ܡܺܐܡܪܳܐ ܕܡܳܐܐ ܘܥܶܣܪܺܝܢ

ܥܰܠ ܡܰܥܰܠܬܳܐ ܕܨܰܘܡܳܐ܆ ܘܥܰܠ ܩܶܪܝܳܢܳܐ ܗܰܘ ܕܠܳܚܶܡ ܕܡܶܢ ܐܶܘܰܢܓ̈ܶܠܺܝܰܐ ܩܰܕܺܝ̈ܫܶܐ܆ ܠܗܰܘ ܕܗܽܘ ܡܺܐܡܪܳܐ ܟܰܕ ܡܶܫܬܰܘܫܰܛ ܡܫܰܘܕܰܥ ܠܶܗ܆ ܟܰܕ ܥܳܒܶܕ ܦܽܘܫܳܩܳܐ ܡܡܰܫܚܳܐ ܕܰܥܠܰܘܗ̱ܝ.

120: ܟܰܕ ܠܡ̈ܶܠܶܐ ܕܡܳܪܝܳܐ ܫܡܰܥܬܽܘܢ܆ ܝܺܕܰܥܬܽܘܢ ܡܳܢܰܘ ܐܰܟܣܺܝܘܡܳܐ ܐܰܘܟܺܝܬ ܐܺܝܩܳܪܳܐ ܕܨܰܘܡܳܐ܆ ܘܡܳܢܳܐ ܗܝ ܡܰܥܒܕܳܢܽܘܬܶܗ. ܘܺܐܝܩܳܪܳܐ ܡܰܢ܆ ܡܶܛܽܠ ܕܰܐ‌ܠܳܗܳܐ ܐܰܝܟ ܡܶܕܶܡ ܛܳܒܳܐ ܣܳܡܶܗ ܐܰܝܟ ܕܰܒܢܳܡܽܘܣܳܐ. ܡܶܛܽܠ ܗܳܕܶܐ ܐܳܦ ܗܽܘ ܣܗܶܕ ܥܠܰܘܗ̱ܝ. ܡܰܥܒܕܳܢܽܘܬܳܐ ܕܶܝܢ܆ ܡܶܛܽܠ ܕܰܠ̈ܫܺܐܕܶܐ ܥܳܒܶܕ ܠܡܶܥܪܰܩ. ܘܰܡܫܰܟܶܢ ܓܗܳܝܬܳܐ ܕܡܶܢ ܥܰܒܕܽܘܬܳܐ ܗܳܝ ܒܺܝܫܬܳܐ܆ ܘܚܺܐܪܽܘܬܳܐ ܗܳܝ ܕܫܳܘܝܳܐ ܠܰܨܠܽܘܬܳܐ. ܡܳܕܶܝܢ ܢܶܬܟܰܚܰܕ ܡܶܢ ܐܺܝܩܳܪܶܗ. ܢܶ݀ܗܘܶܐ ܒܢܶܣܝܳܢܳܐ ܕܡܰܥܒܕܳܢܽܘܬܶܗ܆ ܘܠܳܐ ܢܶܕܚܽܘܩ ܡܶܢܰܢ ܠܝܽܘܬܪܳܢܳܐ ܗܰܘ ܕܗܳܘܶܐ ܒܰܢ ܡܶܢ ܗܳܪܟܳܐ. ܐܰܘ ܓܶܝܪ ܟܰܕ ܟܪܺܝܗܶܝܢܢ ܢܶܬܰܐܣܶܐ܆ ܐܰܘ ܟܰܕ ܚܠܺܝܡܺܝܢܰܢ ܢܺܐܬܰܪ܆ ܗܳܝ ܕܠܳܐ ܢܶ݀ܦܶܠ ܒܟܽܘܪܗܳܢܳܐ.

ܐܶܠܳܐ ܢܶ݀ܦܢܶܐ ܢܶ݀ܣܰܩ ܐܶܢ ܫܳܦܪܳܐ ܠܘܳܬ ܫܽܘܪܳܝܗܽܘܢ ܕܦܶܬܓܳܡ̈ܶܐ ܗܳܢܽܘܢ ܕܶܐܘܰܢܓܶܠܺܝܽܘܢ܆ ܘܢܶ݀ܓܫܽܘܦ ܒܣܽܘܟܳܠܗܽܘܢ ܫܰܠܝܳܐܺܝܬ ܘܢܺܝܚܳܐܺܝܬ ܐܰܝܟ ܚܰܝܠܳܐ ܒܨܺܝܪܳܐ ܗܰܘ ܕܒܰܢ܆ ܘܗܽܘ ܢܗܰܕܶܐ ܘܢܰܣܶܩ ܠܰܢ ܡܶܢ ܟܽܠܦܪܽܘܤ܆ ܠܘܳܬ ܪܰܘܡܳܐ ܕܨܰܘܡܳܐ. ܓܰܒܪܳܐ ܐ̱ܢܳܫ ܐܳܡܰܪ ܩܪܶܒ ܠܘܳܬ ܝܶܫܽܘܥ ܟܰܕ ܡܶܬܟܰܫܰܦ ܠܶܗ ܘܳܐܡܰܪ܆ ܡܳܪܝ ܐܶܬܪܰܚܰܡ ܥܰܠ ܒܪܳܐ ܕܺܝܠܝ܆ ܕܡܶܣܬܰܗܪܰܢ ܘܒܺܝܫܳܐܺܝܬ ܚܳܐܶܫ^[1]. ܘܠܳܐܣ̈ܰܘܳܬܳܐ ܡܰܢ ܬܶܫܟܰܚ ܕܦܘܣܝܘܠܘܓܝܣܐ ܥܳܒܕܺܝܢ܆ ܗܳܢܰܘ ܕܶܝܢ ܕܰܡܡܰܠܠܺܝܢ ܟܝܳܢܳܐܺܝܬ ܡܶܛܽܠ ܗܳܢܳܐ ܚܰܫܳܐ܆ ܘܰܕܠܳܐ ܨܳܒܶܝܢ ܕܢܶܚܫܒܽܘܢܳܝܗ̱ܝ ܥܰܠ ܡܰܥܒܕܳܢܽܘܬܐ ܕܫ̈ܺܐܕܶܐ. ܐܳܡܪܺܝܢ ܕܶܝܢ ܕܰܒܓܶܕܫܳܐ ܡܶܕܶܡ ܥܳܒܕܳܐ ܟܽܘܪܗܳܢܳܐ܆ ܕܛܰܝܒܽܘܬܐ ܗܳܝ ܕܰܒܪܺܝܫܳܐ ܡܶܬܬܙܺܝܥܳܐ ܝܰܬܺܝܪܳܐܺܝܬ܆ ܘܒܰܟܪܽܘܟܝܳܐ ܕܢܽܘܗܪܳܐ ܣܰܗܪܳܢܳܝܳܐ ܐܰܝܟ ܕܡܶܢ ܡܫܰܘܬܦܽܘܬ ܚܰܫܳܐ ܡܶܕܶܡ܆ ܐܳܚܕܳܐ ܠܳܗ̇ ܠܡܶܬܬܙܺܝܥܳܢܽܘܬܳܐ܆ ܘܰܡܨܰܕܪܳܐ ܘܰܡܕܰܘܕܳܐ ܠܶܗ ܠܒܰܪܢܳܫܳܐ. ܚܢܰܢ ܕܶܝܢ ܟܰܕ ܠܰܫܪܳܪܳܐ ܗܰܘ ܕܰܐܟܪܙܶܗ ܠܶܐܘܰܢܓܶܠܺܝܽܘܢ ܡܶܬܬܦܺܝܣܺܝܢ ܚ̱ܢܰܢ܆ ܚܺܐܦܳܐ ܘܰܣܥܳܝܳܐ ܕܫ̈ܺܐܕܶܐ ܐܳܡܪܺܝܢܰܢ ܕܺܐܝܬܶܝܗ̇ ܗܳܕܶܐ܆ ܕܗܳܢܽܘܢ ܣܳܢ̈ܝ̣ܰܝ̣ ܒܢܰܝ̈ܢܳܫܳܐ ܟܽܘܠܳܢܳܐܺܝܬ ܘܒܰܥܪܺܝܪ̈ܳܝܶܐ ܘܰܩܫܰܝ̈ܳܐ܆ ܕܰܡܣܰܪܗܒܺܝܢ ܘܰܚܦܺܝܛܺܝܢ ܕܠܰܘ ܠܦܰܓܪܳܐ ܒܰܠܚܽܘܕ ܢܣܰܓܦܽܘܢ܆ ܐܶܠܳܐ ܐܳܦ ܒܢܰܦ̈ܫܳܬܳܐ ܢܶܪܡܽܘܢ ܕܽܘܓ̈ܡܰܛܰܐ ܒܺܝ̈ܫܶܐ ܘܡܰܘܒ̈ܕܳܢܶܐ. ܥܰܡ ܓܶܝܪ ܟܪܽܘܟܝܳܐ ܕܣܰܗܪܳܐ ܐܰܟܚܕܳܐ ܡܰܟܪܟܺܝܢ ܠܳܗ̇ ܠܡܰܥܒܕܳܢܽܘܬܳܐ ܒܰܝܬܳܝܬܳܐ ܕܺܝܠܗܽܘܢ ܗܳܝ ܕܣܰܓܺܝ ܝܰܬܺܝܪ ܐܺܝܬܶܝܗ̇ ܡܣܰܓܦܳܢܺܝܬܳܐ܆ ܘܰܕܬܶܪܒܶܐ ܐܰܟܚܕܳܐ ܥܰܡܳܗ̇ ܘܕܰܐܟܚܕܳܐ ܬܶܒܨܰܪ ܡܥܰܬܕܺܝܢ ܠܳܗ̇܆ ܟܰܕ ܡܰܫܦܶܝܢ ܨܢܺܝܥܳܐܺܝܬ ܘܟܰܕ ܡܳܬܚܺܝܢ ܘܡܰܣܓܶܝܢ ܠܳܗ̇܆ ܐܰܝܟܰܢܐ ܕܥܳܒܽܘܕܬܳܐ ܕܒܺܝ̈ܫܳܬܳܐ ܢܫܰܒܰܚ ܕܺܐܝܬܶܝܗ̇ ܣܰܗܪܳܐ. ܘܰܠܥܶܠܬܳܐ ܡܓܰܕܦܳܢܳܐܺܝܬ ܥܰܠ ܥܳܒܽܘܕܳܐ ܢܰܣܩܺܝܗ̇. ܘܰܐܝܟ ܕܰܐܡܺܝܪܳܐ ܠܰܢܒܺܝܳܐ ܕܰܘܺܝܕ܆ ܟܰܕ ܒܰܫܡܰܝܳܐ ܣܳܝܡܺܝܢܰܢ ܦܽܘܡܰܢ܆ ܥܰܘܠܳܐ ܒܪܰܘܡܳܐ ܢܡܰܠܶܠ^[2].

