ܡܺܐܡܪܳܐ ܕܥܶܣܪܳܐ

ܥܰܠ ܢܽܘܗܳܪ̈ܶܐ

1: ܬܽܘܒ. ܥܺܐܕܳܐ ܕܰܐ‎ܠܳܗܳܐ ܘܦܳܪܽܘܩܳܐ ܝܶܫܽܘܥ ܡܫܺܝܚܳܐ. ܘܬܽܘܒ ܬܽܘܪܳܨܳܐ ܕܓܶܢܣܳܐ ܕܺܝܠܰܢ. ܡܶܬܺܝܠܶܕ ܗ̱ܘܳܐ ܡܶܢ ܩܕܺܝܡ ܒܰܒܣܰܪ܆ ܘܒܺܝܠܺܝܕܽܘܬܳܐ^[1] ܕܺܝܠܝ ܡܶܫܬܰܘܬܰܦ ܗ̱ܘܳܐ ܕܠܳܐ ܙܰܪܥܳܐ ܘܰܕܠܳܐ ܚܛܳܗ܆ ܗܰܘ ܕܝܳܕܰܥ ܠܟܽܠܗܶܝܢ ܩܕܳܡ ܗܘܳܝܗܶܝܢ ܘܡܶܢ ܓܙܳܪ ܕܺܝܢܳܐ ܗܰܘ ܩܰܕܡܳܝܳܐ. ܡܶܫܬܰܪ̈ܝܳܢ ܗܘܰܝ̈ ܐܶܡܗ̈ܳܬܳܐ܆ ܗܰܘ ܕܫܰܕܪܰܬ݂ ܥܠܰܝܗܶܝܢ ܚܰܘܳܐ܆ ܟܰܕ ܗܳܝ ܕܰܒܥ̈ܳܩܳܬܳܐ ܬܺܐܠܕܺܝܢ ܒܢܰܝ̈ܳܐ^[2]܆ ܩܰܒܠܰܬ݂ ܡܰܪܫܽܘܬܳܐ ܕܰܚܠܳܦ ܛܥܳܡܬܳܐ ܡܰܪܺܝܪܬܳܐ ܘܠܳܐ ܡܶܫܬܰܡܥܳܢܽܘܬܳܐ. ܡܰܠܰܐܟܳܐ ܓܶܝܪ ܡܣܰܒܰܪ ܗ̱ܘܳܐ ܗܳܕܶܐ ܠܪ̈ܳܥܰܘܳܬܳܐ ܟܰܕ ܐܳܡܰܪ ܗ̱ܘܳܐ: ܡܣܰܒܰܪ ܐ̱ܢܳܐ ܠܟܽܘܢ ܚܰܕܽܘܬܳܐ ܪܰܒܬܳܐ ܗܳܝ ܕܬܶܗܘܶܐ ܠܟܽܠܶܗ ܥܳܠܡܳܐ. ܐܶܬܺܝܠܶܕ ܠܟܽܘܢ ܝܰܘܡܳܢܳܐ ܦܳܪܽܘܩܳܐ܆ ܗܰܘ ܕܺܐܝܬܰܘܗ̱ܝ ܡܫܺܝܚܳܐ ܡܳܪܝܳܐ ܒܰܡܕܺܝܢ̱ܬܶܗ ܕܕܰܘܺܝܕ^[3]. ܐܶܠܳܐ ܐܳܦ ܠܰܘܛܬܳܐ ܗܳܝ ܕܰܐܒܽܘܢ ܩܰܕܡܳܝܳܐ ܐܳܕܳܡ܆ ܥܰܡ ܥܳܩܬܳܐ ܡܶܬܚܰܒܠܳܐ ܗ̱ܘܳܬ. ܐܳܦ ܓܶܝܪ ܫܳܡܥܳܐ ܗ̱ܘܳܬ݂. ܗܺܝ ܝܳܠܕܰܬ ܐܰ‎ܠܳܗܳܐ ܒܬܽܘܠܬܳܐ ܥܰܡ ܗܳܝ ܕܰܚܕܳܝ ܡܰܠܝܰܬ݂ ܛܰܝܒܽܘܬܳܐ ܡܳܪܝܳܐ ܥܰܡܶܟܝ^[4]. ܐܳܦ ܗܳܝ ܕܰܡܒܰܪܰܟܬܳܐ ܐܰܢ̱ܬܝ ܒܢܶܫ̈ܶܐ܆ ܘܰܡܒܰܪܰܟ ܗ̱ܘ ܦܺܐܪܳܐ ܕܟܰܪܣܶܟܝ^[5]. ܒܽܘܪܟܬܳܐ ܕܶܝܢ. ܡܚܰܒܠܳܢܺܝܬܳܐ ܕܠܰܘܛܬܳܐ ܐܺܝܬܶܝܗ̇.

2: ܬܽܘܒ ܡܶܫܬܰܘܫܰܛ ܗ̱ܘܳܐ ܝܶܫܽܘܥ ܒܩܰܘܡܬܳܐ ܘܰܒܚܶܟܡܬܳܐ ܘܰܒܛܰܝܒܽܘܬܳܐ^[6]܆ ܗܰܘ ܕܺܐܝܬܰܘܗ̱ܝ ܗܺܝ ܚܶܟܡܬܳܐ ܘܝܳܗܽܘܒܳܐ ܕܚܶܟܡܬܳܐ ܘܰܕܛܰܝܒܽܘܬܳܐ ܠܟܽܠ܆ ܐܰܝܟܰܢܳܐ ܕܰܚܢܰܢ ܒܶܗ ܐܰܝܟ ܕܰܒܪܺܝܫܺܝܬܳܐ ܕܬܰܪܬܶܝܢ ܕܓܶܢܣܰܢ܆ ܠܘܳܬ݂ ܛܰܝܒܽܘܬܳܐ ܘܚܶܟܡܬܳܐ ܢܶܦܢܶܐ ܢܶܣܰܩ܆ ܗܳܝ ܕܰܢܦܰܠܢܰܢ ܡܶܢܳܗ̇ ܟܰܕ ܐܶܬܬܰܛܥܺܝܢܰܢ ܡܶܢ ܚܶܘܝܳܐ.

3: ܒܡܳܢܳܐ ܓܶܝܪ ܥܬܺܝܕ ܗ̱ܘܳܐ ܕܢܶܫܬܰܘܫܰܛ ܗܰܘ ܕܰܠܗܰܠ ܡܶܢ ܟܽܠ ܫܽܘܘܫܳܛܳܐ܆ ܗܰܘ ܬܚܽܘܡܳܐ ܐ̱ܚܪܳܝܳܐ ܐܶܠܳܐ ܡܶܬܥܰܒܪܳܢܳܐ ܕܗܳܠܶܝܢ ܕܺܐܝܬܰܝܗܶܝܢ܆ ܗܰܘ ܕܰܠܘܳܬܶܗ ܚܦܺܝܛ ܟܽܠܡܰܢ ܕܡܶܫܬܰܘܫܰܛ ܒܰܡܝܰܬܪܽܘܬܳܐ. ܐܶܠܳܐ ܠܡܶܬܚܰܘܝܳܢܽܘܬܳܐ ܕܰܒܩܰܠܺܝܠ ܩܰܠܺܝܠ. ܘܰܠܡܶܬܓܰܠܝܳܢܽܘܬܳܐ ܕܰܐ‎ܠܳܗܽܘܬܳܐ ܕܺܝܠܶܗ܆ ܗܳܝ ܕܰܡܣܰܩܡܳܐܺܝܬ ܘܰܠܦܽܘܬ݂ ܡܫܽܘܚܬܳܐ ܕܩܰܘܡܬܳܐ ܡܶܬܓܰܠܝܳܐ ܗ̱ܘܳܬ ܘܡܶܬܝܰܕܥܳܐ܆ ܫܽܘܘܫܳܛܳܐ ܩܪܳܗ̇ ܐܶܘܰܢܓܶܠܺܝܣܛܳܐ. ܡܶܛܽܠ ܗܳܕܶܐ ܐܳܦ ܚܰܠܶܛ ܩܰܘܡܬܳܐ ܥܰܡ ܚܶܟܡܬܳܐ ܘܛܰܝܒܽܘܬܳܐ. ܟܰܕ ܐܰܝܟ ܕܰܠܡܺܐܡܰܪ. ܡܰܙܥܶܩ܆ ܕܶܐ‌ܠܽܘ ܠܳܐ ܕܟܰܕ ܡܶܛܽܠܳܬܰܢ ܐܶܬܒܰܪܢܰܫ ܗ̱ܘܳܐ ܬܚܶܝܬ ܩܰܘܡܬܳܐ ܘܙܰܒܢܳܐ܆ ܗܰܘ ܕܠܳܐ ܣܰܝܒܽܘ ܘܰܕܠܳܐ ܩܰܘܡܬܳܐ ܘܰܕܠܳܐ ܙܰܒܢܳܐ܆ ܠܳܐ ܡܶܬܶܐܡܰܪ ܗ̱ܘܳܐ ܕܰܒܚܶܟܡܬܳܐ ܘܰܒܛܰܝܒܽܘܬܳܐ ܡܶܫܬܰܘܫܰܛ ܗ̱ܘܳܐ. ܐܶܠܳܐ ܡܶܛܽܠ ܟܺܝܬ ܕܰܒܩܰܘܡܬܳܐ. ܡܶܫܬܰܘܫܰܛ ܗ̱ܘܳܐ܆ ܡܶܛܽܠ ܗܳܢܳܐ ܐܳܦ ܒܚܶܟܡܬܳܐ ܐܳܦ ܒܛܰܝܒܽܘܬܳܐ܆ ܟܰܕ ܒܟܽܠܗܶܝܢ ܡܒܰܝܬܶܐ ܠܶܗ ܠܳܐ ܡܫܰܡܠܳܝܽܘܬܳܐ ܗܳܝ ܕܺܝܠܰܢ܆ ܘܰܕܪܰܫ ܠܰܢ ܐܽܘܪܚܳܐ ܠܘܳܬ ܡܫܰܡܠܝܽܘܬܳܐ ܗܳܝ ܕܺܝܠܶܗ. ܘܰܕܗܳܕܶܐ. ܗܳܟܰܢܳܐ ܐܺܝܬ ܠܳܗ̇܆ ܘܕܰܐ‎ܠܳܗܽܘܬܶܗ ܡܕܰܒܪܳܢܺܝܬܳܐ ܕܥܰܡܰܢܽܘܐܶܝܠ ܗܳܝ ܕܒܺܐܝܕܳܐ ܒܺܐܝܕܳܐ ܡܶܬܕܰܢܚܳܐ ܗ̱ܘܳܬ݂܆ ܐܶܬܰܐܡܪܰܬ݂ ܫܽܘܘܫܳܛܳܐ܆ ܝܺܕܺܝܥܳܐ ܡܶܢ ܬܰܡܳܢ.

