ܡܺܐܡܪܳܐ ܕܡܳܐܐ ܘܰܬܡܢܳܬܥܣܪ

ܥܰܠ ‌ܐܰܢ̱ܬܬܳܐ ܗܳܝ ܕܰܟܬܺܝܒܳܐ ܠܘܳܬ ܠܽܘܩܳܐ܆ ܙܳܢܺܝܬܳܐ ܐܰܘܟܺܝܬ ܚܰܛܳܝܬܳܐ.

118: ܐܰܟܙܢܳܐ ܕܗܳܢܽܘܢ ܕܨܽܘܪܬܳܐ ܡܶܕܶܡ ܛܰܪܩܬܳܐ ܘܰܡܝܰܬܰܪܬܳܐ ܚܙܰܘ ܥܰܠ ܕܰܦܳܐ܆ ܘܨܰܠܡܳܐ ܕܣܰܓܺܝ ܝܰܬܺܝܪ ܦܐܶܐ ܕܓܰܒܪܳܐ ܐܰܘ ܕܰܐܢ̱ܬܬܐ ܐܶܢ ܬܶܓܕܰܫ܆ ܕܒܽܐܘܡܳܢܽܘܬܳܐ ܘܒܰܡܗܰܒܒܽܘܬܳܐ ܕܓܰܘ̈ܢܶܐ ܡܗܰܕܰܪ܆ ܘܰܠܪܺܝܫܳܝܽܘܬܳܐ ܕܫܽܘܦܪܳܐ ܥܡܺܝܠ ܒܝܰܨܺܝܦܽܘܬܳܐ܆ ܣܰܓܺܝ ܝܰܨܺܝܦܳܐܺܝܬ ܩܳܒܥܺܝܢ ܠܥܰܝ̈ܢܰܝܗܽܘܢ ܘܡܰܩܬܺܝܢ ܒܶܗ܆ ܘܟܰܕ ܦܥܺܝܪ ܚܶܟܗܽܘܢ ܠܘܳܬ ܗܰܘ ܡܳܐ ܕܡܶܬܚܙܶܐ ܡܶܬܒܰܣܡܺܝܢ ܒܰܙܢܳܐ ܡܶܕܶܡ܆ ܘܠܳܐ ܣܰܒܥܳܐܺܝܬ ܒܳܣܡܺܝܢ ܒܳܗ̇ ܒܰܚܙܳܬܳܐ܆ ܘܒܰܚܙܳܬܳܐ ܗܳܝ ܕܣܰܓܺܝ ܐܺܝܬܶܝܗ̇ ܪܚܺܝܡܬܳܐ ܬܠܶܝܢ܆ ܘܟܰܕ ܡܗܰܠ̈ܟܳܢ ܪ̈ܶܓܠܰܝܗܽܘܢ ܙܰܒ̈ܢܺܝܢ ܣܰܓܺܝ̈ܳܐܢ ܘܳܐܙܺܠ̱ܝܢ܆ ܥܕܰܟܺܝܠ ܒܬܰܪܥܺܝܬܗܽܘܢ ܚܳܝܪܺܝܢ ܒܶܗ܆ ܒܗܰܘ ܡܳܐ ܕܥܰܝ̈ܢܰܝܗܽܘܢ ܥܒ̣ܰܪ̈ܳܝܗ̱ܝ ^[1] ܟܰܕ ܒܰܩܛܺܝܪܳܐ ܘܰܠܡܰܚܣܶܢ ܐܶܬܢܬܶܦ̈ܶܝܢ ܡܶܢܶܗ܆ ܗܳܟܰܢܳܐ ܟܰܕ ܫܶܡܥܶܬ ܐ̱ܢܳܐ ܠܰܟܬܳܒܳܐ ܕܶܐܘܰܢܓ̈ܶܠܺܝܰܐ ܢܦܺܝ̈ܚܰܝ ܡܶܢ ܐܰ‌ܠܳܗܳܐ܆ ܕܠܰܐܢ̱ܬܬܳܐ ܙܳܢܺܝܬܳܐ ܨܳܪ ܘܰܪܫܰܡ ܠܰܢ ܒܡܶܠܬܳܐ ܘܠܰܩܕܳܡ ܥܰܝ̈ܢܶܐ ܐܰܝܬܺܝ܆ ܝܰܬܺܝܪ ܓܰܠܝܳܐܺܝܬ ܘܢܰܗܺܝܪܳܐܺܝܬ ܛܳܒ ܡܶܢ ܟܽܠ ܕܰܦܳܐ ܘܨܰܠܡܳܐ ܐܽܘܡܳܢܳܝܳܐ܆ ܙܳܢܺܝܬܳܐ ܕܶܝܢ ܗܳܝ ܕܒܰܬܝܳܒܽܘܬܳܐ ܡܶܬܬܰܘܝܳܐ ܡܶܢ ܫܶܠܝ ܥܰܠ ܒܺܝܫܽܘܬܳܐ܆ ܘܰܒܡܶܫܬܰܘܕܥܳܢܽܘܬܳܐ ܕܗܳܠܶܝܢ ܕܡܶܬܕܰܒܪ̈ܳܢ^[2] ܠܳܗ̇ ܐܰܘ ܝܰܬܺܝܪ ܩܰܠܺܝܠܳܐܺܝܬ ܡܶܬܚܰܠܦܳܐ ܡܛܰܫܝܳܐܺܝܬ܆ ܘܠܰܫܟܺܝܪܽܘܬܳܐ ܡܰܢ ܫܳܠܚܳܐ܆ ܐܰܕܪܺܝܢܰܛܳܐ ܕܶܝܢ ܕܰܡܝܰܬܪܽܘܬܳܐ ܓܰܠܝܳܐܺܝܬ ܡܶܬܚܰܙܝܳܐ ܘܰܟܬܳܒܳܐ ܕܰܩܕܳܡ ܟܽܠܢܳܫ܆ ܟܰܕ ܠܶܐܕܢ̈ܶܐ ܕܺܝܠܝ ܒܰܕܡܽܘܬ ܥܰܝ̈ܢܶܐ ܩܶܒܥܶܬ ܒܶܗ ܒܬܽܘܢܳܝܳܐ܆ ܘܶܐܬܚܰܛܦܶܬ ܒܗܰܘܢܝ ܠܘܳܬ ܨܰܠܡܳܐ ܗܳܢܳܐ ܚܰܝܳܐ ܘܰܡܢܰܦܫܳܐ ܘܰܕܣܰܓܺܝ ܐܺܝܬܰܘܗ̱ܝ ܡܰܘܬܪܳܢܳܐ܆ ܘܰܕܠܰܘ ܡܶܢ ܗܳܠܶܝܢ ܕܡܶܢ ܠܒܰܪ ܡܶܬܚ̈ܰܙܝܳܢ ܥܠܰܘܗ̱ܝ ܒܰܠܚܽܘܕ ܡܶܬܺܝܕܰܥ܆ ܐܶܠܳܐ ܡܰܠܽܘܢ ܡܶܢ ܣܽܘ̈ܟܳܠܶܐ ܗܳܢܽܘܢ ܕܰܒܥܽܘܡܩܳܐ ܡܶܬܚܙܶܐ܆ ܟܰܕ ܠܗܰܢܺܝܽܐܘܬܳܐ ܗܳܕܶܐ ܐܶܢܳܐ ܒܺܝ ܠܳܐ ܡܶܫܟܰܚ ܐ̱ܢܳܐ ܕܶܐ݀‌ܠܒܽܘܟ܆ ܢܳܦܶܩ ܐ̱ܢܳܐ ܘܳܐܬܶܐ ܐ̱ܢܳܐ ܠܰܡܨܰܥܬܳܐ܆ ܕܳܐܦ ܩܕܳܡܰܝܟܽܘܢ ܕܺܝܠܟܽܘܢ ܣܰܓܺܝ ܒܪܶܚܡܰܬ ܝܽܘܠܦܳܢܳܐ ܘܝܰܬܺܝܪ ܚܰܬܺܝܬܳܐܺܝܬ ܐܰܝܟܰܢ ܕܗܽܘ ܡܶܢ ܕܪܺܝܫ ܐܶ݀ܗܦܽܘܟ ܐܶ݀ܡܪܝܘܗ̱ܝ. ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ ܗܳܢܽܘܢ ܕܰܒܪܶܓܬܳܐ ܠܘܳܬ ܡܶܕܡ ܒܢܰܦܫܗܽܘܢ ܒܰܠܺܝܥܺܝܢ. ܪܳܚܡܺܝܢ ܕܰܠܗܰܘ ܡܳܐ ܕܰܪܚܺܝܡ ܠܗܽܘܢ ܙܰܒ̈ܢܺܝܢ ܣܰܓܺܝ̈ܳܐܢ ܡܶܢ ܕܪܺܝܫ ܢܟܰܪܟܽܘܢ ܘܰܒܝܰܕ ܦܽܘܡܳܐ ܢܰܝܬܽܘܢܳܝܗ̱ܝ ܝܰܬܺܝܪ ܣܒܺܝܣܳܐܺܝܬ܆ ܘܕܰܢܢܰܣܽܘܢ ܕܝܰܬܺܝܪ ܪܚܺܝܡܳܐ ܢܶܥܒܕܽܘܢܳܝܗ̱ܝ ܒܬܽܘܢܳܝܳܐ܆ ܐܰܝܟܰܢܳܐ ܕܳܐܦ ܠܗܳܢܽܘܢ ܕܫܳܡܥܺܝܢ ܠܗܽܘܢ ܫܰܘ̈ܬܳܦܶܐ ܕܪܶܓܬܳܐ ܠܳܐ ܐܽܘܡܳܢܳܐܺܝܬ ܢܶܥܒܕܽܘܢ ܐܶܢܽܘܢ܆ ܘܕܰܡܩܰܠܣܺܝܢ ܠܳܗ̇ ܠܪܶܚܡܬܳܐ܆ ܐܰܝܟ ܕܠܰܐܝ̇ܕܳܐ ܕܠܰܘ ܠܒܰܪ ܡܶܢ ܡܶܠܬܳܐ ܗܘ̣ܳܬ.

ܐܶܠܳܐ ܐܶܢ ܫܳܦܪܳܐ܆ ܠܶܗ ܠܨܰܠܡܳܐ ܬܽܘܒ ܐܰܝܟ ܕܡܶܢ ܬܰܦܢܟܳܐ ܡܶܕܶܡ܆ ܡܶܢ ܐܶܘܰܢܓ̈ܶܠܺܝܰܐ ܩܰܕܺܝ̈ܫܶܐ܆ ܢܶܗܦܽܘܟ ܢܨܽܘܪ ܘܰܢܕܰܡܶܐ ܡܶܢ ܕܪܺܝܫ.

ܐ̱ܢܳܫ ܡܶܢ ܦܪ̈ܺܝܫܳܝܶܐ ܫܳܐܶܠ ܗ̱ܘܳܐ܆ ܗܳܢܳܘ ܕܶܝܢ ܡܦܺܝܤ ܗ̱ܘܳܐ ܠܝܶܫܽܘܥ ܕܢܶܠܥܰܤ ܥܰܡܶܗ. ܘܟܰܕ ܥ̣ܰܠ ܠܒܰܝܬܶܗ ܕܗܰܘ ܦܪܺܝܫܳܝܳܐ ܐܶܣܬܡܶܟ. ܘܗܳܐ ܐܰܢ̱ܬܬܳܐ ܒܰܡܕܺܝܢ̱ܬܳܐ ܗܳܝ ܕܺܐܝܬܶܝܗ̇ ܗ̱ܘܳܬ ܚܰܛܳܝܬܳܐ. ܘܟܰܕ ܝܶܕܥܰܬ ܕܰܓܢܶܐ ܒܒܰܝܬܶܗ ܕܰܦܪܺܝܫܳܝܳܐ܆ ܟܰܕ ܐܰܝܬܝܰܬ̣ ܫܳܛܺܝܦܬܳܐ ܕܡܽܘܪܽܘܢ ܗܳܢܰܘ ܕܶܝܢ ܕܡܶܫܚܳܐ ܡܒܰܣܡܳܐ܆ ܘܩܳܡܰܬ ܠܘܳܬ ܪ̈ܶܓܠܰܘܗ̱ܝ ܡܶܢ ܒܶܣܬܪܳܐ ܟܰܕ ܒܳܟܝܳܐ ܗ̱ܘܳܬ܆ ܫܰܪܝܰܬ ܠܰܡܨܰܒܳܥܽܘ ܪ̈ܶܓܠܰܘܗ̱ܝ ܒܕܶܡ̈ܥܶܝܗ̇. ܘܰܒܣܰܥܪܳܐ ܕܪܺܝܫܳܗ̇܆ ܡܟܰܦܪܳܐ ܗ̱ܘܳܬ ܘܰܡܢܰܫܩܳܐ ܗ̱ܘܳܬ ܠܪ̈ܶܓܠܰܘܗ̱ܝ. ܘܡܳܫܚܳܐ ܗ̱ܘܳܬ ܒܡܽܘܪܽܘܢ^[3].