ܗܳܟܰܢܳܐ ܐܳܦ ܒܛܳܥܝܽܘܬܳܐ ܕܗܳܢܽܘܢ ܕܡܶܬܩܪܶܝܢ ܐܶܤܛܪ̈ܘܠܓܘ ܗܳܢܰܘ ܕܶܝܢ ܡܡܰܠ̈ܠܰܝ ܟܰܘܟ̈ܒܶܐ ܘܰܡܚܰܫ̈ܒܰܝ ܒܶܝܬ ܝܰܠ̈ܕܶܐ܆ ܪ̈ܽܘܚܶܐ ܒܺܝ̈ܫܳܬܳܐ ܗܳܠܶܝܢ ܐܰܟܚܕܳܐ ܕܳܒ̈ܩܳܢ ܥܳܐܠ̈ܳܢ. ܘܟܰܕ ܗܳܢܽܘܢ ܣܪ̈ܺܝܩܶܐ ܘܰܕܡܶܬܬܪܺܝܡܺܝܢ ܣܪܺܝܩܳܐܺܝܬ܆ ܠܫ̈ܳܢܝܘܳܬܗܽܘܢ ܦܰܩܪ̈ܳܬܳܐ ܡܰܣܩܺܝܢ ܠܗܳܢܶܝܢ ܥܰܠ ‌ܐܶܣܟܺܡ̈ܶܐ ܡܶܕܶܡ ܕܟܰܘܟ̈ܒܶܐ ܥܳܒ̈ܕܰܝ ܒܺܝ̈ܫܳܬܳܐ ܐܰܝܟ ܕܗܶܢܽܘܢ ܐܳܡܪܺܝܢ܆ ܢܳܛܪܺܝܢ ܕܰܝ̈ܘܶܐ ܡܰܪܺܝܪܳܐܺܝܬ܆ ܘܡܶܬܬܣܺܝܡܺܝܢ ܠܘܳܬ ܐܶܣܟܺܡܳܐ ܕܟܰܘܟܒܳܐ ܗܰܘ ܐܰܝܢܳܐ ܕܗܽܘ ܕܺܐܝܬܰܘܗ̱ܝ܆ ܘܗܳܝܕܶܝܢ ܠܫܳܢܝܽܘܬܳܐ ܪܳܡܶܝܢ ܒܗܽܘܢ܆ ܐܰܝܟܰܢܳܐ ܕܢܶܥܒܕܽܘܢ ܐܶܢܽܘܢ ܠܗܳܢܽܘܢ ܕܗܳܟܰܢܳܐ ܣܺܝܡܺܝܢ܆ ܕܝܰܬܺܝܪܳܐܺܝܬ ܢܶܬܬܰܚܕܽܘܢ ܒܳܗ̇ ܒܛܳܥܝܽܘܬܳܐ܆ ܐܰܝܟ ܕܒܰܐܝܕܳܐ ܕܠܳܐ ܫܳܪܥܳܐ ܘܠܳܐ ܦܳܕܳܐ. ܒܗܳܕܶܐ ܡܰܪܺܝܪܽܘܬܳܐ܆ ܐܳܦ ܠܘܳܬ ܩܰܒܪ̈ܶܐ ܡܶܕܶܡ ܕܗܳܢܽܘܢ ܕܡܶܬܕܰܝܘܢܺܝܢ ܪܳܕܦܺܝܢ ܡܰܘܒܠܺܝܢ ܠܗܽܘܢ ܠ̱ܐܢܳܫܺܝ̈ܢ܆ ܐܰܝܟܰܢܳܐ ܕܬܽܘܒ ܡܶܢ ܗܳܪܟܳܐ܆ ܡܰܣܒܪܳܢܽܘܬܳܐ܆ ܐ̱ܚܪܺܬܳܐ ܕܠܳܐ ܐܰ‌ܠܳܗܳܐ ܢܫܰܪܪܽܘܢ܆ ܕܗܳܢܽܘܢ ܕܡܰܣܒܪܺܝܢ ܕܚܰܕܚ̈ܕܳܢܝܳܬܳܐ ܡܶܢ ܢܰܦ̈ܫܳܬܳܐ ܕܗܳܢܽܘܢ ܕܡܰܝ̣ܺܝ̣ܬܺܝܢ ܠܫ̈ܺܐܕܶܐ ܡܶܫܬܰܚ̈ܠܦܳܢ. ܘܣܰܓܺܝ̈ܶܐܐ ܡܶܢ ܒܢܰܝ̈ ܐ̱ܢܳܫܳܐ ܥܰܢ̈ܳܬܶܐ ܘܕܰܒܚܰܪܳܫܽܘܬܳܐ ܥܢܶܝܢ܆ ܒܗܳܕܶܐ ܡܰܣܒܪܳܢܽܘܬܳܐ܆ ܐܳܦ ܠܘܳܬ ܩ̈ܶܛܠܶܐ ܕܰܛܠܳܝ̈ܶܐ ܫܩܰܠܘ ܚܺܐܦܳܐ. ܘܡܶܚܕܳܐ ܒܰܪܫܳܥܬܶܗ ܫ̈ܺܐܕܶܐ ܗܳܢܽܘܢ ܡܶܬܚܰܟ̈ܡܳܢܶܐ ܕܒܺܝ̈ܫܳܬܳܐ܆ ܬܚܶܝܬ ܥܒܳܕܳܐ ܗܰܘ ܕܡܰܣܒܪܳܢܽܘܬܗܽܘܢ ܕܗܳܢܽܘܢ ܚܳܠܕܺܝܢ ܥܳܐܠܺܝܢ. ܘܦܰܪܨܽܘܦܳܐ ܕܢܰܦܫܶܗ ܕܗܰܘ ܕܶܐܬܩܛܶܠ ܡܚܰܘܶܝܢ ܡܨܰܕܝܳܢܳܐܺܝܬ. ܘܡܶܬܐܰܡܢܺܝܢ ܠܘܳܬ ܗܳܢܽܘܢ ܩܳܛ̈ܠܰܝ ܐ̱ܢܳܫܳܐ܆ ܘܰܡܛܰܝܒܳܐܺܝܬ ܡܦܰܢܶܝܢ ܠܗܽܘܢ ܦܶܬܓܳܡܳܐ ܟܰܕ ܩܳܪܶܝܢ܆ ܘܰܠܘܳܬ ܗܳܝ ܕܫܳܦܪܳܐ ܥܳܢܶܝܢ. ܐܰܝܟܰܢܳܐ ܕܟܰܕ ܠܘܳܬ ܛܳܥܝܽܘܬܳܐ ܡܶܫܬܰܪܪܺܝܢ ܗܳܢܽܘܢ ܕܳܘ̈ܝ̣ܰܝ̣ ܬܠܺܝܬܳܐܺܝܬ܆ ܐܳܦ ܠܘܳܬ ܩ̈ܶܛܠܶܐ ܐ̱ܚܪ̈ܳܢܶܐ ܢܶܬܩܰܪܒܽܘܢ. ܘܟܰܕ ܡܶܬܬܨܺܝܕܺܝܢ܆ ܕܺܝ̈ܢܶܐ ܗܳܠܶܝܢ ܕܡܶܢ ܢܳܡܽܘܣ̈ܶܐ ܢܶܬܬܰܒܥܽܘܢ.

ܗܳܟܰܢܳܐ ܠܰܐܒܕܳܢܳܐ ܕܺܝܠܰܢ ܡܶܢ ܟܽܠ ܕܽܘܟ ܨܗܶܝܢ ܗܶܢܽܘܢ ܒܺܝ̈ܫܶܐ܆ ܡܶܛܽܠ ܣܶܢܰܐܬ̣ ܒܢܰܝ̈ܢܳܫܳܐ. ܟܰܕ ܟܽܠ ܡܶܕܶܡ ܦܫܺܝܩܳܐܺܝܬ ܥܳܒܕܺܝܢ ܘܰܡܚܰܘܶܝܢ ܡܨܰܕܝܳܢܳܐܺܝܬ܆ ܘܟܰܕ ܢܶܫ̈ܒܶܐ ܕܛܳܥܝܽܘܬܳܐ ܣܳܝܡܺܝܢ ܒܽܐܘܪܚܳܐ. ܡܶܛܽܠ ܗܳܕܶܐ ܡܳܪܰܢ ܒܶܐܘ̈ܰܢܓܶܠܺܝܰܐ܆ ܡܶܛܽܠ ‌ܐܳܟܶܠ ܩܰܪܨܳܐ ܪܺܝܫܳܐ ܕܰܦܠܰܓܳܐ ܕܺܝܠܗܽܘܢ ܐܳܡܰܪ ܗ̱ܘܳܐ܆ ܗܰܘ ܩܳܛܶܠ ‌ܐ̱ܢܳܫܳܐ ܐܺܝܬܰܘܗ̱ܝ܆ ܡܶܢ ܫܽܘܪܳܝܳܐ. ܘܒܰܫܪܳܪܳܐ ܠܳܐ ܩܳܐܶܡ܆ ܡܶܛܽܠ ܕܠܰܝܬ ܒܶܗ ܫܪܳܪܳܐ^[3]. ܡܶܛܽܠܳܬܳܗ̇ ܕܗܳܕܶܐ ܠܫܳܢ̈ܝܘܳܬܰܢ ܘܰܠܡܰܣܒܪ̈ܳܢܘܳܬܰܢ ܛܳܥ̈ܝܳܬܳܐ ܘܫܳܪ̈ܽܘܥܝܳܬܳܐ ܡܨܰܝܕܺܝܢ܆ ܐܰܝܟܰܢܳܐ ܕܕܽܘܓ̈ܡܰܛܰܐ ܗܳܠܶܝܢ ܕܢܳܨܶܝܢ ܘܡܶܬܟܰܬܫܺܝܢ ܠܽܘܩܒܰܠ ܫܪܳܪܳܐ ܘܠܽܘܩܒܰܠ ‌ܐܰ‌ܠܳܗܳܐ ܢܫܰܪܪܽܘܢ. ܕܡܶܢ ܗܳܪܟܳܐ ܙܳܕܶܩ ܕܢܶܐܚܽܘܕ ܠܡܰܫ̈ܠܡܳܢܘܳܬܳܐ ܕܥܺܕܬܳܐ܆ ܘܕܳܐܦܠܳܐ ܒܡܶܕܶܡ ܢܶܦܽܘܩ ܡܶܢ ܬܚܽܘ̈ܡܶܐ ܘܢܳܡܽܘ̈ܣܶܐ ܕܰܟܬܳܒܳܐ ܐܰ‌ܠܳܗܳܝܳܐ܆ ܐܰܝܟܰܢܳܐ ܕܠܳܐ ܡܰܥܒܰܪܬܳܐ ܡܶܕܶܡ ܬܶܗܘܶܐ ܠܗܽܘܢ ܒܰܢ ܠܫ̈ܺܐܕܶܐ ܡܰܛܥ̈ܝܳܢܶܐ ܘܰܡܟ̈ܺܝܠܶܐ܆ ܗܳܢܽܘܢ ܕܳܐܦ ܒܗܶܪ̈ܣܺܝܤ ܚܠܰܕܘ ܕܡܶܣܬܰܟ̈ܡܳܢ ܗ̱ܘܰܝ̈܆ ܫܰܦܺܝܪܽܘܬ ܕܶܚܠܬܳܐ܆ ܘܰܠܣܰܓܺܝ̈ܶܐܐ ܐܰܛܥܺܝܘ. ܡܶܫܬܰܚܠܦܺܝܢ ܓܶܝܪ ܒܶܐܣܟܺܡܳܐ. ܐܳܦ ܠܡܰܠܰܐܟ̈ܶܐ ܕܢܘܗܪܳܐ^[4]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ. ܘܳܐܦ ܒܦܽܘܠܚܳܢܳܐ ܕܶܝܢ ܕܦܽܘܩ̈ܕܳܢܶܐ܆ ܗܳܠܶܝܢ ܒܰܝ̈ܬܳܝܳܬܳܐ ܕܺܝܠܗܽܘܢ ܚܛܺܝܦܺܝܢ ܘܝܰܨܺܝܦܺܝܢ ܕܢܶܚܠܛܽܘܢ. ܟܰܕ ܠܘܳܬ ܐܽܘܪܚܳܐ ܕܰܡܝܰܬܪ̈ܳܬܳܐ ܟܳܡܢܺܝܢ. ܐܰܝܟܰܢܳܐ ܟܺܝܬ ܕܰܢܒܺܝܳܐ ܕܰܘܺܝܕ ܟܰܕ ܐܶܣܬܰܟܰܠ ܠܰܨܢܺܝܥܽܘܬܳܐ ܕܺܝܠܗܽܘܢ܆ ܒܬܰܪܥܺܝܬܳܐ ܡܰܠܽܘܢ ܘܠܰܘ ܒܠܶܫܳܢܳܐ ܢܙܰܡܰܪ ܘܺܢܐܡܰܪ܆ ܒܽܐܘܪܚܳܐ ܗܳܕܶܐ ܗܳܝ ܕܒܳܗ̇ ܪܳܕܶܐ ܗ̱ܘܺܝܬ̣ ܛܡܰܪܘ ܠܺܝ ܦܰܚ̈ܶܐ. ܘܥܰܠ ܓܶܢ̱ܒ ܫܒܺܝܠܳܐ܆ ܣܳܡܘ ܠܺܝ ܟܶܫ̈ܠܶܐ^[5].

ܗܳܟܰܢܳܐ ܟܺܝܬ ܐܳܦ ܗܽܘ ܫܠܺܝܚܳܐ ܟܬܺܝܒ ܒܦܪܟܣܝܤ܆ ܕܰܠܘܳܬ ܐܰܡܬܳܐ ܗܳܝ ܕܺܐܝܬ ܗ̱ܘܳܐ ܒܳܗ̇ ܪܽܘܚܳܐ ܒܺܝܫܬܳܐ ܗܰܘ ܕܡܶܬܶܐܡܰܪ ܦܘܬܘܢ ܕܺܐܝܬܰܘܗ̱ܝ ܩܳܨܽܘܡܳܐ ܘܩܳܨܡܳܐ ܗ̱ܘܳܬ^[6]. ܐܳܦ ܡܶܛܽܠܳܬܳܗ̇ ܘܡܶܛܽܠ ܗܳܢܽܘܢ ܕܰܡܣܰܒܪܺܝܢ ܗܘܰܘ ܥܰܡܶܗ ܐܳܡܪܳܐ ܗ̱ܘܳܬ܆ ܕܗܳܠܶܝܢ ܐ̱ܢܳܫܳܐ ܥܰܒ̈ܕܶܐ ܕܰܐ‌ܠܳܗܳܐ ܐܺܝܬܰܝܗܽܘܢ܆ ܗܳܢܽܘܢ ܟܺܝܬ ܕܰܡܣܰܒܪܺܝܢ ܠܟܽܘܢ ܐܽܘܪܚܳܐ ܕܦܽܘܪܩܳܢܳܐ܆ ܐܶܬܬܕܺܝܥ ܘܶܐܬܢܟ̣ܶܬ܆ ܐܳܦ ܕܟܰܕ ܫܰܪܺܝܪ̈ܳܬܳܐ ܐܳܡܪܳܐ ܗ̱ܘܳܬ ܒܰܠܡܳܗ̇ ܘܰܣܟܰܪ ܦܽܘܡܳܗ̇. ܒܰܕ ܡܰܠܶܦ ܠܰܢ܆ ܕܳܐܦܠܳܐ ܟܰܕ ܚܠܳܦ ܫܪܳܪܳܐ ܥܳܒܕܺܝܢ ܫ̈ܺܐܕܶܐ ܣܢܺܐܓܪܽܘܬܳܐ ܢܩܰܒܶܠ ‌ܐܶܢܽܘܢ. ܐܶܠܳܐ ܟܽܠ ‌ܐܽܘܪܚܳܐ ܕܛܳܥܝܽܘܬܐ ܢܣܽܘܓ ܠܗܽܘܢ܆ ܘܢܶܣܟܽܘܪ ܠܡܰܫܡܰܥܬܰܢ ܠܘܳܬ ܟܽܠܗܶܝܢ ܗܳܠܶܝܢ ܕܡܶܢܗܽܘܢ. ܟܰܕ ܓܶܝܪ ܐܶܬܥܰܙܰܙ ܐܳܡܰܪ ܘܶܐܫܬܚܩ ܦܰܘܠܽܘܤ܆ ܟܰܕ ܐܶܬܦܢܺܝ ܠܘܳܬ ܪܽܘܚܳܐ ܗܰܘ ܐܶܡܰܪ܆ ܡܦܰܪܓܠܳܐ ܐ̱ܢܳܐ ܠܳܟ ܒܰܫܡܶܗ ܕܝܶܫܽܘܥ ܡܫܺܝܚܳܐ܆ ܕܬܶܦܽܘܩ ܡܶܢܳܗ̇. ܘܰܢܦܰܩ ܒܳܗ̇ ܒܫܳܥܬܳܐ. ܗܳܝ ܕܶܝܢ ܕܶܐܬܥܰܙܰܙ ܡܫܰܘܕܥܳܐ܆ ܕܶܐܬܬܙܺܝܥ ܦܰܘܠܽܘܤ ܘܰܠܘܳܬ ܚܶܡܬܳܐ ܟܺܐܢܬܳܐ ܐܶܬܬܥܺܝܪ ܘܩܳܡ. ܙܳܕܶܩ ܓܶܝܪ ܝܰܬܺܝܪܳܐܺܝܬ ܕܠܽܘܩܒܰܠ ܫ̈ܺܐܕܶܐ ܟܰܕ ܡܫܰܓܫܺܝܢ ܘܡܰܛܥܶܝܢ܆ ܘܗܳܠܶܝܢ ܕܰܠܘܳܬ ܗܰܢܺܝܽܐܘܬܳܐ ܐܳܡܪܺܝܢ܆ ܕܢܶܬܩܰܫܶܐ ܠܽܘܩܒܰܠܗܽܘܢ ܘܰܕܢܶܗܘܶܐ ܠܗܽܘܢ ܣܰܩܽܘܒ̈ܠܳܝܶܐ܆ ܘܕܰܢܩܽܘܡ ܠܽܘܩܒܰܠܗܽܘܢ.

