ܡܺܐܡܪܳܐ ܕܡܳܐܐ ܘܰܫܒܬܥܣܪ

ܥܰܠ ܢܽܘܗܪ̈ܶܐ.

117: ܠܦܽܘܪܩܳܢܳܐ ܗܰܘ ܕܰܒܝܰܕ ܫܶܦ̈ܥܰܘܗ̱ܝ ܝܽܘܪܕܢܳܢ܆ ܕܕܰܟܡܳܐ ܐܺܝܬܰܘܗ̱ܝ ܘܕܰܐܝܟ ܐܰܝܢܳܐ܆ ܩܰܪܺܝܒܳܐ ܗ̄ܝ ܕܳܐܦ ܡܶܢ ܗܳܠܶܝܢ ܕܰܐܝܟ ܕܰܒܪܶܡܙܳܐ ܩܰܕܶܡ̈ܶܝܢ ܐܶܬܚ̈ܰܘܶܝܢ ܠܰܢ̈ܒܺܝܶܐ. ܐܰܟܙܢܳܐ ܕܡܶܢ ܢܽܘܛܦܬܳܐ ܚܕܳܐ ܢܶܬܗܰܓܰܓ ܒܰܠܚܽܘܕ ܘܢܶܬܡܰܗ ܒܗܰܘܢܰܢ܆ ܘܰܢܫܰܒܰܚ ܠܰܐܠܳܗܳܐ ܗܰܘ ܕܰܠܗܳܠܶܝܢ ܕܕܰܐܝܟ ܗܳܟܰܢ ܦܰܪܢܶܤ. ܡܩܰܕܶܡ ܓܶܝܪ ܪܳܫܶܡ ܠܳܗ̇ ܐܶܫܰܥܝܳܐ ܗܰܘ ܣܰܓܺܝ ܪܰܒ ܩܳܠܳܐ ܠܡܶܬܥܰܡܪܳܢܺܝܬܳܐ ܟܽܠܳܗ̇܆ ܒܰܕܡܽܘܬ ܐܰܪܥܳܐ ܡܶܕܶܡ ܨܗܺܝܬܳܐ ܘܟܳܘܪܳܢܳܝܬܳܐ ܘܝܰܒܺܝܫܬܳܐ ܘܚܰܪܒܬܳܐ ܘܰܕܠܳܐ ܦܺܐܪ̈ܶܐ܆ ܕܟܰܕ ܒܫܰܒ̈ܶܐ ܕܺܝܠܳܗ̇ ܩܰܒܠܰܬ ܠܢܰܗܪܳܐ ܗܳܢܳܐ ܥܰܬܺܝܪܳܐ ܘܰܕܡܶܢ ܫܡܰܝܳܐ ܪܳܕܶܐ ܘܶܐܫܬܝܰܬ̣ ܘܰܪܘܳܬ̣܆ ܗܘ̣ܳܬ ܡܶܢ ܫܶܠܝ ܡܰܪܓܳܐ ܘܰܐܝܬܝܰܬ ܗܰܒܳܒ̈ܶܐ ܕܕܽܘܒܳܪܳܐ ܐܶܘܰܢܓܶܠܳܝܳܐ܆ ܘܥܰܡ ܗܳܠܶܝܢ ܐܳܦ ܐܺܝ̈ܠܳܢܶܐ ܕܟܽܠ ܓܢܶܤ܆ ܘܰܡܡܰܪܝܳܐ ܡܰܠܽܘܢ ܕܶܝܢ ܡܚܰܦܝܳܐ ܠܛܽܘܪ̈ܶܐ܆ ܗܳܢܽܘܢ ܕܰܠܘܳܬ ܟܽܠ ‌ܐ̱ܢܳܫ ܡܶܬܬܰܡܗܺܝܢ ܥܰܠ ‌ܐܰܦ̈ܰܝ ܪܰܒܽܘܬܗܽܘܢ ܘܣܰܓܺܝܽܐܘܬܳܐ ܕܺܐܝ̈ܠܳܢܰܝܗܽܘܢ.

ܗܰܒ ܠܺܝ ܓܶܝܪ ܕܐ̱ܢܳܫ ܐܰܝܟ ܕܰܒܬܽܘܢܳܝܳܐ ܘܫܰܪܒܳܐ ܡܶܕܶܡ ܕܰܐܪܥܳܐ ܗܳܝ ܕܟܽܠܶܗ ܗܳܢܳܐ ܐܺܝܬܶܝܗ̇ ܘܕܰܒܦܳܣܺܝ̈ܩܳܬܳܐ ܠܡܺܐܡܰܪ ܠܳܐ ܡܶܣܬܰܝܟܳܢܺܝܬܳܐ܆ ܩܰܕܶܡ ܐܶܫܬܰܥܺܝ ܠܝܰܒܺܝܫܽܘܬܳܗ̇. ܠܠܳܐ ܡܰܦܪܝܳܢܽܘܬܳܗ̇. ܠܢܰܓܺܝܒܽܘܬܳܗ̇. ܠܚܰܪܽܘܒܽܘܬܳܗ̇ ܘܰܠܨܶܕܝܳܗ̇. ܠܠܳܐ ܡܶܣܬܰܟܝܳܢܽܘܬܳܐ ܘܠܰܓܠܺܝܙܽܘܬ ܣܰܒܪܳܗ̇ ܕܰܠܘܳܬ ܗܘܳܝܳܐ ܘܡܰܝܬܝܳܢܽܘܬܳܐ܆ ܕܟܽܠ ܦܺܐܪ̈ܶܐ ܘܥܶܣܒܳܐ ܐܰܘ ܕܥܶܩܳܪܳܐ ܡܶܕܶܡ. ܒܳܬܰܪܟܶܢ ܗܳܢܳܐ ܡܶܢ ܫܶܠܝ܆ ܘܰܠܒܰܪ ܡܶܢ ܟܽܠܳܗ̇ ܡܰܣܒܪܳܢܽܘܬܳܐ܆ ܒܝܰܕ ܚܰܘܪܳܐ ܐܶܬܒܰܩܺܝ ܘܰܡܬܰܚ ܥܰܝܢܶܗ܆ ܘܰܚܙܳܐ ܠܗܳܝ ܕܗܳܟܰܢܳܐ ܪܘܺܝܚܳܐ ܗ̱ܘܳܬ ܕܪܳܘܙܳܐ ܘܥܰܒܺܝܛܳܐ ܒܟܽܠ ܡܶܕܶܡ܆

ܘܡܶܢ ܦܺܐܪ̈ܶܐ ܘܢܶܨܒ̈ܳܬܳܐ ܡܶܬܚܰܙܝܳܐ. ܘܡܶܛܽܘܠ ܣܒܺܝܣܽܘܬܳܐ ܘܪܰܘܡܳܐ ܐܰܟܚܕܳܐ ܕܗܳܠܶܝܢ ܕܺܝ̈ܥܰܝ ܒܳܗ̇܆ ܕܺܐܝܬܶܝܗ̇ ܐܰܪܥܳܐ ܡܶܢ ܚܙܳܬܳܐ܆ ܠܳܐ ܡܶܫܟܚܳܐ ܕܬܶܬܺܝܕܰܥ. ܡܳܢܳܐ ܗܳܟܺܝܠ ܠܳܐ ܐܳܡܰܪ ܗ̱ܘܳܐ ܗܰܘ ܕܕܰܐܝܟ ܗܳܢܳܐ܆ ܠܫܽܘܒܚܳܐ ܕܗܰܘ ܕܰܠܗܳܠܶܝܢ ܗܳܟܰܢܳܐ ܫܰܚܠܶܦ. ܡܝܰܬܪܳܐ ܕܶܝܢ ܠܡܺܐܡܰܪ܆ ܕܰܐܝܟܰܢܳܐ ܠܳܐ ܡܶܬܩܒܰܥ ܗ̱ܘܳܐ܆ ܘܰܐܝܟ ܕܽܘܓܳܐ ܡܶܕܶܡ ܠܳܐ ܡܰܪܓܫܳܢܳܐ ܘܠܳܐ ܡܰܠܳܠܳܐ ܡܩܰܘܶܐ ܗ̱ܘܳܐ܆ ܟܰܕ ܠܗܰܠ ܡܶܢ ܟܽܠ ܡܶܠܬܳܐ ܘܰܠܗܰܠ ܡܶܢ ܗܰܘܢܳܐ ܚܳܙܶܐ ܗ̱ܘܳܐ ܠܶܗ ܠܫܽܘܚܠܳܦܳܐ ܗܰܘ ܕܗܳܟܰܢܳܐ ܐܺܝܬܰܘܗ̱ܝ ܦܐܶܐ ܠܰܐܠܳܗܳܐ܆ ܗܰܘ ܕܰܥܠܰܘܗ̱ܝ ܡܡܰܠܶܠ ܡܰܢ ܐܶܫܰܥܝܳܐ ܟܰܕ ܩܳܕܶܡ ܡܫܰܡܠܶܐ ܠܳܗ̇ ܠܬܶܕܡܽܘܪܬܳܐ ܐ̱ܪܳܙܳܢܳܐܺܝܬ ܒܰܚܙܳܬܳܐ ܢܒܺܝ̣ܳܝ̣ܬܳܐ܆ ܡܡܰܠܶܠ ܕܶܝܢ ܠܰܘ ܐܰܝܟܰܢܳܐ ܕܰܢܚܰܘܶܐ ܠܪܰܒܽܘܬܗܶܝܢ ܕܗܳܠܶܝܢ ܕܡܶܬܚ̈ܰܙܝܳܢ܆ ܐܶܠܳܐ ܐܰܝܟܰܢܳܐ ܕܠܳܐ ܢܶܫܒܩܺܝܘܗ̱ܝ ܕܠܳܐ ܣܳܗܕܳܐ ܠܐ̱ܪܳܙܳܐ ܗܰܘ ܕܟܽܠܶܗ ܗܳܢܳܐ܆ ܗܰܘ ܕܰܥܬܺܝܕ ܕܢܶܗܘܶܐ܆ ܘܡܶܢ ܩܰܕܺܝܡܽܘܬ ܡܶܠܬܳܐ ܕܡܶܛܽܠܳܬܶܗ ܢܶܫܬܰܪܰܪ܆ ܘܢܶܬܬܡܰܗ ܒܰܠܚܽܘܕ ܕܩܰܕܶܡ ܐܶܬܟܪܶܙ ܢܒܺܝܳܐܺܝܬ܆ ܘܠܰܘ ܕܰܐܝܟ ܕܫܳܘܶܐ ܐܶܬܐܡܰܪ܆ ܘܰܡܢܳܬܳܐ ܡܶܕܶܡ ܒܨܺܝܪܬܳܐ ܘܰܕܣܰܓܺܝ ܙܥܽܘܪܝܳܐ ܕܗܳܠܶܝܢ ܕܰܢܦܰܩ̈ܶܝܢ ܒܢܶܣܝܳܢܳܐ. ܐܶ‌ܠܽܘ ܓܶܝܪ ܠܰܘ ܡܶܢ ܐܰܢܰܢܩܺܐ ܐܺܝܬܶܝܗ̇ ܗ̱ܘܳܬ ܕܢܶܬܢܰܒܶܐ܆ ܡܶܢ ܟܽܠ ܦܪܽܘܤ ܡܝܰܩܰܪ ܗ̱ܘܳܐ ܠܶܗ ܒܫܶܬܩܳܐ ܠܪܰܒܽܘܬܶܗ ܕܣܽܘܥܪܳܢܳܐ. ܘܟܰܕ ܒܬܰܪܥܺܝܬܶܗ ܒܗܳܝ ܕܰܥܬܺܝܕܳܐ ܗ̱ܘܳܬ ܐܶܬܛܰܦܰܤ܆ ܐܰܝܟ ܕܒܰܐܝ̇ܕܳܐ ܕܩܰܪܺܝܒܳܐ ܘܰܩܕܳܡ ܥܰܝ̈ܢܶܐ ܐܺܝܬܶܝܗ̇܆ ܒܢܰܦܫܶܗ ܐܰܚܕܳܗ̇ ܠܬܶܕܡܽܘܪܬܳܐ.

