ܡܺܐܡܪܳܐ ܕܡܳܐܐ ܘܚܡܫܬܥܣܪ

ܥܰܠ ܒܶܝܬ ܝܰܠܕܳܐ ܐܰܘܟܺܝܬ ܒܶܝܬ ܕܶܢܚܳܐ܆ ܗܳܢܰܘ ܕܶܝܢ ܡܶܬܚܰܙܝܳܢܽܘܬ ܐܰ‌ܠܳܗܳܐ.

115: ܐܳܘ ܕܰܟܡܳܐ ܐܺܝܬܰܘܗ̱ܝ ܪܰܘܡܳܐ ܕܛܳܒܽܘܬܳܐ ܐܰ‌ܠܳܗܳܝܬܳܐ ܗܳܝ ܕܰܠܘܳܬܰܢ. ܡܶܢܳܗ̇ ܓܶܝܪ ܝܳܕܰܥ ܐ̱ܢܳܐ܆ ܐܳܦ ܠܪܰܒܽܘܬܳܐ ܕܰܚܛܺܝܬܳܐ ܕܺܝܠܰܢ. ܟܽܠܶܗ ܓܶܝܪ ܗܳܢܳܐ ܡܶܕܶܡ ܐܺܝܬܶܝܗ̇ ܗ̱ܘܳܬ܆ ܐܰܝܟܰܢܳܐ ܕܰܠܗܰܘ ܕܰܠܗܰܠ ܡܶܢ ܟܽܠ ܪܺܝܫܳܢܽܘܬܳܐ܆ ܡܶܢ ܠܥܶܠ ܬܶܓܰܕ ܠܘܳܬܳܗ̇. ܕܟܰܕ ܚܢܰܢ ܠܳܐ ܝܳܕܥܺܝܢ ܗ̱ܘܰܝܢ ܕܰܐܝܟܳܐ ܪܡܶܝܢ ܗ̱ܘܰܝܢ ܠܬܰܚܬ܆ ܐܳܣܝܳܐ ܒܰܠܚܽܘܕܰܘܗ̱ܝ ܟܰܕ ܢܚܶܬ ܓܠܳܐ ܘܰܐܘܕܰܥ. ܩܳܡ ܓܶܝܪ ܠܰܘ ܥܰܠ ܕܰܟܪܺܝܗܶܝܢ ܗ̱ܘܰܘ܆ ܐܶܠܳܐ ܥܰܠ ܕܡܰܝ̣ܺܝ̣ܬܺܝܢ. ܒܰܕܓܽܘܢ ܠܰܘ ܐܳܣܝܳܐܺܝܬ ܐܰܣܺܝ ܡܰܠܽܘܢ܆ ܐܶܠܳܐ ܟܰܕ ܡܶܢ ܡܰܘܬܳܐ ܐܶܬܒܠܰܥܢܰܢ ܐܰܩܺܝܡ ܠܰܢ܆ ܘܰܢܓܰܕ ܐܰܦܶܩ ܠܰܢ ܡܶܢ ܐܰܣܽܘܪ̈ܰܘܗ̱ܝ ܕܗܰܘ. ܘܰܠܗܳܕܶܐ ܕܰܘܺܝܕ ܢܒܺܝܳܐܺܝܬ ܡܙܰܡܰܪ܆ ܟܰܕ ܐܳܡܰܪ ܗ̱ܘܳܐ ܡܶܛܽܠ ‌ܐܰ‌ܠܳܗܳܐ ܘܰܐܒܳܐ܆ ܫܰܕܰܪ ܡܶܠܬܶܗ ܘܰܐܣܺܝ ܐܶܢܽܘܢ܆ ܘܦܰܨܺܝ ܐܶܢܽܘܢ ܡܶܢ ܚ̈ܒܳܠܶܐ ܕܺܝܠܗܽܘܢ^[1]. ܡܳܢܳܐ ܐܳܡܰܪ ܐ̱ܢܳܐ ܐܳܡܰܪ ܕܰܐܣܺܝ܆ ܟܕ ܒܢܶܫ̈ܒܶܐ ܕܰܚܒܳܠܳܐ ܐܶܬܬܚܶܕܘ ܗ̱ܘܰܘ܆ ܘܰܠܘܳܬ ܚܰܒܳܪܳܐ ܕܡܰܘܬܳܐ ܢܳܚܬܺܝܢ ܗ̱ܘܰܘ ܦܰܨܺܝ ܐܶܢܽܘܢ.

ܕܫܳܠ̈ܡܳܢ ܠܗܳܠܶܝܢ ܐܳܦ ܫܺܝܦܽܘܪܳܐ ܟܳܗܢܳܝܳܐ ܗܰܘ ܕܶܐܘܰܢܓ̈ܶܠܺܝܰܐ ܡܰܙܥܶܩ܆ ܟܰܕ ܠܰܒ̈ܢܳܬ ܩ̈ܳܠܶܐ ܢܒܺܝ̣ܳܝ̣̈ܳܬܳܐ ܐܳܦ ܡܫܰܪܰܪ ܐܳܦ ܝܰܬܺܝܪ ܩܳܥܶܐ. ܡܳܢܳܐ ܓܶܝܪ ܐܳܡܰܪ܆ ܣܥܰܪ ܠܰܢ ܕܶܢܚܳܐ ܡܶܢ ܪܰܘܡܳܐ܆ ܠܡܰܢܗܳܪܽܘ ܠܗܳܢܽܘܢ ܕܰܒܚܶܫܽܘܟܳܐ ܘܰܒܛܶܠܳܠܳܐ ܕܡܰܘܬܳܐ ܝܳܬܒܺܝܢ^[2]. ܠܰܘ ܟܰܕ ܡܶܢ ܪܺܝܫ ܩܰܪܩܰܦܬܳܐ ܐܰܝܟܰܢܳܐ ܕܳܐܦ ܡܶܢ ܩܕܺܝܡ ܥܰܠ ܣܺܝܢܰܝ܆ ܒܰܪ̱ܬ ܩܳܠܳܐ ܡܶܕܶܡ ܐܺܝܬܶܝܗ̇ ܗ̱ܘܳܬ ܕܣܳܝܡܳܐ ܢܳܡܽܘܣܳܐ܆ ܘܰܚܙܳܬܐ ܕܢܽܘܪܳܐ ܕܩܳܝܡܳܐ ܬܰܡܳܢ܆ ܘܡܰܘܕܥܳܐ ܡܢܳܬܳܐܺܝܬ ܘܪܳܫܡܳܐ ܠܦܰܢܛܰܣܺܝܰܐ ܕܫܽܘܒܚܳܐ ܐܰ‌ܠܳܗܳܝܳܐ܆ ܘܰܠܗܳܕܶܐ ܕܥܰܡ ܥܰܪܦܶܠܳܐ ܡܶܬܚܰܦܝܳܐ܆ ܐܶܠܳܐ ܕܡܶܢ ܪܰܘܡܳܐ ܗܰܘ ܕܣܰܓܺܝ ܝܰܬܺܝܪ ܡܶܢ ܟܽܠ ܥܰܠܺܝ܆ ܘܰܕܗܰܘ ܕܣܰܘܦܳܐ ܐܳܦܠܳܐ ܚܰܕ ܐܺܝܬ ܠܡܬܪܢܝܘ܆ ܕܶܢܚܳܐ ܦܰܬܝܳܐ ܘܰܕܣܰܓܺܝ ܝܰܬܺܝܪ ܢܰܗܺܝܪ܆ ܕܰܠܫܶܡܫܳܐ ܕܙܰܕܝܩܽܘܬܳܐ ܐܺܝܬ ܠܶܗ܆ ܕܰܠܘܳܬ ܗܳܢܽܘܢ ܕܰܒܚܶܫܽܘܟܳܐ ܡܶܬܗܰܘܢܳܢܳܐ ܘܰܒܛܶܠܳܠܳܐ ܕܡܰܘܬܳܐ ܝܳܬܒܺܝܢ ܗ̱ܘܰܘ ܗܽܘ ܡܶܢ ܨܶܒܝܳܢܶܗ ܐܶܬܳܐ܆ ܘܰܒܟܽܠܗܽܘܢ ܙܰܠܺܝ̈ܩܰܘܗ̱ܝ ܠܥܶܠ ܡܩܰܘܶܐ ܗ̱ܘܳܐ܆ ܘܟܽܠܶܗ ܥܰܠ ‌ܐܰܪܥܳܐ ܐܝܬܰܘܗ̱ܝ ܗ̱ܘܳܐ ܘܩܰܪܺܝܒ܆ ܘܟܽܠܶܗ ܒܚ̈ܶܙܶܐ ܕܰܫܝܽܘܠ ‌ܐܰܢܗܰܪ܆ ܘܕܳܐܦܠܳܐ ܣܳܟ ܫܒܰܩ ܠܡܰܠܝܽܘܬܶܗ܆ ܐܳܦܠܳܐ ܬܽܘܒ ܒܡܶܐܬܺܝܬܶܗ ܕܰܠܘܳܬܰܢ ܦܽܘܠܳܓܳܐ ܐܰܘ ܣܽܘܝܳܟܳܐ ܣܒܰܠ.

ܗܳܝ ܕܶܝܢ ܕܰܐܝܟܰܢܳܐ܆ ܘܠܳܐ ܗܰܘܢܳܐ ܕܺܝܠܰܢ ܗܰܘ ܡܚܺܝܠܳܐ ܠܡܶܣܬܰܟܳܠܽܘ܆ ܘܳܐܦܠܳܐ ܡܶܠܬܳܐ ܠܰܡܦܰܫܳܩܽܘ ܬܶܫܟܰܚ. ܥܳܒܪܳܐ ܓܶܝܪ ܠܥܶܠ ܡܶܢ ܡܰܕܪܟܳܢܽܘܬܳܐ ܕܟܽܠܶܗ ܟܝܳܢܳܐ ܒܰܪܝܳܐ. ܡܶܛܽܠ ܕܳܐܦ ܠܡܰܠܰܐܟ̈ܶܐ ܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ܆ ܕܶܐܬܚܙܺܝ ܡܰܢ ܟܬܺܝܒܳܐ ܓܰܠܝܳܐܝܬ. ܐܶܬܚܙܺܝ ܓܶܝܪ ܠܡܰܠܰܐܟ̈ܶܐ^[3] ܐܳܡܰܪ ܦܰܘܠܽܘܤ܆ ܕܶܐܬܕܪܶܟ ܕܶܝܢ ܫܰܬܺܝܩܳܐ. ܘܕܶܐܫܬܰܒܰܚ ܡܰܢ ܡܶܢܗܽܘܢ ܐܰܡܺܝܪܳܐ. ܬܶܫܒܽܘܚܬܳܐ ܓܶܝܪ ܒܰܡܪ̈ܰܘܡܶܐ ܙܳܡܪܺܝܢ ܗ̱ܘܰܘ ܠܰܐܠܳܗܳܐ^[4]. ܕܶܐܬܦܰܫܩܰܬ ܕܶܝܢ ܡܶܢ ܚܰܕ ܐ̱ܢܳܫ ܡܶܢ ܚܰܝ̈ܠܰܘܳܬܳܐ ܗܳܢܽܘܢ ܡܫܰܡ̈ܫܳܢܶܐ ܘܰܕܠܳܐ ܓܫܽܘܡ^[5]܆ ܠܳܐ ܟܬܺܝܒܳܐ ܒܬܰܫܥܺܝܬܳܐ.

