ܥܰܠ ܩܰܕܺܝܡܽܘܬ ܥܽܘܬܳܕܳܐ ܕܡܰܥܰܠܬܳܐ ܕܰܠܒܶܝܬ ܡܰܥܡܽܘܕܺܝܬܳܐ ܐܰܝܟ ܥܝܳܕܳܐ.
106: ܘܟܰܕ ܚܕܳܐ ܙܒܰܢ ܘܬܰܪ̈ܬܶܝܢ ܠܥܶܠܬܳܐ ܘܰܠܡܶܠܬܳܐ ܝܶܗܒܶܬ ܠܟܽܘܢ܆ ܗܳܠܶܝܢ ܕܒܺܐܝ̈ܕܰܝܗܶܝܢ ܟܰܕ ܢܩܽܘܡ ܥܠܰܝܢ ܫܽܘܪܳܝܳܐ ܕܝܰܘ̈ܡܳܬܳܐ ܩܰܕܺܝ̈ܫܶܐ ܕܨܰܘܡܳܐ܆ ܡܫܰܢܶܝܢ ܚ̱ܢܰܢ ܘܡܰܪܚܺܝܢ ܚ̱ܢܰܢ ܥܕܰܡܳܐ ܠܥܺܐܕܳܐ ܕܚܰܫܳܐ ܦܳܪܽܘܩܳܝܳܐ ܘܕܰܩܝܳܡܬܳܐ܆ ܡܶܢ ܡܰܥܰܠܬܳܐ ܗܳܝ ܕܰܠܒܰܝܬܳܐ ܗܰܘ ܒܥܶܠ ܫܡܳܐ[1] ܕܢܽܘܗܪܳܐ܆ ܘܡܶܢ ܘܰܠܘܳܬ ܡܥܺܝܢܳܐ ܗܳܝ ܕܝܽܘܪܕܢܳܢ܆ ܗܳܝ ܫܰܦܺܝܪܰܬ ܒܢܰܝ̈ܳܐ ܘܣܰܓܺܝܰܐܬ̣ ܒܢܰܝ̈ܳܐ܆ ܝܰܬܺܝܪܬܳܐ ܛܳܒ ܚܳܫܶܒ ܗ̱ܘܺܝܬ ܠܗܳܝ ܕܶܐ݀ܡܰܠܶܠ ܐܳܦ ܗܳܫܳܐ ܡܶܛܽܠܳܬܳܗ̇ ܟܰܕ ܡܶܛܽܠܳܬ̣ܗ̇ ܕܰܨܒܽܘܬܳܐ܆ ܕܕܰܠܡܳܐ ܐܳܦ ܐ̱ܢܳܫܺܝ̈ܢ ܡܶܢ ܠܳܐ ܡܠܺܝܠܽܘܬܐ ܢܶܣܒܪܽܘܢ ܥܠܰܝ܆ ܕܰܐܝܟ ܚܰܘܒܬܳܐ ܡܶܕܶܡ ܡܶܢ ܗܳܠܶܝܢ ܕܣܰܓܺܝ ܐܳܠ̈ܨܳܢ܆ ܡܶܢ ܥܝܳܕܳܐ ܠܗܳܕܶܐ ܡܡܰܠܶܐ ܐ̱ܢܳܐ. ܗܳܝ ܡܰܢ ܓܶܝܪ ܕܗܳܠܶܝܢ ܕܗܳܐ ܡܶܢ ܟܰܕܽܘ ܐܶܬܶܐܡܰܪ̈ܝ̱܆ ܣܒܺܝܣܳܐܺܝܬ ܘܰܕܠܳܐ ܫܰܠܘܳܐ ܒܬܰܪܥܺܝܬܳܐ ܢܗܰܦܶܟ ܘܰܒܗܳܠܶܝܢ ܢܶܬܗܰܓܶܐ܆ ܘܰܒܗܶܝܢ ܢܶܗܘܶܐ ܒܝܰܕ ܥ̈ܒܳܕܶܐ܆ ܫܰܦܺܝܪܳܐ ܗ̱ܝ ܘܰܕܝܽܘܬܪܳܢܳܐ ܪܺܝܫܳܝܳܐ ܐܺܝܬܶܝܗ̇. ܗܳܝ ܕܶܝܢ ܕܡܶܛܽܠܳܬܗܶܝܢ ܟܰܕ ܡܶܛܽܠܳܬܗܶܝܢ ܬܽܘܒ ܢܡܰܠܶܠ܆ ܗܰܘ ܕܠܳܐ ܡܶܕܶܡ ܚܰܕܬܳܐ ܐܺܝܬ ܠܶܗ ܕܰܢܡܰܠܶܠ܆ ܠܰܘ ܕܚܳܫܚܳܐ[2] ܘܳܐܦܠܳܐ ܐܳܠܨܳܝܬܳܐ ܚܳܫܶܒ ܐ̱ܢܳܐ ܠܳܗ̇. ܠܰܟܪܺܝܣܛܝܳܢܳܐ ܓܶܝܪ ܙܳܕܶܩ ܠܶܗ܆ ܕܢܶܣܥܽܘܪ ܡܰܢ ܣܰܓܺܝ̈ܳܐܬܳܐ. ܢܺܐܡܰܪ ܕܶܝܢ ܙܥܽܘܪ̈ܝܳܬܳܐ ܘܰܡܡܰܫ̈ܚܳܬܳܐ. ܘܰܕܗܳܠܶܝܢ ܕܰܒܟܽܠܫܳܥ ܡܶܬܐܰܡܪ̈ܳܢ ܐܰܘ ܡܶܫ̈ܬܰܡܥܳܢ܆ ܥܒܳܕܳܐ ܢܶܗܘܶܐ ܬܳܒܰܥ ܗܽܘ ܠܶܗ.
ܙܶܠܘ ܗܳܟܺܝܠ܆ ܘܟܽܠܚܰܕ ܡܶܢܟܽܘܢ ܢܶܬܥܰܬܰܕ ܠܘܳܬ ܡܰܥܰܠܬܳܐ ܕܰܥܬܺܝܕܳܐ ܕܒܰܝܬܳܐ ܩܰܕܺܝܫܳܐ܆ ܗܰܘ ܕܒܶܗ ܐܺܝܬܶܝܗ̇ ܡܥܺܝܢܳܐ ܕܢܽܘܪܳܐ ܪܽܘܚܳܢܳܝܬܳܐ܆ ܘܡܰܢܗܪܳܢܺܝܬܳܐ ܘܰܡܕܰܟܝܳܢܺܝܬܳܐ܆ ܘܡܰܘܠܕܳܢܺܝܬܳܐ ܘܰܐܡܺܝܢܰܬ ܪܶܕܝܳܐ܆ ܕܡܶܢ ܚܰܝ̈ܶܐ ܡܬܽܘ̈ܡܳܝܶܐ ܡܫܺܝܚܳܐ ܪܳܕܝܳܐ܆ ܘܰܠܚܰܝ̈ܶܐ ܕܰܠܥܳܠܰܡ ܡܫܰܕܪܳܐ. ܢܶܬܚܰܫܰܒ ܠܦܽܘܚܪܳܐ ܗܰܘ ܐܰܠܳܗܳܝܳܐ܆ ܗܰܘ ܐܰܝܢܳܐ ܕܒܶܐܘܰܢܓ̈ܶܠܺܝܰܐ ܪܫܰܡ ܦܳܪܽܘܩܰܢ[3]. ܘܰܐܝܟ ܐܰܝܠܶܝܢ ܕܰܠܡܶܫܬܽܘܬܳܐ ܐ̱ܪܳܙܳܢܳܝܬܳܐ ܐܶܬܩܪܺܝܢܰܢ܆ ܢܺ݀ܐܨܰܦ ܕܰܠܒܽܘ̈ܫܰܝܢ. ܘܶܐܢܗܽܘ ܕܟܽܘܬܡܳܐ ܡܶܕܶܡ ܐܺܝܬ ܒܗܽܘܢ܆ ܗܳܫܳܐ ܥܰܕ ܐܺܝܬ ܠܰܢ ܫܰܦܺܝܪܽܘܬ[4] ܙܰܒܢܳܐ ܢܕܰܟܝܘܗ̱ܝ. ܠܳܐ ܡܶܕܶܡ ܓܶܝܪ ܗܳܟܰܢܳܐ ܝܳܕܰܥ ܠܰܡܚܰܠܳܠܽܘ ܐܰܝܟ ܨܰܘܡܳܐ܆ ܟܰܕ ܠܚܰܫ̈ܶܐ ܕܒܶܣܪܳܐ ܓܪܰܕ܆ ܘܛܳܒ ܝܰܨܺܝܦܳܐܺܝܬ ܡܫܺܝܓ ܒܕܶܡ̈ܥܶܐ܆ ܘܡܳܪܶܩ ܒܥܰܡ̈ܠܶܐ ܕܥܳܢܘܳܝܽܘܬܳܐ. ܐܶܢ ܕܢܽܘܗܪܳܐ ܐܺܝܬܰܘܗ̱ܝ ܗܽܘ ܒܰܝܬܳܐ܆ ܕܢܽܘܗܪܳܐ ܢܶܗܘܶܐ ܐܳܦ ܢܰܚܬܳܐ. ܠܳܐ ܢܶܫܡܰܥ܆ ܚܰܒܪܝ ܐܰܝܟܰܢܳܐ ܥ̣ܰܠܬ ܠܗܳܪܟܳܐ܆ ܟܰܕ ܠܳܐ ܐܺܝܬ ܠܳܟ ܠܒܽܘܫܳܐ ܢܰܗܺܝܪܳܐ[5].
ܐ̱ܚܪܳܢܝܳܐܺܝܬ ܟܺܝܬ ܘܳܐܦ ܗܺܝ ܐܶܡܳܐ ܕܺܝܠܰܢ܆ ܡܥܺܝܢܳܐ ܗܳܝ ܕܰܣܚܳܬܳܐ ܕܝܰܠܕܳܐ ܕܡܶܢ ܕܪܺܝܫ܆ ܟܰܕ ܥܬܺܝܕܳܐ ܗܳܝܕܶܝܢ ܕܰܠܝܰܠܕܳܐ ܚܰܕܬܳܐ ܬܰܦܶܩ܆ ܨܳܒܝܳܐ ܕܰܠܗܳܢܽܘܢ ܕܰܥܬܺܝܕܺܝܢ ܕܢܶܬܝܰܠܕܽܘܢ܆ ܬܚܰܘܶܐ ܠܗܽܘܢ ܒܢܶܝ̈ܗ̇ ܗܳܢܽܘܢ ܕܩܰܕܺܝܡܺܝܢ ܝܺܠܺܝܕܺܝܢ܆ ܗܳܢܰܘ ܕܶܝܢ ܠܰܢ܆ ܘܬܺܐܡܰܪ ܠܘܳܬܗܽܘܢ܆ ܚܙܰܘ ܐܳܘ ܒܢܰܝ̈ ܠܰܐܚܰܝ̈ܟܽܘܢ ܩܰܕܡܳܝ̈ܶܐ. ܒܗܽܘܢ ܛܰܢܘ ܘܰܒܥܶܩ̈ܒܳܬܳܐ ܕܺܝܠܗܽܘܢ ܪܕܰܘ. ܒܳܗ̇ ܟܰܕ ܒܳܗ̇ ܒܺܝܠܺܝܕܽܘܬܳܐ ܐܰܠܳܗܳܝܬܳܐ ܐܶܫܬܰܘܬܰܦܬܽܘܢ ܠܗܽܘܢ܆ ܘܰܒܝܰܠܕܳܐ ܪܽܘܚܳܢܳܐ܆ ܠܗܽܘܢ ܟܰܕ ܠܗܽܘܢ ܠܰܐܡ̈ܢܶܐ ܐܰܟܘܳܬܗܽܘܢ ܐܰܚܽܘܕܘ܆ ܘܶܐܫܬܰܘܬܰܦܘ ܠܥܰܡ̈ܠܶܐ ܕܰܡܝܰܬܪܽܘܬܳܐ. ܟܰܕ ܐܰܚ̈ܶܐ ܕܗܳܠܶܝܢ ܐܶܬܚܰܘܺܝܬܽܘܢ܆ ܐܰܚ̈ܘܳܬܳܐ ܣܥܽܘܪܘ ܘܠܰܘ ܢܽܘܟܪ̈ܳܝܳܬ ܓܶܢܣܳܐ.
ܐܶܬܒܰܩܰܘ ܕܕܰܐܝܟ ܐܰܝܢܳܐ ܐܺܝܬܰܘܗ̱ܝ ܩܺܝܢܕܽܘܢܘܤ܆ ܕܕܰܟܡܳܐ ܥܽܘܬܳܕܳܐ ܐܺܝܬ ܠܰܢ ܣܽܘܢܩܳܢܳܐ܆ ܐܰܝܟܰܢܳܐ ܕܰܠܗܳܢܽܘܢ ܕܰܥܬܺܝܕܺܝܢ ܕܢܶܫܬܘܽܘܢ ܠܢܽܘܗܪܳܐ ܗܰܘ ܠܳܐ ܡܶܬܡܰܠܠܳܢܳܐ܆ ܢܶܗܘܶܐ ܬܰܚܘܺܝܬܳܐ ܕܗܳܝ ܕܫܰܦܺܝܪ ܢܺܐܚܽܘܢ. ܪܰܘܪ̈ܒܳܬܳܐ ܓܶܝܪ ܐܰܝܟ ܕܒܰܫܪܳܪܳܐ ܝܳܕܰܥ ܐܳܦ ܠܡܰܘܬ̣ܳܪܽܘ ܐܳܦ ܠܰܡܣܰܓܳܦܽܘ܆ ܕܽܘܒܳܪܳܐ ܕܗܳܢܽܘܢ ܕܗܳܐ ܡܶܢ ܟܰܕܽܘ ܗܰܝܡܶܢܘ܆ ܠܗܳܢܽܘܢ ܕܚܰܕܬ̣ܳܐܺܝܬ ܐܶܬܩܰܪܰܒܘ. ܡܶܢ ܡܰܗܡܝܳܢܽܘܬܳܐ ܡܰܢ ܓܶܝܪ ܘܡܰܐܺܝܢܽܘܬܳܐ ܕܗܳܢܽܘܢ ܕܡܶܢ ܩܕܺܝܡ ܒܰܡܗܰܝܡ̈ܢܶܐ ܐܶܬܟܬܶܒܘ܆ ܕܛܽܘܦܣܳܐ ܡܶܕܶܡ ܐܺܝܬܶܝܗ̇ ܘܶܐܣܟܺܡܳܐ ܒܰܠܚܽܘܕ܆ ܘܰܡܨܰܕܝܳܢܽܘܬܐ ܡܶܕܶܡ ܐ̱ܚܪܳܢܝܳܐܺܝܬ ܚܳܫܒܺܝܢ ܠܳܗ̇ ܠܰܣܚܳܬܳܐ. ܡܶܢ ܝܰܨܺܝܦܽܘܬܳܐ ܕܶܝܢ ܘܪܶܚܡܰܬ ܥܰܡܠܳܐ܆ ܪܰܗܒܽܘܢܳܐ ܕܣܳܥܽܘܪ̈ܘܳܬܳܐ ܛܳܒ̈ܳܬܳܐ.
