ܡܺܐܡܪܳܐ ܕܡܳܐܐ ܘܰܐܪܒܥܳܐ

ܥܰܠ ܦܶܬܓܳܡܳܐ ܗܰܘ ܕܒܶܐܘܰܢܓܶܠܺܝܽܘܢ ܕܡܰܬܰܝ ܕܳܐܡܰܪ܆ ܗܳܝܕܶܝܢ ܟܰܕ ܐܶܙܰܠܘ ܦܪ̈ܺܝܫܶܐ ܡܶܠܟܳܐ ܢܣܰܒܘ ܥܠܰܘܗ̱ܝ܆ ܐܰܝܟܰܢܳܐ ܕܰܢܨܽܘܕܽܘܢܳܝܗ̱ܝ ܒܡܶܠܬܳܐ. ܘܰܡܫܰܕܪܺܝܢ ܠܘܳܬܶܗ ܬܰܠ̈ܡܺܝܕܰܝܗܽܘܢ ܥܰܡ ܗܳܢܽܘܢ ܕܒܶܝܬ ܗܶܪܘܕܺܝܣ^[1]܆ ܘܥܰܠ ܗܳܠܶܝܢ ܕܫܰܪܟܳܐ. ܘܕܰܠܗܳܢܽܘܢ ܕܣܰܒܰܪܘ ܠܒܰܪ ܡܶܢ ܗܰܘ ܡܳܐ ܕܩܰܒܶܠܢܰܢ܆ ܙܳܕܶܩ ܕܢܰܚܪܶܡ ܐܶܢܽܘܢ ܐܰܝܟ ܣܝܳܡ ܢܳܡܽܘܣܳܐ ܫܠܺܝܚܳܝܳܐ^[2]܆ ܐܳܦܶܢ ܣܰܓܺܝ ܛܳܒ ܢܶܗܘܽܘܢ ܐܺܝܬܰܝܗܽܘܢ ܒܡܶܢܝܳܢܳܐ.

104: ܨܳܒܶܝܢ ܐܢ̱ܬܽܘܢ ܕܰܠܘܳܬ ܐܰܓܳܢܳܐ ܕܚܶܟܡܬܳܐ ܢܶ݀ܪܕܶܐ ܕܗܳܠܶܝܢ ܕܗܳܫܳܐ ܐܶܬܩܪ̈ܺܝ ܠܰܢ܆ ܐܰܝܟܰܢܳܐ ܕܝܽܘܠܦܳܢܳܐ ܡܶܕܶܡ ܪܽܘܚܳܢܳܝܳܐ ܢܶܕܠܶܐ܆ ܘܗܳܕܶܐ ܟܡܳܐ ܕܰܒܡܰܢܩܺܝܬܳܐ ܙܥܽܘܪܬܳܐ ܢܟܺܝܠ܆ ܘܰܕܣܳܦܩܳܐ ܠܡܰܪܘܳܝܽܘ ܠܰܒܨܺܝܪܽܘܬܳܐ ܕܺܝܠܰܢ^[3]܆ ܐܰܝܟ ܗܳܝ ܕܰܐܡܺܝܪܳܐ ܠܚܰܟܺܝܡܳܐ ܦܰܘܠܽܘܤ܆ ܘܗܳܠܶܝܢ ܕܰܒܙܰܒܢܳܐ ܕܡܶܬܒܰܪܢܫܳܢܽܘܬܶܗ ܕܦܳܪܽܘܩܰܢ ܐܶܣܬܥܰܪ̈ܝ̱ ܐܰܘ ܐܶܬܡܰܠܰܠ̈ܝ̱܆ ܡܶܫܬܰܘܫ̈ܛܳܢ ܗ̱ܘܰܝ̈ ܡܰܢ ܒܰܥ̈ܒܳܕܶܐ ܗܳܝܕܶܝܢ܆ ܐܶܬܟܬܶܒ̈ܝ̱ ܕܶܝܢ ܠܘܳܬ ܡܰܪܬܝܳܢܽܘܬܳܐ ܘܝܽܘܠܦܳܢܳܐ ܕܺܝܠܰܢ܆ ܟܰܕ ܛܽܘܦ̈ܣܶܐ ܘܡܰܠ̈ܦܳܢܘܳܬܳܐ ܕܚܰܝ̈ܶܐ ܡܝܰܬܪ̈ܶܐ ܝܳܗ̈ܒܳܢ ܠܰܢ܆ ܘܪ̈ܳܕܝܳܢ ܘܡܰܠ̈ܦܳܢ ܠܰܢ ܕܰܐܝܠܶܝܢ ܙܳܕܶܩ ܕܢܶܣܥܽܘܪ ܐܰܘ ܢܺܐܡܰܪ.

ܩܰܕܡܳܐܺܝܬ ܗܳܟܺܝܠ ‌ܐܶܢ ܫܳܦܪܳܐ܆ ܢܺܐܠܰܦ ܕܡܳܢܳܐ ܐܺܝܬܰܘܗ̱ܝ ܗ̱ܘܳܐ ܟܢܽܘܫܝܳܐ ܗܰܘ ܕܰܦܪ̈ܺܝܫܶܐ ܘܰܕܗܪ̈ܘܕܝܐܢܘ܆ ܘܡܳܢܳܐ ܗ̱ܘܳܐ ܢܶܣܝܳܢܳܐ ܗܰܘ ܕܡܶܢ ܗܳܠܶܝܢ ܡܶܬܩܰܪܰܒ ܗ̱ܘܳܐ ܠܝܶܫܽܘܥ. ܟܶܢܫܳܐ ܗܰܘ ܥܳܒܰܪ ܢܳܡܽܘܣܳܐ ܘܰܕܠܳܐ ܚܽܘܫܳܒܳܐ ܕܝܽܗ̱ܘ̈ܕܳܝܶܐ܆ ܟܰܕ ܫܡܶܢ ܘܶܐܬܥܰܒܺܝ ܒܬܰܪܥܺܝܬܳܐ ܐܰܝܟ ܕܰܟܬܺܝܒ^[4]܆ ܠܘܳܬ ܡܰܢ ܦܽܘܩ̈ܕܳܢܶܐ ܕܰܐ‌ܠܳܗܳܐ ܐܺܝܬܰܘܗ̱ܝ ܗ̱ܘܳܐ ܕܰܡܣܰܟܰܪ ܗ̱ܘܳܐ ܡܰܫܡܰܥܬܶܗ. ܒܡ̈ܶܠܶܐ ܕܶܝܢ ܘܒܰܫܡܳܗ̈ܶܐ ܗܳܠܶܝܢ ܕܰܒܗܽܘܢ ܐܶܬܝܰܩܰܪܘ܆ ܐܰܝܟܰܢܳܐ ܕܰܢܩܰܕܡܽܘܢ ܢܝܰܩܪܽܘܢ ܠܰܡܝܰܬܪܽܘܬܳܐ ܡܶܢ ܩܕܳܡ ܒܺܝܫܽܘܬܳܐ܆ ܟܰܕ ܒܚܰܣܺܝܪܽܘܬ ܪܶܥܝܳܢܳܐ ܐܶܬܚܰܫܰܚܘ܆ ܠܽܘܩܒܰܠ ܗܳܠܶܝܢ ܕܰܡܝܰܬܪ̈ܳܢ܆ ܒܰܩܪܳܒܳܐ ܘܰܒܡܰܨܽܘܬܳܐ ܩܳܝܡܺܝܢ ܗ̱ܘܰܘ܆ ܘܪܰܘܪܒܳܐܺܝܬ ܡܶܬܢܰܦܚܺܝܢ ܗ̱ܘܰܘ ܥܰܠ ܟܽܘܢܳܝ̈ܶܐ ܘܩܳܪ̈ܝܳܬܳܐ ܕܺܝܠܗܽܘܢ܆ ܟܰܕ ܫܳܡܥܺܝܢ ܗ̱ܘܰܘ ܠܰܐܠܳܗܳܐ ܕܶܐܡܰܪ ܠܘܳܬ ܐܰܒܳܗܰܝ̈ܗܽܘܢ܆ ܬܶܗܘܽܘܢ ܠܺܝ ܥܰܡܳܐ ܡܫܰܪܬܚܳܐ ܡܶܢ ܟܽܠܗܽܘܢ ܥܰܡܡ̈ܶܐ^[5]܆ ܗܳܢܰܘ ܕܶܝܢ ܕܰܡܝܰܬܰܪ ܘܰܡܫܰܚܠܰܦ ܒܰܡܫܰܪܬܚܽܘܬܳܐ ܘܣܰܓܺܝܽܐܘܬܳܐ ܘܕܰܒܩܶܢܝܳܢܳܐ ܚܫܺܝܒ܆ ܡܶܛܽܠ ܟܺܝܬ ܕܒܰܪ̈ܝܳܬܳܐ ܡܰܢ ܕܗܰܘ ܕܰܥܒܰܕ ܟܽܠܗܽܘܢ ܒܢܰܝ̈ܢܳܫܳܐ܆ ܩܶܢ̈ܝܳܢܶܐ ܕܶܝܢ ܗܳܢܽܘܢ ܕܰܒܝܰܕ ܡܶܫܬܰܘܕܥܳܢܽܘܬܳܐ ܐܶܬܒܰܝܬܺܝܘ ܡܶܢ ܐܰ‌ܠܳܗܳܐ܆ ܘܗܳܠܶܝܢ ܕܰܕܫܳܘ̈ܝܳܢ ܠܡܳܪܽܘܬܶܗ ܣܳܥܪܺܝܢ܆ ܘܳܐܦܠܳܐ ܠܚܰܕ ܡܶܫܬܰܥܒܕܺܝܢ ܕܢܶܗܘܶܐ ܥܠܰܝܗܽܘܢ ܡܳܪܳܐ܆ ܐܰܘ ܚܰܫܳܐ ܕܰܚܛܺܝܬܳܐ ܐܰܘ ܐܰ‌ܠܳܗܳܐ ܕܰܓܳܠܳܐ܆ ܘܠܰܘ ܗܳܕܶܐ ܒܰܠܚܽܘܕ܆ ܐܶܠܳܐ ܘܳܐܦ ܗܳܝ ܕܰܐܢ̱ܬܘܢ ܕܶܝܢ ܬܶܗܘܽܘܢ ܠܺܝ ܟܽܘܗܳܢܳܐ ܡܰܠܟܳܝܳܐ ܘܥܰܡܳܐ ܩܰܕܺܝܫܳܐ^5: ܕܰܐܝܟ ܕܰܠܡܰܠܟܳܐ ܡܰܢ ܦܪܺܝܫ܆ ܐܰܝܟ ܕܠܰܐܠܳܗܳܐ ܕܶܝܢ ܐܶܬܟܰܗܰܢ ܘܶܐܬܩܰܕܰܫ.

ܘܛܰܥܝܳܐ ܗ̱ܘܳܬ ܠܗܽܘܢ ܠܗܳܢܽܘܢ ܙܺܝ̈ܥܶܐ ܘܕܳܘ̈ܰܝܳܐ܆ ܕܰܫܡܳܗ̈ܶܐ ܡܫܰܘܕܥܳܢ̈ܶܐ ܕܣܽܘܥܪ̈ܳܢܶܐ ܐܺܝܬܰܝܗܽܘܢ. ܗܳܢܽܘܢ ܓܶܝܪ ܐܺܝܬܰܝܗܽܘܢ ܕܒܰܡܫܰܪܬܚܽܘܬ ܥܰܡܳܐ ܕܰܐ‌ܠܳܗܳܐ ܚܫܺܝܒܺܝܢ܆ ܘܡܳܪܳܢܳܐܺܝܬ ܡܶܬܩܪܶܝܢ ܥܰܡܳܐ ܡܫܰܪܬܚܳܐ ܘܩܶܢܝܳܢܳܐ ܕܰܐ‌ܠܳܗܳܐ܆ ܗܳܢܽܘܢ ܕܰܐܝܟ ܡܶܠܬܶܗ ܕܦܰܘܠܽܘܤ܆ ܡܩܺܝܡܺܝܢ ܘܰܡܛܰܝܒܺܝܢ ܗܰܕܳܡܰܝ̈ܗܽܘܢ ܥܰܒ̈ܕܶܐ ܠܙܰܕܺܝܩܽܘܬܳܐ ܐܰܝܟ ܕܰܠܩܰܕܺܝܫܽܘܬܳܐ^[6]. ܘܒܳܗ̇ ܒܰܕܡܽܘܬܳܐ ܥܰܡܳܐ ܩܰܕܺܝܫܳܐ ܘܟܽܘܗܳܢܳܐ ܡܰܠܟܳܝܳܐ ܗܳܢܽܘܢ ܐܺܝܬܰܝܗܽܘܢ܆ ܗܳܢܽܘܢ ܕܰܐܝܟ ܡܶܠܬܶܗ ܕܺܝܠܶܗ ܟܰܕ ܕܺܝܠܶܗ ܕܰܫܠܺܝܚܳܐ܆ ܕܶܒܚܬܳܐ ܡܶܕܶܡ ܚܰܝܬܳܐ ܘܩܰܕܺܝܫܬܳܐ ܐܺܝܬܰܝܗܽܘܢ܆ ܠܪܺܝܚܳܐ ܒܰܣܺܝܡܳܐ ܗܰܘ ܡܶܬܗܰܘܢܳܢܳܐ^[7].