ܐܶܠܳܐ ܢܶ݀ܚܙܶܐ ܐܰܝܟܰܢܳܐ ܗܽܘ ܚܶܙܘܳܐ܆ ܡܢܰܣܶܐ ܕܢܶܩܕܽܘܡ ܢܶܪܫܽܘܡ ܐܰܝܟ ܕܰܒܛܽܘܦܣܳܐ ܠܨܰܠܡܳܐ ܗܰܘ ܕܶܐܡܪܶܬ܆ ܕܰܐܪܥܳܐ ܗܳܝ ܝܰܒܺܝܫܬܳܐ܆ ܘܕܶܐܬܗܰܦܟܰܬ ܠܡܰܘܠܕܳܢܽܘܬܳܐ ܟܺܝܬ ܘܰܠܫܰܦܺܝܪܽܘܬ ܡܰܘܥܺܝܬܳܐ. ܕܣܳܦܶܩ ܓܶܝܪ ܐܺܝܬܰܘܗ̱ܝ ܕܰܠܡܰܫܡܰܥܬܳܐ ܕܺܝܠܰܢ ܢܰܬܡܰܗ܆ ܐܳܦܶܢ ܡܶܢ ܫܪܳܪܳܐ ܠܪܽܘܚܩܳܐ ܢܳܦܶܠ ܘܦܳܐܶܫ. ܡܶܬܚܙܶܐ ܗܳܟܺܝܠ ܗܽܘ ܢܒܺܝܳܐ܆ ܐܰܝܟ ܗܰܘ ܕܰܒܪܽܘܚܩܳܐ ܩܳܐܶܡ ܗ̱ܘܳܐ ܘܚܳܐܰܪ ܘܡܶܬܒܰܩܶܐ ܝܰܨܺܝܦܳܐܺܝܬ. ܘܰܠܘܬ ܗܳܝ ܕܰܠܕܰܐܝܟ ܗܳܕܶܐ ܪܶܚܡܰܬ ܐ̱ܢܳܫܽܘܬܳܐ ܥܬܺܝܕܳܐ ܗ̱ܘܳܬ ܕܬܶܫܬܘܶܐ ܡܰܙܥܶܩ ܗ̱ܘܳܐ ܗܳܟܰܢܳܐ. ܚܕܺܝ ܡܰܕܒܪܳܐ ܨܰܗܝܳܐ. ܢܶܪܘܰܙ ܡܰܕܒܪܳܐ. ܘܢܗܒܒ ܐܰܝܟ ܫܽܘܫܰܢܬܳܐ. ܘܢܰܦܪܰܥ ܘܥܳܒܳܐܝܬ^[1] ܢܶܚܕܶܐ. ܘܢܶܪܽܘܙܽܘܢ ܡܰܕܒܪ̈ܶܐ ܕܝܽܘܪܕܢܳܢ. ܘܫܽܘܒܚܳܐ ܕܠܶܒܢܳܢ ܐܶܬܺܝܗܶܒ ܠܶܗ ܘܺܐܝܩܳܪܶܗ ܕܟܰܪܡܠܳܐ. ܘܥܰܡܳܐ ܕܺܝܠܝ ܢܶܚܙܶܐ ܬܶܫܒܽܘܚܬܶܗ ܕܡܳܪܝܳܐ ܘܪܰܘܡܶܗ ܕܰܐ‌ܠܳܗܳܐ^[2].

ܒܰܕܓܽܘܢ^[3] ܗܳܟܺܝܠ ܗܽܘ ܡܰܕܒܪܳܐ܆ ܗܳܢܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ ܟܢܺܝܫܳܐܺܝܬ ܠܡܺܐܡܰܪ ܟܽܠ ܢܰܦܫܳܐ ܕܥܰܡ̱ܡ̈ܶܐ ܕܥܰܠ ‌ܐܰܪܥܳܐ܆ ܕܰܣܦܺܝܩܽܘܬܳܐ ܡܫܰܡܠܰܝܬܳܐ ܕܡܶܢ ܐܰ‌ܠܳܗܳܐ ܟܪܺܝܗܳܐ ܗ̱ܘܳܬ܆ ܢܳܚ ܘܰܫܠܺܝ ܡܶܢ ܨܶܗܝܳܐ. ܠܳܐ ܓܶܝܪ ܐܶܫܬܝܰܬ ܒܰܠܚܽܘܕ܆ ܐܶܠܳܐ ܚܕܳܬ ܘܣܶܒܥܰܬ܆ ܘܰܕܥܳܡܪܳܐ ܒܳܗ̇ ܡܰܠܽܘܢ ܕܶܝܢ ܕܢܳܒܥܳܐ ܡܶܢܳܗ̇ ܗܘ̣ܳܬ ܠܳܗ̇ ܒܝܰܕ ܫܶܦ̈ܥܰܘܗ̱ܝ ܕܝܽܘܪܕܢܳܢ܆ ܗܺܝ ܡܥܺܝܢܳܐ ܕܚܰܝ̈ܶܐ܆ ܗܳܝ ܕܺܐܝܬܶܝܗ̇ ܡܫܺܝܚܳܐ. ܫܳܡܥܳܐ ܓܶܝܪ ܠܦܰܘܠܽܘܤ ܕܳܐܡܰܪ܆ ܕܰܒܒܰܪܢܳܫܳܐ ܗܰܘ ܕܰܠܓܰܘ ܥܳܡܰܪ ܡܫܺܝܚܳܐ^[4]܆ ܟܰܕ ܒܚܰܝܠܳܐ ܐܶܬܥܰܫܢܰܬ ܒܝܰܕ ܪܽܘܚܳܐ܆ ܗܘ̣ܳܬ ܕܶܝܢ ܐܳܦ ܗܰܝܟܠܳܐ ܕܰܐ‌ܠܳܗܳܐ܆ ܗܳܝ ܠܳܐ ܡܶܬܥܰܡܪܳܢܺܝܬܳܐ܆ ܐܳܦ ܒܶܝܬ ܡܰܫܪܝܳܐ ܕܪܽܘܚܳܐ ܩܰܕܺܝܫܳܐ. ܐܶܡܰܪ ܓܶܝܪ ܗܽܘ ܟܰܕ ܗܽܘ ܫܠܺܝܚܳܐ ܠܘܳܬܳܗ̇܆ ܠܳܐ ܝܳܕܥܺܝܢ ܐܢ̱ܬܽܘܢ ܕܗܰܝܟܠܶܗ ܐܺܝܬܰܝܟܽܘܢ ܕܰܐ‌ܠܳܗܳܐ܆ ܘܪܽܘܚܳܐ ܕܰܐ‌ܠܳܗܳܐ ܥܳܡܪܳܐ ܒܟܽܘܢ^[5]. ܐܰܝܟܰܢܳܐ ܓܶܝܪ ܠܳܐ ܥܬܺܝܕܳܐ ܗ̱ܘܳܬ ܕܰܠܗܳܕܶܐ ܬܶܫܬܘܶܐ܆ ܗܳܝ ܕܰܐܝܟ ܫܽܘܫܰܢܬܳܐ ܗܶܒܒܰܬ܆ ܘܰܠܚܶܘܳܪܽܘܬܳܗ̇ ܡܰܢ ܣܰܓܺܝܐܬܳܐ ܕܫܽܘܫܰܢܬܳܐ ܘܰܠܢܰܨܺܝܚܽܘܬܳܗ̇ ܩ̣ܢܳܬ܆ ܘܶܐܬܚܰܘܪܰܬ ܒܝܰܕ ܫܶܦ̈ܥܶܐ ܕܝܽܘܪܕܢܳܢ܆ ܠܒܰܣܺܝܡܽܘܬ ܪܺܝܚܳܗ̇ ܕܶܝܢ ܒܝܕ ܗܳܝ ܕܥܶܒܕܰܬ ܦܽܘܩ̈ܕܳܢܶܐ ܐܶܘܰܢܓ̈ܶܠܳܝܶܐ܆ ܘܬܽܘܒ ܥܰܡ ܦܰܘܠܽܘܤ ܐܰܙܥܩܰܬ܆ ܕܪܺܝܚܳܐ ܒܰܣܺܝܡܳܐ ܕܰܡܫܺܝܚܳܐ ܐܺܝܬܰܝܢ ܠܰܐܠܳܗܳܐ^[6].

ܘܠܰܘ ܕܰܢܗܰܒܶܒ^[7] ܒܰܠܚܽܘܕ ܐܳܡܰܪ ܗܽܘ ܢܒܺܝܳܐ܆ ܐܰܝܟ ܡܰܢ ܕܗܰܒܳܒܳܐ ܚܰܡܳܘܝܽܘܬܳܐ ܡܩܰܒܶܠ܆ ܐܶܠܳܐ ܡܶܢ ܒܳܬܰܪ ܗܳܕܶܐ ܡܶܚܕܳܐ ܐܰܝܬܺܝ ܒܳܬܰܪܟܶܢ܆ ܐܳܦ ܢܶܦ̣ܪܰܥ܆ ܘܥܳܒܳܐܺܝܬ ܢܶܚܕܶܐ. ܘܢܶܪܘܙܽܘܢ ܡܰܕܒܪ̈ܶܐ ܕܝܽܘܪܕܢܳܢ. ܗܳܢܰܘ ܕܶܝܢ܆ ܦܶܪܥܳܐ ܥܰܠ ܦܶܪܥܳܐ ܬܰܦܶܩ ܒܫܽܘܘܫܳܛܳܐ ܕܰܡܝܰܬܪ̈ܳܬܳܐ. ܘܰܒܥܰܒܺܝܛܽܘܬܳܐ ܘܒܰܣܒܺܝܣܽܘܬܳܐ ܘܰܒܪܰܘܡܳܐ܆ ܒܺܐܝ̈ܠܳܢܶܐ ܕܰܒܥܳܒ̈ܶܐ ܬܕܰܡܶܐ. ܐܰܘ ܐܰܝܟܰܢܳܐ ܕܰܡܥܰܠܝܳܐܺܝܬ ܡܰܠܽܘܢ ܢܶܣܬܰܟܰܠ ܠܗܳܝ ܕܥܳܒܳܐܺܝܬ ܢܶܚܕܶܐ܆ ܠܽܘܩܒܰܠ ܗܽܘܠܶܐ ܬܶܚܕܶܐ܆ ܟܰܕ ܥܰܠ ܡܰܪ̈ܗܳܛܶܐ ܘܥܰܠ ܩܶܢ̈ܝܳܢܶܐ ܡܒܰܣܪܳܐ ܒܗܳܝ ܕܚܳܕܝܳܐ ܒܪܽܘܚ܆ ܘܥܰܠ ܣܽܘܥܪ̈ܳܢܶܐ ܐ̱ܚܪ̈ܳܢܶܐ ܗܳܠܶܝܢ ܕܕܳܝܒܺܝܢ܆ ܗܳܠܶܝܢ ܕܰܒܗܽܘܢ ܡܶܬܦܰܪܢܰܤ ܘܡܶܬܢܰܦܰܩ ܥܳܠܡܳܐ ܗܳܢܳܐ܆ ܘܰܠܘܳܬ ܚܰܝ̈ܶܐ ܡܶܕܶܡ ܠܳܐ ܦܰܓܪ̈ܳܢܶܐ ܘܠܳܐ ܗܽܘ̈ܠܳܢܳܝܶܐ ܪܳܗܶܛ ܣܳܠܶܩ. ܠܗܳܝ ܕܳܐܦ ܐܶܬܚܰܙܝܰܬ ܕܣܶܥܪܰܬ܆ ܐܰܝܟܰܢܳܐ ܕܰܟܬܳܒܳܐ ܗܰܘ ܕܦܪܟܣܝܤ ܐܶܫܬܰܥܺܝ ܟܰܕ ܐܳܡܰܪ܆ ܕܟܽܠܗܽܘܢ ܗܳܢܽܘܢ ܕܺܐܝܬܰܝܗܽܘܢ ܗ̱ܘܰܘ ܩܰܢܳܝ̈ܶܐ ܕܩܽܘܪ̈ܝܳܐ ܘܰܕܒ̈ܳܬܶܐ܆ ܟܰܕ ܡܙܰܒܢܺܝܢ ܗ̱ܘܰܘ ܡܰܝܬܶܝܢ ܗ̱ܘܰܘ ܛܺܝ̈ܡܶܐ ܕܗܳܠܶܝܢ ܕܡܶܙܕܰܒ̈ܢܳܢ ܗ̱ܘܰܝ̈ ܘܣܳܝܡܺܝܢ ܗ̱ܘܰܘ ܠܘܳܬ ܪ̈ܶܓܠܰܝܗܽܘܢ ܕܰܫ̈ܠܺܝܚܶܐ܆ ܡܶܬܦܰܠܰܓ ܗ̱ܘܳܐ ܕܶܝܢ ܘܡܶܬܺܝܗܶܒ ܗ̱ܘܳܐ ܠܟܽܠܚܰܕ܆ ܐܰܝܟ ܡܶܕܶܡ ܕܺܐܝܬ ܗ̱ܘܳܐ ܠܶܗ ܣܽܘܢܩܳܢܳܐ^[8].

