ܡܺܐܡܪܳܐ ܕܡܳܐܐ ܘܫܬܬܥܣܪ

ܥܰܠ ܩܰܕܺܝܫܳܐ ܒܰܣܶܝܠܺܝܽܘܤ܆ ܘܬܶܐܽܘܠܽܘܓܽܘܤ ܓܪܺܝܓܽܘܪܺܝܽܘܤ.

116: ܐܶܢܳܐ ܠܝܰܘܡܳܐ ܗܳܢܳܐ ܕܩܰܪܺܝܒ܆ ܠܰܘ ܕܰܠܥܽܘܗܕܳܢܳܐ ܕܒܰܣܶܝܠܺܝܽܘܤ ܘܕܰܓܪܺܝܓܽܘܪܺܝܽܘܤ ܡܰܝܬܶܐ ܠܺܝ ܒܟܽܠ ܚܕܳܐ ܫܰܢ̱ܬܳܐ ܚܳܫܶܒ ܐ̱ܢܳܐ܆ ܘܣܰܓܺܝ ܟܺܐܢܳܐܺܝܬ܆ ܐܶܠܳܐ ܠܡܰܥܗܕܳܢܽܘܬܳܐ ܕܺܝܠܳܗ̇ ܕܪܺܝܫܽܘܬ ܟܳܗܢܽܘܬܳܐ ܡܳܪܳܢܳܐܺܝܬ. ܘܚܳܫܶܒ ܐ̱ܢܳܐ ܠܶܗ ܠܗܳܢܳܐ ܕܝܰܘܡܳܐ ܐܺܝܬܰܘܗ̱ܝ ܕܚܽܘܣܳܝܳܐ܆ ܐܰܝܟ ܗܰܘ ܕܰܐܡܺܝܪ ܒܢܳܡܽܘܣܳܐ܆ ܗܰܘ ܕܒܶܗ ܪܺܝܫ ܟܳܗ̈ܢܶܐ ܚܕܳܐ ܙܒܰܢ ܒܫܰܢ̱ܬܳܐ ܒܰܥܣܰܪܬܳܐ ܕܝܰܪܚܳܐ ܫܒܺܝܥܳܝܳܐ܆ ܠܰܩܕܽܘܫ ܩܽܘ̈ܕܫܺܝܢ ܥܳܐܶܠ ܗ̱ܘܳܐ^[1]܆ ܗܳܢܰܘ ܕܶܝܢ ܒܩܽܘܕܫܐ ܡܫܰܡܠܝܳܐ ܘܰܡܒܰܪܟܳܐ ܘܕܰܟܝܳܐ.

ܫܽܘܘܕܳܥܰܐ ܗ̱ܘ ܓܶܝܪ ܡܶܢܝܳܢܳܐ ܡܰܢ ܫܒܺܝܥܳܝܳܐ܆ ܕܩܰܕܺܝܫܽܘܬܳܐ ܘܰܕܒܽܘܪܟܬܳܐ ܘܰܕܕܰܟܝܽܘܬܳܐ. ܘܣܳܗܶܕ ܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ ܕܳܐܡܰܪ܆ ܕܒܰܪܟܶܗ ܐܰ‌ܠܳܗܳܐ ܠܝܰܘܡܳܐ ܫܒܺܝܥܳܝܳܐ ܘܩܰܕܫܶܗ܆ ܡܶܛܽܠ ܕܒܶܗ ܐܶܬܬܢܺܝܚ ܡܶܢ ܟܽܠܗܽܘܢ ܥ̈ܒܳܕܰܘܗܝ^[2]܆ ܘܰܕܢܽܘܚ ܟܰܕ ܐܰܬܩܶܢ ܩܺܒܽܘܬܳܐ܆ ܐܰܝܟܰܢܳܐ ܕܢܶܣܚܶܐ ܘܰܢܛܽܘܦ ܒܶܗ ܒܡܶܛܪܳܐ ܗܰܘ ܐܰܟܣܢܳܝܳܐ ܘܰܬܡܺܝܗܳܐ ܡܶܬܦܩܰܕ ܗ̱ܘܳܐ܆ ܕܡܶܢ ܕܰܟ̈ܝܳܬܳܐ ܚܰܝ̈ܘܳܬܳܐ ܟܺܝܬ ܘܦܳܪ̈ܚܳܬܳܐ܆ ܫܰܒܥܳܐ ܫܰܒܥܳܐ ܢܰܥܶܠ ܠܘܳܬܶܗ܆ ܕܶܟܪ̈ܶܐ ܟܺܝܬ ܘܢܶܩ̈ܒܳܬܳܐ^[3].

ܕܰܡܫܰܡܠܝܽܘܬܳܐ ܕܶܝܢ ܐܺܝܬܰܘܗ̱ܝ ܡܚܰܘܝܳܢܳܐ܆ ܡܶܢܝܳܢܳܐ ܗܰܘ ܥܣܺܝܪܳܝܳܐ܆ ܐܰܝܟܰܢܳܐ ܕܡܰܘܕܰܥ ܓܰܠܝܳܐܺܝܬ ܩܽܘܪܒܳܢܳܐ ܗܰܘ ܕܡܰܥܣܳܪ̈ܶܐ܆ ܘܝܰܥܩܽܘܒ ܕܩܰܕܡܳܝܳܐ ܢܳܕܰܪ ܘܳܐܡܰܪ ܠܘܳܬ ܐܰ‌ܠܳܗܳܐ܆ ܘܳܐܦ ܡܶܢ ܟܽܠܗܶܝܢ ܗܳܠܶܝܢ ܕܶܐܢ ܬܶܬܶܠ ܠܺܝ ܡܰܥܣܳܪ̈ܶܐ ܐ݀ܰܥܣܰܪ ܐܶܢܶܝܢ ܠܳܟ^[4]܆ ܡܰܠܽܘܢ ܕܶܝܢ ܐܰܒܪܳܗܳܡ ܕܡܶܢ ܩܕܳܡܰܘ̈ܗ̱ܝ ܡܰܥܣܳܪ̈ܶܐ ܡܶܢ ܟܽܠܗܶܝܢ ܒ̈ܶܙܬܶܐ ܝܰܗ̱ܒ ܠܡܰܠܟܺܝܙܕܶܩ^[5]܆ ܘܗܽܘ ܢܳܡܽܘܣܳܐ ܕܰܒܟܽܠܗܽܘܢ ܥܶܣܪܳܐ ܦܽܘܩ̈ܕܳܢܶܐ ܡܶܬܚܒܶܫ܆ ܘܳܐܦ ܗܽܘ ܙܰܪܥܳܐ ܗܰܘ ܕܡܶܠܬܳܐ ܐܶܘܰܢܓܶܠܳܝܬܳܐ܆ ܕܟܰܕ ܒܰܥܣܰܪ ܥܣܺܝܪ̈ܝܘܳܬܳܐ ܡ̇ܟܺܝܠ܆ ܡܰܝܬܶܐ ܦܺܐܪܳܐ ܡܫܰܡܠܝܳܐ^[6]܆ ܐܰܝܟܰܢܳܐ ܕܳܐܦ ܐܺܝܣܚܳܩ ܟܰܕ ܙܳܪܰܥ ܗ̱ܘܳܐ ܣܥܳܪ̈ܶܐ܆ ܐܳܦ ܒܡܳܐܐ ܙܰܪ̈ܥܶܐ ܡܰܝܬܶܐ ܗ̱ܘܳܐ ܠܗܶܝܢ^[7]܆ ܘܳܐܦ ܡܙܰܡܪܳܢܳܐ ܕܰܒܩܺܝܬܳܪܳܐ ܕܰܥܣܰܪ ܡܶܢ̈ܺܝܢ ܡܶܬܦܩܰܕ ܠܰܡܙܰܡܳܪܽܘ^[8].

ܡܳܢܳܐ ܗܳܟܺܝܠ ܡܶܣܬܥܰܪ ܗ̱ܘܳܐ ܒܝܰܘܡܳܐ ܗܳܢܳܐ ܕܚܽܘܣܳܝܳܐ ܢܶܫܡܰܥ. ܘܰܢܚܰܣܶܐ ܟܳܗܢܳܐ ܗܰܘ ܕܢܶܡܫܚܽܘܢܳܝܗ̱ܝ ܆ ܘܗܰܘ ܕܰܢܫܰܡܠܽܘܢ ܐܝܕܰܘ̈ܗ̱ܝ܆ ܘܰܢܚܰܣܶܐ ܠܰܩܕܽܘܫ ܩܽܘ̈ܕܫܶܐ ܘܰܠܡܰܫܟܢܳܐ ܕܣܳܗܕܽܘܬܳܐ ܘܰܠܡܰܕܒܚܳܐ. ܘܰܢܚܰܣܶܐ ܡܶܛܽܠ ܟܳܗ̈ܢܶܐ ܘܡܶܛܽܠ ܟܽܠܳܗ̇ ܟܢܽܘܫܬܳܐ ܢܚܰܣܶܐ. ܚܕܳܐ ܙܒܰܢ ܒܫܰܢ̱ܬܳܐ ܢܶܬܥܒܶܕ^[9].

