ܡܺܐܡܪܳܐ ܕܡܳܐܐ ܘܫܰܒܥܳܐ

ܕܶܐܬܶܐܡܰܪ ܒܨܰܘܡܳܐ܆ ܠܦܽܘܬ ܦܽܘܫܳܟ̈ܶܐ ܡܶܕܶܡ ܡܶܕܶܡ ܟܬܳܒܳܝ̈ܶܐ ܕܶܐܬܡܬܰܚܘ ܘܶܐܬܩܰܪܰܒܘ ܠܶܗ ܕܗܳܢܽܘܢ ܕܩܰܕܡܳܝܗܽܘܢ ܐܺܝܬܰܘܗ̱ܝ܆ ܕܡܳܢܳܐ ܐܰܪܰܐ ܡܰܘܕܥܳܐ ܗܳܝ ܕܰܐܡܺܝܪܳܐ ܠܶܐܫܰܥܝܳܐ ܢܒܺܝܳܐ܆ ܒܝܰܘܡܳܐ ܗܰܘ ܢܶܗܘ̈ܝܳܢ ܚܰܡܶܫ ܡܕܺܝܢ̱ܬܳܐ ܒܡܶܨܪܶܝܢ ܕܰܡܡܰܠ̈ܠܳܢ ܒܠܶܫܳܢܳܐ ܟܢܰܥܢܳܝܳܐ܆ ܘܝܳܡ̈ܝܳܢ ܒܰܫܡܶܗ ܕܡܳܪܝܳܐ ܨܒܰܐܘܽܬ܆ ܡܕܺܝܢ̱ܬܳܐ ܐܨܕܩ ܬܶܬܩܪܶܐ ܗܳܝ ܚܕܳܐ ܡܕܺܝܢ̱ܬܳܐ^[1]. ܕܰܥܠܰܘܗ̱ܝ ܕܦܽܘܫܳܟܳܐ ܗܳܢܳܐ ܐܶܬܶܐܡܰܪ ܟܽܠܶܗ ܡܺܐܡܪܳܐ܆ ܟܰܕ ܠܗܳܠܶܝܢ ܐ̱ܚܪ̈ܳܢܶܐ ܡܶܛܽܠ ‌ܐܰܪܺܝܟܽܘܬܳܐ ܠܳܐ ܐܶܫܟܰܚ ܕܢܶܓܫܽܘܦ.

107: ܡܶܢ ܗܳܢܽܘܢ ܕܰܒܡܰܕܒܪܳܐ ܗܰܘ ܕܡܶܨܪܶܝܢ܆ ܕܽܘܒܳܪܳܐ ܗܰܘ ܠܚܽܘܕܳܝ ܙܢܳܐ ܘܚܰܝ̈ܶܐ ܗܳܢܽܘܢ ܥܳܢ̈ܘܳܝܶܐ ܘܦܺܝܠܽܘܣܽܘܦܳܝ̈ܶܐ ܡܶܬܥܰܢܘܶܝܢ܆ ܘܰܒܗܰܘܢܳܐ ܡܰܢ ܣܽܘܓܐܐ ܒܒܶܣܪܳܐ ܕܶܝܢ ܩܰܠܺܝܠ ܘܰܟܡܳܐ ܒܰܠܚܽܘܕ ܕܗܳܝ ܕܰܢܣܽܘܩܽܘܢ ܣܳܘܩܳܐ ܚܳܐܝܶܢ܆ ܓܰܒܪܳܐ ܐ̱ܢܳܫ ܕܰܫܡܶܗ ܦܺܝܠܝܦܘܤ܆ ܢܶܬܬܰܝܬܶܐ ܓܶܝܪ ܩܕܳܡ ܥܺܕܬܳܐ ܥܽܘܗܕܳܢܳܐ ܓܰܠܝܳܐ ܘܰܟܬܺܝܒܳܐ ܕܟܽܘܢܳܝܶܗ܆ ܘܗܳܢܳܐ ܦܽܘܪܥܳܢܳܐ ܕܫܳܥܬܳܐ ܢܶܗܘܶܐ ܠܶܗ ܡܶܢ ܠܘܳܬܝ ܕܪܶܚܡܰܬ ܝܽܘܠܦܳܢܳܐ ܕܺܝܠܶܗ܆ ܫܽܘ̈ܐܴܠܶܐ ܡܶܕܶܡ ܡܶܕܶܡ ܡܶܢ ܡ̈ܶܠܶܐ ܕܰܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ܆ ܕܡܶܣܬܰܒܪܺܝܢ ܕܦܽܘܫܳܟܳܐ ܘܰܕܠܳܐ ܡܰܦܩܳܢܳܐ܆ ܘܰܕܣܰܓܺܝ ܡܛܰܫܝܽܘܬܳܐ ܕܬܰܪܥܺܝܬܳܐ ܐܺܝܬ ܒܗܽܘܢ܆ ܒܝܰܕ ܐܶܓܰܪܬܳܐ ܡܬܰܚ ܘܩܰܪܶܒ ܠܺܝ܆ ܟܰܕ ܡܦܺܝܤ ܕܢܶܫܬܘܽܘܢ ܗܳܠܶܝܢ ܠܰܫܪܳܝܳܐ ܡܶܢ ܠܘܳܬܝ܆ ܘܰܠܦܽܘܫܳܩܳܐ ܓܰܠܝܳܐ ܘܢܰܗܺܝܪܳܐ.

ܐܶܢܳܐ ܕܶܝܢ܆ ܕܡܶܣܟܺܢܳܐ ܡܰܢ ܐܺܝܬܰܝ ܒܺܝܕܰܥܬܳܐ ܕܗܳܠܶܝܢ ܐܰ‌ܠܳܗܳܝ̈ܳܬܳܐ ܡܰܘܕܶܐ ܐ̱ܢܳܐ܆ ܘܠܳܐ ܪܳܗܶܛ ܐ̱ܢܳܐ ܥܰܠ ܗܳܠܶܝܢ ܕܰܠܥܶܠ ܡܶܢ ܚܰܝܠܳܐ܆ ܐܶܠܳܐ ܐܳܦ ܡܝܰܩܰܪ ܐ̱ܢܳܐ ܠܫܶܬܩܳܐ ܢܰܟܦܳܐ ܘܰܕܠܳܐ ܛܳܥܶܐ ܗܽܘ ܠܶܗ܆ ܕܳܚܶܠ ‌ܐ̱ܢܳܐ ܕܶܝܢ ܬܽܘܒ܆ ܕܠܳܐ ܐܺ݀ܡܰܪ ܥܰܠ ܗܳܠܶܝܢ ܕܡܶܬܒܰܥ̈ܝܳܢ܆ ܗܳܝ ܕܳܐܦܶܢ ܟܡܳܢܳܐܺܝܬ ܐܳܬܝܳܐ ܠܡܰܕܪܟܳܢܽܘܬܳܐ ܕܺܝܠܝ܆ ܟܰܕ ܡܶܬܚܰܫܰܒ ܐ̱ܢܳܐ ܠܥܰܒܕܳܐ ܗܰܘ ܕܒܶܐܘܰܢܓ̈ܶܠܺܝܰܐ܆ ܕܰܛܡܰܪ ܒܰܐܪܥܳܐ ܠܟܰܟܪܳܐ ܗܳܝ ܕܶܐܬܗܰܝܡܢܰܬ ܠܶܗ^[2]܆ ܘܰܣܒܰܠ ܚܽܘܝܳܒܳܐ ܕܰܢܛܽܘܪܬܳܐ܆ ܕܠܳܐ ܒܰܨܪܰܬ̣ ܡܰܢ܆ ܠܳܐ ܪܰܒܝܰܬ ܕܶܝܢ ܠܗܰܘ ܡܳܐ ܕܶܐܬܓܥܶܠ ܠܳܗ̇. ܡܶܣܬܰܒܪܳܐ ܠܺܝ ܕܶܝܢ ܕܕܰܬܚܶܝܬ ܚܽܘܝܳܒܳܐ ܕܡܰܪܫܽܘܬܳܐ ܕܕܳܡܝܳܐ ܠܗܳܝ ܕܗܳܢܳܐ ܐܺܝܬܶܝܗ̇܆ ܐܳܦ ܗܳܝ ܕܰܒܓܽܘܢܝܳܐ ܢܶܬܛܰܫܽܘܢ ܥܽܘܩܳܒ̈ܶܐ ܘܒܽܘܚܳܢ̈ܶܐ ܕܗܳܠܶܝܢ ܕܗܳܟܰܢܳܐ ܛܳܒ ܐܳ‌ܠ̈ܨܳܝܳܢ܆ ܘܠܳܐ ܗ̱ܘܳܐ ܒܣܰܓܺܝ̈ܶܐܐ ܢܶܬܦܰܬܝ̈ܳܢ ܗܳܠܶܝܢ ܕܝܽܘܬܪܳܢܳܐ.

ܡܶܛܽܠܗܳܕܶܐ܆ ܡܶܢ ܗܳܝ ܡܰܢ ܕܕܺܝܠܳܢܳܐܺܝܬ ܐܶ݀ܦܰܢܶܐ ܦܶܬܓܳܡܳܐ ܒܝܰܕ ܐܶܓܰܪܬܳܐ ܠܘܳܬ ܗܰܘ ܕܫܰܐܶܠ ܡܰܗܡܶܐ ܐ̱ܢܳܐ܆ ܡܢܰܣܶܐ ܐ̱ܢܳܐ ܕܶܝܢ ܐܰܝܟ ܚܰܝܠܳܐ ܕܺܝܠܝ ܒܨܺܝܪܳܐ܆ ܕܰܩܕܳܡܰܝܟܽܘܢ ܥܰܠ ܗܳܠܶܝܢ ܐܺ݀ܡܰܪ. ܟܰܕ ܬܟܺܝܠ ‌ܐ̱ܢܳܐ ܘܛܳܒ ܡܗܰܝܡܶܢ ܐ̱ܢܳܐ܆ ܕܗܰܘ ܕܒܰܕܡܳܐ ܕܺܝܠܶܗ ܠܥܺܕܬܳܐ ܡܶܢ ܚܛܺܝܬܳܐ ܙܒܶܢ܆ ܡܶܛܽܠ ܪܶܚܡܰܬ ܐܰ‌ܠܳܗܳܐ ܘܠܳܐ ܣܰܒܥܽܘܬܳܐ ܕܨܰܘ̈ܬܶܐ ܪ̈ܽܘܚܳܢܶܐ ܕܡܰܫܡܰܥܬܳܐ ܕܺܝܠܟܽܘܢ܆ ܐܳܦ ܥܠܰܝ ܢܛܰܦ ܝܰܬܺܝܪ ܥܰܬܺܝܪܳܐܺܝܬ ܪ̈ܰܚܡܶܐ܆ ܟܰܕ ܕܣܽܘ̈ܟܳܠܶܐ ܐܰܟܚܕܳܐ ܘܰܕܡܶܠܬܳܐ܆ ܝܳܗܶܒ ܡܰܘܗܰܒܬܳܐ ܫܦܺܝܥܬܳܐ. ܗܳܟܰܢܳܐ ܐܳܦ ܦܰܘܠܽܘܤ ܗܰܘ ܪܰܒܳܐ܆ ܠܶܐܦܶܣܳܝ̈ܶܐ ܫܳܐܶܠ ܗ̱ܘܳܐ ܕܰܢܨܰܠܽܘܢ ܥܠܰܘܗ̱ܝ ܟܰܕ ܐܳܡܰܪ܆ ܕܳܐܦ ܥܠܰܝ ܨܰܠܰܘ܆ ܐܰܝܟܰܢܳܐ ܕܬܶܬܺܝܗܶܒ ܠܺܝ ܡܶܠܬܳܐ ܒܡܰܦܬܰܚ ܦܽܘܡܝ^[3]. ܡܳܢܳܐ ܗܳܟܺܝܠ ܬܡܺܝܗܳܐ܆ ܐܶܢ ܐܳܦ ܐܶܢܳܐ ܙܥܽܘܪܳܐ ܒܝܰܕ ܗܰܝܡܳܢܽܘܬܳܐ ܕܰܒܟܽܘܢ ܡܣܰܟܶܐ ܐ̱ܢܳܐ܆ ܕܥܶܠ̈ܠܳܬܳܐ ܕܦܽܘܫܳܩܳܐ ܕܣܰܓܺܝ ܛܳܒ ܡܫܰܪ̈ܬܚܳܢ ܘܰܫܦܺܝ̈ܥܳܢ ܢܶܪ̈ܕܝܳܢ ܠܺܝ܆ ܠܘܳܬ ܢܽܘܗܳܪܳܐ ܕܗܳܠܶܝܢ ܕܩܰܕܺܝ̈ܡܳܢ ܣܺܝܡ̈ܳܢ ܠܰܢ.

ܡܶܣܬܒܰܪ ܕܶܝܢ ܐܳܦ ܙܰܒܢܳܐ ܗܳܢܳܐ ܕܩܰܪܺܝܒ܆ ܕܣܰܓܺܝ ܝܰܬܺܝܪܳܐܺܝܬ ܐܺܝܬܰܘܗ̱ܝ ܕܠܳܚܶܡ ܘܥܳܗܶܢ ܠܘܳܬ ܗܳܕܶܐ܆ ܐܶܡܰܬܝ ܓܶܝܪ ܒܰܙܒܰܢ ܐ̱ܚܪܺܝܢ ܙܳܕܶܩ ܗ̱ܘܳܐ ܕܢܶܫܬܪܽܘܢ ܫܽܘ̈ܐܴܠܶܐ ܕܓܰܒܪ̈ܶܐ ܗܳܢܽܘܢ ܩܰܕܺܝ̈ܫܶܐ ܘܰܕܒܰܢܙܺܝܪܽܘܬܳܐ ܚܳܐܝܶܢ܆ ܐܶܠܳܐ ܐܶܢ ܒܝܰܘ̈ܡܳܬܳܐ ܗܳܠܶܝܢ ܩܰܕܺܝ̈ܫܶܐ ܘܰܕܟܰܝ̈ܳܐ ܕܨܰܘܡܳܐ ܘܕܰܢܙܺܝܪܽܘܬܳܐ. ܡܳܕܶܝܢ ܢܶܥܒܰܪ ܒܡܶܠܬܳܐ ܟܰܕ ܐܰ‌ܠܳܗܳܐ ܡܰܘܫܶܛ ܐܺܝܕܳܐ܆ ܥܰܠ ܫܽܘܐܴܠܳܐ ܗܰܘ ܩܰܕܡܳܝܳܐ ܐܰܝܟ ܕܡܰܨܝܳܐ.

ܡܳܢܳܐ ܨܳܒܝܳܐ ܐܳܡܰܪ ܗܳܝ ܕܰܐܡܺܝܪܳܐ ܠܶܐܫܰܥܝܳܐ ܢܒܺܝܳܐ ܒܗܳܠܶܝܢ܆ ܒܝܰܘܡܳܐ ܗܰܘ ܢܶܗܘ̈ܝܳܢ ܚܰܡܶܫ ܡܕܺܝܢ̱ܬܳܐ ܒܡܶܨܪܶܝܢ ܕܰܡܡܰܠ̈ܠܳܢ ܒܠܶܫܳܢܳܐ ܗܰܘ ܟܢܰܥܢܳܝܳܐ܆ ܘܝܳܡ̈ܝܳܢ ܒܰܫܡܳܐ ܕܡܳܪܝܳܐ ܨܒܰܐܘܽܬ܆ ܡܕܺܝܢ̱ܬܳܐ ܐܨܐܕܩ ܬܶܬܩܪܶܐ ܗܳܝ ܚܕܳܐ ܡܕܺܝܢ̱ܬܳܐ^[4].

ܥܬܺܝܕ ܗ̱ܘܺܝܬ̣ ܡܰܢ ܗܳܟܺܝܠ ܠܰܡܣܳܡ ܐܰܝܟ ܗܰܘܢܳܐ ܦܫܺܝܩܳܐ܆ ܠܺܝܗ̱ܝ ܒܽܘܬ ܡܶܠܬܳܗ̇ ܕܬܰܫܥܺܝܬܳܐ܆ ܘܶܐ݀ܚܰܘܶܐ ܡܶܢ ܡܡܰܠܠܽܘܬ ܥܰܬܺܝܩܽܘܬܳܐ ܝܺܗܽܘܕܳܝܬܳܐ ܗܳܝ ܕܝܽܘܣܺܝܦܘܤ܆ ܘܡܶܢ ܗܳܠܶܝܢ ܕܰܐܡܺܝܪ̈ܳܢ ܠܶܗ ܠܩܰܕܺܝܫܳܐ ܩܽܘܪܝܠܘܤ܆ ܕܰܐܝܟܰܢܳܐ ܐ̱ܢܳܫ ܪܺܝܫ ܟܳܗ̈ܢܶܐ ܕܝܽܗ̱ܘ̈ܕܳܝܶܐ ܟܰܕ ܐܶܬܛܪܶܕ܆ ܐܰܘ ܐܳܦ ܟܰܕ ܓܠܘܬܐ ܐܰܦܶܩ ܡܶܢ ܕܽܘܟܬܳܗ̇ ܘܡܶܢ ܒ̈ܢܰܝ ܫܰܪܒܬܶܗ ܕܒܺܝܪ ܗ̱ܘܳܐ ܣܰܓܺܝ̈ܶܐܐ܆ ܥܡܰܪ ܒܰܬܚܽܘܡܳܐ ܕܦܠܤܛܺܝܢܝ ܟܺܝܬ ܘܰܕܡܶܨܪܶܝܢ܆ ܠܘܰܥܕܳܐ ܒܕܽܘܟ ܕܰܡܕܺܝܢ̱ܬܽܘܢܺܝܬܳܐ ܗܳܝ ܕܡܶܬܩܰܪܝܳܐ ܪܺܝܢܘܩܘܪܘܪܐ^[5]܆ ܗܳܢܰܘ. ܕܺܐܝܬ ܠܗܽܘܢ ܥܝܳܕܳܐ ܐܳܦ ܗܳܫܳܐ ܕܰܒܟܽܠܚܰܕ ܡܶܢ ܬܪ̈ܰܝܗܽܘܢ ܗܳܠܶܝܢ ܠܶܫܳܢ̈ܶܐ ܢܶܬܚܰܫܚܽܘܢ܆ ܒܗܰܘ ܟܺܝܬ ܕܐܓܘܦ̈ܛܝܐ ܘܰܒܗܰܘ ܕܡܶܬܚܰܫܚܺܝܢ ܒܶܗ ܦܠܰܣܛܺܝ̈ܢܳܝܶܐ ܘܦܽܘܢܺܝ̈ܩܳܝܶܐ܆ ܗܳܢܰܘ ܓܶܝܪ ܠܶܫܳܢܳܐ ܟܢܰܥܢܳܝܳܐ܆ ܘܕܰܐܝܟܰܢܳܐ ܐܶܣܬܰܒܪܰܬ ܕܰܒܗܳܠܶܝܢ ܗܳܢܶܝܢ ܕܰܢܒܺܝܽܘܬ ܡܶܬܡܰܠ̈ܝܳܢ ܗ̱ܘܰܝ̈܆ ܟܰܕ ܐܶܬܬܰܩܰܢ ܒܰܐܬܪܳܐ ܗܰܘ ܕܺܐܝܠܝܘܦܘܠܝܤ ܗܳܝ ܕܒܐܓܘܦܛܘܤ ܡܶܢ ܗܳܢܽܘܢ ܕܶܐܬܓܰܠܘܺܝܘ܆ ܐܳܦ ܗܰܝܟܠܳܐ ܐܳܦ ܡܰܕܒܚܳܐ܆ ܐܰܝܟ ܚܰܘܪܳܐ ܘܛܽܘܦܣܳܐ ܗܰܘ ܕܒܽܐܘܪܫܠܶܡ.

ܡܶܛܽܠ ܕܶܝܢ ܕܗܰܘ ܕܫܰܐܶܠ ܒܥܳܐ ܡܶܢܝ ܘܰܐܦܺܝܣܰܢܝ܆ ܕܰܠܥܶܠ ܡܶܢ ܟܬܺܝܒܬܳܐ ܡܰܢ ܐܶ݀ܬܥܰܠܶܐ ܐܶ݀ܣܰܩ܆ ܘܰܠܡܶܣܟܺܢܽܘܬܳܐ ܝܺܗܽܘܕܳܝܬܳܐ ܐܶ݀ܫܽܘܛ܆ ܘܰܕܬܰܫܥܺܝܬܳܐ ܙܥܽܘܪ̈ܝܳܬܳܐ ܐܺ݀ܝܨܰܦ܆ ܗܳܝ ܕܳܐܦܠܳܐ ܣܰܓܺܝ ܚܰܬܺܝܬ̣ܳܐܺܝܬ ܡܶܫܟܚܳܐ ܕܬܶܬܺܝܗܶܒ ܐܰܝܟ ܕܡܰܣܒܰܪ ܐ̱ܳܢܐ܆ ܬܰܪܥܺܝܬܳܐ ܕܶܝܢ ܕܝܰܬܺܝܪ ܫܰܪܺܝܪܳܐ ܘܰܡܥܰܠܰܝܬܳܐ ܐܶ݀ܬܶܠ ܘܰܐ݀ܫܠܶܡ܆ ܗܳܝ ܕܳܐܦ ܐ̱ܪܳܙܳܢܳܐܺܝܬ ܒܦܶܬܓܳܡ̈ܶܐ ܢܒܺܝ̣ܳܝ̣̈ܶܐ ܡܶܬܬܰܝܬܝܳܐ܆ ܪܚܺܝܡܳܐ ܗ̱ܝ ܓܶܝܪ ܠܗܳܢܽܘܢ ܕܰܒܝܰܕ ܥܰܡ̈ܠܶܐ ܣܳܥܽܘܪ̈ܳܝܶܐ ܕܰܡܝܰܬܪܽܘܬܳܐ ܡܶܬܕܰܟܶܝܢ܆ ܕܰܠܘܳܬ ܬܶܐܽܘܪܺܝܰܐ ܢܶܬܥܰܠܽܘܢ ܘܶܐܘܰܢܓܶܠܳܐܺܝܬ ܘܪܰܒܽܘܬ ܦܰܐܝܳܐܺܝܬ ܢܶܣܬܰܟܠܽܘܢ ܠܗܳܠܶܝܢ ܪܰܘܪ̈ܒܳܬܳܐ܆ ܘܠܳܐ ܢܰܚܬܽܘܢ ܐܶܢܶܝܢ ܠܘܳܬ ܗܰܘܢܳܐ ܛܳܐܶܢ ܒܰܐܪܥܳܐ܆ ܡܶܛܽܠ ܕܳܐܦ ܢܳܡܽܘܣܳܐ ܪܽܘܚܳܢܳܝܰܐ ܗ̱ܘ ܠܪ̈ܽܘܚܳܢܳܝܶܐ܆ ܘܒܳܗ̇ ܒܰܕܡܽܘܬܳܐ ܐܳܦ ܗܳܢܽܘܢ ܕܰܒܙܰܒܢܳܐ ܗܰܘ ܐܶܬܢܰܒܺܝܘ܆ ܐܰ݀ܝܬܶܐ ܕܢܺܐܡܰܪ ܒܕܽܘܟܬܳܐ ܗܳܕܶܐ ܕܰܢܒܺܝܽܘܬܳܐ ܕܣܺܝܡܳܐ ܩܕܳܡܰܝܢ܆ ܗܰܘ ܡܳܐ ܕܶܐܬܳܐ ܠܡܰܚܫܰܒܬܰܢ.

