ܥܰܠ ܩܰܕܺܝܫܳܐ ܣܳܗܕܳܐ ܒܰܐܒܽܘܠܶܐ
1: ܠܳܐ ܝܳܕܰܥ ܐ̱ܢܳܐ ܐܶܢ ܠܰܘ ܟܺܐܢܳܐܺܝܬ ܢܩܰܛܪܶܓ ܠܰܢ ܐ̱ܢܳܫ ܡܶܛܽܠ ܠܳܐ ܡܠܺܝܠܽܘܬܳܐ܆ ܐܶܢܗܽܘ ܕܰܠܪܳܥܝܳܐ ܡܠܺܝܠܳܐ ܘܣܳܗܕܳܐ ܒܰܐܒܽܘܠܳܐ ܒܫܶܬܩܳܐ ܢܰܥܒܪܺܝܘܗ̱ܝ܆ ܠܓܰܒܪܳܐ ܗܰܘ ܕܠܰܒܢ̈ܳܬ ܩ̈ܳܠܶܐ ܗܳܠܶܝܢ ܕܡܶܢ ܡܳܪܝܳܐ ܩܰܕܶܡ̈ܝ ܐܶܬܶܐܡܰܪ̈ܝ ܡܶܛܽܠ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܕܰܢܗܰܝܡܢܽܘܢ ܒܶܗ܆ ܠܟܽܠܗܶܝܢ ܟܢܺܝܫܳܐܺܝܬ ܗܽܘ ܥܠܰܘܗ̱ܝ ܫܰܪܰܪ܆ ܘܫܰܪܺܝܪ̈ܳܬܳܐ ܚܰܘܺܝ ܐܶܢܶܝܢ. ܩܰܕܡܳܐܺܝܬ ܡܰܢ ܓܶܝܪ. ܟܰܕ ܐܶܡܰܪ ܗܽܘ ܐܰܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܗܰܘ ܕܰܡܗܰܝܡܶܢ ܒܺܝ ܐܰܝܟܰܢܳܐ ܕܶܐܡܰܪ ܟܬܳܒܳܐ܆ ܢܰܗܪ̈ܰܘܳܬܳܐ ܡܶܢ ܟܰܪܣܶܐ ܢܶܪܕܽܘܢ ܕܡܰܝ̈ܳܐ ܚܰܝ̈ܶܐ[1]܆ ܟܽܠܶܗ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܒܡܰܠܦܳܢܽܘܬܳܐ܆ ܘܰܕܗܳܟܰܢܳܐ ܒܫܶܦܥ̈ܶܐ ܥܰܬܺܝܪ̈ܶܐ ܘܰܕܠܳܐ ܚܣܳܡ ܕܡܶܠܬܳܐ ܘܕܰܡܠܶܝܢ ܚܶܟܡܬܳܐ ܡܰܦܶܩ ܗ̱ܘܳܐ܆ ܐܰܝܟܰܢܳܐ ܕܳܐܦ ܠܡܰܫܡܰܥܬܳܐ ܣܰܩܽܘܒܠܳܝܬܳܐ ܟܰܕ ܡܶܫܬܰܕܠܳܐ ܗܰܢܺܝܳܐܺܝܬ ܠܘܳܬ ܫܶܡܥܳܐ ܢܰܪܟܶܢ܆ ܘܠܰܛܪܽܘܢܳܐ ܚܰܪܡܳܐ ܗܰܘ ܕܝܰܬܺܝܒ ܗ̱ܘܳܐ܆ ܗܰܘ ܕܰܩܕܳܡܰܘ̈ܗ̱ܝ ܠܰܐܓܽܘܢܳܐ ܕܣܳܗܕܽܘܬܳܐ ܐܶܬܟܰܬܰܫ. ܫܳܡܽܘܥܳܐ ܢܺܝܚܳܐ ܘܪܳܚܶܡ ܝܽܘܠܦܳܢܳܐ ܢܶܥܒܕܺܝܘܗ̱ܝ ܕܡܰܠܦܳܢ̈ܘܳܬܳܐ ܕܺܝܠܶܗ܆ ܐܳܦܶܢ ܐܶܕ̈ܢܶܐ ܕܺܝܠܶܗ ܒܕܶܚܠܰܬ݂ ܫ̈ܺܐܕܶܐ ܩܰܕܺܝ̈ܡܳܢ ܗ̱ܘܰܝ̈ ܣܟܺܝܪ̈ܳܢ.
2: ܒܳܬܰܪܟܶܢ ܕܶܝܢ܆ ܟܰܕ ܗܰܘ ܠܳܐ ܕܰܓܳܠܳܐ ܐܶܡܰܪ ܠܬܰܠܡܺܝܕܰܘ̈ܗ̱ܝ ܗܳܢܽܘܢ ܕܗܳܝܕܶܝܢ܆ ܘܰܒܝܰܕ ܗܳܢܽܘܢ ܕܗܳܝܕܶܝܢ. ܠܗܳܢܽܘܢ ܕܰܥܕܰܡܳܐ ܠܗܳܫܳܐ. ܘܰܠܙܰܒܢܳܐ ܟܽܠܶܗ ܕܒܳܬܰܪܟܶܢ܆ ܕܳܐܦ ܠܰܩܕܳܡ ܗܺܓܡܽܘܢ̈ܶܐ ܘܡܰܠ̈ܟܶܐ ܬܶܬܬܰܝܬܽܘܢ ܡܶܛܽܠܳܬܝ ܠܣܳܗܕܽܘܬܳܐ[2]. ܠܗܽܘܢ ܘܰܠܥܰܡ̱ܡ̈ܶܐ܆ ܒܰܐܒܽܘܠܳܐ ܗܰܘ ܕܫܰܪܺܝܪܳܐܺܝܬ ܛܽܘܒܬܳܢܳܐ܆ ܥܒܰܪ ܠܥܶܠ ܡܶܢ ܚܰܝܠܳܐ ܕܡ̈ܶܠܶܐ ܗܳܠܶܝܢ. ܠܰܘ ܓܶܝܪ ܡܶܢ ܐ̱ܚܪ̈ܳܢܶܐ ܐܶܬܬܰܝܬܺܝ܆ ܐܶܠܳܐ ܨܶܒܝܳܢܳܐܺܝܬ ܠܘܳܬ݂ ܤܛܰܐܕܺܝܽܘܢ ܕܣܳܗܕܽܘܬܳܐ ܫܠܰܚ. ܟܰܕ ܣܳܒܳܐ ܡܰܢ ܐܺܝܬܰܘܗ̱ܝ ܗ̱ܘܳܐ ܒܣܰܥܪܶܗ ܡܶܟܺܝܠ. ܐܰܝܟ ܕܺܐܝܬ ܠܡܶܫܡܰܥ܆ ܡܶܬܥܰܠܰܡ ܕܶܝܢ ܒܬܰܪܥܺܝܬܳܐ ܕܫܰܦܺܝܪܽܘܬ݂ ܕܶܚܠܬܳܐ.
3: ܟܰܕ ܓܶܝܪ ܗܽܘ ܛܪܽܘܢܳܐ ܨܳܒܶܐ ܗ̱ܘܳܐ. ܕܰܠܥܺܕܬܳܐ ܢܶܫܘܰܪ ܢܶܥܽܘܠ܆ ܘܒܰܕܡܽܘܬ݂ ܕܺܐܒܳܐ ܢܳܦܶܠ ܒܰܓܙܳܪܳܐ ܡܠܺܝܠܳܐ ܕܥܶܪ̈ܒܶܐ܆ ܟܰܕ ܩܕܳܡ ܬܰܪ̈ܥܶܐ ܕܗܰܝܟܠܳܐ ܩܰܕܺܝܫܳܐ ܩܳܡ. ܟܰܕ ܠܳܐ ܡܶܬܪܰܦܪܰܦ܆ ܘܒܰܕܡܽܘܬ݂ ܡܰܓܕܠܳܐ ܕܠܳܐ ܡܶܬܬܪܰܥ܆ ܘܰܐܝܟ ܡܰܣܟܳܪܳܐ ܥܰܫܺܝܢܳܐ ܕܒܰܢܩܳܫ̈ܶܐ ܕܓܰܠ̈ܠܶܐ ܒܰܥܪܺܝܪ̈ܳܝܶܐ. ܠܳܐ ܡܶܙܕܰܥܙܰܥ܆ ܟܳܠܶܐ ܗ̱ܘܳܐ ܠܗܳܢܳܐ ܡܶܢ ܡܰܥܰܠܬܳܐ.