ܕܗܳܢܳܐ ܗܳܟܺܝܠ ܝܰܘܡܳܐ ܗܰܝܡܢܶܬ ܕܰܐܚܺܝܕ ܚܰܝܠܳܐ܆ ܐܳܦ ܝܰܘܡܳܐ ܗܳܢܳܐ ܕܩܳܐܶܡ܆ ܗܰܘ ܕܒܶܗ ܐܳܦ ܠܕܽܘܟܪܳܢܳܐ ܕܰܐܒܳܗ̈ܳܬܳܐ ܗܳܠܶܝܢ ܩܰܕܺܝ̈ܫܶܐ ܡܫܰܡܠܶܝܢ ܚ̱ܢܰܢ. ܗܳܢܽܘܢ ܕܳܐܦ ܕܰܡܒܰܪܟܺܝܢ ܠܶܗ ܠܪܺܝܫܳܗ̇ ܕܫܰܢ̱ܬܳܐ ܝܰܘܡܳܢܳܐ ܟܰܕ ܢܺܐܡܰܪ ܐ̱ܢܳܫ܆ ܠܳܐ ܢܶܦܰܕ ܡܶܢ ܗܳܝ ܕܦܰܐܝܳܐ܆ ܟܰܕ ܫܽܘܪ̈ܳܝܶܐ ܕܒܽܘܪܟܬܳܐ ܐܰܝܬܺܝܘ ܠܰܢ܆ ܡܶܬܚܰܘܝܳܢܽܘܬܶܗ ܕܗܽܘܦܐܛܘܤ ܢܰܨܺܝܚܳܐ܆ ܒܪܶܗ ܕܰܡܫܰܒܚܳܐ ܘܪܳܚܶܡ ܐܰ‌ܠܳܗܳܐ ܤܛܪܐܛܝܓܘܤ ܐܰܘ ܟܺܝܬ ܪܺܝܫ ܚܰܝܠܳܐ ܕܰܐܬܪܳܐ ܕܡܰܕܢܚܳܐ܆ ܗܳܢܽܘܢ ܪ̈ܺܝܫܰܝ ܟܳܗ̈ܢܶܐ ܫܰܪܺܝܪ̈ܶܐ܆ ܗܳܢܽܘܢ ܕܰܡܫܰܡܠܶܝܢ ܗ̱ܘܰܘ ܒܺܐܝ̈ܕܰܝܗܽܘܢ܆ ܗܳܢܽܘܢ ܡܫܺܝܚ̈ܶܐ ܕܡܳܪܝܳܐ܆ ܗܳܢܽܘܢ ܕܥܰܡ ܦܰܘܠܽܘܤ ܡܶܫܟܚܺܝܢ ܠܡܰܙܥܳܩܽܘ܆ ܡܕܰܡ̈ܝܳܢܶܐ ܕܺܝܠܝ ܗܘ̣ܰܘ ܐܰܝܟܰܢܳܐ ܕܶܐܢܳܐ ܕܰܡܫܺܝܚܳܐ^[10]܆ ܘܗܳܟܰܢܳܐ ܡܶܬܚܙܶܝܢ ܡܫܺܝ̈ܚܶܐ܆ ܗܳܢܽܘܢ ܕܳܐܦ ܗܳܫܳܐ ܕܳܒܚܺܝܢ ܕܶܒ̈ܚܶܐ ܡܶܬܗܰܘ̈ܢܳܢܶܐ܆ ܘܰܡܟܰܗܢܺܝܢ ܘܡܰܣܩܺܝܢ ܬܰܟܫ̈ܦܳܬܳܐ ܕܣܰܓܺܝ ܝܰܬܺܝܪ ܕܰܟ̈ܝܳܢ܆ ܚܠܳܦ ܩܕܽܘܫ ܩܽܘ̈ܕܫܺܝܢ܆ ܚܠܳܦ ܡܰܕܒܚܳܐ܆ ܚܠܳܦܰܝܢ ܕܺܝܠܰܢ ܟܳܗ̈ܢܶܐ ܕܠܳܐ ܫܳܘܝܳܐܺܝܬ ܩܳܝܡܺܝܢܰܢ ܩܕܳܡܰܝܗܽܘܢ^[11]܆ ܐܰܝܟܰܢܳܐ ܕܳܐܦ ܒܕܽܘܒܳܪܳܐ ܐܳܦ ܒܡܶܠܬܳܐ ܠܳܐ ܢܶܗܘܶܐ ܡܰܣ̈ܠܰܝܳܐ. ܠܘܳܬ ܗܳܕܶܐ ܓܶܝܪ ܚܳܝܪܳܐ ܐܳܦ ܕܶܒܚܬܳܐ ܟܺܝܬ ܘܰܨܠܽܘܬܳܐ ܗܳܝ ܕܰܚܠܳܦ ܡܰܕܒܚܳܐ܆ ܘܳܐܦ ܗܳܝ ܕܰܚܠܳܦ ܩܕܽܘܫ ܩܽܘ̈ܕܫܺܝܢ. ܐܰܝܟܰܢܳܐ ܕܰܐܝܟ ܕܡܶܢ ܨܶܐܕܰܝܢ ܩܰܕܺܝ̈ܫܶܐ ܢܩܰܘܽܘܢ܆ ܘܠܳܐ ܢܶܣܬܰܝܒܽܘܢ ܒܕܽܘܒܳܪ̈ܶܐ ܕܺܝܠܰܢ܆ ܘܰܒܚܽܘܒܳܠܳܐ ܕܕܽܘܓܡ̈ܰܐܛܰܐ ܕܰܓ̈ܳܠܶܐ. ܡܶܛܽܠ ܗܳܕܶܐ ܓܶܝܪ܆ ܐܳܦ ܐܰ‌ܠܳܗܳܐ ܗܰܘ ܕܥܰܠ ܟܽܠ ܪܳܫܶܐ ܗ̱ܘܳܐ ܠ̱ܐܢܳܫܺܝ̈ܢ ܒܝܰܕ ܢܒܺܝ̈ܶܐ ܘܳܐܦ ܣܰܓܺܝ ܡܰܪܺܝܪܳܐܺܝܬ܆ ܕܠܰܫܡܳܐ ܕܺܝܠܶܗ ܘܬܽܘܒ ܐܳܦ ܠܩܽܘ̈ܕܫܰܘ̈ܗ̱ܝ ܥܳܒܕܺܝܢ ܗ̱ܘܰܘ ܡܣܰܝ̈ܒܶܐ܆ ܘܝܳܗܒܺܝܢ ܗ̱ܘܰܘ ܥܶܠܬܳܐ ܕܓܽܘܕܳܦܳܐ ܠܥܰܡ̱ܡ̈ܶܐ^[12].

ܚܠܳܦܰܝܢ ܗܳܟܺܝܠ ܗܳܢܽܘܢ ܕܰܡܟܰܗܢܺܝܢ ܚ̱ܢܰܢ܆ ܒܟܽܠܙܒܰܢ ܡܰܢ܆ ܝܰܬܺܝܪܳܐܺܝܬ ܕܶܝܢ ܒܝܰܘܡܳܐ ܗܳܢܳܐ ܕܩܰܪܺܝܒ܆ ܐܳܦ ܚܠܳܦ ܟܽܠܳܗ̇ ܥܺܕܬܳܐ ܗܰܝܡܢܶܬ ܕܕܳܒܚܺܝܢ ܕܶܒ̈ܚܳܬܳܐ ܡܶܕܶܡ ܡܠܺܝ̈ܠܳܬܳܐ ܘܰܨ̈ܠܰܘܳܬܳܐ܆ ܗܳܢܽܘܢ ܪ̈ܺܝܫܰܝ ܟܳܗ̈ܢܶܐ ܪܰܘܪ̈ܒܶܐ ܘܰܡܫܰܡ̈ܠܰܝܳܐ ܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ. ܠܗܳܢܽܘܢ ܕܠܰܬܪ̈ܰܝܗܽܘܢ ܟܰܕ ܚܕܳܐ ܢܰܦܫܳܐ ܩܢܰܘ܆ ܒܗܳܝ ܕܗܶܢܶܝܢ ܟܰܕ ܗܶܢܶܝܢ ܡܶܬܪܰܥܶܝܢ ܗ̱ܘܰܘ܆ ܘܰܠܘܳܬ ܚܕܳܐ ܩܰܪܩܰܦܬܳܐ ܪܳܡܬܳܐ ܕܰܡܝܰܬܪܽܘܬܳܐ ܪܕܰܦܘ܆ ܚܰܕ ܪܺܝܫ ܟܳܗ̈ܢܶܐ ܚܰܬܺܝܬ̣ܳܐ ܢܶܚܫܽܘܒ ܐܶܢܽܘܢ ܐ̱ܢܳܫ. ܐܳܦ ܓܶܝܪ ܠܶܐܣܟܺܡܳܐ ܗܰܘ ܕܪܺܝܫܽܘܬ ܟܳܗܢܽܘܬܳܐ܆ ܗܰܘ ܕܡܶܢ ܩܕܺܝܡ ܡܰܢ ܡܶܢ ܢܳܡܽܘܣܳܐ ܐܰܝܟ ܕܰܒܛܶܠܳܢܺܝܬܳܐ ܡܶܬܪܫܶܡ ܗ̱ܘܳܐ^[13]܆ ܒܰܫܪܳܪܳܐ ܕܶܝܢ ܠܚܰܪܬܳܐ ܡܶܢ ܐܶܘܰܢܓܶܠܺܝܽܘܢ ܐܶܬܡܰܠܺܝ܆ ܒܗܽܘܢ ܒܰܥ̈ܒܳܕܶܐ ܒܢܰܦܫܗܽܘܢ ܚܰܘܝܘܗ̱ܝ.