ܒܐܒܝ. ܡܶܢ ܪܶܚܡܰܬ ܐ̱ܢܳܫܽܘܬܶܗ ܕܝܶܫܽܘܥ ܡܰܠܽܘܢ ܕܶܝܢ ܡܶܢ ܬܶܕܡܽܘܪܬܳܐ ܡܶܬܟܣܶܤ ܐ̱ܢܳܐ܆ ܬܳܡܰܗ ܓܶܝܪ ܐ̱ܢܳܫ ܒܒܰܣܺܝܡܽܘܬܳܐ ܕܰܐ‌ܠܳܗܳܐ܆ ܕܰܒܝܰܕ ܛܳܒ̈ܳܬܳܐ ܝܰܨܺܝܦ ܠܰܡܫܰܚܠܳܦܽܘ ܠܒܺܝܫܽܘܬܳܐ. ܠܰܦܪ̈ܺܝܫܳܝܶܐ ܓܶܝܪ ܗܳܢܽܘܢ ܚܰܣܳܡ̈ܶܐ܆ ܠܗܳܢܽܘܢ ܩܳܛܽܘܠܳܐ ܕܰܠܩܽܘܒܠܶܗ܆ ܘܰܕܥܰܠ ܚܙܳܬܶܗ ܒܰܠܚܽܘܕ ܡܶܨܛܰܪܶܝܢ ܗ̱ܘܰܘ ܘܕܳܐܦܠܳܐ ܕܢܶܚܙܽܘܢܳܝܗ̱ܝ ܡܶܫܟܚܺܝܢ ܗ̱ܘܰܘ܆ ܘܕܰܐܝܟ ܢܒܺܝܽܘܬܶܗ ܕܶܐܫܰܥܝܳܐ ܐܶܬܚܰܫܰܒܘ ܠܽܘܩܒܰܠ ܢܰܦܫܗܽܘܢ ܡܰܚܫܰܒܬܳܐ ܒܺܝܫܬܳܐ܆ ܘܶܐܡܰܪܘ ܬܽܘܒ ܢܶܐܣܪܺܝܘܗ̱ܝ ܠܙܰܕܺܝܩܳܐ ܡܶܛܽܠ ܕܠܳܐ ܚܳܫܚܳܐ ܠܰܢ ܐܺܝܬܰܘܗ̱ܝ܆ ܠܡܶܫܬܰܘܬܳܦܽܘ ܒܦܳܬܽܘܪܳܐ ܘܰܒܡܶܠܚܳܐ ܡܶܬܪܡܶܐ ܗ̱ܘܳܐ܆ ܐܰܝܟܰܢܳܐ ܕܰܠܘܳܬ ܡܫܰܝܢܽܘܬܳܐ ܢܶܩܪܶܐ ܗ̱ܘܳܐ ܐܶܢܽܘܢ ܟܰܕ ܡܶܬܒܰܥܪܪܺܝܢ ܗ̱ܘܰܘ. ܟܰܕ ܕܶܝܢ ܠܳܐ ܡܶܫܬܰܚܠܦܺܝܢ ܗ̱ܘܰܘ܆ ܣܦܺܝ̈ܩܶܐ ܡܶܢ ܟܽܠ ܡܰܦܰܩ ܒܪܽܘܚܳܐ ܢܶܥܒܶܕ ܗ̱ܘܳܐ ܐܶܢܽܘܢ. ܘܠܳܐ ܡܶܕܶܡ ܓܶܝܪ ܗܳܟܰܢܳܐ܆ ܐܰܝܟ ܫܰܘܬܳܦܽܘܬܳܐ ܕܦܳܬܽܘܪܳܐ ܘܰܕܡܶܐܟܽܘܠܬܳܐ܆ ܐܳܦ ܠܗܳܢܽܘܢ ܕܺܐܝܬܰܝܗܽܘܢ ܒܥܶܠ̈ܕܒܳܒܶܐ ܘܝܰܬܺܝܪ ܡܶܢ ܟܽܠ ܡܰܩܪ̈ܒܳܢܶܐ܆ ܝܳܕܰܥ ܠܡܰܩܳܦܽܘ ܐܰܟܚܕܳܐ.

ܗܳܟܰܢܳܐ ܟܺܝܬ ܐܳܦ ܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ܆ ܡܶܛܽܠ ܟܺܝܬ ܕܰܠܘܳܬ ܚܕܳܐ ܡܟܰܢܶܫ ܠܗܰܕܳܡ̈ܶܐ ܕܥܺܕܬܳܐ܆ ܘܰܠܘܳܬ ܗܳܕܶܐ ܟܽܠܶܗ ܢܺܝܫܳܐ ܚܳܐܰܪ܆ ܠܘܳܬ ܗܳܝ ܕܰܒܡܰܚܫܰܒܬܳܐ ܕܡܶܛܽܠ ܠܚܽܘܕܳܝܽܘܬܳܐ ܗܳܝ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ ܢܶܗܘܶܐ܆ ܘܰܠܘܳܬ ܚܰܕ ܢܶܬܡܰܙܰܓ ܒܫܰܘܬܳܦܽܘܬܳܐ ܕܢܽܘܗܪܳܐ ܗܰܘ ܕܡܶܢ ܬܰܡܳܢ ܡܰܒܪܶܩ܆ ܐܰܝܟܰܢܳܐ ܕܳܐܡܰܪ ܐܳܦ ܗܽܘ ܗܰܘ ܚܰܕ ܡܶܢ ܬܠܺܝܬܳܝܽܘܬܳܐ ܡܫܺܝܚܳܐ܆ ܐܰܝܟܰܢܳܐ ܕܟܽܠܗܽܘܢ ܚܰܕ ܢܶܗܘܽܘܢ܆ ܐܰܝܟܰܢܳܐ ܕܰܐܢ̱ܬ ܐܰܒܳܐ ܒܺܝ ܘܶܐܢܳܐ ܒܳܟ܆ ܐܰܝܟܰܢܳܐ ܕܳܐܦ ܗܶܢܽܘܢ ܒܰܢ ܚܰܕ ܢܶܗܘܽܘܢ^[4]܆ ܒܝܰܕ ܦܳܬܽܘܪܳܐ ܩܰܕܺܝܫܳܐ ܡܶܫܬܰܡܠܶܐ܆ ܘܰܒܝܰܕ ܚܕܳܐ ܫܳܪܽܘܬܳܐ ܘܓܰܘܳܢܳܝܬܳܐ܆ ܗܳܝ ܕܒܳܗ̇ ܒܫܰܘܝܽܘܬ ܐܺܝܩܳܪܳܐ ܡܶܫܬܰܘܬܦܺܝܢܰܢ ܟܰܕ ܡܰܥܗܕܳܐ ܠܰܢ ܠܡܶܠܰܘܗ̱ܝ ܕܦܰܘܠܽܘܤ ܘܠܰܐܘܝܽܘܬܳܐ ܐܰܟܚܕܳܐ ܩܳܪܝܳܐ ܠܰܢ܆ ܘܰܒܝܰܕ ܗܳܝ ܕܡܶܣܬܰܥܪܳܐ ܡܰܙܥܩܳܐ܆ ܟܰܕ ܡܣܰܝܒܪܺܝܢ ܐܢ̱ܬܽܘܢ ܠܰܚ̈ܕܳܕܶܐ ܒܚܽܘܒܳܐ܆ ܟܰܕ ܝܳܨܦܺܝܢ ܐܢ̱ܬܽܘܢ ܠܡܶܛܰܪ ܚܕܳܝܽܘܬܳܐ ܕܪܽܘܚܳܐ܆ ܒܰܐܣܳܪܳܐ ܕܰܐܟܚܕܳܐ ܕܫܰܝܢܳܐ܆ ܚܰܕ ܦܰܓܪܳܐ ܘܰܚܕܳܐ ܪܽܘܚܳܐ܆ ܐܰܝܟܰܢܳܐ ܕܳܐܦ ܐܶܬܩܪܺܝܬܽܘܢ ܒܚܰܕ ܣܰܒܪܳܐ ܕܰܩܪܺܝܬܟܽܘܢ^[5]܆ ܘܬܽܘܒ܆ ܡܶܛܽܠ ܕܚܰܕ ܠܰܚܡܳܐ ܚܰܕ ܦܰܓܪܳܐ ܐܺܝܬܰܝܢ ܚܢܰܢ ܗܳܢܽܘܢ ܣܰܓܺܝ̈ܶܐܐ܆ ܟܽܠܰܢ ܓܶܝܪ ܡܶܢ ܚܰܕ ܠܰܚܡܳܐ ܘܟܳܣܳܐ ܡܶܫܬܰܘܬܦܺܝܢ ܚ̱ܢܰܢ^[6].

