ܥܰܠ ܢܽܘܗܪ̈ܐ. ܕܺܐܝܬܰܘܗ̱ܝ ܕܚܰܡܫܳܐ.
103: ܟܰܕ ܙܰܒ̈ܢܳܬܳܐ ܣܰܓܺܝ̈ܳܐܬܳܐ ܡܰܠܠܶܬ ܠܟܽܘܢ ܡܶܛܽܠ ܥܺܐܕܳܐ ܗܳܢܳܐ܆ ܘܰܐܝܟ ܚܰܝܠܳܐ ܒܨܺܝܪܳܐ ܗܰܘ ܕܺܐܝܬ ܒܺܝ܆ ܗܳܠܶܝܢ ܕܶܐܬܰܝ̈ ܠܺܝ ܦܺܝܠܳܣܽܘܦܺܝܣܳܐ ܥܶܒܕܶܬ܆ ܟܽܠܶܗ ܗܽܘܦܐܤܛܐܣܝܤ ܐܰܝܟ ܕܰܠܡܺܐܡܰܪ ܐܰܘܟܺܝܬ ܩܶܢܝܳܢܳܐ ܕܡܶܣܟܺܢܽܘܬܳܐ ܕܺܝܠܝ ܣܰܦܩܶܬ܆ ܐܶܢ ܟܺܝܬ ܙܳܕܶܩ ܕܢܺܐܡܰܪ ܩܶܢܝܳܢܳܐ ܕܡܶܣܟܺܢܽܘܬܳܐ܆ ܠܡܶܫܬܰܩ ܨܳܒܶܐ ܗ̱ܘܺܝܬ܆ ܘܠܳܐ ܐܰ݀ܟܣܶܗ ܠܰܐܣܳܪܳܐ ܕܰܨܪܺܝܟܽܘܬܳܐ ܗܰܘ ܕܣܺܝܡ ܥܰܠ ܣܶܦ̈ܘܳܬܝ܆ ܘܠܳܐ ܝܳܕܰܥ ܐ̱ܢܳܐ ܐܰܝܟܰܢܳܐ ܗܳܫܳܐ ܡܙܺܝܥܳܐ ܠܶܗ ܠܠܶܫܳܢܝ܆ ܒܰܪ̱ܬ ܩܳܠܶܗ ܕܗܰܘ ܕܩܳܥܶܐ ܒܡܰܕܒܪܳܐ. ܕܬܶܩܕܽܘܡ ܬܶܪܗܰܛ ܡܶܠܬܳܐ ܩܕܳܡ ܬܰܪܥܺܝܬܳܐ ܕܡܶܬܬܰܗܝܳܐ ܥܳܒܶܕ܆ ܗܰܘ ܟܳܪܽܘܙܳܐ ܕܡܶܠܬܳܐ ܐܰܠܳܗܳܐ ܘܪܰܗܳܛܳܐ ܩܰܕܡܳܝܳܐ. ܥܳܒܶܕ ܐܽܘܪܚܳܐ ܡܶܢ ܟܰܕܽܘ܆ ܐܳܦ ܠܬܰܪ̈ܥܝܳܬܳܐ ܬܽܘܒ ܗܽܘ ܝܽܘܚܰܢܳܢ܆ ܗܰܘ ܕܰܐܝܟ ܡܰܠܰܐܟܳܐ ܡܶܫܬܰܕܰܪ ܕܢܶܩܕܽܘܡ ܢܰܬܩܶܢ ܘܰܢܛܰܝܶܒ ܐܽܘܪܚܳܐ ܕܦܽܘܪܩܳܢܳܐ ܕܺܝܠܰܢ܆ ܩܕܳܡ ܦܰܪܨܽܘܦܶܗ ܕܡܳܪܝܳܐ[1].
ܚܳܙܶܐ ܐ̱ܢܳܐ ܠܶܗ ܠܝܽܘܪܕܢܳܢ ܕܰܡܥܰܪܓܶܠ ܫܶܦ̈ܥܶܐ ܕܢܽܘܗܪܳܐ ܡܰܠܽܘܢ ܐܰܘ ܕܡܰܝ̈ܳܐ܆ ܘܡܶܬܬܪܺܝܡ ܒܓܰܠ̈ܠܶܐ ܕܺܝܕܰܥܬܳܐ܆ ܘܠܳܐ ܐܺܝܬ ܠܺܝ ܐܰܝܟܰܢܳܐ ܐܶ݀ܩܰܒܠܺܝܘܗ̱ܝ ܠܢܽܘܗܪܳܐ. ܘܰܒܙܰܒܢܗܶܝܢ ܡܰܙܥܶܩ ܐ̱ܢܳܐ ܠܰܒ̈ܢܳܬ ܩ̈ܳܠܶܐ ܕܩܶܢܛܪܽܘܢܳܐ ܗܰܘ܆ ܕܠܳܐ ܣܳܦܶܩ ܐ̱ܢܳܐ ܕܬܶܥܽܘܠ ܬܚܶܝܬ ܡܰܛܠܠܝ[2].
ܐܶܠܽܘ ܡܰܢ ܓܶܝܪ ܐܶܢܳܐ ܠܺܝ ܪܰܘܚܶܬ ܒܬܽܘܪܳܨܳܐ ܕܦܽܘܩܕܳܢܳܐ ܐܰܠܳܗܳܝܳܐ܆ ܪܘܺܝܚܳܐ ܓܶܝܪ ܐܺܝܬܰܘܗ̱ܝ ܦܽܘܩܕܳܢܶܗ[3] ܣܰܓܺܝ ܐܰܝܟܰܢܳܐ ܕܰܟܬܺܝܒ܆ ܘܰܡܨܶܐ ܗ̱ܘܺܝܬ ܕܰܠܦܽܘܡܳܐ ܕܬܰܪܥܺܝܬܝ ܐܶ݀ܦܰܬܶܐ ܘܶܐ݀ܣܽܘܩ ܪܽܘܚܳܐ[4]܆ ܘܺܐܝܬܰܝ ܗ̱ܘܺܝܬ ܡܕܺܝܢ̱ܬܳܐ ܕܥܰܠ ܛܽܘܪܳܐ ܣܺܝܡܳܐ܆ ܡܶܢ ܟܽܠ ܦܪܘܤ ܟܺܝܬ ܟܰܕ ܡܶܬܩܰܒܠܺܝܢ ܗ̱ܘܰܘ ܒܺܝ ܬܰܦܰܘܗ̱ܝ ܕܢܰܗܪܳܐ܆ ܡܚܰܕܶܝܢ ܗ̱ܘܰܘ ܠܰܡܕܺܝܢ̱ܬܶܗ ܕܰܐܠܳܗܳܐ܆ ܐܰܝܟܰܢܳܐ ܕܰܒܕܽܘܟ ܐܳܡܰܪ ܢܒܺܝܳܐ ܕܰܘܺܝܕ ܟܰܕ ܡܙܰܡܰܪ.
ܠܒܰܝܬܽܘܢܳܐ ܕܶܝܢ ܕܝܰܬܺܝܪ ܐܰܠܺܝܨ ܘܨܳܐܳܐ ܘܰܕܠܳܐ ܙܰܗܪܳܐ܆ ܐܰܝܟܰܢܳܐ ܟܰܕ ܢܶܥܽܘܠ ܢܰܗܪܳܐ ܕܢܽܘܗܪܳܐ ܕܟܽܠܶܗ ܗܳܢܳܐ܆ ܠܳܐ ܢܰܥܡܶܛ ܘܰܢܕܰܥܶܟ ܒܣܰܓܺܝܽܐܘܬܳܐ ܕܢܰܨܺܝܚܽܘܬܶܗ ܠܥܰܝ̈ܢܶܐ ܗܳܠܶܝܢ ܕܡܶܢ ܫܥܺܝܢܳܐ ܣܰܓܺܝܳܐܐ ܡܰܠ̈ܝܳܢ܆ ܐܰܘ ܐܳܦ ܢܛܺܝܦ ܘܢܶܓܪܽܘܦ ܘܡܶܢ ܫܶܪ̈ܫܶܐ ܢܶܗܦܽܘܟ ܠܟܽܠ ܡܶܕܶܡ. ܡܳܕܶܝܢ ܡܰܥܰܠܬܳܐ ܕܰܚܕܳܐ ܬܠܰܠܬܳܐ ܘܛܽܘܦܬܳܐ ܚܕܳܐ ܙܥܽܘܪܬܳܐ܆ ܠܟܽܠܶܗ ܒܰܝܬܽܘܢܳܐ ܕܺܝܠܝ ܬܶܣܦܰܩ ܠܡܰܢܗܽܪܘ܆ ܐܰܝܟܰܢܳܐ ܕܡܶܢܶܗ ܕܢܽܘܗܪܳܐ ܢܶܣܬܒܰܪ ܕܡܰܬܩܶܢ܆ ܟܰܕ ܡܶܬܛܰܫܶܐ ܡܶܟܺܝܠ ܛܺܝܢܳܐ܆ ܒܗܳܝ ܕܡܶܢ ܟܽܠܕܽܘܟ ܡܶܬܢܰܗܰܪ.
