ܡܺܐܡܪܳܐ ܕܡܳܐܐ ܘܬܫܥܐ

ܐܰܘܟܺܝܬ ܡܰܪܬܝܳܢܽܘܬܳܐ ܕܚܰܡܶܫ. ܕܶܐܬܐܰܡܪܰܬ ܐܰܝܟ ܥܝܳܕܳܐ܆ ܒܰܐܪܒܥܳܐ ܒܫܰܒܳܐ ܕܫܰܒܬܳܐ ܗܳܝ ܕܚܰܫܳܐ ܩܰܕܺܝܫܳܐ.

109: ܥܝܳܕܰܐ ܗ̱ܘ ܠܗܳܢܽܘܢ ܕܰܠܡܶܠܬܳܐ ܐܰ‌ܠܳܗܳܝܬܳܐ ܘܰܠܦܽܘܩܕܳܢܳܐ ܡܫܰܡܫܺܝܢ܆ ܘܶܐܫܬܰܘܕܰܥܘ ܒܡܰܪܓܫܳܢܽܘܬܳܐ ܕܟܰܕ ܡܳܢܳܐ ܐܺܝܬܰܝܗܽܘܢ ܠܡܰܢܽܘ ܡܫܰܡܫܺܝܢ܆ ܘܠܰܘ ܒܰܡܫܰܩܠܽܘܬܳܐ ܩܰܕܶܡܘ ܐܶܫܬܝܽܘܗ̇ ܠܗܳܝ ܕܕܰܥ ܐܰܢ̱ܬ ܠܳܟ ܐܰܘܟܺܝܬ ܠܗܳܝ ܕܶܐܬܒܰܩܳܐ ܐܰܢ̱ܬ ܒܳܟ܆ ܕܠܳܐ ܢܶܬܬܰܟܠܽܘܢ ܥܠܶܝܗ̇ ܕܗܳܝ ܕܰܩܪܶܝܢ ܘܰܢܣܺܝܒܺܝܢ܆ ܘܰܢܫܰܡܫܽܘܢ ܠܰܐܠܳܗܳܐ. ܠܘܳܬ ܢܰܟܦܽܘܬܳܐ ܕܶܝܢ ܘܩܰܢܺܝܛܽܘܬܳܐ܆ ܘܰܠܘܳܬ ܗܳܝ ܕܡܰܟܺܝܟܳܐ ܢܶܬܩܰܦܣܽܘܢ ܡܰܠܽܘܢ܆ ܘܠܳܐ ܣܳܟ ܗܳܝ ܕܳܐܬܝܳܐ ܠܗܰܘܢܳܐ ܦܫܺܝܛܳܐܺܝܬ ܗܳܟܰܢܳܐ ܘܗ̱ܝ ܕܰܠܗܽܘܢ ܡܶܣܬܰܒܪܳܐ ܢܺܐܡܪܽܘܢ܆ ܘܠܳܐ ܡܛܰܟܣܳܐܺܝܬ ܐܰܘ ܠܳܐ ܡܬܰܚܡܳܐܺܝܬ܆ ܐܰܘ ܠܳܐ ܡܒܰܚܢܳܐܺܝܬ ܢܡܰܠܠܽܘܢ. ܐܶܠܳܐ ܠܘܳܬ ܗܰܘ ܢܚܽܘܪܽܘܢ܆ ܠܘܳܬ ܗܰܘ ܕܰܩܪܳܐ ܘܩܰܪܶܒ ܐܶܢܽܘܢ. ܠܘܳܬ ܗܰܘ ܕܫܰܕܰܪ. ܠܘܳܬ ܗܰܘ ܕܰܦܩ̣ܰܕ. ܘܥܰܝܢܳܐ ܠܳܐ ܡܶܬܬܪܺܝܡܳܢܺܝܬܳܐ ܘܠܳܐ ܦܰܗܳܝܬܳܐ ܢܶܗܘܽܘܢ ܐܺܝܬ ܠܗܽܘܢ܆ ܐܰܝܟܰܢܳܐ ܕܠܳܐ ܠܟܳܐ ܐܰܘ ܠܟܳܐ ܢܰܟܪܟܽܘܢܳܗ̇. ܐܶܠܳܐ ܕܢܶܗܘܽܘܢ ܩܒܺܝܥܺܝܢ ܒܚܰܘܪܗܽܘܢ ܘܢܶܕܚܠܽܘܢ ܘܢܶܪܥܠܽܘܢ܆ ܘܰܢܫܰܐܠܽܘܢ ܕܰܠܘܳܬ ܡܳܢܳܐ ܡܶܬܒܥܶܐ ܠܶܗ ܠܠܶܫܳܢܳܐ ܕܰܢܫܰܡܶܫ.

ܗܳܟܰܢܳܐ ܡܽܘܫܶܐ ܗܰܘ ܪܰܒܳܐ ܟܰܕ ܫܳܡܰܥ ܗ̱ܘܳܐ ܡܶܢ ܐܰ‌ܠܳܗܳܐ܆ ܕܬܳܐܪܐ ܐܶ݀ܫܰܕܪܳܟ ܠܘܳܬ ܦܶܪܥܽܘܢ ܡܰܠܟܳܐ ܕܡܶܨܪܶܝܢ܆ ܘܬܰܦܶܩ ܠܥܰܡܳܐ ܕܺܝܠܝ ܒ̈ܢܰܝ ܐܺܝܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ܆ ܩܰܕܡܳܐܺܝܬ ܡܰܢ ܐܳܡܰܪ ܗ̱ܘܳܐ܆ ܡܰܢ ܐܺܝܬܰܝ ܐܶܢܳܐ ܕܺܐܙܰܠ ܠܘܳܬ ܦܶܪܥܽܘܢ ܡܰܠܟܳܐ ܕܡܶܨܪܶܝܢ[1]. ܟܰܕ ܕܶܝܢ ܡܶܬܶܐܠܶܨ ܗ̱ܘܳܐ ܠܰܡܡܰܠܳܝܽܘ ܠܗܳܝ ܕܶܐܬܦܰܩܕܰܬ ܡܶܫܬܡܰܥ ܗ̱ܘܳܐ ܡܰܢ܆ ܡܶܛܽܠ ܟܺܝܬ ܕܳܐܦ ܒܳܗ̇ ܒܢܰܟܦܽܘܬܳܐ[2] ܠܗܳܝ ܕܰܡܡܰܫܚܳܐ ܡܝܰܩܰܪ ܗ̱ܘܳܐ܆ ܟܰܕ ܫܰܦܺܝܪ ܝܳܕܰܥ ܗ̱ܘܳܐ ܕܥܶܕܠܳܝܳܐ ܐܺܝܬܶܝܗ̇܆ ܗܳܝ ܕܰܒܟܽܠ ܕܽܘܟ ܠܗܰܠ ܡܶܢ ܬܚܽܘܡ̈ܶܐ ܢܳܡܽܘܣܳܝ̈ܶܐ ܢܶܦܽܘܩ܆ ܬܽܘܒ ܕܶܝܢ ܟܰܕ ܡܙܰܥܰܪ ܗ̱ܘܳܐ ܢܰܦܫܶܗ ܘܰܐܝܟ ܕܰܠܡܺܐܡܰܪ ܒܨܶܒܥܳܐ ܡܚܰܘܶܐ ܗ̱ܘܳܐ ܗܽܘ ܠܶܗ ܐܳܡܰܪ ܗ̱ܘܳܐ܆ ܗܳܐ ܐܶܢܳܐ ܐܳܙܶܠ ‌ܐ̱ܢܳܐ ܠܘܳܬ ܒܢܰܝ̈ܳܐ ܕܺܐܝܣܪܳܐܶܝܠ ܘܺܐ݀ܡܰܪ ܠܘܳܬܗܽܘܢ܆ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ ܫܰܕܪܰܢܝ ܠܘܳܬܟܽܘܢ[3]. ܟܰܕ ܐܶܢܳܐ ܒܺܝ ܚܳܐܰܪ ܐ̱ܢܳܐ܆ ܡܶܬܦܰܫܰܟ ܐ̱ܢܳܐ ܐܳܡܰܪ܆ ܕܰܥܬܺܝܕ ܐ̱ܢܳܐ ܟܺܝܬ ܠܡܺܐܡܰܪ ܐܶܢܳܐ ܠܘܳܬ ܟܽܠܶܗ ܗܰܘ ܥܰܡܳܐ܆ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ ܫܰܕܪܰܢܝ ܠܘܳܬܟܽܘܢ3. ܬܳܩܶܠ ‌ܐ̱ܢܳܐ ܠܰܡܚܺܝܠܽܘܬܳܐ ܕܺܝܠܝ ܠܽܘܩܒܰܠ ܪܰܒܘܳܬܳܐ ܕܡ̈ܶܠܶܐ ܗܳܠܶܝܢ ܕܰܦܩܺܝܕ ܐ̱ܢܳܐ ܠܡܺܐܡܰܪ܆ ܘܛܳܒ ܡܶܣܬܰܪܰܕ ܐ̱ܢܳܐ. ܐܳܦ ܓܶܝܪ ܡܶܚܕܳܐ ܣܰܓܺܝ ܘܳܠܝܳܐܺܝܬ ܢܺܐܡܪܽܘܢ ܠܺܝ ܗܳܢܽܘܢ ܕܰܠܘܳܬܗܽܘܢ ܐܳܙܶܠ ‌ܐ̱ܢܳܐ܆ ܐܰ‌ܠܳܗܳܐ ܕܰܐܒܳܗܰܝ̈ܢ ܐܳܡܰܪ ܐܰܢ̱ܬ ܐܳܘ ܗܳܢܳܐ ܕܫܰܕܪܳܟ ܠܘܳܬܰܢ܆ ܡܳܕܶܝܢ ܡܳܢܳܐ ܫܡܶܗ ܐܶܡܰܪ ܠܰܢ. ܡܳܢܳܐ ܐܺ݀ܡܰܪ ܠܘܳܬܗܽܘܢ3. ܘܗܳܝܕܶܝܢ ܟܰܕ ܝܺܠܶܦ ܗܰܘ ܡܳܐ ܕܙܳܕܶܩ ܗ̱ܘܳܐ ܠܡܺܐܡܰܪ܆ ܘܗ̱ܝ ܕܰܠܡܰܚܣܶܢ ܣܳܦܶܩ ܗ̱ܘܳܐ ܗܽܘ ܠܡܶܫܡܰܥ܆ ܙܗܺܝܪܳܐܺܝܬ ܠܘܳܬ ܗܳܝ ܕܙܳܕܶܩ ܗ̱ܘܳܐ ܕܢܶܣܥܽܘܪ ܐܳܙܶܠ ܗ̱ܘܳܐ. ܘܡܽܘܫܶܐ ܡܰܢ ܗܳܟܰܢܳܐ.

ܐܶܢܳܐ ܕܶܝܢ ܟܰܕ ܐܳܦܠܳܐ ܗܺܝ ܗܳܕܶܐ ܡܶܫܟܰܚ ܐ̱ܢܳܐ ܕܰܒܬܰܪܥܺܝܬܳܐ ܕܰܟܝܳܐܺܝܬ ܐܶܣܬܰܟܠܺܝܘܗ̱ܝ ܠܰܐܠܳܗܳܐ܆ ܫܒܽܘܩ ܟܺܝܬ ܕܳܐܦ ܠܡܰܡܠܠܳܐ ܘܥܶܢܝܳܢܳܐ ܕܗܰܘ ܐܶ݀ܫܬܘܶܐ܆ ܘܟܰܕ ܠܶܐܕܢ̈ܶܐ ܘܰܠܣܶܦ̈ܘܳܬܳܐ ܕܺܝܠܝ ܚܛܺܝܬܳܐ ܣܳܟܪܳܐ܆ ܟܰܕ ܠܟܽܘܢ ܩܰܕܡܶܬ ܚܰܘܺܝܬ ܠܶܗ܆ ܘܰܠܚܰܝܠܳܐ ܕܝܰܘܡܳܐ ܩܰܕܺܝܫܳܐ ܗܳܢܳܐ ܕܩܳܐܶܡ܆ ܟܰܕ ܠܬܰܚܬ ܟܰܦ̈ܝܳܢ ܐܰܦܰܝ̈ ܐܳܡܰܪ ܗ̱ܘܺܝܬ ܠܶܗ܆ ܒܦܽܘܡܳܐ ܡܰܢ ܘܠܳܐ ܣܳܟ܆ ܡܰܪܚܬܳܐ ܓܶܝܪ ܡܶܣܬܰܒܪܳܐ ܗ̱ܘܳܬ܆ ܒܠܶܒܳܐ ܕܶܝܢ ܕܡܶܬܚܰܦܶܐ ܘܒܳܗܶܬ ܡܰܢ ܕܢܺܐܡܰܪ ܕܡܳܢܳܐ ܐܺ݀ܡܰܪ ܠܘܳܬܗܽܘܢ܆ ܡܶܬܠܰܒܰܒ ܕܶܝܢ ܒܝܰܕ ܗܳܠܶܝܢ ܕܫܰܬܺܝܩ ܗ̱ܘܳܐ ܠܡܰܙܥܳܩܽܘ܆ ܕܗܳܠܶܝܢ ܡܳܢܳܐ ܢܶܫܡܥܽܘܢ. ܐܳܦ ܓܶܝܪ ܒܰܫܡܳܟ ܢܶܬܟܰܢܫܽܘܢ. ܘܗܳܝܕܶܝܢ ܟܺܝܬ ܗܳܝܕܶܝܢ ܐܰܣܒܪܶܬ[4] ܕܫܳܡܰܥ ܗ̱ܘܺܝܬ ܒܰܪ̱ܬ ܩܳܠܳܐ ܡܶܢ ܡ̈ܶܠܶܐ ܟܳܗ̈ܢܳܝܳܬܳܐ ܕܳܐܡܪܳܐ ܗ̱ܘܳܬ܆ ܕܰܐܝܟ ܕܡܶܢ ܕܽܘܟ̈ܝܳܬܳܐ ܗܳܠܶܝܢ ܓܰܘܳܝ̈ܳܬܳܐ ܥܰܡܺܝ̈ܩܳܬܳܐ ܘܟܰܣ̈ܝܳܬܳܐ ܕܒܶܝܬ ܩܽܘܕܫܳܐ ܢܳܦܩܳܐ ܗ̱ܘܳܬ܆ ܘܠܰܘ ܡܶܢܶܗ ܕܡܰܡܡܠܠܶܗ ܕܰܐ‌ܠܳܗܳܐ ܐܰܝܟ ܙܢܳܐ ܕܳܐܦ ܡܽܘܫܶܐ܆ ܥܰܗܺܝܕ ܐ̱ܢܳܐ ܓܶܝܪ ܐܳܦ ܟܺܝܬ ܐܶ݀ܬܶܥܰܗܕ ܐܶܢܳܐ ܠܺܝ܆ ܘܠܳܐ ܐܶܬܪܰܘܪܰܒ ܡܶܕܶܡ ܡܶܢ ܗܳܠܶܝܢ ܪܰܘܪ̈ܒܳܬܳܐ ܘܰܕܓܳܚ̈ܟܳܢ ܘܡܶܫ̈ܬܰܥܝܳܢ ܒܗܳܢܽܘܢ ܕܡܶܬܪܰܘܪܒܺܝܢ ܒܰܣܪܺܝܩܽܘܬܳܐ܆ ܙܶܠ ‌ܐܰܘܕܰܥ܆ ܠܳܗ̇ ܠܰܬܠܺܝܬܳܝܽܘܬܳܐ ܒܗܽܘܢ ܒܣܽܘܥܪ̈ܳܢܶܐ ܘܒܰܫ̈ܡܳܗܶܐ. ܐܶܢ ܓܶܝܪ ܚܰܕ ܗ̱ܘ̣ ܡܳܪܝܳܐ܆ ܚܕܳܐ ܗܰܝܡܳܢܽܘܬܳܐ܆ ܚܕܳܐ ܡܰܥܡܽܘܕܺܝܬܳܐ[5]܆ ܡܶܢ ܟܽܠ ܦܪܽܘܤ ܐܳܦ ܚܕܳܐ ܘܗ̱ܝ ܟܰܕ ܗܺܝ ܟܳܪܽܘܙܽܘܬܳܐ܆ ܘܠܰܘ ܐ̱ܚܪܺܬܳܐ ܘܰܐ̱ܚܪܺܬܳܐ ܬܶܗܘܶܐ. ܐܰܝܟܰܢܳܐ ܕܗܳܝ ܟܺܝܬ ܕܡܶܕܶܡ ܚܰܕܬܳܐ ܢܺܐܡܰܪ ܐ̱ܢܳܫ ܐܰܘ ܠܳܐ ܡܥܰܝܕܳܐ܆ ܘܠܳܐ ܡܶܢ ܩܛܺܝܓܪܳܢܽܘܬܳܐ ܡܚܰܪܪܳܐ܆ ܐܶܠܳܐ ܐܳܦ ܡܚܰܝܰܒܬܳܐ ܬܚܶܝܬ ܥܶܕܠܴ̈ܝܶܐ ܪܰܘܪ̈ܒܶܐ ܐܺܝܬܶܝܗ̇. ܐܰܘ ܠܳܐ ܝܳܕܰܥ ܐܰܢ̱ܬ ܕܦܰܘܠܽܘܤ܆ ܟܰܕ ܠܩܽܘܪ̈ܝܢܬܝܐ ܕܰܦܥܺܝܪ ܗ̱ܘܳܐ ܚܶܟܗܽܘܢ ܠܘܳܬ ܣܪ̈ܺܝܩܳܬܳܐ܆ ܘܡܶܢ ܫܠܺܝ̈ܚܶܐ ܕܰܓ̈ܳܠܶܐ ܡܶܬܬܰܫܓܶܝܢ ܗ̱ܘܰܘ ܠܟܳܐ ܘܰܠܟܳܐ ܦܳܢܶܐ ܗ̱ܘܳܐ ܡܬܰܪܶܨ ܘܳܐܡܰܪ ܗ̱ܘܳܐ܆ ܐܶܢ ܡܰܢ ܓܶܝܪ ܗܰܘ ܕܳܐܬܳܐ ܐ̱ܚܪܺܢܳܐ ܝܶܫܽܘܥ ܡܰܟܪܶܙ ܗܰܘ ܕܠܳܐ ܐܰܟܪܶܙܢܰܢ܆ ܐܰܘ ܪܽܘܚܳܐ ܐ̱ܚܪܺܢܳܐ ܢܳܣܒܺܝܢ ܐܢ̱ܬܽܘܢ ܗܰܘ ܕܠܳܐ ܢܣܰܒܬܽܘܢ܆ ܐܰܘ ܐܶܘܰܢܓܶܠܺܝܽܘܢ ܗܰܘ ܕܠܳܐ ܩܰܒܶܠܬܽܘܢ܆ ܛܳܒܳܐܺܝܬ ܡܶܬܪܡܶܝܢ ܗܘܰܝܬܽܘܢ[6] ܐܳܦܶܢ ܓܶܝܪ ܙܰܒ̈ܢܺܝܢ ܣܰܓܺܝ̈ܳܐܢ ܠܘܳܬ ܗܳܝ ܕܡܶܕܶܡ ܚܰܕܬܳܐ ܢܺܐܡܰܪ ܢܶܣܰܒ ܐ̱ܢܳܫ ܚܺܐܦܳܐ܆ ܠܳܐ ܗ̱ܘܳܐ ܐܳܦ ܪܽܘܚܳܐ ܐ̱ܚܪܺܢܳܐ ܢܶܒ̣ܪܶܐ ܘܢܰܠܶܦ܆ ܠܶܗ ܓܶܝܪ ܟܰܕ ܠܶܗ ܝܳܗܶܒ ܗܰܘ ܕܰܠܟܽܠܢܳܫ ܫܦܺܝܥܳܐܺܝܬ ܝܳܗܶܒ܆ ܘܳܐܦ ܠܳܐ ܬܽܘܒ ܠܥܶܠ ܡܶܢ ܐܘܰܢܓܶܠܺܝܽܘܢ ܦܳܣܰܥ.

ܘܟܰܕ ܗܳܠܶܝܢ ܫܳܡܰܥ ܐ̱ܢܳܐ܆ ܬܽܘܒ ܟܰܕ ܠܬܰܚܬ ܐܰܪܟܢܶܬ ܐܰܦܰܝ̈ ܣܰܓܺܝ ܝܰܬܺܝܪܳܐ ܐܰܘ ܡܶܢ ܩܕܺܝܡ܆ ܘܠܰܝܬ ܠܺܝ ܕܡܰܢܽܘ ܐ̱ܢܳܫ ܐܶ݀ܗܘܶܐ܆ ܘܟܰܕ ܡܦܺܝܤ ܐ̱ܢܳܐ ܘܡܶܬܟܰܫܰܦ ܐ̱ܢܳܐ ܘܡܶܬܚܰܫܰܒ ܐ̱ܢܳܐ ܐܳܡܰܪ ܗ̱ܘܺܝܬ܆ ܕܙܳܕܶܩ ܡܰܢ ܕܠܳܗ̇ ܟܰܕ ܠܳܗ̇ ܠܰܬܠܺܝܬܳܝܽܘܬܳܐ ܐܰ݀ܟܪܶܙ ܝܳܕܰܥ ܐ̱ܢܳܐ. ܘܰܕܒܰܬܚܽܘܡ̈ܶܐ ܡܣܰܝ̈ܟܶܐ ܝܰܬܺܝܪ ܡܶܢ ܩܰܛܺܝܢܽܘܬ ܡ̈ܶܠܶܐ ܕܓܶܐܘܡܰܛܪܺܝܰܐ܆ ܒܗܽܘܢ ܟܰܕ ܒܗܽܘܢ ܒܕܽܘܓ̈ܡܰܛܰܐ ܐܶܚܽܘܕ ܡܦܳܤ ܐ̱ܢܳܐ. ܗܳܝ ܕܶܝܢ ܕܡܶܢ ܐܰܝܟܳܐ ܐܶ݀ܫܰܪܶܐ ܒܳܗ̇ ܒܟܳܪܽܘܙܽܘܬܳܐ ܠܰܝܬ ܠܺܝ. ܪܚܺܝܡܳܐ ܓܶܝܪ ܠܗܳܢܽܘܢ ܕܫܳܡܥܺܝܢ܆ ܕܠܰܘ ܡܶܢ ܚܕܳܐ ܐܰܘ ܬܰܪܬܶܝܢ ܡܶܢ ܗܳܠܶܝܢ ܕܡܶܢ ܟܰܕܽܘ ܐܰܡܺܝܪ̈ܳܢ ܬܶܬܩܰܝܰܡ ܡܶܠܬܳܟ܆ ܥܰܬܺܝܪܳܐܺܝܬ ܕܶܝܢ܆ ܘܡܶܢ ܟܽܠܗܶܝܢ ܗܳܠܶܝܢ ܫܟܳܚ̈ܳܬܳܐ ܣܰܓܺܝ̈ܳܐܬܳܐ ܘܣܽܘ̈ܟܳܠܶܐ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ܆ ܐܰܝܟ ܝܰܡܳܐ ܫܦܺܝܥܳܐ ܕܛܰܝܒܽܘܬܳܐ ܕܰܠܘܳܬܳܟ. ܗܳܝ ܕܡܶܢܳܗ̇ ܠܡܰܛܳܦܽܘ ܠܺܝ ܕܡܶܬܟܰܫܰܦ ܐ̱ܢܳܐ ܛܽܘܦܬܳܐ ܚܕܳܐ ܐܶ݀ܫܘܶܐ܆ ܘܫܶܦܥܳܐ ܪܰܒܳܐ ܬܶܗܘܶܐ܆ ܘܰܠܥܶܠ ܡܶܢ ܣܦܳܪ̈ܶܐ ܕܰܪܓ̣ܶܠܬܳܐ ܕܺܝܠܝ ܝܰܒܺܝܫܬܳܐ ܬܶܬܶܐܫܶܕ ܘܬܶܫܬܰܦܰܥ.

ܘܳܐܦ ܥܰܠ ܗܳܕܶܐ ܟܺܝܬ ܬܽܘܒ܆ ܕܫܳܡܰܥ ܐ̱ܢܳܐ ܡܶܬܕܰܡܶܐ[7] ܗ̱ܘܳܐ ܠܺܝ܆ ܕܗܳܟܰܢܳܐ ܐܺܝܬܰܝܟ ܨܪܺܝܟܳܐ ܘܰܟܦܶܢ ܐܰܢ̱ܬ ܟܰܦܢܳܐ ܗܰܘ ܕܥܰܠ ܝܺܕܰܥܬܳܐ ܕܗܳܠܶܝܢ ܐܰ‌ܠܳܗܳܝ̈ܳܬܳܐ܆ ܐܳܦ ܟܰܕ ܣܺܝܡ ܩܕܳܡܰܝܟ ܦܳܬܽܘܪܳܐ ܡܫܰܪܬܚܳܐ܆ ܒܰܠܚܽܘܕ ܐܺܝܕܳܟ ܠܡܶܦܫܰܛ ܠܳܐ ܡܶܫܟܰܚ ܐܰܢ̱ܬ܆ ܘܠܰܡܩܰܪܳܒܽܘ ܠܦܽܘܡܳܟ ܡܶܐܟܽܘܠܬܳܐ܆ ܠܳܐ ܫܳܡܰܥ ܐܰܢ̱ܬ ܠܡ̈ܶܠܶܐ ܟܳܗ̈ܢܳܝܳܬܳܐ ܕܦܳܩ̈ܕܳܢ ܠܳܟ܆ ܦܬܰܚ ܥܰܝ̈ܢܰܝܟ ܘܰܣܒܰܥ ܠܰܚ̈ܡܶܐ[8]܆ ܕܰܐܝܟ ܗܳܟܰܢ ܓܶܝܪ ܐܺܝܬܰܝܗܽܘܢ ܠܰܚ̈ܡܶܐ ܕܬܽܘܪܣܳܝܳܐ ܗܰܘ ܡܶܬܗܰܘܢܳܢܳܐ. ܕܰܒܬܶܐܽܘܪܺܝܰܐ ܕܥܰܝ̈ܢܶܐ ܗܳܢܶܝܢ ܕܰܒܬܰܪܥܺܝܬܳܐ ܡܶܬܰܐܟܠܺܝܢ܆ ܐܰܝܟ ܙܢܳܐ ܕܰܒܦܽܘܡܳܐ. ܡܳܢܳܐ ܕܶܝܢ. ܫܶܐܠܬ ܘܠܳܐ ܢܣܰܒܬ܆ ܒܥܰܝܬ ܘܠܳܐ ܐܶܫܟܰܚܬ܆ ܢܩܰܫܬ ܘܠܳܐ ܦܶܬܚܶܬ[9]܆ ܡܶܢ ܗܳܠܶܝܢ ܓܶܝܪ ܐܰܘ ܘܠܳܐ ܡܶܕܶܡ ܣܥܰܪܬ܆ ܐܰܘ ܟܰܕ ܥܒܰܕܬ ܠܰܘ ܙܳܕܩܳܐܺܝܬ ܥܒܰܕܬ. ܠܡܳܢܳܐ ܗܳܟܺܝܠ ܒܪܰܡ ܐܳܦ ܨܪܺܝܟ ܐܰܢ̱ܬ. ܠܡܳܢܳܐ ܒܟܽܠܳܗ̇ ܗܳܕܶܐ ܪܘܺܝܚܽܘܬܳܐ ܙܪܺܝܒ ܐܰܢ̱ܬ. ܠܡܳܢܳܐ ܡܶܣܟܺܝܢ ܐܰܢ̱ܬ ܒܥܽܘܬܪܳܐ ܣܰܓܺܝܳܐܐ. ܠܳܐ ܠܪܽܘܚܩܳܐ ܬܶܪܕܶܐ. ܩܰܪܺܝܒܳܐ ܗ̱ܝ ܠܳܟ ܡܶܠܬܳܐ ܒܦܽܘܡܳܟ ܘܰܒܠܶܒܳܟ[10]܆ ܐܳܡܰܪ ܒܕܽܘܟ ܪܽܘܚܳܐ ܩܰܕܺܝܫܳܐ. ܡܶܢܗܶܝܢ ܕܗܳܠܶܝܢ ܕܶܐܬܶܥܰܗܕܬ ܥܳܒܶܕ ܡܰܠܦܳܢܽܘܬܳܐ ܡܫܰܡܠܰܝܬܳܐ ܗܳܝ ܕܡܶܛܽܠ ܬܠܺܝܬܳܝܽܘܬܳܐ ܫܰܘܝܰܬ ܒܽܐܘܣܺܝܰܐ. ܟܰܕ ܓܶܝܪ ܐܶܫܬܰܕܰܪ ܡܽܘܫܶܐ ܠܐܓܘܦܛܘܤ ܠܘܳܬ ܗܳܢܽܘܢ ܕܡܶܢ ܐܺܝܣܪܳܐܶܝܠ[11]܆ ܘܰܡܫܰܐܶܠ ܗ̱ܘܳܐ ܕܡܳܢܳܐ ܐܺ݀ܡܰܪ ܠܘܳܬܗܽܘܢ܆ ܐܶܬܒܰܩܳܐ ܒܚܰܝܠܳܐ ܕܰܒ̈ܢܳܬ ܩܴ̈ܠܶܐ ܐܰ‌ܠܳܗܳܝ̈ܳܬܳܐ ܗܳܠܶܝܢ ܕܶܐܬܶܐܡܰܪ̈ܝ̱ ܠܘܳܬܶܗ. ܕܽܘܩ. ܐܶܬܒܰܝܢ. ܥܰܩܶܒ. ܘܒܶܗ ܒܢܽܘܗܪܳܐ ܬܶܦܓܰܥ.

ܘܟܰܕ ܗܳܠܶܝܢ ܐܶܬܐܡܪ̈ܝ̱ ܪܶܚܡܰܬ ܐ̱ܢܳܫܳܐܺܝܬ ܐܰܟܚܕܳܐ ܘܦܰܐܝܽܘܬ ܐܰ‌ܠܳܗܳܐܝܬ܆ ܪܶܗܛܶܬ ܒܬܰܪܥܺܝܬܳܐ ܒܰܠܚܽܘܕ ܠܘܳܬ ܒ̈ܢܳܬ ܩܴ̈ܠܶܐ ܗܳܠܶܝܢ ܕܶܐܬܓ̈ܠܶܝܢ ܠܡܽܘܫܶܐ. ܘܰܩܕܳܡ ܕܰܒܗܶܝܢ ܐܶ݀ܦܓܰܥ܆ ܐܰܘ ܐܶ݀ܚܪܽܘܙ ܒܗܶܝܢ ܠܗܰܘܢܝ܆ ܩܳܕܶܡ ܦܳܓܰܥ ܒܺܝ ܢܽܘܗܪܳܐ. ܗܰܘ ܕܒܶܗ ܬܰܘ ܐܢ̱ܬܽܘܢ ܐܶܫܬܰܘܬܰܦܘ ܠܺܝ܆ ܘܰܐܟܚܕܳܐ ܥܰܡܝ ܐܶܬܢܗܰܪܘ܆ ܘܰܢܣܺܝܡ ܒܰܡܨܰܥܬܳܐ ܠܓܶܠ̈ܝܳܢܶܐ ܗܳܢܽܘܢ ܕܒܰܛܢܺܝܢ ܒܓܰܘܗܽܘܢ ܠܰܡܡܰܠܠܽܘܬ ܐܰ‌ܠܳܗܽܘܬܳܐ. ܕܺܐܝܬ ܠܗܽܘܢ ܗܳܟܰܢܳܐ.

ܐܶܡܰܪ ܕܶܝܢ ܐܰ‌ܠܳܗܳܐ ܠܘܳܬ ܡܽܘܫܶܐ. ܐܶܢܳܐ ܐܺܝܬܰܝ ܗܰܘ ܕܺܐܝܬܰܘܗ̱ܝ. ܘܶܐܡܰܪ ܗܳܟܰܢܳܐ ܬܺܐܡܰܪ ܠܰܒ̈ܢܰܝܳܐ ܕܺܐܝܣܪܳܐܶܝܠ. ܗܰܘ ܕܺܐܝܬܰܘܗ̱ܝ ܫܰܕܪܰܢܝ ܠܘܳܬܟܽܘܢ. ܐܶܡܰܪ ܕܶܝܢ ܬܽܘܒ ܐܰ‌ܠܳܗܳܐ ܠܘܳܬ ܡܽܘܫܶܐ. ܗܳܟܰܢܳܐ ܬܺܐܡܰܪ ܠܰܒ̈ܢܰܝܳܐ ܕܺܐܝܣܪܳܐܶܝܠ܆ ܡܳܪܝܳܐ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ. ܗܰܘ ܐܰ‌ܠܳܗܳܐ ܕܰܐܒܪܳܗܳܡ. ܘܗܰܘ ܐܰ‌ܠܳܗܳܐ ܕܺܐܝܣܚܳܩ܆ ܘܗܰܘ ܐܰ‌ܠܳܗܳܐ ܕܝܰܥܩܽܘܒ ܫܰܕܪܰܢܝ ܠܘܳܬܟܽܘܢ[12]. ܗܳܠܶܝܢ ܡܡܰܠܠܽܘܬ ܐܰ‌ܠܳܗܽܘܬܳܐ ܕܝܰܬܺܝܪ ܡܫܰܡܠܝܳܐ ܘܝܰܬܺܝܪ ܕܢܺܝܚܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܐܺܝܬܰܝܗܶܝܢ. ܩܰܕܺܝܡ ܓܶܝܪ ܡܛܰܟܶܤ ܡܰܠܽܘܬܳܐܻܝܬ܆ ܗܰܘ ܚܰܕ ܘܓܰܘܳܢܳܝܳܐ ܕܽܐܘܣܺܝܰܐ ܘܕܰܐ‌ܠܳܗܽܘܬܳܐ ܕܰܬܠܳܬܰܝ̈ܗܽܘܢ ܩܢܽܘ̈ܡܶܐ. ܐܶܡܰܪ ܓܶܝܪ ܗܳܟܰܢܳܐ ܬܺܐܡܰܪ. ܗܰܘ ܕܺܐܝܬܰܘܗ̱ܝ ܫܰܕܪܰܢܝ ܠܘܳܬܟܽܘܢ1: ܘܬܽܘܒ ܡܶܢ ܩܽܘܪܒܳܐ ܘܰܐܟܚܕܳܐ܆ ܗܳܟܰܢܳܐ ܬܺܐܡܰܪ. ܡܳܪܝܳܐ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ ܫܰܕܪܰܢܝ ܠܘܳܬܟܽܘܢ. ܗܽܘ ܓܶܝܪ ܐܺܝܬܰܘܗ̱ܝ܆ ܫܡܳܐ ܡܚܰܘܝܳܢܳܐ ܕܺܐܝܬܽܘܬܳܐ[13] ܘܰܕܝܳܬܳܐ ܐܺܝܬܰܘܗ̱ܝ. ܕܽܐܘܣܺܝܰܐ ܕܶܝܢ ܡܶܢ ܗܳܝ ܕܺܐܝܬܶܝܗ̇ ܡܟܰܢܝܳܐ ܠܟܽܠܢܳܫ ܝܺܕܺܝܥܳܐ. ܐܰܝܟܰܢܳܐ ܗܳܟܺܝܠ ܕܠܳܐ ܐ̱ܢܳܫ ܢܶܣܒܰܪ ܕܰܐ̱ܚܪܺܢܳܐ ܘܰܐܟܣܢܳܝܳܐ ܐܺܝܬܰܘܗ̱ܝ ܗܰܘ ܕܺܐܝܬܰܘܗ̱ܝ܆ ܠܒܰܪ ܡܶܢ ܐܰ‌ܠܳܗܳܐ ܗܰܘ ܕܰܐܒܳܗ̈ܳܬܳܐ܆ ܐܰ‌ܠܘܶܬ ܐܶܢܶܝܢ ܐܰܟܚܕܳܐ܆ ܟܰܕ ܠܳܐ ܡܶܕܶܡ ܣܳܟ ܦܣܰܩ ܐܰܘ ܣܳܡ ܒܰܡܨܰܥܬܳܐ. ܐܶܠܳܐ ܟܰܕ ܦܩܰܕ ܠܡܺܐܡܰܪ܆ ܗܰܘ ܕܺܐܝܬܰܘܗ̱ܝ ܫܰܕܪܰܢܝ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ.