ܟܰܕ ܠܚܶܙܘܳܐ ܗܰܘ ܕܰܚܙܳܐ ܐܶܫܰܥܝܳܐ ܡܶܛܽܠ ܡܶܨܪܶܝܢ܆ ܐܳܦ ܗܽܘ ܐܶܬܶܐܪܰܙ ܘܳܐܦ ܠܰܢ ܟܬܰܒ܆ ܩܰܕܶܡ ܐܶܡܰܪ ܐܳܦ ܡܰܚܰܬܬܶܗ ܕܠܳܗ̇ ܕܡܳܪܰܢ ܘܰܐ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܟܰܕ ܥܕܰܟܺܝܠ ܫܰܒܪܳܐ ܗܘ̣ܳܐ ܒܰܒܣܰܪ܆ ܟܰܕ ܗܳܕܶܐ ܒܚܶܠܡܳܐ ܐܶܬܦܩܰܕ ܝܰܘܣܶܦ ܘܰܫܡܰܥ ܡܶܢ ܡܰܠܰܐܟܳܐ܆ ܕܒܰܪ ܠܛܰܠܝܳܐ ܘܠܶܐܡܶܗ ܘܰܥܪܽܘܩ ܠܡܶܨܪܶܝܢ܆ ܘܰܗܘܺܝ ܬܰܡܳܢ ܥܕܰܡܳܐ ܕܺܐ݀ܡܰܪ ܠܳܟ܆ ܥܬܺܝܕ ܗ̱ܘ̣ ܓܶܝܪ ܗܶܪܽܘܕܺܝܤ ܠܡܶܒܥܝܶܗ ܠܛܰܠܝܳܐ ܐܰܝܟ ܕܢܰܘܒܕܺܝܘܗ̱ܝ^[6]. ܘܡܶܟܺܝܠ ܒܺܐܝܕܳܐ ܒܺܐܝܕܳܐ ܒܶܗ ܒܚܶܙܘܳܐ ܢܳܦܶܩ ܒܡܶܠܬܶܗ ܗܽܘ ܢܒܺܝܳܐ܆ ܕܕܰܟܡܳܐ ܛܳܒ̈ܳܬܳܐ ܗܘ̣ܳܬ ܥܶܠܬܳܐ ܡܰܚܰܬܬ̣ܶܗ ܕܦܳܪܽܘܩܰܢ ܠܡܶܨܪܶܝܢ܆ ܡܰܠܽܘܢ ܕܶܝܢ ܡܰܚܰܬܬ̣ܶܗ ܕܡܶܢ ܫܡܰܝܳܐ ܠܟܽܠܳܗ̇ ܐܰܪܥܳܐ܆ ܗܺܝ ܓܶܝܪ ܟܰܕ ܗܺܝ ܐܺܝܬܶܝܗ̇܆ ܡܶܨܪܶܝܢ ܟܺܝܬ ܠܡܺܐܡܰܪ܆ ܘܟܽܠܳܗ̇ ܐܰܪܥܳܐ. ܥܝܳܕܰܐ ܗ̄ܘ ܓܶܝܪ ܠܰܟܬܳܒܳܐ ܐܰ‌ܠܳܗܳܝܳܐ܆ ܕܒܰܙܒܰܢ ܡܰܢ ܠܡܶܨܪܶܝܢ܆ ܒܰܙܒܰܢ ܕܶܝܢ ܐ̱ܚܪܺܝܢ ܠܒܳܒܶܠ܆ ܕܝܰܬܺܝܪ ܐܺܝܬܰܝܗܶܝܢ ܗ̱ܘܰܝ̈ ܕܳܚ̈ܠܳܬ ܠܫ̈ܺܐܕܶܐ܆ ܢܦܰܚܡܺܝܗ̇ ܘܰܒܫܶܡܗܶܝܢ ܕܗܳܢܶܝܢ ܢܶܩܪܶܝܗ̇܆ ܠܥܺܕܬܳܐ ܗܳܝ ܕܰܡܟܰܢܫܳܐ ܡܶܢ ܥܰܡ̱ܡ̈ܶܐ ܗܳܢܽܘܢ ܕܠܳܐ ܐܰ‌ܠܳܗ ܘܰܕܣܰܒܪܳܐ ܠܰܝܬ ܗ̱ܘܳܐ ܠܗܽܘܢ܆ ܐܰܝܟܰܢܳܐ ܕܦܰܘܠܽܘܤ ܐܳܡܰܪ^[7].

ܗܳܝ ܗܳܟܺܝܠ ܕܰܢܚܶܬ ܦܳܪܽܘܩܰܢ ܐܳܦ ܠܡܶܨܪܶܝܢ ܐܳܦ ܠܟܽܠܳܗ̇ ܐܰܪܥܳܐ܆ ܐܰܙܺܝܥܰܬ̣ ܘܰܐܢܺܝܕܰܬ̣ ܠܰܥ̈ܒܺܝܕܰܝ ܒܺܐܝ̈ܕܰܝܳܐ ܕܡܶܨܪܶܝܢ ܗܳܢܰܘ ܕܶܝܢ ܠܕܶܚ̈ܠܳܬܳܐ ܫ̈ܺܐܕܳܢܳܝܳܬܳܐ܆ ܘܰܠܩܳܝ̈ܡܳܬܳܐ ܕܠܳܐ ܢܰܦܫܳܐ ܕܰܦܬܰܟܪ̈ܶܐ^[8]. ܠܰܥ̈ܠܰܘܳܬܳܐ ܘܰܠܗܳܠܶܝܢ ܐ̱ܚܪ̈ܳܢܝܳܬܳܐ܆ ܗܳܢܶܝܢ ܕܺܐܝ̈ܕܰܝܳܐ ܕܰܒܢܰܝ̈ܢܳܫܳܐ ܥܒ̈ܰܕܝ̱ ܐܶܢܶܝܢ. ܘܰܐܫܺܝܛܘ ܘܨܰܥܰܪܘ ܡܶܨܪ̈ܳܝܶܐ ܘܟܽܠܗܽܘܢ ܕܳܚ̈ܠܰܝ ܠܫ̈ܺܐܕܶܐ ܠܛܳܥܝܽܘܬܳܐ ܕܺܝܠܗܽܘܢ ܩܰܕܡܳܝܬܳܐ܆ ܘܶܐܙܕܟܺܝܘ ܒܰܫܪܳܪܳܐ ܕܶܐܘܰܢܓܶܠܺܝܽܘܢ. ܘܶܐܫܬܰܥܒܰܕܘ ܗܳܢܽܘܢ ܕܺܐܝܬܰܝܗܽܘܢ ܗ̱ܘܰܘ ܥܰܣ̈ܩܶܐ ܐܰܝܟ ܦܶܪܥܽܘܢ ܘܥܶܨ̈ܝ̣ܳܝ̣ܶܐ ܘܠܳܐ ܡܶܬܬܦܺܝ̈ܣܳܢܶܐ^[9]܆ ܘܩܳܡ ܢܳܡܽܘܣܳܐ ܗܰܘ ܐܶܘܰܢܓܶܠܳܝܳܐ ܥܰܠ ܢܳܡܽܘܣܳܐ ܗܰܘ ܐܰܒܳܗܳܝܳܐ܆ ܘܰܙܟܳܝܗ̱ܝ ܘܚܰܣܢܶܗ ܒܽܐܘܚܕܳܢܳܐ. ܫܬܰܩ̈ܶܝܢ ܡܰܢ ܓܶܝܪ ܬܶܕܡܪ̈ܽܘܢܝܳܬܳܐ ܕܰܓ̈ܳܠܳܬܳܐ ܗܳܢܶܝܢ ܕܩܳܨܽܘܡܽܘܬܳܐ܆ ܐܶܬܓܰܚܟܰܬ̣ ܕܶܝܢ ܡܢܰܚܫܳܢܽܘܬܳܐ ܗܳܝ ܕܰܒܦܳܪ̈ܚܳܬܳܐ ܘܰܒܗܳܠܶܝܢ ܐ̱ܚܪ̈ܳܢܝܳܬܳܐ ܕܫܪܟܳܐ. ܫܽܘܥܺܝܬܳܐ ܣܪܺܝܩܬܳܐ ܐܶܣܬܒܰܪܘ ܙܰܘ̈ܥܶܐ ܗܳܢܽܘܢ ܕܙܳܟܽܘܪ̈ܶܐ ܘܕܰܡܡܰܠ̈ܠܰܝ ܡܶܢ ܟܰܪܣܳܐ ܐܰܘ ܙܡܳܡ̈ܶܐ܆ ܘܟܽܠܗܶܝܢ ܐܰܝܠܶܝܢ ܕܰܠܗܳܠܶܝܢ ܕܳܡ̈ܝܳܢ ܒܛܳܥܝܽܘܬܳܐ.

ܘܟܰܕ ܩܳܪܒܺܝܢ ܗ̱ܘܰܘ ܠܰܩܕܳܡܰܝܗܽܘܢ܆ ܘܰܠܫܽܘܘܫܳܛܳܐ ܘܬܰܪܒܺܝܬܳܐ ܕܰܡܝܰܬܪܽܘܬܳܐ ܐܳܬܶܝܢ ܗ̱ܘܰܘ܆ ܩܳܝܡܺܝܢ ܗ̱ܘܰܘ ܐܓܘܦ̈ܛܝܐ ܥܰܠ ‌ܐܓܘܦ̈ܛܝܐ܆ ܘܡܰܩܪܶܒ ܗ̱ܘܳܐ ܓܰܒܪܳܐ ܥܰܡ ܐܰܚܽܘܗ̱ܝ^[10]. ܙܳܕܶܩ ܓܶܝܪ ܕܰܢܣܺܝܡ ܗܳܪܟܳܐ ܠܘܳܬ ܗܳܠܶܝܢ ܒܗܶܝܢ ܒܡ̈ܶܠܶܐ܆ ܠܰܒ̈ܢܳܬ ܩ̈ܳܠܶܐ ܗܳܠܶܝܢ ܕܰܢܒܺܝܳܐ. ܥܶܠܬܳܐ ܕܶܝܢ ܕܺܝܠܶܗ ܕܰܩܪܳܒܳܐ ܐܺܝܬܶܝܗ̇ ܗ̱ܘܳܬ܆ ܕܶܚܠܰܬ ܐܰ‌ܠܳܗܳܐ ܗܳܝ ܕܒܰܡܫܺܝܚܳܐ ܗܘ̣ܳܬ܆ ܕܩܰܕܡܰܬ̣ ܡܰܢ ܐܶܬܐܰܡܪܰܬ̣ ܡܶܢܶܗ ܒܶܐܘܰܢܓܶܠܺܝܽܘܢ܆ ܡܰܠܝܰܬ ܕܶܝܢ ܗܳܠܶܝܢ ܕܩܰܕܶܡ̈ܶܝܢ ܐܶܬܬܰܙܥܰܩ̈ܶܝܢ ܡܶܢ ܐܶܫܰܥܝܳܐ. ܐܘ ܓܶܝܪ ܠܰܘ ܗܳܠܶܝܢ ܐܺܝܬܰܝܗܶܝܢ ܗ̱ܘܰܝ̈܆ ܗܳܢܶܝܢ ܕܩܳܕܶܡ ܗ̱ܘܳܐ ܐܳܡܰܪ ܡܶܛܽܠ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ ܕܰܢܗܰܝܡܢܽܘܢ ܒܶܗ܆ ܢܰܫܠܶܡ ܕܶܝܢ ܐܰܚܳܐ ܠܰܐܚܽܘܗ̱ܝ ܠܡܰܘܬܳܐ ܘܰܐܒܳܐ ܠܰܒܪܶܗ܆ ܘܰܢܩܽܘܡܽܘܢ ܒܢܰܝ̈ܳܐ ܥܰܠ ‌ܐܰܒܳܗ̈ܶܐ ܘܰܢܡܺܝܬܽܘܢ ܐܶܢܽܘܢ^[11].

ܟܰܕ ܗܳܠܶܝܢ ܗܳܟܺܝܠ ܘܕܰܐܝܟ ܗܳܠܶܝܢ ܢܦܰܩ ܒܡܶܠܬܶܗ ܘܶܐܡܰܪ ܒܺܐܝܕܳܐ ܒܺܐܝܕܳܐ ܗܽܘ ܢܒܺܝܳܐ܆ ܡܶܛܽܠ ܚܽܘܠܳܦܳܐ ܗܰܘ ܬܡܺܝܗܳܐ܆ ܘܡܶܛܽܠ ܫܽܘܚܠܳܦܳܐ ܗܰܘ ܕܰܠܘܳܬ ܗܳܝ ܕܰܡܝܰܬܪܳܐ܆ ܐܳܬܶܐ ܐܳܦ ܠܘܳܬ ܗܳܝ ܕܰܢܚܰܘܶܐ ܘܢܶܕܢܰܚ ܩܕܳܡ ܟܽܠܢܳܫ܆ ܠܪܺܝܫܳܝܽܘܬܗܽܘܢ ܘܡܰܨܠܚܳܢܽܘܬܗܽܘܢ ܣܰܓܺܝܐܬܳܐ ܕܐܓܘܦ̈ܛܝܐ܆ ܕܰܒܚܰܝ̈ܶܐ ܐܶܘܰܢܓ̈ܶܠܳܝܶܐ ܘܦܝܠܘܣܘܦܳܝ̈ܶܐ ܕܕܰܝܪܳܝܽܘܬܳܐ. ܘܳܐܡܰܪ܆ ܕܰܒܝܰܘܡܳܐ ܗܰܘ ܢܶܗܘ̈ܝܳܢ ܚܰܡܶܫ ܡܕܺܝܢ̱ܬܳܐ ܒܐܓܘܦܛܘܤ܆ ܕܰܡܡܰܠ̈ܠܳܢ ܒܠܶܫܳܢܳܐ ܗܰܘ ܟܢܰܥܢܳܝܳܐ^[12].

ܠܗܳܠܶܝܢ ܕܶܝܢ ܚܰܡܶܫ ܡܕܺܝܢ̱ܬܳܐ܆ ܘܠܳܐ ܡܶܕܡ ܐ̱ܚܪܺܢܳܐ ܙܳܕܶܩ ܠܡܶܣܬܰܟܳܠܽܘ ܕܺܐܝܬܰܝܗܶܝܢ܆ ܐܶܠܳܐ ܐܶܢ ܪ̈ܶܓܫܶܐ ܕܺܝܠܰܢ ܗܳܠܶܝܢ ܚܰܡܫܳܐ܆ ܚܙܳܬܳܐ܆ ܫܶܡܥܳܐ܆ ܣܳܘܩܳܐ܆ ܛܥܳܡܬܳܐ܆ ܓܶܫܬܳܐ܆ ܗܳܠܶܝܢ ܟܺܝܬ ܕܰܡܕܺܝܢ̱ܬܳܐ ܐܺܝܬܰܝܗܽܘܢ܆ ܐܶܡܰܬܝ ܕܰܐܝܟ ܢܳܡܽܘܣ̈ܶܐ ܕܰܐ‌ܠܳܗܳܐ ܡܶܬܬܙܺܝܥܺܝܢ܆ ܘܡܰܥܒܪܺܝܢ ܗܳܠܶܝܢ ܕܢܳܡܽܘܣ̈ܝܢ. ܕܺܝܠܳܝܬܳܐ ܓܶܝܪ ܕܰܡܕܺܝܢ̱ܬܳܐ ܗܳܕܶܐ ܐܺܝܬܶܝܗ̇܆ ܗܳܝ ܕܫܰܦܺܝܪ ܬܶܬܕܰܒܰܪ ܒܢܳܡܽܘܣ̈ܶܐ. ܐܳܦ ܓܶܝܪ ܡܶܢ ܕܽܘܒܳܪܳܐ܆ ܘܡܶܢ ܗܽܘܦܳܟܳܐ ܗܰܘ ܕܣܰܓܺܝ ܐܺܝܬܰܘܗ̱ܝ ܢܳܡܽܘܣܳܝܳܐ ܕܗܳܢܽܘܢ ܕܥܳܡܪܺܝܢ ܒܳܗ̇ ܐܰܡܺܝܪܳܐ ܡܕܺܝܢ̱ܬܳܐ. ܒܰܕܓܽܘܢ ܟܰܕ ܡܶܕܶܡ ܕܰܠܒܰܪ ܡܶܢ ܢܳܡܽܘܣܳܐ ܐܺܝܬܰܘܗ̱ܝ ܗܳܘܶܐ ܒܳܗ̇܆ ܥܝܳܕܰܐ ܗ̱ܘ ܠܰܢ ܠܡܺܐܡܰܪ܆ ܕܗܳܕܶܐ ܠܳܐ ܐܺܝܬܶܝܗ̇ ܡܕܺܝܢ̱ܬܳܐ.

ܡܶܬܕܰܒܪܳܐ ܗܳܟܺܝܠ ܚܙܳܬܳܐ ܐܰܝܟ ܢܳܡܽܘܣܳܐ ܒܰܕܡܽܘܬ ܡܕܺܝܢ̱ܬܳܐ܆ ܘܰܡܡ̣ܰܠܠܳܐ ܒܠܶܫܳܢܳܐ ܗܰܘ ܟܢܰܥܢܳܝܳܐ܆ ܗܳܢܰܘ ܕܶܝܢ ܒܗܰܘ ܕܰܡܢܳܬܶܗ ܕܰܐ‌ܠܳܗܳܐ܆ ܡܢܳܬܶܗ ܓܶܝܪ ܕܰܐ‌ܠܳܗܳܐ ܐܺܝܬܶܝܗ̇ ܐܰܪܥܳܐ ܗܳܝ ܕܡܽܘܠܟܳܢܳܐ ܐܰܝܟܰܢܳܐ ܕܳܐܡܪܺܝܢ ܟܬܳܒ̈ܶܐ ܢܦܺܝ̈ܚܰܝ ܡܶܢ ܐܰ‌ܠܳܗܳܐ܆ ܘܝܰܬܺܝܪܳܐܺܝܬ ܡܶܛܽܠ ܗܳܝ ܕܒܳܗ̇ ܐܶܫܬܰܡܠܺܝ ܐ̱ܪܳܙܳܐ ܗܰܘ ܕܡܶܬܒܰܪܢܫܳܢܽܘܬܶܗ ܕܰܐ‌ܠܳܗܳܐ ܡܶܠܬܳܐ܆ ܐܶܡܰܬܝ ܕܠܳܐ ܚܳܙܝܳܐ ܠܰܐܢ̱ܬܬܳܐ ܠܰܘ ܗܳܝ ܕܬܶܪܓܺܝܗ̇^[13]܆ ܐܶܠܳܐ ܢܳܩܦܳܐ ܠܗܰܘܢܳܐ ܪܺܝܫܳܢܳܐ ܕܰܡܦܰܓܶܕ ܘܬܳܟܶܤ ܠܶܗ ܠܚܰܘܪܳܐ܆ ܘܪܳܕܶܐ ܘܡܰܠܶܦ ܫܰܦܺܝܪ ܗܳܠܶܝܢ ܕܙܳܕܶܩ ܠܡܶܚܙܳܐ. ܟܕ ܕܶܝܢ ܚܳܝܪܳܐ ܘܚܳܙܝܳܐ ܫܪܺܝܚܳܐܺܝܬ ܘܝܰܥܢܳܐܺܝܬ ܘܰܒܪܶܚܡܰܬ ܗܰܢܺܝܽܐܘܬܳܐ܆ ܟܰܕ ܪܰܥܝܳܐ ܒܫܽܘܦܪ̈ܶܐ ܗܳܢܽܘܢ ܕܡܶܬܚܰܒܠܺܝܢ ܘܕܳܝܒܺܝܢ܆ ܒܠܶܫܳܢܳܐ ܡܶܨܪܳܝܳܐ ܡܡ̣ܰܠܠܳܐ ܘܠܰܘ ܒܗܰܘ ܟܢܰܥܢܳܝܳܐ.

ܐܳܦ ܡܰܫܡܰܥܬܳܐ ܕܶܝܢ ܗܽܘ ܗܳܟܘܳܬ ܟܰܕ ܡܶܬܬܦܺܝܣܳܐ ܠܦܽܘܩ̈ܕܳܢܶܐ܆ ܘܳܐܡܪܳܐ ܒܰܕܡܽܘܬ ܫܡܘܐܝܠ ܠܘܳܬ ܐܰ‌ܠܳܗܳܐ܆ ܡܰܠܶܠ ܡܳܪܝܳܐ ܡܶܛܽܠ ܕܫܳܡܰܥ ܥܰܒܕܳܟ^[14]܆ ܡܕܺܝܢ̱ܬܳܐ ܕܰܐ‌ܠܳܗܳܐ ܐܺܝܬܶܝܗ̇܆ ܘܰܒܠܶܫܳܢܳܐ ܗܰܘ ܟܢܰܥܢܳܝܳܐ ܡܡ̣ܰܠܠܳܐ. ܟܰܕ ܕܶܝܢ ܥܳܒܪܳܐ ܠܦܽܘܩܕܳܢܳܐ ܗܰܘ ܕܢܳܡܽܘܣܳܐ ܗܰܘ ܕܦܳܩܶܕ ܘܳܐܡܰܪ܆ ܠܳܐ ܬܩܰܒܶܠ ܫܶܡܥܳܐ ܣܪܺܝܩܳܐ^[15]܆ ܒܰܪܒܪܳܐܺܝܬ ܡܰܠܥܙܳܐ ܐܰܝܟ ܐܓܘܦ̈ܛܝܐ܆ ܘܰܡܡ̣ܰܠܠܳܐ ܡܶܕܶܡ ܝܰܩܺܝܪܳܐ ܘܠܳܐ ܗܰܢܺܝܐܐ ܘܰܕܕܳܡܶܐ ܠܰܙܡܳܡܳܐ܆ ܘܠܰܘ ܒܠܶܫܳܢܳܐ ܗܰܘ ܟܢܰܥܢܳܝܳܐ.