ܐܶܠܳܐ ܥܰܕ ܡܗܰܦܶܟ ܐ̱ܢܳܐ ܠܳܗ̇ ܠܬܰܪܥܺܝܬܝ ܘܰܡܫܰܢܶܐ ܐ̱ܢܳܐ܆ ܟܰܕ ܠܘܳܬ ܪܰܘܡܳܐ ܕܫܶܦ̈ܥܰܘܗ̱ܝ ܕܝܽܘܪܕܢܳܢ ܕܡܶܬܓܰܠܠܺܝܢ ܠܳܐ ܡܨܶܐ ܐ̱ܢܳܐ ܚܰܝܠܳܐ܆ ܚܳܙܶܐ ܐ̱ܢܳܐ ܠܶܗ ܠܝܶܫܽܘܥ ܕܥܳܡܶܕ ܒܶܗ܆ ܗܰܘ ܕܰܒܪܽܘܚܳܐ ܩܰܕܺܝܫܳܐ ܘܰܒܢܽܘܪܳܐ ܡܰܥܡܶܕ[5]. ܘܥܰܡ ܓܰܘܙܰܠܬܳܐ ܐܰܠܳܗܳܝܬܳܐ܆ ܡܰܣܰܩܬܳܐ ܗܳܝ ܕܰܠܥܶܠ ܡܶܬܥܰܠܝܳܐ ܐܰܟܚܕܳܐ ܡܶܬܥܰܠܶܐ ܐ̱ܢܳܐ. ܘܦܳܪܽܘܚܳܐ ܟܽܘܠܝ ܐܺܝܬܰܝ܆ ܘܰܠܬܰܚܬ ܚܳܙܶܐ ܐ̱ܢܳܐ ܠܶܗ ܠܢܽܘܗܪܳܐ܆ ܗܰܘ ܕܰܕܫܳܥܬܳܐ ܪܳܡܳܐ ܡܶܬܚܙܶܐ ܗ̱ܘܳܐ ܠܺܝ܆ ܟܰܕ ܣܶܠܩܶܬ ܠܘܳܬ ܗܰܘ ܕܰܗܘ̣ܳܐ ܠܺܝ ܥܶܠܬܳܐ ܕܪܽܘܡܪܳܡܳܐ܆ ܗܰܘ ܝܳܗܽܘܒܳܐ ܕܪܽܘܚܳܐ܆ ܗܰܘ ܕܰܠܥܶܠ ܡܶܢ ܟܽܠ ܪܺܝܫܳܢܽܘܬܳܐ ܘܫܽܘܠܛܳܢܳܐ ܘܚܰܝܠܳܐ ܘܡܳܪܽܘܬܳܐ ܘܟܽܠ ܫܡܳܐ ܕܡܶܫܬܰܡܰܗ܆ ܠܰܘ ܒܰܠܚܽܘܕ ܒܥܳܠܡܳܐ ܗܳܢܳܐ܆ ܐܶܠܳܐ ܐܳܦ ܒܗܰܘ ܕܰܥܬܺܝܕ[6].
ܕܪܽܘܚܳܐ ܓܶܝܪ ܘܰܕܢܽܘܪܳܐ܆ ܕܺܝܠܳܝܬܳܐ ܐܺܝܬܶܝܗ̇ ܗܳܝ ܕܰܠܥܶܠ ܢܶܬܬܪܺܝܡܽܘܢ. ܕܡܰܝ̈ܳܐ ܕܶܝܢ ܗܳܝ ܕܰܠܘܳܬ ܕܽܘܟ̈ܝܳܬܳܐ ܥܰܡܺܝ̈ܩܳܬܳܐ ܠܬܰܚܬ ܢܶܪܕܽܘܢ܆ ܘܰܐܬܪܳܐ ܗܰܘ ܥܰܡܺܝܩܳܐ ܘܕܰܠܬܰܚܬ ܢܶܒܥܽܘܢ ܠܗܽܘܢ. ܐܶܠܳܐ ܡܶܛܽܠ ܕܰܕܗܰܘ ܕܰܡܝܰܬܰܪ ܐܺܝܬܶܝܗ̇ ܗܳܝ ܕܢܶܙܟܶܐ܆ ܐܳܦ ܗܶܢܽܘܢ ܗܘ̣ܰܘ ܪ̈ܳܡܶܐ܆ ܟܰܕ ܐܶܬܥܰܪܙܰܠܘ ܐܰܟܚܕܳܐ ܥܰܡ ܢܽܘܪܳܐ ܘܪܽܘܚܳܐ. ܘܟܰܕ ܠܬܰܚܬ ܪܳܕܶܝܢ܆ ܡܶܢ ܠܥܶܠ ܝܳܠܕܺܝܢ܆ ܘܰܒܢܰܝ̈ܳܐ ܕܰܡܪܰܝܡܳܐ ܡܫܰܡܠܶܝܢ ܠܗܽܘܢ ܠܗܳܢܽܘܢ ܕܡܶܬܝܰܠܕܺܝܢ܆ ܡܶܛܽܠ ܗܰܘ ܕܡܶܢ ܠܥܶܠ ܘܡܶܢ ܫܡܰܝܳܐ ܐܶܬܳܐ܆ ܘܰܠܗܽܘܢ ܢܚܶܬ ܘܰܥܡܰܕ܆ ܘܝܰܗ̱ܒ ܠܗܽܘܢ ܟܽܠܗܶܝܢ ܐܰܠܳܗܳܝ̈ܳܬܳܐ ܘܪ̈ܳܡܳܬܳܐ.
