ܡܺܐܡܪܳܐ ܕܡܳܐܐ ܘܥܶܣܪܺܝܢ ܘܰܬܪܶܝܢ

ܡܚܰܦܛܳܢܽܘܬܳܐ ܕܥܰܠ ܡܰܘܗܰܒܬܳܐ ܗܳܝ ܕܰܥܝܳܕܳܐ ܕܦܶܪ̈ܩܶܐ ܕܟܶܬܳܢܳܐ܆ ܡܶܛܽܠ ܗܳܢܽܘܢ ܕܰܥܡܺܝܠܺܝܢ ܒܟܺܐܒܳܐ ܕܰܐܪܝܳܢܽܘܬܳܐ܆ ܐܰܘ ܐ̱ܚܪܳܢܝܳܐܺܝܬ ܟܪܺܝܗܶܝܢ.

122: ܥܗܺܝܕ ܐ̱ܢܳܐ ܕܳܐܦ ܒܙܰܒܢܳܐ ܗܰܘ ܕܰܥܒܰܪ^[1] ܚܰܦܶܛܬܟܽܘܢ܆ ܕܬܠܚ̈ܶܐ ܕܦܶܪ̈ܩܶܐ ܗܳܢܽܘܢ ܕܟܶܬܳܢܳܐ ܕܰܠܘܳܬ ܡܢܺܝܚܳܢܽܘܬܳܐ ܐܳ‌ܠܨܳܝܬܳܐ ܕܗܳܢܽܘܢ ܕܰܒܟܽܘܪܗܳܢܳܐ ܥܡܺܝܠܺܝܢ܆ ܠܰܘ ܥܰܡ ܠܶܒܳܐ ܚܰܣܽܘܟܬܳܢܳܐ^[2] ܬܥܰܠܽܘܢ܆ ܐܰܝܟܰܢܳܐ ܟܺܝܬ ܕܶܐܢܳܐ ܐܳܦ ܠܟܽܠܶܗ ܡܰܬܠܳܐ ܗܰܘ ܕܒܶܐܘܰܢܓܶܠܺܝܽܘܢ ܐܶ݀ܣܺܝܡ ܩܕܳܡܰܝܟܽܘܢ ܐܰܝܟ ܕܰܠܦܽܘܫܳܩܳܐ܆ ܕܓܰܒܪܳܐ ܗܰܘ ܕܡܶܢ ܐܽܘܪܶܫܠܶܡ ܠܺܐܝܪܺܝܚܽܘ ܢܳܚܶܬ ܗ̱ܘܳܐ^[3]܆ ܘܰܠܚܰܝܠܶܗ ܕܗܳܢܳܐ ܐܰܝܟ ܡܫܽܘܚܬܳܐ ܕܺܝܠܝ ܙܥܽܘܪܬܳܐ ܐܶ݀ܢܰܗܰܪ܆ ܐܶܡܰܬܝ ܕܟܰܕ ܐܳܦ ܐܶܬܢܓܶܕܬܽܘܢ ܒܡܰܫܡܰܥܬܟܽܘܢ ܐܰܝܟܰܢܳܐ ܕܡܰܣܒܪܺܝܢ ܗ̱ܘܰܝܬܽܘܢ܆ ܝܰܬܺܝܪ ܫܦܺܝ̈ܥܶܐ ܘܪܰܘܪ̈ܒܰܝ ܢܰܦܫܳܐ ܒܕܽܘܟ ܐܢ̱ܬܽܘܢ ܡܶܢܟܽܘܢ ܐܶܬܚܕܝܬܘܢ܆ ܠܘܳܬ ܡܰܘܗܰܒܬܳܐ ܕܦܶܪ̈ܩܶܐ ܗܳܝ ܕܶܐܬܰܐܡܪܰܬ. ܡܶܛܽܠ ܓܶܝܪ ܕܣܳܟ ܥܰܠ ܡܚܰܦܛܳܢܽܘܬܳܐ ܘܡܰܪܬܝܳܢܽܘܬܳܐ ܠܘܳܬ ܗܳܕܶܐ ܐܶ‌ܠ̣ܨܰܬ܆ ܠܳܐ ܒܳܗܶܬ ܐ̱ܢܳܐ ܕܰܫܦܺܝܥܽܘܬܳܐ ܘܪܰܒܽܘܬ ܢܰܦܫܳܐ ܐܶ݀ܩܪܶܝܗ̇ ܠܗܳܕܶܐ ܫܺܝܛܽܘܬܳܐ ܘܰܒܨܺܝܪܽܘܬܳܐ.

ܟܰܕ ܗܳܟܺܝܠ ܗܳܝܕܝܢ ܒܶܗ ܒܝܰܘܡܳܐ ܗܰܘ܆ ܚܘܺܝ̈ܚܶܐ ܐ̱ܢܳܫܺܝ̈ܢ ܐܶܬܚܙܺܝܬܽܘܢ ܘܰܫܦܺܝ̈ܥܶܐ ܒܡܰܘܗܰܒܬܳܐ܆ ܠܰܘ ܗܶܢܽܘܢ ܟܰܕ ܗܶܢܽܘܢ ܐܳܦ ܒܫܰܢ̱ܬܳܐ ܗܳܝ ܕܶܐܬ̣ܳܬ̣ ܒܳܬܪܳܗ̇ ܐܶܬܚܙܺܝܬܽܘܢ܆ ܒܣܰܓܺܝܽܐܘܬܳܐ ܕܶܝܢ ܒܨܺܝܪ̈ܶܐ. ܡܳܢܳܐ ܕܶܝܢ ܐܳܡܰܪ ܐ̱ܢܳܐ ܒܨܺܝܪ̈ܶܐ. ܟܰܕ ܒܰܠܚܽܘܕ ܕܰܐܝܟ ܢܳܡܽܘܣܳܐ ܥܳܒܕܺܝܢ ܐܢ̱ܬܽܘܢ ܡܚܰܘܶܝܢ ܗܘܰܝܬܽܘܢ ܡܨܰܕܝܳܢܳܐܺܝܬ܆ ܡܰܠܽܘܢ ܕܶܝܢ ܐܶܢ ܙܳܕܶܩ ܕܗܳܝ ܕܝܰܬܺܝܪ ܫܰܪܺܝܪܳܐ ܐܺ݀ܡܰܪ܆ ܟܰܕ ܐܳܦ ܒܶܗ ܒܰܥܝܳܕܳܐ ܠܢܶܫ̈ܶܐ ܡܶܣ̈ܟܺܝܢܳܬܳܐ ܘܰܠܓܰܒܪ̈ܶܐ ܫܺܝ̈ܛܶܐ ܘܰܒܨܺܝܪ̈ܶܐ ܡܰܫ̣ܦܶܝܢ ܗܘܰܝܬܽܘܢ܆ ܐܰܝܟܰܢܳܐ ܕܗܳܢܽܘܢ ܟܰܕ ܒܪܶܚܡܰܬ ܐܰ‌ܠܳܗܳܐ ܥܳܨܶܝܢ ܗ̱ܘܰܘ ܠܰܣܢܺܝܩܽܘܬܗܽܘܢ ܢܡܰܠܽܘܢ ܗܳܝ ܕܰܡܥܰܝܕܳܐ ܗ̱ܘܳܬ܆ ܘܰܟܠܺܝܠܳܐ ܗܰܘ ܕܗܳܝ ܐܰܪܡܰܠܬܳܐ ܢܒܰܝܬܽܘܢ ܠܗܽܘܢ܆ ܗܳܝ ܕܟܽܠܶܗ ܕܽܘܒܳܪܳܐ ܕܚܰܝ̣̈ܶܝ̣ܗ̇ ܒܰܬܪܶܝܢܫܳܡܽܘ̈ܢܶܐ ܦܽܘܠ̈ܣܶܐ ܡܶܬܗܰܦܰܟ ܗ̱ܘܳܐ܆ ܘܰܒܪܰܡ ܟܽܠܶܗ ܝܶܗܒܰܬ ܠܰܡܫܺܝܚܳܐ܆ ܟܰܕ ܠܰܐܠܺܝܨܽܘܬܳܐ ܕܩܶܢܝܳܢܳܗ̇ ܦܰܬܝܰܬ ܒܨܶܒܝܳܢܳܐ܆ ܘܥܽܘܬܪܳܐ ܪܰܒܳܐ ܚܰܘܝܰܬ ܐܶܢܽܘܢ ܠܗܳܢܽܘܢ ܬܪܶܝܢ ܫܳܡܽܘ̈ܢܶܐ܆ ܐܰܝܟܰܢܳܐ ܕܗܰܘ ܕܰܒܠܶܒ̈ܰܘܳܬܳܐ ܚܳܐܰܪ܆ ܘܠܳܐ ܡܶܬܒܰܩܶܐ ܕܡܳܢܰܐ ܗ̱ܘ ܗܰܘ ܕܶܐܬܺܝܗܶܒ܆ ܐܶܠܳܐ ܒܗܰܘ ܕܡܶܢܶܗ ܐܺܝܬܰܘܗ̱ܝ ܗܰܘ ܕܶܐܬܺܝܗܶܒ܆ ܘܰܠܡܰܠܝܽܘܬܳܗ̇ ܕܬܰܪܥܺܝܬܳܐ ܬܳܩܶܠ܆ ܢܶܦܣܽܘܩ ܘܢܺܐܡܰܪ܆ ܕܰܐܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܰܐܪܡܰܠܬܳܐ ܗܳܕܶܐ ܡܶܣܟܺܢܬܳܐ ܐܰܪܡܝܰܬ̣܆ ܝܰܬܺܝܪ ܡܶܢ ܟܽܠܗܽܘܢ ܗܳܢܽܘܢ ܕܪܳܡܶܝܢ ܗ̱ܘܰܘ ܒܒܶܝܬ ܓܰܙܳܐ^[4]. ܙܳܕܶܩ ܗܳܟܺܝܠ ܠܡܺܐܡܰܪ܆ ܠܘܳܬ ܗܳܢܽܘܢ ܕܰܟܪܺܝܗܶܝܢ ܐܰ‌ܠܺܝܨܽܘܬܳܐ ܘܰܙܥܽܘܪܽܘܬ ܢܰܦܫܳܐ ܕܰܒܗܳܠܶܝܢ܆ ܗܳܝ ܕܶܐܬܰܐܡܪܰܬ ܡܶܢ ܦܰܘܠܽܘܤ ܠܘܳܬ ܩܽܘܪ̈ܝܢܬܝܐ. ܐܶܬܪܰܘܰܚܘ ܐܳܦ ܐܢ̱ܬܽܘܢ ܘܠܳܐ ܬܶܬܐ‌ܱܠܨܽܘܢ ܒܪ̈ܰܚܡܰܝܟܽܘܢ^[5].

ܡܶܢ ܐܰܝܟܳܐ ܓܶܝܪ ܗܳܟܰܢܳܐ ܕܳܘܝܳܐܺܝܬ ܣܺܝܡܺܝܢ ܚ̱ܢܰܢ܆ ܘܺܐܝܬܰܝܢ ܚܰܣܽܘ̈ܟܬܳܢܶܐ^[6] ܐܳܦ ܒܪ̈ܽܘܩܥܶܐ. ܡܶܢ ܐܰܝܟܳܐ܆ ܡܶܢ ܗܳܝ ܕܰܠܗܳܠܶܝܢ ܐܰ‌ܠܳܗܳܝ̈ܳܬܳܐ ܠܳܐ ܥܳܒܕܺܝܢܰܢ ܥܰܡ ܝܺܕܰܥܬܳܐ܆ ܐܶܠܳܐ ܠܟܽܠܗܶܝܢ ܒܥܰܝ̈ܢܶܐ ܕܒܶܣܪܳܐ ܚܳܙܶܝܢ ܚ̱ܢܰܢ܆ ܒܬܰܪܥܺܝܬܳܐ ܕܶܝܢ ܘܳܐܦܠܳܐ ܚܕܳܐ. ܠܳܐ ܓܶܝܪ ܬܚܽܘܪ ܠܺܝ ܒܫܽܝܛܽܘܬܗܶܝܢ ܕܗܳܠܶܝܢ ܕܡܶܬܝܰܗ̈ܒܳܢ. ܐܶܬܒܰܩܳܐ ܕܶܝܢ ܡܰܠܽܘܢ܆ ܒܪܰܒܽܘܬ ܦܰܐܝܽܘܬܳܗ̇ ܕܥܶܠܬܳܐ ܐܰܘܟܺܝܬ ܨܒܽܘܬܳܐ܆ ܗܳܝ ܕܡܶܛܽܠܳܬܳܗ̇ ܗܳܠܶܝܢ ܡܶܬܝܰܗ̈ܒܳܢ. ܘܰܒܪܶܚܡܰܬ ܝܽܘܠܦܳܢܳܐ ܥܰܩܶܒ܆ ܕܡܶܛܽܠ ܡܶܢܳܐ ܚܕܳܐ ܙܒܰܢ̱ܬܳܐ ܒܝܰܘ̈ܡܳܬܳܐ ܗܳܠܶܝܢ܆ ܗܰܘ ܩܰܕܡܳܝܳܐ ܕܰܡܫܰܡ̈ܫܳܢܶܐ ܥܰܠ ܒܺܐܡܰܐ ܟܳܗܢܳܝܬܳܐ ܣܳܠܶܩ܆ ܘܡܰܙܥܶܩ ܒܟܳܪܽܘܙܽܘܬܳܐ ܓܠܺܝܬܳܐ ܘܟܶܢܫܳܢܳܝܬܳܐ܆ ܘܰܠܥܺܕܬܳܐ ܡܰܥܗܶܕ܆ ܕܡܰܘܗܰܒܬܳܐ ܗܳܕܶܐ ܬܰܥܶܠ܆ ܘܪ̈ܽܘܩܥܶܐ ܘܦܶܪ̈ܩܶܐ ܬܶܬܶܠ ܠܗܳܢܽܘܢ ܕܰܒܟܽܘܪܗܳܢܳܐ ܕܰܐܪܝܳܢܽܘܬܳܐ ܡܚܰܒܠܺܝܢ܆ ܐܰܘ ܒܓܰܪܒܳܐ ܥܡܺܝܠܺܝܢ܆ ܐܰܘ ܒܫܽܘܚ̈ܢܶܐ ܡܶܕܶܡ ܐ̱ܚܪ̈ܳܢܶܐ ܡܶܫܬܰܚܩܺܝܢ ܘܰܟܪܺܝܗܶܝܢ.

ܐܳܦ ܓܶܝܪ ܠܰܘ ܦܫܺܝܛܳܐܺܝܬ ܙܰܒܢܳܐ ܗܳܢܳܐ ܦܪܺܝܫ ܠܡܰܘܗܰܒܬܳܐ ܗܳܕܶܐ܆ ܙܥܽܘܪܬܳܐ ܡܰܢ܆ ܫܰܦܺܝܪܰܬ ܕܶܚܠܬܳܐ ܕܶܝܢ ܒܪܰܡ܆ ܘܰܕܡܶܢ ܗܳܠܶܝܢ ܐ̱ܚܪ̈ܳܢܝܳܬܳܐ ܐܰܝܟ ܕܶܐܢܳܐ ܕܳܐܶܢ ܐ̱ܢܳܐ ܝܰܬܺܝܪ ܫܰܦܺܝܪܰܬ ܕܶܚܠܬܳܐ. ܐܳܦ ܓܶܝܪ ܒܩܽܘܪܒܳܐ܆ ܘܥܰܠ ܬܰܪ̈ܥܶܐ ܐܺܝܬܰܘܗ̱ܝ ܥܺܐܕܳܐ ܦܳܪܽܘܩܳܝܳܐ. ܗܰܘ ܕܦܶܣܟܳܐ܆ ܗܰܘ ܕܒܶܗ ܐܺܝܬܰܘܗ̱ܝ ܥܽܘܗܕܳܢܳܐ ܕܚܰܫܳܐ ܗܰܘ ܨܶܒܝܳܢܳܝܐ ܘܰܐ‌ܠܳܗܳܝܳܐ. ܗܳܝ ܟܺܝܬ ܕܡܶܛܽܠ ܕܙܳܕܶܩ ܗ̱ܘܳܐ ܕܢܶܚܰܫ ܐܰ‌ܠܳܗܳܐ܆ ܐܰܝܟܰܢܳܐ ܕܰܒܝܰܕ ܣܰܓܺܝܐܘܬܳܗ̇ ܕܠܳܐ ܚܳܫܽܘܫܽܘܬܳܐ܆ ܠܰܡܥܺܝܢܳܐ ܕܚܰܫ̈ܶܐ ܗܳܝ ܕܰܕܠܳܐ ܚܰܘܣܳܢ ܪܕܳܬ̣ ܠܩܽܘܒܠܰܢ ܢܶܣܟܽܘܪ܆ ܗܳܝ ܟܺܝܬ ܕܺܐܝܬܶܝܗ̇ ܐܳܟܶܠܩܰܪܨܳܐ܆ ܒܪܳܐ ܘܡܶܠܬܳܐ ܗܰܘ ܕܰܩܕܳܡ ܥܳܠ̈ܡܶܐ܆ ܠܒܶܣܪܳܐ ܗܰܘ ܕܡܶܢܰܢ ܫܰܪܺܝܪܳܐܺܝܬ ܢܣܰܒ. ܘܟܰܕ ܤܛܰܪ ܡܶܢ ܫܽܘܚܠܳܦܳܐ ܐܶܬܚܰܝܰܕ ܠܶܗ ܒܰܩܢܽܘܡܳܐ܆ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܘܚܰܕ ܐܺܝܬܰܘܗ̱ܝ ܗ̱ܘܳܐ ܡܶܢ ܬܰܪܬܶܝܢ ܠܳܐ ܡܶܬܦܰܠܓܳܢܳܐܺܝܬ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ܆ ܡܶܬܬܕܺܝܫܳܢܺܝܬܳܐ. ܘܰܕܪܺܝܟܬܳܐ ܥܰܒܕܳܗ̇ ܠܶܗ ܐܰܝܟ ܡܒܰܣܪܳܐ܆ ܠܡܰܥܒܰܪܬܳܐ ܗܳܝ ܕܰܠܘܳܬ ܡܰܘܬܳܐ. ܗܰܘ ܕܳܐܦ ܟܰܕ ܐܶܬܥܰܪܙܰܠ ܥܰܡܶܗ ܒܒܶܣܪܳܐ ܗܰܘ ܡܩܰܒܠܳܢܳܐ ܕܚܰܫܳܐ܆ ܐܳܦ ܡܺܝܬ ܐܰܝܟ ܒܰܪܢܳܫܳܐ܆ ܘܩܰܘܺܝ ܗܽܘ ܟܰܕ ܗܽܘ ܠܳܐ ܡܳܝܽܘܬܳܐ ܘܠܳܐ ܚܳܫܽܘܫܳܐ ܐܰܝܟ ܐܰ‌ܠܳܗܳܐ. ܟܕ ܠܰܢ. ܘܠܳܐ ܗ̱ܘܳܐ ܠܶܗ ܙܟܳܝܗ̱ܝ ܠܡܰܘܬܳܐ. ܘܠܰܘ ܟܰܕ ܒܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܐܶܠܳܐ ܟܰܕ ܒܗܳܝ ܕܰܗܘ̣ܳܐ ܛܰܥܡܶܗ ܠܗܳܢܳܐ. ܡܶܛܽܠ ܓܶܝܪ ܕܗܳܢܽܘܢ ܕܒܳܐܕܳܡ ܐܶܙܕܟܺܝܘ. ܚܢܰܢ ܐܺܝܬܰܝܢ ܗ̱ܘܰܝܢ܆ ܘܕܰܬܚܶܝܬ ܦܰܚܳܐ ܕܡܰܘܬܳܐ ܗܘܰܝܢܰܢ܆ ܟܰܕ ܟܽܠܳܗ̇ ܗܳܝ ܕܺܝܠܰܢ ܐܶܬܒܰܣܰܪ܆ ܘܠܰܢ ܠܟܽܠܰܢ ܗܽܘ ܒܶܗ ܢܣܰܒ܆ ܘܳܐܦܠܳܐ ܡܶܕܡ ܫܒܰܩ ܡܶܢ ܗܳܠܶܝܢ ܕܒܺܐܝ̈ܕܰܝܗܶܝܢ ܗܘ̣ܳܬ ܠܳܗ̇ ܡܰܥܒܰܪܬܳܐ ܠܰܚܛܺܝܬܳܐ܆ ܥܰܡ ܟܽܠܶܗ ܡܰܘܬܳܐ ܠܒܰܟ ܕܰܐܪܳܐ ܘܰܐܩܪܶܒ܆ ܐܰܝܟܰܢܳܐܕܡܶܢ ܥܶܩܳܪ̈ܰܘܗ̱ܝ ܢܬܰܠܫܺܝܘܗ̱ܝ܆ ܟܰܕ ܠܟܽܠܶܗ ܓܶܢܣܳܐ ܕܰܒܢܰܝ̈ܢܳܫܳܐ ܗܳܘܶܐ ܪܺܝܫܺܝܬܳܐ ܕܰܩܝܳܡܬܳܐ. ܘܰܠܗܳܕܶܐ ܦܰܘܠܽܘܤ ܡܰܟܪܶܙ ܒܩܳܠܳܐ ܢܰܨܺܝܚܳܐ܆ ܟܰܕ ܠܩܽܘܪ̈ܝܢܬܝܐ ܟܳܬܶܒ ܘܳܐܡܰܪ܆ ܗܳܟܰܢܳܐ. ܡܶܛܽܠ ܓܶܝܪ ܕܰܒܝܕ ܒܰܪܢܳܫܳܐ ܡܰܘܬܳܐ܆ ܐܳܦ ܒܝܰܕ ܒܰܪܢܳܫܳܐ ܩܝܳܡܬܳܐ ܕܡܺܝ̈ܬܶܐ ܐܰܟܙܢܳܐ ܕܒܳܐܕܳܡ ܟܽܠܗܽܘܢ ܒܢܰܝ̈ܢܳܫܳܐ ܡܳܝܬܺܝܢ܆ ܗܳܟܰܢܳܐ ܐܳܦ ܒܰܡܫܺܝܚܳܐ ܟܽܠܗܽܘܢ ܢܺܚܽܘܢ^[7].

ܡܶܛܽܠ ܗܳܕܶܐ. ܥܰܠ ܨܠܺܝܒܳܐ ܣܳܠܶܩ. ܟܰܕ ܡܰܘܕܰܥ܆ ܕܡܰܚܬܬܶܗ ܕܠܰܫܝܽܘܠ ܗܳܝ ܕܰܒܝܰܕ ܚܰܫܳܐ܆ ܡܰܣܰܩܬܳܐ ܐܺܝܬܶܝܗ̇ ܡܰܠܽܘܢ. ܐܰܘ ܡܰܚܰܬܬ̣ܳܐ. ܐܰܣܶܩ ܓܶܝܪ ܐܰܟܚܕܳܐ ܥܰܡܶܗ܆ ܠܰܢ ܗܳܢܽܘܢ ܕܡܶܢ ܠܬܰܚܬ ܪܡܶܝܢ ܗ̱ܘܰܝܢ. ܘܡܶܬܪܰܡܪܰܡ ܠܘܳܬܳܗ̇ ܕܶܐܫܬܶܗ ܕܡܽܘܟܳܟܳܐ܆ ܟܰܕ ܠܡܰܘܬܳܐ ܐܳܡܰܪ ܐ̱ܢܳܐ ܕܶܝܢ ܠܡܰܦܽܘܠܬܳܐ ܕܺܝܠܰܢ ܒܝܰܕ ܪܰܘܡܳܐ ܗܳܦܶܟ ܩܳܪܶܐ. ܘܟܰܕ ܡܚܰܘܶܐ ܕܳܐܦ ܟܰܕ ܥܕܰܡܳܐ ܠܗܳܕܶܐ ܢܚܶܬ ܪܳܡܳܐ ܐܺܝܬܰܘܗ̱ܝ ܒܽܐܘܣܺܝܰܐ܆ ܒܗܳܝ ܕܟܰܕ ܠܬܰܚܬ ܡܶܬܬܰܝܬܶܐ ܗ̱ܘܳܐ ܡܶܛܽܠ ܡܕܰܒܪܳܢܽܘܬܳܐ܆ ܡܶܢ ܫܟܺܝܢܬܳܐ ܗܳܝ ܕܰܠܥܶܠ ܘܕܰܠܗܰܠ ܡܶܢ ܟܽܠ܆ ܠܳܐ ܣܳܟ ܡܶܬܢܓܶܕ ܗ̱ܘܳܐ ܠܬܰܚܬ.

ܘܟܰܕ ܬܪܺܝܨ ܡܶܬܡܬܰܚ܆ ܟܰܕ ܠܰܢ ܗܳܢܽܘܢ ܕܰܠܘܬ ܙܠܺܝܡܽܘܬܳܐ ܐܶܙܰܠܢܰܢ ܒܝܰܕ ܚܛܺܝܬܳܐ܆ ܠܘܳܬ ܡܰܣܰܩܬܳܗ̇ ܘܥܽܘܠܳܝܳܗ̇ ܕܰܡܝܰܬܪܽܘܬܳܐ ܢܳܓܶܕ ܘܬܳܪܶܨ ܠܥܶܠ܆ ܘܰܠܘܳܬ ܫܽܘܘܫܳܛܳܐ ܡܰܝܬܶܐ ܘܰܠܘܳܬ ܡܬܺܝܚܽܘܬܳܐ. ܘܠܰܘ ܗܳܕܶܐ ܒܰܠܚܽܘܕ܆ ܐܶܠܐ. ܐܳܦ ܟܰܕ ܠܥܶܠ ܡܩܰܘܶܐ ܗ̱ܘܳܐ ܥܰܠ ܩܰܝܣܳܐ܆ ܠܡܰܚ̈ܘܳܬܳܐ ܣܰܓܺܝ̈ܳܐܬܳܐ ܡܶܬܪܡܶܐ܆ ܟܰܕ ܒܡܶܠܬܳܐ ܡܶܕܶܡ ܘܚܶܟܡܬܳܐ܆ ܠܰܪܡܳܝܳܐ ܕܡܶܢ ܡܚܽܘܬܳܐ ܨܶܒܝܳܢܳܐܺܝܬ ܡܩܰܒܶܠ ܗ̱ܘܳܐ. ܡܶܬܡܚܶܐ ܓܶܝܪ܆ ܐܰܝܟܰܢܳܐ ܕܢܶܥܨܽܘܒ ܘܢܰܐܣܶܐ ܠܡܰܚ̈ܘܳܬܳܐ ܕܺܝܠܝ ܗܳܢܶܝܢ ܠܳܐ ܡܶܬܐܰܣ̈ܝܳܢܝܳܬܳܐ. ܘܛܳܥܶܡ ܡܰܢ ܡܪܳܪܬܳܐ ܘܚܰܠܳܐ܆ ܠܽܘܩܒܰܠ ܛܥܳܡܬܳܐ ܗܳܝ ܝܰܥܢܬܳܐ ܕܳܐܕܳܡ. ܡܶܣܬܰܟܰܟ ܕܶܝܢ ܒܺܐܝܕܰܘ̈ܗ̱ܝ ܟܰܕ ܡܰܐܣܶܐ ܠܡܶܬܦܰܫܛܳܢܽܘܬܳܐ ܘܫܰܪܝܽܘܬܳܐ ܕܺܐܝܕܰܘ̈ܗ̱ܝ ܕܗܰܘ܆ ܗܳܠܶܝܢ ܕܰܒܗܶܝܢ ܓܫܰܦ ܒܦܺܐܪܳܐ ܗܰܘ ܫܰܦܺܝܪܳܐ ܘܠܳܐ ܫܰܦܺܝܪܳܐ܆ ܘܫܰܦܺܝܪܳܐ ܡܰܢ ܡܶܛܽܠ ܚܰܕܝܽܘܬܳܐ ܘܡܰܦܨܚܳܢܽܘܬܳܐ܆ ܠܳܐ ܫܰܦܺܝܪܳܐ ܕܶܝܢ ܡܶܛܽܠ ܗܳܝ ܕܰܕܠܳܐ ܒܙܰܒܢܶܗ ܐܶܟܰܠܘ ܡܶܢܶܗ ܘܠܰܘ ܒܙܰܒܢܳܐ ܗܰܘ ܕܙܳܕܶܩ ܗ̱ܘܳܐ ܕܰܢܬܰܚܶܡ ܦܽܘܩܕܳܢܳܐ܆ ܘܠܰܬܚܽܘܡܶܗ ܕܗܰܘ ܢܟܰܬܪܽܘܢ܆ ܘܠܳܐ ܕܡܰܪܳܚܳܐܺܝܬ ܘܰܒܢܳܡܽܘܣܳܐ ܕܡܶܢ ܢܰܦܫܗܽܘܢ܆ ܫܰܦܺܝܪ ܙܰܒܢܳܐ ܢܶܚܫܒܽܘܢ ܠܗܰܘ ܕܰܕܠܳܐ ܒܙܰܒܢܶܗ. ܐܶܠܳܐ ܐܳܦ ܪ̈ܶܓܠܶܐ ܡܶܬܰܐܣܪ̈ܳܢ ܒܨ̈ܶܨܶܐ܆ ܐܰܝܟܰܢܳܐ ܕܠܰܢ ܢܶܗܘ̈ܝܳܢ ܡܦܰܓ̈ܕܳܢܝܳܬܳܐ ܡܶܢ ܪܶܗܛܳܐ ܗܰܘ ܕܰܠܘܳܬ ܚܛܺܝܬܳܐ܆ ܟܰܕ ܬܳܟ̈ܣܳܢ ܠܡܰܚܬܬ̣ܳܐ ܘܡܶܫܬܰܪܓܠܳܢܽܘܬܳܐ ܕܚܺܐܦܳܐ ܗܰܘ ܕܰܠܘܳܬ ܗܰܢܺܝܽܐܘܬܳܐ܆ ܗܳܝ ܟܺܝܬ ܕܒܰܕܡܽܘܬ ܟܽܘܪܗܳܢܳܐ ܩܢܳܬ̣ ܡܰܥܒܰܪܬܳܐ ܡܶܢ ܨܶܒܝܳܢܳܐ ܗܰܘ ܕܶܐܙܕܟܺܝ ܕܳܐܕܳܡ. ܗܰܘ ܕܳܐܦ ܠܚܽܘܝܳܒܳܐ ܕܡܰܘܬܳܐ ܝܰܗ̱ܒ ܥܶܠܬܳܐ.

