢܰܘ ܕܶܝܢ ܨܒܰܐܘܽܬ܆ ܗܰܘ ܕܶܐܬܶܐܡܰܪ ܠܶܗ ܡܶܢ ܝܗܝܗ ܐܰ‌ܠܳܗܳܐ ܐܰܒܳܐ܆ ܕܬܶܒ ܠܳܟ ܡܶܢ ܝܰܡܺܝܢܝ.

[42]ܐܰܝܟ ܕܰܠܘܳܬ ܦܽܘܫܳܩܳܐ ܕܠܶܫܳܢܳܐ ܝܰܘܢܳܝܳܐ܆ ܐܶܡܰܪ ܡܰܠܦܳܢܳܐ܆ ܡܶܛܽܠ ܕܗܳܢܽܘܢ ܕܩܳܪܶܝܢ ܒܠܶܫܳܢܳܐ ܝܰܘܢܳܝܳܐ܆ ܟܰܕ ܚܳܙܶܝܢ ܕܶܐܡܰܪ ܡܳܪܝܳܐ ܠܡܳܪܝܳܐ ܟܬܺܝܒ܆ ܠܐ ܝܳܕܥܺܝܢ ܐܶܢ ܐܺܝܬ ܫܽܘܚܠܳܦܳܐ ܒܠܶܫܳܢܳܐ ܥܶܒܪܳܝܳܐ܆ ܒܰܫܡܳܐ ܗܰܘ ܕܡܳܪܝܳܐ܆ ܠܘܳܬ ܗܰܘ ܫܡܳܐ ܐ̱ܚܪܺܢܳܐ ܕܡܳܪܝܳܐ. ܒܥܶܒܪܳܝܳܐ ܕܶܝܢ܆ ܠܰܘ ܗܽܘ ܟܰܕܗܽܘ ܫܡܳܐ ܐܺܝܬܰܘܗ̱ܝ. ܐܶܠܐ ܗܰܘ ܡܰܢ ܩܰܕܡܳܝܳܐ ܐܺܝܬܰܘܗ̱ܝ ܝܗܝܗ: ܠܗܰܘ ܕܳܐܦ ܒܗܽܘܢ ܒܣܽܘܪ̈ܛܶܐ ܥܶܒܪ̈ܳܝܶܐ ܘܟܰܕ ܠܐ ܡܦܰܫܰܩ ܫܰܒܩܽܘܗܝ ܡܦܰܫ̈ܩܳܢܶܐ܆ ܗܰܘ ܕܶܝܢ ܐ̱ܚܪܳܝܳܐ܆ ܐܰܕܽܘܢܝ ܐܰܘܟܺܝܬ ܡܳܪܝܳܐ ܟܬܺܝܒ܆ ܠܗܰܘ ܕܰܐܡܪܶܗ ܡܰܠܦܳܢܳܐ ܕܗܽܘ ܐܺܝܬܰܘܗ̱ܝ ܡܝܰܩܪܳܐ܆ ܐܰܝܟ ܡܰܢ ܕܗܽܘ ܣܺܝܡ ܒܰܟ̈ܬܳܒܶܐ܆ ܩܕܳܡ ܗܰܘ ܫܡܳܐ ܕܚܰܝ̈ܠܰܘܳܬܳܐ. ܡܶܛܽܠ ܕܶܝܢ ܕܢܶܬܝܰܕܥ̈ܳܢ ܢܰܗܺܝܪܳܐܝܬ: ܗܳܠܶܝܢ ܕܡܶܛܽܠ ܬܪ̈ܰܝܗܽܘܢ ܗܳܠܶܝܢ ܫܡܳܗ̈ܶܐ܆ ܗܳܐ ܣܟܽܘܠܝܘܢ ܚܰܕ ܪܰܒܳܐ: ܥܒܺܝܕ ܗ̱ܘܳܐ ܠܺܝ ܡܶܛܽܠܳܬܶܗ ܕܰܫܡܳܐ ܗܳܢܳܐ ܕܰܠܘܳܬ ܥܶܒܪ̈ܳܝܶܐ: ܕܣܺܝܡ ܒܰܟ̈ܬܳܒܰܝ ܩܽܘܕܫܳܐ܆ ܘܰܪܢܺܝܬ ܕܳܐܦ ܒܳܬܰܪ ܫܽܘܠܳܡܶܗ ܕܡܺܐܡܪܳܐ ܗܳܢܳܐ܆ ܢܶܬܟܬܶܒ ܘܢܶܬܬܣܺܝܡ ܒܰܦܪܰܐܓܡܰܛܺܝܰܐ ܗܳܕܶܐ.