ܓܰܒܪܐܝܠ ܓܶܝܪ ܗܳܝ ܕܰܚܕܳܝ ܡܰܠܝܰܬ ܛܰܝܒܽܘܬܳܐ ܡܳܪܰܢ ܥܰܡܶܟܝ ܐܶܡܰܪ^[6]܆ ܟܰܕ ܠܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܡܫܰܠܶܡ ܗ̱ܘܳܐ܆ ܟܰܕ ܪܳܗܛܳܐ ܗ̱ܘܳܬ ܐܰܟܚܕܳܐ ܥܰܡܳܗ̇ ܕܒܰܪ̱ܬ ܩܳܠܳܐ ܗܳܝ ܕܰܫܠܳܡܳܐ ܠܳܐ ܡܶܬܡܰܠܠܳܢܳܐܺܝܬ ܘܠܳܐ ܡܶܬܩܰܕܡܳܐ ܗ̱ܘܳܬ܆ ܗܺܝ ܡܰܓܢܳܢܽܘܬܳܐ ܕܰܒܡܰܪܝܰܡ ܕܰܐ‌ܠܳܗܳܐ ܡܶܠܬܳܐ܆ ܘܡܶܬܒܰܣܪܳܢܽܘܬܳܐ ܗܳܝ ܕܠܳܐ ܫܽܘܚܠܳܦ ܘܠܳܐ ܡܶܬܦܰܫܩܳܢܺܝܬܳܐ. ܗܳܝ ܕܶܝܢ ܕܰܐܝܟܰܢܳܐ ܡܳܪܝܳܐ ܥܰܡܳܗ̇܆ ܠܳܐ ܐܰܘܣܶܦ. ܘܳܐܦܠܳܐ ܓܶܝܪ ܡܶܬܦܩܳܕܽܘ ܐܶܬܦܩܰܕ ܗ̱ܘܳܐ ܗܳܕܶܐ ܠܡܺܐܡܰܪ܆ ܘܳܐܦܠܳܐ ܡܶܫܟܳܚܽܘ ܐܶܫܟܰܚ ܗ̱ܘܳܐ ܠܰܡܩܰܒܳܠܽܘ ܗܳܝ ܕܠܳܐ ܡܶܬܕܰܪܟܳܐ܆ ܟܰܕ ܡܶܬܦܰܫܟܳܐ ܗ̱ܘܳܬ ܕܶܝܢ ܘܳܐܡܪܳܐ ܗ̱ܘܳܬ܆ ܕܰܐܝܟܰܢܳܐ ܬܶܗܘܶܐ ܠܺܝ ܗܳܕܶܐ ܡܶܛܽܠ ܕܓܰܒܪܳܐ ܠܳܐ ܝܳܕܥܳܐ ܐ̱ܢܳܐ܆ ܟܰܕ ܫܳܪܶܐ ܠܶܗ ܒܰܠܚܽܘܕ ܠܶܗ ܠܦܽܘܫܳܟܳܐ ܐܰܝܬܺܝ ܒܳܬܰܪܟܶܢ܆ ܪܽܘܚܳܐ ܕܩܽܘܕܫܳܐ ܢܺܐܬܶܐ ܥܠܰܝܟܝ܆ ܘܚܰܝܠܶܗ ܕܰܡܪܰܝܡܳܐ ܢܰܓܶܢ ܥܠܰܝܟܝ^[7]. ܠܳܐ ܬܶܫܓܫܶܟܝ̱ ܗܳܝ ܕܠܳܐ ܝܳܕܥܳܐ ܐܰܢ̱ܬܝ ܓܰܒܪܳܐ ܐܳܡܰܪ܆ ܘܳܐܦܠܳܐ ܠܘܳܬ ܒܰܛܢܳܐ ܗܰܘ ܕܡܶܢ ܥܽܘܪܙܳܠܳܐ ܦܰܓܪܳܢܳܝܳܐ ܬܰܘܒܠܺܝܢ ܗܰܘܢܶܟܝ. ܪܽܘܚܳܐ ܓܶܝܪ ܢܺܐܬܶܐ ܥܠܰܝܟܝ⁵. ܫܡܳܐ ܕܶܝܢ ܕܪܽܘܚܳܐ܆ ܠܒܰܪ ܡܶܢ ܟܽܠܶܗ ܫܽܘܘܕܳܥܳܐ ܕܦܰܓܪܳܐ ܐܺܝܬܰܘܗ̱ܝ. ܘܪܽܘܚܳܐ ܠܰܘ ܐܰܝܢܳܐ ܕܗܽܘ. ܐܶܠܳܐ ܗܰܘ ܩܰܕܺܝܫܳܐ. ܠܰܘ ܚܰܕ ܡܶܢ ܗܳܢܽܘܢ ܕܡܶܬܩܰܕܫܺܝܢ܆ ܘܰܒܬܶܓ̈ܡܶܐ ܗܳܢܽܘܢ ܡܫܰܡ̈ܫܳܢܶܐ ܚܒܺܝܫܺܝܢ܆ ܐܶܠܳܐ ܗܽܘ ܗܰܘ ܩܰܕܺܝܫܳܐ܆ ܗܰܘ ܕܡܶܢ ܐܰܒܳܐ ܢܳܦܶܩ. ܗܰܘ ܕܰܠܟܽܘܠ ܚܰܝܠܳܐ ܒ̣ܰܪܝܳܐ ܝܳܗܶܒ ܩܰܕܺܝܫܽܘܬܳܐ. ܐܰܝܟܳܐ ܕܶܝܢ ܕܥܽܘܗܕܳܢܳܐ ܕܩܰܕܺܝܫܽܘܬܳܐ܆ ܬܰܡܳܢ ܡܶܢ ܟܠ ܦܪܽܘܤ ܕܰܟܝܽܘܬܳܐ܆ ܘܰܕܗܰܢܺܝܽܐܘܬܳܐ ܘܕܰܚܛܺܝܬܳܐ ܥܶܩܒܬܳܐ ܘܠܳܐ ܡܶܕܶܡ^[8]. ܡܳܕܶܝܢ ܐܰܝܟ ܪܽܘܚܳܐ ܗܰܘ ܕܡܶܢ ܐܰ‌ܠܳܗܳܐ܆ ܥܳܒܽܘܕܳܐܺܝܬ ܢܶܥܒܕܺܝܘܗ̱ܝ ܠܝܰܠܕܳܐ ܗܰܘ ܕܡܶܢܶܟܝ ܘܡܶܢ ܐܽܘܣܺܝܰܐ ܕܺܝܠܶܟܝ ܥܬܺܝܕ ܕܢܶܬܒܛܶܢ܆ ܡܰܠܽܘܢ ܕܶܝܢ ܕܗܳܐ ܡܶܢ ܟܰܕܽܘ ܒܛܺܝܢ. ܕܝܰܬܺܝܪ ܓܶܝܪ ܩܰܠܺܝܠܳܐ ܡܶܢ ܡ̈ܶܠܶܐ ܕܺܝܠܝ܆ ܐܺܝܬܶܝܗ̇ ܡܰܥܒܕܳܢܽܘܬܳܐ ܕܗܳܢܶܝܢ ܕܡܶܣܬܰܒܪ̈ܳܢ.

ܡܰܢܽܘ ܕܶܝܢ ܗܰܘ ܕܡܶܬܒܛܶܢ. ܒܪܳܐ. ܡܶܠܬܳܐ. ܚܰܝܠܶܗ ܕܰܐܒܳܐ ܡܪܰܝܡܳܐ. ܚܰܝܠܶܗ ܓܶܝܪ ܕܰܡܪܰܝܡܳܐ ܢܰܓܶܢ ܥܠܰܝܟܝ^[9]. ܕܰܡܫܺܝܚܳܐ ܕܶܝܢ ܚܰܝܠܳܐ ܕܰܐ‌ܠܳܗܳܐ ܐܺܝܬܰܘܗ̱ܝ ܘܚܶܟܡܬܳܐ ܕܰܐ‌ܠܳܗܳܐ. ܠܦܰܘܠܽܘܤ ܫܳܡܥܺܝܢܰܢ ܕܟܳܬܶܒ. ܗܳܝ ܕܶܝܢ ܕܢܰܓܶܢ ܥܠܰܝܟܝ ܬܽܘܒ܆ ܠܘܳܬ ܡܣܰܒܪܳܢܽܘܬܳܗ̇ ܕܰܒܬܽܘܠܬܳܐ܆ ܣܰܓܺܝ ܒܙܰܒܢܳܗ̇ ܐܰܡܺܝܪܳܐ܆ ܕܶܐܡܪܰܬ ܗܳܝ ܡܶܛܽܠ ܕܓܰܒܪܳܐ ܠܳܐ ܝܳܕܥܳܐ ܐ̱ܢܳܐ. ܡܶܢ ܡܰܚܫܰܒܬܳܐ ܦܰܓܪܳܢܳܝܬܳܐ ܐܳܦ ܗܳܕܶܐ ܡܰܪܚܩܳܐ܆ ܘܰܠܘܳܬ ܬܰܪܥܺܝܬܳܐ ܕܝܰܬܺܝܪ ܐܰ‌ܠܳܗܳܝܳܐ ܡܥ̣ܰܠܝܳܐ. ܡܶܛܽܠ ܟܺܝܬ ܕܡܶܛܽܠ ܡܶܬܒܰܣܪܳܢܽܘܬܳܐ ܗܳܝ ܫܰܪܺܝܪܬܳܐ ܘܰܕܠܳܐ ܦܰܢܛܣܝܐ܆ ܐܳܦ ܥܰܠ ܡ̈ܶܠܶܐ ܕܝܰܬܺܝܪ ܓܰܠ̈ܝܳܢ ܘܢܰܗܺܝܪ̈ܳܢ ܐܺܝܬ ܗ̱ܘܳܐ ܣܽܘܢܩܳܢܳܐ܆ ܠܘܳܬ ܡܚܰܘܝܳܢܽܘܬܳܗ̇ ܕܬܶܕܡܽܘܪܬܳܐ܆ ܗܳܝ ܠܳܐ ܡܶܬܡܰܠܠܳܢܺܝܬܳܐ ܡܰܢ܆ ܡܶܬܡܰܠܠܳܢܺܝܬܳܐ ܕܶܝܢ ܐܰܝܟ ܕܡܰܨܝܳܐ.

ܘܰܠܗܳܠܶܝܢ ܝܽܘܚܰܢܳܢ ܗܰܘ ܒܪܶܗ ܕܪܰܥܡܳܐ^[10] ܒܪܰܒܽܘܬ ܩܳܠܳܐ ܐܰܦܶܩ ܠܰܢ ܡܶܢ ܡܰܥܒܕܳܢܽܘܬܳܐ ܐܰ‌ܠܳܗܳܝܬܳܐ܆ ܐܰܝܟ ܕܡܶܢ ܕܽܘܟ̈ܝܳܬܳܐ ܟܰܣ̈ܝܳܬܳܐ ܕܒܶܝܬ ܩܽܘܕܫܳܐ ܟܰܕ ܐܳܡܰܪ܆ ܡܶܠܬܳܐ ܒܶܣܪܳܐ ܗ̱ܘܳܐ ܘܰܐܓܶܢ ܒܰܢ^[11]. ܠܰܘ ܡܰܥܒܕܳܢܽܘܬܳܐ ܡܶܕܶܡ ܡܢܳܬܳܝܬܳܐ ܕܡܶܠܬܳܐ ܘܚܰܝܠܳܐ ܐܰܓܢܰܬ ܥܰܠ ܒܬܽܘܠܬܳܐ܆ ܘܥܽܘܠܳܐ ܡܶܢ ܗܳܪܟܳܐ ܒܰܕܡܽܘܬ ܐܶܪܰܡܝܳܐ ܐܰܘ ܐ̱ܢܳܫ ܡܶܢ ܗܳܢܽܘܢ ܕܰܐܡܺܝܪܺܝܢ ܕܶܐܬܩܰܕܰܫܘ ܡܶܢ ܟܰܪܣܳܐ ܕܶܐܡܗܽܘܢ ܒܶܛܢܰܬ܆ ܐܶܠܳܐ ܗܽܘ ܡܶܠܬܳܐ܆ ܗܰܘ ܕܰܐ‌ܠܳܗܳܐ ܐܺܝܬܰܘܗ̱ܝ܆ ܘܰܠܘܳܬ ܐܰ‌ܠܳܗܳܐ ܐܺܝܬܰܘܗ̱ܝ܆ ܘܰܒܪܺܝܫܺܝܬ ܐܺܝܬܰܘܗ̱ܝ^[12]܆ ܒܶܣܪܳܐ ܗܘ̣ܳܐ. ܠܰܘ ܟܰܕ ܫܰܚܠܶܦ ܠܗܳܝ ܕܺܐܝܬܰܘܗ̱ܝ ܗ̱ܘܳܐ܆ ܐܶܠܳܐ ܟܰܕ ܐܰܘܣܶܦ ܘܰܢܣܰܒ ܗܳܝ ܕܢܶܗܘܶܐ ܒܶܣܪܳܐ܆ ܒܗܳܝ ܕܠܳܐ ܡܶܬܦܰܠܓܳܢܳܐܺܝܬ ܐܶܬܚܰܝܰܕ ܩܢܽܘܡܳܐܺܝܬ ܠܒܶܣܪܳܐ ܗܰܘ ܡܶܬܝܰܠܕܳܢܳܐ. ܐܰܝܟܰܢܳܐ ܕܗܽܘ ܟܰܕ ܗܽܘ ܢܶܗܘܶܐ ܐܺܝܬܰܘܗ̱ܝ ܠܳܐ ܡܶܬܡܢܶܐ ܒܫܰܪ̈ܒܳܬܳܐ ܡܰܢ ܒܗܳܝ ܕܰܐ‌ܠܳܗܳܐ܆ ܢܶܬܡܢܶܐ ܕܶܝܢ ܒܗܳܝ ܕܠܳܐ ܡܶܫܬܰܚܠܦܳܢܳܐܺܝܬ ܡܶܛܽܠܳܬܰܢ ܗܘ̣ܳܐ ܒܰܪܢܳܫܳܐ܆ ܟܰܕ ܠܙܰܪܥܶܗ ܕܰܐܒܪܳܗܳܡ ܢܣܰܒ^[13]܆ ܒܗܳܝ ܕܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܡܶܢ ܬܰܡܳܢ ܡܰܚܬܳܐ ܗ̱ܘܳܬ ܠܓܶܢܣܳܐ܆ ܗܳܝ ܕܡܶܢܳܗ̇ ܐܶܬܒܰܣܰܪ ܗܽܘ ܘܶܐܬܒܰܪܢܰܫ܆ ܟܰܕ ܐܶܬܚܰܝܰܕ ܠܒܶܣܪܳܐ ܕܺܐܝܬ ܠܶܗ ܢܰܦܫܳܐ ܡܠܺܝܠܬܳܐ܆ ܗܳܕܐ ܗܝ ܓܶܝܪ ܗܳܝ ܕܰܐܓܶܢ^[14] ܒܰܢ. ܘܠܳܐ ܡܶܕܶܡ ܓܶܝܪ ܐܺܝܬ ܡܶܢ ܗܳܠܶܝܢ ܕܰܒܗܶܝܢ ܐܺܝܬܰܝܢ ܚܢܰܢ܆ ܗܰܘ ܕܠܳܐ ܚܰܝܕܶܗ ܠܶܗ ܡܶܠܬܳܐ. ܐܶܠܳܐ ܟܽܠܶܗ ܠܰܚܕܳܐ ܐܶܬܳܐ܆ ܒܟܽܠܳܗ̇ ܓܒܺܝܠܬܳܐ ܕܺܝܠܰܢ.