ܗܺܝ ܟܰܕ ܗܺܝ ܗܳܕܶܐ ܚܰܘܺܝܘ܆ ܐܳܦ ܪ̈ܶܒܘܳܬܳܐ ܗܳܢܶܝܢ ܕܗܳܢܽܘܢ ܕܚܰܝ̈ܶܐ ܦܝܠܘܣ̈ܘܦܝܶܐ ܕܕܰܝܪܳܝܽܘܬܳܐ ܫܰܪܺܝܪܳܐܺܝܬ ܩܰܒܶܠܘ ܥܠܰܝܗܽܘܢ ܕܢܶܬܕܰܒܪܽܘܢ. ܘܟܽܠܗܶܝܢ ܫܠܰܚܘ ܠܰܡܫܺܝܚܳܐ. ܗܳܠܶܝܢ ܘܕܰܐܝܟ ܗܳܠܶܝܢ܆ ܗܰܒܶܒ ܘܰܐܦܪܰܥ ܦܰܩ̈ܥܳܬܳܐ ܚܰܪ̈ܒܳܬܳܐ ܗܳܠܶܝܢ ܕܶܐܬܩܪ̈ܶܝܶܢ ܕܝܽܘܪܕܢܳܢ. ܢܶܪܘܙܽܘܢ ܓܶܝܪ ܐܳܡܰܪ ܡܰܕܒܪ̈ܶܐ ܐܰܘ ܟܺܝܬ ܚܽܘܪ̈ܒܶܐ ܕܝܽܘܪܕܢܳܢ. ܐܳܦ ܓܶܝܪ ܟܰܕ ܐܰܫܩܺܝ ܐܶܢܽܘܢ ܒܫܶܦܥܳܐ ܢܽܘܗܪܳܢܳܝܳܐ ܘܰܥܒܰܕ ܐܶܢܽܘܢ ܛܥܺܝ̈ܢܰܝ ܦܺܐܪ̈ܶܐ܆ ܟܺܐܢܳܐܺܝܬ ܕܢܶܬܩܪܽܘܢ ܕܺܝܠܶܗ ܥܒܰܕ ܐܶܢܽܘܢ. ܗܳܠܶܝܢ ܗܳܝ ܕܡܶܢ ܩܕܺܝܡ ܝܰܒܺܝܫܬܳܐ ܘܰܨܗܺܝܬܳܐ ܐܰܘܥܝܰܬ܆ ܘܫܽܘܒܚܳܐ ܕܠܶܒܢܳܢ ܐܶܬܺܝܗܶܒ ܠܳܗ̇ ܘܺܐܝܩܳܪܶܗ ܕܟܰܪܡܠܳܐ^[9].

ܕܠܶܒܢܳܢ ܕܶܝܢ ܛܽܘܪܳܐ܆ ܕܰܐܪܥܳܐ ܐܺܝܬܰܘܗ̱ܝ ܕܦܽܘܢܺܝ̈ܩܳܝܶܐ܆ ܘܠܳܐ ܠܐ̱ܢܳܫ ܛܰܥܝܳܐ܆ ܗܰܘ ܕܒܶܗ ܕܶܚܠܬܳܐ ܣܰܓܺܝܐܬܳܐ ܕܫ̈ܺܐܕܶܐ ܐܺܝܬ ܗ̱ܘܳܐ܆ ܘܬܶܫܒܽܘܚܬܳܐ ܥܰܬܺܝܪܬܳܐ ܘܪܰܒܬܳܐ ܕܰܐ‌ܠܳܗ̈ܶܐ ܪ̈ܘܡܐ ܘܕܰܓ̈ܳܠܶܐ. ܟܰܪܡܠܳܐ ܕܶܝܢ ܛܽܘܪܳܐ ܐܺܝܬܰܘܗ̱ܝ ܐܳܦ ܗܽܘ. ܕܦܽܘܢܺܝܩܺܝ ܗܰܘ ܕܰܠܘܳܬ ܝܰܡܳܐ ܕܰܥܕܰܡܳܐ ܠܰܓܠܺܝܠܳܐ ܡܳܛܶܐ܆ ܗܰܘ ܕܒܶܗ ܠܶܐܠܺܝܳܐ ܗܰܘ ܬܰܫܒܳܝܳܐ ܐܶܡܰܪ ܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ܆ ܕܥܳܒܶܕ ܗ̱ܘܳܐ ܟܳܘ̈ܫܶܐ ܘܕܽܘܝܳܪ̈ܶܐ ܠܳܐ ܚ̈ܠܺܝܛܶܐ ܘܫܶܠ̈ܝܶܐ܆ ܘܥܰܡ ܐܰ‌ܠܳܗܳܐ ܠܚܽܘܕܰܘܗ̱ܝ ܚܳܝܶܐ ܗ̱ܘܳܐ ܟܺܝܬ ܘܡܶܬܥܢܶܐ ܐܰܘܟܺܝܬ ܡܡܰܠܶܠ^[10]. ܡܶܛܽܠ ܗܳܟܺܝܠ ܕܥܺܕܬܳܐ ܗܳܝ ܕܚܰܪܒܬܳܐ ܐܺܝܬܶܝܗ̇ ܗ̱ܘܳܬ ܘܡܰܕܒܪܳܐ ܡܶܢ ܩܕܺܝܡ܆ ܘܰܠܗܳܢܽܘܢ ܕܡܶܢ ܝܽܗ̱ܘ̈ܕܳܝܶܐ ܘܡܶܢ ܥܰܡ̱ܡ̈ܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ‌ܐܺܝܬܰܝܗܽܘܢ ܗ̱ܘܰܘ ܕܳܚ̈ܠܰܝ ܠܫ̈ܺܐܕܶܐ ܗܰܝܡܶܢܘ ܩܢܳܬ܆ ܘܡܶܢ ܬܪ̈ܰܝܗܽܘܢ ܐܶܬܟܰܢܫܰܬ܆ ܟܰܕ ܐܶܫܬܰܚܠܰܦܘ ܘܫܰܢܺܝܘ ܡܶܢ ܡܰܣܒܪܳܢܽܘܬܗܽܘܢ ܩܰܕܡܳܝܬܳܐ܆ ܢܳܩܦܳܐܺܝܬ ܐܳܡܰܪ ܢܒܺܝܳܐ܆ ܕܺܐܝܩܳܪܗܽܘܢ ܘܫܽܘܒܚܗܽܘܢ ܕܗܳܢܽܘܢ ܕܰܠܘܳܬ ܡܰܕܒܪܳܐ ܢܫܰܢܶܐ܆ ܘܟܽܠܶܗ ܗܳܢܳܐ ܐܰܝܟܰܢܳܐ ܕܢܶܥܒܰܪ ܠܥܶܠ ܡܶܢ ܟܽܠ ܒܪܰܘܡܳܐ. ܡܳܢܳܐ ܕܶܝܢ ܕܢܶܥܒܰܪ ܐܳܡܰܪ ܐ̱ܢܳܐ܆ ܟܰܕ ܣܰܓܺܝܐܬܳܐ ܐܺܝܬܶܝܗ̇ ܗܳܝ ܕܒܰܡܨܰܥܬܳܐ܆ ܘܳܐܦܠܳܐ ܐܺܝܬ ܠܡܺܐܡܰܪ ܕܰܟܡܳܐ. ܢܶܗܘܐ ܓܶܝܪ ܒܡܰܚܫܰܒܬܳܐ ܕܫܽܘܒܚܶܗ ܕܰܐ‌ܠܳܗܳܐ ܡܪܰܝܡܳܐ܆ ܘܢܶܫܬܰܘܬܰܦ ܒܗܳܢܳܐ ܐܰܝܟ ܕܡܰܨܝܳܐ. ܡܶܛܽܠ ܗܳܕܶܐ ܐܰܝܬܺܝ ܒܳܬܰܪܟܶܢ܆ ܟܰܕ ܡܚܰܘܶܐ ܕܳܐܦܠܳܐ ܙܳܕܶܩ ܠܰܡܥܰܩܳܒܽܘܬܶܗ ܘܠܰܡܦܰܚܳܡܽܘܬܶܗ ܠܫܽܘܚܠܳܦܳܐ ܠܘܳܬ ܡܶܕܶܡ ܐ̱ܚܪܺܢܳܐ܆ ܘܥܰܡܳܐ ܕܺܝܠܝ ܢܶܚܙܶܐ ܫܽܘܒܚܶܗ ܕܡܳܪܝܳܐ܆ ܘܪܰܘܡܳܐ ܕܰܐ‌ܠܳܗܳܐ.