ܐܶܠܳܐ ܟܰܕ ܥܰܡ ܪܳܕܽܘܝܳܐ ܘܡܰܠܦܳܢܳܐ ܕܝܽܘܠ̈ܦܳܢܶܐ ܟܳܗ̈ܢܳܝܶܐ ܕܕܰܐܝܟ ܗܳܠܶܝܢ ܘܰܐ‌ܠܳܗܳܐ܆ ܠܒܰܪ ܡܶܢ ܗܳܝ ܕܫܳܘܝܳܐ ܦܪܺܝܫܳܝܳܐ ܗܰܘ ܐܰܟܚܕܳܐ ܡܶܫܬܰܪܶܐ ܗ̱ܘܳܐ܆ ܘܰܐܟܚܕܳܐ ܥܰܡܶܗ ܓ̇ܢܶܐ̣ ܗ̱ܘܳܐ ܥܰܠ ܚܕܳܐ ܘܗ̱ܝ ܟܰܕ ܗܺܝ ܬܰܫܘܺܝܬܳܐ܆ ܘܒܶܗ ܒܦܰܪܨܽܘܦܳܐ ܚܳܐܰܪ ܗ̱ܘܳܐ܆ ܠܳܐ ܚܳܙܶܐ ܗ̱ܘܳܐ ܘܳܐܦܠܳܐ ܠܪܰܒܽܘܬܶܗ ܡܶܣܬܰܟܰܠ ܗ̱ܘܳܐ ܕܗܰܘ ܕܶܐܬܢܰܚܰܬ̣ ܠܘܳܬܶܗ. ܟܰܕ ܕܶܝܢ ܒܰܡܫܰܩܠܽܘܬܳܐ ܡܪܺܝܡ ܗ̱ܘܳܐ ܓܒܺܝܢܳܐ܆ ܡܰܣܒܰܪ ܗ̱ܘܳܐ ܕܳܐܦ ܡܫܰܟܳܢܽܘ ܫܰܟܶܢ ܗ̱ܘܳܐ ܠܶܗ ܠܝܶܫܽܘܥ܆ ܘܚܰܝܳܒܳܐ ܕܛܰܝܒܽܘܬܳܐ ܐܺܝܬܰܘܗ̱ܝ ܠܶܗ. ܐܰܢ̱ܬܬܳܐ ܕܶܝܢ ܗܳܝ ܚܰܛܳܝܬܳܐ܆ ܐܳܦ ܟܰܕ ܩܳܝܡܳܐ ܗ̱ܘܳܬ ܘܰܡܛܰܫܝܳܐܺܝܬ ܡܶܢ ܒܶܣܬܪܳܐ܆ ܘܠܳܐ ܚܳܫܒܳܐ ܗ̱ܘܳܬ ܗܺܝ ܠܳܗ̇ ܕܫܳܘܝܳܐ ܕܬܶܬܚܙܶܐ ܠܥܰܝ̈ܢܶܐ ܗܳܢܶܝܢ ܕܡܰܠ̣̈ܝܴܢ ܚܰܝܽܘܣܬܳܢܽܘܬܳܐ ܘܰܡܫܰܝܢܽܘܬܳܐ ܐܰ‌ܠܳܗܳܝܬܳܐ܆ ܐܶܫܬܰܘܕܥܰܬ ܠܗܰܘ ܕܒܳܗ̇ ܠܳܐ ܚܳܐܰܪ ܗ̱ܘܳܐ ܘܰܓܢܶܐ ܗ̱ܘܳܐ ܥܰܠ ܣܡܳܟܳܐ܆ ܘܟܰܕ ܫܰܬܺܝܩܳܐ ܩܰܪܒܰܬ̣ ܠܶܗ ܬܰܟܫܶܦܬܳܐ܆ ܐܰܝܟ ܕܠܰܐܝܢܳܐ ܕܰܠܠܶܒܳܐ ܫܳܡܰܥ. ܢܳܣܟܳܐ ܗ̱ܘܳܬ ܓܶܝܪ ܕܶܡ̈ܥܶܐ ܕܰܡܫܰܡܪ̈ܳܢ ܩܳܠܳܐ܆ ܘܰܕܥܰܬܺܝܪܳܐܺܝܬ ܪ̈ܳܕܝܳܢ ܗ̱ܘܰܝ̈ ܘܢܳܚ̈ܬܳܢ ܥܰܠ ܪ̈ܶܓܠܶܐ ܗܳܠܶܝܢ ܐܰ‌ܠܳܗܳܝ̈ܳܬܳܐ. ܘܕܰܒܝܰܕ ܗܳܠܶܝܢ ܕܰܠܗܳܢܶܝܢ ܡܫܺܝܓܳܐ ܗ̱ܘܳܬ܆ ܗܺܝ ܡܶܬܬܫܺܝܓܳܐ ܗ̱ܘܳܬ ܡܶܢ ܚܛܺܝܬܳܐ ܟܰܣܝܳܐ ܗ̱ܘܳܬ. ܪܳܕܶܝܢ ܗ̱ܘܰܘ ܓܶܝܪ ܠܽܘܩܒܰܠܗܶܝܢ ܠܘܳܬܳܗ̇܆ ܪ̈ܰܚܡܶܐ ܕܕܽܘܟܳܝܳܐ ܕܝܰܬܺܝܪ ܫܦܺܝܥܺܝܢ. ܡܰܘܣܦܳܐ ܗ̱ܘܳܬ ܕܶܝܢ ܐܳܦ ܠܺܐܝܩܳܪܳܐ ܗܰܘ ܕܡܶܢ ܡܶܫܚܳܐ ܡܒܰܣܡܳܐ܆ ܟܰܕ ܠܗܶܝܢ ܠܪ̈ܶܓܠܶܐ ܝܰܨܺܝܦܳܐܺܝܬ ܡܳܫܚܳܐ^[7] ܗ̱ܘܳܬ܆ ܘܟܰܕ ܬܶܫܒܽܘܚܬܳܐ ܦܰܐܺܝܬ ܠܰܐܠܳܗܳܐ ܡܩܰܪܒܳܐ ܗ̱ܘܳܬ ܠܶܗ. ܘܟܰܕ ܡܚܰܘܝܳܐ ܗ̱ܘܳܬ܆ ܕܰܚܠܺܝܛܰܬ̣ ܒܡܽܘܪܽܘܢ ܐܺܝܬܶܝܗ̇ ܕܶܡܥܬܳܐ ܕܰܬܝܳܒܽܘܬܳܐ ܘܰܕܡܰܘܕܝܳܢܽܘܬܳܐ. ܘܕܰܚܠܳܦ ܟܽܠܳܗ̇ ܒܰܣܺܝܡܽܘܬ ܪܺܝܚܳܐ ܚܫܺܝܒܳܐ ܠܰܐܠܳܗܳܐ.

ܟܰܕ ܗܳܠܶܝܢ ܕܶܝܢ ܚܳܙܶܐ ܗ̱ܘܳܐ ܦܪܺܝܫܳܝܳܐ ܗܰܘ܆ ܘܠܳܐ ܡܶܬܒܰܩܶܐ ܗ̱ܘܳܐ ܒܗܰܘܢܶܗ܆ ܢܽܘܪܳܐ ܕܠܳܐ ܗܰܝܡܳܢܽܘܬܳܐ ܘܰܕܚܰܣܳܡܽܘܬܳܐ ܡܶܬܢܰܒܪܫܳܐ ܗ̱ܘܳܬ ܒܶܗ. ܘܶܐܡܰܪ ܗܽܘ ܒܶܗ ܐܳܡܰܪ. ܗܳܢܰܘ ܕܶܝܢ ܒܬܰܪܥܺܝܬܶܗ ܡܶܬܚ̣ܒܶܠ ܗ̱ܘܳܐ ܗܽܘ ܚܰܫܳܐ. ܟܰܕ ܐܰܝܟ ܕܰܠܡܺܐܡܰܪ܆ ܐܳܦ ܕܰܠܒܰܪ ܢܶܦܽܘܩ ܡܶܣܬܰܪܗܰܒ ܗ̱ܘܳܐ. ܟܰܕ ܡܡܰܠܶܠ ܗ̱ܘܳܐ ܕܶܝܢ ܒܪܰܡ ܐܳܦ ܡܶܢ ܠܓܰܘ ܘܨܳܪܶܐ ܗ̱ܘܳܐ ܠܶܗ ܠܰܚܣܳܡܳܐ. ܡܳܢܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ ܩܳܠܳܐ ܕܚܽܘܫܳܒ̈ܶܐ܆ ܗܰܘ ܕܳܐܦ ܟܰܕ ܠܳܐ ܡܶܬܚܰܙܝܳܢܳܐ ܐܺܝܬܰܘܗ̱ܝ ܗ̱ܘܳܐ ܫܳܡܰܥ ܗ̱ܘܳܐ ܠܶܗ ܝܶܫܽܘܥ. ܗܳܢܳܐ ܐܶ‌ܠܽܘ ܐܺܝܬܰܘܗ̱ܝ ܗ̱ܘܳܐ ܢܒܺܝܳܐ܆ ܡܶܫܬܰܘܕܰܥ ܗ̱ܘܳܐ ܕܡܰܢ ܗ̱ܝ ܘܕܰܐܝܟ ܐܰܝ̇ܕܳܐ ܐܺܝܬܶܝܗ̇ ܐܰܢ̱ܬܬܳܐ܆ ܗܺܝ ܐܰܝ̇ܕܳܐ ܕܓܳܫܦܳܐ ܒܶܗ܆ ܕܚܰܛܳܝܬܳܐ ܐܺܝܬܶܝܗ̇^[8]. ܐܰܝܢܳܐ ܓܶܝܪ ܢܒܺܝܳܐ ܐܺܝܬܰܘܗ̱ܝ ܐܳܘ ܦܪܺܝܫܳܝܳܐ܆ ܕܢܳܕ̥ܳܐ ܗ̱ܘܳܬ ܠܶܗ ܡܶܢ ܚܰܛܳܝ̈ܶܐ܆ ܘܰܠܓܶܫܬܳܐ ܕܺܝܠܗܽܘܢ ܐܰܝܟ ܕܠܰܡܣܰܝܰܒܬܳܐ ܕܳܚܶܩ ܗ̱ܘܳܐ ܡܶܢܶܗ. ܐܰܘ ܟܽܠܶܗ ܗܳܢܳܐ ܐܺܝܬܰܝܟ ܠܳܐ ܫܳܡܽܘܥܳܐ ܕܰܟ̈ܬܳܒܶܐ ܟܳܗ̈ܢܳܝܶܐ܆ ܐܰܝܟܰܢܳܐ ܕܠܳܐ ܬܶܕܰܥ܆ ܕܥܰܠ ܓܰܪ̈ܡܰܘ̈ܗ̱ܝ ܕܶܐ‌ܠܺܝܫܳܥ ܢܒܺܝܳܐ ܕܡܰܝ̣ܺܝ̣ܬ ܗ̱ܘܳܐ^[9]܆ ܠܶܣܛܳܝܳܐ ܣܽܘܪܝܳܝܳܐ ܐܶܫܬܕܺܝ ܡܺܝܬܳܐ܆ ܘܰܒܝܰܕ ܓܶܫܬܳܐ ܠܘܳܬ ܚܰܝ̈ܶܐ ܬܽܘܒ ܦܢܳܐ. ܐܰܝܟܰܢܳܐ ܠܳܐ ܡܶܬܗܰܕܶܐ ܐܰܢ̱ܬ ܠܘܳܬ ܫܪܳܪܳܐ܆ ܒܩܰܕܺܝܡ̈ܘܳܬ ܪ̈ܽܘܫܡܶܐ ܢܳܡܽܘ̈ܣܳܝܳܬܳܐ. ܗܳܠܶܝܢ ܓܶܝܪ ܩܰܕܶܡ̈ܶܝܢ ܐܶܬܕܰܒܰܪ̈ܶܝܢ ܒܝܰܕ ܢܒܺܝ̈ܶܐ܆ ܐܰܝܟܰܢܳܐ ܕܶܐܡܰܬܝ ܕܬܶܚܙܽܘܗ̱ܝ ܠܝܶܫܽܘܥ ܕܠܰܘ ܒܰܠܚܽܘܕ ܠܰܐ̱ܚܪ̈ܳܢܶܐ܆ ܐܶܠܳܐ ܐܳܦ ܗܽܘ ܠܶܗ ܐܰܩܺܝܡ܆ ܗܳܕܶܐ ܓܶܝܪ ܕܰܐ‌ܠܳܗܳܐ ܠܚܽܘܕܰܘܗ̱ܝ ܐܺܝܬܶܝܗ̇܆ ܗܰܘ ܕܰܒܚܰܝܠܳܐ ܒܰܝܬܳܝܳܐ ܕܺܝܠܶܗ ܡܶܬܚܰܫܰܚ܆ ܬܗܰܝܡܶܢ ܕܗܽܘ ܐܺܝܬܰܘܗ̱ܝ ܫܰܪܺܝܪܳܐܺܝܬ ܗܰܘ ܕܶܐܡܰܪ ܕܶܐܢܳܐ ܐܺܝܬܰܝ ܚܰܝ̈ܶܐ ܘܰܩܝܳܡܬܳܐ^[10]܆ ܗܰܘ ܕܳܐܦ ܒܰܢܒܺܝ̈ܶܐ ܠܰܕܕܰܐܝܟ ܗܳܠܶܝܢ ܩܰܕܶܡ ܐܰܥܒܶܕ܆ ܐܰܝܟܰܢܳܐ ܕܠܳܐ ܠܳܐ ܡܫܰܘܬܦܳܐ ܢܶܗܘܶܐ ܐܺܝܬܰܘܗ̱ܝ ܝܺܗܽܘܕܳܝܳܐ ܕܬܰܚ̈ܘܝܳܬܳܐ ܐܰܒܳܗܳܝ̈ܳܬܳܐ܆ ܐܶܠܳܐ ܐܰܝܟ ܕܡܶܢ ܝܽܘܠ̈ܦܳܢܶܐ ܡܰܥ̈ܠܬܳܢܳܝܶܐ^[11]܆ ܡܶܢ ܬܰܡܳܢ ܢܶܬܬܰܝܬܶܐ ܠܘܳܬ ܡܫܰܡܠܝܽܘܬܳܐ ܕܗܰܝܡܳܢܽܘܬܳܐ ܕܒܰܡܫܺܝܚܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܳܐ ܛܥܳܬܶܗ ܠܝܶܫܽܘܥ܆ ܐܰܝܟܰܢܳܐ ܕܗܰܘ ܦܪܺܝܫܳܝܳܐ ܐܰܣܒܰܪ܆ ܓܶܫܬܳܐ ܕܰܐܢ̱ܬܬܳܐ ܗܳܝ ܚܰܛܳܝܬܳܐ. ܐܶܠܳܐ ܝܺܕܰܥ ܓܰܠܝܳܐܺܝܬ܆ ܕܰܒܠܶܒܳܗ̇ ܡܰܠܽܘܢ ܓܶܫܦܰܬ ܒܶܗ ܘܠܰܘ ܒܺܐܝ̈ܕܶܝܗ̇܆ ܘܗܰܢܺܝܳܐܺܝܬ ܩܰܒܠܳܗ̇ ܥܠܰܘܗ̱ܝ.

