ܡܺܐܡܪܳܐ^[1] ܕܡܳܐܐ ܘܰܬܠܳܬܰܥܣܪ

ܥܰܠ ܦܶܬܓܳܡܳܐ ܗܰܘ ܕܒܶܐܘܰܢܓܶܠܺܝܽܘܢ ܕܠܽܘܩܳܐ ܕܳܐܡܰܪ܆ ܛܽܘܒܰܝܟܽܘܢ ܡܶܣ̈ܟܺܢܶܐ ܕܕܺܝܠܟܽܘܢ ܐܺܝܬܶܝܗ̇ ܡܰܠܟܽܘܬܳܐ ܕܰܐ‌ܠܳܗܳܐ܆ ܛܽܘܒܰܝܟܽܘܢ ܗܳܢܽܘܢ ܕܒܳܟܶܝܢ ܗܳܫܳܐ ܕܬܶܓܚܟܽܘܢ܆ ܘܰܠܟܽܘܢ ܥܰܬܺܝܪ̈ܶܐ ܘܳܝ ܠܟܽܘܢ܆ ܡܶܛܽܠ ܕܩܰܒܶܠܬܽܘܢ ܒܽܘܝܐܟܽܘܢ܆ ܘܳܐܦ ܠܟܽܘܢ ܘܳܝ ܠܟܽܘܢ ܗܳܢܽܘܢ ܕܓܳܚܟܺܝܢ ܗܳܫܳܐ܆ ܕܬܶܬܰܐܒܠܽܘܢ ܘܬܶܒܟܽܘܢ^[2].

113: ܟܰܕ ܚܳܙܶܐ ܐ̱ܢܳܐ ܠ̱ܐܢܳܫܺܝ̈ܢ ܕܰܠܡ̈ܶܠܶܐ ܐܶܘܰܢܓ̈ܶܠܳܝܳܬܳܐ ܡܫܳܟܳܐܺܝܬ ܫܳܡܥܺܝܢ܆ ܘܥܰܠ ܦܽܘܩ̈ܕܳܢܶܐ ܕܦܳܪܽܘܩܰܢ ܡܓܰܚܟܺܝܢ ܣܪܺܝܩܳܐܺܝܬ܆ ܘܣܳܒܪܺܝܢ ܕܠܳܐ ܡܶܬܡܰܨ̈ܝܳܢܶܐ ܐܺܝܬܰܝܗܽܘܢ ܗܶܢܽܘܢ ܦܽܘܩ̈ܕܳܢܶܐ ܘܰܕܠܽܘܩܒܰܠ ܟܝܳܢܳܐ ܡܶܬܟܰܬܫܺܝܢ܆ ܗܺܝ ܟܰܕ ܗܺܝ ܚܳܐܶܫ ܐ̱ܢܳܐ ܠܗܳܢܽܘܢ ܬܰܓܳܪ̈ܶܐ܆ ܗܳܢܽܘܢ ܕܟܰܕ ܒܥܰܘ ܡܰܪ̈ܓܳܢܝܳܬܳܐ ܛܳܒ̈ܳܬܳܐ ܐܰܝܟ ܡܰܬܠܳܐ ܗܰܘ ܕܡܳܪܰܢ܆ ܘܣܰܓ̈ܺܝܐܳܬܳܐ ܩܢܰܘ ܘܰܙܒܰܢܘ܆ ܠܚܰܪܬܳܐ ܟܰܕ ܒܥܰܡ̈ܠܶܐ ܕܬܰܓܳܪܽܘܬܳܐ ܐܰܫܦܶܠܘ ܘܰܐܡܶܐܢܘ܆ ܠܘܳܬ ܫܶܠܝܳܐ ܐܶܨܛܠܺܝܘ܆ ܒܳܬܰܪܟܶܢ ܟܰܕ ܚܙܰܘ ܠ̱ܐܢܳܫܺܝ̈ܢ ܕܕܰܚܫܰܚܬܳܐ ܕܗܳܠܶܝܢ ܠܳܐ ܡܢܰܣܝܳܐܺܝܬ ܘܠܳܐ ܝܰܠܺܝܦܳܐܺܝܬ ܐܺܝܬ ܠܗܽܘܢ܆ ܘܰܠܡܰܪܓܳܢܺܝܬܳܐ ܝܰܩܺܝܪܰܬ ܕܡܰܝ̈ܳܐ ܐܶܢ ܬܶܓܕܰܫ܆ ܒܰܐܒܳܪܳܐ ܫܺܝܛܳܐ ܘܰܒܡܶܕܶܡ ܡܶܢ ܗܽܘܠ̈ܘܤ ܗܳܠܶܝܢ ܫܚܺܝ̈ܡܳܬܳܐ ܘܠܳܐ ܢܰܗܺܝܪ̈ܳܬܳܐ ܩܳܪܡܺܝܢ ܗ̱ܘܰܘ ܐܶܬܚܰܡܰܬܘ ܘܶܐܫܬܚܰܩܘ܆ ܘܟܰܕ ܐܶܬܬܙܺܝܥܘ ܩܳܡܘ ܥܰܠ ܗܳܢܽܘܢ ܠܳܐ ܝܳܕܽܘ̈ܥܶܐ ܘܠܳܐ ܡܢܰܣ̈ܝ̣ܰܝ̣ ܒܫܰܦܺܝܪ̈ܳܬܳܐ ܐܰܙܥܶܩܘ܆ ܡܳܢܳܐ ܥܳܒܕܺܝܢ ܐܢ̱ܬܽܘܢ ܐܳܘ ܗܳܠܶܝܢ܆ ܕܰܠܢܰܗܺܝܪܽܘܬܳܗ̇ ܘܢܰܨܺܝܚܽܘܬܳܗ̇ ܕܡܰܪܓܳܢܺܝܬܳܐ܆ ܒܥܽܘܪܙܳܠܳܐ ܕܰܠܘܳܬ ܗܽܘܠܶܐ ܕܣܰܓܺܝ ܫܺܝܛܳܐ ܡܚܰܦܶܝܢ ܐܢ̱ܬܽܘܢ ܘܰܫܟܺܝܪܽܘܬܳܐ ܡܰܠܽܘܢ ܡܗܰܦܟܺܝܢ ܐܢ̱ܬܽܘܢ ܝܳܗܒܺܝܢ ܐܢ̱ܬܽܘܢ ܠܳܗ̇܆ ܐܰܘ ܫܽܘܦܪܳܐ ܕܡܶܢ ܗܳܝ܆ ܡܰܘܣܦܺܝܢ ܐܢ̱ܬܽܘܢ ܢܳܣܒܺܝܢ ܐܢ̱ܬܽܘܢ܆ ܟܰܕ ܙܳܕܶܩ ܗ̱ܘܳܐ ܠܟܽܘܢ ܕܰܬܠܰܚܡܽܘܢ ܘܬܰܠܘܬ̣ܽܘܢ ܟܺܐܦܳܐ ܗܳܝ ܬܰܠܓܳܢܳܝܬܳܐ ܠܫܶܡܫܳܢܳܝܽܘܬ ܚܙܳܬܶܗ ܕܕܰܗܒܳܐ܆ ܘܰܒܚܽܘܠܛܳܢܳܐ ܕܫܰܦܺܝܪܽܘܬ ܓܰܘܢܳܐ ܕܡܶܢ ܬܪ̈ܰܝܗܽܘܢ܆ ܬܫܰܡܠܽܘܢ ܚܕܳܐ ܫܰܦܺܝܪܽܘܬ ܦܰܐܝܽܘܬܳܐ.

ܘܳܐܦ ܐܶܢܳܐ ܗܳܟܺܝܠ ܟܰܕ ܡܶܬܩܰܪ̈ܝܳܢ ܗ̱ܘܰܝ̈ ܗܳܢܶܝܢ ܒ̈ܢܳܬ ܩ̈ܳܠܶܐ ܕܡܳܪܝܳܐ܆ ܗܳܠܶܝܢ ܕܰܐܟܬܶܒ ܠܽܘܩܳܐ܆ ܛܽܘܒܰܝܟܽܘܢ ܡܶܣ̈ܟܺܢܶܐ ܕܕܺܝܠܟܽܘܢ ܐܺܝܬܶܝܗ̇ ܡܰܠܟܽܘܬܳܐ ܕܰܐ‌ܠܳܗܳܐ܆ ܛܽܘܒܰܝܟܽܘܢ ܗܳܢܽܘܢ ܕܒܳܟܶܝܢ ܗܳܫܳܐ ܕܬܶܓܚܟܽܘܢ܆ ܘܳܐܦ ܠܟܽܘܢ ܥܰܬܺܝܪ̈ܶܐ ܘܳܝ ܠܟܽܘܢ ܡܶܛܽܠ ܕܩܰܒܶܠܬܽܘܢ ܒܽܘܝܳܐܟܽܘܢ܆ ܘܳܐܦ ܠܟܽܘܢ ܗܳܢܽܘܢ ܕܓܳܚܟܺܝܢ ܐܢ̱ܬܽܘܢ ܗܳܫܳܐ ܘܳܝ ܠܟܽܘܢ ܡܶܛܽܠ ܕܬܶܬܐܰܒܠܽܘܢ ܘܬܶܒܟܽܘܢ^[3]܆ ܒܟܽܠܟܽܘܢ ܡܰܢ ܒܦܳܣܺܝ̈ܩܳܬܳܐ ܠܡܺܐܡܰܪ ܡܰܪܓܶܫ ܗ̱ܘܺܝܬ܆ ܕܠܳܐ ܡܶܬܬܘܶܝܢ ܗ̱ܘܰܝܢ ܒܠܶܒܳܐ܆ ܘܳܐܦܠܳܐ ܡܶܬܟܰܡܪܺܝܢ ܗ̱ܘܰܝܬܽܘܢ ܥܠܰܝܗܶܝܢ ܕܡ̈ܶܠܶܐ ܐܰܝܟ ܥܝܳܕܳܐ. ܠ̱ܐܢܳܫܺܝ̈ܢ ܕܶܝܢ ܐܳܦ ܕܳܐܡܪܺܝܢ ܗ̱ܘܰܘ ܫܶܡܥܶܬ܆ ܕܚܳܤ ܘܠܳܐ ܬܶܗܘܶܐ ܠܺܝ ܕܶܐ݀ܬܡܰܣܟܰܢ ܐܰܘ ܐܶܗܘܶܐ ܒܳܝܫܳܐ ܐܰܘ ܐܶ݀ܨܛܰܪܰܟ܆ ܘܳܐܦܠܳܐ ܕܶܐ݀ܬܶܐܒܶܠ ‌ܐܰܘ ܐܶ݀ܒܟܶܐ ܠܡܰܘܬܶܗ ܕܐ̱ܢܳܫ ܡܶܢ ܗܳܢܽܘܢ ܕܙܳܕܩܺܝܢ ܠܺܝ. ܬܶܗܘܶܐ ܠܺܝ ܕܶܝܢ ܕܶܐ݀ܫܬܰܪܬܰܚ ܒܡܰܪ̈ܗܳܛܶܐ ܘܩܶܢ̈ܝܳܢܶܐ ܘܶܐ݀ܬܒܰܣܰܡ ܒܗܳܠܶܝܢ܆ ܘܡܶܢ ܟܽܠ ܕܽܘܟ ܢܶܪܕܶܐ ܠܺܝ ܥܽܘܬܪܳܐ܆ ܘܶܐ݀ܬܦܰܪܦܰܥ ܘܶܐ݀ܚܕܶܐ ܘܶܐ݀ܓܚܰܟ܆ ܘܶܐ݀ܚܙܶܐ ܦܽܘܪ̈ܓܳܝܶܐ ܗܳܠܶܝܢ ܕܰܒܡܰܫܟܢܳܐ ܘܶܐܬܦܨܰܚ܆ ܘܢܶܗܘܽܘܢ ܠܺܝ ܚܰܝ̈ܶܐ܆ ܕܡܶܢ ܟܽܠܳܗ̇ ܟܡܺܝܪܽܘܬܳܐ ܡܚܰܪܪܺܝܢ.

ܕܰܠܘܳܬܗܽܘܢ ܐܳܦ ܗܳܠܶܝܢ ܒܰܕܡܽܘܬ ܬܰܓܳܪܳܐ ܗܰܘ܆ ܡܶܢ ܒܳܬܰܪ ܬܰܓܳܪܽܘܬܳܐ ܢܰܓܺܝܪܬܳܐ܆ ܟܰܕ ܫܶܠܝܳܐ ܨܳܒܶܐ ܗ̱ܘܺܝܬ ܕܶܐ݀ܬܥܰܢܘܶܐ܆ ܟܰܕ ܠܨܰܥܪܳܐ ܕܟܺܐܦ̈ܶܐ ܗܳܠܶܝܢ ܡܶܬܗܰܘ̈ܢܳܢܝܳܬܳܐ ܘܝܰܩܺܝܪ̈ܳܬ ܕܡܰܝ̈ܳܐ ܘܰܡܝܰܩܪ̈ܳܬܳܐ ܠܳܐ ܡܣܰܝܒܰܪ ܐ̱ܢܳܐ ܐܰ݀ܙܥܶܩ܆ ܕܗܳܠܶܝܢ ܡ̈ܶܠܶܐ ܚܰܝ̈ܳܬܳܐ ܐܰܝܟ ܕܒܰܫܪܳܪܳܐ ܐܳܘ ܡܝܰܬܪ̈ܶܐ܆ ܘܕܰܟ̈ܝܳܬܳܐ ܘܩܰܕܺܝ̈ܫܳܬܳܐ ܘܰܫܡܰܝ̈ܳܢܝܳܬܳܐ܆ ܟܰܕ ܒܢܰܦ̈ܫܳܬܳܐ ܕܰܗܒܳܢ̈ܳܝܳܬܳܐ ܘܢܰܗܺܝܪ̈ܳܬܳܐ ܢܶܬܩܰܒ̈ܠܳܢ܆ ܡܚܰܘ̈ܝܳܢ ܠܢܰܨܺܝܚܽܘܬܳܐ ܗܳܝ ܕܺܐܝܬ ܒܗܶܝܢ. ܟܰܕ ܕܶܝܢ ܒܠܶܒܰܘ̈ܳܬܳܐ ܕܰܐܒܳܪܳܐ ܢܳܦ̈ܠܳܢ܆ ܡܰܠܽܘܢ ܕܶܝܢ ܒܛܺܝ̈ܢܳܝܶܐ ܐܰܘ ܚܙܺܝܪ̈ܳܝܶܐ ܠܡܺܐܡܰܪ ܝܰܬܺܝܪ ܒܰܝܬܳܐܺܝܬ܆ ܡܶܬܛܰܡܪ̈ܳܢ ܘܰܒܚܶܫܽܘܟܳܐ ܕܠܳܐ ܡܠܺܝܠܽܘܬܳܐ ܡܶܬܚܰܦ̈ܝܳܢ܆ ܟܰܕ ܨܶܒܝܳܢܳܐܺܝܬ ܡܥܰܡܨܳܐ ܢܰܦܫܳܐ ܥܰܝ̈ܢܶܝܗ̇. ܠܗܳܠܶܝܢ ܕܩܰܠܺܝܠ ‌ܐܶ‌ܠܽܘ ܦܶܬܚܰܬ ܐܶܢܶܝܢ܆ ܠܳܐ ܥܳܒܰܪ ܗ̱ܘܳܐ ܒܰܪܩܳܐ ܟܰܕ ܠܳܐ ܡܶܬܚܙܶܐ. ܡܶܛܽܠܗܳܕܶܐ ܡܳܪܰܢ ܐܳܡܰܪ ܗ̱ܘܳܐ܆ ܠܳܐ ܬܶܬܠܽܘܢ ܩܽܘܕܫܳܐ ܠܟܰܠ̈ܒܶܐ܆ ܐܳܦܠܳܐ ܬܰܪܡܽܘܢ ܡܰܪ̈ܓܳܢܝܳܬܳܐ ܕܺܝܠܟܽܘܢ ܩܕܳܡ ܚܙܺܝܪ̈ܶܐ܆ ܕܰܠܡܳܐ ܢܕܽܘܫܽܘܢ ܐܶܢܶܝܢ ܒܪ̈ܶܓܠܰܝܗܽܘܢ܆ ܘܟܰܕ ܢܶܗܦܟܽܘܢ ܢܒܰܙܥܽܘܢܳܟܽܘܢ^[4]. ܡܶܢ ܒܳܬܰܪ ܓܶܝܪ ܕܰܒܠܳܐ ܡܠܺܝܠܽܘܬܳܐ ܕܳܫܽܘܗ̇ ܠܢܰܨܺܝܚܽܘܬܳܐ ܕܡ̈ܶܠܶܐ ܗܳܠܶܝܢ ܐܰ‌ܠܳܗܳܝ̈ܳܬܳܐ܆ ܘܚܰܒܠܽܘܗ̇ ܐܰܝܟ ܕܳܐܬܝܳܐ ܗ̱ܘܳܬ ܒܺܐܝ̈ܕܰܝܗܽܘܢ܆ ܡܶܢܗܶܝܢ ܗܳܠܶܝܢ ܟܺܝܬ ܕܠܳܐ ܚܙܰܘ ܘܠܳܐ ܐܶܣܬܰܟܰܠܘ܆ ܡܢܰܣܶܝܢ ܙܰܒ̈ܢܺܝܢ ܣܰܓܺܝ̈ܳܐܢ ܕܥܽܘܪ̈ܙܳܠܶܐ ܕܗܽܘܦܳܟ ܚܽܘ̈ܫܳܒܶܐ ܘܗܰܦ̈ܟܳܬܳܐ ܣܰܩܽܘܒ̈ܠܳܝܳܬܳܐ ܢܰܗܦܟܽܘܢ ܠܩܽܘܒܠܰܢ܆ ܟܰܕ ܒܗܳܕܶܐ ܣܳܒܪܺܝܢ ܕܪܳܡܶܝܢ ܘܙܳܟܶܝܢ ܠܰܢ ܐܰܝܟ ܕܥܰܠ ܕܰܐܪ̈ܶܐ.

