ܡܺܐܡܪܳܐ ܕܡܳܐܐ ܘܚܰܕ

ܥܰܠ ܒܶܝܬ ܝܰܠܕܳܐ ܐܰܘ ܟܺܝܬ ܒܶܝܬ ܕܶܢܚܳܐ. ܕܺܐܝܬܰܘܗ̱ܝ ܕܚܰܡܫܳܐ.

100: ܟܰܕ ܠܰܡܫܰܒܳܚܽܘ ܨܳܒܶܐ ܐ̱ܢܳܐ ܠܥܶܠܬܶܗ ܕܚܰܓܳܐ ܗܳܢܳܐ ܕܩܰܪܺܝܒ܆ ܗܳܕܶܐ ܕܶܝܢ ܐܺܝܬܶܝܗ̇ ܡܰܚܰܬܬܶܗ ܕܡܶܢ ܫܡܰܝܳܐ ܕܰܠܘܳܬܰܢ ܕܰܐ‌ܠܳܗܳܐ ܡܶܠܬܳܐ܆ ܘܡܶܐܬܺܝܬܶܗ ܟܺܝܬ ܕܢܺܝܚܬܳܐ ܘܡܶܬܓܰܠܝܳܢܽܘܬܶܗ ܕܥܰܠ ‌ܐܰܪܥܳܐ܆ ܗܳܝ ܕܰܒܝܰܕ ܗܳܝ ܕܶܐܬܒܰܣܰܪ ܒܶܣܪܳܐ ܫܰܪܺܝܪܳܐ ܘܕܰܫܘܶܐ ܠܰܢ ܒܽܐܘܣܺܝܰܐ܆ ܐܶܬܓܠܺܝ ܘܶܐܬܚܙܺܝ ܘܶܐܬܗܰܦܰܟ ܥܰܡ ܒܢܰܝ̈ܢܳܫܳܐ ܐܰܝܟ ܒܰܪܢܳܫܳܐ܆ ܐܰܝܟܰܢܳܐ ܕܚܰܙܳܝ̈ܶܐ ܘܰܡܫܰܡ̈ܫܳܢܶܐ ܢܶܬܩܪܽܘܢ ܕܺܝܠܳܗ̇ ܕܡܶܠܬܳܐ^[1]܆ ܗܰܘ ܕܠܳܐ ܡܟܳܢ ܠܡܶܬܚܙܳܝܽܘ ܘܳܐܦܠܳܐ ܢܳܦܶܠ ܬܚܶܝܬ ܚܙܳܬܳܐ܆ ܬܰܠ̈ܡܺܝܕܶܐ ܗܳܢܽܘܢ ܕܫܰܡܫܽܘܗ̱ܝ ܘܶܐܬܗܰܦܰܟܘ ܥܰܡܶܗ܆ ܐܰܝܢܳܐ ܚܰܝܠܳܐ ܕܰܡܩܰܠܣܳܢܽܘܬܳܐ ܢܶܣܦܰܩ ܠܺܝ. ܐܰܝ̇ܕܳܐ ܕܶܝܢ ܬܶܫܒܽܘܚܬܳܐ ܕܫܳܘܝܳܐ ܬܶܫܬܟܰܚ ܠܺܝ. ܐܰܝܢܳܐ ܕܶܝܢ ܠܶܫܳܢܳܐ ܠܗܳܠܶܝܢ ܢܰܘܕܰܥ. ܚܕܳܐ ܒܰܪ̱ܬ ܩܳܠܳܐ ܡܶܫܟܰܚ ܐ̱ܢܐ ܕܰܟܬܺܝܒܳܐ ܒܶܐܘܰܢ̈ܓܶܠܺܝܰܐ܆ ܘܡܶܣܬܰܪܗܒܳܐ ܡܰܢ ܘܡܶܬܚܰܪܝܳܐ ܕܰܠܪܰܘܡܳܐ ܬܶܬܪܺܝܡ܆ ܘܰܬܡܰܪܶܐ ܒܶܗ ܒܣܽܘܥܪܳܢܳܐ܆ ܘܳܐܦ ܠܳܗ̇ ܕܶܝܢ܆ ܕܓܰܠܝܳܐܺܝܬ ܡܰܘܕܝܳܐ ܕܶܐܙܕܰܟܝܰܬ ܒܳܗ̇ ܒܬܶܕܡܽܘܪܬܳܐ. ܟܶܢܫܳܐ ܓܶܝܪ ܕܦܳܠܚܽܘܬܳܐ ܫܡܰܝܳܢܺܝܬܳܐ܆ ܘܓܽܘܕܳܐ ܕܡܰܠܰܐܟ̈ܶܐ ܐܶܬܚܰܙܝܰܬ ܠܪ̈ܳܥܰܘܳܬܳܐ. ܘܶܐܫܬܡܰܥ ܕܳܐܡܪܳܐ ܗ̱ܘܳܬ ܥܰܠ ܬܶܗܪܳܐ ܕܺܝܠܺܝܕܽܘܬܶܗ ܬܡܺܝܗܬܳܐ ܕܒܰܒܣܰܪ ܕܡܶܠܬܳܐ ܠܳܐ ܥܒܺܝܕܳܐ܆ ܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ^[2].

ܟܰܕ ܕܶܝܢ ܠܚܰܝܠܳܐ ܕܒܰܪ̱ܬ ܩܳܠܳܐ ܗܳܕܶܐ ܕܒܰܙܥܽܘܪܽܘܬ ܡܶܠܬܳܐ ܡܣܰܝܟܳܐ ܡܥܰܩܶܒ ܐ̱ܢܳܐ܆ ܐܰܝܟ ܕܺܐܝܬ ܠܺܝ ܚܰܝܠܳܐ ܠܰܡܕܰܡܳܝܽܘ܆ ܠܺܝ ܠܰܙܥܽܘܪܳܐ ܘܕܰܙܥܽܘܪ̈ܝܳܬܳܐ ܚܳܙܶܐ ܐ̱ܢܳܐ܆ ܘܰܐܝܟ ܕܰܒܢܽܘܛܦܬܳܐ ܡܶܕܡ ܘܰܒܛܶܠ̈ܢܝܬܳܐ ܐܶ݀ܬܗܰܓܰܓ ܘܶܐ݀ܣܥܶܐ ܠܡܺܐܡܰܪ܆ ܕܰܐܝܟ ܗܳܢܳܐ ܚܳܙܶܐ ܐ̱ܢܳܐ ܠܶܗ ܠܗܰܘܢܳܐ ܕܡܰܠܰܐܟ̈ܶܐ ܗܳܢܽܘܢ ܕܡܰܠܠܽܘܗ̇܆ ܘܰܕܗܳܠܶܝܢ ܐܳܡܪܺܝܢ ܒܺܐܝ̈ܕܶܝܗ̇ ܦܰܬܝܳܐܺܝܬ ܡܶܣܬܰܒܪܺܝܢ ܠܺܝ. ܟܰܕ ܠܬܶܫܒܽܘܚܬܳܐ ܦܰܐܺܝܬ ܠܰܐܠܳܗܳܐ ܕܥܽܘܠܳܐ ܗܰܘ ܕܶܐܬܺܝܠܶܕ ܡܶܢ ܒܬܽܘܠܬܳܐ ܚܳܙܶܝܢܰܢ܆ ܘܨܳܒܶܝܢ ܚ̱ܢܰܢ ܕܰܢܫܰܒܚܺܝܗ̇ ܘܰܢܩܰܠܣܺܝܗ̇ ܠܗܳܕܶܐ܆ ܠܬܶܫܒ̈ܚܳܬܳܐ ܗܳܠܶܝܢ ܕܥܰܠ ‌ܐܰܪܥܳܐ܆ ܨܪ̈ܺܝܟܳܬܳܐ ܘܚܰܣܺܝܪ̈ܳܬܳܐ ܚܳܙܶܝܢܰܢ ܠܗܶܝܢ܆ ܘܰܕܦܳܝܫܳܐ ܡܶܢ ܗܳܝ ܕܫܳܘܝܳܐ܆ ܡܰܠܽܘܢ ܕܶܝܢ ܕܰܠܪܽܘܚܩܳܐ ܢܳܦܠܳܐ܆ ܟܽܠ ܒܰܪ̱ܬ ܩܳܠܳܐ ܐ̱ܢܳܫܳܝܬܳܐ ܘܰܕܥܰܠ ‌ܐܰܪܥܳܐ ܐܳܬܝܳܐ. ܕܡܶܢ ܗܳܪܟܳܐ ܠܬܶܫܒܽܘܚܬܳܐ ܗܳܝ ܕܒܰܡܪ̈ܰܘܡܶܐ ܡܶܙܕܰܡܪܳܐ܆ ܡܶܢ ܪ̈ܽܘܚܳܬܳܐ ܠܳܐ ܗܽܘܠܴ̈ܢܳܝܳܬܳܐ ܘܡܶܬܗܰܘ̈ܢܳܢܝܳܬܳܐ ܗܳܠܶܝܢ ܕܰܠܥܶܠ܆ ܕܣܰܓܺܝ ܐܺܝܬܶܝܗ̇ ܕܦܰܐܝܳܐ ܘܣܰܓܺܝ ܠܳܚܡܳܐ ܠܡܰܚܣܶܢ܆ ܕܰܠܐ̱ܪܳܙܳܐ ܗܳܢܳܐ ܕܗܳܫܳܐ ܥܰܠ ‌ܐܰܪܥܳܐ ܡܶܫܬܰܡܠܶܐ ܘܡܶܬܦܰܪܢܰܤ ܡܣܰܒܪܺܝܢ ܚ̱ܢܰܢ. ܠܰܘ ܗܳܝ^[3] ܕܰܡܩܰܪܒܺܝܢ ܛܶܟ̈ܣܶܐ ܕܡܰܠܰܐܟ̈ܶܐ܆ ܘܳܐܦܠܳܐ ܬܽܘܒ ܗܳܢܽܘܢ ܕܪ̈ܺܝܫܰܝ ܡܰܠܰܐܟ̈ܶܐ܆ ܘܠܳܐ ܡܰܘܬܒ̈ܶܐ ܘܠܳܐ ܕܡܳܪ̈ܰܘܳܬܳܐ܆ ܘܠܳܐ ܕܪ̈ܺܝܫܳܢܘܳܬܳܐ ܘܠܳܐ ܕܫܽܘܠ̈ܛܳܢܶܐ ܘܠܳܐ ܕܚܰܝ̈ܠܰܘܳܬܳܐ^[4]܆ ܐܶܠܳܐ ܠܗܳܝ ܕܺܝܠܗܽܘܢ ܕܰܟܪ̈ܽܘܒܶܐ ܗܳܢܽܘܢ ܕܰܠܥܶܠ ܡܶܢܟܽܠ ܛܶܟܣܳܐ ܐܺܝܬܰܝܗܽܘܢ܆ ܘܰܕܗܳܢܽܘܢ ܕܰܠܗܳܠܶܝܢ ܩܰܪܺܝܒܺܝܢ.

ܡܶܛܽܠ ܗܳܕܶܐ ܓܶܝܪ ܠܳܐ ܐܶܡܰܪܘ ܬܶܫܒܽܘܚܬܳܐ ܒܪܰܘܡܳܐ ܚܕܳܢܳܐܺܝܬ ܐܰܘ ܒܰܫܡܰܝܳܐ܆ ܐܶܠܳܐ ܣܰܓܺܝܳܐܢܳܐܺܝܬ܆ ܬܶܫܒܽܘܚܬܳܐ ܒܰܡܪ̈ܰܘܡܶܐ^[5] ܕܝܰܬܺܝܪ ܡܶܢܟܽܠ ܪܳܡܺܝܢ ܠܰܐܠܳܗܳܐ܆ ܟܰܕ ܒܝܰܕ ܡܬܺܝܚܽܘܬܳܐ܆ ܬܶܫܒܽܘܚܬܳܐ ܗܳܝ ܕܝܰܬܺܝܪ ܡܶܢ ܟܽܠܗܶܝܢ ܪܳܡܳܐ܆ ܡܚܰܘܶܝܢ ܠܳܗ̇ ܠܗܳܝ ܕܡܶܫܬܰܕܪܳܐ. ܕܗܳܝ ܕܳܐܦ ܚܰܙܩܝܐܝܠ ܟܰܕ ܡܶܙܕܰܡܪܳܐ ܡܶܢ ܟܪ̈ܽܘܒܶܐ܆ ܗܽܘ ܒܢܰܦܫܶܗ ܗܘ̣ܳܐ ܫܳܡܽܘܥܳܐ܆ ܘܗܳܕܶܐ ܟܰܕ ܐܰܝܟ ܕܰܒܚܶܙܘܳܐ ܡܶܬܶܐܪܙ ܗ̱ܘܳܐ. ܐܶܡܰܪ ܓܶܝܪ ܕܰܫܡܰܥ ܕܳܐܡܪܺܝܢ ܗ̱ܘܰܘ܆ ܡܒܰܪܟܳܐ ܬܶܫܒܽܘܚܬܶܗ ܕܡܳܪܝܳܐ ܡܶܢ ܕܽܘܟܬܳܐ ܕܺܝܠܶܗ^[6]. ܕܽܘܟܬܳܐ ܕܶܝܢ ܕܡܳܪܝܳܐ ܙܳܕܶܩ ܠܡܶܣܬܰܟܳܠܽܘ ܥܰܠ ܗܳܕܶܐ ܕܩܰܕܺܝܡܳܐ ܣܺܝܡܳܐ܆ ܠܽܐܘܣܺܝ̈ܰܐܤ ܠܳܐ ܗܽܘ̈ܠܳܢܳܝܳܬܳܐ ܗܳܢܶܝܢ ܕܩܰܪ̈ܺܝܒܳܢ ܠܶܗ ܝܰܬܺܝܪ ܡܶܢ ܗܳܠܶܝܢ ܚܰܝ̈ܠܰܘܳܬܳܐ ܐ̱ܚܪ̈ܳܢܶܐ܆ ܘܣܰܓܺܝ ܝܰܬܺܝܪܳܐ ܡܶܬܒܰܣ̈ܡܳܢ ܡܶܢ ܫܰܘܬܳܦܽܘܬܳܐ ܘܬܶܐܽܘܪܺܝܰܐ ܐܰ‌ܠܳܗܳܝܬܳܐ܆ ܘܡܶܢ ܢܽܘܗܪܳܐ ܗܰܘ ܡܶܬܗܰܘܢܳܢܳܐ ܘܠܳܐ ܡܶܬܡܰܠܠܳܢܳܐ ܕܡܶܢ ܬܰܡܳܢ. ܡܶܛܽܠܳܬܳܗ̇ ܓܶܝܪ ܕܗܳܕܶܐ܆ ܐܳܦ ܟܽܘܪܣܝܳܐ ܕܺܝܠܶܗ ܘܡܰܘܬܒܳܐ ܡܶܬܩܪܶܝܢ ܟܪ̈ܽܘܒܶܐ܆ ܕܰܒܝܰܕ ܡܶܬܢܰܗܪܳܢܽܘܬܳܐ ܕܝܰܬܺܝܪ ܪܰܒܳܐ ܘܝܰܬܺܝܪ ܡܫܰܡܠܝܳܐ ܐܰܝܟ ܕܡܰܨܝܳܐ܆ ܐܰܝܟ ܗܰܘ ܕܝܳܬܶܒ ܘܡܶܬܬܢܺܝܚ ܥܠܰܝܗܽܘܢ܆ ܘܰܒܟܽܠܙܒܰܢ ܟܰܐܝܺܫ^[7] ܠܘܳܬܗܽܘܢ.