ܐܶܠܳܐ ܠܳܐ ܝܳܕܰܥ ܐ̱ܢܳܐ ܒܰܐܝܢܳܐ ܙܢܳܐ܆ ܐܳܦ ܐܶܢܳܐ ܩܢܽܘܡܝ ܟܰܕ ܒܡܶܠܬܳܐ ܠܘܳܬ ܪܰܘܡܳܐ ܠܥܶܠ ܦܶܪܚܶܬ܆ ܘܰܐܟܚܕܳܐ ܥܰܡ ܡܥܰܠܝܽܘܬܳܗ̇ ܕܰܐܠܳܗܽܘܬܳܐ ܐܰܝܟ ܕܡܰܨܝܳܐ ܐܶܬܬܪܺܝܡܶܬ܆ ܡܶܢ ܫܶܠܝ ܠܘܳܬ ܥܽܘܡܩܳܐ ܕܰܡܕܰܒܪܳܢܽܘܬܳܐ ܫܰܢܺܝܬ܆ ܘܰܚܙܺܝܬ ܠܗܰܘ ܕܰܠܗܰܠ ܡܶܢ ܟܽܠ܆ ܕܰܢܚܶܬ ܠܡܰܝ̈ܳܐ ܘܰܥܡܰܕ. ܐܶܠܳܐ ܡܶܛܽܠ ܕܗܽܘ ܟܰܕ ܗܽܘ ܐܺܝܬܰܘܗ̱ܝ܆ ܗܰܘ ܕܰܡܬܽܘܡܳܐܺܝܬ ܡܰܢ ܘܰܕܠܳܐ ܫܽܘܪܳܝ܆ ܗܳܢܰܘ ܕܶܝܢ ܠܳܐ ܙܰܒܢܳܐܺܝܬ ܡܶܢ ܐܰܠܳܗܳܐ ܐܰܒܳܐ ܐܶܬܺܝܠܶܕ܆ ܐܰܝܟ ܡܰܢ ܕܺܐܝܬܰܘܗ̱ܝ ܨܶܡܚܳܐ ܕܬܶܫܒܽܘܚܬܳܐ ܘܨܰܠܡܳܐ ܕܰܩܢܽܘܡܳܐ ܕܗܰܘ ܕܝܰܠܕܶܗ[7]܆ ܐܶܫܬܰܘܬܰܦ ܕܶܝܢ ܐܳܦ ܒܽܐܘܣܺܝܰܐ ܕܺܝܠܰܢ ܒܚܰܪܬܳܐ ܕܙܰܒܢ̈ܶܐ ܒܝܰܕ ܝܺܠܺܝܕܽܘܬܳܐ܆ ܘܒܳܗ̇ ܒܰܕܡܽܘܬܳܐ ܠܰܢ ܐܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ[8] ܐܰܝܟܰܢܳܐ ܕܦܰܘܠܽܘܤ ܐܳܡܰܪ܆ ܒܶܣܪܳܐ ܕܶܝܢ ܠܰܘ ܕܰܓܠܺܝܙ ܡܶܢ ܢܰܦܫܳܐ ܡܶܬܗܰܘܢܳܢܺܝܬܳܐ܆ ܐܰܝܟܰܢܳܐ ܕܰܡܫܰܡܠܝܳܐܺܝܬ ܠܕܳܡܝܽܘܬܳܐ ܕܺܝܠܰܢ ܢܩܰܒܶܠ܆ ܕܡܶܢ ܚܛܺܝܬܳܐ ܒܰܠܚܽܘܕ ܟܽܠ ܟܽܠܶܗ ܚܰܣܺܝܪ܆ ܐܺܝܬ ܠܶܗ ܕܶܝܢ ܗܳܝ ܕܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܒܬܽܘܠܬܳܐ ܕܦܰܐܝܳܐ ܠܰܐܠܳܗܳܐ ܘܕܰܡܝܰܬܪܳܐ܆ ܡܶܛܽܠ ܗܳܕܶܐ ܟܰܕ ܚܰܕ ܐܺܝܬܰܘܗ̱ܝ ܠܳܐ ܒܠܺܝܠܳܐܺܝܬ ܡܶܢ ܬܪܶܝܢ ܟܝܳܢ̈ܶܐ ܥܰܡܰܢܽܘܐܶܝܠ܆ ܘܚܰܕ ܩܢܽܘܡܳܐ ܟܺܝܬ ܘܰܟܝܳܢܳܐ ܕܰܡܒܰܣܰܪ ܕܰܐܠܳܗܳܐ ܡܶܠܬܳܐ܆ ܐܳܠܨܳܐܺܝܬ ܡܚܰܝܰܕܬܳܐ ܘܠܳܐ ܡܶܬܦܰܠܓܳܢܺܝܬܳܐ ܐܺܝܬܶܝܗ̇ ܐܳܦ ܡܶܠܬܳܐ ܗܳܝ ܕܡܶܛܽܠܳܬܶܗ ܘܣܽܘܟܳܠܳܐ܆ ܘܗܳܠܶܝܢ ܕܰܠܬܰܚܬ ܠܗܳܠܶܝܢ ܕܰܠܥܶܠ ܡܰܠ̈ܘܬܳܢ. ܘܳܐܦܶܢ ܠܪܰܘܡܳܐ ܬܶܪܗܰܛ܆ ܘܰܐܝܟ ܕܡܶܛܽܠ ܐܰܠܳܗܳܐ ܡܶܠܬܳܐ ܬܡܰܠܶܠ܆ ܕܶܐܬܒܰܪܢܰܫ ܠܗܳܢܳܐ ܬܶܣܬܰܟܰܠ. ܘܟܰܕ ܠܳܐ ܝܳܕܰܥ ܐܰܢ̱ܬ܆ ܠܘܳܬ ܥܽܘܡܩܳܐ ܕܪܶܚܡܰܬ ܐ̱ܢܳܫܽܘܬܳܐ ܟܰܣܝܳܐܺܝܬ ܬܚܽܘܬ܆ ܘܬܶܬܡܰܗ ܒܬܶܕܡܽܘܪܬܳܐ. ܘܳܐܦܶܢ ܥܰܡ ܡܽܘܫ̈ܚܳܬܳܐ ܕܣܽܘܪܳܩܳܐ ܬܚܽܘܬ ܒܗܰܘܢܳܟ܆ ܠܘܳܬ ܡܰܢ ܥܽܘܡܩܳܐ ܠܳܐ ܬܶܬܡܨܶܐ. ܠܰܘ ܓܶܝܪ ܟܡܳܐ ܕܗܽܘ ܢܚܶܬ܆ ܠܡܶܣܬܰܟܳܠܽܘ ܬܶܥܪܶܐ ܐܰܢ̱ܬ. ܠܘܳܬ ܕܶܝܢ ܪܰܘܡܳܐ܆ ܒܰܕܡܽܘܬ ܗܳܢܽܘܢ ܕܰܒܝܰܡܳܐ ܥܳܡܕܺܝܢ܆ ܐܰܝܟ ܕܡܶܢ ܚܺܐܦܳܐ ܕܡܰܝ̈ܳܐ ܠܥܶܠ ܬܶܫܬܰܕܰܪ. ܘܟܰܕ ܒܰܪܢܳܫܳܐ ܐܰܚܺܝܕ ܐܰܢ̱ܬ ܠܶܗ܆ ܠܶܗ ܟܰܕ ܠܶܗ ܡܶܢ ܟܽܠ ܦܪܘܤ ܬܶܫܟܰܚ ܐܰܠܳܗܳܐ. ܐܳܦܶܢ ܒܗܳܠܶܝܢ ܡܰܟܺܝ̈ܟܳܬܳܐ ܐܶܬܡܰܣܟܰܢ ܨܶܒܝܳܢܳܐܺܝܬ܆ ܕܰܡܥܰܠܰܝ ܬܶܫܟܰܚ. ܘܰܡܩܰܒܠܳܢܳܐ ܡܰܢ ܕܗܳܠܶܝܢ ܐ̱ܢܳܫܳܝ̈ܳܬܳܐ܆ ܡܶܛܽܠ ܟܺܝܬ ܕܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ ܒܰܪܢܳܫܳܐ܆ ܡܶܬܟܰܒܫܳܢܳܐ ܕܶܝܢ ܘܳܐܦܠܳܐ ܠܰܚܕܳܐ ܡܶܢ ܗܳܠܶܝܢ ܒܗܳܝ ܕܺܐܝܬܰܘܗ̱ܝ ܐܰܠܳܗܳܐ܆ ܗܳܠܶܝܢ ܕܺܐܝܬܰܘܗ̱ܝ ܗ̱ܘܳܐ ܠܗܶܝܢ ܐܳܦ ܩܕܳܡ ܡܶܬܒܰܣܪܳܢܽܘܬܳܐ ܠܳܐ ܡܶܬܟܰܒܫܳܢܳܐ. ܒܗܳܝ ܓܶܝܪ ܕܶܐܬܒܰܣܰܪ܆ ܒܗܳܕܶܐ ܐܳܦ ܠܟܽܠܗܶܝܢ ܐ̱ܢܳܫܳܝ̈ܳܬܳܐ ܩܰܒܶܠ ܕܢܶܚܰܫ܆ ܟܰܕ ܠܳܐ ܡܶܕܶܡ ܫܕܳܐ ܐܰܘ ܒܨܰܪ ܡܶܢ ܟܽܠܗܶܝܢ ܗܳܠܶܝܢ ܕܺܐܝܬ ܗ̱ܘܰܝ̈ ܒܶܗ ܒܽܐܘܣܺܝܰܐ. ܡܳܢܳܐ ܓܶܝܪ ܐܳܦ ܡܰܪܚܶܩ ܗ̱ܘܳܐ ܠܶܗ ܡܶܢ ܗܳܝ ܕܺܐܝܬܰܘܗ̱ܝ ܐܰܠܳܗܳܐ. ܡܶܕܶܝܢ ܢܶܨܛܰܪܽܘܢ ܘܢܶܬܚܰܒܠܽܘܢ ܗܳܢܽܘܢ ܕܰܡܦܰܠܓܺܝܢ ܠܶܗ ܠܗܳܢܳܐ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ ܕܡܶܢ ܒܳܬܰܪ ܚܕܳܝܽܘܬܳܐ܆ ܘܳܐܦ ܗܳܢܽܘܢ ܕܰܐܝܟ ܕܒܶܐܣܟܺܡܳܐ ܬܪ̈ܺܝܨܳܬܳܐ ܐܶܬܪܰܥܺܝܘ܆ ܘܳܐܦ ܗܳܢܶܝܢ ܕܗܳܠܶܝܢ ܐܶܡܰܪܘ ܒܡܰܣܰܒ ܒܰܐܦ̈ܶܐ ܘܰܡܨܰܕܝܳܢܳܐܺܝܬ. ܠܰܬܪܶܝܢ ܓܶܝܪ ܦܣ̈ܳܩܶܐ ܗܳܢܽܘܢ ܕܕܰܐܝܟ ܗܳܠܶܝܢ ܢܶܬܦܰܣܩܽܘܢ ܒܝܰܘܡܳܐ ܕܚܺܝܠܳܐ ܗܰܘ ܕܕܺܝܢܳܐ. ܐܰܝܟܰܢܳܐ ܕܨܳܒܝܳܐ ܒܰܪ̱ܬ ܩܳܠܳܐ ܗܳܝ ܠܳܐ ܕܰܓܳܠܬܳܐ ܕܦܳܪܽܘܩܰܢ ܕܳܐܡܪܳܐ܆ ܢܺܐܬܶܐ ܡܳܪܶܗ ܘܢܶܦܠܓܺܝܘܗ̱ܝ ܘܰܢܣܺܝܡ ܡܢܳܬܶܗ ܥܰܡ ܕܢܳܣ̈ܒܰܝ ܒܰܐܦ̈ܶܐ ܘܰܡܨܰܕܝܳܢ̈ܶܐ[9].