ܗܳܐ ܬܽܘܒ ܪܶܫܡܶܬ ܠܟܽܘܢ ܐܰܝܟ ܕܰܒܢܽܘܛܦܬܳܐ ܡܶܕܶܡ ܒܰܡܚܺܝܠܽܘܬܳܐ ܕܡܶܠܰܝ̈܆ ܠܚܰܝܠܶܗ ܕܒܰܝܬܳܐ ܗܰܘ ܕܢܽܘܗܪܳܐ. ܠܡܰܦܰܩܬܳܐ ܕܗܳܫܳܐ. ܠܡܰܥܰܠܬܳܐ ܗܳܝ ܕܒܳܬܰܪ ܩܰܠܺܝܠ. ܠܢܳܡܽܘܣ̈ܶܐ ܗܳܢܽܘܢ ܕܥܰܡܗܽܘܢ ܙܳܕܶܩ ܠܡܶܥܰܠ. ܠܥܽܘܬܳܕܳܐ. ܠܕܶܚܠܬܳܐ. ܠܣܰܒܪܳܐ. ܠܫܽܘܠܳܡܳܐ ܗܰܘ ܕܰܠܘܳܬܶܗ ܚܳܝܪ̈ܳܢ܆ ܗܳܠܶܝܢ ܕܗܳܪܟܳܐ ܡܶܫ̈ܬܰܡܠܝܳܢ. ܐܳܦ ܓܶܝܪ ܫܶܡܥܶܬ ܠܦܽܘܩܕܳܢܳܐ ܐܰܠܳܗܳܝܳܐ ܗܰܘ ܕܰܠܘܳܬ ܚܰܙܩܝܐܝܠ܆ ܐܳܦܶܢ ܕܶܐ݀ܫܬܽܘܩ ܨܳܒܶܐ ܗ̱ܘܺܝܬ܆ ܘܟܰܕ ܪܳܥܶܠ ܐ̱ܢܳܐ ܐܶܫܬܰܡܥܶܬ܆ ܘܶܐܡܪܶܬ ܠܟܽܘܢ ܗܳܠܶܝܢ ܙܥܽܘܪ̈ܝܳܬܳܐ. ܡܳܢܰܘ ܕܶܝܢ ܗܽܘ ܦܽܘܩܕܳܢܳܐ. ܘܬܶܪܫܡܺܝܘܗ̱ܝ ܠܒܰܝܬܳܐ ܘܰܠܛܽܘܝܳܒܶܗ܆ ܘܰܠܡܰܦ̈ܩܳܢܰܘܗ̱ܝ ܘܰܠܡܰܥ̈ܠܳܢܰܘܗ̱ܝ ܘܰܠܩܽܘܝܳܡܶܗ. ܘܰܠܟܽܠܗܽܘܢ ܦܽܘܩ̈ܕܳܢܰܘܗ̱ܝ ܘܰܠܟܽܠܗܶܝܢ ܢܳܡܽܘܣܳܝ̈ܳܬܳܐ ܕܺܝܠܶܗ. ܘܰܠܟܽܠܗܽܘܢ ܢܳܡܽܘܣܰܘܗ̱ܝ ܬܰܘܕܰܥ ܠܗܽܘܢ ܘܬܶܪܫܽܘܡ ܩܕܳܡܰܝܗܽܘܢ܆ ܘܶܢܛܪܽܘܢ ܟܽܠܗܽܘܢ ܙܶܕܩ̈ܶܐ ܕܺܝܠܝ ܘܟܽܠܗܽܘܢ ܦܽܘܩ̈ܕܳܢܶܐ ܕܺܝܠܝ܆ ܘܢܶܥܒܕܽܘܢ ܐܶܢܽܘܢ[6].