ܗܳܝ ܗܳܟܺܝܠ ܕܰܒܪܺܝܟܳܐ ܬܶܫܒܽܘܚܬܶܗ ܕܡܳܪܝܳܐ ܡܶܢ ܕܽܘܟܬܳܐ ܕܺܝܠܶܗ܆ ܗܺܝ ܟܰܕ ܗܺܝ ܐܺܝܬܶܝܗ̇ ܠܗܳܝ ܕܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ. ܟܽܠܶܗ ܡܰܢ ܓܶܝܪ ܟܝܳܢܳܐ ܒܰܪܝܳܐ ܐܳܡܰܪ܆ ܒܨܺܝܪܳܐ ܐܺܝܬܰܘܗ̱ܝ ܡܶܢ ܗܳܝ ܕܰܢܫܰܒܰܚ ܐܰܘ ܢܒܰܪܶܟ ܠܰܐܠܳܗܳܐ. ܢܒܰܪܟܽܘܢ ܕܶܝܢ ܐܶܢ ܐܰܪܰܐ ܐܺܝܬ ܠܗܽܘܢ ܡܶܕܶܡ ܕܝܰܬܺܝܪ ܫܳܘܶܐ ܡܶܢ ܟܽܠܗܽܘܢ ܗܳܢܽܘܢ ܕܫܰܪܟܳܐ܆ ܗܳܢܽܘܢ ܕܠܰܐܬܪܳܐ ܗܰܘ ܕܰܒܪܰܘܡܳܐ ܘܰܕܝܰܬܺܝܪ ܡܥܰܠܰܝ ܢܣܰܒܘ. ܐܰܝܟܰܢܳܐ ܕܕܽܘܟܬܶܗ ܕܡܳܪܝܳܐ ܢܶܫܬܰܡܗܽܘܢ܆ ܘܡܶܢ ܗܳܝ ܕܡܶܫܬܰܘܬܦܺܝܢ ܒܬܶܫܒܽܘܚܬܳܐ ܐܰ‌ܠܳܗܳܝܬܳܐ ܘܡܶܬܢܰܗܪܺܝܢ܆ ܢܶܫܟܚܽܘܢ ܕܬܶܫܒܽܘܚܬܳܐ ܘܒܽܘܪܟܬܳܐ ܘܩܽܘܠܳܣܳܐ ܢܶܗܦܟܽܘܢ ܢܶܬܠܽܘܢ܆ ܘܢܶܦܪܥܽܘܢ ܚܠܳܦ ܗܳܕܶܐ ܠܝܳܗܽܘܒܶܗ ܕܢܽܘܗܪܳܐ ܡܶܬܗܰܘܢܳܢܳܐ܆ ܒܰܕܡܽܘܬ ܡܰܝ̈ܳܐ ܕܟܰܕ ܒܢܽܘܗܪܳܐ ܫܶܡܫܳܢܳܝܳܐ ܐܶܬܬܰܙܠܰܓܘ܆ ܐܳܦ ܢܽܘܗܪܳܐ ܗܳܦܟܺܝܢ ܡܰܨܡܚܺܝܢ. ܒܗܳܢܳܐ ܓܶܝܪ ܙܢܳܐ ܓܳܕܫܳܐ ܕܗܽܘ ܐܰ‌ܠܳܗܳܐ܆ ܐܰܝܟ ܗܰܘ ܕܡܶܢ ܫܽܘܒܚܳܐ ܒܰܝܬܳܝܳܐ ܕܺܝܠܶܗ ܡܶܫܬܰܒܰܚ. ܕܰܐܝܟ ܗܳܢܳܐ ܡܶܕܶܡ܆ ܐܳܦ ܚܰܟܺܝܡܳܐ ܦܰܘܠܽܘܤ ܟܳܬܶܒ ܠܘܳܬ ܪ̈ܘܡܳܝܶܐ܆ ܡܶܛܽܠ ܗܳܢܽܘܢ ܕܫܰܘܬܳܦܽܘܬܳܐ ܘܡܰܘܗܰܒܬܳܐ ܕܪܽܘܚܳܐ ܩܰܕܺܝܫܳܐ ܢܣܰܒܘ ܘܰܡܨܰܠܶܝܢ ܗ̱ܘܰܘ. ܟܰܕ ܐܳܡܰܪ܆ ܕܗܽܘ ܪܽܘܚܳܐ ܒܬܶܢ̈ܚܳܬܳܐ ܠܳܐ ܡܶܬܡܰܠ̈ܠܳܢܝܳܬܳܐ ܒܳܥܶܐ ܟܺܝܬ ܘܰܡܨܰܠܶܐ^[8].

ܘܡܰܠܰܐܟ̈ܶܐ ܡܰܢ ܗܳܢܽܘܢ ܕܰܠܪ̈ܳܥܰܘܳܬܳܐ ܐܶܬܚܙܺܝܘ܆ ܟܰܕ ܠܘܳܬ ܬܶܫܒܽܘܚܬܳܐ ܗܳܝ ܠܳܐ ܡܶܬܡܰܠܠܳܢܺܝܬܳܐ ܕܥܰܡܰܢܽܘܐܶܝܠ ܚܳܝܪܺܝܢ ܗ̱ܘܰܘ܆ ܟܰܕ ܥܰܠ ܟܽܠܶܗ ܩܽܘܠܳܣܳܐ ܘܬܶܫܒܽܘܚܬܳܐ ܐܰܝܟ ܕܰܠܡܺܐܡܰܪ ܘܒܰܪ̱ܬ ܩܳܠܳܐ ܕܒܶܝܬ ܒܢܰܝ̈ܢܳܫܳܐ܆ ܡܶܣܟܺܢܽܘܬܳܐ ܦܣܰܩܘ ܘܰܥܕܰܠܘ܆ ܠܘܳܬ ܚܰܝ̈ܠܰܘܳܬܳܐ ܕܰܒܪܰܘܡܳܐ ܚܳܪܘ. ܘܟܰܕ ܬܰܡܳܢ ܬܽܘܒ ܠܥܶܠ ܡܶܢ ܟܽܠܗܽܘܢ ܗܳܢܽܘܢ ܐ̱ܚܪ̈ܳܢܶܐ ܚܳܪܘ܆ ܠܘܳܬܳܗ̇ ܕܺܝܠܳܗ̇ ܐܰܝܟ ܐ̱ܢܳܫ ܢܺܐܡܰܪ ܕܩܰܪܩܰܦܬܳܐ ܘܪܺܝܫܳܐ ܕܛܶܟܣ̈ܶܐ ܗܳܢܽܘܢ ܡܫܰܡ̈ܫܳܢܶܐ ܘܛܽܘܒ̈ܬܳܢܶܐ ܪܗܶܛܘ ܣܠܶܩܘ. ܘܠܰܡܡܰܠܠܽܘܬ ܫܽܘܒܚܳܐ ܗܳܝ ܕܝܰܬܺܝܪ ܪܰܒܳܐ ܡܶܢ ܟܽܠܗܶܝܢ܆ ܡܶܕܶܡ ܙܥܽܘܪܳܐ ܚܰܫܒܽܘܗ̇. ܘܰܐܝܟ ܗܰܘ ܕܒܰܨܪܺܝܟܽܘܬܳܐ ܩܳܡܘ܆ ܟܰܕ ܟܽܠܗܶܝܢ ܓܡܰܪܘ ܘܶܐܒܰܕܘ ܠܗܽܘܢ܆ ܗܰܘ ܡܳܐ ܕܶܐܫܬܟܰܚܘ ܐܰܙܥܶܩܘ܆ ܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ.

ܒܝܰܕ ܕܶܝܢ ܗܳܠܶܝܢ ܕܰܠܩܽܘܒܠܳܐ ܐܳܬܶܐ܆ ܗܰܘ ܕܺܐܝܬܰܘܗ̱ܝ ܪܳܡܳܐ ܘܪܳܚܶܡ ܐ̱ܢܳܫܐ ܒܰܟܝܳܢܳܐ. ܘܟܽܠܶܗ ܗܳܢܳܐ ܡܶܬܬܰܚܬܶܐ ܡܶܢ ܝܳܬܶܗ܆ ܟܡܳܐ ܕܝܳܕܰܥ ܗ̱ܘܳܐ ܕܰܣܢܺܝܩܺܝܢ ܗ̱ܘܰܝܢ ܥܰܠ ܗܳܕܶܐ܆ ܗܳܢܽܘܢ ܕܰܕܢܶܬܦܪܶܩ ܣܢܺܝܩܺܝܢ ܗ̱ܘܰܝܢ. ܘܟܰܕ ܡܗܰܝܡܶܢ ܠܶܗ ܠܶܐܫܰܥܝܳܐ ܢܒܺܝܳܐ܆ ܕܢܶܩܕܽܘܡ ܢܺܐܡܪܺܝܘܗ̱ܝ ܠܐ̱ܪܳܙܳܐ ܕܡܶܬܒܰܪܢܫܳܢܽܘܬܳܐ ܗܰܘ ܕܰܠܥܶܠ ܡܶܢ ܟܽܠ ܗܰܘܢܳܐ ܘܡܶܠܬܳܐ܆ ܐܶܡܰܪ ܠܶܗ܆ ܣܰܒ ܠܳܟ ܛܽܘܡܣܳܐ ܚܰܕܬ̣ܳܐ ܪܰܒܳܐ܆ ܘܰܟܬܽܘܒ ܒܶܗ ܒܰܟܬܳܒܳܐ ܕܐ̱ܢܳܫܳܐ܆ ܕܩܰܠܺܝܠܳܐܺܝܬ ܢܶܥܒܶܕ ܫܒܺܝܬܳܐ ܕܒ̈ܶܙܬܶܐ^[9]. ܩܰܪܺܝܒ ܓܶܝܪ ܘܛܽܘܡܣܳܐ ܡܰܢ ܚܰܕܬ̣ܳܐ܆ ܛܳܒ ܠܳܚܡܳܐܺܝܬ ܟܰܢܝܶܗ ܠܶܐܘܰܢܓܶܠܺܝܽܘܢ܆ ܕܡܶܢ ܢܒܺܝ̈ܶܐ ܢܰܗܺܝܪܳܐܺܝܬ ܩܰܕܶܡ ܐܶܬܟܬܶܒ ܘܩܰܕܶܡ ܐܶܬܟܪܶܙ. ܗܰܘ ܕܰܒܟܽܠܙܒܰܢ ܡܶܬܥܰܠܰܡ ܘܳܐܦܠܳܐ ܡܬܽܘܡ ܣܳܐܶܒ܆ ܒܰܕܡܽܘܬ ܟܬܺܝܒܬܳܐ ܢܳܡܽܘܣܳܝܬܳܐ ܗܳܝ ܕܰܒܠܽܘܚ̈ܶܐ ܕܰܐܥܬܩܰܬ. ܪܰܒܳܐ ܕܶܝܢ ܐܶܡܰܪ ܛܽܘܡܣܳܐ. ܐܰܝܟܰܢܳܐ ܓܶܝܪ ܠܰܘ ܪܰܒܰܐ ܗ̱ܘ ܗܰܘ ܕܣܽܘܥܪܳܢܳܐ ܕܟܽܠܶܗ ܗܳܢܳܐ ܡܣܰܒܰܪ܆ ܘܪܰܒܳܐ ܘܰܕܫܳܘܶܐ ܠܕܽܘܡܳܪܳܐ܆ ܡܶܛܽܠ ܟܺܝܬ ܕܰܐܝܟ ܡܶܠܬܶܗ ܕܦܰܘܠܽܘܤ܆ ܡܶܬܬܰܘܕܝܳܢܳܐܺܝܬ ܪܰܒܳܐ ܐܺܝܬܰܘܗ̱ܝ ܐ̱ܪܳܙܳܐ ܕܫܰܦܺܝܪܽܘܬ ܕܶܚܠܬܳܐ^[10]. ܘܳܐܦ ܐ̱ܚܪܳܢܝܳܐܺܝܬ ܕܶܝܢ ܪܰܒܳܐ ܐܺܝܬܰܘܗ̱ܝ܆ ܗܰܘ ܕܝܽܘܠ̈ܦܳܢܶܐ ܡܫܰܡ̈ܠܰܝܳܐ ܡܰܝܬܶܐ܆ ܠܰܘ ܐܰܝܟ ܕܰܠܗܳܢܽܘܢ ܕܪܰܘܪ̈ܒܶܐ ܐܺܝܬܰܝܗܽܘܢ ܒܩܰܘܡܬܳܐ ܡܶܬܗܰܘܢܳܢܺܝܬܳܐ܆ ܗܰܘ ܕܒܺܐܝܕܰܘ̈ܗ̱ܝ ܓܰܠܝܳܐܺܝܬ ܫܡܰܥܢܰܢ܆ ܕܶܐܬܶܐܡܰܪ ܠܩܰܕܡܳܝ̈ܶܐ ܕܠܳܐ ܬܶܩܛܽܘܠ܆ ܐܶܢܳܐ ܕܶܝܢ ܐܳܡܰܪ ܐ̱ܢܳܐ܆ ܕܠܳܐ ܬܶܪܓܰܙ ܥܰܠ ܩܰܪܺܝܒܳܟ ܐܺܝܩܺܐ܆ ܘܶܐܬܶܐܡܰܪ ܬܽܘܒ ܕܠܳܐ ܬ̣ܓܽܘܪ܆ ܐܶܢܳܐ ܕܶܝܢ ܕܳܐܦܠܳܐ ܬܚܽܘܪ ܠܘܳܬ ܗܳܝ ܕܬܶܪܰܓ ܐܳܡܰܪ ܐ̱ܢܳܐ܆ ܘܰܗܘ̣ܰܘ ܡܫܰܡ̈ܠܰܝܳܐ܆ ܐܰܝܟܰܢܳܐ ܕܰܐܒܽܘܟܽܘܢ ܗܰܘ ܫܡܰܝܳܢܳܐ ܡܫܰܡܠܝܳܐ ܐܺܝܬܰܘܗ̱ܝ^[11].

ܐܶܠܳܐ ܒܪܰܡ ܠܛܽܘܡܣܳܐ ܗܰܘ ܕܗܳܟܰܢܳܐ ܐܺܝܬܰܘܗ̱ܝ ܪܰܒܳܐ܆ ܒܰܟܬܳܒܳܐ ܕܐ̱ܢܳܫܳܐ ܦܳܩܶܕ ܗ̱ܘܳܐ ܠܶܗ ܠܰܢܒܺܝܳܐ ܕܢܶܟܬܒܺܝܘܗ̱ܝ. ܟܰܕ ܐܰܝܟ ܕܰܠܡܺܐܡܰܪ ܐܳܡܰܪ ܗ̱ܘܳܐ܆ ܕܠܳܐ ܡܶܕܶܡ ܬܶܬܩܰܢܰܛ ܐܳܘ ܗܳܢܳܐ^[12]܆ ܐܳܦܠܳܐ ܟܰܕ ܠܘܳܬ ܐܰ‌ܠܳܗܳܝܽܘܬܶܗ ܘܠܳܐ ܡܶܬܚܰܒܠܳܢܽܘܬܶܗ ܕܐ̱ܪܳܙܳܐ ܚܳܐܰܪ ܐܰܢ̱ܬ܆ ܘܰܚܦܺܝܛ ܐܰܢ̱ܬ ܕܬܶܬܡܰܛܶܐ ܠܗܳܝ ܕܰܐܝܟ ܕܫܳܘܝܳܐ ܕܣܽܘܥܪܳܢܳܐ܆ ܘܰܐܝܟ ܐܰܝܢܳܐ ܕܡܶܛܽܠ ‌‌ܐܰ‌ܠܳܗܳܐ ܥܬܺܝܕ ܐܰܢ̱ܬ ܠܡܶܫܬܰܥܳܝܽܘ܆ ܘܒܳܥܶܐ ܐܰܢ̱ܬ ܡ̈ܶܠܶܐ ܡܶܕܶܡ ܐܰ‌ܠܳܗܳܝ̈ܳܬܳܐ ܘܰܫܡܳܗ̈ܶܐ ܘܠܳܐ ܡܶܫܟܰܚ ܐܰܢ̱ܬ܆ ܐܳ‌ܠܨܳܐܺܝܬ ܬܶܡܰܐܢ ܠܳܟ ܠܡܶܟܬܰܒ. ܒܰܟ̈ܬܺܝܒܳܬܳܐ ܘܰܒܡ̈ܶܠܶܐ ܐ̱ܢܳܫܳܝ̈ܳܬܳܐ ܦܳܩܶܕ ܐ̱ܢܳܐ ܠܳܟ ܕܬܶܟܬܽܘܒ܆ ܟܰܕ ܣܰܓܺܝ ܢܰܩܺܝܦܳܐܺܝܬ ܘܪܶܚܡܰܬ ܐ̱ܢܳܫܐܺܝܬ ܐܳܦ ܗܳܕܶܐ ܡܕܰܒܰܪ ܐ̱ܢܳܐ. ܐܶܢ ܓܶܝܪ ܡܶܠܬܶܗ ܕܰܐ‌ܠܳܗܳܐ ܢܚܶܬ ܠܗܳܝ ܕܢܶܗܘܶܐ ܒܰܪܢܳܫܳܐ܆ ܟܰܕ ܠܳܐ ܫ̣ܕܳܐ ܠܗܳܝ ܕܢܶܗܘܶܐ ܐܺܝܬܰܘܗ̱ܝ ܐܰ‌ܠܳܗܳܐ܆ ܐܰܝܟܰܢܳܐ ܡܰܣܠܶܐ ܗ̱ܘܳܐ ܕܒܰܟ̈ܬܺܝܒܳܬܳܐ ܐ̱ܢܳܫܳܝ̈ܳܬܳܐ ܢܶܬܟܰܬܒ̈ܳܢ ܟܺܝܬ ܘܢܶܬܟܰܪ̈ܙܳܢ ܗܳܠܶܝܢ ܕܡܶܛܽܠܳܬܶܗ. ܠܗܰܘ ܓܶܝܪ ܕܡܶܬܒܰܪܢܫܳܢܽܘܬܳܐ^[13] ܠܳܐ ܫܰܚܠܶܦܬ̣ܶܗ܆ ܘܠܳܐ ܫܰܓܢܝܰܬ̣ܶܗ ܘܠܳܐ ܒܰܨܰܪܬ̣ܶܗ܆ ܐܰܝܟܰܢܳܐ ܥܬܺܝܕ ܗ̱ܘܳܐ ܕܰܢܒܰܨܪܺܝܘܗ̱ܝ܆ ܟܬܳܒܳܐ ܘܡܰܦܩܳܐ ܕܡܶܠܬܳܐ ܕܒܰܪ̱ܬ ܩܳܠܳܐ ܕܒܰܪܢܳܫܳܐ܆ ܕܰܠܟܳܪܽܘܙܽܘܬܳܐ ܦܳܪܽܘܩܳܝܬܳܐ ܕܶܐܘܰܢܓܶܠܺܝܽܘܢ ܡܰܝܬܶܐ ܠܰܢ. ܘܣܳܗܕܺܝܢ ܗܶܢܽܘܢ ܡܰܠܰܐܟ̈ܶܐ܆ ܕܥܽܘܠܳܐ ܚܳܙܶܝܢ ܗ̱ܘܰܘ ܠܶܗ ܐܰܝܟ ܕܩܰܕܡܶܬ ܐܶܡܪܶܬ ܕܣܺܝܡ ܒܽܐܘܪܝܳܐ܆ ܘܬܶܫܒܽܘܚܬܳܐ ܗܳܝ ܕܒܰܡܪ̈ܰܘܡܶܐ ܡܩܰܪܒܺܝܢ ܗ̱ܘܰܘ ܠܶܗ.

