ܡܺܐܡܪܳܐ ܕܡܳܐܐ ܘܚܰܡܫܳܐ

ܕܥܰܠ ܨܰܘܡܳܐ ܩܰܕܺܝܫܳܐ ܕܺܐܝܬܰܘܗ̱ܝ ܕܚܰܡܫܳܐ. ܐܶܬܶܐܡܰܪ ܕܶܝܢ ܒܥܺܕܬܳܐ ܪܰܒܬܳܐ.

105: ܠܩܺܒܽܘܬܐ ܗܳܝ ܩܰܕܺܝܫܬܳܐ܆ ܗܳܝ ܕܺܐܝܬ ܗ̱ܘܳܐ ܒܳܗ̇ ܠܽܘܚ̈ܶܐ ܕܢܳܡܽܘܣܳܐ ܗܳܠܶܝܢ ܟܬܺܝ̈ܒܳܬ ܡܶܢ ܐܰ‌ܠܳܗܳܐ܆ ܘܚܽܘܛܪܳܐ ܬܡܺܝܗܳܐ ܗܰܘ ܕܰܐܗܪܽܘܢ܆ ܗܰܘ ܕܡܶܢ ܒܳܬܰܪ ܦܣܳܩܳܐ ܕܡܶܢ ܙܰܒܢܳܐ܆ ܒܚܰܕ ܠܶܠܝܳܐ ܐܰܟܚܕܳܐ ܐܰܦܪܰܥ ܛܰܪ̈ܦܶܐ ܘܰܩܠܳܦܬܳܐ ܘܦܺܐܪ̈ܶܐ^[1]܆ ܘܩܶܣܛܳܐ ܗܳܝ ܕܕܰܗܒܳܐ܆ ܗܳܝ ܕܰܠܡܶܛܪܳܐ ܗܰܘ ܫܡܰܝܳܢܳܐ ܘܰܡܬܰܪܣܝܳܢܳܐ ܘܰܕܠܳܐ ܡܰܘܦܶܐ ܠܡܰܢܢܳܐ ܐܳܡܰܪ ܐ̱ܢܳܐ ܢܳܛܪܳܐ ܗ̱ܘܳܬ܆ ܐܶܚܰܕܘ ܦܠܰܫ̈ܬܳܝܶܐ ܒܰܙܒܰܢ܆ ܟܰܕ ܠܗܳܢܽܘܢ ܕܡܶܢ ܐܺܝܣܪܳܐܶܝܠ ܕܰܐܪܓܶܙܘ ܠܰܐܠܳܗܳܐ^[2]܆ ܙܟܰܘ ܒܽܐܘܚܕܳܢܳܐ ܒܣܶܕܪܳܐ ܕܰܩܪܳܒܳܐ. ܐܶܠܳܐ ܟܰܕ ܐܶܬܪܕܺܝܘ ܐܳܦ ܗܳܠܶܝܢ܆ ܘܰܒܠܰܥܘ ܒܫܽܘܚ̈ܢܶܐ ܠܳܐ ܡܶܬܐܰܣ̈ܝܳܢܶܐ. ܟܰܕ ܣܳܡܽܘܗ̇ ܥܰܠ ܥܳܓܰܠܬܳܐ ܥܰܡ ܣܶܓܕܬܳܐ ܘܩܽܘܪ̈ܒܳܢܶܐ ܦܰܢܝܽܘܗ̇܆ ܟܰܕ ܝܺܕܰܥܘ ܡܶܢ ܩܺܒܽܘܬܳܐ^[3]܆ ܕܡܰܢܽܘ ܐܰ‌ܠܳܗܳܐ ܕܗܳܕܶܐ.

ܐܶܠܳܐ ܟܰܕ ܗܳܟܰܢܳܐ ܬܡܺܝܗܳܐܺܝܬ ܘܰܐ‌ܠܳܗܳܐܺܝܬ ܡܶܢ ܠܘܳܬ ܒܥܶܠ̈ܕܒܳܒܶܐ ܦܢܳܬ̣ ܐܶܬ̣ܳܬ̣܆ ܟܰܕ ܘܠܳܐ ܐ̱ܢܳܫ ܥܡܰܠ ‌ܐܰܘ ܐܰܩܪܶܒ܆ ܟܽܠܶܗ ܗܳܢܳܐ ܐܺܝܬܰܝܗܽܘܢ ܗ̱ܘܰܘ ܗܳܢܽܘܢ ܕܡܶܬܐܡܪܺܝܢ ܗ̱ܘܰܘ ܐܺܝܣܰܪ̈ܠܳܝܶܐ܆ ܕܰܒܛܳܥܝܽܘܬܳܐ ܕܡܶܢ ܐܰ‌ܠܳܗܳܐ ܛܡܺܝܪ ܗܰܘܢܗܽܘܢ܆ ܐܰܝܟܰܢܳܐ ܕܥܰܠ ܚܙܳܬܳܐ ܘܣܳܥܽܘܪܽܘܬ ܬܶܕܡܪ̈ܳܬܳܐ ܪܰܒܬܳܐ܆ ܘܰܕܕܰܐܝܟ ܗܳܕܶܐ܆ ܠܳܐ ܡܶܬܬܥܳܪܽܘ ܢܶܬܬܥܺܝܪܽܘܢ܆ ܐܳܦܠܳܐ ܠܡܳܪܝܳܐ ܘܥܳܒܽܘܕܳܐ ܕܰܬܡܺܝ̈ܗܳܬܳܐ ܢܫܰܒܚܽܘܢ. ܟܰܕ ܙܳܕܶܩ ܗ̱ܘܳܐ ܕܢܶܚܕܽܘܢ܆ ܘܰܢܕܽܘܨܽܘܢ ܪܽܘܚܳܢܳܐܺܝܬ ܒܰܕܡܽܘܬ ܢܒܺܝܳܐ ܕܰܘܺܝܕ ܕܪܳܩܶܕ ܗ̱ܘܳܐ ܘܕܳܨ ܩܕܳܡܶܝܗ̇^[4]. ܟܰܕ ܒܶܗ ܒܗܳܢܳܐ ܙܢܳܐ ܡܶܬܬܰܝܬܝܳܐ ܗ̱ܘܳܬ ܠܘܳܬ ܗܰܝܟܠܳܐ ܒܙܰܒܢܳܐ ܐ̱ܚܪܺܢܳܐ.

ܡܳܢܳܐ ܗܳܟܺܝܠ ‌ܐܳܡܰܪ ܟܬܳܒܳܐ ܟܳܗܢܳܝܳܐ܆ ܡܶܛܽܠ ܗܳܢܽܘܢ ܕܗܳܝܕܶܝܢ ܩܰܕܡܳܐܺܝܬ ܕܳܘܝܳܐܺܝܬ ܚܙܰܐܘܽܗ̇܆ ܠܗܳܠܶܝܢ ܕܳܐܦ ܗܳܢܽܘܢ ܕܫܰܪܟܳܐ܆ ܒܳܗ̇ ܒܰܕܡܽܘܬܳܐ ܐܺܝܬܰܝܗܽܘܢ ܗ̱ܘܰܘ. ܘܠܳܐ ܚܕܺܝܘ ܒܢܰܝ̈ܳܐ ܕܝܐܟܘܢܝܐ ܒܓܰܒܪ̈ܶܐ ܕܒܶܝܬ ܫܡܶܫ܆ ܕܰܚܙܰܘ ܠܩܺܒܽܘܬܶܗ ܕܡܳܪܝܳܐ. ܘܰܡܚܳܐ ܒܗܽܘܢ ܫܰܒܥܺܝܢ ܓܰܒܪ̈ܶܐ܆ ܘܚܰܡܫܺܝܢ ܐܰ‌ܠ̈ܦܰܝܳܐ ܕܓܰܒܪ̈ܶܐ^[5].

ܟܰܕ ܗܳܠܶܝܢ ܫܳܡܰܥ ܐ̱ܢܳܐ ܐܶܢܳܐ܆ ܕܳܚܶܠ ‌ܐ̱ܢܳܐ ܘܪܳܥܶܠ ‌ܐ̱ܢܳܐ. ܘܠܰܟܪܽܘܟܝܳܐ ܕܗܳܠܶܝܢ ܐܰܪܒܥܺܝܢ ܝܰܘ̈ܡܳܬܳܐ ܩܰܕܺܝ̈ܫܶܐ ܕܨܰܘܡܳܐ܆ ܕܠܰܘ ܡܶܢ ܠܘܳܬ ܦܠܰܫ̈ܬܳܝܶܐ ܐܶܠܳܐ ܡܶܢܗܽܘܢ ܕܰܫܡܰܝܳܐ ܦܢܳܐ ܐܶܬܳܐ܆ ܡܶܢ ܬܰܡܳܢ ܓܶܝܪ ܦܩܺܝܕ ܠܰܢ܆ ܟܰܕ ܡܰܪܟܶܢ ܐ̱ܢܳܐ ܨܰܘܪܳܐ ܕܺܝܠܝ ܘܰܠܬܰܚܬ ܡܶܬܓܗܶܢ ܐ̱ܢܳܐ܆ ܣܳܓܶܕ ܐ̱ܢܳܐ ܘܫܳܐܶܠ ‌ܐ̱ܢܳܐ ܫܠܳܡܶܗ. ܘܠܰܘ ܗܳܕܶܐ ܒܰܠܚܽܘܕ܆ ܐܶܠܳܐ ܐܳܦ ܚܳܕܝܳܐܺܝܬ ܡܩܰܒܶܠ ‌ܐ̱ܢܳܐ ܠܶܗ. ܘܕܳܐܶܨ ܐ̱ܢܳܐ ܘܚܳܕܶܐ ܐ̱ܢܳܐ. ܗܺܝ ܕܶܝܢ ܗܳܕܶܐ ܐܳܦ ܠܟܽܘܢ ܡܰܪܬܶܐ ܐ̱ܢܳܐ ܠܡܶܥܒܰܕ ܘܰܠܡܶܚܫܰܒ. ܙܳܕܶܩ ܓܶܝܪ ܕܰܩܕܳܡ ܣܳܥܽܘܪܽܘܬܳܐ ܚܽܘܫܳܒܳܐ ܢܶܬܚܠܶܡ܆ ܐܰܝܟܰܢܳܐ ܕܗܳܝ ܕܡܶܣܬܰܥܪܳܐ܆ ܡܶܢ ܚܽܘܫܳܒܳܐ ܬܶܗܘܶܐ ܐܺܝܬܶܝܗ̇.

ܠܰܘ ܓܶܝܪ ܠܽܘܚ̈ܶܐ ܕܟܺܐܦܳܐ ܡܰܝܬܶܐ ܠܰܢ ܨܰܘܡܳܐ܆ ܐܶܠܳܐ ܠܶܗ ܠܰܡܫܺܝܚܳܐ ܐܰ‌ܠܳܗܳܐ ܘܣܳܐܶܡ ܢܳܡܽܘܣܳܐ ܘܡܰܠܟܳܐ܆ ܕܰܚܠܳܦܰܝܢ ܠܗܳܢܳܐ ܨܳܡ. ܐܰܝܟܳܐ ܓܶܝܪ ܐܺܝܬ ܗ̱ܘܳܐ ܣܽܘܢܩܳܢܳܐ ܠܳܐܣܝܳܐ ܥܰܠ ܣܰܡܡ̈ܳܢܶܐ܆ ܠܘܳܬ ܥܽܘܕܪܳܢܳܐ ܒܰܝܬܳܝܳܐ. ܕܗܳܢܽܘܢ ܓܶܝܪ ܕܰܟܪܺܝܗܶܝܢ ܝܺܕܺܝܥܳܐ ܕܺܐܝܬܰܝܗܽܘܢ ܥܨܳܒ̈ܶܐ ܡܰܐܣ̈ܝܳܢܶܐ܆ ܘܠܰܘ ܕܗܳܢܽܘܢ ܕܰܚܠܺܝܡܺܝܢ ܣܰܡ̈ܡܳܢܶܐ. ܐܰܝܟܰܢܳܐ ܕܶܝܢ ܗܰܘ ܕܠܳܐ ܝܳܕܰܥ ܚܛܺܝܬܳܐ܆ ܒܗܳܢܽܘܢ ܕܰܟܪܺܝܗܶܝܢ ܢܶܬܚܫܶܒ ܡܬܽܘܡ. ܐܶܢ ܓܶܝܪ ܗܺܝ ܗܳܝ ܩܰܕܡܳܝܬܳܐ܆ ܡܶܛܽܠܳܬܳܟ ܘܡܶܛܽܠ ܦܽܘܪܩܳܢܳܐ ܕܺܝܠܳܟ ܐܶܬܒܰܣܰܪ ܘܶܐܬܒܰܪܢܰܫ܆ ܗܳܕܶܐ ܓܶܝܪ ܐܳܦ ܒܶܗ ܒܝܽܘܠܦܳܢܳܐ ܕܗܰܝܡܳܢܽܘܬܳܐ ܡܰܘܕܶܝܢ ܚ̱ܢܰܢ ܠܳܗ̇܆ ܡܶܢ ܟܽܠܦܪܽܘܤ ܡܶܛܽܠܳܬܳܟ ܐܳܦ ܨܳܡ. ܢܳܩ̈ܦܳܢ ܓܶܝܪ ܗܳܠܶܝܢ ܕܡܶܢ ܒܳܬܰܪܟܶܢ܆ ܠܫܽܘܪ̈ܳܝܶܐ ܗܳܠܶܝܢ ܩܰܕܡܳܝ̈ܶܐ. ܗܰܘ ܗܳܟܺܝܠ ܕܠܰܘ ܡܶܛܽܠ ܢܰܦܫܶܗ ܐܶܬܒܰܣܰܪ܆ ܐܳܦܠܳܐ ܡܶܛܽܠ ܢܰܦܫܶܗ ܐܰܢܰܢܩܺܐ ܩܰܒܶܠ ܨܰܘܡܳܐ. ܘܣܰܗܶܕ ܦܰܘܠܽܘܤ ܫܠܺܝܚܳܐ܆ ܕܰܒܡ̈ܶܠܶܐ ܙܥܽܘܪ̈ܝܳܬܳܐ ܟܽܠܗܶܝܢ ܗܳܠܶܝܢ ܚܰܘܺܝ ܓܰܠܝܳܐܺܝܬ܆ ܕܰܥܘ ܓܶܝܪ ܐܳܡܰܪ ܠܛܰܝܒܽܘܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܕܡܶܛܽܠܳܬܟܽܘܢ ܐܶܬܡܰܣܟܰܢ ܟܰܕ ܥܰܬܺܝܪܳܐ ܐܺܝܬܰܘܗ̱ܝ܆ ܐܰܝܟܰܢܳܐ ܕܰܐܢ̱ܬܘܢ ܒܡܶܣܟܺܢܽܘܬܶܗ ܕܗܰܘ ܬܶܥܬܪܽܘܢ^[6].

ܠܰܐܠܳܗܳܐ ܕܶܝܢ ܗܰܘ ܕܳܐܦܠܳܐ ܥܰܠ ܡܶܕܶܡ ܣܢܺܝܩ܆ ܡܳܪܳܢܳܐܺܝܬ ܓܶܝܪ ܗܳܢܰܘ ܥܰܬܺܝܪܳܐ܆ ܗܰܘ ܕܥܰܠ ܡܶܕܶܡ ܠܳܐ ܣܢܺܝܩ ܘܗܰܘ ܕܰܒܟܽܠܗܶܝܢ ܣܳܦܶܩ ܗܽܘ ܠܶܗ܆ ܡܶܣܟܺܢܽܘܬܳܐ ܐܺܝܬܶܝܗ̇ ܐܳܦ ܗܳܝ ܕܢܶܬܒܰܣܰܪ܆ ܘܳܐܦ ܗܳܝ ܕܥܰܡ ܒܢܰܝ̈ܢܳܫܳܐ ܢܶܬܗܰܦܰܟ܆ ܘܳܐܦ ܗܳܝ ܕܢܶܥܡܰܕ. ܗܳܟܰܢܳܐ ܟܺܝܬ ܐܳܦ ܗܳܝ ܕܰܢܨܽܘܡ܆ ܐܳܦ ܗܳܝ ܕܰܠܢܶܣܝܳܢܳܐ ܕܳܐܟܶܠ ܩܰܪܨܳܐ ܢܩܰܒܶܠ. ܐܶܠܳܐ ܠܗܳܕܶܐ ܟܽܠܳܗ̇ ܡܶܣܟܺܢܽܘܬܳܐ܆ ܒܛܰܝܒܽܘܬܶܗ ܕܰܠܘܳܬܰܢ ܐܶܨܛܒܺܝ ܕܢܶܬܡܰܣܟܰܢ ܡܶܛܽܠܳܬܰܢ܆ ܟܰܕ ܥܰܬܺܝܪܳܐ ܐܺܝܬܰܘܗ̱ܝ. ܡܶܛܽܠ ܕܳܐܦ ܡܰܘܕܥܳܢܽܘܬܳܐ ܣܰܓܺܝܐܬܳܐ ܐܺܝܬ ܠܳܗ̇܆ ܘܳܐܦ ܡܚܰܘܝܳܢܳܐܺܝܬ ܛܳܒ ܐܰܡܺܝܪܳܐ ܠܶܗ ܠܰܫܠܺܝܚܳܐ܆ ܗܳܝ ܕܰܕܥܰܘ ܓܶܝܪ ܠܛܰܝܒܽܘܬܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܕܡܶܛܽܠܳܬܟܽܘܢ ܐܶܬܡܰܣܟܰܢ ܟܰܕ ܥܰܬܺܝܪܳܐ ܐܺܝܬܰܘܗ̱ܝ^[7].

ܐܶܫܬܰܘܕܰܥܘ ܐܳܡܳܪ ܠܪܰܒܽܘܬܳܗ̇ ܕܛܰܝܒܽܘܬܳܐ. ܥܰܠ ܥܰܝ̈ܢܶܐ ܕܬܰܪܥܺܝܬܳܐ ܚܰܪܺܝܦܬܳܐ ܐܺܝܬ ܣܽܘܢܩܳܢܳܐ ܠܘܳܬ ܡܶܬܒܰܝܢܳܢܽܘܬܳܐ. ܗܰܘ ܕܺܐܝܬܰܘܗ̱ܝ ܥܰܬܺܝܪܳܐ ܒܰܟܝܳܢܳܐ ܐܶܬܡܰܣܟܰܢ ܡܶܛܽܠܳܬܰܢ܆ ܟܰܕ ܬܚܶܝܬ̣ܶܝܗ̇ ܕܺܝܠܳܗ̇ ܕܰܡܫܽܘܚܬܳܐ ܕܟܽܠܳܗ̇ ܡܶܣܟܺܢܽܘܬܳܐ ܟ̣ܕܰܢ ܗܽܘ ܠܶܗ܆ ܘܟܰܕ ܒܰܫܪܳܪܳܐ ܗܘ̣ܳܐ ܒܰܪܢܳܫܳܐ܆ ܥܰܡ ܗܳܝ ܕܺܐܝܬܰܘܗ̱ܝ ܐܰ‌ܠܳܗܳܐ. ܐܶ‌ܠܽܘ ܓܶܝܪ ܚܰܕ ܡܶܢ ܣܰܓܺܝ̈ܶܐܐ ܐܺܝܬܰܘܗ̱ܝ ܗ̱ܘܳܐ܆ ܚܠܳܦ ܐ̱ܚܪ̈ܳܢܶܐ ܕܢܶܬܡܰܣܟܰܢ ܠܳܐ ܡܨܶܐ ܗ̱ܘܳܐ. ܐܰܝܟܰܢܳܐ ܕܶܝܢ ܘܡܳܪܳܢܳܐܺܝܬ ܐܶܬܡܰܣܟܰܢ܆ ܗܰܘ ܕܠܰܘ ܒܰܟܝܳܢܳܐ ܐܺܝܬܰܘܗ̱ܝ ܥܰܬܺܝܪܳܐ. ܡܶܢ ܐܰܝܢܳܐ ܕܶܝܢ ܥܽܘܬܪܳܐ ܝܰܗ̱ܒ ܠܰܢ܆ ܗܰܘ ܕܠܰܘ ܒܽܐܘܣܺܝܰܐ ܐܺܝܬܰܘܗ̱ܝ ܡܳܪܝܳܐ ܕܟܽܠ. ܐܰܝܟܰܢܳܐ ܕܶܐܢ ܐ̱ܢܳܫ ܟܰܕ ܡܦܰܠܶܓ ܠܶܗ܆ ܒܗܳܝ ܕܳܐܡܰܪ ܠܶܗ ܬܪܶܝܢ ܟܝܳܢ̈ܶܐ ܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܦܰܫܩܳܢܺܝܬܳܐ܆ ܠܰܟܝܳܢܳܐ ܐ̱ܢܳܫܳܝܳܐ ܢܰܩܦܺܝܘܗ̱ܝ ܠܨܰܘܡܳܐ܆ ܐܰܘ ܠܡܶܕܶܡ ܐ̱ܚܪܺܝܢ ܡܶܢ ܗܳܠܶܝܢ ܕܰܡܕܰܒܪܳܢܽܘܬܳܐ ܘܡܰܟܺܝ̈ܟܳܬܳܐ܆ ܛܰܥܝܳܐ ܠܶܗ ܕܰܐܝܟ ܕܡܶܢ ܨܶܐܕܰܘܗ̱ܝ܆ ܠܗܰܘ ܥܰܬܺܝܪܳܐ ܡܫܰܠܰܚ ܡܶܢ ܡܶܬܡܰܣܟܢܳܢܽܘܬܳܐ ܗܳܝ ܨܶܒܝܳܢܳܝܬܳܐ܆ ܘܰܠܐ̱ܪܳܙܳܐ ܗܰܘ ܪܰܒܳܐ ܕܫܰܦܺܝܪܽܘܬ ܕܶܚܠܬܳܐ ܫܳܪܶܐ.

ܐܰ‌ܠܳܗܳܐ ܓܶܝܪ ܗܰܘ ܕܶܐܬܒܰܪܢܰܫ܆ ܟܰܕ ܚܰܕ ܐܺܝܬܰܘܗ̱ܝ ܡܶܢ ܬܰܪ̈ܬܶܝܢ ܠܳܐ ܡܶܬܦܰܣܩܳܢܳܐܺܝܬ܆ ܡܶܢ ܐܰ‌ܠܳܗܽܘܬܳܐ ܟܺܝܬ ܘܡܶܢ ܐ̱ܢܳܫܽܘܬܳܐ܆ ܨܳܡ ܠܰܘ ܣܢܺܝܩܳܐܺܝܬ܆ ܐܶܠܳܐ ܡܰܠܦܳܢܳܐܺܝܬ. ܟܰܕ ܐܰܫܶܦ ܗܽܘ ܡܶܢ ܨܶܒܝܳܢܶܗ ܠܚܺܐܦ̈ܶܐ ܪ̈ܰܝܽܘܓܬܳܢܶܐ ܕܟܰܦܢܳܐ ܗܰܘ ܕܰܠܚܰܪܬܳܐ ܟܦܶܢ ܒܰܫܪܳܪܳܐ܆ ܐܰܝܟ ܐܰܝܢܳܐ ܕܰܠܥܰܪ̈ܩܶܐ^[8] ܕܰܬܚܽܘܡ̈ܶܐ ܕܰܟܝܳܢܐ ܐܰܚܺܝܕ܆ ܘܠܰܘ ܟܰܕ ܠܥܰܪ̈ܩܶܐ ܩܛܺܝܪ̈ܳܝܳܬܳܐ ܕܗܰܘ ܢܳܩܶܦ ܗ̱ܘܳܐ ܐܰܝܟܰܢܳܐ ܕܰܚܢܰܢ.

ܗܳܟܰܢܳܐ ܟܺܝܬ ܐܳܦ ܟܰܕ ܐܶܬܳܐ ܕܢܶܐܣܪܺܝܘܗ̱ܝ ܠܚܰܣܺܝܢܳܐ ܒܪܰܒܽܘܬܳܐ ܕܚܰܝܠܳܐ ܐܰ‌ܠܳܗܳܝܳܐ܆ ܘܢܶܒܽܘܙ ܠܡܳܐܢܰܘ̈ܗܝ^[9] ܝܺܕܺܝܥܳܐ ܕܶܝܢ ܕܠܰܢ ܗܳܢܽܘܢ ܕܰܬܚܶܝܬ ܚܰܝܠܶܗ ܕܤܳܛܳܢܳܐ ܗܘ̣ܰܝܢܰܢ܆ ܐܰܝܟ ܕܰܒܕܰܐܪܳܐ ܠܢܶܣܝܳܢܶܗ ܩܰܒܶܠ ܥܠܰܘܗ̱ܝ܆ ܘܰܠܚܺܐܦ̈ܶܐ ܕܰܩܪܳܒܶܗ ܣܰܝܒܰܪ܆ ܟܰܕ ܐ̱ܢܳܫܳܐܺܝܬ ܘܡܰܟܺܝܟܳܐܺܝܬ ܡܦܰܢܶܐ ܗ̱ܘܳܐ ܦܶܬܓܳܡܳܐ ܠܰܒ̈ܢܳܬ ܩ̈ܳܠܶܐ ܨܢܺܝ̈ܥܳܬܳܐ ܕܗܰܘ܆ ܟܰܕ ܡܰܪ̈ܕܘܳܬܳܐ ܘܝܽܘܠ̈ܦܳܢܶܐ ܕܰܐܓܽܘ̈ܢܶܐ ܘܩܰܕܺܝܡܽܘܬ ܕܽܘܪ̈ܳܫܶܐ ܕܰܡܝܰܬܪܽܘܬܳܐ ܫܳܒܶܩ ܗ̱ܘܳܐ ܠܰܢ܆ ܘܫܳܪܶܐ ܗ̱ܘܳܐ ܘܡܰܪܦܶܐ ܠܚܰܝܠܶܗ ܕܗܰܘ ܕܰܛܪܽܘܢܳܐܺܝܬ ܐܶܬܥܰܫܰܢ܆ ܘܗܳܕܶܐ ܐܺܝܬܶܝܗ̇ ܗܳܝ ܟܺܝܬ ܕܶܐܡܰܪ ܦܰܘܠܽܘܤ܆ ܗܳܝ ܕܰܒܗܳܝ ܓܶܝܪ ܕܚܰܫ ܗܽܘ ܟܰܕ ܐܶܬܢܰܣܺܝ܆ ܡܶܫܟܰܚ ܠܰܡܥܰܕܳܪܽܘ ܠܗܳܢܽܘܢ ܕܡܶܬܢܰܣܶܝܢ^[10]. ܒܗܰܘ ܙܢܳܐ ܐܳܡܰܪ ܕܒܶܗ ܣܒܰܠ ܢܶܣܝܳܢܳܐ. ܒܶܗ ܬܰܩܶܢ ܠܰܢ ܥܽܘܕܪܳܢܳܐ ܕܚܰܝܠܳܐ܆ ܕܣܳܦܶܩ ܠܡܶܙܢܰܩ ܠܗܰܘ ܕܰܡܩܰܪܶܒ ܠܶܗ ܠܢܶܣܝܳܢܳܐ. ܡܳܕܶܝܢ ܠܰܘ ܕܰܡܚܺܝܠܽܘܬܰܐ ܗ̄ܘ ܢܶܣܝܳܢܶܗ ܕܝܶܫܽܘܥ. ܐܰܝܟܰܢܳܐ ܓܶܝܪ ܗܰܘ^[11] ܕܰܠܗܳܢܽܘܢ ܕܰܒܗܳܠܶܝܢ ܕܕܳܡ̈ܝܳܢ ܡܶܬܢܰܣܶܝܢ ܝܰܗ̱ܒ ܥܽܘܕܪܳܢܳܐ. ܥܰܠ ܗܳܝ ܐܳܦ ܡܰܠܰܐܟ̈ܶܐ ܟܰܪ ܩܪܶܒܘ܆ ܡܫܰܡܫܺܝܢ ܗ̱ܘܰܘ ܠܶܗ ܐܰܝܟ ܕܠܰܐܠܳܗܳܐ^[12]. ܗܳܢܽܘܢ ܕܚܰܕ ܡܶܢܗܽܘܢ ܒܰܠܚܽܘܕ ܟܰܕ ܢܶܬܦܩܰܕ ܗ̱ܘܳܐ܆ ܥܳܪܽܘܩܳܐ ܡܶܢ ܟܽܠ ܦܪܽܘܤ ܡܚܰܘܶܐ ܗ̱ܘܳܐ ܠܶܗ ܠܳܐܟܶܠ ܩܰܪܨܳܐ. ܐܶܠܳܐ ܒܝܰܕ ܟܽܠܗܶܝܢ ܡܶܬܚܰܘܝܳܐ ܗܳܝ ܕܦܰܐܝܳܐ ܠܰܐܠܳܗܳܐ܆ ܘܡܰܠܦܳܢܳܝܽܘܬܳܐ ܘܨܶܒܝܳܢܳܝܽܘܬܳܐ ܕܗܰܘ ܕܡܶܛܽܠ ܦܽܘܪܩܳܢܳܐ ܕܺܝܠܰܢ ܐܶܬܡܰܣܟܰܢ.

ܡܰܢܽܘ ܗܳܟܺܝܠ ܕܰܠܨܰܘܡܳܐ ܐܰܝܟ ܝܰܬܺܝܪܳܐ ܢܫܽܘܛ܆ ܠܗܰܘ ܕܗܳܟܰܢܳܐ ܚܰܘܝܶܗ ܠܰܢ ܕܺܐܝܬܰܘܗ̱ܝ ܝܰܬܺܝܪ ܡܶܢ ܟܽܠ ‌ܐܳ‌ܠܨܳܝܳܐ܆ ܗܰܘ ܐܰ‌ܠܳܗܳܐ ܘܦܳܪܽܘܩܳܐ܆ ܘܡܰܠܦܳܢܳܐ ܡܢܰܦܶܩ ܛܠܳܝ̈ܶܐ ܕܰܡܝܰܬܪܽܘܬܳܐ. ܐܺܝܛܰܐ^[13] ܟܰܕ ܟܬܺܝ̈ܒܳܬܳܐ ܡܰܢ ܒܰܠܚܽܘܕ ܕܡܰܠܟܳܐ ܡܶܢ ܪ̈ܺܝܫܳܢܶܐ ܒܫܽܘܩܳܐ ܢܶܬܬܣܺܝ̈ܡܳܢ܆ ܟܽܠܳܗ̇ ܐܰܢܰܢܩܺܐ ܐܺܝܬܶܝܗ̇ ܕܰܢܡܰܠܶܐ ܐܶܢܶܝܢ܆ ܟܰܕ ܕܶܝܢ ܐܰ‌ܠܳܗܳܐ ܣܥܰܪ ܡܶܛܽܠܳܬܰܢ ܘܗܳܟܰܢܳܐ ܦܰܩܕܶܗ ܠܗܰܘ ܡܳܐ ܕܰܣܥܰܪ܆ ܗܰܘ ܕܠܰܘ ܚܘܺܝܚܳܐܺܝܬ ܡܶܫܬܡܰܥ܆ ܠܰܘ ܡܰܪܳܚܳܐ ܐܺܝܬܰܘܗ̱ܝ܆ ܘܰܕܥܰܠ ܢܰܦܫܳܐ ܕܺܝܠܶܗ ܡܰܒܣܶܐ.

ܐܶܢܳܐ ܕܶܝܢ ܐܰܟܙܢܳܐ ܕܒܶܐܘܰܢ̈ܓܶܠܺܝܰܐ ܫܡܰܥܬܶܗ ܕܡܰܙܥܶܩ܆ ܕܗܰܘ ܕܳܐܟܶܠ ܦܰܓܪܝ ܘܫܳܬܶܐ ܕܶܡܝ ܐܺܝܬ ܠܶܗ ܚܰܝ̈ܶܐ ܕܰܠܥܳܠܰܡ܆ ܘܗܽܘ ܒܺܝ ܡܩܰܘܶܐ ܘܶܐܢܳܐ ܒܶܗ^[14]܆ ܝܰܬܺܝܪ ܢܰܗܺܝܪܳܐܺܝܬ ܡܣܰܒܰܪ ܐ̱ܢܳܐ ܕܫܳܡܰܥ ܐ̱ܢܳܐ ܠܶܗ ܕܰܒܝܰܕ ܗܳܠܶܝܢ ܕܰܣܥܰܪ ܐܳܡܰܪ܆ ܕܗܰܘ ܕܨܳܐܶܡ ܠܨܰܘܡܳܐ ܕܺܝܠܝ܆ ܐܺܝܬ ܠܶܗ ܚܰܝ̈ܶܐ ܕܰܠܥܳܠܰܡ܆ ܘܗܽܘ ܒܺܝ ܡܩܰܘܶܐ ܘܶܐܢܳܐ ܒܶܗ. ܒܶܗ ܟܰܕ ܒܶܗ ܒܰܙܢܳܐ܆ ܐܳܦ ܗܰܘ ܕܫܳܩܶܠ ܠܰܨܠܺܝܒܳܐ ܕܺܝܠܝ. ܐܳܦ ܗܰܘ ܕܡܶܬܡܰܣܟܰܢ ܡܶܣܟܺܢܽܘܬܳܐ ܕܺܝܠܝ. ܐܳܦ ܗܰܘ ܕܡܰܟܪܶܙ ܠܡܶܠܬܳܐ ܕܺܝܠܝ. ܐܳܦ ܗܰܘ ܕܰܠܗܳܠܶܝܢ ܕܺܝܠܝ ܫܰܪܺܝܪܳܐܺܝܬ ܢܳܩܶܦ. ܐܰ‌ܠ̣ܶܦ ܓܶܝܪ ܐܰܝܟܰܢܳܐ ܕܢܶܥܒܶܕ ܚܢܰܢ܆ ܘܠܰܘ ܐܰܝܟܰܢܳܐ ܕܰܒܰܛܺܝ̈ܠܶܐ ܢܶܪܗܰܛ ܢܶܥܒܰܪ ܐܶܢܽܘܢ ܠܦܽܘܩ̈ܕܳܢܰܘܗ̱ܝ.

ܒܪܰܡ ܘܶܐܢܗܽܘ ܕܠܰܘ ܣܽܘܥܪܳܢܳܐ ܐܳ‌ܠܨܳܝܰܐ ܗ̄ܘ ܨܰܘܡܳܐ ܘܰܡܕܰܟܶܐ ܠܢܰܦܫܳܐ܆ ܐܰܪܰܐ ܙܥܽܘܪܬܳܐ ܗܝ ܠܡܶܠܬܳܐ ܕܺܐܝܩܳܪܳܐ܆ ܗܳܝ ܕܥܰܡ ܡܫܺܝܚܳܐ ܢܨܽܘܡ܆ ܘܗܰܘ ܕܰܠܡܰܠܟܳܐ ܡܰܢ ܡܶܫܬܰܘܬܰܦ ܒܗܶܝܢ ܟܰܕ ܒܗܶܝܢ ܒܝܰܨܺܝ̈ܦܘܳܬܳܐ ܡܶܫܬܘܶܐ ܠܺܐܝܩܳܪ̈ܶܐ܆ ܡܕܰܡܝܳܢܽܘܬܳܐ ܕܶܝܢ ܕܒܰܐܠܳܗܳܐ܆ ܠܳܐ ܐܺܝܬ ܠܳܗ̇ ܦܽܘܪ̈ܥܳܢܶܐ ܡܶܕܶܡ ܐܰ‌ܠܳܗܳܝ̈ܶܐ܆ ܟܰܕ ܡܠܺܝ̈ܠܶܐ ܕܶܝܢ ܐܺܝܬܰܝܢ܆ ܠܳܐ ܗ̱ܘܳܐ ܠܗܳܠܶܝܢ ܐܰ‌ܠܳܗܳܝ̈ܳܬܳܐ ܙܳܕܶܩ ܕܢܶܪܚܰܡ ܡܰܠܽܘܢ܆ ܐܰܘ ܠܗܳܠܶܝܢ ܟܽܠܗܶܝܢ ܕܓܳܪܶܦ ܠܗܶܝܢ ܡܰܚܫܽܘܠܳܐ ܗܳܢܳܐ ܕܪܳܕܶܐ ܕܥܳܠܡܳܐ ܗܳܢܳܐ.

ܡܳܕܶܝܢ ܡܶܛܽܠ ܕܣܽܘܥܪܳܢܳܐ ܐܳ‌ܠܨܳܝܳܐ ܐܺܝܬܰܘܗ̱ܝ ܨܰܘܡܳܐ ܘܰܦܐܶܐ ܒܪܰܒܽܘܬܳܐ܆ ܕܰܠܘܳܬ ܐܰ‌ܠܳܗܳܐ ܡܰܝܬܶܐ܆ ܘܰܠܘܳܬ ܡܕܰܡܝܳܢܽܘܬܳܐ ܕܗܰܘ ܡܰܣܶܩ܆ ܬܐ ܪܐ^[15]ܢܨܽܘܡܺܝܘܗ̱ܝ܆ ܐܰܝܟܰܢܳܐ ܕܢܶܗܘܶܐ ܐܺܝܬܰܘܗ̱ܝ ܨܰܘܡܳܐ ܕܝܶܫܽܘܥ. ܐܺܝܬ ܗ̱ܘ̣ ܓܶܝܪ ܕܰܢܨܽܘܡ ܨܰܘܡܳܐ ܡܶܕܶܡ ܕܺܝܠܳܢܳܝܳܐ ܘܠܰܘ ܗܰܘ ܕܝܶܫܽܘܥ. ܘܰܐܟܙܢܳܐ ܕܗܳܠܶܝܢ ܥܣܰܪ ܒܬܽܘ̈ܠܳܬܳܐ܆ ܕܟܰܕ ܠܠܰܡܦܺܝ̈ܕܶܐ ܕܰܒܬܽܘܠܽܘܬܳܐ ܐܰܢܗܰܪ̈ܶܝܢ^[16]܆ ܘܝܰܨܺܝܦܳܐܺܝܬ ܠܗܳܠܶܝܢ ܨܰܒ̈ܶܬܶܝܢ܆ ܘܒܳܗ̇ ܒܰܕܡܽܘܬܳܐ ܕܢܺܐܪ̈ܥܳܢ ܠܚܰܬܢܳܐ ܝܺܨܰܦ̈ܶܝܢ܆ ܠܰܘ ܟܽܠܗܶܝܢ ܐܶܫ̈ܬܘܶܝܢ ܠܡܰܥܰܠܬܳܐ ܕܰܠܡܶܫܬܽܘܬܳܐ܆ ܐܺܝܬ ܗ̱ܘܰܝ̈ ܒܗܶܝܢ ܓܶܝܪ ܐܰܝܠܶܝܢ ܕܰܠܠܰܡܦܺܝ̈ܕܶܐ ܠܢܰܦܫܗܶܝܢ ܐܰܢܗܰܪ̈ܶܝܢ ܘܠܰܘ ܠܝܶܫܽܘܥ܆ ܒܗܳܝ ܕܡܶܢ ܪ̈ܰܚܡܶܐ ܗܳܢܽܘܢ ܕܥܰܠ ܣܢܺܝ̈ܩܶܐ ܐܰܗܡ̈ܝܢ܆ ܗܳܟܰܢܳܐ ܐܺܝܬ ܐܳܦ ܕܰܢܨܽܘܡ܆ ܘܠܰܘ ܠܝܶܫܽܘܥ ܢܨܽܘܡ.

ܐܰܝܬܳܐ ܗܳܟܺܝܠ ܕܗܰܘܢܳܐ ܡܶܕܶܡ ܕܕܰܐܝܟ ܗܳܢܳܐ ܢܰܠܶܦ ܚܢܰܢ. ܐܶ‌ܠܽܘ ܡܰܠܟܳܐ ܐܰܟܪܶܙ ܒܰܚܕܳܐ ܡܶܢ ܡܕܺܝܢ̱ܬܳܐ܆ ܕܒܰܪܬܳܐ ܕܚܰܕ ܡܶܢ ܡܕܺܝ̈ܢܳܝܶܐ ܨܳܒܶܐ ܕܢܶܣܰܒ ܠܘܳܬ ܫܰܘܬܳܦܽܘܬܳܐ܆ ܗܳܝ ܕܢܶܫܟܰܚ ܒܝܰܘܡܳܐ ܦܠܳܢ ܗܰܘ ܕܒܶܗ ܙܳܕܶܩ ܠܡܶܫܬܰܘܬܳܦܽܘ܆ ܕܫܰܦܺܝܪܳܐ ܛܳܒ ܡܶܢ ܗܳܠܶܝܢ ܐ̱ܚܪ̈ܳܢܝܳܬܳܐ ܘܰܟܢܺܝܟܳܐ ܘܢܰܟܦܳܐܺܝܬ ܡܪܰܒܝܳܐ܆ ܠܰܘ ܠܟܽܠ ‌ܐ̱ܢܳܫ ܝܺܕܺܝܥܳܐ܆ ܕܟܽܠܚܰܕ ܡܶܢ ܗܳܢܽܘܢ ܕܰܡܪܰܒܶܝܢ ܒ̈ܢܳܬܳܐ܆ ܝܰܨܺܝܦܽܘܬܳܐ ܣܰܓܝܐܬܳܐ ܥܳܒܶܕ ܗ̱ܘܳܐ܆ ܘܟܽܠ ܨܶܒܬܳܐ ܡܟܰܢܶܫ ܗ̱ܘܳܐ ܕܢܰܦܫܳܐ ܟܺܝܬ ܘܰܕܦܰܓܪܳܐ܆ ܠܘܳܬ ܗܳܝ ܕܒܰܪܬܶܗ ܬܶܫܦܰܪ ܒܟܽܠ ܡܶܕܶܡ ܝܰܬܺܝܪ ܡܶܢ ܗܳܠܶܝܢ ܐ̱ܚܪ̈ܳܢܝܳܬܳܐ܆ ܐܰܝܟܰܢܳܐ ܕܰܠܡܰܠܟܳܐ ܒܝܰܕ ܣܽܘܥܪܳܢܳܐ ܕܙܽܘܘܳܓܳܐ ܢܶܬܢܰܩܰܦ ܒܓܶܢܣܳܐ܆ ܗܳܟܰܢܳܐ ܗܳܟܺܝܠ ܟܽܠ ܡܰܢ ܕܨܳܐܶܡ܆ ܠܨܰܘܡܳܐ ܕܺܝܠܶܗ ܒܰܕܡܽܘܬ ܒܰܪܬܳܐ ܒܟܽܠ ܨܶܒܬܳܐ ܢܨܰܒܶܬ. ܟܰܕ ܕܳܚܶܠ ܕܕܰܠܡܳܐ ܡܰܠܟܳܐ ܡܫܺܝܚܳܐ ܠܢܶܩܦܶܗ ܠܳܐ ܢܰܫܘܶܝܘܗ̱ܝ ܠܨܰܘܡܶܗ܆ ܘܢܶܚܣܰܪ ܠܫܰܘܝܽܘܬ ܓܶܢܣܳܐ ܕܕܰܐܝܟ ܗܳܕܶܐ.

