ܥܰܠ ܣܳܗܕܬܳܐ ܩܰܕܺܝܫܬܳܐ ܕܪܽܘܣܝܤ ܘܰܒܫܽܘܠܳܡܶܗ ܕܡܺܐܡܪܳܐ ܚܽܘܦܳܛܳܐ܆ ܕܙܳܕܶܩ ܕܰܢܩܰܪܶܒ ܟܽܠ ܚܰܕ ܗܰܘ ܡܳܐ ܕܡܳܛܶܐ ܠܶܗ ܠܗܳܝ ܕܬܶܫܬܰܡܠܶܐ ܬܰܚܦܺܝܬܳܐ ܕܡܰܕܒܚܳܐ ܩܰܕܺܝܫܳܐ.
100: ܗܳܢܽܘܢ ܕܰܡܫܰܐܠܺܝܢ ܕܡܳܢܰܐ ܗ̱ܘ ܚܰܝܠܳܐ ܕܒܰܪ̱ܬ ܩܳܠܳܐ ܗܳܝ ܐܰܠܳܗܳܝܬܳܐ ܕܳܐܡܪܳܐ܆ ܬܽܘܒܘ ܩܶܪܒܰܬ̣ ܠܳܗ̇ ܡܰܠܟܽܘܬܳܐ ܕܰܫܡܰܝܳܐ[1]܆ ܫܰܦܺܝܪܳܐ ܠܰܡܚܰܘܳܝܽܘ ܠܗܽܘܢ܆ ܠܰܕܪܽܘܣܺܝܤ ܒܬܽܘܠܬܳܐ ܗܳܝ ܕܣܰܓܺܝ ܐܺܝܬܶܝܗ̇ ܚܰܝܠܬܳܢܺܝܬܳܐ܆ ܘܰܠܡܰܓܗܳܝܽܘ ܡܶܢ ܡ̈ܶܠܶܐ. ܗܳܠܶܝܢ ܓܶܝܪ ܕܰܩܕܳܡ ܥܰܝ̈ܢܶܐ ܫܰܠܺܝܛ ܠܳܟ ܕܬܶܚܙܶܐ ܐܶܢܶܝܢ܆ ܕܰܒܝܰܕ ܠܶܫܳܢܳܐ ܬܚܰܘܶܐ ܐܶܢܶܝܢ ܝܰܬܺܝܪܬܳܐ ܗܝ. ܐܶܡܰܬܝ ܓܶܝܪ ܕܬܶܚܙܶܐ ܛܠܺܝܬܳܐ ܕܣܰܓܺܝ ܛܰܠܝܳܐ܆ ܘܡܳܢܳܐ ܐܳܡܰܪ ܐ̱ܢܳܐ ܕܛܰܠܝܳܐ܆ ܕܗܳܫܳܐ ܡܶܢ ܩܰܘܡܬܳܐ ܫܰܒܪܳܝܬܳܐ ܢܰܦܺܝܩܳܐ܆ ܕܥܰܠ ܐܰܪ̈ܓܘܳܢܶܐ ܡܰܠ̈ܟܳܝܶܐ ܐܶܬܝܰܠܕܰܬ܆ ܕܛܪܐܝܐܢܘܤ ܓܶܝܪ ܗܰܘ ܕܗܳܝܕܶܝܢ ܡܰܡܠܶܟ ܗ̱ܘܳܐ ܥܰܠ ܪ̈ܽܘܡܳܝܶܐ ܐܺܝܬܶܝܗ̇ ܗ̱ܘܳܬ ܒܰܪܬܳܐ܆ ܕܰܒܒܶܝܬ ܡܰܠܟܳܐ ܐܶܬܪܰܒܝܰܬ܆ ܕܕܣܩ̈ܝܦܛܪܶܐ ܐܰܘܟܺܝܬ ܫܰܒ̈ܛܶܐ ܐܰܒܳܗܳܝ̈ܶܐ ܗܳܐ ܡܶܢ ܟܰܕܽܘ ܐܰܝܟ ܝܳܪܽܘܬ̣ܬܳܐ ܡܳܪܬܳܐ ܐܺܝܬܶܝܗ̇ ܗ̱ܘܳܬ܆ ܕܡܶܙܕܰܝܚܳܐ ܗ̱ܘܳܬ ܒܟܽܠܗܽܘܢ ܗܰܒܳܒ̈ܶܐ ܕܥܳܠܡܳܐ ܗܳܢܳܐ܆ ܕܒܟܽܠܗܶܝܢ ܥܰܒܺܝܛܳܐ ܗ̱ܘܳܬ܆ ܐܳܦ ܒܰܒܣܳܡܳܐ ܕܟܽܠ ܓܢܶܤ ܗܰܘ ܕܰܠܪ̈ܶܓܫܶܐ ܝܰܥ̈ܢܶܐ ܡܰܛܥܶܐ ܘܰܡܫܰܓܶܫ ܡܶܫܬܰܦܥܳܐ ܗ̱ܘܳܬ܆ ܕܰܐܝܟ ܕܠܚܠܐ ܘܚܶܠܡܳܐ ܠܟܽܠܗܶܝܢ ܪܳܗܛܳܐ ܥܳܒܪܳܐ܆ ܘܦܳܪܚܳܐ ܥܳܒܪܳܐ ܠܥܶܠ ܡܶܢ ܗܳܠܶܝܢ ܕܗܳܪܟܳܐ܆ ܘܰܠܘܳܬ ܩܪܳܝܬܳܐ ܕܰܡܫܺܝܚܳܐ ܡܶܢ ܫܶܠܝ ܡܫܰܢܝܳܐ܆ ܘܟܽܠܳܗ̇ ܬܰܠܝܳܐ ܒܣܰܒܪ̈ܶܐ ܫܡܰܝܳܢ̈ܶܐ܆ ܘܰܒܕܽܘܝܳܪܳܐ ܗܰܘ ܛܽܘܒܬܳܢܳܐ܆ ܐܰܝܟܰܢܳܐ ܠܳܐ ܬܺܐܡܰܪ܆ ܠܰܘ ܕܩܶܪܒܰܬ ܠܳܗ̇܆ ܡܰܠܽܘܢ ܕܶܝܢ ܕܗܳܐ ܩܰܪܺܝܒܳܐ ܘܩܳܝܡܳܐ ܡܰܠܟܽܘܬܳܐ ܕܰܫܡܰܝܳܐ.
ܐܰܝܟ ܙܢܳܐ ܓܶܝܪ ܕܗܳܢܽܘܢ ܕܰܠܗܰܢܺܝ̈ܐܘܳܬܳܐ ܫܟܺܝܪ̈ܳܬܳܐ ܦܳܠܚܺܝܢ ܥܰܒܕܽܘܬܳܐ܆ ܕܡܶܢ ܚܛܺܝܬܳܐ ܡܶܬܬܰܡܠܟܺܝܢ ܡܶܬܐܰܡܪܺܝܢ܆ ܐܰܝܟ ܗܳܝ ܕܰܟܬܺܝܒܳܐ ܠܦܰܘܠܽܘܤ ܠܘܳܬ ܪ̈ܽܘܡܳܝܶܐ܆ ܠܳܐ ܗܳܟܺܝܠ ܬܰܡܠܶܟ ܚܛܺܝܬܳܐ ܒܦܰܓܪܟܽܘܢ ܡܳܝܽܘܬܳܐ܆ ܐܰܝܟ ܕܬܶܫܬܰܡܥܽܘܢ ܠܶܗ ܒܰܪ̈ܓܺܝܓܳܬܶܗ[2]܆ ܒܶܗ ܟܰܕ ܒܶܗ ܒܰܙܢܳܐ ܗܳܢܽܘܢ ܕܰܒܣܽܘ̈ܟܳܠܶܐ ܐܰܠܳܗܳܝ̈ܶܐ ܘܰܫܡܰܝܳܢ̈ܶܐ ܐܶܬܬܚܶܕܘ ܒܗܰܘܢܗܽܘܢ܆ ܘܰܠܗܰܕܳܡܰܝ̈ܗܽܘܢ ܐܰܝܟ ܡܶܠܬܳܐ ܕܺܝܠܶܗ ܟܰܕ ܕܺܝܠܶܗ ܕܦܰܘܠܽܘܤ܆ ܠܰܘ ܒܨܺܝܪ[3] ܕܶܝܢ ܐܳܦ ܠܡܰܥ̈ܒܕܳܢܘܳܬܳܗ̇ ܕܢܰܦܫܳܐ܆ ܙܰܝ̈ܢܶܐ ܕܙܰܕܺܝܩܽܘܬܳܐ ܐܰܩܺܝܡܘ ܠܰܐܠܳܗܳܐ[4]܆ ܘܰܠܚܰܝ̈ܠܰܘܳܬܳܐ ܗܳܢܽܘܢ ܕܒܰܫܡܰܝܳܐ ܡܶܬܕܰܡܶܝܢ ܠܘܳܬ ܡܡܰܠܝܳܢܽܘܬܳܐ ܕܦܽܘܩ̈ܕܳܢܶܐ ܡܰܠ̈ܟܳܝܶܐ܆ ܗܳܠܶܝܢ ܕܡܶܛܽܠܳܬܗܽܘܢ ܢܒܺܝܳܐ ܕܰܘܺܝܕ ܡܙܰܡܰܪ܆ ܒܰܪܶܟܘ ܠܡܳܪܝܳܐ ܟܽܠܗܽܘܢ ܚܰܝ̈ܠܰܘܳܬܶܗ܆ ܡܫܰܡ̈ܫܳܢܶܐ ܕܶܝܠܶܗ ܕܥܳܒܕܺܝܢ ܨܶܒܝܳܢܶܗ[5]܆ ܟܰܕ ܚܳܐܝܶܢ ܥܕܰܟܺܝܠ ܚܰܝ̈ܶܐ ܗܳܠܶܝܢ ܕܥܰܠ ܐܰܪܥܳܐ܆ ܕܬܶܗܘܶܐ[6] ܩܰܪܺܝܒܳܐ ܠܗܽܘܢ ܡܥܰܬܕܺܝܢ ܠܳܗ̇ ܠܡܰܠܟܽܘܬܳܐ ܕܰܫܡܰܝܳܐ܆ ܘܡܶܢܳܗ̇ ܡܶܬܬܰܡܠܟܺܝܢ܆ ܟܰܕ ܡܚܰܘܶܝܢ ܕܽܘܒܳܪܳܐ ܕܰܦܐܶܐ ܠܪ̈ܽܘܚܳܬܳܐ ܫܡܰܝ̈ܳܢܝܳܬܳܐ ܘܡܶܬܗܰܘܢܳܢܝ̈ܳܬܳܐ܆ ܘܫܰܢܺܝܘ ܠܗܽܘܢ ܡܶܢ ܟܰܕܽܘ ܘܥܰܒܺܝܪܺܝܢ ܠܘܳܬܳܗ̇ ܘܰܒܓܰܘܗܽܘܢ ܛܥܺܝܢܺܝܢ ܘܡܰܟܪܟܺܝܢ ܠܳܗ̇܆ ܗܳܝ ܕܳܐܡܰܪ ܦܳܪܽܘܩܰܢ ܠܘܳܬ ܬܰܠܡܺܝܕܰܘ̈ܗ̱ܝ܆ ܗܳܐ ܓܶܝܪ ܡܰܠܟܽܘܬܳܐ ܕܰܐܠܳܗܳܐ ܠܓܰܘ ܡܶܢܟܽܘܢ ܐܺܝܬܶܝܗ̇[7].