ܬܐܳܪܳܐ^[5] ܗܳܟܺܝܠ ‌ܐܶܢ ܨܳܒܶܝܢ ܟܰܕ ܠܶܐܕܢܗܽܘܢ ܡܰܪܟܢܺܝܢ ܘܡܶܢ ܐܰܪܥܳܐ ܩܰܠܺܝܠ ܡܕܰܟܶܝܢ ܠܳܗ̇܆ ܠܪܰܘܡܳܐ ܕܡ̈ܶܠܶܐ ܗܳܠܶܝܢ ܐܶܘܰܢܓ̈ܶܠܳܝܳܬܳܐ ܘܰܕܣܽܘ̈ܟܳܠܶܐ ܢܶܫܡܥܽܘܢ. ܠܰܘ ܓܶܝܪ ܠܗܰܘ ܕܰܣܢܺܝܩ ܥܰܠ ܡܰܪ̈ܗܳܛܶܐ ܡܶܢ ܟܽܠ ܦܪܽܘܤ ܡܬܰܚܶܡ ܕܺܐܝܬܰܘܗ̱ܝ ܡܶܣܟܺܢܳܐ ܟܬܳܒܳܐ ܗܰܘ ܟܳܗܢܳܝܳܐ܆ ܘܳܐܦܠܳܐ ܗܰܘ ܕܰܠܩܽܘܒܠܳܐ ܥܰܬܺܝܪܳܐ܆ ܠܗܰܘ ܕܒܰܡܫܰܪܬܚܽܘܬܳܐ ܕܗܳܠܶܝܢ ܐܺܝܬܰܘܗ̱ܝ. ܝܳܗܶܒ ܕܶܝܢ ܛܽܘܒܳܐ܆ ܠܗܰܘ ܕܰܒܬܰܪܥܺܝܬܶܗ ܡܶܣܟܺܝܢ ܡܶܣܟܺܢܽܘܬܳܐ ܗܳܝ ܡܶܬܩܰܠܣܳܢܺܝܬܳܐ. ܠܗܰܘ ܕܺܐܝܬܰܘܗ̱ܝ ܡܰܟܺܝܟܳܐ ܒܰܙܢܳܐ. ܠܗܰܘ ܕܥܰܠ ܗܳܠܶܝܢ ܕܶܐܬܺܝܗܶܒ̈ܝܢ ܛܰܝܒܽܘܬܳܐ ܝܳܕܰܥ ܠܰܐܠܳܗܳܐ܆ ܘܰܠܗܳܠܶܝܢ ܕܠܳܐ ܐܶܬܝܗܶܒ̈ܝܢ ܠܳܐ ܪܳܐܶܓ. ܐܰܝܟܰܢܳܐ ܕܶܐܢܗܽܘ ܕܐ̱ܢܳܫ ܩܢܶܐ ܡܰܢ ܘܠܳܐ ܡܶܕܶܡ܆ ܪܳܐܶܓ ܕܶܝܢ ܡܰܪ̈ܗܳܛܶܐ܆ ܘܰܚܢܺܝܩ ܒܪܶܓܬܳܐ ܕܥܽܘܬܪܳܐ܆ ܘܺܐܝܬܰܘܗ̱ܝ ܒܨܺܝܪܳܐ ܒܩܶܢܝܳܢܶܗ܆ ܘܡܶܙܕܰܒܢܳܢܳܐ ܒܚܰܕ ܫܳܡܽܘܢܳܐ ܡܶܢ ܒܳܬܰܪ ܬܽܘܪܣܳܝܳܐ ܘܰܠܒܽܘܫܳܐ^[6]܆ ܒܗܳܕܶܐ ܓܶܝܪ ܚܒܰܫ ܢܳܡܽܘܣܳܐ ܫܠܺܝܚܳܝܳܐ ܠܣܳܦܩܽܘܬܳܐ܆ ܗܰܘ ܕܕܰܐܝܟ ܗܳܢܳܐ܆ ܠܰܘ ܡܶܣܟܺܢܳܐ ܗܰܘ ܕܡܶܬܺܝܗܶܒ ܠܶܗ ܛܽܘܒܳܐ ܐܺܝܬܰܘܗ̱ܝ܆ ܐܶܠܳܐ ܥܰܬܺܝܪܳܐ ܗܰܘ ܕܡܶܬܶܐܒܶܠ. ܒܝܰܐܝܺܒܽܘܬܳܐ ܓܶܝܪ ܘܰܒܪܶܓܬܳܐ ܕܗܳܝ ܕܝܰܬܺܝܪܳܐ܆ ܥܽܘܬܪܳܐ ܒܺܝܫܳܐ ܥܰܬܺܝܪ ܒܢܰܦܫܶܗ. ܡܶܛܽܠ ܗܳܕܶܐ ܗܳܝ ܕܰܠܘܳܬ ܠܽܘܩܳܐ ܓܶܢܣܳܢܳܐܺܝܬ ܣܺܝܡܳܐ܆ ܛܽܘܒܰܝܗܽܘܢ ܠܡܶܣ̈ܟܺܢܶܐ^[7]܆ ܕܰܒܬܽܘܚܳܡܳܐ ܡܦܰܪܫܳܐ ܡܶܬܢܰܗܪܳܐ ܐܰܫܠܡܳܗ̇ ܡܰܬܝ. ܟܰܕ ܟܬܰܒ܆ ܛܽܘܒܰܝܗܽܘܢ ܠܡܶܣ̈ܟܺܢܶܐ ܕܰܒܪܽܘܚ܆ ܕܕܺܝܠܗܽܘܢ ܗܝ ܡܰܠܟܽܘܬܳܐ ܕܰܫܡܰܝܳܐ^[8].

ܗܳܟܰܢܳܐ ܐܳܦ ܗܰܘ ܕܰܒܡܰܪ̈ܗܳܛܶܐ ܥܰܒܺܝܛ܆ ܘܰܒܩܰܢܳܝܽܘܬܳܐ ܕܗܳܠܶܝܢ ܡܗܰܒܰܒ܆ ܘܫܳܡܰܥ ܠܶܗ ܠܦܰܘܠܽܘܤ ܕܰܠܛܺܝܡܳܬܶܐܘܳܤ ܟܳܬܶܒ ܗ̱ܘܳܐ܆ ܠܥܰܬܺܝܪ̈ܶܐ ܕܥܳܠܡܳܐ ܗܳܢܳܐ ܦܰܩܶܕ܆ ܕܠܳܐ ܪ̈ܳܡܳܬܳܐ ܢܶܬܪܰܥܽܘܢ܆ ܐܳܦܠܳܐ ܢܰܣܒܪܽܘܢ ܥܰܠ ܠܳܐ ܝܺܕܺܝܥܽܘܬܶܗ ܕܥܽܘܬܪܳܐ܆ ܐܶܠܳܐ ܥܰܠ ‌ܐܰ‌ܠܳܗܳܐ ܚܰܝܳܐ ܗܰܘ ܕܝܰܗ̱ܒ ܠܰܢ ܟܽܠܗܶܝܢ ܐܰܝܟ ܕܰܠܒܽܘܤܳܡܳܐ܆ ܕܢܶܥܒܕܽܘܢ ܛܳܒ̈ܳܬܳܐ܆ ܠܡܶܥܬܰܪ ܒܰܥ̈ܒܳܕܶܐ ܛܳܒ̈ܶܐ܆ ܕܢܶܗܘܽܘܢ ܐܺܝܬܰܝܗܽܘܢ ܝܳܗܽܘ̈ܒܶܐ ܦܫܺܝܩܳܐܺܝܬ܆ ܡܫܰܘ̈ܬܦܳܢܶܐ܆ ܕܣܳܝܡܺܝܢ ܠܗܽܘܢ ܣܺܝ̈ܡܳܬܳܐ ܫܶܬܶܐܣܬܳܐ ܛܳܒܬܳܐ ܠܗܳܝ ܕܰܥܬܺܝܕܳܐ܆ ܐܰܝܟܰܢܳܐ ܕܢܶܫܟܚܽܘܢ ܠܚܰܝ̈ܶܐ ܫܰܪܺܝܪ̈ܶܐ^[9]܆ ܘܰܠܗܳܠܶܝܢ ܣܳܥܰܪ ܒܗܽܘܢ ܒܰܥ̈ܒܳܕܶܐ܆ ܗܳܢܳܐ ܕܠܰܘ ܠܶܗ ܡܰܠܽܘܢ ܩܢܶܐ ܠܗܶܝܢ ܠܗܳܠܶܝܢ ܕܺܐܝܬ ܠܶܗ ܐܶܠܳܐ ܠܰܣܢܺܝ̈ܩܶܐ܆ ܠܰܘ ܥܰܬܺܝܪܳܐ ܕܡܶܬܒܟܶܐ ܐܺܝܬܰܘܗ̱ܝ܆ ܐܶܠܳܐ ܡܶܣܟܺܢܳܐ ܕܰܒܪܽܘܚ܆ ܘܝܳܪܽܘܬܳܐ ܕܡܰܠܟܽܘܬܳܐ ܕܰܫܡܰܝܳܐ.

ܐܰܘ ܠܰܘ ܕܰܐܝܟ ܗܳܟܰܢܳܐ ܐܺܝܬܰܘܗ̱ܝ ܗ̱ܘܳܐ ܐܺܝܘܒ܆ ܕܰܒܩܛܤܛܐܣܝܤ ܠܳܐ ܡܫܰܡܠܰܝܬܳܐ ܕܙܰܒ̈ܢܶܐ ܘܒܽܐܘܪܚܳܐ ܠܳܐ ܕܪܺܝܫܬܳܐ ܕܕܶܚܠܰܬ ܐܰ‌ܠܳܗܳܐ ܘܕܰܡܝܰܬܪܽܘܬܳܐ܆ ܗܳܠܶܝܢ ܐܶܘܰܢܓ̈ܶܠܳܝܳܬܳܐ ܘܰܡܫܰܡ̈ܠܝܳܬܳܐ ܡܫܰܡܠܝܳܐܺܝܬ ܦܺܝܠܳܣܽܘܦܺܝܣܳܐ ܥܳܒܶܕ ܗ̱ܘܳܐ܆ ܘܰܒܦܰܢܛܰܣܺܝܰܐ ܡܰܠܟܳܝܬܳܐ ܘܒܰܡܫܰܪܬܚܽܘܬ ܩܶܢ̈ܝܳܢܶܐ܆ ܠܳܐ ܗܽܘܠܳܢܳܝܽܘܬܳܐ ܐܰܘܟܺܝܬ ܕܽܘܒܳܪܳܐ ܡܶܣܟܺܢܳܝܳܐ ܡܚܰܘܶܐ ܗ̱ܘܳܐ܆ ܘܠܳܐ ܣܰܪܺܝܟ ܗ̱ܘܳܐ ܒܥܽܘܬܪܳܐ ܗܰܘ ܕܪܳܕܶܐ ܗ̱ܘܳܐ܆ ܘܒܺܐܝܕܳܐ ܫܦܺܝܥܬܳܐ ܘܥܰܬܺܝܪܬܳܐ ܠܗܳܢܳܐ ܕܠܳܐ ܗ̱ܘܳܐ ܘܠܳܐ ܛܳܡܰܪ ܗ̱ܘܳܐ ܠܶܗ ܒܰܐܪܥܳܐ܆ ܐܰܝܟܰܢܳܐ ܕܢܶܩܢܶܐ ܦܰܪܶܗ̱ܣܺܝܰܐ ܘܢܺܐܡܰܪ ܠܘܳܬ ܡܳܪܝܳܐ ܗܰܘ ܕܰܪܕܳܝܗ̱ܝ ܆ ܡܶܢ ܒܳܬܰܪ ܒܽܘܩܝܳܐ ܕܰܡܚܽܘܬܳܐ ܗܳܝ ܬܡܺܝܗܬܳܐ ܕܫܽܘܚܢܳܐ܆ ܒܶܐܣܟܺܡܳܐ ܡܰܢ ܕܡܰܘܕܝܳܢܽܘܬܳܐ܆ ܠܘܳܬ ܡܰܠܦܳܢܽܘܬܳܐ ܕܶܝܢ ܘܛܽܘܦܣܳܐ ܕܺܝܠܰܢ܆ ܐܶܢ ܣܳܡܶܬ ܕܰܗܒܳܐ ܚܰܝܠܳܐ ܕܺܝܠܝ܆ ܐܶܢ ܕܶܝܢ ܐܳܦ ܥܰܠ ܟܺܐܦܳܐ ܣܰܓܺܝܰܐܬ̣ ܕܡܰܝ̈ܳܐ ܐܶܬܬܰܟܠܶܬ܆ ܐܶܢ ܕܶܝܢ ܐܳܦ ܚܕܺܝܬ ܟܰܕ ܥܽܘܬܪܳܐ ܣܰܓܺܝܳܐܐ ܗܘ̣ܳܐ ܠܺܝ܆ ܘܶܐܢ ܥܰܠ ܠܳܐ ܡܶܬܡܰܢ̈ܝܳܢܶܐ ܣܳܡܶܬ ܐܺܝܕܝ܆ ܘܳܐܦ ܗܳܕܶܐ ܠܳܐ ܢܳܡܽܘܣܳܝܬܳܐ ܪܰܒܬܳܐ ܐܰܪܰܐ ܬܶܬܚܫܶܒ ܠܺܝ^[10]. ܘܕܰܡܒܰܣܰܪ ܗ̱ܘܳܐ ܡܰܢ ܘܫܳܐܶܛ ܠܗܽܘܠܶܐ ܗܳܝ ܕܡܰܪ̈ܗܳܛܶܐ܆ ܒܝܰܕ ܗܳܠܶܝܢ ܚܰܘܺܝ. ܕܒܰܐܝܠܶܝܢ ܕܶܝܢ ܢܰܦ̈ܩܳܬܳܐ ܡܶܬܚܰܫܰܚ ܗ̱ܘܳܐ܆ ܟܰܕ ܡܶܬܚܰܦܰܛ ܗ̱ܘܳܐ ܠܡܶܬܡܰܣܟܳܢܽܘ ܒܪܽܘܚ܆ ܘܰܠܡܶܥܬܰܪ ܒܰܫܦܺܝܥܽܘܬܳܐ ܘܪܰܒܽܘܬ ܢܰܦܫܳܐ ܘܰܒܪܶܚܡܰܬ ܐ̱ܢܳܫܽܘܬܳܐ܆ ܒܗܳܠܶܝܢ ܕܒܳܬܰܪܟܶܢ ܫܡܰܥܳܝܗ̱ܝ ܕܳܐܡܰܪ. ܠܒܰܪ ܕܶܝܢ ܠܳܐ ܒܳܐܶܬ̣ ܗ̱ܘܳܐ ܐܰܟܣܢܳܝܳܐ. ܘܬܰܪܥܳܐ ܕܺܝܠܝ ܠܟܽܠ ‌ܐ̱ܢܳܫ ܦܬܺܝܚ ܗ̱ܘܳܐ. ܐܶܢ ܕܶܝܢ ܘܰܐܪܦܺܝܬ̣ ܠܰܡܚܺܝܠܳܐ ܕܢܶܦܽܘܩ ܡܶܢ ܬܰܪܥܝ ܒܥܽܘܒܳܐ ܣܦܺܝܩܳܐ^[11]. ܐܶܫܛܳܪܳܐ ܕܶܝܢ ܗܰܘ ܕܺܐܝܬ ܗ̱ܘܳܐ ܠܺܝ ܥܰܠ ‌ܐ̱ܢܳܫ܆ ܐܶܢ ܠܰܘ ܟܰܕ ܬܠܰܚܬܶܗ ܝܰܗ̱ܒܬܶܗ܆ ܟܰܕ ܘܠܳܐ ܡܶܕܶܡ ܫܶܩܠܶܬ ܡܶܢ ܚܰܝܳܒܳܐ. ܘܰܩܕܳܡ ܩܰܠܺܝܠ ‌ܐܳܡܰܪ. ܐܶܢ ܕܶܝܢ ܐܳܦ ܠܰܚܡܳܐ ܕܺܝܠܝ ܐܶܟܠܶܬ ܒܰܠܚܽܘܕܰܝ܆ ܘܠܳܐ ܫܰܘܬܦܶܬ ܠܝܰܬܡܳܐ^[12].