ܐܳܦ ܡܪܺܝܚܳܢܽܘܬܳܐ ܕܶܝܢ ܟܰܕ ܠܳܐ ܡܶܬܪܰܦܝܳܐ ܘܡܶܬܢܰܩܒܬܳܐ܆ ܘܡܰܗܦܟܳܐ ܐܰܦܶܝ̈ܗ̇ ܡܶܢ ܐܰܫܺܝܕܽܘܬܳܐ ܕܟܽܠ ܪ̈ܺܝܚܳܢܺܝܢ܆ ܘܰܠܓܰܒܪܳܢܳܝܽܘܬܳܐ ܘܚܺܝܨܽܘܬܳܐ ܡܶܢ ܟܽܠ ܕܽܘܟ ܘܡܶܢ ܟܽܠ ܡܶܕܶܡ ܡܟܰܢܫܳܐ܆ ܘܗ̱ܝ ܕܰܠܩܽܘܒܠܳܐ ܡܶܛܽܠ ܗܳܕܶܐ ܡܶܫܟܚܳܐ ܠܡܺܐܡܰܪ ܠܰܐܠܳܗܳܐ܆ ܬܶܬܩܰܢ ܨܠܽܘܬܝ ܐܰܝܟ ܥܶܛܪܳܐ ܩܕܳܡܰܝܟ^[16]܆ ܟܢܰܥܢܳܝܬܳܐ ܐܺܝܬܶܝܗ̇. ܐܓܘܦܛܐܺܝܬ ܕܶܝܢ ܬܽܘܒ ܡܶܬܕܰܒܪܳܐ܆ ܟܰܕ ܡܳܫܚܳܐ ܡܶܫ̈ܚܳܢܶܐ ܒܰܣܺܝ̈ܡܶܐ ܗܳܠܶܝܢ ܪ̈ܺܝܫܳܝܶܐ ܘܩܰܕܡܳܝ̈ܶܐ^[17] ܐܰܝܟܰܢܳܐ ܕܰܒܕܽܘܟ ܐܳܡܰܪ ܢܒܺܝܳܐ ܥܰܡܽܘܤ.

ܐܳܦ ܛܥܳܡܬܳܐ ܕܶܝܢ ܒܳܗ̇ ܒܰܕܡܽܘܬܳܐ܆ ܟܰܕ ܐܶܬܝܰܠܦܰܬ ܫܰܦܺܝܪ ܡܶܢ ܦܰܘܠܽܘܤ ܕܬܺܐܡܰܪ܆ ܝܶܠܦܶܬ ܕܰܒܗܳܠܶܝܢ ܕܺܐܝܬܰܝ ܒܗܶܝܢ ܕܣܳܦܩܳܐ ܗܺܝ ܠܳܗ̇ ܐܶ݀ܗܘܶܐ ܐܺܝܬܰܝ܆ ܒܟܽܠ ܡܶܕܶܡ ܘܰܒܟܠܗܶܝܢ ܡܕܰܪܫܳܐ ܐ̱ܢܳܐ܆ ܘܳܐܦ ܠܡܶܣܒܰܥ ܘܳܐܦ ܠܡܶܟܦܰܢ܆ ܘܳܐܦ ܕܢܶܚܣܰܪ ܠܺܝ ܘܳܐܦ ܕܢܶܬܝܰܬܰܪ ܠܺܝ^[18]܆ ܢܳܡܽܘܣܳܝ̈ܳܬܳܐ ܘܕܺܝ̈ܠܳܢܳܝܳܬܳܐ ܕܠܶܫܳܢܳܐ ܟܢܰܥܢܳܝܳܐ ܡܡ̣ܰܠܠܳܐ. ܟܰܕ ܕܶܝܢ ܐܰܝܟ ܗܳܢܽܘܢ ܕܰܠܟܰܪܣܳܐ ܡܥܰܒܕܕܺܝܢ ܗ̱ܘܰܘ ܐܳܡܪܳܐ^[19]܆ ܗܳܢܽܘܢ ܕܡܶܢ ܡܶܨܪܶܝܢ ܡܰܢ ܢܦܰܩܘ܆ ܒܡܶܨܪܶܝܢ ܕܶܝܢ ܐܺܝܬܰܝܗܽܘܢ ܗ̱ܘܰܘ ܒܬܰܪܥܺܝܬܗܽܘܢ ܘܠܳܐ ܫܰܒܩܽܘܗ̇܆ ܘܡܶܛܽܠ ܗܳܕܶܐ ܐܳܡܪܺܝܢ ܗ̱ܘܰܘ܆ ܡܰܢܽܘ ܢܰܘܟܶܠ ܠܰܢ ܒܶܣܪܳܐ܆ ܐܶܬܕܟܪܢ ܓܶܝܪ ܠܢܽܘ̈ܢܶܐ ܗܳܢܽܘܢ ܕܳܐܟܠܺܝܢ ܗ̱ܘܰܝܢ ܒܡܶܨܪܶܝܢ ܕܡܰܓܳܢ܆ ܘܰܠܩ̈ܰܛܝܶܐ ܘܰܠܦܰܛܺܝ̈ܚܶܐ܆ ܘܰܠܟܰܪ̈ܳܬ̣ܳܐ ܘܰܠܒ̈ܰܨܠܶܐ ܘܰܠܬܽܘܡܳܐ^[20]܆ ܟܰܕ ܗܳܠܶܝܢ ܕܐܓܘܦ̈ܛܝܐ܆ ܠܰܘ ܡܡ̣ܰܠܠܳܐ ܡܰܠܽܘܢ ܐܶܠܳܐ ܡܓܰܣܝܳܐ܆ ܝܺܕܺܝܥܬܳܐ ܐܺܝܬܶܝܗ̇ ܛܥܳܡܬܳܐ ܕܕܰܐܝܟ ܗܳܕܶܐ܆ ܕܗܺܝ ܡܶܢ ܢܰܦܫܳܗ̇ ܐܺܝܬ ܠܳܗ̇ ܣܰܪܝܽܘܬ ܪܺܝܚܳܐ. ܘܠܰܘ ܡܶܠܬܳܐ ܛܰܥܡܳܢܺܝܬܳܐ ܘܚܰܟܺܝܡܬܳܐ ܘܠܳܐ ܫܰܦܺܝܪܰܬ ܫܽܘܘܕܳܥܳܐ܆ ܘܰܠܟܰܪܣܳܐ ܡܬܰܚܡܳܐ ܐܰ‌ܠܳܗܳܗ̇^[21].

ܘܓܶܫܬܳܐ^[22] ܕܶܝܢ ܐܳܦ ܗܺܝ ܟܰܕ ܠܗܳܝ ܕܢܳܡܽܘܣܳܝܳܐ ܠܳܐ ܥܳܒܪܳܐ܆ ܐܳܡܰܪ ܐ̱ܢܳܐ ܟܺܝܬ ܠܙܽܘܘܳܓܳܐ ܡܝܰܩܪܳܐ ܘܰܠܥܰܪܣܳܐ ܕܟܺܝܬܳ^[23]ܐ܆ ܘܰܡܡܰܠܝܳܐ ܠܡܰܪܬܝܳܢܽܘܬܳܐ ܗܳܝ ܪܳܡܬܳܐ ܕܰܫܠܺܝܚܳܐ ܕܳܐܡܪܳܐ܆ ܛܳܒ ܠܓܰܒܪܳܐ ܕܒܰܐܢ̱ܬܬ̣ܳܐ ܠܳܐ ܢܶܓܫܽܘܦ^[24]܆ ܡܳܪܳܢܳܐܺܝܬ ܘܗܽܘ ܩܢܽܘܡܶܗ ܣܽܘܥܪܳܢܳܐ܆ ܒܠܶܫܳܢܳܐ ܗܰܘ ܟܢܰܥܢܳܝܳܐ ܡܡܰܠ̣ܠܳܐ܆ ܘܰܐܝܟ ܕܶܐܢ ܐ̱ܢܳܫ ܐܰܛܺܝܩܳܐܺܝܬ ܢܡܰܠܶܠ܆ ܘܟܰܕ ܫܰܦܺܝܪܳܐܺܝܬ ܘܪܰܕܝܳܐܺܝܬ ܒܠܶܫܳܢܳܐ ܝܰܘܢܳܝܳܐ ܡܡܰܠܶܠ. ܓܶܫܬܳܐ ܕܶܝܢ ܗܳܝ ܕܓܳܫܦܳܐ ܘܓܳܝܫܳܐ ܒܚܽܘܠܛܳܢܳܐ ܕܰܠܒܰܪ ܡܶܢ ܢܳܡܽܘܣܳܐ܆ ܘܫܳܩܠܳܐ ܠܗܰܕܳܡ̈ܶܐ ܕܰܡܫܺܝܚܳܐ ܘܥܳܒܕܳܐ ܠܗܽܘܢ ܗܰܕܳܡ̈ܶܐ ܕܙܳܢܺܝܬܳܐ܆ ܘܡܶܬܕܰܒܩܳܐ ܘܥܳܒܕܳܐ ܚܰܕ ܦܰܓܪܳܐ ܒܢܶܩܦܳܐ ܠܰܬܪ̈ܰܝܗܽܘܢ^[25]܆ ܟܰܕ ܗܳܠܶܝܢ ܕܐܓܘܦ̈ܛܝܐ ܡܶܬܝܰܩܕܳܐ ܐܰܝܟ ܕܒܶܐܫܳܬ̣ܳܐ ܨܒܳܪܳܐ܆ ܗܳܠܶܝܢ ܕܡܶܢ ܬܰܡܳܢ ܫܳܛܪܳܐ܆ ܘܠܰܘ ܗܳܠܶܝܢ ܕܬܰܩ̈ܢܳܢ ܡܡܰܠ̣ܠܳܐ܆ ܟܰܕ ܕܟܽܠ ܟܽܠܶܗ ܐܺܝܬܶܝܗ̇ ܠܳܐ ܡܰܐܪܰܙܬܳܐ ܘܠܳܐ ܝܰܠܺܝܦܬܳܐ ܕܠܶܫܳܢܳܐ ܟܢܰܥܢܳܝܳܐ.

ܐܶܠܳܐ ܠܗܳܠܶܝܢ ܚܰܡܫܳܐ ܪ̈ܶܓܫܶܐ^[26]܆ ܟܰܕ ܠܢܺܝܪܶܗ ܕܰܡܫܺܝܚܳܐ ܩܰܒܶܠܘ ܐܓܘܦ̈ܛܝܐ܆ ܕܰܒܝܰܕ ܥܰܡ̈ܠܶܐ ܕܰܢܙܺܝܪܽܘܬܳܐ ܪܕܰܘ ܘܰܐ‌ܠ̣ܶܦܘ ܐܶܢܽܘܢ ܕܢܶܣܥܪܽܘܢ ܘܢܶܬܕܰܒܪܽܘܢ܆ ܐܶܘܰܢܓܶܠܳܐܺܝܬ ܘܢܳܡܽܘܣܳܐܺܝܬ܆ ܘܰܒܫܰܦܺܝܪܽܘܬ ܛܶܟܣܳܐ ܘܢܰܟܦܳܐܺܝܬ܆ ܘܰܡܕܺܝܢ̱ܬܳܐ ܕܫܰܦܺܝܪ ܡܶܬܕܰܒܪ̈ܳܢ ܒܢܳܡܽܘܣ̈ܶܐ ܚܰܘܺܝܘ ܐܶܢܽܘܢ܆ ܕܰܡܡܰܠ̈ܠܳܢ ܘܦܽܘܠܝܛܘܣܐܣܬܐ ܥܳܒ̈ܕܳܢ ܒܠܶܫܳܢܳܐ ܗܰܘ ܟܢܰܥܢܳܝܳܐ. ܘܣܰܓܺܝ̈ܶܐܐ ܡܰܢ ܡܶܢ ܐܓܘܦ̈ܛܝܐ܆ ܡܶܢ ܗܳܝ ܓܶܝܪ ܕܣܰܓܺܝ̈ܶܐܐ ܐܺܝܬܶܝܗ̇ ܗܺܝ ܢܒܺܝܽܘܬܳܐ܆ ܟܰܕ ܠܪ̈ܶܓܫܶܐ ܗܳܠܶܝܢ ܕܦܰܓܪܳܐ ܒܕܽܘܥ̈ܬܶܐ ܕܰܡܝܰܬܪܽܘܬܳܐ ܢܰܦܶܩܘ ܘܰܕܪܰܫܘ܆ ܡܕܺܝܢ̱ܬܳܐ ܐܰܝܟ ܙܢܳܐ ܗܰܘ ܕܶܐܬܶܐܡܰܪ ܥܒܰܕܘ ܐܶܢܽܘܢ. ܐ̱ܢܳܫܺܝ̈ܢ ܕܶܝܢ ܕܠ̈ܺܝܠܶܐ܆ ܘܗܳܢܽܘܢ ܕܰܐܝܟ ܪܰܒܳܐ ܐܰܢܛܘܢܝܘܤ ܗܰܘ܆ ܟܰܕ ܝܰܬܺܝܪ ܪܳܡܳܐܺܝܬ ܘܰܡܥܰܠܝܳܐܺܝܬ ܐܶܬܕܰܒܰܪܘ܆ ܥܦܺܝ̈ܦܶܐ ܥܒܰܕܘ ܐܶܢܽܘܢ܆ ܟܰܕ ܣܳܡܘ ܫܽܘܪܳܐ ܘܒܰܪ ܫܽܘܪܳܐ^[27]܆ ܐܰܝܟܰܢܳܐ ܕܳܐܡܰܪ ܐܶܫܰܥܝܳܐ ܒܕܽܘܟܬܳܐ ܐ̱ܚܪܺܬܳܐ.

ܐܳܦ ܓܶܝܪ ܐܺܝܬ ܗ̱ܘ̣܆ ܐܳܦ ܒܢܰܦܫܳܐ ܚܙܳܬܳܐ܆ ܕܠܳܐ ܡܶܬܕܰܒܪܳܐ ܡܶܨܪܳܐܺܝܬ ܘܠܳܐ ܫܳܠܡܳܐ ܠܚܽܘܫܳܒ̈ܶܐ ܫܺܐܕܳܢܳܝ̈ܶܐ܆ ܐܶܠܳܐ ܡܡܰܠ̣ܠܳܐ ܒܠܶܫܳܢܳܐ ܗܰܘ ܟܢܰܥܢܳܝܳܐ܆ ܘܰܡܪܺܝܡܳܐ ܡܰܢ ܠܥܰܝ̈ܢܶܐ ܡܶܬܗܰܘ̈ܢܳܢܝܳܬܳܐ ܠܪܰܘܡܳܐ܆ ܘܰܡܟܰܬܪܳܐ ܘܡܶܬܥܰܢܝܳܐ ܒܣܽܘ̈ܟܳܠܶܐ ܗܳܢܽܘܢ ܫܡܰܝܳܢ̈ܶܐ܆ ܚܕܳܐ ܙܒܰܢ ܕܶܝܢ ܡܶܢ ܟܰܕܽܘ ܐܶܬܬܰܪܨܰܬ ܠܳܗ̇ ܡܶܢ ܡܶܠܬܳܐ ܘܰܒܩܰܢܳܝܽܘܬܳܗ̇ ܕܗܳܕܶܐ ܗܘ̣ܳܬ܆ ܘܰܠܘܳܬ ܗܳܠܶܝܢ ܕܰܠܬܰܚܬ ܐܳܦܠܳܐ ܣܳܟ ܡܶܬܪܰܟܢܳܐ.

ܐܳܦ ܡܰܫܡܰܥܬܳܐ ܕܶܝܢ ܐܺܝܬ ܒܳܗ̇ ܒܰܕܡܽܘܬܳܐ܆ ܕܰܓܙܺܝܪܳܐ ܐܰܝܟ ܡܶܠܬܳܐ ܢܒܺܝ̣ܳܝ̣ܬܳܐ ܒܶܐܕܢ̈ܶܐ ܗܳܠܶܝܢ ܕܡܶܢ ܠܓܰܘ^[28]܆ ܘܰܕܡܶܫܟܚܳܐ ܠܡܶܫܡܰܥ ܠܝܶܫܽܘܥ ܦܳܪܽܘܩܰܢ ܕܳܐܡܰܪ܆ ܕܗܰܘ ܕܺܐܝܬ ܠܶܗ ܐܶܕܢ̈ܶܐ ܕܢܶܫܡܰܥ ܢܶܫܡܰܥ^[29]܆ ܘܰܠܦܰܘܠܽܘܤ ܕܟܳܬܶܒ܆ ܕܶܐܢ ܐ̱ܢܳܫ ܣܳܒܰܪ ܕܰܢܒܺܝܳܐ ܐܺܝܬܰܘܗ̱ܝ ܐܰܘ ܪܽܘܚܳܢܳܝܳܐ܆ ܢܶܫܬܰܘܕܰܥ ܠܗܳܠܶܝܢ ܕܟܳܬܶܒ ܐ̱ܢܳܐ ܠܟܽܘܢ܆ ܕܦܽܘܩ̈ܕܳܢܶܐ ܕܡܳܪܝܳܐ ܐܺܝܬܰܝܗܶܝܢ܆ ܐܶܢ ܕܶܝܢ ܐ̱ܢܳܫ ܠܳܐ ܝܳܕܰܥ ܠܳܐ ܢܶܕܰܥ^[30]. ܠܘܳܬ ܡܰܫܡܰܥܬܳܐ ܗܳܝ ܕܰܒܬܰܪܥܺܝܬܳܐ ܚܳܝܪܳܐ܆ ܐܳܦ ܗܳܝ ܕܶܐܡܰܪ ܐܶܫܰܥܝܳܐ܆ ܟܰܕ ܐܰܪܓܶܫ ܒܢܽܘܗܪܐ ܐܰ‌ܠܳܗܳܝܳܐ ܕܰܐܝܟ ܕܡܶܢ ܚܶܫܽܘܟܳܐ ܕܢܰܚ܆ ܣܳܡܰܢܝ ܒܨܰܦܪܳܐ ܠܡܶܣܬܰܟܳܠܽܘ܆ ܒܨܰܦܪܳܐ ܐܰܘܣܶܦ ܠܺܝ ܐܶܕܢܳܐ ܠܡܶܫܡܰܥ^[31]. ܠܗܳܝ ܓܶܝܪ ܕܢܶܣܬܰܟܰܠ ܡܙܰܘܓܳܐ ܐܶܕܢܳܐ. ܐ̱ܚܪܳܢܝܳܐܺܝܬ ܕܶܝܢ ܬܽܘܒ܆ ܐܳܦ ܠܬܰܘܣܶܦܬܳܐ ܕܶܐܕܢܳܐ܆ ܐܰܝܟܰܢܳܐ ܐ̱ܢܳܫ ܦܰܓܪܳܢܳܐܺܝܬ ܢܶܣܬܰܟܰܠ.

ܒܗܳܢܳܐ ܗܳܟܺܝܠ ܙܢܳܐ܆ ܐܳܦ ܡܪܺܝܚܳܢܽܘܬܳܐ ܐܺܝܬ ܡܶܬܗܰܘܢܳܢܺܝܬܳܐ܆ ܕܟܰܕ ܒܗܳܠܶܝܢ ܕܐܓܘܦ̈ܛܝܐ ܟܳܦܪܳܐ܆ ܡܡܰܠ̣ܠܳܐ ܒܠܶܫܳܢܳܐ ܗܰܘ ܟܢܰܥܢܳܝܳܐ܆ ܘܰܠܪܺܝܚܳܐ ܟܺܝܬ ܪܽܘܚܳܢܳܝܳܐ ܡܩܰܒܠܳܐ܆ ܐܰܝܟܰܢܳܐ ܕܺܐܝܣܚܳܩ ܫܩܰܠ ܪܺܝܚܳܐ ܕܝܰܥܩܽܘܒ ܐܰܝܟ ܕܰܐܝܢܳܐ ܕܫܳܘܶܐ ܠܒܽܘܪܟܬܳܐ ܘܶܐܡܰܪ܆ ܗܳܐ ܪܺܝܚܳܐ ܕܒܶܪܝ ܐܰܝܟ ܪܺܝܚܳܐ ܕܚܰܩܠܳܐ ܡܠܺܝܬܳܐ ܗܳܝ ܕܒܰܪܟܳܗ̇ ܡܳܪܝܳܐ^[32]܆ ܘܰܐܝܟ ܢܰܦ̈ܫܳܬܳܐ ܗܳܠܶܝܢ ܥܠܰܝ̈ܡܳܬܳܐ܆ ܗܳܠܶܝܢ ܕܰܒܬܶܫܒ̈ܚܳܬ ܬܶܫܒ̈ܚܳܬܳܐ ܠܘܳܬ ܚܰܬܢܳܐ ܡܫܺܝܚܳܐ ܐܳܡܪ̈ܳܢ܆ ܒܳܬܪܳܟ ܠܪܺܝܚܳܐ ܕܒܶܣ̈ܡܳܢܶܐ ܕܺܝܠܳܟ ܢܶܪܗܰܛ^[33].