[43]ܗܳܪܟܳܐ ܠܥܶܠ ܟܬܺܝܒ ܗ̱ܘܳܐ ܒܳܐܬܘ̈ܳܬܳܐ ܥܶܒܪ̈ܳܝܳܬܳܐ ܫܡܳܐ ܠܐ ܐܶܬܡܰܨܝܬ ܠܺܝ ܕܶܐ݀ܟܬܒܺܝܘܗܝ. ܟܡܐ ܕܢܰܣܺܝܬ̣. ܝܗܝܗ.

ܡܙܡܘܪ̈ܐ. 110: 1 [44]

ܦܝܠܝܦܣ̈ܝܐ. 2: 6 [45]

ܐܫܥܝܐ. 42: 8  ܐܦ 48: 11 [46]

ܡܙܡܘܪ̈ܐ. 110: 3  ܐܦ 110: 1 [47]

ܐܫܥܝܐ. 45: 12 [48]

ܡܙܡܘܪ̈ܐ. 118: 73 [49]

ܫܥܝܐ. 49: 15 [50]

ܡ̈ܬܠܐ. 31: 2 [51]

ܡܙܡܘܪ̈ܐ. 110: 3 [52]

ܐܰܘܟܺܝܬ ܬܠܳܬܡܳܐܐ ܘܰܬܡܳܢܬܰܥܣܰܪ ܐܰܒܳܗ̈ܳܬܳܐ ܕܢܺܝܩܺܝܰܐ.[53]

ܕܢܝܐܝܠ. 9: 22 ـ 23 [54]

ܠܘܩܐ. 1: 78 ـ 79 [55]

ܝܘܚܢܢ. 17: 21 [56]

ܥܒܪ̈ܝܐ. 1: 3 [57]

ܝܘܚܢܢ. 15: 26 [58]

[59]ܗܳܕܶܐ ܕܰܐܣܪܚܶܗ܆ ܠܰܘ ܗܳܟܰܢܳܐ ܐܺܝܬܶܝܗ̇ ܝܰܘܢܳܐܝܬ܆ ܐܶܠܐ ܡܶܢܶܗ ܕܰܫܡܳܐ ܕܪܽܘܚܳܐ ܐܰܡܺܝܪܳܐ. ܡܶܛܽܠ ܕܶܝܢ ܕܠܐ ܡܶܫܟܚܺܝܢܰܢ ܚܢܰܢ ܕܢܺܐܡܪܝܗ̇ ܣܽܘܪܝܳܐܝܬ܆ ܐ̱ܚܪ̈ܳܢܝܳܬܳܐ ܐܳܡܪܺܝܢܰܢ. ܢܰܦܚܶܗ. ܐܰܦܫܶܗ. ܐܰܫܒܶܗ. ܐܰܦܩܶܗ. ܐܰܣܪܚܶܗ.

ܥܡ[60]

ܡܶܢ ܚܙܺܝܪ̈ܐ[61]