ܡܳܢܳܐ ܗܳܟܺܝܠ ܥܕܰܡܳܐ ܠܗܳܕܶܐ ܢܩܽܘܡ܆ ܘܰܒܚܰܕ ܩܢܽܘܡܳܐ ܘܦܰܪܨܽܘܦܳܐ܆ ܠܗܰܘ ܕܺܐܝܬܰܘܗ̱ܝ܆ ܠܰܐܠܳܗܳܐ ܗܰܘ ܕܰܐܒܳܗ̈ܳܬܳܐ ܢܶܣܒܰܪ܆ ܢܶܬܶܐܡܰܪ ܓܶܝܪ ܐܳܦ ܦܰܪܨܽܘܦܳܐ ܠܘܳܬ ܢܽܘܗܳܪܳܐ ܕܗܳܝ ܕܣܺܝܡܳܐ ܒܰܡܨܰܥܬܳܐ. ܟܰܕ ܠܳܐ ܡܶܬܪܢܶܝܢ ܚ̱ܢܰܢ ܥܰܠ ܗܰܘ ܕܠܳܐ ܓܫܽܘܡ܆ ܘܠܳܐ ܐܶܣܟܺܡܳܐ ܘܠܳܐ ܡܣܰܝܟܽܘܬܳܐ܆ ܗܳܠܶܝܢ ܟܺܝܬ ܕܥܰܠ ܓܽܘܫ̈ܡܶܐ܆ ܥܰܡ ܫܽܘܘܕܳܥܳܐ ܗܰܘ ܕܦܰܪܨܽܘܦܳܐ ܐܰܟܚܕܳܐ ܡܙܰܘ̈ܓܳܢ. ܐܶܠܳܐ ܐܶ‌ܠܽܘ ܟܺܝܬ ܗܳܕܶܐ ܗܳܟܰܢܳܐ ܨܳܒܶܐ ܗ̱ܘܳܐ ܕܬܶܣܬܒܰܪ܆ ܘܰܐܝܟ ܥܰܡܽܘܛܽܘܬܳܐ ܘܰܙܥܽܘܪܽܘܬ ܡܶܠܬܳܐ ܗܳܝ ܝܺܗܽܘܕܳܝܬܳܐ܆ ܒܚܰܕ ܩܢܽܘܡܳܐ ܬܶܣܬܰܝܰܟ ܗ̱ܘܳܬ ܐܰ‌ܠܳܗܽܘܬܳܐ܆ ܟܰܕ ܫܪܳܪܳܐ ܠܰܘ ܐ̱ܚܪܳܢܝܳܐܺܝܬ ܐܺܝܬ ܗ̱ܘܳܐ ܠܶܗ܆ ܠܰܘ ܡܶܢ ܒܳܬܰܪ ܕܶܐܡܰܪ܆ ܗܰܘ ܕܺܐܝܬܰܘܗ̱ܝ܆ ܘܰܐ‌ܠܳܗܳܐ ܕܰܐܒܳܗܰܝ̈ܟܽܘܢ܆ ܥܰܠ ܬܰܘܣܶܦܬܳܐ ܐ̱ܚܪܺܬܳܐ ܣܢܺܝܩ ܗ̱ܘܳܐ. ܐܶܢ ܕܶܝܢ ܐܳܦ ܠܰܐܒܳܗ̈ܳܬܳܐ ܡܫܰܡܗܳܐܺܝܬ ܠܡܰܬܕܟܳܪܽܘ ܣܺܝܡܳܐܗ̱ܘܳܬ ܠܶܗ܆ ܡܶܛܽܠ ܕܰܠܘܳܬ ܪܶܚܡܬܳܐ ܕܰܐ‌ܠܳܗܳܐ ܘܰܡܝܰܬܪܽܘܬܳܐ ܕܰܐܒܳܗܰܝ̈ܗܽܘܢ ܗܳܢܽܘܢ ܩܰܕܡܳܝ̈ܶܐ܆ ܢܳܓܶܕ ܗ̱ܘܳܐ ܠܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܕܢܶܫܡܥܽܘܢ܆ ܙܳܕܶܩ ܗ̱ܘܳܐ ܠܶܗ ܕܢܰܝܬܶܐ ܒܳܬܰܪܟܶܢ܆ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ ܐܰܒܪܳܗܳܡ ܘܺܐܝܣܚܳܩ ܘܝܰܥܩܽܘܒ.

ܗܳܫܳܐ ܕܶܝܢ ܟܰܕ ܠܰܡܦܰܪܫܽܘܬܳܐ ܘܰܠܠܳܐ ܒܠܺܝܠܽܘܬܳܐ ܝܰܬܺܝܪ ܢܰܗܺܝܪܳܐܺܝܬ ܡܰܘܕܰܥ܆ ܐܰܟܚܕܳܐ ܕܶܝܢ ܘܰܠܫܰܘܝܽܘܬ ܐܺܝܩܳܪܳܐ ܘܰܠܠܳܐ ܡܫܰܚܠܦܽܘܬܳܐ ܕܰܒܟܽܠ ܡܽܘܢ ܕܗܽܘ ܕܰܬܠܳܬܳܐ ܩܢܽܘܡ̈ܶܐ܆ ܒܛܺܝܠܳܐܺܝܬ ܡܰܝܬܶܐ ܒܳܬܰܪܟܶܢ܆ ܘܥܰܡ ܟܽܠܳܗ̇ ܡܫܰܘܕܥܳܢܽܘܬܳܐ ܘܰܡܚܰܘܝܳܢܽܘܬܳܐ ܣܰܓܺܝܐܬܳܐ܆ ܗܰܘ ܐܰ‌ܠܳܗܶܗ ܕܰܐܒܪܳܗܳܡ. ܘܗܰܘ ܐܰ‌ܠܳܗܶܗ ܕܺܐܝܣܚܳܩ܆ ܘܗܰܘ ܐܰ‌ܠܳܗܶܗ ܕܝܥܩܘܒ[14].

ܐܶܢ ܓܶܝܪ ܠܰܘ ܗܳܟܰܢܳܐ ܗܳܕܶܐ ܐܺܝܬܶܝܗ̇ ܗ̱ܘܳܬ܆ ܘܳܐܦ ܥܕܰܡܳܐ ܠܰܬܠܺܝܬܳܝܽܘܬܳܐ ܒܰܠܚܽܘܕ ܩܳܝ̈ܡܳܢ ܗ̱ܘܰܝ̈ ܗܳܠܶܝܢ ܕܰܡܡܰܠܠܽܘܬ ܐܰ‌ܠܳܗܽܘܬܳܐ܆ ܙܳܕܶܩ ܗ̱ܘܳܐ ܠܡܰܘܣܳܦܽܘ܆ ܘܗܰܘ ܐܰ‌ܠܳܗܶܗ ܕܝܰܘܣܶܦ. ܐܺܝܬܰܘܗ̱ܝ ܗ̱ܘܳܐ ܓܶܝܪ ܐܳܦ ܗܽܘ ܕܰܪܚܺܝܡ ܠܶܗ ܡܶܢܗܽܘܢ ܕܥܰܙܪܽܘܪ̈ܶܐ܆ ܘܕܰܥܒܰܪ ܠܰܐܒܳܗܰܘܗ̱ܝ ܩܰܕܡܳܝ̈ܶܐ ܒܰܡܝܰܬܪ̈ܘܳܬܳܐ. ܘܕܰܒܢܰܟܦܽܘܬܳܐ ܡܰܢ ܕܰܠܘܳܬ ܓܰܘܙܰܠܬܳܐ ܕܙܳܢܝܽܘܬܳܐ ܐܶܣܬܕܰܪ ܒܰܩܪܳܒܳܐ܆ ܐܰܝܟܰܢܳܐ ܕܢܶܨܒܶܐ ܕܡܰܘ̈ܬܶܐ ܣܰܓܺܝ̈ܶܐܐ ܢܶܣܒܽܘܠ܆ ܗܳܢܽܘܢ ܕܳܐܦ ܣܦܰܩ ܠܗܽܘܢ܆ ܐܰܘ ܕܰܚܕܳܐ ܙܒܰܢ ܢܶܦܠܰܚ ܥܰܒܕܽܘܬܳܐ ܠܰܪ̈ܓܺܝܓܳܬܳܐ܆ ܕܡܶܬܬܰܥܒܰܕ ܗ̱ܘܳܐ ܕܶܝܢ ܡܶܢ ܐܰ‌ܠܳܗܳܐ܆ ܘܺܐܝܬܰܘܗ̱ܝ ܗ̱ܘܳܐ ܡܰܠܝܳܐ ܕܚܶܟܡܬܳܐ ܗܳܝ ܕܰܠܥܶܠ܆ ܘܰܠܟܰܣ̈ܝܳܬܳܐ ܝܳܕܰܥ ܗ̱ܘܳܐ܆ ܘܰܠܗܳܠܶܝܢ ܕܰܥܬܺܝ̈ܕܳܢ ܗ̱ܘܰܝ̈ ܩܳܕܶܡ ܗ̱ܘܳܐ ܡܫܰܘܕܰܥ܆ ܘܰܐܝܟ ܗܰܘ ܕܰܒܗܽܘܢ ܒܣܽܘܥܪ̈ܳܢܶܐ ܚܳܐܰܪ ܗ̱ܘܳܐ. ܘܰܠܪܺܝܫܳܢܽܘܬܳܐ ܡܰܢ ܕܡܶܨܪܶܝܢ ܩܰܒܶܠ ܗ̱ܘܳܐ ܐܰܓܪܳܐ ܕܣܰܟܽܘܠܬܳܢܽܘܬܶܗ܆ ܬܰܪܣܺܝ ܕܶܝܢ ܥܰܬܺܝܪܳܐܺܝܬ ܠܥܰܡܳܐ ܒܰܪ ܫܰܪܒܬܶܗ܆ ܠܐܝܣܪܳܐܶܝܠ ܕܰܠܒܰܪ ܡܶܢ ܬܚܽܘܡ̈ܶܐ ܕܰܐܬܪܶܗ ܐܶܬܓܰܠܘܺܝ ܠܬܰܡܳܢ ܥܳܪܽܘܩܳܐ ܕܡܶܢ ܟܰܦܢܳܐ܆ ܘܒܰܕܡܽܘܬ ܡܕܝܢܝܐ ܠܗܰܘ ܐܰܟܣܢܳܝܳܐ܆ ܘܬܽܘܒ ܩܰܕܶܡ ܐܶܡܰܪ ܠܶܗ܆ ܦܽܘܢܳܝܳܐ ܕܰܠܘܳܬ ܐܰܪܥܳܐ ܗܳܝ ܐܰܒܳܗܳܝܬܳܐ. ܠܡܳܢܳܐ ܗܳܟܺܝܠ ܡܶܢ ܗܳܢܳܐ ܕܗܳܟܰܢܳܐ ܐܺܝܬܰܘܗ̱ܝ ܡܫܰܡܗܳܐ ܘܺܝܕܺܝܥܳܐ ܫܬܶܩ. ܐܺܝܬܰܘܗ̱ܝ ܗ̱ܘܳܐ ܓܶܝܪ ܐܰ‌ܠܳܗܳܐ܆ ܐܰܝܟܰܢܳܐ ܕܕܰܐܒܪܳܗܳܡ ܘܕܺܐܝܣܚܳܩ ܘܰܕܝܰܥܩܽܘܒ܆ ܐܳܦ ܕܺܝܠܶܗ ܐܰ‌ܠܳܗܳܐ܆ ܡܶܛܽܠ ܒܰܝܬܳܝܽܘܬܳܐ ܗܳܝ ܕܡܶܢ ܪܶܚܡܰܬ ܐܰ‌ܠܳܗܳܐ ܘܰܕܡܶܢ ܡܝܰܬܪܽܘܬܳܐ ܗܳܝ ܕܫܰܪܟܳܐ. ܟܒܰܪ ܕܶܝܢ ܗܺܝ ܟܰܕ ܗܺܝ ܐܺܝܬܶܝܗ̇ ܠܡܺܐܡܰܪ ܪܶܚܡܰܬ ܐܰ‌ܠܳܗܳܐ܆ ܘܰܡܝܰܬܪܽܘܬܳܐ ܓܶܢܣܳܢܳܐܺܝܬ. ܡܶܛܽܠ ܗܳܕܶܐ ܟܺܝܬ ܐܳܦ ܢܒܺܝܳܐ ܗܰܘ ܕܰܡܙܰܡܰܪ ܠܘܳܬ ܐܰ‌ܠܳܗܳܐ ܐܳܡܰܪ ܗ̱ܘܳܐ܆ ܗܰܘ ܕܪܳܥܶܐ ܠܺܐܝܣܪܳܐܶܝܠ ܚܽܘܪ. ܗܰܘ ܕܰܡܕܰܒܰܪ ܐܰܝܟ ܕܰܠܥܶܪܒܳܐ ܠܝܰܘܣܶܦ[15]. ܗܳܟܰܢܳܐ ܐܺܝܬܰܘܗ̱ܝ ܗ̱ܘܳܐ ܐܰ‌ܠܳܗܳܐ܆ ܐܳܦ ܐܰ‌ܠܳܗܳܐ ܕܝܰܘܣܶܦ. ܐܰܝܟܰܢܳܐ ܟܺܝܬ ܕܡܳܕܶܝܢ ܗܳܝ ܕܶܐܡܰܪ܆ ܕܗܰܘ ܐܰ‌ܠܳܗܶܗ ܕܰܐܒܪܳܗܳܡ ܘܗܰܘ ܐܰ‌ܠܳܗܶܗ ܕܺܐܝܣܚܩ ܘܗܰܘ ܐܰ‌ܠܳܗܶܗ ܕܝܰܥܩܘܒ[16]܆ ܘܰܥܕܰܡܳܐ ܠܰܬܠܳܬܳܐ ܐܰܩܺܝܡܶܗ ܠܡܶܢܝܳܢܳܐ܆ ܡܡܰܠܠܽܘܬ ܐܰ‌ܠܳܗܽܘܬܳܐ ܡܶܕܶܡ ܐܺܝܬܶܝܗ̇ ܗ̱ܘܳܬ ܘܰܕܣܰܓܺܝ ܝܰܬܺܝܪ ܚܰܬܺܝܬ̣ܬܳܐ܆ ܘܠܰܘ ܡܰܥܗܕܳܢܽܘܬܳܐ ܦܫܺܝܛܬܳܐ ܕܰܐܒܳܗ̈ܶܐ ܩܰܕܡܳܝ̈ܶܐ.

ܘܳܐܦ ܗܺܝ ܕܶܝܢ ܬܰܘܣܶܦܬܳܐ ܗܳܝ ܕܰܐܪܬܷܪ̈ܶܐ[17] ܗܳܠܶܝܢ ܕܡܶܬܬܣܺܝܡܺܝܢ ܩܕܳܡ ܫܡܳܗ̈ܶܐ܆ ܡܚܰܘܝܳܢܽܘܬܳܐ ܣܰܓܺܝܐܬܳܐ ܘܰܕܣܰܓܺܝ ܪܰܒܳܐ ܕܗܳܠܶܝܢ ܡܰܥܠܳܐ ܠܰܢ. ܠܳܐ ܓܶܝܪ ܐܶܡܰܪ ܐܰ‌ܠܳܗܳܐ ܕܰܐܒܪܳܗܳܡ ܘܰܐ‌ܠܳܗܳܐ ܕܺܐܝܣܚܳܩ ܘܰܐ‌ܠܳܗܳܐ ܕܝܥܩܘܒ܆ ܐܶܠܳܐ ܥܰܠ ܟܽܠ ܚܰܕ ܡܶܢܗܽܘܢ ܢܛܺܝܪܳܐܺܝܬ܆ ܗܰܘ ܐܰ‌ܠܳܗܳܐ ܕܰܐܒܪܳܗܳܡ܆ ܘܗܰܘ ܐܰ‌ܠܳܗܳܐ ܕܺܐܝܣܚܩ܆ ܘܗܰܘ ܐܰ‌ܠܳܗܳܐ ܕܝܥܩܘܒ܆ ܐܰܝܟܰܢܳܐ ܕܢܰܘܕܰܥ ܝܽܘܩܢܳܐ ܡܬܰܚܡܳܐ ܘܰܡܦܰܪܫܳܐ ܘܕܺܝܠܳܢܳܝܳܐ ܕܟܽܠ ܚܰܕ ܡܶܢ ܩܢܽܘ̈ܡܶܐ܆ ܘܕܺܐܝܬ ܠܶܗ ܡܰܢ ܠܳܐ ܚܠܺܝܛܳܐܺܝܬ ܒܶܗ ܒܗܰܘ ܕܺܝܠܳܢܳܝܳܐ܆ ܐܰܝܟܰܢܳܐ ܕܠܳܐ ܬܠܳܬܰܝ̈ܗܽܘܢ ܠܚܰܕ ܢܶܬܒܰܠܒܠܽܘܢ ܘܢܶܬܒܰܠܥܽܘܢ܆ ܠܳܐ ܕܶܝܢ ܡܦܰܠܶܓ ܠܗܺܝܟܰܕܗܺܝܽܘܬܳܐ ܕܽܐܘܣܺܝܰܐ.

ܐܳܦ ܓܶܝܪ ܐܳܦܶܢ ܝܺܕܺܝܥܬܳܐ ܘܕܺܝܠܳܢܳܝܬܳܐ ܘܠܳܐ ܚܠܺܝܛܬܳܐ ܐܺܝܬܶܝܗ̇ ܠܶܗ ܠܰܐܒܳܐ ܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰܒܳܐ܆ ܘܗ̱ܝ ܕܠܰܘ ܡܶܢ ܡܶܕܶܡ ܐ̱ܚܪܺܢܳܐ ܝܺܠܺܝܕ܆ ܘܠܰܒܪܳܐ ܗܽܘ ܗܳܟܘܳܬ ܗܳܝ ܕܢܶܗܘܶܐ ܐܺܝܬܰܘܗ̱ܝ ܒܪܳܐ܆ ܘܗ̱ܝ ܕܺܝܠܺܝܕܳܐܺܝܬ ܡܰܢ ܒܫܰܘܝܽܘܬ ܡܬܽܘܡܳܝܽܘܬܳܐ ܕܶܝܢ܆ ܐܰܝܟ ܨܶܡܚܳܐ ܐܳܦ ܨܡܰܚ ܐܳܦ ܐܶܬܺܝܠܶܕ ܡܶܢ ܐܰܒܳܐ܆ ܠܳܐ ܡܶܬܡܰܠܠܳܢܳܐܺܝܬ ܘܰܠܥܶܠ ܡܶܢ ܗܰܘܢܳܐ܆ ܘܒܳܗ̇ ܒܰܕܡܽܘܬܳܐ ܐܳܦ ܠܪܽܘܚܳܐ ܩܰܕܺܝܫܳܐ ܗܺܝ ܗܳܝ ܕܪܽܘܚܳܐ ܩܰܕܺܝܫܳܐ ܢܶܗܘܶܐ ܐܺܝܬܰܘܗ̱ܝ܆ ܘܗ̱ܝ ܕܰܕܠܳܐ ܙܰܒܢܳܐ ܘܰܕܠܳܐ ܦ݀ܣܩܳܐ ܠܰܘ ܝܺܠܺܝܕ ܐܶܠܳܐ ܢܰܦܺܝܩ ܡܶܢ ܐܰ‌ܠܳܗܳܐ ܘܰܐܒܳܐ܆ ܘܗ̱ܝ ܕܺܝܠܳܢܳܝܬܳܐ ܒܟܽܠܚܰܕ ܡܶܢܗܽܘܢ ܕܺܝܠܶܗ ܩܒܺܝܥܳܐܺܝܬ ܐܺܝܬܶܝܗ̇܆ ܘܠܳܐ ܡܫܰܢܝܳܐ ܥܳܒܪܳܐ ܠܘܳܬ ܐ̱ܚܪܺܢܳܐ܆ ܗܳܕܐ ܗܝ ܓܶܝܪ ܡܳܪܳܢܳܐܺܝܬ ܕܺܝܠܳܝܬܳܐ܆ ܐܶܠܳܐ ܟܺܝܬ܆ ܚܕܳܐ ܗܝ ܐܰ‌ܠܳܗܽܘܬܳܐ ܒܰܬܠܳܬܰܝ̈ܗܽܘܢ ܘܗܺܝܟܰܕܗܺܝܽܘܬܳܐ ܕܽܐܘܣܺܝܰܐ܆ ܕܡܶܢ ܟܽܠ ܫܽܘܚܠܳܦܳܐ ܪܰܚܺܝܩܳܐ.

ܐܰܝܟܰܢܳܐ ܓܶܝܪ ܡܶܫܟܚܳܐ܆ ܕܰܠܗܰܘ ܕܡܶܢ ܐܰܒܳܐ ܐܶܬܺܝܠܶܕ ܐܰܘ ܢܦܰܩ܆ ܢܶܪܢܶܐ ܕܠܰܘ ܕܺܝܠܳܢܳܝܳܐ ܕܺܝܠܳܗ̇ ܕܽܐܘܣܺܝܰܐ ܕܺܝܠܶܗ ܐܺܝܬܰܘܗ̱ܝ܆ ܐܶܠܳܐ ܕܰܐܟܣܢܳܝ ܘܡܶܢ ܠܒܰܪ ܘܢܽܘܟܪܳܝܳܐ. ܐܶܢ ܡܰܢ ܓܶܝܪ ܠܳܐ ܡܫܰܘܬܦܺܝܢ ܠܶܗ ܒܽܐܘܣܺܝܰܐ܆ ܘܠܳܐ ܕܶܐܬܺܝܠܶܕ ܘܠܳܐ ܕܰܢܦܰܩ ܢܶܬܶܐܡܰܪ. ܟܰܕ ܕܶܝܢ ܝܺܠܺܝܕܽܘܬܳܐ ܡܶܫܬܰܡܗܳܐ ܘܰܒܪܳܐ ܕܺܝܠܺܝܕ܆ ܘܢܳܦܽܘܩܽܘܬܳܐ ܡܶܬܟܰܪܙܳܐ ܡܶܢܶܗ ܕܰܐ‌ܠܳܗܳܐ܆ ܘܰܕܢܰܦܺܝܩ ܪܽܘܚܳܐ ܩܰܕܺܝܫܳܐ ܡܶܬܟܰܢܶܐ܆ ܐܰܝܟܰܢܳܐ ܡܶܫܟܰܚ ܐ̱ܢܳܐ ܕܠܰܫ̈ܡܳܗܶܐ ܕܡܰܙܥܩܺܝܢ ܓܰܘܳܢܳܝܽܘܬܳܐ ܕܰܟܝܳܢܳܐ ܐܰܘܟܺܝܬ ܕܽܐܘܣܺܝܰܐ ܐܰ݀ܣܠܶܐ܆ ܘܕܰܐ̱ܚܪܺܢܳܐ ܐܺ݀ܡܰܪ ܒܽܐܘܣܺܝܰܐ ܠܗܰܘ ܕܺܝܠܶܕ܆ ܘܡܶܢ ܟܝܳܢܳܐ ܐ̱ܚܪܺܢܳܐ ܡܶܕܶܡ ܐܶ݀ܬܰܚܶܡ ܠܰܒܪܳܐ ܗܰܘ ܕܶܐܬܺܝܠܶܕ܆ ܐܰܘ ܠܪܽܘܚܳܐ ܩܰܕܺܝܫܳܐ ܐܶ݀ܦܪܽܘܫ ܡܶܢ ܗܰܘ ܕܡܶܢܶܗ ܦܰܐܝܽܘܬ ܐܰ‌ܠܳܗܳܐܺܝܬ ܢܳܦܶܩ܆ ܐܰܝܟܰܢܳܐ ܕܳܐܦܠܳܐ ܐ̱ܢܳܫ ܠܢܰܗܪܳܐ ܗܰܘ ܕܡܶܢ ܡܥܺܝܢܳܐ ܢܳܦܶܩ܆ ܕܰܐ̱ܚܪܺܢܳܐ ܟܝܳܢܳܐ ܠܒܰܪ ܡܶܢ ܗܰܘ ܕܰܡܥܺܝܢܳܐ ܐܳܡܰܪ ܕܺܐܝܬܰܘܗ̱ܝ.

ܡܳܢܳܐ ܓܶܝܪ ܐܶܡܰܪ ܗܰܘ ܕܰܠܡܽܘܫܶܐ ܡܡܰܠܶܠ ܗ̱ܘܳܐ. ܐܶܢܳܐ ܐܺܝܬܰܝ ܗܰܘ ܕܺܐܝܬܰܘܗ̱ܝ. ܘܰܕܗܰܘ ܕܺܐܝܬܰܘܗ̱ܝ ܫܰܕܪܰܢܝ ܦܩܰܕ ܗ̱ܘܳܐ ܠܡܺܐܡܰܪ܆ ܘܡܳܪܝܳܐ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ. ܗܳܟܰܢܳܐ ܟܰܕ ܒܝܰܕ ܗܳܠܶܝܢ ܫܡܳܗ̈ܶܐ ܠܰܠܚܽܘܕܳܝܽܘܬܳܐ ܩܰܕܶܡ ܣܳܡ܆ ܗܰܘ ܕܺܐܝܬܰܘܗ̱ܝ܆ ܡܳܪܝܳܐ܆ ܐܰ‌ܠܳܗܳܐ܆ ܡܶܚܕܳܐ ܒܰܪܫܳܥܬܶܗ ܒܥܶܩܒܗܶܝܢ ܕܗܳܠܶܝܢ܆ ܠܫܽܘܘܕܳܥܳܐ ܬܠܺܝܬܳܝܳܐ ܕܰܩܢܽܘ̈ܡܶܐ ܡܰܥܶܠ. ܗܰܘ ܐܰ‌ܠܳܗܶܗ ܕܰܐܒܪܳܗܳܡ. ܘܗܰܘ ܐܰ‌ܠܳܗܶܗ ܕܺܐܝܣܚܩ܆ ܘܗܰܘ ܐܰ‌ܠܳܗܶܗ ܕܝܥܩܘܒ[18]. ܐܰܝܟܰܢܳܐ ܟܺܝܬ ܕܗܳܝ ܕܺܐܝܬܰܘܗ̱ܝ ܘܗ̱ܝ ܕܡܳܪܝܳܐ ܘܗ̱ܝ ܕܰܐ‌ܠܳܗܳܐ܆ ܥܰܠ ܟܽܠ ܚܰܕ ܡܶܢ ܩܢܽܘ̈ܡܶܐ ܫܰܘܝܳܐܺܝܬ ܘܰܒܫܰܘܝܽܘܬ ܐܺܝܩܳܪܳܐ ܡܶܬܡܰܬܚܳܐ. ܐܺܝܬܰܘܗ̱ܝ ܓܶܝܪ ܐܳܦ ܐܰܒܳܐ. ܐܺܝܬܰܘܗ̱ܝ ܐܳܦ ܒܪܳܐ. ܐܺܝܬܰܘܗ̱ܝ ܐܳܦ ܦܰܪܰܩܠܺܝܛܳܐ܆ ܗܳܢܰܘ ܕܝܢ ܪܽܘܚܳܐ ܩܰܕܺܝܫܳܐ. ܠܳܐ ܓܶܝܪ ܐ̱ܢܳܫ ܠܳܐ ܝܰܠܺܝܦܳܐܺܝܬ ܢܙܰܥܪܺܝܘܗ̱ܝ ܠܗܳܢܳܐ܆ ܒܰܙܢܳܐ ܗܰܘ ܕܰܩܪܳܝܬܳܐ ܕܺܐܝܬܰܘܗ̱ܝ ܘܕܐܛܐܪܘܤ܆ ܗܳܢܰܘ ܕܶܝܢ ܠܳܐ ܕܶܟܪܳܐܺܝܬ ܘܠܳܐ ܢܶܩܒܳܐܺܝܬ܆ ܐܶܠܳܐ ܒܓܶܢܣܳܐ ܐ̱ܚܪܺܢܳܐ ܠܒܰܪ ܡܶܢ ܗܳܠܶܝܢ܆ ܡܶܛܽܠ ܕܳܐܦ ܐܰ‌ܠܳܗܳܐ ܘܰܐܒܳܐ܆ ܐܶܬܟܰܢܺܝ ܪܽܘܚܳܐ. ܪܽܘܚܰܐ ܗ̱ܘ ܓܶܝܪ ܐܰ‌ܠܳܗܳܐ ܐܳܡܰܪ. ܘܗܳܢܽܘܢ ܕܣܳܓܕܺܝܢ ܠܶܗ܆ ܒܪܽܘܚܳܐ ܘܒܰܫܪܳܪܳܐ ܙܳܕܶܩ ܕܢܶܣܓܕܽܘܢ[19].

ܒܶܗ ܟܰܕ ܒܶܗ ܒܰܙܢܳܐ܆ ܘܗ̱ܝ ܕܡܳܪܝܳܐ ܘܗ̱ܝ ܕܰܐ‌ܠܳܗܳܐ܆ ܥܰܠ ܬܠܳܬܰܝ̈ܗܽܘܢ ܩܢܽܘܡ̈ܶܐ ܥܳܒܪܳܐ. ܘܰܐܝܟ ܙܢܳܐ ܕܡܳܪܝܰܐ ܗ̱ܘ ܐܰܒܳܐ܆ ܗܳܟܰܢܳܐ ܡܳܪܝܰܐ ܗ̱ܘ ܐܳܦ ܒܪܳܐ܆ ܐܳܦ ܪܽܘܚܳܐ ܩܰܕܺܝܫܳܐ. ܘܰܐ‌ܠܳܗܳܐ ܬܽܘܒ܆ ܠܰܘ ܐ̱ܚܪܳܢܝܳܐܺܝܬ ܡܰܢ ܐܰܒܳܐ܆ ܐ̱ܚܪܳܢܝܳܐܺܝܬ ܕܶܝܢ ܒܪܳܐ܆ ܐ̱ܚܪܳܢܝܳܐܺܝܬ ܕܶܝܢ ܪܽܘܚܳܐ ܢܶܣܬܒܰܪ. ܟܰܕ ܕܶܝܢ ܚܕܳܐ ܐܺܝܬܶܝܗ̇ ܐܽܘܣܺܝܰܐ ܒܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܡܳܪܽܘܬܳܐ ܟܺܝܬ ܘܰܐ‌ܠܳܗܽܘܬܳܐ܆ ܒܗܳܝ ܕܰܩܕܳܡ ܬܠܳܬܰܝ̈ܗܽܘܢ ܩܢܽܘ̈ܡܶܐ܆ ܒܫܰܘܝܽܘܬ ܐܺܝܩܳܪܳܐ ܩܰܕܡܰܬ ܐܶܬܛܰܟܣܰܬ܆ ܗܳܝ ܕܗܰܘ ܕܺܐܝܬܰܘܗ̱ܝ ܘܗ̱ܝ ܕܰܐ‌ܠܳܗܳܐ ܘܗ̱ܝ ܕܡܳܪܝܳܐ܆ ܐܰܝܟܰܢܳܐ ܐܪܺܝܽܘܤ ܗܽܘ ܕܠܽܘܩܒܰܠ ܫܪܳܪܳܐ ܦܩܰܪ ܣܪܺܝܩܳܐܺܝܬ܆ ܐܰܡܪܰܚ ܠܡܺܐܡܰܪ ܗܳܝ ܕܺܐܝܬ ܗ̱ܘܳܐ ܙܰܒܢܳܐ ܐܶܡܰܬܝ ܕܠܳܐ ܐܺܝܬܰܘܗ̱ܝ ܗ̱ܘܳܐ ܒܪܳܐ ܐܰܘ ܪܽܘܚܳܐ ܩܰܕܺܝܫܳܐ܆ ܘܰܕܡܶܢ ܗܳܠܶܝܢ ܕܠܳܐ ܐܺܝܬܰܝܗܶܝܢ ܗܘ̣ܰܘ. ܐܳܦ ܓܶܝܪ ܗܰܘ ܕܺܐܝܬܰܘܗ̱ܝ܆ ܕܺܐܝܬܰܘܗ̱ܝ ܡܳܪܳܢܳܐܺܝܬ. ܐܺܝܬܰܘܗ̱ܝ ܒܟܽܠܙܒܰܢ. ܟܰܕ ܠܳܐ ܫܽܘܪܳܝܳܐ ܘܳܐܦܠܳܐ ܫܽܘܠܳܡܳܐ ܡܬܰܚܶܡ ܠܳܗ̇ ܠܶܗ ܠܗܳܝ ܕܢܶܗܘܶܐ ܐܺܝܬܰܘܗ̱ܝ. ܐܶܢ ܕܶܝܢ ܠܳܐ ܐܺܝܬܰܘܗ̱ܝ ܗ̱ܘܳܐ ܒܰܙܒܰܢ܆ ܐܳܦܶܢ ܐܰܝܟ ܕܰܒܢܽܘܩܰܙܬܳܐ ܡܶܕܶܡ ܡܶܢ ܡܢܳܬܳܐ ܙܥܽܘܪܬܳܐ ܕܥܳܠܡܳܐ^[20]܆ ܐܰܘ ܐܰܝܟ ܕܰܠܡܺܐܡܰܪ ܕܛܰܘܪܳܐ ܙܰܒܢܳܝܳܐ܆ ܗܽܘ ܗܰܘ ܫܡܳܐ ܕܗܳܝ ܕܺܐܝܬܰܘܗ̱ܝ܆ ܦܰܕ ܠܶܗ ܘܕܰܓܶܠ. ܐܳܦ ܓܶܝܪ ܗܰܘ ܕܕܰܐܝܟ ܗܳܢܳܐ܆ ܠܰܘ ܕܺܐܝܬܰܘܗ̱ܝ ܐܺܝܬܰܘܗ̱ܝ܆ ܐܶܠܳܐ ܕܰܠܗܳܝ ܕܢܶܗܘܶܐ ܐܺܝܬܰܘܗ̱ܝ ܐܶܬܬܰܝܬܺܝ ܘܰܥܒܰܪ ܐܺܝܬܰܘܗ̱ܝ܆ ܐܳܦܶܢ ܒܰܪܦܳܦܳܐ ܡܶܕܶܡ ܙܥܽܘܪܳܐ ܕܙܰܒܢܳܐ ܗܰܘ ܕܠܳܐ ܡܶܬܦܣܶܩ ܡܶܛܽܠ ܙܥܽܘܪܽܘܬܶܗ ܢܣܺܝܡ ܐ̱ܢܳܫ ܕܶܐܬܩܰܕܰܡ. ܐܳܦ ܓܶܝܪ ܗܰܘ ܕܺܐܝܬܰܘܗ̱ܝ ܕܠܳܐ ܣܳܟܳܐ ܡܶܕܶܡ ܐܺܝܬܰܘܗ̱ܝ ܘܠܳܐ ܡܶܬܬܰܚܡܳܢܳܐ. ܘܚܳܒܶܫ ܠܟܽܠ܆ ܘܗܽܘ ܘܠܳܐ ܡܶܢ ܡܶܕܶܡ ܡܶܬܚܒܶܫ.