ܘܳܐܦ ܟܺܝܬ ܠܶܗ ܠܰܦܪܺܝܫܳܝܳܐ ܕܰܠܘܳܬ ܗܳܕܶܐ ܡܰܚܫܰܒܬܳܐ ܢܶܓܕܺܝܘܗ̱ܝ ܥܳܨܶܐ܆ ܒܝܰܕ ܗܳܠܶܝܢ ܕܰܐܝܟ ܕܰܒܡ̈ܰܬܠܶܐ ܡܡܰܠܶܠ ܠܘܳܬܶܗ܆ ܟܰܕ ܠܡܰܪܺܝܪܽܘܬܳܐ ܕܬܰܪܥܺܝܬܶܗ ܡܦܰܪܣܶܐ. ܬܪܶܝܢ ܓܶܝܪ ܐܳܡܰܪ ܚܰܝܳܒ̈ܶܐ ܐܺܝܬ ܗ̱ܘܰܘ ܠܡܰܘܙܦܳܢܳܐ ܐ̱ܢܳܫ܆ ܕܡܶܢܗܽܘܢ ܚܰܕ ܚܰܝܳܒ ܗ̱ܘܳܐ ܕܺܝܢܳܪ̈ܶܐ ܚܰܡܶܫܡܳܐܐ. ܗܰܘ ܕܶܝܢ ܐ̱ܚܪܺܢܳܐ ܚܰܡܫܺܝܢ. ܟܰܕ ܠܰܝܬ ܗ̱ܘܳܐ ܠܗܽܘܢ ܕܢܶܦܪܥܽܘܢ܆ ܠܰܬܪ̈ܰܝܗܽܘܢ ܫܒܰܩ. ܐܶܡܰܪ ܐܰܝܢܳܐ ܝܰܬܺܝܪܳܐ ܢܰܚܒܺܝܘܗ̱ܝ. ܟܰܕ ܕܶܝܢ ܦܰܢܺܝ ܦܶܬܓܳܡܳܐ ܫܶܡܥܽܘܢ܆ ܗܳܢܳܐ ܓܶܝܪ ܫܡܳܐ ܐܺܝܬ ܗ̱ܘܳܐ ܠܶܗ ܠܰܦܪܺܝܫܳܝܳܐ܆ ܐܶܡܰܪ. ܡܰܣܒܰܪ ܐ̱ܢܳܐ܆ ܗܰܘ ܕܣܰܓܺܝ ܐܶܫܬܒܶܩ ܠܶܗ. ܗܽܘ ܕܶܝܢ ܐܶܡܰܪ ܠܶܗ. ܬܪܺܝܨܳܐܺܝܬ ܕܳܢ̣ܬ^[12]. ܐܰܢ̱ܬ ܕܝܢ ܥܰܒܝܳܐܺܝܬ ܚܳܙܶܐ ܐܰܢ̱ܬ ܐܳܘ ܦܪܺܝܫܳܝܳܐ܆ ܠܓܶܫܬܳܐ ܕܺܐܝܕܳܐ ܡܥܰܩܶܒ ܐܰܢ̱ܬ܆ ܘܰܐܝܟ ܕܠܰܐܝ̇ܕܳܐ ܕܠܳܐ ܐܺܝܬܶܝܗ̇ ܕܟܺܝܬܳܐ ܕܳܐܶܢ ܐܰܢ̱ܬ ܠܳܗ̇ ܠܗܳܝ ܒܰܪ̱ܬ ܐ̱ܢܳܫܐ. ܐܶܢܳܐ ܕܶܝܢ ܠܥܽܘܡܩܳܐ ܕܬܰܪܥܺܝܬܳܗ̇ ܚܳܙܶܐ ܐ̱ܢܳܐ܆ ܗܰܘ ܕܠܶܗ ܟܽܠܗܶܝܢ ܟܢܺܝܫܳܐܺܝܬ ܪ̈ܗܰܛܶܝܢ. ܒܡܰܪܓܫܳܢܽܘܬܳܐ ܗܘ̣ܳܬ ܕܰܚ̈ܛܳܗܶܐ ܒܰܝ̈ܬܳܝܶܐ. ܕܰܡܥܰܬ. ܐܰܚܒܰܬ. ܬܰܚܘܺܝܬܳܐ ܕܚܽܘܒܳܐ ܠܗܰܘ ܡܶܫܚܳܐ ܕܒܶܣ̈ܡܶܐ ܫܰܟܢܰܬ. ܐܶܠܳܐ ܠܰܘ ܒܰܛܺܝܠܳܐ ܐ̱ܢܐ ܕܪܶܚܡܬܳܗ̇ ܕܗܳܝ ܗܘܺܝܬ̣. ܡܰܪܓܶܫ ܐ̱ܢܳܐ ܓܶܝܪ ܐܰܝܟ ܐܰ‌ܠܳܗܳܐ ܒܟܽܠܙܒܰܢ ܒܡܶܬܬܙܺܝܥܳܢܽܘܬܳܗ̇ ܕܢܰܦܫܳܗ̇܆ ܘܩܳܕܶܡ ܐ̱ܢܳܐ ܐܳܪܰܥ ܐ̱ܢܳܐ ܒܦܽܘܪ̈ܥܳܢܶܐ. ܩܰܕܶܡܬ ܫܰܟܶܢܬ ܚܠܳܦ ܪܶܚܡܬܳܗ̇܆ ܫܽܘܒܩܳܢܳܐ ܕܚܰܘ̈ܒܳܬܳܐ ܗܳܠܶܝܢ ܣܰܓܺܝ̈ܳܐܬܳܐ. ܩܕܳܡ ܕܰܐܢ̱ܬ ܬܕܽܘܢ ܠܓܶܫܬܳܐ ܗܳܝ ܕܡܶܢ ܠܒܰܪ ܐܰܝܟ ܠܳܐ ܕܟܺܝܬܳܐ܆ ܒܗܳܝ ܕܡܶܢ ܠܓܰܘ ܩܰܕܡܰܬ̣ ܐܶܬܕܰܟܝܰܬ̣ ܗܺܝ ܐܰܢ̱ܬܬܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܳܐ ܐܺܝܬܶܝܗ̇ ܗ̱ܘܳܬ ܚܰܛܳܝܬܳܐ ܐܳܘ ܗܳܢܳܐ܆ ܗܳܝ ܕܣܳܒܰܪ ܐܰܢ̱ܬ ܚܰܛܳܝܬܳܐ. ܐܶܠܳܐ ܟܰܕ ܐܶܫܬܰܘܕܥܰܬ ܠܥܽܘܬܪܳܐ ܕܫܽܘܟܳܢܳܐ܆ ܬܶܩܠ̣ܰܬ ܠܩܽܘܒܠܶܗ ܡܰܬܩܳܠܳܐ ܫܘܶܐ ܒܢܶܬܥܳܐ ܕܚܽܘܒܳܐ.

ܚܳܙܶܝܢ ܐܢ̱ܬܽܘܢ ܐܰܝܟܰܢܳܐ ܐܺܝܬܶܝܗ̇ ܢܰܨܺܝܚܬܳܐ܆ ܡܶܬܚܰܙܝܳܢܽܘܬܶܗ ܕܨܰܠܡܳܐ܆ ܡܳܕܶܝܢ ܢ݀ܥܰܩܶܒ ܘܢܶ݀ܚܙܶܐ ܐܳܦ ܠܰܡܛܰܫܝܽܘܬܳܗ̇܆ ܕܝܰܬܺܝܪ ܐܺܝܬܶܝܗ̇ ܢܰܨܺܝܚܬܳܐ. ܗܽܘ ܓܶܝܪ ܦܪܺܝܫܳܝܳܐ ܗܰܘ܆ ܛܽܘܦܣܳܐ ܐܰܚܺܝܕ ܕܰܟܢܽܘܫܬܳܐ ܕܝܽܗ̱ܘ̈ܕܳܝܶܐ܆ ܗܳܝ ܕܰܠܘܳܬܳܗ̇ ܩܰܕܡܳܐܺܝܬ ܫܪܳܐ ܡܶܠܬܳܐ ܕܰܐ‌ܠܳܗܳܐ܆ ܟܰܕ ܐܰܝܟ ܕܰܒܒܰܝܬܳܐ ܚܰܕ܆ ܒܦܠܐܤܛܝܢܝ ܡܶܬܺܝܕܰܥ ܗ̱ܘܳܐ ܒܰܠܚܽܘܕ܆ ܘܡܶܬܚܙܶܐ ܗ̱ܘܳܐ ܥܰܠ ܡܰܫܟܢܳܐ ܕܣܳܗܕܽܘܬܳܐ܆ ܐܰܝܟܰܢܳܐ ܕܳܐܦ ܒܝܰܕ ܦܽܘܡܳܐ ܕܰܢܒܺܝܳܐ ܢܳܬܳܢ܆ ܐܶܡܰܪ ܠܘܳܬ ܡܰܠܟܳܐ ܕܰܘܺܝܕ ܕܨܳܒܶܐ ܗ̱ܘܳܐ ܠܡܶܒܢܳܐ ܗܰܝܟܠܳܐ܆ ܕܠܳܐ ܥܶܡܪܶܬ ܒܒܰܝܬܳܐ ܡܶܢ ܝܰܘܡܳܐ ܕܰܐܣܩܶܬ ܠܰܒ̈ܢܰܝ ܐܝܣܪܳܐܶܝܠ ܡܶܢ ܡܶܨܪܶܝܢ ܘܰܥܕܰܡܳܐ ܠܝܰܘܡܳܐ ܗܳܢܳܐ܆ ܘܺܐܝܬܰܝ ܗ̱ܘܺܝܬ ܕܰܡܗܰܠܶܟ ܒܡܰܫܪܝܳܐ ܒܡܰܫܟܢܳܐ. ܘܗܳܟܰܢܳܐ ܐܶܫܬܰܘܬܰܦ ܠܗܽܘܢ ܒܦܳܬܽܘܪܳܐ ܡܠܺܝܠܳܐ܆ ܟܰܕ ܣܳܡ ܩܕܳܡܰܝܗܽܘܢ ܦܽܘܩ̈ܕܳܢܶܐ ܕܢܳܡܽܘܣܳܐ܆ ܕܶܐܤܛܽܘܟܣܳܢܳܝ̈ܶܐ ܡܰܢ ܐܺܝܬܰܝܗܽܘܢ ܗ̱ܘܰܘ ܐܰܘܟܺܝܬ ܟܬܺܝ̈ܒܳܬܳܐ ܕܫܽܘܪܳܝ ܝܽܘܠܦܳܢܳܐ ܕܫܰܒܪ̈ܶܐ܆ ܒܰܛܢܺܝܢ ܗ̱ܘܰܘ ܕܶܝܢ ܠܰܡܫܰܡܠܝܽܘܬܳܐ ܕܦܽܘܠܚܳܢܳܐ ܕܬܶܫܡܶܫܬܳܐ ܪܽܘܚܳܢܳܝܬܳܐ܆ ܟܰܕ ܫܰܕܰܪ ܒܝܰܕ ܢܒܺܝ̈ܶܐ܆ ܕܠܰܘ ܒܰܠܚܽܘܕ ܠܘܳܬ ܗܳܝ ܕܩܰܪܺܝܒܳܐ ܪܳܕܶܝܢ ܗ̱ܘܰܘ ܘܡܰܠܦܺܝܢ܆ ܐܶܠܳܐ ܐܳܦ ܠܗܳܠܶܝܢ ܕܰܥ̈ܬܺܝܕܳܢ ܗ̱ܘܰܝ̈ ܒܩܰܕܺܝܡܽܘܬ ܡܶܠܬܳܐ ܡܰܐܪܙܺܝܢ ܗ̱ܘܰܘ. ܘܰܠܚܰܪܬܳܐ ܟܰܕ ܕܢܰܚ ܡܕܰܒܪܳܢܳܐܺܝܬ ܠܘܬܗܽܘܢ܆ ܘܶܐܬܚܙܺܝ ܒܝܰܕ ܡܶܐܬܺܝܬܳܐ ܕܒܰܒܣܰܪ܆ ܘܰܐܟܚܕܳܐ ܐܶܬܗܰܦܰܟ ܥܰܡܗܽܘܢ^[13]܆ ܘܥܰܕܰܪ ܐܶܢܽܘܢ ܡܫܰܚܠܦܳܐܺܝܬ ܐܳܦ ܟܰܕ ܠܳܐ ܨܳܒܶܝܢ ܗ̱ܘܰܘ܆ ܘܰܒܫܽܘܠܳܡܳܐ ܟܺܝܬ ܕܰܡܕܰܒܪܳܢܽܘܬܳܐ܆ ܒܽܐܘܪܫܠܶܡ ܐܰܝܟ ܕܰܒܒܰܝܬܳܐ ܕܝܽܗ̱ܘ̈ܕܳܝܶܐ ܓܢܶܐ ܘܶܐܣܬܡܰܟ܆ ܒܝܰܕ ܩܒܽܘܪܬܳܐ ܬܠܺܝܬܳܝܰܬ ܝܰܘ̈ܡܶܐ. ܒܰܕܓܽܘܢ ܐܳܦ ܐܳܡܰܪ ܗ̱ܘܳܐ܆ ܕܠܳܐ ܐܶܫܬܰܕܪܶܬ̣ ܐܶܠܳܐ ܐܶܢ ܠܘܳܬ ܥܶܪ̈ܒܶܐ ܗܳܢܽܘܢ ܕܶܐܒܰܕܘ ܡܶܢ ܒܰܝܬܐ ܕܐܝܣܪܳܐܶܝܠ^[14]. ܟܰܕ ܒܟܽܠ ܕܽܘܟ ܩܳܕܶܡ ܗ̱ܘܳܐ ܡܝܰܩܰܪ ܗ̱ܘܳܐ ܠܗܽܘܢ܆ ܐܰܝܟܰܢܳܐ ܕܟܰܕ ܠܳܐ ܡܗܰܝܡܢܺܝܢ܆ ܢܽܘܟܪ̈ܳܝܶܐ ܕܟܽܠܶܗ ܫܽܘܒܩܳܢܳܐ ܢܚܰܘܶܐ ܐܶܢܽܘܢ.