ܒܶܗ ܟܰܕ ܒܶܗ ܒܰܙܢܳܐ ܐܳܦ ܐܰܒܪܳܗܳܡ ܗܰܘ ܪܺܝܫ ܐܰܒܳܗ̈ܳܬܳܐ ܥܰܬܺܝܪ ܗ̱ܘܳܐ. ܟܰܕ ܡܶܫܬܰܦܰܥ ܗ̱ܘܳܐ ܡܰܢ ܒܩܰܢܳܝܽܘܬܳܐ ܕܟܽܠ ܓܢܶܤ܆ ܡܶܣܟܺܝܢ ܗ̱ܘܳܐ ܕܶܝܢ ܒܬܰܪܥܺܝܬܳܐ. ܘܰܒܟܽܠ ܝܽܘܡ ܠܗܽܘܠܶܐ ܡܒܰܨܰܪ ܗ̱ܘܳܐ. ܘܟܰܕ ܟܽܠܶܗ ܗܳܢܳܐ ܡܶܢ ܪܶܓܬܳܐ ܕܗܳܝ ܕܝܰܬܺܝܪܳܐ ܢܶܩܢܶܐ ܪܰܚܺܝܩ ܗ̱ܘܳܐ܆ ܐܰܝܟܰܢܳܐ ܕܡܶܢ ܒܳܬܰܪ ܕܥܰܡ ܚܰܡܫܳܐ ܡܰܠ̈ܟܶܐ ܐܰܩܪܶܒ܆ ܘܰܙܟܳܐ ܐܶܢܽܘܢ ܒܰܩܪܳܒܳܐ ܘܰܒܬܰܟܬܽܘܫܳܐ܆ ܗܳܢܽܘܢ ܕܥܰܠ ܣܕܽܘܡ ܘܥܰܠ ܥܰܡܽܘܪܳܐ ܐܶܬܰܘ ܒܰܩܪܳܒܳܐ ܘܰܫܒܰܘ ܐܶܢܶܝܢ܆ ܥܰܠ ܒ̈ܶܙܬܶܐ ܢܶܒܣܶܐ܆ ܘܰܠܘܳܬ ܡܰܠܟܳܐ ܕܰܣܕܽܘܡ ܗܰܘ ܕܶܐܫܬܘܺܝ ܠܣܽܘܝܳܥܳܐ ܕܡܶܢܶܗ܆ ܘܨܳܒܶܐ ܗ̱ܘܳܐ ܕܰܢܝܰܩܪܺܝܘܗ̱ܝ ܒܦܶܠܓܽܘܬܳܐ ܘܰܡܢܳܬܳܐ ܕܡܶܢ ܒ̈ܶܙܬܶܐ ܢܺܐܡܰܪ܆ ܐܶ݀ܦܫܽܘܛ ܐܺܝܕܝ ܠܘܳܬ ܐܰ‌ܠܳܗܳܐ ܡܪܰܝܡܳܐ܆ ܗܰܘ ܕܰܒ̣ܪܳܐ ܠܰܫܡܰܝܳܐ ܘܠܰܐܪܥܳܐ܆ ܐܶܢ ܡܶܢ ܚܽܘܛܳܐ ܥܕܰܡܳܐ ܠܥܶܪܰܩܬܳܐ ܕܰܡܣܳܢܳܐ ܐܶ݀ܣܰܒ ܡܶܢ ܟܽܠܗܶܝܢ ܗܳܠܶܝܢ ܕܺܝܠܳܟ܆ ܕܠܳܐ ܬܺܐܡܰܪ ܕܶܐܢܳܐ ܐܰܥܬܰܪܬܶܗ ܠܰܐܒܪܳܗܳܡ܆ ܤܛܰܪ ܡܶܢ ܗܳܠܶܝܢ ܕܶܐܟܰܠܘ ܥܠܰܝ̈ܡܶܐ܆ ܘܰܡܢܳܬܳܐ ܕܓܰܒܪ̈ܶܐ ܗܳܢܽܘܢ ܕܶܐܬܰܘ ܥܰܡܝ^[13]. ܕܬܰܪܥܺܝܬܳܐ ܕܺܐܝܬܶܝܗ̇ ܡܶܣܟܺܢܬܳܐ ܒܪܽܘܚ ܐܰܝܟ ܕܒܰܫܪܳܪܳܐ܆ ܐܺܝܬܰܝܗܽܘܢ ܣܽܘ̈ܟܳܠܶܐ ܗܳܠܶܝܢ ܘܡ̈ܶܠܶܐ. ܥܰܠ ܡܢܳܬܳܐ ܐܳܡܰܪ ܗܳܝ ܕܠܺܝ ܙܳܕܩܳܐ܆ ܒܪܰܒܽܘܬ ܢܰܦܫܳܐ ܡܰܒܣܶܐ ܐ̱ܢܳܐ. ܠܰܛܠܳܝ̈ܶܐ ܕܶܝܢ ܕܺܝܠܝ ܘܰܒ̈ܢܰܝ ܒܰܝܬܳܐ܆ ܬܶܣܦܰܩ ܗܳܝ ܕܶܐܬܬܰܪܣܺܝܘ ܒܰܠܚܽܘܕ. ܠܗܳܢܽܘܢ ܕܶܝܢ ܟܺܝܬ ܕܶܐܙܰܠܘ ܐܰܟܚܕܳܐ ܥܰܡܝ ܘܣܰܝܥܰܘ܆ ܗܰܘ ܡܳܐ ܕܡܳܛܶܐ ܠܗܽܘܢ ܡܶܢ ܒ̈ܶܙܬܶܐ܆ ܢܶܬܺܝܗܶܒ ܠܗܽܘܢ. ܣܪܺܝܩܬܳܐ ܗܝ ܓܶܝܪ ܗܳܝ ܕܡܶܢ ܫܽܘܒܚܳܐ ܣܪܺܝܩܳܐ܆ ܐܶ݀ܬܚܙܶܐ ܪܰܒ ܢܰܦܫܳܐ ܘܰܡܫܰܟܢܳܢܳܐ܆ ܐܳܦ ܒܗܳܠܶܝܢ ܢܽܘܟܪ̈ܳܝܳܬܳܐ. ܫܰܦܺܝܪ ܓܶܝܪ ܐ̱ܢܳܫ ܒܗܳܠܶܝܢ ܒܰܝ̈ܬܳܝܳܬܳܐ ܕܺܝܠܶܗ ܦܺܝܠܳܣܽܘܦܺܝܣܳܐ ܥܳܒܶܕ.

ܗܳܕܶܐ ܐܳܦ ܦܰܘܠܽܘܤ ܥܳܒܶܕ ܗ̱ܘܳܐ. ܟܰܕ ܠܗܳܢܽܘܢ ܡܰܢ ܕܶܐܘܰܢܓܶܠܺܝܽܘܢ ܡܰܟܪܙܺܝܢ ܗ̱ܘܰܘ܆ ܘܰܠܗܳܢܽܘܢ ܕܰܠܘܳܬ ܡܰܕܒܚܳܐ ܡܶܬܐܰܡܢܺܝܢ ܗ̱ܘܰܘ܆ ܕܢܺܐܚܽܘܢ ܡܶܢ ܐܶܘܰܢܓܶܠܺܝܽܘܢ ܘܡܶܢ ܡܰܕܒܚܳܐ ܡܦܰܩܶܕ ܗ̱ܘܳܐ^[14]. ܗܽܘ ܕܶܝܢ ܠܗܳܝ ܕܠܶܗ ܡܳܛܝܳܐ ܗ̱ܘܳܬ ܫܳܒܶܩ ܗ̱ܘܳܐ ܡܥܰܠܝܳܐܺܝܬ ܘܳܐܡܰܪ܆ ܐܶܢܳܐ ܕܶܝܢ ܠܳܐ ܐܶܬܚܰܫܚܶܬ ܘܳܐܦܠܳܐ ܒܰܚܕܳܐ ܡܶܢ ܗܳܠܶܝܢ. ܘܰܐܝܢܳܐ ܗܳܟܺܝܠ ‌ܐܰܓܪܳܐ ܐܺܝܬܰܘܗ̱ܝ ܕܺܝܠܝ. ܐܰܝܟܰܢܳܐ ܕܟܰܕ ܡܣܰܒܰܪ ܐ̱ܢܳܐ ܕܠܳܐ ܢܰܦܩ̈ܳܬܳܐ ܐܶ݀ܥܒܕܺܝܘܗ̱ܝ ܠܶܐܘܰܢܓܶܠܺܝܽܘܢ ܕܰܡܫܺܝܚܳܐ܆ ܒܗܳܝ ܕܠܳܐ ܐܶ݀ܬܚܰܫܰܚ ܒܫܽܘܠܛܳܢܳܐ ܕܺܝܠܝ ܒܶܐܘܰܢܓܶܠܺܝܽܘܢ^[15]. ܟܰܕ ܓܶܝܪ ܒܗܳܠܶܝܢ ܕܣܺܝ̈ܡܳܢ ܒܫܽܘܠܛܳܢܶܗ ܡܰܗܡܶܐ ܐ̱ܢܳܫ܆ ܡܩܰܠܣܰܐ ܗ̱ܘ ܥܰܠ ܪܰܒܽܘܬ ܢܰܦܫܳܐ. ܗܰܘ ܕܶܝܢ ܕܳܐܦ ܥܰܠ ܗܳܠܶܝܢ ܕܠܰܐ̱ܚܪ̈ܳܢܶܐ ܙܳܕܩ̈ܳܢ ܠܳܐ ܚܰܝܽܘܣܬܳܢܳܐܺܝܬ ܐܺܝܬ ܠܶܗ܆ ܒܰܕܡܽܘܬ ܣܳܐܶܡ ܢܳܡܽܘܣܳܐ ܠܳܐ ܗܽܘܠܳܢܳܝܳܐ܆ ܡܰܣܠܝܰܐ ܗ̱ܘ ܥܰܠ ܦܝܠܘܣܘܦܝܐ ܕܠܳܐ ܟܳܐܶܒ ܠܳܗ̇.

ܕܢܦܩܬܢܐܺܝܬ ܕܶܝܢ ܐܺܝܬ ܗ̱ܘܳܐ ܠܶܗ ܡܶܛܽܠ ܥܽܘܬܪܶܗ ܠܰܐܒܪܳܗܳܡ ܪܺܝܫ ܐܰܒܳܗ̈ܳܬܳܐ܆ ܣܳܗܕܳܐ ܪܶܚܡܰܬ̣ ܥܰܡܠܳܐ ܗܳܝ ܕܪܶܚܡܰܬ ܐܰܟܣܢܳܝܽܘܬܳܐ܆ ܐܰܝܟܰܢܳܐ ܕܳܐܦ ܒܛܰܗܪܳܐ ܨܰܚܺܝܚܳܐ ܠܘܳܬ ܬܰܪܥܳܐ ܕܡܰܫܟܢܶܗ ܢܶܬܶܒ ܘܢܶܪܗܶܐ^[16]܆ ܕܕܰܠܡܳܐ ܢܨܽܘܕ ܐ̱ܢܳܫ ܡܶܢ ܐܰܟܣ̈ܢܳܝܶܐ ܕܥܳܒܪܺܝܢ ܗ̱ܘܰܘ. ܗܳܟܰܢܳܐ ܟܺܝܬ܆ ܐܳܦ ܛܥܳܬܶܗ ܕܰܠܡܰܠܰܐܟ̈ܶܐ ܩܰܒܶܠ ‌ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܡܰܠܽܘܢ ܕܶܝܢ ܠܶܗ ܠܰܐܠܳܗܳܐ܆ ܒܰܚܙܳܬܳܐ ܕܓܰܒܪ̈ܶܐ ܘܰܒܩܰܕܺܝܡܽܘܬ ܐܶܣܟܺܡܳܐ ܕܡܰܠܰܐܟ̈ܶܐ^[17].

ܗܳܕܐ ܗܝ ܗܳܝ ܡܶܣܟܺܢܽܘܬܳܐ ܕܪܽܘܚ ܕܰܡܩܰܒܠܳܐ ܛܽܘܒܳܐ. ܗܳܕܶܐ ܐܺܝܬܰܘܗ̱ܝ܆ ܗܰܘ ܥܽܘܬܪܳܐ ܠܳܐ ܥܰܬܺܝܪܳܐ ܘܰܕܫܰܦܺܝܪ ܡܶܫܬܰܥܒܰܕ ܠܡܳܪ̈ܰܘܗ̱ܝ܆ ܘܰܐܝܟ ܡܫܰܡܫܳܢܳܐ ܘܥܰܒܕܳܐ܆ ܠܰܥ̈ܒܳܕܶܐ ܛܳܒ̈ܶܐ ܡܫܰܡܶܫ. ܐܰܝܟܰܢܳܐ ܕܥܽܘܬܪܳܐ ܟܺܝܬ ܗܰܘ ܕܫܰܠܺܝܛ ܘܰܥܒܺܝܕ ܡܳܪܳܐ ܕܗܰܘ ܕܰܐܚܺܝܕ ܠܶܗ܆ ܘܰܐܣܺܝܪܳܐ ܐܺܝܬܰܘܗ̱ܝ ܠܶܗ܆ ܟܰܕ ܦܟ̣ܺܝܪ ܒܟܶܒ̈ܠܶܐ ܕܪܶܓܬܳܐ ܕܪܶܚܡܰܬ ܟܶܣܦܳܐ܆ ܐܰܝܟܰܢܳܐ ܕܳܐܦܠܳܐ ܢܶܬܡܨܶܐ ܕܢܶܦܫܽܘܛ ܐܺܝܕܶܗ ܘܢܶܬܶܠ ܠܐ̱ܢܳܫ ܫܳܡܽܘܢܳܐ ܚܰܕ܆ ܗܳܢܳܐ ܠܗܰܘ ܕܰܩܢܶܐ ܠܶܗ ܥܒܰܕ ܩܶܢܝܳܢܳܐ܆ ܘܰܕܗܰܘ ܕܡܶܣܬܒܰܪ ܗ̱ܘܳܐ ܡܳܪܶܗ ܗܘ̣ܳܐ ܡܳܪܳܐ. ܟܰܕ ܠܗܳܕܶܐ ܥܰܒܕܽܘܬܳܐ ܡܬܰܚܢܳܢܺܝܬܳܐ ܘܣܰܓܺܝ ܕܳܘܺܝܬܳܐ ܡܰܟܶܤ ܗ̱ܘܳܐ ܦܳܪܽܘܩܰܢ ܐܳܡܰܪ ܗ̱ܘܳܐ܆ ܠܳܐ ܡܶܫܟܚܺܝܢ ܐܢ̱ܬܽܘܢ ܠܰܐܠܳܗܳܐ ܠܡܶܦܠܰܚ ܥܰܒܕܽܘܬܳܐ ܘܰܠܡܳܡܽܘܢܳܐ^[18]. ܡܶܛܽܠܗܳܕܶܐ ܗܳܟܺܝܠ܆ ܠܰܘ ܗܳܝ ܕܢܶܥܬܰܪ ܐ̱ܢܳܫ ܟܳܠܝܳܐ܆ ܐܶܠܳܐ ܗܳܝ ܕܢܶܦܠܰܚ ܥܰܒܕܽܘܬܳܐ ܠܪܶܓܬܳܐ ܕܥܽܘܬܪܳܐ܆ ܘܢܶܬܢܓܶܕ ܡܶܢܳܗ̇ ܐܰܝܟ ܥܰܒܕܳܐ ܫܰܦܠܳܐ.

ܠܳܐ ܗܳܟܺܝܠ ܢܶܬܚܰܒ ܒܬܰܪ̈ܥܝܳܬܰܢ ܘܢܶܗܘܶܐ ܟܡܺܝܪ̈ܶܐ܆ ܐܰܘ ܗܳܝ ܕܰܠܩܽܘܒܠܳܐ ܢܶܓܚܰܟ܆ ܐܰܝܟ ܗܰܘ ܕܰܣܪܺܝܩܳܐܺܝܬ ܗܳܠܶܝܢ ܒܓܺܝ̈ܠܳܢ܆ ܐܶܡܰܬܝ ܕܢܶܫܡܰܥ܆ ܒܪܰܡ ܘܳܝ ܠܟܽܘܢ ܥܰܬܺܝܪ̈ܶܐ ܡܶܛܽܠ ܕܩܰܒܶܠܬܽܘܢ ܒܽܘܝܳܐܟܽܘܢ^[19]܆ ܘܰܕܥܰܣܩܳܐܺܝܬ ܢܶܥܽܘܠ ܥܰܬܺܝܪܳܐ ܠܡܰܠܟܽܘܬܳܐ ܕܰܫܡܰܝܳܐ^[20]. ܠܰܘ ܓܶܝܪ ܒܟܽܠܗܽܘܢ ܗܳܢܽܘܢ ܕܒܰܡܫܰܪܬܚܽܘܬܳܐ ܐܺܝܬܰܝܗܽܘܢ ܓܳܫܦܳܐ ܗܺܝ ܡܶܠܬܳܐ܆ ܐܶܠܳܐ ܒܗܳܢܽܘܢ ܒܰܠܚܽܘܕܰܝܗܽܘܢ܆ ܒܗܳܢܽܘܢ ܕܥܰܠ ܡܰܪ̈ܗܳܛܶܐ ܘܩܶܢ̈ܝܳܢܶܐ ܟܽܠܶܗ ܪܶܥܝܳܢܗܽܘܢ ܣܳܝܡܺܝܢ܆ ܘܣܰܪܺܝܟܺܝܢ ܒܗܽܘܢ ܒܬܰܪ̈ܥܝܳܬܗܽܘܢ܆ ܘܠܳܐ ܡܶܣܟܺܢܺܝܢ ܒܪܽܘܚ.