ܐܶܢ ܓܶܝܪ ܕܠܳܐ ܣܰܝܒܳܪܬܳܐ ܬܩܰܘܶܐ܆ ܘܐ̱ܢܳܫ ܡܶܢ ܗܳܢܽܘܢ ܕܰܒܫܽܘܩܳܐ ܡܶܣܟܺܢܺܝܢ ܟܰܕ ܢܶܩܪܽܘܒ ܠܘܳܬܳܟ܆ ܢܶܫܰܐܠ ܡܶܢܳܟ ܚܰܕ ܫܳܡܽܘܢܳܐ܆ ܐܰܘ ܡܶܕܶܡ ܐ̱ܚܪܺܢܳܐ ܡܶܢ ܗܳܠܶܝܢ ܕܣܺܝ̈ܡܳܢ ܒܰܡܫܰܪܬܚܽܘܬ ܩܶܢܝܳܢܳܐ ܕܺܝܠܳܟ܆ ܘܡܶܢ ܗܳܠܶܝܢ ܕܰܠܡܶܬܰܠ ܣܰܓܺܝ ܦܫܺܝܩ ܠܳܟ܆ ܐܰܢ̱ܬ ܕܶܝܢ ܠܳܐ ܡܪܰܚܡܳܢܳܐܺܝܬ ܟܰܕ ܠܳܐ ܣܥܺܝܪ ܠܶܗ ܡܶܕܶܡ ܬܫܰܕܪܺܝܘܗ̱ܝ ܡܶܢܳܟ܆ ܙܰܒ̈ܢܺܝܢ ܣܰܓܺܝ̈ܳܐܢ ܐܳܦ ܟܰܕ ܨܰܥܪܳܐ ܐܰܘܣܶܦܬ ܠܶܗ܆ ܠܢܰܦܫܳܟ ܨܳܐܶܡ ܐܰܢ̱ܬ ܘܠܰܘ ܠܝܶܫܽܘܥ.

ܗܺܝ ܕܶܝܢ ܟܰܕ ܗܺܝ ܗܳܕܶܐ ܬܶܣܥܽܘܪ܆ ܘܶܐܢܗܽܘ ܕܰܠܗܳܢܽܘܢ ܕܚܰܝܳܒܺܝܢ ܟܶܣܦܳܐ ܐܰܘ ܕܰܗܒܳܐ ܐܰܘ ܟܽܘܢܳܫܳܐ ܕܥܰܠ̈ܠܳܬܳܐ܆ ܡܚܰܫܒܳܢܳܐ ܐ̱ܢܳܫ ܡܰܪܺܝܪܳܐ ܬܶܗܘܶܐ܆ ܟܰܕ ܐܺܝܬ ܐܶܡܰܬܝ ܕܳܐܦ ܠܗܳܝ ܕܠܳܐ ܐܺܝܬܶܝܗ̇ ܚܰܘܒܬܳܐ ܡܚܰܫܶܒ ܐܰܢ̱ܬ. ܐܶܢ ܕܶܝܢ ܗܳܝ ܕܰܠܩܽܘܒܠܳܐ ܙܰܕܺܝܩܳܐ ܬܶܬܚܙܶܐ ܘܒܰܣܺܝܡܳܐ ܘܪܳܚܶܡ ܐ̱ܢܳܫܳܐ܆ ܘܰܡܢܳܬܳܐ ܡܶܕܶܡ ܡܶܢ ܗܳܠܶܝܢ ܕܶܐܬܬܚܰܝ̈ܒܶܝܢ܆ ܐܰܘ ܟܰܕ ܓܰܠܝܳܐܺܝܬ ܬܶܫܒܽܘܩ܆ ܐܰܘ ܟܰܕ ܐܶܘܰܢܓܶܠܴܐܺܝܬ ܬܛܰܫܶܐ܆ ܘܬܰܗܡܶܐ ܘܬܶܪܗܰܛ ܬܶܥܒܰܪ ܐܰܝܟ ܕܡܶܢ ܛܽܘܥܝ̣ܰܝ̣܆ ܐܰܝܟܰܢܳܐ ܕܠܳܐ ܬܦܰܪܣܺܝܘܗ̱ܝ ܠܣܽܘܥܪܳܢܳܐ ܘܬܶܕܰܥ ܣܶܡܳܠܳܟ ܡܳܢܳܐ ܥܳܒܕܳܐ ܝܰܡܺܝܢܳܟ܆ ܘܪ̈ܰܚܡܶܐ ܗܳܢܽܘܢ ܕܠܰܐܠܳܗܳܐ ܒܰܠܚܽܘܕܰܘܗ̱ܝ ܡܶܬܝܰܕܥܺܝܢ ܬܚܰܘܶܐ܆ ܡܶܛܽܠ ‌ܐܰܢ̱ܬܬܳܐ܆ ܘܡܶܛܽܠ ܒܢܰܝ̈ܳܐ ܗܳܢܽܘܢ ܕܰܡܬܰܪܣܶܐ ܗܰܘ ܡܶܣܟܺܢܳܐ ܟܰܕ ܥܳܡܶܠ܆ ܨܰܒܶܬܬܳܝܗ̱ܝ ܠܨܰܘܡܳܟ ܒܨܶܒܬܳܐ ܡܰܠܟܳܝܳܐ. ܘܢܶܬܪܰܓܪܰܓ ܡܰܠܟܳܐ ܠܫܽܘܦܪܳܟ^[17] ܢܺܐܡܰܪ ܠܘܳܬܶܗ ܕܰܘܺܝܕ ܢܒܺܝܳܐ ܗܰܘ ܕܰܡܙܰܡܰܪ. ܘܢܶܪܗܰܛ ܠܢܶܩܦܶܗ܆ ܟܰܕ ܡܶܢ ܪܽܘܚܩܳܐ ܫܳܐܶܠ ܫܠܳܡܶܗ.

ܐܶܢ ܕܶܝܢ ܟܰܕ ܨܳܐܶܡ ܐܰܢ̱ܬ ܒܕܺܝ̈ܢܶܐ ܬܶܬܥܦܶܐ܆ ܘܰܠܗܰܘ ܡܰܢ ܟܰܕ ܓܳܪܶܝܢ ܘܰܡܢܰܬܦܺܝܢ ܠܶܗ ܬܩܺܝܡ ܩܕܳܡ ܒܺܐܡܰܐ ܕܕܰܝܳܢܳܐ܆ ܠܗܰܘ ܕܶܝܢ ܬܶܚܒܽܘܫ ܒܶܝܬ ܐܰܣܺܝܪ̈ܶܐ܆ ܠܰܐ̱ܚܪܺܢܳܐ ܕܶܝܢ ܕܰܒܡܰܚ̈ܘܳܬܳܐ ܢܶܬܢܰܬܰܫ ܬܥܰܬܶܕ܆ ܣܪܶܐ ܪܺܝܚܳܐ ܘܨܳܐܳܐ ܐܺܝܬܰܘܗ̱ܝ ܨܰܘܡܳܐ ܕܕܰܐܝܟ ܗܳܢܳܐ܆ ܕܰܠܣܳܘܩܶܗ ܕܰܡܠܟܳܐ ܘܰܠܥܰܝܢܶܗ ܡܰܗܦܶܟ ܡܶܢܶܗ ܠܒܶܣܬܪܳܐ܆ ܘܰܕܠܳܐ ܫܰܘܬܳܦܽܘܬܳܐ ܡܩܰܘܶܐ ܠܘܳܬܳܟ.

ܘܳܐܦ ܟܰܕ ܬܶܡܬܚܺܝܘܗ̱ܝ ܒܰܓ̈ܠܺܝܙܘܳܬܳܐ ܕܝܰܬܺܝܪ ܪܰܘܪ̈ܒܳܢ ܕܡܶܢ ܡܶܐܟ̈ܠܳܬܳܐ܆ ܕܥܰܒܺܝܪ ܠܥܶܠ ܡܶܢ ܩܰܘܡܬܳܐ ܬܶܥܒܕܺܝܘܗ̱ܝ܆ ܘܰܠܗܳܝ ܕܰܫܟܺܝܪܳܐ ܠܳܐ ܬܶܕܰܥ܆ ܕܺܐܝܬ ܠܳܟ^[18] ܒܬܽܘܠܬܳܐ ܚܰܕܳܝܬܳܐ ܡܰܢ ܘܫܰܦܺܝܪܬܳܐ ܒܪܰܚܺܝܩܽܘܬܳܐ ܕܡܶܢ ܡܶܐܟ̈ܠܳܬܳܐ܆ ܠܳܐ ܗܢܺܝܬܳܐ ܕܶܝܢ ܘܰܣܢܺܝܬܳܐ܆ ܘܰܕܠܰܦܨܺܝܚܽܘܬܳܐ ܥܰܠ ܦܰܪܨܽܘܦܳܗ̇ ܠܳܐ ܡܰܝܬܝܳܐ. ܘܗܰܘ ܕܶܝܢ ܕܡܰܪܓܶܙ ܘܰܡܡܰܪܡܰܪ܆ ܘܰܡܨܰܥܰܪ ܘܡܳܚܶܐ ܣܪܺܝܩܳܐܺܝܬ܆ ܘܰܐܟܬܳܐ ܒܬܰܪܥܺܝܬܶܗ ܡܪܰܒܶܐ܆ ܘܗܰܘ ܕܰܠܘܳܬ ܡ̈ܶܠܶܐ ܡܰܓܚ̈ܟܳܢܝܳܬܳܐ ܘܰܫܟܺܝܪ̈ܳܬܳܐ ܘܠܳܐ ܟܢܺܝ̈ܟܳܬܳܐ ܢܳܦܶܩ܆ ܘܗܰܘ ܕܒܰܚܙܳܬܳܐ ܕܙܳܢ̈ܝܳܬܳܐ ܘܰܕܚܶܙܘܳܢ̈ܐ ܘܒܰܙܡܺܝܪ̈ܳܬܳܐ ܦܰܚ̈ܙܳܬܳܐ ܠܥܰܝܢܶܗ ܐܰܘ ܠܡܰܫܡܰܥܬܶܗ ܡܒܰܣܶܡ܆ ܛܰܥܝܳܐ ܠܶܗ ܕܰܣܝܳܢܳܐ ܡܳܠܶܐ ܠܶܗ ܠܨܰܘܡܶܗ.

