ܡܺܐܡܪܳܐ ܕܡܳܐܐ ܘܰܬܪܶܝܢ

ܥܰܠ ܡܰܠܦܳܢܳܐ ܪܰܒܳܐ ܒܰܣܶܝܠܺܝܽܘܤ܆ ܘܰܓܪܺܝܓܽܘܪܺܝܽܘܤ ܡܡܰܠܶܠ ‌ܐܰ‌ܠܳܗܳܝ̈ܳܬܳܐ.

102: ܡܽܘܫܶܐ ܗܰܘ ܡܢܺܝܚܳܢܳܐ ܕܰܐ‌ܠܳܗܳܐ܆ ܘܕܶܐܣܬܗܶܕ ܕܺܐܝܬܰܘܗ̱ܝ ܡܗܰܝܡܢܳܐ ܒܟܽܠܶܗ ܒܰܝܬܶܗ܆^[1] ܘܰܕܡܶܫܟܰܚ ܠܰܡܕܰܒܳܪܽܘ ܒܕܺܝܢܳܐ ܠܡ̈ܶܠܶܐ ܗܳܠܶܝܢ ܕܶܐܬܗܰܝܡܰܢ܆ ܟܰܕ ܢܣܰܒ ܠܢܳܡܽܘܣܳܐ ܗܰܘ ܕܰܒܠܽܘܚ̈ܶܐ܆ ܕܰܒܥܶܣܪܳܐ ܦܽܘܩ̈ܕܳܢܶܐ ܡܣܰܝܰܟ ܗ̱ܘܳܐ܆ ܕܚܳܒܫܺܝܢ ܗ̱ܘܰܘ ܗܳܠܶܝܢ ܕܠܳܐ ܙܳܕܶܩ ܕܢܶܬܥܰܒ̈ܕܳܢ ܘܗܳܠܶܝܢ ܕܙܳܕܶܩ ܕܢܶܣܬܰܥܪ̈ܳܢ܆ ܐܰܝܟܰܢܳܐ ܕܠܳܐ ܡܶܕܶܡ ܡܶܢ ܣܽܘܥܪ̈ܳܢܶܐ ܗܳܠܶܝܢ ܕܰܒܥܳܠܡܳܐ ܢܶܦܶܠ ܠܒܰܪ ܡܶܢ ܣܝܳܡ ܢܳܡܽܘܣܳܐ ܕܺܝܠܗܽܘܢ܆ ܐܶܠܳܐ ܕܢܶܗܘܶܐ ܚܒܺܝ̈ܫܳܢ ܟܽܠܗܶܝܢ ܒܚܰܝܠܳܐ ܕܗܳܝ ܙܥܽܘܪܽܘܬ ܡ̈ܶܠܶܐ ܐܰ‌ܠܳܗܳܝ̈ܳܬܳܐ܆ ܟܰܕ ܢܚܶܬ ܡܶܢ ܪܺܝܫ ܩܰܪܩܰܦܬܳܐ ܕܛܽܘܪܳܐ ܕܣܺܝܢܰܝ܆ ܣܳܡܶܗ ܩܕܳܡܰܝܗܽܘܢ ܘܰܩܪܳܝܗ̱ܝ ܠܗܳܢܳܐ ܠܺܐܝܣܪܳܐܶܝܠ. ܘܡܶܢ ܒܳܬܰܪ ܡܰܪܕܺܝܬ̣ ܐܽܘܪܚܳܐ ܕܰܐܪܒܥܺܝܢ ܫܢܰܝ̈ܳܐ ܗܳܝ ܪܳܕܽܘܝܬܳܐ ܘܡܰܠܦܳܢܺܝܬܳܐ܆ ܟܰܕ ܗܳܐ ܡܶܟܺܝܠ ܠܘܳܬ ܣܦܳܪ̈ܰܘܗ̱ܝ ܒܕܽܘܟ ܕܝܽܘܪܕܢܳܢ ܗܘ̣ܳܐ܆ ܕܙܳܕܩܳܐ ܐܰܣܒܰܪ ܡܐܠܽܘܢ ܕܶܝܢ ܕܗܳܝ ܕܝܰܬܺܝܪ ܫܰܪܺܝܪܳܐ ܢܺܐܡܰܪ܆ ܐܶܬܬܙܺܝܥ ܡܶܢ ܐܰ‌ܠܳܗܳܐ܆ ܕܰܠܦܽܘܩ̈ܕܳܢܰܘܗ̱ܝ ܕܢܳܡܽܘܣܳܐ ܢܰܪܘܰܚ܆ ܘܢܶܓܠܶܐ ܩܰܠܺܝܠ ܡܶܢ ܥܽܘܬܪܳܐ ܕܪܽܘܚܳܐ ܗܰܘ ܕܡܶܬܛܰܫܶܐ ܗ̱ܘܳܐ ܒܰܟܬܺܝܒܬܳܐ܆ ܘܰܐܝܟ ܕܡܶܢ ܟܰܪܣܳܐ ܚܺܐܪܬܳܐ܆ ܝܰܠܕܳܐ ܡܫܰܡܠܝܳܐ ܘܕܰܒܙܰܒܢܶܗ ܢܶܦܰܩ. ܙܳܕܶܩ ܗ̱ܘܳܐ ܓܶܝܪ ܙܳܕܶܩ ܗ̱ܘܳܐ܆ ܕܟܰܕ ܩܪܶܒ ܗ̱ܘܳܐ ܢܳܡܽܘܣܳܐ ܠܝܽܘܪܕܢܳܢ܆ ܢܶܬܢܰܗܰܪ ܗ̱ܘܳܐ ܘܪܽܘܚܳܢܳܝܳܐ ܢܶܬܚܙܶܐ. ܗܳܝ ܕܟܰܕ ܠܘܳܬܳܗ̇ ܐܳܦ ܦܰܘܠܽܘܤ ܚܳܐܰܪ ܗ̱ܘܳܐ ܐܳܡܰܪ ܗ̱ܘܳܐ܆ ܝܳܕܥܺܝܢܰܢ ܓܶܝܪ ܕܢܳܡܽܘܣܳܐ ܪܽܘܚܳܢܳܝܳܐ ܐܺܝܬܰܘܗ̱ܝ^[2].

ܠܗܳܢܳܐ ܗܳܟܺܝܠ ܣܝܳܡܳܐ ܦܰܬܝܳܐ ܘܰܪܘܺܝܚܳܐ܆ ܘܡܰܠܦܳܢܽܘܬܳܐ ܢܳܡܽܘܣܳܝܬܳܐ ܟܰܕ ܐܰܫܠܶܡ ܡܽܘܫܶܐ܆ ܫܰܡܗܶܗ ܠܰܟܬܳܒܳܐ ܬܶܢܝܳܢ ܢܳܡܽܘܣܳܐ. ܗܰܘ ܕܒܶܗ ܟܰܕ ܒܰܕܡܽܘܬ ܠܰܚܡܳܐ ܠܗܳܠܶܝܢ ܥܶܣܪܳܐ ܦܶܬܓܳܡ̈ܶܐ ܕܢܳܡܽܘܣܳܐ ܡܩܰܨܶܐ ܙܥܽܘܪܝܳܐܺܝܬ ܘܰܡܕܰܩܶܩ܆ ܡܫܰܪܬܚܳܐܺܝܬ ܡܬܰܪܣܶܐ ܠܶܗ ܠܫܳܡܽܘܥܳܐ. ܘܰܡܚܰܘܶܐ ܕܩܶܪܝܳܢܶܗ ܕܗܳܢܳܐ ܠܰܘ ܒܨܺܝܪ ܠܗܳܢܽܘܢ ܕܺܐܝܬܰܝܗܽܘܢ ܪ̈ܺܝܫܳܢܶܐ ܐܺܝܬܰܘܗ̱ܝ ܡܰܘܬܪܳܢܳܐ܆ ܐܰܘ ܠܗܳܢܽܘܢ ܕܺܐܝܬܰܝܗܽܘܢ ܬܚܶܝܬ ܪܺܝܫܳܐ. ܟܰܕ ܐܳܡܰܪ ܗܳܟܰܢܳܐ. ܘܢܶܗܘܶܐ ܕܶܐܡܰܬܝ ܕܢܶܬܶܒ ܥܰܠ ܪܺܝܫܳܢܽܘܬܶܗ܆ ܘܢܶܟܬܽܘܒ ܠܶܗ ܠܬܶܢܝܳܢ ܢܳܡܽܘܣܳܐ ܗܳܢܳܐ ܒܰܟܬܳܒܳܐ ܡܶܢ ܠܘܳܬ ܟܳܗ̈ܢܶܐ ܗܳܢܽܘܢ ܠܶܘܳܝ̈ܶܐ܆ ܘܢܶܗܘܶܐ ܥܰܡܶܗ. ܘܢܶܗܘܶܐ ܩܳܪܶܐ ܒܶܗ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗ̱ܝ܆ ܐܰܝܟܰܢܳܐ ܕܢܺܐܠܰܦ ܠܡܶܕܚܰܠ ܠܡܳܪܝܳܐ ܐܰ‌ܠܳܗܶܗ. ܠܡܶܛܰܪ ܟܽܠܗܽܘܢ ܦܽܘܩ̈ܕܳܢܰܘܗܝ܆ ܘܙܶܕܩ̈ܶܐ ܗܳܠܶܝܢ ܢܶܥܒܶܕ. ܐܰܝܟܰܢܳܐ ܕܠܳܐ ܢܶܬܬܪܺܝܡ ܠܶܒܶܗ ܡܶܢ^[3] ܐܰܚܰܘ̈ܗ̱ܝ. ܐܰܝܟܰܢܳܐ ܕܠܳܐ ܢܶܥܒܰܪ ܡܶܢ ܦܽܘܩ̈ܕܳܢܶܐ܆ ܠܝܰܡܺܝܢܳܐ ܐܰܘ ܠܣܶܡܳܠܳܐ^[4].

