ܡܺܐܡܪܳܐ ܕܡܳܐܐ ܘܰܐܪܒܬܥܣܪ

ܥܰܠ ܩܰܕܺܝܫܬܳܐ ܣܳܗܕܬܐ ܕܪܽܘܣܺܝܤ܆ ܘܥܰܠ ܗܳܠܶܝܢ ܕܥܰܡܳܗ̇ ܐܰܣ̈ܗܶܕܶܝܢ܆ ܘܰܡܚܰܦܛܳܢܽܘܬܳܐ ܡܶܛܽܠ ܟܽܘܢܳܫܳܐ ܠܘܳܬ ܗܰܘ ܡܳܐ ܕܚܰܣܺܝܪ ܠܰܥܒܳܕܳܐ ܕܰܠܥܶܠ ܡܶܢ ܡܰܕܒܚܳܐ ܩܰܕܺܝܫܳܐ.

114: ܟܰܕ ܬܪܶܝܢ ܡܺܐܡܪ̈ܺܝܢ ܡܶܢ ܟܰܕܽܘ ܩܰܪܶܒܬ܆ ܠܬܰܟ̈ܬܽܘܫܶܐ ܟܳܗ̈ܢܳܝܶܐ ܕܣܳܗܕܬܳܐ ܚܰܝܠܬܳܢܺܝܬܳܐ ܕܪܽܘܣܺܝܤ ܠܺܐܝܩܳܪܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܐܳܦ ܠܘܳܬ ܗܰܘ ܕܰܬܠܳܬܳܐ ܐܳܬܶܐ ܐ̱ܢܳܐ. ܐܰܝܟ ܙܢܳܐ ܓܶܝܪ ܕܦܰܘܠܽܘܤ ܗܰܘ ܫܠܺܝܚܳܐ ܘܡܰܠܦܳܢܳܐ ܕܥܰܡܡ̈ܶܐ܆ ܟܰܕ ܒܰܐܓܽܘ̈ܢܶܐ ܣܰܓܺܝ̈ܶܐܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܡܥܰܙܶܐ ܗ̱ܘܳܐ܆ ܘܚܳܙܶܐ ܗ̱ܘܳܐ ܠܶܗ ܠܳܐܟܶܠ ܩܰܪܨܳܐ ܕܝܰܬܺܝܪ ܚܰܪܺܝܦܳܐܺܝܬ ܩܳܐܶܡ ܗ̱ܘܳܐ ܠܩܽܘܒܠܶܗ܆ ܘܟܰܕ ܠܽܘܩܒܰܠ ܡܚܺܝܠܽܘܬܳܐ ܕܦܰܓܪܳܐ ܒܰܝܬܳܝܳܐ ܗܰܘ ܕܺܝܠܶܗ܆ ܡܦܰܚܶܡ ܗ̱ܘܳܐ ܘܰܡܒܰܚܶܢ ܠܣܰܓܺܝܽܐܘܬܳܐ ܕܥܰܡ̈ܠܶܐ ܗܳܢܽܘܢ ܕܳܐܬܶܝܢ ܗ̱ܘܰܘ ܥܠܰܘܗ̱ܝ ܐܳܡܰܪ ܗ̱ܘܳܐ܆ ܐܶܬܺܝܗܶܒ ܠܺܝ ܫܦܳܝܳܐ ܕܒܶܣܪܝ ܡܰܠܰܐܟܶܗ ܕܤܳܛܳܢܳܐ ܐܰܝܟܰܢܳܐ ܕܰܢܩܰܦܚܰܢܝ ܕܠܳܐ ܐܶ݀ܬܬܪܺܝܡ܆ ܘܕܰܚܠܳܦ ܗܳܢܳܐ ܬܠܳܬ ܙܰܒ̈ܢܺܝܢ ܐܰܦܺܝܣܶܬ̣ ܠܡܳܪܰܢ ܐܰܝܟܰܢܳܐ ܕܢܰܪܚܶܩ ܡܶܢܝ܆ ܘܶܐܡܰܪ ܠܺܝ ܕܣܳܦܩܳܐ ܠܳܟ ܛܰܝܒܽܘܬܝ܆ ܚܰܝܠܝ ܓܶܝܪ ܒܰܡܚܺܝܠܽܘܬܰܐ ܗ̱ܘ ܡܶܬܓܡܰܪ^[1]܆ ܘܡܶܟܺܝܠ ܟܰܕ ܝܰܬܺܝܪ ܗܳܘܶܐ ܗ̱ܘܳܐ ܢܰܨܺܝܚܳܐ ܒܢܰܦܫܶܗ܆ ܗܳܦܶܟ ܗ̱ܘܳܐ ܡܰܠܚܶܡ ܗ̱ܘܳܐ ܠܳܗ̇ ܠܡܶܠܬܳܐ܆ ܘܥܰܠ ‌ܐܰܝܠܶܝܢ ܕܰܕܫܳܥܬܳܐ ܡܶܫ̣ܬܐܶܠ ܗ̱ܘܳܐ ܡܶܢܗܶܝܢ܆ ܥܰܠ ܗܳܠܶܝܢ ܡܚܰܘܶܐ ܗ̱ܘܳܐ ܪܰܒܽܘܬ ܢܰܦܫܳܐ ܘܳܐܡܰܪ ܗ̱ܘܳܐ܆ ܚܳܕܝܳܐܺܝܬ ܗܳܟܺܝܠ ܡܰܠܽܘܢ ܐܶ݀ܫܬܰܒܗܰܪ ܒܟܽܘܪ̈ܗܳܢܶܐ ܕܺܝܠܝ܆ ܐܰܝܟܰܢܳܐ ܕܢܰܓܶܢ ܥܠܰܝ ܚܰܝܠܶܗ ܕܰܡܫܺܝܚܳܐ^[2]܆ ܘܕܺܐܝܬ ܠܰܢ ܕܶܝܢ ܠܣܺܝܡܬܳܐ ܗܳܕܶܐ ܒܡܳܐܢ̈ܶܐ ܕܚܶܨܦܳܐ܆ ܐܰܝܟܰܢܳܐ ܕܰܕܚܰܝܠܳܐ ܕܰܐ‌ܠܳܗܳܐ ܬܶܗܘܶܐ ܐܺܝܬܶܝܗ̇ ܗܺܝ ܪܰܒܽܘܬܳܐ ܘܰܫܦܺܝܥܽܘܬܳܐ ܘܠܰܘ ܡܶܢܰܢ^[3]܆ ܒܶܗ ܟܰܕ ܒܶܗ ܒܰܙܢܳܐ ܐܳܦ ܐܶܢܳܐ܆ ܒܦܰܓܪܳܐ ܗܰܘ ܕܣܳܗܕܽܘܬܳܐ ܕܣܰܓܺܝ ܝܰܬܺܝܪ ܡܚܺܝܠ ܗ̱ܘܳܐ܆ ܕܰܐܢ̱ܬܬܐ ܗ̱ܘܳܬ ܓܶܝܪ܆ ܒܡܳܐܢܳܐ ܗܰܘ ܚܶܨܦܳܢܳܝܳܐ ܘܰܕܣܰܓܺܝ ܡܛܰܝܰܒ ܘܰܕܠܺܝܠ ܠܘܳܬ ܬܒܳܪܳܐ܆ ܕܛܶܠܻܝܬܳܐ ܗ̱ܘܳܐ ܓܶܝܪ܆ ܝܰܬܺܝܪ ܣܒܺܝܣܳܐܺܝܬ ܡܙܰܝܰܚ ܐ̱ܢܳܐ ܘܰܡܥܰܕܥܶܕ ܐ̱ܢܳܐ܆ ܘܠܰܡܨܰܥܬܳܐ ܡܰܝܬܶܐ ܐ̱ܢܳܐ ܠܳܗ̇ ܠܢܶܩܒܬܳܢܳܝܽܘܬܳܐ܆ ܠܰܡܫܰܪܝܽܘܬܳܐ܆ ܠܫܳܪܽܘܥܽܘܬܳܐ܆ ܠܰܕܠܺܝܠܽܘܬ ܡܶܬܟܰܒܫܳܢܽܘܬܳܐ܆ ܐܰܝܟܰܢܳܐ ܕܰܐ݀ܟܪܶܙ ܠܥܰܬܺܝܪܽܘܬܳܐ ܕܛܰܝܒܽܘܬܳܐ ܗܳܝ ܕܡܶܢ ܠܥܶܠ܆ ܗܳܝ ܕܰܒܗܳܠܶܝܢ ܐܶܬܟܰܬܫܰܬ܆ ܘܒܰܡܚܺܝܠܽܘܬܳܐ ܡܶܬܓܰܡܪܳܐ ܘܝܰܬܺܝܪ ܙܰܟܳܝܳܐ܆ ܐܰܝܟܰܢܳܐ ܕܶܐ݀ܪܰܡܪܶܡ ܠܰܫܦܺܝܥܽܘܬܳܐ ܕܚܰܝܠܳܐ ܐܰ‌ܠܳܗܳܝܳܐ.

ܐܰܟܙܢܳܐ ܓܶܝܪ ܕܰܒܦܳܠܚܳܐ ܠܳܐ ܡܙܰܝܢܳܐ ܕܰܒܡܶܨܥܰܬ ܒܥܶܠܕܒܳܒ̈ܶܐ ܡܰܩܪ̈ܒܳܢܶܐ ܥ̣ܰܠ ‌‌ܐܰܪܡܺܝ܆ ܘܡܶܢ ܟܽܠ ܕܽܘܟ ܡܰܢ ܡܶܬܡܚܶܐ ܗ̱ܘܳܐ ܘܠܳܐ ܢܳܦܶܠ ܗ̱ܘܳܐ܆ ܪܳܡܶܐ ܗ̱ܘܳܐ ܕܶܝܢ ܗܽܘ ܠܒܰܥ̈ܠܰܝ ܕܰܐܪܶܗ܆ ܢܶܬܕܰܡܰܪ ܐ̱ܢܳܫ ܥܰܠ ܡܝܰܬܪܽܘܬܳܐ ܡܰܩܪܒܳܢܺܝܬܳܐ܆ ܗܳܟܰܢܳܐ ܐܳܦ ܗܰܘ ܕܠܰܒܬܽܘܠܬܳܐ ܛܠܺܝܬܳܐ ܕܰܒܪܰܟܺܝܟܽܘܬܳܐ ܕܰܟܝܳܢܳܐ ܘܰܕܩܰܘܡܬܳܐ ܡܶܬܦܰܢܩܳܐ^[4] ܗ̱ܘܳܬ܆ ܘܰܕܬܶܬܕܺܝܫ ܘܬܶܙܕܟܶܐ ܙܳܕܶܩ ܗ̱ܘܳܐ ܒܰܝܢܳܬ ܒܺܝ̈ܫܳܬܳܐ ܗܳܠܶܝܢ ܩܰܫ̈ܝܳܬܳܐ܆ ܚܳܙܶܐ ܕܩܳܝܡܳܐ ܕܠܳܐ ܕܶܚܠܬܳܐ܆ ܘܰܕܓܳܚܟܳܐ ܥܰܠ ܗܳܠܶܝܢ ܕܰܠܡܶܪܥܰܠ ܡܶܢܗܶܝܢ ܙܳܕܶܩ ܗ̱ܘܳܐ܆ ܡܳܢܳܐ ܐ̱ܚܪܺܢܳܐ ܘܠܳܐ ܗ̱ܘܳܐ ܠܶܗ ܕܢܶܥܒܶܕ܆ ܐܶܠܳܐ ܐܶܢ ܕܰܢܩܰܠܶܤ ܠܚܺܝܨܽܘܬܳܐ ܕܢܰܦܫܳܐ ܗܳܝ ܠܒܺܝܒܬܳܐ܆ ܘܰܢܫܰܒܰܚ ܠܰܡܫܺܝܚܳܐ ܗܰܘ ܝܳܗܽܘܒܳܐ ܕܓܰܢ̱ܒܳܪܽܘܬܳܐ܆ ܗܰܘ ܕܳܐܦ ܠܰܛܠܳܝ̈ܳܬܳܐ ܡܚܺܝ̈ܠܳܬܳܐ ܡܢܰܦܶܩ ܘܰܡܕܰܪܶܫ ܒܕܰܐܪ̈ܶܐ ܠܳܐ ܪ̈ܳܚܡܰܝ ܒܶܣܪܳܐ܆ ܘܰܠܘܳܬ ܐܰܓܽܘ̈ܢܶܐ ܡܶܬܗܰܘ̈ܢܳܢܶܐ ܡܰܦܶܩ ܠܗܶܝܢ܆ ܕܬܳܒܥܺܝܢ ܥܽܘܬܳܕܳܐ ܘܛܽܘܝܳܒܳܐ܆ ܩܒܺܝܥܳܐ ܘܠܳܐ ܡܶܙܕܰܥܙܥܳܢܳܐ ܕܚܽܘܫܳܒܳܐ. ܡܶܢ ܗܳܪܟܳܐ ܩܽܘܠܳܣܳܗ̇ ܕܣܳܗܕܬܳܐ܆ ܠܰܘ ܡܶܢ ܒܢܰܝ̈ܢܳܫܳܐ ܐܺܝܬܰܘܗ̱ܝ܆ ܐܶܠܳܐ ܡܶܢ ܐܰ‌ܠܳܗܳܐ ܗܰܘ ܕܰܠܘܳܬܶܗ ܙܳܕܩܳܐܺܝܬ ܥܰܡ ܢܒܺܝܳܐ ܗܰܘ ܕܰܡܙܰܡܰܪ ܬܰܙܥܶܩ܆ ܡܶܢ ܠܘܳܬܳܟ ܗ̱ܘ̣ ܩܽܘܠܳܣܳܐ ܕܺܝܠܝ ܒܥܺܕܬܳܐ ܪܰܒܬܳܐ^[5].