ܘܠܶܐܤܛܠܳܐ ܗܳܝ ܟܳܗܢܳܝܬܳܐ ܒܝܰܕ ܣܳܥܽܘܪ̈ܘܳܬܳܐ ܠܰܒܫܽܘܗ̇܆ ܟܰܕ ܣܚܰܘ ܩܰܕܡܳܐܺܝܬ ܒܡܰܝ̈ܳܐ ܕܟܰܝ̈ܳܐ ܕܦܺܝܠܘܣܘܦܺܝܰܐ ܘܰܕܚܰܝ̈ܶܐ ܕܕܰܝܪܳܝܽܘܬܳܐ. ܒܰܣܶܝܠܺܝܽܘܤ ܡܰܢ܆ ܐܳܦ ܟܰܕ ܠܘܳܬ ܕܽܘܒܳܪܳܐ ܡܰܕܒܪܳܝܳܐ ܘܠܳܐ ܚܠܺܝܛܳܐ ܦܪܰܚ܆ ܡܶܢ ܕܽܘܝܳܪܳܐ ܘܟܰܘܫܳܐ ܕܰܒܢܰܝ̈ܢܳܫܳܐ ܗܳܢܽܘܢ ܕܰܒܗܽܘܠܶܐ ܚܳܐܶܝܢ. ܓܪܺܝܓܽܘܪܺܝܽܘܤ ܕܶܝܢ܆ ܟܰܕ ܡܶܛܽܠ ܡܢܺܝܚܳܢܽܘܬܳܐ ܕܰܐܒܽܘܗ̱ܝ ܕܰܟܪܺܝܗ ܗ̱ܘܳܐ܆ ܐܳܦ ܒܓܰܘ ܡܕܺܝܢ̱ܬܳܐ ܪܳܕܶܦ ܗ̱ܘܳܐ ܒܳܬܰܪ ܚܰܬܺܝܬ̣ܽܘܬ̣ܳܐ ܕܰܡܥܰܙܝܳܢܽܘܬܳܐ܆ ܘܒܳܬܰܪ ܠܳܐ ܡܫܰܘܬܦܽܘܬܳܐ ܕܰܠܘܳܬ ܗܽܘܦܳܟܳܐ ܗܰܘ ܠܳܐ ܡܫܰܚܠܦܳܐ ܘܰܚܠܺܝܛܳܐ܆ ܐܰܝܟܰܢܳܐ ܕܺܐܝܬ ܐܶܡܰܬܝ܆ ܐܳܦ ܫܶܬܩܳܐ ܡܫܰܡܠܝܳܐ ܢܣܺܝܡ ܠܶܗ ܢܳܡܽܘܣܳܐ ܠܠܶܫܳܢܶܗ.

ܒܳܬܰܪܟܶܢ ܕܶܝܢ ܟܰܕ ܒܥܳܢܘܳܝܽܘܬܳܐ ܘܒܰܡܚܰܡܣܢܳܢܽܘܬܳܐ ܕܡܶܢ ܪ̈ܓܺܝܓܳܬܳܐ ܐܶܣܰܪܘ ܚܰܨܰܝ̈ܗܽܘܢ܆ ܘܒܳܗ̇ ܒܰܒܬܽܘܠܽܘܬܳܐ ܠܰܟܣܳܣܬܳܐ ܚܰܨܘ܆ ܘܰܠܫܳܢܝܽܘܬܳܐ ܘܡܶܫܬܰܝܚܢܳܢܽܘܬܳܐ ܕܚܰܫ̈ܶܐ ܗܳܢܽܘܢ ܕܰܬܚܶܝܬ ܟܰܪܣܳܐ ܚܰܣܺܝܢܳܐܺܝܬ ܙܟܰܘ܆ ܘܰܠܒܰܪܢܳܫܳܐ ܗܰܘ ܥܰܬܺܝܩܳܐ ܕܒܺܝܫܽܘܬܳܐ ܕܒ̣ܰܪܘ ܒܰܩܛܺܝܪܳܐ ܘܰܥ̣ܨܰܘ܆ ܘܰܠܘܳܬ ܗܰܘ ܚܰܕܬ̣ܳܐ ܘܰܕܒܰܟܝܳܢܳܐ ܗܶܢܽܘܢ ܡܶܢ ܢܰܦܫܗܽܘܢ ܐܶܬܰܘ܆ ܘܰܐܟܚܕܳܐ ܥܰܡܳܗ̇ ܕܰܡܥܰܙܝܳܢܽܘܬܳܐ ܗܳܕܶܐ ܒܟܽܠܳܗ̇ ܡܰܪܕܽܘܬܳܐ ܕܝܽܘܠ̈ܦܳܢܶܐ ܡܠܺܝ̈ܠܶܐ ܥܒܰܪܘ܆ ܘܰܒܗܳܠܶܝܢ ܒܪܶܚܡܰܬ ܥܰܡܠܳܐ ܐܶܬܗܰܓܺܝܘ܆ ܠܘܳܬ ܐܰܓܳܢܳܐ ܕܚܶܟܡܬܳܐ ܐܰ‌ܠܳܗܳܝܬܳܐ ܐܶܙܰܠܘ܆ ܘܡܶܢ ܢܶܟ̈ܣܳܬܳܐ ܕܗܳܝ ܛܥܶܡܘ܆ ܘܒܰܡܙܳܓܳܗ̇ ܐܶܫܬܰܘܬܰܦܘ^[14]. ܘܟܰܕ ܒܚܰܠܝܽܘܬܳܐ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ ܒܡܰܪܓܫܳܢܽܘܬܳܐ ܐܶܬܠܰܗܰܩܘ ܘܶܐܬܪܰܓܪܰܓܘ܆ ܠܳܐ ܐܰܪܚܶܩܘ ܐܶܠܳܐ ܐܶܬܒܰܣܰܡܘ܆ ܘܰܒܟܽܠܶܗ ܚܰܝܠܗܽܘܢ ܐܶܬܡܠܺܝܘ ܕܠܳܐ ܣܒܰܥܘ ܡܶܢ ܗܳܠܶܝܢ.

ܟܰܕ ܠܰܫ̈ܟܳܚܳܬܳܐ ܗܳܠܶܝܢ ܕܰܓܳܠ̈ܳܬܳܐ ܕܝܽܘܠ̈ܦܳܢܶܐ ܗܳܢܽܘܢ ܕܡܶܢ ܠܒܰܪ ܚܳܕ̈ܝܳܢܐܶܡܰܪܘ܆ ܘܒܰܡܚܺܝܠܽܘܬܳܐ ܕܗܳܢܽܘܢ܆ ܠܘܳܬ ܩܽܘܝܳܡܳܐ ܒܰܠܚܽܘܕ ܕܰܫܪܳܪܳܐ ܐܶܬܚܰܫܰܚܘ܆ ܘܗܳܟܰܢܳܐ ܐܳܦ ܩܕܳܡ ܕܢܶܬܡܰܫܚܽܘܢ ܒܰܡܫܺܝܚܽܘܬܳܐ ܗܳܝ ܪܺܝܫܽܘܬ ܟܳܗܢܳܝܬܳܐ܆ ܟܽܘܬܺܝܢܳܐ ܕܪܺܝܫܽܘܬ ܟܳܗܢܽܘܬܳܐ ܠܒܶܫܘ ܗ̱ܘܰܘ܆ ܕܰܒܓܰܘ̈ܢܶܐ ܣܰܓܺܝ̈ܰܐܝ ܐܳܕܫ̈ܶܐ ܕܰܡܝܰܬܪ̈ܳܬܳܐ ܡܦܰܬܟܳܐ ܗ̱ܘܳܬ܆ ܠܗܳܠܶܝܢ ܟܺܝܬ ܕܛܽܘܦܣܳܐ ܗܰܘ ܢܳܡܽܘܣܳܝܳܐ܆ ܟܰܕ ܙܚܽܘܪܺܝܬܳܐ ܘܒܽܘܨܳܐ ܘܗܳܠܶܝܢ ܕܰܐܝܟ ܗܳܟܰܢ ܡܫܰܡܰܗ ܗ̱ܘܳܐ ܡܰܘܕܰܥ. ܟܽܘܬܺܝܢܳܐ ܕܶܝܢ ܦܽܘܕܺܝܪܳܐ ܐܰܘܟܺܝܬ ܪܶܓܠܳܢܳܝܬܳܐ ܘܰܡܫܰܡܠܰܝܬܳܐ܆ ܘܰܕܡܶܢ ܪܺܝܫܳܐ ܠܪܺܝܫܳܐ ܡܳܛܝܳܐ܆ ܐܰܝܟܰܢܳܐ ܕܠܳܐ ܡܶܕܶܡ ܢܶܗܘܶܐ ܐܺܝܬ ܕܥܰܪܛܶܠܳܝ܆ ܐܰܘ ܕܠܳܐ ܡܟܰܣܰܝ ܡܶܢ ܡܝܰܬܪܽܘܬܳܐ.

ܗܳܟܰܢܳܐ ܐܳܦ ܠܰܐܣܳܪ ܚ̈ܰܨܶܐ ܗܰܘ ܟܳܗܢܳܝܳܐ ܐܶܬܚܰܙܰܩܘ܆ ܕܰܠܟܽܘܬܺܝܢܳܐ ܡܰܢ ܡܓܰܠܓܶܠ܆ ܘܰܠܫܰܦܺܝܪܽܘܬ ܨܶܒܬܳܐ ܗܳܝ ܕܡܶܢ ܗܳܪܟܳܐ ܡܫܰܟܶܢ܆ ܠܰܘ ܕܶܝܢ ܥܰܡ ܩܛܺܝܪܳܐ ܡܶܟܺܝܠ ܘܰܐܓܽܘܢܳܐ܆ ܠܥܶܠ̈ܠܳܬܳܐ ܗܳܠܶܝܢ ܡܰܥ̈ܒܕܳܬ ܝܰܠܕܳܐ ܚܳܐܶܨ. ܥܗܺܝܕܺܝܢ ܗ̱ܘܰܘ ܓܶܝܪ ܠܗܰܘ ܕܰܠܘܳܬ ܚܙܩܝܐܝܠ ܡܰܠܶܠ ܘܶܐܡܰܪ ܡܶܛܽܠ ܟܳܗ̈ܢܶܐ܆ ܘܠܳܐ ܢܶܐܣܪܽܘܢ ܚ̈ܰܨܰܝܗܽܘܢ ܒܰܩܛܺܝܪܳܐ^[15]܆ ܐܰܘ ܐܰܝܟ ܕܰܐ̱ܚܪܺܢܳܐ ܡܶܢ ܗܳܢܽܘܢ ܕܦܰܫܶܩܘ܆ ܘܠܳܐ ܢܶܐܣܪܽܘܢ ܚ̈ܰܨܰܝܗܽܘܢ ܒܕܽܘܥܬܳܐ. ܠܟܳܗ̈ܢܶܐ ܓܶܝܪ ܙܳܕܶܩ܆ ܕܢܶܩܕܡܽܘܢ ܢܶܕܒܪܽܘܢ ܒܰܩܛܺܝܪܳܐ ܠܚܺܐܦ̈ܶܐ ܗܳܢܽܘܢ ܠܳܐ ܡܶܬܠܰܒ̈ܟܳܢܶܐ ܕܰܪ̈ܓܺܝܓܳܬܳܐ܆ ܘܕܰܢܩܰܕܡܽܘܢ ܢܶܕܥܬܽܘܢ ܒܥܰܡ̈ܠܶܐ. ܘܰܐܣܳܪ ܚ̈ܰܨܶܐ ܢܶܗܘܶܐ ܐܺܝܬ ܠܗܽܘܢ܆ ܕܠܳܐ ܬܽܘܒ ܕܳܒܰܪ ܒܰܩܛܺܝܪܳܐ. ܐܶܠܳܐ ܕܰܡܙܰܗܰܪ ܟܺܝܬ ܘܕܰܡܢܰܛܰܪ܆ ܘܰܕܡܰܥܗܶܕ ܢܰܟܦܽܘܬܳܐ.

ܡܶܢ ܗܳܪܟܳܐ ܐܳܦ ܗܽܘܦܘܕܛܝܤ ܗܰܘ ܕܺܐܝܬܰܘܗ̱ܝ ܠܒܽܘܫܳܐ ܕܡܶܢ ܠܬܰܚܬ ܐܰܘܟܺܝܬ ܦܪܺܝܙܽܘܡܳܐ ܠܰܚܶܡܘ ܠܗܽܘܢ܆ ܕܢܰܚܬܳܐ ܡܰܢ ܐܺܝܬܰܘܗ̱ܝ ܐܳܦ ܗܽܘ ܟܳܗܢܳܝܳܐ܆ ܡܰܘܕܰܥ ܕܶܝܢ ܒܝܰܕ ܟܽܘܢܳܝܶܗ܆ ܕܡܶܢ ܠܬܰܚܬ ܗܳܢܳܐ ܡܶܙܕܩܰܪ ܒܝܰܕ ܡܰܣܩܬܳܐ ܕܰܡܝܰܬܪ̈ܳܬܳܐ܆ ܘܺܝܕܰܥܬܳܐ ܐܰܝܟ ܕܡܶܫܟܚܳܐ ܕܐ̱ܪ̈ܳܙܶܐ ܟܣܰܝ̈ܳܐ ܘܠܳܐ ܡܶܬܡܰܠ̈ܠܳܢܶܐ ܡܫܰܟܶܢ. ܟܽܘܬܺܝܢܶܗ ܓܶܝܪ ܕܰܡܫܺܝܚܳܐ ܒܰܠܚܽܘܕܶܝܗ̇ ܐܺܝܬܶܝܗ̇ ܗ̱ܘܳܬ ܙܩܺܝܪܬܳܐ ܡܶܢ ܠܥܶܠ^[16]܆ ܡܶܛܽܠ ܟܺܝܬ ܕܗܽܘ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ ܗܰܘ ܥܶܠܳܝܳܐ܆ ܕܰܠܣܺܝ̈ܡܳܬܳܐ ܕܚܶܟܡܬܳܐ ܘܕܺܝܕܰܥܬܳܐ ܡܶܢ ܠܥܶܠ ܡܰܚܶܬ ܘܰܥܠܰܝܢ ܐܳܫܶܕ^[17]܆ ܘܥܰܠ ܥܳܢܘܳܝܽܘܬܳܐ ܕܰܡܝܰܬܪ̈ܳܬܳܐ ܠܳܐ ܣܢܺܝܩ܆ ܐܰܝܟܰܢܳܐ ܓܶܝܪ ܗܰܘ ܕܠܳܐ ܝܳܕܰܥ ܚܛܺܝܬܳܐ^[18]܆ ܐܶܠܳܐ ܠܰܢ ܒܝܰܕ ܗܳܠܶܝܢ ܕܒܰܡܕܰܒܪܳܢܽܘܬܳܐ ܣܳܥܰܪ ܗ̱ܘܳܐ܆ ܝܳܗܶܒ ܗ̱ܘܳܐ ܛܽܘܦܣܳܐ ܕܚܰܝ̈ܶܐ ܡܝܰܬܪ̈ܶܐ.

