ܡܺܐܡܪܳܐ ܕܡܳܐܐ ܘܰܬܫܬܥܣܪ

ܥܰܠ ܡܶܫܬܽܘܬܳܐ ܗܳܝ ܕܰܟܬܺܝܒܳܐ ܠܘܳܬ ܐܶܘܰܢܓܶܠܺܝܣܛܳܐ ܝܽܘܚܰܢܳܢ܆ ܗܳܝ ܕܰܗܘܳܬ ܒܩܳܛܢܶܐ ܕܰܓܠܺܝܠܳܐ܆ ܗܳܝ ܕܒܳܗ̇ ܟܰܕ ܐܳܦ ܡܫܺܝܚܳܐ ܐܶܬܩܪܺܝ ܡܰܝ̈ܳܐ ܠܚܰܡܪܳܐ ܫܰܚܠܶܦ^[1]܆ ܘܕܰܡܝܰܩܪܰܐ ܗ̄ܘ ܙܽܘܘܳܓܳܐ܆ ܘܰܠܘܬ ܐ̱ܢܳܫ ܪܽܘܡܳܢܳܐ ܕܰܡܓܰܕܦܳܢܳܐܺܝܬ ܘܕܰܠܩܽܘܒܠܳܐܺܝܬ ܫܰܚܠܶܦ ܦܰܫܩܶܗ ܐ̱ܚܪܳܢܝܳܐܺܝܬ ܠܦܶܬܓܳܡܳܐ ܗܰܘ ܕܣܺܝܡ ܩܕܳܡܰܝܢ ܕܶܐܘܰܢܓ̈ܶܠܺܝܰܐ ܩܰܕܺܝ̈ܫܶܐ.

119: ܥܰܠ ܦܶܬ̣ܝܳܐ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ ܐܶܢ ܐ̱ܢܳܫ ܢܶܦܫܽܘܛ ܗܰܘܢܶܗ܆ ܘܝܰܬܺܝܪܳܐܺܝܬ ܥܰܠ ܗܰܘ ܕܶܐܘܰܢܓ̈ܶܠܺܝܰܐ ܩܰܕܺܝ̈ܫܶܐ܆ ܐܽܘܪ̈ܚܳܬܳܐ ܣܰܓܺܝ̈ܐܬܳܐ ܢܶܫܟܰܚ ܕܗܳܝ ܕܫܰܦܺܝܪ ܢܺܚܶܐ. ܘܰܠܟܽܠܗܶܝܢ ܕܰܠܘܳܬ ܐܰ‌ܠܳܗܳܐ ܡܰܝ̈ܬܝܳܢ܆ ܘܰܕܡܰܠ̣̈ܝܳܢ ܩܰܕܺܝܫܽܘܬܳܐ. ܘܕܰܠܘܳܬ ܗܳܝ ܕܰܥܬܺܝܕܳܐ ܡܥ̈ܰܬܕܳܢ܆ ܘܕܰܠܘܳܬ ܚܰܝ̈ܶܐ ܕܰܠܥܳܠܰܡ ܡܙܰܡ̈ܢܳܢ. ܗܳܕܐ ܗܝ ܓܶܝܪ ܗܳܝ ܕܫܰܦܺܝܪ ܢܺܚܶܐ܆ ܗܳܝ ܕܠܳܐ ܠܒܰܪ ܡܶܢ ܐܰ‌ܠܳܗܳܐ ܢܶܦܰܠ. ܢܶܣܒܰܪ ܕܶܝܢ ܕܫܳܡܰܥ ܠܶܗ ܕܰܒܝܰܕ ܐܶܪܰܡܝܳܐ ܢܒܺܝܳܐ ܡܡܰܠܶܠ ܠܘܳܬ ܟܽܠܗܽܘܢ ܗܳܢܽܘܢ ܕܨܳܒܶܝܢ ܠܡܶܫܡܰܥ܆ ܩܽܘܡܘ ܥܰܠ ‌ܐܽܘܪ̈ܚܳܬܳܐ ܘܰܚܙܰܘ܆ ܘܫܰܐܶܠܘ ܥܰܠ ܫܒܺܝ̈ܠܰܘܗ̱ܝ ܕܡܳܪܝܳܐ ܗܳܢܽܘܢ ܕܰܠܥܳܠܰܡ. ܘܰܚܙܰܘ ܐܰܝ̇ܕܳܐ ܐܺܝܬܶܝܗ̇ ܐܽܘܪܚܳܐ ܛܳܒܬܳܐ ܘܗܰܠܶܟܘ ܒܳܗ̇܆ ܘܬܶܫܟܚܽܘܢ ܩܰܕܺܝܫܽܘܬܳܐ ܠܢܰܦ̈ܫܳܬܟܽܘܢ^[2].

ܗܳܐ ܓܶܝܪ ܡܶܠܬܳܐ ܗܰܘ ܕܰܐ‌ܠܳܗܳܐ ܘܰܐܒܳܐ܆ ܗܰܘ ܕܒܰܢ̈ܒܺܝܶܐ ܡܶܢ ܩܕܺܝܡ ܡܰܠܶܠ܆ ܒܚܰܪܬܳܐ ܕܙܰܒ̈ܢܶܐ ܟܰܕ ܐܶܬܒܰܣܰܪ ܘܶܐܬܒܰܪܢܰܫ^[3]܆ ܠܳܐ ܡܶܬܡܰܠܠܳܢܳܐܺܝܬ ܡܰܢ܆ ܠܳܐ ܡܶܫܬܰܚܠܦܳܢܳܐ ܕܶܝܢ ܐܰܟܚܕܳܐ ܘܫܰܪܺܝܪܳܐܺܝܬ܆ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢܳܗ̇ ܕܽܐܘܣܺܝܰܐ ܕܩܰܕܺܝܫܬܳܐ ܝܳܠܕܰܬ ܐܰ‌ܠܳܗܳܐ ܘܰܒܬܽܘܠܰܬ ܒܟܽܠܙܒܰܢ ܡܰܪܝܰܡ܆ ܘܽܐܘܪܚܳܐ ܕܰܒܬܽܘܠܽܘܬܳܐ ܡܰܥܶܠ ܗ̱ܘܳܐ ܡܶܢ ܗܳܪܟܳܐ܆ ܗܳܝ ܕܰܠܥܳܠܡܳܐ ܡܰܢ ܗܳܢܳܐ ܕܩܳܐܶܡ ܐܳܚܕܳܐ܆ ܗܰܘ ܕܰܒܝܰܕ ܥܳܒܽܘܕܽܘܬ ܒܢܰܝ̈ܳܐ ܘܰܒܝܰܕ ܦܽܘܩܕܳܢܳܐ ܐܰ‌ܠܳܗܳܝܳܐ ܗܰܘ ܕܶܐܡܰܪ ܦܪܰܘ ܘܰܣܓܰܘ^[4] ܡܶܫܬܰܡܠܶܐ ܐܰܟܚܕܳܐ܆ ܠܘܳܬ ܕܶܝܢ ܗܰܘ ܕܰܥܬܺܝܕ ܡܫܰܢܝܳܐ܆ ܠܗܰܘ ܕܰܬܚܘܘܗ̱ܝ ܚܰܕܬܳܐ ܩܝܳܡܬܳܐ܆ ܟܰܕ ܗܳܢܽܘܢ ܕܰܥܬܺܝܕܺܝܢ ܕܰܢܩܽܘܡܽܘܢ ܐܰܝܟ ܡܰܠܰܐܟ̈ܶܐ ܥܬܺܝܕܺܝܢ ܕܢܶܗܘܽܘܢ ܒܰܫܡܰܝܳܐ܆ ܘܥܰܠ ܥܽܘܕܪܳܢܳܐ ܕܙܽܘܘܳܓܳܐ ܠܳܐ ܥܬܺܝܕܺܝܢ ܕܢܶܣܬܰܢܩܽܘܢ^[5]܆ ܡܶܛܽܠ ܗܳܝ ܕܰܡܩܰܘܶܝܢ ܐܰܡܺܝܢܳܐܺܝܬ ܘܠܳܐ ܬܽܘܒ ܗܳܘܶܝܢ ܟܺܝܬ ܘܡܳܝܬܺܝܢ. ܟܰܕ ܝܳܕܰܥ ܗ̱ܘܳܐ ܠܳܗ̇ ܠܰܡܥܰܠܝܽܘܬܳܐ ܕܚܰܝ̈ܶܐ ܕܠܳܐ ܙܽܘܘܳܓܳܐ ܐܳܦ ܕܥܰܣܩܳܐ ܠܬܽܘܪܳܨܳܐ܆ ܘܰܐܝܟ ܐܰ‌ܠܳܗܳܐ ܗܳܠܶܝܢ ܕܠܳܚ̈ܡܳܢ ܠܚܰܝܠܳܐ ܕܰܟܝܳܢܳܐ ܕܺܝܠܰܢ ܣܳܐܶܡ ܗ̱ܘܳܐ ܢܳܡܽܘܣܳܐ܆ ܕܙܳܕܶܩ ܕܰܒܬܽܘܠܽܘܬܳܐ ܢܶܬܥܰܢܘܶܐ܆ ܒܢܳܡܽܘܣ̈ܶܐ ܟܬܺܝ̈ܒܶܐ. ܠܳܐ ܬܰܚܶܡ. ܐܶܠܳܐ ܕܨܶܒܝܳܢܳܐܺܝܬ ܬܶܬܛܰܢ̣ܰܢ ܗܳܝ ܕܗܳܟܰܢܳܐ ܐܺܝܬܶܝܗ̇ ܫܰܦܺܝܪܬܳܐ ܘܛܳܒܬܳܐ܆ ܘܕܰܠܘܳܬ ܫܰܘܝܽܘܬ ܐܺܝܩܳܪܳܐ ܕܡܰܠܰܐܟ̈ܶܐ ܡܰܝܬܝܳܐ܆ ܨܒܳܐ ܡܰܢ܆ ܠܳܐ ܬܒܰܥ ܕܶܝܢ. ܟܰܕ ܒܪܶܚܡܬܳܐ ܡܰܠܽܘܢ ܢܳܓܶܕ܆ ܘܠܰܘ ܟܰܕ ܒܰܐܢܰܢܩܺܐ ܕܣܳܝܽܘܡܽܘܬ ܢܳܡܽܘܣܳܐ ܠܘܳܬ ܗܳܕܶܐ ܕܳܚܶܐ. ܗܳܠܶܝܢ ܡܰܢ ܓܶܝܪ ܕܣܺܝ̈ܡܳܢ ܒܢܳܡܽܘܣܳܐ܆ ܟܽܠܳܗ̇ ܐܰܢܰܢܩܺܐ ܐܺܝܬܶܝܗ̇ ܠܡܶܥܒܰܕ. ܗܳܠܶܝܢ ܕܶܝܢ ܡܶܬܛܰܢ̈ܢܝܬܐ ܘܕܰܠܗܰܠ ܡܶܢ ܢܳܡܽܘܣܳܐ܆ ܕܗܳܢܽܘܢ ܕܓܳܒܶܝܢ ܒܨܶܒܝܳܢ ܢܰܦܫܗܽܘܢ ܐܺܝܬܰܝܗܶܝܢ.

ܡܶܛܽܠܗܳܕܶܐ ܦܰܘܠܽܘܤ ܟܰܕ ܠܨܶܒܝܳܢܳܐ ܕܰܐ‌ܠܳܗܶܗ ܘܡܰܠܦܳܢܶܗ ܡܶܬܬܦܺܝܤ ܗ̱ܘܳܐ܆ ܠܰܘ ܐܳ‌ܠܽܘܨܳܐܺܝܬ܆ ܐܶܠܳܐ ܒܳܐܕܫܳܐ ܕܡܶܠܟܳܐ ܠܡܰܪܬܝܳܢܽܘܬܳܐ ܕܡܶܛܽܠܗܳܕܶܐ ܟܳܬܶܒ. ܘܡܰܠܶܦ ܗܳܟܰܢܳܐ. ܡܶܛܽܠ ܕܶܝܢ ܒܬܽܘ̈ܠܶܐ܆ ܦܽܘܩܕܳܢܳܐ ܕܡܳܪܝܳܐ ܠܰܝܬ ܠܺܝ. ܡܶܠܟܳܐ ܕܶܝܢ ܝܳܗܶܒ ܐ̱ܢܳܐ. ܘܡܳܢܳܐ ܡܶܠܟܳܐ ܝܳܗܶܒ ܐܰܢ̱ܬ ܐܶܡܰܪ܆ ܛܳܒ ܠܓܰܒܪܳܐ ܕܒܰܐܢ̱ܬܬܳܐ܆ ܠܳܐ ܢܶܓܫܽܘܦ. ܘܬܽܘܒ. ܛܳܒ ܠܓܰܒܪܳܐ ܕܗܳܟܰܢܳܐ ܢܶܗܘܶܐ. ܐܰܣܺܝܪ ܐܰܢ̱ܬ ܒܰܐܢ̱ܬܬܳܐ ܠܳܐ ܬܶܒܥܶܐ ܫܪܳܝܳܐ. ܫܪܶܐ ܐܰܢ̱ܬ ܡܶܢ ܐܰܢ̱ܬܬܳܐ܆ ܠܳܐ ܬܶܒܥܶܐ ܐܰܢ̱ܬܬܳܐ. ܐܶܢ ܕܶܝܢ ܐܳܦ ܬܶܙܕܰܘܰܓ܆ ܠܳܐ ܚܛܰܝܬ. ܘܶܐܢ ܬܶܙܕܰܘܰܓ ܒܬܽܘܠܬܳܐ܆ ܠܳܐ ܚܛܳܬ̣. ܐܽܘܠܨܳܢܳܐ ܓܶܝܪ ܒܒܶܣܪܳܐ܆ ܢܶܗܘܶܐ ܠܗܽܘܢ ܠܗܳܢܽܘܢ ܕܕܰܐܝܟ ܗܳܠܶܝܢ. ܐܶܢܳܐ ܕܶܝܢ ܥܠܰܝܟܽܘܢ ܚܳܐܶܤ ܐ̱ܢܳܐ^[6]. ܐܽܘܠܨܳܢܳܐ ܕܶܝܢ ܕܒܶܣܪܳܐ ܩܪܳܐ܆ ܠܗܰܘ ܡܳܐ ܕܥܰܡ ܡܰܪ̈ܢܝܳܬܳܐ ܘܥܰܡ̈ܠܶܐ ܥܳܠ̈ܡܳܢܳܝܶܐ ܕܙܽܘܘܳܓܳܐ ܐܰܟܚܕܳܐ ܟܕܺܝܢ. ܐܳܦ ܓܶܝܪ ܗܰܘ ܕܺܐܝܬܰܘܗ̱ܝ ܐܳܡܰܪ ܠܳܐ ܡܙܰܘܓܳܐ܆ ܪܳܢܶܐ ܗܳܠܶܝܢ ܕܡܳܪܝܳܐ ܕܰܐܝܟܰܢܳܐ ܢܶܫܦܰܪ ܠܡܳܪܝܳܐ܆ ܗܰܘ ܕܶܝܢ ܕܶܐܙܕܰܘܰܓ ܪܳܢܶܐ ܗܳܠܶܝܢ ܕܥܳܠܡܳܐ܆ ܕܰܐܝܟܰܢܳܐ ܢܶܫܦܰܪ ܠܰܐܢ̱ܬܬܳܐ܆^[7] ܘܠܰܘ ܐܰܝܟܰܢܳܐ ܕܡܶܢ ܗܳܪܟܳܐ ܐܰܝܟ ܡܣܰܝܒܳܐ ܘܠܳܐ ܕܰܟܝܳܐ ܬܶܢܰܕ ܠܶܗ ܠܐ̱ܢܳܫ ܡܶܢ ܙܽܘܘܳܓܳܐ. ܟܽܠܶܗ ܗܳܢܳܐ ܓܶܝܪ ܝܳܕܰܥ ܠܶܗ ܕܰܟܝܳܐ܆ ܐܰܝܟܰܢܳܐ ܕܳܐܦ ܢܺܐܡܰܪ ܥܰܠ ܙܽܘܘܳܓܳܐ ܕܓܰܒܪܳܐ ܠܳܐ ܡܗܰܝܡܢܳܐ ܘܕܰܐܢ̱ܬܬܳܐ ܡܗܰܝܡܰܢܬܳܐ܆ ܐܰܘ ܗܳܝ ܕܰܒܗܶܦܟܳܐ܆ ܡܩܰܕܰܫ ܗ̱ܘ ܓܶܝܪ ܓܰܒܪܳܐ ܗܰܘ ܠܳܐ ܡܗܰܝܡܢܳܐ ܒܰܐܢ̱ܬܬܐ܆ ܘܰܡܩܰܕܫܳܐ ܗ̱ܝ ܐܰܢ̱ܬܬܳܐ ܗܳܝ ܠܳܐ ܡܗܰܝܡܰܢܬܳܐ ܒܓܰܒܪܳܐ܆ ܘܶܐܢܕܶܝܢ ܠܳܐ ܒܢܰܝ̈ܟܽܘܢ ܡܳܕܶܝܢ ܛܰܡ̈ܶܐܐ ܐܺܝܬܰܝܗܽܘܢ܆ ܗܳܫܳܐ ܕܶܝܢ ܩܰܕܺܝ̈ܫܶܐ ܐܺܝܬܰܝܗܽܘܢ.^[8] ܘܰܒܕܽܘܟܬܳܐ ܐ̱ܚܪܺܬܳܐ ܟܳܬܶܒ܆ ܡܝܰܩܰܪ ܗ̱ܘ̣ ܙܽܘܘܳܓܳܐ ܒܟܽܠܗܶܝܢ. ܘܥܰܪܣܗܽܘܢ ܕܰܟܝܳܐ ܗܝ^[9].

ܟܰܕ ܗܳܕܶܐ ܨܳܒܶܐ ܕܢܰܘܕܰܥ ܒܗܽܘܢ ܒܣܽܘܥܪ̈ܳܢܶܐ ܘܢܰܠܶܦ ܓܰܠܝܳܐܺܝܬ܆ ܕܕܰܟܝܰܐ ܗ̱ܘ ܙܽܘܘܳܓܳܐ܆ ܘܰܕܠܳܐ ܣܳܟ ܦܳܪܶܫ ܡܶܢ ܐܰ‌ܠܳܗܳܐ. ܘܳܐܦ ܗܽܘ ܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ ܗܰܘ ܕܡܶܢ ܒܬܽܘܠܬܳܐ ܒܰܒܣܰܪ ܐܶܬܺܝܠܶܕ܆ ܘܰܒܬܽܘܠܬܳܐ ܢܰܛܪܳܗ̇ ܠܗܳܝ ܕܺܝܠܶܕܬ̣ܶܗ ܘܳܐܦ ܡܶܢ ܒܳܬܰܪ ܝܰܠܕܳܐ܆ ܘܠܽܐܘܪܚܳܐ ܗܳܝ ܕܰܒܬܽܘܠܽܘܬܳܐ ܚܰܘܺܝ ܘܦܰܬܺܝ ܠܚܰܝ̈ܶܐ ܕܥܳܠܡܳܐ܆ ܠܡܶܫܬܽܘܬܳܐ ܗܳܝ ܕܰܒܩܳܛܢܶܐ ܕܰܓܠܺܝܠܳܐ ܚܰܕܺܝ. ܟܰܕ ܩܰܪܝܒܳܐ ܗ̱ܘܳܬ ܠܬܰܡܳܢ ܐܳܦ ܒܬܽܘܠܬܳܐ ܐܶܡܶܗ܆ ܐܳܦ ܬܰܠܡܺܝܕܰܘ̈ܗ̱ܝ. ܩܪܶܝܢ ܗ̱ܘܰܘ ܓܶܝܪ ܒܪܳܚܡܽܘܬܳܐ ܡܶܕܶܡ ܐ̱ܢܳܫܳܝܬܳܐ ܘܒܰܐܚܝܳܢܽܘܬܳܐ ܐܰܝܟ ܐ̱ܢܳܫܺܝ̈ܢ ܕܡܰܘܕܰܥܬܳܐ. ܘܗܰܘ ܕܰܠܟܽܠ ܒܚܶܟܡܬܳܐ ܥܳܒܶܕ܆ ܐܶܫܬܡܰܥ ܡܕܰܒܪܳܢܳܐܺܝܬ܆ ܟܰܕ ܡܒܰܪܶܟ ܠܳܗ̇ ܠܡܶܫܬܽܘܬܳܐ܆ ܐܰܝܟܰܢܳܐ ܕܳܐܦ ܒܳܗ̇ ܠܳܐܬܳܐ ܘܰܠܬܶܕܡܽܘܪܬܳܐ ܩܰܕܡܳܝܬܳܐ ܢܶܣܥܽܘܪ. ܘܰܠܗܳܕܶܐ ܐܶܫܬܰܥܺܝ ܝܽܘܚܰܢܳܢ ܒܰܠܚܽܘܕܰܘܗ̱ܝ ܗܰܘ ܬܶܐܽܘܠܽܘܓܽܘܤ ܠܒܰܪ ܡܶܢ ܗܳܠܶܝܢ ܐܶܘܰܢܓ̈ܶܠܺܝܣܛܶܐ ܐ̱ܚܪ̈ܳܢܶܐ܆ ܗܰܘ ܕܰܒܬܽܘܠܽܘܬܳܐ ܐܶܬܥܰܢܘܺܝ܆ ܘܟܰܕ ܠܳܐ ܛܰܥܡܳܗ̇ ܠܫܰܘܬܳܦܽܘܬܳܐ ܕܙܽܘܘܳܓܳܐ ܫܰܡܠܺܝ ܟܽܠܗܽܘܢ ܚܰܝܰܘ̈ܗ̱ܝ܆ ܘܝܰܬܺܝܪܳܐܺܝܬ ܘܝܺܕܺܝܥܳܐܺܝܬ ܪܚܺܝܡ ܗ̱ܘܳܐ ܠܝܶܫܽܘܥ. ܘܟܰܕ ܛܳܒ ܐܶ‌ܠܽܘ ܢܕܺܝܕܳܐ ܐܺܝܬܰܘܗ̱ܝ ܗ̱ܘܳܐ ܙܽܘܘܳܓܳܐ܆ ܙܳܕܶܩ ܗ̱ܘܳܐ ܠܶܗ ܕܰܒܫܶܬܩܳܐ ܢܶܥܒܪܺܝܘܗ̱ܝ ܠܗܳܢܳܐ܆ ܡܶܛܽܠ ܗܳܢܽܘܢ ܕܥܳܪܩܺܝܢ ܡܶܢ ܫܰܘܬܳܦܽܘܬܳܐ ܕܙܽܘܘܳܓܳܐ܆ ܘܰܠܘܳܬ ܡܕܰܡܝܳܢܽܘܬܳܐ ܗܳܝ ܕܡܰܠܰܐܟ̈ܶܐ ܪܳܕܦܺܝܢ. ܐܶܠܳܐ ܢܶܚܙܶܐ ܡܳܢܳܐ ܗܝ ܗܺܝ ܐܳܬܳܐ܆ ܗܳܝ ܟܺܝܬ ܕܰܥܒܰܕ ܝܶܫܽܘܥ ܟܰܕ ܝܰܩܰܪ ܠܡܶܫܬܽܘܬܳܐ.

ܟܰܕ ܚܣܰܪ ܐܳܡܰܪ ܚܰܡܪܳܐ܆ ܐܳܡܪܳܐ ܐܶܡܶܗ ܕܝܶܫܽܘܥ ܠܘܳܬܶܗ. ܚܰܡܪܳܐ ܠܰܝܬ ܠܗܽܘܢ^[10]. ܡܶܢ ܗܳܕܶܐ ܝܺܕܺܝܥܳܐ܆ ܕܠܰܘ ܡܶܕܶܡ ܪܰܒܳܐ ܐܰܘ ܦܐܶܐ ܠܰܐܠܳܗܳܐ ܡܶܬܪܰܥܶܝܢ ܗ̱ܘܰܘ ܡܶܛܽܠܳܬܶܗ ܗܳܢܽܘܢ ܕܰܩܪܰܐܘܗ̱ܝ ܠܡܶܫܬܽܘܬܳܐ. ܐܳܦ ܓܶܝܪ ܠܗܽܘܢ ܙܳܕܶܩ ܗ̱ܘܳܐ܆ ܐܶ‌ܠܽܘ ܟܺܝܬ ܐܰܝܟ ܕܫܳܘܶܐ ܡܶܬܪܰܥܶܝܢ ܗ̱ܘܰܘ܆ ܕܢܶܫܶܐܠܽܘܢ ܡܶܢܶܗ ܕܚܰܣܺܝܪܽܘܬܳܐ ܕܚܰܡܪܳܐ ܬܶܬܡܰܠܶܐ. ܡܦܺܝܤ ܓܶܝܪ ܗܰܘ ܕܺܐܝܬ ܠܶܗ ܣܽܘܢܩܳܢܳܐ܆ ܕܢܶܫܬܘܶܐ ܠܗܳܝ ܕܰܣܢܺܝܩ. ܐܶܠܳܐ ܗܳܝ ܟܺܝܬ ܕܶܐܡܪܶܬ܆ ܟܰܕ ܐ̱ܢܳܫܳܐܺܝܬ ܝܳܕܥܺܝܢ ܗ̱ܘܰܘ ܠܶܗ܆ ܩܪܳܝܬܳܐ ܕܰܠܡܶܫܬܽܘܬܳܐ ܥܒܰܕܘ. ܟܰܕ ܒܪܰܘܡܳܐ ܕܰܐ‌ܠܳܗܽܘܬܶܗ ܘܠܳܐ ܣܳܟ ܐܰܕܺܝܩܘ.

ܟܰܕ ܕܶܝܢ ܡܰܪܝܰܡ ܡܶܢ ܬܰܪܥܺܝܬܳܐ ܡܪܰܚܡܳܢܺܝܬܳܐ ܠܘܳܬ ܣܢܺܝܩܽܘܬܗܽܘܢ ܕܗܳܢܽܘܢ ܐܶܬܪܰܟܢܰܬ܆ ܘܰܡܩܰܪܒܳܐ ܗ̱ܘܳܬ ܫܶܐܠܬܳܐ܆ ܙܳܢܶܩ ܠܳܗ̇ ܠܗܳܕܶܐ܆ ܐܰܝܟܰܢܳܐ ܕܠܳܐ ܢܶܣܬܒܰܪ ܕܫܽܘܒܚܳܐ ܣܪܺܝܩܳܐ ܡܨܰܝܶܕ ܠܶܗ܆ ܘܥܰܡ ܐܶܡܶܗ ܡܶܬܗܰܓܝܳܐ ܗ̱ܘܳܬ ܠܶܗ ܗܳܕܶܐ ܡܶܬܚܙܰܘܙܝܳܢܽܘܬܳܐ܆ ܐܰܝܟ ܕܗܳܝ ܡܰܢ ܬܶܣܬܒܰܪ ܕܫܶܐܠܰܬ ܐܶܣܟܺܡܬܳܢܳܐܺܝܬ܆ ܗܽܘ ܕܶܝܢ ܦܫܺܝܩܳܐܺܝܬ ܢܶܪܗܰܛ ܥܰܠ ܡܚܰܘܝܳܢܽܘܬܳܐ ܕܳܐܬܘ̈ܳܬܳܐ. ܟܰܕ ܡܶܢ ܗܳܕܶܐ ܕܶܝܢ ܡܰܟܠܳܢܽܘܬܳܐ ܠܪܽܘܚܩܳܐ ܕܳܚܶܩ ܗ̱ܘܳܐ ܠܗܽܘܢ ܠܗܳܢܽܘܢ ܕܫܳܡܥܺܝܢ ܗ̱ܘܰܘ܆ ܘܰܡܚܰܘܶܐ ܗ̱ܘܳܐ ܕܠܰܘ ܡܶܬܚܙܰܘܙܝܳܢܳܐܺܝܬ ܐܶܠܳܐ ܝܰܨܽܘܦܬܳܢܳܐܺܝܬ ܘܡܰܘܬܪܳܢܳܐܺܝܬ ܟܽܠܗܶܝܢ ܥܳܒܶܕ ܗ̱ܘܳܐ܆ ܐܳܦ ܝܰܬܺܝܪ ܩܰܫܝܳܐܺܝܬ ܡܦܰܢܶܐ ܠܘܳܬܳܗ̇ ܦܶܬܓܳܡܳܐ. ܟܰܕ ܠܗܳܢܽܘܢ ܕܫܳܡܥܺܝܢ ܗ̱ܘܰܘ ܗܳܝ ܟܺܝܬ ܕܶܐܡܪܶܬ ܪܳܕܶܐ ܗ̱ܘܳܐ ܘܡܰܠܶܦ ܗܳܝ ܕܫܰܪܺܝܪܳܐ܆ ܘܠܰܘ ܟܰܕ ܠܗܳܝ ܨܳܒܶܐ ܗ̱ܘܳܐ ܕܰܢܫܺܝܛ. ܡܳܐ ܠܺܝ ܘܠܶܟܝ ܐܰܢ̱ܬܬܳܐ܆ ܠܳܐ ܥܕܰܟܺܝܠ ‌ܐܶܬ̣ܳܬ̣ ܫܳܥܬܳܐ ܕܺܝܠܝ^[11].

ܕܠܰܘ ܓܶܝܪ ܟܳܐܬܳܐ ܐܺܝܬܰܝܗܶܝܢ ܗ̱ܘܰܝ̈ ܗܳܠܶܝܢ ܡ̈ܶܠܶܐ܆ ܙܢܳܐ ܕܶܝܢ ܪܳܕܽܘܝܳܐ ܡܶܛܽܠ ܗܳܢܽܘܢ ܕܡܶܢ ܠܒܰܪ܆ ܐܰܘܕܥܰܬ ܐܶܡܶܗ. ܐܳܦ ܓܶܝܪ ܠܰܘ ܐܰܝܟ ܐܰܝ̇ܕܳܐ ܕܶܐܬܟܰܐܺܝ ܒܳܗ̇ ܐܶܬܩܰܦܣܰܬ ܘܟܶܘܙܰܬ܆ ܘܰܐܝܟ ܐܰܝ̇ܕܳܐ ܕܶܐܬܥܰܕܠܰܬ܆ ܫܶܬܩܳܐ ܐܰܝܬܝܰܬ ܘܶܐܬܬܰܘܝܰܬ ܡܶܛܽܠ ܣܦܺܝܦܽܘܬܐ^[12]. ܐܶܠܳܐ ܟܰܕ ܡܦܳܣܳܐ ܗ̱ܘܳܬ ܒܪܽܘܚܳܐ ܗܳܝ ܕܡܶܬܕܰܒܪܳܐ ܗ̱ܘܳܬ܆ ܐܰܝܟ ܗܰܘ ܕܘܠܳܐ ܡܶܕܶܡ ܟܽܠ ܟܽܠܶܗ ܐܶܬܶܐܡܰܪ ܡܶܢ ܝܶܫܽܘܥ܆ ܐܳܡܪܳܐ ܠܗܽܘܢ ܠܰܡܫܰܡ̈ܫܳܢܶܐ. ܗܰܘ ܡܶܕܶܡ ܕܳܐܡܰܪ ܠܟܽܘܢ ܥܒܶܕܘ^[13]܆ ܟܰܕ ܨܳܒܝܳܐ ܗ̱ܘܳܬ ܕܳܐܦ ܡܶܕܶܡ ܕܝܰܬܺܝܪ ܪܰܒ ܘܰܕܝܰܬܺܝܪ ܐܺܝܬܰܘܗ̱ܝ ܦܐܶܐ ܠܰܐܠܳܗܳܐ ܢܚܰܘܶܐ. ܘܟܰܕ ܠܘܳܬ ܗܳܕܶܐ ܬܰܪܥܺܝܬܳܐ ܕܺܝܠܳܗ̇܆ ܗܳܝ ܕܗܳܠܶܝܢ ܝܰܬܺܝܪ ܪܰܘܪ̈ܒܳܢ ܡܶܬܗܰܓܓܳܐ ܗ̱ܘܳܬ ܡܶܬܠܰܚܰܡ^[14] ܗ̱ܘܳܐ܆ ܐܶܡܰܪ. ܠܳܐ ܥܕܰܟܺܝܠ ‌ܐܶܬ̣ܳܬ̣ ܫܳܥܬܐ ܕܺܝܠܝ¹. ܣܳܒܪܳܐ ܐܰܢ̱ܬ ܠܶܟܝ ܐܳܡܰܪ܆ ܕܡܶܢ ܫܶܠܝ ܪܳܗܶܛ ܐ̱ܢܳܐ ܠܘܳܬ ܡܰܥܒܕܳܢܽܘܬܳܐ ܕܳܐܬܘ̈ܳܬܐ ܪܰܘܪ̈ܒܳܬܳܐ܆ ܐܶܠܳܐ ܕܰܥܝ ܕܗܳܠܶܝܢ ܒܙܰܒ̈ܢܶܐ ܕܙܳܕܩܺܝܢ ܡܶܬܦܰܪ̈ܢܣܳܢ܆ ܐܰܝܟܰܢܳܐ ܕܳܐܦܠܳܐ ܡܢܳܬܳܐ ܡܶܕܶܡ ܙܥܽܘܪܬܳܐ ܕܫܳܥܬܳܐ܆ ܠܒܰܪ ܡܶܢ ܒܛܺܝܠܽܘܬܳܐ ܘܰܡܕܰܒܪܳܢܽܘܬܳܐ ܕܺܝܠܝ ܬܶܦܶܠ. ܐܳܦ ܓܶܝܪ ܡܣܰܩܡܳܐܺܝܬ ܠܽܘܩܒܰܠ ܬܰܪܒܺܝܬܳܐ ܕܩܰܘܡܬܳܐ ܦܰܓܪܳܢܳܝܬܳܐ܆ ܒܩܰܠܺܝܠ ܩܰܠܺܝܠ ܡܚܰܘܶܐ ܐ̱ܢܳܐ ܠܰܐܠܳܗܽܘܬܳܐ ܕܺܝܠܝ. ܘܡܶܣܬܒܰܪ ܐ̱ܢܳܐ ܕܪܳܒܶܐ ܐ̱ܢܳܐ ܥܰܡ ܫܽܘܘܫܳܛܳܐ ܫܰܪܺܝܪܳܐ ܕܩܰܘܡܬܳܐ܆ ܐܳܦ ܒܚܶܟܡܬܳܐ ܘܳܐܦ ܡܛܰܝܒܽܘܬܳܐ ܕܬܶܕܡܪ̈ܳܬܳܐ ܘܰܕܚܰܝ̈ܠܶܐ^[15]܆ ܒܗܳܝ ܕܦܰܐܝܽܘܬ ܐܰ‌ܠܳܗܳܐܺܝܬ ܡܰܢ ܠܗܳܠܶܝܢ ܡܫܰܟܶܢ ܐ̱ܢܳܐ܆ ܒܺܐܝܕܳܐ ܒܺܐܝܕܳܐ ܕܶܝܢ ܒܪܰܡ ܡܰܘܕܰܥ ܐ̱ܢܳܐ܆ ܐܰܝܟܰܢܳܐ ܕܗܽܘ ܙܢܳܐ ܕܰܡܕܰܒܪܳܢܽܘܬܳܐ ܬܳܒܰܥ܆ ܥܕܰܡܳܐ ܐܳܦ ܠܰܪܦܳܦܳܐ ܠܳܐ ܡܶܬܦܰܣܩܳܢܳܐ ܕܙܰܒܢܳܐ. ܗܳܠܶܝܢ ܓܶܝܪ ܕܰܡܕܰܒܪ̈ܳܢܘܳܬܳܐ ܐܰ‌ܠܳܗܳܝ̈ܳܬܳܐ܆ ܐܳܦ ܠܘܳܬ ܗܳܠܶܝܢ ܕܝܰܬܺܝܪ ܡܶܢ ܟܽܠ ܩܰܛܺܝ̈ܢܳܢ ܘܕܰܩܺܝ̈ܩܳܢ ܗܳܘ̈ܝܳܢ^[16]܆ ܐܳܦܶܢ ܠܳܐ ܝܺܕܺܝ̈ܥܳܬܳܐ ܐܺܝܬܰܝܗܶܝܢ ܠܰܢ ܟܽܠ ܟܽܠܶܗ܆ ܘܰܕܥܰܣ̈ܩܳܢ ܕܢܶܬܕܰܪ̈ܟܳܢ.

ܐܰܝܟ ܗܳܢܳܐ ܣܽܘܟܳܠܳܐ܆ ܐܳܦ ܒܕܽܘܟܬܳܐ ܐ̱ܚܪܺܬܳܐ ܕܶܐܘܰܢܓܶܠܺܝܽܘܢ ܣܺܝܡܳܐ ܡܶܛܽܠ ܝܽܗ̱ܘ̈ܕܳܝܶܐ܆ ܘܠܳܐ ܐ̱ܢܳܫ ܐܰܪܡܺܝ ܥܠܰܘܗ̱ܝ ܐܺܝܕܳܐ܆ ܡܶܛܽܠ ܕܠܳܐ ܐܰܬܺܝ̣ܝ̣ܳܐ ܗ̱ܘܳܬ ܫܳܥܬܶܗ^[17]. ܘܰܒܕܽܘܟܬܳܐ ܐ̱ܚܪܺܬܳܐ ܬܽܘܒ܆ ܘܠܳܐ ܐ̱ܢܳܫ ܨܳܕܶܗ܆ ܡܶܛܽܠ ܕܠܳܐ ܥܕܰܟܺܝܠ ‌ܐܰܬܺܝ̣ܝ̣ܳܐ ܗ̱ܘܳܬ ܫܳܥܬܶܗ^[18]. ܐܳܦ ܟܺܝܬ ܐܶܬ̣ܳܬ̣ ܫܳܥܬܳܐ܆ ܐܰܝܟܰܢܳܐ ܕܢܶܫܬܰܒܰܚ ܒܪܶܗ ܕܐ̱ܢܳܫܳܐ^[19]. ܥܕܰܡܳܐ ܓܶܝܪ ܕܬܶܫܬܰܠܰܡ ܗ̱ܘܳܬ ܡܕܰܒܪܳܢܽܘܬܳܐ ܠܘܳܬ ܣܳܟܳܐ ܗܰܘ ܪܺܝܫܳܝܳܐ܆ ܘܳܐܦܠܳܐ ܡܶܕܶܡ ܢܦܽܘܫ ܗ̱ܘܳܐ ܡܶܢ ܗܳܠܶܝܢ ܕܩܰܕܺܝ̈ܡܳܢ ܝܺܕܺܝ̈ܥܳܢ ܗ̱ܘܰܝ̈ ܠܶܗ ܘܰܦܪ̈ܺܝܫܳܢ ܐܰܝܟ ܕܰܠܚܶܟܡܬܳܐ ܕܰܐ‌ܠܳܗܳܐ܆ ܘܳܐܦܠܳܐ ܠܚܰܕ ܐ̱ܢܳܫ ܟܽܠ ܟܽܠܶܗ ܐܺܝܬܰܘܗ̱ܝ ܗ̱ܘܳܐ ܠܳܐ ܡܶܬܬܰܚܕܳܢܳܐ. ܐܶܠܳܐ ܐܳܦ ܒܰܡܨܰܥܬܗܽܘܢ ܟܕ ܟܺܐܦ̈ܶܐ ܪܳܡܶܝܢ ܗ̱ܘܰܘ ܥܠܰܘܗ̱ܝ ܥܳܒܰܪ ܗ̱ܘܳܐ^[20]. ܟܰܕ ܕܶܝܢ ܠܘܳܬ ܣܰܘܦܳܐ ܐܶܬܰܝ̈ ܗ̱ܘܰܝ̈ ܟܽܠܗܶܝܢ ܘܰܐܟܚܕܳܐ ܐܶܬܡܰܠ̈ܶܝܢ܆ ܘܰܠܘܳܬܳܗ̇ ܕܶܐܫܬܳܐ ܐܰܝܟ ܐ̱ܢܳܫ ܢܺܐܡܰܪ ܐܶܫܬܰܡ̈ܠܶܝܢ܆ ܗܳܠܶܝܢ ܟܺܝܬ ܕܠܶܗ ܠܗܰܘ ܕܰܡܕܰܒܰܪ ܗ̱ܘܳܐ ܕܫܰܦܺܝܪ ܐܺܝܬ ܠܗܶܝܢ ܐܶܣܬܰܒܪ̈ܶܝܢ ܘܰܡܫܰܡܠܝܳܐܺܝܬ܆ ܗܳܝܕܶܝܢ ܟܺܝܬ ܗܳܝܕܶܝܢ܆ ܐܰܫܠܶܡ ܗܽܘ ܠܶܗ ܨܶܒܝܳܢܳܐܺܝܬ ܗܰܘ ܕܳܐܡܰܪ ܗ̱ܘܳܐ܆ ܕܫܽܘܠܛܳܢܳܐ ܐܺܝܬ ܠܺܝ ܕܶܐ݀ܣܺܝܡ ܢܰܦܫܝ܆ ܘܫܽܘܠܛܳܢܳܐ ܐܺܝܬ ܠܺܝ ܬܽܘܒ ܕܶܐ݀ܣܒܺܝܗ̇܆ ܘܠܳܐ ܐ̱ܢܳܫ ܢܳܣܶܒ ܠܳܗ̇ ܡܶܢܝ܆ ܐܶܠܳܐ ܐܶܢܳܐ ܣܳܐܶܡ ܐ̱ܢܳܐ ܠܳܗ̇ ܡܶܢ ܨܒܽܘܬ ܢܰܦܫܝ^[21]. ܗܳܠܶܝܢ ܕܶܝܢ ܠܳܐ ܐܳܡܰܪ ܗ̱ܘܳܐ܆ ܐܶ‌ܠܽܘ ܟܺܝܬ ܠܰܐܢܰܢ̈ܩܰܐܤ ܕܫܳܥ̈ܶܐ ܡܫܰܥܒܕ ܗ̱ܘܳܐ܆ ܐܰܝܟ ܠܳܐ ܡܦܺܝܣܳܢܽܘܬܳܐ ܗܳܝ ܕܰܫܛܽܘܪ̈ܘܳܬܳܐ ܚܰܢ̈ܦܳܝܳܬܳܐ. ܒܰܕܓܽܘܢ ܐܳܦ ܟܰܕ ܠܘܳܬ ܐܶܡܶܗ ܐܶܡܰܪ ܡܶܛܽܠ ܥܶܠܬܳܐ ܗܳܝ ܕܶܐܡܪܶܬ܆ ܠܗܳܝ ܕܠܳܐ ܥܕܰܟܺܝܠ ‌ܐܶܬ̣ܳܬ̣ ܫܳܥܬܳܐ ܕܺܝܠܝ܆ ܡܶܚܕܳܐ ܒܰܪܫܳܥܬܶܗ ܥܒܰܕ ܐܳܬ̣ܳܐ. ܗܳܝ ܟܺܝܬ ܕܺܐܝܬܶܝܗ̇ ܗ̱ܘܳܬ ܘܠܳܐ ܣܳܟ܆ ܕܗܰܘ ܕܡܶܫܬܰܥܒܰܕ ܠܰܢܛܽܘܪܬܳܐ ܕܫܳܥ̈ܶܐ. ܐܰܟܚܕܳܐ ܕܶܝܢ ܒܝܕ ܗܳܕܶܐ ܪܳܕܶܐ ܘܡܰܠܶܦ܆ ܕܶܐܢ ܐܳܦ ܒܰܙܒܰܢ ܠܶܐܡ̈ܗܳܬܳܐ ܕܺܝܠܰܢ ܠܒܰܪ ܡܶܢ ܙܰܒܢܳܐ ܦܳܩ̈ܕܳܢ ܡܶܕܶܡ ܠܳܐ ܢܶܫܬܡܰܥ܆ ܐܳܦܶܢ ܗܽܘ ܟܦܽܘܪܝܳܐ^[22] ܗܝ ܕܘܳܠܝܳܐ ܘܫܰܦܺܝܪܳܐ ܟܡܳܐ ܟܡܳܐ ܢܶܣܬܒܰܪ ܕܺܐܝܬ ܠܶܗ܆ ܡܶܚܕܳܐ ܒܰܪܫܳܥܬܶܗ ܢܢܺܝܚ ܐܶܢܶܝܢ ܥܰܡ ܗܳܝ ܕܙܳܕܩܳܐ܆ ܐܰܘ ܒܗܳܝ ܕܗܺܝ ܗܳܕܶܐ ܥܳܒܕܺܝܢܰܢ ܗܳܝ ܟܺܝܬ ܕܰܦܩ̈ܰܕܶܝܢ܆ ܐܰܘ ܒܝܰܕ ܐܽܘܪܚܳܐ ܐ̱ܚܪܺܬܳܐ܆ ܘܠܳܐ ܢܰܗܡܶܐ ܒܗܶܝܢ ܣܳܟ ܟܰܕ ܡܶܬܬܥܺܝ̈ܩܳܢ. ܝܰܩܰܪ ܓܶܝܪ ܐܳܡܰܪ ܠܰܐܒܽܘܟ ܘܠܶܐܡܳܟ ܐܰܝܟܰܢܳܐ ܕܫܰܦܺܝܪ ܢܶܗܘܶܐ ܠܳܟ܆ ܘܬܶܗܘܶܐ ܢܰܓܺܝܪ ܙܰܒܢܳܐ ܥܰܠ ‌ܐܰܪܥܳܐ^[23].

