فنقيث الصوم الأربعيني

ܥܰܠ ܬܶܕܡܽܘܪܬܳܐ ܗܳܝ ܕܰܣܥܰܪ ܡܳܪܰܢ ܒܩܳܛܢܶܐ ܡܕܺܝܢ̱ܬܳܐ ܕܰܓܠܺܝܠܳܐ

ܩܰܕܡܳܝܰܬ ܢܳܓܰܗ ܬܪܶܝܢ ܒܫܰܒܳܐ

ܕܢܳܓܰܗ ܬܠܳܬܳܐ ܒܫܰܒܳܐ

ܬܽܘܒ ܕܝܽܘܡ ܐܰܪܒܥܳܐ

ܕܢܳܓܰܗ ܚܰܡܫܳܐ ܕܫܰܒܬܳܐ ܩܰܕܡܳܝܬܳܐ܀

ܬܽܘܒ ܕܪܰܡܫܳܐ ܕܰܥܪܽܘܒܬܳܐ ܕܫܰܒܬܳܐ ܩܰܕܡܳܝܬܳܐ ܕܨܰܘܡܳܐ

ܬܽܘܒ ܛܶܟܣܳܐ ܕܥܰܠ ܡܳܪܝ̱ ܐܰܦܪܶܝܡ ܡܰܠܦܳܢܳܐ ܣܽܘܪܝܳܝܳܐ ܘܡܳܪܝ̱ ܬܶܐܘܳܕܳܘܪܳܘܣ ܣܳܗܕܳܐ܇

ܬܽܘܒ ܛܶܟܣܳܐ ܕܚܰܕ ܒܫܰܒܳܐ ܕܰܬܪܶܝܢ ܕܨܰܘܡܳܐ ܥܰܠ ܗܰܘ ܓܰܪܒܳܢܳܐ

ܬܽܘܒ ܕܪܰܡܫܳܐ ܕܰܬܪܶܝܢ ܒܫܰܒܳܐ

ܬܽܘܒ ܕܪܰܡܫܳܐ ܕܰܬܠܳܬܳܐ ܕܫܰܒܬܳܐ ܕܰܬܪܶܝܢ

ܬܽܘܒ ܛܶܟܣܳܐ ܕܰܐܪܒܥܳܐ ܒܫܰܒܳܐ ܕܫܰܒܬܳܐ ܕܬܰܪܬܶܝܢ ܕܨܰܘܡܳܐ ܩܰܕܺܝܫܳܐ

ܬܽܘܒ ܕܢܳܓܰܗ ܚܰܡܫܳܐ

ܬܽܘܒ ܕܪܰܡܫܳܐ ܕܰܥܪܽܘܒܬܳܐ ܕܬܰܪܬܶܝܢ ܕܨܰܘܡܳܐ

 

ܬܽܘܒ ܕܚܰܕ ܒܫܰܒܳܐ ܬܠܺܝܬܳܝܳܐ ܕܨܰܘܡܳܐ ܥܰܠ ܗܰܘ ܡܫܰܪܝܳܐ

ܬܽܘܒ ܕܪܰܡܫܳܐ ܕܰܬܪܶܝܢ ܒܫܰܒܳܐ ܕܫܰܒܬܳܐ ܕܰܬܠܳܬ ܕܨܰܘܡܳܐ

ܬܽܘܒ ܕܪܰܡܫܳܐ ܕܰܬܠܬܳܐ ܒܫܰܒܳܐ ܒܫܰܒܬܳܐ ܕܰܬܠܳܬ ܕܨܰܘܡܳܐ ܕܰܐܪܒܥܺܝܢ

ܬܽܘܒ ܛܶܟܣܳܐ ܕܰܐܪܒܥܳܐ ܒܫܰܒܳܐ ܕܫܰܒܬܳܐ ܕܓ

ܬܽܘܒ ܕܝܽܘܡ ܚܰܡܫܳܐ ܒܫܰܒܳܐ ܕܫܰܒܬܳܐ ܕܰܬܠܳܬ

ܬܽܘܒ ܕܪܰܡܫܳܐ ܕܰܥܪܽܘܒܬܳܐ ܕܰܬܠܳܬܳܐ ܕܨܰܘܡܳܐ

ܬܽܘܒ ܕܪܰܡܫܳܐ ܕܚܰܕ ܒܫܰܒܳܐ ܪܒܺܝܥܳܝܳܐ ܕܨܰܘܡܳܐ ܕܺܐܝܬܰܘܗ̱ܝ ܥܰܠ ܟܢܰܥܢܰܝܬܳܐ

ܬܽܘܒ ܕܪܰܡܫܳܐ ܕܰܬܪܶܝܢ ܕܫܰܒܬܳܐ ܡܨܶܥܳܝܬܳܐ ܕܨܰܘܡܳܐ ܩܰܕܺܝܫܳܐ

ܬܽܘܒ ܕܪܰܡܫܳܐ ܕܰܬܠܳܬܳܐ ܒܫܰܒܳܐ ܕܫܰܒܬܳܐ ܕܰܐܪܒܰܥ ܕܨܰܘܡܳܐ

ܬܽܘܒ ܕܰܐܪܒܥܳܐ ܕܦܶܠܓܶܗ ܕܨܰܘܡܳܐ

ܬܽܘܒ ܕܪܰܡܫܳܐ ܕܚܰܡܫܳܐ ܕܫܰܒܬܳܐ ܡܨܰܥܬܳܐ ܕܨܰܘܡܳܐ

ܬܽܘܒ ܕܰܥܪܽܘܒܬܳܐ ܕܰܐܪܒܰܥ ܕܨܰܘܡܳܐ

 

ܬܽܘܒ ܛܶܟܣܳܐ ܕܚܰܕ ܒܫܰܒܳܐ ܚܡܺܝܫܳܝܳܐ ܕܨܰܘܡܳܐ

ܬܽܘܒ ܕܝܽܘܡ ܬܪܶܝܢ ܒܫܰܒܳܐ ܕܫܰܒܬܳܐ ܕܚܰܡܶܫ ܕܨܰܘܡܳܐ ܕܺܐܝܬܺܝܗܿ ܬܶܕܡܽܘܪܬܳܐ

ܬܽܘܒ ܕܰܬܠܳܬܳܐ ܒܫܰܒܳܐ ܕܬܶܕܡܪ̈ܳܬܳܐ

ܬܽܘܒ ܕܝܽܘܡ ܐܰܪܒܥܳܐ ܕܫܰܒܬܳܐ ܕܬܶܕܡܪ̈ܳܬܳܐ

ܬܽܘܒ ܕܪܰܡܫܳܐ ܕܚܰܡܫܳܐ ܕܫܰܒܬܳܐ ܕܚܰܡܶܫ

ܬܽܘܒ ܕܝܽܘܡ ܥܪܽܘܒܬܳܐ ܕܫܰܒܬܳܐ ܕܚܰܡܶܫ ܕܬܶܕܡܪ̈ܳܬܳܐ

ܬܽܘܒ ܛܶܟܣܳܐ ܕܥܰܠ ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ

ܬܽܘܒ ܛܶܟܣܳܐ ܕܚܰܕ ܒܫܰܒܳܐ ܫܬܺܝܬܳܝܳܐ ܕܨܰܘܡܳܐ ܥܰܠ ܛܺܝܡܰܝ ܣܰܡܝܳܐ

ܬܽܘܒ ܕܪܰܡܫܳܐ ܕܰܬܪܶܝܢ ܒܫܰܒܳܐ ܕܫܰܒܬܳܐ ܕܽܐܘܫܰܥܢ̈ܶܐ

ܬܽܘܒ ܕܪܰܡܫܳܐ ܕܰܬܠܳܬܳܐ ܒܫܰܒܳܐ ܕܽܐܘܫܰܥܢ̈ܶܐ

ܬܽܘܒ ܕܪܰܡܫܳܐ ܕܰܐܪܒܥܳܐ ܕܽܐܘܫܰܥܢ̈ܶܐ

ܬܽܘܒ ܕܚܰܡܫܳܐ ܒܫܰܒܳܐ  ܕܽܐܘܫܰܥܢ̈ܶܐ܇

ܬܽܘܒ ܥܪܽܘܒܬܳܐ ܕܰܐܪܒܥܺܝܢ ܕܫܽܘܠܳܡ ܨܰܘܡܳܐ

ܬܽܘܒ ܛܟܣܐ ܕܢܘܚܡܗ ܕܳܠܥܙܪ ܗܘ ܕܡܶܢ ܒܶܝܬ ܥܢܝܐ

ܬܽܘܒ ܛܟܣܐ ܕܚܰܕ ܒܫܒܐ ܩܰܕܺܝܫܳܐ  ܕܽܐܘܫܰܥܢ̈ܶܐ

 

 

 

 

 

 

 

ܥܰܠ ܣܰܒܪܳܐ ܘܣܽܘܝܳܥܳܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܘܫܰܘܝܰܬ ܒܽܐܘܣܺܝܰܐ. ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ؛ ܡܫܰܪܺܝܢܰܢ ܠܡܶܟܬܰܒ ܦܶܢܩܺܝܬܳܐ ܣܰܬܘܳܝܬܳܐ ܕܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ؛

ܥܰܠ ܬܶܕܡܽܘܪܬܳܐ ܗܳܝ ܕܰܣܥܰܪ ܡܳܪܰܢ ܒܩܳܛܢܶܐ ܡܕܺܝܢ̱ܬܳܐ ܕܰܓܠܺܝܠܳܐ

ܥܶܢܝܳܢܳܐ ܕܪܰܡܫܳܐ ܕܪܰܚܶܡ ܥܠܰܝ ܒܩܳܠܳܐ ܒܪܺܝܟ ܕܚܰܕܺܝ ܠܰܫܡܰܝܳܢ̈ܶܐ

 

ܗܰܘ ܕܰܫܡܰܝ̈ܳܐ ܙܥܘܽܪܺܝܢ ܠܶܗ؛ ܠܰܐܪܥܳܐ ܐܶܬܬܰܚܬܺܝ ܘܕܰܨܒܳܐ ܥܰܡܰܢ ܐܶܬܗܰܦܰܟ؛ ܡܶܛܽܠ ܕܢܶܦܪܽܘܩ ܠܰܢ܀

ܐܳܡܪܳܐ ܠܶܗ ܐܶܡܶܗ ܠܝܶܫܘܽܥ ܕܰܚܣܰܪ ܠܗܽܘܢ ܚܰܡܪܳܐ܆ ܠܰܙܡܺܝܢ̈ܶܐ ܬܳܐ ܒܶܪܝ̱ ܚܰܘܳܐ܇ ܬܽܘܩܦܳܐ ܕܪܰܒܘܽܬܳܟ܀

ܐܳܬܳܐ ܓܠܺܝܬܳܐ ܐܶܬܚܰܘܝܰܬ܇ ܒܶܝܬ ܐܺܝܕ̈ܰܝ ܡܳܪܰܢ܇ ܒܩܳܛܢܶܐ ܕܰܡܖܺܝܢܬܳܐ ܕܡܶܢ ܡܰܝ̈ܳܐ܇ ܚܰܡܪܳܐ ܛܳܒܳܐ ܥܒܰܕ܀

ܬܗܰܪܘ̱ ܗ̱ܘܰܘ ܬܰܡܳܢ ܚܰܙܳܝ̈ܶܐ܇ ܒܬܶܕܡܽܘܪܬܳܐ ܚܕܰܬܳܐ܇ ܕܰܥܒܰܕ ܡܳܪܰܢ ܒܡܶܫܬܰܘܽܬܳܐ܇ ܝܰܕܥܽܘܗ̱ܝ ܕܒܳܪܘܽܝܰܐ ܗ̱ܘ܀

ܝܰܡܝܺܢܳܟ ܡܳܪܰܢ ܕܒܰܪܟܰܬ݀ ܠܡܰܝ̈ܳܐ ܚܰܡܪܳܐ ܗ̱ܘܰܘ܇ ܗܺܝ ܬܒܰܪܶܟܝ̱ ܠܟܽܠܰܢ ܥܰܒܕܰܝ̈ܟ ܦܪܺܝܩܰܝ ܒܰܨܠܺܝܒܳܟ܀

 

ܡܳܪܝܳܐ ܩܪܺܝܬܳܟ ܒܩܳܠܳܐ ܢܽܘܗܪܳܐ ܕܡܶܢ ܢܽܘܗܪܳܐ܇

ܫܘܽܒܚܳܐ ܠܒܰܪ ܛܳܒܳܐ ܕܟܰܕ ܐܰܠܳܗܰܐ ܗܘ ܒܰܟܝܳܢܶܗ ܒܰܫܪܳܪܳܐ ܗܘܳܐ ܒܰܪܢܳܫܳܐ܇ ܘܰܐܦܨܰܚ ܠܰܢ ܒܰܬܡܺܝ̈ܗܳܬܶܗ܇ ܬܰܘ ܟܽܠ܀

ܫܘܽܒܚܳܐ ܠܗܰܘ ܪܳܡܳܐ ܕܨܶܝܕ ܬܰܚܬܳܝ̈ܶܐ ܐܶܬܬܰܚܬܺܝ ܘܰܒܥܘܽܬܪܶܗ ܣܡܰܟ ܠܰܣܢܺܝܩ̈ܶܐ܇ ܘܰܡܠܺܝ ܠܗܽܘܢ ܣܘܽܢܩܳܢܰܝ̈ܗܽܘܢ܇ ܬܰܘ ܟܽܠ܀

ܒܪܺܝܟ ܗܽܘ ܒܰܪ ܛܳܒܳܐ܇ ܕܶܐܬܡܰܣܟܰܢ ܘܰܗܘܳܐ ܐ̱ܢܳܫܳܐ ܘܒܰܚܠܽܘܠܳܐ ܐܶܣܬܡܶܟ ܕܰܨܒܳܐ܇ ܘܚܰܘܺܝ ܐܳܬܳܐ ܕܬܶܕܡܽܘܪܬܳܐ ܬܰܘ ܟܽܠ ܥܰܡܡ̈ܺܝܢ܀

ܠܡܰܝ̈ܳܐ ܕܒܰܐܓܳܢ̈ܶܐ ܦܫܰܛ ܐܺܝܕܶܗ ܘܒܰܪܶܟ ܐܶܢܽܘܢ ܘܰܗ̱ܘܰܘ ܚܰܡܪܳܐ ܪܺܝܫܳܝܳܐ܇ ܘܶܐܫܬܺܝܘ ܙܡܺܝ̈ܢܶܐ ܘܶܐܬܒܰܣܰܡܘ̱ ܬܰܘ ܟܽܠ܀

ܫܽܘܠܛܳܢܶܗ ܫܰܚܠܶܦ ܠܡܰܝ̈ܳܐ ܫܚܺܝ̈ܡܶܐ ܕܒܰܐܓܳܢ̈ܶܐ܇ ܘܚܰܡܪܳܐ ܛܳܒܳܐ ܗ̱ܘܰܘ ܡܶܢ ܫܶܠܝ̱܇ ܘܚܰܘܺܝ ܕܺܐܝܬܰܘܗ̱ܝ ܐܰܠܳܗܳܐ܇ ܬܰܘ ܟܽܠ ܥܰܡ̈ܡܺܝܢ܀

 

ܩܳܠܳܐ ܕܪܰܡܫܳܐ ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ

ܟܰܕ ܫܰܪܺܝ ܡܶܠܬܳܐ ܐܰܠܳܗܳܐ܇ ܒܽܐܘܪܚܳܐ ܕܰܡܕܰܒܪܳܢܽܘܬܳܐ܇ ܠܰܚܠܽܘܠܳܐ ܕܙܰܒܢܳܐ ܥܰܠ ܗܘܳܐ ܢܚܰܘܶܐ ܫܽܘܠܛܳܢ ܡܳܪܽܘܬܶܗ܇ ܘܶܐܡܶܗ ܘܰܐܚܰܘ̈ܗ̱ܝ ܘܬܰܠܺܡܝܕܰܘ̈ܗ̱ܝ܇ ܐܶܙܕܰܡܰܢܘ̱ ܗ̱ܘܰܘ ܥܰܡܶܗ ܠܰܚܠܽܘܠܳܐ܇ ܘܟܰܕ ܒܰܣܡܳܟܳܐ ܓܢܶܝܢ ܟܽܠܗܽܘܢ ܒܡܶܫܬܽܘܬܳܐ ܕܚܰܕ ܡܶܣܟܺܢܳܐ܇ ܘܰܚ݉ܣܰܪ ܗܘܳܐ ܚܰܡܪܳܐ܇ ܠܰܙܡܺܝ̈ܢܶܐ ܕܶܐܙܕܰܡܰܢܘ̱ ܗ̱ܘܰܘ܇ ܘܡܶܢ ܡܰܝ̈ܳܐ ܚܰܡܪܳܐ ܥܒܰܕ ܗܘܳܐ܇ ܘܗܰܝܡܶܢܘ̱ ܗ̱ܘܰܘ ܒܶܗ ܕܗܽܘܝܽܘ ܡܳܪܳܐ ܕܟܽܠܒܶܪ̈ܝܳܢ܀

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܇ ܕܗܽܘܝܽܘ ܚܰܬܢܳܐ ܕܰܫܪܳܪܳܐ܇ ܘܚܰܬܢܳܐ ܕܙܰܒܢܳܐ ܙܰܡܶܢܶܗ ܗܘܳܐ ܕܢܶܗܘܶܐ ܙܺܡܝܢܳܐ ܒܡܶܫܬܽܘܬܶܗ ܗܽܘ ܘܬܰܠܡܺܝ̈ܕܰܘܗ̱ܝ ܩܰܕܺܝ̈ܫܶܐ܇ ܘܥܰܠܘ̱ ܠܰܚܠܽܘܠܳܐ ܘܰܓܢܰܘ ܒܰܣܡܳܟܳܐ܇ ܘܰܚܣܰܪ ܚܰܡܪܳܐ ܒܡܶܫܬܽܘܬܳܐ ܕܙܳܐܶܢ ܛܽܘܗ̈ܡܶܐ ܓܢܶܐ ܗܘܳܐ ܒܶܗ܇ ܫ݉ܽܘܒܚܳܐ ܠܗܰܘ ܟܰܣܝܳܐ ܕܰܓܠܳܐ ܢܰܦܫܶܗ ܕܰܐܠܳܗܰܐܗ̱ܘ ܘܰܠܡܰܝ̈ܳܐ ܪܡܰܙ ܗܘܳܐ ܡܶܢܫܶܠܝ̱܇ ܘܰܗ̱ܘܰܘ ܚܰܡܪܳܐ܇ ܘܰܚܕܺܝ ܚܰܬܢܳܐ ܘܰܙܡܺܝ̈ܢܶܐ܀

 

ܐ̱ܚܪܺܢܳܐ ܒܩܳܠܳܐ ܛܽܘܒܰܝܟܝ̱ ܥܺܕܬܳܐ

ܚܰܬܢܳܐ ܕܩܽܘܫܬܳܐ܇ ܕܡܶܢ ܪܰܘܡܳܐ ܢܚܶܬ ܒܝܰܕ ܚܽܘܒܶܗ ܠܩܳܛܢܶܐ ܡܕܺܝܢ̱ܬܳܐ ܕܰܓܠܺܝܠܳܐ܇ ܐܶܙܕܰܡܰܢ ܐܰܝܟ ܒܰܪ ܐ̱ܢܳܫܳܐ܇ ܘܰܚܣܰܪ ܚܰܡܪܳܐ ܕܰܟܝܳܢܳܐ܇ ܕܚܰܡܪܶܗ ܕܝܶܫܘܽܥ ܢܶܬܚܰܘܶܐ܇ ܘܰܕܠܳܐ ܓܽܘܦ̈ܢܶܐ ܡܶܢ ܡܰܝ̈ܳܐ܇ ܚܰܡܪܳܐ ܥܒܰܕ ܗܘܳܐ ܒܳܪܽܘܝܳܐ܇ ܘܚܰܕܺܝ ܗܘܳܐ ܚܰܬܢܳܐ ܣܢܺܝܩܳܐ܇ ܘܒܶܗ ܗܽܘ ܝܶܪܒܰܬ݀ ܡܶܫܬܽܘܬܳܐ܀

ܠܡܶܫܬܽܘܬܳܐ ܥܰܠ ܗܘܳܐ ܡܳܪܰܢ܇ ܒܰܪ ܛܳܒܳܐ ܡܶܠܬܶܗ ܕܰܐܒܳܐ܇ ܕܰܨܒܳܐ ܒܚܽܘܒܶܗ ܘܶܐܬܬܰܚܬܺܝ ܕܢܶܦܪܽܘܩ ܠܓܶܢܣܳܐ ܕܒܶܝܬ ܐܳܕܳܡ܇ ܘܰܚܣܰܪ ܚܰܡܪܳܐ ܒܰܚܠܽܘܠܳܐ܇ ܘܚܰܘܺܝ ܚܰܝܠܳܐ ܕܪܰܒܽܘܬܶܗ܇ ܘܰܦܩܰܕ ܘܰܗܘܳܐ ܡܶܢ ܡܰܝ̈ܳܐ܇ ܚܰܡܪܳܐ ܛܳܒܳܐ ܒܰܣܺܝܡܳܐ܇ ܘܶܐܫܬܺܝܘ ܟܽܠܗܽܘܢ ܕܰܣܡܺܝܟܺܝܢ܇ ܘܝܰܗܒܘ̱ ܬܶܫܒܽܘܚܬܳܐ ܠܰܐܠܳܗܳܐ܇

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܪܳܐ ܕܰܐܣܓܺܝ ܗܘܳܐ ܚܰܡܪܳܐ ܛܳܒܳܐ ܒܶܝܬ ܡܶܫܬܽܘܬܳܐ܇ ܗܰܒ ܠܰܢ ܕܢܶܫܬܶܐ ܚܰܡܪܳܐ ܕܚܰܝ̈ܶܐ ܡܶܢ ܝܽܘܠܦܳܢܳܟ܇ ܙܡܺܝܢܳܐ ܕܰܐܥܬܰܪ ܡܶܢ ܡܰܘܗܰܒܬܶܗ ܠܰܡܙܰܡܢܳܢ̈ܶܐ܇ ܬܪܽܘܥ ܠܰܢ ܗܳܪܟܳܐ ܚܰܡܪܳܐ ܕܚܽܘܒܳܟ ܕܰܡܒܰܣܶܡ ܠܰܢ܀

ܨܠܳܐ ܨܶܒܝܳܢܳܐ ܕܥܳܒܽܘܕܽܘܬܶܗ ܥܰܠ ܐܰܓܳܢ̈ܶܐ܇ ܘܰܢܣܰܟ ܗܘܳܐ ܒܗܶܝܢ ܐܳܕܫܳܐ ܚܰܠܝܳܐ ܕܠܰܘ ܡܶܢ ܥܶܢܒ̈ܶܐ ܓܡܰܪ ܗܘܳܐ ܐܶܢܽܘܢ ܐ̱ܪܳܙܶܗ ܠܡܰܝ̈ܳܐ ܕܰܗ̱ܘܰܘ ܬܰܡܳܢ܇ ܘܰܒܫܽܘܚܠܳܦܳܐ ܛܳܒܳܐ ܕܚܰܡܪܳܐ ܫܰܚܠܶܦ ܐܶܢܽܘܢ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܨܶܝܕ ܐ̱ܢܳܫܽܘܬܰܢ܇ ܣܶܓܕܬܳܐ ܠܰܒܪܳܐ ܕܰܠܒܶܫ ܦܰܓܪܳܐ ܕܓܶܢܣܶܗ ܕܳܐܕܳܡ܇ ܐܰܝܟ ܨܶܒܝܳܢܶܗ ܥܰܠ ܠܰܣܡܳܟܳܐ ܢܚܰܘܶܐ ܚܰܝܠܶܗ܇ ܘܰܠܪܽܘܚ ܩܽܘܕܫܳܐ ܟܠܺܝܠ ܩܽܘܠܳܣܳܐ ܠܶܗ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ܇ ܥܺܝܪܳܐ ܕܠܳܐ ܕܳܡܶܟ

ܥܺܝܪܳܐ ܕܠܳ ܕܳܡܶܟ܇ ܐܰܥܺܝܪܰܝܢܝ̱ ܕܢܶܙܡܰܪ ܠܳܟ܀

ܢܰܘܕܶܐ ܠܗܰܘ ܕܰܨܒܳܐ ܘܶܐܬܬܰܚܬܺܝ ܕܰܢܚܰܪܰܪ ܠܰܢ܀ ܫܰܚܠܶܦ ܒܦܽܘܩܕܳܢܶܗ ܠܡܰܝ̈ܳܐ܇ ܘܚܰܡܪܳܐ ܛܳܒܳܐ ܗ̱ܘܰܘ܀

ܒܪܺܝܟ ܡܶܠܬܶܗ ܕܰܐܒܳܐ܇ ܕܥܰܠ ܘܰܒܢܳܐ ܗܘܳܐ ܒܰܚܠܽܘܠܳܐ܀

ܢܶܣܓܽܘܕ ܠܦܳܪܽܘܩܰܢ܇ ܕܰܒܩܳܛܢܶܐ ܣܥܰܪ ܬܶܕܡܽܘܪܬܳܐ܀

ܫܽܘܒܚܳܐ ܠܥܰܬܺܝܪܳܐ܇ ܕܰܠܡܶܣܟܺܢ̈ܶܐ ܐܰܥܬܰܪ ܗܘܳܐ܀

 

ܩܰܘܡܳܐ ܩܰܕܡܳܝܳܐ ܕܠܺܠܝܳܐ ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܟܰܕ ܫܰܪܺܝ ܡܶܠܬܳܐ ܐܰܠܳܗܳܐ ܒܽܐܘܪܚܳܐ ܕܰܡܕܰܒܪܳܢܽܘܬܳܐ܇ ܨܒܳܐ ܢܚܰܘܶܐ ܫܽܘܠܛܳܢ ܡܳܪܽܘܬܶܗ܇ ܠܶܐܡܶܗ ܘܠܰܐܚܰܘ̈ܗ̱ܝ ܘܬܰܠܡܺܝܕܰܘ̈ܗ̱ܝ܇ ܟܰܕ ܒܰܣܡܳܟܳܐ ܓܢܶܝܢ ܟܽܠܗܽܘܢ܇ ܒܡܶܫܬܽܘܬܳܐ ܕܚܰܕ ܡܶܣܟܺܢܳܐ ܚܣܰܪ ܗܘܳܐ ܚܰܡܪܳܐ ܠܰܙܡܺܝܢ̈ܶܐ܇ ܘܡܶܢ ܡܰܝ̈ܳܐ ܚܰܡܪܳܐ ܥܒܰܕ ܗܘܳܐ܇ ܘܗܰܝܡܶܢܘ̱ ܒܶܗ ܕܗܽܘܝܽܘ ܡܳܪܳܐ܀

ܟܰܕ ܚܰܬܢܳܐ ܕܩܽܘܫܬܳܐ ܘܕܰܫܪܳܪܳܐ܇ ܡܶܢ ܪܰܘܡܳܐ ܠܥܽܘܡܩܳܐ ܢܚܶܬ ܗܘܳܐ܇ ܘܡܶܢ ܚܰܬܢܳܐ ܫܺܝܛܳܐ ܘܡܶܣܟܺܢܳܐ܇ ܐܶܙܕܰܡܰܢ ܐܰܝܟ ܒܰܪܢܳܫܳܐ܇ ܘܥܰܠ ܘܰܓܢܶܐ ܗܘܳܐ ܒܰܣܡܳܟܳܐ܇ ܘܚܰܘܺܝ ܬܰܡܳܢ ܪܰܒܽܘܬܶܗ܇ ܘܡܶܢ ܡܰܝ̈ܳܐ ܚܰܡܪܳܐ ܥܒܰܕ ܗܘܳܐ܇ ܒܓܰܘܢܳܐ ܪܺܝܚܳܐ ܘܰܒܛܰܥܡܳܐ܇ ܫܽܘܒܚܳܐ ܠܶܗ ܘܰܥܠܰܝܢ ܪ̈ܰܚܡܰܘܗ̱ܝ

 

ܡܰܕܪܳܫܳܐ ܩܳܠܳܐ܇ ܗܳܢܰܘ ܝܰܪܚܳܐ ܥܽܘܢܺܝܬܳܐ ܫܽܘܒܚܳܐ ܠܰܒܪܳܐ܇ ܕܶܐܬܳܐ ܘܰܐܦܨܰܚ ܠܟܽܠ ܕܰܐܒܺܝܠܺܝܢ

ܒܪܺܝܟ ܗܽܘ ܥܽܘܠܳܐ܇ ܕܰܗܘܳܬ݀ ܐܶܡܶܗ ܟܰܠܰܬ ܢܽܘܗܪܳܐ܇ ܛܽܘܒ ܠܰܚܠܽܘܠܳܐ ܕܰܗܘܳܐ ܒܓܰܘܶܗ܇ ܕܳܐܦܶܢ ܢܰܘܦܶܐ ܚܰܡܪܳܐ ܡܶܢ ܫܶܠܝ̱܇ ܒܳܟ ܬܽܘܒ ܣܳܓܶܐ܇ ܘܠܰܢ ܡܳܪܝ̱ ܐܰܣܓܳܐ ܟܽܠ ܛܳܒ̈ܳܬܳܐ܀ ܡܰܝ̈ܳܐ ܒܩܳܛܢܶܐ܇ ܠܚܰܡܪܳܐ ܫܰܚܠܶܦ ܡܳܪܶܐ ܚܠܽܘܠܳܐ܇ ܘܫܳܩܰܘ̈ܳܬܳܐ ܠܳܐ ܛܰܫܺܝܘ ܗ̱ܘܰܘ܇ ܙܠܰܥܘ̱ ܗ̱ܘܰܘ ܘܰܐܫܩܺܝܘ ܒܶܝܬ ܡܶܫܬܽܘܬܳܐ܇ ܕܢܶܬܢܰܨܰܚ ܗܘܳܐ ܗܰܘ ܕܡܶܢ ܚܰܡܪܳܐ ܣܰܒܰܥ ܐܶܢܽܘܢ܀

ܫܳܩܰܘ̈ܳܬܳܐ ܚܙܰܘ ܕܰܙܥܽܘܪܺܝܢ ܠܡܰܘܕܳܝܽܘ ܠܶܗ܇ ܚܰܡܪܳܐ ܐ̱ܚܪܺܢܳܐ ܕܡܶܢ ܣܰܓܺܝ̈ܐܶܐ܇ ܡܙܰܓ ܒܰܚܠܽܘܠܳܐ ܒܫܶܝܬ ܐܰܓܳܢܺܝ̈ܢ܇ ܒܶܫܬܳܐ ܓܰܘܢܺܝ̈ܢ܇ ܕܢܶܫܬܰܒܰܚ ܗܘܳܐ ܥܰܠ ܡܰܘܗܰܒܬܶܗ܀

ܒܩܳܛܢܶܐ ܐܰܣܓܺܝ ܒܰܪ ܐܰܠܳܗܳܐ ܚܰܡܪܳܐ ܚܰܕܬܳܐ܇ ܘܰܒܓܰܘ ܥܺܕܬܳܐ ܐܰܣܓܺܝ ܡܫܺܝܚܳܐ܇ ܫܶܩܝܳܐ ܚܰܕܬܳܐ ܪܽܘܚܳܢܳܝܳܐ܇ ܕܡܳܐ ܡܶܢ ܕܰܦܢܶܗ܇ ܡܚܰܕܶܐ ܚܰܡܪܳܐ ܠܰܕܫܳܬܶܐ ܠܶܗ܇

 

ܦܰܪܕܰܝܣܳܐ ܩܳܠܳܐ ܒܪܺܝܟ ܗܽܘ ܕܒܰܣܡܳܟܳܐ ܒܰܪܶܟ ܥܰܠ ܡܰܝ̈ܳܐ܇ ܒܪܺܝܟ ܗܽܘ ܕܰܒܡܶܠܬܶܗ ܗ̱ܘܰܘ ܚܰܡܪܳܐ ܛܳܒܳܐ܇

ܚܰܬܢܳܐ ܕܶܐܬܥܰܛܰܦ܇ ܚܰܕܽܘܬܳܐ ܪܰܒܬܳܐ܇ ܟܰܕ ܩܪܳܝܗ̱ܝ ܗܘܳܐ ܗܰܘ ܪܺܝܫ ܣܡܳܟܳܐ ܘܶܐܡܰܪ܇ ܡܶܢ ܐܰܝܡܶܟܳܐ ܠܳܟ ܗܳܫܳܐ ܗܳܢ ܚܰܡܪܳܐ܇ ܕܰܐܟܘܳܬܶܗ ܡܶܡܬܽܘܡ ܠܳܐ ܚܙܺܝܬ܇ ܫܰܦܺܝܪ ܗܽܘ ܓܰܘܢܶܗ ܘܰܪܓܺܝܓ ܗܽܘ ܚܶܙܘܶܗ܇ ܘܰܚܠܶܐ ܬܽܘܒ ܛܰܥܰܡܶܗ܇ ܘܝܳܐܶܐ ܒܟܽܠ ܕܡܶܕܶܡ܀

ܠܳܐ ܓܶܝܪ ܬܽܘܒ ܫܡܺܝܥ ܠܺܝ܇ ܐܰܝܟ ܗܳܢܳܐ ܛܰܥܡܳܐ܇ ܘܠܳܐ ܐܺܝܬ ܕܰܢܡܰܠܶܠ ܫܰܪܒܶܗ ܕܗܳܢ ܚܰܡܪܳܐ܇ ܠܶܠܽܘ ܒܶܝܬ ܡܰܠܟ̈ܶܐ܇ ܘܫܰܠܺܝܛܶܝܗ̈ ܕܰܐܪܥܳܐ܇ ܗܳܢܳܐ ܡܶܬܢܰܛܰܪ ܗܘܳܐ ܠܬܶܗܪܳܐ܇ ܘܡܰܠܟܳܐ ܠܳܐ ܫܟܺܝܚ ܠܗܽܘܢ܇ ܐܰܝܟ ܗܳܢܳܐ ܚܰܡܪܳܐ܇ ܐܰܢ̱ܬ ܕܶܝܢ ܡܶܢ ܐܰܝܟܳܐ ܐܰܝܬܺܝܬܳܝܗ̱ܝ ܠܗܳܪܟܳܐ܀

ܠܩܳܛܢܶܐ ܕܰܓܠܺܝܠܳܐ܇ ܐܶܙܕܰܡܰܢ ܡܳܪܰܢ ܘܬܰܠܡܺܝ̈ܕܰܘܗ̱ܝ ܘܶܐܡܶܗ ܓܢܶܝܢ ܗ̱ܘܰܘ ܒܰܣܡܳܟܳܐ܇ ܘܕܰܨܒܳܐ ܕܰܢܚܰܘܶܐ ܬܰܡܳܢ ܬܶܕܡܽܘܪܬܳܐ܇ ܠܥܰܒܕ̈ܶܐ ܦܩܰܕ ܗ̱ܘܰܘ ܘܰܡܠܰܘ ܐܰܓܳܢ̈ܶܐ܇ ܡܰܝ̈ܳܐ ܪܡܰܙܘ̱ ܘܰܐܝܬܺܝܘܗ̱ܝ ܐܰܝܟ ܡܶܠܰܬ ܦܽܘܡܶܗ܇ ܘܡܶܢ ܫܶܠܝ̱ ܐܶܫܬܰܚܠܰܦܘ̱܇ ܘܚܰܡܪܳܐ ܛܳܒܳܐ ܗ̱ܘܰܘ܇

 

ܩܽܘܡ ܦܰܘܠܳܘܣ ܩܳܠܳܐ ܠܳܟ ܫܽܘܒܚܳܐ ܡܫܺܝܚܳܐ ܦܳܪܽܘܩܰܢ܇ ܕܒܰܚܠܽܘܠܳܐ ܚܰܘܺܝܬ ܬܶܕܡܽܘܪܬܳܐ܇

ܟܰܕ ܛܰܥܡܶܗ ܪܺܝܫܳܐ ܕܰܣܡܳܟܳܐ܇ ܩܪܳܐ ܠܚܰܬܢܳܐ ܘܫܰܪܺܝ ܪܳܫܶܐ ܠܶܗ܇ ܕܐ̱ܢܳܫܳܐ ܠܰܡ ܬܰܩܢ̈ܶܐ ܦܳܪ̈ܽܘܫܶܐ܇ ܠܽܘܩܕܰܡ ܕܶܝܢ ܚܰܡܪܳܐ ܛܳܒܳܐ ܡܚܰܘܶܝܢ܇ ܐܰܢ̱ܬ ܕܶܝܢ ܗܶܦܟܳܐܺܝܬ܇ ܐܰܝܟ ܠܳܐ ܝܳܕܽܘܥܳܐ܇ ܠܚܰܪܬܳܐ ܗܳܐ ܢܛܰܪܬܳܝܗ̱ܝ܇ ܠܚܰܡܪܳܐ ܪܺܝܫܳܝܳܐ܇ ܘܺܝܡܳܐ ܠܶܗ ܚܰܬܢܳܐ܇ ܕܠܳܐ ܪܓܺܝܫ ܐ̱ܢܳܐ܇ ܒܬܶܕܡܽܘܪܬܳܐ ܗܳܕܶܐ ܕܶܐܣܬܰܥܪܰܬ݀܀

ܝܳܕܥܺܝܢ ܗ̱ܘܰܘ ܓܶܝܪ ܫܳܩܰܘ̈ܳܬܳܐ ܡܫܰܡܫܳܢ̈ܶܐ ܕܺܐܝܬ ܗ̱ܘܰܘ ܒܡܶܫܬܽܘܬܳܐ܇ ܕܡܶܢ ܡܰܝ̈ܳܐ ܡܠܰܘ ܗ̱ܘܰܘ ܠܰܐܓܳܢ̈ܶܐ܇ ܘܡܰܝ̈ܳܐ ܗ̱ܘܰܘ ܚܰܡܪܳܐ ܘܶܐܫܬܰܚܠܰܦܘ̱܇ ܨܶܗܝܽܘܢ ܨܳܠܽܘܒܬܳܐ܇ ܫܶܡܥܰܬ݀ ܗܘܳܬ݀ ܗܳܕܶܐ ܬܶܕܡܽܘܪܬܳܐ ܪܰܒܬܳܐ܇ ܡܶܢ ܫܶܠܝ̱ ܐܶܬܕܰܠܚܰܬ݀܇ ܚܠܳܦ ܕܬܶܬܶܠܝ̱ ܫܽܘܒܚܳܐ ܠܒܳܪܽܘܝܳܐ܇ ܐܰܝܟ ܨܶܨ̈ܶܐ ܒܶܐܕܢܶܝ̈ܗܿ ܢܦܰܠ ܛܶܐܒܳܗܿ܀

ܗܳܝ ܕܒܽܘܪܟܬܳܐ ܕܒܰܪܶܟ ܐܰܠܳܗܳܐ܇ ܒܓܰܘ ܩܳܛܢܶܐ ܡܕܺܝܢ̱ܬܳܐ ܕܰܓܠܺܝܠܳܐ܇ ܗܺܝ ܬܺܐܬܶܐ ܘܬܰܐܓܶܢܝ̱ ܘܰܬܒܰܪܶܟܝ̱܇ ܠܗܳܕ ܩܪܺܝܬܳܐ ܘܟܽܠܗܽܘܢ ܥܳܡܽܘܪ̈ܶܝܗܿ܇ ܣܳܒܶܝ̈ܗܿ ܢܶܬܒܰܪܟܽܘܢ܇ ܥܠܰܝܡܶܝ̈ܗܿ ܢܶܬܓܰܒܪܽܘܢ܇ ܛܠܳܝ̈ܶܝܗܿ ܢܶܬܢܰܛܪܽܘܢ܇ ܘܫܰܒܪ̈ܶܝܗܿ ܢܶܬܪܰܒܽܘܢ܇ ܐܳܦ ܟܳܗ̈ܢܶܐ ܕܺܐܝܬ ܒܗܳܕܶܐ ܩܪܺܝܬܳܐ ܢܶܙܕܰܗܽܘܢ ܐܰܝܟ ܐܰܗܪܽܘܢ ܟܳܗܢܳܐ܇

 

ܐܰܒܳܐ ܟܬܰܒ ܗܘܳܐ ܩܳܠܳܐ ܒܪܺܝܟ ܗܽܘ ܚܰܬܢܳܐ ܕܰܐܦܨܰܚ ܗܘܳܐ ܠܰܙܡܺܝ̈ܢܶܐ ܟܽܠܗܽܘܢ

ܙܰܡܶܢܘ̱ ܕܰܒܪܽܘܗ̱ܝ ܐܰܪ̈ܥܳܢܶܐ܇ ܠܡܶܫܬܽܘܬܳܐ ܕܰܗܘܳܬ݀ ܒܩܳܛܢܶܐ܇ ܚܰܬܢܳܐ ܡܶܣܟܺܢܳܐ ܠܡܳܪܶܐ ܟܽܠ ܥܽܘܬܪܺܝܢ܇ ܐܰܝܬܺܝ ܐܰܓܢܺܝ ܒܰܣܡܳܟܶܗ܇ ܬܰܘ ܢܶܬܗܰܪ ܢܶܫܡܰܥ ܒܰܪܶܚܡܬܳܐ܀

ܠܡܳܪܳܗܿ ܕܰܥܕܶܝܢ ܙܰܡܶܢ ܗܘܳܐ܇ ܗܰܘ ܚܰܣܺܝܪ ܚܰܡܪܳܐ ܠܡܶܫܬܽܘܬܳܐ܇ ܩܪܳܐ ܠܶܗ ܠܡܰܒܽܘܥܳܐ܇ ܕܢܶܓܢܶܐ ܒܰܣܡܳܟܶܗ ܘܡܶܢܶܗ ܢܶܒܥܳܐ ܥܰܬܺܝܪܳܐ܇ ܐܶܬܡܠܺܝܘ ܣܽܘܢܩܳܢܰܘ̈ܗ̱ܝ ܟܽܠܗܽܘܢ܀

ܕܰܫܘܶܐ ܕܢܶܚܙܶܝܟ ܒܰܚܠܽܘܠܶܗ܇ ܚܰܘܳܐ ܠܶܗ ܡܶܢ ܥܽܘܬܪܳܐ ܕܺܝܠܳܟ܇ ܢܺܐܬܶܐ ܪܽܘܡܝܳܢܳܐ܇ ܘܢܶܬܦܰܨܚܽܘܢ ܣܡܺܝܟ̈ܶܐ܇ ܘܢܶܕܥܽܘܢ ܕܰܐܢ̱ܬ ܗܽܘ ܐܰܠܳܗܳܐ܇ ܘܡܰܘܗܰܒܬܳܟ ܐܰܟܘܳܬܳܟ ܬܶܬܚܙܶܐ܀

ܚܰܝܠܳܐ ܟܰܣܝܳܐ ܗܰܘ ܕܰܦܫܰܛ ܥܰܠ ܓܽܘܦܢ̈ܶܐ܇ ܘܡܰܬܩܶܢ ܒܓܰܘܗܶܝܢ܇ ܣܡܳܟ̈ܶܐ ܠܰܣܓܽܘ̈ܠܶܐ ܛܰܪ̈ܦܶܐ ܠܬܰܟܣܺܝܬܗܽܘܢ ܦܰܫܛܳܗܿ ܗܳܪܟܳܐ ܒܰܐܓܳܢ̈ܶܐ܇ ܘܝܰܗܒ ܚܰܡܪܳܐ ܕܠܳܐ ܦܺܐܪ̈ܶܐ ܡܦܰܛܡ̈ܶܐ܀

ܗܳܝ ܝܰܡܺܝܢܳܐ ܕܶܐܬܦܰܫܛܰܬ݀ ܘܒܰܪܰܟܬܶܗ ܠܚܰܡܪܳܐ ܕܰܒܩܳܛܢܶܐ܇ ܗܺܝ ܬܒܰܪܶܟܝ̱ ܠܰܒܢܶܝ̈ܗܿ ܕܥܺܕܬܳܐ ܩܰܕܺܝܫܬܳܐ܇ ܘܬܶܙܓܽܘܪܝ̱ ܡܶܢܳܗܿ ܢܶܟܝܳܢ̈ܶܐ ܘܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܠܗܰܠ ܒܰܣܡܳܟܳܐ ܓܢܰܝܬ ܐܰܝܟ ܫܺܝܛܳܐ ܟܰܕ ܠܳܐ ܝܰܕܥܽܘܟ܇ ܒܝܰܕ ܡܰܘܗܰܒܬܳܟ ܐܰܫܽܘܕ ܗܳܪܟܳܐ ܠܰܕܒܳܥܶܝܢ ܠܳܟ܇ ܒܰܚܠܽܘܠܳܐ ܓܶܝܪ ܕܥܺܕܰܬ ܩܽܘܕܫܳܐ ܡܰܙܶܓ ܠܶܫܳܢܝ̱܇ ܬܪܽܘܥ ܘܰܐܪܕܳܐ ܒܶܗ ܫܶܩܝܳܐ ܚܰܠܝܳܐ ܕܒܰܣܺܝܡ ܗܽܘ ܠܶܗ܀

ܐܳܘ ܕܡܶܬܦܰܠܰܓ ܥܰܠ ܝܺܚܺܝܕܳܐ ܕܠܰܘ ܐܰܠܳܗܰܐ ܗ̱ܘ܇ ܚܙܺܝ ܕܒܰܚܠܽܘܠܳܐ ܒܳܪܽܘܝܽܘܬܶܗ ܐܶܬܚܰܙܝܰܬ݀ ܗܘܳܬ݀܇ ܓܢܶܐ ܒܰܣܡܳܟܳܐ ܕܠܳܐ ܢܶܟܦܽܘܪ ܗܘܳܐ ܒܓܶܢܣܳܐ ܕܶܐܡܶܗ܇ ܘܫܰܚܠܶܦ ܡܰܝ̈ܳܐ ܕܢܰܟܪܶܙ ܬܰܡܳܢ ܛܽܘܗܡܳܐ ܕܰܐܒܽܘܗ̱ܝ܀

 

ܩܰܘܡܳܐ ܕܰܬܪܶܝܢ ܕܠܺܠܝܳܐ܇

ܒܩܳܠܳܐ ܗܰܒܠܳܗܿ ܠܥܺܕܬܳܟ

ܚܠܳܦ ܚܰܡܪܳܐ ܕܩܳܛܢܶܐ܇ ܕܡܶܢ ܡܰܝ̈ܳܐ ܥܒܰܕܬ ܒܰܚܠܽܘܠܳܐ܇ ܡܳܪܳܐ ܛܳܒܳܐ ܕܒܰܪ ܥܰܬܺܝܪܳܐ ܐܰܢ̱ܬ܇ ܒܚܰܡܪܳܟ ܪܽܘܚܳܢܳܐ܇ ܚܰܕܳܐ ܠܥܺܕܬܳܟ ܘܰܠܝܰܠܕܶܝ̈ܗܿ܇ ܕܡܳܟ ܗܽܘ ܚܬܺܝܪܳܐ܇ ܥܰܡܳܟ ܬܶܬܒܰܣܰܡܝ̱܀

ܦܰܐܝܳܐ ܗܘܳܬ݀ ܣܰܓܺܝ܇ ܘܰܪܚܺܝܡܳܐ ܗܘܳܬ݀ ܡܶܫܬܽܘܬܳܐ ܕܥܰܠ ܠܶܗ ܡܳܪܰܢ ܒܩܳܛܢܶܐ ܕܰܓܠܺܝܠܳܐ܇ ܕܚܰܕ̈ܬܳܬܳܐ ܗܘ̈ܰܝ ܒܳܗܿ܇ ܕܡܶܢ ܡܰܝ̈ܳܐ ܚܰܡܪܳܐ ܛܳܒܳܐ܇ ܒܰܣܶܡ ܠܥܺܕܬܳܟ ܒܢܶܒ̈ܥܶܐ ܕܝܽܘܠܦܳܢ̈ܰܝܟ܀

 

ܡܰܕܪܳܫܳܐ ܒܩܳܠܳܐ ܠܟܶܢܫܳܐ ܥܶܠܳܝܳܐ ܥܽܘܢܺܝܬܳܐ ܐܰܫܘܳܢܝ̱ ܐܳܦܠܺܝ ܡܳܪܝ̱ ܕܰܒܝܰܕ ܠܒܽܘܫ ܢܰܚܬܰܝ̈ܟ܇ ܐܶܥܽܘܠ ܠܶܗ ܡܳܪܝܳܐ ܠܰܓܢܽܘܢ ܚܰܕܘ̈ܳܬܳܐ

ܩܳܛܢܶܐ ܬܰܘܕܶܐ ܠܳܟ܇ ܕܰܐܦܨܰܚܬ ܡܶܫܬܽܘܬܳܗܿ܇ ܘܰܟܠܺܝܠܶܗ ܕܚܰܬܢܳܐ ܢܪܰܡܶܪܡܳܟ ܕܪܰܡܪܶܡܬܳܝܗ̱ܝ܇ ܘܰܕܟܰܠܬܳܐ ܟܠܺܝܠܳܗܿ ܗܘܳܐ ܠܶܗ ܠܙܳܟܽܘܬܳܐ܇ ܒܡܰܚܙܺܝܬܳܐ ܕܦ̈ܶܠܳܐܬܳܐ ܐܶܬܬܨܺܝܪ ܒܝܽܘܩܢܰܝ̈ܗܽܘܢ܇ ܘܰܠܥܺܕܬܳܟ ܨܳܪܬܳܗܿ ܒܳܟܰܠܬܳܐ܇ ܒܚܰܪ̈ܺܝܦܶܝܗܿ ܙܰܡܶܢܳܟ ܐܶܬܪܫܶܡܘ̱܇ ܘܰܥܒܰܕܬܳܝܗ̱ܝ ܠܡܶܐܬܝܳܟ ܒܙܰܘܚܳܐ܀

ܒܰܙܡܺܝ̈ܢܰܝ ܐܰܘܕܶܐ ܕܰܐܫܘܳܢܝ̱ ܘܙܰܡܶܢܬܶܗ܇ ܠܚܰܬܢܳܐ ܥܶܠܳܝܳܐ ܕܶܐܬܪܟܶܢ ܘܙܰܡܶܢ ܠܟܽܠ܇ ܘܠܰܚܠܽܘܠܶܗ ܕܰܟܝܳܐ ܕܶܐܥܽܘܠ ܪܗܺܝܒܳܐ ܐ̱ܢܳܐ܇ ܘܒܶܝܬ ܥܳܠܡܳܐ ܐܰܘܕܶܐ ܠܺܝ ܕܗܽܘܝܽܘ ܚܰܬܢܳܐ܇ ܘܠܰܝܬܰܘܗ̱ܝ ܐ̱ܚܪܺܝܢ ܕܰܓܢܽܘܢܶܗ ܢܩܺܝܫ ܠܥܳܠܡܺܝܢ܇ ܘܰܚܠܽܘܠܶܗ ܥܰܬܺܝܪ ܘܠܳܐ ܣܢܺܝܩ܇ ܕܰܠܡܶܫܬܽܘܬܝ̱ ܕܚܶܣܪܰܬ݀ ܘܡܰܠܝܳܗܿ܀

 

ܐܰܘܕܰܘ ܥܰܡܡ̈ܶܐ ܥܽܘܢܺܝܬܳܐ ܒܪܺܝܟ ܕܰܒܚܽܘܒܶܗ ܦܰܪܩܰܢ ܒܪܺܝܟ ܗܽܘ ܕܶܐܬܳܐ ܣܰܥܪܰܢ

ܛܽܘܒܝܰܟܝ̱ ܩܳܛܢܶܐ ܡܕܺܝܢ̱ܬܳܐ܇ ܕܚܰܬܢܳܐ ܕܪܰܘܡܳܐ ܢܚܶܬ ܠܶܟܝ̱܇ ܐܳܦ ܒܰܣܡܳܟܶܟܝ̱ ܓܢܶܐ ܗܘܳܐ܇ ܘܰܗܘܳܐ ܙܡܺܝܢܳܐ ܒܚܽܘܒܶܗ܇ ܐܳܬܳܐ ܚܕܰܬܳܐ ܣܥܰܪ ܗܘܳܐ܇ ܕܡܰܠܝܳܐ ܬܶܗܪܳܐ ܠܚܰܙܳܝ̈ܶܐ܇ ܒܪܺܝܟ ܗܽܘ ܠܟܽܠ ܐܰܦܨܰܚ܀

ܛܽܘܒܰܝܟܝ̱ ܥܺܕܬܳܐ ܓܒܺܝܬܳܐ܇ ܕܰܚܠܳܦ ܚܰܡܪܳܐ ܕܩܳܛܢܶܐ܇ ܚܰܬܢܳܐ ܕܪܰܘܡܳܐ ܡܙܰܓ ܒܶܟܝ̱܇ ܟܳܣܳܐ ܕܰܕܡܶܗ ܚܰܝܳܐ܇ ܘܒܶܗ ܢܶܬܚܰܣܽܘܢ ܝܰܠܕܰܝ̈ܟܝ̱܇ ܘܢܶܥܠܽܘܢ ܢܽܐܪܬܽܘܢ ܡܰܠܟܽܘܬܳܐ܇ ܒܪܺܝܟ ܕܒܰܕܡܶܗ ܚܰܕܬܰܢ܀

 

ܛܽܘܒܰܝܟܝ̱ ܐܳܦܪܰܬ ܥܽܘܢܺܝܬܳܐ ܬܶܫܒܚ̈ܳܢ ܠܫܳܠܽܘܚܳܟ ܦܳܪܽܘܩܶܗ ܕܥܳܠܡܳܐ܇ ܕܫܰܚܠܶܦܬ ܡܰܝ̈ܳܐ ܒܩܳܛܢܶܐ ܡܕܺܝܢ̱ܬܳܐ܇

ܛܽܘܒܰܝܟܝ̱ ܩܳܛܢܶܐ ܕܚܰܬܢܳܐ ܕܪܰܘܡܳܐ܇ ܙܰܡܶܢ ܚܰܬܢܶܟܝ̱ ܕܰܚܣܰܪ ܚܰܡܪܶܗ ܕܙܰܡܶܢ ܡܙܰܡܢܳܢܳܐ ܕܙܰܡܶܢ ܥܰܡܡ̈ܶܐ܇ ܠܰܚܠܽܘܠ ܚܰܕܘ̈ܳܬܳܐ ܕܚܰܝ̈ܶܐ ܒܰܥܕܶܝܢ܇ ܛܽܘܒ ܠܰܣܡܺܝܟܰܝ̈ܟܝ̱ ܕܒܶܗ ܐܶܬܦܨܰܚܘ̱܇ ܘܠܰܐܓܳܢܰܝ̈ܟܝ̱ ܕܶܐܬܡܠܺܝܘ ܒܡܶܠܬܶܗ܇ ܒܶܟܝ̱ ܒܰܟܰܪܘ̱ ܗ̱ܘܰܘ܇ ܛܽܘܒܳܐ ܫܡܰܝܳܢܳܐ ܕܰܒܡܶܫܬܽܘܬܶܟܝ̱ ܢܨܰܚܬܝ̱܀

ܛܽܘܒܰܝܟܝ̱ ܥܺܕܬܳܐ ܕܰܚܠܳܦ ܚܰܡܪܳܐ܇ ܕܰܥܒܰܕ ܡܳܪܰܢ ܒܩܳܛܢܶܐ ܡܕܺܝܢ̱ܬܳܐ܇ ܘܶܐܫܬܺܝܘ ܙܡܺܝܢ̈ܶܐ ܕܰܚܠܽܘܠ ܙܰܒܢܳܐ܇ ܘܰܚܕܺܝܘ ܘܰܪܘܰܙܘ̱ ܘܰܙܡܰܪܘ̱ ܫܽܘܒܚܳܐ܇ ܘܟܳܣܳܐ ܕܚܰܝ̈ܶܐ ܕܰܕܡܶܗ ܡܙܰܓ ܒܶܟܝ̱܇ ܕܢܶܫܬܽܘܢ ܝܰܠܕܰܝ̈ܟܝ̱ ܚܰܝ̈ܶܐ ܚܰܕ̈ܬܶܐ܇ ܙܡܰܪܘ̱ ܠܶܗ ܫܽܘܒܚܳܐ܇ ܠܰܒܪܳܐ ܕܰܐܠܳܗܳܐ ܕܢܰܨܚܶܟܝ̱ ܒܟܽܠ ܫܽܘܦܪ̈ܺܝܢ܀

ܐܳܕܳܡ ܚܛܳܐ ܘܰܩܢܳܐ ܥܽܘܢܺܝܬܳܐ ܫܽܘܒܚܳܐ ܠܗܰܘ ܕܶܐܬܳܐ ܘܰܦܪܰܩ ܠܰܢ܇ ܫܽܘܒܚܳܐ ܠܗܰܘ ܕܰܣܥܰܪܢ ܒܰܚܢܳܢܶܗ

ܨܒܳܐ ܗܘܳܐ ܕܰܢܚܰܘܶܐ ܬܶܕܡܽܘܪܬܳܐ܇ ܒܓܰܘ ܩܳܛܢܶܐ ܠܰܐܝܠܶܝܢ ܕܶܐܙܕܰܡܰܢܘ̱܇ ܘܡܶܢ ܬܰܡܳܢ ܫܰܪܺܝ ܕܢܶܣܥܽܘܪ ܗܘܳܐ ܚܰܝܠܳܐ ܘܳܐܬܘ̈ܳܬܳܐ ܒܓܰܘ ܥܳܠܡܳܐ܇ ܫܽܘܒܚܳܐ ܠܡܽܘܟܳܟܶܗ ܕܰܚܠܳܦܰܝܢ܀

ܡܰܝ̈ܳܐ ܡܠܰܘ ܐܶܢܽܘܢ ܠܰܐܓܳܢ̈ܶܐ܇ ܘܰܒܡܶܠܬܶܗ ܕܰܒܪܳܐ ܗ̱ܘܰܘ ܚܰܡܪܳܐ܇ ܐܶܫܬܺܝܘ ܗ̱ܘܰܘ ܙܡܺܝܢ̈ܶܐ ܘܶܐܬܒܰܣܰܡܘ̱܇ ܘܰܐܣܶܩܘ̱ ܬܶܫܒܽܘܚܬܳܐ ܠܙܳܝܽܘܢܳܐ܇ ܫܽܘܒܚܳܐ ܠܗܰܘ ܕܶܐܬܳܐ ܠܦܽܘܪܩܳܢܰܢ܀

ܨܠܳܐ ܗܘܳܐ ܨܶܒܝܳܢܶܗ ܥܰܠ ܡܰܝ̈ܳܐ܇ ܘܠܰܐܓܳܢ̈ܶܐ ܕܣܺܝܡ̈ܳܢ ܗܘ̈ܰܝ ܬܰܡܳܢ܇ ܦܩܰܕ ܠܰܡܫܰܡܫܳܢ̈ܶܐ ܕܡܶܫܬܽܘܬܳܐ ܡܙܰܓܘ̱ ܚܰܡܪܳܐ ܛܳܒܳܐ ܒܰܣܺܝܡܳܐ܇ ܘܡܳܪܶܗ ܕܰܚܠܽܘܠܳܐ ܐܶܬܕܰܡܰܪ܇

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܛܽܘܒܰܝܟܝ̱ ܥܺܕܬܳܐ ܡܗܰܝܡܰܢܬܳܐ܇ ܡܟܺܝܪܬܶܗ ܕܚܰܬܢܳܐ ܫܡܰܝܳܢܳܐ܇ ܕܰܚܠܳܦ ܚܰܡܪܳܐ ܕܰܒܩܳܛܢܶܐ ܚܰܡܪܶܗ ܚܰܝܳܐ ܡܰܦܨܰܚ ܠܶܟܝ̱܇ ܩܳܠܰܝ̈ ܫܽܘܒܚܳܐ ܩܰܪܶܒܝ ܠܶܗ܇ ܕܬܶܥܠܺܝܢ ܥܰܡܶܗ ܠܰܓܢܽܘܢܳܐ܀

ܐܰܠܳܗܳܐ ܕܰܐܪܟܶܢ ܪܰܘܡܶܗ܇ ܘܶܐܬܬܰܚܬܺܝ ܨܶܝܕ ܐ̱ܢܳܫܽܘܬܰܢ܇ ܘܫܰܚܠܶܦ ܡܰܝ̈ܰܐ ܒܓܰܘ ܩܳܛܢܶܐ܇ ܘܰܗܘܳܐ ܚܰܡܪܳܐ ܪܺܝܫܳܝܳܐ ܐܰܫܩܳܐ ܠܰܢ ܡܶܢ ܝܽܘܠܦܳܢܳܟ܇ ܚܰܝ̈ܶܐ ܚܰܕ̈ܬܶܐ ܕܠܳ ܥܳܒܪܺܝܢ܇

 

ܕܨܰܦܪܳܐ ܕܪܰܚܶܡܥܠܰܝ ܚܛܺܝܿܬ ܠܳܟ ܚܳܐܶܢ

ܡܫܺܝܚܳܐ ܕܶܐܬܬܰܚܬܺܝ ܒܚܽܘܒܶܗ ܘܡܶܣܟܺܢܳܐܺܝܬ܇ ܗܰܠܶܟ ܒܰܒܪܺܝܬܳܐ܇ ܡܳܪܝܳܐ ܡܳܪܶܐ ܟܽܠ ܪܰܚܶܡ܀ ܘܰܗܘܳܐ ܥܽܡܗܽܘܢ ܘܰܐܟܘܳܬܗܽܘܢ ܘܰܐܥܬܰܪ ܐܶܢܽܘܢ܇ ܘܗܶܢܽܘܢ ܠܳܐ ܝܰܕܥܽܘܗ̱ܝ ܡܳܪܝܳܐ܀

ܨܒܳܐ ܕܰܢܚܰܘܶܐ ܬܶܕܡܽܘܪܬܳܐ ܒܩܳܛܢܶܐ ܡܕܺܝܢ̱ܬܳܐ ܠܰܐܝܠܶܝܢ ܕܰܣܡܺܝܟܺܝܢ܀

ܒܰܪ ܥܳܒܽܘܕܳܐ ܒܰܣܡܳܟܳܐ ܪܬܰܚ ܗܘܳܐ ܕܢܶܥܒܶܕ܇ ܬܶܕܡܽܘܪܬܳܐ ܪܰܒܬܳܐ܀

ܨܠܳܐ ܗܘܳܐ ܪܶܡܙܶܗ ܟܰܣܝܳܐܺܝܬ ܨܶܝܕ ܡܫܰܡܫܳܢ̈ܶܐ܇ ܕܠܰܐܓܳܢ̈ܶܐ ܢܰܡܠܽܘܢ ܡܰܝ̈ܳܐ܀

ܟܰܕ ܕܶܝܢ ܐܰܘܦܺܝ ܗܘܳܐ ܚܰܡܪܳܐ ܐܳܕܫܳܐ ܫܚܺܝܡܳܐ܇ ܕܰܐܘܠܶܕ̈ܝ̱ ܗܘ̈ܰܝ ܓܽܘܦܢ̈ܶܐ܇ ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝܢ܀

 

ܐܰܠܳܗܝ̱ ܐܰܠܳܗܝ̱ ܩܳܠܳܐ ܡܰܠܰܐܟܳܐ ܕܢܽܘܗܪܳܐ܀

ܠܡܶܫܬܽܘܬܳܐ ܐܶܙܕܰܡܰܢ ܗܘܳܐ܇ ܐܰܝܟ ܒܰܪ ܐ̱ܢܳܫܳܐ ܒܰܪ ܒܳܪܽܘܝܳܐ܇ ܘܰܣܥܰܪ ܬܶܕܡܽܘܪܬܳܐ܇ ܐܰܝܟ ܐܰܠܳܗܳܐ ܕܥܰܠ ܟܽܠ ܫܰܠܺܝܛ܀

ܚܣܰܪ ܗܘܳܐ ܚܰܡܪܳܐ ܒܰܣܡܳܟܳܐ܇ ܕܗܰܘ ܟܳܣܳܐ ܕܚܰܝ̈ܶܐ ܢܶܬܓܠܶܐ. ܬܶܪܓܰܫܝ̱ ܒܶܗ ܐܰܪܥܳܐ܇ ܘܬܶܫܬܺܝܘ ܐ̱ܢܳܫܽܘܬܳܐ܇ ܘܢܶܗܘܶܐ ܡܶܢܶܗ ܒܽܘܝܳܐܳܐ ܠܡܶܣܟܺܢ̈ܶܐ ܘܠܰܐܒܺܝ̈ܠܶܐ ܟܽܠܗܽܘܢ܀

ܐܰܘܦܺܝ ܗܘܳܐ ܚܰܡܪܳܐ ܒܡܶܫܬܽܘܬܳܐ܇ ܘܰܠܡܰܪܝܰܡ ܒܽܘܝܳܐܳܐ ܐܰܪܬܚܳܗܿ ܕܬܩܰܪܶܒܝ ܦܝܳܣܳܐ ܕܬܶܒܥܶܐ ܡܶܢ ܝܰܠܕܳܗܿ܇ ܕܢܶܥܒܶܕ ܐܳܬܳܐ ܒܰܚܠܽܘܠܳܐ. ܘܰܢܚܰܕܶܐ ܠܰܙܡܺܝ̈ܢܶܐ ܟܽܠܗܽܘܢ܀

ܫܶܩܝܳܐ ܝܰܗܒ ܗܘܳܐ ܕܠܳܐ ܥܰܒܕ̈ܶܐ܇ ܘܰܕܠܳܐ ܓܽܘܦܢ̈ܶܐ ܚܰܡܪܳܐ ܛܳܒܳܐ܇ ܘܰܬܗܰܪܘ̱ ܚܰܬܢܳܐ ܘܰܙܡܺܝܢܰܘ̈ܗܝ܇ ܒܳܐܬܳܐ ܕܬܶܗܪܳܐ ܘܠܳܐ ܐܰܣܟܶܠܘ̱ ܕܡܰܢܽܘ ܘܒܰܪ ܡܰܢܽܘ܀

ܗܳܝ ܝܰܡܺܝܢܳܐ ܕܶܐܬܦܰܫܛܰܬ݀܇ ܘܒܰܪܰܟܬܶܗ ܠܚܰܡܪܳܐ ܒܩܳܛܢܶܐ܇ ܗܺܝ ܬܒܰܪܶܟܝ̱ ܠܰܒܢܶܝ̈ܗܿ ܕܥܺܕܬܳܐ ܡܗܰܝܡܰܢܬܳܐ܇ ܘܬܶܙܓܽܘܪ ܡܶܢܳܗܿ ܢܶܟܝܳܢ̈ܶܐ܇ ܘܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܨܠܳܐ ܨܶܒܝܳܢܶܗ ܥܰܠ ܡܰܝ̈ܳܐ܇ ܕܺܐܝܬ ܒܰܐܓܳܢ̈ܶܐ ܘܰܗ̱ܘܰܘ ܚܰܡܪܳܐ܇ ܘܰܒܚܰܝܠܳܐ ܕܥܳܒܽܘܕܽܘܬܶܗ܇ ܟܝܳܢ̈ܶܐ ܫܰܡܥܽܘܗ̱ܝ ܘܶܐܬܬܙܺܝܥܘ̱ ܗ̱ܘܰܘ܇ ܘܫܰܡܠܺܝܘ ܦܽܘܩܕܳܢܶܗ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܒܪܳܐ ܕܰܫܪܳܐ ܒܡܰܪܒܥܳܐ

ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ܇ ܒܰܪܬܺܝܬܳܐ ܒܰܐܬܪܶܗ ܓܰܐܝܳܐ܇ ܐܶܙܕܰܡܰܢ ܗܘܳܐ ܠܡܶܫܬܽܘܬܳܐ܇ ܟܰܕ ܠܳܐ ܦܪܺܝܫ ܡܶܢ ܝܳܠܽܘܕܶܗ ܡܒܰܪܰܟ܀

ܡܰܠܰܐܟ̈ܶܐ ܙܳܝܥܺܝܢ ܡܶܢܶܗ܇ ܘܠܳܐ ܡܣܰܝܒܪܺܝܢ ܝܳܩܽܘܕܽܘܬܶܗ܇ ܘܰܐܝܟ ܫܚܺܝܡܳܐ ܥܰܠ ܠܰܚܠܽܘܠܳܐ܇ ܟܰܕ ܗܽܘ ܡܕܰܒܰܪ ܟܽܠ ܒܶܪ̈ܝܳܢ ܡܒܰܪܰܟ܀

ܫܡܰܥ ܚܰܬܢܳܐ ܕܰܚܣܰܪ ܚܰܡܪܳܐ܇ ܘܡܽܘܢ ܢܺܐܡܰܪ ܠܳܐ ܝܳܕܰܥ ܗܘܳܐ܇ ܡܳܪܰܢ ܐܰܝܟ ܝܳܕܰܥ ܟܽܠܳܐ ܡܰܠܺܝ ܒܰܥܓܰܠ ܣܽܘܢܩܳܢܶܗ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܐܰܝܟ ܐܰܠܳܗܳܐ ܦܩܰܕ ܘܰܗ̱ܘܰܘ܇ ܡܰܝ̈ܳܐ ܚܰܡܪܳܐ ܪܺܝܫܳܝܳܐ܇ ܘܰܐܝܟ ܒܰܪܢܳܫܳܐ ܐ̱ܶܟܰܠ ܘܶܐܫܬܺܝ܇ ܘܐ̱ܢܳܫܳܐ ܟܽܠܗܽܘܢ ܐܶܬܕܰܡܰܪܘ ܡܒܰܪܰܟ܀

ܥܰܠ ܘܰܫܪܳܐ ܐܰܝܟ ܒܰܪܢܳܫܳܐ ܟܰܕ ܠܳܐ ܦܪܺܝܫ ܡܶܢ ܝܳܠܽܘܕܶܗ܇ ܐܰܓܢܺܝ ܢܰܦܫܶܗ ܒܰܣܡܳܟܳܐ܇ ܗܰܘ ܡܙܰܡܢܳܢܳܐ ܕܙܰܕܺܝ̈ܩܶܐ ܡܒܰܪܰܟ܀

ܪܶܘܙܰܬ݀ ܡܶܫܬܽܘܬܳܐ ܒܡܳܪܰܢ܇ ܕܓܳܢܶܐ ܒܳܗܿ ܘܰܡܩܰܕܶܫ ܠܳܗܿ܇ ܘܰܪܘܰܙܘ̱ ܟܽܠܗܽܘܢ ܕܰܣܡܺܝܟܺܝܢ ܘܰܐܣܶܩܘ̱ ܩܳܠܰܝ̈ ܬܶܫܒܽܘܚܬܳܐ ܡܒܰܪܰܟ܀

 

ܬܶܫܒܽܘܚܬܳܐ ܚܕܰܬܳܐ: ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ

ܗܰܠܶܟ ܒܰܐܪܥܳܐ ܐܰܝܟ ܕܰܨܒܳܐ܇ ܘܰܪܕܰܘ ܡܶܢܶܗ ܥܽܘܕܪ̈ܳܢܶܐ܇ ܘܫܰܪܺܝ ܒܚܰܝ̈ܠܶܐ ܘܳܐܬܘ̈ܳܬܳܐ܇ ܘܶܐܬܕܰܢܚܰܬ݀ ܒܳܪܽܘܝܽܘܬܶܗ܀

ܨܒܳܐ ܗܘܳܐ ܘܶܐܙܰܠ ܠܡܶܫܬܽܘܬܳܐ܇ ܕܰܢܚܰܘܶܐ ܒܳܗܿ ܬܶܕܡܽܘܪܬܳܐ܇ ܘܢܶܚܙܶܐ ܟܽܠ ܐ̱ܢܳܫ ܘܰܢܗܰܝܡܶܢ܇ ܕܰܐܠܳܗܰܐܗ̱ܘ ܘܒܰܪ ܐܰܠܳܗܰܐ ܗ̱ܘ܀

ܐܶܡܰܪ ܠܳܗܿ ܡܳܪܰܢ ܝܶܫܽܘܥ܇ ܠܝܳܠܶܕܬܶܗ ܒܰܣܺܝܡܳܐܺܝܬ܇ ܫܠܳܝ ܐܰܢ̱ܬܬܳܐ ܚܰܕ ܥܶܕܳܢܳܐ܇ ܥܰܕ ܡܰܘܦܶܐ ܟܽܠܶܗ ܚܰܡܪܶܗ܀

ܠܡܰܝ̈ܳܐ ܦܩܰܕ ܐܰܝܟ ܒܳܪܽܘܝܳܐ܇ ܘܰܗ̱ܘܰܘ ܚܰܡܪܳܐ ܪܺܝܫܳܝܳܐ܇ ܘܶܐܫܬܺܝܘ ܗܳܢܽܘܢ ܕܰܣܡܺܝܟܺܝܢ܇ ܘܰܐܘܕܺܝܘ ܠܗܰܘ ܕܰܐܦܨܰܚ ܐܶܢܽܘܢ܀

ܕܽܘܡܳܪܰܐܗ̱ܘ ܗܳܕܶܐ ܕܰܗܘܳܬ݀܇ ܕܡܶܢ ܡܰܝ̈ܳܐ ܚܰܡܪܳܐ ܚܰܘܺܝ܇ ܘܫܰܒܰܚ ܟܽܠܰܢܳܫ ܥܰܠ ܗܳܕܶܐ܇ ܬܶܕܡܽܘܪܬܳܐ ܚܕܰܬܳܐ ܕܰܗܘܳܬ݀܀

ܫܽܘܒܚܳܐ ܠܡܶܠܬܳܐ ܐܰܠܳܗܳܐ܇ ܕܰܢܚܶܬ ܡܶܢ ܪܰܘܡܳܐ ܠܥܽܘܡܩܳܐ܇ ܘܰܐܝܟ ܒܰܪܢܳܫܳܐ ܐܶܬܚܙܺܝ܇ ܘܚܰܘܺܝ ܚܰܝ̈ܠܶܐ ܘܳܐܬܘ̈ܳܬܳܐ܀

 

 ܡܰܘܪܒܳܐ ܩܳܠܳܐ ܫܠܳܡܠܶܟܝ̱ ܩܰܕܺܝܫܬܳܐ܀

ܠܩܳܛܢܶܐ ܗܳܝ ܕܰܓܠܺܝܠܳܐ܇ ܐܶܙܕܰܡܰܢ ܗܘܳܐ ܦܳܪܽܘܩܰܢ ܘܰܚܣܰܪ ܚܰܡܪܳܐ ܒܰܐܓܳܢ̈ܶܐ܇ ܘܰܦܩܰܕ ܡܰܝ̈ܳܐ ܡܠܰܘ ܐܶܢܶܝܢ ܘܰܠܡܰܝ̈ܳܐ ܚܰܡܪܳܐ ܥܒܰܕ ܗܘܳܐ܇ ܘܠܶܗ ܗܽܘ ܡܫܰܒܚܺܝܢܰܢ܀

ܥܰܠ ܡܳܪܰܢ ܠܰܚܠܽܘܠܳܐ܇ ܘܥܰܠ ܕܰܚܣܰܪ ܬܰܡܳܢ ܚܰܡܪܳܐ܇ ܠܡܰܝ̈ܳܐ ܪܡܰܙ ܒܓܰܘ ܐܰܓܳܢ̈ܶܐ܇ ܘܰܗ̱ܘܰܘ ܚܰܡܪܳܐ ܪܺܝܫܳܝܳܐ ܘܰܐܬܗܰܪ ܐܶܢܽܘܢ ܠܰܙܡܺܝ̈ܢܶܐ ܘܠܶܗ܀

ܣܳܓܕܺܝܢܰܢ ܠܗܰܘ ܟܰܣܝܳܐ܇ ܕܰܐܪܦܺܝ ܟܪ̈ܽܘܒܶܐ ܘܰܣܪ̈ܳܦܶܐ܇ ܘܰܢܚܶܬ ܗܘܳܐ ܘܗܰܠܶܟ ܒܰܐܪܥܳܐ ܘܰܠܡܶܫܬܽܘܬܳܐ ܐܶܙܰܠ ܘܚܰܘܺܝ ܒܶܗ ܒܳܪܽܘܝܽܘܬܶܗ ܘܠܶܗ܀

ܫܽܘܒܚܳܐ ܢܰܣܶܩ ܟܽܠܰܢ ܝܰܘܡܳܢܳܐ ܠܰܒܪܳܐ ܡܫܺܝܚܳܐ܇ ܕܰܐܝܟ ܫܚܺܝܡܳܐ ܥܰܠ ܠܰܚܠܽܘܠܳܐ܇ ܕܰܐܝܟ ܐܰܠܳܗܳܐ ܫܰܪܺܝܪܳܐ܇ ܚܰܘܺܝ ܐܳܬܳܐ ܕܬܶܕܡܽܘܪܬܳܐ܇ ܘܠܶܗ܀

 

ܫܰܒܰܚܘ̱ ܠܡܳܪܝܳܐ ܩܳܠܳܐ ܣܳܓܶܕ ܠܳܟ ܡܳܪܝܳܐ

ܡܰܠܰܐܟ̈ܶܐ ܘܰܒܢܰܝ̈ܢܳܫܳܐ܇ ܡܩܰܕܡܺܝܢ ܣܳܓܕܺܝܢ ܠܳܐܝܩܳܪܳܟ܇ ܘܠܳܟ ܗܽܘ ܝܳܐܶܐ ܬܶܫܒܽܘܚܬܳܐ܇ ܐܰܠܳܗܳܐ ܣܓܺܝܕ ܡܶܢ ܟܽܠܳܐ܀

ܗܰܘ ܕܰܡܬܰܪܣܶܐ ܠܟܽܠ ܒܶܪ̈ܝܳܢ܇ ܐܰܝܟ ܣܢܺܝܩܳܐ ܥܰܠ ܠܰܚܠܽܘܠܳܐ܇ ܘܰܣܥܰܪ ܐܳܬܳܐ ܕܬܶܕܡܽܘܪܬܳܐ ܗܰܝܡܶܢܘ̱ ܒܶܗ ܐܳܦ ܬܰܠܡܺܝܕܰܘ̈ܗ̱ܝ܀

ܡܽܘܢ ܝܽܘܬܪܳܢܳܐ ܕܰܩܪܰܐܘܽܘܟ ܐܳܡܪܳܐ ܡܰܪܝܰܡ ܠܚܰܒܺܝܒܳܗܿ܇ ܐܶܢܗܽܘ ܕܠܳܐ ܬܥܰܕܰܪ ܐܶܢܽܘܢ܇ ܘܰܬܡܰܠܶܐ ܚܰܣܺܝܪܽܘܬܗܽܘܢ܀

ܪܬܰܚ ܗܘܳܐ ܝܰܡܳܐ ܕܛܳܒ̈ܳܬܳܐ܇ ܥܰܠ ܡܰܝ̈ܳܐ ܘܰܗ̱ܘܰܘ ܚܰܡܪܳܐ܇ ܘܶܐܫܬܺܝܘ ܙܡܺܝܢ̈ܶܐ ܘܶܐܬܒܰܣܰܡܘ̱ ܘܰܐܣܶܩܘ̱ ܩܳܠܰܝ̈ ܬܶܫܒܽܘܚܬܳܐ܀

ܦܩܰܕ ܡܳܪܰܢ ܠܰܡܫܰܡܫܳܢ̈ܶܐ ܕܢܶܡܠܽܘܢ ܐܰܓܳܢ̈ܶܐ ܡܰܝ̈ܳܐ܇ ܘܰܒܪܶܡܙܶܗ ܫܰܚܠܶܦ ܐܶܢܽܘܢ ܘܰܗ̱ܘܰܘ ܚܰܡܪܳܐ ܪܺܝܫܳܝܳܐ܀

ܟܰܕ ܐܶܬܬܰܚܬܺܝ ܦܳܪܽܘܩܰܢ܇ ܘܰܗܘܳܐ ܐ̱ܢܳܫܳܐ ܒܨܶܒܝܳܢܶܗ ܠܩܳܛܢܶܐ ܕܰܓܠܺܝܠܐ ܐܶܙܰܠ܇ ܘܶܐܙܕܰܡܰܢ ܗܘܳܐ ܦܳܪܽܘܩܰܢ܀

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܇ ܕܰܐܪܟܶܢ ܪܰܘܡܳܐ ܕܪܰܒܽܘܬܶܗ܇ ܘܶܐܙܕܰܡܰܢ ܗܘܳܐ ܠܡܶܫܬܽܘܬܳܐ܇ ܘܡܰܝ̈ܳܐ ܠܚܰܡܪܳܐ ܫܰܚܠܶܦ ܗܘܳܐ܀

ܐܶܬܒܰܪܟܰܬ݀ ܗܘܳܬ݀ ܡܶܫܬܽܘܬܳܐ܇ ܘܶܐܬܩܰܕܫܰܬ݀ ܫܰܘܬܳܦܽܘܬܳܐ܇ ܘܟܽܠܶܗ ܟܶܢܫܳܐ ܕܰܣܡܺܝܟ ܗܘܳܐ܇ ܬܗܰܪ ܒܳܐܬܳܐ ܚܕܰܬܳܐ ܕܰܗܘܳܬ݀܀

 

ܛܽܘܒܰܝܗܽܘܢ ܠܡܶܣܟܺܢ̈ܶܐ ܒܩܳܠܳܐ܇ ܣܳܓܕܺܝܢܰܢ ܠܰܨܠܺܝܒܳܐ

ܣܳܓܕܺܝܢܰܢ ܠܗܰܘ ܩܳܠܳܐ ܕܥܰܠ ܠܰܚܠܽܘܠܳܐ ܐܰܝܟ ܒܰܪܢܳܫܳܐ܇ ܘܰܣܥܰܪ ܬܰܡܳܢ ܬܶܕܡܽܘܪܬܳܐ܇ ܡܫܺܝܚܳܐ ܐܶܬܕܰܟܪܰܝܢ܀

ܟܰܕ ܥܰܠ ܡܳܪܰܢ ܠܰܣܡܳܟܳܐ܇ ܘܰܓܢܶܐ ܬܰܡܳܢ ܐܰܝܟ ܒܰܪܢܳܫܳܐ ܘܰܚܣܰܪ ܚܰܡܪܳܐ ܒܰܚܠܽܘܠܳܐ܇ ܡܫܺܝܚܳܐ ܐܶܬܕܰܟܪܰܝܢ܀

ܟܽܠܢܳܫ ܚܰܝܳܒ ܕܢܰܘܕܶܐ ܠܒܰܪ ܐܰܠܳܗܳܐ ܥܰܠ ܛܳܒ̈ܳܬܶܗ܇ ܕܰܣܥܰܪ ܥܰܡܰܢ ܒܛܰܝܒܽܘܬܶܗ܇ ܡܫܺܝܚܳܐ ܐܶܬܕܰܟܪܰܝܢ܀

ܣܓܺܝܕ ܝܰܠܶܕܗ ܕܥܶܠܳܝܳܐ ܕܰܟܡܳܐ ܒܛܺܝܠ ܠܶܗ ܥܰܠ ܒܪܺܝܬܶܗ܇ ܘܰܨܒܳܐ ܟܽܠ ܫܳܥ ܒܳܛܒ̈ܳܬܰܢ܇ ܡܫܺܝܚܳܐ ܐܶܬܕܰܟܪܰܝܢ܀

ܛܳܒܳܐ ܕܚܰܘܺܝ ܒܰܣܡܳܟܳܐ ܠܚܰܬܢܳܐ ܘܟܰܠܬܳܐ ܠܰܙܡܺܝܢ̈ܶܐ܇ ܘܰܐܦܨܰܚ ܐܶܢܽܘܢ ܒܚܰܡܪܳܐ ܕܰܥܒܰܕ ܡܫܺܝܚܳܐ ܐܶܬܕܰܟܪܰܝܢ܀

ܫܽܘܒܚܳܐ ܢܩܰܪܶܒ ܟܽܠܰܢ ܠܝܶܫܽܘܥ ܡܫܺܝܚܳܐ ܕܰܣܥܰܪ ܒܩܳܛܢܶܐ܇ ܬܶܗܪܳܐ ܕܰܡܠܶܐ ܬܶܕܡܽܘܪܬܳܐ܇ ܡܫܺܝܚܳܐ܀