ܠܶܫܳܢܳܐ ܕܝܰܒܺܝܫ ܡܶܢ ܨܶܗܝܳܐ ܘܡܶܢ ܓܠܺܝܙܽܘܬ ܡܶܐܟ̈ܠܳܬܳܐ ܐܺܝܬ ܠܳܟ ܐܳܘ ܒܰܪܢܳܫܳܐ܆ ܘܰܕܠܰܝܬ ܒܶܗ ܬܰܠܺܝܠܽܘܬܳܐ܆ ܐܰܝܟܰܢܳܐ ܕܒܰܛܺܝܠܳܐ ܬܶܗܘܶܐ ܐܺܝܬܰܝܟ ܠܘܳܬ ܨܰܥܪܳܐ ܘܗܽܘܪܗܳܪܳܐ܆ ܘܠܰܘ ܕܡܶܫܟܰܚ ܠܶܗ ܡܛܰܝܒܳܐ ܘܰܕܫܳܘܰܪ ܢܳܦܶܩ ܒܪܶܗܛܳܐ ܟܒܰܪ܆ ܠܽܐܘܪܓܰܢܽܘܢ ܗܰܘ ܕܰܠܗܳܠܶܝܢ ܡܫܰܡܶܫ. ܘܠܰܘ ܐܰܝܟܰܢܳܐ ܕܟܰܕ ܒܡܶܪܬܳܐ ܗܳܝ ܕܡܶܢ ܓܠܺܝܙܽܘܬ ܡܶܐܟ̈ܠܳܬܳܐ ܠܳܛܶܫ ܐܰܢ̱ܬ ܘܰܡܒܰܥܪܰܪ ܐܰܢ̱ܬ ܠܳܗ̇ ܠܚܶܡܬܳܢܽܘܬܳܐ܆ ܐܳܦ ܡܫܰܪܝܳܐ ܘܢܰܫܺܝܫܳܐ ܬܩܺܝܡܺܝܘܗ̱ܝ܆ ܘܰܕܠܰܘ ܡܶܢ ܟܝܳܢܳܐ ܡܶܬܬܙܺܝܥ܆ ܐܶܠܳܐ ܒܪܰܬܺܝܚܽܘܬܳܐ ܕܪܽܘܓܙܳܐ.

ܟܡܺܝܪܽܘܬܳܐ ܡܰܠܶܦ ܨܰܘܡܳܐ܆ ܘܢܳܓܶܕ ܠܬܰܚܬ ܘܡܰܪܟܶܢ ܢܰܟܦܳܐܺܝܬ ܠܬܶܡܪܳܐ܆ ܐܰܝܟܰܢܳܐ ܕܢܶܩܦܽܘܤ ܘܢܶܬܟܣܺܝܘܗ̱ܝ ܠܚܰܘܪܳܐ ܗܰܘ ܩܰܠܺܝܠܳܐ ܘܠܳܐ ܡܛܰܟܣܳܐ܆ ܘܠܳܐ ܟܰܕ ܦܫܺܝܩܳܐܺܝܬ ܥܰܠ ܟܽܠ ܡܶܕܶܡ ܡܶܬܶܐܫܶܕ܆ ܘܰܒܢܶܫ̈ܒܶܐ ܕܪܶܓܬܳܐ ܡܶܬܬܚܶܕ܆ ܫܓܽܘܫܝܳܐ ܘܰܪܗܺܝܒܽܘܬܳܐ ܢܰܥܶܠ ܢܰܥܡܰܪ ܒܬܰܪܥܺܝܬܳܐ.

ܐܰܢ̱ܬ ܕܶܝܢ ܟܰܕ ܨܳܐܶܡ ܐܰܢ̱ܬ܆ ܠܘܳܬ ܪ̈ܶܩܕܳܬܳܐ ܡܶܢ ܨܒܽܘܬ ܢܰܦܫܳܟ ܐܳܙܶܠ ‌ܐܰܢ̱ܬ܆ ܘܰܠܘܳܬ ܪ̈ܶܦܣܶܐ ܗܳܢܽܘܢ܆ ܘܰܠܘܳܬ ܩܺܝ̈ܢܳܬܳܐ ܗܳܠܶܝܢ ܕܟܽܠܳܗ̇ ܦܰܚܙܽܘܬܳܐ ܘܰܫܪܺܝܚܽܘܬܳܐ ܡܰܠ̈ܝܳܢ܆ ܐܶܢ ܓܶܝܪ ܗܳܠܶܝܢ ܥܳܒܶܕ ܐܰܢ̱ܬ ܟܰܕ ܨܳܐܶܡ ܐܰܢ̱ܬ܆ ܢܺܐܡܪܽܘܢ ܗܳܢܽܘܢ ܕܠܳܐ ܨܳܝܡܺܝܢ܆ ܡܳܢܳܐ ܝܰܬܺܝܪܳܐ ܥܒܰܕ ܗܰܘ ܕܨܳܐܶܡ. ܡܳܢܳܐ ܕܶܝܢ ܕܝܰܬܺܝܪ ܢܟܶܦ ܛܳܒ ܡܶܢ ܕܺܝܠܰܢ. ܡܳܢܳܐ ܕܶܝܢ ܕܝܰܬܺܝܪ ܐܺܝܬܰܘܗ̱ܝ ܪܳܚܶܡ ܐ̱ܢܳܫܳܐ. ܡܳܢܳܐ ܒܰܣܺܝܡܳܐ ܐܰܘ ܢܺܝܚܳܐ. ܠܳܐ ܗ̱ܘܳܐ ܦܠܳܢ ܐܳܦ ܝܰܬܺܝܪ ܚܰܪܡܳܐ ܘܩܰܫܝܳܐ ܐܶܬܚܙܺܝ ܠܗܳܢܽܘܢ ܕܦܳܓܥܺܝܢ ܒܶܗ܆ ܠܳܐ ܗ̱ܘܳܐ ܡܰܪܺܝܪܳܐ ܡܰܢ ܠܡܶܚܙܝܶܗ܆ ܥܰܣܩܳܐ ܕܶܝܢ ܠܡܶܦܓܰܥ ܒܶܗ܆ ܠܳܐ ܡܶܣܬܰܝܒܪܳܢܳܐ ܕܶܝܢ ܘܠܳܐ ܦܫܺܝܩܳܐ܆ ܕܢܶܫܐܰܠ ‌ܐ̱ܢܳܫ ܫܠܳܡܶܗ܆ ܐܰܪܚܶܩ ܠܗܰܠ ܡܶܢ ܨܰܘܡܳܐ܆ ܕܕܰܐܝܟ ܐܰܝܢܳܐ ܥܰܒܕܶܗ ܠܗܳܢܳܐ. ܒܨܺܝܪ ܩܰܠܺܝܠ ‌ܐܳܦ ܕܰܚܺܝܠ ‌ܐ̱ܢܳܐ܆ ܕܕܰܠܡܳܐ. ܐܳܦ ܡܶܟܰܬ ܢܟܽܘܬ ܠܐ̱ܢܳܫ ܡܳܢ ܗܳܢܽܘܢ ܕܩܳܪܒܺܝܢ ܠܘܳܬܶܗ. ܡܝܰܬܪܳܐ ܗ̱ܝ ܕܢܶܐܟܽܘܠ ‌ܐ̱ܢܳܫ ܬܰܘܪܳܐ ܘܢܶܫܬܶܐ ܚܰܡܪܳܐ܆ ܐܰܘ ܕܢܶܗܘܶܐ ܐܺܝܬܰܘܗ̱ܝ ܗܳܟܰܢܐ ܒܰܥܪܺܝܪܳܝܳܐ ܒܰܙܢܶܗ ܒܰܕܡܽܘܬ ܚܰܝ̈ܘܳܬ ܫܶܢܳܐ. ܦܠܳܢ ܕܶܝܢ ܟܰܕ ܨܳܐܶܡ ܠܳܐ ܗ̱ܘܳܐ ܥܰܡ ܡܺܝܡ̈ܣܶܐ ܡܫ̈ܥܝܢܐ ܕܓܽܘܚܟܳܐ ܐܺܝܬܰܘܗ̱ܝ܆ ܠܳܐ ܗ̱ܘܳܐ ܕܶܝܢ ܒܒܶܝܬ ܪܶܩܕܳܐ ܟܽܠܫܳܥ ܩܒܺܝܥ܆ ܡܰܗܡܶܐ ܕܶܝܢ ܕܠܳܐ ܢܶܚܙܶܐ ܡܶܕܶܡ ܠܳܐ ܡܶܬܚܰܙܝܳܢܳܐ ܡܶܢ ܗܳܠܶܝܢ ܕܰܒܡܰܫܟܢܳܐ ܡܶܫ̈ܬܰܡܠܝܳܢ܆ ܐܶܢܳܐ ܕܶܝܢ ܐܳܡܰܪ ܟܰܕ ܒܫܳܥܬܳܐ ܕܰܬܠܳܬ ܣܳܚܶܐ ܐ̱ܢܳܐ܆ ܘܰܒܗܳܝ ܕܰܐܪܒܰܥ ܡ̣ܥܪܐ ܐ̱ܢܳܐ ܛܳܒܳܐܺܝܬ܆ ܒܪ̈ܳܚܡܶܐ ܕܺܝܠܝ ܦܳܓܰܥ ܐ̱ܢܳܐ܆ ܟܰܕ ܚܙܰܘ^[19] ܐܳܡܰܪ ܐ̱ܢܳܐ ܠܚܶܙܘܳܢ̈ܶܐ܆ ܘܝܳܨܶܦ ܐ̱ܢܳܐ ܕܣܽܘܥܪ̈ܳܢܶܐ ܕܺܝܠܝ. ܒܨܺܝܪܳܐ ܐ̱ܢܳܫ ܐܺܝܬܰܝ ܒܕܽܘܒܳܪ ܚܰܝ̣̈ܰܝ̣ ܘܰܕܥܳܒܶܕ ܡܕܰܒܪܳܢܽܘܬܳܐ. ܘܳܐܙܶܠ ܘܡܰܪܚܶܩ ܢܰܦܫܶܗ ܡܶܢ ܦܽܘܚܳܡܳܐ ܕܗܳܢܽܘܢ ܕܒܺܝܫܳܐܺܝܬ ܨܳܝܡܺܝܢ. ܟܰܕ ܡܚܰܘܶܐ ܗܽܘ ܠܶܗ ܙܰܕܺܝܩܳܐ. ܘܰܟܒܰܪ ܟܰܕ ܪܶܚܡܰܬ ܟܶܣܦܳܐ ܗܳܝ ܐ̱ܚܪܳܝܬܳܐ ܟܪܺܝܗ܆ ܗܳܝ ܕܺܐܝܬܶܝܗ̇ ܐܶܡܳܐ ܕܟܽܠܗܶܝܢ ܒܺܝ̈ܫܳܬܳܐ ܘܥܶܩܳܪܳܐ ܡܰܪܺܝܪܳܐ܆ ܘܳܐܦ ܟܰܕ ܣܳܒܰܪ ܕܰܚܠܺܝܡ. ܟܰܕ ܐܳܦ ܚܰܘܺܝ ܒܰܠܚܽܘܕ ܡܶܢ ܗܳܠܶܝܢ ܕܶܐܡܰܪ܆ ܕܗܳܢܽܘܢ ܕܨܳܝܡܺܝܢ ܡܰܢ܆ ܠܳܐ ܕܶܝܢ ܣܳܥܪܺܝܢ ܗܳܠܶܝܢ ܕܠܳܚ̈ܡܳܢ ܠܨܰܘܡܳܐ܆ ܐܳܦ ܕܺܝܠܶܗ ܕܓܽܘܕܳܦܳܐ ܗܰܘ ܕܰܥܠܰܘܗ̱ܝ ܡܶܛܽܠܳܬܗܽܘܢ ܡܶܬܓܰܕܰܦ܆ ܢܶܣܒܠܽܘܢ ܕܺܝܢܳܐ ܘܚܽܘܝܳܒܳܐ. ܐܶܢ ܓܶܝܪ ܡܶܕܶܡ ܛܳܒܳܐ ܐܺܝܬܰܘܗ̱ܝ ܨܰܘܡܳܐ܆ ܘܦܽܘܩܳܕܳܐ ܕܪܽܘܚܳܐ ܩܰܕܺܝܫܳܐ܆ ܐܳܦ ܦܺܐܪ̈ܶܐ ܛܳܒ̈ܶܐ ܢܶܗܘܶܐ ܐܺܝܬ ܠܶܗ. ܘܬܶܫܒܽܘܚܬܳܐ ܢܰܝܬܶܐ ܠܰܐܠܳܗܳܐ ܘܠܰܘ ܓܽܘܕܳܦܳܐ.

