ܥܰܠ ܩܰܕܺܝܫܳܐ ܣܳܗܕܳܐ ܬܐܠܐܠܐܘܣ[1]. ܐܶܬܶܐܡܰܪ ܕܶܝܢ ܡܶܢ ܫܶܠܝ ܟܰܕ ܠܳܐ ܩܰܕܶܡ ܐܶܬܥܰܬܰܕ. ܒܶܐܓ̈ܶܐܤ ܡܕܺܝܢ̱ܬܳܐ ܒܒܶܝܬ ܣܳܗ̈ܕܶܐ ܕܺܝܠܶܗ.
110: ܠܺܝ ܕܒܰܙܒܰܢ ܡܶܢ ܩܕܺܝܡ ܪܳܐܶܓ ܗ̱ܘܺܝܬ̣܆ ܕܰܠܕܽܘܟܬܳܐ ܟܺܝܬ ܗܳܕܶܐ ܩܰܕܺܝܫܬܳܐ ܘܰܠܗܰܝܟܠܳܐ ܕܬܐܠܐܠܐܘܤ ܣܳܗܕܳܐ ܐܶ݀ܚܙܶܐ܆ ܘܶܐ݀ܥܰܦܶܩ ܠܩܰܒܪܶܗ ܐܰܬܠܺܝܛܳܝܳܐ܆ ܕܰܒܬܶܕܡܪ̈ܳܬܳܐ ܣܰܓܺܝ̈ܳܐܬܳܐ ܡܶܬܟܰܠܰܠ ܒܟܽܠ ܝܰܘ̈ܡܺܝܢ ܘܒܳܐܣܺܝ̈ܘܳܬܳܐ ܕܟܽܠ ܙܢܺܝ̈ܢ ܕܟܽܘܪ̈ܗܳܢܶܐ܆ ܝܰܗ̱ܒ ܥܶܠܬܳܐ ܕܠܳܚܡܳܐ܆ ܗܰܘ ܕܺܐܝܬܰܘܗ̱ܝ ܥܶܠܬܳܐ ܕܟܽܠܗܶܝܢ ܛܳܒ̈ܳܬܳܐ܆ ܘܰܡܛܰܝܒܳܐ ܠܰܡܡܰܠܳܝܽܘ ܠܰܪ̈ܓܺܝܓܳܬܳܐ ܗܳܠܶܝܢ ܕܡܰܝ̈ܬܝܳܢ ܠܘܳܬ ܗܳܝ ܕܰܡܝܰܬܪܳܐ܆ ܠܗܳܝ ܕܶܐ݀ܫܬܘܶܐ ܠܪܶܓܬܳܐ ܗܳܕܶܐ ܡܶܬܩܰܠܣܳܢܺܝܬܳܐ܆ ܘܡܰܘܬܪܳܢܺܝܬܳܐ ܘܰܕܫܳܘܝܳܐ ܠܰܨܠܽܘܬܳܐ. ܡܳܢܳܐ ܗܝ ܕܶܝܢ ܗܺܝ ܥܶܠܬܳܐ. ܡܫܰܒܚܳܐ ܘܪܳܚܶܡ ܐܰܠܳܗܳܐ ܤܛܪܐܛܝܓܘܤ ܐܰܘܟܺܝܬ ܪܺܝܫ ܚܰܝܠܳܐ܆ ܕܡܶܛܽܠ ܬܽܘܪܳܨܳܐ ܕܣܽܘܥܪ̈ܳܢܶܐ ܓܰܘܳܢܳܝ̈ܶܐ ܕܦܽܘܠܺܝܛܺܝܰܐ ܐܶܬܳܐ ܠܗܳܪܟܳܐ. ܕܶܐܢܳܐ ܓܶܝܪ ܟܰܕ ܒܰܡܕܺܝܢ̱ܬܳܐ ܕܰܐܢܛܝܘܟܘܤ ܐܰܣܺܝܪ ܐ̱ܢܳܐ܆ ܒܰܐܣܽܘܪ̈ܶܐ ܗܳܢܽܘܢ ܕܪܺܝܫܽܘܬ ܟܳܗܢܽܘܬܳܐ[2]܆ ܢܳܡܽܘ̈ܣܳܝܶܐ ܡܰܢ ܥܡܺܝ̈ܠܶܐ ܕܶܝܢ ܒܪܰܡ܆ ܘܕܰܒܢܶܣܝܳܢܳܐ ܒܰܠܚܽܘܕܰܘܗ̱ܝ ܡܶܬܝܰܕܥܺܝܢ܆ ܠܒܰܪ ܡܶܢ ܡܕܺܝܢ̱ܬܳܐ ܒܕܽܘܟ ܐܶ݀ܗܘܶܐ܆ ܟܰܕ ܠܰܘ ܥܶܠܬܳܐ ܕܣܰܓܺܝ ܪܰܒܳܐ ܠܗܳܕܶܐ ܡܰܝܬܝܳܐ܆ ܠܳܐ ܡܶܫܟܚܳܐ ܗ̱ܘܳܬ. ܠܗܳܝ ܕܦܰܪܢܣܳܗ̇܆ ܗܰܘ ܫܰܦܺܝܪ ܦܽܘܪ̈ܣܶܐ ܘܚܰܟܺܝܡܳܐ܆ ܘܰܕܟܽܠܗܶܝܢ ܠܘܳܬ ܦܽܘܪܩܳܢܳܐ ܕܺܝܠܰܢ ܡܰܦܶܩ܆ ܘܕܰܠܗܳܢܽܘܢ ܕܰܕܠܳܐ ܦܽܘܪܣܳܐ ܦܽܘܪܣܳܐ ܝܳܗܶܒ. ܟܰܕ ܒܕܰܐܝܟ ܗܳܠܶܝܢ ܗܳܟܺܝܠ ܥܽܘܕܪ̈ܳܢܶܐ ܡܰܪܓܶܫ ܗ̱ܘܳܐ ܕܰܘܺܝܕ܆ ܘܰܠܟܽܠ ܥܠܰܘܗ̱ܝ ܣܳܐܶܡ ܗ̱ܘܳܐ܆ ܥܰܠ ܗܰܘ ܕܡܶܢܶܗ ܟܽܠ ܗܰܘ ܡܳܐ ܕܺܐܝܬܰܘܗ̱ܝ ܛܳܒܳܐ ܪܳܕܶܐ ܘܢܳܚܶܬ܆ ܟܰܕ ܡܨܰܠܶܐ ܗ̱ܘܳܐ ܐܳܡܰܪ ܗ̱ܘܳܐ܆ ܡܳܪܝܳܐ ܐܰܠܳܗܳܐ ܡܒܰܪܟܰܐ ܗ̱ܘ. ܡܒܰܪܟܰܐ ܗ̱ܘ ܡܳܪܝܳܐ ܟܽܠ ܝܽܘܡ ܒܝܽܘܡ. ܘܢ̣ܨܠܚ ܠܰܢ ܐܰܠܳܗܳܐ ܕܦܽܘܪ̈ܩܳܢܶܐ ܕܺܝܠܰܢ. ܐܰܠܳܗܳܐ ܕܺܝܠܰܢ ܐܰܠܳܗܳܐ ܕܗܳܝ ܕܢܶܦܪܽܘܩ[3].