ܡܶܫܟܰܚ ܕܶܝܢ ܐ̱ܢܳܫ ܟܰܕ ܝܰܬܺܝܪ ܚܰܬܺܝܬ̣ܳܐܺܝܬ ܡܒܰܚܶܢ ܠܶܗ ܠܦܶܬܓܳܡܳܐ܆ ܕܗܺܝ ܝܳܠܕܰܬ ܐܰ‌ܠܳܗܳܐ ܐܳܦ ܡܶܢ ܒܳܬܰܪ ܝܰܠܕܳܐ܆ ܘܳܐܦ ܡܶܢ ܐܶܡܰܬܝ ܕܰܠܐ̱ܪܳܙܳܐ ܕܰܡܕܰܒܪܳܢܽܘܬܳܐ ܫܰܡܫܰܬ܆ ܡܠܺܝܬܳܐ ܐܺܝܬܶܝܗ̇ ܗ̱ܘܳܬ ܡܶܢ ܪܽܘܚܳܐ ܩܰܕܺܝܫܳܐ܆ ܘܩܰܕܺܝܡܳܐ ܗ̱ܘܳܬ ܝܳܕܥܳܐ ܠܗܳܝ ܕܰܥܬܺܝܕܳܐ. ܢܒܺܝܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ܆ ܐܰܝܟܰܢܳܐ ܕܶܐܫܰܥܝܳܐ ܐܳܡܰܪ܆ ܘܩܶܪܒܶܬ ܠܘܳܬ ܢܒܺܝܬܳܐ^[24]. ܐܶܢ ܓܶܝܪ ܗܳܕܶܐ ܠܰܘ ܗܳܟܰܢܳܐ ܐܺܝܬ ܗ̱ܘܳܐ ܠܳܗ̇܆ ܐܰܝܟܰܢܳܐ ܠܳܐ ܣܳܒܪܳܐ ܗ̱ܘܳܬ܆ ܕܳܐܦ ܡܶܢ ܨܒܽܘܬ ܢܰܦܫܳܐ܆ ܘܡܶܢ ܗܳܝ ܕܠܳܐ ܐܺܝܬܰܘܗ̱ܝ܆ ܘܡܶܢ ܡܶܕܶܡ ܠܳܐ ܡܶܬܚܰܙܝܳܢܳܐ܆ ܡܶܫܟܰܚ ܗ̱ܘܳܐ ܝܶܫܽܘܥ ܠܡܰܝܬܳܝܽܘ ܚܰܡܪܳܐ ܠܰܡܨܰܥܬܳܐ. ܐܶܠܳܐ ܡܶܛܽܠ ܟܺܝܬ ܕܩܰܕܺܝܡܳܐ ܝܳܕܥܳܐ ܠܗܳܝ ܕܰܥܬܺܝܕܳܐ ܗ̱ܘܳܬ ܕܬܶܗܘܶܐ܆ ܘܕܰܥܬܺܝܕ ܝܶܫܽܘܥ ܠܡܶܦܩܰܕ ܠܗܽܘܢ ܠܰܡܫܰܡ̈ܫܳܢܶܐ ܕܢܶܕܠܽܘܢ ܡܰܝ̈ܳܐ܆ ܐܰܝܟܰܢܳܐ ܕܗܳܟܰܢܳܐ ܠܚܰܡܪܳܐ ܢܫܰܚܠܶܦ ܐܶܢܽܘܢ܆ ܩܳܕܡܳܐ ܗ̱ܘܳܬ ܦܳܩܕܳܐ ܠܗܽܘܢ ܐܳܦ ܗܺܝ ܟܰܕ ܐܳܡܪܳܐ܆ ܗܰܘ ܡܳܐ ܕܶܐܢ ܢܺܐܡܰܪ ܠܟܽܘܢ ܥܒܶܕܘ^[25]. ܗܳܟܰܢܳܐ ܓܰܘܳܢܳܝܬܳܐ ܡܶܕܶܡ ܐܺܝܬܶܝܗ̇ ܗ̱ܘܳܬ ܩܰܕܷܺܝܡܽܘܬ ܝܺܕܰܥܬܳܐ܆ ܥܰܠ ܗܰܘ ܡܳܐ ܕܰܥܬܺܝܕ ܗ̱ܘܳܐ ܕܢܶܗܘܶܐ܆ ܕܝܶܫܽܘܥ ܐܳܦ ܕܺܝܠܳܗ̇. ܕܗܰܘ ܡܰܢ ܐܰܝܟ ܕܰܐ‌ܠܳܗܳܐ܆ ܕܗܳܝ ܕܶܝܢ ܐܰܝܟ ܕܰܐܝ̇ܕܳܐ ܕܡܶܬܬܰܥܒܕܳܐ ܒܰܕܡܽܘܬ ܢܒܺܝܬܳܐ. ܨܒܳܐ ܗ̱ܘܳܐ ܓܶܝܪ ܘܰܒܝܰܕ ܫܩܳܠ ܛܰܥܢܳܐ ܥܰܒܕܳܗ̇܆ ܕܰܠܟܽܠܳܗ̇ ܡܰܣܒܪܳܢܽܘܬܳܐ ܕܦܰܢܛܰܣܺܝܰܐ ܢܶܕܚܽܘܩ ܗ̱ܘܳܐ ܡܶܢ ܬܶܕܡܽܘܪܬܳܐ. ܐܶ‌ܠܽܘ ܓܶܝܪ ܡܶܢ ܐܽܘܛܘܡܐܛܘܢ ܡܶܕܶܡ ܗܳܢܰܘ ܕܶܝܢ ܡܶܢ ܨܒܽܘܬ ܢܰܦܫܳܐ܆ ܥܰܒܕܶܗ ܗ̱ܘܳܐ ܠܚܰܡܪܳܐ ܕܢܰܒܰܥ ܘܢܶܬܚܙܶܐ ܬܡܺܝܗܳܐܺܝܬ ܒܰܡܨܰܥܬܳܐ ܕܗܳܢܽܘܢ ܕܡܶܫܬܰܪܶܝܢ ܗ̱ܘܰܘ܆ ܡܶܬܕܰܓܰܠ ܗ̱ܘܳܐ ܠܶܗ ܘܠܳܐ ܡܶܬܗܰܝܡܰܢ ܗ̱ܘܳܐ܆ ܘܰܫܪ̈ܰܓܪܳܓܝܳܬܳܐ ܡܶܣܬܰܒܪܳܐ ܗ̱ܘܳܬ܆ ܘܡܰܛܥܝܳܢܽܘܬܳܐ ܕܥܰܝ̈ܢܶܐ ܘܕܰܛܥܳܡܬܳܐ܆ ܘܡܨܰܕܝܳܢܽܘܬܳܐ ܕܫ̈ܺܐܕܶܐ܆ ܐܰܝܟ ܐܰܝܠܶܝܢ ܕܳܐܦ ܗܳܢܽܘܢ ܥܳܒ̈ܕܰܝ ܬܶܕܡܪ̈ܳܬܳܐ ܕܰܒܡܰܫܟܢܳܐ ܡܢܰܣܶܝܢ ܠܡܶܥܒܰܕ ܡܰܛܥܝܳܢܳܐܺܝܬ܆ ܟܰܕ ܡܰܕܡܶܝܢ ܒܥܳܒܽܘܕܽܘܬ ܬܶܕܡܪ̈ܳܬܳܐ.

ܡܶܛܽܠ ܗܳܕܶܐ ܡܳܬܰܚ ܠܳܗ̇ ܠܚܰܣܺܝܪܽܘܬܳܐ ܘܡܰܓܰܪ܆ ܐܰܝܟܰܢܳܐ ܕܰܕܫܳܥܬܳܐ ܗܳܢܽܘܢ ܕܡܶܫܬܰܪܶܝܢ ܗ̱ܘܰܘ ܢܶܣܒܽܘܢ ܡܰܪܓܫܳܢܽܘܬܳܐ ܕܥܰܠ ܚܰܡܪܳܐ ܣܢܺܝܩܺܝܢ܆ ܘܗܳܟܰܢܳܐ ܐܳܦ ܠܬܶܕܡܽܘܪܬܳܐ ܠܳܐ ܢܶܥܒܪܽܘܢܳܗ̇܆ ܐܶܠܳܐ ܝܰܬܺܝܪ ܢܰܗܺܝܪܳܐܺܝܬ ܢܶܐܠܦܽܘܢܳܗ̇. ܠܰܘ ܐܰܝܟܰܢܳܐ ܕܠܰܢܛܽܘܪܬܳܐ ܕܫܳܥܬܳܐ ܢܟܰܬܰܪ܆ ܡܶܛܽܠܗܳܕܶܐ ܡܶܬܬܰܗܶܐ ܗ̱ܘܳܐ. ܐܰܝܟܰܢܳܐ ܓܶܝܪ ܥܬܺܝܕ ܗ̱ܘܳܐ ܕܰܠܘܳܬ ܥܳܗܢܽܘܬܳܐ ܕܫܳܥܬܳܐ ܢܶܗܘܶܐ ܚܳܐܰܪ ܘܰܡܣܰܟܶܐ܆ ܘܠܰܣܪܺܝܩܽܘܬܳܐ ܕܰܒܗܳܠܶܝܢ ܢܶܨܽܘܕ܆ ܗܰܘ ܥܳܒܽܘܕܳܐ ܕܥܳܠ̈ܡܶܐ^[26]. ܒܝܰܕ ܓܶܝܪ ܗܳܝ ܕܰܠܡܰܝ̈ܳܐ ܫܰܚܠܶܦ ܠܚܰܡܪܳܐ܆ ܐܳܦ ܡܶܢ ܗܳܝ ܕܰܢܗܰܓܶܓ ܩܛܺܝܓܪܳܢܽܘܬܳܐ ܥܪܰܩ. ܘܥܳܒܽܘܕܳܐ ܕܟܽܠܗܶܝܢ ܚܰܘܺܝ ܗܽܘ ܠܶܗ ܡܶܢ ܗܳܕܶܐ ܘܠܳܐ ܡܶܕܶܡ ܒܨܺܝܪ܆ ܐܰܝܟ ܕܶܐ‌ܠܽܘ ܐܳܦ ܡܶܢ ܗܳܝ ܕܠܳܐ ܐܺܝܬܰܘܗ̱ܝ ܩܰܝܡܶܗ ܗ̱ܘܳܐ ܠܚܰܡܪܳܐ. ܗܰܘ ܓܶܝܪ ܕܳܐܦ ܒܝܰܕ ܡܶܨܥܳܝܽܘܬܳܗ̇ ܕܰܓܦܶܬܳܐ܆ ܠܛܰܠܳܐ ܗܰܘ ܕܠܰܘ ܡܶܕܶܡ ܐ̱ܚܪܺܢܳܐ ܐܺܝܬܰܘܗ̱ܝ ܐܶܠܳܐ ܐܶܢ ܡܰܝ̈ܳܐ ܠܚܰܡܪܳܐ ܡܫܰܚܠܶܦ܆ ܗܽܘ ܐܺܝܬܰܘܗ̱ܝ ܒܳܗ̇ ܒܰܕܡܽܘܬܳܐ. ܠܶܗ ܕܶܝܢ ܟܰܕ ܠܶܗ ܠܛܰܠܳܐ ܒܺܐܝܠܳܢܳܐ ܗܰܘ ܕܚܰܙܽܘܪܳܐ ܚܰܙܽܘܪܳܐ ܥܳܒܶܕ܆ ܘܰܒܗܰܘ ܕܬܺܬܳܐ ܬܺܬܳܐ܆ ܘܰܠܘܳܬ ܟܽܠ ܚܕܳܐ ܐܰܝܢܳܝܽܘܬܳܐ ܡܫܰܚܠܶܦ.

ܘܶܐܬܒܰܩܳܐ ܕܰܐܝܟܰܢܳܐ ܡܦܰܬܶܐ ܠܳܗ̇ ܠܬܶܕܡܽܘܪܬܳܐ ܒܝܰܕ ܟܪܽܘܟܝܳܐ ܡܦܰܬܟܳܐ܆ ܟܰܕ ܡܶܢ ܟܽܠ ܕܽܘܟ ܡܙܰܡܶܢ ܠܳܗ̇ ܫܪܳܪܳܐ܆ ܘܦܳܣܶܩ ܘܰܡܪܺܝܡ ܡܶܢܳܗ̇ ܠܡܰܣܒܪܳܢܽܘܬܳܐ ܕܦܰܢܛܰܣܺܝܰܐ ܕܰܓܳܠܬܳܐ. ܐܺܝܬ ܗ̱ܘܰܝ̈ ܬܰܡܳܢ ܐܳܡܰܪ ܐܰܓܳܢ̈ܶܐ ܕܟܺܐܦܳܐ ܫܶܬ ܕܣܺܝ̈ܡܳܢ ܗ̱ܘܰܝ̈܆ ܐܰܝܟ ܕܰܠܕܽܘܟܳܝܳܐ ܕܝܽܗ̱ܘ̈ܕܳܝܶܐ. ܕܥܳܪ̈ܝܳܢ ܗ̱ܘܰܝ̈ ܟܽܠ ܚܕܳܐ ܡܰܢ ܬܪܶܝܢ^[27] ܡܛܪ̈ܝܛܐ ܐܰܘ ܬܠܳܬܳܐ. ܐܳܡܰܪ ܠܗܽܘܢ ܝܶܫܽܘܥ܆ ܡܠ̣ܰܘ ܗܳܠܶܝܢ ܐܰܓܳܢ̈ܶܐ ܡܰܝ̈ܳܐ. ܘܰܡܠܰܘ ܐܶܢܶܝܢ ܥܕܰܡܳܐ ܠܥܶܠ^[28]. ܟܰܕ ܓܶܝܪ ܢܳܡܽܘܣܳܐ ܗܰܘ ܕܰܒܝܰܕ ܡܽܘܫܶܐ ܦܳܩܶܕ ܗ̱ܘܳܐ܆ ܕܗܰܘ ܕܓܳܫܶܦ ܗ̱ܘܳܐ ܒܡܶܕܶܡ ܛܰܡܳܐܐ܆ ܢܫܺܝܓ ܡܳܐܢܰܘܗ̱ܝ ܘܢܶܣܚܶܐ ܒܡܰܝ̈ܳܐ܆ ܡܶܛܽܠ ܣܒܺܝܣܽܘܬܳܗ̇ ܕܬܰܕܟܺܝܬܳܐ ܕܕܰܐܝܟ ܗܳܕܶܐ܆ ܟܰܕ ܐܰܬܪܳܐ ܗܰܘ ܕܦܠܣܛܝܢܝ ܝܰܬܺܝܪ ܝܰܒܺܝܫܳܐ ܐܺܝܬܰܘܗ̱ܝ܆ ܘܰܒܥܰܝ̈ܢܳܬܳܐ ܘܰܒܢܰܗܪ̈ܰܘܳܬܳܐ ܠܳܐ ܡܶܬܬܰܫܩܶܐ܆ ܐܶܠܳܐ ܐܰܘ ܡܶܢ ܒܺܐܪ̈ܳܬܳܐ ܐܰܘ ܡܶܢ ܓܽܘ̈ܒܶܐ ܡܡܰܠܶܐ ܣܽܘܢܩܳܢܶܗ܆ ܕܡܰܠ̈ܝܳܢ ܘܰܡܛܰܝ̈ܒܳܢ ܠܗܳܕܶܐ ܐܺܝܬܰܝܗܶܝܢ ܗ̱ܘܰܝ̈ ܠܗܽܘܢ ܠܝܽܗ̱ܘ̈ܕܳܝܶܐ ܗܶܢܶܝܢ ܐܰܓܳܢ̈ܶܐ ܕܣܺܝ̈ܡܳܢ܆ ܐܰܝܟܰܢܳܐ ܕܡܶܚܕܳܐ ܒܰܪܫܳܥܬܶܗ ܢܶܬܕܰܟܽܘܢ. ܠܗܳܠܶܝܢ ܗܳܟܺܝܠ ܕܗܳܝܕܶܝܢ ܡܶܢ ܓܶܕܫܳܐ ܡܶܕܶܡ ܐܶܫܬܟܰܚ ܕܺܐܝܬܰܝܗܶܝܢ ܣܦܺܝ̈ܩܳܬܳܐ܆ ܦܳܩܶܕ ܗ̱ܘܳܐ ܝܶܫܽܘܥ ܕܢܶܡܠܽܘܢ ܐܶܢܶܝܢ ܡܰܝ̈ܳܐ܆ ܠܗܳܠܶܝܢ ܕܡܶܢ ܙܰܒܢܳܐ ܣܰܓܺܝܳܐܐ ܠܡܰܝ̈ܳܐ ܡܫܰܡ̈ܫܳܢ^[29] ܗ̱ܘܰܝ̈܆ ܘܕܳܐܦܠܳܐ ܚܰܕ ܪܺܝܚܳܐ ܐܰܘ ܫܰܪܒܳܐ ܕܫܽܘܘܕܳܥܳܐ ܕܚܰܡܪܳܐ ܐܺܝܬ ܗ̱ܘܳܐ ܒܗܶܝܢ ܟܽܠ ܟܽܠܶܗ. ܐܶ‌ܠܽܘ ܓܶܝܪ ܒܳܩ̈ܽܘܠܳܐ ܡܶܕܶܡ ܐ̱ܚܪ̈ܳܢܝܳܬܳܐ ܦܳܩܶܕ ܗ̱ܘܳܐ ܠܗܽܘܢ ܕܢܶܬܚܰܫܚܽܘܢ܆ ܡܶܫܟܰܚ ܗ̱ܘܳܐ ܐ̱ܢܳܫ ܕܢܺܐܡܰܪ܆ ܕܟܰܕ ܬܶܛܪܳܐ ܦܰܝ̣ܺܝ̣ܫ ܗ̱ܘܳܐ ܒܗܶܝܢ܆ ܟܰܕ ܡܰܝ̈ܳܐ ܐܶܬܬܰܪܡܺܝܘ ܥܠܰܘܗ̱ܝ܆ ܢܣܰܒܘ ܡܶܢ ܐܰܝܢܳܝܽܘܬܳܐ ܗܳܝ ܕܚܰܡܪܳܐ. ܘܟܰܕ ܗܳܐ ܡܶܢ ܟܰܕܽܘ ܪܘܶܝܢ ܗ̱ܘܰܘ ܗܳܢܽܘܢ ܕܡܶܫܬܰܪܶܝܢ ܗ̱ܘܰܘ܆ ܘܰܐܝܟ ܗܰܘ ܕܡܺܝܬܳܐ ܐܺܝܬܰܘܗ̱ܝ ܗ̱ܘܳܐ ܠܗܽܘܢ ܒܪܰܘܳܝܽܘܬܳܐ ܕܺܝܢܳܗ̇ ܕܰܛܥܳܡܬܳܐ܆ ܠܡܰܝ̈ܳܐ ܚܰܡܪܐ ܐܰܣܒܰܪܘ.

ܒܝܰܕܟܽܠܗܶܝܢܗܳܟܺܝܠܚܙܳܗ̇ ܠܡܰܣܒܪܳܢܽܘܬܳܐ ܕܡܶܬܬܪܺܝܡܳܐ. ܠܰܘ ܓܶܝܪ ܬܰܠ̈ܡܺܝܕܶܐ ܡܶܬܦܰܩܕܺܝܢ ܕܢܶܡܠܽܘܢ ܐܶܢܶܝܢ ܠܰܐܓܳܢ̈ܶܐ܆ ܐܶܠܳܐ ܗܳܢܽܘܢ ܡܫܰܡ̈ܫܳܢܶܐ ܣܳܗ̈ܕܶܐ ܐܰܟܣ̈ܢܳܝܶܐ܆ ܘܕܳܐܦܠܳܐ ܡܶܢ ܕܽܘܟ ܡܰܥܠܺܝܢ ܠܳܗ̇ ܡܫܰܟܢܳܢܽܘܬܳܐ ܠܣܳܗܕܽܘܬܳܐ. ܘܰܐܓܳܢ̈ܶܐ ܠܰܘ ܐܰܝܠܶܝܢ ܕܗܽܘ ܕܢܶܬܟܰܝ̈ܢܳܢ. ܐܶܠܳܐ ܗܳܠܶܝܢ ܕܶܐܬܦܪ̈ܰܫܶܝܢ ܠܰܚܫܰܚܬܳܐ ܕܡܰܝ̈ܳܐ ܙܰܒܢܳܐ ܣܰܓܺܝܳܐܐ. ܠܗܳܠܶܝܢ ܕܳܐܦ ܡܠ̣ܰܘ ܐܶܢܶܝܢ ܐܳܡܰܪ ܥܕܰܡܳܐ ܠܥܶܠ^[30]܆ ܟܰܕ ܐܳܦܠܳܐ ܚܰܕ ܚܽܘܠܛܳܢܳܐ ܕܚܰܡܪܳܐ ܡܩܰܒ̈ܠܳܢ ܗ̱ܘܰܝ̈܆ ܘܗܳܟܰܢܳܐ ܐܶܡܰܪ ܠܗܽܘܢ ܝܶܫܽܘܥ. ܕܠ̣ܰܘ ܗܳܫܳܐ ܘܰܐܝܬܺܝܘ ܠܪܺܝܫ ܛܪܺܝܩܠܺܝܢܳܐ. ܘܰܐܝܬܺܝܘ^[31]. ܪܺܝܫ ܛܪܝܩܠܝܢܐ ܕܶܝܢ ܐܺܝܬܰܘܗ̱ܝ܆ ܠܰܘ ܚܰܕ ܡܶܢ ܗܳܢܽܘܢ ܕܰܓܢܶܝܢ ܥܰܠ ܬܰܫܘܺܝܬܳܐ ܗܳܝ ܕܡܰܓܢܝܳܐ܆ ܐܶܠܳܐ ܪܺܝܫܳܢܳܐ ܕܗܰܘ ܕܡܶܬܐܶܡܰܪ ܛܪܝܩܠܝܢܳܐ܆ ܗܳܢܰܘ ܕܶܝܢ ܕܒܰܝܬܽܘܢܳܐ ܗܰܘ ܕܺܝܠܳܗ̇ ܕܫܳܪܽܘܬܳܐ ܘܰܕܗܳܠܶܝܢ ܕܡܶܬܒܰܥ̈ܝܳܢ ܠܳܗ̇. ܗܰܘ ܕܚܰܕ ܥܒܳܕܳܐ ܐܺܝܬ ܠܶܗ܆ ܗܳܝ ܕܡܶܢ ܟܽܠ ܦܪܽܘܤ ܐܰܝܟ ܕܰܠܡܺܐܡܰܪ ܟܰܕ ܐܺܝܬܰܘܗ̱ܝ ܨܰܝܳܡܳܐ܆ ܢܶܗܘܶܐ ܡܶܬܟܪܶܟ ܠܥܶܠ ܘܰܠܬܰܚܬ ܘܰܡܛܰܟܶܤ܆ ܡܓܝܪ̈ܣܶܐ܆ ܡܕܰܝ̈ܠܳܢܶܐ܆ ܫܳܩ̈ܰܘܳܬܳܐ܆ ܘܰܠܟܽܠ ܡܶܕܶܡ ܢܰܬܩܶܢ ܘܢܰܥܒܰܪ܆ ܠܘܳܬ ܗܳܝ ܕܝܳܨܦܳܐ ܐܰܟܚܕܳܐ ܘܡܰܗܢܝܳܐ ܠܗܳܢܽܘܢ ܕܡܶܫܬܰܪܶܝܢ. ܠܗܳܢܳܐ ܗܳܟܺܝܠ ܦܳܩܶܕ ܗ̱ܘܳܐ ܝܶܫܽܘܥ܆ ܕܢܶܬܠܽܘܢ ܪܺܝܫܺܝܬܳܐ ܕܡܰܝ̈ܳܐ ܗܳܢܽܘܢ ܕܶܐܫܬܰܚܠܰܦܘ̱ ܠܚܰܡܪܳܐ܆ ܕܥܺܝܪ ܗ̱ܘܳܐ ܘܺܐܝܬ ܗ̱ܘܳܐ ܠܶܗ ܕܰܟܝܳܐ ܒܶܝܬ ܕܺܝܢܳܐ ܕܰܛܥܳܡܬܳܐ. ܐܰܝܟܰܢܳܐ ܕܠܰܘ ܕܚܰܡܪܳܐ ܒܰܠܚܽܘܕ܆ ܐܶܠܳܐ ܐܳܦ ܕܝܰܬܺܝܪ ܛܳܒܳܐ ܘܪܺܝܫܳܝܳܐ ܐܺܝܬܰܘܗ̱ܝ ܗܳܢܳܐ ܣܗܶܕ. ܟܰܕ ܐܳܡܰܪ ܠܶܗ ܠܚܰܬܢܳܐ܆ ܟܽܠ ܒܰܪܢܳܫܳܐ ܠܽܘܩܕܰܡ܆ ܚܰܡܪܳܐ ܗܰܘ ܛܳܒܳܐ ܣܳܐܶܡ. ܘܶܐܡܰܬܝ ܕܢܶܪܘܽܘܢ܆ ܠܗܰܘ ܕܰܒܨܺܝܪ. ܐܰܢ̱ܬ ܕܶܝܢ ܢܛܰܪܬܳܝܗ̱ܝ ܠܚܰܡܪܳܐ ܛܳܒܳܐ ܥܕܰܡܳܐ ܠܗܳܫܳܐ^[32].

ܗܳܠܶܝܢ ܡܰܢ ܗܳܟܺܝܠ ‌ܐܰܝܟ ܕܰܒܦܽܘܫܳܩܳܐ ܦܫܺܝܩܳܐ ܘܕܰܩܕܳܡ ܐܺܝ̈ܕܰܝܳܐ ܕܺܝܠܳܗ̇ ܕܬܶܕܡܽܘܪܬܳܐ ܣܺܝܡܳܐ ܩܕܳܡܰܝܢ܆ ܢܰܨܺܝܚܽܘܬܳܗ̇ ܘܡܶܬܚܰܙܝܳܢܽܘܬܳܗ̇ ܕܡܶܢ ܠܒܰܪ ܕܡܶܠܬܳܐ ܐܶܘܰܢܓܶܠܳܝܬܳܐ. ܠܗܳܢܽܘܢ ܕܶܝܢ ܕܰܠܘܳܬ ܥܽܘܡܩܳܐ ܕܣܽܘ̈ܟܳܠܶܐ ܡܶܫܟܚܺܝܢ ܠܡܶܚܰܬ ܡܡܰܫܚܳܐܺܝܬ܆ ܠܘܳܬ ܓܶܝܪ ܟܽܘܠܳܝܽܘܬܳܗ̇ ܕܬܶܐܽܘܪܺܝܰܐ ܘܠܳܐ ܐ̱ܢܳܫ ܣܳܦܶܩ܆ ܠܰܘ ܥܽܘܬܪܳܐ ܐܰܝܢܳܐ ܕܗܽܘ ܡܶܫܬܟܰܚ. ܐܳܦ ܓܶܝܪ ܗܺܝ ܡܶܫܬܽܘܬܳܐ ܪܳܫܡܳܐ ܘܰܡܚܰܘܝܳܐ ܠܶܗ ܠܝܶܫܽܘܥ܆ ܕܰܐܝܟ ܕܒܰܦܨܺܝܚܽܘܬܳܐ ܕܡܶܫܬܽܘܬܳܐ ܒܝܰܕ ܡܶܐܬܺܝܬܶܗ ܕܒܰܒܣܰܪ ܐܶܬܳܐ ܠܘܳܬ ܗܳܢܽܘܢ ܕܥܰܠ ‌ܐܰܪܥܳܐ. ܠܳܐ ܓܶܝܪ ܐܶܬܳܐ ܕܰܢܕܽܘܢܳܝܗ̱ܝ ܠܥܳܠܡܳܐ ܐܳܡܰܪ ܐܶܘܰܢܓܶܠܺܝܣܛܳܐ܆ ܐܶܠܳܐ ܐܰܝܟܰܢܳܐ ܕܢܶܬܦܪܶܩ ܥܳܠܡܳܐ ܒܺܐܝ̈ܕܰܘܗܝ^[33]܆ ܘܰܐܝܟܰܢܳܐ ܕܰܠܥܺܕܬܳܐ ܐܰܝܟ ܒܬܽܘܠܬܳܐ ܕܟܺܝܬܳܐ ܢܶܡܟܽܘܪ ܠܶܗ ܟܰܠܬܳܐ^[34]܆ ܐܰܝܟ ܗܳܝ ܕܰܐܡܺܝܪܳܐ ܠܦܰܘܠܽܘܤ ܠܘܳܬ ܩܽܘܪ̈ܝܢܬܳܝܶܐ܆ ܡܟܰܪܬܟܽܘܢ ܓܶܝܪ ܠܓܰܒܪܳܐ ܚܰܕ ܒܬܽܘܠܬܳܐ ܕܟܺܝܬܳܐ ܠܰܡܩܳܡܽܘܬܟܽܘܢ ܩܕܳܡ ܡܫܺܝܚܳܐ^[35]܆ ܗܰܘ ܕܡܶܛܽܠܳܬܶܗ ܐܳܦ ܝܽܘܚܰܢܳܢ ܡܰܥܡܕܳܢܳܐ ܐܳܡܰܪ ܗ̱ܘܳܐ܆ ܗܰܘ ܕܺܐܝܬ ܠܶܗ ܟܰܠܬܳܐ ܚܰܬܢܳܐ ܐܺܝܬܰܘܗ̱ܝ^[36]܆ ܘܳܐܦ ܗܽܘ ܕܶܝܢ ܡܶܛܽܠ ܬܰܠܡܺܝܕܰܘ̈ܗ̱ܝ܆ ܕܰܠܡܳܐ ܡܶܫܟܚܺܝܢ ܒܢܰܘܗ̱ܝ ܕܰܓܢܽܘܢܳܐ ܠܡܶܬܐܰܒܳܠܽܘ܆ ܟܡܳܐ ܕܥܰܡܗܽܘܢ ܐܺܝܬܰܘܗ̱ܝ ܚܰܬܢܳܐ^[37].

ܡܶܫܬܽܘܬܳܐ ܗܳܟܺܝܠ܆ ܝܽܘܩܢܳܐ ܐܺܝܬܶܝܗ̇ ܗ̱ܘܳܬ܆ ܕܰܡܟܺܝܪܽܘܬܳܐ ܘܢܰܩܺܝܦܽܘܬܳܐ ܗܳܝ ܡܶܬܗܰܘܢܳܢܺܝܬܳܐ܆ ܗܳܝ ܕܰܡܟܰܪ܆ ܘܰܒܗܳܝ ܕܶܐܬܢܰܩܰܦ ܡܫܺܝܚܳܐ ܠܢܰܦ̈ܫܳܬܳܐ ܕܺܝܠܰܢ܆ ܗܰܘ ܚܰܬܢܳܐ ܕܰܟܝܳܐ ܕܥܺܕܬܳܐ. ܗܳܝ ܕܰܒܦܰܪܨܽܘܦܳܐ ܕܺܝܠܳܗ̇܆ ܟܰܕ ܗܺܝ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܗܳܝ ܐܶܡܳܐ ܩܰܪܺܝܒܳܐ ܗ̱ܘܳܬ ܠܡܶܫܬܽܘܬܳܐ܆ ܘܚܳܙܝܳܐ ܗ̱ܘܳܬ ܠܚܰܡܪܳܐ ܕܰܚܣܰܪ܆ ܠܡܶܠܬܳܐ ܡܰܠܦܳܢܺܝܬܳܐ ܗܳܝ ܕܶܐܬܝܰܗܒܰܬ ܗ̱ܘܳܬ ܠܰܟܢܽܘܫܬܳܐ ܕܝܽܗ̱ܘ̈ܕܳܝܶܐ܆ ܡܶܛܽܠ ܗܳܝ ܕܰܩܦܺܝܠܳܐܺܝܬ ܡܰܠ̈ܦܳܢܶܝܗ̇ ܪ̈ܺܝܫܰܝ ܟܳܗ̈ܢܶܐ ܘܰܦܪ̈ܺܝܫܳܝܶܐ܆ ܡܰܫ̈ܠܡܳܢܘܳܬܳܐ ܒܰܝ̈ܬܳܝܳܬܳܐ ܕܺܝܠܗܽܘܢ ܡܚܺܝ̈ܠܳܬܳܐ ܘܐ̱ܢܳܫܳܝ̈ܳܬܳܐ܆ ܒܰܕܡܽܘܬ ܡܰܝ̈ܳܐ ܚܳܠܛܺܝܢ ܗ̱ܘܰܘ܆ ܗܳܢܽܘܢ ܕܡܶܛܽܠܳܬܗܽܘܢ ܐܳܦ ܐܶܫܰܥܝܳܐ ܐܳܡܰܪ܆ ܩܦܺܝ̈ܠܶܐ ܕܺܝܠܶܟܝ ܚܳܠܛܺܝܢ ܚܰܡܪܳܐ ܒܡܰܝ̈ܳܐ^[38]܆ ܟܰܕ ܡܰܠܦܺܝܢ ܡܰܠ̈ܦܳܢܘܳܬܳܐ ܦܽܘܩ̈ܕܳܢܶܐ ܕܰܒܢܰܝ̈ܢܳܫܳܐ܆ ܐܰܝܟܰܢܳܐ ܕܡܶܟܺܝܠ ܡܰܝ̈ܳܐ ܢܶܗܘܶܐ ܗ̱ܘܳܐ ܟܽܠ ܡܶܕܶܡ܆ ܘܨܳܒܝܳܐ ܗ̱ܘܳܬ ܕܰܠܘܳܬ ܪ̈ܰܚܡܶܐ ܬܙܺܝܥܺܝܘܗ̱ܝ ܠܰܡܫܺܝܚܳܐ܆ ܐܶܡܪܰܬ܆ ܕܚܰܡܪܳܐ ܠܰܝܬ ܠܗܽܘܢ^[39]. ܟܰܕ ܒܨܺܝܪ ܩܰܠܺܝܠ ܡܚܰܦܛܳܐ ܗ̱ܘܳܬ ܠܶܗ܆ ܐܳܦ ܠܘܳܬ ܝܳܗܽܘܒܽܘܬܳܐ ܕܚܰܡܪܳܐ ܐ̱ܪܳܙܳܢܳܝܳܐ ܗܰܘ ܕܐ̱ܪ̈ܳܙܶܐ. ܡܶܛܽܠ ܗܳܕܶܐ ܡܦܰܢܶܐ ܗ̱ܘܳܐ ܠܳܗ̇ ܦܶܬܓܳܡܳܐ ܝܶܫܽܘܥ܆ ܡܳܐ ܠܺܝ ܘܠܶܟܝ ܐܰܢ̱ܬܬܳܐ. ܠܳܐ ܥܕܰܟܺܝܠ ‌ܐܶܬ̣ܬ̣ ܫܳܥܬܳܐ ܕܺܝܠܝ^[40]. ܕܰܠܚܰܡܪܳܐ ܗܰܘ ܕܝܰܬܺܝܪ ܡܫܰܡܠܰܝ ܘܝܰܬܺܝܪ ܐ̱ܪܳܙܳܢܳܝ ܐܰ݀ܫܦܰܥ܆ ܠܳܐ ܥܕܰܟܺܝܠ ‌ܐܺܝܬܰܘܗ̱ܝ ܙܰܒܢܳܐ܆ ܥܕܰܡܳܐ ܕܠܰܨܠܺܝܒܳܐ ܐܶ݀ܣܒܽܘܠ܆ ܘܠܰܕܡܳܐ ܕܺܝܠܝ ܐܶ݀ܢܰܩܶܐ܆ ܘܦܰܪܩܠܝܛܐ ܢܺܐܬܶܐ ܠܘܳܬ ܗܳܢܽܘܢ ܕܒܰܐܪܥܳܐ. ܕܫܳܥܬܳܐ ܕܶܝܢ ܠܡܰܠܦܳܢܽܘܬܳܐ ܗܳܝ ܡܰܝܳܢܳܝܬܳܐ ܘܐ̱ܢܳܫܳܝܬܳܐ܆ ܠܘܳܬ ܫܰܚܺܝܢܽܘܬܳܐ ܘܚܺܝܨܽܘܬܳܐ ܘܰܡܫܰܪܪܽܘܬܳܐ܆ ܘܰܦܨܺܝܚܽܘܬܳܐ ܕܫܶܩܝܳܐ ܪܽܘܚܳܢܳܝܳܐ ܐܶ݀ܫܰܚܠܶܦ. ܕܗܳܠܶܝܢ ܓܶܝܪ ܐܺܝܬܰܘܗ̱ܝ ܬܰܚܘܺܝܬܳܐ ܗܽܘ ܚܰܡܪܳܐ.

ܠܰܛܥܳܡܬܶܗ ܕܶܝܢ ܕܗܳܢܳܐ܆ ܠܳܐ ܡܶܫܟܚܳܐ ܗ̱ܘܳܬ ܕܬܶܒܩܶܐ ܟܢܽܘܫܬܳܐ ܕܝܽܗ̱ܘ̈ܕܳܝܶܐ ܗܳܝ ܕܪܰܘܝܳܐ ܗ̱ܘܳܬ܆ ܗܳܝ ܕܥܰܡܳܗ̇ ܓܢܶܐ ܗ̱ܘܳܐ ܒܰܣܡܳܟ̣ܳܐ ܡܶܛܽܠ ܪܶܚܡܰܬ ܐ̱ܢܳܫܽܘܬܳܐ܆ ܘܝܰܗ̱ܒ ܘܫܰܘܬܶܦ ܟܡܳܐ ܕܙܳܕܶܩ ܗ̱ܘܳܐ ܠܡܰܠܦܳܢܽܘܬܳܐ ܕܫܳܪܽܘܬܳܐ ܡܶܫܬܽܘܬܳܢܳܝܬܳܐ܆ ܟܰܕ ܣܰܓܺܝ̈ܳܐܬܳܐ ܘܫܰܦܺܝܪ̈ܳܬܳܐ ܐܰ‌ܠܶܦ܆ ܘܰܒܪܰܡ ܠܳܐ ܐܰܪܓܫܰܬ. ܠܪ̈ܺܝܫܰܝ ܛܪ̈ܺܝܩܠܺܝܢܶܐ ܕܶܝܢ ܕܺܝܠܳܗ̇܆ ܗܳܢܽܘܢ ܕܶܝܢ ܐܺܝܬܰܝܗܽܘܢ ܗ̱ܘܰܘ ܗܳܢܽܘܢ ܕܒܶܝܬ ܡܽܘܫܶܐ ܘܰܕܒܶܝܬ ܐܰܒܪܳܗܳܡ܆ ܡܽܘܫܶܐ ܓܶܝܪ ܡܗܰܝܡܢܳܐ ܐܺܝܬܰܘܗ̱ܝ ܗ̱ܘܳܐ ܐܰܝܟ ܡܢܺܝܚܳܢܳܐ ܒܒܰܝܬܳܐ ܕܰܐ‌ܠܳܗܳܐ ܐܰܝܟܰܢܳܐ ܕܰܟܬܺܝܒ^[41]܆ ܕܟܰܕ ܛܥܶܡܘ ܗ̱ܘܰܘ ܒܰܠܚܽܘܕ ܐܳܦ ܒܪܺܝܫ ܣܶܦ̈ܘܳܬܗܽܘܢ ܒܝܰܕ ܪ̈ܶܡܙܶܐ ܢܒܺܝ̣ܳܝ̣̈ܶܐ܆ ܐܶܬܝܰܕܥܰܬ ܠܗܽܘܢ ܓܰܠܝܳܐܺܝܬ܆ ܕܰܠܚܰܡܪܳܐ ܛܳܒܳܐ ܕܡܰܠܦܳܢܽܘܬܳܐ ܐܶܘܰܢܓܶܠܳܝܬܳܐ܆ ܐ̱ܚܪܳܝܳܐ ܢܰܛܪܶܗ ܠܥܺܕܬܳܐ܆ ܘܰܒܚܰܪܬܳܐ ܕܙܰܒ̈ܢܶܐ. ܐܰܒܪܳܗܳܡ ܓܶܝܪ ܐܰܒܽܘܟܽܘܢ ܐܶܡܰܪ ܡܫܺܝܚܳܐ ܠܘܳܬ ܝܽܗ̱ܘ̈ܕܳܝܶܐ܆ ܪܘܰܙ ܕܢܶܚܙܶܐ ܠܝܰܘܡܳܐ ܗܰܘ ܕܺܝܠܝ܆ ܘܰܚܙܳܐ ܘܰܚ̣ܕܳܐ^[42].

ܗܳܠܶܝܢ ܐܺܝܬܰܝܗܶܝܢ ܛܳܒ̈ܳܬܳܐ ܘܡܰܘܬܪ̈ܳܢܝܳܬܳܐ܆ ܗܳܢܶܝܢ ܕܰܠܡ̈ܶܠܶܐ ܐܰ‌ܠܳܗܳܝ̈ܳܬܳܐ ܢܳܩ̈ܦܳܢ ܘܠܳܚ̈ܡܳܢ. ܡܶܢ ܗܳܢܶܝܢ ܕܶܝܢ ܕܡܰܛܥܝܳܢܳܐܺܝܬ ܐܰܡܺܝܪ̈ܳܢ ܠ̱ܐܢܳܫܺܝ̈ܢ܆ ܘܰܠܣܽܘ̈ܟܳܠܶܐ ܗܳܢܽܘܢ ܫܰܪܺܝܪ̈ܶܐ ܩܛܺܝܪܳܐܺܝܬ ܘܰܠܘܳܬ ܗܳܝ ܕܰܠܩܽܘܒܠܳܐ ܡܰܗܦ̈ܟܳܢ ܘܰܡܦ̈ܰܬܠܳܢ܆ ܘܰܠܘܳܬ ܡܓܰܕܦܳܢܽܘܬܳܐ ܡܰܘܒ̈ܠܳܢ܆ ܠܡܶܥܪܰܩ ܙܳܕܶܩ ܘܰܠܡܰܗܦܳܟܽܘ ܐܰܦ̈ܶܐ. ܐܳܦ ܓܶܝܪ ܐܰܡܪܰܚ ܐ̱ܢܳܫ ܠܡܺܐܡܰܪ ܕܡܶܫܬܽܘܬܳܐ ܗܳܕܶܐ܆ ܝܽܘܩܢܳܐ ܡܡܰܠܝܳܐ ܕܰܚܒܳܠܳܐ ܗܰܘ ܕܰܗܘ̣ܳܐ ܒܦܰܪܕܰܝܣܳܐ܆ ܐܰܝܟܰܢܳܐ ܕܗܽܘ ܐܳܡܰܪ ܒܝܰܘܡܳܐ ܗܰܘ ܕܰܬܠܳܬܳܐ܆ ܘܰܕܒܰܝܬܳܐ ܕܗܰܢܺܝܽܐܘܬ ܚܰܫ̈ܶܐ ܘܡܰܣܛܰܒܬܳܐ^[43] ܕܪܰܦܝܽܘܬܳܐ ܢܶܩܪܶܐ ܠܫܳܪܽܘܬܳܐ܆ ܗܳܝ ܕܰܥܠܶܝܗ̇ ܐܳܦ ܕܶܐܣܬܡܶܟ ܝܶܫܽܘܥ ܐܳܡܰܪ܆ ܐܰܘ ܒܰܪܢܳܫܳܐ ܗܰܘ ܕܡܶܢܶܗ ܒܨܰܠܡܳܐ ܕܰܐ‌ܠܳܗܳܐ ܡܶܬܛܦܰܤ. ܘܡܰܘܣܶܦ ܡܶܛܽܠܳܬܶܗ ܡܓܰܕܦܳܢܳܐܺܝܬ ܘܠܳܐ ܝܰܠܺܝܦܳܐܺܝܬ ܒܗܶܝܢ ܒܡ̈ܶܠܶܐ܆ ܕܰܠܟܽܠܶܗ ܚܰܡܪܳܐ ܗܰܘ ܕܡܶܢ ܡܶܬܬܙܺܝܥܳܢܽܘܬܳܐ ܟܝܳܢܳܝܬܳܐ ܐܶܫܬܺܝ. ܘܰܠܝܳܠܕܰܬ ܐܰ‌ܠܳܗܳܐ ܪܦܺܝܬܳܐ ܡܶܕܶܡ ܡܰܥܶܠ ܠܳܗ̇܆ ܘܰܕܓܽܘܡܕܳܢܳܐܺܝܬ ܪܳܗܛܳܐ ܗ̱ܘܳܬ ܠܘܳܬ ܪܶܓܬܳܐ܆ ܘܳܐܦ ܕܨܰܠܡܳܐ ܕܡܰܪܓܫܳܢܽܘܬܳܐ܆ ܪܳܚܡܰܬ̣ ܗܰܢܺܝܽܐܘܬܳܐ ܡܡܰܠܝܳܐ ܗ̱ܘܳܬ܆ ܘܳܐܡܪܳܐ ܗ̱ܘܳܬ ܚܰܡܪܳܐ ܠܰܝܬ ܠܗܽܘܢ^[44]܆ ܘܡܶܛܽܠ ܗܳܕܶܐ ܡܶܬܚܰܣܕܳܐ ܗ̱ܘܳܬ ܘܫܳܡܥܳܐ ܗ̱ܘܳܬ ܐܰܢ̱ܬܬܳܐ܆ ܘܠܰܡܫܰܡ̈ܫܳܢܶܐ ܡܡܰܠܠܳܐ ܗ̱ܘܳܬ ܐܳܡܰܪ܆ ܠܚܽܘܫܳܒ̈ܶܐ ܚܰܫܳܢܳܝ̈ܶܐ. ܘܠܰܐܓܳܢ̈ܶܐ ܡܰܢ ܗܳܠܶܝܢ ܝܺܗܽܘ̈ܕܳܝܳܬܳܐ܆ ܕܕܰܟܝܽܘܬܳܐ ܘܰܕܚܽܘܫܳܒ̈ܶܐ ܥܺܝܪ̈ܶܐ ܘܪ̈ܳܚܡܰܝ ܐܰ‌ܠܳܗܳܐ ܡܩܰܒܶܠ ܕܺܐܝܬܰܝܗܶܝܢ ܫܽܘܘܕܳܥܳܐ. ܚܰܫܳܢܳܝܳܐ ܕܶܝܢ ܘܗܽܘܦܳܟܳܐ܆ ܒܡܶܠܰܘ̈ܗ̱ܝ ܓܶܝܪ ܕܗܰܘ ܡܶܬܚܰܫܰܚ ܐ̱ܢܳܐ܆ ܘܰܕܫܳܢܝܽܘܬܳܐ ܕܰܠܒܰܪ ܡܶܢ ܗܰܘܢܳܐ ܩܳܪܶܐ ܠܶܗ ܠܚܰܡܪܳܐ܆ ܗܰܘ ܕܡܶܢ ܡܰܝ̈ܳܐ ܐܶܫܬܰܚܠܰܦ ܗ̱ܘܳܐ ܒܥܳܒܽܘܕܽܘܬ ܬܶܕܡܪ̈ܳܬܳܐ ܕܰܐ‌ܠܳܗܳܐ ܘܦܳܪܽܘܩܰܢ ܡܫܺܝܚܳܐ܆ ܘܳܐܡܰܪ܆ ܕܡܶܛܽܠܗܳܢܳܐ ܐܶܡܰܪ ܢܒܺܝܳܐ܆ ܕܘܳܝ ܠܗܳܢܽܘܢ ܕܰܪܘܶܝܢ ܠܳܐ ܡܶܢ ܚܰܡܪܳܐ܆ ܘܒܳܬܰܪ ܫܰܟܪܳܐ ܪܳܕܦܺܝܢ^[45]. ܘܠܰܢܒܺܝ̈ܰܘܴܬܳܐ ܡܰܢ ܕܰܡܫܰܚܠܦܳܐܺܝܬ ܣܺܝ̈ܡܳܢ܆ ܐܰܝܟ ܪ̈ܽܘܩܥܽܘܢܝܳܬܳܐ ܡܚܰܝܶܛ ܐܰܟܚܕܳܐ ܠܳܐ ܝܰܠܺܝܦܳܐܺܝܬ. ܒܕܽܘܟܬܳܐ ܓܶܝܪ ܐ̱ܚܪܺܬܳܐ ܗܽܘ ܢܒܺܝܳܐ܆ ܠܗܳܢܽܘܢ ܕܒܳܬܰܪ ܫܰܟܪܳܐ ܪܳܕܦܺܝܢ ܝܳܗܶܒ ܘܳܝܳܐ ܘܳܐܡܰܪ܆ ܚܰܡܪܳܐ ܓܶܝܪ ܢܰܘܩܶܕ ܐܶܢܽܘܢ^[46]. ܘܰܒܕܽܘܟܬܳܐ ܐ̱ܚܪܺܬܳܐ ܕܰܪܘܶܝܢ ܕܠܳܐ ܚܰܡܪܳܐ ܟܰܕ ܐܳܡܰܪ܆ ܘܳܝ ܠܰܟܠܺܝܠܳܐ ܕܨܰܥܪܳܐ^[47]. ܐܰܓܺܝܪ̈ܶܐ ܕܛܽܘܪܳܐ ܕܰܐܦܪܶܝܡ. ܗܰܒܳܒܳܐ ܗܰܘ ܕܰܢܦܰܠ ܡܶܢ ܫܽܘܒܚܳܐ. ܘܥܰܠ ܩܰܪܩܰܦܬܳܐ ܕܛܽܘܪܳܐ ܗܰܘ ܥܳܒܳܝܳܐ^[48]܆ ܗܳܢܽܘܢ ܕܰܪܘܶܝܢ ܕܠܳܐ ܚܰܡܪܳܐ. ܟܽܠ ܓܶܝܪ ܕܡܶܬܒܰܝܕܰܠ ܘܫܳܢܶܐ ܒܚܰܫܳܐ܆ ܐܰܝܟ ܙܢܳܐ ܕܗܳܠܶܝܢ ܕܡܶܛܽܠܳܬܗܽܘܢ ܡܶܬܢܰܒܶܐ܆ ܒܫܰܒܗܪܳܢܽܘܬܳܐ ܪܘܶܐ ܒܗܰܘܢܶܗ. ܡܦܰܫܶܩ ܠܶܗ ܕܶܝܢ ܠܦܶܬܓܳܡܳܐ ܗܳܢܳܐ ܕܶܐܬܒܰܠܒܰܠ ܘܳܐܡܰܪ܆ ܟܰܕ ܠܰܘ ܒܰܠܚܽܘܕ ܒܰܚܛܺܝܬܳܐ ܗܳܝ ܟܝܳܢܳܝܬܳܐ܆ ܐܶܠܳܐ ܐܳܦ ܒܗܳܝ ܕܰܠܒܰܪ ܡܶܢ ܟܝܳܢܳܐ ܡܶܣܬܰܥܪܳܐ܆ ܐܺܝܬܰܝܗܽܘܢ ܗ̱ܘܰܘ ܠܳܐ ܡܶܬܠܰܒ̈ܟܳܢܶܐ ܘܠܳܐ ܙܗܺܝܪ̈ܶܐ.

