ܥܰܠ ܩܰܕܺܝܡܽܘܬ ܥܽܘܬܳܕܳܐ ܘܛܽܘܝܳܒܳܐ ܕܡܰܥܰܠܬܳܐ ܕܰܠܒܶܝܬ ܡܰܥܡܽܘܕܺܝܬܳܐ܆ ܐܰܝܟ ܥܝܳܕܳܐ.
121: ܟܰܕ ܚܕܳܐ ܙܒܰܢ ܘܬܰܪܬܶܝܢ ܡܶܛܽܠ ܪܰܡܫܳܐ ܗܳܢܳܐ ܡܰܠܠܶܬ ܠܟܽܘܢ܆ ܘܰܕܡܳܢܰܐ ܗ̱ܘ ܨܶܒܝܳܢܳܐ ܘܢܺܝܫܳܐ ܕܗܳܝ ܕܰܒܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܩܰܕܺܝ̈ܫܶܐ ܕܨܰܘܡܳܐ ܢܶܟܠܶܐ ܠܡܰܥܰܠܬܳܐ ܗܳܝ ܕܥܰܡ ܒܳܥ̈ܘܳܬܳܐ܆ ܕܰܡܥܺܝܢܳܐ ܗܳܝ ܐܰܡܺܝܢܰܬ ܪܶܕܝܳܐ ܘܰܕܡܶܢ ܫܡܰܝܳܐ ܪܶܕܝܳܐ ܕܰܠܘܳܬ ܝܽܘܪܕܢܳܢ܆ ܥܕܰܡܳܐ ܠܝܰܘܡܳܐ ܗܰܘ ܕܝܰܬܺܝܪ ܡܶܢ ܟܽܠ ܝܰܘ̈ܡܺܝܢ ܣܓܺܝܕܳܐ ܘܰܡܝܰܩܪܳܐ ܕܰܩܝܳܡܬܳܐ܆ ܝܰܬܺܝܪܬܳܐ ܬܽܘܒ ܚܳܫܶܒ ܐ̱ܢܳܐ ܠܳܗ̇܆ ܕܰܒܟܽܠ ܙܒܰܢ ܘܳܐܦ ܒܫܰܢ̱ܬܳܐ ܕܳܐܬܝܳܐ܆ ܥܠܰܘܗ̱ܝ ܟܰܕ ܥܠܰܘܗ̱ܝ ܕܪܰܡܫܳܐ܆ ܘܡܶܛܽܠܳܬܶܗ ܟܰܕ ܡܶܛܽܠܳܬܶܗ ܕܫܰܪܒܳܐ ܐܰܙܺܝܥ ܠܶܫܳܢܳܐ. ܐܰܟܚܕܳܐ ܐܳܦ ܟܰܕ ܠܰܨܪܺܝܟܽܘܬܳܐ ܕܡܶܠܬܳܐ ܡܶܬܪܢܶܐ ܐ̱ܢܳܐ܆ ܕܠܳܐ ܡܶܫܟܚܳܐ ܠܡܰܝܬܳܝܽܘ ܡܶܕܡ ܚܰܕܬܳܐ܆ ܥܰܠ ܣܽܘܥܪ̈ܳܢܶܐ ܕܕܳܡܶܝܢ ܘܟܰܕ ܗܳܠܶܝܢ ܡܶܬܚܰܫܰܒ ܐ̱ܢܳܐ܆ ܕܛܳܒܳܐܺܝܬ ܐܶܬܪܰܥܺܝܬ̣ ܡܰܣܒܰܪ ܐ̱ܢܳܐ.
ܟܰܕ ܕܶܝܢ ܫܰܢ̱ܬܳܐ ܕܰܟܪܽܘܟܝܳܐ ܗܳܝ ܕܒܳܬܰܪܟܶܢ ܡܰܝܬܝܳܐ ܠܺܝ ܬܽܘܒ ܠܶܗ ܟܰܕ ܠܶܗ ܠܪܰܡܫܳܐ܆ ܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܐ̱ܚܪܺܢܳܐ ܚܠܳܦ ܐ̱ܚܪܺܢܳܐ ܗܳܘܶܐ ܐ̱ܢܳܐ܆ ܘܟܰܕ ܒܗܰܘܢܝ ܢܳܣܶܒ ܐ̱ܢܳܐ ܠܟܽܘܢ܆ ܡܫܰܪܬܚܳܐ ܐ̱ܢܳܫ ܡܶܢ ܠܳܐ ܡܫܰܪܬܚܳܐ ܡܶܬܚܙܶܐ ܐ̱ܢܳܐ ܘܪܰܒ ܢܰܦܫܳܐ. ܘܒܰܕܡܽܘܬ ܐܰܪܡܰܠܬܳܐ ܗܳܝ܆ ܗܳܝ ܕܡܶܣܟܺܢܝܳܐ ܗ̱ܘܳܬ ܡܰܢ܆ ܥܶܬܪܰܬ ܕܶܝܢ ܗܳܝ ܕܩܰܒܠܰܬ ܠܶܐܠܺܝܳܐ܆ ܟܰܕ ܚܳܐܰܪ ܐ̱ܢܳܐ ܒܰܣܢܺܝܩܽܘܬܳܐ ܕܺܝܠܝ܆ ܘܰܕܠܰܝܬ ܠܺܝ ܕܰܡܫܰܪܬܚܳܐܺܝܬ ܐܶ݀ܬܰܪܣܶܐ ܠܠܳܐ ܣܰܒܥܽܘܬܳܐ ܡܩܰܠܰܣܬܳܐ ܕܡܰܫܡܰܥܬܳܐ ܕܺܝܠܟܽܘܢ܆ ܘܳܐܦܠܳܐ ܟܡܳܐ ܕܗܽܘ ܕܠܰܚܡܳܐ ܚܰܕ ܡܫܰܡܠܝܳܐ ܐܶ݀ܣܺܝܡ ܩܕܳܡܰܝܟܽܘܢ܆ ܣܳܒܰܪ ܐ̱ܢܳܐ ܕܰܒܡ̈ܶܠܶܝܗ̇ ܐܶܬܚܰܫܰܚ܆ ܘܺܐ݀ܡܰܪ ܠܘܳܬ ܟܽܠ ܚܰܕ ܡܶܢ ܗܳܢܽܘܢ ܕܰܠܘܳܬ ܫܶܡܥܳܐ ܡܛܰܝܒܺܝܢ܆ ܕܚܰܝ ܗ̱ܘ̣ ܡܳܪܝܐ ܐܰܠܳܗܳܟ܆ ܐܶܢ ܐܺܝܬ ܠܺܝ ܛܡܺܝܪܬܳܐ. ܐܶܠܳܐ ܐܶܢ ܐܰܝܟ ܙܘܳܪܳܐ ܕܩܰܡܚܳܐ ܒܩܽܘܠܬܳܐ ܘܩܰܠܺܝܠ ܡܶܫܚܳܐ ܒܩܰܪܢܳܐ[1]. ܐܰܝܟܰܢܳܐ ܕܬܶܥܢܽܘܢ ܐܢ̱ܬܽܘܢ ܠܘܳܬ ܗܳܠܶܝܢ ܘܬܶܩܥܽܘܢ ܠܽܘܩܒܰܠܗܶܝܢ ܠܰܒ̈ܢܳܬ ܩ̈ܳܠܶܐ ܢܒܺܝ̣ܳܝ̣̈ܳܬܳܐ ܕܺܝܠܶܗ ܕܶܐܠܺܝܳܐ܆ ܗܳܠܶܝܢ ܐܳܡܰܪ ܡܳܪܝܳܐ. ܩܽܘܠܬܳܐ ܕܩܰܡܚܳܐ ܠܳܐ ܬܶܓܡܰܪ. ܘܩܰܪܢܳܐ ܕܡܶܫܚܳܐ ܠܳܐ ܬܶܒܨܰܪ[2]. ܗܳܕܶܐ ܐܺܝܬܶܝܗ̇ ܣܰܓܺܝܽܐܘܬ ܡܰܪ̈ܗܳܛܶܐ ܕܺܝܠܝ. ܗܳܕܶܐ ܡܫܰܪܬܚܽܘܬܳܐ ܕܺܝܠܝ. ܗܳܕܶܐ ܥܽܘܬܪܳܐ ܕܡܶܠܬܳܐ. ܗܳܝ ܓܶܝܪ ܕܰܐܢ̱ܬܘܢ ܗܳܟܰܢܳܐ ܬܶܗܘܽܘܢ ܣܺܝܡܺܝܢ ܐܢ̱ܬܽܘܢ ܡܗܰܝܡܢܳܐܺܝܬ܆ ܡܰܘܗܰܒܬܳܐ ܕܣܰܓܺܝ ܣܳܦܩܳܐ ܝܳܗܒܳܐ ܠܺܝ ܕܗܳܝ ܕܳܐܡܰܪ.
ܐܰ݀ܝܬܶܐ ܕܶܝܢ ܒܪܰܡ܆ ܡܶܛܽܠ ܟܺܝܬ ܕܥܽܘܗܕܳܢܳܐ ܕܡܶܫܚܳܐ ܥܒܰܕܢܰܢ܆ ܕܠܳܗ̇ ܠܗܳܕܶܐ ܥܶܠܬܳܐ ܢܶܣܰܒ܆ ܠܘܳܬ ܗܳܝ ܕܡܰܪܬܝܳܢܽܘܬܳܐ ܕܠܳܚܡܳܐ ܠܪܰܡܫܳܐ ܗܳܢܳܐ ܢܶܙܩܽܘܪ ܠܟܽܘܢ. ܢܶܬܚܰܫܰܒ ܗܳܟܺܝܠ ܠܗܳܠܶܝܢ ܥܣܰܪ ܒܬܽܘ̈ܠܳܬܳܐ܆ ܕܰܠܗܳܠܶܝܢ ܕܡܰܥܶܠ ܐܶܘܰܢܓܶܠܺܝܽܘܢ ܕܡܶܬܥ̈ܰܬܕܳܢ ܗ̱ܘܰܝ̈ ܕܢܺܐܪ̈ܥܳܢ ܠܚܰܬܢܳܐ[3]. ܘܰܒܗܳܠܶܝܢ ܡܰܢ ܚܰܡܶܫ ܚܰܟܺܝ̈ܡܳܬܳܐ ܢܕܰܡܶܐ܆ ܡܶܢ ܬܰܚܘܺܝܬܳܐ ܕܶܝܢ ܕܗܳܠܶܝܢ ܚܰܡܶܫ ܫܳܢ̈ܝܳܬܳܐ ܘܚܰܣܺܝܪ̈ܳܬ ܗܰܘܢܳܐ ܢ݀ܶܥܪܽܘܩ. ܘܰܒܗܳܠܶܝܢ ܝܰܘ̈ܡܳܬܳܐ ܩܰܕܺܝ̈ܫܶܐ ܕܨܰܘܡܳܐ܆ ܢܰ݀ܬܩܶܢ ܘܰܢ݀ܛܰܝܶܒ ܠܠܰܡܦܺܝ̈ܕܶܐ ܕܺܝܠܰܢ. ܒܬܽܘܠܬܳܐ ܡܰܢ ܓܶܝܪ ܐܺܝܬܶܝܗ̇ ܢܰܦܫܳܐ ܕܟܽܠ ܚܰܕ ܡܶܢ ܡܗܰܝܡ̈ܢܶܐ܆ ܟܰܕ ܚܰܕ ܚܰܬܢܳܐ ܘܓܰܒܪܳܐ ܝܳܕܥܳܐ ܠܰܡܫܺܝܚܳܐ܆ ܐܰܝܟܰܢܳܐ ܕܦܰܘܠܽܘܤ ܟܰܕ ܠܩܽܘܪ̈ܝܢܬܳܝܶܐ ܟܳܬܶܒ ܐܳܡܰܪ. ܡܟܰܪܬܟܽܘܢ ܠܓܰܒܪܳܐ ܚܰܕ ܒܬܽܘܠܬܳܐ ܕܟܺܝܬܳܐ ܕܰܐ݀ܩܺܝܡܟܽܘܢ ܩܕܳܡ ܡܫܺܝܚܳܐ[4]. ܠܰܡܦܺܝܕܳܐ ܕܶܝܢ܆ ܣܺܝܪܳܐ ܗܳܝ ܕܰܒܝܰܕ ܥܰܡ̈ܠܶܐ ܕܣܳܥܽܘܪ̈ܘܳܬܳܐ ܘܰܒܝܰܕ ܗܽܘܓܳܝܳܐ ܚܦܺܝܛܳܐ ܕܢܳܡܽܘܣܳܐ ܐܰܠܳܗܳܝܳܐ ܕܰܡܝܰܬܪ̈ܳܬܳܐ ܡܶܬܓܰܕܠܳܐ܆ ܘܕܳܠܩܳܐ ܒܢܽܘܗܪܳܐ ܕܢܽܘܪܳܐ ܗܳܝ ܕܡܶܢ ܠܥܶܠ ܘܰܫܡܰܝܳܢܺܝܬܳܐ.
ܠܳܐ ܓܶܝܪ ܐ̱ܢܳܫ ܗܳܟܺܝܠ ܢܶܣܒܰܪ܆ ܕܡܶܛܽܠ ܗܳܠܶܝܢ ܒܰܠܚܽܘܕ ܕܰܟܦܰܪܘ ܒܫܰܘܬܳܦܽܘܬܳܐ ܕܙܽܘܘܳܓܳܐ܆ ܘܰܪܕܰܦܘ ܒܳܬܰܪ ܠܳܐ ܚܠܺܝܛܽܘܬܳܐ ܘܰܠܚܽܘܕܳܝܽܘܬ ܙܢܳܐ ܘܒܳܬܰܪ ܕܰܟܝܽܘܬܳܐ ܗܳܝ ܕܰܒܗܳܕܶܐ܆ ܘܒܳܬܰܪ ܗܳܝ ܕܰܒܟܽܠ ܗܰܘ ܡܳܐ ܕܺܐܝܬܰܘܗ̱ܝ ܠܡܰܘܠܕܳܢܽܘܬܳܐ܆ ܢܩܰܕܡܽܘܢ ܢܶܗܘܽܘܢ ܡܺܝ̈ܬܶܐ ܘܰܐܟܚܕܳܐ ܢܶܨܛܰܠܒܽܘܢ ܥܰܡ ܡܫܺܝܚܳܐ܆ ܡܡܰܠܶܠ ܗܳܪܟܳܐ ܐܶܘܰܢܓܶܠܺܝܽܘܢ. ܡܡܰܠܶܠ ܓܶܝܪ ܐܰܝܟܰܢܳܐ ܕܶܐܡܪܶܬ܆ ܡܶܛܽܠ ܟܽܠ ܢܰܦܫܳܐ ܕܰܒܝܰܕ ܣܚܳܬܳܐ ܕܺܝܠܺܝܕܽܘܬܳܐ ܕܡܶܢ ܕܪܺܝܫ ܐܶܬܡܰܟܪܰܬ ܘܶܐܬܢܰܩܦܰܬ ܠܰܡܫܺܝܚܳܐ܆ ܕܠܰܡܦܺܝܕܳܐ ܡܶܢ ܟܽܠܦܪܽܘܤ ܡܶܬܬܰܒܥܳܐ ܕܢܶܗܘܶܐ ܐܺܝܬ ܠܳܗ̇ ܛܽܘܝܳܒܳܐ ܕܰܡܝܰܬܪ̈ܳܬܳܐ. ܕܰܒܢܽܘܗܪܳܐ ܕܡܶܢ ܠܥܶܠ ܡܶܬܢܗܰܪ. ܐܰܝܟܰܢܳܐ ܕܶܐܡܰܬܝ ܕܡܶܢ ܫܡܰܝܳܐ ܢܳܚܶܬ ܗܳܝ ܕܬܰܪܬܶܝܢ܆ ܥܰܡ ܫܽܘܒܚܳܐ ܦܐܶܐ ܠܰܐܠܳܗܳܐ ܘܰܡܥܰܠܝܳܐ܆ ܘܗܰܘ ܕܰܠܗܰܠ ܡܶܢܶܗ ܘܠܳܐ ܡܶܕܶܡ ܐܺܝܬ ܠܡܶܬܪܢܳܝܽܘ܆ ܟܰܕ ܡܰܠܰܐܟ̈ܶܐ ܐܳܬܶܝܢ ܩܕܳܡܰܘ̈ܗ̱ܝ ܥܰܡ ܫܺܝܦܽܘܪܳܐ ܘܩܳܠܐ ܪܰܒܳܐ[5]܆ ܟܽܠ ܚܕܳܐ. ܠܢܰܗܺܝܪܳܐ ܗܰܘ ܕܰܥ̈ܒܳܕܶܐ ܒܰܝ̈ܬܳܝܶܐ ܕܺܝܠܳܗ̇ ܬܩܰܪܶܒ ܠܶܗ܆ ܕܰܒܪ̈ܰܚܡܶܐ ܕܥܰܠ ܡܶܣ̈ܟܺܢܶܐ ܕܩܰܕܶܡܘ ܐܶܬܛܰܝܰܒܘ ܘܶܐܬܬܣܺܝܡܘ ܡܶܬܬܰܫܩܶܐ. ܘܢܰܨܺܝܚܳܐ ܘܰܕܝܰܬܺܝܪ ܪܳܡ ܡܩܺܝܡ ܠܶܗ ܠܕܶܠܩܶܗ܆ ܘܰܒܝܰܕ ܢܰܨܺܝܚܽܘܬܶܗ ܘܰܗܕܺܝܪܽܘܬܶܗ܆ ܡܫܰܝܢܳܐ ܘܰܦܨܺܝܚܳܐ ܢܳܓܶܕ ܠܶܗ ܠܦܰܪܨܽܘܦܶܗ ܕܚܰܬܢܳܐ܆ ܐܰܝܟܰܢܳܐ ܕܳܐܦ ܠܰܓܢܽܘܢܳܐ ܐܰܟܚܕܳܐ ܥܰܡܶܗ ܬܶܥܽܘܠ. ܠܰܓܢܽܘܢܳܐ ܓܶܝܪ ܐܶܬܕܰܡܝܰܬ ܚܰܕܽܘܬܳܐ ܗܳܝ ܕܡܰܠܟܽܘܬܳܐ ܕܰܫܡܰܝܳܐ[6]܆ ܡܶܛܽܠ ܗܳܝ ܕܰܒܢܰܨܺܝܚܽܘܬܳܐ ܘܰܚܕܳܝܽܘܬܳܐ܆ ܚܠܺܝܛܳܐ ܗܰܢܺܝܽܐܘܬܳܐ ܗܳܝ ܢܰܟܦܬܳܐ ܘܫܰܪܺܝܪܬܳܐ ܘܕܰܒܣܰܒܥܳܐ ܠܳܐ ܡܶܬܡܰܫܚܳܐ܆ ܘܰܕܗܳܝ ܕܥܰܠ ܐܰܪܥܳܐ ܠܳܐ ܐܺܝܬ ܠܡܶܫܟܳܚܽܘ ܬܰܚܘܺܝܬܳܐ. ܡܶܢ ܢܰܩܺܝܦܽܘܬܳܐ ܓܶܝܪ ܗܳܝ ܕܰܒܙܽܘܘܳܓܳܐ܆ ܘܠܳܐ ܡܶܕܶܡ ܐܺܝܬ ܠܘܳܬ ܒܢܰܝ̈ܢܳܫܳܐ ܕܝܰܬܺܝܪ ܪܚܺܝܡ ܘܝܰܬܺܝܪ ܚܰܒܺܝܒ܆ ܗܳܝ ܕܡܶܢܳܗ̇ ܫܳܘܚܳܐ ܐܳܦ ܪܶܚܡܬܳܐ ܗܳܝ ܕܰܠܘܳܬ ܒܢܰܝ̈ܳܐ. ܐܳܦ ܓܶܝܪ ܐܶܠܽܘ ܟܺܝܬ ܐܺܝܬ ܗ̱ܘܳܐ ܝܽܘܩܢܳܐ ܐ̱ܚܪܺܢܳܐ ܠܡܶܫܟܳܚܽܘ ܕܝܰܬܺܝܪ ܪܰܒ ܗ̱ܘܳܐ܆ ܡܶܢ ܟܽܠܦܪܽܘܤ ܠܗܰܘ ܡܰܝܬܶܐ ܗ̱ܘܳܐ ܐܶܠܳܐ ܒܗܳܢܳܐ ܐܶܬܚܰܫܰܚ܆ ܡܶܛܽܠ ܕܠܳܐ ܡܨܶܐ ܐ̱ܚܪܺܢܳܐ܆ ܕܰܐܟܚܕܳܐ ܢܚܰܘܶܐ ܠܗܳܢܶܝܢ ܕܝܰܬܺܝܪ ܣܰܓܺܝ̈ܳܐܢ.
ܡܶܛܽܠ ܗܳܕܶܐ ܐܶܫܰܥܝܳܐ ܢܒܺܝܳܐ ܠܘܳܬ ܐܽܘܪܶܫܠܶܡ ܗܳܝ ܟܺܝܬ ܕܺܐܝܬܶܝܗ̇ ܥܺܕܬܳܐ ܐܳܡܰܪ܆ ܕܰܐܟܙܢܳܐ ܕܚܳܕܶܐ ܚܰܬܢܳܐ ܥܰܠ ܟܰܠܬܳܐ܆ ܗܳܟܰܢܳܐ ܢܶܚܕܶܐ ܡܳܪܝܳܐ ܥܠܰܝܟܝ[7]. ܘܕܰܠܘܳܬ ܥܺܕܬܳܐ ܐܺܝܬܶܝܗ̇ ܗܺܝ ܒܰܪ̱ܬ ܩܳܠܳܐ܆ ܘܠܰܘ ܠܘܳܬ ܐܽܘܪܶܫܠܶܡ ܗܳܝ ܕܰܒܥܰܝ̈ܢܶܐ ܡܶܬܪ̈ܰܓܫܳܢܝܳܬܳܐ ܡܬܚܰܙܝܳܐ ܘܥܰܬܺܝܩܬܳܐ܆ ܩܰܕܶܡ ܐܶܡܰܪ܆ ܘܢܶܩܪܶܐ ܫܡܳܐ ܕܺܝܠܶܟܝ ܚܰܕܬܳܐ܆ ܗܰܘ ܕܡܳܪܝܳܐ ܢܫܰܡܗܺܝܘܗ̱ܝ. ܫܡܳܐ ܕܶܝܢ ܚܰܕܬܳܐ ܐܺܝܬܰܘܗ̱ܝ ܗܰܘ ܕܥܺܕܬܳܐ܆ ܘܗܰܘ ܕܰܠܗܳܕܶܐ ܡܡܰܠܶܐ܆ ܗܰܘ ܕܰܟܪ̈ܺܝܣܛܝܳܢܶܐ. ܕܗܽܘ ܕܶܝܢ ܡܳܪܝܳܐ ܩܪܳܝܗ̱ܝ ܆ ܘܡܶܢ ܒܢܰܝ̈ܢܳܫܳܐ ܘܠܳܐ ܐ̱ܢܳܫ ܐܶܫܟܚܶܗ܆ ܐܰܘܕܰܥ ܩܰܕܡܳܐܺܝܬ܆ ܟܰܕ ܐܶܡܰܪ܆ ܐܰܢ̱ܬ ܗ̱ܘ̣ ܫܽܘܥܳܐ܆ ܘܥܰܠ ܗܳܢܳܐ ܫܽܘܥܳܐ ܐܶ݀ܒܢܶܝܗ̇ ܠܥܺܕܬܝ[8].
ܐܳܦ ܦܰܘܠܽܘܤ ܕܶܝܢ ܒܳܗ̇ ܒܰܕܡܽܘܬܳܐ܆ ܟܰܕ ܒܦܽܘܚܳܡܳܐ ܘܕܽܘܡܝܳܐ ܕܫܰܘܬܳܦܽܘܬܳܐܕܙܽܘܘܓܳܐ ܐܶܬܚܰܫܰܚ܆ ܟܰܕ ܠܶܐܦܶܣܳܝ̈ܶܐ ܟܳܬܶܒ ܗ̱ܘܳܐ ܐܶܡܰܪ܆ ܚܠܳܦ ܗܳܕܶܐ ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ܆ ܘܢܶܬܢܰܩܰܦ ܠܘܳܬ ܐܰܢ̱ܬܬܶܗ. ܘܢܶܗܘܽܘܢ ܬܪ̈ܰܝܗܽܘܢ ܠܒܶܣܪܳܐ ܚܰܕ. ܐ̱ܪܳܙܳܐ ܗܳܢܳܐ ܪܰܒܳܐ ܐܺܝܬܰܘܗ̱ܝ. ܐܶܢܳܐ ܕܶܝܢ ܐܳܡܰܪ ܐ̱ܢܳܐ܆ ܥܰܠ ܡܫܺܝܚܳܐ ܘܥܰܠ ܥܺܕܬܳܐ[9]. ܪܰܒܳܐ ܓܶܝܪ ܐܺܝܬܰܘܗ̱ܝ ܐܰܝܟ ܕܒܰܫܪܳܪܳܐ܆ ܐܳܦ ܒܳܗ̇ ܒܬܰܚܘܺܝܬܳܐ܆ ܕܪܶܚܡܬܳܐ ܗܳܝ ܕܰܥܠܰܘܗ̱ܝ ܕܢܺܝܪܳܐ ܕܫܰܘܬܳܦܽܘܬܳܐ. ܕܝܰܬܺܝܪ ܪܰܒ ܕܶܝܢ ܐܺܝܬܰܘܗ̱ܝ܆ ܘܳܐܦܠܳܐ ܐܺܝܬ ܠܡܺܐܡܰܪ ܕܕܰܐܝܟ ܐܰܝܢܰܐ ܗ̱ܘ܆ ܘܰܒܐ̱ܪܳܙܳܐ ܚܳܐܰܪ܆ ܐܶܡܰܬܝ ܕܥܰܠ ܡܫܺܝܚܳܐ ܘܥܰܠ ܥܺܕܬܳܐ ܢܶܬܥܰܠܶܐ.
ܡܶܛܽܠ ܗܳܟܺܝܠ ܕܺܝܕܰܥܢܰܢ ܕܡܳܢܳܐ ܨܳܒܝܳܐ ܗܳܝ ܕܢܶܐܪܽܘܥ ܠܰܡܫܺܝܚܳܐ܆ ܘܡܳܢܰܐ ܗ̱ܘ ܚܰܝܠܳܐ ܕܠܰܡ̈ܦܺܝܕܶܐ܆ ܐܳܦ ܚܢܰܢ ܢܶ݀ܬܛܰܝܰܒ ܘܢܶܬܥܰܬܰܕ܆ ܠܘܳܬ ܗܳܝ ܕܰܒܝܰܘܡܳܐ ܗܰܘ ܕܚܰܫܳܐ ܦܳܪܽܘܩܳܝܳܐ ܘܕܰܩܝܳܡܬܳܐ܆ ܥܰܡܶܗ ܢܶ݀ܥܽܘܠ ܠܒܰܝܬܳܐ ܕܢܽܘܗܪܳܐ܆ ܟܰܕ ܥܬܺܝܕ ܕܰܒܝܰܕ ܣܚܳܬܳܐ ܐܰܠܳܗܳܝܬܳܐ܆ ܐܳܦ ܒܬܽܘ̈ܠܳܬܳܐ ܐ̱ܚܪ̈ܳܢܝܳܬܳܐ ܢܰܦ̈ܫܳܬܳܐ ܢܰܩܶܦ ܠܶܗ܆ ܟܕ ܠܰܚܕܳܐ ܒܬܽܘܠܬܳܐ ܘܟܰܠܬܳܐ ܥܺܕܬܳܐ ܡܶܬܟܰܢ̈ܫܳܢ ܐܰܟܚܕܳܐ ܘܡܶܨܛܰܡ̈ܕܳܢ. ܐܳܦܶܢ ܓܶܝܪ ܣܰܓܺܝ̈ܳܐܬܳܐ ܢܶܬܬܰܘܣ̈ܦܳܢ܆ ܚܕܳܐ ܬܽܘܒ ܗܺܝ[10] ܗܳܟܘܳܬ ܐܺܝܬܶܝܗ̇܆ ܡܫܰܡܠܰܝܬܳܐ ܘܰܕܠܰܝܬ ܒܳܗ̇ ܡܶܕܶܡ ܕܚܰܣܺܝܪ ܣܳܟ܆ ܐܰܝܟ ܕܰܠܘܳܬ ܩܪܳܝܬܳܐ ܕܗܰܘ ܕܰܩܪܳܐ. ܡܶܛܽܠ ܗܳܕܶܐ܆ ܐܳܦ ܒܰܥܣܰܪ ܒܬܽܘ̈ܠܳܬܳܐ ܠܡܽܘܠܳܝܳܐ ܕܺܝܠܳܗ̇ ܚܒܰܫ܆ ܫܽܘܘܕܳܥܳܐ ܓܶܝܪ ܕܰܡܫܰܡܠܝܽܘܬܳܐ ܐܺܝܬܰܘܗ̱ܝ ܡܶܢܝܳܢܳܐ ܕܥܶܣܪܳܐ. ܗܳܝ ܕܶܝܢ ܕܚܰܡܶܫ ܡܶܢܶܗܝܢ ܫܳܢ̈ܝܳܬܳܐ ܢܶܫ̈ܬܰܟܚܳܢ܆ ܘܰܕܫܳܢܝܽܘܬܳܐ ܐ̱ܚܪܳܝܬܳܐ ܢܶܣ̈ܒܳܢ ܚܽܘܝܳܒܳܐ܆ ܕܥܶܠܬܳܐ ܕܺܝܠܗܶܝܢ ܐܺܝܬܶܝܗ̇. ܡܚܰܘܝܳܐ ܕܶܝܢ ܐܳܦ ܗܳܕܶܐ܆ ܕܣܰܓܺܝ̈ܶܐܐ ܡܰܢ ܩܪ̈ܰܝܳܐ܆ ܙܥܽܘܪ̈ܶܐ ܕܶܝܢ ܓܒܰܝ̈ܳܐ[11].