ܕܰܛܥܳܡܬܳܐ ܕܶܝܢ ܕܗܰܘܢܳܐ܆ ܕܰܡܡܰܠܠܳܐ ܒܠܶܫܳܢܳܐ ܗܰܘ ܟܢܰܥܢܳܝܳܐ܆ ܡܚܰܘܝܳܢܽܘܬܳܐ ܕܣܰܓܺܝ ܓܠܰܝܳܐ ܘܢܰܗܺܝܪܳܐ܆ ܚܰܙܩܺܝܐܝܠ ܗܰܘ ܢܒܺܝܳܐ ܝܰܗ̱ܒ ܠܰܢ܆ ܟܰܕ ܐܶܬܦܩܰܕ ܕܢܶܒܠܰܥ ܠܪܺܝܫܳܐ ܗܰܘ ܕܰܟܬܳܒܳܐ܆ ܘܶܐܟܰܠ ܘܶܐܡܰܪ܆ ܘܰܗܘ̣ܳܐ ܒܦܽܘܡܝ ܐܰܝܟ ܕܶܒܫܳܐ ܚܰܠܝܳܐ^[34]. ܗܳܟܰܢܳܐ ܛܳܥܶܡ܆ ܘܳܐܦ ܗܰܘ^[35] ܕܒܺܝܕܰܥܬܳܐ ܛܳܥܶܡ ܠܠܰܚܡܳܐ ܗܰܘ ܚܰܝܳܐ܆ ܗܰܘ ܕܡܶܢ ܫܡܰܝܳܐ ܢܚܶܬ^[36].

ܐܺܝܬ ܕܶܝܢ ܐܳܦ ܓܶܫܬܳܐ ܡܶܕܶܡ ܡܶܬܗܰܘܢܳܢܺܝܬܳܐ܆ ܕܶܐܣܬܰܗܕܰܬ ܡܶܢ ܦܳܪܽܘܩܰܢ ܡܫܺܝܚܳܐ܆ ܕܡܶܢ ܟܶܢܫܳܐ ܡܶܬܚܒܰܨ ܗ̱ܘܳܐ ܘܡܶܙܕܪܶܒ ܗܳܝܕܶܝܢ܆ ܒܰܚܕܳܐ ܕܶܝܢ ܐܰܢ̱ܬܬܳܐ ܕܓܳܫܬܶܗ ܡܰܪܓܶܫ ܗ̱ܘܳܐ܆ ܗܳܝ ܕܰܟܪܺܝܗܳܐ ܗ̱ܘܳܬ ܡܰܪܕܺܝܬܳܐ ܕܰܕܡܳܐ܆ ܘܶܐܡܰܪ ܕܐ̱ܢܳܫ ܓܫܰܦ ܒܺܝ܆ ܐܶܢܳܐ ܓܶܝܪ ܝܶܕܥܶܬ ܠܚܰܝܠܳܐ ܕܰܢܦܰܩ ܡܶܢܝ^[37].

ܗܳܢܽܘܢ ܕܰܠܗܳܠܶܝܢ ܚܰܡܶܫ ܡܕܺܝܢ̱ܬܳܐ ܥܳܦܶܝܢ^[38]܆ ܘܰܒܒܰܪܢܳܫܳܐ ܗܰܘ ܕܰܠܒܰܪ ܘܗܰܘ ܕܰܠܓܰܘ܆ ܢܳܡܽܘܣܳܐܺܝܬ ܚܳܙܶܝܢ ܘܫܳܡܥܺܝܢ܆ ܘܰܡܪܺܝܚܺܝܢ ܘܛܳܥܡܺܝܢ ܘܓܳܝܫܺܝܢ܆ ܡܙܰܡܪܺܝܢ ܒܟܶܢܳܪܳܐ ܕܰܥܣܰܪ ܡܶܢܺܝ̈ܢ ܠܰܐܠܳܗܳܐ^[39] ܐܰܝܟܰܢܳܐ ܕܳܐܡܰܪ ܢܒܺܝܳܐ ܕܰܘܺܝܕ܆ ܘܫܳܡܰܥ ܟܽܠ ܚܰܕ ܠܒܰܪ̱ܬ ܩܳܠܳܐ ܗܳܝ ܒܝܰܘܡܳܐ ܗܰܘ ܕܕܺܝܢܳܐ܆ ܗܳܝ ܕܩܰܕܶܡ ܐܶܡܰܪ ܡܳܪܰܢ ܒܶܐܘܰܢܓ̈ܶܠܺܝܰܐ܆ ܗܘܺܝ ܕܺܐܝܬ ܠܳܟ ܫܽܘܠܛܳܢܳܐ ܥܰܠ ܥܣܰܪ ܡܕܺܝ̈ܢܳܢ^[40]. ܐܰܝܟ ܗܰܘ ܕܳܐܡܰܪ ܗ̱ܘܳܐ܆ ܕܰܐܢ̱ܬ ܕܰܠܗܳܠܶܝܢ ܬܰܪܬܶܝܢ ܙܰܒ̈ܢܺܝܢ ܚܰܡܶܫ ܕܪ̈ܶܓܫܶܐ܆ ܡܕܺܝܢ̱ܬܳܐ ܥܒܰܕܬ ܕܡܶܬܕܰܒܪ̈ܳܢ ܒܫܰܦܺܝܪܽܘܬ ܢܳܡܽܘܣ̈ܶܐ ܕܪܽܘܚܳܐ܆ ܘܳܐܦ ܠܰܡܡܰܠܳܠܽܘ ܐܰ‌ܠ̣ܶܦܬ ܐܶܢܶܝܢ ܒܠܶܫܳܢܳܐ ܗܰܘ ܟܢܰܥܢܳܝܳܐ܆ ܒܺܐܝܩܳܪܳܐ ܕܠܳܚܶܡ ܐܶܬܒܰܣܡ. ܐܰܝܟ ܐܰܝܢܳܐ ܕܥܰܠ ܥܣܰܪ ܡܕܺܝܢ̱ܬܳܐ ܗܘ̣ܰܝܬ ܪܺܝܫܳܐ܆ ܐܳܦ ܕܰܥܣܰܪ ܡܕܺܝܢ̱ܬܳܐ ܩܢܺܝ ܫܽܘܠܛܳܢܳܐ. ܗܳܢܰܘ ܕܶܝܢ܆ ܐܺܝܩܳܪܳܐ ܘܰܐܟܣܝܽܘܡܳܐ. ܐܳܦ ܓܶܝܪ ܡܶܢ ܥܝܳܕܳܐ ܗܰܘ ܕܰܠܘܳܬܰܢ܆ ܡܚܰܘܶܐ ܠܺܐܝܩܳܪ̈ܶܐ ܗܳܢܽܘܢ ܠܳܐ ܡܶܬܡܰܠ̈ܠܳܢܶܐ܆ ܕܬܶܫܒܽܘܚܬܳܐ ܗܳܝ ܕܰܥܬܺܝܕܳܐ ܘܰܡܛܰܝܒܳܐ ܠܗܳܢܽܘܢ ܕܫܰܦܺܝܪ ܐܶܬܕܰܒܰܪܘ. ܠܗܳܝ ܕܶܝܢ ܬܽܘܒ ܡܢܳܬܳܐ ܕܛܶܟܣܳܐ ܗܰܘ ܬܪܰܝܳܢܳܐ ܡܰܝܬܝܳܐ܆ ܘܰܠܗܳܠܶܝܢ ܚܰܡܶܫ ܡܕܝ̈ܢܳܬܳܐ ܕܡܶܢ ܠܒܰܪ ܒܰܠܚܽܘܕ ܪܕܳܬ ܘܰܐ‌ܠܦܰܬ܆ ܕܰܚܠܳܦ ܠܶܫܳܢܳܐ ܗܰܘ ܕܐܓܘܦ̈ܛܝܐ ܗܰܘ ܟܢܰܥܢܳܝܳܐ ܢܚܰܠ̈ܦܳܢ ܢܶܣ̈ܒܳܢ܆ ܗܰܘ ܕܰܝܳܢܳܐ ܘܣܳܐܶܡ ܐܰܓܽܘ̈ܢܶܐ ܢܺܐܡܰܪ܆ ܐܳܦ ܐܰܢ̱ܬ ܗܘܺܝ ܥܰܠ ܚܰܡܶܫ ܡܕܺܝ̈ܢܳܢ^[41].

ܐܶܠܳܐ ܗܳܢܽܘܢ ܐܓܘܦ̈ܛܝܐ ܐܳܡܰܪ܆ ܗܳܢܽܘܢ ܕܰܥܠܰܝܗܽܘܢ ܗ̱ܝ ܡܶܠܬܳܐ܆ ܐܰܘ ܠܗܳܠܶܝܢ ܡܕܺܝܢ̱ܬܳܐ ܕܰܚܕܳܐ ܙܒܰܢ ܚܰܡܶܫ܆ ܐܰܘ ܠܗܳܠܶܝܢ ܕܬܰܪܬܶܝܢ ܙܰܒ̈ܢܺܝܢ ܚܰܡܶܫ ܡܶܣ̈ܬܰܟܠܳܢ܆ ܠܰܘ ܒܰܠܚܽܘܕ ܠܰܡܡܰܠܳܠܽܘ ܒܠܶܫܳܢܳܐ ܗܰܘ ܟܢܰܥܢܳܝܳܐ ܐܰ‌ܠ̣ܶܦܘ܆ ܐܶܠܳܐ ܐܳܦ ܠܡܺܐܡܳܐ ܒܰܫܡܶܗ ܕܡܳܪܝܳܐ ܨܒܰܐܘܽܬ. ܗܳܝ ܕܶܝܢ ܕܡܰܘ̈ܡܳܬܳܐ܆ ܡܰܘܕܥܳܐ ܡܰܢ ܐܰܝܟ ܣܽܘܟܳܠܳܐ ܗܰܘ ܛܰܝܳܦܳܐ ܘܰܕܡܶܢ ܠܒܰܪ܆ ܕܰܡܫܰܢܝܽܘܬܳܐ ܐܰܘܟܺܝܬ ܡܰܥܒܰܪܬܳܐ ܗܳܝ ܕܰܠܘܳܬ ܕܶܚܠܰܬ ܐܰ‌ܠܳܗܳܐ ܡܶܢ ܛܳܥܝܽܘܬܳܐ ܗܳܝ ܕܳܚܠܰܬ ܠܫ̈ܺܐܕܶܐ܆ ܐܰܝܟ ܕܰܒܡܰܘ̈ܡܳܬܳܐ ܥܳܒܕܳܐ ܠܳܗ̇ ܠܕܶܚܠܬܳܐ ܘܰܠܣܶܓܕܬܳܐ. ܪܳܡܙܳܐ ܕܶܝܢ ܝܰܬܺܝܪ ܫܰܪܺܝܪܳܐܺܝܬ܆ ܠܕܺܝܢܳܐ ܩܒܺܝܥܳܐ ܘܠܳܐ ܡܶܫܬܰܚܠܦܳܢܳܐ ܘܠܳܐ ܡܶܙܕܰܥܙܥܳܢܳܐ܆ ܕܗܳܢܽܘܢ ܕܰܗܦܰܟܘ ܘܚܰܠܶܦܘ ܠܗܳܝ ܕܡܶܨܪܳܐܺܝܬ ܢܡܰܠܠܽܘܢ܆ ܒܗܳܝ ܕܰܒܠܶܫܢܳܐ ܟܢܰܥܢܳܝܳܐ ܢܡܰܠܠܽܘܢ܆ ܐܰܝܟ ܢܒܺܝܳܐ ܗܰܘ ܕܰܡܙܰܡܰܪ ܘܰܠܕܽܘܒܳܪܳܐ ܗܰܘ ܕܰܟܝܳܐ ܕܡܶܢ ܡܽܘܡܳܐ ܪܳܫܶܡ ܘܳܐܡܰܪ܆ ܝܺܡܺܝܬ̣ ܘܰܐܩܺܝܡܶܬ ܕܶܐ݀ܛܰܪ ܕܺܝ̈ܢܶܐ ܕܙܰܕܝܩܽܘܬܳܟ^[42].

ܡܰܘܕܰܥ ܕܶܝܢ ܐܳܦ ܫܠܺܝܚܳܐ ܟܰܕ ܠܥܶܒܪ̈ܳܝܶܐ ܟܳܬܶܒ܆ ܕܶܐܣܟܺܡܳܐ ܕܡܰܘ̈ܡܳܬܳܐ ܡܶܛܽܠ ܠܳܐ ܥܒܽܘܪܝܳܐ ܘܫܽܘܪܳܪܳܐ ܡܶܬܢܣܶܒ. ܗܰܘ ܕܒܺܐܝܕܰܘ̈ܗ̱ܝ ܐܳܦ ܐܰ‌ܠܳܗܳܐ ܟܬܺܝܒ ܕܺܝܡ̣ܳܐ. ܐܳܡܰܪ ܕܶܝܢ ܗܳܟܰܢܳܐ ܗܳܝ ܕܒܳܗ̇ ܟܰܕ ܝܰܬܺܝܪܳܐܺܝܬ ܨܳܒܶܐ ܗ̱ܘܳܐ ܐܰ‌ܠܳܗܳܐ܆ ܕܰܢܚܰܘܶܐ ܗ̱ܘܳܐ ܠܝܳܪ̈ܬܰܘܗ̱ܝ ܕܡܽܘܠܟܳܢܳܐ ܠܳܐ ܡܶܫܬܰܚܠܦܳܢܽܘܬܳܐ ܕܡܰܚܫܰܒܬܶܗ܆ ܥܒܰܕ ܡܰܘ̈ܡܳܬܳܐ ܒܰܡܨܰܥܬܳܐ^[43]. ܒܩܰܢܳܝܽܘܬܳܐ ܡܶܕܶܡ ܩܒܺܝܥܬܳܐ ܕܠܶܫܳܢܳܐ ܟܢܰܥܢܳܝܳܐ ܗ̣ܘ̈ܰܝ ܗܳܠܶܝܢ ܚܰܡܶܫ ܡܕܺܝܢ̱ܬܳܐ ܕܐܓܘܦ̈ܛܝܐ܆ ܐܰܝܟܰܢܳܐ ܕܰܚܠܳܦ ܒܰܪ̱ܬ ܩܳܠܳܐ ܗܳܝ ܐܰܒܳܗܳܝܬܳܐ܆ ܢܶܗܘܶܐ ܒܗܶܝܢ ܗܽܘ ܝܽܘܠܦܳܢܳܐ. ܠܗܳܝ ܟܺܝܬ ܕܗܽܘ ܥܝܳܕܳܐ ܝܰܬܺܝܪܳܐܺܝܬ ܡܰܘܕܰܥ ܠܳܗ̇ ܗܳܫܳܐ܆ ܐܰܘ ܫܽܘܪܳܪܳܐ ܗܰܘ ܕܡܰܘ̈ܡܳܬܳܐ.

ܕܡܶܛܽܠ ܡܳܢܳܐ ܕܶܝܢ ܗܽܘ ܢܒܺܝܳܐ ܐܶܡܰܪ܆ ܕܢܶܗܘ̈ܝܳܢ ܚܰܡܶܫ ܡܕܺܝܢ̱ܬܳܐ ܒܐܓܘܦܛܘܤ ܕܰܡ̈ܡܰܠܠܳܢ ܒܠܶܫܳܢܳܐ ܟܢܰܥܢܳܝܳܐ^[44]܆ ܘܠܰܘ ܒܗܰܘ ܝܺܗܽܘܕܳܝܳܐ ܡܰܠܽܘܢ܆ ܐܰܘ ܒܥܶܒܪܳܝܳܐ ܘܺܐܝܣܰܪܠܳܝܳܐ܆ ܠܰܒܥܳܬܳܐ ܫܳܘܝܳܐ. ܥܰܡܳܐ ܓܶܝܪ ܗܰܘ ܕܰܟܢܰܥܢܳܝ̈ܶܐ܆ ܚܰܕ ܐܺܝܬܰܘܗ̱ܝ ܡܶܢ ܥܰܡ̱ܡ̈ܶܐ ܗܳܢܽܘܢ ܠܺܝ̈ܛܶܐ ܕܩܰܕܶܡܘ̱ ܐܰܚܕܽܘܗ̇ ܗ̱ܘܰܘ ܠܰܐܪܥܳܐ ܗܳܝ ܕܡܽܘܠܟܳܢܳܐ. ܐܶܠܳܐ ܐܳܦ ܠܐ̱ܪܳܙܳܐ ܗܰܘ ܕܒܰܫܡܳܐ ܗܳܢܳܐ ܟܣܶܐ ܗ̱ܘܳܐ܆ ܟܰܕ ܩܰܕܶܡ ܚܙܳܝܗ̱ܝ ܐܶܫܰܥܝܳܐ܆ ܡܰܠܽܘܢ ܕܶܝܢ ܪܽܘܚܳܐ ܗܰܘ ܕܒܶܗ ܡܡܰܠܶܠ ܗ̱ܘܳܐ܆ ܩܰܕܶܡ ܐܰܡܪܶܗ. ܡܫܺܝܚܳܐ ܓܶܝܪ ܡܶܠܬܶܗ ܕܰܐ‌ܠܳܗܳܐ ܗܰܘ ܕܶܐܬܒܰܪܢܰܫ ܡܶܛܽܠܳܬܰܢ܆ ܟܰܕ ܠܟܽܠܗܶܝܢ ܒܚܶܟܡܬܳܐ ܡܕܰܒܰܪ ܗ̱ܘܳܐ܆ ܘܰܠܚܰܣܺܝܪܽܘܬ ܗܰܘܢܳܐ ܘܡܰܪܳܚܽܘܬܳܐ ܕܝܽܗ̱ܘ̈ܕܳܝܶܐ ܒܳܠܶܡ ܗ̱ܘܳܐ܆ ܘܳܐܦܠܳܐ ܚܕܳܐ ܥܶܠܬܳܐ ܓܽܘܡܕܳܢܝܬܳܐ ܝܳܗܶܒ ܗ̱ܘܳܐ ܠܗܽܘܢ ܕܰܠܒܽܘܟܝܳܐ܆ ܐܶܡܰܬܝ ܕܟܰܕ ܠܬܰܠܡܺܝܕܰܘ̈ܗ̱ܝ ܫܠܺܝ̈ܚܶܐ ܫܰܡܰܗ܆ ܘܰܠܡܰܟܪܳܙܽܘ ܫܰܕܰܪ ܐܶܢܽܘܢ ܐܳܡܰܪ ܗ̱ܘܳܐ܆ ܒܽܐܘܪܚܳܐ ܕܥܰܡ̱ܡ̈ܶܐ ܠܳܐ ܬܺܐܙܽܠ̱ܘܢ ܘܠܰܡܕܺܝܢ̱ܬܳܐ ܕܫܳܡܪ̈ܳܝܶܐ ܠܳܐ ܬܶܥܠܽܘܢ. ܙܶܠܘ ܕܶܝܢ ܡܰܠܽܘܢ܆ ܠܘܳܬ ܥܶܪ̈ܒܶܐ ܗܳܢܽܘܢ ܕܰܐܒܺܝܕܺܝܢ ܡܶܢ ܒܰܝܬܳܐ ܕܺܐܝܣܪܳܐܶܝܠ^[45]. ܐܶ‌ܠܽܘ ܓܶܝܪ ܠܰܘ ܗܳܕܶܐ ܐܶܡܰܪ ܘܰܣܥܰܪ܆ ܐܳܦ ܗܽܘ ܟܺܝܬ ܘܳܐܦ ܬܰܠܡܺܝܕܰܘ̈ܗ̱ܝ܆ ܘܰܒܛܶܟܣܳܐ ܩܰܕܡܳܝܳܐ ܥܠܰܝܗܽܘܢ ܩܳܡܘ ܘܣܰܒܰܪܘ̱܆ ܥܬܺܝܕܺܝܢ ܗ̱ܘܰܘ ܕܢܺܐܡܪܽܘܢ ܗܳܢܽܘܢ ܛܳܠܽܘܡ̈ܶܐ܆ ܘܰܕܡܶܬܚܪܶܝܢ ܠܽܘܩܒܰܠ ܦܽܘܡܶܗ ܕܡܳܪܝܳܐ ܐܰܝܟ ܗܳܝ ܕܰܟܬܺܝܒܳܐ܆ ܘܕܰܒܟܽܠ ܙܒܰܢ ܠܽܘܩܒܰܠ ܪܽܘܚܳܐ ܩܰܕܺܝܫܳܐ ܡܶܬܚܪܶܝܢ ܘܩܳܝܡܺܝܢ ܣܰܩܽܘܒܠܳܐܺܝܬ^[46]܆ ܕܰܢܒܺܝ̈ܶܐ ܨܶܐܕܰܝܢ ܐܶܫܬܰܕܰܪܘ܆ ܘܰܠܘܳܬܰܢ ܡܶܬܢܰܒܶܝܢ ܗ̱ܘܰܘ. ܗܳܢܳܐ ܕܶܝܢ ܐܶ‌ܠܽܘ ܠܘܳܬܰܢ ܡܫܰܕܰܪ ܗ̱ܘܳܐ܆ ܠܘܳܬ ܥܰܡ̱ܡ̈ܶܐ ܢܽܘܟܪ̈ܳܝܶܐ ܠܳܐ ܐܳܙܶܠ ܗ̱ܘܳܐ܆ ܟܰܕ ܫܳܒܶܩ ܠܰܒ̈ܢܰܝ ܥܰܡܶܗ.

ܟܰܕ ܗܳܟܺܝܠ ܒܗܳܢܳܐ ܙܢܳܐ ܕܶܐܬܶܐܡܰܪ ܡܕܰܒܰܪ ܗ̱ܘܳܐ ܠܗܽܘܢ ܗܰܘ ܐܳܣܝܳܐ ܚܰܟܺܝܡܳܐ ܘܡܰܠܦܳܢܳܐ܆ ܘܰܐܝܟ ܕܡܶܢ ܨܶܐܕܰܘܗ̱ܝ ܩܳܕܶܡ ܗ̱ܘܳܐ ܦܳܣܶܩ ܠܥܶܠ̈ܠܳܬܳܐ ܕܟܽܘܪ̈ܗܳܢܰܝܗܽܘܢ܆ ܕܳܒܰܪ ܓܶܝܪ ܒܰܩܛܺܝܪܳܐ ܘܠܳܐ ܣܳܟ ܠܫܰܠܺܝܛܽܘܬ ܒܝܳܬܳܐ ܕܢܰܦܫܳܐ܆ ܠܗܽܘܢ ܡܰܠܶܦ ܗ̱ܘܳܐ. ܠܗܽܘܢ ܡܰܐܣܶܐ ܗ̱ܘܳܐ. ܠܘܳܬܗܽܘܢ ܐܺܝܬܰܘܗ̱ܝ ܗ̱ܘܳܐ. ܘܰܒܪܰܡ ܡܨܰܚܶܝܢ ܗ̱ܘܰܘ. ܡܓܰܕܦܺܝܢ ܗ̱ܘܰܘ. ܪܳܕܦܺܝܢ ܗ̱ܘܰܘ. ܘܟܰܕ ܗܳܠܶܝܢ ܕܳܐܣܝܽܘܬܳܐ ܗܳܝ ܡܕܰܒܪܳܢܺܝܬܳܐ܆ ܡܶܢ ܟܽܠܶܗ ܡܰܦܰܩ ܒܪܽܘܚܳܐ ܓܳܠ̈ܙܳܢ ܗ̱ܘܰܝ̈ ܠܗܽܘܢ܆ ܟܰܕ ܠܳܐ ܡܶܬܰܐܣܝܳܢܳܐܺܝܬ ܘܠܳܐ ܡܗܰܝܡܢܳܐܺܝܬ ܣܺܝܡܺܝܢ ܗ̱ܘܰܘ ܡܶܟܺܝܠ܆ ܩܶܪܒܰܬ ܠܘܳܬܶܗ ܐܰܢ̱ܬܬܳܐ ܐ̱ܢܳܫ ܟܢܰܥܢܳܝܬܳܐ ܕܡܰܠ̣ܝܳܐ ܗ̱ܘܳܬ ܗܰܝܡܳܢܽܘܬܳܐ܆ ܘܰܐܚܺܝܕܳܐ ܗ̱ܘܳܬ ܛܽܘܦܣܳܐ ܕܥܺܕܬܳܐ ܗܳܝ ܕܶܐܬܩܰܪܝܰܬ ܡܶܢ ܥܰܡ̱ܡ̈ܶܐ ܗܳܢܽܘܢ ܕܣܰܓܺܝ ܐܺܝܬܰܝܗܽܘܢ ܗ̱ܘܰܘ ܕܳܚ̈ܠܰܝ ܠܫ̈ܺܐܕܶܐ܆ ܘܡܶܬܟܰܫܦܳܐ ܗ̱ܘܳܬ ܕܒܰܪܬܳܗ̇ ܕܡܶܬܕܰܝܘܢܳܐ ܗ̱ܘܳܬ ܠܚܽܘܠܡܳܢܳܐ ܬܶܫܬܘܶܐ. ܟܰܕ ܒܰܪܬܳܐ ܡܶܣܬܰܟܠܳܐ܆ ܐܳܦ ܢܰܦܫܳܐ ܕܟܽܠܚܰܕ ܡܶܢ ܠܳܐ ܡܗܰܝܡ̈ܢܶܐ ܗܳܢܽܘܢ ܕܡܶܢ ܩܕܺܝܡ܆ ܗܳܝ ܕܡܶܬܕܰܝܘܢܳܐ ܗ̱ܘܳܬ ܒܡܰܣܒܪ̈ܳܢܘܳܬܳܐ ܕܰܓ̈ܳܠܳܬܳܐ ܕܡܶܛܽܠ ‌ܐܰ‌ܠܳܗܳܐ܆ ܘܰܒܚܰܫ̈ܶܐ ܫܟܺܝܪ̈ܶܐ ܘܰܢܕܺܝ̈ܕܶܐ. ܗܳܝ ܕܡܶܛܽܠܳܬܳܗ̇ ܗܰܘ ܕܪܽܘܚܳܢܳܐܺܝܬ ܙܳܡܰܪ ܐܰܟܚܕܳܐ ܘܡܶܬܢܰܒܶܐ܆ ܡܨܰܠܶܐ ܟܰܕ ܐܳܡܰܪ܆ ܦܰܨܳܐ ܡܶܢ ܚܰܪܒܳܐ ܠܢܰܦܫܳܐ ܕܺܝܠܝ܆ ܘܡܶܢ ܐܺܝܕܐ ܕܟܰܠܒܳܐ ܠܺܝܚܺܝܕܳܝܬܳܐ ܕܺܝܠܝ. ܘܬܽܘܒ. ܐܰܗܦܶܟ ܢܰܦܫܝ ܡܶܢ ܒܺܝܫܽܘܬܳܐ ܕܺܝܠܗܽܘܢ. ܘܡܶܢ ܐܰܪ̈ܝܰܘܳܬܳܐ ܠܺܝܚܺܝܕܳܝܬܳܐ ܕܺܝܠܝ^[47].

ܡܳܢܳܐ ܗܳܟܺܝܠ ܡܳܪܰܢ. ܟܰܕ ܒܳܚܰܪ ܗ̱ܘܳܐ ܐܰܝܟ ܕܰܒܟܽܘܪܳܐ ܠܗܰܝܡܳܢܽܘܬܳܗ̇܆ ܠܳܐ ܡܦܰܢܶܐ ܗ̱ܘܳܐ ܦܶܬܓܳܡܳܐ. ܘܗ̱ܝ ܝܰܬܺܝܪܳܐܺܝܬ ܐܰܚܺܝܕܳܐ ܗ̱ܘܳܬ ܒܬܰܟܫܶܦܬܳܐ. ܐܳܙܳܠܐ ܗ̱ܘܳܬ ܒܳܬܪܶܗ. ܪܳܗܛܳܐ ܗ̱ܘܳܬ ܩܕܳܡܰܘ̈ܗ̱ܝ. ܩܳܥܝܳܐ ܗ̱ܘܳܬ^[48]. ܠܚܰܪܬܳܐ ܠܒܰܝܬܳܐ ܥ̣ܰܠ ‌ܐܰܝܟܰܢܳܐ ܕܟܳܬܶܒ ܡܰܪܩܽܘܤ. ܘܟܰܕ ܕܢܶܬܛܰܫܶܐ ܨܳܒܶܐ ܗ̱ܘܳܐ^[49]܆ ܡܰܠܙܳܐ ܗ̱ܘܳܬ ܘܬܳܟܒܳܐ ܥܠܰܘܗ̱ܝ. ܘܰܦܫܺܝܛܳܐܺܝܬ ܒܝܰܕ ܟܽܠܗܶܝܢ ܫܳܐܠܳܐ ܗ̱ܘܳܬ. ܒܝܰܕ ܐܳܣܟܺܡܳܐ. ܒܝܰܕ ܗܠܰܟܬܳܐ. ܒܝܰܕ ܩܳܠܳܐ. ܡܰܠܽܘܢ ܕܶܝܢ ܟܽܠܗܶܝܢ ܗܳܠܶܝܢ ܐܺܝܬܰܝܗܶܝܢ ܗ̱ܘܰܝ̈ ܠܳܗ̇܆ ܕܰܡܫܰܡ̈ܫܳܢ ܗ̱ܘܰܝ̈ ܠܢܰܦܫܳܐ ܗܳܝ ܡܫܰܠܗܰܒܬܳܐ ܘܝܳܩܽܘܕܬܳܐ܆ ܗܳܝ ܕܒܺܐܝ̈ܕܶܝܗ̇ ܠܘܳܬ ܣܢܺܐܓܪܽܘܬܳܐ ܢܶܓܕܰܬ ܐܶܢܽܘܢ܆ ܐܳܦ ܠܗܽܘܢ ܠܬܰܠ̈ܡܺܝܕܶܐ ܕܰܡܫܺܝܚܳܐ. ܗܳܢܽܘܢ ܟܺܝܬ ܕܳܐܦ ܐܶܡܰܪܘ ܠܶܗ ܒܽܐܘܪܚܳܐ܆ ܫܪܺܝܗ̇ ܕܩܳܥܝܳܐ ܒܳܬܰܪܢ².

ܐܶܠܳܐ ܟܰܕ ܐܳܦ ܗܳܫܳܐ ܒܳܗ̇ ܟܰܕ ܒܳܗ̇ ܒܰܡܕܰܒܪܳܢܽܘܬܳܐ ܠܘܳܬ ܝܽܗ̱ܘ̈ܕܳܝܶܐ ܐܰܚܺܝܕ ܗ̱ܘܳܐ܆ ܘܣܳܟܰܪ ܗ̱ܘܳܐ ܠܦܽܘܡܗܽܘܢ ܗܰܘ ܪܳܚܶܡ ܥܶܕܠܴ̈ܝܶܐ ܐܳܡܰܪ܆ ܠܳܐ ܐܶܫܬܰܕܪܶܬ ܐܶܠܳܐ ܐܶܢ ܠܘܳܬ ܥܶܪ̈ܒܶܐ ܗܳܢܽܘܢ ܕܰܐܒܺܝܕܺܝܢ ܡܶܢ ܒܰܝܬܳܐ ܕܺܐܝܣܪܝܠ^[50]. ܘܟܰܕ ܛܳܒ ܠܰܘ ܠܘܳܬܗܽܘܢ ܒܰܠܚܽܘܕܰܝܗܽܘܢ ܡܫܰܕܰܪ ܗ̱ܘܳܐ܆ ܐܶܠܳܐ ܐܳܦ ܠܘܳܬ ܟܽܠܶܗ ܓܶܢܣܳܐ ܐ̱ܢܳܫܳܝܳܐ. ܐܶܠܳܐ ܠܘܳܬܗܽܘܢ ܒܛܶܟܣܳܐ ܩܰܕܡܳܝܳܐ. ܗܳܟܰܢܳܐ ܓܶܝܪ ܐܳܦ ܦܰܘܠܽܘܤ ܘܒܰܪܢܰܒܰܐ ܟܰܕ ܢܳܩܦܺܝܢ ܠܡܰܠܦܳܢܗܽܘܢ܆ ܠܘܳܬ ܝܽܗ̱ܘ̈ܕܳܝܶܐ ܗܳܢܽܘܢ ܕܒܰܐܢܛܝܘܟܝܰܐ ܗܳܝ ܕܦܺܝܣܺܝܕܝܰܐ ܕܠܳܐ ܡܶܬܬܦܺܝܣܺܝܢ ܗ̱ܘܰܘ ܐܳܡܪܺܝܢ ܗ̱ܘܰܘ܆ ܠܟܽܘܢ ܐܳ‌ܠܨܳܐ ܗ̱ܘܳܬ ܕܬܶܬܡܰܠܰܠ ܩܰܕܡܳܐܺܝܬ ܡܶܠܬܳܐ ܕܰܐ‌ܠܳܗܳܐ. ܡܶܛܽܠ ܕܶܝܢ ܕܕܳܚܶܝܢ ܐܢ̱ܬܽܘܢ ܠܳܗ̇ ܡܶܢܟܽܘܢ܆ ܘܰܕܠܳܐ ܫܳܘܶܝܢ ܐܢ̱ܬܽܘܢ ܠܚܰܝ̈ܶܐ ܕܰܠܥܳܠܰܡ ܕܳܝܢܺܝܢ ܐܢ̱ܬܽܘܢ ܐܢ̱ܬܽܘܢ ܠܟܽܘܢ܆ ܗܳܐ ܡܶܬܦܢܶܝܢ ܚ̱ܢܰܢ ܠܰܢ ܠܘܳܬ ܥܰܡ̱ܡ̈ܶܐ^[51]. ܗܳܟܰܢܳܐ ܓܶܝܪ ܦܩܰܕ ܠܰܢ ܡܳܪܰܢ. ܡܶܛܽܠ ܕܳܐܦ ܗܰܘ ܩܶܢܛܪܽܘܢܳܐ ܠܰܘ ܝܺܗܽܘܕܳܝܳܐ ܐܺܝܬܰܘܗ̱ܝ ܗ̱ܘܳܐ ܐܶܠܳܐ ܡܶܢ ܥܰܡ̱ܡ̈ܶܐ^[52]܆ ܘܗܽܘ ܡܶܢ ܨܶܒܝܳܢܶܗ ܐܶܫܬܰܘܕܺܝ ܠܶܗ ܚܽܘܠܡܳܢܳܐ ܕܛܰܠܝܳܐ ܗܰܘ ܕܰܟܪܺܝܗ ܗ̱ܘܳܐ܆ ܟܰܕ ܠܳܐ ܡܶܕܶܡ ܕܰܐܝܟ ܗܳܢܳܐ ܐܶܡܰܪ.

ܕܡܶܢ ܗܳܪܟܳܐ ܐܳܦ ܠܒܰܪܬܳܗ̇ ܕܗܳܝ ܟܢܰܥܢܳܝܬܳܐ ܕܡܶܬܕܰܝܘܢܳܐ ܗ̱ܘܳܬ܆ ܐܶ‌ܠܽܘ ܐܰܣܝܳܗ̇ ܒܫܶܠܝܳܐ܆ ܘܠܳܐ ܣܽܘܥܪܳܢܳܐ ܘܠܳܐ ܥܶܕܠܳܝܳܐ ܐܺܝܬ ܗ̱ܘܳܐ ܠܶܗ ܘܠܳܐ ܚܰܕ܆ ܟܰܕ ܚܕܳܐ ܙܒܰܢ ܝܽܗ̱ܘ̈ܕܳܝܶܐ ܩܰܕܶܡܘ ܐܶܬܝܰܩܰܪܘ ܗ̱ܘܰܘ܆ ܐܰܝܟܳܐ ܟܺܝܬ ܕܳܐܦ ܠܗܽܘܢ ܐܰܝܟ ܢܳܡܽܘܣܳܐ ܫܰܠܺܝܛ ܗ̱ܘܳܐ ܗܘ ܠܗܽܘܢ ܕܰܠܗܳܢܽܘܢ ܕܡܶܬܩܪܶܝܢ ܗ̱ܘܰܘ ܓܺܝܽܘܪ̈ܶܐ ܢܩܰܒܠܽܘܢ ܗ̱ܘܰܘ ܒܗܽܘܢ܆ ܟܰܕ ܨܳܒܶܝܢ ܗ̱ܘܰܘ ܠܡܶܫܬܰܘܕܳܥܽܘ ܠܰܐܠܳܗܶܗ ܕܢܳܡܽܘܣܳܐ. ܗܳܝ ܕܶܝܢ ܕܡܶܣܬܰܒܪܳܐ ܗ̱ܘܳܬ ܕܡܰܝܬܝܳܐ ܩܛܺܝܓܪܳܢܽܘܬܳܐ ܗܳܝ ܐܺܝܬܶܝܗ̇ ܗ̱ܘܳܬ܆ ܗܳܝ ܕܡܰܠܝܳܐܺܝܬ ܘܡܶܢ ܫܽܘܪ̈ܳܝܶܐ ܘܳܐܦ ܡܶܢܳܗ̇ ܕܪܺܝܫܺܝܬܳܐ܆ ܢܶܪܗܰܛ ܡܰܢ ܢܶܥܒܰܪ ܐܶܢܽܘܢ ܠܝܽܗ̱ܘ̈ܕܳܝܶܐ܆ ܠܘܳܬ ܥܰܡ̱ܡ̈ܶܐ ܕܶܝܢ ܘܰܡܕܺܝܢ̱ܬܳܐ ܐ̱ܚܪ̈ܳܢܝܳܬܳܐ ܒܛܺܝܠܳܐܺܝܬ ܡܶܛܽܠܳܬܶܗ ܕܣܽܘܥܪܳܢܳܐ ܢܺܐܙܰܠ. ܠܗܳܝ ܕܳܐܦ ܛܳܒܳܐܺܝܬ ܢܰܛܪܳܗ̇. ܗܳܟܰܢܳܐ ܟܺܝܬ ܐܳܦ ܠܗܳܝ ܫܳܡܪܳܝܬܳܐ܆ ܘܳܐܦ ܠܗܳܢܽܘܢ ܕܰܢܦܰܩܘ ܠܘܳܬܶܗ ܡܶܢ ܡܕܺܝܢ̱ܬܳܗ̇ ܕܗܳܝ ܐܰܝܟ ܕܰܒܡܰܥܒܰܪܬܳܐ܆ ܐܰ‌ܠ̣ܶܦ ܐܶܢܽܘܢ^[53]܆ ܐܰܝܟ ܡܰܢ ܕܰܐ‌ܠܳܗܳܐ ܘܦܳܪܽܘܩܳܐ ܓܰܘܳܢܳܝܳܐ ܕܟܽܠܢܳܫ ܐܺܝܬܰܘܗ̱ܝ.

ܐܶܠܳܐ ܗܳܝ ܟܺܝܬ ܕܶܐܡܪܶܬ܆ ܟܰܕ ܠܳܐ ܗܰܝܡܳܢܽܘܬܗܽܘܢ ܕܝܽܗ̱ܘ̈ܕܳܝܶܐ ܡܶܟܺܝܠ܆ ܠܰܬܚܽܘܡܳܐ ܐ̱ܚܪܳܝܳܐ ܐܰܬܺܝ̣ܝ̣ܳܐ ܗ̱ܘܳܬ܆ ܨܳܒܶܐ ܗ̱ܘܳܐ ܕܢܶܪܡܶܐ ܥܶܩܳܪ̈ܶܐ ܕܗܰܝܡܳܢܽܘܬܳܐ ܕܥܺܕܬܳܐ ܗܳܝ ܕܡܶܢ ܥܰܡ̱ܡ̈ܶܐ܆ ܗܳܝ ܕܗܺܝ ܡܶܢ ܨܶܒܝܳܢܳܗ̇ ܘܥܰܡ ܫܽܘܠܗܳܒܳܐ ܣܰܓܺܝܳܐܐ ܐܶܬ̣ܳܬ̣ ܠܳܘܬܶܗ܆ ܘܗ̱ܝ ܕܡܶܢ ܦܰܘܠܽܘܤ ܐܶܬܐܰܡܪܰܬ܆ ܢܫܰܚܠܶܦܢܰܥܒܰܪܥܰܠܙܰܝܬܳܐܗܰܘܕܒܰܪܳܐ܆ ܕܰܗܺܝܢܽܘܬܶܗ ܕܗܰܘ ܕܒܰܙܒܰܢ ܐܺܝܬܰܘܗ̱ܝ ܗ̱ܘܳܐ ܙܰܝܬܳܐ ܛܳܒܳܐ^[54]. ܘܰܠܗܳܕܶܐ ܒܛܽܘܦܣܳܐ ܕܰܐܢ̱ܬܬܳܐ ܗܳܝ ܟܢܰܥܢܳܝܬܳܐ ܚܰܘܝܳܗ̇܆ ܗܳܝ ܕܰܐܝܟ ܕܰܒܪܶܡܙܳܐ ܩܳܕܡܳܐ ܗ̱ܘܳܬ ܡܚܰܘܝܳܐ ܘܪܳܫܡܳܐ ܠܥܺܕܬܳܐ. ܘܗܽܘ ܡܶܢ ܨܒܽܘܬ ܢܰܦܫܶܗ ܐܶܡܰܪ܆ ܠܳܐ ܐܶܫܬܰܕܪܶܬ܆ ܐܶܠܳܐ ܐܶܢ ܠܘܳܬ ܥܶܪ̈ܒܶܐ ܗܳܢܽܘܢ ܕܰܐܒܺܝܕܺܝܢ ܡܶܢ ܒܰܝܬܳܐ ܕܺܐܝܣܪܳܐܶܝܠ^[55].

ܘܟܰܕ ܠܚܰܣܺܝܪܽܘܬ ܗܰܘܢܳܐ ܕܰܦܪ̈ܺܝܫܶܐ ܡܰܟܶܤ ܗ̱ܘܳܐ ܕܩܰܕܺܝܡܺܝܢ ܗ̱ܘܰܘ ܟܫܺܝܠܺܝܢ܆ ܘܣܳܒܪܺܝܢ ܗ̱ܘܰܘ ܥܠܰܘܗ̱ܝ ܕܕܽܘܒܳܪܳܐ ܗܰܘ ܕܥܰܡ̱ܡ̈ܶܐ ܡܰܠܶܦ܆ ܡܶܛܽܠ ܕܫܰܡܥܽܘܗ̱ܝ ܕܳܐܡܰܪ ܕܠܰܘ ܗܳܠܶܝܢ ܕܥܳܐܠ̈ܳܢ ܠܦܽܘܡܳܐ ܡܣܰܝ̈ܒܳܢ ܠܶܗ ܠܒܰܪܢܳܫܳܐ^[56]܆ ܘܰܠܗܰܝܡܳܢܽܘܬܳܗ̇ ܕܗܳܝ ܡܚܰܦܶܛ ܗ̱ܘܳܐ܆ ܠܗܳܝ ܕܳܐܦ ܓܰܘܙܠܳܗ̇ ܘܣܰܓܺܝ ܝܰܬܺܝܪܳܐܺܝܬ ܥܰܒܕܳܗ̇ ܓܠܺܝܬܳܐ ܘܝܰܬܺܝܪ ܕܢܺܝܚܬܳܐ܆ ܣܳܓܕܳܐ ܗ̱ܘܳܬ ܓܶܝܪ ܟܰܕ ܡܳܪܝ ܥܰܕܰܪܰܝܢܝ ܐܳܡܪܳܐ ܗ̱ܘܳܬ܆ ܟܽܠܶܗ ܗܳܢܳܐ ܕܶܝܢ܆ ܐܰܝܟ ܡܰܢ ܕܠܰܐܢ̱ܬܬܳܐ ܗܳܝ ܕܦܰܪܨܽܘܦܳܐ ܕܥܺܕܬܳܐ ܗܳܝ ܕܡܶܢ ܥܰܡ̱ܡ̈ܶܐ ܗܳܢܽܘܢ ܕܠܳܐ ܐܰ‌ܠܳܗ ܗܰܝܡܢܰܬ ܐܰܚܺܝܕܳܐ ܗ̱ܘܳܬ ܡܡܰܠܶܠ ܗ̱ܘܳܐ܆ ܬܽܘܒ ܡܶܢ ܡܫܰܪܬܚܽܘܬܳܐ ܣܰܓܺܝܐܬܳܐ ܓܳܪܶܕ ܗ̱ܘܳܐ ܘܚܳܐܶܟ ܗ̱ܘܳܐ ܒܳܗ̇܆ ܟܰܕ ܗܺܝ ܟܰܕ ܗܺܝ ܐܳܡܰܪ ܗ̱ܘܳܐ܆ ܕܠܳܐ ܫܰܦܺܝܪܳܐ ܕܢܶܣܰܒ ܠܰܚܡܳܐ ܕܰܒ̈ܢܰܝܳܐ ܘܢܰܪܡܶܐ ܠܟܰܠ̈ܒܶܐ^[57].