 

ܩܳܠܳܐ ܕܨܰܦܪܳܐ ܩܳܠܳܐ ܒܟܽܠܡܶܕܶܡ ܐܶܬܒܰܩܺܝܿܬ

ܬܶܗܪܳܐ ܪܰܒܳܐ ܚܰܒܺܝ̈ܒܰܝ܇ ܕܰܐܝܟܰܢ ܡܶܢ ܡܰܝ̈ܳܐ ܫܚܺܝܡ̈ܶܐ܇ ܗܘܳܐ ܚܰܡܪܳܐ ܛܳܒܳܐ ܒܪܶܡܙܶܗ ܕܰܡܪܰܝܡܳܐ܇ ܗܰܘ ܪܺܝܫ ܣܡܳܟܳܐ ܕܰܛܥܶܡ ܗܘܳܐ ܡܰܝ̈ܳܐ ܕܚܰܡܪܳܐ ܗ̱ܘܰܘ܇ ܠܳܐ ܐܰܪܓܶܫ ܗܘܳܐ ܒܬܶܕܡܽܘܪܬܳܐ ܕܰܣܥܰܪ ܦܳܪܽܘܩܰܢ܇ ܩܪܳܐ ܠܶܗ ܠܚܰܬܢܳܐ ܘܶܐܡܰܪ ܠܶܗ܇ ܥܰܠ ܡܳܢܳܐ ܥܒܰܕܬ ܗܳܟܰܢܳܐ܇ ܘܰܢܛܰܪܬܳܝܗ̱ܝ ܠܚܰܡܪܳܐ ܛܳܒܳܐ܇ ܥܕܰܡܳܐ ܕܰܣܡܺܝ̈ܟܶܐ ܪܰܘܺܝܘ ܗ̱ܘܰܘ܇ ܘܶܐܡܰܪ ܠܶܗ ܕܝܶܫܽܘܥ ܢܳܨܪܳܝܳܐ ܐܰܣܓܝܶܗ܀

ܪܰܒ ܬܶܗܪܳܐ ܕܰܗܘܳܐ ܒܩܳܛܢܶܐ܇ ܒܡܶܫܬܽܘܬܳܐ ܕܠܶܗ ܐܶܙܕܰܡܰܢ܇ ܝܶܫܽܘܥ ܦܳܪܽܘܩܰܢ ܟܰܕ ܥܰܠ ܘܰܓܢܳܐ ܒܳܗܿ ܚܰܬܢܳܐ ܥܒܺܝܕ ܗܘܳܐ ܡܶܣܟܺܢܳܐ܇ ܣܢܺܝܩܳܐ ܘܚܰܣܺܝܪܳܐ܇ ܥܰܡܳܐ ܟܢܺܝܫ ܗܘܳܐ ܘܶܐܬܛܰܝܰܒ ܕܠܰܚܠܽܘܠܳܐ ܢܶܚܙܽܘܢ܇ ܘܡܳܪܰܢ ܚܳܣ ܗܘܳܐ ܥܰܠ ܚܰܬܢܳܐ܇ ܕܰܐܳܘܦܺܝ ܗܘܳܐ ܠܶܗ ܓܶܝܪ ܚܰܡܪܶܗ܇ ܘܰܪܡܰܙ ܗܘܳܐ ܠܫܳܩܰܘ̈ܳܬܳܐ܇ ܘܰܡܠܰܘ ܡܰܝ̈ܳܐ ܠܰܐܓܳܢ̈ܶܐ܇ ܘܡܶܢ ܡܰܝ̈ܳܐ ܥܒܰܕ ܗܘܳܐ ܚܰܡܪܳܐ ܪܺܝܫܳܝܳܐ܇

 

ܐ̱ܚܪܺܢܳܐ ܩܳܠܳܐ ܩܽܘܩܳܝܳܐ

ܟܰܕ ܐܶܙܕܰܡܰܢ ܦܳܪܽܘܩܰܢ ܠܡܶܫܬܽܘܬܳܐ ܒܩܳܛܢܶܐ܇ ܐܰܝܟ ܫܰܪܟܳܐ ܕܐ̱ܢܳܫ̈ܳܐ ܟܽܠܗܽܘܢ ܓܢܶܐ ܗܘܳܐ ܒܰܣܡܳܟܳܐ܇ ܕܡܶܬܚܙܶܐ ܗܘܳܐ ܠܗܽܘܢ ܒܰܕܡܽܘܬ ܒܰܪܢܳܫܳܐ܇ ܟܰܕ ܗܽܘ ܐܺܝܬܰܘܗ̱ܝ ܡܳܪܳܐ ܕܰܒܪܺܝܬܳܐ܇ ܫܽܘܒܚܳܐ ܠܶܗ ܟܡܳܐ ܐܶܬܡܰܟܰܟ ܡܶܛܽܠܳܬܰܢ܇ ܕܢܶܦܪܽܘܩ ܠܰܢ ܡܶܢ ܛܳܥܝܽܘܬܳܐ ܕܒܺܝܫܳܐ ܒܥܶܠܕܰܪܳܐ܇ܗ ܇ ܗ܀

ܒܪܳܐ ܕܰܐܣܓܺܝ ܚܰܡܪܳܐ ܛܳܒܳܐ ܒܶܝܬ ܡܶܫܬܽܘܬܳܐ܇ ܘܚܰܕܺܝ ܐܶܢܽܘܢ ܠܰܣܡܺܝܟ̈ܶܐ ܒܬܶܕܡܽܘܪܬܳܐ ܕܰܥܒܰܕ܇ ܐܰܣܓܳܐ ܒܥܺܕܬܳܟ ܫܰܝܢܳܐ ܘܰܫܠܳܡܳܐ܇ ܘܒܰܛܶܠ ܡܶܢܳܗܿ ܣܶܕܩ̈ܶܐ ܘܚܶܪ̈ܝܳܢܶܐ܇ ܘܰܐܝܟ ܕܫܰܚܠܦܶܬ ܡܰܝ̈ܳܐ ܒܪܶܡܙܳܟ ܘܰܗ̱ܘܰܘ ܚܰܡܪܳܐ܇ ܫܰܚܠܶܦ ܠܰܢ ܡܶܢ ܒܺܝܫ̈ܳܬܳܐ ܕܠܰܓܢܽܘܢܳܟ ܢܶܫܬܘܶܐ܇ ܗ܇ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܦܩܰܕ ܗܘܳܐ ܝܶܫܽܘܥ ܕܢܶܡܠܽܘܢ ܡܰܝ̈ܳܐ ܒܓܰܘ ܐܰܓܳܢ̈ܶܐ܇ ܘܰܡܫܰܡܫܳܢ̈ܶܐ ܥܒܰܕܘ̱ ܐܰܝܟ ܡܶܠܬܶܗ ܘܰܡܠܰܘ ܐܶܢܶܝܢ܇ ܗܳܝܕܶܝܢ ܚܰܝܠܳܐ ܕܰܐܠܳܗܽܘܬܶܗ ܕܳܠ ܟܰܣܝܳܐܺܝܬ܇ ܘܫܰܚܠܶܦ ܐܶܢܽܘܢ ܘܰܗ̱ܘܰܘ ܚܰܡܪܳܐ ܩܰܠܺܝܠܳܐܺܝܬ܀

ܫܽܘܒܚܳܐ ܠܳܟ ܡܳܪܝ̱ ܕܰܒܛܰܝܒܽܘܬܳܟ ܬܰܚܬܺܝܬ ܢܰܦܫܳܟ܇ ܡܶܛܽܠܳܬܰܢ ܕܰܬܥܰܠܶܐ ܠܰܢ ܨܶܝܕ ܝܳܠܽܘܕܳܟ܇ ܒܪܳܐ ܕܰܒܡܶܠܬܶܗ ܫܰܚܠܶܦ ܡܰܝ̈ܳܐ ܠܚܰܡܪܳܐ ܛܳܒܳܐ܇ ܫܰܝܢܳܟ ܢܰܡܠܶܟ ܒܰܐܪ̈ܒܰܥܦܶܢܝܳܢ ܠܳܟ ܬܶܫܒܽܘܚܬܳܐ܀

ܕܰܬܠܳܬܫܳܥܺܝ̈ܢ ܩܳܠܳܐ ܠܡܰܪܝܰܡ ܝܳܠܕܰܬ ܐܰܠܳܗܳܐ

ܨܳܡ ܦܳܪܽܘܩܰܢ ܘܰܕܪܰܫ ܠܰܢ ܐܽܘܪܚܳܐ ܕܚܰܝ̈ܶܐ܇ ܕܢܶܪܕܶܐ ܒܳܗܿ ܕܠܳܐ ܬܽܘܩܠ̈ܳܬܳܐ ܠܘܳܬ ܫܳܠܽܘܚܶܗ܇ ܘܢܶܬܒܰܣܰܡ ܪܽܘܚܳܢܳܐܺܝܬ ܡܶܢ ܦܰܪܨܽܘܦܶܗ ܒܰܕܡܽܘܬ ܥܺܝܪ̈ܶܐ ܘܡܰܠܰܐܟ̈ܶܐ ܕܠܳܐ ܕܽܘܘܳܕܳܐ܀

ܒܰܪ ܛܳܒܳܐ ܕܩܰܒܶܠ ܨܰܘܡܳܐ ܕܢܺܝܢܘܶܐ ܡܕܺܝܢ̱ܬܳܐ܇ ܘܰܐܠܶܦ ܨܰܘܡܳܐ ܩܰܕܺܝܫܳܐ ܠܰܒܢܰܝ̈ܢܳܫܳܐ܇ ܗܰܒܠܰܢ ܡܳܪܰܢ ܕܰܢܨܽܘܡ ܠܳܟ ܨܰܘܡܳܐ ܕܰܟܝܳܐ܇ ܘܢܶܗܘܶܐ ܙܡܺܝܢ̈ܶܐ ܒܡܰܠܟܽܘܬܳܟ ܗܳܝ ܕܰܫܡܰܝܳܐ܇

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܥܳܢܘܳܝܽܘܬܳܐ ܐܶܬܟܰܬܰܫܘ̱ ܠܽܘܩܒܰܠ ܪܶܓܬܳܐ ܕܝܰܥܢܽܘܬܳܐ܇ ܘܶܐܨܛܰܠܰܠܘ̱ ܡܶܢ ܚܽܘܫܳܒ̈ܶܐ ܕܡܰܢܟܪܺܝܢ ܡܶܢ ܐܰܠܳܗܳܐ܇ ܕܬܶܬܡܰܢܥܽܘܢ ܐܰܝܟ ܟܰܫܺܝܪܳܐ܇ ܠܡܰܠܟܽܘܬܳܐ ܫܡܰܝܳܢܺܝܬܳܐ܀

ܫܽܘܒܚܳܐ ܠܰܐܒܳܐ ܩܰܕܺܝܫܳܐ܇ ܘܠܰܒܪܶܗ ܕܰܐܩܪܶܒ ܥܰܡ ܒܺܝܫܳܐ܇ ܘܰܠܪܽܘܚܩܽܘܕܫܳܐ ܕܰܡܚܰܝܶܠ܇ ܠܨܰܝܳܡ̈ܶܐ ܒܰܐܓܽܘܢܰܝ̈ܗܽܘܢ܇ ܬܠܽܝܬܳܝܽܘܬܳܐ ܩܰܕܺܝܫܬܳܐ. ܘܶܐܬܪܰܚܰܡ ܥܰܠ ܢܰܦܫ̈ܳܬܰܢ܀

 

ܨܰܠܰܘ ܥܰܠ ܚܰܛܳܝܳܐ ܕܰܣܪܰܛ ܒܫܰܢ̱ܬܳܐ ܐܨܦܐ ܡ ܒܝܰܘܡܰܝ̈ ܕܡܳܪܝ̱ ܝܳܘܠܺܝܳܘܣ ܩܰܕܡܳܝܳܐ ܕܽܐܳܘܪܺܝܦܺܝ

 

ܬܽܘܒ ܛܶܟܣܳܐ ܕܥܰܠ ܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ

ܩܰܕܡܳܝܰܬ ܢܳܓܰܗ ܬܪܶܝܢ ܒܫܰܒܳܐ

ܥܶܢܝܳܢܳܐ ܕܪܰܚܶܡ ܥܠܰܝ܇ ܒܩܳܠܳܐ ܚܛܺܝܿܬ ܠܳܟ ܚܳܐܶܢ

ܚܛܺܝܿܬ ܠܳܟ ܚܳܐܶܢ ܠܚܰܛܳܝ̈ܶܐ܇ ܩܰܒܶܠ ܒܳܥܽܘܬܝ̱ ܘܰܫܒܽܘܩ ܠܺܝ ܣܰܟܠܽܘܬܝ̱܇ ܡܳܪܝܳܐ ܡܳܪܶܐ܀

ܚܽܘܢܰܝܢܝ̱ ܚܳܐܶܢ ܠܚܰܛܳܝ̈ܶܐ܇ ܘܩܰܒܶܠ ܒܳܥܽܘܬܝ̱ ܘܰܫܒܽܘܩ ܠܺܝ ܣܰܟܠܽܘܬܝ̱܇ ܡܳܪܝܳܐ ܡܳܪܶܐ܀

ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ܇ ܚܢܳܢܳܐ ܘܪ̈ܰܚܡܶܐ܇ ܡܶܢܳܟ ܫܳܐܶܠ ܐ̱ܢܳܐ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܨܰܘܡܳܟ ܡܳܪܰܢ ܢܶܗܘܶܐ ܠܰܢ ܫܽܘܪܳܐ ܪܳܡܳܐ܇ ܘܒܶܗ ܗܽܘ ܢܶܣܬܰܬܰܪ ܡܳܪܝܳܐ ܡܳܪܶܐ ܟܽܠ܀

ܨܰܘܡܰܢ ܢܶܗܘܶܐ ܠܰܢܝܳܚܳܟ܇ ܘܰܨܠܰܘ̈ܳܬܰܢ ܐܰܝܟ ܥܶܛܪܳܐ ܩܕܳܡܰܝܟ ܡܳܪܝܳܐ ܡܳܪܶܐ ܟܽܠ܀

ܫܽܘܒܚܳܐ ܠܳܟ ܡܳܪܰܢ ܝܶܫܽܘܥ܇ ܕܨܳܡܬ ܘܰܦܪܰܩܬ ܠܰܢ܇ ܘܡܶܢ ܒܺܝܫܳܐ ܘܚܰܝܠܶܗ ܡܳܪܝܳܐ ܡܳܪܶܐ ܟܽܠ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܢܽܘܗܪܳܐ ܕܡܶܢ ܢܽܘܗܪܳܐ

ܗܰܒܠܰܢ ܦܳܪܽܘܩܰܢ܇ ܒܛܳܒܽܘܬܳܟ ܕܨܰܘܡܳܐ ܢܨܽܘܡ܇ ܒܕܰܟܝܽܘܬܳܐ ܘܩܰܕܺܝܫܽܘܬܳܐ܇ ܘܒܶܗ ܢܗܶܐ ܫܰܘܬܳܦ̈ܶܐ ܠܥܺܝܪ̈ܶܐ܇ ܬܰܘ܀

ܒܨܰܘܡܳܐ ܕܨܳܡ ܡܳܪܰܢ܇ ܐܰܠܦܶܗ ܗܘܳܐ ܠܥܺܕܬܳܐ ܕܗܳܟܰܢ܇ ܕܰܬܨܽܘܡܝ̱ ܘܒܶܗ ܬܶܙܟܶܐ ܠܒܺܝܫܳܐ܇ ܒܥܶܠܕܰܪܳܐ ܕܥܰܡܶܗ ܡܰܩܪܶܒ ܬܰܘ ܟܽܠ܀

ܒܨܰܘܡܳܐ ܦܰܪܨܽܘܦܶܗ܇ ܕܡܽܘܫܶܐ ܒܛܽܘܪܳܐ ܐܶܙܕܰܗܺܝ܇ ܘܰܫܡܰܥ ܡܶܠܰܘ̈ܗ̱ܝ ܕܰܓܢܺܝܙܳܐ܇ ܘܰܐܚܶܬ ܠܽܘܚ̈ܶܐ ܕܢܳܡܽܘܣܳܐ܇ ܘܰܚܢܰܢ ܬܰܝܳܒ̈ܶܐ܇ ܢܨܽܘܡ ܕܰܢܩܰܒܶܠ ܫܽܘܒܩܳܢܳܐ܀

ܡܫܺܝܚܳܐ ܐܰܠܳܗܳܐ. ܕܗܰܘ ܐܰܠܶܦ ܠܰܢ ܕܰܒܨܰܘܡܳܐ ܢܶܙܟܶܐ ܠܚܰܫ̈ܶܐ ܕܰܚܛܺܝܬܳܐ܇ ܘܰܢܫܰܗܶܐ ܠܰܪ̈ܓܺܝܓܳܬܳܐ ܬܰܘ܀

ܩܪܺܝ ܡܳܪܝ̱ ܠܚܽܘܫܳܒ̈ܰܝ ܡܶܢ ܦܶܗܝܳܐ ܕܰܣܪܺܝܩܽܘܬܳܐ܇ ܘܰܥܒܶܕ ܕܢܶܗܘܽܘܢ ܚܳܝܪܺܝܢ ܒܗܰܘ܇ ܥܳܠܡܳܐ ܪܰܒܳܐ ܕܠܳܐ ܡܶܫܬܪܶܐ܇ ܕܰܐܘܕܶܐ ܘܶܐܣܓܽܘܕ ܠܳܟ܇ ܘܶܐܙܡܰܪ ܠܳܟ ܫܽܘܒܳܚܐ܀

ܬܰܘܕܺܝܬܳܐ ܠܳܟ ܡܳܪܝ̱܇ ܕܰܦܪܰܩܬܳܝܗ̱ܝ ܠܓܶܢܣܶܗ ܕܳܐܕܳܡ ܥܰܠ ܟܰܬܦ̈ܳܬܳܟ ܙܰܝܰܚܬܳܝܗ̱ܝ܇ ܘܰܠܒܶܝܬ ܐܰܒܽܘܟ ܐܰܥܶܠܬܳܝܗ̱ܝ ܬܰܘ ܟܽܠ܀

 

ܩܳܠܳܐ ܕܪܰܡܫܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ܇

ܕܳܢܺܝܐܶܝܠ ܛܰܠܝܳܐ ܪܓܺܝܓܳܐ ܒܨܰܘܡܳܐ ܕܨܳܡ ܗܘܳܐ܇ ܣܟܰܪ ܦܽܘܡܳܐ ܕܰܐܪ̈ܝܰܘܳܬܳܐ܇ ܘܚܰܕܺܝ ܡܰܠܟܳܐ ܕܳܪܺܝܽܘܫ ܘܰܙܡܰܪ ܫܽܘܒܚܳܐ܇ ܠܰܐܠܳܗܳܐ ܕܦܰܨܺܝ ܠܥܰܒܕܶܗ܇ ܗ܇ ܡܶܢ ܚܰܝܘ̈ܳܬܳܐ܀

ܒܪܺܝܟ ܗܽܘ ܕܰܥܒܰܕ ܠܰܢ ܨܰܘܡܳܐ ܙܰܝܢܳܐ ܕܰܟܝܳܐ܇ ܕܢܶܪܕܶܐ ܒܶܗ ܕܠܳܐ ܬܽܘܩ̈ܠܳܬܳܐ܇ ܘܢܶܗܘܶܐ ܒܶܗ ܙܡܺܝܢ̈ܶܐ܇ ܟܽܠܰܢ ܠܰܓܢܽܘܢ ܢܽܘܗܪܳܐ ܘܢܶܬܒܰܣܰܡ ܥܰܡ ܩܰܕܺܝܫ̈ܶܐ ܗ ܘܢܶܙܡܰܪ ܫܽܘܒܚܳܐ܀ 

ܐ̱ܚܪܺܢܳܐ ܩܽܘܩܳܝܳܐ܇

ܨܰܝܳܡܳܐ ܫܡܰܥ ܠܰܢܒܺܝܳܐ ܕܗܳܐ ܩܳܥܶܐ ܠܳܟ܇ ܕܰܠܚܶܪܝܳܢܳܐ ܨܳܐܶܡ ܐܰܢ̱ܬ ܘܢܶܟܠܳܐ ܒܠܶܒܳܟ ܟܣܶܐ܇ ܠܳܐ ܗܘܳܐ ܕܬܟܽܘܦ ܨܰܘܪܳܟ ܐܳܡܰܪ ܠܳܟ܇ ܣܰܩܳܐ ܘܩܶܛܡܳܐ ܬܶܗܘܶܐ ܬܶܫܘܺܝܬܳܟ܇ ܡܶܛܽܠ ܚܽܘܒܳܐ ܡܦܰܩܶܕ ܠܳܟ ܕܬܶܗܘܶܐ ܡܫܰܡܠܰܝ ܒܶܗ܇ ܘܰܒܪܳܡܽܘܬܳܐ ܘܫܽܘܒܗܳܪܳܐ ܢܰܦܫܳܟ ܠܳܐ ܬܰܘܒܶܕ܇ ܗ܀

ܬܰܘ ܐܰܚ̈ܰܝ ܢܶܒܥܶܐ ܪ̈ܰܚܡܶܐ ܡܶܢ ܐܰܠܳܗܳܐ܇ ܘܟܽܠܢܳܫ ܢܰܪܡܶܐ ܪܽܘܡܝܳܢܳܐ ܕܚܳܕܶܐ ܒܶܗ ܡܳܪܝܳܐ܇ ܟܳܗ̈ܢܶܐ ܩܰܪܶܒܘ̱ ܨܠܽܘܬܳܐ ܘܒܳܥܽܘܬܳܐ܇ ܘܰܡܫܰܡܫܳܢ̈ܶܐ ܥܶܛܪܳܐ ܕܦܺܝܪ̈ܡܰܝܗܽܘܢ ܥܰܬܺܝܪ̈ܶܐ ܡܪܰܚܡܳܢܽܘܬܳܐ܇ ܘܡܶܣܟܺܢ̈ܶܐ ܦܝܳܣܳܐ܇ ܕܡܶܬܪܰܥܶܐ ܡܳܪܝܳܐ ܘܥܳܒܶܕ ܪܰܚܡܶܐ ܥܰܠ ܥܳܠܡܳܐ܇

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܳܪܶܐ ܐܰܓܪܳܐ ܒܳܥܶܐ ܦܳܥ̈ܠܶܐ ܕܢܺܐܬܽܘܢ ܥܰܡܶܗ܇ ܠܟܰܪܡܶܗ ܕܺܐܝܬܽܘܗ̱ܝ ܥܰܡܠܳܐ ܪܰܒܳܐ ܕܙܰܕܺܝܩܽܘܬܳܐ ܣܰܒ ܠܳܟ ܚܽܘܒܳܐ ܕܺܐܝܬܰܘܗ̱ܝ ܚܙܳܩܳܐ ܕܗܰܝܡܳܢܽܘܬܳܐ܇ ܘܒܶܗ ܐܶܬܬܰܓܰܪ ܟܰܫܺܝܪܳܐܺܝܬ ܚܰܝ̈ܶܐ ܠܰܢܰܦܫܳܟ܀

ܫܽܘܒܚܳܐ ܠܛܳܒܳܐ ܕܝܰܗܒ ܠܰܢ ܨܰܘܡܳܐ ܥܰܡܠܳܐ ܕܰܟܝܳܐ܇ ܕܢܶܬܬܰܓܰܪ ܒܶܗ ܘܢܶܩܢܶܐ ܚܰܝ̈ܶܐ ܪ̈ܽܘܚܳܢܳܝܶܐ܇ ܩܰܒܶܠ ܠܥܰܒܕܰܝ̈ܟ ܕܒܰܥܣܰܪ ܘܰܚܕܳܐ ܠܟܰܪܡܳܟ ܥܰܠܘ̱ ܗ̱ܘܰܘ܇ ܘܣܰܒܘ̱ ܕܺܝܢܳܪܳܐ ܥܰܡ ܩܰܕܡܳܝ̈ܶܐ܇ ܘܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܗܳܐ ܡܰܛܺܝ ܠܶܗ ܗܰܘ ܝܰܘܡܳܐ܇ ܕܦܽܘܠܚܳܢܳܐ ܕܙܰܕܺܝܩܽܘܬܳܐ ܠܰܐܝܢܳܐ ܕܒܳܥܶܐ ܕܢܶܬܟܰܫܰܪ ܘܢܶܩܢܶܐ ܚܰܝ̈ܶܐ ܪ̈ܽܘܚܳܢܶܐ܇ ܫܽܘܒܚܳܐ܀

ܝܶܫܽܘܥ ܟܽܠܝܽܘܡ ܩܳܪܶܐ ܠܰܢ܇ ܒܝܰܕ ܡ̈ܰܬܠܶܐ ܠܰܬܝܳܒܽܘܬܳܐ܇ ܘܒܰܚܕܳܐ ܫܳܥܳܐ ܕܺܝܢܳܪܳܐ܇ ܫܳܩܠܺܝܢ ܡܶܢܶܗ ܦܰܠܳܚܰܘ̈ܗܝ܇ ܫܽܘܒܚܳܐ ܠܳܟ܀

ܐܳܘ ܕܡܰܪܟܰܒܬܳܐ ܕܢܽܘܪ̈ܳܢܶܐ܇ ܘܣܶܕܪ̈ܶܐ ܕܥܺܝܪ̈ܶܐ ܡܫܰܡܫܺܝܢ ܠܶܗ܇ ܘܒܰܛܶܠ ܡܶܢܰܢ ܢܶܟܝܳܢ̈ܶܐ܇ ܘܰܟܐܺܝ ܒܶܗ ܒܒܺܝܫܳܐ ܒܥܶܠܕܰܪܳܐ܇ ܫܽܘܒܚܳܐ܀

ܐܳܘ ܕܰܫܶܝܢ ܪܰܘܡܳܐ ܘܥܽܘܡܩܳܐ܇ ܒܢܺܝܫܶܗ ܪܰܒܳܐ ܕܰܨܠܺܝܒܳܐ܇ ܫܰܝܶܢ ܡܳܪܝ̱ ܡܰܠܟ̈ܶܐ ܘܟܳܗ̈ܢܶܐ܇ ܘܥܺܕܬܳܐ ܩܰܝܶܡ ܒܰܚܢܳܢܳܟ ܫܽܘܒܚܳܐ ܠܳܟ܀

ܫܰܝܢܳܟ ܢܰܡܠܶܟ ܒܰܒܪܺܝܬܳܐ܇ ܘܰܫܠܳܡܳܟ ܒܓܰܘ ܥܺܕ̈ܳܬܳܟ܇ ܟܠܺܝܠܳܐ ܕܫܰܢ̱ܬܳܐ ܢܶܬܒܰܪܰܟ ܘܟܽܠܰܢܳܫ ܒܰܐܬܪܶܗ ܢܰܘܕܶܐ ܠܳܟ܀

 

ܩܳܠܳܐ ܕܠܺܠܝܳܐ ܩܳܠܳܐ ܒܩܳܠܳܐ ܕܩܽܘܩܳܝܳܐ

ܐܰܪܒܥܺܝܢ ܝܰܘ̈ܡܺܝܢ ܨܳܡ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܥܕܰܡܳܐ ܕܰܫܩܰܠ ܢܳܡܽܘܣܳܐ ܘܰܐܝܬܺܝ ܠܰܟܢܽܘܫܬܳܐ܇ ܐܰܪܒܥܺܝܢ ܝܰܘ̈ܡܺܝܢ܇ ܨܳܡ ܐܺܠܺܝܳܐ܇ ܥܕܰܡܳܐ ܕܶܐܬܳܐ ܠܛܽܘܪܶܗ ܕܰܐܠܳܗܳܐ܇ ܐܰܪܒܥܺܝܢ ܝܰܘ̈ܡܺܝܢ ܨܳܡ ܡܳܪܰܢ ܒܰܐܬܪܳܐ ܚܽܘܪܒܳܐ܇ ܥܕܰܡܳܐ ܕܦܰܪܩܳܗܿ ܗܘܳܐ ܠܥܺܕܬܳܐ܇ ܒܰܨܠܺܝܒܶܗ ܨܰܒܬܳܗܿ܇ ܗ ܘ ܗ܀

ܛܠܳܝ̈ܶܐ ܪ̈ܚܺܝܡܶܐ ܘܚܰܒܺܝ̈ܒܶܐ ܕܒܶܝܬ ܚܰܢܰܢܝܳܐ܇ ܕܰܪܚܶܡܘ̱ ܨܰܘܡܳܐ ܘܰܨܠܽܘܬܳܐ ܡܶܢ ܟܽܠܶܗ ܠܶܒܗܽܘܢ܇ ܥܰܠ ܕܠܳܐ ܣܓܶܕܘ̱ ܗ̱ܘܰܘ ܠܰܦܬܰܟܪ̈ܶܐ ܕܡܰܠܟܳܐ܇ ܒܓܰܘ ܐܰܬܽܘܢܳܐ ܕܢܽܘܪܳܐ ܫܕܳܐ ܐܶܢܽܘܢ܇ ܐܰܠܳܗܳܐ ܕܦܰܨܺܝ ܠܥܰܒܕܰܘ̈ܗ̱ܝ ܡܶܢ ܝܰܩܕܳܢܳܐ܇ ܦܰܨܳܐ ܠܥܺܕܬܳܟ ܘܰܠܝܰܠܕܶܝ̈ܗܿ ܡܶܢ ܒܺܝܫܳܐ ܘܚܰܝܠܶܗ ܗ ܘ ܗ܀

 

ܣܽܘܓܺܝܬܳܐ ܒܰܐܝܠܶܝܢ ܩ̈ܳܠܶܐ ܥܽܘܢܺܝܬܳܐ ܫܽܘܒܚܳܐ ܠܳܟ ܚܳܐܶܢ ܠܚܰܛܳܝ̈ܶܐ܇ ܫܽܘܒܚܳܐ ܠܳܟ ܡܩܰܒܶܠ ܠܬܰܝܳܒ̈ܶܐ܇

ܐܰܝܠܶܝܢ ܩ̈ܳܠܶܐ ܡܰܠܝ̈ܰܝ ܚܰܫܳܐ܇ ܐܶܒܟܶܐ ܥܰܠ ܣܽܘܓܳܐ ܕܣܽܘܪ̈ܚܳܢܰܝ܇ ܐܰܝܠܶܝܢ ܦܶܬܓܳܡ̈ܶܐ ܐܶܡܰܠܶܠ܇ ܩܕܳܡ ܒܺܐܝܡܰܐ ܕܚܺܝܠܬܳܐ ܕܕܰܝܳܢܳܐ܀

ܓܽܘܢܚ̈ܶܐ ܡܰܪܺܝܪ̈ܶܐ ܗܳܐ ܐܰܚܕܽܘܢܝ̱ ܕܥܶܗܕܶܬ ܚܰܘ̈ܒܰܝ ܘܰܠܕܰܝܳܢܳܐ܇ ܡܳܐ ܕܢܳܦܩܳܐ ܥܠܰܝ ܐܰܦܽܘܦܰܣܺܝܣ ܕܶܐܫܬܕܶܐ ܠܚܶܫܽܘܟܳܐ ܒܰܪܳܝܳܐ܀

ܗܳܠܶܝܢ ܕܣܳܠܩ̈ܳܢ ܥܰܠ ܪ̈ܶܥܝܳܢܰܝ܇ ܕܳܚܠ̈ܳܢ ܠܶܗ ܘܫܳܓܫ̈ܳܢ ܚܽܘ̈ܫܳܒܰܝ܇ ܘܰܠܚܰܛܳܝ̈ܶܐ ܛܽܘܒܳܐ ܝܳܗܶܒ ܐ̱ܢܳܐ܇ ܒܰܕܡܽܘܬ ܐܺܝܽܘܒ ܗܰܘ ܙܰܕܺܝܩܳܐ܀

ܙܺܝܥ ܗܘܳܐ ܘܰܕܚܺܝܠ ܗܘܳܐ ܥܽܘܢܕܳܢܳܐ܇ ܘܰܩܫܶܐ ܘܡܰܪܺܝܪ ܝܰܘܡܶܗ ܕܕܺܝܢܳܐ܇ ܗܰܘ ܕܦܳܪܶܫ ܢܰܦܫܳܐ ܡܶܢ ܦܰܓܪܳܐ܇ ܘܗܽܘ ܡܰܪܡܶܐ ܬܪ̈ܰܝܗܽܘܢ ܒܓܺܗܰܢܳܐ܀

ܛܰܠܝܽܘܬܝ̱ ܒܰܣܪܺܝܩܽܘܬܳܐ ܐܰܦܩܿܶܬ܇ ܘܣܰܝܒܽܘܬܳܐ ܕܰܬܘܳܬܳܐ ܠܳܐ ܩܢܺܝܿܬ܇ ܘܗܳܐ ܕܳܐܶܢ ܠܺܝ ܝܽܘܡ ܥܽܘܢܕܳܢܳܐ܇ ܘܡܳܢܳܐ ܐܶܥܒܶܕ ܡܳܪܝ̱ ܥܰܕܰܪܰܝܢܝ̱܀

ܟܡܳܐ ܐܶܢ ܐܺܝܬ ܠܺܝ ܚܛܳܗ̈ܶܐ ܪܰܘܪ̈ܒܶܐ܇ ܪ̈ܰܚܡܰܝܟ ܡܳܪܰܢ ܛܳܒ ܣܰܓܺܝܐܺܝܢ܇ ܕܰܚܛܳܗ̈ܶܐ ܘܥܰܘ̈ܳܠܶܐ ܕܰܒܪܺܝܬܳܐ܇ ܒܰܨܠܺܝܒܳܟ ܫܩܰܠܬ ܟܰܕ ܐܶܬܒܰܣܰܪܬ܀

ܡܳܐ ܕܳܐܬܶܐ ܐܰܢ̱ܬ ܒܙܰܘܚܳܐ ܕܥܺܝܪ̈ܶܐ܇ ܘܢܳܗܡܳܐ ܢܽܘܪܳܐ ܥܰܠ ܚܰܛܳܝ̈ܶܐ܇ ܛܠܶܐ ܗܽܘ ܕܰܪܣܰܡܬ ܒܰܐܬܽܘܢܳܐ܇ ܘܪܽܘܣ ܘܦܰܝܶܓ ܡܶܢܝ ܫܰܠܗܶܒܺܝܬܳܐ܀

ܣܶܠܩܿܶܬ ܒܗܰܘܢܳܐ ܠܥܶܠ ܡܶܢ ܥܳܠܡܳܐ܇ ܘܰܚܙܺܝܿܬ ܦܰܪܕܰܝܣܳܐ ܘܓܺܗܰܢܶܐ܇ ܗܳܠܶܝܢ ܡܝܰܒܒܺܝܢ ܥܰܡ ܡܰܠܰܐܟ̈ܶܐ܇ ܘܗܳܠܶܝܢ ܡܒܰܓܢܺܝܢ ܥܰܡ ܣܳܛܳܢܳܐ܀

ܦܽܘܡܝ̱ ܦܶܬܚܿܶܬ ܕܰܐܪܬܶܐ ܠܰܐ̱ܚܪ̈ܳܢܶܐ܇ ܘܶܐܩܪܶܐ ܠܚܰܛܳܝ̈ܶܐ ܕܰܢܬܽܘܒܽܘܢ ܘܶܐܢܳܐ ܡܶܢ ܚܛܳܗ̈ܰܝ ܠܳܐ ܦܳܫܿܶܬ܇ ܥܠܰܝ ܢܶܒܳܟܽܘܢ ܟܺܐܢ̈ܶܐ ܘܙܰܕܺܝ̈ܩܶܐ܀

ܩܰܒܶܠܘ̱ ܡܶܠܰܬܝ̱ ܐܳܘ ܫܳܡܽܘܥ̈ܶܐ܇ ܥܰܕ ܐܺܝܬ ܠܟܽܘܢ ܚܰܝ̈ܶܐ ܒܰܒܪܺܝܬܳܐ܇ ܩܰܒܶܠܘ̱ ܡܶܠܰܬܝ̱ ܥܰܕܠܳܐ ܬܺܐܬܶܐ܇ ܫܳܥܬܳܐ ܙܺܝܥܬܳܐ ܕܦܳܣܺܝܩ̈ܳܬܳܐ܀

ܫܠܺܝ̈ܚܶܐ ܬܪܶܥܣܰܪ ܐܰܦܺܝܣܘ̱ ܚܠܳܦܰܝ܇ ܘܰܢܒܺܝ̈ܶܐ ܘܣܳܗ̈ܕܶܐ ܐܰܬܟܰܫܰܦܘ̱ ܥܰܡܝ̱܇ ܕܢܶܫܬܰܟܰܢ ܠܺܝ ܫܽܘܒܳܩܢ ܚܰܘܒ̈ܶܐ܇ ܘܠܳܐ ܢܶܬܕܰܟܪܽܘܢ ܠܺܝ ܣܽܘܪ̈ܚܳܢܰܝ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܪܳܡܳܐ ܕܰܗܘܳܐ ܒܰܪܢܳܫܳܐ ܐܰܝܟ ܡܽܘܫܶܐ ܘܺܐܠܺܝܳܐ ܨܳܡ܇ ܒܳܟ ܢܶܬܕܰܡܶܐ ܠܡܰܠܰܐܟ̈ܶܐ܇ ܘܢܶܙܟܶܐ ܛܽܘܒ̈ܶܐ ܥܳܒܽܘܪ̈ܶܐ܇ ܘܚܰܫ̈ܰܝ ܒܶܣܪܳܐ ܒܳܟ ܢܶܩܗܶܐ܇ ܐܰܝܟ ܕܰܠܟܺܐܢ̈ܶܐ ܩܰܕܡܳܝ̈ܶܐ܀

ܫܽܘܒܚܳܐ ܠܳܟ ܘܰܠܫܳܠܽܘܚܳܟ܇ ܡܫܺܝܚܳܐ ܕܨܳܡ ܡܶܛܽܠܳܬܰܢ܇ ܒܗܳܢ ܥܳܠܡܳܐ ܘܰܒܗܰܘ ܕܰܥܬܺܝܕ܇ ܛܰܝܒܽܘܬܳܟ ܬܩܽܘܡܝ̱ ܒܰܐܦܰܝ̈ܢ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝ܇ ܒܪ̈ܰܚܡܰܝܟ ܡܳܪܝ̱ ܣܰܓܺܝ̈ܐܶܐ܇

ܒܨܰܘܡܳܐ ܐܶܙܕܰܗܺܝ ܗܘܳܐ܇ ܦܰܪܨܽܘܦܳܐ ܕܡܽܘܫܶܐ ܢܒܺܝܳܐ܇ ܥܰܠ ܛܽܘܪܳܐ ܕܣܺܝܢܰܝ ܘܠܰܐܠܳܗܳܐ ܫܘܳܐ ܗܘܳܐ ܕܢܶܚܙܶܐ܀

ܩܰܒܶܠ ܛܳܒܳܐ ܬܶܫܡܶܫܬܰܢ܇ ܘܨܰܘܡܰܢ ܢܶܗܘܶܐ ܠܰܢܝܳܚܳܟ ܘܰܫܒܽܘܩ ܠܰܢ ܚܰܘ̈ܒܰܝܢ܇ ܒܣܽܘܓܳܐ ܕܰܡܪܰܚܡܳܢܽܘܬܳܟ܀

ܒܨܰܘܡܳܐ ܕܨܳܡ ܕܳܢܺܝܐܶܝܠ܇ ܙܟܳܐ ܗܘܳܐ ܠܚܰܝܘ̈ܳܬܳܐ ܒܰܙܒܰܢ܇ ܘܡܶܢ ܓܽܘܒܳܐ ܣܠܶܩ ܗܘܳܐ܇ ܟܰܕ ܙܡܰܪ ܫܽܘܒܚܳܐ ܠܡܳܪܝܳܐ܀

ܡܳܪܳܐ ܛܳܒܳܐ ܝܰܗܒ ܢܰܦܫܶܗ܇ ܘܨܰܘܡܳܐ ܠܒܰܟ ܐܰܝܟ ܒܰܪܢܳܫܳܐ܇ ܘܰܐܩܪܶܒ ܥܰܡ ܒܺܝܫܳܐ܇ ܕܫܰܦܶܠ ܗܘܳܐ ܠܚܰܝܠܶܗ ܕܒܺܝܫܳܐ܀

ܬܰܘ ܐܰܚ̈ܰܝ ܢܶܬܟܰܫܰܪ ܒܶܗ܇ ܒܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܕܗܽܘ ܡܨܶܐ ܡܰܩܢܶܐ ܠܰܢ܇ ܓܶܦ̈ܶܐ ܠܡܶܦܪܰܚ ܠܰܡܪ̈ܰܘܡܶܐ܀

 

ܐܰܠܳܗܝ̱ ܐܰܠܳܗܝ̱ ܩܳܠܳܐ ܥܒܶܕ ܡܳܪܝ̱ ܕܽܘܟܪܳܢܳܐ

ܨܰܘܡܶܗ ܕܡܳܪܰܢ ܡܰܛܺܝ ܠܶܗ܇ ܒܰܙܗܺܝܪܽܘܬܳܐ ܢܰܩܒܠܺܝܘܗ̱ܝ ܐܰܚ̈ܰܝ܇ ܕܢܶܬܕܰܒܰܪ ܒܶܗ ܬܰܩܢܳܐܺܝܬ܇ ܘܢܶܩܢܶܐ ܚܰܝ̈ܶܐ ܕܰܠܥܳܠܰܡ܀

ܠܰܘ ܗܳܢܳܐ ܨܰܘܡܳܐ ܕܰܓܒܺܝܿܬ܇ ܡܳܪܝܳܐ ܐܶܡܰܪ ܠܰܢܒܺܝܳܐ܇ ܕܡܶܢ ܠܰܚܡܳܐ ܓܠܺܝܼܙ ܘܢܶܟܠܳܐ ܡܰܒܥܰܕ ܡܶܢ ܠܓܰܘ܀

ܪܰܒ ܨܰܘܡܳܐ ܕܰܚܠܺܝ̈ܛܳܢ ܒܶܗ܇ ܙܶܕܩ̈ܳܬܳܐ ܕܦܳܪܽܘܫܽܘܬܳܐ܇ ܘܰܒܗܰܘ ܥܳܠܡܳܐ ܕܠܳܐ ܥܳܒܰܪ܇ ܟܠܺܝܠܳܐ ܡܰܩܢܶܐ ܠܨܰܝ̈ܳܡܶܐ܀

ܒܰܪ ܐܰܠܳܗܳܐ ܕܰܒܨܰܘܡܳܐ܇ ܚܰܘܺܝ ܕܰܗܘܳܐ ܒܰܪܢܳܫܳܐ܇ ܢܶܗܘܶܐ ܒܨܰܘܡܳܟ ܪ̈ܽܘܚܶܢܳܐ܇ ܘܢܰܡܠܶܟ ܥܰܠ ܚܰܫܰܝ̈ ܒܶܣܪܳܐ܀

ܒܳܟ ܢܶܬܕܰܡܶܐ ܠܡܰܠܰܐܟ̈ܶܐ ܘܢܰܣܠܶܐ ܛܳܥܽܘܡ̈ܶܐ ܥܳܒܽܘܪ̈ܶܐ܇ ܘܢܶܠܒܽܘܟ ܨܰܘܡܳܐ ܘܰܨܠܽܘܬܳܐ܇ ܘܬܶܐܓܽܘܪܬܳܐ ܕܡܰܠܝܳܐ ܚܰܝ̈ܶܐ܀

ܒܝܰܕ ܨܰܘܡܳܐ ܕܨܳܡ ܗܘܳܐ ܡܽܘܫܶܐ ܡܶܫܟܳܐ ܕܰܐܦܰܘ̈ܗ̱ܝ ܐܶܙܕܰܗܺܝ܇ ܛܳܒ ܡܶܢ ܫܶܡܫܳܐ ܘܙܰܠܺܝܩܰܘ̈ܗ̱ܝ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܐܰܠܳܗܳܐ ܥܰܕܰܪܰܝܢܝ̱

ܐܰܠܳܗܳܐ ܥܰܕܰܪܰܝܢܝ̱ ܟܺܐܡܽܘܢ̈ܶܐ ܘܡܰܚܫܽܘ̈ܠܶܐ ܕܰܚܛܳܗ̈ܶܐ ܕܣܶܥܪܶܬ ܐܶܬܟܰܪܟܽܘܢܝ̱܇ ܠܡܺܐܢܳܐ ܕܫܰܝܢܳܐ ܗܘܺܝ ܠܺܝ ܡܳܪܝ̱ ܕܠܳܐ ܐܶܛܒܰܥ ܒܝܰܡܳܐ ܕܰܚܛܳܗ̈ܶܐ܇ ܐܶܠܳܐ ܡܣܰܟܶܐ ܐ̱ܢܳܐ ܠܰܬܝܳܒܽܘܬܳܐ ܐܰܘܫܶܛ ܠܺܝ ܐܺܝܕܳܟ܇ ܐܰܝܟ ܕܰܠܫܶܡܥܽܘܢ ܘܶܐܬܪܰܚܰܡܥܠܰܝ܀

ܪ̈ܰܚܡܰܝܟ ܡܳܪܝ̱ ܐܰܦܺܝܣܽܘܟ ܘܰܓܒܰܠܬܳܢܝ̱ ܡܶܢ ܥܰܦܪܳܐ ܘܰܕܡܽܘܬܳܟ ܘܨܰܠܡܳܟ ܐܰܠܒܶܫܬܳܢܝ̱܇ ܘܰܒܦܰܪܕܰܝܣܳܐ ܕܛܽܘܒ̈ܶܐ ܐܰܫܠܶܛܬܳܢܝ̱ ܕܶܐܟܽܘܠ ܘܶܐܬܒܰܣܰܡ܇ ܘܰܒܨܶܒܝܳܢܝ̱ ܢܶܦܠܶܬ ܡܶܢ ܚܺܐܪܽܘܬܳܐ ܒܪ̈ܰܚܡܰܝܟ ܡܳܪܝ̱ ܐܰܩܺܝܡܰܝܢܝ̱ ܘܶܐܬܦܰܢ ܥܠܰܝ܇ ܘܶܐܬܪܰܚܰܡܥܠܰܝ܀

ܒܰܚܣܳܡܶܗ ܫܒܳܢܝ̱ ܒܺܝܫܳܐ ܘܚܰܒܶܠ ܘܰܐܘܒܶܕ ܕܰܟܝܽܘܬܳܐ ܗܳܝ ܕܶܐܬܝܰܗܒܰܬ݀ ܠܺܝ ܘܰܒܛܰܡܐܽܘܬܳܐ ܕܥܳܠܡܳܐ ܐܶܬܚܰܒܠܶܬ ܘܰܗܘܺܝܿܬ ܙܺܝܙܳܢܳܐ܇ ܐܶܠܳܐ ܒܪ̈ܰܚܡܰܝܟ ܣܰܓܺܝ̈ܐܶܐ ܐܰܦܢܳܢܝ̱ ܦܳܪܽܘܩܝ̱ ܠܽܐܘܪܚܳܐ ܕܦܽܘܩܕܳܢܰܝ̈ܟ ܘܶܐܚܙܶܐ ܚܢܳܢܳܟ ܘܶܐܬܦܰܢ ܥܠܰܝ ܘܶܐܬܪܰܚܰܡܥܠܰܝ܀

ܠܚܰܛܳܝܬܳܐ ܐܰܢ̱ܬ ܙܰܕܶܩܬ ܘܠܰܡܡܰܚܰܝܬܳܐ ܕܩܶܪܒܰܬ݀ ܠܳܟ ܚܽܘܠܡܳܢܳܐ ܫܰܟܶܢܬ܇ ܘܠܺܝ ܕܳܘܝܳܐ ܘܣܰܓܺܝ ܡܽܘܡ̈ܶܐ ܚܰܠܶܠܰܝܢܝ̱ ܒܙܽܘܦܳܟ ܡܚܰܘܰܪ ܟܽܠ܇ ܕܰܐܢ̱ܬ ܗܽܘ ܚܳܐܶܢ ܠܚܰܛܳܝ̈ܶܐ ܡܶܢ ܚܰܘܒܰܝ̈ܗܽܘܢ܇ ܚܽܘܢܰܝܢܝ̱ ܒܝܰܕ ܪ̈ܰܚܡܰܝܟ܇ ܘܶܐܬܦܰܢ ܥܠܰܝ ܘܶܐܬܪܰܚܰܡܥܠܰܝ܀

ܠܚܰܛܳܝ̈ܶܐ ܐܰܢ̱ܬ ܙܰܕܶܩܬ܇ ܘܰܠܥܰܡܡ̈ܶܐ ܛܰܡ̈ܐܶܐ ܩܰܕܶܫܬ ܒܰܚܢܳܢܳܟ ܗܰܝܡܶܢ ܒܳܟ܇ ܗܰܘ ܓܰܝܳܣܳܐ ܡܳܪܝܳܐ ܐܰܠܳܗܳܐ ܦܰܪܕܰܝܣܳܐ ܡܠܰܟܬ ܠܶܗ ܒܛܰܝܒܽܘܬܳܟ ܕܰܐܢ̱ܬ ܗܽܘ ܒܶܝܬ ܓܰܘܣܳܐ ܕܬܰܝܳܒ̈ܶܐ܇ ܒܒܳܥܽܘ ܚܰܢܳܢܳܐ ܚܽܘܢܰܝܢܝ̱ ܒܪ̈ܰܚܡܰܝܟ ܘܶܐܬܦܰܢ ܥܠܰܝ܇ ܘܶܐܬܪܰܚܰܡܥܠܰܝ܀

ܬܶܫܒܽܘܚܬܳܐ ܚܕܰܬܳܐ ܩܳܠܳܐ ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ

ܫܽܘܒܚܳܐ ܠܛܳܒܳܐ ܕܰܒܨܰܘܡܶܗ܇ ܚܫܰܠ ܠܰܢ ܙܰܝܢܳܐ ܕܦܽܘܪܩܳܢܳܐ܇ ܨܰܘܡܳܐ ܕܰܟܝܳܐ ܩܰܕܺܝܫܳܐ܇ ܘܒܶܗ ܢܶܙܟܶܐ ܠܳܐܟܶܠܩܰܪܨܳܐ܀

ܢܒܺܝ̈ܶܐ ܒܐ̱ܪ̈ܳܙܶܐ ܨܳܝܡܺܝܢ ܗ̱ܘܰܘ܇ ܟܰܕ ܚܳܝܪܺܝܢ ܗ̱ܘܰܘ ܒܺܝܚܺܝܕܳܐ܇ ܕܰܥܬܺܝܕ ܕܰܢܨܽܘܡ ܐܰܟܘܳܬܶܗ܇ ܘܰܢܫܰܘܙܶܒ ܠܰܢ ܡܶܢ ܒܺܝܫܳܐ܀

ܢܶܙܕܰܝܰܢ ܒܥܳܢܘܳܝܽܘܬܳܐ܇ ܘܢܰܣܠܶܐ ܠܥܰܘ̈ܒܽܛܶܐ ܕܰܚܛܺܝܬܳܐ܇ ܘܢܶܨܛܰܒܰܬ ܒܰܟܢܺܝܟܽܘܬܳܐ܇ ܕܡܶܢ ܒܺܝܫ̈ܳܬܳܐ ܢܶܬܪܰܚܰܩ܀

ܓܥܳܬ݀ ܒܰܬܰܘܳܬܳܐ ܚܰܛܳܝܬܳܐ܇ ܘܕܶܡܥ̈ܶܐ ܒܚܰܫܳܐ ܐܶܫܕܰܬ݀ ܗܘܳܬ݀ ݀܇ ܐܳܦܠܰܢ ܚܰܣܳܐ ܘܰܫܒܽܘܩ ܠܰܢ܇ ܚܰܘܒ̈ܶܐ ܘܰܚܛܳܗ̈ܶܐ ܕܰܣܥܰܪܢ܀

ܐܰܢ̱ܬ ܕܰܣܚܰܦܬ ܠܳܐܟܶܠܩܰܪܨܳܐ܇ ܒܨܰܘܡܳܟ ܪܰܒܳܐ ܕܰܚܠܳܦܰܝܢ܇ ܫܰܪܰܪ ܠܰܢ ܒܗܰܝܡܳܢܽܘܬܳܐ ܕܢܶܙܡܰܪ ܠܳܟ ܬܶܫܒܽܘܚܬܳܐ܀

ܒܪܺܝܟ ܗܽܘ ܕܚܰܘܺܝ ܠܰܢ ܨܰܘܡܳܐ܇ ܙܰܝܢܳܐ ܕܰܟܝܳܐ ܩܰܕܺܝܫܳܐ ܕܒܶܗ ܢܶܙܟܶܐ ܠܳܐܟܶܠܩܰܪܨܳܐ܇ ܗܰܘ ܕܶܐܫܬܰܥܠܺܝ ܥܰܠ ܓܶܢܣܰܢ܀

 

ܩܳܠܳܐ܇ ܕܨܰܦܪܳܐ ܩܳܠܳܐ ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ

ܚܙܰܘ ܨܰܝܳܡ̈ܶܐ ܐܰܝܟܰܢܳܐ ܡܩܰܒܠܺܝܢ ܐ̱ܢܬܽܘܢ ܠܶܗ ܠܨܰܘܡܳܐ ܩܰܕܺܝܫܳܐ܇ ܢܶܨܛܰܠܰܠ ܦܰܓܪܳܐ ܘܢܰܦܫܳܐ ܡܶܢ ܟܽܠ ܒܺܝܫ̈ܳܢ܇ ܘܢܶܗܘܶܐ ܨܰܘܡܰܢ ܠܨܶܒܝܳܢܳܟ ܘܰܠܬܰܪܥܽܘܬܳܐ ܘܰܠܫܽܘܒܩܳܢ ܚܰܘ̈ܒܶܐ܀

ܡܳܐ ܩܰܠܺܝܠ ܓܶܦܶܗ ܕܨܰܘܡܳܐ ܕܰܠܥܰܦܪܳܢܳܐ܇ ܡܰܦܪܰܚ ܠܰܫܡܰܝܳܐ܇ ܘܟܽܠ ܨܰܝܳܡܳܐ ܕܠܳ ܚܳܠܶܛ ܙܺܐܦܳܐ ܒܨܰܘܡܶܗ ܥܰܡ ܪ̈ܽܘܚܳܢܶܐ ܡܶܬܚܰܠܰܛ ܘܰܒܓܰܘ ܥܕܶܝܢ ܪܳܥܶܐ ܓܶܐܳܘ̈ܳܬܳܐ܀

 

ܐ̱ܚܪܺܢܳܐ ܩܳܠܳܐ ܒܨܰܦܪܳܐ ܢܩܰܕܶܡ ܠܰܨܠܽܘܬܳܐ

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ܇ ܕܝܰܗܒܬ ܠܰܢ ܙܰܝܢܳܐ ܙܰܟܳܝܳܐ܇ ܨܰܘܡܳܐ ܕܰܟܝܳܐ ܩܰܕܺܝܫܳܐ ܕܰܡܠܶܐ ܝܽܘܬܪ̈ܳܢܶܐ܇ ܕܒܶܗ ܗܽܘ ܝܳܪܬܺܝܢ ܨܰܝܳܡ̈ܶܐ܇ ܚܰܝ̈ܶܐ ܡܠܺܝܟ̈ܶܐ ܕܰܠܥܳܠܰܡ ܘܡܶܬܒܰܣܡܺܝܢ ܥܰܡ ܪ̈ܽܘܚܳܢܶܐ ܒܰܓܢܽܘܢ ܚܰܕܘ̈ܳܬܳܐ܀

ܐܰܝܟ ܐܰܡܬܳܐ ܩܶܪܒܰܬ݀ ܢܽܘܪܳܐ܇ ܕܬܶܫܪܶܐ ܦܟܳܪ̈ܶܐ ܠܰܛܠܳܝ̈ܶܐ ܕܒܶܝܬ ܚܰܢܰܢܝܳܐ܇ ܘܨܳܡܰܬ݀ ܗܘܳܬ݀ ܕܠܳܐ ܒܰܥܝܳܕܳܐ ܕܰܚܙܳܬ݀ ܠܨܰܝܳܡ̈ܶܐ܇ ܘܰܥܢܳܢܳܐ ܛܰܐܠܳܐ ܪܶܣܡܰܬ݀܇ ܥܰܠ ܦܰܪܨܽܘܦܳܐ ܕܠܳܐ ܚܰܠܦܽܘܗ̱ܝ ܐܰܠܳܗܳܐ ܝܰܗܒ ܠܗܽܘܢ ܚܰܝܠܳܐ ܘܙܳܟܽܘܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܳܦ ܐܰܪܡܶܠܬܳܐ ܕܩܶܪܒܰܬ݀ ܓܰܒܪܳܗܿ ܨܰܘܡܳܐ ܬܶܪܚܰܡܝ̱܇ ܕܗܽܘ ܡܩܰܪܶܒ ܠܳܗܿ ܨܶܝܕ ܐܰܠܳܗܳܐ ܕܢܶܗܘܶܐ ܓܰܒܪܳܗܿ܇ ܨܰܘܡܳܐ ܝܰܬܡܳܐ ܕܰܩܒܰܪ ܐܰܒܽܘܗ̱ܝ ܟܰܕ ܡܶܬܟܰܫܰܦ܇ ܠܰܐܒܳܐ ܕܝܰܬܡ̈ܶܐ ܕܰܢܡܰܠܶܐ ܠܶܗ ܚܰܣܺܝܪܽܘܬܶܗ܀

ܢܨܽܘܡ ܐܰܟܳܪܳܐ ܡܶܛܽܠ ܚܰܩܠܶܗ ܘܡܶܛܽܠ ܢܰܦܫܶܗ܇ ܕܬܶܗܘܶܐ ܢܛܺܝܪܳܐ ܥܠܳܠܬܳܐ ܘܢܰܦܫܳܐ ܡܶܢ ܢܶܟܝܳܢ̈ܶܐ܇ ܡܥܰܕܰܪ ܨܰܘܡܳܐ ܘܰܠܬܰܓܳܪܳܐ ܕܪܳܕܶܐ ܒܽܐܘܪܚܳܐ܇ ܕܥܰܡ ܬܶܐܓܽܘܪܬܶܗ ܟܽܠ ܝܽܘܬܪ̈ܳܢܶܐ ܕܪܽܘܚܳܐ ܢܶܫܟܰܚ܀

ܡܰܘܬܰܪ ܨܰܘܡܳܐ ܘܰܠܥܰܬܺܝܪ̈ܶܐ ܘܰܒܙܶܕܩ̈ܳܬܳܐ܇ ܢܶܩܢܽܘܢ ܪ̈ܰܚܡܶܐ ܕܰܡܩܰܒܠܺܝܢ ܠܗܽܘܢ ܒܰܡܛܰܠܠܰܝ̈ܗܽܘܢ܇ ܝܳܐܶܐ ܨܰܘܡܳܐ ܘܰܠܡܶܣܟܺܢܳܐ ܕܟܰܦܢܳܐ ܟܰܪܣܶܗ܇ ܕܗܽܘ ܗܰܘ ܟܰܦܢܶܗ ܡܶܢ ܨܶܒܝܳܢܶܗ ܢܨܽܘܡ ܠܰܐܠܳܗܳܐ܀

ܢܨܽܘܡ ܣܰܓܺܝ ܝܺܚܺܝܕܳܝܳܐ ܒܢܰܝ̈ ܡܰܠܟܽܘܬܳܐ܇ ܕܰܠܗܽܘܢ ܫܰܦܺܝܪ ܩܺܐܪܣܳܐ ܘܕܰܐܪܳܐ ܥܰܡ ܢܶܨܚܳܢܳܐ܇ ܢܨܽܘܡ ܚܰܛܳܝܳܐ ܕܚܰܘܒܬܶܗ ܪܰܒܳܐܗ̱ܝ ܐܳܦ ܡܶܢ ܚܰܝܠܶܗ܇ ܕܰܠܡܳܐ ܡܶܫܟܰܚ ܢܶܦܪܽܘܥ ܩܰܠܺܝܠ ܡܶܢ ܐܶܫܛܳܪܶܗ܇ ܢܨܽܘܡ ܙܰܕܺܝܩܳܐ ܕܢܰܘܣܶܦ ܫܽܘܦܪܳܐ ܠܙܰܕܺܝܩܽܘܬܶܗ܇ ܕܰܟܡܳܐ ܕܢܶܣܰܩ ܐܺܝܬ ܗܽܘ ܕܰܪܓܳܐ ܠܪܰܘܡܳܐ ܕܰܠܥܶܠ܀

 

ܕܥܶܢܝܳܢܳܐ ܕܪܰܚܶܡܥܠܰܝ ܕܥܶܕܳܢ ܫܽܘܒܩܳܢܳܐ ܒܳܬܰܪ ܨܰܦܪܳܐ ܕܰܬܪܶܝܢ ܒܫܰܒܳܐ܀ ܚܽܘܣܳܝܳܐ ܗܘܺܝ ܠܺܝ

ܚܽܘܣܳܝܳܐ ܗܘܺܝ ܠܺܝ܇ ܐܰܢ̱ܬ ܠܚܽܘܕܰܝܟ ܪܳܚܶܡ ܐ̱ܢܳܫܳܐ ܐܰܠܳܗܳܐ܇ ܩܰܒܶܠܰܝܢܝ̱ ܐܰܝܟ ܕܰܠܗܰܘ ܒܪܳܐ ܐܳܣܽܘܛܳܐ ܘܪܰܚܶܡܥܠܰܝ܀

ܘܳܝ ܠܺܝ ܕܶܐܬܛܰܠܰܩܘ̱ ܝܰܘ̈ܡܰܝ܇ ܛܰܠܝܽܘܬܝ̱ ܣܪܺܝܩܳܐܺܝܬ ܒܰܚܛܺܝܬܳܐ܇ ܘܒܰܪ̈ܓܺܝܓܳܬܶܗ ܕܥܳܠܡܳܐ ܗܳܢܳܐ ܛܳܥܶܐ ܗܘܺܝܿܬ܇ ܘܪܰܚܶܡ܀

ܚܳܐܶܢ ܠܚܰܛܳܝ̈ܶܐ ܚܽܘܢ ܠܰܐܒܺܝܕܽܘܬܝ̱ ܒܰܚܢܳܢܳܟ ܐܰܠܳܗܳܐ܇ ܘܶܐܙܡܰܪ ܫܽܘܒܚܳܐ܇ ܡܳܐ ܕܡܶܬܓܰܠܝܳܐ ܡܰܠܟܽܘܬܳܟ܀

ܒܨܰܘܡܳܟ ܦܳܪܽܘܩܰܢ܇ ܢܶܙܟܶܐ ܠܚܰܫ̈ܶܐ ܕܰܚܛܳܗ̈ܶܐ܇ ܕܢܳܒܗܺܝܢ ܒܰܢ ܐܰܠܳܗܳܐ܇ ܘܩܰܒܶܠ ܒܰܚܢܳܢܳܟ ܨܰܘܡܳܐ ܘܰܨܠܽܘܬܰܢ ܘܪܰܚܶܡ܀

ܒܫܽܘܪܳܝܶܗ ܕܨܰܘܡܰܢ ܫܰܟܶܢ ܠܰܢ܇ ܕܢܶܫܦܰܪ ܠܨܶܒܝܳܢܳܟ ܐܰܠܳܗܳܐ܇ ܘܢܶܬܟܰܫܰܪ ܟܽܠܰܢ ܒܶܗ ܒܰܡܝܰܬܪܽܘܬܳܐ܀

 

ܐܰܠܳܗܝ̱ ܐܰܠܳܗ̱ܝ܀ ܩܳܠܳܐ ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ܀

ܗܳܐ ܩܪܶܒ ܘܰܡܛܳܐ ܠܶܗ ܨܰܘܡܳܐ܇ ܕܨܳܡܶܗ ܡܳܪܰܢ ܚܠܳܦ ܟܽܠܰܢ܇ ܬܰܘ ܕܰܢܩܰܒܠܺܝܘܗ̱ܝ ܚܳܕܝܳܐܺܝܬ܇ ܘܰܢܙܰܗܶܐ ܒܶܗ ܢܰܦܫ̈ܳܬܰܢ܀

ܨܰܝܳܡܳܐ ܕܣܳܢܶܐ ܠܰܐܚܽܘܗ̱ܝ܇ ܐܳܣܽܘܛܳܐ ܚܫܺܝܒ ܠܰܐܠܳܗܳܐ܇ ܘܩܰܕܺܝܫܳܐ ܕܒܺܝܫ ܠܰܟܢ̈ܳܬܶܗ܇ ܠܰܐܠܳܗܳܐ ܐܰܝܟ ܓܰܝܳܪܳܐ܀

ܠܳܐ ܬܰܣܠܶܐ ܒܨܰܘܡܳܟ ܠܰܐܚܽܘܟ܇ ܘܬܶܗܘܶܐ ܣܦܺܝܩܳܐ ܕܠܳܐ ܐܰܓܪܳܐ܇ ܪܚܰܡ ܠܰܐܚܽܘܟ ܕܬܶܗܘܳܐ ܕܽܘܡܝܶܗ܇ ܕܰܡܫܺܝܚܳܐ ܕܪܰܚܡܶܗ ܠܓܶܢܣܰܢ܀

ܒܬܽܘܠܳܐ ܕܰܣܦܺܝܩ ܡܶܢ ܚܽܘܒܳܐ܇ ܠܣܳܛܳܢܳܐ ܢܙܺܝܪ ܠܶܗ ܦܰܓܪܶܗ܇ ܕܫܳܗܰܪ ܘܰܕܠܺܝܚ ܒܰܚܣܳܡܳܐ܇ ܠܫܺܐܕܳܐ ܕܳܡܝܳܐ ܥܺܝܪܽܘܬܶܗ܀

ܐܰܝܢܳܐ ܕܪܳܡܶܝܢ ܕܽܘܒܳܪ̈ܰܘܗ̱ܝ܇ ܠܳܐ ܡܰܪܟܶܢ ܪܺܝܫܶܗ ܠܰܐܚܽܘܗ̱ܝ܇ ܚܠܺܝܛ ܗܽܘ ܒܓܰܒܳܐ ܕܣܶܡܳܠܳܐ܇ ܘܠܳܐ ܪܓܺܝܫܳܐ ܒܶܗ ܝܰܡܺܝܢܳܐ܀

ܟܡܳܐ ܕܰܪܓܺܝܙ ܐܰܢ̱ܬ ܥܰܠ ܐܰܚܽܘܟ܇ ܐܰܠܳܗܳܐ ܪܓܺܝܙ ܗܽܘ ܡܶܢܳܟ ܘܶܐܢ ܐܶܬܪܰܥܺܝܬܳܝܗ̱ܝ ܠܚܰܒܪܳܟ܇ ܪܰܥܺܝܬ ܠܡܳܪܳܟ ܒܰܫܡܰܝܳܐ܀

ܠܳܐ ܢܶܗܘܶܐ ܨܰܘܡܰܢ ܡܰܣܠܰܝ܇ ܐܰܝܟ ܨܰܘܡܳܐ ܕܰܦܪ̈ܺܝܫܳܝܶܐ܇ ܐܶܠܳܐ ܗܰܒܠܰܢ ܕܰܢܫܰܡܠܺܝܘܗ̱ܝ ܒܕܰܟܝܽܘܬܳܐ ܘܩܰܕܺܝܫܽܘܬܳܐ܀

 

ܩܳܠܳܐ ܕܫܽܘܒܩܳܢܳܐ ܒܩܳܠܳܐ ܩܽܘܩܳܝܳܐ

ܨܳܡ ܡܳܪܰܢ ܨܰܘܡܳܐ ܕܰܟܝܳܐ ܟܰܕ ܠܳܐ ܣܢܺܝܩ ܗܘܳܐ܇ ܕܰܢܚܰܘܶܐ ܠܥܺܕܰܬ ܩܽܘܕܫܳܐ ܙܰܝܢܳܐ ܕܒܶܗ ܬܶܚܫܽܘܠܝ̱܇ ܐܰܠܦܳܗܿ ܕܰܬܨܽܘܡܝ̱ ܘܰܐܠܦܳܗܿ ܕܰܬܨܰܠܶܐ܇ ܘܰܐܠܦܳܗܿ ܕܬܺܐܡܰܪܝ̱ ܐܰܒܽܘܢ ܕܒܰܫܡܰܝܳܐ܇ ܕܡܳܐ ܕܫܳܡܰܥ ܐܳܟܶܠܩܰܪܨܳܐ ܠܡܰܢܽܘ ܩܳܪܝܳܐ ܥܳܪܶܩ ܡܶܢܳܗܿ ܘܡܶܬܰܛܫܶܐ ܒܰܐܬܪܳܐ ܚܶܫܽܘܟܳܐ ܗ ܘ ܗ܀

ܐܺܝܬ ܨܰܝܳܡܳܐ ܕܰܠܡܳܪܶܗ ܒܨܰܘܡܶܗ ܡܰܪܓܶܙ܇ ܘܺܐܝܬ ܕܳܐܟܽܠ ܘܰܒܡܶܐܟܽܘܠܬܶܗ ܐܰܠܳܗܳܐ ܡܶܬܬܢܺܝܚ܇ ܐܰܝܢܳܐ ܕܨܳܐܶܡ ܘܝܳܗܶܒ ܠܡܶܣܟܺܢ̈ܶܐ܇ ܥܰܠ ܦܳܬܽܘܪܶܗ ܕܡܳܪܝܳܐ ܡܶܬܒܰܣܰܡ܇ ܐܰܝܢܳܐ ܕܨܳܐܶܡ ܘܟܳܠܶܐ ܠܶܗ ܠܠܰܚܡܶܗ܇ ܡܶܢ ܟܰܦܢܳܐ܇ ܠܳܐ ܡܶܬܪܰܥܶܐ ܒܶܗ ܡܳܪܝܳܐ ܘܠܳܐ ܨܰܘܡܶܗ ܡܩܰܒܶܠ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܳܢܰܘ ܨܰܘܡܳܐ ܕܨܳܡܶܗ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܘܰܚܙܳܐ ܫܟܺܝܢܬܳܐ ܕܰܐܠܳܗܽܘܬܳܐ ܐܰܟܡܳܐ ܕܡܰܨܝܳܐ܇ ܗܳܢܰܘ ܨܰܘܡܳܐ ܕܨܳܡ ܐܺܠܺܝܳܐ ܒܛܽܘܪܳܐ ܕܟܰܪܡܠܐܳ܇ ܘܰܒܡܰܪܟܰܒܬܳܐ ܐܶܬܥܰܠܺܝ ܠܶܗ ܠܪܰܘܡܳܐ ܕܰܠܥܶܠ܀

ܗܳܢܰܘ ܨܰܘܡܳܐ ܕܒܶܗ ܕܳܢܺܝܐܶܝܠ ܙܟܳܐ ܠܚܰܝܘ̈ܳܬܳܐ܇ ܘܶܐܬܢܰܨܰܚ ܗܘܳܐ ܩܽܘܕܡܰܬ ܡܰܠܟܳܐ ܒܰܐܪܥܳܐ ܕܒܳܒܶܝܠ܇ ܗܳܢܰܘ ܨܰܘܡܳܐ ܕܒܶܗ ܐܶܫܬܰܘܙܰܒ ܛܠܳܝ̈ܶܐ ܬܠܳܬܳܐ܇ ܘܰܪܒܺܝܥܳܝܳܐ ܢܚܶܬ ܨܶܝܕܰܝܗܽܘܢ ܘܛܰܐܠܳܐ ܪܰܣ ܠܗܽܘܢ܀

ܒܫܽܘܪܳܝ ܨܰܘܡܰܢ ܠܳܟ ܬܶܫܒܽܘܚܬܳܐ ܐܰܒܳܐ ܓܢܺܝܙܳܐ܇ ܡܩܰܒܶܠ ܨܰܘܡܳܐ ܐܳܦ ܡܶܬܪܰܥܶܐ ܒܰܨܠܰܘ̈ܳܬܳܐ܇ ܒܫܽܘܪܳܝ ܨܰܘܡܰܢ ܠܳܟ ܬܰܘܕܺܝܬܳܐ ܝܰܠܕܳܐ ܣܓܺܝܕܳܐ܇ ܕܩܰܒܶܠܬ ܥܠܰܝܟ ܨܰܘܡܳܐ ܕܰܟܝܳܐ ܡܶܛܽܠܳܬܰܢ܀

 

ܕܰܬܠܳܬܫܳܥܺܝ̈ܢ܀ ܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ܀

ܒܚܰܫܳܐ ܘܒܨܰܘܡܳܐ ܕܰܟܝܳܐ ܢܶܬܟܰܫܰܦ ܠܶܗ܇ ܠܝܶܫܽܘܥ ܡܰܠܟܰܢ ܙܰܟܳܝܳܐ ܪܳܚܶܡ ܒܢܰܝ̈ܢܳܫܳܐ܇ ܕܰܡܥܳܕ ܗܽܘ ܕܢܶܬܪܰܥܶܐ ܠܰܢ ܐܰܝܟ ܕܶܐܬܪܰܥܺܝ܇ ܠܢܺܝܢܘܳܝ̈ܶܐ ܕܰܒܥܰܘ ܡܶܢܶܗ ܒܨܰܘܡܳܐ ܘܒܰܨܠܽܘܬܳܐ܇ ܒܪܺܝܟ ܡܳܪܝܳܐ ܕܠܳܐ ܡܰܗܡܶܐ ܡܶܢܳܗܿ܇ ܕܒܳܥܽܘܬܳܐ ܕܡܰܠܝܳܐ ܬܝܳܒܽܘܬܳܐ܇ ܝܳܗܶܒ ܐܺܝܕܳܐ ܠܬܰܝܳܒ̈ܶܐ܇ ܚܽܘܣ ܘܶܐܬܪܰܚܰܡܥܠܰܝ܀

ܛܽܘܒܰܘܗ̱ܝ ܠܰܐܝܢܳܐ ܕܰܚܣܺܝܠ ܡܶܢ ܒܺܝܫ̈ܳܬܳܐ܇ ܘܰܒܠܶܒܳܐ ܕܰܟܝܳܐ ܨܳܐܶܡ ܨܰܘܡܳܐ ܕܦܽܘܪܫܳܢܳܐ܇ ܗܳܢܰܘ ܕܰܥܒܺܝܕ ܟܽܠܫܳܥ ܗܰܝܟܰܠܩܽܘܕܫܳܐ܇ ܡܶܫܬܰܡܰܫ ܒܶܗ ܐܰܠܳܗܳܐ ܒܓܶܠܝܳܐ ܘܰܒܟܶܣܝܳܐ܇ ܨܰܘܡܰܢ ܡܳܪܝ̱ ܢܶܗܘܶܐ ܠܰܢܝܳܚܳܟ܇ ܒܳܥܽܘܬܰܢ ܬܶܗܘܶܐ ܠܰܦܝܳܣܳܟ܇ ܘܰܒܩ̈ܳܠܶܐ ܕܫܽܘܒܚܳܐ ܕܢܺܐܡܰܪ ܕܚܽܘܣ ܘܶܐܬܪܰܚܰܡܥܠܰܝ܀

 

ܚܳܐܶܢ ܠܚܰܛܳܝ̈ܶܐ

ܛܽܘܒܳܐ ܠܨܰܝܳܡ̈ܶܐ܇ ܕܨܳܝܡܺܝܢ ܓܡܺܝܪܳܐܺܝܬ ܡܶܢ ܟܶܠ ܪ̈ܓܺܝܓܳܬܳܐ܇ ܕܥܳܒܪ̈ܳܢ ܘܡܶܫܬܰܪ̈ܝܳܢ ܕܰܢܛܺܝܪ ܠܗܽܘܢ ܒܰܥܕܶܢ ܓܢܽܘܢܳܐ ܘܡܰܠܳܟܽܘܬܳܐ܀

ܫܽܘܒܚܳܐ ܠܛܰܝܒܽܘܬܳܟ܇ ܚܳܢܰܬ݀ ܠܚܰܛܳܝ̈ܶܐ܇ ܐܰܒܳܐ ܕܠܳܐ ܫܽܘܪܳܝ ܘܰܒܪܳܐ ܘܪܽܘܚܩܽܘܕܫܳܐ܇ ܚܽܘܢ ܠܰܢ ܒܝܽܘܡ ܕܺܝܢܳܟ܇ ܘܰܐܫܘܳܢܝ̱ ܠܡܰܠܟܽܘܬܳܟ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܦܬܺܝܚ ܗܽܘ ܬܰܪܥܶܗ ܕܦܰܪܕܰܝܣܳܐ܇

ܐܶܫܬܰܥܳܐ ܠܰܢ ܓܰܝܳܣܳܐ ܥܰܠ ܦܰܐܝܽܘܬܶܗ ܕܦܰܪܕܰܝܣܳܐ܇ ܘܚܰܘܳܐ ܠܰܢ ܐܺܝܠܳܢ ܚܰܝ̈ܶܐ܇ ܕܢܶܩܛܽܘܦ ܘܢܶܐܟܽܘܠ ܡܶܢ ܦܰܐܪ̈ܰܘܗ̱ܝ ܫܰܗܪܳܐ ܨܰܘܡܳܐ ܘܰܨܠܽܘܬܳܐ܇ ܘܩܽܘܪ̈ܒܳܢܶܐ ܕܰܡܝܰܬܪܽܘܬܳܐ܀

ܟܽܠܰܢ ܐܰܚ̈ܰܝ ܢܶܬܚܰܦܰܛ ܘܢܶܫܰܐܠ ܪ̈ܰܚܡܶܐ ܒܰܨܠܽܘܬܳܐ܇ ܒܝܰܘܡ̈ܳܬܳܐ ܗܳܠܶܝܢ ܕܨܰܘܡܳܐ܇ ܘܢܶܓܥܶܐ ܒܚܰܫܳܐ ܠܘܳܬ ܡܳܪܰܢ܇ ܘܰܢܫܰܕܰܪ ܠܰܢ ܥܽܘܕܪ̈ܳܢܶܐ܇ ܘܚܽܘܠܡܳܢܳܐ ܠܰܡܚܺܝܠܽܘܬܰܢ܇

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܶܬܦܰܛܰܡ ܪܽܘܚܳܢܳܐܺܝܬ܇ ܡܶܢ ܙܺܝܘܳܗܿ ܕܰܐܠܳܗܽܘܬܳܐ܇ܘܰܕܠܳܐ ܡܶܐܟܽܘܠܬܳܐ ܫܦܰܪ ܗܘܳܐ ܒܰܕܡܽܘܬ ܡܳܪܶܗ ܐܶܬܟܰܢܺܝ܇ ܘܰܐܚܶܬ ܠܽܘܚ̈ܶܐ ܕܰܟܬܺܝܒܺܝܢ܇ ܦܽܘܩܕܳܢ̈ܶܐ ܠܒܶܝܬ ܐܺܝܣܪܳܐܶܝܠ܀

ܫܽܘܒܚܳܐ ܠܛܳܒܳܐ ܕܰܒܨܰܘܡܶܗ܇ ܝܰܗܒܠܰܢ ܙܰܝܢܳܐ ܕܙܳܟܽܘܬܳܐ܇ ܨܰܘܡܳܐ ܕܰܟܝܳܐ ܘܩܰܕܺܝܫܳܐ ܕܒܶܗ ܢܶܙܟܶܐ ܠܰܒܥܶܠܕܰܪܳܐ܇ ܘܠܰܐܒܽܘܗ̱ܝ ܘܰܠܪܽܘܚܶܗ ܕܩܽܘܕܫܳܐ܇ ܬܶܫܒܽܘܚܬܳܐ ܘܰܥܠܰܝܢ ܪ̈ܰܚܡܶܐ܀

 

ܕܰܬܫܰܥܫܳܥܺܝ̈ܢ ܩܳܠܳܐ ܡܳܪܶܗ ܕܪܰܡܫܳܐ

ܒܨܰܘܡܳܐ ܕܰܟܝܳܐ ܢܶܬܓܰܘܰܣ ܐܰܚ̈ܰܝ܇ ܘܢܶܦܠܽܘܚ ܥܰܡܶܗ ܥܒܳܕ̈ܶܐ ܕܟܺܐܢܽܘܬܳܐ܇ ܕܗܽܘ ܡܰܩܢܶܐ ܠܰܢ ܚܰܝ̈ܶܐ ܕܰܠܥܳܠܰܡ܇ ܘܰܡܚܰܕܶܐ ܠܰܢ ܒܰܓܢܽܘܢ ܚܰܕܘ̈ܳܬܳܐ܀

ܒܰܥܕܶܝܢ ܚܳܕܶܝܢ ܟܺܐܢ̈ܶܐ ܘܙܰܕܺܝ̈ܩܶܐ܇ ܕܰܙܟܰܘ ܒܨܰܘܡܳܐ ܕܰܟܝܳܐ ܘܒܰܨܠܽܘܬܳܐ܇ ܪܽܘܚܳܐ ܕܩܽܘܕܫܳܐ ܓܳܕܠܳܐ ܠܗܽܘܢ ܟܠܺܝܠܳܐ܇ ܫܽܘܒܚܳܐ ܦܰܐܝܳܐ ܣܺܝܡܳܐ ܒܪ̈ܺܝܫܰܝܗܽܘܢ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܨܰܘܡܳܐ ܐܰܚ̈ܰܝ ܢܶܬܟܰܫܰܪ܇ ܒܦܽܘܠܚܳܢܳܐ ܕܙܰܕܺܝܩܽܘܬܳܐ܇ ܘܒܰܥܒܳܕ̈ܶܐ ܛܳܒ̈ܶܐ ܢܪܰܥܶܐ܇ ܠܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܀

ܫܽܘܒܚܳܐ ܠܰܐܒܳܐ ܕܰܒܨܰܘܡܶܗ܇ ܝܰܗܒܠܰܢ ܙܰܝܢܳܐ ܕܦܽܘܪܩܳܢܳܐ܇ ܕܒܶܗ ܢܶܙܟܶܐ ܠܰܒܥܶܠܕܰܪܳܐ܇ ܘܥܰܒܕܶܗ ܕܝܳܫܳܐ ܠܨܰܝܳܡ̈ܶܐ܀

 

ܕܢܳܓܰܗ ܬܠܳܬܳܐ ܒܫܰܒܳܐ

ܩܕܳܡ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ܇ ܚܛܺܝܿܬ ܠܳܟ ܚܳܐܶܢ

ܡܳܪܰܢ ܕܚܽܘܩ ܡܶܢ ܒܰܝܢܳܬܰܢ܇ ܚܣܳܡܳܐ ܘܢܶܟܠܳܐ ܐܳܦ ܡܶܐܟܰܠܩܰܪܨܳܐ܇ ܡܳܪܝܳܐ ܡܳܪܶܐ ܟܽܠ܀

ܚܽܘܒܳܐ ܕܰܕܟܶܐ ܡܶܢ ܐܰܟܬܳܐ܇ ܘܡܶܢ ܚܶܪ̈ܝܳܢܶܐ܇ ܡܠܺܝ ܠܠܶܒܰܘ̈ܳܬܰܢ ܡܳܪܝܳܐ܀

ܗܳܫܳܐ ܡܳܪܝܳܐ ܡܪܰܚܡܳܢܳܐ܇ ܠܰܢ ܩܳܪܶܝܢܰܢ܇ ܒܨܰܘܡܳܐ ܕܬܶܥܢܶܐ ܠܰܢ܇ ܡܳܪܝܳܐ ܡܳܪܶܐ ܟܽܠ܀

ܒܚܰܫܳܐ ܘܕܶܡܥ̈ܶܐ ܘܚܶܢܓ̈ܳܬܳܐ ܠܳܟ ܗܽܘ ܡܦܺܝܣ ܐ̱ܢܳܐ܇ ܕܰܬܚܰܣܶܐ ܚܰܘܒܰܝ̈ ܡܳܪܝܳܐ܀

ܘܳܐܦ ܥܰܢܺܝܕܰܝ̈ܢ ܕܗܰܝܡܶܢܘ̱ ܒܳܟ ܒܰܓܢܽܘܢ ܢܽܘܗܪܳܐ܇ ܐܰܫܘܳܐ ܕܢܶܬܒܰܣܡܽܘܢ܇ܡܳܪܝܳܐ܀

 