ܠܗܳܢܽܘܢ ܡܰܢ ܓܶܝܪ ܕܐ̱ܢܳܫܳܐܺܝܬ ܡܩܰܠܣܺܝܢ ܐܺܝܬ ܠܡܶܚܙܳܐ܆ ܕܡܶܢ ܗܳܠܶܝܢ ܕܡܶܢ ܠܒܰܪ ܐܰܝܟ ܙܢܳܐ ܕܰܒܓܰܒ̈ܝܳܬܳܐ ܕܠܽܘ̈ܩܳܛܶܐ^[6]܆ ܡܶܟܳܐ ܘܡܶܢ ܠܗܰܠ ܡܟܰܢܫܺܝܢ ܠܗܽܘܢ ܠܩܽܘ̈ܠܳܣܶܐ܆ ܘܰܐܝܟ ܕܰܒܫܽܘܟܳܢܳܐ ܡܥܰܠܶܝܢ ܠܗܽܘܢ ܠܗܳܢܽܘܢ ܕܡܶܬܩܰܠܣܺܝܢ. ܘܶܐܢܗܽܘ ܕܕܽܘܟܬܳܐ ܪܰܒܬܳܐ ܐܺܝܬ ܠܗܽܘܢ ܒܶܝܬ ܐܰܒܳܗ̈ܶܐ ܡܥܰܩܒܺܝܢ ܣܰܓܺܝܳܐܺܝܬ܆ ܘܳܐܦ ܕܗܳܝ ܡܕܺܝܢ̱ܬܳܐ ܩܽܘܠܳܣܳܐ ܦܰܬܝܳܐ ܙܳܩܪܺܝܢ. ܘܶܐܢ ܒܓܶܢܣܳܐ ܐܺܝܬܰܝܗܽܘܢ ܡܫܰܡ̈ܗܶܐ ܘܺܝܕܺܝ̈ܥܶܐ܆ ܐܳܦ ܠܩܽܘܠܳܣ̈ܶܐ ܗܳܢܽܘܢ ܕܣܶܐܒܘ ܘܗܳܐ ܡܶܢ ܟܰܕܽܘ ܐܶܬܚܰܒܰܠܘ ܠܗܽܘܢ ܘܰܗܘ̣ܰܘ ܠܳܐ ܡܶܬܚܰܙܝ̈ܳܢܶܐ ܥܰܡ ܐܰܒܳܗܰܝ̈ܗܽܘܢ ܩܰܕܡܳܝ̈ܶܐ܆ ܒܡ̈ܶܠܶܐ ܡܟܰܢܟܺܝܢ ܘܡܰܘܪܒܺܝܢ. ܒܳܥܶܝܢ ܕܶܝܢ ܘܰܡܥܰܩܒܺܝܢ܆ ܘܶܐܢ ܒܦܶܢ̈ܩܝܳܬܳܐ^[7] ܘܰܒܩܰܠܺܝܠ ܟܬܺܝ̈ܒܳܬܳܐ܆ ܒܰܫܡܳܐ ܕܫܽܘܠܛܳܢܳܐ ܪܰܘܪܒܳܐܺܝܬ ܢܳܦܚܺܝܢ. ܘܰܦܫܺܝܛܳܐܺܝܬ ܠܡܺܐܡܰܪ܆ ܒܓܶܠ̈ܦܳܢܶܐ ܢܽܘܟܪ̈ܳܝܶܐ ܕܳܒܪܺܝܢ ܒܰܩܛܺܝܪܳܐ ܠܡܰܣܳܩܽܘ ܒܳܐܰܐܪ ܠܗܳܢܽܘܢ ܕܰܠܬܰܚܬ ܡܗܰܠܟܺܝܢ܆ ܘܓܶܦ̈ܶܐ ܒܰܝ̈ܬܳܝܶܐ ܠܰܝܬ ܠܗܽܘܢ. ܢܳܡܽܘܣܳܐ ܕܶܝܢ ܗܰܘ ܕܩܽܘܠܳܣ̈ܶܐ ܐܰ‌ܠܳܗܳܝ̈ܶܐ܆ ܒܝܰܕ ܗܳܠܶܝܢ ܕܰܠܩܽܘܒܠܳܐ ܐܳܬܶܐ. ܘܒܰܕܡܽܘܬ ܐ̱ܢܳܫ ܦܰܠܳܚܳܐ ܛܰܪܩܳܐ ܡܶܢ ܗܳܢܽܘܢ ܕܡܶܬܩܰܠܣܺܝܢ܆ ܦܳܣܶܩ ܠܗܳܠܶܝܢ ܫܒܶܫ̈ܬܶܐ ܕܠܳܐ ܝܰܠܕܳܐ ܘܰܕܠܳܐ ܦܺܐܪ̈ܶܐ܆ ܘܕܺܐܝܬܰܝܗܶܝܢ ܬܽܘܪܣܳܝܳܐ ܕܢܽܘܪܳܐ܆ ܘܡܶܢ ܗܳܠܶܝܢ ܕܝܰܬܺܝܪ ܒܰܝ̈ܬܳܝܳܢ ܘܰܕܦܺܐܪ̈ܶܐ ܡܰܝ̈ܬܝܳܢ܆ ܥܳܒܶܕ ܠܶܗ ܠܩܽܘܠܳܣܳܐ.

ܐܰܝܟ ܗܳܢܳܐ ܢܳܡܽܘܣܳܐ ܐܰ‌ܠܳܗܳܝܳܐ܆ ܐܶܬܪܢܶܐ ܠܺܝ ܠܰܕܪܽܘܣܺܝܤ ܥܠܰܝܡܬܶܗ ܕܰܡܫܺܝܚܳܐ܆ ܕܰܕܪܺܝܟܳܐ ܙܗܺܝܪܳܐܺܝܬ ܘܰܡܫܰܪܪܳܐܺܝܬ ܥܰܠ ܫܽܘܥܳܐ ܕܗܰܝܡܳܢܽܘܬܳܐ܆ ܘܰܕܩܳܝܡܳܐ ܟܰܕ ܐܺܝܬܶܝܗ̇ ܪܳܡܬܳܐ ܘܰܕܪܰܘܪ̈ܒܳܬܳܐ ܡܶܬܪܰܥܝܳܐ܆ ܘܕܰܒ̈ܡܶܠܶܐ ܪܳܫܡܳܐ ܠܗܳܢܶܝܢ ܕܰܒܗܽܘܢ ܒܰܥ̈ܒܳܕܶܐ ܚܰܘܝܰܬ ܐܶܢܶܝܢ. ܘܡܶܣܬܰܒܪܳܐ ܕܳܐܡܪܳܐ܆ ܕܡܶܢ ܡܕܺܝܢ̱ܬܳܐ ܡܰܠܟܳܝܬܳܐ ܕܪ̈ܽܘܡܳܝܶܐ ܐܺܝܬܰܝ܆ ܘܗܳܕܶܐ ܐܺܝܬܶܝܗ̇ ܠܺܝ ܒܶܝܬ ܐܰܒܳܗ̈ܶܐ. ܐܶܠܳܐ ܝܰܠܕܳܐ ܗ̱ܝ ܗܺܝ ܫܒܶܫܬܳܐ܆ ܘܕܳܐܦܠܳܐ ܡܶܕܶܡ ܡܥܰܕܪܳܐ ܠܘܳܬ ܡܝܰܬܪܽܘܬܳܐ. ܡܳܕܶܝܢ ܬܶܬܫܺܝܛ ܘܬܶܬܦܣܶܩ ܒܡܰܓܠܳܐ ܗܳܝ ܦܰܠܳܚܳܝܬܳܐ ܕܪܽܘܚܳܐ܆ ܕܳܐܡܪܳܐ ܡܶܛܽܠ ‌ܐܰܒܪܳܗܳܡ ܘܡܶܛܽܠ ܓܰܒܪ̈ܶܐ ܗܳܢܽܘܢ ܕܫܰܦܺܝܪ ܐܶܬܕܰܒܰܪܘ ܘܒܰܡܝܰܬܪܽܘܬܳܐ ܚ̣ܝܰܘ܆ ܕܰܐܟܣ̈ܢܳܝܶܐ ܐܺܝܬܰܝܗܽܘܢ ܗ̱ܘܰܘ ܘܬܰܘܬܳܒ̈ܶܐ ܥܰܠ ‌ܐܰܪܥܳܐ^[8]܆ ܘܰܕܟܰܕ ܗܳܠܶܝܢ ܐܳܡܪܺܝܢ ܗ̱ܘܰܘ ܓܠܺܝܬܳܐ ܥܳܒܕܺܝܢ ܗ̱ܘܰܘ܆ ܕܠܰܐܬܪܳܐ ܡܝܰܬܪܳܐ ܐܰܘ ܟܺܝܬ ܡܕܺܝܢ̱ܬܳܐ ܗܳܝ ܫܡܰܝܳܢܺܝܬܳܐ ܪܳܓܶܝܢ ܗ̱ܘܰܘ܆ ܘܰܡܣܰܟܶܝܢ ܗ̱ܘܰܘ ܠܰܡܕܺܝܢ̱ܬܳܐ ܗܳܝ ܕܽܐܘܡܳܢܳܗ̇ ܘܥܳܒܽܘܕܳܗ̇ ܐܰ‌ܠܳܗܰܐ ܗ̱ܘ.