ܒܰܕܓܽܘܢ ܘܳܐܦܠܳܐ ܦܫܺܝܛܳܐܺܝܬ ܗܳܟܰܢܳܐ ܡܶܬܚܰܫܰܚ ܗ̱ܘܳܐ ܐܰ‌ܠܳܗܳܐ ܕܟܽܠ ܒܗܽܘܢ ܒܰܫ̈ܡܳܗܶܐ ܗܳܢܽܘܢ ܡܝܰܩܪ̈ܶܐ. ܐܶܠܳܐ ܟܰܕ ܩܰܕܶܡ ܐܶܡܰܪ܆ ܕܶܐܢ ܡܶܫܡܰܥ ܬܶܫܡܥܽܘܢ ܠܩܳܠܝ܆ ܘܬܶܥܒܕܽܘܢ ܟܽܠܗܶܝܢ ܗܳܠܶܝܢ ܕܶܐܢ ܐܺ݀ܡܰܪ ܠܟܽܘܢ܆ ܘܬܶܛܪܽܘܢ ܠܕܺܝܰܐܬܺܝܩܺܐ ܕܺܝܠܝ܆ ܬܶܗܘܽܘܢ ܠܺܝ ܥܰܡܳܐ ܡܫܰܪܬܚܳܐ܆ ܕܺܐܝܬܰܘܗ̱ܝ ܩܶܢܝܳܢܳܐ ܕܺܝܠܝ܆ ܘܟܽܘܗܳܢܳܐ ܡܰܠܟܳܝܳܐ ܘܥܰܡܳܐ ܩܰܕܺܝܫܳܐ^[8].

ܟܽܠ ܟܡܳܐ ܡܰܢ ܗܳܟܺܝܠ ܕܰܠܘܳܬ ܗܳܢܽܘܢ ܕܡܶܢ ܐܺܝܣܪܳܐܶܝܠ܆ ܠܳܐ ܐܺܝܬܰܝܗܽܘܢ ܗ̱ܘܰܘ ܗܳܢܽܘܢ ܗܳܠܶܝܢ ܫܡܳܗ̈ܶܐ܆ ܣܦܺܝ̈ܩܶܐ ܟܽܠ ܟܽܠܶܗ ܡܶܢ ܣܽܘܥܪ̈ܳܢܶܐ܆ ܘܳܐܦ ܟܰܕ ܚܳܛܶܝܢ ܗ̱ܘܰܘ ܘܳܐܡܪܺܝܢ ܗ̱ܘܰܘ ܠܰܫܡܽܘܐܝܠ܆ ܐܰܩܺܝܡ ܥܠܰܝܢ ܡܰܠܟܳܐ ܕܰܢܕܽܘܢ ܠܰܢ ܐܰܝܟ ܟܽܠܗܽܘܢ ܥܰܡܡ̈ܶܐ^[9]܆ ܘܳܐܦ ܡܶܬܬܥܳܩܽܘ ܡܶܬܬܥܺܝܩ ܗ̱ܘܳܐ ܐܰ‌ܠܳܗܳܐ܆ ܘܳܐܦ ܡܶܙܕܗܳܪܽܘ ܡܶܙܕܗܰܪ ܗ̱ܘܳܐ ܒܗܽܘܢ ܐܰܝܟ ܕܒܰܐܝܠܶܝܢ ܕܚܰܒܺܝܒܺܝܢ ܠܶܗ. ܘܠܰܫܡܽܘܐܝܠ ܡܦܰܢܶܐ ܗ̱ܘܳܐ ܦܶܬܓܳܡܳܐ ܟܰܕ ܐܳܡܰܪ܆ ܕܠܰܘ ܠܳܟ ܐܰܣܠܺܝܘ܆ ܐܶܠܳܐ ܠܺܝ ܐܰܣܠܺܝܘ ܕܠܳܐ ܐܰ݀ܡܠܶܟ ܥܠܰܝܗܽܘܢ^[10]. ܘܰܐܝܟ ܢܒܺܝܽܘܬܶܗ ܕܶܐܫܰܥܝܳܐ܆ ܐܰܝܟ ܕܰܠܟܰܪܡܳܐ ܣܝܳܓܳܐ ܐܰܟܪܶܟ ܠܶܗ ܠܥܰܡܳܐ܆ ܥܽܘܕܪܳܢܳܐ ܒܰܝܬܳܝܳܐ ܗܰܘ ܕܺܝܠܶܗ^[11]. ܘܰܠܗܳܢܽܘܢ ܕܡܶܬܥܰܫܢܺܝܢ ܗ̱ܘܰܘ ܥܠܰܝܗܽܘܢ ܘܰܡܫܰܥܒܕܺܝܢ ܗ̱ܘܰܘ ܠܗܽܘܢ܆ ܚܳܣܢܺܝܢ ܘܙܳܟܶܝܢ ܗ̱ܘܰܘ ܠܗܽܘܢ܆ ܟܰܕ ܡܶܬܟܰܬܫܺܝܢ ܗ̱ܘܰܘ ܠܽܘܩܒܰܠܗܽܘܢ.

ܟܰܕ ܕܶܝܢ ܡܶܟܺܝܠ ‌ܐܰܝܟ ܗܳܝ ܕܰܟܬܺܝܒܳܐ ܡܶܬܡܰܠܶܝܢ ܗ̱ܘܰܘ ܚ̈ܛܳܗܰܝܗܽܘܢ܆ ܘܟܰܕ ܠܘܳܬ ܬܶܛܪܳܐ ܕܪܽܘܓܙܳܐ ܗܰܘ ܕܡܶܢ ܠܥܶܠ ܪܳܕܦܺܝܢ ܗ̱ܘܰܘ ܘܳܐܙܺܠ̱ܝܢ ܫܪܰܥܘ ܘܰܢܦܰܠܘ^[12]܆ ܗܳܝܕܶܝܢ ܟܺܝܬ ܗܳܝܕܶܝܢ܆ ܡ̈ܶܠܶܐ ܗܳܠܶܝܢ ܕܰܒܝܰܕ ܢܒܺܝܳܐ ܠܘܳܬ ܥ̈ܒܳܕܶܐ ܐܳܬܝ̈ܳܢ ܗ̱ܘܰܝ̈܆ ܘܰܓܙܳܡܳܐ ܕܰܐ‌ܠܳܗܳܐ ܕܳܐܡܰܪ ܗ̱ܘܳܐ܆ ܗܳܫܳܐ ܡܶܟܺܝܠ ‌ܐܶ݀ܚܰܘܶܝܟܽܘܢ ܡܳܢܳܐ ܐܶ݀ܥܒܶܕ ܠܟܰܪܡܳܐ ܕܺܝܠܝ܆ ܐܱ݀ܪܺܝܡ ܣܝܳܓܶܗ ܘܢܶܗܘܶܐ ܠܰܚܛܽܘܦܝܳܐ܆ ܘܶܐ݀ܥܩܽܘܪ ܐܶܣܬܶܗ ܘܢܶܗܘܶܐ ܠܰܕܝܳܫܳܐ^[13].

ܡܶܛܽܠܗܳܕܶܐ ܐܳܦ ܡܶܢ ܒܳܬܰܪ ܦܽܘܢܳܝܳܐ ܕܡܶܢ ܒܳܒܶܝܠ܆ ܟܰܕ ܛܥܰܐܘܗ̱ܝ ܠܥܽܘܕܪܳܢܳܐ ܗܰܘ ܕܕܰܐܝܟ ܗܳܢܳܐ܆ ܡܶܢ ܒܳܬܰܪ ܩܪ̈ܳܒܶܐ ܟܺܝܬ ܘܫܶܒ̈ܝܶܐ ܕܡܰܩܶܕܽܘܢܳܝ̈ܶܐ ܘܕܰܒ̈ܢܰܝܗܽܘܢ ܕܗܳܢܽܘܢ܆ ܠܚܰܪܬܳܐ ܬܚܶܝܬ ܪ̈ܽܘܡܳܝܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠܗܽܘܢ ܥܰܡ̱ܡ̈ܶܐ ܚܰܣܺܝܢܺܝܢ ܗ̱ܘܰܘ. ܘܺܐܝܬܰܝܗܽܘܢ ܗ̱ܘܰܘ ܡܰܣ̈ܩܰܝ ܡܰܕܰܐܬ̣ܳܐ ܘܳܐܦ ܟܰܕ ܠܳܐ ܨܳܒܶܝܢ ܗ̱ܘܰܘ܆ ܕܩܺܝܢܕܽܘܢܽܘܣܳܐ ܥܳܒܕܺܝܢ ܗ̱ܘܰܘ܆ ܕܳܐܦ ܡܶܢܳܗ̇ ܕܬܶܫܡܶܫܬܳܐ ܗܳܝ ܛܶܠܳܢܳܝܬܳܐ ܢܶܦܠܽܘܢ ܗ̱ܘܰܘ܆ ܗܳܝ ܕܡܰܣܩܺܝܢ ܗ̱ܘܰܘ ܠܰܐܠܳܗܳܐ. ܐܳܦ ܟܺܝܬ ܒܙܰܒ̈ܢܰܘܗ̱ܝ ܕܛܺܝܒܰܐܪܺܝܽܘܤ ܩܠܘܕܝܘܤ ܩܶܣܰܪ܆ ܘܬܽܘܒ ܒܗܳܠܶܝܢ ܕܓܰܐܝܽܘܤ ܩܶܣܰܪ ܟܬܺܝܒ ܒܬܰܫ̈ܥܝܳܬܳܐ܆ ܕܥܰܡܳܐ ܣܰܓܺܝܳܐܐ ܢܦܰܠ ܡܶܢ ܝܽܗ̱ܘ̈ܕܳܝܶܐ ܘܶܐܬܩܛܶܠ܆ ܟܰܕ ܦܺܝܠܛܘܤ ܗܶܓܡܽܘܢܳܐ ܨܒܳܐ ܗ̱ܘܳܐ ܕܰܐܕܪܺܝܢܰܛܳܐ ܕܩܶܣܰܪ ܢܶܩܒܽܘܥ ܒܗܰܝܟܠܳܐ ܕܰܐ‌ܠܳܗܳܐ.

ܒܗܰܘ ܗܳܟܺܝܠ ܙܰܒܢܳܐ ܟܰܕ ܩܰܐܛܤܛܐܣܝܤ ܕܕܰܐܝܟ ܗܳܕܶܐ ܐܚܺܝܕܳܐ ܗ̱ܘܳܬ ܘܡܶܬܕܰܒܪܳܐ ܒܽܐܘܪܫܠܶܡ܆ ܐܺܝܬ ܗ̱ܘܳܐ ܐ̱ܢܳܫܺܝ̈ܢ ܕܰܡܦܺܝܣܺܝܢ ܗ̱ܘܰܘ ܠܶܗ ܠܥܰܡܳܐ ܡܰܪܳܚܳܐ ܕܝܽܗ̱ܘ̈ܕܳܝܶܐ܆ ܘܕܰܡܣܰܡܰܝ ܠܘܳܬ ܓܒܺܝܬܳܐ ܗܳܝ ܕܦܳܩܚܳܐ܆ ܕܠܳܐ ܬܽܘܒ ܠܩܶܣܰܪ ܡܰܕܰܐܬ̣ܐ ܢܰܣܩܽܘܢ܆ ܠܗܳܝ ܕܩܺܝܢܣܘܢ ܗܳܢܰܘ ܕܶܝܢ ܡܰܟܬܒܳܢܽܘܬܳܐ ܡܟܰܢܶܝܢ ܠܳܗ̇ ܪ̈ܽܘܡܳܝܶܐ ܒܠܶܫܳܢܳܐ ܐܰܒܳܗܳܝܳܐ ܕܺܝܠܗܽܘܢ ܘܰܡܕܰܒܪ̈ܳܢܶܐ ܘܪ̈ܺܝܫܶܐ ܕܗܳܠܶܝܢ ܐܺܝܬܰܝܗܽܘܢ ܗ̱ܘܰܘ܆ ܗܳܢܽܘܢ ܕܡܶܬܩܪܶܝܢ ܗ̱ܘܰܘ ܦܪ̈ܺܝܫܶܐ܆ ܕܰܠܢܳܡܽܘܣܳܐ ܫܰܦܺܝܪ ܡܦܰܪܫܳܐܺܝܬ ܡܶܫܬܰܘܕܶܝܢ ܕܝܳܕܥܺܝܢ܆ ܘܰܠܟܽܘܢܳܝܳܐ ܡܶܢܶܗ ܕܣܽܘܥܪܳܢܳܐ܆ ܗܳܝ ܟܺܝܬ ܕܡܶܬܪܰܘܪܒܺܝܢ ܗ̱ܘܰܘ ܒܳܗ̇ ܐܺܝܬ ܗ̱ܘܳܐ ܠܗܽܘܢ. ܗܳܝ ܓܶܝܪ ܦܐܪܫ ܒܠܶܫܳܢܳܐ ܕܥܶܒܪ̈ܳܝܶܐ ܡܰܘܕܥܳܐ܆ ܗܳܝ ܕܢܶܦܣܽܘܩ ܘܰܢܦܰܪܶܫ܆ ܘܰܐܝܟܰܢܳܐ ܕܟܰܕ ܥܳܒܶܕ ܐ̱ܢܳܫ ܫܡܳܗ̈ܶܐ ܢܺܐܡܰܪ܆ ܦܳܣܩܳܐ ܘܦܽܘܪܳܫܳܐ.