ܘܰܠܗܳܕܶܐ ܡܚܰܘܶܐ ܡܰܪܩܘܤ܆ ܟܰܕ ܝܰܬܺܝܪ ܢܰܗܺܝܪܳܐܺܝܬ ܐܰܫܠܡܳܗ̇ ܠܬܰܪܥܺܝܬܶܗ ܕܦܳܪܽܘܩܰܢ. ܘܰܟܬܰܒ ܗܳܟܰܢܳܐ. ܐܰܝܟܰܢܳܐ ܥܣܺܝܩܬܳܐ ܐܺܝܬܶܝܗ̇ ܕܗܳܢܽܘܢ ܕܰܬܟܺܝܠܺܝܢ ܥܰܠ ܡܰܪ̈ܗܳܛܶܐ ܢܶܥܠܽܘܢ ܠܡܰܠܟܽܘܬܳܐ ܕܰܐ‌ܠܳܗܳܐ^[21]. ܡܳܕܶܝܢ ܠܰܘ ܗܳܝ ܕܢܶܗܘܶܐ ܐܺܝܬܰܘܗ̱ܝ ܐ̱ܢܳܫ ܡܳܪܳܐ ܕܡܰܪ̈ܗܳܛܶܐ܆ ܐܶܠܳܐ ܗܳܝ ܕܢܶܬܬܟܶܠ ܥܰܠ ܡܰܪ̈ܗܳܛܶܐ܆ ܐܳܚܕܳܐ ܠܡܰܠܟܽܘܬܳܐ ܕܰܫܡܰܝܳܐ. ܡܰܢܽܘ ܕܶܝܢ ܐܺܝܬܰܘܗ̱ܝ ܗܰܘ ܕܰܬܟܺܝܠ ܥܰܠ ܡܰܪ̈ܗܳܛܶܐ. ܗܰܘ ܕܠܳܐ ܫܳܡܰܥ ܠܒܰܪ̱ܬ ܩܠܶܗ ܕܡܳܪܰܢ ܕܳܐܡܪܳܐ܆ ܠܳܐ ܬܣܺܝܡܽܘܢ ܠܟܽܘܢ ܣܺܝ̈ܡܳܬܳܐ ܒܰܐܪܥܳܐ܆ ܐܰܝܟܳܐ ܕܣܳܣܳܐ ܘܳܐܟ̣ܠܳܐ ܡܚܰܒܠܺܝܢ܆ ܘܰܐܝܟܳܐ ܕܓܰܢܳܒ̈ܶܐ ܦܳܠܫܺܝܢ ܘܓܳܢܒܺܝܢ܆ ܣܺܝܡܘ ܠܟܽܘܢ ܕܶܝܢ ܣܺܝ̈ܡܳܬܳܐ ܒܰܫܡܰܝܳܐ܆ ܐܰܝܟܳܐ ܕܠܳܐ ܣܳܣܳܐ ܘܠܳܐ ܐܳܟ̣ܠܳܐ ܡܚܰܒܠܺܝܢ܆ ܘܰܐܝܟܳܐ ܕܓܰܢܳܒ̈ܶܐ ܠܳܐ ܦܳܠܫܺܝܢ ܘܳܐܦܠܳܐ ܓܳܢܒܺܝܢ. ܐܰܝܟܳܐ ܓܶܝܪ ܕܺܐܝܬܶܝܗ̇ ܣܺܝܡܬܳܟ܆ ܬܰܡܳܢ ܢܶܗܘܶܐ ܐܳܦ ܠܶܒܳܟ^[22].

ܠܘܳܬ ܗܳܠܶܝܢ ܕܶܝܢ ܟܒܰܪ ܬܺܐܡܰܪ܆ ܡܳܢܳܐ ܗܳܟܺܝܠ ‌ܐܶ݀ܫܒܽܘܩ ܠܝܳܪ̈ܽܘܬܶܐ ܕܺܝܠܝ. ܟܽܠܗܶܝܢ ܗܳܠܶܝܢ܆ ܟܡܳܐ ܕܰܫܒܰܩ ܗܰܘ ܦܝܠܘܣܘܦܐ ܪܰܒܳܐ ܐܺܝܘܒ܆ ܘܪܳܚܶܡ ܐܰ‌ܠܳܗܳܐ ܐܰܒܪܳܗܳܡ ܘܺܐܝܣܚܳܩ܆ ܒܳܗ̇ ܒܰܕܡܽܘܬܳܐ ܐܳܦ ܝܥܩܘܒ. ܠܳܐ ܓܶܝܪ ܢܶܚܣܰܪ ܠܳܗ̇ ܠܰܫܦܺܝܥܽܘܬܳܐ ܕܛܰܝܒܽܘܬܶܗ ܕܰܐ‌ܠܳܗܳܐ܆ ܠܘܳܬ ܗܳܝ ܕܰܬܡܰܪܶܐ ܒܰܫܦܺܝܥܽܘܬ ܡܰܘܗܰܒܬܳܟ ܕܺܝܠܳܟ܆ ܘܬܶܬܶܠ ܠܳܟ ܪ̈ܶܒܽܘ ܡܥܺܝ̈ܢܶܐ ܕܡܰܪ̈ܗܳܛܶܐ܆ ܐܶܡܰܬܝ ܕܥܰܬܺܝܪܳܐ ܬܶܗܘܶܐ ܐܺܝܬܰܝܟ܆ ܘܰܒܢܰܦ̈ܩܳܬܳܐ ܫܰܦܺܝܪ̈ܳܬ ܕܶܚܠܬܳܐ ܡܶܣܟܺܝܢ ܐܰܢ̱ܬ ܒܪܽܘܚ. ܡܶܢ ܐܰܝܟܳܐ ܓܶܝܪ ܐܶܡܰܪ ܠܺܝ ܝܰܬܺܝܪ ܦܳܩܚܳܐ. ܡܶܢ ܣܺܝܡܬܳܐ ܫܡܰܝܳܢܺܝܬܳܐ ܠܡܶܫܒܰܩ ܝܳܪܬܽܘܬܳܐ ܠܰܒ̈ܢܰܝܟ܆ ܐܰܘ ܡܶܢ ܗܳܝ ܕܒܰܐܪܥܳܐ ܡܶܬܛܰܡܪܳܐ܆ ܗܳܝ ܕܥܰܡܳܗ̇ ܛܡܺܝܪ ܐܳܦ ܠܶܒܳܟ. ܩܰܕܺܝܡܳܐ ܝܺܕܺܝܥܳܐ ܕܡܶܢ ܗܳܝ ܫܡܰܝܳܢܺܝܬܳܐ. ܐܳܦ ܓܶܝܪ ܡܶܢ ܬܰܡܳܢ ܗܳܝ ܕܢܶܥܬܰܪ ܙܗܺܝܪܳܐܺܝܬ ܘܰܕܢܶܬܡܰܣܟܰܢ ܡܩܰܠܣܳܐܺܝܬ܆ ܐܰܝܟܰܢܳܐ ܕܢܳܡܽܘܣܳܐܺܝܬ ܢܶܥܬܰܪ.

ܟܰܕ ܬܰܡܳܢ ܐܺܝܬ ܗ̱ܘܳܐ ܠܗܽܘܢ ܗܰܘܢܗܽܘܢ ܕܰܩܒܺܝܥ ܠܗܳܢܽܘܢ ܕܒܶܝܬ ܐܰܒܪܳܗܳܡ܆ ܝܳܪܬܽܘܬܳܐ ܕܡܰܠܝܳܐ ܒܽܘܪܟܬܳܐ ܡܫܰܕܪܺܝܢ ܗ̱ܘܰܘ ܥܰܠ ܗܳܢܽܘܢ ܕܡܶܢܗܽܘܢ. ܫܡܰܥܳܝܗ̱ܝ ܓܶܝܪ ܠܺܐܝܣܚܳܩ ܟܰܕ ܠܝܰܥܩܘܒ ܡܒܰܪܶܟ ܗ̱ܘܳܐ܆ ܘܡܶܢ ܫܡܰܝܳܐ ܥܳܒܶܕ ܗ̱ܘܳܐ ܠܶܗ ܠܫܽܘܪܳܝܳܐ ܕܒܽܘܪܟܬܳܐ ܐܰܘܟܺܝܬ ܕܝܳܪܬܽܘܬܳܐ܆ ܢܶܬܶܠ ܠܳܟ ܐܰ‌ܠܳܗܳܐ ܡܶܢ ܛܰܠܳܐ ܕܰܫܡܰܝܳܐ܆ ܘܡܶܢ ܫܰܡܺܝܢܽܘܬܳܗ̇ ܕܰܐܪܥܳܐ^[23]. ܠܗܳܠܶܝܢ ܓܶܝܪ ܫܡܰܝܳܢ̈ܝܬܳܐ ܢܳܩ̈ܦܳܢ ܥܰܡܳܗ̇ ܟܰܕ ܥܰܡܳܗ̇ ܕܒܽܘܪܟܬܳܐ܆ ܐܳܦ ܟܽܠܗܶܝܢ ܗܳܠܶܝܢ ܕܡܶܢ ܐܰܪܥܳܐ ܐܺܝܬ ܠܗܶܝܢ ܥܰܠ̈ܠܳܬܳܐ. ܡܶܛܽܠ ܟܺܝܬ ܕܰܠܗܳܢܽܘܢ ܕܒܳܥܶܝܢ ܡܰܠܟܽܘܬܶܗ ܕܰܐ‌ܠܳܗܳܐ ܘܙܰܕܺܝܩܽܘܬܶܗ܆ ܟܽܠܗܶܝܢ ܗܳܠܶܝܢ ܐ̱ܚܪ̈ܳܢܝܳܬܳܐ ܡܶܬܬܰܘܣ̈ܦܳܢ^[24]. ܠܥܺܣܽܘ ܕܶܝܢ ܟܺܝܬ ܕܶܐܬܚܙܺܝ ܠܳܐ ܫܳܘܝܳܐ ܕܒܽܘܪܟܬܳܐ܆ ܗܳܠܶܝܢ ܕܛܽܘܦܣܳܐ ܡܶܬܗܰܦ̈ܟܳܢ ܠܶܗ܆ ܘܡܶܢ ܐܰܪܥܳܐ ܗܳܘܶܝܢ ܠܶܗ ܫܽܘܪ̈ܳܝܶܐ ܕܝܳܪܬܽܘܬܳܐ. ܡܳܢܳܐ ܓܶܝܪ ܐܶܡܰܪ ܠܘܳܬܶܗ ܐܰܒܽܘܗ̱ܝ. ܗܳܐ ܡܶܢ ܫܰܡܺܝܢܽܘܬܳܗ̇ ܕܰܐܪܥܳܐ ܢܶܗܘܶܐ ܡܰܥܡܪܳܟ܆ ܘܡܶܢ ܛܰܠܐ ܕܰܫܡܰܝܳܐ ܡܶܢ ܠܥܶܠ^[25]. ܚܳܙܶܐ ܐܰܢ̱ܬ ܐܰܝܟܰܢܳܐ ܗܳܪܟܳܐ ܩܳܕܡ̈ܳܢ ܗܳܠܶܝܢ ܕܰܠܬܰܚܬ ܠܗܳܠܶܝܢ ܕܰܠܥܶܠ܆ ܘܳܐܦܠܳܐ ܗܳܠܶܝܢ ܣܦܺܝ̈ܩܳܢ ܟܽܠ ܟܽܠܶܗ ܡܶܢ ܗܳܠܶܝܢ ܕܰܠܥܶܠ܆ ܡܶܛܽܠ ܫܦܺܝܥܽܘܬܳܐ ܕܒܰܣܺܝܡܽܘܬܳܐ ܐܰ‌ܠܳܗܳܝܬܳܐ܆ ܗܳܝ ܕܡܰܚܬܳܐ ܡܶܛܪܳܐ ܥܰܠ ܟܺܐܢ̈ܶܐ ܘܥܰܠ ܥܰܘܴ̈ܠܶܐ܆ ܘܡܰܕܢܚܳܐ ܫܶܡܫܳܐ ܥܰܠ ܒܺܝ̈ܫܶܐ ܟܺܝܬ ܘܥܰܠ ܛܳܒ̈ܶܐ^[26]. ܐܶܬܒܰܩܳܐ ܕܶܝܢ ܐܳܦ ܒܚܰܬܺܝܬܽܘܬܳܐ ܘܥܳܗܢܽܘܬܳܐ ܕܗܳܝ ܕܰܐܝܟ ܕܫܳܘܝܳܐ ܕܡ̈ܶܠܶܐ ܕܰܟܬܳܒܳܐ ܐܰ‌ܠܳܗܳܝܳܐ. ܥܰܠ ܗܳܢܽܘܢ ܡܰܢ ܓܶܝܪ ܕܡܶܢ ܫܡܰܝܳܐ ܐܺܝܬ ܠܗܽܘܢ ܫܽܘܪܳܝܳܐ܆ ܐܰܝܟ ܡܶܠܬܳܐ ܕܒܽܘܪܟܬܳܐ ܗܳܝ ܕܩܰܕܡܰܬ̣ ܐܶܬܬܣܺܝܡܰܬ̣ ܐܶܡܰܪ܆ ܢܶܬܶܠ ܠܳܟ ܐܰ‌ܠܳܗܳܐ ܡܶܢ ܛܰܠܐ ܕܰܫܡܰܝܳܐ³. ܥܰܠ ܗܳܢܽܘܢ ܕܶܝܢ ܕܰܡܫܰܪܶܝܢ ܡܶܢ ܐܰܪܥܳܐ܆ ܠܳܐ ܩܳܕܡܳܐ ܡܶܬܬܣܺܝܡܳܐ ܗܳܝ ܕܢܶܬܶܠ ܠܳܟ ܐܰ‌ܠܳܗܳܐ. ܐܶܠܳܐ ܗܳܐ ܡܶܢ ܫܰܡܺܝܢܽܘܬܳܗ̇ ܕܰܐܪܥܳܐ ܢܶܗܘܶܐ ܡܰܥܡܪܳܟ^[27]. ܟܰܕ ܐܺܝܬ ܠܳܟ ܠܳܗ̇ ܒܰܠܚܽܘܕܶܝܗ̇ ܒܰܣܺܝܡܽܘܬܶܗ ܕܰܐ‌ܠܳܗܳܐ ܗܳܝ ܕܥܰܠ ܟܽܠ܆ ܘܠܰܘ ܬܰܦܢܟܳܗ̇ ܘܰܡܥܰܠܝܽܘܬܳܗ̇ ܕܒܽܘܪܟܬܳܐ.

ܛܽܘܒܰܝܗܽܘܢ ܗܳܟܺܝܠ ܠܡܶܣ̈ܟܺܢܶܐ ܒܪܽܘܚ ܘܰܠܡܰܟܺܝ̈ܟܶܐ ܒܢܰܦܫܳܐ ܘܠܰܡܡܰܫ̈ܚܶܐ ܒܰܙܢܳܐ܆ ܘܰܕܠܳܐ ܡܥܰܒܶܝܢ ܠܳܗ̇ ܠܬܰܪܥܺܝܬܗܽܘܢ ܒܰܢܦܺܝܚܽܘܬܶܗ ܕܥܽܘܬܪܳܐ܆ ܘܠܳܐ ܣܰܪܺܝܟܺܝܢ ܒܗܳܠܶܝܢ ܕܠܳܐ ܩܳܝ̈ܡܳܢ ܘܪ̈ܳܕܝܳܢ܆ ܐܰܘ ܠܗܳܢܽܘܢ ܕܡܶܛܽܠ ܣܳܝܽܘܡܽܘܬ ܢܳܡܽܘܣܳܐ ܕܪܽܘܚܳܐ ܩܰܕܺܝܫܳܐ ܡܶܣܟܺܢܺܝܢ܆ ܐܰܝܟ ܗܳܝ ܕܰܐܡܺܝܪܳܐ ܡܶܢ ܦܳܪܽܘܩܰܢ ܠܬܰܠ̈ܡܺܝܕܶܐ܆ ܕܡ̈ܶܠܶܐ ܗܳܠܶܝܢ ܕܡܰܠܠܶܬ ܠܟܽܘܢ ܪܽܘܚܳܐ ܐܺܝܬܰܝܗܶܝܢ ܘܚܰܝ̈ܶܐ ܐܺܝܬܰܝܗܶܝܢ^[28]. ܫܡܳܐ ܓܶܝܪ ܕܪܽܘܚܳܐ ܟܰܕ ܠܳܐ ܡܬܰܚܡܳܐܺܝܬ ܣܺܝܡ ܒܰܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܟܰܕ ܠܳܐ ܡܘܣܦ ܣܺܝܡ ܥܰܡܶܗ ܡܶܕܶܡ܆ ܐܰܝܟ ܕܰܒܣܽܘܓܳܐܐ. ܐܰܘ ܠܢܰܦܫܳܐ ܡܶܬܗܰܘܢܳܢܺܝܬܳܐ ܕܒܰܪܢܳܫܳܐ ܡܫܰܘܕܰܥ܆ ܐܰܘ ܠܗܰܘ ܛܳܒܳܐ ܘܩܰܕܺܝܫܳܐ ܪܽܘܚܳܐ ܕܡܶܢ ܐܰ‌ܠܳܗܳܐ.