ܡܶܛܽܠ ܡܳܢܳܐ ܕܶܝܢ ܠܰܘ ܟܬܳܒܳܐ ܐܶܡܰܪ ܐܶܠܳܐ ܛܽܘܡܣܳܐ. ܡܶܛܽܠ ܟܺܝܬ ܕܠܳܐ ܓܽܘܕܳܐ ܗܳܝ ܕܰܢܒܺܝ̈ܶܐ܆ ܘܳܐܦ ܠܳܐ ܟܶܢܫܳܐ ܗܰܘ ܕܰܡܣܰܒܪ̈ܳܢܶܐ ܐܰܘ ܕܰܫܠܺܝ̈ܚܶܐ ܣܦܰܩ ܕܰܠܟܽܠܶܗ ܣܽܘܥܪܳܢܳܐ ܕܰܡܥܰܠܝܽܘܬܳܐ ܗܳܝ ܦܰܐܺܝܬ ܠܰܐܠܳܗܳܐ܆ ܐܰܘ ܠܡ̈ܶܠܶܐ ܕܡܰܬܒܰܪܢܫܳܢܽܘܬܳܐ܆ ܠܡܶܣܬܰܟܳܠܽܘ ܟܺܝܬ ܘܰܠܡܺܐܡܰܪ. ܐܶܠܳܐ ܒܰܡܢܳܬܳܐ ܙܥܽܘܪܬܳܐ܆ ܘܰܟܡܳܐ ܕܰܒܪܺܝܫ ܨܶܒ̈ܥܳܬܶܗ ܒܰܠܚܽܘܕ ܢܶܓܫܽܘܦ ܐ̱ܢܳܫ܆ ܘܰܒܛܽܘܡܣܳܐ ܙܥܽܘܪܽܘܢܳܐ ܢܶܚܒܽܘܫ. ܡܶܛܽܠܗܳܕܶܐ ܐܳܦ ܝܽܘܚܰܢܳܢ ܗܰܘ ܒܪܳܐ ܕܪܰܥܡܳܐ܆ ܗܰܘ ܕܝܰܬܺܝܪ ܡܶܢ ܟܽܠܢܳܫ ܬܶܐܘܠܘܓܝܣܰܐ ܥܒܰܕ ܘܶܐܬܢܰܗܰܪ ܒܗܰܘܢܶܗ܆ ܘܗܳܠܶܝܢ ܕܡܶܬܒܰܪܢܫܳܢܽܘܬܳܐ ܐܰܟܬܶܒ ܝܰܬܺܝܪ ܡܥܰܠܝܳܐܺܝܬ܆ ܟܰܕ ܡܫܰܠܶܡ ܠܳܗ̇ ܠܡܰܟܬܒܳܢܽܘܬܳܐ ܐܶܘܰܢܓܶܠܳܝܬܳܐ ܐܳܡܰܪ ܗ̱ܘܳܐ܆ ܐܺܝܬ ܕܶܝܢ ܐܳܦ ܐ̱ܚܪ̈ܳܢܝܳܬܳܐ ܣܰܓܺܝ̈ܳܐܬܳܐ܆ ܟܽܠܗܶܝܢ ܗܳܠܶܝܢ ܕܰܥܒܰܕ ܝܶܫܽܘܥ. ܗܳܠܶܝܢ ܟܺܝܬ ܕܶܐܢ ܢܶܬܟܰܬܒ̈ܳܢ ܗ̱ܘܰܝ̈ ܟܽܠ ܚܕܳܐ ܚܕܳܐ܆ ܘܳܐܦܠܳܐ ܗܽܘ ܥܳܠܡܳܐ ܣܳܒܰܪ ܐ̱ܢܳܐ ܕܥܳܪܶܐ ܗ̱ܘܳܐ܆ ܠܰܟ̈ܬܳܒܶܐ ܗܳܢܽܘܢ ܕܡܶܬܟܰܬܒܺܝܢ ܗ̱ܘܰܘ^[14]. ܗܳܕܶܐ ܕܶܝܢ ܐܶܡܰܪ܆ ܠܰܘ ܟܰܕ ܠܣܽܘܓܳܐܐ ܒܰܠܚܽܘܕ ܡܚܰܘܶܐ ܗ̱ܘܳܐ ܕܗܳܠܶܝܢ ܕܰܥܒܰܕ ܝܶܫܽܘܥ܆ ܟܰܕ ܡܶܠܬܳܐ ܕܰܩܕܳܡ ܥܳܠ̈ܡܶܐ ܐܺܝܬܰܘܗ̱ܝ ܗ̱ܘܳܐ ܘܚܰܝܠܶܐ ܐܳܚܽܘܕܳܐ ܕܟܽܠܗܶܝܢ ܗܳܠܶܝܢ ܕܰܗܘ̈ܰܝ܆ ܘܡܶܛܽܠ ܗܳܕܶܐ ܐܳܡܰܪ ܗ̱ܘܳܐ܆ ܕܳܐܒܝ ܥܕܰܡܳܐ ܠܗܳܫܳܐ ܥܳܒܶܕ ܐܳܦ ܐܶܢܳܐ ܥܳܒܶܕ ܐ̱ܢܳܐ^[15]܆ ܐܶܠܳܐ ܐܳܦ ܟܰܕ ܠܪܰܒܽܘܬܳܐ ܡܰܘܕܰܥ܆ ܗܳܝ ܟܺܝܬ ܕܠܳܐ ܐܺܝܬܶܝܗ̇ ܗ̱ܘܳܬ ܡܩܰܒܠܳܢܺܝܬܳܗ̇܆ ܡܰܫܡܰܥܬܳܐ ܕܗܳܢܽܘܢ ܕܰܒܥܳܠܡܳܐ ܚܳܐܶܝܢ.

ܟܽܠܶܗ ܗܳܢܳܐ ܓܶܝܪ ܐܶܬܓܠܺܝ ܘܶܐܬܟܬܶܒ ܒܰܠܚܽܘܕ܆ ܟܡܳܐ ܕܺܐܝܬܶܝܗ̇ ܗ̱ܘܳܬ ܠܰܢ ܡܶܬܕܰܪܟܳܢܺܝܬܳܐ. ܘܳܐܦ ܟܽܠܗܽܘܢ ܟܬܳܒ̈ܶܐ ܢܦܺܝ̈ܚܰܝ ܡܶܢ ܐܰ‌ܠܳܗܳܐ܆ ܢܺܐܡܰܪ ܐ̱ܢܳܫ ܘܛܳܒ ܟܺܐܢܳܐܺܝܬ܆ ܕܰܠܦܽܘܬ ܟܽܠܳܗ̇ ܝܺܕܰܥܬܳܐ ܐܰ‌ܠܳܗܳܝܬܳܐ܆ ܛܶܟܣܳܐ ܕܛܽܘܡܣܳܐ ܡܶܕܶܡ ܘܕܰܡܢܳܬܳܐ ܙܥܽܘܪܬܳܐ ܕܟܽܠܶܗ ܟܬܳܒܳܐ ܐܰܚܺܝܕܺܝܢ. ܠܗܳܝ ܟܺܝܬ ܕܰܒܝܰܕ ܢܒܺܝܳܐ ܗܰܘ ܕܰܡܙܰܡܰܪ ܡܶܬܚܙܶܐ ܕܩܰܕܶܡ ܐܳܡܰܪ ܠܳܗ̇ ܗܽܘ ܦܳܪܽܘܩܰܢ܆ ܘܩܰܕܶܡ ܡܫܰܘܕܰܥ ܠܡܶܐܬܺܝܬܶܗ ܕܒܰܒܣܰܪ܆ ܘܰܠܡܰܦܰܩܬܳܐ ܕܬܶܫܡܶܫܬܳܐ ܗܳܝ ܥܰܬܺܝܩܬܳܐ ܘܛܶܠܳܢܳܝܬܳܐ ܕܰܒܝܰܕ ܝܰܩ̈ܕܶܐ ܫܰܠ̈ܡܶܐ܆ ܘܰܠܡܰܥܰܠܬܳܐ ܕܰܚܠܳܦܶܝܗ̇ ܕܦܽܘܠܚܳܢ ܟܳܗܢܽܘܬܳܐ ܪܽܘܚܳܢܳܝܬܳܐ ܟܺܝܬ ܘܫܰܪܺܝܪܬܳܐ ܕܦܰܓܪܳܐ ܩܰܕܺܝܫܳܐ܆ ܘܰܠܘܳܬ ܐܰܒܽܘܗ̱ܝ ܐܳܡܰܪ܆ ܕܶܒܚܬܳܐ ܘܩܽܘܪܒܳܢܳܐ ܠܳܐ ܨܒܰܝܬ܆ ܦܰܓܪܳܐ ܕܶܝܢ ܬܰܩܶܢܬ ܠܺܝ܆ ܝܰܩ̈ܕܶܐ ܫܰܠ̈ܡܶܐ ܘܡܶܛܽܠ ܚܛܺܝܬܳܐ ܠܳܐ ܒܥܰܝܬ܆ ܗܳܝܕܶܝܢ ܐܶܡܪܶܬ ܗܳܐ ܐܳܬܶܐ ܐ̱ܢܳܐ܆ ܒܪܺܝܫܳܐ ܕܰܟܬܳܒܳܐ ܟܬܺܝܒ ܡܶܛܽܠܳܬܝ^[16]. ܗܳܝ ܕܶܝܢ ܕܦܰܓܪܳܐ ܬܰܩܶܢܬ ܠܺܝ܆ ܗܳܕܶܐ ܐܺܝܬܶܝܗ̇. ܕܰܠܕܶܒܚ̈ܶܐ ܟܺܝܬ ܘܝܰܩ̈ܕܶܐ ܫܰܠ̈ܡܶܐ ܐܳܡܰܪ ܗܳܠܶܝܢ ܕܰܐܝܟ ܢܳܡܽܘܣܳܐ ܡܶܫܬܰܡܠܶܝܢ ܗ̱ܘܰܘ܆ ܡܶܛܽܠ ܛܶܠܳܢܳܝܽܘܬܗܽܘܢ ܘܠܳܐ ܡܫܰܡܠܝܽܘܬܗܽܘܢ ܒܰܛܶܠܬ ܐܶܢܽܘܢ ܐܳܘ ܐܰܒܳܐ. ܠܡܶܐܬܺܝܬܳܐ ܕܶܝܢ ܗܳܝ ܕܝܰܬܺܝܪ ܡܶܢ ܟܽܠ ‌ܐ̱ܪܳܙܳܢܳܝܳܐ ܕܡܶܬܒܰܣܪܳܢܽܘܬܳܐ ܕܺܝܠܝ܆ ܘܰܠܦܽܘܠܚܳܢ ܟܳܗܢܽܘܬܳܐ ܕܦܰܓܪܝ܆ ܡܫܰܡܠܰܝܬܳܐ ܐܰܥܶܠܬ ܚܠܳܦܰܝܗܽܘܢ܆ ܘܕܰܒܠܳܐ ܡܶܕܶܡ ܚܰܣܺܝܪܳܐ܆ ܒܗܳܝ ܕܫܽܘܒܩܳܢܳܐ ܟܺܝܬ ܕܰܚ̈ܛܳܗܶܐ ܘܕܽܘܟܳܝܳܐ ܡܰܠܝܳܐ ܐܺܝܬ ܒܳܗ̇. ܗܳܝ ܟܺܝܬ ܕܢܳܡܽܘܣܳܐ ܢܶܥܒܕܺܝܗ̇ ܠܳܐ ܐܶܬܡܨܺܝ. ܘܗܳܠܶܝܢ ܡܶܢ ܫܽܘܪܳܝܳܐ܆ ܒܪܺܝܫܳܐ ܕܰܟܬܳܒܳܐ ܟܬܺܝ̈ܒܳܢ ܟܺܝܬ ܘܩܰܕܺܝ̈ܡܳܢ ܐܰܡܺܝܪ̈ܳܢ ܡܶܛܽܠܳܬܝ. ܗܳܢܰܘ ܕܶܝܢ ܒܚܰܕ ܩܶܦܰܠܶܐܘܳܢ ܐܰܘܟܺܝܬ ܪܺܝܫܳܐ ܘܰܒܚܰܕ ܦ݀ܣܩܳܐ. ܟܰܕ ܠܟܽܠܗܽܘܢ ܟܬܳܒ̈ܶܐ ܕܩܳܕܡܺܝܢ ܗ̱ܘܰܘ ܐܳܡܪܺܝܢ ܡܶܛܽܠܳܬܶܗ܆ ܚܰܕ ܪܺܝܫܳܐ ܕܰܟܬܳܒܳܐ ܩܳܪܶܐ܆ ܡܶܛܽܠ ܕܳܐܦ ܟܽܠܗܽܘܢ ܩܳܕܡܺܝܢ ܗ̱ܘܰܘ ܐܳܡܪܺܝܢ ܠܳܗ̇ ܠܡܶܐܬܺܝܬܶܗ ܗܳܝ ܕܒܰܒܣܰܪ܆ ܘܠܰܘ ܚܰܕ ܒܰܠܚܽܘܕ.