ܗܳܠܶܝܢ ܐܳܦ ܠܣܰܓܺܝ̈ܶܐܐ ܡܶܢ ܥܰܡܳܐ ܡܰܛܥܶܝܢ ܗ̱ܘܰܘ ܘܫܳܓܡܺܝܢ܆ ܟܰܕ ܒܡ̈ܶܠܶܐ ܐܰ‌ܠܳܗܳܝ̈ܳܬܳܐ ܕܠܰܘ ܒܙܰܒܢܗܶܝܢ ܡܶܬܩܰܪ̈ܒܳܢ ܡܡܰܪܕܺܝܢ ܗ̱ܘܰܘ ܘܥܳܒܕܺܝܢ ܠܗܽܘܢ ܡܰܪ̈ܳܚܶܐ ܠܘܳܬ ܗܳܝ ܕܳܐܦܠܳܐ ܠܚܰܕ ܒܰܪܢܳܫܳܐ ܢܽܘܟܪܳܝܳܐ ܕܥܰܡܳܐ ܗܰܘ ܕܺܝܠܗܽܘܢ ܢܰܪܟܢܽܘܢ ܨܰܘܪܗܽܘܢ܆ ܘܰܢܩܰܒܠܽܘܢ ܢܺܝܪܳܐ ܕܥܰܒܕܽܘܬܳܐ.

ܘܒܰܙܒܰܢ ܡܰܢ܆ ܗܳܠܶܝܢ ܕܡܽܘܫܶܐ ܐܳܡܪܺܝܢ ܗ̱ܘܰܘ܆ ܐܢ̱ܬܽܘܢ ܡܢܳܬܶܗ ܕܡܳܪܝܳܐ ܥܰܡܳܐ ܕܺܝܠܶܗ ܝܥܩܘܒ܆ ܚܰܒ̈ܠܶܐ ܕܝܳܪܬܽܘܬܳܐ ܕܺܝܠܶܗ ܐܺܝܣܪܳܐܶܝܠ^[14]܆ ܘܰܡܩܳܡܽܘ ܬܩܺܝܡ ܥܠܰܝܟ ܪܺܝܫܳܢܳܐ܆ ܠܗܰܘ ܕܶܐܢ ܢܶܓܒܽܘܗ̱ܝ ܡܳܪܝܳܐ ܐܰ‌ܠܳܗܳܟ܆ ܡܶܢ ܐܰܚ̈ܶܐ ܕܺܝܠܳܟ ܬܩܺܝܡ ܥܠܰܝܟ ܪܺܝܫܳܢܳܐ܆ ܠܳܐ ܬܶܬܡܨܶܐ ܠܰܡܩܳܡܽܘ ܥܠܰܝܟ ܒܰܪܢܳܫܳܐ ܢܽܘܟܪܳܝܳܐ܆ ܕܠܳܐ ܐܺܝܬܰܘܗ̱ܝ ܐܰܚܽܘܟ^[15]. ܒܰܙܒܰܢ ܕܶܝܢ ܠܗܳܠܶܝܢ ܕܶܐܫܰܥܝܳܐ ܒܒܰܪܬܩܳܠܳܐ ܦܬܺܝܬܳܐ܆ ܟܰܕ ܡܫܰܚܠܦܺܝܢ ܗ̱ܘܰܘ ܗܰܘܢܗܶܝܢ ܕܰܢܒܺܝ̈ܰܘܳܬܳܐ ܡܒܰܓܒܓܺܝܢ ܗ̱ܘܰܘ ܒܓܰܓܪ̈ܳܬܗܽܘܢ܆ ܡܳܪܝܰܐ ܗ̱ܘ ܡܰܠܟܟܽܘܢ܆ ܡܳܪܝܰܐ ܗ̱ܘ ܪܺܝܫܟܽܘܢ܆ ܡܳܪܝܰܐ ܗ̱ܘ ܕܰܝܳܢܟܽܘܢ^[16]. ܟܰܕ ܠܳܐ ܝܳܕܥܺܝܢ ܗ̱ܘܰܘ܆ ܕܰܐ̱ܚܪܺܬܳܐ ܗ̱ܝ ܗܳܝ ܕܨܶܒܝܳܢܳܐܺܝܬ ܘܰܐܝܟ ܣܝܳܡ ܢܳܡܽܘܣܳܐ ܒܰܝܬܳܝܳܐ ܕܺܝܠܗܽܘܢ ܢܰܣܪܚܽܘܢ ܠܗܽܘܢ ܪܺܝܫܳܢܳܐ܆ ܘܰܐ̱ܚܪܺܬܳܐ ܗ̱ܝ ܗܳܝ ܕܰܒܢܳܡܽܘܣܳܐ ܕܰܩܪܳܒܳܐ܆ ܟܰܕ ܡܶܬܪܕܶܝܢ ܡܶܛܽܠ ܚ̈ܛܳܗܰܝܗܽܘܢ܆ ܙܳܕܶܩ ܕܢܰܪܟܢܽܘܢ ܨܰܘܪ̈ܶܐ ܠܗܳܢܽܘܢ ܕܰܡܝܰܬܪܺܝܢ ܘܰܩܫܶܝܢ ܡܶܢܗܽܘܢ.

ܡܶܢ ܗܳܕܶܐ ܣܺܝܥܬܳܐ ܕܰܦܪ̈ܺܝܫܶܐ ܐܺܝܬܰܘܗ̱ܝ ܗ̱ܘܳܐ܆ ܐܳܦ ܝܺܗܽܘܕܳܐ ܗܰܘ ܓܠܺܝܠܳܝܳܐ܆ ܗܰܘ ܕܥܽܘܗܕܳܢܶܗ ܥܒܰܕ ܠܽܘܩܳܐ ܒܦܪܟܣܝܤ ܟܰܕ ܐܳܡܰܪ܆ ܕܩܳܡ ܝܺܗܽܘܕܳܐ ܗܰܘ ܓܠܺܝܠܳܝܳܐ ܒܝܰܘ̈ܡܳܬܳܐ ܗܳܢܽܘܢ ܕܡܰܟܬܒܳܢܽܘܬܳܐ܆ ܘܰܐܪܚܶܩ ܘܰܐܡܪܶܕ ܒܳܬܪܶܗ ܥܰܡܳܐ ܣܰܓܺܝܳܐܐ܆ ܘܗܰܘ ܐܶܒܰܕ܆ ܘܟܽܠܗܽܘܢ ܗܳܢܽܘܢ ܕܡܶܬܬܦܺܝܣܺܝܢ ܗ̱ܘܰܘ ܠܶܗ ܐܶܬܒܰܕܰܪܘ^[17].

ܗܶܪܘܕܝܣ^[18] ܗܳܟܺܝܠ ܬܽܘܒ ܗܰܘ ܕܺܐܝܬܰܘܗ̱ܝ ܗ̱ܘܳܐ ܪܺܝܫܳܐ ܕܛܰܛܪܰܐܪܟܺܝܰܐ ܐܰܘܟܺܝܬ ܕܰܚܕܳܐ ܡܶܢ ܐܰܪܒܰܥ ܕܪܺܝܫܳܢܽܘܬܳܐ ܕܝܽܗ̱ܘ̈ܕܳܝܶܐ ܗܳܝܕܶܝܢ܆ ܠܰܐܪܒܥ ܓܶܝܪ ܪ̈ܺܝܫܳܢܘܳܬܳܐ ܡܦܰܠܓܳܐ ܗ̱ܘܳܬ ܪܺܝܫܳܢܽܘܬܳܐ ܕܝܽܗ̱ܘ̈ܕܳܝܶܐ ܘܕܰܓܠܺܝ̈ܠܳܝܶܐ ܘܰܕܗܳܢܽܘܢ ܕܩܰܪܺܝܒܺܝܢ ܗ̱ܘܰܘ ܠܗܽܘܢ ܒܰܐܬܪܳܐ܆ ܟܰܕ ܟܽܠ ܚܰܕ ܐܰܬܪܳܐ ܐܺܝܬ ܗ̱ܘܳܐ ܠܶܗ ܪܺܝܫܳܢܳܐ ܕܺܝܠܳܢܳܝܳܐ܆ ܐܰܝܟܰܢܳܐ ܕܰܒܗܽܘܢ ܒܕܽܘܟ ܒܫܽܘܪ̈ܳܝܶܐ ܕܡܰܟܬܒܳܢܽܘܬܳܐ ܐܶܘܰܢܓܶܠܳܝܬܳܐ^[19] ܐܰܡܪܳܗ̇ ܒܬܰܫܥܺܝܬܳܐ ܐܳܦ ܠܗܳܕܶܐ ܗܽܘ ܠܽܘܩܳܐ܆ ܡܳܠܶܟ ܗ̱ܘܳܐ ܠܗܽܘܢ ܠܗܳܢܽܘܢ ܕܥܳܡܪܺܝܢ ܗ̱ܘܰܘ ܒܽܐܘܪܫܠܶܡ܆ ܟܰܕ ܚܳܐܶܤ ܗ̱ܘܳܐ ܥܠܰܝܗܽܘܢ ܘܝܳܨܶܦ ܗ̱ܘܳܐ ܕܺܝܠܗܽܘܢ܆ ܐܰܝܟ ܕܰܒ̈ܢܰܝ ܓܶܢܣܶܗ ܘܒ̈ܢܰܝ ܫܰܪܒܬܶܗ ܒܰܙܢܳܐ ܡܶܕܶܡ܆ ܕܢܶܫܬܰܥܒܕܽܘܢ ܠܪ̈ܽܘܡܳܝܶܐ܆ ܘܢܰܣܩܽܘܢ ܡܰܕܰܐܬܳܐ ܕܡܰܟܬܒܳܢܽܘܬܐ ܗܳܝ ܕܶܐܬܬܣܺܝܡܰܬ ܥܠܰܝܗܽܘܢ. ܘܺܐܝܬ ܗ̱ܘܳܐ ܦܣܳܩܳܐ ܐ̱ܚܪܺܢܳܐ ܕܥܰܡܳܐ܆ ܕܰܠܡܶܠܟܳܐ ܗܳܢܳܐ ܕܗܶܪܽܘܕܺܝܤ ܡܶܬܬܦܺܝܤ ܗ̱ܘܳܐ܆ ܘܰܫܡܳܐ ܕܗܶܪ̈ܘܕܝܐܢܘ ܡܶܢ ܗܳܪܟܳܐ ܡܩܰܒܶܠ ܗ̱ܘܳܐ ܕܢܶܬܟܬܶܒ ܥܠܰܘܗ̱ܝ܆ ܘܠܽܘܩܒܰܠ ܦܪ̈ܺܝܫܶܐ ܣܺܝܡ ܗ̱ܘܳܐ ܣܰܩܽܘܒܠܳܐܺܝܬ܆ ܘܰܠܬܰܪܥܺܝܬܳܐ ܕܺܝܠܗܽܘܢ ܡܡܰܪܕܳܢܺܝܬܳܐ ܘܡܰܪܚܩܳܢܺܝܬܳܐ ܠܳܐ ܡܩܰܒܶܠ ܗ̱ܘܳܐ.

ܐܶܠܳܐ ܗܳܢܽܘܢ ܕܚܶܪܝܳܐܺܝܬ ܗܳܟܰܢܳܐ ܘܣܰܩܽܘܒܠܳܐܺܝܬ ܠܘܳܬ ܚ̈ܕܳܕܶܐ ܐܺܝܬ ܗ̱ܘܳܐ ܠܗܽܘܢ܆ ܗܳܝܕܶܝܢ ܠܽܘܩܒܰܠ ܝܶܫܽܘܥ ܐܰܟܚܕܳܐ ܐܶܬܰܐܘܺܝܘ ܘܶܐܬܡܰܠܰܟܘ. ܝܳܕܰܥ ܗ̱ܘܳܐ ܓܶܝܪ ܐܳܟܶܠܩܰܪܨܳܐ ܕܰܢܙܰܝܶܢ ܐܰܟܚܕܳܐ ܠܗܳܢܽܘܢ ܕܺܐܝܬܰܝܗܽܘܢ ܕܰܠܩܽܘܒܠܳܐ ܕܰܚ̈ܕܳܕܶܐ܆ ܘܰܢܟܰܢܶܫ ܘܢܰܝܬܶܐ ܐܶܢܽܘܢ ܠܰܐܘܝܽܘܬܳܐ܆ ܠܘܳܬ ܗܳܝ ܕܰܢܫܰܡܠܶܐ ܗܳܝ ܕܫܳܦܪܳܐ ܠܶܗ. ܡܶܛܽܠ ܗܳܕܶܐ ܥܰܡ ܡܫܰܘܕܥܳܢܽܘܬܳܐ ܡܶܕܶܡ ܣܰܓܺܝܐܬܳܐ ܐܶܡܰܪ ܡܰܬܰܝ܆ ܗܳܝܕܶܝܢ ܟܰܕ ܐܶܙܰܠܘ ܦܪ̈ܺܝܫܶܐ ܡܶܠܟܳܐ ܢܣܰܒܘ^[20]. ܗܳܢܽܘܢ ܕܕܰܠܩܽܘܒܠܳܐܺܝܬ ܐܳܡܰܪ ܐܺܝܬ ܠܗܽܘܢ ܘܰܒܥܶܠܕܒܳܒܳܐܺܝܬ܆ ܡܶܫܬܰܘܬܦܺܝܢ ܗ̱ܘܰܘ ܗܳܝܕܶܝܢ ܒܡܶܠܟܳܐ.