ܘܗ̱ܝ ܟܺܝܬ ܐ̱ܚܪܳܝܬܳܐ ܘܰܕܣܰܓܺܝ ܝܰܬܺܝܪ ܪܰܒܳܐ܆ ܡܶܢ ܒܳܬܰܪ ܕܰܦܪܰܫ ܠܢܰܦܫܳܐ ܡܶܢ ܦܰܓܪܳܐ ܘܢܶܦܩܰܬ̣ ܪܽܘܚܶܗ܆ ܘܡܺܝܬ ܡܰܘܬܳܐ ܗܰܘ ܨܶܒܝܳܢܳܝܳܐ ܘܗܰܘ ܕܰܚܢܰܢ ܚܳܒܢܰܢ܆ ܒܢܰܝܙܟܳܐ ܡܶܬܡܚܶܐ ܒܕܰܦܢܶܗ^[8]܆ ܗܳܝ ܕܰܒܗܳܝ ܡܰܢ ܐ̱ܢܳܫܳܝܬܳܐ ܡܰܝ̣ܺܝ̣ܬܳܐ ܗ̱ܘܳܬ̣܆ ܕܠܳܐ ܢܰܦܫܳܐ ܓܶܝܪ ܘܰܕܠܳܐ ܢܫܰܡܬܳܐ ܐܺܝܬܰܘܗ̱ܝ ܗ̱ܘܳܐ ܡܶܢ ܟܰܕܽܘ܆ ܚܰܝܳܐ ܗ̱ܘܳܬ ܕܶܝܢ ܚܰܝ̈ܶܐ ܗܳܢܽܘܢ ܐܰ‌ܠܳܗܳܝ̈ܶܐ ܒܰܚܕܳܝܽܘܬܳܐ ܕܰܐ‌ܠܳܗܽܘܬܳܐ. ܘܟܰܕ ܐܶܬܡܚܺܝ܆ ܕܡܳܐ ܘܡܰܝ̈ܳܐ ܫܰܡܰܪ ܡܶܢ ܬܰܡܳܢ. ܐܰܝܟܰܢܳܐ ܕܰܐܟܙܢܳܐ ܕܗܰܘ ܡܳܐ ܕܡܶܢ ܕܰܦܢܶܗ ܕܳܐܕܳܡ ܗܰܘ ܩܰܕܡܳܝܳܐ ܢܦܰܩ܆ ܗܰܘ ܟܺܝܬ ܕܺܐܝܬܰܘܗ̱ܝ ܗ̱ܘܳܐ ܐܰܢ̱ܬܬܳܐ܆ ܡܰܘܬܳܐ ܙܰܡܶܢ ܠܰܢ ܒܝܕ ܡܰܛܥܝܳܢܽܘܬܶܗ ܕܚܶܘܝܳܐ܆ ܗܳܟܰܢܳܐ ܡܰܝ̈ܳܐ ܘܰܕܡܳܐ ܗܳܢܽܘܢ ܕܡܶܢ ܕܰܦܢܶܗ ܕܳܐܕܳܡ ܬܪܰܝܳܢܳܐ ܢܒܰܥܘ܆ ܗܳܢܽܘܢ ܡܕܰܟ̈ܝܳܢܶܐ ܕܰܚܛܺܝܬܳܐ ܕܺܝܠܰܢ܆ ܚܰܝ̈ܶܐ ܢܺܐܠܕܽܘܢ ܘܦܽܘܪܩܳܢܳܐ. ܡܶܢ ܓܶܝܪ ܡܰܝ̈ܳܐ ܘܰܕܡܳܐ ܐܺܝܬܰܘܗ̱ܝ ܫܽܘܪܳܝܳܐ ܕܡܶܢ ܕܪܺܝܫ ܘܰܕܫܰܘܬܳܦܽܘܬܳܐ ܕܰܠܘܳܬ ܐܰ‌ܠܳܗܳܐ.

ܒܝܰܕ ܟܽܠܗܶܝܢ ܗܳܟܺܝܠ ܗܳܠܶܝܢ ܕܺܝܠܰܢ ܐܶܬܳܐ ܥܰܡܰܢܽܘܐܶܝܠ܆ ܟܰܕ ܚܰܕ ܐܺܝܬܰܘܗ̱ܝ ܡܶܢ ܬܰܪܬܶܝܢ ܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܒܰܠܒܠܳܐܺܝܬ ܘܥܳܪܶܩ ܐܳܦ ܡܶܢ ܦܽܘܠܳܓܳܐ ܪܰܫܺܝܥܳܐ ܕܰܬܪܰܝܳܢܽܘܬܳܐ ܕܰܟ̈ܝܳܢܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ܆ ܘܡܶܢ ܡܰܣܒܪܳܢܽܘܬܳܐ ܗܳܝ ܕܠܳܐ ܐܰ‌ܠܳܗ. ܐܰܝܟܰܢܳܐ ܕܠܳܐ ܗ̱ܘܳܐ ܥܰܠ ܒܰܪܢܳܫܳܐ ܕܡܶܢܶܗ ܘܠܶܗ܆ ܘܠܳܐ ܥܰܠ ܫܪܰܓܪ̈ܳܓܝܳܬܳܐ ܕܗܰܓܳܓܽܘܬܳܐ ܢܶܬܟܬܶܒ ܦܽܘܪܩܳܢܳܐ ܕܺܝܠܰܢ܆ ܐܶܠܳܐ ܥܰܠ ‌ܐܰ‌ܠܳܗܳܐ ܕܫܰܪܺܝܪܳܐܺܝܬ ܐܶܬܒܰܪܢܰܫ܆ ܘܰܕܚܰܕ ܡܰܢ ܡܰܘܬܳܐ ܡܺܝܬ܆ ܣܰܓܺܝ ܐܳܕܫ̈ܶܐ ܕܶܝܢ ܗܳܢܳܐ ܘܕܰܒܝܰܕ ܨܰܥܪ̈ܶܐ ܘܢܶܓ̈ܕܶܐ ܣܰܓܺܝ̈ܶܐܐ ܡܕܰܒܪܳܢܳܐܺܝܬ ܐܶܬܬܰܝܬܺܝ ܥܠܰܘܗ̱ܝ܆ ܡܶܛܽܠ ܕܰܠܟܽܠ ܚܰܕ ܡܶܢ ܫܽܘܚ̈ܢܶܐ ܕܺܝܠܰܢ ܢܣܺܝܡ ܥܨܳܒܳܐ ܕܥܳܗܶܢ ܘܠܳܚܶܡ.

ܟܰܕ ܠܗܳܠܶܝܢ ܐܶܫܰܥܝܳܐ ܢܒܺܝܳܐ܆ ܢܰܗܺܝܪܳܐܺܝܬ ܘܰܒܗܶܝܢ ܒܥܰܝ̈ܢܶܐ ܩܳܕܶܡ ܗ̱ܘܳܐ ܚܳܙܶܐ܆ ܘܰܠܡܰܪܳܚܽܘܬܗܽܘܢ ܢܳܨܝܰܬ̣ ܥܰܡ ܐܰ‌ܠܳܗܳܐ ܕܝܽܗ̱ܘ̈ܕܳܝܶܐ ܒ̈ܢܰܝ ܫܰܪܒܬܶܗ ܡܶܢ ܠܥܶܠ ܡܰܟܶܤ ܗ̱ܘܳܐ ܡܰܙܥܶܩ ܗ̱ܘܳܐ܆ ܗܽܘ ܠܰܚ̈ܛܳܗܶܐ ܕܺܝܠܰܢ ܛܥܺܝܢ܆ ܘܡܶܛܽܠܳܬܰܢ ܡܶܬܕܘܶܐ ܒܟܺܐܒܳܐ. ܘܰܚܢܰܢ ܚܫܰܒܢܳܝܗ̱ܝ ܕܺܐܝܬܰܘܗ̱ܝ ܒܟܺܐܒܳܐ ܘܒܰܡܚܽܘܬܳܐ ܘܰܒܛܽܘܪܳܦܳܐ. ܗܽܘ ܕܶܝܢ ܐܶܬܡܰܚܺܝ܆ ܡܶܛܽܠ ܠܳܐ ܢܳܡܽܘܣܳܝ̈ܘܳܬܳܐ ܕܺܝܠܰܢ. ܘܶܐܬܟܪܰܗ ܡܶܛܽܠ ܚ̈ܛܳܗܶܐ ܕܺܝܠܰܢ܆ ܡܰܪܕܽܘܬܳܐ ܕܰܫܠܡܳܐ ܕܺܝܠܰܢ ܥܠܰܘܗ̱ܝ. ܒܰܚܒܰܪܬܶܗ ܚܢܰܢ ܐܶܬܰܐܣܺܝܢܰܢ^[9]. ܟܰܕ ܡܒܰܝܬܶܐ ܗ̱ܘܳܐ ܠܶܗ ܗܽܘ ܢܒܺܝܳܐ ܠܡܰܪܳܚܽܘܬܳܐ ܘܠܰܡܨܰܥܪܳܢܽܘܬܳܐ ܕܥܰܡܳܐ ܕܺܝܠܶܗ܆ ܗܳܝ ܕܰܥܬܺܝܕܳܐ ܗ̱ܘܳܬ ܕܬܶܗܘܶܐ ܥܰܠ ܦܳܪܽܘܩܳܐ ܘܰܐ‌ܠܳܗܳܐ ܝܶܫܽܘܥ܆ ܘܰܐܟܚܕܳܐ ܡܳܢܶܐ ܗ̱ܘܳܐ ܗܽܘ ܠܶܗ ܥܰܡ ܛܳܠܽܘܡ̈ܶܐ܆ ܚܢܰܢ ܐܳܡܰܪ ܗܶܢܽܘܢ ܒܥܶܠ̈ܕܒܳܒܶܐ ܘܡܰܩܪ̈ܒܳܢܶܐ܆ ܗܳܢܽܘܢ ܕܰܡܚܰܝܢܰܢ܆ ܗܳܢܽܘܢ ܕܰܬܪܰܙܢܰܢ܆ ܗܳܢܽܘܢ ܕܰܐܒܶܐܫܢܰܢ܆ ܒܟܽܘܪ̈ܗܳܢܶܐ ܒܡܰܚ̈ܘܳܬܳܐ ܒܚܰܒܪ̈ܳܬܳܐ ܕܗܰܘ ܕܶܐܬܟܪܰܗ܆ ܕܗܰܘ ܕܶܐܬܡܰܚܺܝ܆ ܕܗܰܘ ܕܶܐܬܩܰܦܰܚ܆ ܐܶܬܰܐܣܺܝܢܰܢ. ܐܰܝܟܰܢܳܐ ܟܺܝܬ ܕܥܰܡ ܦܽܘܪܩܳܢܳܐ ܕܗܰܘ ܕܕܰܐܝܟ ܗܳܢܳܐ܆ ܐܳܦ ܡܰܪܕܽܘܬܳܐ ܕܫܰܝܢܳܐ ܢܶܗܘܽܘܢ ܠܰܢ ܚܰܫܰܘ̈ܗ̱ܝ ܕܗܰܘ^[10]. ܡܰܢܽܘ ܓܶܝܪ ܕܠܰܘ ܡܫܰܝܢܳܐܺܝܬ ܘܪܳܚܡܳܐܺܝܬ ܢܶܬܬܣܺܝܡ ܐܳܦ ܠܘܳܬ ܒܥܶܠܕܒܳܒܳܐ ܘܡܰܩܪܒܳܢܳܐ܆ ܘܰܠܬܰܪܥܽܘܬܳܐ ܢܫܰܚܠܶܦ ܠܰܒܥܶܠܕܒܳܒܽܘܬܳܐ ܗܳܝ ܕܣܰܓܺܝ ܐܺܝܬܶܝܗ̇ ܡܛܰܝܰܒܬܳܐ ܠܘܳܬ ܠܳܐ ܡܫܰܝܢܽܘܬ܆ ܟܰܕ ܡܶܬܚܰܫܰܒ ܠܰܐܠܳܗܳܐ܆ ܕܰܚܠܳܦ ܗܳܢܽܘܢ ܕܝܰܬܺܝܪ ܡܶܢ ܟܽܠ ‌‌ܐܺܝܬܰܝܗܽܘܢ ܡܰܩܪ̈ܒܳܢܶܐ ܘܥܰܣ̈ܩܰܝ ܠܡܶܫܬܰܝܳܢܽܘ ܚܰܫ ܒܰܒܣܰܪ܆ ܘܟܽܠܗܶܝܢ ܢܺܝܚܳܐܺܝܬ ܣܰܝܒܰܪ܆ ܗܳܠܶܝܢ ܕܡܶܛܽܠܳܬܗܶܝܢ ܐܺܝܬܰܝܢ ܗ̱ܘܰܝܢ ܕܫܳܘܶܝܢ ܠܪܽܘܓܙܳܐ ܗܰܘ ܐ̱ܚܪܺܢܳܐ. ܗܳܕܶܐ ܗܳܟܺܝܠ ‌ܐܺܝܬܶܝܗ̇܆ ܗܳܝ ܟܺܝܬ ܕܶܐܡܰܪ ܢܒܺܝܳܐ܆ ܕܡܰܪܕܽܘܬܳܐ ܕܰܫܠܳܡܰܢ ܥܠܰܘܗ̱ܝ². ܥܠܰܘܗ̱ܝ ܐܰܝܟ ܕܥܰܠ ܩܳܝܶܡܬܳܐ ܐܶܡܰܪ܆ ܝܽܘܠܦܳܢܳܐ ܕܫܰܝܢܳܐ ܕܺܝܠܰܢ ܟܬܺܝܒ. ܘܰܠܥܶܠܬܳܐ ܡܶܚܕܳܐ ܢܰܩܺܝܦܳܐܺܝܬ ܣܳܐܶܡ ܘܳܐܡܰܪ܆ ܡܶܛܽܠ ܕܒܰܚܒܰܪܬܶܗ ܚܢܰܢ ܐܶܬܰܐܣܺܝܢܰܢ. ܗܳܝ ܕܶܝܢ ܕܰܚܢܰܢ܆ ܡܫܰܘܕܥܳܢܽܘܬܳܐ ܐܺܝܬ ܠܳܗ̇ ܣܰܓܺܝܐܬܳܐ. ܗܳܢܽܘܢ ܕܰܨܠܰܒܢܰܢ. ܗܳܢܽܘܢ ܕܰܒܝܰܕ ܟܽܠ ‌ܐܽܘܪܚܳܐ ܐܰܩܪܶܒܢܰܢ. ܗܳܢܽܘܢ ܕܨܰܥܰܪܢܰܢ ܘܰܐܫܺܝܛܢܰܢ ܕܠܳܐ ܚܰܘܣܳܢ. ܕܡܶܢ ܗܳܪܟܳܐ ܐܳܦ ܗܽܘ ܒܶܐܘܰܢܓ̈ܶܠܺܝܰܐ ܡܰܙܥܶܩ ܗ̱ܘܳܐ܆ ܟܰܕ ܬܰܚܘܺܝܬܳܐ ܒܰܝܬܳܝܬܳܐ ܗܳܝ ܕܺܝܠܶܗ ܣܳܐܶܡ ܗ̱ܘܳܐ ܩܕܳܡܰܝܢ ܠܡܰܪܕܽܘܬܳܐ܆ ܝܺܠܰܦܘ ܡܶܢܝ ܕܢܺܝܚܳܐ ܐܺܝܬܰܝ ܘܡܰܟܺܝܟܳܐ ܒܠܶܒܳܐ܆ ܘܬܶܫܟܚܽܘܢ ܢܝܳܚܳܐ ܠܢܰܦ̈ܫܳܬܟܽܘܢ^[11]. ܠܗܰܘ ܕܳܐܦ ܦܰܘܠܽܘܤ ܗܳܠܶܝܢ ܕܫܳܠ̈ܡܳܢ ܠܶܗ ܟܳܬܶܒ ܟܰܕ ܐܳܡܰܪ܆ ܗܽܘ ܓܶܝܪ ܐܺܝܬܰܘܗ̱ܝ ܫܰܝܢܳܐ ܕܺܝܠܰܢ^[12].