ܗܳܠܶܝܢ ܠܰܐܝ̇ܕܳܐ ܪܰܒܘܳܬܳܐ ܕܓܽܘܕܳܦܳܐ ܠܳܐ ܥܳܒܪ̈ܳܢ. ܥܰܠ ‌ܐܰܝ̇ܕܳܐ ܣܰܩܽܘܒܠܳܝܽܘܬ ܡܶܠܬܳܐ ܡܶܕܶܡ ܣܢܺܝ̈ܩܳܢ ܠܘܳܬ ܗܦܽܘܟܝܳܐ܆ ܟܰܕ ܡܶܢܶܗ ܕܩܶܪܝܳܢܗܶܝܢ ܐܺܝܬܰܝܗܶܝܢ ܓܰܠ̈ܝܳܬܳܐ ܘܰܩܪ̈ܺܝܚܳܬܳܐ. ܡܰܢܽܘ ܕܶܝܢ ܠܰܚܛܺܝܬܳܐ ܦܰܠܶܓ܆ ܠܰܟܝܳܢܳܝܬܳܐ ܘܰܠܗܳܝ ܕܰܠܒܰܪ ܡܶܢ ܟܝܳܢܳܐ܆ ܠܗܳܝ ܕܗܽܘ ܗܳܢܳܐ ܐܳܦ ܨܶܒܝܳܢܳܝܬܳܐ ܐܺܝܬ ܐܶܡܰܬܝ ܐܳܡܰܪ ܠܳܗ̇܆ ܢܦܰܫܩܺܝܘܗ̱ܝ ܠܫܽܘܚܠܳܦܳܐ ܗܰܘ ܕܨܳܒܶܐ܆ ܟܰܕ ܥܳܒܰܪ ܠܰܡܨܰܥܬܳܐ. ܐܰܘ ܓܶܝܪ ܕܨܶܒܝܳܢܳܐ ܐܺܝܬܶܝܗ̇ ܐܰܝܟ ܡܳܐ ܟܺܝܬ ܕܳܐܦ ܐܺܝܬܶܝܗ̇܆ ܟܽܘܪܗܳܢܳܐ ܘܦܰܘܕܳܐ܆ ܘܟܰܕ ܚܳܛܶܝܢܰܢ ܟܺܐܢܳܐܺܝܬ ܡܶܬܬܕܺܝܢܺܝܢܰܢ܆ ܐܰܘ ܐܶܢ ܒܰܟܝܳܢܳܐ ܐܺܝܬܶܝܗ̇܆ ܕܰܟܝܳܢܳܐ ܘܠܳܐ ܐ̱ܢܳܫ ܡܶܬܬܒܰܥ ܡܣܳܡ ܒܪ̈ܺܝܫܶܐ. ܠܥܶܠܬܳܐ ܓܶܝܪ ܢܰܣܩܺܝܗ̇ ܡܶܢ ܟܽܠܦܪܘܤ܆ ܥܰܠ ܗܰܘ ܕܗܳܟܰܢܳܐ ܒ̣ܪܳܝܗ̱ܝ . ܡܰܢܽܘ ܕܶܝܢ ܡܬܽܘܡ ܥܰܠ ܦܰܪ̈ܨܽܘܦܶܐ ܩܰܕܺܝ̈ܫܶܐ ܘܰܡܫܰܒ̈ܚܶܐ ܘܳܐܦ ܥܠܰܘܗ̱ܝ ܕܰܡܫܺܝܚܳܐ܆ ܠܦܽܘ̈ܫܳܩܶܐ ܕܒܺܝܫܽܘܬܳܐ ܗܳܢܽܘܢ ܕܒܰܐܚܪܳܢܝܘܬ ܡܶܠܬܳܐ ܠܰܚܶܡ܆ ܐܰܘ ܗܳܝ ܕܰܠܩܽܘܒܠܳܐ܆ ܥܰܠ ܒܺܝ̈ܫܶܐ ܘܡܰܣ̈ܠܰܝܳܐ܆ ܗܳܠܶܝܢ ܕܰܡܝܰܬܪܽܘܬܳܐ ܘܰܕܕܽܘܒܳܪܳܐ ܢܰܟܦܳܐ. ܙܳܕܶܩ ܓܶܝܪ ܕܰܠܡ̈ܶܠܶܐ ܘܰܠܣܽܘ̈ܟܳܠܶܐ܆ ܠܦܽܘܬ ܐܰܝ̈ܢܺܝܘܳܬܳܐ ܗܳܠܶܝܢ ܕܣܺܝ̈ܡܳܢ ܕܺܝܠܗܽܘܢ ܕܦܰܪ̈ܨܽܘܦܶܐ ܢܶܣܰܒ ܐܶܢܽܘܢ. ܕܰܐܝܟ ܐܰܝܟܰܢ. ܫܡܳܐ ܕܐ̱ܪܳܙܳܐ ܠܘܳܬ ܟܬܳܒܳܐ ܐܰ‌ܠܳܗܳܝܳܐ܆ ܒܰܙܒܰܢ ܡܰܢ ܕܒܺܝܫܽܘܬܳܐ ܐܺܝܬܰܘܗ̱ܝ ܡܫܰܘܕܥܳܢܳܐ܆ ܒܰܙܒܰܢ ܕܶܝܢ ܕܰܡܝܰܬܪܽܘܬܳܐ. ܒܰܙܒܰܢ ܡܰܢ ܓܶܝܪ ܡܶܛܽܠ ܓܠܺܝܙܽܘܬ̣ ܦܺܐܪ̈ܶܐ ܘܫܰܒܗܪܳܢܽܘܬܳܐ ܐܰܡܺܝܪ܆ ܚܙܺܝܬ̣ ܪܰܫܺܝܥܳܐ ܕܣܰܓܺܝ ܡܶܬܪܰܡܪܰܡ. ܘܡܶܬܬܪܺܝܡ܆ ܐܰܝܟ ܐܰܪ̈ܙܶܐ ܕܠܶܒܢܳܢ^[49]. ܒܰܙܒܰܢ ܕܶܝܢ ܡܶܛܽܠ ܒܰܣܺܝܡܽܘܬ ܪܺܝܚܳܐ ܘܰܣܒܺܝܣܽܘܬܶܗ ܕܰܒܣܰܘ̈ܟܶܐ ܐܰܟܚܕܳܐ ܘܰܨܡܺܝܕܽܘܬܶܗ ܘܰܓܠܺܝܠܽܘܬ̣ ܟܪܽܘܟܝܶܗ ܘܥܰܬܺܝܪܽܘܬܶܗ܆ ܘܰܡܬܺܝܚܽܘܬܶܗ ܕܰܠܘܳܬ ܫܡܰܝܳܐ ܘܰܬܪܺܝܨܽܘܬܶܗ܆ ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ܆ ܘܰܐܝܟ ܐܰܪܙܳܐ ܗܰܘ ܕܰܒܠܶܒܢܳܢ ܢܶܣܓܶܐ^[50]. ܘܳܐܦ ܚܰܡܪܳܐ ܒܳܗ̇ ܒܰܕܡܽܘܬܳܐ ܠܦܽܘܬ ܗܳܝ ܕܣܺܝܡܳܐ. ܒܰܙܒܰܢ ܡܰܢ ܕܫܳܢܝܽܘܬܳܐ ܘܪܰܘܳܝܽܘܬܳܐ ܐܺܝܬܰܘܗ̱ܝ ܡܫܰܘܕܥܳܢܳܐ܆ ܐܰܝܟ ܐܰܝܟܰܢܳܐ ܕܳܐܡܰܪ ܫܠܝܡܘܢ ܒܡ̈ܰܬܠܶܐ܆ ܒܚܰܡܪܳܐ ܕܶܝܢ ܕܰܠܒܰܪ ܡܶܢ ܢܳܡܽܘܣܳܐ ܪܳܘܶܝܢ^[51]܆ ܒܰܙܒܰܢ ܕܶܝܢ܆ ܕܡܰܠܦܳܢܽܘܬܳܐ ܪܽܘܚܳܢܳܝܬܳܐ܆ ܐܰܝܟܰܢܳܐ ܕܺܐܝܬ ܠܡܶܫܡܰܥ ܠܘܳܬܶܗ ܟܰܕ ܠܘܳܬܶܗ ܕܳܐܡܪܳܐ ܚܶܟܡܬܳܐ܆ ܐܶܫܬܰܘ ܚܰܡܪܳܐ ܗܰܘ ܕܡܰܙܓܶܬ ܠܟܽܘܢ^[52].

ܡܶܛܽܠ ܗܳܠܶܝܢ ܫܚܺܝܩܺܝܢ ܐ̱ܢܳܫܺܝ̈ܢ ܥܠܰܝ܆ ܥܰܠ ܕܠܰܘ ܠܗܳܠܶܝܢ ܡܰܪܺܝܪ̈ܳܬܳܐ ܘܰܡܣܰܓܦܳܢ̈ܝܳܬܳܐ܆ ܛܳܒ̈ܳܬܳܐ ܘܚܰܠ̈ܝܳܬܳܐ ܐܳܡܰܪ ܐ̱ܢܳܐ. ܐܶܢܳܐ ܕܶܝܢ ܗܰܢܺܝܳܐܺܝܬ ܐܶܫܰܐܶܠ ‌ܐܶܢܽܘܢ ܨܳܒܶܝܢ ܗ̱ܘܰܘ ܟܰܝ ܘܒܳܥܶܝܢ ܗ̱ܘܰܘ ܠܺܝ ܕܕܰܐܝܟ ܗܳܢܳܐ ܐܶ݀ܗܘܶܐ ܐܺܝܬܰܝ܆ ܐܰܝܟܰܢܳܐ ܕܰܠܘܳܬ ܢܝܳܚܳܐ ܕܰܒܢܰܝ̈ܢܳܫܳܐ ܐܶ݀ܫܰܟܢܺܝܘܗ̱ܝ^[53] ܠܰܫܪܳܪܳܐ܆ ܐܰܘ ܕܠܳܐ ܐܶ݀ܗܘܶܐ ܡܶܫܟܰܚ ܐ̱ܢܳܐ ܕܶܐ݀ܦܰܪܶܫ ܠܕܽܘܓ̈ܡܰܛܰܐ ܡܰܣ̈ܠܰܝܳܐ܆ ܘܕܶܐ݀ܩܰܦ ܒܳܬܰܪ ܗܳܠܶܝܢ ܒܰܕܡܽܘܬܳܐ ܕܰܒܥܺܝܪܳܐ܆ ܘܰܕܠܳܐ ܢܶܗܘܶܐ ܡܶܫܟܰܚ ܐ̱ܢܐ ܕܰܐܝܟ ܬܚܽܘ̈ܡܶܐ ܕܦܰܘܠܽܘܤ ܐܳܦܶܢ ܡܡܰܫܚܳܐܺܝܬ܆ ܐܳܦ ܕܶܐ݀ܒܰܝܰܐܐ ܒܡܰܠܦܳܢܽܘܬܳܐ ܚܠܺܝܡܬܳܐ܆ ܐܳܦ ܕܠܰܐܝܠܶܝܢ ܕܡܶܬܚܪܶܝܢ ܐܰ݀ܟܶܣ^[54]܆ ܐܶܠܳܐ ܗܳܕܶܐ ܘܠܳܐ ܡܶܕܶܡ ܐ̱ܚܪܺܝܢ ܐܺܝܬܶܝܗ̇܆ ܐܶܠܳܐ ܐܶܢ ܕܰܠܥܺܕܬܳܐ ܢܠܽܘܛܽܘܢ. ܐܳܦ ܓܶܝܪ ܒܺܝ܆ ܐܳܦ ܗܺܝ ܥܬܺܝܕܳܐ ܗ̱ܘܳܬ ܕܩܺܝܢܕܘܢܘܣܐ ܬܶܥܒܶܕ܆ ܟܰܕ ܡܶܬܝܰܠܦܳܐ ܗ̱ܘܳܬ ܠܡܶܬܪܰܥܳܝܽܘ܆ ܠܒܰܪ ܡܶܢ ܗܰܘ ܡܳܐ ܕܙܳܕܶܩ ܠܡܶܬܪܰܥܳܝܽܘ. ܠܗܳܝ ܕܡܳܪܝܳܐ ܢܩܺܝܡܶܝܗ̇ ܥܰܠ ܗܰܝܡܳܢܽܘܬܳܐ ܚܠܺܝܡܬܳܐ܆ ܟܰܕ ܡܢܰܛܰܪ ܘܰܡܦܰܨܶܐ ܠܳܗ̇ ܡܶܢ ܛܳܥܝܽܘܬܳܐ ܐܰܪܛܝܩܝܬܐ ܘܡܶܢ ܟܽܠ ܚܒܳܠܳܐ.

ܐܶܢ ܕܶܝܢ ܠܡ̈ܶܠܶܐ ܕܺܝܠܝ ܓܳܙܶܡ ܐܰܢ̱ܬ ܠܰܡܦܰܣܳܩܽܘ܆ ܛܐܘܤ ܡܰܢ ܟܰܕ ܦܣܳܩܳܐ ܓܳܙܶܡ ܐܰܢ̱ܬ܆ ܐܰܢ̱ܬ ܡܶܢ ܢܰܦܫܳܟ ܢܦܰܠܬ. ܩܕܳܡܰܝ ܕܶܝܢ ܕܺܝܠܝ ܡܰܠܽܘܢ ܗܳܕܶܐ ܓܙܽܘܡ ܠܕܽܘܝܕ. ܦܫܺܝܩܳܐܺܝܬ ܓܶܝܪ ܬܚܰܘܽܘܗ̱ܝ ܕܠܳܐ ܐܰ‌ܠܳܗ܆ ܐܰܝܟ ܐܰܝܢܳܐ ܕܳܐܡܰܪ ܕܠܰܝܬ ܠܶܗ ܐܰ‌ܠܳܗܳܐ^[55]. ܐܶܠܳܐ ܟܰܕ ܡܶܬܠܰܚܡܳܐ ܘܡܶܬܬܣܺܝܡܳܐ ܗܳܝ ܕܶܐܡܰܪ ܣܰܟܠܳܐ ܒܠܶܒܶܗ܆ ܠܘܳܬ ܗܳܝ ܕܠܰܝܬ ܐܰ‌ܠܳܗܳܐ^1: ܕܣܰܟܠܳܐ ܘܠܰܘ ܕܕܰܘܺܝܕ ܬܶܥܒܕܺܝܗ̇ ܠܡܰܪܫܽܘܬܳܐ܆ ܘܡܶܬܓܰܚܟܳܢܳܐ ܬܚܰܘܽܘܗ̱ܝ ܠܰܓܙܳܡܳܟ. ܡܶܛܽܠ ܕܳܐܦ ܦܰܘܠܽܘܤ܆ ܕܣܰܓܺܝܽܐܘܬ ܐܰ‌ܠܳܗ̈ܶܐ ܢܶܗܘܶܐ ܐܺܝܬܰܘܗ̱ܝ ܡܰܠܦܳܢܳܐ ܐܰܝܟ ܡܶܠܬܳܟ ܕܳܐܡܰܪ܆ ܕܺܐܝܬ ܐܰ‌ܠܳܗ̈ܶܐ ܣܰܓܺܝ̈ܶܐܐ ܘܡܳܪ̈ܰܝܳܐ ܣܰܓܺܝ̈ܶܐܐ. ܐܶܠܳܐ ܟܰܕ ܩܰܕܶܡ ܐܶܡܰܪ܆ ܕܠܰܝܬ ܐܰ‌ܠܳܗܳܐ ܐܶܠܳܐ ܐܶܢ ܚܰܕ^[56]܆ ܘܰܓܚܶܟ ܥܰܠ ܛܳܥܝܽܘܬܳܐ܆ ܘܰܐܘܣܶܦ ܐܳܦܶܢ ܐܺܝܬ ܕܡܶܬܐܰܡܪܺܝܢ ܐܰ‌ܠܳܗ̈ܶܐ܆ ܥܳܪܶܩ ܠܶܗ ܡܶܢ ܩܛܺܝܓܪܳܢܽܘܬܳܐ ܗܳܝ ܩܰܪܺܝܪܬܳܐ.

ܣܶܒܠܬܳܐ ܕܶܝܢ ܗܳܝ ܕܠܰܫܝܽܘܠ ܡܰܚܬܳܐ܆ ܗܳܟܰܢܳܐ ܓܶܝܪ ܪܰܫܡܶܗ ܠܰܟܬܳܒܶܗ ܪܽܘܡܢܘܤ ܗܰܘ ܡܦܰܫܩܳܢܳܐ ܚܰܝܠܬܳܢܳܐ܆ ܗܰܘ ܕܰܠܦܽܘ̈ܫܳܩܶܐ ܗܳܢܽܘܢ ܕܶܐܬܶܐܡܰܪܘ̱ ܕܒܰܐܚܪܳܢܝܽܘܬ ܡܶܠܬܳܐ ܫܛܰܪ܆ ܟܽܠܳܗ̇ ܣܺܝܡܳܐ ܒܝܰܕ ܟܽܠܗܶܝܢ ܩܕܳܡ ܟܽܠܢܳܫ܆ ܟܰܕ ܠܰܫܟܺܝܪܽܘܬܳܐ ܒܰܝܬܳܝܬܳܐ ܗܳܝ ܕܺܝܠܳܗ̇ ܡܚܰܘܝܳܐ ܠܗܳܢܽܘܢ ܕܦܳܓܥܺܝܢ܆ ܘܠܳܐ ܣܢܺܝܩܳܐ ܥܰܠ ܗܰܘ ܕܡܰܟܶܤ܆ ܐܶܠܳܐ ܐܶܢ ܐ̱ܢܳܫ ܒܳܗ̇ ܒܰܕܡܽܘܬܳܐ ܠܗܰܘ ܕܰܐܟܬܶܒ ܪܘܶܐ ܒܗܰܘܢܶܗ܆ ܘܠܰܚܛܺܝܬܳܐ ܕܰܟܝܳܢܳܝܬܳܐ ܘܕܰܠܒܰܪ ܡܶܢ ܟܝܳܢܳܐ ܐܺܝܬܶܝܗ̇ ܡܣܒܰܪ^[57]. ܫܠܺܝܚܳܐ ܡܰܢ ܓܶܝܪ ܡܶܛܽܠܳܬܳܢ ܕܺܝܠܰܢ܆ ܗܳܢܽܘܢ ܕܰܒܝܰܕ ܛܰܝܒܽܘܬܳܐ ܕܡܶܐܬܺܝܬܶܗ ܕܒܰܒܣܰܪ ܕܰܡܫܺܝܚܳܐ ܦܳܪܽܘܩܰܢ ܐܶܬܦܪܰܩܢܰܢ ܐܳܡܰܪ܆ ܘܺܐܝܬܰܝܢ ܗ̱ܘܰܝܢ ܒܰܟܝܳܢܳܐ ܒܢܰܝ̈ܳܐ ܕܪܽܘܓܙܳܐ^[58]. ܗܳܢܰܘ ܕܶܝܢ ܒܰܫܪܳܪܳܐ. ܗܰܘ ܓܶܝܪ ܕܗܳܠܶܝܢ ܕܫܳܘ̈ܝܳܢ ܠܪܽܘܓܙܳܐ ܣܳܥܰܪ܆ ܒܪܳܐ ܕܪܽܘܓܙܳܐ ܡܶܫܬܰܡܰܗ⁴. ܐܳܦ ܓܶܝܪ ܥܝܳܕܳܐ ܐܺܝܬ ܠܰܟܬܳܒܳܐ ܐܰ‌ܠܳܗܳܝܳܐ܆ ܕܰܠܗܳܢܽܘܢ ܕܚܰܫܳܐ ܡܶܕܶܡ ܒܬܰܪܥܺܝܬܗܽܘܢ ܟܪܺܝܗܶܝܢ܆ ܘܰܐܚܺܝܕܺܝܢ ܘܡܶܬܢܰܓܕܺܝܢ ܡܶܢܶܗ܆ ܕܰܒܢܰܝ̈ܳܐ ܕܚܰܫܳܐ ܗܰܘ ܢܶܩܪܶܐ ܐܶܢܽܘܢ. ܡܶܛܽܠ ܗܳܕܶܐ ܟܺܝܬ ܐܳܦ ܦܰܘܠܽܘܤ ܕܶܐܡܰܪ ܕܺܐܝܬܰܝܢ ܗ̱ܘܰܝܢ ܒܰܟܝܳܢܳܐ ܒܢܰܝ̈ܳܐ ܕܪܽܘܓܙܳܐ܆ ܩܰܕܶܡ ܐܶܡܰܪ ܓܰܠܝܳܐܺܝܬ. ܟܰܕ ܥܳܒܕܺܝܢ ܗ̱ܘܰܝܢ ܨܶܒ̈ܝܳܢܶܐ ܕܒܶܣܪܳܐ ܘܰܕܬܰܪ̈ܥܝܳܬܳܐ ܕܺܝܠܰܢ^[59]. ܗܳܢܰܘ ܕܶܝܢ ܘܟܰܕ ܦܰܓܪܳܢܳܐܺܝܬ܆ ܘܟܰܕ ܒܬܰܪܥܺܝܬܳܐ ܚܳܛܶܝܢ ܗ̱ܘܰܝܢ. ܘܰܚܙܺܝ ܠܺܝ ܠܰܡܫܰܡܠܝܽܘܬܳܗ̇ ܕܬܰܪܥܺܝܬܳܐ ܫܠܺܝܚܳܝܬܳܐ ܘܕܰܐܝܟܰܢܳܐ ܠܟܽܠ ‌ܐܳܕܫܳܐ ܕܰܚܛܺܝܬܳܐ ܦܰܘܕܳܐ ܕܨܶܒܝܳܢܳܐ ܘܰܕܚܽܘܫܳܒܳܐ ܗܰܘ ܕܶܐܬܟܪܰܗ ܪܶܚܡܰܬ ܗܰܢܺܝܽܐܘܬܳܐ ܝܳܕܥܳܐ ܠܶܗ. ܐܳܦ ܓܶܝܪ ܗܳܝ ܕܢܶܨܒܶܐ ܐܰܘ ܗܳܝ ܕܠܳܐ ܢܶܨܒܶܐ܆ ܕܺܝܠܳܝܬܳܐ ܗ̱ܝ ܕܢܰܦܫܳܐ ܘܠܰܘ ܕܦܰܓܪܳܐ. ܘܰܒܪܰܡ ܨܶܒܝܳܢܳܐ ܕܒܶܣܪܳܐ ܫܰܡܗܳܗ̇ ܠܰܚܛܺܝܬܳܐ ܦܰܓܪܳܢܳܝܬܳܐ. ܟܰܕ ܡܚܰܘܶܐ ܕܡܶܢ ܨܶܒܝܳܢܳܐ ܒܺܝܫܳܐ ܘܡܶܢ ܢܰܦܫܳܐ ܕܡܰܕܒܪܳܐ ܗܺܝ ܠܳܗ̇ ܠܘܳܬ ܗܰܘ ܡܳܐ ܕܨܳܒܝܳܐ܆ ܘܡܶܬܢܰܓܕܳܐ ܒܦܰܓܪܳܐ܆ ܐܺܝܬܰܝܗܽܘܢ ܐܳܦ ܚܰܫ̈ܶܐ ܗܳܢܽܘܢ ܕܰܒܝܰܕ ܒܶܣܪܳܐ ܡܶܬܬܰܥܒܕܺܝܢ. ܕܰܥܝܳܕܰܐ ܗ̄ܘ ܕܶܝܢ ܠܰܟܬܳܒܳܐ ܐܰ‌ܠܳܗܳܝܳܐ܆ ܕܰܠܗܳܢܽܘܢ ܕܺܐܝܬܰܝܗܽܘܢ ܥܳܒܽܘ̈ܕܰܝܗܽܘܢ ܕܚܰܫ̈ܶܐ܆ ܒܢܰܝ̈ܳܐ ܕܺܝܠܗܽܘܢ ܕܗܳܢܽܘܢ ܚܰܫ̈ܶܐ ܢܶܩܪܶܐ܆ ܡܰܘܕܰܥ ܐܳܦ ܕܰܘܺܝܕ ܟܰܕ ܡܙܰܡܰܪ ܗܳܟܰܢܳܐ. ܘܰܒܪܳܗ̇ ܕܠܳܐ ܢܳܡܽܘܣܳܝܽܘܬܳܐ ܠܳܐ ܢܰܘܣܶܦ ܠܡܰܒܳܐܫܽܘ ܠܶܗ^[60]. ܘܳܐܦ ܗܽܘ ܡܳܪܰܢ ܕܶܝܢ ܡܶܛܽܠ ܝܺܗܽܘܕܳܐ ܐܳܡܰܪ܆ ܘܠܳܐ ܐ̱ܢܳܫ ܡܶܢܗܽܘܢ ܐܳܒܶܕ܆ ܐܶܠܳܐ ܐܶܢ ܗܰܘ ܒܪܳܐ ܕܰܐܒܕܳܢܳܐ^[61]. ܘܳܐܦ ܫܠܺܝܚܳܐ ܕܶܝܢ ܠܗܳܢܽܘܢ ܕܠܳܐ ܗܰܝܡܶܢܘ ܠܶܐܘܰܢܓܶܠܺܝܽܘܢ܆ ܒܢܰܝ̈ܳܐ ܕܠܳܐ ܡܶܬܛܦܺܝܣܳܢܽܘܬܳܐ ܫܰܡܰܗ ܐܶܢܽܘܢ^[62].

ܚܛܺܝܬܳܐ ܕܶܝܢ ܟܝܳܢܳܝܬܳܐ܆ ܘܠܳܐ ܐ̱ܢܳܫ ܡܶܢ ܗܳܢܽܘܢ ܕܰܬܪ̈ܺܝܨܳܬܳܐ ܡܶܬܪܰܥܶܝܢ ܐܰܫܠܶܡ ܠܰܡܫܰܒܳܚܽܘ^[63]. ܐܶܠܳܐ ܬܺܐܡܰܪ܆ ܕܳܐܦ ܗܽܘ ܗܰܘ ܛܳܒܳܐ܆ ܚܛܺܝܬܳܐ ܟܝܳܢܳܝܬܳܐ܆ ܠܗܳܝ ܦܰܓܪܳܢܳܝܬܳܐ ܟܰܢܺܝ ܐܰܝܟ ܫܰܪܺܝܪܬܳܐ. ܡܳܢܳܐ ܗܳܟܺܝܠ. ܚܛܺܝܬܳܐ ܗܳܝ ܕܰܒܨܶܒܝܳܢܳܐ܆ ܕܰܓܳܠܬܳܐ ܐܺܝܬܶܝܗ̇܆ ܠܡܶܢܗܽܘܢ ܡܰܢ ܓܶܝܪ ܕܰܚ̈ܛܳܗܶܐ ܐܶܡܰܪ ܟܝܳܢܳܝ̈ܶܐ܆ ܠܡܶܢܗܽܘܢ ܕܶܝܢ ܨܶܒ̈ܝܳܢܳܝܶܐ. ܘܰܐܝܢܰܐ ܗ̄ܘ ܗܰܘܢܳܐ ܕܦܽܘܠܳܓܳܐ ܠܳܐ ܝܰܠܺܝܦܳܐ ܗܰܘ ܕܕܰܐܝܟ ܗܳܢܳܐ. ܡܶܬܬܕܺܝܢܺܝܢܰܢ ܓܶܝܪ ܚܠܳܦ ܟܽܠ ‌ܐܳܕܫܳܐ ܕܰܚܛܳܗܳܐ܆ ܐܰܝܟ ܡܰܢ ܕܫܰܪܺܝܪܳܐܺܝܬ ܚܛܰܝܢܰܢ ܘܠܰܘ ܕܰܓܳܠܳܐܺܝܬ. ܐܺܝܢ ܐܳܡܰܪ. ܐܶܠܳܐ ܐܳܦ ܗܽܘ ܫܠܺܝܚܳܐ ܟܰܕ ܠܪ̈ܽܘܡܳܝܶܐ ܟܳܬܶܒ ܗ̱ܘܳܐ ܐܶܡܰܪ܆ ܕܢܶܩ̈ܒܳܬܗܽܘܢ ܓܶܝܪ ܚܰܠ̈ܶܦܶܝܢ ܠܰܚܫܰܚܬܳܐ ܟܝܳܢܳܝܬܳܐ܆ ܠܗܳܝ ܕܰܠܒܰܪ ܡܶܢ ܟܝܳܢܳܐ^[64]. ܐܺܝܛܰܐ ܠܳܐ ܡܶܬܒܰܩܶܐ ܐܰܢ̱ܬ܆ ܕܰܚܫܰܚܬܳܐ ܟܝܳܢܳܝܬܳܐ ܐܶܡܰܪ܆ ܘܠܰܘ ܚܛܺܝܬܳܐ܆ ܚܫܰܚܬܳܐ ܡܰܢ ܟܝܳܢܳܝܬܳܐ ܕܢܶܩܒܬܳܐ ܐܺܝܬܶܝܗ̇܆ ܗܳܝ ܕܒܺܐܝ̈ܕܶܝܗ̇ ܗܳܘܝܳܐ ܥܳܒܽܘܕܽܘܬ ܒܢܰܝ̈ܳܐ ܘܝܽܘܒܳܠܳܐ ܕܓܶܢܣܳܐ. ܠܰܘ ܗܳܝ ܕܗܰܢܺܝܽܐܘܬܳܐ ܐܺܝܬ ܠܳܗ̇ ܫܽܘܠܳܡܳܐ܆ ܐܶܠܳܐ ܗܳܝ ܕܺܐܝܬ ܠܳܗ̇ ܗܰܘ ܫܽܘܠܳܡܳܐ ܕܦܰܩܳܚ ܟܺܝܬ ܘܚܳܫܰܚ܆ ܡܰܘܠܕܳܢܽܘܬܳܐ ܕܰܒ̈ܢܰܝܳܐ܆ ܗܳܝ ܕܡܶܢܳܗ̇ ܐܶܣܟܺܡܶܗ ܕܥܳܠܡܳܐ ܐܶܬܩܰܝܰܡ. ܗܳܝ ܕܶܝܢ ܕܰܠܒܰܪ ܡܶܢ ܟܝܳܢܳܐ܆ ܗܳܝ ܕܒܳܗ̇ ܦܰܚ̈ܙܶܐ ܐܳܦ ܥܰܠ ܕܶܟܪ̈ܶܐ ܫܳܢܶܝܢ.

ܚܫܰܚܬܳܐ ܗܳܟܺܝܠ ܟܝܳܢܳܝܬܳܐ ܕܢܶܩܒܬܳܐ܆ ܠܰܘ ܚܛܺܝܬܳܐ ܐܺܝܬܶܝܗ̇܆ ܟܰܕ ܒܢܳܡܽܘܣܳܐ ܕܙܽܘܘܳܓܳܐ ܐܺܝܬ ܠܳܗ̇ ܣܢܺܐܓܪܽܘܬܳܐ. ܟܰܕ ܕܶܝܢ ܢܳܡܽܘܣܳܐ ܟܳܠܶܐ ܠܚܽܘܠܛܳܢܳܐ ܐܰܝܟ ܠܳܐ ܢܳܡܽܘܣܳܝܳܐ܆ ܕܰܐܝܟ ܐܰܝܟܰܢ܆ ܠܗܰܘ ܕܰܠܘܳܬ ܚܳܬܳܐ ܐܰܘ ܐܶܡܳܐ܆ ܐܰܘ ܠܘܳܬ ܐ̱ܢܳܫ ܡܶܢ ܦܰܪ̈ܨܽܘܦܶܐ ܕܕܰܐܝܟ ܗܳܠܶܝܢ܆ ܐܶܢ ܐ̱ܢܳܫ ܟܰܕ ܐܶܨܛܠܺܝ ܒܬܰܪܥܺܝܬܶܗ܆ ܠܫܶܕܠܳܐ ܕܗܰܢܺܝܽܐܘܬܳܐ ܐܰܝܟ ܒܰܠܽܘܥܳܐ ܢܩܰܒܶܠ ܘܢܶܥܒܰܪ ܢܳܡܽܘܣܳܐ܆ ܠܰܘ ܡܶܛܽܠ ܚܫܰܚܬܳܐ ܟܝܳܢܳܝܬܳܐ ܗܳܝ ܕܡܶܢܳܗ̇ ܕܢܶܩܒܬܳܐ܆ ܠܡܶܫܬܰܪܥܳܢܽܘܬܶܗ ܕܚܽܘܫܳܒܳܐ ܘܰܠܟܽܘܪܗܳܢܶܗ܆ ܗܰܘ ܕܡܶܢܶܗ ܐܺܝܬܶܝܗ̇ ܗܳܝ ܕܢܶܚܛܶܐ܆ ܚܛܺܝܬܳܐ ܟܝܳܢܳܝܬܳܐ ܩܳܪܶܐ ܐ̱ܢܳܐ. ܕܨܶܒܝܳܢܳܐ ܓܶܝܪ ܐܰܝܟ ܕܶܐܡܪܶܬ ܐܺܝܬܶܝܗ̇ ܟܽܘܪܗܳܢܳܐ ܗܳܕܶܐ. ܟܽܘܪܗܳܢܳܐ ܕܶܝܢ ܠܰܘ ܟܝܳܢܳܝܳܐ ܐܺܝܬܰܘܗ̱ܝ. ܕܰܚܛܺܝܬܳܐ ܓܶܝܪ ܕܝܐܬܣܝܤ ܗܳܝ ܕܕܰܐܝܟ ܗܳܕܶܐ ܕܢܰܦܫܳܐ܆ ܐܺܝܬܶܝܗ̇ ܥܶܩܳܪܳܐ ܘܥܶܠܬܳܐ. ܐܳܦ ܓܶܝܪ ܡܶܢ ܡܶܬܬܙܺܝܥܳܢܽܘܬܶܗ ܕܗܰܘܢܳܐ ܘܡܶܢ ܚܰܫܳܐ܆ ܡܶܬܬܕܺܝܢ ܗܽܘ ܚܛܳܗܳܐ ܘܦܰܘܕܳܐ. ܘܳܐܦ ܠܘܳܬ ܟܬܳܒܳܐ ܐܰ‌ܠܳܗܳܝܳܐ܆ ܘܳܐܦ ܠܘܳܬ ܟܽܠܗܽܘܢ ܗܳܢܽܘܢ ܕܰܒܦܘ̈ܠܝܛܝܐܤ ܐܰܘܟܺܝܬ ܡܕܺܝܢ̱ܬܳܐ ܗܳܢܶܝܢ ܕܫܰܦܺܝܪ ܡܶܬܕܰܒܪ̈ܳܢ ܒܢܳܡܽܘܣ̈ܶܐ ܣܳܡܘ ܢܳܡܽܘ̈ܣܶܐ.

ܘܰܚܙܺܝ ܠܩܰܕܺܝܫܳܐ ܝܽܘܚܰܢܳܢ ܐܶܦܝܣܩܘܦܐ ܕܩܽܘܤܛܢܛܝܢܘܦܘܠܝܤ܆ ܕܒܶܐܓܰܪܬܳܐ ܗܳܝ ܕܰܠܘܳܬ ܪ̈ܽܘܡܳܝܶܐ ܠܦܶܬܓܳܡܳܐ ܗܳܢܳܐ ܕܗܳܫܳܐ ܡܶܢܰܢ ܐܶܬܒܰܚܰܢ ܡܦܰܫܶܩ܆ ܘܢܳܦܶܩ ܒܬܽܘܪܓܳܡܳܐ ܗܰܘ ܕܰܐܪܒܥܳܐ ܗܳܠܶܝܢ܆ ܘܰܡܚܰܘܶܐ ܕܰܥܒܽܘܪܝܳܐ ܕܢܳܡܽܘܣܳܐ ܟܰܕ ܡܶܢ ܬܰܪܥܺܝܬܳܐ ܐܺܝܬ ܠܶܗ ܚܺܐܦܳܐ܆ ܠܰܚܛܺܝܬܳܐ ܝܳܗܶܒ ܥܶܠܬܳܐ܆ ܘܨܶܒܝܳܢܳܝܬܳܐ ܘܳܠܝܳܐܺܝܬ ܘܠܳܚܡܳܐܺܝܬ܆ ܘܠܰܘ ܟܝܳܢܳܝܬܳܐ ܥܳܒܶܕ ܠܳܗ̇ ܕܬܶܬܩܪܶܐ. ܟܽܠ ܡܳܐ ܓܶܝܪ ܕܥܳܒܰܪ ܥܰܠ ܢܳܡܽܘܣ̈ܶܐ ܗܳܢܽܘܢ ܕܶܐܬܬܣܺܝܡܘ̱ ܡܶܢ ܐܰ‌ܠܳܗܳܐ܆ ܠܢܽܘܟܪ̈ܳܝܳܬܳܐ ܪܳܐܶܓ ܘܠܰܘ ܠܗܳܢܶܝܢ ܕܰܡܬܰܚ̈ܡܳܢ ܒܢܳܡܽܘܣ̈ܶܐ. ܐܰܟܙܢܳܐ ܓܶܝܪ ܕܣܰܓܺܝ̈ܶܐܐ ܙܰܒ̈ܢܺܝܢ ܣܰܓܺܝ̈ܳܐܢ ܟܰܕ ܠܪܶܓܬܳܐ ܕܡܶܐܟ̈ܠܳܬܳܐ ܐܰܪܦܺܝܘ ܡܶܕܪܳܐ ܐܳܟܠܺܝܢ ܘܒܶܙܩ̈ܶܐ ܕܰܩܺܝ̈ܩܶܐ܆ ܘܰܐ̱ܚܪ̈ܳܢܶܐ ܕܶܝܢ ܟܰܕ ܡܶܢ ܨܶܗܝܳܐ ܬܰܩܺܝܦܳܐ ܡܶܬܬܰܚܕܺܝܢ܆ ܐܳܦ ܠܰܣܝܳܢܳܐ ܙܰܒ̈ܢܺܝܢ ܣܰܓܺܝ̈ܳܐܢ ܡܶܬܪܰܓܪܓܺܝܢ܆ ܗܳܟܰܢܳܐ ܐܳܦ ܗܳܢܽܘܢ܆ ܠܘܳܬ ܗܳܕܶܐ ܪܶܚܡܬܳܐ ܕܰܠܒܰܪ ܡܶܢ ܢܳܡܽܘܣܳܐ ܫܦܰܥܘ ܢܦܰܩܘ. ܐܶܢ ܕܶܝܢ ܬܺܐܡܰܪ ܘܡܶܢ ܐܰܝܟܳܐ ܟܽܠܳܗ̇ ܗܳܕܶܐ ܣܰܓܺܝܽܐܘܬܳܗ̇ ܕܪܶܓܬܳܐ ܗܳܕܶܐ܆ ܡܶܢ ܡܶܫܬܰܒܩܳܢܽܘܬܳܐ ܕܡܶܢ ܐܰ‌ܠܳܗܳܐ. ܡܶܫܬܰܒܩܳܢܽܘܬܳܐ ܕܶܝܢ ܕܡܶܢ ܐܰ‌ܠܳܗܳܐ ܡܶܢ ܐܰܝܟܳܐ. ܡܶܢ ܠܳܐ ܢܳܡܽܘܣܳܝܽܘܬܳܐ ܕܗܳܢܽܘܢ ܕܫܰܒܩܽܘܗ̱ܝ.

ܘܳܐܦ ܒܬܽܘܪܓܳܡܳܐ ܕܶܝܢ ܗܰܘ ܕܚܰܡܫܳܐ ܟܬܰܒ ܗܳܟܰܢܳܐ. ܡܶܛܽܠܗܳܕܶܐ ܟܺܝܬ ܠܳܐ ܐܶܡܰܪ ܘܰܐܝܟܰܢܳܐ ܕܠܳܐ ܝܺܕܰܥܘ ܠܰܐܠܳܗܳܐ܆ ܐܶܠܳܐ ܐܰܝܟܰܢܳܐ ܕܠܳܐ ܒܩܰܘ ܕܢܶܗܘܶܐ ܐܺܝܬ ܠܗܽܘܢ ܐܰ‌ܠܳܗܳܐ ܒܺܝܕܰܥܬܳܐ^[65]܆ ܟܰܕ ܡܚܰܘܶܐ ܕܕܺܝܢܳܐ ܡܚܰܒܠܳܐ ܘܰܕܚܶܪܝܳܢܳܐ ܡܰܠܽܘܢ ܐܺܝܬܰܘܗ̱ܝ ܗܽܘ ܚܛܳܗܳܐ܆ ܘܠܰܘ ܕܰܚܛܽܘܦܝܳܐ ܘܰܫܓܽܘܡܝܳܐ. ܘܠܰܘ ܕܒܶܣܪܳܐ ܐܰܝܟܰܢܳܐ ܕܐ̱ܢܳܫܺܝ̈ܢ ܡܶܢ ܗܶܪ̈ܛܝܩܘ ܐܳܡܪܺܝܢ܆ ܐܶܠܳܐ ܕܬܰܪܥܺܝܬܳܐ ܘܰܕܪܶܓܬܳܐ ܒܺܝܫܬܳܐ ܐܺܝܬܰܝܗܽܘܢ ܚ̈ܛܳܗܶܐ܆ ܘܰܕܡܶܢ ܬܰܡܳܢ ܐܺܝܬܶܝܗ̇ ܡܥܺܝܢܳܐ ܕܒܺܝ̈ܫܳܬܳܐ. ܡܶܛܽܠ ܓܶܝܪ ܕܗܽܘ ܗܰܘܢܳܐ ܗܘ̣ܳܐ ܠܳܐ ܒܚܺܝܪܳܐ܆ ܟܽܠܗܶܝܢ ܐܶܬܓܪ̈ܕܶܝܢ ܡܶܟܺܝܠ ܘܶܐܬܗܦ̈ܰܟܶܝܢ܆ ܟܰܕ ܗܶܢܝܽܘܟܳܐ ܐܰܘܟܺܝܬ ܐܰܚܺܝܕ ܥܰܪ̈ܩܶܐ ܐܶܬܚܰܒܰܠ.

ܗܳܟܰܢܳܐ ܐܳܦ ܬܶܐܽܘܠܽܘܓܽܘܤ ܓܪܺܝܓܽܘܪܺܝܽܘܤ ܒܶܐܓܰܪܬܳܐ ܕܰܠܘܳܬ ܩܠܺܝܕܘܢܝܘܤ܆ ܟܰܕ ܠܘܳܬ ܐܰܦܽܘܠܺܝܢܰܪܺܝܽܘܤ ܡܶܬܟܰܬܰܫ܆ ܕܳܐܡܰܪ ܗ̱ܘܳܐ ܕܗܰܘܢܳܐ ܠܳܐ ܐܶܬܢܣܶܒ ܡܶܢ ܐܰ‌ܠܳܗܳܐ ܡܶܠܬܳܐ ܗܰܘ ܕܶܐܬܒܰܣܰܪ ܡܶܛܽܠܳܬܰܢ܆ ܟܰܕ ܡܶܛܽܠ ‌ܐܳܕܳܡ ܕܰܥܒܰܪ ܥܰܠ ܦܽܘܩܕܳܢܳܐ ܐܰ‌ܠܳܗܳܝܳܐ ܡܡܰܠܶܠ܆ ܗܳܟܰܢܳܐ ܐܳܡܰܪ. ܗܰܘ ܓܶܝܪ ܕܰܠܦܽܘܩܕܳܢܳܐ ܩܰܒܶܠ܆ ܗܳܢܳܐ ܠܦܽܘܩܕܳܢܳܐ ܠܳܐ ܢܛܰܪ. ܗܰܘ ܕܶܝܢ ܕܰܠܦܽܘܩܕܳܢܳܐ ܠܳܐ ܢܛܰܪ܆ ܗܳܢܳܐ ܐܳܦ ܠܰܥܒܳܪ ܦܽܘܩܕܳܢܳܐ ܐܰܡܪܰܚ. ܗܰܘ ܕܶܝܢ ܕܰܥܒܰܪ ܥܰܠ ܦܽܘܩܕܳܢܳܐ܆ ܗܳܢܳܐ ܐܳܦ ܥܰܠ ܦܽܘܪܩܳܢܳܐ ܣܢܺܝܩ ܗ̱ܘܳܐ ܝܰܬܺܝܪܳܐܺܝܬ. ܗܰܘ ܕܶܝܢ ܕܥܰܠ ܦܽܘܪܩܳܢܳܐ ܣܢܺܝܩ ܗ̱ܘܳܐ܆ ܗܳܢܳܐ ܐܳܦ ܐܶܬܢܣܶܒ. ܗܰܘܢܳܐ ܐܰܪܰܐ ܐܶܬܢܣܶܒ. ܘܗܳܕܶܐ ܐܶܬܚܰܘܝܰܬ ܐܳܦܶܢ ܠܳܐ ܨܳܒܶܝܢ܆ ܒܰܐܢܰܢ̈ܩܰܐܤ ܘܡܶܬܚܰܘ̈ܝܳܢܘܳܬܳܐ ܓܶܐܘܡܰܛܪ̈ܺܝܩܳܝܳܬܳܐ܆ ܗܳܝ ܟܺܝܬ ܕܳܐܡܪܺܝܢ.