ܕܗܳܕܶܐ ܓܶܝܪ ܐܺܝܬܶܝܗ̇ ܡܰܠܟܽܘܬܳܐ ܕܰܐܠܳܗܳܐ ܘܕܰܫܡܰܝܳܐ܆ ܗܳܝ ܕܢܶܨܒܶܐ ܘܢܶܥܒܶܕ ܗܳܠܶܝܢ ܫܡܰܝܳܢܝ̈ܳܬܳܐ ܘܟܽܠܗܶܝܢ ܗܳܠܶܝܢ ܕܨܳܒܶܐ ܐܰܠܳܗܳܐ܆ ܘܕܰܢܡܰܙܶܓ ܬܰܪ̈ܥܝܳܬܰܢ ܒܨܶܒܝܳܢܳܐ ܐܰܠܳܗܳܝܳܐ܆ ܣܳܗܶܕ ܐܳܦ ܗܽܘ ܛܽܘܦܣܳܐ ܕܰܨܠܽܘܬܳܐ ܗܳܝ ܪܰܒܬܳܐ ܘܦܰܐܺܝܬ ܠܰܐܠܳܗܳܐ܆ ܗܳܝ ܕܰܐܫܠܶܡ ܠܰܢ ܦܳܪܽܘܩܰܢ. ܡܶܢ ܒܳܬܰܪ ܓܶܝܪ ܕܳܐܡܪܺܝܢ ܚ̱ܢܰܢ ܕܬܺܐܬܶܐ ܡܰܠܟܽܘܬܳܟ܆ ܐܳܡܪܺܝܢܰܢ ܢܶܗܘܶܐ ܨܶܒܝܳܢܳܟ܆ ܐܰܝܟܰܢܳܐ ܕܒܰܫܡܰܝܳܐ ܐܳܦ ܥܰܠ ܐܰܪܥܳܐ[8]. ܟܰܕ ܡܰܘܕܥܺܝܢܰܢ ܕܗܳܕܶܐ ܐܺܝܬܶܝܗ̇ ܡܰܠܟܽܘܬܳܐ ܕܰܐܠܳܗܳܐ܆ ܗܳܝ ܕܒܰܕܡܽܘܬ ܡܕܺܝܢ̱ܬܳܐ ܕܫܰܦܺܝܪ ܡܶܬܕܰܒܪܳܐ ܒܢܳܡܽܘ̈ܣܶܐ܆ ܬܶܬܚܶܕ ܢܰܦܫܳܐ ܘܬܶܬܡܰܠܰܟ ܡܶܢ ܗܳܠܶܝܢ ܕܫܳܦܪ̈ܳܢ ܠܰܐܠܳܗܳܐ܆ ܘܰܐܝܟ ܗܰܘ ܕܟܽܠܳܗ̇ ܬܚܽܘܬܰܘܗ̱ܝ ܒܰܠܚܽܘܕܰܘܗ̱ܝ ܐܺܝܬܶܝܗ̇ ܘܰܡܫܰܥܒܕܳܐ ܬܚܶܝܬ ܡܳܪܽܘܬܶܗ܆ ܟܰܕ ܠܳܐ ܡܶܕܶܡ ܡܶܬܚܰܫܒܳܐ ܢܽܘܟܪܳܝܳܐ܆ ܐܰܝܟܰܢܳܐ ܟܺܝܬ ܕܢܶܬܡܰܠܶܐ ܐܳܦ ܥܰܠ ܐܰܪܥܳܐ ܡܶܢܰܢ ܨܶܒܝܳܢܳܐ ܐܰܠܳܗܳܝܳܐ܆ ܐܰܝܟܰܢܳܐ ܕܒܰܫܡܰܝܳܐ ܡܶܢ ܚܰܝ̈ܠܰܘܳܬܳܐ ܗܳܢܽܘܢ ܕܬܰܡܳܢ܆ ܘܰܚܕܳܐ ܬܶܗܘܶܐ ܐܺܝܬܶܝܗ̇ ܡܰܠܟܽܘܬܳܐ ܐܳܦ ܒܗܳܕܶܐ܆ ܗܳܝ ܕܡܶܢ ܪܰܘܡܳܐ ܥܕܰܡܳܐ ܠܗܳܠܶܝܢ ܕܰܠܬܰܚܬ ܡܳܛܝܳܐ܆ ܘܡܶܢ ܗܳܠܶܝܢ ܕܰܠܬܰܚܬ ܠܘܳܬ ܗܳܠܶܝܢ ܕܰܠܥܶܠ ܡܶܬܢܰܩܦܳܐ ܘܡܶܬܬܰܠܘܬܳܐ܆ ܒܫܰܦܺܝܪܽܘܬ ܡܶܬܬܦܺܝܣܳܢܽܘܬܳܐ ܘܕܳܡܝܽܘܬܳܐ ܕܗܳܢܽܘܢ ܕܡܶܬܬܰܡܠܟܺܝܢ. ܗܳܕܶܐ ܓܶܝܪ ܐܺܝܬܶܝܗ̇ ܘܠܰܘ ܡܶܕܶܡ ܐ̱ܚܪܺܝܢ܆ ܗܳܝ ܕܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ܆ ܐܰܝܟܰܢܳܐ ܕܒܰܫܡܰܝܳܐ ܐܳܦ ܥܰܠ ܐܰܪܥܳܐ.
ܡܰܠܟܽܘܬܳܐ ܕܶܝܢ ܕܰܐܠܳܗܳܐ ܘܡܰܠܟܽܘܬܳܐ ܕܰܫܡܰܝܳܐ܆ ܗܳܢܳܐ ܟܽܠܶܗ ܙܳܕܶܩ ܠܰܢ ܠܡܶܣܬܰܟܳܠܽܘ ܕܰܡܫܰܚ̈ܠܦܳܢ ܡܶܢ ܚ̈ܕܳܕܶܐ܆ ܟܡܳܐ ܕܗܰܘ ܕܢܳܣܶܒ ܟܰܕ ܡܶܫܬܰܘܬܰܦ܆ ܘܗܰܘ ܕܡܶܬܢܣܶܒ ܒܫܰܘܬܳܦܽܘܬܳܐ. ܡܶܢ ܓܶܝܪ ܐܰܠܳܗܳܐ ܗܰܘ ܕܡܰܡܠܶܟ ܒܰܢ ܘܥܳܡܰܪ ܒܰܢ ܘܡܶܬܢܣܶܒ ܒܫܰܘܬܳܦܽܘܬܳܐ܆ ܡܰܠܟܽܘܬܳܐ ܕܰܐܠܳܗܳܐ ܡܶܬܩܰܪܝܳܐ ܘܡܶܫܬܰܡܗܳܐ. ܡܶܢ ܕܶܝܢ ܗܳܢܽܘܢ ܕܡܶܬܬܰܡܠܟܺܝܢ ܘܡܶܫܬܰܘܬܦܺܝܢ ܒܛܰܝܒܽܘܬܳܐ ܐܰܠܳܗܳܝܬܳܐ ܘܰܒܡܶܬܢܰܗܪܳܢܽܘܬܳܐ܆ ܐܰܘ ܡܶܢ ܚܰܝ̈ܠܰܘܳܬܐ ܗܳܢܽܘܢ ܕܒܰܫܡܰܝܳܐ܆ ܐܰܘ ܡܶܢܰܢ ܗܳܢܽܘܢ ܕܰܫܡܰܝܳܢܝ̈ܬܳܐ ܡܶܬܪܰܥܶܝܢܰܢ܆ ܡܰܠܟܽܘܬܐ ܕܰܫܡܰܝܳܐ܆ ܚܰܕ ܘܗܽܘ ܟܰܕ ܗܽܘ ܣܽܘܥܪܳܢܳܐ ܡܶܬܟܰܢܶܐ܆ ܘܣܳܗܶܕ ܡܰܬܰܝ ܡܰܢ ܟܰܕ ܐܳܡܰܪ܆ ܕܶܐܡܰܪ ܦܳܪܽܘܩܰܢ ܠܬܰܠ̈ܡܺܝܕܶܐ܆ ܐܰܟܪܶܙܘ ܟܰܕ ܐܳܡܪܺܝܢ ܐܢ̱ܬܽܘܢ ܕܩܶܪܒܰܬ ܠܳܗ̇ ܡܰܠܟܽܘܬܳܐ ܕܰܫܡܰܝܳܐ[9]܆ ܠܽܘܩܳܐ ܕܶܝܢ ܟܰܕ ܟܳܬܶܒ܆ ܕܰܦܩܰܕ ܗܽܘ ܟܰܕ ܗܽܘ ܠܗܽܘܢ ܟܕ ܠܗܽܘܢ ܡܶܛܽܠܳܬܳܗ̇ ܟܰܕ ܡܶܛܽܠܳܬܳܗ̇܆ ܐܶܡܰܪܘ ܠܗܽܘܢ ܩܶܪܒܰܬ ܠܳܗ̇ ܥܠܰܝܟܽܘܢ ܡܰܠܟܽܘܬܳܐ ܕܰܐܠܳܗܳܐ[10].
ܟܰܕ ܡܶܢ ܗܳܕܶܐ ܡܰܠܟܽܘܬܳܐ ܐܶܬܬܰܡܠܟܰܬ ܕܪܽܘܣܝܤ܆ ܘܰܠܟܽܠܶܗ ܢܽܘܗܪܳܐ ܕܨܶܒܝܳܢܳܐ ܐܰܠܳܗܳܝܳܐ ܠܳܐ ܣܰܒܥܳܐܺܝܬ ܡܶܬܩܰܬ܆ ܘܰܒܢܰܦܫܳܗ̇ ܐܶܬܢܰܗܪܰܬ܆ ܘܰܠܡܰܠܟܽܘܬܳܐ ܗܳܝ ܕܥܰܠ ܥܰܦܪܳܐ ܡܶܬܓܰܪܪܳܐ ܕܳܫܰܬ̣܆ ܒܰܪܬܩܳܠܐ ܕܡܶܬܚܰܙܝܳܐ ܡܫܰܡܪܳܐ܆ ܗܳܝ ܕܰܒܝܰܕ ܗܳܠܶܝܢ ܕܡܶܬܚܰܙܝ̈ܳܢ ܐܳܡܪܳܐ܆ ܬܽܘܒܘ. ܒܺܝ ܓܶܝܪ ܚܳܙܶܝܢ ܐܢ̱ܬܽܘܢ ܕܶܐܚܕܰܬ̣܆ ܘܕܰܥܠܰܝܟܽܘܢ ܐܶܬ̣ܳܬ̣ ܡܶܢ ܟܰܕܽܘ ܡܰܠܟܽܘܬܳܐ ܕܰܫܡܰܝܳܐ.
ܠܗܳܝ ܓܶܝܪ ܕܺܐܝܬܶܝܗ̇ ܗ̱ܘܳܬ ܡܳܪܬܳܐ ܕܰܐܪܥܳܐ܆ ܕܟܽܠܳܗ̇ ܐܰܝܟ ܕܰܠܡܺܐܡܰܪ ܘܡܰܡܠܟܳܐ ܗ̱ܘܳܬ ܥܠܶܝܗ̇܆ ܡܳܢܳܐ ܐܺܝܬ ܗ̱ܘܳܐ ܐ̱ܚܪܺܢܳܐ ܕܡܶܫܟܰܚ ܗ̱ܘܳܐ ܕܰܦܝܳܣܳܐ ܢܶܥܒܕܺܝܗ̇ ܕܬܰܒܣܶܐ ܥܰܠ ܟܽܠܗܶܝܢ ܡܶܢܫܶܠܝ܆ ܐܶܠܳܐ ܐܶܢ ܗܰܘ ܡܰܫܪܝܳܐ ܘܰܢܝܳܚܐ ܫܡܰܝܳܢܳܐ. ܘܟܰܕ ܠܗܳܕܶܐ ܟܽܠܢܳܫ ܚܳܙܶܐ ܗ̱ܘܳܐ ܘܡܶܬܕܰܡܰܪ ܗ̱ܘܳܐ ܘܬܳܡܰܗ ܒܬܰܪܥܺܝܬܶܗ܆ ܡܶܬܚܰܫܰܒ ܗ̱ܘܳܐ ܡܶܢ ܟܽܠ ܦܪܽܘܤ ܘܰܠܘܳܬ ܢܰܦܫܶܗ ܐܳܡܰܪ ܗ̱ܘܳܐ܆ ܫܰܪܺܝܪܬܳܐ ܗܝ ܐܱܪܰܐ ܗܳܕܶܐ ܟܺܝܬ܆ ܗܳܝ ܕܰܠܘܳܬ ܟܪ̈ܺܝܣܛܝܳܢܶܐ ܡܶܫܬܰܒܚܳܐ[11] ܡܰܠܟܽܘܬܳܐ ܕܰܫܡܰܝܳܐ. ܘܶܐܠܽܘ ܠܳܐ ܕܳܐܦ ܒܗܳܠܶܝܢ ܚܰܝ̈ܶܐ ܕܰܬܢܳܢ܆ ܕܣܰܒܪܳܐ ܗܰܘ ܕܬܰܡܳܢ ܐܺܝܬ ܗ̱ܘܳܐ ܠܗܽܘܢ ܡܰܫܟ̈ܢܶܐ܆ ܘܰܒܢܽܘܗܪܳܐ ܡܶܕܶܡ ܫܡܰܝܳܢܳܐ ܘܰܐܠܳܗܳܝܳܐ ܡܶܬܢܰܗܪܺܝܢ ܗ̱ܘܰܘ܆ ܘܰܒܗܰܘܢܗܽܘܢ ܡܶܬܬܰܘܒܠܺܝܢ ܗ̱ܘܰܘ܆ ܘܡܶܢ ܐܰܪܥܳܐ ܚܳܙܩܺܝܢ ܗ̱ܘܰܘ܆ ܟܰܕ ܠܘܳܬ ܗܳܠܶܝܢ ܕܰܠܥܶܠ ܡܶܬܬܰܝܬܶܝܢ܆ ܘܰܡܕܰܝܪܺܝܢ ܒܰܙܢܳܐ ܡܶܕܶܡ ܒܰܐܘ̈ܳܢܶܐ ܗܳܢܽܘܢ ܕܰܒܪܰܘܡܳܐ܆ ܠܳܐ ܗ̱ܘܳܐ ܐܳܦ ܡܰܠ̈ܟܳܬܳܐ ܡܶܬܬܦܺܝ̈ܣܳܢ ܗ̱ܘܰܝ̈܆ ܕܰܚܠܳܦ ܐܰܪ̈ܓܘܳܢܶܐ ܡܰܠܟܳܝ̈ܶܐ ܘܽܐܘܚܕܳܢܳܐ ܡܰܠܟܳܝܳܐ܆ ܣܰܒܪܳܐ ܫܚܺܝܡܳܐ ܘܰܕܠܳܐ ܩܽܘܝܳܡ ܢܚ̈ܰܠܦܳܢ ܢܶܣ̈ܒܳܢ.