ܕܗܳܠܶܝܢ ܚܰܫ̈ܶܐ ܦܳܪ̈ܽܘܩܳܝܳܐ. ܕܗܳܠܶܝܢ ܫܽܘܚ̈ܢܶܐ ܡܰܐܣ̈ܝܳܢܶܐ. ܕܟܽܘܪܗܳܢܳܐ ܗܰܘ ܡܰܐܣܝܳܢܳܐ ܘܥܳܒܶܕ ܡܫܰܪܪܽܘܬܳܐ ܘܚܽܘܠܡܳܢܳܐ܆ ܐܺܝܬܶܝܗ̇ ܒܩܽܘܪܒܳܐ ܡܰܥܗܕܳܢܽܘܬܳܐ. ܒܥܺܐܕܳܐ ܗܰܘ ܣܓܺܝܕܳܐ ܕܦܣܟܐ. ܡܶܛܽܠ ܗܳܕܶܐ܆ ܐܳܦ ܒܙܰܒܢܳܐ ܗܳܢܳܐ ܡܚܰܦܛܺܝܢܰܢ ܠܟܽܘܢ ܕܰܬܥܰܠܽܘܢ ܡܥܰܕܪܳܢܽܘܬܳܐ ܠܰܐܚܰܝ̈ܢ ܗܳܢܽܘܢ ܡܡܰܚܰܝ̈ܳܐ܆ ܘܳܐܦ ܒܦܶܪ̈ܩܶܐ ܕܟܶܬܳܢܳܐ ܒܰܠܚܽܘܕ. ܐܰܢ̱ܬ ܕܶܝܢ ܠܰܘ ܟܰܕ ܠܘܳܬ ܫܺܝܛܽܘܬܳܗ̇ ܕܡܰܘܗܰܒܬܳܐ ܐܰܝܟ ܕܩܰܕܡܶܬ ܐܶܡܪܶܬ ܚܳܐܰܪ ܐܰܢ̱ܬ܆ ܬܶܛܥܶܐ ܠܥܶܠܬܳܐ ܦܰܐܺܝܬ ܠܰܐܠܳܗܳܐ ܘܰܠܣܽܘܥܪܳܢܳܐ. ܠܳܐ ܠܘܳܬ ܦܠܳܢ ܐܰܘ ܠܘܳܬ ܦܠܳܢ ܬܚܽܘܪ܆ ܐܰܝܟ ܕܒܰܐܝܢܳܐ ܕܰܡܚܰܒܰܠ ܒܰܐܪܝܳܢܽܘܬܳܐ ܘܰܡܠܶܐ ܫܽܘܚ̈ܢܶܐ ܘܥܰܠ ‌ܐܰܪܥܳܐ ܫܕܶܐ܆ ܘܬܷܪܽܘܩ ܘܬܶܢܰܕ ܠܳܟ. ܐܶܠܳܐ ܟܰܕ ܠܗܳܢܳܐ ܚܳܙܶܐ ܐܰܢ̱ܬ ܠܬܰܚܬ ܒܥܰܝ̈ܢܶܐ ܕܦܰܓܪܳܐ܆ ܒܥܰܝ̈ܢܶܐ ܕܬܰܪܥܺܝܬܳܐ ܠܘܳܬ ܗܰܘ ܚܽܘܪ ܠܥܶܠ܆ ܗܰܘ ܕܡܶܛܽܠܳܬܶܗ ܢܰܗܺܝܪܳܐܺܝܬ ܫܡܰܥܬܳܝܗ̱ܝ ܠܶܐܫܰܥܝܳܐ ܕܡܶܬܢܰܒܶܐ܆ ܗܽܘ ܕܶܝܢ ܐܶܬܡܰܚܺܝ ܡܶܛܽܠ ܠܳܐ ܢܳܡܽܘܣܳܝ̈ܘܳܬܳܐ ܕܺܝܠܰܢ܆ ܘܶܐܬܟܰܪܰܗ ܡܶܛܽܠ ܚ̈ܛܳܗܰܝܢ^[13]. ܠܗܳܢܽܘܢ ܫܽܘܚ̈ܢܶܐ ܡܝܰܩܰܪ ܐܰܢ̱ܬ܆ ܗܳܢܽܘܢ ܕܰܒܗܽܘܢ ܐܶܙܕܒܶܢܬ ܡܶܢ ܚܛܺܝܬܳܐ. ܠܗܰܘ ܕܡܳܐ ܡܩܰܪܶܒ ܐܰܢ̱ܬ ܠܶܗ ܠܩܽܘܪܒܳܢܳܐ܆ ܠܗܰܘ ܕܰܐܛܺܝܦܳܗ̇ ܠܠܳܐ ܢܳܡܽܘܣܳܝܽܘܬܳܟ. ܠܗܳܠܶܝܢ ܡܰܚ̈ܘܳܬܳܐ ܡܰܐܣܶܐ ܐܰܢ̱ܬ܆ ܠܗܳܠܶܝܢ ܕܒܺܐܝ̈ܕܰܝܗܶܝܢ ܐܶܬܰܐܣܺܝ̣ܬ ܟܰܕ ܡܡܰܚܰܝ ܗ̱ܘܰܝܬ ܡܶܢ ܚܛܺܝܬܳܐ. ܗܳܠܶܝܢ ܠܳܐ ܡܶܬܰܐܣ̈ܝܳܢܝܳܬܳܐ܆ ܘܗܳܐ ܡܶܢ ܟܰܕܽܘ ܒܰܠܺܝܥ ܗܘ̣ܰܝܬ ܠܡܰܘܬܳܐ.

ܐܶܬܒܰܩܳܐ ܕܰܠܡܰܢܽܘ ܡܩܰܪܶܒ ܐܰܢ̱ܬ ܐܺܝܩܳܪܳܐ ܟܰܕ ܡܰܢܽܘ ܐܺܝܬܰܝܟ. ܐܰܪܰܐ ܓܶܝܪ ܐܶ‌ܠܽܘ ܡܰܠܟܳܐ ܫܪܳܐ ܠܘܳܬܳܟ܆ ܟܰܕ ܚܠܳܦ ܟܽܠܳܗ̇ ܦܳܠܚܽܘܬܳܐ ܕܚܰܝܠܶܗ ܣܒܰܠ ܩܺܝܢܕܽܘܢܽܘܤ܆ ܘܰܐܨܠܰܚ ܘܶܐܬܢܰܨܰܚ ܘܢܺܝܫܳܐ ܕܙܳܟܽܘܬܳܐ ܐܰܩܺܝܡ ܠܽܘܩܒܰܠ ܡܰܩܪ̈ܒܳܢܶܐ܆ ܘܺܐܝܬ ܗ̱ܘܳܐ ܠܶܗ ܡܚܽܘܬܳܐ ܓܠܺܝܬܳܐ ܡܶܢ ܥܽܘܪܙܳܠܶܗ ܘܚܽܘܠܛܳܢܶܗ ܕܰܠܘܳܬ ܒܰܥ̈ܠܰܝ ܕܰܐܪܳܐ܆ ܘܠܰܘ ܥܰܠ ܚܰܨܶܗ ܥܳܪܽܘܩܳܐܺܝܬ܆ ܠܰܘ ܟܰܕ ܒܳܨܶܐ ܗ̱ܘܰܝܬ ܟܽܠܗܶܝܢ ܗܳܠܶܝܢ ܕܰܒܒܰܝܬܳܟ ܒܪܶܚܡܰܬ ܥܰܡܠܳܐ܆ ܘܳܐܦ ܠܗܳܠܶܝܢ ܟܽܠܗܶܝܢ ܕܰܒܛܽܘܫܝܳܐ ܣܺܝ̈ܡܳܢ ܡܥܰܩܶܒ ܗ̱ܘܰܝܬ ܘܡܶܬܒܰܩܶܐ ܗܰܘ ܕܝܰܬܺܝܪ ܢܰܨܺܝܚ ܡܶܢ ܟܽܠܗܽܘܢ ܟܶܬܳܢܰܝ̈ܟ ܡܰܝܬܶܐ ܗ̱ܘܰܝܬ܆ ܘܰܩܕܳܡ ܥܰܝܢܰܘ̈ܗ̱ܝ ܬܳܠܰܚ ܗ̱ܘܰܝܬ ܠܶܗ܆ ܐܰܝܟܰܢܳܐ ܕܢܶܚܙܶܐ ܗ̱ܘܳܐ ܠܰܚܘܺܝܚܽܘܬܳܟ ܘܰܠܪܰܒܽܘܬ ܢܰܦܫܳܟ ܘܢܶܬܥܳܦ̈ܳܢ ܠܳܟ ܗܳܠܶܝܢ ܕܰܡܢܺܝܚܳܢܽܘܬܳܐ^[14]܆ ܟܰܕ ܬܰܪܥܺܝܬܳܐ ܡܰܠܽܘܢ ܡܶܬܬܢܺܝܚܳܐ ܐܰܘ ܫܽܘܚܢܳܐ܆ ܒܗܳܝ ܕܚܳܙܶܐ ܠܳܟ ܕܥܰܠ ܟܽܠ ܡܶܕܶܡ ܠܳܐ ܚܰܝܽܘܣܬܳܢܳܐܺܝܬ ܐܺܝܬ ܠܳܟ܆ ܟܰܕ ܠܘܳܬ ܚܕܳܐ ܒܰܠܚܽܘܕ ܝܰܨܺܝܦ ܐܰܢ̱ܬ܆ ܠܘܳܬ ܢܦܺܐܫܶܗ ܕܗܰܘ.