ܕܛܪܝܐܢܘܤ ܡܰܠܟܳܐ ܐܺܝܬܰܝ ܒܰܪܬܳܐ. ܘܳܐܦ ܗܳܕܶܐ ܒܳܗ̇ ܒܰܕܡܽܘܬܳܐ ܕܠܳܐ ܦܺܐܪ̈ܶܐ ܐܺܝܬܶܝܗ̇. ܢܶ݀ܩܪܽܘܒ ܠܳܗ̇ ܗܳܟܺܝܠ ܦܣܳܩܳܐ ܡܶܕܶܡ ܕܝܰܬܺܝܪ ܚܰܪܺܝܦ ܡܶܢ ܠܘܳܬ ܡܫܺܝܚܳܐ ܕܡܰܙܥܶܩ܆ ܕܗܰܘ ܕܪܳܚܶܡ ܠܰܐܒܳܐ ܐܰܘ ܠܶܐܡܳܐ ܝܰܬܺܝܪ ܡܶܢ ܕܠܺܝ܆ ܠܳܐ ܫܳܘܶܐ ܠܺܝ^[9].

ܝܳܪܬܽܘܬܳܐ ܕܣܩܝܦܛܪ̈ܶܐ ܐܰܒܳܗܳܝ̈ܶܐ ܘܕܰܐܪ̈ܓܘܳܢܶܐ܆ ܠܘܳܬܝ ܡܶܢ ܟܽܠ ܦܪܽܘܤ ܚܳܝܪܳܐ. ܘܳܐܦ ܠܰܣܪܺܝܩܽܘܬܶܗ ܕܗܳܢܳܐ ܣܰܒܪܳܐ ܬܓܽܘܙ ܘܬܶܦܣܽܘܩ܆ ܗܳܝ ܕܡܳܢܳܐ ܓܶܝܪ ܢܶܬܗܰܢܶܐ ܒܰܪܢܳܫܳܐ܆ ܐܶܢ ܠܥܳܠܡܳܐ ܟܽܠܶܗ ܢܺܐܬܰܪ܆ ܢܰܦܫܶܗ ܕܶܝܢ ܢܶܚܣܰܪ܆ ܐܰܘ ܕܡܳܢܳܐ ܢܶܬܶܠ ܒܰܪܢܳܫܳܐ ܬܚܠܽܘܦܳܐ ܕܢܰܦܫܶܗ^[10].

ܒܗܳܠܶܝܢ ܗܳܟܺܝܠ ‌ܐܰܪܰܐ ܐܳܡܪܳܐ܆ ܫܕܺܝܬ̣ ܡܶܢܝ ܠܠܳܐ ܡܰܦܪܝܳܢܽܘܬܳܐ ܐܰܘܟܺܝܬ ܠܰܓܠܺܝܙܽܘܬܳܐ ܕܡܶܢ ܦܺܐܪ̈ܶܐ܆ ܘܠܳܐ ܣܳܟ ܡܶܬܒܥܶܐ ܠܺܝ ܬܽܘܒ ܦܣܳܩܳܐ܆ ܫܶܕܝܳܐ ܕܰܫܒܶܫ̈ܬܶܐ ܗܳܢܶܝܢ ܕܠܳܐ ܝܽܘܬܪܳܢ. ܗܳܐ ܓܶܝܪ ܚܳܙܝܳܐ ܐ̱ܢܳܐ ܠܰܫܒܶܫܬܳܐ ܕܫܽܘܦܪܳܐ܆ ܕܰܒܗܰܒܳܒ̈ܶܐ ܕܛܰܠܝܽܘܬܳܐ ܒܰܕܡܽܘܬ ܛܰܪ̈ܦܶܐ ܡܟܰܠܠܳܐ ܠܪܺܝܫܳܐ ܕܺܝܠܝ. ܣܓܽܘܠܳܐ ܕܶܝܢ ܠܡܰܘܠܳܕܽܘ ܠܳܐ ܡܶܫܟܚܳܐ. ܐܶܠܳܐ ܐܶ݀ܚܫܽܘܒ ܐܳܦ ܠܗܳܕܶܐ ܡܶܠܬܳܐ ܟܳܗܢܳܝܬܳܐ܆ ܒܰܪܢܳܫܳܐ ܐܰܝܟ ܥܡܺܝܪܳܐ ܝܰܘ̈ܡܰܘ̈ܗ̱ܝ. ܐܰܝܟ ܗܰܒܳܒܳܐ ܕܚܰܩܠܳܐ ܗܳܟܰܢܳܐ ܢܗܰܒܶܒ^[11]. ܘܰܕܢܰܚ ܫܶܡܫܳܐ ܐܰܝܟ ܚܽܘܡܳܐ ܘܰܐܘܒܫܶܗ ܠܰܥܡܺܝܪܳܐ. ܘܗܰܒܳܒܳܐ ܕܺܝܠܶܗ ܢܬ̣ܪ. ܘܫܰܦܺܝܪܽܘܬ ܦܰܐܝܽܘܬܳܐ ܕܦܰܪܨܽܘܦܳܐ ܕܺܝܠܶܗ ܐܶܒܕܰܬ^[12].

ܚܶܫ̈ܠܳܬܳܐ ܕܶܝܢ ܕܕܰܗܒܳܐ ܘܢܰܚ̈ܬܶܐ܆ ܘܟܽܠܶܗ ܦܽܘܢܳܩܳܐ ܢܶܫܳܝܳܐ ܘܰܡܥܰܫܩܽܘܬܳܐ܆ ܕܰܒܗܳܠܶܝܢ ܐܳܦܠܳܐ ܠܰܫܒܶܫܬܳܐ ܢܶܬܚܰܫ̈ܒܳܢ܆ ܐܳܦܠܐ ܢܶܣ̈ܬܰܢܩܳܢ ܥܰܠ ܦܣܳܩܳܐ܆ ܐܳܦܠܳܐ ܢܰܘ̈ܥܝܳܢ ܡܶܢ ܟܰܪܡܳܐ ܡܠܺܝܠܳܐ. ܡܥܰܘܰܪ ܠܳܗ̇ ܓܶܝܪ ܠܳܗ̇ ܠܡܰܘܥܺܝܬܳܗ̇ ܕܗܳܕܶܐ ܦܰܘܠܽܘܤ ܗܰܘ ܦܰܠܳܚܳܐ ܚܰܟܺܝܡܳܐ ܟܰܕ ܪܳܕܽܘܝܳܐܺܝܬ ܡܦܰܪܓܶܠ܆ ܠܳܐ ܒܕܰܗܒܳܐ ܐܰܘ ܒܡܰܪ̈ܓܳܢܝܳܬܳܐ ܐܰܘ ܒܢܰܚ̈ܬܶܐ ܣܰܓܺܝ̈ܰܐܝ ܕܡܰܝ̈ܳܐ. ܐܶܠܳܐ ܗܳܝ ܕܦܰܐܝܳܐ ܠܢܶܫ̈ܶܐ ܕܡܶܫ̈ܬܰܘܕܝܳܢ ܕܶܚܠܰܬ ܐܰ‌ܠܳܗܳܐ܆ ܠܰܡܨܰܒܳܬܽܘ ܗܶܢܶܝܢ ܠܗܶܝܢ ܒܝܰܕ ܥ̈ܒܳܕܶܐ ܛܳܒ̈ܶܐ^[13].

ܠܺܝ ܫܒܶܫܬܳܐ ܐܳܡܪܳܐ܆ ܐܳܦ ܟܽܠܶܗ ܦܰܓܪܳܐ ܕܺܝܠܝ ܡܶܣܬܒܰܪ. ܘܰܠܗܳܢܳܐ ܙܳܕܶܩ ܠܺܝ ܕܶܐ݀ܦܣܩܺܝܘܗ̱ܝ ܠܰܡܫܺܝܚܳܐ܆ ܒܝܰܕ ܦܣܳܩܳܐ ܟܳܗܢܳܝܳܐ ܕܣܳܗܕܽܘܬܳܐ. ܘܰܕܥܰܪܛܶܠܳܝܬܳܐ ܐܶ݀ܚܘܶܝܗ̇ ܠܢܰܦܫܳܐ܆ ܘܕܰܡܚܰܪܪܳܐ ܡܶܢ ܐܰܣܽܘܪ̈ܶܐ ܕܚܰܫܳܢܳܝܽܘܬܳܐ ܘܕܰܣܪܺܝܟܽܘܬܳܐ ܒܶܣܪܳܢܳܝܬܳܐ܆ ܘܕܶܐ݀ܫܡܰܥ ܡܶܢ ܗܰܘܕܰܢܨܰܒ܆ ܠܒܰܪ̱ܬ ܩܳܠܳܐ ܗܳܝ ܕܣܰܓܺܝ ܫܳܘܝܳܐ ܠܰܨܠܽܘܬܳܐ܆ ܗܳܝ ܕܰܒܝܰܕ ܐܶܪܰܡܝܳܐ ܢܒܺܝܳܐ ܐܳܡܪܳܐ܆ ܐܶܢܳܐ ܢܨܰܒܬܶܟܝ ܓܦܶܬܳܐ ܛܥܺܝܢܰܬ ܦܺܐܪ̈ܶܐ^[14]܆ ܟܽܠܶܟܝ ܫܰܪܺܝܪܬܳܐ܆ ܠܳܐ ܐܶܬܗܰܦܟܝ ܠܡܰܪܺܝܪܽܘܬܳܐ܆ ܐܰܝܟ ܓܦܶܬܳܐ ܗܳܝ ܢܽܘܟܪܳܝܬܳܐ ܘܰܕܟܳܦܪܳܐ ܒܫܰܦܺܝܪܽܘܬ ܛܽܘܗܡܳܐ ܕܗܰܘ ܕܰܢܨܰܒ܆ ܠܨܰܠܡܳܐ ܟܺܝܬ ܘܰܕܡܽܘܬܳܐ ܡܠܺܝܠܬܳܐ ܘܰܐ‌ܠܳܗܳܝܬܳܐ.

