ܡܺܐܡܪܳܐ ܕܡܐܐ ܘܰܬܡܳܢܝܳܐ

ܥܰܠ ܫܽܘ̈ܐܴܠܶܐ ܕܫܰܪܟܳܐ ܗܳܢܽܘܢ ܕܶܐܬܬܰܣܪܰܚܘ. ܠܗܳܠܶܝܢ ܕܗܽܘ ܡܺܐܡܪܳܐ ܢܰܘܕܰܥ ܐܶܢܽܘܢ ܓܰܠܝܳܐܺܝܬ܆ ܠܗܳܢܽܘܢ ܕܰܥܬܺܝܕܺܝܢ ܕܢܶܩܪܽܘܢ.

108: ܥܗܺܝܕܺܝܢ ܐܢ̱ܬܽܘܢ ܡܶܢ ܟܽܠ ܦܪܽܘܤ ܫܰܦܺܝܪ ܝܳܕܰܥ ܐ̱ܢܳܐ ܠܫܽܘܘ̈ܕܳܝܶܐ ܕܺܝܠܝ܆ ܡܶܛܽܠ ܕܰܕܚܰܘ̈ܒܳܬܳܐ ܪ̈ܽܘܚܳܢܳܝܳܬܳܐ ܘܠܳܐ ܣܳܟ ܐܺܝܬܰܝܟܽܘܢ ܠܳܐ ܥܗܺܝ̈ܕܶܐ. ܐܶܠܳܐ ܠܕܰܐܝܟ ܗܳܠܶܝܢ ܣܰܓܺܝ ܚܰܬܺܝܬ̣ܳܐܺܝܬ ܬܳܒܥܺܝܢ ܐܢ̱ܬܽܘܢ. ܡܶܛܽܠ ܗܳܕܶܐ ܐܳܦ ܟܰܕ ܥܰܡ ܚܦܺܝܛܽܘܬܳܐ ܣܰܓܺܝܐܬܳܐ ܪܳܕܶܦ^[1] ܐ̱ܢܳܐ ܐܶܢܳܐ ܠܺܝ܆ ܪܶܗܛܶܬ ܕܰܐ݀ܪܡܶܐ ܗܰܘ ܡܳܐ ܕܰܚܕܳܐ ܙܒܰܢ ܐܶܬܚܺܝܒ܆ ܩܕܳܡ ܕܥܶܕܠܳܝܳܐ ܕܡܰܗܡܝܳܢܽܘܬܳܐ ܡܶܕܶܡ ܘܰܕܬܽܘܗܳܝܳܐ܆ ܘܰܕܛܳܠܽܘܡܽܘܬܳܐ ܗܳܝ ܕܡܶܢ ܗܳܪܟܳܐ ܐܶ݀ܣܰܒ. ܟܰܕ ܓܶܝܪ ܗܰܘ ܚܰܕ ܫܽܘܐܴܠܳܐ ܐܶܫܬܪܺܝ ܐܰܝܟ ܡܳܐ ܕܺܐܝܬܶܝܗ̇ ܗ̱ܘܳܬ ܠܺܝ ܡܶܬܡܰܨܝܳܢܺܝܬܳܐ܆ ܐܰܢܰܢܩܺܐ ܕܳܐܦ ܥܰܠ ܗܳܠܶܝܢ ܕܫܰܪܟܳܐ ܐ݀ܺܬܶܐ܆ ܗܳܠܶܝܢ ܕܰܥܠܰܝܗܽܘܢ ܗܰܘ ܕܫܰܐܶܠ ‌ܐܶܬܦܰܫܰܟ܆ ܐܰܘ ܥܒܰܕ ܐܶܣܟܺܡܳܐ ܐܰܝܟ ܗܰܘ ܕܡܶܬܦܰܫܰܟ. ܟܰܕ ܡܶܨܛܰܢܰܥ ܐܰܘ ܕܢܶܣܝܳܢܳܐ ܕܺܝܠܝ ܢܶܣܰܒ܆ ܐܰܘ ܕܢܺܐܬܰܪ ܡܶܕܶܡ ܕܝܰܬܺܝܪ ܐܺܝܬܰܘܗ̱ܝ ܕܪܶܚܡܰܬ ܝܽܘܠܦܳܢܳܐ.

ܬܽܘܒ ܗܳܟܺܝܠ ܟܰܕ ܠܚܶܟܡܬܳܐ ܕܰܐ‌ܠܳܗܳܐ ܩܪܺܝܬ̣܆ ܗܳܝ ܝܺܚܺܝܕܳܝܬܳܐ ܘܩܰܕܡܳܝܰܬ ܝܰܠܕܳܐ^[2] ܘܫܰܘܝܰܬ ܒܰܡܬܽܘܡܳܝܽܘܬܳܐ ܠܗܰܘ ܕܝܰܠܕܳܗ̇܆ ܗܳܝ ܕܡܶܢܳܗ̇ ܟܽܠ ܝܺܕܰܥܬܳܐ ܘܡܶܠܬܳܐ ܚܰܟܺܝܡܬܳܐ ܐܰܝܟ ܕܡܶܢ ܡܥܺܝܢܳܐ ܡܶܫܬܰܦܥܳܐ ܘܪܳܕܝܳܐ ܘܢܳܚܬܳܐ܆ ܘܰܒܥܺܝܬ̣ ܡܶܢܳܗ̇ ܘܰܐܦܺܝܣܬܳܗ̇ ܕܰܬܩܽܘܡ ܠܘܳܬܝ ܘܰܬܣܰܝܥܰܢܝ܆ ܪܳܕܶܐ ܐ̱ܢܳܐ ܠܘܳܬ ܦܽܘܫܳܩܳܐ. ܬܩܽܘܡ ܕܶܝܢ ܠܘܳܬܝ ܡܶܢ ܟܽܠ ܦܪܽܘܤ ܘܰܬܣܰܝܥܰܢܝ܆ ܟܰܕ ܐܢ̱ܬܽܘܢ ܫܳܡܥܺܝܢ ܐܢ̱ܬܽܘܢ܆ ܗܳܢܽܘܢ ܕܕܰܟܝܳܐܺܝܬ ܘܫܰܪܺܝܪܳܐܺܝܬ ܡܶܫܬܰܘܬܦܺܝܢ ܐܢ̱ܬܽܘܢ ܠܫܶܩܝܳܗ̇ ܕܗܳܝ ܘܰܨܗܶܝܢ ܐܢ̱ܬܽܘܢ ܒܟܽܠܙܒܰܢ܆ ܘܰܒܡܰܥܒܕܳܢܽܘܬܳܐ ܡܶܕܡ ܐܰ‌ܠܳܗܳܝܬܳܐ ܬܶܡܚܶܝܘܗ̱ܝ ܠܫܽܘܥܳܐ ܕܺܝܠܝ ܝܰܒܺܝܫܳܐ ܘܠܳܐ ܬܰܠܺܝܠܳܐ܆ ܐܰܝܟܰܢܳܐ ܕܡܽܘܫܶܐ ܒܚܽܘܛܪܳܐ܆ ܘܡܰܘܠܕܳܢܳܐ ܕܡܰܝ̈ܳܐ ܣܰܓܺܝ̈ܶܐܐ ܬܶܥܒܕܺܝܘܗ̱ܝ.

ܗܳܝ ܗܳܟܺܝܠ ܕܬܰܪܬܶܝܢ ܒܰܦܪ̈ܽܘܛܰܐܣܺܝܤ ܐܰܘ ܟܺܝܬ ܡܶܬܬܰܣܪ̈ܚܳܢܘܳܬܳܐ ܗܳܠܶܝܢ ܕܶܐܬܦܫ̈ܟܝܢ ܘܶܐܬܥܣ̈ܩܝܢ ܗܳܕܶܐ ܐܺܝܬܶܝܗ̇. ܒܬܶܫܒ̈ܚܳܬ ܬܶܫܒ̈ܚܳܬܳܐ ܗܳܟܺܝܠ܆ ܫܠܝܡܘܢ ܕܶܝܢ ܐܰܝܟ ܕܝܳܕܥܺܝܢ ܐܢ̱ܬܽܘܢ ܣܳܡܶܗ ܐܳܦ ܠܗܳܢܳܐ ܟܬܳܒܳܐ܆ ܥܳܐܶܠ ܡܠܺܝܠܳܐܺܝܬ ܐܰܘܟܺܝܬ ܕܳܪܽܘܫܳܐܺܝܬ ܡܰܡܠܠܳܐ ܕܦܽܘܢܳܝ ܦܶܬܓ̈ܳܡܶܐ ܕܠܽܘܩܒܰܠ ܚ̈ܕܳܕܶܐ܆ ܕܟܰܠܬܳܐ ܠܽܘܩܒܰܠ ܚܰܬܢܳܐ܆ ܕܰܠܐ̱ܪܳܙܳܐ ܗܰܘ ܕܥܰܠ ܥܺܕܬܳܐ ܘܥܰܠ ܡܫܺܝܚܳܐ ܩܰܕܶܡ ܡܛܰܦܶܤ. ܟܰܠܬܳܐ ܓܶܝܪ ܐܺܝܬܶܝܗ̇ ܥܺܕܬܳܐ ܕܰܡܫܺܝܚܳܐ܆ ܘܚܰܬܢܳܐ ܕܺܝܠܳܗ̇ ܬܽܘܒ ܗܽܘ ܡܫܺܝܚܳܐ. ܘܰܠܗܳܕܶܐ ܦܰܘܠܽܘܤ ܡܚܰܘܶܐ ܟܰܕ ܠܶܐܦܶܣܳܝ̈ܶܐ ܟܬܰܒ ܗܳܟܰܢܳܐ. ܓܰܒܪ̈ܶܐ ܐܰܚܶܒܘ ܠܢܶܫ̈ܶܐ ܕܺܝܠܟܽܘܢ܆ ܐܰܝܟܰܢܳܐ ܕܳܐܦ ܡܫܺܝܚܳܐ ܐܰܚܶܒ ܠܥܺܕܬܳܐ. ܘܬܽܘܒ ܐܰܝܟ ܗܳܕܶܐ܆ ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ܆ ܘܢܶܩܰܦ ܠܘܳܬ ܐܰܢ̱ܬܬܳܐ ܕܺܝܠܶܗ܆ ܘܢܶܗܘܽܘܢ ܬܪ̈ܰܝܗܽܘܢ ܠܒܶܣܪܳܐ ܚܰܕ. ܐ̱ܪܳܙܳܐ ܗܳܢܳܐ ܪܰܒܳܐ ܐܺܝܬܰܘܗ̱ܝ. ܐܶܢܳܐ ܕܶܝܢ ܐܳܡܰܪ ܐ̱ܢܳܐ܆ ܥܰܠ ܡܫܺܝܚܳܐ ܘܥܰܠ ܥܺܕܬܳܐ^[3].

ܕܠܳܐ ܚܰܫܳܐ ܕܶܝܢ ܡܶܕܶܡ ܐܺܝܬܰܘܗ̱ܝ ܢܶܩܦܳܐ ܕܰܡܫܺܝܚܳܐ ܠܘܳܬ ܥܺܕܬܳܐ. ܐܳܦ ܓܶܝܪ ܗܺܝ ܟܰܠܬܳܐ܆ ܐܳܦ ܟܰܕ ܗܘ̣ܳܬ ܟܰܠܬܳܐ ܒܬܽܘܠܬܳܐ ܐܺܝܬܶܝܗ̇. ܘܰܠܗܳܕܶܐ ܦܰܘܠܽܘܤ ܬܽܘܒ ܟܰܕ ܠܩܽܘܪ̈ܺܝܢܬܳܝܶܐ ܟܳܬܶܒ ܗ̱ܘܳܐ ܐܰܘܕܰܥ܆ ܒܗܳܝ ܕܶܐܡܰܪ ܡܟܰܪܬܟܽܘܢ ܠܓܰܒܪܳܐ ܚܰܕ ܒܬܽܘܠܬܳܐ ܕܟܺܝܬܳܐ ܠܰܡܩܳܡܽܘܬܟܽܘܢ ܩܕܳܡ ܡܫܺܝܚܳܐ^[4]. ܐܶܢ ܕܶܝܢ ܗܺܝ ܟܰܠܬܳܐ ܒܬܽܘܠܬܳܐ ܕܟܺܝܬܳܐ ܐܺܝܬܶܝܗ̇܆ ܡܶܢ ܟܽܠ ܦܪܽܘܤ ܕܠܳܐ ܚܰܫܳܐ܆ ܘܕܰܟܝܳܐ ܡܶܢ ܟܽܠ ܨܳܐܬܳܐ ܘܛܽܘܠܫܳܐ ܐܺܝܬܰܘܗ̱ܝ ܥܶܢܝܳܢܗܽܘܢ ܟܺܝܬ ܘܡܰܡܠܠܗܽܘܢ ܕܰܠܘܳܬ ܚ̈ܕܳܕܶܐ. ܕܰܐܝܟ ܗܳܢܳܐ ܓܶܝܪ ܐܺܝܬܰܘܗ̱ܝ܆ ܐܳܦ ܓܢܽܘܢܳܐ ܗܰܘ ܕܡܶܢܶܗ ܫܰܩܠܳܗ̇ ܠܘܳܬ ܫܰܘܬܳܦܽܘܬܳܐ܆ ܐܰܝܢܳܐ ܕܶܝܢ ܐܺܝܬܰܘܗ̱ܝ ܗܳܢܳܐ. ܬܽܘܒ ܠܦܰܘܠܽܘܤ ܫܡܰܥ ܕܟܳܬܶܒ ܘܕܰܥ ܓܰܠܝܳܐܺܝܬ܆ ܕܰܡܥܺܝܢܳܐ ܗܳܝ ܕܰܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ ܐܺܝܬܰܘܗ̱ܝ. ܐܳܡܰܪ ܓܶܝܪ܆ ܕܳܐܦ ܗܽܘ ܠܶܗ ܐܰܫܠܶܡ ܚܠܳܦܶܝܗ̇܆ ܐܰܝܟܰܢܳܐ ܕܰܢܩܰܕܺܫܝܗ̇ ܟܰܕ ܒܡܶܠܬܳܐ ܕܰܟܝܳܗ̇ ܒܰܣܚܳܬܳܐ ܕܡܰܝ̈ܳܐ. ܐܰܝܟܰܢܳܐ ܕܰܢܩܺܝܡܶܝܗ̇ ܗܽܘ ܠܶܗ ܡܫܰܒܰܚܬܳܐ ܠܥܺܕܬܳܐ܆ ܟܰܕ ܠܳܐ ܐܺܝܬ ܒܳܗ̇ ܟܽܘܬܡܳܐ ܐܰܘ ܩܶܡܛܳܐ܆ ܐܰܘ ܡܶܕܶܡ ܡܶܢ ܗܳܠܶܝܢ ܕܕܰܐܝܟ ܗܳܟܰܢ܆ ܐܶܠܳܐ ܕܬܶܗܘܶܐ ܩܰܕܺܝܫܬܳܐ ܘܰܕܠܳܐ ܡܽܘܡ^[5]. ܚܳܙܶܐ ܐܰܢ̱ܬ ܕܰܒܟܽܠܗܶܝܢ ܢܰܩܕܽܘܬܳܐ ܘܩܰܕܺܝܫܽܘܬܳܐ ܘܕܰܟܝܽܘܬܳܐ ܘܰܡܚܰܪܪܽܘܬܳܐ ܕܡܶܢ ܟܽܠ ܡܽܘܡܳܐ ܐܺܝܬ܆ ܡܳܕܶܝܢ ܟܰܕ ܗܳܠܶܝܢ ܐܳܡܪܺܝܢܰܢ ܟܺܝܬ ܘܫܳܡܢܺܝܢܰܢ܆ ܠܳܐ ܡܶܕܶܡ ܚܽܘܫܳܒܳܐ ܫܟܺܝܪܳܐ ܢܶܥܽܘܠ ܠܢܰܦܫܳܟ.

ܒܬܶܫܒ̈ܚܳܬ ܬܳܫܒ̈ܚܳܬܳܐ ܕܶܝܢ܆ ܐܳܦ ܚܳܬܳܐ ܩܳܪܶܐ ܠܳܗ̇ ܚܰܬܢܳܐ ܠܟܰܠܬܳܐ. ܘܗ̱ܝ ܠܚܰܬܢܳܐ܆ ܠܰܘ ܐܰܚܳܐ ܐܶܠܳܐ ܒܰܪ ܚܳܬܝ ܩܳܪܝܳܐ ܠܶܗ^[6]. ܬܪ̈ܰܝܗܽܘܢ ܕܶܝܢ ܡܫܰܘ̈ܕܥܳܢܶܐ ܕܰܚܕܳܐ ܐ̱ܚܝܳܢܽܘܬܳܐ ܐܺܝܬܰܝܗܽܘܢ. ܗܽܘ ܓܶܝܪ ܡܶܠܬܶܗ ܕܰܐ‌ܠܳܗܳܐ ܟܰܕ ܐܶܬܒܰܪܢܰܫ܆ ܒܶܗ ܟܰܕ ܒܶܗ ܒܰܟܝܳܢܳܐ ܐܶܫܬܰܘܬܰܦ ܠܥܺܕܬܳܐ܆ ܘܶܐܫܬܰܘܬܰܦ ܒܳܗ̇ ܒܰܕܡܽܘܬܳܐ ܒܰܕܡܳܐ ܘܰܒܒܶܣܪܳܐ ܕܰܡܢܰܦܰܫ ܒܢܰܦܫܳܐ ܡܶܬܗܰܘܢܳܢܺܝܬܳܐ܆ ܟܕ ܒܟܽܠܗܶܝܢ ܐܶܬܕܰܡܺܝ ܠܰܢ ܤܛܰܪ ܡܶܢ ܚܛܺܝܬܳܐ^[7]. ܡܶܛܽܠ ܡܳܢܳܐ ܕܶܝܢ ܠܰܘ ܐܰܚܳܐ܆ ܐܶܠܳܐ ܒܰܪ ܚܳܬܳܐ ܩܳܪܝܳܐ ܠܶܗ. ܡܶܛܽܠ ܟܺܝܬ ܕܰܗܘ̣ܳܐ ܡܶܢ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܡܰܪܝܰܡ܆ ܗܳܝ ܕܺܐܝܬܶܝܗ̇ ܚܳܬܳܐ ܕܟܽܠܰܢ܆ ܟܰܕ ܡܶܢܶܗ ܟܰܕ ܡܶܢܶܗ ܕܰܐܒܽܘܢ ܐܳܕܳܡ ܢܳܚܬܳܐ ܒܝܽܘܒܳܠܳܐ. ܟܺܐܢܳܐܺܝܬ ܗܳܟܺܝܠ ‌ܐܰܝܟ ܒܪܳܐ ܕܚܳܬܳܐ ܕܺܝܠܰܢ܆ ܒܰܪ ܚܳܬܳܐ ܐܶܫܬܰܡܰܗ܆ ܘܒܰܪ ܚܳܬܳܐ ܩܳܪܝܳܐ ܠܶܗ ܟܰܠܬܳܐ ܘܥܺܕܬܳܐ܆ ܗܳܢܰܘ ܕܶܝܢ ܚܢܰܢ.