ܐܶܣܬܰܟܠ ܗܳܟܺܝܠ ܒܫܰܦܺܝܪܽܘܬ ܕܶܚܠܬܳܐ܆ ܕܳܐܦ ܗܘ̣ܳܐ ܒܶܣܪܳܐ܆ ܐܳܦ ܕܰܫ̣ܪܳܐ ܒܰܢ^[15]܆ ܘܡܶܢ ܬܰܪ̈ܬܰܝܗܶܝܢ ܝܺܬܰܪ܆ ܘܠܳܐ ܡܬܽܘܡ ܬܶܦܪܽܘܫ ܠܗܳܝ ܐ̱ܚܪܺܬܳܐ ܡܶܢ ܗܳܝ ܐ̱ܚܪܺܬܳܐ. ܐܶܢ ܓܶܝܪ ܬܦܰܠܶܓ ܠܡ̈ܶܠܶܐ ܕܗܰܘ ܚܰܕ ܪܽܘܚܳܐ܆ ܦܰܠܶܓܬܳܝܗ̱ܝ ܥܰܡܗܶܝܢ ܠܰܫܪܳܪܳܐ. ܡܚܰܪܰܪܬܳܐ ܕܡܶܢ ܫܽܘܚܠܳܦܳܐ ܡܚܰܘܝܳܐ ܠܳܗ̇ ܠܗܳܝ ܕܰܗܘ̣ܳܐ ܒܶܣܪܳܐ܆ ܗܳܝ ܕܰܐܓܶܢ ܒܰܢ ܐܰܘ ܟܺܝܬ ܫܪܳܐ ܒܰܢ^[16]܆ ܟܰܕ ܐܰܟܚܕܳܐ ܡܰܠܽܘܬܳܐ ܥܰܡܳܗ̇ ܢܽܘܟܪܳܝܬܳܐ ܕܥܳܡܽܘܪܽܘܬܳܐ. ܫܚܺܝܡܬܳܐ ܘܪܶܚܡܬܳܢܝܬܳܐ ܡܚܰܘܝܳܐ ܠܳܗ̇ ܠܗܳܝ ܕܰܫ̣ܪܳܐ ܐܰܘ ܟܺܝܬ ܐܰܓܶܢ ܒܰܢ܆ ܗܳܝ ܕܰܗܘ̣ܳܐ ܒܶܣܪܳܐ^5: ܟܰܕ ܩܳܕܡܳܐ ܡܶܬܬܣܺܝܡܳܐ ܩܕܳܡܶܝܗ̇. ܡܶܢ ܟܽܠ ܕܽܘܟ ܕܚܺܝܘܗ̱ܝ ܠܥܳܫܽܘܩܳܐ܆ ܟܰܕ ܒܡ̈ܶܠܶܐ ܟܳܗ̈ܢܳܝܳܬܳܐ ܗܳܠܶܝܢ ܚܠܺܝ̈ܡܳܬܳܐ ܘܰܡܫܰܡ̈ܠܝܳܬܳܐ ܡܚܰܘܶܐ ܐܰܢ̱ܬ ܠܶܗ ܠܟܽܠܶܗ ܥܰܡܰܢܽܘܐܶܝܠ. ܕܠܳܐ ܒܒܽܘܠܒܳܠܳܐ ܡܶܬܒܰܨܰܪ܆ ܘܠܳܐ ܒܰܦܣܳܩܳܐ ܡܶܬܦܰܠܰܓ. ܡܶܛܽܠ ܕܳܐܦ ܦܰܓܪܳܐ ܗܳܢܳܐ ܕܢܰܦܫܳܐ ܕܺܝܠܰܢ ܡܰܫܟܢܳܐ ܡܶܬܟܰܢܶܐ܆ ܐܰܝܟ ܗܳܝ ܕܰܐܡܺܝܪܳܐ ܠܦܰܘܠܽܘܤ ܠܘܳܬ ܩܽܘܪ̈ܝܢܬܳܝܶܐ܆ ܐܶܢ ܒܰܝܬܳܐ ܗܳܢܳܐ ܐܰܪܥܳܢܳܝܳܐ ܕܺܝܠܰܢ ܕܡܰܫܟܢܳܐ ܢܶܫܬܪܶܐ܆ ܘܬܘܒ ܐܳܦ ܓܶܝܪ ܚܢܰܢ ܗܳܢܽܘܢ ܕܺܐܝܬܰܝܢ ܒܡܰܫܟܢܳܐ ܗܳܢܳܐ ܡܶܬܬܰܢܚܺܝܢܰܢ^[17]܆ ܘܠܰܘ ܡܶܛܽܠܗܳܕܶܐ ܣܳܟ ܟܰܕ ܠܰܫܘܺܝܚܽܘܬܳܐ ܕܰܐܟܚܕܳܐ ܐܰܘܟܺܝܬ ܚܕܳܝܽܘܬܳܐ ܟܝܳܢܳܝܬܳܐ ܛܳܥܶܝܢ ܚ̱ܢܰܢ܆ ܐܰܝܟ ܕܥܰܠ ܒ̈ܳܬܶܐ ܗܳܢܽܘܢ ܕܒܽܐܘܡܳܢܽܘܬܳܐ ܒܢܶܝܢ܆ ܫܚܺܝܡܬܳܐ ܢܶܣܒܪܺܝܗ̇ ܠܡܰܓܢܳܢܽܘܬܳܗ̇ ܐܰܘ ܠܥܳܡܽܘܪܽܘܬܳܗ̇ ܕܢܰܦܫܳܐ ܡܶܬܗܰܘܢܳܢܺܝܬܳܐ ܒܦܰܓܪܳܐ.

ܒܶܗ ܟܰܕ ܒܶܗ ܒܰܙܢܳܐ ܗܳܟܺܝܠ܆ ܐܰܘ ܐܳܦ ܠܗܰܠ ܡܶܢ ܗܳܢܳܐ܆ ܝܰܬܺܝܪܳܐܺܝܬ ܓܶܝܪ ܐܺܝܬܶܝܗ̇ ܠܳܐ ܡܶܬܡܰܠܠܳܢܺܝܬܳܐ ܡܶܠܬܳܐ ܗܳܝ ܕܥܰܠ ܗܳܕܶܐ܆ ܚܶܟܡܬܳܐ ܗܳܝ ܕܰܐ‌ܠܳܗܳܐ ܐܰܒܳܐ ܘܚܰܝܠܳܐ^[18]܆ ܒܪܳܐ ܗܰܘ ܕܰܩܕܳܡ ܥܳܠ̈ܡܶܐ܆ ܐܶܬܚܰܝܰܕ ܩܢܽܘܡܳܐܺܝܬ ܠܦܰܓܪܳܐ ܕܰܡܢܰܦܰܫ ܡܶܬܗܰܘܢܳܢܐܺܝܬ ܘܰܫܪܳܐ ܒܰܢ܆ ܟܰܕ ܐ̱ܚܪܺܢܳܐ ܐܺܝܬܰܘܗ̱ܝ ܠܒܰܪ ܡܶܢ ܗܰܘ ܕܒܶܗ ܫܪܳܐ܆ ܘܠܳܐ ܫܰܢܺܝ ܘܶܐܫܬܰܚܠܰܦ ܠܶܗ܆ ܘܗܳܟܰܢܳܐ ܕܰܗܘ̣ܳܐ ܒܶܣܪܳܐ ܡܶܣܬܰܟܰܠ ܗܳܢܰܘ ܕܶܝܢ ܒܰܪܢܳܫܳܐ܆ ܥܰܡ ܗܳܝ ܕܩܰܘܺܝ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܐܰܝܟܰܢܳܐ ܕܣܳܟ ܬܰܪܥܺܝܬܳܐ ܕܫܽܘܚܠܳܦܳܐ ܐܰܘ ܕܒܽܘܠܒܳܠܳܐ ܐܰܘ ܕܦܽܘܠܳܓܳܐ ܠܳܐ ܬܶܥܽܘܠ ܥܰܡܶܗ܆ ܟܰܕ ܚܰܕ ܩܢܽܘܡܳܐ ܡܶܢ ܬܰܪܬܶܝܢ ܐܰ‌ܠܳܗܽܘܬܳܐ ܐܳܡܰܪ ܐ̱ܢܳܐ ܘܐ̱ܢܳܫܽܘܬܳܐ ܠܥܶܠ ܡܶܢ ܟܽܠ ܗܰܘܢܳܐ ܘܡܶܠܬܳܐ ܐܶܫܬܰܡܠܺܝ܆ ܘܚܰܕ ܦܰܪܨܽܘܦܳܐ܆ ܘܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܰܐ‌ܠܳܗܳܐ ܡܶܠܬܳܐ܆ ܘܗܳܟܰܢܳܐ ܐܳܦ ܠܒܰܛܢܳܐ ܩܰܒܶܠ ܕܢܶܬܟܬܶܒ ܥܠܰܘܗ̱ܝ ܐܳܦ ܝܰܠܕܳܐ܆ ܘܳܐܦ ܠܶܐܡܶܗ ܝܳܠܕܰܬ ܐܰ‌ܠܳܗܳܐ ܚܰܘܝܳܗ̇. ܡܶܠܬܳܐ ܓܶܝܪ ܗܘ̣ܳܐ ܒܶܣܪܳܐ ܘܰܫܪܳܐ ܒܰܢ^[19]. ܗܳܕܳܐ ܗܝ ܓܶܝܪ ܗܳܝ ܕܰܬܡܺܝܗܳܐ܆ ܕܠܰܘ ܥܕܰܡܳܐ ܠܢܰܦܫܳܐ ܐܶܬܳܐ܆ ܗܳܝ ܕܰܐܝܟ ܗܰܘ ܕܩܰܪܺܝܒܳܐ ܠܶܗ ܡܶܬܚܰܙܝܳܐ ܡܶܛܽܠ ܡܶܬܗܰܘܢܳܢܽܘܬܳܐ ܟܺܝܬ ܘܰܡܠܺܝܠܽܘܬܳܐ܆ ܐܶܠܳܐ ܐܳܦ ܠܘܳܬ ܗܳܝ ܕܒܶܣܪܳܐ ܢܶܗܘܶܐ ܢܚܶܬ܆ ܟܰܕ ܕܟܽܠ ܟܽܠܶܗ ܘܠܳܐ ܡܶܕܶܡ ܐܰܫܺܝܛ ܡܶܢ ܟܽܠܗܶܝܢ ܗܳܠܶܝܢ ܕܰܚܢܰܢ. ܘܰܒܪܰܡ ܐܳܦ ܗܳܟܰܢܳܐ ܐܳܡܰܪ ܐܶܘܢܓܠܝܣܛܐ܆ ܕܰܚܙܰܝܢ ܫܽܘܒܚܶܗ܆ ܫܽܘܒܚܳܐ ܐܰܝܟ ܕܺܝܚܺܝܕܳܝܳܐ ܕܡܶܢ ܐܰܒܳܐ܆ ܕܰܡܠܶܐ ܛܰܝܒܽܘܬܳܐ ܘܰܫܪܳܪܳܐ¹. ܚܳܙܶܐ ܐܰܢ̱ܬ ܠܳܗ̇ ܓܰܠܝܳܐܺܝܬ ܠܗܳܕܶܐ܆ ܗܳܝ ܟܺܝܬ ܕܳܐܡܰܪ ܗܘܰܝܬ܆ ܕܰܒܟܽܠܗܽܘܢ ܙܰܠܺܝ̈ܩܶܐ ܕܢܰܚ ܠܰܢ ܫܶܡܫܳܐ ܗܰܘ ܕܙܰܕܺܝܩܽܘܬܳܐ܆ ܘܟܰܕ ܐܰܝܟ ܗܰܘ ܕܰܬܚܶܝܬ ܥܢܳܢܳܐ ܕܒܶܣܪܳܐ ܕܺܝܠܰܢ ܚܠ̣ܰܕ ܥ̣ܰܠ ܘܠܳܐ ܐܶܬܚܰܦܺܝ܆ ܐܶܠܳܐ ܢܰܗܺܝܪܳܐܺܝܬ ܡܚܰܘܶܐ ܗ̱ܘܳܐ ܒܙܰܗܪܺܝܪ̈ܶܐ ܦܰܐܝ̣ܰܝ̣̈ ܠܰܐܠܳܗܳܐ ܕܫܽܘܒܚܶܗ܆ ܕܺܝܚܺܝܕܳܝܳܐ ܕܡܶܢ ܐܰܒܳܐ ܐܺܝܬܰܘܗ̱ܝ ܟܝܳܢܳܐܺܝܬ܆ ܘܠܰܘ ܡܶܢ ܡܫܰܘܬܦܽܘܬܳܐ ܐܺܝܬ ܠܶܗ ܡܰܠ̣ܝܽܘܬܳܐ ܒܰܫܪܳܪܳܐ ܘܰܒܛܰܝܒܽܘܬܳܐ܆ ܘܰܕܗܳܠܶܝܢ ܝܳܗܶܒ ܠܰܢ ܫܰܘܬܳܦܽܘܬܳܐ ܐܰܝܟ ܐܰ‌ܠܳܗܳܐ܆ ܫܦܺܝܥܳܐܺܝܬ ܐܰܟܚܕܳܐ ܘܪܶܚܡܰܬ ܐ̱ܢܳܫܳܐܺܝܬ.