ܡܳܕܶܝܢ ܗܰܘ ܕܶܐܡܰܪ ܓܶܢܣܳܢܳܐܺܝܬ܆ ܐܶܢܳܐ ܐܺܝܬܰܝ ܗܰܘ ܕܺܐܝܬܰܘܗ̱ܝ܆ ܘܗܳܟܰܢܳܐ ܒܪ̈ܽܘܫܡܶܐ ܡܬܰܚ̈ܡܳܢܶܐ ܠܠܳܐ ܒܠܺܝܠܽܘܬܳܐ ܕܰܬܠܳܬܰܝ̈ܗܽܘܢ ܩܢܽܘܡ̈ܶܐ ܪܫܰܡ ܘܫܰܘܕܰܥ܆ ܘܣܳܡ ܡܶܢ ܠܬܰܚܬ ܗܰܘ ܐܰ‌ܠܳܗܶܗ ܕܰܐܒܪܳܗܳܡ ܘܗܰܘ ܐܰ‌ܠܳܗܶܗ ܕܺܐܝܣܚܩ ܘܗܰܘ ܐܰ‌ܠܳܗܶܗ ܕܝܥܩܘܒ^[21]܆ ܠܗܳܝ ܕܺܐܝܬ ܗ̱ܘܳܐ ܙܰܒܢܳܐ ܐܶܡܰܬܝ ܕܠܳܐ ܐܺܝܬܰܘܗ̱ܝ ܗ̱ܘܳܐ܆ ܕܺܐܝܬܶܝܗ̇ ܕܰܐܪܺܝܽܘܤ ܘܰܕܗܳܢܽܘܢ ܕܢܳܩܦܺܝܢ ܠܶܗ܆ ܐܰܦܩܳܗ̇ ܡܶܢ ܬܠܺܝܬܳܝܽܘܬܳܐ ܩܰܕܺܝܫܬܳܐ. ܒܳܗ̇ ܒܰܕܡܽܘܬܳܐ ܐܳܦ ܗܳܝ ܕܡܳܪܝܳܐ ܐܰ‌ܠܳܗܳܐ ܕܰܐܒܳܗܰܝ̈ܟܽܘܢ܆ ܕܰܩܕܳܡ ܬܠܳܬܰܝ̈ܗܽܘܢ ܫܰܘܝܳܐܺܝܬ ܩܰܕܺܝܡܳܐ ܡܛܰܟܣܳܐ܆ ܘܳܐܦ ܠܗܳܝ ܐܽܘܡܳܢܽܘܬ ܡ̈ܶܠܶܐ ܐ̱ܚܪܺܬܳܐ ܕܺܝܠܗܽܘܢ ܐܢܩܬ ܠܒܰܪ ܗܳܝ ܕܒܳܗ̇ ܗܳܝ ܡܰܢ ܕܰܐ‌ܠܳܗܳܐ ܦܳܠܓܺܝܢ ܠܰܐܒܳܐ܆ ܗܳܝ ܕܶܝܢ ܕܡܳܪܝܳܐ ܠܰܒܪܳܐ܆ ܟܰܕ ܠܳܐ ܡܶܣܬܰܟܠܺܝܢ܆ ܕܦܰܘܠܽܘܤ ܟܰܕ ܠܘܳܬ ܩܽܘܪ̈ܺܝܢܬܳܝܶܐ ܕܰܒܛܳܥܝܽܘܬܳܐ ܕܣܰܓܺܝܐܽܘܬ ܐܰ‌ܠܳܗ̈ܶܐ ܡ̇ܪܰܒܶܝܢ ܗ̱ܘܰܘ ܡܡܰܠܶܠ ܗ̱ܘܳܐ ܟܬܰܒ܆ ܠܰܢ ܕܶܝܢ ܚܰܕ ܗ̱ܘ̣ ܐܰ‌ܠܳܗܳܐ ܐܰܒܳܐ ܗܰܘ ܕܡܶܢܶܗ ܟܽܠ܆ ܘܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܗܰܘ ܕܒܺܐܝܕܰܘ̈ܗ̱ܝ ܟܽܠ^[22]܆ ܟܰܕ ܡܶܢ ܥܝܳܕܳܐ ܡܰܪܚܶܩ ܗ̱ܘܳܐ ܠܗܽܘܢ ܕܗܳܝ ܕܰܐ‌ܠ̈ܳܗܶܐ ܣܰܓܺܝ̈ܶܐܐ ܢܶܣܒܪܽܘܢ܆ ܘܓܳܢܶܒ ܗ̱ܘܳܐ ܠܗܽܘܢ ܒܚܽܘܠܳܦܳܐ ܕܰܫܡܳܗ̈ܶܐ ܕܰܫܘܶܝܢ ܒܚܰܝܠܳܐ܆ ܘܠܰܘ ܟܰܕ ܐܰܝܟ ܫܡܳܐ ܡܬܰܚܬܝܳܐ ܠܗܰܘ ܕܡܳܪܝܳܐ ܟܳܬܶܒ ܠܶܗ ܥܰܠ ܒܪܳܐ܆ ܘܬܽܘܒ ܐܰܝܟ ܡܥܰܠܝܳܐ ܠܗܰܘ ܕܰܐ‌ܠܳܗܳܐ ܝܳܗܶܒ ܠܶܗ ܠܰܐܒܳܐ.

ܡܶܬܚܙܶܐ ܓܶܝܪ ܒܕܽܘܟ̈ܝܳܬܳܐ ܣܰܓܺܝ̈ܳܐܬܳܐ܆ ܕܰܐ‌ܠܳܗܳܐ ܡܫܰܡܰܗ ܠܶܗ ܠܰܒܪܳܐ. ܘܟܰܕ ܠܪ̈ܽܘܡܳܝܶܐ ܡܰܢ ܟܳܬܶܒ ܗ̱ܘܳܐ ܘܳܐܡܰܪ ܗ̱ܘܳܐ. ܕܡܶܢܗܽܘܢ ܡܫܺܝܚܳܐ ܕܒܰܒܣܰܪ܆ ܗܰܘ ܕܺܐܝܬܰܘܗ̱ܝ ܥܰܠ ܟܽܠ ‌ܐܰ‌ܠܳܗܳܐ ܡܒܰܪܟܳܐ ܠܥܳܠܡܺܝܢ ܐܰܡܺܝܢ[23]. ܟܰܕ ܠܛܺܛܘܤ ܕܶܝܢ ܟܳܬܶܒ ܗ̱ܘܳܐ܆ ܟܰܕ ܡܣܰܟܶܝܢ ܚ̱ܢܰܢ ܠܣܰܒܪܳܐ ܛܽܘܒܬܳܢܳܐ ܘܰܠܕܶܢܚܳܐ ܕܬܶܫܒܽܘܚܬܶܗ ܕܰܐ‌ܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ[24]. ܚܳܙܶܐ ܐܰܢ̱ܬ ܕܳܐܦ ܗܳܝ ܕܪܰܒܳܐ ܐܰܘܣܶܦ܆ ܐܰܝܟܰܢܳܐ ܕܰܢܚܰܘܶܐ ܕܕܽܐܘܣܺܝܰܐ ܗܳܝ ܕܛܳܒ ܡܥܰܠܝܳܐ ܘܕܰܠܗܰܠ ܡܶܢܟܽܠ ‌ܐܺܝܬܰܘܗ̱ܝ܆ ܘܰܕܗܳܝ ܕܠܳܐ ܐܺܝܬ ܡܶܕܶܡ ܕܪܰܒ ܡܶܢܳܗ̇܆ ܪܰܒ ܗ̱ܘ̣ ܓܶܝܪ ܡܳܪܝܳܐ ܘܰܡܫܰܒܰܚ ܛܳܒ܆ ܘܰܕܪܰܒܽܘܬܶܗ ܠܰܝܬ ܣܳܟܳܐ[25]܆ ܐܰܝܟܰܢܳܐ ܕܰܒܕܽܘܟ ܐܳܡܰܪ ܕܰܘܺܝܕ ܟܰܕ ܡܙܰܡܰܪ.

ܘܳܐܦ ܡܶܢܗܶܝܢ ܗܳܟܺܝܠ ܕܗܳܠܶܝܢ ܕܶܐܬܶܐܡܰܪ̈ܝ̱ ܡܶܢܰܢ ܗܳܫܳܐ ܠܟܽܠܢܳܫ ܓܰܠܝܳܐ܆ ܕܰܐ‌ܠܳܗܳܐ ܐܳܦ ܒܰܠܚܽܘܕܳܝܽܘܬܳܐ ܐܳܦ ܒܰܬܠܺܝܬܳܝܽܘܬܳܐ ܡܶܬܺܝܕܰܥ܆ ܐܰܝܟܰܢܳܐ ܕܳܐܦ ܗܽܘ ܟܰܕ ܠܡܽܘܫܶܐ ܡܡܰܠܶܠ ܗ̱ܘܳܐ ܐܰܘܕܰܥ. ܒܰܠܚܽܘܕܳܝܽܘܬܳܐ ܡܰܢ܆ ܡܶܛܽܠ ܗܳܝ ܕܚܰܕ ܘܗ̱ܝ ܟܰܕ ܗܺܝ[26] ܕܽܐܘܣܺܝܰܐ܆ ܕܡܳܪܽܘܬܳܐ ܟܺܝܬ ܘܕܰܐ‌ܠܳܗܽܘܬܳܐ܆ ܘܬܽܘܒ ܕܨܶܒܝܳܢܳܐ܆ ܕܚܰܝܠܳܐ܆ ܕܡܰܥܒܕܳܢܽܘܬܳܐ܆ ܕܡܰܠܟܽܘܬܳܐ܆ ܕܬܶܫܒܽܘܚܬܳܐ܆ ܕܰܡܬܽܘܡܳܝܽܘܬܳܐ܆ ܕܟܽܠܗܶܝܢ ܦܫܺܝܛܳܐܺܝܬ ܠܡܺܐܡܰܪ܆ ܗܳܠܶܝܢ ܕܥܰܠ ‌ܐܰ‌ܠܳܗܳܐ ܡܶܣ̈ܬܰܟܠܳܢ ܘܡܶܬܰܐܡܪ̈ܳܢ. ܒܰܬܠܺܝܬܳܝܽܘܬܳܐ ܕܶܝܢ܆ ܡܶܛܽܠ ܕܺܝܠܳܢܳܝܽܘܬܳܐ ܘܠܳܐ ܚܠܺܝܛܽܘܬܳܐ ܕܰܩܢܽܘ̈ܡܶܐ.

ܐܶܡܰܬܝ ܗܳܟܺܝܠ ܕܰܒܡܰܚܫܰܒܬܳܐ ܥܰܡܺܝܩܬܳܐ ܬܶܣܰܒ ܠܰܬܠܺܝܬܳܝܽܘܬܳܐ ܐܰܘܟܺܝܬ ܬܶܬܗܰܓܰܓ܆ ܚܰܕ ܐܰ‌ܠܳܗܳܐ ܐܶܡܰܪ ܠܟܽܠ. ܠܰܘ ܒܗܳܝ ܕܚܳܒܶܟ ܐܰܢ̱ܬ ܘܒܳܐܶܠ ‌ܐܰܢ̱ܬ ܠܰܩܢܽܘ̈ܡܶܐ܆ ܐܶܠܳܐ ܒܗܳܝ ܕܰܚܕܳܐ ܝܳܕܰܥ ܐܰܢ̱ܬ ܠܰܐܠܳܗܽܘܬܳܐ ܒܰܬܠܳܬܰܝ̈ܗܽܘܢ܆ ܘܗܳܠܶܝܢ ܐ̱ܚܪ̈ܳܢܝܳܬܳܐ ܡܫܰܘܕܥܳܢ̈ܝܳܬܳܐ ܕܓܰܘܳܢܳܝܽܘܬܳܐ ܘܰܕܗܺܝܟܰܕܗܺܝܽܘܬܳܐ. ܐܶܡܰܬܝ ܕܶܝܢ ܕܰܠܘܳܬ ܐܰܒܳܐ ܬܚܽܘܪ ܡܬܰܚܡܳܐܺܝܬ ܐܰܘ ܐܰܝܬܳܐ ܠܡܺܐܡܰܪ ܠܘܳܬ ܒܪܳܐ܆ ܐܰܘ ܠܘܳܬ ܪܽܘܚܳܐ ܩܰܕܺܝܫܳܐ ܐܶܢ ܬܶܓܕܰܫ܆ ܘܬܶܩܪܶܐ ܐܰ‌ܠܳܗܳܐ ܐܰܘ ܕܺܐܝܬܰܘܗ̱ܝ ܐܰܘ ܡܳܪܝܳܐ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܰܕܓܰܘܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܐܺܝܬܰܝܗܶܝܢ܆ ܫܰܦܺܝܪ ܩܳܪܶܐ ܐܰܢ̱ܬ.

ܒܪܰܡ ܕܰܡܙܰܘܓܳܐ ܬܶܗܘܶܐ ܠܳܟ ܕܺܝܠܳܝܽܘܬܳܐ܆ ܘܰܩܪܺܝ ܐܰ‌ܠܳܗܳܐ ܐܰܝܟ ܐܰܒܳܐ. ܠܰܘ ܕܡܶܢ ܡܶܕܶܡ܆ ܐܶܠܳܐ ܕܠܳܐ ܝܺܠܺܝܕܳܐܺܝܬ ܐܺܝܬܰܘܗ̱ܝ. ܘܒܳܗ̇ ܒܰܕܡܽܘܬܳܐ ܠܰܿܒܪܳܐ܆ ܘܰܐ‌ܠܳܗܳܐ ܡܳܪܝܳܐ ܘܕܺܐܝܬܰܘܗ̱ܝ ܫܰܡܰܗ܆ ܕܶܐܬܺܝܠܶܕ ܕܶܝܢ ܟܺܝܬ ܡܬܽܘܡܳܐܺܝܬ ܡܶܢ ܐܰܒܳܐ. ܘܒܳܗ̇ ܒܰܕܡܽܘܬܳܐ ܠܪܽܘܚܳܐ ܩܰܕܺܝܫܳܐ܆ ܒܗܶܝܢ ܟܕ ܒܗܶܝܢ ܒܰܩܪ̈ܳܝܳܬܳܐ܆ ܘܫܰܘܝ̈ܳܬ ܒܺܐܝܩܳܪܳܐ ܩܰܠܶܤ. ܠܰܘ ܐܰܝܟ ܗܰܘ ܕܡܶܢ ܡܶܕܶܡ ܐܺܝܬܰܘܗ̱ܝ ܐܰܘ ܝܺܠܺܝܕܳܐ܆ ܐܶܠܳܐ ܐܰܝܟ ܐܰܝܢܳܐ ܕܡܶܢ ܐܰܒܳܐ ܢܳܦܶܩ. ܢܶܗܘ̈ܝܳܢ ܠܳܐ ܡܶܙܕܰܥ̈ܙܥܳܢܝܳܬܳܐ ܡܶܢ ܫܽܘܘ̈ܕܳܥܶܐ ܘܰܫܡܳܗ̈ܶܐ ܓܰܘܳܢܳܝ̈ܶܐ ܕܺܝ̈ܠܳܝܳܬܳܐ. ܘܳܐܦ ܡܶܢ ܕܺܝ̈ܠܳܝܳܬܳܐ ܕܶܝܢ ܗܽܘ ܗܳܟܘܳܬ܆ ܠܳܐ ܡܶܬܦܰܪ̈ܫܳܢܝܳܬܳܐ ܢܟܰܬܪ̈ܳܢ ܗܳܠܶܝܢ ܕܓܰܘܳܢܳܝܽܘܬܳܐ. ܐܶܡܰܪܬ ܗܳܠܶܝܢ ܬܠܳܬܳܐ܆ ܠܘܳܬ ܗܰܘ ܚܰܕ ܡܰܠܽܘܬܳܐܺܝܬ ܪܗܰܛ ܣܰܩ. ܗܰܘ ܚܰܕ ܐܶܬܗܰܓܰܓܬ ܠܗܳܠܶܝܢ ܬܠܳܬܳܐ ܡܦܰܪܫܳܐܺܝܬ ܐܶܣܬܰܟܠ. ܬܶܬܟܽܘܤ ܠܒܽܘܠܒܳܠܳܐ ܝܺܗܽܘܕܳܝܳܐ ܘܰܕܣܰܐܒܠܝܘܤ ܗܳܝ ܕܰܬܠܳܬܳܐ. ܗܳܝ ܕܶܝܢ ܕܚܰܕ ܠܰܦܣܳܩܳܐ ܚܰܢܦܳܝܳܐ ܕܰܐܪܺܝܽܘܤ.

ܫܡܰܥܬܳܝܗ̱ܝ ܕܳܐܡܰܪ ܕܶܐܢܳܐ ܐܺܝܬܰܝ ܗܰܘ ܕܺܐܝܬܰܘܗ̱ܝ܆ ܡܳܕܶܝܢ ܕܺܐܝܬܰܘܗ̱ܝ ܡܰܢ ܐܽܘ̣ܕܳܐ. ܕܡܳܢܳܐ ܕܶܝܢ ܐܺܝܬܰܘܗ̱ܝ ܒܽܐܘܣܺܝܰܐ ܠܳܐ ܬܥܰܩܶܒ. ܐܳܦ ܓܶܝܪ ܠܳܐ ܐܺܝܬ ܠܳܟ ܠܡܶܫܟܳܚܽܘ. ܟܰܕ ܗܳܟܰܢܳܐ ܫܡܰܥܬ܆ ܕܰܐܒܳܐ ܡܶܛܽܠ ܕܠܰܘ ܡܶܢ ܡܶܕܶܡ܆ ܘܰܒܪܳܐ ܡܶܛܽܠ ܕܺܝܠܺܝܕ܆ ܘܪܽܘܚܳܐ ܩܰܕܺܝܫܳܐ܆ ܡܶܛܽܠ ܕܡܶܢ ܐܰܒܳܐ ܠܳܐ ܡܶܬܪܰܢܝܳܢܳܐܺܝܬ ܢܳܦܶܩ܆ ܠܳܐ ܡܥܰܩܒܳܢܳܐܺܝܬ ܬܶܒܨܶܐ܆ ܕܡܢܘ ܙܢܳܐ ܕܗܳܠܶܝܢ ܗܳܟܰܢܳܐ ܢܶܗܘܽܘܢ ܐܺܝܬ ܠܗܽܘܢ. ܐܺܝܬܰܘܗ̱ܝ ܓܶܝܪ ܠܳܐ ܡܶܬܢܰܣܒܳܢܳܐ ܘܠܳܐ ܡܶܬܕܰܪܟܳܢܳܐ ܘܰܕܠܳܗ̇ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ ܒܰܠܚܽܘܕ ܫܰܦܺܝܪ ܡܶܬܺܝܕܰܥ. ܢܦܰܫܶܩ ܓܶܝܪ ܗܰܘ ܕܨܳܒܶܐ܆ ܗܺܝ ܗܳܕܶܐ ܕܡܳܢܳܐ ܐܺܝܬܰܘܗ̱ܝ ܒܽܐܘܣܺܝܰܐ ܐܰ‌ܠܳܗܳܐ܆ ܘܗܳܝܕܶܝܢ ܢܶܒܨܶܐ ܕܡܳܢܳܐ ܐܺܝܬܶܝܗ̇ ܝܺܠܺܝܕܽܘܬܳܐ ܐܰ‌ܠܳܗܳܝܬܳܐ ܘܢܳܦܽܘܩܽܘܬܳܐ. ܗܳܠܶܝܢ ܟܺܝܬ ܕܠܳܐ ܐܺܝܬܰܝܗܶܝܢ ܗ̱ܘܰܝ̈ ܐܰ‌ܠܳܗܳܝ̈ܳܬܳܐ܆ ܐܶ‌ܠܽܘ ܟܺܝܬ ܡܶܬܢܰܣܒܳܢܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܙܢܳܐ ܠܬܰܪ̈ܥܝܳܬܳܐ ܕܺܝܠܰܢ. ܡܶܛܽܠ ܕܳܐܦ ܗܺܝ ܗܳܝ ܒܰܠܚܽܘܕ ܕܢܶܕܰܥ ܚܢܰܢ ܘܰܢܫܰܒܰܚ ܬܠܺܝܬܳܝܽܘܬܳܐ ܡܫܰܡܠܰܝܬܳܐ܆ ܕܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ ܡܶܬܚܰܙܝܳܐ܆ ܠܳܐ ܐ̱ܢܳܫ ܡܶܣܬܰܟܰܠ ܗ̱ܘܳܐ ܣܳܟ ܐܰܘ ܒܝܰܕ ܦܽܘܡܳܐ ܡܰܝܬܶܐ ܗ̱ܘܳܐ܆ ܐܶ‌ܠܽܘ ܠܳܐ ܗܰܘ ܚܰܕ ܡܶܢܳܗ̇ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ܆ ܗܰܘ ܒܪܳܐ ܘܡܶܠܬܳܐ܆ ܗܰܘ ܨܰܠܡܳܐ ܕܰܐܒܳܐ ܠܳܐ ܡܶܬܚܰܙܝܳܢܳܐ[27]܆ ܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ ܘܶܐܬܒܰܪܢܰܫ ܡܶܛܽܠܳܬܰܢ. ܘܗܳܠܶܝܢ ܕܡܶܛܽܠܳܬܶܗ ܕܺܝܠܶܗ ܘܡܶܛܽܠ ‌ܐܰܒܳܐ ܘܡܶܛܽܠ ܪܽܘܚܳܐ ܩܰܕܺܝܫܳܐ ܓܠܳܐ܆ ܐܰܝܟ ܕܰܒܢܽܘܛܰܦܬܳܐ ܚܕܳܐ ܙܥܽܘܪܬܳܐ܆ ܘܗܰܘ ܡܳܐ ܕܰܡܨܶܝܢ ܗ̱ܘܰܝܢ ܠܡܶܛܥܰܢ܆ ܘܗܰܘ ܕܰܠܟܽܠܳܗ̇ ܗܳܝ ܕܰܬܚܶܝܬ ܫܡܰܝܳܐ܆ ܡܠܳܐ ܢܽܘܗܪܳܐ ܘܺܝܕܰܥܬܳܐ ܐܰ‌ܠܳܗܳܝܬܳܐ. ܗܰܘ ܕܡܶܢܶܗ ܟܰܕ ܠܘܳܬ ܡ̈ܠܶܐ ܢܒܺܝ̣ܳܝ̣̈ܳܬܳܐ܆ ܘܰܠܘܳܬ ܚ̈ܶܙܘܳܢܶܐ ܕܙܰܕܺܝ̈ܩܶܐ ܗܳܢܽܘܢ ܕܡܶܢ ܩܕܺܝܡ ܪܳܗܛܺܝܢܰܢ ܣܳܠܩܺܝܢܰܢ܆ ܓܰܠܝܳܐܺܝܬ ܡܶܫܟܚܺܝܢܰܢ ܠܶܗ ܠܝܽܘܠܦܳܢܳܐ ܐܰ‌ܠܳܗܳܝܳܐ ܘܦܳܪܽܘܩܳܝܳܐ ܗܳܢܳܐ ܕܺܝܠܰܢ܆ ܗܰܘ ܕܰܩܕܳܡ ܕܢܶܕܢܰܚ ܝܺܚܺܝܕܳܝܳܐ ܡܶܠܬܳܐ܆ ܐܰܝܟ ܕܰܒܛܶܠܳܢܺܝܬܳܐ ܘܰܒܪܶܡܙܳܐ܆ ܒܰܢ̈ܒܺܝܰܘܳܬܳܐ ܐܰܘ ܟܺܝܬ ܒܚ̈ܶܙܘܳܢܶܐ ܡܶܣܬܒܰܪ ܗ̱ܘܳܐ ܕܰܡܟܰܣܰܝ. ܗܳܟܰܢܳܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ܆ ܟܰܕ ܒܝܰܕ ܡܶܐܬܺܝܬܳܐ ܕܒܰܒܣܰܪ ܐܰܢܗܰܪ܆ ܐܰܝܟ ܕܰܒܢܽܘܗܪܳܐ ܥܰܬܶܕ ܠܰܢ ܕܢܶܚܙܶܐ ܐܶܢܶܝܢ ܢܰܗܺܝܪܳܐܺܝܬ܆ ܠܗܳܠܶܝܢ ܠܳܐ ܝܺܕܺܝ̈ܥܳܬܳܐ ܘܠܳܐ ܡܶܬܚܰܙܝܳܢ̈ܝܳܬܳܐ.

ܡܶܛܽܠ ܗܳܕܶܐ ܐܳܦ ܗܳܠܶܝܢ ܕܶܐܬܓ̈ܠܶܝܢ ܠܡܽܘܫܶܐ܆ ܗܳܠܶܝܢ ܕܡܶܛܽܠܳܬܗܶܝܢ ܡܰܠܶܠܢܰܢ܆ ܘܡܶܢܗܶܝܢ ܡܡܰܠܠܽܘܬ ܐܰ‌ܠܳܗܽܘܬܳܐ ܚܰܬܺܝܬ̣ܬܳܐ ܚܰܘܺܝܢܰܢ܆ ܠܰܘ ܐ̱ܚܪܳܢܝܳܐܺܝܬ ܡܶܬܚܰܘ̈ܝܳܢ ܗ̱ܘܰܝ̈܆ ܐܶ‌ܠܽܘ ܠܳܐ ܕܰܐܝܟ ܕܰܒܛܽܘܦܣܳܐ ܡܶܢ ܩܕܺܝܡ܆ ܗܽܘ ܒܪܳܐ ܘܡܶܠܬܳܐ ܐܶܬܚܙܺܝ܆ ܕܩܳܕܶܡ ܗ̱ܘܳܐ ܨܳܐܰܪ ܗ̱ܘܳܐ ܠܶܗ ܠܐ̱ܪܳܙܳܐ ܪܰܒܳܐ ܘܰܐ‌ܠܳܗܳܝܳܐ ܕܡܶܬܒܰܪܢܫܳܢܽܘܬܳܐ. ܡܳܢܳܐ ܓܶܝܪ ܐܳܡܪ̈ܳܢ ܟܬܺܝ̈ܒܳܬܳܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ. ܐܶܬܚܙܺܝ ܠܶܗ ܕܶܝܢ ܡܰܠܰܐܟܶܗ ܕܡܳܪܝܳܐ ܒܫܰܠܗܶܒܺܝܬܳܐܕܢܽܘܪܳܐ ܡܶܢ ܣܰܢܝܳܐ. ܘܚܳܙܶܐ ܕܗܽܘ ܣܰܢܝܳܐ ܡܶܬܓܰܘܙܰܠ ܒܢܽܘܪܳܐ. ܣܰܢܝܳܐ ܕܶܝܢ ܠܳܐ ܝܳܩܶܕ. ܐܶܡܰܪ ܕܶܝܢ ܡܽܘܫܶܐ. ܐܶ݀ܥܒܰܪ ܐܶ݀ܚܙܶܐ ܚܶܙܘܳܐ ܗܳܢܳܐ ܪܰܒܳܐ܆ ܕܡܶܛܽܠ ܡܳܢܳܐ ܠܳܐ ܝܳܩܶܕ ܣܰܢܝܳܐ. ܟܰܕ ܕܶܝܢ ܚܙܳܐ ܡܳܪܝܳܐ ܕܩܳܪܶܒ ܕܢܶܚܙܶܐ܆ ܩܪܳܝܗ̱ܝ ܡܳܪܝܳܐ ܡܶܢ ܣܰܢܝܳܐ[28].

ܘܰܐܝܟܰܢܳܐ ܐܳܡܰܪ ܕܶܐܬܚܙܺܝ ܠܶܗ ܡܰܠܰܐܟܶܗ ܕܡܳܪܝܳܐ ܒܫܰܠܗܶܒܺܝܬܳܐ ܕܢܽܘܪܳܐ ܡܶܢ ܣܰܢܝܳܐ܆ ܡܶܛܽܠܳܬܳܗ̇ ܟܰܕ ܡܶܛܽܠܳܬܳܗ̇ ܩܪܳܝܗ̱ܝ ܡܳܪܝܳܐ ܡܶܢ ܣܰܢܝܳܐ. ܐܰܝܟܰܢܳܐ ܗܽܘ ܟܰܕ ܗܽܘ ܡܰܠܰܐܟܶܗ ܕܡܳܪܝܳܐ ܘܡܳܪܝܳܐ. ܗܽܘ ܓܶܝܪ ܫܡܳܐ ܡܳܪܝܳܐ܆ ܠܟܽܠܗܶܝܢ ܡܰܢ ܗܳܠܶܝܢ ܕܡܶܢ ܒܳܬܰܪ ܐܰ‌ܠܳܗܳܐ ܐܰܟܣܢܳܝܳܐ ܐܺܝܬܰܘܗ̱ܝ܆ ܠܶܗ ܕܶܝܢ ܒܰܠܚܽܘܕܰܘܗ̱ܝ ܫܰܪܺܝܪܳܐܺܝܬ ܐܺܝܬܰܘܗ̱ܝ ܕܠܳܚܶܡ. ܡܙܰܡܰܪ ܓܶܝܪ ܒܕܽܘܟ ܐܳܦ ܢܒܺܝܳܐ ܕܰܘܺܝܕ ܠܘܳܬܶܗ ܗܳܟܰܢܳܐ. ܘܢܶܕܥܽܘܢ ܕܰܫܡܳܐ ܠܳܟ ܡܳܪܝܳܐ. ܐܰܝܟ ܠܚܽܘܕܰܝܟ ܡܪܰܝܡܳܐ ܥܰܠ ܟܽܠܳܗ̇ ܐܰܪܥܳܐ[29].

ܡܚܰܘܝܳܐ ܠܰܢ ܗܳܟܺܝܠ ܗܳܕܶܐ ܕܣܺܝܡܳܐ ܒܰܡܨܰܥܬܳܐ܆ ܕܰܒܪܳܐ ܐܺܝܬܰܘܗ̱ܝ ܗ̱ܘܳܐ ܗܰܘ ܕܰܒܣܰܢܝܳܐ ܐܶܬܚܙܺܝ. ܨܰܠܡܳܐ ܗܰܘ ܚܰܝܳܐ ܘܠܳܐ ܡܫܰܚܠܦܳܐ ܕܰܐܒܳܐ. ܗܰܘ ܕܗܽܘ ܒܶܗ ܡܚܰܘܶܐ ܘܡܰܘܕܰܥ ܚܰܬܺܝܬ̣ܳܐܺܝܬ ܠܗܰܘ ܕܝܰܠܕܶܗ܆ ܒܰܕܡܽܘܬ ܝܽܘܩܢܳܐ ܫܰܪܺܝܪܳܐ܆ ܘܰܐܝܟ ܡܶܠܬܳܐ ܗܰܘ ܡܥܰܠܝܳܐ܆ ܠܗܰܘܢܳܐ ܗܰܘ ܕܰܠܗܰܠ ܡܶܢ ܟܽܠ. ܠܗܰܘ ܕܶܐܫܰܥܝܳܐ ܢܒܺܝܳܐ ܡܶܛܽܠ ܗܳܕܶܐ܆ ܐܳܦ ܒܪܳܐ ܘܳܐܦ ܡܰܠܰܐܟܳܐ ܕܬܰܪܥܺܝܬܳܐ ܪܰܒܬܳܐ ܟܰܢܝܶܗ. ܟܕ ܐܳܡܰܪ܆ ܡܶܛܽܠ ܕܛܰܠܝܳܐ ܐܶܬܺܝܠܶܕ ܠܰܢ܆ ܘܰܒܪܳܐ ܐܶܬܺܝܗܶܒ ܠܰܢ. ܘܡܶܬܩܪܶܐ ܫܡܶܗ ܡܰܠܰܐܟܳܐ ܕܬܰܪܥܺܝܬܳܐ ܪܰܒܬܳܐ. ܡܳܠܽܘܟܳܐ ܬܡܺܝܗܳܐ. ܐܰ‌ܠܳܗܳܐ ܚܰܝܠܬܳܢܳܐ[30]. ܡܰܢܽܘ ܕܠܳܐ ܢܶܬܡܰܗ ܒܰܓܪܺܝܕܽܘܬܳܐ ܕܰܟܬܺܝ̈ܒܳܬܳܐ ܟܳܗ̈ܢܳܝܳܬܳܐ܆ ܕܰܐܝܟ ܕܰܠܡܺܐܡܰܪ ܕܳܒܪܳܐ ܒܰܩܛܺܝܪܳܐ ܠܡܰܣܳܩܽܘ ܠܡܶܣܟܺܢܽܘܬܳܐ ܕܰܫܡܳܗ̈ܶܐ ܘܡ̈ܶܠܶܐ ܕܰܠܘܳܬܰܢ܆ ܠܘܳܬ ܪܰܘܡܳܐ ܕܣܽܘ̈ܟܳܠܶܐ ܐܰ‌ܠܳܗܳܝ̈ܶܐ܆ ܘܗܰܘ ܡܳܐ ܕܠܳܐ ܡܶܫܟܰܚ ܚܰܕ ܫܡܳܐ ܠܡܶܚܒܰܫ܆ ܠܗܳܢܳܐ ܒܝܰܕ ܐ̱ܚܪܺܢܳܐ ܡܰܘܣܦܳܐ. ܡܶܛܽܠ ܓܶܝܪ ܕܰܐܡܪܶܗ ܡܰܠܰܐܟܳܐ ܕܬܰܪܥܺܝܬܳܐ ܪܰܒܬܳܐ܆ ܐܰܝܟ ܨܰܠܡܳܐ ܘܡܶܠܬܳܐ ܕܗܰܘܢܳܐ ܗܰܘ ܕܰܠܗܰܠ ܡܶܢ ܟܽܠ܆ ܘܗܳܟܰܢܳܐ ܡܚܰܘܶܐ ܠܗܰܘ ܕܕܺܝܠܶܗ ܐܺܝܬܰܘܗ̱ܝ ܡܶܠܬܳܐ܆ ܐܰܝܟܰܢܳܐ ܕܠܳܐ ܐ̱ܢܳܫ ܒܪܰܡ ܡܶܢ ܟܽܘܢܳܝܳܐ ܗܽܘ ܕܡܰܠܰܐܟܳܐ ܟܰܕ ܠܘܳܬ ܗܰܘܢܳܐ ܛܳܐܶܢ ܒܰܐܪܥܳܐ ܢܳܦܶܠ܆ ܡܫܰܡܫܳܢܳܐ ܕܰܐܒܳܐ ܢܶܣܒܪܺܝܘܗ̱ܝ܆ ܐܰܝܬܺܝ ܒܳܬܰܪܟܶܢ܆ ܡܳܠܽܘܟܳܐ[31] ܬܡܺܝܗܳܐ. ܫܰܘܬܳܦܳܐ ܐܺܝܬܰܘܗ̱ܝ ܐܳܡܰܪ ܕܬܰܪܥܺܝܬܳܐ ܘܠܰܘ ܡܫܰܡܫܳܢܳܐ. ܐܰܝ̇ܕܳܐ ܓܶܝܪ ܫܰܘܬܳܦܽܘܬܳܐ ܠܳܐ ܐܺܝܬ ܠܡܶܠܬܳܐ ܠܘܳܬ ܗܰܘܢܳܐ܆ ܡܰܠܽܘܢ ܕܶܝܢ ܒܦܳܣܺܝ̈ܩܳܬܳܐ ܠܡܺܐܡܰܪ ܗܺܝܟܰܕܗܺܝܽܘܬܳܐ ܕܰܒܟܽܠܡܶܕܶܡ ܘܢܰܩܺܝܦܽܘܬܳܐ ܪܺܝܫܳܝܬܳܐ. ܐܰ‌ܠܳܗܳܐ ܓܶܝܪ ܐܺܝܬܰܘܗ̱ܝ ܐܳܦ ܗܽܘ ܚܰܝܠܬܳܢܳܐ.