ܡܳܢܳܐ ܕܶܝܢ ܐܰܪܰܐ ܐܺܝܬܰܝܗܶܝܢ ܗ̱ܘܰܝ̈ ܗܳܠܶܝܢ ܕܡܶܠܟܳܐ܆ ܐܰܝܟ ܚܰܝ̈ܠܬܳܢܝܳܬܳܐ ܘܰܬܡܺܝ̈ܗܳܬܳܐ. ܕܠܰܡܫܺܝܚܳܐ ܚܰܝܠܳܐ ܘܚܶܟܡܬܳܐ ܕܰܐ‌ܠܳܗܳܐ ܐܰܒܳܐ^[21] ܢܶܬܚܰܟܡܽܘܢ ܒܫܽܘܐܴܠܳܐ ܨܢܺܝܥܳܐ܆ ܘܠܰܐܠܳܗܳܐ ܘܡܶܠܬܳܐ܆ ܡܶܢ ܡܶܠܬܳܐ ܕܠܳܐ ܩܰܕܺܝܡ ܥܒܺܝܕ ܒܽܘܚܳܢܳܐ ܘܒܽܘܝܳܢܳܐ ܡܶܛܽܠܳܬܳܗ̇܆ ܢܨܽܘܕܽܘܢ ܥܰܠ ܦܽܘܢܳܝ ܦܶܬܓܳܡܳܐ. ܡܶܠܟܳܐ ܓܶܝܪ ܐܳܡܰܪ ܢܣܰܒܘ܆ ܐܰܝܟܰܢܳܐ ܕܰܢܨܽܘܕܽܘܢܳܝܗ̱ܝ ܒܡܶܠܬܳܐ. ܘܰܡܫܰܕܪܺܝܢ ܦܪ̈ܺܝܫܶܐ ܬܰܠ̈ܡܺܝܕܶܐ ܕܺܝܠܗܽܘܢ ܥܰܡ ܗܶܪ̈ܘܕܝܰܐܢܘ ܟܰܕ ܐܳܡܪܺܝܢ: ܡܰܠܦܳܢܳܐ܆ ܝܳܕܥܺܝܢ ܚ̱ܢܰܢ ܕܫܰܪܺܝܪܳܐ ܐܺܝܬܰܝܟ ܘܠܽܐܘܪܚܳܐ ܕܰܐ‌ܠܳܗܳܐ ܒܰܫܪܳܪܳܐ ܡܰܠܶܦ ܐܰܢ̱ܬ. ܘܠܳܐ ܐܳܬܝܳܐ ܠܳܟ ܘܠܳܐ ܕܐ̱ܢܳܫ. ܠܳܐ ܓܶܝܪ ܢܳܣܶܒ ܐܰܘܟܺܝܬ ܚܳܐܰܪ ܐܰܢ̱ܬ ܒܦܰܪܨܽܘܦܳܐ ܕܰܒܢܰܝ̈ܢܳܫܳܐ^[22]. ܐܶܡܰܪ ܠܰܢ ܗܳܟܺܝܠ ܡܳܢܳܐ ܡܶܣܬܒܰܪ ܠܳܟ. ܫܰܠܺܝܛ ܠܡܶܬܰܠ ܟܣܶܦ ܪܺܝܫܳܐ ܠܩܶܣܰܪ ܐܰܘ ܠܳܐ^[23].

ܘܩܰܕܡܳܐܺܝܬ ܙܳܕܶܩ ܠܡܶܕܰܥ܆ ܕܥܰܡ ܗܶܪ̈ܽܘܕܝܰܐܢܘ ܟܒܰܪ ܐܺܝܬ ܗ̱ܘܳܐ ܕܰܚܠܺܝܛܺܝܢ܆ ܐܳܦ ܡܙܰܝ̈ܢܶܐ ܐܰܘܟܺܝܬ ܡܫܰܡ̈ܫܳܢܶܐ ܕܦܘܢܛܝܘܤ ܦܝܠܛܘܤ ܗܶܓܡܽܘܢܳܐ. ܐܳܡܰܪ ܓܶܝܪ ܠܽܘܩܳܐ܆ ܕܢܶܣܝܳܢܳܐ ܡܩܰܪܒܺܝܢ ܗ̱ܘܰܘ ܠܝܶܫܽܘܥ ܗܳܢܽܘܢ ܕܰܡܫܰܐܠܺܝܢ ܗ̱ܘܰܘ ܨܢܺܝܥܳܐܺܝܬ܆ ܐܰܝܟ ܕܢܰܫܠܡܽܘܢܳܝܗ̱ܝ ܠܪܺܝܫܳܢܽܘܬܳܐ ܘܰܠܫܽܘܠܛܳܢܳܐ ܕܗܶܓܡܽܘܢܳܐ. ܗܶܪܽܘܕܺܝܤ ܓܶܝܪ܆ ܕܰܓܠܺܝܠܳܐ ܐܺܝܬܰܘܗ̱ܝ ܗ̱ܘܳܐ ܪܺܝܫܳܢܳܐ ܕܰܚܕܳܐ ܡܶܢ ܐܰܪܒܥ ܡܢܰܘ̈ܳܬܳܐ܆ ܘܬܰܡܳܢ ܐܺܝܬܰܝܗܶܝܢ ܗ̱ܘܰܝ̈ ܠܶܗ ܗܳܠܶܝܢ ܕܫܽܘܠܛܳܢܶܗ.

ܚܕܳܐ ܡܶܢ ܬܰܪܬܶܝܢ ܕܶܝܢ ܣܰܟܺܝܘ ܕܰܥܬܺܝܕܳܐ ܕܬܶܦܽܘܩ ܠܗܽܘܢ ܡܶܢ ܦܽܘܢܳܝ ܦܶܬܓܳܡܳܐ. ܘܕܰܐܘ ܒܢܳܡܽܘܣܳܐ ܕܡܽܘܫܶܐ܆ ܐܰܘ ܒܪܺܝܫܳܢܽܘܬܳܐ ܕܪ̈ܽܘܡܳܝܶܐ ܢܚܰܘܽܘܢܳܝܗ̱ܝ ܓܰܠܝܳܐܺܝܬ ܠܝܶܫܽܘܥ ܕܡܰܣܟܶܠ. ܐܶܢܗܽܘ ܡܰܢ ܓܶܝܪ ܕܰܡܦܰܢܶܐ ܗ̱ܘܳܐ ܕܙܳܕܶܩ ܕܢܶܬܶܠ ܡܰܕܰܐܬܳܐ܆ ܡܶܢ ܟܽܠܦܪܘܤ ܦܪ̈ܺܝܫܶܐ ܠܘܳܬ ܗܳܢܽܘܢ ܕܡܶܬܬܦܺܝܣܺܝܢ ܗ̱ܘܰܘ ܠܗܽܘܢ܆ ܐܳܟܠܺܝܢ ܗ̱ܘܰܘ ܩܰܪ̈ܨܰܘܗ̱ܝ ܟܰܕ ܐܳܡܪܺܝܢ: ܕܰܠܒܰܪ ܡܶܢ ܢܳܡܽܘܣܳܐ ܕܡܽܘܫܶܐ܆ ܡܰܪܚܶܩ ܠܰܢ ܡܰܢ ܡܶܢ ܥܰܒܕܽܘܬܳܐ ܕܰܐ‌ܠܳܗܳܐ܆ ܠܘܳܬ ܪܺܝܫܳܢܽܘܬܳܐ ܕܶܝܢ ܢܽܘܟܪܳܝܬܳܐ ܘܰܕܠܰܘ ܒܰܪ̱ܬ ܫܰܪܒܬܰܢ ܐܺܝܬܶܝܗ̇ ܢܳܓܶܕ ܠܰܢ. ܡܶܛܽܠ ܗܳܕܶܐ ܓܶܝܪ ܐܳܡܰܪ ܠܽܘܩܳܐ܆ ܕܠܳܐ ܐܶܬܡܨܺܝܘ ܕܢܶܠܒܟܺܝܘܗ̱ܝ ܒܡܶܠܬܳܐ ܩܕܳܡ ܥܰܡܳܐ^[24]. ܕܝܡܘܣܝܘܤ ܓܶܝܪ ܐܰܘܟܺܝܬ ܒܡܶܨܥܰܬ ܟܶܢܫܳܐ ܕܥܰܡܳܐ ܡܫܰܐܠܺܝܢ ܗ̱ܘܰܘ܆ ܐܰܝܟܰܢܳܐ ܕܰܠܥܰܡܳܐ ܢܩܺܝܡܽܘܢ ܥܠܰܘܗ̱ܝ. ܐܶܢ ܕܶܝܢ ܠܳܐ ܡܰܦܶܤ ܗ̱ܘܳܐ ܕܬܶܬܺܝܗܶܒ ܡܰܕܰܐܬܳܐ܆ ܡܶܚܕܳܐ ܡܰܪܡܶܝܢ ܗ̱ܘܰܘ ܥܠܰܘܗ̱ܝ ܐܺܝ̈ܕܰܝܳܐ ܗܶܪ̈ܽܘܕܝܰܐܢܘ܆ ܐܰܝܟ ܕܥܰܠ ‌ܐܰܝܢܳܐ ܕܰܠܫܽܘܠ̈ܛܳܢܶܐ ܕܪ̈ܽܘܡܳܝܶܐ ܠܳܐ ܡܶܫܬܰܥܒܰܕ.

ܘܰܚܙܺܝ ܠܚܰܫܶܗ ܕܡܰܣܰܒ ܒܰܐܦ̈ܶܐ^[25] ܕܕܰܐܝܟ ܐܰܝܢܰܐ ܗ̱ܘ܆ ܕܰܐܝܟܰܢܳܐ ܛܰܫܝܳܗ̇ ܠܟܽܠܳܗ̇ ܒܥܶܠܕܒܳܒܽܘܬܳܐ ܘܰܠܬܰܪܥܺܝܬܳܐ ܕܝܽܗ̱ܘ̈ܕܳܝܶܐ ܗܳܝ ܩܳܛܽܘܠܬܳܐ܆ ܒܬܰܚܦܺܝܬܳܐ ܠܳܐ ܚܐܪܝܬܐ ܕܫܰܓܽܘܫܬܳܢܽܘܬܳܐ܆ ܘܗܳܢܽܘܢ ܕܣܳܢܶܝܢ ܡܝܰܩܪܺܝܢ ܠܳܐ ܨܶܒܝܳܢܳܐܺܝܬ܆ ܐܰܝܟܰܢܳܐ ܕܰܠܓܽܘܡܳܨܳܐ ܢܰܚܬܽܘܢ. ܗܳܢܽܘܢ ܓܶܝܪ ܕܳܐܡܪܺܝܢ ܗ̱ܘܰܘ ܕܰܚܢܰܢ ܕܡܽܘܫܶܐ ܐܺܝܬܰܝܢ ܬܰܠ̈ܡܺܝܕܶܐ܆ ܠܗܳܢܳܐ ܕܶܝܢ ܠܳܐ ܝܳܕܥܺܝܢܰܢ ܡܶܢ ܐܰܝܡܶܟܳܐ ܐܺܝܬܰܘܗ̱ܝ܆ ܡܰܠܦܳܢܳܐ ܩܳܪܶܝܢ ܠܶܗ^[26]. ܗܳܢܽܘܢ ܕܛܰܥܝܳܐ ܘܡܰܛܥܝܳܢܳܐ ܡܟܰܢܶܝܢ ܗ̱ܘܰܘ ܠܶܗ^[27]܆ ܐܳܡܪܺܝܢ ܕܝܳܕܥܺܝܢ ܚ̱ܢܰܢ ܕܫܰܪܺܝܪܳܐ ܐܺܝܬܰܝܟ. ܗܳܢܽܘܢ ܕܡܶܬܟܰܬܫܺܝܢ ܗ̱ܘܰܘ ܕܰܢܩܺܝܡܽܘܢ ܚܰܣܳܡܳܐܺܝܬ ܟܺܝܬ ܘܠܳܐ ܝܰܠܺܝܦܳܐܺܝܬ ܟܰܕ ܐܳܡܪܺܝܢ: ܕܗܳܢܳܐ ܒܰܪܢܳܫܐ ܠܳܐ ܐܺܝܬܰܘܗ̱ܝ ܡܶܢ ܐܰ‌ܠܳܗܳܐ ܕܫܰܒܬܳܐ ܠܳܐ ܢܳܛܰܪ܆ ܘܰܕܕܰܝܘܳܐ ܐܺܝܬ ܠܶܗ܆ ܣܳܗܕܺܝܢ ܠܶܗ ܕܽܐܘܪܚܳܐ ܕܰܐ‌ܠܳܗܳܐ ܒܰܫܪܳܪܳܐ ܡܰܠܶܦ. ܗܳܢܽܘܢ ܕܥܳܫܩܺܝܢ ܗ̱ܘܰܘ ܠܶܗ܆ ܐܰܝܟ ܕܠܰܐܝܢܳܐ ܕܰܠܥܰܡܳܐ ܡܰܛܥܶܐ܆ ܐܳܡܪܺܝܢ ܗ̱ܘܰܘ܆ ܕܠܳܐ ܐܳܬܝܳܐ ܠܳܟ ܘܠܳܐ ܪܳܢܶܐ ܐܰܢ̱ܬ ܘܠܳܐ ܕܐ̱ܢܳܫ. ܠܳܐ ܓܶܝܪ ܢܳܣܶܒ ܐܰܢ̱ܬ ܒܦܰܪܨܽܘܦܳܐ ܕܰܒܢܰܝ̈ܢܳܫܳܐ^[28]. ܘܟܰܕ ܛܳܒ ܗܰܘ ܕܡܰܛܥܶܐ܆ ܠܰܘ ܡܶܕܶܡ ܐ̱ܚܪܺܝܢ ܐܶܠܳܐ ܐܶܢ ܕܠܰܒܢܰܝ̈ܢܳܫܳܐ ܢܶܫܦܰܪ ܒܳܥܶܐ. ܘܒܰܐܦܰܝ̈ܗܽܘܢ ܕܗܳܢܽܘܢ ܢܳܣܶܒ. ܗܳܢܽܘܢ ܕܪܰܓܡܽܘܗ̱ܝ ܘܪܰܕܦܽܘܗܝ܆ ܐܶܣܟܺܡܳܐ ܕܡܶܫܬܰܡ̈ܥܳܢܶܐ ܡܡܰܠܶܝܢ܆ ܟܰܕ ܗܳܝ ܕܶܐܡܰܪ ܠܰܢ ܡܳܢܳܐ ܡܶܬܚܙܶܐ ܠܳܟ ܡܫܰܐܠܺܝܢ^[29]. ܘܠܳܐ ܝܳܕܥܺܝܢ ܗ̱ܘܰܘ ܡܶܢ ܚܰܣܺܝܪܽܘܬ ܗܰܘܢܳܐ ܣܰܓܺܝܐܬܳܐ܆ ܕܳܐܦ ܠܗܳܢܽܘܢ ܕܣܰܓܺܝ ܣܰܟܠܺܝܢ܆ ܕܠܳܐ ܦܝܳܣܳܐ ܡܶܣܬܒܰܪ ܗ̱ܘܳܐ ܗܳܢܳܐ ܫܽܘܚܠܳܦܗܽܘܢ ܕܡܶܢܫܶܠܝ܆ ܫܒܽܘܩ ܕܠܰܐܠܳܗܳܐ ܡܶܠܬܳܐ܆ ܘܕܰܠܙܰܘ̈ܥܶܐ ܠܳܐ ܡܶܬܚܰܙܝܳܢ̈ܶܐ ܘܥܰܡܺܝܩ̈ܶܐ ܝܳܕܰܥ. ܡܶܛܽܠܗܳܕܶܐ ܐܳܦ ܗܳܢܽܘܢ ܦܪ̈ܺܝܫܶܐ ܟܰܕ ܟܡܳܐ ܟܡܳܐ ܐܰܝܟܰܢ ܕܗܽܘ ܒܳܗܬܺܝܢ ܗ̱ܘܰܘ ܒܗܳܕܶܐ܆ ܘܰܐܟܚܕܳܐ ܕܡܶܢ ܡܫܰܩܠܽܘܬܗܽܘܢ ܠܳܐ ܢܳܚܬܺܝܢ ܗ̱ܘܰܘ܆ ܠܬܰܠ̈ܡܺܝܕܰܝܗܽܘܢ ܫܰܕܰܪܘ ܥܰܡ ܗܶܪ̈ܘܕܝܐܢܘ. ܗܳܠܶܝܢ ܕܶܝܢ ܟܽܠܗܶܝܢ ܐܳܡܪܺܝܢ ܗ̱ܘܰܘ܆ ܐܰܝܟܰܢܳܐ ܕܰܢܦܰܚܽܘܢܳܝܗ̱ܝ ܒܪܳܡܽܘܬܳܐ ܕܰܣܦܺܝܩܽܘܬ ܗܰܘܢܳܐ.