ܐܳܦ ܗܰܘܢܳܐ ܕܶܝܢ ܡܶܕܶܡ ܐ̱ܚܪܺܢܳܐ ܕܝܰܬܺܝܪ ܥܰܡܺܝܩ܆ ܐܺܝܬ ܠܡܶܫܟܳܚܽܘ ܡܶܢ ܗܳܪܟܳܐ. ܡܶܛܽܠ[12] ܓܶܝܪ ܕܦܽܘܠܚܳܢܳܐ ܗܰܘ ܕܰܡܝܰܬܪ̈ܳܬܳܐ܆ ܒܝܰܕ ܗܳܠܶܝܢ ܚܰܡܫܳܐ ܪ̈ܶܓܫܶܐ ܡܶܬܬܱܪܰܨ܆ ܒܝܰܕ ܚܙܳܬܳܐ ܡܰܫܡܰܥܬܳܐ ܡܪܺܝܚܳܢܽܘܬܳܐ ܛܥܳܡܬܳܐ ܓܶܫܬܳܐ܆ ܐܶܡܰܬܝ ܕܰܠܗܰܘܢܳܐ ܪܺܝܫܳܢܳܐ ܕܬܰܪܥܺܝܬܳܐ܆ ܟܕ ܥܰܡ ܢܳܡܽܘܣܳܐ ܐܰܠܳܗܳܝܳܐ ܦܳܩܶܕ ܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ ܡܶܫܬܰܥܒܕܺܝܢ܆ ܘܰܠܘܳܬ ܗܳܝ ܕܘܳܠܝܳܐ ܡܶܬܠܰܚܡܺܝܢ܆ ܡܚܰܘܝܳܐ ܡܶܠܬܳܐ܆ ܕܶܐܢܗܽܘ ܟܺܝܬܕܰܠܩܽܘܒܠܳܗ̇ ܕܺܝܠܳܗ̇ ܕܗܳܕܶܐ ܡܚܰܡܣܢܳܢܽܘܬܳܐ܆ ܐܦ ܡܢܺܝܚܳܢܽܘܬܳܐ ܘܪ̈ܰܚܡܶܐ ܕܥܰܠ ܣܢܺܝ̈ܩܶܐ ܢܶܗܘܽܘܢ ܐܺܝܬ ܠܗܽܘܢ ܫܰܘ̈ܝ̣ܰܝ̣ ܒܢܶܬܥܳܐ܆ ܥܦܺܝ̈ܦܶܐ ܡܶܕܶܡ܆ ܘܰܚܠܳܦ ܚܰܡܫܳܐ܆ ܥܶܣܪܳܐ ܠܚܰܬܢܳܐ ܡܶܣܬܰܒܪܺܝܢ. ܟܰܕ ܕܶܝܢ ܡܪ̈ܡܠܝܢ ܡܶܢ ܗܳܕܶܐ܆ ܘܰܠܚܰܝܽܘܣܬܳܢܽܘܬܳܐ ܕܥܰܠ ܫܰܘ̈ܝ̣ܰܝ̣ ܒܓܶܢܣܳܐ ܠܳܐ ܥܒܰܕܘ ܒܝܰܕ ܝܰܨܺܝܦܽܘܬܳܐ܆ ܟܺܐܢܳܐܺܝܬ ܡܶܬܬܕܺܝܢܺܝܢ ܕܰܕܚܰܣܺܝܪܽܘܬ ܗܰܘܢܳܐ ܐܺܝܬܰܝܗܽܘܢ܆ ܕܰܠܥܰܡܠܳܐ ܕܰܒܗܳܠܳܝܢ ܐ̱ܚܪ̈ܳܢܝܳܬܳܐ ܣܪܺܝܩܳܐܺܝܬ ܩܰܒܶܠܘ ܥܠܰܝܗܽܘܢ܆ ܘܚܰܡܫܳܐ ܒܰܠܚܽܘܕ ܡܶܬܡܢܶܝܢ܆ ܟܰܕ ܒܘܠܳܐ ܡܶܕܡ ܚܫܺܝܒܺܝܢ܆ ܘܠܰܡ̈ܦܺܝܕܶܐ ܡܰܢ ܐܺܝܬ ܠܗܽܘܢ ܡܶܛܽܠ ܡܚܰܡܣܢܳܢܽܘܬܳܐ ܗܳܝ ܕܫܰܪܟܳܐ܆ ܝܰܒܺܝ̈ܫܶܐ ܕܶܝܢ ܘܰܕܠܳܐ ܡܶܫܟܚܺܝܢ ܕܠܳܐ ܕܰܥܽܘܟܳܐܺܝܬ ܢܶܕܠܩܽܘܢ ܡܶܢ ܢܽܘܗܪܳܐ ܗܰܘ ܕܡܶܢ ܠܥܶܠ ܕܳܐܡܰܪ܆ ܕܪ̈ܰܚܡܶܐ ܨܳܒܶܐ ܐ̱ܢܳܐ ܘܠܰܘ ܕܶܒܚܬܳܐ[13].