ܘܟܰܕ ܛܳܒ ܗܳܝ ܕܩܰܕܡܶܬ ܐܶܡܪܶܬ܆ ܘܠܳܐ ܡܶܕܶܡ ܕܰܐܝܟ ܗܳܟܰܢܳܐ ܠܘܳܬ ܗܰܘ ܩܶܢܛܪܽܘܢܳܐ ܐܰܘ ܠܘܳܬ ܐ̱ܚܪܺܢܳܐ ܥܰܡܡܳܝܳܐ ܐܰܘܟܺܝܬ ܚܰܢܦܳܐ ܕܗܰܝܡܶܢ ܐܶܡܰܪ. ܘܰܒ̈ܢܰܝܳܐ ܡܰܢ ܠܝܽܗ̱ܘ̈ܕܳܝܶܐ ܩ̣ܪܳܐ. ܟܰܠ̈ܒܽܘܢܶܐ^[58] ܕܶܝܢ ܠܗܳܢܽܘܢ ܕܡܶܢ ܥܰܡ̱ܡ̈ܶܐ ܐ̱ܚܪ̈ܳܢܶܐ. ܘܠܰܚܡܳܐ ܠܡܶܠܬܳܐ ܡܰܠܦܳܢܺܝܬܳܐ܆ ܕܠܰܘ ܒܰܠܚܽܘܕ ܒܡ̈ܶܠܶܐ ܕܚܰܝ̈ܶܐ ܡܶܬܐܰܡܪܳܐ܆ ܐܶܠܳܐ ܐܳܦ ܒܡܰܥܒܕܳܢܽܘܬܳܐ ܕܳܐܬܘ̈ܳܬܳܐ ܡܶܬܚܰܘܝܳܐ. ܠܗܳܠܶܝܢ ܕܶܝܢ ܘܠܳܐ ܡܶܛܽܠ ܡܶܕܶܡ ܐ̱ܚܪܺܝܢ ܡܡܰܠܶܠ ܗ̱ܘܳܐ ܠܘܳܬܳܗ̇܆ ܐܶܠܳܐ ܡܶܛܽܠ ܕܰܒܝܰܕ ܦܽܘܢܳܝ ܦܶܬܓܳܡܳܐ ܕܺܝܠܶܗ܆ ܢܶܥܒܶܕ ܓܠܺܝܬܳܐ ܘܺܝܕܺܝܥܬܳܐ܆ ܕܟܺܐܢܳܐܺܝܬ ܡܶܢ ܝܽܗ̱ܘ̈ܕܳܝܶܐ ܡܰܢ ܗܳܢܽܘܢ ܕܡܶܣܬܰܒܪܺܝܢ ܗ̱ܘܰܘ ܒܢܰܝ̈ܳܐ ܡܶܬܬܪܺܝܡ ܠܰܚܡܳܐ ܗܰܘ ܡܠܺܝܠܳܐ ܘܡܰܚܝܳܢܳܐ܆ ܠܘܳܬ ܟܰܠ̈ܒܽܘܢܶܐ ܕܶܝܢ ܡܫܰܢܶܐ ܥܳܒܰܪ.

ܘܰܚܙܺܝ ܐܰܝܟܰܢܳܐ ܗܺܝ ܐܰܢ̱ܬܬܐ ܟܰܕ ܒܰܫܪܳܪܳܐ ܐܰܝܟ ܟܰܠܒܳܐ ܟܰܦܢܳܐ ܗ̱ܘܳܬ܆ ܚܛܰܦܬܳܗ̇ ܠܡܶܠܬܳܐ ܘܡܶܢܳܗ̇ ܒܰܪܫܳܥܬܶܗ ܐܶܬܬܰܪܣܝܰܬ܆ ܟܰܕ ܩܰܒܶܠܬ̣ܳܗ̇ ܡܰܢ ܥܠܶܝܗ̇ ܠܰܩܪܳܝܬܳܐ ܗܳܝ ܡܨܰܥܰܪܬܳܐ ܘܫܰܪܺܝܪܬܳܐ܆ ܟܰܠܒܳܐ ܓܶܝܪ ܐܺܝܬܶܝܗ̇ ܗ̱ܘܳܬ ܠܰܘ ܚܰܝܽܘܬܳܐ ܕܟܺܝܬܳܐ܆ ܕܰܐܝܟ ܗܳܠܶܝܢ ܓܶܝܪ ܐܺܝܬܰܝܗܽܘܢ ܥܰܡ̱ܡ̈ܶܐ ܗܳܢܽܘܢ ܕܠܳܐ ܐܶܫܬܰܘܕܰܥܘ ܠܰܐܠܳܗܳܐ܆ ܚܳܕܝܳܐܺܝܬ ܕܶܝܢ ܐܶܡܪܰܬ܆ ܐܺܝܢ ܡܳܪܝ܆ ܐܳܦ ܓܶܝܪ ܟܰܠ̈ܒܶܐ ܐܳܟܠܺܝܢ ܡܶܢ ܦܰܪ̈ܟܽܘܟܶܐ ܗܳܢܽܘܢ ܕܢܳܦܠܺܝܢ ܡܶܢ ܦܳܬܽܘܪܳܐ ܕܡܳܪ̈ܰܝܗܽܘܢ^[59]܆ ܘܰܠܛܶܟܣܳܐ ܕܒܪܐ ܡܶܢܫܶܠܝ ܫܶܘܪܰܬ ܥܶܒܪܰܬ܆ ܘܠܰܟܢܽܘܫܬܳܐ ܕܝܽܗ̱ܘ̈ܕܳܝܶܐ ܗܳܝ ܕܒܰܒ̈ܢܰܝܳܐ ܚܫܺܝܒܳܐ ܗ̱ܘܳܬ ܡܶܢ ܩܕܺܝܡ ܐܰܦܩܰܬ.

ܡܳܪܶܗ ܓܶܝܪ ܕܠܰܚܡܳܐ܆ ܒܟܽܠܶܗ ܬܽܘܪܣܳܝܳܐ ܫܰܘܬܦܳܗ̇ ܥܰܬܺܝܪܳܐܺܝܬ ܘܰܫܦܺܝܥܳܐܺܝܬ܆ ܟܰܕ ܠܳܗ̇ ܠܪܶܓܬܳܗ̇ ܥܒܰܕ ܟܰܝܠܳܐ ܕܡܰܘܗܰܒܬܳܐ ܘܶܐܡܰܪ܆ ܐܳܘ ܐܰܢ̱ܬܬܐ܆ ܪܰܒܳܐ ܗܝ ܗܰܝܡܳܢܽܘܬܶܟܝ. ܢܶܗܘܶܐ ܠܶܟܝ ܐܰܝܟܰܢܳܐ ܕܨܳܒܝܳܐ ܐܰܢ̱ܬܝ^[60]. ܐܶܡܰܬܝ ܕܶܝܢ ܟܠܰܒܬܳܐ ܕܰܠܦܰܪ̈ܟܽܘܟܶܐ ܡܶܬܝܰܐܒܳܐ܆ ܠܳܐ ܒܳܥܝܳܐ ܕܳܐܦ ܠܟܽܠܶܗ ܠܰܚܡܳܐ ܬܶܫܬܘܶܐ. ܠܗܰܘ ܟܺܝܬ ܕܳܐܦ ܐܶܫܬܰܘܝܰܬ ܒܰܙܢܰܝ̈ܳܐ ܣܰܓܺܝ̈ܶܐܐ܆ ܟܰܕ ܝܽܗ̱ܘ̈ܕܳܝܶܐ ܐܶܬܢܰܟܪܺܝܘ ܡܶܢܶܗ.

ܩܰܕܡܳܐܺܝܬ ܡܰܢ ܓܶܝܪ ܠܗܰܘ ܫܡܰܝܳܢܳܐ ܐܶܟܠܰܬ̣܆ ܗܰܘ ܕܥܰܠ ܡܰܕܒܚܳܐ ܣܺܝܡ ܩܕܳܡܰܝܢ. ܠܰܘ ܟܰܕ ܡܶܢ ܦܰܪ̈ܟܽܘܟܶܐ ܕܥܰܠ ‌ܐܰܪܥܳܐ ܫܕܶܝܢ ܘܰܡܒܰܕܪܺܝܢ ܡܟܰܢܫܳܐ ܠܶܗ܆ ܐܶܠܳܐ ܟܰܕ ܡܶܬܬܰܪܣܝܳܐ ܡܫܰܪܬܚܳܐܺܝܬ ܡܶܢ ܦܳܬܽܘܪܳܐ ܪܽܘܚܳܢܳܐ ܘܡܰܠܟܳܝܳܐ܆ ܘܡܶܣܬܰܒܥܳܐ ܡܰܠܝܳܐܺܝܬ ܘܒܳܣܡܳܐ܆ ܟܰܕ ܝܽܗ̱ܘ̈ܕܳܝܶܐ ܗܳܢܽܘܢ ܕܡܶܢ ܩܕܺܝܡ ܒܡܰܫܟܢܳܐ ܗܰܘ ܕܒܶܗ ܐܺܝܬ ܗ̱ܘܰܘ ܗܳܢܽܘܢ ܢܳܡܽܘܣܳܝ̈ܶܐ ܫܰܡܶܫܘ܆ ܐܳܦܠܳܐ ܕܢܶܚܙܽܘܢܳܝܗ̱ܝ ܡܶܫܟܚܺܝܢ܆ ܫܒܽܘܩ ܟܺܝܬ ܕܢܶܫܬܰܘܬܦܽܘܢ ܒܶܗ. ܘܣܳܗܶܕ ܦܰܘܠܽܘܤ ܟܰܕ ܗܳܟܰܢܳܐ ܟܬܰܒ ܠܥܶܒܪ̈ܳܝܶܐ. ܐܺܝܬ ܠܰܢ ܡܰܕܒܚܳܐ܆ ܗܰܘ ܕܡܶܢܶܗ ܠܡܶܐܟܰܠ. ܠܳܐ ܐܺܝܬ ܠܗܽܘܢ ܫܽܘܠܛܳܢܳܐ܆ ܠܗܳܢܽܘܢ ܕܰܒܡܰܫܟܢܳܐ ܡܫܰܡܫܺܝܢ^[61].

ܒܳܬܰܪܟܶܢ ܕܶܝܢ ܐܶܟܠܰܬ̣ ܠܰܚܡܳܐ ܕܡܶܠܬܳܐ ܕܚܶܟܡܬܳܐ܆ ܠܰܚܡܳܐ ܕܡܶܠܬܳܐ ܕܺܝܕܰܥܬܳܐ܆ ܘܰܦܫܺܝܛܳܐܺܝܬ ܠܡܺܐܡܰܪ܆ ܗܰܘ ܕܥܰܡ ܫܽܘܟܳܢ̈ܶܐ ܕܪܽܘܚܳܐ ܩܰܕܺܝܫܳܐ ܡܶܣܬܰܟܰܠ ܟܺܝܬ ܐܰܟܚܕܳܐ ܘܡܶܬܦܰܬܰܟ^[62]܆ ܗܳܝ ܟܢܰܥܢܳܝܬܳܐ܆ ܗܳܝ ܟܰܠܒܬܳܐ܆ ܗܳܝ ܕܰܣܢܺܝܩܳܐ ܥܰܠ ܦܰܪ̈ܟܽܘܟܶܐ܆ ܗܳܝ ܕܗܰܝܡܳܢܽܘܬܳܗ̇ ܪܰܒܳܐ܆ ܟܰܕ ܝܽܗ̱ܘ̈ܕܳܝܶܐ ܠܒܰܪ̱ܬ ܩܳܠܳܐ ܗܳܝ ܕܫܰܠܚܰܬ̣ ܐܶܢܽܘܢ ܡܶܢ ܟܽܠܗܶܝܢ ܗܳܠܶܝܢ ܫܡܰܥܘ܆ ܕܬܶܫܬܩܶܠ ܡܶܢܟܽܘܢ ܡܰܠܟܽܘܬܶܗ ܕܰܐ‌ܠܳܗܳܐ܆ ܘܬܶܬܺܝܗܶܒ ܠܥܰܡܳܐ ܕܥܳܒܶܕ ܦܺܐܪ̈ܶܐ ܕܺܝܠܳܗ̇^[63]. ܥܰܠ ܗܰܝܡܳܢܽܘܬܳܐ ܓܶܝܪ ܪܰܒܬܳܐ ܣܢܺܝܩ ܗ̱ܘܳܐ ܐܰܝܟ ܕܒܰܫܪܳܪܳܐ ܐ̱ܪܳܙܳܐ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ܆ ܘܠܰܘ ܥܰܠ ܗܳܝ ܝܺܗܽܘܕܳܝܬܳܐ ܘܰܙܥܽܘܪܬܳܐ. ܡܰܠܟܽܘܬܐ ܕܶܝܢ ܕܰܐ‌ܠܳܗܳܐ ܩܳܪܶܐ܆ ܠܗܳܝ ܕܒܳܗ̇ ܙܳܕܶܩ ܠܶܗ ܠܗܰܘܢܳܐ ܕܢܶܥܒܶܕ ܦܺܐܪܳܐ܆ ܘܰܠܥܽܘܬܪܳܐ ܟܽܠܶܗ ܕܪܽܘܚܳܐ ܗܰܘ ܕܣܺܝܡ ܒܰܟ̈ܬܳܒܶܐ ܐܰ‌ܠܳܗܳܝ̈ܶܐ܆ ܘܰܠܘܳܬ ܟܢܰܥܢܳܝܬܳܐ ܘܥܺܕܬܳܐ ܕܡܶܢ ܥܰܡܡ̈ܶܐ ܫܰܢܺܝ ܥܒܰܪ܆ ܕܗܰܘ ܕܳܐܦ ܦܺܐܪܶܗ ܐܰܝܬܝܰܬ܆ ܒܰܬܠܳܬܺܝܢ ܘܒܶܫܬܺܝܢ ܟܰܝ̈ܠܶܐ ܘܰܒܡܳܐܐ^[64]܆ ܟܰܕ ܝܽܗ̱ܘ̈ܕܳܝܶܐ܆ ܕܠܳܐ ܦܺܐܪ̈ܶܐ ܐܶܬܩܒܰܥܘ ܠܘܳܬ ܟܬܺܝܒܬܳܐ.

ܡܶܛܽܠܗܳܕܶܐ ܐܓܘܦ̈ܛܝܐ ܗܳܢܽܘܢ ܕܡܶܛܽܠܳܬܗܽܘܢ ܗ̱ܝ ܡܶܠܬܳܐ܆ ܗܳܢܽܘܢ ܡܩܰܠ̈ܣܶܐ ܒܫܽܘܚ̈ܠܳܦܶܐ ܡܝܰܬܪ̈ܶܐ܆ ܠܳܐ ܐܰ‌ܠ̣ܶܦܘ ܕܰܒܠܶܫܳܢܳܐ ܗܰܘ ܕܝܽܗ̱ܘ̈ܕܳܝܶܐ ܐܰܘ ܒܗܰܘ ܐܺܝܣܰܪܠܳܝܳܐ ܢܡܰܠ̈ܠܳܢ ܗܳܠܶܝܢ ܚܰܡܶܫ ܡܕܺܝܢ̱ܬܳܐ ܕܺܝܠܗܽܘܢ܆ ܐܶܠܳܐ ܒܠܶܫܳܢܳܐ ܗܰܘ ܟܢܰܥܢܳܝܳܐ. ܩܰܘܺܝܘ ܓܶܝܪ ܟܰܕ ܐܰܒܺܝܕܺܝܢ ܥܶܪ̈ܒܶܐ ܗܳܢܽܘܢ ܕܒܰܝܬܳܐ ܕܺܐܝܣܪܳܐܶܝܠ܆ ܟܰܕ ܐܰܢ̱ܬܬܳܐ^[65] ܗܳܝ ܟܢܰܥܢܳܝܬܳܐ ܫܩܰܠܬ̣ܶܗ ܠܠܰܚܡܳܐ ܕܗܳܝ ܕܰܒܡܰܡܠܠܳܗ̇ ܗܰܘ ܕܰܡܠܶܐ ܗܰܘܢܳܐ ܛܰܢܘ ܐܓܘܦ̈ܛܝܐ܆ ܟܰܕ ܠܚܰܡܫ̈ܳܬܰܝܗܽܘܢ ܪ̈ܶܓܫܶܐ ܕܺܝܠܗܽܘܢ ܐܰ‌ܠ̣ܶܦܘ ܠܰܡܡܰܠܳܠܽܘ ܒܗܳܢܳܐ܆ ܘܶܐܬܕܰܡܺܝܘ ܒܪܶܥܝܳܢܳܐ ܡܰܟܺܝܟܳܐ܆ ܒܪܰܒܽܘܬܳܐ ܕܗܰܝܡܳܢܽܘܬܳܐ܆ ܒܪܶܓܬܳܐ ܕܰܠܘܳܬ ܠܰܚܡܳܐ ܗܰܘ ܕܚܰܝ̈ܶܐ܆ ܒܰܐܝܢܳܐ ܕܗܽܘ ܙܢܳܐ ܗܰܘ ܕܨܳܒܶܐ ܐܰܢ̱ܬ ܕܡܶܣܬܰܟܰܠ܆ ܟܰܕ ܠܟܽܠ ܡܶܕܶܡ ܡܰܢ ܕܺܐܝܬܰܘܗ̱ܝ ܕܡܶܬܚܙܰܘܙܝܳܢܽܘܬܳܐ ܘܕܰܠܘܳܬ ܡܰܣܰܒ ܒܰܐܦ̈ܶܐ ܘܰܡܨܰܕܝܳܢܽܘܬܳܐ ܝܺܗܽܘܕܳܝܬܳܐ ܡܰܝܬܶܐ ܫܳܛܘ܆ ܒܰܕܡܽܘܬ ܕܶܒܽܘܪ̈ܝܳܬܳܐ ܕܶܝܢ ܪ̈ܳܚܡܳܬ ܥܒܳܕܳܐ܆ ܒܟܽܘܪ̈ܶܐ ܗܳܢܽܘܢ ܕܬܰܪܥܺܝܬܳܐ ܠܕܶܒܫܳܐ ܪܽܘܚܳܢܳܐ ܟܰܣܝܳܐܺܝܬ ܦܠܰܚܘ܆ ܘܡܶܢ ܐܰܬܪܳܐ ܡܰܢ ܗܰܘ ܕܝܽܗ̱ܘ̈ܕܳܝܶܐ ܕܚܶܠܘ ܐܰܝܟ ܕܡܶܢ ܐܰܬܪܳܐ ܕܰܐ‌ܠܳܗܳܐ܆ ܒܡܰܡܠܠܳܐ ܕܶܝܢ ܕܺܝܠܗܽܘܢ ܗܰܘ ܕܠܳܐ ܣܳܥܽܘܪܽܘܬܳܐ ܠܳܐ ܛܰܢܘ. ܐܶܡܰܪ ܓܶܝܪ ܐܶܫܰܥܝܳܐ ܒܳܗ̇ ܒܰܢܒܺܝܽܘܬܳܐ܆ ܘܢܶܗܘܶܐ ܐܰܬܪܳܐ ܗܰܘ ܕܝܽܗ̱ܘ̈ܕܳܝܶܐ ܠܐܓܘܦ̈ܛܝܐ܆ ܠܕܶܚܠܬܳܐ^[66]. ܐܰܬܪܳܐ ܕܶܝܢ ܐܳܡܪܺܝܢ ܚ̱ܢܰܢ܆ ܐܶܢ ܟܺܝܬ ܠܗܰܘ ܕܕܽܘܟܬܳܢܳܐܺܝܬ ܡܶܬܚܙܶܐ܆ ܘܶܐܢ ܠܗܰܘ ܕܡܶܬܗܰܘܢܳܢܳܐܺܝܬ ܡܶܣܬܰܟܰܠ. ܗܰܘ ܟܺܝܬ ܕܺܐܝܬܰܘܗ̱ܝ܆ ܕܽܘܒܳܪܳܐ ܫܰܦܺܝܪ ܥܰܠ̈ܠܳܬܳܐ܆ ܘܺܝܕܰܥܬܳܐ ܕܒܰܟ̈ܬܳܒܶܐ ܡܶܬܬܰܝܬܝܳܐ܆ ܕܪ̈ܺܝܫܰܝ ܐܰܒܳܗ̈ܳܬܳܐ ܟܺܝܬ ܘܕܰܢܒܺܝ̈ܶܐ. ܗܳܝ ܕܙܳܕܶܩ ܗ̱ܘܳܐ ܠܡܶܕܚܰܠ ܡܶܢܳܗ̇܆ ܘܰܠܡܶܛܰܢ ܒܳܗ̇. ܡܶܢ ܠܶܫܳܢܳܐ ܕܶܝܢ ܒܰܛܺܝܠܳܐ ܘܕܰܟܦܰܪ ܒܰܡܫܺܝܚܳܐ ܢܰܗܦܶܟ ܐܰܦ̈ܶܐ܆ ܘܢܶܓܒܶܐ ܚܠܳܦܰܘܗ̱ܝ ܗܰܘ ܟܢܰܥܢܳܝܳܐ܆ ܡܰܠܽܘܢ ܕܶܝܢ ܡܰܡܠܠܳܐ ܥܺܕܬܳܢܳܝܳܐ܆ ܗܰܘ ܪܽܘܚܳܢܳܝܳܐ ܘܣܰܟܽܘܠܬܳܢܳܐ.