ܐܶܠܳܐ ܟܕ ܠܳܐ ܣܳܥܽܘܪ̈ܶܐ ܥܰܠ ܦܳܬܽܘܪܳܐ ܘܥܰܠ ܬܰܫܘܺܝܬܳܐ ܕܰܣܡܳܟܳܐ ܓܢܶܝܢ ܗ̱ܘܰܘ܆ ܘܠܳܐ ܡܰܢ ܐܳܟܠܺܝܢ ܗ̱ܘܰܘ ܐܰܝܟ ܕܙܳܕܶܩ ܗ̱ܘܳܐ ܠܗܳܢܽܘܢ ܕܪܶܓܬܳܢܳܐܺܝܬ ܐܺܝܬ ܗ̱ܘܳܐ ܠܗܽܘܢ ܕܗܳܠܶܝܢ ܐܰ‌ܠܳܗܳܝ̈ܳܬܳܐ܆ ܛܥܶܡܘ ܕܶܝܢ ܘܡܶܚܕܳܐ ܣܒܰܥܘ ܘܨܰܥܰܪܘ܆ ܐܶܟܰܠ ܓܶܝܪ ܝܰܥܩܽܘܒ ܘܰܣܒܰܥ ܘܰܒܥܰܛ ܚܰܒܺܝܒܳܐ^[15]܆ ܥܶܠܰܬ ܥܠܰܘܗ̱ܝ ܐܰܢ̱ܬܬܳܐ ܗܳܝ ܚܰܛܳܝܬܳܐ ܥܰܠ ܒܰܝܬܳܐ܆ ܘܗ̱ܝ ܡܶܢ ܢܰܦܫܳܗ̇ ܐܶܬ̣ܳܬ̣܆ ܥܺܕܬܳܐ ܗܳܝ ܕܡܶܢ ܥܰܡ̱ܡ̈ܶܐ ܗܳܢܽܘܢ ܕܰܒܟܽܠܳܗ̇ ܡܶܬܥܰܡܪܳܢܺܝܬܳܐ ܐܶܬܟܰܢܫܰܬ܆ ܘܒܰܡܫܺܝܚܳܐ ܒܨܶܒܝܳܢ ܢܰܦܫܳܗ̇ ܗܰܝܡܢܰܬ܆ ܗܰܘ ܕܥܰܡ ܛܳܠܽܘ̈ܡܶܐ ܘܠܳܐ ܡܩܰܒ̈ܠܰܝ ܛܰܝܒܽܘܬܳܐ ܐܰܟܚܕܳܐ ܓܢܶܐ ܗ̱ܘܳܐ.

ܣܰܓܺܝ ܕܶܝܢ ܛܳܒܳܐܺܝܬ ܐܶܡܰܪ܆ ܕܗܳܐ ܐܰܢ̱ܬܬܳܐ ܚܰܛܳܝܬܳܐ^[16]. ܠܰܘ ܠܚܽܘܕܳܝܰܬ̣ ܙܢܳܐ. ܐܶܠܳܐ ܡܦܰܬܟܰܬ ܒܟܽܠ ܙܢܺܝ̈ܢ. ܒܰܚܛܺܝܬܳܐ ܘܰܒܙܳܢܝܽܘܬܳܐ. ܠܟܽܠ ܓܶܝܪ ܚܛܺܝܬܳܐ ܓܶܢܣܳܢܳܐܺܝܬ܆ ܙܳܢܝܽܘܬܳܐ ܐܺܝܬ ܥܝܳܕܳܐ ܠܰܟܬܳܒܳܐ ܐܰ‌ܠܳܗܳܝܳܐ ܠܰܡܫܰܡܳܗܽܘ. ܘܝܰܬܺܝܪܳܐܺܝܬ ܠܫܽܘܢܳܝܳܐ ܕܡܶܢ ܣܶܓܕܬܳܐ ܘܕܶܚܠܬܳܐ ܐܰ‌ܠܳܗܳܝܬܳܐ܆ ܐܶܡܰܬܝ ܕܠܰܓ̈ܠܺܝܦܶܐ ܕܠܳܐ ܢܰܦܫܳܐ܆ ܚܠܳܦ ܗܰܘ ܕܒܰܠܚܽܘܕܰܘܗ̱ܝ ܐܰ‌ܠܳܗܳܐ܆ ܘܰܠܟܺܐܦ̈ܶܐ ܘܰܠܩܰܝ̈ܣܶܐ ܬܶܬܩܰܪܰܒ. ܗܳܕܶܐ ܐܳܡܰܪ ܐܳܦ ܢܒܺܝܳܐ ܕܰܘܺܝܕ ܟܰܕ ܡܙܰܡܰܪ ܠܰܐܠܳܗܳܐ܆ ܬܽܘܒ ܠܟܽܠ ܡܰܢ ܕܰܡܙܰܢܶܐ ܡܶܢܳܟ^[17]. ܘܡܶܛܽܠ ‌ܐ̱ܢܳܫܺܝ̈ܢ ܬܽܘܒ܆ ܘܶܐܬܛܰܢܦܰܬ ܐܰܪܥܳܐ ܒܰܕܡ̈ܶܐ ܕܩ̈ܶܛܠܶܐ܆ ܘܶܐܣܬܰܝܒܰܬ ܒܰܥ̈ܒܳܕܰܝܗܽܘܢ ܘܙܰܢܺܝܘ ܒܰܐܡ̈ܢܶܐ ܕܺܝܠܗܽܘܢ. ܘܳܐܦ ܒܕܺܝ̈ܢܶܐ ܕܶܝܢ ܒܳܗ̇ ܒܰܕܡܽܘܬܳܐ܆ ܘܠܳܐ ܐܶܫܟܰܚܘ ܠܰܡܩܳܡ ܠܽܘܩܒܰܠ ܦܰܪܨܽܘܦܳܐ ܕܰܒܥܶܠ̈ܕܒܳܒܰܝܗܽܘܢ܆ ܒܟܽܠܗܶܝܢ ܗܳܠܶܝܢ ܕܰܡܙܰܢܶܝܢ ܗ̱ܘܰܘ. ܘܺܐܝܕܶܗ ܕܡܳܪܝܳܐ ܐܺܝܬܶܝܗ̇ ܗ̱ܘܳܬ ܥܠܰܝܗܽܘܢ ܠܒܺܝ̈ܫܳܬܳܐ. ܘܳܐܦ ܥܺܕܬܳܐ ܗܳܟܺܝܠ ܡܶܢ ܕܰܐܝܟ ܗܳܠܶܝܢ ܐܰܡ̈ܢܶܐ ܘܗܽܘ̈ܦܳܟܶܐ ܐܰܬܺܝ̣ܝ̣ܳܐ ܗ̱ܘܳܬ܆ ܐܳܦ ܒܗܳܠܶܝܢ ܡܪܰܒܝܳܐ ܗ̱ܘܳܬ ܘܺܐܝܬܶܝܗ̇ ܗ̱ܘܳܬ ܚܰܛܳܝܬܳܐ܆ ܒܰܚܛܺܝܬܳܐ ܗܳܝ ܡܦܰܬܰܟܬܳܐ ܘܣܰܓܺܝܰܐܬ̣ ܙܢܰܝ̈ܳܐ.

ܝܰܬܺܝܪ ܡܫܰܘܕܥܳܢܳܐܺܝܬ ܕܶܝܢ ܐܺܝܬܶܝܗ̇ ܣܰܓܺܝ܆ ܐܳܦ ܗܳܝ ܕܗܳܐ ܐܰܢ̱ܬܬܳܐ ܒܰܡܕܺܝܢ̱ܬܳܐ ܡܰܘܣܦܳܐ ܟܬܺܝܒܳܐ. ܛܒܺܝܒܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܒܒܺܝܫܽܘܬܳܐ܆ ܐܰܝܟ ܕܰܠܟܽܠܳܗ̇ ܡܕܺܝܢ̱ܬܳܐ܆ ܡܰܠܽܘܢ ܕܶܝܢ ܠܟܽܠ ܡܕܺܝܢ̱ܬܳܐ ܘܠܳܗ̇ ܠܡܶܬܥܰܡܪܳܢܺܝܬܳܐ ܬܶܬܺܝܕܰܥ. ܘܗܳܟܰܢܳܐ ܟܰܕ ܒܺܝܫܳܐܺܝܬ ܐܺܝܬ ܠܳܗ̇ ܐܶܬܩܰܪܒܰܬ ܠܰܘ ܦܫܺܝܛܳܐܺܝܬ. ܐܶܠܳܐ ܟܰܕ ܐܶܫܬܰܘܕܥܰܬ ܠܰܡܫܺܝܚܳܐ ܒܥܰܝ̈ܢܶܐ ܕܺܝܕܰܥܬܳܐ. ܐܶܫܬܰܘܕܥܰܬ ܓܶܝܪ ܐܳܡܰܪ܆ ܕܰܒܒܰܝܬܳܐ ܕܰܦܪܺܝܫܳܝܳܐ ܗܰܘ ܓܢܶܐ. ܠܫܳܛܺܝܦܬܳܐ ܕܡܽܘܪܽܘܢ ܚܘܺܝܚܳܐܺܝܬ ܐܰܝܬܝܰܬ̣^[18]܆ ܠܗܰܝܡܳܢܽܘܬܳܐ ܫܒܺܝܚܬܳܐ ܘܫܰܪܺܝܪܬܳܐ ܘܰܕܟܺܝܬܳܐ܆ ܕܰܐܟܙܢܳܐ ܕܰܒܡܳܐܢܳܐ ܗܰܘ ܕܡܶܢ ܙܓܽܘܓܺܝܬܳܐ܆ ܠܰܥܒܳܕܳܐ ܒܰܣܺܝܡ ܪܺܝܚܳܐ ܘܰܡܚܰܠܛܳܐ ܗܰܘ ܕܡܶܢ ܟܽܠܗܶܝܢ ܡܝܰܬܪ̈ܳܬܳܐ ܚܳܒܫܳܐ܆ ܗܳܕܶܐ ܓܶܝܪ ܐܺܝܬܰܘܗ̱ܝ ܡܽܘܪܽܘܢ ܗܰܘ ܡܶܬܗܰܘܢܳܢܳܐ.