ܡܶܛܽܠ ܗܳܕܶܐ ܐܳܦ ܠܘܳܬ ܗܳܝ ܕܢܶܬܬܥܺܝܪ ܙܳܕܶܩ܆ ܘܰܕܢܶܥܪܽܘܩ ܠܪܽܘܚܩܳܐ ܡܶܢ ܗܳܢܽܘܢ ܕܡܶܫܬܰܘܕܶܝܢ ܕܠܳܚܫܺܝܢ܆ ܥܰܠ ܟܽܘܪ̈ܗܳܢܶܐ ܐܰܘ ܥܰܠ ܫܽܘܚ̈ܢܶܐ܆ ܘܒܰܩ̈ܕܠܳܐ ܐܰܘ ܒܰܕܪ̈ܳܥܶܐ ܐܰܘ ܒܗܰܕܳܡܳܐ ܐ̱ܚܪܺܢܳܐ܆ ܬܳܠܶܝܢ ܘܩܳܛܪܺܝܢ ܗܳܠܶܝܢ ܕܡܶܬܰܐܡܪܺܝܢ ܦܘܠܐܩܛܝܪ̈ܳܝܐ ܐܰܘܟܺܝܬ ܩܡܺܝ̈ܠܶܐ ܕܡܶܛܽܠ ܢܛܘܪܐ܆ ܐܳܦܶܢ ܐܶܣܟܺܡܳܐ ܕܫܰܦܺܝܪܽܘܬ ܕܶܚܠܬܳܐ ܢܶܗܘܶܐ ܐܺܝܬ ܠܗܽܘܢ܆ ܕܕܰܠܡܳܐ ܟܰܕ ܚܽܘܠܡܳܢܳܐ ܒܳܥܶܝܢ ܚ̱ܢܰܢ ܕܦܰܓܪܳܐ܆ ܢܰܘܣܶܦ ܢܶܬܟܪܰܗ ܐܳܦ ܒܢܰܦܫܳܐ܆ ܟܰܕ ܡܶܢ ܥܶܠ̈ܠܳܬܐ ܫܰܦܺܝܪ̈ܳܬ ܦܰܪܨܽܘܦܳܐ ܕܕܰܐܝܟ ܗܳܠܶܝܢ܆ ܡܶܬܬܕܺܝܫܳܢܺܝܬܳܐ ܥܳܒܕܺܝܢܰܢ ܠܳܗ̇ ܠܡܰܥܰܠܬܳܐ ܠܛܳܥܝܽܘܬܳ ܕܫ̈ܺܐܕܶܐ.

ܙܳܕܶܩ ܓܶܝܪ ܕܰܒܗܰܝܡܳܢܽܘܬܳܐ ܕܒܰܡܫܺܝܚܳܐ ܒܰܠܚܽܘܕܶܝܗ̇ ܢܶܐܚܽܘܕ܆ ܘܰܠܗܳܕܶܐ ܢܶܠܒܽܘܟ ܒܟܽܠܶܗ ܚܰܝܠܳܐ܆ ܘܡܶܢ ܟܽܠ ܕܽܘܟ ܢܶܟܪܽܘܟ ܢܚܽܘܨܶܝܗ̇. ܘܟܰܕ ܗܳܠܶܝܢ ܐ̱ܚܪ̈ܳܝܳܬܳܐ ܡܶܬܐܰܠܨܺܝܢܰܢ ܘܡܶܬܕܰܢܩܺܝܢܰܢ܆ ܐܳܦ ܠܶܗ ܠܡܰܘܬܳܐ ܩܰܪܝܒܺܝܢ ܚ̱ܢܰܢ܆ ܠܘܳܬ ܫܡܰܝܳܐ ܢܪܺܝܡ ܥܰܝ̈ܢܰܝܢ. ܘܟܰܕ ܥܰܠ ܗܰܝܡܳܢܽܘܬܳܐ ܟܽܠܶܗ ܣܽܘܥܪܳܢܰܢ ܫܳܕܶܝܢ ܚ̱ܢܰܢ܆ ܩܒܺܝܥܳܐܺܝܬ ܘܰܡܫܰܪܪܳܐܺܝܬ܆ ܡ̈ܶܠܶܐ ܗܳܠܶܝܢ ܕܦܛܪܘܤ ܢܺܐܡܰܪ. ܕܳܐܦܶܢ ܬܶܗܘܶܐ ܠܺܝ ܕܥܰܡܳܟ ܐܶ݀ܡܽܘܬ܆ ܠܳܐ ܐܶ݀ܟܦܽܘܪ ܒܳܟ^[7]. ܐܳܦ ܓܶܝܪ ܐܳܦ ܟܰܕ ܗܳܟܰܢܳܐ ܐܺܝܬ ܠܰܢ ܒܬܰܪܥܺܝܬܳܐ܆ ܐܶܢ ܡܰܢ ܠܳܐ ܥܕܰܟܺܝܠ ܠܘܳܬ ܫܽܘܠܳܡܳܐ ܕܚܰܝ̈ܶܐ ܕܺܝܠܰܢ ܐܺܝܬܰܝܢ. ܡܶܚܕܳܐ ܒܰܪܫܳܥܬܶܗ ܒܥܽܘܕܪܳܢܳܐ ܕܡܶܢ ܠܥܶܠ܆ ܐܳܦ ܡܶܬܚܠܳܡܽܘ ܢܶܬܚܠܶܡ܆ ܘܳܐܦ ܡܶܢ ܥܰܪܣܳܐ ܢܩܽܘܡ܆ ܟܰܕ ܥܳܪܩܳܐ ܘܡܶܬܛܰܪܕܳܐ ܡܚܺܝܠܽܘܬܳܐ ܠܪܽܘܚܩܳܐ܆ ܘܰܒܟܽܠܗܶܝܢ ܛܳܒ̈ܳܬܳܐ ܢܶܬܒܰܣܰܡ. ܐܶܢ ܕܶܝܢ ܐܳܦ ܢܟܰܬܰܪ ܟܰܕ ܟܪܺܝܗܳܐܺܝܬ ܐܺܝܬ ܠܰܢ܆ ܟܰܕ ܒܰܕܡܽܘܬ ܐܶܫܰܥܝܳܐ ܛܰܝܒܽܘܬܳܐ ܡܰܘܕܶܝܢ ܚ̱ܢܰܢ ܢܺܐܡܰܪ܆ ܡܰܪܕܽܘܬܶܗ ܕܡܳܪܝܳܐ ܦܳܬܚܳܐ ܠܶܐܕܢ̈ܶܐ ܕܺܝܠܝ^[8]. ܐܶܢ ܕܶܝܢ ܩܰܪܺܝܒ ܗ̱ܘ̣ ܦܽܘܩܕܳܢܳܐ ܘܡܶܬܩܪܶܝܢ ܚ̱ܢܰܢ܆ ܘܙܳܕܶܩ ܠܰܡܫܰܢܳܝܽܘ ܡܶܢ ܚܰܝ̈ܶܐ܆ ܫ݀ܪܝܐ^[9] ܓܶܝܪ ܘܰܦܣܺܝܩܳܐ ܠܗܰܘ ܢܳܛܽܘܪܳܐ ܘܦܰܪܢܳܣܳܐ ܕܕܺܝ̈ܢܶܐ ܠܳܐ ܡܶܬܡܰܠ̈ܠܳܢܶܐ܆ ܘܰܕܟܽܠܗܶܝܢ ܠܘܳܬ ܗܳܝ ܕܦܳܩܚܳܐ ܡܕܰܒܰܪ܆ ܒܡ̈ܶܠܶܐ ܗܳܠܶܝܢ ܕܗܽܘ ܝܳܕܰܥ܆ ܢܶܪܕܶܐ ܐܽܘܪܚܳܐ ܗܳܝ ܐ̱ܚܪܺܬܳܐ ܥܰܡ ܣܰܒܪܳܐ ܛܳܒܳܐ܆ ܟܰܕ ܠܳܐ ܡܶܣܬܰܓܦܺܝܢܰܢ ܒܢܰܦܫܰܢ ܕܠܳܐ ܝܽܘܬܪܳܢ܆ ܡܶܢ ܒܢܰܝ̈ܢܳܫܳܐ ܗܳܢܽܘܢ ܡܰܛܥ̈ܝܳܢܶܐ. ܘܟܰܕ ܥܰܡ ܬܰܘܕܺܝܬܳܐ ܠܳܐ ܡܶܬܢܰܟܝܳܢܺܝܬܳܐ ܕܗܰܝܡܳܢܽܘܬܳܐ ܐܳܙܺܠ̱ܝܢܰܢ܆ ܘܟܰܕ ܡܣܰܟܶܝܢ ܚ̱ܢܰܢ ܠܫܽܘܘܕܳܝܳܐ ܗܰܘ ܫܰܪܺܝܪܳܐ ܕܕܰܝܳܢܳܐ ܟܺܐܢܳܐ܆ ܗܰܘ ܕܨܳܒܶܐ ܕܳܐܦ ܠܗܳܠܶܝܢ ܙܥܽܘܪ̈ܝܳܬܳܐ ܢܝܰܩܰܪ ܒܗܳܠܶܝܢ ܕܣܰܓܺܝ ܪܰܘܪ̈ܒܳܢ܆ ܘܶܐܫܬܰܘܕܺܝ ܘܶܐܡܰܪ܆ ܕܟܽܠ ‌‌ܐܰܝܢܳܐ ܕܢܰܘܕܶܐ ܒܺܝ ܩܕܳܡ ܒܢܰܝ̈ܢܳܫܳܐ܆ ܐܰ݀ܘܕܶܐ ܒܶܗ ܐܳܦ ܐܶܢܳܐ ܩܕܳܡ ܐܳܒܝ ܕܒܰܫܡܰܝܳܐ^[10].