ܕܗܳܠܶܝܢ ܕܶܝܢ ܚܰܡܫܳܐ ܪ̈ܶܓܫܶܐ ܐܰܘ ܟܺܝܬ ܚܰܡܶܫ ܡܕܺܝܢ̱ܬܳܐ܆ ܚܙܳܬܳܐ ܡܰܫܡܰܥܬܳܐ ܡܪܺܝܚܳܢܽܘܬܳܐ܆ ܛܥܳܡܬܳܐ ܘܓܶܫܬܳܐ܆ ܠܗܳܠܶܝܢ ܕܐܓܘܦ̈ܛܳܝܶܐ ܗܳܢܽܘܢ ܦܳܥ̈ܠܶܐ ܕܰܡܝܰܬܪܽܘܬܳܐ ܒܢܳܡܽܘܣ̈ܶܐ ܐܶܘܰܢܓ̈ܶܠܳܝܶܐ ܡ̇ܕܢܘ^[67] ܐܶܢܶܝܢ܆ ܡܕܺܝܢ̱ܬܳܐ ܐܨܐܕܩ ܬܶܬܩܪܶܐ ܐܳܡܰܪ ܗܳܝ ܚܕܳܐ ܡܕܺܝܢ̱ܬܳܐ. ܗܳܝ ܟܺܝܬ ܕܺܐܝܬܶܝܗ̇ ܐܰܝܟ ܗܳܢܽܘܢ ܫܰܒܥܺܝܢ܆ ܡܕܺܝܢ̱ܬܳܐ ܕܙܰܕܺܝܩܽܘܬܳܐ. ܐܰܝܟ ܕܶܝܢ ܐ̱ܚܪ̈ܳܢܶܐ ܕܰܐ̱ܚܪܳܢܝܳܐܺܝܬ ܐܰܫܠܶܡܘ܆ ܡܕܺܝܢ̱ܬܳܐ ܐܪܐܣ^[68]. ܠܗܳܝ ܕܣܽܘܡܐܟܘܤ܆ ܚܰܕ ܕܶܝܢ ܡܶܢ ܗܳܢܽܘܢ ܕܦܰܫܶܩܘ ܐܺܝܬܰܘܗ̱ܝ ܗܳܢܳܐ܆ ܡܕܺܝܢ̱ܬܳܐ ܕܫܶܡܫܳܐ ܒܠܶܫܳܢܳܐ ܝܰܘܢܳܝܳܐ ܦܰܫܩܳܗ̇.

ܘܢܺܐܡܰܪ ܡܰܢ ܐ̱ܢܳܫ܆ ܕܰܚܙܳܬܳܐ ܗܳܝ ܕܝܰܬܺܝܪ ܡܶܢ ܗܳܠܶܝܢ ܪ̈ܶܓܫܶܐ ܐ̱ܚܪ̈ܳܢܶܐ ܡܶܬܗܰܘ̈ܢܳܢܶܐ܆ ܐܺܝܬܶܝܗ̇ ܝܰܬܺܝܪ ܚܰܪܺܝܦܬܳܐ ܠܘܳܬ ܩܽܘܒܳܠܳܐ ܕܗܳܠܶܝܢ ܐܰ‌ܠܳܗܳܝ̈ܳܬܳܐ܆ ܗܳܝ ܟܺܝܬ ܕܺܐܝܬܶܝܗ̇ ܚܰܝܠܳܐ ܗܰܘ ܚܳܙܽܘܝܳܐ ܘܰܡܦܰܪܫܳܢܳܐ ܕܢܰܦܫܳܐ܆ ܐܺܝܬܶܝܗ̇ ܕܶܐܫܬܰܡܗܰܬ ܡܕܺܝܢܰܬ ܫܶܡܫܳܐ܆ ܟܰܕ ܡܶܬܬܰܨܡܚܳܐ ܒܛܰܝܒܽܘܬܳܐ ܕܡܶܢ ܠܥܶܠ. ܠܺܝ ܕܶܝܢ܆ ܐ̱ܚܪܳܢܝܳܐܺܝܬ ܡܶܣܬܰܒܪܳܐ. ܐܳܦ ܓܶܝܪ ܠܳܐ ܐܶܡܰܪ ܗܽܘ ܢܒܺܝܳܐ܆ ܕܰܚܕܳܐ ܡܶܢܗܶܝܢ ܬܶܬܩܪܶܐ ܡܕܺܝܢ̱ܬܳܐ ܐܨܐܕܩ. ܐܶܠܳܐ ܗܳܟܰܢܳܐ. ܡܕܺܝܢ̱ܬܳܐ ܐܨܐܕܩ ܬܶܬܩܪܶܐ ܗܳܝ ܚܕܳܐ ܡܕܺܝܢ̱ܬܳܐ^[69]. ܐܰܝܟܰܢܳܐ ܟܺܝܬ ܕܗܰܘܢܳܐ ܡܶܕܶܡ ܕܕܰܐܝܟ ܗܳܢܳܐ ܢܶܬܪܡܰܙ܆ ܕܗܳܠܶܝܢ ܚܰܡܶܫ ܡܕܺܝܢ̱ܬܳܐ ܐܰܘ ܟܺܝܬ ܪ̈ܶܓܫܶܐ܆ ܟܰܕ ܫܰܠܡܳܐܺܝܬ ܒܗܽܘܢ ܟܰܕ ܒܗܽܘܢ ܒܢܳܡܽܘܣ̈ܶܐ ܡܶܬܕܰܒܪ̈ܳܢ܆ ܚܕܳܐ ܡܕܺܝܢ̱ܬܳܐ ܕܙܰܕܺܝܩܽܘܬܳܐ ܡܫܰܡ̈ܠܝܳܢ ܠܳܗ̇܆ ܠܢܰܦܫܳܐ ܗܳܝ ܕܰܒܗܳܠܶܝܢ ܡܶܬܢܰܛܪܳܐ ܘܡܶܬܚܰܣܢܳܐ. ܐܰܝܟܰܢܳܐ ܕܗܳܠܶܝܢ ܚܰܡܶܫ ܡܦܰܠܓܳܐܺܝܬ܆ ܚܕܳܐ ܢܶܣܬܰܒܪ̈ܳܢ ܟܢܺܝܫܳܐܺܝܬ.

ܘܳܐܦ ܗܳܝ ܕܶܝܢ ܕܠܳܐ ܐܶܡܰܪ ܚܕܳܐ ܡܕܺܝܢ̱ܬܳܐ܆ ܐܶܠܳܐ ܗܳܝ ܚܕܳܐ ܡܕܺܝܢ̱ܬܳܐ܆ ܒܗܳܝ ܬܰܘܣܶܦܬܳܐ ܙܥܽܘܪܬܳܐ ܕܗܰܘ ܐܰܪܬܪܘܢ܆ ܗܳܢܰܘ ܕܶܝܢ ܕܗܰܘ ܗܳܝ܆ ܫܽܘܘܕܳܥܳܐ ܣܰܓܺܝܳܐܐ ܕܣܽܘܟܳܠܳܐ ܗܳܢܳܐ ܡܚܰܘܝܳܐ. ܘܶܐܢ ܕܶܝܢ ܠܳܐ܆ ܘܟܰܕ ܗܳܠܶܝܢ ܪ̈ܶܓܫܶܐ ܐ̱ܚܪ̈ܳܢܶܐ ܣܳܥܪܺܝܢ ܟܺܐܢ̈ܳܬܳܐ ܘܢܳܡܽܘܣܳܝ̈ܳܬܳܐ܆ ܐܰܝܕܳܐ ܡܶܠܬܳܐ ܐܺܝܬ ܠܳܗ̇܆ ܠܗܳܝ ܕܠܰܘ ܟܽܠ ܚܕܳܐ ܡܶܢܗܶܝܢ܆ ܐܶܠܳܐ ܚܕܳܐ ܡܶܢܗܶܝܢ ܒܰܠܚܽܘܕܶܝܗ̇܆ ܡܕܺܝܢ̱ܬܳܐ ܕܙܰܕܺܝܩܽܘܬܳܐ ܬܶܬܟܰܢܶܐ. ܙܰܕܺܝܩܽܘܬܳܐ ܕܶܝܢ ܠܰܘ ܗܳܝ ܕܡܶܬܦܰܪܫܳܐ ܣܰܩܽܘܒܠܳܐܺܝܬ ܠܽܘܩܒܰܠ ܥܰܘܳܠܽܘܬܳܐ ܘܥܳܠܽܘܒܽܘܬܳܐ܆ ܙܳܕܶܩ ܠܡܶܣܬܰܟܳܠܽܘ ܥܰܠ ܗܳܕܶܐ ܕܩܰܪܺܝܒܳܐ܆ ܐܶܠܳܐ ܠܗܳܝ ܓܶܢܣܳܢܳܝܬܳܐ ܘܰܡܫܰܡܠܰܝܬܳܐ܆ ܘܳܐܚܽܘܕܬܳܐ ܕܟܽܠܗܳ ܡܝܰܬܪܽܘܬܳܐ. ܒܗܰܘ ܙܢܳܐ ܕܡܶܛܽܠ ܙܟܰܪܝܳܐ ܘܶܐ‌ܠܺܝܫܒܰܥ ܟܬܰܒ ܠܽܘܩܳܐ܆ ܕܺܐܝܬܰܝܗܽܘܢ ܗ̱ܘܰܘ ܕܶܝܢ ܙܰܕܺܝ̈ܩܶܐ ܬܪ̈ܰܝܗܽܘܢ ܩܕܳܡ ܐܰ‌ܠܳܗܳܐ܆ ܕܰܡܗܰܠܟܺܝܢ ܗ̱ܘܰܘ ܒܟܽܠܗܽܘܢ ܦܽܘܩ̈ܕܳܢܶܐ ܘܢܳܡܽܘܣ̈ܶܐ ܕܡܳܪܝܳܐ ܠܳܐ ܥܕܺܝ̈ܠܶܐ^[70].

ܠܳܐ ܬܶܬܕܰܡܰܪ ܕܶܝܢ܆ ܐܶܢܗܽܘ ܕܗܳܢܽܘܢ ܡܰܢ ܡܶܢ ܗܳܠܶܝܢ ܕܦܰܫܶܩܘ ܐܶܡܰܪܘ ܕܬܶܬܩܪܶܐ ܡܕܺܝܢ̱ܬܳܐ ܕܙܰܕܺܝܩܽܘܬܳܐ܆ ܗܳܢܽܘܢ ܕܶܝܢ ܡܕܺܝܢ̱ܬܳܐ ܕܫܶܡܫܳܐ. ܐܳܦ ܓܶܝܪ ܐܳܦ ܒܗܳܠܶܝܢ ܐܰܝܟ ܡܳܐ ܕܳܐܦ ܒܗܳܠܶܝܢ ܐ̱ܚܪ̈ܳܢܝܳܬܳܐ܆ ܘܠܳܐ ܐ̱ܢܳܫ ܣܳܦܶܩ ܠܘܳܬ ܟܽܠܡܶܕܶܡ. ܐܶܠܳܐ ܟܽܠ ܚܰܕ ܒܡ̈ܶܠܶܐ ܗܳܠܶܝܢ ܕܡܶܛܽܠ ‌ܐܰ‌ܠܳܗܳܐ܆ ܐܰܝܠܶܝܢ ܕܗܽܘ ܐܶܢ ܐܺܝܬܰܝܗܶܝܢ܆ ܡܶܢ ܡܢܳܬܳܐ ܝܳܕܰܥ ܘܡܶܢ ܡܢܳܬܳܐ ܡܡܰܠܶܠ^[71]. ܒܪܰܡ ܗܳܢܽܘܢ ܫܰܒܥܺܝܢ ܟܰܕ ܒܪܽܘܚܳܐ ܩܰܕܺܝܫܳܐ ܥܳܒܕܺܝܢ ܗ̱ܘܰܘ ܦܽܘܫܳܩܳܐ܆ ܡܶܛܽܠ ܗܳܕܶܐ ܓܶܝܪ ܐܳܦ ܟܰܕ ܡܦܰܠܓܳܐܺܝܬ ܦܰܫܶܩܘ ܫܠܶܡܘ ܠܰܚ̈ܕܳܕܶܐ܆ ܟܰܕ ܗܳܠܶܝܢ ܐ̱ܚܪ̈ܳܢܶܐ ܡܕܺܝܢܰܬ ܫܶܡܫܳܐ ܐܶܡܰܪܘ܆ ܗܶܢܽܘܢ ܕܙܰܕܺܝܩܽܘܬܳܐ ܐܶܡܰܪܘ܆ ܟܰܕ ܠܘܳܬ ܫܶܡܫܳܐ ܕܙܰܕܺܝܩܽܘܬܳܐ ܡܥܰܠܶܝܢ ܠܳܗ̇ ܠܬܰܪܥܺܝܬܳܐ ܕܺܝܠܰܢ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ. ܫܶܡܫܳܐ ܓܶܝܪ ܗܳܢܳܐ ܡܶܬܚܰܙܝܳܢܳܐ܆ ܠܳܐ ܐܺܝܬܰܘܗ̱ܝ ܥܳܒܽܘܕܳܐ ܕܙܰܕܺܝܩܽܘܬܳܐ܆ ܘܳܐܦܠܳܐ ܥܳܒܶܕ ܠܗܽܘܢ ܙܰܕܺܝ̈ܩܶܐ ܠܗܳܢܽܘܢ ܕܕܳܢܰܚ ܥܠܰܝܗܽܘܢ^[72]܆ ܐܳܦܶܢ ܡܶܫܟܰܚ ܐ̱ܢܳܫ ܕܡܶܢܶܗ ܐܰܝܟ ܡܳܐ ܕܳܐܦ ܡܶܢ ܗܳܠܶܝܢ ܥ̈ܒܳܕܶܐ ܐ̱ܚܪ̈ܳܢܶܐ܆ ܢܣܰܩܶܡ ܘܢܶܬܚܰܫܰܒ ܠܚܶܟܡܬܳܐ ܗܳܝ ܡܥܰܠܰܝܬܳܐ܆ ܘܰܕܡܶܢ ܗܳܝ ܕܠܳܐ ܐܺܝܬܰܝܗܽܘܢ ܠܗܳܝ ܕܢܶܗܘܽܘܢ ܐܺܝܬܰܝܗܽܘܢ ܐܰܝܬܝܰܬ̣ ܐܶܢܽܘܢ. ܡܶܛܽܠ ܗܳܢܳܐ ܕܶܢܚܳܐ ܕܫܶܡܫܳܐ ܕܙܰܕܺܝܩܽܘܬܳܐ ܣܳܒܰܪ ܐ̱ܢܳܐ܆ ܕܰܒܟܽܠܳܗ̇ ܢܒܺܝܽܘܬܳܐ ܗܳܝ ܕܡܶܛܽܠ ‌ܐܓܘܦ̈ܛܝܐ܆ ܙܰܒ̈ܢܺܝܢ ܣܰܓܺܝ̈ܳܐܢ ܐܶܡܰܪ ܢܒܺܝܳܐ܆ ܒܝܰܘܡܳܐ ܗܰܘ ܢܶܗܘܶܐ ܙܦܠܢ ܒܡܶܨܪܶܝܢ܆ ܟܰܕ ܠܙܰܒܢܳܐ ܗܰܘ ܟܺܐܢܳܐܺܝܬ ܩܳܪܶܐ ܗ̱ܘܳܐ ܝܰܘܡܳܐ܆ ܕܡܶܢ ܕܶܢܚܳܐ ܕܰܐܝܟ ܗܳܢܳܐ ܢܳܗܰܪ. ܠܰܘ ܓܶܝܪ ܒܚܰܕ ܝܰܘܡܳܐ ܒܕܽܘܟ܆ ܗ̣ܘ̈ܰܝ ܗܳܠܶܝܢ ܟܽܠܗܶܝܢ ܠܡܶܨܪ̈ܳܝܶܐ^[73].

ܘܶܐܢܳܐ ܡܰܢ ܣܳܒܰܪ ܗ̱ܘܺܝܬ̣܆ ܗܰܝܡܢܽܘܢܝ ܕܶܝܢ ܕܳܐܡܰܪ ܐ̱ܢܳܐ܆ ܕܰܠܘܳܬ ܟܽܠܗܽܘܢ ܫܽܘ̈ܐܴܠܶܐ ܗܳܢܽܘܢ ܕܶܐܬܥܰܗܕܶܬ ܟܰܕ ܡܫܰܪܶܐ ܗ̱ܘܺܝܬ ܕܺܐ݀ܡܰܪ܆ ܣܳܦܶܩ ܗ̱ܘܳܐ ܡܰܡܠܠܳܐ ܗܳܢܳܐ ܕܗܳܫܳܐ. ܟܰܕ ܚܰܕ ܕܶܝܢ ܒܰܠܚܽܘܕ ܐܰܝܟ ܡܚܺܝܠܽܘܬܳܐ ܕܺܝܠܝ ܐܶܬܥܰܩܰܒ܆ ܚܳܙܶܐ ܐ̱ܢܳܐ ܠܶܗ ܠܡܺܐܡܪܳܐ܆ ܕܠܰܐܪܺܝܟܽܘܬܳܐ ܕܠܳܐ ܣܳܟܳܐ ܥܬܺܝܕ ܕܢܶܦܽܘܩ܆ ܐܶܢ ܥܰܠ ܗܳܢܽܘܢ ܐ̱ܚܪ̈ܳܢܶܐ ܐܺ݀ܡܰܪ. ܡܶܛܽܠܗܳܕܶܐ ܒܝܰܘܡܳܐ ܡܰܢ ܐ̱ܚܪܺܢܳܐ܆ ܐܰܝܟ ܕܰܐ‌ܠܳܗܳܐ ܢܶܬܶܠ ܗܳܠܶܝܢ ܕܡܶܛܽܠ ܗܳܢܽܘܢ ܐ̱ܚܪ̈ܳܢܶܐ ܢܶܬܡܰܠ̈ܠܳܢ܆ ܫܽܘܠܳܡܳܐ ܕܶܝܢ ܐܶ݀ܣܺܝܡ ܥܰܠ ܗܳܠܶܝܢ ܕܶܐܬܶܐܡܰܪ̈ܝ̱܆ ܟܰܕ ܛܽܘܒܳܐ ܝܳܗܶܒ ܐ̱ܢܳܐ ܠܗܳܠܶܝܢ ܚܰܡܶܫ ܡܕܺܝܢ̱ܬܳܐ ܕܐܓܘܦ̈ܛܝܐ܆ ܗܳܠܶܝܢ ܕܺܝ̈ܠܰܦܶܝܢ ܠܰܡܡܰܠܳܠܽܘ ܚܰܬܺܝܬ̣ܳܐܺܝܬ ܒܠܶܫܳܢܳܐ ܟܢܰܥܢܳܝܳܐ܆ ܘܰܐܝܟ ܚܕܳܐ ܐܰܥܡܰܪ̈ܶܝܢ ܚܕܳܐ ܡܕܺܝܢ̱ܬܳܐ ܕܫܶܡܫܳܐ ܕܙܰܕܺܝܩܽܘܬܳܐ܆ ܠܢܰܦܫܳܐ ܡܕܰܟܰܝܬܳܐ ܘܰܡܫܰܡܠܰܝܬܳܐ ܕܒܰܪܢܳܫܳܐ. ܗܳܝ ܕܰܠܘܳܬܳܗ̇ ܟܰܕ ܥܰܡ ܕܰܘܺܝܕ ܡܙܰܡܰܪ ܐ̱ܢܳܐ ܐܳܡܰܪ ܐ̱ܢܳܐ܆ ܡܫܰܒ̈ܚܳܬܳܐ ܐܶܬܡܰܠܰܠ̈ܝ̱ ܡܶܛܽܠܳܬܶܟܝ ܡܕܺܝܢ̱ܬܶܗ ܕܰܐ‌ܠܳܗܳܐ^[74]. ܟܰܕ ܐܓܘܦ̈ܛܝܐ ܒܗܳܠܶܝܢ ܕܶܐܬܥܰܩ̈ܒܶܝܢ ܐܶܣܬܰܟܰܠܘ ܠܰܢ܆ ܠܰܘ ܗܳܢܽܘܢ ܒܰܠܚܽܘܕ ܕܐܓܘܦܛܘܤ ܡܰܟܬܒܺܝܢ ܥܠܰܝܗܽܘܢ ܐܰܬܪܳܐ ܐܰܒܳܗܳܝܳܐ܆ ܐܶܠܳܐ ܟܽܠܗܽܘܢ ܐܰܟܚܕܳܐ ܗܳܢܽܘܢ ܕܡܶܢ ܚܰܝ̈ܶܐ ܥܰܡܡ̈ܳܝܶܐ܆ ܐܰܘܟܺܝܬ ܚܰܢ̈ܦܳܝܶܐ ܠܘܳܬ ܕܽܘܒܳܪܳܐ ܐܶܘܢܓܶܠܳܝܳܐ ܐܶܫܬܰܚܠܰܦܘ.