4: ܟܰܕ ܓܶܝܪ ܐܶܡܶܗ܆ ܝܳܠܕܰܬ ܐܰ‎ܠܳܗܳܐ ܐܳܡܰܪ ܐ̱ܢܳܐ ܒܬܽܘܠܬܳܐ ܡܰܪܝܰܡ ܘܝܰܘܣܶܦ. ܥܳܛܦܺܝܢ ܗ̱ܘܰܘ ܡܶܢ ܒܳܬܰܪ ܥܺܐܕܳܐ ܕܦܶܣܟܳܐ ܡܶܢ ܐܽܘܪܶܫܠܶܡ܆ ܘܒܳܥܶܝܢ ܗ̱ܘܰܘ ܠܶܗ ܒܽܐܘܪܚܳܐ ܟܰܕ ܨܶܒܝܳܢܳܐܺܝܬ ܦܳܫ ܡܶܢ ܒܢܰܝ̈ ܠܘܺܝܬܗܽܘܢ ܕܒܽܐܘܪܚܳܐ܆ ܘܬܽܘܒ ܗܦܰܟܘ ܠܽܐܘܪܶܫܠܶܡ ܘܶܐܫܟܚܽܘܗ̱ܝ. ܐܳܡܰܪ ܗ̱ܘܳܐ ܠܗܽܘܢ: ܕܰܠܡܳܢܳܐ ܒܳܥܶܝܢ ܗܘܰܝܬܽܘܢ ܠܺܝ܆ ܠܳܐ ܝܳܕܥܺܝܢ ܗ̱ܘܰܝܬܽܘܢ ܕܰܒܒܶܝܬ ܐܳܒܝ ܘܠܳܐ ܠܺܝ ܕܶܐ݀ܗܘܶܐ ܐܺܝܬܰܝ؟ ܟܰܕ ܘܠܳܐ ܡܶܕܶܡ ܐ̱ܚܪܺܢܳܐ ܡܶܢ ܗܳܪܟܳܐ ܡܰܘܕܰܥ܆ ܐܶܠܳܐ ܐܶܢ ܕܰܚܕܳܐ ܐܰ‎ܠܳܗܽܘܬܳܐ ܘܡܳܪܽܘܬܳܐ ‌ܐܺܝܬܰܘܗ̱ܝ܆ ܗܽܘ ܟܺܝܬ ܘܰܐܒܳܐ܆ ܘܰܕܗܰܘ ܕܒܳܥܶܝܢ ܗ̱ܘܰܘ ܐܰܝܟ ܕܰܠܛܰܠܝܳܐ ܕܰܛܥܳܐ ܡܶܢ ܐܽܘܪܚܳܐ܆ ܗܳܢܳܐ ‌ܐܺܝܬܰܘܗ̱ܝ ܕܫܰܠܺܝܛ ܥܰܠ ܟܽܠܗܶܝܢ ܗܳܠܶܝܢ ܕܰܐܒܳܐ܆ ܘܳܐܦ ܥܠܶܝܗ̇ ܕܰܡܕܺܝܢ̱ܬܳܐ ܐܽܘܪܶܫܠܶܡ܆ ܗܳܝ ܟܺܝܬ ܕܡܶܢ ܢܒܺܝ̈ܶܐ ܡܟܰܢܝܳܐ ܗ̱ܘܳܬ ܡܕܺܝܢ̱ܬܳܐ ܕܰܐ‎ܠܳܗܳܐ^[7].

5: ܘܟܰܕ ܗܳܕܶܐ ܐܶܫܬܰܥܺܝ ܠܽܘܩܳܐ ܐܶܘܰܢܓܶܠܺܝܣܛܳܐ܆ ܐܰܝܬܺܝ ܒܳܬܰܪܟܶܢ ܗܳܝ ܕܳܐܦ ܝܶܫܽܘܥ ܡܶܫܬܰܘܫܰܛ ܗ̱ܘܳܐ ܒܚܶܟܡܬܳܐ ܘܰܒܩܰܘܡܬܳܐ ܘܰܒܛܰܝܒܽܘܬܳܐ^[8]. ܐܰܝܟܰܢܳܐ ܕܢܺܐܠܰܦ ܚܢܰܢ. ܕܫܽܘܘܫܳܛܳܐ ܩܪܳܐ ܠܡܶܬܓܰܠܝܳܢܽܘܬܳܐ ܕܒܺܐܝܕܳܐ ܒܺܐܝܕܳܐ ܕܰܐ‎ܠܳܗܽܘܬܶܗ ܕܝܶܫܽܘܥ. ܗܰܘ ܓܶܝܪ ܕܕܺܝܠܳܢܳܝ̈ܳܬܳܐ ܐܺܝܬ ܠܶܗ ܠܟܽܠܗܶܝܢ ܗܳܠܶܝܢ ܕܺܝܠܳܢܳܝ̈ܳܬܳܐ ܕܰܐܒܳܐ܆ ܐܰܝܕܳܐ ܬܰܪܒܺܝܬܳܐ ܡܩܰܒܶܠ. ܒܪܰܡ ܕܶܝܢ ܕܡܶܫܬܰܘܫܰܛ ܡܶܣܬܒܰܪ ܗ̱ܘܳܐ ܠܘܳܬ݂ ܐܰ‎ܠܳܗܳܐ ܘܰܠܘܳܬ݂ ܒܢܰܝ̈ܢܳܫܳܐ܆ ܟܰܕ ܡܰܣܒܪܳܢܽܘܬܳܐ ܦܰܐܺܝܬ ܠܰܐܠܳܗܳܐ ܗܳܝ ܕܰܥܠܰܘܗ̱ܝ ܒܩܰܠܺܝܠ ܩܰܠܺܝܠ ܡܶܫܬܰܘܫܛܳܐ ܗ̱ܘܳܬ܆ ܗܳܝ ܕܶܝܢ ܒܰܒܢܰܝ̈ܢܳܫܳܐ. ܗܳܝ ܕܰܒܨܶܒܝܳܢܳܐ ܕܰܐܒܳܐ ܡܚܰܘܶܐ ܗ̱ܘܳܐ܆ ܟܰܕ ܡܰܦܶܩ ܗ̱ܘܳܐ ܐܰܟܚܕܳܐ ܥܰܡ ܙܰܒܢܳܐ ܕܩܰܘܡܬܳܐ܆ ܠܕܶܢܚܳܐ ܕܰܐ‎ܠܳܗܽܘܬܶܗ.

6: ܒܗܳܢܳܐ ܙܢܳܐ ܐܳܦ ܠܘܳܬ݂ ܝܽܘܪܕܢܳܢ܆ ܘܰܠܘܳܬ݂ ܡܰܥܡܽܘܕܺܝܬܳܐ ܐܳܬܶܐ. ܠܰܘ ܟܰܕ ܗܽܘ ܣܢܺܝܩ ܗ̱ܘܳܐ ܥܰܠ ܕܽܘܟܳܝܳܐ܆ ܐܶܠܳܐ ܟܰܕ ܠܺܝ ܩܰܕܶܡ ܡܕܰܟܶܐ ܘܰܡܩܰܕܶܫ ܠܡܰܝ̈ܳܐ܆ ܘܗܽܘ ܠܶܗ ܒܗܳܢܽܘܢ ܕܠܰܬܝܳܒܽܘܬܳܐ ܥܳܡܕܺܝܢ^[9]. ܐܰܟܚܕܳܐ ܡܳܢܶܐ܆ ܗܰܘ ܕܰܥܬܺܝܕ ܠܡܰܥܡܳܕܽܘ ܒܢܽܘܪܳܐ ܘܰܒܪܽܘܚܳܐ ܘܠܰܡܕܰܟܳܝܽܘ ܡܶܢ ܚܛܺܝܬܳܐ܆ ܘܠܰܡܫܰܟܳܢܽܘ ܛܰܝܒܽܘܬܳܐ ܕܣܳܝܽܘܡܽܘܬ݂ ܒܢܰܝ̈ܳܐ. ܘܰܕܠܰܘ ܟܰܕ ‌ܐܺܝܬܰܘܗ̱ܝ ܗܽܘ ܒܣܽܘܢܩܳܢܳܐ ܕܗܳܕܶܐ܆ ܠܰܢ ܥܳܡܶܕ ܗ̱ܘܳܐ. ܐܰܘܕܰܥ ܝܽܘܚܰܢܳܢ ܟܰܕ ܐܰܙܥܶܩ ܠܘܳܬܶܗ܆ ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶ݀ܬܥܡܶܕ܆ ܘܰܐܢ̱ܬ ܐܳܬܶܐ ܐܰܢ̱ܬ ܠܘܳܬܝ^[10]. ܐܶܢ ܗܳܟܺܝܠ ܗܰܘ ܕܡܰܥܡܶܕ. ܣܢܺܝܩ ܗ̱ܘܳܐ ܥܰܠ ܕܽܘܟܳܝܳܐ ܕܡܶܢ ܗܰܘ ܕܥܳܡܶܕ܆ ܠܳܐ ܣܢܺܝܩܳܐ ‌ܐܺܝܬܰܘܗ̱ܝ ܗ̱ܘܳܐ ܗܰܘ ܕܥܳܡܶܕ܆ ܘܰܕܐܺܝܬ ܠܶܗ ܗܳܝ ܕܡܰܠܝܳܐ ܗܽܘ ܒܶܗ.