ܡܳܢܳܐ ܗܳܟܺܝܠ ܚܶܟܡܬܳܐ ܘܡܶܠܬܳܐ ܕܰܐ‌ܠܳܗܳܐ. ܐܰܪܦܺܝ ܐܶܢܽܘܢ ܕܟܽܠ ܚܰܫܗܽܘܢ ܢܶܬܦ̣ܫܶܫ^[30] ܘܰܠܓܶܠܝܳܐ ܢܶܦܽܘܩ܆ ܘܠܳܐ ܬܟܰܤ ܐܶܢܽܘܢ ܟܰܕ ܡܦܰܟܢܺܝܢ ܗ̱ܘܰܘ ܣܪܺܝܩܳܐܺܝܬ. ܘܗܳܝܕܶܝܢ ܡܶܟܺܝܠ ‌ܐܰܝܟ ܐܳܣܝܳܐ ܛܰܪܩܳܐ܆ ܓܙܳܪܳܐ ܩܰܫܝܳܐ ܝܳܗܶܒ ܠܶܗ܆ ܟܰܕ ܒܳܗ̇ ܒܡܶܠܬܳܐ ܩܰܕܡܳܝܬܳܐ ܓܰܙܪܳܗ̇ ܘܶܐܡܰܪ܆ ܡܳܢܳܐ ܡܢܰܣܶܝܢ ܐܢ̱ܬܽܘܢ ܠܺܝ ܢܳܣ̈ܒܰܝ ܒܰܐܦ̈ܶܐ^[31]. ܘܡܶܢ ܒܳܬܰܪ ܕܡܺܝܬܳܐ ܚܰܘܝܶܗ ܒܡܰܟܣܳܢܽܘܬܳܐ ܠܫܶܠܚܳܐ ܗܰܘ ܕܡܰܣܰܒ ܒܰܐܦ̈ܶܐ ܡܨܰܕܝܳܢܳܐ܆ ܢܺܝܚܳܐܺܝܬ ܘܰܐܝܟ ܕܰܠܡܺܐܡܰܪ ܠܳܐ ܡܰܪܓܫܳܢܳܐܺܝܬ ܘܫܰܠܝܳܐܺܝܬ܆ ܒܰܕܡܽܘܬ ܢܰܘܠܳܐ ܕܰܓܘܳܓܰܝ ܠܫܽܘܐܳܠܗܽܘܢ ܗܰܘ ܠܳܐ ܡܶܬܥܰܪܩܳܢܳܐ ܣܰܕܶܩ. ܐܶܡܰܪ ܓܶܝܪ܆ ܚܰܘܰܘ ܠܺܝ ܕܺܝܢܳܪܳܐ ܕܰܟܣܶܦ ܪܺܝܫܳܐ. ܗܶܢܽܘܢ ܕܶܝܢ ܩܰܪܶܒܘ ܠܶܗ ܕܺܝܢܳܪܳܐ. ܘܶܐܡܰܪ ܠܗܽܘܢ. ܕܡܰܢܽܘ ܨܰܠܡܳܐ ܗܳܢܳܐ ܘܰܟܬܳܒܳܐ. ܐܳܡܪܺܝܢ ܠܶܗ ܕܩܶܣܰܪ. ܗܳܝܕܶܝܢ ܐܶܡܰܪ ܠܗܽܘܢ. ܗܰܒܘ ܗܳܟܺܝܠ ܗܳܠܶܝܢ ܕܩܶܣܰܪ ܠܩܶܣܰܪ܆ ܘܗܳܠܶܝܢ ܕܰܐ‌ܠܳܗܳܐ ܠܰܐܠܳܗܳܐ^[32].

ܐܶܢܗܽܘ ܕܕܺܝܢܳܪܳܐ ܕܩܶܣܰܪ ܐܺܝܬܰܘܗ̱ܝ ܐܳܡܰܪ܆ ܗܳܕܶܐ ܓܶܝܪ ܐܶܡܰܪܬܽܘܢ܆ ܙܳܕܶܩ ܕܢܶܬܺܝܗܶܒ ܠܶܗ ܕܺܝܠܶܗ ܠܩܶܣܰܪ. ܡܳܢܳܐ ܗܳܟܺܝܠ. ܠܒܰܪܢܳܫܳܐ ܡܰܦܶܤ ܐܰܢ̱ܬ ܠܰܢ ܕܢܶܦܠܽܘܚ ܥܰܒܕܽܘܬܳܐ ܘܠܰܘ ܠܰܐܠܳܗܳܐ܆ ܘܰܐܝܟܰܢܳܐ ܠܰܘ ܠܒܰܪ ܡܶܢ ܢܳܡܽܘܣܳܐ ܗܝ ܗܳܕܶܐ. ܠܳܐ ܬܶܗܘܶܐ. ܗܳܝ ܓܶܝܪ ܕܢܰܥܶܠ ܫܶܩܠܳܐ ܠܩܶܣܰܪ܆ ܠܳܐ ܦܳܣܩܳܐ ܠܥܰܒܕܽܘܬܳܐ ܕܰܐ‌ܠܳܗܳܐ܆ ܐܳܦܶܢ ܗܳܟܰܢܳܐ ܨܳܒܶܝܢ ܐܢ̱ܬܽܘܢ. ܡܶܛܽܠ ܗܳܕܶܐ ܕܬܶܬܠܽܘܢ ܙܳܕܶܩ ܠܟܽܘܢ ܐܳܦ ܗܳܠܶܝܢ ܕܰܐ‌ܠܳܗܳܐ ܠܰܐܠܳܗܳܐ. ܐܰܝܟܰܢܳܐ ܕܶܐ‌ܠܽܘ ܟܺܝܬ ܒܬܶܫܡܶܫܬܳܐ ܐܰ‌ܠܳܗܳܝܬܳܐ ܗܳܠܶܝܢ ܕܩܶܣܰܪ ܡܶܬܥܰܟܪ̈ܳܢ ܗ̱ܘܰܝ̈܆ ܕܢܶܬܝܰܩܰܪ ܐܰ‌ܠܳܗܳܐ ܩܕܳܡ ܗܳܢܳܐ ܙܳܕܶܩ ܗ̱ܘܳܐ. ܘܳܐܦ ܗܳܝ ܕܶܝܢ ܕܰܬܚܶܝܬ ܡܰܕܰܐܬܳܐ ܬܶܗܘܽܘܢ ܠܩܶܣܰܪ܆ ܥܰܠ ܚ̈ܛܳܗܰܝܟܽܘܢ ܙܳܕܶܩ ܠܟܽܘܢ ܕܬܶܟܬܒܽܘܢܳܗ̇܆ ܘܠܰܘ ܥܰܠ ‌ܐܰ‌ܠܳܗܳܐ. ܟܰܕ ܠܗܳܢܳܐ ܦܽܘܠܳܓܳܐ ܢܳܩܶܦ ܗ̱ܘܳܐ ܐܳܦ ܦܰܘܠܽܘܤ܆ ܟܰܕ ܠܪ̈ܽܘܡܳܝܶܐ ܫܳܠܰܚ ܗ̱ܘܳܐ ܟܳܬܶܒ ܗ̱ܘܳܐ܆ ܦܪܽܘܥܘ ܗܳܟܺܝܠ ܠܟܽܠܢܳܫ ܐܰܝܠܶܝܢ ܕܡܶܬܬܚܺܝ̈ܒܳܢ ܠܶܗ. ܠܗܰܘ ܕܰܟܣܶܦ ܪܺܝܫܳܐ ܟܣܶܦ ܪܺܝܫܳܐ. ܠܗܰܘ ܕܡܰܟܣܳܐ ܡܰܟܣܳܐ^[33].

ܡܶܣܬܰܒܪܳܐ ܕܶܝܢ ܕܳܐܦ ܗܰܘܢܳܐ ܡܶܕܶܡ ܡܥܰܠܝܳܐ ܡܨܰܠܦܳܐ ܡܚܰܘܝܳܐ܆ ܗܳܝ ܕܚܰܘܰܘ ܠܺܝ ܕܺܝܢܳܪܐ ܕܰܟܣܶܦ ܪܺܝܫܳܐ܆ ܘܗ̱ܝ ܕܰܕܡܰܢܽܘ ܐܺܝܬܰܘܗ̱ܝ ܨܰܠܡܳܐ ܘܰܟܬܳܒܳܐ ܗܳܢܳܐ^[34]. ܟܰܕ ܓܶܝܪ ܒܢܰܦܫܳܐ ܕܗܳܢܽܘܢ ܕܰܡܫܰܐܠܺܝܢ ܗ̱ܘܰܘ ܠܶܗ ܡܶܬܒܰܩܶܐ ܗ̱ܘܳܐ ܝܶܫܽܘܥ܆ ܗܳܝ ܕܰܒܨܰܠܡܳܐ ܕܰܐ‌ܠܳܗܳܐ ܐܶܬܒܰܪܝܰܬ܆ ܘܡܶܕܶܡ ܠܳܐ ܚܳܙܶܐ ܗ̱ܘܳܐ ܕܺܐܝܬ ܗ̱ܘܳܐ ܠܳܗ̇ ܡܶܢ ܨܰܠܡܳܐ ܡܰܠܟܳܝܳܐ܆ ܐܶܠܳܐ ܠܟܽܠܳܗ̇ ܕܰܥܒܺܝܕܳܐ ܒܶܣܪܳܐ ܚܳܙܶܐ ܗ̱ܘܳܐ܆ ܘܕܰܛܥܺܝܢܳܐ ܟܬܳܒܳܐ ܕܩܶܣܰܪ ܗܰܘ ܡܶܬܗܰܘܢܳܢܳܐ܆ ܕܰܐܚܺܝܕ ܥܳܠܡܳܐ ܗܰܘ ܐܳܟܶܠܩܰܪܨܳܐ ܘܒܺܝܫܳܐ܆ ܡܰܟܣܳܢܳܐܺܝܬ ܛܳܒ ܐܶܡܰܪ܆ ܚܰܘܰܘ ܠܺܝ ܕܺܝܢܳܪܳܐ ܕܰܟܣܶܦ ܪܺܝܫܳܐ܆ ܕܡܰܢܽܘ ܐܺܝܬܰܘܗ̱ܝ ܨܰܠܡܳܐ ܗܳܢܳܐ ܘܰܟܬܳܒܳܐ¹. ܐܶܢ ܡܰܢ ܕܰܐ‌ܠܳܗܳܐ܆ ܡܢܳܬܳܐ ܐܺܝܬܰܝܟܽܘܢ ܐܰܝܟ ܗܳܝ ܕܰܟܬܺܝܒܳܐ ܕܰܐ‌ܠܳܗܳܐ^[35]܆ ܘܠܰܐܠܳܗܳܐ ܢܶܬܠܟܽܘܢ. ܐܶܢ ܕܶܝܢ ܕܩܶܣܰܪ܆ ܟܰܕ ܕܩܶܣܰܪ ܐܺܝܬܰܝܟܽܘܢ܆ ܦܠܽܘܚܘ ܥܰܒܕܽܘܬܳܐ ܠܩܶܣܰܪ܆ ܘܠܳܐ ܬܶܒܥܽܘܢ ܐܰ‌ܠܳܗܳܐ܆ ܕܗܽܘ ܕܪܽܘܫܡܳܐ ܕܨܰܠܡܶܗ ܠܳܐ ܛܥܺܝܢܺܝܢ ܐܢ̱ܬܘܢ.