ܘܰܠܢܰܦܫܳܐ ܡܰܢ ܕܒܰܪܢܳܫܳܐ ܡܰܘܕܥܳܐ܆ ܗܳܝ ܕܒܰܙܟܰܪܝܳܐ ܢܒܺܝܳܐ ܡܶܛܽܠ ‌ܐܰ‌ܠܳܗܳܐ ܟܬܺܝܒܳܐ܆ ܕܡܳܬܰܚ ܠܰܫܡܰܝܳܐ ܘܰܡܫܰܬܶܐܤ ܠܰܐܪܥܳܐ܆ ܘܓܳܒܶܠ ܠܪܽܘܚܳܐ ܕܒܰܪܢܳܫܳܐ ܒܓܰܘܶܗ^[29]. ܠܗܳܕܶܐ ܕܳܡܝܳܐ܆ ܐܳܦ ܗܳܝ ܕܚܶܙܰܩܝܳܐ ܡܰܠܟܳܐ ܟܰܕ ܒܟܽܘܪܗܳܢܳܐ ܣܺܝܡ ܗ̱ܘܳܐ ܘܩܰܪܺܝܒܳܐ ܗ̱ܘܳܬ ܢܰܦܫܶܗ ܠܡܶܦܰܩ ܒܶܐܫܰܥܝܳܐ ܟܬܺܝܒ ܕܳܐܡܰܪ܆ ܕܪܽܘܚܳܐ ܕܺܝܠܝ ܠܘܳܬܝ ܗܘ̣ܳܬ܆ ܐܰܝܟ ܢܰܘܠܳܐ ܕܰܒܟܶܬܬ̣ܳܐ ܕܩܰܪܺܝܒܳܐ ܠܡܶܓܰܕ^[30]. ܕܰܐܝܟ ܗܳܕܶܐ ܐܺܝܬܶܝܗ̇ ܐܳܦ ܗܳܝ ܕܰܒܒܰܪܽܘܟ ܐܰܡܺܝܪܳܐ. ܗܳܢܽܘܢ ܕܡܺܝܬܺܝܢ. ܗܶܢܽܘܢ ܕܒܰܫܝܽܘܠ. ܗܳܢܽܘܢ ܕܶܐܬܢܰܣܒܰܬ ܪܽܘܚܗܽܘܢ. ܘܬܽܘܒ܆ ܪܽܘܚܳܐ ܕܰܟܦܺܝܦܳܐ ܘܰܡܚܺܝܠܳܐ^[31]. ܕܕܳܡܝܳܐ ܐܺܝܬܶܝܗ̇ ܐܳܦ ܗܳܝ ܕܒܶܐܘܰܢ̈ܓܶܠܺܝܰܐ ܡܶܢ ܡܳܪܰܢ ܐܶܬܰܐܡܪܰܬ̣܆ ܪܽܘܚܳܐ ܡܰܢ ܚܘܺܝܚܳܐ܆ ܒܶܣܪܳܐ ܕܶܝܢ ܡܚܺܝܠ^[32]܆ ܐܳܦ ܗܳܝ ܕܰܠܦܰܘܠܽܘܤ ܠܘܳܬ ܩܽܘܪ̈ܺܝܢܬܳܝܶܐ ܟܬܺܝܒܳܐ܆ ܡܰܢܽܘ ܓܶܝܪ ܡܶܢ ܒܢܰܝ̈ܢܳܫܳܐ ܝܳܕܰܥ ܗܳܠܶܝܢ ܕܒܰܪܢܳܫܳܐ܆ ܐܶܠܳܐ ܐܶܢ ܪܽܘܚܳܐ ܕܒܰܪܢܳܫܳܐ ܗܳܝ ܕܒܶܗ^[33].

ܠܪܽܘܚܳܐ ܕܶܝܢ ܗܰܘ ܛܳܒܳܐ ܘܰܐ‌ܠܳܗܳܝܳܐ ܬܽܘܒ ܠܳܐ ܡܬܰܚܡܳܐܺܝܬ ܗܳܢܶܝܢ ܡܚܰܘ̈ܝܳܢ܆ ܗܳܠܶܝܢ ܕܡܶܢ ܫܠܺܝܚܳܐ ܐܶܬܶܐܡܰܪ̈ܝ̱܆ ܒܪܽܘܚܳܐ ܗܰܠܶܟܘ܆ ܘܪܶܓܬܳܐ ܕܒܶܣܪܳܐ ܠܳܐ ܬܫܰܡܠܽܘܢ^[34]܆ ܘܬܽܘܒ܆ ܟܰܕ ܒܪܽܘܚܳܐ ܪܳܬܚܺܝܢ ܐܢ̱ܬܽܘܢ^[35]. ܘܬܽܘܒ. ܦܺܐܪܳܐ ܕܶܝܢ ܕܪܽܘܚܳܐ. ܚܽܘܒܳܐ. ܚܰܕܽܘܬܳܐ. ܫܰܝܢܳܐ. ܘܗܳܠܶܝܢ ܕܫܰܪܟܳܐ^[36]. ܘܰܒܕܽܘܟܬܳܐ ܐ̱ܚܪܺܬܳܐ. ܪܽܘܚܳܐ ܓܶܝܪ ܠܟܽܠܗܶܝܢ ܒܳܨܶܐ܆ ܘܳܐܦ ܠܥܽܘܡ̈ܩܶܐ ܕܰܐ‌ܠܳܗܳܐ^[37].

ܐ̱ܢܳܫܺܝ̈ܢ ܕܶܝܢ ܒܪܰܡ ܣܥܰܘ ܕܰܠܗܳܝ ܕܛܽܘܒܰܝܗܽܘܢ ܠܡܶܣ̈ܟܺܢܶܐ ܒܪܽܘܚ^[38]܆ ܠܘܳܬ ܬܰܪܥܺܝܬܳܐ ܕܪܽܘܚܳܐ ܗܰܘ ܒܺܝܫܳܐ ܢܶܣܒܽܘܢ܆ ܗܰܘ ܕܡܶܛܽܠܳܬܶܗ ܦܰܘܠܽܘܤ ܟܰܕ ܠܶܐܦܶܣܳܝ̈ܶܐ ܟܳܬܶܒ ܗ̱ܘܳܐ ܐܳܡܰܪ܆ ܪܽܘܚܳܐ ܗܰܘ ܕܗܳܫܳܐ ܡܰܥܒܶܕ ܒܰܒ̈ܢܰܝܳܐ ܕܠܳܐ ܡܶܬܛܦܺܝܣܳܢܽܘܬܳܐ^[39]܆ ܐܰܝܟܰܢܳܐ ܕܢܶܬܺܝܗܶܒ ܠܗܽܘܢ ܠܰܡ ܛܽܘܒܳܐ܆ ܠܗܳܢܽܘܢ ܕܡܶܣܟܺܢܺܝܢ܆ ܘܺܐܝܬܰܝܗܽܘܢ ܥܰܪ̈ܛܶܠܳܝܶܐ ܡܶܢ ܡܰܥܒܕܳܢܽܘܬܳܐ ܕܪܽܘܚܳܐ ܗܰܘ ܕܰܠܩܽܘܒܠܳܐ܆ ܘܡܶܢ ܟܽܠܳܗ̇ ܡܶܬܬܙܺܝܥܳܢܽܘܬܳܐ ܒܺܝܫܬܳܐ ܘܚܰܫܳܢܳܝܬܳܐ. ܐܶܠܳܐ ܗܳܕܶܐ ܠܳܐ ܫܰܪܺܝܪܳܐ. ܘܠܳܐ ܒܕܽܘܟ ܓܶܝܪ ܕܰܟ̈ܬܳܒܶܐ ܟܳܗ̈ܢܳܝܶܐ ܡܶܫܟܚܺܝܢܰܢ܆ ܕܠܳܐ ܡܬܰܚܡܳܐܺܝܬ ܘܰܕܠܳܐ ܦܽܘܪܳܫ܆ ܡܶܬܬܰܘܕܰܥ ܪܽܘܚܳܐ ܗܰܘ ܥܕܺܝܠܳܐ ܘܕܳܐܟܶܠ ܩܰܪܨܳܐ. ܡܶܢ ܟܽܠ ܦܪܽܘܤ ܕܶܝܢ܆ ܥܰܡ ܬܰܘܣܶܦܬܳܐ ܡܶܕܶܡ. ܕܰܐܝܟ ܐܰܝܟܰܢ. ܐܶܡܰܬܝ ܕܶܝܢ ܕܪܽܘܚܳܐ ܗܳܝ ܛܰܢܦܬܳܐ ܬܶܦܽܘܩ ܡܶܢ ܒܰܪܢܳܫܳܐ. ܘܰܒܕܽܘܟܬܳܐ ܐ̱ܚܪܺܬܳܐ. ܪܽܘܚܳܐ ܕܕܰܝܘܳܐ ܛܰܢܦܳܐ^[40]. ܘܬܽܘܒ. ܪܽܘܚܳܐ ܠܳܐ ܡܰܠܳܠܳܐ ܘܕܽܘܓܳܐ܆ ܐܶܢܳܐ ܦܳܩܶܕ ܐ̱ܢܳܐ ܠܳܟ^[41]. ܡܶܫܟܚܳܐ ܗܝ ܓܶܝܪ܆ ܕܳܐܦ ܐܰܝܟ ܬܰܪܥܺܝܬܳܐ ܗܳܕܶܐ ܒܫܰܦܺܝܪܽܘܬ ܕܶܚܠܬܳܐ ܢܶܣܬܰܟܠܺܝܘܗ̱ܝ ܠܦܶܬܓܳܡܳܐ ܗܳܢܳܐ ܕܣܺܝܡ ܩܕܳܡܰܝܢ. ܐܰܝܟܰܢܳܐ ܕܢܶܗܘܶܐ ܐܺܝܬܰܘܗ̱ܝ ܗܰܘܢܶܗ܆ ܕܰܐܝܟ ܗܳܢܳܐ. ܛܽܘܒܰܝܗܽܘܢ ܠܗܳܢܽܘܢ ܕܰܒܪܽܘܚܳܐ ܩܰܕܺܝܫܳܐ܆ ܠܟܶܢܫܳܐ ܗܰܘ ܕܚܰܫ̈ܶܐ ܫܟܺܝܪ̈ܶܐ ܛܪܰܕܘ ܡܶܢܗܽܘܢ܆ ܘܡܶܢ ܗܳܠܶܝܢ ܡܶܣܟܺܢܺܝܢ܆ ܐܰܘ ܕܟܶܝܢ ܝܰܬܺܝܪ ܫܰܪܺܝܪܳܐ ܠܡܺܐܡܰܪ. ܐܰܝܟܳܐ ܓܶܝܪ ܕܰܥܡܽܘܪܝܳܐ ܕܪܽܘܚܳܐ ܐܰ‌ܠܳܗܳܝܳܐ܆ ܬܰܡܳܢ ܥܪܽܘܩܝܳܐ ܡܶܢ ܟܽܠ ܦܪܽܘܤ ܕܗܳܢܽܘܢ ܕܰܠܩܽܘܒܠܳܐ܆ ܘܰܣܦܺܝܩܽܘܬܳܐ ܘܡܶܣܟܺܢܽܘܬܳܐ ܘܰܓܠܺܝܙܽܘܬܳܐ.

ܢܶܬܡܰܣܟܰܢ ܗܳܟܺܝܠ ܒܟܽܠ ܙܢܳܐ ܒܪܽܘܚܳܐ܆ ܟܰܕ ܡܡܰܫ̈ܚܳܬܳܐ ܡܶܬܪܰܥܶܝܢ ܚ̱ܢܰܢ. ܟܰܕ ܠܡܰܘܒܠܳܐ ܝܰܩܺܝܪܬܳܐ ܡܒܰܨܪܺܝܢ ܚ̱ܢܰܢ܆ ܕܡܰܪ̈ܗܳܛܶܐ܆ ܕܩܶܢ̈ܝܳܢܶܐ܆ ܕܚܰܫܳܐ܆ ܐܰܝܟܰܢܳܐ ܕܠܳܐ ܒܥܰܒܝܽܘܬܳܐ ܘܰܢܦܺܝܚܽܘܬܳܐ ܕܗܳܠܶܝܢ܆ ܠܬܰܪܥܳܐ ܗܰܘ ܐܰ‌ܠܺܝܨܳܐ ܘܰܙܪܺܝܒܳܐ ܕܡܰܠܟܽܘܬܳܐ ܕܰܫܡܰܝܳܐ ܚܢܰܢ ܠܰܢ ܢܶܣܟܽܘܪ^[42]. ܛܽܘܒܰܝܗܽܘܢ ܗܳܟܺܝܠ ܠܡܶܣ̈ܟܺܢܶܐ ܕܰܒܪܽܘܚܳܐ. ܠܗܳܢܽܘܢ ܓܶܝܪ ܕܡܶܛܽܠ ܪܽܘܚܳܐ ܘܡܶܛܽܠ ܢܳܡܽܘ̈ܣܶܐ ܐܰ‌ܠܳܗܳܝ̈ܶܐ ܕܗܰܘ܆ ܠܳܐ ܡܰܒܣܶܝܢ ܥܰܠ ܩܶܢܝܳܢܳܐ ܕܗܽܘܠܶܐ܆ ܐܶܠܳܐ ܥܰܠ ܪ̈ܓܺܝܓܳܬܳܐ ܕܒܶܣܪܳܐ ܘܥܰܠ ܦܰܢܛܐܣܺܝ̈ܐܤ ܕܫܽܘܒܚܳܐ ܣܪܺܝܩܳܐ ܡܚܰܘܶܝܢ ܫܦܺܝܥܽܘܬܳܐ ܘܪܒܘܬ ܢܰܦܫܳܐ ܕܢܰܦ̈ܩܳܬܳܐ ܣܪ̈ܺܝܩܳܬܳܐ܆ ܕܢܐܠܐ ܐܶܢܽܘܢ ܙܳܕܶܩ ܥܰܠ ‌ܐܳܤܽܘܛܽܘܬܳܐ. ܘܰܠܪ̈ܳܚܡܰܝ ܪ̈ܓܺܝܓܳܬܳܐ ܠܳܐ ܢܶܩܪܶܐ ܫܦܺܝ̈ܥܰܝ ܡܰܘܗܰܒܬܳܐ.

ܡܶܣܬܰܒܪܳܐ ܠܺܝ ܕܶܝܢ ܗܳܝ ܕܰܐܡܺܝܪܳܐ ܠܠܽܘܩܳܐ ܓܶܢܣܳܢܳܐܺܝܬ ܛܽܘܒܰܝܗܽܘܢ ܠܡܶܣ̈ܟܺܢܶܐ܆ ܕܠܳܐ ܓܠܺܝܙܳܐ ܘܚܰܣܺܝܪܳܐ ܡܶܢ ܦܽܘܪܳܫܳܐ ܗܰܘ ܝܺܕܺܝܥܳܐ ܘܕܺܝܠܳܢܳܝܳܐ ܕܰܐܝܟ ܡܰܬܰܝ܆ ܕܛܽܘܒܰܝܗܽܘܢ ܠܡܶܣ̈ܟܺܢܶܐ ܒܪܽܘܚ^[43]. ܗܳܝ ܓܶܝܪ ܕܡܰܝܬܝܳܐ ܘܣܺܝܡܳܐ ܒܳܬܰܪ ܚܰܕ ܡܶܢܗܽܘܢ ܕܗܳܠܶܝܢ ܛܽܘ̈ܒܶܐ܆ ܒܳܬܰܪ ܗܰܘ ܕܛܽܘܒܰܝܟܽܘܢ ܐܶܡܰܬܝ ܕܰܢܚܰܣܕܽܘܢܳܟܽܘܢ ܘܢܰܦܩܽܘܢ ܫܡܳܐ ܕܺܝܠܟܽܘܢ ܒܺܝܫܳܐ^[44]܆ ܗܳܝ ܐܳܡܰܪ ܐ̱ܢܳܐ܆ ܗܳܝ ܕܡܶܛܽܠ ܒܪܶܗ ܕܐ̱ܢܳܫܳܐ܆ ܠܘܳܬ ܟܽܠܗܽܘܢ ܗܳܢܽܘܢ ܛܽܘܒ̈ܶܐ܆ ܒܳܗ̇ ܒܰܕܡܽܘܬܳܐ ܡܶܬܡܰܬܚܳܐ܆ ܘܥܰܠ ܟܽܠܗܽܘܢ ܘܳܠܝܳܐܺܝܬ ܡܶܬܬܰܘܣܦܳܐ ܡܶܫܬܰܡܥܳܐ.