7: ܢܶܚܙܶܐ ܕܶܝܢ܆ ܘܰܕܡܳܢܳܐ ܠܘܳܬ݂ ܗܳܠܶܝܢ ܗ̱ܘ̣ ܝܶܫܽܘܥ ܡܦܰܢܶܐ. ܫܒܽܘܩ ܗܳܫܳܐ. ܟܳܠܶܐ ܠܶܗ ܠܡܰܥܡܕܳܢܳܐ܆ ܕܫܰܪܺܝ ܠܡܰܟܪܳܙܽܘ ܠܰܡܥܰܠܝܽܘܬܳܐ ܘܠܳܐ ܡܶܬܩܰܪܒܳܢܽܘܬܳܐ ܕܰܐ‎ܠܳܗܽܘܬܶܗ܆ ܘܳܐܡܰܪ: ܫܒܽܘܩ ܗܳܫܳܐ. ܗܳܫܳܐ: ܕܰܡܕܰܒܪܳܢܽܘܬܳܐ ܐܶܡܰܪ ‌ܐܺܝܬܰܘܗ̱ܝ ܙܰܒܢܳܐ܆ ܘܠܰܘ ܕܡܶܬܚܰܘܝܳܢܽܘܬܳܐ. ܐܰܝܟ ܗܰܘ ܕܳܐܡܰܪ ܗ̱ܘܳܐ܆ ܕܫܰܪܺܝܪܳܐ ܡܰܢ. ܗܳܝ ܕܳܐܡܰܪ ܐܰܢ̱ܬ܆ ܐܶܠܳܐ. ܠܰܘ ܕܙܰܒܢܳܐ ܗܳܢܳܐ ܕܩܰܪܺܝܒ ܐܺܝܬܶܝܗ̇. ܗܳܟܰܢܳܐ ܓܶܝܪ ܐܺܝܬܶܝܗ̇ ܕܦܰܐܝܳܐ ܠܰܢ܆ ܕܰܢܡܰܠܶܐ ܟܽܠܳܗ̇ ܟܺܐܢܽܘܬܳܐ. ܗܳܫܳܐ. ܡܽܘܫ̈ܚܳܬܳܐ ܕܡܽܘܟܳܟܳܐ ܨܶܒܝܳܢܳܝܳܐ ܡܫܰܡܠܶܐ ܐ̱ܢܳܐ܆ ܘܰܡܚܰܦܶܐ ܐ̱ܢܳܐ ܠܰܡܥܰܠܝܽܘܬܳܐ ܕܺܝܠܝ ܗܳܝ ܕܒܰܟܝܳܢܳܐ܆ ܘܰܡܡܰܠܶܐ ܐ̱ܢܳܐ ܟܽܠܳܗ̇ ܟܺܐܢܽܘܬܳܐ. ܡܳܢܳܐ ܕܶܝܢ ܐܺܝܬܶܝܗ̇ ܗܳܝ ܕܰܢܡܰܠܶܐ ܟܽܠܳܗ̇ ܟܺܐܢܽܘܬܳܐ. ܥܬܺܝܕ ܗ̱ܘܳܐ ܠܰܡܢܳܚܽܘ^[11] ܠܦܽܘܠܚܳܢܳܐ ܢܳܡܽܘܣܳܝܳܐ܆ ܠܰܘ ܟܰܕ ܫܳܪܶܐ ܠܶܗ܆ ܘܳܐܦܠܳܐ ܟܰܕ ܣܰܩܽܘ̈ܒܠܳܝܳܬܳܐ. ܣܳܐܶܡ ܢܳܡܽܘܣܳܐ. ܐܶܠܳܐ ܟܰܕ ܡܥܰܡܶܛ ܘܰܡܚܰܦܶܐ ܠܶܗ ܒܝܰܕ ܢܰܨܺܝܚܽܘܬܳܐ ܕܦܽܘܩܕܳܢ̈ܶܐ ܐܶܘܰܢܓܶܠܳܝ̈ܶܐ. ܟܰܕ ܓܶܝܪ ܢܳܡܽܘܣܳܐ ܐܳܡܰܪ: ܕܠܳܐ ܬܶܩܛܽܘܠ ܗܘ. ܕܳܐܦܠܳܐ ܬܶܪܓܰܙ ܦܳܩܶܕ ܗ̱ܘܳܐ. ܐܰܝܟܰܢܳܐ ܟܺܝܬ ܕܟܰܕ ܪܽܘܓܙܳܐ ܡܶܬܬܪܺܝܡ܆ ܗܰܘ ܕܡܶܢܶܗ ‌ܐܺܝܬܰܘܗ̱ܝ ܩܶܛܠܳܐ܆ ܝܬܺܝܪܳܐ ܢܶܗܘܶܐ ‌ܐܺܝܬܰܘܗ̱ܝ. ܢܳܡܽܘܣܳܐ ܡܳܕܶܝܢ܆ ܗܰܘ ܕܰܠܩܶܛܠܳܐ ܟܳܠܶܐ ܗ̱ܘܳܐ. ܗܳܟܰܢܳܐ ܐܳܦ ܗܳܝ ܕܠܳܐ ܬܓܽܘܪ܆ ܒܟܶܠܝܳܢܳܐ ܕܗܳܝ ܕܠܳܐ ܥܰܡ ܪܶܓܬܳܐ ܬܚܽܘܪ܆ ܩܳܕܡܳܐ ܡܶܬܦܰܣܩܳܐ.

8: ܡܶܛܽܠ ܗܳܟܺܝܠ ܕܰܥܬܺܝܕ ܗ̱ܘܳܐ. ܕܰܒܝܰܕ ܣܳܝܽܘܡܽܘܬ݂ ܢܳܡܽܘܣܳܐ ܐܶܘܰܢܓܶܠܳܝܬܳܐ ܘܰܕܝܰܬܺܝܪ ܡܫܰܡܠܝܳܐ ܢܫܰܡܠܶܝܘܗ̱ܝ ܠܢܳܡܽܘܣܳܐ܆ ܐܰܝܟܰܢܳܐ ܕܠܳܐ ܐ̱ܢܳܫ ܢܺܐܡܰܪ܆ ܕܰܐܝܟ ܡܰܢ ܕܠܳܐ ܡܶܫܟܰܚ ܗ̱ܘܳܐ ܕܰܢܡܰܠܶܝܘܗ̱ܝ. ܡܶܛܽܠ ܗܳܕܶܐ ܫܶܠܝܶܗ܆ ܡܡܰܠܶܐ ܟܽܠܗܽܘܢ ܙܶܕ̈ܩܶܐ ܕܺܝܠܶܗ^[12]. ܘܠܰܓܙܽܘܪܬܳܐ ܗܳܝ ܕܰܦܩܺܝܕܳܐ ܒܶܗ. ܡܩܰܒܶܠ ܥܠܰܘܗ̱ܝ܆ ܘܰܡܩܰܪܶܒ ܕܶܒܚܬܳܐ܆ ܙܰܘܓܳܐ ܕܫܽܘܦܢܺܝ̈ܢܶܐ ܘܰܬܪܶܝܢ ܦܰܪ̈ܽܘܓܶܐ ܕܝܰܘ̈ܢܶܐ܆ ܘܰܡܫܰܡܠܶܐ ܟܽܠܗܶܝܢ ܗܳܠܶܝܢ ܕܰܒܢܳܡܽܘܣܳܐ^[13]. ܡܶܛܽܠܗܳܕܶܐ ܐܳܦ ܟܰܕ ܚܳܙܶܐ ܗ̱ܘܳܐ ܠܰܦܪ̈ܺܝܫܶܐ ܘܰܠܙܰܕܽܘܩܳܝ̈ܶܐ^[14]܆ ܕܰܚܘܺܝܚܳܐܺܝܬ ܠܘܳܬ݂ ܡܰܥܡܽܘܕܺܝܬܶܗ ܕܝܽܘܚܰܢܳܢ ܢܳܦܩܺܝܢ ܗ̱ܘܰܘ܆ ܗܽܘ ܠܶܗ ܥܰܡܗܽܘܢ ܚܳܠܶܛ. ܟܰܕ ܐܳܦܠܳܐ ܠܗܳܢܳܐ ܐܳܕܫܳܐ ܕܡܽܘܟܳܟܳܐ ܐܰܫܺܝܛ܆ ܐܶܠܳܐ ܨܳܒܶܐ ܗ̱ܘܳܐ ܠܰܡܡܰܠܳܝܽܘ ܟܽܠܳܗ̇ ܟܺܐܢܽܘܬܳܐ. ܗܰܘ ܕܶܝܢ ܕܰܡܡܰܠܶܐ ܟܽܠܳܗ̇ ܟܺܐܢܽܘܬܳܐ܆ ܠܳܐ ܣܢܺܝܩ ܗ̱ܘܳܐ ܥܰܠ ܡܰܥܡܽܘܕܺܝܬܳܐ ܗܳܝ ܕܥܰܠ ܬܝܳܒܽܘܬܳܐ ܕܣܰܟܠ̈ܘܳܬܳܐ ܡܶܫܬܰܡܠܝܳܐ.

9: ܥܰܡ ܗܳܕܶܐ ܕܶܝܢ. ܐܳܦ ܢܺܝܫܳܐ ܐܺܝܬ ܗ̱ܘܳܐ ܠܶܗ ܐܰܟܚܕܳܐ܆ ܕܰܢܫܰܪܶܐ ܒܡܰܥܡܽܘܕܺܝܬܳܐ ܡܫܰܡܠܰܝܬܳܐ ܘܫܰܪܺܝܪܬܳܐ ܗܳܝ ܕܣܳܝܽܘܡܽܘܬ݂ ܒܢܰܝ̈ܳܐ܆ ܗܳܝ ܟܺܝܬ ܕܠܰܢ ܥܬܺܝܕ ܗ̱ܘܳܐ ܠܰܡܫܰܟܳܢܽܘ܆ ܘܢܳܚܶܬ ܡܰܢ ܠܡܰܝ̈ܳܐ. ܘܥܳܡܶܕ ܗܰܘ ܕܫܳܩܶܠ ܚܛܺܝܬܳܐ ܕܥܳܠܡܳܐ^[15]. ܫܳܪܶܐ ܕܶܝܢ ܠܽܐܘܚܕܳܢܳܐ ܕܳܐܟܶܠܩܰܪܨܳܐ ܗܰܘ ܕܺܐܝܬ ܗ̱ܘܳܐ ܠܶܗ ܪܺܝܫܳܢܽܘܬܳܐ ܒܗܽܘܢ ܒܡܰܝ̈ܳܐ܆ ܘܰܕܚܰܝ̈ܠܰܘܳܬܳܐ ܒܺܝ̈ܫܶܐ ܗܳܢܽܘܢ ܕܰܬܚܽܘܬܰܘܗ̱ܝ. ܘܪ̈ܺܝܫܳܢܶܐ ܡܳܪ̈ܽܘܕܶܐ܆ ܗܳܝ ܟܺܝܬ ܕܩܰܕܶܡ ܗ̱ܘܳܐ ܡܰܙܥܶܩ ܐܳܦ ܕܰܘܺܝܕ ܟܰܕ ܐܳܡܰܪ: ܐܰܢ̱ܬ ܫܚܰܩܬ݁ ܠܪ̈ܺܝܫܶܐ ܕܬܰܢܺܝ̈ܢܶܐ ܥܰܠ ܡܰܝ̈ܳܐ܆ ܐܰܢ̱ܬ ܪܰܨܶܨܬ݁ ܠܪ̈ܺܝܫܰܘ̈ܗ̱ܝ ܕܬܰܢܺܝܢܳܐ^[16]. ܒܕܽܘܟ̈ܝܳܬܳܐ ܓܶܝܪ ܪ̈ܰܛܺܝܒܳܬܳܐ ܪܳܚܡܺܝܢ ܕܰܝ̈ܘܶܐ ܠܡܶܥܡܰܪ܆ ܘܳܐܟܶܠܩܰܪܨܳܐ ܗܰܘ ܪܺܝܫܳܢܳܐ ܕܗܳܠܶܝܢ ܗܳܟܰܢܳܐ. ܐܳܦ ܒܰܒܢܰܝ̈ܢܳܫܳܐ ܕܚܰܝ̈ܶܐ ܪ̈ܰܛܺܝܒܶܐ ܘܳܐܣܽܘ̈ܛܶܐ ܚܳܐܶܝܢ ܡܶܬܬܢܺܝܚܺܝܢ.

10: ܡܶܛܽܠܗܳܕܶܐ. ܐܳܦ ܗܰܘ ܕܠܺܐܝܽܘܒ ܡܡܰܠܶܠ ܗ̱ܘܳܐ܆ ܡܶܛܽܠ ‌ܐܳܟܶܠܩܰܪܨܳܐ. ܐܳܡܰܪ: ܕܰܬܚܶܝܬ ܟܽܠ ‌ܐܺܝ̈ܠܳܢܶܐ ܡܫܰܚܠ̈ܦܶܐ ܕܳܡܶܟ. ܠܘܳܬ݂ ܩܰܢܝܳܐ ܘܦܰܦܪܽܘܢ ܘܰܐܪܒܳܢܳܐ^[17]. ܗܳܠܶܝܢ ܟܺܝܬ ܕܒܰܐܫܺܝܕܽܘܬܳܐ ܕܡܰܝ̈ܳܐ ܡܶܬܪܰܒܶܝܢ܆ ܡܶܛܽܠ ܗܳܢܽܘܢ ܕܰܡܙܰܡܪܳܢܳܐ ܕܰܘܺܝܕ^[18] ܟܰܕ ܡܨܰܠܶܐ ܐܳܡܰܪ ܗ̱ܘܳܐ: ܟܰܕ ܠܕܶܢܚܳܐ ܕܰܐ‎ܠܳܗܳܐ ܪܰܒܳܐ ܡܫܺܝܚܳܐ ܩܰܕܶܡ ܗ̱ܘܳܐ ܡܰܟܪܶܙ. ܡܳܪܝܳܐ ܐܰܪܟܶܢ ܠܰܫܡܰܝܳܐ ܘܚܽܘܬ݂܆ ܓܫܽܘܦ ܒܛܽܘܪ̈ܶܐ ܘܢܶܬܢܽܘܢ܆ ܐܰܒܪܶܩ ܒܰܪܩܳܐ ܘܰܬܒܰܕܰܪ ܐܶܢܽܘܢ܆ ܫܰܕܰܪ ܓܶܐܪ̈ܶܐ ܕܺܝܠܳܟ ܘܰܬܕܰܠܰܚ ܐܶܢܽܘܢ܆ ܫܰܕܰܪ ܐܺܝܕܳܐ ܕܺܝܠܳܟ ܡܶܢ ܪܰܘܡܳܐ ܘܦܰܨܳܢܝ܆ ܘܫܰܘܙܶܒܰܝܢܝ ܡܶܢ ܡܰܝ̈ܳܐ ܣܰܓܺܝ̈ܶܐܐ܆ ܡܶܢ ܐܺܝܕܳܐ ܕܰܒܢܰܝ̈ܳܐ ܢܽܘܟܪ̈ܳܝܶܐ.