ܠܗܳܢܳܐ ܗܳܟܺܝܠ ܕܶܢܚܳܐ ܕܡܶܢ ܪܰܘܡܳܐ ܗܰܘ ܕܒܺܐܝܕܰܘ̈ܗ̱ܝ ܐܶܣܬܥܰܪܢܰܢ܆ ܡܶܢ ܩܕܺܝܡ ܡܰܢ ܥܰܠ ‌ܐܰܪܥܳܐ ܡܰܙܥܩܺܝܢ ܗ̱ܘܰܘ ܢܒܺܝ̈ܶܐ܆ ܟܰܕ ܠܘܳܬ ܫܡܰܝܳܐ ܚܳܝܪܺܝܢ ܗ̱ܘܰܘ܆ ܘܰܡܦܺܝܣܺܝܢ ܗ̱ܘܰܘ ܕܢܶܕܢܰܚ ܘܳܐܡܪܺܝܢ ܗ̱ܘܰܘ܆ ܚܰܘܳܐ ܠܰܢ ܡܳܪܝܳܐ ܪ̈ܰܚܡܶܐ ܕܺܝܠܳܟ܆ ܘܦܽܘܪܩܳܢܳܐ ܕܺܝܠܳܟ ܬܶܬܶܠ ܠܰܢ. ܘܗܰܘ ܕܝܳܬܶܒ ܥܰܠ ܟܪ̈ܽܘܒܶܐ ܐܶܬܓܠܺܝ^[20]. ܗܳܢܰܘ ܕܶܝܢ ܒܰܢ ܒܰܡܨܰܥܬܰܢ ܐܶܬܚܙܺܝ܆ ܟܰܕ ܗܳܘܶܐ ܐܰܢ̱ܬ ܒܰܪܢܳܫܳܐ܆ ܘܡܰܢܗܰܪ ܐܰܢ̱ܬ ܘܡܰܨܡܰܚ ܐܰܢ̱ܬ ܐܰܝܟ ܐܰ‌ܠܳܗܳܐ ܫܰܪܺܝܪܳܐ. ܗܳܫܳܐ ܕܶܝܢ ܡܶܢ ܠܥܶܠ܆ ܫܡܰܝܳܐ ܡܰܟܪܙܳܐ ܠܶܗ܆ ܟܰܕ ܒܝܰܕ ܟܰܘܟܒܳܐ ܐܰܟܣܢܳܝܳܐ ܫܒܺܝܚܳܐܺܝܬ ܢܳܓܕܳܐ ܠܰܡܓܽܘ̈ܫܶܐ܆ ܕܡܶܢ ܦܳܪܶܤ ܠܽܐܘܪܫܠܶܡ ܐܳܬܶܝܢ ܘܳܐܡܪܺܝܢ܆ ܐܰܝܟܳܐ ܐܺܝܬܰܘܗ̱ܝ ܡܰܠܟܳܐ ܕܝܽܗ̱ܘ̈ܕܳܝܶܐ ܗܰܘ ܕܶܐܬܺܝܠܶܕ. ܚܙܰܝܢ ܓܶܝܪ ܟܰܘܟܒܶܗ ܒܡܰܕܢܚܳܐ ܘܶܐܬܰܝܢ ܠܡܶܣܓܰܕ ܠܶܗ^[21].

ܠܳܐ ܐ̱ܢܳܫ ܕܶܝܢ ܟܰܕ ܗܳܠܶܝܢ ܫܳܡܰܥ܆ ܢܶܣܒܰܪ ܒܺܝܫܳܐܺܝܬ ܘܠܳܐ ܝܰܠܺܝܦܳܐܺܝܬ܆ ܕܡܶܢ ܟܬܳܒܳܐ ܐܰ‌ܠܳܗܳܝܳܐ ܛܳܥܝܽܘܬܳܐ ܗܳܝ ܕܰܡܡܰܠܠܽܘܬ ܒܶܝܬ ܝܰܠ̈ܕܶܐ ܥܳܐܠܳܐ܆ ܗܳܝ ܕܒܺܐܝ̈ܕܶܝܗ̇ ܡܦܰܠܓܺܝܢ ܘܝܳܗܒܺܝܢ ܗܳܢܽܘܢ ܣܪ̈ܺܝܩܶܐ܆ ܡܰܘ̈ܠܳܕܶܐ ܕܗܳܢܽܘܢ ܕܰܒܟܽܠ ܙܒܰܢ ܡܶܬܝܰܠܕܺܝܢ. ܐܳܦ ܓܶܝܪ ܫܽܘܘܕܳܝܳܗ̇ ܕܗܳܝ ܗܳܢܳܐ ܐܺܝܬܰܘܗ̱ܝ܆ ܗܳܝ ܕܡܶܢ ܡܶܬܬܙܺܝܥܳܢܽܘܬܳܐ ܦܠܳܢܝܰܬ ܐܰܝ̇ܕܳܐ ܕܗܺܝ ܕܰܐܝܠܶܝܢ ܕܗܽܘ ܟܰܘܟܒ̈ܶܐ܆ ܗܳܢܽܘܢ ܕܡܶܢ ܫܽܘܪܳܝܳܐ ܒܰܫܡܰܝܳܐ ܐܺܝܬܰܝܗܽܘܢ܆ ܘܡܶܢ ܥܽܘܪܙܳܠܳܐ ܘܰܟܢܽܘܫܝܳܐ ܕܰܠܘܳܬ ܟܰܘܟ̈ܒܶܐ ܗܳܢܽܘܢ ܕܰܒܚܽܘܕܪܳܐ ܗܰܘ ܕܡܶܬܩܪܶܐ ܙܽܘܕܝܰܐܩܽܘܢ ܣܺܝܡܺܝܢ܆ ܘܡܶܢ ܐܶܣܟܺܡ̈ܶܐ ܐܰܝܠܶܝܢ ܕܗܽܘ ܕܺܝܠܗܽܘܢ ܕܰܠܘܳܬ ܚ̈ܕܳܕܶܐ܆ ܡܶܬܟܰܬܒܳܐ ܫܳܥܬܳܐ܆ ܘܩܳܨܡܺܝܢ ܚܰܝ̈ܶܐ ܐܰܝܠܶܝܢ ܕܰܥܬܺܝܕܺܝܢ ܕܢܶܗܘܽܘܢ ܠܶܗ ܠܗܰܘ ܕܒܳܗ̇ ܐܶܬܺܝܠܶܕ. ܗܳܪܟܳܐ ܕܶܝܢ ܚܰܕ ܟܰܘܟܒܳܐ ܐܰܟܣܢܳܝܳܐ ܘܫܰܪܺܝܪܳܐ܆ ܕܰܕܢܰܚ ܠܰܡܚܰܘܝܳܢܽܘܬܳܐ ܕܺܝܠܺܝܕܽܘܬܳܐ ܬܡܺܝܗܬܳܐ ܗܳܝ ܕܒܰܒܣܰܪ ܕܡܶܠܬܳܐ ܫܡܰܝܳܢܳܐ܆ ܐܳܬ̣ܳܐ ܐܺܝܬܶܝܗ̇܆ ܕܰܠܒܰܪ ܡܶܢ ܫܳܛܽܘܪܽܘܬܗܽܘܢ ܘܪܰܘܳܝܽܘܬܗܽܘܢ ܕܗܳܢܽܘܢ ܡܗܰܠܟܳܐ. ܕܠܰܡܕܰܒܪܳܢܽܘܬܳܐ ܡܫܰܡܫܳܐ܆ ܘܠܰܘ ܬܚܶܝܬ ܥܰܒܕܽܘܬܳܐ ܗܳܝ ܡܦܰܠܓܰܬ̣ ܚܶܠ̈ܩܶܐ ܕܗܳܢܽܘܢ ܣܪ̈ܺܝܩܶܐ܆ ܟܳܕܢܳܐ ܠܶܗ ܠܝܰܠܕܶܗ ܦܐܶܐ ܠܰܐܠܳܗܳܐ ܕܥܰܡܰܢܽܘܐܶܝܠ.