ܡܳܪܝܳܐ ܩܪܺܝܬܳܟ ܢܽܘܗܪܳܐ ܕܡܶܢ ܢܽܘܗܪܳܐ

ܟܺܐܢ̈ܶܐ ܫܦܰܪܘ̱ ܒܨܰܘܡܳܐ܇ ܒܕܳܪ̈ܰܝܗܽܘܢ ܘܰܒܙܰܒܢܰܝ̈ܗܽܘܢ ܢܶܫܦܰܪ ܠܳܟ ܚܢܰܢ ܚܰܛܳܝ̈ܶܐ܇ ܡܳܪܳܐ ܕܨܳܒܶܐ ܒܬܰܝܳܒ̈ܶܐ܇ ܬܰܘ܀

ܫܶܡܥܽܘܢ ܕܰܩܪܳܟ ܗܘܳܐ܇ ܓܰܠ̈ܠܶܐ ܕܝܰܡܳܐ ܠܳܐ ܛܰܒܥܽܘܗ̱ܝ܇ ܘܠܺܝ ܕܰܠܳܢܝ̱ ܐܰܝܟ ܕܰܠܫܶܡܥܽܘܢ܇ ܡܶܢ ܓܰܠ̈ܠܶܐ ܫܓܺܝܫ̈ܶܐ ܕܥܳܠܡܳܐ ܬܰܘ ܟܽܠ ܥܰܡܡܺܝ̈ܢ܀

ܒܬܰܪܥܳܟ ܢܳܩܫܺܝܢܰܢ܇ ܕܢܶܫܰܐܠ ܡܶܢܳܟ ܫܽܘܒܩܳܢܳܐ܇ ܛܳܒܳܐ ܦܰܢܳܐ ܫܶܐܠ̈ܳܬܰܢ܇ ܒܥܽܘܬܪܳܐ ܪܰܒܳܐ ܕܰܚܢܳܢܳܟ܇ ܬܰܘ܀

ܣܡܳܟܳܐ ܕܠܳܐ ܥܳܒܰܪ܇ ܘܫܶܩܝܳܐ ܚܰܝܳܐ ܕܪܽܘܚܩܽܘܕܫܳܐ ܡܰܬܩܶܢ ܒܚܽܘܒܶܗ ܒܰܪ ܡܰܠܟܳܐ܇ ܠܟܶܢܫܳܐ ܕܢܰܟܦ̈ܶܐ ܘܨܰܝܳܡ̈ܶܐ܇ ܬܰܘ܀

ܟܽܠܰܢ ܚܰܒܺܝ̈ܒܰܝ܇ ܒܨܰܘܡܳܐ ܕܰܟܝܳܐ ܘܒܰܨܠܽܘܬܳܐ܇ ܘܢܶܫܦܰܪ ܠܡܳܪܝܳܐ ܐܰܠܳܗܳܐ܇ ܕܰܢܚܰܣܶܐ ܠܰܢ ܚܰܘܒ̈ܳܬܰܢ܇ ܬܰܘ܀

ܒܨܰܘܡܳܐ ܒܕܰܟܝܽܘܬܳܐ܇ ܘܣܶܓܕܬܳܐ ܘܫܽܘܒܚܳܐ ܒܙܰܗܝܽܘܬܳܐ܇ ܢܩܰܪܶܒ ܠܪܰܒ ܟܽܘܡܪ̈ܶܐ ܕܦܰܪܩܰܢ܇ ܒܨܰܘܡܶܗ ܕܰܚܠܳܦܰܝܢ ܨܳܡ ܬܰܘ ܟܽܠ ܥܰܡܡܺܝ̈ܢ܀

 

ܩܳܠܳܐ ܕܪܰܡܫܳܐ ܩܳܠܳܐ ܩܰܒܶܠܳܝܗ̱ܝ ܡܳܪܰܢ

ܢܽܘܗܪܳܐ ܘܒܽܘܣܳܡܳܐ܇ ܡܰܩܢܶܐ ܨܰܘܡܳܐ ܠܦܳܪ̈ܽܘܫܶܐ܇ ܘܚܰܝ̈ܶܐ ܕܠܳܐ ܫܽܘܠܳܡ܇ ܒܥܳܠܡܳܐ ܚܰܕܬܳܐ ܕܠܳܐ ܥܳܒܰܪ܀

ܚܰܬܢܳܐ ܫܡܰܝܳܢܳܐ܇ ܕܨܰܘܡܳܐ ܐܰܠܶܦ ܠܰܐܬܠܺܝܛܰܘ̈ܗ̱ܝ܇ ܚܰܝܶܠ ܠܰܢ ܒܪ̈ܰܚܡܰܝܟ ܕܰܢܨܽܘܡ ܨܰܘܡܳܐ ܩܰܕܺܝܫܳܐ܀

 

ܐ̱ܚܪܺܢܳܐ ܗܘܺܝ ܠܳܗܿ ܠܢܰܦܫܝ̱ ܡܢܰܛܪܳܢܳܐ܇

ܛܽܘܒܰܘܗ̱ܝ ܠܰܐܝܢܳܐ ܕܨܳܡ ܕܰܟܝܳܐܺܝܬ ܨܰܘܡܳܐ ܕܦܽܘܪܫܳܢܳܐ܇ ܘܰܩܨܳܐ ܠܰܚܡܶܗ ܘܝܰܗܒܶܗ ܠܟܰܦܢ̈ܶܐ܇ ܡܶܢ ܠܶܒܳܐ ܛܳܒܳܐ܇ ܬܰܡܳܢ ܡܩܰܒܶܠ ܦܽܘܪܥܳܢܳܐ܇ ܡܶܢ ܗܰܘ ܡܳܪܳܐ ܡܪܰܚܡܳܢܳܐ܇ ܘܝܳܪܶܬ ܡܰܠܟܽܘܬܳܐ܀

ܨܳܡ ܗܘܳܐ ܡܽܘܫܶܐ ܨܰܘܡܳܐ ܕܰܟܝܳܐ܇ ܘܰܢܗܰܪ ܦܰܪܨܽܘܦܶܗ܇ ܐܳܦ ܐܺܠܺܝܳܐ ܐܶܬܥܰܠܺܝ ܗܘܳܐ ܒܝܰܕ ܨܰܘܡܳܐ ܕܰܟܝܳܐ܇ ܘܰܚܢܰܢ ܡܳܪܰܢ ܢܶܫܦܰܪ ܠܳܟ ܒܰܨܠܽܘܬܳܐ ܘܨܰܘܡܳܐ ܕܰܟܝܳܐ܇ ܘܢܺܐܪܰܬ ܡܰܠܟܽܘܬܳܐ܀

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܛܽܘܒܰܘܗ̱ܝ ܠܰܐܝܢܳܐ ܕܥܰܡܶܗ ܨܰܘܡܳܐ ܗܘܳܐ ܥܶܢܝܳܢܶܗ܇ ܕܒܰܕܡܽܘܬ ܡܽܘܫܶܐ ܢܳܗܪܳܐ ܢܰܦܫܶܗ ܘܡܶܙܕܰܗܝܳܐ ܒܶܗ܇ ܐܰܪܒܥܺܝܢ ܝܰܘܡܺܝ̈ܢ ܥܰܡ ܐܰܠܳܗܳܐ ܗܘܳܐ ܥܶܢܝܳܢܶܗ܇ ܒܨܰܘܡܳܐ ܕܰܟܝܳܐ ܕܠܳܐ ܡܶܐܟܽܘܠܬܳܐ ܘܶܐܬܰܢܰܨܰܚ ܒܶܗ܀

ܫܽܘܒܚܳܐ ܗܕܺܝܪ̈ܶܐ ܥܰܡ ܩܽܘܠܳܣ̈ܶܐ ܫܒܺܝܚ̈ܶܐ ܢܶܣܰܩ܇ ܘܠܰܐܒܳܐ ܘܠܰܒܪܳܐ ܘܰܠܪܽܘܚܩܽܘܕܫܳܐ ܒܟܽܠܥܶܕܳܢܺܝ̈ܢ܇ ܐ̱ܪܳܙܳܐ ܣܓܺܝܕܳܐ ܟܝܳܢܳܐ ܓܢܺܝܙܳܐ ܚܰܕ ܐܰܠܳܗܳܐ܇ ܕܡܶܢ ܟܽܠܒܶܪ̈ܝܳܢ ܣܓܺܝܕ ܘܰܡܫܰܒܰܚ ܠܶܗ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ܀ ܒܩܳܠܳܐ ܝܳܐܶܐ ܘܙܳܕܶܩ܇

ܒܕܶܡܥ̈ܶܐ ܕܩܶܪܒܰܬ݀ ܚܰܛܳܝܬܳܐ܇ ܠܶܐܫܛܳܪܳܐ ܕܚܰܘܒܶܝ̈ܗܿ ܬܶܠܚܰܬ݀܇ ܗܳܠܶܝܢ ܣܰܒ ܠܳܟ ܚܰܛܳܝܳܐ܇ ܘܰܓܥܺܝ ܒܚܰܫܳܐ ܠܘܳܬ ܡܳܪܳܢ܇ ܫܽܘܒܚܳܐ ܠܳܟ܀

ܥܰܡ ܨܰܘܡܰܢ ܢܶܪܗܰܛ ܐܰܚ̈ܰܝ܇ ܕܢܶܬܡܰܢܰܥ ܠܦܶܨܚܶܗ ܕܰܒܪܳܐ܇ ܘܰܒܕܰܟܝܽܘܬܳܐ ܢܶܫܬܰܘܬܰܦ ܒܦܰܓܪܳܐ ܘܰܕܡܳܐ ܩܰܕܺܝܫܳܐ܇ ܫܽܘܒܚܳܐ ܠܳܟ܀

ܩܪܰܝܢܳܟ ܡܳܪܰܢ ܒܰܨܠܽܘܬܳܐ܇ ܠܳܐ ܬܰܗܡܶܐ ܚܝܳܪܳܟ ܡܶܢܰܢ܇ ܐܶܬܪܰܚܰܡ ܥܰܠ ܢܰܦܫ̈ܳܬܰܢ܇ ܘܠܳܐ ܬܶܡܚܶܐ܇ ܒܪܺܝܬܳܟ ܠܰܐܒܕܳܢ܇ ܫܽܘܒܚܳܐ܀

ܚܽܘܪ ܒܰܐܒܪܳܗܳܡ ܩܰܕܡܳܝܳܐ܇ ܘܶܐܬܒܰܩܳܐ ܒܺܐܝܽܘܒ ܟܺܐܢܳܐ܇ ܕܡܶܢ ܬܽܘܪܣܳܝܳܐ ܕܡܶܣܟܺܢ̈ܶܐ܇ ܝܺܪܶܬܘ̱ ܓܰܙ̈ܶܐ ܕܠܳܐ ܡܶܢܝܳܢ܀

ܗܰܒܠܰܢ ܚܰܝܠܳܐ ܕܡܶܢ ܕܺܝܠܳܟ܇ ܕܢܰܩܪܶܒ ܒܶܗ ܥܰܡ ܪ̈ܳܕܽܘܦܰܝܢ܇ ܘܩܰܒܶܠ ܒܳܥܽܘܬܳܐ ܕܥܰܒܕܰܝ̈ܟ܇ ܘܨܰܘܡܰܢ ܢܶܗܘܶܐ ܠܰܢܝܳܚܳܟ܀

 

ܩܳܠܳܐ ܕܠܺܠܝܳܐ܇ ܒܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ܀

ܐܰܪܒܥܺܝܢ ܝܰܘ̈ܡܺܝܢ ܓܶܙܪܰܬ݀ ܗܘܳܬ݀ ܢܺܝܢܘܶܐ ܡܕܺܝܢ̱ܬܳܐ܇ ܨܰܘܡܳܐ ܕܰܟܝܳܐ ܩܰܕܺܝܫܳܐ܇ ܡܶܛܽܠ ܓܙܳܪ ܕܺܝܢܶܗ܇ ܨܳܡ ܡܰܠܟܳܐ ܘܶܐܬܟܰܣܺܝ ܣܰܩܳܐ ܘܩܶܛܡܳܐ ܘܩܰܪܶܒ ܠܡܳܪܝܳܐ ܐܰܠܳܗܳܐ ܨܰܘܡܳܐ ܘܰܨܠܽܘܬܳܐ܇ ܬܰܘ ܐܰܚ̈ܰܝ ܢܨܽܘܡ ܘܰܢܨܰܠܶܐ܇ ܘܢܶܪܥܶܐ ܠܡܳܪܝܳܐ ܒܕܽܘܒܳܪ̈ܰܝܢ܇ ܘܢܺܐܡܰܪ ܠܶܗ ܒܓܰܠܝܽܘܬ ܐܰܦ̈ܶܐ ܕܚܽܘܣ ܘܶܐܬܪܰܚܰܡܥܠܰܝܢ܀

ܗܳܢܰܘ ܨܰܘܡܳܐ ܕܰܟܝܳܐ ܘܙܰܝܢܳܐ ܪܰܒܳܐ܇ ܕܒܶܗ ܐܶܬܢܰܨܰܚܘ ܙܰܕܺܝ̈ܩܶܐ ܘܰܫܦܰܪܘ̱ ܠܰܐܠܳܗܳܐ܇ ܨܳܡܶܗ ܡܽܘܫܳܐ ܢܒܺܝܳܐ ܐܳܦ ܐܺܠܺܝܳܐ ܚܰܕ ܐܶܙܕܰܗܺܝ ܦܰܪܨܽܘܦܶܗ ܘܰܐ̱ܚܪܺܝܢ ܐܶܬܥܰܠܺܝ܇ ܛܽܘܒ ܠܰܐܝܢܳܐ ܕܰܐܚܒܶܗ ܘܰܫܦܰܪ ܒܶܗ܇ ܕܗܽܘ ܝܳܪܶܬ ܚܰܝ̈ܶܐ ܕܰܠܥܳܠܰܡ܇ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ ܕܰܢܨܰܚܘ̱ ܘܶܐܬܟܰܠܰܠܘ̱܀

 

ܡܰܕܪܳܫܳܐ ܩܳܠܳܐ ܦܰܪܕܰܝܣܳܐ ܥܽܘܢܺܝܬܳܐ܇ ܫܽܘܒܚܳܐ ܠܛܰܝܒܽܘܬܳܟ ܡܚܰܝܠܰܬ ܠܨܰܝܳܡ̈ܶܐ܇ ܫܽܘܒܚܳܐ ܠܟܺܐܢܽܘܬܳܟ ܡܩܰܒܠܰܬ ܠܬܰܝܳܒ̈ܶܐ܇

ܣܰܓܺܝ ܪܓܺܝܓ ܨܰܘܡܳܐ܇ ܠܰܐܝܢܳܐ ܕܡܰܚܶܒ ܠܶܗ܇ ܘܙܰܝܢܰܐܗ̱ܘ ܕܠܳܐ ܚܳܐܶܒ܇ ܕܒܶܗ ܡܶܙܕܟܶܐ ܒܺܝܫܳܐ܇ ܕܫܰܦܶܠ ܠܓܰܢ̱ܒܳܪ̈ܶܐ܇ ܘܰܣܚܰܦ ܩܪ̈ܰܒܬܳܢܶܐ܇ ܨܰܘܡܳܐ ܠܶܗ ܡܫܰܦܶܠ ܒܟܽܠܗܶܝܢ܇ ܠܪܰܒܳܐ ܕܣܰܢܝ̈ܳܬܳܐ܇ ܕܡܰܟܶܟ ܩܛܰܠ ܠܳܐܕܳܡ܇ ܗܰܒܠܰܢ ܒܰܪ ܚܰܝܳܐ܇ ܕܢܶܙܟܺܝܘܗ̱ܝ ܠܣܳܛܳܢܳܐ܀

ܚܙܺܝܬܶܗ ܒܬܶܫܒܽܘܚܬܳܐ ܠܒܽܘܟܪܶܗ ܕܥܶܠܳܝܳܐ܇ ܕܰܠܒܺܝܟ ܒܝܰܡܺܝܢܶܗ܇ ܟܠܺܝ̈ܠܶܐ ܕܙܳܟܽܘܬܳܐ܇ ܠܟܺܐܢ̈ܶܐ ܒܢܰܝ̈ ܢܽܘܗܪܳܐ܇ ܕܰܐܚܒܽܘܗ̱ܝ ܒܨܰܘܡܰܝ̈ܗܽܘܢ܇ ܘܰܫܪܳܐ ܒܓܰܘ ܢܽܘܪܳܐ ܥܰܡܗܽܘܢ܇ ܡܪܰܚܶܡ ܒܥܽܘܕܪ̈ܳܢܰܘܗ̱ܝ܇ ܡܣܰܡܶܟ ܒܛܰܝܒܽܘܬܶܗ ܡܙܰܟܶܐ ܒܝܰܕ ܚܽܘܒܶܗ܇ ܡܟܰܠܶܠ ܒܝܰܕ ܚܰܝܠܶܗ܀

ܐܶܢܗܽܘ ܕܡܳܝܽܘ̈ܬܶܐ܇ ܡܰܠܟ̈ܶܐ ܒܢܰܝ̈ ܥܰܦܪܳܐ܇ ܠܙܰܟܳܝܳܐ ܡܰܘܪܒܺܝܢ܇ ܕܰܢܨܰܚܘ̱ ܒܰܐܓܽܘܢܳܐ܇ ܟܡܳܐ ܢܰܘܪܶܒܗ ܡܳܪܰܢ ܠܓܶܢܣܳܐ ܕܨܰܝܳܡ̈ܶܐ܇ ܕܰܙܟܰܘ ܒܝܰܕ ܚܰܝܠܶܗ ܠܣܳܐܢܳܐ܇ ܒܪܶܗܛܳܐ ܕܥܰܡܠܰܝ̈ܗܽܘܢ܇ ܨܰܒܶܬܘ̱ ܟܠܺܝܠܰܝ̈ܗܽܘܢ ܬܰܘܕܽܝ ܠܗܰܘ ܕܰܕܪܰܫ ܐܽܘܪܚܳܐ ܠܡܰܠܟܽܘܬܳܐ܀

ܠܳܐ ܐܰܟܝܰܬ݀ ܢܽܘܪܳܐ܇ ܠܫܰܒܪ̈ܶܐ ܒܰܐܬܽܘܢܳܐ܇ ܐܶܠܳܐ ܒܰܕܡܽܘܬ ܐܶܡܳܐ ܪܳܣܰܬ݀ ܠܗܽܘܢ ܛܰܐܠܳܐ܇ ܡܰܝܢܩܳܐ ܐܶܡܳܐ ܠܰܒܪܳܗܿ܇ ܚܰܠܒܳܐ ܠܬܰܪܒܺܝܬܶܗ܇ ܘܢܽܘܪܳܐ ܡܫܰܠܗܰܒܬܳܐ ܐܰܝܢܩܰܬ݀܇ ܛܰܐܠܳܐ ܠܨܰܝܳܡ̈ܶܐ ܫܰܒܪ̈ܶܐ ܒܟܺܝܪ̈ܳܝܶܐ܇ ܒܪܺܝܟ ܒܽܘܟܪܳܐ ܕܰܢܨܰܚ܇ ܠܥܰܒܕܰܘ̈ܗ̱ܝ ܨܰܝܳܡ̈ܶܐ܇

 

ܗܳܢܰܘ ܝܰܪܚܳܐ܇ ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܥܰܠ ܦܽܘܪܩܳܢܰܢ

ܨܰܘܡܳܐ ܠܒܰܟ ܗܘܳܐ܇ ܟܰܕ ܠܳܐ ܣܢܺܝܩ ܗܘܳܐ܇ ܥܰܠ ܗܳܝ ܕܰܢܨܽܘܡ܇ ܝܰܗܒܶܗ ܙܰܝܢܳܐ ܠܰܒܢ̈ܰܝ ܐ̱ܪܳܙܶܗ܇ ܕܢܶܬܟܰܬܫܽܘܢ ܒܶܗ ܥܰܡ ܐܰܪܟܽܘܢܳܐ܇ ܒܪܺܝܟ ܗܽܘ ܡܰܠܟܰܢ ܕܰܠܥܽܘܕܪܳܢܰܢ܇ ܨܰܘܡܳܐ ܠܒܰܟ ܗܘܳܐ܀

ܒܨܰܘܡܳܐ ܕܡܳܪܗܽܘܢ܇ ܐܶܬܕܰܡܺܝܘ ܗ̱ܘܰܘ ܟܺܐܢ̈ܶܐ ܕܰܢܨܰܚܘ̱܇ ܘܰܚܢܰܢ ܐܰܚ̈ܰܝ ܢܶܬܓܰܘܰܣ ܒܶܗ܇ ܕܗܽܘܝܽܘ ܡܢܰܨܰܚ ܠܰܕܢܳܩܶܦ ܠܶܗ܇ ܒܪܺܝܟ ܪܰܒ ܚܰܝܠܳܐ܇ ܕܝܰܗܒܶܗ ܙܰܝܢܳܐ ܠܰܒܢ̈ܰܝ ܐ̱ܪܳܙܶܗ܀

ܐܶܢܗܽܘ ܕܰܐܢ̱ܬ ܗܽܘ ܒܪܳܐ ܕܰܐܠܳܗܳܐ ܐܶܡܰܪ ܒܡܶܠܬܳܐ܇ ܕܠܰܚܡܳܐ ܢܶܗܘܶܐ ܐܳܦ ܡܶܢ ܟܺܐܦܳܐ܇ ܥܢܳܐ ܘܶܐܡܰܪ ܠܶܗ ܕܠܳܐ ܗܘܳܐ ܒܠܰܚܡܳܐ܇ ܚܳܝܶܐ ܐܰܝܢܳܐ ܕܳܐܬܶܐ ܨܶܝܕܰܝ ܐܶܠܳܐ ܒܡܶܠܬܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܬܰܘ ܐܰܚ̈ܰܝ ܢܶܬܓܰܘܰܣ ܒܶܗ܇ ܒܨܰܘܡܳܐ ܦܳܥܠܳܐ ܟܰܫܺܝܪܳܐ܇ ܕܺܠܠܺܝܳܐ ܕܶܐܬܓܰܘܰܣ ܒܶܗ ܒܡܰܪܟܰܒܬܳܐ ܣܠܶܩ ܠܰܫܡܰܝܳܐ܇ ܘܒܶܗ ܐܶܬܢܰܨܰܚ ܕܳܢܺܝܐܶܝܠ܇ ܘܰܙܟܳܐ ܗܘܳܐ ܠܰܐܪ̈ܝܰܘܳܬܳܐ܀

ܫܽܘܒܚܳܐ ܘܗܶܕܪܳܐ ܘܺܐܝܩܳܪܳܐ܇ ܢܰܣܶܩ ܠܰܬܠܺܝܬܳܝܽܘܬܳܐ܇ ܕܗܺܝ ܩܳܝܡܳܐ ܠܰܢ ܒܶܝܬ ܕܺܝܢܳܐ܇ ܘܰܡܚܰܣܝܳܐ ܠܰܢ ܚܰܘ̈ܒܳܬܰܢ܇ ܘܠܳܟ ܫܽܘܒܚܳܐ ܘܰܥܠܰܝܢ ܪ̈ܰܚܡܰܝܟ܇ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡ ܥܠܰܝ ܩܳܠܳܐ ܡܰܠܰܐܟܳܐ ܕܢܽܘܗܪܳܐ ܘܕܰܪܘܳܪܳܐ

ܐܰܠܳܗܳܐ ܕܰܒܨܰܘܡܳܐ ܥܰܙܺܝ܇ ܘܥܰܡ ܡܶܢܰܣܝܳܢܳܐ ܬܰܟܬܽܘܫܳܐ ܠܒܰܟ܇ ܗܰܒܠܰܢ ܡܳܪܰܢ ܕܰܒܨܰܘܡܳܐ܇ ܢܶܫܦܰܪ ܠܳܟ ܘܢܶܙܟܺܝܘܗ̱ܝ ܠܰܒܥܶܠܕܰܪܳܐ܇ ܒܨܰܘܡܳܐ ܩܰܕܺܝܫܳܐ܀

ܠܟܽܠܗܽܘܢ ܪ̈ܶܓܫܰܝܢ ܘܚܽܘܫܳܒܰܝ̈ܢ܇ ܒܕܶܚܠܬܳܟ ܣܰܬܶܬ ܡܳܪܶܐ ܟܽܠ܇ ܐܳܦ ܒܨܰܘܡܳܐ ܕܡܶܢ ܒܺܝܫ̈ܳܬܳܐ ܘܣܰܢܝ̈ܳܬܳܐ܇ ܐܰܫܘܳܐ ܠܟܽܠܰܢ ܕܢܶܫܦܰܪ ܠܳܟ܇ ܐܰܢ̱ܬ ܠܳܐ ܡܳܝܽܘܬܳܐ܀

ܐܰܢ̱ܬ ܕܰܒܝܰܕ ܨܰܘܡܳܐ ܩܰܕܺܝܫܳܐ܇ ܠܢܺܝܢܘܶܐ ܡܶܢ ܝܰܕ ܪܽܘܓܙܳܐ ܦܰܨܺܝܬ܇ ܘܝܰܗܒܬ ܠܽܘܒܳܒܳܐ ܫܰܘܝܳܐܺܝܬ ܠܬܰܝܳܒ̈ܶܐ܇ ܕܰܒܝܰܕ ܨܰܘܡܳܐ ܕܰܟܝܳܐ܇ ܢܶܒܥܽܘܢ ܫܽܘܒܩܳܢܳܐ܀

ܐܰܢ̱ܬ ܕܰܒܝܰܕ ܨܰܘܡܳܐ ܩܰܕܺܝܫܳܐ ܢܰܨܰܚܬ ܠܟܺܐܢ̈ܶܐ ܒܕܳܪ̈ܺܝܢ ܕܳܪ̈ܺܝܢ܇ ܡܽܘܫܶܐ ܪܰܒܳܐ ܒܰܢܒܺܝ̈ܶܐ܇ ܘܺܐܠܺܝܳܐ ܘܕܳܢܺܝܐܶܝܠ ܨܠܽܘܬܗܽܘܢ ܬܰܥܕܰܪܝ̱ ܠܰܢ܀

ܐܰܢ̱ܬ ܕܰܢܦܰܩܬ ܠܕܰܒܪܳܐ ܒܨܶܒܝܳܢܳܟ܇ ܘܨܰܘܡܳܐ ܠܒܰܟܬ ܘܒܶܗ ܗܽܘ ܦܪܰܩܬܳܢ܇ ܐܰܫܘܳܐ ܠܰܢ ܕܰܒܨܰܘܡܳܐ ܘܒܰܨܠܽܘܬܳܐ ܢܶܙܟܶܐ ܠܒܺܝܫܳܐ ܒܥܶܠܕܰܪܳܐ܇ ܕܟܽܠ ܫܳܥ ܡܰܩܪܶܒ ܥܰܡܰܢ܀

ܫܽܘܒܚܳܐ ܠܳܟ ܡܩܰܒܶܠ ܨܠܰܘ̈ܳܬܳܐ܇ ܕܟܽܠ ܨܰܝܳܡ̈ܶܐ ܕܦܳܪܽܘܫܽܘܬܳܐ܇ ܩܰܒܶܠ ܡܳܪܝ̱ ܨܰܘܡܰܢ ܘܰܨܠܰܘ̈ܳܬܰܢ܇ ܘܚܰܣܳܐ ܠܰܢ ܚܰܘ̈ܒܰܝܢ ܒܰܡܪܰܚܡܳܢܽܘܬܳܟ܀

 

ܐܰܠܳܗܝ̱ ܐܰܠܳܗܝ̱ ܩܳܠܳܐ ܒܪܳܐ ܕܰܫܪܳܐ ܒܡܰܪܒܥܳܐ܀

ܫܦܰܪ ܡܶܠܟܺܝܙܕܶܩ ܠܰܐܠܳܗܳܐ܇ ܒܨܰܘܡܳܐ ܕܰܡܠܶܐ ܦܽܘܪܫܳܢܳܐ܇ ܘܩܰܪܶܒ ܠܶܗ ܠܰܚܡܳܐ ܘܚܰܡܪܳܐ܇ ܘܨܳܪ ܠܶܗ ܐ̱ܪܳܙ ܦܰܓܪܶܗ ܘܰܕܡܶܗ܇ ܡܒܰܪܰܟ܀

ܕܳܢܺܝܐܶܝܠ ܛܰܠܝܳܐ ܪܓܺܝܓܳܐ܇ ܒܨܰܘܡܳܐ ܕܨܳܡ ܗܘܳܐ ܒܓܰܘ ܓܽܘܒܳܐ܇ ܡܰܠܰܐܟܳܐ ܢܚܶܬ ܠܰܫܠܳܡܶܗ ܘܶܐܡܰܪ ܨܽܠܘܳܬܳܟ ܐܶܫܬܰܡܥܰܬ݀܇ ܡܒܰܪܰܟ܀

ܠܪܶܗܛܶܗ ܕܨܰܘܡܳܐ ܩܰܕܺܝܫܳܐ܇ ܟܽܠܰܢ ܢܫܰܡܠܶܐ ܕܰܟܝܳܐܺܝܬ܇ ܟܰܕ ܕܟܶܝܢܰܢ ܡܶܢ ܟܽܠ ܛܽܘܠܫܳܐ܇ ܕܰܚܛܳܗ̈ܶܐ ܘܚܰܘܒ̈ܶܐ ܕܰܣܥܰܪܢ܇ ܡܒܰܪܰܟ܀

ܠܨܰܘܡܳܐ ܐܰܚ̈ܰܝ ܢܶܬܢܰܩܰܦ܇ ܘܰܡܙܰܗܶܐ ܠܰܕܢܳܩܶܦ ܠܶܗ܇ ܕܨܳܡܽܘܗ̱ܝ ܟܺܐܢ̈ܶܐ ܘܙܰܕܺܝ̈ܩܶܐ܇ ܘܰܩܢܰܘ ܚܰܝ̈ܶܐ ܕܰܠܥܳܠܰܡ܇ ܡܒܰܪܰܟ܀

ܠܳܐ ܐܺܝܬ ܠܰܢ ܡܳܪܳܐ ܐ̱ܚܪܺܢܳܐ܇ ܕܢܶܬܟܰܫܰܦ ܠܶܗ ܒܰܚܢܰܓܬܳܐ ܛܳܒܳܐ ܩܰܒܶܠ ܒܳܥܽܘܬܰܢ܇ ܘܰܦܬܰܚ ܬܰܪܥܳܟ ܠܰܨܠܽܘܬܰܢ܇ ܡܒܰܪܰܟ܀

ܦܬܰܚ ܬܰܪܥܳܟ ܠܰܨܠܽܘܬܰܢ܇ ܘܰܫܡܰܥ ܩܳܠܳܐ ܕܒܳܥܽܘܬܰܢ܇ ܘܨܰܘܡܰܢ ܢܶܫܦܰܪ ܠܺܐܝܩܳܪܳܟ܇ ܘܗܰܒ ܐܰܓܪܳܐ ܠܰܬܝܳܒܽܘܬܰܢ ܡܒܰܪܰܟ܀

ܐܰܚ̈ܰܝ ܢܨܽܘܡ ܕܰܟܝܳܐܺܝܬ܇ ܠܟܽܠܶܗ ܨܰܘܡܳܐ ܩܰܕܺܝܫܳܐ܇ ܕܥܰܡ ܨܰܝܳܡ̈ܶܐ ܢܶܬܚܰܠܰܛ܇ ܒܰܥܕܶܝܢ ܡܰܠܝܰܬ ܚܰܕܘ̈ܳܬܳܐ܇

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܠܰܡܫܺܝܚܳܐ ܐܰܠܳܗܳܐ

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܰܒܡܰܕܒܪܳܐ ܨܳܡ ܗܘܳܐ܇ ܘܣܰܚܦܶܗ ܠܰܒܥܶܠܕܰܪܳܐ܇ ܘܥܰܒܕܶܗ ܗܘܳܐ ܕܝܳܫܳܐ ܠܰܡܗܰܝܡܶܢ̈ܶܐ ܫܰܒܰܚܘ̱ ܘܠܶܗ ܟܳܗ̈ܢܶܐ ܟܽܠܗܽܘܢ ܒܰܪܶܟܘ̱܇ ܥܰܡܡ̈ܶܐ ܘܶܐܡܘ̈ܳܬܳܐ ܪܰܡܪܶܡܘ̱ ܠܰܫܡܶܗ ܩܰܕܺܝܫܳܐ܇ ܠܥܳܠܰܡ ܥܳܠܡܺܝܢ܀

ܠܰܡܫܺܝܚܳܐ ܐܰܠܳܗܳܐ ܗܰܘ ܕܺܐܝܬܰܘܗ̱ܝ ܠܳܐ ܣܢܺܝܩܳܐ܇ ܕܣܰܪܶܩ ܢܰܦܫܶܗ ܚܠܳܦܰܝܢ܇ ܘܰܒܡܽܘܟܳܟܶܗ ܐܽܘܪܚܳܐ ܠܟܺܐܢ̈ܶܐ ܘܙܰܕܺܝ̈ܩܶܐ ܕܪܰܫ܇ ܠܶܗ ܟܺܐܢ̈ܶܐ ܫܰܒܰܚܘ̱܇ ܘܠܶܗ ܟܳܗ̈ܢܶܐ܀

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܰܒܚܽܘܒܶܗ ܐܶܬܪܟܶܢ܇ ܘܨܳܡ ܘܰܒܨܰܘܡܶܗ ܦܪܰܩ ܠܰܢ܇ ܘܥܰܡ ܥܺܝܪ̈ܶܐ ܕܰܠܥܶܠ ܚܰܠܶܛ ܠܰܢ܇ ܠܶܗ ܟܺܐܢ̈ܶܐ ܫܰܒܰܚܘ̱܇ ܘܠܶܗ܀

 

 ܐ̱ܚܪܺܢܳܐ ܒܩܳܠܳܐ ܒܪܺܝܟ ܕܚܰܕܺܝ ܠܰܫܡܰܝܳܢ̈ܶܐ

ܨܳܡ ܡܳܪܰܢ ܐܰܪܒܥܺܝܢ ܝܰܘ̈ܡܺܝܢ ܡܶܛܽܠ ܦܽܘܪܩܳܢܰܢ܇ ܘܝܰܗܒ ܠܰܢ ܙܰܝܢܳܐ ܙܰܟܳܝܳܐ܇ ܕܒܶܗ ܢܶܙܟܶܐ ܠܒܺܝܫܳܐ܀

ܟܺܐܢ̈ܶܐ ܒܨܰܘܡܳܐ ܐܶܬܢܰܨܰܚܘ̱ ܘܰܙܟܰܘ ܠܣܳܛܳܢܳܐ܇ ܘܰܐܒܗܶܬܘ̱ ܗ̱ܘܰܘ ܠܽܘܩܒܰܠ ܕܰܐܪܳܐ܇ ܘܟܽܠܗܶܝܢ ܨܶܢܥ̈ܳܬܶܗ܀

ܗܳܢܰܘ ܓܶܝܪ ܨܰܘܡܳܐ ܕܰܓܒܺܝܿܬ܇ ܐܶܡܪܰܬ݀ ܗܘܳܬ݀ ܪܽܘܚܳܐ܇ ܕܰܢܨܽܘܡ ܐ̱ܢܳܫ ܡܶܢ ܒܺܝܫ̈ܳܬܳܐ܇ ܘܠܳܐ ܗܘܳܐ ܡܶܢ ܠܰܚܡܳܐ܀

 

ܕܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ܇

ܒܨܰܘܡܳܐ ܢܶܩܨܶܐ ܠܰܣܢܺܝܩ̈ܶܐ܇ ܘܠܰܚܡܳܐ ܘܰܢܣܰܒܰܥ ܟܰܦܢ̈ܶܐ܇ ܕܰܒܡܰܠܟܽܘܬܳܐ ܢܶܬܒܰܣܰܡ ܡܶܢ ܛܳܒ̈ܳܬܶܗ ܕܰܡܫܺܝܚܳܐ܀

ܒܪܺܝܟ ܗܽܘ ܕܰܒܨܰܘܡܶܗ ܚܰܘܺܝ܇ ܒܰܩܢܽܘܡܶܗ ܒܽܘܩܝܳܐ ܕܩܽܘܫܬܳܐ܇ ܕܢܶܙܟܶܐ ܒܶܗ ܠܳܐܟܶܠܩܰܪܨܳܐ܇ ܘܰܢܛܰܠܶܩ ܒܶܗ ܠܝܰܥܢܽܘܬܳܐ܀

ܨܳܡ ܡܽܘܫܶܐ ܐܰܪܒܥܺܝܢ ܝܰܘ̈ܡܺܝܢ ܘܶܐܙܕܰܗܺܝ ܗܘܳܐ ܦܰܪܨܽܘܦܶܗ܇ ܡܶܢ ܙܺܝܘܶܗ ܕܡܳܪܝܳܐ ܡܪܰܝܡܳܐ܇ ܕܡܰܠܶܠ ܥܰܡܶܗ ܥܰܠ ܛܽܘܪܳܐ܀

ܛܽܘܒܰܘܗ̱ܝ ܠܰܐܝܢܳܐ ܕܶܐܬܟܰܫܰܦ܇ ܐܰܝܟ ܕܰܘܺܝܕ ܡܰܠܟܳܐ ܘܟܺܐܢܳܐ܇ ܘܶܐܬܕܟܰܪ ܠܡܳܪܝܳܐ ܒܰܚܢܓܬܳܐ܇ ܘܰܐܫܺܝܓ ܐܺܝܕܰܘ̈ܗ̱ܝ ܕܰܟܝܳܐܺܝܬ܀

ܗܰܒܠܰܢ ܕܰܢܨܽܘܡ ܕܰܟܝܳܐܺܝܬ܇ ܢܶܙܟܶܐ ܠܒܺܝܫܳܐ ܒܥܶܠܕܰܪܳܐ܇ ܡܫܺܝܚܳܐ ܡܟܰܠܶܠ ܠܰܐܬܠܺܝܬܰܘ̈ܗ̱ܝ܇ ܘܰܡܙܰܟܶܐ ܠܗܽܘܢ ܒܰܐܓܽܘܢܳܐ܀

 

ܩܳܠܳܐ ܕܨܰܦܪܳܐ ܩܳܠܳܐ ܒܥܶܕܳܢܶܗ ܕܨܰܦܪܳܐ ܡܶܬܬܣܺܝܡܺܝܢ

ܒܪܺܝܟ ܗܽܘ ܕܰܒܨܰܘܡܶܗ܇ ܙܟܳܐ ܠܳܐܟܶܠܩܰܪܨܳܐ܇ ܘܰܕܪܰܫ ܠܰܢ ܐܽܘܪܚܳܐ ܕܢܶܪܕܶܐ ܠܡܰܠܟܽܘܬܳܐ܇ ܘܝܰܗܒܶܗ ܠܰܢ ܙܰܝܢܳܐ ܕܒܶܗ ܗܽܘ ܢܶܬܟܰܬܰܫ܇ ܘܢܺܐܪܰܬ ܡܰܠܟܽܘܬܳܐ ܥܰܡ ܟܶܐܢ̈ܶܐ ܕܪܰܚܡܽܘܗ̱ܝ ܗ ܘ ܗ ܕܢܶܙܡܰܪ ܬܶܫܒܽܘܚܬܳܐ ܐܺܝܡܳܡܳܐ ܘܠܺܠܝܳܐ܀

ܠܰܘ ܠܰܚܡܳܐ ܘܡܰܝ̈ܳܐ܇ ܡܰܚܛܺܝܢ ܘܰܡܙܕܩܺܝܢ ܕܰܠܚܰܝ̈ܶܐ ܕܦܰܓܪܳܐ ܝܰܗܒ ܐܶܢܽܘܢ ܡܳܪܝܳܐ܇ ܥܒܰܪ ܡܶܢ ܒܺܝܫ̈ܳܬܳܐ ܘܰܥܒܶܕ ܛܳܒ̈ܳܬܳܐ܇ ܘܗܳܢ ܐܺܝܬܰܘܗ̱ܝ ܨܰܘܡܳܐ ܕܰܢܪܰܥܶܐ ܠܡܳܪܝܳܐ܇ ܗ ܘ ܗ. ܗܰܒܠܰܢ ܕܰܒܨܰܘܡܳܐ ܢܶܫܦܰܪ ܠܳܟ ܡܳܪܰܢ܀

 

ܒܥܶܕܳܢ ܨܰܦܪܳܐ ܡܶܬܦܰܬܚܺܝܢ

ܐܰܚ̈ܰܝ ܢܰܚܶܒ ܠܰܚܰܕܳܕ̈ܶܐ ܕܗܳܢܰܘ ܫܽܘܡܠܳܝ ܦܽܘܩܕܳܢ̈ܶܐ܇ ܕܺܐܝܬ ܗܽܘ ܕܨܳܐܶܡ ܡܶܢ ܠܰܚܡܳܐ܇ ܘܰܡܠܶܐ ܚܣܳܡܳܐ ܘܰܛܢܳܢܳܐ܇ ܘܺܐܝܬ ܗܽܘ ܕܰܢܙܺܝܪ ܡܶܢ ܚܰܡܪܳܐ܇ ܘܰܠܚܰܒܰܪܶܗ ܒܟܶܣܝܳܐ ܩܳܛܶܠ܀

ܒܝܰܕ ܨܰܘܡܳܐ ܕܨܳܡ ܕܳܢܺܝܐܶܝܠ܇ ܣܟܰܪ ܦܽܘܡܳܐ ܕܰܐܪ̈ܝܰܘܳܬܳܐ܇ ܘܰܛܠܳܝ̈ܶܐ ܕܒܶܝܬ ܚܰܢܰܢܝܳܐ܇ ܒܨܰܘܡܳܐ ܕܰܥܟܽܘܗܿ ܠܓܰܘܙܰܠܬܳܐ܇ ܘܰܚܢܰܢ ܢܨܽܘܡ ܕܰܟܝܳܐܺܝܬ܇ ܕܢܶܬܒܰܣܰܡ ܥܰܡ ܪ̈ܽܘܚܳܢܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܗܳܢܳܐ ܝܰܘܡܳܐ ܕܰܢܨܰܚ ܨܰܘܡܳܐ ܒܰܟܢܽܘܫ̈ܳܬܳܐ܇ ܐܰܪܺܝܡ ܩܳܠܰܝ̈ ܠܰܕܫܳܡܰܥ ܠܺܝ ܦܳܪܽܘܫܳܐܺܝܬ܇ ܝܰܘܡܳܢ ܕܰܒܠܺܝܡ ܘܰܣܟܺܝܪ ܦܽܘܡܶܗ ܕܳܐܣܽܘܛܽܘܬܳܐ ܬܶܦܬܰܚܝ̱ ܐܶܕܢܳܐ ܬܰܪܥܳܐ ܠܩܳܠܳܐ ܕܡܰܠܦܳܢܽܘܬܳܐ܀

ܒܗܳܢܳܐ ܙܰܒܢܳܐ ܕܢܰܦܫܳܐ ܟܪܺܝܗܬܳܐ ܡܶܬܚܠܰܡܳܐ ܒܶܗ܇ ܬܰܘ ܨܰܝܳܡ̈ܶܐ ܠܬܰܪܥܶܗ ܕܳܐܣܝܳܐ ܥܨܽܘܒܘ̱ ܫܽܘܚܢܰܝ̈ܟܽܘܢ ܒܗܳܠܶܝܢ ܝܰܘܡ̈ܶܐ ܚܰܓܳܐ ܠܡܳܪܝܳܐ ܗܳܐ ܡܶܬܟܰܫܰܦ܇ ܦܽܘܩܘ̱ ܬܰܐܓܳܪ̈ܶܐ ܪܽܘܚܳܢܳܝܶܐ ܘܰܐܥܬܰܪܘ̱ ܡܶܢܶܗ܀

 

ܕܰܬܠܳܬܫܳܥܺܝ̈ܢ܇ ܒܩܳܠܳܐ ܩܽܘܩܳܝܳܐ܇

ܨܳܡ ܡܽܘܫܶܐ ܐܰܪܒܥܺܝܢ ܝܰܘ̈ܡܺܝܢ ܒܛܽܘܪܳܐ ܕܣܺܝܢܰܝ܇ ܘܶܐܙܕܰܗܺܝ ܗܘܳܐ ܦܰܪܨܽܘܦܶܗ ܡܶܢ ܙܽܝܘܶܗ ܕܡܳܪܝܳܐ܇ ܘܰܢܣܰܒ ܡܶܢܶܗ ܥܶܣܪܳܐ ܦܽܘܩܕܳܢܺܝ̈ܢ܇ ܕܰܟܬܺܝܒܺܝܢ ܗ̱ܘܰܘ ܥܰܠ ܠܽܘܚ̈ܶܐ ܕܟܺܐܦܳܐ܇ ܛܽܘܒܰܝܟܝ̱ ܥܺܕܬܳܐ ܡܗܰܝܡܰܢܬܳܐ ܕܰܒܝܰܕ ܨܰܘܡܶܟܝ̱܇ ܒܕܶܒܚܳܐ ܚܰܝܳܐ ܡܶܬܒܰܣܡܰܬܝ̱ ܒܪܺܝܟ ܡܳܪܝܳܐ ܕܰܓܒܳܟܝ̱܇ ܗ ܘ ܗ܀

ܒܝܰܕ ܨܰܘܡܳܐ ܕܨܳܡ ܕܳܢܺܝܐܶܝܠ ܐܶܬܢܰܨܰܚ ܗܘܳܐ܇ ܘܰܐܣܠܺܝ ܛܥܽܘܡ̈ܶܐ ܘܚܰܡܪ̈ܳܢܶܐ ܘܦܰܛܒܳܓ̈ܶܐ ܕܡܰܠܟܳܐ܇ ܘܰܚܣܰܡܘ̱ ܗ̱ܘܰܘ ܒܶܗ ܥܠܰܝܡ̈ܶܐ ܒܢܰܝ̈ ܒܳܒܶܝܠ܇ ܘܥܰܡ ܚܰܝܘ̈ܳܬܳܐ ܕܠܳܐ ܪ̈ܰܚܡܶܐ ܫܕܰܐܽܘܗ̱ܝ ܒܓܰܘ ܓܽܘܒܳܐ ܕܰܐܪ̈ܝܰܘܳܬܳܐ ܠܗܰܘ ܙܰܕܺܝܩܳܐ܇ ܘܰܣܠܶܩ ܡܶܢܶܗ ܟܰܕ ܢܳܨܰܚ ܘܰܙܡܰܪ ܬܶܫܒܽܘܚܬܳܐ܇ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܨܳܐܶܡ ܦܽܘܡܳܐ ܡܶܢ ܠܰܚܡܳܐ܇ ܢܨܽܘܡ ܥܰܡܶܗ ܐܳܦ ܠܶܫܳܢܳܐ܇ ܘܠܳܐ ܢܡܰܠܶܠ ܝܰܬܺܝܪ̈ܳܬܳܐ܇ ܕܢܶܗܘܶܐ ܨܰܘܡܳܐ ܒܰܛܺܝܠܳܐ܀

ܐܰܝܟܰܢܳܐ ܕܠܳܐ ܡܶܬܩܰܒܰܠ܇ ܕܶܒܫܳܐ ܕܰܚܠܺܝܛ ܒܰܡܪܳܪ̈ܶܐ܇ ܗܳܟܰܢܳܐ ܐܳܦܠܳܐ ܨܰܘܡܳܐ ܕܰܡܠܶܐ ܟܽܠܗܶܝܢ ܒܺܝܫ̈ܳܬܳܐ܀

ܠܳܟ ܗܽܘ ܡܫܰܒܚܺܝܢ ܡܰܠܰܐܟ̈ܶܐ܇ ܘܬܶܐܓܡ̈ܶܐ ܟܽܠܗܽܘܢ ܕܰܫܡܰܝܳܐ܇ ܘܝܰܠܕܰܘ̈ܗ̱ܝ ܕܳܐܕܳܡ ܥܰܦܪܳܢܳܐ܇ ܕܰܗ̱ܘܰܘ ܝܳܪ̈ܬܶܐ ܒܡܰܠܟܽܘܬܳܐ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝܕ̈ܶܐ

ܒܨܰܦܪܳܐ ܕܰܕܢܰܚ ܒܶܗ ܢܽܘܗܪܳܐ܇ ܛܽܘܒܳܐ ܪܰܒܳܐ ܠܟܰܫܺܝܪ̈ܶܐ܇ ܘܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ܇ ܡܶܬܒܰܣܡܺܝܢ ܒܶܝܬ ܡܰܠܟܽܘܬܳܐ ܘܢܶܚܕܶܐ ܘܢܶܪܘܰܙ ܪ̈ܶܥܝܳܢܗܽܘܢ܇ ܒܦܽܘܪܥܳܢܳܐ ܕܙܰܕܺܝܩܽܘܬܳܐ܀

ܛܽܘܒܰܘܗ̱ܝ ܠܰܐܝܢܳܐ ܕܰܒܨܰܘܡܶܗ܇ ܪܰܥܺܝ ܠܡܳܪܝܳܐ ܒܕܽܘܒܳܪ̈ܰܘܗ̱ܝ܇ ܘܰܫܡܰܥ ܡܶܢܶܗ ܗܰܘ ܩܳܠܳܐ܇ ܕܬܳܐ ܥܽܘܠ ܝܺܪܰܬ ܡܰܠܟܽܘܬܳܐ܇ ܘܚܰܝ̈ܶܐ ܡܠܺܝܟ̈ܶܐ ܕܰܠܥܳܠܰܡ܇ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܛܽܘܒܰܝܟܽܘܢ ܐܳܘ ܨܰܝܳܡ̈ܶܐ܇ ܐܶܢ ܨܳܝܡܺܝܢ ܐ̱ܢܬܽܘܢ ܕܰܟܝܳܐܺܝܬ܇ ܘܟܽܠ ܐ̱ܢܳܫ ܟܽܠܶܗ ܥܰܡ ܟܽܠܶܗ܇ ܬܰܘ ܢܨܽܘܡ ܒܶܗ ܦܳܪܽܘܫܳܐܺܝܬ܇ ܘܢܶܫܠܰܚ ܘܢܶܫܕܶܐ ܪܰܦܝܽܘܬܳܐ܇ ܘܢܶܠܒܰܫ ܙܰܝܢܳܐ ܕܛܳܒ̈ܳܬܳܐ܀

ܐܰܝܢܳܐ ܕܨܳܐܶܡ ܕܰܟܝܳܐܺܝܬ܇ ܥܰܡ ܪ̈ܽܘܚܳܢܶܐ ܡܶܬܒܰܣܰܡ܇ ܒܰܫܡܰܝܳܐ ܢܛܺܝܪ ܠܶܗ ܟܠܺܝܠܳܐ܇ ܘܡܰܠܟܽܘܬܳܐ ܘܚܰܝ̈ܶܐ ܚܰܕ̈ܬܶܐ܇ ܬܰܡܳܢ ܚܳܕܶܐ ܘܡܶܬܒܰܣܰܡ܇ ܥܰܡ ܐܶܡܪ̈ܶܐ ܒܢܰܝ̈ ܝܰܡܺܝܢܳܐ܀

 

ܕܰܬܫܰܥܫܳܥܺܝ̈ܢ ܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܦܐܶܐ ܗܘܳܐ ܘܰܪܓܺܝܓ ܨܰܘܡܳܐ ܠܘܳܬ ܐܰܠܳܗܳܐ܇ ܕܨܳܡܽܘܗ̱ܝ ܟܺܐܢ̈ܶܐ ܘܙܰܕܺܝ̈ܩܶܐ ܘܺܝܪܶܬܘ̱̱ ܡܰܠܟܽܘܬܳܐ܇ ܨܳܡܶܗ ܡܽܘܫܶܐ ܒܛܽܘܪܳܐ ܐܰܪܒܥܺܝܢ ܝܰܘ̈ܡܺܝܢ܇ ܘܶܐܙܕܰܗܺܝ ܗܘܳܐ ܦܰܪܨܽܘܦܶܗ ܡܶܢ ܢܽܘܪܳܐ ܕܣܰܢܝܳܐ܇ ܘܺܐܠܺܝܳܐ ܨܳܡܶܗ ܕܰܟܝܳܐܺܝܬ܇ ܛܥܶܢܬܶܗ ܗܘܳܬ݀ ܡܰܪܟܰܒܬܳܐ ܕܢܽܘܪܳܐ܇ ܘܰܚܢܰܢ ܢܨܽܘܡ ܘܰܢܨܰܠܶܐ ܘܢܺܐܪܰܬ ܡܰܠܟܽܘܬܳܐ܀

ܗܳܢܰܘ ܨܰܘܡܳܐ ܕܰܟܝܳܐ ܕܰܡܨܶܐ ܡܰܩܢܶܐ܇ ܓܶܦ̈ܶܐ ܪ̈ܽܘܚܳܢܶܐ ܠܰܢܰܦܫܳܐ ܠܡܶܦܪܰܚ ܠܰܫܡܰܝܳܐ܇ ܐܳܕܳܡ ܕܶܐܟܰܠ ܡܶܢ ܦܺܐܪܳܐ ܗܘܳܐ ܢܽܘܟܪܳܝܳܐ܇ ܘܨܰܝܳܡ̈ܶܐ ܒܥܳܢܘܳܝܽܘܬܳܐ ܗܳܘܶܝܢ ܪ̈ܽܘܚܳܢܶܐ܇ ܫܽܘܒܚܳܐ ܠܶܗ ܠܒܽܘܟܪܳܐ ܕܺܐܝܬܽܘܬܳܐ܇ ܕܰܚܫܰܠ ܠܰܢ ܙܰܝܢܳܐ ܒܝܰܕ ܨܰܘܡܶܗ܇ ܕܒܶܗ ܢܶܬܟܰܬܰܫ ܥܰܡ ܒܺܝܫܳܐ ܘܢܺܐܪܰܬ ܡܰܠܟܽܘܬܳܐ܀

 

ܒܚܳܐܶܢ ܠܚܰܛܳܝ̈ܶܐ

ܛܽܘܒܰܘܗ̱ܝ ܠܨܰܝܳܡܳܐ܇ ܕܨܳܐܶܡ ܓܡܺܝܪܳܐܺܝܬ܇ ܡܶܢܟܽܠ ܪ̈ܓܺܝܓܳܬܳܐ܇ ܕܥܳܒܪ̈ܳܢ ܘܡܶܫܬܰܪ̈ܝܳܢ ܘܰܢܛܺܝܪ ܠܶܗ ܒܰܥܕܶܝܢ ܓܢܽܘܢܳܐ ܕܚܰܕܘ̈ܳܬܳܐ܀

ܒܨܰܘܡܳܐ ܡܶܙܕܰܗܝܳܐ܇ ܢܰܦܫܳܐ ܘܡܶܬܒܰܣܡܳܐ ܘܣܳܠܩܳܐ ܒܶܗ ܟܽܠܫܳܥ܇ ܠܪܰܘܡܳܐ ܨܶܝܕ ܥܺܝܪ̈ܶܐ܇ ܘܚܳܙܝܳܐ ܠܒܳܪܽܘܝܳܐ܇ ܐܰܝܟ ܕܳܐܦ ܚܙܳܝܗ̱ܝ ܡܽܘܫܶܐ܀

ܫܽܘܒܚܳܐ ܠܛܰܝܒܽܘܬܳܟ܇ ܡܚܰܝܠܰܬ ܠܨܰܝܳܡ̈ܶܐ܇ ܫܽܘܒܚܳܐ ܠܛܰܝܒܽܘܬܳܟ܇ ܓܰܡܪܰܬ݀ ܠܬܰܝܳܒ̈ܶܐ܇ ܫܽܘܒܚܳܐ ܠܰܚܢܳܢܳܟ ܡܳܪܳܐ ܡܪܰܚܡܳܢܳܐ܀

 

ܬܽܘܒ ܕܝܽܘܡ ܐܰܪܒܥܳܐ

ܩܕܳܡ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ܇ ܒܪ̈ܰܚܡܰܝܟ ܡܳܪܝ̱ ܣܰܓܺܝ̈ܐܶܐ

ܒܪ̈ܰܚܡܰܝܟ ܡܳܪܝ̱ ܣܰܓܺܝ̈ܐܶܐ܇ ܕܰܐܚܬܽܘܟ ܡܶܢ ܪܰܘܡܳܐ ܠܥܽܘܡܩܳܐ܇ ܘܨܰܘܡܳܐ ܠܒܰܟܬ ܚܠܳܦܰܝܢ܇ ܘܒܶܗ ܦܪܰܩܬܳܢ ܡܶܢ ܛܳܥܝܽܘܬܳܐ܀

ܒܨܰܘܡܳܐ ܥܺܕܬܳܐ ܙܳܡܪܳܐ ܠܳܟ܇ ܫܽܘܒܚܳܐ ܒܠܺܠܝܳܐ ܘܒܺܐܝܡܳܡܳܐ܇ ܒܪܳܐ ܕܨܳܡܬ ܥܰܠ ܐܰܦܶܝ̈ܗܿ܇ ܘܝܰܗܒܬ ܠܳܗܿ ܙܰܝܢܳܐ ܕܒܳܗܿ ܬܶܙܟܶܐ܀

ܙܰܝܢܳܐ ܕܩܽܘܫܬܳܐ ܝܰܗܒ ܗܘܳܐ܇ ܦܳܪܽܘܩܰܢ ܠܥܺܕܰܬ ܩܽܘܕܫܳܐ܇ ܨܰܘܡܳܐ ܩܰܕܺܝܫܳܐ܇ ܕܒܶܗ ܬܶܬܟܰܬܰܫܝ̱ ܥܰܡ ܒܺܝܫܳܐ܀

ܒܝܰܕ ܨܰܘܡܳܐ ܩܰܕܺܝܫܳܐ܇ ܡܬܢܰܨܚܳܐ ܥܺܕܰܬ ܩܽܘܕܫܳܐ܇ ܘܰܟܠܺܝܠܳܐ ܕܫܽܘܒܚܳܐ ܓܳܕܠܳܐ܇ ܠܚܰܬܢܳܐ ܕܝܰܗܒܳܗܿ ܠܳܗܿ܀

ܒܝܰܕ ܨܠܽܘܬܳܐ ܕܝܳܠܶܕܬܳܟ܇ ܘܰܕܩܰܕܺܝ̈ܫܶܐ ܡܢܺܝܚܳܢܰܝ̈ܟ܇ ܩܰܒܶܠ ܡܳܪܝ̱ ܠܨܰܘܡܰܢ܇ ܘܚܰܣܳܐ ܠܰܢ ܘܪܰܚܶܡܥܠܰܝܢ܀

ܬܶܫܒܽܘܚܬܳܐ ܘܬܰܘܕܺܝܬܳܐ܇ ܡܰܣܩܳܐ ܥܺܕܬܳܐ ܡܗܰܝܡܰܢܬܳܐ܇ ܠܰܒܪܳܐ ܕܰܒܨܰܘܡܳܐ܇ ܨܰܒܬܶܗ ܘܰܐܥܰܪܬܳܗܿ ܒܥܰܕܥܺܐܕܰܘ̈ܗ̱ܝ܀

 

ܡܳܪܝܳܐ ܩܪܺܝܬܳܟ ܒܩܳܠܳܐ ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ

ܐܰܠܳܗܳܐ ܕܰܫܡܥܰܬ ܩܳܠܳܐ܇ ܕܢܺܝܢܳܘܝ̈ܶܐ ܕܶܐܬܟܰܫܰܦܘ̱ ܠܳܟ܇ ܥܢܺܝ ܠܥܰܒܕܰܝ̈ܟ ܕܗܳܐ ܩܳܪܶܝܢ ܠܳܟ܇ ܘܦܰܢܳܐ ܒܰܥܓܰܠ ܫܶܐܠܳܬܗ̈ܽܘܢ܀

ܒܝܰܕ ܨܰܘܡܳܐ ܕܨܳܡ ܗܘܳܐ ܡܽܘܫܶܐ܇ ܐܶܬܥܰܠܺܝ ܠܛܽܘܪܳܐ ܕܣܺܝܢܰܝ܇ ܘܰܫܡܰܥ ܡܶܠܘܰܗ̈ܝ ܕܰܓܢܺܝܙܳܐ܇ ܘܰܫܩܰܠ ܠܽܘܚ̈ܶܐ ܕܦܽܘܩܕܳܢ̈ܶܐ܀

ܡܽܘܫܶܐ ܒܨܰܘܡܳܐ ܐܶܙܕܰܗܺܝ܇ ܘܰܒܨܰܘܡܳܐ ܢܨܰܚ ܐܺܠܺܝܳܐ܇ ܐܳܦ ܦܳܪܽܘܩܰܢ ܒܝܰܕ ܨܰܘܡܳܐ ܕܺܝܠܶܗ ܙܟܳܐ ܗܘܳܐ ܠܒܺܝܫܳܐ ܒܥܶܠܕܰܪܳܐ܀

ܒܨܰܘܡܳܐ ܙܰܗܝܳܐ ܐܶܬܢܰܨܰܚܘ̱܇ ܟܺܐܢ̈ܶܐ ܕܰܐܚܶܒܘ̱ ܠܰܐܠܳܗܳܐ܇ ܘܰܒܕܽܘܒܳܪ̈ܰܝܗܽܘܢ ܪ̈ܽܘܚܳܢܶܐ ܐܶܬܡܰܢܰܥܘ̱ ܠܰܠܡܺܐܢ ܚܰܝ̈ܶܐ܀

ܨܳܡ ܡܳܪܰܢ ܨܰܘܡܳܐ ܕܰܟܝܳܐ܇ ܚܠܳܦ ܓܶܢܣܳܐ ܕܰܒܢܰܝ̈ܢܳܫܳܐ܇ ܘܰܦܪܰܩ ܠܳܐܕܳܡ ܘܰܠܝܰܠܕܰܘ̈ܗ̱ܝ܇ ܡܶܢ ܫܽܘܥܒܳܕܳܐ ܕܰܚܛܺܝܬܳܐ܀

ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ܇ ܘܰܐܪ̈ܥܳܢܶܐ ܣܶܓܕܬܳܐ ܡܩܰܪܒܺܝܢ܇ܠܚܰܕ ܐܺܝܬܝܳܐ ܡܬܽܘܡܳܝܳܐ܇ ܐܰܠܳܗܳܐ ܒܳܪܽܘܝܳܐ ܕܟܽܠܶܗ ܥܳܠܡܳܐ܀

ܫܽܘܒܚܳܐ ܦܰܐܝܳܐ ܬܰܘ ܢܰܣܶܩ܇ ܒܨܰܘܡܳܐ ܕܰܟܝܳܐ ܩܰܕܺܝܫܳܐ܇ ܕܗܽܘ ܡܩܰܕܶܫ ܠܶܒܰܘ̈ܳܬܰܢ܇ ܘܰܡܚܰܣܶܐ ܠܰܢ ܚܰܘܒ̈ܳܬܰܢ܀

 

ܩܳܠܳܐ ܕܪܰܡܫܳܐ ܩܳܠܳܐ ܥܰܠ ܥܶܛܪܳܐ ܕܒܶܣܡ̈ܶܐ

ܨܰܘܡܰܢ ܢܶܫܦܰܪ ܠܳܟ܇ ܡܫܺܝܚܳܐ ܡܠܶܐ ܪ̈ܰܚܡܶܐ܇ ܘܰܐܝܟ ܥܶܛܪܳܐ ܕܒܶܣܡ̈ܶܐ܇ ܩܰܒܶܠ ܒܳܥܽܘܬܰܢ܀

ܢܽܘܗܪܳܐ ܘܒܽܘܣܳܡܳܐ܇ ܝܳܪܬܺܝܢ ܨܰܝܳܡ̈ܶܐ܇ ܘܰܒܣܶܕܪ̈ܶܐ ܕܟܺܐܢ̈ܶܐ ܒܰܥܕܶܝܢ ܡܶܬܒܰܣܡܺܝܢ܀

 

ܐ̱ܚܪܺܢܳܐ܇ ܗܰܒܠܳܗܿ ܠܥܺܕܬܳܟ

ܒܨܰܘܡܳܐ ܡܶܫܬܰܒܩܺܝܢ ܚܛܳܗ̈ܶܐ ܘܚܰܘܒ̈ܶܐ ܕܐ̱ܢܳܫܽܘܬܳܐ܇ ܕܚܳܒܰܬ݀ ܒܰܥܕܶܝܢ ܒܰܥܒܳܪ ܦܽܘܩܕܳܢܳܐ܇ ܘܒܶܗ ܗܽܘ ܡܶܬܦܰܬܚܺܝܢ܇ ܬܰܪ̈ܥܶܐ ܪ̈ܳܡܶܐ ܕܦܰܪܕܰܝܣܳܐ܇ ܕܢܶܥܽܘܠ ܐܳܕܳܡ ܘܢܺܐܪܰܬ ܡܰܠܟܽܘܬܳܐ܀

ܫܽܘܒܚܳܐ ܠܗܰܘ ܕܶܐܬܳܐ܇ ܘܰܠܒܶܫ ܦܰܓܪܳܐ ܕܡܽܘܟܳܟܳܐ܇ ܘܰܒܝܰܕ ܨܰܘܡܳܐ ܙܟܳܐ ܠܰܒܥܶܠܕܰܪܳܐ܇ ܘܰܕܪܰܫ ܠܰܢ ܐܽܘܪܚܳܐ ܕܢܶܪܕܶܐ ܒܶܗ ܠܰܓܢܽܘܢ ܢܽܘܗܪܳܐ܇ ܠܶܗ ܬܶܫܒܽܘܚܬܳܐ ܕܰܒܨܰܘܡܶܗ ܐܰܚ̈ܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܫܰܦܺܝܪ ܡܰܠܶܠ ܗܰܘ ܟܶܢܳܪܳܐ ܕܰܢܒܺܝܽܘܬܳܐ܇ ܕܠܳܐ ܐ̱ܢܳܫ ܢܶܬܢܶܐ ܥܒܳܕ̈ܶܐ ܒܺܝܫ̈ܶܐ ܕܐ̱ܢܳܫܳܐ ܚܰܒܪ̈ܰܘܗ̱ܝ܇ ܠܳܐ ܡܰܥܒܰܪܬܳܐ ܠܫܰܪ̈ܒܶܐ ܣܪ̈ܺܝܩܶܐ ܢܶܗܘܶܐ ܦܽܘܡܳܟ܇ ܡܽܘܢ ܝܳܬܰܪ ܐܰܢ̱ܬ ܡܶܢ ܨܽܘܚܝ̈ܳܬܳܐ ܕܰܟܢܰܘ̈ܳܬܳܟ܀

ܫܰܦܺܝܪ ܨܰܘܡܶܗ ܘܣܰܢ̈ܝܳܢ ܡܶܠܰܘ̈ܗ̱ܝ ܦܰܟܺܝ̈ܗܳܬܳܐ܇ ܒܶܣܡ̈ܶܐ ܘܙܶܒܠܳܐ ܣܳܡ ܥܰܠ ܦܽܘܡܶܗ ܘܠܳܐ ܡܶܬܩܰܒܰܠ܇ ܐܰܘ ܨܰܝܳܡܳܐ ܙܽܘܥ ܡܶܢ ܡܶܠܬܳܐ ܠܰܡܡܰܠܳܠܽܘ܇ ܕܳܐܦ ܗܺܝ ܩܳܛܠܳܐ ܘܒܺܝܫܬܳܐܗ̱ܝ ܪܰܒܬܳܐ ܠܰܕܢܳܦܶܠ ܒܳܗܿ܀

 

ܡܥܺܝܪܳܢܳܐ ܕܠܺܠܝܳܐ

ܝܳܐܶܐ ܘܙܳܕܶܩ ܢܰܥܺܝܪ ܢܰܦܫܰܢ ܚܰܒܺܝ̈ܒܰܝ ܒܗܳܢܳܐ ܨܰܘܡܳܐ ܩܰܕܺܝܫܳܐ܇ ܘܢܶܬܚܰܦܰܛ ܥܰܠ ܦܽܘܠܚܳܢܰܢ܇ ܘܢܶܣܰܒ ܐܰܓܪܳܐ ܡܰܠܝܳܐܺܝܬ܀

ܠܳܐ ܢܶܬܩܰܛܰܥ ܪܶܥܝܳܢܰܢ ܡܶܢ ܦܽܘܠܚܳܢܳܐ ܕܥܰܡ ܡܳܪܰܢ܇ ܕܢܶܬܶܠ ܠܰܢ ܐܰܓܪܳܐ ܛܳܒܳܐ܇ ܡܳܐ ܕܳܐܬܶܐ ܒܫܽܘܒܚܶܗ ܪܰܒܳܐ܇ ܫܽܘܒܚܳܐ ܠܳܟ܀

ܨܰܘܡܳܐ ܡܰܘܬܰܪ ܦܳܪ̈ܽܘܫܳܐ܇ ܠܡܰܢ ܕܨܳܐܶܡ ܠܶܗ ܒܦܽܘܪܫܳܢܳܐ܇ ܕܢܶܣܰܒ ܐܰܓܪܳܐ ܡܫܰܡܠܝܳܐ܇ ܡܶܢ ܐܰܠܳܗܳܐ ܡܪܰܚܡܳܢܳܐ܇ ܫܽܘܒܚܳܐ܀

ܛܽܘܒܰܝܟܽܘܢ ܐܳܘ ܨܰܝܳܡ̈ܶܐ܇ ܐܶܢ ܨܳܝܡܺܝܢ ܐ̱ܢܬܽܘܢ ܕܰܟܝܳܐܺܝܬ܇ ܟܽܠܢܳܫ ܟܽܠܶܗ ܥܰܡ ܟܽܠܶܗ܇ ܬܰܘ ܢܨܽܘܡ ܦܳܪܽܘܫܳܐܺܝܬ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܀

ܨܰܘܡܳܐ ܙܰܝܢܰܐܗ̱ܘ ܙܰܟܳܝܳܐ܇ ܡܶܢ ܕܰܡܩܰܪܶܒ ܒܶܗ ܠܳܐ ܚܳܐܶܒ܇ ܣܰܒܳܝܗ̱ܝ ܠܳܟ ܐܳܘ ܦܳܪܽܘܫܳܐ ܘܦܽܘܩ ܠܰܩܪܳܒܳܐ ܘܬܰܟܬܽܘܫܳܐ ܫܽܘܒܚܳܐ܀

 

ܩܳܠܳܐ ܕܠܺܠܝܳܐ ܙܰܕܺܝ̈ܩܶܐ ܕܰܪܚܶܡܘ̱ ܩܽܘܫܬܳܐ

ܐܶܫܰܥܝܳܐ ܒܰܢܒܺܝܽܘܬܶܗ ܐܰܠܶܦ ܠܰܢ ܒܰܙܡܺܝܪ̈ܳܬܶܗ܇ ܕܗܳܢ ܐܺܝܬܰܘܗ̱ܝ ܨܰܘܡܳܐ ܕܰܡܪܰܥܶܐ ܠܡܳܪܝܳܐ܇ ܐܰܝܢܳܐ ܕܝܳܗܶܒ ܡܶܢ ܠܰܚܡܶܗ ܠܟܰܦܢ̈ܶܐ ܘܠܰܡܛܰܪ̈ܦܶܐ܇ ܐܰܝܢܳܐ ܕܡܰܠܒܶܫ ܠܰܣܢܺܝܩ̈ܶܐ ܟܰܕ ܩܶܢܛܳܐ ܠܰܝܬ ܒܶܗ܇ ܐܰܝܢܳܐ ܕܰܐܝܟ ܗܳܠܶܝܢ ܥܳܒܶܕ܇ ܠܥܳܠܰܡ ܥܳܠܡܺܝܢ ܠܳܐ ܢܙܽܘܥ܇ ܢܶܗܘܶܐ ܒܰܕܡܽܘܬ ܐܺܝܠܳܢܳܐ܇ ܕܰܢܨܺܝܒ ܥܰܠ ܬܰܦܳܐ ܕܡܰܝ̈ܳܐ܇ ܕܰܒܩܰܝܛܳܐ ܘܣܰܬܰܘܳܐ ܛܰܪ̈ܦܰܘܗ̱ܝ ܠܳܐ ܢܳܬܪܺܝܢ܀

ܒܨܰܘܡܳܐ ܕܰܟܝܳܐ ܐܶܬܢܰܨܰܚܘ̱܇ ܙܰܕܺܝ̈ܩܶܐ ܒܕܳܪ̈ܺܝܢ ܕܳܪ̈ܺܝܢ܇ ܘܰܫܦܰܪܘ̱ ܠܰܐܠܳܗܳܐ ܒܰܥܒܳܕ̈ܶܐ ܡܝܰܬܖ̈ܶܐ:  ܡܽܘܫܶܐ ܢܒܺܝܳܐ ܒܛܽܘܪ ܣܺܝܢܰܝ ܠܡܳܪܝܳܐ ܒܨܰܘܡܳܐ ܚܙܳܐ܇ ܕܳܢܺܝܐܶܝܠ ܠܰܐܪ̈ܝܰܘܳܬܳܐ ܒܨܰܘܡܳܐ ܡܰܟܶܟ ܗܘܳܐ܇ ܕܒܶܝܬ ܚܰܢܰܢܝܳܐ ܡܶܢ ܢܽܘܪܳܐ܇ ܒܨܰܘܡܰܝ̈ܗܽܘܢ ܠܳܐ ܝܺܩܶܕܘ̱ ܗ̱ܘܰܘ܇ ܒܨܰܘܡܳܐ ܐܰܚ̈ܰܝ ܢܶܬܟܰܫܰܪ ܕܺܐܝܬܰܘܗ̱ܝ ܙܰܝܢܳܐ ܕܠܳ ܚܳܐܶܒ܇ ܘܢܶܫܦܰܪ ܠܰܐܠܳܗܳܐ ܒܰܥܒܳܕ̈ܶܐ ܡܝܰܬܪ̈ܶܐ܀

 

ܡܰܕܪܳܫܳܐ ܩܳܠܳܐ ܩܽܘܡ ܦܰܘܠܳܘܣ ܥܶܢܝܳܢܳܐ ܡܳܪܝ̱ ܘܰܐܠܳܗܝ̱ ܐܰܫܘܳܢܝ̱ ܠܫܽܘܒܩܳܢܳܐ ܕܶܐܙܡܰܪ ܠܳܟ ܫܽܘܒܚܳܐ ܒܦܽܘܪܫܳܢܳܐ

ܒܪܰܝܬܳܢܝ̱ ܡܳܪܝ̱ ܒܨܰܠܡܳܟ ܘܒܰܕܡܽܘܬܳܟ܇ ܘܟܰܢܺܝܬܳܢܝ̱ ܝܽܘܩܢܳܐ ܕܪܰܒܽܘܬܳܟ܇ ܘܰܐܠܶܦܬܳܢܝ̱ ܐܽܘܪܚܳܐ ܕܒܶܝܬ ܚܰܝ̈ܶܐ ܚܰܘܺܝܬܳܢܝ̱ ܐܽܘܪܚܳܐ ܕܓܺܗܰܢܳܐ܇ ܘܒܺܝܫܳܐ ܒܰܚܣܳܡܶܗ܇ ܟܡܶܢ ܠܺܝ ܒܨܶܢܥ̈ܳܬܶܗ ܘܰܫܒܳܢܝ̱ ܡܶܢ ܐܽܘܪܚܳܐ܇ ܘܰܪܕܺܝܿܬ ܒܬܽܘܩܰܠܬܳܐ܇ ܠܺܝ ܘܳܝܠܺܝ ܡܳܪܰܢ ܟܡܳܐ ܚܳܒܶܬ܇ ܚܽܘܢܰܝܢܝ̱ ܡܳܪܝ̱ ܒܪ̈ܰܚܡܶܐ ܕܛܰܝܒܽܘܬܳܟ܀

ܕܳܘܝܳܐ ܐ̱ܢܳܐ ܕܟܽܠܗܽܘܢ ܒܢܰܝ̈ܢܳܫܳܐ܇ ܕܰܕܘܺܝܿܬ ܠܺܝ ܘܶܐܒܕܶܬ ܒܰܚܛܳܗ̈ܰܝ܇ ܚܳܛܶܐ ܗܘܺܝܿܬ ܟܽܠܫܳܥ ܚܳܕܶܐ ܗܘܺܝܿܬ܇ ܘܠܳܐ ܪܢܺܝܿܬ ܠܺܝ ܕܡܰܘܬܳܐ ܕܳܒܰܪ ܠܺܝ܇ ܘܰܩܪܶܒ ܘܰܡܛܳܐ ܠܶܗ܇ ܡܰܠܰܐܟܳܐ ܕܡܰܘܬܳܐ܇ ܕܶܐܫܬܠܰܚ ܒܦܽܘܩܕܳܢܳܐ܇ ܕܺܐܙܰܠ ܠܘܳܬ ܟܺܐܢܳܐ܇ ܠܺܝ ܘܳܝܠܺܝ ܕܟܽܠܗܶܝܢ ܟܰܣܝ̈ܳܬܳܐ܇ ܡܶܬܓܰܠܝ̈ܳܢ ܬܰܡܳܢ ܒܳܗܶܬ ܐ̱ܢܳܐ܀

ܗܳܐ ܛܽܘܪ̈ܶܐ ܘܢܰܚ̈ܠܶܐ ܘܰܫܩܺܝܦ̈ܶܐ܇ ܐܳܠܺܝܢ ܥܠܰܝ ܐܶܢ ܗܽܘ ܕܠܳܐ ܐܶܬܽܘܒ ܪ̈ܳܡܳܬܳܐ ܡܒܰܟ̈ܝܳܢ ܘܳܐܠܝ̈ܳܢ ܠܺܝ܇ ܒܽܐܘܠܝ̈ܳܬܳܐ ܕܣܰܓܺܝ ܚܰܫܺܝܫ̈ܳܢ܇ ܘܕܳܒܪ̈ܳܢ ܠܺܝ ܥܰܡܗܶܝܢ܇ ܠܰܚܢܺܝܓ ܒܽܐܘܠܝ̈ܳܬܳܐ ܢܒܺܝܳܐ ܐܶܪܰܡܝܳܐ܇ ܟܶܢܳܪܳܐ ܕܪܽܘܚܳܐ܇ ܘܳܝ ܐܶܢܗܽܘ ܕܝܳܬܒܺܝܢ ܟܢܺܝܫܳܐܺܝܬ܇ ܘܐܳܠܺܝܢ ܠܳܗܿ ܠܫܰܦܠܽܘܬܝ̱ ܚܢܺܝܓܳܐܺܝܬ܀

ܚܽܘܫܳܒܰܝ̈ ܦܰܟܪܽܘܢܝ̱ ܘܰܫܕܰܐܽܘܢܝ̱܇ ܒܰܡܨܺܝܕܬܶܗ ܕܒܺܝܫܳܐ ܥܰܘܳܠܳܐ܇ ܘܣܶܒܪܶܬ ܠܺܝ ܕܰܟܣܶܝܢ ܘܠܳܐ ܪܫܺܝܡܺܝܢ܇ ܒܗܰܘ ܣܶܦܪܳܐ ܪܰܒܳܐ ܕܕܰܝܳܢܳܐ܇ ܘܗܳܐ ܟܽܠܗܽܘܢ ܣܺܝܡܺܝܢ܇ ܩܕܳܡܰܝ ܒܶܝܬ ܕܺܝܢܳܐ܇ ܘܚܳܝܪܺܝܢ ܠܺܝ ܬܰܡܳܢ܇ ܕܶܐܣܰܒ ܦܽܘܪܥܳܢܳܐ܇ ܠܳܐ ܬܰܪܦܰܝܢܝ̱ ܛܰܝܒܽܘܬܳܟ ܕܶܐܥܽܘܠ܇ ܠܓܺܗܰܢܳܐ ܡܶܢܳܬܳܐ ܕܰܡܛܳܬ݀ ܠܺܝ܀

ܝܰܡܺܝܢܳܟ ܡܳܪܰܢ ܕܰܐܘܫܶܛܬܳܗܿ܇ ܒܓܰܘ ܝܰܡܳܐ ܠܬܰܠܡܺܝܕܰܝ̈ܟ ܕܠܳ ܢܶܛܒܥܽܘܢ܇ ܗܺܝ ܡܳܪܰܢ ܐܰܘܫܶܛ ܠܺܝ ܒܪ̈ܰܚܡܰܝܟ܇ ܘܡܶܢ ܝܰܡܳܐ ܕܰܚܛܳܗ̈ܶܐ ܕܰܠܳܢܝ̱܇ ܡܰܥܡܽܘܕܺܝܬܳܐ ܡܳܪܝ̱܇ ܕܰܐܠܒܫܿܶܬ ܠܗܰܕܳܡ̈ܰܝ܇ ܬܶܗܘܶܐ ܠܺܝ ܬܰܡܳܢ܇ ܣܶܬܳܪܳܐ ܘܺܐܚܶܐ܇ ܒܳܗܿ ܦܪܽܘܩܰܝܢܝ̱ ܡܳܪܰܢ ܘܶܐܬܦܰܨܶܐ܇ ܒܶܝܬ ܓܰܠ̈ܠܶܐ ܕܓܰܘܙܰܠܬܳܐ ܕܚܺܝܠܬܳܐ܀

ܠܳܗܿ ܘܳܝܳܐ ܠܫܰܦܠܽܘܬܝ̱ ܚܰܒܺܝܒܰܝ̈. ܕܰܐܥܶܬܩܶܬ ܠܺܝ ܒܣܽܘܓܳܐ ܕܒܺܝܫ̈ܳܬܳܐ܇ ܐܳܘ ܠܶܒܳܐ ܥܰܒܝܳܐ ܘܰܛܪܽܘܢܳܐ܇ ܕܠܳܐ ܥܳܗܶܕ ܝܰܘܡܶܗ ܕܥܽܘܢܕܳܢܳܐ܇ ܕܰܕܚܺܝܠ ܗܽܘ ܣܰܓܺܝ܇ ܘܠܳܐ ܐܺܝܬ ܒܶܗ ܪ̈ܰܚܡܶܐ܇ ܘܠܳܐ ܡܩܰܒܶܠ ܕܶܡܥ̈ܶܐ܇ ܕܰܐܝܢܳܐ ܕܡܶܬܬܰܢܰܚ܇ ܠܺܝ ܘܳܝ ܠܺܝ ܡܶܢܳܗܿ ܕܟܺܐܢܽܘܬܳܐ܇ ܕܝܳܕܰܥ ܐ̱ܢܳܐ ܠܰܐܝܠܶܝܢ ܕܡܶܣܬܰܥܪ̈ܳܢ܀

ܡܰܢ ܡܳܢܶܐ ܚܛܳܗ̈ܶܐ ܕܛܰܠܝܽܘܬܳܐ܇ ܕܚܳܒܶܬ ܠܺܝ ܒܥܳܠܡܳܐ ܡܠܶܐ ܬܽܘܟ̈ܶܐ܇ ܡܰܢ ܡܳܢܶܐ ܫܒܺܝ̈ܠܶܐ ܕܰܥܠܰܝܡܽܘܬܝ̱܇ ܘܡܰܢ ܩܳܐܶܡ ܕܰܢܨܽܘܪ ܐܽܘܪ̈ܚܳܬܶܗ܇ ܐܳܘ ܐܰܒܳܐ ܛܳܒܳܐ܇ ܕܚܰܢܶܗ ܠܒܰܪ ܐܺܝܫܰܝ܇ ܚܽܘܢ ܡܳܪܝ̱ ܠܚܰܛܳܝܽܘܬܝ̱ ܘܓܳܥܶܐ ܐ̱ܢܳܐ ܠܘܳܬܳܟ܇ ܒܳܟ ܐܶܚܕܶܬ ܓܰܘܣܳܐ ܒܰܣܺܝܡܳܐ܇ ܩܰܒܶܠܰܝܢܝ̱ ܒܪ̈ܰܚܡܰܝܟ ܕܠܳܐ ܐܺܒܰܕ܀