ܕܰܐܝܟ ܐܰܝܟܰܢ ܛܽܘܒܰܝܗܽܘܢ ܠܡܶܣ̈ܟܺܢܶܐ. ܕܡܰܘܣܦܳܐ ܣܺܝܡܳܐ ܙܳܕܶܩ ܕܢܶܣܒܰܪ ܐܳܦ ܥܰܡ ܗܳܢܳܐ ܛܽܘܒܳܐ܆ ܡܶܛܽܠ ܒܪܶܗ ܕܐ̱ܢܳܫܳܐ. ܗܳܢܰܘ ܕܶܝܢ. ܕܛܽܘܒܰܝܗܽܘܢ ܠܡܶܣ̈ܟܺܢܶܐ ܡܶܛܽܠ ܒܪܶܗ ܕܐ̱ܢܳܫܳܐ. ܗܳܝ ܟܺܝܬ ܕܗܺܝ ܟܰܕ ܗܺܝ ܡܰܨܝܳܐ܆ ܠܗܳܝ ܕܛܽܘܒܰܝܗܽܘܢ ܠܡܶܣ̈ܟܺܢܶܐ ܒܪܽܘܚ. ܣܰܓܺܝ̈ܶܐܐ ܓܶܝܪ ܐܺܝܬ܆ ܗܳܢܽܘܢ ܕܠܰܘ ܡܶܛܽܠ ܒܪܶܗ ܕܐ̱ܢܳܫܳܐ ܗܳܢܰܘ ܕܶܝܢ ܡܫܺܝܚܳܐ ܡܶܣܟܺܢܺܝܢ܆ ܟܽܠܗܽܘܢ ܗܳܢܽܘܢ ܕܡܶܣܟܺܢܽܘܬܳܐ ܗܳܝ ܕܡܶܢ ܚܽܘܣܪ̈ܳܢܶܐ ܘܥܳܩ̈ܳܬܳܐ܆ ܕܠܳܐ ܩܽܘܒܳܠ ܛܰܝܒܽܘܬܳܐ ܘܠܳܐ ܡܰܘܕܝܳܢܳܐܺܝܬ ܣܳܒܠܺܝܢ܆ ܟܰܕ ܡܓܰܕܦܺܝܢ ܥܰܠ ‌ܐܰ‌ܠܳܗܳܐ.

ܛܽܘܒܰܝܗܽܘܢ ܠܰܡܪ̈ܰܚܡܳܢܶܐ ܬܽܘܒ܆ ܡܶܛܽܠ ܒܪܶܗ ܕܐ̱ܢܳܫܳܐ. ܐ̱ܢܳܫܺܝ̈ܢ ܓܶܝܪ ܟܰܕ ܠܘܳܬ ܡܶܬܚܰܘܝܳܢܽܘܬܳܐ ܕܰܒܢܰܝ̈ܢܳܫܳܐ ܗܳܕܐ ܥܳܒܕܺܝܢ܆ ܠܳܐ ܡܶܬܺܝܗܶܒ ܠܗܽܘܢ ܛܽܘܒܳܐ.

ܛܽܘܒܰܝܗܽܘܢ ܠܥܳܒ̈ܕܰܝ ܫܰܝܢܳܐ^[45]܆ ܐܶܢ ܡܶܛܽܠ ܒܪܶܗ ܕܐ̱ܢܳܫܳܐ. ܐܳܦ ܓܶܝܪ ܚܳܙܶܝܢܰܢ ܠܗܽܘܢ ܠܚܰܕܚ̈ܕܳܢܶܐ܆ ܕܥܰܠ ܒܺܝܫܽܘܬܳܐ ܡܟܰܢܫܺܝܢ ܠܶܗ ܠܫܰܝܢܳܐ ܕܐ̱ܢܳܫܺܝ̈ܢ܆ ܘܠܰܐܘܝܽܘܬܳܐ ܡܰܘܒܕܳܢܺܝܬܳܐ ܗܳܝ ܕܡܶܛܽܠܳܬܳܗ̇ ܢܒܺܝܳܐ ܗܰܘ ܕܰܡܙܰܡܰܪ ܐܳܡܰܪ܆ ܕܛܶܢܶܬ ܒܥܰܘܴ̈ܠܶܐ܆ ܟܰܕ ܚܳܙܶܐ ܗ̱ܘܺܝܬ ܫܰܝܢܳܐ ܕܪ̈ܰܫܺܝܥܶܐ^[46].

ܛܽܘܒܰܝܗܽܘܢ ܠܗܳܢܽܘܢ ܕܰܕܟܶܝܢ ܒܠܶܒܳܐ܆ ܡܶܛܽܠ ܒܪܶܗ ܕܐ̱ܢܳܫܳܐ^[47]. ܡܰܢܽܘ ܓܶܝܪ ܕܟܰܕ ܠܰܘ ܠܘܳܬܶܗ ܚܳܐܰܪ܆ ܕܢܶܬܡܨܶܐ ܕܢܶܗܘܶܐ ܐܺܝܬܰܘܗ̱ܝ ܕܰܟܝܳܐ. ܒܰܠܚܽܘܕ ܓܶܝܪ ܐܶܢ ܡܶܢ ܬܶܐܽܘܪܺܝܰܐ ܕܗܰܘ ܢܶܨܠܶܐ ܚܝܳܪܶܗ ܐ̱ܢܳܫ܆ ܠܒܰܪ ܡܶܢ ܟܽܠܳܗ̇ ܕܰܟܝܽܘܬܳܐ ܢܶܗܘܶܐ. ܡܶܛܽܠ ܗܳܕܶܐ ܝܽܘܚܰܢܳܢ ܗܰܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ ܟܬܰܒ܆ ܕܢܶܚܙܽܘܗ̱ܝ ܐܰܝܟܰܢܳܐ ܕܺܐܝܬܰܘܗ̱ܝ. ܘܟܽܠ ‌ܐܰܝܢܳܐ ܕܺܐܝܬ ܠܶܗ ܗܳܢܳܐ ܣܰܒܪܳܐ ܥܠܰܘܗ̱ܝ܆ ܡܕܰܟܶܐ ܗܽܘ ܠܶܗ܆ ܐܰܝܟܰܢܳܐ ܕܗܽܘ ܐܺܝܬܰܘܗ̱ܝ ܕܰܟܝܳܐ^[48]. ܐܳܦ ܐܺܝܓܢܰܐܛܺܝܽܘܤ ܕܶܝܢ ܗܰܘ ܠܒܺܝܫ ܠܰܐܠܳܗܳܐ ܠܘܳܬ ܦܘܠܘܩܪܦܘܤ ܗܳܟܰܢܳܐ ܟܬܰܒ. ܐܶܢ ܐ̱ܢܳܫ ܡܶܫܟܰܚ ܕܰܒܕܰܟܝܽܘܬܳܐ ܢܩܰܘܶܐ܆ ܠܺܐܝܩܳܪܳܐ ܕܒܶܣܪܶܗ ܕܡܳܪܰܢ܆ ܒܠܳܐ ܫܰܒܗܪܳܢܽܘܬܳܐ ܢܩܰܘܶܐ. ܐܶܢ ܕܶܝܢ ܢܶܫܬܰܒܗܰܪ ܐܳܒܶܕ. ܡܶܬܚܙܶܐ ܓܶܝܪ ܗܰܘ ܕܕܰܐܝܟ ܗܳܢܳܐ܆ ܕܠܰܘ ܡܶܛܽܠ ܒܪܶܗ ܕܐ̱ܢܳܫܳܐ܆ ܣܳܥܰܪ ܠܳܗ̇ ܠܗܳܝ ܕܡܶܣܬܰܒܪܳܐ ܕܰܟܝܽܘܬܳܐ.

ܛܽܘܒܰܝܗܽܘܢ ܠܡܰܟܺܝ̈ܟܶܐ^[49] ܡܶܛܽܠ ܒܪܶܗ ܕܐ̱ܢܳܫܳܐ. ܠܗܳܢܽܘܢ ܕܡܶܛܽܠܳܬܗܽܘܢ ܟܰܕ ܡܶܛܽܠܳܬܗܽܘܢ ܕܢܳܡܽܘ̈ܣܶܐ܆ ܟܳܠܶܝܢ ܪܽܘܓܙܳܐ ܘܰܩܥܳܬܳܐ ܘܡܰܪܺܝܪܽܘܬܳܐ ܘܓܽܘܕܳܦܳܐ ܘܟܽܠܳܗ̇ ܒܺܝܫܽܘܬܳܐ^[50]܆ ܗܳܠܶܝܢ ܕܦܰܘܠܽܘܤ ܚܫܰܒ ܐܶܢܶܝܢ܆ ܙܳܕܶܩ ܕܢܶܬܠ ܛܽܘܒܳܐ܆ ܘܠܰܘ ܠܗܳܢܽܘܢ ܕܒܰܕܡܽܘܬ ܫܳܢ̈ܝܶܐ ܘܠܳܐ ܡܶܬܬܙܺܝ̈ܥܳܢܶܐ ܐܺܝܬܰܝܗܽܘܢ ܡܶܢ ܟܝܳܢܳܐ. ܠܗܳܠܶܝܢ ܓܶܝܪ܆ ܘܠܳܐ ܠܰܡܣܳܡ ܒܪ̈ܺܝܫܶܐ ܕܥܰܠ ܒܺܝܫܽܘܬܳܐ܆ ܘܳܐܦܠܳܐ ܬܽܘܒ ܠܰܟ̈ܠܺܝܠܶܐ ܕܰܡܝܰܬܪܽܘܬܳܐ܆ ܢܰܫܘܶܐ ܐܶܢܽܘܢ ܐ̱ܢܳܫ ܟܺܐܢܳܐܺܝܬ.

ܛܽܘܒܰܝܗܽܘܢ ܠܗܳܢܽܘܢ ܕܟܰܦܢܺܝܢ ܘܰܨܗܶܝܢ ܠܟܺܐܢܽܘܬܳܐ^[51]܆ ܝܺܕܺܝܥܳܐ ܕܡܶܛܽܠ ܒܪܶܗ ܕܐ̱ܢܳܫܳܐ. ܐܳܦ ܓܶܝܪ ܗܳܢܽܘܢ ܕܠܰܡܫܺܝܚܳܐ ܒܳܥܶܝܢ܆ ܘܠܶܗ ܟܰܦܢܺܝܢ ܘܰܨܗܶܝܢ܆ ܒܳܬܰܪ ܙܰܕܺܝܩܽܘܬܳܐ ܫܰܪܺܝܪܬܳܐ ܪܳܕܦܺܝܢ܆ ܘܠܰܘ ܡܶܢ ܟܽܠ ܦܪܽܘܤ ܒܳܬܰܪ ܗܳܝ ܕܠܰܒ̈ܢܰܝ ܐ̱ܢܳܫܳܐ ܫܳܦܪܳܐ܆ ܗܳܝ ܟܺܝܬ ܕܙܰܒ̈ܢܺܝܢ ܣܰܓܺܝ̈ܳܐܢ ܐܳܦ ܠܰܫܡܳܗ̇ ܡܕܰܓܠܳܐ. ܣܰܓܺܝ̈ܶܐܐ ܓܶܝܪ ܟܰܕ ܡܺܐܡܪ̈ܶܐ ܐܰܪ̈ܺܝܟܶܐ ܡܶܛܽܠ ܙܰܕܺܝܩܽܘܬܳܐ ܐܰܘܟܺܝܬ ܟܺܐܢܽܘܬܳܐ ܥܒܰܕܘ܆ ܕܡܳܢܰܐ ܗ̱ܘ ܗܰܘ ܕܫܰܪܺܝܪܳܐܺܝܬ ܟܺܐܝܢ܆ ܠܡܶܫܟܳܚܽܘ ܠܳܐ ܐܶܬܡܨܺܝܘ. ܠܘܳܬ ܗܳܢܳܐ ܗܰܘܢܳܐ܆ ܟܬܳܒܳܐ ܟܳܗܢܳܝܳܐ ܗܰܘ ܕܡ̈ܰܬܠܶܐ ܐܶܫܬܰܘܕܺܝ ܠܡܰܠܳܦܽܘ ܘܰܠܡܶܪܕܳܐ܆ ܕܢܶܣܬܰܟܰܠ ܠܙܰܕܺܝܩܽܘܬܳܐ ܫܰܪܺܝܪܬܳܐ^[52]. ܐܳܦ ܓܶܝܪ ܠܰܘ ܟܰܕ ܙܰܕܺܝܩܽܘܬܳܐ܆ ܡܶܢ ܟܽܠ ܦܪܽܘܤ ܐܳܦ ܫܰܪܺܝܪܬܳܐ ܗܝ.

ܗܳܟܰܢܳܐ ܐܳܦ ܗܳܝ ܕܛܽܘܒܰܝܟܽܘܢ ܗܳܢܽܘܢ ܕܒܳܟܶܝܢ ܐܢ̱ܬܽܘܢ ܗܳܫܳܐ ܐܰܘܟܺܝܬ ܕܡܶܬܐܰܒܠܺܝܢ ܐܢ̱ܬܽܘܢ܆ ܕܬܶܓܚܟܽܘܢ ܐܰܘܟܺܝܬ ܕܬܶܬܒܰܝܐܘܢ^[53]܆ ܒܳܗ̇ ܟܰܕ ܒܳܗ̇ ܒܬܰܘܣܶܦܬܳܐ ܬܶܬܠܰܚܰܡ܆ ܘܬܶܬܬܰܘܣܰܦ ܬܶܫܬܡܰܥ ܥܰܡܳܗ̇ ܐܳܦ ܗܳܝ ܕܡܶܛܽܠ ܒܪܶܗ ܕܐ̱ܢܳܫܳܐ. ܐܳܦ ܓܶܝܪ ܠܰܘ ܟܽܠ ܥܳܩܬܳܐ܆ ܟܰܕ ܥܶܩܳܪܳܐ ܐܺܝܬܶܝܗ̇ ܕܗܳܝ ܕܢܶܬܶܐܒܶܠ ܘܢܶܒܟܶܐ܆ ܡܶܛܽܠ ܒܪܶܗ ܕܐ̱ܢܳܫܐ ܗܳܘܝܳܐ܆ ܘܺܐܝܬ ܠܳܗ̇ ܡܩܰܒܠܽܘܬܳܐ ܠܘܳܬ ܐܰ‌ܠܳܗܳܐ. ܡܶܛܽܠ ܗܳܕܶܐ ܟܺܝܬ ܐܳܦ ܦܰܘܠܽܘܤ ܐܳܡܰܪ ܗ̱ܘܳܐ܆ ܕܥܳܩܬܳܐ ܗܳܝ ܕܒܰܐܠܳܗܳܐ܆ ܬܝܳܒܽܘܬܳܐ ܠܳܐ ܡܶܬܬܰܘܝܳܢܺܝܬܳܐ ܠܦܽܘܪܩܳܢܳܐ ܥܳܒܕܳܐ. ܥܳܩܬܳܐ ܕܶܝܢ ܗܳܝ ܕܥܳܠܡܳܐ܆ ܡܰܘܬܳܐ ܥܳܒܕܳܐ^[54]. ܥܳܩܬܳܐ ܕܥܳܠܡܳܐ ܡܶܬܬܥܺܝܩ܆ ܗܰܘ ܕܠܰܓܠܺܝܙܽܘܬܳܐ ܕܡܶܢ ܪ̈ܓܺܝܓܳܬܶܗ ܕܒܶܣܪܳܐ ܒܳܟܶܐ܆ ܘܰܠܗܳܝ ܕܰܢܦܰܕ ܡܶܢ ܡܶܕܶܡ ܡܶܢ ܗܳܢܶܝܢ ܕܗܰܢܺܝ̈ܳܐܢ܆ ܥܶܠܬܳܐ ܥܳܒܶܕ ܠܳܗ̇ ܕܽܐܘܠ̈ܝܳܬܳܐ. ܗܳܟܰܢܳܐ ܒܳܟܶܝܢ ܗ̱ܘܰܘ ܗܳܢܽܘܢ ܕܡܶܢ ܐܺܝܣܪܳܐܶܝܠ ܒܡܰܕܒܪܳܐ܆ ܟܰܕ ܠܩܰܕܣ̈ܶܐ ܕܒܶܣܪܳܐ ܗܳܢܽܘܢ ܐܓܘܦ̈ܛܝܐ ܡܶܬܰܥܰܗܕܺܝܢ ܗ̱ܘܰܘ܆ ܘܰܠܟܰܪܣܳܐ ܗܳܝ ܠܰܥܒܬܳܐ ܡܗܰܪܗܪܺܝܢ ܗ̱ܘܰܘ ܘܬܳܒܥܺܝܢ ܗ̱ܘܰܘ ܠܶܗ ܠܡܽܘܫܶܐ ܡܽܘܠܳܝ ܣܽܘܢܩܳܢܳܐ ܕܪܶܓܬܳܐ ܕܺܝܠܗܽܘܢ܆ ܐܰܝܟܰܢܳܐ ܟܺܝܬ ܕܢܺܐܡܰܪ ܗܰܘ ܠܘܳܬ ܐܰ‌ܠܳܗܳܐ܆ ܡܶܢ ܐܰܝܟܳܐ ܠܺܝ ܒܶܣܪܳܐ ܠܡܶܬܰܠ ܠܟܽܠܶܗ ܗܳܢܳܐ ܥܰܡܳܐ܆ ܕܒܳܟܶܝܢ ܥܠܰܝ ܘܳܐܡܪܺܝܢ܆ ܗܰܒ ܠܰܢ ܒܶܣܪܳܐ ܕܢܶܐܟܽܘܠ^[55]. ܕܰܐܝܟ ܗܳܕܶܐ ܥܳܩܬܳܐ ܪܦܺܝܬܳܐ ܘܦܰܚܺܝܚܬܳܐ ܘܰܢܕܺܝܕܬܳܐ ܡܶܬܬܥܺܝܩܺܝܢ܆ ܘܶܐܒܠܳܐ ܡܰܣܠܝܳܐ ܡܶܬܐܰܒܠܺܝܢ܆ ܐܳܦ ܗܳܢܽܘܢ ܕܡܶܛܽܠ ܫܶܩ̈ܠܽܘܢ̈ܶܐ^[56] ܗܳܢܽܘܢ ܕܝܰܬܺܝܪ ܒܺܝܫܺܝܢ ܘܫܺܝܛܺܝܢ ܦܥܺܝܪ ܚܶܟܗܽܘܢ܆ ܘܰܠܢܽܘܟܪ̈ܳܝܳܬܳܐ ܥܳܠܽܘܒܳܐܺܝܬ ܪܳܓܶܝܢ܆ ܐܰܝܟܰܢܳܐ ܕܰܟܬܺܝܒ ܡܶܛܽܠ ‌ܐܳܚܳܒ ܡܰܠܟܳܐ ܕܺܐܝܣܪܳܐܶܝܠ܆ ܕܪܰܓ ܠܡܶܣܰܒ ܟܰܪܡܳܐ ܕܢܳܒܽܘܬ ܘܠܳܐ ܦܝܳܣܳܐ ܥܰܒ̣ܕܶܗ. ܐܰܓܶܤ ܓܶܝܪ ܐܳܡܰܪ ܥܰܠ ܥܰܪܣܳܐ ܕܺܝܠܶܗ ܘܚܰܦܺܝ ܐܰܦܰܘ̈ܗ̱ܝ܆ ܘܠܳܐ ܐܶܟܰܠ ܠܰܚܡܳܐ܆ ܥܕܰܡܳܐ ܕܟܰܕ ܩܰܛܠܶܗ ܠܓܰܒܪܳܐ ܐܶܫܬܘܺܝ ܠܪܶܓܬܶܗ^[57].