ܠܗܳܢܳܐ ܗܳܟܺܝܠ܆ ܡܰܠܰܐܟܶܗ ܕܡܳܪܝܳܐ ܘܡܳܪܝܳܐ ܡܚܰܘܝܳܐ ܠܶܗ ܡܶܠܬܳܐ܆ ܕܶܐܬܚܙܺܝ ܠܡܽܘܫܶܐ ܒܣܰܢܝܳܐ. ܐܶܬܚܙܺܝ ܕܶܝܢ ܐܰܝܟܰܢܳܐ. ܒܫܰܠܗܶܒܺܝܬܳܐ ܕܢܽܘܪܳܐ ܐܳܡܰܪ ܡܶܢ ܣܰܢܝܳܐ. ܟܰܕ ܣܰܢܝܳܐ ܡܶܬܓܰܘܙܰܠ ܘܠܳܐ ܝܳܩܶܕ[32]. ܐܰܝܟܳܐ ܐܺܝܬܰܝܗܽܘܢ ܗܳܢܽܘܢ ܕܳܐܡܪܺܝܢ܆ ܐܰܝܟܰܢܳܐ ܐܰ‌ܠܳܗܳܐ ܐܶܬܚܰܝܰܕ ܠܒܶܣܪܳܐ܆ ܐܰܝܟܰܢܳܐ ܗܰܘ ܠܳܐ ܦܰܓܪܳܢܳܐ ܢܳܩܶܦ[33] ܗ̱ܘܳܐ ܠܦܰܓܪܳܐ. ܟܕ ܠܗܳܢܳܐ ܐ̱ܪܳܙܳܐ ܨܳܝܪܳܐ ܠܳܟ ܬܶܕܡܽܘܪܬܳܐ܆ ܬܶܗܘܶܐ ܠܳܟ ܝܰܬܺܝܪ ܓܠܺܝܬܳܐ ܘܢܰܗܺܝܪܬܳܐ܆ ܘܝܰܬܺܝܪ ܡܶܢ ܟܽܠ ܬܰܚܘܺܝܬܳܐ. ܐܰܝܟܰܢܳܐ ܓܶܝܪ ܠܳܗ̇ ܟܰܕ ܠܳܗ̇ ܐܳܬܶܐ ܐܰܟܚܕܳܐ ܩܰܝܣܳܐ ܥܰܡ ܢܽܘܪܳܐ. ܐܰܝܟܰܢܳܐ ܕܶܝܢ ܡܣܰܝܒܰܪ ܠܚܺܐܦܳܗ̇ ܕܫܰܠܗܶܒܺܝܬܳܐ. ܐܰܝܟܰܢܳܐ ܚܰܕ ܡܶܕܶܡ ܗܳܘ̈ܝܳܢ܆ ܗܳܠܶܝܢ ܕܺܐܝܬ ܠܗܶܝܢ ܒܰܟܝܳܢܳܐ ܠܳܐ ܫܰܠܡܳܐܺܝܬ ܠܘܳܬ ܚ̈ܕܳܕܶܐ. ܐܳܦ ܓܶܝܪ ܠܳܐ ܐܶܡܰܪ ܕܡܰܢܗܪܳܐ ܗ̱ܘܳܬ܆ ܐܰܘ ܕܡܰܒܪܩܳܐ ܗ̱ܘܳܬ ܚܕܳܪ̈ܰܘܗ̱ܝ܆ ܐܰܘ ܕܡܶܣܬܰܿܒܪܳܐ ܗ̱ܘܳܬ ܕܡܶܬܚܰܙܝܳܐ ܢܽܘܪܳܐ ܠܥܶܠ ܡܶܢ ܣܰܢܝܳܐ. ܐܶܠܳܐ ܕܡܶܬܓܰܘܙܰܠ ܗ̱ܘܳܐ ܣܰܢܝܳܐ ܘܠܳܐ ܝܳܩܶܕ ܗ̱ܘܳܐ[34]. ܒܟܽܠܶܗ ܐܳܡܰܪ ܐܺܝܬܶܝܗ̇ ܗ̱ܘܳܬ ܢܽܘܪܳܐ ܕܥܰܠܺܝܠܳܐ ܘܚܰܠܺܝܕܳܐ ܘܰܥܒܺܝܕ ܗ̱ܘܳܐ ܓܡܽܘܪܬܳܐ. ܘܢܽܘܪܳܢܳܐ ܐܺܝܬܰܘܗ̱ܝ ܗ̱ܘܳܐ ܟܽܠܶܗ ܘܗ̱ܝ ܢܽܘܪܳܐ. ܘܚܰܣܺܝܪܳܐ ܗ̱ܘܳܬ ܠܶܗ ܡܶܟܺܝܠ ‌ܐܶ‌ܠܽܘ ܒܝܰܕ ܟܝܳܢܶܗ ܪܳܕܶܐ ܗ̱ܘܳܐ܆ ܕܰܠܩܶܛܡܳܐ ܘܕܰܚܺܝܚܳܐ ܢܶܫܪܰܟ. ܗܳܕܶܐ ܓܶܝܪ ܡܚܰܘܝܳܐ ܓܰܠܝܳܐܺܝܬ ܗܳܝ ܕܠܳܐ ܝܳܩܶܕ ܗ̱ܘܳܐ.

ܒܳܗ̇ ܒܰܕܡܽܘܬܳܐ ܗܳܟܺܝܠ ܠܗܳܕܶܐ ܬܶܕܡܽܘܪܬܳܐ܆ ܐܳܦ ܗܽܘ ܡܶܠܬܶܗ ܕܰܐ‌ܠܳܗܳܐ ܐܶܬܚܰܝܰܕ ܠܒܶܣܪܳܐ ܕܺܝܠܰܢ ܕܢܰܦܫܳܐ ܐܺܝܬ ܠܶܗ ܡܶܬܗܰܘܢܳܢܺܝܬܳܐ܆ ܟܰܕ ܐܶܬܥܰܪܙܰܠ ܥܰܡܶܗ ܩܢܽܘܡܳܐܺܝܬ ܠܗܰܠ ܡܶܢ ܟܽܠ ܡܶܠܬܳܐ܆ ܡܶܛܽܠ ܕܗܳܕܶܐ ܨܳܒܶܐ ܗ̱ܘܳܐ. ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܶܝܢ ܬܡܺܝ̈ܗܳܬܳܐ. ܕܡܶܬܗܰܝ̈ܡܢܳܢ ܡܶܢ ܡܶܛܽܠ ܕܰܗ̣ܘ̈ܰܝ܆ ܘܗܳܕܶܐ ܐܺܝܬ ܠܗܶܝܢ ܠܘܳܬ ܡܚܰܘܝܳܢܽܘܬܳܐ ܕܣܰܓܺܝ ܣܳܦܩܳܐ܆ ܗܺܝ ܗܳܝ ܕܺܐܝܬܰܝܗܶܝܢ ܬܡܺܝ̈ܗܳܬܳܐ܆ ܘܠܰܘ ܕܟܽܠ ܟܽܠܶܗ ܐܺܝܬܰܝܗܶܝܢ ܡܶܬܕܰܪ̈ܟܳܢܝܳܬܳܐ ܠܬܰܪ̈ܥܝܳܬܳܐ ܕܺܝܠܰܢ܆ ܥܳܒܪ̈ܳܢ ܕܶܝܢ ܠܰܡܚܺܝܠܽܘܬܳܐ ܕܰܒܨܳܬܳܐ ܡܠܺܝܠܬܳܐ ܘܰܡܥܰܩܒܳܢܺܝܬܳܐ܆ ܐܰܝܟܰܢܳܐ ܕܳܐܦ ܢܩܰܘ̈ܝܳܢ ܬܡܺܝ̈ܗܳܬܳܐ.

ܢܦܰܫܶܩ ܓܶܝܪ ܝܺܗܽܘܕܳܝܳܐ ܐܰܘ ܚܰܢܦܳܐ܆ ܕܡܳܢܳܐ ܗܝ ܡܶܠܬܳܐ ܕܗܳܝ ܕܡܶܬܓܰܘܙܰܠ ܗ̱ܘܳܐ ܣܰܢܝܳܐ ܘܠܳܐ ܝܳܩܶܕ ܗ̱ܘܳܐ܆ ܘܢܶܬܒܥܰܢܝ ܗܳܝܕܶܝܢ ܠܺܝ܆ ܠܡܶܫܬܰܥܳܝܽܘ ܠܶܗ ܙܢܳܐ ܕܰܚܕܳܝܽܘܬܶܗ ܐܰ‌ܠܳܗܳܝܬܳܐ ܕܥܰܡܰܢܽܘܐܶܝܠ. ܐܶܢ ܕܶܝܢ ܕܗܳܝ ܕܶܐܬܚܰܙܝܰܬ ܡܶܢ ܡܽܘܫܶܐ܆ ܘܰܬܚܶܝܬ ܥܰܝ̈ܢܶܐ ܡܶܬܪ̈ܰܓܫܳܢܝܳܬܳܐ ܢܳܦܠܳܐ ܗ̱ܘܳܬ܆ ܠܳܐ ܡܶܬܡܰܠܠܳܢܺܝܬܳܐ ܗܝ ܡܶܠܬܳܐ܆ ܡܳܢܳܐ ܢܺܐܡܰܪ ܐ̱ܢܳܫ܆ ܡܶܛܽܠ ܚܕܳܝܽܘܬܳܐ ܕܰܐ‌ܠܳܗܳܐ ܡܶܠܬܳܐ ܕܰܠܘܳܬ ܒܶܣܪܳܐ܆ ܗܳܝ ܕܰܠܗܰܘܢܳܐ ܠܚܽܘܕܰܘܗ̱ܝ ܡܶܬܚܰܙܝܳܐ܆ ܘܗܳܕܶܐ ܟܡܳܐ ܕܺܐܝܬܶܝܗ̇ ܠܰܢ ܠܳܐ ܡܶܬܕܰܪܟܳܢܺܝܬܳܐ. ܐܰܘ ܐܰܢ̱ܬ ܒܰܡܡܰܠܠܽܘܬ ܐܰ‌ܠܳܗܽܘܬܳܐ ܡܰܢ ܕܝܽܘܚܰܢܢ ܬܡܰܗܬ܆ ܗܳܝ ܕܒܺܐܝ̈ܕܶܝܗ̇ ܪܥܶܡ ܗܳܝ ܕܰܒܪܺܝܫܺܝܬ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ ܘܗܽܘ ܡܶܠܬܳܐ ܐܺܝܬܰܘܗ̱ܝ ܗ̱ܘܳܐ ܠܘܳܬ ܐܰ‌ܠܳܗܳܐ܆ ܘܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܗܽܘ ܡܶܠܬܳܐ[35]. ܗܳܝ ܕܒܳܗ̇ ܐ̱ܢܳܫܺܝ̈ܢ ܐܳܦ ܡܶܢ ܗܳܢܽܘܢ ܕܥܰܠ ܚܶܟܡܬܳܐ ܗܳܝ ܚܰܢܦܳܝܬܳܐ ܪܰܒܬܳܐ ܡܶܬܪܰܥܶܝܢ ܬܗܰܪܘ܆ ܠܗܳܝ ܕܶܝܢ ܕܡܶܠܬܳܐ ܒܶܣܪܳܐ ܗܘ̣ܳܐ ܘܰܐܓܶܢ ܒܰܢ[36]܆ ܠܳܐ ܡܗܰܝܡܶܢ ܐܰܢ̱ܬ. ܘܟܰܕ ܛܳܒ ܟܺܝܬ܆ ܗܰܘ ܕܰܐܥܒܶܕ ܒܶܗ ܕܢܺܐܡܰܪ ܗܳܝ ܐܰܥܒܶܕ ܐܳܦ ܗܳܕܶܐ. ܐܳܦܠܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܕܨܰܝܳܕܳܐ ܘܠܳܐ ܝܰܠܺܝܦܳܐ ܕܕܰܐܝܟ ܗܳܠܶܝܢ ܢܶܪܥܰܡ܆ ܐܶܠܳܐ ܕܰܡܫܺܝܚܳܐ ܗܰܘ ܕܒܶܗ ܡܡܰܠܶܠ ܗ̱ܘܳܐ܆ ܘܳܐܦܠܳܐ ܬܽܘܒ ܐ̱ܚܪܳܢܝܳܐܺܝܬ ܐܺܝܬܶܝܗ̇ ܕܰܦܝܳܣܳܐ܆ ܗܳܝ ܕܗܽܘ ܟܰܕ ܗܽܘ ܡܶܢ ܦܶܠܓܳܐ ܢܶܗܘܶܐ ܡܶܬܬܰܥܒܰܕ ܡܶܢ ܐܰ‌ܠܳܗܳܐ܆ ܘܗ̱ܝ ܡܰܢ ܡܶܢ ܫܡܰܝܳܐ ܢܶܫܡܰܥ ܘܢܺܐܡܰܪ܆ ܗܳܝ ܕܶܝܢ ܡܶܢ ܐܰܪܥܳܐ ܢܶܓܒܽܘܠ ܘܢܶܒܕܶܐ.

ܐܶܠܳܐ ܬܽܘܒ ܗܽܘ ܣܰܢܝܳܐ ܠܘܳܬܶܗ ܢܳܬܶܦ ܠܺܝ܆ ܘܒܶܗ ܒܨܰܠܡܳܐ ܐܰܚܺܝܕ ܐ̱ܢܳܐ. ܐܳܦ ܓܶܝܪ ܐܰܝܟ ܙܢܳܐ ܕܰܠܗܰܘ ܥܒ̣ܰܕܬܶܗ ܢܽܘܪܳܐ ܓܡܽܘܪܬܳܐ܆ ܘܰܕܚܰܕ ܐܺܝܬܶܝܗ̇ ܥܰܡܶܗ ܐܶܬܚܰܫܒܰܬ܆ ܘܠܳܐ ܡܶܬܦܰܠܓܳܢܳܐܺܝܬ ܐܶܬܚܰܝܕܰܬ܆ ܐܰܝܟܰܢܳܐ ܓܶܝܪ ܢܦܰܠܶܓ ܐ̱ܢܳܫ ܠܫܰܠܗܶܒܺܝܬܳܐ ܕܝܳܩܕܳܐ ܒܩܰܝܣܳܐ܆ ܘܠܳܐ ܫܰܢܝܰܬܶܗ ܠܰܟܝܳܢܳܐ ܕܢܽܘܪܳܐ܆ ܘܳܐܦܠܳܐ ܗܺܝ ܥܶܒܪܰܬ ܠܗܳܝ ܕܬܶܗܘܶܐ ܐܺܝܬܶܝܗ̇ ܣܰܢܝܳܐ܆ ܐܳܦܶܢ ܒܟܽܠܶܗ ܐܶܬܥܰܠܠ̣ܰܬ[37] ܘܚܶܠܕܰܬ܆ ܘܠܳܐ ܫܶܒܩܰܬ ܒܶܗ ܡܶܕܶܡ ܗܰܘ ܕܠܳܐ ܥܒܰܕܬܶܗ ܢܽܘܪܳܢܳܐ܆ ܠܘܳܬ ܗܳܝ ܕܳܐܦ ܗܳܠܶܝܢ ܕܢܽܘܪܳܐ ܢܶܥܒܶܕ܆ ܠܡܰܘܩܳܕܽܘ ܟܺܝܬ ܘܰܠܡܰܢܗܳܪܽܘ܆ ܟܡܳܐ ܕܰܡܩܰܘܶܐ ܟܰܕ ܡܶܬܓܰܘܙܰܠ ܡܰܢ ܠܳܐ ܝܳܩܶܕ ܕܶܝܢ܆ ܘܰܓܡܽܘܪܬܳܐ ܐܺܝܬܰܘܗ̱ܝ ܗܰܘ ܡܳܐ ܕܡܶܬܚܙܶܐ܆ ܚܰܕ ܡܶܢ ܬܰܪ̈ܬܶܝܢ ܗܳܠܶܝܢ ܕܠܳܐ ܕܳܡ̈ܝܳܢ ܒܰܟܝܳܢܳܐ܆ ܟܰܕ ܠܰܬܪܶܝܢ ܠܳܐ ܡܶܬܦܰܠܰܓ܆ ܒܶܗ ܟܰܕ ܒܶܗ ܒܰܙܢܳܐ܆ ܒܡܰܚ̈ܫܒܳܬܳܐ ܩܰܛܺܝ̈ܢܳܬܳܐ ܚܳܙܶܝܢܰܢ ܠܡܶܠܬܳܐ ܕܰܐ‌ܠܳܗܳܐ܆ ܕܶܐܬܚܰܝܰܕ ܠܐܢܳܫܽܘܬܳܐ ܕܺܝܠܰܢ܆ ܝܺܕܺܝܥܳܐ ܟܺܝܬ ܕܰܠܒܶܣܪܳܐ ܕܰܡܢܰܦܰܫ ܡܶܬܗܰܘܢܳܢܳܐܺܝܬ܆ ܐܰ‌ܠܳܗܳܐܺܝܬ ܘܰܠܥܶܠ ܡܶܢ ܗܰܘܢܳܐ܆ ܐܰܝܟܰܢܳܐ ܕܠܳܐ ܠܶܗ ܠܒܶܣܪܳܐ ܠܰܟܝܳܢܳܐ ܕܺܝܠܶܗ ܢܫܰܢܶܐ܆ ܐܳܦܠܳܐ ܗܽܘ ܬܽܘܒ ܠܒܶܣܪܳܐ ܢܶܫܬܰܚܠܰܦ. ܚܰܕ ܕܶܝܢ ܩܢܽܘܡܳܐ ܐܺܝܬܰܘܗ̱ܝ ܡܶܢ ܬܪ̈ܰܝܗܽܘܢ܆ ܘܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ܆ ܐܳܦܶܢ ܠܳܐ ܒܠܺܝ̈ܠܳܢ ܗܳܠܶܝܢ ܕܡܶܢܗܶܝܢ ܠܚܰܕ ܐܶܬܟܰܢܰܫ̈ܝ̱܆ ܟܰܕ ܦܰܓܪܳܐ ܠܳܐ ܐܶܫܬܰܓܢܺܝ ܡܰܢ ܒܰܟܝܳܢܳܐ܆ ܒܰܚܕܳܝܽܘܬܳܐ ܕܶܝܢ ܪܺܝܫܳܝܬܳܐ ܕܰܠܘܳܬ ܡܶܠܬܳܐ ܗܶܢܶܝܢ ܟܰܕ ܗܶܢܶܝܢ ܠܗܰܘ ܕܡܶܫܟܰܚ܆ ܘܟܰܕ ܡܰܚܶܐ ܘܟܰܕ ܡܰܐܣܶܐ.

ܘܗܳܕܶܐ ܕܶܝܢ ܐܶܡܰܪܢܰܢ܆ ܟܰܕ ܐܰܝܟ ܕܰܒܬܰܪܥܺܝܬܳܐ ܩܰܛܺܝܢܬܳܐ ܐܶܬܕܒܰܪܢܰܢ ܒܰܩܛܺܝܪܳܐ. ܠܡܶܠܬܳܐ ܓܶܝܪ ܗܰܘ ܕܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܶܬܦܰܣܩܳܢܳܐܺܝܬ ܐܶܬܒܰܣܰܪ ܘܶܐܬܒܰܪܢܰܫ܆ ܟܽܠܗܶܝܢ ܐܺܝܬ ܠܡܶܫܟܳܚܽܘ ܕܡܰܥܒܶܕ܆ ܗܳܠܶܝܢ ܦܰܐܺܝܬ ܠܰܐܠܳܗܳܐ ܘܗܳܠܶܝܢ ܐ̱ܢܳܫܳܝ̈ܳܬܳܐ܆ ܘܳܐܦܠܳܐ ܐ̱ܢܳܫ ܐܳܡܰܪ܆ ܕܡܶܠܬܳܐ ܡܰܢ ܕܰܐ‌ܠܳܗܳܐ ܐܰܥܒܶܕ ܙܦܠܢ܆ ܟܝܳܢܳܐ ܕܶܝܢ ܐ̱ܢܳܫܳܝܳܐ ܗܰܘ ܙܦܠܢ. ܦܽܘܠܳܓܳܐ ܓܶܝܪ ܕܐ̱ܪܳܙܳܐ ܐܺܝܬܶܝܗ̇ ܗܳܕܶܐ. ܙܳܕܶܩ ܕܶܝܢ ܠܡܶܕܰܥ ܣܰܟܽܘܠܬܳܢܳܐܺܝܬ ܘܡܶܬܒܰܝܢܳܢܳܐܺܝܬ ܕܰܐ̱ܚܪܺܢܳܐ ܡܶܕܶܡ ܐܺܝܬܰܘܗ̱ܝ ܗܰܘ ܕܡܰܥܒܶܕ܆ ܘܰܐ̱ܚܪܺܢܐ ܗܺܝ ܡܰܥܒܕܳܢܽܘܬܳܐ܆ ܘܰܐ̱ܚܪܺܢܐ ܗܽܘ ܥܒܳܕܳܐ[38]. ܘܗܳܠܶܝܢ ܣܰܓܺܝ ܪ̈ܰܚܺܝܩܳܢ ܡܶܢ ܚ̈ܕܳܕܶܐ. ܗܰܘ ܓܶܝܪ ܕܡܰܥܒܶܕ ܐܺܝܬܰܘܗ̱ܝ܆ ܗܰܘ ܕܰܠܘܳܬ ܗܳܝ ܕܢܶܥܒܶܕ ܡܶܕܶܡ ܡܶܬܬܙܺܝܥ. ܡܰܥܒܕܳܢܽܘܬܳܐ ܕܶܝܢ ܗܳܝ ܡܶܬܬܙܺܝܥܳܢܽܘܬܳܐ ܡܰܥܒܕܳܢܺܝܬܳܐ ܐܰܝܟ ܕܰܠܡܺܐܡܰܪ܆ ܘܬܰܪܥܺܝܬܳܐ ܚܺܐܦܳܢܝܬܳܐ ܕܰܠܘܳܬ ܗܳܕܶܐ. ܥܒܳܕܳܐ ܕܶܝܢ ܗܰܘ ܡܳܐ ܕܡܶܢ ܗܳܕܶܐ ܡܶܫܬܰܡܠܶܐ.

ܐܰ݀ܝܬܶܐ ܠܳܟ ܣܳܗܕܳܗ̇ ܕܗܳܕܶܐ܆ ܠܗܰܘ ܚܰܟܺܝܡܳܐ ܒܰܐܠܳܗܳܝ̈ܳܬܳܐ ܒܰܣܶܝܠܺܝܽܘܤ. ܠܐܘܢܘܡܝܘܤ ܓܶܝܪ ܗܰܘ ܕܰܠܫܳܢܝܽܘܬܶܗ ܕܰܐܪܺܝܽܘܤ ܝܺܨܶܦ ܠܰܡܚܰܦܳܝܽܘ܆ ܒܰܒܓ̣̈ܳܠܶܐ ܚܶܪ̈ܝ̣ܳܝ̣ܶܐ ܘܰܡܓܰܕܦܳܢ̈ܶܐ ܘܕܰܡܛܰܫܝܽܘܬܳܐ ܣܰܓܺܝܐܬܳܐ ܐܺܝܬ ܒܗܽܘܢ܆ ܕܳܐܡܰܪ ܗ̱ܘܳܐ ܠܶܗ ܠܰܒܪܳܐ ܕܰܥܒܳܕܳܐ ܐܺܝܬܰܘܗ̱ܝ ܕܰܐܒܳܐ ܘܠܰܘ ܝܰܠܕܳܐ܆ ܡܫܰܐܶܠ ܘܡܰܟܶܤ ܠܳܗ̇ ܠܠܶܟܣܺܝܤ ܪܰܒܳܐ ܒܰܣܶܝܠܺܝܽܘܤ ܘܳܐܡܰܪ܆ ܡܳܢܳܐ ܐܳܡܰܪ ܐܰܢ̱ܬ ܐܰܘ ܡܳܢܳܐ ܡܶܣܬܰܟܰܠ ‌ܐܰܢ̱ܬ ܠܰܥܒܳܕܳܐ ܗܳܢܳܐ. ܐܰܝ̇ܕܳܐ ܡܶܢܗܶܝܢ. ܡܰܥܒܕܳܢܽܘܬܳܐ ܗܳܝ ܕܰܐܝܟ ܕܰܠܡܺܐܡܰܪ ܚܺܐܦܳܐ ܐܺܝܬܶܝܗ̇ ܘܡܶܬܬܙܺܝܥܳܢܽܘܬܳܐ ܡܰܥܒܕܳܢܺܝܬܳܐ܆ ܡܳܕܶܝܢ ܒܪܳܐ܆ ܘܠܳܐ ܗܰܘ ܕܰܐܥܒܶܕ ܐܺܝܬܰܘܗ̱ܝ܆ ܘܳܐܦܠܳܐ ܗܰܘ ܕܶܐܬܬܰܥܒܰܕ܆ ܗܳܢܰܘ ܕܶܝܢ ܗܰܘ ܕܡܶܢ ܡܰܥܒܕܳܢܽܘܬܳܐ ܐܶܫܬܰܡܠܺܝ. ܐܶܠܳܐ ܬܽܘܒ ܟܺܝܬ܆ ܐܳܦ ܠܳܐ ܡܩܰܝܡܰܐ ܗ̱ܘ ܒܪܳܐ. ܗܺܝ ܓܶܝܪ ܡܰܥܒܕܳܢܽܘܬܳܐ ܘܚܺܐܦܳܐ ܗܰܘ ܕܰܠܘܳܬ ܗܳܝ ܕܢܶܥܒܶܕ ܡܶܕܶܡ܆ ܘܠܳܐ ܣܳܟ ܐܺܝܬܰܘܗ̱ܝ ܡܩܰܝܡܳܐ. ܐܶܢ ܕܶܝܢ ܐܳܡܰܪ ܐܰܢ̱ܬ ܠܶܗ ܕܠܰܘ ܡܰܥܒܕܳܢܽܘܬܳܐ ܐܺܝܬܰܘܗ̱ܝ܆ ܐܶܠܳܐ ܗܰܘ ܕܶܐܬܬܰܥܒܰܕ܆ ܬܠܺܝܬܳܝܳܐ ܢܶܫܬܟܰܚ ܡܶܢ ܐܰܒܳܐ. ܗܰܘ ܕܰܐܥܒܶܕ ܓܶܝܪ ܩܰܕܡܳܝܳܐ. ܬܪܰܝܳܢܺܝܬܳܐ ܕܶܝܢ ܡܰܥܒܕܳܢܽܘܬܳܐ. ܘܰܬܠܺܝܬܳܝܳܐ ܗܰܘ ܕܶܐܬܬܰܥܒܰܕ܆ ܐܰܘܟܺܝܬ ܗܽܘ ܥܒܳܕܳܐ.

ܫܰܦܺܝܪܳܐ ܕܶܝܢ ܣܰܓܺܝ܆ ܕܳܐܦ ܒܗܶܝܢ ܒܡ̈ܶܠܶܐ ܢܶܫܡܥܺܝܗ̇ ܠܒܰܪ̱ܬ ܩܠܶܗ ܕܡܰܠܦܳܢܳܐ. ܕܺܐܝܬ ܠܳܗ̇ ܗܳܟܰܢܳܐ. ܐܶܢ ܒܪܳܐ ܥܒܳܕܰܐ ܗ̄ܘ ܘܠܰܘ ܝܰܠܕܳܐ܆ ܘܠܳܐ ܗܰܘ ܕܰܐܥܒܶܕ܆ ܘܠܳܐ ܬܽܘܒ ܗܰܘ ܕܶܐܬܬܰܥܒܰܕ ܐܺܝܬܰܘܗ̱ܝ ܗܽܘ. ܐ̱ܚܪܺܢܳܐ ܓܶܝܪ ܡܶܕܶܡ܆ ܡܰܥܒܕܳܢܽܘܬܳܐ ܠܒܰܪ ܡܶܢܗܽܘܢ. ܐܶܠܳܐ ܐܳܦ ܠܳܐ ܡܩܰܝܰܡܬܳܐ. ܐܳܦܠܳܐ ܓܶܝܪ ܚܕܳܐ ܡܰܥܒܕܳܢܽܘܬܳܐ ܡܩܰܝܰܡܬܳܐ. ܐܶܢ ܕܶܝܢ ܗܰܘ ܕܶܐܬܬܰܥܒܰܕ܆ ܬܠܺܝܬܳܝܰܐ ܗ̱ܘ ܡܶܢ ܐܰܒܳܐ܆ ܘܠܰܘ ܕܠܳܐ ܡܶܨܥܳܝܳܐ. ܗܰܘ ܓܶܝܪ ܕܰܐܥܒܶܕ ܩܰܕܡܳܝܳܐ. ܒܳܬܰܪܟܶܢ ܡܰܥܒܕܳܢܽܘܬܳܐ܆ ܘܗܳܟܰܢܐ ܗܰܘ ܕܶܐܬܬܰܥܒܰܕ.

ܪ̈ܰܫܺܝܥܶܐ ܗܳܟܺܝܠ ‌ܐܺܝܬܰܝܗܽܘܢ ܗܳܢܽܘܢ ܕܥܰܠ ܡܫܺܝܚܳܐ ܬܪܶܝܢ ܟܝܳܢ̈ܶܐ ܕܡܰܥܒܕܺܝܢ ܡܰܠܦܺܝܢ. ܐܰܢܰܢܩܺܐ ܓܶܝܪ ܕܟܽܠ ܚܰܕ ܟܝܳܢܳܐ܆ ܡܰܥܒܕܳܢܽܘܬܳܐ ܕܺܝܠܳܢܳܝܬܳܐ ܕܺܝܠܶܗ ܘܰܦܪܺܝܫܬܳܐ ܢܶܗܘܶܐ ܐܺܝܬ ܠܶܗ. ܗܳܢܰܘ ܕܶܝܢ ܡܶܬܬܙܺܝܥܳܢܽܘܬܳܐ ܡܰܥܒܕܳܢܺܝܬܳܐ. ܐܶܢ ܕܶܝܢ ܚܰܕ ܡܶܢ ܬܰܪܬܶܝܢ ܡܰܘܕܶܝܢ ܚ̱ܢܰܢ ܡܫܺܝܚܳܐ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܐܳܡܰܪ ܐ̱ܢܳܐ ܘܡܶܢ ܐ̱ܢܳܫܽܘܬܳܐ܆ ܘܚܰܕ ܦܰܪܨܽܘܦܳܐ ܘܚܰܕ ܩܢܽܘܡܳܐ܆ ܘܚܰܕ ܟܝܳܢܳܐ ܕܰܡܒܰܣܰܪ ܕܡܶܠܬܳܐ܆ ܢܳܩܦܳܐܺܝܬ ܚܰܕ ܢܶܗܘܶܐ ܗܰܘ ܕܡܰܥܒܶܕ܆ ܘܰܚܕܳܐ ܡܶܬܬܙܺܝܥܳܢܽܘܬܳܐ ܕܺܝܠܶܗ ܕܰܠܘܳܬ ܗܳܝ ܕܢܰܥܒܶܕ܆ ܐܳܦܶܢ ܡܫܰܚ̈ܠܦܶܐ ܐܺܝܬܰܝܗܽܘܢ ܥܒ̈ܳܕܶܐ܆ ܐܳܡܰܪ ܐ̱ܢܳܐ ܕܶܝܢ ܫܽܘܡ̈ܠܳܝܶܐ ܗܳܠܶܝܢ ܕܡܶܢ ܡܰܥܒܕܳܢܽܘܬܳܐ. ܗܳܠܶܝܢ ܡܰܢ ܓܶܝܪ ܐܺܝܬܰܝܗܽܘܢ ܦܰܐܝ̣̈ܰܝ̣ ܠܰܐܠܳܗܳܐ܆ ܗܳܠܶܝܢ ܕܶܝܢ ܐ̱ܢܳܫܳܝ̈ܶܐ. ܕܡܶܢ ܚܰܕ ܘܗܽܘ ܟܰܕ ܗܽܘ ܐܶܬܬܰܥܒܰܕܘ܆ ܡܶܢ ܐܰ‌ܠܳܗܳܐ ܗܰܘ ܕܶܐܬܒܰܣܰܪ ܘܶܐܬܒܰܪܢܰܫ ܠܳܐ ܡܶܫܬܰܚܠܦܳܢܳܐܺܝܬ. ܘܠܳܐ ܬܡܺܝܗܳܐ܆ ܐܶܡܰܬܝ ܕܳܐܦ ܥܒ̈ܳܕܶܐ ܕܒܰܪܢܳܫܳܐ ܕܺܝܠܰܢ܆ ܗܳܠܶܝܢ ܡܰܢ ܐܺܝܬܰܝܗܽܘܢ ܡܶܬܗܰܘ̈ܢܳܢܶܐ܆ ܗܳܠܶܝܢ ܕܶܝܢ ܡܶܬܪ̈ܰܓܫܳܢܶܐ ܘܦܰܓܪ̈ܳܢܳܝܶܐ܆ ܕܰܐܝܟ ܐܰܝܟܰܢ܆ ܗܳܝ ܕܢܶܬܡܰܠܰܟ ܘܢܶܬܚܰܫܰܒ ܡܶܛܽܠ ܡܶܕܶܡ ܕܙܳܕܶܩ ܕܢܶܣܥܽܘܪ܆ ܘܢܩ݀ܦܠ ܒܚܽܘܫܳܒܰܢ ܘܰܢܫܰܠܡܺܝܘܗ̱ܝ ܠܪܶܥܝܳܢܳܐ ܥܒܳܕܳܐ ܗܰܘ ܡܶܬܗܰܘܢܳܢܳܐ܆ ܐܰܝܟ ܗܳܝ ܕܢܶܬܪܰܥܶܐ ܕܰܐܝܟܰܢܳܐ ܙܳܕܶܩ ܕܢܰܬܩܶܢ ܡܕܺܝܢ̱ܬܳܐ ܐܰܘ ܒܰܝܬܳܐ ܐܰܘ ܐܶ‌ܠܦܳܐ܆ ܗܳܝ ܕܶܝܢ ܕܢܶܒܢܶܐ ܒܰܝܬܳܐ ܐܰܘ ܢܶܩܒܽܘܥ ܐܶ‌ܠܦܳܐ܆ ܡܶܬܪܰܓܫܳܢܳܐ ܘܦܰܓܪܳܢܳܝܳܐ. ܐܶܠܳܐ ܚܰܕ ܒܰܪܢܳܫܳܐ ܗܰܘ ܕܡܶܢ ܢܰܦܫܳܐ ܘܦܰܓܪܳܐ ܠܗܳܕܶܐ ܟܺܝܬ ܘܰܠܗܳܝ ܐܰܥܒܶܕ܆ ܘܰܚܕܳܐ ܡܶܬܬܙܺܝܥܳܢܽܘܬܳܐ ܡܰܥܒܕܳܢܺܝܬܳܐ.