ܐܰܝܟܰܢܳܐ ܗܳܟܺܝܠ ܠܳܐ ܙܳܕܶܩ ܗ̱ܘܳܐ ܐܳܦ ܠܺܝ ܝܰܘܡܳܢܳܐ܆ ܕܠܶܫܳܢܳܐ ܡܩܰܒܶܠ ܛܰܝܒܽܘܬܳܐ ܐܰ݀ܙܻܝܥ܆ ܥܰܠ ܗܳܠܶܝܢ ܕܫܰܦܺܝܪ ܚܶܫܶܬ܆ ܕܩܶܪܒܶܬ ܠܩܰܒܪܶܗ ܡܰܐܣܝܳܢܳܐ ܕܣܳܗܕܳܐ. ܠܗܳܢܽܘܢ ܡܰܢ ܓܶܝܪ ܐ̱ܚܪ̈ܳܢܶܐ܆ ܣܓܺܝܦܽܘܬܳܐ ܕܗܰܕܳܡ̈ܶܐ ܕܦܰܓܪܳܐ܆ ܗܳܝ ܕܰܒܥܽܘܡܩܳܐ ܡܶܬܚܰܒܠܳܐ[4] ܘܡܰܘܠܕܳܐ ܟܽܘܪ̈ܗܳܢܶܐ܆ ܢܳܓܕܳܐ ܠܘܳܬ ܚܽܘܠ̈ܡܳܢܶܐ ܕܪܳܕܶܝܢ ܡܶܢ ܓܽܘܪܢܳܐ ܩܰܕܺܝܫܬܳܐ ܣܰܓܺܝ ܫܦܺܝܥܳܐܺܝܬ܆ ܝܰܬܺܝܪ ܡܶܢ ܟܽܠ ܡܰܒܽܘܥܳܐ ܐܰܡܺܝܢ ܪܳܕܝܳܐ. ܠܺܝ ܕܶܝܢ ܡܫܰܪܝܽܘܬܳܐ ܕܢܰܦܫܝ ܗܳܝ ܕܣܰܓܺܝ̈ܳܐܬܳܐ ܛܳܒ ܚ̣ܛܳܬ܆ ܘܟܽܘܪܗܳܢܳܐ ܗܰܘ ܕܝܰܬܺܝܪ ܡܶܢ ܟܽܠ ܩܫܶܐ܆ ܘܪܶܓܬܳܐ ܕܰܓܗܳܝܬܳܐ ܕܡܶܢ ܗܳܠܶܝܢ.
ܡܳܕܶܝܢ ܟܰܕ ܒܰܙܥܽܘܪܽܘܬ ܡܶܠܬܳܐ ܡܶܕܶܡ ܠܫܰܦܺܝܪܽܘܬ ܬܰܪܥܺܝܬܳܐ ܕܨܶܒܝܳܢܳܐ ܡܚܰܘܶܐ ܐ̱ܢܳܐ܆ ܬܽܘܒ ܒܰܕܡܽܘܬ ܢܒܺܝܳܐ ܕܰܘܺܝܕ܆ ܢܶܕܪ̈ܰܝ ܠܡܳܪܝܳܐ ܐܶ݀ܦܪܽܘܥ ܩܕܳܡ ܟܽܠܶܗ ܥܰܡܶܗ. ܒܕܳܪ̈ܳܬܳܐ ܕܒܰܝܬܶܗ ܕܡܳܪܝܳܐ܆ ܒܰܡܨܰܥܬܶܟܝ ܐܽܘܪܶܫܠܶܡ[5]. ܐܽܘܪܶܫܠܶܡ ܓܶܝܪ ܐܺܝܬܶܝܗ̇܆ ܟܽܠ ܥܺܕܬܳܐ ܕܰܡܫܰܒܚܳܐ ܠܰܐܠܳܗܳܐ ܫܰܪܺܝܪܳܐܺܝܬ. ܡܶܛܽܠ ܟܺܝܬ ܕܗܽܘ ܫܡܳܐ ܐܽܘܪܶܫܠܶܡ ܟܰܕ ܥܳܒܰܪ ܠܠܶܫܳܢܳܐ ܝܰܘܢܳܝܳܐ܆ ܚܙܳܬܳܐ ܕܫܰܝܢܳܐ ܡܫܰܘܕܰܥ. ܡܰܢ ܗܝ ܕܶܝܢ ܗܳܝ ܕܰܠܫܰܝܢܳܐ ܐܰܠܳܗܳܝܳܐ ܚܳܙܝܳܐ ܒܥܰܝ̈ܢܶܐ ܕܬܰܪܥܺܝܬܳܐ܆ ܘܰܠܗܳܢܳܐ ܒܟܽܠ ܙܒܰܢ ܫܳܡܥܳܐ ܕܡܶܬܬܰܙܥܰܩ ܡܶܢ ܗܳܢܽܘܢ ܕܰܡܟܰܗܢܺܝܢ܆ ܐܶܠܳܐ ܐܶܢ ܥܺܕܬܳܐ܆ ܗܳܝ ܕܰܠܘܳܬܳܗ̇ ܒܝܰܕ ܡܶܨ̈ܥܳܝܶܐ ܫܠܺܝ̈ܚܶܐ ܐܳܡܰܪ ܗ̱ܘܳܐ ܡܫܺܝܚܳܐ ܗܰܘ ܫܰܝܢܳܐ ܕܺܝܠܰܢ܆ ܫܰܝܢܳܐ ܕܺܝܠܝ ܝܳܗܶܒ ܐ̱ܢܳܐ ܠܟܽܘܢ܆ ܫܰܝܢܳܐ ܕܺܝܠܝ ܫܳܒܶܩ ܐ̱ܢܳܐ ܠܟܽܘܢ[6].