ܘܳܐܦ ܡܶܢ ܬܰܡܳܢ ܐܺܝܬ ܠܡܶܚܙܳܐ ܘܳܐܦ ܡܶܢܳܗ̇ ܕܺܝܠܳܗ̇ ܕܬܰܫܥܺܝܬܳܐ܆ ܕܰܐܝܟܰܢܳܐ ܠܘܳܬ ܚܽܘܪ̈ܒܶܐ ܕܝܽܘܪܕܢܳܢ܆ ܗܳܢܶܝܢ ܕܺܐܝܩܳܪܳܐ ܕܟܰܪܡܠܳܐ ܫܳܪ̈ܝܳܢ ܕܰܢܫܰܢ̈ܝܳܢ. ܟܰܕ ܓܶܝܪ ܠܛܽܘܦܣܳܐ ܗܰܘ ܡܰܠܰܐܟܳܝܳܐ ܘܠܳܐ ܦܰܓܪܳܢܳܐ ܕܕܽܘܒܳܪܶܗ ܡܝܰܩܪܳܐ ܕܶܐ‌ܠܺܝܳܐ܆ ܗܰܘ ܕܰܒܟܰܪܡܠܳܐ ܦܝܠܘܣܘܦܝܬܝܢܐ ܗܘ̣ܳܐ܆ ܡܚܰܘܶܐ ܗ̱ܘܳܐ ܝܽܘܚܰܢܳܢ ܥܰܡ ܡܫܰܪܬܚܽܘܬܳܐ ܣܰܓܺܝܐܬܳܐ܆ ܐܶܬܳܐ ܗ̱ܘܳܐ ܠܚܽܘܪܒܳܐ ܗܰܘ ܕܝܽܘܪܕܢܳܢ. ܐܰܟܙܢܳܐ ܓܶܝܪ ܕܟܰܕ ܠܶܐܠܺܝܳܐ ܪܳܫܶܡ ܗ̱ܘܳܐ ܟܬܳܒܳܐ ܗܰܘ ܟܳܗܢܳܝܳܐ ܐܶܡܰܪ܆ ܓܰܒܪܳܐ ܣܰܥܳܪܳܐ ܘܩܰܡܪܳܐ ܕܡܶܫܟܳܐ ܐܰܣܺܝܪ ܥܰܠ ܟܣܳܣܬܶܗ^[11]܆ ܗܳܟܰܢܳܐ ܐܳܦ ܝܽܘܚܰܢܳܢ܆ ܠܰܘ ܒܰܠܚܽܘܕ ܣܰܥܳܪܳܐ܆ ܐܶܠܳܐ ܐܳܦ ܡܶܫܟܳܝ ܓܽܘܫܡܳܐ ܘܚܰܙܽܘܦܳܐ^[12] ܘܡܰܛܪܳܢܳܐ܆ ܘܰܕܟܽܠ ܟܽܠܶܗ ܠܳܐ ܝܺܕܺܝܥ ܠܰܒܢܰܝ̈ܢܳܫܳܐ܆ ܘܕܰܒܚܽܘܪ̈ܒܶܐ ܘܰܒܕܽܘܟ̈ܝܳܬܳܐ ܠܳܐ ܡܥܰܝ̈ܕܳܬܳܐ ܚܝܳܐ ܘܶܐܬܕܰܒܰܪ܆ ܬܡܺܝܗܳܐܺܝܬ ܐܶܬܚܙܺܝ܆ ܕܒܶܗ ܟܰܕ ܒܶܗ ܒܩܰܡܪܳܐ ܐܰܣܺܝܪ ܗ̱ܘܳܐ ܚܰܨܰܘ̈ܗܝ^[13]. ܘܰܐܝܟ ܙܢܳܐ ܕܗܰܘ ܡܶܬܚܰܫܰܚ ܗ̱ܘܳܐ ܒܡܺܝܠܽܘܛܳܐ܆ ܗܳܢܰܘ ܕܶܝܢ ܒܰܦܪܽܘܬܳܐ^[14] ܕܥܶܪܒܳܐ܆ ܘܒܶܗ ܡܶܬܟܰܣܶܐ ܗ̱ܘܳܐ܆ ܒܶܗ ܟܰܕ ܒܶܗ ܒܰܙܢܳܐ ܘܬܽܘܒ ܝܰܬܺܝܪ ܡܚܰܡܣܢܳܢܳܐܺܝܬ ܐܳܦ ܗܳܢܳܐ܆ ܠܒܽܘܫܳܐ ܕܡܶܢ ܣܰܥܪܳܐ ܕܓܰܡ̈ܠܶܐ ܡܰܬܩܰܢ ܗ̱ܘܳܐ ܡܶܬܟܰܣܶܐ ܗ̱ܘܳܐ. ܘܰܐܟܙܢܳܐ ܕܶܐ‌ܠܺܝܳܐ ܥܬܺܝܕ ܕܢܶܩܕܽܘܡ ܢܶܪܗܰܛ ܩܕܳܡ ܡܶܐܬܺܝܬܳܐ ܗܳܝ ܕܬܰܪܬܶܝܢ ܕܰܡܫܺܝܚܳܐ܆ ܐܰܝܟ ܢܒܺܝܽܘܬܶܗ ܕܡܰܠܰܐܟܺܝ ܗܳܝ ܕܳܐܡܪܳܐ܆ ܗܳܐ ܐܶܢܳܐ ܡܫܰܕܰܪ ܐ̱ܢܳܐ ܠܟܽܘܢ ܐܶ‌ܠܺܝܳܐ ܬܰܫܒܳܝܳܐ ܩܕܳܡ ܕܢܺܐܬܶܐ ܝܰܘܡܶܗ ܕܡܳܪܝܳܐ ܗܰܘ ܪܰܒܳܐ ܘܰܕܢܺܝܚܳܐ^[15]܆ ܒܳܗ̇ ܒܰܕܡܽܘܬܳܐ ܐܳܦ ܝܽܘܚܰܢܳܢ ܩܕܳܡ ܗܳܝ ܩܰܕܡܳܝܬܳܐ ܩܰܕܶܡ ܪܗܶܛ. ܡܶܢ ܗܳܪܟܐ ܐܳܦ ܡܳܪܰܢ ܡܶܛܽܠ ܕܳܡܝܽܘܬܶܗ ܕܰܒܟܽܠ ܡܽܘܢ ܕܗܽܘ܆ ܡܶܛܽܠ ܝܽܘܚܰܢܳܢ ܓܰܠܝܳܐܺܝܬ ܐܳܡܰܪ ܗ̱ܘܳܐ܆ ܘܶܐܢ ܨܳܒܶܝܢ ܐܢ̱ܬܽܘܢ ܠܰܡܩܰܒܳܠܽܘ܆ ܗܽܘ ܐܺܝܬܰܘܗ̱ܝ ܐܶ‌ܠܺܝܳܐ ܗܰܘ ܕܰܥܬܺܝܕ ܠܡܶܐܬܳܐ^[16]. ܘܰܒܕܽܘܟܬܳܐ ܐ̱ܚܪܺܬܳܐ ܬܽܘܒ. ܐܳܡܰܪ ܐ̱ܢܳܐ ܠܟܽܘܢ ܕܶܝܢ܆ ܕܶܐ‌ܠܺܝܳܐ ܡܶܢ ܟܰܕܽܘ ܐܶܬܳܐ܆ ܘܠܳܐ ܐܶܫܬܰܘܕܥܽܘܗܝ^[17]. ܘܡܰܝܬܶܐ ܒܳܬܰܪ ܗܳܠܶܝܢ ܗܽܘ ܐܶܘܰܢܓܶܠܝܣܛܐ܆ ܗܳܝܕܶܝܢ ܐܶܣܬܰܟܰܠܘ ܬܰܠ̈ܡܺܝܕܶܐ܆ ܕܡܶܛܽܠ ܝܽܘܚܰܢܳܢ ܡܰܥܡܕܳܢܳܐ ܐܶܡܰܪ ܠܗܽܘܢ^[18].

ܡܶܛܽܠܗܳܕܶܐ ܐܳܦ ܓܰܒܪܐܝܠ ܟܰܕ ܠܰܐܒܽܘܗ̱ܝ ܙܟܰܪܝܳܐ ܓܶܠܝܳܢܳܐ ܐܳܡܰܪ ܗ̱ܘܳܐ܆ ܘܰܠܝܰܠܕܶܗ ܕܝܽܘܚܰܢܳܢ ܗܰܘ ܕܰܥܬܺܝܕ ܗ̱ܘܳܐ ܕܢܶܗܘܶܐ܆ ܘܰܠܗܳܠܶܝܢ ܕܰܥܬܺܝ̈ܕܳܢ ܗ̱ܘܰܝ̈ ܕܢܶܓ̈ܕܫܳܢ ܥܠܰܘܗ̱ܝ ܩܳܕܶܡ ܗ̱ܘܳܐ ܡܰܘܕܰܥ ܐܳܡܰܪ ܗ̱ܘܳܐ܆ ܘܣܰܓܺܝ̈ܶܐܐ ܡܶܢ ܒܢܰܝ̈ܳܐ ܕܺܐܝܣܪܳܐܶܝܠ ܢܰܦܢܶܐ ܠܘܳܬ ܡܳܪܝܳܐ ܐܰ‌ܠܳܗܗܽܘܢ. ܘܗܽܘ ܢܶܩܕܽܘܡ ܢܺܐܙܰܠ ܩܕܳܡܰܘ̈ܗ̱ܝ ܒܪܽܘܚܳܐ ܘܰܒܚܰܝܠܳܐ ܕܶܐ‌ܠܺܝܳܐ܆ ܠܡܰܦܢܳܝܽܘ ܠܶܒ̈ܰܘܳܬܳܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ܆ ܘܰܠܠܳܐ ܡܶܬܬܦܺܝ̈ܣܳܢܶܐ ܒܚܶܟܡܬܳܐ ܕܙܰܕܺܝ̈ܩܶܐ^[19]. ܘܰܕܫܳܥܬܳܐ ܒܗܳܝ ܕܙܳܕܶܩ ܕܰܢܚܽܘܪ܆ ܕܰܐܝܟܰܢܳܐ ܐܶܡܰܪ ܗܽܘ ܡܰܠܰܐܟܳܐ܆ ܘܣܰܓܺܝ̈ܶܐܐ ܡܶܢ ܒܢܰܝ̈ܳܐ ܕܺܐܝܣܪܳܐܶܝܠ ܢܰܦܢܶܐ ܠܘܳܬ ܡܳܪܝܳܐ ܐܰ‌ܠܳܗܗܽܘܢ܆ ܘܰܐ‌ܠ̣ܘܶܬ ܠܳܗ̇܆ ܘܗܽܘ ܢܶܩܕܽܘܡ ܢܺܐܙܰܠ ܩܕܳܡܰܘܗܝ³. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܡܳܪܝܳܐ ܘܰܐ‌ܠܳܗܳܐ ܕܺܐܝܣܪܳܐܶܝܠ ‌ܐܺܝܬܰܘܗ̱ܝ ܗ̱ܘܳܐ ܡܫܺܝܚܳܐ܆ ܗܰܘ ܕܰܩܕܳܡܰܘ̈ܗ̱ܝ ܪܗܶܛ ܝܽܘܚܰܢܳܢ܆ ܟܰܕ ܡܰܦܢܶܐ ܠܶܒ̈ܰܘܳܬܳܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ³. ܡܳܢܳܐ ܕܶܝܢ ܐܺܝܬܶܝܗ̇ ܗܳܕܶܐ. ܝܽܗ̱ܘ̈ܕܳܝܶܐ ܐܳܦ ܕܝܽܘܚܰܢܳܢ ܐܳܦ ܕܰܫ̈ܠܺܝܚܶܐ ܘܳܐܦ ܕܟܽܠܗܽܘܢ ܗܳܢܽܘܢ ܕܰܐܟܪܶܙܘ ܐܶܘܰܢܓܶܠܺܝܽܘܢ܆ ܐܰܒܳܗ̈ܶܐ ܐܺܝܬܰܝܗܽܘܢ ܗ̱ܘܰܘ. ܡܶܢܗܽܘܢ ܓܶܝܪ ܢܳܚܬܺܝܢ ܒܝܽܘܒܳܠܳܐ ܘܳܐܦ ܒܰܐܚܝܳܢܽܘܬܳܐ ܕܰܕܡܳܐ܆ ܘܳܐܦ ܒܝܽܘܠ̈ܦܳܢܶܐ ܐܰܒܳܗ̈ܳܝܶܐ ܕܢܳܡܽܘܣܳܐ ܘܕܰܢܒܺܝ̈ܶܐ. ܐܶܠܳܐ ܒܪܰܡ ܟܰܕ ܐܰܒܳܗ̈ܶܐ ܐܺܝܬܰܝܗܽܘܢ ܗ̱ܘܰܘ܆ ܠܘܳܬ ܐܶܘܰܢܓܶܠܺܝܽܘܢ ܡܶܢ ܡܫܰܩܠܽܘܬܳܐ ܘܰܚܣܳܡܳܐ ܘܠܳܐ ܗܰܝܡܳܢܽܘܬܳܐ ܡܣܰܡܶܝܢ ܗ̱ܘܰܘ܆ ܟܰܕ ܠܳܐ ܡܶܫܬܰܘܕܥܺܝܢ ܗ̱ܘܰܘ ܠܰܡܫܺܝܚܳܐ ܗܰܘ ܕܰܥܠܰܘܗ̱ܝ ܩܰܕܶܡܘ ܐܶܬܢܰܒܺܝܘ ܢܒܺܝ̈ܶܐ܆ ܗܰܘ ܕܰܠܘܳܬܶܗ ܐܳܦ ܝܽܘܚܰܢܳܢ ܐܳܦ ܫ̈ܠܺܝܚܶܐ ܒܰܕܡܽܘܬ ܒܢܰܝ̈ܳܐ ܡܪ̈ܰܚܡܳܢܶܐ܆ ܡܣܰܡܟܺܝܢ ܗ̱ܘܰܘ ܠܗܽܘܢ ܘܢܳܓܕܺܝܢ ܟܰܕ ܝܳܗܒܺܝܢ ܠܗܽܘܢ ܐܺܝܕܳܐ ܡܶܛܽܠ ܕܠܳܐ ܚܳܙܶܝܢ ܗ̱ܘܰܘ܆ ܘܰܠܗܳܝ ܕܫܰܪܺܝܪܳܐ ܡܚܰܘܶܝܢ ܗ̱ܘܰܘ ܠܗܽܘܢ܆ ܟܰܕ ܠܛܺܝ̈ܛܶܐ ܕܠܳܐ ܗܰܝܡܳܢܽܘܬܳܐ ܡܟܰܦܪܺܝܢ ܗ̱ܘܰܘ ܡܶܢܗܽܘܢ܆ ܘܢܳܓܕܺܝܢ ܗ̱ܘܰܘ ܠܗܽܘܢ ܠܘܳܬ ܙܰܕܺܝܩܽܘܬܳܐ ܘܚܶܟܡܬܳܐ ܒܰܝܬܳܝܬܳܐ ܕܺܝܠܗܽܘܢ.