ܟܰܕ ܥܰܡ ܗܳܢܳܐ ܥܽܘܬܳܕܳܐ ܐܰ‌ܠܳܗܳܝܳܐ ܘܠܳܐ ܦܰܓܪܳܢܳܐ܆ ܕܪܽܘܣܺܝܤ ܗܳܝ ܕܣܰܓܺܝ ܓܰܒܪܳܢܺܝܬܳܐ ܠܒܶܝܬ ܡܰܠܟܽܘܬܳܐ ܫܶܒܩܰܬ܆ ܘܥܶܪܩܰܬ ܥܪܽܘܩܝܳܐ ܗܰܘ ܕܣܰܓܺܝ ܚܰܝܠܬܳܢ܆ ܗܰܘ ܕܰܟܠܺܝܠܳܐ ܐܺܝܬ ܠܳܗ̇ ܕܓܰܢ̱ܒܳܪܽܘܬܳܐܐܶܠܐܠܰܘܩܽܘܛܪܳܓܳܐ ܕܕܰܚܽܘܠܬܳܢܽܘܬܳܐ܆ ܥܰܡ ܢܶܫ̈ܶܐ ܩܰܠܺܝܠ ܒܬܽܘ̈ܠܳܬܳܐ ܟܢܺܝ̈ܟܳܬܳܐ ܘܢܰܟ̈ܦܳܬܳܐ܆ ܘܕܰܒܝܰܕ ܢܙܺܝܪܽܘܬܳܐ ܘܕܽܘܒܳܪܳܐ ܥܳܢܘܳܝܳܐ ܦܪ̈ܰܫܶܝܢ ܟܽܠܗܽܘܢ ܚܰܝ̣ܰܝܗܶܝܢ ܠܰܡܫܺܝܚܳܐ܆ ܘܰܠܘܳܬ ܩܒܽܘܪܬܳܐ ܕܗܳܢܽܘܢ ܕܗܳܝܕܶܝܢ ܡܰܣܗܕܺܝܢ ܗ̱ܘܰܘ ܘܰܕܠܳܐ ܩܒܽܘܪܬܳܐ ܡܶܫܬܕܶܝܢ ܗ̱ܘܰܘ ܥܰܢ̈ܝܳܢ ܗ̱ܘܰܝ̈܆ ܘܰܠܗܳܕܶܐ ܥܒ̈ܰܕܶܝܢ ܚܰܝ̣ܰܝܗܶܝܢ܆ ܗܺܝ ܠܳܗ̇ ܡܢ̣ܳܬ̣. ܘܡܶܫܬܰܘܬܦܳܐ ܠܗܶܝܢ ܠܗܳܠܶܝܢ܆ ܒܟܽܠܗܶܝܢ ܐܰܟܚܕܳܐ ܡܶܢ ܫܶܠܝ. ܒܗܰܝܡܳܢܽܘܬܳܐ. ܒܣܳܥܽܘܪ̈ܘܳܬܳܐ. ܒܣܰܒܪ̈ܶܐ. ܒܢܶܨܚܳܢ̈ܶܐ ܕܓܰܢ̱ܒܳܪܽܘܬܳܐ܆ ܘܒܰܓܗܳܝܬܳܐ ܛܽܘܒܬܳܢܺܝܬܳܐ ܕܡܶܢ ܗܳܪܟܳܐ܆ ܕܰܛܥܺܝܢܳܐ ܟܠܺܝ̈ܠܶܐ ܒܣܳܗܕܽܘܬܳܐ. ܟܰܕ ܓܶܝܪ ܒܠܶܠܝܳܐ ܡܰܩܦ̈ܣܳܢ ܗ̱ܘܰܝ̈ ܘܰܡܥܰܦ̈ܝܳܢ ܗ̱ܘܰܝ̈ ܠܦܰܓܪ̈ܶܐ ܡܥܰܙܝܳܢ̈ܶܐ ܕܗܳܢܽܘܢ ܕܡܰܣܗܕܺܝܢ ܗ̱ܘܰܘ ܘܺܐܝܬܰܝܗܽܘܢ ܗ̱ܘܰܘ ܕܠܳܐ ܩܒܽܘܪܬܳܐ܆ ܓܽܘܕܳܐ ܕܰܡܙܰܝܢ̈ܶܐ ܩܳܡܰܬ̣ ܥܠܰܝܗܶܝܢ܆ ܘܰܐܘܒܠܽܘܗ̱ܝ ܠܨܺܝܕܳܐ ܗܰܘ ܣܰܓܺܝ ܡܛܰܝܒܳܐ ܘܕܰܦܫܺܝܩ ܗ̱ܘܳܐ ܕܢܶܬܠܒܰܟ. ܗܰܘ ܕܒܶܗ ܟܰܣܝܳܐܺܝܬ܆ ܐܳܦ ܕܪܽܘܣܺܝܤ ܗܳܝ ܒܰܪܬܶܗ ܕܡܰܠܟܳܐ܆ ܗܳܝ ܥܳܪܽܘܩܬܳܐ ܠܒܺܝܒܬܳܐ܆ ܡܛܰܫܝܳܐ ܗ̱ܘܳܬ. ܘܗܳܕܶܐ ܠܛܪܐܝܐܢܘܤ ܐܰܝܟ ܕܠܰܐܒܳܐ ܘܰܛܪܽܘܢܳܐ܆ ܘܕܰܒܬܰܪ̈ܬܰܝܗܶܝܢ ܠܪܽܘܓܙܳܐ ܠܳܐ ܡܶܫܟܰܚ ܗ̱ܘܳܐ ܠܰܡܣܰܝܒܳܪܽܘ܆ ܡܶܚܕܳܐ ܒܰܪ ܫܳܥܬܶܗ ܥܶܒܕܰܬ ܕܢܶܦܣܽܘܩ ܡܰܘܬܳܐ ܥܰܠ ܒܬܽܘ̈ܠܳܬܳܐ. ܘܡܰܘܬܳܐ ܡܰܪܺܝܪܳܐ ܘܚܰܪܡܳܐ܆ ܘܗܰܘ ܕܗܺܝ ܚܶܡܬܳܐ ܟܰܕ ܡܶܢ ܫܶܠܝ ܐܶܫܟܰܚܬܶܗ ܐܰ‌ܠ̣ܦܰܬ. ܟܰܕ ܓܶܝܪ ܒܰܐܠܰܢܺܝܘܽܢ ܒܳܢܶܐ ܗ̱ܘܳܐ ܒܗܰܘ ܙܰܒܢܳܐ ܡܫܰܡܠܝܳܐܺܝܬ܆ ܗܳܝ ܕܺܐܝܬ ܠܳܗ̇ ܫܽܘܡܳܗܳܐ ܥܰܠ ܟܽܘܢܳܝܶܗ܆ ܘܰܢܚܳܫܳܐ ܢܳܣܶܟ ܗ̱ܘܳܐ ܠܰܥܒܳܕܳܐ ܕܩܰܕܣ̈ܶܐ܆ ܗܳܢܽܘܢ ܕܒܺܐܝ̈ܕܰܝܗܽܘܢ ܟܰܕ ܡܶܫܬܰܓܪܺܝܢ ܗ̱ܘܰܘ܆ ܠܓܰܘ ܒܰܐܠܰܢܺܝܘܽܢ ܪܳܕܶܝܢ ܗ̱ܘܰܘ ܥܳܐܠܺܝܢ ܡܰܝ̈ܳܐ ܫܰܚܺܝ̈ܢܶܐ܆ ܦܳܩܶܕ ܗ̱ܘܳܐ ܕܰܥܠܰܝܡ̈ܳܬܳܐ ܗܳܠܶܝܢ܆ ܠܥܶܠ ܡܶܢ ܢܚܳܫܳܐ ܗܰܘ ܟܰܕ ܡܶܫܬܰܠܗܰܒ ܗ̱ܘܳܐ܆ ܘܡܶܫܬܓܰܪ ܘܡܶܬܦܰܫܰܪ ܢܶܫ̈ܬܰܕܝܳܢ. ܘܠܰܥܒܳܕܳܐ ܐܶܬ̣ܳܬ̣ ܗܳܝ ܕܶܐܬܦܰܩܕܰܬ܆ ܘܰܒܗܳܢܳܐ ܙܢܳܐ ܠܘܳܬ ܫܡܰܝܳܐ ܪ̈ܗܶܛܝ̱ ܣ̈ܠܶܩܝ̱܆ ܢܰܦ̈ܫܳܬܳܐ ܗܳܠܶܝܢ ܕܰܒܝܰܕ ܡܚܰܡܣܢܳܢܽܘܬܳܐ ܣܰܓܺܝܐܬܳܐ ܐܶܬܗ̈ܰܓܶܝܢ ܫܪܳܝܶܗ ܕܦܰܓܪܳܐ. ܠܕܰܐܝܟ ܗܳܠܶܝܢ ܒܬܽܘ̈ܠܳܬܳܐ ܐܰܟܚܕܳܐ ܘܰܥܠܰܝ̈ܡܳܬܳܐ܆ ܒܶܝܬ ܕܽܘܪܳܫܳܐ ܕܰܡܫܺܝܚܳܐ܆ ܠܘܳܬ ܐܰܘ̈ܳܢܶܐ ܗܳܢܽܘܢ ܕܰܠܥܶܠ ܡܰܥܒܰܪ ܡܰܥܡܰܪ. ܘܡܶܢ ܐܰܝܟܳܐ. ܡܶܢ ܡܰܫܟܢܳܐ ܘܰܐܫܺܝܕܽܘܬܳܐ ܕܥܳܠܡܳܐ ܗܳܢܳܐ. ܠܗܰܘ ܕܶܐܫܰܥܝܳܐ ܢܒܺܝܳܐ ܡܶܛܽܠ ܪܰܛܺܝܒܽܘܬܳܐ ܕܰܪ̈ܓܺܝܓܳܬܳܐ ܘܡܶܛܽܠ ܫܓܺܝܫܽܘܬܳܐ܆ ܝܰܡܳܐ ܩܳܪܶܐ ܠܶܗ ܦܶܠܶܬ̣ܳܢܳܐܺܝܬ ܒܰܙܢܳܐ ܡܶܕܶܡ. ܘܡܰܥܶܠ ܠܶܗ ܓܰܠܝܳܐܺܝܬ ܕܡܰܘܕܶܐ ܕܗܳܕܶܐ ܬܶܕܡܽܘܪܬܳܐ܆ ܠܳܐ ܐܺܝܬܶܝܗ̇ ܕܚܰܝܠܳܐ ܕܺܝܠܶܗ܆ ܐܶܠܳܐ ܕܚܰܝܠܳܐ ܗܰܘ ܕܰܐ‌ܠܳܗܳܐ. ܡܳܢܳܐ ܓܶܝܪ ܐܳܡܰܪ. ܚܰܝܠܳܐ ܓܶܝܪ ܕܝܰܡܳܐ ܐܶܡܰܪ܆ ܠܳܐ ܚܶܒܠܶܬ̣ ܘܳܐܦܠܳܐ ܝܶܠܕܶܬ. ܘܳܐܦܠܳܐ ܪܰܒܺܝܬ̣ ܥܠܰܝ̈ܡܶܐ܆ ܐܳܦܠܳܐ ܪܰܡܪܡܶܬ̣ ܒܬܽܘ̈ܠܳܬܳܐ^[15]. ܡܳܕܶܝܢ ܠܺܝ ܠܳܐ ܢܶܬܚܫܶܒ ܗܰܘ ܡܳܐ ܕܠܳܐ ܐܺܝܬܰܘܗ̱ܝ ܕܺܝܠܝ. ܐܶܠܳܐ ܠܚܰܝܠܳܐ ܕܰܡܫܺܝܚܳܐ.

ܕܗܳܢܳܐ ܚܰܝܠܳܐ ܐܺܝܬܶܝܗ̇ ܗ̱ܘܳܬ܆ ܐܳܦ ܐܳܬ̣ܳܐ ܗܳܝ ܕܢܶܩܦܰܬ ܗ̱ܘܳܬ ܠܣܳܗ̈ܕܳܬܳܐ. ܟܰܕ ܓܶܝܪ ܩܰܕܣ̈ܶܐ ܗܳܢܽܘܢ ܕܡܶܢ ܢܚܳܫܳܐ ܗܰܘ ܐܶܬܬܰܩܰܢܘ ܗ̱ܘܰܘ܆ ܗܰܘ ܕܟܰܕ ܠܗܰܕܳܡܰܝܗܶܝܢ ܕܰܒܬܽܘ̈ܠܳܬܳܐ ܗܳܠܶܝܢ ܦܰܫܰܪ܆ ܐܶܫܬܰܘܬܰܦ ܒܛܰܝܒܽܘܬܳܐ ܘܰܒܡܰܥܒܕܳܢܽܘܬܳܐ ܡܶܕܶܡ܆ ܘܗ̱ܝ ܒܐܠܐܢܐ ܠܰܢܝܳܚܳܐ ܘܰܠܒܽܘܣܳܡܳܐ ܐܶܬܛܰܝܒܰܬ܆ ܟܽܠ ܕܥܳܐܶܠ ܗ̱ܘܳܐ ܠܓܰܘ܆ ܛܳܥܶܐ ܗ̱ܘܳܐ ܗܽܘ ܠܶܗ ܕܣܳܚܶܐ ܗܳܠܶܝܢ ܐ̱ܚܪ̈ܳܝܬܳܐ ܘܰܕܥܽܘܦܝܳܐ. ܢܳܦܶܠ ܗ̱ܘܳܐ ܓܶܝܪ ܕܠܳܐ ܥܶܠܬܳܐ ܗܽܘ ܡܶܢ ܢܰܦܫܶܗ ܡܺܝܬܳܐ. ܘܟܰܕ ܥܰܠ ܬܶܕܡܽܘܪܬܳܐ ܐܰܩܺܝܡ ܗܰܘܢܶܗ ܗܽܘ ܡܰܠܟܳܐ܆ ܦܳܩܶܕ ܗ̱ܘܳܐ ܕܰܐ̱ܚܪ̈ܳܢܶܐ ܡܰܢ ܩܰܕܣ̈ܶܐ ܢܰܗܦܟܽܘܢ ܢܬܰܩܢܽܘܢ ܚܠܳܦ ܗܳܢܽܘܢ. ܗܳܠܶܝܢ ܕܶܝܢ ܡܫܰܢ̈ܩܳܢܶܐ ܕܰܒܬܽܘ̈ܠܳܬܳܐ܆ ܗܳܢܽܘܢ ܕܡܰܘܬܳܐ ܡܰܠܽܘܢ ܐܰܘ ܡܰܝ̈ܳܐ ܫܰܚܺܝ̈ܢܶܐ ܠܗܳܢܽܘܢ ܕܣܳܚܶܝܢ ܡܛܰܪܛܥܺܝܢ ܗ̱ܘܰܘ܆ ܠܐܰܕܪܺܝܢܰܛܳܐ ܕܺܝܠܗܶܝܢ ܕܰܥܠܰܝܡ̈ܳܬܳܐ ܢܶܗܦܟܽܘܢ ܢܶܬܢܰܣܟܽܘܢ. ܪܳܚܡܳܐ ܓܶܝܪ ܗܺܝ ܛܳܥܝܽܘܬܳܐ܆ ܕܳܐܦ ܡܶܢ ܒܳܬܰܪ ܡܶܫܬܰܘܕܥܳܢܽܘܬܳܐ ܕܰܫܪܳܪܳܐ܆ ܡܶܢܗܽܘܢ ܕܫܽܘܘ̈ܕܳܥܶܐ ܒܰܝ̈ܬܳܝܶܐ ܕܺܝܠܶܗ ܬܝܰܩܪܺܝܘܗ̱ܝ ܠܶܗ ܠܰܫܪܳܪܳܐ. ܠܗܳܢܶܝܢ ܓܶܝܪ ܕܰܡܙܰܡܪ̈ܳܢ ܗ̱ܘܰܝ̈ ܒܟܽܠܙܒܰܢ܆ ܦܬܰܟܪ̈ܶܐ ܕܥܰܡ̱ܡ̈ܶܐ ܥܒܳܕ ܐܺܝ̈ܕܰܝܳܐ ܕܰܒܢܰܝ̈ܢܳܫܳܐ܆ ܕܕܳܡܶܝܢ ܠܗܽܘܢ ܢܶܗܘܽܘܢ ܗܳܢܽܘܢ ܕܥܳܒܕܺܝܢ ܠܗܽܘܢ܆ ܘܟܽܠܗܽܘܢ ܗܳܢܽܘܢ ܕܰܬܟܺܝܠܺܝܢ ܥܠܰܝܗܽܘܢ^[16]܆ ܕܒܰܥ̈ܒܳܕܶܐ ܥܒܺܝ̈ܕܰܝ ܒܺܐܝ̈ܕܰܝܳܐ ܡܢܺܝܚ ܗ̱ܘܳܐ ܠܗܶܝܢ ܡܰܣܒܰܪ ܗ̱ܘܳܐ.

ܕܕܰܐܝܟ ܗܳܢܳܐ ܡܶܕܶܡ ܥܒܰܕܘ ܒܰܙܒܰܢ܆ ܐܳܦ ܥܰܠ ܦܠܶܫ̈ܬܳܝܶܐ ܐܶܫܬܰܥܺܝ ܟܬܳܒܳܐ ܐܰ‌ܠܳܗܳܝܳܐ. ܟܰܕ ܓܶܝܪ ܢܣܰܒܘ ܡܶܢ ܙܳܟܽܘܬܳܐ ܕܰܩܪܳܒܳܐ ܠܩܺܐܒܽܘܬܳܐ ܗܳܝ ܕܰܐ‌ܠܳܗܳܐ ܘܰܐܘܒܠܽܘܗ̇ ܐܰܟܙܢܳܐ ܕܰܠܫܶܒܝܳܐ܆ ܘܰܐܚܺܝܕܺܝܢ ܗ̱ܘܰܘ ܠܳܗ̇ ܠܘܳܬܗܽܘܢ ܕܠܳܐ ܩܶܢܛܳܐ܆ ܒܫܽܘܚ̈ܢܶܐ ܒܠܰܥܘ ܒܡܰܘܬܒܰܝ̈ܗܽܘܢ܆ ܘܣܽܘܓܳܐܐ ܕܥܽܘܩܰܒܪ̈ܶܐ ܡܓܰܕܝܳܐ ܗ̱ܘܳܬ ܐܰܪܥܗܽܘܢ ܒܰܕܡܽܘܬ ܫܽܘܫ̈ܡܳܢܶܐ. ܘܟܰܕ ܐܶܫܟܚܽܘܗ̇ ܠܥܶܠܬܳܐ ܕܰܡܣܳܡ ܒܪܺܝܫܳܐ܆ ܚܫܰܠܘ ܕܽܘܡ̈ܝܶܐ ܕܺܝܠܳܗ̇ ܕܰܡܚܽܘܬܳܐ܆ ܘܫܰܕܰܪܘ ܥܰܡ ܩܺܐܒܽܘܬܳܐ ܠܰܐܠܳܗܳܐ ܕܺܐܝܣܪܳܐܶܝܠ. ܐܳܡܰܪ ܓܶܝܪ ܗܳܟܰܢܳܐ ܟܬܳܒܳܐ ܗܰܘ ܟܳܗܢܳܝܳܐ܆ ܘܣܳܡܘ ܠܩܺܐܒܽܘܬܳܐ ܕܰܐ‌ܠܳܗܳܐ ܥܰܠ ܥܳܓܰܠܬܳܐ܆ ܘܰܠܥܽܘܩܰܒܪ̈ܶܐ ܗܳܠܶܝܢ ܕܕܰܗܒܳܐ^[17]܆ ܘܰܠܡܰܘܬܒ̈ܶܐ ܗܳܠܶܝܢ ܕܕܰܗܒܳܐ܆ ܣܳܡܘ ܡܶܢ ܤܶܛܪܳܗ̇.

ܡܳܢܳܐ ܗܳܟܺܝܠ ܚܢܰܢ܆ ܗܳܢܽܘܢ ܡܗܰܝܡ̈ܢܶܐ܆ ܘܰܕܒܰܒ̈ܢܰܝܳܐ ܕܰܐ‌ܠܳܗܳܐ ܡܛܰܟܣܺܝܢܰܢ܆ ܘܰܕܢܺܐܪܰܬ ܡܰܠܟܽܘܬܳܐ ܕܰܫܡܰܝܳܐ ܡܣܰܟܶܝܢ ܚ̱ܢܰܢ. ܒܰܦ̈ܠܰܫܬܳܝܶܐ ܠܳܐ ܢܕܡܐ܆ ܘܰܠܘܳܬ ܦܳܬܽܘܪܳܐ ܟܳܗܢܳܝܳܐ ܘܰܡܝܰܩܪܳܐ ܢܚܽܘܪ܆ ܘܰܠܗܰܘ ܡܶܕܶܡ ܕܚܰܣܺܝܪ ܠܣܺܐܡܳܐ ܢ݀ܰܥܶܠ܆ ܘܗܳܟܰܢܳܐ ܟܰܕ ܗܳܝ ܕܰܒܨܺܝܪܳܐ ܢܶܗܘܶܐ ܐܺܝܬ ܠܰܢ܆ ܘܟܽܠܶܗ ܗܳܢܳܐ ܟܡܳܐ ܕܺܐܝܬ ܒܰܡܨܰܥܬܳܐ ܕܕܰܗܒܳܐ ܘܰܕܣܺܐܡܳܐ܆ ܐܶܠܳܐ ܬܺܐܡܰܪ܆ ܕܰܦܠܰܫ̈ܬܳܝܶܐ. ܟܰܕ ܨܰܥܰܪܘ ܠܩܺܐܒܽܘܬܳܐ ܕܰܐ‌ܠܳܗܳܐ܆ ܘܰܒܠܰܥܘ ܥܰܠ ‌ܐܰܦܰܝ̈ ܗܳܠܶܝܢ ܕܰܐܥܘܶܠܘ܆ ܝܰܗܒܘ ܦܽܘܪܩܳܢܳܐ ܕܰܡܚܽܘܬܳܐ. ܐܰܢ̱ܬ ܕܶܝܢ ܠܰܘ ܕܝܰܬܺܝܪ ܩܰܫ̈ܝܳܢ ܡܰܥܘܶܠ ‌ܐܰܢ̱ܬ܆ ܠܰܘ ܩܺܒܽܘܬܳܐ ܡܠܺܝܠܬܳܐ ܐܺܝܬܰܝܟ ܕܰܐ‌ܠܳܗܳܐ܆ ܐܰܘ ܠܳܐ ܫܳܡܰܥ ܐܰܢ̱ܬ ܠܶܗ ܠܦܰܘܠܽܘܤ ܕܳܐܡܰܪ܆ ܠܳܐ ܝܳܕܥܺܝܢ ܐܢ̱ܬܽܘܢ ܕܗܰܝܟ̈ܠܶܐ ܐܢ̱ܬܽܘܢ ܕܰܐ‌ܠܳܗܳܐ܆ ܘܪܽܘܚܳܐ ܕܰܐ‌ܠܳܗܳܐ ܥܳܡܰܪ ܒܟܽܘܢ^[18]. ܐܰܪܰܐ ܬܟܺܝܠ ‌ܐܰܢ̱ܬ ܠܡܺܐܡܰܪ ܕܩܺܒܽܘܬܳܐ ܕܺܝܠܳܟ ܒܰܪ̱ܬ ܚܺܐܪ̈ܶܐ ܐܺܝܬܶܝܗ̇ ܡܶܢ ܚܰܫ̈ܶܐ ܦܠܶܫ̈ܬܳܝܶܐ܆ ܘܡܶܢ ܫ̈ܺܐܕܶܐ ܗܳܢܽܘܢ ܕܰܠܗܳܠܶܝܢ ܡܰܪܺܝܪܳܐܺܝܬ ܪܳܗܶܝܢ ܘܢܳܛܪܺܝܢ ܘܰܡܙܺܝܥܺܝܢ܆ ܐܺܝܬ ܒܰܢ ܐ̱ܢܳܫ ܕܠܳܐ ܐܺܝܬܰܘܗ̱ܝ ܫܶܒܝܳܐ܆ ܡܰܢܽܘ ܓܶܝܪ ܢܶܫܬܰܒܗܰܪ ܕܺܐܝܬ ܠܶܗ ܠܶܒܳܐ ܕܰܟܝܳܐ܆ ܐܰܘ ܠܡܰܢܽܘ ܬܶܗܘܶܐ ܦܰܪܶܗ̱ܣܺܝܰܐ ܕܕܰܟܝܳܐ ܐܺܝܬܰܘܗ̱ܝ ܡܶܢ ܚ̈ܛܳܗܶܐ^[19]܆ ܐܰܝܟܰܢܳܐ ܕܳܐܡܪܳܐ ܒܰܪ̱ܬ ܩܳܠܳܐ ܢܦܺܝܚܰܬ̣ ܡܶܢ ܐܰ‌ܠܳܗܳܐ. ܐܰܘ ܡܶܛܠ ܕܠܳܐ ܒܰܠܺܝܥܺܝܢ ܚ̱ܢܰܢ ܡܶܛܽܠ ܪ̈ܰܚܡܶܐ ܣܰܓܺܝ̈ܶܐܐ ܕܰܐ‌ܠܳܗܳܐ܆ ܡܶܛܽܠ ܗܳܕܶܐ ܠܳܐ ܢܶܚܫܽܘܒ ܕܰܚܛܶܐ ܠܰܢ. ܢܶ݀ܬܒܰܝܰܢ ܕܰܟܡܳܐ ܐܰ‌ܠ̈ܦܰܝܳܐ ܕܦܳܪ̈ܣܳܝܶܐ܆ ܒܨܺܝܪ ܩܰܠܺܝܠ ‌ܐܳܦ ܩܳܝܡܺܝܢ ܗ̱ܘܰܘ ܒܰܬܚܽܘ̈ܡܶܐ ܗܳܠܶܝܢ ܕܺܝܠܰܢ. ܡܰܢܽܘ ܗܳܟܺܝܠ ܗܰܘ ܕܰܠܗܳܠܶܝܢ ܬܡܺܝܗܳܐܺܝܬ ܠܒܶܣܬܰܪܗܽܘܢ ܥܒܰܕ ܕܰܢܫܰܢܽܘܢ܆ ܘܡܶܢ ܚܺܐܦܳܐ ܕܰܥܠܰܝܢ ܬܟܰܤ. ܠܳܐ ܗ̱ܘܳܐ ܐܺܝܕܶܗ ܗܳܝ ܠܳܐ ܡܶܬܬܰܩܪܒܳܢܺܝܬܳܐ ܕܰܐ‌ܠܳܗܳܐ܆ ܡܳܢܳܐ ܗܳܟܺܝܠ. ܠܳܐ ܝܳܗܶܒ ܗ̱ܘܳܐ ܟܽܠ ܚܰܕ ܟܽܠ ܡܳܐ ܕܰܩܢܶܐ ܗ̱ܘܳܐ ܟܰܕ ܬܺܐܬܶܐ ܗ̱ܘܳܬ ܐܰܢܰܢܩܺܐ܆ ܐܰܝܟܰܢܳܐ ܕܗܳܠܶܝܢ ܕܰܐܢܰܢܩܺܐ ܠܳܐ ܢܶܣܒܽܘܠ ܗ̱ܘܳܐ܆ ܠܽܐܘܠܨܳܢܳܐ ܗܰܘ ܢܶܪܫܽܘܡ ܠܰܢ ܩܕܳܡ ܥܰܝ̈ܢܰܝܢ܆ ܘܢܶ݀ܗܘܶܐ ܝܳܗܽܘ̈ܒܶܐ ܫܦܺܝ̈ܥܶܐ ܠܘܳܬ ܡܰܘܗ̈ܒܳܬܳܐ ܡܰܘܬܪ̈ܳܬ ܢܰܦܫܳܐ. ܠܳܐ ܐܰܝܟ ܗܰܘ ܕܰܐܚܺܝܕܺܝܢ ܚ̱ܢܰܢ ܗܳܠܶܝܢ ܕܰܐܚܺܝܕܺܝܢ ܚ̱ܢܰܢ ܢܶܬܬܣܺܝܡ ܒܬܰܪܥܺܝܬܰܢ܆ ܘܗܳܟܰܢܳܐ ܠܚܰܫܳܐ ܗܰܘ ܕܚܰܣܽܘܟܬܳܢܽܘܬܳܐ ܢܶܫܕܶܐ ܡܶܢܰܢ܆ ܕܩܰܫܝܳܐܺܝܬ ܡܰܚܫܶܟ ܠܳܗ̇ ܠܢܰܦܫܳܐ܆ ܘܰܡܣܰܡܶܐ ܠܥܰܝ̈ܢܶܐ ܕܚܰܟܺܝ̈ܡܶܐ^[20]܆ ܐܰܝܟܰܢܳܐ ܕܳܐܡܰܪ ܟܬܳܒܳܐ ܐܰ‌ܠܳܗܳܝܳܐ.