ܘܗܳܠܶܝܢ ܡܰܢ ܡܽܘܫܶܐ ܓܰܘܢܳܐܺܝܬ܆ ܟܰܕ ܠܟܽܠܗܽܘܢ ܪ̈ܺܝܫܳܢܶܐ ܡܦܰܩܶܕ. ܠܶܐܦܝܣ̈ܩܽܘܦܶܐ ܕܶܝܢ܆ ܢܳܡܽܘܣܳܐ ܡܰܢ ܦܽܘܩܕܳܢܶܗ ܕܦܰܘܠܽܘܤ܆ ܕܒܰܒ̈ܢܳܬ ܩ̈ܳܠܶܐ ܙܥܽܘܪ̈ܝܳܬܳܐ ܡܫܰܘ̈ܕܥܳܢܝܳܬܳܐ ܕܣܰܓܺܝܽܐܘܬܳܐ ܘܪܰܒܘܳܬܳܐ ܕܣܽܘ̈ܟܳܠܶܐ ܡܣܰܝܶܟ ܒܦܳܣܺܝ̈ܩܳܬܳܐ ܘܳܐܡܰܪ܆ ܕܙܳܕܶܩ ܗܳܟܺܝܠ ܠܶܐܦܝܣܩܘܦܐ܆ ܕܰܕܠܳܐ ܥܶܕܠܳܝ ܢܶܗܘܶܐ ܐܺܝܬܰܘܗ̱ܝ. ܓܰܒܪܳܐ ܕܰܚܕܳܐ ܐܰܢ̱ܬܬܳܐ. ܥܺܝܪܳܐ. ܢܰܟܦܳܐ ܟܢܺܝܟܳܐ. ܪܳܚܶܡ ܐܰܟܣ̈ܢܳܝܶܐ. ܡܰܠܦܳܢܳܝܳܐ^[5]. ܘܗܳܢܶܝܢ ܕܰܐܟܚܕܳܐ ܥܰܡ ܗܳܠܶܝܢ ܡܙܰܘ̈ܓܳܢ.

ܬܶܢܝܳܢ ܢܳܡܽܘܣܳܐ ܕܶܝܢ܆ ܕܽܘܒܳܪܳܐ ܘܡܶܠܬܳܐ ܕܒܰܣܶܝܠܺܝܽܘܤ ܘܰܓܪܺܝܓܽܘܪܺܝܽܘܤ܆ ܕܰܠܗܰܘܢܳܐ ܕܢܳܡܽܘܣܳܐ ܟܳܗܢܳܝܳܐ ܐܰܝܟ ܕܡܰܨܝܳܐ ܝܰܬܺܝܪܳܐܺܝܬ ܪܶܘܚܰܬ̣ ܘܦܶܬ̣ܝܰܬ̣ ܒܗܽܘܢ ܒܣܽܘܥܪ̈ܳܢܶܐ܆ ܘܣܺܝܡܳܐ ܩܕܳܡ ܟܽܠܗܽܘܢ ܗܳܢܽܘܢ ܕܨܳܒܶܝܢ ܠܡܺܐܠܰܦ܆ ܐܰܝܟ ܕܰܠܡܰܠܦܳܢܽܘܬܳܐ ܘܰܠܬܽܘܪܳܨܳܐ.

ܙܳܕܶܩ ܗ̱ܘܳܐ ܗܳܟܺܝܠ ‌ܐܰܝܟ ܡܰܪܬܝܳܢܽܘܬܶܗ ܕܪܰܒܳܐ ܡܽܘܫܶܐ܆ ܕܰܠܬܶܢܝܳܢ ܢܳܡܽܘܣܳܐ ܗܳܢܳܐ ܪܺܝܫ ܟܳܗܢܳܝܳܐ܆ ܟܽܠ ܚܰܕ ܐܶܦܝܣܩܘܦܐ ܐܶܡܰܬܝ ܕܢܶܬܶܒ ܥܰܠ ܪܺܝܫܳܢܽܘܬܶܗ ܢܶܟܬܒܺܝܘܗ̱ܝ ܠܶܗ܆ ܐܰܝܟܰܢܳܐ ܕܢܶܗܘܶܐ ܐܺܝܬܰܘܗ̱ܝ ܥܰܡܶܗ܆ ܘܰܕܢܶܗܘܶܐ ܩܳܪܶܐ ܒܶܗ ܠܢܰܦܫܶܗ܆ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܘ̈ܗ̱ܝ. ܐܰܝܟܰܢܳܐ ܕܢܺܐܠܰܦ ܠܡܶܕܚܰܠ ܠܡܳܪܝܳܐ ܐܰ‌ܠܳܗܶܗ܆ ܠܡܶܛܰܪ ܟܽܠܗܽܘܢ ܦܽܘܩ̈ܕܳܢܰܘܗ̱ܝ. ܐܰܝܟܰܢܳܐ ܕܠܳܐ ܢܶܬܬܪܺܝܡ ܠܶܒܶܗ ܡܶܢ ܐܰܚܰܘ̈ܗ̱ܝ. ܐܰܝܟܰܢܳܐ ܕܠܳܐ ܢܶܥܒܰܪ ܡܶܢ ܦܽܘܩ̈ܕܳܢܶܐ ܠܝܰܡܺܝܢܳܐ ܐܰܘ ܠܣܶܡܳܠܳܐ.

ܐܶܠܳܐ ܐܶܢܳܐ ܟܰܕ ܕܳܚܶܠ ‌ܐ̱ܢܳܐ ܡܶܢ ܣܝܳܡܶܗ ܕܰܩܕܡܳܝ ܕܗܳܢܳܐ ܬܶܢܝܳܢ ܢܳܡܽܘܣܳܐ܆ ܘܚܳܙܶܐ ܐ̱ܢܳܐ ܕܥܰܡܶܗ ܕܰܣܝܳܡ ܢܳܡܽܘܣܳܐ ܡܰܩܪܶܒ ܟܺܝܬ ܘܢܳܨܶܐ ܕܽܘܒܳܪܳܐ ܕܺܝܠܝ܆ ܡܰܗܦܶܟ ܐ̱ܢܳܐ ܥܰܝ̈ܢܰܝ ܡܶܢ ܦܶܢܩܺܝܬܳܐ ܕܝܽܘܠ̈ܦܳܢܶܐ ܗܳܢܽܘܢ ܟܳܗ̈ܢܳܝܶܐ܆ ܘܚܰܒܺܝܒܬܳܐ ܕܳܐܶܢ ܐ̱ܢܳܐ܆ ܠܗܳܝ ܕܳܐܦ ܝܰܘܡܳܢܳܐ ܒܰܠܚܽܘܕ ܐܰܝܟ ܕܒܰܡܫܰܠܛܽܘܬܳܐ ܡܶܕܶܡ܆ ܒܥܽܘܗܕܳܢܳܐ ܚܰܣܝܳܐ ܕܗܳܢܽܘܢ ܓܰܒܪ̈ܶܐ ܩܰܕܺܝ̈ܫܶܐ܆ ܠܘܳܬ ܢܰܦܫܝ ܐܶ݀ܚܪܽܘܓ ܘܶܐ݀‌ܠܛܽܘܫ܆ ܘܡܶܕܶܡ ܡܶܢ ܫܽܘܚܬܳܐ ܐܶ݀ܓܪܽܘܕ ܘܶܐ݀ܫܕܶܐ ܡܶܢܝ ܕܰܚܛܺܝܬܳܐ ܗܳܝ ܥܰܬܺܝܩܬܳܐ܆ ܘܕܳܐܟܠܳܐ ܘܰܒܩܰܠܺܝܠ ܩܰܠܺܝܠ ܘܰܡܛܰܫܝܳܐܺܝܬ ܡܛܰܠܩܳܐ.