11: ܘܰܫܡܰܥ ܗܰܘ ܕܰܡܛܰܝܶܒ ܠܪ̈ܰܚܡܶܐ ܘܰܠܪܶܚܡܰܬ݂ ܐ̱ܢܳܫܽܘܬܳܐ܆ ܘܰܐܪܟܶܢ ܫܡܰܝܳܐ ܘܰܢܚܶܬ݂. ܗܳܢܰܘ ܕܶܝܢ܆ ܟܰܕ ܠܫܽܘܒܚܳܐ ܕܺܝܠܶܗ ܗܰܘ ܫܡܰܝܳܢܳܐ ܘܪܳܡܳܐ ܐܰܪܟܶܢ܆ ܐܰܝܟܰܢܳܐ ܕܡܶܬܩܰܪܒܳܢܳܐ ܠܗܳܢܽܘܢ ܕܥܰܠ ‌ܐܰܪܥܳܐ ܒܝܰܕ ܡܽܘܟܳܟܳܐ ܨܶܒܝܳܢܳܝܳܐ ܢܶܗܘܶܐ. ܘܰܓܫܰܦ ܒܛܽܘܪ̈ܶܐ܆ ܒܪ̈ܺܝܫܳܢܘܳܬܳܐ. ܒܫܽܘܠܛܳܢ̈ܶܐ܆ ܒܰܐܚܺܝ̈ܕܰܝ ܥܳܠܡܳܐ ܕܚܶܫܽܘܟܳܐ ܗܳܢܳܐ܆ ܘܰܐܝܟ ܬܶܢܳܢܳܐ ܐܶܫܬܪܺܝܘ. ܐܰܒܪܶܩ ܒܰܪܩܳܐ܆ ܠܢܰܨܺܝܚܽܘܬܳܐ ܕܟܳܪܽܘܙܽܘܬܳܐ ܐܶܘܰܢܓܶܠܳܝܬܳܐ܆ ܘܒܰܕܰܪ ܐܶܢܽܘܢ. ܫܰܕܰܪ ܓܶܐܪ̈ܶܐ ܕܺܝܠܶܗ܆ ܠܩܰܕܺܝܡܽܘܬ݂ ܡ̈ܶܠܶܐ ܢܒܺܝܳܝ̈ܳܬܳܐ܆ ܠܗܳܠܶܝܢ ܕܢܶܩܰܦ ܡܶܢ ܒܳܬܰܪܟܶܢ. ܐܳܦ ܡܰܠܦܳܢ̈ܘܳܬܳܐ ܕܰܫܠܺܝ̈ܚܶܐ܆ ܘܕܰܠܰܚ ܐܶܢܽܘܢ. ܠܳܐ ܕܶܝܢ ܢܳܩ̈ܦܳܢ ܗ̱ܘܰܝ̈ ܗܳܠܶܝܢ ܟܽܠܗܶܝܢ܆ ܐܶ‎ܠܽܘ ܠܳܐ ܕܩܰܕܡܳܐܺܝܬ ܗܺܝ ܐܺܝܕܳܐ ܐܶܫܬܰܕܪܰܬ݂܆ ܗܽܘ ܕܪܳܥܳܐ ܗܰܘ ܪܳܡܳܐ܆ ܚܰܝܠܳܐ ܕܰܐܒܳܐ ܠܳܐ ܡܶܬܚܰܙܝܳܢܳܐ܆ ܝܺܚܺܝܕܳܝܳܐ ܒܪܳܐ܆ ܡܶܠܬܳܐ ܗܰܘ ܕܶܐܬܒܰܣܰܪ ܡܶܛܽܠܳܬܰܢ܆ ܘܟܰܕ ܗܘ̣ܳܐ ܒܰܡܨܰܥܬܳܐ ܕܝܽܘܪܕܢܳܢ ܘܩܰܕܶܫ ܠܫܶܦܥܰܘ̈ܗ̱ܝ܆ ܠܰܐܫܺܝܕܽܘܬܳܐ ܕܰܚܛܺܝܬܳܐ ܐܰܛܺܝܦ܆ ܘܰܦܪܰܩ ܘܦܰܨܺܝ ܠܰܢ ܡܶܢ ܡܰܝ̈ܳܐ ܣܰܓܺܝ̈ܶܐܐ܆ ܡܶܢ ܐܺܝܕܳܐ ܕܰܒܢܰܝ̈ܳܐ ܢܽܘܟܪ̈ܳܝܶܐ.

12: ܠܩܶܦܰܠܶܐܘܳܢ ܓܶܝܪ ܗܰܘ ܕܛܳܒ̈ܳܬܳܐ܆ ܕܰܒܚܰܪܬܳܐ ܣܳܡܶܗ ܗܽܘ ܢܒܺܝܳܐ ܕܰܘܺܝܕ. ܗܰܘ ܕܡܶܢܶܗ ܐܳܦ ܗܳܢܶܝܢ ܫܘܰܚ̈ܝ. ܡܶܛܽܠ ܗܳܟܺܝܠ ܕܗܳܟܰܢܳܐ. ܘܡܶܛܽܠ ܗܳܠܶܝܢ. ܢܚܶܬ݂ ܝܶܫܽܘܥ ܠܝܽܘܪܕܢܳܢ ܟܰܕ ܣܳܠܶܩ ܗ̱ܘܳܐ ܡܶܢ ܡܰܝ̈ܳܐ܆ ܦܳܬܰܚ ܠܰܫܡܰܝܳܐ ܗܳܢܽܘܢ ܕܶܐܚܰܕ ܐܳܕܳܡ ܩܰܕܡܳܝܳܐ. ܘܟܰܕ ܡܰܘܕܰܥ ܕܚܰܝܠܳܐ ܕܡܰܥܡܽܘܕܺܝܬܳܐ܆ ܡܰܣܰܩܬܳܐ ܕܠܰܫܡܰܝܳܐ ‌ܐܺܝܬܰܘܗ̱ܝ. ܠܰܢ ܓܶܝܪ ܣܳܥܰܪ ܗ̱ܘܳܐ ܟܽܠܗܶܝܢ ܗܰܘ ܫܡܰܝܳܢܳܐ܆ ܟܰܕ ܒܩܽܘܕܳܫܳܐ ܘܰܒܦܽܘܪܩܳܢܳܐ ܕܺܝܠܰܢ ܗܳܘܶܐ ܗ̱ܘܳܐ ܪܺܝܫܺܝܬܳܐ.

13: ܗܳܟܰܢܳܐ ܐܳܦ ܪܽܘܚܳܐ ܡܶܛܽܠܳܬܰܢ ܢܳܚܶܬ ܥܠܰܘܗ̱ܝ. ܪܽܘܚܳܐ ܕܶܝܢ ܠܰܘ ܚܕܳܐ ܡܶܢ ܗܳܠܶܝܢ ܪ̈ܽܘܚܶܐ ܡܫܰܡ̈ܫܳܢܝܳܬܳܐ^[19]܆ ܐܶܠܳܐ ܗܰܘ ܕܺܝܠܶܗ ܕܰܐ‎ܠܳܗܳܐ܆ ܗܰܘ ܫܘܶܐ ܒܽܐܘܣܺܝܰܐ ܘܕܰܐܟܚܕܳܐ ܡܰܡܠܶܟ ܥܰܡܶܗ ܟܺܝܬ ܘܥܰܡ ܐܰܒܳܐ. ܡܶܛܽܠܗܳܕܶܐ ܓܶܝܪ܆ ܡܚܰܘܝܳܢܳܐܺܝܬ ܐܶܡܰܪ ܗܽܘ ܐܶܘܰܢܓܶܠܺܝܣܛܳܐ. ܪܽܘܚܳܐ ܗ̱ܘ ܕܰܐ‎ܠܳܗܳܐ܆ ܪܽܘܚܳܐ ܗܰܘ. ܗܰܘ ܕܰܫܒܰܩ ܠܓܶܢܣܳܐ ܐ̱ܢܳܫܳܝܳܐ. ܗܰܘ ܕܡܶܛܽܠܳܬܶܗ ܐܶܡܰܪ ܡܳܪܝܳܐ ܐܰ‎ܠܳܗܳܐ܆ ܕܠܳܐ ܬܟܰܬܰܪ ܪܽܘܚܳܐ ܕܺܝܠܝ ܒܰܒܢܰܝ̈ܢܳܫܳܐ ܗܳܠܶܝܢ ܠܥܳܠܰܡ܆ ܡܶܛܽܠ ܕܒܶܣܪ̈ܶܐ ܐܺܝܬܰܝܗܽܘܢ^[20]. ܐܶܠܳܐ ܗܰܘ ܪܳܚܶܡ ܐ̱ܢܳܫܳܐ. ܘܰܕܡܶܛܽܠ ܫܦܺܝܥܽܘܬܳܐ ܕܛܳܒܽܘܬܶܗ܆ ܐܰܝܟ ܗܰܘ ܕܨܳܒܶܐ ܠܡܶܗܦܰܟ ܠܰܬܚܽܘ̈ܡܶܐ ܒܰܝ̈ܬܳܝܶܐ܆ ܫܪܳܐ ܠܰܢ. ܐܳܦ ܗܳܢܳܐ ܓܙܳܪ ܕܺܝܢܳܐ. ܐܳܦ ܗܽܘ܆ ܟܰܕ ܒܶܣܪܳܐ ܠܳܐ ܡܶܫܬܰܚܠܦܳܢܳܐܺܝܬ ܗܘ̣ܳܐ܆ ܥܰܠ ܒܶܣܪܳܐ ܢܰܓܕܶܗ ܠܪܽܘܚܳܐ܆ ܟܰܕ ܚܰܝܶܕ ܠܰܓܒܺܝܠܬܳܐ ܗܳܝ ܕܶܐܬܚܰܝܒܰܬ݂. ܐܰ‌ܠܳܗܽܘܬܳܐ ܗܳܝ ܕܺܝܠܶܗ܆ ܘܗܳܟܰܢܳܐ ܠܟܽܠܶܗ ܓܶܢܣܳܐ ܕܺܝܠܰܢ ܫܰܕܪܳܗ̇ ܠܛܰܝܒܽܘܬܳܐ.