ܠܗܳܕܶܐ ܗܳܟܺܝܠ ܬܶܫܒܽܘܚܬܳܐ ܐܶ݀ܥܒܕܺܝܗ̇ ܕܰܐܠܳܗܳܐ ܡܥܰܕܪܳܢܳܐ܆ ܠܗܳܝ ܕܰܓܒܺܝܬ̣ ܡܰܢ ܕܶܐ݀ܩܰܠܶܤ ܠܗܰܘ ܕܰܚܠܳܦܰܘܗ̱ܝ ܡܥܰܙܝܳܢܳܐܺܝܬ ܐܶܬܟܰܬܰܫ ܘܰܥܒܰܕ ܣܳܗܕܽܘܬܳܐ܆ ܐܶܙܕܟܺܝܬ̣ ܕܶܝܢ ܡܶܢ ܩܽܘ̈ܠܳܣܰܘܗ̱ܝ ܕܣܳܗܕܳܐ. ܠܗܰܘ ܕܕܽܘܒܳܪܳܐ ܡܰܢ ܩܰܕܺܝܫܳܐ ܘܥܽܘܬܳܕܳܐ ܕܚܰܝ̈ܶܐ ܢܰܟ̈ܦܶܐ܆ ܠܘܳܬ ܢܶܨܚܳܢܳܐ ܗܳܢܳܐ ܐܰܝܬܝܶܗ܆ ܘܰܠܘܳܬ ܙܳܟܽܘܬܳܐ ܡܫܰܡܠܰܝܬܳܐ ܕܠܽܘܩܒܰܠ ܐܳܟܶܠܩܰܪܨܳܐ܆ ܠܳܐ ܡܶܬܦܰܠܰܓ ܐ̱ܢܳܐ ܕܰܐܓܽܘ̈ܢܶܐ ܓܶܝܪ ܕܣܰܓܺܝ ܪܰܘܪܒܺܝܢ ܢܳܩܦܳܐ ܠܡܶܬܪܢܳܝܽܘ܆ ܕܪܰܘܪ̈ܒܳܬܳܐ ܡܶܕܶܡ ܐܺܝܬܰܝܗܶܝܢ ܩܰܕܺܝܡܽܘܬ ܕܽܘܪ̈ܳܫܶܐ ܕܺܝܠܗܽܘܢ. ܒܪܰܡ ܟܰܕ ܠܗܳܠܶܝܢ ܫܶܒܩܶܬ ܘܰܒܫܶܬܩܳܐ ܝܰܩܪܶܬ܆ ܒܗܳܝ ܣܰܓܺܝ ܐܶܬܕܰܡܪܶܬ. ܐܰܝܟܰܢܳܐ ܩܕܳܡ ܡܰܦܩܳܢܗܽܘܢ ܕܣܽܘܥܪ̈ܳܢܶܐ܆ ܩܰܕܶܡ ܐܶܬܩܪܺܝ ܒܰܫܡܳܐ ܬܐܠܐܠܐܘܤ܆ ܗܳܝ ܟܺܝܬ ܕܰܥܬܺܝܕܳܐ ܗ̱ܘܳܬ ܠܡܶܗ̱ܘܳܐ܆ ܟܰܕ ܒܰܕܡܽܘܬ ܐܺܝܠܳܢܳܐ ܕܛܳܒܳܐܺܝܬ ܐܺܝܬ ܠܶܗ ܠܘܳܬ ܡܰܘܠܕܳܢܽܘܬܳܐ ܕܦܺܐܪ̈ܶܐ܆ ܡܰܫܘܰܚ ܘܡܰܦܶܩ ܡܶܢ ܩܰܒܪܶܗ ܪ̈ܰܚܡܶܐ ܥܰܬܺܝܪ̈ܶܐ ܥܰܠ ܗܳܢܽܘܢ ܕܰܟܪܺܝܗܶܝܢ܆ ܘܰܠܡܶܠܬܳܐ ܗܳܝ ܕܡܰܙܡܽܘܪܐ ܒܗܽܘܢ ܒܰܥ̈ܒܳܕܶܐ ܡܰܙܥܶܩ܆ ܐܶܢܳܐ ܕܶܝܢ ܐܰܝܟ ܙܰܝܬܳܐ ܛܥܺܝܢ ܦܺܐܪ̈ܶܐ ܒܒܰܝܬܶܗ ܕܰܐܠܳܗܳܐ[7].