ܡܳܢܳܐ ܗܳܟܺܝܠ ‌ܐܶܡܰܪ ܠܺܝ܆ ܡܫܺܝܚܳܐ ܠܰܘ ܡܶܬܢܰܨܚܳܢܳܐ ܕܒܰܩܪܳܒܳܐ ܐܺܝܬܰܘܗ̱ܝ܆ ܠܰܘ ܟܰܕ ܩܪܳܒܳܐ ܕܺܝܠܳܟ ܐܰܩܪܶܒ ܠܘܳܬ ܐܳܟܶܠܩܰܪܨܳܐ܆ ܘܰܠܘܳܬ ܣܺܝܥܬܳܐ ܗܳܝ ܣܳܢܝܰܬ ܒܢܰܝ̈ܢܳܫܳܐ܆ ܘܰܠܘܳܬ ܦܠܰܓܳܐ ܕܫ̈ܺܐܕܶܐ ܗܰܘ ܕܝܰܬܺܝܪ ܡܶܢ ܟܽܠ ܒܺܝܫܳܐ܆ ܠܰܘ ܟܰܕ ܙܳܟܽܘܬܳܐ ܗܳܝ ܕܰܚܠܳܦܰܝܟ ܙܟܳܐ ܠܡܰܘܬܳܐ܆ ܫܡܰܥ ܠܚܰܝ̈ܠܰܘܳܬܳܐ ܗܳܢܽܘܢ ܕܒܰܡܪܰܘܡܳܐ܆ ܕܰܙܡܺܝܪܬܳܐ ܕܙܳܟܽܘܬܳܐ ܙܳܡܪܺܝܢ ܠܶܗ܆ ܟܰܕ ܡܶܢ ܒܳܬܰܪ ܩܝܳܡܬܳܐ ܕܡܶܢ ܡܺܝ̈ܬܶܐ ܣܠܶܩ ܠܘܳܬ ܫܡܰܝܳܐ܆ ܠܗܰܘ ܕܡܳܠܶܐ ܗ̱ܘܳܐ ܐܰ‌ܠܳܗܳܐܺܝܬ ܐܳܦ ܟܰܕ ܥܰܠ ‌ܐܰܪܥܳܐ ܐܺܝܬܰܘܗ̱ܝ ܗ̱ܘܳܐ܆ ܘܳܐܦ ܟܰܕ ܢܚܶܬ ܠܚ̈ܶܙܶܐ ܕܰܫܝܽܘܠ܆ ܡܰܢܽܘ ܐܺܝܬܰܘܗ̱ܝ ܗܳܢܳܐ ܡܰܠܟܳܐ ܕܬܶܫܒܽܘܚܬܳܐ. ܡܳܪܝܳܐ ܥܰܫܺܝܢܳܐ ܘܚܰܝܠܬܳܢܳܐ܆ ܡܳܪܝܳܐ ܚܰܝܠܬܳܢܳܐ ܒܰܩܪܳܒܳܐ^[15]. ܒܗܳܢܳܐ ܗܳܟܺܝܠ ‌ܐܺܝܩܳܪܳܐ ܫܰܘܬܶܦܳܝܗ̱ܝ ܆ ܒܗܰܘ ܕܰܡܫܰܘܬܰܦ ܗ̱ܘܰܝܬ ܐܳܦ ܠܐ̱ܢܳܫ ܡܶܢ ܡܰܠ̈ܟܶܐ ܕܥܰܠ ‌ܐܰܪܥܳܐ ܐܰܘ ܪ̈ܺܝܫܰܝ ܚܰܝ̈ܠܰܘܳܬܳܐ. ܐܶܬܒܰܩܳܐ ܕܰܟܡܳܐ ܗܝ ܡܶܨܥܳܝܽܘܬܳܐ ܕܺܝܠܶܗ ܘܰܕܗܳܢܽܘܢ܆ ܘܙܽܘܥ ܡܶܢ ܫܽܘܚܠܳܦܳܐ ܗܰܘ ܕܰܠܥܶܠ ܡܶܢ ܟܽܠ ܪܰܒܽܘܬܳܐ܆ ܘܠܳܐ ܒܪ̈ܽܘܩܥܶܐ ܕܣܰܓܺܝ ܡܬܰܠ̈ܚܳܢ ܘܨ̈ܳܐܳܢ ܘܰܕܟܽܠ ܟܽܠܶܗ ܠܳܐ ܚܳܫ̈ܚܳܬܳܐ܆ ܬܩܰܒܠܺܝܘܗ̱ܝ ܠܡܰܠܟܳܐ ܗܰܘ ܕܡܰܠ̈ܟܶܐ܆ ܠܡܳܪܳܐ ܕܡܳܪ̈ܰܘܳܬܳܐ^[16]܆ ܠܰܐܠܳܗܳܐ ܗܰܘ ܕܰܠܗܰܠ ܡܶܢ ܟܽܠ^[17]܆ ܠܗܰܘ ܕܳܐܦ ܠܘܳܬ ܗܳܕܶܐ ܠܳܐ ܐܰܣܠܺܝ ܕܢܶܚܽܘܬ܆ ܗܳܝ ܕܢܶܗܘܶܐ ܐܺܝܬ ܠܶܗ ܗܰܢܺܝܳܐܺܝܬ܆ ܕܫܰܦܺܝܪ ܢܶܚܰܫ ܡܶܢܳܟ ܐܳܦ ܒܗܳܠܶܝܢ ܕܣܰܓܺܝ ܙܥܽܘܪ̈ܝܳܢ܆ ܘܰܚܠܳܦ ܗܳܠܶܝܢ ܢܶܗܦܽܘܟ ܢܰܝܬܶܐ ܥܠܰܝܟ ܥܽܘܕܪ̈ܳܢܶܐ ܕܟܽܠܶܗ ܗܳܢܳܐ܆ ܘܢܶܬܶܠ ܠܳܟ ܒܛܺܝ̈ܡܶܐ ܙܥܽܘܪ̈ܬܐ^[18] ܡܰܠܟܽܘܬܳܐ ܕܰܫܡܰܝܳܐ.

ܫܳܡܥܺܝܢܰܢ ܠܶܐܘܰܢܓ̈ܶܠܺܝܰܐ ܩܰܕܺܝ̈ܫܶܐ ܕܡܶܫܬܰܥܶܝܢ܆ ܕܝܰܘܣܶܦ ܗܰܘ ܕܡܶܢ ܪܳܡܬܳܐ ܘܢܺܝܩܽܘܕܝܡܘܤ ܘܢܶܫ̈ܶܐ ܩܰܠܺܝܠ ܥܰܡܗܽܘܢ܆ ܒܡܽܘܪܳܐ ܘܒܐܠܘܐ ܘܰܒ̈ܟܶܬܳܢܶܐ܆ ܘܰܒܡܶܫ̈ܚܳܢܶܐ ܒܰܣܺܝ̈ܡܶܐ ܝܰܩܰܪܘ ܠܦܰܓܪܶܗ ܕܦܳܪܽܘܩܰܢ ܒܙܰܒܢܳܐ ܗܰܘ ܕܰܩܒܽܘܪܬܳܐ܆ ܘܰܬܠܺܝ̈ܬܳܝ̣ܰܝ̣ ܛܽܘܒ̈ܶܐ ܚܳܫܒܺܝܢܰܢ ܠܗܽܘܢ ܠܗܳܠܶܝܢ ܐ̱ܢܳܫܳܐ܆ ܡܶܛܽܠ ܟܺܝܬ ܕܶܐܫܬܘܺܝܘ ܕܰܢܫܰܡܫܽܘܢ ܠܦܰܓܪܳܐ ܗܰܘ ܡܝܰܩܪܳܐ. ܘܳܐܡܰܪ ܐ̱ܢܳܫ ܟܒܰܪ܆ ܕܶܐܫܬܽܘܦ ܐܺܝܬܰܝ ܗ̱ܘܺܝܬ ܒܙܰܒ̈ܢܶܐ ܗܳܢܽܘܢ ܕܗܳܝܕܶܝܢ܆ ܐܰܝܟܰܢܳܐ ܕܳܐܦ ܐܶܢܳܐ ܐܶ݀ܓܫܽܘܦ ܗ̱ܘܺܝܬ ܒܦܰܓܪܳܐ ܗܰܘ ܩܰܕܺܝܫܳܐ܆ ܘܶܐ݀ܫܬܰܘܬܰܦ ܗ̱ܘܺܝܬ ܒܰܩܒܽܘܪܬܶܗ܆ ܐܰܘ ܒܰܡܢܺܝܚܳܢܽܘܬܳܐ ܡܶܕܶܡ ܐ̱ܚܪܺܬܳܐ. ܕܰܥܝܳܕܳܐ ܗܝ ܓܶܝܪ ܠܰܒܢܰܝ̈ܢܳܫܳܐ܆ ܕܰܠܗܳܠܶܝܢ ܡܰܢ ܕܥܰܒܺܝܪ̈ܳܢ ܢܶܬܠܽܘܢ ܛܽܘܒܳܐ܆ ܥܰܠ ܕܶܝܢ ܗܳܢܶܝܢ ܕܰܒܫܽܘܠܛܳܢܗܽܘܢ ܣܺܝ̈ܡܳܢ ܢܶܒܣܽܘܢ܆ ܘܰܠܗܳܠܶܝܢ ܐܰܝܟ ܕܠܳܐ ܡܶܕܶܡ ܐܺܝܬܰܝܗܶܝܢ ܢܶܚܫܒܽܘܢ ܐܶܢܶܝܢ܆ ܘܢܰܗܡܽܘܢ ܡܶܢܗܶܝܢ. ܐܶܠܳܐ ܐܺܝܬ ܠܳܟ ܐܳܦ ܗܳܫܳܐ ܫܽܘܠܛܳܢܳܐ ܐܳܘ ܒܰܪܢܳܫܳܐ܆ ܗܳܝ ܕܝܰܬܺܝܪ ܪܰܘܪܒܳܐܺܝܬ ܐܳܦ ܕܬܶܓܫܽܘܦ ܘܳܐܦ ܕܰܬܢܺܝܚ܆ ܐܳܦ ܬܚܰܒܶܒ ܠܦܰܓܪܳܐ ܕܰܡܫܺܝܚܳܐ. ܫܽܘܚܢܳܐ ܓܶܝܪ ܕܰܐܚܳܐ ܗܳܢܳܐ ܗܰܘ ܕܰܒܫܽܘܩܳܐ ܫܕܶܐ܆ ܗܰܘ ܕܡܶܛܽܠܳܬܶܗ ܪܳܐܶܩ ܐܰܢ̱ܬ ܣܒܺܝܣܳܐܺܝܬ܆ ܘܳܐܦܠܳܐ ܠܰܚܙܳܬܶܗ ܡܣܰܝܒܰܪ ܐܰܢ̱ܬ܆ ܐܶܠܳܐ ܥܳܒܰܪ ܐܰܢ̱ܬ ܒܪܶܗܛܳܐ ܘܳܐܦ ܕܰܢܕܺܝܕܳܐ ܠܳܟ ܘܰܕܫܰܗܝܳܐ ܠܳܟ ܢܰܦܫܳܟ ܐܳܡܰܪ ܐܰܢ̱ܬ܆ ܒܰܕ ܥܰܠ ‌ܐܳܐܰܪ ܡܣܰܒܰܟ ܐܰܢ̱ܬ ܘܛܰܥܳܝ ܐܰܢܬ ܠܛܺܝܢܳܟ܆ ܘܪܰܘܪ̈ܒܳܬܳܐ ܢܳܦܰܚ ܐܰܢ̱ܬ܆ ܕܦܰܓܪܶܗ ܕܗܰܘ ܐܺܝܬܰܘܗ̱ܝ. ܩܰܕܡܳܐܺܝܬ ܡܰܢ܆ ܡܶܛܽܠ ܟܺܝܬ ܕܰܕܟܽܠܗܽܘܢ ܗܳܢܽܘܢ ܕܗܰܝܡܶܢܘ܆ ܗܳܢܽܘܢ ܕܡܶܢܗܽܘܢ ܡܩܰܝܡܳܐ ܥܺܕܬܳܐ܆ ܪܺܝܫܳܐ ܐܺܝܬܰܘܗ̱ܝ ܡܫܺܝܚܳܐ^[19]. ܕܬܰܪܬܶܝܢ ܕܶܝܢ܆ ܕܓܰܠܝܳܐܺܝܬ ܐܶܡܰܪ ܕܗܽܘ ܒܝܰܕ ܗܳܠܶܝܢ ܕܟܰܦܢܺܝܢ ܡܶܬܬܰܪܣܶܐ܆ ܘܰܒܝܰܕ ܗܳܢܽܘܢ ܕܰܟܪܺܝܗܶܝܢ ܡܶܬܬܢܺܝܚ. ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ. ܐܳܡܰܪ܆ ܕܰܟܡܳܐ ܕܰܥܒܰܕܬܽܘܢ ܠܚܰܕ ܡܶܢ ܐܰܚ̈ܶܐ ܕܺܝܠܝ ܗܳܠܶܝܢ ܙܥܽܘܪ̈ܶܐ܆ ܠܺܝ^[20].