ܐܶ‌ܠܽܘ ܡܰܢ ܓܶܝܪ ܒܝܰܕ ܗܳܠܶܝܢ ܕܕܳܡܶܝܢ ܪܳܕܶܐ ܗ̱ܘܺܝܬ܆ ܘܰܩܢܶܐ ܗ̱ܘܺܝܬ ܣܰܝܦܳܐ ܬܪ̈ܰܝܳܢܰܝ ܦܽܘ̈ܡܶܐ ܗܰܘ ܕܗܳܢܽܘܢ܆ ܕܦܳܣܶܩ ܡܰܢ ܠܚܰܫܰܘ̈ܗ̱ܝ ܕܒܶܣܪܳܐ ܒܝܰܕ ܡܝܰܬܪ̈ܳܬܳܐ ܣܳܥܽܘܪ̈ܝܳܬܳܐ܆ ܒܡܶܠܬܳܐ ܕܶܝܢ ܕܪܽܘܚܳܐ ܥܳܒܰܪ ܒܡܰܠܦܳܢܽܘܬܳܐ ܘܥܳܐܶܠ ܒܢܰܦ̈ܫܳܬܳܐ ܗܳܠܶܝܢ ܗܽܘ̈ܠܳܢܳܝܳܬܳܐ ܘܰܕܝܰܬܺܝܪ ܥܰܒ̈ܝܳܢ ܘܰܕܠܳܐ ܟܳܐܶܒ ܠܗܶܝܢ܆ ܡܶܫܟ̈ܚܳܢ ܗ̱ܘܰܝ̈ ܗܳܠܶܝܢ ܕܺܝܠܝ܆ ܕܟܰܕ ܒܗܳܠܶܝܢ ܕܗܳܢܽܘܢ ܓܳܫ̈ܦܳܢ ܗ̱ܘܰܝ̈܆ ܠܰܟܬܺܝܒܬܳܐ ܗܳܝ ܕܡ̈ܰܬܠܶܐ ܢܡܰܠ̈ܝܳܢ ܘܰܐܚܪܳܢܝܳܐܺܝܬ ܢܙܰܡ̈ܢܳܢ ܠܺܝ ܝܽܘܬܪܳܢܳܐ܆ ܟܬܺܝܒ ܓܶܝܪ ܕܦܰܪܙܠܳܐ ܠܦܰܪܙܠܳܐ ܠܳܛܶܫ^[6]. ܟܰܕ ܕܶܝܢ ܩܺܝܢܕܽܘܢܽܘܣܳܐ ܥܳܒܶܕ ܐ̱ܢܳܐ ܐܰܝܟܰܢܳܐ ܕܶܐܡܪܶܬ܆ ܕܶܐ݀ܬܛܰܠܰܩ ܘܰܐ݀ܘܦܶܐ ܒܫܽܘܚܬܳܐ ܕܰܚܛܺܝܬܳܐ܆ ܚܫܰܚܬܳܐ ܕܡܰܠܛܰܫܬܳܐ ܢܡܰܠܽܘܢ ܗܶܢܽܘܢ ܐܰܒܳܗ̈ܳܬܳܐ ܟܰܕ ܡܶܬܥܰܗܕܺܝܢ ܡܶܢܰܢ܆ ܗܳܢܽܘܢ ܕܰܠܘܳܬܗܽܘܢ ܐܰܝܟ ܕܰܠܡܺܐܡܰܪ ܐܰܝܟ ܕܰܒܚܰܒ̈ܠܶܐ ܢܳܓܶܕ ܐ̱ܢܳܐ ܠܳܗ̇ ܠܢܰܦܫܝ ܡܥܳܩܬܳܐ ܘܕܳܘܺܝܬܳܐ܆ ܕܳܐܦܠܳܐ ܠܕܽܘܟܪܳܢܗܽܘܢ ܡܶܬܪܰܡܝܳܐ ܡܶܛܽܠ ܡܰܟܣܳܢܽܘܬܳܐ܆ ܐܶܠܳܐ ܕܚܳܠܕܳܐ ܒܰܐܪܥܳܐ ܘܡܶܬܛܰܫܝܳܐ ܘܪܳܥܠܳܐ ܐܰܝܟ ܥܳܪܽܘܩܬܳܐ ܕܡܶܢ ܥܰܡ̈ܠܶܐ ܕܰܡܝܰܬܪܽܘܬܳܐ܆ ܘܕܰܚܺܝܠܳܐ ܕܕܰܠܡܳܐ ܒܕܽܘܟ ܡܶܕܶܡ ܛܳܒܳܐ ܬܶܣܥܽܘܪ܆ ܐܳܦ ܟܰܕ ܒܳܗܬܳܐ. ܘܳܐܡܰܪ ܐ̱ܢܳܐ ܠܘܳܬܳܗ̇܆ ܗܳܠܶܝܢ. ܠܡܳܢܳܐ ܬܺܐܙܰܠ ‌ܐܰܢ̱ܬܝ ܘܥܳܪܩܳܐ ܐܰܢ̱ܬܝ ܡܶܢ ܗܳܠܶܝܢ ܬܰܚ̈ܘܝܳܬܳܐ ܛܳܒ̈ܳܬܳܐ܆ ܐܳܘ ܐܰܢ̱ܬܝ ܕܰܚܽܘܠܬܳܢܺܝܬܳܐ ܘܕܳܘܺܝܬܳܐ. ܬܳܝ ܢܺܐܙܰܠ ܠܘܳܬ ܗܳܠܶܝܢ ܐܢܕܪ̈ܝܢܛܐ ܕܫܰܦܺܝܪܽܘܬ ܕܶܚܠܬܳܐ ܒܝܰܘܡܳܐ ܕܕܽܘܟܪܳܢܗܽܘܢ܆ ܐܰܝܟ ܕܰܒܚܰܓܳܐ ܡܝܰܩܪܳܐ ܘܢܰܨܺܝܚܳܐ܆ ܘܢ݀ܶܛܰܢ ܡܶܕܶܡ ܡܶܢ ܢܶܨܚܳܢܰܝ̈ܗܽܘܢ ܫܰܦܺܝܪ̈ܶܐ܆ ܘܢܶܪܰܓ ܠܩܰܢܺܝ̈ܘܳܬܳܐ ܕܗܳܠܶܝܢ ܕܕܳܡ̈ܝܳܢ܆ ܐܰܝܟܰܢܳܐ ܕܢܶܗܘܶܐ ܩܶܢܝܳܢܳܐ ܕܰܐ‌ܠܳܗܳܐ. ܟܽܠܗܽܘܢ ܡܰܢ ܓܶܝܪ ܒܢܰܝ̈ܢܳܫܳܐ ܒܪܺܝܬܳܐ ܕܗܰܘ ܕܥܳܒܶܕ ܐܺܝܬܰܝܗܽܘܢ. ܩܶܢܝܳܢܳܐ ܕܶܝܢ ܕܺܝܠܗ ܙܥܽܘܪ̈ܶܐ܆ ܘܗܳܢܽܘܢ ܕܳܐܦܠܳܐ ܡܶܕܶܡ ܐ̱ܚܪܺܢܳܐ ܒܰܥܒܳܕܳܐ ܘܰܒܡܶܠܬܳܐ ܝܳܕܥܺܝܢ ܐܶܠܳܐ ܐܶܢ ܠܰܐܠܳܗܳܐ܆ ܘܰܠܚܰܫ̈ܶܐ ܕܨܰܥܪܳܐ ܠܳܐ ܡܶܫܬܰܥܒܕܺܝܢ. ܗܳܕܶܐ ܐܳܦ ܐܶܫܰܥܝܳܐ ܟܰܕ ܡܨܰܠܶܐ ܐܳܡܰܪ ܗ̱ܘܳܐ. ܡܳܪܝܳܐ ܐܰ‌ܠܳܗܳܐ ܕܺܝܠܰܢ ܩܢܺܝ ܠܰܢ. ܡܳܪܝܳܐ ܠܒܰܪ ܡܶܢܳܟ ܐ̱ܚܪܺܢܳܐ ܠܳܐ ܝܳܕܥܺܝܢ ܚ̱ܢܰܢ. ܠܰܫܡܳܐ ܕܺܝܠܳܟ ܡܫܰܡܗܺܝܢܰܢ^[7].

ܥܰܣܩ̈ܶܐ ܡܰܢ ܓܶܝܪ ܐܺܝܬܰܝܗܽܘܢ ܥܰܡ̈ܠܶܐ ܘܕܽܘ̈ܥܬܶܐ ܕܰܡܝܰܬܪܽܘܬܳܐ܆ ܘܝܰܬܺܝܪܳܐܺܝܬ ܗܳܠܶܝܢ ܕܥܰܡ ܟܳܗܢܽܘܬܳܐ ܘܪܳܥܝܽܘܬܳܐ ܕܥܶܪ̈ܒܶܐ ܡܠܺܝ̈ܠܶܐ ܐܰܟܚܕܳܐ ܡܬܰܚܡܺܝܢ ܘܰܡܛܰܟܣܺܝܢ܆ ܘܗܳܠܶܝܢ ܕܠܳܐ ܐܺܝܬ ܠܡܺܐܡܰܪ܆ ܒܝܰܕ ܓܰܒܪ̈ܶܐ ܕܝܢ ܗܳܢܽܘܢ ܛܰܢܳܢ̈ܶܐ ܘܰܡܫܰܒ̈ܚܶܐ ܕܬܰܪܶܨܘ ܐܶܢܽܘܢ܆ ܢܳܓܕܺܝܢ ܠܘܳܬ ܡܕܰܡܝܳܢܽܘܬܳܐ܆ ܠܗܳܢܽܘܢ ܕܺܐܝܬܰܝܗܽܘܢ ܡܰܗܡ̈ܝܳܢܶܐ ܘܡܰܐܝ̈ܢܶܐ.

ܙܳܕܶܩ ܗܳܟܺܝܠ ܕܰܠܘܳܬ ܗܳܢܽܘܢ ܒܬܰܪܥܺܝܬܰܢ ܢܶܪܗܰܛ܆ ܘܢܶܪܕܽܘܦ ܒܰܛܢܳܢܳܐ ܒܳܬܰܪ ܗܳܢܽܘܢ ܕܰܪܥܰܘ ܥܰܡ ܝܺܕܰܥܬܳܐ ܠܡܰܪܥܺܝܬܳܐ ܕܡܳܪܝܳܐ܆ ܗܳܢܽܘܢ ܡܶܬܟܰܬܫܳܢ̈ܶܐ ܙܪ̈ܺܝܙܶܐ ܕܰܐܓܽܘ̈ܢܶܐ ܟܳܗ̈ܢܳܝܶܐ܆ ܗܳܢܽܘܢ ܕܣܳܝܩܺܝܢ ܗ̱ܘܰܘ܆ ܗܳܝ ܕܰܚܠܳܦ ܡܫܺܝܚܳܐ ܢܶܚܫܽܘܢ܆ ܗܳܢܽܘܢ ܕܡܰܠܦܺܝܢ ܗ̱ܘܰܘ ܡܶܢ ܐܰܝܠܶܝܢ ܕܶܐܬܟܰܬܰܫܘ܆ ܕܡܳܢܳܐ ܗܝ ܗܳܝ ܕܰܡܡܰܠܶܠ ܗ̱ܘܺܝܬ ܒܣܳܗ̈ܕܘܳܬܳܟ ܩܕܳܡ ܡܰܠ̈ܟܶܐ ܘܠܳܐ ܒܳܗܶܬ ܗ̱ܘܺܝܬ^[8]܆ ܘܰܕܙܳܕܶܩ ܠܗܰܘ ܕܡ̈ܶܠܶܐ ܐܰ‌ܠܳܗܳܝ̈ܳܬܳܐ ܫܩܺܝܠ ܒܦܽܘܡܶܗ܆ ܕܚܺܝܨܽܘܬܳܐ ܣܳܗܕܳܝܬܳܐ ܢܶܗܘܶܐ ܐܺܝܬ ܠܶܗ ܘܰܕܝܰܬܺܝܪ ܡܛܰܝܒܳܐ ܠܘܳܬ ܗܳܝ ܕܢܶܚܰܫ. ܣܳܗ̈ܕܘܳܬܳܐ ܓܶܝܪ ܡܶܛܽܠ ܗܳܕܶܐ ܠܡ̈ܶܠܶܐ ܐܰ‌ܠܳܗܳܝ̈ܳܬܳܐ ܫܰܡܰܗ ܢܒܺܝܳܐ܆ ܘܠܰܘ ܕܰܐܪܬܳܕܽܘܟܣܺܝܰܐ ܗܳܝ ܕܠܳܐ ܩܺܝܢܕܽܘܢܽܘܤ ܒܠܶܫܳܢܳܐ ܒܰܠܚܽܘܕ ܢܛܰܒܶܒ ܘܰܢܪܰܘܪܶܒ܆ ܢܶܗܘܶܐ ܕܶܝܢ ܠܒܺܝܫܺܝܢܰܢ ܣܰܓܺܝ ܟܢܺܝܟܳܐܺܝܬ ܦܰܪܨܽܘܦܽܘܢܳܐ ܫܐܺܝܠܳܐ ܕܡܰܣܰܒ ܒܰܐܦ̈ܶܐ ܘܕܰܡܨܰܕܝܳܢܽܘܬܳܐ܆ ܘܩܰܦܺܝܠܽܘܣܳܐ^[9] ܢܶܥܒܶܕ ܠܡܶܠܬܳܐ ܕܰܫܪܳܪܳܐ܆ ܘܗܳܠܶܝܢ ܡܰܢ ܢܡܰܠܶܠ܆ ܗܳܠܶܝܢ ܕܶܝܢ ܬܚܶܝܬ ܫܶܢܳܐ ܢܶܛܰܪ܆ ܘܰܠܙܰܒ̈ܢܶܐ ܢܶܬܥܰܒܕܰܕ܆ ܘܚܰܝ̈ܶܐ ܐܰܪ̈ܢܒܳܝܶܐ ܢܺܚܶܐ܆ ܘܢܶܗܘܶܐ ܩܳܢܛܺܝܢܰܢ ܘܪܳܥܠܺܝܢܰܢ܆ ܕܕܰܠܡܳܐ ܒܕܽܘܟ ܐ̱ܢܳܫ ܡܶܢ ܫܒܳܒܰܝ̈ܢ ܢܶܪܓܰܫ ܒܐܘܪܬܘܕܘܟܣܝܰܐ ܕܺܝܠܰܢ ܘܩܺܝܢܕܽܘܢܘܣܳܐ ܢܶܥܒܶܕ܆ ܘܡܶܛܽܠ ܗܳܕܶܐ ܢܶܬܒܰܩܶܐ ܕܠܰܐܝܟܳܐ ܢܶܨܛܠܽܘܢ ܣܽܘܥܪ̈ܳܢܶܐ.