ܟܽܠܗܶܝܢ ܗܳܠܶܝܢ ܡܚܰܘܶܝܢ ܡܨܰܕܝܳܢܳܐܺܝܬ ܫ̈ܺܐܕܶܐ ܒܺܝ̈ܫܶܐ܆ ܟܰܕ ܚܦܺܝܛܺܝܢ ܘܰܡܣܰܪܗܒܺܝܢ ܕܰܒܽܕܽܘܓ̈ܡܰܛܰܐ ܡܰܚܣܪ̈ܳܢܶܐ ܢܡܰܚܽܘܢ ܠܢܰܦ̈ܫܳܬܳܐ܆ ܐܰܘ ܠܦܰܓܪ̈ܶܐ ܒܽܐܘܠ̈ܨܳܢܶܐ ܘܰܒܡܰܚ̈ܘܳܬܳܐ. ܗܳܠܶܝܢ ܕܰܒܗܽܘܢ ܠܳܐ ܢܶܦܶܠ܆ ܟܰܕ ܒܐܘܩܝܢܐ ܟܳܗܢܳܝܬܳܐ ܐܰܚܺܝܕܺܝܢ ܚ̱ܢܰܢ܆ ܒܣܰܒܪܳܐ ܐܰ‌ܠܳܗܳܝܳܐ. ܘܠܳܐ ܓܶܝܪ ܟܪܽܘܟܝܳܐ ܕܣܰܗܪܳܐ ܥܳܒܽܘܕܳܐ ܕܒܺܝ̈ܫܳܬܳܐ ܐܺܝܬܰܘܗ̱ܝ܆ ܘܳܐܦܠܳܐ ܕܚܰܝ̈ܶܐ ܕܟܰܘܟ̈ܒܶܐ. ܟܽܠܗܶܝܢ ܓܶܝܪ ܗܳܠܶܝܢ ܕܰܥܒܰܕ ܐܰ‌ܠܳܗܳܐ ܫܰܦܺܝܪ̈ܳܢ^[11]܆ ܘܣܰܓܺܝ ܫܰܦܺܝܪ̈ܳܢ ܐܰܝܟܰܢܳܐ ܕܒܰܪܬ ܩܳܠܶܗ ܢܦܺܝܚܰܬ ܡܶܢ ܐܰ‌ܠܳܗܳܐ ܐܳܡܰܪ܆ ܐܳܦ ܓܶܝܪ ܗܽܘ ܐܶܡܰܪ ܘܰܗܘ̣ܰܘ܆ ܗܽܘ ܦܩܰܕ ܘܶܐܬܒܪܺܝܘ^[12]. ܐܰܝܟ ܡܶܠܬܶܗ ܕܶܝܢ ܕܶܐܪܰܡܝܳܐ܆ ܡܶܢ ܦܽܘܡܶܗ ܕܰܡܪܰܝܡܳܐ܆ ܠܳܐ ܢܳܦ̈ܩܳܢ ܒܺܝ̈ܫܳܬܳܐ ܘܛܳܒ̈ܳܬܳܐ^[13]. ܘܰܠܢܰܦ̈ܫܳܬܳܐ ܕܰܒܢܰܝ̈ܢܳܫܳܐ܆ ܠܳܐ ܐ̱ܢܳܫ ܐܳܡܰܪ ܕܒܰܕܡܽܘܬ ܫ̈ܺܐܕܶܐ ܠܦܽܘܪ̈ܣܶܐ ܕܚܰܪ̈ܫܶܐ ܢܳܩ̈ܦܳܢ. ܡܰܫܰܪ ܓܶܝܪ ܗܰܘ ܕܰܒܝܰܕ ܚܰܙܩܝܐܝܠ ܢܒܺܝܳܐ ܡܡܰܠܶܠ܆ ܕܟܽܠܗܶܝܢ ܢܰܦ̈ܫܳܬܳܐ ܕܺܝܠܝ ܐܺܝܬܰܝܗܶܝܢ^[14]. ܠܗܳܠܶܝܢ ܕܶܝܢ ܕܺܐܝܬܰܝܗܶܝܢ ܕܰܐ‌ܠܳܗܳܐ܆ ܐܰܝܟܰܢܳܐ ܒܰܪܢܳܫܳܐ ܪܰܫܺܝܥܳܐ ܢܳܓܶܕ ܐܶܢܶܝܢ. ܠܫ̈ܺܐܕܶܐ ܓܶܝܪ ܒܰܠܚܽܘܕܰܝܗܽܘܢ ܪܚܺܝܡܳܐ ܠܡܶܫܬܡܳܥܽܘ ܠܒܺܝ̈ܫܶܐ. ܐܶܢ ܓܶܝܪ ܥܬܺܝ̈ܕܳܢ ܕܕܺܝ̈ܢܶܐ ܢܶܬܬܰܒ̈ܥܳܢ ܒܝܰܘܡܳܐ ܗܰܘ ܕܕܺܝܢܳܐ ܢܰܦ̈ܫܳܬܳܐ ܗܳܠܶܝܢ ܕܰܚ̈ܛܰܝ܆ ܡܶܛܽܠ ܕܰܐܝܟ ܡܶܠܬܶܗ ܕܚܰܟܺܝܡܳܐ ܩܽܘܗܠܰܬ܆ ܠܟܽܠܗܽܘܢ ܥ̈ܒܳܕܶܐ ܐܰܟܚܕܳܐ ܢܰܝܬܶܐ ܐܰ‌ܠܳܗܳܐ ܠܕܺܝܢܳܐ^[15]܆ ܘܗܳܝܕܶܝܢ ܢܶܦܪܽܘܥ ܠܟܽܠܢܳܫ ܐܰܝܟ ܥ̈ܒܳܕܰܘܗܝ^[16] ܐܰܝܟ ܡܶܠܬܶܗ ܕܰܢܒܺܝܳܐ ܕܰܘܺܝܕ. ܐܰܝܟܰܢܳܐ ܢܶܬܪ̈ܰܫܝܳܢ ܟܺܐܢܳܐܺܝܬ܆ ܐܰܝܟ ܐܰܝܠܶܝܢ ܕܒܺܝܫܳܐܺܝܬ ܣܥܰܪ̈ܶܝܢ ܒܥܳܠܡܳܐ ܗܳܢܳܐ܆ ܟܰܕ ܡܶܢ ܒܳܬܰܪ ܦܽܘܪܫܳܢܳܐ ܕܡܶܢ ܦܰܓܪܳܐ ܡܶܫܬܰܒ̈ܩܳܢ ܕܰܢܫܰܡ̈ܫܳܢ ܠܒܺܝ̈ܫܶܐ܆ ܘܰܕܢܶܬܢܰܓ̈ܕܳܢ ܡܶܢܗܽܘܢ ܒܰܐܢܰܢܩܺܐ ܘܒܰܩܛܺܝܪܳܐ. ܣܰܓܺܝ ܕܶܝܢ ܝܰܬܺܝܪܳܐܺܝܬ ܬܶܬܚܰܘܶܐ ܗܳܕܶܐ ܕܰܓܳܠܬܳܐ܆ ܐܳܦ ܥܰܠ ܢܰܦ̈ܫܳܬܳܐ ܕܰܛܠܳܝ̈ܶܐ ܗܳܢܽܘܢ ܕܠܳܐ ܡܶܕܶܡ ܚܛܰܘ. ܕܢܰܦ̈ܫܳܬܳܐ ܓܶܝܪ ܕܙܰܕܺܝ̈ܩܶܐ ܒܺܐܝܕܳܐ ܕܰܐ‌ܠܳܗܳܐ ܐܺܝܬܰܝܗܶܝܢ^[17]܆ ܗܳܢܰܘ ܕܶܝܢ ܒܢܰܩܺܝܦܽܘܬܳܐ ܘܒܰܝܬܳܝܽܘܬܳܐ ܗܳܝ ܕܰܠܘܳܬܶܗ܆ ܐܰܝܟ ܗܰܘ ܕܡܶܬܚܰܒ̈ܒܳܢ ܡܶܢܶܗ ܘܒܺܐܝܕܶܗ ܡܶܬܠܰܒ̈ܟܳܢ܆ ܐܳܦ ܐ̱ܢܳܫ ܚܰܟܺܝܡܳܐ ܦܺܝܠܳܣܽܘܦܺܝܣܳܐ ܥܒܰܕ ܣܰܓܺܝ ܫܰܦܺܝܪܳܐܺܝܬ.

ܘܳܐܦ ܗܳܢܳܐ ܟܺܝܬ ܐܰܒܽܘܗ̱ܝ ܕܛܰܠܝܳܐ ܗܳܢܳܐ܆ ܐܰܝܟ ܩܰܕܺܝܡܽܘܬ ܐܰܚܺܝܕܽܘܬܳܐ ܘܡܰܣܒܪܳܢܽܘܬܳܐ ܘܰܥܝܳܕܳܐ ܕܰܠܒܺܝܟ ܩܳܥܶܐ ܗ̱ܘܳܐ܆ ܐܶܬܪܰܚܰܡ ܥܰܠ ܒܶܪܝ ܕܡܶܣܬܰܗܪܰܢ ܘܒܺܝܫܳܐܺܝܬ ܚܳܐܶܫ^[18]. ܘܳܐܦ ܗܽܘ ܕܶܝܢ ܐܶܘܰܢܓܶܠܝܣܛܳܐ܆ ܠܦܽܘܬ ܡܰܣܒܪܳܢܽܘܬܳܐ ܓܰܘܳܢܳܝܬܳܐ ܕܰܒ̈ܢܰܝ ܐ̱ܢܳܫܳܐ ܟܳܬܶܒ ܠܥܶܠ ܡܶܛܽܠ ܝܶܫܽܘܥ܆ ܘܩܰܪܶܒܘ ܠܶܗ ܟܽܠܗܽܘܢ ܗܳܢܽܘܢ ܕܒܺܝܫܳܐܺܝܬ ܐܺܝܬ ܗ̱ܘܳܐ ܠܗܽܘܢ܆ ܘܕܰܒܟܽܘܪ̈ܗܳܢܶܐ ܡܫܰܚ̈ܠܦܶܐ ܘܰܒܬܰܫܢܺܝ̈ܩܶܐ ܡܶܬܰܐܠܨܺܝܢ ܗ̱ܘܰܘ܆ ܘܰܕܡܶܬܕܝܰܘܢܺܝܢ ܗ̱ܘܰܘ܆ ܘܰܕܡܶܣܬܰܗܪܢܺܝܢ^[19]. ܘܳܐܦ ܠܰܡܫܰܪ̈ܰܝܳܐ܆ ܘܠܰܘ ܟܰܕ ܐ̱ܚܪܺܢܳܐ ܝܳܕܰܥ ܠܶܗ ܠܚܰܫܳܐ ܗܰܘ ܕܡܶܬܶܐܡܰܪ ܡܶܣܬܰܗܪܳܢܽܘܬܳܐ܆ ܠܒܰܪ ܡܶܢ ܗܰܘ ܡܳܐ ܕܳܐܡܪܺܝܢܰܢ ܕܡܶܬܕܰܝܘܰܢ. ܐܶܠܳܐ ܗܳܝ ܟܺܝܬ ܕܶܐܡܪܶܬ܆ ܟܰܕ ܒܰܥܝܳܕܳܐ ܐܶܬܚܰܫܰܚ. ܒܰܕܓܽܘܢ ܟܰܕ ܐܰܒܽܘܗ̱ܝ ܐܳܡܰܪ ܗ̱ܘܳܐ ܗܳܪܟܳܐ ܕܰܒܪܶܗ ܡܶܣܬܰܗܪܰܢ܆ ܟܰܕ ܠܳܐܣܝܽܘܬܶܗ ܕܚܰܫܳܐ ܡܰܘܣܶܦ ܗ̱ܘܳܐ ܐܶܘܰܢܓܶܠܺܝܣܛܳܐ܆ ܠܳܐ ܐܶܡܰܪ ܦܫܺܝܛܳܐܺܝܬ ܕܰܐܣܝܶܗ܆ ܐܰܝܟܰܢܳܐ ܕܗܽܘ ܚܰܫܳܐ ܕܦܽܘܫܳܟܳܐ ܢܶܣܬܒܰܪ. ܐܶܠܳܐ ܕܰܟܐܳܐ ܒܶܗ܆ ܘܰܢܦܰܩ ܡܶܢܶܗ ܗܰܘ ܕܰܝܘܳܐ ܗܳܟܰܢܳܐ ܠܰܘ ܐ̱ܚܪܺܬܐ ܗܝ ܗܳܝ ܕܢܶܣܬܰܗܪܰܢ܆ ܠܒܰܪ ܡܶܢ ܗܳܝ ܕܢܶܬܕܰܝܘܰܢ.