ܙܰܒ̈ܢܺܝܢ ܓܶܝܪ ܣܰܓܺܝ̈ܳܐܢ ܐܰܝܟܰܢܳܐ ܕܳܐܦ ܒܙܰܒ̈ܢܶܐ ܥܰܬܺܝ̈ܩܶܐ ܟܬܺܝܒ ܒܬܰܫܥ̈ܝܳܬܳܐ܆ ܠܫܽܘܚ̈ܠܳܦܶܐ ܕܣܽܘܥܪ̈ܳܢܶܐ ܩܳܕܡܺܝܢ ܪܳܡܙܺܝܢ܆ ܟܰܘܟ̈ܒܶܐ ܡܶܕܶܡ ܐܰܟܣ̈ܢܳܝܶܐ ܘܠܳܐ ܡܥܰܝ̈ܕܶܐ ܕܡܶܬܚܙܶܝܢ. ܐܰܝܟ ܗܳܢܽܘܢ ܕܡܶܬܚܙܶܝܢ ܒܰܐܬ̣ܺܝܪ܆ ܘܡܶܬܩܪܶܝܢ ܩܽܘܡܺܝ̈ܛܶܐ ܘܦܽܘܓܽܘ̈ܢܝܐ ܘܕܽܘܩܺܝ̈ܕܶܐ܆ ܗܳܢܰܘ ܕܶܝܢ ܥܢܳܦܳܝ̈ܶܐ^[22] ܐܰܘܟܺܝܬ ܣܰܥܪ̈ܳܢܳܝܶܐ܆ ܘܕܰܩ̈ܢܳܢܳܝܶܐ ܘܩܳܪ̈ܺܝܬܳܢܳܝܶܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܰܘ ܕܠܳܐ ܐܺܝܬ ܠܗܶܝܢ ܦܝܳܣܳܐ ܘܗ̱ܝ ܕܕܳܡܝܳܐ ܢܶܦܣܩܽܘܢ ܚܰܢ̈ܦܶܐ ܥܰܠ ܡ̈ܶܠܶܐ ܕܺܝܠܰܢ. ܐܶܠܳܐ ܡܶܢ ܗܳܠܶܝܢ ܒܰܝ̈ܬܳܝܳܬܳܐ ܢܶܬܥܰܠܽܘܢ ܘܡܶܢ ܗܳܠܶܝܢ ܕܡܶܣܬܰܒܪ̈ܳܢ ܕܩܰܪ̈ܺܝܒܳܢ ܒܕܳܡܝܽܘܬܳܐ܆ ܠܳܐ ܢܶܬܦܰܠܓܽܘܢ ܟܰܕ ܠܳܐ ܡܗܰܝܡܢܺܝܢ ܠܶܗ ܠܟܰܘܟܒܳܐ ܗܰܘ ܕܶܐܬܚܙܺܝ ܠܰܡܓܽܘ̈ܫܶܐ. ܠܗܰܘ ܕܠܳܐ ܝܳܕܰܥ ܐ̱ܢܳܐ ܐܶܢ ܐܳܦ ܟܰܘܟܒܳܐ ܙܳܕܶܩ ܕܢܶܩܪܶܝܘܗ̱ܝ܆ ܘܠܳܐ ܗ̱ܘܳܐ ܡܰܠܽܘܢ ܚܰܝܠܳܐ ܡܠܺܝܠܳܐ ܕܒܰܚܙܳܬܳܐ ܕܟܰܘܟܒܳܐ ܐܶܬܚܙܺܝ܆ ܡܶܛܽܠ ܬܡܺܝܗܽܘܬܳܐ ܕܰܒܟܽܠܗܶܝܢ.

ܩܰܕܡܳܝܰܬ ܡܰܢ ܓܶܝܪ ܒܰܙܢܳܐ ܡܶܕܶܡ܆ ܡܗܰܕܶܐ ܠܰܡܓܽܘ̈ܫܶܐ ܘܪܺܝܫܳܐ ܕܽܐܘܪܚܳܐ ܗܳܘܶܐ܆ ܟܰܕ ܠܘܳܬ ܐܰܪܥܳܐ ܡܰܢܗܰܪ ܗ̱ܘܳܐ ܘܡܶܬܬܰܚܬܶܐ ܠܰܐܦܰܝ̈ ܠܬܰܚܬ܆ ܘܰܠܥܶܠ ܡܶܢ ܪܺܝܫܶܗ ܕܛܰܠܝܳܐ ܩܳܐܶܡ܆ ܘܰܐܝܟ ܕܰܠܡܺܐܡܰܪ ܒܨܶܒܥܳܐ ܡܚܰܘܶܐ ܘܡܰܘܕܰܥ ܠܣܽܘܝܳܟܳܐ ܕܕܽܘܟܬܳܐ ܕܣܰܓܺܝ ܙܥܽܘܪܝܳܐ܆ ܗܳܝ ܟܺܝܬ ܕܢܽܘܟܪܳܝܬܳܐ ܗܝ ܕܟܰܘܟ̈ܒܶܐ ܘܳܐܦ ܕܺܝܠܶܗ ܕܣܰܗܪܳܐ. ܥܰܠ ܟܽܠܶܗ ܓܶܝܪ ܥܳܠܡܳܐ ܡܰܢܗܪܺܝܢ܆ ܘܕܰܠܟܽܠ ܚܰܕ ܩܰܪܺܝܒܺܝܢ܆ ܘܰܠܥܶܠ ܡܶܢ ܪܺܝܫܳܐ ܩܳܝܡܺܝܢ ܡܶܣܬܰܒܪܺܝܢ. ܡܶܢ ܗܳܝ ܕܶܝܢ ܕܶܐܡܰܪܘ܆ ܘܗܳܐ ܟܰܘܟܒܳܐ ܗܰܘ ܕܰܚܙܰܘ ܒܡܰܕܢܳܚܳܐ ܐܳܙܶܠ ܗ̱ܘܳܐ ܩܕܳܡܰܝܗܽܘܢ܆ ܥܕܰܡܳܐ ܕܟܰܕ ܐܶܬܳܐ ܩܳܡ ܠܥܶܠ ܡܶܢ ܐܰܝܟܳܐ ܕܺܐܝܬܰܘܗ̱ܝ ܗ̱ܘܳܐ ܛܰܠܝܳܐ^[23]܆ ܡܶܬܝܰܕܥܳܐ ܓܰܠܝܳܐܺܝܬ܆ ܕܗܺܝ ܟܰܕ ܗܺܝ ܚܫܰܚܬܳܐ ܝܳܗܶܒ ܗ̱ܘܳܐ ܠܗܽܘܢ܆ ܐܳܦ ܟܰܕ ܡܶܢ ܦܳܪܶܤ ܠܽܐܘܪܫܠܶܡ ܐܳܬܶܝܢ ܗ̱ܘܰܘ. ܟܰܕ ܡܗܰܠܶܟ ܗ̱ܘܳܐ ܐܰܟܚܕܳܐ ܥܰܡܗܽܘܢ ܘܟܰܕ ܐܳܙܶܠ ܗ̱ܘܳܐ ܩܕܳܡܰܝܗܽܘܢ ܒܽܐܘܪܚܳܐ. ܘܳܐܦ ܗܳܕܶܐ ܕܶܝܢ ܐܰܟܣܢܳܝܬܳܐ ܐܺܝܬܶܝܗ̇܆ ܘܕܰܠܩܽܘܒܠܳܐ ܕܡܶܬܬܙܺܝܥܳܢܽܘܬܳܐ ܕܗܳܢܽܘܢ ܟܰܘܟ̈ܒܶܐ ܐ̱ܚܪ̈ܳܢܶܐ܆ ܗܳܢܽܘܢ ܟܺܝܬ ܕܰܐܝܟ ܕܰܒܣܽܘܓܳܐܐ ܡܶܢ ܡܰܕܢܚܳܐ ܠܘܳܬ ܡܰܥܪܒܳܐ ܡܥܳܕܺܝܢ ܕܢܶܬܬܰܝܬܽܘܢ. ܗܳܢܳܐ ܕܶܝܢ ܠܘܳܬ ܬܰܝܡܢܳܐ ܡܶܢ ܐܰܬܪ̈ܰܘܴܬܳܐ ܗܳܢܽܘܢ ܕܝܰܬܺܝܪ ܓܰܪܒܝ̣ܳܝ̣ܢ ܐܰܘ ܐܺܝܬܰܝܗܽܘܢ ܡܰܕܢܰܚ ܓܰܪܒܰܝ ܡܶܬܬܰܝܬܶܐ ܗ̱ܘܳܐ. ܐܳܦ ܓܶܝܪ ܦܳܪܶܤ ܠܘܳܬ ܐܽܘܪܶܫܠܶܡ܆ ܗܳܢܳܐ ܣܝܳܡܳܐ ܐܺܝܬ ܠܳܗ̇.

ܡܶܬܚܙܶܐ ܕܶܝܢ ܗܽܘ ܗܳܢܳܐ ܟܰܘܟܒܳܐ ܕܳܐܦ ܒܗܳܝ ܐܰܟܣܢܳܝܳܐ ܐܺܝܬܰܘܗ̱ܝ܆ ܕܰܠܘܳܬ ܣܽܘܢܩܳܢܳܐ ܕܰܡܓܽܘ̈ܫܶܐ ܡܶܬܚܙܶܐ ܗ̱ܘܳܐ ܐܳܦ ܡܶܬܛܰܫܶܐ ܗ̱ܘܳܐ. ܐܳܦ ܓܶܝܪ ܟܰܕ ܐܶܬܰܘ ܠܽܐܘܪܫܠܶܡ ܐܶܬܓܰܢܺܝ ܘܰܛܒܰܥ. ܘܟܰܕ ܐܳܙܺܠ̱ܝܢ ܗ̱ܘܰܘ ܠܒܶܝܬ ܠܚܶܡ ܬܽܘܒ ܐܶܬܚܙܺܝ܆ ܘܰܡܡܰܠܶܐ ܗ̱ܘܳܐ ܬܶܫܡܶܫܬܳܐ ܕܰܡܗܰܕܝܳܢܽܘܬܳܐ ܕܽܐܘܪܚܳܐ. ܡܶܣܬܰܒܪܳܐ ܠܺܝ ܕܶܝܢ܆ ܕܳܐܦ ܒܰܡܨܰܥܬܶܗ ܕܺܐܝܡܳܡܳܐ ܐܶܬܚܙܺܝ ܗܳܝܕܶܝܢ. ܡܶܚܕܳܐ ܓܶܝܪ ܒܰܪܫܳܥܬܶܗ܆ ܠܒܶܝܬ ܠܚܶܡ ܦܳܩܶܕ ܗ̱ܘܳܐ ܗܶܪܽܘܕܺܝܤ ܕܢܺܐܙܽܠ̱ܘܢ܆ ܡܶܢ ܒܳܬܰܪ ܩܶܪܝܳܢܳܐ ܕܰܢܒܺܝܽܘܬܳܐ ܕܡܺܝܟܳܐ. ܘܡܶܚܕܳܐ ܥܰܡܳܗ̇ ܕܗܳܝ ܕܪ̈ܶܓܠܰܝܗܽܘܢ ܡܙܺܝܥܺܝܢ ܗ̱ܘܰܘ ܡܓܽܘ̈ܫܶܐ܆ ܘܗܽܘ ܟܰܘܟܒܳܐ ܡܶܚܕܳܐ ܡܶܬܚܙܶܐ ܗ̱ܘܳܐ܆ ܟܰܕ ܠܳܐ ܡܰܫܶܦ ܗ̱ܘܳܐ ܐܳܦܠܳܐ ܠܢܰܨܺܝܚܽܘܬܶܗ ܕܫܶܡܫܳܐ܆ ܗܳܝ ܕܒܺܐܝ̈ܕܶܝܗ̇ ܐܳܦ ܢܽܘܗܪܶܗ ܕܣܰܗܪܳܐ ܡܶܬܚܰܦܶܐ.