ܟܰܕ ܗܳܠܶܝܢ ܟܪܺܝܗܳܐ ܐܰܢ̱ܬܝ ܐܳܘ ܢܰܦܫܝ܆ ܠܘܳܬ ܐܳܣܰܘ̈ܳܬܳܐ ܐܶܣܬܰܪܗܰܒܝ. ܠܝܽܘܩ̈ܢܶܐ ܕܒܰܣܶܝܠܺܝܽܘܤ ܘܕܰܓܪܺܝܓܽܘܪܺܝܽܘܤ܆ ܕܰܒܝܰܕ ܛܽܘܥܝ̣ܰܝ̣ ܘܡܰܗܡܝܳܢܽܘܬܳܐ ܐܶܬܠܚܺܝܘ ܡܶܢܶܟܝ܆ ܬܽܘܒ ܝܰܘܡܳܢܳܐ ܡܶܢ ܕܪܺܝܫ ܗܦܽܘܟܝ̱ ܨܽܘܪܝ̱ ܐܰܢ̱ܬܝ ܒܶܟܝ. ܠܳܐ ܬܶܪܚܩܺܝܢ ܡܶܢ ܨܰܠ̈ܡܶܐ ܐܰ‌ܠܳܗܳܝ̈ܶܐ ܕܗܳܢܽܘܢ. ܕܰܡܳܝ ܒܟܽܠܶܗ ܚܰܝܠܶܟܝ ܒܗܳܝ ܕܡܶܬܕܰܪܟܳܐ ܡܶܢ ܡܕܰܡܝܳܢܽܘܬܳܐ. ܐܶܢ ܓܶܝܪ ܠܰܘ ܗܳܫܳܐ ܬܶܩܒܥܺܝܢ ܐܶܢܽܘܢ ܒܗܰܘܢܶܟܝ ܨܶܒܝܳܢܳܐܺܝܬ܆ ܠܳܐ ܡܶܙܕܰܥ̈ܙܥܳܢܶܐ ܘܠܳܐ ܡܶܬܬܙܺܝ̈ܥܳܢܶܐ܆ ܬܶܚܙܺܝܢ ܐܶܢܽܘܢ ܠܗܳܠܶܝܢ ܠܳܐ ܨܶܒܝܳܢܳܐܺܝܬ ܘܰܟܡܺܝܪܳܐܺܝܬ ܘܰܒܟܺܐܒ̈ܶܐ ܕܠܶܒܳܐ܆ ܕܠܰܘ ܠܰܡܕܰܡܝܳܢܽܘܬܳܐ ܐܶܠܳܐ ܠܡܰܟܣܳܢܽܘܬܳܐ ܣܺܝܡܺܝܢ ܩܕܳܡܰܝܟܝ܆ ܒܝܰܘܡܳܐ ܗܰܘ ܕܕܺܝܢܳܐ܆ ܘܡܶܢܗܽܘܢ ܬܶܣܒܠܺܝܢ ܚܽܘ̈ܝܳܒܶܐ.

ܗܰܘ ܓܶܝܪ ܕܰܒܝܰܕ ܚܰܙܩܝܐܝܠ ܢܒܺܝܳܐ܆ ܕܚܺܝܠܳܐܺܝܬ ܓܙܰܡ ܟܺܝܬ ܟܰܕ ܐܶܡܰܪ܆ ܘܶܐܕܽܘܢ ܒܶܝܬ ܥܶܪܒܳܐ ܠܥܶܪܒܳܐ܆ ܘܒܶܝܬ ܕܶܟܪܳܐ ܠܘܳܬ ܕܶܟܪܳܐ^[10]܆ ܢܒܰܚܶܢ ܘܰܢܥܰܩܒܶܟܝ ܠܘܳܬ ܗܳܠܶܝܢ ܕܶܟܪ̈ܶܐ ܚܰܝ̈ܠܬܳܢܶܐ܆ ܐܰܝܟ ܐܰܝ̇ܕܳܐ ܕܰܡܛܳܬܶܟܝ ܕܬܶܗܘܶܝܢ ܪܺܝܫܳܐ ܕܡܰܪܥܺܝܬܳܐ ܕܕܰܐܝܟ ܗܳܕܶܐ܆ ܘܥܰܠ ܡܰܘܬܒܳܐ ܕܦܰܛܪܝܰܪܟܽܘܬܳܐ ܡܶܬܢܰܦܚܳܐ ܐܰܢ̱ܬܝ ܘܢܺܐܡܰܪ܆ ܐܰܝܟܰܢܳܐ ܓܪܺܝܓܽܘܪܺܝܽܘܤ ܗܰܘ ܕܰܒܪܺܝܫ ܢܰܐܙܺܝܰܢܙܽܘ ܡܕܺܝܢ̱ܬܽܘܢܺܝܬܳܐ ܙܥܽܘܪܬܳܐ ܩܳܐܶܡ ܗ̱ܘܳܐ܆ ܟܰܕ ܒܣܰܝܒܽܘܬܳܐ ܥܰܡܺܝܩܬܳܐ ܘܰܒܚܶܘܳܪ̈ܳܬܳܐ ܟܦܺܝܦ ܗ̱ܘܳܐ܆ ܘܡܶܟܺܝܠ ܥܰܠ ܚܽܘܛܪܳܐ ܣܢܺܝܩ ܗ̱ܘܳܐ܆ ܒܡܰܪ̈ܢܝܳܬܳܐ ܕܟܽܠܗܶܝܢ ܥܻ̈ܕܳܬܳܐ ܡܶܬܶܐܒܶܠ ܗ̱ܘܳܐ ܘܡܶܫܬܰܢܰܩ܆ ܘܰܠܘܳܬ ܡܕܺܝܢ̱ܬܳܐ ܗܳܝ ܡܰܠܟܳܝܬܳܐ ܗܽܘ ܡܶܢ ܢܰܦܫܶܗ ܐܶܙܰܠ܆ ܘܥܰܡ ܗܳܢܽܘܢ ܕܰܠܩܽܘܒܠܳܐ ܨܶܒܝܳܢܳܐܺܝܬ ܡܶܬܥܰܪܙܰܠ ܗ̱ܘܳܐ܆ ܟܰܕ ܙܰܒܢܳܐ ܕܰܥܣܰܪ ܫܢܰܝ̈ܳܐ ܠܰܠܒܽܘܟ̈ܝܶܐ ܒܺܝ̈ܫܰܝ ܨܶܢ̈ܥܳܬܳܐ ܘܚܶܪ̈ܝܳܢܳܝܶܐ ܕܶܐܪ̈ܛܝܩܘ ܫܳܪܶܐ ܗ̱ܘܳܐ܆ ܘܰܠܫܽܘܦܪܳܐ ܗܰܘ ܒܰܪ ܚܺܐܪ̈ܶܐ ܕܰܫܪܳܪܳܐ ܕܰܟܝܳܐ ܡܚܰܘܶܐ ܗ̱ܘܳܐ܆ ܘܡܶܛܽܠܗܳܕܶܐ ܟܰܕ ܒܳܠܰܥ ܗ̱ܘܳܐ܆ ܡܶܬܓܰܪܓܰܪ ܗ̱ܘܳܐ܆ ܟܰܕ ܒܟܺܐܦ̈ܶܐ ܡܶܬܪܓܶܡ ܗ̱ܘܳܐ܆ ܟܰܕ ܗܳܝ ܕܟܽܠ ܝܽܘܡ ܡܳܐܶܬ ܐ̱ܢܳܐ^[11] ܥܰܡ ܦܰܘܠܽܘܤ܆ ܐܳܦ ܡܶܬܪܰܥܶܐ ܗ̱ܘܳܐ ܐܳܦ ܐܳܡܰܪ ܗ̱ܘܳܐ ܐܳܦ ܟܳܬܶܒ ܗ̱ܘܳܐ.