14: ܘܰܚܙܳܐ ܐܳܡܰܪ ܠܪܽܘܚܳܐ ܕܰܐ‎ܠܳܗܳܐ. ܕܢܳܚܶܬ݂ ܐܰܝܟ ܝܰܘܢܳܐ^[21]. ܐܰܝܟܰܢܳܐ ܕܬܶܬܚܰܘܶܐ ܓܰܠܝܳܐܺܝܬ܆ ܕܚܰܕ ܐܺܝܬܰܘܗ̱ܝ ܐܰ‎ܠܳܗܳܐ ܕܕܺܝܰܬܺܝܩܺܐ ܥܰܬܺܝܩܬܳܐ ܘܕܰܚܕܰܬܳܐ. ܘܰܠܥܽܘܗܕܳܢܳܐ ܢܰܝܬܶܐ ܕܛܰܘܦܳܢܳܐ ܗܰܘ ܕܰܒܝܰܘ̈ܡܰܝ ܢܽܘܚ. ܐܰܟܙܢܳܐ ܓܶܝܪ ܕܗܳܝܕܶܝܢ܆ ܝܰܘܢܳܐ ܣܰܒܪܰܬ݂ ܠܢܰܘܚܳܐ ܕܪܽܘܓܙܳܐ ܕܰܐ‎ܠܳܗܳܐ܆ ܗܳܟܰܢܳܐ ܐܳܦ ܗܳܫܳܐ ܕܡܽܘܬܳܐ ܕܝܰܘܢܳܐ ܡܰܘܕܥܳܐ ܛܰܘܦܳܢܳܐ ܕܰܚܛܺܝܬܳܐ ܘܬܰܪܥܽܘܬܳܐ ܕܥܳܠܡܳܐ.

15: ܠܘܳܬ ܗܳܠܶܝܢ܆ ܡܳܢܳܐ ܐܳܡܪܺܝܢ ܐܢ̱ܬܽܘܢ ܠܰܢ؟ ܐܰܢ̱ܬܽܘܢ ܡܣܰܝܥܳܢ̈ܶܐ ܕܚܰܣܺܝܪܽܘܬ݂ ܗܰܘܢܳܐ ܗܰܓܳܓܳܝܬܳܐ ܕܶܐܘܛܶܘܟ̥ܶܐ ܘܰܕܡܰܢܺܝܢܳܝ̈ܶܐ ܗܳܢܽܘܢ ܕܠܳܐ ܐܰ‌ܠܳܗ. ܐܶ‎ܠܽܘ ܠܳܐ ܓܶܝܪ. ܕܒܶܣܪܳܐ ܗ̱ܘ ܫܘܶܐ ܒܓܶܢܣܳܐ ܕܺܝܠܰܢ. ܘܕܰܫܘܶܐ ܠܰܢ ܒܽܐܘܣܺܝܰܐ ܡܶܠܬܶܗ ܕܰܐ‎ܠܳܗܳܐ. ܚܰܝܶܕ ܠܶܗ ܒܰܩܢܽܘܡܳܐ܆ ܡܳܢܳܐ ܥܬܺܝܕܳܐ ܗ̱ܘܳܬ ܕܬܰܘܬܰܪ ܠܰܢ ܡܰܚܰܬܬܶܗ ܕܪܽܘܚܳܐ܆ ܟܰܕ ܥܰܠ ܪܺܝܫܺܝܬܳܐ ܐ̱ܚܪܺܬܳܐ ܐܶܬܳܬ܆ ܘܠܰܘ ܥܰܠ ܗܳܝ ܕܓܶܢܣܳܐ ܕܺܝܠܰܢ؟ ܐܰܝܟܰܢܳܐ ܕܶܝܢ ܠܘܳܬܰܢ ܥܶܒܪܰܬ݂ ܗܺܝ ܛܰܝܒܽܘܬܳܐ܆ ܗܳܢܽܘܢ ܕܡܶܛܽܠܳܬܗܽܘܢ ܦܳܪܽܘܩܰܢ ܟܽܠܗܶܝܢ ܣܳܥܰܪ ܗ̱ܘܳܐ܆ ܟܰܕ ܐܰܟܣܢܳܝܳܐ ‌ܐܺܝܬܰܘܗ̱ܝ ܠܰܝܫܳܐ ܘܠܰܘ ܗܽܘ ܟܰܕ ܗܽܘ ܠܰܓܒܺܝܠܬܳܐ ܕܫܰܪܟܳܐ܆ ܠܗܳܝ ܟܺܝܬ ܕܨܳܒܶܐ ܗ̱ܘܳܐ ܕܰܢܠܽܘܫ ܠܘܳܬܶܗ. ܐܰܝܟܰܢܳܐ ܕܶܝܢ ܡܶܢ ܣܝܳܡܳܐ ܕܰܒܦܽܘܚܳܡܳܐ ܕܰܚܙܳܬܳܐ ܕܝܰܘܢܳܐ܆ ܠܳܐ ܡܶܬܪܕܶܝܢ ܐܢ̱ܬܽܘܢ ܫܪܳܪܳܐ ܕܡܶܬܒܰܪܢܫܳܢܽܘܬܳܐ. ܐܳܦ ܓܶܝܪ ܐܶܡܰܪܘ ܐܶܘܰܢܓܶܠܺܝܣ̈ܛܶܐ܆ ܡܶܛܽܠ ܡܶܬܓܰܠܝܳܢܽܘܬܶܗ ܕܪܽܘܚܳܐ ܩܰܕܺܝܫܳܐ ܥܰܠ ܝܽܘܪܕܢܳܢ܆ ܕܶܐܬܚܙܺܝ. ܐܰܝܟ ܝܰܘܢܳܐ. ܠܽܘܩܳܐ ܕܶܝܢ܆ ܐܳܦ ܗܳܝ ܕܒܰܚܙܳܬܳܐ ܐܰܘܣܶܦ. ܡܶܛܽܠ ܕܶܝܢ ܡܶܬܒܰܤܪܳܢܽܘܬܳܐ ܕܡܳܪܰܢ ܘܰܐ‌ܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ 222ܗܰܘ ܐܰ‌ܠܑܳܗܳܐ ܘܡܶܠܬܳܐ ܡܶܛܽܠ ܟܺܝܬ ܕܠܰܘ ܒܰܚܙܳܬܳܐ ܒܰܠܚܽܘܕ ܐܺܝܬܶܝܗ̇ ܗ̱ܘܳܬ݂܆ ܐܶܠܳܐ ܒܰܫܪܳܪܳܐ܆ ܘܠܳܐ ܐ̱ܢܳܫ ܡܶܢܗܽܘܢ ܐܶܡܰܪ ܕܶܐܬܚܙܺܝ ܐܰܝܟ ܒܰܪܢܳܫܳܐ܆ ܐܶܠܳܐ. ܕܒܰܫܪܳܪܳܐ ܤܛܰܪ ܡܶܢ ܫܽܘܚܠܳܦܳܐ ܗܘ̣ܳܐ ܒܰܪܢܳܫܳܐ.

16: ܡܶܛܽܠܗܳܕܶܐ. ܐܳܦ ܐܶܡܳܐ. ܡܶܬܢܰܣܒܳܐ܆ ܐܳܦܶܢ ܒܬܽܘܠܬܳܐ ܗ̱ܝ. ܘܙܰܒܢܳܐ ܕܒܰܛܢܳܐ ܗܰܘ ܕܰܡܬܰܚܰܡ ܐܳܦܶܢ ܕܠܳܐ ܙܰܪܥܰܐ ܗ̱ܘ. ܘܝܰܠܕܳܐ. ܘܥܰܙܪܽܘܪ̈ܶܐ. ܘܺܝܢܰܩܬܳܐ ܕܚܰܠܒܳܐ. ܘܰܓܙܽܘܪܬܳܐ. ܘܬܰܪ̈ܒܝܳܬܳܐ ܕܩܰܘܡܬܳܐ. ܘܡܶܐܟܽܘܠܬܳܐ ܘܫܶܩܝܳܐ܆ ܘܗܳܠܶܝܢ ܕܫܰܪܟܳܐ ܕܺܝܠܳܝ̈ܳܬܳܐ ܕܣܽܘܪܳܩܳܐ ܨܶܒܝܳܢܳܝܳܐ. ܗܳܠܶܝܢ ܟܺܝܬ ܕܕܰܡܚܰܪܪ̈ܳܢ ܡܶܢ ܚܛܺܝܬܳܐ ܒܨܶܒܝܳܢܶܗ ܩܰܒܶܠ ‌ܐܶܢܶܝܢ. ܗܘ̣ܳܐ ܓܶܝܪ ܡܶܢ ܐܰܢ̱ܬܬܳܐ. ܗܘ̣ܳܐ ܬܚܶܝܬ ܢܳܡܽܘܣܳܐ^[22].

17: ܐܶܠܳܐ. ܠܘܳܬ݂ ܒܰܪ̱ܬ ܩܳܠܳܐ ܕܰܐܒܳܐ ܡܫܰܢܶܐ ܐ̱ܢܳܐ܆ ܗܳܝ ܕܡܶܢ ܫܡܰܝܳܐ ܐܶܬܬܰܝܬܝܰܬ݂ ܘܶܐܡܪܰܬ݂: ܗܳܢܳܐ ‌ܐܺܝܬܰܘܗ̱ܝ ܒܪܳܐ ܕܺܝܠܝ ܚܰܒܺܝܒܳܐ ܗܰܘ ܕܒܶܗ ܐܶܨܛܒܺܝܬ̣^[23]܆ ܘܰܠܪܽܘܫܥܳܐ ܢܶܣܛܽܘܪܝܰܢܶܐ ܡܶܢ ܥܶܩܳܪܳܐ ܬܶܠܫܰܬ݂܆ ܗܰܘ ܕܡܶܢ ܒܳܬܰܪ ܚܕܳܝܽܘܬܳܐ ܗܳܝ ܕܗܳܟܰܢܳܐ ܐܺܝܬܶܝܗ̇ ܠܳܐ ܡܶܬܡܰܠܠܳܢܺܝܬܳܐ ܘܠܳܐ ܡܶܬܦܰܠܓܳܢܺܝܬܳܐ܆ ܡܦܰܠܶܓ ܠܶܗ ܠܥܰܡܰܢܽܘܐܶܝܠ ܒܰܬܪܰܝܳܢܽܘܬܳܐ ܕܰܟܝܳܢ̈ܶܐ. ܓܰܠܝܳܐܺܝܬ ܓܶܝܪ ܐܶܡܰܪ: ܘܰܐܝܟ ܗܰܘ ܕܰܒܨܶܒܥܳܐ ܡܚܰܘܶܐ ܗ̱ܘܳܐ. ܗܳܢܳܐ ‌ܐܺܝܬܰܘܗ̱ܝ ܒܪܳܐ ܕܺܝܠܝ܆ ܗܰܘ ܕܡܶܢ ܗܳܢܽܘܢ ܕܩܳܝܡܺܝܢ ܚܕܳܪ̈ܰܘܗ̱ܝ ܡܶܬܚܙܶܐ܆ ܘܠܰܘ ܐܰܝܟ ܢܶܣܛܽܘܪܺܝܽܘܤ܆ ܗܰܘ ܕܰܒܗܰܘ ܕܡܶܬܚܙܶܐ ܡܛܰܫܰܝ.