ܗܽܘ ܕܶܝܢ ܡܶܟܺܝܠ ܡܶܛܽܠ ܪܶܚܡܰܬ ܐ̱ܢܳܫܽܘܬܶܗ ܘܠܰܘ ܒܣܽܘܢܩܳܢܳܐ܆ ܐܰܝܟܰܢܳܐ ܓܶܝܪ ܗܰܘ ܕܒܰܟܝܳܢܳܐ ܐܺܝܬܰܘܗ̱ܝ ܒܪܳܐ ܘܰܐ‌ܠܳܗܳܐ ܕܡܶܢ ܐܰ‌ܠܳܗܳܐ܆ ܡܰܥܡܽܘܕܺܝܬܳܐ ܗܳܝ ܕܺܝܠܰܢ ܥܡܰܕ܆ ܟܰܕ ܩܰܕܶܫ ܐܶܢܽܘܢ ܠܡܰܝ̈ܳܐ܆ ܘܰܣܚܳܬܳܐ ܕܣܳܝܽܘܡܽܘܬ ܒܢܰܝ̈ܳܐ ܬܰܩܶܢ ܐܶܢܽܘܢ ܠܰܢ܆ ܘܗܳܟܰܢܳܐ ܥܒܰܕ ܠܰܢ ܒܢܰܝ̈ܳܐ ܕܰܐܒܳܐ ܫܡܰܝܳܢܳܐ܆ ܘܢܳܩܦܳܐܺܝܬ ܐܰܚ̈ܶܐ ܕܺܝܠܶܗ. ܡܶܛܽܠܗܳܕܶܐ ܠܥܺܕܬܳܐ ܐܰܘ ܟܺܝܬ ܟܰܠܬܳܐ ܚܳܬܳܐ ܩܳܪܶܐ܆ ܘܗܳܕܶܐ ܟܰܕ ܗܽܘ ܒܰܪ ܚܳܬܳܐ ܐܺܝܬܰܘܗ̱ܝ ܕܺܝܠܳܗ̇. ܟܰܕ ܗܳܟܺܝܠ ‌ܐܰܝܟ ܕܰܠܚܳܬܳܐ ܐܰܚܒܳܗ̇܆ ܗܦܰܟ ܡܶܬܪܚܶܡ ܐܳܦ ܡܶܢܳܗ̇. ܘܰܐܝܟ ܙܢܳܐ ܕܗܽܘ ܠܰܕܡܳܐ ܒܰܝܬܳܝܳܐ ܕܺܝܠܶܗ ܚܠܳܦܶܝܗ̇ ܐܶܫܰܕ܆ ܗܳܟܰܢܳܐ ܐܳܦ ܗܺܝ ܟܰܕ ܝܳܩܕܳܐ܆ ܟܰܕ ܡܶܬܦܰܣܩܳܐ܆ ܟܰܕ ܒܫܶܢ̈ܕܶܐ ܣܰܓܺܝ̈ܶܐܐ ܡܶܬܒܰܣܒܣܳܐ܆ ܟܰܕ ܡܳܢܳܐ ܓܶܝܪ ܠܳܐ ܚܳܫܳܐ ܗ̱ܘܳܬ ܡܶܢ ܗܳܠܶܝܢ ܠܳܐ ܡܶܣܬܰܝܒܪ̈ܳܢܝܳܬܳܐ܆ ܐܶܬܟܰܬܫܰܬ ܚܠܳܦܰܘܗ̱ܝ ܐܰܓܽܘ̈ܢܶܐ ܗܳܢܽܘܢ ܡܰܠ̈ܝ̣ܰܝ̣ ܟܺܐܒ̈ܶܐ ܘܕܰܠܥܶܠ ܡܶܢ ܟܽܠ ‌ܐܺܝܬܰܝܗܽܘܢ ܡܥܰܙܝ̈ܢܶܐ ܕܣܳܗܕܽܘܬܳܐ. ܒܥܽܘܡܩܳܐ ܓܶܝܪ ܒܪܶܚܡܬܳܐ ܫܡܰܝܳܢܺܝܬܳܐ ܒܠܶܒܳܗ̇ ܒܰܠܺܝܥܳܐ ܗ̱ܘܳܬ. ܡܶܛܽܠܗܳܕܶܐ ܐܳܦ ܐܳܡܪܳܐ ܗ̱ܘܳܬ܆ ܒܰܠܺܝܥܰܬ̣ ܒܪܶܚܡܬܳܐ ܐ̱ܢܳܐ. ܠܘܳܬ ܓܶܝܪ ܦܽܘܩܕܳܢܳܐ ܗܰܘ ܩܰܕܡܳܝܳܐ ܘܪܰܒܳܐ ܣܳܠܩܳܐ ܗ̱ܘܳܬ ܕܳܐܡܰܪ܆ ܕܬܶܪܚܰܡ ܠܡܳܪܝܳܐ ܐܰ‌ܠܳܗܳܐ ܕܺܝܠܳܟ ܒܟܽܠܶܗ ܠܶܒܳܟ ܘܰܒܟܽܠܳܗ̇ ܢܰܦܫܳܟ ܘܰܒܟܽܠܳܗ̇ ܬܰܪܥܺܝܬܳܟ^[8]. ܘܠܳܐ ܬܡܺܝܗܳܐ. ܡܶܛܽܠ ܟܺܝܬ ܕܗܳܝ ܕܛܰܥܝܳܐ ܗ̱ܘܳܬ ܘܰܕܠܳܐ ܐܰ‌ܠܳܗ ܐܺܝܬܶܝܗ̇ ܗ̱ܘܳܬ܆ ܘܕܰܠܚܰܫ̈ܶܐ ܒܺܝ̈ܫܶܐ ܘܰܠܫ̈ܺܐܕܶܐ ܦܶܠܚܰܬ ܥܰܒܕܽܘܬܳܐ܆ ܘܣܰܒܪܳܐ ܠܰܝܬ ܗ̱ܘܳܐ ܠܳܗ̇܆ ܠܘܳܬ ܓܢܽܘܢܳܐ ܕܡܰܠܟܳܐ ܡܶܢ ܫܶܠܝ ܫܶܘܪܰܬ܆ ܟܰܕ ܐܺܝܩܳܪܳܐ ܕܚܳܬܳܐ ܘܰܕܟܰܠܬܳܐ ܢܶܣܒܰܬ܆ ܘܗܳܠܶܝܢ ܠܳܐ ܡܶܬܡܰܠ̈ܠܳܢܝܳܬܳܐ ܐܶܬܗܰܝܡܢܰܬ܆ ܘܰܐܝܟ ܕܡܶܬܕܪܶܟ ܠܰܒ̈ܢܰܝܢܳܫܳܐ܆ ܘܰܐܝܟ ܕܥܳܪܝܳܐ ܗ̱ܘܳܬ ܠܡܶܣܬܰܟܳܠܽܘ܆ ܒܩܰܠܺܝܠ ܩܰܠܺܝܠ ܡܶܫܬܰܘܫܛܳܐ ܗ̱ܘܳܬ ܒܺܝܕܰܥܬܳܐ. ܗܳܝ ܟܺܝܬ ܕܳܐܦ ܗܺܝ ܚܳܕܝܳܐܺܝܬ ܣܰܓܺܝ ܡܰܘܕܝܳܐ ܘܳܐܡܪܳܐ܆ ܐܰܥܠܰܢܝ ܡܰܠܟܳܐ ܠܩܰܝܛܽܘܢܶܗ^[9].

ܟܽܠܶܗ ܗܳܟܺܝܠ ܥܽܘܬܳܕܶܗ ܕܰܟܬܳܒܳܐ܆ ܗܰܘ ܕܬܶܫܒ̈ܚܳܬ ܬܶܫܒ̈ܚܳܬܳܐ ܐܳܡܰܪ ܐ̱ܢܳܐ܆ ܬܰܪܥܺܝܬܳܐ ܕܢܰܦܫܳܐ ܕܒܰܠܺܝܥܳܐ ܒܪܶܚܡܬܳܐ ܐܰ‌ܠܳܗܳܝܬܳܐ ܘܰܕܠܳܐ ܚܰܫܳܐ ܪܳܫܶܡ܆ ܘܥܶܢܝܳܢܳܐ ܕܡܰܡܠܠܳܐ ܕܰܐ‌ܠܳܗܳܐ܆ ܘܰܕܪܳܚܡܽܘܬܳܐ ܕܣܰܓܺܝ ܪܳܡܳܐ ܘܰܡܥܰܠܝܳܐ܆ ܕܰܡܗܰܕܝܳܐ ܘܢܳܓܕܳܐ ܠܗܳܝ ܕܰܪܚܡܶܬܶܗ ܘܡܶܬܪܰܚܡܳܐ ܡܶܢܶܗ܆ ܘܰܠܘܳܬ ܪܺܝܫܳܝܽܘܬܳܐ ܐܰܝܟ ܕܡܶܫܟܚܳܐ ܕܺܝܕܰܥܬܳܐ ܘܰܕܬܶܐܽܘܪܺܝܰܐ ܘܰܕܠܳܐ ܚܳܫܽܘܫܽܘܬܳܐ ܡܰܣܩܳܐ.

ܟܰܕ ܗܳܕܶܐ ܗܳܟܺܝܠ ܗܳܟܰܢܳܐ ܐܺܝܬ ܠܳܗ̇܆ ܒܥܳܐ ܗܰܘ ܕܰܠܫܽܘ̈ܐܴܠܶܐ ܗܳܠܶܝܢ ܐܰܘܫܶܛ܆ ܕܰܐܝܟܰܢܳܐ ܟܰܕ ܚܰܬܢܳܐ ܢܩܰܫ ܒܬܰܪܥܳܐ ܘܶܐܡܰܪ ܦܬܰܚܝ ܠܺܝ܆ ܟܰܠܬܳܐ ܐܳܡܪܳܐ ܠܘܳܬܶܗ܆ ܫܶܠܚܶܬ ܟܽܘܬܺܝܢܝ ܐܰܝܟܰܢܳܐ ܐܶ݀‌ܠܒܫܺܝܗ̇܆ ܐܰܫܺܝܓܶܬ ܪ̈ܶܓܠܰܝ ܐܰܝܟܰܢܳܐ ܐܶ݀ܛܰܪܛܶܫ ܐܶܢܶܝܢ^[10]. ܐܰܪܰܐ ܓܶܝܪ ܠܘܳܬ ܛܽܘܠܫܳܐ ܡܶܕܶܡ ܘܨܳܐܬܳܐ ܩܳܪܶܐ ܗ̱ܘܳܐ ܠܳܗ̇ ܚܰܬܢܳܐ܆ ܗܳܝ ܕܶܝܢ ܕܬܺܐܙܰܠ ܠܘܳܬܶܗ܆ ܥܬܺܝܕܳܐ ܗ̱ܘܳܬ ܕܰܬܛܽܘܫ ܡܶܕܶܡ ܕܰܐܝܟ ܗܳܟܰܢܳܐ ܒܪ̈ܶܓܠܶܝܗ̇.

ܐܳܦ ܟܺܝܬ ܠܘܳܬ ܫܽܘܐܴܠܳܐ ܗܳܕܶܐ ܐܳܡܪܺܝܢܰܢ. ܕܟܰܠܬܳܐ ܗܳܢܰܘ ܕܶܝܢ ܢܰܦܫܳܐ ܗܳܝ ܫܰܗܳܪܬܳܐ ܘܥܳܒܽܘܕܬܳܐ ܕܦܽܘܩ̈ܕܳܢܶܐ܆ ܘܰܕܦܰܪܨܽܘܦܳܐ ܕܥܺܕܬܳܐ ܐܰܚܺܝܕܳܐ܆ ܩܕܳܡ ܕܡܶܢ ܚܰܬܢܳܐ ܬܶܬܩܪܶܐ ܩܪܳܝܬܳܐ ܗܳܕܶܐ܆ ܘܬܶܫܡܰܥ ܦܬܰܚܝ̱ ܐܳܡܪܳܐ ܗ̱ܘܳܬ܆ ܐܶܢܳܐ ܕܰܡܺܝܟܳܐ ܐ̱ܢܳܐ ܘܠܶܒܳܐ ܕܺܝܠܝ ܫܳܗܰܪ. ܐܳܦ ܓܶܝܪ ܗܰܘ ܕܰܕܡܶܟ ܡܶܢ ܣܽܘܥܪ̈ܳܢܶܐ ܗܳܢܽܘܢ ܕܰܒܥܳܠܡܳܐ ܗܳܢܳܐ܆ ܘܥܰܡܶܨ ܥܰܝܢܶܗ ܠܘܳܬ ܛܳܥܝܽܘܬܳܐ ܗܳܝ ܕܡܶܢ ܐܰܫܺܝܕܽܘܬܳܐ ܕܰܪ̈ܓܺܝܓܳܬܳܐ ܗܳܝ ܕܪܳܕܝܳܐ܆ ܘܰܠܘܳܬ ܦܰܢܛܰܣܺܝܰܐ ܗܳܝ ܕܡܶܢ ܠܒܰܪ܆ ܘܗܽܘ ܒܶܗ ܐܶܬܗܰܦܰܟ ܟܽܠܶܗ܆ ܘܰܠܓܰܘ ܚܳܐܰܪ܆ ܕܰܡܺܝܟ ܡܰܢ ܫܶܢܬܳܐ ܗܳܝ ܡܩܰܠܣܳܢܺܝܬܳܐ܆ ܟܰܕ ܠܙܰܘ̈ܥܶܐ ܕܢܰܦܫܳܐ ܟܺܝܬ ܘܰܕܦܰܓܪܳܐ ܗܳܢܽܘܢ ܕܰܠܘܳܬ ܚܛܺܝܬܳܐ܆ ܠܳܐ ܣܳܥܽܘܪ̈ܶܐ ܐܺܝܬ ܠܶܗ ܘܠܳܐ ܡܰܥܒ̈ܕܳܢܶܐ܆ ܘܰܒܕܶܚܠܬܳܐ ܕܰܐ‌ܠܳܗܳܐ ܩܰܕܡܳܐܺܝܬ ܘܗܳܟܰܢܳܐ ܒܪܶܚܡܬܳܐ ܩܒܺܝܥܺܝܢ܆ ܥܺܝܪ ܕܶܝܢ ܒܗܰܘܢܳܐ ܥܺܝܪܽܘܬܳܐ ܐܰ‌ܠܳܗܳܝܬܳܐ܆ ܟܰܕ ܫܳܗܰܪ ܠܘܳܬ ܟܡܺܐܢ̈ܶܐ ܕܤܳܛܳܢܳܐ ܘܰܕܪ̈ܽܘܚܶܐ ܕܒܺܝܫܽܘܬܳܐ܆ ܗܳܢܽܘܢ ܕܡܶܛܽܠܳܬܗܽܘܢ ܐܳܡܰܪ ܟܬܳܒܳܐ ܟܳܗܢܳܝܳܐ܆ ܠܳܐ ܓܶܝܪ ܢܶܕܡܟܽܘܢ ܐܶܠܳܐ ܢܶܥܒܕܽܘܢ ܒܺܝܫܬܳܐ܆ ܡܶܪܡܳܐ ܗܝ ܡܶܢܗܽܘܢ ܫܶܢܬܗܽܘܢ ܘܠܳܐ ܕܳܡܟܺܝܢ^[11].

ܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܦܰܘܠܽܘܤ܆ ܕܕܰܡܺܝܟ ܗ̱ܘܳܐ ܫܶܢܬܳܐ ܗܳܝ ܛܽܘܒܬܳܢܺܝܬܳܐ ܡܰܠܽܘܢ ܕܶܝܢ ܡܰܘܬܳܐ܆ ܘܡܰܙܥܶܩ ܗ̱ܘܳܐ܆ ܚܰܝ ܐ̱ܢܳܐ ܕܶܝܢ ܠܳܐ ܡܶܟܺܝܠ‌ ‌ܐܶܢܳܐ܆ ܚܰܝ ܒܺܝ ܕܶܝܢ ܡܫܺܝܚܳܐ^[12]܆ ܘܰܒܪܰܡ ܐܳܡܰܪ ܗ̱ܘܳܐ ܥܺܝܪܳܐܺܝܬ܆ ܐܰܝܟܰܢܳܐ ܕܠܳܐ ܢܶܬܥܠܶܒ ܡܶܢ ܤܳܛܳܢܳܐ܆ ܠܳܐ ܓܶܝܪ ܛܰܥ̈ܝܳܢ ܠܰܢ ܡܰܚܫ̈ܒܳܬܶܗ^[13]. ܕܗܳܕܶܐ ܫܶܢܬܳܐ ܘܰܕܗܳܕܶܐ ܥܺܝܪܽܘܬܳܐ ܦܺܐܪ̈ܶܐ ܐܺܝܬܶܝܗ̇ ܗ̱ܘܳܬ܆ ܐܳܦ ܗܺܝ ܗܳܝ ܕܶܐܬܚܛܶܦ ܠܘܳܬ ܫܡܰܝܳܐ ܗܰܘ ܕܰܬܠܳܬܳܐ ܘܬܽܘܒ ܠܦܰܪܕܰܝܣܳܐ܆ ܐܶܢ ܟܺܝܬ ܥܰܡ ܦܰܓܪܳܐ ܘܶܐܢ ܟܺܝܬ ܒܢܰܦܫܳܐ ܥܰܪܛܶܠܳܝܬܳܐ܆ ܘܰܫܡܰܥ ܡ̈ܶܠܶܐ ܠܳܐ ܡܶܬܡܰܠ̈ܠܳܢܝܳܬܳܐ^[14]܆ ܘܡܶܚܕܳܐ ܐܶܡܰܪ܆ ܐܶܬܺܝܗܶܒ ܠܺܝ ܫܦܳܝܳܐ ܠܒܶܣܪܝ ܡܰܠܰܐܟܳܐ ܕܤܳܛܳܢܳܐ ܕܰܢܩܰܦܚܰܢܝ܆ ܐܰܝܟܰܢܳܐ ܕܠܳܐ ܐܶ݀ܬܬܪܺܝܡ^[15].

ܗܰܘ ܗܳܟܺܝܠ ܕܰܠܒܺܝܫܽܘܬܳܐ ܕܰܡܺܝܟ܆ ܥܺܝܪ ܘܳܐܦ ܠܘܳܬ ܡܟܰܝܢܽܘܬܳܐ ܕܗܳܢܽܘܢ ܕܰܠܩܽܘܒܠܳܐ܆ ܘܳܐܦ ܠܘܳܬ ܡܶܫܬܰܘܕܥܳܢܽܘܬܳܐ ܕܗܳܠܶܝܢ ܐܰ‌ܠܳܗܳܝ̈ܳܬܳܐ. ܗܰܘ ܕܶܝܢ ܕܕܰܐܝܟ ܗܳܢܳܐ܆ ܘܳܐܦ ܟܰܕ ܫܶܢܬܳܐ ܗܳܕܶܐ ܕܓܰܘܳܐ ܕܳܡܶܟ܆ ܗܳܝ ܕܟܽܠܰܢ ܕܳܡܟܺܝܢܰܢ܆ ܐܰܝܟ ܡܰܢ ܕܰܚܕܳܐ ܙܒܰܢ ܩܢܳܐ ܐܰܝܢܳܝܽܘܬܳܐ ܒܬܰܪܥܺܝܬܶܗ ܕܕܳܡܝܳܐ ܠܚܽܘܫܳܒ̈ܶܐ ܕܢܽܘܗܪܳܐ܆ ܐܰܝܟ ܗܰܘ ܕܥܺܝܪ ܒܺܐܝܡܳܡܳܐ ܐܺܝܬܰܘܗ̱ܝ. ܟܰܕ ܛܰܥܺܝ ܠܠܶܠܝܳܐ ܕܒܺܝܫܽܘܬܳܐ ܘܰܠܝܰܩܺܝܪܽܘܬ ܪܺܝܫܳܐ ܗܳܝ ܕܡܶܢ ܗܳܪܟܳܐ܆ ܘܰܒܚܰܫ̈ܶܐ ܚܰܝ̈ܽܘܬܳܢܶܐ ܗܳܢܽܘܢ ܕܰܒܠܶܠܝܳܐ ܡܗܰܠܟܺܝܢ ܠܳܐ ܡܶܬܕܰܚܰܠ܆ ܘܳܐܦܠܳܐ ܬܽܘܒ ܡܶܬܠܙܶܙ. ܘܡܶܫܟܰܚ ܕܢܺܐܡܰܪ܆ ܐܶܢܳܐ ܕܰܡܺܝܟ ܐ̱ܢܳܐ. ܘܠܶܒܳܐ ܕܺܝܠܝ ܫܳܗܰܪ. ܠܗܳܕܶܐ ܫܶܢܬܳܐ ܠܗܳܢܽܘܢ ܕܢܳܛܪܺܝܢ ܦܽܘܩ̈ܕܳܢܰܘܗܝ܆ ܒܰܟ̈ܬܳܒܶܐ ܢܳܡܽܘܣܳܝ̈ܶܐ ܗܳܢܽܘܢ ܕܳܐܦ ܐܰܝܟ ܕܰܒܛܽܘܦܣܳܐ ܘܳܐܦ ܪܽܘܚܳܢܳܐܺܝܬ ܡܶܣܬܰܟܠܺܝܢ܆ ܡܶܫܬܰܘܕܶܐ ܐܰ‌ܠܳܗܳܐ ܟܰܕ ܐܳܡܰܪ܆ ܘܶܐ݀ܬܶܠ ܫܰܝܢܳܐ ܒܰܐܪܥܳܐ ܕܺܝܠܟܽܘܢ. ܘܬܶܕܡܟܽܘܢ ܘܠܳܐ ܢܶܗܘܶܐ ܗܰܘ ܕܡܰܕܚܶܠ ܠܟܽܘܢ. ܘܰܐ݀ܘܒܶܕ ܚܰܝ̈ܘܳܬܳܐ ܒܺܝ̈ܫܳܬܳܐ ܡܶܢ ܐܰܪܥܳܐ ܕܺܝܠܟܽܘܢ. ܘܰܩܪܳܒܳܐ ܠܳܐ ܢܶܥܒܰܪ ܒܰܐܪܥܳܐ ܕܺܝܠܟܽܘܢ^[16].

ܠܗܳܢܳܐ ܣܽܘܟܳܠܳܐ ܕܶܐܬܶܐܡܰܪ ܡܶܢܰܢ ܡܚ̈ܰܘܝܳܢ܆ ܐܳܦ ܗܳܠܶܝܢ ܕܦܰܘܠܽܘܤ ܠܬܰܣܠܽܘܢܺܝ̈ܩܳܝܶܐ ܫܠܰܚ ܗܳܟܰܢܳܐ. ܐܢ̱ܬܽܘܢ ܓܶܝܪ ܟܽܠܟܽܘܢ܆ ܒܢܰܝ̈ܳܐ ܕܢܽܘܗܪܳܐ ܐܺܝܬܰܝܟܽܘܢ ܘܰܒ̈ܢܰܝܳܐ ܕܺܐܝܡܳܡܳܐ. ܘܠܳܐ ܐܺܝܬܰܝܢ ܕܠܶܠܝܳܐ ܐܳܦܠܳܐ ܕܚܶܫܽܘܟܳܐ. ܐܰܪܰܐ ܗܳܟܺܝܠ܆ ܠܳܐ ܢܶܕܡܰܟ ܐܰܝܟ ܕܳܐܦ ܗܳܢܽܘܢ ܕܫܰܪܟܳܐ. ܐܶܠܳܐ ܢܶ݀ܬܬܥܺܝܪ ܘܢܶ݀ܫܗܰܪ. ܐܳܦ ܓܶܝܪ ܗܳܢܽܘܢ ܕܕܳܡܟܺܝܢ ܒܠܶܠܝܳܐ ܗܘ ܕܳܡܟܺܝܢ^[17].

ܐܶܠܳܐ ܟܰܠܬܳܐ ܘܢܰܦܫܳܐ ܗܳܝ ܕܰܒܨܶܒܬܳܐ ܕܰܡܝܰܬܪ̈ܳܬܳܐ ܡܨܰܒܬܳܐ܆ ܟܰܕ ܠܫܶܢܬܳܐ ܗܳܝ ܕܺܐܝܡܳܡܳܐ ܕܳܡܟܳܐ܆ ܗܳܝ ܕܠܳܐ ܡܫܰܘܬܦܳܐ ܠܠܶܠܝܳܐ܆ ܗܳܝ ܕܥܰܡ ܥܺܝܪܽܘܬܳܐ ܡܙܰܘܓܳܐ܆ ܐܳܦ ܣܰܓܺܝ ܟܺܐܢܳܐܺܝܬ ܐܳܡܪܳܐ ܗ̱ܘܳܬ܆ ܐܶܢܳܐ ܕܰܡܺܝܟܳܐ ܐ̱ܢܳܐ܆ ܘܠܶܒܝ ܫܳܗܰܪ. ܡܶܛܽܠ ܗܳܕܶܐ ܘܳܐܦܠܳܐ ܛܥܳܬܳܗ̇ ܟܰܕ ܗܳܟܰܢܳܐ ܕܰܡܺܝܟܳܐ ܗ̱ܘܳܬ܆ ܒܰܪ̱ܬ ܩܳܠܶܗ ܕܚܰܬܢܳܐ. ܐܳܦ ܓܶܝܪ ܘܟܰܕ ܒܬܰܪܥܳܐ ܢܳܩܶܫ ܗ̱ܘܳܐ܆ ܐܰܪܓܫܰܬ ܘܶܐܡܪܰܬ܆ ܩܳܠܶܗ ܕܒܰܪ ܚܳܬܳܐ ܕܺܝܠܝ܆ ܢܳܩܶܫ ܥܰܠ ܬܰܪܥܳܐ. ܟܰܕ ܕܶܝܢ ܫܡܰܥܬܶܗ ܕܳܐܡܰܪ܆ ܦܬܰܚܝ̱ ܠܺܝ ܚܳܬܝ܆ ܩܰܪܺܝܒܬܝ. ܝܰܘܢܝ܆ ܡܫܰܡܠܰܝܬܳܐ ܕܺܝܠܝ܆ ܠܘܳܬ ܫܡܳܐ ܗܰܘ ܕܰܡܫܰܡܠܝܽܘܬܳܐ ܢܶܫܰܬ ܘܶܐܬܬܰܗܝܰܬ܆ ܟܰܕ ܗܳܢܳܐ ܗܳܫܳܐ ܩܰܕܡܳܐܺܝܬ ܐܶܫܬܰܡܗܰܬ܆ ܘܗ̱ܝ ܕܰܡܡܰܫܚܳܐ ܘܡܰܟܺܝܟܳܐ ܡܶܬܪܰܥܝܳܐ ܗ̱ܘܳܬ܆ ܘܰܥܗܺܝܕܳܐ ܗ̱ܘܳܬ ܠܚܰܬܢܳܐ ܘܡܰܠܦܳܢܳܐ ܕܶܐܡܰܪ ܠܘܳܬ ܬܰܠܡܺܝܕܰܘ̈ܗ̱ܝ܆ ܕܶܐܡܰܬܝ ܕܬܶܥܒܕܽܘܢ ܟܽܠܗܶܝܢ ܗܳܠܶܝܢ ܕܶܐܬܦܰܩ̈ܰܕܶܝܢ ܠܟܽܘܢ܆ ܐܶܡܰܪܘ ܕܥܰܒ̈ܕܶܐ ܠܳܐ ܚܳܫ̈ܚܶܐ ܐܺܝܬܰܝܢ܆ ܡܶܛܽܠ ܕܗܰܘ ܡܳܐ ܕܚܰܝܳܒܺܝܢ ܗ̱ܘܰܝܢ ܠܡܶܥܒܰܕ ܥܒܰܕܢܰܢ^[18].