ܗܳܝ ܗܳܟܺܝܠ ܕܶܐ݀ܪܫܽܘܡ ܘܶܐ݀ܚܰܘܶܐ ܫܒܺܝܠܳܐ ܕܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ܆ ܕܺܝܠܝ. ܗܳܝ ܟܺܝܬ ܕܳܐܦ ܥܶܒܕܶܬ܆ ܟܰܕ ܒܡܶܠܬܳܐ ܙܥܽܘܪܬܳܐ ܠܪܰܘܪ̈ܒܳܬܳܐ ܐܶܡܪܶܬ ܡܰܪܗܛܳܐܺܝܬ. ܗܳܝ ܕܶܝܢ ܕܰܠܦܽܘܩ̈ܕܳܢܶܐ ܘܰܠܢܳܡܽܘܣ̈ܶܐ ܢܡܰܠܶܐ܆ ܬܽܘܒ ܕܺܝܠܝ ܐܳܦ ܕܺܝܠܟܽܘܢ. ܣܳܥܽܘܪܽܘܬܳܐ ܓܶܝܪ ܕܓܰܘܳܐ ܗܝ܆ ܘܠܰܘ ܗܰܘ ܕܡܰܠܶܦ܆ ܗܳܐ ܡܶܢ ܟܰܕܽܘ ܡܶܢ ܗܳܝ ܕܢܶܣܥܽܘܪ ܡܰܓܗܰܝ ܠܶܗ. ܣܰܓܺܝ ܕܶܝܢ ܝܰܬܺܝܪܳܐܺܝܬ ܐܺܝܬܰܘܗ̱ܝ ܚܰܝܳܒܳܐ܆ ܕܗܳܠܶܝܢ ܕܡܰܠܶܦ ܢܶܥܒܶܕ. ܡܶܠܬܳܐ ܓܶܝܪ ܕܠܳܐ ܣܳܥܽܘܪܽܘܬܳܐ܆ ܠܳܐ ܡܶܫܟܚܳܐ ܕܬܬܡܰܛܶܐ ܠܢܰܦܫܳܐ܆ ܘܡܰܪܓܫܳܢܽܘܬܳܐ ܬܶܥܒܶܕ ܒܡܰܫܡܰܥܬܳܐ.
ܚܰܙܩܝܐܝܠ ܡܰܢ ܗܳܟܺܝܠ ܟܰܕ ܪܳܫܶܡ ܠܶܗ ܠܒܰܝܬܳܐ ܗܰܘ ܕܶܐܬܚܰܘܺܝ ܠܶܗ܆ ܡܶܢ ܬܰܪ̈ܥܰܘܗܝ܆ ܠܗܳܠܶܝܢ ܡܰܢ ܐܳܡܰܪ ܕܺܐܝܬܰܝܗܽܘܢ ܠܘܳܬ ܓܰܪܒܝܳܐ. ܠܗܳܠܶܝܢ ܕܶܝܢ ܠܘܳܬ ܬܰܝܡܢܳܐ. ܠܗܳܠܶܝܢ ܕܶܝܢ ܠܘܳܬ ܦܢܺܝܬܳܐ ܐ̱ܚܪܺܬܳܐ. ܘܳܐܡܰܪ ܕܙܳܕܶܩ ܠܶܗ ܠܗܰܘ ܕܥܳܐܶܠ ܒܝܰܕ ܗܳܢܳܐ ܬܰܪܥܳܐ܆ ܕܠܳܐ ܒܶܗ ܟܰܕ ܒܶܗ ܢܶܗܦܽܘܟ ܘܢܶܦܽܘܩ. ܟܰܕ ܐܳܡܰܪ ܗܳܟܰܢܳܐ. ܘܠܳܐ ܢܶܗܦܽܘܟ ܒܽܐܘܪܚܳܐ ܕܬܰܪܥܳܐ܆ ܗܰܘ ܕܒܶܗ ܥ̣ܰܠ. ܐܶܠܳܐ ܠܩܽܘܒܠܶܗ ܬܪܺܝܨܳܐܺܝܬ ܢܶܦܽܘܩ[7]. ܟܰܕ ܪܳܕܶܐ ܠܰܢ ܒܝܰܕ ܗܳܢܳܐ ܛܽܘܦܣܳܐ ܓܰܠܝܳܐܺܝܬ܆ ܕܠܳܐ ܙܳܕܶܩ ܠܗܰܘ ܕܰܠܘܳܬ ܚܶܙܘܳܢ̈ܶܐ ܐܰܠܳܗܳܝ̈ܶܐ ܥ̣ܰܠ܆ ܘܰܐܝܟ ܗܰܘ ܕܰܒܗܰܝܟܠܳܐ ܗܘ̣ܳܐ ܘܰܠܓܘ ܡܶܢ ܟܰܣ̈ܝܳܬܳܐ ܐܺܝܬܰܘܗ̱ܝ܆ ܕܰܠܒܶܣܬܪܶܗ ܬܽܘܒ ܢܶܪܗܰܛ. ܐܶܠܳܐ ܕܢܶܪܰܓ ܠܗܳܠܶܝܢ ܕܰܠܩܰܕܡ̈ܶܐ܆ ܘܡܶܢ ܣܰܘܦܳܐ ܠܣܰܘܦܳܐ ܢܶܦܽܘܩ ܐܰܝܟ ܕܡܶܫܟܚܳܐ. ܘܥܰܡ ܦܰܘܠܽܘܤ ܢܺܐܡܰܪ܆ ܕܟܰܕ ܠܗܳܠܶܝܢ ܡܰܢ ܕܒܶܣܬܰܪܝ ܛܳܥܶܐ ܐ̱ܢܳܐ܆ ܒܗܳܠܶܝܢ ܕܶܝܢ ܕܠܰܩܕܳܡܰܝ ܡܶܫܬܰܘܫܰܛ ܐ̱ܢܳܐ܆ ܐܰܝܟ ܢܺܝܫܳܐ ܪܳܕܶܦ ܐ̱ܢܳܐ ܠܘܳܬ ܟܠܺܝܠܳܐ ܕܰܩܪܳܝܬܳܐ ܕܰܠܥܶܠ ܕܰܐܠܳܗܳܐ[8].
ܐܶܢܳܐ ܕܶܝܢ ܟܰܕ ܠܗܳܢܳܐ ܒܰܝܬܳܐ ܐܰܠܳܗܳܝܳܐ ܚܳܙܶܐ ܐ̱ܢܳܐ܆ ܕܟܽܠܶܗ ܠܘܳܬ ܡܰܕܢܚܳܐ ܣܺܝܡ܆ ܡܰܠܽܘܢ ܕܶܝܢ ܒܶܗ ܒܢܽܘܗܪܳܐ܆ ܘܡܶܢ ܫܶܡܫܳܐ ܗܰܘ ܕܙܰܕܝܩܽܘܬܳܐ ܡܶܬܢܰܗܰܪ܆ ܠܳܐ ܦܺܝܠܘܣܽܘܦܣܳܐ ܥܳܒܶܕ ܐ̱ܢܳܐ ܠܟܽܘܢ ܡܶܛܽܠ ܡܰܥܰܠܬܳܐ ܘܡܰܦܰܩܬܳܐ. ܡܳܠܶܟ ܐ̱ܢܳܐ ܠܟܽܘܢ ܕܶܝܢ ܕܳܐܦ ܟܰܕ ܩܰܠܺܝܠ ܦܰܓܪܳܢܳܐܺܝܬ ܠܒܰܪ ܡܶܢܳܗ̇ ܗܳܘܶܝܢܰܢ܆ ܠܓܰܘ ܢܶܗܘܶܐ ܐܺܝܬܰܝܢ ܒܬܰܪܥܺܝܬܳܐ܆ ܘܢܶܗܘܶܐ ܩܒܺܝܥܺܝܢܰܢ ܠܘܳܬܶܗ܆ ܘܠܳܐ ܢܶܪܚܰܩ ܡܶܢܶܗ ܡܬܽܘܡ. ܐܰܝܟܰܢܳܐ ܓܶܝܪ ܬܺܚܶܐ ܢܰܦܫܐ ܚܰܝ̈ܶܐ ܗܳܢܽܘܢ ܫܰܪܺܝܪ̈ܶܐ܆ ܐܳܦ ܟܰܕ ܒܙܰܒܢܳܐ ܙܥܽܘܪܳܐ ܗܰܘ ܕܠܳܐ ܡܶܬܦܣܶܩ ܡܶܛܽܠ ܙܥܽܘܪܽܘܬܶܗ ܡܶܬܦܰܪܫܳܐ ܡܶܢ ܢܽܘܗܪܳܐ.