ܐܰܝܟܰܢܳܐ ܗܳܟܺܝܠ ܚܢܰܢ ܢܶܗܘܶܐ ܪ̈ܳܚܡܰܝ ܐ̱ܢܳܫܳܐ ܠܗܳܢܽܘܢ ܡܨܰܕܝܳܢ̈ܶܐ܆ ܐܰܘ ܐܰܝܟܰܢܳܐ ܠܳܐ ܢܶܦܣܽܘܩ ܘܢܰܟܪܶܙ ܐܶܢܽܘܢ ܠܗܳܢܽܘܢ ܕܰܐܝܟ ܕܡܶܢ ܨܶܐܕܰܝܗܽܘܢ܆ ܠܰܬܪܶܝܢ ܦܰܣܩܽܘܗ̱ܝ ܠܗܰܘ ܚܰܕ ܡܳܪܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ. ܐܰܘ ܒܰܐܝ̇ܕܳܐ ܡܶܠܬܳܐ܆ ܟܰܕ ܨܰܥܪܳܐ ܕܰܥܠܰܝܢ ܕܺܝܠܰܢ ܠܳܐ ܡܣܰܝܒܪܺܝܢܰܢ܆ ܠܟܽܠ ܡܨܰܥܪ̈ܳܢܶܐ ܕܰܐܠܳܗܽܘܬܳܐ ܢܚܽܘܤ. ܗܳܢܽܘܢ ܕܰܠܦܰܐܝܽܘܬ ܙܥܽܘܪܽܘܬܳܐ ܗܳܝ ܕܡܶܛܽܠ ܥܽܘܕܪܳܢܳܐ ܕܰܠܘܳܬܰܢ ܕܗܰܘ ܕܣܰܪܶܩ ܗܽܘ ܠܶܗ ܨܶܒܝܳܢܳܐܺܝܬ[10]܆ ܥܶܠܬܳܐ ܥܰܒܕܽܘܗ̇ ܠܗܳܝ ܕܢܶܫܪܽܘܢ ܠܐ̱ܪܳܙܳܐ ܪܰܒܳܐ ܘܠܳܐ ܡܶܫܬܰܪܝܳܢܳܐ ܕܡܶܬܒܰܪܢܫܳܢܽܘܬܳܐ. ܘܰܠܗܳܠܶܝܢ ܕܳܐܣܝܽܘܬܳܐ ܘܰܕܡܶܬܢܰܚܬܳܢܽܘܬܳܐ ܗܳܝ ܪܳܚܡܰܬ ܐ̱ܢܳܫܳܐ܆ ܠܰܟܝܳܢܳܐ ܐ̱ܢܳܫܳܝܳܐ ܡܶܢܶܗ ܘܠܶܗ ܦܠܰܓܘ ܘܝܰܗܒܘ܆ ܘܢܽܘܟܪܳܝܳܐ ܥܰܒܕܽܘܗ̱ܝ ܠܳܐܣܝܳܐ܆ ܗܰܘ ܕܡܶܛܽܠ ܚܰܝܽܘܣܬܳܢܽܘܬܶܗ ܡܶܢ ܪܰܘܡܳܐ ܐܶܬܪܟܶܢ ܥܰܠ ܗܳܢܽܘܢ ܕܰܟܪܺܝܗܶܝܢ ܗ̱ܘܰܘ. ܗܰܘ ܕܳܐܦ ܟܰܕ ܠܳܐ ܡܶܫܬܰܪܝܳܢܐ ܐܺܝܬܰܘܗ̱ܝ ܘܠܳܐ ܡܶܬܦܰܣܩܳܢܳܐ܆ ܘܠܰܦܣܳܩܳܐ ܡܓܰܕܦܳܢܳܐ ܕܗܳܢܽܘܢ ܣܳܟ ܠܳܐ ܡܶܬܪܡܶܐ܆ ܠܘܳܬ ܝܽܘܪܕܢܳܢ ܐܶܬܳܐ. ܘܟܰܕ ܐ̱ܢܳܫܳܐܺܝܬ ܩܰܒܶܠ ܥܠܰܘܗ̱ܝ ܡܰܥܡܽܘܕܺܝܬܳܐ ܕܝܽܘܚܰܢܳܢ ܗܳܝ ܕܰܒܡܰܝ̈ܳܐ܆ ܐܰܠܳܗܳܐܺܝܬ ܢܨܰܒ ܒܳܗ̇ ܒܗܳܕܶܐ ܕܽܘܟܳܝܳܐ ܕܺܝܠܰܢ ܗܰܘ ܕܰܒܢܽܘܪܳܐ ܘܰܒܪܽܘܚܳܐ ܩܰܕܺܝܫܳܐ܆ ܘܡܶܬܚܰܠܰܛ ܒܡܰܝ̈ܳܐ ܡܶܬܪ̈ܰܓܫܳܢܶܐ ܕܰܡܥܺܝܢܳܐ ܡܶܬܗܰܘܢܳܢܺܝܬܳܐ ܕܚܰܝ̈ܶܐ܆ ܗܳܝ ܕܰܒܢܽܘܗܪܳܗ̇ ܚܙܰܝܢܰܢ ܢܽܘܗܪܳܐ[11]܆ ܟܰܕ ܐܰܝܟ ܕܰܒܡܰܚܙܺܝܬܳܐ ܚܙܰܝܢܰܢ ܒܳܗ̇ ܠܰܚܕܳܐ ܟܺܝܬ ܐܽܘܣܺܝܰܐ ܘܰܐܠܳܗܽܘܬܳܐ ܕܰܐܒܳܐ ܘܰܕܪܽܘܚܳܐ ܩܰܕܺܝܫܳܐ. ܘܡܰܪܟܶܢ ܡܰܢ ܪܺܝܫܳܐ ܠܡܰܥܡܕܳܢܳܐ ܐܰܝܟ ܒܰܪܢܳܫܳܐ܆ ܫܳܡܰܥ ܕܶܝܢ ܗܽܘ ܟܰܕ ܗܽܘ ܐܰܝܟ ܐܰܠܳܗܳܐ܆ ܐܶܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܥܡܰܕ ܘܰܐܢ̱ܬ ܐܳܬܶܐ ܐܰܢ̱ܬ ܠܘܳܬܝ܆ ܘܰܡܦܰܢܶܐ ܗܳܝ ܕܰܫܒܽܘܩ ܗܳܫܳܐ[12]܆ ܟܰܕ ܟܳܠܶܐ ܠܳܗ̇ ܠܗܳܝ ܕܣܰܓܺܝ ܡܰܒܥܕܳܐ ܘܰܠܒܰܪ ܡܶܢ ܗܳܝ ܕܫܳܦܪܳܐ ܠܡ̈ܶܠܶܐ ܕܰܡܕܰܒܪܳܢܽܘܬܳܐ ܐܺܝܬܶܝܗ̇܆ ܗܳܝ ܕܪܰܒܽܘܬܳܐ ܕܰܐܠܳܗܽܘܬܶܗ ܬܶܬܓܠܶܐ ܒܰܢ.