ܡܶܛܽܠ ܗܳܕܶܐ ܐܳܦ ܥܰܠ ܡܫܺܝܚܳܐ ܦܳܪܽܘܩܰܢ ܝܳܕܥܺܝܢܰܢ ܫܽܘܚܠܳܦܳܐ ܕܰܒ̈ܢܳܬ ܩ̈ܳܠܶܐ. ܗܳܠܶܝܢ ܡܰܢ ܐܺܝܬܰܝܗܶܝܢ ܦܰܐܺܝܬ ܠܰܐܠܳܗܳܐ. ܗܳܠܶܝܢ ܕܶܝܢ ܐ̱ܢܳܫܳܝ̈ܳܬܳܐ. ܗܳܠܶܝܢ ܕܶܝܢ܆ ܕܰܐܟܚܕܳܐ ܐܺܝܬ ܠܗܶܝܢ ܗܳܝ ܕܦܰܐܝܳܐ ܠܰܐܠܳܗܳܐ ܘܗ̱ܝ ܐ̱ܢܳܫܳܝܬܳܐ. ܐܶܠܳܐ ܠܰܘ ܡܶܛܽܠ ܗܳܕܶܐ ܢܺܐܡܰܪ܆ ܕܗܳܠܶܝܢ ܡܰܢ ܡܶܢ ܗܰܘ ܟܝܳܢܳܐ ܐܰܡܺܝܪ̈ܳܢ܆ ܗܳܠܶܝܢ ܕܶܝܢ ܡܶܢ ܗܰܘ. ܐܰܡܺܝܪ̈ܳܢ ܓܶܝܪ ܡܶܢ ܚܰܕ ܘܗܽܘ ܟܰܕ ܗܽܘ ܡܫܺܝܚܳܐ ܠܳܐ ܡܦܰܠܓܳܐܺܝܬ. ܐ̱ܢܳܫܺܝ̈ܢ ܕܶܝܢ ܟܰܕ ܡܰܪܫܥܺܝܢ ܐܰܟܚܕܳܐ ܘܰܟܪܺܝܗܶܝܢ ܠܳܐ ܪܰܕܝܽܘܬܳܐ ܗܳܝ ܐ̱ܚܪܳܝܬܳܐ܆ ܥܰܠ ܫܽܘܚܠܳܦܳܐ ܕܰܥܒ̈ܳܕܶܐ ܘܕܰܒ̈ܢܳܬ ܩ̈ܳܠܶܐ܆ ܬܪܶܝܢ ܕܡܰܥܒܕܺܝܢ ܘܰܡܡܰܠܠܺܝܢ ܐܰܩܺܝܡܘ[39]܆ ܟܰܕ ܣܰܓܺܝ ܟܢܺܝܟܳܐܺܝܬ ܠܦܰܪ̈ܨܽܘܦܶܐ ܟܝܳܢ̈ܶܐ ܫܰܡܰܗܘ܆ ܘܠܰܬܪܶܝܢ ܒܢܰܝ̈ܳܐ ܘܰܡܫܺܝ̈ܚܶܐ ܒܗܳܢܳܐ ܓܶܠܕܳܐ ܕܰܐܪܝܳܐ ܟܰܣܺܝܘ.

ܐܶܠܳܐ ܬܽܘܒ ܠܘܳܬܶܗ ܕܣܰܢܝܳܐ ܦܳܢܶܐ ܐ̱ܢܳܐ܆ ܘܡܶܬܕܰܡܰܪ ܐ̱ܢܳܐ ܒܛܽܘܦܣܶܗ ܕܐ̱ܪܳܙܳܐ. ܐܺܝܬܰܘܗ̱ܝ ܓܶܝܪ ܣܰܢܝܳܐ ܡܰܘܥܺܝܬܳܐ[40] ܕܠܳܐ ܦܺܐܪ̈ܶܐ܆ ܕܰܒܟܽܘ̈ܒܶܐ ܚܰܪ̈ܺܝܦܶܐ ܣܒܺܝܣܳܐ. ܠܰܚ̈ܛܳܗܶܐ ܕܶܝܢ ܥܝܳܕܰܐ ܗ̄ܘ ܠܰܟܬܳܒܳܐ ܐܰ‌ܠܳܗܳܝܳܐ ܠܡܶܩܪܳܐ ܟܽܘܒ̈ܶܐ܆ ܐܰܝܟ ܗܳܝ ܕܰܐܡܺܝܪܳܐ ܠܰܢܒܺܝܳܐ ܕܰܘܺܝܕ. ܐܶܬܗܰܦܟܶܬ ܠܕܳܘܝܽܘܬܳܐ ܟܰܕ ܐܶܬܩܒܰܥ ܒܺܝ ܟܽܘܒܳܐ܆ ܠܰܚܛܺܝܬܳܐ ܕܺܝܠܝ ܐܰܘܕܥܶܬ܆ ܘܰܠܠܳܐ ܢܳܡܽܘܣܳܝܽܘܬܳܐ ܕܺܝܠܝ ܠܳܐ ܟܰܣܺܝܬ̣[41]. ܘܰܐܝܟ ܡܰܬܠܳܐ ܗܰܘ ܕܦܳܪܽܘܩܰܢ܆ ܗܰܘ ܕܳܐܡܰܪ ܕܡܶܬܚܰܢܩܳܐ ܡܶܠܬܳܐ ܕܡܰܠܦܳܢܽܘܬܳܐ ܡܶܢ ܟܽܘ̈ܒܶܐ܆ ܗܳܠܶܝܢ ܕܰܐܘܕܰܥ ܕܺܐܝܬܰܝܗܽܘܢ ܡܰܪ̈ܢܝܳܬܶܗ ܕܥܳܠܡܳܐ ܗܳܢܳܐ[42]. ܘܰܐܝܟ ܟܰܪܡܳܐ ܗܰܘ ܡܶܬܗܰܘܢܳܢܳܐ ܕܺܐܝܣܪܳܐܶܝܠ ܗܰܘ ܕܰܠܘܳܬ ܐܶܫܰܥܝܳܐ܆ ܕܡܶܬܪܫܶܐ ܗ̱ܘܳܐ ܡܶܢ ܩܕܺܝܡ ܕܟܽܘ̈ܒܶܐ ܐܰܝܬܺܝ ܚܠܳܦ ܥܶܢ̈ܒܶܐ܆ ܘܒܳܬܰܪ ܟܶܢ ܫܳܡܰܥ ܗ̱ܘܳܐ ܡܶܢ ܦܰܠܳܚܳܐ܆ ܣܰܟܺܝܬ̣ ܐܰܝܟܰܢܳܐ ܕܬܶܥܒܶܕ ܕܺܝܢܳܐ܆ ܥܒܰܕܬ ܕܶܝܢ ܠܳܐ ܢܳܡܽܘܣܳܝܽܘܬܳܐ܆ ܘܠܰܘ ܙܰܕܺܝܩܽܘܬܳܐ܆ ܐܶܠܳܐ ܩܥܳܬܳܐ[43]. ܗܳܕܶܐ ܗܳܟܺܝܠ ܡܚܰܘܶܐ ܛܽܘܦܣܳܐ. ܕܡܶܠܬܶܗ ܕܰܐ‌ܠܳܗܳܐ ܗܰܘ ܕܒܰܚܙܳܬܳܐ ܕܢܽܘܪܳܐ ܐܶܬܥܰܪܙܰܠ ܥܰܡ ܣܰܢܝܳܐ ܗܳܝܕܶܝܢ܆ ܗܽܘ ܐܳܦ ܒܚܰܪܬܳܐ ܕܙܰܒ̈ܢܶܐ ܠܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ ܚܰܝܶܕ ܠܶܗ܆ ܗܰܘ ܕܡܶܢ ܐܳܕܳܡ ܗܰܘ ܕܰܬܚܶܝܬ ܚܛܺܝܬܳܐ ܢܦܰܠ ܢܳܚܶܬ ܒܝܽܘܒܳܠܳܐ܆ ܗܰܘ ܕܡܶܢ ܓܶܢܣܳܐ ܗܰܘ܆ ܐܳܦܶܢ ܕܠܳܐ ܚܛܺܝܬܳܐ ܐܶܬܒܰܣܰܪ ܗܽܘ܆ ܘܡܶܢ ܪܽܘܚܳܐ ܩܰܕܺܝܫܳܐ܆ ܘܡܶܢ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ܆ ܘܰܤܛܰܪ ܡܶܢ ܙܰܪܥܳܐ ܐ̱ܢܳܫܳܝܳܐ ܘܟܽܠܳܗ̇ ܪܶܓܬܳܐ.

ܡܶܬܬܦܺܝܤ ܐ̱ܢܳܐ ܕܶܝܢ ܡܶܛܽܠ ܗܳܠܶܝܢ܆ ܕܳܐܦ ܗܳܢܽܘܢ ܡܦܰܫ̈ܩܳܢܶܐ ܕܰܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܗܳܢܽܘܢ ܕܡܶܢ ܥܶܒܪܳܝܳܐ ܠܘܳܬ ܠܶܫܳܢܳܐ ܝܰܘܢܳܝܳܐ ܐܰܥܒܰܪܘ ܐܶܢܽܘܢ܆ ܘܝܰܬܺܝܪܳܐܺܝܬ ܗܳܢܽܘܢ ܫܰܒܥܺܝܢ܆ ܟܰܕ ܡܶܢ ܐܰ‌ܠܳܗܳܐ ܐܶܬܬܰܥܒܰܕܘ ܕܶܟܪܳܢܳܐܝܬ[44] ܐܰܫܠܡܽܘܗ̱ܝ ܠܰܫܡܳܐ܆ ܘܙܰܒ̈ܢܳܬܳܐ ܣܰܓܺܝ̈ܳܐܬܳܐ ܐܶܡܰܪܘ ܗܰܘ ܣܰܢܝܳܐ܆ ܘܳܐܦܠܳܐ ܚܕܳܐ ܙܒܰܢ̱ܬܳܐ ܗܳܝ ܣܰܢܝܳܐ. ܡܶܛܽܠ ܟܺܝܬ ܕܡܶܠܬܶܗ ܕܰܐ‌ܠܳܗܳܐ܆ ܠܰܟܝܳܢܳܐ ܕܺܝܠܰܢ ܕܰܠܘܳܬ ܢܶܩܒܬܳܢܳܝܽܘܬܳܐ ܘܫܰܪܝܽܘܬܳܐ ܪܦܺܝܬܳܐ ܫܪܰܥ ܗ̱ܘܳܐ܆ ܘܡܶܢ ܪ̈ܓܺܝܓܳܬܳܐ ܡܶܬܬܕܺܝܫ ܗ̱ܘܳܐ܆ ܘܰܠܓܰܒܪܽܘܬܳܐ ܗܳܝ ܟܝܳܢܳܝܬܳܐ ܛܥܳܐ ܗ̱ܘܳܐ܆ ܐܰܝܟܰܢܳܐ ܕܡܶܕܶܡ ܚܰܕܬܳܐ ܐܳܡܰܪ ܟܰܕ ܚܰܕܬ̣ܽܘܬ̣ ܦܣܳܩܳܐ ܥܳܒܶܕ ܐ̱ܢܳܐ ܠܘܳܬ ܠܶܟܣܺܝܤ ܗܳܕܶܐ܆ ܕܰܟܪܶܗ ܒܝܰܕ ܡܶܬܒܰܣܪܳܢܽܘܬܳܐ ܐܰ‌ܠܳܗܳܝܬܳܐ. ܗܳܢܰܘ ܕܶܝܢ ܥܰܒܕܶܗ ܕܶܟܪܳܐ. ܘܠܰܘ ܓܰܒܪܳܢܳܝܳܐ ܒܰܠܚܽܘܕ܆ ܐܶܠܳܐ ܐܳܦ ܦܐܶܐ ܠܰܐܠܳܗܳܐ ܚܰܘܝܶܗ܆ ܒܰܚܕܳܝܽܘܬܳܐ ܗܳܝ ܕܒܰܩܢܽܘܡܳܐ. ܘܰܐܝܟ[45] ܕܒܰܫܪܳܪܳܐ ܣܰܢܝܳܐ ܐܰܘܟܺܝܬ ܡܶܬܕܰܪܟܳܢܳܐ ܚܰܘܝܶܗ܆ ܟܰܕ ܢܰܣܒܶܗ ܡܶܢ ܓܶܢܣܳܐ ܕܺܝܠܰܢ ܗܰܘ ܟܽܘܒܳܢܳܝܳܐ ܘܰܕܠܳܐ ܦܺܐܪ̈ܶܐ܆ ܘܕܰܕܟܽܠ ܟܽܠܶܗ ܐܺܝܬܰܘܗ̱ܝ ܗ̱ܘܳܐ ܠܳܐ ܡܶܬܕܰܪܟܳܢܳܐ ܠܰܐܠܳܗܳܐ܆ ܘܡܶܬܕܰܪܟܳܢܳܐ ܥܰܒܕܶܗ. ܘܟܽܠܶܗ ܗܳܢܳܐ܆ ܐܰܝܟܰܢܳܐ ܕܳܐܦ ܠܒܰܛܢܳܐ ܢܶܬܪܡܶܐ ܒܰܒܣܰܪ ܘܰܠܝܰܠܕܳܐ܆ ܒܳܗ̇ ܒܰܕܡܽܘܬܳܐ ܠܰܢ܆ ܐܳܦܶܢ ܠܥܶܠ ܡܶܢܰܢ܆ ܡܶܛܽܠ ܗܳܝ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܐܶܡܳܐ ܒܬܽܘܠܰܬ ܒܟܽܠܙܒܰܢ. ܫܳܡܥܺܝܢܰܢ ܠܶܗ ܓܶܝܪ ܠܦܰܘܠܽܘܤ ܕܳܐܡܰܪ ܢܰܗܺܝܪܳܐܺܝܬ܆ ܡܶܛܽܠ ܟܺܝܬ ܕܰܛܠܳܝ̈ܶܐ ܐܶܫܬܰܘܬܰܦܘ ܒܒܶܣܪܳܐ ܘܒܰܕܡܳܐ܆ ܐܳܦ ܗܽܘ ܒܳܗ̇ ܒܰܕܡܽܘܬܳܐ ܐܶܫܬܰܘܬܰܦ ܒܗܶܝܢ ܟܰܕ ܒܗܶܝܢ[46].

ܗܳܠܶܝܢ ܕܶܝܢ܆ ܠܰܘ ܡܥܰܩܒܳܢܳܐܺܝܬ ܦܝܠܘܣܘܦܝܬܝܢܐ ܗܘ̣̈ܰܝ ܡܶܢܰܢ܆ ܐܰܝܟ ܕܡܶܢ ܫܡܳܐ ܗܰܘ ܕܣܰܢܝܳܐ. ܣܰܓܺܝ̈ܳܐܬܳܐ ܓܶܝܪ ܕܰܐܝܟ ܗܳܠܶܝܢ ܐܺܝܬ ܠܡܶܫܟܳܚܽܘ܆ ܕܣܳܡܘ ܗܳܢܽܘܢ ܕܦܰܫܶܩܘ܆ ܡܶܢ ܡܶܬܬܙܺܝܥܳܢܽܘܬܳܐ ܐܰ‌ܠܳܗܳܝܬܳܐ. ܐܳܦ ܓܶܝܪ ܘܟܰܕ ܡܶܛܽܠ ܦܐܣܟܐ ܗܰܘ ܢܳܡܽܘܣܳܝܳܐ ܥܳܒܕܺܝܢ ܗ̱ܘܰܘ ܦܽܘܫܳܩܳܐ܆ ܗܰܘ ܟܺܝܬ ܕܰܡܥܰܕܥܕܺܝܢ ܗ̱ܘܰܘ ܝܽܗ̱ܘ̈ܕܳܝܶܐ܆ ܟܰܕ ܥܽܘܗܕܳܢܳܐ ܥܳܒܕܺܝܢ ܗ̱ܘܰܘ ܕܰܥܪܽܘܩܝܗܽܘܢ ܘܰܕܚܽܘܪܳܪܗܽܘܢ ܗܰܘ ܕܡܶܢ ܡܶܨܪܶܝܢ܆ ܘܒܳܬܰܪܟܶܢ ܕܡܰܥܒܰܪܬܳܐ ܗܳܝ ܕܰܥܒܰܪܘ ܒܝܰܡܳܐ ܗܰܘ ܣܽܘܡܳܩܳܐ ܟܰܕ ܡܗܰܠܟܺܝܢ ܒܪ̈ܶܓܠܶܐ܆ ܗܳܢܽܘܢ ܡܰܢ ܐ̱ܚܪ̈ܳܢܶܐ܆ ܦܐܣܩ ܐܰܫܠܡܽܘܗ̱ܝ ܠܰܫܡܶܗ ܕܥܺܐܕܳܐ. ܗܳܝ ܟܺܝܬ ܕܺܐܝܬܶܝܗ̇ ܡܰܥܒܰܪܬܳܢܳܝܳܐ. ܗܳܢܽܘܢ ܕܶܝܢ ܫܰܒܥܺܝܢ܆ ܟܰܕ ܪܽܘܚܳܐ ܐܰ‌ܠܳܗܳܝܳܐ ܡܰܙܥܶܩ ܗ̱ܘܳܐ ܒܗܽܘܢ ܐܰܝܟܰܢܳܐ ܕܶܐܡܪܶܬ܆ ܦܐܣܟܐ ܐܰܘܟܺܝܬ ܚܰܫܳܐ ܠܶܗ ܠܥܺܐܕܳܐ ܩܕܳܡ ܟܽܠܗܶܝܢ ܗܳܠܶܝܢ ܫܢܰܝ̈ܳܐ܆ ܠܰܘ ܦܰܫܶܩܘ ܡܐܰܠܽܘܢ ܐܶܠܳܐ ܐܶܬܢܰܒܺܝܘ܆ ܟܰܕ ܡܶܢ ܚܰܫܳܐ ܦܳܪܽܘܩܳܝܳܐ ܕܰܐ‌ܠܳܗܳܐ ܗܰܘ ܕܶܐܬܒܰܣܰܪ ܥܬܺܝܕ ܗ̱ܘܳܐ ܕܰܢܫܰܪܪܶܗ ܥܠܰܘܗ̱ܝ ܠܰܫܡܳܐ܆ ܐܰܝܟ ܕܡܰܨܝܳܐ ܝܰܬܺܝܪܳܐܺܝܬ. ܐܳܦ ܓܶܝܪ ܗܽܘ ܗܰܘ ܦܐܣܟܐ ܢܳܡܽܘܣܳܝܳܐ܆ ܛܽܘܦܣܳܐ ܐܺܝܬܰܘܗ̱ܝ ܗ̱ܘܳܐ ܕܗܳܢܳܐ ܕܺܝܠܰܢ ܘܫܰܪܺܝܪܳܐ܆ ܗܰܘ ܕܒܺܐܝܕܰܘ̈ܗ̱ܝ ܐܳܦ ܚܢܰܢ ܠܛܳܥܝܽܘܬܳܐ ܗܳܝ ܕܳܚܠܰܬ ܠܫ̈ܺܐܕܶܐ ܫܒܰܩܢܰܢ܆ ܠܡܶܨܪܶܝܢ ܗܳܝ ܡܶܬܗܰܘܢܳܢܺܝܬܳܐ܆ ܘܰܠܡܶܨܪ̈ܳܝܶܐ܆ ܠܫ̈ܺܐܕܶܐ ܗܳܢܽܘܢ ܒܺܝ̈ܫܶܐ܆ ܘܰܠܦܶܪܥܽܘܢ܆ ܠܳܐܟܶܠܩܰܪܨܳܐ ܪܺܝܫܳܢܳܐ ܕܗܳܠܶܝܢ܆ ܘܰܥܒܰܪܢܰܢ ܠܒܺܝܫܽܘܬܳܐ ܗܳܝ ܡܰܠܺܝܚܬܳܐ ܘܰܐܫܺܝܕܬܳܐ ܘܰܕܒܰܪ̈ܓܺܝܓܳܬܳܐ ܪܳܕܝܳܐ܆ ܟܰܕ ܐܶܬܕܰܟܺܝܢܰܢ ܒܰܥܡܳܕܳܐ ܩܰܕܺܝܫܳܐ܆ ܘܶܐܬܚܰܣܺܝܢܰܢ ܒܰܕܡܳܐ܆ ܠܰܘ ܕܥܶܪܒܳܐ ܡܶܕܶܡ܆ ܐܶܠܳܐ ܕܺܝܠܶܗ ܕܰܒܪܶܗ ܕܰܐ‌ܠܳܗܳܐ.

ܠܳܐ ܐ̱ܢܳܫ ܕܶܝܢ ܒܬܰܚܘܺܝܬܳܐ ܗܳܝ ܕܣܰܢܝܳܐ܆ ܟܰܕ ܡܰܢܺܝܢܳܐܺܝܬ ܡܶܬܬܰܘܒܰܠ ܘܡܶܬܓܪܶܦ ܠܗܰܘܢܳܐ ܡܰܣܠܝܳܐ܆ ܢܶܣܒܰܪ ܕܰܡܢܳܬܳܐ ܕܰܟܝܳܢܳܐ ܕܺܝܠܰܢ ܐܺܝܬܶܝܗ̇ ܚܛܺܝܬܳܐ. ܒܣܰܢܝܳܐ ܓܶܝܪ ܡܟܳܢܳܐ ܗܝ ܟܽܘܒܳܢܳܝܽܘܬܳܐ. ܚܢܰܢ ܕܶܝܢ܆ ܟܰܕ ܐܰܗܦܶܟܢܰܢ ܠܨܶܒܝܳܢܰܢ ܡܶܢ ܪܟܺܝܢܽܘܬܳܐ ܗܳܝ ܕܰܠܘܳܬ ܛܳܒܬܳܐ܆ ܐܶܬܟܪܰܗܢܰܢ ܚܛܺܝܬܳܐ. ܟܽܘܪܗܳܢܳܐ ܕܶܝܢ ܠܰܘ ܟܝܳܢܳܝܳܐ܆ ܘܳܐܦܠܳܐ ܡܢܳܬܳܐ ܡܶܕܶܡ ܕܽܐܘܣܺܝܰܐ ܐܺܝܬܰܘܗ̱ܝ܆ ܐܶܠܳܐ ܕܓܶܕܫ̈ܶܐ ܗܳܢܽܘܢ ܕܡܶܢ ܠܒܰܪ ܓܳܕܫܺܝܢ ܠܰܟܝܳܢܳܐ. ܡܶܛܽܠ ܗܳܕܶܐ܆ ܛܳܒܳܐܺܝܬ ܐܳܡܰܪ ܡܶܛܽܠ ܚܛܺܝܬܳܐ ܗܽܘ ܡܙܰܡܪܳܢܳܐ܆ ܐܶܬܗܰܦܟܶܬ ܠܕܳܘܝܽܘܬܳܐ ܟܰܕ ܐܶܬܩܒܰܥ ܒܺܝ ܟܽܘܒܳܐ[47]. ܗܰܘ ܡܳܐ ܓܶܝܪ ܕܡܶܬܩܒܰܥ܆ ܡܶܢ ܠܒܰܪ ܐܺܝܬܰܘܗ̱ܝ ܘܠܰܘ ܕܺܝܠܳܢܳܝܰܐ ܗ̱ܘ܆ ܐܰܟܙܢܳܐ ܕܠܳܐ ܐ̱ܢܳܫ ܚܳܫܶܒ ܠܶܗ ܠܓܶܐܪܳܐ܆ ܕܰܡܢܳܬܳܐ ܐܺܝܬܰܘܗ̱ܝ ܕܦܰܓܪܳܐ ܗܰܘ ܕܶܐܬܡܚܺܝ ܒܶܗ. ܗܳܝ ܕܶܝܢ ܕܶܐܬܩܒܰܥ܆ ܠܥܰܣܩܽܘܬ ܡܫܰܢܝܳܢܽܘܬܳܐ ܕܺܝܠܰܢ ܕܡܶܢ ܥܝܳܕܳܐ ܕܗܳܝ ܕܢܶܚܛܶܐ ܡܰܘܕܥܳܐ.

ܡܳܢܳܐ ܕܶܝܢ ܠܘܳܬ ܗܳܠܶܝܢ ܐܳܡܪܺܝܢ܆ ܗܳܢܽܘܢ ܕܰܠܪܰܘܳܝܽܘܬܳܐ ܗܳܝ ܐܶܬܡܳܠܳܝܬܳܐ ܕܦܰܢܛܰܣܺܝܰܐ ܕܶܐܘܛܶܘܟ̥ܶܐ ܥܰܠ ܪܺܝܫܳܐ ܕܺܝܠܗܽܘܢ ܕܢܰܦܫܗܽܘܢ ܐܳܫܕܺܝܢ܆ ܘܰܒܗܳܕܶܐ ܠܘܳܬ ܫܪܳܪܳܐ ܡܶܬܚܠܰܡܠܡܺܝܢ. ܐܰܪܰܐ ܐܳܦܠܳܐ ܗܽܘ ܛܽܘܦܣܳܐ ܕܣܰܢܝܳܐ ܡܰܒܗܶܬ ܠܗܳܠܶܝܢ ܠܡܰܘܕܳܝܽܘ܆ ܕܟܰܕ ܠܰܢ ܗܳܢܽܘܢ ܕܰܚܛܺܝܬܳܐ ܐܬܟܪܰܗܢܰܢ ܡܰܐܣܶܐ ܗ̱ܘܳܐ ܐܳܣܝܳܐ ܗܰܘ ܚܰܟܺܝܡܳܐ ܘܦܳܪܽܘܩܳܐ܆ ܕܰܟܝܳܐܺܝܬ ܘܰܕܠܳܐ ܚܛܳܗ ܘܟܽܠܶܗ ܐܰ‌ܠܳܗܳܐܺܝܬ ܐܶܬܒܰܣܰܪ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܡܰܢܽܘ ܓܶܝܪ ܣܢܺܝܩ ܗ̱ܘܳܐ ܥܰܠ ܫܰܘܬܳܦܽܘܬܳܐ ܕܰܐ‌ܠܳܗܳܐ ܘܰܚܕܳܝܽܘܬܳܐ܆ ܐܶܠܳܐ ܡܶܢ ܟܽܠ ܦܪܽܘܤ ܗܰܘ ܕܶܐܬܢܰܟܪܺܝ ܡܶܢ ܐܰ‌ܠܳܗܳܐ܆ ܘܰܣܢܺܝܩ ܗ̱ܘܳܐ ܥܰܠ ‌ܐܳܣܝܽܘܬܳܐ. ܐܶܢ ܕܶܝܢ ܠܰܘ ܦܰܓܪܳܐ ܗܰܘ ܕܺܝܠܰܢ ܢܣܰܒ܆ ܡܶܛܽܠ ܡܶܕܶܡ ܐ̱ܚܪܺܝܢ ܡܰܠܽܘܢ܆ ܘܠܰܘ ܡܶܛܽܠܳܬܰܢ ܐܶܬܳܐ ܠܘܳܬ ܗܳܠܶܝܢ ܕܥܰܠ ‌ܐܰܪܥܳܐ. ܐܰܝܟܰܢܳܐ ܗܳܟܺܝܠ ܠܥܶܠ ܘܰܠܬܰܚܬ ܐܳܡܪܺܝܢ ܗܳܢܽܘܢ ܕܳܘܰܝ̈ܳܐ ܘܠܺܝ̈ܛܶܐ܆ ܕܡܶܬܬܦܺܝܣܺܝܢ ܠܰܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܟܰܕ ܠܽܘܩܒܰܠ ܟܽܠܗܽܘܢ ܘܛܽܘܦ̈ܣܶܐ ܢܳܡܽܘ̈ܣܳܝܶܐ ܘܩܰܕܺܝܡܽܘܬ ܡ̈ܶܠܶܐ ܕܰܢܒܺܝ̈ܶܐ܆ ܘܠܽܘܩܒܰܠ ܬܚܽܘܡ̈ܶܐ ܐܶܘܰܢ̈ܓܶܠܳܝܶܐ ܘܰܫܠܺܝ̈ܚܳܝܶܐ ܓܽܘܡܕܳܢܳܐܺܝܬ ܡܶܬܟܰܬܫܺܝܢ܆ ܒܰܕܡܽܘܬ ܗܳܢܽܘܢ ܕܟܽܠܗܶܝܢ ܗܳܢܶܝܢ ܕܰܠܒܰܪ ܡܶܢ ܢܳܡܽܘܣܳܐ ܣܳܥܪܺܝܢ܆ ܘܰܕܢܳܡܽܘܣܳܐܺܝܬ ܚܳܐܝܶܢ ܡܶܫܬܰܒܗܪܺܝܢ.

ܫܰܦܺܝܪܳܐ ܗ̄ܝ ܕܶܝܢ ܛܳܒ ܕܡܶܢܶܗ ܕܣܰܢܝܳܐ܆ ܐܳܦ ܠܗܳܢܽܘܢ ܕܚܰܣܺܝܪܽܘܬ ܗܰܘܢܳܐ ܕܰܐܰܦܽܘܠܺܝܢܰܪܺܝܽܘܤ ܡܰܘܕܶܝܢ ܢܫܰܐܶܠ. ܡܳܢܳܐ ܗܳܟܺܝܠ. ܒܶܣܪܳܐ ܡܰܢ ܡܢܰܦܫܳܐ ܐܳܡܪܺܝܢ ܐܢ̱ܬܽܘܢ ܕܶܐܬܒܰܣܰܪ ܡܳܪܰܢ܆ ܕܰܓܠܺܝܙ ܕܶܝܢ ܗܳܢܳܐ ܡܶܢ ܗܰܘܢܳܐ܆ ܐܰܝ̇ܕܳܐ ܡܶܢܗܶܝܢ. ܗܰܘܢܳܐ ܗܰܘ ܕܺܝܠܰܢ܆ ܕܠܳܐ ܚܛܳܗ ܩܰܘܺܝ܆ ܘܳܐܦ ܕܟܽܠ ܟܽܠܶܗ ܘܠܳܐ ܡܶܕܶܡ ܡܶܢ ܟܽܘ̈ܒܶܐ ܩܰܒܶܠ ܒܶܗ܆ ܡܳܢܳܐ ܕܶܝܢ. ܚܰܘܳܐ ܘܳܐܕܳܡ ܗܰܘ ܕܰܠܗܳܕܶܐ ܐܶܬܬܦܺܝܣܘ܆ ܟܰܕ ܐܶܙܕܟܺܝܘ ܡܶܢ ܛܥܳܡ̈ܳܬܳܐ܆ ܠܳܐ ܡܶܬܬܨܺܝ̈ܕܳܢܶܐ ܐܺܝܬܰܝܗܽܘܢ ܗ̱ܘܰܘ ܒܗܰܘܢܳܐ܆ ܐܰܘ ܗܽܘ ܐܺܝܬܰܘܗ̱ܝ ܗ̱ܘܳܐ ܡܕܰܒܪܳܢܳܐ ܘܪܺܝܫܳܢܳܐ܆ ܗܰܘ ܕܰܒܪ̈ܶܓܫܶܐ ܗܳܢܽܘܢ ܕܰܡܫܰܡܫܺܝܢ ܗ̱ܘܰܘ܆ ܠܘܳܬ ܚܛܺܝܬܳܐ ܐܶܬܚܰܫܰܚ. ܗܰܘܢܳܐ ܓܶܝܪ ܚܳܙܶܐ ܘܗܰܘܢܳܐ ܫܳܡܰܥ܆ ܘܗܰܘܢܳܐ ܒܝܰܕ ܟܽܠ ܪܶܓܫܳܐ ܡܰܥܒܶܕ. ܘܟܰܕ ܗܽܘ ܫܰܬܺܝܩ܆ ܡܺܝ̈ܬܶܐ ܒܰܙܢܳܐ ܡܶܕܶܡ ܟܽܠܗܽܘܢ ܘܠܳܐ ܣܳܥܽܘܪ̈ܶܐ ܘܠܳܐ ܡܶܬܬܙܺܝ̈ܥܳܢܶܐ. ܡܶܛܽܠ ܗܳܕܶܐ ܠܳܐ ܣܶܦܩܰܬ ܠܶܗ ܠܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ ܕܢܺܐܡܰܪ܆ ܕܰܚܙܳܬ ܐܰܢ̱ܬܬܳܐ ܕܝܳܐܝܳܐ ܗ̱ܘܳܐ ܩܰܝܣܳܐ ܗܰܘ ܠܡܶܐܟܽܘܠܬܳܐ ܘܰܕܫܰܦܺܝܪ ܠܥܰܝ̈ܢܶܐ ܠܡܶܚܙܳܐ[48]. ܐܶܠܳܐ ܐܰܘܣܶܦ܆ ܕܳܐܦ ܗܕܺܝܪܳܐ ܐܺܝܬܰܘܗ̱ܝ ܠܡܶܬܒܰܝܳܢܽܘ ܒܶܗ ܐܰܘܟܺܝܬ ܠܡܶܬܗܰܘܢܳܢܽܘ. ܗܳܝ ܕܶܝܢ ܕܰܠܡܶܬܗܰܘܢܳܢܽܘ܆ ܕܡܰܢܽܘ ܐ̱ܚܪܺܢܳܐ ܐܺܝܬܶܝܗ̇ ܤܛܰܪ ܡܶܢ ܕܗܰܘܢܳܐ܆ ܕܺܝܠܟܽܘܢ ܗܳܢܽܘܢ ܕܰܐܝܟ ܕܒܰܫܪܳܪܳܐ ܕܠܳܐ ܗܰܘܢܳܐ ܐܺܝܬܰܝܟܽܘܢ ܐܺܝܬܶܝܗ̇ ܕܬܶܚܙܽܘܢ ܘܬܶܬܒܰܩܽܘܢ܆ ܠܳܐ ܓܶܝܪ ܟܺܝܬ ܐܳܦ ܠܘܳܬ ܗܳܕܶܐ ܚܶܪܝ̣ܳܝ̣ܐܺܝܬ ܬܩܽܘܡܽܘܢ.