ܡܶܛܽܠ ܗܳܕܶܐ ܗܳܟܺܝܠ ‌ܐܳܦ ܠܽܘܩܳܐ ܟܬܰܒ܆ ܕܟܰܕ ܐܶܬܚܙܺܝ ܡܶܢ ܒܳܬܰܪ ܩܝܳܡܬܳܐ ܕܡܶܢ ܡܺܝ̈ܬܶܐ ܠ̱ܐܢܳܫܺܝ̈ܢ ܕܪܳܕܶܝܢ ܗ̱ܘܰܘ ܒܽܐܘܪܚܳܐ܆ ܕܟܰܕ ܫܰܪܺܝ ܡܶܢ ܡܽܘܫܶܐ ܘܡܶܢ ܟܽܠܗܽܘܢ ܢܒܺܝ̈ܶܐ܆ ܡܦܰܫܶܩ ܗ̱ܘܳܐ ܠܗܽܘܢ ܒܟܽܠܗܽܘܢ ܟܬܳܒ̈ܶܐ ܗܳܠܶܝܢ ܕܡܶܛܽܠܳܬܶܗ^[17]. ܘܰܠܟܽܠܗܽܘܢ ܒܪܰܡ܆ ܚܰܕ ܦ݀ܣܩܳܐ ܙܥܽܘܪܳܐ ܕܰܟܬܳܒܳܐ܆ ܘܚܰܕ ܪܺܝܫܳܐ ܫܰܡܰܗ ܐܶܢܽܘܢ. ܐܰܝܟ ܕܰܠܦܽܘܬ ܟܽܠܶܗ ܟܬܳܒܳܐ ܕܺܝܕܰܥܬܳܐ ܐܰ‌ܠܳܗܳܝܬܳܐ܆ ܗܰܘ ܟܺܝܬ ܕܠܶܗ ܠܰܡܫܺܝܚܳܐ ܒܰܠܚܽܘܕܰܘܗ̱ܝ ܡܶܬܺܝܕܰܥ܆ ܗܰܘ ܕܒܶܗ ܐܺܝܬܰܝܗܶܝܢ ܟܽܠܗܶܝܢ ܣܺܝ̈ܡܳܬܳܐ ܡܛܰܫ̈ܝܳܬܳܐ ܕܚܶܟܡܬܳܐ ܘܕܺܝܕܰܥܬܳܐ^[18]܆ ܐܰܝܟܰܢܳܐ ܕܰܠܩܽܘܠܳܣܳܝ̈ܶܐ ܟܬܰܒ ܦܰܘܠܽܘܤ. ܠܘܳܬܰܢ ܓܶܝܪ ܡܶܢ ܗܳܢܶܝܢ ܣܺܝ̈ܡܳܬܳܐ ܡܶܕܶܡ ܙܥܽܘܪܳܐ ܢܚܶܬ܆ ܘܰܟܡܳܐ ܕܢܶܬܕܰܡܶܐ ܠܩܶܦܰܠܶܐܘܳܢ ܘܰܠܛܽܘܡܣܳܐ܆ ܘܗܳܢܳܐ ܠܰܘ ܕܡܶܢ ܟܽܠܢܳܫ ܡܶܬܥܪܶܐ܆ ܐܶܠܳܐ ܡܶܢ ܗܳܢܽܘܢ ܡܰܢ ܝܰܬܺܝܪܳܐܺܝܬ܆ ܡܶܢ ܗܳܢܽܘܢ ܕܶܝܢ ܒܨܺܝܪܳܐܺܝܬ܆ ܐܰܝܟܰܢܳܐ ܕܰܠܟܽܠ ܚܰܕ ܢܶܗܘܶܐ ܐܺܝܬ ܠܶܗ܆ ܒܛܽܘܝܳܒܳܐ ܘܕܽܘܟܳܝܳܐ ܕܰܠܘܳܬ ܬܶܐܽܘܪܺܝܰܐ. ܠܗܳܢܳܐ ܟܬܳܒܳܐ ܕܺܝܕܰܥܬܳܐ ܡܫܰܡܠܰܝܬܳܐ ܐܳܦ ܝܽܘܚܰܢܳܢ ܗܰܘ ܐܶܘܰܢܓܶܠܺܝܣܛܳܐ ܒܓܶܠܝܳܢܳܐ ܚܙܳܝܗ̱ܝ ܆ ܕܰܟܬܺܝܒ ܗ̱ܘܳܐ ܡܶܢ ܠܓܰܘ ܟܺܝܬ ܘܡܶܢ ܠܒܰܪ܆ ܘܰܛܒܺܝܥ ܗ̱ܘܳܐ ܒܛܰܒ̈ܥܶܐ ܫܰܒܥܳܐ܆ ܕܡܰܘܕܥܺܝܢ ܠܰܡܫܰܡܠܝܽܘܬܳܗ̇ ܕܰܡܚܰܦܝܽܘܬܳܐ. ܗܰܘ ܕܡܶܛܽܠܳܬܶܗ ܐܳܡܰܪ܆ ܕܘܠܳܐ ܐ̱ܢܳܫ ܡܨܶܐ ܗ̱ܘܳܐ ܒܰܫܡܰܝܳܐ ܘܠܳܐ ܥܰܠ ‌ܐܰܪܥܳܐ܆ ܘܳܐܦܠܳܐ ܠܬܰܚܬܳ ܡܶܢ ܐܰܪܥܳܐ ܠܡܶܦܬܚܶܗ܆ ܐܶܠܳܐ ܐܶܢ ܗܰܘ ܕܰܙܟܳܐ ܠܡܰܘܬܳܐ܆ ܙܳܟܽܘܬܳܐ ܗܳܝ ܕܰܚܠܳܦܰܝܢ܆ ܐܰܪܝܳܐ ܗܰܘ ܕܡܶܢ ܫܰܒܛܳܐ ܕܺܝܗܽܘܕܳܐ܆ ܥܶܩܳܪܳܐ ܗܰܘ ܕܕܰܘܺܝܕ܆ ܗܳܢܳܐ ܕܶܝܢ ܐܺܝܬܰܘܗ̱ܝ ܡܫܺܝܚܳܐ܆ ܗܰܘ ܕܡܶܛܽܠܳܬܶܗ ܝܰܥܩܘܒ ܡܰܢ ܗܰܘ ܪܺܝܫ ܐܰܒܳܗ̈ܳܬܳܐ ܟܰܕ ܡܶܬܢܰܒܶܐ ܐܳܡܰܪ ܗ̱ܘܳܐ܆ ܓܽܘܪܝܳܐ ܕܰܐܪܝܳܐ ܝܺܗܽܘܕܳܐ܆ ܟܰܕ ܪܒܰܥܬ ܕܡܶܟ̣ܬ ܐܰܝܟ ܐܰܪܝܳܐ^[19]܆ ܟܰܕ ܐܰܪܝܳܐ ܡܶܛܽܠ ܡܰܠܟܽܘܬܳܐ ܡܫܰܡܰܗ ܠܶܗ܆ ܗܰܘ ܟܺܝܬ ܕܟܰܕ ܪܒܰܥ ܝܰܬܺܝܪܳܐܺܝܬ ܘܰܫܟܶܒ ܘܰܕܡܶܟ ܫܶܢܬܳܐ ܗܳܝ ܕܰܚܠܳܦܰܝܢ ܘܡܺܝܬ ܚܰܘܺܝ܆ ܕܥܰܠ ܡܰܘܬܳܐ ܗܰܘ ܕܥܰܠ ܟܽܠ ‌ܐܰܡܠܶܟ܆ ܐܰܡܠܶܟ ܘܶܐܬܥܰܫܰܢ ܒܝܰܕ ܩܝܳܡܬܳܐ܆ ܦܰܘܠܽܘܤ ܕܶܝܢ ܠܥܶܒܪ̈ܳܝܶܐ ܟܳܬܶܒ ܗ̱ܘܳܐ ܗܳܟܰܢܳܐ܆ ܝܺܕܺܝܥܳܐ ܗܝ ܓܶܝܪ ܕܡܶܢ ܝܺܗܽܘܕܳܐ ܕܢܰܚ ܡܳܪܰܢ^[20].

ܗܳܢܳܐ ܦܬܰܚ ܠܰܢ ܠܰܟܬܳܒܳܐ ܗܰܘ ܕܺܝܕܰܥܬܳܐ ܕܟܽܘܠܳܢܳܐܺܝܬ ܐܰܚܺܝܕ ܗ̱ܘܳܐ܆ ܕܡܶܢܶܗ ܛܽܘܡܣܳܐ ܚܰܕ ܢܚܶܬ ܠܘܳܬ ܒܢܰܝ̈ܢܳܫܳܐ܆ ܠܗܳܢܳܐ ܓܶܝܪ ܐܳܦ ܥܳܪܶܝܢ ܚ̱ܢܰܢ ܒܰܠܚܽܘܕ܆ ܘܰܠܗܳܢܽܘܢ ܕܰܐܝܟ ܐܶܫܰܥܝܳܐ ܡܶܬܗܰܝܡܰܢ ܗ̱ܘܳܐ܆ ܥܰܡ ܗܳܝ ܕܳܐܦ ܢܶܟܬܒܽܘܢ ܐܳܦ ܢܺܐܡܪܽܘܢ܆ ܐܳܦ ܗܳܝ ܕܠܰܐ̱ܚܪ̈ܳܢܶܐ ܢܚܰܘܽܘܢ ܗܳܠܶܝܢ ܕܒܶܗ܆ ܡܶܛܽܠ ܗܳܕܶܐ ܐܳܦ ܫܳܡܰܥ ܗ̱ܘܳܐ܆ ܣܰܒ ܠܳܟ ܛܽܘܡܣܳܐ ܚܰܕܬ̣ܐ ܪܰܒܳܐ. ܚܰܕܚ̈ܕܳܢܶܐ ܕܶܝܢ ܡܶܢ ܨܚܳܚ̈ܶܐ ܐܺܝܬ ܒܗܽܘܢ܆ ܣܰܒ ܠܳܟ ܛܽܘܡܣܳܐ ܕܚܰܕܬ̣ܐ ܪܰܒܳܐ. ܗܳܝ ܕܒܺܐܝ̈ܕܶܝܗ̇ ܡܶܬܚܰܘܝܳܐ ܓܰܠܝܳܐܺܝܬ܆ ܕܰܕܚܰܕܬ̣ܐ ܪܰܒܳܐ܆ ܕܐ̱ܪܳܙܳܐ ܗܰܘ ܕܰܒܛܽܘܡܣܳܐ ܗܰܘ ܥܬܺܝܕ ܗ̱ܘܳܐ ܕܢܶܬܟܬܶܒ ܐܳܡܰܪ܆ ܗܰܘ ܕܡܶܢܶܗ ܐܳܦ ܠܶܗ ܠܛܽܘܡܣܳܐ ܚܰܕܬ̣ܐ ܘܪܰܒܳܐ ܩܪܳܐ܆ ܡܶܛܽܠ ܕܺܝܕܺܝܥܳܐ܆ ܕܟܽܠ ܛܽܘܡܣܳܐ ܗܰܘ ܕܰܥܬܺܝܕ ܕܢܶܟܬܽܘܒ ܒܶܗ ܐ̱ܢܳܫ܆ ܚܰܕܬ̣ܐ ܐܰܝܟ ܕܰܒܣܽܘܓܳܐܐ ܐܺܝܬܰܘܗ̱ܝ ܘܠܳܐ ܟܬܺܝܒܳܐ. ܕܡܶܢ ܗܳܪܟܳܐ ܐܶܢ ܐܳܦ ܐ̱ܢܳܫ ܡܶܢ ܢܒܺܝ̈ܶܐ ܢܶܟܬܽܘܒ ܥܰܠ ܟܬܳܒܳܐ ܡܶܬܦܩܰܕ܆ ܗܳܢܳܐ܆ ܟܬܳܒܳܐ ܡܰܢ ܐܰܝܬܰܘܗ̱ܝ܆ ܐܰܝܟ ܕܰܠܘܳܬܰܢ ܗܳܢܽܘܢ ܕܠܳܐ ܡܶܕܶܡ ܝܳܕܥܺܝܢܰܢ܆ ܘܰܕܠܳܐ ܡܫܰܘܬܦܺܝܢ ܟܽܠ ܟܽܠܶܗ ܒܗܳܠܶܝܢ ܐܰ‌ܠܳܗܳܝ̈ܳܬܳܐ. ܛܽܘܡܣܳܐ ܕܶܝܢ ܐܰܝܟ ܕܰܠܘܳܬ ܟܬܳܒܳܐ ܗܰܘ ܥܶܠܳܝܳܐ.

ܐܶܠܳܐ ܢܶܚܙܶܐ ܡܳܢܳܐ ܒܰܟܬܳܒܳܐ ܕܐ̱ܢܳܫܳܐ܆ ܡܶܬܦܩܰܕ ܐܶܫܰܥܝܳܐ ܠܡܶܟܬܰܒ ܒܛܽܘܡܣܳܐ. ܕܩܰܠܺܝܠܳܐܺܝܬ ܐܳܡܰܪ ܢܶܥܒܶܕ ܫܒܺܝܬܳܐ ܐܰܘܟܺܝܬ ܦܽܘܠܳܓܳܐ ܕܒ̈ܶܙܬܶܐ^[21]. ܩܰܪܺܝܒ ܓܶܝܪ ܠܥܶܠܬܳܐ ܕܡܶܬܒܰܪܢܫܳܢܽܘܬܳܐ ܐܰ‌ܠܳܗܳܝܬܳܐ ܒܗܽܘܢ ܒܫܽܘܪ̈ܳܝܶܐ ܓܳܠܶܐ ܠܳܗ̇. ܡܶܛܽܠ ܓܶܝܪ ܕܰܒܝܰܕ ܚܛܺܝܬܶܗ ܕܳܐܕܳܡ ܚܠܰܕ ܥ̣ܰܠ ܡܰܘܬܳܐ܆ ܘܥܰܠ ܟܽܠܶܗ ܓܶܢܣܳܐ ܕܰܒܢܰܝ̈ܢܳܫܳܐ ܐܶܬܥܰܫܰܢ܆ ܘܡܶܟܺܝܠ ܟܰܕ ܐܰܝܟ ܕܡܶܢ ܙܳܟܽܘܬܳܐ ܕܰܩܪܳܒܳܐ ܫܩܰܠ ܒ̈ܶܙܬܶܐ ܗܽܘ ܐܳܟܶܠ ܩܰܪܨܳܐ ܐܰܚܺܝܕ ܗ̱ܘܳܐ ܠܰܢ܆ ܟܰܕ ܥ̈ܒܳܕܶܐ ܕܰܚܛܺܝܬܳܐ ܣܳܥܪܺܝܢ ܗ̱ܘܰܝܢ܆ ܘܗܳܟܰܢܳܐ ܡܰܣܩܺܝܢ ܗ̱ܘܰܝܢ ܡܰܕܰܐܬܳܐ ܡܬܚܢܢܝܬܳܐ ܠܰܛܪܽܘܢܳܐ܆ ܗܰܘ ܕܥܰܠ ܒܢܰܝ̈ܳܐ ܕܺܐܝܣܪܳܐܶܝܠ ܕܥܳܒܕܺܝܢ ܗ̱ܘܰܘ ܠܶܒ̈ܢܶܐ ܒܡܶܨܪܶܝܢ܆ ܘܦܳܠܚܺܝܢ ܗ̱ܘܰܘ ܥܰܒܕܽܘܬܳܐ ܠܦܶܪܥܽܘܢ ܐܶܡܰܪ܆ ܕܡܶܚܙܳܐ ܚܙܺܝܬ̣ ܠܡܽܘܟܳܟܳܐ ܕܥܰܡܳܐ ܕܺܝܠܝ ܗܰܘ ܕܰܒܡܶܨܪܶܝܢ܆ ܘܠܰܓܥܳܬܗܽܘܢ ܫܶܡܥܶܬ ܡܶܢ ܗܳܢܽܘܢ ܕܪܳܕܦܺܝܢ ܠܗܽܘܢ ܒܰܥܒܳܕܳܐ܆ ܝܳܕܰܥ ܐ̱ܢܳܐ ܓܶܝܪ ܟܺܐܒܗܽܘܢ ܘܢܶܚܬܶܬ̣ ܕܶܐ݀ܦܪܽܘܩ ܐܶܢܽܘܢ^[22]܆ ܗܽܘ ܐܳܦ ܠܘܳܬ ܟܽܠܶܗ ܓܶܢܣܳܐ ܕܺܝܠܰܢ ܐܶܬܪܟܶܢ܆ ܕܡܶܢ ܫ̈ܺܐܕܶܐ ܗܳܢܽܘܢ ܪ̈ܳܕܦܰܝ ܥܒܳܕܳܐ ܡܰܪܺܝܪܳܐ ܡܶܬܪܕܶܦ ܗ̱ܘܳܐ܆ ܘܰܡܚܰܘܶܐ ܗܽܘ ܠܶܗ ܒܝܰܕ ܢܒܺܝܽܘܬܳܐ ܕܚܰܪܺܝܦܳܐܺܝܬ ܘܩܰܠܺܝܠܳܐܺܝܬ ܡܣܰܪܗܶܒ܆ ܕܰܢܪܺܝܡ ܘܰܢܫܰܠܚܺܝܘܗ̱ܝ ܠܒܰܪܢܳܫܳܐ ܡܶܢ ܒ̈ܶܙܬܶܐ܆ ܗܳܠܶܝܢ ܟܺܝܬ ܕܺܐܝܬܰܝܢ ܗ̱ܘܰܝܢ ܚܢܰܢ܆ ܡܶܛܽܠ ܗܳܕܶܐ ܐܳܦ ܒܶܐܘܰܢܓ̈ܶܠܺܝܰܐ ܐܳܡܰܪ ܗ̱ܘܳܐ܆ ܕܶܐܬܳܐ ܕܢܶܐܣܪܺܝܘܗ̱ܝ ܠܚܰܝܠܬܳܢܳܐ ܘܰܕܢܶܚܛܽܘܦ ܡܳܐܢܰܘ̈ܗܝ^[23]܆ ܟܰܕ ܠܰܢ ܬܽܘܒ ܡܰܘܕܰܥ. ܐܶܠܳܐ ܠܰܘ ܕܥܰܠ ܗܳܝ ܕܰܢܪܺܝܡ ܒ̈ܶܙܬܶܐ ܒܰܠܚܽܘܕ ܡܣܰܪܗܶܒ ܐܳܡܰܪ܆ ܐܶܠܳܐ ܐܳܦ ܥܰܠ ܗܳܝ ܕܰܫܒܺܝܬܗܶܝܢ ܢܶܥܒܶܕ܆ ܗܳܢܰܘ ܕܶܝܢ ܦܽܘܠܳܓܗܶܝܢ. ܟܰܕ ܓܶܝܪ ܢܣܰܒ ܠܰܢ ܡܶܢ ܐܳܟܶܠܩܰܪܨܳܐ ܘܡܶܢ ܫ̈ܺܐܕܶܐ܆ ܠܰܫ̈ܠܺܝܚܶܐ ܦܰܠܶܓ ܠܰܢ܆ ܟܰܕ ܒܟܽܠܳܗ̇ ܡܶܬܥܰܡܪܳܢܺܝܬܳܐ ܦܰܠܶܓ ܐܶܢܽܘܢ܆ ܘܦܰܠܓܳܗ̇ ܠܗܽܘܢ ܠܰܐܪܥܳܐ ܐܰܝܟ ܕܰܒܦܶܣܳܐ܆ ܘܰܐܩܺܝܡ ܡܰܠܰܐܟ̈ܶܐ ܥܰܠ ܥܻ̈ܕܳܬܳܐ܆ ܘܰܦܪܰܫ ܠܟܽܠܚܰܕ ܡܶܢ ܡܗܰܝܡ̈ܢܶܐ ܠܘܳܬ ܢܛܽܘܪܬܳܐ ܐܰܝܟ ܗܳܝ ܕܰܐܡܺܝܪܳܐ܆ ܚܙܰܘ ܠܳܐ ܬܶܒܣܽܘܢ ܥܰܠ ܚܰܕ ܡܶܢ ܗܳܠܶܝܢ ܙܥܽܘܪ̈ܶܐ܆ ܐܳܡܰܪ ܐ̱ܢܳܐ ܠܟܽܘܢ ܓܶܝܪ܆ ܕܡܰܠܰܐܟ̈ܶܐ ܕܺܝܠܗܽܘܢ ܒܰܫܡܰܝܳܐ܆ ܒܟܽܠ ܙܒܰܢ ܚܳܙܶܝܢ ܦܰܪܨܽܘܦܶܗ ܕܳܐܒܝ ܗܰܘ ܕܒܰܫܡܰܝܳܐ^[24].