ܡܳܢܳܐ ܗܳܟܺܝܠ ܕܰܢܗܰܝܡܶܢ ܙܳܕܶܩ ܠܰܡܫܺܝܚܳܐ܆ ܗܰܘ ܕܒܺܐܝ̈ܕܰܝܗܶܝܢ ܕܗܳܠܶܝܢ ܕܡܶܬܚܰܙܝ̈ܳܢ ܡܚܰܘܶܐ ܫܪܳܪܳܐ ܕܡܶܠܰܘܗ̱ܝ܆ ܗܳܠܶܝܢ ܕܳܐܦ ܠܥܶܠ ܡܶܢ ܗܰܝܡܳܢܽܘܬܳܐ ܐܺܝܬܰܝܗܶܝܢ. ܗܳܝ ܡܰܢ ܓܶܝܪ ܕܬܶܦܽܘܩ ܛܠܺܝܬܳܐ ܡܶܢ ܒܶܝܬ ܐܰܒܳܗܶܝ̈ܗ̇܆ ܐܰܘ ܟܰܕ ܒܫܽܘܦܪܳܐ ܕܐ̱ܢܳܫ ܥܠܰܝܡܳܐ ܐܶܫܬܰܕܠܰܬ ܘܶܐܬܬܰܛܥܝܰܬ܆ ܐܰܘ ܒܰܡܫܰܪܬܚܽܘܬܳܐ ܕܥܽܘܬܪܳܐ ܘܒܰܒܣܳܡܐ܆ ܘܰܒܦܰܢܛܰܣܺܝܰܐ ܕܥܳܠܡܳܐ ܗܳܝ ܕܫܰܪܟܳܐ܆ ܘܰܒܦܽܘܪܓܳܝܳܐ ܕܗܳܠܶܝܢ ܕܡܰܗ̈ܢܝܳܢ ܘܕܰܢܫܰܕܠܴ̈ܢ ܡܟ̈ܳܢܳܢ܆ ܗܳܠܶܝܢ ܕܰܒܗܶܝܢ ܝܰܬܺܝܪܳܐܺܝܬ ܓܶܢܣܳܐ ܢܶܫܳܝܳܐ ܕܠܺܝ̣ܠ ܠܨܰܝܕܳܐ ܐܺܝܬܰܘܗ̱ܝ܆ ܐܳܦ ܒܬܰܫܥ̈ܝܳܬܳܐ ܥܰܬܺܝ̈ܩܳܬܳܐ ܐܺܝܬ ܠܡܶܫܟܳܚܽܘ܆ ܘܳܐܦ ܒܙܰܒܢܳܐ ܗܰܘ ܕܡܶܢ ܩܕܳܡܰܝܢ. ܡܶܢ ܟܽܠ ܦܪܘܤ ܕܶܝܢ ܐܳܦ ܒܗܳܢܳܐ ܕܺܝܠܰܢ܆ ܐܺܝܬ ܬܰܚܘܝ̈ܳܬܳܐ ܣܰܓܺܝ̈ܳܐܬܳܐ ܒܺܝ̈ܫܳܬܳܐ ܕܕܰܐܝܟ ܗܳܠܶܝܢ. ܗܳܝ ܕܶܝܢ ܕܚܰܝܠܬܳܢܺܝܬܳܐ ܕܪܽܘܣܝܤ ܠܘܳܬ ܥܰܡ̈ܠܶܐ ܨܶܒܝܳܢܳܝ̈ܶܐ ܬܶܦܽܘܩ܆ ܘܰܠܘܳܬ ܕܶܚܠܬܳܐ ܠܳܐ ܡܥܰܝܰܕܬܳܐ܆ ܘܰܠܘܳܬ ܕܽܘܓܡܰܐ ܗܰܘ ܕܰܟܪ̈ܺܝܣܛܝܳܢܶܐ܆ ܕܰܡܦܺܝܤ ܕܥܰܠ ܐܰܠܳܗ̈ܶܐ ܡܰܢ ܣܰܓܺܝ̈ܶܐܐ ܬܰܒܣܶܐ܆ ܗܳܢܽܘܢ ܕܺܝܕܺܝܥܺܝܢ ܡܰܢ ܠܳܐ ܐܺܝܬܰܝܗܽܘܢ ܕܶܝܢ܆ ܢܰܟܦܽܘܬܳܐ ܕܶܝܢ ܡܰܠܶܦ ܘܰܡܥܰܙܝܳܢܽܘܬܳܐ ܕܰܡܝܰܬܪܽܘܬܳܐ ܗܳܝ ܕܫܰܪܟܳܐ܆ ܘܰܕܡܶܛܽܠܗܳܕܶܐ ܡܶܬܪܕܶܦ܆ ܡܶܬܛܪܶܕ܆ ܡܶܬܢܰܓܰܕ܆ ܕܡܳܢܳܐ ܓܶܝܪ ܡܶܢ ܗܳܢܶܝܢ ܡܥܺܝ̈ܩܳܢܝܳܬܳܐ ܘܠܳܐ ܡܶܣܬܰܝܒܪ̈ܳܢܝܳܬܳܐ ܠܳܐ ܣܳܒܶܠ܆ ܡܶܢ ܢܳܡܽܘܣ̈ܶܐ܆ ܡܶܢ ܡܰܠ̈ܟܶܐ܆ ܡܶܢ ܗܳܢܽܘܢ ܕܰܠܪ̈ܺܝܫܳܢܘܳܬܳܐ ܘܠܰܡܕܰܒܪ̈ܳܢܘܳܬܳܐ ܡܦܰܪܢܣܺܝܢ܆ ܡܶܢ ܗܳܢܽܘܢ ܕܰܟܢܽܘܫ̈ܝܶܐ ܕܦܳܠ̈ܰܚܘܳܬܳܐ ܡܡܰܠܶܝܢ܆ ܡܶܢܗܽܘܢ ܕܺܝܠܗܽܘܢ ܕܰܥ̈ܝܳܕܶܐ ܐܰܒܳܗܳܝ̈ܶܐ ܕܰܒܟܽܠ ܕܽܘܟ܆ ܘܡܶܢ ܕܶܚܠܰܬ ܫ̈ܺܐܕܶܐ ܗܳܝ ܕܰܐܝܟ ܕܰܠܡܺܐܡܰܪ ܠܟܽܠ ܐܰܚܺܝܕܳܐ ܗ̱ܘܳܬ܆ ܥܒܳܕܳܐ ܐܺܝܬܶܝܗ̇ ܗ̱ܘܳܬ ܕܗܳܝ ܢܽܘܪܳܐ܆ ܗܳܝ ܕܡܶܛܽܠܳܬܳܗ̇ ܡܫܺܝܚܳܐ ܒܶܐܘܰܢ̈ܓܶܠܺܝܰܐ ܐܳܡܰܪ ܗ̱ܘܳܐ܆ ܢܽܘܪܳܐ ܐܶܬܺܝܬ̣ ܕܰܐܪܡܶܐ ܥܰܠ ܐܰܪܥܳܐ܆ ܘܡܳܢܳܐ܆ ܨܳܒܶܐ ܗ̱ܘܺܝܬ ܐܶܠܽܘ ܡܶܢ ܟܰܕܽܘ ܕܶܠܩܰܬ[12].
ܗܳܕܶܐ ܗܳܟܺܝܠ ܢܽܘܪܳܐ܆ ܟܰܕ ܒܢܰܦܫܳܗ̇ ܕܣܳܗܕܬܳܐ
ܢܶܦܠܰܬ܆ ܠܟܽܠܗܽܘܢ ܡܰܢ ܚܽܘܫܳܒ̈ܶܐ ܐܰܪ̈ܥܳܢܳܝܶܐ ܘܥܳܠܡܳܢ̈ܳܝܶܐ ܐܰܘܩܕܰܬ ܒܰܕܡܽܘܬ ܚܰܒܬܳܐ ܘܛܰܠܩܰܬ܆ ܠܟܽܠܳܗ̇ ܕܶܝܢ ܬܰܪܥܺܝܬܳܗ̇ ܟܰܕ ܒܚܽܘܕܪܳܐ ܥܰܦܩܰܬ ܘܠܶܒܟܰܬ܆ ܒܰܕܡܽܘܬ ܣܰܢܝܳܐ ܗܰܘ ܕܶܐܬܚܙܺܝ ܡܶܢ ܡܽܘܫܶܐ ܕܡܶܬܓܰܘܙܰܠ ܗ̱ܘܳܐ ܘܠܳܐ ܝܳܩܶܕ ܗ̱ܘܳܐ[13]܆ ܘܓܰܘܙܰܠܬܳܐ ܢܰܨܺܝܚܬܳܐ ܐܰܪܺܝܡܰܬ̣ ܠܥܶܠ ܘܶܐܬܬܪܺܝܡܰܬ̣ ܠܪܰܘܡܳܐ܆ ܒܰܕܡܽܘܬ ܦܳܪܽܘܚܬܳܐ ܒܳܐܐܰܪ ܐܰܪܝܡܬܳܗ̇ ܠܰܥܠܰܝܡܬܳܐ܆ ܘܰܠܘܳܬ ܫܡܰܝܳܐ ܥܰܠܺܝܬܳܗ̇. ܘܟܰܕ ܡܶܟܺܝܠ ܒܫܽܘܦܪ̈ܶܐ ܗܳܠܶܝܢ ܕܰܠܥܶܠ ܥܰܢܝܳܐ ܗ̱ܘܳܬ ܘܣܰܪܺܝܟܳܐ܆ ܒܗܳܠܶܝܢ ܕܰܠܘܳܬ ܐܰܪܥܳܐ ܢܳܬܦ̈ܳܢ ܗ̱ܘܰܝ̈ ܠܳܗ̇܆ ܠܳܐ ܡܰܪܓܫܳܐ ܗ̱ܘܳܬ.