ܐܰܢ̱ܬܝ ܕܶܝܢ ܟܽܠܶܗ ܙܰܒܢܳܐ ܕܚܰܝ̣ܰܝ̣̈ܟܝ̱ ܕܰܡܺܝܟܳܐ ܗܘܰܝܬܝ ܟܰܕ ܒܺܐܝܩܳܪܳܐ ܡܶܬܐܰܫܕܳܐ ܐܰܢ̱ܬܝ܆ ܘܡܶܬܒܰܣܡܳܐ ܗ̱ܘܰܝܬܝ ܒܰܬܪܘܢܘܤ܆ ܘܰܕܓܽܘ̈ܕܳܦܶܐ ܕܰܥܠܰܝ ܙܥܽܘܪ̈ܝܳܬܳܐ ܝܺܨܶܦܬܝ܆ ܘܳܐܦܠܳܐ ܕܰܠܒܰܪ ܡܶܢ ܐܶܣܟܽܘܦܬܳܐ^[12] ܗܳܝ ܟܺܝܬ ܕܡܶܬܐܰܡܪܳܐ ܕܰܬܙܺܝܥܺܝܢ ܪ̈ܶܓܠܶܐ ܐܰܡܪܰܚܬܝ̱܆ ܘܶܐܢ ܪܶܓܠܐ ܟܒܰܪ܆ ܐܶܠܳܐ ܠܰܘ ܠܶܫܳܢܳܐ܆ ܗܰܘ ܕܠܳܐ ܡܰܡܪܚܳܢܳܐ^[13] ܘܠܳܐ ܡܶܬܬܙܺܝܥܳܢܳܐ ܠܓܰܘ ܡܶܢ ܫܶܢ̈ܶܐ ܩܰܘܺܝ ܒܙܰܒ̈ܢܶܐ ܕܬܳܒܥܺܝܢ ܗ̱ܘܰܘ ܦܰܪܶܗ̱ܣܺܝܰܐ܆ ܐܰܘ ܟܰܕ ܐܶܬܬܙܺܝܥ ܠܰܘ ܡܰܘܬܪ̈ܳܢܝܬܳܐ܆ ܘܗܳܠܶܝܢ ܕܝܰܬܺܝܪ ܡܶܢܗܶܝܢ ܦܳܩܚܳܐ ܗ̱ܘܳܬ ܗܳܝ ܕܠܳܐ ܢܶܬܬܙܺܝܥ.

ܟܰܕ ܗܳܠܶܝܢ ܬܶܫܡܥܺܝܢ ܐܳܘ ܢܰܦܫܝ ܟܰܕ ܩܳܐܶܡ ܕܺܝܢܳܐ܆ ܘܡܶܢ ܕܰܝܳܢܳܐ ܘܰܐ‌ܠܳܗܳܐ ܡܶܬܐܰܡܪ̈ܳܢ܆ ܟܰܕ ܟܽܠܳܗ̇ ܒܪܺܝܬܳܐ ܡܠܺܝܠܬܳܐ ܚܳܙܝܳܐ܆ ܡܳܢܳܐ ܢܶܗܘܐ ܡܶܢܶܟܝ. ܐܰܝܟܳܐ ܕܶܝܢ ܬܶܚܠܕܺܝܢ ܘܬܶܬܛܰܫܝܢ. ܐܰܝܟܰܢܳܐ ܕܶܝܢ ܬܣܰܝܒܪܺܝܢ ܠܫܶܡܥܗܶܝܢ ܕܗܳܠܶܝܢ܆ ܟܰܕ ܠܳܐ ܡܣܰܝܒܪܳܐ ܐܰܢ̱ܬܝ ܠܦܽܘܚܳܡܳܐ ܘܰܣܝܳܡܳܐ ܕܰܠܩܽܘܒܠܶܟܝ ܕܩܰܘܡܳܐ ܘܰܡܥܰܙܝܳܢܽܘܬܳܐ ܚܰܝܠܬܳܢܺܝܬܳܐ ܘܓܰܢ̱ܒܳܪܬܳܐ ܕܪܰܒܳܐ ܒܰܣܶܝܠܺܝܽܘܤ܆ ܗܳܝ ܕܥܰܡܳܗ̇ ܡܡܰܠܶܠ ܠܘܳܬ ܘܰܐ‌ܠܺܝܤ ܕܗܳܠܶܝܢ ܕܰܐܪܺܝܽܘܤ ܦܰܩܺܝܪ ܗ̱ܘܳܐ܆ ܘܰܠܘܳܬ ܡܽܘܕܐܤܛܘܤ ܗܽܘܦܰܪܟܳܐ ܕܗܰܘ܆ ܟܰܕ ܥܰܡ ܡܶܠܬܳܐ ܠܨܰܘܪܶܗ ܦܳܫܶܛ ܗ̱ܘܳܐ ܠܘܳܬ ܣܰܝܦܳܐ܆ ܘܟܰܕ ܒܰܐܟܣܽܘܪܝܳܐ ܡܶܬܦܩܰܕ ܗ̱ܘܳܐ ܠܡܶܥܡܰܪ܆ ܐܳܦ ܐܺܝܬܰܘܗ̱ܝ ܗ̱ܘܳܐ ܪܳܕܶܐ ܒܽܐܘܪܚܳܐ ܡܛܰܝܒܳܐܺܝܬ ܗܽܘ ܡܶܢ ܢܰܦܫܶܗ܆ ܠܰܘ ܟܰܕ ܠܘܳܬ ܗܰܘ ܕܓܳܙܶܡ ܗ̱ܘܳܐ ܘܰܒܕܽܘܚ̈ܳܠܶܐ ܗܳܠܶܝܢ ܕܟܽܠ ܝܽܘܡ ܡܕܰܚܶܠ ܗ̱ܘܳܐ ܚܳܐܰܪ ܗ̱ܘܳܐ܆ ܐܶܠܳܐ ܟܰܕ ܠܘܳܬ ܗܰܘ ܕܣܳܡ ܢܳܡܽܘܣܳܐ܆ ܗܳܝ ܕܶܐܡܰܬܝ ܕܪܳܕܦܺܝܢ ܠܟܽܘܢ ܒܗܳܕܶܐ ܡܕܺܝܢ̱ܬܳܐ܆ ܥܪܽܘܩܘ ܠܟܽܘܢ ܠܗܳܝ ܐ̱ܚܪܺܬܳܐ^[14].

ܡܳܢܳܐ ܕܶܝܢ ܐܺ݀ܡܰܪ܆ ܡܶܛܽܠ ܕܽܘܒܳܪܳܐ ܕܰܟܝܳܐ ܕܗܳܢܽܘܢ ܚܰܝ̈ܶܐ. ܐܰܝܟܰܢܳܐ ܢܣܰܝܒܰܪ ܠܒܽܘܚܳܢܳܐ ܘܦܽܘܚܳܡܳܐ ܕܠܽܘܩܒܰܠ ܗܳܢܳܐ܆ ܐܶܡܰܬܝ ܕܰܐܝܟ ܡܶܠܬܶܗ ܕܡܰܠܰܐܟܺܝ ܢܒܺܝܳܐ܆ ܗܽܘ ܕܰܝܳܢܳܐ ܢܶܥܽܘܠ ‌ܐܰܝܟ ܢܽܘܪܳܐ ܕܟܽܘܪܳܐ ܘܰܐܝܟ ܥܶܩܳܪܳܐ ܕܗܳܢܽܘܢ ܕܰܡܚܰܠܠܺܝܢ܆ ܘܢܶܬܶܒ ܟܰܕ ܢܳܣܶܟ ܘܰܡܕܰܟܶܐ܆ ܐܰܝܟ ܕܰܠܣܺܐܡܳܐ ܘܰܐܝܟ ܕܰܠܕܰܗܒܳܐ^[15]. ܐܰܪܰܐ ܠܰܘ ܐܰܝܟ ܐܰܒܳܪܳܐ܆ ܣܽܘܠܳܐܢܳܐ ܕܣܳܥܽܘܪ̈ܘܳܬܳܐ ܕܺܝܠܰܢ ܢܶܬܛܰܠܰܩ܆ ܐܰܘ ܐܰܝܟ ܚܰܒܬܳܐ ܘܰܥܡܺܝܪܳܐ܆ ܠܰܘ ܐܰܝܟ ܕܰܚܺܝܚܳܐ ܘܩܶܛܡܳܐ ܢܶܗܘܶܐ܆ ܣܰܒܝ̱ ܘܰܩܪܳܝ ܠܡܺܐܡܪܳܐ ܗܰܘ ܕܰܐܡܺܝܪ ܠܶܗ ܠܡܰܠܦܳܢܳܐ ܥܰܠ ܗܳܝ ܕܶܐܬܒܰܩܳܐ ܐܰܢ̱ܬ ܒܳܟ܆ ܘܬܶܚܙܶܝܢ ܗܰܘܢܳܐ ܦܺܝܠܘܣܘܦܳܝܳܐ܆ ܕܝܰܬܺܝܒ ܥܠܰܘܗ̱ܝ ܕܚܶܣܢܳܐ ܕܺܝܠܳܗ̇ ܕܢܰܟܦܽܘܬܳܐ܆ ܐܰܝܟ ܐ̱ܢܳܫ ܢܺܐܡܰܪ ܒܰܕܡܽܘܬ ܡܰܠܟܳܐ܆ ܘܠܰܘ ܒܰܠܚܽܘܕ ܠܪ̈ܶܓܫܶܐ ܘܰܠܡܰܥܒܕܳܢܽܘܬܳܐ ܕܟܽܠ ܚܰܕ ܗܰܕܳܡܳܐ ܚܰܟܺܝܡܳܐܺܝܬ ܘܰܡܛܰܟܣܳܐܺܝܬ܆ ܐܰܝܟ ܙܢܳܐ ܕܠܰܡܫܰܡ̈ܢܶܐ ܛܥܺܝ̈ܢܰܝ ܢܰܝܙܟ̈ܶܐ ܡܦܰܪܓܰܠ ܟܺܝܬ ܘܣܺܝܡ ܥܠܰܝܗܽܘܢ܆ ܐܶܠܳܐ ܕܪܳܗܶܐ ܘܢܳܛܰܪ ܒܚܰܘܪܳܐ ܚܰܪܺܝܦܳܐ ܘܕܰܥܡܺܝܠ ܒܡܰܪܢܺܝܬܳܐ ܐܳܦ ܠܗܽܘܢ ܠܙܰܘ̈ܥܶܐ ܕܚܽܘܫܳܒ̈ܶܐ܆ ܘܡܶܬܒܰܩܶܐ ܘܚܳܐܰܪ ܠܟܳܐ ܘܰܠܟܳܐ܆ ܕܕܰܠܡܳܐ ܒܕܽܘܟ ܚܺܐܦܳܐ ܡܶܕܶܡ ܕܚܽܘܫܳܒܳܐ ܠܳܐ ܦܰܐܝܳܐ ܢܶܩܕܽܘܡ ܢܶܪܗܰܛ ܘܢܶܦܽܘܩ ܡܶܢ ܗܰܘ ܪܺܝܫܳܢܳܝܳܐ܆ ܘܟܰܕ ܠܳܐ ܡܶܬܟܠܶܐ ܐܳܦܠܳܐ ܡܶܬܟܣܶܤ܆ ܚܛܺܝܬܐ ܕܠܳܐ ܡܶܣܬܰܗܕܳܐ ܘܠܳܐ ܓܰܠܝܳܐ ܡܶܢ ܠܓܰܘ ܢܶܣܥܽܘܪ ܒܚܰܪܺܝܦܽܘܬܶܗ ܕܙܰܘܥܳܐ܆ ܠܳܐ ܝܺܕܺܝܥܬܳܐ ܠܟܽܠܢܳܫ܆ ܥܕܰܡܳܐ ܕܢܺܐܬܶܐ ܗܰܘ ܕܝܳܕܰܥ ܡܛܰܫ̈ܝܳܬܶܗ ܕܚܶܫܽܘܟܳܐ܆ ܘܓܳܠܶܐ ܡܰܚ̈ܫܒܳܬܳܐ ܕܠܶܒܰܘ̈ܳܬܳܐ܆ ܙܳܕܶܩ ܠܺܝ ܓܶܝܪ ܕܰܒܡ̈ܶܠܶܐ ܕܺܝܠܶܗ ܕܒܰܣܶܝܠܺܝܽܘܤ ܐܶܬܚܰܫܰܚ܆ ܡܶܛܽܠ ܟܺܝܬ ܕܠܳܐ ܡܰܨܝܳܐ ܕܗܳܠܶܝܢ ܕܗܰܘ܆ ܠܰܘ ܒܗܳܠܶܝܢ ܕܗܰܘ ܢܚܰܘܶܐ ܟܺܝܬ ܘܢܺܐܡܰܪ.