4: ܟܰܕ ܐܰܝܟ ܕܰܠܡܺܐܡܰܪ. ܠܰܒܟܶܗ ܒܺܐܝܕܶܗ. ܘܶܐܡܰܪ ܠܶܗ: ܕܠܳܐ ܙܳܕܶܩ ܠܳܟ ܠܡܶܬܩܰܪܳܒܽܘ ܠܗܰܝܟܠܳܐ܆ ܘܰܠܡܶܩܒܰܥ ܕܽܘܪܟܬ̣ܳܐ ܡܣܰܝܰܒܬܳܐ ܥܰܠ ܐܶܣܟܽܘܦܬܳܐ ܕܬܰܪ̈ܥܶܐ. ܟܰܕ ܒܰܥܒܳܕܳܐ ܡܡܰܠܶܐ ܐܰܟܚܕܳܐ. ܐܰܝܟܰܢܳܐ ܕܳܐܡܪܰܬ. ܠܟܽܠܗܶܝܢ ܡ̈ܶܠܶܐ ܕܰܟܬܳܒܳܐ ܐܰܠܳܗܳܝܳܐ. ܗܳܝ ܕܙܰܕܺܝܩܳܐ ܐܰܝܟ ܐܰܪܝܳܐ ܬܟܺܝܠ. ܗܳܝ ܕܰܡܡܰܠܶܠ ܗ̱ܘܰܝܬ ܒܣܳܗ̈ܕܘܳܬܳܟ ܩܕܳܡ ܡܰܠ̈ܟܶܐ ܘܠܳܐ ܒܳܗܶܬ݂ ܗ̱ܘܰܝܬ[3]. ܗܳܝ ܕܪܳܥܝܳܐ ܛܳܒܳܐ ܢܰܦܫܶܗ ܣܳܐܶܡ ܚܠܳܦ ܥܶܪ̈ܒܶܐ[4]܆ ܘܰܐ̱ܚܪ̈ܳܢܝܳܬܳܐ ܟܽܠܗܶܝܢ ܐܰܝܠܶܝܢ ܕܺܐܝܬܰܝܗܶܝܢ ܒܢ̈ܳܬ݂ ܓܶܢܣܳܐ ܠܗܳܠܶܝܢ ܘܰܕܕܳܡ̈ܝܳܢ ܠܗܶܝܢ.
5: ܘܰܐܟܙܢܳܐ ܕܐ̱ܢܳܫ ܐܰܢ̱ܬܬܳܐ. ܫܰܦܺܝܪܰܬ݂ ܚܶܙܘܳܐ܆ ܕܟܰܕ ܒܦܰܪܨܽܘܦܳܐ ܘܰܒܫܽܘܦܪܳܐ ܕܫܰܪܟܳܐ ܕܦܰܓܪܳܗ̇. ܫܰܦܺܝܪܽܘܬ݂ ܟܝܳܢܳܐ ܐܺܝܬ ܠܳܗ̇܆ ܠܰܐܝܢܳܐ ܕܗܽܘ ܨܶܒܬܳܐ. ܘܰܠܒܽܘ̈ܫܶܐ ܐܶܢ ܬܶܬܥܰܛܰܦ܆ ܠܟܽܠܗܽܘܢ ܒܳܗ̇ ܒܰܕܡܽܘܬܳܐ ܥܳܒܕܳܐ ܫܰܦܺܝܪ̈ܶܐ܆ ܟܰܕ ܗܺܝ ܡܨܰܒܬܳܐ ܠܗܽܘܢ ܝܰܬܺܝܪܳܐܺܝܬ ܘܠܰܘ ܗܺܝ ܡܶܨܛܰܒܬܳܐ ܒܗܶܝܢ ܒܗܳܠܶܝܢ ܕܣܺܝ̈ܡܳܢ ܥܠܶܝܗ̇܆ ܘܡܰܨܡܚܳܐ ܠܽܘܩܒܰܠ ܗܳܠܶܝܢ. ܡܰܠܽܘܢ ܕܶܝܢ ܕܳܐܡܰܪ ܗܳܝ ܕܒܰܝܬܳܝܳܐ܆ ܟܰܕ ܡܛܰܫܝܳܐ ܘܰܡܚܰܦܝܳܐ ܠܢܰܗܺܝܪܽܘܬܳܐ ܗܳܝ ܕܡܶܢ ܗܳܠܶܝܢ ܒܫܽܘܦܪܳܐ ܕܰܟܝܳܢܳܐ܆ ܗܳܟܰܢܳܐ ܐܳܦ ܒܰܐܒܽܘܠܳܐ ܗܰܘ ܐܰܬܠܺܝܛܳܐ ܪܰܒܳܐ ܕܫܰܦܺܝܪܽܘܬ݂ ܕܶܚܠܬܳܐ܆ ܟܰܕ ܒܫܰܦܺܝܪܽܘܬ݂ ܡܠܰܚܡܽܘܬܳܐ ܘܰܒܛܰܝܒܽܘܬܳܐ ܕܪܽܘܚܳܐ ܡܰܨܡܰܚ ܗ̱ܘܳܐ܆ ܘܟܰܕ ܠܰܒܢ̈ܳܬ݂ ܩ̈ܳܠܶܐ ܐܰܠܳܗܳܝ̈ܳܬܳܐ ܐܰܝܟ ܨܶܒܬܳܐ ܐܰܘ ܠܒܽܘܫܳܐ ܡܶܕܶܡ ܡܥܰܠܝܳܐ ܠܒܶܫ܆ ܘܰܠܟܽܠܗܶܝܢ ܓܰܘܳܢܳܐܺܝܬ ܘܰܠܟܽܠܚܕܳܐ ܕܺܝܠܳܢܳܐܺܝܬ. ܕܝܰܬܺܝܪ ܢܰܨܺܝ̈ܚܳܬܳܐ ܚܰܘܺܝ ܐܶܢܶܝܢ܆ ܟܰܕ ܬܚܶܝܬ ܚܙܳܬܳܐ[5] ܡܰܝܬܶܐ[6] ܣܳܐܶܡ ܠܗܶܝܢ ܕܰܕܫܳܥܬܳܐ ܡܶܫܬܰܡ̈ܥܳܢ ܗ̱ܘܰܝ̈ ܠܰܢ.
6: ܘܗܳܟܰܢܳܐ ܡܰܢ ܚܰܬܺܝܬܳܐܺܝܬ܆ ܟܰܕ ܚܕܳܐ ܡܶܢܗܶܝܢ ܒܰܠܚܽܘܕ ܡܶܬܥܰܛܰ̇ܦ ܗ̱ܘܳܐ. ܐܰܝܕܳܐ ܕܗܺܝ ܕܶܐܢ ܬܺܐܡܰܪ܆ ܐܰܝܟܰܢܳܐ ܕܠܳܐ ܢܶܣܬܢܶܩ ܥܰܠ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܠܘܳܬ ܡܫܰܪܬܚܽܘܬܳܐ ܕܫܽܘܦܪܳܐ. ܗܳܟܰܢܳܐ ܕܶܝܢ. ܟܰܕ ܠܟܽܠܗܶܝܢ ܐܰܟܚܕܳܐ ܡܟܰܢܶܫ ܗ̱ܘܳܐ܆ ܘܠܳܗ̇ ܟܰܕ ܠܳܗ̇ ܡܰܝܬܶܐ ܗ̱ܘܳܐ ܠܗܶܝܢ܆ ܘܰܥܠܰܘܗ̱ܝ ܡܠܰܚܶܡ ܗ̱ܘܳܐ ܠܗܶܝܢ܆ ܘܰܐܟܙܢܳܐ ܕܰܒܚܽܘܕܪܳܐ ܕܰܟܠܺܝܠܳܐ ܚܳܒܶܫ ܗ̱ܘܳܐ ܠܗܶܝܢ܆ ܐܰܝܟܰܢܳܐ ܕܟܰܕ ܚܕܳܐ ܡܶܢܗܶܝܢ. ܬܶܬܦܫܰܚ ܗ̱ܘܳܬ ܡܶܢ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܟܽܠ ܡܶܕܶܡ ܢܶܗܘܶܐ ܫܪܶܐ ܡܶܢ ܫܰܦܺܝܪܽܘܬ݂ ܦܰܐܝܽܘܬܳܐ ܘܛܰܝܒܽܘܬܳܐ܆ ܟܰܕ ܣܽܘܥܪ̈ܳܢܶܐ ܗܳܠܶܝܢ ܕܫܰܪܟܳܐ ܘܠܰܘ ܡ̈ܶܠܶܐ܆ ܬܳܒܥܺܝܢ ܫܰܠܡܽܘܬܳܐ ܫܰܦܺܝܪܬܳܐ ܘܫܰܘܬܳܦܽܘܬܳܐ.
7: ܐܶܢܳܐ ܕܶܝܢ ܟܰܕ ܟܽܠܗܶܝܢ ܗܳܠܶܝܢ ܐ̱ܚܪ̈ܳܢܝܳܬܳܐ ܫܳܒܶܩ ܐ̱ܢܳܐ܆ ܒܳܐܕܫܳܐ ܕܡܰܠܦܳܢܽܘܬܳܐ ܕܺܝܠܳܟ܆ ܝܰܬܺܝܪ ܡܶܢ ܕܰܒܗܳܠܶܝܢ ܐ̱ܚܪ̈ܳܢܝܳܬܳܐ ܡܶܬܕܰܡܰܪ ܐ̱ܢܳܐ. ܐܳܦ ܓܶܝܪ ܟܰܕ ܗܽܘ ܛܪܽܘܢܳܐ. ܒܶܗ ܒܶܣܛܰܐܕܝܽܘܢ ܕܰܐܓܽܘܢܳܐ ܕܣܳܗܕܽܘܬܳܐ ܒܪܽܘܫܥܳܐ ܡܣܰܡܰܝ ܗ̱ܘܳܐ܆ ܘܰܐܝܟ ܕܰܒܨܰܕܘܳܐ. ܘܰܒܓܽܘܚܟܳܐ ܐܶܡܰܪ ܗ̱ܘܳܐ ܠܘܳܬܶܗ ܕܩܰܕܺܝܫܳܐ܆ ܐܰܝܟܰܢܳܐ ܕܰܠܗܶܝܢ ܠܡܶܠܰܘ̈ܗ̱ܝ ܪ̈ܰܫܺܝܥܳܬܳܐ ܐܶܬܥܰܗܕ܆ ܕܶܐܢ ܟܰܕ ܢܶܫܡܰܥ ܡܫܺܝܚܳܟ ܕܫܰܡܰܗܬ ܠܰܐܠܳܗܳܐ ܒܰܠܚܽܘܕ ܢܶܫܬܚܶܩ ܡܳܢܳܐ ܥܳܒܶܕ ܐܰܢ̱ܬ܆ ܠܨܰܕܘܳܐ ܗܰܘ ܠܰܡܡܰܠܠܽܘܬ݂ ܐܰܠܳܗܽܘܬܳܐ ܫܰܚܠܶܦ ܐܰܥܒܪܶܗ܆ ܘܶܐܡܰܪ ܒܦܰܪܨܽܘܦܳܐ ܓܰܠܝܳܐ: ܟܰܕ ܒܫܽܘܒܚܳܐ ܕܡܳܪܝܳܐ ܐܰܝܟ ܕܰܒܡܰܚܙܺܝܬܳܐ ܡܶܬܒܰܩܶܐ ܗ̱ܘܳܐ. ܐܰܝܟܰܢܳܐ ܕܳܐܡܰܪ ܦܰܘܠܽܘܣ[7]܆ ܕܶܐܡܰܬܝ ܕܰܟܪ̈ܶܝܣܛܝܳܢܶܐ ܠܰܡܫܺܝܚܳܐ ܡܫܰܡܗܺܝܢ ܡܰܘܕܶܝܢ ܐܳܦ ܒܰܐܒܳܐ. ܘܶܐܡܰܬܝ ܕܠܰܐܒܳܐ ܡܫܰܡܗܺܝܢ܆ ܡܰܘܕܶܝܢ ܐܳܦ ܒܰܒܪܳܐ. ܠܳܐ ܦܪܺܝܫ ܓܶܝܪ ܐܰܒܳܐ ܡܶܢ ܒܪܳܐ܆ ܘܳܐܦܠܳܐ ܒܪܳܐ ܡܶܢ ܐܰܒܳܐ.
8: ܢܶܒܗܬܽܘܢ ܟܰܕ ܗܳܠܶܝܢ ܫܳܡܥܺܝܢ܆ ܡܩܰܠ̈ܣܳܢܶܐ ܘܬܰܠܡܺܝ̈ܕܶܐ ܕܫܳܢܝܽܘܬܳܐ ܕܰܐܪܺܝܽܘܤ. ܘܢܶܕܥܽܘܢ ܢܰܗܺܝܪܳܐܺܝܬ܆ ܕܗܰܝܡܳܢܽܘܬܳܐ ܘܡܰܠܦܳܢܽܘܬܳܐ ܕܰܫܠܺܝ̈ܚܶܐ ܘܰܕܣܳܗ̈ܕܶܐ܆ ܫܘܶܐ ܒܽܐܘܣܺܝܰܐ ܝܳܕܥܳܐ ܠܶܗ ܠܰܒܪܳܐ܆ ܠܰܐܠܳܗܳܐ ܘܰܐܒܳܐ. ܐܶܢ ܓܶܝܪ ܒܪܳܐ. ܦܪܺܝܫ ܡܶܢ ܐܰܒܳܐ ܒܗܳܝ ܕܺܐܝܬܰܘܗ̱ܝ ܒܪܳܐ܆ ܘܒܰܩܢܽܘܡܳܐ ܡܰܢ ܕܺܝܠܳܢܳܝܳܐ ܕܗܳܟܰܢܳܐ ܐܳܡܰܪ ܡܶܬܚܙܶܐ ܦܰܪܨܽܘܦܳܐ ܗܰܘ ܕܰܐܒܳܐ܆ ܒܰܩܢܽܘܡܳܐ ܕܶܝܢ ܬܽܘܒ ܕܺܝܠܳܢܳܝܳܐ ܗܰܘ ܕܰܒܪܳܐ܆ ܒܡܳܢܳܐ ܡܶܟܺܝܠ ܠܳܐ ܡܶܬܦܰܪܫܳܢܳܐ ܢܶܗܘܶܐ ܐܺܝܬܰܘܗ̱ܝ ܐܰܒܳܐ ܡܶܢ ܒܪܳܐ ܘܰܒܪܳܐ ܡܶܢ ܐܰܒܳܐ܆ ܐܶܡܰܪ ܛܽܘܒܬܳܢܳܐ ܒܰܐܒܽܘܠܶܐ܆ ܐܶܠܳܐ ܐܶܢ ܒܗܳܝ ܕܰܚܕܳܐ ܬܶܗܘܶܐ ܐܺܝܬܶܝܗ̇ ܕܰܬܪ̈ܰܝܗܽܘܢ܆ ܐܽܘܣܺܝܰܐ ܟܺܝܬ ܘܰܐܠܳܗܽܘܬܳܐ.