[62]ܗܳܝ ܕܶܐܡܰܪ ܡܰܐܢܺܝ ܒܡ̈ܶܠܰܘܗܝ ܠܥܶܠ: ܡܶܛܽܠ ‌ܐܰ‌ܠܳܗܳܐ ܛܳܒܳܐ: ܕܠܰܝܬ ܠܬܰܚܬ ܘܠܐ ܡܶܕܶܡ ܕܰܥܡܺܝܕ ܘܰܓܢܶܐ ܡܶܢܶܗ܆ ܡܶܛܽܠ ܟܺܝܬ ܕܗܺܝ ܗܳܝ ܕܢܺܐܡܰܪ ܕܰܥܡܺܝܕ ܕܺܐܝܬܶܝܗ̇ ܗ̱ܘܳܬ ܗܘܦܘܕܛܘܢ: ܐܺܝܬ ܠܳܗ̇ ܕܽܘܡܝܳܐ ܠܘܳܬ ܫܡܳܐ ܕܰܠܒܽܘܫܳܐ ܬܰܚܬܳܝܳܐ: ܗܰܘ ܕܠܳܒܶܫ ܐ̱ܢܳܫ ܬܚܶܝܬ ܡܳܐܢܰܘ̈ܗܝ܆ ܡܶܛܽܠ ܗܳܕܶܐ ܟܰܕ ܡܰܓܚܶܟ ܒܶܗ ܡܰܠܦܳܢܳܐ ܥܰܠ ܕܶܐܡܰܪ ܕܠܰܝܬ ܡܶܢ ܠܬܰܚܬ ܗܘܦܘܕܛܘܢ ܗܳܢܰܘ ܕܶܝܢ ܠܒܽܘܫܳܐ ܬܰܚܬܳܝܳܐ܆ ܐܳܡܰܪ ܠܘܳܬܶܗ܆ ܕܰܐܝܟ ܕܡܶܛܽܠ ‌ܐ̱ܢܳܫ ܕܩܰܪܺܝܪ ܠܶܗ܆ ܡܡܰܠܶܠ ‌ܐܰܢ̱ܬ ܡܶܛܽܠ ‌ܐܰ‌ܠܳܗܳܐ ܛܳܒܳܐ.

ܒ. ܩܘܪ̈ܝܢܬܝܐ. 6: 14[63]

ܒ. ܛܝܡܬܐܘܣ. 3: 9 [64]

ܒܺܕ̥ܝ̈ܶܐ[65]

ܥܒܪ̈ܝܐ. 1: 3 [66]

ܪ̈ܗܘܡܳܝܐ. 1: 20[67]

ܐܰ‌ܠܳܗܳܐ[68]

ܣܶܦܪܐ ܕܒܪܝܬܐ. 1: 26 [69]

[70]ܫܡܳܐ ܕܨܰܠܡܳܐ ܠܘܳܬ ܝܰܘ̈ܢܳܝܶܐ܆ ܡܶܢ ܗܳܝ ܕܡܣܒܗ ܡܶܬܰܐܡܪܳܐ. ܐܰܝܟ ܐ̱ܢܳܫ ܢܺܐܡܰܪ ܣܶܒܗܳܐ.

[71]ܙܳܕܶܩ ܠܡܶܕܰܥ. ܕܠܰܘ ܡܩܰܝܡܳܐ ܚܛܺܝܬܳܐ ܐܳܡܰܪ ܡܰܠܦܳܢܳܐ܆ ܐܰܘ ܕܺܐܝܬ ܡܶܕܶܡ܆ ܕܥܳܒܶܕ ܠܳܗ̇ ܡܩܰܝܰܡܬܳܐ. ܠܰܘ ܓܶܝܪ ܕܰܡܩܰܝ̈ܡܳܢ ܠܳܗ̇ ܬܪܺܝܨܳܐܝܬ ܐܰܡܺܝܪܳܐ ܒܝܰܘܢܳܝܳܐ: ܘܳܐܦܶܢ ܠܐ ܡܨܶܝܢܰܢ ܕܢܺܐܡܪܝܗ̇ ܠܡܶܠܬܳܐ ܐܰܝܟ ܕܺܐܝܬܶܝܗ̇܆ ܐܶܠܐ ܡܩܰܝ̈ܡܳܢ ܠܳܗ̇ ܡܫܳܟܳܐܝܬ.

ܐܓܪܬܐ ܕܝܗܘܕܐ. 6[72]

 ܒ. ܦܛܪܘܣ. 3: 7 [73]

ܡܬܝ. 25: 41 [74]

ܣܶܦܪܐ ܕܒܪܝܬܐ. 1: 31[75]

ܐܫܥܝܐ. 14: 13 [76]

 ܝܘܚܢܢ. 8: 12 [77]

ܐܫܥܝܐ. 43: 25 [78]

ܛܝܛܘܣ. 3: 5 [79]

ܐܫܥܝܐ. 29: 19 [80]

 ܐܦܣ̈ܝܐ. 2: 12 ـ 13 [81]

ܐܫܥܝܐ. 42: 16[82]

ܡܦܩܢܐ. 14: 22 [83]