ܐܶܠܳܐ ܐܳܦܠܳܐ ܡܶܢ ܐܦܘܡ̈ܝܕܐܤ ܐܰܘܟܺܝܬ ܟܒܺܝ̈ܢܳܬܳܐ^[19] ܗܳܠܶܝܢ ܕܥܰܠ ܟܰܬܦ̈ܳܬܳܐ^[20]܆ ܚܰܣܺܝܪܺܝܢ ܗ̱ܘܰܘ ܗܳܢܽܘܢ ܚܰܝ̈ܠܬܳܢܶܐ. ܚܕܳܐ ܕܶܝܢ ܥܰܠ ܟܽܠ ܚܕܳܐ ܡܶܢ ܟܰܬܦ̈ܳܬܗܽܘܢ ܚܘܺܝܚܳܐܺܝܬ ܣܳܡܘ܆ ܐܳܦ ܗܳܠܶܝܢ ܕܶܝܢ܆ ܐܰܣܳܪ̈ܶܐ ܡܶܕܶܡ ܐܺܝܬܰܝܗܶܝܢ ܗ̱ܘܰܝ̈ ܥܰܠ ܟܰܬܦ̈ܳܬܳܐ܆ ܟܰܕ ܒܰܕܡܽܘܬ ܫܺܫ̈ܠܳܬܳܐ ܡܶܢ ܕܰܗܒܳܐ ܘܡܶܢ ܥ̈ܶܙܠܶܐ ܐ̱ܚܪ̈ܳܢܶܐ ܫܰܦܺܝܪ̈ܰܝ ܓܰܘܢܳܐ ܓܕܺܝܠܺܝܢ ܗ̱ܘܰܘ܆ ܘܥܰܠ ܚܰܕܝܳܐ ܡܶܬܟܰܪܟܺܝܢ ܗ̱ܘܰܘ܆ ܘܰܠܟܽܘܬܺܝܢܳܐ ܗܳܝ ܟܳܗܢܳܝܬܳܐ ܐܰܟܚܕܳܐ ܚܳܝܨܺܝܢ ܗ̱ܘܰܘ. ܠܛܽܘܦܣܳܐ ܕܶܝܢ ܕܪܶܚܡܰܬ̣ ܥܰܡܠܳܐ ܡܡܰܠܶܝܢ ܗ̱ܘܰܘ܆ ܘܰܕܡܰܥܒܕܳܢܽܘܬܳܐ ܡܶܬܗܰܘܢܳܢܺܝܬܳܐ ܕܰܡܝܰܬܪ̈ܳܬܳܐ. ܘܡܰܘܕܰܥ ܗ̱ܘܳܐ܆ ܟܬܳܒܳܐ ܗܰܘ ܟܳܗܢܳܝܳܐ ܕܡܶܛܠ ‌ܐܝܣܐܟܪ ܚܰܕ ܡܶܢ ܒܢܰܘܗ̱ܝ ܕܝܰܥܩܽܘܒ ܐܳܡܰܪ܆ ܕܰܐܚܠܶܕ ܟܕܰܢ ܟܰܬܦܶܗ ܠܗܳܝ ܕܢܶܥܡܰܠ܆ ܘܰܗܘ̣ܳܐ ܓܰܒܪܳܐ ܦܰܠܳܚܳܐ^[21]. ܦܪ̈ܺܝܫܳܝܶܐ ܡܰܢ ܓܶܝܪ ܡܶܬܥܰܕܠܺܝܢ ܗ̱ܘܰܘ ܡܶܢ ܦܳܪܽܘܩܰܢ܆ ܕܡܰܘ̈ܒܠܶܐ ܝܰܩܺܝܪ̈ܳܬܳܐ ܘܰܕܥܰܣ̈ܩܳܢ ܠܛܰܥܢܳܐ ܣܳܝܡܺܝܢ ܗ̱ܘܰܘ ܥܰܠ ܟܰܬܦ̈ܳܬܳܐ ܕܰܒܢܰܝ̈ܢܳܫܳܐ܆ ܗܶܢܽܘܢ ܕܶܝܢ ܐܳܦܠܳܐ ܒܪܺܝܫ ܨܶܒܥܳܐ ܠܡܶܓܫܰܦ ܒܝܽܘܩܪܳܐ ܡܶܕܶܡ ܨܳܒܶܝܢ ܗ̱ܘܰܘ^[22]. ܒܰܣܶܝܠܺܝܽܘܤ ܕܶܝܢ ܘܰܓܪܺܝܓܽܘܪܺܝܽܘܤ܆ ܟܰܕ ܒܰܟܒܺܝ̈ܢܳܬܳܐ ܗܳܢܶܝܢ ܕܪܺܝܫܽܘܬ ܟܳܗܢܽܘܬܳܐ ܡܰܦܪܓܺܝܢ ܗ̱ܘܰܘ܆ ܠܰܡܚܰܡܣܢܳܢܽܘܬܳܐ ܘܰܠܪܶܚܡܰܬ ܥܰܡܠܳܐ ܛܥܺܝܢܺܝܢ ܗ̱ܘܰܘ܆ ܟܰܕ ܝܳܗܒܺܝܢ ܗ̱ܘܰܘ ܛܽܘܦܣܳܐ ܕܗܳܝ ܕܢܰܥܡܠܽܘܢ ܠܗܳܢܽܘܢ ܕܰܬܚܶܝܬ ܪܺܝܫܳܢܽܘܬܗܽܘܢ. ܘܰܒܝܰܕ ܥ̈ܒܳܕܶܐ ܠܘܳܬ ܗܳܕܶܐ ܡܚܰܦܛܺܝܢ ܗ̱ܘܰܘ ܘܡܰܙܥܩܺܝܢ ܗ̱ܘܰܘ܆ ܕܒܰܣܺܝܡܳܐ ܐܺܝܬܰܘܗ̱ܝ ܢܺܝܪܳܐ ܕܶܐܘܰܢܓܶܠܺܝܽܘܢ܆ ܘܡܰܘܒܠܐ ܕܺܝܠܶܗ ܩܰܠܺܝܠܳܐ^[23].

ܡܶܢ ܗܳܕܶܐ ܐܳܦ ܠܰܦܪܺܝܣܳܐ ܗܰܘ ܕܕܺܝ̈ܢܶܐ ܕܡܶܬܩܪܶܐ ܠܽܘܓܝܘܢ ܐܰܘܟܺܝܬ ܡܶܠܬܳܐ ܥܰܠ ܚܰܕܝܳܐ ܡܰܝܬܶܝܢ ܗ̱ܘܰܘ^[24]܆ ܗܰܘ ܟܺܝܬ ܕܡܶܬܪܰܓܫܳܢܳܐܺܝܬ ܡܰܢ ܐܰܝܟ ܩܰܕܺܝܡܽܘܬ ܡܛܰܦܣܳܢܽܘܬܳܐ ܗܳܝ ܢܳܡܽܘܣܳܝܬܳܐ܆ ܙܩܽܘܪܳܐ ܐܺܝܬܰܘܗ̱ܝ ܗ̱ܘܳܐ ܥܦܺܝܦܳܐ܆ ܕܰܒܫܰܘܝܽܘܬܳܐ ܡܫܽܘܚܬܳܐ ܕܙܰܪܬܳܐ ܐܺܝܬ ܗ̱ܘܳܐ ܠܶܗ ܒܦܶܬܝܳܐ ܘܒܽܐܘܪܟܳܐ܆ ܘܳܐܦ ܗܽܘ ܕܶܝܢ ܒܕܰܗܒܳܐ ܘܰܒܓܰܘ̈ܢܶܐ ܕܡܶܢ ܨܽܘܒܳܥܳܐ ܡܗܰܕܰܪ ܗ̱ܘܳܐ܆ ܘܒܰܐܪܒܥܳܐ ܣܶܕܪ̈ܶܐ ܕܟܺܐܦ̈ܶܐ ܝܰܩܺܝܪ̈ܳܬ ܕܡܰܝ̈ܳܐ ܡܶܢ ܠܥܶܠ ܡܨܰܒܰܬ ܗ̱ܘܳܐ܆ ܡܶܬܗܰܘܢܳܢܳܐܺܝܬ ܕܶܝܢ ܪܳܡܶܙ ܗ̱ܘܳܐ ܘܡܰܘܕܰܥ ܠܕܽܘܟܳܝܳܐ ܗܰܘ ܡܒܰܢܝܳܢܳܐ ܘܰܒܚܺܝܪܳܐ ܕܗܰܘ ܡܠܺܝܠܳܐ ܘܪܺܝܫܳܢܳܝܳܐ ܕܢܰܦܫܳܐ܆ ܕܗܳܕܶܐ ܓܶܝܪ ܐܺܝܬܰܘܗ̱ܝ ܬܰܚܘܺܝܬܳܐ ܕܰܗܒܳܐ܆ ܘܰܠܕܺܝܢܳܐ ܩܒܺܝܥܳܐ ܘܰܚܠܺܝܡܳܐ ܕܰܒܛܳܒ̈ܳܬܳܐ܆ ܘܠܳܐ ܡܶܫܬܰܚܠܦܳܢܳܐ ܘܕܰܠܟܽܠܢܳܫ ܩܰܕܺܝܡ ܡܰܟܪܙ ܘܢܰܨܺܝܚܳܐ܆ ܠܗܳܝ ܟܺܝܬ ܕܰܡܫܰܘ̈ܕܥܳܢ ܠܳܗ̇ ܟܺܐܦ̈ܶܐ ܗܳܠܶܝܢ ܢܰܗܺܝܪ̈ܳܬܳܐ ܟܰܕ ܐܳܦ ܒܰܥܦܺܝܦܽܘܬ ܪܒܺܝܥܳܝܽܘܬܳܐ ܗܳܝ ܕܣܶܕܪ̈ܶܐ ܡܫܰܘ̈ܕܥܳܢ܆ ܕܡܶܢ ܟܽܠ ܓܰܒܳܐ ܣܟܺܝܪ ܘܰܚܒܺܝܫ. ܥܦܺܝܦܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ܆ ܟܰܕ ܗܽܘ ܦܶܪܩܳܐ ܗܰܘ ܡܶܬܥܦܶܦ ܗ̱ܘܳܐ ܘܡܶܬܟܪܶܟ ܥܰܠ ܢܰܦܫܶܗ܆ ܘܪܳܡܶܙ ܗ̱ܘܳܐ ܕܙܳܕܶܩ ܠܶܗ ܠܟܳܗܢܳܐ܆ ܕܰܠܙܰܘ̈ܥܶܐ ܕܬܰܪܥܺܝܬܶܗ ܗܳܠܶܝܢ ܡܠܺܝ̈ܠܶܐ܆ ܐܰܝܟ ܗܰܘ ܕܡܶܢ ܕܪܺܝܫ ܫܳܪܶܐ ܠܗܽܘܢ ܘܡܰܗܦܶܟ ܥܰܠ ܢܰܦܫܗܽܘܢ ܘܰܒܡܰܪ̈ܢܝܳܬܳܐ ܥܳܐܶܦ ܠܗܽܘܢ܆ ܐܰܝܟܰܢܳܐ ܕܡܶܢ ܟܽܠ ܕܽܘܟ ܢܶܗܘܶܐ ܐܺܝܬ ܠܶܗ ܗܳܝ ܕܰܙܗܺܝܪܳܐ.