ܘܳܐܦ ܚܰܟܺܝܡܳܐ ܕܶܝܢ ܘܩܰܕܺܝܫܳܐ ܩܽܘܪܝܠܘܤ܆ ܟܽܘܪܗܳܢܳܐ ܘܠܰܘ ܟܝܳܢܳܐ ܝܳܕܰܥ ܠܳܗ̇ ܠܰܚܛܺܝܬܳܐ܆ ܘܠܰܚܒܳܠܳܐ ܗܰܘ ܕܰܓܕܰܫ ܠܶܗ ܠܒܶܣܪܳܐ ܡܶܢ ܟܽܘܪܗܳܢܶܗ ܕܗܰܘܢܳܐ܆ ܕܠܰܘ ܫܰܦܺܝܪ ܡܰܕܒܰܪ^[66] ܗ̱ܘܳܐ ܘܰܠܘܳܬ ܗܳܠܶܝܢ ܕܰܡܝܰܬܪ̈ܳܢ ܠܙܰܘܥܳܐ ܗܰܘ ܪܰܝܽܘܓܬܳܢܳܐ ܗܰܘ ܕܰܢܨܺܝܒ ܒܰܢ܆ ܡܰܠܽܘܢ ܕܶܝܢ ܕܡܶܬܬܰܝܬܶܐ ܗ̱ܘܳܐ ܡܶܢܶܗ܆ ܟܰܕ ܒܝܰܕ ܪܶܚܡܰܬ ܗܰܢܺܝܽܐܘܬܳܐ ܫܟܺܝܪܬܳܐ ܐܶܬܒܰܥܪܰܪ ܘܰܦܩܰܪ܆ ܘܠܰܚܛܺܝܬܳܐ ܒܰܕܡܽܘܬ ܢܳܡܽܘܣܳܐ ܡܶܟܺܝܠ ܦܳܩܶܕ ܗ̱ܘܳܐ ܠܶܗ. ܟܬܰܒ ܕܶܝܢ ܗܳܟܰܢܳܐ ܒܶܐܓܰܪܬܳܐ ܗܳܝ ܩܰܕܡܳܝܬܳܐ ܕܰܠܘܳܬ ܣܽܘܩܢܣܘܣ^[67]. ܐܳܡܪܺܝܢܰܢ ܗܳܟܺܝܠ ܕܡܶܢ ܥܒܳܪ ܦܽܘܩܕܳܢܳܐ ܗܰܘ ܕܒܳܐܕܳܡ܆ ܟܰܕ ܗܽܘ ܟܝܳܢܳܐ ܐ̱ܢܳܫܳܝܳܐ ܚܰܫ ܚܒܳܠܳܐ܆ ܘܬܰܪܥܺܝܬܳܐ ܗܳܝ ܕܒܰܢ ܡܶܬܡܰܪܕܳܐ ܗ̱ܘܳܬ ܘܡܶܬܥܰܫܡܳܐ ܡܶܢ ܪ̈ܓܺܝܓܳܬܳܐ ܗܳܠܶܝܢ ܕܒܶܣܪܳܐ܆ ܐܰܘܟܺܝܬ ܡܶܢ ܙܰܘ̈ܥܶܐ ܗܳܢܽܘܢ ܢܨܺܝ̈ܒܶܐ ܕܒܰܢ܆ ܐܳ‌ܠܨܳܝܬܳܐ ܗܘ̣ܳܬ ܠܰܢ ܠܗܳܢܽܘܢ ܕܥܰܠ ‌ܐܰܪܥܳܐ ܠܘܳܬ ܦܽܘܪܩܳܢܳܐ܆ ܗܳܝ ܕܢܶܬܒܰܪܢܰܫ ܗ̱ܘܳܐ ܡܶܠܬܳܐ ܕܰܐ‌ܠܳܗܳܐ܆ ܐܰܝܟܰܢܳܐ ܕܰܠܒܶܣܪܳܐ ܐ̱ܢܳܫܳܝܳܐ ܗܰܘ ܕܰܡܫܰܥܒܰܕ ܗ̱ܘܳܐ ܠܰܚܒܳܠܳܐ܆ ܘܶܐܬܟܪܰܗ ܪܶܚܡܰܬ ܗܰܢܺܝܽܐܘܬܳܐ܆ ܕܺܝܠܳܢܳܝܳܐ ܕܺܝܠܶܗ ܢܶܥܒܕܺܝܘܗ̱ܝ. ܘܡܶܛܽܠ ܟܺܝܬ ܕܺܐܝܬܰܘܗ̱ܝ ܚܰܝ̈ܶܐ ܘܡܰܥܒܶܕ ܚܰܝ̈ܶܐ܆ ܢܒܰܛܶܠ ܡܰܢ ܠܰܚܒܳܠܳܐ ܗܰܘ ܕܒܶܗ܆ ܢܶܟܐܶܐ ܕܶܝܢ ܒܙܰܘ̈ܥܶܐ ܗܳܢܽܘܢ ܢܨܺܝ̈ܒܶܐ܆ ܝܺܕܺܝܥܳܐ ܕܶܝܢ ܕܰܒܗܳܠܶܝܢ ܕܰܠܘܳܬ ܪܶܚܡܰܬ ܗܰܢܺܝܽܐܘܬܳܐ. ܗܳܟܰܢܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܕܰܬܡܽܘܬ ܚܛܺܝܬܳܐ ܗܳܝ ܕܒܶܗ. ܥܰܗܺܝܕܺܝܢ ܚ̱ܢܰܢ ܓܶܝܪ܆ ܐܳܦ ܠܛܽܘܒܬܳܢܐ ܦܰܘܠܽܘܤ ܕܢܳܡܽܘܣܳܐ ܕܰܚܛܺܝܬܳܐ ܩܪܳܝܗ̱ܝ ^[68]܆ ܠܙܰܘܥܳܐ ܗܰܘ ܢܨܺܝܒܳܐ ܕܒܰܢ. ܩܰܕܺܝܡܳܐ ܗܳܟܺܝܠ ܝܺܕܺܝܥܳܐ܆ ܕܗܳܝ ܕܢܶܬܟܪܰܗ ܪܶܚܡܰܬ ܗܰܢܺܝܽܐܘܬܳܐ܆ ܘܰܒܗܳܕܶܐ ܢܺܐܩܰܪ ܙܰܘܥܳܐ ܗܰܘ ܢܨܺܝܒܳܐ ܕܒܰܢ܆ ܘܢܳܡܽܘܣܳܐ ܕܗܳܝ ܕܢܶܚܛܶܐ ܢܶܗܘܶܐ ܠܶܗ ܠܗܰܘܢܳܐ ܗܰܘ ܪܺܝܫܳܢܳܝܳܐ܆ ܘܰܛܪܽܘܢܳܐܺܝܬ ܢܰܝܬܶܝܘܗ̱ܝ ܘܢܶܕܒܪܺܝܘܗ̱ܝ܆ ܗܳܕܶܐ ܐܺܝܬܶܝܗ̇ ܚܛܺܝܬܳܐ. ܠܗܳܝ ܕܶܝܢ ܕܡܶܢ ܟܽܘܪܗܳܢܳܐ ܓܶܕܫܰܬ܆ ܟܝܳܢܳܝܬܳܐ ܠܳܐ ܐ̱ܢܳܫ ܐܳܡܰܪ ܠܳܗ̇ ܡܬܽܘܡ.

ܡܶܢ ܐܰܝܟܳܐ ܗܳܟܺܝܠ ‌ܐܶܬ̣ܳܬ̣ ܠܗܰܘܢܶܗ܆ ܕܗܰܘ ܢܰܓܳܪܳܐ ܕܣܶܒܠܬܳܐ ܗܳܝ ܢܳܨܝܰܬ̣ ܥܰܡ ܐܰ‌ܠܳܗܳܐ܆ ܕܰܠܦܽܘܠܳܓܳܐ ܗܳܢܳܐ ܕܰܚܛܺܝܬܳܐ ܢܰܥܶܠ ܠܰܢ܆ ܘܰܠܗܳܝ ܡܰܢ ܦܰܓܪܳܢܳܝܬܳܐ ܢܺܐܡܰܪ ܟܝܳܢܳܝܬܳܐ܆ ܠܗܳܝ ܕܶܝܢ ܕܰܒܬܰܪܥܺܝܬܳܐ ܨܶܒܝܳܢܳܝܬܳܐ܆ ܘܢܺܐܡܰܪ ܗܳܟܰܢܳܐ. ܡܚܰܘܶܐ ܕܝܰܬܺܝܪ ܪܰܒ ܚܛܳܗܳܐ ܗܰܘ ܕܨܶܒܝܳܢܳܐ ܐܰܘ ܗܰܘ ܕܰܟܝܳܢܳܐ. ܘܝܰܬܺܝܪ ܝܰܩܺܝܪܳܐ ܛܳܒ ܡܶܢ ܗܳܝ ܡܶܬܪܰܓܫܳܢܺܝܬܳܐ܆ ܣܰܟܠܽܘܬܳܐ ܗܳܝ ܡܶܬܗܰܘܢܳܢܺܝܬܳܐ. ܡܶܛܽܠ ܕܳܐܟܶܠ ܩܰܪܨܳܐ܆ ܡܚܰܪܪܳܐ ܐܺܝܬܰܘܗ̱ܝ ܡܶܢ ܣܰܟ̈ܠܘܳܬܳܐ ܗܳܠܶܝܢ ܗܽܘ̈ܠܳܢܳܝܳܬܳܐ. ܕܠܳܐ ܓܫܽܘܡ ܗܘ ܓܶܝܪ. ܘܰܐܝܢܳܐ ܐܳܕܫܳܐ ܢܶܫܟܰܚ ܐ̱ܢܳܫ ܐܶܡ̣ܰܪ ܠܺܝ܆ ܕܰܚܛܺܝܬܳܐ ܕܰܟܝܳܢܳܐ ܐܰܝܟ ܕܳܐܡܰܪ ܐܰܢ̱ܬ܆ ܘܰܕܠܰܘ ܨܶܒܝܳܢܳܐ ܐܺܝܬ ܠܳܗ̇ ܫܽܘܪܳܝܳܐ. ܫܳܡܥܺܝܢ ܚ̱ܢܰܢ ܓܶܝܪ ܠܰܐܒܳܗ̈ܳܬܳܐ ܩܰܕܺܝ̈ܫܶܐ܆ ܕܡܰܠܦܺܝܢ ܒܗܳܠܶܝܢ ܕܡܶܢ ܠܥܶܠ ‌ܐܶܬܬܣܺܝ̈ܡܶܝܢ܆ ܕܬܰܪܥܺܝܬܳܐ ܐܺܝܬܶܝܗ̇ ܡܥܺܝܢܳܐ ܕܟܽܠܗܽܘܢ ܚ̈ܛܳܗܶܐ܆ ܘܕܰܕܗܶܪ̈ܛܝܩܘ ܐܺܝܬܶܝܗ̇ ܗܳܝ ܕܥܰܠ ܒܶܣܪܳܐ ܢܰܣܩܺܝܗ̇ ܠܥܶܠܬܳܐ ܕܰܚܛܺܝܬܳܐ.

ܐܰܝܟܰܢܳܐ ܕܶܝܢ ܠܰܘ ܐܳܦ ܠܽܘܩܒܰܠ ܚܽܘܫܳܒ̈ܶܐ ܓܰܘܳܢܳܝ̈ܶܐ ܕܟܽܠܗܽܘܢ ܒܢܰܝ̈ܢܳܫܳܐ ܡܶܬܟܰܬܰܫ ܐܰܢ̱ܬ܆ ܕܠܰܚܛܳܗܳܐ ܡܶܬܪܰܓܫܳܢܳܐ ܘܦܰܓܪܳܢܳܝܳܐ܆ ܕܝܰܬܺܝܪ ܩܰܠܺܝܠ ‌ܐܳܡܰܪ ܐܰܢ̱ܬ ܠܶܗ܆ ܛܳܒ ܡܶܢ ܚܛܳܗܳܐ ܗܰܘ ܡܶܣܬܰܟܠܳܢܳܐ ܘܕܰܒܬܰܪܥܺܝܬܳܐ. ܠܰܘ ܓܶܝܪ ܗܺܝ ܟܰܕ ܗܺܝ ܒܕܽܘܟ ܐܺܝܬܶܝܗ̇܆ ܗܳܝ ܕܰܒܬܰܪܥܺܝܬܶܗ ܪܶܓܬܳܐ ܕܓܰܘܪܳܐ ܢܶܣܰܒ ܐ̱ܢܳܫ܆ ܘܰܥܕܰܡܳܐ ܠܗܳܕܶܐ ܢܩܽܘܡ܆ ܠܗܳܝ ܕܳܐܦ ܒܶܗ ܒܦܰܓܪܳܐ ܢܶܣܥܽܘܪ ܓܰܘܪܳܐ. ܐܳܦܶܢ ܓܶܝܪ ܘܡܳܪܰܢ ܠܗܰܘ ܕܚܳܪ ܒܰܐܢ̱ܬܬܳܐ ܠܘܳܬ ܗܳܝ ܕܢܶܪܰܓ܆ ܕܓܰܘܪܳܐ ܕܳܢ^[69]܆ ܐܶܠܳܐ ܟܺܝܬ܆ ܕܣܰܓܺܝ ܐܺܝܬܶܝܗ̇ ܡܶܨܥܳܝܽܘܬܳܐ ܘܫܽܘܚܠܳܦܳܐ ܕܣܳܥܽܘܪܽܘܬܳܐ ܦܰܓܪܳܢܳܝܬܳܐ܆ ܠܘܳܬ ܡܶܬܬܙܺܝܥܳܢܽܘܬܳܐ ܪܳܚܡܰܬ ܗܰܢܺܝܽܐܘܬܳܐ ܗܳܝ ܕܰܒܬܰܪܥܺܝܬܳܐ. ܕܡܶܢ ܗܳܪܟܳܐ ܐܳܦ ܩܳܢܽܘܢܳܐ ܗܰܘ ܕܰܐܪܒܥܺܝܢ ܘܰܬܡܳܢܝܳܐ ܕܡܶܬܕܰܒܪ̈ܳܢ ܒܶܗ ܥ̈ܺܕܳܬܳܐ ܩܰܕܺܝ̈ܫܳܬܳܐ܆ ܐܶܡܰܪ ܗܳܟܰܢܳܐ. ܐܶܢ ܢܶܬܪܰܥܶܐ ܐ̱ܢܳܫ ܟܰܕ ܪܰܓ ܐܰܢ̱ܬܬܳܐ ܕܢܶܕܡܰܟ ܥܰܡܳܗ̇܆ ܠܳܐ ܕܶܝܢ ܬܺܐܬܶܐ ܠܰܥܒܳܕܳܐ ܗܺܝ ܡܰܚܫܰܒܬܶܗ܆ ܡܶܬܚܙܶܐ ܕܡܶܢ ܛܰܝܒܽܘܬܳܐ ܡܶܫܬܰܘܙܰܒ.

ܢܳܨܶܐ ܐܰܢ̱ܬ ܗܳܟܺܝܠ ܥܰܡ ܡ̈ܶܠܶܐ ܟܺܝܬ ܟܳܗ̈ܢܳܝܳܬܳܐ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ ܓܰܠܝܳܐܺܝܬ܆ ܘܥܰܡ ܦܽܘ̈ܫܳܩܶܐ ܕܡܰܠ̈ܦܳܢܶܐ ܒܚܺܝܪ̈ܶܐ܆ ܘܳܐܦ ܥܰܡ ܩܳܢܽܘ̈ܢܶܐ ܟܺܝܬ ܘܢܳܡܽܘܣ̈ܶܐ ܥ̈ܺܕܬܳܢܳܝܶܐ. ܘܡܶܛܽܠ ܗܳܕܶܐ ܫܽܘܒܩܰܢܳܐ ܝܳܗܶܒ ܐܰܢ̱ܬ ܠܰܚ̈ܛܳܗܶܐ ܗܳܢܽܘܢ ܡܶܬܪ̈ܰܓܫܳܢܶܐ ܘܦܰܓܪ̈ܳܢܳܝܶܐ܆ ܘܰܠܗܳܢܽܘܢ ܕܰܟܝܳܢܳܐ ܐܰܝܟ ܕܶܐܡܰܪܬ܆ ܘܰܡܩܰܠܣܳܢܳܐܺܝܬ ܕܝܰܬܺܝܪ ܩܰܠܺܝܠܺܝܢ ܐܳܡܰܪ ܐܰܢ̱ܬ ܠܗܽܘܢ ܕܺܐܝܬܰܝܗܽܘܢ܆ ܝܰܬܺܝܪ ܡܶܢ ܗܳܢܽܘܢ ܕܰܒܬܰܪܥܺܝܬܳܐ ܡܶܬܚܛܶܝܢ܆ ܡܶܛܽܠ ܟܺܝܬ ܕܰܐܝܟ ܡܰܢܺܝ̈ܢܳܝܶܐ ܗܳܢܽܘܢ ܢܕܺܝ̈ܕܶܐ ܡܶܢ ܟܽܠܦܪܘܤ ܐܰܣܒ̣ܰܪܬ܆ ܕܕܰܡܢܳܬܳܐ ܡܶܕܶܡ ܚܛܺܝܬܳܢܳܝܬܳܐ ܐܺܝܬܰܘܗ̱ܝ ܦܰܓܪܳܐ܆ ܘܡܶܛܽܠ ܗܳܕܶܐ ܡܶܢ ܐܰܢܰܢܩܺܐ ܟܝܳܢܳܝܬܳܐ ܡܶܬܕܒܰܪ ܠܘܳܬ ܚܛܺܝܬܳܐ. ܡܳܕܶܝܢ ܠܰܟܝܳܢܶܗ ܕܦܰܓܪܳܐ ܗܰܘ ܕܰܩܛܺܝܪܳܐܺܝܬ ܡܶܬܕܒܰܪ ܠܡܶܚܛܳܐ܆ ܡܫܰܡܠܝܳܐ ܫܰܟܶܢ ܠܶܗ ܫܽܘܒܩܳܢܳܐ܆ ܘܠܳܐ ܟܰܕ ܓܳܢܶܒ ܐܰܢ̱ܬ ܠܗܽܘܢ ܠܗܳܢܽܘܢ ܕܫܳܡܥܺܝܢ ܬܺܐܡܰܪ܆ ܕܣܰܟ̈ܠܘܳܬܳܐ ܗܳܢܶܝܢ ܡܶܬܗܰܘܢܳܢ̈ܝܳܬܳܐ܆ ܝܰܬܺܝܪ ܝܰܩܺܝܪ̈ܳܬܳܐ ܐܺܝܬܰܝܗܶܝܢ ܛܳܒ ܡܶܢ ܗܳܢܶܝܢ ܡܶܬܪ̈ܰܓܫܳܢܝܳܬܳܐ ܘܦܰܓܪ̈ܳܢܝܳܬܳܐ. ܠܰܘ ܓܶܝܪ ܡܶܛܽܠ ܗܳܝ ܕܳܐܟܶܠ ܩܰܪܨܳܐ ܠܰܘ ܗܽܘܠܳܢܳܐܺܝܬ ܚܛܳܐ ܘܦܰܓܪܳܢܳܐܺܝܬ܆ ܐܶܠܳܐ ܠܳܐ ܗܽܘܠܳܢܳܐܺܝܬ܆ ܗܳܐ ܡܶܢ ܟܰܕܽܘ ܟܺܝܬ ܒܕܽܘܡܝܳܐ ܕܰܠܘܳܬ ܗܰܘ܆ ܐܳܦ ܚ̈ܛܳܗܶܐ ܕܰܒܢܰܝ̈ܢܳܫܳܐ ܗܳܢܽܘܢ ܕܰܒܬܰܪܥܺܝܬܳܐ܆ ܕܝܰܬܺܝܪ ܪܰܘܪܒܺܝܢ ܡܶܢ ܗܳܢܽܘܢ ܦܰܓܪ̈ܳܢܳܝܶܐ ܢܶܬܚܰܫܒܽܘܢ. ܐܳܦ ܓܶܝܪ ܠܗܰܘ܆ ܚܽܘܝܳܒܳܐ ܐܰܣܓܝܰܬ ܠܶܗ܆ ܗܳܝ ܕܳܐܦ ܒܩܛܣܛܣܝܤ ܡܶܬܗܰܘܢܳܢܺܝܬܳܐ ܘܡܰܠܰܐܟܳܝܬܳܐ ܢܶܗܘܶܐ ܐܺܝܬܰܘܗ̱ܝ ܗ̱ܘܳܐ܆ ܘܰܒܪܰܡ ܠܽܘܩܒܰܠ ܬܶܫܒܽܘܚܬܳܐ ܐܰ‌ܠܳܗܳܝܬܳܐ ܐܰܩܠܺܝ ܘܰܚܛܳܐ.

ܟܽܠܶܗ ܗܳܢܳܐ ܕܶܝܢ ܡܶܬܓܰܕܠܳܐ ܠܳܟ ܨܢܺܝܥܳܐܺܝܬ ܡܨܺܝܕܬܳܐ ܕܡܰܛܥܝܳܢܽܘܬܳܐ܆ ܕܳܐܚܶܕ ܐܰܢ̱ܬ ܥܶܠܬܳܐ ܕܰܠܘܳܬ ܝܽܗ̱ܘ̈ܕܳܝܶܐ ܡܶܬܟܰܬܰܫ ܐܰܢ̱ܬ܆ ܐܰܝܟ ܗܰܘ ܕܚܠܳܦ ܫܠܺܝ̈ܚܶܐ ܡܣܰܟܶܡ ܐܰܢ̱ܬ ܠܳܗ̇ ܠܡܶܠܬܳܐ܆ ܘܥܳܕܶܠ ‌ܐܰܢ̱ܬ ܠܗܽܘܢ ܐܰܝܟ ܕܠܰܐܝܠܶܝܢ ܕܰܟܝܳܢܳܝܬܳܐ ܐܳܡܪܺܝܢ ܠܳܗ̇ ܠܰܚܛܺܝܬܳܐ ܘܠܳܐ ܗ̱ܘܳܐ ܨܶܒܝܳܢܳܝܬܳܐ܆ ܒܗܳܠܶܝܢ ܡ̈ܶܠܶܐ. ܡܶܛܽܠ ܗܳܕܶܐ ܗܶܢܽܘܢ ܢܶܗܘܽܘܢ ܠܟܽܘܢ ܕܰܝܳܢ̈ܶܐ. ܗܳܢܽܘܢ ܕܰܒܝܰܕ ܕܽܘܒܳܪܳܐ ܡܚܰܡܣܢܳܢܳܐ ܘܰܡܝܰܬܪܳܐ ܠܠܳܐ ܡܶܬܚܰܒܠܳܢܽܘܬܳܐ ܬܰܪܶܨܘ ܢܚܰܝܒܽܘܢܳܟܽܘܢ܆ ܕܠܰܘ ܒܰܠܚܽܘܕ ܠܳܐ ܢܕܳܐ ܠܟܽܘܢ ܡܶܢ ܚܛܺܝܬܳܐ܆ ܐܶܠܳܐ ܐܳܦ ܡܰܠܦܺܝܢ ܐܢ̱ܬܽܘܢ ܕܰܟܝܳܢܳܝܬܳܐ ܐܺܝܬܶܝܗ̇ ܘܠܰܘ ܨܶܒܝܳܢܳܝܬܳܐ܆ ܐܰܝܟ ܗܰܘ ܕܳܐܡܰܪ܆ ܐܢ̱ܬܽܘܢ ܓܶܝܪ ܐܳܡܪܺܝܢ ܐܢ̱ܬܽܘܢ܆ ܡܳܢܳܐ ܐ̱ܚܪܺܢܳܐ ܒܳܥܶܐ ܐܰ‌ܠܳܗܳܐ܆ ܐܶܠܳܐ ܐܶܢ ܙܰܪܥܳܐ^[70].

ܡܰܢܽܘ ܠܳܐ ܢܶܬܡܰܗ ܠܘܳܬ ܗܳܠܶܝܢ܆ ܕܡܶܪܬܳܐ ܟܣܺܝܬܳܐ ܪܳܡܶܝܢ ܒܰܦܫܺܝ̈ܛܶܐ. ܟܰܕ ܓܶܝܪ ܬܚܶܝܬ ܡܰܪܫܽܘܬܳܐ ܡܰܣܒܰܪ ܕܪܳܡܶܐ ܠܗܽܘܢ ܠܝܽܗ̱ܘ̈ܕܳܝܶܐ܆ ܐܰܝܟ ܡܰܢ ܟܶܐܡܰܬ ܕܰܟܝܳܢܳܝܬܳܐ ܒܰܠܚܽܘܕ ܐܳܡܪܺܝܢ ܠܳܗ̇ ܠܰܚܛܺܝܬܳܐ܆ ܘܠܳܐ ܗ̱ܘܳܐ ܐܰܝܟ ܦܽܘܠܳܓܳܐ ܕܺܝܠܶܗ ܗܰܘ ܣܰܓܺܝ ܒܺܝܫܳܐ ܘܠܳܐ ܡܶܫܟܚܳܢܳܐ ܘܣܰܓܺܝ ܠܳܐ ܝܰܠܺܝܦܳܐ܆ ܠܗܳܝ ܡܰܢ ܟܝܳܢܳܝܬܳܐ܆ ܠܗܳܝ ܕܶܝܢ ܨܶܒܝܳܢܳܝܬܳܐ܆ ܡܶܢ ܬܰܪܥܺܝܬܳܐ ܕܺܝܠܶܗ ܗܳܝ ܣܰܓܺܝ ܒܺܝܫܬܳܐ܆ ܘܰܐܝܟ ܕܡܶܢ ܣܳܗܕܽܘܬܳܐ ܟܬܳܒܳܝܬܳܐ ܡܰܬܩܶܢ ܠܳܗ̇ ܠܰܩܛܺܝܓܪܳܢܽܘܬܳܐ. ܟܰܕ ܐܰܝܬܺܝ ܒܳܬܰܪܟܶܢ܆ ܐܢ̱ܬܽܘܢ ܓܶܝܪ ܐܳܡܰܪ ܐܳܡܪܺܝܢ ܐܢ̱ܬܽܘܢ܆ ܡܳܢܳܐ ܐ̱ܚܪܺܢܳܐ ܒܳܥܶܐ ܐܰ‌ܠܳܗܳܐ܆ ܐܶܠܳܐ ܐܶܢ ܙܰܪܥܳܐ^[71]. ܟܰܕ ܨܳܒܶܐ ܕܰܚܛܺܝܬܳܐ ܟܝܳܢܳܝܬܳܐ ܢܚܰܘܽܘܗ̱ܝ ܠܰܪܡܳܝܳܐ ܕܙܰܪܥܳܐ ܕܰܒܢܰܝ̈ܢܳܫܳܐ ܗܰܘ ܡܰܥܒܶܕ ܝܰܠܕܳܐ.

ܐܶܠܳܐ ܚܰܘܺܝܢܰܢ ܒܗܳܠܶܝܢ ܕܡܶܢ ܠܥܶܠ ‌ܐܶܬܶܐܡܰܪ̈ܶܝܢ ܐܳܘ ܡܝܰܬܪܳܐ܆ ܕܠܳܐ ܟܺܝܬ ܚܽܘܠܛܳܢܳܐ ܗܰܘ ܕܰܠܘܳܬ ܐܰܢ̱ܬܬܳܐ ܕܰܡܬܰܚܶܡ ܠܢܳܡܽܘܣܳܐ ܐܺܝܬܰܘܗ̱ܝ ܚܛܺܝܬܳܐ܆ ܐܳܦܠܳܐ ܗܺܝ ܥܳܒܽܘܕܽܘܬ ܒܢܰܝ̈ܳܐ ܒܳܗ̇ ܒܰܕܡܽܘܬܳܐ܆ ܐܶܠܳܐ ܗܰܘ ܠܳܐ ܢܳܡܽܘܣܳܝܳܐ܆ ܘܕܰܒܠܳܐ ܡܡܰܫܚܽܘܬܳܐ ܕܪܶܚܡܰܬ ܗܰܢܺܝܽܐܘܬܳܐ܆ ܠܒܰܪ ܡܶܢ ܬܚܽܘ̈ܡܶܐ ܗܳܢܽܘܢ ܕܰܐܡܺܝܪܺܝܢ ܒܢܳܡܽܘܣܳܐ ܢܳܦܶܩ. ܘܶܐܢ ܕܶܝܢ ܠܳܐ܆ ܕܠܳܐ ܟܺܝܬ ܐܺܝܬܰܘܗ̱ܝ ܢܕܺܝܕܳܐ ܗܽܘ ܙܰܪܥܳܐ܆ ܫܡܰܥܳܝܗ̱ܝ ܠܶܐܫܰܥܝܳܐ ܢܒܺܝܳܐ ܕܳܐܡܰܪ. ܕܛܽܘܒܰܘ̈ܗ̱ܝ ܠܗܰܘ ܕܺܐܝܬ ܠܶܗ ܒܨܶܗܝܽܘܢ ܙܰܪܥܳܐ ܘܒܰܝ̈ܬܳܝܶܐ ܒܽܐܘܪܫܠܶܡ^[72]܆ ܘܬܽܘܒ܆ ܢܰܦܫܳܐ ܕܺܝܠܟܽܘܢ ܬܶܚܙܶܐ ܙܰܪܥܳܐ ܢܰܓܺܝܪ ܚܰܝ̈ܶܐ܆ ܕܳܐܦ ܡܶܬܪܰܓܫܳܢܳܐܺܝܬ ܡܶܣܬܰܟܰܠ ܥܰܠ ܡܰܘܠܕܳܢܽܘܬܳܐ ܕܰܒܢܰܝ̈ܳܐ܆ ܘܰܡܥܰܠܝܳܐܺܝܬ ܐܰܟܚܕܳܐ ܡܶܬܚܙܶܐ܆ ܥܰܠ ܙܰܪܥܳܐ ܗܰܘ ܕܰܡܝܰܬܪܽܘܬܳܐ ܘܥܰܠ ܗܰܘ ܕܡܰܠܦܳܢܽܘܬܳܐ ܪܽܘܚܳܢܳܝܬܳܐ܆ ܗܰܘ ܕܡܶܢܶܗ ܒܢܰܝ̈ܳܐ ܣܰܓܺܝ̈ܶܐܐ ܗܳܘܶܝܢ ܕܡܶܫܬܰܘܕܥܺܝܢ ܠܰܐܠܳܗܳܐ. ܘܳܐܦ ܒܬܶܢܝܳܢ ܢܳܡܽܘܣܳܐ ܕܶܝܢ ܐܳܡܰܪ ܡܽܘܫܶܐ܆ ܒܪܺܝܟܺܝܢ ܝܰܠ̈ܕܶܐ ܕܟܰܪܣܳܟ^[73].

ܘܰܐܪܺܝܟܬܳܐ ܐܺܝܬܶܝܗ̇ ܕܰܠܣܳܗ̈ܕܘܳܬܳܐ ܕܡܶܛܽܠܗܳܕܶܐ ܕܣܰܓܺܝ̈ܳܐܬܳܐ ܐܺܝܬܰܝܗܶܝܢ ܢܣܺܝܡ ܗܳܪܟܳܐ. ܐܰܢ̱ܬ ܕܶܝܢ ܐܳܘ ܗܳܢܳܐ ܝܺܕܺܝܥܳܐ ܐܺܝܬܰܝܟ܆ ܕܛܰܡܰܐܬܳܐ ܘܰܕܥܰܡ ܚܛܺܝܬܳܐ ܠܺܝܫܳܐ ܐܰܝܟ ܐ̱ܢܳܫ ܢܺܐܡܰܪ ܡܢܰܣܶܐ ܐܰܢ̱ܬ ܠܡܰܥܳܠܽܘ ܠܥܳܒܽܘܕܽܘܬ ܒܢܰܝ̈ܳܐ܆ ܒܰܕܡܽܘܬ ܡܰܢܺܝ̈ܢܳܝܶܐ ܕܳܘ̈ܰܝܳܐ܆ ܘܰܐܝܟ ܡܨܰܠ̈ܝܳܢܶܐ ܗܳܢܽܘܢ ܕܰܙܡܳܡ̈ܶܐ ܘܰܨܒܳܪ̈ܶܐ ܕܺܝܠܗܽܘܢ ܫܳܛܪܺܝܢ. ܟܬܰܒܬ ܓܶܝܪ ܒܳܗ̇ ܒܣܶܒܠܬܳܐ ܩܰܠܺܝܠ ܡܶܢ ܩܕܳܡ ܦܶܬܓܳܡ̈ܶܐ ܗܳܠܶܝܢ ܕܶܐܬܬܣܺܝܡܘ̱ ܗܳܪܟܳܐ. ܒܗܳܢܳܐ ܙܢܳܐ. ܐܰܡܺܝܪܳܐ ܐܳܦ ܡܶܢ ܩܕܺܝܡ܆ ܕܰܒܥܶܠܙܒܽܘܒ ܡܶܬܦܰܫܰܩ ܒܳܠܰܥ ܕܶܒܳܒ̈ܶܐ^[74]. ܡܫܰܘܕܰܥ ܕܶܝܢ ܠܪܽܘܚܳܐ ܕܙܳܢܝܽܘܬܳܐ. ܐܰܝܟ ܗܳܝ ܕܰܐܡܺܝܪܳܐ܆ ܕܳܐܡܪܺܝܢ ܗ̱ܘܰܘ ܕܪܽܘܚܳܐ ܛܰܢܦܳܐ ܐܺܝܬ ܒܶܗ^[75]܆ ܗܰܘ ܕܰܠܟܽܠܗܽܘܢ ܚܰܫ̈ܶܐ ܫܟܺܝܪ̈ܶܐ ܘܒܺܝ̈ܫܶܐ܆ ܒܰܙܒܰܢ ܡܰܢ ܡܒܰܝܬܶܐ ܠܗܽܘܢ ܠܶܗ܆ ܒܰܙܒܰܢ ܕܶܝܢ ܕܳܚܶܩ ܠܗܽܘܢ ܡܶܢܶܗ. ܡܶܛܽܠ ܗܳܕܶܐ ܐܳܦ ܕܪܺܝܫܳܢܳܐ ܐܺܝܬܰܘܗ̱ܝ ܕܕܰܝ̈ܘܶܐ ܡܶܬܶܐܡܰܪ^[76]. ܩܕܳܡ ܓܶܝܪ ܟܽܠܗܶܝܢ ܒܺܝ̈ܫܳܬܳܐ܆ ܗܳܢܳܐ ܩܰܕܡܳܝܳܐ ܥ̣ܰܠ ܒܒܰܪܢܳܫܳܐ ܗܰܘ ܩܰܕܡܳܝܳܐ. ܗܰܘ ܕܟܰܕ ܡܶܢܶܗ ܢܶܣܰܒ ܫܽܘܪܳܝܳܐ܆ ܥܰܡ ܟܽܠܶܗ ܟܝܳܢܳܐ ܐ̱ܢܳܫܳܝܳܐ ܡܶܟܺܝܠ ܓܽܘܡܕܳܢܳܐܺܝܬ ܘܠܳܐ ܡܶܬܟܰܚܕܳܢܳܐܺܝܬ ܐܳܦ ܡܶܬܺܝܠܶܕ ܐܰܟܚܕܳܐ܆ ܘܰܐܟܚܕܳܐ ܡܶܬܗܰܦܰܟ܆ ܘܰܐܟܚܕܳܐ ܡܶܬܕܰܒܰܪ. ܘܺܐܝܬ ܠܡܶܐܠܦܳܗ̇ ܠܗܳܕܶܐ ܝܰܬܺܝܪ ܚܰܬܺܝܬ̣ܳܐܺܝܬ܆ ܡܶܢ ܩܰܘܡܬܳܐ ܗܳܝ ܫܰܒܪܳܝܬܳܐ܆ ܗܳܝ ܕܕܝܐܬܣܝܤ ܡܰܢ ܐܰܘܟܺܝܬ ܬܰܪܥܺܝܬܳܐ ܕܟܽܠܗܽܘܢ ܚܰܫ̈ܶܐ ܒܰܡܢܳܬܳܐ ܣܰܓܺܝܐܬܳܐ ܛܰܥܝܳܐ ܠܳܗ̇܆ ܕܪܶܚܡܰܬ ܟܶܣܦܳܐ܆ ܕܪܶܚܡܰܬ ܫܽܘܒܚܳܐ܆ ܕܪܶܚܡܰܬ ܥܶܬܳܐ܆ ܕܰܡܫܰܩܠܽܘܬܳܐ܆ ܕܚܰܣܳܡܽܘܬܳܐ܆ ܘܰܕܗܳܢܶܝܢ ܕܫܰܪܟܳܐ܆ ܠܗܰܘ ܕܶܝܢ ܕܪܶܚܡܰܬ ܗܰܢܺܝܽܐܘܬܳܐ܆ ܘܳܐܦ ܩܕܳܡ ܙܰܒܢܳܐ ܕܙܳܕܶܩ ܝܳܕܥܳܐ ܟܺܝܬ ܘܰܡܚܰܒܒܳܐ܆ ܗܳܕܶܐ ܡܰܢ ܒܗܳܝ ܕܬܶܬܚܰܒܰܠ܆ ܗܳܕܶܐ ܕܶܝܢ ܒܗܳܝ ܕܰܬܚܰܒܶܠ.

ܠܘܳܬ ܡܳܢܳܐ ܢܚܽܘܪ ܐ̱ܢܳܫ܆ ܡܶܢ ܗܳܠܶܝܢ ܕܰܕܠܳܐ ܒܽܘܝܳܢܳܐ ܐܳܘ ܪܽܘܡܳܢܳܐ܆ ܐܳܦ ܪܰܫܺܝܥܳܐܺܝܬ ܐܳܦ ܡܰܪܳܚܳܐܺܝܬ ܐܰܡܺܝܪ̈ܳܢ ܠܳܟ. ܡܶܢ ܛܥܳܡܬܳܐ ܓܶܝܪ ܝܰܥܢܬܳܐ ܘܠܰܘ ܡܶܢ ܙܳܢܝܽܘܬܳܐ܆ ܐܳܡܰܪ ܟܬܳܒܳܐ ܗܰܘ ܟܳܗܢܳܝܳܐ ܕܶܐܙܕܟܺܝ ܒܰܪܢܳܫܳܐ ܗܰܘ ܩܰܕܡܳܝܳܐ܆ ܗܳܢܰܘ ܕܶܝܢ ܐܳܕܳܡ ܗܳܟܰܢܳܐ. ܘܰܚܙܳܬ ܐܰܢ̱ܬܬܳܐ ܕܫܰܦܺܝܪ ܐܺܝܠܳܢܳܐ ܠܡܶܐܟܽܘܠܬܳܐ܆ ܘܟܰܕ ܫܶܩܠܰܬ ܡܶܢ ܦܺܐܪܶܗ ܐܶܟܠܰܬ. ܘܝܶܗܒܰܬ ܐܳܦ ܠܓܰܒܪܳܗ̇ ܥܰܡܳܗ̇ ܘܶܐܟܰܠ^[77]. ܗܳܝ ܟܺܝܬ ܕܠܰܘ ܕܙܳܢܝܽܘܬܳܐ ܐܺܝܬܶܝܗ̇܆ ܐܶܠܳܐ ܕܝܰܥܢܽܘܬ ܟܰܪܣܳܐ. ܐܶܠܳܐ ܐܳܦ ܗܳܕܶܐ ܥܰܡ ܗܳܠܶܝܢ ܐ̱ܚܪ̈ܳܢܝܳܬܳܐ ܡܰܪܫܰܥ ܐܰܢ̱ܬ܆ ܟܰܕ ܡܶܬܬܩܶܠ ‌ܐܰܢ̱ܬ ܒܣܶܒܠܬܳܟ ܗܳܝ ܐܰ‌ܠܺܝܠܬܳܐ. ܐܳܡܰܪ ܐܰܢ̱ܬ ܒܳܗ̇ ܓܶܝܪ܆ ܕܒܶܣܪܳܢܳܐܺܝܬ ܐܶܬܢܰܩܰܦ ܐܳܕܳܡ ܠܚܰܘܳܐ ܒܦܰܪܕܰܝܣܳܐ܆ ܘܰܕܗܳܕܶܐ ܐܺܝܬܶܝܗ̇ ܡܶܐܟܽܘܠܬܐ ܗܳܝ ܕܡܶܢ ܐܺܝܠܳܢܳܐ ܫܳܛܰܪ ܐܰܢ̱ܬ. ܟܰܕ ܡܡܰܠܶܠ ‌ܐܢ̱ܬ ܡܶܛܽܠ ܝܽܘܚܰܢܳܢ ܗܰܘ ܡܰܥܡܕܳܢܳܐ ܘܡܶܛܽܠ ‌ܐܳܟܶܠܩܰܪܨܳܐ ܘܟܳܬܶܒ ܐܰܢ̱ܬ ܗܳܟܰܢܳܐ. ܘܗܳܢܳܐ ܡܰܢ ܐܰܝܟ ܪܳܚܡܳܐ ܡܗܰܝܡܢܳܐ ܘܫܰܪܺܝܪܳܐ܆ ܟܰܕ ܡܰܩܶܦ ܠܶܗ ܠܡܳܪܰܢ ܪܽܘܚܳܢܳܐܺܝܬ ܠܥܺܕܬܳܐ܆ ܡܶܫܬܰܘܕܶܐ ܠܳܗ̇ ܗܳܠܶܝܢ ܕܰܡܟܺܝܪܽܘܬܳܐ ܡܰܠܟܽܘܬܐ ܕܰܫܡܰܝܳܐ. ܗܰܘ ܕܶܝܢ ܐܰܝܟ ܪܳܚܡܳܐ ܡܛܰܫܝܳܐ ܘܡܰܘܒܕܳܢܳܐ܆ ܟܰܕ ܡܰܩܶܦ ܠܳܗ̇ ܠܚܰܘܳܐ ܠܳܐܕܳܡ ܒܶܣܪܳܢܳܐܺܝܬ܆ ܡܶܫܬܰܘܕܶܐ ܠܳܗ̇ ܦܶܪܢܺܝܬܳܐ܆ ܫܽܘܠܛܳܢܶܗ ܕܰܐ‌ܠܳܗܳܐ. ܒܝܰܘܡܳܐ ܕܶܝܢ ܐܳܡܰܪ ܗܰܘ ܕܬܶܐܟܠܽܘܢ ܒܶܗ ܡܶܢ ܐܺܝܠܳܢܳܐ܆ ܢܶܬܦܰܬܚ̈ܳܢ ܥܰܝܢܰܝ̈ܟܽܘܢ܆ ܘܬܶܗܘܽܘܢ ܐܰܝܟ ܐܰ‌ܠܳܗ̈ܶܐ ܕܝܳܕܥܺܝܢ ܛܳܒܬܳܐ ܘܒܺܝܫܬܳܐ^[78]. ܕܒܶܗ ܒܣܽܘܥܪܳܢܳܐ ܒܝܰܕ ܣܳܥܽܘܪܽܘܬܳܐ ܗܳܝ ܡܰܥܒܕܰܬ ܚܒܳܠܳܐ܆ ܚܠܰܕ ܥܡܰܕ ܐܰܟܚܕܳܐ ܥܰܡܗܽܘܢ.

ܐܶܢ ܗܳܟܺܝܠ ‌ܐܳܟܶܠܩܰܪܨܳܐ ܒܦܰܪܕܰܝܣܳܐ܆ ܡܶܬܚܙܶܐ ܡܰܢ ܟܰܕ ܗܳܠܶܝܢ ܐܶܡܰܪ ܠܘܳܬ ܚܰܘܳܐ܆ ܐܰܩܦܳܗ̇ ܕܶܝܢ ܒܶܣܪܳܢܳܐܺܝܬ ܠܳܐܕܳܡ ܟܰܕ ܐܶܬܬܰܛܥܝܰܬ܆ ܘܣܳܥܽܘܪܽܘܬܳܐ ܡܰܥܒܕܰܬ ܚܒܳܠܳܐ ܐܰܝܟ ܕܶܐܡܰܪܬ ܣܥܰܪܘ܆ ܘܙܳܢܝܽܘܬܳܐ ܐܺܝܬܰܘܗ̱ܝ ܗ̱ܘܳܐ ܚܛܳܗܳܐ ܗܰܘ ܩܰܕܡܳܝܳܐ܆ ܒܶܝܬ ܙܳܢܝܽܘܬܳܐ ܗܘ̣ܳܐ ܐܰܝܟ ܡܶܠܬܳܟ܆ ܐܰܬܪܳܐ ܗܰܘ ܕܠܳܐ ܡܶܬܚܰܒܠܳܢܽܘܬܳܐ.