ܚܢܰܢ ܕܶܝܢ ܡܳܢܳܐ ܢܺܐܡܰܪ ܡܶܛܽܠ ܪ̈ܶܓܫܶܐ ܕܺܝܠܰܢ. ܐܰܪܰܐ ܡܕܺܝܢ̱ܬܳܐ ܐܺܝܬܰܝܗܽܘܢ܆ ܐܰܪܰܐ ܠܰܘ ܡܶܢ ܒܰܪܒܪ̈ܳܝܶܐ ܠܒܺܝܟܺܝܢ ܟܽܠܗܽܘܢ܆ ܟܰܕ ܐܳܦܠܳܐ ܚܰܕ ܢܳܡܽܘܣܳܐ ܪܽܘܚܳܢܳܝܳܐ ܡܶܬܕܰܒܰܪ ܒܗܽܘܢ܆ ܡܳܢܳܐ ܕܶܝܢ. ܠܰܘ ܡܶܨܪ̈ܳܝܳܬܳܐ ܡܡܰܠܠܺܝܢ܆ ܝܳܕܥܺܝܢ ܕܶܝܢ ܕܺܐܝܬܰܘܗ̱ܝ ܒܰܙܒܰܢ^[75] ܡܰܡܠܠܳܐ ܗܰܘ ܟܢܰܥܢܳܝܳܐ܆ ܠܰܘ ܟܽܠܶܗ ܝܰܘܡܳܐ ܒܬܶܐܰܛܪ̈ܶܐ ܡܶܬܗܰܦܟܺܝܢ܆ ܟܰܕ ܚܳܙܶܝܢ ܘܫܳܡܥܺܝܢ ܘܰܡܪܺܝܚܺܝܢ ܘܛܳܥܡܺܝܢ ܘܓܳܝܫܺܝܢ܆ ܟܽܠܳܗ̇ ܗܰܢܺܝܽܐܘܬܳܐ ܫܪܺܝܚܬܳܐ ܘܶܐܤܛܪܝܢܝܐ^[76]܆ ܐܰܝܟܰܢܳܐ ܕܢܶܗܘܽܘܢ ܪܳܕܶܝܢ ܘܥܳܠܶܝܢ ܠܢܰܦܫܳܐ ܡܶܢ ܟܽܠܕܽܘܟ ܐܰܝܟ ܕܡܶܢ ܡܰܝܬܝ̈ܳܢܶܐ ܡܫܰܚ̈ܠܦܶܐ܆ ܪ̈ܶܕܝܶܐ ܣܰܪ̈ܝ̣ܰܝ̣ ܪܺܝܚܳܐ܆ ܘܠܳܐ ܐ̱ܢܳܫ ܢܺܐܡܰܪ ܠܺܝ܆ ܬܽܘܒ ܠܽܘܩܒܰܠ ܬܶܐܰܛܪ̈ܶܐ ܐܳܡܰܪ ܐܰܢ̱ܬ. ܐܺ݀ܡܰܪ ܓܶܝܪ ܠܘܳܬܶܗ܆ ܕܳܐܦ ܐܳܡܰܪ ܐ̱ܢܳܐ܆ ܘܡܶܢ ܕܺܐ݀ܡܰܪ ܐܶܢܳܐ ܠܳܐ ܐܶ݀ܫܠܶܐ. ܕܰܦܝܳܣܳܐ ܐܶ݀ܥܒܶܕ ܨܳܒܶܐ ܐ̱ܢܳܐ ܐܳܘ ܡܝܰܬܪܳܐ ܟܰܕ ܐܳܡܰܪ ܐ̱ܢܳܐ. ܠܡܳܐ ܓܶܝܪ ܕܶܐ݀ܕܒܰܪ ܒܰܩܛܺܝܪܳܐ܆ ܐܰܘ ܐܰܢ̱ܬ ܡܰܢ ܒܬܶܐܰܛܪ̈ܶܐ ܗܳܠܶܝܢ ܕܨܳܒܶܐ ܐܰܢ̱ܬ ܥܳܒܶܕ ܐܰܢ̱ܬ܆ ܠܺܝ ܕܶܝܢ ܒܥܺܕܬܳܐ ܠܳܐ ܫܰܠܺܝܛ ܠܺܝ ܕܺܐ݀ܡܰܪ ܗܳܠܶܝܢ ܕܨܳܒܶܐ ܐ̱ܢܳܐ. ܐܶܢ ܓܶܝܪ ܐܳܦ ܟܰܕ ܚܰܕ ܒܰܠܚܽܘܕ ܡܶܫܟܰܚ ܐ̱ܢܳܐ ܦܝܳܣܳܐ ܠܡܶܥܒܰܕ ܐܶ݀ܫܬܽܘܩ܆ ܪܰܒܳܐ ܢܶܗܘܶܐ ܠܺܝ ܡܣܳܡ ܒܪܺܝܫܳܐ ܗܰܘ ܕܫܶܬܩܳܐ܆ ܘܩܺܝܢܕܽܘܢܽܘܤ ܗܰܘ ܐ̱ܚܪܳܝܳܐ. ܒܪܰܡ ܠܰܘ ܗܳܢܽܘܢ ܕܰܒܡܰܫܟܢܳܐ ܚܳܙܶܝܢ܆ ܥܳܒܕܺܝܢ ܐܶܓܽܘܦܛܳܐܺܝܬ ܒܰܠܚܽܘܕ. ܕܰܐܝܟ ܗܳܠܶܝܢ ܕܶܝܢ ܐܺܝܬܰܝܗܽܘܢ܆ ܐܳܦ ܗܳܢܽܘܢ ܕܥܰܝܢܳܐ ܚܰܣܳܡܬܳܐ ܐܺܝܬ ܠܗܽܘܢ܆ ܠܶܫܳܢܳܐ ܡܨܰܚܝܳܢܳܐ܆ ܡܰܫܡܰܥܬܳܐ ܡܥܰܩܒܳܢܺܝܬܳܐ܆ ܛܥܳܡܬܳܐ ܝܰܥܢܬܳܐ ܘܰܡܪܺܝܚܳܢܽܘܬܳܐ ܫܪܺܝܚܬܳܐ܆ ܐܺܝܕܳܐ ܚܳܛܽܘܦܬܳܐ ܘܥܰܘܳܠܬܳܐ܆ ܘܰܕܓܳܫܦܳܐ ܒܢܽܘܟܪ̈ܳܝܳܬܳܐ. ܘܳܝ ܠܺܝ ܡܳܢܳܐ ܢܶܥܒܶܕ܆ ܐܶܢ ܠܰܘ ܫܽܘܚܠܳܦܳܐ ܗܰܘ ܩܰܠܺܝܠܳܐ ܢܶܫܬܰܚܠܰܦ܆ ܘܰܡܕܺܝܢ̱ܬܳܐ ܕܺܝܠܰܢ ܢܩܽܘ̈ܡܳܢ ܩܕܳܡ ܒܺܐܡܰܐ ܕܰܡܫܺܝܚܳܐ ܟܰܕ ܒܰܪܒܪܳܐܺܝܬ ܡܶܬܕܰܒܪ̈ܳܢ. ܝܺܕܺܝܥܬܳܐ ܓܶܝܪ ܐܺܝܬܶܝܗ̇܆ ܕܗܳܠܶܝܢ ܕܒܰܪܒܪ̈ܳܝܶܐ ܢܶܚܰܫ܆ ܟܰܕ ܣܳܒܠܺܝܢ ܚ̱ܢܰܢ ܢܶܣܝܳܢܳܐ ܕܫܽܘܢܳܩ̈ܶܐ ܠܳܐ ܡܶܣܬܰܝܒܪ̈ܳܢܶܐ. ܢܶ݀ܣܬܰܪܗܰܒ ܗܳܟܺܝܠ ܕܰܒܟܽܠ ܚܰܕ ܡܶܢ ܪ̈ܶܓܫܰܝܢ܆ ܢܶܟܬܽܘܒ ܢܳܡܽܘܣ̈ܶܐ ܕܪܽܘܚܳܐ. ܐܰܝܟܰܢܳܐ ܕܟܰܕ ܢܶܬܝܰܕܥܽܘܢ ܡܕܺܝܢ̱ܬܳܐ ܡܶܢ ܡܰܠܟܳܐ܆ ܬܚܶܝܬ ܡܰܠܟܽܘܬܳܐ ܕܰܫܡܰܝܳܐ ܢܶܗܘܽܘܢ. ܠܗܳܝ ܕܬܶܗܘܶܐ ܕܟܽܠܰܢ ܢܶ݀ܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܗܰܘ ܕܰܠܗܳܕܶܐ ܩܪܳܐ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ܀

ܫܠܡ ܡܐܡܪܐ ܕܡܐܐ ܘܫܒܥܐ.

[1]ܐܫܥܝܐ. 19: 18  ܘܫܶܡ ܡܕܝܢ̱ܬܐ ܕܟܬܝܒ ܠܥܠ ‌ܐܨܕܩ. ܒܣܶܦܪܐ ܕܐܫܥܝܐ ܟܳܬܶܒ ܠܗ̇ ܗܳܟܰܢ. ܗܪܣ ܬܶܬܩܪܶܐ.

ܡܬܝ. 25: 18 ـ 25[2]

ܐܦܣ̈ܝܐ. 6: 19 [3]

.[4]ܐܫܥܝܐ. 19: 18  ܘܫܶܡ ܡܕܝܢ̱ܬܐ ܕܟܬܝܒ ܠܥܠ ‌ܐܨܕܩ. ܒܣܶܦܪܐ ܕܐܫܥܝܐ ܟܳܬܶܒ ܠܗ̇ ܗܳܟܰܢ. ܗܪܣ ܬܶܬܩܪܶܐ

[5]ܙܳܕܶܩ ܠܡܶܕܰܥ ܕܗܳܕܶܐ ܡܕܺܝܢ̱ܬܳܐ܆ ܗܺܝ ܐܺܝܬܶܝܗ̇ ܩܰܕܡܳܝܬܳܐ ܒܡܰܥܠܳܢܳܐ ܕܐܓܘܦܛܘܣ ܕܡܶܢ ܦܠܣܛܝܢܝ܆ ܥܠܰܘܗܝ ܕܢܰܚܠܳܐ ܐܰܘ ܟܺܝܬ ܪܓܰܠܬܳܐ ܗܳܝ ܕܒܶܝܬ ܦܠܣܛܝܢܝ ܠܡܶܨܪܶܝܢ܆ ܡܶܢ ܤܶܛܪܳܐ ܡܥܪܒܳܝܳܐ. ܘܰܐܝܟ ܕܡܶܢ ܥܳܡܽܘܪ̈ܶܐ ܩܰܕܡܳܝ̈ܶܐ ܘܥܰܬܺܝ̈ܩܶܐ܆ ܡܶܬܩܰܪܝܳܐ ܗ̱ܘܳܬ ܒܰܙܒܰܢ ܐܳܦ ܗܳܫܳܐ܆ ܥܪܫ. ܗܳܝ ܕܰܠܘܳܬ ܐ̱ܢܳܫܺܝ̈ܢ ܡܦܰܫ̈ܩܳܢܶܐ ܐܰܪܣ ܟܬܺܝܒܳܐ܆ ܡܶܛܽܠ ܕܠܐ ܡܶܫܟܚܺܝܢ ܠܡܺܐܡܰܪ ܘܠܐ ܥܶܐ ܘܠܐ ܫܺܝܢ. ܘܒܳܬܰܪ ܙܰܒ̈ܢܶܐ ܡܶܢ ܥܳܡܽܘܪ̈ܶܐ ܐ̱ܚܪ̈ܳܢܶܐ ܐܶܬܩܰܪܝܰܬ ܪܝܢܘܩܘܪܘܪܐ. ܘܬܽܘܒ ܡܶܢ ܒܳܬܰܪ ܕܰܐܚܕܽܘܗ̇ ܝܰܘ̈ܢܳܝܶܐ ܠܐܓܘܦܛܘܣ: ܐܶܬܩܰܪܝܰܬ ܡܶܢ ܥܳܡܽܘܪ̈ܶܐ ܐ̱ܚܪ̈ܳܢܶܐ܆ ܦܐܘܝܣ. ܐܰܘ ܟܺܝܬ ܦܐܩܝܕܐ. ܘܳܐܦ ܗܳܫܳܐ ܒܟܽܠܗܽܘܢ ܗܳܠܶܝܢ ܟܽܘܢܳܝ̈ܶܐ ܡܶܬܩܰܪܝܳܐ܆ ܡܶܢ ܗܳܢܽܘܢ ܕܥܳܡܪܺܝܢ ܒܳܗ̇ ܘܡܶܢ ܫܒܳܒܰܝ̈ܗܽܘܢ. ܐܺܝܬܶܝܗ̇ ܕܶܝܢ ܗܺܝ ܗܳܕܶܐ܆ ܒܐܪܥܐ ܗܳܝ ܕܰܡܫܰܥܒܕܳܐ ܗ̱ܘܳܬ ܬܚܶܝܬ ܐܝܠܝܘܦܠܝܣ. ܐܰܘ ܟܺܝܬ ܡܕܺܝܢܰܬ ܫܶܡܫܳܐ܆ ܡܕܺܝܢ̱ܬܳܐ ܕܡܰܠܟܽܘܬܳܐ܆ ܗܳܝ ܕܡܶܬܩܪܝܐ ܒܰܟ̈ܬܳܒܶܐ ܒܶܝܬ ܫܡܶܫ܆ ܘܒܳܗ̇ ܐܺܝܬܰܝܗܽܘܢ ܒ̈ܳܬܶܐ ܗܳܠܶܝܢ ܪܰܘܪ̈ܒܶܐ ܘܰܬܡܺܝ̈ܗܶܐ ܕܡܰܠܟܽܘܬܐ ܕܡܶܨܪ̈ܳܝܶܐ܆ ܘܳܐܦ ܩܝܡ̈ܬܐ ܗܳܠܶܝܢ ܬܡܺܝ̈ܗܳܬܳܐ ܕܡܶܬܥܗܕ ܟܬܳܒܳܐ܆ ܟܰܕ ܩܳܪܶܐ ܠܗܶܝܢ ܩܝܡ̈ܬܳܐ ܕܒܶܝܬ ܫܡܶܫ.    ܐܦ ܐܪܡܝܐ. 43: 13

ܡܬܝ. 2: 13 [6]

ܐܦܣ̈ܝܐ. 2: 12 [7]

ܐܫܥܝܐ. 19: 1 [8]

ܡܦܩܢܐ. 7: 13 [9]

ܐܫܥܝܐ. 19: 2[10]

ܡܬܝ. 10: 21 [11]

[12]ܐܫܥܝܐ. 19: 18  ܘܫܶܡ ܡܕܝܢ̱ܬܐ ܕܟܬܝܒ ܠܥܠ ‌ܐܨܕܩ. ܒܣܶܦܪܐ ܕܐܫܥܝܐ ܟܳܬܶܒ ܠܗ̇ ܗܳܟܰܢ. ܗܪܣ ܬܶܬܩܪܶܐ.

ܡܬܝ. 5: 28 [13]

ܐ. ܫܡܘܐܝܠ. 3: 10 [14]

ܡܦܩܢܐ. 23: 1 [15]

ܡܙܡܘܪ̈ܐ. 140: 2 [16]

ܥܡܘܣ. 6: 6 [17]

ܦܝܠܝܦܣ̈ܝܐ. 4: 11 ـ 12 [18]

ܪ̈ܗܘܡܝܐ. 16: 18 [19]

ܡܢܝܢܐ. 11: 4 ـ 5 [20]

ܦܝܠܝܦܣ̈ܝܐ. 3: 19 [21]

ܘܓܶܫܬܶܗ[22]

ܥܒܪ̈ܝܐ. 13: 4 [23]

ܐ. ܩܘܪ̈ܝܢܬܝܐ. 7: 1 [24]

ܐ. ܩܘܪ̈ܝܢܬܝܐ. 6: 15 ـ 16 [25]

[26]ܐܳܦ ܗܽܘ ܗܳܢܳܐ ܫܡܳܐ ܕܺܝܠܗܽܘܢ ܕܪ̈ܶܓܫܶܐ: ܒܠܶܫܳܢܳܐ ܝܰܘܢܳܝܳܐ ܢܶܩܒܬܳܢܳܐܝܬ ܡܶܬܶܐܡܰܪ܆ ܘܠܰܘ ܕܶܟܪܳܢܳܐܝܬ.

ܐܫܥܝܐ. 26: 1 [27]

ܐܪܡܝܐ. 6: 10 [28]

ܡܬܝ. 11: 15 [29]

ܐ. ܩܘܪ̈ܝܢܬܝܐ. 14: 37 ـ 38 [30]

ܐܫܥܝܐ. 50: 4 [31]

ܣܶܦܪܐ ܕܒܪܝܬܐ. 27: 27 [32]

ܬܫܒ̈ܚܳܬ ܬܫܒ̈ܚܬܐ. 1: 3 [33]

ܚܙܩܝܐܝܠ. 3: 3 [34]

[35]ܡܨܶܐ ܗ̱ܘܳܐ ܕܶܝܢ ܡܰܠܦܳܢܳܐ ܠܡܺܐܡܰܪ ܗܳܪܟܳܐ ܐܶ‌ܠܽܘ ܨܒܳܐ܆ ܐܳܦ ܗܳܠܶܝܢ ܕܕܰܘܺܝܕ܆ ܗܳܝ ܕܰܛܥܡܘ ܘܰܚܙܰܘ ܕܛܳܒ ܗ̱ܘ̣ ܡܳܪܝܳܐ܆ ܘܗܳܝ ܕܡܳܐ ܚܰܠ̈ܝܳܢ ܡܶܠܰܝ̈ܟ ܠܰܫ̈ܡܰܝ ܚܶܟܝ ܝܰܬܺܝܪ ܡܶܢ ܕܶܒܫܳܐ ܘܟܰܟܳܪܺܝܬܳܐ ܠܦܽܘܡܳܐ ܕܺܝܠܝ ܡܙܡܘܪ̈ܐ. 118: 103  ܘܕܺܝ̈ܢܶܐ ܕܡܳܪܝܳܐ ܬܽܘܒ ܕܰܚܠ̣ܶܝܢ. ܚܰܠܝܽܘܬܳܐ ܓܶܝܪ ܕܰܛܥܳܡܬܳܐ ܗܝ ܡܶܢ ܟܽܠ ܦܪܘܣ.

ܝܘܚܢܢ. 6: 41  ܐܦ 6: 51 [36]

ܠܘܩܐ. 7: 46 [37]

 ܡܶܢ ܥܦܳܦܳܐ[38]

ܡܙܡܘܪ̈ܐ. 33: 2 [39]

ܠܘܩܐ. 19: 17 [40]

ܠܘܩܐ. 19: 19 [41]

ܡܙܡܘܪ̈ܐ. 118: 106 [42]

ܥܶܒܪ̈ܳܝܶܐ. 6. 17[43]

ܐܫܥܝܐ. 19: 18 [44]

ܡܬܝ. 10: 5 ـ 6 [45]

ܦܪܟܣܝܣ. 7: 51 [46]

ܡܙܡܘܪ̈ܐ. 22: 21  ܐܦ. 35: 17 [47]

ܡܬܝ. 15: 23 [48]

ܡܪܩܘܣ. 7: 24 [49]

ܡܬܝ. 15: 24 [50]

ܦܪܟܣܝܣ. 13: 46 ـ 47 [51]

ܡܬܝ. 8: 7 [52]

ܝܘܚܢܢ. 4: 30 [53]

 ܪ̈ܗܘܡܝܐ. 11. 17[54]

ܡܬܝ. 15: 24 [55]

ܡܬܝ. 15: 11 [56]

ܡܬܝ. 15: 25 ـ 26 [57]

[58]ܗܳܕܶܐ ܕܟܰܠ̈ܒܽܘܢܶܐ ܗܳܟܰܢܳܐ ܣܺܝܡܳܐ܆ ܐܰܝܟ ܗܳܝ ܕܰܡܥܰܝܕܳܐ ܒܥܳܠܡܳܐ ܕܢܶܩܪܽܘܢ ܩܽܘܪ̈ܛܰܝܣܶܐ. ܗܳܢܽܘܢ ܕܰܐܝܟ ܕܰܒܣܽܘܓܐܐ ܗܶܢܽܘܢ ܐܺܝܬܰܝܗܽܘܢ ܕܡܶܬܐܰܡܪܺܝܢ ܬܚܶܝܬ ܦܳܬܽܘܪܳܐ܆ ܘܫܳܕܶܝܢ ܠܗܽܘܢ ܡܳܪ̈ܰܝܗܽܘܢ ܟܡܳܐ ܙܰܒ̈ܢܺܝܢ ܐܳܦ ܡܶܢ ܠܰܚܡܳܐ ܗܰܘ ܕܣܺܝܡ ܥܠܰܘܗܝ ܕܦܳܬܽܘܪܳܐ

ܡܬܝ. 15: 27[59]

ܡܬܝ. 15: 28 [60]

ܥܒܪ̈ܝܐ. 13: 10 [61]

[62] ܘܡܶܬܦܰܬܰܟ ܐܳܡܰܪ܆ ܕܰܗܘܳܐ ܡܦܰܬܟܳܐ ܒܫܽܘܚ̈ܠܳܦܶܐ ܕܟܽܠ ܓܢܶܣ܆ ܒܫܽܘܟܳܢ̈ܶܐ ܗܳܢܽܘܢ ܕܪܽܘܚܳܐ

ܡܬܝ. 21: 43 [63]

ܡܪܩܘܣ. 4: 8 [64]

ܥܺܕܬܐ[65]

ܐܫܥܝܐ. 19: 17[66]

[67]ܙܳܕܶܩ ܠܡܶܕܰܥ܆ ܕܠܰܘ ܡܶܛܽܠ ܗܳܝ ܒܰܠܚܽܘܕ ܕܰܒܢܳܡܽܘܣܳܐ ܡܶܬܩܰܝ̈ܡܳܢ ܡܕܺܝ̈ܢܳܬܳܐ: ܘܰܒܗܳܕܶܐ ܒܰܠܚܽܘܕ ܦܪ̈ܺܝܫܳܢ ܡܶܢ ܡܰܥܡܪ̈ܶܐ ܐ̱ܚܪ̈ܳܢܶܐ܆ ܐܶܡܰܪ ܡܰܠܦܳܢܳܐ ܕܰܒܢܳܡܽܘܣ̈ܶܐ ܐܶܘܢܓ̈ܠܝܐ ܡܕܢܘ ܐܶܢܶܝܢ܆ ܐܶܠܐ ܐܳܦ ܡܶܛܽܠ ܗܳܝ ܐ̱ܚܪܺܬܳܐ܆ ܕܐܓܘܦ̈ܛܝܐ ܒܠܶܫܳܢܳܐ ܕܺܝܠܗܽܘܢ ܘܒܰܥܝܳܕܳܐ܆ ܠܗܶܝܢ ܠܰܡܕܺܝ̈ܢܳܬܳܐ ܠܰܘ ܡܕܺܝ̈ܢܳܬܳܐ ܩܪܝܢ ܠܗܶܝܢ܆ ܐܶܠܐ ܢܳܡܽܘܣ̈ܶܐ. ܝܰܘ̈ܢܳܝܶܐ ܕܶܝܢ ܡܶܢ ܗܳܝ ܕܰܐܟܚܕܳܐ ܐܺܝܬ ܠܗܶܝܢ ܕܽܘܒܳܪܳܐ ܓܰܘܳܢܳܝܳܐ܆ ܩܳܪܶܝܢ ܠܶܗ ܠܰܫܡܳܐ ܕܰܡܕܺܝ̈ܢܳܬܳܐ.

 ܥܐܪܐܫ[68]

ܐܫܥܝܐ. 19: 18 [69]

ܠܘܩܐ. 1: 6 [70]

ܐ. ܩܘܪ̈ܝܢܬܝܐ. 13: 9[71]

ܡܬܝ. 5: 45 [72]

ܐܫܥܝܐ. 19: 16. 18. 23. 24. [73]

ܡܙܡܘܪ̈ܐ. 87: 3 [74]

ܗܰܘ ܡܳܐ ܕܺܐܝܬܰܘܗ̱ܝ[75]

 ܘܐܨܛܪܝܢܝܐ[76]