ܐܰܝܟܰܢܳܐ ܓܶܝܪ ܠܗܰܘ ܡܳܐ ܕܺܐܝܬܰܘܗ̱ܝ ܗ̱ܘܳܐ ܡܠܺܝܠܳܐ ܒܒܰܪܢܳܫܳܐ܆ ܠܗܰܘ ܕܰܒܨܰܠܡܳܐ ܐܰ‌ܠܳܗܳܝܳܐ ܗܘ̣ܳܐ܆ ܟܰܕ ܟܪܺܝܗ ܗ̱ܘܳܐ܆ ܥܬܺܝܕ ܗ̱ܘܳܐ ܐܰ‌ܠܳܗܳܐ ܡܶܠܬܳܐ ܕܢܶܫܒܩܺܝܘܗ̱ܝ ܕܠܳܐ ܐܳܣܝܽܘܬܳܐ. ܐܰܘ ܡܶܢ ܠܳܐ ܡܠܺܝܠܽܘܬܳܐ. ܕܒܶܣܪܳܐ ܕܠܳܐ ܡܶܠܬܳܐ ܟܽܠܶܗ ܗܳܢܳܐ ܝܺܨܶܦ܆ ܐܰܘ ܠܳܐ ܫܳܡܥܺܝܢ ܐܢ̱ܬܽܘܢ ܠܶܗ ܕܳܐܦ ܡܶܢ ܒܳܬܰܪ ܛܳܘܦܳܢܳܐ ܗܰܘ ܕܰܒܝܰܘ̈ܡܰܝ ܢܽܘܚ ܐܳܡܰܪ ܗ̱ܘܳܐ܆ ܕܣܺܝܡܳܐ ܬܰܪܥܺܝܬܶܗ ܕܒܰܪܢܳܫܳܐ ܝܰܨܺܝܦܳܐܺܝܬ ܥܰܠ ܒܺܝ̈ܫܳܬܳܐ ܡܶܢ ܛܰܠܝܽܘܬܶܗ[49]. ܡܳܢܳܐ ܗܳܟܺܝܠ. ܠܗܳܝ ܕܶܐܬܪܰܟܢܰܬ ܠܘܳܬ ܒܺܝܫܽܘܬܳܐ ܠܳܐ ܡܬܰܪܶܨ ܗ̱ܘܳܐ܆ ܒܗܳܝ ܕܰܠܘܳܬܶܗ ܢܚܰܝܕܶܝܗ̇܆ ܘܗܳܕܶܐ ܕܳܐܣܝܽܘܬܳܐ ܚܰܟܺܝܡܬܳܐ ܐܺܝܬܶܝܗ̇܆ ܐܰܝܟܰܢܳܐ ܕܶܝܢ ܐܳܦ ܡܶܬܒܰܪܢܫܳܢܽܘܬܳܐ ܢܶܩܪܶܝܗ̇ ܠܗܳܕܶܐ ܟܺܐܢܳܐܺܝܬ܆ ܠܗܳܝ ܟܺܝܬ ܕܰܠܗܰܘ ܪܺܝܫܳܢܳܝܳܐ ܕܒܰܪܢܳܫܳܐ ܚܶܒܫܰܬ܆ ܘܰܠܗܰܘ ܕܒܶܗ ܗܘ ܡܳܪܳܢܳܐܺܝܬ ܒܰܪܢܳܫܳܐ.

ܡܶܛܽܠ ܗܳܕܶܐ ܐܰܒܳܗ̈ܳܬܳܐ ܟܰܕ ܠܗܰܝܡܳܢܽܘܬܳܐ ܡܰܫܠܡܺܝܢ ܗ̱ܘܰܘ܆ ܘܠܰܟ̈ܬܳܒܶܐ ܩܰܕܺܝ̈ܫܶܐ ܢܳܩܦܺܝܢ ܗ̱ܘܰܘ܆ ܠܗܳܝ ܕܶܐܬܒܰܣܰܪ܆ ܐܳܦ ܗܳܝ ܕܶܐܬܒܰܪܢܰܫ ܡܶܠܬܶܗ ܕܰܐ‌ܠܳܗܳܐ ܐܰܟܚܕܳܐ ܐܰܙܘܶܓܘ. ܐܰܝܟܰܢܳܐ ܕܰܢܚܰܘܽܘܢ ܕܒܶܣܪܳܐ ܡܢܰܦܫܳܐ ܘܰܡܗܰܘܢܳܐ ܐܶܬܒܰܣܰܪ ܡܳܪܰܢ܆ ܐܰܝܟܰܢܳܐ ܕܠܳܐ ܡܶܕܶܡ ܡܶܢ ܗܳܠܶܝܢ ܕܰܒܗܶܝܢ ܐܺܝܬܰܝܢ܆ ܠܒܰܪ ܢܩܰܘܶܐ ܡܶܢ ܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ. ܗܽܘ ܗܳܟܺܝܠ ܡܶܠܬܶܗ ܕܰܐ‌ܠܳܗܳܐ ܗܰܘ ܕܶܐܬܒܰܣܰܪ ܘܶܐܬܒܰܪܢܰܫ܆ ܐܳܦ ܚܰܫ܆ ܐܳܦ ܐܶܨܛܠܶܒ. ܟܰܕ ܐܳܦ ܒܗܽܘܢ ܒܚܰܫ̈ܶܐ ܠܠܳܐ ܚܳܫܽܘܫܽܘܬܳܐ ܠܳܐ ܫ̣ܕܳܐ ܡܶܢܶܗ܆ ܐܰܝܟܰܢܳܐ ܕܳܐܦܠܳܐ ܠܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ. ܡܶܬܩܰܪܒܳܢܳܐ ܡܰܢ ܓܶܝܪ ܗܘ̣ܳܐ ܠܗܳܝ ܕܢܶܚܰܫ܆ ܡܶܛܽܠ ܕܰܡܒܰܣܰܪ ܗ̱ܘܳܐ܆ ܘܠܗܰܘ ܕܰܡܟܳܢ ܗ̱ܘܳܐ ܕܢܶܚܰܫ ܡܚܰܝܶܕ ܗ̱ܘܳܐ ܩܢܽܘܡܳܐܺܝܬ. ܟܰܕ ܕܶܝܢ ܥܕܰܡܳܐ ܠܒܶܣܪܳܐ ܗܺܝ ܡܰܥܒܕܳܢܽܘܬܳܐ ܕܚܰܫ̈ܶܐ ܩܶܪܒܰܬ܆ ܘܬܽܘܒ ܝܰܬܺܝܪܳܐ ܠܗܰܕܳܡ̈ܶܐ[50] ܟܰܕ ܡܶܫܬܰܘܫܛܳܐ ܘܩܳܪܒܳܐ܆ ܡܶܛܽܠ ܗܳܝ ܕܚܰܕ ܐܺܝܬܰܘܗ̱ܝ ܗ̱ܘܳܐ ܗܰܘ ܕܰܡܒܰܣܰܪ ܗ̱ܘܳܐ ܘܰܡܒܰܪܢܰܫ. ܠܡܶܓܫܰܦ ܒܗܰܘ ܠܳܐ ܚܳܫܽܘܫܳܐ ܠܳܐ ܐܶܫܟܚܰܬ. ܐܳܦ ܓܶܝܪ ܠܳܐ ܢܶܚܰܫ ܗܰܘ ܡܳܐ ܕܠܳܐ ܡܩܰܒܠܳܢܳܐ ܐܺܝܬܰܘܗ̱ܝ ܕܚܰܫܳܐ܆ ܐܳܦܶܢ ܝܰܬܺܝܪܳܐܺܝܬ ܢܶܬܩܰܪܰܒ ܠܚܰܫ̈ܶܐ. ܗܳܠܶܝܢ ܕܳܐܦ ܥܰܡܳܗ̇ ܕܗܳܝ ܕܢܶܬܩܰܪܰܒ ܠܗܽܘܢ܆ ܠܪܽܘܚܩܳܐ ܒܕܽܘܟ ܢܩܽܘܡܽܘܢ.

ܠܡܳܢܳܐ ܗܳܟܺܝܠ ‌ܐܳܘ ܗܳܠܶܝܢ܆ ܠܰܘ ܚܰܕܟܝܳܢܳܐ ܡܰܘܕܶܝܢ ܐܢ̱ܬܽܘܢ ܕܰܡܒܰܣܰܪ ܕܰܐ‌ܠܳܗܳܐ ܡܶܠܬܳܐ܆ ܐܶܠܳܐ ܒܰܬܪܶܝܢ ܟܝܳܢ̈ܶܐ ܡܬܰܚܡܺܝܢ ܐܢ̱ܬܽܘܢ ܠܶܗ ܠܗܰܘ ܚܰܕ ܡܫܺܝܚܳܐ܆ ܟܰܕ ܠܰܚܕܳܝܽܘܬܳܐ ܫܳܪܶܝܢ ܐܢ̱ܬܽܘܢ܆ ܘܰܟܪܺܝܗܶܝܢ ܐܢ̱ܬܽܘܢ ܚܰܫܽܘܬ ܐܰ‌ܠܳܗܽܘܬܳܐ ܗܳܝ ܕܰܥܠܰܝܢ ܠܳܐ ܝܰܠܺܝܦܳܐܺܝܬ ܡܰܛܶܐܒܺܝܢ ܐܢ̱ܬܽܘܢ܆ ܘܕܰܚܺܝܠܺܝܢ ܐܢ̱ܬܽܘܢ ܘܪܳܥܠܺܝܢ ܐܢ̱ܬܽܘܢ܆ ܕܕܰܠܡܳܐ ܬܚܶܝܬ ܚܰܫܳܐ ܢܶܦܶܠ ܗܰܘ ܠܳܐ ܚܳܫܽܘܫܳܐ܆ ܐܶܢ ܠܳܐ ܢܶܬܦܪܶܫ ܡܶܢ ܗܰܘ ܚܰܫܽܘܫܳܐ. ܩܽܘܡܘ ܗܳܟܺܝܠ ܘܥܰܠ ܫܽܘܥܳܐ ܕܗܰܝܡܳܢܽܘܬܳܐ ܫܰܪܰܪܘ ܪ̈ܶܓܠܰܝܟܽܘܢ. ܟܰܕ ܡܶܬܬܰܟܠܺܝܢ ܐܢ̱ܬܽܘܢ܆ ܕܥܰܠ ܚܰܘܣܳܢܳܐ ܕܺܝܠܟܽܘܢ ܐܰ‌ܠܳܗܳܐ ܠܳܐ ܣܢܺܝܩ. ܐܶܠܳܐ ܒܗܳܝ ܕܶܐܬܒܰܣܰܪ܆ ܒܳܗ̇ ܐܳܦ ܠܘܳܬ ܗܳܝ ܕܢܶܚܰܫ ܐܳܬܶܐ ܡܶܢ ܨܶܒܝܳܢܶܗ܆ ܡܩܰܘܶܐ ܕܶܝܢ ܐܳܦ ܗܳܟܰܢܳܐ ܠܳܐ ܡܶܬܟܰܒܫܳܢܳܐ ܠܗܳܝ ܕܢܶܚܰܫ܆ ܒܳܗ̇ ܒܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ ܒܰܟܝܳܢܳܐ. ܐܶܢ ܡܰܢ ܓܶܝܪ ܠܳܐ ܐܶܬܒܰܣܰܪ܆ ܐܳܦܠܳܐ ܕܚܰܫ ܢܶܬܶܐܡܰܪ. ܐܳܦ ܓܶܝܪ ܐܰܝܟ ܕܒܰܫܪܳܪܳܐ܆ ܕܠܳܐ ܦܽܘܪܣܳܐ ܗܝ ܗܺܝ ܗܳܕܶܐ. ܟܰܕ ܕܶܝܢ ܡܒܰܣܰܪ܆ ܠܳܐ ܢܶܬܦܪܶܫ ܡܶܢ ܒܶܣܪܳܐ܆ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ܆ ܐܰܝܟܰܢܳܐ ܕܠܳܐ ܥܰܠ ܟܝܳܢܳܐ ܐ̱ܢܳܫܳܝܳܐ ܕܡܶܢܶܗ ܘܠܶܗ ܡܩܰܝܰܡ܆ ܢܶܬܟܬܶܒ ܗܽܘ ܚܰܫܳܐ.

ܥܰܡ ܡܰܘܬܳܐ ܕܶܝܢ ܗܽܘ ܡܰܠܽܘܢ ܐܶܬܥܰܪܙܰܠ ‌ܐܰܝܟ ܡܒܰܣܪܳܐ܆ ܡܶܛܽܠ ܕܳܐܦܠܳܐ ܡܰܨܝܳܐ ܗ̱ܘܳܬ ܐ̱ܚܪܳܢܝܳܐܺܝܬ܆ ܕܗܰܘ ܕܨܶܒܝܳܢܳܐܺܝܬ ܗܳܕܶܐ ܩܰܒܶܠ ܥܠܰܘܗ̱ܝ܆ ܢܦܰܣܶܩ ܓܝܳܕܰܘܗ̱ܝ ܕܗܳܢܳܐ܆ ܐܰܝܟ ܐܰܝܢܳܐ ܕܺܐܝܬܰܘܗ̱ܝ ܠܳܐ ܡܳܝܽܘܬܳܐ ܒܰܟܝܳܢܳܐ. ܕܡܶܢ ܗܳܪܟܳܐ ܐܳܦ ܟܰܕ ܛܰܥܡܶܗ ܒܰܠܚܽܘܕ ܠܗܳܢܳܐ ܐܰܝܟ ܕܰܗܘ̣ܳܐ ܒܰܪܢܳܫܳܐ܆ ܩܳܡ ܒܝܰܘܡܳܐ ܬܠܺܝܬܳܝܳܐ܆ ܟܰܕ ܫܪܳܐ ܠܰܐܣܽܘܪ̈ܶܐ ܠܳܐ ܡܶܬܥܰܪ̈ܩܳܢܶܐ ܕܰܫܝܽܘܠ܆ ܘܝܳܗܶܒ ܐܳܬܳܐ ܓܠܺܝܬܳܐ ܕܗܳܕܶܐ܆ ܡܺܝ̈ܬܶܐ ܗܳܢܽܘܢ ܕܡܶܢ ܩܰܒܪ̈ܶܐ ܢܳܦܩܺܝܢ ܗ̱ܘܰܘ܆ ܘܗܳܠܶܝܢ ܗܳܘܶܝܢ ܗ̱ܘܰܘ ܡܶܬܚܰܙܝܳܢ̈ܶܐ ܠܣܰܓܺܝ̈ܶܐܐ[51]. ܗܽܘ ܐܳܦ ܣܠܶܩ ܠܰܫܡܰܝܳܐ܆ ܟܰܕ ܟܽܠܶܗ ܐܺܝܬܰܘܗ̱ܝ ܗ̱ܘܳܐ ܒܒܶܣܪܳܐ ܠܳܐ ܡܶܣܬܰܝܟܳܢܳܐܺܝܬ܆ ܠܗܰܠ ܡܶܢ ܟܽܠܶܗ ܣܽܘܟܳܠܳܐ ܘܬܶܕܡܽܘܪܬܳܐ܆ ܗܰܘ ܕܟܽܠܶܗ ܒܟܽܠ܆ ܘܟܽܠܶܗ ܠܥܶܠ ܡܶܢ ܟܽܠ܆ ܘܰܠܟܽܠ ܡܰܢ ܚܳܒܶܫ܆ ܡܶܬܚܒܶܫ ܕܶܝܢ ܘܠܳܐ ܡܶܢ ܡܶܕܶܡ܆ ܘܥܳܪܶܩ ܡܶܢ ܟܽܠ ܦܰܢܛܰܣܺܝܰܐ ܘܡܶܬܬܙܺܝܥܳܢܽܘܬܳܐ ܡܬܰܚܡܳܢܺܝܬܳܐ ܕܗܰܘܢܳܐ.

ܡܶܠܬܳܐ ܓܶܝܪ ܗܘ̣ܳܐ ܒܶܣܪܳܐ ܘܰܐܓܶܢ ܒܰܢ[52]. ܗܽܘ ܗܰܘ ܡܶܠܬܳܐ܆ ܗܰܘ ܚܰܕ ܡܶܢ ܬܠܳܬܳܐ ܩܢܽܘܡ̈ܶܐ. ܗܳܢܰܘ ܕܶܝܢ ܗܽܘ ܩܢܽܘܡܶܗ ܕܰܒܪܳܐ܆ ܘܠܰܘ ܐܰܝܟ ܙܢܳܐ ܕܒܰܢܒܺܝ̈ܶܐ܆ ܡܰܥܒܕܳܢܽܘܬܳܐ ܡܶܕܶܡ ܡܢܳܬܳܝܬܳܐ. ܟܽܠܶܗ ܕܶܝܢ ܡܽܘܠܳܝܳܐ ܕܰܐ‌ܠܳܗܽܘܬܳܐ ܕܺܝܠܶܗ[53]܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܘܗ̱ܝ ܡܥܺܝܢܳܐ ܕܚܰܝ̈ܶܐ܆ ܗܳܝ ܕܢܰܗܪ̈ܰܘܳܬܳܐ ܣܰܓܺܝ̈ܶܐܐ ܕܫܽܘܟܳܢ̈ܶܐ ܝܳܗܒܳܐ ܠܗܳܢܽܘܢ ܕܡܶܫܬܰܘܬܦܺܝܢ ܠܳܗ̇.

ܟܰܕ ܡܗܰܝܡܢܺܝܢܰܢ ܗܳܟܺܝܠ ܒܚܰܕ ܐܰ‌ܠܳܗܳܐ ܐܰܒܳܐ ܐܰܚܺܝܕ ܟܽܠ܆ ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ܆ ܢܗܰܝܡܶܢ ܕܠܳܐ ܦܳܣܩܺܝܢܰܢ ܠܶܗ. ܐܶܠܳܐ ܟܰܕ ܡܰܠܽܘܬܳܐܺܝܬ ܡܰܘܕܶܝܢ ܚ̱ܢܰܢ. ܕܰܢܚܶܬ܆ ܕܶܐܬܒܰܣܰܪ܆ ܕܶܐܬܒܰܪܢܰܫ܆ ܕܚܰܫ܆ ܥܕܰܡܳܐ ܠܗܳܝ ܕܬܽܘܒ ܐܳܬܶܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬܶܐ܆ ܘܗܳܟܰܢܳܐ ܟܰܕ ܡܳܢܶܝܢ ܚ̱ܢܰܢ ܘܕܰܡܗܰܝܡܢܺܝܢܰܢ ܐܳܡܪܺܝܢ ܚ̱ܢܰܢ ܘܰܒܪܽܘܚܳܐ ܩܰܕܺܝܫܳܐ܆ ܐܰܝܟ ܫܽܘܘܕܳܥܳܐ ܗܰܘ ܠܳܐ ܙܺܐܦܳܢܳܐ܆ ܕܰܐܒܳܗ̈ܳܬܳܐ ܘܡܰܠ̈ܦܳܢܶܐ ܕܗܰܝܡܳܢܽܘܬܳܐ ܫܰܪܺܝܪܬܳܐ ܘܰܕܠܳܐ ܛܽܘܥܝ̣ܰܝ̣. ܐܰܝܟܰܢܳܐ ܕܰܬܠܺܝܬܳܝܽܘܬܳܐ ܬܩܰܘܶܐ ܬܠܺܝܬܳܝܽܘܬܳܐ܆ ܘܠܳܐ ܐܰܝܟ ܗܳܢܽܘܢ ܕܰܡܦܰܠܓܺܝܢ ܠܶܗ ܠܗܰܘ ܚܰܕ ܡܫܺܝܚܳܐ ܘܰܬܪܶܝܢ ܟܝܳܢ̈ܶܐ ܡܰܘܕܶܝܢ ܠܶܗ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܦܰܫܩܳܢܺܝܬܳܐ ܢܺܐܡܰܪ܆ ܕܰܡܗܰܝܡܢܺܝܢܰܢ ܒܰܐܒܳܐ ܘܒܰܒܪܳܐ ܘܰܒܪܽܘܚܳܐ ܩܰܕܺܝܫܳܐ܆ ܘܰܒܡܶܬܒܰܪܢܫܳܢܽܘܬܶܗ ܕܡܳܪܰܢ. ܠܗܳܢܽܘܢ ܕܗܽܘ ܡܳܪܰܢ ܢܶܦܠܽܘܓ ܐܶܢܽܘܢ ܒܝܰܘܡܳܐ ܗܰܘ ܕܕܺܝܢܳܐ[54]܆ ܐܰܝܟ ܒܰܪ̱ܬ ܩܳܠܳܐ ܕܶܐܘܰܢܓܶܠܺܝܽܘܢ܆ ܕܒܦܽܘܠܳܓܳܐ ܥܰܒܕܘܗ̇ ܠܰܬܠܺܝܬܳܝܽܘܬܳܐ ܪܒܺܝܥܳܝܽܘܬܳܐ܆ ܘܰܢܣܺܝܡ ܡܢܳܬܳܐ ܕܺܝܠܗܽܘܢ ܥܰܡ ܕܰܡܨܰܕܝܳܢ̈ܶܐ ܢܳܣ̈ܒܰܝ ܒܰܐܦ̈ܶܐ.

ܘܶܐܢ ܐ̱ܢܳܫ ܕܶܝܢ ܢܺܐܡܰܪ܆ ܕܡܶܠܬܳܐ ܐܰ‌ܠܳܗܳܐ ܡܶܢ ܫܡܰܝܳܐ ܐܰܝܬܺܝ ܠܶܗ ܒܶܣܪܳܐ܆ ܐܰܘ ܕܡܶܢ ܗܽܘܠܶܐ ܡܶܕܶܡ ܐ̱ܚܪܺܬܳܐ ܐܺܝܬܰܘܗ̱ܝ܆ ܐܰܘ ܕܗܽܘ ܐܶܫܬܰܚܠܰܦ ܠܒܶܣܪܳܐ܆ ܐܰܘ ܕܶܐܬܥܰܒܺܝ ܐܰܘ ܕܰܩܛܰܪ ܐܰܝܟ ܓܠܺܝܕܳܐ ܡܶܢ ܡܰܝ̈ܳܐ܆ ܐܰܘ ܕܰܩܢ̣ܳܐ ܕܡܽܘܬܳܐ ܐܰܝܟ ܛܽܘܦܣܳܐ ܡܶܢ ܛܰܒܥܳܐ܆ ܐܰܘ ܕܶܐܣܬܒܰܪ ܕܶܐܬܚܙܺܝ ܒܰܕܡܽܘܬ ܫܪܰܓܪ̈ܳܓܝܳܬܳܐ ܘܛܶܠܳܢܺܝܬܳܐ ܘܰܐܝܟ ܦܰܢܛܰܣܝܐܤ ܗܳܠܺܝܢ ܕܰܒܫܶܢܬܳܐ܆ ܘܠܳܐ ܡܰܘܕܶܐ ܕܰܒܪܶܗ ܕܰܐ‌ܠܳܗܳܐ ܗܰܘ ܕܠܳܐ ܒܶܣܪܳܐ ܘܠܳܐ ܦܰܓܪܳܢܳܐ ܘܕܰܩܕܳܡ ܥܳܠ̈ܡܶܐ܆ ܐܶܬܒܰܣܰܪ ܒܶܣܪܳܐ ܗܰܘ ܕܰܫܘܶܐ ܠܰܢ ܒܽܐܘܣܺܝܰܐ܆ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܩܰܕܺܝܫܬܳܐ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܡܰܪܝܰܡ ܒܰܚܕܳܝܽܘܬܳܐ ܩܢܽܘܡܳܝܬܳܐ܆ ܐܰܝܟܰܢܳܐ ܕܳܐܦ ܢܶܬܒܛܶܢ ܘܠܳܐ ܗ̱ܘܳܐ ܐܰܝܟ ܕܰܒܝܰܕ ܣܺܝܠܽܘܢܳܐ ܢܶܪܗܰܛ܆ ܢܽܘܟܪܳܝܳܐ ܢܶܗܘܶܐ ܡܶܢ ܛܰܝܒܽܘܬܳܐ ܕܡܶܬܒܰܪܢܫܳܢܽܘܬܳܐ ܗܳܝ ܫܰܪܺܝܪܬܳܐ ܘܰܐ‌ܠܳܗܳܝܬܳܐ. ܘܡܶܢ ܣܳܝܽܘܡܽܘܬ ܒ̈ܢܰܝܳܐ ܢܶܦܰܠ܆ ܘܠܳܐ ܢܶܫܟܚܶܝܗ̇ ܠܡܶܐܬܺܝܬܶܗ ܗܳܝ ܕܬܰܪܬܶܝܢ ܡܫܰܝܰܢܬܳܐ ܘܰܡܪܰܚܡܳܢܺܝܬܳܐ܆ ܒܕܰܠܗܳܝ ܩܰܕܡܳܝܬܳܐ ܕܰܓܶܠ.

ܐܶܢ ܐ̱ܢܳܫ ܠܒܶܣܪܶܗ ܕܡܳܪܰܢ܆ ܕܠܳܐ ܢܰܦܫܳܐ ܘܰܕܠܳܐ ܗܰܘܢܳܐ ܐܰܣܒܰܪ܆ ܘܰܒܡܶܕܶܡ ܐܰܝܢܳܐ ܕܗܽܘ ܦܳܣܶܩ ܠܳܗ̇ ܠܰܡܫܰܡܠܝܽܘܬܳܗ̇ ܕܡܶܬܒܰܪܢܫܳܢܽܘܬܳܐ܆ ܢܺܐܪܰܬ̣ ܡܢܳܬܳܐ ܕܗܳܠܶܝܢ ܒܬܽܘ̈ܠܳܬܳܐ ܣܰܟ̈ܠܳܬܳܐ ܘܰܕܠܳܐ ܗܰܘܢܳܐ܆ ܘܢܶܬܬܚܶܕ ܬܰܪܥܳܐ ܕܡܶܫܬܽܘܬܳܐ ܒܰܐܦܰܘ̈ܗܝ[55]܆ ܘܢܶܬܦܣܶܩ ܡܶܢ ܣܰܒܪܳܐ ܕܚܰܝ̈ܶܐ ܗܳܠܶܝܢ ܕܰܥܬܺܝܕܺܝܢ.

ܐܶܢ ܐ̱ܢܳܫ ܠܡܶܠܬܶܗ ܕܰܐ‌ܠܳܗܳܐ ܗܰܘ ܕܠܳܐ ܡܶܫܬܰܚܠܦܳܢܳܐܺܝܬ ܐܶܬܒܰܣܰܪ ܘܶܐܬܒܰܪܢܰܫ܆ ܟܰܕ ܚܰܕ ܒܪܳܐ ܐܳܡܰܪ ܠܶܗ܆ ܚܰܕ ܡܳܪܝܳܐ ܚܰܕ ܡܫܺܝܚܳܐ܆ ܚܰܕ ܦܰܪܨܽܘܦܳܐ ܚܰܕ ܩܢܽܘܡܳܐ܆ ܚܰܕ ܟܝܳܢܳܐ ܕܰܡܒܰܣܰܪ ܕܺܝܠܶܗ ܕܡܶܠܬܳܐ܆ ܠܳܐ ܡܰܘܕܶܐ ܠܶܗ ܠܗܳܢܳܐ ܠܳܐ ܚܳܫܽܘܫܳܐ ܒܗܳܝ ܕܰܐ‌ܠܳܗܳܐ܆ ܕܰܒܒܶܣܪܳܐ ܕܶܝܢ ܚܰܫ ܐܰܝܟ ܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܘܶܐܢ ܐ̱ܢܳܫ ܠܒܶܣܪܳܐ ܐܳܡܰܪ ܕܶܐܫܬܰܚܠܰܦ ܐܰܘ ܐܶܬܡܰܙܰܓ ܒܽܐܘܣܺܝܰܐ ܐܰ‌ܠܳܗܳܝܬܳܐ܆ ܚܶܪܡܳܐ ܢܶܗܘܶܐ܆ ܘܢܶܫܬܠܶܡ ܠܬܰܫܢܺܝ̈ܩܶܐ ܩܫܰܝ̈ܳܐ ܘܰܕܠܳܐ ܫܽܘܠܳܡ.

ܡܶܛܽܠ ܗܳܟܺܝܠ ܕܰܐܦܶܩܢܰܢ ܘܰܫܕܰܝܢܰܢ ܠܰܫܥܺܝܢܳܐ[56] ܕܠܳܐ ܗܰܝܡܳܢܽܘܬܳܐ. ܟܰܕ ܕܰܟܝܽܘܬܳܐ ܘܫܰܪܺܝܪܽܘܬܳܐ ܒܝܰܕ ܟܽܠܗܶܝܢ ܢܳܛܪܺܝܢ[57] ܐܢ̱ܬܽܘܢ ܠܳܗ̇ ܠܡܰܠܦܳܢܽܘܬܳܐ ܚܠܺܝܡܬܳܐ ܕܗܰܝܡܳܢܽܘܬܳܐ܆ ܟܰܕ ܠܥܶܠ ܩܳܝܡܺܝܢ ܐܢ̱ܬܽܘܢ ܐܢ̱ܬܽܘܢ܆ ܗܳܢܽܘܢ ܕܰܒܛܰܝܒܽܘܬܳܐ ܐܰ‌ܠܳܗܳܝܬܳܐ ܕܰܥܡܳܕܳܐ ܥܬܺܝܕܺܝܢ ܐܢ̱ܬܽܘܢ ܠܡܶܬܒܰܣܳܡܽܘ܆ ܠܘܳܬ ܦܢܺܝܬܳܐ ܡܰܥܪܒܳܝܬܳܐ ܐܶܬܦܢܰܘ. ܟܰܕ ܠܟܽܠ ܕܽܘܟܬܳܐ ܡܰܢ ܝܳܕܥܺܝܢ ܐܢ̱ܬܽܘܢ܆ ܕܰܕܗܰܘ ܚܰܕ ܐܰ‌ܠܳܗܳܐ ܥܳܒܽܘܕܳܐ ܘܛܳܒܳܐ ܐܺܝܬܶܝܗ̇܆ ܗܰܘ ܕܒܰܠܚܽܘܕܳܝܽܘܬܳܐ ܘܒܰܬܠܺܝܬܳܝܽܘܬܳܐ ܡܶܬܺܝܕܰܥ܆ ܘܰܒܝܰܕ ܢܒܺܝܳܐ ܡܰܙܥܶܩ܆ ܡܶܢ ܡܰܕܢܳܚܰܘ̈ܗ̱ܝ ܕܫܶܡܫܳܐ ܘܰܥܕܰܡܳܐ ܠܡܰܥܪ̈ܳܒܰܘ̈ܗ̱ܝ ܫܡܳܐ ܕܺܝܠܝ ܡܶܫܬܰܒܰܚ[58]܆ ܘܰܒܕܽܘܟܬܳܐ ܐ̱ܚܪܺܬܳܐ ܐܳܡܰܪ܆ ܤܛܰܪ ܡܶܢܝ ܠܰܝܬ ܐܰ‌ܠܳܗܳܐ[59]܆ ܒܝܰܕ ܕܶܝܢ ܐܶܣܟܺܡܳܐ ܘܰܒܝܰܕ ܒ̈ܢܳܬ ܩ̈ܳܠܶܐ ܗܳܠܶܝܢ ܕܰܥܬܺܝ̈ܕܳܢ ܕܢܶܬܐܰܡܪ̈ܳܢ ܝܳܠܦܺܝܢ ܐܢ̱ܬܽܘܢ܆ ܕܠܰܠܒܽܘܫܳܐ ܐܽܘܟܳܡܳܐ ܕܒܺܝܫܽܘܬܳܐ ܫܳܕܶܝܢ ܐܢ̱ܬܽܘܢ ܡܶܢܟܽܘܢ܆ ܠܰܥ̈ܒܳܕܶܐ ܕܥܰܡܛܳܢܳܐ܆ ܠܥܒܕܽܘܬܳܐ ܕܰܚܛܺܝܬܳܐ܆ ܠܶܗ ܠܳܐܟܶܠ ܩܰܪܨܳܐ ܘܰܠܫ̈ܺܐܕܶܐ ܗܳܢܽܘܢ ܡܰܠ̈ܦܳܢܶܐ ܕܒܺܝܫܽܘܬܳܐ.