ܐܶܠܳܐ ܐ̱ܚܪܳܢܝܳܐܺܝܬ ܪܳܕܶܐ ܘܡܰܠܶܦ ܠܰܢ ܟܬܳܒܳܐ ܐܰ‌ܠܳܗܳܝܳܐ. ܡܶܢ ܒܳܬܰܪ ܓܶܝܪ ܕܶܐܡܰܪ ܘܰܐܦܩܶܗ ܐܰ‌ܠܳܗܳܐ ܠܳܐܕܳܡ܆ ܘܰܐܥܡܪܶܗ ܠܽܘܩܒܰܠ ܦܰܪܕܰܝܣܳܐ ܕܒܽܘܣܳܡܳܐ܆ ܗܳܝܕܶܝܢ ܐܰܝܬܺܝ ܒܳܬܰܪܟܶܢ܆ ܐܳܕܳܡ ܕܶܝܢ ܚܟ̣ܰܡ ܠܚܰܘܳܐ ܐܰܢ̱ܬܬܶܗ܆ ܘܟܰܕ ܒܶܛܢܰܬ ܝܶܠܕܰܬ ܠܩܳܐܝܢ^[79]. ܗܳܝ ܕܟܰܕ ܠܥܽܘܕܪܳܢܳܐ ܗܰܘ ܕܡܶܢ ܥܳܒܽܘܕܽܘܬ ܒܢܰܝ̈ܳܐ ܡܚܰܘܝܳܐ ܗ̱ܘܳܬ܆ ܘܰܠܩܽܘܝܳܡܳܐ ܕܓܶܢܣܳܐ ܗܰܘ ܕܡܶܢ ܗܳܪܟܳܐ܆ ܐܶܡܪܰܬ ܩܢܺܝܬ̣ ܒܰܪܢܳܫܳܐ ܒܝܰܕ ܐܰ‌ܠܳܗܳܐ³. ܕܰܥ ܕܶܝܢ ܐܶܢ ܨܳܒܶܐ ܐܰܢ̱ܬ܆ ܐܶ݀ܡܰܠܶܠ ܓܶܝܪ ܠܘܳܬܳܟ ܐܰܝܟ ܗܰܘ ܕܩܰܪܺܝܒ ܐܰܢ̱ܬ܆ ܘܗܰܘ ܡܰܢ ܕܺܐܝܬܰܘܗ̱ܝ ܠܳܟ ܪܳܚܡܳܐ܆ ܕܠܰܘ ܗܶܢܶܝܢ ܟܰܕ ܗܶܢܶܝܢ ܠܳܟ ܡܶܬܪܰܥܶܝܢ܆ ܐܳܦ ܡܶܛܽܠ ܡܶܐܟܽܘܠܬܳܐ ܗܳܝ ܕܡܶܢ ܦܺܐܪܳܐ ܗܰܘ ܕܺܐܝܠܳܢܳܐ܆ ܡܰܠܦܳܢ̈ܶܐ ܕܥܺܕܬܳܐ ܘܕܰܫܪܳܪܳܐ܆ ܕܡܰܠܦܺܝܢ ܕܰܠܘܬ ܬܶܐܽܘܪܺܝܰܐ ܐܰ‌ܠܳܗܳܝܬܳܐ ܡܰܣܩܳܐ ܗ̱ܘܳܬ ܡܶܐܟܽܘܠܬܳܐ ܗܳܝ܆ ܐܶ‌ܠܽܘ ܒܙܰܒܢܳܗ̇ ܐܶܬܢܰܣܒܰܬ. ܟܬܒ ܓܶܝܪ ܓܪܺܝܓܽܘܪܺܝܽܘܤ ܗܰܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ ܒܡܺܐܡܪܳܐ ܗܰܘ ܕܥܰܠ ܕܶܢܚܳܐ ܕܰܐ‌ܠܳܗܳܐ ܗܳܠܶܝܢ. ܘܝܳܗܶܒ ܢܳܡܽܘܣܳܐ ܗܽܘܠܶܐ ܠܰܡܫܰܠܛܽܘܬ ܒܝܳܬܳܐ. ܗܽܘ ܕܶܝܢ ܢܳܡܽܘܣܳܐ ܐܺܝܬܰܘܗ̱ܝ ܗ̱ܘܳܐ܆ ܦܽܘܩܕܳܢܳܐ ܕܡܶܢ ܐܰܝܠܶܝܢ ܟܺܝܬ ܢܶܨ̈ܒܳܬܳܐ ܙܳܕܶܩ ܠܶܗ ܕܢܶܛܥܰܡ܆ ܘܰܕܒܰܐܝܕܳܐ ܠܳܐ ܙܳܕܶܩ ܕܢܶܓܫܽܘܦ. ܗܳܕܶܐ ܕܶܝܢ ܐܺܝܬܶܝܗ̇ ܗ̱ܘܳܬ܆ ܩܰܝܣܳܐ ܕܺܝܕܰܥܬܳܐ. ܕܠܳܐ ܡܶܢ ܫܽܘܪܳܝܳܐ ܒܺܝܫܳܐܺܝܬ ܐܶܬܢܨܶܒ܆ ܘܳܐܦܠܳܐ ܚܰܣܳܡܳܐܺܝܬ ܐܶܬܟܠܺܝ. ܠܳܐ ܢܫܰܕܪܽܘܢ ܠܬܰܡܳܢ ܠܶܫܳܢܰܝ̈ܗܽܘܢ ܗܳܢܽܘܢ ܢܳܨ̈ܝ̣ܰܝ̣ ܥܰܡ ܐܰ‌ܠܳܗܳܐ܆ ܐܳܦܠܳܐ ܠܚܶܘܝܳܐ ܢܶܬܕܰܡܽܘܢ. ܐܶܠܳܐ ܛܳܒܳܐ ܗ̱ܘܳܬ ܡܰܢ ܟܰܕ ܒܙܰܒܢܳܗ̇ ܡܶܬܢܰܣܒܳܐ ܗ̱ܘܳܬ܆ ܬܶܐܽܘܪܺܝܰܐ ܓܶܝܪ ܐܺܝܬܶܝܗ̇ ܗ̱ܘܳܬ ܗܺܝ ܢܶܨܒܬܳܐ ܐܰܝܟ ܬܶܐܽܘܪܺܝܰܐ ܕܺܝܠܝ܆ ܕܰܥܠܶܝܗ̇ ܙܗܺܝܪܳܐ ܕܢܶܣܩܽܘܢ ܠܗܳܢܽܘܢ ܒܰܠܚܽܘܕܰܝܗܽܘܢ ܕܝܰܬܺܝܪ ܡܫܰܡܠܶܝܢ ܒܬܰܪܥܺܝܬܳܐ܆ ܠܳܐ ܕܶܝܢ ܛܳܒܳܐ ܗ̱ܘܳܬ ܠܗܳܢܽܘܢ ܕܝܰܬܺܝܪ ܦܫܺܝܛܺܝܢ ܥܕܰܟܺܝܠ܆ ܘܰܒܪܶܓܬܳܐ ܝܰܬܺܝܪ ܠܰܥܒܺܝܢ܆ ܐܰܝܟܰܢܳܐ ܕܳܐܦܠܳܐ ܡܶܐܟܽܘܠܬܳܐ ܡܫܰܡܠܰܝܬܳܐ ܡܰܘܬܪܳܐ ܠܗܳܢܽܘܢ ܕܰܥܕܰܟܺܝܠ ܪܰܥܕܺܝܢ܆ ܘܰܣܢܺܝܩܺܝܢ ܥܰܠ ܚܰܠܒܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ ܒܠܳܐ ܡܶܫܬܰܡܥܳܢܽܘܬܳܐ ܒܰܠܚܽܘܕ ܐܺܝܬܰܝܗܶܝܢ ܗܳܠܶܝܢ ܕܰܚܛܺܝܬܳܐ܆ ܘܰܒܗܳܝ ܕܶܐܙܕܟܺܝ ܡܶܢ ܡܶܐܟܽܘܠܬܳܐ ܕܠܳܐ ܒܙܰܒܢܳܗ̇ ܕܡܶܢ ܦܺܐܪܳܐ.

ܐܰܝܟܰܢܳܐ ܗܳܟܺܝܠ ‌ܐܰܝܟ ܡܶܠܬܳܟ ܙܳܕܶܩ ܕܢܶܣܒܰܪ ܕܙܳܢܝܽܘܬܳܐ ܐܺܝܬܶܝܗ̇ ܗ̱ܘܳܬ ܗܺܝ ܛܥܳܡܬܳܐ܆ ܘܥܽܘܪܙܳܠܳܐ ܕܰܐܢ̱ܬܬܳܐ ܠܘܳܬ ܓܰܒܪܳܐ܆ ܘܣܳܥܽܘܪܽܘܬܳܐ ܐܰܝܟ ܕܶܐܡܰܪܬ ܫܟܺܝܪܬܳܐ܆ ܐܰܝܟܰܢܳܐ ܕܗܰܘ ܕܙܳܢܝܽܘܬܳܐ ܢܶܗܘܶܐ ܐܺܝܬܰܘܗ̱ܝ ܚܛܳܗܳܐ ܩܰܕܡܳܝܳܐ܆ ܥܰܠ ܗܳܝ ܐܳܦ ܕܰܐܟܚܕܳܐ ܡܶܬܺܝܠܶܕ ܐܳܡܰܪ ܐܰܢ̱ܬ ܠܶܗ ܘܳܐܦ ܠܪܽܘܚܳܐ ܛܰܢܦܳܐ ܗܰܘ ܕܰܥܠܰܘܗ̱ܝ܆ ܥܰܡ ܟܽܠܳܗ̇ ܐ̱ܢܳܫܽܘܬܳܐ. ܡ̇ܕܓܶܠ ܗܳܟܺܝܠ ܦܰܘܠܽܘܤ ܕܳܐܡܰܪ܆ ܘܶܐܢ ܕܶܝܢ ܠܳܐ ܒܢܰܝ̈ܟܽܘܢ ܡܳܕܶܝܢ ܛܰܡ̈ܶܐܐ ܐܺܝܬܰܝܗܽܘܢ܆ ܗܳܫܳܐ ܕܶܝܢ ܩܰܕܺܝ̈ܫܶܐ ܐܺܝܬܰܝܗܽܘܢ^[80]. ܐܰܝܟܰܢܳܐ ܕܶܝܢ ܠܰܛܠܳܝ̈ܶܐ ܐܳܡܰܪ ܐ̱ܢܳܐ܆ ܟܰܕ ܗܳܝ ܕܳܐܬܝܳܐ ܠܦܽܘܡܳܟ ܒܳܓܽܘܠܳܐܺܝܬ ܡܡܰܠܶܠ ‌ܐܰܢ̱ܬ ܒܰܠܚܽܘܕ܆ ܡܶܬܪܰܥܶܐ ܐܰܢ̱ܬ ܕܶܝܢ ܘܠܳܐ ܡܶܕܶܡ ܚܠܺܝܡܳܐ܆ ܘܳܐܦ ܩܕܳܡ ܩܰܘܡܬܳܐ ܗܳܝ ܕܙܳܕܩܳܐ܆ ܝܰܬܺܝܪ ܡܶܢ ܗܳܠܶܝܢ ܚܰܫ̈ܶܐ ܐ̱ܚܪ̈ܳܢܶܐ܆ ܠܘܳܬ ܙܳܢܝܽܘܬܳܐ ܐܺܝܬ ܠܗܽܘܢ ܡܶܬܪܰܟܢܳܢܳܐܺܝܬ. ܡܶܬܚܙܶܝܢ ܓܶܝܪ ܕܒܰܛܥܳܡܬܳܐ ܐܺܝܬܰܝܗܽܘܢ ܠܰܥ̈ܒܶܐ ܝܰܬܺܝܪܳܐܺܝܬ܆ ܘܰܕܡܶܬܚܰܡܬܺܝܢ ܘܰܕܒܰܚ̈ܕܳܕܶܐ ܚܳܣܡܺܝܢ. ܕܰܠܥܽܘܪܙܳܠܳܐ ܕܶܝܢ ܕܦܰܓܪ̈ܶܐ ܘܰܠܫܰܘܬܳܦܽܘܬܳܐ܆ ܩܕܳܡ ܗܳܠܶܝܢ ܚܰܫ̈ܶܐ ܘܠܳܐ ܣܳܟ ܪܳܓܺܝܢ. ܗܳܝ ܓܶܝܪ ܕܰܐܡܺܝܪܳܐ ܠܡܳܪܰܢ܆ ܗܳܝ ܕܶܐܢ ܠܳܐ ܬܶܗܘܽܘܢ ܐܰܝܟ ܛܠܳܝ̈ܶܐ܆ ܠܳܐ ܬܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ^[81]܆ ܐܰܡܺܝܪܳܐ ܡܶܛܽܠ ܗܳܢܽܘܢ ܕܰܥܕܰܟܺܝܠ ܫܰܒܪ̈ܶܐ ܐܺܝܬܰܝܗܽܘܢ܆ ܘܳܐܦܠܳܐ ܡܶܕܶܡ ܕܰܐܝܟ ܗܳܟܰܢ ܟܽܠ ܟܽܠܶܗ ܩܰܒܶܠܘ ܒܗܽܘܢ܆ ܘܠܰܘ ܦܫܺܝܛܳܐܺܝܬ. ܐܶܠܳܐ ܐܶܢ ܠܳܐ ܬܶܬܗܰܦܟܽܘܢ ܘܬܶܗܘܽܘܢ ܐܰܝܟ ܛܠܳܝ̈ܶܐ². ܗܳܢܰܘ ܕܶܝܢ ܡܶܢ ܟܽܠܳܗ̇ ܒܺܝܫܽܘܬܳܐ ܐܰܗܦܶܟܘ ܐܰܦܰܝ̈ܟܽܘܢ܆ ܐܰܝܟ ܗܳܝ ܕܰܟܬܺܝܒܳܐ ܠܰܫܠܺܝܚܳܐ ܦܰܘܠܽܘܤ ܠܘܳܬ ܩܽܘܪ̈ܺܝܢܬܝܐ܆ ܐܰܚܰܝ̈ ܠܳܐ ܛܠܳܝ̈ܶܐ ܬܗܘܽܘܢ ܒܪ̈ܶܥܝܳܢܰܝܟܽܘܢ܆ ܐܶܠܳܐ ܠܒܺܝܫܽܘܬܳܐ ܗܘ̣ܰܝܬܽܘܢ ܫܰܒܪܺܝܢ܆ ܒܪ̈ܶܥܝܳܢܰܝܟܽܘܢ ܕܶܝܢ ܗܘ̣ܰܝܬܽܘܢ ܓܡܺܝܪܺܝܢ^[82].

ܡܶܛܽܠ ܗܳܕܶܐ ܗܳܟܺܝܠ ܗܳܠܶܝܢ ܕܰܐܝܟ ܗܳܟܰܢ ܡܶܢ ܕܪܺܝܫ ܡܰܟܪܶܟ ܐܰܢ̱ܬ܆ ܘܰܠܪܽܘܚܳܐ ܕܙܳܢܝܽܘܬܳܐ ܐܳܡܰܪ ܐܰܢ̱ܬ ܕܰܐܟܚܕܳܐ ܡܶܬܺܝܠܶܕ ܥܰܡ ܟܽܠܳܗ̇ ܐ̱ܢܳܫܽܘܬܳܐ܆ ܘܠܰܛܠܳܝ̈ܶܐ ܕܰܩܕܳܡ ܗܳܠܶܝܢ ܚܰܫ̈ܶܐ ܐ̱ܚܪ̈ܳܢܶܐ ܪܳܓܶܝܢ ܫܟܺܝܪܳܐܺܝܬ ܠܰܡܚܰܒܳܠܽܘ ܟܺܝܬ ܘܰܠܡܶܬܚܰܒܳܠܽܘ܆ ܟܰܕ ܨܳܒܶܐ ܐܰܢ̱ܬ ܕܰܬܚܰܘܶܐ܆ ܕܰܐܝܟ ܗܰܘ ܕܥܰܡܶܗ ܕܰܟܝܳܢܳܐ ܕܺܝܠܰܢ ܐܶܬܬܰܝܬܝܰܬ ܘܰܗܘ̣ܳܬ ܐܽܘܣܺܝܰܐ܆ ܚܛܺܝܬܳܐ ܕܕܰܐܝܟ ܗܳܕܶܐ. ܕܡܶܢ ܗܳܪܟܳܐ ܐܳܦ ܡܶܢ ܠܥܶܠ ܟܬܰܒܬ ܡܶܛܽܠ ܫܺܐܕܳܐ ܐܰܝܟܰܢܳܐ ܕܳܐܡܰܪ ܐܰܢ̱ܬ ܗܰܘ ܕܙܳܢܝܽܘܬܳܐ܆ ܗܰܘ ܕܰܒܝܰܕ ܚܛܺܝܬܳܐ ܩܢܳܐ ܠܘܳܬ ܒܢܰܝ̈ܢܳܫܳܐ ܙܶܕܩܳܐ ܕܰܐ̱ܚܝܳܢܽܘܬܳܐ.

ܘܳܐܦ ܒܕܰܪܓܳܐ ܕܶܝܢ ܐ̱ܚܪܺܢܳܐ ܕܢܳܐܶܕ ܗ̱ܘܳܐ܆ ܕܣܶܒܠܬܳܐ ܗܳܝ ܡܰܠܝܰܬ ܩܝܢܕܘܢܘܤ ܘܰܕܥܰܠ ܫܩܺܝ̈ܦܶܐ ܡܰܝܬܝܳܐ܆ ܟܰܕ ܢܳܚܶܬ ܐܰܢ̱ܬ ܡܰܘܣܶܦ ܐܰܢ̱ܬ܆ ܗܳܠܶܝܢ ܕܺܐܝܬܰܝܗܶܝܢ ܐܰܚ̈ܘܳܬܳܐ ܠܗܳܠܶܝܢ ܘܕܳܡ̈ܝܳܢ ܠܗܶܝܢ. ܐܰܝܟܰܢܳܐ ܟܺܝܬ ܕܰܢܥܰܕܥܶܕ ܡܳܕܶܝܢ܆ ܠܰܘ ܒܰܚܡܺܝܪܳܐ ܥܰܬܺܝܩܳܐ܆ ܒܦܽܘܠܚܳܢܳܐ ܢܳܡܽܘܣܳܝܳܐ܆ ܐܳܦܠܳܐ ܒܰܚܡܺܝܪܳܐ ܕܒܺܝܫܽܘܬܳܐ ܘܰܕܡܰܪܺܝܪܽܘܬܳܐ^[83]܆ ܗܳܢܰܘ ܕܶܝܢ ܒܣܳܥܽܘܪܽܘܬܳܐ ܟܝܳܢܳܝܬܳܐ ܘܨܶܒܝܳܢܳܝܬܳܐ ܕܳܐܕܳܡ ܘܰܕܩܳܐܝܶܢ܆ ܗܳܝ ܕܒܺܐܝ̈ܕܶܝܗ̇ ܟܽܠܳܗ̇ ܓܒܺܝܠܬܳܐ ܕܰܟܝܳܢܳܐ ܡܳܝܽܘܬܳܐ܆ ܒܰܚܛܺܝܬܳܐ ܡܰܥܒܕܰܬ ܚܒܳܠܳܐ ܘܣܰܪܝܰܬ ܪܺܝܚܳܐ ܐܶܬܡܰܙܓܰܬ. ܗܳܠܶܝܢ ܐܰܢ̱ܬ ܗܰܘ ܕܰܠܘܳܬ ܝܽܗ̱ܘ̈ܕܳܝܶܐ ܐܰܝܟ ܕܒܶܐܣܟܺܡܳܐ ܡܶܬܟܰܬܰܫ ܐܰܢ̱ܬ܆ ܕܠܰܘ ܟܝܳܢܳܝܬܳܐ ܐܶܠܳܐ ܨܶܒܝܳܢܳܝܬܳܐ ܐܺܝܬܶܝܗ̇ ܚܛܺܝܬܳܐ. ܐܰܝ̇ܕܳܐ ܗܝ ܗܳܟܺܝܠ ܨܶܒܝܳܢܳܝܬܳܐ. ܐܰܝ̇ܕܳܐ ܗܝ ܕܶܝܢ ܣܳܥܽܘܪܽܘܬܳܐ ܟܝܳܢܳܝܬܳܐ ܕܳܐܕܳܡ ܘܰܕܩܳܐܝܶܢ ܗܳܝ ܕܡܰܪܡܠܳܐ ܡܶܢ ܨܶܒܝܳܢܳܐ ܐܶܡܰܪ. ܐܰܝܟܰܢܳܐ ܕܶܝܢ ܓܒܺܝܠܬܳܐ ܕܰܟܝܳܢܳܐ ܐ̱ܢܳܫܳܝܳܐ ܐܶܬܡܰܙܓܰܬ ܐܰܟܚܕܳܐ ܥܰܡ ܚܛܺܝܬܳܐ܆ ܐܰܘ ܐܰܝܟܰܢܳܐ ܐ̱ܢܳܫܺܝ̈ܢ ܠܩܺܒܽܘܬܳܐ ܒܰܝܬܳܝܬܳܐ ܕܺܝܠܗܽܘܢ܆ ܡܚܰܪܰܪܬܳܐ ܩܢܰܘ ܡܶܢ ܚܰܫ̈ܶܐ ܗܳܢܽܘܢ ܕܰܐܟܚܕܳܐ ܡܡܰܙܓܺܝܢ ܒܰܓܒܺܝܠܬܳܐ ܕܰܟܝܳܢܳܐ܆ ܐܰܝܟܰܢܳܐ ܕܶܐܡܰܪܬ ܐܰܢ̱ܬ܆ ܟܰܕ ܠܟܽܠܗܶܝܢ ܡܚܰܠܛܳܐܺܝܬ ܡܒܰܠܒܶܠ ‌ܐܰܢ̱ܬ܆ ܗܳܠܶܝܢ ܕܣܳܟ ܠܳܐ ܫܳܠ̈ܡܳܢ ܠܰܚ̈ܕܳܕܶܐ. ܠܗܳܠܶܝܢ ܓܶܝܪ ܕܥܰܡ ܟܝܳܢܳܐ ܐܰܟܚܕܳܐ ܙܪ̈ܺܝܥܳܢ ܘܰܐܟܚܕܳܐ ܪ̈ܰܡܝܳܢ܆ ܐܰܝܟܰܢܳܐ ܢܶܕܚܽܘܩ ܐܶܢܶܝܢ ܐ̱ܢܳܫ ܡܶܢܶܗ. ܐܰܝ̇ܕܳܐ ܗܝ ܕܶܝܢ ܐ̱ܚܝܳܢܽܘܬܳܐ ܘܫܰܘܝܽܘܬ ܓܶܢܣܳܐ ܕܫܺܐܕܳܐ ܗܰܘ ܕܙܳܢܝܽܘܬܳܐ܆ ܐܰܘ ܡܰܢܽܘ ܕܰܠܫܰܘܝܽܘܬ ܓܶܢܣܳܐ܆ ܡܶܢ ܕܽܘ̈ܥܬܶܐ ܕܰܡܝܰܬܪܽܘܬܳܐ ܫܳܠܰܚ. ܒܰܐܝܢܳܐ ܕܶܝܢ ܙܢܳܐ ܫܰܘܝܽܘܬ ܓܶܢܣܳܐ ܗܳܝ ܕܗܳܘܝܳܐ ܡܶܢ ܚܛܺܝܬܳܐ ܡܶܬܩܰܝܡܳܐ. ܡܰܢܽܘ ܕܶܝܢ ܡܶܢ ܗܳܢܽܘܢ ܕܦܰܫܶܩܘ ܐܶܡܰܪ܆ ܕܶܐܡܰܪܘ ܝܽܗ̱ܘ̈ܕܳܝܶܐ ܕܰܒܪܽܘܚܳܐ ܕܙܳܢܝܽܘܬܳܐ ܡܶܬܕܰܝܘܰܢ ܗ̱ܘܳܐ ܡܳܪܰܢ. ܐܳܦ ܓܶܝܪ ܐܳܦ ܗܺܝ ܩܰܕܺܝܫܽܘܬܶܗ ܕܰܒܗܽܘܦܳܟܳܐ ܗܰܘ ܐ̱ܢܳܫܳܝܳܐ ܘܰܡܕܰܒܪܳܢܳܝܐ܆ ܐܳܦ ܠܦܽܘܡܳܐ ܗܰܘ ܕܰܒܥܶܠܕܒܳܒ̈ܶܐ ܘܡܰܩܪ̈ܒܳܢܶܐ ܣܳܟܪܳܐ ܗ̱ܘܳܬ. ܗܳܝ ܕܶܝܢ ܕܰܐܟܚܕܳܐ ܡܶܬܺܝܠܶܕ ܥܰܡ ܒܢܰܝ̈ܢܳܫܳܐ ܚܰܫܳܐ ܗܰܘ ܕܙܳܢܝܽܘܬܳܐ ܐܳܦ ܪܽܘܚܳܐ ܗܰܘ ܕܰܥܠܰܘܗ̱ܝ܆ ܓܰܠܝܳܐܺܝܬ ܒܰܟ̈ܬܳܒܰܝܗܽܘܢ ܪ̈ܰܫܺܝܥܶܐ ܕܰܡܨܰܠ̈ܝܳܢܶܐ ܟܬܺܝܒܳܐ. ܘܰܠܗܳܕܶܐ ܐܳܦ ܗܳܝ ܕܳܡܝܳܐ܆ ܗܳܝ ܕܰܠܡܶܢܗܽܘܢ ܡܰܢ ܕܰܚ̈ܛܳܗܶܐ ܟܝܳܢܳܝ̈ܶܐ ܬܺܐܡܰܪ܆ ܡܶܢܗܽܘܢ ܕܶܝܢ ܨܶܒܝܳܢܳܝ̈ܶܐ܆ ܘܗܳܕܶܐ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ. ܟܬܰܒܬ ܓܶܝܪ ܗܳܟܰܢܳܐ. ܚܽܘܫܳܒ̈ܶܐ ܡܰܢ ܗܳܢܽܘܢ ܕܗܰܢܺܝܽܐܘܬ̣ ܚܰܫܳܐ܆ ܒܰܒܢܰܝ̈ܢܳܫܳܐ ܒܶܣܪ̈ܳܢܶܐ ܪܳܒܥܺܝܢ. ܚܽܘܬܚ̈ܳܬܶܐ ܕܶܝܢ ܗܳܢܽܘܢ ܕܥܳܠܽܘܒܽܘܬܳܐ܆ ܒܗܳܢܽܘܢ ܦܠܺܝ̈ܓܰܝ ܢܰܦܫܳܐ ܡܰܩܢܶܝܢ. ܘܬܽܘܒ. ܒܺܝܫܽܘܬܳܐ ܡܰܢ ܗܳܝ ܟܝܳܢܳܝܬܳܐ܆ ܒܬܰܪ̈ܥܝܳܬܳܐ ܪ̈ܳܫܦܳܬ ܒܰܐܪܥܳܐ ܕܝܽܗ̱ܘ̈ܕܳܝܶܐ ܟܰܡܺܝܢܳܐ. ܪܰܫܺܝܥܽܘܬܳܐ ܕܶܝܢ ܤܳܛܳܢܳܝܬܳܐ ܒܨܶܒ̈ܝܳܢܶܐ ܪ̈ܳܡܰܝ ܨܰܘܪܳܐ ܕܚܰܢ̈ܦܶܐ ܫ̣ܰܪܝܳܐ.

ܚܳܙܶܐ ܐܰܢ̱ܬ ܕܡܶܬܬܨܺܝܕ ܐܰܢ̱ܬ܆ ܕܰܠܟܽܠܳܗ̇ ܚܛܺܝܬܳܐ ܟܝܳܢܳܝܬܳܐ ܐܳܡܰܪ ܐܰܢ̱ܬ ܠܳܗ̇܆ ܘܠܰܘ ܒܰܠܚܽܘܕ ܠܗܳܝ ܕܰܒܝܰܕ ܦܰܓܪܳܐ ܡܶܬܬܰܥܒܕܳܐ܆ ܐܶܠܳܐ ܡܶܢ ܟܰܕܽܘ ܐܳܦ ܠܗܳܝ ܕܰܒܬܰܪܥܺܝܬܳܐ ܡܶܬܚܰܛܝܳܐ܆ ܗܳܝ ܕܠܳܗ̇ ܒܰܠܚܽܘܕܶܝܗ̇ ܐܳܡܰܪ ܗܘ̣ܰܝܬ ܨܶܒܝܳܢܳܝܬܳܐ܆ ܫܡܰܥ ܓܶܝܪ ܠܡ̈ܶܠܶܐ ܕܺܝܠܳܟ܆ ܐܶܢ ܠܰܘ ܕܺܐܝܬܰܝܟ ܕܽܘܓܳܐ ܥܳܒܶܕ ܐܰܢ̱ܬ ܢܰܦܫܳܟ ܡܨܰܕܝܳܢܳܐܺܝܬ܆ ܘܰܠܗܳܢܽܘܢ ܕܠܳܟ ܡܶܬܬܦܺܝܣܺܝܢ܆ ܦܝܳܣܳܐ ܥܳܒܶܕ ܐܰܟܚܕܳܐ ܕܢܶܫܡܥܽܘܢ. ܐܶܡܰܪܬ ܓܶܝܪ܆ ܕܒܺܝܫܽܘܬܳܐ ܟܝܳܢܳܝܬܳܐ܆ ܒܬܰܪ̈ܥܝܳܬܳܐ ܪ̈ܳܫܦܳܬ ܒܰܐܪܥܳܐ ܕܝܽܗ̱ܘ̈ܕܳܝܶܐ ܚܰܠܺܝܕܳܐ. ܐܶܢ ܗܳܟܺܝܠ ܟܝܳܢܳܝܬܳܐ ܗܝ ܒܺܝܫܽܘܬܳܐ ܗܳܝ ܕܬܰܪܥܺܝܬܳܐ܆ ܐܰܝ̇ܕܳܐ ܗܝ ܡܶܟܺܝܠ ܗܳܝ ܨܶܒܝܳܢܳܝܬܳܐ. ܐܰܝܟܳܐ ܕܶܝܢ ܠܳܟ ܢܶܗܘ̈ܝܳܢ ܗܳܠܶܝܢ ܕܦܽܘܠܳܓܳܐ ܗܰܘ ܕܚܽܘܟܳܡܳܐ ܘܰܟܢܺܝܟܳܐ܆ ܗܰܘ ܕܒܺܐܝܕܰܘ̈ܗ̱ܝ ܐܳܚܶܕ ܐܰܢ̱ܬ ܥܶܠ̈ܠܳܬܳܐ܆ ܕܰܠܗܳܝ ܡܰܢ ܚܛܺܝܬܳܐ ܟܝܳܢܳܝܬܳܐ ܩܳܪܶܐ ܐܰܢ̱ܬ܆ ܠܗܳܝ ܕܶܝܢ ܨܶܒܝܳܢܳܝܬܳܐ܆ ܐܰܝܟܰܢܳܐ ܕܬܶܣܬܒܰܪ ܒܰܠܚܽܘܕ ܕܳܐܡܰܪ ܐܰܢ̱ܬ ܨܶܒܝܳܢܳܝܬܳܐ܆ ܘܰܒܠܶܟܣܺܝܤ ܬܚܰܪܟܶܫ ܠܗܳܢܽܘܢ ܕܦܳܓܥܺܝܢ ܒܳܟ.

ܬܽܘܒ ܓܶܝܪ ܟܰܕ ܡܶܛܽܠ ‌ܐܳܕܳܡ ܫܳܩܶܠ ‌ܐܰܢ̱ܬ ܠܡܺܐܡܰܪ ܒܕܽܘܟܬܳܐ ܐ̱ܚܪܺܬܳܐ܆ ܟܰܕ ܒܶܗ ܒܦܽܘܠܳܓܳܐ ܡܶܬܚܰܫܰܚ ܐܰܢ̱ܬ ܐܳܡܰܪ ܐܰܢ̱ܬ ܗܳܟܰܢܳܐ. ܒܫܳܥܬܳܐ ܗܳܝ ܫܬܺܝܬܳܝܬܳܐ ܐܶܬܩܛܶܦ ܐܰܝܟ ܣܓܽܘܠܳܐ܆ ܒܝܰܕ ܪܶܓܬܳܐ ܨܶܒܝܳܢܳܝܬܳܐ. ܒܫܳܥܬܳܐ ܗܳܝ ܬܫܺܝܥܳܝܬܳܐ ܐܶܬܚܒܶܫ ܐܰܝܟ ܚܰܡܪܳܐ ܒܚܶܨܒܳܐ ܕܡܰܘܬܳܐ܆ ܒܝܰܕ ܚܛܺܝܬܳܐ ܟܝܳܢܳܝܬܳܐ. ܘܬܽܘܒ ܒܕܽܘܟܬܳܐ ܐ̱ܚܪܺܬܳܐ܆ ܘܰܩܪܶܒܘ ܠܘܳܬܶܗ ܟܶܢ̈ܫܶܐ ܕܰܐܬܪܐ ܗܰܘ ܕܡܶܢ ܠܓܰܘ ܘܰܕܗܰܘ ܕܡܶܢ ܠܒܰܪ܆ ܟܝܳܢܳܝ̈ܶܐ ܬܰܪ̈ܥܺܝܬܳܢܳܝܶܐ ܢܰܦ̈ܫܳܢܳܝܶܐ܆ ܟܰܕ ܐܺܝܬ ܠܗܽܘܢ ܥܰܡܗܽܘܢ ܟܶܢܫܳܐ ܣܰܓܺܝܳܐܐ ܘܰܡܫܰܚܠܦܳܐ ܕܰܡܚܺܝܠܽܘܬܳܐ ܨܶܒܝܳܢܳܝܬܳܐ܆ ܠܗܰܘ ܕܰܟܒܰܪ ܡܶܛܽܠ ܗܳܕܶܐ ܦܫܺܝܩܳܐܺܝܬ ܐܰܣܝܶܗ܆ ܡܶܛܽܠ ܟܺܝܬ ܕܰܒܛܽܘܪܳܐ ܕܦܺܝܠܘܣܘܦܝܰܐ ܕܰܡܝܰܬܪܽܘܬܳܐ ܝܳܬܶܒ ܗ̱ܘܳܐ.

ܐܰܪܰܐ ܡܶܣܬܰܟܰܠ ‌ܐܰܢ̱ܬ ܗܳܠܶܝܢ ܕܳܐܡܰܪ ܐܰܢ̱ܬ ܐܳܘ ܗܳܢܳܐ܆ ܠܡܳܢܳܐ ܓܶܝܪ ܠܟܶܢ̈ܫܶܐ ܡܫܰܚܠܶܦ ܐܰܢ̱ܬ ܐܳܡܰܪ ܐܰܢ̱ܬ ܐ̱ܚܪܳܢܝܳܐܺܝܬ. ܡܳܢܳܐ ܐܺܝܬ ܠܳܟ ܕܰܬܫܰܚܠܶܦ ܬܶܩܪܶܐ ܐܶܢܽܘܢ ܒܰܐܚܪܳܢܝܽܘܬ ܡܶܠܬܳܐ. ܐܰܝܠܶܝܢ ܐܺܝܬܰܝܗܽܘܢ ܡܰܢ ܗܳܠܶܝܢ ܗܳܢܽܘܢ ܟܝܳܢܳܝ̈ܶܐ. ܐܰܝܠܶܝܢ ܕܶܝܢ ܗܳܢܽܘܢ ܢܰܦ̈ܫܳܢܳܝܶܐ܆ ܐܰܝܠܶܝܢ ܕܶܝܢ ܗܳܢܽܘܢ ܬܰܪ̈ܥܺܝܬܳܢܳܝܶܐ. ܐܰܝܟܰܢܳܐ ܕܶܝܢ ܗܳܢܽܘܢ ܟܝܳܢܳܝ̈ܶܐ ܨܶܒܝܳܢܳܝܬܳܐ ܐܺܝܬ ܠܗܽܘܢ ܡܚܺܝܠܽܘܬܳܐ. ܐܶܢ ܡܰܢ ܓܶܝܪ ܗܳܠܶܝܢ ܕܒܰܟܝܳܢܳܐ ܡܶܬܚܰܫܰܒ ܐ̱ܢܳܫ܆ ܗܳܢܰܘ ܕܶܝܢ ܠܘܳܬ ܨܶܒܝܳܢܳܐ ܕܥܳܒܽܘܕܳܐ ܕܰܟܝܳܢܳܐ ܘܕܰܐ‌ܠܳܗܳܐ ܕܰܒ̣ܪܳܝܗ̱ܝ ܆ ܐܳܦ ܚܽܘܠܡܳܢܳܐ ܪܺܝܫܳܝܳܐ ܚܠܺܝܡ܆ ܘܥܰܠ ‌ܐܳܣܝܽܘܬܳܐ ܠܳܐ ܣܢܺܝܩ. ܟܰܕ ܕܶܝܢ ܐܶܡܰܪܬ܆ ܕܰܠܟܽܠܶܗ ܟܢܶܫܳܐ ܐܺܝܬ ܗ̱ܘܳܐ ܠܶܗ ܡܚܺܝܠܽܘܬܳܐ ܨܶܒܝܳܢܳܝܬܳܐ܆ ܡܳܢܳܐ ܢܶܣܒܰܪ ܠܦܽܘܠܳܓܳܐ ܗܰܘ ܕܟܶܢܫ̈ܶܐ ܟܝܳܢܳܝ̈ܶܐ ܘܢܰܦ̈ܫܳܢܳܝܶܐ ܘܬܰܪ̈ܥܺܝܬܳܢܳܝܶܐ. ܡܰܠܽܘܢ ܕܶܝܢ ܛܳܥܶܐ ܐܰܢ̱ܬ ܐܶܢ ܙܳܕܶܩ ܕܗܳܝ ܕܫܰܪܺܝܪܳܐ ܐܺ݀ܡܰܪ܆ ܕܰܡܒܰܠܒܶܠ ‌ܐܰܢ̱ܬ ܠܶܗ ܠܦܽܘܠܳܓܳܟ ܗܰܘ ܠܳܐ ܡܶܬܦܰܠܓܳܢܳܐ. ܢܶܫܬܰܟܚܽܘܢ ܐܳܦ ܗܳܢܽܘܢ ܕܰܚܛܺܝܬܳܐ ܟܝܳܢܳܝܬܳܐ ܚܛܰܘ ܐܰܝܟ ܡܶܠܬܳܟ܆ ܗܳܕܐ ܗܝ ܓܶܝܪ ܗܳܝ ܕܟܶܢ̈ܫܶܐ ܟܝܳܢܳܝ̈ܶܐ܆ ܕܰܡܚܺܝܠܽܘܬܳܐ ܨܶܒܝܳܢܳܝܬܳܐ ܐܺܝܬ ܠܗܽܘܢ. ܡܳܕܶܝܢ ܐܶܬܬܨܺܝܕܬ ܠܳܟ܆ ܕܳܐܦ ܠܰܚܛܺܝܬܳܐ ܗܳܝ ܨܶܒܝܳܢܳܝܬܳܐ ܗܳܦܶܟ ܐܰܢ̱ܬ ܬܽܘܒ ܡܫܰܚܠܶܦ ܠܰܟܝܳܢܳܝܬܳܐ. ܘܺܝܕܺܝܥܳܐ ܘܓܰܠܝܳܐ ܗܘ̣ܰܝܬ܆ ܕܰܠܘܳܬ ܨܰܕܘܳܐ ܒܰܠܚܽܘܕ ܡܫܰܡܰܗ ܐܰܢ̱ܬ ܠܳܗ̇ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ ܨܶܒܝܳܢܳܝܬܳܐ.

ܐܰܝܟܰܢܳܐ ܕܶܝܢ ܠܳܐ ܡܰܪܓܶܫ ܐܰܢ̱ܬ ܕܳܐܦ ܒܗܳܝ ܓܰܕܶܦܬ ܡܶܢ ܪܽܘܫܥܳܐ ܠܳܐ ܝܰܠܺܝܦܳܐ܆ ܕܰܐܡܪܰܚܬ ܟܺܝܬ ܠܡܺܐܡܰܪ܆ ܕܡܶܛܽܠ ܗܳܕܶܐ ܦܫܺܝܩܳܐܺܝܬ ܐܰܣܺܝ ܝܶܫܽܘܥ ܠܟܶܢܫܳܐ ܗܰܘ ܕܗܳܢܽܘܢ ܕܰܟܪܺܝܗܶܝܢ ܗ̱ܘܰܘ܆ ܡܶܛܽܠ ܟܺܝܬ ܕܥܰܠ ܛܽܘܪܳܐ ܗܰܘ ܕܦܝܠܘܣܘܦܝܰܐ ܝܳܬܶܒ ܗ̱ܘܳܐ. ܐܰܝ̇ܕܳܐ ܓܶܝܪ ܐܳܣܝܽܘܬܳܐ ܠܳܐ ܥܒܰܕ ܦܫܺܝܩܳܐܺܝܬ. ܡܰܢܽܘ ܕܶܝܢ ܡܶܢ ܐܶܘܰܢܓ̈ܶܠܝܣܛܶܐ ܠܗܳܝ ܡܰܢ ܥܰܣܩܳܐܺܝܬ܆ ܠܗܳܝ ܕܶܝܢ ܦܫܺܝܩܳܐܺܝܬ ܐܶܫܬܰܥܺܝ ܡܬܽܘܡ ܕܶܐܬܥܰܒܕܰܬ. ܟܽܠܗܶܝܢ ܓܶܝܪ ܐܰܝܟ ܐܰ‌ܠܳܗܳܐ ܫܰܪܺܝܪܳܐ ܥܳܒܶܕ ܗ̱ܘܳܐ܆ ܒܨܶܒܝܳܢܳܐ ܒܰܠܚܽܘܕ. ܥܰܠ ‌ܐܰܝ̇ܕܳܐ ܕܶܝܢ ܡܰܣܰܩܬܳܐ ܕܰܠܘܳܬ ܛܽܘܪܳܐ ܣܢܺܝܩܳ ܗ̱ܘܳܐ ܠܘܳܬ ܗܳܕܶܐ. ܐܰܘ ܠܳܐ ܝܳܕܰܥ ܐܰܢ̱ܬ ܕܟܕ ܢܚܶܬ ܡܶܢ ܛܽܘܪܳܐ܆ ܠܒܰܪܬܩܳܠܳܐ ܗܳܝ ܕܰܠܘܬ ܗܰܘ ܓܰܪܒܳܐ ܐܶܡܰܪ܆ ܕܰܠܡܰܥܒܕܳܢܽܘܬܳܐ ܕܨܶܒܝܳܢܳܐ ܐܰ‌ܠܳܗܳܝܳܐ ܡܚܰܘܝܳܐ ܗ̱ܘܳܬ܆ ܣܰܓܺܝ ܩܰܠܺܝܠܬܳܐ ܘܰܕܦܳܪܚܳܐ ܗ̱ܘܳܬ ܘܰܕܣܳܥܪܳܐ܆ ܨܳܒܶܐ ܐ̱ܢܳܐ ܐܶܬܕܰܟܳܐ^[84]. ܠܗܶܝܢ ܓܶܝܪ ܠܡ̈ܶܠܶܐ܆ ܫܘܶܐ ܒܪܶܗܛܳܐ ܐܺܝܬܰܘܗ̱ܝ ܗ̱ܘܳܐ ܕܽܘܟܳܝܶܗ ܕܗܰܘ ܕܰܟܪܺܝܗ ܗ̱ܘܳܐ. ܕܗܽܘ ܡܰܢ ܓܶܝܪ ܝܶܫܽܘܥ ܒܝܕ ܟܽܠܗܶܝܢ ܪܳܫܶܡ ܗ̱ܘܳܐ ܠܰܢ ܛܽܘܦܣܳܐ ܕܚܰܝ̈ܶܐ ܦܺܝܠܽܘܣܽܘ̈ܦܳܝܶܐ܆ ܘܟܰܕ ܡܫܰܢܶܐ ܗ̱ܘܳܐ ܠܕܽܘܟܬܳܐ ܡܶܢܶܗ ܘܠܶܗ ܘܟܰܕ ܡܨܰܠܶܐ ܗ̱ܘܳܐ^[85]܆ ܡܶܬܬܰܘܕܝܳܢܺܝܬܳܐ ܐܺܝܬܶܝܗ̇. ܥܰܠ ܗܳܠܶܝܢ ܕܶܝܢ ܗܽܘ ܠܳܐ ܣܢܺܝܩ ܗ̱ܘܳܐ܆ ܠܘܳܬ ܡܰܥܒܕܳܢܽܘܬܳܐ ܦܫܺܝܩܬܳܐ ܕܳܐܣܝܽܘܬܳܐ ܕܗܳܢܽܘܢ ܕܰܟܪܺܝܗܶܝܢ ܗ̱ܘܰܘ܆ ܐܰܘ ܕܗܳܠܶܝܢ ܬܶܕܡܪ̈ܳܬܳܐ ܐ̱ܚܪ̈ܳܢܝܳܬܳܐ.

ܐܰܝܟܰܢܐ ܗܳܟܺܝܠ ܒܰܕܡܽܘܬܳܐ ܕܗܳܢܽܘܢ ܕܰܪܘܶܝܢ܆ ܣܳܒܰܪ ܐܰܢ̱ܬ ܕܰܠܘܳܬ ܕܰܪ̈ܓܶܐ ܗܳܢܽܘܢ ܕܰܠܥܶܠ ܕܣܶܒܠܬܳܟ ܣܳܠܶܩ ܐܰܢ̱ܬ܆ ܘܛܰܥܝܳܐ ܠܳܟ ܕܰܠܬܰܚܬ ܡܶܬܬܰܝܬܶܐ ܐܰܢ̱ܬ܆ ܘܳܐܦ ܟܰܕ ܡܢܰܣܶܐ ܐܰܢ̱ܬ ܬܽܘܒ ܠܡܶܕܪܰܟ ܘܰܠܡܶܣܰܩ ܡܙܰܥܙܥܳܐܺܝܬ܆ ܘܬܽܘܒ ܡܶܬܗܦܰܟ ܐܰܢ̱ܬ ܘܳܐܚܕܺܝܢ ܠܳܟ ܨܰܘܪ̈ܳܢܶܐ܆ ܗܳܝ ܟܺܝܬ ܕܡܶܬܐܰܡܪܳܐ. ܟܬܰܒܬ ܓܶܝܪ܆ ܐܳܦ ܗܳܠܶܝܢ. ܠܒܰܪܢܳܫܳܐ ܡܰܢ ܟܳܗܢܳܝܳܐ ܕܰܒܚܰܘܒܬܳܐ ܕܡܶܫܚܳܐ ܡܰܠܦܳܢܳܝܳܐ ܡܶܬܚܰܝܰܒ ܗ̱ܘܳܐ܆ ܫܰܟܶܢ ܠܶܗ ܡܢܳܬܳܐ ܚܕܳܐ ܡܶܢ ܚܰܡܶܫ܆ ܟܰܕ ܫܒܰܩ ܠܰܚ̈ܛܳܗܶܐ ܠܳܐ ܨܶܒܝܳܢܳܝ̈ܶܐ. ܩܰܒܶܠ ܓܶܝܪ ܐܳܡܰܪ ܫܛܳܪܳܟ܆ ܘܰܟܬܽܘܒ ܬܡܳܢܐܝܢ^[86]. ܠܒܰܪܢܳܫܳܐ ܕܶܝܢ ܥܳܠܡܳܝܳܐ܆ ܕܰܒܚܰܘܒܬܳܐ ܪܡܶܐ ܗ̱ܘܳܐ ܕܚ̈ܶܛܶܐ ܡܬܰܪ̈ܣܝܳܢܝܳܬܳܐ܆ ܐܰܪܦܺܝ ܦܶܠܓܳܐ ܟܰܕ ܫܒܰܩ ܠܶܗ ܬܰܪ̈ܬܶܝܢ ܡ̈ܢܰܘܳܬܳܐ ܘܦܶܠܓܳܗ̇܆ ܗܳܠܶܝܢ ܠܳܐ ܨܶܒܝܳܢܳܝ̈ܳܬܳܐ ܘܗܳܠܶܝܢ ܟܝܳܢܳܝ̈ܳܬܳܐ܆ ܘܰܡܢܳܬܳܐ ܡܶܕܶܡ ܡܶܢ ܗܳܠܶܝܢ ܨܶܒܝܳܢ̈ܳܝܳܬܳܐ܆ ܡܶܛܽܠ ܬܶܐܓܽܘܪܬܳܐ ܥܳܠܡܳܢܳܝܬܳܐ. ܟܰܕ ܐܶܡܰܪ ܐܳܦ ܠܶܗ ܩܰܒܶܠ ܟܬܳܒܳܟ. ܘܟܰܕ ܝܳܬܶܒ ܐܰܢ̱ܬ ܒܓܽܘܡܳܨܳܐ ܕܰܦܣܳܩ ܣܰܒܪܳܐ܆ ܟܬܽܘܒ ܚܰܡܫܺܝܢ^[87].