18: ܐܶ‎ܠܽܘ ܓܶܝܪ ܗܳܕܶܐ ܐܺܝܬܶܝܗ̇ ܗ̱ܘܳܬ݂. ܐܳܡܰܪ ܗ̱ܘܳܐ܆ ܕܰܒܗܳܢܳܐ ‌ܐܺܝܬܰܘܗ̱ܝ ܒܪܳܐ ܕܺܝܠܝ܆ ܘܠܰܘ ܕܗܳܢܳܐ ‌ܐܺܝܬܰܘܗ̱ܝ ܒܪܳܐ ܕܺܝܠܝ. ܐܶܠܳܐ ܟܰܕ ܡܚܰܘܝܳܢܳܐܺܝܬ ܐܶܡܰܪ: ܕܗܳܢܳܐ ‌ܐܺܝܬܰܘܗ̱ܝ ܒܪܳܐ ܕܺܝܠܝ܆ ܚܰܘܺܝ ܕܗܰܘ ܕܡܶܬܚܙܶܐ. ܡܶܛܽܠ ܕܰܡܒܰܣܰܪ ܗ̱ܘܳܐ܆ ܗܽܘ ܟܰܕ ܗܽܘ ‌ܐܺܝܬܰܘܗ̱ܝ ܐܳܦ ܡܶܠܬܳܐ ܠܳܐ ܡܶܬܚܰܙܝܳܢܳܐ ܒܰܟܝܳܢܳܐ܆ ܘܰܒܪܳܐ ܫܰܪܺܝܪܳܐ ܕܰܐܒܳܐ. ܗܳܝ ܓܶܝܪ ܕܺܐܝܬܰܘܗ̱ܝ܆ ܡܚܰܘܝܳܢܺܝܬܳܐ ܐܺܝܬܶܝܗ̇ ܕܫܰܪܺܝܪܽܘܬܳܐ ܘܰܕܫܰܘܝܽܘܬܳܐ ܕܒܽܐܘܣܺܝܰܐ. ܐܰܝܟܰܢܳܐ ܕܡܶܢ ܗܳܪܟܳܐ܆ ܐܳܦ ܢܕܺܝܕܽܘܬܳܐ ܕܰܐܪܺܝܽܘܤ ܬܶܦܽܘܩ ܗܳܝ ܕܳܐܡܰܪ: ܕܺܐܝܬ ܗ̱ܘܳܐ ܐܶܡܰܬܝ ܕܠܳܐ ‌ܐܺܝܬܰܘܗ̱ܝ ܗ̱ܘܳܐ ܒܪܳܐ. ܐܰܡܺܝܢܳܐܺܝܬ ܓܶܝܪ ‌ܐܺܝܬܰܘܗ̱ܝ܆ ܐܰܝܟܰܢܳܐ ܕܰܐܣܗܕܰܬ݂ ܒܰܪ̱ܬ ܩܳܠܳܐ ܟܰܕ ܐܰܙܥܩܰܬ݂ ܡܶܢ ܦܰܪܨܽܘܦܳܐ ܕܰܐܒܳܐ. ܕܗܳܢܳܐ ‌ܐܺܝܬܰܘܗ̱ܝ ܒܪܳܐ ܕܺܝܠܝ. ܥܰܠ ܒܶܪ̈ܝܳܬܳܐ ܡܰܢ ܓܶܝܪ. ܗܳܠܶܝܢ ܕܰܒܙܰܒܢܳܐ ܗܳܘ̈ܝܳܢ܆ ܗܳܝ ܕܺܐܝܬܰܘܗ̱ܝ ܗ̱ܘܳܐ. ܘܗܳܝ ܕܢܶܗܘܶܐ ‌ܐܺܝܬܰܘܗ̱ܝ ܡܶܫܬܰܩܠܳܐ. ܐܰ‎ܠܳܗܳܐ ܕܶܝܢ. ‌ܐܺܝܬܰܘܗ̱ܝ ܐܰܡܺܝܢܳܐܺܝܬ. ܟܰܕ ܘܠܳܐ ܒܙܰܒܢܳܐ ܗܰܘ ܕܰܥܒܰܪ. ܐܳܦܠܳܐ ܒܗܰܘ ܕܰܥܬܺܝܕ ܡܶܬܬܰܚܰܡ. ܐܶܠܳܐ ܐܺܝܬ ܠܶܗ ܕܩܳܐܶܡ. ܠܟܽܠܶܗ ܙܰܒܢܳܐ܆ ܘܰܕܠܳܐ ܫܽܘܠܳܡ ‌ܐܺܝܬܰܘܗ̱ܝ. ܘܰܕܗܽܘ ܗܳܟܘܳܬ݂ ܐܰܡܺܝܢܳܐܺܝܬ ܘܕܰܒܠܳܐ ܡܶܕܶܡ ܡܫܰܚܠܰܦ.

19: ܗܳܝܕܶܝܢ ܕܚܰܒܺܝܒܳܐ. ܗܰܘܕ ܒܶܗ ܐܶܨܛܒܺܝܬ݂܆ ܟܰܕ ܠܰܡܕܰܒܪܳܢܽܘܬܳܐ ܕܡܶܛܽܠܳܬܰܢ ܦܰܐܝܳܐ܆ ܬܽܘܒ ܠܪܰܒܽܘܬܳܐ ܕܪܶܚܡܰܬ̣ ܐ̱ܢܳܫܽܘܬܳܐ ܡܚܰܘܝܳܐ. ܡܶܛܽܠ ܓܶܝܪ ܕܟܰܕ ܡܶܢ ܚܛܺܝܬܳܐ ܡܶܬܬܰܡܠܟܺܝܢ ܗ̱ܘܰܝܢ܆ ܡܰܩܪ̈ܒܳܢܶܐ ܩܳܡܢܰܢ ܠܰܐܠܳܗܳܐ. ܘܰܗܘܰܝܢܰܢ ܐܰܟܣܢܳܝ̈ܶܐ ܠܚܽܘܒܶܗ܆ ܘܺܐܝܬܰܝܢ ܗ̱ܘܰܝܢ ܒܰܟܝܳܢܳܐ ܒܢܰܝ̈ܳܐ ܕܪܽܘܓܙܳܐ^[24]. ܕܣܰܒܪܳܐ ܠܰܝܬ ܠܗܽܘܢ܆ ܘܰܕܠܳܐ ܐܰ‌ܠܳܗ ܒܥܳܠܡܳܐ܆ ܣܢܺܝ̈ܶܐܐ܆ ܕܣܳܢܶܝܢ ܚ̱ܢܰܢ ܠܰܚܕܳܕ̈ܶܐ܆ ܘܡܶܛܽܠ ܗܳܕܶܐ ܕܡܶܣܬܢܶܝܢ ܚ̱ܢܰܢ ܟܺܐܢܳܐܺܝܬ ܡܶܢ ܐܰ‎ܠܳܗܳܐ^[25]܆ ܟܰܕ ܠܣܶܢܶܐܬܳܐ ܗܳܝ ܫܳܪܶܐ ܗ̱ܘܳܐ܆ ܘܠܰܩܪܳܒܳܐ ܗܰܘ ܕܠܳܐ ܚܽܘܒܳܐ ܐܶܡܰܪ: ܚܰܒܺܝܒܳܐ ܗܰܘ ܕܒܶܗ ܐܶܨܛܒܺܝܬ݂. ܟܰܕ ܠܚܽܘܒܳܐ ܗܰܘ ܕܰܠܘܳܬܰܢ ܒܥܰܡܰܢܽܘܐܶܝܠ ܩܰܕܡܳܝܳܐ ܡܫܰܬܶܐܤ. ܩܰܕܺܝܡܳܐ ܓܶܝܪ ܝܺܕܺܝܥܳܐ. ܕܗܰܘ ܠܳܐ ܣܢܺܝܩ ܗ̱ܘܳܐ ܥܰܠ ܒܰܪ̱ܬ ܩܳܠܳܐ ܕܰܐܝܟ ܗܳܕܶܐ܆ ܐܰܝܟ ܡܰܢ ܕܰܒܪܳܐ ܫܰܪܺܝܪܳܐ ‌ܐܺܝܬܰܘܗ̱ܝ ܕܡܶܢ ܐܰܒܳܐ ܡܶܬܪܚܶܡ ܘܪܳܚܶܡ ܠܰܐܒܳܐ. ܡܰܠܽܘܢ ܕܶܝܢ ܟܰܕ ܕܺܝܠܳܗ̇ ܟܰܕ ܕܺܝܠܳܗ̇ ܕܰܚܕܳܐ ܐܽܘܣܺܝܰܐ ܘܨܶܒܝܳܢܳܐ ‌ܐܺܝܬܰܘܗ̱ܝ.

20: ܗܳܝܕܶܝܢ ܕܒܶܗ ܐܶܨܛܒܺܝܬ݂܆ ܗܳܕܶܐ ܐܺܝܬܶܝܗ̇. ܚܰܒܺܝܒܳܐ ܩܪܺܝܬ݂. ܐܳܡܰܪ: ܟܰܕ ܙܰܪܥܳܐ ܕܚܽܘܒܳܐ ܗܰܘ ܕܰܠܘܳܬ ܓܶܢܣܳܐ ܕܰܒܢܰܝ̈ܢܳܫܳܐ ܪܳܡܶܐ ܐ̱ܢܳܐ܆ ܗܳܢܽܘܢ ܕܙܳܕܶܩ ܗ̱ܘܳܐ ܕܶܐ݀ܣܢܶܐ ܐܶܢܽܘܢ. ܠܰܘ ܕܶܝܢ ܐܰܝܟ ܗܰܘ ܕܡܶܢ ܥܶܠܬܳܐ ܡܶܕܶܡ ܟܺܐܢܳܐܺܝܬ ܠܗܳܕܶܐ ܐܳܬܶܐ ܐ̱ܢܳܐ܆ ܐܶܠܳܐ ܡܶܛܽܠ ܕܫܰܦܺܝܪܳܐܺܝܬ ܠܳܗ̇ ܐܶܣܬܰܒܪܰܬ݂ ܠܺܝ. ܗܳܝ ܕܶܐ݀ܦܪܽܘܩ ܒܺܐܝܕܰܝ̈ܟ ܠܗܳܢܽܘܢ ܕܶܐܒܰܕܘ܆ ܘܕܳܐܦܠܳܐ ܚܰܕ ܣܰܒܪܳܐ ܐܺܝܬ ܠܗܽܘܢ ܠܡܶܬܦܪܳܩܽܘ. ܫܰܦܺܝܪܽܘܬ݂ ܨܶܒܝܳܢܳܐ ܓܶܝܪ ܡܳܪܳܢܳܐܺܝܬ ܐܺܝܬܶܝܗ̇܆ ܬܰܪܥܺܝܬܳܐ ܩܰܕܡܳܝܬܳܐ ܘܨܶܒܝܳܢܳܝܬܳܐ ܗܳܝ ܕܠܰܘ ܡܶܛܽܠ ܥܶܠܬܳܐ ܡܶܕܶܡ ܡܶܣܬܰܒܪܳܐ܆ ܐܶܠܳܐ ܡܶܛܽܠܳܬܳܗ̇ ܕܺܝܠܳܗ̇ ܕܛܳܒܬܳܐ. ܘܠܳܐ ܡܶܕܶܡ ܕܶܝܢ ܗܳܟܰܢܳܐ܆ ܘܠܳܐ ܠܐ̱ܢܳܫ ܐܺܝܬ ܕܺܐܝܬܰܘܗ̱ܝ ܠܶܗ ܛܳܒܳܐ ܘܰܡܚܰܕܝܳܢܳܐ܆ ܐܰܝܟ ܕܠܰܐܠܳܗܳܐ ܗܳܝ ܕܰܢܥܰܕܰܪ ܘܢܶܦܪܽܘܩ.