ܡܶܢ ܐܰܝܟܳܐ ܗܳܟܺܝܠ ܗܳܕܶܐ ܡܰܘܗܰܒܬܳܐ ܗܘ̣ܳܬ ܠܶܗ ܠܣܳܗܕܳܐ܆ ܠܒܰܪ ܡܶܢ ܗܳܠܶܝܢ ܣܳܗ̈ܕܶܐ ܐ̱ܚܪ̈ܳܢܶܐ. ܠܺܝ ܡܶܣܬܰܒܪܳܐ܆ ܕܡܶܛܽܠ ܗܳܝ ܕܰܒܪܶܚܡܬܳܐ ܕܟܺܝܬܳܐ ܘܫܰܪܺܝܪܬܳܐ܆ ܟܰܕ ܐܳܦܠܳܐ ܚܕܳܐ ܕܶܚܠܬܳܐ ܚܠܺܝܛܳܐ܆ ܩܰܒܶܠ ܕܽܘܡܝܳܐ ܕܚܰܫ̈ܶܐ ܕܰܡܫܺܝܚܳܐ ܘܰܕܡܰܘܬܶܗ ܦܳܪܽܘܩܳܝܳܐ܆ ܒܰܕܡܽܘܬ ܗܳܢܽܘܢ ܕܰܠܘܳܬ ܨܽܘܪܬܳܐ ܡܶܕܶܡ ܕܫܰܦܺܝܪ ܨܺܝܪܳܐ ܥܰܠ ܕܰܦܳܐ ܪܶܚܡܬܳܢܳܐܺܝܬ ܐܶܬܬܣܺܝܡܘ܆ ܘܰܠܗܳܕܶܐ ܒܗܳܠܶܝܢ ܕܕܳܡ̈ܝܳܢ ܫܰܘܙܶܒܘ ܕܰܡܝܽܘܗ̇. ܡܫܺܝܚܳܐ ܓܶܝܪ ܗܰܘ ܡܶܠܬܶܗ ܕܰܐܠܳܗܳܐ܆ ܟܰܕ ܕܶܒܚ̈ܶܐ ܕܰܒܝܰܕ ܕܡ̈ܶܐ ܕܬܰܘܪ̈ܶܐ ܘܰܕܬܰܝܫ̈ܶܐ ܐܰܦܶܤ ܠܗܳܢܽܘܢ ܕܡܶܢ ܐܺܝܣܪܳܐܶܝܠ ܕܡܶܢ ܥܰܒܝܽܘܬܳܐ ܚܰܢܦܳܝܬܳܐ ܐܰܬܺܝ̣ܺܝ̣ܢ ܗ̱ܘܰܘ܆ ܘܰܫܒܰܩ ܠܗܽܘܢ ܡܰܢ ܗܳܝ ܕܰܥܝܳܕܳܐ܆ ܡܶܢ ܐܰܠܳܗ̈ܶܐ ܕܶܝܢ ܕܰܓ̈ܳܠܶܐ ܐܰܪܚܶܩ ܐܶܢܽܘܢ܆ ܘܠܶܗ ܒܰܠܚܽܘܕܰܘܗ̱ܝ ܠܡܶܕܒܰܚ ܦܩܰܕ ܠܗܽܘܢ܆ ܘܚܳܙܶܐ ܗ̱ܘܳܐ ܠܗܽܘܢ ܕܰܠܗܳܠܶܝܢ ܗܳܟܰܢܳܐ ܦܫܺܝܛܳܐܺܝܬ ܡܩܰܪܒܺܝܢ ܗ̱ܘܰܘ܆ ܘܰܐܝܟ ܐܰܝܠܶܝܢ ܕܰܠܢܳܡܽܘܣܳܐ ܡܨܰܕܝܳܢܳܐܺܝܬ ܡܚܰܘܶܝܢ ܗ̱ܘܰܘ ܐܶܣܟܺܡܳܐ ܕܰܡܫܰܡܠܶܝܢ܆ ܕܰܠܘܳܬ ܟܺܝܬ ܟܽܠܳܗ̇ ܒܺܝܫܽܘܬܳܐ ܢܳܦܩܺܝܢ ܗ̱ܘܰܘ܆ ܘܰܒܒܰܥܪܺܝܪܳܝܽܘܬܳܐ ܕܚܰܝ̈ܘܳܬ ܫܶܢܳܐ ܛܳܥܶܝܢ ܗ̱ܘܰܘ܆ ܘܰܒܚܰܪܡܽܘܬܳܐ ܘܩܰܫܝܽܘܬܳܐ ܕܰܠܘܳܬ ܒ̈ܢܰܝ ܓܶܢܣܗܽܘܢ܆ ܟܰܕ ܡܰܣܠܶܐ ܗ̱ܘܳܐ ܠܶܗ ܠܦܽܘܠܚܳܢ ܬܶܫܡܶܫܬܗܽܘܢ ܐܳܡܰܪ ܗ̱ܘܳܐ܆ ܪ̈ܰܚܡܶܐ ܨܳܒܶܐ ܐ̱ܢܳܐ ܘܠܰܘ ܕܶܒܚܬܳܐ[8]. ܗܽܘ ܕܶܝܢ ܟܰܕ ܡܶܛܽܠ ܪ̈ܰܚܡܶܐ ܕܰܠܘܳܬܰܢ ܣܰܪܶܩ ܗܽܘ ܠܶܗ[9]܆ ܠܰܘ ܒܗܳܝ ܕܰܠܡܰܠܝܽܘܬܶܗ ܫܕܳܐ ܡܶܢܶܗ܆ ܐܰܝܟܰܢܳܐ ܓܶܝܪ ܡܰܨܝܳܐ ܗ̱ܘܳܬ ܕܢܶܦܽܘܩ ܡܶܢ ܗܳܝ ܕܺܐܝܬܰܘܗ̱ܝ ܗ̱ܘܳܐ ܠܳܐ ܡܶܫܬܰܚܠܦܳܢܳܐ܆ ܐܰܘ ܕܰܒܡܶܕܶܡ ܢܶܬܒܰܨܰܪ ܗܰܘ ܡܫܰܡܠܝܳܐ܆ ܐܶܠܳܐ ܒܗܳܝ ܕܒܶܣܪܳܐ ܗܰܘ ܕܡܶܢܰܢ ܢܣܰܒ ܕܰܡܢܰܦܰܫ ܒܢܰܦܫܳܐ ܡܶܬܗܰܘܢܳܢܺܝܬܳܐ܆ ܢܶܣܰܒ ܕܶܝܢ ܗܰܘ ܠܰܘ ܒܪܶܚܡܬܳܐ ܡܶܕܶܡ ܕܬܰܪܥܺܝܬܳܐ ܐܰܝܟ ܙܢܳܐ ܕܥܰܠ ܢܒܺܝ̈ܶܐ ܡܶܢ ܩܕܺܝܡ. ܐܶܠܳܐ ܒܰܚܕܳܝܽܘܬܳܐ ܗܳܝ ܩܢܽܘܡܳܝܬܳܐ ܐܰܠ̣ܘܶܬ ܠܬܰܪ̈ܬܰܝܗܶܝܢ܆ ܠܕܶܒܚܬܳܐ ܐܳܡܰܪ ܐ̱ܢܳܐ ܘܰܠܪ̈ܰܚܡܶܐ܆ ܟܰܕ ܒܪ̈ܰܚܡܶܐ ܡܰܢ ܗܳܢܽܘܢ ܕܰܠܘܳܬ ܓܶܢܣܳܐ ܐ̱ܢܳܫܳܝܳܐ ܐܶܬܒܰܪܢܰܫ܆ ܩܰܪܶܒ ܕܶܝܢ ܗܽܘ ܠܶܗ ܕܶܒܚܬܳܐ ܘܩܽܘܪܒܳܢܳܐ ܚܠܳܦܰܝܢ ܠܰܐܠܳܗܳܐ ܘܰܐܒܳܐ܆ ܘܙܰܡܶܢ ܠܰܢ ܚܺܐܪܽܘܬܳܐ ܗܳܝ ܕܡܶܢ ܠܥܶܠ ܥܰܠ ܗܳܢܶܝܢ ܕܚ̣ܳܒܢܰܢ܆ ܘܰܥܒܰܕ ܠܰܢ ܒܢܰܝ̈ܳܐ ܚܠܳܦ ܥܰܒ̈ܕܶܐ.