ܝܰܘܢܳܐ ܡܰܢ ܓܶܝܪ ܐܺܝܬܶܝܗ̇ ܗ̱ܘܳܬ܆ ܟܰܕ ܡܶܢ ܫܶܦ̈ܥܰܘܗ̱ܝ ܕܝܽܘܪܕܢܳܢ ܣܶܠܩܰܬ܆ ܘܰܡܥܰܛܦܳܐ ܗ̱ܘܳܬ ܠܟܽܠܳܗ̇ ܛܰܝܒܽܘܬܳܐ ܕܪܽܘܚܳܐ܆ ܗܰܘ ܕܒܰܕܡܽܘܬܳܐ ܕܝܰܘܢܳܐ ܐܶܬܚܙܺܝ^[19]. ܘܩܰܪܺܝܒܬܳܐ ܗܳܘܝܳܐ ܗ̱ܘܳܬ ܒܗܳܝ ܕܶܐܬܢܰܩܦܰܬ ܠܚܰܬܢܳܐ ܒܫܰܘܬܳܦܽܘܬܳܐ܆ ܘܫܰܦܺܝܪ ܩܰܪܺܝܒܬܳܐ ܡܶܫܬܰܡܗܳܐ ܗ̱ܘܳܬ. ܘܗܳܠܶܝܢ ܐܺܝܬܰܝܗܶܝܢ ܗ̱ܘܰܝ̈܆ ܕܡܰܘܗܰܒܬܳܐ ܕܡܶܢ ܠܥܶܠ. ܡܶܛܽܠܗܳܕܶܐ ܐܳܦ ܩܕܳܡ ܩܰܠܺܝܠ ܡܶܬܐܰܡܪܳܐ ܗ̱ܘܳܬ ܠܘܳܬܳܗ̇܆ ܟܽܘܠܶܟܝ ܫܰܦܺܝܪܬܳܐ ܐܺܝܬܰܝܟܝ ܩܰܪܺܝܒܬܳܐ ܕܺܝܠܝ܆ ܘܡܽܘܡܳܐ ܠܰܝܬ ܒܶܟܝ^[20]. ܠܟܽܠ ܓܶܝܪ ܡܽܘܡܳܐ ܘܰܠܟܽܘܠ ܫܟܺܝܪܽܘܬܳܐ܆ ܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ ܐܰܫܺܝܓܰܬ ܡܶܢܳܗ̇. ܘܰܠܟܽܠܳܗ̇ ܫܰܦܺܝܪܬܳܐ ܘܰܕܟܺܝܬܳܐ ܥܒܰܕܬܳܗ̇.

ܫܡܳܐ ܕܶܝܢ ܗܰܘ ܕܰܡܫܰܡܠܝܽܘܬܳܐ܆ ܕܰܒܝܰܕ ܥܰܡ̈ܠܶܐ ܕܰܡܝܰܬܪܽܘܬܳܐ ܡܶܬܬܰܪܰܨ܆ ܘܰܒܝܰܕ ܥ̈ܒܳܕܶܐ ܪܰܘܪ̈ܒܶܐ ܘܰܢܛܽܘܪܬܳܐ ܚܰܬܺܝܬ̣ܬܳܐ ܕܦܽܘܩ̈ܕܳܢܶܐ܆ ܡܰܘܕܰܥ ܠܗܳܝ ܕܠܳܐ ܚܰܣܺܝܪܳܐ ܘܕܰܠܘܳܬ ܕܳܡܝܽܘܬܳܐ ܕܰܐ‌ܠܳܗܳܐ ܐܳܬܝܳܐ. ܘܰܕܗܳܕܶܐ ܣܳܗܕܳܐ ܐܺܝܬܰܘܗ̱ܝ܆ ܗܽܘ ܦܳܪܽܘܩܰܢ܆ ܕܰܠܘܳܬ ܬܰܠܡܺܝܕܰܘ̈ܗ̱ܝ ܒܶܐܘܰܢܓ̈ܶܠܺܝܰܐ܆ ܡܶܢ ܒܳܬܰܪ ܡܰܠܦܳܢܽܘܬܳܐ ܟܺܝܬ ܘܡܰܪܬܝܳܢܽܘܬܳܐ ܕܡܶܛܽܠ ܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ ܐܶܡܰܪ܆ ܗܘ̣ܰܘ ܗܳܟܺܝܠ ܡܫܰܡ̈ܠܰܝܳܐ܆ ܐܰܝܟ ܡܳܐ ܕܰܐܒܽܘܟܽܘܢ ܗܰܘ ܕܒܰܫܡܰܝܳܐ ܡܫܰܡܠܝܳܐ ܐܺܝܬܰܘܗ̱ܝ^[21]܆ ܘܬܽܘܒ ܠܘܳܬ ܐܰܒܳܐ ܐܶܡܰܪ ܐܰܝܟ ܕܒܳܐܕܫܳܐ ܕܰܨܠܽܘܬܳܐ ܡܶܛܽܠܳܬܗܽܘܢ܆ ܐܰܝܟܰܢܳܐ ܕܢܶܗܘܽܘܢ ܐܺܝܬܰܝܗܽܘܢ ܚܰܕ܆ ܐܰܝܟܰܢܳܐ ܕܳܐܦ ܚܢܰܢ ܚܰܕ ܐܺܝܬܰܝܢ܆ ܐܶܢܳܐ ܒܗܽܘܢ ܘܰܐܢ̱ܬ ܒܺܝ܆ ܐܰܝܟܰܢܳܐ ܕܢܶܗܘܽܘܢ ܐܺܝܬܰܝܗܽܘܢ ܕܰܓܡܺܝܪܺܝܢ ܠܚܰܕ^[22].

ܠܘܳܬ ܗܳܟܺܝܠ ܣܳܗܕܽܘܬܳܐ ܕܰܡܫܰܡܠܝܽܘܬܳܐ܆ ܘܰܠܘܳܬ ܗܳܝ ܕܬܶܣܬܒܰܪ ܕܗܳܐ ܡܶܢ ܟܰܕܽܘ ܡܰܢܥܰܬ ܠܳܗ̇ ܠܘܳܬ ܕܳܡܝܽܘܬܳܐ ܕܰܐ‌ܠܳܗܳܐ܆ ܐܳܦ ܚܶܓܪܰܬ ܗܺܝ ܟܰܠܬܳܐ܆ ܘܠܳܐ ܪܶܗܛܰܬ ܡܶܟܺܝܠ ܥܰܠ ܩܳܠܳܐ܆ ܒܰܕܝܰܠܺܝܦܳܐ ܗ̱ܘܳܬ ܠܳܗ̇ ܡܰܟܺܝܟܽܘܬ ܪܶܥܝܳܢܳܐ܆ ܘܟܰܕ ܡܚܰܘܝܳܐ ܠܶܗ ܠܚܰܬܢܳܐ ܒܶܗ ܒܢܶܣܝܳܢܳܐ܆ ܕܠܶܒܳܗ̇ ܡܶܫܗܰܪ ܫܳܗܰܪ. ܠܣܰܓܺܝ̈ܶܐܐ ܓܶܝܪ ܕܥܰܠ ܗܳܠܶܝܢ ܕܕܰܐܝܟ ܗܳܟܰܢ ܠܳܐ ܡܒܰܚܢܳܢܳܐܺܝܬ ܘܰܕܠܳܐ ܒܽܘܩܝܳܐ ܘܥܰܡ ܦܫܺܝܩܽܘܬܳܐ ܪܗܶܛܘ܆ ܐܰܛܥܺܝ ܐܳܟܶܠ ܩܰܪܨܳܐ ܗܰܘ ܕܰܡܫܰܚܠܶܦ ܐܶܣܟܺܡܶܗ ܠܡܰܠܰܐܟܳܐ ܕܢܽܘܗܪܳܐ. ܘܒܰܕܡܽܘܬ ܣܺܝܡܘܢ ܐܳܡܰܪ܆ ܐܶܢܳܐ ܐܺܝܬܰܝ ܚܰܝܠܳܐ ܕܰܐ‌ܠܳܗܳܐ܆ ܗܰܘ ܕܡܶܬܩܪܶܐ ܪܰܒܳܐ^[23]. ܐܰܘ ܠܰܘ ܗܳܟܰܢܳܐ ܠܳܐܕܳܡ ܘܰܠܚܰܘܳܐ ܕܚܳܐܶܝܢ ܗ̱ܘܰܘ ܒܦܰܪܕܰܝܣܳܐ ܚܰܝ̈ܶܐ ܗܳܠܶܝܢ ܛܽܘܒ̈ܬܳܢܶܐ܆ ܐܰܪܺܝܡ ܠܥܶܠ ܘܰܢܦܰܚ ܐܶܢܽܘܢ ܟܰܕ ܐܶܡܰܪ܆ ܕܬܶܗܘܽܘܢ ܐܰܝܟ ܐܰ‌ܠܳܗ̈ܶܐ^[24]܆ ܘܰܠܒܰܪ ܡܶܢ ܦܰܪܕܰܝܣܳܐ ܥܒܰܕ ܐܶܢܽܘܢ܆ ܘܚܰܘܺܝ ܐܶܢܽܘܢ ܣܦܺܝ̈ܩܶܐ ܡܶܢ ܐܰ‌ܠܳܗܳܐ.

ܣܰܟܽܘܠܬܳܢܳܐܺܝܬ ܗܳܟܺܝܠ ܘܥܺܝܪܳܐܺܝܬ ܐܶܬܚܰܫܒܰܬ ܟܰܠܬܳܐ܆ ܟܰܕ ܠܳܐ ܡܩܰܒܠܳܐ ܠܣܳܗܕܽܘܬܳܐ ܕܰܡܫܰܡܠܝܽܘܬܳܐ܆ ܠܡܰܙܥܳܩܽܘ ܩܳܠܐ ܠܘܳܬ ܚܰܬܢܳܐ܆ ܐܰܝܟ ܕܰܠܘܳܬ ܢܽܘܟܪܳܝܳܐ ܘܕܰܒܝܰܕ ܗܳܝ ܕܰܡܫܰܡܠܰܝܬܳܐ ܡܫܰܡܰܗ ܠܳܗ̇ ܠܡܰܛܥܳܝܽܘ ܘܰܠܡܶܓܢܒܳܗ̇ ܨܳܒܶܐ܆ ܘܕܰܠܒܰܪ ܡܶܢ ܩܰܝܛܽܘܢܳܐ ܡܰܠܟܳܝܳܐ ܢܶܥܒܕܺܝܗ̇܆ ܘܰܠܒܰܪ ܡܶܢ ܓܢܽܘܢܳܐ ܗܰܘ ܕܰܟܝܳܐ. ܝܳܕܥܳܐ ܗ̱ܘܳܬ ܓܶܝܪ ܕܗܳܝ ܕܗܳܟܰܢܳܐ ܙܗܺܝܪܳܐܺܝܬ ܢܶܗܘܶܐ ܣܺܝܡܳܐ܆ ܣܰܓܺܝ ܡܚܰܕܝܳܐ ܠܶܗ ܠܚܰܬܢܳܐ. ܡܶܛܽܠ ܗܳܕܶܐ ܐܳܦ ܐܳܡܪܳܐ ܗ̱ܘܳܬ܆ ܫܶܠܚܶܬ ܟܽܘܬܺܝܢܝ܆ ܐܰܝܟܰܢܳܐ ܐܶ݀‌ܠܒܫܺܝܗ̇. ܐܰܫܺܝܓܶܬ ܪ̈ܶܓܠܰܝ܆ ܐܰܝܟܰܢܳܐ ܐܶ݀ܛܰܪܛܶܫ ܐܶܢܶܝܢ^[25]. ܘܠܳܐ ܡܶܕܶܡ ܕܫܳܘܶܐ ܠܡܶܠܬܳܐ ܐܳܡܪܳܐ ܝܳܕܥܳܐ ܐ̱ܢܳܐ ܐܶܢܳܐ ܠܺܝ ܕܰܣܥܺܝܪ ܠܺܝ܆ ܘܗܰܘ ܕܰܫܡܳܐ ܕܰܡܫܰܡܠܝܽܘܬܳܐ ܡܫܰܟܶܢ ܠܺܝ. ܠܟܽܘܢܳܝܳܐ ܕܶܝܢ ܗܰܘ ܕܥܳܒܰܪ ܠܰܫܪܳܪܗܽܘܢ ܕܣܽܘܥܪ̈ܳܢܶܐ܆ ܠܳܐ ܙܳܕܶܩ ܕܰܦܫܺܝܩܳܐܺܝܬ ܢܩܰܒܶܠ ‌ܐ̱ܢܳܫ ܥܠܰܘܗ̱ܝ܆ ܕܕܰܠܡܳܐ ܟܰܕ ܢܶܬܩܰܒܰܠ܆ ܐܳܦ ܡܶܢ ܗܳܠܶܝܢ ܕܺܐܝܬܰܝܗܶܝܢ ܠܶܗ ܢܶܓܠܙܺܝܘܗ̱ܝ ܒܝܰܕ ܡܰܛܥܝܳܢܽܘܬܳܐ. ܙܳܕܶܩ ܕܶܝܢ ܠܡܶܬܚܰܫܳܒܽܘ ܥܠܰܘܗ̱ܝ܆ ܕܢܶܣܝܳܢܳܐ ܐܺܝܬܰܘܗ̱ܝ ܘܒܽܘܩܝܳܐ ܘܡܰܛܥܝܳܢܽܘܬܳܐ. ܫܶܠܚܶܬ ܡܰܢ ܓܶܝܪ ܟܽܘܬܺܝܢܝ܆ ܗܳܢܰܘ ܕܶܝܢ ܠܒܰܪܢܳܫܳܐ ܥܰܬܺܝܩܳܐ ܥܰܡ ܣܳܥܽܘܪ̈ܘܳܬܶܗ^[26] ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܘܰܐܫܺܝܓܶܬ ܪ̈ܶܓܠܰܝ ܟܰܕ ܦܶܠܥܶܬ ܘܡܶܪܩܶܬ ܡܶܢܗܶܝܢ ܠܛܺܝܢܳܐ ܗܰܘ ܕܰܕܒܰܩ ܒܗܶܝܢ ܡܶܢ ܐܽܘܪ̈ܚܳܬܳܐ ܕܰܚܛܺܝܬܳܐ܆ ܒܝܰܕ ܣܚܳܬܳܐ ܐܰ‌ܠܳܗܳܝܬܳܐ܆ ܘܢܶܛܪܶܬ ܐܶܢܶܝܢ ܠܗܳܠܶܝܢ ܕܠܳܐ ܬܽܘܒ ܒܗܶܝܢ ܟܰܕ ܒܗܶܝܢ ܢܗܰܠ̈ܟܳܢ܆ ܝܳܕܥܳܐ ܐ̱ܢܳܐ. ܡܫܰܡܠܰܝܬܳܐ ܕܶܝܢ ܐܶܢܳܐ ܠܺܝ ܐܶܢ ܐ݀ܶܚܫܽܘܒ܆ ܘܶܐ݀ܪܗܰܛ ܥܰܠ ܩܪܳܝܬܳܐ܆ ܛܰܥܝܳܐ ܠܺܝ ܕܰܒܝܰܕ ܗܳܝ ܕܶܐܬܬܪܺܝܡܶܬ̣ ܠܘܳܬ ܡܫܰܩܠܽܘܬܳܐ܆ ܘܰܒܝܰܕ ܗܳܝ ܕܡܰܣܒܪܳܐ ܐ̱ܢܳܐ ܕܺܐܝܬܰܝ ܗܳܕܶܐ ܗܰܘ ܡܳܐ ܕܠܳܐ ܐܺܝܬܰܝ܆ ܠܟܽܘܬܺܝܢܳܐ ܬܽܘܒ ܗܳܝ ܥܰܬܺܝܩܬܳܐ ܠܳܒܫܳܐ ܐ̱ܢܳܐ܆ ܘܒܰܫܒܺܝܠܳܐ ܗܰܘ ܕܳܐܟܶܠ ܩܰܪܨܳܐ ܡܗܰܠܟܳܐ ܐ̱ܢܳܐ܆ ܘܰܠܪ̈ܶܓܠܰܝ ܡܨܰܝܳܐܐ ܐ̱ܢܳܐ܆ ܡܶܛܽܠ ܟܺܝܬ ܕܳܐܦ ܗܽܘ ܗܰܘ ܡܶܢ ܡܫܰܩܠܽܘܬܳܐܢܦܰܠ. ܡܳܢܳܐ ܗܳܟܺܝܠ. ܠܒܰܪ̱ܬ ܩܳܠܳܐ ܗܳܝ ܕܣܰܓܺܝ ܝܰܬܺܝܪ ܐܺܝܬܶܝܗ̇ ܙܗܺܝܪܬܳܐ ܐܶ݀ܦܢܶܐ ܘܺܐ݀ܡܰܪ܆ ܕܫܶܠܚܶܬ ܟܽܘܬܺܝܢܝ ܐܰܝܟܰܢܳܐ ܐܶ݀‌ܠܒܫܺܝܗ̇. ܐܰܫܺܝܓܶ ܬܠܪ̈ܶܓܠܰܝ܆ ܐܰܝܟܰܢܳܐ ܐܶ݀ܛܰܪܛܶܫ ܐܶܢܶܝܢ^[27]. ܡܶܢ ܟܽܠ ܦܪܽܘܤ ܚܰܬܢܳܐ ܟܰܕ ܗܳܠܶܝܢ ܫܳܡܰܥ܆ ܒܰܩܪܳܝܬܳܐ ܕܝܰܬܺܝܪ ܓܰܠܝܳܐ ܘܢܰܗܺܝܪܳܐ ܢܶܩܪܶܝܢܝ ܘܠܳܐ ܐܶ݀ܫܪܰܥ.

ܘܟܰܕ ܗܳܠܶܝܢ ܟܰܠܬܳܐ ܗܳܝ ܫܰܗܳܪܬܳܐ ܘܰܕܡܰܠ̣ܝܳܐ ܥܺܝܪܽܘܬܳܐ ܐܶܬܚܰܫܒܰܬ ܘܶܐܡܪܰܬ܆ ܡܶܢ ܣܰܒܪܳܗ̇ ܠܳܐ ܦܶܕܰܬ̣. ܐܰܪܓܫܰܬ ܓܶܝܪ ܡܶܚܕܳܐ ܡܰܪܓܫܳܢܽܘܬܳܐ ܐܰ‌ܠܳܗܳܝܬܳܐ ܘܳܐܡܪܳܐ܆ ܒܰܪ ܚܳܬܝ ܫܰܕܰܪ ܐܺܝܕܶܗ ܡܶܢ ܢܶܩܒܳܐ܆ ܘܟܰܪܣܳܐ ܕܺܝܠܝ ܐܶܬܪܰܗܒܰܬ ܘܶܐܬܬܰܘܗܰܬ ܥܠܰܘܗ̱ܝ. ܩܳܡܶܬ ܐܶܢܳܐ ܠܡܶܦܬܰܚ ܠܒܰܪ ܚܳܬܳܐ ܕܺܝܠܝ.

ܡܶܬܪܕܶܝܢ ܚ̱ܢܰܢ ܗܳܟܺܝܠ ܒܝܰܕ ܗܳܠܶܝܢ܆ ܕܰܠܘܳܬ ܩܪ̈ܳܝܳܬܳܐ ܐܰ‌ܠܳܗܳܝ̈ܳܬܳܐ ܘܬܶܐܽܘܪܺܝܰܐܤ ܘܓܶܠ̈ܝܳܢܶܐ܆ ܠܰܘ ܦܫܺܝܩܳܐܺܝܬ ܢܶܪܗܰܛ. ܐܶܠܳܐ ܐܳܦܶܢ ܠܬܰܪܥܰܢ ܕܡܶܬܢܩܶܫ ܢܶܚܙܶܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܡܰܪܓܫܳܢܽܘܬܳܐ ܕܬܰܪܥܺܝܬܳܐ܆ ܗܳܝ ܕܰܡܟܳܢܳܐ ܕܰܒܕܰܐܝܟ ܗܳܠܶܝܢ ܬܶܪܓܰܫ܆ ܥܰܡ ܩܶܢܛܳܐ ܙܗܺܝܪܳܐ ܙܳܕܶܩ ܕܢܶܬܩܦܶܤ܆ ܘܢܶܫܘܰܪ ܢܶܥܪܽܘܩ. ܘܰܕܢܶܬܬܦܺܝܤ ܓܰܠܝܳܐܺܝܬ܆ ܕܳܐܦܠܳܐ ܠܚܰܕ ܡܶܕܶܡ ܕܰܐܝܟ ܗܳܢܳܐ ܫܳܘܶܝܢܰܢ. ܗܰܘ ܓܶܝܪ ܕܣܳܒܰܪ ܕܫܳܘܶܐ܆ ܘܰܡܛܰܝܒܳܐܺܝܬ ܦܳܬܰܚ܆ ܛܰܥܝܳܐ ܠܶܗ ܕܰܩܕܳܡ ܚܰܬܢܳܐ ܡܰܢ ܐܳܚܶܕ ܬܰܪܥܳܐ ܒܝܰܕ ܗܳܠܶܝܢ ܕܦܳܬܰܚ܆ ܟܒܰܪ ܕܶܝܢ ܠܰܒܥܶܠܕܒܳܒܳܐ ܒܶܐܣܟܺܡܳܐ ܪܳܚܡܳܝܳܐ ܡܩܰܒܶܠ.