ܡܶܬܚܙܶܝܢ ܕܶܝܢ ܐܳܦ ܒܕܽܘܟ̈ܝܳܬܳܐ ܐ̱ܚܪ̈ܳܢܝܳܬܳܐ܆ ܕܰܠܦܽܘܬ ܡܰܣܒܪܳܢܽܘܬܳܐ ܕܰܒ̈ܢܰܝ ܐ̱ܢܳܫܳܐ ܐܰܝܟ ܕܶܐܡܪܶܬ܆ ܘܠܰܘ ܠܦܽܘܬ ܫܽܘܒܚܳܐ^[20] ܒܰܝܬܳܝܳܐ ܕܺܝܠܗܽܘܢ܆ ܟܬܰܒܘ ܐܶܘܰܢܓ̈ܶܠܺܝܣܛܶܐ ܡܶܕܶܡ ܡܶܕܶܡ. ܕܡܶܢ ܗܳܪܟܳܐ ܟܺܝܬ ܟܬܰܒ ܡܰܬܰܝ܆ ܕܶܐܡܰܪ ܝܶܫܽܘܥ ܠܗܰܘ ܕܰܡܫܰܪܰܝ ܗ̱ܘܳܐ܆ ܘܰܕܥܰܠ ܥܰܪܣܳܐ ܐܶܬܩܰܪܰܒ܆ ܐܶܬܠܰܒܒ ܒܶܪܝ. ܫܒܺܝܩܺܝܢ ܠܳܟ ܚ̈ܛܳܗܰܝܟ. ܘܗܳܐ ܐ̱ܢܳܫܺܝ̈ܢ ܐܳܡܰܪ ܡܶܢ ܣܳܦܪ̈ܶܐ ܐܶܡܰܪܘ ܒܢܰܦܫܗܽܘܢ܆ ܗܳܝ ܕܺܐܝܬܶܝܗ̇ ܡܶܬܚܰܫܒܺܝܢ ܗ̱ܘܰܘ. ܘܰܒܬܰܪܥܺܝܬܗܽܘܢ ܐܳܡܪܺܝܢ ܗ̱ܘܰܘ܆ ܗܳܢܳܐ ܡܓܰܕܶܦ. ܘܰܠܥܶܠܬܳܗ̇ ܕܗܳܕܶܐ ܝܰܬܺܝܪ ܦܰܬܝܳܐܺܝܬ ܡܰܘܣܶܦ ܠܽܘܩܳܐ. ܡܰܢܽܘ ܓܶܝܪ ܡܶܫܟܰܚ ܐܶܡܰܪܘ ܠܡܶܫܒܰܩ ܚ̈ܛܳܗܶܐ܆ ܐܶܠܳܐ ܐܶܢ ܐܰ‌ܠܳܗܐ ܒܰܠܚܽܘܕܰܘܗ̱ܝ. ܘܟܰܕ ܝܺܕܰܥ ܝܶܫܽܘܥ ܡܰܚܫ̈ܒܳܬܗܽܘܢ܆ ܐܶܡܰܪ. ܠܡܳܢܳܐ ܡܶܬܚܰܫܒܺܝܢ ܐܢ̱ܬܽܘܢ ܒܺܝ̈ܫܳܬܳܐ ܒܠܶܒܰܘ̈ܳܬܟܽܘܢ. ܡܳܢܳܐ ܓܶܝܪ ܝܰܬܺܝܪ ܦܫܺܝܩ ܠܡܺܐܡܰܪ. ܫܒܺܝܩܺܝܢ ܠܳܟ ܚ̈ܛܳܗܰܝܟ܆ ܐܰܘ ܠܡܺܐܡܰܪ ܩܽܘܡ ܘܗܰܠܶܟ^[21]. ܐܰܝܟܰܢܳܐ ܕܶܝܢ ܕܬܶܕܥܽܘܢ ܕܫܽܘܠܛܳܢܳܐ ܐܺܝܬ ܠܶܗ ܠܰܒܪܶܗ ܕܐ̱ܢܳܫܳܐ ܥܰܠ ‌‌ܐܰܪܥܳܐ ܠܡܫܒܰܩ ܚ̈ܛܳܗܶܐ܆ ܗܳܝܕܶܝܢ ܐܳܡܰܪ ܠܶܗ ܠܗܰܘ ܡܫܰܪܝܳܐ. ܩܽܘܡ ܫܩܽܘܠ ܥܰܪܣܳܟ. ܘܙܶܠ ܠܒܰܝܬܳܟ. ܘܰܒܝܰܕ ܗܳܠܶܝܢ ܓܰܠܝܳܐܺܝܬ ܚܰܘܺܝ܆ ܕܰܐ‌ܠܳܗܳܐ ܫܰܪܺܝܪܳܐ ܐܺܝܬܰܘܗ̱ܝ܆ ܗܰܘ ܕܗܳܠܶܝܢ ܐܳܦ ܐܶܡܰܪ ܐܳܦ ܣܥܰܪ܆ ܥܰܡ ܫܽܘܠܛܳܢܳܐ ܦܐܶܐ ܠܰܐܠܳܗܳܐ. ܕܺܝܠܳܝܬܳܐ ܗܝ ܓܶܝܪ ܐܰܝܟ ܕܒܰܫܪܳܪܳܐ ܘܕܺܝܠܶܗ ܕܰܐ‌ܠܳܗܳܐ ܒܰܠܚܽܘܕܰܘܗ̱ܝ܆ ܕܰܠܙܰܘ̈ܥܶܐ ܡܛܰܫ̈ܰܝܳܐ ܕܠܶܒܰܘ̈ܳܬܳܐ ܢܶܕܰܥ܆ ܘܰܐܝܟ ܗܳܝ ܕܠܫܠܝܡܘܢ ܐܰܡܺܝܪܳܐ ܒܰܨܠܽܘܬܳܐ ܒܗܳܝ ܕܰܬܠܳܬ ܕܡܰܠ̈ܟܘܳܬܳܐ܆ ܕܰܐܢ̱ܬ ܒܰܠܚܽܘܕܰܝܟ ܝܳܕܰܥ ܐܰܢ̱ܬ ܠܠܶܒܳܐ ܕܟܽܠܗܽܘܢ ܒܢܰܝ̈ܳܐ ܕܐ̱ܢܳܫܳܐ܆ ܘܰܐܝܟ ܗܳܝ ܕܠܰܫ̈ܠܺܝܚܶܐ ܐܰܡܺܝܪܳܐ ܒܰܦܪܟܣܝܤ܆ ܐܰܢ̱ܬ ܡܳܪܝܳܐ ܝܳܕܰܥ ܠܠܶܒܰܘ̈ܳܬܳܐ ܕܟܽܠ^[22]. ܕܰܐ‌ܠܳܗܳܐ ܗܝ ܕܶܝܢ ܗܽܘ ܗܳܟܘܳܬ ܒܰܝܬܳܝܬܳܐ܆ ܐܳܦ ܗܳܝ ܕܢܺܐܡܰܪ ܥܰܡ ܫܽܘܠܛܳܢܳܐ ܫܒܺܝܩܺܝܢ ܠܳܟ ܚ̈ܛܳܗܰܝܟ܆ ܘܰܢܫܰܟܢܺܝܗ̇ ܠܗܳܕܶܐ ܡܰܠܟܳܐܺܝܬ܆ ܘܳܐܦ ܕܰܢܫܰܪܰܪ ܒܝܰܕ ܗܳܝ ܕܰܫܪܳܐ ܠܰܡܫܰܪܝܽܘܬܳܐ ܗܳܝ ܡܶܬܚܰܙܝܳܢܺܝܬܳܐ܆ ܕܳܐܦ ܐܰܣܳܪܳܐ ܠܳܐ ܡܶܬܚܰܙܝܳܢܳܐ ܗܰܘ ܕܰܚ̈ܛܳܗܶܐ ܐܶܫܬܪܺܝ. ܘܟܰܕ ܛܳܒ ܐܶ‌ܠܽܘ ܠܰܘ ܐܰ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܒܽܐܘܣܺܝܰܐ܆ ܥܰܡ ܗܳܝ ܕܰܗܘ̣ܳܐ ܒܰܫܪܳܪܳܐ ܒܰܪܢܳܫܳܐ܆ ܙܳܕܶܩ ܗ̱ܘܳܐ ܠܶܗ܆ ܕܰܠܗܳܝ ܕܶܐܣܬܰܒܪܰܬ ܠܝܽܗ̱ܘ̈ܕܳܝܶܐ ܕܓܽܘܕܳܦܳܐ ܐܺܝܬܶܝܗ̇ ܢܰܦܶܨ ܡܶܢܶܗ ܘܢܺܐܡܰܪ܆ ܐܰܒܳܐ ܝܰܗ̱ܒ ܠܺܝ ܫܽܘܠܛܳܢܳܐ ܗܳܢܳܐ. ܗܳܝ ܟܺܝܬ ܕܺܐܝܬ ܐܶܡܰܬܝ܆ ܐܳܦ ܐܰܡܪܳܗ̇ ܒܰܐܚܪ̈ܳܢܝܳܬܳܐ܆ ܟܰܕ ܡܕܰܒܰܪ ܠܰܡܚܺܝܠܽܘܬܳܐ ܕܗܳܢܽܘܢ ܕܫܳܡܥܺܝܢ. ܗܳܫܳܐ ܕܶܝܢ ܐܳܦ ܣܰܓܺܝ ܡܚܰܘܝܳܢܳܐܺܝܬ ܐܰܝܟ ܡܶܠܰܘܗ̱ܝ ܚܰܟܺܝ̈ܡܳܬܳܐ ܘܠܳܐ ܡܶܬܡܰܠܠܳܢ̈ܝܳܬܳܐ܆ ܚܰܘܝܶܗ ܫܪܳܪܳܐ܆ ܠܓܽܘܕܳܦܳܐ ܗܰܘ ܕܡܶܣܬܒܰܪ ܗ̱ܘܳܐ ܠܗܳܢܽܘܢ. ܐܶܢ ܓܶܝܪ ܕܰܐ‌ܠܳܗܳܐ ܠܚܽܘܕܰܘܗ̱ܝ ܐܺܝܬܶܝܗ̇ ܗܳܝ ܕܢܶܫܒܽܘܩ ܚ̈ܛܳܗܶܐ ܐܳܘ ܝܽܗ̱ܘ̈ܕܳܝܶܐ܆ ܫܳܒܶܩ ܐ̱ܢܳܐ ܕܶܝܢ ܐܶܢܳܐ܆ ܠܘܳܬ ܡܳܢܳܐ ܚܳܐܰܪ ܗ̱ܘܳܐ ܣܘܡܦܪܐܣܡܐ ܐܰܘܟܺܝܬ ܫܽܘܠܳܡܳܐ ܕܡܶܠܬܳܐ ܐܶܣܬܰܟܰܠܘ. ܕܰܐ‌ܠܳܗܳܐ ܐܺܝܬܰܘܗ̱ܝ ܝܺܕܺܝܥܳܐ ܗܝ ܗܰܘ ܕܰܠܗܳܠܶܝܢ ܕܰܐܝܟ ܗܳܟܰܢ܆ ܫܳܒܶܩ ܦܰܐܝܽܘܬ ܐܰ‌ܠܳܗܳܐܝܬ.

ܘܰܚܙܺܝ ܠܺܝ ܥܷܠܳܐ܆ ܡܶܬܦܰܠܓܳܢܽܘܬܳܗ̇ ܕܰܡܕܰܒܪܳܢܽܘܬܳܐ. ܘܰܕܚܰܕ ܘܗܽܘ ܟܰܕ ܗܽܘ ܐܺܝܬܰܘܗ̱ܝ܆ ܕܳܐܦ ܐܰ‌ܠܳܗܳܐܺܝܬ ܐܰܟܚܕܳܐ ܐܳܦ ܐ̱ܢܳܫܳܐܺܝܬ ܡܡܰܠܶܠ. ܟܰܕ ܓܶܝܪ ܚܰܘܺܝ ܒܝܰܕ ܗܳܠܶܝܢ ܓܰܠܝܳܐܺܝܬ܆ ܕܰܐ‌ܠܳܗܳܐ ܐܺܝܬܰܘܗ̱ܝ ܫܰܪܺܝܪܳܐ܆ ܠܳܐ ܐܶܡܰܪ ܐܰܝܟܰܢܳܐ ܕܶܝܢ ܕܬܶܕܥܽܘܢ ܕܫܽܘܠܛܳܢܳܐ ܐܺܝܬ ܠܶܗ ܠܰܒܪܶܗ ܕܰܐ‌ܠܳܗܳܐ ܕܢܶܫܒܽܘܩ ܚ̈ܛܳܗܶܐ. ܐܶܠܳܐ ܫܡܳܐ ܗܰܘ ܕܣܰܓܺܝ ܐܺܝܬܰܘܗ̱ܝ ܡܰܟܺܝܟܳܐ ܣܳܐܶܡ ܘܳܐܡܰܪ܆ ܐܰܝܟܰܢܳܐ ܕܶܝܢ ܕܬܶܕܥܽܘܢ ܕܫܽܘܠܛܳܢܳܐ ܐܺܝܬ ܠܶܗ ܠܰܒܪܶܗ ܕܐ̱ܢܳܫܐ^[23]. ܒܗܳܕܶܐ ܝܺܕܺܝܥܳܐ ܘܓܰܠܝܳܐ܆ ܕܕܰܓܳܠܳܐ ܐܺܝܬܰܘܗ̱ܝ ܚܽܘܒܳܫܳܐ ܕܗܳܢܽܘܢ ܕܰܡܦܰܠܓܺܝܢ ܠܶܗ ܒܰܥܦܺܝܦܽܘܬܳܐ ܕܰܟ̈ܝܳܢܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܡܰܠܠܳܢܺܝܬܳܐ܆ ܘܰܡܦܰܠܓܺܝܢ ܘܝܳܗܒܺܝܢ܆ ܒܢ̈ܳܬ ܩ̈ܳܠܶܐ ܡܰܢ ܗܳܠܶܝܢ ܦܰܐܺܝܬ ܠܰܐܠܳܗܳܐ ܠܰܟܝܳܢܳܐ ܗܰܘ ܐܰ‌ܠܳܗܳܝܳܐ܆ ܗܳܠܶܝܢ ܕܶܝܢ ܡܰܟܺܝ̈ܟܳܬܳܐ ܘܰܡܕܰܒܪ̈ܳܢܝܳܬܳܐ ܠܰܟܝܳܢܳܐ ܗܰܘ ܐ̱ܢܳܫܳܝܳܐ. ܘܰܐܝܟܰܢܳܐ ܒܰܪ̱ܬ ܩܳܠܳܐ ܕܰܡܕܰܒܪܳܢܽܘܬܳܐ ܢܺܐܡܰܪ ܐ̱ܢܳܫ ܕܺܐܝܬܶܝܗ̇܆ ܠܗܳܝ ܕܡܰܟܺܝܟܳܐ ܡܡܰܠܶܠ ܠܳܗ̇ ܡܰܟܺܝܟܳܐܺܝܬ. ܗܰܘ ܓܶܝܪ ܕܰܐܝܟ ܕܠܳܚܶܡ ܠܶܗ ܡܡܰܠܶܠ܆ ܥܰܠ ܡܕܰܒܪܳܢܽܘܬܳܐ ܠܳܐ ܣܢܺܝܩ. ܡܡܰܠܶܠ ܕܶܝܢ ܡܕܰܒܪܳܢܳܐܺܝܬ ܗܰܘ ܕܺܐܝܬܰܘܗ̱ܝ ܪܳܡܳܐ ܪܳܡܳܐ ܒܰܟܝܳܢܳܐ܆ ܟܰܕ ܠܘܳܬ ܡܬܰܚܬܳܝܽܘܬܳܐ ܕܡ̈ܶܠܶܐ ܡܶܬܢܰܚܰܬ̣܆ ܐܰܝܟܰܢܳܐ ܕܳܐܦ ܒܺܐܝ̈ܕܰܝܗܶܝܢ ܕܗܳܠܶܝܢ ܕܳܐܡܰܪ ܢܫܰܪܰܪ܆ ܕܒܰܫܪܳܪܳܐ ܡܶܛܽܠ ܦܽܘܪܩܳܢܳܐ ܕܺܝܠܰܢ ܗܘ̣ܳܐ ܒܰܪܢܳܫܳܐ. ܠܳܐ ܐ̱ܢܳܫ ܗܳܟܺܝܠ ‌ܐ̱ܚܪܺܢܳܐ ܘܰܐ̱ܚܪܺܢܳܐ ܢܶܣܒܰܪ ܠܥܰܡܰܢܽܘܐܶܝܠ܆ ܟܰܕ ܪܰܫܺܝܥܳܐܺܝܬ ܦܳܣܶܩ ܠܶܗ ܡܶܢ ܒܳܬܰܪ ܚܕܳܝܽܘܬܳܐ܆ ܠܰܬܪܰܝܳܢܽܘܬܳܐ ܕܰܟܝܳܢ̈ܶܐ. ܚܰܕ ܓܶܝܪ ܐܺܝܬܰܘܗ̱ܝ. ܘܗܽܘ ܟܰܕ ܗܽܘ ܡܶܢ ܬܰܪ̈ܬܰܝܗܶܝܢ܆ ܐܰ‌ܠܳܗܽܘܬܳܐ ܟܺܝܬ ܘܐ̱ܢܳܫܽܘܬܳܐ. ܚܰܕ ܦܰܪܨܽܘܦܳܐ ܘܚܰܕ ܩܢܽܘܡܳܐ. ܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ ܘܕܰܤܛܰܪ ܡܶܢ ܫܽܘܚܠܳܦܳܐ ܘܦܢܛܣܝܰܐ ܡܫܰܡܠܝܳܐܺܝܬ ܐܶܬܒܰܪܢܰܫ.

