ܐܶܬܶܐܡܰܪ ܐܳܦ ܗܳܢܳܐ ܒܶܐܓ̈ܶܐܤ. ܡܰܘܕܰܥ ܕܶܝܢ ܠܗܳܝ ܕܳܐܦ ܥܠܶܝܗ̇ ܐܶܬܶܐܡܰܪ܆ ܟܰܕ ܠܘܳܬ ܫܽܘܐܴܠܳܐ ܡܶܕܶܡ ܐܶܬܬܰܪܓܰܡ ܡܶܢܫܶܠܝ܆ ܘܠܳܐ ܩܰܕܶܡ ܐܶܬܟܬܶܒ.
111: ܐܺܝܬ ܗ̱ܘ̣ ܐܳܦ ܡܰܫܡܰܥܬܳܐ ܝܰܥܢܬܳܐ܆ ܕܒܰܡܫܽܘܚܬܳܐ ܠܫܶܡܥܳܐ ܠܳܐ ܡܬܰܚܡܳܐ܆ ܡܶܬܺܝܗܶܒ ܠܳܗ̇ ܕܶܝܢ ܛܽܘܒܳܐ ܥܰܠ ܚܰܫܳܐ ܡܶܬܩܰܠܣܳܢܳܐ[1]܆ ܡܶܛܽܠ ܕܰܠܣܰܒܥܳܐ ܡܨܰܥܪܳܢܳܐ ܕܫܶܡܥܳܐ ܕܡܶܛܽܠ ܗܳܠܶܝܢ ܐܰܠܳܗܳܝ̈ܳܬܳܐ ܛܳܪܕܳܐ. ܡܰܢܽܘ ܓܶܝܪ ܕܳܐܦ ܢܶܣܒܰܥ ܡܶܢ ܐܰܠܳܗܳܐ܆ ܗܰܘ ܢܽܘܗܪܳܐ ܡܶܬܗܰܘܢܳܢܳܐ ܘܠܳܐ ܡܶܬܩܰܪܒܳܢܳܐ. ܐܶܢ ܓܶܝܪ ܟܰܕ ܟܽܠܝܽܘܡ ܚܳܙܶܝܢܰܢ ܠܶܗ܆ ܒܟܽܠܙܒܰܢ ܚܰܕܬܳܐ ܪܳܡܶܝܢܰܢ ܠܳܗ̇ ܥܠܰܘܗ̱ܝ ܠܥܰܝܢܳܐ ܡܰܪܓܫܳܢܺܝܬܳܐ܆ ܡܳܢܳܐ ܢܺܐܡܰܪ ܡܶܛܽܠ ܙܰܗܪܳܐ ܗܰܘ ܠܳܐ ܡܶܬܡܰܠܠܳܢܳܐ܆ ܗܰܘ ܕܡܽܘܫܶܐ ܟܰܕ ܨܶܡܚܳܐ ܡܶܕܶܡ ܕܣܰܓܺܝ ܙܥܽܘܪ ܚܙܳܐ܆ ܪܳܗܶܛ ܗ̱ܘܳܐ ܘܚܳܒܶܨ ܠܘܳܬ ܢܰܨܺܝܚܽܘܬܶܗ܆ ܘܫܳܐܶܠ ܗ̱ܘܳܐ ܠܰܐܠܳܗܳܐ ܕܟܽܠ ܟܰܕ ܒܰܠܺܝܥ ܗ̱ܘܳܐ ܒܠܶܒܶܗ ܘܳܐܡܰܪ ܗ̱ܘܳܐ܆ ܚܰܘܳܐ ܠܺܝ ܐܰܢ̱ܬ ܠܳܟ܆ ܝܺܕܺܝܥܳܐܺܝܬ ܐܶ݀ܚܙܶܝܟ[2]. ܘܟܰܕ ܩܰܠܺܝܠ ܐܰܫܶܦ ܐܰܠܳܗܳܐ܆ ܘܟܽܠܶܗ ܗܳܢܳܐ ܟܡܳܐ ܕܰܠܗܰܘ ܐܺܝܬܶܝܗ̇ ܗ̱ܘܳܬ ܡܶܬܕܰܪܟܳܢܺܝܬܳܐ܆ ܐܳܡܰܪ ܟܬܳܒܳܐ ܟܳܗܢܳܝܳܐ܆ ܕܰܚܙܳܐ ܒܶܣܬܪܶܗ[3]. ܡܶܛܽܠ ܓܶܝܪ ܕܗܽܘ ܟܽܘܠܳܐ ܪܳܗܶܛ ܥܳܒܰܪ ܠܶܗ ܡܶܢܰܢ܆ ܟܽܠܶܗ ܗܳܢܳܐ ܐ̱ܢܳܫ ܢܶܚܙܶܐ ܒܰܠܚܽܘܕ܆ ܟܡܳܐ ܕܰܕܗܰܘ ܕܥܳܪܶܩ ܚ̈ܰܨܶܐ ܢܶܚܙܶܐ. ܡܶܛܽܠ ܗܳܕܶܐ ܐܳܦ ܠܟܽܘܢ ܡܩܰܠܶܤ ܐ̱ܢܳܐ܆ ܥܰܠ ܪܶܓܬܳܐ ܕܫܶܡ̈ܥܶܐ ܐܰܠܳܗܳܝ̈ܶܐ. ܗܳܟܰܢܳܐ ܓܶܝܪ ܐܳܦ ܡܳܪܰܢ ܡܶܛܽܠ ܡܰܪܝܰܡ ܗܳܝ ܚܳܬܳܗ̇ ܕܡܳܪܬܳܐ ܐܳܡܰܪ ܗ̱ܘܳܐ܆ ܕܰܒܡܰܠܦܳܢܽܘܬܶܗ ܠܳܐ ܡܶܨܛܰܠܝܳܢܳܐܺܝܬ ܩܒܰܥܬܳܗ̇ ܠܶܐܕܢܳܗ̇. ܡܰܪܝܰܡ ܡܢܳܬܳܐ ܛܳܒܬܳܐ ܓܒ̣ܳܬ ܠܳܗ̇. ܗܳܝ ܕܠܳܐ ܬܶܬܪܺܝܡ ܡܶܢܳܗ̇[4].
ܡܶܛܽܠ ܗܳܟܺܝܠ ܕܶܐܬܡܳܠ ܡ̈ܶܠܶܐ ܐܶܬܬܙܺܝܥ̈ܶܝܢ ܡܶܢܝ܆ ܠܘܳܬ ܐ̱ܢܳܫܺܝ̈ܢ ܡܶܢܟܽܘܢ ܡܶܛܽܠ ܡܶܬܒܰܪܢܫܳܢܽܘܬܳܐ ܐܰܠܳܗܳܝܬܳܐ܆ ܘܐ̱ܢܳܫ ܫܰܐܶܠ ܟܰܕ ܐܳܡܰܪ ܗ̱ܘܳܐ܆ ܕܶܐܢ ܠܳܐ ܡܶܬܦܰܪܫܳܢܰܐ ܗ̱ܘ ܒܪܳܐ ܡܶܢ ܐܰܒܳܐ܆ ܠܡܳܢܳܐ ܠܳܐ ܐܳܡܪܺܝܢܰܢ ܕܶܐܬܒܰܣܰܪ ܘܶܐܬܒܰܪܢܰܫ ܐܳܦ ܐܰܒܳܐ܆ ܙܳܕܶܩ ܠܡܺܐܡܰܪ܆ ܕܠܳܐ ܡܶܬܦܰܪܫܳܢܳܐ ܐܺܝܬܰܘܗ̱ܝ ܐܰܒܳܐ ܡܶܢ ܒܪܳܐ܆ ܒܗܳܝ ܕܺܐܝܬܰܘܗ̱ܝ ܐܰܠܳܗܳܐ ܠܘܳܬ ܐܰܠܳܗܳܐ܆ ܘܰܒܓܰܘܳܢܳܝܽܘܬܳܐ ܗܳܝ ܕܽܐܘܣܺܝܰܐ܆ ܚܕܳܐ ܗܝ ܓܶܝܪ ܐܰܠܳܗܽܘܬܳܐ ܕܰܐܒܳܐ ܘܕܰܒܪܳܐ܆ ܐܰܝܟ ܐ̱ܢܳܫܽܘܬܳܐ ܚܕܳܐ ܐܰܝܬܳܐ ܠܡܺܐܡܰܪ ܕܦܰܘܠܽܘܤ ܘܰܕܦܛܪܘܤ܆ ܘܠܰܘ ܒܕܺܝܠܳܝܽܘܬܳܐ ܗܳܝ ܕܰܩܢܽܘܡܳܐ. ܠܳܐ ܓܶܝܪ ܡܬܽܘܡ ܢܫܰܢܶܐ ܐܰܘ ܢܶܥܒܰܪ ܒܪܳܐ܆ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰܒܳܐ܆ ܐܰܝܟܰܢܳܐ ܕܳܐܦܠܳܐ ܐܰܒܳܐ ܥܳܒܰܪ ܘܰܡܫܰܢܶܐ ܠܘܳܬ ܗܳܝ ܕܢܶܗܘܶܐ ܐܺܝܬܰܘܗ̱ܝ ܒܪܳܐ. ܒܪܳܐ ܡܰܢ ܓܶܝܪ ܡܶܢ ܐܰܒܳܐ܆ ܕܠܳܐ ܫܽܘܪܳܝܳܐ ܘܰܡܬܽܘܡܳܐܺܝܬ ܝܺܠܺܝܕ܆ ܐܰܝܟ ܙܢܳܐ ܕܨܶܡܚܳܐ ܡܶܢ ܙܰܠܺܝܩܳܐ ܫܶܡܫܳܢܳܝܳܐ܆ ܕܠܳܐ ܡܬܽܘܡ ܡܶܢ ܗܰܘ ܕܡܰܨܡܰܚ ܠܶܗ ܡܶܬܦܪܶܫ. ܐܰܒܳܐ ܕܶܝܢ ܠܳܐ ܡܶܢ ܡܶܕܶܡ. ܐܶܠܳܐ ܕܺܝܠܳܝܬܳܐ ܕܺܝܠܶܗ ܐܺܝܬܶܝܗ̇ ܠܳܐ ܝܺܠܺܝܕܽܘܬܳܐ. ܡܶܛܽܠܗܳܕܶܐ ܓܶܝܪ ܡܳܪܳܢܳܐܺܝܬ܆ ܗܰܘ ܡܰܢ ܐܰܒܳܐ܆ ܗܰܘ ܕܶܝܢ ܒܪܳܐ܆ ܐܺܝܬܰܘܗ̱ܝ ܟܺܝܬ ܘܡܶܫܬܰܡܰܗ. ܐܰܘ ܗܳܟܺܝܠ ܐܳܦ ܠܰܐܒܳܐ ܬܶܬܶܠ ܕܰܒܪܳܐ ܐܺܝܬܰܘܗ̱ܝ܆ ܘܕܺܝܠܺܝܕ ܬܺܐܡܪܺܝܘܗ̱ܝ ܠܗܰܘ ܕܠܰܘ ܡܶܢ ܡܶܕܶܡ ܘܠܳܐ ܝܺܠܺܝܕܳܐܺܝܬ ܐܺܝܬܰܘܗ̱ܝ܆ ܘܒܽܘܠܒܳܠܳܐ ܬܶܥܒܶܕ ܒܝܽܘܩ̈ܢܶܐ ܕܺܝ̈ܠܳܢܳܝܶܐ܆ ܘܰܣܦܺܝ̈ܩܶܐ ܘܳܐܦ ܘܠܳܐ ܡܶܕܶܡ ܬܶܫܒܽܘܩ ܐܶܢܽܘܢ ܠܰܢ ܠܰܫ̈ܡܳܗܶܐ ܕܰܩܢܽܘ̈ܡܶܐ܆ ܐܰܘ ܟܡܳܐ ܕܰܡܩܰܘܶܐ ܐܰܒܳܐ ܐܰܒܳܐ܆ ܡܩܰܘܶܐ ܕܶܝܢ ܗܰܘ ܕܰܒܝܰܕ ܢܒܺܝܳܐ ܡܰܙܥܶܩ܆ ܐܶܢܳܐ ܐܺܝܬܰܝ ܘܠܳܐ ܐܶܫܬܰܚܠܦܶܬ[5]܆ ܠܰܘ ܐܰܢܰܢܩܺܐ ܐܺܝܬܶܝܗ̇ ܡܶܛܽܠ ܕܰܡܒܰܣܰܪ ܒܪܳܐ܆ ܕܳܐܦ ܗܽܘ ܥܰܡܶܗ ܢܶܣܬܒܰܪ ܕܰܡܒܰܣܰܪ. ܐܶܢ ܓܶܝܪ ܕܡܶܠܬܳܐ ܒܶܣܪܳܐ ܗܘ̣ܳܐ[6] ܫܳܡܥܺܝܢܰܢ ܕܩܳܥܶܝܢ ܟܳܪ̈ܽܘܙܶܐ ܕܰܫܪܳܪܳܐ܆ ܡܶܠܬܳܐ ܕܶܝܢ ܝܰܠܕܳܐ ܕܗܰܘܢܳܐ ܐܺܝܬܶܝܗ̇܆ ܗܰܘܢܳܐ ܕܶܝܢ ܕܰܠܗܰܠ ܡܶܢ ܟܽܠ ܘܽܐܘܣܝ̣ܳܝ̣ܳܐ ܐܰܒܳܐ ܐܺܝܬܰܘܗ̱ܝ܆ ܐ̱ܚܪܺܢܳܐ ܡܳܕܶܝܢ ܡܶܕܶܡ ܐܺܝܬܰܘܗ̱ܝ ܡܶܠܬܳܐ܆ ܠܒܰܪ ܡܶܢ ܗܰܘܢܳܐ ܗܰܘ ܕܕܺܝܠܶܗ ܐܺܝܬܰܘܗ̱ܝ ܡܶܠܬܳܐ܆ ܐܳܦܶܢ ܨܰܠܡܳܐ ܚܰܬܺܝܬ̣ܳܐ ܐܺܝܬܰܘܗ̱ܝ ܕܗܰܘܢܳܐ܆ ܟܰܕ ܐܰܝܟ ܗܰܘ ܕܨܳܐܰܪ ܘܰܐܝܟ ܕܰܒܛܰܒܥܳܐ ܡܫܰܡܠܝܳܐ ܡܚܰܘܶܐ ܠܗܰܘ ܡܳܐ ܕܰܒܥܽܘܡܩܳܐ܆ ܘܰܠܙܰܘܥܳܐ ܘܚܽܘܫܳܒܳܐ ܠܳܐ ܡܶܬܚܰܙܝܳܢܳܐ ܘܕܰܒܠܶܒܳܐ.
ܡܶܛܽܠ ܗܳܕܶܐ ܓܶܝܪ ܠܰܘ ܡܶܠܬܳܐ ܒܰܠܚܽܘܕ ܐܰܡܺܝܪ܆ ܐܶܠܳܐ ܐܳܦ ܡܰܠܰܐܟܳܐ ܕܬܰܪܥܺܝܬܳܐ ܪܰܒܬܳܐ܆ ܘܨܰܠܡܳܐ ܕܰܐܒܳܐ ܠܳܐ ܡܶܬܚܰܙܝܳܢܳܐ[7]܆ ܕܠܳܐ ܒܨܺܝܪܳܐܺܝܬ ܡܰܘܕܰܥ ܗܽܘ ܒܶܗ܆ ܠܗܰܘܢܳܐ ܗܰܘ ܕܡܶܢܶܗ ܝܺܠܺܝܕ܆ ܘܰܡܚܰܘܶܐ ܐܰܝܟ ܕܰܒܨܰܠܡܳܐ ܡܶܕܶܡ ܠܬܰܦܢܟܳܐ. ܐܰܝܟܰܢܳܐ ܓܶܝܪ ܕܳܐܦ ܢܺܐܡܰܪ ܠܘܳܬ ܦܝܠܝܦܘܤ ܚܰܕ ܡܶܢ ܬܰܠ̈ܡܺܝܕܶܐ܆ ܕܶܐܡܰܪ ܚܰܘܳܐ ܠܰܢ ܠܰܐܒܽܘܟ܆ ܟܽܠܶܗ ܗܳܢܳܐ ܙܰܒܢܳܐ ܥܰܡܟܽܘܢ ܐܺܝܬܰܝ܆ ܘܠܳܐ ܝܺܕܰܥܬܳܢܝ ܦܺܝܠܺܝܦܶܐ܆ ܗܰܘ ܕܰܚܙܳܢܝ ܚܙܳܐ ܠܰܐܒܳܐ[8]. ܗܳܝ ܕܶܝܢ ܕܰܚܙܳܢܝ܆ ܚܠܳܦ ܗܳܝ ܕܶܐܣܬܰܟܠܰܢܝ ܡܶܫܬܰܩܠܳܐ ܗܳܪܟܳܐ. ܐܰܝܟܰܢܳܐ ܓܶܝܪ ܐ̱ܢܳܫ ܡܶܢ ܚܙܳܬܳܐ ܦܰܓܪܳܢܳܝܬܳܐ ܘܡܶܬܪܰܓܫܳܢܺܝܬܳܐ܆ ܠܰܐܒܳܐ ܗܰܘ ܠܳܐ ܦܰܓܪܳܢܳܐ ܢܶܚܙܶܐ. ܡܶܛܽܠ ܗܳܕܶܐ ܓܶܝܪ ܐܳܦ ܩܰܕܶܡ ܣܳܡ ܗܳܝ ܕܠܳܐ ܝܺܕܰܥܬܳܢܝ. ܐܰܝܟܰܢܳܐ ܕܗܳܝ ܕܰܚܙܳܐ ܕܺܝܕܰܥ ܬܶܣܬܰܟܰܠ. ܚܙܳܬܳܐ ܓܶܝܪ ܡܶܕܶܡ ܡܶܬܗܰܘܢܳܢܺܝܬܳܐ܆ ܐܺܝܬܶܝܗ̇ ܝܺܕܰܥܬܳܐ ܕܰܐܠܳܗܳܝ̈ܳܬܳܐ.
ܗܳܢܳܐ ܗܳܟܺܝܠ ܐܶܬܒܰܣܰܪ ܘܶܐܬܒܰܪܢܰܫ. ܗܰܘ ܒܪܳܐ. ܗܰܘ ܡܶܠܬܳܐ. ܗܰܘ ܨܰܠܡܳܐ. ܠܰܘ ܐܰܒܳܐ. ܠܰܘ ܗܰܘܢܳܐ. ܘܳܐܦܠܳܐ ܬܽܘܒ ܬܰܦܢܟܳܐ. ܗܳܢܳܐ ܡܶܛܽܠܳܬܰܢ ܐܶܬܡܰܣܟܰܢ܆ ܟܰܕ ܐܺܝܬܰܘܗ̱ܝ ܥܰܬܺܝܪܳܐ[9]. ܐܳܘ ܠܰܙܥܽܘܪܽܘܬ ܡܶܠܬܳܐ ܕܦܶܬܓܳܡ̈ܶܐ܆ ܕܰܛܥܺܝܢܳܐ ܗܺܝ ܒܳܗ̇ ܥܽܘܬܪܳܐ ܕܣܽܘ̈ܟܳܠܶܐ ܦܰܐܝ̣ܰܝ̣̈ ܠܰܐܠܳܗܳܐ. ܥܰܬܺܝܪܳܐ ܓܶܝܪ ܡܳܪܳܢܳܐܺܝܬ܆ ܗܰܘ ܕܺܐܝܬܰܘܗ̱ܝ ܠܳܐ ܣܢܺܝܩܳܐ ܘܰܡܫܰܡܠܰܝ ܒܟܽܠ ܐܺܝܬܰܘܗ̱ܝ. ܗܳܝ ܟܺܝܬ ܕܕܺܝܠܳܝܬܳܐ ܕܰܐܠܳܗܳܐ ܐܺܝܬܶܝܗ̇. ܗܰܘ ܓܶܝܪ ܕܚܰܣܺܝܪܳܐܺܝܬ ܐܺܝܬ ܠܶܗ ܒܡܶܕܶܡ܆ ܗܳܢܳܐ ܠܰܘ ܥܰܬܺܝܪܰܐ ܗ̱ܘ. ܐܰܝܟܰܢܳܐ ܟܺܝܬ ܕܡܳܕܶܝܢ ܕܺܝܠܳܗ̇ ܟܰܕ ܕܺܝܠܳܗ̇ ܕܽܐܘܣܺܝܰܐ ܐܺܝܬܰܘܗ̱ܝ ܗ̱ܘܳܐ ܥܰܡ ܐܰܒܳܐ܆ ܕܬܳܫܒܽܘܚܬܳܐ܆ ܕܡܰܠܟܽܘܬܳܐ܆ ܕܰܡܬܽܘܡܳܝܽܘܬܳܐ. ܡܳܕܶܝܢ ܗܰܘ ܥܰܬܺܝܪܳܐ ܨܶܒܝܳܢܳܐܺܝܬ ܐܶܬܡܰܣܟܰܢ܆ ܘܠܰܘ ܟܰܕ ܡܶܢ ܡܶܕܶܡ ܐ̱ܢܫ ܐܶܬܕܒܰܪ ܒܰܩܛܺܝܪܳܐ. ܡܰܢܽܘ ܓܶܝܪ ܐܳܦ ܢܶܕܒܪܺܝܘܗ̱ܝ ܒܰܩܛܺܝܪܳܐ܆ ܠܗܰܘ ܕܗܳܟܰܢܳܐ ܐܺܝܬ ܠܶܗ ܒܰܟܝܳܢܳܐ ܘܰܒܚܰܝܠܳܐ.
ܐܶܬܡܰܣܟܰܢ ܕܶܝܢ ܒܗܳܝ ܕܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ܆ ܟܰܕ ܩܰܘܺܝ ܥܰܬܺܝܪܳܐ ܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ܆ ܘܠܳܐ ܫܕܳܐ ܡܶܢܶܗ ܠܰܡܥ̈ܠܝܘܳܬܳܐ ܐܰܠܳܗܳܝ̈ܳܬܳܐ ܘܽܐܘܣ̈ܝ̣ܳܝ̣ܳܬܳܐ ܗܳܠܶܝܢ ܕܺܐܝܬ ܗ̱ܘܳܐ ܠܶܗ. ܐܶܢ ܓܶܝܪ ܠܶܗ ܐܰܚܣܪܰܬ ܡܶܣܟܺܢܽܘܬܳܐ܆ ܐܰܝܟܰܢܳܐ ܐܰܝܟ ܡܶܠܬܶܗ ܕܦܰܘܠܽܘܤ܆ ܚܢܰܢ ܥܰܬܺܝܪ̈ܶܐ ܒܡܶܣܟܺܢܽܘܬܶܗ ܕܗܰܘ ܗܘ̣ܰܝܢܰܢ[10]. ܐܰܝܟܰܢܳܐ ܕܶܝܢ ܡܶܬܚܰܡܨܺܝܢ ܒܡ̈ܶܠܶܐ ܟܺܝܬ ܘܰܒܚܰܫ̈ܶܐ ܡܕܰܒܪ̈ܳܢܳܝܶܐ ܕܡܶܣܟܺܢܽܘܬܶܗ܆ ܗܳܢܽܘܢ ܣܢܺܐܓܪ̈ܶܐ ܝܰܬܺܝܪ̈ܶܐ ܕܰܗܰܘ ܠܳܐ ܣܢܺܝܩܳܐ ܘܥܰܬܺܝܪܳܐ܆ ܘܕܰܐܘ ܠܘܳܬ ܦܰܢܛܰܐܣܺܝܰܐ ܡܰܢܺܝܢܳܝܬܳܐ ܕܶܐܘܛܶܘܟܶܐ܆ ܐܰܘ ܠܘܳܬ ܦܽܘܠܳܓܳܐ ܝܺܗܽܘܕܳܝܳܐ ܕܢܶܣܛܽܘܪܺܝܽܘܤ ܡܶܬܓܰܘܣܺܝܢ. ܐܶܠܽܘ ܓܶܝܪ ܠܳܐ ܡܰܠܶܠ ܐ̱ܢܳܫܳܐܺܝܬ܆ ܡܶܢ ܐܰܝܟܳܐ ܝܳܕܥܺܝܢ ܗ̱ܘܰܘ ܕܶܐܬܡܰܣܟܰܢ. ܐܶܢ ܓܶܝܪ ܠܳܐ ܚܰܫ܆ ܐܳܦܠܳܐ ܦܪܰܩ. ܚܰܫ ܕܶܝܢ ܡܶܛܽܠ ܕܰܡܒܰܣܰܪ ܗ̱ܘܳܐ܆ ܟܰܕ ܠܘܳܬ ܗܰܘ ܡܳܐ ܕܰܡܟܳܢ ܗ̱ܘܳܐ ܕܢܶܚܰܫ ܩܳܐܶܡ ܗ̱ܘܳܐ ܗܽܘ ܚܰܫܳܐ܆ ܘܰܠܘܳܬ ܗܰܘ ܠܳܐ ܚܳܫܽܘܫܳܐ ܠܡܶܥܒܰܪ ܠܳܐ ܡܶܫܟܰܚ ܗ̱ܘܳܐ܆ ܐܳܦܶܢ ܣܰܓܺܝ ܝܰܬܺܝܪܳܐܺܝܬ ܢܶܕܒܰܪ ܗ̱ܘܳܐ ܒܰܩܛܺܝܪܳܐ. ܠܳܐ ܗܳܟܺܝܠ ܢܶܦܠܓܺܝܘܗ̱ܝ ܠܥܰܡܰܢܽܘܐܶܝܠ܆ ܣܽܘܥܪܳܢܳܐ ܘܰܫܡܳܐ ܠܳܐ ܡܶܬܦܰܠܓܳܢܳܐ܆ ܐܳܦܠܳܐ ܢܰܪܚܩܺܝܘܗ̱ܝ ܡܶܢ ܚܰܫܳܐ܆ ܐܶܢ ܠܳܐ ܠܽܘܩܕܰܡ ܢܫܰܠܚܺܝܘܗ̱ܝ ܡܰܪܚܳܐܺܝܬ ܡܶܢ ܒܶܣܪܳܐ. ܟܽܠ ܟܡܳܐ ܕܶܝܢ ܕܰܡܒܰܣܰܪ ܡܶܣܬܰܟܰܠ܆ ܐܳܦ ܕܚܰܫ ܒܰܒܣܰܪ ܡܶܬܬܰܘܕܶܐ܆ ܘܰܐܠܳܗܳܐ ܘܦܳܪܽܘܩܳܐ ܕܟܽܠ ܡܶܬܗܰܝܡܰܢ ܕܺܐܝܬܰܘܗ̱ܝ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܡܳܐܐ ܘܰܚܕܰܥܣܪ.