ܢܶܣܥܽܘܪ ܗܳܟܺܝܠ ܟܽܠܚܰܕ ܡܶܢܰܢ ܠܕܺܝܢܳܪܳܐ ܕܢܰܦܫܶܗ܆ ܘܢܶ݀ܥܒܶܕ ܟܽܠܰܢ ܝܰܨܺܝܦܽܘܬܳܐ ܕܨܰܠܡܳܐ ܡܰܠܟܳܝܳܐ ܘܰܐ‌ܠܳܗܳܝܳܐ܆ ܐܰܝܟ ܡܰܪ̈ܬܝܳܢܘܳܬܳܐ ܫܠܺܝ̈ܚܳܝܳܬܳܐ. ܠܰܘ ܟܰܕ ܡܶܬܕܰܡܶܝܢܰܢ ܒܶܐܣܟܺܡܶܗ ܕܥܳܠܡܳܐ ܗܳܢܳܐ܆ ܐܶܠܳܐ ܟܰܕ ܡܶܫܬܰܚܠܦܺܝܢܰܢ ܒܚܽܘܕܳܬܳܐ ܕܗܰܘܢܰܢ ܒܗܳܝ ܕܢܶܒܩܶܐ ܗܳܠܶܝܢ ܕܡܰܘܬܪ̈ܳܢ܆ ܕܡܳܢܰܐ ܗ̄ܘ ܨܶܒܝܳܢܶܗ ܕܰܐ‌ܠܳܗܳܐ܆ ܛܳܒܳܐ ܘܰܡܩܰܒܠܳܐ ܘܰܓܡܺܝܪܳܐ^[36]. ܘܰܠܦܰܓܪܳܐ ܡܰܢ ܢܶܦܪܽܘܥ܆ ܬܽܘܪܣܳܝܳܐ ܘܬܰܟܣ̈ܝܳܬܳܐ ܐܳ‌ܠ̈ܨܳܝܳܬܳܐ. ܗܳܠܶܝܢ ܕܶܝܢ ܐ̱ܚܪ̈ܳܢܝܳܬܳܐ ܟܽܠܗܶܝܢ܆ ܢܰܗܦܶܟ ܠܘܳܬ ܒܰܪܢܳܫܰܢ ܗܰܘ ܕܡܶܢ ܠܓܰܘ. ܘܰܠܟܽܠ ܚܰܕ ܕܶܝܢ ܚܽܘܫܳܒܳܐ ܕܡܳܠܶܟ ܘܡܰܠܶܦ ܠܰܢ܆ ܕܡܳܢܰܘ ܗܰܘ ܕܙܳܕܶܩ ܕܢܶܣܥܽܘܪ܆ ܝܰܨܺܝܦܳܐܺܝܬ ܢܬܰܪܨܺܝܘܗ̱ܝ ܘܢܺܐܡܰܪ ܠܘܳܬܶܗ܆ ܚܰܘܳܐ ܠܺܝ ܕܺܝܢܳܪܳܐ ܕܰܟܣܶܦ ܪܺܝܫܳܐ܆ ܕܡܰܢܽܘ ܐܺܝܬܰܘܗ̱ܝ ܨܰܠܡܳܐ ܘܰܟܬܳܒܳܐ ܗܳܢܳܐ¹. ܘܶܐܢܗܽܘ ܡܰܢ ܕܰܠܘܳܬ ܬܰܦܢܟܳܐ ܘܨܰܠܡܳܐ ܐܰ‌ܠܳܗܳܝܳܐ ܚܳܐܰܪ܆ ܢܩܰܒܶܠ. ܐܶܢ ܕܶܝܢ ܠܘܳܬ ܗܰܘ ܕܩܶܣܰܪ܆ ܗܳܝ ܕܠܳܐ ܒܰܝܬܳܝܳܐ ܢܶܕܚܽܘܩ ܡܶܢܰܢ. ܪܰܒܬܳܐ ܗܝ ܘܰܕܣܰܓܺܝ ܡܰܘܬܪܳܐ܆ ܗܳܝ ܕܰܚܢܰܢ ܠܗܳܠܶܝܢ ܕܺܝܠܰܢ ܢܬܰܪܶܨ܆ ܩܕܳܡ ܕܰܢܩܽܘܡ ܥܠܰܝܢ ܝܰܘܡܳܐ ܗܰܘ ܕܕܺܝܢܳܐ܆ ܘܢܶܫܡܰܥ ܡܶܢ ܕܰܝܳܢܳܐ ܣܰܓܺܝ ܡܰܪܺܝܪܳܐܺܝܬ܆ ܗܳܝ ܕܚܰܘܳܐ ܠܺܝ ܕܺܝܢܳܪܳܐ ܕܰܟܣܶܦ ܪܺܝܫܳܐ܆ ܕܡܰܢܽܘ ܐܺܝܬܰܘܗ̱ܝ ܨܰܠܡܳܐ ܘܰܟܬܳܒܳܐ ܗܳܢܳܐ. ܗܳܝܕܶܝܢ ܓܶܝܪ ܟܰܕ ܢܶܣܬܠܶܐ ܘܢܶܫܡܰܥ ܐܰܝܟ ܢܒܺܝܽܘܬܶܗ ܕܶܐܪܰܡܝܳܐ܆ ܟܶܣܦܳܐ ܡܰܣܠܝܳܐ ܩܪܰܘ ܐܶܢܽܘܢ^[37]܆ ܠܢܽܘܪܳܐ ܕܰܠܥܳܠܰܡ ܢܶܫܬܠܶܡ.

ܟܰܕ ܠܗܳܠܶܝܢ ܫܳܡ̈ܥܳܢ ܐܢ̱ܬܶܝܢ܆ ܟܽܠܟܶܝܢ ܗܳܠܶܝܢ ܕܡܶܢ ܢܶܫ̈ܶܐ ܪ̈ܳܚܡܳܬ ܨܶܒ̈ܬܶܐ ܐܺܝܬܰܝܟܶܝܢ܆ ܘܠܐܰܕܪܺܝܢܰܛܳܐ ܗܰܘ ܕܡܶܬܚܰܒܰܠ܆ ܒܚܶܫ̈ܠܳܬܳܐ ܕܕܰܗܒܳܐ ܘܰܒܢܰܚ̈ܬܶܐ ܝܺܨܺܝ̈ܦܶܐ܆ ܡܶܢ ܠܒܰܪ ܡܨܰܒ̈ܬܳܢ ܐܰܢ̱ܬܶܝܢ܆ ܥܰܡ ܡܰܪܓܫܳܢܽܘܬܳܐ ܡܶܕܶܡ ܢܰܟܦܬܳܐ ܐܰܢ̱ܬܶܝܢ ܠܟܶܝܢ ܫ̈ܳܐܠܳܢ܆ ܕܡܰܢܽܘ ܨܰܠܡܳܐ ܘܰܟܬܳܒܳܐ ܗܳܢܳܐ܆ ܘܰܡܫܰܘܚܪܳܐܺܝܬ ܐܶܡܰܬܝ ܕܗܽܘ܆ ܠܘܳܬ ܝܰܨܺܝܦܽܘܬܳܐ ܕܫܽܘܦܪܳܐ ܗܰܘ ܕܢܰܦܫܳܐ ܬܶܬܦܰܢ̈ܝܳܢ. ܗܰܘ ܓܶܝܪ ܕܡܶܢ ܠܒܰܪ ܟܰܕ ܡܶܢ ܒܳܬܰܪ ܩܰܠܶܝܠ ܢܶܫܬܪܶܐ ܐܰܣܳܪܳܐ܆ ܟܰܕ ܡܶܬܚܰܒܰܠ܆ ܠܥܰܦܪܳܐ ܘܰܠܕܰܚܺܝܚܳܐ ܢܶܫܬܪܶܐ.

ܚܳܫܚܳܐ ܗܝ ܠܰܢ ܕܶܝܢ ܗܳܕܶܐ ܘܡܰܘܬܪܳܐ܆ ܘܰܐܝܟ ܕܡܰܨܝܳܐ ܝܰܬܺܝܪܳܐܺܝܬ ܐܳ‌ܠܨܳܝܬܳܐ ܐܺܝܬܶܝܗ̇܆ ܘܳܐܦ ܒܡܶܠܬܳܐ ܕܗܰܝܡܳܢܽܘܬܳܐ. ܐܶܢ ܓܶܝܪ ܐ̱ܢܳܫ ܟܰܕ ܠܳܐ ܝܰܠܺܝܦܳܐܺܝܬ ܐܺܝܬ ܠܶܗ ܢܫܰܐܶܠ܆ ܫܰܠܺܝܛ ܕܰܠܟܽܠܳܗ̇ ܣܽܘܢܗܕܘܤ ܕܶܐܦܝܣ̈ܩܽܘܦܶܐ ܠܡܰܚܪܳܡܽܘ܆ ܐܶܡܰܪ ܠܘܳܬܶܗ܆ ܚܰܘܳܐ ܠܺܝ ܕܺܝܢܳܪܳܐ ܕܰܟܣܶܦ ܪܺܝܫܳܐ. ܘܶܐܢܗܽܘ ܕܬܶܫܟܰܚ ܠܗܰܘ ܚܰܕ ܡܳܪܰܢ ܘܰܐ‌ܠܳܗܰܢ ܝܶܫܽܘܥ ܡܫܺܝܚܳܐ܆ ܕܪܰܫܺܝܥܳܐܺܝܬ ܒܕܺܝܢܳܪܳܐ ܡܰܣܠܝܳܐܘܕܰܠܒܰܪܡܶܢܪܽܘܫܡܳܐܫܰܪܺܝܪܳܐ ܡܶܬܦܰܠܰܓ܆ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܗܳܝ ܕܡܶܢ ܒܳܬܰܪ ܚܕܳܝܽܘܬܳܐ ܠܳܐ ܡܶܬܦܰܫܩܳܢܺܝܬܳܐ܆ ܡܶܚܕܳܐ ܫܰܐܶܠ܆ ܕܡܰܢܽܘ ܐܺܝܬܰܘܗ̱ܝ ܨܰܠܡܳܐ ܗܳܢܳܐ ܘܰܟܬܳܒܳܐ. ܘܶܐܢ ܗܽܘ ܡܰܢ ܕܕܰܐ‌ܠܳܗܳܐ ܠܳܐ ܐܺܝܬܰܘܗ̱ܝ ܐܰܝܟ ܡܳܐ ܟܺܝܬ ܕܳܐܦܠܳܐ ܐܺܝܬܰܘܗ̱ܝ܆ ܗܰܘ ܡܳܐ ܕܠܳܐ ܐܺܝܬܰܘܗ̱ܝ ܕܰܐ‌ܠܳܗܳܐ܆ ܒܚܶܪܡܳܐ ܢܶܬܦܪܶܫ ܡܶܢ ܐܰ‌ܠܳܗܳܐ.