ܕܰܚܺܝܠ ‌ܐ̱ܢܐ ܕܶܝܢ܆ ܕܕܰܠܡܳܐ ܟܰܕ ܗܳܠܶܝܢ ܐܳܡܰܪ ܐ̱ܢܳܐ܆ ܐ̱ܢܳܫ ܡܶܢ ܗܳܢܽܘܢ ܙܥܽܘܪ̈ܝ̣ܰܝ̣ ܡܶܠܬܳܐ ܘܪ̈ܳܚܡܰܝ ܥܽܘܬܪܳܐ ܢܺܐܡܰܪ ܒܬܰܪܥܺܝܬܶܗ܆ ܐܰܘ ܟܰܕ ܫܰܠܝܳܐܺܝܬ ܬܚܶܝܬ ܣܶܦ̈ܘܳܬܶܗ ܡܰܠܚܶܫ܆ ܐܳܘ ܐܰܝܟܰܢܳܐ ܠܳܐ ܡܶܬܟܰܚܕܳܢܳܐܺܝܬ ܬܳܒܰܥ ܐܰܢ̱ܬ ܠܰܢ. ܡܶܛܽܠ ܗܳܕܶܐ ܗܳܟܺܝܠ ܒܟܽܠ ܚܕܳܐ ܫܰܢ̱ܬܳܐ ܥܰܠ ܒܺܐܡܰܐ ܟܳܗܢܳܝܬܳܐ ܣܳܠܶܩ ܐܰܢ̱ܬ܆ ܘܥܳܒܶܕ ܐܰܢ̱ܬ ܥܶܠܬܳܐ ܩܽܘ̈ܠܳܣܰܝܗܽܘܢ ܕܣܳܗ̈ܕܶܐ܆ ܘܰܥܠܰܝܢ ܡܰܗܦܶܟ ܐܰܢ̱ܬ ܡܰܥܒܰܪ ܐܰܢ̱ܬ ܠܳܗ̇ ܠܡܶܠܬܳܐ܆ ܐܰܝܟܰܢܳܐ ܕܬܶܬܒܰܥ ܠܰܢ ܐܳܦ ܟܰܕ ܠܳܐ ܨܳܒܶܝܢ ܚ̱ܢܰܢ.

ܐܶܠܳܐ ܐܳܡܰܪ ܐ̱ܢܳܐ ܐܳܘ ܡܝܰܬܪܳܐ܆ ܕܠܰܘ ܐܶܢܳܐ ܚܰܕܬܳܐܺܝܬ ܠܠܳܐ ܡܶܬܟܰܚܕܳܢܽܘܬܳܐ ܗܳܕܶܐ ܐܶܫܟܚܶܬ ܐܰܘ ܦܰܣܩܶܬ. ܐܶ‌ܠܽܘ ܓܶܝܪ ܗܳܕܶܐ ܐܺܝܬܶܝܗ̇ ܗ̱ܘܳܬ܆ ܡܶܬܚܰܡܰܨ ܗ̱ܘܺܝܬ̣ ܫܰܦܺܝܪ ܕܰܥ܆ ܘܡܶܬܚܰܦܶܐ ܗ̱ܘܺܝܬ̣. ܘܟܰܕ ܠܰܐ̱ܚܪܺܢܳܐ ܫܳܡܰܥ ܗ̱ܘܺܝܬ ܕܳܐܡܰܪ܆ ܫܒܽܘܩ ܕܟܰܕ ܐܶܢܳܐ ܠܡܶܠܬܳܐ ܕܰܐܝܟ ܗܳܕܶܐ ܡܫܰܡܶܫ ܗ̱ܘܺܝܬ̣. ܐܶܠܳܐ ܕܡܶܢ ܒܶܝܬ ܩܽܘ̈ܕܫܶܐ ܟܳܗ̈ܢܳܝܶܐ ܢܳܚܬܳܐ ܒܝܽܘܒܳܠܳܐ ܩܰܒܶܠܬܳܗ̇. ܫܡܰܥ ܓܶܝܪ ܟܰܕ ܡܶܢ ܡܶܨܥܰܬ̣ ܥܢܳܢܳܐ ܥܰܠ ܪܺܝܫ ܩܰܪܩܰܦܬܳܐ ܕܛܽܘܪܳܐ ܕܣܺܝܢܰܝ܆ ܐܰܪܒܥܺܝܢ ܐܺܝܡܳܡ̈ܺܝܢ ܘܰܐܪܒܥܺܝܢ ܠܰܝ̈ܠܰܘܳܢ ܕܠܳܐ ܡܶܐܟܽܘܠܬܳܐ ܡܶܬܶܐܪܰܙ ܗ̱ܘܳܐ ܡܽܘܫܶܐ܆ ܡܳܢܳܐ ܐܶܡܰܪ ܠܶܗ ܐܰ‌ܠܳܗܳܐ ܕܟܽܠ. ܐܶܡܰܪ ܠܰܒ̈ܢܰܝܳܐ ܕܺܐܝܣܪܳܐܶܝܠ܆ ܘܣܰܒܘ ܠܺܝ ܪ̈ܺܝܫܝܳܬܳܐ. ܡܶܢ ܟܽܠܗܽܘܢ ܗܳܢܽܘܢ ܕܬܶܣܬܒܰܪ ܠܗܽܘܢ ܒܠܶܒܗܽܘܢ܆ ܬܶܣܒܽܘܢ ܪ̈ܺܝܫܝܳܬܳܐ ܕܺܝܠܝ. ܘܗܳܕܐ ܗܝ ܪܺܝܫܺܝܬܳܐ ܗܳܝ ܕܬܶܣܒܽܘܢ ܡܶܢܗܽܘܢ. ܕܰܗܒܳܐ. ܣܺܐܡܳܐ. ܢܚܳܫܳܐ. ܬܶܟ̣ܠܬܳܐ. ܐܰܪܓܘܳܢܳܐ. ܙܚܽܘܪܺܝܬܳܐ ܥܦܺܝܦܬܳܐ܆ ܘܒܽܘܨܳܐ ܥܙܺܝܠܳܐ܆ ܘܣܰܥܪܳܐ ܕܥܷ̈ܙܶܐ^[21]. ܘܗܳܠܶܝܢ ܕܫܰܪܟܳܐ. ܐܶܢ ܗܳܟܺܝܠ ܗܰܘ ܕܰܒܪܰܘܡܳܐ ܕܕܰܐܝܟ ܗܳܢܳܐ ܣܳܐܶܡ ܗ̱ܘܳܐ ܢܳܡܽܘܣܳܐ܆ ܐܳܦ ܥܕܰܡܳܐ ܠܣܰܥܪܳܐ ܕܥܷ̈ܙܶܐ ܢܚܶܬ܆ ܐܰܝܟܰܢܳܐ ܠܺܝ ܒܡܰܪܫܽܘܬܳܐ ܕܠܳܐ ܡܶܬܟܰܚܕܳܢܽܘܬܳܐ ܡܩܰܛܪܶܓ ܐܰܢ̱ܬ܆ ܗܰܘ ܕܥܰܠ ‌ܐܰܪܥܳܐ ܡܶܬܓܰܪܓܰܪ ܐ̱ܢܳܐ܆ ܘܗܽܘ ܟܰܕ ܗܽܘ ܐܳܐܰܪ ܐܰܟܘܳܬܳܟ ܣܳܐܶܩ ܐ̱ܢܳܐ܆ ܘܢܳܩܶܦ ܐ̱ܢܳܐ ܠܝܽܘܩܢܳܐ ܘܰܠܛܽܘܦܣܳܐ ܕܰܐ‌ܠܳܗܳܐ. ܐܶܠܳܐ ܐܰܪܰܐ ܕܰܠܡܳܐ ܕܛܳܪܶܐ ܐ̱ܢܳܐ ܠܶܗ ܠܝܽܘܩܢܳܐ ܡܶܣ̣ܬܒܰܪ ܐ̱ܢܳܐ ܠܳܟ܆ ܟܰܕ ܡܶܛܽܠ ܣܺܐܡܳܐ ܒܰܠܚܽܘܕ ܡܰܠܠܶܬ̣܆ ܐܶܠܐ. ܐܳܦ ܫܳܡܽܘ̈ܢܶܐ^[22] ܕܰܢܚܳܫܳܐ ܕܰܒܚܰܕ ܚܰܕ ܐܰܘ ܬܪܶܝܢ ܡܶܬܟܰܢܫܺܝܢ ܡܶܢ ܗܳܢܽܘܢ ܕܣܰܓܺܝ ܝܰܬܺܝܪ ܡܶܢ ܟܽܠ ܡܶܣܟܺܢܺܝܢ ܡܩܰܒܠ ܗ̱ܘܺܝܬ̣܆ ܡܶܛܽܠ ܕܡܶܢ ܬܰܪܥܺܝܬܳܐ ܥܰܬܺܝܪܬܳܐ ܡܶܢ ܗܳܠܶܝܢ ܕܺܐܝܬ ܗ̱ܘܳܐ ܠܗܽܘܢ ܥܳܒܕܺܝܢ ܗ̱ܘܰܘ.

