ܥܰܠ ܐܢܩ̈ܢܝܐ ܐܰܘܟܺܝܬ ܚܽܘ̈ܕܳܬ̣ܐ ܕܥܺܕܬܳܐ ܪܰܒܬܳܐ܆ ܟܰܕ ܥܬܺܝ̈ܕܳܢ ܗ̱ܘܰܝ̈ ܕܢܶܬܩܰܪ̈ܝܳܢ ܟܬܺܝ̈ܒܳܬܳܐ ܣܘܢܘ̈ܕܝܩܐ܆ ܕܚܰܣܝܳܐ ܛܺܝܡܳܬܶܐܘܤ ܪܺܝܫܳܐ ܕܶܐܦܝܣ̈ܩܽܘܦܶܐ ܕܗܳܝ ܕܰܐܠܶܟܣܰܢܕܪ̈ܳܝܶܐ.
112: ܒܡܶܢ ܟܬܺܝ̈ܒܳܬܳܐ ܟܳܗ̈ܢܳܝܳܬܳܐ ܕܰܟܬܳܒܳܐ ܢܦܺܝܚ ܡܶܢ ܐܰܠܳܗܳܐ܆ ܩܰܒܶܠܢܰܢ ܠܰܫܡܳܐ ܟܺܝܬ ܘܰܠܣܽܘܥܪܳܢܳܐ ܕܰܐܢܩ̈ܢܝܐ ܐܰܘܟܺܝܬ ܚ̈ܽܘܕܳܬ̣ܶܐ. ܐܳܦ ܓܶܝܪ ܒܕܽܘܟ ܐܳܦ ܡܶܢ ܐܶܘܰܢܓ̈ܶܠܺܝܰܐ ܩܰܕܺܝ̈ܫܶܐ ܫܡܰܥܢܰܢ ܕܳܐܡܪܺܝܢ܆ ܕܰܗܘ̣ܰܘ ܚ̈ܽܘܕܳܬܶܐ ܒܽܐܘܪܫܠܶܡ[1]. ܕܡܶܢ ܗܳܪܟܳܐ ܐܳܦ ܚܢܰܢ܆ ܥܺܐܕܳܐ ܗܳܢܳܐ ܕܰܐܡܺܝܪ ܕܥܺܕܬܳܐ ܗܳܕܶܐ ܪܰܒܬܳܐ܆ ܡܥܰܕܥܕܺܝܢܰܢ ܗܳܫܳܐ. ܐܰܟܚܕܳܐ ܡܰܢ܆ ܐܳܦ ܟܰܕ ܡܝܰܩܪܺܝܢܰܢ ܠܗܰܝܟܠܳܐ ܗܳܢܳܐ ܐܰܠܳܗܳܝܳܐ܆ ܕܒܶܗ ܒܟܽܠ ܝܽܘܡ ܡܶܬܟܰܗܰܢ ܐ̱ܪܳܙܳܐ ܕܫܰܦܺܝܪܽܘܬ ܕܶܚܠܬܳܐ܆ ܘܟܽܠܶܗ ܛܶܟܣܳܐ ܕܬܶܫܡܶܫܬܳܐ ܡܠܺܝܠܬܳܐ ܡܶܬܡܰܠܶܐ܆ ܘܟܰܕ ܥܰܠ ܐܰܠܳܗܳܐ ܡܰܣܩܺܝܢܰܢ ܠܶܗ ܠܺܐܝܩܳܪܳܐ܆ ܐܰܝܟ ܡܶܠܬܶܗ ܕܰܢܒܺܝܳܐ ܗܰܘ ܕܰܡܙܰܡܰܪ ܘܳܐܡܰܪ܆ ܢܶ݀ܣܓܽܘܕ ܒܕܽܘܟܬܳܐ ܐܰܝܟܳܐ ܕܩܳܡ ܪ̈ܶܓܠܰܘܗ̱ܝ[2]. ܐܰܟܚܕܐ ܕܶܝܢ ܘܟܰܕ ܡܚܰܘܶܝܢ ܚ̱ܢܰܢ܆ ܕܠܰܘ ܥܰܠ ܒܶܢܝܳܢܳܐ ܗܳܢܳܐ ܡܶܬܚܰܙܝܳܢܳܐ ܣܳܝܡܺܝܢܰܢ ܠܳܗ̇ ܠܟܽܠܳܗ̇ ܨܒܽܘܬܳܐ܆ ܟܰܕ ܥܰܬܺܝܩܽܘܬܳܐ ܘܚܰܕܬ̣ܽܘܬ̣ܳܐ ܡܶܕܶܡ ܝܳܕܥܺܝܢܰܢ ܕܩܰܝ̈ܣܶܐ ܘܰܕܟܺܐܦ̈ܶܐ܆ ܘܰܕܗܳܠܶܝܢ ܡܥܰܕܥܕܺܝܢܰܢ ܚ̈ܽܘܕܳܬܶܐ. ܐܶܠܳܐ ܟܰܕ ܠܢܰܦ̈ܫܳܬܳܐ ܕܺܝܠܰܢ܆ ܡܶܢ ܟܽܠܳܗ̇ ܠܳܐ ܝܺܕܰܥܬܳܐ ܕܰܐܠܳܗܳܐ ܘܡܶܢ ܒܺܝܫܽܘܬܳܐ ܥܰܬܺܝܩܬܳܐ ܡܰܪܚܩܺܝܢܰܢ. ܘܰܠܘܳܬ ܚܰܕܬ̣ܽܘܬ̣ܳܐ ܘܠܳܐ ܡܥܰܬܩܳܢܽܘܬܳܐ ܕܗܰܝܡܳܢܽܘܬܐ ܕܒܰܡܫܺܝܚܳܐ ܘܕܰܥ̈ܒܳܕܶܐ ܕܒܰܡܝܰܬܪܽܘܬܳܐ ܡܶܬܚܰܕܬ̣ܺܝܢ܆ ܦܳܢܶܝܢ ܚ̱ܢܰܢ ܡܰܣܩܺܝܢܰܢ ܠܗܶܝܢ. ܐܶܢ ܐ̱ܢܳܫ ܓܶܝܪ ܒܰܡܫܺܝܚܳܐ ܒܪܺܝܬܰܐ ܗ̄ܘ ܚܕܰܬܳܐ[3]܆ ܠܦܰܘܠܽܘܤ ܫܳܡܥܺܝܢܰܢ ܕܡܰܙܥܶܩ.