ܡܰܢܽܘ ܗܳܟܺܝܠ ܕܰܠܗܳܠܶܝܢ ܕܗܳܟܰܢܳܐ ܐܰܟܚܕܳܐ ܡܪ̈ܰܟܒܳܢ ܘܰܡܚܰܝ̈ܕܳܢ ܥܰܡ ܚ̈ܕܳܕܶܐ ܐܰܠܳܗܳܐܺܝܬ ܐܰܟܚܕܳܐ ܘܰܡܕܰܒܪܳܢܳܐܺܝܬ܆ ܡܶܛܽܠ ܟܺܝܬ ܕܗܽܘ ܟܰܕ ܗܽܘ ܐܺܝܬܰܘܗ̱ܝ ܗ̱ܘܳܐ ܐܰܠܳܗܳܐ ܘܒܰܪܢܳܫܳܐ ܫܰܪܺܝܪܳܐ܆ ܢܰܡܪܰܚ ܕܰܢܦܰܠܶܓ ܐܶܢܶܝܢ ܠܰܬܪܶܝܢ ܟܝܳܢ̈ܶܐ ܡܓܰܕܦܳܢܳܐܺܝܬ ܘܠܳܐ ܝܰܠܺܝܦܳܐܺܝܬ. ܐܶܠܳܐ ܐܳܘ ܠܬܶܕܡܽܘܪܬܳܐ ܐܳܘ ܠܥܽܘܡܩܐ ܥܣܺܝܩ ܠܡܶܬܕܰܪܟܳܢܽܘܬܳܐ ܕܰܡܕܰܒܪܳܢܽܘܬܳܐ. ܘܰܕܡܶܛܠ ܥܽܘܬܪܳܐ ܕܪܶܚܡܰܬ ܐ̱ܢܳܫܽܘܬܳܐ ܡܶܢ ܟܽܠܕܽܘܟ ܡܰܢܗܰܪ. ܝܽܘܚܰܢܳܢ ܠܗܳܢܽܘܢ ܕܳܐܬܶܝܢ ܗ̱ܘܰܘ ܠܘܳܬ ܡܰܥܡܽܘܕܺܝܬܳܐ܆ ܝܰܠ̈ܕܶܐ ܕܳܐܟܶܕ̈ܢܶܐ ܩܳܪܶܐ ܗ̱ܘܳܐ ܠܗܽܘܢ[13]܆ ܒܝܰܕ ܕܰܠܘܳܬ ܡܰܪܺܝܪܽܘܬܳܐ ܕܪ̈ܰܚܫܳܐ ܪ̈ܳܡܝ̣ܰܝ̣ ܡܶܪܬܳܐ ܐܶܫܬܰܪܓܰܠܘ܆ ܘܡܶܢ ܟܰܕܽܘ ܢܰܦܺܝܩܺܝܢ ܗ̱ܘܰܘ ܠܘܳܬ ܟܝܳܢܳܐ ܕܚܰܝܘܰܬ ܫܶܢܳܐ. ܘܝܶܫܽܘܥ ܗܰܘ ܕܠܳܐ ܝܳܕܰܥ ܚܛܺܝܬܳܐ܆ ܐܰܝܟ ܚܰܕ ܡܶܢ ܗܳܠܶܝܢ܆ ܠܘܳܬ ܡܰܝ̈ܳܐ ܐܳܬܶܐ ܗ̱ܘܳܐ. ܗܰܘ ܕܰܠܘܳܬܶܗ ܕܰܘܺܝܕ ܟܰܕ ܡܶܢ ܫܽܘܪܳܝܳܐ ܒܥܰܝ̈ܢܶܐ ܢܒܺܝ̣ܳܝ̣̈ܳܬܳܐ ܚܳܐܰܪ ܗ̱ܘܳܐ ܐܳܡܰܪ ܗ̱ܘܳܐ܆ ܐܰܢ̱ܬ ܬܰܒܰܪܬ ܠܪ̈ܺܝܫܰܝܗܽܘܢ ܕܬܰܢܺܝ̈ܢܶܐ ܥܰܠ ܡܰܝ̈ܳܐ. ܐܰܢ̱ܬ ܪܰܨܶܨܬ ܠܪ̈ܺܝܫܰܘ̈ܗ̱ܝ ܕܬܰܢܺܝܢܳܐ[14]. ܬܰܢܺܝܢܳܐ ܓܶܝܪ ܗܰܘ ܪܺܝܫܳܢܳܐ ܩܰܕܡܳܝܳܐ ܘܚܶܘܝܳܐ܆ ܐܳܟܶܠܩܰܪܨܳܐ ܗܰܘ ܕܰܐܦܩܶܗ ܠܳܐܕܳܡ ܡܶܢ ܦܰܪܕܰܝܣܳܐ[15]܆ ܘܫ̈ܺܐܕܶܐ ܗܳܢܽܘܢ ܕܺܐܝܬ ܬܚܽܘܬܰܘܗ̱ܝ ܕܳܐܦ ܗܳܢܽܘܢ ܟܺܐܢܳܐܺܝܬ ܬܰܢܺܝ̈ܢܶܐ ܡܶܬܩܪܶܝܢ܆ ܐܰܝܟ ܐܰܝܠܶܝܢ ܕܕܺܝܠܶܗ ܟܰܕ ܕܺܝܠܶܗ ܕܨܶܒܝܳܢܳܐ ܥܰܡܶܗ ܐܺܝܬܰܝܗܽܘܢ܆ ܗܳܢܽܘܢ ܕܪ̈ܺܝܫܶܐ ܣܰܓܺܝ̈ܶܐܐ ܐܺܝܬ ܠܗܽܘܢ ܘܕܰܫܘܶܝܢ ܒܡܶܢܝܳܢܳܐ ܠܚܰܫ̈ܶܐ܆ ܟܰܕ ܐܰܝܟ ܕܰܒܝܰܡܳܐ ܒܪܰܛܺܝܒܽܘܬܳܐ ܕܚܰܝ̈ܶܐ ܐܰܘܟܺܝܬ ܕܕܽܘܒܳܪ̈ܶܐ ܕܰܒܢܰܝ̈ܢܳܫܳܐ ܐܶܚܰܕܘ ܪܺܝܫܳܢܽܘܬܳܐ܆ ܘܰܠܘܳܬ ܒܺܝܫܽܘܬܳܐ ܕܺܝܠܗܽܘܢ ܒܰܙܢܳܐ ܡܶܕܶܡ ܫܰܚܠܦܽܘܗ̱ܝ ܠܰܟܝܳܢܳܐ܆ ܚ̈ܘܰܘܳܬܳܐ ܚܰܘܺܝܘ ܠܰܢ ܘܝܰܠ̈ܕܶܐ ܕܳܐܟܶܕ̈ܢܶܐ. ܘܠܰܘ ܒܢܰܝ̈ܢܳܫܳܐ ܗܰܘ ܡܳܐ ܕܺܐܝܬܰܝܢ܆ ܐܶܠܳܐ ܗܰܘ ܡܳܐ ܕܰܗܘ̣ܰܝܢܰܢ ܟܰܕ ܚܛܺܝܬܳܐ ܐܶܬܟܪܗܢܰܢ.