ܘܰܐܝܠܶܝܢ ܕܶܝܢ ܐܺܝܬܰܝܗܽܘܢ ܦܺܐܪ̈ܶܐ܆ ܦܰܘܠܽܘܤ ܚܳܫܶܒ ܠܗܽܘܢ ܟܰܕ ܠܓܰܠܰܛܳܝ̈ܶܐ ܟܳܬܶܒ ܗܳܟܰܢܳܐ. ܦܺܐܪܳܐ ܕܶܝܢ ܕܪܽܘܚܳܐ ܐܺܝܬܰܘܗ̱ܝ܆ ܚܽܘܒܳܐ. ܚܰܕܽܘܬܳܐ. ܫܰܝܢܳܐ. ܢܰܓܺܝܪܽܘܬ ܪܽܘܚܳܐ. ܒܰܣܺܝܡܽܘܬܳܐ ܛܳܒܽܘܬܐ. ܗܰܝܡܳܢܽܘܬܳܐ. ܢܺܝܚܽܘܬܳܐ. ܡܣܰܝܒܪܳܢܽܘܬܳܐ^[20]. ܐܶܢ ܡܶܢ ܗܳܠܶܝܢ ܦܺܐܪ̈ܶܐ ܡܰܪܡܶܠ ܨܰܘܡܳܐ܆ ܐܳܦܶܢ ܡܩܰܠܣܺܝܢܰܢ ܠܶܗ ܘܡܶܬܕܰܒܪܺܝܢܰܢ ܒܶܗ ܠܳܐ ܘܳܠܝܳܐܺܝܬ܆ ܢܺܐܡܰܪ ܐܳܦ ܠܘܳܬܰܢ ܦܳܪܽܘܩܰܢ܆ ܐܰܘ ܥܒܶܕܘ ܐܺܝܠܳܢܳܐ ܛܳܒܳܐ ܘܦܺܐܪܳܐ ܕܺܝܠܶܗ ܛܳܒܳܐ܆ ܐܰܘ ܥܒܶܕܘ ܐܺܝܠܳܢܳܐ ܒܺܝܫܳܐ ܘܦܺܐܪܳܐ ܕܺܝܠܶܗ ܒܺܝܫܳܐ. ܡܶܢ ܦܺܐܪܶܗ ܓܶܝܪ ܡܶܬܺܝܕܰܥ ܐܺܝܠܳܢܳܐ^[21].

ܙܳܕܶܩ ܕܶܝܢ ܠܡܶܕܰܥ܆ ܕܢܽܘܟܪܳܝܬܳܐ ܐܺܝܬܶܝܗ̇ ܕܺܐܝܠܳܢܳܐ ܕܨܰܘܡܳܐ ܐܳܦ ܡܨܰܕܝܳܢܽܘܬܳܐ ܐܶܣܟܺܡܬܳܢܝܬܳܐ܆ ܘܳܐܦ ܗܳܝ ܕܡܶܬܚܰܘܝܳܢܳܐܺܝܬ ܢܨܽܘܡ܆ ܘܰܠܘܳܬ ܫܽܘܒܚܳܐ ܣܪܺܝܩܳܐ ܢܚܽܘܪ. ܣܰܓܺܝ̈ܶܐܐ ܓܶܝܪ ܠܗܳܕܶܐ ܕܳܘܝܽܘܬܳܐ ܐܶܬ̣ܘ܆ ܘܽܐܘܪܚܳܐ ܗܳܝ ܕܰܠܩܽܘܒܠܳܝܬܳܐ ܕܢܳܡܽܘ̈ܣܶܐ ܕܡܳܪܰܢ ܪܳܕܶܝܢ܆ ܗܳܢܽܘܢ ܕܨܳܒܶܝܢ ܕܳܐܦ ܠܨܰܘܡܳܐ ܗܰܘ ܕܒܰܫܪܳܪܳܐ ܐܺܝܬܰܘܗ̱ܝ ܠܳܐ ܢܦܰܪܣܶܐ܆ ܡܶܛܽܠ ܟܺܝܬ ܕܳܐܦ ܟܰܕ ܠܳܐ ܨܳܝܡܺܝܢ܆ ܥܳܢ̈ܘܳܝܶܐ ܘܰܡܚܰܡܣ̈ܢܳܢܶܐ ܨܳܒܶܝܢ ܕܢܶܣܬܰܒܪܽܘܢ ܕܺܐܝܬܰܝܗܽܘܢ܆ ܘܟܰܕ ܒܚܰܫ̈ܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ܫܟܺܝܪܺܝܢ ܡܶܬܥܰܪܓܠܺܝܢ܆ ܕܠܳܐ ܢܶܫ̈ܶܐ ܘܕܺܝܚܺܝ̈ܕܳܝܶܐ ܐ̱ܢܳܫܺܝ̈ܢ ܐܺܝܬܰܝܗܽܘܢ ܨܳܒܶܝܢ ܕܢܶܣܬܰܒܪܽܘܢ܆ ܘܰܠܘܳܬ ܗܳܕܶܐ ܠܒܽܘܫܳܐ ܐܽܘܟܳܡܳܐ ܡܰܬܩܶܢ ܠܗܽܘܢ܆ ܘܗ̱ܝ ܕܢܰܪܟܢܽܘܢ ܪܺܝܫܗܽܘܢ ܠܬܰܚܬ܆ ܘܗ̱ܝ ܕܰܢܩܰܝܡܽܘܢ ܣܰܥܪܗܽܘܢ܆ ܘܗ̱ܝ ܕܢܶܬܟܰܡܪܽܘܢ^[22]܆ ܘܰܕܡ̈ܶܠܽܘܢܝܳܬܳܐ ܕܰܚ̈ܠܺܝܛܳܢ ܒܰܡܫܰܩܠܽܘܬܳܐ ܘܕܳܘ̈ܝܳܬܳܐ ܢܰܦܩܽܘܢ. ܗܳܢܽܘܢ ܕܰܥܠܰܝܗܽܘܢ ܢܶܓܚܰܟ ܡܰܢ ܐ̱ܢܳܫ ܥܰܠ ܡܰܫܟܢܳܐ ܡܨܰܕܝܳܢܳܐ ܕܗܳܪܟܳܐ܆ ܢܶܒܟܶܐ ܕܶܝܢ ܥܰܠ ܫܽܘܢܳܩܳܐ ܕܰܓܙܺܝܡ ܠܗܽܘܢ ܬܰܡܳܢ.

ܠܰܢ ܕܶܝܢ ܡܚܺܝ̈ܠܶܐ ܘܚܰܛܳܝ̈ܶܐ܆ ܢܦܰܨܶܐ ܡܳܪܰܢ ܡܶܢ ܗܳܕܶܐ ܒܺܝܫܽܘܬܳܐ ܘܡܰܪܺܝܪܽܘܬܳܐ ܦܪܺܝܫܳܝܬܳܐ܆ ܡܶܬܥܰܪܩܳܢܺܝܬܳܐ ܘܰܕܟܺܐܢܳܐܺܝܬ ܣܢܺܝܐܳܐ܆ ܘܗܳܢܳܐ ܟܽܠܶܗ܆ ܟܡܳܐ ܕܝܶܨܦܰܬ ܪܶܚܡܬܳܐ ܕܰܒܢܰܝ̈ܢܳܫܳܐ ܕܬܬܦܝܗ̇ ܥܠܶܝܗ̇. ܗܳܝ ܕܡܶܛܽܠܳܬܳܗ̇ ܒܶܐܘܰܢܓ̈ܶܠܺܝܰܐ ܐܳܡܰܪ ܠܘܳܬ ܬܰܠܡܺܝܕܰܘ̈ܗ̱ܝ܆ ܐܶܙܕܰܗܪܘ ܡܶܢ ܚܡܺܝܪܳܐ ܕܰܦܪ̈ܺܝܫܶܐ^[23]܆ ܗܰܘ ܟܺܝܬ ܕܺܐܝܬܰܘܗ̱ܝ ܐܶܣܟܺܡܳܐ ܕܰܡܨܰܕܝܳܢܽܘܬܳܐ.