ܐܰܢ̱ܬ ܗܳܟܺܝܠ ܩܢܽܘܡܳܟ ܒܰܝ̈ܢܰܝܟ ܘܠܳܟ܆ ܒܰܚܶܢܳܝܗ̱ܝ ܠܣܽܘܥܪܳܢܳܐ. ܘܰܐܝܟ ܕܰܒܬܰܚܘܺܝܬܳܐ ܕܣܽܘܥܪܳܢܳܐ ܕܣܺܝܡ ܠܒܽܘܚܳܢܳܐ. ܐܶܬܚܰܫܰܒ܆ ܕܣܰܓܺܝ ܟܪܺܝܗܳܐܺܝܬ ܣܺܝܡ ܐܰܢ̱ܬ ܒܦܰܓܪܳܟ. ܘܡܶܢ ܪ̈ܳܚܡܰܝܟ. ܣܰܓܺܝ̈ܶܐܐ ܠܟܽܠܗܶܝܢ ܗܳܠܶܝܢ ܕܚܳܝܪ̈ܳܢ ܠܘܳܬ ܢܝܳܚܳܟ ܘܳܐܣܝܽܘܬܳܟ ܡܰܥܠܶܝܢ. ܘܗܰܘ ܡܰܢ ܠܘܳܬ ܐܳܣܰܘ̈ܳܬܳܐ ܐܳܙܶܠ. ܗܰܘ ܕܶܝܢ ܠܘܳܬ ܒܰܐܠܐܢܝܘܢ ܟܰܕ ܐܳܙܶܠ ‌ܐܰܢ̱ܬ܆ ܐܳܙܶܠ ‌ܐܰܟܚܕܳܐ ܥܰܡܳܟ. ܐ̱ܚܪܺܢܳܐ ܕܶܝܢ. ܥܰܠ ‌ܐܝܕܰܘ̈ܗ̱ܝ ܡܰܝܬܶܐ ܘܛܳܥܶܢ ܠܳܟ܆ ܘܥܰܠ ܥܰܪܣܳܐ ܡܰܓܶܤ ܠܳܟ. ܐ̱ܚܪܺܢܳܐ ܕܶܝܢ. ܐܳܦ ܒܠܶܠܝܳܐ ܕܳܡܶܟ ܠܘܳܬܳܟ܆ ܘܡܶܐܟܽܘܠܬܳܐ ܡܰܘܫܶܛ ܘܫܶܩܝܳܐ܆ ܘܶܐܢ ܥܰܠ ܡܶܕܶܡ ܐ̱ܚܪܺܢܳܐ ܢܶܗܘܶܐ ܣܽܘܢܩܳܢܳܐ. ܘܰܦܫܺܝܛܳܐܺܝܬ ܠܡܺܐܡܰܪ܆ ܥܰܡ ܚ̈ܕܳܕܶܐ ܡܦܰܠܓܺܝܢ ܝܰܨܺܝܦܽܘܬܳܐ ܕܟܽܘܪܗܳܢܳܟ. ܚܰܕ^[21] ܕܶܝܢ ܒܰܠܚܽܘܕ܆ ܡܶܢ ܗܳܠܶܝܢ ܟܽܠܗܶܝܢ ܥܳܒܶܕ ܘܠܳܐ ܡܶܕܶܡ܆ ܡܶܢ ܒܳܬܰܪ ܕܶܝܢ ܥܽܘܢܕܳܢܳܟ ܢܰܚ̈ܬܶܐ ܘܰܠܒܽܘ̈ܫܶܐ ܗܳܠܶܝܢ ܕܰܠܘܳܬ ܩܒܽܘܪܬܶܗ ܕܦܰܓܪܳܟ ܢܶܬܶܠ ܝܰܨܺܝܦܳܐܺܝܬ܆ ܘܗܳܠܶܝܢ ܐ̱ܚܪ̈ܳܢܝܳܬܳܐ ܕܒܺܐܝ̈ܕܰܝܗܶܝܢ ܡܶܣܬܒܰܪ ܕܡܶܬܝܰܩܰܪ ܒܽܘܝܳܐܳܐ ܕܶܐܒܠܳܐ ܕܗܳܢܽܘܢ ܕܶܐܙܰܠܘ܆ ܠܰܐܝܠܶܝܢ ܗܳܟܺܝܠ ܝܰܬܺܝܪܳܐܺܝܬ ܚܒ̣ܬ ܛܰܝܒܽܘܬܳܐ. ܠܗܳܢܽܘܢ ܕܟܰܕ ܚܰܝ ܗ̱ܘܰܝܬ ܘܡܰܪܓܶܫ ܗ̱ܘܰܝܬ ܡܢܺܝܚܺܝܢ ܗ̱ܘܰܘ܆ ܘܕܰܠܘܳܬ ܚܽܘܠܡܳܢܳܐ ܕܢܰܦܢܽܘܢܳܟ ܥܳܨܶܝܢ ܗ̱ܘܰܘ܆ ܐܰܘ ܠܗܰܘ ܕܰܡܝܰܩܰܪ ܗ̱ܘܳܐ ܠܪܳܚܡܽܘܬܳܟ ܒܺܐܝܩܳܪܳܐ ܕܰܩܒܽܘܪܬܳܐ. ܩܰܕܺܝܡܳܐ ܝܺܕܺܝܥܳܐ܆ ܕܰܠܗܳܢܽܘܢ ܝܰܬܺܝܪܳܐܺܝܬ܆ ܘܰܒܡܶܨܥܳܝܽܘܬܳܐ ܣܰܓܺܝܐܬܳܐ ܝܰܬܺܝܪܳܐ܆ ܐܰܘ ܠܗܳܢܳܐ. ܕܰܐܝܟ ܗܳܠܶܝܢ ܐ̱ܢܳܫܺܝ̈ܢ ܐܺܝܬܰܝܗܽܘܢ܆ ܐܳܦ ܗܳܢܽܘܢ ܕܠܶܗ ܠܰܡܫܺܝܚܳܐ ܚܳܙܶܝܢ ܒܗܳܢܽܘܢ ܐܰܚܰܝ̈ܢ ܕܚܰܝ̣ܺܝ̣ܢ ܘܰܟܪܺܝܗܶܝܢ܆ ܘܡܰܗܡܶܝܢ ܘܥܳܒܪܺܝܢ ܠܗܽܘܢ ܒܪܶܗܛܳܐ܆ ܘܰܠܘܳܬ ܗܳܠܶܝܢ ܥܰܬܺܝ̈ܩܳܬܳܐ ܦܥܺܝܪ ܠܗܽܘܢ ܚܶܟܗܽܘܢ ܘܳܐܡܪܺܝܢ܆ ܠܘܰܝ ܐܺܝܬܰܝ ܗ̱ܘܺܝܬ ܗܳܝܕܶܝܢ܆ ܕܒܰܚܦܺܝܛܽܘܬܳܐ ܗܳܝ ܕܒܰܩܒܽܘܪܬܳܐ ܐܶܫܬܰܘܬܰܦ ܗܘܺܝܬ̣ ܠܝܰܘܣܶܦ ܗܰܘ ܕܡܶܢ ܪܳܡܬܳܐ ܘܰܠܗܳܢܽܘܢ ܕܫܰܪܟܳܐ܆ ܘܶܐ݀ܟܰܪܶܟ ܘܶܐ݀ܥܰܦܶܐ ܠܦܰܓܪܳܐ ܗܰܘ ܐܰ‌ܠܳܗܳܝܳܐ܆ ܘܡܶܢ ܓܶܫܬܳܐ ܗܳܝ. ܐܶܫܬܰܘܬܰܦ ܗܘܺܝܬ̣ ܒܩܰܕܺܝܫܽܘܬܳܐ ܘܰܒܒܽܘܪܟܬܳܐ. ܫܰܠܺܝܛ ܗ̱ܘ̣ ܠܳܟ ܓܶܝܪ. ܐܳܦ ܗܳܫܳܐ ܕܬܶܓܫܽܘܦ ܒܶܗ. ܒܰܙܢܰܝ̈ܳܐ ܣܰܓܺܝ̈ܶܐܐ ܘܠܰܘ ܒܚܰܕ ܒܰܠܚܽܘܕ. ܠܘܳܬ ܓܶܝܪ ܐܰܝ̇ܕܳܐ ܣܳܥܽܘܪܽܘܬܳܐ ܛܳܒܬܳܐ ܕܶܐܢ ܬܺܐܙܰܠ܆ ܕܩܳܕܶܡ ܐܳܪܰܥ ܠܳܟ ܡܶܢ ܟܽܠ ܦܪܽܘܤ ܬܶܫܟܚܺܝܘܗ̱ܝ. ܚܳܙܶܐ ܐܰܢ̱ܬ ܠܶܗ ܕܥܰܠ ܡܰܕܒܚܳܐ ܣܺܝܡ ܩܕܳܡܰܝܟ܆ ܐܰܝܟ ܡܳܐ ܕܥܰܠ ܬܪܽܘܢܘܤ ܫܡܰܝܳܢܳܐ ܝܳܬܶܒ. ܩܳܪܶܒ ܐܰܢ̱ܬ ܘܡܶܢ ܬܰܡܳܢ ܡܩܰܒܶܠ ‌ܐܰܢ̱ܬ ܠܶܗ܆ ܘܒܺܐܝ̈ܕܰܝܳܐ ܚܳܐܶܨ ܐܰܢ̱ܬ܆ ܘܰܡܥܰܦܶܩ ܐܰܢ̱ܬ. ܘܰܡܢܰܫܶܩ ܐܰܢ̱ܬ ܠܶܗ. ܘܰܠܦܽܘܡܳܟ ܡܩܰܪܶܒ ܐܰܢ̱ܬ ܠܶܗ ܘܰܠܓܰܘ ܡܫܰܕܰܪ ܐܰܢ̱ܬ܆ ܘܰܠܟܽܠܶܗ ܐܺܝܬ ܠܳܟ ܒܳܟ ܘܰܠܘܳܬܳܟ. ܘܶܐܢ ܠܘܳܬ ܒܶܝܬ ܐܰܣܺܝܪ̈ܶܐ ܬܺܐܙܰܠ ܘܬܶܣܥܽܘܪ ܠܗܰܘ ܕܒܰܐܣܽܘܪ̈ܶܐ܆ ܠܟܽܠܶܗ ܬܽܘܒ ܬܰܡܳܢ ܬܶܫܟܚܺܝܘܗ̱ܝ ܕܰܐܣܺܝܪ. ܟܽܠܶܗ ܕܥܰܠ ܥܰܪܣܳܐ ܥܰܡ ܟܪܺܝܗܳܐ ܐܰܟܚܕܳܐ ܪܡܶܐ. ܟܽܠܶܗ ܕܥܰܡ ܗܰܘ ܡܡܰܚܝܳܐ ܘܰܐܪܝܳܢܳܐ ܐܰܟܚܕܳܐ ܡܠܶܐ ܫܽܘܚ̈ܢܶܐ. ܟܽܠܶܗ ܕܥܰܡ ܗܰܘ ܕܰܟܦܶܢ ܐܺܝܕܳܐ ܦܳܫܶܛ. ܟܽܠܶܗ ܕܥܰܡ ܗܰܘ. ܕܰܨܗܶܐ ܝܳܩܶܕ ܒܨܶܗܝܳܐ. ܕܰܠܣܽܘܢܩܳܢܳܐ ܕܟܽܠܗܽܘܢ ܡܩܰܒܶܠ ܥܠܰܘܗ̱ܝ܆ ܘܰܕܟܽܠܶܗ ܥܰܠ ܟܽܠ ܚܰܕ ܡܶܬܚܙܶܐ.

ܠܡܳܢܐ ܗܳܟܺܝܠ ܟܰܕ ܐܶܡܰܬܝ ܕܰܣܢܺܝܩ ܡܰܗܡܶܐ ܐܰܢ̱ܬ ܡܶܢܶܗ܆ ܒܗܳܠܶܝܢ ܕܠܳܐ ܐܺܝܬܰܘܗ̱ܝ ܒܣܽܘܢܩܳܢܗܶܝܢ ܨܳܒܶܐ ܐܰܢ̱ܬ ܕܰܬܝܰܩܪܺܝܘܗ̱ܝ܆ ܘܰܡܥܰܠܶܐ ܐܰܢ̱ܬ ܢܰܦܫܶܟ ܠܘܳܬ ܗܳܢܶܝܢ ܕܡܶܢ ܩܕܺܝܡ. ܐܶܡܰܬܝ ܓܶܝܪ ܕܠܰܨܠܺܝܒܳܐ ܗܰܘ ܕܰܚܠܳܦܰܝܢ ܣܰܝܒܰܪ ܨܶܒܝܳܢܳܐܺܝܬ܆ ܘܰܠܦܰܓܪܳܐ ܦܪܰܫ ܡܶܢ ܢܰܦܫܳܐ܆ ܐܰܝܟܰܢܳܐ ܕܟܰܕ ܠܡܰܘܬܳܐ ܕܺܝܠܰܢ ܡܳܐܶܬ ܢܨܽܘܒ ܒܗܳܢܳܐ ܙܰܪ̈ܥܶܐ ܕܚܰܝ̈ܶܐ ܘܕܰܩܝܳܡܬܳܐ܆ ܟܰܕ ܡܰܠܝܳܐ ܐܺܝܬܰܘܗ̱ܝ ܐܰܝܟ ܐܰ‌ܠܳܗܳܐ ܘܡܶܠܬܳܐ܆ ܘܰܕܢܶܬܦܰܠܰܓ ܠܳܐ ܡܟܳܢ܆ ܟܽܠܶܗ ܡܚܰܝܰܕ ܗ̱ܘܳܐ ܠܢܰܦܫܳܐ ܩܢܽܘܡܳܐܺܝܬ܆ ܘܒܺܐܝ̈ܕܶܝܗ̇ ܠܰܫܝܽܘܠ ܒܳܐܶܙ ܗ̱ܘܳܐ܆ ܟܰܕ ܡܦܰܣܶܩ ܗ̱ܘܳܐ ܠܰܐܣܽܘܪ̈ܶܐ ܕܬܰܡܳܢ. ܐܳܦ ܗܽܘ ܗܳܟܘܳܬ ܘܠܰܘ ܐ̱ܚܪܳܢܝܳܐܺܝܬ ܐܶܠܳܐ ܩܢܽܘܡܳܐܺܝܬ܆ ܟܽܠܶܗ ܡܚܰܝܰܕ ܗ̱ܘܳܐ ܐܳܦ ܠܦܰܓܪܳܐ. ܘܰܡܕܰܒܪܳܢܳܐܺܝܬ ܘܠܰܘ ܒܣܽܘܢܩܳܢܳܐ ܡܶܬܩܒܰܪ ܗ̱ܘܳܐ܆ ܟܰܕ ܡܒܰܛܶܠ ܗ̱ܘܳܐ ܠܰܚܒܳܠܳܐ ܗܰܘ ܕܰܒܩܰܒܪ̈ܶܐ܆ ܘܰܡܩܰܕܶܡ ܗ̱ܘܳܐ ܡܰܪܡܶܐ ܠܦܰܓܪ̈ܶܐ ܗܳܢܽܘܢ ܕܠܰܐܪܥܳܐ ܗܳܦܟܺܝܢ ܘܡܶܫܬܪܶܝܢ ܪܺܝܫܝܬܐ ܕܰܩܝܳܡܬܳܐ܆ ܘܪܳܡܶܐ ܒܗܽܘܢ ܚܰܝܠܳܐ ܕܰܠܘܳܬ ܗܳܕܶܐ. ܗܳܝܕܶܝܢ ܐܳܦܶܢ ܠܳܐ ܣܢܺܝܩ ܗ̱ܘܳܐ܆ ܐܳ‌ܠܨܳܐ ܗ̱ܘܳܬ ܥܰܠ ‌ܐܺܝܩܳܪܳܐ ܕܰܒܗܳܠܶܝܢ ܕܰܩܒܽܘܪܬܳܐ ܠܗܳܢܽܘܢ ܕܗܳܝܕܶܝܢ܆ ܘܠܰܘ ܕܗܳܫܳܐ ܚܢܰܢ ܠܗܳܠܶܝܢ ܢܶܪܰܓ ܣܪܺܝܩܳܐܺܝܬ. ܠܰܘ ܓܶܝܪ ܥܰܠ ܟ̈ܶܬܳܢܶܐ ܟܺܝܬ ܣܢܺܝܩ ܗ̱ܘܳܐ܆ ܘܥܰܠ ܟܽܘܪܳܟܳܐ ܐ̱ܚܪܺܢܳܐ ܕܥܽܘܦܳܝܳܐ܆ ܗܰܘ ܕܦܰܪܨܽܘܦܶܗ ܐܰܢܗܰܪ ܐܰܝܟ ܫܶܡܫܳܐ܆ ܘܢܰܚ̈ܬܰܘܗ̱ܝ ܗܘ̣ܰܘ ܚܶܘܳܪ̈ܶܐ ܐܰܝܟ ܢܽܘܗܪܳܐ^[22]܆ ܐܶܡܰܬܝ ܕܟܰܕ ܐܶܫܬܰܚܠܦܰܬ ܕܡܽܘܬܶܗ ܥܰܠ ܛܽܘܪܳܐ܆ ܚܰܘܺܝ ܩܰܠܺܝܠ ܡܶܕܶܡ ܡܶܢ ܫܽܘܒܚܶܗ ܒܰܝܬܳܝܳܐ ܠܬܰܠܡܺܝܕܰܘ̈ܗ̱ܝ܆ ܐܶܠܳܐ ܡܕܰܒܪܳܢܳܐܺܝܬ ܗܳܝ ܟܺܝܬ ܕܶܐܡܪܶܬ ܡܶܬܪܡܶܐ ܗ̱ܘܳܐ ܠܰܩܒܽܘܪܬܳܐ܆ ܘܡܶܛܽܠ ܥܶܠܬܳܐ ܗܳܝ ܕܶܐܬܰܐܡܪܰܬ. ܘܰܐܝܟܰܢܳܐ ܕܰܢܚܰܘܶܐ ܒܝܰܕ ܟܽܠܗܶܝܢ܆ ܕܡܶܢ ܐܽܘܣܺܝܰܐ ܕܺܝܠܰܢ ܐܺܝܬܰܘܗ̱ܝ ܗ̱ܘܳܐ ܦܰܓܪܶܗ܆ ܘܡܶܢ ܟܽܠ ܕܽܘܟ ܢܶܪܕܽܘܦ ܘܢܶܛܪܽܘܕ ܠܡܰܣܒܪܳܢܽܘܬܳܐ ܗܳܝ ܕܦܰܢܛܰܣܺܝܰܐ. ܡܶܛܽܠܗܳܕܶܐ. ܐܳܦ ܒܟ̈ܶܬܳܢܶܐ ܡܶܬܟܰܪܰܟ ܘܰܠܚܘܢܛܬܳܐ ܕܡܽܘܪܳܐ ܡܶܬܪܡܶܐ܆ ܘܰܒܩܰܒܪܳܐ ܡܶܬܬܣܺܝܡ܆ ܘܰܬܚܶܝܬ ܛܰܒ̈ܥܶܐ ܘܢܳܛܽܘܪ̈ܶܐ ܗܳܘܶܐ܆ ܟܰܕ ܗܳܝ ܕܫܰܪܺܝܪܳܐ ܘܕܰܠܟܽܠܳܗ̇ ܗܰܓܳܓܽܘܬܳܐ ܐܺܝܬܶܝܗ̇ ܠܳܐ ܡܫܰܘܬܰܦܬܳܐ܆ ܡܟܰܢܶܫ ܗ̱ܘܳܐ ܠܰܩܝܳܡܬܳܐ ܘܩܳܕܶܡ ܗ̱ܘܳܐ ܡܥܰܬܶܕ ܘܰܡܛܰܝܶܒ܆ ܘܒܺܐܝ̈ܕܰܝܗܽܘܢ ܕܺܝܠܗܽܘܢ ܕܣܽܘܥܪ̈ܳܢܶܐ ܡܫܰܪܰܪ ܗ̱ܘܳܐ. ܐܶܢ ܓܶܝܪ ܐܳܦ ܟܰܕ ܗܳܠܶܝܢ ܟܽܠܗܶܝܢ ܗܘܰܝ̈܆ ܘܠܳܐ ܡܶܕܶܡ ܡܟܰܚܶܕ ܠܗܽܘܢ ܘܡܰܒܗܶܬ ܠܗܳܢܽܘܢ ܕܦܰܢܛܰܣܺܝܰܐ ܡܫܰܒܚܺܝܢ܆ ܠܰܐܝ̇ܕܳܐ ܫܳܢܝܽܘܬܳܐ ܠܳܐ ܡܶܫܬܰܪܓܠܺܝܢ ܗ̱ܘܰܘ܆ ܐܶ‌ܠܽܘ ܠܳܐ ܕܶܐܫܬܠܶܡ ܦܰܓܪܶܗ ܕܡܳܪܰܢ ܠܰܩܒܽܘܪܬܳܐ.