ܨܳܒܶܐ ܐܰܢ̱ܬ ܕܳܐܦ ܠܕܰܘܺܝܕ ܐܶ݀ܚܰܘܶܐ ܠܳܟ܆ ܕܒܳܗ̇ ܟܰܕ ܒܳܗ̇ ܒܠܳܐ ܡܶܬܟܰܚܕܳܢܽܘܬܳܐ ܐܶܬܳܐ܆ ܘܡܶܢ ܒܳܬܰܪ ܡܰܘܗܰܒܬܳܐ ܒܰܝܬܳܝܬܳܐ ܕܺܝܠܶܗ ܗܳܝ ܡܰܠܟܳܝܬܳܐ ܘܪܳܚܡܰܬ̣ ܐܰ‌ܠܳܗܳܐ܆ ܗܳܝ ܕܰܡܟܰܢܫܳܐ ܗ̱ܘܳܬ ܡܶܢ ܒ̈ܶܙܬܶܐ ܡܫܰܚ̈ܠܦܳܬܳܐ ܗܳܠܶܝܢ ܕܰܩܢܶܐ ܗ̱ܘܳܐ܆ ܟܰܕ ܠܰܒܥܶܠ̈ܕܒܳܒܶܐ ܡܰܩܪ̈ܒܳܢܶܐ ܚܣܰܢ ܗ̱ܘܳܐ ܘܰܙܟܳܐ܆ ܐܶܡܰܪ ܠܘܳܬ ܡܶܫܬܰܡ̈ܥܳܢܰܘܗܝ܆ ܐܶܡܰܬܝ ܕܡܶܬܚܰܫܰܒ ܗ̱ܘܳܐ ܕܢܶܒܢܶܐ ܗܰܝܟܠܳܐ ܠܰܐܠܳܗܳܐ܆ ܘܠܰܒܪܶܗ ܡܛܰܝܶܒ ܗ̱ܘܳܐ ܘܢܳܛܰܪ ܗ̱ܘܳܐ ܠܶܗ ܠܰܥܒܳܕܳܐ. ܡܰܢܽܘ ܢܶܨܛܒܶܐ ܠܡܶܡܠܳܐ ܐܝܕܰܘ̈ܗ̱ܝ ܝܰܘܡܳܢܳܐ ܠܡܳܪܝܳܐ. ܘܝܰܗܒܘ ܐܳܡܰܪ ܠܥܰܒ̈ܕܶܐ ܕܒܰܝܬܶܗ ܕܡܳܪܝܳܐ܆ ܟܰܟܪ̈ܶܐ ܕܕܰܗܒܳܐ ܚܰܡܫܳܐ ܐܰ‌ܠ̈ܦܺܝܢ. ܘܡ̈ܰܬܩܳܠܶܐ ܗܳܠܶܝܢ ܕܡܶܬܩܪܶܝܢ ܕܪ̈ܐܟܡܐܣ^[23] ܥܶܣܪܳܐ ܐܰ‌ܠ̈ܦܺܝܢ. ܟܰܟܪ̈ܶܐ ܕܣܺܐܡܳܐ ܥܰܣܪܳܐ ܐܰ‌ܠ̈ܦܺܝܢ. ܘܟܰܟܪ̈ܶܐ ܕܰܢܚܳܫܳܐ ܏ܝܚ ܬܡܳܢܰܥܣܰܪ ܐܰ‌ܠ̈ܦܺܝܢ. ܘܰܕܦܰܪܙܠܳܐ ܡܳܐܐ ܐܰ‌ܠ̈ܦܺܝܢ ܟܰܟܪ̈ܺܝܢ. ܘܗܳܢܽܘܢ ܕܶܐܫܬܟܰܚܘ ܠܗܽܘܢ ܟܺܐܦ̈ܶܐ܆ ܝܰܗܒܘ ܒܒܶܝܬ ܓܰܙܳܐ ܕܒܰܝܬܶܗ ܕܡܳܪܝܳܐ. ܘܰܚܕܺܝ ܥܰܡܳܐ ܥܰܠ ܡܶܨܛܰܒܝܳܢܽܘܬܳܐ܆ ܡܶܛܽܠ ܕܰܒܠܶܒܳܐ ܡܰܠܝܳܐ ܐܶܨܛܒܺܝܘ ܘܩܰܪܶܒܘ ܠܡܳܪܝܳܐ.

ܡܶܬܒܰܝܰܢ ܐܰܢ̱ܬ ܐܳܘ ܐܰܢ̱ܬ ܡܚܰܣܟܳܢܳܐ ܘܪܳܚܶܡ ܟܶܣܦܳܐ܆ ܕܰܐܝܟܰܢܳܐ ܐܶܡܰܪ ܠܡܶܡܠܳܐ ܐܺܝ̈ܕܰܝܳܐ܆ ܘܟܰܕ ܛܳܒ ܠܡܶܬܰܠ ܥܬܺܝܕܺܝܢ ܗ̱ܘܰܘ܆ ܐܶܠܳܐ ܒܝܰܕ ܗܳܕܶܐ ܡܚܰܘܶܐ܆ ܕܗܳܝ ܕܰܢܣܰܦܶܩ ܐ̱ܢܳܫ ܐܺܝܕܶܗ ܠܰܐܠܳܗܳܐ܆ ܕܢܶܡܠܶܝܗ̇ ܐܺܝܬܶܝܗ̇ ܡܳܪܳܢܳܐܺܝܬ. ܒܳܬܰܪܟܶܢ ܕܶܝܢ܆ ܨܶܒܝܳܢܳܝܽܘܬܳܐ ܩܳܪܶܐ ܠܳܗ̇ ܠܡܰܘܗܰܒܬܳܐ ܗܳܝ ܕܗܳܢܽܘܢ ܡܶܫܬܰܡ̈ܥܳܢܶܐ ܘܕܰܬܚܶܝܬ ܐܺܝܕܳܐ܆ ܕܡܶܢ ܒܳܬܰܪ ܡܶܠܬܶܗ ܘܰܡܚܰܦܛܳܢܽܘܬܶܗ ܕܡܰܠܟܳܐ. ܘܠܰܘ ܨܶܒܝܳܢܳܝܽܘܬܳܐ ܒܰܠܚܽܘܕ܆ ܐܶܠܳܐ ܐܳܦ ܚܰܕܽܘܬܳܐ ܘܳܐܦ ܠܶܒܳܐ ܡܰܠ̣ܝܳܐ.

ܐܰܝܟܰܢܳܐ ܗܳܟܺܝܠ ܠܡܶܠܬܳܐ ܕܺܝܠܝ ܐܰܢܰܢܩܺܐ ܩܳܪܶܐ ܐܰܢ̱ܬ܆ ܕܰܠܨܶܒܝܳܢܳܝܽܘܬܳܐ ܠܳܐ ܡܪܺܝܡܳܐ ܡܶܢܳܟ. ܗܰܘ ܓܶܝܪ ܕܺܐܝܬ ܠܶܗ ܐܶܕܢ̈ܶܐ ܕܢܶܫܡܰܥ ܢܶܫܡܰܥ^[24]܆ ܡܰܙܥܶܩ ܐܳܦ ܗܳܫܳܐ ܦܳܪܽܘܩܰܢ. ܐܶܠܳܐ ܝܺܕܺܝܥܳܐ ܐܺܝܬܰܝܟ ܕܳܐܦ ܒܳܗ̇ ܒܡܰܥܗܕܳܢܽܘܬܳܐ ܡܶܬܥܰܣܰܩ ܐܰܢ̱ܬ ܘܕܳܚܶܠ ‌ܐܰܢ̱ܬ܆ ܕܕܰܠܡܳܐ ܠܺܐܝܕܳܟ ܗܳܝ ܕܡܶܢ ܡܚܰܣܟܽܘܬܳܐ ܥܒܺܝܕܳܐ ܡܫܰܪܰܝܬܳܐ܆ ܬܶܥܒܕܳܟ ܡܶܠܬܳܐ ܕܬܶܦܫܛܺܝܗ̇. ܐܶܠܳܐ ܗܳܕܶܐ ܠܰܘ ܕܰܡܚܺܝܠܽܘܬܳܐ ܕܡ̈ܶܠܶܐ ܕܺܝܠܝ ܐܺܝܬܶܝܗ̇ ܥܒܳܕܳܐ܆ ܐܶܠܳܐ ܕܚܰܝܠܶܗ ܕܝܶܫܽܘܥ܆ ܗܰܘ ܕܰܠܕܕܰܐܝܟ ܗܳܠܶܝܢ ܐܰܣܺܝ^[25].

ܘܕܰܘܺܝܕ ܡܰܢ ܘܡܽܘܫܶܐ܆ ܡܰܠܽܘܢ ܕܶܝܢ ܗܰܘ ܕܰܒܗܽܘܢ ܡܡܰܠܶܠ ܗ̱ܘܳܐ܆ ܡܶܛܽܠ ܬܽܘܩܳܢܳܐ ܕܗܰܝܟܠܳܐ ܘܰܕܡܰܫܟܢܳܐ܆ ܗܳܠܶܝܢ ܡܰܠܶܠ. ܦܰܘܠܽܘܤ ܕܶܝܢ ܐܳܦ ܡܶܛܽܠ ܣܽܘܢܩܳܢܳܐ ܕܺܝܠܳܢܳܝܳܐ ܕܺܝܠܶܗ ܡܡܰܠܶܠ ܥܰܡ ܦܰܪܶܗ̱ܣܺܝܰܐ܆ ܟܰܕ ܠܦܺܝ̈ܠܝܦܣܝܐ ܐܰܝܟ ܕܠܰܡܫܰܡ̈ܠܰܝܳܐ ܟܳܬܶܒ ܗ̱ܘܳܐ܆ ܕܳܐܦ ܚܕܳܐ ܙܒܰܢ ܘܬܰܪܬܶܝܢ ܠܣܽܘܢܩܳܢܳܐ ܕܺܝܠܝ ܫܰܕܰܪܬܽܘܢ ܠܺܝ܆ ܠܰܘ ܕܒܳܥܶܐ ܐ̱ܢܳܐ ܡܰܘܗܰܒܬܳܐ܆ ܐܶܠܳܐ ܕܒܳܥܶܐ ܐ̱ܢܳܐ ܕܦܺܐܪ̈ܶܐ ܢܶܣܓܽܘܢ ܠܟܽܘܢ^[26]. ܠܩܽܘܪ̈ܝܢܬܳܝܶܐ ܕܶܝܢ ܕܠܳܐ ܡܫܰܡܠܝܳܐܺܝܬ ܐܺܝܬ ܗ̱ܘܳܐ ܠܗܽܘܢ ܘܰܕܢܶܬܠܽܘܢ ܨܳܒܶܝܢ ܗ̱ܘܰܘ܆ ܟܳܠܶܐ ܗ̱ܘܳܐ ܟܰܕ ܐܳܡܰܪ܆ ܒܟܽܠ ܡܶܕܶܡ ܕܠܳܐ ܝܽܘܩܪܳܐ ܐܶܢܳܐ ܠܺܝ ܢܶܛܪܶܬ ܠܟܽܘܢ. ܐܶܠܳܐ ܐܳܦ ܐܶ݀ܛܰܪ. ܐܺܝܬܰܘܗ̱ܝ ܒܺܝ ܫܪܳܪܶܗ ܕܰܡܫܺܝܚܳܐ. ܕܫܽܘܒܗܳܪܳܐ ܗܳܢܳܐ ܠܳܐ ܢܶܣܬܟܰܪ ܐܰܘܟܺܝܬ ܢܶܬܒܰܛܰܠ ܒܺܝ ܒܰܐܬܪ̈ܰܘܳܬܳܐ ܕܰܐܟܰܐܝܰܐ^[27].