9: ܐܶܠܳܐ ܟܒܰܪ. ܬܺܐܡܪܽܘܢ܆ ܕܰܒܫܽܘܒܚܳܐ ܘܰܒܡܰܠܟܽܘܬܳܐ ܐܶܡܰܪ ܕܺܐܝܬܰܝܗܽܘܢ ܠܳܐ ܡܶܬܦܰܪ̈ܫܳܢܶܐ ܐܰܒܳܐ ܘܰܒܪܳܐ. ܐܶܠܳܐ ܐܶܢܗܽܘ ܕܰܐܝܟ ܡܶܠܰܬܟܽܘܢ. ܐܳܘ ܡܓܰܕ̈ܦܳܢܶܐ܆ ܒܪܺܝܬܳܐ ܡܰܢ ܐܺܝܬܰܘܗ̱ܝ ܒܪܳܐ܆ ܠܳܐ ܒܰܪܝܳܐ ܕܶܝܢ. ܘܠܳܐ ܥܒܺܝܕܳܐ ܐܰܒܳܐ܆ ܠܳܐ ܬܽܘܒ ܐܺܝܬܰܝܗܽܘܢ ܕܰܚܕܳܐ ܬܶܫܒܽܘܚܬܳܐ ܘܕܺܝܠܳܗ̇ ܟܰܕ ܕܺܝܠܳܗ̇ ܘܠܳܐ ܡܶܬܦܰܪܫܳܢܺܝܬܳܐ܆ ܗܰܘ ܟܺܝܬ ܚܰܕܬܳܐ܆ ܘܗܰܘ ܕܰܩܕܳܡ ܥܳܠ̈ܡܶܐ. ܐܶܠܳܐ ܐܰܒܳܐ ܡܰܢ܆ ܐܽܘܣܝ̣ܳܝ̣ܳܐ ܢܶܗܘܶܐ ܐܺܝܬ ܠܶܗ ܫܽܘܒܚܳܐ. ܘܡܶܢܶܗ ܕܰܟܝܳܢܳܐ. ܒܪܳܐ ܕܶܝܢ. ܐܰܝܟ ܕܒܰܡܫܰܘܬܦܽܘܬܳܐ ܘܒܰܢܣܺܝܒܽܘܬܳܐ܆ ܘܕܰܐܝܟ ܕܒܰܡܢܳܬܳܐ ܕܛܰܝܒܽܘܬܳܐ ܐܶܫܬܰܟܰܢ ܠܶܗ܆ ܘܠܰܘ ܕܺܐܝܬܰܘܗ̱ܝ ܒܽܐܘܣܺܝܰܐ ܘܒܰܟܝܳܢܳܐ. ܢܕܰܓܶܠ ܕܶܝܢ. ܐܳܦ ܐܰܒܳܐ ܕܰܒܝܰܕ ܢܒܺܝܳܐ ܐܳܡܰܪ܆ ܕܫܽܘܒܚܳܐ
Lacuna- ܚܰܣܺܝܪ
10: ….. ܡܶܢܰܢ. ܢܺܐܠܰܦ ܠܰܡܝܰܩܳܪܽܘ ܠܣܳܗܕ̈ܶܐ ܒܗܳܠܶܝܢ ܕܕܳܡ̈ܝܳܢ. ܐܶܠܽܘ ܡܰܢ ܓܶܝܪ ܠܓܰܒܪ̈ܶܐ ܪ̈ܦܰܝܳܐ ܘܢܶܩܒ̈ܬܳܢܶܐ. ܗܳܢܽܘܢ ܕܰܒܡܰܫܟܢܳܐ ܘܰܒܪܰܩܕܽܘܬܳܐ ܡܶܬܟܰܬܫܺܝܢ ܗ̱ܘܰܘ܆ ܡܫܰܡܠܶܝܢ ܗ̱ܘܰܘ ܚܰܓ̈ܶܐ܆ ܙܳܕܶܩ ܗ̱ܘܳܐ ܕܰܒܝܰܕ ܪܰܦܝܽܘܬܳܐ ܘܰܒܝܰܕ ܡܥܰܫܩܽܘܬܳܐ ܕܢܰܚ̈ܬܶܐ ܘܰܐܫܺܝܕܽܘܬܳܐ ܫܪܺܝܬܳܐ. ܢܢܺܝܚ ܐܶܢܽܘܢ܆ ܡܶܛܽܠ ܕܰܒܗܳܠܶܝܢ ܗܶܢܽܘܢ. ܟܰܕ ܚܰܝ݂ܺܝ݂ܢ ܗ̱ܘܰܘ ܡܶܬܗܰܢܶܝܢ ܗ̱ܘܰܘ ܘܡܶܬܦܰܨܚܺܝܢ. ܐܶܢ ܕܶܝܢ ܕܽܘܟܪ̈ܳܢܶܐ ܕܣܳܗ̈ܕܶܐ ܕܰܐܠܳܗܳܐ ܡܫܰܡܠܶܝܢ ܚ̱ܢܰܢ܆ ܟܰܕ ܠܰܡܝܰܬܪܽܘܬܳܐ ܕܗܳܢܽܘܢ. ܒܬܰܪ̈ܥܝܳܬܳܐ ܕܺܝܠܰܢ ܡܶܢ ܕܪܺܝܫ ܡܚܰܕܬܺܝܢ ܚ̱ܢܰܢ܆ ܕܗܳܠܶܝܢ ܐܰܠܳܗܳܝ̈ܳܬܳܐ ܘܕܰܪ̈ܚܺܝܡܳܢ ܠܣܳܗ̈ܕܶܐ ܢܺܐܨܰܦ.
11: ܘܰܐܝܟܰܢܳܐ ܕܗܳܢܽܘܢ ܠܡܶܠܬܳܐ ܕܰܐܠܳܗܳܐ ܗܰܘ ܕܡܶܛܽܠܳܬܰܢ ܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ ܘܶܐܬܒܰܪܢܰܫ ܘܰܚܠܳܦܰܝܢ ܚܰܫ ܒܰܒܣܰܪ܆ ܒܚܰܫ̈ܶܐ ܕܕܳܡܶܝܢ ܝܰܩܰܪܘ܆ ܗܳܟܰܢܳܐ ܐܳܦ ܚܢܰܢ ܒܝܰܕ ܥܰܡ̈ܠܶܐ ܕܰܡܝܰܬܪܽܘܬܳܐ ܕܕܳܡܶܝܢ܆ ܠܗܳܠܶܝܢ ܢܝܰܩܰܪ. ܡܶܛܽܠ ܕܳܐܦ ܐܰܢܛܽܘܢܺܝܽܘܤ ܗܰܘ ܪܰܒܳܐ܆ ܗܰܘ ܕܕܽܘܟܪܳܢܶܗ ܐܰܙܘܶܓܢܰܢ. ܠܗܰܘ ܕܣܳܗܕܳܐ ܩܰܕܺܝܫܳܐ ܒܰܐܒܽܘܠܶܐ܆ ܗܰܘ ܣܳܐܶܡ ܢܳܡܽܘܣܳܐ ܘܪܺܝܫܳܐ ܘܡܰܠܦܳܢܳܐ ܕܕܽܘܝܳܪܳܐ ܥܳܢܘܳܝܳܐ܆ ܘܰܐܝܟ ܗܰܘ ܕܫܶܬܶܐܣܬܳܐ ܩܳܒܰܥ ܗ̱ܘܳܐ ܕܚܰܝ̈ܶܐ ܠܳܐ ܚܠܺܝ̈ܛܶܐ ܘܡܰܕܒܪ̈ܳܝܶܐ܆ ܘܕܰܟܢܺܝܫܳܐܺܝܬ ܐܳܡܰܪ ܠܳܐ ܡܶܬܩܰܪ̈ܒܳܢܶܐ܆ ܟܰܕ ܐܰܚܘ̈ܳܬܳܐ ܘܰܕܕܳܡ̈ܝܳܢ ܠܗܳܠܶܝܢ ܕܣܳܗ̈ܕܶܐ ܣܳܥܰܪ ܗ̱ܘܳܐ܆ ܡܝܰܩܰܪ ܗ̱ܘܳܐ ܠܣܳܗ̈ܕܶܐ. ܠܰܘ ܟܰܕ ܩܕܳܡ ܕܰܝܳܢܳܐ ܩܳܡ܆ ܘܠܳܐ ܟܰܕ ܓܰܒܰܘ̈ܗ̱ܝ ܐܶܣܬܰܪܰܩܘ܆ ܘܠܳܐ ܟܰܕ ܐܶܫܬܠܶܡ ܕܢܶܥܽܘܠ ܕܰܐܪܳܐ ܠܚܰܝ̈ܘܳܬܳܐ܆ ܘܳܐܦܠܳܐ ܟܰܕ ܒܰܐܬܽܘܢܳܐ ܕܢܽܘܪܳܐ ܐܶܬܪܡܺܝ ܐܰܘ ܒܩܰܕܣܳܐ ܕܪܳܬܰܚ܆ ܐܶܠܳܐ ܟܰܕ ܡܥܰܨܰܪ ܠܦܰܓܪܶܗ ܘܰܡܟܰܒܶܫ ܠܶܗ܆ ܒܗܳܝ ܕܰܢܫܰܥܒܶܕ ܠܒܶܣܪܳܐ ܥܒܳܕܳܐ ܠܪܽܘܚܳܐ. ܗܰܘ ܕܰܒܟܽܠ ܫܳܥܳܐ ܐܰܝܟ ܕܰܠܡܺܐܡܰܪ ܩܳܐܶܡ ܗ̱ܘܳܐ ܩܕܳܡ ܡܫܺܝܚܳܐ܆ ܒܕܡܽܘܬ݂ ܐܶܠܺܝܳܐ ܬܰܫܒܳܝܳܐ ܗܰܘ ܕܳܐܡܰܪ ܗ̱ܘܳܐ: ܚܰܝ ܗ̱ܘ̣ ܡܳܪܝܳܐ ܗܰܘ ܕܩܳܡܶܬ݂ ܩܕܳܡܰܘܗܝ܆ ܗܰܘ ܕܡܶܢ ܕܰܝ̈ܘܶܐ ܐܰܝܟ ܕܡܶܢ ܕܝܡ̈ܝܘ ܡܶܬܢܰܬܰܫ ܗ̱ܘܳܐ܆ ܘܟܰܕ ܡܶܫܬܰܚܠܦܺܝܢ ܗ̱ܘܰܘ ܒܕܶܡ̈ܘܳܬܳܐ ܠܰܚ̈ܙܳܬܶܐ ܕܚܰܝ̈ܘܳܬ݂ ܫܶܢܳܐ܆ ܘܰܠܚܶܙ̈ܘܶܐ ܡܦܰܬܟ̈ܶܐ ܕܰܫܪܰܓܪ̈ܳܓܝܳܬܳܐ܆ ܡܩܰܘܶܐ ܗ̱ܘܳܐ ܕܠܳܐ ܣܽܘܪܳܕܳܐ ܘܰܕܠܳܐ ܣܳܟ ܡܶܬܗܦܰܟ ܗ̱ܘܳܐ. ܗܰܘ ܕܰܠܫܰܠܗܶܒܺܝܬܳܐ[8] ܗܳܝ ܕܙܳܢܝܽܘܬܳܐ ܘܰܠܩܰܕܣܳܐ ܗܰܘ ܕܰܪ̈ܓܺܝܓܳܬܳܐ܆ ܝܰܬܺܝܪ ܡܶܢ ܟܽܠܶܗ ܓܠܺܝܕܳܐ ܘܬܰܠܓܳܐ ܚܰܘܺܝ ܕܩܰܪܺܝܪܺܝܢ. ܗܰܘ ܕܰܠܣܺܝܪܳܐ[9] ܕܰܡܝܰܬܪ̈ܳܬܳܐ ܐܰܠܘܶܬ݂ ܠܶܗ܆ ܐܰܝܟܰܢܳܐ ܕܣܳܗܕܳܐ ܒܰܐܒܽܘܠܳܐ ܠܫܺܫܰܠܬܳܐ.