ܣܰܒܪܳܐ ܐܰܢ̱ܬ ܡܳܪܰܢ ܕܚܰܛܳܝ̈ܶܐ܇ ܐܳܦ ܠܶܘܝܳܐ ܕܟܽܠܗܽܘܢ ܬܰܝܳܒ̈ܶܐ܇ ܡܦܺܝܣ ܐ̱ܢܳܐ ܠܳܟ ܪܳܚܶܡ ܒܢܰܝ̈ܢܳܫܳܐ܇ ܐܳܘ ܛܳܒܳܐ ܘܰܡܠܶܐ ܛܰܝܒܽܘܬܳܐ܇ ܒܚܽܘܒܶܗ ܕܝܳܠܽܘܕܳܟ܇ ܒܟܰܪܣܳܐ ܕܛܰܝܒܽܘܬܳܟ܇ ܒܪܽܘܡܚܳܐ ܗܳܝ ܕܬܪܶܥܰܬ݀܇ ܕܰܦܢܳܟ ܒܓܳܓܽܘܠܳܬܐ܇ ܪܽܘܣ ܥܠܰܝ ܛܰܐܠܳܐ ܕܫܽܘܒܩܳܢܳܐ܇ ܒܗܰܘ ܐܰܬܪܳܐ ܠܳܐ ܐܶܨܗܶܐ ܠܡܰܝ̈ܳܐ܀

ܦܬܰܚ ܠܺܝ ܡܳܪܝ̱ ܬܰܪܥܳܟ ܡܠܶܐ ܪ̈ܰܚܡܶܐ܇ ܐܰܝܟ ܕܰܦܬܚܰܬ ܩܽܘܕܡܰܬ ܚܰܛܳܝܬܳܐ܇ ܘܩܰܒܶܠ ܡܶܢܝ̱ ܕܶܡܥ̈ܶܐ ܕܝܳܗܶܒ ܐ̱ܢܳܐ܇ ܗܰܒ ܐܰܢ̱ܬ ܠܺܝ ܫܽܘܒܩܳܢܳܐ ܕܚܰܘܒ̈ܶܐ܇ ܠܳܟ ܡܰܝ̈ܳܐ ܚܰܝ̈ܶܐ܇ ܫܶܩܠܶܬ ܠܺܝ ܒܰܠܘܺܝܬ܇ ܕܠܳܐ ܐܶܒܥܶܐ ܬܰܡܳܢ ܡܰܝ̈ܳܐ ܡܶܢ ܐܰܒܪܰܡ܇ ܕܰܫܡܺܝܥ ܠܺܝ ܒܡܰܬܠܶܗ ܕܥܰܬܺܝܪܳܐ܇ ܟܰܕ ܫܐܶܠ ܗܘܳܐ ܡܰܝ̈ܳܐ ܒܪܺܝܫ ܚܶܨܪܶܗ܀

ܩܳܡܶܬ ܠܺܝ ܘܢܳܕܶܬ ܡܶܢ ܫܶܢܬܳܐ܇ ܟܰܕ ܫܶܟܒܶܬ ܘܕܶܡܟܶܬ ܡܶܢ ܥܰܝ̈ܛܶܐ܇ ܘܰܨܪܺܝܬܶܗ ܐܰܠܒܽܘܫܝ̱ ܘܰܒܳܟܺܝܬ ܠܺܝ܇ ܘܰܓܢܺܝܬ ܠܺܝ ܥܰܠ ܡܶܕܶܡ ܕܰܗܘܳܢܝ̱܇ ܐܶܓܠܶܐ ܠܪܺܝܫܳܐ ܕܺܝܠܝ܇ ܐܰܝܟ ܕܰܠܙܳܢܺܝܬܳܐ܇ ܘܰܐܘܕܶܐ ܒܰܚܛܳܗ̈ܰܝ܇ ܘܺܐܡܰܪ ܣܰܟܽܠܘ̈ܳܬܝ̱܇ ܘܶܐܫܰܐܶܠ ܠܺܝ ܥܰܝܢ̈ܶܐ ܬܪ̈ܺܝܥܳܬܳܐ܇ ܕܠܳܠܺܝܢ ܥܠܰܝ ܒܠܺܠܝܳܐ ܘܒܺܐܝܡܳܡܳܐ܀

ܫܶܡܥܽܘܢ ܡܳܪܝ̱ ܟܦܰܪ ܒܳܟ ܬܠܳܬ ܙܰܒܢܺܝ̈ܢ܇ ܘܩܰܪܶܒ ܠܳܟ ܕܶܡܥ̈ܶܐ ܘܩܰܒܶܠܬܳܝܗ̱ܝ܇ ܗܳܐ ܕܶܡܥ̈ܰܝ ܐܳܫܶܕ ܐ̱ܢܳܐ ܩܕܳܡܰܝܟ܇ ܘܬܰܘܕܺܝܬܳܐ ܕܟܺܝܬܳܐ ܡܩܰܪܶܒ ܐ̱ܢܳܐ܇ ܚܛܳܗ̈ܰܝ ܣܰܓܺܝܐܺܝܢ܇ ܘܠܳܐ ܐܺܝܬ ܠܗܽܘܢ ܣܳܟܳܐ܇ ܒܝܰܕ ܪ̈ܰܚܡܰܝܟ ܡܳܪܰܢ܇ ܚܰܣܳܐ ܠܺܝ ܚܰܘܒ̈ܰܝ܇ ܠܚܺܝ ܐ̱ܶܫܛܳܪܳܐ ܕܣܰܟܽܠܘ̈ܳܬܝ ܒܝܰܕ ܪ̈ܰܚܡܰܝܟ܇ ܡܳܪܰܢ ܠܳܐ ܬܶܬܕܟܰܪ ܠܺܝ ܚܛܳܗ̈ܰܝ܀

ܬܰܘ ܟܽܠܟܽܘܢ ܐܰܒܳܗ̈ܰܝ ܘܰܐܚܰܝ̈܇ ܬܰܘ ܕܰܡܰܥܘ̱ ܥܠܰܝ ܚܢܺܝܓܳܐܺܝܬ܇ ܘܰܥܒܶܕܘ̱ ܠܺܝ ܚܰܓܳܐ ܒܶܝܬ ܒܳܟܶܐ܇ ܕܰܗܘܺܝܿܬ ܠܺܝ ܡܰܣܠܝܳܐ ܒܕܽܘܒܳܪ̈ܰܝ܇ ܘܰܩܪܶܒ ܘܰܡܛܳܐ ܠܶܗ܇ ܝܰܘܡܶܗ ܕܥܽܘܢܕܳܢܳܐ܇ ܘܶܐܬܳܐ ܫܽܘܠܳܡܳܐ܇ ܘܟܺܐܢܽܘܬܳܐ ܠܚܺܝܡܳܐ܇ ܒܥܰܘ ܥܠܰܝ ܒܚܰܫܳܐ ܘܟܰܪܝܽܘܬܳܐ܇ ܕܠܳܐ ܐܶܦܽܘܩ ܠܚܶܫܟܳܐ ܒܰܪܳܝܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܠܡܽܘܢ ܨܳܐܶܡ ܐܰܢ̱ܬ ܐܶܢ ܠܳܐ ܬܪܰܚܶܡ ܥܰܠ ܩܰܪܺܝܒܳܟ܇ ܕܗܳܢܰܘ ܨܰܘܡܳܐ ܕܰܓܒܳܐ ܡܳܪܝܳܐ ܕܰܢܪܰܚܶܡ ܐ̱ܢܳܫ܇ ܚܙܺܝ ܠܳܐ ܬܶܐܚܽܘܕ ܬܰܪܥܳܐ ܕܪ̈ܰܚܡܶܐ ܩܕܳܡ ܡܶܣܟܺܢ̈ܶܐ܇ ܕܠܳܐ ܨܰܝܳܡܳܐ ܬܶܗܘܶܐ ܨܰܘܡܶܗ ܟܽܠܶܗ ܨܰܥܪܰܐܗ̱ܘ܀

ܕܨܳܐܶܡ ܦܽܘܡܳܟ ܡܶܢ ܡܶܐܟܽܘܠܬܳܐ ܢܶܗܘܶܐ ܨܳܐܶܡ܇ ܘܡܶܢ ܠܰܘ̈ܛܳܬܳܐ ܘܡܶܢ ܨܽܘܚܝ̈ܳܬܳܐ܇ܘܡܶܢ ܡܽܘܝܳܩܳܐ܇ ܠܳܐ ܬܡܰܠܶܠ ܒܶܗ ܡܶܠܬܳܐ ܕܢܶܟܠܳܐ ܐܰܘ ܕܰܚܣܳܡܳܐ܇ ܐܳܘ ܛܢܳܢܳܐ ܘܡܶܐܟܰܠܩܰܪܨܳܐ ܘܕܰܓܳܠܽܘܬܳܐ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ܇ ܒܪܺܝܟ ܕܚܰܕܺܝ ܠܰܫܡܰܝܳܢ̈ܶܐ

ܒܨܰܘܡܳܐ ܡܽܘܫܶܐ ܐܶܙܕܰܗܺܝ܇ ܒܛܽܘܪܳܐ ܦܰܪܨܽܘܦܶܗ܇ ܨܳܡ ܐܺܠܺܝܳܐ ܒܓܰܘ ܚܽܘܪܺܝܒ܇ ܘܰܣܠܶܩ ܟܰܕ ܢܳܨܰܚ܀

ܡܫܺܝܚܳܐ ܓܰܙܳܐ ܕܥܽܘܕܪ̈ܳܢܶܐ ܐܰܠܶܦ ܠܰܢ ܨܰܘܡܳܐ܇ܕܢܶܦܪܰܚ ܒܶܐܒܪ̈ܶܐ ܩܰܠܺܝ̈ܠܶܐ܇ ܘܢܶܪܕܶܐ ܠܒܶܝܬ ܚܰܝ̈ܶܐ܀

ܚܙܰܘ ܐܰܚ̈ܰܝ ܕܰܟܡܳܐ ܡܝܰܬܰܪ ܨܰܘܡܳܐ ܘܰܨܠܽܘܬܳܐ܇ ܘܰܪ̈ܚܺܝܡܳܢ ܐܳܦ ܙܶܕܩ̈ܳܬܳܐ ܩܽܘܕܡܰܬ ܐܰܠܳܗܳܐ܀

ܒܨܰܘܡܶܗ ܕܰܒܪܳܐ ܚܳܝܪܺܝܢ ܗ̱ܘܰܘ ܟܺܐܢ̈ܶܐ ܩܰܕܡܳܝ̈ܶܐ܇ ܬܰܘ ܐܰܚ̈ܰܝ ܢܶܬܓܰܘܰܣ ܒܶܗ܇ ܕܢܶܫܬܘܶܐ ܠܫܽܘܒܩܳܢܳܐ܀

ܨܰܘܡܳܐ ܠܡܺܐܢܳܐ ܘܒܶܝܬ ܓܰܘܣܳܐ ܘܢܰܘܚܳܐ ܕܰܡܛܰܪ̈ܦܶܐ܇ ܥܽܘܠܘ̱ ܨܰܝܳܡ̈ܶܐ ܘܰܫܪܰܘ ܒܶܗ ܕܰܡܶܢܺܝܚ ܥܰܡܠܰܝ̈ܟܽܘܢ܀

 

ܐܰܠܳܗܝ̱ ܐܰܠܳܗܝ̱: ܠܘܳܬܳܟ ܡܩܰܕܶܡ ܐ̱ܢܳܐ

ܠܘܳܬܳܟ ܡܩܰܕܶܡ ܐ̱ܢܳܐ܇ ܘܒܳܥܶܐ ܐ̱ܢܳܐ ܘܡܶܬܟܰܫܰܦ ܐ̱ܢܳܐ ܕܬܶܫܒܽܘܩ ܠܺܝ ܣܰܟܽܠܘܽܬܝ܇ ܐܰܢ̱ܬ ܐܰܠܳܗܳܐ ܡܪܰܚܡܳܢܳܐ܀

ܚܽܘܢܰܝܢܝ̱ ܡܳܪܝ̱ ܒܛܰܝܒܽܘܬܳܟ܇ ܐܰܝܟ ܓܰܝܳܣܳܐ ܒܰܙܩܺܝܦܳܐ܇ ܘܛܰܝܒܽܘܬܳܟ ܬܩܽܘܡܝ̱ ܒܰܐܦܰܝ̈܇ ܘܰܬܚܶܝܬ ܟܶܢܦܰܝ̈ܟ ܣܰܬܰܪܰܝܢܝ̱ ܡܶܢ ܢܽܘܪܳܐ ܕܝܳܩܕܳܐ ܡܰܪܺܝܪܳܐܺܝܬ܀

ܚܰܘ̈ܒܰܝ ܡܳܪܝ̱ ܣܰܓܺܝܐܺܝܢ ܘܡܰܝ̈ܳܐ ܘܕܶܡܥ̈ܶܐ ܙܥܽܘܪ̈ܝܳܢ ܠܺܝ ܐܶܬܬܫܺܝܓ ܘܶܐܬܕܰܟܶܐ܇ ܕܰܐܢ̱ܬ ܗܽܘ ܙܽܘܦܳܐ ܡܚܰܣܝܳܢܳܐ܇ ܚܰܣܳܐ ܠܺܝ ܚܰܘ̈ܒܰܝ ܡܳܪܝܳܐ ܐܰܠܳܗܝ̱܀

ܡܶܛܽܠ ܕܠܳ ܗܘܳܐ ܒܥܳܠܡܳܐ܇ ܐ̱ܚܪܢܺܝܢ ܚܰܛܳܝܳܐ ܕܕܳܡܶܐ ܠܺܝ܇ ܕܰܚܛܺܝܿܬ ܣܰܓܺܝ ܐܰܪܓܶܙܬܳܟ܇ ܒܰܦܝܳܣܳܐ ܡܪܰܥܶܐ ܐ̱ܢܳܐ ܠܳܟ ܚܽܘܢܝܰܢܝ̱ ܠܚܰܛܳܝܳܐ܀

ܢܨܽܘܡ ܐܰܚ̈ܰܝ ܕܰܟܝܳܐܺܝܬ܇ ܘܢܶܩܨܶܐ ܠܰܚܡܰܢ ܠܰܣܢܺܝܩ̈ܶܐ܇ ܘܰܢܬܰܪܣܶܐ ܠܟܰܦܢ̈ܶܐ܇ ܘܢܶܦܫܽܘܛ ܐܺܝܕܰܝ̈ܢ ܠܙܶܕܩ̈ܳܬܳܐ܇ ܕܢܰܥܢܰܝܢ ܐܰܠܳܗܳܐ ܕܰܡܠܶܐ ܪ̈ܰܚܡܶܐ܀

ܨܳܡ ܡܽܘܫܶܐ ܒܰܪ ܥܰܡܪܰܡ܇ ܘܩܰܒܶܠ ܠܽܘܚ̈ܶܐ ܡܶܢ ܡܳܪܝܳܐ܇ ܘܦܽܘܩܕܳܢ̈ܶܐ ܠܥܰܡܳܐ܇ ܘܨܳܡ ܐܺܠܺܝܳܐ ܒܓܰܘ ܚܽܘܪܺܝܒ܇ ܘܰܣܠܶܩ ܠܰܫܡܰܝܳܐ܇ ܒܙܰܘܚܳܐ ܘܒܺܐܝܩܳܪܳܐ܀

ܠܳܟ ܫܽܘܒܚܳܐ ܘܬܰܘܕܺܝܬܳܐ ܝܺܚܺܝܕܳܐ ܕܨܳܡܬ ܥܰܠ ܐܰܦܰܝ̈ܢ܇ ܘܰܐܠܶܦܬ ܠܰܢ ܕܰܢܨܽܘܡ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ ܒܣܽܘܓܳܐ ܕܛܰܝܒܽܘܬܳܟ܀

 

ܫܡܰܝܳܐ ܡܶܫܬܰܥܶܝܢ ܩܳܠܳܐ ܥܒܶܕ ܡܳܪܝ̱ ܕܽܘܟܪܳܢܳܐ

ܒܨܰܘܡܳܐ ܕܰܐܪܒܥܺܝܢ ܕܨܳܡ ܡܽܘܫܶܐ܇ ܐܶܙܕܰܗܺܝ ܗܘܳܐ ܦܰܪܨܽܘܦܶܗ܇ ܒܰܨܠܰܘ̈ܳܬܶܗ ܦܳܪܽܘܩܰܢ܇ ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ܀

ܒܰܨܠܰܘ̈ܳܬܗܽܘܢ ܕܰܪ̈ܚܽܘܡܰܝܟ ܕܰܒܨܰܘܡܰܝ̈ܗܽܘܢ ܫܦܰܪܘ̱ ܠܳܟ ܡܳܪܝ̱܇ ܩܰܒܶܠ ܨܰܘܡܰܢ ܘܨܰܠܘܽܬܰܢ܇ ܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܡܰܪ̈ܓܶܐ ܕܨܰܘܡܳܐ ܢܶܬܦܰܛܡܽܘܢ܇ ܘܰܢܕܽܘܨܽܘܢ ܐܶܡܪ̈ܶܐ ܕܥܳܢܳܟ ܒܥܳܢܘܳܝܽܘܬܳܐ ܢܶܬܕܰܒܪܽܘܢ܇ ܘܰܒܕܰܟܝܽܘܬܳܐ ܢܶܬܢܰܛܪܽܘܢ܀

ܗܳܐ ܥܰܠ ܗܳܠܶܝܢ ܐܰܟܪܶܙ ܠܰܢ܇ ܢܒܺܝܳܐ ܡܫܰܒܚܳܐ ܐܶܫܥܰܝܳܐ܇ ܕܟܽܠ ܒܣܰܪ ܐܰܝܟ ܥܰܡܺܝܪܳܐ ܐܺܝܬܰܘܗ̱ܝ܇ ܘܥܽܘܦܝܳܐ ܕܚܰܩܠܳܐ ܝܳܐܝܽܘܬܶܗ܀

ܐܰܪܒܥܺܝܢ ܝܰܘ̈ܡܺܝܢ ܨܳܡ ܒܕܰܒܪܳܐ ܐܰܠܳܗܳܐ ܚܠܳܦ ܐ̱ܢܳܫܽܘܬܳܐ܇ ܕܢܶܥܛܶܐ ܒܨܰܘܡܳܐ ܠܝܰܥܢܽܘܬܳܐ܇ ܕܒܶܝܬ ܐܺܝܠܳܢ̈ܶܐ ܐܶܫܬܰܠܛܰܬ݀܀

 

ܬܶܫܒܽܘܚܬܳܐ ܚܕܰܬܳܐ܇ ܩܳܠܳܐ ܣܳܓܶܕ ܠܳܟ ܡܳܪܝܳܐ

ܨܰܘܡܳܐ ܡܰܚܠܶܡ ܢܰܦܫ̈ܳܬܳܐ܇ ܡܶܢܟܽܠ ܚܰܘ̈ܒܰܝܢ ܘܰܚܛܳܗ̈ܰܝܢ܇ ܘܰܠܦܰܓܪܳܐ ܝܳܗܶܒ ܡܰܣܓܳܐ܇ ܚܽܘܠܡܳܢܳܐ ܐܳܦ ܐܳܣܝܽܘܬܳܐ܀

ܢܶܒܥܳܐ ܪܰܒܳܐ ܕܥܽܘܕܪ̈ܳܢܶܐ܇ ܨܰܘܡܳܐ ܠܐ̱ܢܳܫ̈ܳܐ ܟܰܫܺܝܪ̈ܶܐ܇ ܘܒܶܗ ܕܳܢܺܝܐܶܝܠ ܐܶܬܦܰܨܺܝ܇ ܘܒܶܗ ܡܽܘܫܶܐ ܢܣܰܒ ܦܽܘܩܕܳܢ̈ܶܐ܀

ܦܐܶܐ ܘܰܪܓܺܝܓ ܨܰܘܡܳܐ ܕܰܟܝܳܐ܇ ܘܣܰܓܺܝ ܪܚܺܝܡ ܥܰܠ ܐܰܠܳܗܳܐ܇ ܟܽܠܰܢ ܐܰܚ̈ܰܝ ܢܶܬܟܰܫܰܪ܇ ܒܨܰܘܡܳܐ ܕܰܟܝܰܐܗ̱ܘ ܡܶܢ ܐܰܟܬܳܐ܀

ܨܳܡ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܘܒܰܕܡܽܘܬ ܫܶܡܫܳܐ ܢܗܰܪ̈ܝ ܐܰܦܰܘ̈ܗ̱ܝ܇ ܘܰܐܚܶܬ ܠܽܘܚ̈ܶܐ ܕܢܳܡܽܘܣܳܐ܇ ܦܽܘܩܕܳܢ̈ܶܐ ܠܒܶܝܬ ܐܺܝܣܪܳܐܶܝܠ܀

ܕܣܰܓܺܝ ܪܚܺܝܡܳܐ ܒܳܥܽܘܬܳܐ܇ ܘܰܚܠܺܝܛ ܒܳܗܿ ܚܽܘܒܳܐ ܕܰܟܝܳܐ܇ ܘܣܳܠܩܳܐ ܠܪܰܘܡܳܐ ܕܰܫܡܰܝܳܐ܇ ܘܠܳܐ ܡܶܬܟܰܠܝܳܐ܇ ܡܶܢ ܥܺܝܪ̈ܶܐ܀

ܗܰܒܠܰܢ ܡܳܪܰܢ ܡܽܘܟܳܟܳܐ܇ ܘܒܳܟ ܢܶܬܡܰܟܰܟ ܣܳܩܽܘܪܰܢ܇ ܘܰܒܡܽܘܟܳܟܳܟ ܢܶܬܪܰܡܪܰܡ܇ ܘܟܽܠܫܳܥ ܢܶܙܡܰܪ ܠܳܟ ܫܽܘܒܚܳܐ܀

 

ܩܳܠܳܐ ܕܨܰܦܪܳܐ܇ ܠܡܰܠܟܽܘܬ ܪܰܘܡܳܐ܀

ܒܨܰܘܡܳܐ ܕܡܶܢ ܠܰܚܡܳܐ܇ ܛܠܳܝ̈ܶܐ ܚܬܺܝܪܺܝܢ܇ ܒܪܶܥܝܳܢܳܐ ܪܳܡܳܐ܇ ܘܰܢܒܺܝܳܐ ܒܦܽܘܩܕܳܢ ܡܳܪܶܗ܇ ܩܥܳܐ ܓܰܠܝܳܐܺܝܬ ܟܰܕ ܐܳܡܰܪ܇ ܕܳܠܰܘ ܗܳܢܰܘ ܨܰܘܡܳܐ ܕܰܓܒܺܝܿܬ܇ ܘܡܶܢ ܠܰܚܡܳܐ ܘܡܰܝ̈ܳܐ ܢܨܽܘܡܽܘܢ܇ ܒܢܰܝ̈ܢܳܫܳܐ ܐܶܠܳܐ ܡܶܢ ܥܰܘܠܳܐ܀

ܕܒܶܝܬ ܚܰܢܰܢܝܳܐ܇ ܒܨܰܘܡܳܐ ܐܶܙܕܰܗܺܝܘ ܒܰܐܪܥܳܐ ܕܟܰܠܕܳܝ̈ܶܐ܇ ܘܰܙܟܰܐܽܘܗ̱ܝ ܗ̱ܘܰܘ ܠܓܰܘܙܰܠܬܳܐ܇ ܘܰܬܡܰܗܘ̱ ܘܰܬܗܰܪܘ̱ ܒܳܒܠܳܝ̈ܶܐ܇ ܒܨܰܘܡܳܐ ܐܰܚ̈ܰܝ ܢܶܬܟܰܫܰܪ܇ ܘܢܶܩܢܶܐ ܒܶܗ ܕܰܟܝܽܘܬ ܠܶܒܐ܇ ܘܡܰܘܪܶܬ ܠܰܢ ܚܰܝ̈ܶܐ ܕܰܠܥܳܠܰܡ܀

 

ܐ̱ܚܪܺܢܳܐ ܩܳܠܳܐ ܕܣܳܗܕܰܘ̈ܗ̱ܝ ܐܰܢ̱ܬܽܘܢ܇

ܒܪܺܝܟ ܗܽܘ ܕܝܰܗܒ ܠܰܢ܇ ܡܰܪ̈ܓܳܢܝܳܬܳܐ ܒܗܶܝܢ ܢܶܬܬܰܓܰܪ ܚܰܝ̈ܶܐ ܠܢܰܦܫ̈ܳܬܰܢ܇ ܘܦܺܝܪܡܳܐ ܕܰܟܝܳܐ܇ ܘܥܰܡܠܳܐ ܕܟܺܐܢܽܘܬܳܐ܇ ܛܽܘܒܰܘܗ̱ܝ ܠܰܐܝܢܳܐ ܕܰܐܰܝܟ ܬܰܐܓܳܪܳܐ ܟܰܫܺܝܪܳܐ܇ ܩܢܳܐ ܠܶܗ ܚܰܝ̈ܶܐ ܕܰܠܥܳܠܰܡ܀

ܐܰܪܒܥܺܝܢ ܝܰܘ̈ܡܺܝܢ ܨܳܡ ܗܘܳܐ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܘܰܫܦܰܪ ܠܰܐܠܳܗܳܐ܇ ܐܰܪܒܥܺܝܢ ܝܰܘ̈ܡܺܝܢ ܨܳܡ ܐܺܠܺܝܳܐ܇ ܒܛܽܘܪܳܐ ܕܟܰܪܡܠܳܐ܇ ܘܰܣܠܶܩ ܠܰܫܡܰܝܳܐ܇ ܐܰܪܒܥܺܝܢ ܝܰܘ̈ܡܺܝܢ  ܨܳܡܘ̱ ܫܠܺܝ̈ܚܶܐ ܒܓܰܘ ܥܶܠܺܝܬܳܐ܇ ܘܩܰܒܶܠܘ̱ ܪܽܘܚܳܐ ܦܰܪܰܩܠܺܝܛܳܐ܀

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܶܬܒܰܣܰܡ ܗܘܳܐ ܒܚܰܡܪܳܐ ܕܰܥܨܺܝܪ ܡܶܢ ܥܰܪܦܶܠܳܐ܇ ܘܓܰܘܢܳܐ ܩܢܳܐ ܠܶܗ ܕܫܰܠܗܶܒܺܝܬܳܐ ܒܳܐܕܫܳܐ ܚܰܠܝܳܐ܇ ܥܒܰܕ ܠܶܗ ܨܰܘܡܳܐ ܚܰܕܳܐ ܫܳܪܽܘܬܳܐ ܕܡܰܠܝܳܐ ܢܽܘܗܪܳܐ܇ ܘܰܒܓܶܠܝܳܢܳܐ ܡܶܬܦܰܛܰܡ ܗܘܳܐ ܪܽܘܚܳܢܳܐܺܝܬ܀

ܫܽܘܒܚܳܐ ܠܰܐܒܳܐ ܕܰܐܠܶܦ ܨܰܘܡܳܐ ܠܰܒܢ̈ܰܝ ܐ̱ܪܳܙܶܗ܇ ܘܣܶܓܕܬܳܐ ܠܰܒܪܳܐ ܕܒܶܗ ܐܶܬܢܰܨܰܚ ܡܽܘܫܶܐ ܥܰܒܕܶܗ܇ ܬܰܘܕܺܝ ܠܪܽܘܚܳܐ ܕܗܽܘܝܽܘ ܡܚܰܝܶܠ ܠܟܽܠ ܨܰܝܳܡ̈ܶܐ܇ ܚܰܕ ܗܽܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܒܥܶܕܳܢ ܨܰܦܪܳܐ ܡܶܬܦܰܬܚܺܝܢ܀

ܢܛܰܝܶܒ ܢܰܦܫܰܢ ܚܰܒܺܝ̈ܒܰܝ܇ ܠܦܽܘܠܚܳܢܳܐ ܕܙܰܕܺܝܩܽܘܬܳܐ܇ ܘܢܶܩܒܽܘܥ ܒܳܗܿ ܥܒܳܕ̈ܶܐ ܛܳܒ̈ܶܐ܇ ܕܰܡܝܰܬܪܺܝܢ ܡܶܢ ܣܺܝܡ̈ܳܬܳܐ܇ ܒܩܰܕܺܝܫܽܘܬܳܐ ܢܶܙܕܰܗܶܐ܇ ܕܢܶܛܰܪ ܚܰܫ̈ܶܐ ܕܰܚܛܺܝܬܳܐ܀

ܩܽܘܡܘ̱ ܐܰܝܟ ܛܰܪ̈ܩܶܐ ܕܶܐܬܟܰܫܰܪܘ̱܇ ܒܦܽܘܠܚܳܢܳܐ ܕܟܰܪܡܳܐ ܚܰܕܬܳܐ܇ ܐܰܝܟ ܦܳܠܚ̈ܶܐ ܟܰܫܺܝܪ̈ܶܐ ܐܶܬܬܰܓܰܪܘ̱ ܒܶܗ ܝܽܘܬܪ̈ܳܢܶܐ܇ ܕܬܶܣܒܽܘܢ ܐܰܓܪܳܐ ܡܰܠܝܳܐܺܝܬ܇ ܚܰܝ̈ܶܐ ܡܠܺܝܟ̈ܶܐ ܕܰܠܥܳܠܰܡ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ܇

ܘܰܐܟܡܳܐ ܕܗܳܠܶܝܢ ܐܳܡܰܪ ܗܘܳܐ܇ ܠܰܐܠܳܗܳܐ ܒܰܨܠܰܘ̈ܳܬܳܐ܇ ܐܰܠܳܗܳܐ ܕܚܰܘܺܝܬܳܝܗ̱ܝ ܠܺܝ܇ ܟܰܕ ܡܳܪܝ̱ ܠܳܐ ܝܳܕܰܥ ܗܘܺܝܿܬ ܠܶܗ܇ ܐܰܦܢܳܝܗ̱ܝ ܠܺܝ ܡܶܢ ܓܰܘ ܓܽܘܒܳܐ܇ ܠܪܳܚܡܳܐ ܚܰܕܬܳܐ ܕܰܗܘܳܐ ܠܺܝ܀

ܫܽܘܒܚܳܐ ܠܳܟ ܡܦܰܨܶܐ ܠܪ̈ܳܚܡܰܘܗ̱ܝ܇ ܫܽܘܒܚܳܐ ܠܳܟ ܠܶܘܝܳܐ ܕܥܰܒܕܰܘ̈ܗ̱ܝ܇ ܫܽܘܒܚܳܐ ܠܳܟ ܩܢܶܐ ܠܣܳܓܽܘܕܰܘ̈ܗ̱ܝ܇ ܘܫܽܘܒܚܳܐ ܠܳܟ ܠܰܐܒܳܐ ܕܫܰܠܚܳܟ܇ ܘܠܰܢ ܚܽܘܣܳܝܳܐ ܘܫܽܘܒܩܳܢܳܐ ܘܰܥܛܳܝܳܐ ܕܣܰܟܠܘ̈ܳܬܳܐ܀

 

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܡܳܪܝܳܐ ܡܳܪܰܢ܀

ܥܺܕܰܬ ܩܽܘܕܫܳܐ܇ ܗܳܝ ܕܰܦܪܰܩܬܳܗܿ ܡܶܢ ܛܽܘܥܝܰܝ܇ ܡܦܺܝܣܳܐ ܠܳܟ ܡܳܪܝ̱ ܒܚܰܫܳܐ ܘܟܰܪܝܽܘܬܳܐ܇ ܩܰܒܶܠ ܡܳܪܰܢ܇ ܒܰܚܢܳܢܳܟ ܨܰܘܡܳܐ ܕܝܰܠܕܶܝ̈ܗܿ܇ ܘܶܐܬܪܰܥܳܐ ܠܗܽܘܢ܇ ܒܰܨܠܽܘܬ ܝܳܠܶܕܬܳܟ ܗ܇ ܫܽܘܒܚܳܐ ܠܳܟ ܘܰܥܠܰܝܢ ܪ̈ܰܚܡܰܝܟ܇ ܡܫܺܝܚܳܐ ܕܦܰܪܩܶܗ ܒܰܕܡܶܗ ܙܰܟܳܝܳܐ܀

ܢܒܺܝ̈ܶܐ ܘܰܫܠܺܝ̈ܚܶܐ܇ ܘܣܳܗܕ̈ܶܐ ܕܰܢܨܰܚܘ̱ ܘܶܐܬܟܰܠܰܠܘ̱܇ ܒܫܰܗܪܳܐ ܘܨܰܘܡܳܐ ܘܰܣܒܰܠܘ̱ ܐܽܘܠܨܳܢ̈ܶܐ܇ ܒܥܰܘ ܡܶܢ ܡܳܪܰܢ ܕܢܶܬܪܰܚܰܡ ܥܰܠ ܚܰܛܳܝ̈ܶܐ܇ ܘܢܰܫܪܶܐ ܫܰܝܢܶܗ ܘܰܫܠܳܡܶܗ ܒܥܺܕܬܳܐ܇ ܘܢܰܘܕܽܘܢ ܝܰܠܕܰܝ̈ܗܿ ܕܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܇ ܘܫܽܘܒܚܳܐ ܢܰܣܩܽܘܢ ܒܠܺܠܝܳܐ ܘܒܺܐܝܡܳܡܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܥܰܡ ܨܰܘܡܰܢ ܐܳܦ ܙܶܕܩ̈ܳܬܰܢ܇ ܢܶܬܝܰܗܒ̈ܳܢ ܠܰܐܝܢܳܐ ܕܰܣܢܺܝܩ܇ ܘܶܐܢܽܗܘ ܕܬܶܬܶܠ ܚܰܣܺܝܪ ܐܰܢ̱ܬ܇ ܨܶܒܝܳܢܳܐ ܛܳܒܳܐ ܚܰܘܳܐ܀

ܫܽܘܒܚܳܐ ܠܛܰܝܒܽܘܬܳܟ ܡܳܪܰܢ܇ ܕܒܳܗܿ ܗܽܘ ܒܪܰܝܬܳܢ ܡܶܢ ܠܽܘܩܕܰܡ܇ ܘܒܳܗܿ ܚܰܣܳܐ ܘܰܫܒܽܘܩ ܚܰܘ̈ܒܰܝܢ܇ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

 

ܕܰܬܫܰܥܫܳܥܺܝ̈ܢ ܩܳܠܳܐ ܐܰܝܟ ܦܺܝܪܡܳܐ ܕܩܰܪܶܒ ܐܰܗܪܽܘܢ

ܒܝܰܕ ܨܰܘܡܳܐ ܕܨܳܡ ܕܳܢܺܝܐܶܝܠ܇ ܙܟܳܐ ܗܘܳܐ ܠܚܰܝܘ̈ܳܬܳܐ܇ ܘܰܛܠܳܝ̈ܶܐ ܕܒܶܝܬ ܚܰܢܰܢܝܳܐ܇ ܕܰܥܟܽܘܗܿ ܠܓܰܘܙܰܠܬܳܐ܇ ܘܰܒܨܰܘܡܳܐ ܕܨܳܡܘ̱ ܙܰܕܺܝ̈ܩܶܐ܇ ܐܶܬܡܰܢܰܥܘ̱ ܠܰܓܢܽܘܢ ܢܽܘܗܪܳܐ܀

ܙܰܝܢܰܐܗ̱ܘ ܪܰܒܳܐ ܘܥܰܫܺܝܢܳܐ܇ ܨܰܘܡܳܐ ܠܦܳܪ̈ܽܘܫܶܐ܇ ܕܒܳܗܿ ܝܳܪܬܺܝܢ ܓܰܢܰܬ ܛܽܘܒ̈ܶܐ ܘܚܰܝ̈ܶܐ ܘܒܽܘܣܳܡ̈ܶܐ܇ ܛܽܘܒܰܘܗ̱ܝ ܠܰܐܝܢܳܐ ܕܰܒܨܰܘܡܳܐ܇ ܘܒܰܨܠܽܘܬܳܐ ܫܦܰܪ ܠܰܐܠܳܗܳܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܕܳܢܰܚ ܒܰܪ ܡܰܠܟܳܐ܇ ܒܝܰܘܡܶܗ ܕܢܽܘܚܳܡܳܐ ܕܢܶܦܪܽܘܥ ܠܟܽܠ ܐ̱ܢܳܫܳܐ ܐܰܟܡܳܐ ܕܰܣܥܺܝܪ ܠܶܗ܇ ܛܽܘܒܳܐ ܠܨܰܝܳܡ̈ܶܐ܇ ܕܡܶܬܒܰܣܡܺܝܢ ܒܰܥܕܶܝܢ܀ ܫܽܘܒܚܳܐ ܠܗܰܘ ܛܳܒܳܐ܇ ܕܰܡܠܰܟ ܘܶܐܫܬܰܘܕܺܝ܇ ܐܰܓܪܳܐ ܘܦܽܘܪܥܳܢܳܐ܇ ܠܟܽܠ ܡܰܢ ܕܶܐܬܟܰܫܰܪ܇ ܒܨܰܘܡܳܐ ܘܒܰܨܠܽܘܬܳܐ ܘܰܠܚܰܝ̈ܶܐ ܝܳܪܬܺܝܢ܀

 

ܕܢܳܓܰܗ ܚܰܡܫܳܐ ܕܫܰܒܬܳܐ ܩܰܕܡܳܝܬܳܐ܀

ܩܰܕܡܳܝܰܬ ܕܪܰܚܶܡܥܠܰܝ ܩܳܠܳܐ ܚܽܘܣܳܝܳܐ ܗܘܺܝ ܠܺܝ܇

ܒܕܶܡܥ̈ܶܐ ܚܢܺܝܓ̈ܳܬܳܐ܇ ܓܳܥܶܐ ܐ̱ܢܳܐ ܘܰܡܦܺܝܣ ܐ̱ܢܳܐ ܠܳܟ ܐܰܠܳܗܳܐ܇ ܚܽܘܢܰܝܢܝ̱ ܡܳܪܝ̱ ܘܚܰܣܳܐ ܚܰܘ̈ܒܰܝ ܒܰܚܢܳܢܳܟ܇ ܪܰܚܶܡܥܠܰܝ܀

ܚܰܢܳܢܳܐ ܡܳܪܝܳܐ܇ ܚܽܘܢ ܠܰܐܒܺܝܕܽܘܬܝ̱܇ ܒܗܰܘ ܝܰܘܡܳܐ ܕܡܶܐܬܺܝܬܳܟ܇ ܘܰܐܩܺܝܡܰܝܢܝ̱ ܡܶܢ ܝܰܡܺܝܢܳܟ ܥܰܡ ܐܶܡܪ̈ܰܝܟ. ܪܰܚܶܡܥܠܰܝ܀

 

ܕܡܳܪܝܳܐ ܩܪܺܝܬܳܟ ܩܳܠܳܐ ܡܳܪܝܳܐ ܩܪܺܝܬܳܟ ܐܰܢ̱ܬ

ܡܳܪܝܳܐ ܩܪܺܝܬܳܟ ܐܰܢ̱ܬ ܥܢܺܝܢܝ̱܇ ܨܽܘܬ ܡܶܠ̈ܰܝ ܘܩܰܒܶܠ ܨܠܽܘܬܝ̱܀

ܨܠܽܘܬܳܟ ܬܶܗܘܶܐ ܩܕܳܡܰܝܟ ܡܳܪܝܳܐ܇ ܐܰܝܟ ܥܶܛܪܳܐ ܕܒܶܣܡ̈ܶܐ ܛܳܒܳܐ܀

ܐܰܝܟ ܕܩܰܒܶܠ ܨܰܘܡܳܐ ܕܟܺܐܢ̈ܶܐ܇ ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ܀

ܨܳܡ ܡܽܘܫܶܐ ܘܰܚܙܳܐ ܠܪܳܡܳܐ܇ ܘܰܚܢܰܢ ܢܨܽܘܡ ܥܰܡܶܗ ܢܶܚܕܶܐ܀

ܨܳܡ ܐܺܠܺܝܳܐ ܘܶܐܬܥܰܠܺܝ܇ ܘܰܛܠܳܝ̈ܶܐ ܙܟܰܐܳܘܽܗܿ ܠܢܽܘܪܳܐ܀

ܩܰܒܶܠ ܡܫܺܝܚܳܐ ܒܰܚܢܳܢܳܟ܇ ܨܰܘܡܳܐ ܘܰܨܠܽܘܬܳܐ ܕܥܰܒܕܰܝ̈ܟ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܩ̈ܳܠܶܐ ܕܰܡܠܶܝܢ ܬܰܘܕܺܝܬܳܐ

ܡܽܘܫܶܐ ܢܒܺܝܳܐ ܒܝܰܕ ܨܰܘܡܳܐ܇ ܕܨܳܡ ܗܘܳܐ ܒܛܽܘܪ ܣܺܝܢܰܝ܇ ܐܶܙܕܰܗܺܝ ܗܘܳܐ ܦܰܪܨܽܘܦܶܗ ܘܰܢܗܰܪ̈ܝ ܐܰܦܰܘ̈ܗ̱ܝ ܒܰܕܡܽܘܬ ܫܶܡܫܳܐ܇ ܘܠܽܘܚ̈ܶܐ ܕܢܳܡܽܘܣܳܐ ܩܰܒܶܠ ܡܶܢ ܐܰܠܳܗܳܐ܇ ܕܰܒܨܶܒܥܳܐ ܕܢܽܘܪܳܐ ܟܬܺܝܒܺܝܢ ܘܦܽܘܩܕ̈ܳܢܶܐ ܘܕܺܝܢ̈ܶܐ܇ ܘܰܚܢܰܢ ܐܰܚ̈ܰܝ ܒܝܰܕ ܨܰܘܡܳܐ ܕܡܶܢ ܒܺܝܫ̈ܳܬܳܐ ܢܪܰܥܶܐ ܠܡܳܪܝܳܐ܀

ܚܰܣܳܐ ܚܰܘܒܰܝ̈ܢ ܒܛܰܝܒܽܘܬܳܟ ܡܰܠܟܳܐ ܫܡܰܝܳܢܳܐ܇ ܘܰܫܒܽܘܩܠܰܢ ܟܽܠ ܕܰܚܛܰܝܢܰܢ܇ ܐܰܝܟ ܣܽܘܓܳܐ ܕܒܰܣܺܝܡܽܘܬܳܟ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ ܪܳܚܶܡܢܳܫܳܐ܇ ܘܦܰܢܳܐ ܫܶܐܠ̈ܳܬܰܢ܇ ܒܰܫܦܺܝܥܽܘܬ ܪ̈ܰܚܡܰܝܟ܇ ܕܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܠܳܟ ܒܰܪ ܛܳܒܳܐ ܕܰܡܠܶܐ ܪ̈ܰܚܡܶܐ܀

 

ܐ̱ܚܪܺܢܳܐ ܩܳܠܳܐ ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ

ܨܳܡ ܡܽܘܫܶܐ ܘܦܰܠܶܓ ܝܰܡܳܐ ܠܺܐܝܣܪܳܐܶܝܠ܇ ܨܳܡ ܕܳܢܺܝܐܶܝܠ ܘܶܐܬܦܰܨܺܝ ܡܶܢ ܚܰܝܘ̈ܳܬܳܐ܇ ܨܳܡܘ̱ ܛܳܠܝ̈ܶܐ ܕܒܶܝܬ ܚܰܢܰܢܝܳܐ ܘܕܰܥܶܟܘ̱ ܗ̱ܘܰܘ ܢܽܘܪܳܐ ܕܰܫܓܰܪ ܟܰܠܕܳܝ̈ܶܐ܇ ܒܰܐܪܥܳܐ ܕܒܳܒܶܝܠ܀

ܨܰܘܡܳܐ ܡܰܢܗܰܪ ܬܰܪܥܺܝܬܳܐ ܟܰܣܝܳܐܺܝܬ܇ ܡܫܰܦܶܠ ܦܰܓܪܳܐ ܓܰܠܝܳܐܺܝܬ܇ ܘܢܰܦܫܳܐ ܡܳܪܶܩ܇ ܬܰܘ ܐܰܚ̈ܰܝ ܢܶܪܗܰܛ ܘܢܶܥܬܰܪ ܡܶܢ ܓܰܙܶܗ܇ ܐܰܝܟ ܗܳܢܽܘܢ ܕܒܶܝܬ ܚܰܢܰܢܝܳܐ ܕܶܐܬܓܰܘܰܣ ܒܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܽܠ ܨܰܝܳܡܳܐ ܕܠܽܘܩܒܰܠ ܡܳܪܝܳܐ ܣܺܝܡ̈ܳܢ ܐܰܦܰܘ̈ܗ̱ܝ܇ ܠܳܐ ܡܨܶܐ ܟܰܦܢܳܐ ܡܫܰܦܶܠ ܘܡܡܰܚܶܠ ܘܰܡܥܰܗܶܕ ܠܶܗ܇ ܕܰܟܡܳܐ ܦܰܓܪܳܐ ܒܳܨܰܪ ܬܳܚܶܒ ܙܳܥܰܪ ܘܡܰܘܦܶܐ܇ ܢܰܦܫܳܐ ܚܳܝܳܐ ܘܥܳܫܢܳܐ ܘܫܳܦܪܳܐ ܩܕܳܡ ܐܰܠܳܗܳܐ܀

ܫܽܘܒܚܳܐ ܠܰܐܒܳܐ ܕܚܰܘܺܝ ܙܺܝܘܶܗ ܠܡܽܘܫܶܐ ܥܰܒܕܶܗ܇ ܘܣܶܓܕܬܳܐ ܠܰܒܪܳܐ ܕܠܶܗ ܨܳܐܰܪ ܗܘܳܐ ܒܟܽܠܶܗ ܐܽܘܪܚܶܗ܇ ܬܰܘܕܺܝ ܠܪܽܘܚܳܐ ܕܒܶܗ ܡܶܬܬܙܺܝܥ ܗܘܳܐ ܥܰܠ ܟܰܣܝ̈ܳܬܳܐ܇ ܘܰܥܠܰܝܢ ܪ̈ܰܚܡܶܐ ܒܟܽܠܥܶܕܳܢܺܝ̈ܢ ܠܶܗ ܬܶܫܒܽܘܚܬܳܐ܇

 

ܡܥܺܝܪܳܢܳܐ ܕܠܺܠܝܳܐ܇ ܝܳܐܶܐ ܘܙܳܕܶܩ܇

ܐܰܚ̈ܰܝ ܢܦܽܘܫ ܡܶܢ ܒܽܝܫܬܳܐ܇ ܘܢܺܐܨܰܦ ܩܰܠܺܝܠ ܕܰܩܢܽܘܡܰܢ܇ ܘܢܶܫܕܶܐ ܡܶܢܰܢ ܪܰܦܝܽܘܬܳܐ܇ ܘܢܶܬܟܰܫܰܪ ܒܰܬܝܳܒܽܘܬܳܐ܇ ܫܽܘܒܚܳܐ܀

ܢܶܫܠܰܚ ܐܰܚ̈ܰܝ ܒܺܝܫ̈ܳܬܳܐ܇ ܘܢܶܠܒܰܫ ܙܰܝܢܳܐ ܕܛܳܒ̈ܳܬܳܐ܇ ܘܰܢܩܰܪܶܒ ܠܰܡܠܶܟ ܡܰܠܟ̈ܶܐ܇ ܩܽܘܪ̈ܒܳܢܶܐ ܕܦܳܪܽܘܫܽܘܬܳܐ܇ ܫܽܘܒܚܳܐ܀

ܫܽܘܒܚܳܐ ܩܰܪܶܒܘ̱ ܨܰܝܳܡ̈ܶܐ܇ ܠܰܐܠܳܗܳܐ ܚܠܳܦ ܥܰܡܠܰܝ̈ܗܽܘܢ ܦܺܐܪ̈ܶܐ ܛܳܒ̈ܶܐ ܕܬܰܘܕܺܝܬܳܐ܇ ܒܕܽܘܒܳܪ̈ܰܝܗܽܘܢ ܫܰܦܺܝܪ̈ܶܐ ܫܽܘܒܚܳܐ܀

ܠܳܟ ܫܽܘܒܚܳܐ ܚܽܘܒܳܐ ܫܰܦܝܳܐ܇ ܡܫܺܝܚܳܐ ܢܽܘܗܪܳܐ ܕܒܶܪ̈ܝܳܬܳܐ܇ ܘܠܰܐܒܳܐ ܕܫܰܠܚܳܟ ܬܰܘܕܺܝܬܳܐ܇ ܕܪܰܥܝܰܢ ܡܽܘܟܳܟܳܟ ܠܰܐܒܽܘܟ܇ ܫܽܘܒܚܳܐ܀

ܫܽܘܒܚܳܐ ܠܳܟ ܡܳܪܳܐ ܛܳܒܳܐ܇ ܕܚܰܘܝܺܬ ܠܰܢ ܨܰܘܡܳܐ ܕܰܟܝܳܐ܇ ܕܒܶܗ ܢܶܙܕܟܶܐ ܡܶܢ ܥܰܘܠܰܢ܇ ܘܢܶܬܚܰܣܶܐ ܡܶܢ ܒܺܝܫ̈ܳܬܳܐ܀

 

ܩܳܠܳܐ ܕܠܺܠܝܳܐ܇ ܫܳܪܶܐ ܐܰܣܺܝܪ̈ܶܐ ܡܳܪܝܳܐ

ܛܽܘܒܰܘܗ̱ܝ ܠܰܐܝܢܳܐ ܕܰܒܨܰܘܡܶܗ ܪܰܥܺܝ ܠܰܐܠܳܗܳܐ܇ ܘܰܒܬܰܟܫܶܦܬܳܐ ܘܬܰܚܢܰܢܬܳܐ ܩܕܳܡܰܘܗ̱ܝ ܐܶܬܟܰܫܰܪ܇ ܗܳܢܰܘ ܕܰܡܶܢܺܝܚ ܠܰܐܠܳܗܳܐ܇ ܘܥܳܒܶܕ ܦܽܘܩܕܳܢ ܒܳܪܽܘܝܶܗ܀

ܩܰܒܶܠ ܡܳܪܰܢ ܒܰܚܢܳܢܳܟ ܨܰܘܡܰܢ ܘܰܨܠܽܘܬܰܢ܇ ܦܰܢܳܐ ܒܪ̈ܰܚܡܰܝܟ ܫܶܐܠ̈ܳܬܰܢ܇ ܛܳܒܳܐ ܘܒܰܣܺܝܡܳܐ܇ ܚܰܣܳܐ ܚܰܘܒܰܝ̈ܢ ܘܰܚܛܳܗ̈ܰܝܢ܇ ܐܰܠܳܗܰܢ ܣܰܓܺܝ ܪ̈ܰܚܡܶܐ܀

 

ܣܽܘܓܺܝܬܳܐ܇ ܒܩܳܠܳܐ ܣܠܶܩ ܠܰܨܠܺܝܒܳܐ ܥܶܢܝܳܢܳܐ ܠܳܟ ܬܶܫܒܽܘܚܬܳܐ ܡܚܰܣܶܐ ܟܽܠ ܒܛܰܝܒܽܘܬܶܗ܇ ܘܠܳܟ ܬܰܘܕܽܝܬܳܐ ܚܳܐܶܢ ܟܽܠ ܒܰܚܢܳܢܶܗ

ܐܳܘ ܬܰܐܓܳܪ̈ܶܐ ܐܶܙܕܰܗܰܪܘ̱ ܒܓܰܙܰܝ̈ܟܽܘܢ܇ ܘܡܶܢ ܓܰܝܳܣ̈ܶܐ ܕܗܳܢ ܥܳܠܡܳܐ ܥܳܒܽܘܪܳܐ܇ ܕܟܺܐܡܽܘܢܰܘ̈ܗ̱ܝ ܩܰܛܺܝܢܺܝܢ ܐܶܢܽܘܢ܇ ܐܽܘܪ̈ܚܳܬܶܗ ܬܽܘܩ̈ܠܳܬܳܐ ܡܰܠܝ̈ܳܢ܇ ܛܽܘܒ ܠܰܐܝܢܳܐ ܕܰܒܢܽܘܗܪܳܐ ܥܳܒܰܪ ܠܶܗ ܙܗܺܝܪܳܐܺܝܬ܀

ܓܰܠܝܳܐܗ̱ܝ ܗܳܕܶܐ ܕܥܰܪܛܶܠܳܝ ܥܰܠܢܰܢ ܠܶܗ܇ ܠܘܰܝ ܕܶܝܢ ܕܥܰܪܛܶܠ ܗܘܳܬ̈ ܡܶܢܶܗ ܡܰܦܩܳܬܰܢ܇ ܥܰܠܢܰܢ ܠܶܗ ܕܟܰܝ̈ܶܐ ܘܫܰܦܺܝܪ̈ܶܐ܇ ܘܢܳܦܩܺܝܢܰܢ ܨ̈ܳܐܶܐ ܘܰܡܟܰܬܡ̈ܶܐ܇ ܘܰܛܥܺܝܢ̈ܰܝ ܚܰܘܒ̈ܳܬܳܐ ܕܡܰܘ̈ܒܠܳܢ ܠܒܶܝܬ ܕܺܝܢܳܐ܀

ܗܳܐ ܪܗܺܝܒ ܕܢܶܥܒܰܪ ܐܳܦܠܰܢ ܡܣܰܪܗܶܒ ܠܰܢ܇ ܕܢܺܐܬܶܐ ܥܳܠܡܳܐ ܐ̱ܚܪܺܢܳܐ ܕܠܳܐ ܥܳܒܰܪ܇ ܘܟܰܕ ܟܽܠܝܽܘܡ ܒܰܪܶܗܛܶܗ ܓܳܢܶܒ ܠܰܢ܇ ܒܚܽܘܬܚܳܬܰܘ̈ܗ̱ܝ ܡܰܣܓܶܐ ܡܓܰܪܶܓ ܠܰܢ܇ ܘܡܰܛܥܶܐ ܠܰܢ ܕܰܢܚܰܫܒܺܝܘܗ̱ܝ ܐܰܝܟ ܗܰܘ ܕܠܳܐ ܥܳܒܰܪ܀

ܙܘܳܕ̈ܶܐ ܒܺܝܫ̈ܶܐ ܕܚܳܫܚܺܝܢ ܠܓܺܗܰܢܳܐ܇ ܣܳܕܰܪ ܣܳܐܶܡ ܟܽܠܝܽܘܡ ܠܘܳܬ ܟܽܠܢܳܫ܇ ܛܽܘܒ ܠܰܐܝܢܳܐ ܕܰܓܒܳܐ ܠܶܗ ܡܶܢܗܽܘܢ܇ ܘܰܫܩܰܠ ܠܶܗ ܛܳܒ̈ܶܐ ܚܠܳܦ ܒܺܝܫ̈ܶܐ܇ ܕܽܐܳܘܪܚܳܐܗ̱ܝ ܕܠܳܐ ܦܳܢܶܐ ܠܒܶܣܬܪܶܗ ܕܪܳܕܶܐ ܒܳܗܿ܀

ܛܳܒ ܗܽܘ ܐܰܬܪܳܐ ܐܳܦ ܕܳܐܕܳܡ ܫܳܪܶܐ ܗܘܳܐ ܒܶܗ܇ ܘܒܺܝܫ ܗܘܳܐ ܘܡܰܪܺܝܪ ܐܰܝܟܳܐ ܕܠܽܘܛ ܥܳܡܰܪ ܗܘܳܐ܇ ܒܶܝܬ ܚܰܝ̈ܶܐ ܡܺܝܬ ܐܳܕܳܡ ܕܰܨܒܳܐ܇ ܘܒܶܝܬ ܡܺܝ̈ܬܶܐ ܚܰܝܳܐ ܠܽܘܛ ܕܰܫܦܰܪ ܠܶܗ܇ ܕܚܺܐܪܽܘܬܳܐ ܗܰܘ ܒܨܶܒܝܳܢܶܗ ܙܰܟܳܝܳܐ ܡܶܙܕܟܶܐ܀

ܟܡܳܐ ܙܥܽܘܪ ܙܰܒܢܰܢ ܘܰܪܗܺܝܒ ܕܢܶܥܒܰܪ ܠܶܗ܇ ܘܪܶܗܛܳܐܗ̱ܝ ܐܽܘܪܚܰܢ ܘܰܟܠܺܝܠܳܐܗ̱ܝ ܡܰܪܕܺܝܬܰܢ܇ ܡܳܠܶܐ ܝܰܘܡܳܐ ܡܶܢ ܟܰܪܣܳܐ ܠܰܫܝܽܘܠ܇ ܡܳܠܶܐ ܠܺܠܝܳܐ ܫܶܢܬܳܐ ܒܓܰܘ ܩܰܒܪܳܐ܇ ܡܳܠܶܐ ܨܰܦܪܳܐ ܢܽܘܚܳܡܳܐ܇ ܘܗܳܐ ܕܺܝܢܳܐ ܕܠܳܐ ܥܳܒܰܪ܀

ܡܳܐ ܕܚܳܙܶܐ ܠܗܽܘܢ ܠܰܟܠܺܝ̈ܠܶܐ ܕܢܰܨܺܝܚ̈ܶܐ܇ ܪܶܒܽܘ ܡܶܢܗܽܘܢ ܥܳܗܕܺܝܢ ܠܶܗ ܚܰܝܰܝ̈ܗܽܘܢ܇ ܕܟܽܠ ܛܽܘܒ̈ܶܐ ܕܥܳܡ̈ܠܶܐ ܘܰܕܠܰܐܝ̈ܳܐ܇ ܟܡܳܐ ܡܝܰܬܰܪ ܦܽܘܠܚܳܢܗܽܘܢ ܝܳܠܦܺܝܢ܇ ܟܡܳܐ ܡܰܚܶܒ ܐܰܠܳܗܳܐ ܠܣܳܓܽܘܕܰܘ̈ܗ̱ܝ ܫܰܪܺܝܪ̈ܶܐ܀

ܣܳܠܩܺܝܢ ܛܳܒ̈ܶܐ ܒܕܰܪ̈ܓܰܝܗܽܘܢ ܪ̈ܽܘܚܳܢܶܐ܇ ܕܢܽܗܘܽܘܢ ܚܰܒܪ̈ܶܐ ܘܰܐ̱ܚܝܳܢ̈ܶܐ ܠܥܶܠܳܝ̈ܶܐ܇ ܕܠܳܐ ܗܰܠܶܟܘ̱ ܒܽܐܘܪ̈ܚܳܬܳܐ ܕܒܶܣܪܳܐ܇ ܕܪ̈ܽܘܚܳܢܺܝܢ ܗ̱ܘܰܘ ܟܰܕ ܦܰܓܪ̈ܳܢܺܝܢ܇ ܥܰܡܗܽܘܢ ܕܪ̈ܽܘܚܳܢܶܐ ܝܳܪܬܺܝܢ ܡܰܠܳܟܽܘܬܳܐ܀

ܦܳܬܚܳܐ ܦܽܘܡܳܐ ܟܺܐܢܽܘܬܳܐ ܠܡܰܐܟܳܣܽܘ܇ ܘܟܽܠ ܦܽܘܡ ܬܰܡܶܢ ܡܶܣܬܟܰܪ ܘܡܶܬܚܰܝܰܒ܇ ܛܰܝܒܽܘܬܳܐ ܡܶܢܟܽܠ ܐܶܬܛܰܠܡܰܬ݀܇ ܟܺܐܢܽܘܬܳܐ ܕܥܰܠ ܟܽܠ ܐܶܬܐܰܫܕܰܬ݀܇ ܘܢܳܛܪ̈ܳܢ ܠܦܽܘܪܥܳܢܳܐ ܕܝܰܡܺܝܢܳܐ ܘܣܶܡܳܠܳܐ܀

ܩܳܝܡܺܝܢ ܓܰܒ̈ܶܐ ܕܝܰܡܺܝܢܳܐ ܘܣܶܡܳܠܳܐ܇ ܚܰܕ ܒܚܰܕ ܚܳܝܪܺܝܢ ܬܪ̈ܰܝܗܽܘܢ ܒܕܽܘܡܳܪܳܐ܇ ܘܚܰܕ ܢܳܚܶܬ ܠܥܽܘܡܩܳܐ ܬܰܚܬܳܝܳܐ܇ ܚܰܕ ܣܳܠܶܩ ܠܪܰܘܡܳܐ ܕܰܫܡܰܝܳܐ܇ ܠܚܰܕ ܛܽܘܒܳܐ ܕܠܳܐ ܥܳܒܰܪ܇ ܠܚܰܕ ܘܳܝܳܐ ܕܠܳܐ ܡܰܘܦܶܐ܀

ܪܳܥܰܡܺܝܢ ܬܰܡܳܢ ܩ̈ܳܠܶܐ ܕܟܽܠ ܬܶܓܡܺܝ̈ܢ܇ ܟܽܠ ܐܰܝܟ ܕܰܥܒܰܕ ܡܰܥܒܰܪܬܳܐ ܒܠܶܫܳܢܶܗ܇ ܡܓܰܕܦܳܢ̈ܶܐ ܡܶܢ ܓܰܘ ܓܺܗܰܢܳܐ܇ ܘܙܰܕܺܝ̈ܩܶܐ ܡܶܢ ܓܰܘ ܡܰܠܟܽܘܬܳܐ܇ ܪܳܥܰܡܺܝܢ ܒܗܽܘ̈ܠܳܠܶܐ ܙܳܥܩܺܝܢ ܩܕܳܡ ܚܰܬܢܳܐ܀

ܬܶܕܢܰܚ ܥܠܰܝ ܐܳܦ ܛܰܐܠܳܐ ܕܛܰܝܒܽܘܬܳܐ܇ ܘܰܬܚܶܝܬ ܟܶܢܦܶܝ̈ܗܿ ܣܰܬܰܪܰܝܢܝ̱ ܕܠܳܐ ܐܺܝܩܳܕ܇ ܝܳܕܰܥ ܐ̱ܢܳܐ ܕܰܒܣܺܝܪ ܐ̱ܢܳܐ ܒܰܩܢܽܘܡܝ̱܇ ܘܢܽܘܟܪ̈ܳܝܺܝܢ ܡܶܠ̈ܰܝ ܠܰܥܒ̈ܳܕܰܝ܇ ܩܰܒܶܠ ܡܳܪܝ̱ ܦܝܳܣ ܡܶܠ̈ܰܝ̈ ܚܽܘܢ ܡܳܪܝ̱ ܠܚܰܝܳܒܽܘܬܝ̱܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܚܣܰܟܬܳܝܗ̱ܝ ܡܶܢܳܟ ܗܰܒܳܝܗ̱ܝ ܠܰܐܝܢܳܐ ܕܟܰܦܢܳܐ ܟܰܪܣܶܗ܇ ܕܰܒܝܰܕ ܨܰܘܡܳܐ ܬܪܶܝܢ ܝܽܘܬܪ̈ܳܢܺܝܢ ܢܶܫܬܰܟܚܽܘܢ ܠܳܟ܇ ܠܨܰܘܡܳܐ ܝܰܩܰܪ ܒܰܬܪ̈ܶܝܢ ܦܽܘܡܺܝ̈ܢ ܟܰܕ ܨܳܐܶܡ ܐܰܢ̱ܬ܇ ܒܕܺܝܠܳܟ ܕܰܢܙܺܝܪ ܘܰܒܗܰܘ ܕܳܐܟܶܠ ܡܶܢ ܦܳܬܽܘܪܳܟ܀

ܫܽܘܒܚܳܐ ܠܰܐܒܳܐ ܕܝܰܗܒ ܠܰܢ ܨܰܘܡܳܐ ܕܒܶܗ ܢܶܙܕܰܕܰܩ܇ ܘܣܶܓܕܬܳܐ ܠܰܒܪܳܐ ܕܰܒܙܶܕܩ̈ܳܬܳܐ ܚܳܕܶܐ ܘܡܶܬܬܢܺܝܚ܇ ܬܰܘܕܺܝ ܠܪܽܘܚܳܐ ܕܥܳܢܶܐ ܠܥܰܒܕܰܘ̈ܗ̱ܝ ܡܳܐ ܕܩܳܪܶܝܢ ܠܶܗ܇ ܘܰܡܦܰܢܶܐ ܠܗܽܘܢ ܟܳܠ ܫܳܐܠ̈ܳܬܗܽܘܢ ܠܶܗ ܬܶܫܒܽܘܚܬܳܐ܀

 

ܕܨܰܦܪܳܐ ܕܪܰܚܶܡܥܠܰܝ ܩܳܠܳܐ ܚܛܺܝܿܬ ܠܳܟ ܚܳܐܶܢ ܠܚܰܛܳܝ̈ܶܐ܇

ܚܛܺܝܿܬ ܠܳܟ ܚܳܐܶܢ ܠܚܰܛܳܝ̈ܶܐ܇ ܩܰܒܶܠ ܒܳܥܽܘܬܝ̱ ܒܰܡܪܰܚܡܳܢܽܘܬܳܟ܇ ܡܳܪܝܳܐ ܡܳܪܶܐ܀

ܚܰܛܳܝܳܐ ܐ̱ܢܳܐ ܘܰܡܚܺܝܠܳܐ܇ ܘܪ̈ܰܚܡܰܝܟ ܫܦܺܝܥܺܝܢ܇ ܥܰܠ ܟܽܠ ܕܩܳܪܶܝܢ ܠܳܟ ܡܳܪܝܳܐ ܡܳܪܶܐ܀

ܚܳܐܶܢ ܠܚܰܛܳܝ̈ܶܐ ܒܪ̈ܰܚܡܰܘܗ̱ܝ ܚܽܘܢ ܠܰܐܒܺܝܕܽܘܬܝ̱܇ ܒܝܰܘܡܳܐ ܕܡܶܐܬܺܝܬܳܟ ܡܳܪܝܳܐ܀

ܒܨܰܘܡܳܐ ܙܟܳܐ ܗܘܳܐ ܕܳܢܺܝܐܶܝܠ܇ ܘܰܠܚܰܝܘ̈ܳܬܳܐ ܘܰܠܕܳܐܟܶܠܩܰܪ̈ܨܰܘܗ̱ܝ ܡܳܪܝܳܐ܀

ܒܨܰܘܡܳܐ ܛܠܳܝ̈ܶܐ ܙܟܰܘ ܠܰܢܽܘܪܳܐ܇ ܘܰܐܒܗܶܬܘ̱ ܠܡܰܠܟܳܐ ܘܥܰܡܳܐ ܟܰܠܕܳܝܳܐ ܡܳܪܝܳܐ ܡܳܪܶܐ܀

ܫܽܘܒܚܳܐ ܢܰܣܶܩ ܠܰܡܫܺܝܚܳܐ ܕܨܳܡ ܥܰܠ ܐܰܦܰܝ̈ܢ܇ ܘܦܰܪܩܰܢ ܒܝܰܕ ܨܰܘܡܶܗ ܡܳܪܝܳܐ܀

 

ܐܰܠܳܗܝ̱ ܐܰܠܳܗܝ̱ ܩܳܠܳܐ ܒܪܳܐ ܕܰܫܪܳܐ ܒܡܰܪܒܥܳܐ܇

ܓܰܙܳܐ ܕܢܰܦܫܳܐ ܡܶܬܟܰܢܰܫ ܒܗܳܢܳܐ ܨܰܘܡܳܐ ܩܰܕܺܝܫܳܐ܇ ܙܰܒܢܰܐܗ̱ܘ ܕܰܡܠܶܐ ܚܽܘܣܳܝܳܐ܇ ܠܳܐ ܢܶܗܘܶܐ ܒܶܗ ܚܒܰܢܳܢ̈ܶܐ܇ ܡܒܰܪܰܟ܀

ܠܥܰܡܳܐ ܕܰܐܦܶܩ ܡܶܢ ܡܶܨܪܶܝܢ܇ ܨܰܘܡܳܐ ܦܩܰܕ ܠܶܗ ܠܰܐܠܳܗܳܐ܇ ܕܶܐܬܝܰܥܰܢ ܘܰܐܪܓܶܙ ܝܰܗܒ ܠܶܗ܇ ܡܳܪܝܳܐ ܒܶܣܪܳܐ ܐܰܝܟ ܕܰܟܬܺܝܒ ܡܒܰܪܰܟ܀

ܫܽܘܒܚܳܐ ܠܳܟ ܡܶܢ ܚܰܛܳܝ̈ܶܐ܇ ܕܰܒܪ̈ܰܚܡܰܝܟ ܐܰܫܘܺܝܬ ܐܶܢܽܘܢ܇ ܕܢܶܬܩܪܰܒܽܘܢ ܠܰܬܝܳܒܽܘܬܳܐ܇ ܘܢܶܣܒܽܘܢ ܡܶܢܳܟ ܫܽܘܒܩܳܢܳܐ܀

ܐܳܘ ܦܳܪ̈ܽܘܫܶܐ ܕܶܐܬܡܰܢܰܥܘ̱܇ ܠܰܠܡܺܐܢܳܐ ܕܨܰܘܡܳܐ ܕܰܟܝܳܐ܇ ܐܰܟܡܳܐ ܕܙܳܕܶܩ ܠܨܰܝܳܡ̈ܶܐ܇ ܐܶܬܒܰܕܰܪܘ̱ ܒܶܗ ܬܰܩܢܳܐܺܝܬ܇ ܡܒܰܪܰܟ ܐܰܢ̱ܬ܀

ܩܪܺܝ ܢܒܺܝ̈ܶܐ ܘܰܚܙܺܝ ܫܽܘܦܪ̈ܶܐ܇ ܕܝܳܗܶܒ ܨܰܘܡܳܐ ܠܨܰܝܳܡ̈ܶܐ܇ ܘܶܐܬܟܰܫܰܪܘ̱ ܒܶܗ ܕܰܟܝܳܐܺܝܬ܇ ܘܶܐܬܢܰܩܰܦܘ̱ ܠܶܗ ܙܰܗܝܳܐܺܝܬ܇ ܡܒܰܪܰܟ ܐܰܢ̱ܬ܀

ܟܡܳܐ ܠܰܢ ܦܽܘܡ̈ܶܐ ܕܢܰܘܕܽܘܢ ܠܳܟ܇ ܘܠܳܐ ܣܳܦܩܺܝܢܰܢ ܠܛܰܝܒܽܘܬܳܟ܇ ܚܽܘܢ ܒܺܝܫܽܘܬܰܢ ܒܰܚܢܳܢܳܟ܇ ܘܰܣܥܽܘܪ ܠܰܢ ܐܰܝܟ ܕܰܡܥܳܕ ܐܰܢ̱ܬ ܡܒܰܪܰܟ ܐܰܢ̱ܬ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܒܪܺܝܟ ܕܚܰܕܺܝ ܠܰܫܡܰܝܳܢ̈ܶܐ܇

ܒܪܺܝܟ ܗܽܘ ܕܶܐܬܳܐ ܒܰܚܢܳܢܶܗ܇ ܘܩܰܕܫܰܢ ܒܝܰܕ ܨܰܘܡܶܗ܇ ܫܽܘܒܚܳܐ ܠܶܗ ܕܰܒܝܰܕ ܚܽܘܒܶܗ܇ ܦܰܪܩܰܢ ܡܶܢ ܛܽܘܥܝܰܝ܀

ܚܰܝ̈ܶܐ ܚܰܕ̈ܬܶܐ ܘܒܽܘܣܳܡ̈ܶܐ ܡܠܺܝܟܺܝܢ ܠܨܰܝܳܡ̈ܶܐ܇ ܠܟܽܠܗܽܘܢ ܐܰܝܠܶܝܢ ܕܒܰܫܪܳܪܳܐ܇ ܨܳܝܡܺܝܢ ܓܡܺܝܪܳܐܺܝܬ܀

ܒܨܰܘܡܳܐ ܕܰܟܝܳܐ ܩܰܕܺܝܫܳܐ܇ ܡܰܪܟܰܒܬܳܐ ܕܢܽܘܪܳܐ܇ ܛܶܥܢܰܬ݀ ܘܥܰܠܝܰܬ݀ ܙܰܝܰܚܬܶܗ܇ ܒܰܝܢܳܬ ܪ̈ܽܘܚܳܢܶܐ܀

ܟܽܠ ܨܰܝܳܡܳܐ ܕܨܳܐܶܡ ܠܶܗ܇ ܠܨܰܘܡܶܗ ܕܦܳܪܽܘܩܰܢ܇ ܢܶܪܚܰܩ ܘܢܶܦܣܽܘܩ ܡܶܢ ܠܶܒܶܗ܇ ܡܶܢܟܽܠ ܪ̈ܓܺܝܓܳܬܳܐ܀

ܛܽܘܒ ܠܰܐܝܢܳܐ ܕܰܠܐܺܝ ܘܶܐܬܟܰܫܰܪ܇ ܒܦܽܘܠܚܳܢ ܟܺܐܢܽܘܬܳܐ܇ ܡܶܢ ܨܰܦܪܳܐ ܥܕܰܡܳܐ ܠܪܰܡܫܳܐ܇ ܘܝܳܪܶܬ ܡܰܠܟܽܘܬܳܐ܀

ܥܺܕܬܳܐ ܬܶܣܓܽܘܕܝ̱ ܥܰܡ ܝܰܠܕܶܝ̈ܗܿ܇ ܠܒܽܘܟܪܶܗ ܕܥܶܠܳܝܳܐ܇ ܕܶܐܬܬܰܚܬܺܝ ܘܰܦܪܰܩ ܝܰܠܕܰܝ̈ܗܿ ܒܨܰܘܡܶܗ ܘܡܽܘܟܳܟܶܗ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܫܡܰܝܳܢ̈ܶܐ ܫܽܘܒܳܚܟ ܙܳܡܪܺܝܢ

ܫܽܘܒܚܳܐ ܠܶܗ ܠܗܰܘ ܕܰܐܠܒܶܫ ܠܰܢ܇ ܙܰܝܢܳܐ ܪܰܒܳܐ ܘܚܰܣܺܝܢܳܐ܇ ܫܰܗܪܳܐ ܘܨܰܘܡܳܐ ܘܰܨܠܽܘܬܳܐ܇ ܕܰܒܗܽܘܢ ܢܶܙܟܶܐ ܠܣܳܛܳܢܳܐ܀

ܡܳܪܝ̱ ܥܰܕܰܪܰܝܢܝ̱ ܕܰܡܚܺܝܠ ܐ̱ܢܳܐ܇ ܘܚܰܣܳܐ ܚܰܘ̈ܒܰܝ ܕܣܰܓܺܝ ܚܛܺܝܿܬ܇ ܘܢܰܟܶܦ̈ܝ ܪ̈ܶܓܫܰܝ܇ ܕܢܶܫܬܰܥܒܕܽܘܢ ܠܡܶܪܕܳܐ ܒܽܐܘܪܚܳܐ ܕܦܽܘܩܕܳܢܰܝ̈ܟ܀

ܣܰܢܝ̈ܳܬܝ̱ ܒܙܽܘܦܳܟ ܢܶܬܚܰܘܪ̈ܳܢ܇ ܟܽܘܬܡ̈ܳܬܝ̱ ܒܰܕܡܳܟ ܢܶܬܠܰܚܝ̈ܳܢ܇ ܘܰܒܝܰܕ ܦܰܓܪܳܟ ܢܶܬܩܰܕܫܽܘܢ܇ ܙܰܘܥ̈ܶܐ ܟܣܰܝ̈ܳܐ ܕܰܒܡܰܚܫܒ̈ܳܬܝ̱܀

ܫܒܽܘܩ ܠܺܝ ܫܒܽܘܩܠܺܝ ܚܰܢܳܢܳܐ܇ ܚܰܘܒ̈ܶܐ ܘܰܚܛܳܗ̈ܶܐ ܕܣܶܥܪܶܬ܇ ܘܠܳܐ ܬܶܬܕܟܰܪ ܠܺܝ ܡܪܰܚܡܳܢܳܐ܇ ܕܰܐܢ̱ܬ ܗܽܘ ܒܰܠܚܽܘܕ ܙܰܟܳܝܳܐ܀

ܒܰܕܡܳܐ ܕܰܪܕܳܐ ܡܶܢ ܕܰܦܢܳܟ܇ ܐܰܫܺܝܓ ܟܽܘܬܡ̈ܳܬܳܐ ܕܰܒܢܶܦܫܝ̱܇ ܘܚܰܠܶܠܰܝܢܝ̱ ܒܕܶܡܥ̈ܶܐ ܕܥܰܝ̈ܢܰܝ܇ ܕܰܐܢ̱ܬ ܗܽܘ ܡܚܰܘܰܪ ܟܽܘܬܡ̈ܳܬܳܐ܀

ܡܶܬܟܰܫܰܦ ܐ̱ܢܳܐ ܠܳܟ ܦܳܪܽܘܩܝ̱܇ ܘܒܰܕܡܽܘܬ ܡܳܟܣܳܐ ܘܙܳܢܺܝܬܳܐ܇ ܩܰܒܶܠܰܝܢܝ̱ ܡܳܪܝ̱ ܒܰܚܢܳܢܳܟ܇ ܘܚܰܣܳܐ ܚܰܘ̈ܒܰܝ ܒܛܰܝܒܽܘܬܳܟ܀

 

ܩܳܠܳܐ ܕܨܰܦܪܳܐ ܩܳܠܳܐ ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ

ܕܳܢܺܝܐܶܝܠ ܕܶܐܫܬܰܡܰܗ ܗܘܳܐ܇ ܡܶܢ ܐܰܠܳܗܳܐ ܓܰܒܪܳܐ ܕܪܶܓܬܳܐ܇ ܒܝܰܕ ܨܰܘܡܳܐ ܘܰܨܠܰܘ̈ܳܬܳܐ܇ ܡܶܢ ܛܰܠܝܽܘܬܶܗ ܐܶܬܕܰܪܰܫ܇ ܘܰܙܟܳܐ ܗܘܳܐ ܠܰܐܪ̈ܝܰܘܳܬܳܐ܇ ܒܓܽܘܒܳܐ ܟܰܕ ܢܳܨܰܚ܇ ܘܰܚܢܰܢ ܢܶܬܟܰܫܰܪ܇ ܕܢܶܙܟܶܐ ܠܒܺܝܫܳܐ ܒܰܐܓܽܘܢܳܐ܀

ܐܰܠܳܗܳܐ ܕܰܗܘܳܐ ܐ̱ܢܳܫܳܐ܇ ܡܶܢ ܒܰܪܬ ܐ̱ܢܳܫܳܐ܇ ܒܦܰܓܪܳܐ ܐܶܬܚܙܺܝ ܡܶܠܬܶܗ ܕܰܐܒܳܐ ܕܶܐܬܬܰܚܬܺܝ܇ ܘܰܗܘܳܐ ܡܶܢܰܢ ܐܰܟܘܳܬܰܢ܇ ܘܝܰܗܒ ܠܰܢ ܢܺܝܪܶܗ ܒܰܣܺܝܡܳܐ܇ ܨܰܘܡܳܐ ܕܰܟܝܳܐ ܘܰܨܠܽܘܬܳܐ ܗܰܒܠܰܢ ܦܳܪܽܘܩܰܢ܇ ܕܢܶܫܦܰܪ ܠܳܟ ܐܰܝܟ ܨܶܒܝܳܢܳܟ܀

 

ܐ̱ܚܪܺܢܳܐ ܩܳܠܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝܕ̈ܶܐ

ܒܪܺܝܟ ܪܰܒ ܚܰܝܠܳܐ ܚܰܟܺܝܡܳܐ܇ ܕܚܰܘܺܝ ܒܨܰܘܡܶܗ ܚܠܺܝܨܽܘܬܳܐ܇ ܠܗܰܘ ܕܗܳܐ ܩܪܶܒ ܨܶܝܕ ܝܽܘܠܦܳܢܶܗ܇ ܘܡܶܬܬܰܠܡܰܕ ܠܶܗ ܠܰܣܒܰܪܬܶܗ܇ ܘܰܡܗܰܝܡܶܢ ܕܰܐܳܠܗܰܐܗ̱ܘ܇ ܘܰܒܕܰܐܪܳܐ ܙܟܳܐ ܠܣܳܛܳܢܳܐ܀

ܒܪܺܝܟ ܕܰܒܝܰܕ ܨܰܘܡܶܗ ܚܰܘܺܝ܇ ܒܽܘܩܝܳܐ ܕܩܽܘܫܬܳܐ ܒܰܩܢܽܘܡܶܗ܇ ܕܢܶܙܟܶܐ ܒܶܗ ܠܰܒܥܶܠܕܰܪܳܐ܇ ܘܰܢܛܰܠܶܩ ܒܶܗ ܠܝܰܥܢܽܘܬܳܐ܇ ܘܢܶܩܢܶܐ ܒܶܗ ܫܽܘܦܪܳܐ ܦܰܐܝܳܐ܇ ܗܰܘ ܕܰܐܘܒܶܕܢܰܢ ܒܰܚܛܺܝܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܰܪܒܥܺܝܢ ܝܰܘܡܺܝ̈ܢ ܨܳܡ ܗܘܳܐ ܢܒܺܝܳܐ ܘܠܳܐ ܟܬܺܝܒ ܕܰܟܦܶܢ܇ ܘܡܳܪܶܐ ܢܒܺܝ̈ܶܐ ܒܶܗ ܒܨܶܒܝܳܢܶܗ ܟܦܶܢ ܥܰܠ ܕܰܨܒܳܐ܇ ܨܳܡ ܗܘܳܐ ܘܰܟܦܶܢ ܘܰܐܡܚܶܠ ܘܶܐܬܚܶܒ ܐܰܝܟ ܬܰܚܽܘܒܳܐ܇ ܥܳܦ ܡܶܢ ܟܰܦܢܳܐ ܘܢܳܡ ܡܶܢ ܫܰܗܪܳܐ ܠܰܐܝܳܐ ܕܰܨܒܳܐ܀

ܚܙܳܝܗ̱ܝ ܠܰܡܫܺܝܚܳܐ ܕܰܠܒܰܟ ܨܰܘܡܳܐ ܒܫܽܘܪܳܝ ܕܳܐܪܶܗ܇ ܘܶܐܫܟܰܚ ܥܶܠܬܳܐ܇ ܕܡܶܢܶܗ ܢܺܐܠܰܦ ܥܰܠ ܐܰܬܠܺܝܛܳܐ܇ ܚܙܳܝܗ̱ܝ ܕܰܒܐ̱ܪܳܙܳܐ ܒܕܰܐܪܳܐ ܕܰܐܪܡܺܝ ܡܶܬܚܰܫܰܚ ܗܘܳܐ܇ ܘܙܳܥ ܘܶܐܬܒܰܠܗܺܝ ܘܬܰܟܣܶܗ ܩܶܢܛܳܐ ܕܰܐܠܳܗܽܘܬܳܐ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ

ܐܶܢ ܟܺܐܢ̈ܶܐ ܒܨܰܘܡܳܐ ܕܰܟܝܳܐ ܫܩܰܠܘ̱ ܢܶܨܚܳܢ̈ܶܐ ܘܺܝܪܶܒܘ̱ ܒܰܒܪܺܝܬܳܐ܇ ܟܡܳܐ ܢܶܩܢܽܘܢ ܒܶܗ ܚܰܛܳܝ̈ܶܐ ܓܰܠܝܽܘܬ ܐܰܦ̈ܶܐ܇ ܒܗܰܘ ܝܰܘܡܳܐ ܕܕܳܢܰܚ ܒܽܘܟܪܳܐ܇ ܢܶܬܶܠ ܐܰܓܪܳܐ ܠܟܽܠܗܽܘܢ ܟܰܫܺܝܪ̈ܶܐ܀

ܒܨܰܘܡܳܐ ܕܰܟܝܳܐ ܘܒܰܨܠܽܘܬܳܐ܇ ܐܶܬܢܰܨܰܚ ܗܘܳܐ ܢܒܺܝܳܐ ܕܳܢܺܝܐܶܝܠ܇ ܘܰܣܟܰܪ ܦܽܘܡܳܐ ܕܚܰܝܘ̈ܳܬܳܐ ܒܓܰܘ ܓܽܘܒܳܐ܇ ܘܡܶܛܽܠ ܗܳܕܶܐ܇ ܫܡܶܗ ܢܳܨܰܚ܇ ܒܥܺܕܰܬ ܩܽܘܕܫܳܐ ܒܰܐܪ̈ܒܰܥܦܶܢܝܳܬܳܐ܀

 