ܟܰܕ ܗܳܟܺܝܠ ܠܰܦܪܺܝܣܳܐ ܕܕܺܝ̈ܢܶܐ ܕܗܳܟܰܢܳܐ ܡܰܬܩܰܢ ܗ̱ܘܳܐ ܘܰܡܫܰܟܠܰܠ ܗ̱ܘܳܐ ܛܥܺܝܢܺܝܢ ܗ̱ܘܰܘ܆ ܐܺܝܬ ܗ̱ܘܳܐ ܠܗܽܘܢ ܒܶܗ^[25] ܡܫܰܘܕܥܳܢܽܘܬܳܐ ܘܰܫܪܳܪܳܐ^[26]. ܕܽܐܘܡܳܢܳܝܬܳܐ ܡܰܢ ܐܺܝܬ ܗ̱ܘܳܬ ܘܡܶܬܪܰܓܫܳܢܺܝܬܳܐ ܐܰܝܟ ܟܬܳܒܳܐ ܗܰܘ ܢܳܡܽܘܣܳܝܳܐ܆ ܡܶܬܗܰܘܢܳܢܳܐܺܝܬ ܕܶܝܢ ܕܰܠܓܶܠ̈ܝܳܢܶܐ ܗܳܢܽܘܢ ܕܡܶܢ ܠܥܶܠ ܕܗܳܢܶܝܢ ܐܰ‌ܠܳܗܳܝ̈ܳܬܳܐ ܪܳܡܙܳܐ ܗ̱ܘܳܬ ܘܰܡܚܰܘܝܳܐ܆ ܘܰܠܡܶܬܓܰܠܝܳܢܽܘܬܶܗ ܕܰܫܪܳܪܳܐ. ܗܰܘ ܓܶܝܪ ܕܰܠܙܰܘܥܳܐ ܗܰܘ ܡܠܺܝܠܳܐ ܐܺܝܬ ܠܶܗ ܕܰܡܕܰܟܰܝ܆ ܘܗܳܟܰܢܳܐ ܡܰܢܗܰܪ ܘܡܰܚ̣ܣܶܢ܆ ܒܢܽܘܗܪܐ ܕܰܫܪܳܪܳܐ ܡܶܬܬܰܒܪܰܩ. ܒܗܰܘ ܟܺܝܬ ܕܟܰܕ ܐܶܬܢܰܗܰܪܘ ܗܳܢܽܘܢ ܕܰܠܚܰܓܳܐ ܗܳܢܳܐ ܕܩܰܪܺܝܒ ܝܳܗܒܺܝܢ ܥܶܠܬܳܐ܆ ܡܰܠܦܳܢܽܘܬܳܐ ܥܰܬܺܝܪܬܳܐ ܘܰܡܠܺܝܬܳܐ ܘܰܡܫܰܪܬܰܚܬܳܐ ܚܰܘܺܝܘ. ܟܰܕ ܠܰܙܢܰܝ̈ܳܐ ܗܳܢܽܘܢ ܚܰܝܘܰܬ ܫܶܢܴ̈ܝܶܐ ܘܒܰܥܪܺܝܪ̈ܳܝܶܐ ܪܳܕܦܺܝܢ ܘܡܰܠܦܺܝܢ. ܟܰܕ ܬܶܐܽܘܪܺܝܰܐ ܟܝܳܢܳܝܬܳܐ ܕܚܶܟܡܬܳܐ ܕܥܳܒܽܘܕܳܐ ܗܳܝ ܕܡܶܬܬܰܝܬܝܳܐ ܒܒܶܪ̈ܝܳܬܳܐ ܗܳܠܶܝܢ ܕܡܶܬܚ̈ܰܙܝܳܢ ܘܰܠܥܳܠܡܳܐ ܗܳܢܳܐ ܡܡܰܠ̈ܝܳܢ܆ ܐܰܝܟ ܕܡܶܢ ܕܽܘܟ̈ܝܳܬܳܐ ܟܰܣ̈ܝܳܬܳܐ ܡܰܦܩܺܝܢ. ܟܰܪ ܠܪܰܘܡܳܐ ܕܬܶܐܘܳܠܘܓܺܝܰܐ ܒܗܰܘܢܳܐ ܘܰܒܡܶܠܬܳܐ ܐܰܝܟ ܟܡܳܐ ܕܡܶܬܕܰܪܟܳܐ ܡܶܢ ܠܥܶܠ ܢܳܓܕܺܝܢ܆ ܘܰܠܗܳܢܳܐ ܒܕܺܝܢܳܐ ܕܰܡܒܰܚܶܢ ܥܰܡ ܒܽܘܝܳܢܳܐ܆ ܠܘܳܬ ܗܳܢܽܘܢ ܐ̱ܚܪ̈ܳܢܶܐ ܡܰܦܩܺܝܢ.

ܠܽܘܓܝܘܢ ܓܶܝܪ ܐܰܘܟܺܝܬ ܡܶܠܬܳܐ ܕܡܶܬܩܰܪܝܳܐ ܦܪܺܝܣܳܐ܆ ܛܥܺܝܢܺܝܢ ܗ̱ܘܰܘ ܠܰܘ ܦܫܺܝܛܳܐܺܝܬ܆ ܐܶܠܳܐ ܦܪܺܝܣܳܐ ܕܕܺܝ̈ܢܶܐ. ܗܳܟܰܢܳܐ ܐܳܦ ܕܥܽܘܡܩܳܐ ܕܰܟܬܳܒܳܐ ܐܰ‌ܠܳܗܳܝܳܐ܆ ܐܺܝܬܰܝܗܽܘܢ ܗ̱ܘܰܘ ܓܺܙܰܒܪ̈ܶܐ ܡܶܕܶܡ ܘܪ̈ܰܒܰܝ ܒ̈ܳܬܶܐ ܪ̈ܽܘܚܳܢܶܐ. ܟܰܕ ܐܳܦܠܳܐ ܠܦܰܐܝܽܘܬܳܗ̇ ܛܰܝܳܦܬܳܐ ܕܰܟܬܺܝܒܬܳܐ ܘܠܰܫܛܺܝܚܽܘܬܳܗ̇ ܒܰܪܳܝܬܳܐ ܡܫܺܝܛܺܝܢ ܗ̱ܘܰܘ܆ ܐܰܘ ܡܪܺܝܡܺܝܢ ܗ̱ܘܰܘ ܠܳܗ̇ ܟܽܠ ܟܽܠܶܗ. ܘܰܠܥܽܘܬܪܳܐ ܕܪܽܘܚܳܐ ܗܰܘ ܕܰܡܛܰܫܰܝ ܗ̱ܘܳܐ ܒܡܽܘܫ̈ܚܳܬܳܐ ܕܺܝܕܰܥܬܳܐ ܪܕܺܝܬܳܐ ܕܳܠܶܝܢ ܗ̱ܘܰܘ ܘܡܳܬ̣ܩܺܝܢ܆ ܘܠܰܘ ܟܰܕ ܒܟܳܣܳܐ ܐܩܪܐܛܘܢ ܐܰܘܟܺܝܬ ܠܳܐ ܡܙܺܝܓܳܐ ܕܰܐ̱ܚܪܳܢܝܽܘܬ ܦܽܘܫܳܩ̈ܶܐ ܛܰܥ̈ܝܳܬܳܐ ܐܰܘܟܺܝܬ ܥܒܺܝܕܽܘܬ ܡ̈ܰܬܠܶܐ܆ ܡܶܛܽܠ ܠܳܐ ܝܰܠܺܝܦܽܘܬܳܐ ܪܳܘܶܝܢ ܗ̱ܘܰܘ܆ ܘܡܶܢ ܡܰܛܥ̈ܝܢܘܳܬܳܐ ܕܣܰܓܺܝܽܐܘܬ ܡ̈ܶܠܶܐ ܗܳܝ ܐܰܪܛܝܩܝܬܐ ܐܶܬܬܫܺܝܓܘ܆ ܘܒܰܡܡܰܠܠܽܘܬ ܡ̈ܰܬܠܶܐ ܦܳܫܪ̈ܳܬ ܚܶܠ̈ܡܶܐ ܠܫܽܘܦܪܶܗ ܕܰܫܪܳܪܳܐ ܩܰܐܦܝܠܘܣܐ ܥܒܰܕܘ ܘܙܰܝܶܦܘ.

ܡܝܰܬܰܪܬܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܠܗܽܘܢ܆ ܕܺܝܗܽܘܕܳܐܺܝܬ ܢܶܗܘܽܘܢ ܡܡܰܟܟܺܝܢ ܐܰܟܚܕܳܐ ܥܰܡ ܟܬܳܒܳܐ ܕܡܶܣܟܺܢܳܐܺܝܬ ܡܶܣܬܰܟܰܠ܆ ܘܠܳܐ ܕܰܒܝܰܕ ܪܳܡܽܘܬܳܐ ܠܳܐ ܪܕܺܝܬܳܐ ܘܰܡܫܰܩܰܠܬܳܐ܆ ܚܠܳܦ ܚ̈ܶܛܶܐ ܡܬܰܪ̈ܣܝܳܢܝܳܬܳܐ ܘܕܰܠܢܰܦ̈ܫܳܬܳܐ ܡܠܺܝ̈ܠܳܬܳܐ ܦܰܐܝ̈ܳܢ܆ ܠܘܳܬ ܩܰܠܺܝܠܽܘܬܳܐ ܗܳܝ ܕܬܶܒܢܳܐ ܢܶܦܩܽܘܢ܆ ܘܰܒܥܺܝܪܳܝܬܳܐ ܘܰܕܠܳܐ ܡܶܠܬܳܐ. ܡܶܛܽܠ ܡ̈ܶܠܶܐ ܕܰܐܝܟ ܗܳܠܶܝܢ܆ ܫܰܦܺܝܪ ܐܶܡܰܪ ܐ̱ܢܳܫ ܡܶܢ ܢܒܺܝ̈ܶܐ܆ ܟܰܦܳܐ ܕܠܳܐ ܐܺܝܬ ܒܳܗ̇ ܚܰܝܠܳܐ ܕܬܶܥܒܶܕ ܩܰܡܚܳܐ^[27]. ܐܶܠܳܐ ܠܰܘ ܕܕܰܐܝܟ ܗܳܢܳܐ ܪܰܒܳܐ ܒܰܣܶܝܠܺܝܽܘܤ ܘܰܡܡܰܠܶܠ ‌ܐܰ‌ܠܳܗܳܝ̈ܳܬܳܐ ܓܪܺܝܓܽܘܪܺܝܽܘܤ܆ ܗܳܢܽܘܢ ܕܠܺܝ ܦܪܺܝܣܳܐ ܐܰܘܟܺܝܬ ܡܶܠܬܳܐ ܕܕܺܝ̈ܢܶܐ ܐܺܝܬܰܝܗܽܘܢ܆ ܘܰܡܫܰܘܕܥܳܢܽܘܬܳܐ ܘܰܫܪܳܪܳܐ. ܘܰܠܡ̈ܶܠܶܐ ܕܺܝܠܝ ܒܨܺܝܪ̈ܳܬܳܐ ܒܟܽܠ ܡܶܕܶܡ܆ ܠܘܳܬ ܡܰܠ̈ܦܳܢܘܳܬܳܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ ܕܗܳܢܽܘܢ ܣܳܐܶܡ ܐ̱ܢܳܐ ܘܰܡܦܰܚܶܡ ܐ̱ܢܳܐ ܘܶܐܢܗܽܘ ܕܒܰܙܒܰܢ ܐܶ݀ܫܟܰܚ ܐܶܢܶܝܢ ܠܡܶܠ̈ܰܝ܆ ܟܰܕ ܒܰܕܡܽܘܬ ܡܰܚܙܺܝܬܳܐ ܙܰܒ̈ܢܺܝܢ ܣܰܓܺܝ̈ܳܐܢ ܡܶܬܒܰܩܶܐ ܐ̱ܢܳܐ ܒܗܶܝܢ ܒܡܰܠܦܳܢ̈ܘܳܬܗܽܘܢ܆ ܕܠܰܘ ܝܽܘܩܢܳܐ ܕܕܳܡܶܐ ܡܰܝ̈ܬܝܳܢ܆ ܡܶܚܕܳܐ ܒܰܪܫܳܥܬܶܗ ܡܬܰܪܶܨ ܐ̱ܢܳܐ ܠܗܶܝܢ܆ ܘܕܰܠܘܳܬ ܡܕܰܡܝܳܢܽܘܬܳܐ ܕܗܳܢܽܘܢ ܐܳ‌‌ܠܶܨ ܐ̱ܢܳܐ ܕܰܐ݀ܣܶܩ ܐܶܢܶܝܢ. ܗܳܢܽܘܢ ܕܡܶܛܽܠ ܗܳܕܶܐ ܦܪܺܝܣܳܐ ܕܰܒܕܺܝ̈ܢܶܐ ܪܨܺܝܦ ܘܰܩܒܺܝܥ ܘܰܡܫܰܪܰܪ ܐܺܝܬ ܗ̱ܘܳܐ ܠܗܽܘܢ܆ ܡܶܛܽܠ ܟܺܝܬ ܕܰܐܝܟ ܦܽܘܩܕܳܢܳܐ ܢܳܡܽܘܣܳܝܳܐ܆ ܒܗܳܠܶܝܢ ܟܒܺܝ̈ܢܳܬܳܐ ܕܥܰܠ ܟܰܬܦ̈ܳܬܳܐ ܬܠܶܐ ܗ̱ܘܳܐ܆ ܘܥܰܡ ܡܚܰܡܣܢܳܢܽܘܬܳܐ ܘܪܶܚܡܰܬ ܥܰܡܠܳܐ ܐܰܟܚܕܳܐ ܟܕܺܝܢ ܗ̱ܘܳܐ ܘܡ̣ܙܘܓ. ܐܳܡܰܪ ܓܶܝܪ ܢܰܗܺܝܪܳܐܺܝܬ܆ ܠܳܐ ܬܶܦܫܽܘܚܳܝܗ̱ܝ ܠܰܦܪܺܝܣܳܐ ܡܶܢ ܟܒܺܝܢܬܳܐ ܗܳܝ ܕܥܰܠ ܟܰܬܦܳܐ^[28]. ܕܗܺܝ ܟܺܝܬ ܟܒܺܝܢܬܳܐ ܐܺܝܬܶܝܗ̇ ܗ̱ܘܳܬ ܒܰܕܡܽܘܬ ܣܺܝܪܳܐ ܓܕܺܝܠܬܳܐ܆ ܘܺܐܝܬ ܗ̱ܘܳܐ ܠܳܗ̇ ܡܰܓܢܽܘܢ̈ܝܳܬܳܐ ܐܰܘܟܺܝܬ ܣܰܟܪ̈ܽܘܢܝܳܬܳܐ ܕܰܡܠܰܚ̈ܡܳܢ ܒܳܗ̇ ܘܡܶܬܬܰܠ̈ܘܬܳܢ ܥܰܡ ܗܰܘ ܦܪܺܝܣܳܐ܆ ܕܡܶܢ ܕܰܗܒܳܐ ܘܡܶܢ ܚܽܘܠܛܳܢܳܐ ܗܰܘ ܣܰܓܺܝ ܓܰܘ̈ܢܶܐ ܡܰܬܩ̈ܢܳܢ ܗ̱ܘܰܝ̈. ܘܡܶܫ̈ܟܚܳܢ ܗ̱ܘܰܝ̈ ܡܰܢ ܡܶܛܽܠ ‌ܐܶܣܟܺܡܳܐ ܗܰܘ ܚܽܘܕܪܳܢܳܝܳܐ܆ ܕܳܐܦ ܓܺܝ̈ܓܠܶܐ ܐܳܦ ܕܝܣܩܘ ܐܰܘܟܺܝܬ ܦܺܝܢ̈ܟܽܘܢܶܐ܆ ܐܰܘ ܡܶܕܶܡ ܕܰܐܝܟ ܗܳܟܰܢ ܢܶܬܟܰܢ̈ܝܳܢ܆ ܠܳܚܡܳܐܺܝܬ ܕܶܝܢ ܡܰܓܢܽܘܢ̈ܝܳܬܳܐ ܐܰܘܟܺܝܬ ܣܰܟܪ̈ܽܘܢܝܳܬܳܐ ܡܶܫ̈ܬܰܡܗܳܢ. ܡܶܛܽܠ ܟܺܝܬ ܕܙܳܕܶܩ ܠܶܗ ܠܪܺܝܫ ܟܳܗ̈ܢܶܐ܆ ܕܳܐܦ ܡܶܢ ܩܕܳܡܰܘ̈ܗ̱ܝ ܘܳܐܦ ܡܶܢ ܒܶܣܬܪܶܗ܆ ܒܰܕܡܽܘܬ ܣܰܟܪܳܐ ܢܶܗܘܶܐ ܡܰܟܪܶܟ ܠܳܗ̇ ܠܶܗ ܠܝܰܨܺܝܦܽܘܬܳܐ ܗܳܝ ܢܳܛܽܘܪܬܳܐ܆ ܕܕܰܠܡܳܐ ܒܕܽܘܟ ܡܰܚܫܰܒܬܳܐ ܡܶܕܶܡ ܣܰܩܽܘܒܠܳܝܬܳܐ ܕܪ̈ܽܘܚܶܐ ܗܳܠܶܝܢ ܕܒܺܝܫܽܘܬܳܐ ܬܶܛܪܶܐ ܒܶܗ ܒܗܰܘ ܠܽܘܓܝܘܢ^[29] ܐܰܘܟܺܝܬ ܦܪܺܝܣܳܐ܆ ܘܠܰܒܚܺܝܪܽܘܬܳܐ ܕܕܺܝ̈ܢܶܐ ܬܶܫܓܽܘܫ܆ ܘܠܰܡܫܰܘܕܥܳܢܽܘܬܳܐ ܘܠܰܫܪܳܪܳܐ܆ ܒܰܚܒܺܝܟܽܘܬܳܗ̇ ܕܒܺܝܫܽܘܬܳܐ ܬܶܥܒܶܕ ܠܡܰܪܚܳܩܽܘ.