ܡܶܛܽܠ ܗܳܕܶܐ ܠܥܳܠܡܳܐ ܐܳܬܶܐ ܝܶܫܽܘܥ. ܟܰܕ ܡܳܠܶܐ ܠܶܗ ܡܰܢ ܐܰܝܟ ܐܰܠܳܗܳܐ܆ ܥܳܐܶܠ ܠܶܗ ܕܶܝܢ ܐܰܝܟ ܒܰܪܢܳܫܳܐ. ܡܶܛܽܠ ܗܳܕܶܐ ܠܘܳܬ ܝܽܘܪܕܢܳܢ ܢܰܗܪܳܐ ܐܳܬܶܐ܆ ܐܰܝܟܰܢܳܐ ܕܰܠܪ̈ܺܝܫܶܐ ܣܰܓܺܝ̈ܶܐܐ ܣܶܕܩ̈ܶܐ ܕܒܺܝܫܽܘܬܳܐ ܢܶܩܛܽܘܠ܆ ܘܠܳܐ ܬܽܘܒ ܢܶܗܘܶܐ ܐܺܝܬܰܝܢ ܒܢܰܝ̈ܳܐ ܕܺܝܠܗܽܘܢ. ܐܶܠܳܐ ܗܽܘ ܟܰܕ ܚܰܕ ܪܺܝܫܳܐ ܘܰܚܕܳܐ ܪܺܝܫܺܝܬܳܐ ܕܥܺܕܬܳܐ ܗܳܘܶܐ܆ ܢܚܰܘܶܐ ܠܰܢ ܒܢܰܝ̈ܳܐ ܕܚܰܕ ܪܺܝܫܳܐ ܒܝܰܕ ܣܚܳܬܳܐ ܐܰܠܳܗܳܝܬܳܐ ܕܺܝܠܺܝܕܽܘܬܳܐ ܕܡܶܢ ܕܪܺܝܫ[16]. ܠܳܐ ܬܽܘܒ ܡܦܰܬܟ̈ܶܐ ܐܰܝܟ ܒܢܰܝ̈ܳܐ ܕܣܰܓܺܝ̈ܶܐܐ܆ ܐܶܠܳܐ ܦܫܺܝ̈ܛܶܐ ܘܫܰܪܺܝܪ̈ܶܐ܆ ܐܰܝܟ ܕܚܰܕ. ܟܰܕ ܠܗܳܕܶܐ ܡܚܰܘܶܐ ܗ̱ܘܳܐ ܦܰܘܠܽܘܤ ܟܳܬܶܒ ܗ̱ܘܳܐ ܠܓܰܠܰܛܳܝ̈ܶܐ. ܗܳܟܰܢܳܐ ܟܽܠܟܽܘܢ ܓܶܝܪ ܐܰܝܠܶܝܢ ܕܒܰܡܫܺܝܚܳܐ ܥܡܰܕܬܽܘܢ܆ ܠܰܡܫܺܝܚܳܐ ܠܒܶܫܬܽܘܢ. ܠܰܝܬ ܝܺܗܽܘܕܳܝܳܐ ܘܠܳܐ ܚܰܢܦܳܐ. ܠܰܝܬ ܥܰܒܕܳܐ ܐܳܦܠܳܐ ܒܰܪ ܚܺܐܪ̈ܶܐ. ܠܰܝܬ ܕܶܟܪܳܐ ܘܢܶܩܒܬܳܐ. ܟܽܠܟܽܘܢ ܓܶܝܪ ܚܰܕ ܐܺܝܬܰܝܟܽܘܢ ܒܰܡܫܺܝܚܳܐ ܝܶܫܽܘܥ[17]. ܐܳܦ ܗܽܘ ܕܶܝܢ ܦܳܪܽܘܩܰܢ ܒܶܐܘܰܢܓ̈ܶܠܺܝܰܐ ܠܘܳܬ ܐܰܒܳܐ ܡܶܛܽܠ ܗܳܢܽܘܢ ܕܰܡܗܰܝܡܢܺܝܢ ܒܶܗ ܐܳܡܰܪ܆ ܐܰܝܟܰܢܳܐ ܕܳܐܦ ܗܶܢܽܘܢ ܒܰܢ ܚܰܕ ܐܺܝܬܰܝܗܽܘܢ[18].
ܐܳܦ ܝܽܘܚܰܢܳܢ ܕܶܝܢ ܟܰܕ ܩܳܕܶܡ ܗ̱ܘܳܐ ܡܰܟܪܶܙ ܘܩܳܕܶܡ ܪܳܗܶܛ ܩܕܳܡ ܡܶܠܬܳܐ܆ ܘܠܰܒ̈ܢܳܬ ܩ̈ܳܠܶܐ ܗܳܠܶܝܢ ܕܡܶܢ ܐܶܫܰܥܝܳܐ ܩܰܕܶܡ ܐܶܬܶܐܡܰܪ̈ܝ̱ ܡܰܙܥܶܩ ܗ̱ܘܳܐ܆ ܩܳܕܶܡ ܗ̱ܘܳܐ ܡܰܘܕܰܥ ܠܰܚܕܳܝܽܘܬܳܐ ܘܫܰܘܝܽܘܬ ܐܺܝܩܳܪܐ ܕܰܩܪܳܝܬܶܗ ܕܝܶܫܽܘܥ ܗܳܝ ܕܰܒܝܰܕ ܥܡܳܕܳܐ ܘܳܐܡܰܪ ܗ̱ܘܳܐ܆ ܟܽܠ ܢܰܚܠܳܐ ܢܶܬܡܠܶܐ܆ ܘܟܽܠ ܛܽܘܪܳܐ ܘܪܳܡܬܳܐ ܢܶܬܡܰܟܟܽܘܢ. ܘܶܢܗܘ̈ܝܳܢ ܗܳܠܶܝܢ ܥܰܣܩ̈ܳܬܳܐ ܠܰܬܪܺܝܨܽܘܬܳܐ܆ ܘܗܳܠܶܝܢ ܩܰܫ̈ܝܳܬܳܐ ܠܽܐܘܪ̈ܚܳܬܳܐ ܫܰܦ̈ܝܳܬܳܐ܆ ܘܢܶܚܙܶܐ ܟܽܠ ܒܶܣܪܳܐ ܦܽܘܪܩܳܢܶܗ ܕܰܐܠܳܗܳܐ[19].
ܠܟܽܠ ܗܰܘ ܡܳܐ ܓܶܝܪ ܕܺܐܝܬܰܘܗ̱ܝ ܗ̱ܘܳܐ ܬܰܪܥܺܝܬܳܐ ܪܳܡܬܳܐ ܘܪܳܡܰܬ̣ ܓܒܺܝܢܳܐ܆ ܘܕܰܠܪܳܡܬܳܐ ܘܛܽܘܪܳܐ ܡܣܰܒܰܗ ܗ̱ܘܳܐ܆ ܐܶܘܰܢܓܶܠܺܝܽܘܢ ܐܰܫܘܝܶܗ܆ ܟܰܕ ܡܡܰܫ̈ܚܳܬܳܐ ܪܕܳܐ ܘܰܐܠܶܦ ܠܡܶܬܪܰܥܳܝܽܘ. ܟܽܠ ܕܶܝܢ ܥܰܡܩܽܘܬܳܐ ܘܕܰܒܥܽܘܡܩܳܐ ܐܺܝܬܶܝܗ̇ ܕܠܳܐ ܝܺܕܰܥܬܳܐ ܕܰܐܠܳܗܳܐ ܘܕܰܠܢܰܚܠܳܐ ܕܳܡܝܳܐ܆ ܐܶܬܡܰܠܝܰܬ ܒܝܰܕ ܩܪܳܝܬܳܐ ܫܘܺܝܬܳܐ ܕܥܰܠ ܟܽܠ ܘܡܰܠܦܳܢܽܘܬܳܐ ܘܡܶܫܬܰܘܕܥܳܢܽܘܬܳܐ܆ ܐܰܝܟ ܢܒܺܝܽܘܬܳܐ ܕܶܐܪܰܡܝܳܐ ܗܳܝ ܕܳܐܡܪܳܐ܆ ܘܠܳܐ ܢܰܠܦܽܘܢ ܟܽܠ ܚܰܕ ܠܩܰܪܺܝܒܶܗ܆ ܘܟܽܠ ܚܰܕ ܠܰܐܚܳܐ ܕܺܝܠܶܗ ܟܰܕ ܐܳܡܰܪ܆ ܕܰܥ ܠܡܳܪܝܳܐ. ܡܶܛܽܠ ܕܟܽܠܗܽܘܢ ܢܶܕܥܽܘܢܳܢܝ ܡܶܢ ܙܥܽܘܪܗܽܘܢ ܘܰܥܕܰܡܳܐ ܠܪܰܒܳܐ[20].