ܒܪܰܡ ܐܶܘܰܢܓܶܠܺܝܣܛܳܐ ܗܰܘ ܕܗܳܠܶܝܢ ܟܬܰܒ܆ ܗܳܠܶܝܢ ܕܰܡܚܰܘ̈ܝܳܢ ܓܰܠܝܳܐܺܝܬ ܕܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܫܪܺܝܪܳܐ܆ ܕܰܒܚܰܝܠܳܐ ܒܰܝܬܳܝܳܐ ܘܰܒܫܽܘܠܛܳܢܳܐ ܟܽܠܗܶܝܢ ܥܳܒܶܕ ܗ̱ܘܳܐ܆ ܐܰܝܬܺܝ ܒܳܬܰܪܟܶܢ ܠܡܰܣܒܪܳܢܽܘܬܳܐ ܐ̱ܢܳܫܳܝܬܳܐ܆ ܕܟܶܢܫܳܐ ܗܰܘ ܕܩܳܐܶܡ ܗ̱ܘܳܐ ܚܕܳܪ̈ܰܘܗ̱ܝ܆ ܘܰܕܣܰܓܺܝ ܡܶܢ ܫܪܳܪܳܐ ܪܰܚܺܝܩܳܐ ܗ̱ܘܳܬ. ܐܶܡܰܪ ܓܶܝܪ܆ ܟܰܕ ܚܙܰܘ ܕܶܝܢ ܟܶܢܫ̈ܶܐ܆ ܐܶܬܕܰܡܰܪܘ. ܘܫܰܒܰܚܘ ܠܰܐܠܳܗܳܐ ܗܰܘ ܕܝܰܗ̱ܒ ܫܽܘܠܛܳܢܳܐ ܕܰܐܝܟ ܗܳܢܳܐ ܠܰܒܢܰܝ̈ܢܳܫܳܐ^[24]. ܗܳܟܰܢܳܐ ܕܰܥܝܳܕܳܐ ܐܺܝܬܶܝܗ̇ ܗ̱ܘܳܬ ܠܗܳܢܽܘܢ ܕܰܐܟܬܶܒܘ܆ ܕܳܐܦ ܠܗܳܠܶܝܢ ܕܡܰܣܒܪܳܢܽܘܬܳܐ ܕܣܰܓܺܝ̈ܶܐܐ ܠܰܡܨܰܥܬܳܐ ܢܰܝܬܽܘܢ܆ ܐܰܟܙܢܳܐ ܕܠܰܚܫܰܚܬܳܐ ܕܓܰܘܳܐ܆ ܐܳܦ ܡܰܬܰܝ ܐܶܬܚܰܫܰܚ ܒܠܟܣܝܤ ܗܳܝ ܕܗܳܢܽܘܢ ܕܡܶܣܬܰܗܪܢܺܝܢ^[25]܆ ܗܳܝ ܕܒܳܗ̇ ܐܳܦ ܠܰܐܒܽܘܗ̱ܝ ܕܗܰܘ ܛܰܠܝܳܐ ܐܶܫܬܰܥܺܝ ܕܶܐܡܰܪ ܡܶܛܽܠܳܬܶܗ܆ ܕܡܶܣܬܰܗܪܰܢ ܘܒܺܝܫܳܐܺܝܬ ܚܳܐܶܫ^[26].

ܡܶܬܚܙܶܐ ܕܶܝܢ ܗܽܘ ܗܳܢܳܐ ܐܰܒܽܘܗ̱ܝ ܕܛܰܠܝܳܐ ܕܠܳܐ ܗܰܝܡܳܢܽܘܬܳܐ ܟܪܺܝܗ܆ ܘܕܰܡܩܰܛܪܶܓ ܠܰܡܚܺܝܠܽܘܬܳܐ ܕܬܰܠ̈ܡܺܝܕܶܐ. ܩܰܪܶܒܬܶܗ ܓܶܝܪ ܐܳܡܰܪ ܠܘܳܬ ܬܰܠ̈ܡܺܝܕܰܝܟ܆ ܘܠܳܐ ܐܶܫܟܰܚܘ ܠܡܰܐܣܳܝܽܘܬܶܗ^[27]. ܥܰܠܗܳܝ ܐܳܦ ܒܰܡܕܰܒܪܳܢܽܘܬܳܐ ܐܶܬܟ̣̈ܠܝܢ ܗܳܠܶܝܢ ܕܳܐܣܝܽܘܬܳܐ܆ ܟܰܕ ܣܰܓܺܝ̈ܳܐܬܳܐ ܕܕܰܐܝܟ ܗܳܠܶܝܢ ܣܥܺܝܪ ܗ̱ܘܳܐ ܠܗܽܘܢ ܡܶܢ ܟܰܕܽܘ ܠܬܰܠ̈ܡܺܝܕܶܐ܆ ܘܚܳܕܶܝܢ ܗ̱ܘܰܘ ܘܳܐܡܪܺܝܢ ܗ̱ܘܰܘ ܠܝܶܫܽܘܥ܆ ܕܳܐܦ ܫ̈ܺܐܕܶܐ ܡܶܫܬܰܥܒܕܺܝܢ ܠܰܢ^[28]. ܐܳܦ ܓܶܝܪ ܣܢܺܝܩ ܗ̱ܘܳܐ ܗܳܢܳܐ ܥܰܠ ܟܳܐܬܳܐ ܘܥܰܠ ܡܰܟܣܳܢܽܘܬܳܐ ܪܳܕܽܘܝܬܳܐ. ܟܰܕ ܕܶܝܢ ܐܳܦ ܟܶܢ̈ܫܶܐ ܗܳܢܽܘܢ ܕܩܳܝܡܺܝܢ ܗ̱ܘܰܘ ܒܰܚ̈ܕܳܕܶܐ܆ ܡܶܫܬܰܘܬܦܺܝܢ ܗ̱ܘܰܘ ܠܶܗ ܒܠܳܐ ܗܰܝܡܳܢܽܘܬܳܐ܆ ܓܰܘܳܢܳܝܬܳܐ ܥܳܒܶܕ ܠܳܗ̇ ܠܰܟܐܳܬܳܐ ܟܰܕ ܐܳܡܰܪ܆ ܐܳܘ ܫܰܪܒܬܳܐ ܠܳܐ ܡܗܰܝܡܰܢܬܳܐ ܘܰܡܥܰܩܰܡܬܳܐ^[29]. ܣܰܓܺܝ ܕܶܝܢ ܛܳܒܳܐܺܝܬ ܐܶܡܰܪ ܡܥܰܩܰܡܬܳܐ܆ ܟܰܕ ܠܰܙܢܳܐ ܕܠܳܐ ܗܰܝܡܳܢܽܘܬܳܐ ܡܦܰܪܣܳܐ. ܐܳܦ ܓܶܝܪ ܐܳܦ ܟܰܕ ܐ̱ܚܪ̈ܳܢܶܐ ܕܡܶܬܕܰܝܘܢܺܝܢ ܗ̱ܘܰܘ ܐܶܬܰܐܣܺܝܘ ܐܳܡܪܺܝܢ ܗ̱ܘܰܘ܆ ܕܒܰܒܥܶܠܙܒܽܘܒ ܪܺܝܫܳܐ ܕܕܰܝ̈ܘܶܐ ܢܳܦܩܺܝܢ ܗ̱ܘܰܘ ܕܰܝ̈ܘܶܐ^[30]. ܘܗܳܫܳܐ ܟܰܕ ܬܽܘܗܳܝܳܐ ܙܥܽܘܪܳܐ ܗ̱ܘܳܐ܆ ܠܡܶܓܚܰܟ ܡܰܣܒܪܺܝܢ ܗ̱ܘܰܘ ܥܰܠ ܡܚܺܝܠܽܘܬܳܐ. ܘܗܳܢܳܐ ܟܽܠܶܗ ܐܰܘܬܪܶܗ ܡܶܢ ܟܐܳܬܳܐ ܠܰܐܒܽܘܗ̱ܝ ܕܛܰܠܝܳܐ܆ ܗܳܝ ܕܰܐܝܟ ܡܳܪܳܐ ܘܡܰܠܦܳܢܳܐ ܠܳܚܡܳܐܺܝܬ ܐܰܝܬܺܝ ܒܳܬܰܪܟܶܢ܆ ܕܳܐܦ ܟܺܝܬ ܡܰܙܥܶܩ ܗ̱ܘܳܐ ܟܰܕ ܐܳܡܰܪ ܐܰܝܟܰܢܳܐ ܕܡܰܪܩܽܘܤ ܐܳܡܰܪ܆ ܡܗܰܝܡܶܢ ܐ̱ܢܳܐ ܥܰܕܰܪ ܠܠܳܐ ܗܰܝܡܳܢܽܘܬܝ^[31]. ܠܳܗ̇ ܠܠܳܐ ܗܰܝܡܳܢܽܘܬܳܐ ܗܳܝ ܕܰܐܟܣܰܬ ܚܠܳܦ ܗܰܝܡܳܢܽܘܬܳܐ ܩܰܒܶܠܺܝܗ̇ ܘܚܽܘܢ. ܡܶܫܬܰܘܕܰܥ ܐ̱ܢܳܐ ܓܶܝܪ ܠܰܚܛܳܗܳܐ. ܘܶܐܬܪܟܶܢ ܟܰܕ ܗܳܕܶܐ ܨܳܒܶܐ ܗ̱ܘܳܐ. ܘܟܰܕ ܩܰܕܶܡ ܕܰܟܺܝ ܠܰܐܒܳܐ ܡܶܢ ܠܳܐ ܗܰܝܡܳܢܽܘܬܳܐ܆ ܗܳܟܰܢܳܐ ܡܚܰܪܰܪ ܐܳܦ ܠܛܰܠܝܳܐ ܡܶܢ ܕܰܝܘܳܐ^[32].

ܟܰܕ ܐܶܫܬܓܶܫܘ ܕܶܝܢ ܡܡܰܫܚܳܐܺܝܬ ܗܶܢܽܘܢ ܬܰܠ̈ܡܺܝܕܶܐ܆ ܘܰܕܚܶܠܘ ܕܕܰܠܡܳܐ ܫܶܒܩܰܬ ܐܶܢܽܘܢ ܛܰܝܒܽܘܬܳܐ ܗܳܝ ܕܳܐܣܺܝ̈ܘܳܬܳܐ܆ ܡܫܰܐܠܺܝܢ ܡܶܛܽܠ ܗܰܘ ܕܰܝܘܳܐ܆ ܡܶܛܽܠ ܡܳܢܳܐ ܚܢܰܢ ܠܳܐ ܐܶܫܟܰܚܢܰܢ ܠܡܰܦܳܩܽܘܬܶܗ^[33]. ܘܟܰܕ ܩܳܦܶܤ ܗ̱ܘܳܐ ܠܗܽܘܢ ܠܘܳܬ ܡܰܟܺܝܟܽܘܬܳܐ܆ ܘܰܠܘܳܬ ܗܳܝ ܕܰܒܟܽܠܙܒܰܢ ܢܶܣܒܪܽܘܢ ܕܚܰܣܺܝܪܳܐܺܝܬ ܐܺܝܬ ܠܗܽܘܢ ܠܘܳܬ ܟܽܠ ܫܰܦܺܝܪܬܳܐ܆ ܘܰܕܗܶܢܽܘܢ ܒܗܽܘܢ ܢܶܬܥܰܕܠܽܘܢ܆ ܕܛܰܝܒܽܘܬܳܐ ܗܳܝ ܕܡܶܢܶܗ܆ ܠܰܘ ܗܺܝ ܡܶܢ ܢܰܦܫܳܗ̇ ܐܳܬܝܳܐ ܐܶܡܰܬܝ ܕܗܽܘ ܒܡܶܠܬܳܐ ܡܶܕܶܡ ܠܳܐ ܡܶܬܡܰܠܠܳܢܺܝܬܳܐ܆ ܦܰܢܺܝ ܠܗܽܘܢ ܦܶܬܓܳܡܳܐ܆ ܡܶܛܽܠܠܳܐ ܗܰܝܡܳܢܽܘܬܟܽܘܢ^[34]. ܒܳܬܰܪܟܶܢ ܕܶܝܢ. ܐܰܝܟܰܢܳܐ ܕܠܳܐ ܢܶܣܒܪܽܘܢ ܬܽܘܒ܆ ܕܟܽܠܶܗ ܡܰܢ ܣܽܘܥܪܳܢܳܐ ܕܗܰܝܡܳܢܽܘܬܳܐ ܐܺܝܬܰܘܗ̱ܝ܆ ܥܰܠ ܥ̈ܒܳܕܶܐ ܕܶܝܢ ܠܳܐ ܣܢܺܝܩܺܝܢ܆ ܡܰܘܣܶܦ ܡܰܝܬܶܐ ܒܳܬܰܪܟܶܢ ܟܰܕ ܐܳܡܰܪ܆ ܗܳܢܳܐ ܕܶܝܢ ܓܶܢܣܳܐ ܠܳܐ ܢܳܦܶܩ ܐܶܠܳܐ ܐܶܢ ܒܰܨܠܽܘܬܳܐ ܘܰܒܨܰܘܡܳܐ^[35].