ܙܳܕܶܩ ܗܳܟܺܝܠ ܐܳܦ ܕܢܶܓܕܠܺܝܘܗ̱ܝ ܠܠܰܡܦܺܝܕܳܐ ܒܰܓܕܠܳܐ ܕܰܡܝܰܬܪ̈ܳܬܳܐ ܐܰܝܟ ܕܶܐܡܪܶܬ܆ ܘܕܰܒܡܶܫܚܳܐ ܡܫܰܪܬܚܳܐ ܢܰܫܩܶܝܘܗ̱ܝ ܠܗܳܢܳܐ܆ ܘܕܳܐܦܠܳܐ ܒܐ̱ܢܳܫ ܢܰܗܡܶܐ܆ ܘܕܰܠܘܳܬ ܗܳܝ ܕܫܰܘܝܳܐܺܝܬ ܢܶܙܪܽܘܥ ܢܶܬܥܰܬܰܕ܆ ܢܰܨܺܝܚܽܘܬܳܐ ܓܶܝܪ ܗܳܝ ܕܰܒܝܰܕ ܕܽܘܟܳܝܳܐ ܕܰܥ̈ܒܳܕܶܐ ܛܳܒ̈ܶܐ܆ ܡܚܰܦܛܳܐ ܠܢܽܘܗܪܳܐ ܗܰܘ ܕܡܶܢ ܠܥܶܠ. ܠܘܳܬ ܓܶܝܪ ܗܰܘ ܕܕܳܡܶܐ܆ ܗܰܘ ܕܕܳܡܶܐ ܪܳܗܶܛ. ܘܰܫܡܰܥ ܠܐ̱ܢܳܫ ܡܶܢ ܢܒܺܝ̈ܶܐ܆ ܗܽܘܫܳܥ ܕܶܝܢ ܐܺܝܬܰܘܗ̱ܝ ܗܳܢܳܐ܆ ܕܪܳܫܶܡ ܠܶܗ ܠܳܟ ܠܥܽܘܬܳܕܶܗ ܕܠܰܡܦܺܝܕܳܐ. ܙܪܽܘܥܘ ܠܟܽܘܢ ܠܙܰܕܺܝܩܽܘܬܳܐ܆ ܘܰܚܨܽܘܕܘ ܠܦܺܐܪܳܐ ܕܚܰܝ̈ܶܐ. ܐܰܢܗܰܪܘ ܠܟܽܘܢ ܢܽܘܗܪܳܐ ܕܺܝܕܰܥܬܳܐ[14]. ܥܕ ܐܺܝܬ ܙܰܒܢܳܐ ܒܥܰܘ ܠܡܳܪܝܳܐ܆ ܥܕܰܡܳܐ ܕܢܶܐܬܝ̈ܳܢ ܠܟܽܘܢ ܥܰܠ̈ܠܳܬܳܐ ܕܙܰܕܺܝܩܽܘܬܳܐ. ܟܰܕ ܗܳܠܶܝܢ ܥܳܒܕܺܝܢܰܢ܆ ܒܬܽܘ̈ܠܳܬܳܐ ܥܠܰܝ̈ܡܳܬܳܐ ܢܶܗܘܶܐ܆ ܕܫܳܘ̈ܝܳܢ ܕܢܺܐܪ̈ܥܳܢ ܠܰܡܫܺܝܚܳܐ. ܠܗܶܝܢ ܓܶܝܪ ܟܰܕ ܠܗܶܝܢ ܠܢܰܦ̈ܫܳܬܳܐ ܙܰܒ̈ܢܺܝܢ ܣܰܓܺܝ̈ܳܐܢ܆ ܐܳܦ ܒܬܽܘ̈ܠܳܬܳܐ ܐܳܦ ܥܠܰܝ̈ܡܳܬܳܐ ܩܳܪܝܳܐ ܡܶܠܬܳܐ܆ ܟܰܕ ܥܠܰܝܡܽܘܬܳܐ ܐܰܘܟܺܝܬ ܙܪܺܝܙܽܘܬܳܐ ܚܰܘ̈ܝ̣ܝ̣ܢ ܠܽܘܩܒܰܠ ܚܰܫ̈ܶܐ ܕܨܰܥܪܳܐ.