ܐܺܝܢ ܐܳܡܰܪ. ܐܶܠܳܐ ܡܶܬܚܰܡܰܨ ܐ̱ܢܳܐ ܡܶܢ ܐܺܝܩܳܪܳܐ ܕܟܳܗܢܽܘܬܳܐ. ܐܳܦ ܓܶܝܪ ܫܳܡܰܥ ܐ̱ܢܳܐ ܠܐ̱ܢܳܫ ܡܶܢ ܢܒܺܝ̈ܶܐ ܩܰܕܺܝ̈ܫܶܐ ܕܶܐܡܰܪ܆ ܕܣܶܦ̈ܘܳܬܶܗ ܕܟܳܗܢܳܐ ܢܶܛܪ̈ܳܢ ܝܺܕܰܥܬܳܐ܆ ܘܢܳܡܽܘܣܳܐ ܢܶܒܥܽܘܢ ܡܶܢ ܦܽܘܡܶܗ܆ ܡܶܛܽܠ ܕܡܰܠܰܐܟܶܗ ܕܡܳܪܝܳܐ ܐܰܚܺܝܕ ܟܽܠ ‌ܐܺܝܬܰܘܗ̱ܝ^[38]. ܡܳܢܳܐ ܗܳܟܺܝܠ. ܠܳܐ ܫܳܡܰܥ ܐܰܢ̱ܬ ܠܦܰܘܠܽܘܤ ܕܰܒܝܰܕ ܡܫܺܝܚܳܐ ܗܰܘ ܕܒܶܗ ܡܡܰܠܶܠ ܗ̱ܘܳܐ ܐܶܡܰܪ܆ ܐܶܠܳܐ ܐܳܦܶܢ ܚܢܰܢ ܐܰܘ ܡܰܠܰܐܟܳܐ ܡܶܢ ܫܡܰܝܳܐ ܢܣܰܒܰܪܟܽܘܢ ܠܒܰܪ ܡܶܢ ܗܰܘ ܡܳܐ ܕܣܰܒܰܪܢܳܟܽܘܢ܆ ܢܶܗܘܶܐ ܚܪܶܡ^[39]܆ ܠܡܳܐ ܕܫܳܘܶܐ ܠܰܟܚܺܝܕܽܘܬܳܐ ܕܳܢܶܗ ܠܰܐܟܣܺܝܽܘܡܳܐ ܐܰܘܟܺܝܬ ܠܺܐܝܩܳܪܳܐ ܕܡܰܠܰܐܟ̈ܶܐ ܐܳܦܶܢ ܡܶܢ ܫܡܰܝܳܐ ܢܶܚܽܘܬ܆ ܟܰܕ ܠܗܰܝܡܳܢܽܘܬܳܐ ܡܫܰܚܠܶܦ ܘܰܡܙܰܝܶܦ.

ܐ̱ܚܪܳܢܝܳܐܺܝܬ ܬܽܘܒ ܟܺܝܬ܆ ܐܶܬܒܰܩܳܐ ܘܥܰܩܶܒ ܐܶܢܶܝܢ ܠܡ̈ܶܠܶܐ ܗܳܠܶܝܢ ܕܶܐܬܶܥ̣ܰܗܕܬ ܐܳܘ ܗܳܢܳܐ܆ ܣܶܦ̈ܘܳܬܶܗ ܕܟܳܗܢܳܐ ܢܶܛܪ̈ܳܢ ܝܺܕܰܥܬܳܐ܆ ܘܢܳܡܽܘܣܳܐ ܢܶܒܥܽܘܢ ܡܶܢ ܦܽܘܡܶܗ܆ ܡܶܛܽܠ ܕܡܰܠܰܐܟܶܗ ܕܡܳܪܝܳܐ ܐܰܚܺܝܕ ܟܽܠ ‌ܐܺܝܬܰܘܗ̱ܝ¹. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܗܳܝܕܶܝܢ ܙܳܕܶܩ ܕܢܶܚܽܘܪ ܒܗܽܘܢ ܒܟܳܗ̈ܢܶܐ ܐܰܝܟ ܕܰܒܡܰܠܰܐܟ̈ܶܐ ܕܡܳܪܝܳܐ ܐܰܚܺܝܕ ܟܽܠ܆ ܐܶܡܰܬܝ ܕܢܶܛܪܽܘܢ ܝܺܕܰܥܬܳܐ ܕܗܳܠܶܝܢ ܐܰ‌ܠܳܗܳܝ̈ܳܬܳܐ. ܐܶܡܰܬܝ ܕܠܳܐ ܢܶܥܒܪܽܘܢ ܥܰܠ ܢܳܡܽܘܣܳܐ܆ ܐܶܠܳܐ ܐܳܦ ܠܰܐ̱ܚܪ̈ܳܢܶܐ ܕܒܳܥܶܝܢ ܠܶܗ܆ ܚܠܺܝܡܳܐܺܝܬ ܢܰܠܦܽܘܢܳܝܗ̱ܝ . ܐܶܢ ܕܶܝܢ ܟܺܝܬ ܐܳܦ ܠܰܐ̱ܚܪ̈ܳܢܶܐ ܥܶܠܬܳܐ ܕܛܳܥܝܽܘܬܳܐ ܢܶܗܘܽܘܢ܆ ܐܰܝܟܳܐ ܙܳܕܶܩ ܕܰܢܣܺܝܡ ܐܶܢܽܘܢ ܠܗܳܢܽܘܢ ܕܕܰܐܝܟ ܗܳܠܶܝܢ. ܛܳܒ ܝܺܕܺܝܥܳܐ܆ ܕܥܰܡ ܪ̈ܳܥܰܘܳܬܳܐ ܠܳܐ ܚܣ̈ܰܝܳܐ ܘܢܽܘܟܪ̈ܳܝܶܐ.

ܐܶܠܳܐ ܐܺܝܬ ܗ̱ܘܳܐ ܒܗܽܘܢ ܐ̱ܢܳܫܳܐ ܕܰܬܪܺܝܨܬܳܐ ܡܶܬܪܰܥܶܝܢ ܗ̱ܘܰܘ ܬܺܐܡܰܪ. ܡܳܕܶܝܢ ܙܳܕܶܩ ܗ̱ܘܳܐ ܠܗܽܘܢ ܠܡܶܥܪܰܩ ܘܰܠܡܺܐܡܰܪ ܥܰܡ ܢܒܺܝܳܐ ܕܰܘܺܝܕ܆ ܠܳܐ ܝܶܬܒܶܬ̣ ܥܰܡ ܟܢܽܘܫܝܳܐ ܕܰܣܪܺܝܩܽܘܬܳܐ. ܘܥܰܡ ܗܳܢܽܘܢ ܕܥܳܒܪܺܝܢ ܢܳܡܽܘܣܳܐ ܠܳܐ ܐܶ݀ܥܽܘܠ. ܣܢܺܝܬ̣ ܟܢܽܘܫܝܳܐ ܕܒܺܝ̈ܫܶܐ܆ ܘܥܰܡ ܪ̈ܰܫܺܝܥܶܐ ܠܳܐ ܐܶ݀ܬܶܒ. ܐܰ݀ܫܺܝܓ ܒܕܰܟܝܽܘܬܳܐ ܐܺܝ̈ܕܰܝ^[40]. ܢܶܣܒܽܘܢ ܕܶܝܢ ܒܗܰܘܢܗܽܘܢ ܐܳܦ ܠܦܽܘܩܕܳܢܳܐ ܕܡܽܘܫܶܐ ܕܳܐܡܰܪ܆ ܠܳܐ ܬܶܗܘܶܐ ܥܰܡ ܣܰܓܺܝ̈ܶܐܐ ܠܒܺܝܫܬܳܐ܆ ܠܳܐ ܬܶܬܬܰܘܣܰܦ ܥܰܡ ܟܶܢܫܳܐ ܠܡܰܣܛܳܝܽܘ ܥܰܡ ܣܰܓܺܝ̈ܶܐܐ^[41]. ܕܢܶܬܢܰܟܦܽܘܢ ܕܶܝܢ ܐܳܦ ܡܶܢ ܗܳܝ ܕܶܐܢ ܚܳܙܶܐ ܗܘܰܝܬ ܓܰܢܳܒܳܐ ܪܳܗܶܛ ܗ̱ܘܰܝܬ ܥܰܡܶܗ܆ ܘܥܰܡ ܓܰܝܳܪ̈ܶܐ ܡܢܳܬܳܟ ܣܳܐܶܡ ܗ̱ܘܰܝܬ^[42]܆ ܘܠܳܐ ܐܰܝܟܰܢܳܐ ܕܳܐܡܰܪ ܓܪܺܝܓܽܘܪܺܝܽܘܤ ܗܰܘ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ܆ ܥܰܡ ܟܬܺܝܒܬܳܐ ܪܰܫܺܝܥܬܳܐ ܕܺܐܝܕܳܐ܆ ܢܰܦܫܳܐ ܐܰܟܚܕܳܐ ܬܰܘܟܶܡ.

ܐܶܠܳܐ ܐܳܦ ܠܘܳܬ ܗܳܠܶܝܢ ܬܺܐܡܰܪ܆ ܕܶܐܙܕܟܺܝܘ ܡܰܢ ܡܶܢ ܙܰܒܢܳܐ ܗܳܝܕܶܝܢ܆ ܡܶܢ ܒܳܬܰܪܟܶܢ ܕܶܝܢ ܬܳܒܘ. ܐܶܠܳܐ ܠܰܘ ܐܶܢܳܐ ܡܶܟܺܝܠ܆ ܐܶܠܳܐ ܚܰܟܺܝܡܳܐ ܒܰܣܶܝܠܺܝܽܘܤ ܡܦܰܢܶܐ ܠܳܟ ܦܶܬܓܳܡܳܐ܆ ܟܰܕ ܗܳܟܰܢܳܐ ܒܰܟܬܺܝܒܬܳܐ ܫܳܠܰܚ ܠܘܳܬ ܐ̱ܢܳܫܺܝ̈ܢ. ܐܶܢ ܕܶܝܢ ܐܳܡܪܺܝܢ ܐ̱ܢܳܫܺܝ̈ܢ ܕܬܳܒܘ܆ ܢܚܰܘܽܘܢ ܬܝܳܒܽܘܬܗܽܘܢ ܒܰܟܬܳܒܳܐ܆ ܘܚܶܪܡܳܐ ܕܗܰܝܡܳܢܽܘܬܳܐ ܗܳܝ ܕܰܒܩܽܘܤܛܰܢܛܺܝܢܽܘܦܘܠܝܤ܆ ܘܰܦܪܽܘܫܝܳܐ ܕܡܶܢ ܐܶܪ̈ܛܝܩܘ܆ ܘܠܳܐ ܢܰܛܥܽܘܢ ܠܰܦܫܺܝ̈ܛܶܐ. ܐܰܝܟܰܢܳܐ ܟܺܝܬ ܕܡܳܕܶܝܢ܆ ܠܳܐ ܣܳܦܩܳܐ ܗ̱ܘܳܬ ܒܰܠܚܽܘܕ ܗܳܝ ܕܒܰܟܬܳܒܳܐ ܒܝܰܕ ܬܝܳܒܽܘܬܳܐ ܘܰܒܚܶܪܡܳܐ ܢܒܰܙܚܽܘܢܳܝܗ̱ܝ ܗ̱ܘܰܘ ܠܪܽܘܫܥܳܐ܆ ܐܶܠܳܐ ܐܳܦ ܕܢܶܬܦܰܪܫܽܘܢ ܗ̱ܘܰܘ ܡܶܢ ܫܰܘܬܳܦܽܘܬܳܐ ܕܰܠܘܳܬ ܗܳܢܽܘܢ ܕܗܳܟܰܢܳܐ ܡܶܬܪܰܥܶܝܢ ܗ̱ܘܰܘ. ܐܰܝܟܰܢܳܐ ܓܶܝܪ ܠܳܐ ܫܟܺܝܪܳܐ܆ ܕܒܰܟܬܳܒܳܐ ܡܰܢ ܢܶܬܚܰܣܰܢ ܓܽܘܕܳܦܳܐ܆ ܬܝܳܒܽܘܬܳܐ ܕܶܝܢ ܕܠܳܐ ܟܬܳܒܳܐ ܢܶܓܒܠܽܘܢ ܠܰܢ.

ܐܶܠܳܐ ܐܶܫܬܽܘܦ܆ ܐܺܝܬ ܗ̱ܘܰܘ ܐ̱ܢܳܫܺܝ̈ܢ ܕܢܳܡܽܘܣܳܐܺܝܬ ܬܳܒܘ. ܒܗܳܢܽܘܢ ܓܶܝܪ ܕܕܰܐܝܟ ܗܳܠܶܝܢ܆ ܚܶܪܡܳܐ ܓܰܘܳܢܳܝܳܐ ܗܰܘ ܕܥܰܠ ܣܽܘܢܗܕܘܤ ܗܳܝ ܕܰܒܟܰܠܩܺܝܕܽܘܢܰܐ ܠܳܐ ܓܳܫܶܦ. ܡܶܛܽܠ ܕܒܰܬܝܳܒܽܘܬܳܐ ܠܒܰܪ ܡܶܢ ܟܢܽܘܫܝܗܽܘܢ ܕܗܳܢܽܘܢ ܗܘ̣ܰܘ. ܐܰܝܟ ܙܢܳܐ ܗܳܟܺܝܠ ܕܠܰܘ ܝܺܗܽܘܕܳܝܰܐ ܗ̱ܘ ܘܠܳܐ ܐܰܪܝܐܢܘܤ܆ ܗܰܘ ܕܡܶܢ ܬܰܡܳܢ ܠܘܳܬ ܫܰܦܺܝܪܽܘܬ ܕܶܚܠܬܳܐ ܐܶܫܬܰܚܠܰܦ ܘܫܰܢܺܝ܆ ܗܳܟܰܢܳܐ ܐܳܦ ܗܰܘ ܕܡܶܢ ܗܳܪܟܳܐ ܢܦܰܩ܆ ܠܳܐ ܡܶܬܚܫܶܒ ܡܚܰܝܒܳܐ ܥܰܡܗܽܘܢ. ܗܳܟܰܢܳܐ ܓܶܝܪ ܘܶܐܢ ܐ̱ܢܳܫ ܢܰܚܪܶܡ ܐܶܢ ܬܶܓܕܰܫ ܠܗܳܢܽܘܢ ܕܰܕܡܶܗ ܕܰܤܛܦܰܢܘܤ ܙܰܕܺܝܩܳܐ ܐܶܫܰܕܘ܆ ܠܳܐ ܚܰܫܒܶܗ ܐܰܟܚܕܐ ܠܦܰܘܠܽܘܤ ܐܰܝܟ ܕܠܰܐܝܢܳܐ ܕܶܐܫܬܰܘܬܰܦ ܒܶܗ ܒܣܽܘܥܪܳܢܳܐ܆ ܠܗܰܘ ܕܰܠܒܰܪ ܡܶܢ ܗܳܢܳܐ ܥܒܰܕܬܶܗ ܬܝܳܒܽܘܬܶܗ ܢܳܡܽܘܣܳܝܬܳܐ. ܘܬܽܘܒ ܐܶܢ ܐ̱ܢܳܫ ܢܠܽܘܛ ܠܗܳܢܽܘܢ ܕܰܟܦܰܪܘ ܒܰܡܫܺܝܚܳܐ܆ ܠܳܐ ܗ̱ܘܳܐ ܐܳܦ ܠܦܶܛܪܽܘܤ܆ ܕܰܟܦܰܪ ܡܰܢ܆ ܬܳܒ ܕܶܝܢ܆ ܡܢܳܐ ܐܰܟܚܕܳܐ ܥܰܡܗܽܘܢ.