ܡܶܛܽܠܗܳܕܶܐ ܓܶܝܪ ܟܰܕ ܡܢܰܗܰܪ ܗ̱ܘܳܐ ܡܰܠܰܐܟܳܐ܆ ܕܡܳܢܳܐ ܗܝ ܗܳܝ ܕܢܰܦܢܶܐ ܠܶܒܰܘ̈ܳܬܳܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ܆ ܐܰܘܣܶܦ܆ ܘܰܠܠܳܐ ܡܶܬܬܦܺܝ̈ܣܳܢܶܐ ܒܚܶܟܡܬܳܐ ܕܙܰܕܺܝ̈ܩܶܐ^[20]. ܕܗܳܕܶܐ ܓܶܝܪ ܗܳܟܰܢܳܐ ܐܺܝܬܶܝܗ̇܆ ܐܳܦ ܗܽܘ ܡܳܪܰܢ ܟܰܕ ܠܘܳܬܗܽܘܢ ܕܝܽܗ̱ܘ̈ܕܳܝܶܐ ܕܰܡܓܰܕܦܺܝܢ ܗ̱ܘܰܘ ܘܳܐܡܪܺܝܢ܆ ܕܗܳܢܳܐ ܠܳܐ ܡܰܦܶܩ ܕܰܝ̈ܘܶܐ ܐܶܠܳܐ ܐܶܢ ܒܰܒܥܶܠܙܒܽܘܒ ܪܺܝܫܳܐ ܕܕܰܝ̈ܘܶܐ^[21]܆ ܟܰܕ ܩܳܕܶܡ ܗ̱ܘܳܐ ܡܰܘܕܰܥ ܠܬܶܕܡܪ̈ܳܬܳܐ ܗܳܠܶܝܢ ܕܒܳܗ̇ ܒܰܕܡܽܘܬܳܐ ܒܝܰܕ ܫ̈ܠܺܝܚܶܐ ܥܬܺܝ̈ܕܳܢ ܗ̱ܘܰܝ̈ ܠܡܶܗ̱ܘܳܐ܆ ܘܰܠܚܰܝܠܬܳܢܽܘܬܳܐ ܗܳܝ ܕܰܒܪܽܘܚܳܐ ܩܰܕܺܝܫܳܐ ܕܠܽܘܩܒܰܠ ܫ̈ܺܐܕܶܐ܆ ܡܰܒܗܬܳܢܳܐܺܝܬ ܐܳܡܰܪ ܗ̱ܘܳܐ܆ ܐܶܢ ܕܶܝܢ ܐܶܢܳܐ ܒܰܒܥܶܠܙܒܽܘܒ ܡܰܦܶܩ ܐ̱ܢܳܐ ܕܰܝ̈ܘܶܐ܆ ܒܢܰܝ̈ܟܽܘܢ ܒܡܳܢܳܐ ܡܰܦܩܺܝܢ ܠܗܽܘܢ. ܡܶܛܽܠ ܗܳܕܶܐ ܗܶܢܽܘܢ ܢܶܗܘܽܘܢ ܕܰܝܳܢ̈ܶܐ ܕܺܝܠܟܽܘܢ^[22]. ܗܳܟܰܢܳܐ ܐܳܦ ܐܶ‌ܠܺܝܳܐ ܐܶܡܰܬܝ ܕܢܺܐܬܶܐ ܟܰܕ ܪܳܗܶܛ ܩܕܳܡ ܡܶܐܬܺܝܬܶܗ ܗܳܝ ܕܬܰܪܬܶܝܢ ܕܰܡܫܺܝܚܳܐ܆ ܠܝܽܗ̱ܘ̈ܕܳܝܶܐ ܗܳܢܽܘܢ ܕܰܢܩܰܘܽܘܢ ܒܛܰܥܝܽܘܬܳܐ ܗܳܝ ܐܰܒܳܗܳܝܬܳܐ܆ ܘܡܶܬܪܰܘܪܒܺܝܢ ܕܦܰܪܨܽܘܦܳܐ ܕܰܐܒܳܗܰܝ̈ܗܽܘܢ ܐܰܚܺܝܕܺܝܢ܆ ܢܶ݀ܦܢܶܐ ܠܘܳܬ ܫܪܳܪܳܐ ܗܰܘ ܕܰܫ̈ܠܺܝܚܶܐ ܘܰܕܝܽܘܚܰܢܳܢ܆ ܘܰܕܟܽܠܗܽܘܢ ܗܳܢܽܘܢ ܕܰܒܛܶܟܣܳܐ ܕܰܒ̈ܢܰܝܳܐ ܚܫܺܝܒܺܝܢ܆ ܐܰܝܟܰܢܳܐ ܕܫܰܪܟܳܢܶܗ ܕܺܐܝܣܪܳܐܶܝܠ ܢܶܬܦܪܶܩ^[23]܆ ܐܰܝܟ ܡܳܐ ܕܳܐܡܰܪ ܫܠܺܝܚܳܐ.

ܚܳܙܶܝܢ ܐܢ̱ܬܽܘܢ ܐܰܝܟܰܢܳܐ ܠܟܰܪܡܠܶܗ ܕܶܐ‌ܠܺܝܳܐ܆ ܠܘܳܬܗܽܘܢ ܕܺܝܠܗܽܘܢ ܕܚܽܘܪ̈ܒܶܐ ܗܳܢܽܘܢ ܕܝܽܘܪܕܢܳܢ ܫܰܚܠܶܦ ܐܰܥܒܰܪ܆ ܘܝܰܬܺܝܪܳܐ ܪܗܶܛ ܥܒܰܪ܆ ܚܙܳܐ ܓܶܝܪ ܥܰܡܳܐ ܠܬܶܫܒܽܘܚܬܶܗ ܕܡܳܪܝܳܐ܆ ܘܰܠܪܰܘܡܳܐ ܕܰܐ‌ܠܳܗܳܐ^[24]. ܠܥܰܡܰܢܽܘܐܶܝܠ ܕܡܶܛܽܠ ܡܫܽܘܚܬܳܐ ܡܬܰܚܬܰܝܬܳܐ ܕܡܶܬܒܰܪܢܫܳܢܽܘܬܳܐ ܠܘܳܬ ܡܰܝ̈ܳܐ ܢܚܶܬ܆ ܘܕܰܟܺܝ ܠܗܳܠܶܝܢ ܡܫܰܡܠܝܳܐܺܝܬ ܘܰܥܒܰܕ ܐܶܢܽܘܢ ܣܚܳܬܳܐ ܕܽܘܟܳܝܳܐ ܕܟܽܠܳܗ̇ ܡܶܬܥܰܡܪܳܢܺܝܬܳܐ. ܠܰܒܪܬ ܩܳܠܶܗ ܕܰܐܒܳܐ ܕܣܳܗܕܳܐ܆ ܕܰܒܪܳܐ ܐܺܝܬܰܘܗ̱ܝ ܒܰܟܝܳܢܳܐ ܘܠܰܘ ܒܛܰܝܒܽܘܬܳܐ ܗܘ̣ܳܐ. ܠܪܽܘܚܳܐ ܩܰܕܺܝܫܳܐ ܕܟܰܕ ܡܶܢ ܡܰܝ̈ܳܐ ܣܠܶܩ ܝܶܫܽܘܥ ܒܰܕܡܽܘܬ ܝܰܘܢܳܐ ܟܰܕ ܦܳܪܰܚ ܗ̱ܘܳܐ ܫܟܶܢ ܥܠܰܘܗ̱ܝ^[25]. ܘܰܒܝܰܕ ܗܳܢܳܐ ܚܶܙܘܳܐ ܦܰܓܪܳܢܳܝܳܐ ܡܰܘܕܰܥ ܗ̱ܘܳܐ܆ ܕܳܐܦ ܠܳܐ ܦܰܓܪܳܢܳܐܺܝܬ ܐܺܝܬܰܘܗ̱ܝ ܗ̱ܘܳܐ ܒܰܡܫܺܝܚܳܐ܆ ܟܰܕ ܕܺܝܠܳܢܳܝܳܐ ܕܺܝܠܶܗ ܐܺܝܬܰܘܗ̱ܝ ܗ̱ܘܳܐ ܒܽܐܘܣܺܝܰܐ.

ܐܳܦ ܓܶܝܪ ܐܶ‌ܠܽܘ ܠܰܘ ܗܳܕܶܐ ܐܺܝܬܶܝܗ̇ ܗ̱ܘܳܬ܆ ܡܶܢ ܟܽܠ ܦܪܽܘܤ ܐܳܬܶܐ ܗ̱ܘܳܐ ܥܠܰܘܗ̱ܝ܆ ܟܰܕ ܐܺܝܬܰܘܗ̱ܝ ܗ̱ܘܳܐ ܠܬܰܚܬ ܒܓܰܘ ܡܰܝ̈ܳܐ. ܐܶܠܳܐ ܝܶܫܽܘܥ܆ ܐܰܝܟ ܐܰܝܢܳܐ ܡܰܢ ܕܪܺܝܫܺܝܬܳܐ ܕܓܶܢܣܳܐ ܕܺܝܠܰܢ ܗܘ̣ܳܐ܆ ܢܚܶܬ ܠܝܽܘܪܕܢܳܢ. ܐܰܝܟ ܐܰܝܢܳܐ ܕܶܝܢ ܕܡܶܠܬܳܐ ܫܘܶܐ ܒܽܐܘܣܺܝܰܐ ܠܰܐܒܳܐ ܐܺܝܬܰܘܗ̱ܝ܆ ܘܠܳܐ ܐܰܪܚܶܩ ܡܶܢ ܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ܆ ܒܡܰܚܰܬܬ̣ܶܗ ܕܰܠܡܰܝ̈ܳܐ܆ ܡܰܠ̣ܝܳܐ ܘܰܡܫܰܡܠܝܳܐ ܘܩܰܕܺܝܫܳܐ ܫܰܡܠܝܶܗ ܠܰܥܡܳܕܳܐ ܕܺܝܠܰܢ. ܗܰܘ ܡܳܐ ܓܶܝܪ ܕܰܒܪܳܐ ܡܰܥܒܶܕ܆ ܠܳܐ ܚܰܣܺܝܪ ܗܰܘ ܡܳܐ ܕܶܐܬܬܰܥܒܰܕ܆ ܡܶܢ ܐܰܒܳܐ ܐܰܘ ܡܶܢ ܪܽܘܚܳܐ. ܚܕܳܐ ܓܶܝܪ ܐܺܝܬܶܝܗ̇ ܡܰܥܒܕܳܢܽܘܬܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܐܰܝܟܰܢܳܐ ܕܳܐܦ ܐܽܘܣܺܝܰܐ܆ ܐܳܦܶܢ ܒܰܩܢܽܘܡ̈ܶܐ ܠܳܐ ܒܠܺܝܠܳܐܺܝܬ ܡܦܰܪܫܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܗܽܘ ܡܰܢ ܒܪܳܐ܆ ܗܰܘ ܕܰܚܠܳܦܰܝܢ ܐܶܬܒܰܣܰܪ ܘܶܐܬܒܰܪܢܰܫ ܥܡܰܕ ܡܕܰܒܪܳܢܳܐܺܝܬ܆ ܘܟܰܕ ܥܡܰܕ ܩܰܕܶܫ ܠܡܰܝ̈ܳܐ܆ ܗܽܘ ܕܶܝܢ ܩܽܘܕܳܫܳܐ܆ ܠܳܐ ܐܺܝܬܰܘܗ̱ܝ ܗ̱ܘܳܐ ܣܦܺܝܩܳܐ ܡܶܢ ܐܰܒܳܐ ܘܡܶܢ ܪܽܘܚܳܐ. ܡܶܢ ܒܳܬܰܪ ܕܶܝܢ ܡܰܣܰܩܬܳܐ ܕܡܶܢ ܡܰܝ̈ܳܐ܆ ܒܝܰܕ ܚܙܳܬܳܐ ܕܝܰܘܢܳܐ ܗܳܘܝܳܐ ܠܰܢ ܝܺܕܺܝܥܬܳܐ ܗܳܕܶܐ. ܒܝܰܕ ܒܰܪ̱ܬ ܩܳܠܳܐ. ܗܳܕܶܐ ܦܬܳܚܳܐ ܕܰܫܡܰܝܳܐ. ܡܶܫܬܰܘܕܥܳܢܽܘܬܳܐ ܕܰܐܒܳܐ. ܠܗܰܘ ܓܶܝܪ ܕܠܳܐ ܝܳܕܥܺܝܢ ܗ̱ܘܰܝܢ ܕܰܐ‌ܠܳܗܰܐ ܗ̄ܘ܆ ܠܗܳܢܳܐ ܐܰܝܟ ܕܠܰܐܒܳܐ ܡܶܫܬܰܘܕܥܺܝܢܰܢ. ܡܰܚܰܬܬ̣ܳܐ ܕܪܽܘܚܳܐ ܩܰܕܺܝܫܳܐ. ܟܽܠܗܽܘܢ ܓ̈ܰܙܶܐ ܕܺܝܕܰܥܬܳܐ ܐܰ‌ܠܳܗܳܝܬܳܐ.