ܒܳܥܽܘܬܳܐ ܡܳܪܝ̱ ܒܰܠܰܝ

ܛܽܘܒܰܘܗ̱ܝ ܠܨܰܝܳܡܳܐ܇ ܡܳܐ ܕܕܳܢܰܚ ܡܰܠܟܳܐ܇ ܘܡܶܫܟܰܚ ܠܶܗ ܕܰܠܒܺܝܫ܇ ܠܒܽܘܫܳܐ ܕܡܶܫܬܽܘܬܳܐ܇ ܚܠܳܦ ܨܰܘܡܶܗ ܢܶܣܰܒ ܛܽܘܒܳܐ ܕܠܳܐ ܡܰܘܦܶܝܢ܀

ܗܳܢܰܘ ܓܶܝܪ ܨܰܘܡܳܐ ܕܡܰܘܬܰܪ ܡܰܠܟܽܘܬܳܐ܇ ܐܰܝܢܳܐ ܕܰܚܠܺܝܛ ܒܶܗ܇ ܚܽܘܒܳܐ ܘܙܶܕܩ̈ܳܬܳܐ܇ ܛܽܘܒܰܘܗ̱ܝ ܠܨܰܝܳܡܳܐ܇ ܒܝܰܘܡܶܗ ܕܢܽܘܚܳܡܳܐ܀

 

ܕܦܶܠܓܶܗ ܕܝܰܘܡܳܐ ܩܳܠܳܐ ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ

ܚܙܰܘ ܐܰܚ̈ܰܝ ܕܰܟܡܳܐ ܡܝܰܬܰܪ܇ ܫܰܗܪܳܐ ܨܰܘܡܳܐ ܘܰܨܠܽܘܬܳܐ܇ ܕܨܳܡܶܗ ܡܽܘܫܶܐ ܒܛܽܘܪ ܣܺܝܢܰܝ܇ ܘܶܐܙܕܰܗܺܝ ܗܘܳܐ ܦܰܪܨܽܘܦܶܗ܇ ܘܨܳܡ ܐܺܠܺܝܳܐ ܘܶܐܬܥܰܠܺܝ܇ ܥܰܠ ܡܰܪܟܰܒܬܳܐ ܣܠܶܩ ܗܘܳܐ ܠܰܫܡܰܝܳܐ܀

ܠܨܰܘܡܳܐ ܐܰܚ̈ܰܝ ܒܰܥܒܳܕ̈ܶܐ܇ ܫܰܦܺܝܪ̈ܶܐ ܢܶܬܢܰܩܰܦ ܠܶܗ܇ ܕܟܺܐܢ̈ܶܐ ܘܙܰܕܺܝ̈ܩܶܐ ܨܳܡܽܘܗ̱ܝ܇ ܘܺܝܪܶܬܘ̱ ܚܰܝ̈ܶܐ ܕܰܠܥܳܠܰܡ܇ ܨܳܡܽܘܗ̱ܝ ܫܠܺܝ̈ܚܶܐ ܒܥܶܠܺܝܬܳܐ܇ ܘܩܰܒܶܠܘ̱ ܪܽܘܚܳܐ ܕܩܽܘܕܫܳܐ ܡܶܢ ܪܰܘܡܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܪܓܺܝܓ ܐܰܢ̱ܬ ܨܰܘܡܳܐ ܛܽܘܒܰܘܗ̱ܝ ܠܰܐܝܢܳܐ ܕܶܐܬܢܰܨܰܚ ܒܳܟ܇ ܕܟܽܠܗܽܘܢ ܐ̱ܪ̈ܳܙܶܐ ܘܟܽܠܗܽܘܢ ܛܽܘܦܣ̈ܶܐ ܒܳܟ ܗܽܘ ܫܟܺܝܚܺܝܢ܇ ܡܳܪܰܢ ܐܰܪܒܥܺܝܢ ܘܺܐܝܬ ܠܶܗ ܚܰܡܫܺܝܢ ܥܰܬܺܝܪܳܐܺܝܬ܇ ܕܕܰܐܪܳܐ ܚܺܝܨܳܐ ܘܰܒܫܽܘܠܳܡܶܗ ܩܺܐܪܣܳܐ ܪܰܒܳܐ܀

ܒܗܳܢܳܐ ܙܰܒܢܳܐ ܒܬܽܘ̈ܠܶܐ ܢܨܽܘܡܽܘܢ ܥܰܡ ܩܰܕܺܝܫ̈ܶܐ܇ ܕܒܶܗ ܨܳܐܶܡ ܗܘܳܐ ܒܪܳܗܿ ܕܰܒܬܽܘܠܬܳܐ ܡܶܛܽܠܳܬܰܢ܇ ܒܕܰܪܓܶܗ ܟܽܠ ܐ̱ܢܳܫ ܢܶܛܽܘܪ ܢܰܦܫܶܗ ܡܶܢ ܣܽܘܓܦܳܢ̈ܶܐ܇ ܕܨܰܘܡܳܐ ܕܓܰܘܰܐܗ̱ܘ ܟܽܠ ܐ̱ܢܳܫ ܢܺܐܬܶܐ ܒܫܰܦܺܝܪ̈ܳܬܳܐ܀

 

ܕܰܬܫܰܥܫܳܥܽܝ̈ܢ ܩܳܠܳܐ ܛܽܘܒܰܝܟܝ̱ ܥܺܕܬܳܐ܇

ܕܒܶܝܬ ܚܰܢܰܢܝܳܐ܇ ܒܰܐܬܽܘܢܳܐ ܒܰܐܪܥܳܐ ܕܒܳܒܶܝܠ܇ ܒܨܰܘܡܳܐ ܙܟܰܘ ܠܫܰܠܗܶܒܺܝܬܳܐ܇ ܘܰܐܬܗܰܪܘ̱ ܐܶܢܽܘܢ ܠܒܳܒܠܳܝ̈ܶܐ܇ ܐܳܦ ܕܳܢܺܝܐܶܝܠ ܒܝܰܕ ܨܰܘܡܶܗ ܣܟܰܪ ܦܽܘܡ̈ܶܐ ܕܰܐܪ̈ܝܰܘܳܬܳܐ܇ ܠܨܰܘܡܳܐ ܐܰܚ̈ܰܝ ܢܶܬܢܰܩܰܦ܇ ܘܢܶܬܟܰܫܰܪ ܒܰܬܝܳܒܽܘܬܐ ܕܰܡܦܰܨܶܐ ܠܰܢ ܡܶܢ ܒܺܝܫܳܐ܇ ܘܡܰܘܪܶܬ ܠܰܢ ܡܰܠܟܽܘܬ ܪܰܘܡܳܐ܀

ܨܳܡ ܐܺܠܺܝܳܐ܇ ܨܰܘܡܳܐ ܕܰܟܝܳܐ ܩܰܕܺܝܫܳܐ܇ ܘܰܣܠܶܩ ܗܘܳܐ ܠܛܽܘܪܳܐ ܕܚܺܘܪܺܝܒ ܟܰܕ ܚܙܳܐ ܠܪܳܡܳܐ ܒܰܡܥܰܪܬܳܐ܇ ܘܰܐܩܒܶܠ ܗܘܳܐ ܥܰܠ ܐܺܝܣܪܳܐܺܝܠ܇ ܕܰܐܣܠܺܝ ܟܽܠܗܽܘܢ ܦܽܘܩܕܳܢܰܘ̈ܗܝ܇ ܘܰܒܝܰܕ ܨܰܘܡܶܗ ܐܶܬܢܰܨܰܚ܇ ܘܥܰܠ ܡܰܪܟܰܒܬܳܐ ܐܶܙܕܰܝܰܚ܇ ܘܰܚܢܰܢ ܢܶܫܦܰܪ ܠܰܐܠܳܗܳܐ܇ ܒܝܰܕ ܨܰܘܡܳܐ ܕܡܶܢ ܒܺܝܫ̈ܳܬܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܗܳܢܰܘ ܠܰܡ ܨܰܘܡܳܐ ܕܰܓܒܺܝܿܬ܇ ܙܶܡܪܰܬ݀ ܪܽܘܚܳܐ ܒܰܢܒܺܝ̈ܶܐ܇ ܕܥܰܡ ܨܰܘܡܳܐ ܕܡܶܢ ܡܶܐܟ̈ܠܳܬܳܐ܇ ܢܨܽܘܡ ܐܰܚ̈ܰܝ ܡܶܢ ܒܺܝܫ̈ܳܬܳܐ܀

ܫܽܘܒܚܳܐ ܠܪܳܡܳܐ ܕܶܐܬܬܰܚܬܺܝ܇ ܡܶܢ ܡܶܕܝܳܪ̈ܰܘܗ̱ܝ ܥܶܠܳܝ̈ܶܐ܇ ܘܰܕܪܰܫ ܠܰܢ ܐܽܘܪܚܳܐ ܕܚܰܝ̈ܶܐ܇ ܠܡܰܠܟܽܘܬܳܐ ܫܡܰܝܳܢܺܝܬܳܐ܀

 

ܬܽܘܒ ܕܪܰܡܫܳܐ ܕܰܥܪܽܘܒܬܳܐ ܕܫܰܒܬܳܐ ܩܰܕܡܳܝܬܳܐ ܕܨܰܘܡܳܐ

ܩܰܕܡܳܝܰܬ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܒܪܺܝܟ ܕܚܰܕܺܝ ܠܰܫܡܰܝܳܢ̈ܶܐ

ܐܰܪܥܳܐ ܛܳܒܬܳܐ ܘܫܰܦܺܝܪܬܳܐ܇ ܚܰܘܳܢܝ ܒܰܚܢܳܢܳܟ܇ ܘܙܰܪܥܳܐ ܒܪܺܝܟܳܐ ܕܦܽܘܩܕܳܢܰܝ̈ܟ܇ ܐܰܫܘܰܚ ܒܢܰܦܫ̈ܳܬܰܢ܀

ܡܳܪܶܐ ܟܽܠ ܗܰܒܠܺܝ ܪ̈ܰܚܡܰܝܟ ܕܶܐܗܘܶܐ ܒܓܰܘ ܟܰܪܡܳܟ܇ ܦܳܥܠܳܐ ܛܳܒܳܐ ܘܟܰܫܺܝܪܳܐ܇ ܥܰܡ ܟܺܐܢ̈ܶܐ ܕܪܰܚܡܽܘܟ܀

ܠܳܐ ܢܶܬܕܰܓܰܠ ܫܽܘܘܕܳܝܳܟ ܝܶܫܽܘܥ ܦܳܪܽܘܩܰܢ܇ ܕܰܩܪܰܘ ܘܶܐܢܳܐ ܥܳܢܶܐ ܐ̱ܢܳܐ܇ ܘܩܽܘܫܽܘܢ ܦܳܬܰܚ ܐ̱ܢܳܐ܀

ܡܳܪܶܐ ܟܽܠ ܗܰܒܠܺܝ ܒܪ̈ܰܚܡܰܝܟ܇ ܬܘܳܬ ܢܰܦܫܳܐ ܕܟܺܝܬܳܐ܇ ܘܰܒܝܰܕ ܕܶܡܥ̈ܶܐ ܚܰܠܶܠܰܝܢܝ̱܇ ܪܳܚܶܡ ܬܰܝܳܒ̈ܶܐ܀

ܒܓܰܘ ܨܳܡܰܪܬܳܐ ܕܰܚܛܳܗ̈ܶܐ܇ ܗܳܐ ܡܶܬܢܰܘܰܠ ܐ̱ܢܳܐ܇ ܕܰܠܳܐ ܘܰܐܣܩܳܗܿ ܠܢܰܦܫܝ̱ ܡܳܪܝܳܐ܇ ܡܶܢ ܝܰܡܳܐ ܕܚܰܘ̈ܒܶܐ܀

ܫܽܘܒܚܳܐ ܠܳܟ ܪܳܚܶܡ ܐ̱ܢܳܫܳܐ ܡܩܰܒܶܠ ܬܰܝܳܒ̈ܶܐ܇ ܩܰܒܶܠܰܝܢܝ̱ ܡܳܪܝ̱ ܒܰܚܢܳܢܳܟ܇ ܥܰܒܕܳܐ ܒܰܓܙܳܪܳܐ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܟܰܕ ܩܳܪܶܝܢܰܢ ܠܳܟ ܡܳܪܝܳܐ܇

ܨܽܘܬ ܡܳܪܝܳܐ ܨܠܽܘܬܳܐ ܕܥܰܒܕܰܝ̈ܟ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ ܘܪܰܚܶܡܥܠܰܝܢ܀

ܐܰܝܟ ܕܰܫܡܥܰܬ ܨܰܘܡܳܐ ܕܟܺܐܢ̈ܶܐ܇ ܫܡܰܥ ܡܳܪܝ̱ ܨܰܘܡܰܢ ܘܨܰܠܽܘܬܰܢ ܘܪܰܚܶܡ܀

ܨܰܘܡܳܟ ܪܰܒܳܐ ܕܰܚܠܳܦܰܝܢ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ ܘܪܰܚܶܡ܀

ܒܩ̈ܳܠܶܐ ܕܰܡܠܶܝܢ ܬܰܘܕܺܝܬܳܐ܇ ܡܶܬܟܰܫܦܺܝܢܰܢ ܠܳܟ ܡܳܪܝܳܐ ܘܪܳܚܶܡ܀

ܢܰܦܫܳܐ ܕܶܐܚܕܰܬ݀ ܒܳܟ ܓܰܘܣܳܐ܇ ܬܶܚܙܶܐ ܚܢܳܢܳܟ ܒܶܝܬ ܕܺܝܢܳܐ ܘܪܳܚܶܡ܀

ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ܇ ܠܰܐܒܳܐ ܘܠܰܒܪܳܐ ܘܪܽܘܚ ܩܽܘܕܫܳܐ ܒܟܽܠܥܶܕܳܢܺܝ̈ܢ܀

 

ܩܳܠܳܐ ܕܪܰܡܫܳܐ ܩܳܠܳܐ ܒܰܕܡܽܘܬ ܒܶܣܡ̈ܶܐ

ܗܳܢܰܘ ܨܰܘܡܳܐ܇ ܕܨܳܡ ܗܘܳܐ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܐܶܙܕܰܗܺܝ ܗܘܳܐ ܦܰܪܨܽܘܦܶܗ܇ܘܰܐܒܪܶܩ ܚܶܙܘܶܗ ܒܰܕܡܽܘܬ ܒܰܪܩܳܐ܇ ܘܰܐܚܶܬ ܠܽܘܚ̈ܶܐ܇ ܘܦܽܘܩܕܳܢ̈ܶܐ ܠܒܶܝܬ ܐܺܝܣܪܳܐܶܝܠ܀

ܨܰܘܡܰܢ ܡܳܪܰܢ ܢܗܶܐ ܠܰܢܝܳܚܳܟ܇ ܐܳܦ ܒܳܥܽܘܬܰܢ ܬܶܬܩܰܒܰܠܝ̱ ܩܕܳܡ ܪܰܒܽܘܬܳܟ܇ ܘܰܫܒܽܘܩ ܚܰܘ̈ܒܰܝܢ ܘܚܰܣܳܐ ܚܛܳܗܰܝ̈ܢ܇ ܕܰܐܢ̱ܬ ܗܽܘ ܚܳܐܶܢ ܠܚܰܛܳܝ̈ܶܐ ܡܶܢ ܚܰܘܒܰܝ̈ܗܽܘܢ܀

 

ܐ̱ܚܪܺܢܳܐ ܩܳܠܳܐ ܒܰܥܪܽܘܒܬܳܐ ܒܪܺܝܫܺܝܬ

ܩܰܒܶܠ ܦܳܪܽܘܩܰܢ܇ ܨܰܘܡܰܢ ܒܰܚܢܳܢܳܟ ܘܰܒܣܽܘܓܳܐ ܕܪ̈ܰܚܡܰܝܟ܇ ܐܰܝܟܰܢܳܐ ܕܩܰܒܶܠܬ܇ ܨܰܘܡܳܐ ܘܰܨܠܽܘܬܳܐ ܕܺܐܠܺܝܳܐ ܢܒܺܝܳܐ܇ ܗ ܘ ܗ ܘܶܐܬܪܰܚܰܡܥܠܰܝܢ܀

ܨܳܡ ܡܽܘܫܶܐ ܢܒܺܝܳܐ܇ ܨܰܘܡܳܐ ܩܰܕܺܝܫܳܐ ܘܰܫܦܰܪ ܠܰܐܠܳܗܳܐ܇ ܘܺܐܠܺܝܳܐ ܒܨܰܘܡܶܗ ܡܰܪܟܰܒܬܳܐ ܚܛܰܦܬܶܗ ܘܰܣܠܶܩ ܠܰܫܡܰܝܳܐ ܗ ܘ ܗ܇ ܨܠܽܘܬܶܗ ܬܥܰܕܰܪܝ̱ ܠܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܫܒܺܝܚ ܗܽܘ ܟܠܺܝܠܳܐ ܕܰܒܬܽܘܠܽܘܬܳܐ ܘܩܰܕܺܝܫܽܘܬܳܐ܇ ܘܶܐܢ ܡܶܢ ܚܽܘܒܳܐ ܓܠܺܝܙ ܩܰܕܺܝܫܳܐ ܐܰܝܟ ܓܰܝܳܪܰܐܗ̱ܘ܇ ܪܰܒ ܗܽܘ ܐܰܓܪܶܗ ܕܰܐܝܢܳܐ ܕܩܳܨܶܐ ܠܟܰܦܢܳܐ ܠܰܚܡܶܗ܇ ܘܰܕܠܳܐ ܚܽܘܒܳܐ ܐܶܢ ܩܳܨܶܐ ܠܶܗ ܡܽܘܢ ܝܽܘܬܪܳܢܰܐܗ̱ܘ܀

ܐܰܝܟ ܨܰܝܳܪܳܐ ܡܗܺܝܪܳܐ ܕܪܽܘܚܳܐ ܨܳܪ ܐܶܫܰܥܝܳܐ܇ ܨܰܠܡܳܐ ܠܨܰܘܡܳܐ ܕܟܽܠܶܗ ܒܪܺܝܬܳܐ ܬܶܚܙܶܐ ܫܽܘܦܪܶܗ܇ ܡܶܛܽܠ ܕܰܚܙܳܐ ܕܺܐܝܬ ܗܽܘ ܨܰܘܡܳܐ ܕܠܳܐ ܫܰܦܺܝܪܺܝܢ܇ ܨܳܪܶܗ ܠܗܳܢܳܐ ܒܟܽܠܗܽܘܢ ܓܰܘܢܰܘ̈ܗ̱ܝ ܪܽܘܚܳܢܳܐܺܝܬ܀

 

ܡܥܺܝܪܳܢܳܐ ܕܠܺܠܝܳܐ ܩܳܠܳܐ ܝܳܐܶܐ ܘܙܳܕܶܩ

ܗܳܐ ܒܬܰܪܥܳܟ ܐܳܣܝܳܐ ܕܪ̈ܰܚܡܶܐ ܢܳܩܫܺܝܢ ܟܪ̈ܺܝܗܶܐ ܘܰܐܠܺܝܨ̈ܶܐ܇ ܚܢܳܢܳܟ ܢܩܽܘܡ ܘܰܢܦܰܪܢܶܣ܇ ܒܰܥܨܳܒ̈ܶܐ ܕܰܚܒܳܪ̈ܳܬܰܢ ܫܽܘܒܚܳܐ ܠܳܟ܀

ܦܬܰܚ ܬܰܪܥܳܟ ܠܰܨܠܰܘ̈ܳܬܰܢ܇ ܡܳܪܳܐ ܕܪܰܚܡܽܘܗ̱ܝ ܣܰܓܺܝܐܺܝܢ܇ ܘܦܰܢܳܐ ܒܪ̈ܰܚܡܰܝܟ ܫܶܐܠ̈ܳܬܰܢ܇ ܫܽܘܒܩܳܢܳܐ ܕܰܚܒܳܪ̈ܳܬܰܢ܇ ܫܽܘܒܚܳܐ ܠܳܟ܀

ܦܬܰܚ ܡܳܪܝ̱ ܬܰܪܥܳܟ ܠܰܨܠܽܘܬܰܢ܇ ܐܰܝܟ ܕܠܰܨܠܽܘܬܶܗ ܕܕܳܢܺܝܐܶܝܠ܇ ܕܨܰܠܺܝ ܒܓܽܘܒܳܐ ܘܰܥܢܰܝܬܳܝܗ̱ܝ ܘܡܰܠܰܐܟܳܐ ܢܚܶܬ ܠܰܫܠܳܡܶܗ܇ ܫܽܘܒܚܳܐ܀

ܒܙܶܕܩ̈ܳܬܳܐ ܬܰܘ ܢܶܬܟܰܫܰܪ܇ ܥܰܠ ܡܶܣܟܺܢ̈ܶܐ ܘܚܰܣܺܝܪ̈ܶܐ܇ ܘܰܐܝܢܳܐ ܕܰܓܠܺܝܙ ܡܶܢ ܗܳܢܳܐ܇ ܨܰܘܡܶܗ ܠܳܐ ܡܬܽܘܡ ܡܶܬܩܰܒܰܠ܇ ܫܽܘܒܚܳܐ܀

 

ܩܳܠܳܐ ܕܠܺܠܝܳܐ ܒܩܳܠܳܐ ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܒܝܰܕ ܨܰܘܡܳܐ ܛܠܳܝ̈ܶܐ ܐܶܬܢܰܨܰܚܘ̱܇ ܒܰܐܬܽܘܢܳܐ ܒܰܐܪܥܳܐ ܕܒܳܒܶܝܠ܇ ܘܰܕܠܳܐ ܣܓܶܕܘ̱ ܗ̱ܘܰܘ ܠܰܦܬܰܟܪ̈ܶܐ܇ ܠܳܐ ܐܶܙܕܟܺܝܘ ܡܶܢ ܓܰܘܙܰܠܬܳܐ܇ ܘܰܚܢܰܢ ܢܨܽܘܡ ܡܶܢ ܒܺܝܫ̈ܳܬܳܐ܇ ܘܢܶܬܓܰܘܰܣ ܒܰܬܝܳܒܽܘܬܳܐ܇ ܘܢܶܒܢܶܐ ܢܰܦܫܰܢ ܕܰܣܚܺܝܦܳܐ܇ ܒܥܰܘܠܳܐ ܕܫܰܡܶܫ ܨܶܒܝܳܢܰܢ܇ ܕܗܺܝ ܪܰܒܳܐ ܡܶܢ ܟܽܠ ܡܶܕܶܡ܀

ܛܽܘܒܰܘܗ̱ܝ ܠܰܐܝܢܳܐ ܕܶܐܬܟܰܠܰܠ܇ ܒܫܰܗܪܳܐ ܨܰܘܡܳܐ ܘܰܨܠܽܘܬܳܐ܇ ܕܠܶܗ ܡܶܬܦܰܬܚܳܐ ܡܰܠܟܽܘܬܳܐ܇ ܘܥܰܡ ܩܰܕܺܝܫ̈ܶܐ ܡܶܬܒܰܣܰܡ܇ ܛܽܘܒܰܝܟܽܘܢ ܐܳܘ ܨܰܝܳܡ̈ܶܐ܇ ܐܶܢ ܨܳܝܡܺܝܢ ܐ̱ܢܬܽܘܢ ܕܰܟܝܳܐܺܝܬ܇ ܚܰܕ ܛܽܘܒܳܐ ܕܨܰܘܡܳܐ ܕܰܟܝܳܐ܇ ܘܰܐ̱ܚܪܺܢܳܐ ܕܦܰܓܪܳܐ ܘܰܕܡܳܐ܇ ܕܒܶܗ ܡܶܬܒܰܣܡܺܝܢ ܨܰܝܳܡ̈ܶܐ܀

 

ܣܽܘܓܺܝܬܳܐ ܒܩܳܠܳܐ ܗܳܐ ܩܛܺܝܠ ܗܽܘ ܒܡܶܨܪܶܝܢ ܥܽܘܢܺܝܬܳܐ ܫܽܘܒܚܳܐ ܠܰܡܫܺܝܚܳܐ܇ ܕܶܐܬܳܐ ܠܡܰܘܬܳܐ ܘܩܰܒܶܠ ܥܠܰܘܗ̱ܝ ܨܰܘܡܳܐ ܐܰܝܟ ܒܰܪܢܳܫܳܐ܀

ܐܰܚܠܶܡ ܠܺܝ ܫܽܘܚܢ̈ܰܝ܇ ܡܳܪܝ̱ ܣܰܓܺܝܐܺܝܢ܇ ܕܥܰܬܺܝܪ ܒܶܝܬ ܓܰܙܳܟ ܒܝܰܕ ܚܽܘܠܡܳܢ̈ܶܐ܇ ܦܰܢܳܐ ܠܺܝ ܫܶܐܠ̈ܳܬܝ̱܇ ܕܒܳܟ ܡܳܪܝ̱ ܛܶܦܣܿܶܬ܇ ܘܚܰܣܳܐ ܠܺܝ ܚܰܘܒ̈ܰܝ܇ ܕܰܐܘܕܺܝܿܬ ܒܰܫܡܳܟ܀

ܒܳܟ ܐܶܚܕܶܬ ܓܰܘܣܳܐ ܡܳܪܳܐ ܕܪ̈ܰܚܡܳܐ܇ ܢܺܐܬܶܐ ܥܽܘܕܪܳܢܳܟ ܠܺܐܝܳܠ ܥܰܒܕܳܟ܇ ܩܽܘܫܬܳܟ ܨܶܝܕ ܛܰܠܝܽܘܬܝ̱܇ ܫܪܳܪܳܟ ܒܣܰܝܒܽܘܬܝ̱ ܐܰܫܺܝܓ ܠܺܝ ܨ̈ܳܐܬܳܐ ܕܢܰܦܫܝ̱ ܕܳܘܺܝܬܳܐ܀

ܘܳܝ ܠܺܝ ܒܥܶܕܳܢܳܐ ܕܒܶܗ ܫܳܡܰܥ ܐ̱ܢܳܐ܇ ܩܳܠܳܐ ܕܟܺܐܢܽܘܬܳܐ ܕܢܳܗܡܳܐ ܒܰܐܦܰܝ̈܇ ܘܓܳܙܡܳܐ ܥܠܰܝ ܕܺܝܢܳܐ ܕܦܳܣܺܝܩ̈ܳܬܳܐ܇ ܡܳܪܝ̱ ܘܰܐܠܳܗܝ̱ ܚܰܝܶܠ ܐܳܦ ܥܰܕܰܪܰܝܢܝ̱܀

ܐܰܠܳܗܳܐ ܕܰܢܚܶܬ ܘܰܗܘܳܐ ܐ̱ܢܳܫܳܐ܇ ܕܰܠܐ̱ܢܳܫ̈ܳܐ ܢܰܐܚܶܐ ܒܝܰܕ ܛܰܝܒܽܘܬܶܗ܇ ܠܳܐ ܬܰܗܡܶܐ ܡܶܢܰܢ ܕܠܳܐ ܢܺܐܒܰܕ ܠܰܢ܇ ܘܢܶܚܕܶܐ ܠܰܢ ܒܺܝܫܳܐ ܡܳܐ ܕܚܳܙܶܐ ܠܰܢ܀

ܒܳܟ ܐܶܚܕܶܬ ܓܰܘܣܳܐ ܐܰܠܳܗ ܟܽܠܳܐ܇ ܪܽܘܣ ܥܠܰܝ ܛܰܐܠܳܐ ܕܒܰܣܺܝܡܽܘܬܳܟ܇ ܘܰܐܫܺܝܓ ܚܰܠܶܠܰܝܢܝ̱ ܕܰܡܟܰܬܰܡ ܐ̱ܢܳܐ ܒܰܚܛܳܗ̈ܶܐ ܕܣܶܥܪܶܬ ܒܨܶܒܝܳܢܝ̱ ܪܰܦܝܳܐ܀

ܕܰܒܨܶܒܝܳܢܝ̱ ܚܳܛܶܬ܇ ܡܳܪܝ̱ ܡܰܘܕܶܐ ܐ̱ܢܳܐ ܘܰܚܛܰܗ̈ܰܝ ܕܰܣܓܺܝܘ ܡܶܫܬܰܘܕܰܥ ܐ̱ܢܳܐ܇ ܒܚܽܘܒܳܟ ܕܰܚܠܳܦܰܝܢ ܠܡܰܘܬܳܐ ܐܰܚܬܳܟ܇ ܚܰܣܳܐ ܠܺܝ ܚܰܘܒ̈ܰܝ ܒܝܰܕ ܛܰܝܒܽܘܬܳܟ܀

ܘܳܝܠܶܗ ܠܰܡ ܕܰܐܟܘܳܬܝ̱ ܣܓܺܝܘ ܣܽܘܪ̈ܚܳܢܰܘܗ̱ܝ܇ ܘܰܒܟܶܣܝܳܐ ܛܰܫܺܝ ܘܰܛܡܰܪ ܐܶܢܽܘܢ܇ ܕܬܰܡܳܢ ܡܚܰܘܶܝܢ ܠܶܗ ܐܰܝܟ ܕܰܒܨܶܒܥܳܐ܇ ܟܽܠܢܳܫ ܡܶܬܥܰܩܰܒ ܥܰܠ ܒܽܘܨܳܪ̈ܰܘܗ̱ܝ܀

ܚܰܘܒܰܝ̈ ܘܰܚܛܳܗ̈ܰܝ ܥܫܶܢܘ̱ ܡܶܢ ܝܰܡܳܐ܇ ܘܝܰܘܡ̈ܰܝ ܛܠܶܩܘ̱ ܘܰܐܳܘܦܺܝܘ ܘܰܥܒܰܪ ܘܶܐܙܰܠܘ̱܇ ܘܡܰܛܺܝ ܠܶܗ ܩܶܨܳܐ ܘܠܰܝܬ ܬܝܳܒܽܘܬܳܐ܇ ܘܶܐܢܽܗܘ ܕܠܰܝܬ ܪ̈ܰܚܡܶܐ ܘܳܝ ܡܽܘܢ ܐܶܥܒܶܕ܀

ܠܳܐ ܐܺܝܬ ܒܶܗ ܒܕܺܝܢܳܟ ܡܰܐܣܰܒ ܒܰܐܦ̈ܶܐ܇ ܐܰܝܟ ܕܰܣܥܰܪ ܟܽܠܢܳܫ ܗܳܟܰܢ ܦܳܪܰܥ܇ ܒܗܳܝ ܫܳܥܬܳܐ ܕܚܺܝܠܬܳܐ ܪܰܚܶܡܥܠܰܝ܇ ܘܰܒܝܰܘܡܳܟ ܪܰܒܳܐ ܚܽܘܣ ܥܰܠ ܫܰܦܠܽܘܬܝ̱܀

ܡܰܢܽܘ ܕܠܳܐ ܢܶܕܚܰܠ ܘܰܢܙܽܘܥ ܠܶܒܶܗ܇ ܟܰܕ ܚܳܙܶܐ ܠܐ̱ܢܳܫܳܐ ܡܳܐ ܕܡܶܬܦܰܪܫܺܝܢ܇ ܡܶܢܗܽܘܢ ܠܝܰܡܺܝܢܳܐ ܘܰܠܣܶܡܳܠܳܐ܇ ܡܶܢܽܗܘܢ ܠܡܰܠܟܽܘܬܳܐ ܘܰܠܓܺܗܰܢܳܐ܀

ܢܶܗܘܽܘܢ ܠܳܟ ܩ̈ܳܠܶܐ ܕܰܨܠܰܘ̈ܳܬܰܢ ܩܠܺܝܕ̈ܶܐ ܡܪ̈ܰܥܝܳܢܶܐ ܕܦܳܬܰܚ ܓܰܙܳܟ܇ ܫܦܺܝܥܳܐܗ̱ܝ ܡܰܘܗܰܒܬܳܟ ܥܰܠ ܚܰܛܳܝ̈ܶܐ܇ ܚܽܘܢ ܠܰܢ ܒܛܰܝܒܽܘܬܳܟ ܡܳܪܳܐ ܛܳܒܳܐ܀

ܥܠܰܝܟ ܐܺܝܬܰܘܗ̱ܝ ܬܽܘܟܽܠܳܢܝ̱ ܡܶܢ ܟܰܪܣܶܗ ܕܶܐܡܝ̱܇ ܛܳܒܳܐ ܘܒܰܣܺܝܡܳܐ ܘܰܡܠܶܐ ܪ̈ܰܚܡܶܐ܇ ܒܗܳܢ ܥܳܠܡܳܐ ܕܰܥܒܰܪ ܐܰܢ̱ܬ ܕܰܒܰܪܰܝܢܝ̱܇ ܘܰܒܗܰܘ ܕܠܳܐ ܥܳܒܰܪ ܪܰܚܶܡܥܠܰܝ܀

ܨܒܶܝܢܳܝ̱ ܕܠܳܐ ܨܳܒܶܐ ܢܺܐܬܶܐ ܠܘܳܬܳܟ܇ ܠܨܶܒܝܳܢܳܟ ܐܰܝܬܳܝܗ̱ܝ ܨܳܒܶܐ ܟܽܠܳܐ܇ ܐܰܚܳܐ ܒܨܶܒܝܳܢܳܟ ܐܰܝܟ ܨܶܒܝܳܢܳܟ܇ ܛܰܝܒܽܘܬܳܟ ܬܪܰܚܶܡܝ̱ ܘܰܬܚܣܶܐ ܠܺܝ܀

ܩܰܒܶܠ ܒܰܚܢܳܢܳܟ ܒܳܥܽܘܬܝ̱ ܥܰܒܕܰܝ̈ܟ܇ ܘܫܰܟܶܢ ܠܰܢ ܪ̈ܰܚܡܶܐ ܒܝܽܘܡ ܡܶܐܬܺܝܬܳܟ܇ ܘܚܰܣܳܐ ܠܰܢ ܚܰܘܒܰܝ̈ܢ ܕܰܐܘܕܺܝܢܰܢ ܒܳܟ܇ ܘܢܶܒܗܰܬ ܣܳܛܳܢܳܐ ܕܚܳܙܶܐ ܕܚܰܢܬܳܢ܀

ܪܰܒܗܽܘ ܓܶܝܪ ܥܰܘܠܰܢ ܡܶܢ ܒܳܥܽܘܬܰܢ܇ ܐܳܦ ܥܰܘܠܰܢ ܣܰܓܺܝ ܘܰܦܝܳܣܰܢ ܙܥܽܘܪ܇ ܕܠܳܐ ܐܺܝܬ ܠܰܢ ܡܶܕܶܡ ܕܰܢܩܰܪܶܒ ܠܳܟ܇ ܒܦܰܓܪܳܟ ܡܳܪܝ̱ ܘܰܕܡܳܟ ܚܰܣܳܐ ܚܰܘܒܰܝ̈ܢ܀

ܬܰܘܕܺܝ ܠܒܰܣܺܝܡܳܐ ܕܰܡܣܰܝܒܰܪ ܠܰܢ܇ ܘܝܳܕܰܥ ܕܒܺܝܫܺܝܢܰܢ ܠܳܐ ܡܰܘܒܶܕ ܠܰܢ܇ ܘܰܒܪܳܐ ܙܳܐܶܢ ܠܰܢ ܘܰܡܪܰܛܢܺܝܢܰܢ ܠܶܗ ܫܽܘܒܚܳܐ ܘܠܰܐܒܽܘܗ̱ܝ ܘܰܠܪܽܘܚ ܩܽܘܕܫܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܗܳܐ ܥܶܕܳܢܳܐ ܕܰܒܟܳܬܳܐ܇ ܦܶܠܓܶܗ ܕܠܺܠܝܳܐ ܐܰܝܟ ܕܰܟܬܺܝܒ܇ ܐܰܚ̈ܰܝ ܢܶܬܬܥܺܝܪ ܡܶܢ ܫܶܢܬܐܳ܇ ܕܰܩܪܶܒ ܠܶܗ ܡܳܪܶܐ ܒܰܝܬܳܐ܀

ܟܠܺܝ̈ܠܶܐ ܓܕܺܝܠܺܝܢ ܠܪܽܘܚ ܩܽܘܕܫܳܐ܇ ܘܰܬܠܶܝܢ ܒܰܥܕܶܝܢ ܒܺܐܝܠܳܢ̈ܶܐ܇ ܘܟܽܠ ܐܰܝܢܳܐ ܕܒܰܥܕܶܝܢ ܦܳܐܶܫ܇ ܟܪܽܘܒܳܐ ܣܳܐܶܡ ܠܶܗ ܒܪܺܝܫܶܗ܀

ܫܽܘܒܚܳܐ ܠܛܰܝܒܽܘܬܳܟ ܡܳܪܰܢ܇ ܓܶܕܠܰܬ݀ ܟܠܺܝ̈ܠܶܐ ܠܨܰܝܳܡ̈ܶܐ܇ ܘܠܰܐܒܽܘܟ ܘܰܠܪܽܘܚܳܐ ܕܩܽܘܕܫܳܐ܇ ܬܶܫܒܽܘܚܬܳܐ ܒܟܽܠܥܶܕܳܢܺܝ̈ܢ܀

 

ܕܨܰܦܪܳܐ ܕܪܰܚܶܡܥܠܰܝ ܩܳܠܳܐ ܚܛܺܝܿܬ ܠܳܟ ܚܳܐܶܢ

ܚܛܺܝܿܬ ܒܰܫܡܰܝܳܐ ܘܰܩܕܳܡܰܝܟ܇ ܥܢܺܝܢܝ̱ ܒܰܚܢܳܢܳܟ ܚܳܐܶܢ ܠܚܰܛܳܝ̈ܶܐ܇ ܡܳܪܝܳܐ ܡܳܪܶܐ ܟܽܠ܀

ܒܰܪܶܟ ܟܰܪ̈ܡܶܐ ܘܢܶܨܒ̈ܳܬܳܐ ܕܢܽܗܘܽܘܢ ܦܺܐܪ̈ܶܐ ܠܬܶܫܒܽܘܚܬܳܐ ܕܰܫܡܳܟ ܡܳܪܝܳܐ ܡܳܪܶܐ܀

ܨܰܘܡܳܐ ܙܰܝܢܳܐ ܙܰܟܳܝܳܐ ܕܒܶܗ ܗܽܘ ܙܳܟܶܝܢ܇ ܟܽܠܗܽܘܢ ܨܰܝܳܡ̈ܶܐ ܡܳܪܝܳܐ܀

ܨܰܘܡܳܐ ܕܰܟܝܳܐ ܘܰܨܠܽܘܬܳܐ܇ ܩܰܪܶܒܘ̱ ܟܺܐܢ̈ܶܐ ܠܰܡܪܰܚܡܳܢܽܘܬܳܟ ܡܳܪܝܳܐ܀

ܨܳܡ ܗܘܳܐ ܡܽܘܫܶܐ ܘܶܐܙܕܰܗܺܝ܇ ܨܳܡ ܐܺܠܳܝܳܐ ܘܶܐܬܥܰܠܺܝ ܠܪܰܘܡܳܐ ܡܳܪܝܳܐ܀

 

ܐܰܠܳܗܝ̱ ܐܰܠܳܗܝ̱ ܒܩܳܠܳܐ ܠܳܟ ܡܩܰܕܶܡ ܐ̱ܢܳܐ

ܒܨܰܦܪܳܐ ܠܘܳܬܳܟ ܡܩܰܕܶܡ ܐ̱ܢܳܐ܇ ܪܳܚܶܡ ܐ̱ܢܳܫܳܐ܇ ܘܰܠܘܳܬܳܟ ܗܽܘ ܓܳܥܶܐ ܐ̱ܢܳܐ ܦܳܪܽܘܩܝ̱ ܘܰܐܠܳܗܝ̱܇ ܠܳܐ ܬܰܒܗܶܬܰܝܢܝ̱ ܩܕܳܡ ܒܺܐܝܡܰܐ ܕܺܝܠܳܟ ܕܚܺܝܠܬܳܐ܇ ܐܶܠܳܐ ܚܽܘܣ ܥܠܰܝ ܐܰܢ̱ܬ ܪܳܚܶܡ ܐ̱ܢܳܫܳܐ܀

ܡܫܺܝܚܳܐ ܕܚܰܣܺܝ ܠܶܗ ܠܫܶܡܥܽܘܢ܇ ܘܰܠܚܰܛܳܝܬܳܐ ܘܰܠܓܰܝܳܣܳܐ ܒܰܙܩܺܝܦܳܐ܇ ܘܰܠܗܰܘ ܡܳܟܣܳܐ܇ ܚܰܣܳܐ ܠܥܺܕܬܳܟ ܡܳܪܰܢ܇ ܕܦܰܓܪܳܟ ܘܰܕܡܳܟ ܘܰܐܟܶܠܬܳܗܿ ܘܶܐܬܪܰܚܰܡ ܥܠܶܝܗܿ ܐܰܢ̱ܬ ܪܳܚܶܡ ܐ̱ܢܳܫܳܐ܀

ܝܶܫܽܘܥ ܡܠܶܐ ܪ̈ܰܚܡܶܐ܇ ܕܥܰܠ ܣܕܽܘܡ ܥܒܰܕ ܗܘܳܐ ܪ̈ܰܚܡܶܐ܇ ܡܳܪܳܐ ܕܨܳܡ ܘܰܦܪܽܥ ܚܰܘܒܬܶܗ ܕܥܰܒܕܰܘ̈ܗ̱ܝ ܘܰܐܣܟܠܳܝܗ̱ܝ܇ ܐܰܥܒܰܪ ܡܳܪܳܐ ܡܶܢ ܥܺܕܬܳܟ܇ ܣܶܕܩ̈ܶܐ ܘܚܶܪ̈ܝܳܢܶܐ ܒܺܝܫ̈ܶܐ܀

ܘܰܚܬܽܘܡ ܝܰܠܕܶܝ̈ܗܿ ܡܶܢ ܒܺܝܫܳܐ ܠܡܺܐܢܰܐܗ̱ܘ ܘܒܶܝܬ ܓܰܘܣܳܐ܇ ܨܰܘܡܳܐ ܐܳܘ ܚܰܒܺܝ̈ܒܰܝ܇ ܢܨܽܘܡ ܒܕܰܟܝܽܘܬܳܐ ܕܢܶܥܢܶܝܢ ܗܽܘ ܚܳܐܶܢ ܟܽܠ ܕܢܶܬܶܠ ܒܶܗ ܐܳܦ ܠܰܣܢܺܝܩ̈ܶܐ܇ ܕܢܶܬܚܰܢܰܢ ܒܕܺܝܢܳܐ ܕܟܺܐܢܽܘܬܳܐ ܘܢܶܫܬܘܶܐ ܠܫܽܘܒܩܳܢܳܐ ܕܚܰܘܒ̈ܶܐ ܘܕܰܚܛܳܗ̈ܶܐ܀

 

ܐ̱ܚܪܺܢܳܐ ܩܳܠܳܐ ܢܽܘܗܪܳܐ ܕܡܶܢ ܢܽܘܗܪܳܐ

ܢܽܘܗܪܳܐ ܕܡܶܢ ܢܽܘܗܪܳܐ܇ ܝܶܫܽܘܥ ܢܽܘܗܪܳܐ ܫܰܪܺܝܪܳܐ ܕܰܐܢܗܰܪ ܒܨܰܘܡܶܗ ܠܚܶܫܽܘܟ̈ܶܐ܇ ܘܰܐܦܢܺܝ ܐܶܢܽܘܢ ܠܘܳܬ ܢܽܘܗܪܳܐ܇ ܬܰܘ ܟܽܠ ܥܰܡܡܺܝ̈ܢ܀

ܢܽܘܗܪܳܐ ܫܰܪܺܝܪܳܐ܇ ܕܡܶܢ ܐܰܠܳܗܳܐ ܫܰܪܺܝܪܳܐ܇ ܕܨܳܡ ܒܕܰܒܪܳܐ ܡܶܛܽܠܳܬܰܢ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ܇ ܬܰܘ ܟܽܠ ܥܰܡܡܺܝ̈ܢ܀

ܢܽܘܗܪܳܐ ܒܰܪ ܢܽܘܗܪܳܐ܇ ܕܰܡܫܰܒܚܺܝܢ ܠܳܟ ܒܢ̈ܰܝ ܢܽܘܗܪܳܐ ܠܳܟ ܟܽܠܰܢ ܒܨܰܘܡܳܐ ܢܫܰܒܰܚ܇ ܕܒܶܗ ܦܪܰܩܬܳܢ ܡܶܢ ܛܳܥܝܽܘܬܳܐ܇ ܬܰܘ ܟܽܠ ܥܰܡܡܺܝ̈ܢ܀

 

ܫܡܰܝ̈ܳܐ ܡܶܫܬܰܥܶܝܢ܇ ܒܪܳܐ ܕܰܫܪܳܐ ܒܡܰܪܒܥܳܐ

ܟܰܕ ܐܰܬܩܶܢ ܗܘܳܐ ܦܳܪܽܘܩܰܢ܇ ܐܰܦܰܘ̈ܗ̱ܝ ܕܢܺܐܬܶܐ ܠܰܒܪܺܝܬܳܐ܇ ܨܠܽܘܬܳܐ ܐܰܠܶܦ ܠܬܰܠܡܺܝܕܰܘ̈ܗ̱ܝ܇ ܘܨܰܘܡܳܐ ܚܰܘܺܝ ܒܰܩܢܽܘܡܶܗ܀

ܐܰܠܳܗܳܐ ܡܳܪܶܐ ܕܟܽܠܳܐ܇ ܘܰܡܕܰܒܰܪ ܣܰܘܦܶܝ̈ܗܿ ܕܰܐܪܥܳܐ܇ ܒܳܟ ܢܶܬܦܰܢܝ̈ܳܢ ܫܶܐܠ̈ܳܬܰܢ܇ ܘܢܶܬܢܰܛܪ̈ܳܢ ܒܳܟ ܢܰܦܫ̈ܳܬܰܢ܀

ܨܰܘܡܳܐ ܡܳܪܶܩ ܟܽܠ ܢܰܦܫ̈ܳܬܰܢ܇ ܕܰܢܚܽܘܪ̈ܳܢ ܠܪܰܘܡܳܐ ܕܰܠܥܶܠ܇ ܘܠܰܓܢܺܝܙܳܐ ܒܰܐܬܪܶܗ ܚܳܙܝ̈ܳܢ܇ ܟܰܕ ܪ̈ܳܘܙܳܢ ܟܡܳܐ ܐܶܬܥܰܠܺܝ܇ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܚܠܶܐ ܪܺܝܚܶܗ ܕܨܰܘܡܳܐ ܘܒܰܣܺܝܡ܇ ܘܣܰܓܺܝ ܪܚܺܝܡ ܥܰܠ ܐܰܠܳܗܳܐ܇ ܬܰܘ ܢܶܩܢܶܐ ܒܶܗ ܢܰܦܫ̈ܳܬܰܢ܇ ܕܢܺܐܪܰܬ ܚܰܝ̈ܶܐ ܕܰܠܥܳܠܰܡ܇ ܡܒܰܪܰܟ ܐܰܢ̱ܬ܀

ܡܶܢ ܟܰܪܣܳܐ ܕܶܐܡܝ̱ ܐܰܠܳܗܝ̱ ܐܰܢ̱ܬ܇ ܘܡܶܬܟܰܫܰܦ ܐ̱ܢܳܐ ܠܰܚܢܳܢܳܟ܇ ܠܳܐ ܬܶܫܕܶܝܢܝ̱ ܡܶܢ ܩܕܳܡܰܝܟ܇ ܕܰܚܛܺܝܿܬ ܠܳܟ ܪܰܚܶܡܥܠܰܝ܇ ܡܒܰܪܰܟ܀

 

ܬܽܫܒܽܘܚܬܳܐ ܚܕܰܬܳܐ ܒܩܳܠܳܐ ܥܒܶܕ ܡܳܪܝ̱ ܕܽܘܟܪܳܢܳܐ

ܡܳܪܝ̱ ܪܕܰܝܬܳܢܝ̱ ܒܪ̈ܰܚܡܶܐ ܘܶܐܬܪܕܺܝܿܬ܇ ܘܰܒܣܽܘܓܐܳܐ ܕܰܚܢܳܢܳܟ ܩܢܺܝܢܝ̱܇ ܘܡܶܢ ܬܰܘܫܳܐ ܕܰܚܛܳܗ̈ܶܐ ܩܪܺܝܢܝ̱܇ ܘܒܶܐܡܪ̈ܶܐ ܕܡܶܢ ܝܰܡܺܝܢܳܟ ܡܶܢܺܝܢܝ̱܀

ܒܨܰܘܡܳܐ ܐܰܚ̈ܰܝ ܢܶܬܟܰܫܰܪ ܕܒܶܗ ܢܶܫܬܒܰܩ̈ܳܢ ܚܰܘܒ̈ܳܬܰܢ܇ ܢܶܬܥܰܛܰܦ ܙܰܝܢܳܐ ܓܡܺܝܪܳܐ܇ ܒܝܰܕ ܨܰܘܡ̈ܶܐ ܘܰܨܠܰܘ̈ܳܬܳܐ܀

ܠܳܐ ܐ̱ܢܳܫ ܠܰܒܫܳܗܿ ܠܪܰܦܝܽܘܬܳܐ܇ ܕܠܳܐ ܗܺܝ ܠܚܰܪܬܳܐ ܟܰܐܝܰܪܬܶܗ܇ ܘܠܳܐ ܐ̱ܢܳܫ ܐܰܚܒܳܗܿ ܠܫܰܦܽܝܘܬܳܐ܇ ܕܠܳܐ ܗܺܝ ܠܚܰܪܬܳܐ ܪܰܡܪܰܡܬܶܗ܀

ܠܡܺܐܢܰܐܗ̱ܘ ܨܰܘܡܳܐ ܘܒܶܝܬ ܓܰܘܣܳܐ܇ ܘܶܐܠܦܳܐ ܛܥܺܝܢܰܬ ܝܽܘܬܪ̈ܳܢܶܝܗܿ܇ ܘܡܶܢܶܗ ܣܺܝܡܺܝܢ ܣܺܝܡ̈ܳܬܳܐ ܬܰܐܓܳܪ̈ܶܐ ܪ̈ܽܘܚܳܢܳܝܶܐ܀

ܨܰܘܡܶܗ ܕܰܒܪܳܐ ܢܽܘܚܳܡܰܐܗ̱ܘ܇ ܘܒܶܗ ܡܶܬܢܰܚܡܺܝܢ ܚܽܘܫܳܒܰܝ̈ܢ܇ ܡܶܢ ܡܺܝܬܽܘܬܳܐ ܕܰܚܛܺܝܬܳܐ܇ ܒܪܺܝܟ ܨܰܘܡܳܟ ܕܰܗܘܳܐ ܚܠܳܦܰܝܢ܀

ܫܽܘܒܚܳܐ ܠܳܟ ܕܶܢܚܳܐ ܓܢܺܝܙܳܐ܇ ܘܨܶܡܚܳܐ ܫܒܺܝܚܳܐ ܕܺܐܝܬܽܘܬܳܐ܇ ܕܡܶܢ ܛܳܥܝܽܘܬܳܐ ܕܰܚܛܺܝܬܳܐ܇ ܒܨܰܘܡܳܟ ܕܰܚܠܳܦܰܝܢ ܦܪܰܩܬܳܢ܀

 

ܩܳܠܳܐ ܕܨܰܦܪܳܐ ܩܳܠܳܐ ܣܳܗܕ̈ܶܐ ܗ̱ܘܰܘ ܦܺܝܪ̈ܡܶܐ

ܐܰܪܒܥܺܝܢ ܝܰܘ̈ܡܳܬܳܐ܇ ܨܳܡ ܗܘܳܐ ܡܫܺܝܚܳܐ ܦܳܪܽܘܩܰܢ ܡܶܛܽܠ ܦܽܘܪܩܳܢܶܗ ܕܓܶܢܣܰܢ܇ ܕܢܦܶܪܽܘܩ ܠܳܐܕܳܡ ܘܰܠܝܰܠܕܰܘ̈ܗ̱ܝ ܕܢܶܒܗܰܬ ܒܺܝܫܳܐ ܕܰܠܗܽܘܢ ܙܳܟܶܐ܇ ܗ ܫܽܘܒܚܳܐ ܠܶܗ ܕܶܐܬܳܐ ܘܦܰܪܩܰܢ ܡܶܢ ܫܽܘܥܒܳܕܶܗ ܕܣܳܛܳܢܳܐ܀

ܨܳܡ ܗܘܳܐ ܕܳܢܺܝܐܶܝܠ܇ ܘܰܙܟܳܐ ܗܘܳܐ ܠܰܐܪ̈ܝܰܘܳܬܳܐ܇ ܒܓܽܘܒܳܐ ܚܰܪܒܳܐ ܕܒܶܗ ܐܶܫܬܕܺܝ܇ ܘܡܶܢ ܓܰܘ ܐܰܬܽܘܢܳܐ܇ ܢܦܰܩܘ̱ ܛܠܳܝ̈ܶܐ ܕܒܶܝܬ ܚܰܢܰܢܝܳܐ܇ ܘܡܶܢ ܓܰܘ ܝܰܡܳܐ ܣܠܶܩ ܝܰܘܢܳܢ܇ ܗ ܘܠܰܢ ܦܰܨܳܐ ܠܰܢ ܡܶܢ ܒܺܝܫܳܐ ܝܶܫܽܘܥ ܦܳܪܽܘܩܶܗ ܕܥܳܠܡܳܐ܀

 

ܐ̱ܚܪܺܢܳܐ ܩܳܠܳܐ ܒܗܰܘ ܨܰܦܪܳܐ ܪܰܒܳܐ

ܒܨܰܘܡܳܐ ܘܒܰܨܠܽܘܬܳܐ ܘܒܰܥܒܳܕ̈ܶܐ ܛܳܒ̈ܶܐ܇ ܘܰܒܚܽܘܒܳܐ ܡܫܰܡܠܝܳܐ ܡܶܬܪܰܥܶܐ ܡܳܪܝܳܐ܇ ܘܰܐܝܢܳܐ ܕܪܳܕܶܐ ܒܗܽܘܢ ܡܳܪܝܳܐ ܪܳܚܶܡ ܠܶܗ܇ ܘܝܳܪܶܬ ܡܰܠܟܽܘܬܳܐ ܘܚܰܝ̈ܶܐ ܕܠܳܐ ܥܳܒܪܺܝܢ ܗ ܘܰܓܢܽܘܢ ܚܰܕܘ̈ܳܬܳܐ ܘܚܰܝ̈ܶܐ ܕܠܳܐ ܦܳܛܪܺܝܢ܀

ܒܨܰܘܡܳܐ ܘܒܰܨܠܽܘܬܳܐ ܢܺܝܢܘܶܐ ܐܶܬܦܰܪܩܰܬ݀܇ ܛܽܘܒܰܘܗ̱ܝ ܠܕܶܐܬܟܰܫܰܪ ܒܨܰܘܡܳܐ ܘܒܰܨܠܽܘܬܳܐ܇ ܕܨܰܘܡܳܐ ܘܰܨܠܽܘܬܳܐ ܙܰܝܢܰܐܗ̱ܘ ܙܰܟܳܝܳܐ܇ ܕܠܳܐ ܡܶܫܟܰܚ ܒܺܝܫܳܐ ܩܳܪܶܒ ܨܶܝܕ ܘܰܥܕܶܗ܇ ܗ ܒܪ̈ܰܚܡܰܝܟ ܦܰܨܳܐ ܠܰܢ ܡܶܢ ܒܺܝܫܳܐ ܘܚܰܝܠܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܳܐ ܡܶܣܟܺܢ̈ܶܐ ܒܫܽܘܩ̈ܶܐ ܫܠܺܝܚܺܝܢ ܐܰܝܟ ܚܰܝܘ̈ܳܬܳܐ܇ ܬܰܡܳܢ ܠܒܺܫܺܝܢ ܠܒܽܘܫ̈ܶܐ ܦܰܐܝ̈ܳܐ ܒܶܝܬ ܡܰܠܟܽܘܬܳܐ܇ ܘܣܳܣܳܐ ܒܡܳܐܢ̈ܶܐ ܢܰܦܺܝܠ ܒܳܪܶܡ ܒܶܝܬ ܥܰܬܺܝܪ̈ܶܐ܇ ܕܢܶܗܘܽܘܢ ܝܰܥܢܶܝܢ ܚܰܪܡܶܝܢ ܘܰܫܠܶܝܢ ܡܶܢ ܛܳܒ̈ܳܬܳܐ܀

ܠܳܟ ܬܶܫܒܽܘܚܬܳܐ ܐܳܘ ܥܰܬܺܝܪܳܐ ܕܰܠܟܽܠ ܡܰܥܬܰܪ܇ ܕܟܽܠܡܰܢ ܕܰܩܢܳܟ ܐܶܫܟܰܚ ܥܽܘܬܪܳܐ ܕܠܳܐ ܡܶܬܚܰܠܰܨ ܒܳܟ ܡܳܪܝ̱ ܢܶܥܬܰܪ ܘܡܶܢ ܓܺܗܰܢܳܐ ܒܳܟ ܢܶܫܬܰܘܙܰܒ܇ ܘܢܰܘܕܶܐ ܠܰܫܡܳܟ ܘܢܶܣܓܽܘܕ ܠܰܐܒܽܘܟ ܘܰܠܪܽܘܚܩܽܘܕܫܳܐ܀

 

ܕܰܬܠܳܬܫܳܥܺܝ̈ܢ܇ ܩܳܠܳܐ ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ

ܨܰܘܡܳܐ ܕܰܟܝܳܐ ܩܰܕܺܝܫܳܐ ܨܳܡ ܕܳܢܺܝܐܶܝܠ܇ ܒܓܽܘܒܳܐ ܕܚܰܝܘ̈ܳܬܳܐ܇ ܡܶܢ ܚܽܘܒܳܠܳܐ ܐܶܫܬܰܘܙܰܒ܇ ܘܰܣܠܶܩ ܡܶܢܶܗ ܙܰܟܳܝܳܐ܇ ܘܰܚܢܰܢ ܢܨܽܘܡ ܡܶܢ ܒܽܝܫ̈ܳܬܳܐ܇ ܕܡܳܪܰܢ ܢܰܫܘܰܝܢ ܠܰܓܢܽܘܢ ܚܰܕܘ̈ܳܬܳܐ܀

ܨܳܡ ܗܘܳܐ ܡܽܘܫܶܐ ܘܶܐܙܕܰܗܺܝ܇ ܨܳܡ ܐܺܠܺܝܳܐ ܘܶܐܬܥܰܠܺܝ ܠܪܰܘܡܳܐ܇ ܗܰܒܠܰܢ ܡܳܪܰܢ ܕܰܒܨܰܘܡܳܐ܇ ܐܰܝܟ ܐܺܠܺܝܳܐ ܢܶܬܥܰܠܶܐ܇ ܘܢܶܙܕܰܗܶܐ ܐܰܝܟ ܒܰܪ ܥܰܡܪܰܡ܇ ܢܶܗܘܶܐ ܙܡܺܝܢ̈ܶܐ ܠܰܓܢܽܘܢ ܚܰܕܘ̈ܳܬܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܣܳܦܶܩ ܗܽܘ ܠܶܗ ܠܨܰܝܳܡܳܐ܇ ܕܢܶܗܘܶܐ ܛܡܺܝܪ ܒܶܗ ܥܽܘܗܕܳܢܳܟ܇ ܘܰܚܠܳܦ ܛܥܽܘܡ̈ܶܐ ܢܶܬܬܰܪܣܶܐ ܡܶܢ ܗܶܪ̈ܓܶܐ ܕܰܒܢܳܡܽܘܣܰܝ̈ܟ܀

ܫܽܘܒܚܳܐ ܠܳܟ ܕܰܐܢ̱ܬ ܗܽܘ ܫܶܩܝܳܐ܇ ܘܠܰܐܒܽܘܟ ܘܠܳܟ ܘܪܽܘܚܳܟ ܫܽܘܒܚܳܐ܇ ܘܰܥܠܰܝܢ ܪ̈ܰܚܡܶܐ ܘܰܚܢܳܢܳܐ܀

 

ܕܦܶܠܓܶܗ ܕܝܰܘܡܳܐ

ܒܩܳܠܳܐ ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ

ܚܙܰܘ ܣܳܗܕ̈ܶܐ ܠܶܐܠܦܳܐ ܕܰܛܥܺܝܢܳܐ ܘܥܳܐܠܳܐ ܫܰܗܪܳܐ ܘܨܰܘܡܳܐ ܘܰܨܠܽܘܬܳܐ ܘܗܰܝܡܳܢܽܘܬܳܐ܇ ܥܶܠܰܬ݀ ܘܰܫܪܳܬ݀ ܘܶܐܬܬܢܺܝܚܰܬ݀܇ ܒܓܰܘ ܠܡܺܐܢܳܐ܇ ܘܚܰܕܺܝ ܡܰܠܟܳܐ ܡܫܺܝܚܳܐ ܕܟܰܠܶܠ ܐܶܢܽܘܢ܀

ܐܰܫܘܳܢ ܡܳܪܝ̱ ܕܰܢܨܽܘܡ ܨܰܘܡܳܐ ܩܰܕܺܝܫܳܐ܇ ܐܰܝܟ ܒܰܪ ܥܰܡܪܰܡ ܕܶܐܙܕܰܗܺܝ ܗܘܳܐ ܦܰܪܨܽܘܦܶܗ܇ ܘܰܐܝܟ ܕܩܰܒܶܠܬ ܨܰܘܡܳܐ ܕܺܐܠܺܝܳܐ ܢܒܺܝܳܐ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ ܪܳܚܶܡ ܐ̱ܢܳܫܳܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܒܨܰܘܡܳܐ ܡܶܙܕܗܝܳܐ ܢܰܦܫܳܐ ܘܫܳܡܶܢܳܐ ܠܳܗܿ܇ ܘܒܶܗ ܣܳܠܩܳܐ ܟܽܠܫܳܥ܇ ܠܪܰܘܡܳܐ ܕܒܶܝܬ ܐܰܒܳܐ܇ ܚܳܙܝܳܐ ܠܒܳܪܽܘܝܳܐ܇ ܐܰܝܟ ܕܳܐܦ ܚܙܳܝܗ̱ܝ ܡܽܘܫܶܐ܀

ܠܘܰܪ̈ܕܶܐ ܘܫܽܘܫܰܢ̈ܶܐ܇ ܕܳܡܶܝܢ ܨܰܝܳܡ̈ܶܐ܇ ܘܣܳܠܩܺܝܢ ܘܡܶܬܥܰܠܶܝܢ܇ ܠܪܰܘܡܳܐ ܕܰܫܡܰܝܳܐ܇ ܛܽܘܒܰܘܗ̱ܝ ܠܡܰܢ ܕܰܫܘܳܐ ܠܰܐܬܪܳܐ ܕܥܳܠܺܝܢ ܠܶܗ܀

 

ܕܰܬܫܰܥܫܳܥܺܝ̈ܢ ܩܳܠܳܐ ܩܽܘܩܳܝܳܐ

ܛܽܘܒ ܠܰܐܝܢܳܐ ܕܡܰܟܶܟ ܢܰܦܫܶܗ ܒܨܽܘܡܳܐ ܕܰܟܝܳܐ ܐܰܝܟ ܕܰܘܺܝܕ ܡܰܠܟܳܐ ܟܺܐܢܳܐ ܘܰܢܒܺܝܳܐ ܡܫܰܒܚܳܐ܇ ܕܶܐܬܕܟܰܪ ܡܳܪܝܳܐ ܒܠܺܠܝܳܐ ܘܒܺܐܝܡܳܡܳܐ܇ ܘܠܳܐ ܥܒܰܕ ܥܰܘܠܳܐ ܘܗܰܠܶܟ ܒܽܐܘܪ̈ܚܳܬܶܗ܇ ܘܰܐܪܺܝܡ ܐܺܝܕܰܘ̈ܗ̱ܝ ܕܰܟܝܳܐܺܝܬ ܠܥܶܠ ܒܰܫܡܰܝܳܐ܇ ܘܒܰܙܡܺܝܪ̈ܳܬܶܗ ܘܶܐܬܗܰܓܺܝ ܐܺܝܡܳܡܳܐ ܘܠܺܠܝܳܐ ܗ ܘ ܗ܀

ܛܽܘܒܰܘܗ̱ܝ ܠܰܐܝܳܢܐ ܕܰܒܚܽܘܒܳܐ ܨܳܐܶܡ ܠܶܗ ܠܨܰܘܡܳܐ܇ ܕܥܰܡ ܪ̈ܽܘܚܳܢܶܐ ܡܶܬܒܰܣܰܡ ܒܚܰܝ̈ܶܐ ܕܠܳܐ ܥܳܒܪܺܝܢ܇ ܘܶܐܢܗܽܘ ܕܺܐܝܬ ܒܶܗ ܒܨܰܘܡܳܐ ܙܶܕܩ̈ܳܬܳܐ܇ ܛܳܒ ܝܰܬܺܝܪܳܐ ܡܶܬܢܰܨܰܚ ܫܽܘܦܪܶܗ܇ ܘܒܰܕܡܽܘܬ ܪ̈ܽܘܚܳܢܶܐ ܗܳܘܶܐ ܥܰܡܗܽܘܢ ܡܶܬܚܰܠܰܛ܇ ܒܡܰܠܟܽܘܬܳܐ ܗܳܝ ܕܰܫܡܰܝܳܐ ܕܠܳܐ ܣܳܟ ܡܶܫܬܰܪܝܳܐ܇ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܰܠܳܗ ܟܽܠܳܐ ܕܰܒܨܰܘܡܶܗ ܐܶܬܕܰܡܺܝ ܠܰܒܢܰܝ̈ܢܳܫܳܐ܇ ܗܰܒܠܰܢ ܕܢܶܬܕܰܡܶܐ ܒܨܰܘܡܰܢ܇ ܠܥܺܝܪ̈ܶܐ ܥܳܡܪ̈ܰܝ ܒܰܫܡܰܝܳܐ܀

ܛܽܘܒܰܘܗ̱ܝ ܠܰܐܝܢܳܐ ܕܰܒܨܰܘܡܳܐ ܘܒܰܨܠܽܘܬܳܐ ܗܘܳܐ ܥܶܢܝܳܢܶܗ܇ ܕܰܢܛܺܝܪ ܟܠܺܝܠܶܗ ܒܰܡܪ̈ܰܘܡܶܐ ܘܥܰܡ ܡܰܠܰܐܟ̈ܶܐ ܦܽܘܪܥܳܢܶܗ܀

 

ܫܠܶܡ ܒܥܽܘܕܪܳܢ ܡܳܪܰܢ ܫܰܒܬܳܐ ܩܰܕܺܝܫܬܳܐ

 

ܬܽܘܒ ܛܶܟܣܳܐ ܕܥܰܠ ܡܳܪܝ̱ ܐܰܦܪܶܝܡ ܡܰܠܦܳܢܳܐ ܣܽܘܪܝܳܝܳܐ ܘܡܳܪܝ̱ ܬܶܐܘܳܕܳܘܪܳܘܣ ܣܳܗܕܳܐ܇

ܗܳܘܶܐ ܕܽܘܟܪܳܢܗܽܘܢ ܝܽܘܡ ܫܰܒܬܳܐ ܩܰܕܡܳܝܬܳܐ ܕܨܰܘܡܳܐ ܕܰܐܪܒܥܺܝܢ ܘܕܽܘܟܪܳܢܳܐ ܐ̱ܚܪܺܝܳܐ ܝܚ ܒܰܚܙܺܝܪܳܢ܇

ܩܳܠܳܐ ܥܶܢܝܳܢܳܐ ܕܪܰܚܶܡ ܥܠܰܝ ܩܳܠܳܐ ܐܶܡܳܐ ܕܟܺܝܬܳܐ

ܒܝܽܘܡ ܕܽܘܟܪܳܢܳܟ ܓܰܒܝܳܐ ܡܳܪܝ̱ ܐܰܦܪܶܝܡ܇ ܚܳܕܝܳܐ ܥܺܕܬܳܐ ܥܰܡ ܟܽܠܗܽܘܢ ܝܰܠܕܶܝ̈ܗܿ ܪܰܚܶܡ܀

ܐܳܘ ܡܰܠܦܳܢܳܐ ܕܳܐܪܬܳܕܽܘܟܣܺܝܰܐ ܒܝܰܕ ܝܽܘܠܦܳܢܰܝ̈ܟ܇ ܥܺܕܬܳܐ ܡܶܬܪܰܡܪܡܳܐ܇ ܪܰܚܶܡ܀

ܒܪܺܝܟ ܗܽܘ ܡܫܺܝܚܳܐ܇ ܕܰܓܒܳܟ ܘܰܗܘܰܝܬ ܠܶܗ܇ ܡܳܐܢܳܐ ܓܰܒܝܳܐ ܘܡܰܠܦܳܢܳܐ ܒܚܺܝܪܳܐ܇ ܪܰܚܶܡ܀

ܛܽܘܒܰܝܟ ܣܳܗܕܳܐ ܡܳܪܝ̱ ܬܶܐܘܳܕܳܘܪܳܘܣ܇ ܕܰܐܟܶܣܬ ܠܡܰܠܟܳܐ ܛܪܽܘܢܳܐ ܝܽܘܠܝܰܢܶܐ ܪܰܚܶܡ܀

ܫܽܘܒܚܳܐ ܠܰܐܒܳܐ ܕܝܰܩܪܳܟ ܘܗܽܘ ܐܰܘܪܒܳܟ܇ ܘܢܰܨܚܳܟ ܘܥܰܒܕܳܟ ܡܳܐܢܳܐ ܠܺܐܝܩܳܪܶܗ܇ ܨܠܽܘܬܳܟ ܫܽܘܪܳܐ܀

 

ܕܡܳܪܳܝܐ ܩܪܺܝܬܳܟ ܒܩܳܠܳܐ ܨܠܺܝ ܡܳܪܝܳܐ ܒܪ̈ܰܚܡܶܐ

ܒܪܺܝܟ ܗܽܘ ܕܰܓܒܳܟ ܡܳܪܝ̱ ܐܰܦܪܶܝܡ܇ ܕܬܶܗܘܶܐ ܠܶܗ ܢܰܘܣܳܐ ܕܰܟܝܳܐ܇ ܘܰܡܠܳܟ ܪܽܘܚܳܐ ܩܰܕܺܝܫܳܐ܇ ܘܒܶܗ ܦܰܪܣܺܝܬ ܠܟܽܠ ܐܶܪ̈ܶܣܺܝܣ܀

ܡܽܘܫܶܐ ܒܝܰܕ ܡܰܟܺܝܟܽܘܬܶܗ܇ ܐܰܚܶܬ ܦܽܘܩܕܳܢ̈ܶܐ ܠܥܰܡܳܐ܇ ܘܰܐܢ̱ܬ ܡܳܪܝ̱ ܐܰܦܪܶܝܡ܇ ܒܚܶܟܡܬܳܟ܇ ܠܥܺܕܬܳܐ ܡܠܰܝܬ ܡܰܠܦܳܢܽܘܬܳܐ܀

ܟܶܢܫܰܢ ܕܩܰܒܶܠ ܝܽܘܠܦܳܢܳܟ܇ ܕܢܶܬܒܰܪܰܟ ܒܰܨܠܘ̈ܰܬܳܟ܇ ܘܥܺܕܬܳܐ ܕܙܳܡܪܳܐ ܩܽܘܠܣܳܝ̈ܰܟ܇ ܫܰܝܢܶܗ ܕܡܳܪܳܟ ܢܕܰܝܰܪ ܒܳܗܿ܀

ܟܡܳܐ ܐܶܫܬܰܢܰܩܬ ܡܳܪܝ̱ ܐܰܦܪܶܝܡ܇ ܒܳܟܰܦܢܳܐ ܘܨܰܗܝܳܐ ܘܰܒܫܰܗܝܳܐ܇ ܒܰܨܠܰܘ̈ܳܬܳܟ ܢܶܬܦܰܨܶܐ ܡܶܢ ܬܰܫܢܺܝܩ̈ܶܐ ܕܓܺܗܰܢܳܐ܀

ܠܰܐܦܟܺܝܛܰܐ ܡܕܺܝܢ̱ܬܳܐ ܬܰܠܡܶܕܬ܇ ܬܶܐܘܳܕܳܘܪܳܘܣ ܢܰܨܺܝܚܳܐ ܘܩܰܛܶܠܬ ܒܳܗܿ ܠܗܰܘ ܬܰܢܺܝܢܳܐ܇ ܘܰܬܗܰܪܘ̱ ܟܶܢܫ̈ܶܐ ܒܰܚܙܳܬܶܗ܀

ܒܪܺܝܟ ܗܽܘ ܕܝܰܗܒܠܰܢ ܙܳܟܽܘܬܳܐ܇ ܢܰܨܺܝܚܳܐ ܬܶܐܘܳܕܳܘܪܳܘܣ܇ ܘܰܐܒܗܶܬܬ ܠܡܰܠܟܳܐ ܝܽܘܠܝܰܢܳܘܣ ܘܰܒܣܳܗܕܽܘܬܳܐ ܐܶܬܟܰܠܠܰܬ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܡܫܺܝܚܳܐ ܢܰܛܰܪܶܝܗܿ ܠܥܺܕܬܳܟ

ܠܳܟ ܬܶܫܒܽܘܚܬܳܐ ܐܰܠܳܗܳܐ܇ ܬܠܺܝܬܳܝܳܐ ܘܰܠܚܽܘܕܳܝܳܐ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܇ ܚܰܕ ܨܶܒܝܳܢܳܐ ܘܰܟܝܳܢܳܐ܇ ܠܳܐ ܝܺܠܺܝܕܳܐ ܘܺܝܠܺܝܕܳܐ܇ ܐܳܦ ܢܳܦܽܘܩܳܐ ܘܡܰܒܽܘܥ ܛܳܒ̈ܳܬܳܐ܇ ܬܠܺܝܬܳܝܽܘܬܳܐ ܩܰܕܺܝܫܬܳܐ ܐܺܝܬܝܳܝܬܳܐ ܘܰܡܬܽܘܡܳܝܬܳܐ܇  ݉ ܡܳܪܝܳܐ ܣܓܺܝܕ ܡܶܢ ܟܽܠ܇ ܚܰܝܶܠ ܠܥܰܒܕܰܝ̈ܟ ܕܰܢܝܰܩܪܽܘܢ܇ ܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ܇ ܕܰܐܒܽܘܢ ܚܰܣܝܳܐ ܡܳܐܢܳܐ ܓܰܒܝܳܐ ܡܳܪܝ̱ ܐܰܦܪܶܝܡ܀

ܝܰܠܕܳܐ ܘܡܶܠܬܳܐ ܡܬܽܘܡܳܝܳܐ܇ ܕܰܐܒܳܐ ܓܢܺܝܙܳܐ ܕܠܳܐ ܫܽܘܪܳܝ܇ ܕܶܢܚܳܐ ܘܢܽܘܗܪܳܐ ܐܳܦ ܛܰܒܥܳܐ ܘܝܽܘܩܢܳܐ ܘܚܳܬܡܳܐ ܕܠܳܐ ܫܽܘܚܠܳܦ܇ ܐܶܡܪܳܐ ܘܕܶܒܚܳܐ ܘܪܺܝܫܟܳܗ̈ܢܳܐ܇ ܗܰܘ ܕܒܰܪܺܝܫܺܝܬ ܐܺܝܬܰܘܗ̱ܝ ܥܰܡ ܐܰܒܽܘܗ̱ܝ܇ ܝܳܗܶܒ ܦܽܘܪܥܳܢ ܙܰܕܺܝ̈ܩܶܐ܇ ܘܰܡܝܰܩܰܪ ܝܽܘܡ ܕܽܘܟܪܳܢܗܽܘܢ܇  ݉ ܗܰܒܠܰܢ ܦܳܪܽܘܩܰܢ܇ ܫܽܘܒܩܳܢ ܚܰܘܒ̈ܶܐ ܘܰܚܛܳܗ̈ܶܐ܇ ܒܝܰܘܡܳܐ ܫܒܺܝܚܳܐ ܕܕܽܘܟܪܳܢܶܗ܇ ܕܰܐܒܽܘܢ ܙܰܗܝܳܐ܇ ܪܰܒ ܒܰܡܠܦܳܢ̈ܶܐ ܡܳܪܝ̱ ܐܰܦܪܶܝܡ܀

 

ܐ̱ܚܪܺܢܳܐ ܒܩܳܠܳܐ ܛܽܘܒܰܝܟܝ̱ ܥܺܕܬܳܐ

ܡܳܪܝܳܐ ܕܶܐܡܰܪ܇ ܠܰܐܒܪܳܗܳܡ ܕܦܽܘܩ ܡܶܢ ܐܰܪܥܳܟ܇ ܘܩܽܘܡ ܬܳܐ ܠܰܐܪܥܳܐ ܕܶܐܚܰܘܝܳܟ܇ ܘܰܠܗܳܝ ܐܰܪܥܳܐ ܕܡܽܘܠܟܳܢܳܐ܇ ܐܰܥܒܰܪ ܐܰܝܬܺܝ ܘܝܰܗܒܳܗܿ ܠܶܗ܇ ܝܳܪܬܽܘܬܳܐ ܠܶܗ ܘܰܠܙܪܰܥܶܗ܇ ܗܽܘ ܓܒܳܐ ܘܰܐܦܶܩ ܠܡܳܪܝ̱ ܐܰܦܪܶܝܡ܇ ܡܶܢ ܟܽܘܡܪܽܘܬܳܐ ܕܚܰܢܦܽܘܬܳܐ܇ ܘܰܠܥܺܕܰܬ ܩܽܘܕܫܳܐ ܐܺܝܬܶܝܗܿ܇ ܘܰܐܩܺܝܡܶܗ ܒܳܗܿ ܥܰܡܽܘܕܳܐ܀

ܡܽܘܫܶܐ ܪܰܒܳܐ܇ ܟܰܕ ܐܶܙܰܠ ܗܘܳܐ ܡܶܢ ܡܶܨܪܶܝܢ ܠܘܳܬ ܝܰܬܪܽܘܢ ܟܽܘܡܪܳܐ ܕܡܶܕܝܰܢ܇ ܗܘܳܐ ܠܶܗ ܪܳܥܝܳܐ ܘܥܰܠܠܳܢܳܐ܇ ܥܕܰܡܳܐ ܕܠܶܗ ܐܶܬܓܠܺܝ ܡܳܪܝܳܐ܇ ܘܥܰܒܕܶܗ ܪܺܝܫܳܐ ܠܺܐܝܣܪܳܐܶܝܠ܇ ܠܳܟ ܕܶܝܢ ܐܰܒܽܘܢ ܡܳܪܝ̱ ܐܰܦܪܶܝܡ܇ ܐܰܠܳܗܳܐ ܒܪ̈ܰܚܡܰܘܗ̱ܝ ܗܰܕܺܝ܇ ܠܘܳܬ ܪܺܝܫܟܳܗ̈ܢܶܐ ܡܳܪܝ̱ ܝܰܥܩܽܘܒ ܨܠܽܘܬܟܽܘܢ ܫܽܘܪܳܐ ܬܶܗܘܶܐ ܠܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܳܘ ܫܳܡܽܘܥ̈ܶܐ ܒܚܽܘܒܳܐ ܪܰܒܳܐ ܫܡܰܥܘ̱ ܬܰܫܥܺܝܬܶܗ܇ ܕܰܐܦܪܶܝܡ ܪܰܒܳܐ ܡܠܶܐ ܢܶܨܚܳܢ̈ܶܐ ܕܓܰܢ̱ܒܳܪܽܘܬܳܐ܇ ܣܢܺܐܓܪܳܐ ܕܩܽܘܫܬܳܐ ܕܰܗܘܳܐ ܦܽܘܡܳܐ ܠܗܰܝܡܳܢܽܘܬܳܐ܇ ܘܒܶܗ ܐܶܬܡܰܠܰܠ ܫܪܳܪܳܐ ܓܰܠܝܳܐ ܒܩܳܠܳܐ ܪܳܡܳܐ܇ ܢܶܒܥܳܐ ܒܪܺܝܟܳܐ ܕܡܰܝ̈ܳܐ ܚܰܠܝ̈ܳܐ ܕܰܐܪܕܺܝ ܒܰܐܪܥܳܐ܇ ܘܒܶܗ ܐܶܬܪܰܒܺܝ ܥܳܒܳܐ ܓܰܒܝܳܐ ܕܗܰܝܡܳܢܽܘܬܳܐ܀

ܦܳܥܠܳܐ ܕܩܽܘܫܬܳܐ ܕܫܰܪܺܝ ܘܫܰܠܶܡ ܟܰܫܺܝܪܳܐܺܝܬ܇ ܘܚܰܘܺܝ ܒܢܰܦܫܶܗ ܥܒܳܕ̈ܶܐ ܘܡ̈ܶܠܶܐ ܣܽܘܥܪܳܢܳܐܺܝܬ܇ ܐܰܪܕܺܝܟܠܳܐ ܗܘܳܐ ܥܰܠ ܫܶܬܶܐܣܬܳܐ ܕܰܫܪܳܪܳܐ ܒܢܳܐ܇ ܘܚܰܬܶܡ ܕܽܘܡܣܰܘ̈ܗ̱ܝ ܒܕܰܗܒܳܐ ܘܟܺܐܦ̈ܶܐ ܝܰܩܺܝܪ̈ܳܬܳܐ܇ ܪܰܒܳܐ ܕܩܽܘܫܬܳܐ ܕܰܥܒܰܕ ܘܰܐܠܶܦ ܐܰܝܟܰܢ ܕܰܟܬܺܝܒ܇ ܘܰܠܬܰܠܡܺܝܕܰܘ̈ܗ̱ܝ ܨܳܪ ܕܶܡܘ̈ܳܬܶܗ ܕܢܶܬܕܰܡܽܘܢ ܒܶܗ܀

 

ܡܥܺܝܪܳܢܳܐ ܕܠܺܠܝܳܐ ܩܳܠܳܐ ܝܳܐܶܐ ܘܙܳܕܶܩ

ܢܶܬܬܥܺܝܪ ܐܰܚ̈ܰܝ ܡܶܢ ܫܶܢܬܳܐ܇ ܘܢܶܙܡܰܪ ܫܽܘܒܚܳܐ ܒܕܽܘܟܪܳܢܶܗ܇ ܕܰܐܒܳܐ ܒܪܺܝܟܳܐ ܡܳܪܝ̱ ܐܰܦܪܶܝܡ܇ ܡܰܠܦܳܢܳܐ ܕܫܰܪܺܝܪ̈ܳܬܳܐ ܫܽܘܒܚܳܐ܀

ܠܳܐ ܬܶܫܠܶܐ ܐܰܒܳܐ ܒܰܪܺܝܟܳܐ܇ ܡܶܢ ܗܳܝ ܕܰܬܦܺܝܣ ܠܰܐܠܳܗܳܐ܇ ܕܰܫܪܳܪܳܐ ܕܡܰܠܦܳܢܽܘܬܳܟ܇ ܒܥܺܕܰܬ ܩܽܘܕܫܳܐ ܢܶܬܡܰܠܰܠ܇ ܫܽܘܒܚܳܐ܀

ܒܥܺܝ ܚܠܳܦܰܝܢ ܐܳܘ ܡܳܪܝ̱ ܐܰܦܪܶܝܡ܇ ܕܰܒܫܰܝܢܳܐ ܘܚܽܘܒܳܐ ܕܡܶܢܳܟ܇ ܢܶܬܒܰܣܰܡ ܟܽܠܝܽܘܡ ܡܶܢܶܗ܇ ܕܛܰܝܒܽܘܬܳܐ ܕܶܐܫܬܰܟܢܰܬ݀ ܠܳܟ܇ ܫܽܘܒܚܳܐ܀

ܒܗܳܢܳܐ ܝܰܘܡܳܐ ܕܕܽܘܟܪܳܢܳܟ܇ ܡܶܙܕܰܝܰܚ ܡܳܪܝ̱ ܬܶܐܘܳܕܳܘܪܳܘܣ܇ ܐܰܦܺܝܣ ܘܰܒܥܺܝ ܡܶܢ ܡܳܪܳܟ܇ ܕܢܰܫܪܶܐ ܫܰܝܢܶܗ ܘܰܫܠܳܡܶܗ܇ ܒܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܀