ܘܗܳܠܶܝܢ ܡܰܢ ܫܰܪܺܝܪܳܐܺܝܬ ܬܡܺܝ̈ܗܳܬܳܐ ܐܺܝܬܰܝܗܶܝܢ܆ ܘܰܠܥܶܠ ܡܶܢ ܚܙܳܬܳܐ ܘܡܶܬܬܙܺܝܥܳܢܽܘܬܳܐ ܕܟܰܘܟ̈ܒܶܐ. ܗܳܝ ܕܶܝܢ ܕܝܰܬܺܝܪ ܬܡܺܝܗܬܳܐ ܐܺܝܬܶܝܗ̇ ܡܶܬܚܰܙܝܳܐ܆ ܗܳܝ ܕܰܡܓܽܘ̈ܫܶܐ ܢܺܐܡܪܽܘܢ܆ ܕܰܐܝܟܳܐ ܐܺܝܬܰܘܗ̱ܝ ܡܰܠܟܳܐ ܕܝܽܗ̱ܘ̈ܕܳܝܶܐ ܕܶܐܬܺܝܠܶܕ^[24]. ܗܳܕܶܐ ܓܶܝܪ ܘܠܳܐ ܣܳܟ ܗܺܝ ܚܙܳܬܶܗ ܕܟܰܘܟܒܳܐ ܡܫܰܘܕܥܳܐ ܗ̱ܘܳܬ. ܕܰܠܘܳܬ ܚܙܳܬܳܐ ܡܰܢ ܓܶܝܪ ܕܡܶܕܶܡ ܐܰܟܣܢܳܝܳܐ ܢܳܓܶܕ ܗ̱ܘܳܐ ܡܰܘܕܰܥ ܗ̱ܘܳܐ܆ ܘܰܕܫܽܘܚܠܳܦܳܐ ܕܣܽܘܥܪ̈ܳܢܶܐ ܪܳܡܶܙ. ܕܡܳܢܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ ܗܳܢܳܐ ܐܰܘ ܕܰܐܝܢܳܐ܆ ܕܺܝܠܶܗ ܕܢܶܣܝܳܢܳܐ ܒܰܠܚܽܘܕܰܘܗ̱ܝ ܐܺܝܬܶܝܗ̇ ܗ̱ܘܳܬ ܕܰܢܚܰܘܶܐ ܘܢܰܘܕܰܥ܆ ܘܠܰܘ ܕܶܐܣܟܺܡܶܗ ܕܟܰܘܟܒܳܐ ܗܰܘ ܕܶܐܬܚܙܺܝ. ܡܶܣܬܰܒܪܺܝܢ ܕܶܝܢ ܗܶܢܽܘܢ ܡܓܽܘ̈ܫܶܐ܆ ܕܠܳܐ ܛܰܥܝܳܐ ܗ̱ܘܳܬ ܠܗܽܘܢ ܢܒܺܝܽܘܬܶܗ ܕܒܶܠܥܰܡ ܗܳܝ ܕܣܺܝܡܳܐ ܒܰܟܬܳܒܳܐ ܕܡܶܢ̈ܝܳܢܶܐ܆ ܘܕܰܚܙܳܬܶܗ ܕܟܰܘܟܒܳܐ ܢܠܰܚܡܽܘܢ܆ ܕܕܰܐܝܟ ܗܳܠܶܝܢ ܡ̈ܶܠܶܐ ܢܡܰܠܠܽܘܢ.

ܐܳܦ ܓܶܝܪ ܟܰܕ ܥܰܡܳܐ ܗܰܘ ܕܺܐܝܣܰܪ̈ܠܳܝܶܐ ܢܦܰܩ ܗ̱ܘܳܐ ܡܶܢ ܡܶܨܪܶܝܢ܆ ܘܙܰܒܢܳܐ ܕܰܐܪܒܥܺܝܢ ܫܢܰܝ̈ܳܐ ܐܶܬܪܕܺܝ ܒܡܰܕܒܪܳܐ܆ ܘܰܠܡܰܚܣܶܢ ܒܰܙܒܰܢ ܒܩܽܘܪܒܳܐ ܕܰܐܪܥܳܐ ܗܳܝ ܕܡܽܘܠܟܳܢܳܐ ܗܘ̣ܳܐ ܗ̱ܘܳܐ܆ ܘܰܡܚܳܐ ܘܰܬܒ̣ܰܪ ܘܒܽܐܘܚܕܳܢܳܐ ܕܰܩܪܳܒܳܐ ܟܒܰܫ܆ ܠܣܺܝܚܽܘܢ ܟܺܝܬ ܡܰܠܟܳܐ ܕܳܐܡܽܘܪ̈ܳܝܶܐ ܘܰܠܥܽܘܓ ܡܰܠܟܳܐ ܕܒܰܐܬܰܢ^[25]܆ ܒܐܠܐܩ ܐ̱ܢܳܫ ܡܰܠܟܳܐ ܕܥܰܡܳܐ ܗܰܘ ܕܡܽܘܐܳܒ̈ܳܝܶܐ܆ ܟܰܕ ܚܳܙܶܐ ܗ̱ܘܳܐ ܕܳܐܬܶܐ ܥܠܰܘܗ̱ܝ ܒܽܐܘܪܚܳܐ ܢܰܝܙܟܳܐ ܡܰܩܪܒܳܢܳܐ ܗܰܘ܆ ܡܰܠܽܘܢ ܕܶܝܢ ܝܰܡܺܝܢܳܐ ܕܰܐ‌ܠܳܗܳܐ܆ ܘܕܰܚܺܝܠ ܗ̱ܘܳܐ ܡܶܢ ܬܰܚܘܺܝܬܳܐ܆ ܩܪܳܐ ܠܘܳܬܶܗ ܐ̱ܢܳܫ ܛܒܺܝܒܳܐ ܩܳܨܽܘܡܳܐ܆ ܐܰܝܟ ܕܡܶܣܬܒܰܪ ܗ̱ܘܳܐ ܠܗܳܢܽܘܢ ܕܗܳܝܕܶܝܢ ܡܶܢ ܒܶܝܬ ܢܰܗܪ̈ܺܝܢ ܕܰܫܡܶܗ ܗ̱ܘܳܐ ܒܶܠܥܰܡ ܟܰܕ ܐܳܡܰܪ ܗ̱ܘܳܐ܆ ܬܐܳܪܳܐ ܠܽܘܛ ܠܺܝ ܠܐܝܣܪܳܐܶܝܠ. ܡܶܛܽܠ ܕܝܳܕܰܥ ܐ̱ܢܳܐ܆ ܕܰܠܗܳܢܽܘܢ ܕܶܐܢ ܬܒܰܪܶܟ ܐܰܢ̱ܬ ܡܒܰܪܟܺܝܢ. ܘܰܠܗܳܢܽܘܢ ܕܶܐܢ ܬܠܽܘܛ ܐܰܢ̱ܬ ܠܺܝܛܺܝܢ^[26]. ܘܟܰܕ ܡܶܫܟܰܚ ܗ̱ܘܳܐ ܐܰ‌ܠܳܗܳܐ ܕܒܰܛܝܠܬܳܐ ܘܕܰܓܳܠܬܳܐ ܢܶܥܒܕܺܝܗ̇ ܠܠܰܘܛܬܶܗ ܕܩܳܨܽܘܡܳܐ܆ ܒܝܰܕ ܡܰܦܩܳܢܳܐ ܕܰܠܩܽܘܒܠܳܝܳܐ ܕܣܽܘܥܪ̈ܳܢܶܐ܆ ܠܗܳܕܶܐ ܡܰܢ܆ ܠܳܐ ܥܳܒܶܕ. ܟܰܕ ܨܳܒܶܐ ܗ̱ܘܳܐ ܕܶܝܢ ܕܠܰܘ ܒܝܰܕ ܙܳܟܽܘܬܳܐ ܕܒܰܩܪܳܒܳܐ ܒܰܠܚܽܘܕ܆ ܐܶܠܳܐ ܐܳܦ ܒܝܰܕ ܐܳܕܫ̈ܶܐ ܣܰܓܺܝ̈ܶܐܐ ܘܰܡܫܰܚ̈ܠܦܶܐ܆ ܠܰܡܫܰܪܬܚܽܘܬܳܐ ܕܚܰܝܠܳܐ ܒܰܝܬܳܝܳܐ ܢܚܰܘܶܐ܆ ܡܥܰܬܶܕ ܠܶܗ ܡܰܢ ܕܢܺܐܬܶܐ ܐܰܝܟ ܕܢܶܠܽܘܛ܆ ܒܝܰܕ ܡܰܥܒܕܳܢܽܘܬܳܐ ܕܶܝܢ ܐܰ‌ܠܳܗܳܝܬܳܐ܆ ܠܰܘ ܕܢܶܠܽܘܛ ܡܰܠܽܘܢ܆ ܐܶܠܳܐ ܕܰܢܒܰܪܶܟ ܠܐܝܣܪܳܐܶܝܠ܆ ܐܰܝܟܰܢܳܐ ܕܦܽܘܡܳܐ ܗܰܘ ܡܫܰܡܫܳܢܳܐ ܕܕܰܓܳܠܽܘܬܳܐ ܢܶܬܗܰܝܡܰܢ܆ ܡܶܢ ܗܳܢܽܘܢ ܕܰܡܥܰܝܕܺܝܢ ܥܰܡܶܗ܆ ܘܥܰܡ ܛܳܥܝܽܘܬܳܐ ܐܰܟܚܕܳܐ ܡܪܰܒܶܝܢ.