ܗܰܘ ܕܶܝܢ ܕܡܶܬܒܰܝܰܢ ܘܩܳܦܶܤ ܢܰܦܫܶܗ ܠܘܳܬ ܗܳܝ ܕܰܡܡܰܫܚܳܐ ܘܡܰܟܝܟܐ܆ ܢܰܩܢܽܘܗ̱ܝ ܠܚܰܬܢܳܐ ܕܠܰܙܗܺܝܪܽܘܬܶܗ ܕܳܒܰܪ ܒܰܩܛܺܝܪܳܐ܆ ܘܰܐܝܟ ܕܰܒܝܰܕ ܢܶܩܒܳܐ ܡܶܕܶܡ ܕܳܚܶܐ ܐܺܝܕܶܗ ܠܓܰܘ܆ ܘܠܰܘ ܛܰܝܳܦܳܐܺܝܬ ܡܶܟܺܝܠ ܐܶܠܳܐ ܥܰܡܺܝܩܳܐܺܝܬ ܓܳܫܶܦ ܒܶܗ܆ ܐܰܝܟܰܢܳܐ ܕܳܐܦ ܟܰܪܣܶܗ ܬܶܬܘܰܗ ܘܬܶܬܪܗܶܒ܆ ܝܺܕܺܝܥܳܐ ܕܶܝܢ ܕܗܰܘ ܡܳܐ ܕܺܐܝܬܰܘܗ̱ܝ ܒܬܰܪܥܺܝܬܳܐ ܕܣܰܓܺܝ ܝܰܬܺܝܪ ܥܰܡܺܝܩ܆ ܗܰܘ ܟܺܝܬ ܕܺܐܝܬܰܘܗ̱ܝ ܡܩܰܒܠܳܢܳܐ ܕܬܽܘܪ̈ܣܳܝܶܐ ܡܶܬܗܰܘ̈ܢܳܢܶܐ܆ ܘܕܰܒܗܳܝ ܕܦܳܫܰܪ ܘܦܳܠܰܚ ܘܡܶܣܬܰܟܰܠ ܛܳܒ ܩܰܛܺܝܢܳܐܺܝܬ^[28] ܘܕܩܺܝܩܳܐܝܬ܆ ܠܗܳܠܶܝܢ ܕܶܐܫܬܰܕܪ̈ܶܝܢ ܒܝܰܕ ܐܺܝܕܳܐ ܐܰ‌ܠܳܗܳܝܬܳܐ܆ ܗܳܠܶܝܢ ܕܶܝܢ ܐܺܝܬܰܝܗܶܝܢ܆ ܡ̈ܶܠܶܐ ܗܳܢܶܝܢ ܕܰܒܗܶܝܢ ܒܪܺܝܬܳܐ ܗܳܝ ܡܶܬܗܰܘܢܳܢܺܝܬܳܐ ܘܗ̱ܝ ܡܶܬܪܰܓܫܳܢܺܝܬܳܐ ܗܘ̣ܳܬ܆ ܡܶܣܬܰܪܰܕ ܟܺܝܬ ܘܬܳܘܰܗ ܘܬܳܡܰܗ܆ ܘܡܶܬܡܚܶܠ ‌ܐܳܦ ܠܘܳܬ ܡܢܳܬܳܐ ܙܥܽܘܪܬܳܐ ܕܡܰܕܪܟܳܢܽܘܬܳܐ ܡܫܰܡܠܰܝܬܳܐ. ܕܰܐܝܟ ܗܳܟܰܢܰܐ ܗ̱ܘ ܓܶܝܪ ܗܰܘ ܡܳܐ ܕܰܒܝܰܕ ܢܶܩܒܳܐ ܥܳܐܶܠ ܡܰܢܗܰܪ܆ ܘܣܳܦܶܩ ܒܪܰܡ ܕܳܐܦ ܠܥܽܘܡܩ̈ܶܐ ܕܬܰܪܥܺܝܬܰܢ ܢܰܢܗܰܪ.

ܗܳܟܰܢܳܐ ܗܺܝ ܟܰܠܬܳܐ ܒܝܰܕ ܗܳܠܶܝܢ ܕܢܰܟܦܳܐܺܝܬ ܘܩܰܢܺܝܛܳܐܺܝܬ ܟܶܘܙܰܬ܆ ܘܟܰܕ ܡܶܬܪܰܥܝܳܐ ܗ̱ܘܳܬ ܗܳܝ ܕܡܰܟܺܝܟܳܐ ܘܰܡܡܰܫܚܳܐ ܐܡ̣ܐܢ݀ܬ܆ ܠܺܐܝܕܳܐ ܐܰ‌ܠܳܗܳܝܬܳܐ ܒܝܰܕ ܢܶܩܒܳܐ ܢܶܓܕܰܬ ܠܘܳܬܳܗ̇ ܘܗܶܦܟܰܬ ܐܶܬܢܰܓܕܰܬ ܡܶܢܳܗ̇. ܘܟܰܕ ܩܳܡܰܬ ܥܰܡ ܠܒܺܝܒܽܘܬܳܐ܆ ܠܟܽܠܳܗ̇ ܬܰܪܥܳܐ ܦܶܬܚܰܬ܆ ܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܡܽܘܫܶܐ ܕܰܠܘܳܬ ܗܰܘܢܳܐ ܘܡܰܘܕܥܳܢܽܘܬܳܐ ܕܰܒ̈ܢܳܬ ܩ̈ܳܠܶܐ ܪܰܘܪ̈ܒܳܬܳܐ ܕܰܐ‌ܠܳܗܳܐ܆ ܩܰܛܺܝܢ ܩܳܠܳܐ ܘܝܰܩܺܝܪ ܠܶܫܳܢܳܐ ܩܳܪܶܐ ܗ̱ܘܳܐ ܗܽܘ ܠܶܗ܆ ܘܰܒܝܰܕ ܡܰܟܺܝܟܽܘܬܳܐ ܡܶܬܩܰܠܣܳܢܺܝܬܳܐ ܐܳܚܶܕ ܗ̱ܘܳܐ ܬܰܪܥܶܗ܆ ܘܡܶܬܟܰܫܰܦ ܗ̱ܘܳܐ ܘܳܐܡܰܪ܆ ܐܰܣܪܰܚ ܐ̱ܚܪܺܢܳܐ ܗܰܘ ܕܰܡܫܰܕܰܪ ܐܰܢ̱ܬ^[29]܆ ܘܟܰܕ ܐܶܬܕܒܰܪ ܒܰܩܛܺܝܪܳܐ܆ ܘܡܶܢ ܒܳܬܰܪܟܶܢ ܟܰܕ ܟܽܠܳܗ̇ ܬܰܪܥܺܝܬܶܗ ܦܬܰܚ܆ ܐܳܦ ܡܦܺܝܤ ܗ̱ܘܳܐ ܘܡܶܬܟܰܫܰܦ ܟܰܕ ܐܳܡܰܪ܆ ܐܶܢ ܐܶܫܟܚܶܬ ܛܰܝܒܽܘܬܳܐ ܩܕܳܡܰܝܟ ܚܰܘܳܐ ܠܺܝ ܐܰܢ̱ܬ ܠܳܟ܆ ܝܺܕܺܝܥܳܐܺܝܬ ܐܶ݀ܚܙܶܝܟ^[30]. ܒܶܗ ܟܰܕ ܒܶܗ ܒܰܙܢܳܐ ܐܳܦ ܐܶܪܰܡܝܳܐ ܟܰܕ ܐܳܡܰܪ ܗ̱ܘܳܐ܆ ܗܰܘ ܕܺܐܝܬܰܘܗ̱ܝ ܡܳܪܳܐ ܡܳܪܝܳܐ܆ ܗܳܐ ܠܳܐ ܝܳܕܰܥ ܐ̱ܢܳܐ ܠܰܡܡܰܠܳܠܽܘ ܡܶܛܽܠ ܕܛܰܠܝܳܐ ܐܺܝܬܰܝ ܐܶܢܳܐ܆ ܒܺܐܝܕܳܐ ܐܰ‌ܠܳܗܳܝܬܳܐ ܡܰܪܓܶܫ ܗ̱ܘܳܐ ܘܳܐܦ ܟܳܬܶܒ ܗ̱ܘܳܐ܆ ܘܰܐܘܫܶܛ ܡܳܪܝܳܐ ܐܺܝܕܳܐ ܕܺܝܠܶܗ ܠܘܳܬܝ܆ ܘܰܓܫܰܦ ܒܦܽܘܡܳܐ ܕܝܠܝ ܘܶܐܡܰܪ ܡܳܪܝܳܐ ܠܘܳܬܝ. ܗܳܐ ܝܶܗܒܶܬ ܡܶܠܰܝ̈ ܒܦܽܘܡܳܟ^[31].

ܐܰܝܟܳܐ ܗܳܟܺܝܠ ‌ܐܰܪܰܐ ܐܺܝܬܰܝܗܽܘܢ܆ ܗܳܢܽܘܢ ܕܡܶܛܽܠ ܗܳܝ ܕܥܳܒܕܺܝܢ ܟܰܘܫܳܐ ܘܡܶܬܐܰܡܢܺܝܢ ܠܘܳܬ ܥܺܕܬܳܐ܆ ܡܶܬܢܰܦܚܺܝܢ ܘܓܳܒܠܺܝܢ ܒܶܕ̥ܝܳܐ ܐܰܘ ܐܳܦ ܡܓܰܚܟܺܝܢ܆ ܘܳܐܡܪܺܝܢ ܦܫܺܝܩܳܐܺܝܬ܆ ܦܠܳܢ ܩܰܕܺܝܫܳܐ ܩܳܡ ܠܘܳܬܝ ܒܠܶܠܝܳܐ܆ ܘܶܐܬܚܙܺܝ ܠܺܝ ܙܦܠܢ ܡܶܕܶܡ܆ ܘܶܐܬܬܰܘܕܥܰܬ ܡܰܢ ܗܳܕܶܐ܆ ܐܶܬܦܰܩܕܰܬ ܕܶܝܢ ܗܳܝ܆ ܘܶܐܬܓܰܠܝܰܬ ܗܳܝ ܕܝܰܬܺܝܪ ܐܺܝܬܶܝܗ̇ ܣܒܬܢܝܬܐ. ܓܶܠܝܳܢܳܐ ܕܶܝܢ ܕܝܰܬܺܝܪ ܡܶܢ ܟܽܠ ܪܰܒ ܐܺܝܬܰܘܗ̱ܝ ܐܰܝܟ ܕܠܺܝ ܡܶܣܬܰܒܪܳܐ܆ ܗܳܝ ܕܢܶܬܒܰܩܶܐ ܒܰܚ̈ܛܳܗܰܝܢ ܕܺܝܠܰܢ ܘܠܳܐ ܢܶܛܥܶܐ ܝܳܬܰܢ܆ ܐܳܦܠܳܐ ܢܶܬܬܰܛܥܶܐ ܣܪܺܝܩܳܐܺܝܬ܆ ܘܢܶܬܶܠ ܡܰܥܒܰܪܬܳܐ ܠܛܳܥܝܽܘܬܳܐ ܕܫ̈ܺܐܕܶܐ. ܐܰܘ ܠܳܐ ܚܳܙܶܝܢܰܢ ܠܳܗ̇ ܠܟܰܠܬܳܐ܆ ܠܗܳܝ ܩܰܪܺܝܒܬܳܐ܆ ܗܳܝ ܝܰܘܢܳܐ܆ ܗܳܝ ܡܫܰܡܠܰܝܬܳܐ܆ ܕܳܐܦܠܳܐ ܟܰܕ ܥܰܠ ܬܰܪܥܳܐ ܩܳܐܶܡ ܚܰܬܢܳܐ ܪܳܗܛܳܐ ܗ̱ܘܳܬ ܠܘܳܬܶܗ܆ ܐܳܦܠܳܐ ܠܒܰܪ̱ܬ ܩܠܶܗ ܦܫܺܝܩܳܐܺܝܬ ܡܩܰܒܠܳܐ ܗ̱ܘܳܬ܆ ܠܗܳܝ ܕܡܶܫܬܰܘܕܥܳܐ ܗ̱ܘܳܬ ܠܳܗ̇܆ ܐܶܠܳܐ ܠܘܳܬ ܡܰܟܺܝܟܽܘܬܳܐ ܡܶܬܪܰܟܢܳܐ ܗ̱ܘܳܬ. ܐܳܦܶܢ ܘܠܳܐ ܡܶܢ ܡܶܕܡ ܐ̱ܚܪܺܝܢ܆ ܡܶܢ ܬܰܚܘܺܝܬܳܗ̇ ܕܗܳܕܶܐ ܢܶ݀ܒܗܰܬ.

ܠܳܐ ܐ̱ܢܳܫ ܕܶܝܢ ܟܰܕ ܠܰܫܪܳܝܳܐ ܗܳܢܳܐ ܕܶܐܬܶܐܡܰܪ ܡܶܢܰܢ ܠܘܳܬ ܫܽܘܐܴܠܳܐ ܘܦܽܘܫܳܟܳܐ ܫܳܡܰܥ܆ ܕܰܕܠܳܐ ܦܝܳܣܳܐ ܐܺܝܬܶܝܗ̇ ܢܶܣܒܰܪ܆ ܗܳܝ ܕܟܰܠܬܳܐ ܟܰܕ ܚܕܳܐ ܙܒܰܢ ܐܶܬܡܰܙܓܰܬ ܗ̱ܘܳܬ ܠܳܗ̇ ܒܪܶܚܡܬܳܐ ܐܰ‌ܠܳܗܳܝܬܳܐ ܕܚܰܬܢܳܐ܆ ܠܘܳܬ ܫܽܘܪܰܥܬܳܐ ܕܗܳܠܶܝܢ ܕܰܠܩܽܘܒܠܳܐ ܡܶܬܒܰܝܢܳܢܳܐܺܝܬ ܐܺܝܬ ܗ̱ܘܳܐ ܠܳܗ̇ ܘܩܰܢܺܝܛܳܐܺܝܬ ܘܕܰܚܺܝܠܳܐ ܗ̱ܘܳܬ܆ ܡܶܢ ܩܺܝܢܕܽܘܢܘܤ ܗܰܘ ܕܰܥܬܺܝܕ ܗ̱ܘܳܐ ܕܢܶܗܘܶܐ ܡܶܢ ܬܰܡܳܢ܆ ܟܰܕ ܡܶܬܪܰܢܶܐ ܠܦܰܘܠܽܘܤ ܪܰܒܳܐ ܕܶܐܡܰܪ܆ ܕܳܐܦܠܳܐ ܒܪܺܝܬܳܐ ܗܳܝ ܕܡܶܬܚܰܙܝܳܐ ܘܠܳܐ ܗܳܝ ܠܳܐ ܡܶܬܚܰܙܝܳܢܺܝܬܳܐ܆ ܘܠܳܐ ܐ̱ܚܪܺܬܳܐ ܕܕܰܐܝܟ ܗܳܕܶܐ ܬܶܬܡܨܶܐ ܠܡܶܦܪܫܶܗ ܡܶܢ ܚܽܘܒܶܗ ܕܰܐ‌ܠܳܗܳܐ ܗܰܘ ܕܒܰܡܫܺܝܚܳܐ ܝܶܫܽܘܥ ܡܳܪܰܢ^[32]܆ ܘܰܙܗܺܝܪܳܐܺܝܬ ܟܳܬܶܒ ܗ̱ܘܳܐ ܬܽܘܒ܆ ܐܶܠܳܐ ܡܥܰܨܰܪ ܐ̱ܢܳܐ ܠܶܗ ܠܦܰܓܪܝ ܘܰܡܫܰܥܒܶܕ ܐ̱ܢܳܐ܆ ܕܕܰܠܡܳܐ ܟܰܕ ܠܰܐ̱ܚܪ̈ܳܢܶܐ ܐܰܟܪܙܶܬ܆ ܐܶܢܳܐ ܡܰܣܠܝܳܐ ܐܶ݀ܗܘܶܐ^[33]. ܗܳܝ ܓܶܝܪ ܕܰܐܡܺܝܪܳܐ ܠܝܽܘܚܰܢܳܢ܆ ܕܕܶܚܠܬܳܐ ܠܰܝܬ ܒܚܽܘܒܳܐ܆ ܐܶܠܳܐ ܚܽܘܒܳܐ ܡܫܰܡܠܝܳܐ ܠܒܰܪ ܪܳܡܶܐ ܠܳܗ̇ ܠܕܶܚܠܬܳܐ^[34]܆ ܠܘܳܬ ܕܶܚܠܬܳܐ ܕܥܰܒ̈ܕܶܐ ܚܳܝܪܳܐ܆ ܐܶܡܰܬܝ ܕܰܐܝܟ ܒܰܪ ܒܰܝܬܳܐ ܒܺܝܫܳܐ ܘܥܰܒܕܳܐ ܫܰܦܠܳܐ܆ ܒܪܶܥܠܳܐ ܕܡܶܢ ܬܰܫܢܺܝ̈ܩܶܐ ܕܰܓܙܺܝܡܺܝܢ ܓܳܫܶܦ ܒܥܰܡ̈ܠܶܐ ܕܰܡܝܰܬܪܽܘܬܳܐ܆ ܘܠܰܘ ܒܪܶܚܡܬܳܐ ܗܳܝ ܕܰܠܘܳܬ ܐܰ‌ܠܳܗܳܐ. ܕܡܶܢ ܗܳܪܟܳܐ ܠܗܳܢܽܘܢ ܕܰܡܫܰܪܶܝܢ ܒܝܽܘܠ̈ܦܳܢܶܐ ܐܰ‌ܠܳܗܳܝ̈ܶܐ܆ ܘܰܥܬܺܝܕܺܝܢ ܕܢܶܛܥܡܽܘܢ ܠܚܶܟܡܬܳܐ܆ ܘܢܶܬܗܰܕܽܘܢ ܒܰܕܡܽܘܬ ܫܰܒܪ̈ܶܐ ܠܘܳܬ ܐܽܘܪܚܳܐ ܕܕܶܚܠܰܬ ܐܰ‌ܠܳܗܳܐ܆ ܡܰܘܬܪܳܢܺܝܬܳܐ ܐܺܝܬܶܝܗ̇ ܕܶܚܠܬܳܐ ܥܰܒܕܳܢܳܝܬܳܐ ܗܳܝ ܕܕܰܐܝܟ ܗܳܕܶܐ. ܪܺܝܫܳܐ ܓܶܝܪ ܕܚܶܟܡܬܳܐ ܕܶܚܠܬܳܐ ܕܡܳܪܝܳܐ^[35]. ܐ̱ܢܳܫܺܝ̈ܢ ܕܶܝܢ ܟܰܕ ܠܥܶܠ ܡܶܢ ܗܳܢܳܐ ܛܶܟܣܳܐ ܥܰܒܕܳܢܳܝܳܐ ܥܒܰܪܘ܆ ܒܣܰܒܪܳܐ ܕܗܳܝ ܕܢܶܫܬܘܽܘܢ ܠܺܐܝܩܳܪ̈ܶܐ ܗܳܢܽܘܢ ܕܰܡܠܺܝܟܺܝܢ܆ ܝܳܨܦܺܝܢ ܠܰܡܡܰܠܳܝܽܘ ܠܗܳܢܶܝܢ ܕܰܦܩܺܝ̈ܕܳܢ. ܠܗܳܢܽܘܢ ܕܰܚܠܳܦ ܥܰܒ̈ܕܶܐ܆ ܐܰܓܺܝܪ̈ܶܐ ܢܶܩܪܶܐ ܐܶܢܽܘܢ ܐ̱ܢܳܫ. ܛܶܟܣܳܐ ܕܶܝܢ ܬܠܺܝܬܳܝܳܐ ܐܰܚܺܝܕܺܝܢ܆ ܗܳܢܽܘܢ ܕܟܰܕ ܘܠܳܐ ܠܘܳܬ ܡܶܕܶܡ ܡܶܢ ܗܳܠܶܝܢ ܚܳܝܪܺܝܢ܆ ܐܶܠܳܐ ܥܳܒܕܺܝܢ ܠܳܗ̇ ܠܛܳܒܬܳܐ ܡܶܛܽܠܳܬܳܗ̇ ܕܺܝܠܳܗ̇ ܕܛܳܒܬܳܐ܆ ܘܰܐܝܟ ܐܰܝܠܶܝܢ ܕܪܳܚܡܺܝܢ ܠܶܗ ܠܡܳܪܝܳܐ܆ ܘܺܐܝܬ ܠܗܽܘܢ ܚܽܘܒܳܐ ܕܰܟܝܳܐ ܘܠܳܐܚܠܺܝܛܳܐ ܘܕܰܡܚܰܪܰܪ ܡܶܢ ܟܽܠ ܡܶܕܶܡ ܐܰܝܢܳܐ ܕܗܽܘ.