ܐܶܠܳܐ ܡܶܛܽܠ ܕܰܫܕܰܝܬܽܘܢ ܡܶܢܟܽܘܢ ܠܰܛܪܽܘܢܽܘܬܳܐ ܒܺܝܫܬܳܐ܆ ܗܦܽܘܟܘ. ܐܶܬܦܢܰܘ ܠܺܝ ܚܘܺܝܚܳܐܺܝܬ ܠܘܳܬ ܡܰܕܢܚܳܐ. ܟܰܕ ܡܰܘܕܥܺܝܢ ܐܢ̱ܬܽܘܢ ܬܽܘܒ ܒܶܗ ܒܶܐܣܟܺܡܳܐ. ܕܫܶܡܫܳܐ ܕܙܰܕܺܝܩܽܘܬܳܐ ܕܢܰܚ ܠܟܽܘܢ. ܕܡܶܢ ܒܳܬܰܪ ܩܰܠܺܝܠ ܗܳܘܶܝܢ ܐܢ̱ܬܽܘܢ ܒܢܰܝ̈ܳܐ ܕܢܽܘܗܪܳܐ. ܩܢ̣ܰܘ ܦܰܪܶܗ̱ܣܺܝܰܐ ܠܘܳܬ ܡܳܪܟܽܘܢ. ܬܰܪ̈ܬܰܝܗܶܝܢ ܐܺܝ̈ܕܰܝܟܽܘܢ ܐܰܪܺܝܡܘ ܠܘܳܬ ܪܰܘܡܳܐ. ܡܶܢ ܫܶܒܝܳܐ ܐܶܫܬܪܺܝܬܽܘܢ. ܐܰܙܥܶܩܘ ܒ̈ܢܳܬ ܩ̈ܳܠܶܐ ܕܚܺܐܪܽܘܬܳܐ. ܒ̣ܰܪ̈ܝܳܬܳܐ ܡܰܢ ܐܺܝܬܰܝܟܽܘܢ ܗ̱ܘܰܝܬܽܘܢ ܕܗܰܘ ܕܰܥܒܰܕܟܽܘܢ܆ ܡܳܐܢ̈ܶܐ ܕܶܝܢ ܕܒܺܝܫܳܐ܆ ܒܝܰܕ ܥ̈ܒܳܕܶܐ ܕܰܚܛܺܝܬܳܐ ܗܘ̣ܰܝܬܽܘܢ. ܡܶܚܕܳܐ ܬܶܗܘܽܘܢ ܐܳܦ ܩܶܢܝܳܢܳܐ ܡܫܰܡܠܝܳܐܺܝܬ ܕܗܰܘ ܕܰܒ̣ܪܳܟܽܘܢ. ܟܰܕ ܠܳܐ ܬܽܘܒ ܡܶܟܺܝܠ ܫܳܒܩܺܝܢ ܐܢ̱ܬܽܘܢ ܠܰܚܛܺܝܬܳܐ ܕܬܰܡܠܶܟ ܒܦܰܓܪܟܽܘܢ ܡܳܝܽܘܬܳܐ܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܐܶܠܳܐ ܟܰܕ ܠܗܰܕܳܡܰܝ̈ܟܽܘܢ ܡܩܺܝܡܺܝܢ ܐܢ̱ܬܽܘܢ ܙܰܝ̈ܢܶܐ ܕܙܰܕܺܝܩܽܘܬܳܐ ܠܰܐܠܳܗܳܐ[60]. ܒܰܠܚܽܘܕ ܥܰܡ ܢܒܺܝܳܐ ܐܰܙܥܶܩܘ܆ ܡܳܪܝܳܐ ܐܰ‌ܠܳܗܳܐ ܕܺܝܠܰܢ ܩܢܺܝ ܠܰܢ. ܡܳܪܝܳܐ ܠܒܰܪ ܡܶܢܳܟ ܐ̱ܚܪܺܢܳܐ ܠܳܐ ܝܳܕܥܺܝܢܰܢ. ܠܰܫܡܳܟ ܡܫܰܡܗܺܝܢܰܢ[61]. ܓܠܽܘܦܘ ܥܰܠ ܬܰܪܥܺܝܬܟܽܘܢ ܐܰܝܟ ܕܥܰܠ ܩܳܝܶܡܬܳܐ ܡܶܕܶܡ ܠܰܗܦܳܟܬܳܐ ܗܳܝ ܕܶܐܬܗܦܰܟܬܽܘܢ. ܠܳܐ ܬܶܛܥܽܘܢ. ܠܰܘ ܐܶܣܟܺܡܳܐ ܦܫܺܝܛܳܐܺܝܬ ܗܳܟܰܢܳܐ ܐܺܝܬܶܝܗ̇ ܗܳܝ ܕܡܶܣܬܰܥܪܳܐ܆ ܐܶܠܳܐ ܛܽܘܦܣܳܐ ܢܰܗܺܝܪܳܐ ܡܫܰܡܠܝܳܢܳܐ ܕܚܰܝܠܳܐ.

ܫܳܡܰܥ ܗ̱ܘܳܐ ܠܽܘܛ ܟܰܕ ܩܰܕܶܡ ܐܶܬܚܛܶܦ ܡܶܢ ܐܰ‌ܠܳܗܳܐ܆ ܡܶܢ ܪܽܘܓܙܳܐ ܗܰܘ ܕܰܓܙܺܝܡ ܗ̱ܘܳܐ܆ ܩܕܳܡ ܕܰܒܢܽܘܪܳܐ ܘܰܒܟܶܒܪܺܝܬܳܐ ܬܺܐܩܰܕ ܣܕܽܘܡ܆ ܕܟܰܕ ܠܒܰܪ ܡܶܢ ܐܰܬܪܳܐ ܗܰܘ ܗܳܘܶܐ ܐܰܢ̱ܬ ܥܰܡ ܒܢܰܝ̈ܳܐ ܘܰܐܢ̱ܬܬܳܐ܆ ܠܳܐ ܬܚܰܝܰܪ ܠܒܶܣܬܪܳܟ܆ ܐܳܦܠܳܐ ܬܩܽܘܡ ܒܟܽܠܶܗ ܚܕܳܪ̈ܰܝ ܐܰܬܪܳܐ[62]. ܘܗܽܘ ܡܰܢ ܒܦܽܘܩܕܳܢܳܐ ܠܳܐ ܐܰܒܣܺܝ. ܐܰܢ̱ܬܬܶܗ ܕܶܝܢ ܗܳܝ ܕܰܠܩܽܘܒܠܳܐ܆ ܚܙܳܬ ܐܳܡܰܪ ܠܒܶܣܬܪܳܗ̇ ܘܰܗܘ̣ܳܬ ܩܳܝܶܡܬܳܐ ܕܡܶܠܚܳܐ3. ܘܬܽܘܒ ܫܡܽܘܐܝܠ ܗܰܘ ܕܚܳܙܶܐ ܗ̱ܘܳܐ ܕܠܳܐ ܦܰܘܕܳܐ ܠܗܳܝ ܕܰܥܬܺܝܕܳܐ܆ ܘܡܶܛܽܠ ܗܳܕܶܐ ܗܰܘ ܕܚܳܙܶܐ ܡܶܫܬܰܡܰܗ ܗ̱ܘܳܐ[63]܆ ܐܳܡܰܪ ܗ̱ܘܳܐ ܠܫܳܐܘܳܠ܆ ܘܬܶܬܗܦܰܟ ܠܓܰܒܪܳܐ ܐ̱ܚܪܺܢܳܐ. ܘܡܶܠܬܳܐ ܥܒܳܕܳܐ ܐܺܝܬܶܝܗ̇ ܗ̱ܘܳܬ. ܡܰܘܣܶܦ ܓܶܝܪ ܐܳܡܰܪ ܟܬܳܒܳܐ ܗܰܘ ܟܳܗܢܳܝܳܐ ܥܰܠ ܗܳܢܳܐ܆ ܘܰܗܘ̣ܳܐ ܕܟܰܕ ܐܰܗܦܶܟ ܫܳܐܘܳܠ ܟܰܬܦܶܗ ܠܡܺܐܙܰܠ ܡܶܢ ܠܘܳܬ ܫܡܽܘܐܝܠ܆ ܘܰܐܗܦܶܟ ܠܶܗ ܐܰ‌ܠܳܗܳܐ ܠܶܒܳܐ ܐ̱ܚܪܺܢܳܐ[64].

ܡܳܕܶܝܢ ܠܘܳܬ ܓܰܒܪܳܐ ܐ̱ܚܪܺܢܳܐ܆ ܘܰܠܘܳܬ ܠܶܒܳܐ ܐ̱ܚܪܺܢܳܐ܆ ܗܽܘ ܐܶܣܟܺܡܳܐ ܘܡܶܠܬܳܐ ܩܳܪܶܐ ܠܟܽܘܢ ܡܰܠܶܦ ܕܰܒܟܽܠܶܗ ܚܰܝܠܳܐ ܒܳܬܰܪ ܗܳܠܶܝܢ ܕܰܠܩܰܕܡ̈ܶܐ ܡܰܝ̈ܬܝܳܢ ܬܶܪܕܦܽܘܢ. ܕܰܒܗܶܝܢ ܬܶܬܬܰܚܕܽܘܢ. ܕܰܠܘܳܬ ܒܺܝܫܬܳܐ ܠܳܐ ܬܽܘܒ ܬܶܪܗܛܽܘܢ. ܕܡܶܢ ܗܳܪܟܳܐ ܡܳܪܰܢ ܒܶܐܘܰܢܓ̈ܶܠܺܝܰܐ ܐܳܡܰܪ ܗ̱ܘܳܐ܆ ܐܶܬܕܰܟܪܘ ܠܰܐܢ̱ܬܬܶܗ ܕܠܽܘܛ[65]. ܘܬܽܘܒ܆ ܠܳܐ ܐ̱ܢܳܫ ܟܰܕ ܢܰܪܡܶܐ ܐܺܝܕܶܗ ܥܰܠ ܩܺܝܩܢܳܐ ܘܢܶܗܦܽܘܟ ܠܒܶܣܬܪܶܗ܆ ܚܳܫܚܳܐ ܐܺܝܬܰܘܗ̱ܝ ܠܡܰܠܟܽܘܬܳܐ ܕܰܐ‌ܠܳܗܳܐ[66].

ܟܦܰܪܬܽܘܢ ܒܳܐܟܶܠ ܩܰܪܨܳܐ. ܒܨܶܢ̈ܥܳܬܶܗ ܕܗܰܘ. ܒܚܰܪܳܫܽܘܬܳܐ ܡܦܰܬܰܟܬܳܐ. ܒܨܰܕܘܳܐ.[67] ܒܟܽܠܳܗ̇ ܛܳܥܝܽܘܬܳܐ ܡܰܛܥܝܳܢܺܝܬܳܐ ܘܣܰܓܺܝܰܐܬ̣ ܣܶܕܩ̈ܶܐ ܕܕܰܓܳܠܽܘܬܳܐ. ܒܩܳܨܽܘܡܽܘܬܳܐ. ܒܢܰܚܳܫܽܘܬܳܐ. ܒܰܡܡܰܠܠܽܘܬ ܒܶܝܬ ܝܰܠ̈ܕܶܐ ܕܒܳܕܝܳܐ ܗܺܝ ܡܶܢ ܢܰܦܫܳܗ̇ ܐܰܝܟ ܕܡܶܢ ܙܰܘܥܳܐ ܕܟܰܘܟ̈ܒܶܐ܆ ܠܡܰܘ̈ܠܳܕܶܐ ܕܰܒܢܰܝ̈ܢܳܫܳܐ ܘܰܠܗܳܠܶܝܢ ܕܓܳܕܫ̈ܳܢ܆ ܘܰܠܚܶܙܘ̈ܶܐ ܘܕܶܡ̈ܘܳܬܳܐ܆ ܘܰܐܝܟܰܢܳܐ ܕܗܳܢܽܘܢ ܣܪ̈ܺܝܩܶܐ ܐܳܡܪܺܝܢ܆ ܦܶܣ̈ܶܐ ܘܚܶܠ̈ܩܶܐ ܕܚܰܝ̈ܶܐ܆ ܘܰܕܠܽܘܩܒܰܠ ܒܛܺܝܠܽܘܬܳܐ ܕܰܐ‌ܠܳܗܳܐ ܐܶܫܬܰܟܚܰܬ. ܐܰܝܟܰܢܳܐ ܓܶܝܪ ܕܰܠܒܶܕܝܳܐ ܗܰܘ ܕܰܢܛܽܘܪܬܳܐ ܕܫܳܥ̈ܶܐ ܘܥ̈ܶܕܳܢܶܐ ܒܪܶܗܛܳܐ ܢܶܥܒܰܪ܆ ܘܰܠܥܰܣܽܘܣܽܘܬܳܐ ܗܳܝ ܕܡܶܛܽܠ ܚܽܘܕܪܳܐ ܕܟܰܘܟ̈ܒܶܐ ܗܰܘ ܕܡܶܬܶܐܡܰܪ ܛܥܺܝܢ ܚܰܝ̈ܘܳܬܳܐ܆ ܕܰܡܢܰܘ̈ܳܬܳܐ ܗܳܠܶܝܢ ܕܺܐܝܬܶܝܗ̇ ܟܽܠ ܚܕܳܐ ܡܶܢܗܶܝܢ ܚܕܳܐ ܡܶܢ ܏ܝܒ ܐܰܘ ܚܕܳܐ ܡܶܢ ܫܬܺܝܢ܆ ܗܳܝ ܕܚܰܒܠܳܐ ܕܡܶܢ ܚܳܠܳܐ ܡܦܰܫܠܳܐ ܗܳܝ ܟܺܝܬ ܕܡܶܬܐܰܡܪܳܐ܆ ܐܰܝܟܰܢܳܐ ܕܰܡܙܰܥܙܥܽܘܬܳܗ̇ ܠܳܐ ܬܶܬܟܣܶܤ܆ ܕܰܓܠܽܘܬܳܗ̇ ܕܶܝܢ ܠܳܐ ܬܶܬܚܫܶܒ܆ ܒܡܰܟܬܒܳܢܽܘܬܳܐ ܠܳܐ ܚܰܬܺܝܬ̣ܬܳܐ ܕܫܳܥܬܳܐ܆ ܡܳܢܳܐ ܙܳܕܶܩ ܠܡܺܐܡܰܪ܆ ܡܶܛܽܠ ܟܰܘܟ̈ܒܶܐ ܗܳܢܽܘܢ ܥܳܒ̈ܕܰܝ ܒܺܝ̈ܫܳܬܳܐ܆ ܗܳܢܽܘܢ ܕܰܠܥܶܠܬܳܐ ܕܡܶܬܬܙܺܝܥܳܢܽܘܬܳܐ ܕܰܐܝܟ ܗܳܕܶܐ ܥܰܠ ܥܳܒܽܘܕܳܐ ܡܰܣܩܺܝܢ ܠܳܗ̇܆ ܗܰܘ ܕܰܕܟܽܠܗܶܝܢ ܛܳܒ̈ܳܬܳܐ ܐܺܝܬܰܘܗ̱ܝ ܥܶܠܬܳܐ ܟܺܝܬ ܘܰܡܕܰܒܪܳܢܳܐ. ܡܶܢܰܢ ܓܶܝܪ ܐܺܝܬܶܝܗ̇ ܒܺܝܫܬܳܐ܆ ܕܰܒܫܰܠܺܝܛܽܘܬ ܒܝܳܬܳܐ ܘܰܒܨܶܒܝܳܢܳܐ ܕܺܝܠܰܢ ܡܕܰܒܪܺܝܢ ܚ̱ܢܰܢ ܢܰܦܫܰܢ܆ ܘܠܰܘ ܡܶܢ ܡܶܕܶܡܐ̱ܚܪܺܝܢ. ܐܶ‌ܠܽܘ ܓܶܝܪ ܡܶܢ ܐܰܢܰܢܩܺܐ ܕܟܰܘܟ̈ܒܶܐ ܡܶܬܕܰܒܪܺܝܢ ܗ̱ܘܰܝܢ܆ ܣܪܺܝܩܳܐ ܐܺܝܬܰܘܗ̱ܝ ܗ̱ܘܳܐ ܥܰܡܠܳܐ ܕܰܡܝܰܬܪܽܘܬܳܐ. ܣܪܺܝܩܳܐܺܝܬ ܡܫܰܢܩܺܝܢ ܢܳܡܽܘ̈ܣܶܐ ܠܓܰܢܳܒܽܘܬܳܐ ܘܰܠܩܶܛܠܳܐ ܘܰܠܓܰܘܪܳܐ܆ ܘܰܠܗܳܢܶܝܢ ܕܫܰܪܟܳܐ ܕܰܡܥܰܘ̈ܠܳܢܘܳܬܳܐ. ܘܠܳܐ ܐ̱ܢܳܫ ܡܶܬܬܘܶܐ ܗ̱ܘܳܐ ܥܰܠ ܒܺܝܫܽܘܬܳܐ܆ ܟܰܕ ܚܕܳܐ ܙܒܰܢ ܠܘܳܬ ܒܺܝܫܬܳܐ ܐܺܝܬ ܗ̱ܘܳܐ ܠܶܗ ܚܶܠܩܳܐ ܕܦܠܓܘܬܗ.

ܗܳܠܶܝܢ ܕܡܶܛܽܠܳܬܗܶܝܢ ܟܰܕ ܣܰܓܺܝ̈ܳܐܬܳܐ ܐܺܝܬ ܗ̱ܘܳܐ ܠܺܝ ܕܺܐ݀ܡܰܪ܆ ܥܳܒܰܪ ܐ̱ܢܳܐ ܠܗܶܝܢ ܡܶܛܽܠ ‌ܐܰ‌ܠܺܝܨܽܘܬܶܗ ܕܥܶܕܳܢܳܐ. ܡܙܰܗܪܳܢܰܐ ܗ̄ܘ ܓܶܝܪ ܗܽܘ ܡܺܐܡܪܳܐ ܘܡܰܪܬܝܳܢܳܐ܆ ܐܶܠܳܐ ܠܰܘ ܕܣܰܩܽܘܒܠܳܝܽܘܬ ܡܶܠܬܳܐ. ܟܰܕ ܗܳܝ ܚܕܳܐ ܝܳܕܰܥ ܐ̱ܢܳܐ ܚܰܬܺܝܬ̣ܳܐܺܝܬ܆ ܕܣܰܓܺܝ̈ܶܐܐ ܡܶܢܗܽܘܢ ܕܗܳܢܽܘܢ ܕܡܶܫܬܰܘܕܶܝܢ܆ ܕܚܰܟܺܝܡܳܐܺܝܬ ܘܚܰܬܺܝܬ̣ܳܐܺܝܬ ܝܳܕܥܺܝܢ ܠܗܶܝܢ ܠܗܳܠܶܝܢ܆ ܝܰܬܺܝܪ ܣܰܓܺܝ ܒܺܝܫܽܘܬ[68] ܫܺܐܕܳܢܳܐܺܝܬ ܚܳܐܝܶܢ܆ ܝܰܬܺܝܪ ܡܶܢ ܟܽܠܗܽܘܢ ܗܳܢܽܘܢ ܕܕܳܘܝܳܐܺܝܬ ܣܺܝܡܺܝܢ܆ ܐܰܝܟܰܢܳܐ ܕܰܐܟܘܳܬܗܽܘܢ ܐܺ݀ܡܰܪ. ܠܗܳܢܽܘܢ ܕܙܳܕܶܩ ܗ̱ܘܳܐ ܠܗܽܘܢ ܕܰܢܦܺܝܣܽܘܢ ܠܟܰܘܟ̈ܒܶܐ ܕܺܝܠܗܽܘܢ܆ ܠܳܐ ܓܶܝܪ ܐܳܡܰܪ ܐ̱ܢܳܐ ܠܗܽܘܢ ܠܗܳܠܶܝܢ ܕܰܐܝܟ ܗܳܟܰܢ ܕܺܝܠܝ܆ ܐܶܢ ܟܺܝܬ ܡܠܺܝܠܳܐܺܝܬ ܘܰܐܟܙܢܳܐ ܕܡܽܘܣܺܝܩܳܐܺܝܬ ܡܶܬܬܙܺܝܥܺܝܢ܆ ܐܳܡܪܺܝܢ ܐܶܢܽܘܢ ܓܶܝܪ ܐܳܦ ܗܳܕܶܐ܆ ܕܢܰܝܬܽܘܢ ܚܕܳܐ ܡܶܬܬܙܺܝܥܳܢܽܘܬܳܐ ܠܽܘܩܒܰܠ ܕܶܚܠܬܳܐ ܕܰܟܪ̈ܺܝܣܛܝܳܢܶܐ. ܡܰܠܽܘܢ ܕܶܝܢ܆ ܕܢܶܬܥܰܕܠܽܘܢ ܒܗܽܘܢ ܒܗܳܠܶܝܢ ܕܡܰܩܪܒܳܢܳܐܺܝܬ ܠܽܘܩܒܰܠ ܢܰܦܫܗܽܘܢ ܐܶܬܬܙܺܝܥܘ܆ ܟܰܕ ܐܰܝܬܺܝܘ ܕܽܘܓܡܰܐ܆ ܗܰܘ ܕܺܐܝܬܰܘܗ̱ܝ ܒܥܶܠܕܒܳܒܳܐ ܘܰܒܥܶܠܕܰܪܳܐ ܕܺܝܠܗܽܘܢ ܕܢܰܦܫܗܽܘܢ.

ܐܶܠܳܐ ܗܳܠܶܝܢ ܡܰܢ ܡ̈ܰܬܠܶܐ ܘܚܶܠ̈ܡܶܐ܆ ܫܰܪܺܝܪ̈ܳܬܳܐ ܕܶܝܢ ܡ̈ܶܠܶܐ ܕܗܰܘ ܕܶܐܡܰܪ܆ ܕܰܫܡܰܝܳܐ ܘܰܐܪܥܳܐ ܬܶܥܒܰܪ܆ ܡ̈ܶܠܶܐ ܕܶܝܢ ܕܺܝܠܝ ܠܳܐ ܢܶܥܒܪ̈ܳܢ[69]܆ ܡܶܢ ܗܳܪܟܳܐ ܫܰܬܺܝܩ ܩܰܩܒܳܐ ܕܢܰܚܳܫܳܐ ܗܰܘ ܩܳܨܽܘܡܳܝܳܐ ܕܰܒܕܘܕܘܢܐ܆ ܡܰܝ̈ܳܐ ܗܳܢܽܘܢ ܡܡܰܠ̈ܠܰܝ ܫܳܢ̈ܝܳܬܳܐ ܕܒܩܐܤܛܐܠܝܐ܆ ܛܪܺܝܦܽܘܕܐ ܗܰܘ ܕܠܦܝܐ܆ ܫܒܳܒܳܐ ܕܺܝܠܰܢ ܗܳܢܳܐ ܙܠܺܝܡܳܐ ܕܰܒܕܦܢܐ. ܐܺܝܢ ܐܳܡܰܪ ܡܶܛܽܠ ܕܠܳܐ ܡܶܬܬܢܺܝܚܺܝܢ ܒܕܶܒ̈ܚܶܐ ܘܒܰܕܡ̈ܶܐ. ܐܳܘ ܡܶܢ ܚܰܣܺܝܪܽܘܬ ܗܰܘܢܳܐ. ܗܳܫܳܐ ܓܶܝܪ ܝܰܬܺܝܪܳܐܺܝܬ ܙܳܕܶܩ ܗ̱ܘܳܐ ܕܰܢܚܰܘܽܘܢ ܗܳܠܶܝܢ ܒܰܝ̈ܬܳܝܳܬܳܐ ܕܺܝܠܗܽܘܢ ܫܦܺܝܥܳܐܺܝܬ܆ ܐܰܘ ܡܶܢ ܩܕܺܝܡ. ܐܰ‌ܠܳܗܽܘܬܳܐ ܓܶܝܪ ܠܳܐ ܣܢܺܝܩܬܳܐ ܗܝ. ܘܫܰܦܺܝܪܽܘܬ ܕܶܚܠܬܳܐ ܟܰܕ ܡܶܬܬܰܩܪܒܳܐ܆ ܝܰܬܺܝܪ ܢܰܨܺܝܚܬܳܐ ܡܶܬܚܰܙܝܳܐ. ܡܶܛܽܠ ܗܳܕܶܐ ܟܺܝܬ ܐܳܦ ܐܰ‌ܠܳܗܳܝܳܐ ܕܳܢܝܐܝܠ ܘܗܳܢܽܘܢ ܬܠܳܬܳܐ ܛܠܳܝ̈ܶܐ ܕܰܒܒܳܒܶܠ܆ ܟܰܕ ܐܳܡܪܺܝܢ ܗ̱ܘܰܘ ܕܠܳܐ ܐܺܝܬ ܝܰܩܕܳܐ ܫܰܠܡܳܐ܆ ܠܳܐ ܕܶܒܚܬܳܐ܆ ܠܳܐ ܩܽܘܪܒܳܢܳܐ܆ ܠܳܐ ܒܶܣ̈ܡܶܐ[70]܆ ܚܰܝ̈ܠܶܐ ܕܳܐܬܘ̈ܳܬܳܐ ܡܰܥܒܕܺܝܢ ܗ̱ܘܰܘ ܘܡܶܬܢܰܒܶܝܢ ܗ̱ܘܰܘ. ܗܳܫܶܐ ܕܶܝܢ ܕܓܰܕܶܦ ܟܽܠܶܗ ܥܰܡܳܐ ܕܝܽܗ̱ܘ̈ܕܳܝܶܐ ܘܰܐܪܫܰܥ܆ ܠܽܘܩܒܰܠܡܫܺܝܚܳܐ ܗܰܘ ܕܡܰܠܶܠ ܒܰܢܒܺܝ̈ܶܐ[71]܆ ܘܗܳܕܶܐ ܟܰܕ ܦܳܠܰܚ ܘܰܡܫܰܡܶܫ ܐܰܝܟܰܢܳܐ ܕܰܠܗܽܘܢ ܡܶܣܬܰܒܪܳܐ܆ ܪܕܶܐ ܘܰܙܪܺܝܩ ܒܟܽܠ ܕܽܘܟ ܕܰܐܪܥܳܐ܆ ܘܳܐܦܠܳܐ ܠܰܚܕܳܐ ܬܶܕܡܽܘܪܬܳܐ ܐܰܘ ܢܒܺܝܽܘܬܳܐ ܟܽܠ ܟܽܠܶܗ ܐܶܫܬܘܺܝ. ܗܰܝܡܳܢܽܘܬܳܐ ܕܶܝܢ ܕܰܟܪ̈ܺܝܣܛܝܳܢܶܐ܆ ܟܰܕ ܟܺܝܬ ܫܰܪܝܰܬ ܐܰܟܚܕܳܐ ܘܡܶܬܪܰܕܦܳܐ ܗ̱ܘܳܬ܆ ܘܡܶܢ ܟܽܠ ܕܽܘܟ ܡܶܬܛܰܪܕܳܐ ܗ̱ܘܳܬ܆ ܘܡܶܬܢܰܬܫܳܐ ܗ̱ܘܳܬ ܒܫܶܢ̈ܕܶܐ ܕܟܽܠ ܙܢܺܝ̈ܢ܆ ܘܰܠܟܽܠܳܗ̇ ܐܰܪܥܳܐ ܙܠܺܝܚܳܐ ܒܰܕܡ̈ܶܐ܆ ܒܝܰܕ ܐܳܬܘ̈ܳܬܳܐ ܐܰܨܡܚܰܬ܆ ܟܰܕ ܐܺܝܬ ܗ̱ܘܳܐ ܠܳܗ̇ ܐܰ‌ܠܳܗܳܐ ܕܡܰܩܪܶܒ ܚܠܳܦܶܝܗ̇.

ܐܶܠܳܐ ܡܳܢܳܐ ܐܶ݀ܥܒܶܕ ܟܰܕ ܠܣܽܘܓܳܐܐ ܚܳܙܶܐ ܐ̱ܢܳܐ ܠܶܗ ܠܡܺܐܡܪܳܐ ܕܢܳܦܶܩ܆ ܘܡܶܛܽܠ ܗܳܢܳܐ ܡܶܬܬܟܶܤ ܐ̱ܢܳܐ ܕܺܐ݀ܡܰܪ ܝܰܬܺܝܪܳܐ. ܐܢ̱ܬܽܘܢ ܗܳܟܺܝܠ ܟܰܕ ܠܟܽܠܳܗ̇ ܛܳܥܝܽܘܬܳܐ ܚܕܺܝ ܐܳܡܪܺܝܢ ܐܢ̱ܬܽܘܢ܆ ܐܰܝܟ ܣܝܳܡ ܢܳܡܽܘܣܳܐ ܫܠܺܝܚܳܝܳܐ܆ ܟܽܠ ܗܰܘ ܡܳܐ ܕܥܳܒܕܺܝܢ ܐܢ̱ܬܽܘܢ ܒܡܶܠܬܳܐ ܐܰܘ ܒܰܥܒܳܕܳܐ܆ ܟܽܠܗܶܝܢ ܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܥܒܶܕܘ[72]܆ ܘܠܳܐ ܬܶܦܕܽܘܢ ܡܶܢ ܗܳܝ ܕܦܳܩܚܳܐ. ܥܰܡ ܗܳܢܳܐ ܕܶܝܢ ܥܽܘܬܳܕܳܐ܆ ܪܗܰܛܘ ܠܘܳܬ ܥܡܳܕܳܐ ܐܰ‌ܠܳܗܳܝܳܐ. ܠܘܳܬ ܡܰܝ̈ܳܐ. ܠܘܳܬ ܪܽܘܚܳܐ ܗܰܘ ܕܒܺܐܝܕܰܘ̈ܗ̱ܝ ܥܬܺܝܕܺܝܢ ܐܢ̱ܬܽܘܢ ܠܡܶܬܕܰܟܳܝܽܘ ܡܶܢ ܟܽܠ ܨܳܐܬܳܐ܆ ܟܰܕ ܡܰܓܗܶܝܢ ܐܢ̱ܬܽܘܢ ܡܶܢ ܟܽܠ ܟܽܘܬܡܳܐ. ܠܘܳܬ ܢܰܦܫܳܐ ܥܳܒܪܺܝܢ ܗܶܢܽܘܢ ܡܰܝ̈ܳܐ. ܥܰܡ ܪܽܘܚܳܐ ܓܶܝܪ ܐܰ‌ܠܳܗܳܝܳܐ ܡܡܰܙܓܺܝܢ. ܗܳܠܶܝܢ ܠܳܐ ܡܶܬܚܰܙܝܳܢ̈ܝܳܬܳܐ ܡܰܣܚܶܝܢ. ܒܗܳܠܶܝܢ ܕܰܡܛܰܫ̈ܝܳܢ ܓܳܫܦܺܝܢ. ܨܽܘܬܳܝܗ̱ܝ ܠܰܢܒܺܝܳܐ ܕܡܶܢ ܪܽܘܚܩܳܐ ܩܰܕܶܡ ܐܰܙܥܩܶܗ ܠܚܰܝܠܳܐ܆ ܣܚܰܘ ܕܟܰܝ̈ܳܐ ܗܘ̣ܰܘ܆ ܐܰܪܺܝܡܘ ܒܺܝ̈ܫܳܬܳܐ ܕܺܝܠܟܽܘܢ ܡܶܢ ܢܰܦ̈ܫܳܬܟܽܘܢ܆ ܘܶܐܢ ܢܶܗܘܽܘܢ ܚ̈ܛܳܗܰܝܟܽܘܢ ܐܰܝܟ ܣܽܘܡܳܩܳܐ܆ ܐܰܝܟ ܬܰܠܓܳܐ ܐܶ݀ܚܰܘܰܪ ܐܶܢܽܘܢ܆ ܐܶܢ ܕܶܝܢ ܢܶܗܘܽܘܢ ܐܰܝܟ ܙܚܽܘܪܺܝܬܳܐ܆ ܐܰܝܟ ܥܰܡܪܳܐ ܐܶ݀ܚܰܘܰܪ ܐܶܢܽܘܢ[73]. ܗܳܕܶܐ ܕܶܝܢ ܠܰܘ ܫܽܘܚܠܳܦܳܐ ܕܕܽܘܟܳܝܳܐ ܡܚܰܘܝܳܐ܆ ܚܰܕ ܓܶܝܪ ܐܺܝܬܰܘܗ̱ܝ ܘܗܽܘ ܟܰܕ ܗܽܘ ܘܰܫܘܶܐ ܒܺܐܝܩܳܪܳܐ܆ ܐܶܠܳܐ ܕܢܰܨܺܝܚܽܘܬܶܗ ܕܰܥܡܳܕܳܐ ܕܰܐܟܚܕܳܐ ܐܰܝܟ ܬܰܠܓܳܐ܆ ܘܳܐܦ ܠܒܽܘܫܳܐ ܗܳܘܝܳܐ. ܗܳܕܶܐ ܓܶܝܪ ܡܚܰܘܶܐ ܥܰܡܪܳܐ. ܟܽܠܟܽܘܢ ܓܶܝܪ ܐܳܡܰܪ ܦܰܘܠܽܘܤ ܗܳܢܽܘܢ ܕܒܰܡܫܺܝܚܳܐ ܥܡܰܕܬܽܘܢ܆ ܠܰܡܫܺܝܚܳܐ ܠܒܶܫܬܽܘܢ[74]. ܡܶܛܽܠ ܕܳܐܦ ܥܰܡܪܳܐ ܗܳܟܰܢܳܐ ܐܺܝܬܰܘܗ̱ܝ ܚܶܘܳܪܳܐ. ܘܡܶܢ ܬܰܠܓܳܐ ܘܠܳܐ ܡܶܕܶܡ ܐܰܘ ܩܰܠܺܝܠ ܡܶܕܶܡ ܒܨܺܝܪ܆ ܩܰܕܺܝܡܳܐ ܗܝ ܝܺܕܺܝܥܳܐ. ܟܰܕ ܓܶܝܪ ܨܳܒܶܐ ܗ̱ܘܳܐ ܗܽܘ ܢܒܺܝܳܐ ܕܰܢܚܰܘܶܐ ܐܰܟܚܕܳܐ܆ ܕܥܰܡ ܫܦܺܝܥܽܘܬܳܐ ܣܰܓܺܝܐܬܳܐ ܣܚܳܬܳܐ ܗܳܝ ܐܰ‌ܠܳܗܳܝܬܳܐ܆ ܐܳܦ ܡܚܰܘܳܪܽܘ ܡܚܰܘܪܳܐ ܐܳܦ ܡܰܠܒܳܫܽܘ ܡܰܠܒܫܳܐ܆ ܐܶܨܛܪܶܟ ܘܶܐܬܦܰܫܰܟ܆ ܘܠܳܐ ܐܶܫܟܰܚ ܚܕܳܐ ܬܰܚܘܺܝܬܳܐ܆ ܕܡܶܫܟܚܳܐ ܕܰܡܫܰܡܠܝܳܐܺܝܬ ܬܚܰܘܘܗ̱ܝ ܠܨܰܠܡܳܐ. ܠܬܰܠܓܳܐ ܡܰܢ ܓܶܝܪ ܐܺܝܬ ܠܶܗ ܢܰܨܺܝܚܽܘܬܳܐ ܛܳܒ. ܡܰܠܒܶܫ ܕܶܝܢ ܘܠܳܐ ܣܳܟ. ܥܰܡܪܳܐ ܕܶܝܢ ܟܰܕ ܣܽܘܟܳܠܳܐ ܕܰܠܒܽܘܫܳܐ ܡܰܝܬܶܐ܆ ܠܚܶܘܳܪܽܘܬܳܐ ܗܳܝ ܪܺܝܫܳܝܬܳܐ ܕܬܰܠܓܳܐ ܠܳܐ ܡܚܰܘܶܐ. ܐܳ‌ܠܨܳܐܺܝܬ ܗܳܟܺܝܠ ‌ܐܶܬܚܰܫܰܚ ܒܰܬܪ̈ܰܝܗܽܘܢ܆ ܟܰܕ ܨܳܒܶܐ ܗ̱ܘܳܐ ܕܰܢܫܰܘܕܰܥ ܠܚܰܝܠܳܐ ܕܚܰܕ ܣܽܘܥܪܳܢܳܐ. ܠܰܘ ܓܶܝܪ ܐܰܝܟܰܢܳܐ ܕܫܽܘܚܠܳܦܳܐ ܕܕܽܘܟܳܝܳܐ ܢܰܥܶܠ.