ܗܳܠܶܝܢ ܡܣܰܪܗܶܒ ܗ̱ܘܳܐ ܠܶܗ ܠܶܐܫܰܥܝܳܐ ܠܡܶܟܬܰܒ܆ ܥܰܡ ܩܰܠܺܝܠܽܘܬܳܐ ܣܰܓܺܝܐܬܳܐ ܟܰܕ ܐܳܡܰܪ܆ ܩܰܪܺܝܒ ܓܶܝܪ. ܗܳܢܰܘ ܕܶܝܢ ܕܗܽܘ ܥܒܳܕܶܐ ܗܳܐ ܩܳܐܶܡ܆ ܘܗܳܐ ܥܰܠ ܬܰܪ̈ܥܶܐ ܐܺܝܬܰܘܗ̱ܝ. ܐܶܢ ܕܶܝܢ ܐ̱ܢܳܫ ܢܺܐܡܰܪ܆ ܡܳܢܳܐ ܗܳܟܺܝܠ܆ ܕܰܓܠܶܗ ܠܰܢܒܺܝܳܐ܆ ܟܰܕ ܐܳܡܰܪ ܕܩܰܪܺܝܒ ܓܶܝܪ܆ ܘܠܰܘ ܡܶܚܕܳܐ ܐܶܠܳܐ ܒܳܬܰܪ ܙܰܒܢܳܐ ܕܚܰܡܶܫܡܳܐܐ ܫܢܰܝ̈ܳܐ ܘܝܰܬܺܝܪ ܐܶܬܒܰܪܢܰܫ ܘܠܰܢܒܺܝܽܘܬܳܐ ܡܰܠ̣ܺܝ܆ ܗܳܟܰܢܳܐ ܢܶܬܚܰܫܰܒ ܕܡܶܬܦܩܶܕ ܗ̱ܘܳܐ ܐܶܫܰܥܝܳܐ ܗܳܠܶܝܢ ܒܙܰܒܢܳܐ. ܠܳܐ ܒܗܰܘ ܕܺܐܝܬܰܘܗ̱ܝ ܗ̱ܘܳܐ ܒܶܗ ܗܽܘ܆ ܐܶܠܳܐ ܒܶܗ ܒܥܶܕܳܢܳܐ ܕܙܰܒܢܳܐ ܗܰܘ ܕܒܳܬܰܪܟܶܢ܆ ܗܰܘ ܕܒܶܗ ܥܬܺܝܕ ܗ̱ܘܳܐ ܕܢܶܗܘܶܐ ܡܰܦܩܳܢܳܐ ܕܗܳܠܶܝܢ ܕܒܰܢܒܺܝܽܘܬܳܐ ܡܶܬܡܰܠ̈ܠܳܢ ܗ̱ܘܰܝ̈. ܗܳܕܐ ܗܝ ܓܶܝܪ ܢܒܺܝܽܘܬܳܐ܆ ܗܳܝ ܕܬܶܬܚܛܶܦ ܬܰܪܥܺܝܬܳܐ܆ ܘܥܰܡ ܗܳܠܶܝܢ ܕܰܥ̈ܬܺܝܕܳܢ܆ ܐܰܝܟ ܕܥܰܡ ܐܰܝܠܶܝܢ ܕܩܰܪ̈ܺܝܒܳܢ ܘܩܳܝ̈ܡܳܢ ܬܶܗܘܶܐ. ܡܶܣܬܰܒܪܳܐ ܗܳܟܺܝܠ܆ ܕܟܰܕ ܥܠܰܝܗܽܘܢ ܕܣܽܘܥܪ̈ܳܢܶܐ ܗܳܢܽܘܢ ܕܰܥܬܺܝܕܺܝܢ ܗ̱ܘܰܘ܆ ܐܰܝܟ ܕܥܰܠ ‌ܐܰܝܠܶܝܢ ܕܗܳܐ ܡܶܢ ܟܰܕܽܘ ܩܰܪܺܝܒܺܝܢ ܗ̱ܘܰܘ ܩܳܐܶܡ ܗ̱ܘܳܐ ܐܶܫܰܥܝܳܐ܆ ܛܳܒܐܺܝܬ ܘܫܰܪܺܝܪܳܐܺܝܬ ܫܳܡܰܥ ܗ̱ܘܳܐ܆ ܗܳܝ ܕܩܰܪܺܝܒ ܓܶܝܪ.

ܐܶܠܳܐ ܐܳܦ ܣܳܗ̈ܕܶܐ ܐܳܡܰܪ ܥܒܕ ܠܺܝ ܐ̱ܢܳܫܳܐ ܡܗܰܝܡ̈ܢܶܐ. ܠܽܐܘܪܺܝܳܐ ܟܳܗܢܳܐ܆ ܘܠܰܙܟܰܪܝܳܐ ܒܪܶܗ ܕܰܒܪܰܟܝܳܐ^[25]. ܘܰܐܝܟ ܗܰܘܢܳܐ ܡܰܢ ܦܫܺܝܩܳܐ ܘܕܰܩܕܳܡ ܐܺܝ̈ܕܰܝܳܐ܆ ܨܳܒܶܐ ܕܗܽܘ ܐܶܫܰܥܝܳܐ ܟܰܕ ܗܳܠܶܝܢ ܟܳܬܶܒ ܗ̱ܘܳܐ ܢܶܕܒܰܪ ܥܰܡܶܗ. ܠܽܐܘܪܺܝܳܐ ܟܺܝܬ ܗܰܘ ܕܰܒܙܰܒܢܳܐ ܗܰܘ ܡܟܰܗܶܢ ܗ̱ܘܳܐ܆ ܘܠܰܙܟܰܪܝܳܐ ܗܰܘ ܕܛܶܟܣܳܐ ܕܰܢܒܺܝܳܐ ܐܰܚܺܝܕ ܗ̱ܘܳܐ܆ ܐܰܝܟ ܕܰܠܘܳܬ ܐܺܝܩܳܪܳܐ ܣܰܓܺܝܳܐܐ ܘܰܣܓܺܝܕܳܐ ܕܗܳܠܶܝܢ ܕܩܳܕܡ̈ܳܢ ܗ̱ܘܰܝ̈ ܡܶܬܐܰܡܪ̈ܳܢ܆ ܘܰܡܗܰܝܡܢܽܘܬܳܐ ܘܫܽܘܪܳܪܳܐ. ܐܰܝܟ ܣܽܘܟܳܠܳܐ ܕܶܝܢ ܗܰܘ ܕܝܰܬܺܝܪ ܐ̱ܪܳܙܳܢܳܝ ܘܝܰܬܺܝܪ ܫܰܪܺܝܪ܆ ܘܰܕܝܰܬܺܝܪܳܐܺܝܬ ܦܐܶܐ ܠܪܽܘܚܳܐ܆ ܠܰܡܚܰܘܳܝܽܘ ܨܳܒܶܐ ܗ̱ܘܳܐ܆ ܠܶܐܘܰܢܓܶܠܺܝܽܘܢ ܗܰܘ ܕܰܒܛܽܘܡܣܳܐ ܚܰܕܬ̣ܳܐ ܡܶܬܟܬܶܒ ܗ̱ܘܳܐ܆ ܟܰܕ ܡܶܢ ܢܳܡܽܘܣܳܐ ܘܡܶܢ ܢܒܺܝ̈ܶܐ ܡܶܣܬܗܶܕ ܗ̱ܘܳܐ. ܐܽܘܪܺܝܳܐ ܡܰܢ ܓܶܝܪ܆ ܟܰܕ ܠܦܽܘܠܚܳܢ ܟܳܗܢܽܘܬܳܐ ܗܰܘ ܕܰܐܝܟ ܢܳܡܽܘܣܳܐ ܡܟܰܗܶܢ ܗ̱ܘܳܐ܆ ܕܽܘܟܬܳܐ ܕܢܳܡܽܘܣܳܐ ܡܡܰܠܶܐ ܗ̱ܘܳܐ. ܙܟܰܪܝܳܐ ܕܶܝܢ ܕܰܢܒܺܝܳܐ ܐܺܝܬܰܘܗ̱ܝ ܗ̱ܘܳܐ܆ ܡܳܢܳܐ ܐ̱ܚܪܺܢܳܐ ܐܶܠܳܐ ܐܶܢ ܠܰܢܒܺܝ̈ܶܐ ܪܳܫܶܡ ܗ̱ܘܳܐ. ܘܳܐܦ ܫܽܘܘܕܳܥܗܽܘܢ ܕܶܝܢ ܕܺܝܠܗܽܘܢ ܕܰܫܡܳܗ̈ܶܐ܆ ܡܶܬܚܰܘܝܳܢܽܘܬܗܽܘܢ ܕܺܝܠܗܽܘܢ ܕܣܽܘܥܪ̈ܳܢܶܐ ܗܳܘܶܐ. ܐܶܢ ܓܶܝܪ ܐܽܘܪܺܝܳܐ ܡܰܢ ܢܽܘܗܪܳܐ ܕܰܐ‌ܠܳܗܳܐ ܐܺܝܬܰܘܗ̱ܝ ܥܶܒܪܳܐܺܝܬ܆ ܙܟܰܪܝܳܐ ܕܶܝܢ ܥܽܘܗܕܳܢܳܐ ܕܰܐ‌ܠܳܗܳܐ܆ ܡܶܬܚܰܙܝܳܐ ܢܰܗܺܝܪܳܐܺܝܬ܆ ܕܡܶܢ ܥܽܘܗ̈ܕܳܢܶܐ ܗܳܠܶܝܢ ܢܳܡܽܘܣܳܝ̈ܶܐ ܘܰܢܒܺܝ̣̈ܳܝ̣ܶܐ܆ ܢܽܘܗܪܳܐ ܐܰ‌ܠܳܗܳܝܳܐ ܕܰܫܪܳܪܳܐ ܗܰܘ ܕܒܶܐܘܰܢܓܶܠܺܝܽܘܢ ܕܢܰܚ. ܟܰܕ ܕܶܝܢ ܕܰܒܪܰܟܝܳܐ ܐܺܝܬܰܘܗ̱ܝ ܙܟܰܪܝܳܐ ܒܪܳܐ܆ ܗܰܘ ܕܺܐܝܬܰܘܗ̱ܝ ܒܥܶܠ ܫܡܳܐ ܕܒܽܘܪܟܬܳܐ ܗܳܝ ܕܡܶܢ ܐܰ‌ܠܳܗܳܐ܆ ܡܰܘܕܰܥ ܕܡܰܠܝܰܬ ܒܽܘܪܟܬܳܐ ܐܺܝܬܶܝܗ̇ ܟܳܪܽܘܙܽܘܬܳܐ ܐܶܘܰܢܓܶܠܳܝܬܳܐ ܠܗܳܢܽܘܢ ܕܰܡܗܰܝܡܢܺܝܢ.

ܠܗܳܢܳܐ ܛܽܘܦܣܳܐ ܘܛܶܟܣܳܐ ܕܣܳܗܕܽܘܬܳܐ܆ ܗܳܝ ܕܡܶܛܽܠܳܬܳܗ̇ ܡܡܰܠܠܺܝܢܰܢ܆ ܐܳܦ ܗܽܘ ܡܳܪܰܢ ܒܶܐܘܰܢܓ̈ܶܠܺܝܰܐ ܡܰܠܺܝ. ܟܰܕ ܕܶܝܢ ܕܒ̣ܰܪ ܠܦܶܛܪܘܤ ܘܰܠܝܥܩܘܒ ܘܰܠܝܽܘܚܰܢܳܢ ܥܰܠ ܛܽܘܪܳܐ܆ ܘܶܐܬܚܰܠܦܰܬ ܕܡܽܘܬܶܗ ܘܝܰܬܺܝܪ ܡܶܢ ܫܶܡܫܳܐ ܐܰܢܗܰܪ܆ ܟܰܕ ܨܳܒܶܐ ܗ̱ܘܳܐ ܕܰܢܚܰܘܶܐ ܠܗܽܘܢ ܩܰܠܺܝܠ ܡܶܕܶܡ ܡܶܢ ܫܽܘܒܚܶܗ ܐܰ‌ܠܳܗܳܝܳܐ܆ ܒܰܕܡܽܘܬ ܒܠܶܨܽܘܨܺܝܬܳܐ ܙܥܽܘܪܬܳܐ܆ ܥܰܡ ܡܽܘܫܶܐ ܘܥܰܡ ܐܶ‌ܠܺܝܳܐ ܐܶܬܚܙܺܝ ܕܰܡܡܰܠܶܠ. ܟܰܕ ܡܚܰܘܶܐ ܡܶܢ ܗܳܪܟܳܐ܆ ܕܡܶܬܒܰܪܢܫܳܢܽܘܬܶܗ ܘܶܐܘܰܢܓܶܠܺܝܽܘܢ ܗܰܘ ܕܰܠܗܳܕܶܐ ܡܰܟܪܶܙ܆ ܡܶܢ ܢܳܡܽܘܣܳܐ ܘܡܶܢ ܢܒܺܝ̈ܶܐ ܡܶܣܬܰܗܕܺܝܢ. ܒܦܰܪܨܽܘܦܳܐ ܡܰܢ ܓܶܝܪ ܕܢܳܡܽܘܣܳܐ܆ ܡܽܘܫܶܐ ܡܶܬܚܙܶܐ ܗ̱ܘܳܐ. ܒܗܰܘ ܕܶܝܢ ܕܰܢܒܺܝ̈ܶܐ ܐܶ‌ܠܺܝܳܐ. ܗܳܢܽܘܢ ܕܡܶܛܽܠܳܬܗܽܘܢ ܐܳܦ ܐܳܡܰܪ ܠܽܘܩܳܐ܆ ܕܟܰܕ ܐܶܬܚܙܺܝܘ ܥܰܠ ܛܽܘܪܳܐ ܥܰܡ ܝܶܫܽܘܥ܆ ܐܳܡܪܺܝܢ ܗ̱ܘܰܘ܆ ܡܰܦܩܳܢܶܗ ܗܰܘ ܕܰܥܬܺܝܕ ܗ̱ܘܳܐ ܕܰܢܡܰܠܶܐ ܒܽܐܘܪܶܫܠܶܡ^[26]. ܡܳܢܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ ܡܰܦܩܳܢܶܗ܆ ܐܶܠܳܐ ܐܶܢ ܫܽܘܠܳܡܳܐ ܕܰܡܕܰܒܪܳܢܽܘܬܳܐ܆ ܗܰܘ ܟܺܝܬ ܕܺܐܝܬܰܘܗ̱ܝ ܗ̱ܘܳܐ ܨܠܺܝܒܳܐ܆ ܘܰܩܝܳܡܬܳܐ ܕܡܶܢ ܡܺܝ̈ܬܶܐ܆ ܗܳܝ ܕܡܶܢ ܒܳܬܰܪ ܗܰܘ. ܗܳܟܰܢܳܐ ܗܳܟܺܝܠ ‌ܐܳܦ ܐܶܫܰܥܝܳܐ ܫܳܡܰܥ ܗ̱ܘܳܐ܆ ܟܰܕ ܥܬܺܝܕ ܗ̱ܘܳܐ ܕܢܶܟܬܽܘܒ ܠܛܽܘܡܣܳܐ ܗܰܘ ܕܐ̱ܪܳܙܳܐ ܚܰܕܬ̣ܳܐ ܘܪܰܒܳܐ܆ ܣܳܗ̈ܕܶܐ ܥܒܕ ܠܺܝ ܐ̱ܢܳܫܳܐ ܡܗܰܝܡ̈ܢܶܐ܆ ܠܽܐܘܪܺܝܳܐ ܟܳܗܢܳܐ ܘܠܰܙܟܰܪܝܳܐ܆ ܕܰܠܢܳܡܽܘܣܳܐ ܘܰܠܓܽܘܕܳܐ ܕܰܢܒܺܝ̈ܶܐ ܡܫܰܘܕܥܺܝܢ ܘܣܳܗܕܺܝܢ.