ܣܰܓܺܝ̈ܳܐܬܳܐ ܡܰܢ ܗܳܟܺܝܠ ‌ܐܳܦ ܐ̱ܚܪ̈ܳܢܝܳܬܳܐ ܡܰܨܝܳܐ ܗ̱ܘܳܬ ܕܰܢܣܺܝܡ ܗܳܪܟܳܐ܆ ܕܣܰܓܺܝ ܓܽܘܕܳܦܳܐ ܣܰܓܺܝܳܐܐ ܘܰܡܫܰܚܠܦܳܐ ܡܰܠ̣̈ܝܴܢ ܗ̱ܘܰܝ̈܆ ܘܰܕܡܰܘ̈ܒܠܳܢ܆ ܣܰܓܺܝ̈ܳܐܬܳܐ ܡܰܢ ܡܶܢܗܶܝܢ ܓܰܠܝܳܐܺܝܬ܆ ܡܶܕܶܡ ܡܶܕܶܡ ܕܶܝܢ ܡܶܢܗܶܝܢ ܐܺܝܬ ܐܡܰܬܝ ܐܳܦ ܡܰܛܫܝܳܐܺܝܬ܆ ܠܘܳܬ ܢܕܺܝܕܽܘܬܳܐ ܕܡܰܢܺܝ̈ܢܳܝܶܐ ܘܕܰܡܨܰܠ̈ܝܳܢܶܐ܆ ܘܰܠܘܳܬ ܗܳܝ ܣܺܝܪܳܐ ܐ̱ܚܪܺܬܳܐ ܕܗܶܪ̈ܣܝܤ ܗܳܠܶܝܢ ܡܦܰܬܟ̈ܳܬܳܐ. ܗܳܠܶܝܢ ܕܶܝܢ ܒܰܠܚܽܘܕ ܐܰ‌ܠܺܝܨܳܐܺܝܬ ܐܰܝܬܺܝܬ̣ ܠܰܡܨܰܥܬܳܐ܆ ܐܰܝܟܰܢܳܐ ܕܬܺܐܠܦܽܘܢ ܠܥܶܠܬܳܐ ܗܳܝ ܕܡܶܛܽܠܳܬܳܗ̇܆ ܠܒܰܝܬܳܐ ܕܗܰܢܺܝܽܐܘܬ ܚܰܫܳܐ܆ ܢܳܣܶܒ ܠܶܗ ܠܰܚܠܽܘܠܳܐ ܗܰܘ ܕܰܗܘ̣ܳܐ ܒܩܳܛܢܶܐ ܕܰܓܠܺܝܠܳܐ܆ ܟܰܕ ܚܒܳܠܳܐ ܘܰܚܛܺܝܬܳܐ ܟܝܳܢܳܝܬܳܐ ܡܫܰܒܰܚ ܕܐܺܝܬܰܘܗ̱ܝ ܚܽܘܠܛܳܢܳܐ ܕܙܽܘܘܳܓܳܐ. ܐܰܝܟܰܢܳܐ ܟܺܝܬ ܕܳܐܦܶܢ ܢܶܫܬܟܰܚ ܒܕܽܘܟ ܕܡܶܬܥܗܰܕ ܠܰܫܡܳܐ ܕܡܶܫܬܽܘܬܳܐ ܐܰܝܟ ܕܰܒܫܰܦܺܝܪܽܘܬ ܡܶܠܬܳܐ܆ ܐܳܦܶܢ ܕܰܚܛܺܝܬܳܐ ܨܶܒܝܳܢܳܝܬܳܐ ܡܫܰܡܰܗ܆ ܐܳܦܶܢ ܕܰܡܩܛܪܶܓ ܠܡܰܢܺܝ̈ܢܳܝܶܐ ܥܳܒܶܕ ܐܶܣܟܺܡܳܐ܆ ܠܳܐ ܢܶܬܗܰܝܡܰܢ. ܟܣܺܝܬܳܐ ܓܶܝܪ ܐܳܫܶܕ ܠܳܗ̇ ܠܡܶܪܬܳܐ܆ ܐܰܝܟ ܣܽܘ̈ܟܳܠܶܐ ܗܳܠܶܝܢ ܕܡܶܢ ܡ̈ܶܠܶܐ ܕܺܝܠܶܗ ܐܶܬܓܠܺܝܘ܆ ܘܩܰܕܶܡܘ ܐܶܬܒܰܚܰܢܘ ܡܶܢܰܢ. ܥܝܳܕܰܐ ܗ̱ܘ ܓܶܝܪ ܠܣܰܓܺܝ̈ܶܐܐܐܳܦܡܶܢܗܳܢܽܘܢܕܗܳܢܶܝܢ ܕܢܶܣܛܽܘܪܺܝܽܘܤ ܡܶܬܪܰܥܶܝܢ ܕܢܰܚܪܡܽܘܢ ܠܢܶܣܛܽܘܪܺܝܽܘܤ܆ ܐܳܦ ܠܰܡܩܰܛܪܳܓܽܘ ܟܒܕ^[88] ܠܕܽܘܓܡ̈ܰܛܐ ܕܺܝܠܶܗ܆ ܐܳܦ ܕܙܰܪ̈ܥܶܐ ܕܗܰܘ ܢܶܙܪܥܽܘܢ ܒܰܦܫܺܝ̈ܛܶܐ ܝܰܬܺܝܪ ܩܰܛܺܝܢܳܐܺܝܬ ܥܰܡ ܨܢܺܝܥܽܘܬܳܐ ܡܶܕܶܡ. ܗܺܝ ܟܰܕ ܗܺܝܗܳܕܶܐ ܐܺܝܬ ܥܝܳܕܳܐ ܠܡܶܥܒܰܕ܆ ܐܳܦ ܠܗܳܢܽܘܢ ܕܰܒܗܳܠܶܝܢ ܗܶܪ̈ܣܝܤ ܐ̱ܚܪ̈ܳܢܝܳܬܳܐ ܐܰܚܺܝܕܺܝܢ ܘܝܰܨܺܝܦܺܝܢ ܕܺܝܠܗܶܝܢ ܝܰܬܺܝܪ ܨܢܺܝܥܳܐܺܝܬ.

ܡܶܛܽܠ ܗܳܠܶܝܢ ܠܳܐ ܪܥܶܠ ܕܰܠܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ܆ ܠܛܽܘܦܣܳܐ ܕܡܰܪܓܫܳܢܽܘܬܳܐ ܪܳܚܡܰܬ ܗܰܢܺܝܽܐܘܬܳܐ ܘܠܳܐ ܡܶܬܟܰܚܕܳܢܺܝܬܳܐ ܢܶܣܒܺܝܗ̇܆ ܘܡܶܢ ܗܳܝ ܕܰܠܩܽܘܒܠܳܐ܆ ܠܰܐܓܳܢ̈ܶܐ ܗܳܠܶܝܢ ܝܺܗܽܘ̈ܕܳܝܳܬܳܐ܆ ܠܬܰܚܘܺܝܬܳܐ ܕܕܽܘܟܳܝܳܐ ܘܰܕܚܽܘܫܳܒ̈ܶܐ ܪ̈ܳܚܡܰܝ ܐܰ‌ܠܳܗܳܐ܆ ܟܰܕ ܛܰܥܝܳܐ ܠܶܗ܆ ܕܳܐܦ ܠܡܰܝ̈ܳܐ ܠܦܽܘܬ ܐܰܝܢܳܝܽܘܬܳܐ ܗܳܝ ܕܣܺܝܡܳܐ ܙܳܕܶܩ ܠܡܶܣܬܰܟܳܠܽܘ܆ ܕܦܰܪ̈ܨܽܘܦܶܐ ܟܺܝܬ ܘܰܕܣܽܘܥܪ̈ܳܢܶܐ. ܒܰܙܒܰܢ ܡܰܢ ܓܶܝܪ ܠܰܢܝܳܚܳܐ ܘܦܽܘܝܳܓܳܐ ܡܶܫܬܰܘܕܶܐ ܐܰ‌ܠܳܗܳܐ ܒܝܰܕ ܗܳܠܶܝܢ ܕܳܐܡܰܪ܆ ܠܘܳܬ ܗܳܢܽܘܢ ܕܡܶܢ ܚܰܫ̈ܶܐ ܫܟܺܝܪ̈ܶܐ ܘܡܶܢ ܓܶܐܪ̈ܶܐ ܝܰܩ̈ܕܶܐ ܕܳܐܟܶܠ ܩܰܪܨܳܐ ܡܶܫܬܰܠܗܒܺܝܢ܆ ܘܝܰܒܺܝ̈ܫܶܐ ܘܰܕܠܰܝܬ ܒܗܽܘܢ ܬܰܠܺܝܠܽܘܬܳܐ ܕܺܝܕܰܥܬܳܐ ܐܰ‌ܠܳܗܳܝܬܳܐ܆ ܟܰܕ ܒܐܫܰܥܝܳܐ ܢܒܺܝܳܐ ܡܰܙܥܶܩ܆ ܗܳܢܽܘܢ ܕܰܨܗܶܝܢ ܙܶܠܘ ܠܘܳܬ ܡܰܝ̈ܳܐ^[89]. ܘܒܶܐܪܰܡܝܳܐ ܬܽܘܒ܆ ܠܺܝ ܫܒܰܩܘ ܡܰܒܽܘܥܳܐ ܕܡܰܝ̈ܳܐ ܚܰܝ̈ܶܐ܆ ܘܰܚܦܰܪܘ ܠܗܽܘܢ ܓܽܘ̈ܒܶܐ ܪ̈ܥܺܝܥܶܐ܆ ܗܳܢܽܘܢ ܕܠܳܐ ܡܶܫܟܚܺܝܢ ܠܡܶܩܒܳܐ ܡܰܝ̈ܳܐ^[90]. ܘܳܐܦ ܒܶܐܘܰܢܓ̈ܶܠܺܝܰܐ ܒܳܗ̇ ܒܰܕܡܽܘܬܳܐ܆ ܐܶܢ ܐ̱ܢܳܫ ܨܗܶܐ ܢܺܐܬܶܐ ܠܘܳܬܝ ܘܢܶܫܬܶܐ. ܗܰܘ ܕܰܡܗܰܝܡܶܢ ܒܺܝ܆ ܐܰܝܟܰܢܳܐ ܕܶܐܡܰܪ ܟܬܳܒܳܐ܆ ܢܰܗܪ̈ܰܘܳܬܳܐ ܡܶܢ ܟܰܪܣܶܗ ܢܶܪܕܽܘܢ ܕܡܰܝ̈ܳܐ ܚܰܝ̈ܶܐ^[91]. ܒܰܙܒܰܢ ܕܶܝܢ ܠܰܢܦܺܝܚܽܘܬܳܐ ܕܡܶܢ ܡܰܪܳܚܽܘܬܳܐ܆ ܘܠܰܐܫܺܝܕܽܘܬܳܐ ܘܪܰܛܺܝܒܽܘܬܳܐ ܕܚܰܝ̈ܶܐ ܚܰܫܳܢܳܝ̈ܶܐ܆ ܘܰܠܚܺܐܦ̈ܶܐ ܘܩܺܐܪ̈ܣܶܐ ܕܽܐܘܠ̈ܨܳܢܶܐ ܕܩܳܝܡܺܝܢ ܥܰܠ ܒܢܰܝ̈ܢܳܫܳܐ ܡܫܰܘܕܥܺܝܢ܆ ܐܰܝܟܰܢܳܐ ܕܒܰܟܬܳܒܳܐ ܕܰܒܪܺܝܬܳܐ ܠܘܳܬ ܪܽܘܒܝܠ ‌ܐܶܡܰܪ ܝܰܥܩܽܘܒ. ܩܰܫܝܳܐ ܡܰܪܳܚܳܐ. ܨܥܰܪܬ ܐܰܝܟ ܡܰܝ̈ܳܐ܆ ܠܳܐ ܬܶܪܬ̣ܰܚ܆ ܣܠܶܩܬ ܓܶܝܪ ܥܰܠ ܡܰܫܟܒܶܗ ܕܰܐܒܽܘܟ^[92]܆ ܘܰܐܝܟܰܢܳܐ ܕܰܢܒܺܝܳܐ ܕܰܘܺܝܕ ܐܳܡܰܪ܆ ܫܰܘܙܶܒܰܝܢܝ ܘܦܰܨܳܢܝ ܡܶܢ ܡܰܝ̈ܳܐ ܣܰܓܺܝ̈ܶܐܐ܆ ܘܡܶܢ ܐܺܝܕܳܐ ܕܰܒܢܰܝ̈ܳܐ ܕܢܽܘܟܪ̈ܳܝܶܐ^[93]܆ ܘܬܽܘܒ܆ ܟܰܕ ܩܳܡܘ ܒܢܰܝ̈ܢܳܫܳܐ ܥܠܰܝܢ܆ ܟܰܕ ܚܰܝ̣ܺܝ̣ܢ ܚ̱ܢܰܢ ܐܰܪܰܐ ܒܳܠܥܺܝܢ ܗ̱ܘܰܘ ܠܰܢ܆ ܘܟܰܕ ܪܶܓܙܰܬ ܚܶܡܬܳܐ ܕܺܝܠܗܽܘܢ ܥܠܰܝܢ܆ ܐܰܪܰܐ ܡܰܝ̈ܳܐ ܡܰܛܒܥܺܝܢ ܗ̱ܘܰܘ ܠܰܢ^[94]. ܡܫܰܘܕܥܺܝܢ ܕܶܝܢ܆ ܐܳܦ ܠܰܡܚܺܝܠܽܘܬܳܐ ܘܡܰܐܺܝܢܽܘܬܳܐ܆ ܘܠܰܡܙܰܥܙܥܽܘܬܳܐ ܕܠܳܐ ܩܰܘܡܳܐ ܕܡܰܠܦܳܢܽܘܬܳܐ ܕܰܓܳܠܬܳܐ܆ ܘܰܕܡܶܠܬܳܐ ܕܚܶܟܡܬܳܐ ܗܳܝ ܕܡܶܢ ܠܒܰܪ܆ ܕܰܐܝܟ ܐܰܝܟܰܢ܆ ܕܗܳܝ ܡܶܨܪܳܝܬܳܐ ܟܺܝܬ ܘܰܕܗܳܝ ܟܰܠܕܳܝܬܳܐ܆ ܘܰܕܗܳܢܶܝܢ ܕܰܠܗܳܠܶܝܢ ܕܳܡ̈ܝܳܢ. ܐܰܝܟ ܗܳܝ ܕܩܰܐܦܺܝ̈ܠܶܐ ܕܺܝܠܶܟܝ ܚܳܠܛܺܝܢ ܚܰܡܪܳܐ ܒܡܰܝ̈ܳܐ^[95]܆ ܕܰܒܝܰܕ ܐܶܫܰܥܝܳܐ ܠܘܳܬ ܐܽܘܪܶܫܠܶܡ ܐܶܬܐܰܡܪܰܬ܆ ܘܗ̱ܝ ܕܰܒܝܰܕ ܐܶܪܰܡܝܳܐ܆ ܕܡܳܐ ܠܶܟܝ ܘܠܽܐܘܪܚܳܐ ܕܡܶܨܪܶܝܢ܆ ܠܡܶܫܬܳܐ ܡܰܝ̈ܳܐ ܕܓܺܝܚܽܘܢ܆ ܘܡܳܐ ܠܶܟܝ ܘܠܽܐܘܪܚܳܐ ܕܳܐܬܽܘܪ̈ܳܝܶܐ܆ ܠܡܶܫܬܳܐ ܡܰܝ̈ܳܐ ܕܢܰܗܪ̈ܰܘܳܬܳܐ^[96]܆ ܘܗ̱ܝ ܕܰܐܝܟ ܡܰܝ̈ܳܐ ܕܰܓ̈ܳܠܶܐ ܕܠܰܝܬ ܒܗܽܘܢ ܗܰܝܡܳܢܽܘܬܳܐ^[97].

ܐܰܝܟܰܢܳܐ ܕܶܝܢ ܠܰܘ ܪܽܘܫܥܳܐ ܡܰܠ̣ܝܳܐ܆ ܗܳܝ ܕܠܳܐܬ̣ܳܐ ܩܰܕܡܳܝܬܳܐ ܕܰܐ‌ܠܳܗܰܢ ܘܦܳܪܽܘܩܰܢ ܡܫܺܝܚܳܐ܆ ܠܡܰܝ̈ܳܐ ܗܳܢܽܘܢ ܕܦܰܐܝܽܘܬ ܐܰ‌ܠܳܗܳܐܺܝܬ ܘܰܬܡܺܝܗܳܐܺܝܬ ܐܶܫܬܰܚܠܰܦܘ ܠܚܰܡܪܳܐ܆ ܗܳܦܽܘ̈ܟܶܐ ܢܺܐܡܰܪ ܐܶܢܽܘܢ ܘܥܳܒܽܘ̈ܕܶܐ ܕܚܰܫ̈ܶܐ ܘܰܕܫܳܢܝܽܘܬܳܐ.

ܐܳܬ̣ܳܐ ܕܶܝܢ ܩܰܕܡܳܝܬܳܐ ܐܰܡܺܝܪܳܐ. ܐܳܦ ܓܶܝܪ ܐܳܦ ܗܳܕܶܐ ܐܶܬܒܰܥܝܰܬ܆ ܟܰܕ ܐ̱ܢܳܫܺܝ̈ܢ ܡܰܢ ܐܳܡܪܺܝܢ ܕܠܳܗ̇ ܥܒܰܕ ܩܰܕܡܳܝܬܳܐ܆ ܟܕ ܒܙܰܒܢܳܐ ܗܰܘ ܕܰܥܒܰܪ ܕܩܰܘܡܬܶܗ ܦܰܓܪܳܢܳܝܬܳܐ܆ ܠܳܐ ܡܶܕܶܡ ܟܽܠ ܟܽܠܶܗ ܗܘ̣ܳܐ ܕܰܐܝܟ ܗܳܢܳܐ܆ ܡܶܛܽܠ ܕܠܳܐ ܨܳܒܶܐ ܗ̱ܘܳܐ ܕܓܰܠܝܳܐ ܢܶܗܘܶܐ ܩܕܳܡ ܙܰܒܢܳܐ ܗܰܘ ܕܡܶܬܦܰܪܢܰܤ ܗ̱ܘܳܐ ܡܕܰܒܪܳܢܳܐܺܝܬ. ܡܶܢ ܟܽܠܦܪܽܘܤ ܓܶܝܪ ܐܳܦ ܝܰܬܺܝܪܳܐܺܝܬ ܡܶܬܦܰܠܓܺܝܢ ܗ̱ܘܰܘ ܥܠܰܘܗ̱ܝ ܝܽܗ̱ܘ̈ܕܳܝܶܐ ܘܠܳܐ ܡܗܰܝܡܢܺܝܢ ܗ̱ܘܰܘ ܠܶܗ܆ ܕܠܰܘ ܩܰܘܡܬܳܐ ܗܳܝ ܕܙܳܕܩܳܐ ܠܓܰܒܪ̈ܶܐ ܡܰܝܬܶܐ ܗ̱ܘܳܐ܆ ܘܡܶܣܬܰܪܗܒܺܝܢ ܗ̱ܘܰܘ ܐܳܦ ܩܰܠܺܝܠܳܐܺܝܬ ܕܢܶܩܕܡܽܘܢ ܢܶܚܛܦܽܘܢܳܝܗ̱ܝ ܘܢܶܩܒܥܽܘܢܳܝܗ̱ܝ ܒܰܨܠܝܒܳܐ܆ ܐܳܦܶܢ ܠܳܐ ܡܶܬܬܨܺܝܕܳܢܳܐ ܐܺܝܬܰܘܗ̱ܝ ܗ̱ܘܳܐ ܠܗܽܘܢ ܐܳܦ ܟܰܕ ܨܳܒܶܝܢ ܗ̱ܘܰܘ ܕܢܶܠܒܟܽܘܢܝܗ̱ܝ ܆ ܡܶܛܽܠܗܳܢܳܐ ܟܺܝܬ ܐܳܦܠܳܐ ܡܶܬܬܨܺܝܕ܆ ܐܶܠܳܐ ܗܽܘ ܒܨܶܒܝܳܢܶܗ ܐܰܫܠܶܡ ܗܽܘ ܠܶܗ. ܡܶܬܚܙܶܐ ܗܳܟܺܝܠ ‌ܐܳܡܪܺܝܢ ܕܰܒܟܽܠܳܗ̇ ܩܰܘܡܬܳܐ ܗܳܝ ܩܰܕܡܳܝܬܳܐ܆ ܩܕܳܡ ܗܳܕܶܐ ܬܶܕܡܽܘܪܬܳܐ܆ ܐܳܦܠܳܐ ܚܕܳܐ ܐܳܬ̣ܳܐ ܥܒܰܕ. ܒܰܠܚܽܘܕ ܕܶܝܢ ܟܰܕ ܐܺܝܬܰܘܗ̱ܝ ܗ̱ܘܳܐ ܒܰܪ ܬܰܪܬܰܥܶܣܪܶܐ ܫܢܰܝ̈ܳܐ܆ ܐܰܝܟܰܢܳܐ ܕܶܐܫܬܰܥܺܝ ܠܽܘܩܳܐ. ܟܰܕ ܥܰܡ ܡܰܠ̈ܦܳܢܶܐ ܕܝܽܗ̱ܘ̈ܕܳܝܶܐ ܕܒܽܐܘܪܫܠܶܡ ܐܰܟܚܕܳܐ ܝܺܬܶܒ܆ ܘܰܒܫܽܘ̈ܐܴܠܶܐ ܘܰܒܣܰܟܽܘܠܬܳܢܽܘܬܳܐ ܕܦܽܘܢܳܝ ܦܶܬܓܳܡ̈ܶܐ ܐܰܬܡܰܗ ܐܶܢܽܘܢ^[98].

ܐ̱ܚܪ̈ܳܢܶܐ ܕܶܝܢ ܐܺܝܬ ܠܡܶܫܡܰܥ ܕܝܰܬܺܝܪ ܩܰܛܺܝܢܳܐܺܝܬ ܡܥܰܩܒܺܝܢ ܘܳܐܡܪܺܝܢ܆ ܕܰܠܗܳܕܶܐ ܐܳܬ̣ܳܐ ܩܰܕܡܳܝܬܳܐ ܐܰܡܪܳܗ̇ ܐܶܘܰܢܓܶܠܺܝܣܛܳܐ ܕܥܰܒܕܳܗ̇܆ ܠܰܘ ܦܫܺܝܛܳܐܺܝܬ. ܐܶܠܳܐ ܒܩܳܛܢܶܐ ܕܰܓܠܺܝܠܳܐ. ܟܰܕ ܡܫܰܘܕܰܥ ܕܳܐܦ ܙܒܰܢ̱ܬܳܐ ܐ̱ܚܪܺܬܳܐ ܘܐܦ ܒܕܽܘܟܬܳܐ ܐ̱ܚܪܺܬܳܐ ܥܒܰܕ ܐܳܬܘ̈ܳܬܳܐ܆ ܐܳܦܶܢ ܠܰܘ ܠܘܳܬ ܟܽܠܢܳܫ ܗܶܢܶܝܢ ܟܰܕ ܗܶܢܶܝܢ ܐܰܘ ܕܕܳܡ̈ܝܳܢ ܠܗܶܝܢ. ܐܳܦ ܓܶܝܪ ܐܳܦ ܠܦܽܘܬ ܫܽܘܚܠܳܦܳܐ ܕܦܰܪ̈ܨܽܘܦܶܐ ܘܰܕܙܰܒ̈ܢܶܐ ܘܰܕܕܽܘܟ̈ܝܳܬܳܐ܆ ܗܳܠܶܝܢ ܡܶܬܕܰܒܪ̈ܳܢ ܗ̱ܘܰܝ̈܆ ܡܦܰܬܟܳܐܺܝܬ ܟܺܝܬ ܘܚܰܟܺܝܡܳܐܺܝܬ. ܐ̱ܚܪܳܢܝܳܐܺܝܬ ܡܰܢ ܠܘܳܬ ܝܽܗ̱ܘ̈ܕܳܝܶܐ ܚܰܣܳܡ̈ܶܐ܆ ܘܰܕܪܰܒܬܳܐ ܡܶܬܪܰܥܶܝܢ ܗ̱ܘܰܘ ܥܰܠ ܗܳܝ ܕܣܳܒܪܺܝܢ ܕܝܳܕܥܺܝܢ ܠܰܐܠܳܗܳܐ ܘܰܠܢܳܡܽܘܣܳܐ ܕܗܰܘ܆ ܐ̱ܚܪܳܢܝܳܐܺܝܬ ܕܶܝܢ ܠܘܳܬ ܗܳܢܽܘܢ ܕܺܐܝܬܰܝܗܽܘܢ ܡܚܰܪܪ̈ܶܐ ܡܶܢ ܚܰܫ̈ܶܐ ܕܕܰܐܝܟ ܗܳܠܶܝܢ. ܒܐܓܘܦܛܘܤ ܓܶܝܪ܆ ܐܶܡܰܬܝ ܕܡܶܛܽܠ ܫܳܢܝܽܘܬܶܗ ܕܗܶܪܽܘܕܺܝܤ ܠܬܰܡܳܢ ܢܚܶܬ܆ ܟܰܕ ܫܰܒܪܳܐ ܐܺܝܬܰܘܗ̱ܝ܆ ܐܰܝܟ ܢܒܺܝܽܘܬܶܗ ܕܶܐܫܰܥܝܳܐ܆ ܡܙܺܝܥ ܗ̱ܘܳܐ ܠܰܥܒܺܝ̈ܕܰܝ ܒܺܐܝ̈ܕܰܝܳܐ ܕܺܝܠܳܗ̇܆ ܝܺܕܺܝܥܳܐ ܕܶܝܢ ܕܠܰܓ̈ܠܺܝܦܶܐ ܘܠܰܦܬܰܟܪ̈ܶܐ ܘܰܠܕܶܡ̈ܘܳܬܳܐ^[99] ܕܫ̈ܺܐܕܶܐ܆ ܕܩܳܕܡܺܝܢ ܗ̱ܘܰܘ ܡܫܰܘܕܥܺܝܢ ܠܰܫܪܳܝܳܐ ܕܺܝܠܗܽܘܢ^[100]܆ ܘܰܕܡܶܚܕܳܐ ܣܰܓܺܝ ܥܬܺܝܕܺܝܢ ܗ̱ܘܰܘ ܕܢܶܫܬܰܥܒܕܽܘܢ ܠܶܗ ܐܰܝܟ ܕܠܰܐܠܳܗܳܐ ܫܰܪܺܝܪܳܐ܆ ܘܳܐܦ ܒܶܗ ܒܚܺܐܦܳܐ ܘܰܩܪܳܒܳܐ ܕܰܠܘܳܬܶܗ ܢܶܦܠܽܘܢ ܘܢܶܙܕܟܽܘܢ. ܘܳܐܦ ܗܺܝ ܕܶܝܢ ܐܶܡܶܗ ܘܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ܆ ܐܰܝܟ ܐܰܝ̇ܕܳܐ ܕܰܡܥܰܝܕܳܐ ܗ̱ܘܳܬ ܒܗܳܝ ܕܬܶܚܙܶܐ ܐܳܬܘ̈ܳܬܳܐ܆ ܘܰܡܦܳܣܳܐ ܗ̱ܘܳܬ ܕܰܕܚܰܝ̈ܠܶܐ ܬܡܺܝ̈ܗܶܐ ܥܳܒܽܘܕܳܐ ܐܳܡܪܳܐ ܗ̱ܘܳܬ܆ ܚܰܡܪܳܐ ܠܰܝܬ ܠܗܽܘܢ^[101]. ܐܰܝܟܰܢܳܐ ܟܺܝܬ ܕܳܐܬ̣ܳܐ ܩܰܕܡܳܝܬܳܐ ܠܗܳܕܶܐ ܙܳܕܶܩ ܕܢܶܣܒܰܪ܆ ܐܰܘ ܕܗܳܢܶܝܢ ܕܰܒܩܳܛܢܶܐ ܕܰܓܠܺܝܠܳܐ ܗܘ̣̈ܰܝ܆ ܐܰܘ ܩܰܕܡܳܝܬܳܐ ܡܶܢ ܒܳܬܰܪ ܕܰܥܡܰܕ ܝܶܫܽܘܥ.

ܕܰܡܝܰܬܪܳܐ ܕܶܝܢ ܗܳܢܳܐ ܗܰܘ ܕܠܰܬܪ̈ܺܝܨܳܬܳܐ ܡܦܰܬܶܠ ܒܦܽܘܫܳܩ̈ܶܐ ܗܳܢܽܘܢ ܛܳܥ̈ܝܐ ܕܰܥܒܺܝܕܺܝܢ ܠܶܗ ܒܰܐܚܪܳܢܝܽܘܬ ܡܶܠܬܳܐ܆ ܠܘܬ ܓܽܘܕܳܦܳܐ ܕܣܰܓܺܝ ܒܺܝܫ ܫܰܚܠܶܦ ܐܰܥܒܪܳܗ̇ ܠܬܶܕܡܽܘܪܬܳܐ ܗܳܕܶܐ܆ ܟܰܕ ܗܳܘܶܐ ܕܰܠܩܽܘܒܠܳܐ ܐܳܦ ܠܢܺܝܫܳܐ ܕܰܟܬܳܒܳܐ ܐܰ‌ܠܳܗܳܝܳܐ܆ ܘܳܐܦ ܠܗܰܘܢܳܐ ܕܡܰܠ̈ܦܳܢܶܐ ܘܡܰܐܪ̈ܙܳܢܶܐ ܕܰܫܪܳܪܳܐ܆ ܗܳܢܽܘܢ ܕܒܶܗ ܟܰܕ ܒܶܗ ܒܪܽܘܚܳܐ ܠܗܳܢܳܐ ܦܰܫܶܩܘ܆ ܠܘܳܬ ܫܽܘܪܳܪܳܐ ܕܺܝܠܟܽܘܢ ܗܳܢܽܘܢ ܕܫܳܡܥܺܝܢ ܐܢ̱ܬܽܘܢ܆ ܠܣܳܗܕܽܘܬܳܐ ܕܗܳܢܽܘܢ ܐܶ݀ܣܺܝܡ ܗܳܪܟܳܐ.

ܟܬܰܒ ܓܶܝܪ ܩܰܕܺܝܫܳܐ ܝܽܘܚܰܢܳܢ ܐܶܦܝܣܩܘܦܳܐ ܕܩܘܤܛܢܛܝܢܘܦܘܠܝܤ܆ ܟܰܕ ܠܕܽܘܟܬܳܐ ܗܳܕܶܐ ܕܶܐܘܰܢܓܶܠܺܝܽܘܢ ܡܦܰܫܶܩ ܗܳܟܰܢܳܐ. ܗܳܝܕܶܝܢ ܡܰܢ ܗܳܟܺܝܠ܆ ܚܰܡܪܳܐ ܡܶܢ ܡܰܝ̈ܳܐ ܥܒܰܕ ܝܶܫܽܘܥ. ܘܳܐܦ ܗܳܝܕܶܝܢ ܕܶܝܢ ܘܳܐܦ ܗܳܫܳܐ܆ ܠܨܶܒܝܳܢ̈ܶܐ ܪ̈ܦܰܝܳܐ ܘܰܕܪܳܕܶܝܢ ܘܡܶܬܐܰܫܕܺܝܢ܆ ܠܳܐ ܒܳܛܶܠ ܕܰܡܫܰܚܠܶܦ. ܐܺܝܬ ܓܶܝܪ ܐܺܝܬ ܒܢܰܝ̈ܢܳܫܳܐ܆ ܕܠܳܐ ܡܶܕܶܡ ܡܫܰܚܠܦܺܝܢ ܡܶܢ ܡܰܝ̈ܳܐ. ܕܗܳܟܰܢܳܐ ܐܺܝܬܰܝܗܽܘܢ ܐܳܦ ܩܰܪܺܝܪ̈ܶܐ ܐܳܦ ܪ̈ܦܰܝܳܐ ܘܰܕܠܳܐ ܡܬܽܘܡ ܩܳܝܡܺܝܢ. ܠܗܳܢܽܘܢ ܕܶܝܢ ܕܗܳܟܰܢܳܐ ܣܺܝܡܺܝܢ܆ ܢܩܰܪܶܒ ܐܶܢܽܘܢ ܠܡܳܪܰܢ܆ ܐܰܝܟܰܢܳܐ ܕܰܠܨܶܒܝܳܢܳܐ ܕܺܝܠܗܽܘܢ܆ ܠܰܙܢܳܐ ܕܚܰܡܪܳܐ ܢܫܰܚܠܦܺܝܘܗ̱ܝ܆ ܐܰܝܟܰܢܳܐ ܕܠܳܐ ܬܽܘܒ ܢܕܽܘܒܽܘܢ ܘܢܶܬܐܰܫܕܽܘܢ܆ ܐܶܠܳܐ ܕܢܶܗܘܽܘܢ ܐܺܝܬܰܝܗܽܘܢ ܥܶܠܬܳܐ ܕܚܰܕܽܘܬܳܐ ܐܳܦ ܠܢܰܦܫܗܽܘܢ ܐܳܦ ܠܰܐ̱ܚܪ̈ܳܢܶܐ. ܡܶܬܒܰܩܶܝܢ ܐܢ̱ܬܽܘܢ ܒܳܗ̇ ܒܕܰܠܩܽܘܒܠܳܝܽܘܬܳܐ ܕܰܟܡܳܐ ܗܝ܆ ܘܰܕܚܰܡܪܳܐ ܗܳܪܟܳܐ܆ ܕܫܽܘܚܠܳܦܳܐ ܕܰܠܘܳܬ ܗܳܝ ܕܰܡܝܰܬܪܳܐ܆ ܘܰܕܚܰܕܽܘܬܳܐ ܪܽܘܚܳܢܳܝܬܳܐ ܐܺܝܬܰܘܗ̱ܝ ܐܳܬ̣ܳܐ ܘܠܰܘ ܕܫܳܢܝܽܘܬܳܐ܆ ܐܰܝܟܰܢܳܐ ܕܰܙܢܳܐ ܗܰܘ ܫܺܐܕܳܢܳܝܳܐ ܕܦܽܘܫܳܩܶܗ ܕܗܰܘ ܨܳܒܶܐ܆ ܘܕܳܐܦ ܡܰܝ̈ܳܐ ܠܰܘ ܕܕܰܟܝܽܘܬܳܐ ܗܳܪܟܳܐ ܘܰܕܪܶܚܡܰܬ ܐܰ‌ܠܳܗܳܐ ܐܺܝܬܰܝܗܽܘܢ ܬܰܚܘܺܝܬܳܐ܆ ܐܶܠܳܐ ܕܩܰܪܺܝܪܽܘܬܳܐ ܘܰܕܪܰܦܝܽܘܬܳܐ܆ ܘܰܕܗܳܝ ܕܠܳܐ ܩܰܘܡܳܐ ܘܰܕܕܽܘܒܳܐ ܘܰܕܡܶܬܐܰܫܕܳܢܽܘܬܳܐ.

ܡܳܕܶܝܢ ܫܡܰܥܘ̱ ܠܚܰܟܺܝܡܳܐ ܘܩܰܕܺܝܫܳܐ ܩܽܘܪܺܝܠܘܤ܆ ܗܰܘ ܕܠܰܡܕܺܝܢ̱ܬܳܐ ܪܰܒܬܳܐ ܘܰܡܗܰܝܡܰܢܬܳܐ ܕܰܐ‌ܠܶܟܣܰܢܕܪ̈ܳܝܶܐ ܪܥܳܐ܆ ܕܰܐ‌ܠܳܗܳܐܺܝܬ ܡܦܰܫܶܩ ܠܳܗ̇ ܠܕܽܘܟܬܳܐ ܗܳܕܶܐ ܕܶܐܘܰܢܓܶܠܺܝܽܘܢ ܘܟܳܬܶܒ ܗܳܟܰܢܳܐ. ܘܰܒܝܰܘܡܳܐ ܕܰܬܠܳܬܳܐ ܡܶܫܬܽܘܬܳܐ ܗܘ̣ܳܬ ܒܩܳܛܢܶܐ ܕܰܓܠܺܝܠܳܐ^[102]. ܒܫܰܦܺܝܪܽܘܬ ܥܶܠܬܳܐ ܡܶܟܺܝܠ ‌ܐܳܬܶܐ ܠܘܳܬ ܫܽܘܪܳܝܳܐ ܕܳܐܬܘ̈ܳܬܳܐ܆ ܐܳܦܶܢ ܠܳܐ ܨܶܒܝܳܢܳܐܺܝܬ ܡܶܣܬܒܰܪ ܗ̱ܘܳܐ ܕܡܶܬܩܪܶܐ ܠܘܳܬܳܗ̇. ܟܰܕ ܓܶܝܪ ܚܰܓܳܐ ܡܶܫܬܰܡܠܶܐ ܗ̱ܘܳܐ ܥܰܠ ܚܠܽܘܠܳܐ܆ ܝܺܕܺܝܥܳܐ ܗܝ ܟܺܝܬ ܡܶܢ ܟܽܠ ܦܪܘܤ܆ ܕܰܟܢܺܝܟܳܐܺܝܬ ܡܰܢ ܩܰܪܺܝܒܳܐ ܐܶܡܶܗ ܕܦܳܪܽܘܩܰܢ܆ ܟܰܕ ܩܪܶܐ ܗ̱ܘܳܐ ܕܶܝܢ ܐܳܦ ܗܽܘ܆ ܥܰܡ ܬܰܠ̈ܡܺܝܕܶܐ ܒܰܝ̈ܬܳܝܶܐ ܕܺܝܠܶܗ ܐܰܟܚܕܳܐ ܐܳܬܶܐ܆ ܕܢܶܥܒܶܕ ܬܶܕܡܽܘܪܬܳܐ ܡܰܠܽܘܢ ܐܰܘ ܕܢܶܫܬܰܪܶܐ. ܬܽܘܒ ܕܶܝܢ ܥܰܡ ܗܳܠܶܝܢ ܐܳܦ ܕܠܶܗ ܠܫܽܘܪܳܝܳܐ ܕܰܗܘܳܝܶܗ ܕܒܰܪܢܳܫܳܐ ܢܩܰܕܶܫ܆ ܐܳܡܪܺܝܢ ܚ̱ܢܰܢ ܕܶܝܢ ܟܡܳܐ ܕܳܐܬܝܳܐ ܗ̱ܘܳܬ ܠܒܶܣܪܳܐ. ܙܳܕܶܩ ܗ̱ܘܳܐ ܠܶܗ ܓܶܝܪ ܕܟܰܕ ܠܰܟܝܳܢܳܐ ܕܒܰܪܢܳܫܳܐ ܐܰܟܚܕܳܐ ܡܟܰܢܶܫ ܗ̱ܘܳܐ܆ ܘܰܠܟܽܠܶܗ ܡܶܢ ܕܪܺܝܫ ܗܳܦܶܟ ܗ̱ܘܳܐ ܠܘܳܬ ܗܳܝ ܕܰܡܝܰܬܪܳܐ܆ ܕܠܰܘ ܒܰܠܚܽܘܕ ܠܗܳܢܽܘܢ ܕܗܳܐ ܡܶܢ ܟܰܕܽܘ ܠܘܳܬ ܗܳܝ ܕܢܶܗܘܽܘܢ ܐܺܝܬܰܝܗܽܘܢ ܩܪܶܝܢ ܗ̱ܘܰܘ ܢܦܰܠܶܓ ܒܽܘܪܟܬܳܐ܆ ܐܶܠܳܐ ܐܳܦ ܕܰܠܗܳܢܽܘܢ ܕܒܳܬܰܪ ܩܰܠܺܝܠ ܥܬܺܝܕܺܝܢ ܕܢܶܬܝܰܠܕܽܘܢ ܢܩܰܕܶܡ ܢܥܰܬܕܺܝܗ̇ ܠܛܰܝܒܽܘܬܳܐ܆ ܘܩܰܕܺܝܫܬܳܐ ܢܶܥܒܕܺܝܗ̇ ܠܡܰܥܒܰܪܬܐ ܕܺܝܠܗܽܘܢ ܕܰܠܘܳܬ ܗܳܝ ܕܢܶܗܘܽܘܢ ܐܺܝܬܰܝܗܽܘܢ. ܐܳܦ ܕܰܬܠܳܬܳܐ ܩܰܒܶܠ ܡܰܦܰܩ ܒܪܽܘܚܳܐ ܕܥܰܠ ܗܳܕܶܐ. ܐܰܡܺܝܪܳܐ ܗ̱ܘܳܬ ܒܕܽܘܟ ܠܘܳܬ ܐܰܢ̱ܬܬܳܐ ܡܶܢ ܐܰ‌ܠܳܗܳܐ܆ ܕܰܒܥܳܩ̈ܳܬܳܐ ܬܺܐܠܕܺܝܢ ܒܢܰܝ̈ܳܐ^[103]. ܐܰܝܟܰܢܳܐ ܗܳܟܺܝܠ ܙܳܕܶܩ ܗ̱ܘܳܐ ܕܳܐܦ ܠܗܳܕܶܐ ܠܰܘܛܬܳܐ ܢܶܙܢܽܘܩ ܡܶܢܰܢ܆ ܐܰܘ ܐܰܝܟܰܢܳܐ ܐܺܝܬ ܗ̱ܘܳܐ ܠܰܢ ܐ̱ܚܪܳܢܝܳܐܺܝܬ ܠܡܶܥܪܰܩ ܡܶܢ ܙܽܘܘܳܓܳܐ ܡܚܰܝܒܳܐ. ܫܪܳܗ̇ ܐܳܦ ܠܗܳܕܶܐ ܟܰܕ ܪܳܚܶܡ ܐ̱ܢܳܫܳܐ ܐܺܝܬܰܘܗ̱ܝ ܗܽܘ ܦܳܪܽܘܩܢ. ܝܰܩܪܶܗ ܒܩܰܪܺܝܒܽܘܬܳܐ ܠܙܽܘܘܳܓܳܐ܆ ܗܰܘ ܦܨܺܝܚܽܘܬܳܐ ܘܚܰܕܽܘܬܳܐ ܕܟܽܠܢܳܫ܆ ܐܰܝܟܰܢܳܐ ܕܠܰܟܡܺܝܪܽܘܬܳܐ ܗܳܝ ܩܰܕܡܳܝܬܳܐ ܕܡܰܘܠܕܽܘܬ ܒܢܰܝ̈ܳܐ ܢܶܛܪܽܘܕ. ܐܶܢ ܐ̱ܢܳܫ ܓܶܝܪ ܒܰܡܫܺܝܚܳܐ܆ ܒܪܺܝܬܰܐ ܗ̱ܘ ܚܕܰܬܳܐ. ܘܥܰܬܺܝ̈ܩܳܬܳܐ ܥܒܰܪ̈ܝ̱ ܠܗܶܝܢ^[104]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ. ܗܘܰܝ̈ ܕܶܝܢ ܚ̈ܰܕܬ̣ܳܬ̣ܳܐ. ܚܙܰܝܬܽܘܢ ܕܰܟܡܳܐ ܡܶܨܥܳܝܽܘܬܳܐ ܕܒܰܝܢܳܬ ܢܽܘܗܪܳܐ ܘܚܶܫܽܘܟܳܐ܆ ܕܰܠܡܳܐ ܒܰܝܬܳܐ ܕܗܰܢܺܝܽܐܘܬ ܚܰܫ̈ܶܐ ܩܪܳܗ̇ ܠܡܶܫܬܽܘܬܳܐ܆ ܕܰܠܡܳܐ ܫܽܘܘܕܳܥܳܐ ܕܰܚܒܳܠܳܐ ܕܰܒܦܰܪܕܰܝܣܳܐ ܘܰܕܥܽܘܪܙܳܠܳܐ ܫܟܺܝܪܳܐ ܕܳܐܕܳܡ ܘܰܕܚܰܘܳܐ܆ ܠܗܰܘ ܕܡܶܣܬܰܪܗܰܒ ܠܡܶܓܒܰܠ ܒܢܳܡܽܘܣܳܐ ܕܡܶܢ ܢܰܦܫܶܗ ܗܰܘ ܡܚܰܒܠܳܐ ܒܗܰܘܢܳܐ.

ܢܶܬܬܰܝ̈ܬܝܳܢ ܗܳܟܺܝܠ ܠܰܡܨܰܥܬܳܐ܆ ܐܳܦ ܡ̈ܶܠܶܐ ܗܳܠܶܝܢ ܕܬܰܪܥܺܝܬܳܐ ܡܥܰܠܰܝܬܳܐ ܘܰܕܬܶܐܽܘܪܺܝܰܐ ܕܺܝܠܶܗ ܕܡܰܠܦܳܢܳܐ. ܡܰܝܬܶܐ ܓܶܝܪ ܒܳܬܰܪ ܗܳܠܶܝܢ ܕܶܐܬܶܐܡܰܪ̈ܝ̱܆ ܡܶܢ ܒܳܬܰܪ ܙܥܽܘܪ̈ܝܳܬܳܐ ܐܳܦ ܗܳܠܶܝܢ܆ ܕܰܠܚܰܣܺܝܪܽܘܬ ܗܰܘܢܳܐ ܕܗܰܘ ܗܳܝ ܡܓܰܕܦܳܢܺܝܬܳܐ ܘܫܽܘܥܺܝܬܳܢܺܝܬܳܐ ܘܕܰܫܟܺܝܪܽܘܬܳܐ ܣܰܓܺܝܐܬܳܐ ܐܺܝܬ ܒܳܗ̇܆ ܗܳܝ ܕܰܥܒܺܝܕܐ ܠܶܗ ܒܰܐܚܪܳܢܝܽܘܬ ܡܶܠܬܳܐ܆ ܡܶܢ ܫܶܪ̈ܫܶܝܗ̇ ܬܳܠ̈ܫܳܢ ܠܳܗ̇܆ ܘܡܶܢ ܕܽܘܟ̈ܝܳܬܳܐ ܩܰܕܺܝ̈ܫܳܬܳܐ ܠܒܰܪ ܡܶܢ ܟܬܳܒܳܐ ܐܰ‌ܠܳܗܳܝܳܐ ܐܰܝܟ ܕܠܰܡܣܰܝܰܒܬܳܐ ܕܳܚ̈ܩܳܢ ܠܳܗ̇.