ܣܰܓܺܝ ܕܶܝܢ ܐܰܝܟ ܘܳܠܺܝܬܳܐ ܣܳܡܳܗ̇ ܠܡܶܠܬܳܐ ܕܠܳܐ ܡܫܰܘܕܥܳܢܽܘܬܳܐ ܕܦܰܪܨܽܘܦܳܐ܆ ܘܠܳܐ ܐܶܡܰܪ܆ ܕܶܐܢ ܠܳܐ ܬܨܽܘܡܽܘܢ ܐܢ̱ܬܽܘܢ ܗܳܢܽܘܢ ܕܡܰܐܣܶܝܢ ܐܢ̱ܬܽܘܢ܆ ܐܰܘ ܗܳܢܽܘܢ ܕܡܶܬܬܰܠܨܺܝܢ ܟܺܝܬ ܘܚܳܫܺܝܢ܆ ܐܰܝܟܰܢܳܐ ܕܰܕܓܰܘܳܐ ܢܶܗܘܶܐ ܐܺܝܬܰܘܗ̱ܝ ܕܽܘܪܳܫܳܐ ܗܰܘ ܕܰܨܠܽܘܬܳܐ ܘܰܕܨܰܘܡܳܐ. ܐܳܦ ܕܗܳܢܽܘܢ ܕܡܰܐܣܶܝܢ܆ ܘܳܐܦ ܕܗܳܢܽܘܢ ܕܥܰܠ ‌ܐܳܣܝܽܘܬܳܐ ܣܢܺܝܩܺܝܢ. ܗܳܕܶܐ ܕܶܝܢ ܐܶܡܰܪ܆ ܡܶܛܽܠ ܗܳܢܽܘܢ ܕܒܰܡܝܰܬܪܽܘܬܳܐ^[36] ܐܰܝܟ ܫ̈ܠܺܝܚܶܐ ܫܳܩܠܺܝܢ ܫܽܘܠܛܳܢܳܐ ܘܛܰܝܒܽܘܬܳܐ܆ ܠܘܳܬ ܗܳܝ ܕܢܶܛܪܕܽܘܢ ܪ̈ܽܘܚܶܐ. ܣܰܓܺܝ̈ܶܐܐ ܓܶܝܪ ܡܶܛܽܠ ܝܽܘܬܪܳܢܳܐ ܕܐ̱ܢܳܫܺܝ̈ܢ܆ ܒܕܽܘܟ̈ܝܳܬܳܐ ܗܳܠܶܝܢ ܕܠܰܝܬ ܗ̱ܘܳܐ ܒܗܶܝܢ ܝܺܕܰܥܬܳܐ ܕܰܐ‌ܠܳܗܳܐ܆ ܗܳܠܶܝܢ ܕܰܐܝܟ ܗܳܟܰܢ ܠܦܽܘܬ ܣܽܘܢܩܳܢܳܐ ܐܰܥܒܶܕܘ. ܘܠܰܘ ܕܰܡܝܰܬܪܽܘܬܳܐ ܕܺܝܠܗܽܘܢ ܐܺܝܬܰܝܗܶܝܢ ܗ̱ܘܰܝ̈܆ ܐܶܠܳܐ ܕܰܐ‌ܠܳܗܳܐ ܗܰܘ ܕܝܰܗ̱ܒ. ܡܶܛܽܠ ܕܳܐܦ ܒܶܠܥܰܡ ܗܰܘ ܩܳܨܽܘܡܳܐ ܟܰܕ ܠܳܐ ܫܳܘܶܐ ܗ̱ܘܳܐ ܐܶܬܢܰܒܺܝ ܡܶܛܽܠ ܡܕܰܒܪܳܢܽܘܬܳܐ܆ ܐܳܦ ܩܰܝܳܦܳܐ ܗܰܘ ܪܺܝܫ ܟܳܗ̈ܢܶܐ ܕܝܽܗ̱ܘ̈ܕܳܝܶܐ܆ ܐܶܠܳܐ ܠܰܘ ܡܶܢ ܗܳܕܶܐ ܢܒܺܝ̈ܶܐ ܐܺܝܬܰܝܗܽܘܢ ܩܰܝܳܦܳܐ ܘܒܶܠܥܰܡ. ܕܡܶܢ ܗܳܪܟܳܐ ܐܳܦ ܡܳܪܰܢ ܐܳܡܰܪ ܗ̱ܘܳܐ܆ ܕܣܰܓܺܝ̈ܶܐܐ ܢܺܐܡܪܽܘܢ ܠܺܝ ܒܗܰܘ ܝܰܘܡܳܐ܆ ܡܳܪܝ ܡܳܪܝ܆ ܠܳܐ ܗ̱ܘܳܐ ܒܰܫܡܳܟ ܐܶܬܢܰܒܺܝܢܰܢ܆ ܘܒܰܫܡܳܟ ܫ̈ܺܐܕܶܐ ܐܰܦܶܩܢܰܢ܆ ܘܒܰܫܡܳܟ ܚܰܝ̈ܠܶܐ ܣܰܓܺܝ̈ܶܐܐ ܥܒܰܕܢܰܢ. ܘܗܳܝܕܶܝܢ ܐܰ݀ܘܕܶܐ ܠܗܽܘܢ܆ ܕܠܳܐ ܡܬܽܘܡ ܝܺܕܰܥܬܟܽܘܢ. ܐܰܪܚܶܩܘ ܠܟܽܘܢ ܡܶܢܝ ܦܳܠ̈ܚܰܝ ܥܰܘܠܳܐ^[37]. ܙܳܕܶܩ ܗܳܟܺܝܠ ܠܡܶܥܒܰܕ ܗܳܠܶܝܢ ܕܰܡܬܰܚ̈ܡܳܢ ܒܢܳܡܽܘܣ̈ܶܐ܆ ܘܗܳܟܰܢܳܐ ܐܳܦ ܥܰܠ ܚܰܝ̈ܠܶܐ ܗܳܠܶܝܢ ܕܡܶܢ ܐܰ‌ܠܳܗܳܐ ܝܗ̱ܝ ܒܺܝܢ ܘܡܶܬܬܰܥܒܕܺܝܢ܆ ܢܶܚܕܶܐ ܡܰܢ܆ ܠܳܐ ܢܶܬܬܪܺܝܡ ܕܶܝܢ܆ ܘܰܒܕܶܚܠܬܳܐ ܡܶܚܕܳܐ ܢܶܬܩܦܶܤ.

ܡܳܢܳܐ ܕܶܝܢ ܐܺܝܬܶܝܗ̇܆ ܗܳܝ ܕܗܳܢܳܐ ܓܶܢܣܳܐ. ܐܰܪܰܐ ܡܶܛܽܠ ܕܰܝ̈ܘܶܐ ܗܳܢܽܘܢ ܕܒܰܟܪ̈ܽܘܟܝܶܐ ܕܣܰܗܪܳܐ ܡܶܬܬܣܺܝܡܺܝܢ ܥܰܠ ܒܢܰܝ̈ܢܳܫܳܐ ܐܳܡܰܪ܆ ܘܠܳܐ ܟܽܠ ܟܽܠܶܗ. ܘܶܐܢ ܕܶܝܢ ܠܳܐ ܐܳܡܰܪ ܗ̱ܘܳܐ܆ ܗܳܢܳܐ ܐܳܕܫܳܐ. ܐܶܠܳܐ ܟܰܕ ܓܶܢܣܳܐ ܐܶܡܰܪ܆ ܓܶܢܣܳܢܳܐܺܝܬ ܡܶܛܽܠ ܟܽܠܳܗ̇ ܡܰܥܒܕܳܢܽܘܬܳܐ ܕܫ̈ܺܐܕܶܐ ܐܳܡܰܪ. ܗܳܝ ܕܰܠܘܳܬܳܗ̇ ܐܳ‌ܠܨܳܐ ܠܟܽܠܰܢ܆ ܥܰܠ ܨܰܘܡܳܐ ܘܰܨܠܽܘܬܳܐ. ܨܰܘܡܳܐ ܕܶܝܢ ܐܺܝܬܰܘܗ̱ܝ܆ ܠܰܘ ܗܰܘ ܕܡܶܢ ܡܶܐܟ̈ܠܳܬܳܐ܆ ܐܶܠܳܐ ܡܰܪܚܩܳܢܽܘܬܳܐ ܗܳܝ ܕܡܶܢ ܟܽܠܗܶܝܢ ܒܺܝ̈ܫܳܬܳܐ. ܐܶܢ ܓܶܝܪ ܪܚܶܡ̣ܬ ܟܶܣܦܳܐ ܟܪܺܝܗ ܐܰܢ̱ܬ܆ ܡܶܚܕܳܐ ܒܰܪ ܫܳܥܬܶܗ ܕܰܝܘܳܐ ܗܰܘ ܕܰܡܓܰܘܙܶܠ ܠܫܽܘܠܗܳܒܳܗ̇܆ ܟܰܕ ܕܰܪܓܳܐ ܕܢܶܕܪܽܘܟ ܡܶܫܟܰܚ ܠܶܗ܆ ܕܳܪܶܟ ܘܣܳܒܶܟ ܥܰܠ ܢܰܦܫܳܟ. ܨܽܘܡ ܗܳܟܺܝܠ ܘܟܰܒܶܫ ܒܟܰܦܢܳܐ ܪܶܓܬܳܐ ܗܳܝ ܕܪܶܚܡܰܬ ܟܶܣܦܳܐ܆ ܒܰܕ ܠܳܐ ܡܟܰܢܶܫ ܐܰܢ̱ܬ ܠܳܗ̇ ܗܳܠܶܝܢ ܕܰܪ̈ܚܺܝܡܳܢ ܠܳܗ̇܆ ܘܟܰܕ ܝܳܗܶܒ ܐܰܢ̱ܬ ܡܶܢ ܗܳܠܶܝܢ ܕܺܐܝܬ ܠܳܟ ܠܗܳܢܽܘܢ ܕܒܰܣܢܺܝܩܽܘܬܳܐ. ܘܟܰܕ ܡܨܰܠܶܐ ܐܰܢ̱ܬ ܬܶܬܚܰܪܰܪ ܡܶܚܕܳܐ ܡܶܢ ܫܳܢܝܽܘܬܳܐ. ܐܶܢ ܕܶܝܢ ܟܰܕ ܡܚܰܫܶܒ ܐܰܢ̱ܬ ܝܰܪ̈ܚܶܐ܆ ܬܶܬܣܺܝܡ ܝܰܬܺܝܪ ܩܰܫܝܳܐܺܝܬ ܥܰܠ ܗܳܢܽܘܢ ܕܚܰܝܳܒܺܝܢ ܟܰܕ ܪ̈ܶܒܝܳܬܳܐ ܝܰܩܺܝܪ̈ܳܬܳܐ ܘܚܰܪ̈ܡܳܬܳܐ ܬܳܒܰܥ ܐܰܢ̱ܬ܆ ܠܳܐ ܡܶܕܶܡ ܡܫܰܚܠܶܦ ܐܰܢ̱ܬ ܡܶܢ ܕܰܝܘܳܐ܆ ܗܰܘ ܕܒܰܟܪܽܘܟܝܳܐ ܕܪܶܗܛܶܗ ܕܣܰܗܪܳܐ ܡܢܰܬܶܫ ܠܶܗ ܠܒܰܪܢܳܫܳܐ. ܐܶܢ ܕܶܝܢ ܐܳܦ ܡܶܢ ܪܽܘܓܙܳܐ ܕܠܳܐ ܡܶܠܬܳܐ ܘܚܰܝܘܰܬ ܫܶܢܳܝܳܐ܆ ܡܶܬܬܰܟܰܒ ܐ̱ܢܳܫ ܘܡܶܬܬܰܠܰܝ܆ ܢܨܽܘܡ ܡܶܢ ܗܳܢܳܐ ܒܝܰܕ ܢܺܝܚܽܘܬܳܐ܆ ܘܠܳܐ ܢܶܛܥܶܐ ܕܰܠܕܰܝܘܳܐ ܗܰܘ ܕܰܡܪܰܒܶܐ ܠܶܗ ܠܚܰܫܳܐ܆ ܠܽܘܩܒܰܠ ܢܰܦܫܶܗ ܡܰܥܶܠ ܡܩܰܒܶܠ ܠܶܗ. ܠܗܳܕܶܐ ܐܳܣܝܽܘܬܳܐ܆ ܐܳܦ ܚܰܣܳܡܳܐ ܢܒܰܝܬܶܐ ܠܶܗ܆ ܘܠܳܐ ܢܶܚܣܽܘܡ ܒܫܰܦܺܝܪ̈ܳܬܳܐ ܕܩܰܪ̈ܺܝܒܶܐ. ܘܶܐܢ ܕܶܝܢ ܠܳܐ܆ ܠܚܶܘܝܳܐ ܗܰܘ ܕܪܳܚܶܫ ܢܶܫܟܰܚ ܕܰܚܠܺܝܕ ܟܰܣܝܳܐܺܝܬ ܒܬܰܘ̈ܳܢܶܐ ܕܠܶܒܶܗ܆ ܗܰܘ ܕܰܚܣܰܡ ܒܳܐܕܳܡ ܡܶܛܽܠ ܕܽܘܝܳܪܳܐ ܛܽܘܒܬܳܢܳܐ ܗܰܘ ܕܰܒܦܰܪܕܰܝܣܳܐ܆ ܗܰܘ ܕܙܰܝܶܢ ܒܝܰܕ ܚܣܳܡܳܐ ܥܰܠ ܗܳܒܝܠ ܠܝܰܡܺܝܢܳܐ ܕܰܐܚܽܘܗ̱ܝ. ܠܗܳܕܶܐ܆ ܐܳܦ ܙܰܢܳܝܳܐ ܘܳܐܦ ܗܰܘ ܕܰܠܟܰܪܣܶܗ ܦܳܠܰܚ ܥܰܒܕܽܘܬܳܐ ܘܰܠܝܰܥܢܽܘܬܳܐ܆ ܠܰܡܟܰܢ̈ܫܰܝ ܡܰܕܰܐܬܳܐ ܘܬܳܒܽܘ̈ܥܶܐ ܕܠܳܐ ܣܳܒܥܺܝܢ. ܐܳܦ ܓܶܝܪܕܗܳܠܶܝܢ. ܘܳܐܦ ܕܟܽܠܗܶܝܢ ܒܺܝ̈ܫܳܬܳܐ ܓܶܢܣܳܢܳܐܺܝܬ܆ ܡܢܰܒܪܫܺܝܢ ܫ̈ܺܐܕܶܐ ܠܦܰܩܪܽܘܬܳܐ. ܗܳܢܳܐ ܕܶܝܢ ܓܶܢܣܳܐ. ܗܳܢܰܘ ܕܶܝܢ ܟܽܠ ‌ܐܳܕܫܳܐ ܕܰܡܩܰܒܶܠ ܡܰܥܒܕܳܢܽܘܬܳܐ ܕܫ̈ܺܐܕܶܐ܆ ܡܶܬܛܪܶܕ ܒܝܰܕ ܨܰܘܡܳܐ ܘܰܨܠܽܘܬܳܐ. ܥܰܡ ܗܳܢܳܐ ܕܽܘܟܳܝܳܐ ܨܳܒܶܐ ܕܢܶܐܪܥܺܝܘܗ̱ܝ ܒܝܰܘܡܳܐ ܗܰܘ ܕܰܩܝܳܡܬܳܐ^[38]܆ ܡܫܺܝܚܳܐ ܦܶܣܟܐ ܗܰܘ ܕܰܚܠܳܦܰܝܢ ܐܶܬܕܒܰܚ.