ܒܟܽܠܗܶܝܢ ܗܳܟܺܝܠ ܗܳܠܶܝܢ ܕܠܳܚ̈ܡܳܢ ܢܝܰܩܪܺܝܘܗ̱ܝ܆ ܘܥܳܗ̈ܢܳܢ ܠܣܽܘܢ̈ܩܳܢܶܐ ܘܰܠܙܰܒ̈ܢܶܐ. ܗܳܝܕܶܝܢ ܕܰܩܒܽܘܪܬܳܐ ܐܺܝܬܰܘܗ̱ܝ ܗ̱ܘܳܐ ܙܰܒܢܳܐ. ܘܰܩܒܰܪܘ ܗܳܢܽܘܢ ܕܰܠܘܳܬ ܗܳܕܶܐ ܝܺܨܶܦܘ܆ ܘܡܶܢ ܥܠܰܠܬܳܐ ܕܝܽܘܬܪܳܢܳܐ ܟܰܢܶܫܘ ܝܽܘܬܪܳܢܳܐ. ܗܳܫܳܐ ܕܰܡܠܶܐ ܫܽܘܚ̈ܢܶܐ. ܐܳܣܝܽܘܬܳܐ ܒܳܥܶܐ. ܠܗܳܕܶܐ ܚܘܺܝܚܳܐܺܝܬ ܢܶܚܛܽܘܦ܆ ܘܰܕܢܶܩܕܽܘܡ ܟܽܠ ܚܰܕ ܠܰܐ̱ܚܪܺܢܳܐ ܢܶܬܚܰܦܰܛ. ܘܠܘ ܒܰܠܚܽܘܕ ܪܽܘܩܰܥܬܰܐ܆ ܐܶܠܳܐ ܐܳܦ ܟܽܠܳܗ̇ ܬܰܟܣܺܝܬܳܐ ܢܶܬܶܠ ܠܗܳܢܽܘܢ ܕܰܥܡܺܝܠܺܝܢ ܘܰܟܪܺܝܗܶܝܢ܆ ܚܠܳܦ ܗܳܝ ܕܰܚܢܰܢ ܚܠܺܝܡܺܝܢ ܚ̱ܢܰܢ܆ ܘܗܳܢܽܘܢ ܕܰܒܫܽܘܚ̈ܢܶܐ ܡܶܬܕܰܢܩܺܝܢ. ܠܗܳܢܽܘܢ ܕܚܳܫܶܝܢ ܘܰܒܟܺܐܒܳܐ ܡܶܬܕܘܶܝܢ ܡܰܪܺܝܪܳܐܺܝܬ܆ ܡܰܕܰܐܬܳܐ ܟܺܐܢܬܳܐ ܢܰܣܶܩ. ܢܶܫܬܰܘܬܰܦ ܠܗܽܘܢ ܓܶܝܪ ܒܚܰܫܗܽܘܢ܆ ܒܝܰܕ ܗܳܝ ܕܡܰܥܠܶܝܢ ܚ̱ܢܰܢ ܠܗܽܘܢ ܢܦܺܐܫܳܐ ܘܒܽܘܝܳܐܳܐ ܡܶܕܶܡ. ܙܰܒ̈ܢܺܝܢ ܓܶܝܪ ܣܰܓܺܝ̈ܳܐܢ ܐ̱ܢܳܫܺܝ̈ܢ ܡܶܢܗܽܘܢ܆ ܒܗܳܢܳܐ ܥܳܠܡܳܐ ܐܰܝܟ ܠܳܥܳܙܳܪ ܥܰܠ ‌ܐܰܦ̈ܰܝ ܗܳܠܶܝܢ ܕܰܚܛܰܘ ܡܩܰܒܠܺܝܢ ܒܺܝ̈ܫܳܬܳܐ܆ ܘܰܒܝܰܕ ܕܽܘܘܳܢܳܐ ܘܟܺܐܒܳܐ ܡܶܬܕܰܟܶܝܢ. ܘܰܠܘܳܬ ܥܽܘ̈ܒܶܐ ܕܰܐܒܪܳܗܳܡ ܢܶܬܬܰܘܒܠܽܘܢ܆ ܘܰܠܘܳܬ ܐܰܘܳܘܢܳܐ ܕܙܰܕܺܝ̈ܩܶܐ. ܘܢܶܫܬܰܘܕܥܽܘܢ ܠܰܐܝܠܶܝܢ ܕܰܥܒܰܕܘ ܠܗܽܘܢ ܫܰܦܺܝܪ܆ ܘܚܳܕܝܳܐܺܝܬ ܢܩܰܒܠܽܘܢ ܐܶܢܽܘܢ.

ܗܰܘ ܕܰܚܠܺܝܡ ܝܰܘܡܳܢܳܐ܆ ܠܗܳܝ ܕܰܡܚܳܪ ܕܠܳܐ ܝܺܕܺܝܥܳܐ ܢܶܬܚܰܫܰܒ. ܕܓܰܘܳܐ ܓܶܝܪ ܚܰܫ̈ܶܐ܆ ܘܗ̱ܝ ܕܰܥܬܺܝܕܳܐ ܠܳܐ ܡܶܬܚܰܙܝܳܢܺܝܬܐ ܗܝ. ܠܳܐ ܐ̱ܢܳܫ ܢܶܒܣܶܐ ܘܢܶܒܣܽܘܪ ܘܰܢܫܽܘܛ ܠܫܽܘܚ̈ܢܶܐ ܕܩܪܺܝܒܶܗ܆ ܘܰܒܫܽܘܚ̈ܢܶܐ ܠܳܐ ܢܶܬܢܰܣܶܐ. ܩܕܳܡ ܓܶܝܪ ܥܰܝ̈ܢܶܐ ܕܰܐ‌ܠܳܗܳܐ ܐܺܝܬܰܝܗܶܝܢ ܐܽܘܪ̈ܚܳܬܶܗ ܕܓܰܒܪܳܐ^[23]܆ ܐܶܡܰܪ ܟܬܳܒܳܐ ܗܰܘ ܟܳܗܢܳܝܳܐ. ܘܟܰܕ ܚܳܙܶܐ ܠܳܟ ܕܶܝܢ ܕܺܐܝܬܰܝܟ ܒܰܣܺܝܡܳܐ܆ ܘܰܕܡܶܬܟܰܦܰܦ ܐܰܢ̱ܬ ܠܘܳܬ ܚܰܫܳܐ ܕܰܐܚܽܘܟ܆ ܡܶܢ ܦܰܓܪܳܐ ܕܺܝܠܳܟ ܠܟܽܠ ܥܶܠܬܳܐ ܥܳܒܕܰܬ ܟܽܘܪܗܳܢܳܐ܆ ܘܠܰܚܒܳܠܳܐ ܗܰܘ ܕܡܶܢ ܐܰܪܝܳܢܽܘܬܳܐ ܘܓܰܪܒܳܢܽܘܬܳܐ ܘܩܰܠܳܦܺܝܬܳܐ܆ ܘܰܕܫܽܘܚ̈ܢܶܐ ܗܳܢܽܘܢ ܕܫܰܪܟܳܐ ܛܳܪܶܕ. ܩܰܠܺܝܠܳܐܺܝܬ ܗܳܟܺܝܠ ܫܠܰܚ ܠܢܰܚܬܳܟ܆ ܘܥܰܠ ܗܰܘ ܕܰܟܪܺܝܗ ܫܕܺܝ. ܟܰܕ ܝܳܕܰܥ ܐܰܢ̱ܬ ܕܥܰܡܶܗ ܐܰܟܚܕܳܐ ܫܳܠܰܚ ܐܰܢ̱ܬ܆ ܐܳܦ ܠܟܽܘܬܺܝܢܳܐ ܗܳܝ ܕܫܽܘܚ̈ܢܶܐ.

ܝܺܨܰܦ̈ܶܝܢ ܡܰܢ ܢܶܫ̈ܶܐ ܟܽܠܟܶܝܢ ܗܳܠܶܝܢ ܕܺܐܝܬܰܝܟܶܝܢ ܡܪ̈ܰܚܡܳܢܝܳܬܳܐ܆ ܐܳܦ ܓܶܝܪ ܓܶܢܣܳܐ ܕܺܝܠܟܶܝܢ ܝܰܬܺܝܪܳܐܺܝܬ ܐܺܝܬܰܘܗ̱ܝ ܡܛܰܝܒܳܐ ܠܘܳܬ ܪ̈ܰܚܡܶܐ܆ ܕܟܽܠܚܕܳܐ ܡܶܢܟܶܝܢ ܚܠܳܦ ܢܰܦܫܶܗ̇ ܡܶܢ ܟ̈ܶܬܳܢܶܐ ܒܰܝ̈ܬܳܝܶܐ ܕܺܝܠܳܗ̇ ܬܶܫܕܶܐ ܚܰܕ܆ ܘܰܚܠܳܦ ܒܰܥܠܳܗ̇ ܒܳܗ̇ ܒܰܕܡܽܘܬܳܐ ܡܶܢ ܠܒܽܘܫ̈ܶܐ ܕܺܝܠܳܗ̇܆ ܘܰܚܠܳܦ ܒܢܰܝ̈ܳܐ ܗܽܘ ܗܳܟܘܳܬ. ܚܠܳܦ ܟܽܠ ܚܰܕ ܦܽܘܪܩܳܢܳܐ ܐܺܝܬܰܘܗ̱ܝ ܗܰܘ ܡܳܐ ܕܡܶܬܺܝܗܶܒ܆ ܚܰܘܒܬܳܐ ܡܰܐܣܝܳܢܺܝܬܳܐ ܘܰܡܥܰܕܪܳܢܺܝܬܳܐ. ܙܪܽܘܥܝ ܫܦܺܝܥܳܐܺܝܬ ܥܰܠ ܦܰܓܪܳܐ ܗܰܘ ܕܰܟܪܺܝܗ܆ ܐܰܝܟܰܢܳܐ ܕܟܰܦ̈ܶܐ ܕܚܽܘܠܡܳܢܳܐ ܬܶܚܨܕܺܝܢ ܕܣܰܓܺܝ ܛܳܒ ܥܰܬܺܝܪ̈ܳܢ.

ܡܳܢܐ ܗܳܟܺܝܠ ܢܺܐܡܰܪ ܐ̱ܢܳܫ ܡܶܢ ܓܰܒܪ̈ܶܐ ܗܳܢܽܘܢ ܕܩܳܝܡܺܝܢ. ܕܶܐ݀ܫܠܰܚ ܨܳܒܶܐ ܐܰܢ̱ܬ ܡܶܚܕܳܐ ܒܰܪܫܳܥܬܶܗ܆ ܘܗܳܟܰܢܳܐ ܡܰܪܗܶܒ ܐܰܢ̱ܬ ܘܪܳܕܶܦ ܐܰܢ̱ܬ ܠܺܝ܆ ܐܶܠܳܐ ܝܰܬܺܝܪܳܐܺܝܬ ܡܰܢ܆ ܐܶܢ ܟܰܕ ܩܰܠܺܝܠ ܡܫܰܢܶܐ ܐܰܢ̱ܬ ܬܶܥܒܶܕ ܗܳܕܶܐ܆ ܕܬܶܬܚܙܶܐ ܕܛܳܒ ܪܳܬܰܚ ܐܰܢ̱ܬ ܒܗܰܝܡܳܢܽܘܬܳܐ܆ ܘܠܰܐ̱ܚܪ̈ܳܢܶܐ ܬܙܺܝܥ ܠܘܳܬ ܛܢܳܢܳܐ ܕܕܳܡܶܐ܆ ܘܢܶܗܘܶܐ ܠܳܟ ܐܳܦ ܐܰܓܪܳܐ ܕܥܰܠ ‌ܐܰܦ̈ܰܝ ܗܳܠܶܝܢ. ܐܶܢ ܕܶܝܢ ܟܰܕ ܠܒܰܝܬܳܟ ܐܳܙܶܠ ‌ܐܰܢ̱ܬ܆ ܠܰܡܚܳܪ ܬܶܨܒܶܐ ܗܺܝ ܗܳܕܶܐ ܐܰܘ ܐܳܦ ܡܶܕܶܡ ܕܝܰܬܺܝܪ ܪܰܒ ܠܡܶܥܒܰܕ܆ ܗܳܝ ܕܰܒܨܺܝܪ ܝܰܘܡܳܐ܆ ܬܰܝܬܶܐ ܚܽܘܣܪܳܢܳܐ ܘܠܳܐ ܚܰܕ. ܒܰܠܚܽܘܕ܆ ܠܳܐ ܬܶܛܥܶܐ ܠܗܳܠܶܝܢ ܕܶܐܬܶܐܡܰܪ̈ܝ̱. ܐܶܢܗܽܘ ܡܰܢ ܗܳܟܺܝܠ ܕܒܰܪ ܫܳܥܬܶܗ ܐܰܝܟ ܕܺܐܝܬ ܠܳܟ ܬܶܫܠܰܚ܆ ܬܶܬܕܰܡܶܐ ܠܗܳܢܽܘܢ ܕܰܚܙܰܘ ܠܰܡܫܺܝܚܳܐ ܕܥܰܠ ܥܺܝܠܳܐ ܕܰܚܡܳܪܳܐ ܝܳܬܶܒ܆ ܘܰܫܠܰܚܘ ܘܫܰܘܺܝܘ ܒܽܐܘܪܚܳܐ ܢܰܚ̈ܬܰܝܗܽܘܢ^[24].