ܘܟܰܕ ܩܳܡܰܬ ܡܶܢ ܒܶܣܬܪܳܐ܆ ܗܳܢܰܘ ܕܶܝܢ ܡܶܢ ܒܳܬܰܪ ܟܢܽܘܫܬܳܐ ܟܰܕ ܒܛܶܟܣܳܐ ܬܪܰܝܳܢܳܐ ܩܰܪܝܳܐ ܗ̱ܘܳܬ ܘܰܢܣܺܝܒܳܐ܆ ܗܳܝ ܟܺܝܬ ܕܳܐܦ ܗܶܢܽܘܢ ܫܠܺܝ̈ܚܶܐ ܠܝܽܗ̱ܘ̈ܕܳܝܶܐ ܕܠܳܐ ܡܗܰܝܡܢܺܝܢ ܗ̱ܘܰܘ܆ ܘܠܶܐܘܰܢܓܶܠܺܝܽܘܢ ܠܳܐ ܡܶܫܬܰܡܥܺܝܢ ܗ̱ܘܰܘ ܐܳܡܪܺܝܢ ܗ̱ܘܰܘ܆ ܕܰܠܟܽܘܢ ܐܺܝܬܶܝܗ̇ ܗ̱ܘܳܬ ܐܳ‌ܠܨܳܝܬܳܐ ܕܰܢ݀ܡܰܠܶܠ ܩܰܕܡܳܐܺܝܬ ܡܶܠܬܳܐ ܕܰܐ‌ܠܳܗܳܐ܆ ܡܶܛܽܠ ܕܶܝܢ ܕܕܳܚܶܝܢ ܐܢ̱ܬܽܘܢ ܠܳܗ̇ ܡܶܢܟܽܘܢ܆ ܘܰܕܠܳܐ ܫܳܘܶܝܢ ܐܢ̱ܬܽܘܢ ܠܚܰܝ̈ܶܐ ܕܰܠܥܳܠܰܡ ܕܳܝܢܺܝܢ ܐܢ̱ܬܽܘܢ ܐܢ̱ܬܽܘܢ ܠܟܽܘܢ܆ ܗܳܐ ܡܶܬܦܢܶܝܢ ܚ̱ܢܰܢ ܠܰܢ ܠܘܳܬ ܥܰܡ̱ܡ̈ܶܐ܆ ܗܳܟܰܢܐ ܓܶܝܪ ܡܳܪܰܢ ܦܩܰܕ ܠܰܢ܆ ܣܳܡܬܳܟ ܠܢܽܘܗܪܳܐ ܕܥܰܡ̱ܡ̈ܶܐ ܕܬܶܗܘܶܐ ܠܦܽܘܪܩܳܢܳܐ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ܆ ܟܰܕ ܫܳܡܥܺܝܢ ܗ̱ܘܰܘ ܕܶܝܢ ܥܰܡ̱ܡ̈ܶܐ܆ ܚܳܕܶܝܢ ܗ̱ܘܰܘ ܘܰܡܫܰܒܚܺܝܢ ܠܡܶܠܬܳܐ ܕܡܳܪܝܳܐ^[19]܆ ܡܶܛܽܠ ܗܳܟܺܝܠ ܕܚܳܕܝܳܐ ܗ̱ܘܳܬ ܥܺܕܬܳܐ ܗܳܝ ܕܡܶܢ ܥܰܡ̱ܡ̈ܶܐ܆ ܘܰܡܫܰܒܚܳܐ ܗ̱ܘܳܬ ܠܡܶܠܬܳܐ ܕܡܶܪܝܳܐ܆ ܟܰܕ ܩܰܒܶܠܬܳܗ̇ ܚܳܕܝܳܐܺܝܬ ܗܳܝ ܕܡܶܢ ܩܕܺܝܡ ܐܰܢ̱ܬܬܳܐ ܚܰܛܳܝܬܳܐ܆ ܒܳܟܝܳܐ ܡܰܢ ܥܰܠ ܗܳܠܶܝܢ ܕܡܶܢ ܩܕܺܝܡ ܡܶܬܕܰܒܪ̈ܳܢ ܗ̱ܘܰܝ̈ ܠܳܗ̇܆ ܚܳܕܝܳܐ ܕܶܝܢ ܥܰܠ ܗܳܠܶܝܢ ܕܗܳܐ ܡܶܢ ܟܰܕܽܘ ܗܘ̣̈ܰܝ ܬܚܶܝܬ ܫܽܘܪܳܝܳܐ ܘܡܶܣ̈ܬܰܟܝܳܢ ܬܽܘܒ܆ ܘܠܳܐ ܡܶܬܠܰܒܟܳܢܳܐܺܝܬ ܡܢܰܫܩܳܐ. ܡܢܰܫܩܳܐ ܕܶܝܢ ܠܰܘ ܒܰܛܺܝܠܳܐܺܝܬ^[20]܆ ܐܶܠܳܐ ܟܰܕ ܒܡܽܘܪܽܘܢ ܠܪ̈ܶܓܠܰܘܗ̱ܝ ܡܳܫܚܳܐ܆ ܘܢܳܩܦܳܐ ܠܥܶܩ̈ܒܳܬܶܗ ܒܝܰܕ ܦܽܘܠܚܳܢܳܐ ܕܰܡܝܰܬܪ̈ܳܬܳܐ.

ܡܶܢ ܗܳܪܟܳܐ ܐܳܦ ܟܰܕ ܡܒܰܚܶܢ ܠܳܗ̇ ܘܰܡܦܰܚܶܡ܆ ܘܣܳܐܶܡ ܠܳܗ̇ ܠܽܘܩܒܰܠ ܟܢܽܘܫܬܳܐ܆ ܠܘܳܬ ܗܰܘ ܦܪܺܝܫܳܝܳܐ ܐܳܡܰܪ ܗ̱ܘܳܐ ܡܫܺܝܚܳܐ ܐܰܝܟ ܕܰܒܛܽܘܦܣܳܐ܆ ܢܽܘܫܰܩܬܳܐ ܠܺܝ ܠܳܐ ܝܰܗ̱ܒܬ^[21]. ܐܶܢ ܓܶܝܪ ܐܳܦ ܡܶܕܶܡ ܣܶܥܪܰܬ ܒܰܙܒܰܢ ܟܢܽܘܫܬܳܐ ܡܶܢ ܗܳܠܶܝܢ ܕܰܦܩܺܝ̈ܕܳܢ܆ ܒܪܶܚܡܬܳܐ ܡܰܢ ܘܠܳܐ ܟܽܠ ܟܽܠܶܗ܆ ܒܕܶܚܠܬܳܐ ܕܶܝܢ ܡܰܠܽܘܢ ܥܰܒܕܳܢܳܐܺܝܬ܆ ܘܒܰܕܡܽܘܬ ܥܰܒܕܳܐ ܥܒܰܕܬܶܗ. ܡܶܛܽܠܗܳܕܶܐ ܐܳܦ ܟܰܕ ܣܳܐܶܡ ܗ̱ܘܳܐ ܠܗܽܘܢ ܐܰ‌ܠܳܗܳܐ ܢܳܡܽܘܣܳܐ܆ ܫܽܘܢܳܩ̈ܶܐ ܕܰܩܕܳܡ ܪ̈ܶܓܠܶܐ ܣܺܝܡܺܝܢ ܗ̱ܘܰܘ ܘܡܶܚܕܳܐ ܒܰܪܫܳܥܬܶܗ ܦܳܓܥܺܝܢ^[22] ܗ̱ܘܰܘ ܓܳܙܶܡ ܗ̱ܘܳܐ܆ ܐܰܝܟܰܢܳܐ ܕܟܰܕ ܐܰܝܟ ܥܰܒ̈ܕܶܐ ܡܶܢ ܗܳܝ ܕܒܳܬܰܪ ܩܰܠܺܝܠ ܢܶܚܫܽܘܢ ܕܳܚܠܺܝܢ ܢܶܬܪܰܟܢܽܘܢ ܠܦܽܘܩ̈ܕܳܢܶܐ܆ ܘܠܰܘ ܟܰܕ ܐܰܝܟ ܒܢܰܝ̈ܳܐ ܠܰܐܒܳܐ ܒܪܶܚܡܬܳܐ ܡܶܬܬܦܺܝܣܺܝܢ܆ ܘܗܳܕܶܐ ܐܺܝܬܶܝܗ̇ ܗ̱ܘܳܬ ܗܳܝ ܕܦܰܘܠܽܘܤ ܟܰܕ ܠܪ̈ܽܘܡܳܝܶܐ ܫܳܠܰܚ ܐܳܡܰܪ ܗ̱ܘܳܐ܆ ܠܳܐ ܓܶܝܪ ܢܣܰܒܬܽܘܢ ܪܽܘܚܳܐ ܕܣܳܝܽܘܡܽܘܬ ܒܢܰܝ̈ܳܐ܆ ܗܳܝ ܕܒܳܗ̇ ܩܳܥܶܝܢ ܚ̱ܢܰܢ ܐܰܒܳܐ ܐܰܒܳܐ^[23]. ܐܰܡܺܝܪܳܐ ܗ̱ܘܳܬ ܡܰܢ ܓܶܝܪ܆ ܐܳܦ ܒܢܳܡܽܘܣܳܐ ܗܰܘ ܕܬܶܪܚܰܡ ܠܡܳܪܝܳܐ ܐܰ‌ܠܳܗܳܟ^[24]. ܒܪܶܚܡܬܳܐ ܕܶܝܢ ܠܗܳܕܶܐ ܠܳܐ ܡܬܰܪܨܺܝܢ ܗ̱ܘܰܘ ܗܳܢܽܘܢ ܕܶܐܬܬܣܺܝܡ ܠܗܽܘܢ ܢܳܡܽܘܣܳܐ. ܐܶܠܳܐ ܒܕܶܚܠܬܳܐ ܒܰܠܚܽܘܕ܆ ܐܰܝܟ ܕܶܐܡܪܶܬ. ܗܳܪܟܳܐ ܕܶܝܢ ܟܺܝܬ ܦܰܬܝܳܐ ܘܰܕܝܰܬܺܝܪ ܡܥܰܠܰܝ ܣܰܓܺܝ܆ ܘܰܕܛܳܒ ܡܬܺܝܚ ܐܺܝܬܰܘܗ̱ܝ ܦܽܘܩܕܳܢܳܐ. ܐܳܡܰܪ ܓܶܝܪ ܗܰܘ ܕܪܳܚܶܡ ܠܰܐܒܳܐ ܐܰܘ ܠܶܐܡܳܐ ܝܰܬܺܝܪ ܡܶܢ ܕܠܺܝ ܠܳܐ ܫܳܘܶܐ ܠܺܝ. ܗܰܘ ܕܪܳܚܶܡ ܠܰܒܪܳܐ ܐܰܘ ܠܒܰܪܬܳܐ ܝܰܬܺܝܪ ܡܶܢ ܕܠܺܝ ܠܳܐ ܫܳܘܶܐ ܠܺܝ. ܘܗܰܘ ܕܢܰܘܒܶܕ ܢܰܦܫܶܗ ܡܶܛܽܠܳܬܝ ܢܶܫܟܚܺܝܗ̇.^[25] ܨܳܒܶܐ ܓܶܝܪ ܕܪܶܚܡܬܳܐ ܗܳܝ ܕܰܡܒܰܕܪܳܐ ܒܰܒ̈ܢܰܝ ܐ̱ܢܳܫܳܐ܆ ܘܰܡܦܰܠܓܳܐ ܒܰܐܬܪܳܐ ܕܒܶܝܬ ܐܰܒܳܗ̈ܶܐ܆ ܘܰܒܓܶܢܣܳܐ ܘܒܰܐ̱ܚܝܳܢܽܘܬܳܐ ܕܙܽܘܘܳܓܳܐ ܐܰܘ ܕܪܳܚܡܽܘܬܳܐ܆ ܘܰܒܟܽܠܗܶܝܢ ܗܳܠܶܝܢ ܕܰܠܒܰܪ܆ ܒܶܗ ܒܰܠܚܽܘܕܰܘܗ̱ܝ ܬܶܬܟܰܢܰܫ.