ܐܶܠܳܐ ܟܺܝܬ ܐܳܦ ܗܳܠܶܝܢ ܡܥܰܩ̈ܡܳܬܳܐ ܗܘܰܝ̈ ܠܰܬܪܺܝܨܽܘܬܳܐ܆ ܟܰܕ ܟܽܠܗܽܘܢ ܗܳܢܽܘܢ ܕܶܐܬܩܪܺܝܘ܆ ܓܒܰܘ ܠܗܽܘܢ ܚܠܳܦ ܡܥܰܩܡܽܘܬܳܐ܆ ܬܪܺܝܨܽܘܬܶܗ ܕܰܫܪܳܪܳܐ. ܗܳܕܶܐ ܕܶܝܢ ܠܳܐ ܗܳܘܝܳܐ ܗ̱ܘܳܬ܆ ܐܶܠܽܘܠܳܐ ܐܰܝܟܰܢܳܐ ܕܩܰܕܶܡ ܐܶܡܰܪ ܐܶܫܰܥܝܳܐ܆ ܐܰܝܬܺܝ ܡܳܪܝܳܐ ܣܰܝܦܳܐ ܥܰܠ ܚܶܘܝܳܐ ܗܰܘ ܡܥܰܩܡܳܐ[21]܆ ܗܰܘ ܕܥܳܪܶܩ܆ ܗܰܘ ܣܰܓܺܝܳܐܐ ܒܪ̈ܺܝܫܶܐ܆ ܗܰܘ ܕܩܰܕܡܳܝܳܐ ܐܶܬܟܪܰܗ ܡܦܰܬܟܽܘܬܳܐ ܕܒܺܝܫܽܘܬܳܐ܆ ܘܰܐܒܳܐ ܕܰܡܥܰܩܡܽܘܬܳܐ. ܣܰܝܦܳܐ ܕܶܝܢ ܐܳܡܰܪ܆ ܠܚܰܝܠܳܐ ܕܪܽܘܚܳܐ ܩܰܕܷܺܝܫܳܐ܆ ܗܰܘ ܕܰܐܚܶܬ ܝܶܫܽܘܥ ܥܰܠ ܡܰܝ̈ܳܐ܆ ܕܰܠܪ̈ܺܝܫܳܢܰܘܗ̱ܝ ܕܬܰܢܺܝܢܳܐ ܬܰܒܰܪ[22]܆ ܕܗܰܘ ܕܳܐܦ ܗܳܫܳܐ ܬܽܘܒ ܡܰܥܒܕܳܢܽܘܬܶܗ ܡܰܚܬܺܝܢ ܟܳܗ̈ܢܶܐ ܒܪܶܚܡܰܬ ܐ̱ܢܳܫܽܘܬܶܗ܆ ܒܝܰܕ ܡܶܠܬܳܐ ܕܰܐܠܳܗܳܐ ܘܰܨܠܽܘܬܳܐ. ܘܣܳܗܶܕ ܠܗܳܕܶܐ ܦܰܘܠܽܘܤ ܫܠܺܝܚܳܐ ܟܰܕ ܐܳܡܰܪ܆ ܘܣܰܝܦܳܐ ܕܪܽܘܚܳܐ܆ ܗܰܘ ܕܺܐܝܬܰܘܗ̱ܝ ܡܶܠܬܳܐ ܕܰܐܠܳܗܳܐ[23]. ܟܰܕ ܡܶܢ ܗܳܢܳܐ ܗܳܟܺܝܠ ܕܳܚܶܠ ܬܰܢܺܝܢܳܐ܆ ܠܳܐ ܡܣܰܝܒܰܪ ܦܳܣܩܳܐ. ܐܶܠܳܐ ܡܫܰܢܝܳܢܳܐ ܗܳܘܶܐ ܘܥܳܪܽܘܩܳܐ.
ܡܶܢ ܗܳܪܟܳܐ ܐܳܦ ܗܳܠܶܝܢ ܩܰܫ̈ܝܳܬܳܐ܆ ܠܽܐܘܪ̈ܚܳܬܳܐ ܫܰܦ̈ܝܳܬܳܐ ܗܘܰܝ̈. ܠܢܰܦ̈ܫܳܬܳܐ ܓܶܝܪ ܠܳܐ ܡܶܬܬܕܺܝܫܳܢ̈ܝܳܬܳܐ ܘܠܳܐ ܡܶܬܗܰܠܟ̈ܳܢܝܳܬܳܐ ܕܥܰܡ̱ܡ̈ܶܐ܆ ܘܕܶܐܬܩܰܫ̈ܶܝܢ ܡܶܢ ܕܶܚܠܰܬ ܫ̈ܺܐܕܶܐ܆ ܡܶܠܬܳܐ ܫܠܺܝܚܳܝܬܳܐ ܕܶܪܫܰܬ܆ ܘܫܰܦ̈ܝܳܬܳܐ ܥܶܒܕܰܬ ܐܶܢܶܝܢ. ܘܗܳܕܶܐ ܠܰܘ ܡܶܢ ܚܰܝܠܳܐ ܒܰܝܬܳܝܳܐ܆ ܐܶܠܳܐ ܡܶܛܽܠ ܕܟܽܠ ܒܣܰܪ ܚܙܳܐ ܦܽܘܪܩܳܢܶܗ ܕܰܐܠܳܗܳܐ[24]܆ ܗܳܢܰܘ ܕܶܝܢ ܠܰܐܠܳܗܳܐ ܕܓܰܠܝܳܐܺܝܬ ܐܶܬܳܐ ܘܰܦܪܰܩ܆ ܘܚܰܘܺܝ ܒܗܽܘܢ ܒܰܥ̈ܒܳܕܶܐ ܕܦܳܪܽܘܩܳܐ ܐܺܝܬܰܘܗ̱ܝ.
ܐܰܝܟܰܢܳܐ ܗܳܟܺܝܠ ܚܢܰܢ ܟܰܕ ܠܗܳܠܶܝܢ ܐܶܫܬܘܺܝܢܰܢ܆ ܡܥܰܩ̈ܡܶܐ ܡܶܕܶܡ ܐ̱ܢܳܫܺܝ̈ܢ ܐܺܝܬܰܝܢ ܠܘܳܬ ܚ̈ܕܳܕܶܐ ܘܡܰܪܺܝܪ̈ܶܐ ܘܰܩܫܰܝ̈ܳܐ܆ ܘܰܢܟܺܝ̈ܠܶܐ ܒܰܙܢܳܐ ܘܚܰܣܳܡ̈ܶܐ܆ ܘܕܰܠܡܰܟ̈ܝܳܢܘܳܬܳܐ ܕܥܰܠ ܚ̈ܕܳܕܶܐ ܡܶܬܦܰܪܣܺܝܢܰܢ܆ ܘܰܠܒܶܝܬ ܕܺܝܢܳܐ ܢܳܓܕܺܝܢܰܢ܆ ܐܺܝܬ ܐܶܡܰܬܝ ܐܳܦ ܠܗܰܘ ܕܠܳܐ ܡܶܕܶܡ ܚܰܝܳܒ܆ ܘܠܰܐܣܽܘܪ̈ܶܐ ܡܰܫܠܡܺܝܢ ܚ̱ܢܰܢ܆ ܘܡܶܢ ܗܳܠܶܝܢ ܕܺܐܝܬ ܠܗܽܘܢ ܓܳܠܙܺܝܢܰܢ ܠܗܽܘܢ ܥܕܰܡܳܐ ܠܗܳܝ ܕܰܢܩܺܝܡ ܐܶܢܽܘܢ ܥܰܪ̈ܛܶܠܳܝܶܐ. ܫܳܬܶܩ ܐ̱ܢܳܐ ܡܶܢ ܠܶܫܳܢ̈ܶܐ ܗܳܢܽܘܢ ܕܰܡܩܰܛܪܓܺܝܢ ܠܩܰܪܺܝܒܳܐ ܣܪܺܝܩܳܐܺܝܬ. ܒܪܶܗܛܳܐ ܥܳܒܰܪ ܐ̱ܢܳܐ ܠܳܗ̇ ܠܡܰܫܡܰܥܬܳܐ ܗܳܝ ܕܥܰܡ ܗܰܢܺܝܽܐܘܬܳܐ ܚܳܠܒܳܐ ܠܰܣܬ̣ܽܘܪ̈ܝܶܐ ܘܨܽܘܚ̈ܝܳܬܳܐ܆ ܘܠܳܐ ܝܳܕܥܳܐ ܕܓܽܘܡܪ̈ܶܐ ܕܢܽܘܪܳܐ ܡܳܠܝܳܐ ܠܗܶܝܢ ܠܶܐܕܢ̈ܶܐ. ܡܳܢܳܐ ܕܶܝܢ ܐܺ݀ܡܰܪ ܡܶܛܽܠ ܗܳܢܽܘܢ ܕܳܐܦܠܳܐ ܗܶܢܽܘܢ ܠܗܽܘܢ ܐܰܝܟ ܐ̱ܢܳܫ ܢܺܐܡܰܪ ܫܳܠܡܺܝܢ܆ ܘܗܳܫܳܐ ܡܰܢ ܐܺܝܬܰܝܗܽܘܢ ܡܫܰܝ̈ܢܶܐ܆ ܒܰܙܒܰܢ ܕܶܝܢ ܩܫܰܝ̈ܳܐ܆ ܐܶܬܡܳܠܝ̱ ܫܰܓܽܘܫ̈ܬܳܢܳܐ ܝܰܘܡܳܢ ܚܬܺܝܪ̈ܶܐ܆ ܕܰܒܝܰܘܡܳܐ ܐ̱ܚܪܺܢܳܐ ܓܳܚܟܺܝܢ܆ ܒܰܐ̱ܚܪܺܢܳܐ ܕܶܝܢ ܥܰܣ̈ܩܰܝ ܠܦܶܓܥܳܐ ܐܺܝܬܰܝܗܽܘܢ ܘܰܩܫܰܝ̈ܳܐ܆ ܕܚܳܕܶܝܢ ܘܡܶܬܟܰܡܪܺܝܢ ܣܪܺܝܩܳܐܺܝܬ܆ ܕܰܡܣܰܪܩܽܘܬܳܐ ܡܰܢ ܡܚܰܘܶܝܢ ܡܨܰܕܝܳܢܳܐܺܝܬ܆ ܪܶܚܡܰܬ ܟܶܣܦܳܐ ܕܶܝܢ ܡܨܰܝܕܺܝܢ܆ ܕܕܰܟܝܽܘܬܳܐ ܡܶܣܬܰܟܡܺܝܢ ܒܨܶܕܘܳܐ ܘܨܳܐܝܺܢ ܒܬܰܪܥܺܝܬܳܐ܆ ܕܒܳܬܰܪ ܬܶܫܒܽܘܚܬܳܐ ܣܪܺܝܩܬܳܐ ܪܳܕܦܺܝܢ܆ ܘܰܡܩܰܠܣܺܝܢ ܒܡܶܠܬܳܐ ܠܗܳܝ ܕܰܡܡܰܫܚܳܐ܆ ܕܕܰܥܛܰܦܬܳܐ ܡܰܢ ܘܰܕܕܰܩܢܳܐ ܘܰܕܗܳܝ ܕܢܶܡܟܽܘܢ ܓܒܺܝ̈ܢܰܝܗܽܘܢ܆ ܘܰܟܢܺܝܫܳܐܺܝܬ ܠܡܺܐܡܰܪ ܕܰܢܡܰܫܚܽܘܢ ܗܳܠܶܝܢ ܒܛܺܝ̈ܠܳܬܳܐ ܒܡܶܬܬܙܺܝܥܳܢܽܘܬܳܐ ܪܡܺܝܣܬܳܐ ܘܕܰܡܛܰܟ̈ܢܳܬܐ ܢܶܥܒܕܽܘܢ ܦܨ̈ܥܬܳܐ[25]ܕܰܗܠܰܟܬܳܐ ܝܰܨܺܝܦܺܝܢ ܛܳܒ܆ ܕܙܰܘ̈ܥܶܐ ܕܶܝܢ ܘܰܬܙܺܝ̈ܙܘܳܬܳܐ ܠܳܐ ܡܛܰܟ̈ܣܳܬܳܐ ܕܢܰܦܫܳܐ ܘܰܕܪ̈ܽܘܩܥܶܝܗ̇ ܫܟܺܝܪ̈ܳܬܳܐ ܟܺܝܬ ܘܫܺܝ̈ܛܳܬܳܐ܆ ܐܳܦܠܳܐ ܙܥܽܘܪ̈ܝܳܬܳܐ ܪܳܢܶܝܢ. ܐܰ݀ܘܣܶܦ ܥܰܠ ܗܳܠܶܝܢ܆ ܗܳܢܽܘܢ ܕܗܳܫܳܐ ܡܰܢ ܒܥܺܕܬܳܐ܆ ܒܳܬܰܪܟܶܢ ܕܶܝܢ ܠܘܳܬ ܫܳܢܝܽܘܬܳܐ ܗܳܝ ܕܪ̈ܰܟܫܳܐ ܐܳܙܺܠ̱ܝܢ܆ ܘܰܠܘܳܬ ܬܶܐܛܪ̈ܶܐ ܗܳܠܶܝܢ ܕܪܰܦܝܽܘܬܳܐ ܘܰܕܩܰܫܝܽܘܬܳܐ ܘܰܕܚܰܪܡܽܘܬܳܐ ܕܚ̈ܰܝܘܳܬ ܫܶܢܳܐ܆ ܗܳܠܶܝܢ ܕܰܠܚܰܫ̈ܶܐ ܣܰܩܽܘܒ̈ܠܳܝܶܐ ܡܶܬܦܰܠ̈ܓܳܢ܆ ܘܰܠܟܳܐ ܘܰܠܗܰܠ ܡܢܰܬܫ̈ܳܢ ܘܰܡܒܰܣ̈ܒܣܳܢ ܠܳܗ̇ ܠܢܰܦܫܳܐ ܕܳܘܺܝܬܳܐ ܕܒܰܪܢܳܫܳܐ. ܡܰܙܡܽܘܪ̈ܶܐ ܐܺ݀ܡܰܪ܆ ܘܰܙܡܺܝܪ̈ܳܬܳܐ ܕܙܳܢܝܽܘܬܳܐ܆ ܨܠܽܘܬܳܐ ܘܓܽܘܕܳܦܳܐ. ܬܶܢܚ̈ܳܬܳܐ ܘܓܽܘܚ̈ܟܶܐ ܠܳܐ ܡܶܬܠܰܒ̈ܟܳܢܶܐ܆ ܘܕܰܐܝܟ ܕܡܶܢ ܩܰܕܣܳܐ ܕܥܰܠ ܢܽܘܪܳܐ ܡܶܬܛܰܪܛܢܺܝܢ.
ܗܳܠܶܝܢ ܒܺܝ̈ܫܳܬܳܐ ܡܦܰܬܟ̈ܳܬܳܐ ܘܰܣܕܺܝ̈ܩܳܬܳܐ[26]܆ ܕܗܰܘ ܚܶܘܝܳܐ ܥܩܰܠܩܠܳܐ ܘܰܡܥܰܩܡܳܐ ܐܺܝܬܰܝܗܶܝܢ. ܝܰܠ̈ܕܶܐ ܕܪ̈ܺܝܫܶܐ ܣܰܓܺܝ̈ܶܐܐ ܕܗܰܘ܆ ܗܳܠܶܝܢ ܕܥܰܠ ܡܰܝ̈ܳܐ ܬܰܒܰܪ ܘܪܰܨܶܨ ܐܶܢܽܘܢ ܝܶܫܽܘܥ ܐܰܠܳܗܳܐ ܪܰܒܳܐ. ܡܶܢ ܗܳܠܶܝܢ ܡܰܢ ܢܶܥܪܽܘܩ܆ ܠܘܳܬ ܕܶܝܢ ܫܰܦܺܝܪܽܘܬ ܛܽܘܗܡܳܐ ܕܗܰܘ ܚܰܕ ܪܺܝܫܳܐ ܢܚܽܘܪ܆ ܗܰܘ ܕܡܶܢܶܗ ܪܽܘܚܳܢܳܐܺܝܬ ܐܶܬܺܝܠܶܕܢܰܢ. ܘܒܳܬܰܪ ܚܕܳܢܳܝܽܘܬܳܐ ܘܰܦܫܺܝܛܽܘܬܳܐ ܕܰܫܪܳܪܳܐ ܢܶܪܕܽܘܦ.
ܚܳܙܶܝܢ ܐܢ̱ܬܽܘܢ ܐܰܝܟܰܢܳܐ ܛܽܘܦܬܳܐ ܚܕܳܐ ܙܥܽܘܪܬܳܐ ܡܶܢ ܫܶܦ̈ܥܰܘܗ̱ܝ ܕܝܽܘܪܕܢܳܢ܆ ܐܰܛܺܝܦܰܬ ܘܰܐܫܩܝܰܬ ܘܰܐܢܗܪܰܬ܆ ܠܒܰܝܬܽܘܢܳܐ ܕܺܝܠܝ ܝܰܒܺܝܫܳܐ[27] ܘܠܳܐ ܬܰܠܺܝܠܳܐ ܘܰܕܠܳܐ ܙܰܗܪܳܐ܆ ܐܰܝܟܰܢܳܐ ܕܢܶܬܡܨܶܐ ܠܦܽܘܬ ܗܳܝ ܕܡܶܬܕܰܪܟܳܐ ܠܺܝ܆ ܕܳܐܦ ܦܳܬܽܘܪܳܐ ܗܳܢܳܐ ܢܣܺܝܡ ܩܕܳܡܰܝܟܽܘܢ܆ ܠܗܰܘ ܕܟܰܕ ܐܳܦ ܐܢ̱ܬܽܘܢ ܒܟܽܘܢ ܒܰܥܒܳܕܳܐ ܡܦܰܬܶܝܢ ܐܢ̱ܬܽܘܢ܆ ܢܽܘܗܪܳܐ ܥܰܬܺܝܪܳܐ ܒܢܰܦܫ̈ܳܬܟܽܘܢ ܬܥܰܡܪܽܘܢ܆ ܘܬܶܫܬܘܽܘܢ ܠܡܰܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ܆ ܥܰܡ ܪܽܘܚܳܐ ܩܰܕܺܝܫܳܐ ܘܛܳܒܳܐ ܘܡܰܥܒܶܕ ܚܰܝ̈ܶܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܡܺܐܡܪܳܐ ܕܡܳܐܐ ܘܰܬܠܳܬܳܐ.
ܡܪܩܘܣ. 11: 10 ܐܦ ܡܰܠܰܐܟܺܝ. 3: 1 [1]