ܡܶܛܽܠ ܗܳܕܶܐ ܐܳܦ ܠܩܽܘܤܛܢܛܝܢܘܤ ܡܰܠܟܳܐ ܗܰܘ ܕܰܐܝܟ ܕܒܰܫܪܳܪܳܐ ܫܰܦܺܝܪ ܕܶܚܠܬܳܐ܆ ܘܠܰܐܒܳܗ̈ܬܳܐ ܩܰܕܺܝ̈ܫܶܐ ܘܶܐܦܝܣ̈ܩܽܘܦܶܐ ܗܳܢܽܘܢ ܬܠܳܬܡܳܐܐ ܘܰܬܡܳܢܬܰܥܣܰܪ ܒܶܗ ܡܶܬܰܥܗܕܺܝܢ ܚ̱ܢܰܢ. ܘܗܳܕܶܐ ܟܰܕ ܟܪܽܘܟܝܶܗ ܕܙܰܒܢܳܐ܆ ܥܽܘܗܕܳܢܳܐ ܕܥܽܘܢܕܳܢܗܽܘܢ ܕܰܠܘܳܬ ܐܰܠܳܗܳܐ ܕܗܳܢܽܘܢ ܘܠܳܐ ܟܽܠ ܟܽܠܶܗ ܡܰܝܬܶܐ܆ ܡܶܛܽܠ ܕܳܐܦܠܳܐ ܒܚܰܕ ܝܰܘܡܳܐ ܟܽܠܗܽܘܢ ܐܰܟܚܕܳܐ܆ ܠܚܰܝ̈ܶܐ ܕܗܳܪܟܳܐ ܫܒܰܩܘ ܐܰܝܟܰܢܳܐ ܕܰܢܚܰܘܶܐ܆ ܕܰܡܚܰܠܛܳܐ ܐܺܝܬܰܘܗ̱ܝ ܚܰܓܳܐ. ܘܳܐܦ ܕܥܺܕܬܳܐ ܗܳܕܶܐ ܕܡܶܬܚܰܙܝܳܐ܆ ܘܳܐܦ ܕܗܳܝ ܕܡܶܣܬܰܟܠܳܐ܆ ܗܳܝ ܟܺܝܬ ܕܺܐܝܬܶܝܗ̇ ܫܽܘܥܳܐ ܗܰܘ ܕܗܰܝܡܳܢܽܘܬܳܐ܆ ܗܰܘ ܕܰܥܠܰܘܗ̱ܝ ܚܢܰܢ ܡܫܰܪܪܺܝܢ ܚ̱ܢܰܢ ܘܩܳܝܡܺܝܢܰܢ܆ ܟܰܕ ܐܶܬܒܢܺܝܢܰܢ ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܥܰܠ ܫܶܬܶܐܣܬܳܐ ܕܰܫ̈ܠܺܝܚܶܐ ܘܕܰܢܒܺܝ̈ܶܐ܆ ܟܰܕ ܐܺܝܬܰܘܗ̱ܝ ܟܺܐܦܳܐ ܪܺܝܫ ܓܽܘܢܝܳܐ ܕܺܝܠܳܗ̇ ܝܶܫܽܘܥ ܡܫܺܝܚܳܐ܆ ܗܰܘ ܕܒܶܗ ܟܽܠܶܗ ܒܶܢܝܳܢܳܐ ܡܶܬܠܰܚܰܡ ܐܰܟܚܕܳܐ܆ ܪܳܒܶܐ ܠܗܰܝܟܠܳܐ ܩܰܕܺܝܫܳܐ ܒܡܳܪܝܳܐ܆ ܗܰܘ ܕܒܶܗ ܐܳܦ ܐܢ̱ܬܽܘܢ ܐܰܟܚܕܳܐ ܥܰܡܶܗ ܡܶܬܒܢܶܝܢ ܐܢ̱ܬܽܘܢ܆ ܠܡܰܥܡܪܳܐ ܕܰܐܠܳܗܳܐ ܒܪܽܘܚܳܐ[4].
ܐܳܦ ܓܶܝܪ ܗܰܘ ܩܘܤܛܢܛܝܢܘܤ ܗܰܘ ܕܥܽܘܗܕܳܢܳܐ[5] ܪܳܚܶܡ ܐܰܠܳܗܳܐ ܘܡܶܛܽܠܗܳܕܶܐ ܝܰܬܺܝܪܳܐܺܝܬ ܫܰܦܺܝܪ ܕܶܚܠܬܳܐ ܘܛܽܘܒܬܳܢܳܐ܆ ܠܰܘ ܒܰܠܚܽܘܕ ܒܰܝܬܳܐ ܗܳܢܳܐ ܟܳܗܢܳܝܳܐ ܡܶܢ ܕܪܺܝܫ ܒ̣ܢܳܐ ܘܚܰܕܶܬ ܠܰܢ ܘܰܐܩܺܝܡܶܗ ܠܥܶܠ܆ ܐܶܠܳܐ ܐܳܦ ܠܰܐܒܳܗ̈ܳܬܳܐ ܩܰܕܺܝ̈ܫܶܐ ܬܠܳܬܡܳܐܐ ܘܰܬܡܳܢܬܰܥܣܰܪ ܒܰܡܕܺܝܢ̱ܬܳܐ ܗܳܝ ܕܢܺܝܩܺܝܰܐ ܟܰܢܶܫ܆ ܐܰܝܟܰܢܳܐ ܕܰܠܟܺܐܦܳܐ ܗܰܘ ܪܺܝܫ ܓܽܘܢܝܳܐ ܡܫܺܝܚܳܐ܆ ܕܣܺܝܡ ܗ̱ܘܳܐ ܥܰܠ ܫܽܘܥܳܐ ܡܫܰܪܪܳܐ ܕܗܰܝܡܳܢܽܘܬܳܐ ܕܗܳܢܽܘܢ ܕܡܰܘܕܶܝܢ ܠܶܗ ܫܰܪܺܝܪܳܐܺܝܬ܆ ܘܡܶܬܛܡܰܪ ܗ̱ܘܳܐ ܡܶܢ ܕܽܘܓܡ̈ܰܛܰܐ ܥܰܦܪ̈ܳܢܳܝܶܐ ܕܰܐܪܺܝܽܘܤ܆ ܗܳܢܽܘܢ ܕܥܰܡ ܒܶܪ̈ܝܳܬܳܐ ܡܳܢܶܝܢ ܗ̱ܘܰܘ ܐܰܟܚܕܳܐ ܠܗܰܘ ܠܳܐ ܒܰܪܝܳܐ܆ ܒܳܐܡ̈ܝܳܬܳܐ ܡܰܠ̈ܦܳܢܝܳܬܳܐ ܕܫܽܘܒܚܳܐ ܬܪܺܝܨܳܐ ܢܶܓܠܽܘܢ ܘܰܢܚܰܪܪܽܘܢ ܘܕܰܟܝܳܐ ܢܚܰܘܽܘܢܳܝܗ̱ܝ . ܗܳܝ ܟܺܝܬ ܕܳܐܦ ܣܥܰܪܘ܆ ܟܰܕ ܠܥܰܦܪܳܐ ܕܕܽܘܓ̈ܡܰܛܰܐ ܗܳܢܽܘܢ ܪ̈ܰܫܺܝܥܶܐ ܘܛܢ̈ܝ ܒܰܐܪܥܳܐ܆ ܚܛܰܘ ܘܰܐܦܶܩܘ ܡܶܢ ܥܻ̈ܕܳܬܳܐ ܩܰܕܺܝ̈ܫܳܬܳܐ܆ ܘܰܐܝܟ ܗܳܝ ܕܰܒܢܳܡܽܘܣܳܐ ܐܰܡܺܝܪܳܐ ܠܒܰܪ ܡܶܢ ܡܰܫܪܺܝܬܳܐ ܫܕܰܘ܆ ܘܚܰܘܝܘܗ̱ܝ ܠܟܺܐܦܳܐ ܗܰܘ ܪܺܝܫ ܓܽܘܢܝܳܐ ܢܰܨܺܝܚܳܐ ܕܰܠܥܶܠ ܣܺܝܡ܆ ܘܰܠܥܶܠ ܡܶܢ ܟܽܠܳܗ̇ ܒܪܺܝܬܳܐ ܡܥܰܠܰܝ܆ ܘܰܫܘܶܐ ܒܺܐܝܩܳܪܳܐ ܐܺܝܬܰܘܗ̱ܝ ܘܰܫܘܶܐ ܒܽܐܘܣܺܝܰܐ ܠܰܐܠܳܗܳܐ ܐܰܒܳܐ ܘܰܠܪܽܘܚܳܐ܆ ܕܡܶܛܽܠ ܪܶܚܡܰܬ ܐ̱ܢܳܫܽܘܬܶܗ ܕܰܠܘܳܬܰܢ܆ ܠܳܐ ܡܶܫܬܰܚܠܦܳܢܳܐܺܝܬ ܡܰܢ ܨܶܒܝܳܢܳܐܺܝܬ ܕܶܝܢ܆ ܗܳܝ ܕܥܰܡ ܒܶܣܪܳܐ ܢܶܬܥܰܪܙܰܠ ܐܶܬܡܰܣܟܰܢ܆ ܘܟܽܠܶܗ ܗܳܢܳܐ ܢܚܶܬ ܡܶܛܽܠ ܡܕܰܒܪܳܢܽܘܬܳܐ܆ ܟܡܳܐ ܕܺܐܝܬܰܘܗ̱ܝ ܠܥܶܠ ܡܶܢ ܟܽܠ ܪܺܝܫܳܢܽܘܬܳܐ ܘܫܽܘܠܛܳܢܳܐ ܘܡܳܪܽܘܬܳܐ ܘܚܰܝܠܳܐ[6]܆ ܐܰܝܟܰܢܳܐ ܕܳܐܦ ܡܰܘܬܐ ܢܶܛܥܰܡ ܘܰܠܗܳܢܳܐ ܢܶܣܒܽܘܠ܆ ܝܺܕܺܝܥܳܐ ܕܶܝܢ ܕܰܥܕܰܡܳܐ ܠܦܰܓܪܳܐ ܗܰܘ ܕܰܡܟܳܢ ܗ̱ܘܳܐ ܕܢܶܚܰܫ܆ ܗܰܘ ܕܶܐܬܢܰܦܰܫ ܒܢܰܦܫܳܐ ܡܠܺܝܠܬܳܐ ܟܺܝܬ ܘܡܶܬܗܰܘܢܳܢܺܝܬܳܐ. ܐܳܦ ܓܶܝܪ ܠܰܘ ܕܰܐ̱ܚܪܺܢܳܐ ܐ̱ܢܳܫ ܐܺܝܬܰܘܗ̱ܝ ܗ̱ܘܳܐ ܗܽܘ ܚܰܫܳܐ܆ ܐܶܠܳܐ ܐܶܢ ܕܰܐܠܳܗܳܐ ܗܰܘ ܕܶܐܬܒܰܣܰܪ ܘܶܐܬܒܰܪܢܰܫ. ܘܚܰܕ ܐܺܝܬܰܘܗ̱ܝ ܡܶܢ ܬܰܪܬܶܝܢ ܠܳܐ ܡܶܬܦܰܠܓܳܢܳܐܺܝܬ ܡܶܢ ܐܰܠܳܗܽܘܬܳܐ ܘܐ̱ܢܳܫܽܘܬܳܐ܆ ܘܩܰܘܺܝ ܠܳܐ ܚܳܫܽܘܫܳܐ܆ ܐܳܦܶܢ ܐܶܫܬܰܘܬܰܦ ܠܚܰܫܳܐ ܒܝܰܕ ܗܰܘ ܕܰܡܟܳܢ ܗ̱ܘܳܐ ܕܢܶܚܰܫ. ܕܗܰܘ ܓܶܝܪ ܕܕܺܝܠܶܗ ܐܺܝܬܰܘܗ̱ܝ ܦܰܓܪܳܐ܆ ܗܰܘ ܕܰܠܘܳܬܶܗ ܩܳܐܶܡ ܚܰܫܳܐ܆ ܕܗܳܢܳܐ ܡܶܢ ܟܽܠܦܪܽܘܤ ܐܳܦ ܨܠܺܝܒܳܐ ܘܳܐܦ ܡܰܘܬܳܐ܆ ܟܰܕ ܠܳܐ ܣܢܺܝܩ ܠܰܣܢܺܐܓܪܽܘܬܳܐ܆ ܥܰܠ ܦܰܢܛܰܣܺܝܰܐ ܕܠܳܐ ܐܰܠܳܗ ܕܶܐܘܛܶܘܟܶܐ܆ ܘܥܰܠ ܦܽܘܠܳܓܳܐ ܬܪ̈ܝ̣ܝ̣ ܟܝܳܢ̈ܐ ܕܢܶܣܛܽܘܪܺܝܽܘܤ. ܗܳܢܽܘܢ ܕܪܰܫܺܝܥܳܐܺܝܬ ܒܟܰܠܩܺܝܕܽܘܢܰܐ ܐܶܬܟܰܢܰܫܘ܆ ܐܰܝܟܰܢܳܐ ܕܰܢܥܰܟܪܽܘܢܳܝܗ̱ܝ ܡܶܢ ܦܽܘܪܩܳܢܳܐ ܕܺܝܠܰܢ܆ ܘܗܳܟܰܢܳܐ ܐܰܝܟ ܗܳܝ ܕܰܠܗܽܘܢ ܡܶܣܬܰܒܪܳܐ܆ ܢܫܰܟܢܽܘܢ ܠܶܗ ܠܳܐ ܚܳܫܽܘܫܽܘܬܳܐ ܕܠܳܐ ܝܽܘܬܪܳܢ ܘܰܣܪܺܝܩܬܳܐ܆ ܐܰܘ ܕܰܣܒܺܝܪܽܘܬܳܐ܆ ܐܰܘ ܕܰܟܝܳܢܳܐ ܐ̱ܢܳܫܳܝܳܐ ܕܕܺܝܠܳܢܳܐܺܝܬ ܘܰܦܪܺܝܫܳܐܺܝܬ ܡܶܬܟܬܶܒ ܥܠܰܘܗ̱ܝ ܬܽܘܪܳܨܳܐ ܗܰܘ ܪܰܒܳܐ܆ ܕܡܰܘܬܳܐ ܗܰܘ ܦܳܪܽܘܩܳܝܳܐ ܘܕܰܩܝܳܡܬܳܐ.
ܕܥܺܕܬܳܐ ܗܳܟܺܝܠ ܗܳܝ ܕܥܰܠ ܗܳܢܳܐ ܫܽܘܥܳܐ ܡܶܬܗܰܘܢܳܢܳܐ ܕܗܰܝܡܳܢܽܘܬܳܐ ܡܫܰܬܐܣܳܐ܆ ܝܰܘܡܳܢܳܐ ܐܶܢܳܐ ܡܫܰܡܠܶܐ ܐ̱ܢܳܐ ܚ̈ܽܘܕܳܬܶܐ ܡܰܠܽܘܢ܆ ܠܰܘ ܕܗܳܝ ܕܰܒܥܰܝ̈ܢܶܐ ܡܶܬܪ̈ܰܓܫܳܢܝܳܬܳܐ ܡܶܬܚܰܙܝܳܐ. ܘܰܠܗܳܕܶܐ ܡܫܰܪܰܪ ܢܰܗܺܝܪܳܐܺܝܬ܆ ܗܰܘ ܕܰܠܟܽܠܗܶܝܢ ܒܚܶܟܡܬܳܐ ܡܰܦܶܩ܆ ܘܰܡܦܰܪܢܶܤ ܠܗܳܠܶܝܢ ܕܺܝܠܰܢ. ܡܚܰܓܝܳܐ ܓܶܝܪ ܐܰܟܚܕܳܐ ܥܰܡܰܢ܆ ܥܺܕܬܳܐ ܩܰܕܺܝܫܬܳܐ ܗܳܝ ܕܒܰܡܕܺܝܢ̱ܬܳܐ ܪܰܒܬܳܐ ܘܰܡܗܰܝܡܰܢܬܳܐ ܕܰܐܠܶܟܣܰܢܕܪܽܘܤ܆ ܟܰܕ ܒܦܰܪܺܝܩܽܘܬܳܐ ܡܰܢ ܕܕܽܘܟܬܳܐ ܠܪܽܘܚܩܳܐ ܐܺܝܬܶܝܗ̇܆ ܒܪܽܘܚܳܐ ܕܶܝܢ ܡܚܰܝܕܳܐ ܘܩܰܪܺܝܒܳܐ܆ ܘܐ̱ܪܳܙܳܢܳܐܺܝܬ ܐܰܟܚܕܳܐ ܥܰܡܰܢ ܚܳܕܝܳܐ ܘܩܽܘܪܒܳܢܳܐ ܡܰܝܬܝܳܐ܆ ܠܕܽܘܟܪܳܢܳܐ ܡܰܢ ܕܰܬܠܳܬܡܳܐܐ ܘܰܬܡܳܢܬܰܥܣܰܪ ܐܶܦܝܣ̈ܩܽܘܦܶܐ ܩܰܕܺܝ̈ܫܶܐ ܘܪ̈ܺܝܫܰܝ ܟܳܗ̈ܢܶܐ܆ ܪܺܝܫ ܟܳܗ̈ܢܶܐ ܚܰܕܬܳܐ ܘܣܳܒܳܐ ܒܬܰܪܥܺܝܬܳܐ܆ ܠܫܶܬܶܐܣܬܳܐ ܕܶܝܢ ܕܗܰܝܡܳܢܽܘܬܳܐ ܕܺܝܠܗܽܘܢ܆ ܟܬܺܝ̈ܒܳܬܳܐ ܣܽܘܢܘܕܺܝܩ̈ܶܐ ܕܗܶܢܶܝܢ ܟܰܕ ܗܶܢܶܝܢ ܐܰܟܘܳܬܳܗ̇ ܕܫܶܬܶܐܣܬܳܐ ܡܡܰܠ̈ܠܳܢ ܘܰܐܟܚܕܳܐ ܥܰܡܳܗ̇ ܡܶܬܠܰܚ̈ܡܳܢ܆ ܒܰܕܡܽܘܬ ܩܺܝܬܳܪܳܐ ܡܶܕܶܡ ܕܺܐܝܬ ܠܶܗ ܡܶܢ̈ܶܐ ܫܰܦܺܝܪ̈ܳܬ ܢܶܥ̈ܡܳܬܳܐ܆ ܘܰܕܗܳܝ ܕܫܰܦܺܝܪܳܐ ܘܡܰܦܨܚܳܐ ܙܳܡܪ̈ܳܢ. ܕܒܰܨ̈ܠܰܘܳܬܗܽܘܢ ܟܺܝܬ ܘܰܒܬܰܟܫ̈ܦܳܬܗܽܘܢ ܕܺܝܠܗܽܘܢ ܕܰܐܒܳܗ̈ܳܬܳܐ܆ ܗܰܝܡܢܶܬ ܕܪܳܥܝܳܐ ܒܚܺܝܪܳܐ ܐܶܬܺܝܗܶܒ ܠܳܗ̇܆ ܘܰܕܛܰܪܩܳܐܺܝܬ ܘܰܡܠܺܝܠܳܐܺܝܬ ܐܰܟܚܕܳܐ ܘܦܰܐܝܽܘܬ ܟܳܗܢܳܐܺܝܬ ܡܶܢ ܛܰܠܝܽܘܬܶܗ ܡܪܰܒܰܝ܆ ܘܰܕܠܰܘ ܒܪ̈ܶܓܠܶܐ ܕܠܳܐ ܡܫ̈ܳܓܳܢ ܗܳܝ ܟܺܝܬ ܕܡܶܬܐܰܡܪܳܐ܆ ܥܰܠ ܟܽܘܪܣܝܳܐ ܣܠܶܩ܆ ܐܶܠܳܐ ܕܩܰܕܺܝܡ ܡܕܰܟܰܝ ܡܶܢ ܩܕܳܡ ܟܳܗܢܽܘܬܳܐ܆ ܒܗܽܘܓܳܝܳܐ ܕܚܰܝ̈ܶܐ ܘܰܕܡܶܠܬܳܐ܆ ܘܰܒܝܰܨܺܝܦܽܘܬܳܐ ܥܺܝܪܬܳܐ ܘܰܒܥܽܘܬܳܕܳܐ ܕܟܽܠܗܶܝܢ܆ ܠܘܳܬ ܗܳܝ ܕܢܶܬܡܨܶܐ ܕܳܐܦ ܠܰܐ̱ܚܪ̈ܳܢܶܐ ܠܡܰܠܳܦܽܘ ܘܰܠܡܰܝܬܳܝܽܘ ܨܶܝܕ ܐ̱ܪ̈ܳܙܶܐ. ܗܳܟܰܢܳܐ ܟܺܝܬ ܐܳܦ ܐܶܙܕܢܶܩܘ ܘܶܐܬܢܦܰܚܘ ܒܰܕܡܽܘܬ ܣܺܝܦܢܳܐ ܕܬܶܒܢܳܐ ܡܶܢ ܛܰܝܒܽܘܬܳܐ ܐܰܠܳܗܳܝܬܳܐ܆ ܗܳܢܽܘܢ ܕܰܡܣܰܝܒܳܐܺܝܬ ܘܠܳܐ ܟܳܗܢܳܐܺܝܬ ܠܪܺܝܫܽܘܬ ܩܳܝܽܘܡܽܘܬܳܐ ܪܰܓܘ܆ ܘܕܰܐܘ ܟܢܺܝܟܽܘܬܳܐ ܓܒܺܝܠܬܳܐ ܘܠܳܐ ܣܳܥܽܘܪܳܝܬܳܐ ܘܕܰܠܬܰܚܬ ܡܰܪܟܢܳܐ ܓܒܺܝܢܳܐ ܒܰܕܡܽܘܬ ܫܶܠܚܳܐ ܡܺܝܬܳܐ ܕܥܶܪܒܳܐ ܠܒܺܝܫܺܝܢ܆ ܘܰܒܚܶܠ̈ܡܶܐ ܠܶܐܤܛܠܳܐ ܕܪܺܝܫܽܘܬ ܟܳܗܢܽܘܬܳܐ ܗܶܢܽܘܢ ܥܰܠ ܢܰܦܫܗܽܘܢ ܪܳܡܶܝܢ܆ ܘܟܰܕ ܐܳܦܠܳܐ ܒܚܶܠܡܳܐ ܐܺܝܬܰܝܗܽܘܢ ܡܚܰܪܪ̈ܶܐ ܡܶܢ ܚܰܫܳܐ܆ ܐܶܠܳܐ ܐܳܦ ܣܰܓܺܝ ܕܳܘܝܳܐܺܝܬ ܡܶܬܟܰܒܫܺܝܢ ܬܚܶܝܬ ܡܳܪܽܘܬܶܗ܆ ܘܰܐܝܟ ܟܰܠ̈ܒܶܐ ܝܰܥ̈ܢܶܐ ܡܶܬܟܰܪܟܺܝܢ ܘܰܡܪܰܚܪܚܺܝܢ܆ ܕܕܰܠܡܳܐ ܒܕܽܘܟ ܢܶܪܓܫܽܘܢ ܒܡܶܕܶܡ ܚܰܕܬܳܐ ܕܓܳܕܶܫ܆ ܐܰܘ ܒܰܫܓܽܘܫܝܳܐ ܕܟܶܢ̈ܫܶܐ܆ ܐܰܘ ܒܰܒܠܺܝܠܽܘܬܳܐ ܐ̱ܚܪܺܬܳܐ ܕܙܰܒ̈ܢܶܐ܆ ܐܘ ܒܥܽܘܪܩܳܠܳܐ ܕܣܽܘܥܪ̈ܳܢܶܐ܆ ܒܨܰܚܘܳܐ ܓܶܝܪ ܡܶܬܚܰܙ̈ܝܳܢ ܕܕܰܐܝܟ ܐܰܝܠܶܝܢ ܐ̱ܢܳܫܺܝ̈ܢ ܐܺܝܬܰܝܗܽܘܢ܆ ܐܰܝܟܰܢܳܐ ܕܰܠܪܶܓܬܳܐ ܕܺܝܠܗܽܘܢ ܫܟܺܝܪܬܳܐ ܢܡܰܠܽܘܢ܆ ܐܰܘ ܟܰܕ ܒܩܶܢ̈ܝܳܢܶܐ ܕܥܽܘܬܪܳܐ ܕܡܶܢ ܥܰܘܠܳܐ ܡܟܰܢܫܺܝܢ ܥܰܒܺܝܛܺܝܢ܆ ܘܰܒܝܰܕ ܗܳܠܶܝܢ ܨܳܒܶܝܢ ܕܢܶܙܒܢܽܘܢ ܠܗܽܘܢ ܐܺܝ̣ܕܳܐ ܡܶܙܕܰܒܢܳܢܺܝܬܳܐ܆ ܘܠܰܘ ܛܰܝܒܽܘܬܳܐ ܗܳܝ ܠܳܐ ܡܶܙܕܰܒܢܳܢܺܝܬܳܐ ܕܪܽܘܚܳܐ.