ܘܰܠܗܳܕܶܐ ܫܰܪܺܝܪܳܐܺܝܬ ܐܰܝܟ ܒܰܪܬܳܐ ܘܰܐܝܟ ܕܫܳܘܶܐ ܠܣܳܝܽܘܡܽܘܬ ܒܢܰܝ̈ܳܐ܆ ܘܚܰܡܺܝܡܳܐܺܝܬ ܚܰܘܝܰܬ ܗܺܝ ܥܺܕܬܳܐ܆ ܟܕ ܥܰܠ ܩܺܝܢ̈ܕܽܘܢܽܘ ܕܰܚܠܳܦܰܘܗ̱ܝ ܪܶܗܛܰܬ̣܆ ܘܒܰܐܓܽܘ̈ܢܶܐ ܕܣܳܗܕܽܘܬܳܐ ܘܰܒܚܰܫ̈ܶܐ ܕܡܶܛܽܠ ܫܰܦܺܝܪܽܘܬ ܕܶܚܠܬܳܐ ܫܰܪܰܪܬܳܗ̇ ܠܟܳܪܽܘܙܽܘܬܳܐ܆ ܥܕܰܡܳܐ ܕܚܶܒܫܰܬ ܒܦܳܣܺܝ̈ܩܳܬܳܐ ܠܡܺܐܡܰܪ ܠܟܽܠܶܗ ܚܽܘܕܪܳܗ̇ ܕܰܐܪܥܳܐ. ܐܳܦܶܢ ܓܶܝܪ ܘܒܶܐܘܰܢܓ̈ܶܠܺܝܰܐ ܓܙܺܝܡܳܐ ܗ̱ܘܳܬ ܢܽܘܪܳܐ ܕܠܳܐ ܕܳܥܟܳܐ܆ ܐܶܠܳܐ ܠܰܘ ܡܶܚܕܳܐ ܒܰܪܫܳܥܬܶܗ ܥܰܒܕܳܢܳܐܺܝܬ ܦܳܪܚܳܐ ܗ̱ܘܳܬ ܘܫܳܘܪܳܐ ܡܶܢ ܕܶܚܠܬܳܐ. ܗܳܝ ܓܶܝܪ ܕܰܒܪܽܘܚܩܳܐ ܡܰܒܥܕܳܐ܆ ܠܳܐ ܡܶܣܬܰܒܪܳܐ ܠܣܰܓܺܝ̈ܶܐܐ ܕܺܐܝܬܶܝܗ̇ ܕܚܺܝܠܬܳܐ. ܒܪܶܚܡܬܳܐ ܗܳܟܺܝܠ ܩܰܒܠܰܬ̣ ܥܠܶܝܗ̇ ܥܺܕܬܳܐ ܚܰܫ̈ܶܐ ܗܳܠܶܝܢ ܕܰܚܠܳܦ ܡܫܺܝܚܳܐ܆ ܘܰܒܗܳܠܶܝܢ ܚܰܡܣܢܰܬ. ܡܶܛܽܠ ܗܳܕܶܐ ܘܰܠܘܳܬ ܗܰܘ ܦܪܺܝܫܳܝܳܐ ܐܳܡܰܪ ܗ̱ܘܳܐ܆ ܗܳܕܶܐ ܕܶܝܢ ܡܶܢ ܟܰܕ ܥܶܠܰܬ ܠܳܐ ܒܶܛܠܰܬ ܡܶܢ ܕܰܡܢܰܫܩܳܐ ܠܪ̈ܶܓܠܰܝ^[26]. ܘܳܐܦ ܗܳܝ ܕܶܝܢ܆ ܣܰܓܺܝ ܐܺܝܬܶܝܗ̇ ܡܚܰܘܝܳܢܺܝܬܳܐ ܕܪܶܚܡܬܳܐ ܕܡܶܛܽܠ ܡܫܺܝܚܳܐ. ܠܳܐ ܓܶܝܪ ܐܶܡܰܪ ܕܗܰܘ ܕܪܳܚܶܡ ܠܰܐܒܳܐ ܐܰܘ ܠܶܐܡܳܐ ܝܰܬܺܝܪ ܡܶܢ ܕܠܺܝ^6: ܗܳܢܳܐ ܡܶܕܶܡ ܢܶܚܰܫ ܐܰܘ ܢܶܫܬܰܢܰܩ. ܐܶܠܳܐ ܕܠܳܐ ܫܳܘܶܐ ܠܺܝ. ܗܳܕܶܐ ܕܶܝܢ܆ ܕܗܳܢܽܘܢ ܕܺܐܝܬ ܠܗܽܘܢ ܫܽܘܦܪܳܐ ܪܓܺܝܓܳܐ ܐܺܝܬܶܝܗ̇ ܕܺܝܠܳܝܬܳܐ ܕܢܺܐܡܪܽܘܢ܆ ܘܰܬܟܺܝܠܺܝܢ ܕܰܠܗܳܢܽܘܢ ܕܪܳܓܶܝܢ ܕܠܳܐ ܚܶܪܝܳܢܳܐ ܢܶܓܒܽܘܢ. ܒܗܳܝ ܟܺܝܬ ܕܳܐܦ ܟܰܕ ܒܶܠܥܰܬ ܒܳܗ̇ ܐܰܢ̱ܬܬܳܐ ܗܳܝ ܚܰܛܳܝܬܳܐ܆ ܡܢܰܫܩܳܐ ܗ̱ܘܳܬ ܠܪ̈ܶܓܠܰܘܗ̱ܝ. ܘܰܠܪܺܝܫܳܗ̇ ܡܰܪܟܢܳܐ ܗ̱ܘܳܬ܆ ܟܰܕ ܒܣܰܥܪܳܗ̇ ܠܪܰܛܺܝܒܽܘܬܳܐ ܕܕܶܡ̈ܥܶܐ ܡܟܰܦܪܳܐ ܗ̱ܘܳܬ. ܘܦܶܛܪܽܘܤ ܡܰܢ ܟܰܕ ܫܡܰܥ ܒܡܰܪܫܽܘܬܳܐ܆ ܗܳܝ ܕܶܐܢ ܠܳܐ ܡܫܺܝܓ ܐ̱ܢܳܐ ܠܳܟ ܠܰܝܬ ܠܳܟ ܡܢܳܬܳܐ ܥܰܡܝ܆ ܟܰܕ ܕܚܶܠ ‌ܐܳܡܰܪ ܗ̱ܘܳܐ܆ ܕܠܰܘ ܪ̈ܶܓܠܰܝ ܒܰܠܚܽܘܕ܆ ܐܶܠܳܐ ܐܳܦ ܪܺܝܫܝ^[27].

ܗܳܕܶܐ ܕܶܝܢ ܚܰܡܺܝܡܳܐܺܝܬ ܐܰܝܟ ܐܰܝ̇ܕܳܐ ܕܡܰܚܒܳܐ܆ ܠܪܺܝܫܳܗ̇ ܚܰܛܳܝܳܐ܆ ܕܢܶܓܫܽܘܦ ܒܪ̈ܶܓܠܶܐ ܗܳܠܶܝܢ ܐܰ‌ܠܳܗܳܝ̈ܳܬܳܐ ܥܳܒܕܳܐ ܗ̱ܘܳܬ. ܘܟܰܕ ܒܡܰܝ̈ܳܐ ܗܳܠܶܝܢ ܕܡܶܢ ܕܶܡ̈ܥܶܐ ܣܳܚܶܐ ܗ̱ܘܳܐ܆ ܕܰܒܝܰܕ ܦܰܣ̈ܶܐ ܕܪ̈ܶܓܠܰܘܗ̱ܝ ܕܝܶܫܽܘܥ ܪܳܕܶܝܢ ܗ̱ܘܰܘ ܘܢܳܚܬܺܝܢ܆ ܟܽܠܳܗ̇ ܡܰܪܓܫܳܢܽܘܬܳܐ ܡܶܬܡܠܶܐ ܗ̱ܘܳܐ܆ ܟܰܕ ܡܶܢ ܩܕܺܝܡ ܠܳܐ ܡܰܪܓܶܫ ܗ̱ܘܳܐ ܒܗܳܠܶܝܢ ܕܚ̈ܰܛܝܳܢ ܗ̱ܘܰܝ̈܆ ܡܶܛܽܠ ܥܝܳܕܳܐ ܗܰܘ ܕܡܶܢ ܙܰܒܢܳܐ ܣܰܓܺܝܳܐܐ. ܓܕܽܘܠܳܐ ܗܰܘ ܕܣܰܥܪܳܐ܆ ܠܳܐ ܡܰܪܓܫܳܢܳܐ ܡܶܕܶܡ ܡܶܣܬܒܰܪ ܕܺܐܝܬܰܘܗ̱ܝ܆ ܒܗܳܝ ܕܡܶܬܦܣܶܩ ܘܠܳܐ ܥܳܒܶܕ ܟܺܐܒܳܐ ܒܦܰܓܪܳܐ܆ ܐܰܟܙܢܳܐ ܕܗܰܕܳܡ̈ܶܐ ܟܰܕ ܡܶܬܦܰܣܩܺܝܢ. ܟܰܕ ܗܳܟܺܝܠ ܒܣܰܥܪܳܗ̇ ܡܟܰܦܪܳܐ ܗ̱ܘܳܬ ܠܗܶܝܢ ܠܪ̈ܶܓܠܶܐ܆ ܠܠܳܐ ܡܰܪܓܫܳܢܽܘܬܳܐ ܓܳܪܕܳܐ ܗ̱ܘܳܬ ܡܶܢܳܗ̇. ܡܶܛܽܠܗܳܕܶܐ ܐܳܦ ܡܰܪܓܫܳܐ ܗ̱ܘܳܬ ܒܫܽܘܒܩܳܢܳܐ ܗܰܘ ܣܰܓܺܝܳܐܐ ܕܰܚ̈ܛܳܗܶܐ܆ ܘܡܰܚܒܳܐ ܗ̱ܘܳܬ ܣܰܓܺܝ. ܗܰܘ ܓܶܝܪ ܕܩܰܠܺܝܠ ܡܶܫܬܒܶܩ ܠܶܗ ܐܳܡܰܪ܆ ܩܰܠܺܝܠ ܡܰܚܶܒ^[28].

ܗܳܕܶܐ ܕܶܝܢ ܐܶܬܐܰܡܪܰܬ܆ ܠܘܳܬ ܡܰܟܣܳܢܽܘܬܳܐ ܕܰܦܪܺܝܫܳܝܳܐ ܗܰܘ܆ ܘܕܰܟܢܽܘܫܬܳܐ ܗܳܝ ܕܡܰܣܒܪܳܐ ܕܰܒܝܰܕ ܙܰܕܺܝܩܽܘܬܳܐ ܕܰܒܢܳܡܽܘܣܳܐ ܠܗܳܝ ܟܺܝܬ ܕܳܐܦܠܳܐ ܣܥܰܪܬܳܗ̇܆ ܥܰܠ ܫܽܘܒܩܳܢܳܐ ܙܥܽܘܪܳܐ ܣܢܺܝܩܳܐ. ܗܰܘ ܓܶܝܪ ܕܣܳܟ ܡܰܪܓܶܫ܆ ܐܳܦܶܢ ܣܰܓܺܝ ܡܶܣܬܒܰܪ ܙܰܕܺܝܩܳܐ܆ ܝܳܕܰܥ ܗ̱ܘ̣ ܕܥܰܠ ܫܽܘܒܩܳܢܳܐ ܣܰܓܺܝܳܐܐ ܐܺܝܬܰܘܗ̱ܝ ܣܢܺܝܩܳܐ. ܘܰܐܝܟ ܗܰܘ ܕܣܰܓܺܝ̈ܳܐܬܳܐ ܡܶܫܬܰܒ̈ܩܳܢ ܠܶܗ܆ ܙܥܽܘܪܳܐ ܐܳܦ ܠܟܽܠܶܗ ܚܽܘܒܳܐ ܚܳܫܶܒ܆ ܘܗ̱ܝ ܕܰܟܬܺܝܒܳܐ ܒܬܶܫܒ̈ܚܳܬ ܬܶܫܒ̈ܚܳܬܳܐ ܢܺܐܡܰܪ. ܕܶܐܢ ܢܶܬܶܠ ܓܰܒܪܳܐ ܟܽܠ ܡܳܐ ܕܰܩܢܶܐ ܒܥܳܠܡܳܐ ܒܚܽܘܒܳܐ ܡܰܣܠܳܝܽܘ ܢܶܣܠܽܘܢܳܝܗ̱ܝ ^[29].