ܠܗܳܢܳܐ ܐܶܒܠܳܐ ܕܰܣܢܶܐ ܠܰܐܠܳܗܳܐ ܡܶܬܐܰܒܠܺܝܢ܆ ܐܳܦ ܗܳܢܽܘܢ ܕܥܰܠ ܡܰܘܬܳܐ ܕܰܪ̈ܚܽܘܡܰܝܗܽܘܢ ܐܳ‌ܠܶܝܢ ܗܳܠܶܝܢ ܕܠܳܐ ܡܫܽܘܚܬܳܐ ܘܰܕܠܳܐ ܛܶܟܣܳܐ܆ ܘܰܕܓܽܘܕܳܦܳܐ ܘܠܳܐ ܗܰܝܡܳܢܽܘܬܳܐ ܡܥܺܝܪ̈ܳܢ ܥܰܠ ܣܰܒܪܳܐ ܕܰܩܝܳܡܬܳܐ. ܗܳܢܽܘܢ ܕܰܠܘܳܬܗܽܘܢ ܦܰܘܠܽܘܤ ܐܳܡܰܪ܆ ܠܳܐ ܬܶܬܥܺܝܩܽܘܢ ܐܰܝܟ ܕܳܐܦ ܗܳܢܽܘܢ ܕܫܰܪܟܳܐ܆ ܗܳܢܽܘܢ ܕܠܳܐ ܐܺܝܬ ܠܗܽܘܢ ܣܰܒܪܳܐ^[58].

ܡܰܢܽܘ ܗܳܟܺܝܠ ‌ܐܺܝܬܰܘܗ̱ܝ ܗܰܘ ܕܶܐܒܠܳܐ ܛܽܘܒܬܳܢܳܐ ܡܶܬܶܐܒܶܠ ܘܒܳܟܶܐ ܡܶܛܽܠ ܒܪܶܗ ܕܐ̱ܢܳܫܳܐ. ܗܰܘ ܕܥܰܠ ܚ̈ܛܳܗܶܐ ܒܰܝ̈ܬܳܝܶܐ ܕܺܝܠܶܗ ܡܕܰܡܰܥ܆ ܘܰܠܡܶܬܕܰܟܳܝܽܘ ܒܳܥܶܐ ܘܰܠܡܶܬܒܰܝܬܳܝܽܘ ܠܰܡܫܺܝܚܳܐ ܘܥܶܠܬܳܐ ܕܶܐܒܠܳܐ ܐܺܝܬܶܝܗ̇ ܠܶܗ܆ ܗܳܝ ܕܡܶܛܽܠ ܗܳܝ ܕܰܚܛܳܐ ܦܪܺܝܫ ܡܶܢ ܐܰ‌ܠܳܗܳܐ܆ ܘܥܰܡ ܕܰܘܺܝܕ ܐܳܡܰܪ܆ ܠܳܐ ܢܳܡܽܘܣܳܝܽܘܬܳܐ ܕܺܝܠܝ ܐܰ݀ܘܕܰܥ܆ ܘܶܐܪܢܶܐ ܚܠܳܦ ܚܛܺܝܬܳܐ ܕܺܝܠܝ܆ ܘܣܳܡܶܬ ܠܒܽܘܫܳܐ ܕܺܝܠܝ ܣܰܩܳܐ܆ ܘܰܐܝܟ ܗܰܘ ܕܡܶܬܶܐܒܶܠ ܘܡܶܬܟܡܰܪ ܗܳܟܰܢܳܐ ܡܶܬܡܰܟܰܟ ܗܘܺܝܬ܆ ܘܬܰܦ̈ܶܐ ܕܡܰܝ̈ܳܐ ܐܰܚ̈ܶܬ̣ܝ̱ ܥܰܝ̈ܢܰܝ ܡܶܛܽܠ ܕܠܳܐ ܢܶܛܪܶܬ ܢܳܡܽܘܣܳܟ^[59]. ܟܰܕ ܓܶܝܪ ܒܝܰܕ ܗܳܠܶܝܢ ܢܶܬܕܰܟܶܐ ܐ̱ܢܳܫ܆ ܠܘܳܬ ܡܫܽܘܚܬܳܐ ܪܰܒܬܳܐ ܢܶܬܥܰܠܶܐ ܕܶܐܒܠܳܐ ܗܰܘ ܛܽܘܒܬܳܢܳܐ. ܘܢܶܬܬܰܢܰܚ ܐܳܦ ܥܰܠ ‌ܐ̱ܚܪ̈ܳܢܶܐ ܡܶܛܽܠ ܚܽܘܒܳܐ܆ ܕܥܰܠ ܬܶܢ̈ܚܳܬܳܐ ܣܢܺܝܩܺܝܢ. ܘܟܰܕ ܡܙܰܡܰܪ ܢܺܐܡܰܪ܆ ܟܡܺܝܪܽܘܬܳܐ ܐܶܚܰܕܬ̣ܰܢܝ ܡܶܢ ܚܰܛܳܝ̈ܶܐ ܕܰܫܒܰܩܘ ܢܳܡܽܘܣܳܟ^[60].

ܒܗܳܢܳܐ ܙܢܳܐ ܐܳܦ ܐܶܪܰܡܝܳܐ ܟܰܕ ܚܳܛܶܝܢ ܗ̱ܘܰܘ ܘܒܳܣܡܺܝܢ ܗ̱ܘܰܘ ܒ̈ܢܰܝ ܥܰܡܶܗ܆ ܡܶܬܶܐܒܶܠ ܗ̱ܘܳܐ ܟܰܕ ܐܳܡܰܪ܆ ܠܳܐ ܝܶܬܒܶܬ ܒܰܟܢܽܘܫܝܳܐ ܕܺܝܠܗܽܘܢ ܟܰܕ ܡܶܫܬܰܥܶܝܢ ܗ̱ܘܰܘ. ܒܰܠܚܽܘܕܰܝ ܝܳܬܶܒ ܗ̱ܘܺܝܬ܆ ܡܶܛܽܠ ܕܡܰܪܺܝܪ̈ܘܳܬܳܐ ܐܶܬܡܠܺܝܬ̣^[61].

ܥܰܠ ܗܳܢܳܐ ܐܶܒܠܳܐ ܛܽܘܒܬܳܢܳܐ ܙܳܕܶܩ ܕܢܰܘܣܶܦ ܢܶܟܬܽܘܒ܆ ܐܳܦ ܠܶܐܒܠܳܐ ܗܰܘ ܕܶܐܬܶܐܒܶܠ ܫܡܽܘܐܝܠ ܗܰܘ ܕܚܳܙܶܐ ܗ̱ܘܳܐ ܡܶܢ ܛܰܠܝܽܘܬܶܗ ܗܳܠܶܝܢ ܕܟܰܣ̈ܝܳܢ܆ ܘܺܐܝܬܰܘܗ̱ܝ ܗ̱ܘܳܐ ܒܰܢܒܺܝ̈ܶܐ ܘܰܒܕܰܝܳܢ̈ܶܐ ܛܒܺܝܒܳܐ ܘܺܝܕܺܝܥܳܐ܆ ܟܰܕ ܚܳܙܶܐ ܗ̱ܘܳܐ ܠܶܗ ܠܫܳܐܘܳܠ ܗܰܘ ܕܡܶܢܶܗ ܐܶܬܡܫܰܚ ܡܰܠܟܳܐ܆ ܕܰܚܛܳܐ܆ ܘܰܒܦܽܘܩ̈ܕܳܢܶܐ ܕܰܐ‌ܠܳܗܳܐ ܐܰܥܘܶܠ ܘܨܰܥܰܪ܆ ܘܶܐܣܬܠܺܝ ܘܰܗܘ̣ܳܐ ܠܒܰܪ ܡܶܢ ܛܰܝܒܽܘܬܳܐ ܐܰ‌ܠܳܗܳܝܬܳܐ. ܡܶܢ ܗܰܘ ܕܳܐܦ ܗܽܘ ܐܰܗܦܶܟ ܡܰܢ ܐܰܦܰܘ̈ܗ̱ܝ܆ ܐܴ‌ܠܶܐ ܗ̱ܘܳܐ ܠܳܗ̇ ܕܶܝܢ ܒܪܰܡ ܠܰܚܛܺܝܬܶܗ܆ ܥܕܰܡܳܐ ܕܰܓܠܳܐ ܠܶܗ ܐܰ‌ܠܳܗܳܐ ܠܳܐ ܡܶܬܐܰܣܝܳܢܽܘܬܳܗ̇ ܕܗܳܕܶܐ. ܫܳܘܝܳܐ ܕܶܝܢ܆ ܕܳܐܦ ܠܗܶܝܢ ܠܡ̈ܶܠܶܐ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ ܢܶܫܡܰܥ. ܘܠܳܐ ܐܰܘܣܶܦ ܐܳܡܰܪ ܫܡܽܘܐܝܠ ܕܢܶܚܙܽܘܗ̱ܝ ܠܫܳܐܘܳܠ܆ ܥܕܰܡܳܐ ܠܝܰܘܡܳܐ ܕܡܰܘܬܶܗ. ܡܶܛܽܠ ܕܡܶܬܶܐܒܶܠ ܗ̱ܘܳܐ ܫܡܽܘܐܝܠ ܥܰܠ ܫܳܐܘܳܠ. ܘܡܳܪܝܳܐ ܐܶܬܬܘܺܝ ܥܰܠ ܕܰܐܡܠܟܶܗ ܠܫܳܐܘܳܠ ܥܰܠ ‌ܐܺܝܣܪܳܐܶܝܠ. ܘܶܐܡܰܪ ܡܳܪܝܳܐ ܠܘܳܬ ܫܡܽܘܐܝܠ. ܥܕܰܡܳܐ ܠܶܐܡܰܬܝ ܡܶܬܶܐܒܶܠ ‌ܐܰܢ̱ܬ ܥܰܠ ܫܳܐܘܳܠ܆ ܘܶܐܢܳܐ ܕܚܰܩܬܶܗ ܕܠܳܐ ܢܰܡܠܶܟ ܥܰܠ ‌ܐܺܝܣܪܳܐܶܝܠ^[62].

ܒܳܗ̇ ܒܰܕܡܽܘܬܳܐ ܐܳܦ ܦܰܘܠܽܘܤ ܥܳܒܶܕ ܗ̱ܘܳܐ ܟܰܕ ܠܩܽܘܪ̈ܝܢܬܳܝܶܐ ܟܳܬܶܒ ܗ̱ܘܳܐ܆ ܕܕܰܠܡܳܐ ܬܽܘܒ ܟܰܕ ܐܺ݀ܬܶܐ ܠܘܳܬܟܽܘܢ ܢܡܰܟܟ̣ܰܢܝ ܐܰ‌ܠܳܗܝ܆ ܘܶܐ݀ܬܶܐܒܶܠ ܥܰܠ ܣܰܓܺܝ̈ܶܐܐ ܡܶܢ ܗܳܢܽܘܢ ܕܩܰܕܶܡܘ ܚܛܰܘ ܘܠܳܐ ܬܳܒܘ܆ ܥܰܠ ܛܰܡܐܘܬܐ ܘܙܳܢܝܽܘܬܳܐ ܘܰܫܪܺܝܚܽܘܬܳܐ ܗܳܝ ܕܰܣܥܰܪܘ^[63].

ܐܺܝܬ ܐܳܦ ܪܰܘܡܳܐ ܐ̱ܚܪܺܢܳܐ܆ ܕܗܳܢܽܘܢ ܕܛܽܘܒܬܳܢܳܐܺܝܬ ܡܶܬܐܰܒܠܺܝܢ. ܐܰܝܟ ܐܶܡܰܬܝ ܕܐ̱ܢܳܫ ܟܰܕ ܢܰܦܫܶܗ ܕܰܟܺܝ ܡܶܢ ܗܽܘܠܶܐ܆ ܢܶܬܚܰܫܰܒ ܠܰܐܟܣܺܝܽܘܡܳܐ ܕܗܳܕܶܐ ܐܰܘܟܺܝܬ ܐܺܝܩܳܪܳܐ܆ ܘܕܰܐܝܟܰܢܳܐ ܟܰܕ ܢܶܦܠܰܬ ܡܶܢ ܦܰܪܕܰܝܣܳܐ ܘܰܫܕܳܬ ܡܶܢܳܗ̇ ܠܛܰܝܒܽܘܬܳܐ ܗܳܝ ܕܠܳܐ ܡܳܝܽܘܬܽܘܬܳܐ܆ ܟܽܘܬܺܝ̈ܢܝܳܬܳܐ ܕܡܶܫܟܳܐ ܠܶܒܫܰܬ܆ ܗܳܢܶܝܢ ܕܰܡܫܰܘ̈ܕܥܳܢ ܠܡܳܝܽܘܬܽܘܬܳܐ ܘܰܠܡܺܝܬܽܘܬܳܐ܆ ܘܢܶܪܰܓ ܠܥܽܘܢܕܳܢܳܐ ܕܒܰܡܫܺܝܚܳܐ܆ ܗܰܘ ܕܟܰܕ ܡܣܰܪܗܶܒ ܗ̱ܘܳܐ ܦܰܘܠܽܘܤ ܐܳܡܰܪ ܗ̱ܘܳܐ܆ ܙܰܒܢܳܐ ܕܥܽܘܢܕܳܢܝ ܡܛܳܐ܆ ܘܗ̱ܝ ܕܶܐ݀ܥܢܰܕ ܘܥܰܡ ܡܫܺܝܚܳܐ ܐܶ݀ܗܘܶܐ ܡܝܰܬܪܳܐ^[64]܆ ܘܰܚܢܰܢ ܗܳܢܽܘܢ ܕܺܐܝܬܰܝܢ ܒܡܰܫܟܢܳܐ ܗܳܢܳܐ ܛܥܺܝܢܺܝܢ ܚ̱ܢܰܢ ܝܽܘܩܪܳܐ^[65].

ܗܳܕܶܐ ܐܳܦ ܕܰܘܺܝܕ ܚܳܐܶܫ ܗ̱ܘܳܐ ܟܰܕ ܐܳܡܰܪ܆ ܗܘ̣̈ܰܝ ܠܺܝ ܕܶܡ̈ܥܰܝ ܠܰܚܡܳܐ ܐܺܝܡܳܡܳܐ ܘܠܶܠܝܳܐ. ܠܶܐܡܰܬܝ ܐܺ݀ܬܶܐ ܘܶܐ݀ܚܙܶܐ ܠܦܰܪܨܽܘܦܳܐ ܕܰܐ‌ܠܳܗܳܐ^[66]. ܗܳܕܶܐ ܣܳܒܶܠ ܗ̱ܘܳܐ ܐܳܦ ܐܰܢܛܽܘܢܝܘܤ ܗܰܘ ܪܰܒܳܐ܆ ܟܰܕ ܡܶܢ ܫܶܦ̈ܥܶܐ ܕܟܰܝ̈ܳܐ ܕܥܳܢܘܳܝܽܘܬܳܐ܆ ܠܘܳܬ ܩܰܢܳܝܽܘܬܳܐ ܠܳܐ ܦܰܓܪܳܢܳܝܬܳܐ ܣܠܶܩ܆ ܘܗܳܠܶܝܢ ܕܫܳܘ̈ܝܳܢ ܠܪܰܘܡܳܗ̇ ܕܢܰܦܫܳܐ ܡܶܬܪܰܥܶܐ ܗ̱ܘܳܐ܆ ܘܒܳܗܶܬ ܗ̱ܘܳܐ ܘܡܶܬܬܰܢܰܚ ܗ̱ܘܳܐ܆ ܐܶܡܰܬܝ ܕܰܠܘܳܬ ܬܽܘܪܣܳܝܳܐ ܕܦܰܓܪܳܐ ܡܶܬܶܐܠܶܨ ܗ̱ܘܳܐ ܠܡܶܚܰܬ̣.