ܢܶܙܡܰܪ ܫܽܘܒܚܳܐ ܒܕܽܘܟܪܳܢܳܟ܇ ܣܳܗܕܳܐ ܡܳܪܝ̱ ܬܶܐܘܳܕܳܘܪܳܘܣ܇ ܠܡܳܪܝܳܐ ܕܝܰܗܒ ܠܳܟ ܙܳܟܽܘܬܳܐ܇ ܟܰܠܠܳܟ ܒܰܟܠܺܝܠܳܐ ܕܫܽܘܒܚܳܐ܇ ܫܽܘܒܚܳܐ܀

 

ܩܰܘܡܳܐ ܩܰܕܡܳܝܳܐ ܕܠܺܠܝܳܐ܇

ܒܩܳܠܳܐ ܒܟܽܠܡܶܕܶܡ ܐܶܬܒܰܩܺܝܿܬ܇

ܢܒܺܝܳܐ ܕܬܶܗܪܳܐ ܚܰܙܩܺܝܐܶܝܠ܇ ܒܫܽܘܘܟܳܢ̈ܶܐ ܕܪܽܘܚܳܐ ܩܰܒܶܠ܇ ܒܳܟܶܪܟܳܐ ܚܰܠܝܳܐ ܕܳܐܟܶܠ ܗܘܳܐ܇ ܘܰܗܘܳܐ ܠܶܗ ܒܰܕܡܽܘܬ ܕܶܒܫܳܐ ܒܦܽܘܡܶܗ ܕܰܢܒܺܝܳܐ܇ ܘܰܡܠܶܐ ܗܘܳܐ ܟܰܪܣܶܗ ܘܰܡܥܰܘ̈ܗ̱ܝ ܡܶܢܳܗܿ ܕܡܰܘܗܰܒܬܳܐ܇ ܐܰܢ̱ܬ ܕܶܝܢ ܓܰܒܝܳܐ ܡܳܪܝ̱ ܐܰܦܪܶܝܡ܇ ܒܳܗܿ ܒܰܕܡܽܘܬܳܐ ܐܰܟܘܳܬܶܗ܇ ܡܶܢܳܗܿ ܕܛܰܝܒܽܘܬܳܐ ܩܰܒܶܠܬ܇ ܫܽܘܘܟܳܢ̈ܶܐ ܕܡܰܠܦܳܢܽܘܬܳܐ܇ ܘܥܺܕܬܳܐ ܗܳܐ ܒܳܣܡܳܐ ܟܽܠܝܽܘܡ ܒܝܽܘܠܦܳܢܳܟ܀

ܒܰܕܡܽܘܬ ܛܽܘܦܣܳܐ ܕܰܓܦܶܬܳܐ܇ ܦܺܐܝܬܳܐ ܗܕܺܝܪܬܳܐ ܘܫܰܦܺܝܪܬܳܐ܇ ܘܰܕܡܰܠܝܳܐ ܣܓܽܘ̈ܠܶܐ ܘܛܽܘܛܝ̈ܳܬܳܐ ܕܒܽܘܪܟܬܳܐ܇ ܨܳܪ ܚܰܘܺܝ ܠܺܝ ܐܰܠܳܗܳܐ ܓܰܒܝܳܐ ܡܳܪܝ̱ ܐܰܦܪܶܝܡ܇ ܡܰܘܗܰܒܬܳܐ ܕܡܰܠܦܳܢܽܘܬܳܐ ܕܠܳܟ ܗܽܘ ܐܶܫܬܰܟܢܰܬ݀܇  ܕܺܐܝܬ ܗܘܳܐ ܒܳܗܿ ܪܶܒܽܘ ܡܺܐܡܪ̈ܶܐ܇ ܘܪܶܒܽܘ ܪ̈ܶܒܘܳܢ ܡܰܕܪ̈ܳܫܶܐ܇ ܒܥܺܝ ܕܶܝܢ ܚܠܳܦܰܝܢ ܐܳܘ ܐܰܒܽܘܢ܇ ܕܰܒܫܰܝܢܳܐ ܘܚܽܘܒܳܐ ܕܡܶܢܳܟ܇ ܟܽܠ ܝܽܘܡ ܢܶܬܒܰܣܰܡ ܡܶܢܳܗܿ ܕܛܰܝܒܽܘܬܳܐ܀

 

ܡܰܕܪܳܫܳܐ ܩܳܠܳܐ ܐܰܦܢܳܐ ܕܶܝܢ ܘܶܐܫܬܰܥܶܐ ܠܟܽܘܢ ܥܶܢܝܳܢܳܐ ܠܳܟ ܫܽܘܒܚܳܐ ܡܶܢܟܽܠ ܦܽܘܡܺܝ̈ܢ ܡܳܪܶܐ ܕܟܺܐܢ̈ܶܐ ܘܙܰܕܺܝ̈ܩܶܐ܇

ܐܰܫܘܳܢ ܡܳܪܰܢ ܕܶܐܙܡܰܪ ܠܳܟ܇ ܫܽܘܒܚܳܐ ܒܕܽܘܟܪܳܢ ܚܰܒܺܝܒܳܟ܇ ܩܰܕܺܝܫܳܐ ܥܛܺܝܦ ܙܳܟܽܘܬܳܐ܇ ܓܰܒܝܳܐ ܪܰܒܳܐ ܡܳܪܝ̱ ܐܰܦܪܶܝܡ܇ ܕܡܶܢ ܓܰܘ ܟܰܪܣܳܐ ܩܰܕܶܫܬܳܝܗ̱ܝ܇ ܐܰܝܟ ܐܶܪܰܡܝܳܐ ܘܰܫܡܽܘܐܶܝܠ܇ ܗܳܢܳܐ ܕܰܗܘܳܐ ܟܶܢܳܪܳܐ ܠܪܽܘܚܳܐ ܕܩܽܘܕܫܳܐ܇ ܘܙܶܡܪܰܬ݀ ܩ̈ܳܠܶܐ ܚܠܰܝ̈ܳܐ ܘܗܰܢܺܝ̈ܐܶܐ܇ ܘܗܳܐ ܥܺܕ̈ܳܬܳܐ ܘܕܰܝܪ̈ܳܬܳܐ܇ ܡܶܬܒܰܣܡ̈ܳܢ ܡܶܢ ܩܺܝܢ̈ܳܬܶܗ܀

ܠܽܐܘܪܗܳܝ ܟܰܪܟܳܐ ܐܶܫܬܰܕܰܪ܇ ܡܶܢ ܐܰܠܳܗܳܐ ܗܰܘ ܓܰܒܝܳܐ܇ ܟܰܕ ܠܳܘܝܳܐ ܠܶܗ ܛܰܝܒܽܘܬܳܐ ܕܕܰܐܪܳܐ ܢܶܥܒܶܕ ܥܰܡ ܒܺܝܫܳܐ܇ ܕܒܰܚܣܳܡܶܗ ܐܰܒܰܥ ܗܘܳܐ ܒܶܗ ܫܒܰܥ ܐܶܪ̈ܶܣܺܝܣ ܛܳܥܝ̈ܳܬܳܐ܇ ܕܡܰܐܢܺܝ ܫܳܢܝܳܐ ܘܰܕܡܰܪܩܺܝܽܘܢ ܡܰܪܳܚܳܐ܇ ܘܰܕܛܰܥܝܳܐ ܐܰܪܡܰܐܢܺܝܽܘܣ ܘܰܕܗܰܘ ܠܺܝܛܳܐ ܒܰܪ ܕܰܝܨܳܢ܇ ܗܳܢܳܐ ܕܰܐܡܪܰܚ ܘܰܓܒܰܠ ܗܘܳܐ܇ ܡܺܐܡܪ̈ܶܐ ܣܰܓܺܝ ܘܡܰܕܪ̈ܳܫܶܐ܀

ܬܰܘ ܨܽܘܬܰܘ̱ ܘܰܫܡܰܥܘ̱ ܦܳܪ̈ܽܘܫܶܐ܇ ܘܕܽܘܢܘ̱ ܒܰܝܢܳܬܰܢ ܟܺܐܢܳܐܺܝܬ܇ ܗܳܠܶܝܢ ܐܶܡܰܪ ܡܰܠܦܳܢܳܐ܇ ܓܰܒܝܳܐ ܘܪܰܒܳܐ ܘܡܳܪܝ̱ ܐܰܦܪܶܝܡ܇ ܡܶܛܽܠ ܣܰܟܠܳܐ ܒܰܪܕܰܝܨܳܢ܇ ܟܰܕ ܨܳܒܶܐ ܕܢܶܕܪܽܘܫ ܥܰܡܶܗ܇ ܡܶܛܽܠ ܩܽܘܫܬܳܐ ܘܰܫܪܳܪܳܐ ܕܨܶܝܕ ܡܰܢ ܐܺܝܬܰܘܗ̱ܝ܇ ܘܰܐܝܢܳܐ ܕܰܐܚܺܝܕ ܠܰܫܪܳܪܳܐ܇ ܡܶܢ ܣܰܓܺܝ̈ܐܶܐ ܡܶܬܩܰܠܰܣ܇ ܐܰܝܢܳܐ ܕܺܐܝܬܰܘܗ̱ܝ ܒܰܛܺܝܠܳܐ܇ ܡܶܢ ܣܰܓܺܝ̈ܐܶܐ ܢܶܬܟܰܐܐܰܪ܀

ܒܳܬܰܪ ܬܰܪܥܺܝܬܐܳ ܗܳܕܶܐ܇ ܕܒܰܪܕܰܝܨܳܢ ܥܰܡ ܕܠܶܓܝܽܘܢܰܘ̈ܗ̱ܝ܇ ܦܬܰܚ ܦܽܘܡܶܗ ܕܪܽܘܚܳܐ ܒܚܰܝܠܳܐ܇ ܐܰܦܪܶܝܡ ܢܶܒܥܳܐ ܕܚܰܠܝܽܘܬܳܐ܇ ܣܳܡ ܒܰܡܨܰܥܬܳܐ ܫܳܡܽܘܥ̈ܶܐ܇ ܕܢܶܦܽܘܩ ܕܺܝܢܳܐ ܕܟܺܐܢܽܘܬܳܐ܇ ܘܰܩܕܳܡܰܝܗܽܘܢ ܚܰܝܳܒܶܗ ܗܘܳܐ܇ ܐܰܦܪܶܝܡ ܓܰܒܝܳܐ܇ ܠܒܰܪܕܰܝܨܳܢ ܥܰܡ ܡܰܫܪܺܝܬܶܗ ܘܰܠܡܰܪܳܚܳܐ ܡܰܪܩܺܝܽܘܢ܇ ܚܳܒ ܠܶܗ ܓܰܒܝܳܐ ܕܣܶܡܳܠܳܐ ܘܢܰܨܰܚ ܓܰܒܳܐ ܕܝܰܡܺܝܢܳܐ܀

ܘܶܐܠܳܐ ܬܰܘܕܶܐ ܒܰܫܪܳܪܳܐ܇ ܕܰܓܠܶܐ ܘܢܰܗܺܝܪ ܐܰܝܟ ܫܶܡܫܳܐ܇ ܗܳܦܶܟ ܐ̱ܢܳܐ ܡܫܰܐܶܠ ܐ̱ܢܳܐ ܠܳܟ ܦܰܢܳܐ ܠܺܝ ܐܶܢ ܝܳܕܰܥ ܐܰܢ̱ܬ܇ ܕܰܠܡܳܐ ܟܰܝ ܡܶܬܪܰܥܶܐ ܐܰܢ̱ܬ܇ ܥܰܠ ܒܺܝܫܳܐ ܕܗܽܘܝܽܘ ܩܰܕܺܝܡ܇ ܘܥܰܠܗܳܕܶܐ ܦܶܪܥܶܬ ܠܶܗ ܒܡܰܪܳܚܽܘܬܳܝ̱܇ ܥܰܠ ܕܪܳܓܳܐ ܠܳܟ ܙܳܢܝܽܘܬܳܐ ܘܰܪܚܺܝܡܳܐ ܥܠܰܝܟ ܐܰܝܟ ܫܺܐܕܳܐ܇ ܠܳܐ ܡܶܣܬܰܟܰܠܬ ܡܶܢ ܡܶܠ̈ܰܝ̈ܟ܇ ܡܶܬܚܰܙܝܳܐ ܚܰܝܳܒܽܘܬܳܟ܀

ܟܶܪܟܳܐ ܗܰܘ ܕܶܐܬܺܝܗܶܒ ܠܶܗ܇ ܡܶܢ ܐܰܠܳܗܳܐ ܒܓܶܠܝܳܢܳܐ܇ ܠܣܳܒܳܐ ܙܰܗܝܳܐ ܘܢܰܨܺܝܚܳܐ܇ ܪܰܒܳܐ ܘܓܰܒܝܳܐ ܡܳܪܝ̱ ܐܰܦܪܶܝܡ܇ ܕܰܟܬܺܝܒ ܗܘܳܐ ܒܰܬܪܶܝܢ ܣܶܛܪ̈ܰܘܗ̱ܝ܇ ܠܗܳܕܶܐ ܚܰܘܺܝ ܓܰܠܝܳܐܺܝܬ܇ ܠܫܽܘܘܟܳܢܳܐ ܕܡܰܠܦܳܢܽܘܬܳܐ ܐܰܠܳܗܳܐܝܬܳܐ܇ ܕܝܰܗܒ ܠܶܗ ܪܽܘܚܳܐ ܗܰܘ ܕܒܶܗ ܢܶܓܠܶܐ ܓܢܺܝܙ̈ܳܬܳܐ ܘܥܰܡܺܝܩ̈ܳܬܳܐ܇ ܕܺܐܝܬ ܒܰܟܬܳܒ̈ܶܐ ܩܰܕܺܝܫ̈ܶܐ܇ ܘܰܢܚܰܘܶܐ ܠܥܺܕܰܬ ܩܽܘܕܫܳܐ܀

 

ܩܽܘܡ ܦܰܘܠܳܘܣ ܩܳܠܳܐ ܬܶܫܒܽܘܚܬܳܐ ܠܡܳܪܳܟ ܒܕܽܘܟܪܳܢܳܟ܇ ܢܰܨܺܝܚܳܐ ܘܓܰܒܝܳܐ ܡܳܪܝ̱ ܐܰܦܪܶܝܡ

ܟܰܕ ܫܰܕܪܶܗ ܡܳܪܶܗ ܠܓܰܘ ܐܽܘܪܗܳܝ܇ ܠܢܰܨܺܝܚܳܐ ܘܓܰܒܝܳܐ ܡܳܪܝ̱ ܐܰܦܪܶܝܡ܇ ܕܥܰܡ ܒܺܝܫܳܐ ܢܰܩܪܶܒ ܘܢܶܬܟܰܬܰܫ܇ ܚܠܳܦ ܥܺܕܬܳܐ ܕܦܰܪܩܶܗ ܒܰܨܠܺܝܒܶܗ܇ ܘܗܳܟܰܢ ܦܰܩܕܶܗ ܗܘܳܐ܇ ܘܙܰܗܪܶܗ ܟܰܕ ܐܳܡܰܪ܇ ܐܰܥܺܝܪ ܚܽܘܫܳܒܰܝ̈ܟ܇ ܘܟܰܢܶܫ ܪܶܥܝܳܢܳܟ܇ ܕܗܳܐ ܒܺܝܫܳܐ ܛܰܝܶܒ ܠܶܓܝܽܘܢܰܘ̈ܗ̱ܝ܇ ܒܓܰܘ ܐܽܘܪܗܳܝ ܕܥܰܡܳܟ ܢܶܬܟܰܬܫܽܘܢ܀

ܗܳܝ ܪܽܘܚܳܐ ܕܫܽܘܩܪܳܐ ܘܒܽܝܫܽܘܬܳܐ܇ ܕܰܪܕܰܦ ܗܘܳܐ ܕܰܘܺܝܕ ܡܶܢ ܫܳܐܳܘܳܠ܇ ܘܗܳܝ ܪܽܘܚܳܐ ܕܟܽܠܳܗܿ ܛܰܐܡܽܘܬܳܐ܇ ܘܚܰܢܦܽܘܬܳܐ ܕܟܽܠܳܗܿ ܫܓܺܝܫܽܘܬܳܐ܇ ܟܽܠܗܶܝܢ ܒܫܰܘܝܽܘܬܳܐ܇ ܠܽܐܘܪܗܳܝ ܕܒܶܝܬ ܢܰܗܪ̈ܺܝܢ܇ ܐܰܫܩܶܠܝ̱ ܒܚܰܕܽܘܬܳܐ܇ ܒܡܶܠܟܶܗ ܕܣܳܛܳܢܳܐ܇ ܘܕܳܨ ܒܺܝܫܳܐ ܒܣܶܕܪ̈ܰܘܗ̱ܝ ܕܣܰܓܺܝܐܺܝܢ܇ ܘܰܠܚܺܝܡܺܝܢ ܘܰܢܩܶܝܢ ܠܣܽܘܓܦܳܢ̈ܶܐ܀

ܚܙܳܐ ܐܰܦܪܶܝܡ ܠܒܺܝܫܳܐ ܘܠܶܓܝܽܘܢܰܘ̈ܗ̱ܝ܇ ܕܣܰܓܺܝܐܺܝܢ ܡܶܢܶܗ ܕܡܶܢܝܳܢܳܐ܇ ܘܰܡܣܰܟܶܝܢ ܘܚܳܝܪܺܝܢ ܘܰܠܗܺܝܩܺܝܢ܇ ܕܠܶܐܡܰܬܝ̱ ܟܰܝ ܢܶܚܽܘܬ ܠܰܩܪܳܒܳܐ܇ ܢܚܰܦܽܘܢ ܒܥܰܡܛܳܢܳܐ܇ ܠܢܰܦܫܶܗ ܕܢܰܨܺܝܚܳܐ܇ ܘܓܶܐܪ̈ܶܐ ܘܠܽܘܠܝ̈ܳܬܳܐ܇ ܣܰܝܦ̈ܶܐ ܥܰܡ ܢܰܝܙܟ̈ܶܐ܇ ܢܫܰܡܪܽܘܢ ܥܠܰܘܗ̱ܝ ܟܽܠܗܽܘܢ ܕܠܳܐ ܚܰܘܣܳܢ܇ ܘܰܢܛܰܠܩܽܘܢ ܚܰܝܰܘ̈ܗ̱ܝ ܐܶܢ ܡܰܨܝܳܐ܀

ܐܰܝܟ ܐܰܪܝܳܐ ܕܢܳܗܶܡ ܠܰܬܒܳܪܳܐ܇ ܕܢܰܥܕܶܐ ܠܶܗ ܓܶܙܪܳܐ ܠܡܶܐܟܽܘܠܬܳܐ܇ ܗܳܟܰܢܳܐ ܢܗܰܡ ܗܘܳܐ ܡܳܪܝ̱ ܐܰܦܪܶܝܡ܇ ܥܰܠ ܒܺܝܫܳܐ ܘܟܽܠܗܽܘܢ ܠܶܓܝܽܘܢܰܘ̈ܗ̱ܝ܇ ܘܰܢܣܰܒ ܫܩܰܠ ܥܰܡܶܗ܇ ܪܽܘܚ ܓܰܢ̱ܒܳܪܽܘܬܳܐ܇ ܘܪܽܘܚܳܐ ܕܺܝܕܰܥܬܳܐ܇ ܘܕܕܶܚܠܰܬ ܐܰܠܳܗܳܐ܇ ܒܝܰܕ ܪܽܘܚ̈ܶܐ ܗܳܠܶܝܢ ܕܶܐܡܰܪܢܰܢ܇ ܙܟܳܐ ܐܰܦܪܶܝܡ ܘܚܰܝܒܶܗ ܠܣܳܛܳܢܳܐ܀

ܒܕܶܡܘ̈ܳܬܳܐ ܕܰܒܗܶܝܢ ܚܳܒ ܐܳܕܳܡ܇ ܘܶܐܫܬܰܦܰܠ ܘܰܢܦܰܠ ܡܶܢ ܪܰܘܡܶܗ܇ ܒܗܶܝܢ ܐܰܩܪܶܒ ܐܰܦܪܶܝܡ ܥܰܡ ܒܺܝܫܳܐ܇ ܘܰܙܟܳܝܗ̱ܝ ܗܘܳܐ ܘܡܰܟܟܶܗ ܠܫܽܘܒܗܳܪܶܗ܇ ܨܠܺܝܒܳܐ ܚܠܳܦ ܩܰܝܣܳܐ܆ ܦܺܐܪܳܐ ܚܠܳܦ ܦܺܐܪܳܐ܇ ܘܨܰܘܡܳܐ ܚܠܳܦ ܐܽܘܟܠܳܐ܇ ܘܡܰܪܝܰܡ ܚܠܳܦ ܚܰܘܳܐ܇ ܘܗܰܘ ܦܺܐܪܳܐ ܕܰܕܢܰܚ ܡܶܢ ܡܰܪܝܰܡ܇ ܒܶܗ ܐܳܕܳܡ ܘܝܰܠܕܰܘ̈ܗ̱ܝ ܩܢܰܘ ܚܰܝ̈ܶܐ܀

 

ܣܽܘܓܺܝܬܳܐ ܗܳܝ ܕܰܐܡܪܳܗܿ ܡܳܪܝ̱ ܐܰܦܪܶܝܡ ܥܰܠ ܢܰܦܫܶܗ: ܚܽܘܬܰܘ̱ ܐܰܚ̈ܰܝ ܪ̈ܫܺܝܡܶܐ܇

ܟܶܦܢܶܬ ܟܡܳܐ ܙܰܒܢܺܝ̈ܢ܇ ܕܰܟܝܳܢܝ̱ ܬܳܒܰܥ ܗܘܳܐ܇ ܘܶܐܬܟܺܠܝܬ ܘܠܳܐ ܐܶܟܠܶܬ܇ ܕܶܐܫܬܘܶܐ ܠܗܰܘ ܛܽܘܒܳܐ܇ ܕܰܢܛܺܝܪ ܠܨܰܝܳܡ̈ܶܐ܀

ܘܡܶܛܽܠ ܚܽܘܬܚܳܬܰܘ̈ܗ̱ܝ܇ ܕܰܣܓܺܝܘ ܒܥܶܠܕܰܪܰܢ܇ ܠܛܰܠܝܽܘܬܝ̱ ܘܰܠܣܰܝܒܽܘܬܝ̱܇ ܓܶܢܒܿܶܬ ܚܰܕ ܚܰܕ ܝܽܘܡ܇ ܥܕܰܡܳܐ ܠܫܽܘܠܳܡܳܐ܀

ܒܪܰܡܫܳܐ ܗܘܳܐ ܚܽܘܫܳܒܝ̱܇ ܫܶܡܥܶܬ ܙܰܗܝܳܐܺܝܬ܇ ܘܩܳܡܶܬ ܒܰܨܠܽܘܬܳܐ܀

ܐܶܢܳܐ ܠܺܝ ܥܶܒܕܶܬ ܥܺܕܬܳܐ ܠܰܡܫܺܝܚܳܐ܇ ܘܩܶܪܒܶܬ ܠܳܗܿ ܒܓܰܘܳܗܿ܇ ܒܶܣܡ̈ܶܐ ܘܗܶܪ̈ܽܘܡܶܐ܇ ܥܰܡܠܳܐ ܕܗܰܕܳܡ̈ܰܝ܀

ܕܠܳܐ ܐܶܡܫܽܘܚ ܡܶܫܚܳܐ܇ ܙܗܺܝܪ ܗܘܺܝܿܬ ܕܠܳܐ ܣܳܟܳܐ܇ ܡܶܛܽܠ ܕܶܐܬܡܰܫܚܿܶܬ ܚܕܳܐ ܙܒܰܢ ܒܰܥܰܡܳܕܳܐ܇ ܡܶܫܚܳܐ ܕܪܽܘܚ ܩܽܘܕܫܳܐ܀

ܢܽܘܪܳܐ ܕܩܽܘܪܒܳܢܳܐ܇ ܐܶܡܰܬܝ̱ ܕܢܳܣܶܒ ܗܘܺܝܿܬ ܗܳܕܶܐ ܗܘܳܬ݀ ܒܳܥܽܘܬܝ̱܇ ܕܬܰܘܩܶܕܝ̱ ܙܺܝܙܳܢ̈ܶܐ܇ ܘܝܰܥܪܳܐ ܕܗܰܕܳܡ̈ܰܝ܀

ܦܰܓܪܶܗ ܕܰܡܫܺܝܚܳܐ ܫܶܩܠܶܬ ܒܶܝܬ ܩܽܘܕܫܳܐ܇ ܗܽܘ ܢܰܛܪܶܗ ܠܰܩܢܽܘܡܝ̱܇ ܡܶܢ ܟܽܠ ܢܶܟܝܳܢܺܝ̈ܢ܇ ܡܶܢ ܗܰܘ ܕܰܐܩܪܶܒ ܥܰܡܝ̱܀

ܫܽܘܒܚܳܐ ܠܳܟ ܡܶܢܟܽܠ܇ ܚܰܝܠܳܐ ܬܠܺܝܬܳܝܳܐ܇ ܕܚܰܝܶܠܬܶܗ ܠܣܰܝܒܽܘܬܝ̱܇ ܘܩܳܡܶܬ ܒܰܐܓܽܘܢܳܐ܇ ܢܽܘܓܪܳܐ ܕܰܫܢܰܝ̈ܳܐ܀

ܠܛܽܘܪܳܦܳܐ ܕܟܰܦܢܳܐ܇ ܚܰܝܒܿܶܬ ܘܰܙܟܺܝܬܶܗ܇ ܕܰܚܙܺܝܿܬ ܠܡܳܪܝ̱ ܕܶܐܟܰܠ ܡܪܳܪܳܐ ܡܶܛܽܠܳܬܝ̱܇ ܒܰܝܢܳܬ ܓܰܝܳܣ̈ܶܐ܀

ܒܨܰܘܡܳܐ ܘܰܒܫܰܗܪܳܐ ܐܰܦܰܝ̈ ܐܶܬܝܰܩܰܪ̈ܝ܇ ܕܰܒܝܽܘܡ ܢܽܘܚܳܡܳܐ܇ ܕܶܐܚܙܶܟ ܐܰܝܟ ܡܽܘܫܶܐ ܘܶܐܙܕܰܗܶܐ ܘܶܐܢܗܰܪ܀

ܫܽܘܒܚܳܐ ܠܶܗ ܠܰܐܒܳܐ ܘܬܰܘܕܺܝܬܳܐ ܠܰܒܪܳܐ܇ ܘܰܠܪܽܘܚܳܐ ܕܩܽܘܕܫܳܐ܇ ܕܚܰܝܠܰܢܝ̱ ܒܰܐܓܽܘܢܳܐ܇ ܡܶܟܺܝܠ ܘܰܠܥܳܠܰܡ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܡܰܢܽܘ ܚܙܳܐ ܐܳܘ ܡܰܢܽܘ ܫܡܰܥ܇ ܓܰܢ̱ܒܳܪ ܚܰܝܠܳܐ ܙܟܳܐ ܘܚܰܝܶܒ܇ ܕܰܐܝܟ ܗܳܢܳܐ ܟܰܕ ܒܰܠܚܽܘܕܰܘܗ̱ܝ܇ ܙܟܳܐ ܘܚܰܝܶܒ ܠܕܰܐܩܪܶܒ ܥܰܡܶܗ܇ ܒܚܰܝܠܳܐ ܕܡܳܪܶܗ ܠܟܽܠ ܕܰܐܩܪܶܒ܇ ܘܚܰܝܒܶܗ ܠܓܰܒܳܐ ܕܛܳܥܰܝ̈ܳܐ܇ ܒܰܬܪܺܝܨܽܘܬ ܗܰܝܡܳܢܽܘܬܶܗ܀

ܐܰܒܪܶܩ ܣܰܝܦܶܗ ܒܶܝܬ ܣܶܕܪ̈ܶܐ܇ ܘܙܺܐܦܳܢ̈ܶܐ ܥܪܽܘܩܝܳܐ ܚܰܘܺܝܘ܇ ܙܥܰܩܘ̱ ܫܺܝܦܽܘܪ̈ܶܐ ܕܰܩܕܳܡܰܘܗ̱ܝ܇ ܘܪܶܥܠܰܬ݀ ܦܠܰܓܳܐ ܕܣܳܕܽܘܩ̈ܶܐ܇ ܩܳܡܰܬ݀ ܩܰܪܢܳܐ ܕܙܳܟܽܘܬܳܐ ܘܰܒܗܶܬ ܓܰܒܳܐ ܕܒܰܪܕܰܝܨܳܢ܇ ܪܥܶܡ ܩܳܠܶܗ ܘܚܳܒܰܬ݀ ܛܽܘܥܝܰܝ܇ ܒܪܺܝܟ ܗܽܘ ܕܝܰܗܒ ܠܶܗ ܢܶܨܚܳܢܳܐ܀

 

ܩܰܘܡܳܐ ܕܰܬܪܶܝܢ ܕܠܺܠܝܳܐ

ܩܳܠܳܐ ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ

ܐܶܡܰܪ ܗܘܳܐ ܡܰܠܟܳܐ ܚܰܢܦܳܐ܇ ܟܰܕ ܡܶܬܚܰܡܰܬ ܥܰܠ ܡܳܪܝ̱ ܬܶܐܘܳܕܳܘܪܳܘܣ܇ ܕܰܟܦܽܘܪ ܒܶܗ ܒܝܶܫܽܘܥ ܡܳܪܳܟ܇ ܘܶܐܢܳܐ ܐܶܬܶܠ ܠܳܟ ܡܰܠܟܽܘܬ̱ܝ܇ ܘܳܐܦ ܓܰܙ̈ܰܝ ܘܬܳܐܓܳܐ ܕܰܒܪܺܝܫܝ̱ ܝܳܗܶܒ ܐ̱ܢܳܐ ܠܳܟ܇ ܐܶܢܗܽܘ ܕܬܶܟܦܽܘܪ ܒܶܗ܀

ܒܝܽܘܡ ܕܽܘܟܪܳܢܳܟ ܐܳܘ ܣܳܗܕܳܐ ܬܶܐܘܳܕܳܘܪܳܘܣ܇ ܒܥܺܝ ܘܰܐܦܺܝܣ ܚܠܳܦܰܝܢ܇ ܠܗܰܘ ܕܝܰܩܰܪ ܣܺܝܡܰܬ ܓܰܪ̈ܡܰܝܟ܇ ܕܢܶܬܶܠ ܫܰܝܢܶܗ ܘܰܫܠܳܡܶܗ ܠܥܺܕܬܳܐ ܕܙܰܝܚܰܬ݀ ܕܽܘܟܪܳܢܳܟ܇ ܕܠܳܐ ܢܶܥܠܽܘܢ ܠܶܗ ܣܶܕܩ̈ܶܐ ܘܚܶܪ̈ܝܳܢܶܐ܀

 

ܡܰܕܪܳܫܳܐ ܩܳܠܳܐ ܕܗܳܢܰܘ ܝܰܪܚܳܐ ܥܽܘܢܺܝܬܳܐ ܒܪܺܝܟ ܗܽܘ ܕܰܐܳܘܪܶܒ܇ ܝܽܘܡ ܕܽܘܟܪܳܢܳܟ ܬܶܐܘܳܕܳܘܪܳܘܣ

ܒܰܪ ܐܰܠܳܗܳܐ ܕܰܩܪܳܐ ܘܙܰܡܶܢ ܠܣܳܗܕܳܐ ܒܪܺܟܳܐ܇ ܕܢܶܚܕܶܐ ܥܰܡܶܗ ܒܶܝܬ ܡܰܠܟܽܘܬܳܐ܇ ܕܠܳܐ ܥܳܒܪܳܐ ܐܳܦܠܳܐ ܡܶܫܬܰܪܝܳܐ܇ ܘܗܳܐ ܡܕܰܝܰܪ ܒܳܗܿ ܘܚܳܕܶܐ ܘܕܳܐܶܨ ܥܰܡ ܪ̈ܽܘܚܳܢܶܐ܀

ܕܠܳܘ̱ ܗ̱ܘܰܘ ܥܺܝܪ̈ܶܐ ܡܶܢ ܘܰܥܕܰܝ̈ܗܽܘܢ ܟܰܕ ܠܒܺܝܫܺܝܢ ܗ̱ܘܰܘ܇ ܘܚܰܠܶܛܘ̱ ܥܰܡܶܗ ܒܚܶܘܳܪ̈ܰܝܗܽܘܢ ܒܓܰܘ ܐܰܓܽܘܢܳܐ ܕܬܶܐܘܳܕܳܘܪܳܘܣ܇ ܘܚܳܒ ܠܶܗ ܒܺܝܫܳܐ ܐܳܦ ܐܶܫܬܰܦܰܠ܇ ܒܚܰܝܠܳܐ ܕܡܳܪܶܗ܀

ܠܡܺܐܢܳܐ ܐܺܝܬܰܝܟ ܕܟܽܠܗܽܘܢ ܐܰܝܠܶܝܢ ܕܡܶܬܓܰܘܣܺܝܢ ܒܳܟ܇ ܘܰܡܚܰܝܠܳܢܳܐ ܕܟܽܠ ܕܰܐܠܺܝܨܺܝܢ܇ ܐܳܦ ܥܳܕܽܘܪܳܐ ܕܟܽܠ ܕܰܡܥܳܩܺܝܢ܇ ܐܳܦ ܣܳܡܽܘܟܳܐ ܕܟܽܠ ܕܰܡܚܺܝܠܺܝܢ܇ ܘܟܽܠ ܕܰܬܒܺܝܪ̈ܳܢ܀

ܪܰܒ ܚܰܝܠܳܐ ܗܘܰܝܬ܇ ܕܢܳܛܰܪ ܐܰܬܪܳܐ ܡܶܢ ܒܰܪܒܪ̈ܳܝܶܐ܇ ܛܽܘܪܳܝܗ̱ܝ ܠܰܐܬܪܰܢ ܒܰܨܠܰܘ̈ܳܬܳܟ܇ ܡܶܢ ܢܶܟܝܳܢ̈ܶܐ ܘܡܶܢ ܣܽܘܓܦܳܢ̈ܶܐ܇ ܣܳܗܕܳܐ ܒܪܺܝܟܳܐ܇ ܡܳܪܝ̱ ܬܶܐܘܳܕܳܘܪܳܘܣ܇ ܨܠܽܘܬܳܟ ܥܰܡܰܢ܀

ܢܽܘܪܶܗ ܕܚܽܘܒܶܗ ܕܒܰܪ ܐܰܠܳܗܳܐ܇ ܫܒܳܬ݀ ܪܶܥܝܳܢܳܟ܇ ܘܒܳܗܿ ܐܶܫܬܰܠܗܒܰܬ݀ ܒܝܰܕ ܪܶܚܡܬܶܗ܇ ܘܰܐܫܠܡܶܬ ܦܰܓܪܳܟ ܠܟܽܠ ܐܽܘܠܨܳܢܺܝ̈ܢ܇ ܘܠܳܐ ܡܶܐܢܰܬ݀ ܠܳܟ܇ ܒܟܽܠܗܽܘܢ ܝܰܘܡܰܝ̈ܟ ܥܕܰܡܳܐ ܕܰܙܟܰܝܬ܀

 

ܐܰܘܕܰܘ ܥܰܡܡ̈ܶܐ ܦܪ̈ܺܝܩܶܐ ܩܳܠܳܐ ܒܪܺܝܟ ܗܽܘ ܕܰܐܳܘܪܶܒ ܥܺܐܕܳܟ܇ ܬܶܐܘܳܕܳܘܪܳܘܣ ܢܰܨܺܝܚܳܐ

ܐܰܙܽܘܥ ܟܶܢܳܪ ܩܺܝܢ̈ܳܬܳܟ܇ ܘܰܙܡܰܪ ܫܽܘܒܚܳܐ ܠܡܳܪܝܳܐ܇ ܒܝܽܘܡ ܕܽܘܟܪܳܢܶܗ ܦܰܐܝܳܐ܇ ܕܣܳܗܕܳܐ ܬܶܐܘܳܕܳܘܪܳܘܣ܇ ܗܳܢܳܐ ܕܰܐܩܪܶܒ ܘܰܙܟܳܐ܇ ܘܰܐܥܕܺܝ ܟܠܺܝܠܳܐ ܕܙܳܟܽܘܬܳܐ܇ ܘܰܛܪܰܦ ܓܶܦ̈ܶܐ ܠܪܰܘܡܳܐ܀

ܡܶܢ ܦܳܠܚܽܘܬܳܐ ܕܙܰܒܢܳܐ܇ ܠܗܳܝ ܡܰܠܟܽܘܬܳܐ ܕܰܫܡܰܝܳܐ܇ ܘܡܶܢ ܡܰܠܟܽܘܬܳܐ ܕܥܳܒܪܳܐ܇ ܘܡܳܪܶܗ ܕܰܚܙܳܐ ܕܰܐܪܶܗ܇ ܢܚܶܬ ܗܘܳܐ ܘܥܰܕܪܶܗ ܒܰܐܓܽܘܢܳܐ܇ ܒܪܺܝܟ ܗܽܘ ܕܢܰܨܰܚ ܠܰܪܚܽܘܡܶܗ܀

ܫܰܦܺܝܪ ܗܘܳܐ ܠܶܗ ܠܣܳܗܕܳܐ܇ ܡܳܪܝ̱ ܬܶܐܘܳܕܳܘܪܳܘܣ ܢܰܨܺܝܚܳܐ܇ ܟܰܕ ܠܒܺܝܒܳܐܺܝܬ ܫܳܠܰܚ܇ ܣܐܽܘܢܳܐ ܕܪ̈ܶܓܠܰܘܗ̱ܝ ܥܳܐܶܠ܇ ܠܢܽܘܪܳܐ ܕܰܫܓܰܪܘ̱ ܚܰܢܦ̈ܶܐ܇ ܘܥܰܠ ܩܳܡ ܒܓܰܘܶܗ ܕܠܳܐ ܕܶܚܠܳܐ܇ ܒܪܺܝܟ ܗܽܘ ܚܰܝܠܳܐ ܕܚܰܝܠܶܗ܀

 

ܐ̱ܚܪܺܢܳܐ ܡܰܘܕܝܳܢ̈ܶܐ ܩܳܠܳܐ ܒܪܺܝܟ ܗܽܘ ܕܝܰܗܒ ܠܳܟ ܙܳܟܽܘܬܳܐ܇

ܢܰܨܺܝܚܳܐ ܬܶܐܘܳܕܳܘܪܳܘܣ ܒܳܬܰܪ ܕܶܐܬܢܰܓܰܕ ܣܳܗܕܳܐ܇ ܘܰܢܬܰܪ ܒܶܣܪܶܗ ܥܰܠ ܐܰܪܥܳܐ܇ ܡܰܝ̈ܳܐ ܡܛܰܪ̈ܛܥܶܐ ܘܪ̈ܰܬܺܝܚܶܐ܇ ܐܶܫܰܕܘ̱ ܛܪ̈ܽܘܢܶܐ ܥܰܠ ܓܽܘܫܡܶܗ܇ ܘܓܽܘܡܪ̈ܶܐ ܩܰܒܰܪܘ̱ ܥܰܠ ܪܺܝܫܶܗ܀

ܐܰܟܡܳܐ ܕܦܰܨܺܝܬܳܝܗ̱ܝ ܠܰܒܪܶܗ܇ ܕܗܰܘ ܓܰܒܪܳܐ ܕܰܛܒܰܥ ܒܝܰܡܐ܇ ܢܶܬܕܰܠܶܐ ܒܰܨܠܰܘ̈ܳܬܳܟ܇ ܡܶܢ ܛܽܘܒܳܥܳܐ ܕܰܚܛܺܝܬܳܐ܇ ܘܢܺܐܪܰܬ ܚܰܝ̈ܶܐ ܒܡܰܠܟܽܘܬܳܐ܀

ܒܰܬܪܶܝܢ ܥܳܠܡ̈ܶܐ ܐܶܬܝܰܩܰܪܬ܇ ܒܡܰܠܟܽܘܬܳܐ ܕܗܳܪܟܳܐ ܘܬܰܡܳܢ܇ ܒܥܺܝ ܚܠܳܦܰܝܢ ܕܰܡܝܰܩܪܺܝܢܰܢ ܘܰܡܩܰܠܣܺܝܢܰܢ ܕܽܘܟܪܳܢܳܟ܇ ܕܢܶܫܬܘܶܐ ܠܰܡܶܢܳܬܳܐ ܕܥܰܡܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܫܰܪܺܝ ܡܰܠܟܳܐ ܡܫܰܕܶܠ ܗܘܳܐ ܠܶܗ ܟܰܕ ܐܳܡܰܪ ܠܶܗ܇ ܕܪܺܝܫܳܐ ܘܪܰܒܳܐ ܕܟܽܠܗܽܘܢ ܦܳܠܚ̈ܶܐ ܥܳܒܶܕ ܐ̱ܢܳܐ ܠܳܟ܇ ܘܪܰܒ ܦܳܠܚܽܘܬܳܐ ܒܟܽܠܳܗܿ ܡܰܠܟܽܘܬܝ̱ ܠܳܟ ܡܰܘܪܶܒ ܐ̱ܢܳܐ܇ ܥܢܳܐ ܩܰܕܺܝܫܳܐ ܘܦܰܢܺܝ ܠܡܰܠܟܳܐ ܕܠܳܐ ܕܶܚܠܬܳܐ܇ ܕܶܐܢܳܐ ܠܝܶܫܽܘܥ ܡܳܪܝܳܐ ܡܫܺܝܚܳܐ ܠܶܗ ܣܳܓܶܕ ܐ̱ܢܳܐ܀

ܫܽܘܒܚܳܐ ܠܰܐܒܳܐ ܕܡܶܛܽܠܳܬܶܗ ܣܰܝܒܰܪ ܚܰܫ̈ܶܐ܇ ܣܳܗܕܳܐ ܓܰܒܝܳܐ ܬܶܐܘܳܕܳܘܪܳܘܣ ܣܪ̈ܳܩܶܐ ܘܢܶܓܕ̈ܶܐ܇ ܘܣܶܓܕܬܳܐ ܠܰܒܪܳܐ ܕܶܐܬܕܰܡܺܝ ܒܶܗ ܘܰܣܒܰܠ ܚܰܫ̈ܶܐ܇ ܘܟܽܠ ܐܽܘܠܨܳܢܺܝ̈ܢ ܥܰܡ ܛܽܘܪ̈ܳܦܶܐ ܡܶܢ ܪ̈ܳܕܽܘܦܶܐ܇ ܬܰܘܕܺܝ ܠܪܽܘܚܳܐ ܕܰܐܫܪܺܝ ܚܰܝܠܳܐ ܒܓܰܘ ܗܰܕܳܡܰܘ̈ܗ̱ܝ܇ ܟܰܕ ܗܽܘ ܒܚܰܝ̈ܶܐ ܒܳܬܰܪ ܡܰܘܬܶܗ ܨܠܽܘܬܶܗ ܥܰܡܰܢ܀

 

ܡܰܘܪܒܳܐ ܕܠܺܠܝܳܐ ܠܶܟܝ̱ ܢܶܬܟܰܫܰܦ

ܦܰܓܪܳܟ ܕܰܟܝܳܐ ܗܰܝܟܠܳܐ ܠܪܽܘܚܳܐ ܩܰܕܺܝܫܳܐ ܥܒܰܕܬܳܝܗ̱ܝ ܐܰܒܽܘܢ܇ ܘܒܳܟ ܗܽܘ ܠܶܥܙܰܬ݀܇ ܙܡܺܝܪ̈ܳܬܳܐ ܩܰܕܺܝܫ̈ܳܬܳܐ ܠܥܳܢ̈ܳܐ ܦܪܺܝܩܬܳܐ܇ ܘܗܳܐ ܝܰܘܡܳܢ ܡܶܬܒܰܣܡܳܐ܇ ܒܪܺܝܬܳܐ ܟܽܠܶܗ ܡܶܢ ܣܳܟܳܐ܇ ܒܢܶܒܥܳܐ ܕܝܽܘܠܦܳܢܳܟ܀

ܓܰܒܝܳܐ ܐܰܦܪܶܝܡ ܡܶܢ ܐܰܠܳܗܳܐ ܐܶܫܬܰܕܰܪ ܠܽܐܘܪܗܳܝ ܟܰܪܟܳܐ܇ ܘܬܰܡܳܢ ܥܒܰܕ ܗܘܳܐ܇ ܕܰܐܪܳܐ ܥܰܡ ܐܳܟܶܠܩܰܪܨܳܐ ܕܰܐܒܰܥ ܗܘܳܐ ܒܶܗ܇ ܗܶܪ̈ܶܣܺܝܣ ܫܒܰܥ ܛܳܥܰܝ̈ܳܐ܇ ܕܡܰܐܢܺܝ ܠܺܝܛܳܐ ܘܡܰܪܩܺܝܳܘܢ ܘܟܰܠܒܳܐ ܒܰܪܕܰܝܨܳܢ܀

ܒܝܽܘܡ ܕܽܘܟܪܳܢܳܟ܇ ܐܳܘ ܡܰܠܦܳܢܳܐ ܡܳܪܝ̱ ܐܰܦܪܶܝܡ ܚܳܕܝܳܐ ܥܺܕܬܳܐ܇ ܘܙܳܡܪܳܐ ܫܽܘܒܚܳܐ ܠܡܳܪܝܳܐ ܕܚܰܟܡܳܟ ܒܺܝܕܰܥܬܳܐ ܐܰܠܳܗܳܝܬܳܐ܇ ܐܰܢ̱ܬ ܕܶܝܢ ܐܰܒܽܘܢ ܓܰܒܝܳܐ ܐܰܦܺܝܣ ܘܰܒܥܺܝ ܠܰܡܫܺܝܚܳܐ ܕܪ̈ܰܚܡܶܐ ܢܫܰܟܶܢ ܠܰܢ܀

 

ܫܰܒܰܚܘ̱ ܠܡܳܪܝܳܐ: ܫܡܰܝ̈ܶܐ ܡܶܫܬܰܥܶܝܢ

ܪܶܬܚܰܬ݀ ܩܰܪܢܳܐ ܘܰܡܫܰܚܬܳܟ܇ ܒܰܕܡܽܘܬ ܕܰܘܺܝܕ ܒܰܪ ܐܺܝܫܰܝ܇ ܘܣܶܘܚܰܬ݀ ܥܺܕܬܳܐ ܘܩܰܒܶܠܬܳܟ܇ ܗܳܐ ܪܳܘܙܳܐ ܒܡܰܠܦܳܢܽܘܬܳܟ܀

ܡܳܐ ܦܐܶܐ ܘܰܪܚܺܝܡ ܕܽܘܟܪܳܢܳܟ܇ ܠܰܐܠܳܗܳܐ ܐܳܘ ܡܳܪܝ̱ ܐܰܦܪܶܝܡ܇ ܘܰܠܥܶܠܳܝ̈ܶܐ ܘܰܬܰܚܬܳܝ̈ܶܐ܇ ܫܒܺܝܚ ܘܰܡܝܰܩܰܪ ܥܰܕܥܺܐܕܳܟ܀

ܠܳܟ ܛܽܘܒܰܝܟ ܓܰܒܝܳܐ ܐܰܦܪܶܝܡ܇ ܕܰܐܠܳܗܳܐ ܒܪ̈ܰܚܡܰܘܗ̱ܝ ܗܰܕܝܳܟ܇ ܠܘܳܬ ܪܺܝܫܟܳܗ̈ܢܶܐ ܡܳܪܝ̱ ܝܰܥܩܽܘܒ܇ ܐܶܦܺܝܣܩܽܘܦܳܐ ܕܰܢܨܺܝܒܺܝܢ܀

ܗܰܘ ܕܰܐܦܶܩ ܠܰܐܒܪܰܡ ܟܺܐܢܳܐ܇ ܡܶܢ ܐܰܪܥܶܗ ܗܽܘ ܓܒܳܟ ܐܰܒܽܘܢ܇ ܡܶܢ ܟܽܘܡܪܽܘܬܳܐ ܘܚܰܢܦܽܘܬܳܐ܇ ܘܰܠܥܺܕܰܬ ܩܽܘܕܫܳܐ ܐܰܝܬܝܳܟ܀

ܟܶܪܟܳܐ ܕܶܐܟܰܠ ܚܰܙܩܺܝܐܶܝܠ܇ ܒܶܗ ܗܽܘ ܝܺܕܰܥ ܟܰܣܝ̈ܳܬܳܐ ܘܰܐܢ̱ܬ ܐܰܒܽܘܢ ܒܪܽܘܚܳܐ ܩܰܒܠܶܬ: ܘܶܐܬܢܰܗܪܰܬ ܒܪܽܘܚܳܐ ܕܩܽܘܕܫܳܐ܀

ܫܘܶܐ ܗܽܘ ܨܰܘܡܳܟ ܐܰܝܟ ܕܒܰܪܒܽܘܙܺܝ܇ ܨܠܽܘܬܳܟ ܐܰܝܟ ܕܺܐܠܺܝܳܐ ܕܰܐܝܟ ܗܰܘ ܕܩܰܒܶܠܬ ܓܶܠܝܳܢ̈ܶܐ܇ ܘܰܐܝܟ ܗܳܢܳܐ ܢܨܰܚܬ ܒܳܐܬܰܘ̈ܳܬܳܐ܀

ܗܳܟܰܢܳܐ ܠܰܡ ܪܰܚܺܝܩ ܗܘܰܝܬ܇ ܡܶܢ ܚܶܟܡܬܳܐ ܐܰܪܥܳܢܳܝܬܳܐ܇ ܕܟܽܠܳܗܿ ܚܶܟܡܬܳܟ ܘܺܝܕܰܥܬܳܟ ܡܶܢ ܪܽܘܚܳܐ ܕܩܽܘܕܫܳܐ ܡܰܠܝܳܐ܀

ܒܒܳܥܽܘ ܡܶܢܳܟ ܡܳܪܝ̱ ܐܰܦܪܶܝܡ܇ ܘܰܐܦܺܝܣ ܘܰܒܥܺܝ ܡܶܢ ܡܳܪܳܟ܇ ܚܠܳܦ ܫܰܝܢܳܐ ܕܥܺܕܰܬ ܩܽܘܕܫܳܐ܇ ܕܢܶܥܒܪܽܘܢ ܡܶܢܳܗܿ ܢܶܣܝܽܘܢ̈ܶܐ܀

 

ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܒܕܽܘܟܪܳܢ ܝܳܠܶܕܬܳܟ

ܬܰܘ ܦܳܪ̈ܽܘܫܶܐ ܒܚܽܘܒܳܐ ܫܰܪܺܝܪܳܐ܇ ܢܝܰܩܰܪ ܠܝܰܘܡܳܐ ܕܕܽܘܟܪܳܢܶܗ ܕܓܰܒܝܳܐ ܘܰܐܒܳܐ ܒܪܺܝܟܳܐ ܘܢܰܨܺܝܚܳܐ܇ ܡܳܪܝ̱ ܐܰܦܪܝܶܡ ܐܰܠܗܳܝܳܐ ܨܠܽܘܬܳܟ ܫܽܘܪܳܐ܀

ܒܰܕܡܽܘܬ ܛܽܘܦܣܳܐ ܕܰܓܦܶܬܳܐ ܗܕܺܝܪܬܳܐ܇ ܨܳܪ ܚܰܘܺܝ ܠܳܟ ܓܰܒܝܳܐ ܡܳܪܝ̱ ܐܰܦܪܶܝܡ܇ ܕܺܐܝܬ ܗܘܳܐ ܒܳܗ ܣܓܽܘ̈ܠܶܐ ܬܡܺܝܗ̈ܶܐ܇ ܕܺܐܝܬܶܝܗܿ ܗܘܳܬ݀ ܡܰܠܦܳܢܽܘܬܳܟ܇ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܐ̱ܢܳܫ ܠܳܐ ܐܶܬܡܨܺܝ ܚܰܝܠܶܗ ܕܬܰܢܺܝܢܳܐ܇ ܡܶܢ ܓܰܢ̱ܒܳܪ̈ܶܐ ܘܕܳܪ̈ܶܐ ܕܰܩܕܳܡܰܝܟ ܐܳܘ ܣܳܗܕܳܐ ܬܶܐܘܳܕܳܘܪܳܘܣ ܒܪܺܝܟ ܗܽܘ ܕܝܰܗܒܠܳܟ ܙܳܟܽܘܬܳܐ܀

ܐܰܟܡܳܐ ܕܩܰܛܠܶܬ ܠܝܽܘܕܳܝܳܐ܇ ܕܰܒܥܳܐ ܢܒܰܙܰܚ ܒܝܽܘܩܢܳܐ ܘܰܒܨܽܘܪܬܳܐ ܕܺܝܠܳܟ܇ ܩܛܽܘܠ ܘܰܛܪܽܘܕ ܡܶܢܰܢ ܠܫܺܐܕܳܐ܇ ܕܗܳܐ ܡܡܰܝܶܩ ܘܰܡܒܰܙܰܚ ܒܰܢ܇ ܡܶܛܽܠ܀

 

ܕܰܐܠܳܗܝ̱ ܐܰܠܗܳܝ̱܇ ܒܩܳܠܳܐ ܗܰܘ ܕܩܳܡ ܡܶܢ ܒܶܝܬ ܡܺܝ̈ܬܶܐ

ܗܰܘ ܕܰܐܥܬܪܶܗ ܠܡܳܪܝ̱ ܐܰܦܪܶܝܡ܇ ܒܝܽܘܠܦܳܢ̈ܶܐ ܐܰܠܳܗܳܝ̈ܶܐ ܘܰܢܣܰܟ ܘܰܡܠܳܝܗ̱ܝ ܚܶܟܡܬܳܐ ܘܺܝܕܰܥܬܳܐ ܕܥܰܠ ܟܰܣܝ̈ܳܬܳܐ ܟܳܗ̈ܢܶܐ ܙܗܰܝ̈ܳܐ܀

ܗܰܘ ܕܙܰܝܰܢܶܗ ܠܡܳܪܝ̱ ܐܰܦܪܶܝܡ܇ ܒܚܰܝܠܳܐ ܟܰܣܝܳܐ ܕܪܽܘܚܩܽܘܕܫܳܐ܇ ܘܰܐܟܶܣ ܘܦܰܪܣܺܝ ܐܳܦ ܚܰܝܶܒ܇ ܠܪܽܘܫܥܳܐ ܕܟܽܠܗܶܝܢ ܐܶܪ̈ܶܣܺܝܣ܇ ܟܳܗ̈ܢܶܐ ܙܗܰܝ̈ܳܐ܀

ܗܳܐ ܥܺܕ̈ܳܬܳܐ ܘܕܰܝܪ̈ܳܬܳܐ܇ ܗܳܐ ܪܳܥܰܡܺܝܢ ܒܡܰܠܦܳܢܽܘܬܳܟ܇ ܘܰܒܡܰܕܪ̈ܳܫܶܐ ܘܙܽܘܡܳܪ̈ܶܐ܇ ܘܡܺܐܡܪ̈ܶܐ ܘܬܽܘܪ̈ܓܳܡܶܐ ܕܰܐܒܰܥܬ܇ ܟܳܗ̈ܢܶܐ ܙܗܰܝ̈ܳܐ܀

ܗܰܘ ܕܰܡܠܳܝܗ̱ܝ ܪܽܘܚܳܐ ܩܽܘܕܫܳܐ܇ ܠܢܰܨܺܝܚ ܫܽܘܦܪ̈ܶܐ ܡܳܪܝ̱ ܐܰܦܪܶܝܡ܇ ܘܚܰܕܺܝ ܠܥܺܕܬܳܐ ܩܰܕܺܝܫܬܳܐ܇ ܘܰܠܝܰܠܕܶܝ̈ܗܿ ܒܡܰܠܦܳܢܽܘܬܶܗ ܟܳܗ̈ܢܶܐ ܙܗܰܝ̈ܳܐ܀

ܗܰܘ ܕܰܓܒܳܐ ܠܰܫܠܺܝ̈ܚܶܐ܇ ܕܢܰܟܪܙܽܘܢ ܣܒܰܪܬܶܗ ܒܰܒܪܺܝܬܳܐ܇ ܗܽܘ ܓܒܳܟ ܐܰܒܽܘܢ ܡܳܪܝ̱ ܐܰܦܪܶܝܡ܇ ܘܰܡܠܳܟ ܪܽܘܚܳܐ ܩܰܕܺܝܫܳܐ ܟܳܗ̈ܢܶܐ ܙܗܰܝ̈ܳܐ܀

ܪܶܕܝܳܐ ܕܫܶܩܝܳܐ ܕܝܽܘܠܦܳܢܳܟ܇ ܐܰܪܘܺܝ ܠܬܺܒܶܝܠ ܡܶܢ ܣܳܟܳܗܿ܇ ܘܝܶܗܒܰܬ݀ ܦܺܐܪ̈ܶܐ ܪ̈ܽܘܚܳܢܶܐ܇ ܡܰܠܝܰܝ̈ ܫܽܘܒܚܳܐ ܠܗܰܘ ܕܰܓܒܳܟ܀

ܒܥܺܝ ܘܶܐܬܟܰܫܰܦ ܚܠܳܦܰܝܢ܇ ܕܢܶܗܘܶܐ ܠܳܟ ܐܰܪܥܳܐ ܛܳܒܬܳܐ܇ ܘܙܰܪܥܳܐ ܕܡܶܠܬܳܟ ܡܳܪܝ̱ ܐܰܦܪܶܝܡ܇ ܢܰܫܘܰܚ ܦܺܐܪ̈ܶܐ ܒܢܰܦܫ̈ܳܬܰܢ܀

 

ܫܡܰܝ̈ܳܐ ܡܶܫܬܰܥܶܝܢ܇

ܒܩܳܠܳܐ ܠܰܝܬ ܩܰܕܺܝܫܳܐ ܐܰܟܘܳܬܳܟ

ܕܝܳܪ̈ܬܶܐ ܕܰܐܠܶܦܬ ܐܶܢܶܝ̈ܢ܇ ܡܺܐܡܪ̈ܰܝܟ ܐܳܦ ܬܽܘܪ̈ܓܳܡܰܝܟ ܗܳܐ ܡܝܰܩܪ̈ܳܢ ܠܝܽܘܡ ܕܽܘܟܪܳܢ ܡܠܶܐ ܫܽܘܦܪ̈ܶܐ ܐܰܠܳܗܳܝ̈ܶܐ܇ ܒܥܺܝ ܘܶܐܬܟܰܫܰܦ ܡܶܢ ܡܳܪܳܟ܇ ܕܫܰܝܢܳܐ ܢܰܡܠܶܟ ܒܰܒܪܺܝܬܳܐ܇ ܘܰܫܠܳܡܳܐ ܒܓܰܘ ܥܺܕ̈ܳܬܳܐ܇ ܠܰܝܬ܀

ܠܽܐܘܪܗܳܝ ܪܚܺܝܡܬܳܐ ܓܰܒܝܳܐ ܡܛܳܐ܇ ܕܥܰܡ ܣܳܛܳܢܳܐ ܢܶܬܟܰܬܰܫ܇ ܘܛܰܝܶܒ ܒܺܝܫܳܐ ܠܶܓܝܽܘܢܰܘ̈ܗܝ܇ ܘܰܒܢ̈ܰܝ ܓܰܒܶܗ ܡܰܪܳܚܳܐ ܒܰܪܕܰܝܨܳܢ ܘܰܐܪܡܰܐܢܺܝܽܘܣ܇ ܘܡܰܐܢܺܝ ܘܡܰܪܩܺܝܳܘܢ ܠܺܝܛܳܐ܇ ܘܶܐܙܕܟܺܝܘ ܘܰܢܨܰܚ ܡܳܪܝ̱ ܐܰܦܪܶܝܡ܀

ܟܰܕ ܐܰܝܟ ܐܶܡܪܳܐ ܕܠܳܐ ܡܽܘܡܳܐ܇ ܠܡܳܪܳܟ ܡܶܬܩܰܪܰܒ ܗܘܰܝܬ܇ ܘܰܐܝܟ ܪܺܝܚܳܐ ܚܰܠܝܳܐ ܕܗܶܪ̈ܽܘܡܶܐ܇ ܠܡܳܪܳܟ ܒܕܶܒܚܳܟ ܡܪܰܥܶܐ ܗܘܰܝܬ܇ ܩܰܕܺܝܫܳܐ ܡܳܪܝ̱ ܬܶܐܘܳܕܳܘܪܳܘܣ܇ ܕܠܳܐ ܫܶܠܝܳܐ ܒܥܺܝ ܘܶܐܬܟܰܫܰܦ܇ ܕܢܶܬܦܰܪ̈ܩܳܢ ܢܰܦܫ̈ܳܬܳܐ ܕܟܽܠܰܢ܀

 

ܐ̱ܚܪܺܢܳܐ ܩܳܠܳܐ ܐܰܢ̱ܬ ܕܰܒܪܺܝܫܺܝܬ

ܪܰܒܐ ܕܩܽܘܫܬܳܐ܇ ܕܰܥܒܰܕ ܘܰܐܠܶܦ ܐܰܝܟ ܕܰܒܥܳܐ܇ ܘܨܳܪ ܠܬܰܠܡܺܝܕܰܘ̈ܗ̱ܝ ܬܰܚܘܺܝܬܳܐ܇ ܕܢܶܬܕܰܡܽܘܢ ܒܶܗ܇ ܡܒܰܪܟܳܐ ܓܶܝܪ܀

ܒܰܕܡܽܘܬ ܐܶܡܪܳܐ܇ ܕܰܪܫܺܝܡ ܘܰܛܒܺܝܥ ܒܰܓܙܳܪܳܐ܇ ܐܶܬܕܰܒܰܪܬ ܠܩܶܛܠܳܐ ܐܳܘ ܣܳܗܕܳܐ ܬܶܐܘܳܕܳܘܪܳܘܣ ܡܒܰܪܟܳܐ ܓܶܝܪ܀

 

ܬܶܫܒܽܘܚܬܳܐ ܚܕܰܬܳܐ ܩܳܠܳܐ ܗܰܘ ܕܽܒܛܽܘܪܳܐ

ܗܰܘ ܕܚܰܘܝܶܗ ܗܘܳܐ ܢܰܗܺܝܪܳܐ ܘܡܳܐܢܳܐ ܓܰܒܝܳܐ܇ ܠܶܗ ܠܡܳܪܝ̱ ܐܰܦܪܶܝܡ ܟܠܺܝܠܳܐ ܦܰܐܝܳܐ ܕܫܽܘܒܗܳܪܰܢ܇ ܘܝܽܘܡ ܕܽܘܟܪܳܢܶܗ ܡܫܰܡܠܺܝܢܰܢ ܟܰܕ ܩܳܥܶܝܢܰܢ܀

ܒܪܺܝܟ ܗܽܘ ܡܫܺܝܚܳܐ܇ ܕܰܓܒܳܟ ܚܰܣܝܳܐ ܡܳܪܝ̱ ܐܰܦܪܶܝܡ܇ ܘܥܰܒܕܳܟ ܡܥܺܝܢܳܐ ܕܡܰܪܕܝܳܐ ܫܶܦܥ̈ܶܐ ܪ̈ܽܘܚܳܢܶܐ܇ ܘܰܡܠܰܝܬܳܗܿ ܠܬܺܐܒܶܝܠ ܫܶܩܝܳܐ ܚܰܠܝܳܐ ܕܡܰܠܦܳܢܽܘܬܳܟ ܠܡܳܪܝܳܐ܀

ܦܐܶܐ ܘܚܰܒܺܝܒ ܠܺܝ܇ ܡܫܺܝܚܳܐ܇ ܡܶܠܬܳܐ ܩܳܥܶܐ ܗܘܰܝܬ܇ ܬܶܐܘܳܕܳܘܪܳܘܣ ܡܶܛܽܠܳܬܶܗ ܣܳܒܶܠ ܐ̱ܢܳܐ ܚܰܫ̈ܶܐ ܘܫܶܢܕ̈ܶܐ ܘܣܰܝܦ̈ܶܐ ܕܚܺܝ̈ܠܶܐ܇ ܘܠܶܗ ܡܰܙܥܶܩ ܐ̱ܢܳܐ ܠܡܳܪܝܳܐ܀

ܘܰܐܝܟ ܕܶܐܬܚܰܣܺܝ܇ ܓܰܒܪܳܐ ܕܰܟܬܺܝܒ ܠܰܚܛܳܗܰܘ̈ܗ̱ܝ܇ ܐܰܝܟ ܕܶܐܡܰܪܬ ܠܶܗ ܐܳܘ ܣܳܗܕܳܐ܇ ܡܳܪܝ̱ ܬܶܐܘܳܕܳܘܪܳܘܣ ܢܶܬܚܰܣܽܘܢ ܚܰܘ̈ܒܰܝܢ ܘܰܚܛܳܗ̈ܰܝܢ ܒܰܨܠܰܘ̈ܳܬܳܟ ܘܰܒܒܳܥܘ̈ܳܬܳܟ܇ ܠܡܳܪܝܳܐ܀

ܘܰܐܝܟ ܕܦܰܨܺܝܬܳܗܿ ܠܗܳܝ ܐܰܢ̱ܬܬܳܐ ܕܶܐܬܓܰܘܣܰܬ݀ ܒܳܟ܇ ܒܓܰܘ ܒܰܠܰܐܢܺܝ܇ ܘܰܢܚܶܬ ܬܰܢܺܝܢܳܐ ܘܚܰܢܩܶܗ ܠܒܰܠܰܐܢܳܝܳܐ ܕܰܒܥܳܐ ܕܰܢܛܰܢܦܶܝܗܿ܇ ܘܰܟܪܰܟ ܠܰܩܕܳܠܶܗ ܠܡܳܪܝܳܐ܀

ܦܰܨܳܐ ܠܰܢ ܡܳܪܰܢ ܒܰܨܠܽܘܬܶܗ ܕܡܳܪܝ̱ ܬܶܐܘܳܕܳܘܪܳܘܣ ܡܶܢ ܢܶܟܝܳܢ̈ܶܐ ܘܡܶܢ ܣܽܘܓܦܳܢ̈ܶܐ ܘܽܐܳܘܠܳܨܳܢ̈ܶܐ ܘܰܫܒܽܘܩ ܚܰܘܒܰܝ̈ܢ ܘܰܚܛܳܗܰܝ̈ܢ ܘܶܐܬܪܰܚܰܡ ܥܰܠ ܢܰܦܫ̈ܳܬܰܢ ܠܡܳܪܝܳܐ܀

ܡܰܘܪܒܳܐ ܩܳܠܳܐ ܣܰܢܝܳܐ ܗܰܘ ܕܰܚܙܳܐ ܗܘܳܐ

ܠܗܰܘ ܕܫܰܠܚܶܗ ܠܥܳܠܡܳܐ ܥܳܒܽܘܪܳܐ܇ ܘܰܠܟܽܠܗܶܝܢ ܪ̈ܓܺܝܓܳܬܶܗ ܘܶܐܬܥܰܛܰܦ ܫܶܪܝܳܢܳܐ ܕܢܽܘܗܪܳܐ܇ ܒܰܡܫܺܝܚܳܐ ܡܰܠܟܳܐ ܕܥܳܠܡܳܐ܇ ܐܰܝܟ ܕܰܠܒܰܥܳܝܳܐ ܕܰܚܠܳܦܰܝܢ ܡܦܺܝܣܺܝܢܰܢ ܠܳܟ܇ ܐܳܘ ܢܰܨܺܝܚܳܐ ܡܳܪܝ̱ ܐܰܦܪܶܝܡ܇ ܒܥܺܝ ܚܠܳܦܰܝܢ ܪ̈ܰܚܡܶܐ܀

ܠܗܰܘ ܕܒܰܕܡܽܘܬܳܐ ܫܶܪܝܳܢܳܐ ܕܢܽܘܗܪܳܐ܇ ܠܗܰܝܡܳܢܽܘܬܳܐ ܠܒܺܝܫ ܗܘܳܐ܇ ܘܶܐܬܥܰܛܰܦ ܙܰܝܢܳܐ ܠܒܺܝܒܳܐܺܝܬ܇ ܠܽܘܩܒܰܠ ܪ̈ܽܘܚܶܐ ܒܺܝܫ̈ܳܬܳܐ܇ ܗܰܘ ܦܳܠܚܳܐ ܕܰܡܫܺܝܚܳܐ ܬܶܐܘܳܕܳܘܪܳܘܣ܇ ܠܗܳܢܳܐ ܒܰܙܡܺܝܪ̈ܳܬܳܐ ܕܪܽܘܚܳܐ ܡܩܰܠܣܺܝܢܰܢ܀

ܘܰܐܝܟ ܕܚܰܣܺܝܬ ܡܳܪܝܳܐ ܠܗܳܝ ܐܰܢ̱ܬܬܳܐ ܒܰܨܠܰܘ̈ܳܬܗܽܘܢ ܕܩܰܕܺܝܫܰܝ̈ܟ܇ ܘܡܳܪܝ̱ ܐܰܦܪܶܝܡ ܘܒܰܣܺܝܠܺܝܳܘܣ ܘܰܐܝܟ ܓܰܒܪܳܐ ܕܒܽܨܠܽܘܬ ܣܳܗܕܳܐ܇ ܬܶܐܘܳܕܳܘܪܳܘܣ ܐܶܬܚܰܣܺܝ܇ ܚܰܣܳܐ ܚܰܘܒܰܝ̈ܢ ܕܟܳܬܽܘܒܳܐ ܘܰܕܥܰܢܺܝܕܰܝ̈ܢ܀

 

ܫܰܒܰܚܘ̱ ܥܰܒܕܰܘ̈ܗ̱ܝ: ܒܥܶܕܳܢ ܨܰܦܪܳܐ

ܗܳܐ ܥܺܕ̈ܳܬܳܐ ܘܕܰܝܪ̈ܳܬܳܐ ܙܳܡܪ̈ܳܢ ܬܶܫܒܽܘܚܬܳܐ܇ ܒܕܽܘܟܪܳܢܶܗ ܕܓܰܒܝܳܐ ܡܳܪܝ̱ ܐܰܦܪܶܝܡ܇ ܘܰܡܫܰܒܚ̈ܳܢ܇ ܫܽܘܒܚܳܐ܀

ܠܫܽܘܒܩܳܢ ܚܰܘܒ̈ܶܐ܇ ܐܰܫܘܳܐ ܠܰܢ ܒܝܰܘܡܳܐ ܕܕܽܘܟܪܳܢܶܗ܇ ܕܡܰܠܦܳܢܳܐ ܘܓܰܒܝܳܐ ܡܳܪܝ̱ ܐܰܦܪܶܝܡ܇ ܕܢܶܩܥܶܐ ܘܢܺܐܡܰܪ܇ ܫܽܘܒܚܳܐ܀

ܡܫܰܒܚܺܝܢܰܢ ܠܳܟ ܡܳܪܝܳܐ ܐܰܫܘܳܐ ܦܳܪܽܘܩܰܢ܇ ܕܰܟܠܺܝܠ ܩܽܘܠܳܣ̈ܶܐ ܢܶܓܕܽܘܠ ܘܰܢܩܰܪܶܒ ܠܣܳܗܕܳܐ ܬܶܐܘܳܕܳܘܪܳܘܣ܀

ܒܚܰܝܠܶܗ ܡܰܩܪܶܒ ܗܘܰܝܬ܇ ܘܥܰܡ ܒܺܝܫܳܐ ܘܚܰܝܠܶܗ܇ ܘܒܶܗ ܗܽܘ ܐܶܫܬܰܒܗܰܪܬ܇ ܘܰܙܟܰܝܬ ܠܬܰܢܺܝܢܳܐ܀

ܠܬܰܢܺܝܢܳܐ ܒܺܝܫܳܐ܇ ܕܰܐܛܺܥܝ ܒܣܳܓܽܘܕܰܘ̈ܗ̱ܝ܇ ܒܝܰܕ ܚܰܝܠܳܐ ܕܡܶܢܶܗ ܩܰܛܶܠܬܳܝܗ̱ܝ ܘܰܐܘܒܶܕܬܳܝܗ̱ܝ܀

 

ܗܳܐ ܚܰܬܢܳܐ ܡܰܛܺܝ

ܒܪܺܝܟ ܗܽܘ ܡܫܺܝܚܳܐ ܗܘ ܕܰܐܘܪܒܳܟ܇ ܚܰܣܝܳܐ ܡܳܪܝ̱ ܐܰܦܪܶܝܡ܇ ܘܢܰܨܰܚ ܝܰܘܡܳܐ ܕܕܽܘܟܪܳܢܳܟ ܒܰܐܪܒܰܥ ܦܶܢܝ̈ܳܢ܀

ܩܕܳܡ ܕܰܝܳܢܳܐ ܝܰܘܠܝܰܢܽܘܣ ܐܰܟܪܶܙܬ ܩܽܘܫܬܳܐ܇ ܕܰܟܝܳܢܳܐ ܚܰܕ ܐܰܘܕܺܝܬܳܝܗ̱ܝ܇ ܠܗܰܘ ܕܶܐܬܒܰܣܰܪ܀

ܒܒܶܝܬ ܚܒܽܘܫܝܳܐ ܣܰܥܪܳܟ ܡܳܪܳܟ܇ ܡܳܪܝ̱ ܬܶܐܘܳܕܳܘܪܳܘܣ܇ ܘܰܐܝܟ ܕܰܠܦܶܛܪܽܘܣ ܐܳܦ ܦܰܘܠܳܘܣ܇ ܫܰܘܙܶܒ ܐܳܦܠܰܢ܀

 

ܛܽܘܒܰܝܗܽܘܢ ܠܡܶܣܟܺܢ̈ܶܐ: ܡܳܐ ܕܳܐܬܶܐ ܐܰܢ̱ܬ܀

ܐܳܘ ܡܳܪܝ̱ ܐܰܦܪܶܝܡ ܕܰܫܠܡܶܬ ܪܶܗܛܳܐ ܕܕܽܘܒܳܪ̈ܰܝܟ܇ ܘܰܫܪܳܪܳܐ ܒܓܶܠܝܳܐ ܐܰܟܪܶܙܬ ܕܠܳܐ ܕܽܘܘܳܕܳܐ܇ ܨܠܽܘܬܳܟ܀

ܡܫܺܝܚܳܐ ܕܰܓܒܳܟ ܡܳܐܢܳܐ ܓܰܒܝܳܐ ܠܺܐܝܩܳܪܶܗ܇ ܢܫܰܘܙܶܒ ܠܰܢ ܒܰܨܠܰܘ̈ܳܬܳܟ܇ ܡܶܢܟܽܠ ܢܶܟܝܳܢܺܝ̈ܢ܇ ܨܠܽܘܬܳܟ܀

ܒܰܨܠܰܘ̈ܳܬܳܟ ܢܶܫܬܘܶܐ ܠܫܽܘܒܩܳܢܳܐ ܕܚܰܘܒ̈ܶܐ܇ ܐܰܝܢܳܐ ܕܰܠܐܺܝ ܒܩܽܘܠܳܣܰܝ̈ܟ܇ ܘܰܪܫܰܡ ܢܶܨܚܳܢܰܝ̈ܟ܇ ܨܠܽܘܬܳܟ܀

 

ܡܳܐ ܫܰܦܺܝܪ ܗܘܳܐ܇

ܝܳܐܶܐ ܗܘܳܐ ܠܶܗ ܠܣܳܗܕܳܐ ܬܶܐܘܳܕܳܘܪܳܘܣ ܡܳܐ ܕܩܳܥܶܐ ܗܘܳܐ܇ ܩܕܳܡ ܕܰܝܳܢܳܐ ܝܽܘܠܝܰܢܽܘܣ ܡܰܠܟܳܐ ܛܳܪܽܘܢܳܐ܇ ܕܡܳܪܝ̱ ܚܰܕ ܐܺܝܬܰܘܗ̱ܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܀

ܒܝܽܘܡ ܕܽܘܟܪܳܢܳܟ ܣܳܗܕܳܐ ܡܳܪܝ̱ ܬܶܐܘܳܕܳܘܪܳܘܣ ܐܽܘܪܚܳܐ ܫܦܺܝܬܳܐ܇ ܗܳܝ ܕܰܡܩܰܪܒܳܐ ܠܰܐܠܳܗܳܐ ܒܝܰܕ ܚܽܘܒܳܐ ܕܒܶܗ܇ ܘܰܡܚܰܘܝܳܐ ܠܰܢ܇ ܨܰܘܡܳܐ ܙܰܗܝܳܐ ܡܠܶܐ ܫܽܘܦܪ̈ܶܐ܀

 

ܩܳܠܳܐ ܕܨܰܦܪܳܐ܇ ܩܽܘܩܳܝܳܐ܀

ܛܽܘܒܳܢܳܐ ܘܰܡܠܶܐ ܛܽܘܒ̈ܶܐ ܓܰܒܝܳܐ ܡܳܪܝ̱ ܐܰܦܪܶܝܡ܇ ܒܰܨܠܰܘ̈ܳܬܳܟ ܢܶܬܦܰܪ̈ܩܳܢ ܢܰܦܫ̈ܳܬܳܐ ܕܟܽܠܰܢ܇ ܘܠܳܟ ܢܶܫܬܰܡܥ̈ܳܡ ܒܰܕܡܽܘܬ ܗܰܘ ܟܶܢܫܳܐ܇ ܡܠܶܐ ܙܰܗܝܽܘܬܳܐ ܘܟܽܠܳܗܿ ܢܰܟܦܽܘܬܳܐ܇ ܘܬܶܗܘܶܐ ܪܺܝܫܳܐ ܘܪܰܒܳܐ ܐܳܦ ܡܰܠܦܳܢܳܐ܇ ܘܒܰܟܬܳܒ̈ܶܐ ܕܡܰܠܦܳܢܽܘܬܳܟ ܢܶܬܒܰܣܰܡ ܟܽܠܰܢ܇ ܗ ܘ ܗ܀

ܨܠܽܘܬܳܐ ܕܟܺܝܬܳܐ ܡܩܰܪܶܒ ܗܘܰܝܬ ܐܳܘ ܡܳܪܝ̱ ܐܰܦܪܶܝܡ܇ ܩܕܳܡ ܐܰܠܳܗܳܐ ܡܳܪܶܐ ܟܽܠ܇ ܘܰܫܪܳܪܳܐ ܚܰܘܺܝܬ܇ ܘܰܟܡܳܐ ܕܶܐܫܟܰܚܬ ܐܰܘܪܶܒܬܳܗܿ ܠܥܺܕܬܳܐ܇ ܘܰܟܡܳܐ ܕܰܣܦܰܩܬ ܛܝܳܪܳܐ ܒܢܰܝܬ ܠܰܒܢܶܝ̈ܗܿ܇ ܙܓܰܪܬ ܡܶܢܳܗܿ ܕܺܐܒ̈ܶܐ ܒܺܝܫ̈ܶܐ ܘܰܡܚܰܒܠܳܢ̈ܶܐ܇ ܘܰܒܡܰܪ̈ܓܶܐ ܕܥܽܘܫܢܳܐ ܪܥܰܝܬܳܗܿ ܥܰܠ ܡܰܝ̈ܳܐ ܢܺܝܚ̈ܶܐ ܗ ܘ ܗ܀

 

ܐ̱ܚܪܺܢܳܐ ܒܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܪܰܒ ܗܽܘ ܘܰܫܒܺܝܚ ܫܰܪܒܳܟ ܡܶܢ ܡܰܠ̈ܳܠܶܐ܇ ܐܳܘ ܩܰܕܺܝܫܳܐ ܡܳܪܝ̱ ܐܰܦܪܶܝܡ ܪܳܚܡܶܗ ܕܰܡܫܺܝܚܳܐ܇ ܘܠܳܐ ܡܨܶܐ ܦܽܘܡܳܐ ܡܚܺܝܠܳܐ ܕܢܺܐܡܰܪ ܫܰܪܒܳܟ܇ ܕܰܒܥܺܕܬܳܐ ܕܒܽܘܟܪ̈ܶܐ ܪܫܺܝܡ ܗܽܘ ܩܽܘܠܳܣܳܟ ܦܰܐܝܳܐ܇ ܒܥܺܝ ܚܠܳܦܰܝܢ ܚܰܛܳܝ̈ܶܐ ܐܺܝܬܰܝܢ܇ ܕܠܳܐ ܢܶܗܘܶܐ ܢܽܘܟܪ̈ܳܝܶܐ ܠܛܽܘܒܳܟ܇ ܘܒܰܨܠܽܘܬܳܟ ܘܰܒܒܳܥܽܘܬܳܟ ܪ̈ܰܚܡܶܐ ܢܶܗܘܽܘܢ ܥܠܰܝܢ܀

ܐܽܢܗܽܘ ܕܰܠܳܗܝ ܐܰܢ̱ܬܬܳܐ ܛܰܥܰܡܳܢܺܝܬܳܐ܇ ܝܰܗܒܬܽܘܢ ܚܽܘܣܳܝܳܐ ܕܚܰܘܒ̈ܶܐ ܐܰܝܟܰܢܳܐ ܕܫܶܐܠܰܬ݀܇ ܐܰܒܽܘܢ ܓܰܒܝܳܐ ܡܳܪܝ̱ ܐܰܦܪܶܝܡ ܘܒܰܣܺܝܠܺܝܳܘܣ܇ ܘܰܚܛܳܗ̈ܶܐ ܘܡܽܘܡ̈ܶܐ ܕܺܐܝܬ ܒܰܢ ܒܳܟܽܘܢ ܗܽܘ ܡܶܬܚܰܣܶܝܢ܇ ܘܰܐܝܟܰܢܳܐ ܕܰܠܗܳܝ ܐܶܫܬܰܟܢܰܬ݀܇ ܫܽܘܒܩܳܢܳܐ ܕܟܽܠܗܶܝܢ ܚܰܘ̈ܒܳܬܳܗܿ ܫܰܟܶܢ ܠܰܢ ܒܰܨܠܰܘ̈ܳܬܟܽܘܢ ܫܽܘܒܩܳܢܳܐ ܕܚܰܘܒ̈ܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܳܢܳܐ ܕܰܗܘܳܐ ܦܽܘܡܶܗ ܩܶܫܬܳܐ ܘܡܶܠܰܘ̈ܗ̱ܝ ܓܶܐܪܳܐ܇ ܘܰܐܝܟ ܠܽܘܠܝ̈ܳܬܳܐ ܚܫܰܠ ܩܺܝܢ̈ܳܬܳܐ ܘܰܐܬܩܶܢ ܙܰܝܢܳܐ܇ ܗܳܢܳܐ ܕܰܫܕܳܐ ܠܽܘܩܒܰܠ ܒܺܝܫܳܐ ܩܳܠܰܝ̈ ܬܶܗܪܳܐ܇ ܘܰܒܝܽܘܠܦܳܢܶܗ ܛܪܰܕ ܡܰܟܫܽܘ̈ܠܶܐ ܕܣܰܓܺܝܐܺܝܢ ܗ̱ܘܰܘ܇ ܗܳܢܳܐ ܕܰܗܘܳܐ ܟܠܺܝܠܳܐ ܠܟܽܠܶܗ ܣܽܘܪܝܳܝܽܘܬܳܐ܇ ܘܒܶܗ ܐܶܬܩܰܪܒܰܬ݀ ܕܬܶܡܛܶܐ ܠܫܽܘܦܪܳܐ ܪܽܘܚܳܢܳܝܳܐ܇ ܗܳܢܳܐ ܕܰܗܘܳܐ ܪܗܺܝܛܪܳܐ ܪܰܒܳܐ ܒܶܝܬ ܣܽܘܪ̈ܝܳܝܶܐ܇ ܘܟܽܠ ܡܰܠܦܳܢܳܐ ܡܶܢܶܗ ܘܰܠܟܳܐ ܒܶܗ ܐܶܬܝܰܬܰܪ܇ ܗܳܢܳܐ ܕܰܡܫܰܚ ܘܰܬܩܰܠ ܘܛܰܟܶܣ ܟܽܠܗܶܝܢ ܡܶܠܰܘ̈ܗ̱ܝ܇ ܘܡܰܠܦܳܢܽܘܬܶܗ ܝܰܗܒܶܗ ܠܛܶܟܣܳܐ ܕܰܣܕܺܝܪܽܘܬܳܐ܀