ܕܰܐܝܟ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܦܰܘܠܽܘܤ܆ ܟܰܕ ܗܳܟܰܢܳܐ ܪܰܬܺܝܳܚܐܺܝܬ ܪܳܚܶܡ ܗ̱ܘܳܐ ܠܶܗ ܠܝܶܫܽܘܥ. ܐܰܝܟܰܢܳܐ ܕܡܶܛܽܠ ܫܦܺܝܥܽܘܬܳܐ ܣܰܓܺܝܐܬܳܐ܆ ܢܶܓܒܶܐ ܠܶܗ ܕܢܶܦܰܠ ܡܰܢ ܗܰܘ ܕܡܶܬܪܚܶܡ ܗ̱ܘܳܐ܆ ܠܘܳܬ ܗܳܝ ܕܣܰܓܺܝ̈ܶܐܐ ܪ̈ܳܚܽܘܡܶܐ ܢܩܰܪܶܒ ܠܘܳܬܶܗ ܡܶܢ ܗܳܢܽܘܢ ܕܠܳܐ ܡܗܰܝܡܢܺܝܢ. ܡܶܛܽܠܗܳܕܶܐ ܐܳܡܰܪ ܗ̱ܘܳܐ܆ ܡܨܰܠܶܐ ܗ̱ܘܺܝܬ ܓܶܝܪ ܕܶܐܢܳܐ ܩܢܽܘܡܝ܆ ܚܶܪܡܳܐ ܐܶ݀ܗܘܶܐ ܡܶܢ ܡܫܺܝܚܳܐ܆ ܚܠܳܦ ܐܰܚ̈ܶܐ ܕܺܝܠܝ܆ ܗܳܢܽܘܢ ܒ̈ܢܰܝ ܓܶܢܣܳܐ ܕܺܝܠܝ ܒܰܒܣܰܪ[36]. ܕܝܽܘܚܰܢܳܢ ܕܶܝܢ܆ ܕܰܕܟܶܐ ܡܶܢ ܕܶܚܠܬܳܐ ܗܳܝ ܥܰܒܕܳܢܳܝܬܳܐ ܐܳܡܰܪ ܠܶܗ ܠܚܽܘܒܳܐ܆ ܗܳܝ ܕܕܳܚܠܳܐ ܡܶܢ ܬܰܫܢܺܝ̈ܩܶܐ ܗܳܢܽܘܢ ܕܰܓܙܺܝܡܺܝܢ܆ ܗܽܘ ܓܰܠܝܳܐܺܝܬ ܢܚܰܘܶܐ. ܟܰܕ ܓܶܝܪ ܐܳܡܰܪ ܕܚܽܘܒܳܐ ܡܫܰܡܠܝܳܐ ܠܒܰܪ ܫܳܕܶܐ ܠܳܗ̇ ܠܕܶܚܠܬܳܐ[37]܆ ܡܶܚܕܳܐ ܡܰܝܬܶܐ ܒܳܬܰܪܟܶܢ܆ ܠܕܶܚܠܬܳܐ ܫܽܘܢܳܩܳܐ ܐܺܝܬ ܠܳܗ̇. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܕܶܚܠܬܳܐ ܗܳܝ ܛܳܪܶܕ ܚܽܘܒܳܐ ܘܰܠܒܰܪ ܣܳܐܶܡ܆ ܠܗܳܝ ܥܰܒܕܳܢܳܝܬܳܐ܆ ܗܳܝ ܕܰܡܙܰܘܓܳܐ ܠܕܶܚܠܬܳܐ ܕܡܶܢ ܬܰܫܢܺܝ̈ܩܶܐ ܕܰܓܙܺܝܡܺܝܢ܆ ܠܰܘ ܠܗܳܝ ܕܺܐܝܬ ܠܳܗ̇ ܩܰܢܺܝܛܽܘܬܳܐ ܡܒܰܝܰܢܬܳܐ܆ ܘܢܳܛܪܳܐ ܠܦܽܘܠܚܳܢܳܐ ܕܰܡܝܰܬܪ̈ܳܬܳܐ. ܒܰܕܓܽܘܢ ܟܰܕ ܠܳܐܕܳܡ ܐܰܩܺܝܡ ܐܰܘܟܺܝܬ ܬܰܩܶܢ ܐܰ‌ܠܳܗܳܐ ܒܚܰܝ̈ܶܐ ܕܠܳܐ ܥܳܩܳܐ ܕܦܰܪܕܰܝܣܳܐ܆ ܣܳܡܶܗ ܐܳܡܰܪ ܟܬܳܒܳܐ ܟܳܗܢܳܝܳܐ ܕܢܶܦܠܚܺܝܘܗ̱ܝ ܘܢܶܛܪܺܝܘܗ̱ܝ[38]. ܘܳܐܦ ܠܬܰܠ̈ܡܺܝܕܶܐ ܕܶܝܢ ܡܳܪܰܢ܆ ܟܰܕ ܐܶܡܰܪ ܐܢ̱ܬܽܘܢ ܪ̈ܳܚܡܰܝ ܐܺܝܬܰܝܟܽܘܢ܆ ܘܠܳܐ ܬܽܘܒ ܐܳܡܰܪ ܐ̱ܢܳܐ ܠܟܽܘܢ ܥܰܒ̈ܕܶܐ[39]܆ ܦܳܩܶܕ ܗ̱ܘܳܐ ܠܗܽܘܢ ܡܶܢ ܒܳܬܰܪ ܩܰܠܺܝܠ ܟܰܕ ܐܳܡܰܪ. ܐܶܬܬܥܺܝܪܘ ܘܨܰܠܰܘ ܐܰܝܟܰܢܳܐ ܕܠܳܐ ܬܶܥܠܽܘܢ ܠܢܶܣܝܽܘܢܳܐ[40].

ܗܰܘ ܓܶܝܪ ܕܡܰܚܶܒ ܠܝܶܫܽܘܥ܆ ܘܰܒܪܶܚܡܬܳܐ ܗܳܝ ܕܰܠܘܳܬܶܗ ܐܰܣܺܝܪ܆ ܠܰܘ ܡܶܛܽܠ ܗܳܕܶܐ ܠܳܐ ܡܶܫܬܰܚܠܦܳܢܳܐܺܝܬ ܐܺܝܬܰܘܗ̱ܝ ܠܘܳܬ ܚܛܺܝܬܳܐ܆ ܘܰܠܗܳܕܶܐ ܟܽܠܳܗ̇ ܡܛܳܐ ܒܰܟܝܳܢܳܐ܆ ܐܰܝܟ ܡܶܠܬܶܗ ܕܠܐܡܦܛܝܘܤ ܗܰܘ ܡܣܰܝܒܳܐ ܘܰܕܣܰܓܺܝ ܪܰܘܪܒܳܢ ܢܳܦܰܚ܆ ܘܰܕܒܰܣܝܳܢܳܐ ܕܰܪ̈ܓܺܝܓܳܬܳܐ ܡܶܬܦܰܠܦܰܠ. ܐܶܠܳܐ ܟܰܕ ܠܘܳܬ ܛܳܒܬܳܐ ܒܙܢܳܐ ܡܶܕܶܡ ܐܶܫܬܰܚܠܰܦ ܘܰܩܢܳܐ ܐܰܝܢܳܝܽܘܬܳܗ̇ ܒܢܰܦܫܶܗ܆ ܘܰܠܥܶܠ ܚܳܐܰܪ܆ ܘܰܠܘܳܬ ܗܳܝ ܕܰܡܢܰܬܥܳܐ ܘܢܳܓܕܳܐ ܠܬܰܚܬ ܠܘܳܬ ܫܽܘܪܰܥܬܳܐ ܠܰܘ ܦܫܺܝܩܳܐܺܝܬ ܡܶܫܬܰܥܒܰܕ܆ ܘܡܶܛܽܠ ܗܳܕܶܐ ܣܢܺܝܩ ܒܪܰܡ ܥܰܠ ܗܳܝ ܕܢܶܗܘܶܐ ܥܺܝܪ܆ ܘܥܰܡ ܗܳܕܶܐ ܢܶܗܘܶܐ ܐܺܝܬ ܠܶܗ ܕܰܡܙܰܘܓܳܐ ܕܶܚܠܬܳܐ ܕܰܢܛܽܘܪܬܳܐ. ܗܰܘ ܓܶܝܪ ܕܠܰܝܬ ܠܶܗ ܗܳܕܶܐ܆ ܡܶܢ ܟܽܠ ܫܰܦܺܝܪܬܳܐ ܐܺܝܬܰܘܗ̱ܝ ܣܦܺܝܩܳܐ. ܡܶܛܽܠ ܗܳܕܶܐ ܐܳܦ ܐ̱ܢܳܫ ܚܰܟܺܝܡܳܐ ܐܳܡܰܪ ܗ̱ܘܳܐ܆ ܕܪܰܒܳܐ ܐܺܝܬܰܘܗ̱ܝ ܗܰܘ ܕܶܐܫܟܰܚ ܚܶܟܡܬܳܐ܆ ܐܶܠܳܐ ܠܳܐ ܐܺܝܬܰܘܗ̱ܝ ܠܥܶܠ ܡܶܢ ܗܰܘ ܕܕܳܚܶܠ ܡܶܢ ܐܰ‌ܠܳܗܳܐ. ܕܶܚܠܬܶܗ ܕܡܳܪܝܳܐ ܥܶܒܪܰܬ ܠܟܽܠ ܡܶܕܶܡ[41]. ܗܰܘ ܕܳܐܚܶܕ ܠܳܗ̇ ܠܡܰܢܽܘ ܢܶܬܕܰܡܶܐ.

ܗܳܠܶܝܢ ܕܶܝܢ ܢܶܦܩܶܬ ܒܡܶܠܰܬܝ܆ ܟܰܕ ܠܰܦܪܘܛܰܐܣܺܝܤ ܐܰܘܟܺܝܬ ܒܥܳܬܳܐ ܕܗܰܘ ܕܫܰܐܶܠ ܫܳܪܶܐ ܐ̱ܢܳܐ ܒܰܠܚܽܘܕ. ܠܰܘ ܓܶܝܪ ܟܰܕ ܠܟܽܠ ܚܕܳܐ ܠܶܟܣܝܤ ܡܒܰܚܶܢܐ̱ܢܳܐ ܩܰܛܺܝܢܳܐܺܝܬ܆ ܕܦܶܬܓܳܡ̈ܶܐ ܗܳܢܽܘܢ ܕܡܶܢ ܬܶܫܒ̈ܚܳܬ ܬܶܫܒ̈ܚܳܬܳܐ ܐܶܬܬܰܝܬܺܝܘ ܠܰܡܨܰܥܬܳܐ.

ܫܽܘܐܴܠܳܐ ܕܶܝܢ ܗܰܘ ܬܠܺܝܬܳܝܳܐ ܗܳܢܳܐ ܐܺܝܬܰܘܗ̱ܝ. ܐܰܝܟܰܢܳܐ ܒܗܳܝ ܕܬܰܪܬܶܝܢ ܕܡܰܠ̈ܟܘܳܬܳܐ ܟܰܕ ܡܶܬܚܰܫܒܺܝܢ ܪ̈ܺܝܫܰܝ ܛܶܟܣ̈ܶܐ ܕܚܰܝܠܳܐ ܩܪܳܒܳܝܳܐ ܕܕܰܘܺܝܕ܆ ܥܽܘܗܕܳܢܳܐ ܕܰܐܒܺܝܫܰܝ ܥܳܒܶܕ ܟܬܳܒܳܐ ܟܳܗܢܳܝܳܐ܆ ܘܗܳܟܰܢܳܐ ܐܳܡܰܪ. ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܡܫܰܡܗܳܐ ܒܰܬܠܳܬܳܐ܆ ܡܫܰܒܚܳܐ ܝܰܬܺܝܪ ܡܶܢ ܬܪܶܝܢ܆ ܘܺܐܝܬܰܘܗ̱ܝ ܗ̱ܘܳܐ ܠܗܽܘܢ ܠܪܺܝܫܳܢܳܐ܆ ܘܰܥܕܰܡܳܐ ܠܰܬܠܳܬܳܐ ܠܳܐ ܐܳܬܶܐ ܗ̱ܘܳܐ[42]. ܡܳܢܳܐ ܗܺܟܺܝܠ ‌ܐܺܝܬܶܝܗ̇ ܬܰܪܥܺܝܬܳܐ ܕܦܶܬܓܳܡ̈ܶܐ ܗܳܠܶܝܢ. ܐܶܢܳܐ ܐܳܡܰܪ ܐ̱ܢܳܐ. ܟܰܕ ܬܠܳܬܳܐ ܐܺܝܬܰܝܗܽܘܢ ܗ̱ܘܰܘ ܗܳܢܽܘܢ ܕܩܰܕܡܳܝ̈ܳܬܳܐ ܡܰܝܬܶܝܢ ܗ̱ܘܰܘ ܕܗܳܢܽܘܢ ܪ̈ܺܝܫܳܢܶܐ ܕܫܰܪܟܳܐ܆ ܪܺܝܫܳܐ ܐܺܝܬܰܘܗ̱ܝ ܗ̱ܘܳܐ ܡܫܰܡܗܳܐ ܐܰܒܺܝܫܰܝ܆ ܕܺܝܠܗܽܘܢ ܕܗܳܠܶܝܢ ܬܠܳܬܳܐ. ܠܰܘ ܟܰܕ ܚܰܕ ܐܺܝܬܰܘܗ̱ܝ ܗ̱ܘܳܐ ܡܶܢ ܗܳܢܽܘܢ ܬܠܳܬܳܐ܆ ܐܰܝܟܰܢܳܐ ܕܗܰܘ ܕܫܰܐܶܠ ‌ܐܣܒܪ܆ ܐܶܠܳܐ ܐ̱ܚܪܺܢܳܐ ܐ̱ܢܳܫ ܠܒܰܪ ܡܶܢ ܗܳܢܽܘܢ ܬܠܳܬܳܐ. ܕܡܶܢ ܗܳܢܽܘܢ ܡܰܢ ܬܪܶܝܢ܆ ܒܫܽܘܒܚܳܐ ܗܰܘ ܕܰܒܚܰܝܠܳܐ ܘܰܒܓܰܢ̱ܒܳܪܽܘܬܳܐ ܡܝܰܬܰܪ ܗ̱ܘܳܐ܆ ܡܶܢ ܗܰܘ ܕܶܝܢ ܕܰܬܠܳܬܳܐ܆ ܠܳܐ ܬܽܘܒ. ܗܳܕܶܐ ܓܶܝܪ ܐܺܝܬܶܝܗ̇܆ ܗܳܝ ܕܰܥܕܰܡܳܐ ܠܰܬܠܳܬܳܐ ܠܳܐ ܐܳܬܶܐ ܗ̱ܘܳܐ. ܒܪܰܡ ܡܕܰܒܪܳܢܳܐ ܕܺܝܠܗܽܘܢ ܐܺܝܬܰܘܗ̱ܝ ܗ̱ܘܳܐ܆ ܡܶܛܽܠ ܟܺܝܬ ܕܰܒܪܳܐ ܐܺܝܬܰܘܗ̱ܝ ܗ̱ܘܳܐ ܕܨܐܪܘܐܝܐ ܚܳܬܶܗ ܕܕܰܘܺܝܕ.

ܡܶܛܽܠ ܕܶܝܢ ܒܐܢܐܐ ܟܰܕ ܢܳܚܶܬ ܒܬܰܫܥܺܝܬܳܐ܆ ܗܳܝ ܕܝܰܬܺܝܪ ܪܰܒܳܐ ܐܳܡܰܪ ܗܳܟܰܢܳܐ. ܘܳܐܦ ܠܗܳܢܳܐ ܐܺܝܬ ܗ̱ܘܳܐ ܫܡܳܐ ܒܗܳܠܶܝܢ ܬܠܳܬܳܐ ܚܰܝ̈ܠܬܳܢܶܐ܆ ܟܰܕ ܝܰܬܺܝܪ ܡܶܢ ܬܠܳܬܰܝ̈ܗܽܘܢ ܡܫܰܒܰܚ ܗ̱ܘܳܐ. ܘܰܠܘܳܬ ܬܠܳܬܰܝ̈ܗܽܘܢ ܠܳܐ ܐܳܬܶܐ ܗ̱ܘܳܐ. ܐܰܩܺܝܡܶܗ ܕܰܘܺܝܕ ܥܰܠ ܡܰܛܰܪܬܳܐ ܕܺܝܠܶܗ. ܘܳܐܦ ܗܳܕܶܐ ܕܶܝܢ܆ ܗܽܘ ܟܰܕ ܗܽܘ ܣܽܘܟܳܠܳܐ ܩܰܢ̣ܝܳܐ܆ ܕܗܳܢܽܘܢ ܬܠܳܬܳܐ ܕܩܰܕܶܡܘ ܐܶܬܛܰܟܰܣܘ܆ ܡܶܢ ܩܕܳܡ ܪ̈ܺܝܫܰܝ ܛܶܟ̈ܣܶܐ ܕܣܰܓܺܝ̈ܶܐܐ ܐܺܝܬܰܝܗܽܘܢ ܗ̱ܘܰܘ܆ ܗܶܢܽܘܢ ܒܰܝܢܳܬܗܽܘܢ ܡܫܰܡܗܳܐ ܚܳܫܒܺܝܢ ܗ̱ܘܰܘ ܠܶܗ ܠܒܐܢܐܐ ܘܺܐܝܬܰܘܗ̱ܝ ܗ̱ܘܳܐ ܫܡܶܗ ܪܰܒܳܐ ܠܘܳܬܗܽܘܢ. ܐܺܝܬܰܘܗ̱ܝ ܗ̱ܘܳܐ ܓܶܝܪ ܡܫܰܒܚܳܐ ܝܰܬܺܝܪ ܡܶܢ ܬܠܳܬܰܝ̈ܗܽܘܢ܆ ܐܰܝܟ ܝܰܬܺܝܪ ܚܰܝܠܬܳܢܳܐ ܡܶܢܗܽܘܢ ܘܝܰܬܺܝܪ ܓܰܢ̱ܒܳܪܳܐ. ܒܪܰܡ ܟܰܕ ܠܘܳܬ ܟܽܠ ܚܰܕ ܡܶܢܗܽܘܢ ܡܶܢܶܗ ܘܠܶܗ ܦܪܺܝܫܳܐܺܝܬ ܡܶܬܦܰܚܰܡ ܗ̱ܘܳܐ. ܠܘܳܬ ܓܶܝܪ ܬܠܳܬܰܝ̈ܗܽܘܢ ܐܰܟܚܕܳܐ܆ ܒܰܠܚܽܘܕܰܘܗ̱ܝ ܢܶܩܪܰܒ ܠܳܐ ܡܶܫܟܰܚ ܗ̱ܘܳܐ܆ ܘܳܐܦܠܳܐ ܬܽܘܒ ܕܢܶܬܒܩܶܐ ܒܦܽܘܚܳܡܳܐ ܠܽܘܩܒܰܠ ܬܠܳܬܰܝ̈ܗܽܘܢ. ܘܗܳܕܶܐ ܡܰܘܕܥܳܐ܆ ܗܳܝ ܕܝܰܬܺܝܪ ܡܶܢ ܬܠܳܬܰܝ̈ܗܽܘܢ ܐܺܝܬܰܘܗ̱ܝ ܗ̱ܘܳܐ ܡܫܰܒܚܳܐ܆ ܘܰܠܘܳܬ ܬܠܳܬܰܝ̈ܗܽܘܢ ܠܳܐ ܐܳܬܶܐ ܗ̱ܘܳܐ. ܡܶܛܽܠܗܳܕܶܐ ܐܳܦ ܥܰܠ ܢܛܽܘܪܬܳܐ ܕܦܰܓܪܳܐ ܕܺܝܠܶܗ ܐܰܩܺܝܡܶܗ ܕܰܘܺܝܕ܆ ܐܰܝܟ ܕܠܰܐܝܢܳܐ ܕܡܶܢ ܟܽܠܗܽܘܢ ܡܝܰܬܰܪ ܗ̱ܘܳܐ. ܗܳܝ ܗܳܟܺܝܠ ܕܡܶܬܟܰܢܫܳܐ ܗܳܕܶܐ ܐܺܝܬܶܝܗ̇. ܕܟܰܕ ܚܰܡܫܳܐ ܐܺܝܬܰܝܗܽܘܢ ܗ̱ܘܰܘ ܟܽܠܗܽܘܢ܆ ܐܰܒܺܝܫܰܝ ܡܰܢ܆ ܕܗܳܠܶܝܢ ܬܠܳܬܳܐ ܐܺܝܬܰܘܗ̱ܝ ܗ̱ܘܳܐ ܪܺܝܫܳܐ܆ ܐܰܝܟ ܒܰܪ ܓܶܢܣܳܐ ܕܕܰܘܺܝܕ. ܘܗܳܕܶܐ ܟܰܕ ܡܶܢ ܗܳܠܶܝܢ ܬܪܶܝܢ ܒܰܠܚܽܘܕ ܡܝܰܬܰܪ ܗ̱ܘܳܐ ܒܰܡܝܰܬܪܽܘܬܳܐ ܩܪܳܒܳܝܬܳܐ܆ ܡܶܢ ܗܰܘ ܕܶܝܢ ܕܰܬܠܳܬܳܐ ܚܰܣܺܝܪ ܗ̱ܘܳܐ. ܒܐܢܐܐ ܕܶܝܢ܆ ܟܰܕ ܠܥܶܠ ܡܶܢ ܗܳܠܶܝܢ ܬܠܳܬܳܐ ܥܳܒܰܪ ܗ̱ܘܳܐ܆ ܒܪܰܡ ܠܥܶܠ ܡܶܢ ܟܽܠܚܰܕ ܡܶܢܶܗ ܘܠܶܗ ܘܠܰܘ ܐܰܟܚܕܳܐ܆ ܡܶܛܽܠ ܢܛܽܘܪܬܳܐ ܕܡܰܠܟܳܐ ܦܪܺܝܫ ܗ̱ܘܳܐ. ܟܕ ܡܶܛܽܠ ܩܰܕܡܳܝ̈ܳܬܳܐ ܘܰܡܥܰܠ̈ܝܳܬܳܐ܆ ܫܰܘܝܽܘܬ ܡܶܬܗܰܝܡܢܳܢܽܘܬܳܐ ܡܰܝܬܶܐ ܗ̱ܘܳܐ.