ܡܶܛܽܠ ܗܳܟܺܝܠ ܬܰܐܠܶܐܠܰܐܘܳܤ ܗܰܘ ܐܰܓܽܘܢܺܝܣܛܳܐ ܕܫܰܦܺܝܪܽܘܬ ܕܶܚܠܬܳܐ܆ ܒܗܳܕܶܐ ܕܶܒܚܬܳܐ ܕܰܚܠܺܝܛܳܐ ܐܰܟܚܕܳܐ ܒܪ̈ܰܚܡܶܐ ܪܺܝܫܳܐܺܝܬ ܕܰܡܺܝ܆ ܟܰܕ ܒܚܽܘܒܳܐ[10] ܠܡܰܘܬܳܐ ܡܶܬܩܰܠܣܳܢܳܐ ܚܰܒܶܒ܆ ܫܽܘܘ̈ܕܳܥܶܐ ܗܳܠܶܝܢ ܕܨܰܠܡܳܐ ܡܰܝܬܶܐ. ܘܟܰܕ ܐܶܬܩܒܰܪ ܡܰܠܽܘܢ ܕܶܝܢ ܚܰܝ ܚܰܝ̈ܶܐ ܫܰܪܺܝܪ̈ܶܐ܆ ܡܰܫܘܰܚ ܘܡܰܝܬܶܐ ܪ̈ܰܚܡܶܐ ܠܗܳܢܽܘܢ ܕܰܣܢܺܝܩܺܝܢ. ܡܶܛܽܠܗܳܕܶܐ ܐܰܝܟ ܕܡܶܢ ܡܥܺܝܢܳܐ ܡܶܫܬܰܬܝܳܢܺܝܬܳܐ ܫܦܺܝܥܳܐܺܝܬ܆ ܕܳܠܶܝܢ ܚ̱ܢܰܢ ܐܳܣܝܽܘܬܳܐ ܠܳܐ ܡܰܘܦܝܳܢܺܝܬܳܐ܆ ܘܰܕܪܳܒܝܳܐ ܘܣܳܓܝܳܐ ܒܗܳܝ ܕܡܶܬܢܰܦܩܳܐ܆ ܒܰܕܡܽܘܬ ܥܳܒܽܘܕܽܘܬ ܬܶܕܡܪ̈ܳܬܳܐ ܗܳܝ ܕܠܰܚ̈ܡܶܐ܆ ܕܰܐܠܳܗܰܢ ܘܦܳܪܽܘܩܰܢ.
ܐܶܠܳܐ ܟܰܕ ܗܳܠܶܝܢ ܐܳܡܰܪ ܐ̱ܢܳܐ܆ ܡܶܢ ܟܽܘܢܳܝܳܐ ܕܬܐܠܐܠܐܘܤ ܘܡܶܢ ܡܰܘܗܰܒܬܳܐ ܫܦܺܝܥܬܳܐ ܕܪ̈ܰܚܡܶܐ܆ ܠܘܳܬ ܥܽܘܗܕܳܢܳܐ ܡܶܕܶܡ ܢܒܺܝ̣ܳܝ̣ܳܐ ܘܰܕܠܳܚܶܡ ܠܗܳܕܶܐ ܕܣܺܝܡܳܐ ܩܕܳܡܰܝܢ ܡܶܬܥܰܠܶܐ ܐ̱ܢܳܐ. ܐܰܢ̱ܬܬܳܐ ܓܶܝܪ ܒܰܙܒܰܢ܆ ܕܩܶܪܒܰܬ ܠܘܳܬ ܐܶܠܺܝܫܳܥ ܢܒܺܝܳܐ܆ ܕܠܰܐܪܡܠܽܘܬܳܐ ܘܰܠܡܶܣܟܺܢܽܘܬܳܐ ܕܰܡܩܰܦܚܳܐ ܗ̱ܘܳܬ ܠܳܗ̇ ܐܳܠ̣ܝܳܐ ܗ̱ܘܳܬ܆ ܘܠܰܬܒܰܥܬܳܐ ܕܦܽܘܪܥܳܢܳܐ ܕܚܰܘ̈ܒܳܬܳܐ܆ ܘܰܒܟܽܠܶܗ ܩܶܢܝܳܢܳܗ̇ ܐܳܡܪܳܐ ܗ̱ܘܳܬ ܕܩ̣ܰܢܝܳܐ ܡܶܫܚܳܐ ܕܰܡܣܺܝܟ ܒܫܳܛܺܝܦܬܳܐ ܚܕܳܐ ܙܥܽܘܪܬܳܐ܆ ܫܳܡܥܳܐ ܗ̱ܘܳܬ ܡܶܚܕܳܐ ܡܶܢܶܗ܆ ܙܶܠܝ ܫܶܐܠܝ̱ ܠܶܟܝ ܡܳܐܢ̈ܶܐ ܡܶܢ ܠܒܰܪ ܡܶܢ ܟܽܠܗܽܘܢ ܫܒܳܒܰܝ̈ܟܝ ܓܰܪ̈ܒܶܐ ܣܦܺܝ̈ܩܶܐ܆ ܘܠܳܐ ܬܰܙܥܪܺܝܢ. ܘܬܶܥܠܺܝܢ ܘܬܶܐܚܕܺܝܢ ܬܰܪܥܳܐ ܥܠܰܝܟܝ ܘܥܰܠ ܒܢܰܝ̈ܟܝ. ܘܬܶܢܣܟܺܝܢ ܒܡܳܐܢ̈ܶܐ ܗܳܠܶܝܢ܆ ܘܠܳܐ ܬܰܪܚܩܺܝܢ ܐܶܢܽܘܢ. ܘܗܰܘ ܕܰܡܠܶܐ ܬܶܣܒܺܝܢ[11]. ܘܥܶܒܕܰܬ ܗܳܟܰܢܳܐ. ܘܡܶܠܬܶܗ ܕܰܢܒܺܝܳܐ ܡܰܪܕܝܳܐ ܗ̱ܘܳܬ ܡܶܫܚܳܐ܆ ܘܠܳܐ ܒܶܛܠܰܬ ܥܕܰܡܳܐ ܕܠܰܐܢ̱ܬܬܳܐ ܗܳܝ ܚܣܰܪ ܡܶܢܝܳܢܳܐ ܕܓܰܪ̈ܒܶܐ. ܢ݀ܰܦܬܶܐ ܗܳܟܺܝܠ ܐܳܦ ܚܢܰܢ ܠܡܳܐܢ̈ܶܐ ܕܗܰܝܡܳܢܽܘܬܳܐ ܘܢܶ݀ܥܒܶܕ ܐܶܢܽܘܢ ܚ̈ܰܕܬ̣ܶܐ. ܟܰܕ ܡܕܰܟܶܝܢ ܚ̱ܢܰܢ ܠܗܽܘܢ ܡܶܢ ܒܺܝܫܽܘܬܳܐ ܥܰܬܺܝܩܬܳܐ܆ ܘܠܳܐ ܒܰܙܥܽܘܪܽܘܬ ܗܰܝܡܳܢܽܘܬܳܐ ܢܶܐܠܽܘܨ ܐܶܢܽܘܢ܆ ܘܠܳܐ ܢܶܚܣܪܽܘܢ ܠܰܢ ܡܬܽܘܡ ܪ̈ܰܚܡܰܘ̈ܗ̱ܝ ܕܣܳܗܕܳܐ܆ ܘܫܽܘܒܩܳܢܳܐ ܕܚܰܘ̈ܒܳܬܳܐ ܗܳܠܶܝܢ ܕܡܶܢ ܚܛܺܝܬܳܐ܆ ܒܰܡܫܺܝܚܳܐ ܝܶܫܽܘܥ ܡܳܪܰܢ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܩܝ (ܡܐܐ ܘܥܶܣܪܳܐ)
ܬܐܠܐܠܐܘܣ ܐܺܝܬܰܘܗ̱ܝ ܡܫܘܚ. ܪ̈ܚܡܐ.[1]
ܐܦܣ̈ܝܐ. 2: 14 ܐܦ ܝܘܚܢܢ. 14: 27 [6]
[8]ܡܬܝ. 9: 13 ܐܦ 12: 7 ܐܦ ܗܘܫܥ. 6: 6