ܐܳܦ ܐܰܢ̱ܬܝ ܕܶܝܢ ܐܳܘ ܐܰܢ̱ܬܬܳܐ ܟܰܕ ܨܳܝܡܳܐ ܐܰܢ̱ܬܝ܆ ܐܶ݀ܡܰܠܶܠ ܓܶܝܪ ܡܶܕܶܡ ܕܺܝܠܳܢܳܐܺܝܬ ܐܳܦ ܠܘܳܬܶܟܝ܆ ܥܰܡ ܗܳܠܶܝܢ ܦܽܘܪ̈ܓܳܠܶܐ ܘܦܽܘ̈ܩܳܕܶܐ ܓܰܘܳܢܳܝ̈ܶܐ܆ ܐܶܙܕܰܗܪܝ̱ ܡܶܢ ܚܰܫܳܐ ܕܪܽܘܓܙܳܐ. ܛܳܒ ܓܶܝܪ ܩܰܠܺܝܠܳܐܺܝܬ ܡܶܬܬܙܺܝ̈ܥܳܢ ܢܶܫ̈ܶܐ ܠܘܳܬ ܗܳܢܳܐ܆ ܘܣܰܓܺܝ ܩܰܫܝܳܐܺܝܬ. ܠܳܐ ܬܶܗܘܶܝܢ ܡܰܪܺܝܪܬܳܐ ܠܰܡܢܺܝ̈ܚܳܢܝܳܬܶܟܝ. ܠܳܐ ܬܡܰܬ̣ܚܺܝܢܳܝܗ̱ܝ ܥܠܰܝܗܶܝܢ ܠܦܽܘܠܚܳܢܳܐ ܘܬܰܘܣܦܺܝܢ ܥܠܰܘܗ̱ܝ. ܗܳܝ ܕܰܥܝܳܕܳܐ ܬܒܰܥܝ̱܆ ܕܠܳܐ ܢܨܰܚ̈ܝܢܳܝܗ̱ܝ ܠܨܰܘܡܳܐ. ܐܶܬܚܙܰܝ ܐܳܦ ܠܥܰܒ̈ܕܶܐ ܪܳܚܡܰܬ ܐ̱ܢܳܫܳܐ. ܢܺܝܚܬܳܐ. ܡܰܟܺܝܟܬܳܐ. ܡܫܰܝܰܢܬܳܐ. ܩܦܺܝܣܬܳܐ. ܘܰܪܡܺܝܣܬܳܐ. ܘܶܐܢܗܽܘ ܕܰܬܥܺܝܪܶܟܝ̱ ܚܶܡܬܳܐ ܘܬܶܥܨܶܝܟܝ̱ ܙܰܒ̈ܢܺܝܢ ܣܰܓܺܝ̈ܳܐܢ ܕܬܶܦܫܛܺܝܢ ܐܺܝܕܶܟܝ ܘܬܶܡܚܶܝܢ܆ ܐܶܬܚܰܫܒܺܝܘܗ̱ܝ ܠܨܰܘܡܳܐ ܕܰܐܝܟ ܡܰܠܟܬܳܐ^[24] ܕܚܺܝܠܬܳܐ ܠܥܶܠ ܡܶܢ ܪܺܝܫܶܟܝ ܩܳܐܶܡ܆ ܘܠܳܒܶܟ ܘܟܳܠܶܐ ܠܶܟܝ ܡܶܢ ܡܚܽܘܬܳܐ. ܘܶܐܢܗܽܘ ܕܗܳܟܰܢܳܐ ܬܶܬܣܺܝܡܺܝܢ ܒܬܰܪܥܺܝܬܶܟܝ܆ ܘܬܶܬܟܰܣܶܝܢ ܠܰܢܦܺܝܚܽܘܬܳܐ ܪܽܘܓܙܳܢܳܝܬܳܐ ܘܕܰܡܫܰܘܪܐ ܘܰܡܚܰܩܛܳܐ܆ ܬܽܘܒ ܟܠܺܝܠܳܐ ܠܥܶܠ ܡܶܢ ܪܺܝܫܶܟܝ. ܗܺܝ ܓܶܝܪ ܡܰܠܟܬܳܐ ܒܳܗ̇ ܒܰܕܡܽܘܬܳܐ ܠܥܶܠ ܡܶܢ ܪܺܝܫܶܟܝ ܩܳܝܡܳܐ܆ ܟܰܕ ܡܟܰܠܠܳܐ ܠܶܟܝ. ܘܗܳܟܰܢܳܐ ܐܳܦܠܳܐ ܥܰܠ ܡܶܕܶܡ ܕܰܥܣܶܩ ܢܶܗܘܶܐ ܠܶܟܝ ܣܽܘܢܩܳܢܳܐ. ܐܶܠܳܐ ܗܽܘ ܛܽܘܦܣܳܐ ܕܰܡܝܰܬܪܽܘܬܳܐ ܕܺܝܠܶܟܝ ܢܶܗܘܶܐ ܪܺܝܫܳܐ ܕܰܒܝܳܬܳܐ܆ ܘܟܰܕ ܡܶܬܟܰܚܕܳܐ ܐܰܢ̱ܬܝ ܝܰܬܺܝܪܳܐ ܘܟܰܕ ܡܰܚܒܳܐ ܐܰܢ̱ܬܝ ܐܰܟܚܕܳܐ܆ ܐܳܦ ܒܰܒܗܺܝܠܽܘܬܳܐ ܘܳܐܦ ܒܫܰܦܺܝܪܽܘܬ ܩܰܘܡܳܐ ܬܕܰܒܪܺܝܢ ܠܟܽܠܗܽܘܢ ܚܰܝ̣ܰܝ̣̈ܟܝ̱.

ܒܰܥ̈ܒܳܕܶܐ ܗܳܟܺܝܠ ܛܳܒ̈ܶܐ ܓܰܒܪ̈ܶܐ ܘܢܶܫ̈ܶܐ ܢܨܰܒܬܺܝܘܗ̱ܝ ܠܨܰܘܡܳܐ܆ ܘܢܶܥܒܕܺܝܘܗ̱ܝ ܨܰܘܡܳܐ ܕܝܶܫܽܘܥ ܐܰ‌ܠܳܗܳܐ. ܐܰܝܟܰܢܳܐ ܕܰܢܥܰܕܥܶܕ܆ ܠܳܐ ܒܰܚܡܺܝܪܳܐ ܥܰܬܺܝܩܳܐ ܕܰܚ̈ܛܳܗܶܐ ܗܳܢܽܘܢ ܩܰܕܡܳܝ̈ܶܐ܆ ܐܶܠܳܐ ܒܦܰܛܺܝܪܳܐ ܕܫܰܦܝܽܘܬܳܐ ܘܕܰܫܪܳܪܳܐ܆ ܘܰܕܚܽܘܕܳܬܳܐ ܚܰܕܬܳܐ ܘܰܐ‌ܠܳܗܳܝܳܐ^[25]܆ ܐܰܝܟܰܢܳܐ ܕܳܐܡܰܪ ܦܰܘܠܽܘܤ. ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܗܰܘ ܕܰܠܗܳܕܶܐ ܩܪܳܐ ܠܰܢ. ܠܶܗ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܳܐ ܕܡܳܐܐ ܘܚܰܡܫܳܐ.

ܡܶܢܝܢܐ. 17: 8 [1]

ܐ. ܫܡܘܐܝܠ. 4: 11 [2]

ܐ. ܫܡܘܐܝܠ. 5: 11 [3]

ܒ. ܫܡܘܐܝܠ. 6: 14 [4]

ܐ. ܫܡܘܐܝܠ. 6: 19[5]

ܒ. ܩܘܪ̈ܝܢܬܝܐ. 8: 9 [6]

ܒ. ܩܘܪ̈ܝܢܬܝܐ. 8: 9[7]

[8] ܩܳܪܺܝܬܐ ܐܰܘ ܕܰܦܳܐ ܕܰܐܣܺܝܪܳܐ ܘܰܡܥܰܠܝܳܐ ܒܶܐܣ̈ܶܐ ܕܙܳܘ̈ܝܳܬܳܐ ܠܣܽܘܡܳܟ ܒܶܢܝܢܳܐ

ܠܘܩܐ. 11: 22 [9]

ܥܒܪ̈ܝܐ. 2: 18 [10]

 ܗܽܘ ܢܶܣܝܳܢܳܐ ܘܠܰܘ ܗܽܘ ܝܶܫܽܘܥ[11]

ܡܬܝ. 4: 11 [12]

ܒܳܬܰܪܟܶܢ[13]

ܡܬܝ. 6: 55 ـ 57[14]

 ܬܐ ܐܢܬ ܪܐ[15]

ܡܬܝ. 25: 7 [16]

ܡܙܡܘܪ̈ܐ. 45: 11[17]

[18] ܙܳܕܶܩ ܠܡܶܕܰܥ ܕܨܰܘܡܳܐ ܒܠܶܫܳܢܳܐ ܝܰܘܢܳܝܳܐ ܢܶܩܒܬܳܢܳܐܝܬ ܡܶܬܶܐܡܰܪ. ܡܶܛܽܠ ܗܳܕܶܐ ܐܰܝܟ ܕܥܰܠ ܒܬܽܘܠܬܳܐ ܫܰܦܺܝܪܬܳܐ ܘܰܟܢܺܝܟܬܳܐ܆ ܙܩܰܪ ܠܶܗ ܡܰܠܦܳܢܳܐ ܠܡܶܠܬܳܐ ܕܡܶܛܽܠܳܬܶܗ ܢܶܩܒܬܳܢܳܐܝܬ ܘܠܰܘ ܕܶܟܪܳܢܳܐܝܬ

 ܚܕܰܘ[19]

ܓܠܛܝ̈ܐ. 5: 22 ـ 23 [20]

ܡܬܝ. 12: 33 [21]

ܡܬܝ. 6: 16 ـ 18 [22]

ܠܘܩܐ. 12: 1 [23]

[24]ܫܰܠܺܝܛ ܗܳܪܟܳܐ ܐ̱ܢܳܫ ܟܕ ܩܳܪܶܐ܆ ܕܡܰܠܟܳܐ ܚܠܳܦ ܡܰܠܟܬܳܐ ܐܶܢ ܢܶܨܒܶܐ܆ ܠܦܽܘܬ ܠܳܚܡܽܘܬܳܐ ܕܠܶܫܳܢܳܐ ܣܽܘܪܝ̣ܳܝ̣ܳܐ.

ܐ. ܩܘܪ̈ܝܢܬܝܐ. 5: 8 [25]