ܘܡܶܬܕܰܡܰܪ ܟܺܝܬ ܐ̱ܢܳܫ܆ ܟܰܕ ܚܰܬܺܝܬ̣ܳܐܺܝܬ ܒܣܽܘܥܪ̈ܳܢܶܐ ܡܶܬܒܰܩܶܐ܆ ܕܰܟܡܳܐ ܚܰܝܠܶܗ ܘܥܰܫܢܶܗ ܡܫܺܝܚܳܐ ܠܰܟܝܳܢܰܢ. ܠܚܰܘܳܐ ܡܰܢ ܓܶܝܪ ܗܳܝ ܕܩܰܕܡܳܝܬܳܐ ܐܶܬܓܰܒܠܰܬ[14]܆ ܡܰܠܽܘܢ ܕܶܝܢ ܐܰܝܟܰܢܳܐ ܕܰܐܝܟ ܟܬܳܒܳܐ ܢܺܐܡܰܪ ܕܶܐܬܒܰܢܝܰܬ ܡܶܢ ܐܰܠܳܗܳܐ܆ ܫܡܳܐ ܓܶܝܪ ܕܒܶܢܝܳܢܳܐ ܡܫܰܪܰܪܬܳܐ ܡܶܕܶܡ ܘܰܚܠܺܝܡܬܳܐ ܡܚܰܘܶܐ ܠܳܗ̇ ܠܰܒܪܺܝܬܳܐ܆ ܘܰܕܠܰܘ ܪܰܟܺܝܟܬܳܐ ܘܠܳܐ ܫܪܺܝܬܳܐ ܘܠܳܐ ܪܦܺܝܬܳܐ ܥܰܒܕܳܗ̇ ܗܰܘ ܕܰܒ̣ܪܳܗ̇܆ ܐܶܠܳܐ ܚܰܝܠܬܳܢܺܝܬܳܐ ܒܳܗ̇ ܒܰܕܡܽܘܬܳܐ ܐܰܝܟ ܓܰܒܪܳܐ܆ ܕܪܺܝܫܺܝܬܳܐ ܘܚܰܕܬܽܘܬܳܐ ܐܰܝܟ ܐ̱ܢܳܫ ܢܺܐܡܰܪ ܕܰܟܝܳܢܳܐ ܐܺܝܬ ܠܳܗ̇܆ ܘܡܶܬܒܰܣܡܳܐ ܗ̱ܘܳܬ ܒܕܽܘܝܳܪܳܐ ܐܰܠܳܗܳܝܳܐ ܘܛܽܘܒܬܳܢܳܐ ܘܰܕܠܳܐ ܥܳܩܬܳܐ ܗܰܘ ܕܦܰܪܕܰܝܣܳܐ܆ ܘܰܡܫܰܠܛܳܐܺܝܬ ܡܶܢ ܟܽܠܗܽܘܢ ܐܺܝܠܳܢ̈ܶܐ ܡܶܬܬܰܪܣܝܳܐ ܗ̱ܘܳܬ܆ ܡܶܢ ܛܥܳܡܬܳܐ ܕܶܝܢ ܕܦܺܐܪܳܐ ܕܚܕ ܒܰܠܚܽܘܕܰܘܗ̱ܝ ܩܰܝܣܳܐ ܟܰܠ̣ܝܳܐ ܗ̱ܘܳܬ܆ ܐܰܝܟܰܢܳܐ ܕܬܶܬܒܩܶܐ ܫܰܠܺܝܛܽܘܬ ܒܝܳܬܳܐ ܕܬܰܪܥܺܝܬܳܐ܆ ܐܶܢ ܐܺܝܬܶܝܗ̇ ܡܶܫܬܰܡܥܳܢܺܝܬܳܐ܆ ܐܰܛܥܝܳܗ̇ ܐܳܟܶܠܩܰܪܨܳܐ܆ ܘܰܕܬܶܐܟܽܘܠ ܠܒܰܪ ܡܶܢ ܢܳܡܽܘܣܳܐ ܐܰܦܺܝܣܳܗ̇. ܘܟܰܕ ܒܫܰܥܺܝܥܽܘܬܳܗ̇ ܕܗܰܢܺܝܽܐܘܬܳܐ ܫܶܪܥܰܬ܆ ܠܘܳܬ ܐܰܪܥܳܐ ܓܪܳܗ̇. ܘܟܰܕ ܠܘܳܬ ܒܶܣܪܳܐ ܐܶܬܢܰܬܥܰܬ̣܆ ܐܰܡܬܳܐ ܕܰܚܛܺܝܬܳܐ ܥܰܒܕܳܗ̇. ܡܶܛܽܠ ܗܳܕܶܐ ܥܰܡ ܐܳܕܳܡ ܗܰܘ ܕܶܐܫܬܰܘܬܰܦ ܠܳܗ̇ ܒܰܥܒܳܪ ܢܳܡܽܘܣܳܐ ܫܳܡܥܳܐ ܗ̱ܘܳܬ܆ ܕܥܰܦܪܳܐ ܐܺܝܬܰܝܟܝ ܘܰܠܥܰܦܪܳܐ ܬܺܐܙܺܠ̱ܝܢ[15]. ܠܕܪܘܣܝܤ ܕܶܝܢ ܗܳܝ ܕܒܰܫܪܳܪܳܐ ܬܡܺܝܗܬܳܐ܆
ܗܳܝ ܕܕܰܟܝܳܢܳܐ ܕܺܝܠܰܢ ܗܰܘ ܕܰܐܥܬܶܩ ܒܰܚ̈ܛܳܗܶܐ܆ ܘܡܶܢ ܫ̈ܺܐܕܶܐ ܒܥܶܠ̈ܕܒܳܒܶܐ ܐܶܬܬܕܺܝܫ[16] ܐܰܝܟ ܕܶܐܡܰܪ ܕܰܘܺܝܕ܆ ܕܰܐܥܬܩܶܬ ܒܟܽܠܗܽܘܢ ܒܥܶܠ̈ܕܒܳܒܰܝ܆ ܘܰܡܫܰܪܰܝ ܗ̱ܘܳܐ ܘܰܠܘܳܬ ܥܰܡ̈ܠܶܐ ܕܰܡܝܰܬܪܽܘܬܳܐ ܐܰܫܦܶܠ ܗܘ̣ܳܬ ܒܰܪܬܳܐ܆ ܘܰܐܝܟ ܕܰܒܦܰܪܕܰܝܣܳܐ ܒܦܽܘܪ̈ܦܳܥܶܐ ܘܰܒܓܶܐܘ̈ܳܬܳܐ ܡܰܛܥ̈ܝܳܢܝܳܬܳܐ ܘܰܙܥܽܘܪ̈ܝܳܬ ܙܰܒܢܳܐ ܘܚܶܠܡܳܢ̈ܳܝܳܬܳܐ ܕܥܳܠܡܳܐ ܗܳܢܳܐ ܡܦܰܢܩܳܐ ܗ̱ܘܳܬ ܘܰܡܚܰܛܝܳܐ܆ ܟܰܕ ܒܒܶܝܬ ܡܰܠܟܽܘܬܳܐ ܕܰܐܒܽܘܗ̇ ܡܕܰܝܪܳܐ ܗ̱ܘܳܬ܆ ܘܳܐܦܠܳܐ ܚܕܳܐ ܢܶܨܒܬܳܐ ܚܳܙܝܳܐ ܗ̱ܘܳܬ ܕܰܢܨܺܝܒܳܐ ܬܰܡܳܢ܆ ܗܳܝ ܕܰܠܘܳܬ ܐܰܠܳܗܳܐ ܡܰܣܩܳܐ ܗ̱ܘܳܬ܆ ܐܰܘ ܕܪܶܓܬܳܐ ܢܳܡܽܘܣܳܝܬܳܐ ܛܥܺܝܢܳܐ ܗ̱ܘܳܬ܆ ܠܳܐ ܐܰܛܥܺܝ ܘܥܰܪܩܠܳܗ̇ ܫܺܐܕܳܐ ܗܰܘ ܡܥܰܩܡܳܐ܆ ܗܰܘ ܕܰܠܟܽܠ ܐ̱ܢܳܫ ܐܰܝܟ ܕܰܠܡܺܐܡܰܪ܆ ܐܳܦ ܠܗܳܢܽܘܢ ܕܡܶܬܪܰܘܪܒܺܝܢ ܒܠܶܒܗܽܘܢ ܕܠܳܐ ܡܶܙܕܰܟܝܳܢ̈ܶܐ ܐܺܝܬܰܝܗܽܘܢ܆ ܓܳܢܶܒ ܨܢܺܝܥܳܐܺܝܬ.
ܡܳܢܳܐ ܓܶܝܪ ܠܳܐ ܐܺܝܬ ܗ̱ܘܳܐ܆ ܕܣܳܦܶܩ ܕܥܰܡ ܬܰܪܥܺܝܬܳܐ ܡܚܰܣܰܢܬܳܐ ܢܶܩܪܰܒ. ܠܰܘ ܡܶܢ ܗܳܪܟܳܐ ܡܰܢ ܡܩܰܪܒܳܐ ܗ̱ܘܳܬ ܢܰܨܺܝܚܽܘܬܳܐ ܟܺܝܬ ܘܰܡܫܰܪܬܚܽܘܬܳܐ ܕܕܰܗܒܳܐ܆ ܡܶܢ ܬܰܡܳܢ ܕܶܝܢ ܡܩܰܪܒܳܐ ܗ̱ܘܳܬ ܟܺܝܬ ܘܢܳܬܦܳܐ ܠܘܳܬܳܗ̇܆ ܗܺܝ ܢܰܗܺܝܪܽܘܬܳܐ ܘܰܡܥܰܠܝܽܘܬܳܐ ܕܟܺܐܦ̈ܶܐ ܝܰܩܺܝܪ̈ܳܬܳܐ ܘܕܰܡܦܰܬܟܳܐ ܒܓܰܘ̈ܢܶܐ܆ ܘܰܕܣܳܦܩܳܐ ܠܰܡܫܰܚܠܳܦܽܘ ܘܰܠܡܰܛܥܳܝܽܘ܆ ܐܳܦ ܠܥܰܝ̈ܢܶܐ ܗܳܠܶܝܢ ܕܪܕܝܐܺܝܬ ܘܠܰܘ ܒܢܳܡܽܘܣܳܐ ܕܡܶܢ ܢܰܦܫܗܶܝܢ ܚܳܝܪ̈ܳܢ܆ ܠܰܘ ܡܶܢ ܓܰܒܳܐ ܐ̱ܚܪܺܢܳܐ ܩܳܝܡܳܐ ܗ̱ܘܳܬ ܥܠܶܝܗ̇ ܒܰܩܪܳܒܳܐ ܡܰܦܪܓܽܘܬܳܐ ܘܡܰܠܟܳܝܽܘܬܳܐ ܕܰܠܒܽܘܫܳܐ܆ ܪܰܒܘܳܬܳܐ ܘܫܽܘܦܪܳܐ ܕܒܶܢܝܳܢ̈ܶܐ܆ ܕܡܶܢ ܐܰܪܥܳܐ ܘܰܥܕܰܡܳܐ ܠܬܰܛܠܺܝܠܳܐ ܡܳܛܶܐ܆ ܘܰܠܘܳܬ ܫܰܦܺܝܪܽܘܬ ܦܶܩ̈ܚܶܐ ܕܡܰܪ̈ܓܶܐ ܡܡܰܪܶܐ܆ ܗܳܢܶܝܢ ܕܡܶܢܗܶܝܢ ܐܳܦ ܢܰܒܽܘܟܕܢܨܪ ܒܰܙܒܰܢ ܗܰܘ ܡܰܠܟܳܐ ܕܒܳܒ̈ܠܳܝܶܐ ܟܰܕ ܐܶܬܬܪܺܝܡ ܒܢܰܦܫܶܗ ܐܶܡܰܪ܆ ܠܰܘ ܗܳܕܶܐ ܐܺܝܬܶܝܗ̇ ܒܳܒܶܠ ܗܳܝ ܪܰܒܬܳܐ܆ ܗܳܝ ܕܶܐܢܳܐ ܒܢܺܝܬܳܗ̇ ܠܒܶܝܬ ܡܰܠܟܽܘܬܳܐ ܒܽܐܘܚܕܳܢܳܐ ܕܚܰܝܠܳܐ ܕܺܝܠܝ܆ ܠܺܐܝܩܳܪܳܐ ܘܫܘܒܚܳܐ ܕܺܝܠܝ[17]܆ ܘܡܶܚܕܳܐ ܒܰܪ ܫܳܥܬܶܗ ܡܶܛܽܠ ܡܫܰܩܠܽܘܬܶܗ ܘܡܶܛܽܠ ܪܽܘܪܳܒܳܐ ܕܡܶܠܰܘܗ̱ܝ܆ ܒܬܶܡܗܳܐ ܘܫܳܢܝܽܘܬܳܐ ܕܚܽܘܫܳܒܰܘ̈ܗ̱ܝ ܡܶܬܚܰܝܰܒ ܗ̱ܘܳܐ܆ ܗܳܟܰܢܳܐ ܣܳܦ̈ܩܳܢ ܗܳܠܶܝܢ܆ ܕܳܐܦ ܠܚܽܘܫܳܒܳܐ ܩܒܺܝܥܳܐ ܢܰܫܪ̈ܥܳܢ ܡܶܢ ܗܳܝ ܕܘܳܠܝܳܐ. ܐܳܡܰܪ ܦܳܬܽܘܪܳܐ ܕܟܰܗܺܝܢ ܒܡܶܐܟ̈ܠܳܬܳܐ ܛܪ̈ܽܘܢܳܝܳܬܳܐ܆ ܘܰܕܡܶܢ ܟܽܠܕܽܘܟ ܡܶܢ ܐܰܪܥܳܐ ܡܶܢ ܝܰܡܳܐ ܡܶܬܟܰܢ̈ܫܳܢ ܗ̱ܘܰܝ̈܆ ܘܰܒܕܰܠܺܝܠܽܘܬܳܐ ܘܰܡܙܰܠܗܙܽܘܬܳܐ ܕܺܝܠܗܶܝܢ ܘܥܰܣܩܽܘܬ ܫܟܳܚ̈ܳܬܗܶܝܢ ܡܪ̈ܰܒܝܳܢ ܠܳܗ̇ ܠܪܶܓܬܳܐ܆ ܘܰܡܚ̈ܰܬ̣ܚܬ̣ܳܢ ܐܳܦ ܠܟܰܪܣܳܐ ܗܳܝ ܥܳܢܘܳܝܬܳܐ ܘܰܡܚܰܡܣܢܳܢܺܝܬܳܐ ܙܰܒ̈ܢܺܝܢ ܣܰܓܺܝ̈ܳܐܢ܆ ܫܒܽܘܩ ܠܗܳܝ ܝܰܥܢܬܳܐ܆ ܠܣܽܘܓܳܐܐ ܕܰܛܥܺܝ̈ܢܰܝ ܢܰܝ̈ܙܟܶܐ܆ ܠܓܰܒܝܽܘܬܳܐ ܘܚܰܙܝܽܘܬܳܐ[18] ܗܳܝ ܕܡܶܢ ܟܽܠ ܥܰܡܳܐ ܘܓܶܢܣܳܐ܆ ܟܽܠܳܗ̇ ܟܺܝܬ ܗܳܝ ܕܰܠܘܳܬ ܒܶܝܬ ܢܶܫ̈ܶܐ ܡܫܰܡܫܳܐ܆ ܘܟܽܠܳܗ̇ ܗܳܝ ܕܡܶܢ ܠܒܰܪ ܡܡܰܠܝܳܐ ܠܦܰܢܛܣܝܰܐ ܘܰܠܬܶܡܗܳܐ ܘܕܽܘܚܳܠܳܐ܆ ܠܰܡܥܰܝܕܽܘܬܳܐ ܕܰܡܢܺܝܚܳܢ̈ܝܳܬܳܐ ܒ̈ܢܳܬ ܩܰܘܡܬܳܐ ܐܶ݀ܡܢܶܐ܆ ܠܰܡܚܰܬܪܽܘܬܳܐ܆ ܠܨܶܒܬܳܐ܆ ܗܳܠܶܝܢ ܕܟܽܠܶܗ ܗܳܢܳܐ ܐܺܝܬܰܝܗܶܝܢ ܪ̈ܚܺܝܡܳܬܳܐ ܘܡܶܬܝܰܨܦܳܢ̈ܝܳܬܳܐ ܠܢܶܫ̈ܶܐ܆ ܐܰܝܟܰܢܳܐ ܕܢܶܗܘܶܐ ܦܫܺܝܩ ܠܗܶܝܢ܆ ܕܰܠܗܳܝ ܕܰܢܣܽܘ̈ܩܳܢ ܐܳܐܰܪ ܐܰܘ ܠܫܶܩܝܳܐ ܘܰܠܬܽܘܪܣܳܝܳܐ ܢܶܛ̈ܥܝܳܢ ܒܰܙܒܰܢ ܐܰܘ ܠܗܳܠܶܝܢ܆ ܗܳܝ ܕܰܥܠܶܝܗ̇ ܣܳܗܶܕ ܐܳܦ ܐܶܪܰܡܝܳܐ ܗܰܘ ܢܒܺܝܳܐ ܟܰܕ ܗܳܟܰܢܳܐ ܟܳܬܶܒ܆ ܕܰܠܡܳܐ ܬܶܛܥܶܐ ܟܰܠܬܳܐ ܨܶܒܬܳܐ ܕܺܝܠܳܗ̇ ܘܰܒܬܽܘܠܬܳܐ ܥܽܘܕܢܳܗ̇܆ ܥܰܡܳܐ ܕܶܝܢ ܕܺܝܠܝ ܛܥܳܢܝ ܝܰܘ̈ܡܳܬܳܐ ܗܳܠܶܝܢ ܕܠܰܝܬ ܠܗܽܘܢ ܡܶܢܝܳܢܳܐ[19].
ܐܶܠܳܐ ܕܪܽܘܣܝܤ ܠܳܐ ܛܥܳܬ̣. ܡܰܠܽܘܢ ܕܶܝܢ ܒܗܳܝ ܕܝܶܕܥܰܬ̣ ܠܰܐܠܳܗܳܐ܆ ܡܶܬܢܰܫܝܳܢܽܘܬܳܐ ܘܛܳܥܝܽܘܬܳܐ ܗܘ̣ܳܬ ܠܳܗ̇܆ ܐܳܦ ܕܺܝܠܳܗ̇ ܕܗܳܝ ܕܺܐܝܬܶܝܗ̇ ܗ̱ܘܳܬ ܐܰܢ̱ܬܬܳܐ܆ ܟܰܕ ܠܘܳܬ ܟܽܠܗܶܝܢ ܗܳܠܶܝܢ ܡܶܬܪ̈ܰܓܫܳܢܝܳܬܳܐ ܥܰܡܨܰܬ ܥܰܝ̈ܢܶܝܗ̇܆ ܘܒܰܫܡܰܝܳܐ ܩܶܒܥܰܬ ܠܥܰܝ̈ܢܶܐ ܕܬܰܪܥܺܝܬܳܗ̇܆ ܘܟܽܠܳܗ̇ ܠܘܳܬ ܗܳܠܶܝܢ ܕܰܠܥܶܠ ܫܰܢܝܰܬ܆ ܒܗܳܝ ܕܗܳܠܶܝܢ ܕܰܠܥܶܠ ܡܶܬܪܰܥܝܳܐ ܗ̱ܘܳܬ܆ ܗܳܠܶܝܢ ܕܰܠܥܶܠ ܒܳܥܝܳܐ ܗ̱ܘܳܬ܆ ܐܰܝܟܳܐ ܕܰܡܫܺܝܚܳܐ ܐܺܝܬܰܘܗ̱ܝ ܕܝܳܬܶܒ ܡܶܢ ܝܰܡܺܝܢܳܐ ܕܰܐܠܳܗܳܐ[20]. …ܠ[21] ܗܳܕܶܐ܆ ܘܳܐܦܠܳܐ ܐܰܝܟ ܚܰܘܳܐ ܫܳܡܥܳܐ ܗ̱ܘܳܬ ܡܶܢܶܗ܆ ܕܰܐܪܥܳܐ ܐܺܝܬܰܝܟܝ ܘܠܰܐܪܥܳܐ ܬܺܐܙܺܠ̱ܝܢ[22]. ܐܶܠܳܐ ܕܰܫܡܰܝܳܐ ܐܺܝܬܰܝܟܝ ܘܠܰܫܡܰܝܳܐ ܬܶܣܩܺܝܢ. ܡܶܛܽܠ ܗܳܕܶܐ ܐܳܦ ܣܶܠܩܰܬ܆ ܟܰܕ ܒܰܕܡܽܘܬ ܝܰܘܢܳܐ ܒܓܶܦ̈ܶܐ ܪ̈ܽܘܚܳܢܶܐ ܐܶܬܬܪܺܝܡܰܬ܆ ܘܟܰܕ ܠܒܰܪ ܡܶܢ ܕܳܪ̈ܳܬܳܐ ܡܰܠ̈ܟܳܝܳܬܳܐ ܗܘ̣ܳܬ܆ ܥܰܡ ܒܬܽܘ̈ܠܳܬܳܐ ܕܶܝܢ ܩܰܠܺܝܠ ܢܰܦܫܳܗ̇ ܡܢܳܬ̣ ܘܟܰܣܝܳܐܺܝܬ ܛܰܫܝܰܬ܆ ܕܚܰܝ̈ܶܐ ܟܢܺܝ̈ܟܶܐ ܘܥܳܢ̈ܘܳܝܶܐ ܕܕܰܝܪܳܝܽܘܬܳܐ ܚ̈ܳܐܝܳܢ ܗ̱ܘܰܝ̈ ܘܡܶܬܗܰܦ̈ܟܳܢ܆ ܘܰܟܪܺܝܣܛܝܳܢܽܘܬܳܐ ܗܳܝ ܡܰܠܝܰܬ ܩܺܝܢܕܽܘܢܽܘܤ ܕܗܳܝܕܶܝܢ. ܗܳܠܶܝܢ ܕܟܰܕ ܥܰܡܗܶܝܢ ܐܶܫܬܰܘܬܦܰܬ ܒܚܰܝ̈ܶܐ ܡܥ̈ܰܙܝܳܢܶܐ ܕܕܰܝܪܳܝܽܘܬܳܐ܆ ܒܕܽܘܒܳܪܳܐ ܕܰܟܝܳܐ܆ ܒܣܰܒܪܳܐ ܕܒܰܐܠܳܗܳܐ܆ ܘܰܠܚܰܪܬܳܐ ܒܪܶܗܛܳܐ ܗܰܘ ܕܰܒܣܳܗܕܽܘܬܳܐ܆ ܘܗܰܘ ܕܡܶܛܽܠ ܢܰܦܫܳܗ̇ ܪܶܗܛܰܬ̣ ܘܥܰܡ ܦܰܘܠܽܘܤ ܐܶܡܪܰܬ܆ ܠܪܶܗܛܝ ܫܰܡܠܺܝܬ̣܆ ܠܗܰܝܡܳܢܽܘܬܝ ܢܶܛܪܶܬ܆ ܠܰܟܠܺܝܠܳܐ ܕܙܰܕܺܝܩܽܘܬܳܐ ܐܶܫܬܘܺܝܬ̣[23]. ܟܰܕ ܠܦܰܓܪܳܗ̇ ܡܰܢ ܡܝܰܩܪܳܐ܆ ܗܰܘ ܐܽܘܪܓܰܢܘܢ ܚܺܝܨܳܐ ܘܰܙܪܺܝܙܳܐ ܘܠܳܐ ܡܰܐܺܝܢܳܐ ܕܬܰܪܥܺܝܬܳܐ ܐܰܬܠܺܝܛܬܳܐ܆ ܡܰܠܽܘܢ ܕܶܝܢ ܚܰܪܺܝܦܳܐ ܘܩܰܠܺܝܠܳܐ ܘܰܡܛܰܝܒܳܐ܆ ܗܳܪܟܳܐ ܐܰܓܥܠܰܬ̣. ܒܪܽܘܚܳܗ̇ ܕܶܝܢ܆ ܟܰܕ ܥܰܡ ܢܰܦ̈ܫܳܬܳܐ ܐܶܬܚܰܠܛܰܬ ܘܶܐܬܥܰܢܝܰܬ܆ ܗܳܢܶܝܢ ܕܒܶܗ ܒܰܙܢܳܐ ܕܕܳܡܶܐ ܠܕܺܝܠܳܗ̇ ܥܠܰܝܡܳܐܺܝܬ ܘܰܙܪܺܝܙܳܐܺܝܬ ܐܶܬܟܰܬܰܫ̈ܶܝܢ܆ ܘܒܰܕܡܽܘܬ ܦܠܰܓܳܐ[24] ܠܦܰܓܪ̈ܰܝܗܶܝܢ ܒܥܰܡ̈ܠܶܐ ܕܰܡܝܰܬܪܽܘܬܳܐ ܝܰܒܶܫ̈ܶܝܢ܆ ܐܰܘ ܒܢܶܓ̈ܕܶܐ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ ܐܰܡܺܝ̈ܬܶܝܢ. ܗܳܠܶܝܢ ܕܥܰܡܗܶܝܢ ܟܰܕ ܡܶܫܬܰܪ̈ܝܳܢ ܡܶܢ ܐܰܣܳܪܳܐ ܕܒܶܣܪܳܐ ܚܕܳܢܳܐܺܝܬ܆ ܡܶܛܽܠ ܗܳܝ ܕܩܰܕܶܡ̈ܶܝܢ ܐܶܬܗ̈ܰܓܶܝܢ ܫܪܳܝܳܐ܆ ܪ̈ܺܝܫܳܢܶܐ ܡܶܕܶܡ ܡܶܬܗܰܘ̈ܢܳܢܶܐ ܘܚܰܝ̈ܠܰܘܳܬܳܐ ܡܰܠܰܐܟܳܝ̈ܶܐ܆ ܐܰܟܚܕܳܐ ܣܳܠܩܺܝܢ ܘܰܐܟܚܕܳܐ ܡܙܰܡܪܺܝܢ. ܘܰܐܝܟ ܕܥܰܡ ܗܳܢܶܝܢ ܕܣܺܝ̈ܡܳܢ ܟܠܺܝ̈ܠܶܐ ܒܰܙܢܳܐ ܡܶܕܶܡ܆ ܙܡܺܝܪܬܳܐ ܕܥܰܠ ܙܳܟܽܘܬܳܐ ܙܳܡܪܺܝܢ. ܗܳܝ ܟܺܝܬ ܕܟܰܕ ܪܳܫܶܡ ܠܳܗ̇ ܒܰܙܥܽܘܪܽܘܬ ܡܶܠܬܳܐ ܕܰܘܺܝܕ ܢܒܺܝܳܐ܆ ܗܳܟܰܢܳܐ ܐܳܡܰܪ. ܩܰܕܶܡܘ ܪ̈ܺܝܫܳܢܶܐ ܒܳܬܰܪ ܗܳܢܽܘܢ ܕܰܡܙܰܡܪܺܝܢ܆ ܒܰܝܢܳܬ ܥܠܰܝ̈ܡܳܬܳܐ ܕܢܳܩ̈ܫܳܢ ܒܰܦ̈ܠܰܓܶܐ[25].
ܡܳܢܳܐ ܗܳܟܺܝܠ ܚܢܰܢ ܟܰܕ ܗܳܠܶܝܢ ܫܳܡܥܺܝܢ ܚ̱ܢܰܢ. ܠܳܐ ܐܳܦܶܢ ܡܫܰܘܚܪܳܐܺܝܬ ܐܶܡܰܬܝ ܕܗܽܘ ܡܶܬܪܰܓܪܓܺܝܢܰܢ ܠܝܽܘܬܪ̈ܳܢܶܐ ܫܡܰܝܳܢ̈ܶܐ܆ ܗܳܢܽܘܢ ܕܰܠܘܳܬܗܽܘܢ ܐܺܝܬ ܠܗܶܝܢ ܪܶܗܛܳܐ ܠܢܰܦ̈ܫܳܬܳܐ ܡܠܺܝ̈ܠܳܬܳܐ܆ ܘܡܰܪܕܺܝܬܳܐ ܕܰܠܥܶܠ ܗܳܝ ܕܒܰܟܝܳܢܳܐ܆ ܐܰܝܟ ܗܰܘ ܕܶܝܢ ܕܢܰܦܫܳܐ ܡܶܕܶܡ ܚܙܺܝܪܳܝܬܳܐ ܐܰܘ ܒܥܺܝܪܳܝܬܳܐ ܡܛܳܬ̣ ܠܰܢ܆ ܠܘܳܬ ܟܰܪܣܳܐ ܘܗܳܠܶܝܢ ܕܰܠܬܰܚܬ ܡܶܢܳܗ̇ ܢܚܽܘܪ܆ ܘܰܒܠܳܐ ܡܠܺܝܠܽܘܬܳܐ ܠܕܳܡܝܽܘܬܳܐ ܕܺܝܠܰܢ ܗܳܝ ܕܰܠܘܳܬ ܐܰܠܳܗܳܐ ܢܛܰܫܶܐ܆ ܠܳܐ ܢܶܬܥܰܢܘܶܐ ܡܚܰܡܣܢܳܢܽܘܬܳܐ܆ ܘܠܳܐ ܕܽܘܒܳܪܳܐ ܢܰܟܦܳܐ܆ ܠܳܐ ܐܳܦ ܠܳܗ̇ ܠܰܒܬܽܘܠܽܘܬܳܐ ܡܶܕܶܡ ܙܥܽܘܪܳܐ ܢܶܚܫܒܺܝܗ̇܆ ܠܘܳܬ ܛܽܘܝܳܒܳܐ ܕܨܶܝܕ ܕܽܘܝܳܪ̈ܶܐ ܫܡܰܝܳܢ̈ܶܐ܆ ܘܰܠܘܳܬ ܚܰܝ̈ܶܐ ܗܳܢܽܘܢ ܕܡܰܥܡܪܳܐ ܕܰܐܟܚܕܳܐ ܕܥܰܡ ܡܰܠܰܐܟ̈ܶܐ܆ ܘܰܠܘܳܬ ܪܰܒܽܘܬܳܐ ܕܦܽܘܪ̈ܥܳܢܶܐ ܗܳܢܽܘܢ ܕܰܡܛܰܝܒܺܝܢ ܠܗܳܢܽܘܢ ܕܰܒܫܰܦܺܝܪܽܘܬ ܕܶܚܠܬܳܐ ܚܳܐܶܝܢ܆ ܗܳܝ ܟܺܝܬ ܕܠܳܐ ܐܺܝܬܶܝܗ̇ ܦܫܺܝܩܬܳܐ܆ ܐܳܦܠܳܐ ܕܰܒܬܰܪܥܺܝܬܳܐ ܢܶܣܒܺܝܗ̇܆ ܥܰܠ ܓܶܝܪ ܠܶܒܳܐ ܕܒܰܪ ܐ̱ܢܳܫܳܐ ܠܳܐ ܣܠܶܩ[26] ܐܳܡܰܪ ܟܬܳܒܳܐ ܐܰܠܳܗܳܝܳܐ.
ܠܰܘ ܒܗܳܠܶܝܢ ܢ݀ܝܰܩܰܪ ܠܕܽܘܟܪܳܢܳܐ ܕܣܳܗܕܬܳܐ܆ ܕܽܘܟܪܳܢܳܐ ܓܶܝܪ ܫܰܪܺܝܪܳܐ ܕܣܳܗ̈ܕܶܐ܆ ܡܕܰܡܝܳܢܽܘܬܳܐ ܕܰܡܝܰܬܪܽܘܬܗܽܘܢ ܕܗܳܢܽܘܢ ܐܺܝܬܶܝܗ̇. ܡܶܛܽܠܗܳܕܶܐ ܐܳܦ ܡܫܰܡܠܶܝܢ ܚ̱ܢܰܢ ܠܶܗ܆ ܘܟܰܕ ܡܶܬܰܥܗܕܺܝܢܰܢ ܠܗܽܘܢ ܡܚܰܓܶܝܢ ܚ̱ܢܰܢ܆ ܐܰܝܟܰܢܳܐ ܕܰܒܥܽܘܗܕܳܢܳܐ ܘܒܰܡܕܰܡܝܳܢܽܘܬܳܐ܆ ܕܰܡܣܰܝܒܪܳܢܽܘܬܳܐ܆ ܕܓܰܢ̱ܒܳܪܽܘܬܳܐ܆ ܕܣܰܒܪܳܐ ܗܰܘ ܕܡܶܛܽܠܳܬܶܗ ܠܳܐ ܫܳܘܶܝܢ ܚܰܫܰܘ̈ܗ̱ܝ ܕܙܰܒܢܳܐ ܗܳܢܳܐ ܕܗܳܫܳܐ܆ ܠܘܳܬ ܬܶܫܒܽܘܚܬܳܐ ܐܰܝ̇ܕܳܐ ܕܰܥܬܺܝܕܳܐ ܕܬܶܬܓܠܶܐ ܒܰܢ[27]܆ ܡܝܰܬܪ̈ܶܐ ܢܶܗܘܶܐ. ܠܫܶܢܬܳܐ ܕܡܰܪ̈ܢܝܳܬܳܐ ܢܰܦܶܨ ܡܶܢܰܢ. ܢ݀ܺܐܠܰܦ ܕܰܠܘܳܬ ܡܳܢܳܐ ܫܽܘܠܳܡܳܐ ܚܳܝܪ̈ܳܢ ܗܳܠܶܝܢ ܕܰܟܪ̈ܺܝܣܛܝܳܢܶܐ܆ ܘܠܳܐ ܢܶܬܚܛܶܦ ܕܠܳܐ ܣܽܘܟܳܝ܆ ܥܰܪ̈ܛܶܠܳܝܶܐ ܘܚܰܣܺܝܪ̈ܶܐ ܘܰܡܫܰܟܪ̈ܶܐ ܘܰܕܠܳܐ ܐܶܣܟܺܡ܆ ܟܰܕ ܠܳܐ ܡܶܕܶܡ ܙܘ̈ܳܕܶܐ ܐܺܝܬ ܠܰܢ ܠܦܽܘܪܩܳܢܳܐ.
ܡܩܰܠܣܳܐ ܐܰܢ̱ܬܝ ܐܶܡܰܪ ܠܺܝ ܐܳܘ ܐܰܢ̱ܬܬܳܐ܆ ܠܰܒܬܽܘܠܽܘܬܳܗ̇ ܕܕܪܘܣܝܤ܆ ܒܰܥܒܳܕܳܐ ܛܰܢܝ̱ ܒܗܰܘ ܡܳܐ ܕܰܡܩܰܠܣܳܐ ܐܰܢ̱ܬܝ܆ ܐܰܝܟܰܢܳܐ ܕܰܠܚܰܬܢܳܐ ܡܫܺܝܚܳܐ ܬܶܫܬܘܺܝܢ. ܠܦܰܘܠܽܘܤ ܓܶܝܪ ܫܡܰܥܬܝ̱ ܠܶܟܝ ܕܳܐܡܰܪ܆ ܡܟ̣ܰܪܬܟ̣ܽܘܢ ܠܓܰܒܪܳܐ ܚܰܕ ܕܰܐ݀ܩܺܝܡܟܽܘܢ ܩܕܳܡ ܡܫܺܝܚܳܐ ܒܬܽܘܠܬܳܐ ܕܟܺܝܬܳܐ[28]܆ ܘܰܕܗܳܝ ܕܠܳܐ ܡܙܰܘܰܓܬܳܐ ܐܺܝܬܶܝܗ̇ ܪܳܢܝܳܐ ܗܳܠܶܝܢ ܕܡܳܪܰܢ܆ ܐܰܝܟܰܢܳܐ ܕܬܶܗܘܶܐ ܩܰܕܺܝܫܬܳܐ ܘܰܒܦܰܓܪܳܐ ܘܰܒܪܽܘܚܳܐ[29]. ܕܪܰܒܳܐ ܕܶܝܢ ܗܳܕܶܐ ܐܳܡܪܳܐ ܐܰܢ̱ܬܝ܆ ܘܰܕܠܰܘ ܦܫܺܝܩܬܳܐ ܐܺܝܬܶܝܗ̇ ܠܬܽܘܪܳܨܳܐ. ܝܰܬܺܝܪܳܐܺܝܬ ܡܰܢ ܠܳܐ ܪܰܒܳܐ܆ ܠܢܰܦ̈ܫܳܬܳܐ ܗܳܢܶܝܢ ܕܰܒܪܶܚܡܬܳܐ ܐܰܠܳܗܳܝܬܳܐ ܒܰܠܺܝ̈ܥܳܢ. ܒܪܰܡ ܕܝܢ ܩܰܒܶܠܝ̱ ܡܰܢ ܠܢܺܝܪܳܐ ܕܙܽܘܘܳܓܳܐ܆ ܡܝܰܩܪܳܐ ܕܶܝܢ ܛܰܪܺܝܘܗ̱ܝ[30] ܒܰܢܛܽܘܪܬܳܐ ܢܰܟܦܬܳܐ. ܘܶܐܢ ܓܰܒܪܶܟܝ ܫܰܢܺܝ ܡܶܢ ܥܳܠܡܳܐ܆ ܠܳܐ ܠܘܳܬ ܗܰܘ ܕܰܬܪܶܝܢ ܬܚܽܘܪܺܝܢ. ܐܶܢ ܕܶܝܢ ܐܳܦ ܠܘܳܬ ܗܰܘ ܕܰܬܪܶܝܢ܆ ܡܶܫܬܒܶܩ ܓܶܝܪ ܡܶܛܽܠ ܐܰܢܰܢܩܺܐ ܕܒܶܣܪܳܐ܆ ܐܶܠܳܐ ܠܳܐ ܠܘܳܬ ܗܰܘ ܕܰܬܠܳܬܳܐ ܬܶܬܥܰܪܓܠܺܝܢ. ܘܝܰܬܺܝܪܳܐܺܝܬ ܐܶܢ ܠܩܰܘܡܬܳܐ ܕܛܰܠܝܽܘܬܳܐ ܥܒܰܪܬܝ̱ ܒܰܫ̈ܢܰܝܳܐ܆ ܘܩܰܪܺܝܒܳܐ ܠܶܟܝ ܣܰܝܒܽܘܬܳܐ ܐܰܘ ܡܰܘܬܳܐ. ܐܶܢ ܓܶܝܪ ܗܰܘ ܕܰܬܪܶܝܢ ܕܫܽܘܒܩܳܢܰܐ ܗ̱ܘ܆ ܗܰܘ ܕܰܬܠܳܬܳܐ ܠܰܝܬ ܠܺܝ ܠܡܺܐܡܰܪ܆ ܐܶܠܳܐ ܐܶܢ ܕܰܕܠܳܐ ܫܽܘܒܩܳܢܰܐ ܗ̱ܘ. ܡܶܛܽܠ ܕܳܐܦ ܗܽܘ ܫܽܘܒܩܳܢܳܐ܆ ܒܰܬܚܽܘ̈ܡܶܐ ܡܶܕܶܡ ܡܶܬܚܒܶܫ ܘܡܶܣܬܰܝܰܟ܆ ܘܠܳܐ ܡܰܦܶܤ ܚܽܘܠܛܳܢܳܐ ܠܳܐ ܡܦܰܓܕܳܐ.