ܡܳܢܳܐ ܥܳܒܶܕ ܐܰܢ̱ܬ ܐܳܘ ܒܰܪܢܳܫܳܐ. ܡܳܢܳܐ ܪܳܗܶܛ ܐܰܢ̱ܬ ܟܰܕ ܠܳܐ ܩܪܶܐ ܐܰܢ̱ܬ ܐܰܘ ܟܰܕ ܡܶܢ ܢܰܦܫܳܟ ܩܪܶܐ ܐܰܢ̱ܬ܆ ܠܘܳܬ ܢܶܟܣܬܳܐ ܚܠܺܝܬܳܐ܆ ܗܳܝ ܕܰܐ̱ܚܪ̈ܳܝܳܬܶܗ ܡܰܪܺܝܪ̈ܳܬܳܐ ܘܰܕܡܰܠ̈ܝܳܢ ܟܺܐܒܳܐ. ܠܗܳܢܽܘܢ ܕܶܝܢ ܕܳܐܦܶܢ ܡܰܪܓܫܳܢܽܘܬܳܐ ܙܥܽܘܪܬܳܐ ܐܺܝܬ ܠܗܽܘܢ܆ ܘܠܰܘ ܟܽܠ ܟܽܠܶܗ ܡܶܬܓܰܢܒܺܝܢ ܡܶܢ ܪ̈ܓܺܝܓܳܬܳܐ ܫܟܺܝܪ̈ܳܬܳܐ܆ ܩܫܰܝ̈ܳܐ ܐܺܝܬܰܝܗܽܘܢ ܐܳܦ ܗܶܢܽܘܢ ܫܽܘܪ̈ܳܝܶܐ. ܠܡܳܢܳܐ ܠܡܰܚܢܽܘܩܺܝܬܶܗ ܕܺܝܗܽܘܕܳܐ ܝܰܨܺܝܦܐܺܝܬ ܙܳܒܶܢ ܐܰܢ̱ܬ. ܠܡܳܢܳܐ ܚܦܺܝܛ ܐܰܢ̱ܬ ܠܘܳܬ ܡܰܦܽܘܠܬܳܐ ܕܣܺܝܡܘܢ. ܠܳܐ ܬܟܰܬܰܪ ܕܬܶܫܡܰܥ ܕܟܶܣܦܳܟ ܥܰܡܳܟ ܢܺܐܙܰܠ ܠܰܐܒܕܳܢܳܐ[7]. ܠܳܐ ܬܰܗܦܶܟ ܐܰܦܰܝ̈ܟ ܡܶܢ ܦܰܘܠܽܘܤ ܕܳܐܡܰܪ܆ ܠܳܐ ܗ̱ܘܳܐ ܗܽܘ ܠܶܗ ܐ̱ܢܳܫ ܢܳܣܶܒ ܐܺܝܩܳܪܳܐ܆ ܐܶܠܳܐ ܟܰܕ ܡܶܬܩܪܶܐ ܡܶܢ ܐܰܠܳܗܳܐ[8]. ܒܪܰܡ ܗܳܝ ܕܶܐܡܪܶܬ܆ ܐܶܬܪܰܚܰܡ ܐܰܠܳܗܳܐ ܘܣܰܥܪܳܗ̇ ܠܥܺܕܬܳܐ ܩܰܕܺܝܫܬܳܐ ܕܪ̈ܳܚܡܰܝ ܠܰܡܫܺܝܚܳܐ ܐܰܠܟܣܰܢܕܪ̈ܳܝܶܐ܆ ܕܰܛܪܰܕ ܠܕܺܐܒ̈ܶܐ܆ ܘܰܠܗܰܘ ܕܰܦܐܶܐ ܠܰܬܪܽܘܢܘܤ ܒܕܺܝܢܳܐ ܟܺܐܢܳܐ ܐܰܘܬܶܒ܆ ܕܰܒܝܰܕ ܪܽܘܚܳܐ ܘܥܰܡ ܟܺܐܢܽܘܬܳܐ ܘܰܫܪܳܪܳܐ܆ ܕܰܢܩܽܘܡ ܒܪܺܝܫ ܡܰܪܥܺܝܬܶܗ ܡܶܫܟܰܚ. ܘܠܺܝ ܡܶܣܬܰܒܪܳܐ܆ ܕܫܰܦܺܝܪܳܐ ܗܝ ܕܢܶܠܚܰܡ ܠܶܗ ܠܗܳܢܳܐ܆ ܠܰܢܒܺܝܽܘܬܶܗ ܕܶܐܫܰܥܝܳܐ ܗܳܝ ܕܳܐܡܪܳܐ܆ ܘܢܶܬܬܪܶܨ ܥܰܡ ܪ̈ܰܚܡܶܐ ܟܽܘܪܣܝܳܐ܆ ܘܢܶܬܶܒ ܥܠܰܘܗ̱ܝ ܥܰܡ ܫܪܳܪܳܐ ܒܡܰܫܟܢܶܗ ܕܕܰܘܺܝܕ܆ ܕܕܳܐܶܢ ܘܒܳܥܶܐ ܕܺܝܢܳܐ ܘܡܶܣܬܰܪܗܰܒ ܠܘܳܬ ܟܺܐܢܽܘܬܳܐ[9]. ܕܡܰܫܟܢܶܗ ܕܶܝܢ ܕܕܰܘܺܝܕ܆ ܥܺܕܬܳܐ ܐܺܝܬܶܝܗ̇ ܠܟܽܠܢܳܫ ܝܺܕܺܝܥܳܐ܆ ܡܶܛܽܠ ܡܫܺܝܚܳܐ ܪܺܝܫܳܗ̇ ܕܥܺܕܬܳܐ[10]܆ ܗܰܘ ܕܡܶܢ ܓܶܢܣܳܐ ܕܕܰܘܺܝܕ ܢܳܚܶܬ ܒܝܽܘܒܳܠܳܐ.