ܐܶ݀ܫܰܢܶܐ ܗܳܟܺܝܠ ܡܶܟܺܝܠ܆ ܐܳܦ ܠܘܳܬ ܗܰܘ ܫܽܘܐܴܠܳܐ ܐ̱ܚܪܺܢܳܐ܆ ܘܗܳܟܰܢܳܐ ܐܶ݀ܫܰܠܡܺܝܘܗ̱ܝ ܠܡܺܐܡܪܳܐ܆ ܟܰܕ ܐܺ݀ܡܰܪ ܐܳܦ ܥܠܰܘܗ̱ܝ܆ ܗܳܠܶܝܢ ܕܥܰܠ ܬܰܪܥܺܝܬܳܐ ܕܺܝܠܝ ܡܚܺܝܠܬܳܐ ܕܳܝ̈ܠܳܢ. ܡܶܛܽܠ ܡܳܢܳܐ ܐܶܪܰܡܝܳܐ ܐܳܡܰܪ܆ ܠܳܐܶܛ ܠܝܰܘܡܳܐ ܗܰܘ ܕܶܐܬܺܝܠܶܕ ܒܶܗ܆ ܘܠܰܘ ܠܝܰܘܡܳܐ ܒܰܠܚܽܘܕ܆ ܐܶܠܳܐ ܐܳܦ ܠܒܰܪܢܳܫܳܐ ܗܰܘ ܕܣܰܒܪܶܗ ܠܰܐܒܽܘܗ̱ܝ ܕܶܐܬܺܝܠܶܕ ܠܶܗ ܛܰܠܝܳܐ[43]. ܗܳܝ ܕܰܠܘܳܬܳܗ̇܆ ܗܳܕܶܐ ܐܳܡܪܺܝܢܰܢ. ܕܰܢܒܺܝܳܐ ܠܰܘ ܐܰܝܟ ܚܰܕ ܡܶܢ ܣܰܓܺܝ̈ܶܐܐ ܗܳܢܽܘܢ ܕܒܺܝܫܳܐܺܝܬ ܘܰܐ‌ܠܺܝܨܳܐܺܝܬ ܡܶܢ ܒܺܝܫܽܘܬܳܐ ܣܺܝܡܺܝܢ܆ ܘܒܰܙܥܽܘܪܽܘܬ ܢܰܦܫܳܐ ܡܶܬܬܰܝܬܶܝܢ ܠܘܳܬ ܗܳܠܶܝܢ ܡܥܺܝ̈ܩܳܢܝܳܬܳܐ ܘܡܰܠ̈ܝܳܬ̣ ܟܺܐܒ̈ܶܐ ܕܥܳܠܡܳܐ ܗܳܢܳܐ܆ ܡܓܰܕܦܳܢܳܐܺܝܬ ܗܳܠܶܝܢ ܐܰܙܥܶܩ܆ ܐܶܠܳܐ ܐܰܝܟ ܐܰܝܢܳܐ ܕܝܳܕܰܥ ܗ̱ܘܳܐ ܕܢ̣ܐܠܐ ܐ̱ܪܳܙܳܢܳܐܺܝܬ܆ ܘܰܠܚܰܫ̈ܶܐ ܓܰܘܳܢܳܝ̈ܶܐ ܕܰܟܝܳܢܳܐ ܕܺܝܠܰܢ ܕܺܝܠܳܢܳܝܳܐ ܕܺܝܠܶܗ ܢܶܚܫܽܘܒ܆ ܠܘܳܬ ܥܽܘܡܩ̈ܶܐ ܗܳܠܶܝܢ ܠܳܐ ܡܶܬܕܰܪ̈ܟܳܢܶܐ ܕܣܽܘ̈ܟܳܠܶܐ ܩܳܪܶܒ܆ ܘܰܒܡ̈ܶܠܶܐ ܡܛܰܫ̈ܝܳܬܳܐ ܓܳܫܶܦ.

ܡܶܛܽܠ ܓܶܝܪ ܕܫܰܡܥܶܗ ܠܰܐܠܳܗܳܐ ܕܳܐܡܰܪ ܠܘܳܬܶܗ܆ ܕܰܩܕܳܡ ܕܬܶܦܽܘܩ ܡܶܢ ܡܰܪܒܥܳܐ ܩܰܕܶܫܬ̊ܳܟ܆ ܢܒܺܝܳܐ ܠܥܰܡܡ̈ܶܐ ܣܳܡܬ̊ܳܟ[44]܆ ܘܟܽܠܶܗ ܗܳܢܳܐ ܐܺܝܬܰܘܗ̱ܝ ܗ̱ܘܳܐ ܒܰܡܝܰܬܪܽܘܬܳܐ܆ ܐܰܝܟܰܢܳܐ ܕܳܐܦ ܟܰܕ ܡܫܺܝܚܳܐ ܠܬܰܠ̈ܡܺܝܕܶܐ ܡܫܰܐܶܠ ܗ̱ܘܳܐ ܕܡܰܢܽܘ ܐܳܡܪܺܝܢ ܒܢܰܝ̈ܢܳܫܳܐ ܕܺܐܝܬܰܝ܆ ܢܺܐܡܪܽܘܢ ܗܶܢܽܘܢ ܟܰܕ ܡܦܰܢܶܝܢ ܦܶܬܓܳܡܳܐ܆ ܕܐ̱ܢܳܫܺܝ̈ܢ ܡܰܢ ܐܶܪܰܡܝܳܐ ܡܰܣܒܪܺܝܢ ܥܠܰܘܗ̱ܝ ܕܺܐܝܬܰܘܗ̱ܝ[45]܆ ܟܰܕ ܚܳܙܶܐ ܗ̱ܘܳܐ ܠܒܺܝܫܽܘܬܳܐ ܕܰܐܫܺܝܕܳܐ ܗ̱ܘܳܬ܆ ܘܠܰܚܛܺܝܬܳܐ ܕܡܶܬܥܰܫܢܳܐ ܗ̱ܘܳܬ ܥܰܠ ܟܽܠܗܽܘܢ ܒܢܰܝ̈ܢܳܫܳܐ܆ ܘܗܽܘ ܠܶܗ ܕܠܳܐ ܡܶܫܟܰܚ ܗ̱ܘܳܐ ܕܰܢܩܽܘܡ ܠܽܘܩܒܰܠ ܗܳܕܶܐ܆ ܘܢܶܬܟܽܘܤ ܠܚܰܝܠܳܗ̇ ܠܳܐ ܡܶܬܠܰܒܟܳܢܳܐ܆ ܐܰܝܟܰܢܳܐ ܕܳܐܦ ܢܺܐܡܰܪ܆ ܟܽܠܗܽܘܢ ܠܳܐ ܡܶܫ̈ܬܰܡܥܳܢܶܐ ܐܺܝܬܰܝܗܽܘܢ܆ ܕܰܡܗܰܠܟܺܝܢ ܡܥܰܩܡܳܐܺܝܬ܆ ܠܰܣܪܺܝܩܽܘܬܐ ܦܳܣܶܩ܆ ܣܺܐܡܳܐ ܦܳܠܰܚ܆ ܒܺܝ̈ܫܘܳܬܳܐ ܕܺܝܠܗܽܘܢ ܠܳܐ ܐܶܬܦܰܫܪ̈ܶܝܢ[46]. ܡܶܬܥܰܠܶܐ ܡܶܟܺܝܠ ܠܘܳܬ ܥܶܠܬܳܐ܆ ܟܰܕ ܒܥܽܘܡ̈ܩܶܐ ܠܳܐ ܡܶܬܕܰܪ̈ܟܳܢܶܐ ܐܰܝܟ ܕܶܐܡܪܶܬ ܕܣܽܘ̈ܟܳܠܶܐ ܗܳܢܽܘܢ ܕܣܰܓܺܝ ܐܺܝܬܰܝܗܽܘܢ ܠܳܐ ܡܶܬܡܰܠ̈ܠܳܢܶܐ ܐܰܕܺܝܩ܆ ܘܡܶܫܟܰܚ ܗܽܘ ܠܶܗ܆ ܕܡܶܢ ܗܰܘ ܗܘܳܝܳܐ ܗܘ̣ܳܐ܆ ܘܡܶܢ ܗܰܘ ܚܽܘܠܛܳܢܳܐ ܕܪܶܕܝܳܐ܆ ܗܰܘ ܕܒܶܗܚܟܰܡ ܐܳܕܳܡ ܠܚܰܘܳܐ ܐܰܢ̱ܬܬܶܗ܆ ܡܶܢ ܒܳܬܰܪ ܕܶܐܬܛܪܶܕܘ ܡܶܢ ܦܰܪܕܰܝܣܳܐ ܕܒܽܘܣܳܡܳܐ܆ ܗܰܘ ܕܡܶܢܶܗ ܟܰܕ ܒܶܛܢܰܬ ܝܶܠܕܰܬ ܠܩܳܐܝܢ܆ ܠܗܰܘ ܕܳܐܦ ܩܰܕܡܶܗ ܡܣܳܡ ܒܪܺܝܫܳܐ ܗܰܘ ܕܠܰܘܛܬܳܐ܆ ܗܰܘ ܕܡܰܣܓܳܝܽܘ ܐܰ݀ܣܓܶܐ ܥܳܩ̈ܳܬܶܟܝ ܘܬܶܢܚ̈ܳܬܶܟܝ܆ ܒܥܳܩ̈ܳܬܳܐ ܬܺܐܠܕܺܝܢ ܒܢܰܝ̈ܳܐ[47]. ܡܶܛܽܠ ܗܳܕܶܐ ܐܳܦ ܠܶܐܡܳܐ ܩܰܕܡܳܝܬܳܐ ܐܶܬܶܥܰܗܕ ܟܰܕ ܐܶܡܰܪ܆ ܝܰܘܡܳܐ ܗܰܘ ܕܒܶܗ ܝܺܠܶܕܬ̣ܰܢܝ ܐܶܡܳܐ ܕܺܝܠܝ. ܐܳܦ ܓܶܝܪ ܗܺܝ ܩܰܕܡܳܝܬܳܐ ܐܶܬܟܰܪܗܰܬ ܒܰܚܛܺܝܬܳܐ܆ ܟܰܕ ܡܰܛܥܝܳܢܽܘܬܶܗ ܕܚܶܘܝܳܐ ܩܰܒܠܰܬ܆ ܘܥܶܒܪܰܬ ܥܰܠ ܦܽܘܩܕܳܢܳܐ. ܠܗܳܝ ܟܺܝܬ ܕܰܢܩܶܦ ܐܳܦ ܝܰܠܕܳܐ ܕܟܽܠ ‌ܐܰܢ̱ܬܬܳܐ ܡܶܢ ܗܰܘ ܗܳܟܺܝܠ ܗܘܳܝܳܐ ܐܳܡܰܪ ܐܺ݀ܝܬܰܝ܆ ܡܶܢ ܗܰܘ ܕܘܠܳܐ ܐ̱ܢܳܫ ܟܰܕ ܡܶܢܶܗ ܡܶܬܺܝܠܶܕ ܢܶܫܟܰܚ܆ ܕܠܰܚܛܺܝܬܳܐ ܡܶܢ ܥܶܩܳܪܳܗ̇ ܘܡܶܢܗܽܘܢ ܕܫܶܪ̈ܫܶܐ ܢܶܬܠܽܘܫ. ܠܺܝܛ ܗ̱ܘ̣ ܗܳܟܺܝܠ ܗܰܘ ܝܰܘܡܳܐ܆ ܗܰܘ ܕܒܶܗ ܐܶܬܝܰܠܕܶܬ܆ ܝܰܘܡܳܐ ܗܰܘ ܕܒܶܗ ܝܺܠܶܕܬ̣ܰܢܝ ܐܶܡܳܐ ܕܺܝܠܝ[48].

ܗܳܠܶܝܢ ܕܶܝܢ ܡܶܬܪܰܥܶܐ ܗ̱ܘܳܐ ܢܒܺܝܳܐܺܝܬ. ܟܰܕ ܠܘܳܬ ܝܰܠܕܳܐ ܗܰܘ ܚܳܐܰܪ ܗ̱ܘܳܐ܆ ܗܰܘ ܐܰܟܣܢܳܝܳܐ܆ ܗܰܘ ܕܰܥܠܰܘܗ̱ܝ ܒܰܠܚܽܘܕܰܘܗ̱ܝ ܣܢܺܝ̈ܩܳܢ ܗ̱ܘܰܝ̈ ܠܘܳܬ ܐܳܣܝܽܘܬܳܐ ܗܳܠܶܝܢ ܐ̱ܢܳܫܳܝ̈ܳܬܳܐ. ܗܰܘ ܕܡܶܛܽܠܳܬܶܗ ܠܘܳܬ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܡܶܬܐܰܡܪܳܐ ܗ̱ܘܳܬ ܘܛܳܒ ܟܺܐܢܳܐܺܝܬ܆ ܡܒܰܪܰܟܬܳܐ ܐܰܢ̱ܬܝ ܒܢܶܫ̈ܶܐ ܘܰܡܒܰܪܰܟ ܗ̱ܘ̣ ܦܺܐܪܳܐ ܕܰܒܟܰܪܣܶܟܝ[49]܆ ܘܡܶܢ ܡܰܠܰܐܟܳܐ ܠܘܳܬ ܪ̈ܳܥܰܘܳܬܳܐ܆ ܗܳܐ ܡܣܰܒܰܪ ܐ̱ܢܳܐ ܠܟܽܘܢ ܚܰܕܽܘܬܳܐ ܪܰܒܬܳܐ܆ ܗܳܝ ܕܬܶܗܘܶܐ ܠܟܽܠܶܗ ܥܳܠܡܳܐ܆ ܕܶܐܬܺܝܠܶܕ ܠܟܽܘܢ ܝܰܘܡܳܢܐ ܦܳܪܽܘܩܳܐ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ ܡܳܪܝܳܐ ܒܰܡܕܺܝܢ̱ܬܶܗ ܕܕܰܘܺܝܕ[50].

ܕܟܰܕ ܠܘܳܬ ܗܰܘ ܐ̱ܪܳܙܳܐ ܚܳܐܰܪ ܗ̱ܘܳܐ ܐܶܪܰܡܝܳܐ ܡܶܢ ܪܽܘܚܩܳܐ܆ ܐܳܡܰܪ ܗ̱ܘܳܐ ܗܳܠܶܝܢ܆ ܝܰܬܺܝܪ ܓܰܠܝܳܐܺܝܬ ܢܚܰܘ̈ܝܳܢ܆ ܗܳܠܶܝܢ ܕܒܳܬܰܪܟܶܢ. ܡܳܢܳܐ ܓܶܝܪ ܐܳܡܰܪ. ܠܺܝܛ ܗ̱ܘ̣ ܒܰܪܢܳܫܳܐ ܗܰܘ ܕܣܰܒܪܶܗ ܠܰܐܒܳܐ ܕܺܝܠܝ ܟܰܕ ܐܳܡܰܪ܆ ܕܶܐܬܺܝܠܶܕ ܠܳܟ ܒܪܳܐ ܕܶܟܪܳܐ[51]. ܡܳܢܳܐ ܓܶܝܪ. ܠܳܐ ܣܳܦܩܳܐ ܗ̱ܘܳܬ ܕܢܺܐܡܰܪ ܒܪܳܐ܆ ܐܶܠܳܐ ܙܳܕܶܩ ܗ̱ܘܳܐ ܕܢܰܘܣܶܦ ܐܳܦ ܕܶܟܪܳܐ܆ ܣܰܓܺܝ ܡܰܢ ܗܳܟܺܝܠ܆ ܡܶܛܽܠ ܕܰܠܘܳܬ ܐ̱ܪܳܙܳܐ ܗܰܘ ܟܺܝܬ ܕܶܐܡܪܶܬ ܚܳܐܰܪ܆ ܘܠܰܘ ܦܫܺܝܛܳܐܺܝܬ ܐܰܡܺܝܪܳܐ ܗܳܝ ܕܶܐܬܐܰܡܪܰܬ. ܡܶܛܽܠ ܓܶܝܪ ܕܰܐ‌ܠܳܗܳܐ ܩܰܕܶܡ ܛܰܟܣܶܗ ܠܕܶܟܪܳܐ ܩܕܳܡ ܢܶܩܒܬܳܐ ܐܰܝܟ ܚܰܝܠܬܳܢܳܐ ܘܪܺܝܫܳܢܳܐ܆ ܐܰܝܟܰܢܳܐ ܕܟܰܕ ܡܶܢ ܚܰܝܠܬܳܢܽܘܬܳܐ ܡܶܬܕܰܒܰܪ ܚܠܺܝܡܳܐ ܢܶܬܝܰܒܰܠ ܟܽܠܶܗ ܓܶܢܣܳܐ܆ ܕܶܟܪܐ ܓܶܝܪ ܘܢܶܩܒܬܳܐ ܥܒܰܕ ܐܶܢܽܘܢ[52] ܐܳܡܪ̈ܳܢ ܟܬܺܝ̈ܒܳܬܳܐ ܢܦܺܝ̈ܚܳܬ ܡܶܢ ܐܰ‌ܠܳܗܳܐ܆ ܗܳܠܶܝܢ ܕܶܝܢ ܕܛܶܟܣܳܐ ܐܶܬܗܰܦܰܟ̈ܶܝܢ܆ ܘܰܗܘ̣ܳܬ ܪܺܝܫܳܐ ܢܶܩܒܬܳܐ ܠܕܶܟܪܳܐ ܠܘܳܬ ܚܛܺܝܬܳܐ܆ ܐܰܝܟܰܢܳܐ ܕܢܺܐܡܰܪ ܕܳܘܝܳܐܺܝܬ ܠܘܳܬ ܐܰ‌ܠܳܗܳܐ܆ ܐܰܢ̱ܬܬܳܐ ܗܳܝ ܕܝܰܗ̱ܒܬ ܠܺܝ ܗܺܝ ܝܶܗܒܰܬ ܠܺܝ ܡܶܢ ܐܺܝܠܳܢܳܐ ܘܶܐܟܠܶܬ[53]܆ ܡܶܟܺܝܠ ܟܽܠܗܽܘܢ ܗܳܢܽܘܢ ܕܡܶܬܝܰܠܕܺܝܢ ܗ̱ܘܰܘ ܡܶܢ ܐܽܘܚܕܳܢܳܐ ܕܗܳܝ ܕܰܒܨܺܝܪܳܐ܆ ܢܶܩ̈ܒܳܬܳܐ ܡܶܕܶܡ ܐܺܝܬܰܝܗܽܘܢ ܗ̱ܘܰܘ ܘܕܶܟܪܳܐ ܐܳܦܠܐ ܚܰܕ܆ ܡܶܛܽܠ ܟܺܝܬ ܕܰܡܓ̈ܰܝܕܶܐ ܘܰܡܢܰܩ̈ܒܳܬܳܐ ܘܰܡܫܰܪ̈ܰܝܳܐ ܐܺܝܬܰܝܗܽܘܢ ܗ̱ܘܰܘ܆ ܡܶܢ ܚܺܝܨܽܘܬܳܐ ܗܳܝ ܓܰܒܪܳܢܳܝܬܳܐ ܘܰܟܝܳܢܳܝܬܳܐ. ܘܳܐܦܠܳܐ ܐ̱ܢܳܫ ܠܺܝܠܺܝܕܽܘܬܳܐ ܐܶܬܳܐ܆ ܕܰܡܫܰܡܠܝܳܐܺܝܬ ܡܶܫܟܰܚ ܕܢܶܙܟܶܝܗ̇ ܠܰܚܛܺܝܬܳܐ܆ ܘܰܠܡܰܘܬܳܐ. ܗܰܘ ܕܡܶܢ ܗܳܪܟܳܐ ܠܒܰܟ ܐܽܘܚܕܳܢܳܐ ܥܰܠ ܟܽܠܶܗ ܟܝܳܢܳܐ܆ ܥܕܰܡܳܐ ܕܶܐܬܺܝܠܶܕ ܡܫܺܝܚܳܐ܆ ܗܰܘ ܕܡܳܪܳܢܳܐܺܝܬ ܕܶܟܪܳܐ܆ ܗܰܘ ܐܳܕܳܡ ܬܪܰܝܳܢܳܐ܆ ܗܰܘ ܐܰ‌ܠܳܗܳܐ ܚܰܝܠܬܳܢܳܐ܆ ܗܰܘ ܕܠܰܛܪܽܘܢܽܘܬܳܐ ܕܰܚܛܺܝܬܳܐ ܙܰܥܙܰܥ.

ܘܣܰܒ ܠܺܝ ܠܶܐܫܰܥܝܳܐ ܕܗܳܕܶܐ ܡܰܘܕܰܥ ܢܰܗܺܝܪܳܐܺܝܬ܆ ܒܗܳܝ ܕܰܡܩܰܕܶܡ ܗ̱ܘܳܐ ܐܳܡܰܪ ܠܰܬܡܺܝܗܽܘܬܶܗ ܕܝܰܠܕܳܐ ܒܬܽܘܠܳܝܳܐ܆ ܗܰܘ ܕܠܰܙܢܳܐ ܕܰܥܝܳܕܳܐ ܕܚܶܒ̈ܠܶܐ ܠܳܐ ܝܺܕܰܥ܆ ܡܶܛܽܠ ܗܳܝ ܕܠܳܐ ܡܶܣܬܰܕܩܳܢܳܐ ܩܰܘܺܝ ܐܰܣܳܪܳܐ ܕܰܒܬܽܘܠܽܘܬܳܐ. ܗܰܘ ܟܺܝܬ ܕܳܐܦ ܟܬܰܒ ܗܳܟܰܢܳܐ. ܩܕܳܡ ܕܬܺܐܠܰܕ ܗܳܝ ܕܝܳܠܕܳܐ܆ ܘܰܩܕܳܡ ܕܢܺܐܬܶܐ ܟܺܐܒܳܐ ܕܚܶܒ̈ܠܶܐ܆ ܦܶܠܛܰܬ ܘܝܶܠܕܰܬ ܕܶܟܪܳܐ[54]. ܗܳܝ ܕܶܝܢ ܕܦܶܠܛܰܬ ܡܰܙܥܩܳܐ ܠܰܬܡܺܝܗܽܘܬܳܐ. ܕܟܰܕ ܒܝܰܕ ܟܝܳܢܳܐ ܐܶܬܳܐ܆ ܠܒܰܪ ܡܶܢ ܬܚܽܘ̈ܡܶܐ ܕܰܟܝܳܢܳܐ ܗܘ̣ܳܐ܆ ܠܥܶܠ ܡܶܢ ܗܰܘܢܳܐ ܘܡܶܠܬܳܐ܆ ܟܰܕ ܡܶܢ ܐܰܣܽܘܪ̈ܶܐ ܒܬܽܘܠܳܝ̈ܶܐ ܪܗܶܛ ܥܒܰܪ ܘܰܫܪܰܥ ܢܦܰܩ܆ ܘܗܳܕܶܐ ܟܰܕ ܡܶܢ ܒܬܽܘܠܬܳܐ ܐܶܬܒܰܣܰܪ܆ ܘܟܽܠܶܗ ܙܰܒܢܳܐ ܗܰܘ ܕܒܰܛܢܳܐ ܡܰܠܺܝ܆ ܘܠܳܐ ܡܶܫܬܰܚܠܦܳܢܳܐܺܝܬ ܒܰܒܣܰܪ ܗܘ̣ܳܐ ܠܰܢ ܫܘܶܐ ܒܽܐܘܣܺܝܰܐ܆ ܘܟܰܕ ܐܺܝܬܰܘܗ̱ܝ ܫܘܶܐ ܒܽܐܘܣܺܝܰܐ ܠܰܐܒܳܐ ܒܗܳܝ ܕܰܐ‌ܠܳܗܳܐ܆ ܘܒܰܠܚܽܘܕܰܘܗ̱ܝ ܐܰܝܟ ܕܒܰܫܪܳܪܳܐ ܡܶܢ ܒܳܬܰܪ ܡܶܬܥܰܒܪܳܢܽܘܬܶܗ ܕܳܐܕܳܡ ܐܶܬܺܝܠܶܕ ܕܶܟܪܳܐ. ܐܶܢ ܓܶܝܪ ܠܰܘ ܠܘܳܬ ܗܰܘܢܳܐ ܗܳܢܳܐ ܚܳܝܪܳܐ ܗ̱ܘܳܬ ܗܳܝ ܕܰܐܡܺܝܪܳܐ ܠܶܐܪܰܡܝܳܐ܆ ܐܳܦ ܡܶܬܓܰܚܟܳܢܺܝܬܳܐ ܛܳܒ ܐܺܝܬܶܝܗ̇ ܗ̱ܘܳܬ ܗܳܝ ܕܢܺܐܡܰܪ܆ ܐܶܬܺܝܠܶܕ ܠܳܟ ܒܪܳܐ ܕܶܟܪܳܐ[55]. ܡܰܢܽܘ ܓܶܝܪ ܕܺܐܝܬ ܠܶܗ ܗܰܘܢܳܐ܆ ܕܰܐܝܟ ܣܽܘܟܳܠܳܐ ܦܫܺܝܩܳܐ܆ ܢܶܩܒܬܳܐ ܢܶܣܒܰܪ ܠܰܒܪܳܐ ܘܠܰܘ ܕܶܟܪܳܐ.