ܢܚܶܬ ܗܳܟܺܝܠ ܡܶܢ ܫܡܰܝܳܐ ܡܶܠܬܳܐ ܗܰܘ ܕܰܐ‌ܠܳܗܳܐ܆ ܐܰܝܟܰܢܳܐ ܕܗܽܘ ܒܕܽܘܟ ܐܳܡܰܪ܆ ܐܰܝܟܰܢܳܐ ܕܟܰܕ ܠܰܟܝܳܢܳܐ ܕܒܰܪܢܳܫܳܐ^[105] ܒܰܕܡܽܘܬ ܚܰܬܢܳܐ ܡܒܰܝܬܶܐ ܠܶܗ܆ ܦܝܳܣܳܐ ܢܶܥܒܕܺܝܘܗ̱ܝ ܕܢܶܒܛܰܢ ܙܰܪ̈ܥܶܐ ܪ̈ܽܘܚܳܢܶܐ ܕܚܶܟܡܬܳܐ. ܘܟܰܠܬܳܐ ܡܰܢ ܟܺܐܢܳܐܺܝܬ ܗܺܝ ܐ̱ܢܳܫܽܘܬܳܐ ܡܶܛܽܠ ܗܳܕܶܐ ܡܶܬܩܰܪܝܳܐ܆ ܚܰܬܢܳܐ ܕܶܝܢ ܦܳܪܽܘܩܰܢ܆ ܟܰܕ ܡܶܢ ܗܳܠܶܝܢ ܕܺܝܠܰܢ܆ ܠܣܽܘܟܳܠܳܐ ܗܰܘ ܕܰܠܥܶܠ ܡܶܢܰܢ ܡܳܬܰܚ ܡܥܰܠܶܐ ܠܳܗ̇ ܠܡܶܠܬܐ ܟܬܳܒܳܐ ܐܰ‌ܠܳܗܳܝܳܐ.

ܡܶܬܟܰܢܰܫ ܕܶܝܢ ܦܽܘܚܪܳܐ ܕܡܶܫܬܽܘܬܳܐ ܒܝܰܘܡܳܐ ܗܰܘ ܕܰܬܠܳܬܳܐ. ܗܳܢܰܘ ܕܶܝܢ ܒܙܰܒ̈ܢܶܐ ܐ̱ܚܪ̈ܳܝܶܐ ܕܥܳܠܡܳܐ ܗܳܢܳܐ ܕܩܰܪܺܝܒ. ܡܶܢܝܳܢܳܐ ܓܶܝܪ ܗܰܘ ܕܰܬܠܳܬܳܐ܆ ܫܽܘܪܳܝܳܐ ܡܰܥܶܠ ܠܰܢ ܘܡܶܨܥܳܝܽܘܬܳܐ ܘܫܽܘܠܳܡܳܐ. ܗܳܟܰܢܳܐ ܕܶܝܢ ܟܽܠܶܗ ܙܰܒܢܳܐ ܡܶܬܬܟܺܝܠ. ܠܗܳܕܶܐ ܕܬܶܬܚܙܶܐ ܕܕܳܡܝܳܐ܆ ܗܳܝ ܕܰܒܝܰܕ ܚܰܕ ܡܶܢ ܢܒܺܝ̈ܶܐ ܒܕܽܘܟ ܐܰܡܺܝܪܳܐ܆ ܢܶܡܚܶܐ ܘܢܶܥܨܽܘܒ ܠܰܢ܆ ܢܰܚܠܶܡ ܠܰܢ ܒܝܰܘܡܳܐ ܗܰܘ ܕܰܬܠܳܬܳܐ܆ ܘܰܢܩܽܘܡ ܘܢܺܚܶܐ ܩܕܳܡܰܘ̈ܗ̱ܝ ܘܢܶܕܰܥ܆ ܢܶܪܕܽܘܦ ܒܳܬܰܪ ܗܳܝ ܕܢܶܕܰܥ ܠܡܳܪܝܳܐ܆ ܐܰܝܟ ܫܰܦܪܳܐ ܡܛܰܝܒܳܐ ܢܶܫܟܚܺܝܘܗ̱ܝ^[106]. ܡܚ̣ܳܐ ܡܰܢ ܓܶܝܪ ܡܶܛܽܠ ܥܒܳܪ ܦܽܘܩܕܳܢܳܐ ܕܒܳܐܕܳܡ ܟܰܕ ܐܶܡܰܪ ܥܰܦܪܳܐ ܐܺܝܬܰܝܟ ܘܰܠܥܰܦܪܳܐ ܬܺܐܙܰܠ^[107]܆ ܠܗܰܘ ܕܶܝܢ ܕܒܰܚܒܳܠܳܐ ܘܰܒܡܰܘܬܳܐ ܡܰܚܶܐ ܗ̱ܘܳܐ܆ ܬܽܘܒ ܥܨܰܒ ܗܽܘ ܒܝܰܘܡܳܐ ܗܰܘ ܕܰܬܠܳܬܳܐ. ܗܳܢܰܘ ܕܶܝܢ ܠܰܘ ܒܙܰܒ̈ܢܶܐ ܩܰܕܡܳܝ̈ܶܐ ܘܳܐܦܠܳܐ ܒܡܶܨܥܳܝ̈ܶܐ܆ ܐܶܠܳܐ ܒܙܰܒܢ̈ܶܐ ܐ̱ܚܪ̈ܳܝܶܐ܆ ܐܶܡܰܬܝ ܕܟܰܕ ܡܶܛܽܠܳܬܰܢ ܗܘ̣ܳܐ ܒܰܪܢܳܫܳܐ ܚܠܺܝܡܳܐ ܚܰܘܝܶܗ ܠܰܟܝܳܢܳܐ܆ ܟܰܕ ܠܟܽܠܶܗ ܐܰܩܺܝܡ ܗܽܘ ܒܶܗ ܡܶܢ ܡܺܝ̈ܬܶܐ. ܡܶܛܽܠ ܗܳܕܶܐ ܗܳܟܺܝܠ ܡܶܬܩܪܶܐ ܐܳܦ ܪܺܝܫܺܝܬܳܐ ܕܕܰܡ̈ܟܶܐ^[108]. ܡܳܕܶܝܢ ܒܝܰܕ ܗܳܝ ܕܝܰܘܡܳܐ ܬܠܺܝܬܳܝܳܐ ܐܶܡܰܪ܆ ܗܰܘ ܕܒܶܗ ܡܶܫܬܽܘܬܳܐ ܡܶܫܬܰܡܠܝܳܐ ܗ̱ܘܳܬ^[109]܆ ܠܙܰܒܢܳܐ ܐ̱ܚܪܳܝܳܐ ܡܫܰܘܕܰܥ.

ܡܰܘܕܰܥ ܕܶܝܢ ܐܳܦ ܠܕܽܘܟܬܳܐ. ܒܩܳܛܢܶܐ ܓܶܝܪ ܕܰܓܠܺܝܠܳܐ ܐܳܡܰܪ⁵. ܢ݀ܛܪ^[110] ܕܶܝܢ ܬܽܘܒ ܪܳܚܶܡ ܝܽܘܠܦܳܢܳܐ. ܠܰܘ ܓܶܝܪ ܒܽܐܘܪܫܠܶܡ ܗܘ ܚܰܓܳܐ. ܠܒܰܪ ܡܶܢ ܝܺܗܽܘܕ ܗܝ ܫܳܪܽܘܬܐ. ܐܰܝܟ ܕܒܰܐܬܪܳܐ ܕܥܰܡ̱ܡ̈ܶܐ ܡܶܫܬܰܡܠܝܳܐ. ܓܠܺܝܠܳܐ ܓܶܝܪ ܕܥܰܡ̱ܡ̈ܶܐ ܗ̱ܘܳܐ^[111] ܐܰܝܟܰܢܳܐ ܕܰܢܒܺܝܳܐ ܐܳܡܰܪ. ܝܺܕܺܝܥܬܳܐ ܕܶܝܢ ܟܺܝܬ ܒܕܽܘܟ ܡܶܢ ܟܽܠ ܦܪܽܘܤ ܐܺܝܬܶܝܗ̇܆ ܕܰܟܢܽܘܫܬܳܐ ܗܳܝ ܕܝܽܗ̱ܘ̈ܕܳܝܶܐ܆ ܐܰܣܠܝܰܬ̣ܶܗ ܠܚܰܬܢܳܐ ܗܰܘ ܕܡܶܢ ܫܡܰܝܳܐ܆ ܩܰܒܶܠܬ̣ܶܗ ܕܶܝܢ ܘܣܰܓܺܝ ܚܳܕܝܳܐܺܝܬ܆ ܥܺܕܬܐ ܗܳܝ ܕܡܶܢ ܥܰܡ̱ܡ̈ܶܐ. ܐܳܬܶܐ ܕܶܝܢ ܠܡܶܫܬܽܘܬܳܐ܆ ܠܰܘ ܗܽܘ ܡܶܢ ܢܰܦܫܶܗ ܦܳܪܽܘܩܰܢ. ܒܰܒ̈ܢܳܬ ܩ̈ܳܠܶܐ ܓܶܝܪ ܣܰܓܺܝ̈ܳܐܬܳܐ ܕܩܰܕܺܝ̈ܫܶܐ ܡܶܬܩܪܶܐ ܗ̱ܘܳܐ.

ܐܶܠܳܐ ܚܰܡܪܳܐ ܚܰܣܺܝܪ ܗ̱ܘܳܐ ܠܗܳܢܽܘܢ ܕܡܶܫܬܰܪܶܝܢ ܗ̱ܘܰܘ. ܘܠܳܐ ܡܶܕܶܡ ܓܶܝܪ ܫܰܡܠܺܝ ܢܳܡܽܘܣܳܐ^[112]. ܠܳܐ ܣܳܦܶܩ ܗ̱ܘܳܐ ܠܘܳܬ ܗܳܝ ܕܰܢܚܰܕܶܐ ܡܫܰܡܠܝܳܐܺܝܬ܆ ܟܬܳܒܳܐ ܗܰܘ ܕܡܽܘܫܶܐ. ܐܶܠܳܐ ܐܳܦܠܳܐ ܗܺܝ ܡܫܽܘܚܬܳܐ ܕܥܺܝܪܽܘܬܳܐ ܗܳܝ ܕܰܢܨܺܝܒܳܐ ܒܰܢ܆ ܠܗܳܝ ܕܬܶܫܟܰܚ ܬܫܰܘܙܶܒ ܠܰܢ ܡܶܬܡܰܬܚܳܐ ܗ̱ܘܳܬ. ܡܳܕܶܝܢ ܫܰܪܺܝܪܬܐ ܗܝ ܐܳܦ ܥܠܰܝܢ܆ ܗܳܝ ܕܬܺܐܡܰܪ ܕܚܰܡܪܳܐ ܠܰܝܬ ܠܗܽܘܢ^[113]. ܐܰ‌ܠܳܗܳܐ ܕܶܝܢ ܕܺܝܠܰܢ ܗܰܘ ܥܰܬܺܝܪ ܒܡܰܘܗ̈ܒܳܬܳܐ ܠܳܐ ܡܰܗܡܶܐ ܒܰܟܝܳܢܳܐ ܕܡܶܬܛܰܪܰܦ ܒܚܰܣܺܝܪܽܘܬܳܐ ܕܛܳܒ̈ܳܬܳܐ. ܚܰܡܪܳܐ ܚܰܘܺܝ ܠܰܢ܆ ܕܛܳܒ ܘܰܡܝܰܬܰܪ ܡܶܢ ܗܰܘ ܩܰܕܡܳܝܳܐ. ܟܬܳܒܳܐ ܓܶܝܪ ܩܳܛܶܠ܆ ܪܽܘܚܳܐ ܕܶܝܢ ܡܰܚܝܳܐ^[114]. ܘܰܠܢܳܡܽܘܣܳܐ ܡܰܢ܆ ܠܰܝܬ ܠܶܗ ܡܫܰܡܠܝܽܘܬܳܐ ܒܛܳܒ̈ܳܬܳܐ. ܡܰܪ̈ܕܘܳܬܳܐ ܕܶܝܢ ܐܰ‌ܠܳܗܳܝ̈ܳܬܳܐ ܕܡܰܠܦܳܢܽܘܬܳܐ ܐܶܘܰܢܓܶܠܳܝܬܳܐ܆ ܒܽܘܪܟܬܳܐ ܕܣܰܓܺܝ ܡܰܠ̣ܝܳܐ ܡܰܥ̈ܠܳܢ. ܡܶܬܕܰܡܰܪ ܒܶܗ ܕܶܝܢ ܒܚܰܡܪܳܐ ܗܰܘ ܪܺܝܫ ܛܪܝܩܠܝܢܘܤ. ܣܳܒܰܪ ܐ̱ܢܳܐ ܓܶܝܪ ܕܟܽܠ ܚܰܕ ܡܶܢ ܗܳܢܽܘܢ ܕܰܠܟܳܗܢܽܘܬܳܐ ܐܰ‌ܠܳܗܳܝܬܳܐ ܡܛܰܟܣܺܝܢ܆ ܘܰܡܗܰܝܡܢܺܝܢ ܒܝܳܬܶܗ ܕܦܳܪܽܘܩܰܢ ܕܺܝܠܰܢ ܡܫܺܝܚܳܐ܆ ܡܶܬܕܰܡܰܪ ܒܡܶܠܬܶܗ ܘܬܳܡܰܗ. ܕܺܐܝܬܶܝܗ̇ ܠܥܶܠ ܡܶܢ ܢܳܡܽܘܣܳܐ. ܠܶܗ ܕܶܝܢ ܩܰܕܡܳܝܳܐ ܦܳܩܶܕ ܡܫܺܝܚܳܐ ܕܢܶܬܺܝܗܶܒ܆ ܡܶܛܽܠ ܕܰܐܝܟ ܒܰܪ̱ܬ ܩܳܠܶܗ ܕܦܰܘܠܽܘܤ܆ ܠܰܐܟܳܪܳܐ ܕܥܳܡܶܠ ܙܳܕܶܩ ܕܩܰܕܡܳܝܳܐ ܢܶܬܬܰܪܣܶܐ ܡܶܢ ܦܺܐܪ̈ܰܘܗ̱ܝ^[115].

ܟܰܕ ܗܳܠܶܝܢ ܫܡܰܥܬܽܘܢ܆ ܕܰܠܡܳܐ ܥܰܠ ܒܰܪ̱ܬ ܩܳܠܳܐ ܕܺܝܠܝ ܬܽܘܒ ܣܢܺܝܩܺܝܢ ܐܢ̱ܬܽܘܢ܆ ܠܘܳܬ ܗܳܝ ܕܰܬܕܽܘܢܽܘܢ܆ ܕܗܳܠܶܝܢ ܡܰܢ ܕܪܽܘܚܳܐ ܩܰܕܺܝܫܳܐ ܐܺܝܬܰܝܗܶܝܢ ܝܰܠ̈ܕܶܐ܆ ܗܳܠܶܝܢ ܕܶܝܢ ܕܗܰܘ ܡܫܰܩܦܳܐ܆ ܒܰܛܢ̈ܶܐ ܐܺܝܬܰܝܗܶܝܢ ܕܫ̈ܺܐܕܶܐ܆ ܒܰܕܡܽܘܬ ܕܶܡ̈ܘܳܬܳܐ ܗܳܠܶܝܢ ܕܬܶܕܡܪ̈ܽܘܢܝܳܬܳܐ ܕܰܓ̈ܳܠܳܬܳܐ܆ ܗܳܠܶܝܢ ܕܡܰܠ̣̈ܐܳܢ^[116] ܐܳܦ ܡܶܢ ܚܙܳܬܳܐ ܩܰܕܡܳܝܬܳܐ ܠܗܳܢܽܘܢ ܕܦܳܓܥܺܝܢ܆ ܗܳܢܳܐ ܡܰܢ ܓܶܝܪ ܡܰܠܦܳܢܳܐ ܕܰܫܪܳܪܳܐ܆ ܠܚܰܬܢܳܐ ܫܡܰܝܳܢܳܐ ܡܫܺܝܚܳܐ ܐܶܡܰܪ ܕܡܶܬܛܰܦܰܤ ܘܡܶܬܪܫܶܡ ܒܝܰܕ ܡܶܫܬܽܘܬܳܐ܆ ܕܡܰܩܶܦ ܠܶܗ ܠܢܰܦ̈ܫܳܬܳܐ ܕܺܝܠܰܢ ܒܝܰܕ ܗܰܝܡܳܢܽܘܬܳܐ ܕܒܶܗ ܘܰܒܝܰܕ ܡܶܬܒܰܝܬܝܳܢܽܘܬܳܐ^[117] ܐܰܘ ܟܺܝܬ ܡܟܺܝܪܽܘܬܳܐ. ܡܫܰܡܫܳܢܳܐ ܕܶܝܢ ܗܰܘ ܕܕܰܓܳܠܽܘܬܳܐ ܕܕܰܠܩܽܘܒܠܳܐ ܐܶܡܰܪ܆ ܕܦܳܪܽܘܩܰܢ ܛܽܘܦܣܳܐ ܨܳܐܰܪ ܗ̱ܘܳܐ ܘܪܳܫܶܡ܆ ܠܐ̱ܢܳܫ ܕܰܪܘܶܐ ܒܰܪ̈ܓܺܝܓܳܬܳܐ܆ ܘܰܠܒܰܪܢܳܫܳܐ ܕܫܰܢܺܝ ܘܡܶܬܒܰܝܕܰܠ ܒܚܰܫ̈ܶܐ܆ ܘܳܐܡܰܪ ܒܡ̈ܶܠܶܐ ܫܟܺܝܪ̈ܳܬܳܐ ܕܳܐܦ ܡܶܙܕܰܟܝܳܢܽܘܬܳܐ ܡܰܘ̈ܕܝܳܢ܆ ܥܕܰܟܺܝܠ ‌ܐܳܡܰܪ ܡܰܩܪܶܒ ܐ̱ܢܳܐ ܘܡܶܬܟܰܬܰܫ ܐ̱ܢܳܐ ܘܡܶܬܚܪܶܐ ܐ̱ܢܳܐ܆ ܕܠܳܐ ܐܶ݀ܫܰܠܶܡ ܠܪܶܓܬܳܐ ܕܒܶܣܪܳܐ. ܘܒܳܬܰܪ ܗܳܠܶܝܢ ܡܰܝܬܶܐ܆ ܐܳܡܪܳܐ ܠܰܡܫܰܡ̈ܫܳܢܶܐ ܐܶܡܶܗ. ܠܚܽܘ̈ܫܳܒܶܐ ܚܰܫܳܢܳܝ̈ܶܐ. ܗܰܘ ܡܳܐ ܕܳܐܡܰܪ ܠܟܽܘܢ ܥܒܶܕܘ^[118]. ܠܳܐ ܡܶܫܟܚܳܐ ܓܶܝܪ ܕܠܳܐ ܢܶܣܥܪܺܝܗ̇ ܠܗܳܝ ܕܩܰܕܺܝܡܳܐ ܣܺܝܡܳܐ܆ ܡܶܢ ܐܶܡܰܬܝ ܕܰܛܥܶܡ ܡܶܢ ܫܶܩܝܳܐ ܩܰܕܡܳܝܳܐ ܗܰܘ ܕܡܰܚܫܰܒܬܳܐ. ܘܟܰܕ ܛܳܒ ܐܺܝܬ ܗܘ ܕܳܐܦ ܗܰܘ ܕܩܰܒܶܠ ܚܽܘܫܳܒܳܐ ܒܺܝܫܳܐ ܘܕܰܠܘܳܬ ܪܶܓܬܳܐ ܚܳܐܰܪ܆ ܕܰܒܝܰܕ ܚܽܘܫܳܒܳܐ ܢܰܟܦܳܐ ܕܡܶܬܬܰܝܬܶܐ ܒܳܬܰܪ ܟܶܢ܆ ܢܶܕܚܩܺܝܗ̇ ܠܗܳܢܳܐ܆ ܘܠܳܐ ܢܺܐܬܶܐ ܣܳܟ ܠܘܳܬ ܣܳܥܽܘܪܽܘܬܳܐ. ܐܰܝܟܰܢܳܐ ܗܳܟܺܝܠ ‌ܐܳܡܰܪ ܗ̱ܘ̣ܰܝܬ ܠܥܶܠ܆ ܟܰܕ ܬܶܐܽܘܪܺܝܰܐ ܗܳܝ ܕܡܰܠ̣ܝܳܐ ܚܶܫܽܘܟܳܐ ܚܳܙܶܐ ܗ̱ܘ̣ܰܝܬ܆ ܬܰܠ̈ܡܺܝܕܶܐ܆ ܚܽܘܫܳܒ̈ܶܐ ܫܰܦܺܝܪ̈ܰܝ ܕܶܚܠܬܳܐ ܘܰܡܝܰܬܪ̈ܶܐ ܐܺܝܬܰܝܗܽܘܢ܆ ܗܳܢܽܘܢ ܕܥܰܡܗܽܘܢ ܐܰܝܟ ܫܰܠܺܝܛ ܒܝܳܬܶܗ܆ ܥܰܠ ‌ܐܽܘܪܚܳܐ ܛܳܒܬܳܐ ܟܺܝܬ ܘܒܺܝܫܬܳܐ ܕܠܳܐ ܟܳܠܺܝܬܳܐ ܕܳܪܶܟ. ܘܶܐܢ ܫܰܠܺܝܛ ܒܝܳܬܶܗ ܐܺܝܬܰܘܗ̱ܝ܆ ܘܠܳܐ ܡܶܬܟܰܠܝܳܢܳܐܺܝܬ ܪܳܕܶܐ ܠܘܳܬ ܗܰܘ ܡܳܐ ܕܨܳܒܶܐ܆ ܐܰܝܟܰܢܳܐ ܠܳܐ ܡܰܨܝܳܐ ܕܠܳܐ ܢܶܣܥܽܘܪ܆ ܟܰܕ ܛܥܶܡ ܐܰܝܟ ܕܶܐܡܰܪܬ ܡܶܢ ܫܶܩܝܳܐ ܩܰܕܡܳܝܳܐ ܕܡܰܚܫܰܒܬܳܐ. ܗܳܝ ܓܶܝܪ ܕܠܳܐ ܡܰܨܝܳܐ܆ ܠܰܐܢܰܢܩܺܐ ܩܛܺܝܪܳܝܬܳܐ ܪܡܳܙܳܐ ܡܚܰܘܝܳܐ܆ ܘܰܠܠܳܐ ܨܶܒܝܳܢܳܝܽܘܬܳܐ. ܚܳܙܶܐ ܐܰܢ̱ܬ ܕܫܰܠܺܝܛܽܘܬ ܒܝܳܬܳܐ ܘܟܽܠܗܽܘܢ ܫܡܳܗ̈ܶܐ ܕܫܰܦܺܝܪܽܘܬ ܕܶܚܠܬܳܐ܆ ܥܶܠܬܳܐ ܡܨܰܕܝܳܢܺܝܬܳܐ ܒܰܠܚܽܘܕ ܐܺܝܬܰܝܗܽܘܢ ܠܳܟ܆ ܘܰܥܕܰܡܳܐ ܠܒܰܪ̱ܬ ܩܠܐ ܢܳܦܩܺܝܢ ܘܡܶܫܬܰܘܫܛܺܝܢ܆ ܒܗܽܘܢ ܕܶܝܢ ܒܣܽܘܥܪ̈ܳܢܶܐ܆ ܚܛܺܝܬܳܐ ܩܛܺܝܪܳܝܬܳܐ ܡܰܥܶܠ ‌ܐܰܢ̱ܬ ܘܰܟܝܳܢܳܝܬܳܐ܆ ܠܗܳܝ ܕܦܰܠܰܓܬܳܗ̇ ܐܰܝܟ ܕܰܐܣܒܰܪܬ ܠܰܟܝܳܢܳܝܬܳܐ ܘܰܠܨܶܒܝܳܢܳܝܬܳܐ܆ ܟܰܕ ܓܳܢܶܒ ܐܰܢ̱ܬ ܠܡܰܫܡܰܥܬܳܐ ܠܳܐ ܡܒܰܚܰܢܬܳܐ ܘܠܳܐ ܦܠܺܝܚܬܳܐ. ܐܶܠܳܐ ܚܢܰܢ ܝܳܕܥܺܝܢܰܢ ܠܟܽܠ ܚܛܺܝܬܳܐ܆ ܕܟܽܘܪܗܳܢܳܐ ܐܺܝܬܶܝܗ̇ ܕܢܰܦܫܳܐ܆ ܘܡܶܢ ܨܶܒܝܳܢܳܐ ܕܶܐܬܟܪܰܗ ܫܳܘܚܳܐ܆ ܐܰܝܟ ܡܶܠܬܶܗ ܕܰܢܒܺܝܳܐ ܐܰ‌ܠܳܗܳܝܳܐ ܕܰܘܺܝܕ܆ ܕܰܡܙܰܡܪ ܚܰܟܺܝܡܳܐܺܝܬ ܘܥܰܡ ܝܺܕܰܥܬܳܐ ܘܳܐܡܰܪ܆ ܒܰܪܶܟܝ ܢܰܦܫܝ ܠܡܳܪܝܳܐ܆ ܗܰܘ ܕܰܡܚܰܣܶܐ ܠܟܽܠܗܶܝܢ ܠܳܐ ܢܳܡܽܘܣܳܝ̈ܘܳܬܳܐ ܕܺܝܠܶܟܝ܆ ܠܗܰܘ ܕܡܰܐܣܶܐ ܟܽܠܗܽܘܢ ܟܽܘܪ̈ܗܳܢܰܝܟܝ܆ ܠܗܰܘ ܕܦܳܪܶܩ ܡܶܢ ܚܒܳܠܳܐ ܠܚܰܝ̣ܰܝ̣̈ܟܝ^[119].

ܠܡܳܢܳܐ ܕܶܝܢ ܟܰܕ ܠܟܽܠܗܽܘܢ ܣܽܘ̈ܟܳܠܶܐ ܫܰܦܺܝܪ̈ܰܝ ܡܶܠܬܳܐ ܘܰܡܩܰܠ̈ܣܳܢܶܐ ܕܡܶܫܬܽܘܬܳܐ ܫܒܰܩܬ܆ ܠܘܬ ܫܽܘܘ̈ܕܳܥܶܐ ܒܺܝ̈ܫܶܐ ܡܶܬܬܰܘܒܰܠ ‌ܐܰܢ̱ܬ ܡܰܠܽܘܢ܆ ܟܰܕ ܒܰܕܡܽܘܬ ܡܰܢܺܝ̈ܢܳܝܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ܡܣܰܝܒܺܝܢ ܨܳܒܶܐ ܐܰܢ̱ܬ ܕܛܰܡܳܐܐ ܬܚܰܘܽܘܗ̱ܝ ܠܙܽܘܘܳܓܳܐ. ܗܳܠܶܝܢ ܕܡܶܛܽܠܳܬܗܽܘܢ ܟܰܕ ܠܛܺܝܡܳܬܶܐܘܤ ܟܳܬܶܒ ܗ̱ܘܳܐ ܫܠܺܝܚܳܐ ܩܰܕܶܡ ܐܶܡܰܪ ܗܳܟܰܢܳܐ܆ ܪܽܘܚܳܐ ܕܶܝܢ ܓܰܠܝܳܐܺܝܬ ܒܳܗ̇ ܒܡܶܠܬܳܐ ܐܳܡܰܪ܆ ܕܰܒܙܰܒ̈ܢܶܐ ܐ̱ܚܪ̈ܳܝܶܐ ܢܶܪܚܩܽܘܢ ܐ̱ܢܳܫܳܐ ܡܶܢ ܗܰܝܡܳܢܽܘܬܳܐ܆ ܟܰܕ ܚܳܝܪܺܝܢ ܘܨܳܝܬܺܝܢ ܠܪ̈ܽܘܚܶܐ ܡܰܛܥ̈ܝܳܢܝܳܬܳܐ ܘܰܠܡܰܠ̈ܦܳܢܘܳܬܳܐ ܕܫ̈ܺܐܕܶܐ܆ ܒܡܰܣܰܒ ܒܰܐܦ̈ܶܐ ܡܨܰܕܝܳܢܳܐ ܕܰܡܡܰܠ̈ܠܰܝ ܕܰܓܳܠܽܘܬܳܐ܆ ܕܰܟܘܶܝܢ ܒܬܺܐܪܬܳܐ ܕܺܝܠܗܽܘܢ܆ ܘܟܳܠܶܝܢ ܠܡܶܙܕܰܘܳܓܽܘ^[120].

ܟܰܕ ܕܶܝܢ ܚܕܳܐ ܙܒܰܢ ܒܪܽܘܚܳܐ ܕܰܠܩܽܘܒܠܳܐ ܫܢ̣ܰܝܬ ܘܰܦܩ̣ܰܪܬ ܠܳܟ ܒܬܰܪܥܺܝܬܳܟ܆ ܠܚܰܡܪܳܐ ܗܰܘ ܛܳܒܳܐ܆ ܠܗܰܘ ܕܡܰܠܦܳܢܽܘܬܳܐ ܐܶܘܰܢܓܶܠܳܝܬܳܐ܆ ܠܗܰܘ ܡܫܰܡܠܝܳܐ܆ ܥܳܒܽܘܕܳܐ ܕܚܰܫܳܐ ܘܰܕܫܳܢܝܽܘܬܳܐ. ܦܣ̣ܰܩܬ ܕܺܐܝܬܰܘܗ̱ܝ. ܘܰܠܗܰܘ ܪܺܝܫ ܛܪܝܩܠܝܢܘܤ܆ ܗܰܘܢܳܐ ܕܶܐܨܛܠܺܝ ܘܰܢܦܰܠ ܒܚܰܫ̈ܶܐ. ܘܰܠܗܰܘ ܚܰܬܢܳܐ܆ ܚܽܘܫܳܒܳܐ ܨܰܚܢܳܐ ܘܪܳܐܶܓ ܚܰܫ̈ܶܐ܆ ܐܰܘ ܫܺܐܕܳܐ ܗܰܘ ܕܢܳܩܶܦ ܘܰܡܥܰܕܰܪ ܠܛܰܡܽܐܘܬܳܐ܆ ܬܽܘܒ ܓܶܝܪ ܒܡ̈ܶܠܶܐ ܕܺܝܠܳܟ ܡܶܬܚܰܫܰܚ ܐ̱ܢܳܐ.

ܐܶܠܳܐ ܥܒܳܕܳܐ ܕܰܫܩܳܠ ܛܰܥܢܳܐ ܐܺܝܬܰܘܗ̱ܝ܆ ܕܢܰܝܬܶܐ ܐ̱ܢܳܫ ܢܶܩܰܦ ܒܳܬܰܪ ܗܳܠܶܝܢ܆ ܠܗܳܢܶܝܢ ܕܫܰܪܟܳܐ ܘܰܕܒܳܬܰܪܟܶܢ. ܒܰܠܚܽܘܕ ܓܶܝܪ ܠܗܳܠܶܝܢ ܕܚܳܝܪ̈ܳܢ ܗ̱ܘܰܝ̈ ܠܦܽܘܫܳܩܳܐ ܗܳܢܳܐ ܕܣܺܝܡ ܩܕܳܡܰܝܢ ܕܦܶܬܓܳܡܳܐ ܗܰܘ ܐܶܘܰܢܓܶܠܳܝܳܐ܆ ܘܰܠܬܶܐܽܘܪܺܝܰܐ ܕܡܶܫܬܽܘܬܳܐ ܗܳܝ ܕܶܐܫܬܰܡܠܝܰܬ ܒܩܳܛܢܶܐ ܕܰܓܠܺܝܠܳܐ܆ ܘܡܶܢ ܓܽܘ̈ܕܳܦܰܘܗ̱ܝ ܣܰܓܺܝ̈ܶܐܐ ܩܰܠܺܝܠ ܣܳܡܢܰܢ܆ ܡܶܛܽܠ ܙܗܺܝܪܽܘܬܳܐ^[121] ܕܺܝܠܟܽܘܢ. ܘܶܐܢ ܕܶܝܢ ܠܳܐ ܕܥܰܠ ܟܽܠܗܶܝܢ ܢܶܥܒܰܪ܆ ܕܡܰܟܬܒܳܢܽܘܬܳܐ ܟܽܠܳܗ̇܆ ܘܕܰܦܪܰܓܡܰܛܝܰܐ ܕܺܝܠܳܢܳܝܬܳܐ ܘܰܡܫܰܡܠܰܝܬܳܐ ܐܺܝܬܶܝܗ̇. ܘܶܐܢܳܐ ܕܶܝܢ ܟܰܕ ܕܝܽܘܬܪܳܢܳܐ ܕܺܝܠܟܽܘܢ ܡܶܠܬܳܐ ܣܰܓܺܝܐܬܳܐ ܥܳܒܶܕ ܐ̱ܢܳܐ܆ ܠܳܐ ܡܶܬܪܡܶܐ ܐ̱ܢܳܐ ܕܗܳܠܶܝܢ ܐ̱ܚܪ̈ܳܢܝܘܬ^[122] ܡ̈ܶܠܶܐ ܣܳܒ̈ܳܬܳܢܳܝܳܬܳܐ ܘܥܰܢ̈ܳܬܳܬ̣ܳܐ ܕܦܽܘܫܳܩܰܘ̈ܗ̱ܝ܆ ܒܰܠܚܽܘܕܰܝܗܶܝܢ ܐܶ݀ܣܺܝܡ ܩܕܳܡܰܝܟܽܘܢ ܠܫܶܡܥܳܐ܆ ܘܶܐ݀ܥܒܶܕ ܐܰܝܢܳܝܽܘܬܳܐ ܕܣܽܘܓܦܳܢܳܐ ܒܡܰܫܡܰܥܬܟܽܘܢ܆ ܘܳܐܦ ܒܗܶܝܢ ܒܢܰܦ̈ܫܳܬܟܽܘܢ. ܐܶܠܳܐ ܒܝܰܕ ܝܰܨܺܝܦܽܘܬܳܐ ܥܳܒܶܕ ܐ̱ܢܳܐ ܠܳܗ̇ ܠܗܳܕܶܐ܆ ܕܰܒܬܽܘܪܣܳܝܳܐ ܫܰܪܺܝܪܳܐ ܠܽܘܩܕܰܡ ܐܶܬܰܪܣܶܝܟܽܘܢ܆ ܘܶܐ݀ܒܰܣܶܡ ܘܶܐ݀ܚܰܕܶܝܟܽܘܢ ܒܡܰܠܦܳܢܽܘܬܗܽܘܢ ܪܽܘܚܳܢܳܝܬܳܐ ܕܰܐܒܳܗ̈ܳܬܳܐ܆ ܟܰܕ ܓܶܝܪ ܠܗܳܢܶܝܢ ܕܗܳܢܽܘܢ ܐܳܡܰܪ ܐ̱ܢܳܐ ܡܶܬܟܰܢܰܟ ܐ̱ܢܳܐ܆ ܘܗܳܟܰܢܳܐ ܠܰܫܟܺܝܪܽܘܬܳܗ̇ ܕܛܳܥܝܽܘܬܳܐ ܐܶ݀ܦܰܪܣܶܐ܆ ܘܰܠܟܽܘܢ ܐܰ݀ܩܺܝܡ ܕܰܝܳܢ̈ܶܐ ܕܗܳܠܶܝܢ ܕܡܶܬܐܰܡܪ̈ܳܢ. ܘܰܠܗܳܕܶܐ ܟܰܕ ܐܰ‌ܠܳܗܳܐ ܝܳܗܶܒ ܒܺܐܝܕܳܐ ܒܺܐܝܕܳܐ ܢܶܥܒܶܕ܆ ܐܳܦܶܢ ܗܰܝܡܢܶܬ܆ ܕܟܰܕ ܗܳܠܶܝܢ ܫܡܰܥܬܽܘܢ ܣܳܦܩܺܝܢ ܐܢ̱ܬܽܘܢ ܗܰܘ ܕܰܒܩܶܪܝܳܢܳܗ̇ ܒܰܠܚܽܘܕ ܕܣܶܒܠܬܳܐ ܗܳܝ ܣܰܓܺܝ ܪܰܫܺܝܥܬܳܐ ܘܣܰܓܺܝ ܓܚܺܝܟܬܳܐ܆ ܕܬܶܫܬܰܘܕܥܽܘܢ ܠܰܫܟܺܝܪܽܘܬܳܗ̇܆ ܘܰܕܗܺܝ ܡܶܢܳܗ̇ ܝܺܕܺܝܥܳܐ ܕܰܠܓܽܘܡܳܨܳܐ ܡܰܘܒܠܳܐ܆ ܘܠܰܐܟܣܢܳܝܽܘܬܳܗ̇ ܘܠܰܓܠܺܝܙܽܘܬܳܗ̇ ܕܡܶܢ ܟ̈ܬܳܒܶܐ ܐܰ‌ܠܳܗܳܝ̈ܶܐ.

ܡܰܢܽܘ ܓܶܝܪ ܕܠܳܐ ܢܶܓܚܰܟ ܐܰܪܺܝܟܳܐܺܝܬ܆ ܐܰܝܟܰܢܳܐ ܕܟܰܕ ܠܗܳܠܶܝܢ ܪ̈ܰܫܺܝܥܳܬܳܐ ܕܫܳܥܬܳܐ ܫܳܒܶܩ ܐ̱ܢܳܐ܆ ܠܡܶܕܶܡ ܡܶܢ ܗܳܠܶܝܢ ܓܚܺܝ̈ܟܳܬܳܐ ܐܶܬܶܥܗܰܕ܆ ܟܰܕ ܒܰܐܡ̈ܶܐ ܚܳܙܶܐ ܕܡܶܬܡܫܰܚ ܩܰܝܣܳܐ ܗܰܘ ܕܰܒܦܰܪܕܰܝܣܳܐ܆ ܘܫܳܡܰܥ ܕܡܶܬܓܒܶܠ ܒܒܶܕ̥ܝܳܐ ܡܶܢܝܳܢܗܶܝܢ ܕܗܳܠܶܝܢ܆ ܡܶܛܽܠ ܗܳܝ ܕܰܕܚܰܡܫܺܝܢ ܐܳܡܰܪ ܐܰܡ̈ܶܐ ܐܺܝܬܰܘܗ̱ܝ ܗ̱ܘܳܐ ܩܰܝܣܳܐ ܐ̱ܚܪܺܢܳܐ܆ ܗܰܘ ܕܒܶܗ ܐ̱ܢܳܫ ܕܰܫܡܶܗ ܗܳܡܳܢ ܠܘܳܬ ܦܳܪ̈ܣܳܝܶܐ ܐܶܙܕܩܶܦ^[123].

ܐܰܝܟܰܢܳܐ ܕܶܝܢ ܠܰܘ ܙܥܽܘܪ̈ܶܐ ܡܚܰܘܝܳܐ ܠܗܽܘܢ ܠܓܽܘܚ̈ܟܶܐ ܗܳܢܽܘܢ ܕܰܒܡܰܫܟܢܳܐ܆ ܬܶܐܽܘܪܺܝܰܐ ܡܰܠܽܘܢ ܕܶܝܢ ܩܳܘܡܘܕܝܰܐ ܐܰܘܟܺܝܬ ܡܡܰܝܩܳܢܽܘܬܳܐ ܕܶܐܣܬܺܪܳܐ ܗܳܝ ܕܰܒܢܽܘܢܳܐ܆ ܗܳܝ ܕܡܶܛܽܠܳܬܳܗ̇ ܠܘܳܬ ܦܶܛܪܽܘܤ ܒܶܐܘܰܢܓ̈ܶܠܺܝܰܐ ܐܶܡܰܪ ܡܳܪܰܢ܆ ܙܶܠ ܠܝܰܡܳܐ ܐܰܪܡܳܐ ܒܰܠܽܘܥܳܐ܆ ܘܰܠܢܽܘܢܳܐ ܗܰܘ ܕܣܳܠܶܩ ܩܰܕܡܳܝܳܐ ܣܰܒ܆ ܟܰܕ ܦܳܬܰܚ ܐܰܢ̱ܬ ܦܽܘܡܶܗ ܬܶܫܟܰܚ ܐܶܣܬܺܪܳܐ܆ ܠܗܳܝ ܣܰܒ ܘܗܰܒ ܠܗܽܘܢ^[124]. ܟܳܬܶܒ ܓܶܝܪ ܗܰܘ ܣܰܓܺܝܳܐܐ ܒܰܐܚܪ̈ܳܢܝܘܬ ܡ̈ܶܠܶܐ ܘܰܕܟܽܠܶܗ ܬܠܶܐ ܒܬܶܐܽܘܪܺܝܰܐ܆ ܘܰܕܪܳܡܳܐܺܝܬ ܘܠܰܘ ܡܳܟܳܐܺܝܬ ܡܶܬܪܰܘܪܰܒ ܕܰܡܦܰܫܶܩ ܠܶܐܘܰܢܓܶܠܺܝܽܘܢ ܗܳܟܰܢܳܐ. ܬܶܫܟܰܚ ܠܶܐܣܬܺܪܳܐ ܒܚܺܝܪܬܳܐ ܘܰܡܝܰܬܰܪܬܐ ܕܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ. ܚܠܳܦ ܡܰܢ ܒܰܪܢܳܫܳܐ ܗܰܘ ܕܰܠܓܰܘ ܘܗܰܘ ܕܰܠܒܰܪ܆ ܬܪܶܝܢ ܣܝ̈ܡܝܣܝܐ ܐܰܘܟܺܝܬ ܦܶܠ̈ܓܶܐ. ܠܺܝܕܰܥܬܳܐ ܘܰܠܣܳܥܽܘܪܽܘܬܳܐ. ܚܠܳܦ ܕܶܝܢ ܪܽܘܚܳܐ ܘܢܰܦܫܳܐ ܘܦܰܓܪܳܐ܆ ܬܠܳܬܳܐ ܛܪ̈ܝܡܣܝܐ. ܠܗܰܝܡܳܢܽܘܬܳܐ ܘܣܰܒܪܳܐ ܘܚܽܘܒܳܐ. ܒܳܗ̇ ܒܰܕܡܽܘܬܳܐ ܐܳܦ ܚܠܳܦ ܗܳܠܶܝܢ ܐܰܪܒܥܳܐ ܡܽܘ̈ܙܳܓܶܐ܆ ܫܰܚܺܝܢܳܐ ܝܰܒܺܝܫܳܐ ܪܰܛܺܝܒܳܐ ܩܰܪܺܝܪܳܐ܆ ܗܳܠܶܝܢ ܐܰܪܒܥܳܐ ܓܪܐܡ̈ܛܐ^[125]. ܓܰܢ̱ܒܳܪܽܘܬܳܐ. ܚܶܟܡܬܳܐ. ܢܰܟܦܽܘܬܳܐ. ܟܺܐܢܽܘܬܳܐ. ܬܽܘܒ ܕܶܝܢ ܗܳܠܶܝܢ ܥܶܣܪܺܝܢ ܘܰܐܪܒܥܳܐ ܩܰܪ̈ܛܶܐ܆ ܪ̈ܶܥܝܳܢܶܐ ܫܰܦܺܝܪ̈ܰܝ ܕܶܚܠܬܳܐ ܕܰܬܪܶܥܣܰܪ ܪ̈ܺܝܫܰܝ ܐܰܒܳܗ̈ܳܬܳܐ܆ ܘܬܽܘܪ̈ܳܨܶܐ ܚܰܬܺܝ̈ܬ̣ܶܐ ܕܰܬܪܶܥܣܰܪ ܫܠܺܝ̈ܚܶܐ. ܠܗܳܠܶܝܢ ܕܰܐܝܢܳܐ ܦܽܘܕܩܳܝܳܐ ܕܰܡܚܰܫܶܒ ܛܺܝ̈ܡܶܐ ܕܰܣܥܳܪ̈ܶܐ ܘܰܕܬܶܒܢܳܐ܆ ܘܰܕܨܶܒ̈ܥܳܬܶܗ ܐܰܟܚܕܳܐ ܡܙܺܝܥ܆ ܠܳܐ ܢܺܐܡܰܪ ܐܶܢܶܝܢ ܐ̱ܢܳܫ ܘܛܳܒ ܟܺܐܢܳܐܺܝܬ ܡܠ̈ܘܢܝܬܐ. ܥܰܠ ‌ܐܰܝ̇ܕܳܐ ܓܶܝܪ ܝܰܬܺܝܪܳܐܺܝܬ ܛܳܒ ܡܶܢ ܗܳܝ ܐ̱ܚܪܺܬܳܐ ܙܳܕܶܩ ܕܢܶܓܚܰܟ܆ ܠܰܘ ܦܫܺܝܩܬܳܐ ܗܝ ܠܡܶܫܟܳܚܽܘ܆ ܥܰܠ ܩܰܪܺܝܪܽܘܬܳܐ ܘܣܶܒܬܳܢܳܝܽܘܬܳܐ ܕܣܽܘ̈ܟܳܠܶܐ܆ ܐܰܘ ܥܰܠ ܡܰܡܠܠܳܐ ܩܽܘܪܝ̣ܳܝ̣ܳܐ ܘܠܳܐ ܪܰܕܝܳܐ ܘܰܕܣܰܓܺܝ ܐܺܝܬ ܠܶܗ ܫܽܘܩܳܝܽܘܬܳܐ ܕܰܫܡܳܗ̈ܶܐ.