ܠܳܐ ܐ̱ܢܳܫ ܗܳܟܺܝܠ ܟܰܕ ܐܳܚܶܕ ܥܶܠ̈ܠܳܬܳܐ ܕܰܓܳܠ̈ܳܬܳܐ ܒܰܚ̈ܛܳܗܶܐ܆ ܢܶܬܚܰܫܰܒ ܚܽܘܟ̈ܡܶܐ ܕܠܽܘܩܒܰܠ ܢܳܡܽܘܣ̈ܶܐ ܕܥܺܕܬܳܐ ܩܰܕܺܝܫܬܳܐ܆ ܟܰܕ ܐܳܚܶܕ ܥܶܠ̈ܠܳܬܳܐ ܕܪܶܚܡܰܬ ܐ̱ܢܳܫܽܘܬܳܐ. ܐܶܠܳܐ ܢܶܩܰܦ ܠܢܳܡܽܘܣ̈ܶܐ܆ ܘܠܳܐ ܢܶܬܶܠ ‌ܐܰܬܪܳܐ ܠܪܽܘܫܥܳܐ܆ ܕܰܒܝܰܕ ܙܶܕܩ̈ܶܐ ܩܰܪܺܝܪ̈ܶܐ ܕܕܰܐܝܟ ܗܳܠܶܝܢ ܢܕܺܝܩ܆ ܘܗܳܟܰܢܳܐ ܢܶܩܢܶܐ ܦܰܪܶܗ̱ܣܺܝܰܐ. ܐܶܢ ܕܶܝܢ ܘܥܰܠ ܡܶܬܢܰܚܬܳܢܽܘܬܳܐ ܢܳܡܽܘܣܳܝܬܳܐ ܐܺܝܬ ܣܽܘܢܩܳܢܳܐ ܠܘܳܬ ܗܳܢܽܘܢ ܕܰܣܕܝܩܺܝܢ܆ ܬܽܘܒ ܠܘܳܬ ܢܳܡܽܘܣ̈ܶܐ ܕܰܟܬܳܒ̈ܶܐ ܩܰܕܺܝ̈ܫܶܐ ܘܰܕܡܰܠ̈ܦܳܢܶܐ ܕܥܺܕܬܳܐ ܩܰܕܺܝܫܬܳܐ ܢܚܽܘܪ. ܐܰܝܟܰܢܳܐ ܕܠܳܐ ܗܳܝ ܕܺܝܠܰܢ ܢܚܰܒܶܠ܆ ܘܰܠܗܳܝ ܕܢܽܘܟܪܳܝܳܐ ܢܰܘܣܶܦ ܢܶܣܰܒ܆ ܐܰܝܟܰܢܳܐ ܕܰܒܕܽܘܟ ܐܳܦ ܠܗܳܕܶܐ ܐܳܡܰܪ܆ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ ܓܪܺܝܓܽܘܪܺܝܽܘܤ. ܡܶܬܢܰܚܰܬ ܓܶܝܪ ܐ̱ܢܳܫ܆ ܠܰܘ ܕܢܶܦܶܠ ‌ܐܳܦ ܗܽܘ܆ ܐܶܠܳܐ ܐܰܝܟܰܢܳܐ ܕܰܢܩܺܝܡ ܠܗܰܘ ܕܰܪܡܶܐ. ܐܰܝܟܰܢܳܐ ܕܰܐܝܟ ܡܶܠܬܶܗ ܕܦܰܘܠܽܘܤ܆ ܛܰܝܒܽܘܬܳܐ ܕܣܶܓܝܰܬ܆ ܬܶܣܓܶܐ ܝܰܬܺܝܪܳܐ ܩܽܘܒܳܠ ܛܰܝܒܽܘܬܳܐ ܠܬܶܫܒܽܘܚܬܳܐ ܕܰܐ‌ܠܳܗܳܐ^[43]. ܠܗܰܘ ܕܳܐܦ ܦܰܐܝܳܐ ܬܶܫܒܽܘܚܬܳܐ ܠܥܳܠܡܺܝܢ ܐܰܡܺܝܢ‌܀

ܫܠܶܡ ܡܺܐܡܪܐ ܕܡܐܐ ܘܐܪܒܥܐ.

ܡܬܝ. 22: 15 ـ 16 [1]

ܓܠܛܝ̈ܐ. 1: 9 [2]

ܐ. ܩܘܪ̈ܝܢܬܝܐ. 15: 9  ܐܦ ܐܦܣ̈ܝܐ. 3: 8 [3]

ܬܶܢܝܢ ܢܡܘܣܐ. 32: 15 [4]

ܡܦܩܢܐ. 19: 5 [5]

ܪ̈ܗܘܡܝܐ. 6: 19[6]

ܪ̈ܗܘܡܝܐ. 12: 1 [7]

ܡܦܩܢܐ. 19: 5 ـ 6 [8]

ܐ. ܫܡܘܐܝܠ. 8: 5 [9]

ܐ. ܫܡܘܐܝܠ. 8: 7 [10]

ܐܫܥܝܐ. 5: 2 [11]

ܐ. ܬܣܠܘܢܝܩ̈ܝܐ. 2: 16 [12]

ܐܫܥܝܐ. 5: 5[13]

ܬܢܝܢ ܢܡܘܣܐ. 32: 9 [14]

ܬܢܝܢ ܢܡܘܣܐ. 17: 15 [15]

ܐܫܥܝܐ. 33: 22 [16]

ܦܪܟܣܝܣ. 5: 37 [17]

[18]ܗܳܢܳܐ ܗܶܪܘܕܝܣ ܐܺܝܬܰܘܗ̱ܝ܆ ܗܶܪܘܕܝܣ ܐܰܓܪܝܦܐܣ ܒܰܪ ܐܰܓܪܺܝܦܐܣ܆ ܗܰܘ ܕܰܩܕܳܡܰܘܗܝ ܐܫܬܐܠ ܦܘܠܘܣ ܡܶܢ ܦܝܠܟܣ ܐܰܝܟܰܢܳܐ ܕܰܟܬܺܝܒ ܒܰܦܪܟܣܝܣ. ܘܺܐܝܬܰܘܗ̱ܝ ܒܰܪ ܒܪܶܗ ܕܰܐܪܝܣܛܘܦܘܠܘܣ ܒܪܶܗ ܕܗܶܪܘܕܝܣ ܗܰܘ ܩܰܕܡܳܝܳܐ. ܠܗܳܢܳܐ ܡܚܰܘܶܐ ܝܽܘܣܺܝܦܘܣ ܒܡܺܐܡܪܳܐ ܗܰܘ ܕܰܬܪܶܝܢ ܕܡܶܛܽܠ ܚܽܘܪܒܳܗ̇ ܕܽܐܘܪܶܫܠܶܡ܆ ܕܣܰܓܺܝ̈ܐܬܐ ܡܠܰܟ ܠܥܰܡܳܐ ܕܝܗܘ̈ܕܝܐ܆ ܕܠܐ ܢܶܡܪܕܽܘܢ ܥܰܠ ܪ̈ܽܘܡܳܝܶܐ܆ ܘܢܶܗܘܽܘܢ ܥܶܠܬܳܐ ܠܰܥܩܽܘܪܝܳܐ ܕܰܡܕܺܝܢ̱ܬܗܽܘܢ ܘܠܰܐܒܕܳܢܳܐ ܕܥܰܡܗܽܘܢ. ܐܶܠܐ ܗܳܢܳܐ ܒܙܰܒܢܳܐ ܕܰܡܫܺܝܚܳܐ܆ ܐܳܦܠܐ ܡܺܐܠܰܕ ܝܺܠܺܝܕ ܗ̱ܘܳܐ. ܡܳܕܶܝܢ ܗܳܝ ܕܢܶܗܘܽܘܢ ܡܶܬܩܪܶܝܢ ܐ̱ܢܳܫܺܝ̈ܢ ܡܶܢ ܝܗܘ̈ܕܝܐ ܗܪ̈ܘܕܝܐܢܘ܆ ܠܰܘ ܒܙܰܒܢܳܐ ܗܰܘ ܕܰܡܪܰܕܘ ܒܶܗ ܥܰܠ ܪ̈ܽܘܡܳܝܶܐ ܓܶܕܫܰܬ ܠܗܽܘܢ܆ ܐܶܠܐ ܐܳܦ ܡܶܢ ܙܰܒܢܳܐ ܕܰܡܫܺܝܚܳܐ܆ ܘܡܶܢ ܩܕܳܡ ܡ̄ 40 ܫܢܰܝ̈ܳܐ ܕܚܽܘܪܒܳܗ̇ ܕܽܐܘܪܶܫܠܡ. ܠܰܘ ܕܶܝܢ ܡܶܢ ܚܕܳܐ ܥܶܠܬܳܐ܆ ܐܰܘ ܡܶܢ ܚܰܕ ܗܶܪܘܕܝܣ܆ ܠܒܟ ܫܽܘܡܳܗܳܐ ܗܳܢܳܐ ܐܶܠܐ ܡܶܬܩܪܶܝܢ ܗ̱ܘܰܘ ܗܳܟܰܢܳܐ܆ ܐܳܦ ܡܶܢ ܗܪܘܕܝܣ ܗܰܘ ܩܰܕܡܳܝܳܐ ܕܰܐܡܠܶܟ ܥܠܰܝܗܽܘܢ. ܘܳܐܦ ܡܶܢ ܗܰܘ ܛܛܪܐܪܟܝܣ ܕܩܰܛܶܠ ܠܝܽܘܚܰܢܳܢ. ܘܳܐܦ ܡܶܢ ܗܶܪܘܕܝܣ ܐ̱ܚܪܺܢܳܐ ܗܰܘ ܕܡܶܬܩܪܶܐ ܐܰܢܛܝܦܐܣ. ܥܰܡ ܗܳܠܶܝܢ܆ ܐܳܦ ܡܶܢ ܗܶܪܘܕܝܣ ܐܓܪܝܦܐܣ ܐܰܒܽܘܗܝ ܕܗܳܢܳܐ ܕܶܐܬܥܗܕ ܡܰܠܦܳܢܳܐ܆ ܕܡܺܝܬ ܒܩܶܣܰܪܺܝܰܐ ܐܰܝܟܰܢܳܐ ܕܰܟܬܺܝܒ ܒܰܦܪܟܣܝܣ

ܠܘܩܐ. 3: 1[19]

ܡܬܝ. 22: 15 [20]

ܐ. ܩܘܪ̈ܝܢܬܝܐ. 1: 24 [21]

ܡܬܝ. 22: 15 ـ 17 [22]

ܠܘܩܐ. 20: 23 [23]

ܠܘܩܐ. 20: 26 [24]

ܕܶܐܣܟܺܡܳܐ ܡܨܕܝܢܐ[25]

ܝܘܚܢܢ. 9: 28 ـ 29  ܐܦ ܡܬܝ. 22: 16 [26]

ܝܘܚܢܢ. 7: 12  ܐܦ ܡܬܝ. 27: 63[27]

[28]ܡܬܝ. 22: 16  ܐܦ ܝܘܚܢܢ. 9: 16                ܐܦ ܝܘܚܢܢ. 8: 41 (52)

ܡܬܝ. 22: 17 [29]

ܐܰܝܟ ܕܡܰܦܫܳܐ ܙܶܩܳܐ[30]

 ܡܬܝ. 22: 18 [31]

ܡܬܝ. 22: 19 ـ 21 [32]

ܪ̈ܗܘܡܝܐ. 13: 7 [33]

ܡܬܝ. 22: 19 ـ 20[34]

ܬܢܝܢ ܢܡܘܣܐ. 32: 9 [35]

ܪ̈ܗܘܡܝܐ. 12: 2 [36]

ܐܪܡܝܐ 6: 30[37]

[38]ܡܰܠܰܐܟܝ. 2: 7  ܒܟܬܒܐ ܕܡܰܠܰܐܟܺܝ ܟܬܝܒ ܗܳܟܰܢ. ܣܶܦ̈ܘܳܬܗ ܕܟܗܢܐ ܢܳܛܦ̈ܳܢ ܝܺܕܥܬܐ.

ܓܠܛܝ̈ܐ. 1: 8 [39]

ܡܙܡܘܪ̈ܐ. 26: 4 ـ 6 [40]

ܡܦܩܢܐ. 23: 2 [41]

ܡܙܡܘܪ̈ܐ. 50: 18[42]

ܒ. ܩܘܪ̈ܝܢܬܝܐ. 4: 15 [43]