ܗܳܢܳܐ ܕܫܰܒܰܚ ܠܰܐܒܳܐ ܓܢܺܝܙܳܐ ܕܠܳܐ ܦܽܘܠܳܓܳܐ܇ ܗܰܝܡܳܢܽܘܬܳܐ ܚܠܺܝܡܬܳܐ ܚܰܘܺܝ ܒܡܰܠܦܳܢܽܘܬܶܗ܇ ܗܳܢܳܐ ܕܰܣܓܶܕ ܠܰܒܪܳܐ ܘܪܽܘܚܳܐ ܐܳܦ ܒܰܫܪܳܪܳܐ܇ ܘܰܐܠܦܳܗܿ ܠܥܺܕܬܳܐ ܕܬܶܣܓܽܘܕܝ̱ ܗܳܟܰܢ ܕܠܳܐ ܚܶܪܝܳܢܳܐ܇ ܗܳܢܳܐ ܕܰܐܳܘܕܺܝ ܒܪܽܘܚܳܐ ܕܩܽܘܕܫܳܐ ܕܠܳܐ ܕܽܘܘܳܕܳܐ܇ ܘܣܳܡ ܗܘܳܐ ܢܺܝܫܳܐ ܕܰܣܓܺܝ ܡܗܰܕܶܐ ܒܰܫܒܺܝܠ ܩܽܘܫܬܳܐ܇ ܗܳܢܳܐ ܕܰܐܟܪܶܙ ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ܇ ܚܕܳܐ ܐܽܘܣܺܝܰܐ ܚܰܕ ܫܽܘܠܛܳܢܳܐ ܠܶܗ ܬܶܫܒܽܘܚܬܳܐ܇ ܕܗܳܢܳܐ ܟܠܺܝܠܶܗ ܐܳܦ ܕܽܘܟܪܳܢܶܗ ܥܰܡ ܒܽܘܪ̈ܟܳܬܳܐ܇ ܘܠܰܢ ܚܰܛܳܝ̈ܶܐ ܚܢܳܢܳܐ ܘܪ̈ܰܚܡܶܐ ܒܰܨܠܰܘ̈ܳܬܶܗ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܠܡܰܪܝܰܡ ܝܳܠܕܰܬ ܐܰܠܳܗܳܐ

ܠܡܳܪܝ̱ ܐܰܦܪܶܝܡ ܣܳܒܳܐ ܙܰܗܝܳܐ ܢܗܶܐ ܕܽܘܟܪܳܢܳܐ܇ ܡܶܢ ܣܰܘܦ̈ܶܐ ܠܣܰܘܦ̈ܶܝܗܿ ܕܰܐܪܥܳܐ ܥܕܰܡܳܐ ܠܥܳܠܰܡ܇ ܕܰܐܝܟ ܥܰܡܽܘܕܳܐ ܛܥܶܢ ܝܽܘܩܪܳܗܿ ܕܥܺܕܰܬ ܩܽܘܕܫܳܐ܇ ܘܠܳܐ ܐܶܙܕܰܥܙܰܥ ܡܶܢ ܓܰܠ̈ܠܶܐ ܘܡܶܢ ܡܰܚܫܽܘ̈ܠܶܐ܀

ܚܒܺܝܫ ܒܰܚܣܳܡܳܐ ܢܰܨܺܝܚܳܐ ܡܳܪܝ̱ ܬܶܐܘܳܕܳܘܪܳܘܣ܇ ܕܢܶܗܘܶܐ ܕܶܒܚܳܐ ܠܰܐܠܳܗܳܐ ܚܠܳܦ ܚܰܛܳܝ̈ܶܐ܇ ܢܰܓܕܽܘܗ̱ܝ ܣܰܪܩܽܘܗ̱ܝ ܘܰܒܢܽܘܪܳܐ ܐܰܥܠܽܘܗ̱ܝ ܣܳܡܽܘܗ̱ܝ܇ ܘܰܒܣܰܝܦܳܐ ܦܰܣܩܽܘܗ̱ܝ ܠܪܺܝܫܶܗ܇ ܨܠܽܘܬܶܗ ܥܰܡܰܢ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܙܥܽܘܪ ܗܽܘ ܓܶܝܪ ܠܶܫܳܢܝ̱܇ ܕܢܺܐܡܰܪ ܩܽܘܠܳܣܰܝ̈ܟ܇ ܨܶܒ̈ܬܳܐ ܕܥܺܕ̈ܳܬܳܐ܇ ܘܪܰܒܳܐ ܒܡܰܠܦܳܢ̈ܶܐ܇ ܓܰܒܝܳܐ ܡܳܪܝ̱ ܐܰܦܪܶܝܡ܇ ܨܠܽܘܬܳܟ ܬܥܰܕܰܪܝ̱ ܠܰܢ܀

ܫܽܘܒܚܳܐ ܠܒܰܪ ܛܳܒܳܐ܇ ܕܟܰܠܶܠ ܠܰܐܬܠܺܝܛܰܘ̈ܗ̱ܝ܇ ܘܰܐܫܪܺܝ ܒܗܽܘܢ ܚܰܝܠܶܗ܇ ܘܙܰܝܰܚ ܕܽܘܟܪܳܢܗܽܘܢ ܠܶܗ ܫܽܘܒܚܳܐ ܠܰܐܒܽܘܗ̱ܝ ܘܣܶܓܕܬܳܐ ܠܪܽܘܚ ܩܽܘܕܫܳܐ܀

 

ܫܠܶܡ ܕܥܰܠ ܩܰܕܺܝܫܳܐ ܡܳܪܝ̱ ܐܰܦܪܶܝܡ ܘܡܳܪܝ̱ ܬܶܐܘܳܕܳܘܪܳܘܣ ܣܳܗܕܳܐ ܢܰܨܺܝܚܳܐ ܒܰܨܠܰܘ̈ܳܬܗܽܘܢ ܢܶܬܚܰܢܰܢ ܕܳܘܝܳܐ ܕܰܟܬܰܒ ܘܰܐܒܳܗܰܘ̈ܗ̱ܝ ܘܥܰܢܺܝܕܰܗ̈ܘܗ̱ܝ

 

 

ܬܽܘܒ ܛܶܟܣܳܐ ܕܚܰܕ ܒܫܰܒܳܐ ܕܰܬܪܶܝܢ ܕܨܰܘܡܳܐ ܥܰܠ ܗܰܘ ܓܰܪܒܳܢܳܐ

ܥܶܢܝܳܢܳܐ ܕܪܰܚܶܡܥܠܰܝ ܕܪܰܡܫܳܐ ܠܳܐ ܬܶܥܽܘܠ ܠܕܺܝܢܳܐ

ܡܳܪܰܢ ܐܰܝܟ ܛܳܒܳܐ܇ ܒܝܰܕ ܓܶܫܬܳܐ ܕܺܐܝܕܶܗ܇ ܐܰܣܺܝ ܗܘܳܐ ܘܰܐܚܠܶܡ܇ ܠܓܰܒܪܳܐ ܓܰܪܒܳܢܳܐ܀

ܩܪܶܒ ܗܘܳܐ ܓܰܪܒܳܢܳܐ܇ ܒܚܰܫܳܐ ܘܟܰܪܝܽܘܬܳܐ܇ ܟܰܕ ܡܶܬܟܰܫܰܦ ܗܘܳܐ܇ ܕܰܐܣܳܢܝ̱ ܚܰܢܳܢܳܐ܀

ܡܽܘܫܶܐ ܗܳܐ ܛܰܪܕܰܢܝ̱܇ ܕܠܳܐ ܣܰܟܠܽܘ ܡܳܪܝܳܐ܇ ܘܡܶܢ ܓܰܘ ܡܰܫܪܺܝܬܶܗ܇ ܢܽܘܟܪܳܝܳܐ ܥܰܒܕܢܰܝ̱܀

ܘܰܦܫܰܛ ܝܰܡܺܝܢܶܗ܇ ܐܳܣܝܳܐ ܕܟܽܠ ܟܺܐܒܺܝ̈ܢ܇ ܘܰܐܣܺܝ ܗܘܳܐ ܠܓܽܘܫܡܳܐ܇ ܛܰܡܐܳܐ ܕܰܩܪܶܒ ܠܶܗ܀

ܡܫܺܝܚܳܐ ܕܚܰܘܺܝ ܗܘܳܐ܇ ܐܳܣܝܽܘܬܶܗ ܒܓܰܪܒܳܐ܇ ܐܰܣܳܐ ܡܳܪܝ̱ ܘܰܐܚܠܶܡ܇ ܡܽܘܡ̈ܶܐ ܕܢܰܦܫ̈ܳܬܰܢ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܡܫܺܝܚܳܐ ܐܶܬܺܝܠܶܕ

ܟܰܕ ܡܳܪܰܢ ܪܕܳܐ ܗܘܳܐ܇ ܒܰܝܢܳܬ ܐܽܘܪ̈ܚܳܬܳܐ܇ ܘܟܶܢܫ̈ܶܐ ܕܬܰܠܡܺܝܕ̈ܶܐ܇ ܩܰܕܺܝܫ̈ܶܐ ܟܪܺܝܟܺܝܢ ܗ̱ܘܰܘ ܠܶܗ܇ ܦܓܰܥ ܗܘܳܐ ܒܶܗ ܓܰܪܒܳܐ܇ ܟܰܕ ܩܳܥܶܐ ܘܳܐܡܰܪ܇ ܕܡܳܪܰܢ ܝܶܫܽܘܥ܇ ܒܰܪ ܕܰܘܺܝܕ ܪܰܚܶܡܥܠܰܝ܀

ܓܰܪܒܳܐ ܨܶܝܕ ܡܳܪܰܢ܇ ܩܪܶܒ ܠܶܗ ܟܰܕ ܐܳܡܰܪ ܕܡܳܪܰܢ ܝܶܫܽܘܥ܇ ܒܰܪ ܕܰܘܺܝܕ ܪܰܚܶܡܥܠܰܝ܇ ܘܕܰܟܳܢܝ̱ ܡܶܢ ܚܰܫܳܐ ܕܺܐܝܬ ܠܺܝ܇ ܕܰܐܢ̱ܬ ܗܽܘ ܡܳܪܝ̱ ܐܺܝܬܰܝܟ ܐܳܣܝܳܐ ܕܰܟܪ̈ܺܝܗܶܐ܇ ܘܥܳܨܽܘܒܳܐ ܕܟܽܠ ܕܰܐܠܺܝܨܺܝܢ܀

ܡܳܪܝ̱ ܐܶܢܗܽܘ ܕܨܳܒܶܝܬ܇ ܡܨܶܝܬ ܗܽܘ ܕܰܬܕܰܟܶܢܝ̱܇ ܐܶܡܰܪ ܗܘܳܐ ܓܰܪܒܳܐ܇ ܠܝܶܫܽܘܥ ܡܳܪܰܢ ܒܰܚܢܰܓܬܳܐ܇ ܡܶܢ ܚܰܫܳܐ ܕܢܰܘܠܰܢܝ̱܇ ܘܰܐܦܩܰܢܝ̱ ܡܶܢ ܓܰܘ ܥܰܡܝ̱܇ ܐܰܣܳܢܝ̱ ܒܰܚܢܳܢܳܟ ܕܶܐܙܡܰܪ ܠܳܟ ܫܽܘܒܚܳܐ܀

ܥܢܳܐ ܗܘܳܐ ܘܶܐܡܰܪ ܠܶܗ܇ ܓܰܪܒܳܐ ܠܚܰܢܳܢܳܐ܇ ܡܳܪܝ̱ ܐܶܢ ܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܠܰܡܕܰܟܳܝܽܘܬܝ̱܇ ܗܳܝܕܶܝܢ ܗܽܘ ܡܳܪܰܢ܇ ܦܫܰܛ ܐܺܝܕܶܗ ܘܓܳܫܶܗ܇ ܘܳܐܡܰܪ ܗܘܳܐ ܡܳܪܰܢ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܀

ܗܳܝܕܶܝܢ ܗܽܘ ܝܶܫܽܘܥ܇ ܦܰܢܺܝ ܠܶܗ ܠܓܰܪܒܳܐ܇ ܒܚܰܝܠܳܐ ܕܪܽܘܚ ܩܽܘܕܫܳܐ܇ ܘܫܽܘܠܛܳܢܳܐ ܦܐܶܐ ܠܰܐܠܳܗܳܐ܇ ܕܗܳܐ ܛܪܺܝܕ ܗܽܘ ܓܰܪܒܳܟ܇ ܙܶܠ ܚܰܘܳܐ ܠܟܳܗ̈ܢܶܐ܇ ܘܩܰܪܶܒ ܩܽܘܪܒܳܢܳܐ܇ ܐܰܝܟ ܕܰܟܬܺܝܒ ܒܢܳܡܽܘܣܳܐ܀

ܡܫܺܝܚܳܐ ܡܠܶܐ ܪ̈ܰܚܡܶܐ܇ ܕܰܒܡܶܠܬܶܗ ܕܰܟܺܝ܇ ܠܗܰܘ ܓܰܒܪܳܐ ܓܰܪܒܳܐ܇ ܕܰܒܥܳܐ ܗܘܳܐ ܡܶܢܶܗ܇ ܕܰܟܢܳܝ̱ ܒܰܚܢܳܢܳܟ܇ ܒܪ̈ܰܚܡܶܐ ܕܛܰܝܒܽܘܬܳܟ܇ ܘܰܛܪܽܘܕ ܟܽܘܬܡ̈ܳܬܰܢ܇ ܘܚܰܣܳܐ ܚܰܘܒ̈ܳܬܰܢ܀

 

ܩܳܠܳܐ ܕܪܰܡܫܳܐ ܡܫܺܝܚܳܐ ܢܰܛܰܪܶܝܗܿ ܠܥܺܕܬܳܟ

ܫܰܦܺܝܪ ܗܘܳܐ ܠܶܗ ܠܦܳܪܽܘܩܰܢ܇ ܟܰܕ ܪܳܕܶܐ ܒܶܝܬ ܐܽܘܪ̈ܚܳܬܳܐ܇ ܘܡܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܒܡܶܠܬܳܐ ܟܺܝܬ ܘܰܒܦܽܘܩܕܳܢܳܐ܇ ܘܓܰܪܒܳܐ ܦܓܰܥ ܒܶܗ ܟܰܕ ܩܳܥܶܐ܇ ܕܡܳܪܝܳܐ ܝܶܫܽܘܥ ܐܶܬܪܰܚܰܡܥܠܰܝ܇ ܐܶܢ ܨܳܒܶܐ ܐܰܢ̱ܬ ܐܶܬܕܰܟܶܐ܇ ܡܶܢ ܓܰܪܒܳܐ ܕܗܳܐ ܡܫܰܢܶܩ ܠܺܝ܇ ܘܡܳܪܰܢ ܐܰܝܟ ܛܳܒܳܐ܇ ܦܫܰܛ ܐܺܝܕܶܗ ܡܰܠܝܰܬ ܚܰܝܠܳܐ܇ ܘܒܳܗܿ ܒܫܳܥܬܳܐ ܐܶܙܰܠ ܓܰܪܒܶܗ܇ ܘܰܙܡܰܪ ܫܽܘܒܚܳܐ ܠܰܐܠܳܗܳܐ ܒܩܳܠܳܐ ܪܳܡܳܐ܀

ܟܰܕ ܢܳܚܶܬ ܗܳܘܐ ܦܳܪܽܘܩܰܢ܇ ܡܶܢ ܛܽܘܪܳܐ ܗܽܘ ܘܬܰܠܡܺܝܕܰܘ̈ܗ̱ܝ܇ ܩܪܶܒ ܠܶܗ ܓܰܒܪܳܐ ܡܶܢ ܪܽܘܚܩܳܐ܇ ܕܰܡܠܶܐ ܗܘܳܐ ܟܽܠܶܗ ܓܰܪܒܳܐ܇ ܘܰܢܦܰܠ ܥܰܠ ܐܰܦܰܘ̈ܗ̱ܝ܇ ܒܰܐܪܥܳܐ ܘܰܡܦܺܝܣ ܗܘܳܐ ܠܶܗ܇ ܘܗܳܟܰܢ ܐܳܡܰܪ ܗܘܳܐ܇ ܡܳܪܝܳܐ ܐܶܢܗܽܘ ܕܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܠܰܡܕܰܟܝܽܘܬܝ̱܇  ݉ ܘܰܦܫܰܛ ܝܰܡܺܝܢܶܗ܇ ܡܳܪܰܢ ܩܪܶܒ ܠܶܗ ܟܰܕ ܐܳܡܰܪ܇ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܘܶܐܙܰܠ ܓܰܪܒܶܗ܇ ܘܰܐܘܕܺܝ ܠܳܐܣܝܳܐ ܡܪܰܚܡܳܢܳܐ܀

 

ܛܽܘܒܰܝܟܝ̱ ܥܺܕܬܳܐ

ܥܶܣܪܳܐ ܓܰܪ̈ܒܳܢܶܐ܇ ܡܶܢ ܪܽܘܚܩܳܐ ܩܥܰܘ ܟܰܕ ܐܳܡܪܺܝܢ܇ ܕܝܶܫܽܘܥ ܗܰܒܠܰܢ ܚܽܘܠܡܳܢܳܐ܇ ܡܶܢ ܒܶܝܬ ܓܰܙܳܟ ܥܰܬܺܝܪܳܐ܇ ܘܰܒܝܰܕ ܪ̈ܰܚܡܰܘܗ̱ܝ ܣܰܓܺܝ̈ܐܶܐ܇ ܚܳܣ ܥܰܠ ܨܰܠܡܶܗ ܕܶܐܬܚܰܒܰܠ܇ ܘܰܩܪܶܒ ܠܘܳܬܗܽܘܢ ܟܰܕ ܐܳܡܰܪ܇ ܕܶܐܢ ܡܰܘܕܶܝܢ ܐ̱ܢܬܽܘܢ ܕܰܡܨܶܐ ܐ̱ܢܳܐ܇ ܗܳܕܶܐ ܬܶܕܡܽܘܪܬܳܐ ܠܡܶܣܥܰܪ܇ ܢܶܗܘܶܐ ܠܟܽܘܢ ܐܰܝܟ ܫܶܐܠ̈ܳܬܟܽܘܢ܀

ܠܳܟ ܬܶܫܒܽܘܚܬܳܐ ܡܶܠܬܳܐ ܕܚܰܝ̈ܶܐ ܐܰܠܳܗܳܐ܇ ܕܬܰܚܬܺܝܬ ܪܰܘܡܳܐ ܕܪܰܒܽܘܬܳܟ܇ ܘܰܗܘܰܝܬ ܐ̱ܢܳܫܳܐ ܒܨܶܒܝܳܢܳܟ܇ ܡܶܛܽܠ ܦܽܘܪܩܳܢܶܗ ܕܳܐܕܳܡ܇ ܕܬܰܦܢܺܝܘܗ̱ܝ ܠܓܰܘ ܦܰܪܕܰܝܣܳܐ܇ ܘܰܣܥܰܪܬ ܠܰܐܪܥܳܐ ܒܥܽܘܕܪ̈ܳܢܶܐ܇ ܘܰܐܣܺܝܬ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܰܒܢܰܝ̈ܢܳܫܳܐ ܡܡܰܚܰܝ̈ܳܐ܇ ܘܗܳܐ ܙܳܡܪܺܝܢ ܠܶܗ ܬܶܫܒܽܘܚܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܶܢܗܽܘ ܕܚܺܐܪܽܘܬܝ̱ ܥܶܒܕܰܬ݀ ܓܰܪܒܳܐ ܫܰܦܺܝܪ ܛܰܪܕܰܢܝ̱܇ ܘܶܐܢ ܒܳܪܽܘܝܳܐ ܗܽܘ ܒܪܳܐ ܡܰܘܡܶܐ ܠܡܽܘܢ ܒܳܠܰܥ ܐ̱ܢܳܐ܇ ܠܳܐ ܣܳܦܶܩ ܠܺܝ ܡܰܘܡܶܐ ܣܰܢܝܳܐ ܕܰܡܢܰܘܶܠ ܠܺܝ܇ ܘܗܳܐ ܛܪܺܝܕ ܐ̱ܢܳܐ ܠܺܝ ܐܰܝܟ ܢܽܘܟܪܳܝܳܐ ܡܶܢ ܚܰܒܺܝܒ̈ܰܝ܀

ܠܳܟ ܬܽܫܒܽܘܚܬܳܐ ܐܳܣܝܳܐ ܕܰܢܚܶܬ ܡܶܢ ܡܶܕܝܳܪ̈ܰܘܗ̱ܝ܇ ܘܰܒܛܰܝܒܽܘܬܶܗ ܐܰܣܺܝ ܟܺܐܒ̈ܶܐ ܕܰܟܪܺܝܗܽܘܬܰܢ܇ ܦܓܰܥ ܒܶܗ ܓܰܪܒܳܐ ܘܰܒܥܳܐ ܡܶܢܶܗ ܘܕܰܟܺܝ ܓܰܪܒܶܗ܇ ܠܶܗ ܬܶܫܒܽܘܚܬܳܐ ܠܰܐܒܳܐ ܕܫܰܠܚܶܗ ܘܰܠܪܽܘܚܩܽܘܕܫܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܦܳܪܽܘܩܰܢ ܪܬܰܚ ܗܘܳܐ ܒܚܽܘܒܶܗ܇ ܘܰܫܦܰܥ ܝܰܡܳܐ ܕܰܚܢܳܢܶܗ܇ ܘܺܐܝܕܶܗ ܦܫܰܛ ܗܘܳܐ ܨܶܝܕ ܓܰܪܒܳܐ܇ ܘܰܐܥܪܶܩ ܗܘܳܐ ܡܶܢܶܗ ܓܰܪܒܶܗ ܫܽܘܒܚܳܐ܀

ܐܶܢ ܚܺܐܪܽܘܬܝ̱ ܥܶܒܕܰܬ݀ ܓܰܪܒܳܐ܇ ܫܰܦܺܝܪ ܛܰܪܕܰܢܝ̱ ܒܰܪ ܥܰܡܪܰܡ܇ ܗܳܠܶܝܢ ܐܶܡܰܪ ܓܰܪܒܳܢܳܐ܇ ܠܰܡܫܺܝܚܳܐ ܟܰܕ ܡܶܬܟܰܫܰܦ܇ ܫܽܘܒܚܳܐ܀

ܛܪܺܝܕ ܗܘܳܐ ܓܰܪܒܳܐ ܡܶܢ ܥܰܡܳܐ܇ ܒܢܳܡܽܘܣܳܐ ܕܒܶܝܬ ܐܺܝܣܪܳܐܶܝܠ ܘܚܰܛܳܝܳܐ ܛܪܺܝܕ ܡܶܢ ܚܛܳܗܰܘ̈ܗ̱ܝ ܥܕܰܡܳܐ ܕܢܶܬܬܰܘܶܐ ܘܢܶܬܚܰܣܶܐ܇ ܫܽܘܒܚܳܐ܀

ܕܰܟܳܐ ܠܰܢ ܒܰܪ ܐܰܠܳܗܳܐ܇ ܡܶܢ ܛܰܡܽܐܘܬܳܐ ܕܰܚܛܳܗ̈ܶܐ܇ ܐܰܟܡܳܐ ܕܕܰܟܺܝܬܳܝܗ̱ܝ ܠܓܰܪܒܳܐ܇ ܡܶܢ ܓܰܪܒܳܐ ܕܰܫܚܰܩ ܗܘܳܐ ܠܶܗ܀

 

ܩܰܘܡܳܐ ܩܰܕܡܳܝܳܐ ܒܩܳܠܳܐ ܩܽܘܩܳܝܳܐ

ܚܰܢܳܢܳܐ ܚܰܘܺܝ ܚܰܝܠܶܗ ܒܨܰܠܡܳܐ ܕܺܐܝܕܰܘ̈ܗ̱ܝ ܕܰܓܒܰܠܝ̈܇ ܘܒܰܣܪܶܗ ܠܥܰܡܳܐ ܛܳܠܽܘܡܳܐ ܕܠܳܐ ܨܒܳܐ ܕܰܢܗܰܝܡܶܢ܇ ܡܰܪܩܶܗ ܘܕܰܟܺܝ ܠܓܽܘܫܡܶܗ ܕܶܐܬܚܰܒܰܠ܇ ܘܩܳܡ ܗܘܳܐ ܫܰܦܺܝܪ ܒܛܶܟܣܳܐ ܕܰܟܝܳܢܶܗ܇ ܘܟܶܢܫ̈ܶܐ ܕܰܚܙܰܘ ܬܶܕܡܽܘܪܬܳܐ ܕܶܐܣܬܰܥܪܰܬ݀ ܗܘܳܬ݀܇ ܒܚܰܕܽܘܬܳܐ ܐܰܙܥܶܩܘ̱ ܘܶܐܡܰܪܘ̱ ܕܠܳܟ ܫܽܘܒܚܳܐ ܡܳܪܝܳܐ܇ ܗ ܘ ܗ܀

ܝܺܚܺܝܕܳܝܳܐ ܐܰܠܳܗܳܐ ܠܰܐܪܥܳܐ ܐܶܬܬܰܚܬܺܝ܇ ܘܰܢܣܰܟ ܘܰܡܠܳܗܿ ܥܽܘܕܪ̈ܳܢܶܐ ܘܚܰܝ̈ܠܶܐ ܕܠܳܐ ܡܶܬܡܶܢܶܝܢ܇ ܩܪܶܒ ܠܶܗ ܓܰܪܒܳܐ ܒܚܰܫܳܐ ܘܟܰܪܝܽܘܬܳܐ܇ ܘܰܩܥܳܐ ܘܶܐܡܰܪ ܕܠܳܟ ܫܽܘܒܚܳܐ ܡܳܪܝܳܐ܇ ܘܰܐܝܟ ܒܳܪܽܘܝܳܐ ܚܰܟܺܝܡܳܐ ܐܶܝܕܶܗ ܦܫܰܛ ܗܘܳܐ ܘܰܒܡܶܠܬܶܗ ܕܰܟܺܝ ܓܰܪܒܶܗ ܘܰܙܡܰܪ ܬܶܫܒܽܘܚܬܳܐ܇ ܗ ܘ ܗ܀

 

ܡܰܕܪܳܫܳܐ ܩܳܠܳܐ ܗܳܢܰܘ ܝܰܪܚܳܐ܇ ܥܶܢܝܳܢܳܐ ܫܽܘܒܚܳܐ ܠܰܐܒܳܐ܇ ܕܫܰܕܰܪ ܠܰܒܪܶܗ ܘܰܐܣܺܝ ܟܺܐܒܰܝ̈ܢ

ܠܳܐ ܬܰܣܠܶܐ ܠܰܢ܇ ܡܶܢ ܝܳܪܬܽܘܬܳܟ ܐܳܘ ܚܰܢܳܢܳܐ܇ ܒܰܕܡܽܘܬ ܓܰܪܒܳܐ ܕܛܰܪܕܶܗ ܡܽܘܫܶܐ܇ ܡܶܢ ܡܰܫܪܺܝܬܶܗ ܟܰܕ ܠܳܐ ܐܰܣܟܶܠ܇ ܚܢܰܢ ܡܰܣܟܠܳܢ̈ܶܐ ܒܳܟ ܢܶܫܬܰܒܩ̈ܳܢ ܣܰܟܠܘ̈ܳܬܰܢ܀

ܥܰܝܢܳܐ ܕܣܰܡܝܳܐ܇ ܟܰܕ ܐܶܬܦܰܬܚܰܬ݀ ܘܗܳܐ ܦܳܗܝܳܐ ܗܘܳܬ݀܇ ܕܬܶܚܙܶܐ ܫܽܘܦܪ̈ܶܐ ܕܽܟܽܠ ܒܶܪ̈ܝܳܬܳܐ܇ ܒܢܽܘܗܪܳܐ ܚܰܠܝܳܐ ܨܰܕܺܝܕܳܐ ܗܘܳܬ݀܇ ܕܬܶܣܒܰܥܝ̱ ܡܶܢܶܗ ܬܚܽܘܪܝ̱ ܬܶܚܙܶܐ ܕܰܠܡܽܘܢ ܕܳܡܶܐ܀

ܐܶܕܢܳܐ ܕܕܽܘܓܳܐ ܕܩܳܠܐ ܫܶܡܥܰܬ݀ ܕܢܽܘܟܪܳܝ ܗܘܳܐ ܠܳܗܿ܇ ܒܩ̈ܳܠܶܐ ܘܡ̈ܶܠܶܐ ܬܰܗܺܝܪܳܐ ܗܘܳܬ݀܇ ܗܰܘ ܕܶܐܬܦܰܫܛܰܬ݀ ܬܽܘܒ ܝܰܡܺܝܢܶܗ܇ ܠܳܐ ܫܳܠܶܐ ܗܘܳܐ܇ ܡܶܢ ܕܰܡܶܢܺܝܦ ܠܳܗܿ ܒܚܰܕܽܘܬ ܠܶܒܳܐ܀

ܚܓܺܝܪܳܐ ܕܗܰܠܶܟ܇ ܠܳܐ ܝܳܕܰܥ ܗܘܳܐ ܕܰܢܩܽܘܡ ܢܶܫܠܶܐ܇ ܘܰܣܟܺܝܪ ܚܶܟܳܐ ܕܡܰܝܠܶܠ ܡܶܢ ܫܶܠܝ̱܇ ܠܳܐ ܝܳܕܰܥ ܗܘܳܐ ܕܢܰܘܦܶܐ ܡܶܠܰܘ̈ܗ̱ܝ ܕܰܫܠܰܚ ܓܰܪܒܶܗ܇ ܠܳܐ ܣܳܒܰܥ ܗܘܳܐ ܕܢܶܚܙܶܐ ܓܽܘܫܡܶܗ܀

ܣܰܡܝܳܐ ܠܕܽܘܓܳܐ܇ ܩܳܡ ܚܰܘܺܝ ܠܶܗ ܦܽܘܬܳܚ ܥܰܝܢܰܘ̈ܗ̱ܝ܇ ܐܳܦ ܗܽܘ ܕܽܘܓܳܐ ܦܪܰܥ ܚܽܘܒܳܠܶܗ ܩܳܡ ܚܰܘܺܝ ܠܶܗ ܦܽܘܬܳܚ ܐܶܕܢܰܘ̈ܗ̱ܝ܇ ܘܰܚܙܳܐ ܚܓܺܝܪܳܐ܇ ܘܩܳܡ ܚܰܘܺܝ ܠܗܽܘܢ ܪܶܗܛܳܐ ܕܪ̈ܶܓܠܰܘܗ̱ܝ܀

ܟܰܪܟܽܘܗ̱ܝ ܚܰܝ̈ܶܐ ܠܡܺܝܬܳܐ ܕܰܚܝܳܐ ܟܰܕ ܡܫܰܐܠܺܝܢ ܠܶܗ܇ ܕܰܠܡܽܘܢ ܕܳܡܶܐ ܥܽܘܡܪܶܝܗܿ ܕܰܫܝܽܘܠ ܕܰܠܡܳܐ ܪ̈ܳܓܫܳܢ ܒܶܗ ܢܰܦܫ̈ܳܬܳܐ܇ ܗܽܘ ܕܶܝܢ ܐܶܡܰܪ ܕܰܐܝܟ ܕܡܶܢ ܥܰܪܣܳܐ ܕܫܶܢܬܳܐ ܩܳܡܶܬ܀

ܟܶܢܫ̈ܶܐ ܟܢܺܝܫܺܝܢ܇ ܘܡܽܘܡ̈ܶܐ ܚܕܺܝܪܺܝܢ ܘܡܳܪܰܢ ܩܳܐܶܡ܇ ܥܰܠ ܗܰܘ ܣܰܡܝܳܐ ܢܦܰܩ ܟܰܕ ܚܳܙܶܐ܇ ܥܰܠ ܗܘܳܐ ܚܓܺܝܪܳܐ ܢܦܰܩ ܟܰܕ ܪܳܗܶܛ܇ ܡܫܰܪܝܳܐ ܕܰܛܥܺܝܢ ܥܰܪܣܶܗ ܘܩܳܥܶܐ ܕܝܰܗܒ ܠܺܝ ܐܰܬܪܳܐ܀

ܒܛܶܠܘ̱ ܗ̱ܘܰܘ ܒܺܝܗܽܘܕ܇ ܐܳܣܰܘ̈ܳܬܳܐ ܥܰܡ ܥܳܨܽܘܒ̈ܶܐ܇ ܝܺܙܶܦܘ̱ ܘܰܚܝܰܘ ܣܰܦܶܩܘ̱ ܘܰܥܪܰܩܘ̱܇ ܒܛܶܠܘ̱ ܥܶܩܳܪ̈ܶܐ ܥܰܡ ܣܰܡܡܳܢ̈ܶܐ܇ ܘܰܒܚܰܕ ܐܶܬܬܠܺܝܘ ܡܶܢ ܓܰܘ ܢܰܚܬܰܘ̈ܗ̱ܝ ܢܒܰܥܘ̱ ܚܽܘܠܡܳܢ̈ܶܐ܀

 

ܛܽܘܒܰܝܟܝ̱ ܐܳܦܪܰܬ ܥܽܘܢܺܝܬܳܐ ܒܪܺܝܟ ܕܰܐܝܬܺܝ ܠܰܢ ܟܽܠ ܥܽܘܕܪ̈ܳܢܺܝܢ܇ ܡܶܢ ܒܶܝܬ ܓܰܙܶܗ ܡܠܶܐ ܟܽܠ ܛܽܘܒܺܝ̈ܢ܇

ܡܰܢ ܙܡܰܪ ܡܶܡܬܽܘܡ܇ ܬܶܗܪܳܐ ܒܬܶܗܪܳܐ܇ ܘܰܐܙܺܝܥ ܐܰܟܚܕܳܐ ܪ̈ܶܒܽܘ ܡܶܢܺܝ̈ܢ܇ ܘܰܡܙܰܓ ܒܚܶܟܡܬܳܐ ܥܰܬܺܝܩ̈ܳܬܳܐ܇ ܐܳܦ ܚܰܕ̈ܬܳܬܳܐ ܥܰܡ ܕܰܟܝܳܢܳܐ܇ ܘܨܰܠܡܶܗ ܪܰܒܳܐ ܕܥܳܒܽܘܕܳܐ ܟܣܶܐ ܒܗܶܝܢ܇ ܘܰܥܠܰܝܗܶܝܢ ܓܰܠܝܳܐܺܝܬ ܕܨܳܪܬܳܝܗ̱ܝ܇ ܘܰܐܝܟ ܕܡܶܢ ܟܽܠܗܶܝܢ܇ ܡܳܪܳܐ ܟܽܠ ܡܕܺܝܩ ܠܰܢ܇ ܘܰܒܪܶܗ ܕܡܳܪܶܐ ܟܽܠ܀

ܛܽܘܒܰܝܟ ܓܰܒܪܳܐ ܕܫܰܢܩܽܘܗ̱ܝ ܫܽܘܚܢ̈ܶܐ܇ ܕܓܰܪܒܳܐ ܣܰܪܝܳܐ ܢܽܘܓܪܳܐ ܕܙܰܒܢܳܐ܇ ܘܰܒܝܰܕ ܓܶܫܬܶܗ ܕܝܶܫܽܘܥ ܡܳܪܳܟ܇ ܩܢܰܝܬ ܚܽܘܠܡܳܢܳܐ ܐܳܦ ܐܳܣܝܽܘܬܳܐ܇ ܫܦܰܪ ܓܽܘܫܡܳܟ ܘܰܬܗܰܪܘ̱ ܒܳܟ ܚܰܙܳܝ̈ܶܐ܇ ܢܶܗܪܰܬ̈ ܢܰܦܫܳܟ ܘܶܐܬܚܰܪܰܪܬ ܡܶܢ ܚܛܳܗ̈ܶܐ܇ ܘܠܰܘܛܬܳܐ ܗܳܝ ܕܰܥܠܰܝܟ܇ ܘܥܰܠ ܟܽܠܶܗ ܓܶܢܣܳܟ ܒܝܶܫܽܘܥ ܐܶܬܒܰܛܠܰܬ݀܀

ܛܽܘܒܰܝܟ ܓܰܪܒܳܐ ܕܰܓܫܶܦ̈ܝ̱ ܐܰܝܕܺܘ̈ܗ̱ܝ ܕܗܰܘ ܥܳܒܽܘܕܳܐ ܕܟܽܠ ܒܶܪ̈ܝܳܬܳܐ. ܒܦܰܓܪܳܐ ܟܪܺܝܗܳܐ ܗܘܳܐ ܚܽܘܠܡܳܢܳܐ܇ ܘܒܶܗ ܐܶܬܕܰܟܺܝܬ ܒܰܕܡܽܘܬ ܬܰܠܓܳܐ܇ ܛܽܘܒܰܝܟ ܕܰܒܥܰܝܬ ܘܗܽܘ ܢܦܰܩ ܒܰܒܥܳܬܳܟ܇ ܛܽܘܒܰܝܟ ܕܰܐܢ̱ܬ ܐܶܫܟܰܚܬܳܝܗ̱ܝ ܠܡܶܫܟܰܚ ܠܰܐܒܺܝܕ̈ܶܐ܇ ܟܰܕ ܢܽܘܟܪܳܝ ܐܰܢ̱ܬ ܡܶܢܳܗܿ ܕܡܰܫܪܺܝܬܳܐ܇ ܐܰܥܠܳܟ ܠܰܟܢܽܘܫܬܳܐ܀

ܛܽܘܒܰܝܟ ܓܰܒܪܳܐ ܕܰܐܓܗܺܝܬ ܡܶܢܶܗ܇ ܕܫܽܘܚܢܳܐ ܒܺܝܫܳܐ ܕܰܫܚܰܩ ܗܘܳܐ ܠܳܟ܇ ܐܳܦ ܐܶܬܚܰܪܰܪܬ ܡܶܢ ܗܳܝ ܠܰܘܛܬܳܐ܇ ܕܣܺܝܡܳܐ ܗܘܳܬ݀ ܥܠܰܝܟ ܐܳܦ ܥܰܠ ܓܶܢܣܳܟ܇ ܛܽܘܒܰܝܟ ܕܰܫܘܰܝܬ ܕܰܬܡܰܠܶܠ ܥܰܡ ܡܫܺܝܚܳܐ܇ ܛܽܘܒܰܝܟ ܕܶܐܬܕܰܟܺܝܬ ܒܢܰܦܫܳܟ ܥܰܡ ܦܰܓܪܳܟ܇ ܛܽܘܒܰܘܗ̱ܝ ܠܡܰܢ ܕܰܫܘܳܐ ܕܢܶܗܘܶܐ ܐܰܟܘܳܬܳܟ܇ ܡܶܬܕܰܟܶܐ ܓܰܪܒܳܐ ܕܢܰܦܫܶܗ܀

ܛܽܘܒܰܘܗ̱ܝ ܠܰܐܝܢܳܐ ܕܶܐܬܐܰܡܪܰܬ݀ ܠܶܗ܇ ܕܨܳܒܶܐ ܐ̱ܢܳܐ ܒܳܟ ܠܰܡ ܐܶܬܕܰܟܳܐ܇ ܡܶܢ ܟܽܠ ܛܽܘܠܫܳܐ ܘܥܳܘܠܳܐ ܢܰܦܫܳܟ܇ ܐܰܝܟ ܕܶܐܬܶܐܡܰܪ ܠܗܳܢܳܐ ܓܰܪܒܳܐ܇ ܨܒܺܝ ܡܳܪܝ̱ ܘܕܰܟܳܐ ܠܰܢ ܡܶܢ ܟܽܘܬܡ̈ܳܬܳܐ ܕܰܚܛܺܝܬܳܐ܇ ܘܗܳܐ ܡܫܺܝܡ̈ܳܢ ܠܰܢܰܦܫ̈ܳܬܰܢ ܘܰܠܦܰܓܪ̈ܰܝܢ܇ ܘܰܫܒܽܘܩ ܚܰܘܒ̈ܰܝܢ ܘܚܰܣܳܐ ܠܰܚܛܳܗ̈ܰܝܢ ܒܰܡܪܰܚܡܳܢܽܘܬܳܟ܀

ܛܽܘܒܰܝܟ ܡܳܟܣܳܐ ܓܰܒܪܳܐ ܙܥܽܘܪܳܐ܇ ܕܰܪܟܶܢ ܪܳܡܳܐ ܘܰܒܒܰܝܬܳܟ ܫܪܳܐ܇ ܥܶܠܰܬ݀ ܣܺܝܡܬܳܐ ܡܳܪܰܬ ܓܰܙ̈ܶܐ܇ ܘܰܕܪܳܬ݀ ܓܰܙ̈ܶܐ ܕܟܰܢܶܫ ܥܰܘܠܳܐ܇ ܛܽܘܒ ܠܥܽܘܬܪܳܟ ܕܰܙܪܥܰܬܳܝܗ̱ܝ ܘܶܐܬܚܨܶܕ܇ ܘܰܠܩܶܢܝܳܢܰܝ̈ܟ ܕܶܐܬܒܰܕܰܪܘ̱ ܕܢܰܣܓܽܘܢ܇ ܡܰܢ ܐܰܚܬܳܟ ܡܶܢ ܗܰܘ܇ ܐܺܝܠܳܢܳܐ ܕܠܶܗ ܣܠܶܩܬ܇ ܕܰܐܚܝܳܟ ܒܝܰܕ ܙܩܺܝܦܶܗ܀

ܛܽܘܒܰܝܟ ܡܰܕܒܪܳܐ ܕܰܟܠܺܝܠ ܫܰܝܢܳܐ܇ ܓܕܰܠ ܠܳܟ ܡܳܪܰܢ ܥܰܠ ܦܳܬܽܘܪ̈ܰܘܗ̱ܝ܇ ܡܰܢ ܣܦܰܩ ܕܢܶܚܙܶܐ ܠܰܚܡܳܐ ܕܰܣܓܺܝ܇ ܘܰܠܒܳܪܽܘܝܶܗ ܒܳܥܶܐ ܕܢܶܒܨܶܐ܇ ܛܽܘܒ ܠܰܐܝܢܳܐ ܕܶܐܟܰܠ ܡܶܢ ܒܽܘܪ̈ܟܳܬܶܗ ܘܰܒܨܳܝܗ̱ܝ܇ ܘܒܰܣܶܡ ܡܶܢ ܓܶܐܘ̈ܳܬܶܗ ܘܠܳܐ ܕܪܰܫ ܥܰܠ ܝܰܠܕܶܗ܇ ܘܰܦܢܳܐ ܘܰܐܟܶܣ ܠܰܢ ܕܰܠܠܰܚܡܶܗ ܣܢܺܝܩ ܐ̱ܢܳܫ܇ ܠܳܐ ܗܘܳܐ ܕܶܝܢ ܕܢܶܒܨܺܝܘܗ̱ܝ܀

 

ܐܰܝܢܰܘ ܕܢܰܓܺܝܪܳܐ ܩܳܠܳܐ ܫܽܘܒܚܳܐ ܠܗܰܘ ܕܰܐܣܺܝ ܓܰܪܒܳܐ ܕܢܰܦܫ̈ܳܬܰܢ

ܓܰܪܒܳܐ ܡܦܺܝܣ ܗܘܳܐ ܠܶܗ܇ ܒܚܰܫܳܐ ܟܰܕ ܐܳܡܰܪ܇ ܝܶܫܽܘܥ ܒܰܪ ܕܰܘܺܝܕ܇ ܐܶܬܪܰܚܰܡ ܥܠܰܝ܇ ܘܕܰܟܳܢܝ̱ ܡܶܢ ܓܰܪܒܳܐ܇ ܕܗܳܐ ܡܫܰܢܶܩ ܗܘܳܐ ܠܺܝ܀

ܓܰܪܒܳܐ ܗܳܐ ܡܫܰܢܶܩ܇ ܠܦܰܓܪܳܐ ܒܝܰܕ ܟܺܐܒܳܐ܇ ܘܰܚܛܳܗܳܐ ܡܫܰܢܶܩ ܠܢܰܦܫܳܐ ܐܳܦ ܡܰܐܟܶܒ܇ ܐܰܣܳܐ ܡܳܪܝ̱ ܘܰܐܚܠܶܡ܇ ܠܰܢܰܦܫܳܐ ܘܰܠܦܰܓܪܳܐ܀

ܠܳܐ ܢܶܗܘܶܐ ܛܪ̈ܺܝܕܶܐ܇ ܡܶܢ ܡܰܠܟܽܘܬܳܟ ܡܳܪܝ̱܇ ܐܰܝܟ ܡܳܐ ܕܡܶܬܛܪܶܕ ܗܘܳܐ܇ ܓܰܪܒܳܐ ܡܶܢ ܟܢܽܘܫܬܳܐ ܐܶܠܳܐ ܒܰܝܬܳܝ̈ܶܐ܇ ܚܠܺܝ̈ܛܶܐ ܥܰܡ ܐܶܡܪ̈ܰܝܟ܀

ܫܽܘܒܚܳܐ ܠܶܗ ܠܳܐܣܝܳܐ܇ ܕܶܐܫܬܰܠܰܚ ܡܶܢ ܪܰܘܡܳܐ܇ ܘܰܐܣܺܝ ܟܽܘܪ̈ܗܳܢܶܐ܇ ܕܓܶܢܣܳܐ ܕܒܶܝܬ ܐܳܕܳܡ ܘܕܰܟܺܝ ܟܽܘܬܡ̈ܳܬܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܝܳܕܰܥ ܐ̱ܢܳܐ ܠܳܟ ܕܺܐܝܬ ܒܳܟ ܚܰܝܠܳܐ ܕܗܳܕܶܐ ܬܶܣܥܽܘܪ܇ ܘܟܽܠ ܥܰܣܩ̈ܳܬܳܐ ܦܫܺܝ̈ܛܳܢ ܐܶܢܶܝܢ ܕܒܳܟ ܢܶܣܬܰܥܖ̈ܳܢ܇ ܠܳܐ ܐܺܝܬ ܡܶܕܶܡ ܕܠܳܐ ܒܺܐܝܕܰܝ̈ܟ ܗܽܘ ܘܰܒܶܠܥܳܕܳܟ ܠܳܐ܇ ܐܰܝܠܶܝܢ ܕܰܟܣܶܝܢ ܘܰܐܝܠܶܝܢ ܕܰܓܠܶܝܢ܇ ܘܰܐܝܠܶܝܢ ܕܥܰܣܩ̈ܳܢ܀

ܫܽܘܒܚܳܐ ܠܛܳܒܳܐ ܕܶܐܬܳܐ ܒܪ̈ܰܚܡܰܘܗ̱ܝ ܣܰܥܪܳܗܿ ܠܰܐܪܥܳܐ܇ ܒܝܰܕ ܥܽܘܕܪ̈ܳܢܶܐ ܐܰܠܳܗܳܝ̈ܶܐ ܕܪܶܚܡܰܬ ܚܽܘܒܶܗ܇ ܒܪܺܝܟ ܗܽܘ ܐܰܒܽܘܗ̱ܝ ܕܫܰܕܪܶܗ ܨܶܝܕܰܝܢ ܠܡܰܐܣܳܝܽܘܬܰܢ܇ ܣܓܺܝܕ ܪܽܘܚܩܽܘܕܫܳܐ ܚܰܕ ܐܰܠܳܗܳܐ ܠܶܗ ܬܶܫܒܽܘܚܬܳܐ܀

 

ܩܰܘܡܳܐ ܕܰܬܪܶܝܢ ܕܠܺܠܝܳܐ ܗܰܒܠܳܗܿ ܠܥܺܕܬܳܟ

ܡܳܪܝܳܐ ܒܪܶܗ ܕܕܰܘܺܝܕ܇ ܐܶܬܪܰܚܰܡ ܥܰܠ ܗܰܘ ܓܰܪܒܳܐ ܕܰܒܥܳܐ ܡܶܢܶܗ ܐܳܣܝܽܘܬܳܐ ܠܦܰܓܪܶܗ܇ ܓܳܫܶܗ ܐ̱ܢܳܫܳܐܺܝܬ ܘܰܐܣܝܶܗ ܗܘܳܐ ܐܰܠܳܗܳܐܺܝܬ܇ ܫܽܘܒܚܳܐ ܠܪ̈ܰܚܡܶܐ ܕܚܳܢܽܘܗܿ ܠܰܓܒܺܝܠܬܰܢ܀

ܫܽܘܒܚܳܐ ܘܬܰܘܕܺܝܬܳܐ ܩܰܪܶܒ ܗܘܳܐ ܓܰܪܒܳܐ ܒܚܰܫܳܐ ܟܰܕ ܐܶܬܰܐܣܺܝ ܡܶܢ ܚܰܫܳܐ ܕܓܰܪܒܶܗ܇ ܠܰܡܫܺܝܚܳܐ ܡܳܪܝܳܐ܇ ܕܚܰܝܠܳܐ ܘܳܐܣܝܽܘܬܳܐ ܝܰܗܒܠܶܗ܇ ܘܰܚܢܳܢܳܐ ܕܡܶܢܶܗ ܢܣܰܒ܀

 

ܡܰܕܪܳܫܳܐ ܒܩܳܠܳܐ ܩܽܘܡ ܦܰܘܠܳܘܣ: ܗܰܘ ܓܰܪܒܳܐ ܒܚܰܫܳܐ ܡܦܺܝܣ ܗܘܳܐ ܠܳܟ܇ ܦܳܪܽܘܩܰܢ ܝܶܫܽܘܥ ܐܰܠܳܗܳܐ܇

ܐܳܘ ܡܳܪܝܳܐ ܐܶܢܗܽܘ ܕܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܚܰܝܠܳܐ ܕܰܬܕܰܟܶܝܢܝ̱܇ ܘܥܰܡ ܡܶܠܬܶܗ ܕܓܰܒܪܳܐ܇ ܕܰܒܥܳܐ ܐܶܬܰܐܣܺܝ܇ ܐܰܝܟ ܗܰܝܡܳܢܽܘܬܶܗ܇ ܐܶܬܕܰܟܺܝ ܓܰܪܒܳܐ ܡܶܢ ܦܰܓܪܶܗ܀

ܩܥܳܐ ܒܩܳܠܳܐ ܪܳܡܳܐ ܘܰܚܢܺܝܓܳܐ܇ ܕܰܡܠܶܐ ܗܘܳܐ ܚܰܫܳܐ ܘܟܰܪܝܽܘܬܳܐ܇ ܘܰܥܢܳܝܗ̱ܝ ܗܘܳܐ ܝܰܡܳܐ ܕܰܚܢܳܢܳܐ܇ ܘܰܒܕܺܝܪܺܝܢ ܫܶܦܥܰܘ̈ܗ̱ܝ ܥܰܠ ܟܽܠ ܐ̱ܢܳܫ܇ ܛܽܘܒܰܘܗ̱ܝ ܟܡܳܐ ܡܠܶܐ ܗܘܳܐ܇ ܡܶܢ ܗܰܝܡܳܢܽܘܬܶܗ܇ ܘܠܳܐ ܐܶܬܦܰܠܰܓ ܗܘܳܐ ܥܰܠ ܐܳܣܝܳܐ ܕܪ̈ܰܚܡܶܐ܇ ܗܰܝܡܶܢ ܗܘܳܐ ܕܰܡܨܶܐ ܗܘܳܐ ܚܰܝܠܳܐ܇ ܕܗܽܘ ܝܶܫܽܘܥ ܡܰܐܣܶܐ ܟܪܺܝܗܽܘܬܶܗ܀

ܡܰܢ ܐܺܝܬ ܠܶܗ ܐܰܝܟ ܗܰܝܡܳܢܽܘܬܶܗ܇ ܕܗܰܘ ܓܰܪܒܳܐ ܕܰܒܥܳܐ ܡܶܢ ܝܶܫܽܘܥ܇ ܐ̱ܢܳܫܳܐܺܝܬ ܚܳܪ ܒܶܗ ܓܰܠܝܳܐܺܝܬ܇ ܘܟܰܣܝܳܐܺܝܬ ܐܰܝܟ ܝܳܕܰܥ ܟܽܠܳܐ܇ ܘܡܳܪܰܢ ܒܰܚܢܳܢܶܗ܇ ܐ̱ܢܳܫܳܐܺܝܬ ܓܳܫܶܗ܇ ܣܰܥܪܶܗ ܒܛܰܝܒܽܘܬܶܗ܇ ܡܳܪܳܐ ܡܪܰܚܡܳܢܳܐ܇ ܓܳܫܶܗ ܗܘܳܐ ܒܪܶܚܡܰܬ ܐ̱ܢܳܫܽܘܬܶܗ܇ ܘܰܐܣܝܶܗ ܗܘܳܐ ܒܚܺܝܠ ܐܰܠܳܗܽܘܬܶܗ܀

 

ܠܟܶܢܫܳܐ ܥܶܠܳܝܳܐ ܒܩܳܠܳܐ ܫܽܘܒܚܳܐ ܠܗܰܘ ܕܶܐܬܳܐ ܘܰܕܢܰܚ ܡܶܢ ܪܰܘܡܳܐ܇ ܘܚܰܣܺܝ ܒܰܚܢܳܢܶܗ ܚܰܘ̈ܒܳܬܶܗ ܕܳܐܕܳܡ܇

ܢܰܘܕܶܐ ܐܳܦ ܕܰܒܪܳܐ ܕܠܰܚܡܳܐ ܣܓܺܝ ܒܓܰܘܶܗ܇ ܟܰܦܢܳܐ ܣܒܰܥܘ̱ ܘܰܐܳܘܬܰܪܘ̱܇ ܙܘܳܕ̈ܶܐ ܫܩܰܠܘ̱ ܘܶܐܙܰܠܘ̱܇ ܙܘܳܕܰܝ̈ܗܽܘܢ ܕܰܐܘܒܶܠܘ̱ ܐܰܟܪܙܽܘܗ̱ܝ ܒܟܶܪ̈ܟܰܝܗܽܘܢ܇ ܡܶܢ ܦܳܬܽܘܪ ܡܰܠܟܳܐ ܠܰܚܡܳܐ ܕܰܪܓܺܝܓ ܗܘܳܐ܇ ܛܽܘܒ ܠܰܐܝܢܳܐ ܕܰܬܗܰܪ ܟܰܕ ܐܶܟܰܠ܇ ܕܒܳܟ ܡܳܪܰܢ ܢܶܬܗܰܪ ܙܳܕܶܩ ܗܘܳܐ܇ ܫܽܘܒܚܳܐ ܠܰܚܢܳܢܳܟ ܙܳܝܽܘܢܳܐ ܕܥܳܠܡ̈ܶܐ܀

ܕܽܘܟܬܳܐ ܕܪܰܩ ܗܘܳܐ ܒܳܗܿ ܬܶܗܪܳܐ ܝܺܥܳܐ ܒܓܰܘܳܗܿ܇ ܕܡܶܢ ܛܺܝܢܳܐ ܫܰܦܝܳܐ ܥܒܰܕ ܗܘܳܐ ܒܳܒ̈ܳܬܳܐ܇ ܫܩܰܠ ܥܰܦܪܳܐ ܘܰܫܕܳܐ ܒܥܰܝܢ̈ܶܐ ܘܶܐܬܦܰܬܰܚ̈ܝ܇ ܐܳܣܝܳܐ ܕܰܠܣܰܡܝܳܐ ܒܛܺܝܢܳܐ ܦܰܬܰܚ ܗܘܳܐ܇ ܚܣܰܡܘ̱ ܟܳܗ̈ܢܶܐ ܕܰܫܪܳܐ ܠܫܰܒܬܳܐ܇ ܕܫܳܪܝܳܐ ܕܺܝܠܶܗ ܠܗܽܘܢ ܐܶܣܰܪ܇ ܕܰܕܪܰܫܘ̱ ܘܶܐܬܦܟܰܪܘ̱ ܘܶܐܬܚܢܶܩܘ̱܀

ܐܰܣܝܶܗ ܠܓܰܪܒܳܢܳܐ ܘܫܰܕܪܶܗ ܠܘܳܬ ܟܳܗ̈ܢܶܐ܇ ܕܢܶܚܙܽܘܢ ܘܰܢܗܰܝܡܶܢܽܘܢ ܒܬܶܕܡܽܘܪܬܳܐ ܕܰܗܘܳܬ݀܇ ܦܪܰܫܘ̱ ܠܗܽܘܢ ܐܺܝܩܳܪܳܐ ܘܠܳܐ ܐܶܬܒܰܝܰܢܘ̱ ܗ̱ܘܰܘ܇ ܘܠܳܐ ܐܰܣܶܩܘ̱ ܫܽܘܒܚܳܐ ܠܣܳܥܰܪ ܬܶܕܡܪ̈ܳܬܳܐ܇ ܐܶܠܳܐ ܚܣܳܡܳܐ ܩܰܫܝܳܐ ܒܠܰܥܘ̱ ܗ̱ܘܰܘ܇ ܕܰܠܡܳܢܳܐ ܫܳܐܶܛ ܠܶܗ ܠܫܰܒܬܳܐ܇ ܘܳܝܠܟܽܘܢ ܛܳܠܽܘܡ̈ܶܐ ܟܡܳܐ ܣܳܡܶܝܢ ܐ̱ܢܬܽܘܢ܀

 

ܐܰܘܕܰܘ ܥܰܡܡ̈ܶܐ ܩܳܠܳܐ ܒܪܺܝܟ ܗܽܘ ܕܰܣܦܰܩ ܠܟܺܐܒܰܝ̈ܢ܇ ܒܪܺܝܟ ܗܽܘ ܕܕܰܟܺܝ ܠܓܰܪܒܳܐ

ܒܰܪ ܥܶܠܳܝܳܐ ܢܚܶܬ ܗܘܳܐ܇ ܕܰܠܡܶܣܟܺܢ̈ܶܐ ܢܰܥܬܰܪ܇ ܘܡܶܢ ܒܶܝܬ ܐܰܒܳܐ ܐܰܝܬܺܝ܇ ܥܽܘܬܪܳܐ ܟܣܰܝ̈ܳܐ ܠܥܳܠܡܳܐ܇ ܚܽܘܠܡܳܢ ܟܺܐܒ̈ܶܐ ܛܥܺܝܢ ܗܘܳܐ܇ ܘܕܽܘܟܳܝ ܓܰܪ̈ܒܶܐ ܘܛܰܐܡ̈ܶܐ܇ ܒܪܺܝܟ ܗܽܘ ܕܶܐܬܳܐ ܘܦܰܪܩܰܢ܀

ܓܰܒܪܳܐ ܕܰܠܒܺܝܫ ܓܰܪܒܳܐ܇ ܐܰܦܺܝܣܶܗ ܗܘܳܐ ܒܚܰܫܳܐ܇ ܒܪ̈ܰܚܡܶܐ ܕܫܰܠܚܽܘܟ ܐܳܘ ܒܰܪ ܛܳܒܳܐ܇ ܨܒܺܝ ܒܺܝ ܘܕܰܟܳܢܝ̱ ܒܡܶܠܬܳܟ܇ ܦܫܰܛ ܝܰܡܺܝܢܶܗ ܘܕܰܟܝܶܗ܇ ܘܰܥܪܰܩ ܚܰܫܳܐ ܕܓܰܪܒܶܗ܇ ܘܰܙܡܰܪ ܫܽܘܒܚܳܐ ܠܕܰܐܣܝܶܗ܀

ܢܽܘܓܪܳܐ ܕܰܫܒܰܥ ܡܐܳܐ ܫܢܰܝ̈ܳܐ܇ ܡܚܽܘܬܳܐ ܕܓܰܪܒܳܐ ܠܳܐ ܐܰܪܚܩܰܬ݀܇ ܡܶܢ ܫܰܪܒܬܶܗ ܘܡܶܢ ܓܶܢܣܶܗ܇ ܕܗܳܢܳܐ ܓܰܒܪܳܐ ܓܰܪܒܳܢܳܐ܇ ܥܕܰܡܳܐ ܕܶܐܬܳܐ ܡܫܺܝܚܶܗ܇ ܕܕܰܟܝܶܗ ܠܶܗ ܘܰܠܓܶܢܣܶܗ܇ ܘܚܰܪܰܪ ܐܶܢܽܘܢ ܡܶܢ ܠܰܘܛܬܳܐ܀

ܟܰܕ ܒܰܣܦܺܝܢ̱ܬܳܐ ܕܰܡܺܝܟ ܗܘܳܐ܇ ܥܺܝܪܳܐ ܕܰܨܒܳܐ ܘܰܕܡܶܟ܇ ܫܓܰܫܘ̱ ܡܰܚܫܽܘ̈ܠܶܐ ܒܝܰܡܳܐ܇ ܘܩܶܪܒܰܬ݀ ܐܶܠܦܳܐ ܕܬܶܛܒܰܥܝ̱܇ ܟܐܳܐ ܒܶܗ ܒܝܰܡܳܐ ܘܰܫܠܺܝ܇ ܘܪ̈ܽܘܚܶܐ ܫܰܬܶܩ ܒܩܳܠܶܗ܇ ܒܪܺܝܟ ܗܽܘ ܕܟܽܠ ܡܶܫܬܡܰܥ ܠܶܗ܀

 

ܐܶܬܩܰܛܰܠܘ̱ ܗ̱ܘܰܘ ܝܰܠܽܘ̈ܕܶܐ ܥܶܢܝܳܢܳܐ ܫܽܘܒܚܳܐ ܠܳܟ ܐܳܣܝܳܐ ܕܪ̈ܰܚܡܶܐ܇ ܕܒܳܟ ܐܶܬܰܐܣܺܝܘ ܟܽܘܪ̈ܗܳܢܰܝܢ܇

ܥܳܒܶܕ ܕܺܝܢܳܐ ܠܰܛܠܺܝܡ̈ܶܐ ܥܒܶܕ ܠܺܝ ܕܺܝܢܳܐ ܡܶܢ ܡܽܘܫܶܐ܇ ܕܛܰܪܕܰܢܝ̱ ܡܶܢ ܓܰܘ ܡܰܫܪܺܝܬܳܐ܇ ܘܠܳܐ ܫܒܰܩ ܠܺܝ ܕܶܐܥܽܘܠ ܠܶܗ܇ ܡܳܢܳܐ ܚܛܺܝܿܬ ܠܶܗ ܠܒܰܪ ܥܰܡܪܰܡ܇ ܕܕܰܚܩܰܢܝ̱ ܡܶܢ ܓܰܘ ܐܺܝܣܪܳܐܶܝܠ܇ ܒܢ̈ܰܝ ܫܰܒܩܽܘܢܝ̱ ܘܡܶܢܝ̱ ܐܶܬܪܰܚܰܩܘ̱܇ ܘܠܳܐ ܒܳܥܶܝܢ ܠܺܝ ܩܰܪ̈ܺܝܒܰܝ̱܇ ܚܰܢܳܢܳܐ ܚܽܘܢ ܠܰܛܠܺܝܡܽܘܬܝ̱܇ ܕܰܕܠܳܐ ܣܰܟܠܽܘ ܛܳܪܕܺܝܢ ܠܺܝ܀

ܗܳܝܕܶܝܢ ܝܶܫܽܘܥ ܐܰܝܟ ܛܳܒܳܐ܇ ܐܶܬܪܰܚܰܡ ܥܠܰܘܗ̱ܝ ܘܶܐܡܰܪ ܠܶܗ܇ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܘܒܰܪ ܫܳܥܬܶܗ ܐܶܙܰܠ ܓܰܪܒܶܗ܇ ܘܳܐܡܰܪ ܗܘܳܐ ܠܶܗ ܦܳܪܽܘܩܰܢ܇ ܕܙܶܠ ܚܰܘܳܐ ܢܰܦܫܳܟ ܠܟܳܗ̈ܢܶܐ܇ ܘܩܰܪܶܒ ܚܠܳܦܰܝܟ ܩܽܘܪܒܳܢܳܐ܇ ܐܰܝܟܰܢܳܐ ܕܰܦܩܰܕ ܡܽܘܫܶܐ܇ ܠܣܳܗܕܽܘܬܳܐ ܕܒܶܝܬ ܐܺܝܣܪܳܐܶܝܠ܇ ܘܗܰܒ ܬܶܫܒܽܘܚܬܳܐ ܠܰܐܠܳܗܳܐ܀

ܒܪܺܝܟ ܕܰܒܚܽܘܒܶܗ ܐܶܬܬܰܚܬܺܝ ܡܶܢ ܡܶܕܝܳܪ̈ܰܘܗ̱ܝ ܥܶܠܳܝ̈ܶܐ܇ ܠܘܳܬ ܓܶܢܣܶܗ ܕܳܐܕܳܡ ܪܰܡܝܳܐ܇ ܕܢܰܐܣܶܐ ܟܺܐܒܰܘ̈ܗ̱ܝ ܘܟܽܘܪ̈ܗܳܢܰܘܗ̱ܝ ܦܓܰܥ ܒܶܗ ܓܰܪܒܳܐ ܘܶܐܬܕܰܟܺܝ܇ ܘܡܶܬܟܰܫܰܦ ܠܶܗ ܒܰܚܢܰܓܬܳܐ܇ ܘܳܐܡܰܪ ܗܘܳܐ ܠܶܗ ܒܰܦܝܳܣܳܐ܇ ܕܳܐܳܘ ܚܰܢܳܢܳܐ ܬܶܟܪܶܐ ܠܳܟ܇ ܥܰܠ ܕܳܘܝܳܐ ܕܛܰܪܕܶܗ ܡܽܘܫܶܐ ܕܠܳܐ ܣܰܟܠܽܘܬܳܐ ܘܣܽܘܪܚܳܢܳܐ܀

 

ܐ̱ܚܪܺܢܳܐ ܡܫܺܝܚܳܐ ܡܶܫܚܳܐ܇ ܥܽܘܢܺܝܬܳܐ ܦܓܰܥܘ̱ ܒܶܗ ܓܰܪ̈ܒܶܐ ܘܶܐܬܕܰܟܺܝܘ܇ ܘܰܣܡܰܝ̈ܳܐ ܘܰܚܙܰܘ ܢܽܘܗܪܳܐ

ܠܓܰܪܒܳܐ ܒܡܶܠܬܶܗ ܕܰܟܺܝ ܗܘܳܐ܇ ܝܳܗܽܘܒܳܐ ܕܟܽܠ ܚܽܘܠܡܳܢܺܝ̈ܢ܇ ܕܰܒܥܳܐ ܡܶܢܶܗ ܒܬܰܟܫܶܦܬܳܐ܇ ܘܰܒܚܰܫܳܐ ܟܰܕ ܡܶܬܟܰܫܰܦ܇ ܕܡܳܪܰܢ ܐܶܢܗܽܘ ܕܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܠܰܡܕܰܟܳܝܽܘܬܝ̱܇ ܘܥܰܡ ܡܶܠܬܶܗ ܦܰܫܛܶܗ ܠܺܐܝܕܶܗ܇ ܘܟܽܠܶܗ ܓܰܪܒܳܐ ܐܶܬܕܰܟܺܝ܀

ܟܽܠ ܟܽܘܪ̈ܗܳܢܰܝܢ ܡܰܐܣܶܐ ܗܘܳܐ܇ ܐܳܣܝܳܐ ܕܪ̈ܰܚܡܶܐ ܕܶܐܫܬܰܕܰܪ ܡܶܢ ܪܰܘܡܳܐ ܨܶܝܕ ܚܰܛܳܝ̈ܶܐ܇ ܕܢܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ ܦܓܰܥ ܒܶܗ ܓܰܪ̈ܒܶܐ ܘܶܐܬܕܰܟܺܝܘ܇ ܘܰܚܙܰܘ ܢܽܘܗܪܳܐ ܕܰܣܡܶܝܢ ܗ̱ܘܰܘ܇ ܘܰܚܓܺܝܪ̈ܶܐ ܩܢܰܘ ܗܶܠܰܟܬܳܐ܇ ܐܳܦ ܕܽܘܓ̈ܶܐ ܘܰܩܢܰܘ ܫܶܡܥܳܐ܀

ܐܰܣܳܐ ܟܺܐܒ̈ܶܐ ܕܢܰܦܫ̈ܳܬܰܢ܇ ܕܣܰܓܺܝ ܒܺܝܫܺܝܢ ܡܶܢ ܓܰܪܒܳܐ܇ ܐܰܚܠܶܡ ܫܽܘܚܢ̈ܶܐ ܕܰܚܛܳܗ̈ܰܝܢ܇ ܕܛܳܒ ܡܶܢ ܓܰܪܒܳܐ ܡܫܰܢܩܺܝܢ ܠܰܢ܇ ܠܰܝܬ ܠܰܢ ܡܳܪܳܐ ܠܒܰܪ ܡܶܢܳܟ ܘܠܳܐ ܐܳܣܝܳܐ ܕܥܳܨܶܒ ܡܰܓܳܢ܇ ܕܢܶܐܫܰܠ ܡܶܢܶܗ ܐܳܣܝܽܘܬܳܐ܇ ܕܢܰܦܫܳܐ ܘܦܰܓܪܳܐ ܫܰܘܝܳܐܺܝܬ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܳܣܝܳܐ ܕܪ̈ܰܚܡܶܐ ܢܚܶܬ ܗܰܠܶܟ܇ ܘܣܰܡܡܳܢ̈ܶܐ ܛܥܶܢ ܠܰܒܪܺܝܬܳܐ܇ ܠܓܰܪ̈ܒܶܐ ܕܰܟܺܝ ܗܘܳܐ ܒܡܶܠܬܶܗ܇ ܘܰܒܪܶܡܙܶܗ ܦܰܬܰܚ ܠܰܣܡܰܝ̈ܳܐ܇ ܘܰܦܫܰܛ ܐܺܝܕܳܐ ܕܝܰܒܺܝܫܳܐ܇ ܘܡܰܠܶܠ ܠܶܫܳܢܶܗ ܕܦܺܐܩܳܐ܀

ܟܶܢܫ̈ܶܐ ܒܕܰܒܪܳܐ ܣܰܒܰܥ ܗܘܳܐ܇ ܡܶܢ ܚܰܡܫܳܐ ܠܚܰܡ̈ܶܐ ܕܰܩܨܳܐ܇ ܘܡܰܝ̈ܳܐ ܠܚܰܡܪܳܐ ܫܰܚܠܶܦ ܗܘܳܐ܇ ܘܚܰܕܺܝ ܠܚܰܬܢܳܐ ܘܠܰܙܡܺܝܢ̈ܶܐ܇ ܘܰܠܓܰܪ̈ܒܶܐ ܕܰܒܥܰܘ ܡܶܢܶܗ܇ ܐܰܩܢܺܝ ܐܶܢܽܘܢ ܕܽܘܟܳܝܳܐ܀

 

ܡܰܘܪܒܳܐ ܕܠܺܠܝܳܐ ܫܠܳܡܠܶܟܝ̱ ܡܰܠܝܰܬ ܛܰܝܒܽܘܬܳܐ

ܩܪܶܒ ܗܘܳܐ ܓܰܪܒܳܐ ܡܶܢ ܪܽܘܚܩܳܐ܇ ܟܰܕ ܒܳܟܶܐ ܗܘܳܐ ܒܚܰܫܳܐ ܘܰܡܦܺܝܣ ܗܘܳܐ܇ ܕܡܳܪܝܳܐ ܐܶܢܗܽܘ ܕܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܗܽܘ ܕܬܰܕܰܟܶܝܢܝ̱܇ ܡܶܢ ܓܰܪܒܳܐ܀

ܛܰܪܕܰܢܝ̱ ܡܽܘܫܶܐ ܡܶܢ ܥܰܡܳܐ܇ ܘܢܽܘܟܪܳܝܳܐ ܗܘܺܝܿܬ ܠܟܽܠܗܽܘܢ ܩܰܪ̈ܺܝܒܰܝ܇ ܘܳܐܦܠܳܐ ܕܶܐܣܽܘܩ ܠܳܐܐܰܪ ܦܳܩܶܕ ܠܺܝ ܒܢܳܛܽܘܪܽܘܬܳܐ ܕܢܳܡܽܘܣܳܐ ܕܺܝܠܶܗ܀

ܦܫܰܛ ܡܳܪܰܢ ܐܺܝܕܶܗ ܘܶܐܡܰܪ ܕܨܳܒܶܐ ܐ̱ܢܳܐ ܒܳܟ ܓܰܒܰܪܳܐ ܐܶܬܕܰܟܳܐ܇ ܘܥܰܡ ܡܶܠܬܶܗ ܥܪܰܩ ܗܘܳܐ ܟܺܐܒܳܐ܇ ܘܰܫܦܰܪ ܓܽܘܫܡܶܗ ܒܚܽܘܠܡܳܢܳܐ ܫܰܦܝܳܐ܀

ܐܰܢ̱ܬ ܡܳܪܝ̱ ܕܰܒܓܶܫܬܳܐ ܕܺܐܝܕܳܟ܇ ܘܰܒܝܰܕ ܡܶܠܬܳܟ ܦܩܰܕܬ ܐܰܠܳܗܳܐܺܝܬ܇ ܘܕܰܟܺܝܬ ܘܰܐܚܠܶܡܬ ܠܗܰܘ ܓܰܪܒܳܐ܇ ܕܶܐܬܟܰܫܰܦ ܠܳܟ ܪܰܚܳܡ ܐ̱ܢܳܫܳܐ܀

 

ܫܰܒܰܚܘ̱ ܠܡܳܪܝܳܐ ܩܳܠܳܐ ܠܗܰܘ ܕܰܛܥܺܝܢܳܐ ܡܰܪܟܰܒܬܳܐ܇

ܟܰܕ ܪܳܕܶܐ ܗܘܳܐ ܦܳܪܽܘܩܰܢ܇ ܒܶܝܬ ܟܰܪ̈ܟܶܐ ܡܕܰܒܪܳܢܳܐܺܝܬ܇ ܓܰܒܪܳܐ ܚܰܕ ܕܰܡܠܶܐ ܓܰܪܒܳܐ ܡܶܢ ܪܽܘܚܩܳܐ ܚܙܳܝܗ̱ܝ ܘܰܣܓܶܕ ܠܶܗ ܗ ܘ ܗ܀

ܫܰܪܺܝ ܒܳܥܶܐ ܒܰܚܢܰܓܬܳܐ܇ ܘܡܶܬܟܰܫܰܦ ܪܰܥܽܘܡܳܐܺܝܬ܇ ܕܡܳܪܝܳܐ ܐܶܢܗܽܘ ܕܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܠܰܡܕܰܟܳܝܽܘܬܝ̱ ܗ ܘ ܗ܀

ܓܶܢܣܶܗ ܕܓܰܚܙܰܝ ܓܰܪܒܳܢܳܐ܇ ܕܠܳܛܶܗ ܐܶܠܺܝܫܳܥ ܢܒܺܝܳܐ܇ ܠܳܐ ܐܶܣܬܰܦܰܩ ܡܶܢ ܓܰܪܒܳܐ܇ ܢܽܘܓܪܳܐ ܕܰܫܒܰܥܡܐܳܐ ܫܢܰܝ̈ܳܐ܇ ܗ ܘ ܗ܀

ܥܕܰܡܳܐ ܠܙܰܒܢܳܐ ܕܡܶܐܬܺܝܬܶܗ܇ ܕܰܡܫܺܝܚܳܐ ܒܪܳܐ ܕܰܐܠܳܗܳܐ܇ ܠܓܰܪܒܳܐ ܡܶܢ ܓܰܪܒܶܗ ܐܰܣܺܝ܇ ܘܰܐܪܺܝܡ ܠܠܰܘܛܬܳܐ ܡܶܢ ܓܶܢܣܶܗ܇ ܗ ܘ ܗ܀

ܛܳܪܕܺܝܢ ܗ̱ܘܰܘ ܠܶܗ ܡܶܢ ܟܢܽܘܫܬܳܐ܇ ܘܕܳܚܩܺܝܢ ܠܶܗ ܡܶܢ ܒܰܝܢܳܬܗܽܘܢ܇ ܘܠܰܚܡܳܐ ܠܪܽܘܚܩܳܐ ܫܳܕܶܝܢ ܠܶܗ܇ ܕܰܠܡܳܐ ܡܶܢܶܗ ܢܶܬܛܰܡܽܐܘܢ ܗ ܘ ܗ܀

ܠܳܐ ܢܦܽܘܫ ܟܰܕ ܡܦܰܠܦܰܠܺܝܢܰܢ܇ ܒܰܚܛܳܗ̈ܶܐ ܘܰܒܟܽܘܬܡ̈ܳܬܳܐ܇ ܐܶܠܳܐ ܢܶܓܥܶܐ ܠܘܳܬ ܝܶܫܽܘܥ܇ ܕܢܰܐܣܶܐ ܦܰܓܪ̈ܰܝܢ ܘܢܰܦܫ̈ܳܬܰܢ܇ ܗ ܘ ܗ܀

ܢܰܦܫܰܢ ܕܰܠܒܺܝܫܳܐ ܓܰܪܒܳܐ܇ ܕܚܽܘܒܳܐ ܘܕܰܚܛܳܗ̈ܶܐ ܕܣܶܥܪܰܬ݀܇ ܬܶܬܕܰܟܶܐ ܒܙܽܘܦܳܟ ܕܰܟܝܳܐ܇ ܡܫܺܝܚܳܐ ܡܕܰܟܶܐ ܠܰܡܟܰܬܡ̈ܶܐ ܗ ܘ ܗ܀

ܠܳܐ ܬܶܛܪܽܘܕ ܠܰܢ ܚܰܢܳܢܳܐ܇ ܐܳܦܶܢ ܓܰܪ̈ܒܰܢ ܘܢܰܦܫ̈ܳܬܰܢ܇ ܐܰܘܫܶܛ ܐܺܝܕܳܟ ܘܕܰܟܳܐ ܠܰܢ܇ ܘܰܠܡܰܠܟܽܘܬܳܟ ܐܰܥܶܠ ܠܰܢ܇ ܗ ܘ ܗ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝ܇ ܩܳܠܳܐ ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܛܶܐܒܳܐ ܫܡܰܥ ܗܘܳܐ ܓܰܪܒܳܐ܇ ܕܳܐܣܝܳܐ ܕܪ̈ܰܚܡܶܐ ܡܰܛܺܝ ܠܶܗ܇ ܕܡܰܐܣܶܐ ܘܡܰܚܠܶܡ ܡܫܰܠܛܳܐܺܝܬ ܐܰܝܟ ܐܰܠܳܗܳܐ܇ ܐܰܠܳܗܳܐ܀

ܟܰܕ ܓܰܪܒܳܢܳܐ ܡܰܙܥܶܩ ܗܘܳܐ܇ ܠܘܳܬ ܡܳܪܰܢ ܟܰܕ ܐܳܡܰܪ ܗܘܳܐ܇ ܕܰܟܢܳܝ̱ ܡܳܪܝܳܐ܇ ܕܣܰܓܺܝ ܢܰܘܠܰܢܝ̱ ܗܳܢ ܟܺܐܒܳܐ܇ ܐܰܠܳܗܳܐ܀

ܦܳܪܽܘܩܰܢ ܐܰܝܟ ܛܳܒܳܐ܇ ܡܠܳܝܗ̱ܝ ܗܘܳܐ ܣܰܒܪܳܐ ܘܠܽܘܒܳܒܳܐ܇ ܘܰܥܢܳܐ ܘܶܐܡܰܪ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܐܰܠܳܗܳܐ܀

ܒܚܰܫܳܐ ܡܦܺܝܣܺܝܢܰܢ ܠܳܟ܇ ܘܰܒܕܶܡܥ̈ܶܐ ܡܶܬܟܰܫܦܺܝܢܰܢ܇ ܐܰܝܟ ܗܰܘ ܓܰܪܒܳܐ܇ ܕܬܰܚܠܶܡ ܫܽܘܚܢ̈ܶܐ ܕܢܰܦܫ̈ܳܬܰܢ܇ ܐܰܠܳܗܳܐ܀

ܕܰܟܳܐ ܠܰܢ ܦܳܪܽܘܩܰܢ ܡܶܢ ܓܰܪܒܳܐ ܕܰܫܟܺܝܪ̈ܳܬܳܐ܇ ܕܢܰܘܕܶܐ ܘܢܶܣܓܽܘܕ ܠܳܟ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ܀

 

ܕܰܐܠܳܗܝ̱ ܐܰܠܳܗܝ̱܇ ܒܩܳܠܳܐ ܗܰܘ ܕܥܽܘܗܕܳܢܳܐ

ܡܫܺܝܚܳܐ ܐܰܠܳܗܳܐ܇ ܕܰܒܝܰܕ ܡܶܠܬܶܗ܇ ܕܰܟܺܝ ܘܰܐܚܠܶܡ ܠܗܰܘ ܓܰܪܒܳܐ ܒܫܽܘܠܛܳܢܳܐ ܦܐܶܐ ܠܰܐܠܳܗܳܐ ܠܘܳܬܳܟ܀

ܡܫܺܝܚܳܐ ܐܰܠܳܗܳܐ ܕܰܠܗܰܘ ܓܰܪܒܳܐ܇ ܕܶܐܬܩܰܪܰܒ ܘܰܒܥܳܐ ܡܶܢܳܟ܇ ܪܶܚܡܰܬ ܐ̱ܢܳܫܳܐܺܝܬ ܐܰܚܠܶܡܬ ܠܘܳܬܳܟ܀

ܓܰܪܒܳܐ ܡܚܺܝܠܳܐ܇ ܒܩܳܠܰܝ̈ ܟܰܪܝܽܘܬܳܐ܇ ܠܰܡܫܺܝܚܳܐ ܡܶܬܟܰܫܰܦ ܗܘܳܐ܇ ܕܡܳܪܝܳܐ ܐܶܢ ܗܽܘ ܕܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܠܰܡܕܰܟܳܝܽܘܬܝ̱ ܠܘܳܬܳܟ܀

ܗܽܘ ܚܠܺܝܡ ܐܰܢ̱ܬ ܗܽܘ܇ ܡܳܪܰܢ ܐܶܡܰܪ ܠܶܗ܇ ܙܶܠ ܚܰܘܳܐ ܢܰܦܫܳܟ ܠܟܳܗ̈ܢܶܐ܇ ܘܩܰܪܶܒ ܩܽܘܪܒܳܢܳܐ ܠܡܳܪܝܳܐ ܐܰܝܟ ܕܰܦܩܰܕ ܡܽܘܫܶܐ ܠܥܰܡܳܐ܀

ܐܰܢ̱ܬ ܡܳܪܝ̱ ܕܰܐܣܺܝܬ܇ ܘܰܐܚܠܶܡܬ ܠܗܰܘ ܓܰܪܒܳܐ܇ ܕܶܐܬܩܰܪܰܒ ܠܳܟ ܒܰܚܢܰܓܬܳܐ܇ ܘܕܰܟܺܝܬ ܚܰܫܳܐ ܕܰܒܢܰܦܫܶܗ܇ ܠܘܳܬܳܟ܀

ܡܫܺܝܚܳܐ ܕܕܰܟܺܝ ܒܡܶܠܬܶܗ ܠܗܰܘ ܓܰܪܒܳܐ܇ ܕܰܟܳܐ ܠܰܢ ܡܶܢ ܟܽܘܬܡ̈ܳܬܰܢ܇ ܚܰܣܳܐ ܚܰܘ̈ܒܰܝܢ ܘܰܚܛܳܗ̈ܰܝܢ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܗܳܢܰܘ ܒܰܫܪܳܪܳܐ

ܩܪܶܒ ܗܘܳܐ ܓܰܪܒܳܢܳܐ܇ ܠܝܶܫܽܘܥ ܟܰܕ ܩܳܥܶܐ ܘܳܐܡܰܪ܇ ܕܪܰܚܶܡܥܠܰܝ ܒܰܪ ܕܰܘܺܝܕ܇ ܘܕܰܟܳܢܝ̱ ܕܶܐܙܡܰܪ ܠܳܟ ܫܽܘܒܚܳܐ܇ ܘܰܩܪܳܝܗ̱ܝ ܝܶܫܽܘܥ ܘܶܐܡܰܪ ܠܶܗ܇ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܘܡܶܚܕܳܐ ܐܶܙܰܠ ܓܰܪܒܶܗ܇ ܘܰܙܡܰܪ ܫܽܘܒܚܳܐ ܠܳܐܣܝܳܐ ܕܝܰܗܒܠܶܗ ܚܽܘܠܡܳܢܳܐ܀