ܡܶܛܽܠ ܗܳܢܽܘܢ ܕܗܳܟܰܢܳܐ ܡܶܛܽܠ ܒܪܶܗ ܕܐ̱ܢܳܫܳܐ ܡܶܬܐܰܒܠܺܝܢ ܟܬܺܝܒ܆ ܛܽܘܒܰܝܟܽܘܢ ܗܳܢܽܘܢ ܕܒܳܟܶܝܢ ܕܬܶܓܚܟܽܘܢ^[67]. ܓܽܘܚܟܳܐ ܕܶܝܢ ܗܳܪܟܳܐ ܠܚܰܕܽܘܬܳܐ ܘܰܠܒܽܘܝܳܐܳܐ ܡܫܰܡܰܗ܆ ܟܰܕ ܡܰܬܰܝ ܟܬܰܒ ܠܰܘ ܕܬܶܓܚܟܽܘܢ܆ ܐܶܠܳܐ ܕܬܶܬܒܰܝܐܘܽܢ^[68]. ܥܝܳܕܰܐ ܗ̄ܘ ܓܶܝܪ ܠܰܟܬܳܒܳܐ ܐܰ‌ܠܳܗܳܝܳܐ܆ ܕܢܶܩܪܶܐ ܠܚܰܕܽܘܬܳܐ ܓܽܘܚܟܳܐ. ܡܶܛܽܠ ܗܳܕܶܐ ܐܳܦ ܣܰܪܳܐ ܟܰܕ ܝܶܠܕܰܬ ܠܺܐܝܣܚܳܩ ܐܶܡܪܰܬ܆ ܓܽܘܚܟܳܐ ܥܒܰܕ ܠܺܝ ܡܳܪܝܳܐ. ܗܰܘ ܓܶܝܪ ܕܢܶܫܡܰܥ ܢܶܚܕܶܐ ܠܺܝ^[69]. ܘܳܐܦ ܐܺܝܘܒ ܕܶܝܢ ܡܶܛܽܠ ‌ܐܰ‌ܠܳܗܳܐ ܐܶܡܰܪ܆ ܠܦܽܘܡܳܐ ܕܶܝܢ ܫܰܪܺܝܪܳܐ ܢܶܡܠܽܘܗ̱ܝ ܓܽܘܚܟܳܐ^[70]. ܠܓܽܘܚܟܳܐ ܕܶܝܢ ܗܰܘ ܕܡܶܢ ܦܽܘ̈ܡܶܐ ܗܳܢܽܘܢ ܕܡܶܬܩܰܬܩܬܺܝܢ ܘܠܳܐ ܪ̈ܕܰܝܳܐ ܡܶܬܶܐܫܶܕ܆ ܚܰܟܺܝܡܳܐܺܝܬ ܡܰܣܠܶܐ ܩܽܘܗܠܰܬ ܟܰܕ ܐܳܡܰܪ܆ ܐܰܝܟ ܩܳܠܳܐ ܕܟܽܘܒ̈ܶܐ ܬܚܶܝܬ ܩܰܕܣܳܐ܆ ܗܳܟܰܢܳܐ ܓܽܘܚܟܳܐ ܕܣܰܟ̈ܠܶܐ^[71].

ܐܰܝܟܳܐ ܐܺܝܬܰܝܗܽܘܢ ܗܳܢܽܘܢ ܕܰܠܟܽܠܶܗ ܝܰܘܡܳܐ ܒܚܶܙܘܳܢ̈ܶܐ ܡܰܛܠܩܺܝܢ܆ ܘܰܒܠܶܠܝܳܐ ܠܘܳܬ ܕܰܐܦܢܶܐ ܐܳܙܺܠ̱ܝܢ܆ ܘܩܳܥܶܝܢ ܐܰܝܟ ܩܰܪ̈ܩܣܶܐ ܘܩܳܪ̈ܽܘܢܶܐ ܡ̈ܶܠܶܐ ܕܓܽܘܚܟܳܐ ܠܳܐ ܝܺܕܺܝ̈ܥܳܬܳܐ܆ ܘܕܰܠܒܳܒܽܘ̈ܣܶܐ ܒܶܗܬܬܳܐ ܡܰܝܬܶܝܢ܆ ܫܒܽܘܩ ܠܓܰܒܪ̈ܶܐ ܡܫܰܡ̈ܠܰܝܳܐ. ܐܶܠܳܐ ܟܒܰܪ ܠܘܳܬ ܗܳܠܶܝܢ ܐܶ݀ܫܡܰܥ܆ ܕܰܠܡܳܢܳܐ ܡܨܰܚܶܐ ܐܰܢ̱ܬ ܠܰܢ܆ ܟܰܕ ܐܰܢ̱ܬ ܘܠܳܐ ܡܶܕܶܡ ܡܶܣܬܰܓܰܦ ܐܰܢ̱ܬ. ܕܰܠܡܳܐ ܒܰܟ̈ܢܽܘܫܝܶܐ ܗܳܢܽܘܢ ܕܰܒܥܺܕܬܳܐ ܡܡܰܝܩܺܝܢ ܚ̱ܢܰܢ܆ ܕܰܠܡܳܐ ܠܐ̱ܢܳܫ ܒܡ̈ܶܠܰܝܢ ܡܚܰܦܛܺܝܢ ܚ̱ܢܰܢ ܕܢܺܐܙܰܠ ܢܶܚܙܶܐ ܦܽܘܪ̈ܓܳܝܶܐ܆ ܫܬܽܘܩ ܗܳܟܺܝܠ ܟܰܕ ܚܢܰܢ ܫܰܬܺܝܩܺܝܢܰܢ. ܐܶܠܳܐ ܡܛܰܝܒܳܐ ܗܝ ܠܡܺܐܡܰܪ ܠܘܳܬܗܽܘܢ ܕܰܠܟܽܘܢ ܪܶܕܝܳܐ ܫܳܪܽܘܥܳܐ ܘܰܕܪܳܗܶܛ ܠܒܶܝܬ ܬܚܬܝܢ ܕܗܰܢܺܝ̈ܐܘܳܬܳܐ ܐܺܝܬ ܠܟܽܘܢ܆ ܕܰܠܣܰܓܺܝ̈ܶܐܐ ܢܳܓܶܕ ܟܢܺܝܫܳܐܺܝܬ ܡܶܢ ܫܶܠܝ܆ ܘܕܳܐܦܠܳܐ ܥܰܠ ܚܕܳܐ ܡܶܠܬܳܐ ܣܢܺܝܩ. ܐܶܢܳܐ ܕܶܝܢ ܟܰܕ ܠܘܳܬ ܐܽܘܪܚܳܐ ܕܰܡܝܰܬܪܽܘܬܳܐ ܗܳܝ ܕܩܰܫܝܳܐ ܘܰܡܥܰܪܡܳܐ ܘܰܡܙܰܩܦܳܐ ܥܳܨܶܐ ܐ̱ܢܳܐ܆ ܥܰܠ ܚܰܒ̈ܠܶܐ ܡܠܺܝ̈ܠܶܐ ܣܰܓܺܝ̈ܶܐܐ ܣܢܺܝܩ ܐ̱ܢܳܐ܆ ܐܰܝܟܰܢܳܐ ܕܟܰܕ ܣܰܓܺܝ ܥܳܡܶܠ ‌ܐ̱ܢܳܐ܆ ܠܡܰܚܣܶܢ ܐܳܦܶܢ ܠܚܰܕ ܘܒܰܠܚܽܘܕ ܐܶ݀ܬܽܘܦ ܠܘܳܬ ܗܳܠܶܝܢ ܕܰܠܥܶܠ. ܘܳܐܦܠܳܐ ܓܶܝܪ ܢܰܗܪܳܐ ܕܰܡܠܶܐ ܘܓܳܪܶܦ ܠܦܶܩ̈ܥܳܬܳܐ ܕܫܶܒ̈ܠܶܐ ܘܰܠܟܰܪ̈ܡܶܐ ܘܠܺܐܝ̈ܠܳܢܶܐ ܕܦܺܐܪ̈ܶܐ ܘܠܰܕܠܳܐ ܦܺܐܪ̈ܶܐ܆ ܫܰܦܺܝܪ ܡܶܬܥܰܠܰܠ ܘܥܳܕܶܠ ܠܦܰܠܳܚܳܐ܆ ܕܣܳܟܰܪ ܠܡܰܥܠܳܢܳܐ ܩܕܳܡ ܚܺܐܦܗܽܘܢ ܕܡܰܝ̈ܳܐ.

ܢܶܫܠܶܐ ܗܳܟܺܝܠ܆ ܘܰܢܢܽܘܚ ܡܶܢ ܓܽܘܚܟܳܐ ܠܳܐ ܟܢܺܝܟܳܐ ܘܡܶܢ ܐܰܫܺܝܕܽܘܬܳܐ. ܘܰܩܕܳܡ ܕܢܺܐܬܶܐ ܡܰܘܬܳܐ ܗܰܘ ܕܠܳܐ ܡܶܬܢܛܰܪ܆ ܒܳܬܰܪ ܐܶܒܠܳܐ ܗܰܘ ܛܽܘܒܬܳܢܳܐ ܢܶܪܕܽܘܦ܆ ܘܠܳܐ ܢܶܚܰܫ ܒܰܕܡܽܘܬ ܗܳܢܽܘܢ ܠܳܐ ܡܰܪ̈ܐܙܶܐ (ܡܰܐܪ̈ܙܶܐ) ܘܰܕܗܳܠܶܝܢ ܕܚܰܢ̈ܦܶܐ ܡܶܬܪܰܥܶܝܢ܆ ܟܰܕ ܠܶܐܘܰܢܓ̈ܶܠܺܝܰܐ ܩܰܕܺܝ̈ܫܶܐ ܫܳܡܥܺܝܢܰܢ ܕܳܐܡܪܺܝܢ܆ ܕܛܽܘܒܰܝܗܽܘܢ ܠܗܳܢܽܘܢ ܕܡܶܬܐܰܒܠܺܝܢ ܘܒܳܟܶܝܢ ܕܢܶܬܒܰܝܐܘܽܢ ܘܢܶܓܚܟܽܘܢ^[72]. ܢ݀ܫܰܒܰܚ ܕܶܝܢ ܠܰܡܫܺܝܚܳܐ܆ ܗܰܘ ܕܰܠܘܳܬ ܕܰܐܝܟ ܗܳܕܶܐ ܡܥܰܠܝܽܘܬܳܐ ܘܪܺܝܫܳܝܽܘܬܳܐ ܕܰܡܝܰܬܪܽܘܬܳܐ ܘܰܕܦܺܝܠܘܣܘܦܝܰܐ ܡܥܰܠܶܐ ܠܰܢ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܡܳܐܐ ܘܰܬܠܳܬܰܥܣܰܪ.

ܡܺܐܡܪܳܐ ܩܰܕܡܳܝܳܐ ܕܫܰܢ̱ܬܐ ܕܫܶܬ[1]

ܠܘܩܐ. 6: 20 ـ 25[2]

ܠܘܩܐ. 6: 20 ـ 25 [3]

ܡܬܝ. 7: 6 [4]

[5]ܣܺܝܡܬܐ  ܕܬܐܘܡܐ ܐܘܕܘ. ܦܐܬܐ 610 ܬܐܰܪ. ܢܶܬ̣ܐܰܪ ܬܐܳܪܳܐ. (ܡܠܬܐ ܗܝ ܚܫܝܠܬܐ ܡ̣ܢ ܬܐܘܪܝܰܐ) ܐܶܬܒܰܩܺܝ. ܪܙܳܐ. ܐܰܨܶܕ ܒܡܶܕܶܡ.

ܐ. ܛܝܡܬܐܘܣ. 6: 8 [6]

ܠܘܩܐ. 6: 20 [7]

ܡܬܝ. 5: 3 [8]

ܐ. ܛܝܡܬܐܘܣ. 6: 17 ـ 19 [9]

ܐܝܘܒ. 31: 24 ـ 28 [10]

ܐܝܘܒ. 31: 32 ـ 33 [11]

ܐܝܘܒ. 31: 17[12]

ܣܶܦܪܐ ܕܒܪܝܬܐ. 14: 22 ـ 24 [13]

ܐ. ܩܘܪ̈ܝܢܬܝܐ. 9: 13 ـ 14 [14]

ܐ. ܩܘܪ̈ܝܢܬܝܐ. 9: 15 ـ 18 [15]

ܣܶܦܪܐ ܕܒܪܝܬܐ. 18: 1 ـ [16]

ܥܒܪ̈ܝܐ. 13: 2 [17]

ܡܬܝ. 6: 24  ܐܦ ܠܘܩܐ. 16: 13[18]

ܠܘܩܐ. 6: 24[19]

ܡܬܝ. 19: 23 [20]

ܡܪܩܘܣ. 10: 24 [21]

ܡܬܝ. 6: 19 ـ 21 [22]

ܣܶܦܪܐ ܕܒܪܝܬܐ. 27: 28 [23]

ܡܬܝ. 6: 33 [24]

ܣܶܦܪܐ ܕܒܪܝܬܐ. 27: 39 [25]

ܡܬܝ. 5: 45[26]

ܣܶܦܪܐ ܕܒܪܝܬܐ. 27: 39 [27]

ܝܘܚܢܢ. 6: 63 [28]

ܙܟܪܝܐ. 12: 1 [29]

ܐܫܥܝܐ. 38: 12 [30]

ܐܓܪܬܐ ܕ ܒ. ܒܰܪܘܟ. 2: 17 ـ 18 [31]

ܡܬܝ. 26: 41 [32]

ܐ. ܩܘܪ̈ܝܢܬܝܐ. 2: 11 [33]

ܓܠܛܝ̈ܐ. 5: 16 [34]

ܪ̈ܗܘܡܝܐ. 12: 11 [35]

ܓܠܛܝ̈ܐ. 5: 22 [36]

ܐ. ܩܘܪ̈ܝܢܬܝܐ. 2: 10 [37]

ܡܬܝ. 5: 3 [38]

ܐܦܣ̈ܝܐ. 2: 2[39]

ܡܬܝ. 12: 43  ܐܦ ܠܘܩܐ. 11: 24 [40]

ܠܘܩܐ. 8: 29  ܐܦ ܡܪܩܘܣ. 5: 2 [41]

ܡܬܝ. 7: 14 [42]

ܡܬܝ. 5: 3 [43]

ܠܘܩܐ. 6: 22 [44]

ܡܬܝ. 5: 9 [45]

ܡܙܡܘܪ̈ܐ. 73: 3 [46]

ܡܬܝ. 5: 8 [47]

ܝܘܚܢܢ. 3: 2 ـ 3 [48]

ܡܬܝ. 5: 5 [49]

ܐܦܣ̈ܝܐ. 4: 31 [50]

ܡܬܝ. 5: 6  ܐܦ ܠܘܩܐ. 6: 21 [51]

ܡ̈ܬܠܐ. 2: 9 [52]

ܡܬܝ. 5: 4 [53]

ܒ. ܩܘܪ̈ܝܢܬܝܐ. 7: 10 [54]

ܡܢܝܢܐ. 11: 13 [55]

 ܡܰܬ̣ܩܳܠܳܐ[56]

ܐ. ܡܠܟ̈ܐ. 21: 4 [57]

ܐ. ܬܣܠܘܢܝܩ̈ܝܐ. 4: 13 [58]

ܡܙܡܘܪ̈ܐ. 118: 136 [59]

ܡܙܡܘܪ̈ܐ. 118: 53 [60]

ܐܪܡܝܐ. 15: 17 [61]

ܐ. ܫܡܘܐܝܠ. 15: 35  ܐܦ 16: 1 [62]

ܒ. ܩܘܪ̈ܝܢܬܝܐ. 12: 21[63]

ܒ. ܛܝܡܬܐܘܣ. 4: 6  ܐܦ ܦܝܠܝܦܣ̈ܝܐ. 1: 23 [64]

ܒ. ܩܘܪ̈ܝܢܬܝܐ. 5: 4 [65]

ܡܙܡܘܪ̈ܐ. 42: 3 ـ 4 [66]

ܠܘܩܐ. 6: 21 [67]

ܡܬܝ. 5: 4 [68]

ܣܶܦܪܐ ܕܒܪܝܬܐ. 21: 6 [69]

ܐܝܘܒ. 8: 21 [70]

ܩܘܗܠܰܬ. 7: 7[71]

ܠܘܩܐ. 6: 21  ܐܦ ܡܬܝ. 5: 4 [72]