ܐܶܢ ܐ̱ܢܳܫ ܗܳܟܺܝܠ ܕܢܶܪܚܡܺܝܘܗ̱ܝ ܠܰܡܫܺܝܚܳܐ ܨܳܒܶܐ܆ ܠܳܐ ܪܶܚܡܬܳܐ ܕܠܳܐ ܣܳܥܽܘܪܽܘܬܳܐ. ܒܡܽܘܪܽܘܢ ܕܶܝܢ ܕܰܡܝܰܬܪ̈ܳܬܳܐ ܠܗܳܢܳܐ ܢܶܡܫܽܘܚ. ܟܰܕ ܠܟܽܠ ܦܽܘܩܕܳܢܳܐ ܥܳܒܶܕ. ܘܠܰܘ ܟܰܕ ܠܗܰܘ ܡܰܢ ܥܳܒܶܕ܆ ܠܗܰܘ ܕܶܝܢ ܠܳܐ. ܡܽܘܪܽܘܢ ܓܶܝܪ ܡܶܢ ܟܽܠܗܽܘܢ ܡܶܬܬܰܩܰܢ. ܕܰܐܝܟ ܗܳܢܳܐ ܐܺܝܬܰܘܗ̱ܝ ܐܳܦ ܡܽܘܪܽܘܢ ܗܰܘ ܪܺܝܫܽܘܬ ܟܳܗܢܳܝܳܐ ܘܡܰܠܦܳܢܳܝܳܐ. ܫܳܡܰܥ ܗ̱ܘܳܐ ܓܶܝܪ ܡܶܢ ܐܰ‌ܠܳܗܳܐ ܡܽܘܫܶܐ܆ ܘܰܐܢ̱ܬ ܣܰܒ ܒܶܣ̈ܡܳܢܶܐ܆ ܗܰܒܳܒܳܐ ܕܡܽܘܪܳܐ ܓܰܒܝܳܐ܆ ܚܰܡܶܫܡܳܐܐ ܣܺܝܩ̈ܠܘ. ܘܰܕܩܝܢܐܡܽܘܡܘܢ ܒܰܣܺܝܡ ܪܺܝܚܳܐ. ܦܶܠܓܶܗ ܕܗܳܢܳܐ ܡܰܐܬܶܝܢ ܘܚܰܡܫܺܝܢ ܣܝܩ̈ܠܘ. ܘܰܕܩܰܢܝܳܐ ܒܰܣܺܝܡ ܪܺܝܚܳܐ ܡܰܐܬܶܝܢ ܘܚܰܡܫܺܝܢ. ܘܕܐܝܪܝܤ ܚܰܡܫܡܳܐܐ ܣܝܩ̈ܠܘ ܕܩܽܘܕܫܳܐ. ܘܡܶܫܚܳܐ ܡܶܢ ܙܰܝ̈ܬܶܐ ܐܺܝܢ. ܐܳܕܫܳܐ ܕܶܝܢ ܕܟܰܝܠܳܐ ܐܺܝܬܰܘܗ̱ܝ ܗܳܢܳܐ. ܘܬܶܥܒܕܺܝܘܗ̱ܝ ܡܶܫܚܳܐ܆ ܡܫܺܝܚܽܘܬܳܐ ܩܰܕܺܝܫܬܳܐ. ܡܽܘܪܽܘܢ ܒܰܣܡܳܝܳܐ ܒܽܐܘܡܳܢܽܘܬܳܐ ܕܒܶܣܡܳܐ. ܡܶܫܚܳܐ܆ ܡܫܳܚܳܐ ܩܰܕܺܝܫܳܐ ܢܶܗܘܶܐ^[30].

ܙܳܕܶܩ ܗܳܟܺܝܠ ܕܰܐܝܟ ܕܶܐܬܡܫܰܚܢܰܢ܆ ܗܳܟܰܢܳܐ ܐܳܦ ܠܡܶܠܬܳܐ ܕܡܰܠܦܳܢܽܘܬܳܐ ܢܰܦܶܩ܆ ܡܶܢ ܒܶܣ̈ܡܳܢܶܐ ܗܳܢܽܘܢ ܕܰܒܢܳܡܽܘܣܳܐ ܐܰܡܺܝܪܺܝܢ ܘܠܰܘ ܡܶܢ ܗܰܒܳܒܳܐ ܡܶܕܡ ܐ̱ܚܪܺܢܳܐ ܐܰܟܣܢܳܝܳܐ܆ ܐܳܦܶܢ ܒܰܣܺܝܡܽܘܬ ܪܺܝܚܳܐ ܡܶܕܶܡ ܡܛܰܟܰܢܬܳܐ ܢܶܣܬܒܰܪ ܕܺܐܝܬ ܠܶܗ܆ ܘܰܠܘܳܬ ܫܟܺܝܪܽܘܬܳܐ ܕܰܡܛܰܫܝܳܐ ܢܰܘܒܶܠ܆ ܐܰܝܟ ܙܢܳܐ ܕܪ̈ܶܡܙܶܐ^[31] ܗܳܠܶܝܢ ܕܚܰܢ̈ܦܶܐ. ܗܳܠܶܝܢ ܓܶܝܪ ܕܰܐܝܟ ܗܳܟܰܢ܆ ܠܰܘ ܡܬܰܩܢܳܢ̈ܝܳܬܳܐ ܕܡܽܘܪܽܘܢ܆ ܕܣܰܡܳܐ ܕܶܝܢ ܕܡܰܘܬܳܐ ܡܰܠܽܘܢ ܐܺܝܬܰܝܗܶܝܢ. ܐܳܦ ܗܶܢܽܘܢ ܕܶܝܢ ܗܳܠܶܝܢ ܒܶܣ̈ܡܳܢܶܐ ܕܰܐܡܺܝܪܺܝܢ ܒܢܳܡܽܘܣܳܐ܆ ܕܢܶܬܬܰܩܠܽܘܢ ܙܳܕܶܩ ܐܰܝܟ ܟܰܝ̈ܠܶܐ ܟܺܝܬ ܘܡܰܬܩ̈ܳܠܶܐ ܗܳܢܽܘܢ ܕܰܐܡܺܝܪܺܝܢ܆ ܡܶܢ ܝܳܕܽܘܥ̈ܶܐ ܕܽܐܘܡܳܢܽܘܬܳܐ ܒܰܣܳܡܳܝܬܳܐ ܘܟܳܗܢܳܝܬܳܐ܆ ܡܶܢ ܡܰܐܪ̈ܙܳܢܶܐ ܟܺܝܬ ܕܫܽܘܒܚܳܐ ܬܪܺܝܨܳܐ ܐܳܡܰܪ ܐ̱ܢܳܐ܆ ܘܰܠܗܳܝ ܕܡܶܢ ܬܚܽܘܡ̈ܶܐ ܕܗܳܢܽܘܢ ܢܳܦܩܳܐ ܠܪܽܘܚܩܳܐ ܢܶܫܕܶܐ ܘܰܕܪܽܘܫܥܳܐ ܢܶܚܫܒܺܝܗ̇܆ ܐܳܦܶܢ ܡܶܢ ܫܡܰܝܳܐ ܐܳܬܶܐ ܐ̱ܢܳܫ܆ ܗܰܘ ܐܰܝܢܳܐ ܕܳܐܡܰܪ ܠܶܗ^[32]. ܒܗܳܢܳܐ ܓܶܝܪ ܙܢܳܐ ܐܶܢ ܢܶܬܡܙܓ ܡܽܘܪܽܘܢ ܗܰܘ ܡܰܠܦܳܢܳܝܳܐ ܘܠܳܐ ܙܺܐܦܳܢܳܝܳܐ܆ ܒܡܽܘܪܽܘܢ ܗܰܘ ܣܳܥܽܘܪܳܝܳܐ ܕܗܳܢܽܘܢ ܕܫܳܡܥܺܝܢ܆ ܟܽܠܰܢ ܢܶܗܘܶܐ ܐܰܝܟ ܡܶܠܬܶܗ ܕܦܰܘܠܽܘܤ܆ ܒܰܣܺܝܡܽܘܬ ܪܺܝܚܳܐ ܕܰܡܫܺܝܚܳܐ^[33]. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܺܪܳܐ ܕܡܳܐܐ ܘܰܬܡܳܢܬܰܥܣܪ.

ܥܒ̣ܪ̈ܢܝܗܝ[1]

 ܕܡܬܕܒܪ[2]

ܠܘܩܐ. 7: 36 ـ 38 [3]

ܝܘܚܢܢ. 17: 21 [4]

 ܐܦܣ̈ܝܐ. 4: 2 ـ 4[5]

ܐ. ܩܘܪ̈ܝܢܬܝܐ. 10: 17 [6]

ܡܢܰܫܩܳܐ ܗ̱ܘܳܬ[7]

ܠܘܩܐ. 7: 39 [8]

ܒ. ܡܠܟ̈ܐ. 13: 21 [9]

ܝܘܚܢܢ. 11: 25 [10]

[11]ܡܰܥ̈ܠܬܳܢܳܝܶܐ ܡܥܳܕܺܝܢ ܝܰܘ̈ܢܳܝܶܐ ܠܡܶܩܪܳܐ܆ ܠܝܽܘܠ̈ܦܳܢܶܐ ܗܳܢܽܘܢ ܫܰܪ̈ܘܳܝܶܐ ܘܰܡܫܰܒ̈ܠܳܢܶܐ ܠܗܳܢܽܘܢ ܕܝܳܠܦܺܝܢ܆ ܩܕܳܡ ܐܰܝܢܳܐ ܕܗܽܘ ܝܽܘܠܦܳܢܳܐ ܡܶܕܶܡ. ܐܰܡܺܝܪܺܝܢ ܕܶܝܢ܆ ܐܰܝܟ ܕܡܶܢ ܫܡܳܐ ܕܡܰܥܰܠܬܳܐ

ܠܘܩܐ. 7: 41 ـ 43 [12]

ܐܓܪܬܐ ܕܒ. ܕܒܪܘܟ. 3: 38 [13]

ܡܬܝ. 15: 24 [14]

ܬܢܝܢ ܢܡܘܣܐ. 32: 15 [15]

ܠܘܩܐ. 7: 37 [16]

ܡܙܡܘܪ̈ܐ. 73: 26 [17]

ܠܘܩܐ. 7: 37 [18]

ܦܪܟܣܝܣ. 13: 46 ـ 48 [19]

ܡܫܳܟܳܐܺܝܬ[20]

ܠܘܩܐ. 7: 45 [21]

ܦܳܠܓܥܝܢ؟[22]

 ܪ̈ܗ̱ܘܡܳܝܶܐ. 8: 15[23]

ܬܢܝܢ ܢܡܘܣܐ. 6: 5 [24]

 ܡܬܝ. 10: 37ـ 39[25]

ܠܘܩܐ. 7: 45[26]

ܝܘܚܢܢ. 13: 8 ـ 9 [27]

ܠܘܩܐ. 7: 47 [28]

ܬܫܒ̈ܚܬ ܬܫܒ̈ܚܬܐ. 8: 7 [29]

ܡܦܩܢܐ. 30: 22 ـ 25  ܐܦ 30: 31 [30]

ܡ̈ܰܬܠܶܐ ܦܷ̈ܠܳܐܬܳܐ[31]

ܓܠܛܝ̈ܐ. 1: 8 [32]

ܒ. ܩܘܪ̈ܝܢܬܝܐ. 2: 15 [33]