12: ܗܳܝ ܕܡܶܢܳܗ̇. ܐܳܦ ܚܢܰܢ ܢܶܬܪܕܶܐ. ܘܳܐܦܶܢ ܡܫܰܘܚܪܳܐܺܝܬ ܢܢܽܘ̈ܚܳܢ ܢܶܫ̈ܶܐ ܡܶܢ ܗܳܝ ܕܰܒܟܶܒ̈ܠܶܐ ܕܕܰܗܒܳܐ ܕܒܺܐܝ̈ܕܰܝܳܐ ܘܰܒܪ̈ܶܓܠܶܐ ܡܶܬܢܰܬܥ̈ܳܢ܆ ܘܰܒܟܺܐܦ̈ܶܐ ܝܰܩܺܝܪ̈ܳܬܳܐ ܠܨܶܒ̈ܥܳܬܗܶܝܢ ܡܰܙܗܪ̈ܳܢ܆ ܘܡܶܢ ܫܺܫܰܠܬܶܗ ܕܒܰܐܒܽܘܠܳܐ ܢܶܬܚܰܡ̈ܨܳܢ܆ ܗܰܘ ܕܟܽܠܶܗ ܗܳܢܳܐ ܐܺܝܬܰܘܗ̱ܝ ܒܰܡܝܰܬܪܽܘܬܳܐ. ܫܪܳܝ ܐܰܢ̱ܬܝ ܠܶܟܝ ܐܳܘ ܐܰܢ̱ܬܬܳܐ ܡܶܢ ܐܰܣܽܘܪ̈ܶܐ ܗܳܢܽܘܢ ܨܶܒܝܳܢܳܝ̈ܶܐ܆ ܗܳܠܶܝܢ ܟܺܝܬ ܕܠܳܐ ܡܣܰܝܒܪܳܐ ܗ̱ܘܰܝܬܝ ܠܗܽܘܢ܆ ܐܶܠܽܘ ܡܶܢ ܐܰܒܳܪܳܐ ܘܦܰܪܙܠܳܐ ܥܒܺܝܕܺܝܢ ܗ̱ܘܰܘ. ܗܳܫܳܐ ܕܶܝܢ. ܗܰܢܺܝܳܐܺܝܬ ܛܥܺܝܢܳܐ ܐܰܢ̱ܬܝ ܠܶܗ ܠܝܽܘܩܪܳܐ܆ ܡܶܛܽܠ ܕܡܶܬܓܰܢܒܳܐ ܐܰܢ̱ܬܝ ܒܗܰܘܢܶܟܝ ܒܰܚܙܳܬܶܗ ܕܕܰܗܒܳܐ. ܐܰܪܺܝܡܝ ܡܶܕܶܡ ܩܰܠܺܝܠ ܡܶܢ ܨܶܒܬܳܐ ܘܙܰܒܶܢܝ܆ ܘܚܰܪܰܪ ܠܰܡܫܺܝܚܳܐ ܕܰܐܣܺܝܪ ܘܰܒܒܶܝܬ ܐܰܣܺܝܪ̈ܶܐ ܚܒܺܝܫ܆ ܘܰܟܒܰܪ ܡܶܛܽܠ ܦܽܘܪܥܳܢܽܘܬܳܐ ܕܚܰܘ̈ܒܳܬܳܐ܆ ܒܩܰܝܣܳܐ ܡܫܰܢܩܳܢܳܐ ܡܬܺܝܚ.
13: ܗܳܝܕܶܝܢ ܓܶܝܪ ܐܰܝܟ ܕܒܰܫܪܳܪܳܐ. ܗܳܝܕܶܝܢ܆ ܠܟܽܠܗܽܘܢ ܒܢܰܝ̈ܢܳܫܳܐ ـ ـ ـ ܚܙܺܝܬܳܐ. ܟܰܕ ܡܰܢ ܓܶܝܪ ܒܨܶܒ̈ܬܶܐ ܕܕܰܗܒܳܐ ܘܰܒܢܰܚ̈ܬܶܐ ܕܫܺܐܪܳܝܳܐ. ܡܶܨܛܰܒܬܳܐ ܐܰܢ̱ܬܝ. ܠ̱ܐܢܳܫܺܝ̈ܢ ܡܰܢ ܗܰܢܺܝܳܐܺܝܬ ܬܶܬܚܙܶܝܢ. ܘܰܠܗܳܠܶܝܢ܆ ܟܰܕ ܙܥܽܘܪ̈ܶܐ ܐܺܝܬܰܝܗܽܘܢ. ܬܶܬܩܰܛܪܓܺܝܢ ܕܶܝܢ. ܡܶܢ ܣܰܓܺܝ̈ܶܐܐ܆ ܐܰܘ ܕܣܳܢܶܝܢ ܠܰܚܬܺܝܪܽܘܬܳܐ܆ ܐܰܘ ܕܒܰܚܣܳܡܳܐ ܠܳܐ ܡܣܰܝܒܪܺܝܢ ܠܳܗ̇ ܠܰܚܙܳܬܳܐ. ܐܶܢ ܕܶܝܢ ܠܰܡܫܺܝܚܳܐ ܬܶܠܒܫܺܝܢ ܟܰܕ ܬܶܫܪܺܝܢܳܝܗ̱ܝ ܡܶܢ ܐܰܣܽܘܪ̈ܶܐ܆ ܒܗܳܝ ܕܰܬܪܺܝܡܺܝܢ ܠܚܰܘܒܬܳܐ ܕܰܚܠܳܦܰܘܗܝ܆ ܐܰܘ ܕܟܰܕ ܟܦܶܢ ܬܬܰܪܣܺܝܢܳܝܗ̱ܝ ܆ ܐܰܘ ܟܰܕ ܥܰܪܛܶܠܳܝ ܬܟܰܣܺܝܢܳܝܗ̱ܝ ܆ ܘܰܠܨܶܒܬܳܐ ܗܰܘ ܕܰܡܝܰܬܪܽܘܬܳܐ ܬܶܓܒܶܝܢ ܚܠܳܦ ܗܰܘ ܕܨܶܒ̈ܬܶܐ ܕܕܰܗܒܳܐ܆ ܠܘܳܬܶܟܝ ܬܰܗܦܟܺܝܢ ܠܥܰܝ̈ܢܶܐ ܕܟܽܠܗܽܘܢ ܚܰܙܳܝ̈ܶܐ.