ܡܩܰܠܶܤ ܐܰܢ̱ܬ ܐܳܘ ܗܳܢܳܐ[31] ܠܣܳܗܕܬܳܐ܆ ܕܥܰܠ ܫܽܘܒܚܳܐ ܡܰܠܟܳܝܳܐ ܘܥܰܠ ܡܰܪ̈ܗܳܛܶܐ ܐܰܒܣܝܰܬ܆ ܒܰܥܒܳܕܳܐ ܚܰܘܳܝܗ̱ܝ ܠܩܽܘܠܳܣܳܐ܆ ܘܡܶܢ ܡܰܪ̈ܗܳܛܰܝܟ ܗܰܒ ܠܡܶܣ̈ܟܺܢܶܐ. ܐܰܘ ܗܳܝ ܐ̱ܚܪܳܝܬܳܐ ܘܕܰܙܥܽܘܪܝܳܐ܆ ܠܳܐ ܬܶܪܰܓ ܠܢܽܘܟܪ̈ܳܝܳܬܳܐ. ܐܶܠܳܐ ܐܳܦ ܡܶܢ ܗܳܢܶܝܢ ܕܶܐܬܚ̈ܛܰܦܶܝܢ ܐܰܘ ܐܶܬܥܰܘ̈ܠܶܝܢ ܐܶܬܪܰܚܩ. ܠܳܐ ܬܺܐܙܰܠ ܐܰܟܚܕܳܐ ܥܰܡܗܶܝܢ܆ ܕܰܠܡܳܐ ܩܕܳܡ ܕܰܝܳܢܳܐ ܬܶܬܚܙܶܐ ܟܰܕ ܐܺܝܬܰܝܗܶܝܢ ܠܳܟ. ܢܶܬܬܣܺܝ̈ܡܳܢ ܓܶܝܪ ܥܠܰܝܟ ܘܰܢܥܰܦ̈ܩܳܢܳܟ. ܘܳܐܦ ܟܰܕ ܠܳܐ ܨܳܒܶܐ ܐܰܢ̱ܬ. ܘܬܶܬܪܰܓܪܰܓ ܠܰܡܛܰܫܳܝܽܘ ܐܶܢܶܝܢ܆ ܐܰܘ ܠܡܰܪܚܳܩܽܘ ܐܶܢܶܝܢ ܡܶܢܳܟ ܗܳܝܕܶܝܢ ܘܠܳܐ ܬܶܫܟܰܚ. ܝܽܘܩ̈ܢܶܐ ܓܶܝܪ ܕܣܳܥܽܘܪ̈ܘܳܬܳܐ ܕܶܝܠܰܢ ܢܶܗܘܽܘܢ ܢܰܩܺܝܦܺܝܢ ܠܰܢ ܟܰܕ ܠܳܐ ܦܳܪܫܺܝܢ ܡܶܢܰܢ܆ ܐܰܝܟܰܢܳܐ ܕܰܠܓܽܘܫ̈ܡܶܐ ܛܶܠܢܝ̈ܳܬܳܐ.
ܠܰܡܚܰܡܣܢܳܢܽܘܬܳܗ̇[32] ܕܒܰܐܓܽܘ̈ܢܶܐ ܟܳܗ̈ܢܳܝܶܐ ܕܰܥܠܰܝܡܬܶܗ ܕܰܡܫܺܝܚܳܐ܆ ܡܩܰܠܶܤ ܐܰܢ̱ܬ ܐܳܘ ܡܝܰܬܪܳܐ܆ ܡܳܕܶܝܢ ܐܶܬܪܕܺܝ ܘܶܐܬܝܰܠܦ ܒܝܰܕ ܗܳܠܶܝܢ ܕܰܡܩܰܠܶܤ ܐܰܢ̱ܬ܆ ܕܟܰܕ ܩܳܪܶܐ ܙܰܒܢܳܐ ܬܣܰܝܒܰܪ ܚܶܣ̈ܕܶܐ ܗܳܢܽܘܢ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ܆ ܘܬܰܘܕܶܐ ܩܕܳܡ ܒܢܰܝ̈ܢܳܫܳܐ ܗܰܝܡܳܢܽܘܬܳܐ ܚܠܺܝܡܬܳܐ܆ ܘܰܕܠܳܐ ܬܶܫܬܰܚܠܰܦ ܥܰܡ ܙܰܒ̈ܢܶܐ܆ ܘܰܬܩܰܠܶܤ ܡܰܢ ܠܗܳܢܽܘܢ ܕܰܥܕܰܡܳܐ ܠܰܕܡܳܐ ܐܶܬܟܰܬܰܫܘ܆ ܬܶܪܕܽܘܦ[33] ܕܶܝܢ ܠܫܰܦܺܝܪܽܘܬ ܕܶܚܠܬܳܐ ܗܳܝ ܕܰܒܠܶܫܳܢܳܐ ܒܰܠܚܽܘܕ ܡܶܬܛܰܒܒܳܐ ܗ̱ܘܳܬ ܘܡܶܬܩܰܠܣܳܐ ܥܰܡ ܪܽܘܪܳܒܳܐ܆ ܘܗܳܕܶܐ ܐܶܡܰܬܝ ܕܫܰܠܺܝܛ ܗ̱ܘܳܐ. ܒܗܳܠܶܝܢ ܐܳܕܫ̈ܶܐ ܫܰܦܺܝܪ̈ܶܐ ܕܰܡܝܰܬܪܽܘܬܳܐ܆ ܘܰܒܚܶܪ̈ܡܶܐ ܐܰܘܟܺܝܬ ܢܶܕܪ̈ܶܐ ܗܳܠܶܝܢ ܕܒܰܪܢܳܫܰܢ ܗܰܘ ܕܰܠܓܰܘ܆ ܨܳܒܝܳܐ ܚܰܝܠܬܳܢܺܝܬܳܐ ܕܪܘܣܝܤ܆ ܕܢܶܬܓܰܕܠܽܘܢ ܠܳܗ̇ ܟܠܺܝ̈ܠܶܐ ܕܩܽܘ̈ܠܳܣܶܐ. ܠܡܳܢܳܐ ܕܶܝܢ ܡܶܛܽܠ ܗܳܢܽܘܢ ܕܡܶܢ ܠܓܰܘ ܐܳܡܰܪ ܐ̱ܢܳܐ. ܡܶܢ ܗܳܠܶܝܢ ܕܡܶܢ ܠܒܰܪ ܘܝܰܬܺܝܪ̈ܳܬܳܐ܆ ܘܠܳܐ ܐ̱ܢܳܫ ܡܶܢ ܗܳܠܶܝܢ ܕܺܐܝܬ ܠܗܽܘܢ ܐܶܨܛܒܺܝ ܕܢܶܬܶܠ ܠܳܗ̇. ܟܽܠܗܽܘܢ ܡܰܢ ܓܶܝܪ ܓܰܒܪ̈ܶܐ ܘܟܽܠܗܶܝܢ ܢܶܫ̈ܶܐ܆ ܠܘܳܬ ܗܳܢܳܐ ܗܰܝܟܠܳܐ ܩܰܕܺܝܫܳܐ ܪܳܗܛܺܝܢ ܣܒܺܝܣܳܐܺܝܬ܆ ܘܥܳܒܕܺܝܢ ܨ̈ܠܰܘܳܬܗܽܘܢ ܘܰܡܩܰܪܒܺܝܢ ܒܳܥ̈ܘܳܬܗܽܘܢ܆ ܘܒܰܡܣܰܝܥܳܢܽܘܬܳܐ ܘܺܐܝܙܓܰܕܽܘܬܳܐ ܕܣܳܗܕܬܳܐ ܡܶܬܒܰܣܡܺܝܢ܆ ܘܠܳܐܣܺܝ̈ܘܳܬܳܐ ܘܰܠܚܽܘܠ̈ܡܳܢܶܐ ܘܡܰܘܗ̈ܒܳܬܳܐ ܡܫܰܚ̈ܠܦܳܬܳܐ ܕܟܽܠ ܓܢܶܤ ܡܶܫܬܘܶܝܢ܆ ܗܳܠܶܝܢ ܟܺܝܬ ܕܟܽܠ ܚܰܕ ܡܦܺܝܤ ܕܢܶܫܬܘܶܐ ܠܗܶܝܢ܆ ܘܠܳܐ ܐ̱ܢܳܫ ܕܶܝܢ ܠܘܳܬ ܦܳܬܽܘܪܳܐ ܡܝܰܩܪܳܐ ܕܰܡܟܰܗܢܳܢܽܘܬܳܐ ܩܰܕܺܝܫܬܳܐ ܚܳܐܰܪ܆ ܘܰܠܘܳܬ ܐܶܤܛܽܘ̈ܢܶܐ ܕܣܺܐܡܳܐ ܕܩܳܝܡܺܝܢ ܠܘܳܬܶܗ܆ ܕܰܛܥܺܝܢܺܝܢ ܠܦܶܠܓܽܘܬ ܐܶܣܦܺܪܐ ܗܳܝ ܕܰܠܥܶܠ ܡܶܢ ܪܺܝܫܗܽܘܢ ܥܰܪܛܶܠܳܝܬܳܐ ܘܰܡܫܰܟܰܪܬܳܐ ܘܰܕܠܳܐ ܐܶܣܟܺܡ܆ ܕܰܒܩܳܢܽܘ̈ܢܶܐ ܡܰܢ ܡܶܕܶܡ ܕܦܰܪܙܠܳܐ ܐܰܘ ܟܺܝܬ ܫܰܦܽܘ̈ܕܶܐ ܐܝܟ ܕܰܒܨܽܘܪܬܳܐ ܛܶܠܳܢܳܝܬܳܐ ܦܫܺܝܛܳܐܺܝܬ ܐܶܬܪܰܫܡܰܬ܆ ܒܣܺܐܡܳܐ ܕܶܝܢ ܠܳܐ ܐܶܬܟܰܣܝܰܬ܆ ܗܳܝ ܟܺܝܬ ܕܠܰܘ ܠܘܳܬ ܫܽܘܦܪܳܐ ܒܰܠܚܽܘܕ܆ ܐܶܠܳܐ ܐܳܦ ܠܘܳܬ ܕܶܚܠܬܳܐ ܐܰܘܟܺܝܬ ܐܺܝܩܳܪܳܐ ܣܓܺܝܕܳܐ ܐܰܝܟ ܕܠܺܝ ܡܶܣܬܰܒܪܳܐ܆ ܐܶܬܬܕܝܢܰܬ ܘܶܐܫܬܰܟܚܰܬ ܡܶܢ ܗܳܢܽܘܢ ܕܰܒ̣ܢܰܘ ܐܶܢܶܝܢ ܠܥܺܕ̈ܳܬܳܐ ܩܰܕܺܝ̈ܫܳܬܳܐ. ܐܶܣܟܺܡܳܐ ܕܶܝܢ ܕܰܫܡܰܝܳܐ ܡܡܰܠܝܳܐ܆ ܟܰܕ ܒܝܰܕ ܗܳܠܶܝܢ ܟܰܦ̈ܶܐ ܐܰܝܟ ܕܰܒܝܰܕ ܚܽܘܕܪܳܐ܆ ܠܗܳܝ ܓܠܺܝܠܽܘܬ ܟܪܽܘܟܝܳܐ ܕܰܠܥܶܠ ܡܥܰܠܝܳܐ ܘܬܰܠܝܳܐ ܒܳܐܐܰܪ܆ ܟܰܕ ܒܰܡܨܰܥܬܳܐ ܗܳܝ ܕܕܳܡܝܳܐ ܠܟܽܘܢܫܪܳܐ ܡܫܰܟܠܠܳܐ܆ ܐܰܝܟܰܢܳܐ ܕܰܠܘܳܬ ܕܰܬܚܰܘܶܐ ܠܰܢ ܗܳܢܽܘܢ ܕܰܬܚܽܘܬܶܝܗ̇ ܡܟܰܗܢܺܝܢ ܚ̱ܢܰܢ܆ ܕܰܒܓܰܘ ܫܡܰܝܳܐ ܩܳܝܡܺܝܢܰܢ ܒܰܕܡܽܘܬ ܚܰܝ̈ܠܰܘܳܬܳܐ ܗܳܢܽܘܢ ܠܳܐ ܦܰܓܪ̈ܳܢܶܐ܆ ܘܐ̱ܪܳܙܳܢܳܐܺܝܬ ܡܫܰܡܠܶܝܢ ܚ̱ܢܰܢ ܠܗܽܘܢ ܠܩܽܘ̈ܕܫܶܐ. ܘܐ̱ܢܳܫ ܒܪܰܡ ܠܳܐ ܐܶܬܪܟܶܢ܆ ܕܰܠܣܽܘܥܪܳܢܳܐ ܕܚܺܝܠܳܐ ܕܰܐܝܟ ܗܳܢܳܐ܆ ܦܺܐܪܳܐ[34] ܕܰܚܕܳܐ ܠܺܝܛܪܳܐ ܕܣܺܐܡܳܐ ܢܰܝܬܶܐ. ܘܟܰܕ ܛܳܒ ܐܶܠܽܘ ܟܽܠ ܚܰܕ ܐ̱ܢܳܫ ܚܕܳܐ ܒܰܠܚܽܘܕ ܝܰܗܒ܆ ܡܶܢ ܗܳܢܽܘܢ ܕܳܐܦ ܩܰܠܺܝܠ ܩܢܶܝܢ܆ ܠܶܗ ܡܰܢ ܠܳܐ ܥܳܒܶܕ ܗ̱ܘܳܐ ܡܰܪܓܫܳܢܽܘܬܳܐ ܗܰܘ ܡܳܐ ܕܡܶܬܺܝܗܶܒ ܗ̱ܘܳܐ. ܗܰܘ ܡܳܐ ܕܶܝܢ ܕܡܶܢ ܟܽܠܢܳܫ ܐܰܟܚܕܳܐ ܡܶܬܟܰܢܰܫ ܗ̱ܘܳܐ܆ ܡܫܰܡܠܶܐ ܗ̱ܘܳܐ ܒܣܽܘܥܪܳܢܳܐ[35] ܠܗܳܝ ܕܣܳܦܩܳܐ ܘܣܰܓܺܝܳܐܐ. ܫܳܬܶܩ ܐ̱ܢܳܐ ܓܶܝܪ ܕܳܐܦ ܚܰܕ ܒܰܠܚܽܘܕܰܘܗ̱ܝ ܣܳܦܶܩ ܗ̱ܘܳܐ ܕܰܠܟܽܠܶܗ ܢܰܘܫܶܛ ܗ̱ܘܳܐ܆ ܡܶܢ ܗܳܢܽܘܢ ܕܥܰܠ ܬܰܫܘ̈ܝܳܬܳܐ ܪ̈ܳܡܳܬܳܐ ܡܰܓܣܺܝܢ܆ ܘܰܒܦܺܝܢ̈ܟܶܐ ܕܣܺܐܡܳܐ ܕܡܶܢ ܥܠܰܝܡ̈ܶܐ ܣܰܓܺܝ̈ܶܐܐ ܡܶܬܛܰܥܢܺܝܢ ܡܶܬܬܰܪܣܶܝܢ.
ܡܳܢܳܐ ܕܶܝܢ ܐܺ݀ܡܰܪ ܐܳܦ ܡܶܛܽܠ ܢܶܫ̈ܶܐ܆ ܟܽܠܗܶܝܢ ܗܳܠܶܝܢ ܕܟܰܕ ܐܳܙ̈ܳܠ̱ܢ ܠܒܰܐܠܰܢܺܐ܆ ܒܡܳܐܢ̈ܶܐ ܕܣܺܐܡܳܐ ܕܠܺܝܛܪ̈ܶܐ ܣܰܓܺܝ̈ܳܐܬܳܐ ܡܶܬܬܰܘܒ̈ܠܳܢ܆ ܘܥܰܠ ܟܽܘܪ̈ܣܰܘܳܬܳܐ ܐܰܘܟܺܝܬ ܡܰܪ̈ܟܒܳܬܳܐ ܒܓܰܘ ܫܽܘ̈ܩܶܐ ܡܶܬܛܰܥ̈ܢܳܢ܆ ܟܰܕ ܒܣܺܐܡܳܐ ܬܽܘܒ ܡܰܙܗܪ̈ܳܢ܆ ܐܰܝܟܰܢܳܐ ܕܠܳܐ ܢܶܗܘܽܘܢ ܚܰܣܺܝܪܺܝܢ ܡܶܢ ܗܳܢܳܐ܆ ܐܳܦܠܳܐ ܦܽܘ̈ܓܕܶܐ ܕܟܽܘ̈ܕܰܢܘܳܬܳܐ. ܒܳܬܰܪܟܶܢ ܐܶܠܽܘ ܡܰܢ ܒܰܪܬܳܐ ܕܡܰܠܟܳܐ ܐܶܬ̣ܳܬ̣ ܠܰܡܕܺܝܢ̱ܬܰܢ܆ ܘܰܠܐ̱ܢܳܫ ܗܳܪܟܳܐ ܠܘܳܬ ܫܰܘܬܳܦܽܘܬܳܐ ܡܶܬܡܰܟܪܳܐ ܗ̱ܘܳܬ܆ ܡܶܢ ܟܽܠܦܪܽܘܤ ܟܽܠ ܚܕܳܐ ܡܶܢܟܶܝܢ܆ ܟܰܕ ܚܦܺܝܛܳܐ ܗ̱ܘܳܬ ܕܝܰܬܺܝܪ ܝܺܕܺܝܥܬܳܐ ܬܶܥܒܶܕ ܗܺܝ ܠܳܗ̇ ܠܘܳܬ ܗܳܝ ܕܡܶܫܬܰܘܬܦܳܐ܆ ܗܰܘ ܡܳܐ ܕܝܰܬܺܝܪ ܡܝܰܩܰܪ ܗ̱ܘܳܐ ܡܶܢ ܟܽܠܗܶܝܢ ܚܶܫ̈ܠܳܬܳܐ ܕܕܰܗܒܳܐ܆ ܐܰܘ ܡܶܢ ܡܳܐܢ̈ܶܐ ܝܰܩܺܝܪ̈ܰܝ ܕܡܰܝ̈ܳܐ܆ ܡܰܝܬܝܳܐ ܗ̱ܘܳܬ ܩܽܘܪܒܳܢܳܐ ܠܒܶܝܬ ܓܢܽܘܢܳܐ. ܠܣܳܗܕܬܳܐ ܕܶܝܢ ܗܳܝ ܕܰܒܡܰܠܟܽܘܬܳܐ ܗܳܝ ܕܥܰܠ ܐܰܪܥܳܐ ܟܶܦܪܰܬ܆ ܘܰܗܘܳܬ ܒܰܪܬܳܐ ܕܡܰܠܟܳܐ ܘܰܐܒܳܐ ܫܡܰܝܳܢܳܐ܆ ܘܰܗܘܳܬ ܟܰܠܬܳܐ ܠܰܡܫܺܝܚܳܐ܆ ܡܡܐܢܳܐ ܘܰܡܒܣܝܳܐ ܐܢ̱ܬܝ܆ ܘܡܶܬܬܰܗܝܳܐ ܐܰܢ̱ܬܝ ܕܬܶܬܠܺܝܢ ܡܶܕܶܡ ܡܶܢ ܡܳܐܢܰܝ̈ܟܝ. ܐܶܠܳܐ ܐܰܘܫܶܛܝ ܘܗܰܒܝ ܚܘܺܝܚܳܐܺܝܬ ܘܠܳܐ ܬܶܬܥܰܟܪܺܝܢ. ܬܶܫܬܘܶܝܢ ܠܦܽܘܪ̈ܥܳܢܶܐ ܥܰܬܺܝܪ̈ܶܐ܆ ܡܶܛܽܠ ܟܺܝܬ ܕܠܰܘ ܛܳܠܽܘܡܳܐ܆ ܘܳܐܦܠܳܐ ܚܰܣܺܝܪܳܐ ܐܺܝܬܰܘܗ̱ܝ ܡܟܺܝܪܳܗ̇. ܢܶܬܶܠ ܠܰܒ̈ܢܰܝܳܐ ܕܶܝܠܶܟܝ ܚܽܘܠܡܳܢܳܐ܆ ܕܝܰܬܺܝܪ ܡܶܢ ܟܰܟܪ̈ܶܐ ܣܰܓܺܝ̈ܳܐܬܳܐ ܐܺܝܬܰܘܗ̱ܝ ܪܚܺܝܡܳܐ. ܚܰܪܺܝܦܽܘܬܳܐ ܕܬܰܪܥܺܝܬܳܐ ܠܘܳܬ ܝܽܘܠ̈ܦܳܢܶܐ. ܗܳܠܶܝܢ ܐ̱ܚܪ̈ܳܢܝܳܬܳܐ܆ ܕܒܺܐܝ̈ܕܰܝܗܶܝܢ ܐܰܒ̈ܳܗܶܐ ܚܳܕܶܝܢ ܥܰܠ ܒܢܰܝ̈ܗܽܘܢ. ܠܓܰܒܪܶܟܝ ܢܶܬܶܠ ܥܰܡ ܫܰܦܺܝܪܽܘܬ ܚܽܘܠܡܳܢܳܐ ܐܳܦ ܡܫܰܪܬܚܽܘܬܳܐ ܕܝܽܘܬܪ̈ܳܢܶܐ ܟ̈ܺܐܢܶܐ. ܠܒܰܝܬܳܐ. ܠܩܶܢܝܳܢܳܐ ܒܽܘܪܟܬܳܐ ܘܛܰܝܒܽܘܬܳܐ ܕܡܶܢ ܠܥܶܠ. ܘܒܳܬܰܪ ܟܽܠܗܶܝܢ ܗܳܠܶܝܢ܆ ܡܶܢ ܒܳܬܰܪ ܫܽܘܢܳܝܳܐ ܕܡܶܢ ܗܳܪܟܳܐ܆ ܡܰܠܟܽܘܬܳܐ ܕܰܫܡܰܝܳܐ. ܠܗܳܝ ܕܬܶܗܘܶܐ ܕܟܽܠܰܢ ܢܶܫܬܘܶܐ܆ ܒܛܰܝܒܽܘܬܶܗ ܘܰܒܪ̈ܰܚܡܰܘܗܝ܆ ܘܰܒܪܶܚܡܰܬ ܐ̱ܢܳܫܽܘܬܶܗ ܕܰܐܠܳܗܳܐ ܪܰܒܳܐ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ ܕܥܰܡܶܗ ܠܰܐܒܳܐ ܦܰܐܝܳܐ ܬܶܫܒܽܘܚܬܳܐ ܘܺܐܝܩܳܪܳܐ ܘܽܐܘܚܕܳܢܳܐ܆ ܥܰܡ ܪܽܘܚܳܐ ܩܰܕܺܝܫ ܒܟܽܠ. ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ.
ܫܠܡ ܡܺܐܡܪܳܐ ܕܡܳܐܐ.