ܐܶܠܳܐ ܢܶ݀ܚܙܶܐ ܡܳܢܳܐ ܐܳܡܰܪ ܐܶܫܰܥܝܳܐ ܒܳܬܰܪ ܗܳܠܶܝܢ. ܘܩܶܪܒܶܬ ܠܘܳܬ ܢܒܺܝܬܳܐ܆ ܘܒܶܛܢܰܬ̣ ܘܝܶܠܕܰܬ ܒܪܳܐ^[27]. ܘܰܢܒܺܝܬܳܐ ܡܰܢ ܠܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܩܳܪܶܐ܆ ܕܶܐܬܢܰܒܝܰܬ ܡܶܢ ܡܰܚܫܰܒܬܳܐ ܐܰ‌ܠܳܗܳܝܬܳܐ ܟܰܕ ܫܶܐܠܰܬ ܫܠܳܡܳܗ̇ ܕܶܐ‌ܠܺܝܫܒܰܥ܆ ܗܳܝ ܕܗܳܐ ܓܶܝܪ ܡܶܢ ܗܳܫܳܐ ܢܶܬܠ̈ܳܢ ܠܺܝ ܛܽܘܒܳܐ ܟܽܠܗܶܝܢ ܫܰܪ̈ܒܳܬܳܐ^[28]܆ ܘܗܳܢܶܝܢ ܕܰܠܗܳܠܶܝܢ ܢܳܩ̈ܦܳܢ.

ܕܶܐ݀ܬܕܰܡܰܪ ܕܶܝܢ ܣܰܓܺܝ ܐܳܬܝܳܐ ܠܺܝ܆ ܕܰܐܝܟܰܢܳܐ ܢܒܺܝܳܐ ܟܰܕ ܫܡܰܥ ܕܣܰܒ ܠܳܟ ܛܽܘܡܣܳܐ ܚܰܕܬ̣ܳܐ ܪܰܒܳܐ܆ ܠܳܐ ܐܶܡܰܪ ܘܫܶܩܠܶܬ ܛܽܘܡܣܳܐ܆ ܐܶܠܳܐ ܕܩܶܪܒܶܬ ܠܘܳܬ ܢܒܺܝܬܳܐ܆ ܟܰܕ ܡܰܣܰܩܬܳܐ ܕܬܰܪܥܺܝܬܳܐ ܪܰܒܬܳܐ ܝܳܗܶܒ ܠܰܢ܆ ܘܰܕܛܽܘܡܣܳܐ ܗܰܘ ܚܰܕܬ̣ܳܐ܆ ܗܺܝ ܢܒܺܝܬܳܐ ܐܺܝܬܶܝܗ̇܆ ܗܳܝ ܝܳܠܕܰܬ ܐܰ‌ܠܳܗܳܐ܆ ܗܳܝ ܒܬܽܘܠܬܳܐ. ܘܰܐܝܟܰܢܳܐ ܐܶܢܳܐ ܐܳܡܰܪ ܐ̱ܢܳܐ. ܠܳܐܕܳܡ ܡܶܢ ܐܰܪܥܳܐ ܓܒܰܠ ‌ܐܰ‌ܠܳܗܳܐ. ܟܰܕ ܕܶܝܢ ܦܣܰܩ ܚܕܳܐ ܡܶܢ ܐܶ‌ܠ̈ܥܰܘܗ̱ܝ ܘܰܐܪܺܝܡܳܗ̇ ܡܶܢܶܗ܆ ܘܡܰܠܺܝ ܒܶܣܪܳܐ ܚܠܳܦܶܝܗ̇ ܐܰܝܟ ܕܰܟܬܺܝܒ܆ ܠܚܰܘܳܐ ܒ̣ܪܳܐ^[29]. ܦܣܳܩܳܐ ܗܳܟܺܝܠ ܕܓܰܒܪܳܐ ܐܰܘܟܺܝܬ ܛܽܘܡܣܳܐ^[30]܆ ܐܺܝܬܶܝܗ̇ ܐܰܢ̱ܬܬܳܐ. ܡܶܛܽܠ ܗܳܟܺܝܠ ܕܚܰܘܳܐ ܛܽܘܡܣܳܐ ܗܰܘ ܩܰܕܡܳܝܳܐ ܒܝܰܕ ܚܛܺܝܬܳܐ ܐܰܥܬܩܰܬ܆ ܟܰܕ ܐܶܬܚܰܝܒܰܬ ܕܰܒܥܳܩ̈ܳܬܳܐ ܬܺܐܠܰܕ ܒܢܰܝ̈ܳܐ܆ ܠܘܳܬ ܐܳܣܝܽܘܬܳܐ ܝܳܠܕܰܬ ܐܰ‌ܠܳܗܳܐ ܛܽܘܡܣܳܐ ܗܰܘ ܚܰܕܬ̣ܳܐ ܐܶܬܢܰܣܒܰܬ܆ ܟܰܕ ܒܪܽܘܚܳܐ ܩܰܕܺܝܫܳܐ ܐܶܬܕܰܟܝܰܬ܆ ܘܟܽܠ ܗܰܘ ܡܳܐ ܕܥܰܬܺܝܩܳܐ ܐܺܝܬܰܘܗ̱ܝ ܘܥܳܩܬܳܐ ܕܰܚܛܺܝܬܳܐ ܠܰܝܬ ܗ̱ܘܳܐ ܒܳܗ̇܆ ܘܰܠܝܰܠܕܳܐ ܐܰ‌ܠܳܗܳܝܳܐ ܫܰܡܫܰܬ܆ ܬܡܺܝܗܳܐܺܝܬ ܘܚܰܕܬ̣ܳܐܺܝܬ ܘܦܰܐܝܽܘܬ ܐܰ‌ܠܳܗܳܐܝܬ܆ ܘܺܐܝܬܶܝܗ̇ ܛܽܘܡܣܳܐ ܚܰܕܬ̣ܳܐ^[31] ܐܰܟܚܕܳܐ ܘܰܬܡܺܝܗܳܐ܆ ܘܰܒܬܰܪ̈ܬܰܝܗܶܝܢ ܚܕܰܬܳܐ. ܟܰܕ ܒܶܣܪܐ ܡܰܢ ܡܶܢܳܗ̇ ܢܣܰܒ ܡܶܠܬܳܐ ܐܰ‌ܠܳܗܳܐ܆ ܕܢܰܦܫܳܐ ܐܺܝܬ ܒܶܗ ܡܶܬܗܰܘܢܳܢܺܝܬܳܐ܆ ܘܰܠܗܳܢܳܐ ܚܰܝܕܳܗ̇ ܠܶܗ ܩܢܽܘܡܳܐܺܝܬ܆ ܟܰܕ ܥܰܡܳܗ̇ ܕܗܳܝ ܕܶܐܬܚܰܝܰܕ ܐܳܦ ܐܶܬܩܰܝܰܡ܆ ܠܰܘ ܓܶܝܪ ܩܕܳܡ ܚܕܳܝܽܘܬܳܐ ܡܩܰܝܰܡ ܗ̱ܘܳܐ܆ ܐܰܝܟܰܢܳܐ ܕܗܳܟܰܢܳܐ ܗܽܘ ܗܰܘ ܕܶܐܬܒܰܣܰܪ ܠܳܐ ܡܶܫܬܰܚܠܦܳܢܳܐܺܝܬ ܘܠܳܐ ܡܶܬܦܰܣܩܳܢܳܐܺܝܬ܆ ܢܶܬܪܢܶܐ ܕܶܐܬܒܛܶܢ ܘܶܐܬܺܝܠܶܕ ܘܠܰܘ ܐ̱ܢܳܫ ܐ̱ܚܪܺܢܳܐ ܠܒܰܪ ܡܶܢܶܗ܆ ܠܰܘ ܕܶܝܢ ܡܶܢ ܙܰܪܥܳܐ ܕܓܰܒܪܳܐ. ܐܶܠܳܐ ܡܶܢ ܪܽܘܚܳܐ ܩܰܕܺܝܫܳܐ܆ ܕܰܤܛܰܪ ܡܶܢ ܟܽܠܳܗ̇ ܪܶܓܬܳܐ ܒܳܪܽܘܝܳܐܺܝܬ ܘܰܐ‌ܠܳܗܳܐܺܝܬ ܡܰܥܒܶܕ ܗ̱ܘܳܐ ܠܶܗ ܠܒܰܛܢܳܐ܆ ܟܰܕ ܒܰܟܬܳܒܐ ܕܐ̱ܢܳܫܳܐ ܡܶܬܟܬܶܒ ܗ̱ܘܳܐ ܒܛܽܘܡܣܳܐ܆ ܐܰܝܟ ܓܶܠܝܳܢܳܐ ܗܰܘ ܢܒܺܝ̣ܳܝ̣ܳܐ. ܗܳܢܰܘ ܕܶܝܢ ܟܰܕ ܐ̱ܢܳܫܳܐܺܝܬ ܡܶܬܬܨܺܝܪ^[32] ܘܡܶܬܓܒܶܠ ܘܡܶܨܛܰܠܰܡ ܒܰܛܢܳܐ ܗܰܘ ܐܰ‌ܠܳܗܳܝܳܐ܆ ܘܰܡܟܰܬܰܪ ܠܬܰܪܒܺܝܬܳܐ ܕܰܒܩܰܠܺܝܠ ܩܰܠܺܝܠ ܘܰܠܫܽܘܘܫܳܛܳܐ܆ ܐܰܝܟܰܢܳܐ ܕܰܠܗܳܝ ܕܒܶܛܢܰܬ ܦܰܐܝܽܘܬ ܐܰ‌ܠܳܗܳܐܺܝܬ ܘܝܶܠܕܰܬ ܝܰܬܺܝܪ ܦܰܐܝܽܘܬ ܐܰ‌ܠܳܗܳܐܝܬ܆ ܡܶܛܽܠ ܕܳܐܦ ܐܶܡܳܐ ܐܳܦ ܒܬܽܘܠܬܳܐ ܥܕܰܟܺܝܠ܆ ܢܶܬܡܰܠܽܘܢ ܝܰܘ̈ܡܳܬܳܐ ܕܗܳܝ ܕܬܺܐܠܰܕ^[33]܆ ܐܰܝܟܰܢܳܐ ܕܐܶܡܰܪ ܟܬܳܒܳܐ ܗܰܘ ܟܳܗܢܳܝܳܐ.

ܒܝܰܕ ܟܽܠܗܶܝܢ ܓܶܝܪ ܗܳܠܶܝܢ ܕܺܝܠܰܢ ܠܳܐ ܡܒܰܨܪܳܐܺܝܬ ܐܶܬܳܐ ܗܽܘ ܐܳܣܝܳܐ ܘܦܳܪܽܘܩܳܐ܆ ܟܰܕ ܒܳܗ̇ ܒܰܕܡܽܘܬܳܐ ܠܰܢ ܐܰܝܟ ܕܰܟܬܺܝܒ ܐܶܫܬܰܘܬܰܦ ܒܰܕܡܳܐ ܘܰܒܒܶܣܪܳܐ^[34]܆ ܘܰܥܪܰܩ ܡܶܢ ܡܕܰܡܝܳܢܽܘܬܳܐ ܕܰܚܛܺܝܬܳܐ ܒܰܠܚܽܘܕܶܝܗ̇܆ ܐܰܝܟܰܢܳܐ ܕܰܒܟܽܠܗܶܝܢ ܗܳܢܶܝܢ ܕܰܒܗܶܝܢ ܐܺܝܬܰܝܢ܆ ܢܙܰܡܶܢ ܠܰܢ ܦܽܘܪܩܳܢܳܐ ܘܳܐܣܝܽܘܬܳܐ.

ܒܡܶܢܗܽܘܢ ܡܰܢ ܗܳܟܺܝܠ ܕܰܟܬܳܒ̈ܶܐ ܐܺܝܬ ܒܗܽܘܢ܆ ܘܩܶܪܒܶܬ ܠܘܳܬ ܢܒܺܝܬܳܐ^[35]. ܒܰܐܚܪ̈ܳܢܶܐ ܕܶܝܢ ܘܰܩܪܶܒ ܠܘܳܬ ܢܒܺܝܬܳܐ. ܘܗ̱ܝ ܡܰܢ ܕܩܶܪܒܶܬ ܡܰܘܕܥܳܐ܆ ܠܶܐܫܰܥܝܳܐ ܕܡܶܬܩܰܪܰܒ ܠܬܶܐܽܘܪܺܝܰܐ ܘܰܠܓܶܠܝܳܢܳܗ̇ ܕܬܶܕܡܽܘܪܬܳܐ. ܗܳܝ ܕܶܝܢ ܕܰܩܪܶܒ ܡܚܰܘܝܳܐ܆ ܠܗܰܘ ܕܶܐܡܰܪ ܠܶܗ ܣܰܒ ܠܳܟ ܛܽܘܡܣܳܐ ܚܰܕܬܳܐ ܪܰܒܳܐ. ܗܳܢܳܐ ܕܶܝܢ ܐܺܝܬܰܘܗ̱ܝ ܗ̱ܘܳܐ܆ ܦܰܪܰܩܠܺܝܛܳܐ ܪܽܘܚܳܐ ܩܰܕܺܝܫܳܐ܆ ܗܰܘ ܕܒܰܢܒܺܝ̈ܶܐ ܡܡܰܠܶܠ܆ ܕܰܩܪܶܒ ܠܘܳܬ ܒܬܽܘܠܬܳܐ܆ ܐܰܝܟ ܒܰܪ̱ܬ ܩܳܠܳܐ ܗܳܝ ܕܳܐܡܪܳܐ ܒܶܐܘܰܢܓ̈ܶܠܺܝܰܐ܆ ܪܽܘܚܳܐ ܩܰܕܺܝܫܳܐ ܢܺܐܬܶܐ ܥܠܰܝܟܝ^[36]. ܡܶܛܽܠܗܳܕܶܐ ܐܳܦ ܐܰܝܬܺܝ ܒܳܬܰܪܟܶܢ܆ ܘܒܶܛܢܰܬ ܘܝܶܠܕܰܬ ܒܪܳܐ܆ ܐܰܝܟܰܢܳܐ ܕܡܶܢܶܗ ܕܪܽܘܚܳܐ ܩܰܕܺܝܫܳܐ ܢܚܰܘܽܘܗ̱ܝ ܠܒܰܛܢܳܐ.