14: ܘܡܶܢ ܗܳܠܶܝܢ ܡܰܢ. ܕܰܒܫܰܦܺܝܪܽܘܬ݂ ܓܰܘܢܳܐ ܕܗܽܘܠܶܐ ܡܶܬܚܰܒܠܳܢܺܝܬܳܐ ܡܰܚܘܪ̈ܳܢ ܢܰܗܡܽܘܢ[10]܆ ܒܫܰܦܺܝܪܽܘܬ݂ ܦܰܐܝܽܘܬܳܐ ܕܶܝܢ ܡܶܬܗܰܘܢܳܢܺܝܬܳܐ ܕܺܝܠܶܟܝ ܢܶܬܡܗܽܘܢ. ܐܶܣܬܳܐ ܓܶܝܪ ܕܠܳܐ ܢܦܶܫ ܘܠܳܐ ܡܰܪܓܫܳܢܺܝܬܳܐ ܕܰܡܫܺܝܚܳܐ[11] ܒܟܶܠܫܳܐ܆ ܐܳܡܰܪ ܐ̱ܢܳܐ ܠܳܗ̇ ܐܶܢܳܐ ܠܗܳܝ ܕܰܡܨܰܒܬܳܐ. ܡܳܢܳܐ ܕܶܝܢ ܐܳܡܰܪ ܐ̱ܢܳܐ܆ ܠܥܰܝ̈ܢܶܐ ܕܰܒܢܰܝ̈ܢܳܫܳܐ. ܠܓܽܘ̈ܕܶܐ ܕܡܰܠܰܐܟ̈ܶܐ ܬܚܰܕܶܝܢ܆ ܘܬܰܦܨܚܺܝܢ ܠܟܽܠ ܥܰܝܢܳܐ ܠܳܐ ܢܳܣܒܰܬ݂ܝ ܒܰܐܦ̈ܶܐ ܕܚܳܙܝܳܐ ܠܶܟܝ܆ ܘܬܶܣܒܺܝܢ ܡܶܢܳܗ̇ ܩܽܘܠܳܣܳܐ ܗܰܘ ܕܠܳܐ ܕܳܥܶܟ ܘܠܳܐ ܡܶܫܬܰܠܰܡ. ܠܗܳܢܽܘܢ ܓܶܝܪ ܕܦܳܠܚܺܝܢ ܡܝܰܬܪܽܘܬܳܐ܆ ܡܶܛܽܠ ܩܽܘ̈ܠܳܣܶܐ ܕܡܶܢ ܒܢܰܝ̈ܢܳܫܳܐ. ܗܳܢܽܘܢ ܕܕܳܝܒܺܝܢ ܘܰܥܕܰܡܳܐ ܠܡܰܫܡܰܥܬܳܐ ܩܳܝܡܺܝܢ܆ ܡܶܠܬܳܐ ܐܳܦܠܳܐ ܚܕܳܐ. ܠܰܡ̈ܫܰܩܠܶܐ ܕܶܝܢ ܘܠܰܚܬܺܝܪ̈ܶܐ܆ ܘܰܕܠܳܐ ܚܳܝܪܺܝܢ ܠܘܳܬ݂ ܣܶܒܪ̈ܶܐ ܕܰܥܬܺܝܕܺܝܢ܆ ܡܶܬܝܰܨ̈ܦܳܢܝܳܬܳܐ ܐܺܝܬܰܝܗܶܝܢ ܗܳܠܶܝܢ ܕܥܳܠܡܳܐ ܗܳܢܳܐ ܕܩܰܪܺܝܒ܆ ܐܰܝܟܰܢܳܐ ܕܳܐܦ ܝܽܘܚܰܢܳܢ ܡܡܰܠܶܠ ܐܰܠܳܗܳܝ̈ܳܬܳܐ ܟܰܕ ܟܳܬܶܒ ܐܳܡܰܪ: ܕܟܽܠ ܗܰܘ ܡܳܐ ܕܰܒܥܳܠܡܳܐ܆ ܪܶܓܬܳܐ ܕܒܶܣܪܳܐ ܘܪܶܓܬܳܐ ܕܥܰܝ̈ܢܶܐ܆ ܘܰܡܫܰܩܠܽܘܬܳܐ ܕܥܳܠܡܳܐ܆ ܠܳܐ ܐܺܝܬܰܝܗܶܝܢ ܡܶܢ ܐܰܒܳܐ܆ ܐܶܠܳܐ ܡܶܢ ܥܳܠܡܳܐ ܐܺܝܬܰܝܗܶܝܢ܆ ܘܥܳܠܡܳܐ ܥܳܒܰܪ ܠܶܗ ܘܪܶܓܬܳܐ܆ ܗܰܘ ܕܶܝܢ ܕܥܳܒܶܕ ܨܶܒܝܳܢܳܐ ܕܰܐܠܳܗܳܐ ܡܩܰܘܶܐ ܠܥܳܠܰܡ. (ܐ.ܝܘܚܢܢ. 2: 16 ـ 17)
15: ܐܶܠܳܐ ܡܶܢ ܫܺܫܰܠܬܳܐ ܡܰܢ ܗܳܝ ܫܠܺܝܚܳܝܬܳܐ ܕܣܳܗܕܳܐ ܒܰܐܒܽܘܠܳܐ ܗܰܘ ܕܰܒܟܽܠ ܡܶܬܩܰܠܣܳܢܳܐ܆ ܕܰܐܝܟ ܗܳܕܶܐ ܡܰܠܦܳܢܽܘܬܳܐ ܥܳܦܺܝܢܰܢ. ܠܶܐܡܳܐ ܕܶܝܢ. ܗܳܟܰܢܳܐ ܢܰܥܒܪܺܝܗ̇ ܐܶܡܰܪ ܠܺܝ܆ ܗܳܝ ܕܰܬܠܳܬܳܐ ܛܠܳܝ̈ܶܐ ܫܰܒܪ̈ܶܐ. ܗܳܢܽܘܢ ܕܰܐܟܚܕܳܐ ܐܶܬܟܰܬܰܫܘ ܥܰܡܶܗ ܕܡܰܠܦܳܢܗܽܘܢ ܘܥܰܡܶܗ ܐܰܟܚܕܳܐ ܐܶܬܦܣܶܩܘ ܪ̈ܺܝܫܰܝܗܽܘܢ܆ ܘܰܕܠܳܐ ܒܽܘܚܳܢ ܐܰܫܠܶܡܘ ܒܝܰܕ ܫܽܘܦܳܥܳܐ ܕܕܶܡܗܽܘܢ ܠܝܽܘ̈ܠܦܳܢܶܐ ܪ̈ܰܒܶܐ ܕܫܰܦܺܝܪܽܘܬ݂ ܕܶܚܠܬܳܐ܆ ܠܗܳܝ ܕܟܰܕ ܠܰܘ ܐܳܦ ܢܰܥܒܪܺܝܗ̇ ܐ̱ܢܳܫ܆ ܐܶܠܳܐ ܕܽܘܪܳܫܳܐ ܕܰܛܠܳܝ̈ܶܐ ܕܒܰܡܝܰܬܪܽܘܬܳܐ܆ ܠܳܐ ܢܶܦܶܕ ܡܶܢ ܚܽܘܫܳܒܳܐ ܢܰܟܦܳܐ.