ܡܶܢ ܗܳܪܟܳܐ ܐܳܦ ܠܟܽܠܗܽܘܢ ܗܳܢܽܘܢ ܕܡܶܬܪܰܥܶܝܢ ܐܺܝܬܰܘܗ̱ܝ ܗ̱ܘܳܐ ܟܚܺܝܕܳܐ. ܘܰܠܗܳܢܽܘܢ ܡܰܢ ܕܦܺܝܠܳܣܽܘܦܺܝܣܳܐ ܥܳܒܕܺܝܢ ܘܕܽܘܒܳܪܳܐ ܕܕܰܝܪܳܝܽܘܬܳܐ ܡܶܬܥܰܢܘܶܝܢ ܗ̱ܘܰܘ܆ ܠܰܘ ܠܓܰܒܪ̈ܶܐ ܒܰܠܚܽܘܕ ܐܶܠܳܐ ܐܳܦ ܠܢܶܫ̈ܶܐ܆ ܟܰܕ ܡܦܰܢܶܐ ܗ̱ܘܳܐ ܦܶܬܓܳܡܳܐ ܐܳܣܝܳܐܺܝܬ܆ ܟܬܳܒܳܐܺܝܬ܆ ܡܰܠܦܳܢܳܐܺܝܬ܆ ܐܰܒܳܗܳܐܺܝܬ. ܐܰܝܟܰܢܳܐ ܕܦܽܘܢܳܝ ܦܶܬܓܳܡ̈ܶܐ ܗܳܠܶܝܢ ܕܺܝܠܶܗ܆ ܟܰܕ ܒܰܕܡܽܘܬ ܓܶܠ̈ܝܳܢܶܐ ܘܦܽܘܩ̈ܕܳܢܶܐ ܐܰ‌ܠܳܗܳܝ̈ܶܐ ܐܺܝܬܰܝܗܽܘܢ ܗ̱ܘܰܘ܆ ܠܳܐ ܡܶܕܡ ܟܽܠ ܟܽܠܶܗ ܢܶܫܒܩܽܘܢ ܠܳܐ ܡܶܬܐܰܣܝܳܢܳܐ. ܐܶܠܳܐ ܐܺܝܬܰܝܗܽܘܢ ܟܽܠܶܗ ܟܬܳܒܳܐ ܕܦܽܘܪܩܳܢܳܐ. ܗܰܘ ܕܗܳܝ ܕܢܶܥܒܰܪ ܘܢܶܣܛܶܐ ܡܶܢܶܗ ܩܰܠܺܝܠ ܡܶܕܶܡ ܙܥܽܘܪܳܐ܆ ܐܳܦ ܡܶܢ ܗܳܠܶܝܢ ܕܡܶܣܬܰܒܪ̈ܳܢ ܝܰܡܺܝ̈ܢܳܝܳܬܳܐ܆ ܩܺܝܢܕܽܘܢܽܘܤ ܓܰܠܝܳܐ ܐܺܝܬ ܒܳܗ̇܆ ܘܫܽܘܪܰܥܬܳܐ ܕܠܰܚܒܳܪܳܐ ܡܰܝܬܝܳܐ.

ܠܗܳܢܽܘܢ ܕܶܝܢ ܕܰܒܥܳܠܡܳܐ ܚܳܐܶܝܢ ܗ̱ܘܰܘ܆ ܘܰܒܡܶܨܥܰܬ ܣܽܘܥܪ̈ܳܢܶܐ ܡܶܬܗܰܦܟܺܝܢ ܗ̱ܘܰܘ܆ ܟܰܕ ܣܒܺܝܣܳܐܺܝܬ ܡܬܰܪܓܶܡ ܗ̱ܘܳܐ܆ ܡܰܪܬܶܐ ܗ̱ܘܳܐ܆ ܗܳܝ ܕܠܳܐ ܢܶܗܘܽܘܢ ܣܰܪܺܝܟ̣ܺܝܢ ܒܪܶܕܝܳܐ ܕܗܽܘܠܶܐ ܡܰܠܶܦ ܗ̱ܘܳܐ܆ ܐܶܠܳܐ ܕܰܠܗܳܢܶܝܢ ܕܥܳܒܪ̈ܳܢ ܒܪܶܗܛܳܐ ܢܶܩܕܡܽܘܢ ܢܶܥܒܪܽܘܢ ܒܪܶܗܛܳܐ܆ ܘܥܰܠ ܗܳܠܶܝܢ ܕܰܥܬܺܝ̈ܕܳܢ ܘܩܳܝ̈ܡܳܢ ܢܶܬܬܰܘܣܦܽܘܢ. ܘܰܠܡܶܠܬܳܐ ܥܒܳܕܳܐ ܢܳܩܶܦ ܗ̱ܘܳܐ. ܘܗܳܢܽܘܢ ܕܥܰܬܺܝܪܺܝܢ ܗ̱ܘܰܘ ܡܰܩܠܶܝܢ ܗ̱ܘܰܘ ܡܶܢܗܽܘܢ ܝܽܘܩܪܳܐ ܕܡܰܘܒܠܳܐ܆ ܘܟܰܕ ܫܰܦܺܝܪ ܡܶܫܬܰܕܪܺܝܢ ܗ̱ܘܰܘ܆ ܚܳܙܩܺܝܢ ܗ̱ܘܰܘ ܡܶܢ ܥܳܠܡܳܐ ܙܗܺܝܪܳܐܺܝܬ܆ ܘܗܳܢܽܘܢ ܕܟܰܦܢܺܝܢ ܗ̱ܘܰܘ ܡܶܬܬܰܪܣܶܝܢ ܗ̱ܘܰܘ. ܗܳܟܰܢܳܐ ܟܺܝܬ ܘܟܰܕ ܟܰܦܢܳܐ ܒܰܙܒܰܢ ܐܰܕܪܶܟ ܠܰܐܬܪܳܐ ܕܩܰܦܰܕܽܘܩܳܝ̈ܶܐ܆ ܘܟܽܠܗܽܘܢ ܟܰܦܢܺܝܢ ܗ̱ܘܰܘ ܘܳܐܒܕܺܝܢ ܗ̱ܘܰܘ܆ ܘܝܰܬܺܝܪܳܐܺܝܬ ܗܳܢܽܘܢ ܕܡܶܣܟܺܢܺܝܢ ܗ̱ܘܰܘ܆ ܦܬܰܚ ܦܽܘܡܶܗ ܒܡܶܠܬܳܐ ܕܰܐ‌ܠܳܗܳܐ ܐܰܝܟ ܦܽܘܩܕܳܢܳܐ ܗܰܘ ܕܰܒܡ̈ܰܬܠܶܐ^[16]܆ ܘܡܶܚܕܳܐ ܐܰܘܨܪ̈ܶܐ ܕܗܳܢܽܘܢ ܡܶܬܬܰܓܪ̈ܰܝ ܒܚ̈ܶܛܶܐ ܡܶܬܦܰܬܚܺܝܢ ܗ̱ܘܰܘ܆ ܕܩܽܘܦܠܳܐ ܗܳܝ ܠܳܐ ܡܶܫܬܰܪܝܳܢܺܝܬܳܐ ܕܪܶܚܡܰܬ ܟܶܣܦܳܐ ܐܺܝܬ ܗ̱ܘܳܐ ܥܠܰܝܗܽܘܢ܆ ܗܳܝ ܕܡܶܬܦܰܬܚܳܐ ܗ̱ܘܳܬ ܘܡܶܫܬܰܥܒܕܳܐ ܒܰܠܚܽܘܕ܆ ܠܻܐܝܕܳܐ ܗܳܝ ܕܡܰܠܝܳܐ ܗ̱ܘܳܬ ܕܰܗܒܳܐ܆ ܕܠܳܐ ܢܚܳܫܳܐ ܕܶܝܢ ܠܳܐ ܥܳܢܝܳܐ ܗ̱ܘܳܬ. ܘܡܶܟܺܝܠ ‌ܐܰܝܟ ܕܡܶܢ ܡܰܒܽܘ̈ܥܶܐ ܪ̈ܳܕܝܳܢ ܗ̱ܘܰܝ̈ ܚ̈ܶܛܶܐ܆ ܟܰܕ ܒܰܡܫܰܪܬܚܽܘܬܳܐ ܒܟܽܠܶܗ ܐܰܬܪܳܐ ܡܶܫܬܰܦ̈ܥܳܢ ܗ̱ܘܰܝ̈. ܘܡܶܢ ܬܽܘܪܣܳܝܳܐ ܘܠܳܐ ܐ̱ܢܳܫ ܐܺܝܬ ܗ̱ܘܳܐ ܨܪܺܝܟܳܐ. ܐܶܠܳܐ ܗܳܢܳܐ ܡܰܢ ܗܳܟܰܢܳܐ.