ܟܬܺܝܒ ܓܶܝܪ ܕܰܗܘ̣ܳܬ ܪܽܘܚܳܐ ܕܰܐ‌ܠܳܗܳܐ ܥܠܰܘܗ̱ܝ. ܐܶܠܳܐ ܡܶܛܽܠ ܟܺܝܬ ܕܒܽܘܪܟܬܳܐ ܠܙܰܪܥܶܗ ܕܰܐܒܪܳܗܳܡ ܡܶܬܢܰܛܪܳܐ ܗ̱ܘܳܬ܆ ܐܳܦ ܓܶܝܪ ܠܳܐ ܐܶܡܰܪ ܐܰ‌ܠܳܗܳܐ ܠܙܰܪ̈ܥܰܝܟ ܐܰܝܟ ܕܥܰܠ ܣܰܓܺܝ̈ܶܐܐ ܐܶܠܳܐ ܐܰܝܟ ܕܥܰܠ ܚܰܕ܆ ܘܢܶܬܒܰܪܟܽܘܢ ܟܽܠܗܽܘܢ ܥܰܡܡ̈ܶܐ ܒܙܰܪܥܳܟ ܗܰܘ ܕܺܐܝܬܰܘܗ̱ܝ ܡܫܺܝܚܳܐ܆ ܐܰܝܟܰܢܳܐ ܕܒܽܘܪܟܬܳܐ ܗܳܝ ܕܰܐܒܪܳܗܳܡ܆ ܒܺܐܝܣܰܪ̈ܠܳܝܶܐ ܗܳܢܽܘܢ ܕܡܶܢ ܥܰܡܡ̈ܶܐ ܐܰܝܟ ܕܡܶܢ ܗܰܝܡܳܢܽܘܬܳܐ ܬܶܗܘܶܐ ܒܝܰܕ ܡܶܨܥܳܝܳܐ ܡܫܺܝܚܳܐ܆ ܐܰܝܟܰܢܳܐ ܕܦܰܘܠܽܘܤ ܟܰܕ ܠܓ̈ܠܛܳܝܶܐ ܟܳܬܶܒ ܗ̱ܘܳܐ ܐܳܡܰܪ܆ ܐܰܡܺܝܪ ܗ̱ܘ̣ ܓܶܝܪ ܠܘܳܬ ܐܰܒܪܳܗܳܡ ܕܢܶܗܘܶܐ ܙܰܪܥܶܗ܆ ܐܰܝܟ ܟܰܘܟܒ̈ܶܐ ܕܒܰܫܡܰܝܳܐ^[27]܆ ܝܺܕܺܝܥܳܐ ܕܶܝܢ ܕܰܕܟܰܝ̈ܳܐ ܕܗܳܢܽܘܢ ܕܡܶܢ ܡܰܥܡܽܘܕܺܝܬܳܐ܆ ܘܰܐܝܟ ܡܶܠܬܶܗ ܕܰܫܠܺܝܚܳܐ ܕܠܳܐ ܐܺܝܬ ܒܗܽܘܢ ܟܽܘܬܡܳܐ ܐܰܘ ܩܶܡܛܳܐ ܐܰܘ ܡܶܕܶܡ ܡܶܢ ܗܳܠܶܝܢ ܕܕܰܐܝܟ ܗܳܟܰܢ܆ ܗܳܢܽܘܢ ܕܳܐܦ ܢܶܢܗܪܽܘܢ ܐܰܝܟ ܫܶܡܫܳܐ ܒܡܰܠܟܽܘܬܳܐ ܕܰܐܒܽܘܗܽܘܢ^[28]܆ ܗܘ̣ܳܐ ܕܶܝܢ ܪܺܝܫܺܝܬܳܐ ܕܗܳܠܶܝܢ ܡܫܺܝܚܳܐ܆ ܟܰܕ ܫܶܡܫܳܐ ܡܰܢ ܕܙܰܕܝܩܽܘܬܳܐ ܐܺܝܬܰܘܗ̱ܝ ܒܗܳܝ ܕܰܐ‌ܠܳܗܳܐ܆ ܟܰܘܟܒܳܐ ܕܶܝܢ ܐܰܝܟ ܕܒܰܒܢܰܝ̈ܢܳܫܳܐ܆ ܟܰܕ ܗܽܘ ܩܰܕܡܳܝܳܐ ܐܶܬܚܙܺܝ ܥܰܠ ܝܽܘܪܕܢܳܢ܆ ܗܳܢܰܘ ܕܶܝܢ ܠܳܐ ܡܶܬܟܰܒܫܳܢܳܐ ܠܟܽܠܶܗ ܛܽܘܠܫܳܐ ܕܰܚܛܺܝܬܳܐ܆ ܘܟܰܕ ܠܰܣܚܳܬܳܐ ܕܺܝܠܰܢ ܡܩܰܕܶܫ܆ ܗܳܝ ܕܡܶܢܳܗ̇ ܒܰܕܡܽܘܬ ܟܰܘܟ̈ܒܶܐ ܕܳܢܚܺܝܢ ܚ̱ܢܰܢ܆ ܡܶܬܢܰܒܶܐ ܠܳܗ̇ ܠܗܳܕܶܐ ܒܽܘܪܟܬܳܐ ܒܶܠܥܰܡ ܗܰܘ ܡܫܰܡܫܳܢܳܐ ܕܫ̈ܺܐܕܶܐ܆ ܟܰܕ ܩܳܕܶܡ ܗ̱ܘܳܐ ܡܛܰܦܶܤ ܠܗܳܢܽܘܢ ܕܡܶܢ ܥܰܡ̱ܡ̈ܶܐ܆ ܡܶܢ ܕܶܚܠܰܬ ܫ̈ܺܐܕܶܐ ܗܳܝ ܪܺܝܫܳܝܬܳܐ܆ ܠܘܳܬ ܫܰܦܺܝܪܽܘܬ ܕܶܚܠܬܳܐ ܥܬܺܝܕܺܝܢ ܗ̱ܘܰܘ ܕܰܢܫܰܢܽܘܢ ܘܢܶܥܒܪܽܘܢ ܘܢܶܬܢܰܒܽܘܢ܆ ܘܳܐܡܰܪ ܟܰܕ ܒܗܳܝ ܕܰܥܬܺܝܕܳܐ ܚܳܐܰܪ ܗ̱ܘܳܐ ܐܳܦ ܒܶܗ ܒܰܡܫܺܝܚܳܐ܆ ܟܰܕ ܐܰܝܟ ܕܰܠܘܳܬ ܐܺܝܣܪܳܐܶܝܠ ܕܶܝܢ ܗܰܘ ܥܰܬܺܝܩܳܐ ܡܳܬܰܚ ܗ̱ܘܳܐ ܠܳܗ̇ ܠܡܶܠܬܳܐ. ܐܶ݀ܚܰܘܶܐ ܠܶܗ ܘܠܰܘ ܗܳܫܳܐ. ܐܶܬܶܠ ܠܶܗ ܛܽܘܒܳܐ ܘܠܳܐ ܩܰܪܺܝܒ. ܢܶܕܢܰܚ ܟܰܘܟܒܳܐ ܡܶܢ ܝܰܥܩܽܘܒ܆ ܘܰܢܩܽܘܡ ܒܰܪܢܳܫܳܐ ܡܶܢ ܐܺܝܣܪܳܐܶܝܠ. ܘܢܶܬܒܽܘܪ ܠܪܺܝܫܳܐ ܕܡܽܘܐܳܒ܆ ܘܢܶܫܒܶܐ ܠܟܽܠܗܽܘܢ ܒܢܰܝ̈ܳܐ ܕܫܺܝܬ. ܘܬܶܗܘܶܐ ܐܰܕܽܘܡ ܝܳܪܬܽܘܬܳܐ^[29]. ܕܟܽܠܗܽܘܢ ܓܶܝܪ ܥܰܡ̱ܡ̈ܶܐ܆ ܡܶܛܽܠ ܟܺܝܬ ܕܡܶܢ ܗܳܠܶܝܢ ܕܰܡܢܳܬܳܐܺܝܬ ܡܫܰܡܗܺܝܢ܆ ܐܳܦ ܠܗܳܠܶܝܢ ܐ̱ܚܪ̈ܳܢܶܐ ܡܰܘܕܰܥ܆ ܬܒܰܪ ܡܫܺܝܚܳܐ ܠܕܶܚ̈ܠܳܬܳܐ ܐܰܒܳܗܳܝ̈ܳܬܳܐ. ܠܗܳܠܶܝܢ ܟܺܝܬ ܕܰܕܚܰܩܘ ܘܰܐܣܠܺܝܘ ܐܶܢܶܝܢ܆ ܒܝܰܕ ܕܗܰܝܡܶܢܘ ܠܰܩܝܳܡܬܳܐ܆ ܒܕܺܝܢܳܐ ܩܒܺܝܥܳܐ ܕܚܽܘܫܳܒܳܐ܆ ܘܶܐܬܚܫܶܒܘ ܠܝܳܪܬܽܘܬܶܗ. ܡܶܛܽܠ ܗܳܕܶܐ ܕܰܘܺܝܕ܆ ܠܘܳܬܶܗ ܩܳܥܶܐ ܗ̱ܘܳܐ ܟܰܕ ܐܳܡܰܪ܆ ܩܽܘܡ ܐܰ‌ܠܳܗܳܐ ܘܕܽܘܢܶܝܗ̇ ܠܰܐܪܥܳܐ܆ ܡܶܛܽܠ ܕܰܐܢ̱ܬ ܬܺܐܪܰܬ ܒܟܽܠܗܽܘܢ ܥܰܡ̱ܡ̈ܶܐ^[30].

ܗܳܕܶܐ ܢܒܺܝܽܘܬܳܐ ܕܒܶܠܥܰܡ܆ ܕܳܐܡܪܳܐ ܕܢܶܕܢܰܚ ܟܰܘܟܒܳܐ ܡܶܢ ܝܥܩܘܒ܆ ܘܰܢܩܽܘܡ ܒܰܪܢܳܫܳܐ ܡܶܢ ܐܺܝܣܪܳܐܶܝܠ^[31]܆ ܓܳܕܫܳܐ ܕܶܐܬ̣ܳܬ̣ ܠܘܳܬ ܡܓܽܘ̈ܫܶܐ ܕܰܫ̈ܒܳܒܶܐ ܐܺܝܬܰܝܗܽܘܢ ܗ̱ܘܰܘ ܕܒܶܝܬ ܢܰܗܪ̈ܺܝܢ܆ ܐܰܘ ܡܶܢ ܟܬܳܒ̈ܶܐ ܐܰܘ ܡܶܢ ܐܰܒܳܗܰܝ̈ܗܽܘܢ܆ ܡܶܢ ܡܰܫܠܡܳܢܽܘܬܳܐ ܡܶܕܶܡ ܠܳܐ ܟܬܺܝܒܬܳܐ ܘܡܶܢ ܝܽܘܒܳܠܳܐ܆ ܘܰܡܣܰܟܶܝܢ ܗ̱ܘܰܘ ܠܕܶܢܚܳܐ ܕܟܰܘܟܒܳܐ ܐܰܟܣܢܳܝܳܐ ܘܠܳܐ ܡܥܰܝܕܳܐ܆ ܘܰܠܡܰܘܠܳܕܳܐ ܕܐ̱ܢܳܫ ܒܰܪܢܳܫܳܐ ܡܶܢ ܐܰܬܪܐ ܕܝܽܗ̱ܘ̈ܕܳܝܶܐ܆ ܕܰܥܬܺܝܕ ܕܢܶܐܚܽܘܕ ܥܰܡ̱ܡ̈ܶܐ ܣܰܓܺܝ̈ܶܐܐ. ܠܗܰܘ^[32] ܕܳܐܦ ܚܙܰܐܘܗ̱ܝ ܗܳܢܽܘܢ܆ ܥܝܳܕܰܐ ܗ̄ܘ ܓܶܝܪ ܠܰܡܓܽܘ̈ܫܶܐ ܘܰܠܟܽܠܗܽܘܢ ܟܰܠ̈ܕܳܝܶܐ ܕܰܠܘܳܬ ܟܰܘܟ̈ܒܶܐ ܕܒܰܫܡܰܝܳܐ ܢܶܗܘܽܘܢ ܦܥܺܝܪܺܝܢ܆ ܘܰܠܡ̈ܶܠܶܐ ܗܳܠܶܝܢ ܕܒܶܠܥܰܡ ܩܰܪܺܝܒܳܐܺܝܬ ܒܰܚܶܢܘ܆ ܥܰܡܳܗ̇ ܕܰܨܒܽܘܬܳܐ ܡܶܚܕܳܐ ܒܰܪ ܫܳܥܬܶܗ ܠܦܠܣܛܝܢܝ ܪܗܶܛܘ܆ ܘܢܳܩܦܳܐܺܝܬ ܡܶܚܕܳܐ ܡܫܰܐܠܺܝܢ ܗ̱ܘܰܘ܆ ܕܰܐܝܟܳܐ ܐܺܝܬܰܘܗ̱ܝ ܡܰܠܟܳܐ ܕܺܝܗܽܘܕ ܗܰܘ ܕܶܐܬܺܝܠܶܕ܆ ܚܙܰܝܢ ܓܶܝܪ ܟܰܘܟܒܶܗ ܒܡܰܕܢܚܳܐ ܘܶܐܬܰܝܢ ܠܡܶܣܓܰܕ ܠܶܗ^[33].