ܐܶܢܳܐ ܕܶܝܢ ܠܛܰܝܒܽܘܬܳܐ ܗܳܕܶܐ ܘܰܠܪ̈ܰܚܡܶܐ ܕܡܶܢ ܥܺܐܕܐ ܗܳܢܳܐ܆ ܘܠܳܐ ܕܐ̱ܢܳܫ ܐ̱ܚܪܺܢܳܐ ܚܳܫܶܒ ܐ̱ܢܳܐ ܕܺܐܝܬܰܝܗܽܘܢ܆ ܐܶܠܳܐ ܐܶܢ ܕܰܨ̈ܠܰܘܳܬܳܐ ܕܰܐܒܳܗ̈ܳܬܳܐ ܗܳܢܽܘܢ ܫܝܚ ܐܰܘܟܺܝܬ ܬܠܳܬܡܳܐܐ ܘܰܬܡܳܢܬܰܥܣܰܪ܆ ܘܰܕܗܳܢܽܘܢ ܕܰܠܗܳܠܶܝܢ ܕܳܡܶܝܢ. ܒܛܺܝܠ ܠܗܽܘܢ ܓܶܝܪ ܥܰܠ ܥܺܕܬܳܐ ܫܰܪܺܝܪܬܳܐ܆ ܗܳܝ ܕܥܰܠ ܗܰܝܡܳܢܽܘܬܳܐ ܕܺܝܠܗܽܘܢ ܡܫܰܪܪܳܐ ܘܰܩܒܺܝܥܳܐ܆ ܘܡܰܙܥܩܺܝܢ ܕܠܳܐ ܫܰܠܘܳܐ ܠܘܳܬ ܐܰܠܳܗܳܐ܆ ܠܰܒ̈ܢܳܬ ܩ̈ܳܠܶܐ ܗܳܠܶܝܢ ܕܡܽܘܫܶܐ܆ ܢܶܣܥܽܘܪ ܡܳܪܝܳܐ ܐܰܠܳܗܳܐ ܕܪ̈ܽܘܚܳܬܳܐ ܘܰܕܟܽܠ ܒܣܰܪ܆ ܒܰܪܢܳܫܳܐ ܥܰܠ ܟܢܽܘܫܬܳܐ ܗܳܕܶܐ܆ ܗܰܘ ܐܰܝܢܳܐ ܕܢܶܦܽܘܩ ܩܕܳܡܰܝܗܽܘܢ܆ ܘܗܰܘ ܐܰܝܢܳܐ ܕܢܶܥܽܘܠ ܩܕܳܡܰܝܗܽܘܢ܆ ܘܗܰܘ ܐܰܝܢܳܐ ܕܢܰܥܶܠ ܐܶܢܽܘܢ܆ ܘܠܳܐ ܬܶܗܘܶܐ ܟܢܽܘܫܬܶܗ ܕܡܳܪܝܳܐ܆ ܐܰܝܟ ܥܶܪ̈ܒܶܐ ܗܳܢܽܘܢ ܕܠܰܝܬ ܠܗܽܘܢ ܪܳܥܝܳܐ[11]. ܕܰܐܝܟ ܗܳܠܶܝܢ ܐܳܦ ܠܒܺܝܫ ܠܰܐܠܳܗܳܐ ܐܺܝܓܢܰܐܛܺܝܽܘܤ܆ ܟܰܕ ܠܘܳܬ ܣܳܗܕܽܘܬܳܐ ܥܰܡ ܨܶܗܝܳܐ ܡܶܕܶܡ ܠܳܐ ܡܶܬܠܰܒܟܳܢܳܐ ܪܳܕܶܦ ܗ̱ܘܳܐ܆ ܘܟܰܕ ܐܳܦܠܳܐ ܗܳܟܰܢܳܐ ܠܡܰܪܥܺܝܬܳܐ ܗܳܕܶܐ ܛܥܳܐ܆ ܡܶܛܽܠܳܬܳܗ̇ ܐܳܡܰܪ ܗ̱ܘܳܐ. ܗܳܝ ܐܰܝ̇ܕܳܐ ܕܚܠܦܝ ܒܪܳܥܝܳܐ܆ ܒܰܐܠܳܗܳܐ ܡܶܬܚܰܫܚܳܐ. ܝܶܫܽܘܥ ܡܫܺܝܚܳܐ ܠܚܽܘܕܰܘܗ̱ܝ ܢܶܣܥܪܺܝܗ̇.