ܗܰܘ ܕܶܝܢ ܠܒܺܝܫ ܠܰܐܠܳܗܳܐ ܐܺܝܓܢܰܐܛܺܝܽܘܤ܆ ܗܰܘ ܕܝܰܬܺܝܪ ܪ̈ܳܡܳܢ ܡܗܰܠܶܟ܆ ܘܰܒܗܳܕܶܐ ܬܽܘܒ ܐܰܝܟ ܣܳܗܕܳܐ܆ ܠܰܘ ܠܡܰܪܥܺܝܬܳܐ ܒܰܝܬܳܝܬܳܐ ܕܺܝܠܶܗ ܒܰܠܚܽܘܕ ܐܺܝܬܰܘܗ̱ܝ ܗ̱ܘܳܐ ܡܦܺܝܣܳܢܳܐ܆ ܐܶܠܳܐ ܟܰܕ ܠܘܳܬ ܪܽܘܡܺܐ ܡܕܺܝܢ̱ܬܳܐ ܘܡܶܛܽܠ ܬܰܟܬܽܘ̈ܫܶܐ ܕܣܳܗܕܽܘܬܳܐ ܪܳܕܶܦ ܗ̱ܘܳܐ ܘܰܡܣܰܪܗܶܒ܆ ܡܰܠܽܘܢ ܕܶܝܢ ܠܘܳܬ ܡܕܺܝܢ̱ܬܳܐ ܗܳܝ ܕܰܠܥܶܠ ‌ܐܽܘܪܶܫܠܶܡ܆ ܐܳܦ ܠܗܳܢܽܘܢ ܕܰܒܡܰܥܒܰܪܬܳܐ ܚܙܰܐܘܽܗܝ܆ ܒܝܰܕ ܐܶܓܪ̈ܳܬܳܐ ܟܳܬܶܒ ܗ̱ܘܳܐ ܗܳܠܶܝܢ ܕܡܶܣܬܰܒܪ̈ܳܢ ܗ̱ܘܰܝ̈ ܠܶܗ܆ ܘܢܳܡܽܘܣܳܐ ܠܳܐ ܡܶܙܕܰܥܙܥܳܢܳܐ ܐܺܝܬܰܝܗܽܘܢ ܗ̱ܘܰܘ ܦܽܘܩ̈ܕܳܢܰܘܗ̱ܝ ܕܗܰܘ. ܡܶܠܰܝ̈ܗܽܘܢ ܓܶܝܪ ܕܩܰܕܺܝ̈ܫܶܐ ܥܳܒ̈ܕܳܢ ܘܡܰܥܒ̈ܕܳܢ.

ܐܶܢܳܐ ܕܶܝܢ ܡܶܛܽܠ ܕܰܒܥܰܡ̈ܠܶܐ ܣܳܥܽܘܪ̈ܳܝܶܐ ܠܳܐ ܦܠܰܚܬܳܗ̇ ܠܢܰܦܫܳܐ ܕܺܝܠܝ܆ ܠܳܐ ܡܦܺܝܣܳܢܳܐ ܐܺܝܬܰܝ ܠܗܳܢܽܘܢ ܕܫܳܡܥܺܝܢ. ܒܰܕܓܽܘܢ ܟܰܕ ܡܶܢ ܩܕܺܝܡ ܡܰܠܶܠ ܗ̱ܘܺܝܬ ܠܟܽܘܢ ܡܶܛܽܠ ܡܰܘܗܰܒܬܳܐ ܙܥܽܘܪܬܳܐ ܕܩܰܠܺܝܠ ܣܺܐܡܳܐ܆ ܕܡܶܫܟܚܳܐ ܗ̱ܘܳܬ ܕܰܠܦܽܘܪܣܳܝܳܐ ܘܰܠܥܰܪܛܶܠܳܝܽܘܬܳܐ ܒܰܠܚܽܘܕ ܬܟܰܣܶܐ ܕܦܳܬܽܘܪܳܐ ܡܝܰܩܪܳܐ ܕܒܰܚܕܳܐ ܡܶܢ ܥ̈ܺܕܳܬܳܐ ܩܰܕܺܝ̈ܫܳܬܳܐ܆ ܗܳܝ ܕܡܳܢܳܐ ܢܶܣܒܰܪ ܐ̱ܢܳܫ ܕܺܐܝܬ ܕܝܰܬܺܝܪ ܡܶܢܳܗ̇ ܙܳܕܶܩ ܗ̱ܘܳܐ܆ ܐܰܘ ܕܝܰܬܺܝܪ ܟܚܺܝܕ ܘܰܡܝܰܩܰܪ܆ ܠܳܐ ܐܶܫܟܚܶܬ ܠܡܰܦܣܽܘܬܟܽܘܢ ܫܰܦܺܝܪ. ܐܶܠܳܐ ܗܳܢܽܘܢ ܡܰܢ ܫܡܰܥܘ܆ ܘܰܠܡܶܠܬܳܐ ܩܰܠܶܣܘ. ܘܠܺܐܝܕܳܐ ܐܰܙܺܝܥܘ܆ ܘܠܶܫܳܢܳܐ ܡܩܰܠܣܳܢܳܐ ܫܰܟܶܢܘ. ܗܳܢܽܘܢ ܕܶܝܢ ܒܡܰܘܗܰܒܬܳܐ ܡܶܕܶܡ ܙܥܽܘܪܬܳܐ ܚܰܘܺܝܘ ܚܽܘܒܳܐ ܠܪܳܚܡܽܘܬܳܐ ܕܺܝܠܝ ܡܨܰܕܝܳܢܳܐܺܝܬ. ܐܶ‌ܠܽܘ ܓܶܝܪ ܠܰܐܠܳܗܳܐ ܡܰܣܒܪܺܝܢ ܗ̱ܘܰܘ ܕܝܳܗܒܺܝܢ ܗ̱ܘܰܘ܆ ܡܶܢ ܟܽܠ ܦܪܽܘܤ ܟܺܝܬ ܐܳܦ ܠܗܳܝ ܕܡܶܣܬܰܒܪܳܐ ܪܰܒܬܳܐ܆ ܙܥܽܘܪܬܳܐ ܚܳܫܒܺܝܢ ܗ̱ܘܰܘ ܠܳܗ̇. ܣܰܓܺܝ̈ܶܐܐ ܕܶܝܢ ܡܶܚܕܳܐ ܒܬܰܚܘܺܝܬܳܐ ܕܗܳܝ ܐܰܪܡܰܠܬܳܐ ܡܶܬܚܰܫܚܺܝܢ^[17]܆ ܗܳܝ ܕܶܐܬܩܰܒܠܰܬ ܘܶܐܬܩܰܠܣܰܬ ܒܩܽܘܪܳܒܳܐ ܕܗܳܢܽܘܢ ܬܪܶܝܢ ܫܳܡܽܘ̈ܢܶܐ ܒܰܠܚܽܘܕ^[18]܆ ܘܠܳܐ ܝܳܕܥܺܝܢ ܕܟܰܕ ܒܗܽܘܢ ܗܳܝ ܡܶܬܗܰܦܟܳܐ ܗ̱ܘܳܬ ܘܚܳܕܪܳܐ܆ ܟܽܠܶܗ ܩܶܢܝܳܢܳܗ̇ ܝܶܗܒܰܬ̣. ܗܳܢܽܘܢ ܕܶܝܢ ܟܰܕ ܒܰܙܥܽܘܪܽܘܬܳܗ̇ ܕܰܟܡܳܝܽܘܬܳܐ ܡܕܰܡܶܝܢ܆ ܡܶܢ ܝܰܬܺܝܪܽܘܬܳܐ ܣܰܓܺܝܐܬܳܐ ܗܳܝ ܕܺܐܝܬ ܠܗܽܘܢ܆ ܠܳܐ ܝܳܕܥܺܝܢ ܕܰܟܡܳܐ ܦܰܐܝܺܫܺܝܢ ܘܪܰܚܺܝܩܺܝܢ܆ ܡܶܢ ܨܶܒܝܳܢܳܗ̇ ܕܰܐܢ̱ܬܬܳܐ ܗܳܝ ܡܶܬܩܰܠܣܳܢܺܝܬܳܐ.