ܟܰܕ ܕܶܝܢ ܣܰܓܺܝ̈ܳܐܬܳܐ ܐܺܝܬ ܗ̱ܘܳܐ ܠܺܝ ܕܺܐ݀ܡܰܪ ܝܰܬܺܝܪ ܦܰܬܝܳܐܺܝܬ܆ ܥܰܠ ܟܽܠܳܗ̇ ܢܒܺܝܽܘܬܳܐ ܗܳܝ ܕܒܶܠܥܰܡ܆ ܘܶܐ݀ܚܰܘܶܐ ܓܰܠܝܳܐܺܝܬ ܕܢܶܦܩܰܬ̣ ܠܫܽܘܠܳܡܳܐ ܒܰܡܫܺܝܚܳܐ܆ ܡܶܛܽܠ ܡܣܰܪܗܒܽܘܬܶܗ ܕܥܶܕܳܢܳܐ ܫܳܒܶܩ ܐ̱ܢܳܐ ܗܳܫܳܐ܆ ܟܰܕ ܗܳܢܶܝܢ ܒܰܠܚܽܘܕ ܐܳܡܰܪ ܐ̱ܢܳܐ ܠܘܳܬܟܽܘܢ. ܢܶ݀ܬܟܰܚܰܕ ܡܶܢ ܡܰܪܕܺܝܬܶܗ ܕܟܰܘܟܒܳܐ܆ ܗܳܝ ܕܽܐܘܪܚܳܐ ܫܡܰܝܳܢܺܝܬܳܐ ܦܳܣܩܳܐ ܠܰܢ܆ ܘܪܳܕܝܳܐ ܠܰܢ ܕܙܳܕܶܩ ܕܰܠܘܳܬ ܗܳܝ ܢܶܬܬܰܝܬܶܐ܆ ܘܢܶ݀ܒܗܰܬ ܕܳܐܦܠܳܐ ܗܳܠܶܝܢ ܕܫܳܘ̈ܝܳܢ ܠܰܐܪܥܳܐ ܡܗܰܠܟܺܝܢܰܢ܆ ܡܰܠܽܘܢ ܕܶܝܢ ܕܰܠܘܳܬ ܫܝܽܘܠ ܪܳܕܦܺܝܢܰܢ܆ ܐܶܢܗܽܘ ܕܠܳܐ ܟܰܕ ܡܶܬܬܥܺܝܪܺܝܢܰܢ܆ ܚܢܰܢ ܠܰܢ ܩܰܠܺܝܠܳܐܺܝܬ ܢܶܬܟܽܘܤ. ܢܶ݀ܬܚܰܡܰܨ ܡܶܢ ܒܰܪܒܪ̈ܳܝܶܐ ܡܓܽܘ̈ܫܶܐ܆ ܕܕܰܗܒܳܐ ܡܩܰܪܒܺܝܢ ܠܰܡܫܺܝܚܳܐ ܟܰܕ ܥܕܰܟܺܝܠ ܛܰܠܝܰܐ ܗ̄ܘ ܡܶܛܽܠ ܡܕܰܒܪܳܢܽܘܬܳܐ܆ ܚܢܰܢ ܕܳܐܦ ܟܰܕ ܚܠܳܦܰܝܢ ܐܶܨܛܠܶܒ܆ ܐܳܦܠܳܐ ܦܽܘܠܣܳܐ ܚܰܕ ܕܰܢܚܳܫܳܐ ܝܳܗܒܺܝܢܰܢ ܠܶܗ܆ ܒܝܰܕ ܡܶܣܟܺܢܳܐ ܡܶܨܥܳܝܳܐ. ܗܳܢܽܘܢ ܡܰܢ܆ ܠܰܢܒܺܝܽܘܬܳܐ ܗܳܝ ܕܒܶܠܥܰܡ ܕܰܐܥܬܩܰܬ ܘܫܽܘܥܺܝܬܳܐ ܡܶܟܺܝܠ ܡܶܣܬܰܒܪܳܐ ܗ̱ܘܳܬ ܡܰܠ̣ܺܝܘ. ܐܰܢ̱ܬ ܕܶܝܢ ܟܰܕ ܠܶܐܘܰܢܓ̈ܶܠܺܝܰܐ ܘܰܠܕܝܰܐܬܺܝܩܺܐ ܚܕܰܬܳܐ ܫܳܡܰܥ ܐܰܢ̱ܬ܆ ܒܪܶܗܛܳܐ ܥܳܒܰܪ ܐܰܢ̱ܬ܆ ܘܳܐܦܠܳܐ ܕܫܳܡܰܥ ܐܰܢ̱ܬ ܡܰܣܒܰܪ ܐܰܢ̱ܬ. ܐܶܢ ܒܶܝܬ ܝܰܠܕܳܐ ܡܥܰܕܥܶܕ ܐܰܢ̱ܬ܆ ܗܘܺܝ ܒܟܽܠ ܝܽܘܡ ܚܰܕܬ̣ܳܐ. ܠܗܳܕܶܐ ܓܶܝܪ ܐܶܬܺܝܠܶܕ ܡܫܺܝܚܳܐ. ܡܶܛܽܠ ܟܺܝܬ ܕܶܐܢ ܐ̱ܢܳܫ ܒܰܡܫܺܝܚܳܐ ܐܺܝܬܰܘܗ̱ܝ܆ ܒܪܺܝܬܰܐ ܗ̄ܘ ܚܕܰܬܳܐ. ܥܰܬܺܝ̈ܩܳܬܳܐ ܥܒܰܪ̈ܝ̱ ܠܗܶܝܢ^[34] ܐܰܙܥܶܩ ܦܰܘܠܽܘܤ. ܐܶܢ ܡܶܬܚܰܙܝܳܢܽܘܬ ܐܰ‌ܠܳܗܳܐ ܡܚܰܓܶܐ ܐܰܢ̱ܬ܆ ܕܫܳܘܶܐ ܐܶܬܚܙܺܝ ܠܰܐܠܳܗܳܐ܆ ܘܫܰܒܰܚܳܝܗ̱ܝ ܠܥܺܐܕܳܐ ܒܝܰܕ ܗܳܠܶܝܢ ܕܡܶܬܚܙܶܐ ܐܰܢ̱ܬ܆ ܘܬܶܫܬܘܶܐ ܠܬܶܫܒܽܘܚܬܳܐ ܗܳܝ ܕܰܒܡܰܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ̣ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫ ܒܟܽܠ. ܗܳܫܳܐ ܘܰܒܟܽܠܙܒܰܢ. ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܡ ܡܺܐܡܪܳܐ ܕܡܳܐܐ ܘܚܰܡܫܶܬܥܣܪ.

ܡܙܡܘܪ̈ܐ. 107: 20 [1]

ܠܘܩܐ. 1: 78 ـ 79[2]

ܐ. ܛܝܡܬܐܘܣ. 3: 16 [3]

ܠܘܩܐ. 2: 14 [4]

ܥܒܪ̈ܝܐ. 1: 14 [5]

ܠܘܩܐ. 1: 28 [6]

ܠܘܩܐ. 1: 34 ـ 35 [7]

ܚܕܳܐ[8]

ܠܘܩܐ. 1: 35 [9]

ܡܪܩܘܣ. 3: 17 [10]

ܝܘܚܢܢ. 1: 14 [11]

ܝܘܚܢܢ. 1: 1 [12]

ܥܒܪ̈ܝܐ. 2: 16 [13]

[14]ܙܳܕܶܩ ܠܡܶܕܰܥ ܕܰܒܠܶܫܳܢܳܐ ܝܰܘܢܳܝܳܐ. ܗܳܝ ܕܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ: ܘܗܳܝ ܕܚܰܝܠܶܗ ܕܰܡܪܰܝܡܳܐ ܢܰܓܶܢ ܥܠܰܝܟܝ ܕܡܶܢ ܓܰܒܪܺܐܝܠ ‌ܐܶܬܐܰܡܪܰܬ̣܆ ܠܐ ܗܘܳܐ ܒܰܚܕܳܐ ܠܰܟܣܝܣ ܐܺܝܬܰܝܗܶܝܢ. ܐܶܠܐ ܗܳܝ ܡܰܢ ܕܝܽܘܚܰܢܳܢ ܕܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ܆ ܫ̣ܪܳܐ ܒܰܢ ܐܺܝܬܶܝܗ̇. ܗܳܢܰܘ ܕܝܢ ܕܰܥܡܰܪ ܒܰܢ܆ ܐܰܝܟ ܕܡܶܢ ܫܡܳܐ ܕܡܰܫܟܢܳܐ. ܗܳܝ ܕܶܝܢ ܕܓܰܒܪܐܝܠ ܕܶܐܡܰܪ ܕܚܰܝܠܶܗ ܕܥܶܠܳܝܳܐ ܢܰܓܶܢ ܥܠܰܝܟܝ܆ ܕܢܰܛܶܠ ܥܠܰܝܟܝ ܐܺܝܬܶܝܗ̇ ܐܰܝܟ ܕܡܶܢ ܫܡܳܐ ܕܛܶܠܳܠܳܐ܆ ܐܰܘ ܕܢܶܫܟܰܢ ܥܠܰܝܟܝ. ܡܶܛܽܠ ܕܥܰܡ ܗܳܠܶܝܢ܆ ܐܳܦ ܠܰܟܣ̈ܝܣ ܐ̱ܚܪ̈ܳܢܝܳܬܳܐ ܐܺܝܬ ܠܗܽܘܢ ܠܝܰܘ̈ܢܳܝܶܐ܆ ܕܡܶܬܚܰܫܚܺܝܢ ܒܗܶܝܢ ܒܚܰܝܠܳܐ ܗܳܢܳܐ. ܘܳܐܦ ܠܶܗ ܓܶܝܪ ܠܰܫܡܳܐ ܗܰܘ ܕܡܰܫܟܢܳܐ ܕܰܠܘܳܬ ܝܰܘ̈ܢܳܝܶܐ: ܙܳܕܶܩ ܕܢܶܐܡܪܝܘܗܝ ܒܶܝܬ ܡܰܫܪܝܳܐ ܐܰܘ ܡܰܫܪܝܳܐ܆ ܐܰܝܟܰܢܳܐ ܕܡܶܢܶܗ ܢܶܥܒܕܝܗ̇ ܠܡܶܠܬܳܐ ܗܳܝ ܕܳܐܡܪܺܝܢܰܢ ܕܰܫ̣ܪܳܐ ܒܰܢ. ܝܺܕܺܝܥܳܐ ܓܶܝܪ ܕܡܰܫܟܢܳܐ. ܒܶܝܬ ܡܰܫܪܝܰܐ ܗ̄ܘ ܘܒܰܝܬܰܐ ܗ̄ܘ ܘܥܽܘܡܪܳܐ. ܘܗܰܘ ܕܥܳܡܰܪ܆ ܐܳܦ ܕܒܳܐܶܬ̣ ܐܳܦ ܕܫܳܪܶܐ ܐܳܦ ܕܫܳܟܶܢ ܡܶܬܶܐܡܰܪ܆ ܐܳܦ ܕܡܰܓܶܢ.

ܝܘܚܢܢ. 1: 14 [15]

ܝܘܚܢܢ. 1: 14 [16]

ܒ. ܩܘܪ̈ܝܢܬܝܐ. 5: 1 ـ 2 [17]

ܐ. ܩܘܪ̈ܝܢܬܝܐ. 1: 24[18]

ܝܘܚܢܢ. 1: 14 [19]

ܡܙܡܘܪ̈ܐ. 85: 8  ܐܦ 80: 2 [20]

ܡܬܝ. 2: 2[21]

[22]ܣܝܡܬܐ ܕܬܐܘܡܐ ܐܘܕܘ. ܦܐܬܐ 246 ܥܢܳܦܳܐ. ܕܟܪܢܝܐ. ܥܢܳܦܬܳܐ ܢܩܒܬܢܝܐ. ܗܳܢܰܘ ܕܶܝܢ ܢܰܥܦܐ. ܟܰܪܒܰܠܬܳܐ. ܣܰܥܪܳܐ ܕܒܰܩܕܳܠܳܐ ܕܣܽܘܣܝܳܐ. ܘܬܳܓܐ ܕܒܪܝܫ ܬܪܢܓܠܐ.

ܡܬܝ. 2: 9[23]

ܡܬܝ. 2: 2[24]

ܒܐܫܢ[25]

ܡܢܝܢܐ. 22: 6  ܐܦ 24: 2 [26]

[27]ܓܠ̈ܛܝܐ. 3: 14 ـ 16  ܐܦ ܣܶܦܪܳܐ ܕܒܪܝܬܐ. 22: 17 ـ 18

ܐܦܣ̈ܝܐ. 5: 27  ܐܦ ܡܬܝ. 13: 43 [28]

[29]ܡܢܝܢܐ. 24: 17 ـ 18 ܒܢܰܝ̈ܳܐ ܕܫܺܝܬ ܐܶܡܪܰܬ ܢܒܺܝܽܘܬܳܐ ܕܒܶܠܥܰܡ܆ ܡܶܛܽܠ ܕܬܶܚܒܽܘܫ ܠܟܽܠܗܽܘܢ ܥܰܡܡ̈ܶܐ܆ ܒܰܫܡܳܐ ܗܳܢܳܐ ܕܫܺܝܬ. ܐܶܢ ܗܳܟܺܝܠ ܝܺܕܺܝܥܳܐ ܕܢܽܘܚ ܡܰܢ ܡܶܢ ܫܺܝܬ ܡܶܬܝܰܒܰܠ: ܘܡܶܢ ܢܽܘܚ ܕܶܝܢ ܟܽܠܗܽܘܢ ܥܰܡܡ̈ܶܐ܆ ܓܰܠܝܳܐ ܕܟܽܠܗܽܘܢ ܒܢܰܝ̈ܳܐ ܕܫܺܝܬ ܗܳܠܶܝܢ ܕܶܐܡܪܰܬ܆ ܠܟܽܠܗܽܘܢ ܥܰܡܡ̈ܶܐ ܕܰܐܪܥܳܐ ܩܪܳܬ. ܐܰܝܟܰܢܳܐ ܕܳܐܦ ܡܶܢ ܗܳܪܟܳܐ ܬܶܬܚܰܘܶܐ: ܕܡܶܢ ܟܽܠܗܽܘܢ ܥܰܡܡ̈ܶܐ ܕܰܐܪܥܳܐ ܫܒܳܐ ܘܰܢܓܰܕ ܡܫܺܝܚܳܐ ܡܶܢ ܛܳܥܝܽܘܬܳܐ ܘܠܐ ܝܺܕܰܥܬܳܐ܆ ܠܘܳܬ ܝܺܕܰܥܬܳܐ ܕܰܐ‌ܠܳܗܳܐ.

ܡܙܡܘܪ̈ܐ. 82: 8 [30]

ܡܢܝܢܐ. 24: 17 [31]

 ܠܗܰܘ ܕܶܢܚܳܐ ܐܳܡܰܪ[32]

ܡܬܝ. 2: 2 [33]

ܒ. ܩܘܪ̈ܝܢܬܝܐ. 5: 17[34]