ܫܽܘܡܠܳܝܳܐ ܕܗܳܠܶܝܢ ܒ̈ܢܳܬ ܩ̈ܳܠܶܐ ܐܰܠܳܗܳܝ̈ܳܬܳܐ ܘܫܰܪܺܝܪ̈ܳܬܳܐ܆ ܐܳܦ ܟܺܝܪܽܘܛܽܘܢܺܝܰܐ ܡܶܬܩܰܠܣܳܢܺܝܬܳܐ ܕܰܫܘܶܐ ܒܬܶܫܡܶܫܬܰܢ ܛܺܝܡܳܬܶܐܘܤ ܗܘ̣ܳܬ܆ ܗܳܝ ܕܒܰܡܕܺܝܢ̱ܬܶܗ ܕܰܐܠܟܣܰܢܕܪܘܤ܆ ܡܶܛܽܠ ܫܽܘܥܳܐܬܪܺܝܨܫܽܘܒܚܳܐܘܠܳܐܡܶܙܕܰܥܙܥܳܢܳܐ ܕܗܰܝܡܳܢܽܘܬܳܐ. ܗܳܝ ܕܠܳܐ ܡܰܨܝܳܐ ܕܟܰܕ ܕܰܟܝܳܐܺܝܬ ܡܶܬܢܰܛܪܳܐ ܘܡܶܢ ܟܽܠ ܚܽܘܠܛܳܢܳܐ ܢܽܘܟܪܳܝܳܐ ܡܚܰܪܪܳܐ܆ ܕܠܳܐ ܐܳܦ ܚܰܝ̈ܶܐ ܕܟܰܝ̈ܳܐ ܕܪ̈ܺܝܫܰܝ ܟܳܗ̈ܢܶܐ ܬܰܝܬܶܐ. ܡܶܛܽܠ ܕܰܐܝܟ ܒܰܪ̱ܬ ܩܳܠܶܗ ܕܦܳܪܽܘܩܰܢ܆ ܟܽܠ ܐܺܝܠܳܢܳܐ ܛܳܒܳܐ ܦܺܐܪ̈ܶܐ ܛܳܒ̈ܶܐ ܥܳܒܶܕ[12]. ܐܳܦ ܐܶܫܰܥܝܳܐ ܕܶܝܢ ܗܰܘ ܢܒܺܝܳܐ܆ ܟܰܕ ܠܡܰܘܠܕܳܢܽܘܬܳܐ ܘܰܠܡܰܠܝܽܘܬܳܐ ܕܫܽܘܥܳܐ ܗܳܢܳܐ ܝܳܕܰܥ ܗ̱ܘܳܐ܆ ܡܫܰܐܠܳܢܳܐܺܝܬ ܟܰܕ ܐܰܝܟ ܕܡܶܛܽܠ ܣܽܘܥܪܳܢܳܐ ܡܶܬܬܰܘܕܝܳܢܳܐ ܡܣܰܟܶܡ ܠܳܗ̇ ܠܡܶܠܬܳܐ ܐܳܡܰܪ܆ ܕܰܠܡܳܐ ܫܽܘܥܳܐ ܚܰܪܒܳܐ ܐܺܝܬܰܘܗ̱ܝ ܛܽܘܪܳܐ ܕܒܰܪܬ ܨܶܗܝܽܘܢ[13]. ܒܰܪܬܳܐ ܕܶܝܢ ܥܺܕܬܳܐ ܕܰܐܠܳܗܳܐ܆ ܡܶܛܽܠ ܣܳܝܽܘܡܽܘܬ ܒܢܰܝ̈ܳܐ ܕܪܽܘܚܳܐ. ܕܡܶܛܽܠ ܪܰܘܡܳܐ ܕܕܽܘܓ̈ܡܰܛܰܐ ܐܰܠܳܗܳܝ̈ܶܐ܆ ܛܽܘܪܳܐ ܪܳܡܳܐ ܘܒܶܝܬ ܕܳܘܩܳܐ ܐܺܝܬܶܝܗ̇. ܗܳܕܶܐ ܓܶܝܪ ܡܶܬܦܰܫܰܩ ܫܡܳܐ ܕܨܶܗܝܽܘܢ.
ܥܶܕܳܢܰܐ ܗ̱ܘ ܕܶܝܢ ܡܶܟܺܝܠ܆ ܡܶܛܽܠ ܟܺܝܬ ܕܰܠܘܳܬ ܫܶܡܥܳܐ ܣܳܦܩܳܐܺܝܬ ܐܰܝܟ ܕܣܳܒܰܪ ܐ̱ܢܳܐ ܥܰܬܶܕܢܳܟܽܘܢ܆ ܕܠܰܒ̈ܢܳܬ ܩ̈ܳܠܶܐ ܗܳܠܶܝܢ ܣܽܘ̈ܢܘܕܝܩܶܐ ܢܶܫܡܰܥ. ܕܡܶܢܗܶܝܢ ܬܶܚܙܽܘܢ ܫܰܠܡܽܘܬܳܐ ܕܰܚܕܳܐ ܬܰܘܕܺܝܬܳܐ ܕܺܝܠܰܢ ܘܗܰܝܡܳܢܽܘܬܳܐ܆ ܘܰܕܡܰܣܠܝܳܢܽܘܬܳܐ ܕܕܽܘܓ̈ܡܰܛܰܐ ܪ̈ܰܫܺܝܥܶܐ܆ ܐܰܝܟܰܢܳܐ ܕܠܳܐ ܬܽܘܒ ܢܶܗܘܶܐ ܠܗܽܘܢ ܐܰܬܪܳܐ ܠܗܳܢܽܘܢ ܕܳܐܡܪܺܝܢ܆ ܕܰܢܒܺܝܳܐ ܟܰܕ ܡܰܪܡܶܐ ܐܳܡܰܪ܆ ܠܳܐ ܬܡܰܠܠܽܘܢ ܠܰܢ ܬܪܺܝܨܳܐܺܝܬ܆ ܐܶܠܳܐ ܡܰܠܶܠܘ ܠܰܢ ܘܰܐܘܕܰܥܘ ܠܰܢ ܡܰܛܥܝܳܢܽܘܬܳܐ ܐ̱ܚܪܺܬܳܐ܆ ܘܰܐܗܦܶܟܘ ܠܰܢ ܡܶܢ ܐܽܘܪܚܳܐ ܗܳܕܶܐ܆ ܘܰܐܪܺܝܡܘ ܡܶܢܰܢ ܫܒܺܝܠܳܐ ܗܳܢܳܐ܆ ܘܰܐܪܺܝܡܘ ܡܶܢܰܢ ܠܡܺܐܡܪܶܗ ܕܩܰܕܺܝܫܳܐ ܕܺܐܝܣܪܳܐܶܝܠ[14]܆ ܠܰܫܒܺܝܠܳܐ ܓܶܝܪ ܗܳܢܳܐ ܢܚܰܘܶܐ ܘܢܰܠܶܦ܆ ܐܳܦܶܢ ܠܳܐ ܢܶܨܒܽܘܢ ܘܰܠܡܺܐܡܪܶܗ ܕܩܰܕܺܝܫܳܐ ܕܺܐܝܣܪܳܐܶܝܠ ܢܡܰܠܶܠ܆ ܘܠܰܘ ܐ̱ܚܪܺܢܳܐ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܫܠܡ ܡܺܐܡܪܐ ܕܡܳܐܐ ܘܰܬܪܶܥܣܰܪ.