ܘܰܐܝܟܰܢܳܐ ܠܰܘ ܕܕܳܘܝܽܘܬܳܐ ܐܺܝܬܶܝܗ̇ ܘܕܰܩܛܺܐܓܪܳܢܽܘܬܳܐ ܣܰܓܺܝܐܬܳܐ ܡܰܝܬܝܳܐ܆ ܐܶܢܗܽܘ ܕܡܽܘܫܶܐ ܡܰܢ ܒܫܽܘܪ̈ܳܝܶܐ ܕܺܝܕܰܥܬܳܐ ܕܰܐ‌ܠܳܗܳܐ܆ ܟܰܕ ܐܰܝܟ ܕܰܒܛܶܠܳܢܺܝܬܳܐ ܡܫܰܡܶܫ ܗ̱ܘܳܐ ܠܗܳܢܶܝܢ ܕܠܳܐ ܡܫܰܡ̈ܠܝܳܢ ܗ̱ܘܰܝ̈܆ ܒܰܥܒܺܝܕܽܘܬܶܗ ܕܡܰܫܟܢܳܐ ܕܰܢܩܰܪܒܽܘܢ ܦܳܩܶܕ ܗ̱ܘܳܐ ܠܗܳܢܽܘܢ ܥܰܣ̈ܩܶܐ ܒܰܙܢܳܐ܆ ܒܗܳܢܽܘܢ ܕܡܶܢ ܡܶܨܪܶܝܢ ܡܥܰܒܶܝܢ ܗ̱ܘܰܘ ܒܗܰܘܢܗܽܘܢ܆ ܘܒܰܕܡܽܘܬ ܪܓܶܠܬܳܐ ܪܳܕܶܐ ܗ̱ܘܳܐ ܥܽܘܬܪܳܐ ܕܗܳܢܶܝܢ ܕܡܶܬܩܰܪ̈ܒܳܢ ܗ̱ܘܰܝ̈܆ ܗܳܕܶܐ ܡܰܢ ܕܗܳܢܽܘܢ ܕܝܳܗܒܺܝܢ ܗ̱ܘܰܘ ܒܰܠܚܽܘܕ܆ ܗܳܕܶܐ ܕܶܝܢ ܕܗܳܢܽܘܢ ܕܳܐܦ ܠܗܽܘܢ ܠܰܥ̈ܒܳܕܶܐ ܐܰܟܚܕܳܐ ܥܳܒܕܺܝܢ ܗ̱ܘܰܘ ܥܰܡܗܽܘܢ܆ ܐܰܝܟܰܢܳܐ ܕܢܺܐܡܪܽܘܢ ܗ̱ܘܰܘ ܐܳܦ ܗܳܢܽܘܢ ܕܰܡܩܰܒܠܺܝܢ ܗ̱ܘܰܘ ܗܳܝ ܕܰܟܬܺܝܒܳܐ܆ ܕܣܽܘܓܳܐܐ ܡܰܝܬܶܐ ܥܰܡܳܐ܆ ܝܰܬܺܝܪ ܡܶܢ ܥ̈ܒܳܕܶܐ ܗܳܠܶܝܢ ܕܦܰܩܶܕ ܡܳܪܝܳܐ ܠܡܶܥܒܰܕ^[19].

ܚܢܰܢ ܕܶܝܢ ܡܫܰܡ̈ܫܳܢܶܐ ܕܛܰܝܒܽܘܬܳܐ ܘܰܕܕܺܝܰܐܬܺܝܩܺܐ ܗܳܝ ܕܠܳܐ ܡܬܽܘܡ ܣܳܐܒܳܐ܆ ܟܰܕ ܠܘܳܬܟܽܘܢ ܕܺܝܠܟܽܘܢ ܡܡܰܠܠܺܝܢܰܢ ܗܳܢܽܘܢ ܕܰܠܣܳܝܽܘܡܽܘܬ ܒܢܰܝ̈ܳܐ ܐܶܫܬܘܺܝܬܽܘܢ܆ ܗܳܢܽܘܢ ܕܝܳܪ̈ܽܘܬܶܐ ܡܰܢ ܕܰܐ‌ܠܳܗܳܐ܆ ܒܢ̈ܰܝ ܝܳܪܬܽܘܬܳܐ ܕܶܝܢ ܕܰܡܫܺܝܚܳܐ ܐܺܝܬܰܝܟܽܘܢ^[20]܆ ܗܳܢܽܘܢ ܕܠܰܘ ܠܘܳܬ ܐܰܪܥܳܐ ܕܡܽܘܠܟܳܢܳܐ ܚܳܙܩܺܝܢ ܐܢ̱ܬܽܘܢ܆ ܐܶܠܳܐ ܠܘܳܬܳܗ̇ ܕܰܫܡܰܝܳܐ ܡܣܰܪܗܒܺܝܢ ܐܢ̱ܬܽܘܢ܆ ܟܰܕ ܩܝܳܡܬܳܐ ܒܳܬܰܪ ܩܰܠܺܝܠ ܩܰܪܺܝܒܳܐ ܘܚܰܝ̈ܶܐ ܛܽܘܒ̈ܬܳܢܶܐ ܘܠܳܐ ܗܽܘ̈ܠܳܢܳܝܶܐ ܗܳܠܶܝܢ ܕܰܥܬܺܝܕܺܝܢ܆ ܟܽܠܶܗ ܗܳܢܳܐ ܢܶܫܦܰܠ܆ ܘܗ̱ܝ ܕܰܒܨܺܝܪܳܐ ܢܶܗܘܶܐ ܐܺܝܬ ܠܰܢ܆ ܐܰܝܟ ܗܰܘ ܕܳܐܦܠܳܐ ܚܰܕ ܣܰܒܪܳܐ ܐܺܝܬ܆ ܕܢܶܗܦܽܘܟ ܢܶܬܺܝܗܶܒ ܡܶܕܶܡ ܛܳܒܳܐ܆ ܠܗܳܢܽܘܢ ܕܝܳܗܒܺܝܢ ܡܰܘܗܰܒܬܳܐ ܫܦܺܝܥܳܐܺܝܬ. ܐܳܘ ܡܶܢ ܠܳܐ ܗܰܝܡܳܢܽܘܬܳܐ ܐܳܘ ܡܶܢ ܡܚܺܝܠܽܘܬܳܐ ܕܡ̈ܶܠܶܐ ܕܺܝܠܝ. ܗܳܝ ܕܰܢܣܰܝܥܶܝܗ̇ ܘܗ̱ܝ ܕܚܰܣܺܝܪܳܐ ܢܡܰܠܶܐ܆ ܕܕܽܘܟܪܳܢܗܽܘܢ ܕܩܰܕܺܝ̈ܫܶܐ ܐܺܝܬܶܝܗ̇ ܥܒܳܕܳܐ. ܗܳܢܽܘܢ ܕܟܰܕ ܡܶܛܽܠܳܬܗܽܘܢ ܡܰܟܣܳܢܽܘܬܐ ܕܺܝܠܝ ܡܚܰܓܶܐ ܐ̱ܢܳܐ܆ ܠܳܐ ܡܶܬܚܰܡܰܨ ܐ̱ܢܳܐ. ܗܳܝ ܓܶܝܪ ܕܢܶܬܟܣܶܤ ܒܚܰܝ̈ܶܐ ܗܳܠܶܝܢ ܕܩܰܪܺܝܒܺܝܢ܆ ܝܽܘܬܪܳܢܳܐ ܡܰܝܬܝܳܐ. ܗܳܝ ܕܶܝܢ ܕܰܒܗܳܠܶܝܢ ܕܰܥܬܺܝܕܺܝܢ ܚܽܘܣܪܳܢܳܐ܆ ܘܥܳܩܬܳܐ ܕܒܽܘܝܳܐܳܐ ܠܰܝܬ ܠܳܗ̇. ܗܳܝ ܕܢܶܬܦܰܨܶܐ ܡܶܢܳܗ̇܆ ܒܛܰܝܒܽܘܬܳܐ ܘܰܒܪܶܚܡܰܬ ܐ̱ܢܳܫܽܘܬܳܐ ܕܰܐ‌ܠܳܗܳܐ ܪܰܒܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ ܘܽܐܘܚܕܳܢܳܐ܆ ܥܰܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.

ܫܠܡ ܡܐܡܪܐ ܕܡܐܐ ܘܬܪܝܢ.

ܥܒܪ̈ܝܐ. 3: 2   ܐܦ ܡܢܝܢܐ. 12: 7[1]

ܪ̈ܗܘܡܝܐ. 7: 14 [2]

ܥܰܠ [3]

ܬܢܝܢ ܢܡܘܣܐ. 17: 18 ـ 20 [4]

ܐ. ܛܝܡܬܐܘܣ. 3: 2 [5]

ܡ̈ܬܠܐ. 27: 17 [6]

ܐܫܥܝܐ. 26: 13 [7]

ܡܙܡܘܪ̈ܐ. 118: 46 [8]

[9] ܩܰܦܺܝܠܽܘܣܳܐ ܘܩܰܦܠܽܘܣܳܐ. ܐܰܡܢܳܐ ܕܩܰܦܺܝܠܳܐ. ܥܒܰܕ ܩܰܦ̈ܠܽܘܣܶܐ. ܗܳܢܰܘ ܕܶܝܢ. ܦܠܰܚ ܒܰܐܡܢܳܐ ܕܩܰܦܺܝܠܳܐ ܘܰܐܝܟ ܕܰܒܣܽܘܓܐܐ ܒܰܚܢܳܝܳܐ ܣܰܢܝܳܐ. ܡܙܰܝܦܽܘܬܳܐ.

ܚܙܩܝܐܝܠ. 34: 17 [10]

ܐ. ܩܘܪ̈ܝܢܬܝܐ. 15: 31 [11]

ܕܰܠܥܶܠ ܡܶܢ ܕܰܪ̈ܓܶܐ[12]

 ܣܥܘܝܐ[13]

ܡܬܝ. 10: 23[14]

ܡܠܐܟܝ. 3: 2 ـ 3 [15]

ܡ̈ܬܠܐ. 31: 8 ـ 9[16]

ܐܶܬܚܰܫܰܚܘ[17]

ܡܪܩܘܣ. 12: 42 [18]

ܡܦܩܢܐ. 36: 5 [19]

ܪ̈ܗܘܡܝܐ. 8: 17[20]