ܠܗܳܕܶܐ ܕܶܝܢ ܐܳܦ ܥܰܠ ‌ܐ̱ܚܪ̈ܳܢܝܳܬܳܐ ܐܺܝܬ ܠܡܶܫܟܳܚܽܘ ܒܰܟܬܳܒܳܐ ܐܰ‌ܠܳܗܳܝܳܐ. ܟܰܕ ܓܶܝܪ ܦܳܪܽܘܩܢ ܡܫܺܝܚܳܐ ܐܶܫܬܰܚܠܰܦ ܒܰܕܡܽܘܬܶܗ ܥܰܠ ܛܽܘܪܳܐ܆ ܡܰܬܰܝ ܡܰܢ ܐܳܡܰܪ܆ ܕܢܰܚ̈ܬܰܘܗ̱ܝ ܗܘ̣ܰܘ ܚܶܘܳܪ̈ܶܐ܆ ܐܰܝܟ ܢܽܘܗܪܳܐ[75]. ܡܰܪܩܽܘܤ ܕܶܝܢ܆ ܕܢܰܚ̈ܬܰܘܗ̱ܝ ܗܘ̣ܰܘ ܕܡܰܙܠܓܺܝܢ܆ ܚܶܘܳܪ̈ܶܐ ܣܰܓܺܝ ܐܰܝܟ ܬܰܠܓܳܐ[76]. ܐܰܝܟ ܐܰܝܠܶܝܢ ܕܩܰܨܳܪܳܐ ܥܰܠ ‌ܐܰܪܥܳܐ ܠܳܐ ܡܶܫܟܰܚ ܠܰܡܚܰܘܳܪܽܘ. ܘܟܰܕ ܛܳܒ ܐܰܝܟܰܢܳܐ ܠܳܐ ܝܺܕܺܝܥܳܐ ܕܥܰܠ ܚܰܕ ܟܺܝܬ ܘܗܽܘ ܟܰܕ ܗܽܘ ܣܽܘܥܪܳܢܳܐ܆ ܡܶܢ ܬܰܚ̈ܘܝܳܬܳܐ ܘܠܳܐ ܚܰܕ ܫܽܘܚܠܳܦܳܐ ܥܳܐܶܠ܆ ܘܗܳܕܶܐ ܟܰܕ ܐܺܝܬ ܫܽܘܚܠܳܦܳܐ ܒܰܫܪܳܪܳܐ܆ ܘܰܒܢܽܘܗܪܳܐ ܘܰܒܬܰܠܓܳܐ܆ ܘܳܐܦ ܒܢܰܚ̈ܬܶܐ ܕܡܶܬܩܰܨܪܺܝܢ. ܐܶܢ ܟܺܝܬ ܗܳܟܺܝܠ ܡܰܣܡܩܳܐ ܐܺܝܬܰܘܗ̱ܝ ܐ̱ܢܳܫ ܒܰܚܛܺܝܬܳܐ܆ ܘܶܐܢ ܟܺܝܬ ܕܡܳܢܳܝܳܐ ܘܣܽܘܡܳܩܳܐ܆ ܠܳܗ̇ ܟܰܕ ܠܳܗ̇ ܠܛܰܝܒܽܘܬܳܐ ܢܶܫܬܘܶܐ. ܟܰܕ ܡܶܬܢܰܨܰܚ ܟܺܝܬ ܘܟܰܕ ܠܳܒܶܫ.

ܠܳܐ ܗܳܟܺܝܠ ܒܡܰܝ̈ܳܐ ܒܰܠܚܽܘܕ ܬܶܚܽܘܪܽܘܢ. ܐܶܠܳܐ ܐܳܦ ܒܡܶܠܬܳܐ ܗܳܝ ܕܰܡܩܰܕܫܳܐ. ܡܶܠܬܳܐ ܓܶܝܪ ܚܰܝܠܶܗ ܕܰܥܡܳܕܳܐ܆ ܡܶܛܽܠ ܟܺܝܬ ܕܕܰܐ‌ܠܳܗܳܐ ܐܺܝܬܶܝܗ̇ ܡܶܠܬܳܐ. ܐܳܡܰܪ ܓܶܝܪ ܚܰܟܺܝܡܳܐ ܦܰܘܠܽܘܤ܆ ܟܰܕ ܕܰܟܺܝ ܒܰܣܚܳܬܳܐ ܕܡܰܝ̈ܳܐ ܒܡܶܠܬܳܐ[77]. ܠܳܐ ܠܘܳܬܝ ܬܚܽܘܪܽܘܢ܆ ܗܰܘ ܕܡܰܪ̈ܫܘܳܬܳܐ ܣܰܓܺܝ̈ܳܐܬܳܐ ܡܠܶܐ ܐ̱ܢܳܐ܆ ܐܶܠܳܐ ܠܘܳܬ ܡܫܺܝܚܳܐ. ܕܝܰܬܺܝܪ ܪܰܒܳܐ ܐܰܘ ܐܰܝܟ ܝܽܘܚܰܢܳܢ ܡܰܙܥܶܩ ܐ̱ܢܳܐ܆ ܗܳܝ ܕܗܽܘ ܢܰܥܡܶܕܟܽܘܢ ܒܪܽܘܚܳܐ ܩܰܕܺܝܫܳܐ ܘܰܒܢܽܘܪܳܐ[78]. ܗܽܘ ܘܠܰܘ ܐ̱ܚܪܺܢܳܐ ܩܳܐܶܡ ܥܰܠ ܡܥܺܝܢܳܐ. ܗܽܘ ܦܳܬܰܚ ܠܰܫܡܰܝܳܐ. ܗܽܘ ܡܰܚܶܬ̣. ܡܰܠܽܘܢ ܕܶܝܢ ܐܰܝܟ ܐܰܝܢܳܐ ܕܒܶܗ ܐܺܝܬܰܘܗ̱ܝ ܡܰܫܟܰܢ ܪܽܘܚܳܐ. ܠܒܰܪ̱ܬ ܩܳܠܳܐ ܕܰܐܒܳܐ ܕܡܰܘܕܝܳܐ ܠܟܽܘܢ ܒܢܰܝ̈ܳܐ ܐܳܦܶܢ ܠܰܘ ܐܰܟܘܳܬܶܗ. ܗܽܘ ܓܶܝܪ ܐܺܝܬܰܘܗ̱ܝ ܗ̱ܘܳܐ ܒܽܐܘܣܺܝܰܐ ܒܪܳܐ܆ ܕܠܰܢ ܘܠܳܐ ܗ̱ܘܳܐ ܠܶܗ ܥܳܡܶܕ ܗ̱ܘܳܐ. ܐܢ̱ܬܽܘܢ ܕܶܝܢ ܬܶܗܘܽܘܢ ܒܛܰܝܒܽܘܬܳܐ. ܥܡܳܕܶܗ ܗܳܟܺܝܠ ܕܗܰܘ܆ ܗܰܘ ܕܒܺܐܝܕܰܘ̈ܗ̱ܝ ܕܰܟܺܝ ܐܶܢܽܘܢ ܠܡܰܝ̈ܳܐ܆ ܐܺܝܬܰܘܗ̱ܝ ܗܰܘ ܕܡܰܥܒܶܕ܆ ܐܳܦ ܒܝܰܕ ܡܶܨܥܳܝܽܘܬܳܐ ܕܺܝܠܰܢ.

ܡܳܕܶܝܢ ܟܰܕ ܡܶܢ ܬܰܡܳܢ ܣܳܠܩܺܝܢ ܐܢ̱ܬܽܘܢ ܢܰܨܺܝ̈ܚܶܐ܆ ܡܶܢ ܟܽܠ ܡܳܐ ܕܺܐܝܬܰܘܗ̱ܝ ܐܽܘܟܳܡܳܐ ܐܰܘ ܕܥܳܒܶܕ ܟܽܘܬܡܳܐ ܐܰܗܦܶܟܘ ܐܰܦܰܝ̈ܟܽܘܢ. ܐܰܟܙܢܳܐ ܓܶܝܪ ܕܐ̱ܢܳܫ ܡܶܣܟܺܢܳܐ ܘܒܳܝܫܳܐ܆ ܟܰܕ ܢܶܣܰܒ ܡܶܢ ܐ̱ܢܳܫ ܒܡܰܘܗܰܒܬܳܐ ܘܰܒܛܰܝܒܽܘܬܳܐ ܢܰܚܬܳܐ ܚܶܘܳܪܳܐ܆ ܠܳܐ ܡܶܬܪܡܶܐ ܕܰܠܗܳܢܳܐ ܒܰܚܫܰܚܬܳܐ ܗܳܝ ܕܰܥܝܳܕܳܐ ܢܨܰܐܶܐ ܐܶܠܳܐ ܒܥ̈ܺܐܕܶܐ ܒܰܠܚܽܘܕ ܡܶܬܚܰܫܰܚ ܒܶܗ܆ ܘܗܳܕܶܐ ܙܗܺܝܪܳܐܺܝܬ ܘܰܢܛܺܝܪܳܐܝܬ܆ ܗܳܟܰܢܳܐ ܐܳܦ ܐܢ̱ܬܽܘܢ ܟܰܕ ܐܶܤܛܠܳܐ ܐܰ‌ܠܳܗܳܝܬܳܐ ܘܡܰܠܟܳܝܬܳܐ ܬܶܣܒܽܘܢ܆ ܠܳܐ ܟܰܕ ܠܳܒܫܺܝܢ ܐܢ̱ܬܽܘܢ ܠܳܗ̇܆ ܠܘܳܬ ܗܳܠܶܝܢ ܕܒܰܥܝܳܕܳܐ ܥ̈ܒܳܕܶܐ ܕܒܰܚ̈ܛܳܗܶܐ ܬܺܐܙܽܠ̱ܘܢ. ܬܶܨܛܰܐܰܐ ܓܶܝܪ. ܐܶܠܳܐ ܐܰܝܟ ܕܰܒܥܺܐܕܳܐ ܟܽܠܶܗ ܙܰܒܢܳܐ ܐܶܬܕܰܒܰܪܘ. ܡܳܢܰܐ ܗ̱ܘ ܕܶܝܢ ܥܺܐܕܳܐ܆ ܥܽܘܗܕܳܢܳܐ ܕܰܐ‌ܠܳܗܳܐ. ܐܳܦ ܓܶܝܪ ܐܶܬܕܰܟܪܶܬ ܠܰܐܠܳܗܳܐ[79]. ܘܰܚܕܺܝܬ̣ ܐܳܡܰܪ ܕܰܘܺܝܕ. ܐܶܬܕܰܟܪܘ ܗܳܟܺܝܠ ܠܗܰܘ ܘܰܠܢܰܦܫܟܽܘܢ. ܐܶܢ ܓܶܝܪ ܠܘܳܬܰܢ ܬܚܽܘܪܽܘܢ܆ ܐܶܢ ܠܰܘ ܣܰܓܺܝ ܩܫܺܝܬܳܐ ܐܺܝܬܶܝܗ̇ ܠܡܺܐܡܰܪ܆ ܐܳܦ ܐܰܟܚܕܳܐ ܢܶܥܽܘܠ ܥܰܡܟܽܘܢ. ܡܰܠܽܘܢ ܕܶܝܢ ܢܶܩܕܽܘܡܟܽܘܢ ܒܽܐܘܪܚܳܐ ܗܳܝ ܕܰܠܘܳܬ ܚܛܺܝܬܳܐ ܘܰܠܘܳܬ ܟܽܠ ܡܰܗܡܝܳܢܽܘܬܳܐ ܡܰܝܬܝܳܐ. ܡܶܛܽܠ ܗܳܕܶܐ ܨܰܠܰܘ ܒܫܳܥܬܳܐ ܗܳܝ ܕܒܳܗ̇ ܠܛܰܝܒܽܘܬܳܐ ܕܣܳܝܽܘܡܽܘܬ ܒܢܰܝ̈ܳܐ ܠܳܒܫܺܝܢ ܐܢ̱ܬܽܘܢ܆ ܡܶܫܟܚܺܝܢ ܐܢ̱ܬܽܘܢ ܗܘ ܓܶܝܪ܆ ܕܳܐܦ ܚܢܰܢ ܟܰܕ ܡܶܫܬܰܚܠܦܺܝܢ ܚ̱ܢܰܢ ܢܺܚܶܐ ܥܰܡܟܽܘܢ܆ ܠܬܶܫܒܽܘܚܬܳܐ ܕܰܡܫܺܝܚܳܐ ܐܰ‌ܠܳܗܳܐ ܕܥܰܠ ܟܽܠ. ܠܶܗ ܬܶܫܒܽܘܚܬܳܐ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ[80]‌܀

ܫܠܶܡ ܡܺܐܡܪܳܐ ܕܡܐܐ ܘܬܶܫܥܳܐ.

ܡܦܩܢܐ. 3: 10 ـ 11 [1]

ܒܩܰܢܺܝܛܽܘܬܳܐ[2]

ܡܦܩܢܐ. 3: 13 [3]

ܐܬܕܡܝ ܠܝ [4]

ܐܦܣ̈ܝܐ. 4: 5[5]

ܒ. ܩܘܪ̈ܝܢܬܝܐ. 11: 4 [6]

ܡܣܒܪ ܗܘܝܬ[7]

ܡ̈ܬܠܐ. 20: 13 [8]

ܡܬܝ. 7: 7 ـ 8  ܐܦ ܠܘܩܐ. 11: 9 ـ 10 [9]

ܬܢܝܢ ܢܡܘܣܐ. 30: 14 [10]

ܡܦܩܢܐ. 3: 13 [11]

ܡܦܩܢܐ. 3: 14 ـ 15 [12]

ܕܽܐܘܣܺܝܰܐ[13]

ܡܦܩܢܐ. 3: 15 [14]

ܡܙܡܘܪ̈ܐ. 80: 1 [15]

ܡܦܩܢܐ. 3: 15 [16]

[17]ܒܠܶܫܳܢܳܐ ܝܰܘܢܳܝܳܐ ܐܺܝܬ ܗܕܡܽܘ̈ܢܶܐ ܡܶܕܶܡ ܙܥܽܘܪ̈ܶܐ ܕܡܶܬܩܪܶܝܢ ܐܪܬܪ̈ܐ ܐܰܘܟܺܝܬ ܫܪ̈ܝܬܐ܆ ܘܡܶܬܬܣܺܝܡܺܝܢ ܩܕܳܡ ܫܡܳܗ̈ܶܐ. ܘܰܠܘܳܬ ܠܶܫܳܢܳܐ ܗܳܢܳܐ ܣܽܘܪܝ̣ܳܝ̣ܳܐ ܠܐ ܐܺܝܬܰܝܗܽܘܢ. ܘܰܐܝܟ ܕܡܶܢ ܐܰܢܰܢܩܺܐ ܡܶܟܺܝܠ ܣܳܡܢܰܢ ܚܠܳܦܰܝܗܽܘܢ ܩܕܳܡ ܫܡܳܐ ܗܰܘ ܕܰܐ‌ܠܳܗܳܐ܆ ܟܰܕ ܐܳܡܪܺܝܢܰܢ: ܗܰܘ ܐܰ‌ܠܳܗܳܐ. ܐܰܝܟܳܐ ܗܳܟܺܝܠ ܕܗܳܠܶܝܢ ܕܡܶܬܬܣܺܝܡܺܝܢ ܥܰܡ ܫܡܳܗ̈ܶܐ ܡܚܰܘܶܝܢ܆ ܕܕܺܝܠܳܢܳܝ̈ܶܐ ܡܶܕܶܡ ܐܺܝܬܰܝܗܽܘܢ ܣܽܘܥܪ̈ܳܢܶܐ ܗܳܠܶܝܢ ܕܡܶܢ ܫܡܳܗ̈ܶܐ ܡܶܬܝܰܕܥܺܝܢ. ܗܳܢܰܘ ܕܶܝܢ ܩܢܽܘܡ̈ܶܐ ܝܺܕܺܝ̈ܥܶܐ ܘܰܦܪ̈ܺܝܫܶܐ܆ ܘܠܰܘ ܓܰܘܳܢܳܝ̈ܶܐ.

ܡܦܩܢܐ. 3: 15 [18]

ܝܘܚܢܢ. 4: 24 [19]

[20]ܥܳܠܡܳܐ ܗܳܪܟܳܐ܆ ܠܰܘ ܠܥܳܠܡܳܐ ܗܳܢܳܐ ܡܶܬܚܰܙܝܳܢܳܐ ܕܺܐܝܬܰܘܗ̱ܝ ܩܽܘܝܳܡܳܝܳܐ ܕܡܶܢ ܫܡܰܝܳܐ ܘܡܶܢ ܐܰܪܥܳܐ ܘܡܶܢ ܗܳܠܶܝܢ ܕܒܰܡܨܰܥܬܳܐ ܩܳܪܶܐ܆ ܐܶܠܐ ܠܡܶܬܚܳܐ ܕܙܰܒܢܳܐ܆ ܗܳܢܳܐ ܕܝܰܘܢܳܐܝܬ ܐ ܐܘܢ ܡܶܬܩܪܶܐ. ܗܰܘ ܕܶܝܢ ܥܳܠܡܳܐ ܡܶܬܚܰܙܝܳܢܳܐ܆ ܩܘܣܡܘܣ ܡܶܬܶܐܡܰܪ

ܡܦܩܢܐ. 3: 15 [21]

 ܐ. ܩܘܪ̈ܝܢܬܝܐ. 8: 6 [22]

 ܪ̈ܗܘܡܝܐ. 9: 5 [23]

 ܛܝܛܘܣ. 2: 13 [24]

ܡܙܡܘܪ̈ܐ. 144: 3 [25]

 ܗܺܝܟܰܕܗܝܘܬܐ[26]

ܩܘܠܣ̈ܝܐ. 1: 15 [27]

ܡܦܩܢܐ. 3: 2 ـ 4[28]

ܡܙܡܘܪ̈ܐ. 83: 18 [29]

ܐܫܥܝܐ. 9: 6 [30]

[31]ܫܘܶܐ ܒܬܰܪܥܺܝܬܳܐ ܩܳܪܶܝܢ ܝܰܘܢܳܝ̈ܶܐ ܠܡܳܠܽܘܟܳܐ܆ ܐܰܘ ܒܰܪ ܬܰܪܥܺܝܬܳܐ ܐܰܝܟ ܥܝܳܕܳܐ ܕܨܶܝܕ ܣܽܘܪ̈ܝ̣ܳܝ̣ܶܐ.

ܡܦܩܢܐ. 3: 2 [32]

 ܫܳܠܶܡ[33]

ܡܦܩܢܐ. 3: 2 [34]

ܝܘܚܢܢ. 1: 1 [35]

ܝܘܚܢܢ. 1: 14 [36]

ܥܶܠܰܬ[37]

[38]ܙܳܕܶܩ ܠܡܶܕܰܥ ܕܗܳܢܳܐ ܫܡܳܐ ܕܣܳܡܶܬ ܗܳܪܟܳܐ ܥܒܳܕܳܐ܆ ܠܐ ܗܘܳܐ ܥܒܳܕܳܐ ܐܺܝܬܰܘܗ̱ܝ. ܐܶܠܐ ܡܶܢ ܐܽܘܠܨܳܢܐ ܘܡܶܢ ܒܠܰܝ ܕܠܰܝܬ ܗ̱ܘܳܐ ܫܡܳܐ ܕܠܳܚܶܡ ܒܠܶܫܳܢܳܐ ܣܽܘܪܝ̣ܳܝ̣ܳܐ܆ ܐܶܬܐܰܠܨܶܬ ܘܣܳܡܬܶܗ. ܐܰܟܙܢܳܐ ܓܶܝܪ ܕܳܐܡܪܺܝܢܰܢ ܒܰܫ̈ܡܳܗܶܐ ܐ̱ܚܪ̈ܳܢܶܐ: ܕܰܬܠܳܬܳܐ ܦܰܪ̈ܨܽܘܦܶܐ ܡܶܕܶܡ ܡܶܬܪܰܫܡܺܝܢ ܒܗܰܘܢܳܐ. ܕܰܡܫܰܚܠܦܺܝܢ ܡܶܢ ܚ̈ܕܳܕܶܐ: ܘܳܐܡܪܺܝܢܰܢ ܗܰܘ ܕܩܳܪܶܐ ܘܗܺܝ ܩܪܘܝܘܬܐ: ܘܩܶܪܝܳܢܳܐ ܗܰܘ ܕܒܶܗ ܒܩܳܪܽܘܝܽܘܬܳܐ ܩܳܪܐ ܗܰܘ ܕܩܳܪܐ: ܘܗܰܘ ܕܟܳܬܶܒ ܘܟܳܬܽܘܒܽܘܬܳܐ ܘܰܟܬܳܒܳܐ: ܘܗܰܘ ܕܥܳܒܶܕ ܘܥܳܒܽܘܕܽܘܬܳܐ ܘܰܥܒܳܕܳܐ܆ ܘܗܳܟܰܢܳܐ ܨܳܒܶܝܢ ܗ̱ܘܰܝܢ ܕܢܺܐܡܰܪ܆ ܘܳܐܦ ܡܶܢ ܫܡܳܐ ܗܰܘ ܕܡܰܥܒܕܳܢܽܘܬܳܐ. ܗܰܘ ܕܡܰܥܒܶܕ. ܘܗܺܝ ܡܰܥܒܕܳܢܽܘܬܳܐ. ܘܗܰܘ ܕܒܳܗ̇ ܒܡܰܥܒܕܳܢܽܘܬܳܐ ܡܶܬܬܰܥܒܰܕ ܡܶܢ ܗܰܘ ܕܡܰܥܒܶܕ. ܠܗܰܘ ܟܺܝܬ ܕܰܩܪܳܝܬܶܗ ܥܒܳܕܳܐ ܐܰܝܟ ܕܡܶܢ ܫܡܳܐ ܗܘ ܕܥܳܒܽܘܕܽܘܬܳܐ ܡܶܛܽܠ ܕܶܐܬܐܰܠܨܶܬ܆ ܘܠܐ ܗܘܳܐ ܐܰܝܟ ܕܡܶܢ ܫܡܳܐ ܕܡܰܥܒܕܳܢܽܘܬܳܐ. ܟܒܰܪ ܕܶܝܢ ܐܰܝܟ ܕܡܶܢ ܗܳܕܶܐ ܡܨܶܐ ܗܘܳܐ ܐ̱ܢܳܫ ܕܢܩܪܘܗܝ܆ ܐܘ ܥܒܳܕܳܐ ܐܰܘ ܡܥܰܒܕܐ. ܡܶܛܽܠ ܕܳܐܦ ܒܡܶܠܬܳܐ ܕܡܶܛܽܠ ܡܫܺܝܚܳܐ܆ ܡܶܬܐܰܠܨܺܝܢܰܢ ܗܘ ܒܳܗ̇ ܒܡܶܠܬܳܐ ܗܳܕܶܐ ܐܰܝܟ ܕܰܒܠܶܫܳܢܳܐ ܣܽܘܪܝ̣ܳܝ̣ܳܐ. ܒܗܳܝ ܕܰܚܕܳܐ ܡܰܢ ܐܳܡܪܺܝܢܰܢ ܐܰܢܐܪܓܝܰܐ ܐܰܘܟܺܝܬ ܡܰܥܒܕܳܢܽܘܬܳܐ ܥܰܠ ܡܫܺܝܚܳܐ܆ ܣܰܓܺܝ̈ܐܐ ܕܶܝܢ ܘܰܡܫܰܚ̈ܠܦܶܐ ܐܢܐܪ̈ܓܝܡܛܐ ܐܰܘ ܟܺܝܬ ܥܰܒ̈ܕܐ ܐܰܘ ܡܥ̈ܰܒܕܐ܆ ܐܰܘ ܠܐ ܝܳܕܰܥ ܐ̱ܢܳܐ ܕܰܐܝܟܰܢܳܐ ܐܺ݀ܡܰܪ. ܒܪܰܡ ܐܰܝܠܶܝܢ ܕܡܶܢ ܠܶܫܳܢܳܐ ܝܰܘܢܳܝܳܐ ܠܣܽܘܪܝ̣ܳܝ̣ܳܐ ܡܰܥܒܪܺܝܢ܆ ܒܕܽܘܟ̈ܝܳܬܳܐ ܣܰܓܺܝ̈ܐܬܐ ܐܳܦ ܠܗܰܘ ܐܰܢܐܪܓܝܡܛܐ ܡܰܥܒܕܳܢܽܘܬܳܐ ܣܳܡܽܘܗܝ ܡܶܛܽܠ ‌ܐܰ‌ܠܺܝܨܽܘܬܳܐ. ܐܰܟܙܢܳܐ ܕܥܰܠ ܫܠܺܝ̈ܚܶܐ ܐܳܡܪܺܝܢܰܢ ܕܣܳܥܪܺܝܢ ܗ̱ܘܰܘ ܐܰܢܐܪ̈ܓܝܡܛܐ ܐܰܘܟܺܝܬ ܡܰܥ̈ܒܕܳܢܘܳܬܳܐ ܕܚܰܝ̈ܠܶܐ ܘܕܳܐܣ̈ܝܘܳܬܳܐ. ܐܳܦ ܓܶܝܪ ܘܨܶܐܕܰܝܗܽܘܢ ܕܝܰܘ̈ܢܳܝܶܐ: ܗܽܘ ܗܰܘ ܫܡܳܐ ܕܐܢܐܪܓܝܡܐ ܐܰܘܟܺܝܬ ܕܥܒ̣ܕܐ ܒܰܬܪܶܝܢ ܙܢܰܝ̈ܳܐ ܡܶܬܶܐܡܰܪ. ܒܰܙܒܰܢ ܡܰܢ ܚܠܳܦ ܗܰܘ ܕܡܰܥܒܕܳܢܽܘܬܳܐ܆ ܒܰܙܒܰܢ ܕܶܝܢ܆ ܚܠܳܦ ܗܰܘ ܕܡܶܢ ܗܳܕܶܐ ܐܶܬܬܰܥܒܰܕ. ܡܶܛܽܠ ܗܳܕܶܐ ܟܺܝܬ܆ ܐܳܦ ܒܰܣܝܠܝܘܣ ܡܫܰܐܶܠ ܗ̱ܘܳܐ ܠܐܘܢܘܡܝܘܣ܆ ܕܰܐܝ̇ܕܳܐ ܡܶܢܗܶܝܢ ܐܳܡܰܪ ܐܰܢ̱ܬ ܘܡܶܣܬܰܟܰܠ ‌ܐܰܢ̱ܬ. ܡܳܕܶܝܢ ܙܳܕܶܩ ܠܡܶܣܬܰܟܳܠܽܘ ܗܳܟܰܢܐ. ܐܢܐܪܓܝܰܐ ܡܰܢ ܐܰܘܟܺܝܬ ܡܰܥܒܕܳܢܽܘܬܳܐ ܚܕܳܐ. ܐܰܢܐܪ̈ܓܝܡܛܐ ܕܶܝܢ ܐܰܘܟܺܝܬ ܥ̣ܒ̈ܕܐ ܐܰܘ ܥ̈ܒܳܕܶܐ ܐܰܘ ܡܥܰܒ̈ܕܶܐ: ܗܳܢܽܘܢ ܕܗܳܘܶܝܢ ܒܳܗ̇ ܒܡܰܥܒܕܳܢܽܘܬܳܐ ܣܰܓܺܝ̈ܐܐ

 ܝܺܕܰܥܘ[39]

 ܢܶܨܒܬܳܐ[40]

ܡܙܡܘܪ̈ܐ. 32: 4 ـ 5 [41]

[42]ܡܬܝ. 13: 22  ܐܦ ܡܪܩܘܣ. 4: 19  ܐܦ ܠܘܩܐ. 8: 14

ܐܫܥܝܐ. 5: 7 [43]

[44] ܠܘܳܬ ܝܰܘ̈ܢܳܝܶܐ ܒܰܚܫܰܚܬܳܐ ܕܡܰܡܠܠܐ܆ ܗܳܝ ܕܢܶܩܒܬܳܢܳܐܝܬ ܢܶܩܪܝܘܗܝ ܠܣܰܢܝܳܐ ܡܥܰܝܕܳܐ ܣܰܓܝܐܢܐܝܬ܆ ܘܠܰܘ ܗܳܝ ܕܕܶܟܪܳܢܳܐܝܬ. ܗܳܢܽܘܢ ܕܶܝܢܡܦܰܫ̈ܩܳܢܶܐ ܕܰܟ̈ܬܳܒܶܐ܆ ܕܶܟܪܳܢܳܐܝܬ ܣܳܡܽܘܗܝ ܠܰܫܡܳܐ ܕܣܰܢܝܳܐ ܒܰܟܬܳܒܳܐ ܝܰܘܢܳܝܳܐ.

[45]ܘܳܐܦ ܗܳܕܶܐ ܙܳܕܶܩ ܕܬܶܬܢܰܗܰܪ ܐܰܝܟ ܕܡܰܨܝܳܐ. ܣܰܢܝܳܐ ܒܠܶܫܳܢܳܐ ܝܰܘܢܳܝܳܐ܆ ܒܐܛܘܣ ܡܶܬܩܪܶܐ. ܘܺܐܝܬ ܠܶܗ ܕܳܡܝܽܘܬܳܐ ܒܰܩܪܳܝܬܳܐ ܕܰܫܡܳܐ ܗܳܢܳܐ܆ ܠܘܳܬ ܗܰܘ ܕܡܶܬܶܐܡܰܪ ܝܰܘܢܳܐܝܬ ܒܰܐܛܘܣ܆ ܗܳܢܰܘ ܕܶܝܢ ܡܶܬܕܰܪܟܳܢܳܐ܆ ܐܰܘ ܡܶܬܬܕܺܝܫܳܢܳܐ. ܘܰܟܒܰܪ ܐܳܦ ܡܶܢ ܗܳܕܶܐ ܐܶܬܩܪܺܝ ܗܳܟܰܢܳܐ ܠܘܳܬ ܝܰܘ̈ܢܳܝܶܐ ܥܰܬܺܝ̈ܩܶܐ: ܡܶܢ ܗܳܝ ܕܕܳܪܶܟ ܐ̱ܢܳܫ ܥܠܰܘܗܝ ܘܕܳܐܶܫ ܠܶܗ ܒܪ̈ܶܓܠܰܘܗܝ: ܡܶܛܽܠ ܟܺܝܬ ܕܒܺܐܝ̈ܕܰܝܳܐ ܠܐ ܡܶܬܠܒܶܟ: ܒܰܕܣܰܓܺܝ ܟܽܘ̈ܒܶܐ ܐܺܝܬܰܘܗ̱ܝ܆ ܐܳܦܶܢ ܙܰܘܥܳܐ ܗܰܘ ܕܣܺܝܡ ܥܠܰܘܗܝ ܡܫܰܚܠܰܦ ܡܶܢ ܗܰܘ ܕܡܶܬܬܣܺܝܡ ܥܰܠ ܡܶܬܬܕܺܝܫܳܢܳܐ. ܡܶܛܽܠܗܳܕܶܐ ܐܳܡܰܪ ܡܰܠܦܳܢܳܐ ܟܰܕ ܚܳܪ ܒܰܫܡܳܐ ܗܳܢܳܐ ܕܣܰܢܝܳܐ܆ ܕܰܐܝܟ ܕܒܰܫܪܳܪܳܐ ܡܶܬܕܰܪܟܳܢܳܐ ܚܰܘܝܶܗ ܡܶܠܬܳܐ ܐܰ‌ܠܳܗܳܐ ܠܰܟܝܳܢܳܐ ܕܺܝܠܰܢ ܟܰܕ ܚܰܝܕܶܗ ܠܶܗ. ܗܳܢܰܘ ܕܶܝܢ ܡܶܬܟܰܒܫܳܢܳܐ ܘܡܶܬܬܕܺܝܫܳܢܳܐ. ܡܰܘܣܶܦ ܐ̱ܢܳܐ ܕܶܝܢ ܐܶܢܳܐ܆ ܕܳܐܦ ܡܶܛܽܠ ܕܰܡܪܺܝܕ ܗ̱ܘܳܐ܆ ܙܰܒܢܳܐ ܣܰܓܺܝܐܐ ܥܰܠ ‌ܐܰ‌ܠܳܗܳܐ܆ ܘܗܳܝܕܶܝܢ ܨܳܕܶܗ ܘܟܰܒܫܶܗ܆ ܠܳܚܡܳܐ ܕܢܶܬܩܪܶܐ ܡܶܬܕܰܪܟܳܢܳܐ ܘܡܶܬܬܕܺܝܫܳܢܳܐ ܘܡܶܬܟܰܒܫܳܢܳܐ܆ ܠܰܐܠܳܗܳܐ ܡܶܠܬܳܐ ܗܰܘ ܕܢܰܣܒܶܗ (ܣܰܢܝܳܐ) (ܡܶܬܕܰܪܟܳܢܳܐ).

ܥܒܪ̈ܝܐ. 2: 14[46]

ܡܙܡܘܪ̈ܐ. 32: 4 [47]

ܣܶܦܪܐ ܕܒܪܝܬܐ. 3: 6 [48]

ܣܶܦܪܐ ܕܒܪܝܬܐ. 8: 21[49]

ܠܩܰܕܡ̈ܶܐ[50]

ܡܬܝ. 27: 53 [51]

ܝܘܚܢܢ. 1: 14 [52]

ܩܘܠܣ̈ܝܐ. 2: 9 [53]

ܡܬܝ. 24: 51 [54]

ܡܬܝ. 25: 10 [55]

ܛܺܝܢܳܐ. ܣܝܳܢܳܐ[56]

ܚܢܰܢ[57]

ܡܙܡܘܪ̈ܐ. 113: 4 [58]

ܐܫܥܝܐ. 45: 5 [59]

ܪ̈ܗܘܡܝܐ. 6: 12 ـ 13 [60]

ܐܫܥܝܐ. 26: 13 [61]

ܣܶܦܪܐ ܕܒܪܝܬܐ. 19: 17  ܐܦ 26 [62]

ܐ. ܫܡܘܐܝܠ. 9: 9.  11.  18.[63]

ܐ. ܫܡܘܐܝܠ. 10: 6  ܐܦ 10: 9 [64]

ܠܘܩܐ. 17: 32 [65]

ܠܘܩܐ. 9: 62 [66]

 ܚܶܣܕܳܐ. ܬܰܗܠܰܠܬܐ[67]

ܒܺܝܫܽܘܬ ܫܺܐܕܳܢܳܐܝܬ ܠܘܳܬ ܚܰܢ̈ܦܶܐ ܐܺܝܬܶܝܗ̇ ܕܳܘܝܳܐܝܬ ܘܫܺܝܛܳܐܝܬ ܘܡܶܣܟܺܢܳܐܝܬ.[68]

[69]ܡܬܝ. 24: 35  ܐܦ ܡܪܩܘܣ. 13: 31 ܐܦ ܠܘܩܐ. 21: 33

ܕܢܝܐܝܠ. 3: [70]

ܥܒܪ̈ܝܐ. 1: 1[71]

ܩܘܠܣ̈ܝܐ. 3: 17 [72]

ܐܫܥܝܐ. 1: 16 ـ 18 [73]

ܓܠܛܝ̈ܐ. 3: 27 [74]

ܡܰܬܰܝ. 17: 2 [75]

 ܡܪܩܘܣ. 9:2[76]

ܐܦܣ̈ܝܐ. 5: 26 [77]

ܡܬܝ. 3: 11  ܐܦ ܠܘܩܐ. 3: 16 [78]

ܡܙܡܘܪ̈ܐ. 77: 3 [79]

ܪ̈ܗܘܡܝܐ. 9: 5 [80]