ܟܰܕ ܒܬܶܡܗܳܐ ܗܳܟܺܝܠ ܗܘ̣ܳܐ ܗܽܘ ܢܒܺܝܳܐ܆ ܘܶܐܬܚܛܶܦ ܒܬܰܪܥܺܝܬܶܗ܆ ܘܟܽܠܶܗ ܬܰܗܺܝܪܳܐ ܐܺܝܬܰܘܗ̱ܝ ܗ̱ܘܳܐ܆ ܘܚܳܐܶܤ ܗ̱ܘܳܐ ܘܟܳܐܶܒ ܗ̱ܘܳܐ ܠܶܗ ܥܰܠ ܟܝܳܢܰܢ ܥܰܠ ܕܰܒܪܰܦܝܽܘܬܳܐ ܢܦܰܠ܆ ܠܺܝܛܳܐ ܐܳܡܰܪ ܕܺܐܝܬܰܘܗ̱ܝ܆ ܗܰܘ ܕܰܒܪܳܐ ܕܶܟܪܳܐ ܕܰܓܳܠܳܐܺܝܬ ܫܰܡܗܶܗ. ܐܳܦ ܓܶܝܪ ܘܠܳܐ ܐ̱ܢܳܫ ܐܺܝܬ ܕܶܟܪܳܐ܆ ܐܶܠܳܐ ܐܶܢ ܡܫܺܝܚܳܐ. ܩܰܕܺܝܡܳܐ ܕܶܝܢ ܝܺܕܺܝܥܳܐ܆ ܕܗܰܘ ܕܰܡܕܰܓܶܠ܆ ܘܳܐܦܶܢ ܠܳܐ ܐ̱ܢܳܫ ܢܠܽܘܛܺܝܘܗ̱ܝ܆ ܬܚܶܝܬ ܡܰܪ̈ܫܘܳܬܳܐ ܕܕܰܓܳܠܽܘܬܳܐ ܣܺܝܡ. ܟܬܺܝܒ ܓܶܝܪ܆ ܕܬܰܘܒܶܕ ܠܟܽܠܗܽܘܢ ܗܳܢܽܘܢ ܕܰܡܡܰܠܠܺܝܢ ܕܰܓܳܠܽܘܬܳܐ[56]. ܘܠܳܐ ܐ̱ܢܳܫ ܕܶܝܢ ܐܺܝܬ ܗ̱ܘܳܐ ܗܰܘ ܕܠܰܐܒܽܘܗ̱ܝ ܕܰܢܒܺܝܳܐ ܗܳܠܶܝܢ ܣܰܒܪ̈ܳܬܳܐ ܐܰܝܬܺܝ ܘܶܐܡܰܪ܆ ܐܶܬܺܝܠܶܕ ܠܳܟ ܒܪܳܐ ܕܶܟܪܳܐ[57]. ܐܳܦܠܳܐ ܓܶܝܪ ܐܺܝܬ ܗ̱ܘܳܐ ܕܣܳܦܶܩ ܕܢܶܬܥܰܠܶܐ ܠܘܳܬ ܗܳܢܳܐ ܣܽܘܟܳܠܳܐ. ܐܶܢ ܕܶܝܢ ܟܰܕ ܐܶܣܬܰܟܰܠ ܗܳܟܰܢܳܐ ܣܰܒܰܪ ܟܰܕ ܕܰܓܶܠ܆ ܗܽܘ ܠܶܗ ܥܒܰܕ ܬܚܶܝܬ ܠܰܘܛܬܳܐ܆ ܕܰܫܡܳܐ ܕܕܶܟܪܳܐ ܗܰܘ ܕܠܰܡܫܺܝܚܳܐ ܒܰܠܚܽܘܕܰܘܗ̱ܝ ܙܳܕܶܩ܆ ܥܠܰܝ ܐܳܡܰܪ ܣܳܡܶܗ. ܙܳܕܶܩ ܗ̱ܘܳܐ ܠܶܗ ܓܶܝܪ ܟܰܕ ܫܪܳܪܳܐ ܝܳܕܰܥ ܗ̱ܘܳܐ܆ ܐܳܦ ܕܦ݀ܣܩܳܐ ܕܡܰܘܬܳܐ ܢܰܝܬܶܐ ܥܠܰܝ܆ ܘܰܕܩܳܛܶܠ ܠܺܝ ܒܗܳܕܶܐ ܢܶܣܬܒܰܪ.

ܟܽܠܢ ܓܶܝܪ ܐܺܝܬܰܝܢ ܗ̱ܘܰܝܢ ܬܚܶܝܬ ܠܰܘܛܬܳܐ ܚܽܘܝܳܒܳܐ ܕܡܰܘܬܳܐ܆ ܡܶܛܽܠ ܟܺܝܬ ܕܰܐܝܟ ܡܶܠܬܶܗ ܕܦܰܘܠܽܘܤ܆ ܐܰܡܠܶܟ ܡܰܘܬܳܐ ܐܳܦ ܥܰܠ ‌ܐܰܝܠܶܝܢ ܕܠܳܐ ܚܛܰܘ܆ ܡܶܢ ܐܳܕܳܡ ܥܕܰܡܳܐ ܠܡܽܘܫܶܐ[58]܆ ܗܳܢܰܘ ܕܶܝܢ ܥܰܠ ܗܳܢܽܘܢ ܕܰܐܝܟ ܢܳܡܽܘܣܳܐ ܕܡܽܘܫܶܐ ܐܶܬܕܰܒܰܪܘ ܥܕܰܡܳܐ ܕܶܐܬܳܐ ܡܫܺܝܚܳܐ܆ ܗܰܘ ܕܰܬܡܺܝܗܳܐܺܝܬ ܒܝܰܕ ܟܝܳܢܳܐ ܕܺܝܠܰܢ ܐܶܬܳܐ܆ ܘܡܶܢ ܒܬܽܘܠܬܳܐ ܐܶܬܺܝܠܶܕ ܕܶܟܪܳܐ܆ ܘܠܰܢ ܫܰܘܬܶܦ ܒܗܳܕܶܐ܆ ܘܢܰܟܪܺܝ ܠܰܢ ܡܰܢ ܡܶܢ ܝܰܠܕܳܐ ܗܰܘ ܕܢܶܩ̈ܒܳܬܳܐ ܝܳܠܶܕ ܗ̱ܘܳܐ܆ ܐܰܥܒܰܪ ܠܰܢ ܕܶܝܢ ܠܘܳܬ ܡܰܘܠܳܕܳܐ ܕܡܶܢ ܕܪܺܝܫ ܗܰܘ ܪܽܘܚܳܢܳܝܳܐ܆ ܗܰܘ ܕܡܶܢ ܡܰܝ̈ܳܐ ܟܺܝܬ ܘܪܽܘܚܳܐ. ܐܰܝܟܰܢܳܐ ܕܠܰܘ ܡܶܢ ܕܡ̈ܶܐ[59] ܘܡܶܢ ܨܶܒܝܳܢܳܐ ܕܒܶܣܪܳܐ܆ ܘܡܶܢ ܨܶܒܝܳܢܳܐ ܕܓܰܒܪܳܐ[60] ܢܶܬܝܰܠܕܽܘܢ ܗܳܢܽܘܢ ܕܕܰܐܝܟ ܗܳܟܰܢ܆ ܐܶܠܳܐ ܡܶܢ ܐܰ‌ܠܳܗܳܐ ܚܰܝܳܐ ܕܶܟܪ̈ܶܐ܆ ܕܳܐܦܠܳܐ ܚܕܳܐ ܥܶܩܒܬ̣ܳܐ ܕܰܚܛܺܝܬܳܐ ܕܰܡܢܰܩܒܬܳܐ ܐܺܝܬ ܒܗܽܘܢ.

ܩܕܳܡ ܕܶܝܢ ܕܗܳܕܶܐ ܡܰܘܗܰܒܬܐ ܬܶܫܬܰܟܰܢ ܠܰܢ܆ ܟܰܕ ܟܽܠܰܢ ܢܶܩܒܬܳܢܳܝܽܘܬܳܐ ܟܪܺܝܗܶܝܢ ܗ̱ܘܰܝܢ܆ ܠܡܰܘܬܳܐ ܡܶܬܝܰܠܕܺܝܢ ܗ̱ܘܰܝܢ. ܐܰܝܟܰܢܳܐ ܟܺܝܬ ܕܰܠܟܽܠ ܚܰܕ ܡܝܰܬܰܪܬܳܐ ܐܺܝܬܶܝܗ̇ ܗ̱ܘܳܬ ܠܶܗ܆ ܗܳܝ ܕܳܐܦܠܳܐ ܢܶܦܽܘܩ ܗ̱ܘܳܐ ܠܥܳܠܡܳܐ ܗܳܢܳܐ܆ ܘܕܰܒܩܰܒܪܳܐ ܝܰܬܺܝܪܳܐܺܝܬ ܢܶܗܘܶܐ ܗ̱ܘܳܐ ܠܶܗ ܡܰܪܒܥܳܐ ܕܗܳܝ ܕܺܝܠܶܕܬ̣ܶܗ[61]܆ ܐܰܝܟ ܗܳܝ ܕܰܐܡܺܝܪܳܐ ܠܰܢܒܺܝܳܐ. ܐܳܦ ܓܶܝܪ ܘܡܳܪܰܢ ܐܶܡܰܪ ܥܰܠ ܝܺܗܽܘܕܳܐ ܗܰܘ ܕܰܢܦܰܠ ܡܶܢ ܚܰܝ̈ܶܐ ܫܰܪܺܝܪ̈ܶܐ܆ ܕܛܳܒ ܗ̱ܘܳܐ ܠܶܗ܆ ܐܶ‌ܠܽܘܠܳܐ ܐܶܬܺܝܠܶܕ ܓܰܒܪܳܐ ܗܰܘ[62].

ܠܡܶܬܕܰܡܳܪܽܘ ܕܶܝܢ ܙܳܕܶܩ܆ ܒܚܰܕ ܘܗܽܘ ܟܰܕ ܗܽܘ ܪܽܘܚܳܐ ܕܰܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܕܳܐܦ ܐܝܘܒ ܟܰܕ ܒܶܗ ܒܳܐܕܫܳܐ ܕܰܐܝܟ ܗܳܢܳܐ ܕܬܶܢܚ̈ܳܬܳܐ ܐ̱ܪ̈ܳܙܳܢܳܝܳܬܳܐ ܐܶܬܚܰܫܰܚ ܒܰܕܡܽܘܬ ܐܶܪܰܡܝܳܐ܆ ܒܳܗ̇ ܟܰܕ ܒܳܗ̇ ܒܒܰܪ̱ܬ ܩܳܠܳܐ ܐܶܬܳܐ ܟܰܕ ܐܳܡܰܪ܆ ܢܺܐܒܰܕ ܝܰܘܡܳܐ ܗܰܘ ܕܒܶܗ ܐܶܬܝܰܠܕܶܬ܆ ܘܠܶܠܝܳܐ ܗܰܘ ܕܶܐܡܰܪܘ ܒܶܗ ܗܳܐ ܕܶܟܪܳܐ. ܠܳܐ ܓܶܝܪ ܐ̱ܢܳܫ ܐܳܡܰܪ ܠܶܗ ܐܺܝܡܳܡܳܐ ܡܳܪܳܢܳܐܺܝܬ܆ ܠܗܰܘ ܕܒܶܗ ܐܰܘܒܶܕ ܟܝܳܢܳܐ ܠܺܐܝܩܳܪܳܐ ܕܶܟܪܳܢܳܝܳܐ. ܐܶܠܳܐ ܠܶܠܝܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ ܟܽܠ ܚܰܕ ܡܶܢ ܗܳܢܽܘܢ ܕܐ̱ܪܳܙܳܢܳܐܺܝܬ ܡܶܬܐܰܒܠܺܝܢ ܗ̱ܘܰܘ܆ ܥܰܠ ܗܳܕܶܐ ܡܶܬܶܐܒܠ ܗ̱ܘܳܐ ܘܡܶܬܬܰܢܰܚ ܗ̱ܘܳܐ.

ܐܶܠܳܐ ܢܺܐܡܰܪ ܐ̱ܢܳܫ܆ ܕܠܳܐ ܙܳܕܶܩ ܗ̱ܘܳܐ ܕܠܶܗ ܠܝܰܘܡܳܐ ܢܠܽܘܛ. ܐܶܠܳܐ ܡܰܠܽܘܢ ܠܰܚܛܺܝܬܳܐ ܗܳܝ ܕܡܶܛܽܠܳܬܳܗ̇ ܠܗܳܕܶܐ ܫܪܰܥܢܰܢ ܢܚܶܬܢܰܢ. ܐܶܠܳܐ ܠܗܳܕܶܐ ܠܳܐ ܐ̱ܢܳܫ ܕܺܐܝܬ ܠܶܗ ܗܰܘܢܳܐ ܥܳܕܶܠ܆ ܟܰܕ ܚܳܙܶܐ ܠܥܶܠܬܳܐ ܗܳܝ ܕܡܰܘܣܦܳܐ ܣܺܝܡܳܐ. ܠܰܘ ܓܶܝܪ ܠܶܗ ܠܝܰܘܡܳܐ ܒܳܗ̇ ܒܗܳܝ ܕܺܐܝܬܰܘܗ̱ܝ ܝܰܘܡܳܐ܆ ܘܒܶܗ ܒܰܟܝܳܢܳܐ ܙܰܒܢܳܝܳܐ ܐܰܝܟ ܐ̱ܢܳܫ ܢܺܐܡܰܪ܆ ܒܺܝܫܳܐ ܐܳܡܰܪ ܠܗ ܐܰܘ ܕܰܠܠܰܘܛܬܳܐ ܐܰܘ ܠܰܐܒܕܳܢܳܐ ܫܳܘܶܐ܆ ܐܶܠܳܐ ܠܰܚܛܳܗܳܐ ܗܰܘ ܕܒܶܗ ܗܘ̣ܳܐ. ܐܰܝܟ ܙܢܳܐ ܕܳܐܦ ܠܕܽܘܟܬܳܐ ܩܳܪܶܐ ܐ̱ܢܳܫ ܡܣܰܝܰܒܬܳܐ܆ ܡܶܢ ܗܳܢܽܘܢ ܕܣܽܘܥܪܳܢܳܐ ܡܣܰܝܒܳܐ ܣܥܰܪܘ ܒܳܗ̇. ܘܰܠܗܳܕܶܐ ܗܳܟܰܢܳܐ ܐܺܝܬ ܠܡܶܫܟܳܚܽܘ ܕܰܟܬܺܝܒܳܐ ܒܰܟܬܳܒܳܐ ܗܰܘ ܕܠܶܘܳܝ̈ܶܐ܆ ܐܰܝܟܳܐ ܕܡܶܛܽܠ ܙܽܘܘܳܓ̈ܶܐ ܗܳܠܶܝܢ ܠܳܐ ܢܳܡܽܘܣܳܝ̈ܶܐ ܡܡܰܠܶܠ. ܡܶܛܽܠ ܕܰܒܗܳܠܶܝܢ ܟܽܠܗܶܝܢ ܐܶܣܬܰܝܰܒܘ ܥܰܡ̱ܡ̈ܶܐ ܗܳܠܶܝܢ ܕܡܰܘܒܶܕ ܐ̱ܢܳܐ ܡܶܢ ܩܕܳܡܰܝܟܽܘܢ܆ ܘܶܐܣܬܰܝܒܰܬ ܐܰܪܥܳܐ. ܘܰܒܕܽܘܟܬܳܐ ܐ̱ܚܪܺܬܳܐ ܠܳܗ̇ ܟܰܕ ܠܳܗ̇ ܠܰܐܪܥܳܐ܆ ܩܰܕܺܝܫܬܳܐ ܘܰܐܪܥܳܐ ܕܰܐܒܳܗ̈ܳܬܳܐ ܩܳܪܶܐ ܠܳܗ̇܆ ܕܡܰܪܕܝܳܐ ܚܰܠܒܳܐ ܘܕܶܒܫܳܐ[63] ܡܶܛܽܠ ܫܽܘܚܠܳܦܳܐ ܕܗܳܢܽܘܢ ܕܰܥܡܰܪܘ ܒܳܗ̇܆ ܟܰܕ ܗܺܝ ܐܰܪܥܳܐ ܒܶܗ ܟܰܕ ܒܶܗ ܒܰܟܝܳܢܳܐ ܐܰܡܺܝܢܳܐܺܝܬ ܡܩܰܘܝܳܐ܆ ܟܡܳܐ ܕܰܠܒܺܝܫܽܘܬܳܐ ܘܠܰܡܝܰܬܪܽܘܬܳܐ.

ܗܺܝ ܟܰܕ ܗܺܝ ܐܳܦ ܥܰܠ ܙܰܒܢܳܐ ܘܝܰܘ̈ܡܳܬܳܐ ܚܳܙܶܐ ܐ̱ܢܳܫ. ܦܰܘܠܽܘܤ ܕܶܝܢ ܟܰܕ ܠܓܰܠܰܛܳܝ̈ܶܐ ܟܳܬܶܒ ܐܳܡܰܪ܆ ܐܰܝܟܰܢܳܐ ܕܰܢܦܰܨܶܐ ܠܰܢ ܡܶܢ ܗܳܢܳܐ ܥܳܠܡܳܐ ܒܺܝܫܳܐ ܕܩܳܐܶܡ[64]. ܘܠܶܐܦܶܣܳܝ̈ܶܐ ܬܽܘܒ܆ ܟܰܕ ܙܳܒܢܺܝܢ ܐܢ̱ܬܽܘܢ ܠܶܗ ܠܙܰܒܢܳܐ܆ ܡܶܛܽܠ ܕܝܰܘ̈ܡܳܬܳܐ ܒܺܝ̈ܫܶܐ ܐܺܝܬܰܝܗܽܘܢ[65]. ܘܗܰܘ ܕܗܳܠܶܝܢ ܐܶܡܰܪ܆ ܟܰܕ ܠܩܽܘܪ̈ܝܢܬܝܐ ܟܳܬܶܒ ܗ̱ܘܳܐ ܡܰܙܥܶܩ ܗ̱ܘܳܐ܆ ܗܳܐ ܗܳܫܳܐ ܙܰܒܢܳܐ ܫܰܦܺܝܪ ܡܶܬܩܰܒܠܳܢܳܐ ܐܺܝܬܰܘܗ̱ܝ[66]. ܗܳܐ ܗܳܫܳܐ ܝܰܘܡܳܐ ܕܦܽܘܪܩܳܢܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܗܽܘ ܟܰܕ ܗܽܘ ܥܳܠܡܳܐ ܘܙܰܒܢܳܐ ܘܝܰܘ̈ܡܳܬܳܐ܆ ܟܡܳܐ ܕܰܠܦܽܘܬ ܒܺܝ̈ܫܶܐ ܡܶܬܰܐܡܪܺܝܢ܆ ܒܺܝ̈ܫܶܐ ܐܺܝܬܰܝܗܽܘܢ ܘܰܕܫܳܘܶܝܢ ܠܠܰܘܛܬܳܐ. ܟܡܳܐ ܕܶܝܢ ܕܰܠܦܽܘܬ ܗܳܢܽܘܢ ܕܣܳܥܪܺܝܢ ܡܝܰܬܪܽܘܬܳܐ܆ ܘܦܳܪ̈ܽܘܩܳܝܶܐ ܘܛܳܒ̈ܶܐ. ܐܳܦ ܐܶܪܰܡܝܳܐ ܗܳܟܺܝܠ ܘܳܐܦ ܐܝܘܒ ܠܝܰܘܡܳܐ ܠܳܛܘ[67]܆ ܗܰܘ ܕܒܺܐܝܕܰܘ̈ܗ̱ܝ ܐܶܬܕܰܓܠܰܬ̣ ܕܶܟܪܳܢܳܝܽܘܬܳܐ܆ ܘܢܶܩܒܬܳܢܳܐ ܐܺܝܬܰܘܗ̱ܝ ܗ̱ܘܳܐ ܟܽܠ ܕܡܶܬܺܝܠܶܕ ܗ̱ܘܳܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܗܽܘ ܙܢܳܐ ܘܗ̱ܝ ܥܶܠܬܳܐ ܕܰܚܛܺܝܬܳܐ ܐܺܝܬܰܝܗܽܘܢ ܬܚܶܝܬ ܠܰܘܛܬܳܐ܆ ܘܠܰܘ ܗܽܘ ܝܰܘܡܳܐ.