21: ܐܶܠܳܐ ܚܳܙܶܐ ܐ̱ܢܳܐ ܠܶܗ ܬܽܘܒ ܠܙܰܒܢܳܐ. ܕܬܳܟܶܤ ܠܳܗ̇ ܠܡܶܠܬܳܐ ܘܰܠܟܽܘܢ ܕܰܠܐܶܝܢ ܐܢ̱ܬܽܘܢ܆ ܠܰܘ ܡܶܛܽܠ ܣܰܒܥܽܘܬܳܐ. ܐܶܠܳܐ. ܡܶܛܽܠ ܩܛܺܝܪܳܐ ܕܟܶܢܫܳܐ ܕܰܠܘܳܬ ܫܶܡܥܳܐ܆ ܘܰܐܢܰܢܩܺܐ ܠܺܝ ܕܰܐܥܒܪܺܝܘܗ̱ܝ ܠܝܽܘܚܰܢܳܢ ܠܗܰܘ ܩܳܠܳܐ ܕܩܰܕܶܡ ܐܶܬܳܐ ܘܩܰܕܶܡ ܪܗܶܛ ܩܕܳܡ ܡܶܠܬܳܐ܆ ܠܗܰܘ ܕܡܶܢ ܥܩܰܪܬܳܐ ܩܕܳܡ ܗܰܘ ܕܡܶܢ ܒܬܽܘܠܬܳܐ܆ ܠܗܰܘ ܕܰܒܡܰܕܒܪܳܐ ܡܛܰܫܰܝ ܗ̱ܘܳܐ ܘܰܐܟܙܢܳܐ ܕܡܶܢ ܕܽܘܟ̈ܝܳܬܳܐ ܟܰܣ̈ܝܳܬܳܐ ܘܠܳܐ ܡܶܬܕܰܪ̈ܟܳܢܝܳܬܳܐ ܐܶܬܚܙܺܝ܆ ܩܕܳܡ ܗܰܘ ܕܡܶܢ ܫܡܰܝܳܐ ܐܶܬܳܐ܆ ܘܠܳܐ ܡܶܬܡܰܠܠܳܢܳܐܺܝܬ ܩܕܳܡ ܥܳܠ̈ܡܶܐ ܐܶܬܺܝܠܶܕ ܡܶܢ ܐܰܒܳܐ. ܘܬܽܘܒ ܠܳܐ ܡܶܬܦܰܫܩܳܢܳܐܺܝܬ ܒܰܒܣܰܪ ܡܶܢ ܐܶܡܳܐ ܒܬܽܘܠܬܳܐ ܘܰܕܢܰܚ ܠܰܢ܆ ܘܗܳܢܳܐ ܥܺܐܕܳܐ ܕܢܽܘܗܪ̈ܶܐ ܐܰ‌ܠܶܦ ܠܰܢ^[26]. ܢܽܘܗܪ̈ܶܐ ܓܶܝܪ ܩܳܪܶܝܢ ܚ̱ܢܰܢ ܠܚܰܓܳܐ ܗܳܢܳܐ ܕܩܰܪܺܝܒ܆ ܡܶܛܽܠ ܟܺܝܬ ܕܰܬܠܳܬܰܝ̈ܗܽܘܢ ܢܽܘܗܪ̈ܶܐ ܕܰܬܠܳܬܳܐ ܩܢܽܘܡ̈ܶܐ܆ ܟܰܕ ܚܕܳܐ ܡܰܢܗܪܳܢܽܘܬܳܐ ܕܡܶܢ ܚܕܳܐ ܐܽܘܣܺܝܰܐ ܡܰܢܗܪܺܝܢ^[27]. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܠܘܳܬ ܫܶܦܥܰܘ̈ܗ̱ܝ ܕܝܽܘܪܕܢܳܢ. ܒܝܰܘܡܳܐ ܗܳܢܳܐ ܕܩܳܐܶܡ ܐܶܬܓܠܺܝܘ^[28]܆ ܗܳܢܽܘܢ ܕܟܰܕ ܒܗܽܘܢ ܥܳܡܕܺܝܢ ܚ̱ܢܰܢ ܡܶܬܢܰܗܪܺܝܢܰܢ ܚ̱ܢܰܢ.

22: ܡܰܢܽܘ ܗܳܟܺܝܠ ‌ܐܺܝܬܰܘܗ̱ܝ ܗ̱ܘܳܐ܆ ܗܰܘ ܕܰܠܐ̱ܪܳܙܳܐ ܗܳܢܳܐ ܕܫܰܦܺܝܪܽܘܬ݂ ܕܶܚܠܬܳܐ ܡܫܰܡܶܫ ܗ̱ܘܳܐ. ܝܽܘܚܰܢܳܢ ܗܰܘ ܕܪܰܒ ܗ̱ܘܳܐ ܒܺܝܠܺܝ̈ܕܶܐ ܕܢܶܫ̈ܶܐ^[29]. ܗܰܘ ܬܚܽܘܡܳܐ ܕܰܢܒܺܝ̈ܶܐ ܘܕܰܒܗܳܕܶܐ ܠܟܽܠܗܽܘܢ ܥܳܒܰܪ܆ ܡܶܛܽܠ ܕܰܠܗܰܘ ܕܡܶܢܗܽܘܢ ܡܶܬܢܰܒܶܐ ܗ̱ܘܳܐ ܚܙܳܐ ܘܰܠܟܽܠܢܳܫ ܚܰܘܝܶܗ܆ ܘܣܳܡ ܫܽܘܠܳܡܳܐ ܠܰܢ̈ܒܺܝܰܘܳܬܳܐ ܕܰܥܠܰܘܗ̱ܝ. ܗܰܘ ܕܠܳܐ ܬܽܘܪܣܳܝܳܐ܆ ܘܕܳܐܦܠܳܐ ܠܰܚܡܳܐ ܐܳܟܶܠ ܗ̱ܘܳܐ ܘܳܐܦܠܳܐ ܫܳܬܶܐ ܗ̱ܘܳܐ܆ ܘܕܰܒܕܽܘܒܳܪܳܐ ܠܡܰܠܰܐܟ̈ܶܐ ܕܳܡܶܐ ܗ̱ܘܳܐ. ܐܶܠܳܐ ܡܳܢܳܐ ܐܶܚܰܫ. ܐܳܦ ܟܰܕ ܠܙܰܒܢܳܐ ܡܰܫܶܦ ܐ̱ܢܳܐ܆ ܨܳܒܶܐ ܐ̱ܢܳܐ ܕܶܐܫܰܠܡܺܝܘܗ̱ܝ ܠܡܺܐܡܪܳܐ. ܘܬܽܘܒ ܡܶܢ ܡܝܰܬܪܽܘܬܶܗ ܕܡܰܥܡܕܳܢܳܐ ܡܶܙܕܟܶܐ ܐ̱ܢܳܐ܆ ܘܰܠܘܳܬ ܗܳܝ ܕܺܐܡܰܪ ܡܶܬܢܓܶܕ ܐ̱ܢܳܐ. ܐܶ݀ܫܬܽܘܩ ܕܶܝܢ ܒܪܰܡ܆ ܐܰܝܟܰܢܳܐ ܕܠܳܐ ܟܰܕ ܙܥܽܘܪ̈ܝܳܬܳܐ ܐܳܡܰܪ ܐ̱ܢܳܐ ܡܶܛܽܠ ܕܫܳܥܬܳܐ ܡܣܰܪܗܒܳܐ܆ ܐܰ݀ܥܘܶܠ^[30] ܒܗܰܘ ܕܡܶܬܩܰܠܰܤ. ܡܰܠܽܘܢ ܕܶܝܢ ܠܟܽܘܢ ܐܰ݀ܚܣܰܪ܆ ܟܰܕ ܠܗܳܠܶܝܢ ܕܰܡܙܰܡ̈ܢܳܢ ܝܽܘܬܪܳܢܳܐ ܪܰܒܳܐ܆ ܡܶܣܟܺܢܳܐܺܝܬ ܡܶܫܬܰܥܶܐ ܐ̱ܢܳܐ.

23: ܢܶܕܚܰܠ ܗܳܟܺܝܠ܆ ܕܝܽܘܚܰܢܳܢ ܡܰܢ ܕܽܘܒܳܪܳܐ ܕܰܐܝܟ ܗܳܢܳܐ ܡܚܰܘܶܐ ܗ̱ܘܳܐ܆ ܟܰܕ ܗܳܢܶܝܢ ܡܶܬܢܰܒܶܐ ܗ̱ܘܳܐ܆ ܗܳܠܶܝܢ ܕܰܚܢܰܢ ܒܢܶܣܝܳܢܗܶܝܢ ܗܘ̣ܰܝܢܰܢ܆ ܚܢܰܢ ܕܶܝܢ ܗܳܢܽܘܢ ܕܰܠܪܰܘܪ̈ܒܳܬܳܐ ܐܶܫܬܘܺܝܢܰܢ܆^[31] ܒܗܰܢܺܝ̈ܐܘܳܬܳܐ ܥܢܶܝܢ ܚ̱ܢܰܢ܆ ܘܟܰܕ ܠܥܺܐܕܳܐ ܕܢܽܘܗܪ̈ܶܐ ܡܫܰܡܠܶܝܢ ܚ̱ܢܰܢ܆ ܥܒܳܕ̈ܶܐ ܕܚܶܫܽܘܟܳܐ ܣܳܥܪܺܝܢ ܚ̱ܢܰܢ. ܗܰܘ ܓܫܰܦ ܒܪܺܝܫܶܗ ܕܰܡܫܺܝܚܳܐ ܟܰܕ ܥܳܡܶܕ ܗ̱ܘܳܐ܆ ܟܰܕ ܠܘܳܬ ܡܰܟܺܝܟܽܘܬܳܐ ܢܚܶܬ݂܆ ܘܐ̱ܢܳܫܳܐܺܝܬ ܥܰܡ ܒܢܰܝ̈ܢܳܫܳܐ ܡܶܬܗܰܦܰܟ ܗ̱ܘܳܐ. ܡܶܛܽܠ ܟܺܝܬ ܕܗܳܕܶܐ ܬܳܒܥܳܐ ܗ̱ܘܳܬ ܡܶܠܬܳܐ ܕܰܡܕܰܒܪܳܢܽܘܬܳܐ. ܐܰܢ̱ܬ ܕܶܝܢ ܒܟܽܠܝܽܘܡ. ܠܟܽܠܶܗ ܓܳܐܶܫ ܐܰܢ̱ܬ ܒܺܐܝ̈ܕܰܝܟ ܘܗܳܝ ܕܫܰܪܟܳܐ. ܝܳܕܥܺܝܢ ܐܢ̱ܬܽܘܢ ܗܘ ܗܳܢܽܘܢ ܕܡܰܐܪܙܺܝܢ. ܐܳܦܶܢ ܐܶܢܳܐ ܡܶܛܽܠ ܡܰܫܡܰܥܬܳܐ ܠܳܐ ܡܰܐܪܰܙܬܳܐ^[32] ܠܡܺܐܡܰܪ ܠܳܐ ܡܶܫܟܰܚ ܐ̱ܢܳܐ. ܘܶܐܡܰܬܝ ܓܳܐܶܫ ܐ̱ܢܳܐ ܠܶܗ. ܡܶܢ ܒܳܬܰܪ ܙܳܟܽܘܬܳܐ ܕܰܨܠܺܝܒܳܐ. ܡܶܢ ܒܳܬܰܪ ܫܪܳܝܳܐ ܕܡܰܘܬܳܐ. ܡܶܢ ܒܳܬܰܪ ܩܝܳܡܬܳܐ ܡܶܢ ܡܺܝ̈ܬܶܐ. ܡܶܢ ܒܳܬܰܪ ܡܰܣܰܩܬܳܐ ܕܠܰܫܡܰܝܳܐ. ܟܰܕ ܟܽܠܶܗ ܦܰܐܝܽܘܬ ܐܰ‎ܠܳܗܳܐܺܝܬ ܐܳܬܶܐ܆ ܘܰܒܬܰܪܥܺܝܬܳܐ ܠܢܽܘܗܪܳܐ ܕܺܝܠܶܗ ܡܰܒܪܶܩ܆ ܘܠܰܘ ܐ̱ܢܳܫܳܐܺܝܬ ܡܶܛܽܠ ܡܕܰܒܪܳܢܽܘܬܳܐ ܫܳܪܶܐ.