ܣܰܓܺܝ ܕܶܝܢ ܫܰܪܺܝܪܳܐܺܝܬ ܘܡܳܪܳܢܳܐܺܝܬ܆ ܘܛܳܒ ܒܙܰܒܢܳܗ̇ ܣܺܝܡܳܐ܆ ܗܳܝ ܕܝܶܠܕܰܬ ܒܪܳܐ. ܠܘܳܬ ܗܳܕܶܐ ܓܶܝܪ ܚܳܐܰܪ ܗ̱ܘܳܐ܆ ܟܽܠܶܗ ܢܺܝܫܳܐ ܕܰܡܕܰܒܪܳܢܽܘܬܳܐ. ܗܰܘ ܓܶܝܪ ܛܽܘܡܣܳܐ ܥܰܬܺܝܩܳܐ ܚܰܘܳܐ܆ ܟܰܕ ܝܶܠܕܰܬ ܠܩܳܐܝܶܢ܆ ܩܢܺܝܬ̣ ܒܰܪܢܳܫܳܐ ܐܶܡܪܰܬ^[37]܆ ܘܠܰܘ ܒܪܳܐ. ܘܡܶܢ ܬܰܡܳܢ ܒܢܰܝ̈ܢܳܫܳܐ ܡܰܢ܆ ܠܰܘ ܒܢܰܝ̈ܳܐ ܕܶܝܢ ܡܶܟܺܝܠ ܡܶܬܝܰܠܕܺܝܢ ܗ̱ܘܰܝܢ܆ ܟܰܕ ܚܛܺܝܬܳܐ ܐܰܚܺܝܕܳܐ ܗ̱ܘܳܬ ܘܡܶܬܥܰܫܢܳܐ܆ ܘܰܡܢܰܟܪܝܳܐ ܗ̱ܘܳܬ ܠܰܢ ܡܶܢ ܒܰܝܬܳܝܽܘܬܳܐ ܕܰܐ‌ܠܳܗܳܐ. ܗܽܘ ܕܶܝܢ ܛܽܘܡܣܳܐ ܚܰܕܬܳܐ܆ ܗܳܢܰܘ ܕܶܝܢ ܝܳܠܕܰܬ ܐܰ‌ܠܳܗܳܐ܆ ܒܪܳܐ ܝܶܠܕܰܬ. ܡܶܬܒܥܶܐ ܗ̱ܘܳܐ ܠܰܢ ܓܶܝܪ ܘܰܣܢܺܝܩܺܝܢ ܗ̱ܘܰܝܢ ܗܘ܆ ܥܰܠ ܒܪܳܐ ܕܺܐܝܬܰܘܗ̱ܝ ܒܰܟܝܳܢܐ ܐܰ‌ܠܳܗܳܐ܆ ܕܰܡܫܰܟܶܢ ܠܰܢ ܛܰܝܒܽܘܬܳܐ ܕܣܳܝܽܘܡܽܘܬ ܒܢܰܝ̈ܳܐ܆ ܗܳܝ ܕܡܶܢܳܗ̇ ܐܺܝܬܰܝܢ ܗ̱ܘܰܝܢ ܥܰܪ̈ܛܶܠܳܝܶܐ.

ܐܰܝܟܰܢܳܐ ܠܳܐ ܒܳܗܬܺܝܢ ܟܰܕ ܗܳܠܶܝܢ ܫܳܡܥܺܝܢ܆ ܦܰܪ̈ܽܘܓܶܐ ܕܥܽܘܪ̈ܒܰܘ̈ܗ̱ܝ ܕܢܶܣܛܽܘܪܺܝܽܘܤ܆ ܥܽܘܪ̈ܒܶܐ ܓܶܝܪ ܐܺܝܬܰܝܗܽܘܢ ܕܽܘܓܡ̈ܰܛܰܐ ܕܗܰܘ ܘܛܰܡ̈ܶܐܐ܆ ܘܰܕܡܰܘܟܡܺܝܢ ܐܰܝܟ ܕܡܶܢ ܨܶܐܕܰܝܗܽܘܢ܆ ܠܢܽܘܗܪܳܐ ܕܺܝܕܰܥܬܳܐ ܕܰܐ‌ܠܳܗܳܐ. ܠܗܰܘ ܓܶܝܪ ܕܺܐܝܬܰܘܗ̱ܝ ܒܰܟܝܳܢܳܐ ܐܰ‌ܠܳܗܳܐ ܕܡܶܢ ܐܰ‌ܠܳܗܳܐ܆ ܘܗܽܘ ܟܰܕ ܗܽܘ ܐܶܬܺܝܠܶܕ ܒܰܒܣܰܪ ܒܪܳܐ܆ ܠܗܳܢܳܐ ܕܰܒܛܰܝܒܽܘܬܳܐ ܝܰܬܪܳܗ̇ ܠܰܡܫܰܡܠܝܽܘܬܳܗ̇ ܕܣܳܝܽܘܡܽܘܬ ܒܢܰܝ̈ܳܐ ܡܶܢ ܥܡܳܕܳܐ ܗܰܘ ܕܰܒܝܽܘܪܕܢܳܢ ܐܳܡܪܺܝܢ. ܐܰܝܟܰܢܳܐ ܗܳܟܺܝܠ ܠܺܝ ܢܫܰܟܶܢ ܡܶܟܺܝܠ܆ ܗܰܘ ܡܳܐ ܕܗܽܘ ܒܛܰܝܒܽܘܬܳܐ ܥܰܬܪܶܗ. ܡܶܕܶܝܢ ܩܰܕܡܳܐܺܝܬ ܒܗܳܢܽܘܢ ܕܫܰܦܺܝܪ ܚܳܫܺܝܢ ܢܶܬܛܰܟܰܤ܆ ܘܠܰܘ ܒܗܳܢܽܘܢ ܕܥܳܒܕܺܝܢ ܫܰܦܺܝܪ. ܥܰܡܰܢ ܦܪܺܝܩ ܦܳܪܽܘܩܰܢ. ܘܰܐܝܟܰܢܳܐ ܢܶܫܪ̈ܳܢ ܡ̈ܶܠܶܐ ܐܰ‌ܠܳܗܳܝ̈ܳܬܳܐ ܕܳܐܡܪ̈ܳܢ܆ ܕܶܐܬܺܝܠܶܕ ܠܟܽܘܢ ܝܰܘܡܳܢܳܐ ܦܳܪܽܘܩܳܐ܆ ܘܰܕܗܽܘ ܢܶܦܪܩܺܝܘܗ̱ܝ ܠܥܰܡܶܗ ܡܶܢ ܚ̈ܛܳܗܰܝܗܽܘܢ^[38]. ܗܰܘ ܓܶܝܪ ܕܶܐܬܺܝܠܶܕ ܒܪܳܐ ܘܦܳܪܽܘܩܳܐ܆ ܠܳܐ ܣܢܺܝܩ ܥܰܠ ܬܰܘܣܶܦܬܳܐ ܐ̱ܚܪܺܬܳܐ ܠܰܡܫܰܡܠܝܽܘܬܳܐ. ܘܳܐܦܠܳܐ ܬܽܘܒ ܡܶܬܩܰܢܝܳܢܽܘܬܳܐ ܐܺܝܬܶܝܗ̇ ܠܶܗ ܐܰܘ ܥܰܠܺܝܠܬܳܐ ܗܳܝ ܕܢܶܦܪܽܘܩ܆ ܐܶܠܳܐ ܕܒܽܐܘܣܺܝܰܐ ܐܺܝܬܶܝܗ̇ ܒܶܗ.

ܡܳܢܳܐ ܕܶܝܢ ܗܳܢܽܘܢ ܕܦܰܢܛܰܣܝܐ ܗܳܝ ܢܳܡܽܘܣܳܝܰܬ ܢܰܦܫܳܗ̇ ܕܽܐܘܛܘܟܐ ܡܫܰܒܚܺܝܢ܆ ܘܢܳܡܽܘܣܳܐ ܚܳܫܒܺܝܢ ܠܳܗ̇ ܠܗܳܝ ܕܰܠܗܽܘܢ ܡܶܣܬܰܒܪܳܐ܆ ܘܓܰܘܳܢܳܝܳܐ ܡܰܢ ܐܺܝܬܰܘܗ̱ܝ ܠܗܽܘܢ ܟܦܽܘܪܝܶܗ ܕܰܫܪܳܪܳܐ܆ ܠܣܰܓܺܝܽܐܘܬ ܣܶܕܩ̈ܶܐ ܕܶܝܢ ܕܫܽܘܒܚܳܐ ܕܰܓܳܠܳܐ ܐܝܟ ܕܰܠܟܽܠ ܚܕ ܡܶܬܚܰܘܶܐ ܡܦܰܠܓܺܝܢ. ܘܟܰܕ ܐ̱ܢܳܫܺܝ̈ܢ ܛܳܥܰܝ̈ܳܐ ܐܺܝܬܰܝܗܽܘܢ ܘܳܐܦ ܒܳܗ̇ ܒܛܳܥܝܽܘܬܳܐ܆ ܐܳܦ ܡܶܫܬܰܒܗܪܺܝܢ ܒܳܗ̇ ܒܗܳܝ ܕܠܰܝܬ ܠܗܽܘܢ ܪܺܝܫܳܐ܆ ܘܰܒܗܳܝ ܕܠܳܐ ܠܐ̱ܢܳܫ ܡܶܢ ܡܰܠ̈ܦܳܢܶܐ ܡܡܰܠ̈ܠܰܝ ܐܰ‌ܠܳܗܳܝ̈ܳܬܳܐ ܘܡܰܐܪ̈ܙܳܢܶܐ ܕܥܺܕܬܳܐ ܢܶܬܬܦܺܝܣܽܘܢ܆ ܘܛܳܒ ܡܶܢ ܩܰܡܨܳܐ ܗܰܘ ܕܠܰܝܬ ܠܶܗ ܡܰܠܟܳܐ^[39] ܐܰܝܟ ܡܰܬܠܳܐ ܝܰܬܺܝܪ ܠܳܐ ܡܠܺܝܠܳܐܺܝܬ ܣܺܝܡܺܝܢ܆ ܐܶܢ ܟܺܝܬ ܗܰܘ ܡܰܢ ܚܳܙܶܩ ܡܶܢ ܚܰܕ ܦܽܘܩܕܳܢܳܐ ܫܰܦܺܝܪ ܡܛܰܟܣܳܐܺܝܬ܆ ܗܶܢܽܘܢ ܕܶܝܢ ܐ̱ܚܪ̈ܳܢܶܐ ܐ̱ܚܪܳܢܝܳܐܺܝܬ ܠܦܽܘܬ ܗܳܝ ܕܳܐܬܝܳܐ ܠܠܶܒܶܗ܆ ܘܰܐܝܟ ܕܺܝ̈ܢܶܐ ܐܰܘ ܟܺܝܬ ܦܫܳܪ̈ܶܐ ܕܚܶܠ̈ܡܶܐ ܗܳܢܽܘܢ ܕܣܳܚܶܝܢ܆ ܡܦܰܫܩܺܝܢ ܠܳܗ̇ ܠܰܣܒܺܝܪܽܘܬܳܐ.

ܐܰܪܰܐ ܡܶܢ ܛܽܘܡܣܳܐ ܗܰܘ ܚܰܕܬܳܐ ܠܳܐ ܢܶܬܚܰܡܨܽܘܢ܆ ܡܶܢ ܝܳܠܕܰܬ ܐܰ‌ܠܳܗܳܐ ܒܬܽܘܠܬܳܐ ܐܳܡܰܪ ܐ̱ܢܳܐ܆ ܗܳܝ ܕܡܶܢ ܓܶܢܣܳܐ ܕܺܝܠܰܢ ܐܶܬܦܰܣܩܰܬ ܘܶܐܬܓܰܒܝܰܬ ܐܰܝܟ ܕܐ̱ܢܳܫ ܢܺܐܡܰܪ ܗܰܝܟܠܳܐ ܩܰܕܺܝܫܳܐ܆ ܠܘܳܬ ܬܶܫܡܶܫܬܳܐ ܘܡܽܘܠܳܝܳܐ ܕܰܡܕܰܒܪܳܢܽܘܬܳܐ ܗܳܝ ܕܡܶܛܽܠܳܬܰܢ܆ ܗܳܝ ܕܡܶܢܳܗ̇ ܝܺܥܳܐ ܥܰܡܰܢܽܘܐܶܝܠ.

ܠܳܐ ܠܘܳܬ ܐܳܕܳܡ ܘܚܰܘܳܐ ܪܳܗܛܺܝܢ ܣܳܠܩܺܝܢ ܗܳܢܽܘܢ ܐܰܒܳܗܰܝ̈ܢ ܩܰܕܡܳܝ̈ܶܐ܆ ܗܳܢܽܘܢ ܕܡܶܛܽܠܳܬܗܽܘܢ ܩܳܡܢܰܢ ܒܣܽܘܢܩܳܢܳܐ ܕܳܐܣܝܽܘܬܳܐ ܗܳܝ ܕܰܒܝܰܕ ܡܶܬܒܰܣܪܳܢܽܘܬܳܐ ܘܡܶܬܒܰܪܢܫܳܢܽܘܬܳܐ܆ ܘܡܶܫܬܰܘܕܥܺܝܢ ܓܰܠܝܳܐܺܝܬ܆ ܕܗܰܘ ܡܳܐ ܕܙܳܕܶܩ ܗ̱ܘܳܐ ܕܢܶܬܐܰܣܶܐ܆ ܗܳܢܳܐ ܐܶܬܢܣܶܒ܆ ܐܶܢ ܓܶܝܪ ܠܰܘ ܒܝܰܕ ܬܚܽܘܡ̈ܶܐ ܕܰܟܝܳܢܳܐ ܕܺܝܠܰܢ ܒܰܫܪܳܪܳܐ ܨܳܒܶܐ ܗ̱ܘܳܐ ܕܢܶܪܕܶܐ܆ ܘܗܳܕܶܐ ܟܰܕ ܠܥܶܠ ܡܶܢ ܟܝܳܢܳܐ ܐܳܦ ܒܗܽܘܢ ܐܶܬܳܐ܆ ܐܰܝܟܰܢܳܐ ܕܰܐܝܟ ܡܶܠܬܶܗ ܕܦܰܘܠܽܘܤ ܐܰܝܟ ܙܢܳܐ ܕܰܒܝܰܕ ܚܰܕ ܒܰܪܢܳܫܳܐ ܚܛܺܝܬܳܐ ܥܶܠܰܬ ܠܥܳܠܡܳܐ܆ ܘܰܒܝܰܕ ܠܳܐ ܡܶܫܬܰܡܥܳܢܽܘܬܳܐ ܕܚܕ ܒܰܪܢܳܫܳܐ܆ ܚܰܛܳܝ̈ܶܐ ܗܘ̣ܰܘ ܣܰܓܺܝ̈ܶܐܐ܆ ܗܳܟܰܢܳܐ ܐܳܦ ܒܝܰܕ ܡܶܫܬܰܡܥܳܢܽܘܬܳܐ ܕܚܰܕ ܙܰܕܺܝ̈ܩܶܐ ܢܶܗܘܽܘܢ ܣܰܓܺܝ̈ܶܐܐ^[40]܆ ܘܡܶܛܽܠ ܕܰܒܝܰܕ ܒܰܪܢܳܫܳܐ ܡܰܘܬܳܐ܆ ܐܳܦ ܒܝܰܕ ܒܰܪܢܳܫܳܐ ܩܝܳܡܬܳܐ ܕܡܺܝ̈ܬܶܐ^[41]܆ ܡܳܢܐ ܐܳ‌ܠܨܳܐ ܗ̱ܘܳܬ ܥܰܠ ܟܽܠܶܗ ܗܳܢܳܐ ܚܽܘܕܪܳܐ ܕܡܶܬܒܰܪܢܫܳܢܽܘܬܳܐ܆ ܘܥܰܠ ܗܳܝ ܕܰܣܒܺܝܪܽܘܬܳܐ ܗܳܕܶܐ ܥܣܺܝܩܬܳܐ ܘܰܡܬܺܝܚܬܳܐ ܢܚܰܘܶܐ ܒܨܶܕܘܳܐ^[42]܆ ܘܰܒܝܰܕ ܒܰܛܢܳܐ ܘܝܰܠܕܳܐ ܢܺܐܬܶܐ ܘܰܒܝܰܕ ܗܳܠܶܝܢ ܕܫܰܪܟܳܐ. ܗܳܠܶܝܢ ܟܺܝܬ ܕܰܐܝܟ ܕܒܰܫܪܰܓܪ̈ܳܓܝܳܬܳܐ ܢܶܬܚܰܘ̈ܝܳܢ܆ ܡܶܢ ܗܳܠܶܝܢ ܕܠܳܐ ܦܝܳܣܳܐ ܐܺܝܬܶܝܗ̇. ܡܰܠܽܘܢ ܕܶܝܢ ܡܶܢ ܗܳܠܶܝܢ ܕܠܳܐ ܡܶܫܟ̈ܚܳܢ ܠܡܶܗܘܳܐ. ܡܕܰܝܠܳܢܽܘܬܳܐ ܓܶܝܪ ܕܰܟܝܳܢܳܐ܆ ܡܶܬܚܰܘܝܳܢܽܘܬܳܐ ܕܰܫܪܳܪܳܐ ܐܺܝܬ ܠܳܗ̇ ܘܠܰܘ ܕܦܰܢܛܰܣܺܝܰܐ.