ܡܶܟܺܝܠ ܦܬܺܝ̈ܚܶܐ ܐܺܝܬܰܝܗܽܘܢ ܒܶܝܬ ܡܰܠ̈ܟܶܐ ܗܳܠܶܝܢ ܕܰܠܥܶܠ. ܟܰܕ ܓܶܝܪ ܐܳܕܳܡ ܐܶܚܰܕ ܐܶܢܽܘܢ ܠܰܢ ܠܰܫܡܰܝܳܐ ܒܝܰܕ ܚܛܺܝܬܳܐ܆ ܘܗܳܢܽܘܢ ܕܡܶܢܶܗ ܠܘܳܬ ܒܶܣܪܳܢܳܝܽܘܬܳܐ. ܐܶܫܬܰܪܓܰܠܘ܆ ܐܰܝܟܰܢܳܐ ܕܳܐܦ ܢܺܐܡܰܪ ܐܰ‌ܠܳܗܳܐ܆ ܕܠܳܐ ܬܟܰܬܰܪ ܪܽܘܚܝ ܒܰܒܢܰܝ̈ܢܳܫܳܐ ܗܳܠܶܝܢ ܡܶܛܽܠ ܕܒܶܣܪܳܐ ܐܺܝܬܰܝܗܽܘܢ^[26]܆ ܘܠܳܐ ܡܶܕܶܡ ܡܶܢ ܬܰܡܳܢ܆ ܐܰܘ ܡܶܕܶܡ ܙܥܽܘܪܳܐ ܢܳܚܶܬ ܗ̱ܘܳܐ ܠܘܳܬܰܢ. ܟܰܕ ܕܶܝܢ ܐܳܕܳܡ ܬܪܰܝܳܢܳܐ ܡܫܺܝܚܳܐ܆ ܪܺܝܫܺܝܬܳܐ ܕܟܺܝܬܳܐ ܗܽܘ ܠܶܗ ܚܰܘܺܝ ܕܓܶܢܣܳܐ ܕܺܝܠܰܢ܆ ܩܽܘܦܠܳܐ ܗܳܝ ܕܰܫܡܰܝܳܐ ܐܶܬܬܪܺܝܡܰܬ ܘܶܐܬܬܰܒܪܰܬ܆ ܗܳܝ ܕܡܶܣܬܰܒܪܳܐ ܗ̱ܘܳܬ ܠܳܐ ܡܶܬܦܰܬܚܳܢܺܝܬܳܐ. ܕܡܶܢ ܗܳܪܟܳܐ ܡܰܪܩܘܤ ܟܰܕ ܒܠܶܟܣܝܤ ܕܝܰܬܺܝܪ ܐܺܝܬܶܝܗ̇ ܡܫܰܘܕܥܳܢܺܝܬܳܐ ܡܶܬܚܰܫܰܚ܆ ܠܰܘ ܕܡܶܬܦܰܬܚܺܝܢ ܫܡܰܝܳܐ ܐܶܡܰܪ܆ ܐܶܠܳܐ ܕܡܶܣܬܰܕܩܺܝܢ^[27]. ܐܰܝܟܰܢܳܐ ܕܰܢܚܰܘܶܐ ܓܰܠܝܳܐܺܝܬ܆ ܕܗܳܕܶܐ ܕܰܡܕܰܒܪܳܢܽܘܬܳܐ ܕܥܰܡܰܢܽܘܐܶܝܠ ܒܰܠܚܽܘܕܶܝܗ̇ ܐܺܝܬܶܝܗ̇ ܗ̱ܘܳܬ܆ ܕܬܶܕܒܰܪ ܒܰܩܛܺܝܪܳܐ ܘܬܶܬܠܽܘܚ ܘܬܶܣܕܽܘܩ ܠܗܰܘ ܠܳܐ ܡܶܣܬܰܕܩܳܢܳܐ. ܡܶܢ ܗܳܪܟܳܐ ܗܳܢܽܘܢ ܕܒܰܡܫܺܝܚܳܐ ܗܰܝܡܶܢܘ ܗ̱ܘܰܘ܆ ܕܰܦܬܺܝܚܺܝܢ ܐܺܝܬ ܗܘܰܘ ܠܗܽܘܢ ܫܡܰܝܳܐ܆ ܘܠܳܐ ܡܶܬܟܰܠܝܳܢܳܐܺܝܬ ܒܝܰܕ ܬܶܐܽܘܪܺܝܰܐ ܥܳܐܠܺܝܢ ܗ̱ܘܰܘ ܠܗܽܘܢ. ܗܳܟܰܢܳܐ ܤܛܦܐܢܘܤ ܗܰܘ ܩܰܕܡܳܝܳܐ ܕܣܳܗ̈ܕܶܐ܆ ܟܰܕ ܒܰܡܨܰܥܬܳܐ ܕܰܟܢܽܘܫܝܳܐ ܕܝܽܗ̱ܘ̈ܕܳܝܶܐ ܩܳܐܶܡ ܗ̱ܘܳܐ܆ ܘܶܐܬܚܛܶܦ ܒܬܰܪܥܺܝܬܶܗ ܘܒܰܫܡܰܝܳܐ ܐܰܩܶܬ̣ ܚܝܳܪܶܗ܆ ܚܙܳܐ ܠܬܶܫܒܽܘܚܬܳܐ ܕܰܐ‌ܠܳܗܳܐ. ܗܳܢܰܘ ܕܶܝܢ ܠܰܦܬܳܚܳܐ ܕܰܫܡܰܝܳܐ܆ ܘܰܠܝܶܫܽܘܥ ܕܩܳܐܶܡ ܗ̱ܘܳܐ ܡܶܢ ܝܰܡܺܝܢܳܐ ܕܰܐ‌ܠܳܗܳܐ^[28]܆ ܘܰܒܝܰܕ ܚܙܳܬܳܐ ܕܰܐܝܟ ܗܳܕܶܐ ܪܳܕܶܐ ܗ̱ܘܳܐ ܘܡܰܠܶܦ ܗ̱ܘܳܐ ܠܶܗ ܕܰܢܩܽܘܡ܆ ܘܠܳܐ ܢܶܫܦܰܠ ܘܶܢܟܽܘܦ ܒܽܘܪܟܳܐ ܒܰܐܓܽܘܢܳܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ. ܠܦܽܘܬ ܓܶܝܪ ܣܽܘܥܪ̈ܳܢܶܐ ܕܣܺܝܡܺܝܢ܆ ܐܳܦ ܗܳܠܶܝܢ ܕܓܶܠ̈ܝܳܢܶܐ ܘܰܕܬܶܐܽܘܪܺܝܰܐܤ ܡܶܬܚܙܶܝܢ.

ܠܘܳܬ ܗܳܝ ܕܶܝܢ ܟܺܐܢܳܐܺܝܬ ܢܶܬܦܰܫܰܟ ܐ̱ܢܳܫ܆ ܕܰܐܝܟܰܢܳܐ ܡܰܥܡܕܳܢܳܐ ܟܰܕ ܩܳܕܶܡ ܗ̱ܘܳܐ ܐܳܡܰܪ܆ ܕܗܰܘ ܕܒܳܬܰܪܝ ܐܳܬܶܐ ܚܰܝܠܬܳܢ ܗ̱ܘ̣ ܝܰܬܺܝܪ ܡܶܢܝ܆ ܗܰܘ ܕܠܳܐ ܫܳܘܶܐ ܐ̱ܢܳܐ ܡܣܳܢ̈ܰܘܗ̱ܝ ܠܡܶܛܥܰܢ܆ ܗܽܘ ܢܰܥܡܶܕܟܽܘܢ ܒܪܽܘܚܳܐ ܩܰܕܺܝܫܳܐ ܘܰܒܢܽܘܪܳܐ^[29]܆ ܒܳܬܰܪ ܗܳܠܶܝܢ ܐܳܡܰܪ܆ ܘܶܐܢܳܐ ܠܳܐ ܝܳܕܰܥ ܗ̱ܘܺܝܬ ܠܶܗ܆ ܐܶܠܳܐ ܗܰܘ ܕܫܰܕܪܰܢܝ ܠܡܰܥܡܳܕܽܘ ܒܡܰܝ̈ܳܐ ܗܽܘ ܐܶܡܰܪ ܠܺܝ܆ ܕܥܰܠ ܗܰܘ ܕܬܶܚܙܶܐ ܪܽܘܚܳܐ ܕܢܳܚܶܬ ܘܰܡܩܰܘܶܐ ܥܠܰܘܗ̱ܝ܆ ܗܳܢܳܐ ܐܺܝܬܰܘܗ̱ܝ ܗܰܘ ܕܡܰܥܡܶܕ ܒܪܽܘܚܳܐ ܩܰܕܺܝܫܳܐ^[30]. ܐܶܠܳܐ ܩܰܕܺܝܡ ܗ̱ܘܳܐ ܝܺܕܺܝܥ ܘܰܓܠܶܐ ܚܽܘܫܳܒܗܶܝܢ ܕܡ̈ܶܠܶܐ ܗܳܠܶܝܢ. ܟܰܕ ܓܶܝܪ ܦܪ̈ܺܝܫܳܝܶܐ ܫܰܕܰܪܘ ܗ̱ܘܰܘ ܐ̱ܢܳܫܺܝ̈ܢ ܘܰܡܫܰܐܠܺܝܢ ܗ̱ܘܰܘ ܘܝܳܠܦܺܝܢ ܕܶܐܢ ܗܽܘ ܝܽܘܚܰܢܳܢ ܐܺܝܬܰܘܗ̱ܝ ܗ̱ܘܳܐ ܡܫܺܝܚܳܐ܆ ܟܦܰܪ. ܟܰܕ ܨܳܒܶܐ ܗ̱ܘܳܐ ܕܶܝܢ ܕܰܢܚܰܘܶܐ ܠܣܳܗܕܽܘܬܳܐ ܕܺܝܠܶܗ ܗܳܝ ܕܡܶܛܽܠ ܡܫܺܝܚܳܐ ܫܰܪܺܝܪܳܐ܆ ܘܕܰܡܚܰܪܪܳܐ ܡܶܢ ܟܽܠ ܚܰܫܳܢܳܝܽܘܬܳܐ ܘܡܰܣܰܒ ܒܰܐܦ̈ܶܐ܆ ܐܶܡܰܪ܆ ܘܶܐܢܳܐ ܠܳܐ ܝܳܕܰܥ ܗ̱ܘܺܝܬ ܠܶܗ². ܠܰܘ ܐܰܝܟܰܢܳܐ ܕܰܐܢ̱ܬܘܢ ܡܰܣܒܪܺܝܢ ܐܢ̱ܬܽܘܢ ܐܳܘ ܦܪ̈ܺܝܫܳܝܶܐ܆ ܒܺܝܕܰܥܬܳܐ ܐ̱ܢܳܫܳܝܬܳܐ ܡܦܳܤ ܐ̱ܢܳܐ ܒܶܗ܆ ܐܰܝܟ ܕܒܰܫܘܶܐ ܒܫܰܪܒܬܳܐ ܘܒܰܪ ܩܰܘܡܬܳܐ܆ ܘܰܕܒܶܗ ܟܰܕ ܒܶܗ ܒܰܥܝܳܕܳܐ ܟܺܝܬ ܘܰܒܕܽܘܒܳܪܳܐ ܡܫܰܘܬܶܦ ܠܺܝ ܗܳܠܶܝܢ ܕܡܶܢܗܶܝܢ ܗܳܘܝܳܐ ܡܫܰܟܢܳܢܽܘܬܳܐ ܒܣܳܗ̈ܕܘܳܬܳܐ. ܐܳܦ ܓܶܝܪ ܠܳܐ ܝܺܕܺܝܥܳܐ ܐܺܝܬܰܘܗ̱ܝ ܗ̱ܘܳܐ ܠܺܝ ܒܗܳܕܶܐ ܝܺܕܰܥܬܳܐ܆ ܒܝܰܕ ܕܰܒܡܰܕܒܪܳܐ ܟܳܫܶܬ ܟܽܠܗܽܘܢ ܚܰܝ̣ܰܝ̣̈. ܐܰܝܟܰܢܳܐ ܟܺܝܬ ܕܗܳܟܰܢܳܐ܆ ܐܰܝܟܰܢܳܐ ܕܰܐܢ̱ܬܘܢ ܡܰܣܒܪܺܝܢ ܐܢ̱ܬܽܘܢ܆ ܠܳܐ ܝܳܕܰܥ ܗ̱ܘܺܝܬ ܠܶܗ. ܐܶܠܳܐ ܗܰܘ ܕܫܰܕܪܰܢܝ ܠܡܰܥܡܳܕܽܘ ܒܡܰܝ̈ܳܐ܆ ܝܺܕܺܝܥܳܐ ܥܰܒ̣ܕܶܗ ܠܺܝ ܠܗܳܢܳܐ܆ ܒܺܝܕܰܥܬܳܐ ܐܰ‌ܠܳܗܳܝܬܳܐ².