16: ܟܰܕ ܓܶܝܪ ܬܠܳܬܳܐ ܐܺܝܬܰܝܗܽܘܢ ܗ̱ܘܰܘ܆ ܠܳܐ ܐܶܬܦܰܠܓܰܬ݂ ܒܬܰܪܥܺܝܬܳܗ̇ ܠܡܶܢܝܳܢܳܐ܆ ܘܳܐܦܠܳܐ ܡܶܕܶܡ ܠܳܐ ܚܠܺܝܡܳܐ ܘܙܰܒܢܳܝܳܐ ܐܶܬܪܰܥܝܰܬ݂܆ ܘܰܠܗܶܢܽܘܢ ܡܰܢ ܠܘܳܬ ܣܳܗܕܽܘܬܳܐ ܚܰܦܛܰܬ݂܆ ܘܰܠܘܳܬ ܚܰܝ̈ܶܐ ܕܰܥܬܺܝܕܺܝܢ ܫܰܕܪܰܬ܆ ܠܗܰܘ ܕܶܝܢ ܠܡܶܟܠܳܐ ܐܶܬܚܰܫܒܰܬ݂ ܕܢܶܗܘܶܐ ܚܽܘܛܪܳܐ ܕܣܰܝܒܽܘܬܳܐ܆ ܘܕܰܢܬܰܪܣܶܝܗ̇ ܬܽܘܪܣܳܝܳܐ ܐܳܠܨܳܝܳܐ. ܐܶܠܳܐ ܒܕܰܠܩܽܘܒܠܳܐ. ܟܰܕ ܡܰܘܬܳܐ ܚܶܫܒܰܬ݂ ܐܶܢܽܘܢ ܠܗܳܠܶܝܢ ܚܰܝ̈ܶܐ܆ ܕܡܰܝ̣ܺܝ̣ܬ݂ ܡܣܰܒܪܳܐ ܗ̱ܘܳܬ ܠܰܒܪܳܗ̇ ܗܰܘ ܕܦܳܐܶܫ ܗ̱ܘܳܐ܆ ܘܰܐܝܟ ܐܶܡܳܐ ܡܪܰܚܡܳܢܺܝܬܳܐ ܘܪܳܚܡܰܬ ܒܢܶܝ̈ܗ̇܆ ܕܰܬܠܳܬܰܝܗܽܘܢ ܢܺܚܽܘܢ ܝܶܨܦܰܬ݂܆ ܚܰܝ̈ܶܐ ܗܳܢܽܘܢ ܫܰܪܺܝܪ̈ܶܐ ܘܠܳܐ ܡܶܬܚܰܒܠܳܢ̈ܶܐ.
17: ܐܶܡ̈ܗܳܬܳܐ ܕܶܝܢ ܗܳܠܶܝܢ ܕܗܳܫܳܐ܆ ܐܰܘܣܶܦ ܕܶܝܢ ܘܛܳܒ ܟܺܐܢܳܐܺܝܬ ܐܰܝܟ ܕܳܐܦ ܐܰܒܳܗ̈ܶܐ܆ ܗܳܟܰܢܳܐ ܕܳܘܝܳܐܺܝܬ ܣܰܝ̣ܺܝ̣ܒܺܝܢ܆ ܘܰܒܥܳܠܡܳܐ ܗܳܢܳܐ ܣܰܪܺܝܟܺܝܢ܆ ܘܳܐܦܠܳܐ ܚܕܳܐ ܡܶܠܬܳܐ ܥܳܒܕܺܝܢ ܡܶܛܽܠ ܗܰܘ ܕܰܥܬܺܝܕ܆ ܕܶܐܢ ܒܕܽܘܟ. ܠܐ̱ܢܳܫ ܡܶܢ ܒܢܰܝ̈ܳܐ ܕܺܝܠܗܽܘܢ ܢܶܚܙܽܘܢ܆ ܕܰܠܘܳܬ ܥܺܕܬܳܐ ܪܳܗܶܛ ܘܣܰܓܺܝ̈ܳܐܬܳܐ ܥܳܒܶܕ ܗ̱ܘܳܐ܆ ܘܰܕܥܰܡ ܒܢܰܝ̈ܢܳܫܳܐ ܢܰܟ̈ܦܶܐ ܦܳܐܶܫ ܘܡܶܬܥܢܶܐ܆ ܕܶܐܣܬܰܓܰܦ ܗܳܢܳܐ ܐܳܡܪܺܝܢ ܟܰܕ ܣܳܪܒܺܝܢ. ܘܰܠܘܳܬ ܗܳܢܽܘܢ ܕܰܠܗܳܕܶܐ ܡܝܰܬܪܽܘܬܳܐ ܐܺܝܬܝܘܗ̱ܝ ܡܶܬܥܰܣܩܺܝܢ܆ ܘܰܡܚܰܒܠܳܢܰܝ̈ ܛܠܳܝ̈ܶܐ ܩܳܪܶܝܢ ܠܗܽܘܢ ܘܰܡܣܰܓܦܳܢ̈ܶܐ܆ ܘܰܫܡܳܗ̈ܶܐ ܕܰܠܗܳܠܶܝܢ ܕܳܡܶܝܢ.
18: ܐܶܢ ܕܶܝܢ ܐܳܦ ܠܘܳܬ ܕܽܘܒܳܪܳܐ ܕܕܰܝܪܳܝܽܘܬܳܐ ܢܶܣܰܒ ܗܽܘ ܛܰܠܝܳܐ ܚܺܐܦܳܐ܆ ܘܢܶܓܒܶܐ ܠܶܗ ܕܦܺܝܠܳܣܽܘܦܺܝܣܳܐ ܢܶܥܒܶܕ܆ ܗܳܝܕܶܝܢ ܡܶܟܺܝܠ܆ ܗܳܠܶܝܢ ܕܳܐܦܠܳܐ ܒܡܶܠܬܳܐ ܡܶܬܰܐܡܪ̈ܳܢ ܘܒܰܥ̈ܒܳܕܶܐ ܠܳܐ ܡܶܣܬܰܝܒܪ̈ܳܢ ܣܳܥܪܺܝܢ. ܡܢܰܬܫܺܝܢ ܣܰܥܪܗܽܘܢ. ܡܚܰܪܛܺܝܢ ܦܰܟܰܝ̈ܗܽܘܢ. ܟܽܘܬܺܝ̈ܢܝܳܬܗܽܘܢ ܡܣܰܕܩܺܝܢ. ܥܰܠ ܣܰܩܳܐ ܘܩܶܛܡܳܐ ܝܳܬܒܺܝܢ܆ ܟܰܕ ܢܰܚ̈ܬܶܐ ܐܽܘܟܳܡ̈ܶܐ ܡܶܬܟܰܣܶܝܢ܆ ܘܰܐܝܟ ܕܥܰܠ ܡܺܝܬܳܐ ܡܶܬܰܐܒܠܺܝܢ ܘܡܰܪܩܕܺܝܢ ܥܠܰܘܗ̱ܝ ܕܛܰܠܝܳܐ܆ ܟܰܕ ܐܺܝܬ ܠܗܽܘܢ ܫܰܘܬܳܦ̈ܶܐ ܕܶܐܒ̈ܠܶܐ ܥܰܒܕܰܝ̈ܗܽܘܢ ܘܰܐܡ̈ܗܳܬܗܽܘܢ܆ ܐܰܘ ܐܺܝܬ ܐܰܝܟܳܐ ܕܳܐܦ ܟܰܕ ܥܰܪܣܳܐ ܣܳܝܡܺܝܢ ܩܕܳܡܰܝܗܽܘܢ ܘܡܶܕܶܡ ܡܶܢ ܡܳܐܢܰܘ̈ܗ̱ܝ ܕܛܰܠܝܳܐ܆ ܒܳܟܶܝܢ ܠܶܗ ܐܰܝܟ ܗܰܘ ܕܒܰܐܟܣܶܢܝܳܐ ܡܺܝܬ ܒܨܺܝܪ ܩܰܠܺܝܠ܆ ܐܳܦ ܠܢܶܫ̈ܶܐ ܗܳܠܶܝܢ ܕܠܽܐܘܠ̈ܝܳܬܳܐ ܙܳܩܪ̈ܳܢ ܩܳܪܶܝܢ܆ ܟܰܕ ܡܶܢ ܚܰܫܳܐ ܪ̈ܰܘܝܳܢ. ܗܳܠܶܝܢ ܗܳܟܺܝܠ ܐܶܡܰܪ ܠܺܝ. ܕܰܟܪ̈ܺܝܣܛܝܳܢܶܐ ܐܺܝܬܰܝܗܶܝܢ. ܗܳܠܶܝܢ܆ ܕܗܳܢܽܘܢ ܕܰܡܣܰܟܶܝܢ ܠܰܩܝܳܡܬܳܐ܆ ܗܳܠܶܝܢ܆ ܕܗܳܢܽܘܢ ܕܰܦܩܺܝܕܺܝܢ ܐܳܦܠܳܐ ܥܰܠ ܡܺܝ̈ܬܶܐ ܢܶܒܟܽܘܢ ܘܢܶܬܬܥܺܝܩܽܘܢ ܕܠܳܐ ܡܫܽܘܚܬܳܐ܆ ܒܰܕܡܽܘܬ݂ ܥܰܡ̱ܡ̈ܶܐ ܗܳܢܽܘܢ ܕܣܰܒܪܳܐ ܠܰܝܬ ܠܗܽܘܢ.(ܐ. ܬܣܠܘܢܝܩ̈ܝܐ. 4: 13)