ܟܰܕ ܗܳܠܶܝܢ ܗܳܟܺܝܠ ܝܳܕܥܺܝܢ ܐܢ̱ܬܽܘܢ܆ ܕܰܥܘ ܓܰܠܝܳܐܺܝܬ ܕܰܠܘܳܬ ܥܽܘܩ̈ܣܶܐ ܐܰܝܟ ܗܳܝ ܕܰܟܬܺܝܒܳܐ ܒܳܥܛܺܝܢ ܐܢ̱ܬܽܘܢ܆ ܘܕܰܡܢܳܬܳܐ ܡܝܰܬܰܪܬܳܐ ܗܘ̣ܰܘ. ܡܰܠܽܘܢ ܕܶܝܢ܆ ܕܗܳܝ ܕܺܝܠܶܗ ܕܰܐ‌ܠܳܗܳܐ. ܫܰܦܺܝܪܳܐ ܗܝ ܓܶܝܪ ܕܬܶܬܶܐܡܰܪ ܐܳܦ ܡܶܛܽܠܳܬܟܽܘܢ܆ ܕܰܗܘܳܬ ܡܢܳܬܶܗ ܕܡܳܪܝܳܐ ܥܰܡܳܐ ܕܺܝܠܶܗ ܕܝܰܥܩܽܘܒ܆ ܚܰܒܠܳܐ ܕܝܳܪܬܽܘܬܳܐ ܕܺܝܠܶܗ ܐܺܝܣܪܳܐܶܝܠ^[43]. ܠܳܐ ܓܶܝܪ ܐܺܝܬܰܝܗܽܘܢ ܐܰ‌ܠܳܗ̈ܶܐ ܕܺܝܠܟܽܘܢ܆ ܐܰܝܟ ܐܰ‌ܠܳܗܳܐ ܕܺܝܠܰܢ. ܐܳܦ ܗܳܕܶܐ ܓܶܝܪ ܡܶܢܶܗ ܟܰܕ ܡܶܢܶܗ ܕܰܟܬܳܒܳܐ ܙܳܩܰܪ ܐ̱ܢܳܐ ܠܟܽܘܢ܆ ܡܶܛܽܠ ܟܺܝܬ ܕܰܒܥܶܠ̈ܕܒܳܒܶܐ ܕܰܫܪܳܪܳܐ ܕܠܳܐ ܗܰܘܢܳܐ܆ ܘܡܶܢ ܓܦܶܬܳܐ ܕܰܣܕܽܘܡ ܓܦܶܬܳܐ ܕܡܰܠܦܳܢܽܘܬܗܽܘܢ܆ ܥܰܠ ܗܳܝ ܕܠܳܐ ܐܶܫܰܕܘ̱ ܡܶܛܪܳܐ ܥܢܳܢ̈ܶܐ ܕܡܳܪܝܳܐ܆ ܢܽܘܪܳܐ ܕܶܝܢ ܘܟܶܒܪܺܝܬܳܐ ܟܰܕ ܪܕܰܘ ܥܠܶܝܗ̇܆ ܡܰܟ̈ܣܳܢܘܳܬܳܐ ܕܡܶܢ ܟܬܳܒܳܐ ܢܦܺܝܚ ܡܶܢ ܐܰ‌ܠܳܗܳܐ܆ ܕܠܳܐ ܝܰܠܕܳܐ ܥܰܒܕܽܘܗ̇܆ ܘܶܐܡܳܐ ܕܦܺܐܪ̈ܶܐ ܠܳܐ ܡܫܰܡ̈ܠܰܝܳܐ ܘܰܕܠܳܐ ܒܙܰܒܢܗܽܘܢ.

ܒܰܟܡܳܐ ܗܳܟܺܝܠ ܦܽܘ̈ܡܶܐ ܡܶܫܟܚܺܝܢܰܢ ܐܰܚܰܝ̈ ܕܰܐܝܟ ܕܫܳܘܝܳܐ ܢ݀ܫܰܒܰܚ ܠܰܡܫܺܝܚܳܐ܆ ܕܬܰܘܕܺܝܬܳܐ ܬܪܺܝܨܬܳܐ ܕܗܰܝܡܳܢܽܘܬܳܐ ܫܰܟܶܢ ܠܰܢ܆ ܘܡܶܢ ܟܽܠܳܗ̇ ܥܰܪܦܶܠܳܐ ܗܰܪܛܝܩܝܬܐ ܚܰܪܰܪ ܠܰܢ. ܡܳܢܳܐ ܩܽܘܪܒܳܢܳܐ ܢܰܝܬܶܐ ܠܛܽܘܡܣܳܐ ܚܰܕܬ̣ܳܐ ܕܐ̱ܪܳܙܳܐ ܪܰܒܳܐ. ܡܳܢܳܐ܆ ܗܳܝ ܕܳܐܦ ܚܢܰܢ ܩܢܽܘܡܰܢ ܢܶܗܘܶܐ ܛܽܘܡ̈ܣܶܐ ܚ̈ܰܕܬ̣ܶܐ܆ ܟܰܕ ܡܶܢ ܟܽܠܳܗ̇ ܪܶܚܡܬܳܐ ܘܫܰܘܬܳܦܽܘܬܳܐ ܒܺܝܫܬܳܐ ܡܶܬܦܰܣܩܺܝܢܰܢ^[44]܆ ܠܰܐܠܳܗܳܐ ܕܶܝܢ ܝܰܬܺܝܪܳܐܺܝܬ ܐܰܝܟ ܕܡܰܨܝܳܐ ܡܶܬܢܰܩܦܺܝܢܰܢ܆ ܟܰܕ ܢܳܡܽܘܣ̈ܶܐ ܡܰܢ ܩܰܕܺܝ̈ܫܶܐ^[45] ܡܶܬܟܰܬܒܺܝܢ ܒܟܽܠܙܒܰܢ ܒܠܶܒܰܘ̈ܳܬܰܢ܆ ܡܶܬܚܰܬܡܺܝܢ ܕܶܝܢ ܒܣܳܥܽܘܪ̈ܘܳܬܳܐ ܛܳܒ̈ܳܬܳܐ ܒܟܽܠܶܗ ܚܰܝܠܳܐ ܘܝܰܨܺܝܦܽܘܬܳܐ܆ ܡܶܛܽܠ ܕܰܠܘܳܬ ܪܰܘܡܳܐ ܒܳܥܶܝܢ ܚ̱ܢܰܢ ܠܡܶܪܕܳܐ܆ ܡܶܢ ܐܰܝܟܳܐ ܕܰܢܚܶܬ ܡܫܺܝܚܳܐ. ܠܬܰܡܳܢ ܓܶܝܪ ܢܳܓܕܳܐ ܘܡܰܣܩܳܐ ܠܰܢ܆ ܐܳܦ ܗܺܝ ܗܳܝ ܕܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܘܥܰܠ ‌ܐܰܪܥܳܐ ܫܰܝܢܳܐ܆ ܒܰܒܢܰܝ̈ܢܳܫܐ ܫܰܦܺܝܪܽܘܬ ܨܶܒܝܳܢܳܐ^[46]. ܠܶܗ ܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ‌܀

ܫܠܡ ܡܐܡܪܐ ܕܡܐܐ ܘܚܕ.

ܠܘܩܐ. 1: 2 [1]

ܠܘܩܐ. 2: 14 [2]

ܗܰܘ[3]

ܩܘܠܣ̈ܝܐ. 1: 16 [4]

[5] ܙܳܕܶܩ ܠܡܶܕܰܥ ܕܗܳܕܶܐ ܒܰܪܬܩܳܠܐ ܕܒܰܡܪ̈ܰܘܡܶܐ ܕܣܺܝܡܳܐ ܒܦܶܬܓܳܡܳܐ ܗܳܢܳܐ ܕܳܐܡܪܺܝܢ ܚ̱ܢܰܢ ܬܶܫܒܽܘܚܬܳܐ ܒܰܡܪ̈ܰܘܡܶܐ ܠܰܐܠܳܗܳܐ܆ ܠܰܘ ܒܰܠܚܽܘܕ ܣܰܓܝܐܢܐܝܬ ܣܺܝܡܳܐ ܒܠܶܫܳܢܳܐ ܝܰܘܢܳܝܳܐ܆ ܐܶܠܐ ܐܳܦ ܒܰܡܬܺܝܚܽܘܬܳܐ ܡܶܕܶܡ ܕܡܶܠܬܳܐ܆ ܕܠܐ ܡܰܨܝܳܐ ܕܬܶܬܶܐܡܰܪ ܐܰܝܟ ܕܰܒܠܶܫܳܢܳܐ ܗܳܢܳܐ ܣܽܘܪܝ̣ܳܝ̣ܳܐ. ܒܪܰܡ ܕܶܝܢ ܚܰܝܠܳܐ ܕܒܰܪܬܩܳܠܐ ܗܳܝ ܕܣܺܝܡܳܐ ܒܠܶܫܳܢܳܐ ܝܰܘܢܳܝܳܐ ܗܳܟܰܢܳܐ ܐܺܝܬܰܘܗ̱ܝ܆ ܬܶܫܒܽܘܚܬܳܐ ܒܰܡܪ̈ܰܘܡܶܐ ܗܳܢܽܘܢ ܕܝܰܬܺܝܪ ܡܶܢ ܟܽܠ ܪܳܡܺܝܢ ܠܰܐܠܳܗܳܐ. ܡܶܛܽܠ ܗܳܕܶܐ ܐܶܡܰܪ ܡܰܠܦܳܢܳܐ܆ ܟܰܕ ܣܳܡ ܡܬܺܝܚܽܘܬܳܐ. ܡܶܛܽܠ ܕܰܒܠܶܫܳܢܳܐ ܝܰܘܢܳܝܳܐ܆ ܟܽܠܗܽܘܢ ܫܡܳܗ̈ܶܐ ܒܰܬܠܳܬܳܐ ܙܢܰܝ̈ܳܐ ܡܶܬܐܰܡܪܺܝܢ. ܡܶܬܩܪܶܝܢ ܗܳܟܰܢܳܐ. ܩܰܕܡܳܝ ܛܽܘܦܣܳܐ. ܕܰܒܦܶܚܡܳܐ ܕܰܡܬܺܝܚܽܘܬܳܐ. ܕܰܐܝܟ ܐܰܝܟܰܢ. ܪܳܡܳܐ܆ ܘܰܕܝܰܬܺܝܪ ܪܳܡ. ܘܰܕܝܰܬܺܝܪ ܡܶܢ ܟܽܠ ܪܳܡ.

ܚܙܩܝܐܝܠ. 3: 12[6]

 ܐܰܪܰܐ ܐܳܬܝܳܐ ܡܶܠܬܳܐ ܗܳܕܶܐ ܡܶܢ ܟ̇ܫܐ̣؟[7]

ܪ̈ܗܘܡܝܐ. 8: 26 [8]

ܦܽܘܠܳܓܳܐ  ܐܫܥܝܐ. 8: 1[9]

ܐ. ܛܝܡܬܐܘܣ. 3: 16 [10]

ܡܬܝ. 5: 21  ܐܦ 5: 27 ـ 28  ܐܦ 5: 48 [11]

ܐܢ̱ܬ[12]

ܕܡܶܬܒܰܪܢܫܽܘܬܐ[13]

ܝܘܚܢܢ. 21: 25 [14]

ܝܘܚܢܢ. 5: 17[15]

ܥܒܪ̈ܝܐ. 10: 5 ـ 7  ܐܦ ܡܙܡܘܪ̈ܐ. 40: 7 ـ 8 [16]

ܠܘܩܐ. 24: 27 [17]

ܩܘܠܣ̈ܝܐ. 2: 3 [18]

ܣܶܦܪܐ ܕܒܪܝܬܐ. 49: 9[19]

ܥܒܪ̈ܝܐ. 7: 14 [20]

ܐܫܥܝܐ. 8: 1 [21]

ܡܦܩܢܐ. 3: 7 ـ 8 [22]

ܡܬܝ. 12: 29 [23]

ܡܬܝ. 18: 10 [24]

ܐܫܥܝܐ. 8: 2 [25]

ܠܘܩܐ. 9: 31 [26]

ܐܫܥܝܐ. 8: 3[27]

ܠܘܩܐ. 1: 48 [28]

ܣܶܦܪܐ ܕܒܪܝܬܐ. 2: 21 [29]

[30]ܫܡܳܐ ܗܳܢܳܐ ܕܶܐܡܰܪܢܰܢ ܛܽܘܡܣܳܐ: ܟܰܕ ܡܶܬܦܰܫܰܩ ܡܶܢ ܝܰܘܢܳܝܳܐ ܠܣܽܘܪܝ̣ܳܝ̣ܳܐ܆ ܦܣܳܩܳܐ ܡܶܕܶܡ ܡܶܬܶܐܡܰܪ.

[31]ܐܳܦ ܫܡܳܐ ܗܳܢܳܐ ܕܳܐܡܪܺܝܢܰܢ ܚ̣ܕܬܐ܆ ܒܬܰܪܬܶܝܢ ܠܶܟܣܺܝ̈ܣ ܡܶܬܶܐܡܰܪ ܝܰܘܢܳܐܝܬ. ܢܐܘܣ. ܘܩܐܢܘܣ

[32]ܠܘܳܬ ܝܰܘ̈ܢܳܝܶܐ ܒܰܚܫܰܚܬܳܐ ܕܡܰܡܠܠܐ ܐܺܝܬܶܝܗ̇ ܗܳܝ ܕܢܶܟܬܽܘܒ ܚܠܳܦ ܗܳܝ ܕܰܢܨܽܘܪ܆ ܡܶܛܽܠܗܳܕܶܐ ܗܝ ܕܰܟܬܽܘܒ ܒܰܟܬܳܒܳܐ ܕܐ̱ܢܳܫܳܐ܆ ܚܠܳܦ ܗܳܝ ܕܨܽܘܪ ܒܨܽܘܪܬܳܐ ܕܐ̱ܢܳܫܳܐ܆ ܐܶܢ ܨܳܒܶܐ ܐ̱ܢܳܫ ܫܳܩܶܠ.

ܠܘܩܐ. 2: 6 [33]

ܥܒܪ̈ܝܐ. 2: 14 [34]

ܐܫܥܝܐ. 8: 3[35]

ܠܘܩܐ. 1: 35[36]

ܣܦܪܐ ܕܒܪܝܬܐ. 4: 1 [37]

ܡܬܝ. 1: 21  ܐܦ ܠܘܩܐ. 2: 11 [38]

ܡ̈ܬܠܐ. 30: 27[39]

ܪ̈ܗܘܡܝܐ. 5: 12  ܐܦ 5: 19 [40]

ܐ. ܩܘܪ̈ܝܢܬܝܐ. 15: 21 [41]

 ܚܶܣܕܐ ܬܰܗܠܰܠܬܳܐ[42]

ܬܢܝܢ ܢܡܘܣܐ. 32: 9 [43]

[44]ܡܶܬܦܰܣܩܺܝܢܰܢ ܐܶܡܰܪ܆ ܡܶܛܽܠ ܕܛܽܘܡܣ̈ܶܐ ܒܠܶܫܳܢܳܐ ܝܰܘܢܳܝܳܐ܆ ܦܣ̈ܳܩܶܐ ܡܶܬܐܰܡܪܺܝܢ.

 ܟܳܗ̈ܢܳܝܶܐ[45]

ܠܘܩܐ. 2: 14 [46]