ܙܳܕܶܩ ܗܳܟܺܝܠ ܕܳܐܦ ܚܠܳܦ ܚܽܘܠܡܳܢܳܐ܆ ܐܳܦ ܚܠܳܦ ܟܽܠ ܥܽܘܕܪܳܢܳܐ܆ ܢܶܦܪܥܺܝܘܗ̱ܝ ܠܰܐܠܳܗܳܐ ܡܥܰܕܪܳܢܳܐ ܘܥܳܒܶܕ ܫܰܦܺܝܪ̈ܳܬܳܐ. ܟܰܕ ܓܶܝܪ ܡܽܘܫܶܐ ܐܶܙܕܰܝܰܢ ܘܶܐܙܰܠ ܒܰܩܪܳܒܳܐ ܥܰܠ ܡܶܕܰܝܢ܆ ܟܰܕ ܗܦܰܟܘ ܓܰܒܪ̈ܶܐ ܗܳܢܽܘܢ ܩܪ̈ܰܒܬܳܢܶܐ܆ ܟܰܕ ܠܗܳܢܽܘܢ ܡܰܩܪ̈ܒܳܢܶܐ ܙܟܰܘ܆ ܘܠܳܐ ܢܦܰܠ ܡܶܢܗܽܘܢ ܒܰܩܪܳܒܳܐ ܘܳܐܦܠܳܐ ܚܰܕ܆ ܐܶܠܳܐ ܟܽܠܗܽܘܢ ܐܶܫܬܰܘܙܰܒܘ܆ ܡܶܛܽܠ ܦܽܘܪܩܳܢܳܐ ܗܰܘ ܕܕܰܐܝܟ ܗܳܢܳܐ܆ ܟܰܕ ܒܫܰܦܺܝܪܽܘܬ ܨܶܒܝܳܢܳܐ ܐܶܬܪܰܥܺܝܘ ܚܠܳܦ ܟܽܠܶܗ ܚܰܝܠܳܐ ܕܦܳܠ̈ܚܶܐ܆ ܐܶܡܰܪܘ ܠܘܳܬܶܗ ܪ̈ܺܝܫܰܝ ܐܰ‌ܠ̈ܦܶܐ ܟܺܝܬ ܘܪ̈ܺܝܫܰܝ ܡܰܐܘ̈ܳܬܳܐ. ܥܰܒ̈ܕܰܝܟ ܫܩܰܠܘ ܡܶܢܝܳܢܳܐ ܕܓܰܒܪ̈ܶܐ ܩܪ̈ܰܒܬܳܢܶܐ ܗܳܢܽܘܢ ܕܡܶܢ ܠܘܳܬܰܢ܆ ܘܠܳܐ ܛܥܳܐ ܘܳܐܦܠܳܐ ܚܰܕ. ܘܩܰܪܶܒܢܰܢ ܩܽܘܪܒܳܢܳܐ ܠܡܳܪܝܳܐ܆ ܓܰܒܪܐ ܗܰܘ ܡܳܐܢܳܐ ܕܶܐܫܟܰܚ ܕܕܰܗܒܳܐ. ܙܺܝܪܳܐ ܘܫܺܐܪܳܐ ܘܥܶܙܰܩܬܳܐ ܘܩܘܠܒܐ ܘܰܚܫܰܠܬܳܐ ܕܒܰܓ̈ܕܽܘܠܶܐ^[25]܆ ܠܰܡܚܰܣܳܢܽܘ ܡܶܛܽܠܳܬܰܢ ܩܕܳܡ ܡܳܪܝܳܐ. ܒܶܗ ܟܰܕ ܒܶܗ ܗܳܟܺܝܠ ܒܰܙܢܳܐ ܟܽܠ ܚܰܕ ܡܶܢܟܽܘܢ ܪܺܝܫܳܐ ܘܡܳܪܳܐ ܕܒܰܝܬܶܗ܆ ܚܠܳܦ ܚܽܘܠܡܳܢܳܐ ܘܦܽܘܪܩܳܢܳܐ ܕܟܽܠܗܽܘܢ ܗܳܢܽܘܢ ܕܥܳܡܪܺܝܢ ܒܶܗ܆ ܘܠܳܐ ܠܶܗ ܕܰܢܩܰܪܶܒ ܩܽܘܪ̈ܒܳܢܶܐ ܘܰܢܪܰܥܶܝܘܗ̱ܝ ܠܡܳܪܝܳܐ ܕܰܢܚܰܣܶܐ ܠܶܗ.

ܠܗܳܠܶܝܢ ܓܶܝܪ ܕܡܶܛܽܠ ܪ̈ܽܘܩܥܶܐ ܐܶܬܶܐܡܰܪ̈ܝ̱ ܡܶܢܰܢ܆ ܙܳܕܶܩ ܕܳܐܦ ܠܘܳܬ ܥܒ̈ܳܕܶܐ ܛܳܒ̈ܶܐ ܕܝܰܬܺܝܪ ܪܰܘܪܒܺܝܢ ܢܰܥܒܰܪ ܐܶܢܶܝܢ. ܠܦܽܘܬ ܡܫܽܘܚܬܳܐ ܕܚܰܝܠܳܐ ܕܟܽܠܢܳܫ܆ ܘܰܠܦܽܘܬ ܣܽܘܢܩܳܢܳܐ ܕܗܳܢܽܘܢ ܕܰܣܢܺܝܩܺܝܢ ܡܶܛܽܠ ܕܳܐܦ ܡܳܪܰܢ܆ ܟܳܣܳܐ ܕܩܰܪܺܝܪ̈ܶܐ ܕܡܶܬܺܝܗܶܒ ܐܶܡܰܪ ܕܡܰܝܬܶܐ ܐܰܓܪܳܐ ܠܗܰܘ ܕܝܳܗܶܒ^[26]. ܐܶܠܳܐ ܗܳܝܕܶܝܢ ܡܶܢ ܟܽܠ ܦܪܽܘܤ܆ ܐܶܡܰܬܝ ܕܢܶܬܺܝܗܶܒ ܠܗܰܘ ܕܠܳܐ ܩܢܶܐ ܐܳܦܠܳܐ ܗܽܘ ܗܳܢܳܐ܆ ܒܕܽܘܟܬܳܐ ܡܶܕܶܡ ܕܠܳܐ ܡܰܝ̈ܳܐ܆ ܐܰܘ ܒܚܰܣܺܝܪܽܘܬܳܐ ܕܡܰܝ̈ܳܐ. ܐܳܦ ܓܶܝܪ ܐܶܢܗܽܘ ܕܐ̱ܢܳܫ ܗܳܪܟܳܐ܆ ܟܰܕ ܡܶܢ ܪܶܕܝܳܐ ܗܰܘ ܕܡܶܢ ܕܰܐܦܢܰܐ ܥܰܬܺܝܪܳܐܺܝܬ ܪܳܕܶܐ ܠܰܢ ܝܳܗܶܒ ܟܳܣ̈ܶܐ ܠܰܣܢܺܝ̈ܩܶܐ܆ ܢܶܣܒܰܪ ܕܰܡܡܰܠܶܐ ܦܽܘܩܕܳܢܳܐ ܐܶܘܰܢܓܶܠܳܝܳܐ܆ ܢܶܬܓܚܶܟ ܕܰܕܫܶܩܝܳܐ ܕܥܰܬܺܝܪܐܺܝܬ ܡܶܫܬܰܦܰܥ ܐܺܝܬܰܘܗ̱ܝ ܝܳܗܽܘܒܳܐ ܝܰܬܺܝܪܳܐ ܘܒܰܛܝܠܳܐ. ܘܠܰܘ ܕܬܰܪܥܺܝܬܶܗ ܕܢܳܡܽܘܣܳܐ ܡܡܰܠܳܐ^[27].

ܢܶܬܶܠ ܕܶܝܢ ܠܰܢ ܡܳܪܰܢ ܘܰܐ‌ܠܳܗܰܢ ܝܽܫܽܘܥ ܡܫܺܝܚܳܐ܆ ܗܰܘ ܣܳܐܶܡ ܢܳܡܽܘܣܳܐ ܕܢܳܡܽܘ̈ܣܶܐ ܕܚܰܝ̈ܶܐ܆ ܐܳܦ ܣܽܘܟܳܠܳܐ ܠܡܶܣܬܰܟܳܠܽܘ ܐܳܦ ܚܰܝܠܳܐ ܠܡܶܣܥܰܪ ܗܳܠܶܝܢ ܕܰܦܩܰܕ܆ ܘܢܰܫܘܶܐ ܠܰܡܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܠܬܶܫܒܽܘܚܬܳܐ ܘܰܠܩܽܘܠܳܣܳܐ ܕܰܫܡܶܗ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܥܶܣܪܺܝܢ ܘܰܬܪܶܝܢ.

  ܒܡܺܐܡܪܳܐ ܗܰܘ ܕܦܛ 89[1]

 ܚܰܝܽܘܣܬܳܢܳܐ[2]

ܠܘܩܐ. 10: 30 [3]

ܡܪܩܘܣ. 12: 43  ܐܦ ܠܘܩܐ. 21: 3 [4]

 ܒ. ܩܘܪ̈ܝܢܬܝܐ. 6: 12 ـ 13 [5]

[6]ܚܰܣܽܘ̈ܟܬܳܢܶܐ. et in textuܚܰܝܽܘ̈ܣܬܳܢܶܐ

ܐ. ܩܘܪ̈ܝܢܬܝܐ. 15: 21 ـ 22 [7]

ܝܘܚܢܢ. 19: 30[8]

ܐܫܥܝܐ. 53: 4 ـ 5 [9]

ܐܫܥܝܐ. 53: 5 [10]

ܡܬܝ. 11: 29[11]

ܐܦܣ̈ܝܐ. 2: 14 [12]

ܐܫܥܝܐ. 53: 5 [13]

[14]ܐܳܦ ܠܳܐܣܝܽܘܬܳܐ ܡܥܳܕܺܝܢ ܝܰܘ̈ܢܳܝܶܐ ܠܡܶܩܪܳܐ ܡܢܺܝܚܳܢܽܘܬܳܐ܆ ܘܳܐܦ ܠܰܡܕܰܝܠܳܢܽܘܬܳܐ ܗܳܝ ܕܒܺܐܝܩܳܪܳܐ. ܡܶܛܽܠ ܗܳܕܶܐ ܐܶܡܰܪ ܡܰܠܦܳܢܳܐ ܘܢܶܬܥܳܦ̈ܳܢ ܗܳܠܶܝܢ ܕܰܡܢܺܝܚܳܢܽܘܬܳܐ

ܡܙܡܘܪ̈ܐ. 24: 8[15]

ܐ. ܛܝܡܬܐܘܣ. 6: 15 [16]

ܪ̈ܗܘܡܝܐ. 9: 5 [17]

ܙܥܽܘܪܬܳܐ[18]

ܐܦܣ̈ܝܐ. 5: 23  ܐܦ ܩܘܠܣ̈ܝܐ. 1: 18 [19]

ܡܬܝ. 25: 40 [20]

[21] ܠܐ ܐ̱ܢܳܫ ܢܶܗܦܽܘܟ ܠܣܘܢܛܐܟܣܝܣ ܗܳܕܶܐ܆ ܐܰܝܟ ܕܗܰܦܟܽܘܗ̇ ܗܳܢܽܘܢ ܩܰܕܡܳܝ̈ܶܐ܆ ܡܶܛܽܠ ܕܒܰܬܠܳܬܳܐ ܨܚܳܚ̈ܶܐ ܕܝܰܘ̈ܢܳܝܶܐ ܒܰܩܪܶܬ܆ ܘܗܳܟܰܢܳܐ ܐܶܫܟܚܶܬ ܕܣܺܝܡܳܐ. ܕܰܠܗܳܢܽܘܢ ܕܰܒܚܰܝ̈ܰܘܗܝ ܝܰܩܪܽܘܗܝ ܐܶܡܰܪ ܐܳܦ ܡܰܠܦܳܢܳܐ ܕܚܰܝܳܒ ܛܰܝܒܽܘܬܳܐ. ܣܰܓܺܝ ܝܰܬܺܝܪܳܐܝܬ܆ ܐܰܘ ܠܗܰܘ ܕܰܒܡܰܘܬܶܗ ܝܩܪ. ܘܢܺܝܫܶܗ ܕܡܰܠܦܳܢܳܐ ܐܺܝܬܰܘܗ̱ܝ ܕܢܺܐܡܰܪ܆ ܕܗܳܫܳܐ ܝܰܩܪܽܘܗܝ. ܕܫܳܐܶܠ ܡܶܢܳܟ ܒܗܳܠܶܝܢ ܕܚܰܝ̣ܺܝ̣̈ܢ ܘܰܐ‌ܠܺܝܨܺܝܢ ܒܟܽܘܪܗܳܢܳܐ܆ ܘܠܰܘ ܒܗܳܠܶܝܢ ܕܰܩܒܽܘܪܬܶܗ ܬܶܪܰܓ ܠܰܡܝܰܩܪܽܘܬܶܗ ܥܰܡ ܝܰܘܣܶܦ

ܡܬܝ. 17: 2[22]

ܡ̈ܬܠܐ. 5: 21 [23]

ܡܬܝ. 21: 7[24]

ܡܢܝܢܐ. 31: 48 ـ 50 [25]

ܡܬܝ. 10: 42  ܐܦ ܡܪܩܘܣ. 10: 40 [26]

 ܡܡܰܠܠܐ.[27]