ܡܶܫܟܚܳܐ ܕܶܝܢ ܗܳܕܶܐ ܕܬܶܣܬܰܟܰܠ܆ ܐܳܦ ܒܰܙܢܳܐ ܐ̱ܚܪܺܢܳܐ܆ ܕܒܳܗ̇ ܒܰܕܡܽܘܬܳܐ ܡܰܢ ܐܺܝܬܰܘܗ̱ܝ ܫܰܪܺܝܪܳܐ܆ ܡܰܠܽܘܢ ܕܶܝܢ ܡܥܰܠܝܳܐ ܘܰܕܝܰܬܺܝܪ ܪܳܡ. ܐܰܟܙܢܳܐ ܓܶܝܪ ܕܡܶܛܽܠ ܡܽܘܫܶܐ ܟܬܺܝܒ܆ ܕܰܐܝܟ ܪܳܚܡܳܐ ܥܰܡ ܪܳܚܡܶܗ ܗܳܘܶܐ ܗ̱ܘܳܐ ܥܰܡ ܐܰ‌ܠܳܗܳܐ ܘܰܡܡܰܠܶܠ ܗ̱ܘܳܐ ܥܰܡܶܗ܆ ܘܰܐܦܺܝ̈ܢ ܒܰܐܦܺܝ̈ܢ ܐܰܝܟܰܢܳܐ ܕܳܐܡܰܪ ܟܬܳܒܳܐ ܗܰܘ ܟܳܗܢܳܝܳܐ^[31]܆ ܘܒܳܬܰܪ ܩܰܠܺܝܠ ܟܰܕ ܬܶܐܽܘܪܺܝܰܐ ܕܝܰܬܺܝܪ ܢܰܗܺܝܪܳܐ ܘܓܰܠܝܳܐ ܐܶܬܚܰܙܝܰܬ ܠܶܗ ܐܶܡܰܪ܆ ܕܰܠܡܰܚܣܶܢ ܚܙܳܐ ܒܶܣܬܪ̈ܶܐ ܕܐܰ‌ܠܳܗܳܐ^[32]܆ ܘܳܐܦ ܦܰܘܠܽܘܤ ܟܰܕ ܠܩܽܘܪ̈ܝܢܬܳܝܶܐ ܫܳܠܰܚ ܗ̱ܘܳܐ ܟܳܬܶܒ ܗ̱ܘܳܐ܆ ܕܡܶܢ ܡܢܳܬܳܐ ܓܶܝܪ ܝܳܕܥܺܝܢܰܢ ܘܡܶܢ ܡܢܳܬܳܐ ܡܶܬܢܰܒܶܝܢ ܚ̱ܢܰܢ܆ ܐܶܡܰܬܝ ܕܶܝܢ ܕܬܺܐܬܶܐ ܗܺܝ ܡܫܰܡܠܝܽܘܬܳܐ܆ ܗܳܝ ܕܡܶܢ ܡܢܳܬܳܐ ܬܶܬܒܰܛܰܠ^[33]܆ ܒܗܳܢܳܐ ܛܽܘܦܣܳܐ ܐܳܦ ܝܽܘܚܰܢܳܢ ܝܳܕܰܥ ܗ̱ܘܳܐ ܠܶܗ ܡܰܢ ܠܝܶܫܽܘܥ܆ ܘܰܒܪܽܘܚܳܐ ܩܰܕܺܝܫܳܐ ܡܰܥܡܶܕ^[34]܆ ܘܳܐܦ ܕܗܽܘ ܐܺܝܬܰܘܗ̱ܝ ܐܶܡܪܶܗ ܕܰܐ‌ܠܳܗܳܐ ܗܰܘ ܕܰܡܪܺܝܡ ܠܰܚܛܺܝܬܶܗ ܕܥܳܠܡܳܐ^[35]. ܐܶܡܰܬܝ ܕܶܝܢ ܕܰܚܙܳܐ ܠܪܽܘܚܳܐ ܕܰܢܚܶܬ ܘܩܰܘܺܝ ܥܠܰܘܗ̱ܝ܆ ܡܩܰܘܝܳܢܽܘܬܳܐ ܡܶܕܶܡ ܦܰܐܺܝܬ ܠܰܐܠܳܗܳܐ ܘܠܳܐ ܡܶܬܡܰܠܠܳܢܺܝܬܳܐ܆ ܗܳܝ ܕܳܐܦ ܒܪܳܐ ܒܰܐܒܳܐ ܡܩܰܘܶܐ ܘܳܐܦ ܐܰܒܳܐ ܒܰܒܪܳܐ܆ ܐܰܝܟ ܗܳܝ ܕܰܐܡܺܝܪܳܐ ܡܶܢܶܗ܆ ܐܰܒܳܐ ܕܶܝܢ ܗܰܘ ܕܒܺܝ ܡܩܰܘܶܐ ܗܽܘ ܥܳܒܶܕ ܠܗܽܘܢ ܠܰܥ̈ܒܳܕܶܐ܆ ܗܰܝܡܢܽܘܢܝ ܕܶܐܢܳܐ ܒܰܐܒܳܐ ܘܰܐܒܳܐ ܒܺܝ^[36]܆ ܗܳܝܕܶܝܢ ܠܺܝܕܰܥܬܳܐ ܗܳܝ ܩܰܕܡܳܝܬܳܐ܆ ܡܶܛܽܠ ܡܥܰܠܝܽܘܬܳܐ ܕܗܳܝ ܕܡܶܢ ܒܳܬܰܪܟܶܢ ܗܘܳܬ܆ ܠܳܐ ܝܺܕܰܥܬܳܐ ܚܰܫܒܳܗ̇. ܘܶܐܡܰܪ܆ ܘܶܐܢܳܐ ܠܳܐ ܝܳܕܰܥ ܗܘܺܝܬ ܠܶܗ⁶. ܘܗܳܠܶܝܢ ܟܰܕ ܣܳܒܰܪ ܗ̱ܘܳܐ ܕܝܳܕܰܥ.

ܘܳܐܦ ܗܳܝ ܕܟܰܕ ܥܡܰܕ ܕܶܝܢ ܝܶܫܽܘܥ ܡܶܚܕܳܐ ܣܠܶܩ ܡܶܢ ܡܰܝ̈ܳܐ^[37]܆ ܠܒܶܕ̥ܝ̣ܰܝ̣̈ܗܽܘܢ ܕܡܰܢܺܝ̈ܢܳܝܶܐ ܗܳܢܽܘܢ ܡܣܰܝ̈ܒܶܐ ܒܳܠܡܳܐ. ܐܳܡܪܺܝܢ ܓܶܝܪ ܗܳܢܽܘܢ ܕܰܠܘܳܬ ܟܽܠ ܡܶܕܶܡ ܡܡܰܠܠܺܝܢ ܫܽܘ̈ܥܝܳܬܳܐ ܕܒܶܕ̥ܝܳܐ܆ ܘܥܰܢܳܬܳܐܺܝܬ ܗܳܠܶܝܢ ܕܣܳܒ̈ܳܬܳܐ ܡܩܰܛܠܒܺܝܢ܆ ܕܗܰܘ ܡܰܢ ܕܰܥܡܰܕ ܠܬܰܚܬ ܩܰܘܺܝ܆ ܡܰܝ̈ܳܐ ܕܶܝܢ ܐ̱ܚܪܺܢܳܐ ܒܰܣܒܺܝܪܽܘܬܳܐ ܝܰܗ̱ܒܘ ܚܠܳܦܰܘܗ̱ܝ ܕܗܰܘ ܕܒܰܫܪܳܪܐ ܐܺܝܬܰܘܗ̱ܝ܆ ܐܰܝܟܰܢܳܐ ܕܠܳܐ ܡܶܕܶܡ ܡܶܢ ܫܪܳܪܳܐ ܢܶܗܘܶܐ ܐܺܝܬ ܕܠܳܐ ܥܫܺܝܩ ܠܗܽܘܢ܆ ܕܝܰܬܺܝܪ ܕܶܝܢ ܠܳܚܡܳܐܺܝܬ ܐ݀ܺܡܰܪ܆ ܕܠܳܐ ܝܰܬܺܝܪ ܒܚܺܝܪܳܐ ܡܚܰܘܶܐ ܠܶܗ. ܕܳܐܦ ܒܺܐܝ̈ܕܰܝܗܶܝܢ ܕܗܳܠܶܝܢ ܕܡܶܬܥܫܶܩ ܝܰܬܺܝܪܳܐܺܝܬ ܡܰܢ̣ܗܰܪ. ܐܳܦ ܓܶܝܪ ܟܰܕ ܥܡܰܕ ܝܶܫܽܘܥ ܐܳܡܰܪ܆ ܡܶܚܕܳܐ ܣܠܶܩ ܡܶܢ ܡܰܝ̈ܳܐ⁹. ܘܗܽܘ ܝܶܫܽܘܥ ܘܡܶܚܕܳܐ܆ ܐܰܝܟܰܢܳܐ ܕܰܓܙܳܪܳܐ ܩܰܫܝܳܐ ܘܰܡܡܺܝܬܳܢܳܐ ܢܶܬܶܠ ܠܳܗ̇ ܠܛܳܥܝܽܘܬܗܽܘܢ.

ܗܳܠܶܝܢ ܙܳܕܶܩ ܗ̱ܘܳܐ ܠܡܶܒܥܳܐ܆ ܘܕܳܐܦܠܳܐ ܒܗܳܠܶܝܢ ܕܡܶܣܬܰܒܪ̈ܳܢ ܙܥܽܘܪ̈ܝܳܬܳܐ ܢܶܒܣܶܐ. ܘܰܕܢܶܒܨܶܐ ܠܥܽܘܬܪܳܐ ܕܰܟܬܳܒ̈ܶܐ ܐܰ‌ܠܳܗܳܝ̈ܶܐ܆ ܘܰܠܡܶܕܚܰܠ ܘܰܠܡܶܪܥܰܠ܆ ܕܕܰܠܡܳܐ ܒܕܽܘܓ̈ܡܰܛܰܐ ܠܳܐ ܒܚܺܝܪ̈ܶܐ ܢܶܦܶܠ܆ ܒܶܐܣܟܺܡܳܐ ܡܶܕܶܡ ܐܺܝܬ ܐܶܡܰܬܝ ܕܫܰܦܺܝܪܽܘܬ ܕܶܚܠܬܳܐ. ܐܰܝܟܰܢܳܐ ܓܶܝܪ ܠܳܐ ܫܟܺܝܪܳܐ܆ ܕܢܰܓܳܪܳܐ ܡܰܢ ܘܩܰܝܢܳܝܳܐ܆ ܐܳܦܠܳܐ ܚܰܕ ܐ̱ܢܳܫ ܡܶܬܶܐܡܰܪ ܟܰܕ ܠܳܐ ܝܳܕܰܥ ܠܳܗ̇ ܠܽܐܘܡܳܢܽܘܬܳܐ ܘܦܳܠܰܚ ܒܳܗ̇܆ ܗܳܢܽܘܢ ܕܶܝܢ ܕܡܶܫܬܰܡܗܺܝܢ ܟܪ̈ܺܝܣܛܝܳܢܶܐ܆ ܠܳܐ ܡܰܐܪ̈ܙܶܐ ܒܦܳܣܺܝ̈ܩܳܬܳܐ ܠܡܺܐܡܰܪ ܢܶܗܘܽܘܢ ܐܺܝܬܰܝܗܽܘܢ ܕܰܟ̈ܬܳܒܐ ܐܰ‌ܠܳܗܳܝ̈ܶܐ܆ ܘܰܦܫܺܝ̈ܩܶܐ ܠܡܶܬܬܰܛܥܝܳܢܽܘܬܳܐ ܠܗܳܢܽܘܢ ܕܨܳܒܶܝܢ. ܡܶܛܽܠ ܗܳܕܶܐ ܦܰܘܠܽܘܤ ܐܳܡܰܪ ܗ̱ܘܳܐ܆ ܐܢ̱ܬܽܘܢ ܠܟܽܘܢ ܢܰܣܰܘ܆ ܐܶܢ ܐܺܝܬܰܝܟܽܘܢ ܒܗܰܝܡܳܢܽܘܬܳܐ. ܐܢ̱ܬܽܘܢ ܠܟܽܘܢ ܒܩܰܘ. ܐܰܘ ܠܳܐ ܡܶܫܬܰܘܕܥܺܝܢ ܐܢ̱ܬܽܘܢ܆ ܕܝܶܫܽܘܥ ܡܫܺܝܚܳܐ ܒܟܽܘܢ ܗ̱ܘ̣܆ ܐܶܢܗܽܘ ܕܠܰܘ ܡܰܣ̈ܠܰܝܳܐ ܐܺܝܬܰܝܟܽܘܢ^[38].