ܐܶܠܳܐ ܗܳܫܳܐ ܠܺܝ ܟܰܕ ܪ̈ܺܝܫܰܝܟܽܘܢ ܡܰܪܟܢܺܝܢ ܐܢ̱ܬܽܘܢ ܠܰܡܥܺܝܢܳܐ ܗܳܕܶܐ ܡܰܠܝܰܬ ܛܳܒ̈ܳܬܳܐ܆ ܐܶܬܟܰܫܰܦܘ ܚܦܺܝܛܳܐܺܝܬ ܘܰܒܪܶܚܡܰܬ ܥܰܡܠܳܐ܆ ܡܶܛܽܠ ܩܰܛܰܤܛܰܣܺܝܤ ܕܟܽܠܶܗ ܥܳܠܡܳܐ. ܡܶܛܽܠ ܫܰܦܺܝܪܽܘܬ ܩܽܘܝܳܡܳܐ ܕܣܽܘܥܪ̈ܳܢܶܐ. ܡܶܛܽܠ ܗܳܢܽܘܢ ܕܰܚܠܳܦ ܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܡܶܬܟܰܬܫܺܝܢ. ܡܶܛܽܠ ܫܰܝܢܳܐ ܕܒܰܪܢܳܫܳܐ. ܕܗܰܘ ܕܰܠܒܰܪ. ܕܗܰܘ ܕܰܠܓܰܘ. ܡܶܛܽܠ ܗܰܘ ܕܡܶܬܚܙܶܐ. ܡܶܛܽܠ ܗܰܘ ܕܡܶܣܬܰܟܰܠ. ܘܢܶܬܶܠ ܠܟܽܘܢ ܡܶܢ ܟܽܠ ܦܪܽܘܤ܆ ܗܰܘ ܕܳܐܦ ܠܗܳܢܽܘܢ ܕܡܶܬܢܰܗܪܺܝܢ ܝܳܗܶܒ܆ ܥܰܡ ܚܽܘܪܳܪܳܐ ܗܰܘ ܕܡܶܢ ܚ̈ܛܳܗܰܝܟܽܘܢ܆ ܐܳܦ ܫܽܘܠܳܡܳܐ ܘܡܰܦܩܳܢܳܐ ܛܳܒܳܐ ܕܟܽܠܗܶܝܢ ܗܳܠܶܝܢ ܕܫܳܐܠܺܝܢ ܐܢ̱ܬܽܘܢ. ܡܶܕܶܡ ܓܶܝܪ ܪܰܒܳܐ ܡܶܫܟܚܳܐ ܨܠܽܘܬܳܐ ܪܳܚܡܰܬ ܥܰܡܠܳܐ ܘܰܚܦܺܝܛܬܳܐ܆ ܒܒܰܝܬܳܐ ܕܰܩܕܽܘܫ ܩܽܘܕܫ̈ܶܐ. ܬܶܗܘܶܐ ܠܰܢ ܕܶܝܢ܆ ܕܒܳܬܰܪ ܟܽܠܗܶܝܢ ܗܳܠܶܝܢ܆ ܕܳܐܦ ܠܡܰܠܟܽܘܬܳܐ ܕܰܫܡܰܝܳܐ ܢܶܫܬܘܶܐ. ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܗܰܘ ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܕܺܝܠܶܗ ܩܰܕܺܝܫܳܐ ܘܡܰܥܒܶܕ ܚܰܝ̈ܶܐ ܘܕܰܫܘܶܐ ܠܶܗ ܒܽܐܘܣܺܝܰܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ܀
ܫܠܡ ܡܺܐܡܪܐ ܕܡܳܐܐ ܘܶܫܬܳܐ.
[1]ܒܶܝܬ ܢܽܘܗܪܳܐ ܡܶܬܩܪܶܐ ܠܘܳܬ ܝܰܘ̈ܢܳܝܶܐ܆ ܒܰܝܬܳܐ ܗܰܘ ܕܒܶܝܬ
ܡܰܥܡܽܘܕܺܝܬܳܐ܆ ܡܶܛܽܠܗܳܕܶܐ ܒܥܶܠ ܫܡܳܐ ܕܢܽܘܗܪܳܐ ܩܪܳܝܗܝ ܡܰܠܦܳܢܳܐ