ܚܳܙܶܝܢ ܐܢ̱ܬܽܘܢ ܕܕܰܒܕܰܐܝܟ ܐܰܝܠܶܝܢ ܢܳܡܽܘ̈ܣܶܐ ܡܚܰܣܢܳܐ܆ ܚܰܘܺܝܢܳܗ̇ ܠܠܳܐ ܡܶܬܟܰܚܕܳܢܽܘܬܳܐ ܗܳܕܶܐ ܡܩܰܠܰܣܬܳܐ܆ ܡܳܕܶܝܢ ܐܶܢ ܡܰܢ ܬܶܙܟܶܐ ܗܳܕܶܐ ܥܰܡ ܢܳܡܽܘ̈ܣܶܐ ܐܳܦ ܒܟܽܘܢ܆ ܐܰܝܟ ܕܰܠܘܳܬ ܦܝܠܝܦ̈ܝܣܳܝܶܐ ܕܰܡܫܰܡ̈ܠܰܝܳܐ ܐܺܝܬܰܝܗܽܘܢ ܗ̱ܘܰܘ ܡܰܠܠܶܬ⁴. ܟܰܕ ܕܶܝܢ ܒܶܗ ܟܰܕ ܒܶܗ ܒܛܶܟܣܳܐ ܡܩܰܘܶܝܢ ܐܢ̱ܬܽܘܢ܆ ܐܰܝܟ ܕܰܠܘܳܬ ܩܽܘܪ̈ܝܢܬܳܝܶܐ ܡܶܟܺܝܠ ܥܰܠ ܗܳܕܶܐ ܦܺܝܠܳܣܽܘܦܺܝܣܳܐ ܐܶ݀ܥܒܶܕ ܫܶܬܩܳܐ.

ܛܰܝܒܽܘܬܳܐ ܕܶܝܢ ܒܪܰܡ ܠܰܒܬܽܘ̈ܠܳܬܳܐ ܘܣܳܗ̈ܕܳܬܳܐ܆ ܕܰܒܝܰܕ ܢܶܨܚܳܢ̈ܶܐ ܒܰܝ̈ܬܳܝܶܐ ܕܺܝܠܗܶܝܢ ܝܰܗ̱ܒ̈ܶܝܢ ܥܶܠܬܳܐ܆ ܐܳܦ ܠܡܰܠܦܳܢܽܘܬܳܐ ܕܡ̈ܶܠܶܐ ܗܳܝ ܕܡܶܛܽܠ ܕܽܘܒܳܪ̈ܶܐ. ܡܰܘܬܳܐ ܕܕܳܡܶܐ ܠܰܕܗܳܠܶܝܢ ܣܶܒܠܰܬ܆ ܐܳܦ ܕܪܽܘܣܺܝܤ ܗܳܝ ܚܰܝܠܬܳܢܺܝܬܳܐ܆ ܐܳܦܶܢ ܒܡܶܕܶܡ ܩܰܠܺܝܠ ܡܫܰܚܠܦ ܗ̱ܘܳܐ. ܟܰܕ ܓܶܝܪ ܒܬܰܢܽܘܪܳܐ ܕܢܽܘܪܳܐ ܐܶܬܚܰܝܒܰܬ ܕܬܶܬܪܡܶܐ܆ ܚܘܺܝܚܳܐܺܝܬ ܘܰܒܨܶܒܝܳܢ ܢܰܦܫܳܗ̇ ܫܶܘܪܰܬ̣ ܠܓܰܘܳܗ̇܆ ܘܢܽܘܪܳܐ ܒܰܕܡܽܘܬ ܡܰܝ̈ܳܐ ܩܰܒܶܠܬܳܗ̇܆ ܐܰܝܟ ܪܽܘܚܳܐ ܕܛܰܠܳܐ ܗܳܝ ܕܰܡܫܪܩܳܐ ܗ̱ܘܳܬ ܒܡܶܨܥܰܬ ܐܰܬܽܘܢܐ ܗܰܘ ܕܰܬܠܳܬܳܐ ܛܠܳܝ̈ܶܐ܆ ܚܰܢܰܢܝܳܐ ܘܥܶܙܰܪܝܳܐ ܘܡܺܝܫܐܝܠ. ܡܶܢ ܗܳܕܶܐ ܓܰܘܙܰܠܬܳܐ ܕܩ̣ܶܪܰܬ̣܆ ܦܰܓܪܳܗ̇ ܕܣܳܗܕܬܳܐ ܫܰܠܡܳܐ ܘܰܕܠܳܐ ܢܶܟܝܳܢ ܐܶܬܢܛܰܪ܆ ܘܢܶܣܒܰܬ ܫܽܘܪ̈ܳܝܶܐ ܕܰܩܝܳܡܬܳܐ. ܗܳܝ ܕܳܐܦ ܐܶܡܰܬܝ ܕܬܶܫܬܘܶܐ ܠܳܗ̇܆ ܠܰܒ̈ܢܳܬ ܩܴ̈ܠܶܐ ܗܳܠܶܝܢ ܕܰܒܝܰܕ ܐܶܫܰܥܝܳܐ ܩܰܕܶܡ ܐܶܬܶܐܡܰܪ̈ܝ̱ ܡܶܢ ܟܽܠ ܦܪܽܘܤ ܬܺܐܡܰܪ܆ ܕܗܳܫܳܐ ܫܰܪܺܝܪܳܐܺܝܬ ܝܶܕܥܶܬ܆ ܕܰܒܗܽܘܢ ܒܣܽܘܥܪ̈ܳܢܶܐ ܢܶܦܩܰܬ ܠܰܥܒܳܕܳܐ܆ ܗܳܝ ܕܢܺܐܚܽܘܢ ܡܺܝ̈ܬܶܐ ܘܰܢܩܽܘܡܽܘܢ ܗܳܢܽܘܢ ܕܰܒܩܰܒܪ̈ܶܐ܆ ܛܰܠܳܐ ܓܶܝܪ ܗܰܘ ܕܡܶܢ ܠܘܳܬܳܟ ܐܳܣܝܽܘܬܳܐ ܐܺܝܬܰܘܗ̱ܝ ܠܗܽܘܢ^[28]. ܗܳܫܳܐ ܗܘܺܝܬ̣ ܕܪܽܘܣܺܝܤ ܐܰܘܟܺܝܬ ܛܰܠܳܢܺܝܬܳܐ܆ ܕܰܒܝܰܕ ܦܽܘܪ̈ܥܳܢܶܐ ܕܙܳܟܽܘܬܳܐ ܡܫܰܪܪܳܐ ܐ̱ܢܳܐ ܠܶܗ ܠܟܽܘܢܳܝܳܐ܆ ܘܰܡܫܰܒܚܳܐ ܐ̱ܢܳܐ ܠܰܡܫܺܝܚܳܐ ܗܰܘ ܦܳܪܽܘܩܳܐ ܠܳܐ ܕܰܓܳܠܳܐ ܘܰܐ‌ܠܳܗܳܐ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ܆ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܡܳܐܐ ܘܰܐܪܒܰܥܣܰܪ.

ܒ. ܩܘܪ̈ܝܢܬܝܐ. 12: 7 ـ 9 [1]

ܒ. ܩܘܪ̈ܝܢܬܝܐ. 12: 9 [2]

ܒ. ܩܘܪ̈ܝܢܬܝܐ. 4: 7 [3]

ܡܒܰܥܒܥܳܐ[4]

ܡܙܡܘܪ̈ܐ. 22: 26 [5]

ܕܟܽܘܢܳܫ̈ܶܐ[6]

[7] ܦܶܢ̈ܩܝܳܬܳܐ ܩܳܪܶܐ ܗܳܪܟܳܐ ܠܕܰܦ̈ܶܐ ܗܳܢܽܘܢ ܕܰܓܪܶܡ ܦܺܝܠܳܐ܆ ܕܟܳܬܒܺܝܢܒܗܽܘܢ ܡܰܠ̈ܟܶܐ ܐܰܟܣܝܽܘܡܳܐ ܐܰܘ ܟܺܝܬ ܐܺܝܩܳܪܳܐ ܡܶܕܶܡ ܘܫܽܘܠܛܳܢܳܐ܆ ܘܰܡܫܰܟܢܺܝܢ ܠܗܽܘܢ ܠܶܗ ܠܗܰܘ ܕܡܰܣܪܚܺܝܢ ܒܫܽܘܠܛܳܢܳܐ܆ ܘܩܳܪܶܝܢ ܠܗܽܘܢ ܪܽܘܡܳܐܝܬ ܩܽܘܕܘܩ̈ܝܠܐ. ܐܰܘ ܠܗܽܘܢ ܠܰܟ̈ܬܳܒܶܐ ܕܺܝܠܗܽܘܢ ܕܡܰܠ̈ܟܶܐ܆ ܕܰܒܗܽܘܢ ܪܳܫܡܺܝܢ ܥܳܘܗ̈ܕܳܢܶܐ ܕܟܽܠܗܶܝܢ ܗܳܠܶܝܢ ܕܥܳܒܕܺܝܢ ܐܰܘ ܡܫܰܟܢܺܝܢ܆ ܐܰܘ ܡܶܕܶܡ ܐ̱ܚܪܺܢܳܐ ܣܳܥܪܺܝܢ

ܣܶܦܪܐ ܕܒܪܝܬܐ. 23: 4 [8]

ܡܬܝ. 10: 37 [9]

ܡܬܝ. 16: 26[10]

ܡܙܡܘܪ̈ܐ. 103: 15 [11]

ܝܥܩܘܒ. 1: 11 [12]

ܐ. ܛܝܡܬܐܘܣ. 2: 9 ـ 10 [13]

ܐܪܡܝܐ. 2: 21[14]

ܐܪܡܝܐ. 23: 4 [15]

ܡܙܡܘܪ̈ܐ. 114: 8  ܐܦ ܡܙܡܘܪ̈ܐ. 134: 15. 18 [16]

ܐ. ܫܡܘܐܝܠ. 6: 11 [17]

ܐ. ܩܘܪ̈ܝܢܬܝܐ. 3: 16 [18]

ܡ̈ܬܠܐ. 20: 9 [19]

ܬܢܝܢ ܢܡܘܣܐ. 16: 19 [20]

ܡܦܩܢܐ. 25: 2 ـ 4 [21]

ܦܽܘܠ̈ܣܶܐ[22]

[23]ܚܰܕ ܡܶܢ ܗܳܠܶܝܢ ܕܪ̈ܐܟܡܐܣ ܥܳܒܶܕ ܗ̱ܘܳܐ ܕܺܝܢܳܪܳܐ ܕܕܰܗܒܳܐ܆ ܕܐܝܬ ܗ̱ܘܳܐ ܒܶܗ ܝܚ ܬܡܳܢܰܥܣܪ ܩܪ̈ܛܐ.

ܡܬܝ. 11: 15 [24]

ܡܬܝ. 12: 10 [25]

ܦܝܠܝܦܣ̈ܝܐ. 4: 16 ـ 17 [26]

ܒ. ܩܘܪ̈ܝܢܬܝܐ. 11: 9 ـ 10[27]

ܐܫܥܝܐ. 26: 19 [28]