ܢ݀ܨܰܠܶܐ ܗܳܟܺܝܠ܆ ܘܬܰܟܫ̈ܦܳܬܳܐ ܪ̈ܳܚܡܳܬ ܥܰܡܠܳܐ ܢܶܡܬܽܘܚ ܘܰܢܩܰܪܶܒ܆ ܠܗܰܘ ܕܰܕܢܰܚ ܠܗܳܢܽܘܢ ܕܰܒܚܶܫܽܘܟܳܐ ܘܰܒܛܶܠܳܠܳܐ ܕܡܰܘܬܳܐ ܝܳܬܒܺܝܢ ܗ̱ܘܰܘ^[39]܆ ܘܰܠܢܽܘܗܪܳܐ ܕܰܚܕܳܐ ܐܰ‌ܠܳܗܽܘܬܳܐ ܗܳܝ ܕܒܰܬܠܺܝܬܳܝܽܘܬܳܐ ܩܰܕܺܝܫܬܳܐ ܡܶܣܬܰܟܠܳܐ܆ ܒܰܕܡܽܘܬ ܫܶܡܫܳܐ ܥܰܠ ܝܽܘܪܕܢܳܢ ܦܪܰܤ ܘܰܢܦܺܝܣܺܝܘܗ̱ܝ ܕܰܢܫܰܟܶܢ ܠܰܢ ܗܳܝ ܕܰܒܚܺܝܪܳܐ܆ ܘܰܒܕܽܘܒܳܪܳܐ ܘܰܒܗܰܝܡܳܢܽܘܬܳܐ܆ ܠܬܳܫܒܽܘܚܬܳܐ ܕܡܶܬܓܰܠܝܳܢܽܘܬܶܗ. ܠܗܰܘ ܕܳܐܦ ܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܪܽܘܚܳܐ ܕܺܝܠܶܗ ܡܰܥܒܶܕ ܚܰܝ̈ܶܐ ܘܰܫܘܶܐ ܒܽܐܘܣܺܝܰܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܡܐܐ ܘܫܒܬܥܣܪ.

 ܘܥܰܒܝܐܝܬ[1]

ܐܫܥܝܐ. 35: 1 ـ 2 [2]

[3] ܙܳܕܶܩ ܠܡܶܕܰܥ ܠܰܐܝܠܶܝܢ ܕܩܳܪܶܝܢ ܗܳܪܟܳܐ܆ ܕܥܰܣܩܳܐܝܬ ܡܶܫܬܰܘܙܒܳܐ ܒܕܽܘܟܬܳܐ ܗܳܕܶܐ܆ ܣܘܢܛܐܟܣܝܣ ܐܰܘ ܟܺܝܬ ܣܕܺܝܪܽܘܬܐ ܕܡܶܠܬܳܐ ܒܩܶܪܝܳܢܳܐ. ܒܗܳܝ ܕܰܠܡ̈ܶܠܶܐ ܗܳܠܶܝܢ܆ ܢܒܺܝܳܐ ܡܰܢ ܥܰܠ ܡܰܕܒܪܳܐ ܡܰܠܶܠ ܘܠܰܚܶܡ ܐܶܢܶܝܢ. ܡܰܠܦܳܢܳܐ ܕܶܝܢ ܡܶܬܥܰܠܝܳܢܳܐܝܬ܆ ܥܰܠ ܢܰܦܫܳܐ ܗܳܝ ܕܺܐܝܬܶܝܗ̇ ܗ̱ܘܳܬ ܡܰܕܒܪܳܐ ܘܚܳܪܽܘܒܬܳܐ ܘܰܣܦܺܝܩܬܳܐ ܡܶܢ ܝܺܕܰܥܬܳܐ ܕܰܐ‌ܠܳܗܳܐ. ܘܰܒܠܶܫܳܢܳܐ ܡܰܢ ܝܰܘܢܳܝܳܐ ܡܶܬܢܰܛܪܳܐ ܗ̱ܘܳܬ ܣܕܺܝܪܽܘܬܳܐ ܕܡܶܠܬܳܐ܆ ܡܶܛܽܠ ܕܳܐܦ ܡܰܕܒܪܳܐ ܘܳܐܦ ܢܰܦܫܳܐ܆ ܢܶܩܒܬܳܢܳܐܝܬ ܡܶܬܐܰܡܪܺܝܢ. ܒܣܽܘܪܝ̣ܳܝ̣ܳܐ ܕܶܝܢ ܠܐ ܡܶܬܢܰܛܪܳܐ܆ ܡܶܛܽܠ ܕܡܰܕܒܪܳܐ ܕܶܟܪܳܢܳܐܝܬ܆ ܘܕܶܟܪܳܢܳܐܝܬ ܬܳܒܰܥ ܠܗܶܝܢ ܠܡ̈ܶܠܶܐ ܕܢܶܬܬܣܺܝ̈ܡܳܢ ܥܠܰܘܗܝ. ܢܰܦܫܳܐ ܕܶܝܢ ܢܶܩܒܬܳܢܳܐܝܬ ܘܢܶܩܒܬܳܢܳܐܝܬ ܬܳܒܥܳܐ ܠܗܶܝܢ ܠܡ̈ܶܠܶܐ ܕܢܶܬܐܰܡܪ̈ܳܢ ܥܠܶܝܗ̇. ܘܡܶܛܽܠ ܗܳܕܶܐ ܥܰܣܩܳܐܝܬ ܡܶܬܦܰܪ̈ܫܳܢ ܘܡܶܬܩܰܪ̈ܝܳܢ. ܐܶܠܐ ܙܳܕܶܩ ܠܶܗ ܠܗܰܘ ܕܩܳܪܶܐ: ܟܰܕ ܩܳܪܶܐ ܠܗܶܝܢ ܢܶܩܒܬܳܢܳܐܝܬ ܡܶܛܽܠ ܢܰܦܫܳܐ܆ ܕܶܟܪܳܢܳܐܝܬ ܢܚܽܘܪ ܒܗܶܝܢ ܡܶܛܽܠ ܡܰܕܒܪܳܐ. ܘܗܳܝ ܕܰܒܗܶܦܟܳܐ ܟܰܕ ܩܳܪܶܐ ܠܗܶܝܢ ܕܶܟܪܳܢܳܐܝܬ ܡܶܛܽܠ ܡܰܕܒܪܳܐ܆ ܢܶܩܒܬܳܢܳܐܝܬ ܢܚܽܘܪ ܒܗܶܝܢ܆ ܐܰܝܟ ܕܡܶܢ ܢܰܦܫܳܐ.

ܐܦܣ̈ܝܐ. 3: 16 ـ 17 [4]

ܐ. ܩܘܪ̈ܝܢܬܝܐ. 3: 16 [5]

ܒ. ܩܘܪ̈ܝܢܬܝܐ. 2: 15 [6]

[7] ܬܽܘܒ ܕܶܝܢ ܐܳܦ ܗܳܕܶܐ ܙܳܕܶܩ ܠܡܶܕܰܥ܆ ܕܝܰܘ̈ܢܳܝܶܐܠܥܳܒܳܐ ܗܽܘܠܳܐ ܩܳܪܶܝܢ ܠܶܗ. ܘܳܐܦ ܠܩܶܢܝܳܢܳܐ ܘܥܽܘܬܪܳܐ܆ ܗܽܘ ܗܳܟܘܳܬ ܗܽܘܠܳܐ ܡܟܰܢܶܝܢ ܠܶܗ ܡܕܰܡܝܳܢܳܐܝܬ܆ ܐܰܝܟ ܕܡܶܢ ܥܳܒܳܐ ܕܡܶܬܩܪܶܐ ܗܘܠܐ ܡܳܪܳܢܳܐܝܬ ܘܰܟܝܳܢܳܐܝܬ. ܒܗܳܝ ܕܡܶܢܗܶܝܢ ܕܩܳܪ̈ܝܳܬܳܐ ܟܝܳܢܳܐܝܬ܆ ܘܡܶܢܗܶܝܢ ܡܕܰܡܝܳܢܳܐܝܬ ܐܺܝܬܰܝܗܶܝܢ. ܘܟܰܕ ܠܰܚܶܡ ܡܰܠܦܳܢܳܐ ܠܡܶܠܬܳܐ ܗܳܝ ܕܡܶܛܽܠ ܥܳܒܳܐ ܓܽܘܫܡܳܢܳܐܝܬ ܥܰܠ ܢܰܦܫܳܐ܆ ܨܒܳܐ ܬܽܘܒ܆ ܕܳܐܦ ܡܶܬܥܰܠܝܳܢܳܐܝܬ ܢܦܰܫܩܝܗ̇ ܠܡܶܠܬܳܐ ܗܳܕܶܐ ܕܰܢܒܺܝܳܐ ܕܳܐܡܪܳܐ܆ ܕܥܳܒܳܐܝܬ ܢܶܚܕܶܐ. ܐܰܝܟܰܢܳܐ ܟܺܝܬ ܕܡܳܕܶܝܢ ܐܰܝܟ ܗܰܘܢܳܐ ܗܳܢܳܐ: ܘܰܐܝܟ ܙܢܳܐ ܗܳܢܳܐ ܕܰܩܪܳܝܬܳܐ܆ ܗܳܝ ܕܥܳܒܳܐܝܬ ܢܶܚܕܶܐ܆ ܗܽܘܠܳܢܳܐܝܬ ܢܶܚܕܶܐ ܙܳܕܶܩ ܕܰܢܣܺܝܡܺܝܗ̇. ܐܰܝܟ ܦܽܘܫܳܩܳܐ ܕܶܝܢ ܕܡܰܠܦܳܢܳܐ: ܕܠܽܘܩܒܰܠ ܗܽܘܠܳܐ ܬܶܚܕܶܐ ܟܰܕ ܡܒܰܣܪܳܐ ܥܠܶܝܗ̇ ܢܰܦܫܳܐ ܘܥܳܪܩܳܐ.

ܦܪܟܣܝܣ. 4: 34 ـ 35[8]

ܐܫܥܝܐ. 35: 2 [9]

ܐ. ܡܠܟ̈ܐ. 18: 19  ܐܦ 18: 42 [10]

ܐ. ܡܠܟ̈ܐ. 1: 8 [11]

 ܘܚܰܪܙܽܘܦܳܐ[12]

ܡܬܝ. 3: 4  ܐܦ ܡܪܩܘܣ. 1: 6 [13]

ܢܦܪܘܬܐ[14]

ܡܠܐܟܝ. 4: 5[15]

ܡܬܝ. 11: 14 [16]

ܡܬܝ. 17: 12 [17]

ܡܬܝ. 17: 13 [18]

ܠܘܩܐ. 1: 16 ـ 17 [19]

ܠܘܩܐ. 1: 17 [20]

ܡܬܝ. 12: 24 [21]

ܡܬܝ. 12: 27  ܐܦ ܠܘܩܐ. 11: 19 [22]

ܪ̈ܗܘܡܝܐ. 9: 27[23]

ܐܫܥܝܐ. 35: 2[24]

ܡܪܩܘܣ. 1: 10 [25]

ܣܶܦܪܐ ܕܒܪܝܬܐ. 6: 3 [26]

ܡܪܩܘܣ. 1: 10 [27]

ܦܪܟܣܝܣ. 7: 55 [28]

ܡܬܝ. 3: 11 ܐܦ ܠܘܩܐ. 3: 16 [29]

ܝܘܚܢܢ. 1: 33 [30]

ܡܦܩܢܐ. 33: 11 [31]

ܡܦܩܢܐ. 33: 23 [32]

 ܐ. ܩܘܪ̈ܝܢܬܝܐ. 13: 9  (ܕܡܶܢ ܡܢܳܬܳܐ) ܩܰܠܺܝܠ ܗ̱ܘ̣ ܓܶܝܪ.[33]

ܝܘܚܢܢ. 1: 33 [34]

ܝܘܚܢܢ. 1: 29 [35]

ܝܘܚܢܢ. 14: 10 ـ 11 [36]

ܡܬܝ. 3: 16[37]

ܒ. ܩܘܪ̈ܝܢܬܝܐ. 13: 5 [38]

ܠܘܩܐ. 1: 79 [39]