24: ܥܰܬܶܕ ܠܶܗ ܗܳܟܺܝܠ ܢܰܨܺܝܚܳܐ. ܠܒܶܝܬ ܡܰܫܪܝܳܐ ܗܰܘ ܕܺܝܠܳܟ. ܐܰܫܺܝܓ ܒܕܰܟ̈ܝܳܬܳܐ ܐܺܝܕܰܝ̈ܳܐ ܕܺܝܠܳܟ܆ ܐܰܝܟܰܢܳܐ ܕܗܰܘ ܕܰܡܙܰܡܰܪ ܐܳܡܰܪ: ܟܰܕ ܡܶܢ ܟܽܠ ܣܳܥܽܘܪܽܘܬܳܐ ܡܛܰܘܰܫܬܳܐ ܘܥܰܘܳܠܬܳܐ ܡܰܪܚܶܩ ܐܰܢ̱ܬ. ܛܰܢ ܒܥܳܢܘܳܝܽܘܬܶܗ ܕܝܽܘܚܰܢܳܢ܆ ܘܰܒܡܰܪܚܩܳܢܽܘܬܳܐ ܗܳܝ ܕܡܶܢ ܡܶܐܟ̈ܠܳܬܳܐ. ܗܳܝ ܕܳܐܦ ܠܽܘܩܝܰܐܢܽܘܤ ܟܰܕ ܛܰܢ ܒܳܗ̇܆ ܗܰܘ ܕܕܽܘܟܪܳܢܶܗ ܡܫܰܡܠܶܝܢ ܚ̱ܢܰܢ܆ ܒܰܟ̈ܠܺܝܠܶܐ ܕܣܳܗܕܽܘܬܳܐ ܐܶܨܛܰܒܰܬ݂܆ ܘܗܳܫܳܐ ܒܝܰܕ ܣܰܓܺܝ̈ܶܐܐ ܗܳܢܽܘܢ ܕܚܳܕܪܺܝܢ ܡܫܰܪܬܚܳܐܺܝܬ ܡܬܰܪܣܶܐ ܠܰܡܫܺܝܚܳܐ܆ ܐܶܢܗܽܘ ܕܰܐܢ̱ܬܘܢ ܟܰܕ ܠܕܽܘܟܪܳܢܶܗ ܡܝܰܩܪܺܝܢ ܐܢ̱ܬܽܘܢ܆ ܒܺܐܝ̈ܕܰܝܳܐ ܕܺܝܠܗܽܘܢ ܩܰܠܺܝܠ ܫܳܡܽܘ̈ܢܶܐ ܬܰܪܡܽܘܢ ܕܰܢܚܳܫܳܐ. ܡܶܛܽܠܗܳܕܶܐ ܓܶܝܪ ܠܚܰܓ̈ܶܐ ܕܣܳܗ̈ܕܶܐ ܪܳܗܛܺܝܢ ܗܳܢܽܘܢ ܕܰܣܢܺܝܩܺܝܢ܆ ܐܰܝܟܰܢܳܐ ܕܰܠܚܰܫܰܝ̈ܗܽܘܢ ܕܰܐܬܠܺܝ̈ܛܶܐ ܚܠܳܦ ܬܰܟ̈ܫܦܳܬܳܐ ܢܰܣܪܚܽܘܢ܆ ܘܰܠܘܳܬ݂ ܪ̈ܰܚܡܶܐ ܢܰܪܟܽܘܢܳܟܽܘܢ.

25: ܘܒܺܐܝܕܰܝ̈ܗܽܘܢ ܡܫܺܝܚܳܐ ܡܰܙܥܶܩ܆ ܟܰܕ ܩܳܠܳܐ ܪܰܒܳܐ ܡܫܰܡܰܪ. ܐܶܢ ܠܺܝ ܕܰܟܦܶܢ ܐ̱ܢܳܐ ܠܳܐ ܡܬܰܪܣܶܝܢ ܐܢ̱ܬܽܘܢ܆ ܘܟܰܕ ܥܰܪܛܶܠܳܝܳܐ ܐܺܝܬܰܝ. ܠܳܐ ܡܟܰܣܶܝܢ ܐܢ̱ܬܽܘܢ ܠܺܝ^[33]܆ ܘܰܠܟܽܠܗܶܝܢ ܗܳܠܶܝܢ ܕܺܝܠܝ ܛܥܰܝܬܽܘܢ܆ ܗܳܠܶܝܢ ܟܺܝܬ ܕܣܰܝܒܪܶܬ݂ ܡܶܛܽܠܳܬܟܽܘܢ܆ ܠܺܝܠܺܝܕܽܘܬܳܐ ܕܒܰܒܣܰܪ܆ ܠܡܰܚܰܬܬܳܐ ܕܰܠܘܳܬ ܝܽܘܪܕܢܳܢ܆ ܠܰܨܠܺܝܒܳܐ܆ ܠܩܰܒܪܳܐ ܡܰܥܒܶܕ ܚܰܝ̈ܶܐ܆ ܠܰܩܝܳܡܬܳܐ܆ ܠܛܳܒ̈ܳܬܳܐ ܗܳܠܶܝܢ ܕܰܡܠܺܝ̈ܟܳܢ܆ ܠܣܰܒܪ̈ܶܐ ܠܳܐ ܡܳܝܽܘ̈ܬܶܐ. ܐܶܬܟܰܚܕܘ ܗܳܟܺܝܠ ܡܶܢ ܐܶܬܠܺܝ̈ܣܘܳܬܳܐ ܕܣܳܗ̈ܕܶܐ܆ ܘܡܶܢ ܬܰܟ̈ܫܦܳܬܳܐ ܕܗܳܢܽܘܢ܆ ܕܰܒܗܶܝܢ ܡܰܘܡܶܝܢ ܠܟܽܘܢ ܗܳܢܽܘܢ ܡܶܣ̈ܟܺܢܶܐ܆ ܘܠܰܣܢܺܝܩܽܘܬܳܐ ܕܺܝܠܗܽܘܢ ܐܰܝܟ ܕܡܰܨܝܳܐ ܒܰܝܰܐܘ. ܗܳܠܶܝܢ ܠܘܳܬܟܽܘܢ ܡܫܺܝܚܳܐ. ܡܶܢ ܗܳܠܶܝܢ. ܠܳܐ ܢܰܗܡܶܐ ܐܰܚܰܝ̈. ܒܗܳܠܶܝܢ ܢܶܦܪܥܺܝܘܗ̱ܝ ܘܰܠܛܳܒ̈ܳܬܳܐ ܗܳܠܶܝܢ ܕܰܥܬܺܝ̈ܕܳܢ ܢܶܫܬܘܶܐ. ܒܛܰܝܒܽܘܬܳܐ ܘܰܒܪܶܚܡܰܬ݂ ܐ̱ܢܳܫܽܘܬܳܐ ܕܺܝܠܶܗ. ܠܗܰܘ ܕܦܰܐܝܳܐ ܬܶܫܒܽܘܚܬܳܐ. ܘܺܐܝܩܳܪܳܐ ܘܣܶܓܕܬܳܐ܆ ܥܰܡ ܐܰܒܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ. ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ. ܐܰܡܺܝܢ.

ܫܠܶܡ ܕܡܪܝ ܣܶܐܘܺܝܪܶܐ ܕܥܰܠ ܥܺܐܕܳܐ ܕܢܽܘܗܪ̈ܶܐ.

ܘܰܒܗܰܘܢܳܐ[1]

ܣܶܦܪܐ ܕܰܒܪܺܝܬܳܐ. 3: 16 [2]

ܠܘܩܐ. 2: 10 ـ 11[3]

ܠܘܩܐ. 1: 28 [4]

ܠܘܩܐ. 1: 42 [5]

ܠܘܩܐ. 2: 52 [6]

ܡܙܡܘܪ̈ܐ: 87: 3 [7]

ܠܘܩܐ. 2: 52 [8]

ܡܬܝ. 3: 11 ܠܘܩܐ. 3: 16[9]

ܡܬܝ. 3: 14 ـ 15[10]

ܠܡܫ̇ܠܝܘ[11]

ܡܬܝ. 5: 17 ـ 28[12]

ܠܘܩܐ. 2: 21 ـ 24 ܣܶܦܪܳܐ ܕܰܒܪܝܬܐ. 17: 10[13]

ܡܬܝ. 3: 7 [14]

ܝܘܚܢܢ. 1: 29 [15]

ܡܙܡܘܪ̈ܐ. 74: 13 ـ 14[16]

ܐܝܘܒ. 40: 21 [17]

ܡܙܡܘܪ̈ܐ. 143: 5 ـ 7 [18]

ܥܒܪ̈ܝܐ. 1: 14 [19]

ܣܦܪܐ ܕܒܪܝܬܐ. 6: 3 [20]

ܡܬܝ. 3: 16 [21]

ܓܠ̈ܛܝܐ. 4: 4 [22]

ܡܬܝ. 3: 17 [23]

ܐܦܣ̈ܝܐ. 2: 3[24]

ܛܝܛܘܣ. 3: 3 [25]

[26]ܣܳܡ ܠܰܢ ܢܳܡܽܘܣܳܐ.   ܕܩܰܕܺܝܫܳܐ ܣܶܐܘܺܝܪܶܐ ܡܶܢ ܡܺܐܡܪܳܐ ܕܝܕ̄ ܕܰܐܪܒܰܥܣܪ ܕܰܐܦܝܬܪ̈ܽܘܢܝ ܥܰܠ ܢܽܘܗܪ̈ܶܐ ܩܳܪܶܝܢܰܢ.

[27]ܡܶܛܠ ܕܰܬܠܳܬܰܝܗܽܘܢ ܩܢܽܘ̈ܡܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ. ܚܰܕ ܕܢܳܚܳܐ ܡܶܢ ܚܕܳܐ ܐܽܘܣܺܝܰܐ ܡܰܢܗܪܺܝܢ.

ܐ. ܛܝܡܬܐܘܣ. 3: 16[28]

ܡܬܝ. 11: 11[29]

ܐܶܛܠܽܘܡ ܠܗܰܘ[30]

ܪ̈ܗܘܡܝܐ. 13: 12 [31]

ܠܐ ܝܰܠܺܝܦܬܳܐ[32]

ܡܬܝ. 25: 42 [33]