ܗܳܝ ܕܶܝܢ ܕܢܺܐܡܰܪ ܐܝܘܒ ܡܶܛܽܠܳܬܶܗ܆ ܕܢܶܫܩܠܺܝܘܗ̱ܝ ܚܶܫܽܘܟܳܐ܆ ܠܳܐ ܢܶܗܘܶܐ ܒܝܰܘ̈ܡܳܬܳܐ ܕܫܰܢ̱ܬܳܐ܆ ܐܳܦܠܳܐ ܢܶܬܡܢܶܐ ܒܝܰܘ̈ܡܳܬܳܐ ܕܝܰܪ̈ܚܶܐ܆ ܠܳܐ ܠܐ̱ܢܳܫ ܬܶܫܓܽܘܫ. ܗܳܠܶܝܢ ܓܶܝܪ ܢܒܺܝܳܐܺܝܬ ܐܰܡܺܝܪ̈ܳܢ ܡܰܠܽܘܢ܆ ܐܰܘ ܒܶܐܣܟܺܡܳܐ ܡܨܰܠܝܳܢܳܐ. ܐܳܦ ܓܶܝܪ ܐܰܝܟ ܕܒܰܫܪܳܪܳܐ ܟܰܕ ܢܶܫܬܰܠܰܡ ܥܳܠܡܳܐ ܗܳܢܳܐ܆ ܟܽܠ ܝܰܘܡܳܐ ܕܙܰܒܢܳܐ܆ ܒܳܛܶܠ ܘܦܳܐܶܫ ܡܶܢ ܗܳܝ ܕܢܶܬܡܢܶܐ ܒܝܰܘ̈ܡܳܬܳܐ ܕܝܰܪ̈ܚܶܐ ܘܕܰܫ̈ܢܰܝܳܐ܆ ܟܰܕ ܩܳܐܶܡ ܪܶܗܛܳܐ܆ ܘܡܶܟܺܝܠ ܡܩܰܒܶܠ ܕܽܘܟܬܶܗ ܢܽܘܗܳܪܳܐ ܗܰܘ ܐ̱ܚܪܳܝܳܐ܆ ܗܰܘ ܕܺܝܗ̱ܝ ܒ ܒܦܶܣܳܐ ܘܰܒܝܳܪܬܽܘܬܳܐ ܥܰܡ ܚܰܝ̈ܶܐ ܛܽܘܒ̈ܬܳܢܶܐ ܘܰܕܠܳܐ ܫܽܘܠܳܡ ܕܙܰܕܺܝ̈ܩܶܐ܆ ܗܰܘ ܟܺܝܬ ܕܠܳܐ ܬܽܘܒ ܒܠܰܝ̈ܠܰܘܳܬܳܐ ܘܒܺܐܝ̈ܡܳܡܶܐ ܡܶܬܦܣܶܩ ܐܰܘ ܡܶܬܦܰܠܰܓ.

ܘܳܐܦ ܗܳܢܳܐ ܕܶܝܢ ܙܰܒܢܳܐ ܕܩܳܐܶܡ ܕܒܶܗ ܗܳܫܳܐ ܐܺܝܬܰܝܢ܆ ܒܫܰܒܥܳܐ ܗܳܠܶܝܢ ܝܰܘ̈ܡܳܬܳܐ ܡܶܬܟܪܶܟ ܥܰܠ ܢܰܦܫܶܗ܆ ܟܰܕ ܠܰܘ ܐ̱ܚܪܺܢܳܐ ܘܰܐ̱ܚܪܺܢܳܐ ܐܺܝܬܰܘܗ̱ܝ ܟܽܠ ܚܰܕ ܡܶܢ ܝܰܘ̈ܡܳܬܳܐ܆ ܘܳܐܦܠܳܐ ܕܺܐܝܬ ܠܶܗ ܫܽܘܚܠܳܦܳܐ ܡܶܕܶܡ ܠܗܳܢܳܐ܆ ܡܶܢ ܗܰܘ ܐ̱ܚܪܺܢܳܐ. ܐܶܠܳܐ ܟܰܕ ܚܰܕ ܡܰܢ ܐܺܝܬܰܘܗ̱ܝ ܟܽܠܗܽܘܢ܆ ܫܒܰܥ ܕܶܝܢ ܙܰܒ̈ܢܺܝܢ ܡܶܬܟܪܶܟ. ܗܰܘ ܟܺܝܬ ܕܟܰܕ ܡܳܛܶܐ ܠܩܶܨܳܐ ܘܣܳܟܳܐ ܘܩܳܐܶܡ ܟܰܕ ܡܶܫܬܰܠܰܡ܆ ܐܰܟ ܐܰܝܠܶܝܢ ܕܰܡܫܰܚܠܦܳܐܺܝܬ ܐܰܡܺܝܪ̈ܳܢ ܡܶܢ ܢܒܺܝ̈ܶܐ ܒܚܶܫܽܘܟܳܐ ܢܶܬܟܰܣܶܐ܆ ܘܰܐ̱ܚܪ̈ܳܢܝܳܬܳܐ ܙܺܝ̈ܥܳܬܳܐ ܘܰܕܚܺܝ̈ܠܳܬܳܐ ܢܶܗܘ̈ܝܳܢ ܒܶܗ܆ ܡܶܛܽܠ ܕܚܺܝܠܽܘܬܶܗ ܕܕܺܝܢܳܐ. ܫܳܡܥܺܝܢܰܢ ܠܶܗ ܓܶܝܪ ܠܶܐܫܰܥܝܳܐ ܕܳܐܡܰܪ܆ ܕܢܶܬܟܪܶܟ ܐܰܝܟ ܡܓܰܠܬܳܐ ܫܡܰܝܳܐ. ܘܟܽܠܗܽܘܢ ܟܰܘܟ̈ܒܶܐ ܢܶܦܠܽܘܢ܆ ܐܰܝܟ ܕܢܳܦܠܺܝܢ ܛܰܪ̈ܦܶܐ ܡܶܢ ܓܦܶܬܳܐ܆ ܘܰܐܝܟ ܕܢܳܬ̣ܪܺܝܢ ܛܰܪ̈ܦܶܐ ܡܶܢ ܬܺܬܳܐ[68]. ܘܳܐܦ ܠܝܘܐܝܠ ܕܶܝܢ ܕܟܳܬܶܒ ܕܫܶܡܫܳܐܘܣܰܗܪܳܐ ܢܶܚܫܟܽܘܢ ܐܰܟܚܕܳܐ. ܘܟܰܘܟ̈ܒܶܐ ܠܳܐ ܢܶܬܠܽܘܢ ܙܰܗܪܳܐ ܕܺܝܠܗܽܘܢ[69].

ܐܳܬ̣ܳܐ ܕܶܝܢ ܢܰܗܺܝܪܬܳܐ܆ ܕܗܳܝ ܕܡܶܛܽܠ ܝܰܘܡܳܐ ܗܰܘ ܐܳܡܰܪ ܐܝܘܒ ܢܒܺܝܳܐܺܝܬ܆ ܗܳܠܶܝܢ ܕܕܳܡ̈ܝܳܢ ܠܰܕܗܳܠܶܝܢ ܒܶܐܣܟܺܡܳܐ ܕܠܰܘܛܬܳܐ܆ ܗܳܝ ܕܰܐܝܬܺܝ ܒܳܬܰܪܟܶܢ܆ ܢܠܽܘܛܺܝܘܗ̱ܝ ܗܰܘ ܕܠܴܐܶܛ ܠܝܰܘܡܳܐ ܗܰܘ܆ ܗܰܘ ܕܰܥܬܺܝܕ ܕܰܠܩܺܝܛܘܤ ܗܰܘ ܪܰܒܳܐ ܢܶܟܒܽܘܫ ܘܰܢܫܰܥܒܶܕ[70]. ܡܰܢܽܘ ܕܶܝܢ ܐܺܝܬܰܘܗ̱ܝ ܩܺܝܛܘܤ ܗܰܘ ܪܰܒܳܐ܆ ܐܶܠܳܐ ܐܶܢ ܐܳܟܶܠ ܩܰܪܨܳܐ܆ ܗܰܘ ܚܶܘܝܳܐ ܩܰܕܡܳܝܳܐ܆ ܗܰܘ ܡܰܠܦܳܢܳܗ̇ ܕܰܚܛܺܝܬܳܐ܆ ܗܰܘ ܕܰܒܪܰܛܺܝܒܽܘܬܳܐ ܕܰܪ̈ܓܺܝܓܳܬܳܐ ܕܺܝܠܰܢ ܐܶܚܰܕ ܛܪܽܘܢܽܘܬܳܐ܆ ܘܥܰܡ ܟܽܠܳܗ̇ ܡܫܰܠܛܽܘܬܳܐ ܣܰܓܺܝܐܬܳܐ ܘܠܳܐ ܩܰܢܺܝܛܽܘܬܳܐ ܣܚܳܐ ܒܗܶܝܢ܆ ܘܗܳܟܰܢܳܐ ܗܘ̣ܳܐ ܩܝܛܘܤ ܪܰܒܳܐ܆ ܠܗܰܘ ܕܗܳܝܕܶܝܢ ܐܰܝܟ ܡܶܠܬܶܗ ܕܦܰܘܠܽܘܤ܆ ܡܳܪܰܢ ܢܶܩܛܠܺܝܘܗ̱ܝ ܒܪܽܘܚܳܐ ܕܦܽܘܡܶܗ܆ ܘܰܢܒܰܛܠܺܝܘܗ̱ܝ ܒܕܶܢܚܳܐ ܕܡܶܐܬܺܝܬܶܗ[71]܆ ܟܰܕ ܐܳܡܰܪ ܐܳܦ ܠܗܳܢܽܘܢ ܕܒܰܚ̈ܛܳܗܶܐ ܚ̣ܝܰܘ܆ ܕܙܶܠܘ ܠܟܽܘܢ ܠܺܝ̈ܛܶܐ ܠܢܽܘܪܳܐ ܗܳܝ ܕܰܠܥܳܠܰܡ܆ ܗܳܝ ܕܰܡܛܰܝܒܳܐ ܠܳܐܟܶܠ ܩܰܪܨܳܐ ܘܰܠܡܰܠܰܐܟܰܘ̈ܗܝ[72]. ܐܰܝܟܰܢܳܐ ܟܺܝܬ ܕܡܳܕܶܝܢ ܝܰܘܡܳܐ ܗܰܘ ܡܶܬܶܐܡܰܪ ܠܺܝܛܳܐ܆ ܡܶܛܽܠ ܗܳܢܽܘܢ ܕܒܶܗ ܡܩܰܒܠܺܝܢ ܡܣܳܡ ܒܪܺܝܫܳܐ ܕܠܰܘܛܬܳܐ.

ܘܠܳܐ ܗܳܟܺܝܠ ‌ܐܶܪܰܡܝܳܐ ܘܳܐܦܠܳܐ ܐܝܘܒ܆ ܟܰܕ ܡܶܢ ܙܥܽܘܪܽܘܬ ܢܰܦܫܳܐ ܡܶܕܶܡ ܘܩܘܛܳܦܳܐ ܫܰܦܠܳܐ ܘܠܳܐ ܚܺܐܪܳܝܳܐ ܐܶܙܕܟܺܝ ܐܶܬܐܒܶܠ ܘܠܳܛ܆ ܘܟܰܕ ܐܰܝܟ ܗܰܘ ܕܥܰܠ ‌ܐܰ‌ܠܳܗܳܐ ܡܓܰܕܶܦ ܗ̱ܘܳܐ܆ ܐܰܝܬܺܝ ܠܰܘܛܬܳܐ ܥܰܠ ܝܰܘܡܳܐ ܗܰܘ. ܐܶܠܳܐ ܐܰܝܟܰܢܳܐ ܕܶܐܡܪܶܬ܆ ܟܰܕ ܠܚܰܫܳܐ ܓܰܘܳܢܳܝܳܐ ܕܰܟܝܳܢܳܐ ܐ̱ܢܳܫܳܝܳܐ ܐ̱ܪܳܙܳܢܳܐܺܝܬ ܐܴܠܶܐ ܗ̱ܘܳܐ ܘܡܶܬܶܐܒܶܠ. ܘܗܳܕܶܐ ܡܶܢ ܬܰܡܳܢ ܐܺܝܬܶܝܗ̇ ܓܠܺܝܬܳܐ܆ ܡܶܢ ܗܳܝ ܕܶܐܪܰܡܝܳܐ ܩܕܳܡ ܕܰܢܠܽܘܛܺܝܘܗ̱ܝ ܠܝܰܘܡܳܐ܆ ܬܶܫܒܽܘܚܬܳܐ ܕܩܽܘܒܳܠ ܛܰܝܒܽܘܬܳܐ ܐܰܣܶܩ ܠܰܐܠܳܗܳܐ. ܟܬܺܝܒ ܓܶܝܪ܆ ܙܡܰܪܘ ܠܡܳܪܝܳܐ. ܫܰܒܚܽܘܗ̱ܝ ܡܶܛܽܠ ܕܦܰܨܺܝ ܠܢܰܦܫܶܗ ܕܡܶܣܟܺܢܳܐ܆ ܡܶܢ ܐܺܝܕܳܐ ܕܡܰܒܐܫܳܢ̈ܶܐ[73]. ܐܰܝܟܳܐ ܕܶܝܢ ܐܺܝܬ ܠܳܗ̇ ܦܝܳܣܳܐ܆ ܠܗܳܝ ܕܗܽܘ ܟܰܕ ܗܽܘ ܐܳܦ ܬܶܫܒܽܘܚܬܳܐ ܕܩܽܘܒܳܠ ܛܰܝܒܽܘܬܳܐ ܢܶܙܡܰܪ܆ ܘܕܰܢܓܰܕܶܦ.

ܟܰܕ ܗܳܠܶܝܢ ܗܳܟܺܝܠ ܚܢܰܢ ܫܡܰܥܢܰܢ܆ ܢ݀ܨܰܠܶܐ ܕܢܶܗܘܶܐ ܐܰ‌ܠܳܗܳܐ ܡܚܰܣܝܳܢܳܐ ܕܰܚ̈ܛܳܗܰܝܢ܆ ܕܡܶܢ ܒܳܬܰܪ ܕܶܢܚܳܐ ܐܰ‌ܠܳܗܳܝܳܐ ܘܡܶܐܬܺܝܬܶܗ ܕܦܳܪܽܘܩܢ ܡܫܺܝܚܳܐ܆ ܘܡܶܢ ܒܳܬܰܪ ܕܰܠܡܰܘܠܳܕܳܐ ܕܡܶܢ ܠܥܶܠ ‌ܐܶܫܬܘܺܝܢܰܢ܆ ܘܫܰܦܺܝܪܽܘܬ ܚܺܝܨܽܘܬܳܐ ܘܓܰܢ̱ܒܳܪܽܘܬܳܐ ܡܶܢ ܗܳܪܟܳܐ ܢܣܰܒܢܰܢ ܡܶܢ ܕܪܺܝܫ܆ ܘܠܳܐ ܡܶܕܶܡ ܕܶܟܪܳܢܳܝܳܐ ܣܳܥܪܺܝܢܰܢ܆ ܐܶܠܳܐ ܟܽܠ ܡܶܕܶܡ ܕܺܐܝܬܰܘܗ̱ܝ ܢܶܩܒܬܳܢܳܐ ܘܕܰܡܠܶܐ ܪܰܦܝܽܘܬܳܐ. ܟܰܕ ܪܰܦܝܽܘܬܳܐ ܝܺܕܺܝܥܳܐ ܕܡܶܣܬܰܟܠܳܐ܆ ܗܳܝ ܕܣܳܟ ܢܶܙܕܟܶܐ ܡܶܢ ܚܰܫܳܐ ܡܶܕܶܡ. ܫܳܒܶܩ ܐ̱ܢܳܐ ܕܶܝܢ ܠܡܺܐܡܰܪ ܡܶܢ ܣܰܓܺܝ̈ܶܐܐ. ܡܶܛܽܠ ܗܳܕܶܐ ܢܺ݀ܐܨܰܦ ܠܡܶܫܬܰܚܠܳܦܽܘ܆ ܘܰܠܡܶܬܒܰܩܳܝܽܘ ܕܡܰܢܽܘ ܐܺܝܬܰܝܢ܆ ܘܰܕܡܶܛܠ ܡܳܢܳܐ ܗܘ̣ܰܝܢܰܢ܆ ܐܰܝܟܰܢܳܐ ܕܠܳܐ ܟܰܕ ܡܶܕܶܡ ܐ̱ܚܪܺܝܢ ܐܺܝܬܰܝܢ܆ ܗܰܘ ܡܳܐ ܕܠܳܐ ܐܺܝܬܰܝܢ ܢܶܬܚܙܶܐ ܩܕܳܡ ܒܺܐܡܰܐ ܕܰܡܫܺܝܚܳܐ܆ ܗܰܘ ܕܰܒܨܰܠܡܶܗ ܘܒܰܕܡܽܘܬܶܗ ܥܰܒܕܶܗ ܠܒܰܪܢܳܫܳܐ[74]. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܡܐܐ ܘܬܡܢܝܐ.

ܐܳ‌ܠܶܨ [1]

 ܒܽܘܟܪܬܐ ܐܰܘ ܝܠܝܕܬ ܩܕܡܝܬ[2]

ܐܦܣ̈ܝܐ. 5: 25 ـ 32 [3]

ܒ. ܩܘܪ̈ܝܢܬܝܐ. 11: 2 [4]

ܐܦܣ̈ܝܐ. 5: 25 ـ 27 [5]

ܬܫܒ̈ܚܬ ܬܫܒ̈ܚܬܐ. 5: 2 [6]

ܥܒܪ̈ܝܐ. 4: 15  ܐܦ ܥܒܪ̈ܝܐ. 2: 14 [7]

ܡܬܝ. 22: 37 [8]

ܬܫܒ̈ܚܬܐ ܬܫܒ̈ܚܬܐ. 1: 3 [9]

ܬܫܒ̈ܚܬܐ ܬܫܒ̈ܚܬܐ. 5: 4 [10]

ܡ̈ܬܠܐ. 4: 16 [11]

ܓܠܛܝ̈ܐ. 2: 20 [12]

ܒ. ܩܘܪ̈ܝܢܬܝܐ. 2: 11 [13]

ܒ. ܩܘܪ̈ܝܢܬܝܐ. 12: 2. 3. 4. [14]

ܒ. ܩܘܪ̈ܝܢܬܝܐ. 12: 7[15]

ܟܗ̈ܢܐ. 26: 6 [16]

ܐ. ܬܣܠܘܢܝܩ̈ܝܐ. 5: 5 ـ 7 [17]

ܠܘܩܐ. 17: 10 [18]

ܡܬܝ. 3: 16 [19]

ܬܫܒ̈ܚܬ ܬܫܒ̈ܚܬܐ. 4: 7 [20]

ܡܬܝ. 5: 48 [21]

ܝܘܚܢܢ. 17: 22 ـ 23 [22]

ܦܪܟܣܝܣ. 8: 10 [23]

ܣܶܦܪܐ ܕܒܪܝܬܐ. 3: 5 [24]

ܬܫܒ̈ܚܬ ܬܫܒ̈ܚܬܐ. 5: 4 [25]

ܩܘܠܣ̈ܝܐ. 3: 9 [26]

ܬܫܒ̈ܚܬ ܬܫܒ̈ܚܬܐ. 5: 4 [27]

ܩܰܢܺܝܛܳܐܝܬ[28]

ܡܦܩܢܐ. 4: 13 [29]

ܡܦܩܢܐ. 33: 13 [30]

ܐܪܡܝܐ. 1: 6  ܐܦ 1: 9[31]

ܪ̈ܗܘܡܝܐ. 8: 39 [32]

ܐ. ܩܘܪ̈ܝܢܬܝܐ. 9: 27 [33]

ܐ. ܝܘܚܢܢ. 4: 18 [34]

ܡܙܡܘܪ̈ܐ. 111: 10  ܐܦ ܡ̈ܬܠܐ. 1: 7  ܐܦ 9: 10 [35]

ܪ̈ܗܘܡܝܐ. 9: 3 [36]

ܐ. ܝܘܚܢܢ. 4: 18[37]

ܣܶܦܪܳܐ ܕܒܪܝܬܐ. 2: 15 [38]

ܝܘܚܢܢ. 15: 14 ـ 15 [39]

ܡܬܝ. 26: 41  ܐܦ ܡܪܩܘܣ. 14: 38 [40]

ܝܫܘܥ ܒܪܐܣܝܪܐ. 25: 13 ـ 15 [41]

ܒ. ܫܡܘܐܝܠ. 23: 18 ـ 19[42]

ܐܪܡܝܐ. 20: 14 ـ 15 [43]

ܐܪܡܝܐ. 1: 5 [44]

ܡܬܝ. 16: 13 ـ 14 [45]

ܐܪܡܝܐ. 6: 28 ـ 29 [46]

ܣܶܦܪܐ ܕܒܪܝܬܐ. 3: 16[47]

ܐܪܡܝܐ. 20: 14 [48]

ܡܪܩܘܣ. 1: 42 [49]

ܠܘܩܐ. 2: 10 ـ 11 [50]

ܐܪܡܝܐ. 20: 15 [51]

ܣܶܦܪܐ ܕܒܪܝܬܐ. 1: 27 [52]

ܣܶܦܪܳܐ ܕܒܪܝܬܐ. 3: 12 [53]

ܐܫܥܝܐ. 66: 7 [54]

ܐܪܡܝܐ. 20: 15 [55]

ܡܙܡܘܪ̈ܐ. 5: 7 [56]

ܐܪܡܝܐ. 20: 15 [57]

ܪ̈ܗܘܡܝܐ. 5: 14 [58]

ܕܡܳܐ؟[59]

ܝܘܚܢܢ. 1: 13 [60]

ܐܪܡܝܐ. 20: 17 [61]

ܡܬܝ. 26: 24 [62]

ܡܦܩܢܐ. 3: 17 [63]

 ܓܠ̈ܛܝܐ.1: 4 ـ 6[64]

 ܐܦܣ̈ܝܐ. 5: 16 [65]

 ܒ. ܩܘܪ̈ܝܢܬܝܐ. 6: 2 [66]

ܐܝܘܒ. 3: 6 [67]

ܐܫܥܝܐ. 34: 4 [68]

ܝܘܐܝܠ. 2: 10 [69]

ܓܠܝܢܐ. 12: 9  ܐܦ 20: 2 [70]

ܒ. ܬܣܠܘܢܝܩ̈ܝܐ. 2: 8 [71]

ܡܬܝ. 25: 41 [72]

ܐܪܡܝܐ. 20: 13 [73]

ܣܶܦܪܐ ܕܒܪܝܬܐ. 1: 26 ـ 27 [74]