ܐܶܠܳܐ ܐܶܫܬܽܘܦ ܥܕܰܡܳܐ ܠܓܽܘܚܟܳܐ ܢܳܦܩܺܝܢ ܗ̱ܘܰܘ ܠܶܗ ܫܶܥ̈ܝܶܐ ܗܳܠܶܝܢ ܕܰܐܝܟ ܗܳܟܰܢ܆ ܕܡܶܢ̈ܝܳܢܶܐ ܐܺܝܬ ܐܶܡܰܬܝ ܘܰܕܟܰܝ̈ܠܶܐ܆ ܘܰܟܒܰܪ ܡܶܬܛܰܥܢܳܢܳܐ ܐܺܝܬܰܘܗ̱ܝ ܗ̱ܘܳܐ ܠܪ̈ܳܚܡܰܝ ܓܽܘܚܟܳܐ܆ ܟܰܕ ܚܠܳܦ ܡܶܕܶܡ ܐ̱ܚܪܺܢܳܐ ܡܶܬܓܰܚܟܳܢܳܐ ܡܶܬܓܚܶܟ ܗ̱ܘܳܐ. ܗܳܫܳܐ ܕܶܝܢ ܐܳܦ ܠܘܳܬ ܪܰܫܺܝܥܽܘܬܳܐ ܢܳܦܶܩ܆ ܡܶܢ ܨܒܳܪܳܐ ܠܳܐ ܡܛܰܟܣܳܐ ܘܠܳܐ ܡܶܬܠܰܒܟܳܢܳܐ܆ ܐܰܡܪܰܚ ܓܶܝܪ ܠܡܶܟܬܰܒ ܡܶܛܽܠ ܡܰܥܡܕܳܢܳܐ ܘܺܐܝܙܓܰܕܳܐ܆ ܘܕܰܐܝܟ ܣܳܗܕܽܘܬܶܗ ܕܦܳܪܽܘܩܰܢ ܝܰܬܺܝܪ ܪܰܒ ܡܶܢ ܟܽܠܗܽܘܢ ܗܳܢܽܘܢ ܕܒܺܝ̈ܠܺܝܕܰܝ ܢܶܫ̈ܶܐ ܗܳܟܰܢܳܐ^[126]. ܘܰܐܟܙܢܳܐ ܕܡܳܪܰܢ ܠܰܕܡܽܘܬܶܗ ܕܗܰܘ ܒܰܪܢܳܫܳܐ ܕܶܐܬܬܰܛܥܝ ܐܶܬ̣ܳܐ܆ ܗܳܟܰܢܳܐ ܐܳܦ ܠܝܽܘܚܰܢܳܢ܆ ܠܨܰܠܡܶܗ ܕܳܐܟܶܠܩܰܪܨܳܐ ܗܰܘ ܕܰܐܛܥܺܝ ܐܰܝܬܝܶܗ. ܘܰܠܗܳܕܶܐ ܬܶܐܽܘܪܺܝܰܐ ܪܰܫܺܝܥܬܳܐ܆ ܡܰܩܶܦ ܠܳܗ̇ ܡܶܢܝܳܢܳܐ ܣܪܺܝܩܳܐ ܘܪܰܫܺܝܥܳܐ ܒܳܗ̇ ܒܰܕܡܽܘܬܳܐ ܘܢܳܡܽܘܣܳܝ ܢܰܦܫܶܗ ܟܰܕ ܐܳܡܰܪ܆ ܕܰܬܠܳܬ ܙܰܒ̈ܢܺܝܢ ܥܡܰܕ ܐܳܕܳܡ ܡܶܢ ܐܳܟܶܠܩܰܪܨܳܐ܆ ܐܰܝܟܰܢܳܐ ܕܡܶܢ ܝܽܘܚܰܢܳܢ ܡܫܺܝܚܳܐ. ܐܳܦ ܟܺܝܬ ܟܳܬܶܒ ܗܳܠܶܝܢ. ܘܟܰܕ ܠܟܽܠܢܳܫ ܡܰܢ ܚܕܳܐ ܙܒܰܢ ܡܰܥܡܶܕ ܗ̱ܘܳܐ ܝܽܘܚܰܢܳܢ ܐܳܡܰܪ ܗ̱ܘܳܐ܆ ܡܰܥܡܶܕ ܐ̱ܢܳܐ ܠܳܟ܆ ܠܡܽܘܠܳܝܳܐ ܕܰܚܛܺܝܬܳܐ. ܠܣܽܘܥܪܳܢܳܐ ܕܰܬܝܳܒܽܘܬܳܐ. ܠܡܶܫܬܰܘܕܥܳܢܽܘܬܳܐ ܕܰܫܪܳܪܳܐ. ܡܶܛܽܠ ܕܳܐܦ ܟܰܕ ܥܰܠ ܗܰܘ ܣܳܡ ܐܳܟܶܠܰܩܪܨܳܐ ܐܺܝܕܳܐ ܣܳܥܽܘܪܳܝܬܳܐ ܐܶܡܰܪ܆ ܡܰܥܡܶܕ ܐ̱ܢܳܐ ܠܳܟ܆ ܠܫܕܝܳܐ ܕܠܳܐ ܡܶܬܚܰܒܠܳܢܽܘܬܳܐ. ܠܩܽܘܝܳܡܳܐ ܕܰܚܛܺܝܬܳܐ. ܠܕܰܠܩܽܘܒܠܳܝܽܘܬܳܐ ܕܦܽܘܪܩܳܢܳܐ. ܟܰܕ ܕܶܝܢ ܠܡܳܪܰܢ ܬܠܳܬ ܙܰܒ̈ܢܺܝܢ ܡܰܥܡܶܕ ܗ̱ܘܳܐ. ܐܳܡܰܪ ܗ̱ܘܳܐ܆ ܡܰܥܡܶܕ ܐ̱ܢܳܐ ܠܳܟ ܕܫܳܩܶܠ ‌ܐܰܢ̱ܬ ܠܰܚ̈ܛܳܗܰܘܗ̱ܝ ܕܥܳܠܡܳܐ^[127]. ܕܝܳܗܶܒ ܐܰܢ̱ܬ ܠܟܽܠ ‌ܐ̱ܢܳܫ ܠܳܐ ܡܳܝܽܘܬܽܘܬܳܐ. ܕܕܳܒܰܪ ܐܰܢ̱ܬ ܠܟܽܠܢܳܫ ܠܡܰܠܟܽܘܬܳܐ ܕܺܝܠܳܟ ܫܡܰܝܳܢܺܝܬܳܐ. ܗܳܠܶܝܢ ܠܰܘ ܟܽܠܶܗ ܣܥܳܝܳܐ ܢܳܡܽܘܣܳܝ ܢܰܦܫܶܗ ܡܰܠ̈ܝܴܢ܆ ܘܡܰܪܳܚܽܘܬܳܐ ܡܓܰܕܦܳܢܺܝܬܳܐ܆ ܫܰܪܺܝܪܬܳܐ ܐܰܪܰܐ ܐܺܝܬܶܝܗ̇ ܗ̱ܘܳܬ ܗܳܝ ܕܰܐܡܺܝܪܳܐ ܠܰܟ̈ܬܳܒܶܐ ܟܳܗ̈ܢܳܝܶܐ܆ ܕܰܒܠܳܐ ܪ̈ܰܕܝܶܐ ܦܳܓܰܥ ܡܰܘܬܳܐ^[128]܆ ܘܰܒܗܽܘܫܳܥ ܢܒܺܝܳܐ ܬܽܘܒ܆ ܢܶܦܠܽܘܢ ܪ̈ܺܝܫܳܢܶܐ ܕܺܝܠܗܽܘܢ ܒܚܰܪܒܳܐ܆ ܡܶܛܽܠ ܠܳܐ ܪܰܕܝܽܘܬܳܐ ܕܠܶܫܢܳܗܽܘܢ^[129].

ܐܰܝܢܳܐ ܓܶܝܪ ܟܬܳܒܳܐ ܐܶܫܬܰܥܺܝ܆ ܕܥܰܡܰܕ ܒܰܬܠܳܬ ܩܪ̈ܳܝܬܳܐ ܐܳܕܳܡ ܡܶܢ ܤܳܛܳܢܳܐ. ܐܰܝܢܳܐ ܕܶܝܢ ܐܶܘܰܢܓܶܠܺܝܽܘܢ ܐܰܫܠܶܡ܆ ܕܒܰܬܠܳܬ ܓܡܳܥ̈ܳܬܳܐ ܘܰܩܪ̈ܳܝܳܬܳܐ ܡܰܥܡܶܕ ܗ̱ܘܳܐ ܝܽܘܚܰܢܳܢ. ܟܰܕ ܡܶܢ ܐܰܝܟܳܐ ܢܣܰܒܬ ܗܳܠܶܝܢ ܫܳܛܰܪ ܐܰܢ̱ܬ. ܗܳܕܶܐ ܓܶܝܪ ܟܬܺܝܒܳܐ ܒܰܠܚܽܘܕ. ܕܡܰܥܡܶܕ ܗ̱ܘܳܐ ܠܰܬܝܳܒܽܘܬܳܐ^[130]. ܡܰܢܽܘ ܡܬܽܘܡ ܡܶܢ ܡܰܠ̈ܦܳܢܶܐ ܒܚܺܝܪ̈ܶܐ ܠܰܨܒܳܪܳܐ ܗܳܢܳܐ ܠܥ̈ܺܕܳܬܳܐ ܐܰܥܶܠ. ܠܰܥܡܳܕܳܐ ܓܶܝܪ ܗܰܘ ܡܫܰܡܠܝܳܐ܆ ܗܰܘ ܕܣܳܝܽܘܡܽܘܬ ܒܢܰܝ̈ܳܐ ܡܫܰܟܶܢ܆ ܡܫܺܝܚܳܐ ܗܰܘ ܚܰܕ ܡܶܢ ܬܠܺܝܬܳܝܽܘܬܳܐ܆ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ ܢܶܫܬܰܡܠܶܐ ܐܰܫܠܶܡ. ܘܥܰܡ ܗܳܠܶܝܢ ܬܠܳܬ ܡܰܙܥ̈ܩܳܢܘܳܬܳܐ ܕܰܩܢܽܘ̈ܡܶܐ ܫܰܘܝ̈ܳܬ ܒܡܶܢܝܳܢܳܐ ܐܳܦ ܗܶܢܶܝܢ ܓܡܳܥ̈ܳܬܳܐ ܐܰܟܚܕܳܐ ܪ̈ܳܗܛܳܢ. ܗܳܠܶܝܢ ܕܰܒܗܶܝܢ ܐܳܦ ܡܶܠܬܳܐ ܐ̱ܚܪܺܬܳܐ ܐ̱ܪܳܙܳܢܳܝܬܳܐ ܘܕܰܣܗܺܝܕܳܐ ܡܶܢ ܟܬܳܒܳܐ ܐܰ‌ܠܳܗܳܝܳܐ ܡܶܬܬܰܝܬܝܳܐ. ܡܶܛܽܠ ܓܶܝܪ ܕܰܐܝܟ ܦܰܘܠܽܘܤ ܟܰܕ ܠܪ̈ܽܘܡܳܝܶܐ ܟܳܬܶܒ ܐܳܡܰܪ܆ ܡܶܬܩܰܒܪܺܝܢ ܚ̱ܢܰܢ ܥܰܡ ܡܫܺܝܚܳܐ ܒܝܰܕ ܡܰܥܡܽܘܕܺܝܬܳܐ܆ ܟܰܕ ܒܡܰܘܬܶܗ ܗ̱ܘ̣ ܥܳܡܕܺܝܢܰܢ^[131]܆ ܬܠܺܝܬܳܝܰܬ ܝܰܘ̈ܡܶܐ ܕܶܝܢ ܐܺܝܬܶܝܗ̇ ܩܒܽܘܪܬܶܗ ܕܰܡܫܺܝܚܳܐ܆ ܗܳܝ ܕܒܳܬܪܳܗ̇ ܐܺܝܬܶܝܗ̇ ܩܝܳܡܬܳܐ܆ ܒܰܬܠܳܬ ܓܡܳܥ̈ܳܬܳܐ ܕܰܒܡܰܝ̈ܳܐ ܠܗܳܕܶܐ ܡܚܰܘܶܝܢ ܚ̱ܢܰܢ. ܘܟܰܕ ܠܥܰܬܺܝܩܽܘܬܳܐ ܕܰܚ̈ܛܳܗܶܐ ܩܳܒܪܺܝܢ ܚ̱ܢܰܢ ܒܰܩܒܽܘܪܬܳܐ ܡܰܥܒܕܰܬ ܚܰܝ̈ܶܐ܆ ܠܘܳܬ ܒܰܪܢܳܫܳܐ ܚܰܕܬܳܐ ܡܶܫܬܰܚܠܦܺܝܢܰܢ ܥܳܒܪܺܝܢܰܢ܆ ܟܰܕ ܡܶܢ ܬܰܡܳܢ ܢܳܣܒܺܝܢܰܢ ܠܪܰܗܒܽܘܢܳܐ ܕܰܩܝܳܡܬܳܐ.

ܐܶܠܳܐ ܢܶܦܢܶܐ ܢܶܣܰܩ ܠܘܳܬ ܡܶܫܬܽܘܬܳܐ ܗܳܝ ܕܰܒܩܳܛܢܶܐ ܕܰܓܠܺܝܠܳܐ܆ ܘܰܐܝܟ ܕܫܳܘܶܐ ܠܚܰܬܢܳܐ ܗܰܘ ܠܳܐ ܚܳܫܽܘܫܳܐ ܢܶܬܕܰܒܰܪ. ܘܟܰܕ ܠܰܐܚܪ̈ܢܝܘܬ ܡ̈ܶܠܶܐ ܗܳܠܶܝܢ ܡܰܝܳܢ̈ܳܝܳܬܳܐ ܘܰܫܟܺܝܪ̈ܳܬܳܐ ܕܗܳܢܳܐ ܛܒܳܐ ܡܶܢ ܪܽܘܚܩܳܐ ܚܕ̈ܰܝ ܐܳܡܪܺܝܢܰܢ܆ ܒܳܬܰܪ ܚܰܡܪܳܐ ܗܰܘ ܛܒܳܐ ܢܶܪܕܽܘܦ܆ ܗܰܘ ܕܰܡܚܰܕܶܐ ܠܠܶܒܳܐ ܕܒܰܪܢܳܫܳܐ^[132] ܐܰܝܟ ܡܶܠܬܶܗ ܕܰܡܙܰܡܪܳܢܳܐ܆ ܗܰܘ ܕܺܐܝܬ ܠܶܗ ܡܫܰܡܠܝܽܘܬܳܐ ܕܡܰܠܦܳܢܽܘܬܳܐ ܐܶܘܰܢܓܶܠܳܝܬܳܐ. ܘܰܢܩܰܠܣܺܝܘܗ̱ܝ ܠܙܽܘܘܳܓܳܐ ܐܰܝܟ ܕܠܰܡܝܰܩܪܳܐ܆ ܘܠܰܒܬܽܘܠܽܘܬܳܐ ܢܩܰܠܶܤ ܐܰܝܟ ܕܠܰܐܝ̇ܕܳܐ ܕܺܐܝܬܶܝܗ̇ ܡܝܰܬܰܪܬܳܐ ܘܝܰܬܺܝܪ ܡܝܰܩܰܪܬܳܐ. ܘܠܰܬܪ̈ܰܝܗܽܘܢ. ܕܰܡܙܰܡܢܺܝܢ ܡܰܠܟܽܘܬܳܐ ܕܰܫܡܰܝܳܐ ܘܰܠܗܰܘ ܡܰܢ ܠܳܐ ܢܶܟ̣ܠܶܐ. ܕܗܶܪ̈ܛܝܩܘ ܓܶܝܪ ܐܺܝܬܶܝܗ̇ ܗܳܝ ܕܰܢܒܰܛܠܽܘܢ ܘܢܶܟܠܽܘܢ ܙܽܘܘܳܓܳܐ. ܥܰܠ ܗܳܝ ܕܶܝܢ ܢܚܰܦܶܛ܆ ܘܢܶܩܰܦ ܠܰܫܠܺܝܚܳܐ ܕܟܳܬܶܒ ܠܩܽܘܪ̈ܝܢܬܳܝܶܐ܆ ܐܰܝܟܰܢܳܐ ܟܺܝܬ ܕܳܐܦ ܗܰܘ ܡܰܢ ܕܰܡܙܰܘܶܓ ܒܬܽܘܠܬܶܗ ܫܰܦܺܝܪ ܥܳܒܶܕ܆ ܘܳܐܦ ܗܰܘ ܕܠܳܐ ܡܙܰܘܰܓ ܠܳܗ̇ ܝܰܬܺܝܪ ܫܰܦܺܝܪ ܥܳܒܶܕ^[133]. ܐܳܦ ܓܶܝܪ ܐ̱ܚܪܺܬܳܐ ܗܝ ܗܳܝ ܕܢܶܟ̣ܠܶܐ ܘܢܶܥܕܽܘܠ܆ ܘܒܺܝܫܳܐܺܝܬ ܢܺܐܡܰܪ ܠܗܳܝ ܕܣܺܝܡܳܐ ܒܢܳܡܽܘܣܳܐ܆ ܘܰܐ̱ܚܪܺܬܐ ܗܝ ܗܳܝ ܕܢܰܪܬܶܐ ܠܡܶܓܒܳܐ ܚܠܳܦ ܗܳܝ ܕܫܰܦܺܝܪܳܐ܆ ܗܳܝ ܕܝܰܬܺܝܪ ܫܰܦܺܝܪܳܐ܆ ܘܰܕܢܶܩܕܰܡ ܢܝܰܩܰܪ ܡܶܢ ܩܕܳܡ ܗܳܝ ܕܡܰܦܣܳܐ ܠܗܳܝ ܕܰܠܥܶܠ ܡܶܢ ܢܳܡܽܘܣܳܐ. ܘܰܠܟܽܠ ܚܛܺܝܬܳܐ ܕܶܝܢ ܟܽܘܪܗܳܢܳܐ ܕܢܰܦܫܳܐ ܢܶܚܫܒܺܝܗ̇܆ ܘܰܕܫܽܘܪܳܝܳܐ ܐܺܝܬ ܠܳܗ̇ ܡܶܬܬܙܺܝܥܳܢܽܘܬܳܐ ܚܰܫܳܢܳܝܬܳܐ ܕܗܰܘܢܳܐ ܘܟܽܘܪܗܳܢܳܐ ܕܨܶܒܝܳܢܳܐ܆ ܐܳܦܶܢ ܒܝܰܕ ܦܰܓܪܳܐ ܡܶܬܬܰܥܒܰܕ ܫܽܘܡܠܳܝܳܗ̇ ܕܗܰܢܺܝܽܐܘܬܳܐ܆ ܘܠܰܘ ܠܰܐܢܰܢܩܺܐ ܕܰܟܝܳܢܳܐ ܢܶܚܫܒܺܝܗ̇ ܠܗܳܕܶܐ.

ܘܡܶܢ ܗܳܢܽܘܢ ܕܗܳܟܰܢܳܐ ܐܺܝܬ ܠܗܽܘܢ܆ ܐܰܝܟ ܕܡܶܢ ܗܶܪ̈ܛܝܩܘ ܬܶܢܰܕ ܠܰܢ. ܘܟܰܕ ܡܰܦܩܺܝܢ ܘܳܐܡܪܺܝܢ ܐܰܝܟ ܕܰܠܡܰܦܰܩ ܒܪܽܘܚܳܐ܆ ܡ̈ܶܠܶܐ ܡܶܕܶܡ ܡܶܕܶܡ ܕܫܳܠ̈ܡܳܢ ܠܫܽܘܒܚܳܐ. ܬܪܺܝܨܳܐ܆ ܒܰܡܢܳܬܳܐ ܐ̱ܚܪܺܬܳܐ ܘܠܰܘ ܒܗܳܝ ܕܡܶܬܥܰܕܠܺܝܢ ܒܳܗ̇ ܘܡܶܬܟܰܣܣܺܝܢ ܕܰܐܣܟܶܠܘ܆ ܐܰܝܟ ܡܰܛܥ̈ܝܳܢܶܐ ܢܶܬܬܕܺܝܢܽܘܢ. ܘܳܐܦܠܳܐ ܓܶܝܪ ܠܐܘܛܘܟܐ ܘܠܢܶܣܛܽܘܪܺܝܽܘܤ ܬܦܰܨܶܐ ܐܶܢܽܘܢ ܡܶܢ ܗܳܢܶܝܢ ܕܚ̈ܰܛܝܳܢ ܠܗܽܘܢ܆ ܗܳܝ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܡܰܘܕܶܝܢ ܫܰܘܝܰܬ ܒܽܐܘܣܺܝܰܐ. ܡܶܛܽܠ ܗܳܕܶܐ ܓܶܝܪ ܠܳܐ ܐ̱ܢܳܫ ܪܫ̣ܳܐ ܐܶܢܽܘܢ. ܘܳܐܦܠܳܐ ܠܢܘܒܛܘܤ ܐܰܘܬܪܰܬ܆ ܗܳܝ ܕܰܠܬܰܘܕܺܝܬܳܐ ܥܺܕܬܳܢܳܝܬܳܐ ܫܳܠܶܡ ܒܟܽܠܗܶܝܢ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܟܰܕ ܠܳܐ ܡܩܰܒܶܠ ܬܝܳܒܽܘܬܳܐ. ܕܓܽܘܚܟܳܐ ܗܝ ܓܶܝܪ ܗܰܘ ܕܡܶܬܩܰܛܪܰܓ ܕܓ̣ܰܪ܆ ܡܰܦܰܩ ܒܪܽܘܚܳܐ ܢܶܙܩܽܘܪ ܕܠܳܐ ܩܛܰܠ. ܐܳܦ ܓܶܝܪ ܠܳܐ ܐܺܝܬ ܐܰܝܟ ܕܰܒܣܽܘܓܳܐܐ ܠܡܶܫܟܳܚܽܘ ܗܶܪܛܝܩܐ܆ ܕܠܳܐ ܐܳܡܰܪ ܡܶܢ ܟܽܠ ܦܪܽܘܤ ܡܶܕܶܡ ܡܶܢ ܗܳܠܶܝܢ ܕܰܚ̈ܠܺܝܡܳܢ܆ ܡܶܢ ܗܳܢܶܝܢ ܕܰܡܫܰܒܚܳܐ ܥܺܕܬܳܐ܆ ܘܠܰܘ ܗܳܐ ܡܶܢ ܟܰܕܽܘ ܒܗܳܢܽܘܢ ܕܰܬܪ̈ܺܝܨܳܬܳܐ ܡܶܬܪܰܥܶܝܢ ܡܶܛܽܠ ܗܳܕܶܐ ܢܶܡܢܶܐ ܐܶܢܽܘܢ. ܡܶܛܽܠ ܕܳܐܦ ܐܪܺܝܽܘܤ ܡܰܘܕܶܐ ܠܶܗ ܠܰܐܒܳܐ ܐܰܝܟܰܢܳܐ ܕܳܐܦ ܚܢܰܢ ܐܰ‌ܠܳܗܳܐ ܐܰܚܺܝܕ ܟܽܠ܆ ܘܰܒܪܰܡ ܠܳܐ ܣܳܦܩܳܐ ܗܳܕܶܐ܆ ܕܰܬܚܰܘܽܘܗ̱ܝ ܠܗܳܢܳܐ ܡܚܰܪܪܳܐ ܡܶܢ ܓܽܘܕܳܦܳܐ ܕܥܰܠ ܒܪܳܐ. ܟܽܠ ܓܶܝܪ ܐܰܝܢܳܐ ܕܰܡܫܰܚܠܶܦ ܒܰܡܢܳܬܳܐ ܡܶܕܶܡ ܠܕܽܘܓ̈ܡܰܛܰܐ ܕܫܰܦܺܝܪܽܘܬ ܕܶܚܠܬܳܐ܆ ܘܡܰܪܚܶܩ ܡܶܢ ܫܰܦܺܝܪܽܘܬ ܢܳܡܽܘܣ̈ܶܐ ܘܬܶܫܒܽܘܚܬܳܐ ܥܺܕܬܳܢܳܝܬܳܐ܆ ܘܙܰܪ̈ܥܶܐ ܕܗܶܪ̈ܣܝܤ ܗܳܢܶܝܢ ܕܩܰܕܶܡ ܐܶܬܥܕܰܠ ܡܰܥܶܠ܆ ܘܰܐܝܟܰܢܳܐ ܕܦܰܘܠܽܘܤ ܐܳܡܰܪ܆ ܡܣܰܒܰܪ ܠܒܰܪ ܡܶܢ ܗܰܘ ܡܳܐ ܕܩܰܒܶܠܢܰܢ^[134]܆ ܕܰܡܢܳܬܐ ܕܗܶܪ̈ܛܝܩܘ ܐܺܝܬܰܘܗ̱ܝ܆ ܗܳܢܽܘܢ ܕܡܶܛܽܠܳܬܗܽܘܢ ܗܽܘ ܟܰܕ ܗܽܘ ܫܠܺܝܚܳܐ ܡܰܪܬܶܐ ܘܰܡܦܰܩܶܕ ܠܰܡܗܰܝܡ̈ܢܶܐ ܟܰܕ ܐܳܡܰܪ܆ ܡܶܛܽܠܗܳܕܶܐ ܦܽܘܩܘ ܡܶܢ ܒܰܝܢܳܬܗܽܘܢ ܘܶܐܬܦܰܪܫܘ ܡܶܢܗܽܘܢ ܐܳܡܰܪ ܡܳܪܝܳܐ܆ ܘܰܒܛܰܡ̈ܶܐܐ ܠܳܐ ܬܶܓܫܦܽܘܢ܆ ܘܶܐܢܳܐ ܐܶ݀ܩܰܒܠܟܽܘܢ܆ ܘܶܐ݀ܗܘܶܐ ܠܟܽܘܢ ܠܰܐܒܳܐ܆ ܘܰܐܢ̱ܬܽܘܢ ܬܶܗܘܽܘܢ ܠܺܝ ܠܰܒ̈ܢܰܝܳܐ ܘܠܰܒ̈ܢܳܬܳܐ܆ ܐܳܡܰܪ ܡܳܪܝܳܐ ܐܰܚܺܝܕ ܟܽܠ^[135]. ܠܗܰܘ ܕܳܐܦ ܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܡ ܡܺܐܡܪܳܐ ܕܡܳܐܐ ܘܰܬܫܰܥܣܰܪ.

ܝܘܚܢܢ. 2: 1 ـ 11 [1]

ܐܪܡܝܐ. 6: 16 [2]

ܥܒܪ̈ܝܐ. 1: 1 [3]

ܣܶܦܪܐ ܕܒܪܝܬܐ. 1: 28 [4]

ܡܪܩܘܣ. 12: 25 [5]

ܐ. ܩܘܪ̈ܝܢܬܝܐ. 7: 25 ـ 28[6]

 ܐ. ܩܘܪ̈ܝܢܬܝܐ. 7: 32 ـ 33 [7]

ܐ. ܩܘܪ̈ܝܢܬܝܐ. 7: 14[8]

ܥܶܒܪ̈ܝܐ. 13: 4[9]

ܝܘܚܢܢ. 2: 3[10]

ܝܘܚܢܢ. 2: 4[11]

 ܫܽܘܠܗܳܒܳܐ. ܓܽܘܙܳܠܳܐ[12]

ܝܘܚܢܢ. 2: 5[13]

[14]ܡܶܢ ܡܠܰܚܡܽܘܬܳܐ ܐܳܡܰܪ ܕܡܶܬܠܰܚܰܡ ܗ̱ܘܳܐ܆ ܘܠܰܘ ܡܶܢ ܠܽܘܚܳܡܳܐ܆ ܗܳܢܰܘ ܕܶܝܢ ܓܙܳܡܳܐ

ܠܘܩܐ. 2: 52[15]

ܢܳܦ̈ܩܳܢ ܢܳܚ̈ܬܳܢ[16]

 ܝܘܚܢܢ. 7: 30[17]

ܝܘܚܢܢ. 8: 20[18]

ܝܘܚܢܢ. 12:23[19]

ܝܘܚܢܢ. 10: 31 [20]

ܝܘܚܢܢ. 10: 18[21]

[22]ܟܦܽܘܪܝܳܐ ܩܳܪܶܝܢ ܝܰܘ̈ܢܳܝܶܐ܆ ܠܰܘ ܒܰܠܚܽܘܕ ܠܗܳܝ ܕܢܺܐܡܰܪ ܐ̱ܢܳܫ ܠܐ: ܠܽܘܩܒܰܠ ܗܰܘ ܕܳܐܡܰܪ ܐܺܝܢ܆ ܐܶܠܐ ܐܳܦ ܠܗܳܝ ܕܰܢܕܝܫ ܐ̱ܢܳܫ ܘܠܐ ܢܶܥܒܶܕ ܗܳܝ ܕܶܐܬܦܰܩܕܰܬ.

ܡܦܩܢܐ. 20: 12  ܐܦ ܬܢܝܢ ܢܡܘܣܐ. 5: 16 [23]

ܐܫܥܝܐ. 8: 3 [24]

 ܝܘܚܢܢ. 2: 5[25]

ܥܶܒܪ̈ܳܝܶܐ. 1: 2[26]

[27]ܡܰܛܪܝܛܝܣ ܟܰܝܠܳܐ ܐܺܝܬܰܘܗ̱ܝ ܐܰܝܟܰܢܳܐ ܕܳܐܡܰܪ ܐܦܝܦܢܝܘܣ܆ ܕܳܐܚܶܕ ܩܶܣ̈ܛܶܐ ܥܒ̄. ܩܶܣܛܳܐ ܕܶܝܢ ܬܰܪ̈ܬܶܝܢ ܠܺܝܛܪ̈ܶܐ ܘܦܶܠܓܳܗ̇. ܐܰܝܟܰܢܳܐ ܕܢܶܫܬܟܰܚ ܡܛܪܝܛܝܣ ܕܠܺܝܛܪ̈ܶܐ ܩܦ̄. ܗܳܢܰܘ ܕܶܝܢ ܕܟܰܝ̈ܠܳܬܳܐ ܬܠܳܬ ܐܰܝܟ ܟܰܝܠܳܐ ܐܽܘܪܗܳܝܳܐ

ܝܘܚܢܢ. 2: 6 ـ 7 [28]

ܡܫܰܡ̈ܗܳܢ [29]

 ܝܘܚܢܢ. 2: 7 [30]

ܝܘܚܢܢ. 2: 8[31]

ܝܘܚܢܢ. 2: 10 [32]

 ܝܘܚܢܢ. 3: 17[33]

ܢܩܺܝܡ ܩܕܳܡ ܐܰ‌ܠܳܗܳܐ[34]

ܒ. ܩܘܪ̈ܝܢܬܝܐ. 11: 2[35]

ܝܘܚܢܢ. 3: 29[36]

 ܡܰܬܰܝ. 9: 15 [37]

ܐܫܥܝܐ. 1: 22 [38]

 ܝܘܚܢܢ. 2: 3[39]

ܝܘܚܢܢ. 2: 4[40]

 ܡܢܝܢܐ. 12: 7  ܐܦ ܥܒܪ̈ܝܐ. 3: 5 [41]

 ܝܘܚܢܢ. 8: 56 [42]

ܕܽܘܟܬܳܐ ܕܡܶܬܟܰܢܫܺܝܢ ܒܳܗ̇ ܡܶܣ̈ܟܺܢܶܐ ܘܫܳܐܠ̈ܰܝ ܙܶܕܩܬܐ.[43]

ܝܘܚܢܢ. 2: 3 [44]

ܐܫܥܝܐ. 5: 22  ܐܦ 29: 9 [45]

ܐܫܥܝܐ. 5: 11 [46]

ܐܫܥܝܐ. 28: 1 [47]

ܗܳܢܰܘ ܕܶܝܢ ܡܶܢ ܥܒܐ[48]

[49]ܗܳܠܶܝܢ ܡ̈ܶܠܶܐ ܘܰܫ̈ܡܳܗܶܐ ܕܶܐܡܰܪ ܡܰܠܦܳܢܳܐ ܥܰܠ ܟܝܳܢܶܗ ܘܥܰܠ ‌ܐܶܣܟܺܡܶܗ ܕܐ̱ܪܳܙܳܐ܆ ܠܐ ܡܰܨܝܳܐ ܕܢܶܗܘ̈ܝܳܢ ܟܽܠܗܶܝܢ ܥܰܠ ‌ܐ̱ܪ̈ܳܙܶܐ ܗܳܢܽܘܢ ܥܳܒ̈ܕܰܝ ܙܦܬܐ. ܒܗܳܝ ܕܗܳܢܽܘܢ ܠܐ ܥܰܒܽܘ̈ܛܶܐ ܐܺܝܬܰܝܗܽܘܢ ܒܣܰܘ̈ܟܶܐ. ܘܳܐܦܠܐ ܓܠܻ̈ܝܠܶܐ ܘܰܨܡܺܝ̈ܕܰܝ ܣܰܘ̈ܟܶܐ: ܐܶܠܐ ܕܰܡܒܰܕܪ̈ܳܢ ܣܰܘ̈ܟܰܝܗܽܘܢ܆ ܘܠܐ ܕܰܒܺܝ̈ܩܳܢ ܠܰܚ̈ܕܳܕܶܐ ܘܠܐ ܨܡܺܝ̈ܕܳܢ܆ ܘܳܐܦܠܐ ܥܰܬܺܝܪ̈ܶܐ ܘܰܬܪ̈ܺܝܨܶܐ ܡܶܢ ܟܽܠ ܦܪܽܘܣ ܡܶܫܬܰܟܚܺܝܢ܆ ܘܰܕܡܳܬܚܺܝܢ ܠܘܳܬ ܫܡܰܝܳܐ. ܐܶܠܐ ܗܳܠܶܝܢ ܐܺܝܬܰܝܗܶܝܢ܆ ܥܰܠ ܥܪ̈ܩܶܐ ܗܳܢܽܘܢ ܕܰܒܠܶܒܢܳܢ܆ ܕܥܳܒܕܺܝܢ ܥܶܛܪ̈ܳܢܶܐ ܕܡܶܬܩܪܶܝܢ ܩܐܕܪܘ܆ ܕܰܨܡܺܝ̈ܕܳܢ ܣܰܘ̈ܟܰܝܗܽܘܢ ܘܰܪ̈ܨܺܝܦܳܢ ܠܘܳܬ ܚ̈ܕܳܕܶܐ܆ ܒܕܳܡܝܽܘܬܳܐ ܕܗܳܢܶܝܢ ܕܶܐܤܛܪ̈ܽܘܒܺܝܠܶܐ. ܘܳܐܦ ܓܶܝܪ ܘܳܐܦ ܒܳܗ̇ ܒܕܺܝܰܬܺܝܩܺܐ ܕܝܰܘ̈ܢܳܝܶܐ: ܘܳܐܦ ܒܶܗ ܒܡܺܐܡܪܳܐ ܕܺܝܠܶܗ ܕܡܰܠܦܳܢܳܐ܆ ܩܐܕܪܘܣ ܐܰܘ ܟܺܝܬ ܥܪܩܐ ܟܬܺܝܒ܆ ܘܠܐ ܗܘܳܐ ܐܰܪܙܐ. ܐܶܢܳܐ ܕܶܝܢ ܣܳܡܶܬ ܐܰܪܙܳܐ܆ ܡܶܛܽܠ ܥܝܳܕܳܐ ܗܰܘ ܕܒܰܟ̈ܬܳܒܶܐ ܕܰܠܘܳܬ ܣܽܘܪ̈ܝ̣ܳܝ̣ܶܐ.

ܡܙܡܘܪ̈ܐ. 37: 35

ܡܙܡܘܪ̈ܐ. 92: 13 [50]

ܡ̈ܬܠܐ. 4: 17 [51]

ܡ̈ܬܠܐ. 9: 5 [52]

ܐܓܙܪܝܘܗܝ. ܐܙܒܢܝܘܗܝ[53]

ܛܝܛܘܣ. 1: 9 [54]

ܡܙܡܘܪ̈ܐ. 14: 1  ܐܦ 53: 1 [55]

 ܐ. ܩܘܪ̈ܝܢܬܝܐ. 8: 4 ـ 5[56]

ܡܫܰܒܰܚ [57]

ܐܦܣ̈ܝܐ. 2: 3 [58]

 ܐܶܦܣ̈ܝܐ. 2: 3 [59]

ܡܙܡܘܪ̈ܐ. 89: 23 [60]

 ܝܘܚܢܢ. 17: 12 [61]

 ܐܦܣ̈ܝܐ. 5: 6[62]

ܠܡܶܬܪܰܥܳܝܽܘ[63]

ܪ̈ܽܗ̱ܘܡܳܝܶܐ. 1: 26[64]

ܪ̈ܗܘܡܝܐ. 1: 28[65]

ܡܰܝܬܶܐ[66]

ܣܽܘܩܺܝܣܘܣ[67]

ܪ̈ܗܘܡܝܐ. 7: 23[68]

 ܡܬܝ. 5: 28[69]

ܡܰܠܐܟܝ. 2: 15[70]

ܡܰܠܐܟܝ. 2: 15 [71]

ܐܶܫܰܥܝܳܐ. 53: 10[72]

ܬܺܢܝܶܢ ܢܶܡܽܘܣܐ. 28: 4[73]

[74]ܪܘܡܢܘܣ ܕܝܘܢܳܐ ܩܝܠܝܩܝܐ ܐܶܡܰܪ ܕܡܶܬܦܰܫܰܩ ܒܥܶܠܙܒܽܘܒ܆ ܒܳܠܰܥ ܕܶܒܳܒ̈ܶܐ. ܟܰܕ ܠܗܰܘ ܒܳܠܰܥ ܐܣܒܪ܆ ܘܡܰܠܦܳܢܳܐ ܡܰܢ ܠܽܘܩܒܰܠ ܚܰܣܺܝܪܽܘܬ ܗܰܘܢܶܗ ܕܰܒܗܳܕܶܐ ܠܐ ܨܒܳܐ ܕܢܺܐܡܰܪ ܡܶܕܶܡ܆ ܟܰܕ ܡܫܳܟܳܐ ܚܰܫܒܳܗ̇ ܠܗܳܝ ܕܠܽܘܩܒܰܠ ܗܰܘ ܕܦܳܐܶܕ ܒܦܽܘܫܳܩܳܐ ܕܰܫܡܳܗ̈ܶܐ ܢܶܬܟܰܬܰܫ܆ ܘܟܰܕ ܠܗܶܪܣܝܣ ܕܺܝܠܶܗ ܒܰܠܚܽܘܕ ܝܰܨܺܝܦ ܗ̱ܘܳܐ ܕܢܰܟܶܣ. ܐܶܢܳܐ ܕܶܝܢ ܕܰܣܦܺܝܩ ܐ̱ܢܳܐ ܕܠܽܘܩܒܰܠ ܡܫ̈ܟܐ ܐܶ݀ܬܟܰܬܰܫ ܐܳܡܰܪ ܐ̱ܢܳܐ܆ ܕܓܰܓܰܪܬܶܗ ܡܰܢ ܗܳܝ ܣܪܺܝܬܳܐ ܕܪܽܘܡܢܘܣ ܐܺܝܬܶܝܗ̇ ܗ̱ܘܳܬ ܒܳܠܥܰܬ ܕܶܒܳܒ̈ܶܐ: ܡܶܢ ܗܳܢܽܘܢ ܣܰܓܺܝ̈ܐܐ ܕܡܰܘܠܶܕ ܐܰܬܪܳܐ ܗܰܘ ܕܩܺܝܠܺܝܩܺܝܰܐ: ܐܰܘ ܡܶܢ ܩܽܘ̈ܠܶܐ ܗܳܠܶܝܢ ܕܡܝܘܡܢܝ ܕܳܐܟܶܠ ܗ̱ܘܳܐ ܒܰܠܡܺܐܢܳܐ ܗܰܘ ܕܪܘܣܘܣ: ܕܗܰܘ ܕܳܐܦ ܐܺܝܬܰܘܗ̱ܝ ܗ̱ܘܳܐ ܐܶܦܝܣܩܘܦܐ: ܐܰܝܟܰܢܳܐ ܕܟܰܕ ܡܓܰܚܶܟ ܐ̱ܢܳܐ ܒܶܗ ܐܺ݀ܡܰܪ܆ ܘܠܰܘ ܫܡܳܐ ܕܰܒܥܶܠܙܒܽܘܒ ܡܶܬܦܰܫܰܩ ܗܳܟܰܢܳܐ. ܐܶܠܐ ܡܶܬܦܰܫܰܩ ܫܡܳܐ ܕܰܒܥܶܠܙܒܽܘܒ܆ ܐܰ‌ܠܳܗܳܐ ܕܒܒܐ. ܒܥܶܠ ܓܶܝܪ ܐܰܘ ܟܺܝܬ ܒܰܥܠܳܐ܆ ܐܰ‌ܠܳܗܳܐ ܒܠܶܫܳܢܳܐ ܟܢܰܥܢܳܝܳܐ ܐܺܝܬܰܘܗ̱ܝ. ܙܒܽܘܒ ܕܶܝܢ ܟܰܕ ܙ ܚܠܳܦ ܕ ܐܳܡܪܺܝܢ܆ ܕܒܒܐ ܐܺܝܬܰܘܗ̱ܝ. ܗܳܟܰܢܳܐ ܕܶܝܢ ܓܠܺܝܦ ܗ̱ܘܳܐ ܘܺܐܝܬܰܘܗ̱ܝ ܗ̱ܘܳܐ܆ ܐܳܦ ܐܰ‌ܠܳܗܳܐ ܗܰܘ ܕܥܰܩܪ̈ܽܘܢܳܝܶܐ܆ ܗܰܘ ܕܰܠܘܳܬܶܗ ܫܰܕܰܪ ܐܘܚܘܙܝܐ ܡܰܠܟܳܐ ܕܺܐܝܣܪܐܝܠ ܡܶܛܠ ܟܽܘܪܗܳܢܶܗ.

ܡܪܩܘܣ. 3: 30[75]

[76] ܡܬܝ. 12: 24ܐܦ ܡܪܩܘܣ. 3: 22  ܐܦ ܠܘܩܐ. 11: 15

ܣܶܦܪܐ ܕܒܪܝܬܐ. 3: 6 [77]

ܣܶܦܪܐ ܕܒܪܝܬܐ. 3: 5 [78]

ܣܶܦܪܐ ܕܒܪܝܬܐ. 3: 24  ܐܦ 4: 1 [79]

ܐ. ܩܘܪ̈ܝܢܬܝܐ. 7: 14[80]

ܡܬܝ. 18: 3[81]

ܐ. ܩܘܪ̈ܝܢܬܝܐ. 14: 20[82]

ܐ. ܩܘܪ̈ܝܢܬܝܐ. 5: 8[83]

[84]ܡܬܝ. 8: 3  ܐܦ ܡܪܩܘܣ. 1: 40  ܐܦ ܠܘܩܐ. 5: 3

ܠܘܩܐ. 5: 16[85]

ܠܘܩܐ. 16: 7[86]

ܠܘܩܐ. 16: 6[87]

ܫܘܝܐܝܬ[88]

 ܐܶܫܰܥܝܳܐ. 55: 1[89]

 ܐܶܪܰܡܝܳܐ. 2:  3[90]

ܝܘܚܢܢ. 7: 37 ـ 38[91]

ܣܶܦܪܐ ܕܒܪܝܬܐ. 49: 3 ـ 4 [92]

 ܡܙܡܘܪܐ. 143: 7[93]

ܡܙܡܘܪܐ. 123: 2 ـ 4[94]

 ܐܶܫܰܥܝܐ. 1: 22[95]

ܐܪܡܝܐ. 2: 18 [96]

ܐܪܡܝܐ. 15: 18 [97]

ܠܘܩܐ. 2: 46 ـ 47 [98]

ܘܰܠܕܶܚ̈ܠܳܬܳܐ[99]

ܐܫܥܝܐ. 19: 1 [100]

ܝܘܚܢܢ. 2: 3[101]

ܝܘܚܢܢ. 2: 1 [102]

ܣܶܦܪܐ ܕܒܪܝܬܐ. 3: 16 [103]

 ܒ. ܩܘܪ̈ܝܢܬܝܐ. 5: 17[104]

[105]ܠܰܟܝܳܢܳܐ ܐ̱ܢܳܫܳܝܳܐ ܐܳܡܰܪ ܡܰܠܦܳܢܳܐ ܕܒܰܝܬܺܝ ܠܶܗ ܦܳܪܽܘܩܰܢ ܚܰܬܢܳܐ܆ ܒܰܕܡܽܘܬ ܟܰܠܬܳܐ. ܘܰܒܠܶܫܳܢܳܐ ܝܰܘܢܳܝܳܐ ܝܰܬܺܝܪܳܐܝܬ ܐܺܝܬ ܠܳܗ̇ ܠܳܚܡܽܘܬܳܐ ܠܡܶܠܬܳܐ. ܡܶܛܽܠ ܕܢܶܩܒܬܳܢܳܐܝܬ ܡܶܬܶܐܡܰܪ ܟܝܳܢܳܐ

ܗܘܫܥ. 6: 2 ـ 3 [106]

ܣܶܦܪܐ ܕܒܪܝܬܐ. 3: 18 [107]

 ܐ. ܩܘܪ̈ܝܢܬܝܐ. 15: 20[108]

ܝܘܚܢܢ. 2: 1 [109]

ܢܣܺܝܡ ܟܽܠܶܗ[110]

ܐܫܥܝܐ. 9: 1 [111]

 ܥܶܒܪ̈ܝܐ. 7: 19[112]

ܝܘܚܢܢ. 2: 3 [113]

ܒ. ܩܘܪ̈ܝܢܬܝܐ. 3: 6 [114]

ܒ. ܛܝܡܬܐܘܣ. 2: 6 [115]

ܡܶܢ ܠܶܐܘܬܳܐ[116]

 ܡܒܰܝܬܝܳܢܽܘܬܳܐ[117]

ܝܘܚܢܢ. 2: 5 [118]

ܡܙܡܘܪܐ. 103: 1 ـ4[119]

 ܐ. ܛܝܡܬܐܘܣ. 4: 1 ـ 3[120]

ܝܽܘܬܪܳܢܳܐ[121]

[122] ܐ̱ܚܪܳܢܝܘܬ ܡܶܠܬܳܐ ܐܰܘ ܐ̱ܚܪ̈ܳܢܝܘܬ ܡ̈ܶܠܶܐ ܡܥܳܕܺܝܢ ܝܰܘ̈ܢܳܝܶܐ ܠܡܶܩܪܳܐ܆ ܐܰܝܟ ܐܶܡܰܬܝ ܕܢܺܐܡܰܪ ܐ̱ܢܳܫ܆ ܕܙܦܠܢ ܙܦܠܢ ܡܫܘܕܥ܆ ܘܙܦܠܢ ܗܰܘ ܕܰܟܬܰܒ܆ ܙܦܠܢ ܪܳܫܶܡ ܘܰܡܚܰܘܶܐ܆ ܐܰܘ ܒܰܙܢܳܐ ܕܦ̈ܶܠܳܐܬܳܐ܆ ܘܒܰܙܢܳܐ ܕܡܶܬܥܰܠܝܳܢܽܘܬܳܐ ܘܰܕܬܶܐܘܳܪܺܝܰܐ.

ܐܶܣܬܝܪ. 7: 9[123]

ܡܬܝ. 17: 27 [124]

[125]ܓܪܐܡܐ ܩܳܪܶܐ ܠܡܢܝܐ ܕܕܰܗܒܳܐ ܕܥܳܒܶܕ ܫܬܳܐ ܩܰܪ̈ܛܶܐ܆ ܗܳܢܰܘ ܕܶܝܢ ܚܕܳܐ ܡܶܢ ܐܰܪܒܰܥ ܕܕܺܝܢܳܪܳܐ.

 ܡܬܝ. 11: 11 [126]

ܝܘܚܢܢ. 1: 29[127]

ܡ̈ܬܠܐ. 24: 8 [128]

ܗܘܫܥ. 7: 16[129]

ܡܪܩܘܣ. 1: 4  ܐܦ ܠܘܩܐ. 3: 3 [130]

 ܪ̈ܗܘܡܝܐ. 6: 3 ـ 4 [131]

ܡܙܡܘܪ̈ܐ. 104: 15 [132]

 ܐ. ܩܘܪ̈ܝܢܬܝܐ. 7: 38[133]

ܓܠܛ̈ܝܐ. 1: 9 [134]

 ܒ. ܩܘܪ̈ܝܢܬܝܐ. 6: 17 ـ 18 [135]