19: ܘܰܠܡܳܢܳܐ ܗܳܠܶܝܢ ܐܳܡܰܪ ܐ̱ܢܳܐ. ܟܰܕ ܫܶܒܩܶܬ݂ ܗܳܠܶܝܢ ܕܝܰܬܺܝܪ ܪܰܘܪ̈ܒܳܢ ܘܝܰܬܺܝܪ ܩܰܫ̈ܝܳܢ. ܐܳܦ ܓܶܝܪ ܟܰܕ ܐܺܝܬܰܝܗܽܘܢ ܠܗܽܘܢ ܒܢܰܝ̈ܗܽܘܢ ܐܰܝܟ ܕܰܒܣܽܘܓܳܐܐ. ܒܳܗ̇ ܒܰܒܝܳܬܗܽܘܢ܆ ܠܘܳܬ݂ ܓܶܝܪ ܦܺܝܠܳܣܽܘܦܺܝܰܐ. ܙܥܽܘܪܝܳܐܺܝܬ. ܢܶܫܬܟܰܚ ܐ̱ܢܳܫ ܕܫܳܩܶܠ ܚܺܐܦܳܐ܆ ܪܶܒܽܘ ܥܶܠ̈ܠܳܬܳܐ ܕܢܰܦ̈ܩܳܬܳܐ ܡܶܫܟܚܺܝܢ[12] ܒܬܰܪ̈ܥܝܳܬܳܐ܆ ܟܰܕ ܡܰܠܦܳܢ̈ܶܐ ܘܪ̈ܳܕܽܘܝܶܐ ܡܩܺܝܡܺܝܢ܆ ܕܟܽܠ ܝܺܕܰܥܬܳܐ ܡܫܰܚܠܰܦܬܳܐ ܘܽܐܘܡܳܢܽܘܬܳܐ. ܟܰܕ ܦܳܠܚܽܘܬܳܐ ܡܰܢ ܒܟܰܟܪ̈ܶܐ ܣܰܓܺܝ̈ܳܐܬܳܐ ܙܳܒܢܺܝܢ ܠܗܽܘܢ܆ ܐܰܘ ܠܘܳܬ݂ ܡܶܢܝܳܢܳܐ ܕܣܟܽܘܠܽܘܤܛܺܝ̈ܩܶܐ ܡܰܝܬܶܝܢ ܠܗܽܘܢ܆ ܫܳܡܽܘܢܳܐ ܕܶܝܢ ܚܰܕ ܡܶܛܽܠ ܗܳܠܶܝܢ܆ ܠܗܳܢܽܘܢ ܕܰܣܢܺܝܩܺܝܢ[13] ܠܳܐ ܡܰܘܫܛܺܝܢ. ܘܶܐܢܗܽܘ ܡܰܢ ܕܰܠܐ̱ܢܳܫ ܡܶܢ ܒܢܰܝ̈ܗܽܘܢ. ܡܶܢ ܒܳܬܰܪ ܥܽܘܬܳܕܳܐ ܕܰܐܝܟ ܗܳܢܳܐ. ܡܰܟܺܝܟܳܐ ܢܶܚܙܽܘܢܳܝܗ̱ܝ ܆ ܐܰܘ ܕܩܰܠܺܝܠ ܒܰܠܚܽܘܕ ܒܰܛܺܝܠ ܡܶܢ ܒܺܝܫܽܘܬܳܐ܆ ܠܳܐ ܚܳܫܚܳܐ ܩܳܪܶܝܢ ܠܶܗ ܠܗܳܢܳܐ܆ ܘܰܕܠܳܐ ܥܒܳܕ ܡܫܰܡܗܺܝܢ ܠܶܗ܆ ܘܒܰܛܺܝܠܳܐ ܡܟܰܢܶܝܢ ܠܶܗ. ܟܰܕ ܒܝܰܕ ܟܽܘܢܳܝ̈ܶܐ ܕܕܰܐܝܟ ܗܳܠܶܝܢ܆ ܠܢܺܝܚܽܘܬܶܗ ܕܰܙܢܳܐ ܥܳܒܕܺܝܢ ܕܺܐܝܬܶܝܗ̇ ܡܰܪܫܽܘܬܳܐ[14]܆ ܘܰܠܘܳܬ݂ ܒܺܝܫܽܘܬܳܐ ܡܢܰܣܶܝܢ ܕܢܶܬܦܽܘܢܳܝܗ̱ܝ܆ ܒܰܕܡܽܘܬ݂ ܗܳܢܽܘܢ ܕܰܠܪ̈ܶܕܝܶܐ ܕܡܰܝ̈ܳܐ ܡܬܰܦܦܺܝܢ[15] ܡܶܢ ܕܽܘܟܳܐ ܠܕܽܘܟܳܐ.
20: ܠܗܰܘ ܕܶܝܢ ܕܺܐܝܬܰܘܗ̱ܝ. ܕܝܰܬܺܝܪ ܚܰܪܺܝܦ ܒܰܙܢܳܐ ܕܪܶܥܝܳܢܶܗ܆ ܘܰܡܥܰܬܰܕ ܠܘܳܬ݂ ܝܽܘܬܪ̈ܳܢܶܐ ܕܥܰܘܠܳܐ܆ ܘܺܐܝܬܰܘܗ̱ܝ ܚܰܨܺܝܦܳܐ ܒܰܐܦ̈ܶܐ ܘܰܡܣܰܝܒܳܐ ܒܒܰܪ̱ܬ݂ ܩܳܠܶܗ ܐܰܝܟܰܢܳܐ ܕܳܐܦ ܒܬܰܪܥܺܝܬܶܗ܆ ܘܰܡܛܰܝܒܳܐ ܠܘܳܬ݂ ܚܶܪ̈ܝܳܢܶܐ܆ ܐܰܝܟ ܕܰܠܣܰܝܦܳܐ ܨܳܒܥܺܝܢ[16] ܠܶܗ ܘܠܳܛܫܺܝܢ܆ ܘܰܠܘܳܬ݂ ܪܶܚܡܰܬ݂ ܟܶܣܦܳܐ ܫܳܓܪܺܝܢ ܠܶܗ. ܟܰܕ ܠܥܶܠ̈ܠܳܬܳܐ ܚܳܫܒܺܝܢ. ܟܰܕ ܒܚܽܘܫܒܳܢܳܐ ܕܪ̈ܶܒܝܳܬܳܐ܆ ܠܥܽܘܩܣܳܐ ܕܠܳܐ ܣܰܒܥܽܘܬܳܐ ܡܚܰܪܦܺܝܢ܆ ܘܰܠܪܰܒܽܘܬܳܐ ܕܽܐܘܣܺܝܰܐ ܕܺܝܠܗܽܘܢ ܙܰܒܢܺܝ̈ܢ ܣܰܓܺܝ̈ܳܐܢ ܘܡܶܠܬܳܐ ܬܳܩܠܺܝܢ܆
Lacune ܚܰܣܺܝܪ
Extrait de l’Hom. 11 d‘apres l’Add. 14,613 (Extr. Ascetig.) f. 203 ro 9e ligne
ܡܶܢ ܗܘ ܕܝܐ. ܘܠܳܐ ܡܶܕܶܡ ܓܶܝܪ ܡܣܰܝܶܒ ܠܒܰܪܢܳܫܳܐ܆ ܤܛܰܪ ܡܶܢ ܚܛܺܝܬܳܐ.
ܕܝܐ ܕܐܦܝܬܪܢܝܘܢ. ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ ܕܡܰܠܰܐܟܰܝ̈ܗܽܘܢ ܒܟܽܠ ܙܒܰܢ ܚܳܙܶܝܢ ܦܰܪܨܽܘܦܶܗ ܕܳܐܒܝ ܕܒܰܫܡܰܝܳܐ.