ܠܗܳܕܶܐ ܕܶܝܢ ܣܰܟܪܳܐ ܙܳܕܶܩ ܠܶܗ ܠܪܺܝܫ ܟܳܗ̈ܢܶܐ ܐܰܝܟ ܡܶܬܟܰܬܫܳܢܳܐ ܩܰܕܡܳܝܳܐ ܘܪܺܝܫ ܩܪܳܒܳܐ܆ ܕܳܐܦ ܠܘܳܬ ܗܳܢܽܘܢ ܕܫܳܡܥܺܝܢ ܠܗܽܘܢ ܠܕܺܝ̈ܢܶܐ ܕܠܽܘܓܝܘܢ ܐܰܘܟܺܝܬ ܦܪܺܝܣܳܐ ܘܡܶܬܝܰܠܦܺܝܢ܆ ܘܡܶܫܬܰܘܬܦܺܝܢ ܒܢܽܘܗܪܳܐ ܕܰܡܫܰܘܕܥܳܢܽܘܬܳܐ ܘܕܰܫܪܳܪܳܐ ܢܶܡܬܚܺܝܗ̇܆ ܘܢܶܛܪܽܘܕ ܡܶܢܗܽܘܢ ܠܟܽܠܶܗ ܣܽܘܓܦܳܢܳܐ ܗܰܘ ܕܡܶܢ ܡܰܩܪ̈ܒܳܢܶܐ. ܗܳܝ ܕܰܬܚܽܘܬܶܝܗ̇ ܣܰܬܪܽܘܗ̇ ܠܥܺܕܬܳܐ ܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ܆ ܟܰܕ ܚܰܝܠܬܳܢܳܐܺܝܬ ܙܢܰܩܘ ܠܢܳܩ̈ܫܶܐ ܘܰܠܚܺܐܦ̈ܶܐ ܕܰܩܪܳܒܳܐ ܕܰܐܪܺܝܽܘܤ ܘܕܐܘܢܘܡܝܘܤ ܘܰܕܡܐܩܕܘܢܝܘܤ. ܘܳܐܦ ܗܳܫܳܐ ܥܕܰܟܺܝܠ ܡܣܰܬܪܺܝܢ܆ ܟܰܕ ܠܘܳܬ ܟܽܠ ܗܶܪܣܝܤ ܡܶܬܠܰܚܡܺܝܢ܆ ܘܰܠܗܳܕܶܐ ܗܳܦܟܺܝܢ ܘܙܳܟܶܝܢ.

ܘܰܠܛܶܟܣܳܐ ܗܰܘ ܡܩܰܕܫܳܐ ܛܥܺܝܢܺܝܢ ܒܶܝܬ ܥܰܝ̈ܢܰܝܗܽܘܢ^[30]܆ ܘܰܒܦܰܪܨܽܘܦܳܐ ܓܰܠܝܳܐ ܥܰܡ ܦܰܘܠܽܘܤ ܠܬܶܫܒܽܘܚܬܶܗ ܕܡܳܪܝܳܐ ܡܰܘܕܥܺܝܢ^[31]܆ ܘܰܒܫܰܦܺܝܪܽܘܬ ܦܰܐܝܽܘܬܳܐ ܕܡܶܢ ܟܽܠܗܶܝܢ ܐܰܝܟ ܕܒܰܟܠܺܝܠܳܐ ܠܪܺܝܫܳܐ ܡܟܰܠܠܺܝܢ܆ ܘܡܶܢ ܠܥܶܠ ܒܩܺܝܕܐܪܝܤ ܡܟܰܣܶܝܢ܆ ܒܩܽܘܒܥܳܐ ܡܶܕܶܡ ܓܠܺܝܠܳܐ ܘܚܽܘܕܪܳܢܳܝܳܐ ܘܕܰܒܪܺܝܫܳܐ ܥܶܠܳܝܳܐ ܡܫܰܠܰܡ ܘܩܰܛܺܝܢ ܘܚܰܛܺܝܛ܆ ܘܒܰܙܢܳܐ ܡܶܕܶܡ ܐܶܣܟܺܡܳܐ ܕܰܫܡܰܝܳܐ ܡܡܰܠܶܐ܆ ܘܡܰܘܕܰܥ ܠܗܽܘܢ ܡܫܰܡܠܝܳܐܺܝܬ ܘܢܰܗܺܝܪܳܐܺܝܬ ܘܦܰܐܝܽܘܬ ܟܳܗܢܳܐܺܝܬ܆ ܕܟܰܕ ܟܽܠܗܽܘܢ ܡܶܢ ܠܬܰܚܬ ܥܕܰܡܳܐ ܠܥܶܠ ܡܥܰܛܦܺܝܢ ܒܫܽܘܘܫܳܛܳܐ ܕܰܡܝܰܬܪ̈ܳܬܳܐ܆ ܡܕܺܝ̈ܢܳܝܶܐ ܐܺܝܬܰܝܗܽܘܢ ܕܡܰܠܟܽܘܬܳܐ ܕܰܫܡܰܝܳܐ. ܕܗܳܝ ܕܳܐܦ ܠܟܽܠܰܢ ܬܶܗܘܶܐ܆ ܕܠܳܐ ܢܶܬܚܙܶܐ ܐܰܟܣ̈ܢܳܝܶܐ ܕܺܝܠܳܗ̇܆ ܒܝܰܘܡܳܐ ܗܰܘ ܕܕܺܝܢܳܐ. ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܡ ܡܺܐܡܪܳܐ ܕܡܳܐܐ ܘܫܬܬܥܣܪ.

ܟܗ̈ܢܐ. 16: 29 [1]

ܣܶܦܪܐ ܕܒܪܝܬܐ. 2: 3 [2]

ܣܶܦܪܐ ܕܒܪܝܬܐ. 7: 2 ـ 3 [3]

ܣܶܦܪܐ ܕܒܪܝܬܐ. 28: 22 [4]

ܣܶܦܪܐ ܕܒܪܝܬܐ. 14: 20 [5]

ܡܬܝ. 13: 8  ܐܦ 13: 23 [6]

ܣܶܦܪܐ ܕܒܪܝܬܐ. 26: 12 [7]

ܡܙܡܘܪ̈ܐ. 92: 3  ܐܦ 143: 9 [8]

ܟܗ̈ܢܐ. 16: 32 ـ 34 [9]

ܐ. ܩܘܪ̈ܝܢܬܝܐ. 4: 16  ܐܦ 11: 1 [10]

ܩܕܳܡܰܝܗܽܘܢ ܐܳܡܰܪ܆ ܩܕܳܡ ܡܰܕܒܚܳܐ ܘܰܩܕܳܡ ܩܕܽܘܫ ܩܽܘ̈ܕܫܶܐ.[11]

ܚܙܩܝܐܝܠ. 22: 26  ܐܦ 36: 22 [12]

[13]ܡܦܩܢܐ. 28: 4 ـ 39  ܐܦ 39: 1 ـ 30  ܐܦ ܟܗ̈ܢܐ. 8: 7 ـ 9

ܡ̈ܬܠܐ. 9: 2[14]

ܚܙܩܝܐܝܠ. 44: 18 [15]

ܝܘܚܢܢ. 19: 23 [16]

ܩܘܠܣ̈ܝܐ. 2: 3 [17]

ܒ. ܩܘܪ̈ܝܢܬܝܐ. 5: 21 [18]

ܟܒܥ̈ܢܬܐ؟[19]

ܡܦܩܢܐ. 28: 6 ـ 14 [20]

ܣܶܦܪܐ ܕܒܪܝܬܐ. 49: 15 [21]

ܡܬܝ. 23: 4 [22]

ܡܬܝ. 11: 30 [23]

ܡܦܩܢܐ. 28: 15 ـ 30[24]

ܥܠܰܘܗܝ[25]

ܟܗ̈ܢܐ. 8: 8  ܐܦ ܡܦܩܢܐ. 28: 30 [26]

ܗܘܫܥ. 8: 7[27]

ܡܦܩܢܐ. 28: 28 [28]

[29]ܙܳܕܶܩ ܠܶܗ ܠܡܶܕܰܥ ܠܗܰܘ ܕܩܳܪܶܐ܆ ܕܡܶܛܽܠ ܗܳܕܶܐ ܐܰ‌ܠܘܬܶܬ ܠܰܫܡܳܐ ܗܰܘ ܕܠܽܘܓܝܘܢ ܕܳܐܡܪܺܝܢ ܝܰܘ̈ܢܳܝܶܐ: ܥܰܡ ܗܳܝ ܦܪܺܝܣܳܐ ܕܩܳܪܶܝܢ ܣܽܘܪ̈ܝ̣ܳܝ̣ܶܐ܆ ܡܶܛܽܠ ܕܡܶܬܦܰܫܰܩ ܠܽܘܓܝܘܢ ܡܶܠܬܳܐ܆ ܘܠܳܚܡܳܐ ܡܶܢ ܟܽܠ ܦܪܽܘܣ ܕܡܶܠܬܳܐ ܬܶܗܘܶܐ ܐܺܝܬܶܝܗ̇ ܡܦܰܪܫܳܢܺܝܬܳܐ ܕܕܺܝ̈ܢܶܐ܆ ܗܳܢܰܘ ܕܶܝܢ ܚܽܘܫܳܒܳܐ ܡܠܺܝܠܳܐ܆ ܗܰܘ ܕܙܳܕܶܩ ܕܢܶܗܘܶܐ ܐܺܝܬ ܠܶܗ ܡܫܰܘܕܥܳܢܽܘܬܳܐ ܘܰܫܪܳܪܳܐ ܕܺܝܠܗܽܘܢ ܕܕܺܝ̈ܢܶܐ܆ ܘܟܺܐܢܽܘܬܳܐ ܕܠܐ ܦܘܕܐ ܘܰܕܠܐ ܡܰܣܰܒ ܒܰܐܦ̈ܶܐ

ܡܦܩܢܐ. 28: 36 ـ 38 [30]

ܒ. ܩܘܪ̈ܝܢܬܝܐ. 3: 18 [31]