ܕܥܰܡ ܗܳܠܶܝܢ ܕܶܝܢ ܕܶܐܬܶܐܡܰܪ̈ܝ̱܆ ܐܳܦ ܗܺܝ ܗܳܝ ܕܠܳܐ ܡܫܰܘ̈ܬܦܶܐ ܕܬܽܘܪܣܳܝܳܐ ܢܶܗܘܶܐ܆ ܕܽܘܟܳܝܳܐ ܕܰܚ̈ܛܳܗܶܐ ܐܺܝܬܶܝܗ̇܆ ܣܳܗܶܕ ܐܰ‌ܠܳܗܳܐ܆ ܕܰܠܝܰܘܡܳܐ ܗܰܘ ܥܣܺܝܪܳܝܳܐ ܕܝܰܪܚܳܐ ܗܰܘ ܕܫܰܒܥܳܐ ܫܰܡܰܗ ܒܰܠܚܽܘܕܰܘܗ̱ܝ ܝܰܘܡܳܐ ܕܚܽܘܣܳܝܳܐ܆ ܗܰܘ ܕܒܶܗ ܦܩܰܕ ܠܰܡܨܳܡ ܒܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܐܶܬܺܝܗܶܒ^[39]. ܡܰܢܽܘ ܗܳܟܺܝܠ ‌ܐܺܝܬܰܘܗ̱ܝ܆ ܗܰܘ ܕܠܳܐ ܨܳܒܶܐ ܕܰܒܝܰܕ ܗܳܕܶܐ ܐܳܣܝܽܘܬܳܐ܆ ܥܰܠ ܗܳܠܶܝܢ ܕܰܚܛܳܐ܆ ܡܚܰܣܝܳܢܳܐ ܢܶܥܒܕܺܝܘܗ̱ܝ ܠܶܗ ܠܰܐܠܳܗܳܐ. ܡܳܕܶܝܢ. ܚܘܺܝܚܳܐܺܝܬ ܢܨܽܘܡ܆ ܘܰܤܛܰܪ ܡܶܢ ܟܽܠ ܥܶܠܬܳܐ܆ ܐܰܝܟܰܢܳܐ ܕܫܽܘܒܩܳܢܳܐ ܡܫܰܪܬܚܳܐ ܘܥܰܬܺܝܪܳܐ ܕܗܳܠܶܝܢ ܕܚܰܛܝ̈ܳܢ ܠܢ ܢܶܣܰܒ܆ ܘܢܶܫܬܘܶܐ ܠܡܰܠܟܽܘܬܳܐ ܕܰܫܡܰܝܳܐ. ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܕܺܝܠܶܗ ܩܰܕܺܝܫ ܒܟܽܠ܆ ܘܛܳܒܳܐ ܘܰܕܫܳܘܶܐ ܠܶܗ ܒܽܐܘܣܺܝܰܐ. ܗܳܫܳܐ ܘܰܒܟܽܠ ܙܒܰܢ. ܘܰܠܥܳܠܰܡ ܥܳܠܡܺܝܢ. ܐܰܡܺܝܢ‌܀

ܫܠܶܡ ܡܺܐܡܪܳܐ ܕܡܳܐܐ ܘܥܶܣܪܺܝܢ.

ܡܬܝ. 17: 15[1]

ܡܙܡܘܪ̈ܐ. 73: 8 ـ 9 [2]

ܝܘܚܢܢ. 8: 33 (44)[3]

ܒ. ܩܘܪ̈ܝܢܬܝܐ. 11: 14 [4]

ܡܙܡܘܪ̈ܐ. 140: 9[5]

ܦܪܟܣܝܣ. 16: 16  ܐܦ 18 [6]

ܡܬܝ. 26: 35 ܐܦ ܡܰܪܩܘܣ. 14: 31 [7]

ܐܫܥܝܐ. 50: 5 [8]

ܫ݀ܪܝܝܐ[9]

ܡܬܝ. 10: 32[10]

 ܣܶܦܪܳܐ ܕܰܒܪܺܝܬܳܐ. 1: 31[11]

ܡܙܡܘܪ̈ܐ. 148: 5 [12]

ܐܘܠ̈ܝܬܗ ܕܐܪܡܝܐ. 3: 38 [13]

 ܢܒܝܘܬܗ ܕܚܙܩܝܐܝܠ. 18: 4 [14]

ܩܘܗܠܬ. 12: 15 [15]

ܡܬܝ. 16: 27 [16]

ܚܟܡܬܐ. 3: 1 [17]

ܡܬܝ. 17: 16 [18]

[19]ܝܰܘܢܳܝ̈ܶܐ ܡܰܢ ܠܰܙܢܳܐ ܗܰܘ ܕܕܰܝܘܢܘܬܐ܆ ܡܶܣܬܰܗܪܳܢܽܘܬܳܐ ܩܳܪܶܝܢ ܠܶܗ܆ ܐܰܝܟ ܡܰܢ ܕܡܶܢ ܣܰܗܪܳܐ ܠܣܰܗܪܳܐ ܓܳܕܶܫ. ܥܝܳܕܐ ܗܘ ܕܣܽܘܪ̈ܝ̣ܳܝ̣ܶܐ. ܕܒܰܪ ܐܶܓܳܪܳܐ ܡܫܰܡܰܗ ܠܶܗ. ܟܒܰܪ ܕܶܝܢ ܒܙܰܒ̈ܢܶܐ ܗܳܢܽܘܢ ܩܰܕܡܳܝ̈ܶܐ ܓܶܕܫܰܬ܆ ܕܰܠܣܰܓܺܝ̈ܐܐ ܡܶܢ ܗܳܢܽܘܢ ܕܒܟܒܢܐ ܚܰܫܳܐ ܢܶܫܕܶܐ ܕܰܝܘܳܐ ܡܶܢ ܐܶܓܳܪܳܐ ܘܰܢܚܰܒܶܠ ‌ܐܶܢܽܘܢ. ܒܪܰܡ. ܘܳܐܦ ܠܘܳܬ ܣܽܘܪ̈ܝ̣ܳܝ̣ܶܐ ܡܥܰܝܕܳܐ ܗܳܕܶܐ܆ ܕܣܰܓܺܝ̈ܐܐ ܢܺܐܡܪܘܢ ܡܶܛܽܠ ‌ܐ̱ܢܳܫ ܐ̱ܢܳܫ ܡܶܢ ܗܳܢܽܘܢ ܕܡܶܬܕܰܝܘܢܺܝܢ܆ ܕܡܶܢ ܣܰܗܪܳܐ ܠܣܰܗܪܳܐ ܐܳܬܶܐ ܥܠܰܘܗܝ ܕܰܝܘܶܗ.

 ܬܰܪܥܺܝܬܳܐ[20]

 ܡܬܝ. 9: 2 ـ 6  ܠܘܩܐ. 5: 21 ـ 23 [21]

 ܦܪܟܣܝܣ. 1: 24 [22]

ܡܬܝ. 9: 6[23]

ܡܬܝ. 9: 8[24]

ܡܬܝ. 4: 24 [25]

ܡܬܝ. 17: 15 [26]

ܡܬܝ. 17: 16 [27]

 ܠܘܩܐ. 10: 17[28]

ܡܬܝ. 16: 17 [29]

ܠܘܩܐ. 11: 15 [30]

ܡܪܩܘܣ. 9: 24 [31]

ܡܬܝ. 17: 18[32]

ܡܬܝ. 17: 19 [33]

ܡܬܝ. 17: 20 [34]

ܡܬܝ. 17:  21[35]

[36] ܒܙܰܒܢܳܐ ܕܡܶܢ ܩܕܺܝܡ ܓܳܒܶܝܢ ܗ̱ܘܰܘ ܐܶܦܝܣܩ̈ܘܦܐ ܗܳܢܽܘܢ ܕܰܒ̈ܥܺܕܳܬܳܐ: ܓܰܒܪ̈ܶܐ ܢܰܟ̈ܦܶܐ ܘܕܺܝܕܺܝܥܺܝܢ ܒܰܡܝܰܬܪܽܘܬܳܐ ܡܶܢ ܗܳܢܽܘܢ ܕܰܒܥܺܕܬܳܐ܆ ܘܝܳܗܒܺܝܢ ܗ̱ܘܰܘ ܠܗܽܘܢ ܫܽܘܠܛܳܢܐ ܒܝܰܕ ܨܠܽܘܬܳܐ܆ ܘܰܡܩܺܝܡܺܝܢ ܗ̱ܘܰܘ ܠܗܽܘܢ ܥܠܶܝܗ̇ ܕܗܳܕܶܐ܆ ܕܢܶܛܪܕܽܘܢ ܪ̈ܽܘܚܶܐ ܒܺܝ̈ܫܳܬܳܐ ܡܶܢ ܗܳܢܽܘܢ ܕܡܶܬܢܰܣܶܝܢ. ܘܡܶܬܩܪܶܝܢ ܗ̱ܘܰܘ ܡܘܡ̈ܝܢܐ. ܗܳܠܶܝܢ ܕܗܳܫܳܐ ܥܽܘܗܕܳܢܗܽܘܢ ܡܰܢ ܐܺܝܬ ܠܰܢ ܒܬܰܫ̈ܥܝܳܬܳܐ ܘܰܒܩܳܢܽܘ̈ܢܶܐ ܕܥܺܕܬܳܐ܆ ܠܗܽܘܢ ܕܶܝܢ ܠܰܝܬ ܠܰܢ܆ ܡܶܛܽܠ ܠܐ ܗܰܝܡܳܢܽܘܬܳܐ ܗܳܝ ܕܶܐܡܰܪ ܡܳܪܰܢ܆ ܘܡܶܛܽܠ ܓܠܺܝܙܽܘܬܳܐ ܕܡܶܢ ܡܝܰܬܪܽܘܬܳܐ.

 ܡܬܝ. 7: 22 ـ 23 [37]

ܐ. ܩܘܪ̈ܝܢܬܝܐ. 5: 7 [38]

ܟܗ̈ܢܐ. 23: 27[39]