ܗܳܝܕܶܝܢ ܐܳܦ ܡܶܠܬܳܐ ܗܳܝ ܕܡܰܠܦܳܢܽܘܬܳܐ ܡܶܛܽܠ ܡܬܰܪܣܝܳܢܽܘܬܳܐ܆ ܟܰܕ ܠܚ̈ܶܛܶܐ ܘܰܠܚܰܡܪܳܐ ܡܶܬܕܰܡܝܳܐ܆ ܒܰܣܺܝܡܰܬ ܪܺܝܚܳܐ ܬܶܬܚܙܶܐ ܥܰܠ ܣܳܥܽܘܪ̈ܘܳܬܳܐ ܕܺܝܠܟܽܘܢ. ܐܝܟ ܓܶܝܪ ܡܶܠܬܳܐ ܕܰܙܟܰܪܝܳܐ ܢܒܺܝܳܐ܆ ܚ̈ܶܛܶܐ ܠܰܥ̈ܠܰܝܡܶܐ܆ ܘܚܰܡܪܳܐ ܕܒܰܣܺܝܡ ܪܺܝܚܶܗ ܠܰܒ̈ܬܽܘܠܳܬܳܐ[15]. ܒܰܒܬܽܘܠܽܘܬܳܐ ܓܶܝܪ܆ ܘܰܒܢܳܛܽܘܪܽܘܬܳܐ ܕܚܰܝ̈ܶܐ ܕܟܰܝ̈ܳܐ ܘܕܰܡܙܰܘܓܽܘܬܳܐ ܗܳܝ ܕܰܒܝܰܕ ܚܳܬܡܳܐ ܕܰܡܫܺܝܚܳܐ ܐܶܬܬܰܙܘܰܓ̈ܶܝܢ܆ ܘܰܒܡܶܬܥܰܠܡܳܢܽܘܬܳܐ ܘܰܙܪܺܝܙܽܘܬܳܐ ܕܥܰܡ̈ܠܶܐ ܕܰܡܝܰܬܪ̈ܳܬܳܐ܆ ܚ̈ܶܛܶܐ ܗܳܠܶܝܢ ܡܶܠ̈ܬܳܢܳܝܳܬܳܐ[16] ܘܚܰܡܪܳܐ܆ ܗܳܢܰܘ ܓܶܝܪ ܚܰܝܠܳܗ̇ ܕܡܰܠܦܳܢܽܘܬܳܐ܆ ܝܺܕܺܝ̈ܥܶܐ ܗܳܘܶܝܢ܆ ܘܡܶܢ ܒܰܣܺܝܡܽܘܬ ܪܺܝܚܳܐ ܡܫܰܘܬܦܺܝܢ ܐܳܦ ܠܩܰܪ̈ܺܝܒܶܐ܆ ܘܠܰܐ̱ܚܪ̈ܳܢܶܐ ܡܰܝܬܶܝܢ ܠܘܳܬ ܛܢܳܢܳܐ ܕܗܳܠܶܝܢ ܕܕܳܡܶܝܢ܆ ܘܰܐܝܟܰܢܳܐ ܕܦܰܘܠܽܘܤ ܐܳܡܰܪ܆ ܕܶܒܚܬܳܐ ܘܩܽܘܪܒܳܢܳܐ ܡܶܕܶܡ ܠܪܺܝܚܳܐ ܒܰܣܺܝܡܳܐ܆ ܡܶܫܬܰܕܪܺܝܢ ܠܰܐܠܳܗܳܐ ܚܰܝܳܐ[17]. ܗܰܘ ܕܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܡܳܐܐ ܘܥܶܣܪܝܢ ܘܚܕ.
[12] ܡܶܛܽܠ ܕܰܒܠܶܫܳܢܳܐ ܝܰܘܢܳܝܳܐ ܐܳܦ ܒܬܽܘ̈ܠܳܬܳܐ ܘܳܐܦ ܚܰܡܫܳܐ ܪ̈ܶܓܫܶܐ ܗܳܢܽܘܢ. ܕܰܫܩܰܠ ܡܰܠܦܳܢܳܐ ܒܬܶܐܘܳܪܺܝܰܐ ܗܳܝ ܕܰܒܡܶܬܥܰܠܝܳܢܽܘܬܳܐ ܢܶܩܒܬܳܢܳܐܝܬ ܡܶܬܐܰܡܪܺܝܢ: ܒܣܽܘܪܝ̣ܳܝ̣ܳܐ ܕܶܝܢ ܠܰܘ ܗܳܟܰܢܳܐ: ܐܶܠܐ ܒܬܽܘ̈ܠܳܬܳܐ ܡܰܢ ܢܶܩܒܬܳܢܳܐܝܬ ܪ̈ܶܓܫܶܐ ܕܶܝܢ ܕܶܟܪܳܢܳܐܝܬ܆ ܟܰܕ ܫܽܘܪܳܝܳܗ̇ ܕܣܽܘܢܛܰܐܟܣܝܣ ܥܰܠ ܪ̈ܶܓܫܶܐ ܫܰܪܺܝ ܡܰܠܦܳܢܳܐ: ܘܒܳܬܰܪܟܶܢ ܐܰܚܺܝܪܳܗ̇ ܐܰܝܟ ܕܰܠܘܳܬ ܒܬܽܘ̈ܠܳܬܳܐ܆ ܒܝܰܘܢܳܝܳܐ ܡܰܢ ܠܳܚܡܳܐܝܬ ܡܶܫܬܰܡܠܝܳܐ ܗܺܝ ܣܽܘܢܛܰܐܟܣܝܣ܆ ܒܣܽܘܪܝ̣ܳܝ̣ܳܐ ܕܶܝܢ ܠܐ ܬܽܘܒ.