ܚܰܘܺܝ ܦܳܪܽܘܩܰܢ܇ ܕܫܰܪܺܝܪܳܐܺܝܬ ܒܰܪ ܐܰܠܳܗܳܐ ܦܳܩܽܘܕܳܐܺܝܬ܇ ܒܝܰܕ ܒܰܪܬ ܩܳܠܳܐ ܐܰܠܳܗܳܐܝܬܳܐ܇ ܗܰܘ ܟܰܕ ܐܰܙܥܶܩ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܘܒܳܗܿ ܒܫܳܥܬܳܐ ܐܶܬܕܰܟܺܝ ܗܰܘ ܓܰܪܒܳܢܳܐ܇ ܫܰܪܺܝ ܗܘܳܐ ܘܰܙܡܰܪ ܬܶܫܒܽܘܚܬܳܐ ܠܰܡܫܺܝܚܳܐ ܕܰܐܣܝܶܗ܀

ܒܳܪܽܘܝܳܐ ܕܟܽܠ ܒܶܪ̈ܝܳܢ܇ ܘܰܡܬܰܩܢܳܢܳܐ ܕܟܽܠܗܽܘܢ ܗܘܰܝ̈ܳܐ܇ ܒܝܰܡܺܝܢܳܐ ܕܬܶܩܠܰܬ݀ ܛܽܘܪ̈ܶܐ܇ ܘܰܠܪ̈ܳܡܳܬܳܐ ܫܕܳܬ̈ ܒܡܰܐܣܰܐܬܳܐ܇ ܓܳܫܶܗ ܗܘܳܐ ܠܗܰܘ ܕܶܐܬܟܰܫܰܦ܇ ܘܕܰܟܺܝ ܘܰܐܣܝܶܗ ܒܰܚܢܳܢܶܗ ܡܶܢ ܟܽܘܪܗܳܢܶܗ܇ ܘܥܰܠ ܗܳܕܶܐ ܟܽܠܰܢ ܡܫܰܒܚܺܝܢܰܢ ܠܥܳܠܰܡܥܳܠܡܺܝܢ܀

 

ܠܰܐܠܰܗܳܐ ܕܒܰܐܬܽܘܢܳܐ

ܡܽܘܫܶܐ ܛܰܪܕܰܢܝ̱ ܡܶܢ ܥܰܡܳܐ܇ ܒܢܳܡܽܘܣܳܐ ܘܰܒܢܳܛܽܘܪ̈ܘܳܬܶܗ ܕܠܳܐ ܣܰܟܠܽܘܬܳܐ܇ ܡܳܪܶܗ ܕܡܽܘܫܶܐ ܕܠܳܐ ܡܫܰܥܒܶܕ ܠܢܳܡܽܘܣܳܐ ܘܰܠܰܢܳܛܽܘܪ̈ܘܳܬܶܗ ܐܰܢ̱ܬ ܗܽܘ ܡܳܪܝ̱ ܐܰܠܳܗܳܐ ܕܥܰܠ ܟܽܠ ܫܰܠܺܝܛ ܐܰܣܳܢܝ̱ ܡܳܪܝ̱ ܒܰܚܢܳܢܳܟ܇ ܘܰܐܘܕܶܐ  ܠܛܰܝܒܽܘܬܳܟ܀

ܦܫܰܛ ܝܰܡܺܝܢܶܗ ܦܳܪܽܘܩܰܢ܇ ܘܓܳܫ ܗܘܳܐ ܦܰܐܝܽܘܬ ܐ̱ܢܳܫܳܐܺܝܬ ܐܰܝܟ ܒܰܪܢܳܫܳܐ܇ ܘܦܳܩܶܕ ܗܘܳܐ ܐܰܠܳܗܳܐܺܝܬ܇ ܐܰܝܟ ܒܳܪܽܘܝܳܐ ܫܰܠܺܝܛ ܟܽܠ ܟܰܕ ܐܳܡܰܪ܇ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܘܒܳܗܿ ܒܫܳܥܬܳܐ ܐܶܬܕܰܟܺܝ ܘܰܙܡܰܪ ܬܶܫܒܽܘܚܬܳܐ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ

ܚܙܳܝܗ̱ܝ ܓܰܪܒܳܐ ܠܝܰܡܳܐ ܫܦܺܝܥܳܐ܇ ܕܫܶܦܥܰܘ̈ܗ̱ܝ ܫܦܺܝܥܺܝܢ ܥܰܠ ܟܽܠ ܐ̱ܢܳܫ܇ ܘܰܪܗܶܛ ܐܶܬܳܐ ܩܳܡ ܨܶܝܕܰܘܗ̱ܝ܇ ܘܰܥܢܳܐ ܘܗܳܟܰܢ ܐܶܡܰܪ ܠܶܗ܇ ܐܳܘ ܡܰܒܽܘܥܳܐ ܕܦܽܘܪܩܳܢܳܐ܇ ܘܰܡܥܺܝܢܳܐ ܕܚܰܝ̈ܶܐ܇ ܐܰܫܺܝܓܰܝܢܝ̱ ܡܶܢ ܛܰܡܽܐܘܬܳܐ܀

 

ܫܰܦܺܝܪ ܗܘܳܐ ܠܶܗ ܠܦܳܪܽܘܩܰܢ܇ ܟܰܕ ܪܳܕܶܐ ܒܶܝܬ ܐܽܘܪ̈ܚܳܬܳܐ܇ ܡܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܒܡܶܠܬܳܐ ܟܺܝܬ ܘܰܒܦܽܘܩܕܳܢܳܐ܇ ܘܓܰܪܒܳܐ ܦܓܰܥ ܒܶܗ ܟܰܕ ܩܳܥܶܐ܇ ܕܡܳܪܝܳܐ ܐܶܢܗܽܘ ܕܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܠܰܡܕܰܟܳܝܽܘܬܝ̱܀

ܗܰܘ ܓܰܪܒܳܐ ܒܩܳܠܰܝ̈ ܚܰܫܳܐ܇ ܠܰܡܫܺܝܚܳܐ ܡܶܬܟܰܫܰܦ ܗܘܳܐ܇ ܕܡܳܪܝܳܐ ܐܶܢ ܗܽܘ ܕܨܳܒܶܐ ܐܰܢ̱ܬ ܡܶܫܟܰܚ ܐܰܢ̱ܬ ܠܰܡܕܰܟܳܝܽܘܬܝ̱܇ ܘܥܰܡܳܗܿ ܕܡܶܠܬܶܗ ܐܶܡܰܪ ܠܶܗ܇ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܘܒܳܗܿ ܒܫܳܥܬܳܐ ܐܶܙܰܠ ܓܰܪܒܶܗ܀

ܟܰܕ ܪܳܕܶܐ ܒܶܝܬ ܐܽܘܪ̈ܚܳܬܳܐ܇ ܦܓܰܥ ܒܶܗ ܓܰܒܪܳܐ ܓܰܪܒܳܢܳܐ܇ ܘܰܨܒܳܐ ܡܳܪܰܢ ܘܕܰܟܝܶܗ ܗܘܳܐ܇ ܘܰܚܠܺܝܡܳܐ ܥܰܒܕܶܗ ܘܫܰܢܺܝ܇ ܘܚܰܘܺܝ ܡܳܪܰܢ ܕܰܢܕܰܟܶܐ ܒܳܥܶܐ ܠܢܰܦܫ̈ܳܬܳܐ ܕܐ̱ܢܳܫܳܐ܇ ܡܶܢ ܓܰܪܒܳܐ ܕܟܳܦܽܘܪܽܘܬܳܐ܀

ܕܰܟܳܐ ܠܰܢ ܒܰܪ ܐܰܠܳܗܳܐ܇ ܡܶܢ ܓܰܪܒܳܐ ܕܰܫܟܺܝܪ̈ܳܬܳܐ܇ ܐܰܝܟ ܕܕܰܟܺܝܬܳܝܗ̱ܝ ܡܶܢ ܓܰܪܒܶܗ܇ ܠܓܰܪܒܳܢܳܐ ܕܶܐܬܟܰܫܰܦ ܠܳܟ܇ ܘܰܫܒܽܘܩ ܚܰܘ̈ܒܰܝܢ ܘܰܚܛܳܗ̈ܰܝܢ ܘܚܰܣܳܐ ܠܰܢ ܘܰܠܥܰܢܺܝܕܰܝ̈ܢ܇ ܘܰܠܟܳܬܽܘܒܳܐ ܒܝܽܘܡ ܕܺܝܢܳܐ܀

 

ܡܰܘܪܒܳܐ ܒܩܳܠܳܐ ܕܟܺܝܬܳܐ ܘܰܡܫܰܒܰܚܬܳܐ

ܟܰܕ ܢܳܚܶܬ ܗܘܳܐ ܦܳܪܽܘܩܰܢ܇ ܡܶܢ ܛܽܘܪܳܐ ܕܡܶܬܩܪܶܐ ܕܬܳܒܽܘܪ܇ ܒܳܬܰܪ ܕܚܰܘܺܝ ܒܰܫܪܳܪܳܐ܇ ܐܰܠܳܗܽܘܬܶܗ ܠܬܰܠܡܺܝܕܰܘ̈ܗ̱ܝ܇ ܦܓܰܥ ܒܶܗ ܓܰܪܒܳܐ܀

ܐܰܢ̱ܬ ܕܰܠܓܰܒܪܳܐ ܓܰܪܒܳܐ܇ ܕܰܡܦܺܝܣ ܗܘܳܐ ܠܳܟ ܥܰܠ ܕܽܘܟܳܝܶܗ܇ ܕܰܟܺܝܬܳܝܗ̱ܝ ܡܳܪܝ̱ ܒܰܚܢܳܢܳܟ܇ ܕܰܟܳܐ ܠܰܢ ܐܳܦܠܰܢ ܒܛܰܝܒܽܘܬܳܟ܇ ܡܳܪܶܐ ܟܽܠ ܫܽܘܒܚܳܐ܀

ܕܰܟܳܐ ܠܰܢ ܦܳܪܽܘܩܰܢ܇ ܡܶܢ ܟܽܘܬܡ̈ܳܬܳܐ ܕܰܒܢܰܦܫܰܢ܇ ܕܒܺܝܫܳܐ ܚܛܺܝܬܳܐ ܡܶܢ ܓܰܪܒܳܐ܇ ܒܳܟ ܢܶܬܕܰܟܶܐ ܘܢܶܬܚܰܣܶܐ܇ ܡܶܢ ܥܰܘܠܳܐ܀

ܫܽܘܒܚܳܐ ܠܳܟ ܦܳܪܽܘܩܰܢ܇ ܕܰܒܡܶܠܬܳܟ ܡܳܪܳܢܳܝܬܳܐ܇ ܕܰܟܺܝܬ ܓܰܪܒܶܗ ܕܓܰܪܒܳܢܳܐ܇ ܕܰܡܦܺܝܣ ܗܘܳܐ ܠܳܟ ܒܰܚܢܰܓܬܳܐ ܥܰܠ ܕܽܘܟܳܝܶܗ܀

 

ܫܰܒܰܚܘ̱ ܥܰܒܕܰܘ̈ܗ̱ܝ ܩܳܠܳܐ ܗܰܘ ܕܰܛܥܺܝܢܳܐ ܡܰܪܟܰܒܬܳܐ܇

ܫܡܰܥ ܗܘܳܐ ܛܶܐܒܳܐ ܡܶܢ ܪܽܘܚܩܳܐ܇ ܕܳܐܣܝܳܐ ܕܪ̈ܰܚܡܶܐ ܡܰܛܺܝ ܠܶܗ܇ ܚܙܳܝܗ̱ܝ ܠܝܶܫܽܘܥ ܘܰܣܓܶܕ ܘܶܐܡܰܪ܇ ܒܰܪ ܕܰܘܺܝܕ ܪܰܚܶܡܥܠܰܝ ܗ ܘ ܗ܀

ܗܘܺܝܿܬ ܢܽܘܟܪܳܝܳܐ ܠܝܳܕܽܘܥ̈ܰܝ܇ ܐܳܦ ܪܰܚܺܝܩܳܐ ܠܩܰܪ̈ܺܝܒܰܝ܇ ܗܰܘ ܓܰܪܒܳܐ ܒܩܳܠܰܝ̈ ܚܰܫܳܐ܇ ܠܰܡܫܺܝܚܳܐ ܡܶܬܟܰܫܰܦ ܗܘܳܐ ܗ ܘ ܗ܀

ܡܽܘܢ ܝܽܘܬܪܳܢܳܐ ܡܛܳܢܝ̱ ܡܳܪܰܢ܇ ܡܶܢ ܡܽܘܫܶܐ ܘܡܶܢ ܢܳܡܽܘܣܶܗ܇ ܕܰܒܫܰܒܛܳܐ ܛܰܪܕܰܢܝ̱ ܘܰܐܦܩܰܢܝ̱܇ ܡܶܢ ܡܰܫܪܺܝܬܳܐ ܕܥܶܒܪ̈ܳܝܶܐ܇ ܗ ܘ ܗ܀

ܐܰܢ̱ܬ ܗܽܘ ܫܰܠܺܝܛ ܥܰܠ ܡܽܘܫܶܐ܇ ܘܥܰܠ ܢܳܡܽܘܣܶܗ ܕܒܰܪ ܥܰܡܪܰܡ܇ ܚܰܘܳܢܝ̱ ܡܳܪܝ̱ ܗܳܪܟܳܐ ܕܺܝܢܺܐ܇ ܕܰܝܳܢܳܐ ܕܟܽܠ ܕܰܝܳܢ̈ܶܐ܇ ܗ ܘ ܗ܀

ܟܳܗ̈ܢܶܐ ܒܺܝ ܡܳܪܝ̱ ܗܳܐ ܚܳܝܪܺܝܢ܇ ܕܥܰܐܺܝܠ ܐ̱ܢܳܐ ܒܰܝܢܳܬ ܟܶܢܫܳܐ܇ ܘܶܐܢ ܢܳܦܶܩ ܐ̱ܢܳܐ ܕܠܳܐ ܕܽܘܟܳܝ ܡܒܰܙܚܺܝܢ ܒܳܟ ܐܳܦܠܺܝ ܩܳܛܠܺܝܢ܇ ܗ ܘ ܗ܀

ܗܳܝܕܶܝܢ ܝܶܫܽܘܥ ܐܰܝܟ ܛܳܒܳܐ܇ ܒܚܽܘܒܳܐ ܪܰܒܳܐ ܦܰܢܺܝ ܠܶܗ܇ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܘܒܳܗܿ ܒܫܳܥܬܳܐ ܐܶܬܕܰܟܺܝ ܗܘܳܐ܇ ܗ ܘ ܗ܀

ܙܶܠ ܚܰܘܳܐ ܢܰܦܫܳܟ ܠܟܳܗ̈ܢܶܐ܇ ܐܳܡܰܪ ܗܘܳܐ ܠܶܗ ܦܳܪܽܘܩܰܢ ܘܩܰܪܶܒ ܚܠܳܦܰܝܟ ܩܽܘܪܒܳܢܳܐ܇ ܐܰܝܟ ܕܰܦܩܰܕ ܡܽܘܫܶܐ ܠܥܰܡܳܐ܇ ܗ ܘ ܗ܀

 

ܛܽܘܒܰܝܗܽܘܢ ܠܡܶܣܟܺܢ̈ܶܐ ܩܳܠܳܐ ܠܗܳܝ ܒܰܪܬ ܩܳܠܳܐ ܫܒܺܝܚܬܳܐ

ܟܰܕ ܠܗܳܝ ܗܘܳܐ ܓܰܒܪܳܐ ܓܰܪܒܳܢܳܐ܇ ܕܳܐܣܝܳܐ ܡܫܺܝܚܳܐ ܗܳܐ ܡܰܛܺܝ ܠܶܗ܇ ܘܰܩܪܶܒ ܨܶܝܕܰܘܗ̱ܝ ܘܶܐܡܰܪ ܠܶܗ܇ ܕܳܐܳܘ ܚܰܢܳܢܳܐ ܚܽܘܢܰܝܢܝ̱ ܒܛܰܝܒܽܘܬܳܟ܇ ܘܕܰܟܳܢܝ̱ ܡܶܢ ܓܰܪܒܳܐ܀

ܗܳܝܕܶܝܢ ܡܳܪܰܢ ܐܰܝܟ ܛܳܒܳܐ܇ ܕܨܳܒܶܐ ܐ̱ܢܳܐ ܒܳܟ ܓܰܒܪܳܐ ܐܶܬܕܰܟܳܐ܇ ܘܒܳܗܿ ܒܫܳܥܬܳܐ ܐܶܙܰܠ ܓܰܪܒܶܗ ܡܶܢܶܗ܇ ܘܰܐܘܕܺܝ ܘܫܰܒܰܚ ܠܒܰܪ ܛܳܒܳܐ ܕܰܐܣܝܶܗ܀

ܠܓܰܪܒܳܐ ܕܰܟܺܝ ܗܘܳܐ ܡܳܪܰܢ܇ ܒܓܶܫܬܳܐ ܘܡܶܠܬܳܐ ܦܳܩܽܘܕܳܐܺܝܬ܇ ܘܫܰܕܪܶܗ ܢܺܐܙܰܠ ܢܩܰܪܶܒ ܩܽܘܪ̈ܒܳܢܶܐ܇ ܐܰܝܟ ܕܰܦܩܰܕ ܡܽܘܫܶܐ ܠܟܳܗ̈ܢܶܐ ܒܢ̈ܰܝ ܠܶܘܺܝ܀

ܠܗܳܝ ܒܰܪܬ ܩܳܠܳܐ ܫܒܺܝܚܬܳܐ܇ ܢܶܫܬܘܶܐ ܠܡܶܫܡܰܥ ܕܳܐܡܰܪ ܐܰܢ̱ܬ ܠܰܢ܇ ܕܨܳܒܶܐ ܐ̱ܢܳܐ ܒܳܟܽܘܢ ܫܒܺܝܩܺܝܢ ܚܛܳܗܰܝ̈ܟܽܘܢ܇ ܘܶܐܢܳܐ ܡܕܰܟܶܐ ܐ̱ܢܳܐ ܓܰܪܒܳܐ ܕܢܰܦܫ̈ܳܬܟܽܘܢ܀

ܡܫܺܝܚܳܐ ܕܕܰܟܺܝ ܒܰܚܢܳܢܶܗ܇ ܠܓܰܒܰܪܳܐ ܓܰܪܒܳܐ ܕܰܒܥܳܐ ܡܶܢܶܗ܇ ܕܰܟܳܐ ܚܰܘܒ̈ܶܐ ܘܰܚܛܳܗ̈ܶܐ ܕܟܽܠܰܢ܇ ܒܣܽܘܓܐܳܐ ܕܪ̈ܰܚܡܰܝܟ܇ ܡܳܪܝ̱ ܘܰܕܒܰܣܺܝܡܽܘܬܳܟ܀

ܢܺܐܬܶܐ ܚܰܢܳܢܳܟ ܠܰܐܝܠܶܢ܇ ܛܳܒܳܐ ܕܰܐܣܺܓܝ ܚܢܳܢܶܗ ܥܰܠ ܒܶܪ̈ܝܳܬܶܗ܇ ܘܕܰܟܳܐ ܛܰܐܡܽܘܬܰܢ ܘܰܡܪܽܘܩ܇ ܘܰܐܫܺܝܓ ܥܰܘܠܳܐ ܕܢܰܦܫ̈ܳܬܰܢ܇ ܕܢܶܙܡܰܪ ܠܳܟ܀

 

ܩܳܠܳܐ ܕܨܰܦܪܳܐ ܩܳܠܳܐ ܕܩܽܘܩܳܝܳܐ

ܗܰܘ ܓܰܪܒܳܐ ܒܩܳܠܰܝ̈ ܚܰܫܳܐ ܘܒܶܟܝܳܐ ܡܦܺܝܣ ܗܘܳܐ܇ ܠܝܶܫܽܘܥ ܐܳܣܝܳܐ ܫܡܰܝܳܢܳܐ܇ ܘܗܳܟܰܢ ܐܳܡܰܪ ܗܘܳܐ܇ ܕܡܳܪܰܢ ܝܶܫܽܘܥ ܐܶܬܪܰܚܰܡܥܠܰܝ܇ ܘܗܰܒ ܥܽܘܕܪܳܢܳܐ ܠܟܺܐܒܳܐ ܕܡܰܚܶܫ ܠܺܝ܇ ܡܨܶܐ ܐܰܢ̱ܬ ܚܰܝܠܳܐ ܐܶܢ ܒܳܥܶܝܬ܇ ܠܰܡܕܰܟܳܝܽܘܬܝ̱ ܕܫܽܘܠܛܳܢܳܐ ܕܪܰܘܡܳܐ ܘܥܽܘܡܩܳܐ ܒܺܐܝܕܰܝ̈ܟ ܗܽܘ ܣܺܝܡܺܝܢ܇ ܗ ܘ ܗ܀

ܒܚܰܫܳܐ ܘܰܒܠܶܒܳܐ ܫܚܺܝܩܳܐ ܐܰܪܺܝܡ ܗܘܳܐ ܩܳܠܶܗ܇ ܗܰܘ ܓܰܪܒܳܐ ܟܰܕ ܡܶܬܟܰܫܰܦ ܠܝܶܫܽܘܥ ܐܰܠܳܗܳܐ܇ ܐܳܘ ܒܰܪ ܕܰܘܺܝܕ ܘܰܐܠܳܗܶܗ ܕܕܰܘܺܝܕ܇ ܐܳܣܝܳܐ ܪܰܒܳܐ ܕܶܐܬܳܐ ܠܰܒܪܺܝܬܳܐ܇ ܒܪ̈ܰܚܡܰܝܟ ܕܰܟܳܢܝ̱ ܡܶܢ ܓܰܪܒܳܐ ܕܰܡܫܰܢܶܩ ܠܺܝ܇ ܘܥܰܡ ܡܶܠܬܶܗ ܓܳܫܶܗ ܒܺܐܝܕܶܗ ܘܰܠܓܰܪܒܶܗ ܐܰܥܪܶܩ܇ ܗ ܘ ܗ܀

 

ܐ̱ܚܪܺܢܳܐ ܠܡܰܠܟܽܘܬ ܪܰܘܡܳܐ

ܫܽܘܒܚܳܐ ܠܺܝܚܺܝܕܳܝܳܐ܇ ܕܰܒܝܰܕ ܛܰܝܒܽܘܬܶܗ܇ ܣܰܥܪܶܗ ܠܰܓܒܺܝܠܬܶܗ܇ ܘܰܒܝܰܕ ܣܰܡܳܐ ܕܥܽܘܕܪܳܢܳܐ܇ ܢܶܗܪܰܬ݀ ܐܰܪܥܳܐ ܘܶܐܬܦܰܨܚܰܬ݀܇ ܘܟܶܢܫ̈ܶܐ ܕܥܰܡܡ̈ܶܐ ܟܰܕ ܚܳܕܶܝܢ܇ ܩܳܠܰܝ̈ ܬܰܘܕܺܝܬܳܐ ܝܰܗܒܘ̱ ܠܶܗ܇ ܒܪܺܝܟ ܕܶܐܬܳܐ ܘܦܰܪܩܰܢ ܡܶܢ ܛܽܘܥܝܰܝ܀

ܫܽܘܒܚܳܐ ܠܳܟ ܡܳܪܰܢ܇ ܐܺܝܬܝܳܐ ܕܡܶܢ ܐܰܒܳܐ܇ ܕܬܰܚܬܺܝܬ ܪܰܒܽܘܬܳܟ܇ ܡܶܢ ܪ̈ܰܘܡܶܐ ܓܢܺܝ̈ܙܶܐ ܕܰܠܥܶܠ܇ ܘܰܗܘܰܝܬ ܐ̱ܢܳܫܳܐ ܒܨܶܒܝܳܢܳܟ܇ ܘܰܐܣܺܝܬ ܟܺܐܒ̈ܶܐ ܘܟܽܘܪ̈ܗܳܢܶܐ ܕܰܒܢ̈ܰܝ ܐ̱ܢܳܫܳܐ ܥܰܦܪ̈ܳܢܶܐ܇ ܒܪܺܝܟ ܚܽܘܒܳܟ ܘܰܒܪܺܝܟ ܐܺܝܩܳܪܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܰܕ ܪܳܕܶܐ ܗܘܳܐ ܒܰܪ ܐܰܠܳܗܳܐ ܒܽܐܘܪܚܳܐ ܦܓܰܥ ܒܶܗ܇ ܓܰܪܒܳܐ ܒܚܰܫܳܐ ܘܰܡܦܺܝܣ ܗܘܳܐ ܠܶܗ ܥܰܠ ܚܽܘܠܡܳܢܳܐ܇ ܐܶܢ ܨܳܒܶܝܬ ܡܳܪܝ̱ ܡܶܫܟܰܚ ܐܰܢ̱ܬ ܗܽܘ ܠܰܡܕܰܟܳܝܽܘܬܝ܇ ܘܰܨܒܳܐ ܘܕܰܟܝܶܗ ܘܰܗܘܳܐ ܚܠܺܝܡܳܐ ܘܟܶܢ ܫܰܢܺܝ ܗܘܳܐ܀

ܩܽܘܪܒܳܢܳܐ ܦܩܰܕ ܡܳܪܝܳܐ ܠܓܰܪܒܳܐ ܕܰܢܩܰܪܶܒ ܗܘܳܐ܇ ܕܠܳܐ ܢܰܪܚܶܩ ܠܰܢ ܡܶܢ ܦܽܘܩܕܳܢ̈ܶܐ ܕܡܽܘܫܶܐ ܪܰܒܳܐ܇ ܦܩܰܕ ܗܘܳܐ ܢܒܺܝܳܐ ܕܰܢܩܰܪܶܒ ܗܘܳܐ ܕܶܒܚܳܐ ܠܡܳܪܝܳܐ܇ ܗܰܘ ܕܡܶܬܕܰܟܶܐ ܡܶܢ ܛܰܐܡܽܘܬܳܐ ܕܓܰܪܒܳܐ ܕܦܰܓܪܶܗ܀

 

ܕܰܬܠܳܬܫܳܥܺܝ̈ܢ܇ ܩܳܠܳܐ ܠܡܰܪܝܰܡ ܝܳܠܕܰܬ ܐܰܠܳܗܳܐ

ܐܳܣܝܳܐ ܛܳܒܳܐ ܕܢܰܦܫ̈ܳܬܰܢ܇ ܕܳܠ ܡܶܢ ܐܰܬܪܶܗ܇ ܘܰܐܣܺܝ ܘܰܐܚܠܶܡ ܚܒܳܪ̈ܳܬܳܐ܇ ܕܟܽܠ ܕܰܡܚܺܝܠܺܝܢ܇ ܘܕܰܟܺܝ ܗܘܳܐ ܠܓܰܪܒܳܐ ܒܡܶܠܬܶܗ܇ ܐܰܝܟ ܚܳܐܶܢ ܟܽܠ܇ ܒܪܺܝܟ ܐܰܒܳܐ ܕܫܰܠܚܶܗ ܨܶܐܝܕܰܝܢ܇ ܕܢܰܐܣܶܐ ܟܺܐܒܰܝ̈ܢ܀

ܐܳܡܰܪ ܓܰܪܒܳܐ ܡܳܢܳܐ ܚܛܺܝܿܬ ܠܡܽܘܫܶܐ ܕܛܰܪܕܰܢܝ̱܇ ܕܗܳܐ ܨܶܒܝܳܢܶܗ ܕܡܳܪܶܐ ܟܽܠ ܐܶܫܬܰܡܠܺܝ ܒܺܝ܇ ܒܳܥܶܐ ܗܘܺܝܿܬ ܐܶܬܶܠ ܩܶܢܝܳܢܝ̱ ܘܳܠܶܐ ܠܰܡ ܐܰܓܪܶܒ܇ ܒܪܺܝܟ ܕܰܐܣܓܺܝ ܚܢܳܢܶܗ ܨܶܝܕܰܝ ܕܰܟܺܝ ܘܡܰܪܩܰܢܝ̱܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܣܕܰܪ ܦܳܬܽܘܪܶܗ ܘܰܩܨܳܐ ܠܰܚܡܶܗ ܩܕܳܡ ܕܰܣܡܺܝܟܺܝܢ܇ ܟܽܠܶܗ ܒܪܺܝܬܳܐ ܣܶܒܥܰܬ݀ ܡܶܢܶܗ ܘܗܽܘ ܠܳܐ ܡܰܘܦܶܐ܇ ܛܥܺܝܢ ܗܘܳܐ ܥܽܘܬܪܳܐ ܘܪܳܕܶܐ ܒܰܐܬܪܰܢ ܐܰܝܟ ܬܰܐܓܳܪ̈ܳܐ܇ ܘܡܰܓܳܢ ܟܽܠܝܽܘܡ ܝܳܗܶܒ ܗܘܳܐ ܠܶܗ ܠܰܐܝܢܳܐ ܕܰܣܢܺܝܩ܀

ܡܶܣܟܺܢܳܐܺܝܬ ܥܳܐܶܠ ܗܘܳܐ ܠܗܶܝܢ ܠܰܡܕܺܝܢ̈ܳܬܳܐ܇ ܕܳܪܶܐ ܓܰܙܰܘ̈ܗ̱ܝ ܥܰܠ ܡܶܣܟܺܢ̈ܶܐ ܕܢܰܥܬܰܪ ܐܶܢܽܘܢ܇ ܩܪܳܬܶܗ ܐܽܘܪܚܶܐ ܕܰܐܦܠܶܗ ܢܶܣܥܽܘܪ ܠܰܟܦܰܪܢܰܚܽܘܡ܇ ܘܰܢܣܰܟ ܗܘܳܐ ܒܳܗܿ ܚܢܳܢܳܐ ܘܪ̈ܰܚܡܶܐ ܘܟܶܢ ܫܰܢܺܝ ܗܘܳܐ܀

 

ܫܠܶܡ ܕܚܰܕ ܒܫܰܒܳܐ ܕܰܬܪܶܝܢ ܕܨܰܘܡܳܐ ܕܰܐܪܒܥܺܝܢ

ܨܰܠܰܘ ܥܰܠ ܕܰܣܪܰܛ ܒܫܰܢܰܬ ܐܨܦܐ ܡ

 

ܬܽܘܒ ܕܪܰܡܫܳܐ ܕܰܬܪܶܝܢ ܒܫܰܒܳܐ

ܕܪܰܚܶܡܥܠܰܝ ܒܩܳܠܳܐ ܠܳܐ ܬܶܥܽܘܠ ܠܕܺܝܢܳܐ܇

ܒܚܰܘܒ̈ܶܐ ܘܰܚܛܳܗ̈ܶܐ܇ ܕܰܩܢܽܘܡܝ̱ ܡܰܘܕܶܐ ܐ̱ܢܳܐ܇ ܚܰܣܳܐ ܠܺܝ ܚܰܘ̈ܒܰܝ܇ ܒܪ̈ܰܚܡܶܐ ܕܛܰܝܒܽܘܬܳܟ܀

ܒܨܰܘܡܳܐ ܕܨܳܡ ܡܳܪܰܢ܇ ܐܰܠܦܶܗ ܗܘܳܐ ܠܥܺܕܬܶܗ܇ ܕܰܒܨܰܘܡܳܐ ܕܬܶܙܟܶܐ܇ ܒܺܝܫܳܐ ܒܥܶܠܕܰܪܳܐ܀

ܗܰܒܠܰܢ ܡܳܪܝ̱ ܕܰܢܨܽܘܡ܇ ܨܰܘܡܳܐ ܩܰܕܺܝܫܳܐ܇ ܘܰܐܫܘܳܢ ܠܡܰܠܟܽܘܬܳܟ܇ ܝܶܫܽܘܥ ܡܠܶܐ ܪ̈ܰܚܡܶܐ܀

ܒܝܰܕ ܨܰܘܡܳܐ ܕܨܳܡܘ̱ ܗ̱ܘܰܘ܇ ܛܠܳܝ̈ܶܐ ܒܰܐܬܽܘܢܳܐ܇ ܘܕܰܥܶܟܘ̱ ܓܰܘܙܰܠܬܳܐ܇ ܕܰܫܓܰܪܘ̱ ܒܳܒܠܳܝ̈ܶܐ܀

ܚܰܣܝܳܐ ܩܰܕܺܝܫܳܐ܇ ܕܨܳܡ ܗܘܳܐ ܥܰܠ ܐܰܦܰܝ̈ܢ܇ ܒܨܰܘܡܳܟ ܩܰܕܺܝܫܳܐ ܘܶܐܬܪܰܚܰܡܥܠܰܝܢ܀

 

ܕܡܳܪܝܳܐ ܩܪܺܝܬܳܟ ܩܳܠܳܐ ܡܫܺܝܚܳܐ ܕܶܐܬܺܝܠܶܕ

ܟܡܳܐ ܒܰܣܺܝܡ ܘܰܚܠܶܐ ܨܰܘܡܳܐ ܩܰܕܺܝܫܳܐ܇ ܘܣܳܗܶܕ ܒܰܪ ܥܰܡܪܰܡ܇ ܕܒܶܗ ܗܽܘ ܫܦܰܪ ܗܘܳܐ ܘܶܐܙܕܰܗܺܝ܇ ܒܶܗ ܡܳܪܝܳܐ ܡܰܠܶܠ ܥܰܡܶܗ ܒܰܥܢܳܢܳܐ܇ ܒܗ ܩܰܒܶܠ ܠܽܘܚ̈ܶܐ܇ ܘܦܽܘܩܕܳܢ̈ܶܐ ܠܒܶܝܬ ܐܺܝܣܪܳܐܶܝܠ܀

ܟܡܳܐ ܪܰܒ ܘܰܡܥܰܠܰܝ ܨܰܘܡܳܐ ܩܰܕܺܝܫܳܐ܇ ܣܳܗܶܕ ܕܳܢܺܝܐܶܝܠ܇ ܕܰܙܟܳܐ ܗܘܳܐ ܠܰܐܪ̈ܝܰܘܳܬܳܐ܇ ܒܶܗ ܗܽܘ ܣܚܰܦ ܨܰܠܡ̈ܶܐ܇ ܘܒܶܗ ܐܰܒܗܶܬ ܠܣܳܢܰܘ̈ܗ̱ܝ ܒܶܗ ܗܽܘ ܒܠܰܡ ܦܽܘܡܳܐ܇ ܕܚܰܝܘ̈ܳܬܳܐ ܚܰܒ̈ܠܳܬܳܐ܀

ܟܡܳܐ ܡܰܥܬܰܪ ܐܰܚ̈ܰܝ܇ ܨܰܘܡܳܐ ܩܰܕܺܝܫܳܐ܇ ܣܳܗܕܺܝܢ ܛܽܘܒܳܢ̈ܶܐ ܬܠܳܬܐ ܕܶܝܢ ܕܒܶܝܬ ܚܰܢܰܢܝܳܐ܇ ܕܒܶܗ ܗܽܘ ܐܶܬܢܰܨܰܚܘ̱܇ ܒܰܐܪܥܳܐ ܕܟܰܠܕܳܝ̈ܶܐ܇ ܘܒܶܗ ܗܽܘ ܙܟܰܘ ܠܢܽܘܪܳܐ܇ ܘܒܶܗ ܢܚܶܬ ܥܺܝܪܳܐ ܨܝܶܕܰܝ̈ܗܽܘܢ܀

ܟܡܳܐ ܒܰܣܺܝܡ ܘܰܚܠܶܐ ܨܰܘܡܳܐ ܩܰܕܺܝܫܳܐ܇ ܣܳܗܶܕ ܒܰܪ ܡܰܬܰܝ܇ ܗܰܘ ܕܒܰܠܥܶܗ ܢܽܘܢܳܐ ܩܺܝܛܳܘܣ܇ ܘܒܶܗ ܗܽܘ ܦܰܠܛܶܗ ܗܘܳܐ ܡܳܪܝܳܐ ܡܶܢ ܢܽܘܢܳܐ܇ ܘܒܶܗ ܗܽܘ ܕܰܠܠܝܶܗ ܗܘܳܐ ܡܶܢ ܓܰܘ ܝܰܡܳܐ ܘܛܽܘܒܳܥܳܐ܀

ܟܡܳܐ ܡܝܰܬܰܪ ܐܰܚ̈ܰܝ܇ ܨܰܘܡܳܐ ܩܰܕܺܝܫܳܐ܇ ܘܣܳܗܕܺܝܢ ܢܺܝܢܘܳܝ̈ܶܐ܇ ܕܒܶܗ ܗܽܘ ܐܶܫܬܰܘܙܰܒܘ̱܇ ܘܒܶܗ ܗܽܘ ܟܠܰܘ ܪܽܘܓܙܳܐ܇ ܕܰܠܚܺܝܡ ܗܘܳܐ ܥܠܰܝܗܽܘܢ܇ ܘܒܶܗ ܗܽܘ ܐܶܬܪܰܥܺܝ ܡܳܪܝܳܐ ܘܰܫܒܰܩ ܣܰܟܠܽܘܬܗܽܘܢ܀

ܟܡܳܐ ܥܳܢܶܐ ܨܰܘܡܳܐ ܩܰܕܺܝܫܳܐ ܘܦܳܪܶܩ܇ ܘܣܳܗܶܕ ܐܺܠܺܝܳܐ܇ ܕܰܗܘܳܐ ܠܘܳܬܶܗ ܒܰܫܪܳܪܳܐ܇ ܘܦܰܪܩܶܗ ܡܶܢ ܐܺܝܙܒܺܝܠ܇ ܘܗܽܘ ܡܰܢܥܶܗ ܠܛܽܘܪܳܐ ܘܬܰܡܳܢ ܐܶܫܬܘܺܝ ܗܘܳܐ܇ ܘܰܚܙܳܝܗ̱ܝ ܠܰܐܠܳܗܳܐ ܓܢܺܝܙܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܩܰܒܶܠܳܝܗ̱ܝ ܡܳܪܰܢ

ܒܨܰܘܡܳܐ ܡܶܬܦܰܬܚܺܝܢ܇ ܬܰܪ̈ܥܶܐ ܪ̈ܳܡܶܐ ܕܦܰܪܕܰܝܣܳܐ܇ ܘܥܳܐܠܺܝܢ ܙܰܕܺܝ̈ܩܶܐ܇ ܘܝܳܪܬܺܝܢ ܚܰܝ̈ܶܐ ܕܰܠܥܳܠܰܡ܀

ܙܺܝܘܳܐ ܕܡܰܠܰܐܟ̈ܶܐ܇ ܡܰܩܢܶܐ ܨܰܘܡܳܐ ܠܦܳܪ̈ܽܘܫܶܐ܇ ܘܓܶܦ̈ܶܐ ܪ̈ܽܘܚܳܢܶܐ܇ ܕܒܶܗ ܡܶܬܥܰܠܺܝܢ ܠܰܡܪ̈ܰܘܡܶܐ܀

ܛܽܘܒܳܐ ܠܨܰܝܳܡ̈ܶܐ܇ ܡܳܐ ܕܕܳܢܰܚ ܒܰܪ ܐܰܠܳܗܳܐ܇ ܘܥܰܡܶܗ ܡܶܬܦܰܨܚܺܝܢ܇ ܒܰܓܢܽܘܢܳܐ ܡܠܶܐ ܚܰܕܘ̈ܳܬܳܐ܀

 

ܐ̱ܚܪܺܢܳܐ ܩܳܠܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܒܫܰܗܪܳܐ ܘܰܨܠܽܘܬܳܐ ܘܨܰܘܡܳܐ ܒܶܗ ܐܶܬܢܰܨܰܚܘ̱܇ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ܇ ܘܰܒܥܰܡ̈ܠܶܐ ܕܰܡܝܰܬܪܽܘܬܳܐ ܫܦܰܪܘ̱ ܠܰܐܠܳܗܳܐ܇ ܘܰܐܥܕܺܝܘ ܟܠܺܝ̈ܠܶܐ ܕܙܳܟܽܘܬܳܐ ܗ ܘܺܝܪܶܬܰܘ̱ ܚܰܝ̈ܶܐ܀

ܫܰܦܺܝܪ ܨܰܘܡܳܐ ܘܰܨܠܽܘܬܳܐ ܘܕܰܟܝܽܘܬ ܠܶܒܳܐ܇ ܘܚܽܘܒܐ ܐܶܢ ܗܽܘ ܕܰܡܫܰܡܠܰܝ܇ ܕܒܶܗ ܫܳܪܶܐ ܪܽܘܚܳܐ ܕܩܽܘܕܫܳܐ ܘܰܡܩܰܕܶܫ ܠܶܗ܇ ܠܥܰܒܕܳܐ ܕܦܳܠܰܚ ܥܰܡ ܡܳܪܶܗ܇ ܗ ܒܰܬܪܺܝܨܽܘܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܰܪܒܥܺܝܢ ܝܰܘ̈ܡܺܝܢ ܩܳܠܰܝ̈ ܚܰܫܳܐ ܡܶܫܬܰܡܥܺܝܢ ܗ̱ܘܰܘ܇ ܒܗܳܝ ܒܳܥܽܘܬܳܐ ܕܥܶܒܕܰܬ݀ ܢܺܝܢܘܶܐ ܩܕܳܡ ܐܰܠܳܗܳܐ܇ ܐܰܪܒܥܺܝܢ ܝܰܘ̈ܡܺܝܢ ܦܶܟܪܰܬ̈ ܐܺܝܕܶܝ̈ܗܿ ܩܕܳܡ ܟܺܐܢܽܘܬܳܐ܇ ܕܬܶܬܪܰܥܶܐ ܠܳܗܿ ܕܰܪܓܺܝܙܳܐ ܗܘܳܬ݀ ܥܰܠ ܣܽܘܪ̈ܚܳܢܶܝܗܿ܀

ܐܰܪܒܥܺܝܢ ܝܰܘܡܺܝ̈ܢ ܐܶܫܕܰܬ݀ ܕܶܡܥ̈ܶܐ ܩܕܳܡ ܐܰܠܳܗܳܐ܇ ܕܰܢܣܰܒ ܒܰܐܦܶܝ̈ܗܿ ܢܶܟܠܳܐ ܘܪܽܘܓܙܳܐ ܕܰܡܛܰܝܰܒ ܠܳܗܿ܇ ܐܰܪܒܥܺܝܢ ܝܰܘܡܺܝ̈ܢ܇ ܚܰܓܳܐ ܥܶܒܕܰܬ̈ ܠܰܬܝܳܒܽܘܬܳܐ܇ ܘܙܶܒܢܰܬ݀ ܡܶܢܶܗ ܚܢܳܢܳܐ ܒܕܶܡܥ̈ܶܐ ܕܰܛܥܺܝܢܳܐ ܗܘܳܬ݀܀

 

ܡܥܺܝܪܳܢܳܐ ܕܠܺܠܝܳܐ ܩܳܠܳܐ ܝܳܐܶܐ ܘܙܳܕܶܩ

ܡܳܪܶܐ ܟܽܠ ܕܰܒܝܰܕ ܨܰܘܡܶܗ܇ ܝܰܗܒܠܰܢ ܐܽܘܪܚܳܐ ܕܢܶܪܕܶܐ ܒܳܗܿ܇ ܘܰܒܝܰܕ ܨܳܘܡܶܐ ܘܙܺܕܩ̈ܳܬܳܐ܇ ܢܺܐܪܰܬ ܚܰܝ̈ܶܐ ܕܰܠܥܳܠܰܡ ܫܽܘܒܚܳܐ܀

ܒܪܳܐ ܕܰܐܬܩܶܢ ܟܽܠ ܒܶܪ̈ܝܳܬܳܐ܇ ܒܪܶܡܙܳܐ ܟܰܣܝܳܐ ܕܨܶܒܝܳܢܶܗ܇ ܥܨܽܘܒ ܡܳܪܝ̱ ܠܶܒܰܢ ܕܰܬܒܺܝܪ ܗܘܳܐ܇ ܡܶܢ ܥܒܳܕ̈ܶܐ ܕܰܥܒܰܕ̈ܝ ܐܺܝܕܰܝ̈ܢ ܫܽܘܒܚܳܐ܀

ܒܪܳܐ ܕܰܒܪ̈ܰܚܡܰܘܗ̱ܝ ܐܰܣܺܝ ܗܘܳܐ ܠܟܺܐܒܬܳܢ̈ܶܐ ܕܰܒܥܰܘ ܡܶܢܶܗ܇ ܐܳܦܠܰܢ ܐܰܣܳܐ ܒܳܥܶܝܢܰܢ܇ ܠܟܺܐܒܳܐ ܟܰܣܝܳܐ ܕܢܰܦܫ̈ܳܬܰܢ ܫܽܘܒܚܳܐ܀

ܒܢܰܦܫܳܐ ܕܫܰܦܝܳܐ ܡܶܢ ܥܰܘܠܳܐ܇ ܒܦܰܓܪܳܐ ܕܰܟܝܳܐ ܘܩܰܕܺܝܫܳܐ܇ ܢܰܫܘܶܝܢ ܠܰܚܙܳܬܶܗ ܕܡܳܪܰܢ܇ ܡܳܐ ܕܳܐܬܶܐ ܒܫܽܘܒܚܶܗ ܪܰܒܳܐ܇ ܫܽܘܒܚܳܐ܀

ܫܽܘܒܚܳܐ ܠܳܟ ܪܳܚܶܡ ܐ̱ܢܳܫܳܐ܇ ܕܡܰܟܶܟܬ ܢܰܦܫܳܟ ܥܰܠ ܐܰܦܰܝ̈ܢ܇ ܘܨܰܘܡܳܐ ܠܒܰܟܬ ܡܕܰܒܪܳܢܳܐܺܝܬ܇ ܕܰܠܳܢ ܬܰܦܢܶܐ ܠܓܰܘ ܦܰܪܕܰܝܣܳܐ܀

 

ܩܳܠܳܐ ܕܠܺܠܝܳܐ ܩܳܠܳܐ ܩܽܘܩܳܝܳܐ

ܬܰܘ ܐܰܚ̈ܰܝ ܢܶܬܓܰܘܰܣ ܒܶܗ ܒܨܰܘܡܳܐ ܕܰܟܝܳܐ܇ ܐܰܝܟ ܕܶܐܬܓܰܘܰܣ ܒܶܗ ܟܺܐܢ̈ܶܐ ܘܙܰܕܺܝ̈ܩܶܐ ܕܡܶܢ ܩܕܺܝܡ܇ ܐܶܬܓܰܘܰܣ ܒܶܗ ܡܽܘܫܶܐ ܡܰܟܺܝܟܳܐ܇ ܐܶܙܕܰܗܺܝ ܗܘܳܐ ܦܰܪܨܽܘܦܶܗ ܙܰܗܝܳܐ܇ ܐܶܬܓܰܘܰܣ ܒܶܗ ܐܺܠܺܝܳܐ ܘܰܒܡܰܪܟܰܒܬܳܐ ܣܠܶܩ܇ ܘܰܛܠܳܝ̈ܶܐ ܕܒܶܝܬ ܚܰܢܰܢܝܳܐ܇ ܘܠܳܐ ܝܺܩܶܕܘ̱ ܒܰܐܬܽܘܢܳܐ܇ ܗ ܘ ܗ܀

ܗ̱ܘܰܘ ܠܗܽܘܢ ܒܥܳܠܡܳܐ ܨܰܝܳܡ̈ܶܐ ܕܚܰܝ̈ܠܶܐ ܣܥܰܪ ܨܰܘܡܗܽܘܢ܇ ܘܰܕܠܳܐ ܡܨܶܝܢܝ̱ ܐܶܬܢܶܐ ܟܽܠܗܽܘܢ ܐܳܡܰܪ ܐ̱ܢܳܐ ܡܶܢܗܽܘܢ܇ ܘܡܽܘܫܶܐ ܘܡܽܘܪܕܰܟܝ ܘܺܐܠܺܝܳܐ ܘܶܐܣܬܺܝܪ܇ ܐܳܦ ܕܳܢܺܝܐܶܝܠ ܘܰܕܒܶܝܬ ܚܰܢܰܢܝܳܐ܇ ܫܶܡܥܽܘܢ ܟܺܐܢܳܐ ܕܥܰܠ ܟܺܐܦܳܐ ܒܨܰܘܡܳܐ ܠܥܺܕܬܳܐ ܣܥܰܪ܇ ܐܰܝܟ ܩܰܕܡܳܝ̈ܶܐ ܢܨܽܘܡ ܐܰܚ̈ܰܝ ܕܢܶܬܪܰܥܶܐ ܡܳܪܝܳܐ܇ ܗ ܘ ܗ܀

 

ܡܰܕܪܳܫܳܐ ܩܳܠܳܐ ܚܽܘܬܰܘ̱ ܐܰܚ̈ܰܝ ܪ̈ܫܺܝܡܶܐ ܥܽܘܢܺܝܬܳܐ

ܫܽܘܒܚܳܐ ܠܒܰܪ ܛܳܒܳܐ܇ ܕܰܦܬܺܝܚ ܬܪܰܥ ܪ̈ܰܚܡܰܘܗ̱ܝ ܐܰܣܪܰܚ ܠܒܽܘܣܒܳܣ̈ܰܝ܇ ܣܰܡܳܐ ܕܦܽܘܪܩܳܢܳܟ܇ ܕܢܺܝܫܳܟ ܡܨܶܐ ܕܢܶܗܘܶܐ܇ ܢܺܝܫܳܐ ܕܦܽܘܪܩܳܢܳܐ܇ ܣܰܡܳܐ ܡܰܐܣܶܐ ܟܽܠ܀

ܐܰܒܺܝܠܽܘܬܶܗ ܡܳܪܝ̱܇ ܕܗܰܘ ܡܰܕܒܚܳܟ ܕܰܟܝܳܐ܇ ܘܰܕܟܳܗܢܳܐ ܢܰܟܦܳܐ܇ ܕܩܳܐܶܡ ܠܒܺܝܫ ܐܶܒܠܳܐ܇ ܘܡܶܢ ܠܥܶܠ ܟܒܶܝܢ ܣܰܩܳܐ܀

ܒܺܝܫ ܓܰܪܒܳܐ ܒܬܰܪܬܶܝܢ܇ ܒܡܶܪܬܶܗ ܘܰܒܢܶܫܡܶܗ܇ ܐܳܦ ܗܳܢ ܚܰܪܡܳܢܳܐ܇ ܒܬܰܪܬܶܝܢ ܡܚܰܒܶܠ ܠܺܝ܇ ܒܛܶܐܒܶܗ ܘܒܰܥܒܳܕܶܗ܀

ܟܰܕ ܙܰܥܪܳܐ ܛܳܒܰܐܗ̱ܘ܇ ܐܽܘܪܚܳܐ ܒܺܝܫܳܐ ܗܘܳܐ܇ ܟܡܳܐ ܟܺܝܬ ܡܰܥܒܰܪܬܳܐ܇ ܕܰܡܠܶܐ ܛܳܒ̈ܳܬܳܐ ܬܕܽܘܫܳܝܘܗ̱ܝ ܠܙܺܝܙܳܢܳܐ܀

ܟܽܠ ܡܡܰܠܠܺܝܢ ܒܺܝܫܺܝܢ܇ ܗܳܐ ܪܳܕܶܝܢ ܘܳܐܬܶܝܢ ܠܰܠܡܺܐܢܶܗ ܕܶܐܕܢܳܐ܇ ܕܠܳܐ ܗܘܳܬ݀ ܠܳܗܿ ܠܡܺܐܢܳܐ܇ ܠܡܶܡܠܠܳܐ ܕܰܟܬܳܒ̈ܶܐ܀

ܬܰܘ ܢܶܒܟܶܐ ܟܽܠܰܢ܇ ܕܙܰܝܢܳܐ ܕܥܽܘܕܪܳܢܰܢ܇ ܗܘܳܐ ܠܶܗ ܠܣܽܘܓܦܳܢܰܢ܇ ܚܠܳܦܰܝܢ ܕܶܝܢ ܠܒܶܫܢܳܝܗ̱ܝ܇ ܗܘܳܐ ܠܶܗ ܕܰܠܩܽܘܒܠܰܢ܀

ܡܳܐ ܫܰܦܺܝܪ ܨܰܘܡܳܐ܇ ܘܰܪ̈ܓܺܝܓܺܝܢ ܦܺܐܪ̈ܰܘܗ̱ܝ܇ ܛܽܘܒܰܘܗ̱ܝ ܠܡܰܢ ܕܰܩܛܰܦ܇ ܡܶܢܗܽܘܢ ܒܚܰܕܽܘܬܳܐ܇ ܩܽܘܪ̈ܒܳܢܶܐ ܕܟܰܝ̈ܳܐ܀

ܡܳܐ ܫܰܦܺܝܪ ܨܰܘܡܳܐ܇ ܕܨܳܡܽܘܗ̱ܝ ܙܰܕܺܝ̈ܩܶܐ܇ ܕܒܶܗ ܝܺܪܶܬܘ̱  ܚܰܝ̈ܶܐ܇ ܘܰܓܢܽܘܢ ܚܰܕܘ̈ܳܬܳܐ܇ ܘܡܰܠܟܽܘܬܳܐ ܕܪܰܘܡܳܐ܀

ܡܳܐ ܫܰܦܺܝܪ ܨܰܘܡܳܐ܇ ܕܨܳܡܶܗ ܒܰܪ ܥܰܡܪܰܡ܇ ܘܶܐܫܬܺܘܝ ܕܰܢܡܰܠܶܠ܇ ܥܰܡܶܗ ܐܰܠܳܗܳܐ܇ ܥܰܠ ܛܽܘܪܳܐ ܕܣܺܝܢܰܝ܀

ܡܳܐ ܫܰܦܺܝܪ ܨܰܘܡܳܐ ܕܨܳܡܶܗ ܕܳܢܺܝܐܶܝܠ܇ ܕܩܰܠܣܶܗ ܡܰܠܰܐܟܳܐ܇ ܘܓܰܒܪܳܐ ܕܪܶܓܬܳܐ ܩܪܳܝܗ̱ܝ܇ ܡܶܛܽܠ ܕܰܪܓܺܝܓ ܗܘܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܦܶܠܓܶܗ ܕܠܺܠܝܳܐ ܐܶܬܬܥܺܝܪ ܕܰܘܺܝܕ ܠܰܡܫܰܒܳܚܽܘ܇ ܕܰܢܩܽܘܡ ܢܰܘܕܶܐ ܡܶܛܽܠ ܬܶܗܪ̈ܶܐ ܕܰܐܠܳܗܽܘܬܳܐ܇ ܐܳܦ ܐܰܢ̱ܬ ܗܳܫܳܐ ܒܦܶܠܓܶܗ ܕܠܺܠܝܳܐ ܩܽܘܡ ܦܳܪܽܘܫܳܐ܇ ܘܒܰܙܡܺܝܪ̈ܳܬܶܗ ܕܕܰܘܺܝܕ ܗܰܠܶܠ ܪܽܘܚܳܢܳܐܺܝܬ܀

ܒܳܟ ܡܳܪܝ̱ ܐܶܢܗܰܪ ܕܺܐܝܡܳܡܳܐ ܐܰܢ̱ܬ ܠܰܕܪܳܚܶܡ ܠܳܟ܇ ܢܽܘܗܪܳܐ ܐܰܢ̱ܬ ܡܳܪܝ̱ ܐܰܢܗܰܪ ܥܰܝܢ̈ܰܝ ܕܶܐܚܙܶܐ ܚܢܳܢܳܟ܇ ܐܽܘܪܚܶܗ ܕܥܳܠܡܳܐ ܣܪܺܝܓܳܐ ܘܡܰܠܝܳܐ ܟܽܠ ܬܽܘܩ̈ܠܳܬܳܐ܇ ܕܰܡܗܰܠܶܟ ܒܳܟ ܠܳܐ ܡܶܬܬܩܶܠ ܠܶܗ ܕܺܐܝܡܳܡܳܐ ܐܰܢ̱ܬ܀

 

ܕܨܰܦܪܳܐ ܕܪܰܚܶܡܥܠܰܝ ܩܳܠܳܐ ܥܰܕܠܳܐ ܢܺܐܙܠܺܘܢ

ܦܫܺܝܩ ܠܶܗ ܠܨܰܘܡܳܐ ܚܰܝܠܳܐ ܕܢܽܘܪܳܐ ܠܰܡܕܰܥܳܟܽܘ܇ ܘܡܶܢ ܓܰܘܙܰܠܬܳܐ ܛܰܐܠܳܐ ܢܶܪܽܘܣ܇ ܥܰܠ ܨܰܝܳܡ̈ܶܐ܇ ܐܶܬܪܰܚܰܡܥܠܰܝܢ܀

ܡܽܘܫܶܐ ܒܨܰܘܡܳܐ ܡܛܳܐ ܠܰܫܟܺܝܢܬܶܗ ܕܪܳܡܳܐ ܢܶܚܙܶܐ܇ ܘܐ̱ܪ̈ܳܙܶܐ ܟܣܰܝ̈ܳܐ ܢܡܰܠܶܠ ܥܰܡܶܗ܇ ܡܶܢ ܥܰܪܦܶܠܳܐ܇ ܐܶܬܪܰܚܰܡܥܠܰܝܢ܀

ܨܳܡ ܡܶܢ ܠܰܚܡܳܐ ܘܥܰܠ ܦܳܬܽܘܪܶܗ ܓܳܢܶܐ ܕܰܐܠܳܗܳܐ܇ ܘܶܐܟܰܠ ܢܽܘܗܪܳܐ ܘܶܐܫܬܺܝ ܙܺܝܘܳܐ ܘܰܩܢܳܐ ܫܽܘܦܪܳܐ܀

ܥܒܶܕ ܠܶܗ ܨܰܘܡܳܐ ܚܰܕܳܐ ܫܳܪܽܘܬܳܐ ܕܡܰܠܝܳܐ ܚܰܝ̈ܶܐ܇ ܒܗܳܝ ܡܶܐܟܽܘܠܬܳܐ ܕܠܰܝܬ ܐܰܦܽܘܣܝܰܐ ܠܛܰܥܡ̈ܳܬܶܗ ܐܶܬܪܰܚܰܡܥܠܰܝܢ܀

ܐܰܥܠܶܗ ܨܰܘܡܳܐ ܠܒܰܝܬܳܐ ܕܐ̱ܪ̈ܳܙܶܐ ܘܩܳܡ ܚܰܘܺܝ ܠܶܗ܇ ܒܺܝܪܰܬ ܥܳܠܡܳܐ ܟܰܕ ܡܶܬܒܰܢܝܳܐ ܡܶܢ ܠܳܐ ܡܶܕܶܡ ܐܶܬܪܰܚܰܡܥܠܰܝܢ܀

 

ܕܰܐܠܳܗܝ̱ ܐܰܠܳܗܝ̱ ܒܩܳܠܳܐ ܙܳܥ ܗܘܳܐ ܝܰܘܣܶܦ

ܒܨܰܘܡܳܐ ܕܰܟܝܳܐ ܘܚܶܢܓ̈ܳܬܳܐ܇ ܡܦܺܝܣܺܝܢܰܢ ܠܳܟ ܦܳܪܽܘܩܰܢ܇ ܚܰܣܳܐ ܠܰܢ ܟܽܠ ܕܰܚܛܰܝܢܰܢ܇ ܕܰܐܢ̱ܬ ܗܽܘ ܐܶܫܬܰܘܕܺܝܬ ܘܶܐܡܰܪܬ܇ ܕܰܩܪܰܘ ܘܶܐܢܳܐ ܥܳܢܶܐ ܐ̱ܢܳܐ܇ ܘܩܽܘܫܽܘܢ ܘܶܐܢܳܐ ܦܳܬܰܚ ܐ̱ܢܳܐ܇ ܥܢܺܝ ܠܰܢ ܘܰܫܡܰܥ ܒܳܥܽܘܬܰܢ܇ ܛܳܒܳܐ ܪܳܚܶܡ ܬܰܝܳܒ̈ܶܐ܀

ܠܳܟ ܦܳܪܽܘܩܰܢ ܕܰܒܚܽܘܒܳܟ܇ ܠܘܳܬ ܥܰܒܕܰܝ̈ܟ ܐܶܬܬܰܚܬܺܝܬ ܘܰܠܨܰܠܡܳܐ ܕܺܝܠܳܟ ܚܰܕܶܬܬ܇ ܡܦܺܝܣܺܝܢܰܢ ܠܒܰܣܺܝܡܽܘܬܳܟ ܒܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܕܰܬܚܰܕܶܬ ܥܰܬܺܝܩܽܘܬܰܢ܇ ܘܬܶܡܪܽܘܩ ܡܶܢܰܢ ܟܽܘܬܡ̈ܳܬܰܢ܇ ܐܰܢ̱ܬ ܐܰܠܳܗܐ ܡܪܰܚܡܳܢܳܐ܀

ܒܰܕܡܽܘܬ ܗܰܘ ܒܪܳܐ ܐܳܣܽܘܛܳܐ܇ ܒܰܚܢܰܓܬܳܐ ܓܳܥܶܐ ܐ̱ܢܳܐ ܐܳܒܝ̱ ܚܽܘܣ ܘܶܐܬܪܰܚܰܡ ܥܠܰܝ܇ ܚܛܺܝܿܬ ܒܰܫܡܰܝܳܐ ܘܰܩܕܳܡܰܝܟ܇ ܩܰܒܶܠܰܝܢܝ̱ ܐܰܝܟ ܐܰܓܺܝܪܳܐ܇ ܘܶܐܗܘܶܐ ܒܒܰܝܬܳܟ ܐܰܝܟ ܥܰܒܕܳܐ܇ ܘܰܫܒܽܘܩ ܠܺܝ ܟܽܠ ܕܰܚܛܺܝܿܬ ܠܳܟ܀

ܥܶܪܒܳܐ ܐ̱ܢܳܐ ܡܳܪܝ̱ ܐܰܒܺܝܕܳܐ܇ ܕܫܶܒܩܿܶܬ ܐܽܘܪܚܳܐ ܕܚܰܝ̈ܶܐ܇ ܘܰܛܥܺܝܿܬ ܒܳܬܰܪ ܣܪ̈ܺܝܩܳܬܳܐ܇ ܪܳܥܝܳܐ ܛܳܒܳܐ ܦܽܘܩ ܒܰܒܥܳܬܝ̱܇ ܘܠܳܐ ܬܰܪܦܰܝܢܝ̱ ܕܺܐܒܰܕ ܡܶܢܳܟ܇ ܐܶܠܳܐ ܡܶܢܺܝܢܝ̱ ܡܳܪܝ̱ ܒܰܓܙܳܪܳܟ܇ ܘܥܰܡ ܡܳܟܣܳܐ ܘܗܳܝ ܚܰܛܳܝܬܳܐ܇ ܐܶܩܥܶܐ ܠܳܟ ܫܽܘܒܚܳܐ ܡܳܪܝܳܐ܀

ܚܽܘܫܳܒ̈ܶܐ ܛܰܡ̈ܐܶܐ ܗܳܐ ܪܥܺܝܿܬ ܒܰܕܡܽܘܬܳܐ ܕܰܚܙܺܝܪܳܐ܇ ܘܰܗܘܺܝܿܬ ܥܰܒܕܳܐ ܠܰܚܛܺܝܬܳܐ܇ ܒܟܰܦܢܳܐ ܘܨܰܘܡܳܐ ܢܰܘܠܽܘܢܳܢܝ̱܇ ܢܽܘܓܪܳܐ ܪܰܒܳܐ ܕܰܫܢܰܝ̈ܳܐ܇ ܘܶܐܬܢܰܟܪܺܝܬ ܡܶܢ ܝܳܪܬܽܘܬܳܟ܇ ܗܰܒܠܺܝ ܦܳܪܽܘܩܝ̱ ܕܶܐܬܚܰܢܰܢ܀

ܐܰܝܢܳܐ ܕܨܳܐܶܡ ܕܰܟܝܳܐܺܝܬ ܘܩܳܨܶܐ ܠܰܚܡܶܗ ܠܟܰܦܢ̈ܶܐ܇ ܘܰܡܪܰܚܶܡ ܥܰܠ ܡܶܣܟܺܢ̈ܶܐ܇ ܚܠܺܝܛ ܗܽܘ ܒܨܰܘܡܶܗ ܥܰܡ ܥܺܝܪ̈ܶܐ܇ ܘܰܥܒܺܝܕ ܚܰܒܪܳܐ ܠܨܰܝܳܡ̈ܶܐ܇ ܕܰܒܨܰܘܡܰܝ̈ܗܽܘܢ ܐܶܬܢܰܨܰܚܘ̱܇ ܘܠܳܐ ܡܨܶܐ ܒܺܝܫܳܐ ܩܳܪܶܒ ܠܶܗ܇ ܕܡܳܪܝܳܐ ܥܒܺܝܕ ܠܶܗ ܢܳܛܽܘܪܳܐ܀

ܫܽܘܒܚܳܐ ܠܗܰܘ ܕܳܥܢܶܐ ܠܥܰܒܕܰܘ̈ܗ̱ܝ܇ ܕܩܳܪܶܝܢ ܠܶܗ ܒܰܚܢܰܓܬܳܐ܇ ܘܡܶܢ ܐܽܘܠܨܳܢܳܐ ܦܳܪܶܩ ܠܗܽܘܢ܇ ܫܽܘܒܚܳܐ ܠܡܳܪܳܐ ܕܩܳܪܶܐ ܠܰܢ܇ ܕܢܰܦܢܶܐ ܠܰܢ ܠܰܬܝܳܒܽܘܬܳܐ܇ ܫܽܘܒܚܳܐ ܠܶܗ ܡܶܢܟܽܠ ܕܰܒܪܳܐ܇ ܒܪܰܘܡܳܐ ܘܥܽܘܡܩܳܐ ܘܟܽܠ ܕܰܒܗܽܘܢ܇ ܫܽܘܒܚܳܐ ܠܶܗ ܘܰܥܠܰܝܢ ܪ̈ܰܚܡܰܘܗ̱ܝ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܗܰܘ ܕܰܛܥܺܝܢ ܟܽܠ ܒܶܪ̈ܝܳܬܳܐ

ܒܨܰܘܡܳܐ ܕܨܳܡ ܗܘܳܐ ܕܳܢܺܝܐܶܝܠ܇ ܣܟܰܪ ܦܽܘܡܳܐ ܕܰܐܪ̈ܝܰܘܳܬܳܐ܇ ܕܪܺܝܚ ܨܰܘܡܶܗ ܕܗܽܘ ܩܰܕܺܝܫܳܐ ܣܰܩ̈ܝ ܚܰܝܘ̈ܳܬܳܐ ܘܶܐܫܬܰܗ̈ܺܝ ܘܰܒܨܰܘܡܳܐ ܕܒܶܝܬ ܚܰܢܰܢܝܳܐ܇ ܢܽܘܪܳܐ ܩܪܳܬ݀ ܒܰܐܬܽܘܢܳܐ܇ ܒܰܪܺܝܟ ܚܰܝܠܳܐ ܕܰܢܚܶܬ ܚܰܝܶܠ ܠܰܐܬܠܺܝܛܰܘ̈ܗ̱ܝ ܒܓܰܘ ܐܰܓܽܘܢܳܐ܀

ܝܺܚܺܝܕܳܐ ܕܳܠ ܡܶܢ ܐܰܬܪܶܗ܇ ܘܨܳܡ ܘܶܐܬܟܰܬܰܫ ܚܠܳܦ ܓܶܢܣܰܢ܇ ܢܶܣܝܳܢܳܐ ܣܒܰܠ ܡܶܢ ܒܺܝܫܳܐ܇ ܕܰܢܚܰܪܪܰܢ ܡܶܢ ܫܽܘܥܒܳܕܶܗ܇ ܟܺܐܦܳܐ ܠܰܚܡܳܐ ܬܰܒܥܶܗ ܗܘܳܐ܇ ܡܳܪܽܘܕܳܐ ܠܒܰܪ ܐܰܠܳܗܳܐ܇ ܘܰܦܢܺܝ ܡܳܪܰܢ ܟܰܕ ܐܳܡܰܪ܇ ܕܠܳܐ ܬܢܰܣܶܐ ܠܡܳܪܝܳܐ ܡܳܪܳܟ܀

ܓܳܥܶܨ ܗܘܳܐ ܐ̱ܢܳܫ ܡܶܢ ܢܰܦܫܶܗ܇ ܡܳܐ ܕܚܳܙܶܐ ܥܒܳܕܰܘ̈ܗ̱ܝ ܒܺܝܫܳܐ܇ ܗܽܘ ܠܶܗ ܡܚܰܝܶܒ ܟܰܕ ܚܳܙܶܐ܇ ܕܰܟܡܳܐ ܐܰܣܓܺܝ ܐܰܪܫܰܥ ܗܘܳܐ܇ ܕܶܚܠܰܐܗ̱ܘ ܪܰܒܳܐ ܚܰܒܺܝܒ̈ܰܝ܇ ܡܳܐ ܕܟܰܣܝ̈ܳܬܳܐ ܡܶܬܓܰܠܝ̈ܳܢ܇ ܘܟܽܠܢܳܫ ܐܰܝܟ ܡܶܕܶܡ ܕܰܣܥܰܪ ܡܶܬܦܪܰܥ ܒܕܺܝܢܳܐ ܕܟܺܐܢܽܘܬܳܐ܀

ܠܳܒܫܺܝܢ ܙܰܕܺܝ̈ܩܶܐ ܫܽܘܒܚܳܐ ܕܰܒܢܽܘܗܪܶܗ ܠܫܶܡܫܳܐ ܡܰܓܗܰܪ܇ ܘܰܠܢܽܘܗܪܶܗ ܠܳܐ ܡܰܘܦܶܐ ܐ̱ܢܳܫ܇ ܘܬܰܫܥܺܝܬܶܗ ܪܰܒܳܐ ܡܶܢ ܟܽܠ܇ ܘܥܰܘ̈ܳܠܶܐ ܬܽܘܒ ܡܶܬܥܰܛܦܺܝܢ܇ ܥܰܪܦܶܠܳܐ ܕܰܚܛܳܗܰܝ̈ܗܽܘܢ܇ ܘܠܳܐ ܣܳܦܶܩ ܠܶܫܳܢܝ̱ ܢܺܐܡܰܪ ܐܳܦܠܳܐ ܬܰܫܢܺܝܩܳܐ ܕܗܳܠܶܝܢ܀

 

ܬܶܫܒܽܘܚܬܳܐ ܚܕܰܬܳܐ ܩܳܠܳܐ ܡܫܺܝܚܳܐ ܕܰܡܠܰܟ ܢܽܘܚܳܡܳܐ

ܨܰܝܳܡܳܐ ܨܰܠܳܐ ܨܠܽܘܬܳܟ܇ ܘܠܳܐ ܬܨܰܚܶܐ ܒܶܗ ܠܒܰܪ ܙܰܘܓܳܟ܇ ܐܶܢ ܨܰܚܺܝܬܳܝܗ̱ܝ ܠܳܐ ܬܨܰܠܶܐ ܕܰܨܠܽܘܬܳܟ ܡܰܪܓܙܳܐ ܠܡܳܪܝܳܐ܀

ܫܕܺܝ ܐܰܟܬܳܐ ܡܶܢ ܓܰܘ ܠܶܒܳܟ܇ ܗܳܐ ܐܶܬܩܰܒܠܰܬ݀ ܒܳܥܽܘܬܳܟ܇ ܐܶܢ ܠܳܐ ܐܶܬܪܰܥܺܝܬ ܠܚܰܒܪܳܟ܇ ܣܪܺܝܩ ܨܰܘܡܳܟ ܣܦܺܝܩܳܐ ܨܠܽܘܬܳܟ܀

ܡܳܪܝܳܐ ܐܶܡܰܪ ܒܰܣܒܰܪܬܶܗ܇ ܕܰܗ̱ܘܰܘ ܐܰܚܶܒܘ̱ ܠܰܚܕܳܕ̈ܶܐ܇ ܘܰܐܝܢܳܐ ܕܠܳܐ ܡܰܐܚܶܒ ܠܰܐܚܽܘܗ̱ܝ܇ ܫܪܶܐܗ̱ܘ ܨܰܘܡܶܗ ܘܠܳܐ ܡܶܬܩܰܒܰܠ܀

ܡܶܪܚܰܡ ܪ̈ܰܚܡܰܗ̱ܝ ܕܶܝܢ ܠܰܐܚܽܘܟ܇ ܕܗܰܕܳܡܶܗ ܕܡܳܪܳܟ ܐܺܝܬܰܘܗ̱ܝ܇ ܘܶܐܢܕܶܝܢ ܗܰܕܳܡܶܗ ܬܶܣܢܶܐ܇ ܪܳܚܡܳܐ ܠܣܳܛܳܢܳܐ ܗܳܘܶܝܬ܀

ܐܰܚ̈ܰܝ ܢܰܐܚܶܒ ܠܰܚܕܳܕ̈ܶܐ܇ ܘܢܶܪܚܰܡ ܥܰܠ ܩܰܪ̈ܺܝܒܰܝܢ܇ ܘܢܶܦܫܽܘܛ ܐܺܝܕܰܝ̈ܢ ܠܰܣܢܺܝܩ̈ܶܐ܇ ܕܢܶܫܒܽܘܩ ܚܛܳܗ̈ܰܝܢ ܘܒܽܘܨܳܪ̈ܰܝܢ܀

ܫܽܘܒܚܳܐ ܠܳܟ ܡܳܪܳܐ ܕܪ̈ܰܚܡܶܐ܇ ܒܚܽܘܒܳܟ ܦܪܰܩܬܳܝܗ̱ܝ ܠܓܶܢܣܰܢ܇ ܠܳܟ ܫܽܘܒܚܳܐ ܒܟܽܠ ܥܶܕܳܢܺܝ̈ܢ܇ ܘܰܥܠܰܝܢ ܪ̈ܰܚܡܰܝܟ ܘܰܚܢܳܢܳܟ܀

 

ܩܳܠܳܐ ܕܨܰܦܪܳܐ ܩܳܠܳܐ ܐܰܝܟ ܦܺܝܪܡܳܐ ܕܩܰܪܶܒ ܐܰܗܪܽܘܢ

ܥܺܕܬܳܐ ܒܰܨܠܽܘܬܳܐ ܘܨܰܘܡܳܐ ܩܳܪܝܳܐ ܠܳܟ ܟܽܠܫܳܥ܇ ܝܺܚܺܝܕܳܝܳܐ ܐܰܠܳܗܳܐ ܕܰܒܚܽܘܒܳܟ ܦܪܰܩܬܳܗܿ܇ ܫܡܰܥ ܛܳܒܳܐ ܩܳܠ ܒܳܥܽܘܬܰܢ܇ ܘܰܥܒܶܕ ܪ̈ܰܚܡܶܐ ܥܰܠ ܝܰܠܕܶܝ̈ܗܿ܀

ܛܳܒܳܐ ܕܩܰܒܶܠ ܒܳܥܽܘܬܶܗ ܕܝܰܘܢܳܢ ܒܰܪ ܡܰܬܰܝ܇ ܘܰܫܡܰܥ ܨܠܽܘܬܶܗ ܕܚܶܙܰܩܝܳܐ ܒܓܰܘ ܗܰܝܟܰܠ ܩܽܘܕܫܳܐ܇ ܫܡܰܥ ܨܠܽܘܬܰܢ ܘܶܐܬܪܰܥܳܐ ܠܰܢ܇ ܘܗܰܒ ܠܳܗܿ ܫܰܝܢܳܐ ܠܡܰܪܺܥܝܬܳܟ܀

 

ܐ̱ܚܪܺܢܳܐ ܒܩܳܠܳܐ ܒܨܰܦܪܳܐ ܢܩܰܕܶܡ ܠܰܨܠܽܘܬܳܐ܇

ܬܰܘ ܐܰܚ̈ܰܝ ܢܶܬܓܰܘܰܣ ܠܰܢ܇ ܒܝܰܘ̈ܡܳܬܳܐ ܕܰܡܠܶܝܢ ܚܰܫܳܐ܇ ܘܢܶܗܘܶܐ ܒܨܰܘܡܳܐ ܘܬܶܫܡܶܫܬܳܐ ܚܰܒܪ̈ܶܐ ܠܩܰܕܺܝܫ̈ܶܐ܇ ܕܡܳܪܰܢ ܐܶܡܰܪ ܒܰܣܒܰܪܬܶܗ܇ ܕܩܳܪܶܐ ܠܺܝ ܥܳܢܶܐ ܐ̱ܢܳܐ ܠܶܗ܇ ܘܰܕܢܳܩܶܫ ܦܳܬܰܚ ܐ̱ܢܳܐ ܠܶܗ܇ ܘܗܳܘܶܝܢ ܥܠܰܘܗ̱ܝ ܪ̈ܰܚܡܶܐ܀

ܒܨܰܘܡܳܐ ܐܶܙܕܰܝܰܢܘ̱ ܟܺܐܢ̈ܶܐ ܘܰܙܟܰܘ ܠܒܺܝܫܳܐ ܒܰܐܓܽܘܢܳܐ܇ ܘܢܰܒܗܶܬܘ̱ ܐܳܦ ܠܰܒܥܶܠܕܰܪܳܐ ܘܟܽܠܗܶܝܢ ܨܶܢܥ̈ܳܬܶܗ܇ ܘܰܚܢܰܢ ܢܨܽܘܡ ܘܰܢܨܰܠܶܐ܇ ܘܢܶܒܥܶܐ ܪ̈ܰܚܡܶܐ ܡܶܢ ܡܳܪܰܢ ܕܢܶܬܶܠ ܠܰܢ ܓܰܠܝܽܘܬ ܐܰܦ̈ܶܐ܇ ܒܝܰܘܡܳܐ ܕܒܶܗ ܕܳܢܰܚ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܳܐ ܝܰܘܡ̈ܳܬܳܐ ܕܬܳܒܥܳܐ ܪܶܗܛܳܐ ܕܙܰܕܺܝܩܽܘܬܳܐ܇ ܢܶܬܬܥܺܝܪ ܟܽܠܢܳܫ ܥܰܠ ܦܽܘܠܚܳܢܳܐ ܟܰܫܺܝܪܳܐܺܝܬ ܒܗܽܘܢ ܒܝܰܘܡ̈ܳܬܳܐ ܡܶܬܬܨܺܝܪ ܨܰܠܡܳܗܿ ܕܰܬܝܳܒܽܘܬܳܐ܇ ܢܰܝܬܶܐ ܟܽܠܢܳܫ ܓܰܘܢ̈ܶܐ ܓܒܰܝ̈ܳܐ ܡܶܢ ܣܽܘܥܪ̈ܳܢܰܘܗ̱ܝ܀

ܫܽܘܒܚܳܐ ܫܰܦܝܳܐ ܠܗܰܘ ܕܰܒܚܽܘܒܶܗ ܚܰܫ ܥܰܠ ܐܰܦܰܝ̈ܟܝ̱܇ ܘܝܰܗܒ ܠܶܟܝ̱ ܨܰܘܡܳܐ ܙܰܝܢܳܐ ܪܰܒܳܐ ܠܽܘܩܒܰܠ ܒܺܝܫܳܐ ܒܪܺܝܟ ܐܰܢ̱ܬ ܡܶܢ ܟܽܠ ܡܳܪܳܐ ܛܳܒܳܐ ܫܽܘܒܚܳܐ ܠܰܫܡܳܟ܇ ܘܠܰܐܒܳܐ ܕܫܰܠܚܳܟ ܘܰܠܪܽܘܚܩܽܘܕܫܳܐ ܘܰܥܠܰܝܢ ܪ̈ܰܚܡܶܐ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܩܪܶܒ ܘܰܡܛܳܐ ܠܶܗ ܙܰܒܢܳܐ ܕܶܐܡܰܪ ܡܳܪܰܢ܇ ܢܰܥܺܝܪ ܢܰܦܫܰܢ ܠܰܨܠܽܘܬܳܐ ܥܰܕ ܐܺܝܬ ܠܰܢ ܐܰܬܪܳܐ܇ ܒܕܶܡܥ̈ܶܐ ܘܒܰܬܰܘܳܬ ܢܰܦܫܳܐ ܦܝܳܣܳܐ ܢܩܰܪܶܒ܇ ܘܰܒܚܰܫܳܐ ܢܦܺܝܣ ܠܰܐܠܳܗܳܐ ܕܪ̈ܰܚܡܶܐ ܢܫܰܟܶܢ ܠܰܢ܇ ܦܽܘܡܳܟ ܡܳܪܝ̱ ܩܰܕܺܝܫܳܐ ܐܶܡܰܪ܇ ܕܰܩܪܰܐܳܘܽܘܢ ܘܶܐܢܳܐ ܥܳܢܶܐ ܐ̱ܢܳܐ܇ ܠܳܟ ܩܳܪܝܳܐ ܥܺܕܬܳܐ ܘܝܰܠܕܶܝ̈ܗܿ ܚܽܘܣ ܘܶܐܬܪܰܚܰܡܥܠܰܝ܀

ܐܰܦܺܝܣܽܘܟ ܢܺܝܢܘܳܝ̈ܶܐ ܒܰܬܝܳܒܽܘܬܳܐ ܘܚܳܢܰܬ݀ ܐܶܢܽܘܢ ܛܰܝܒܽܘܬܳܟ ܘܬܰܪܥܳܐ ܠܗܽܘܢ ܦܬܰܚܬ܇ ܘܥܰܠܝ̈ ܪ̈ܰܚܡܶܐ ܕܒܳܒ̈ܳܬܳܐ ܩܕܳܡ ܪܰܒܽܘܬܳܟ܇ ܘܰܐܢ̱ܬ ܠܳܟ ܐܰܪܟܶܢܬ ܨܶܝܕܰܝܗܽܘܢ ܘܡܶܢ ܪܽܘܓܙܳܐ ܦܰܨܺܝܬ܇ ܘܰܚܢܰܢ ܡܳܪܝ̱ ܕܰܚܛܰܝܢ ܘܰܐܪܓܶܙܢܳܟ܇ ܘܒܰܥܒܳܕܰܝ̈ܢ ܡܰܪܡܪܰܢ ܠܟܺܐܢܽܘܬܳܟ܇ ܚܽܘܣ ܘܶܐܬܪܰܚܰܡ ܥܰܠ ܟܽܠܰܢ ܒܰܡܪܰܚܡܳܢܽܘܬܳܟ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܰܢ̱ܬ ܡܳܪܝ̱ ܝܰܡܳܐ ܕܰܚܢܳܢܳܐ܇ ܘܛܽܘܦܬܳܐ ܕܰܣܝܳܢܳܐ ܥܰܘܠܰܢ܇ ܕܰܚܕܳܐ ܛܽܘܦܬܳܐ ܠܳܐ ܡܰܨܝܳܐ܇ ܕܰܠܝܰܡܳܐ ܪܰܒܳܐ ܬܶܕܠܽܘܚ܀

ܫܽܘܒܚܳܐ ܠܚܽܘܒܳܟ ܣܰܓܺܝܐܳܐ܇ ܕܰܫܦܺܝܥ ܗܘܳܐ ܥܰܠ ܚܰܛܳܝ̈ܶܐ܇ ܫܽܘܒܚܳܐ ܠܫܰܦܽܝܘܬܳܟ ܡܳܪܰܢ܇ ܕܠܳܐ ܡܶܬܕܰܠܚܳܐ ܡܶܢ ܥܰܘܠܰܢ܀

 

ܕܦܶܠܓܶܗ ܕܝܰܘܡܳܐ ܩܳܠܳܐ ܕܩܽܘܩܳܝܳܐ

ܐܰܝܢܳܐ ܕܡܰܪܦܶܐ ܬܶܫܡܶܫܬܶܗ ܕܡܳܪܝܳܐ ܘܦܳܗܶܐ ܠܒܰܪ܇ ܕܳܡܶܐ ܠܗܰܘ ܐܶܡܪܳܐ ܕܰܚܛܰܦ ܕܺܐܒܳܐ ܡܶܢ ܪܳܥܝܳܐ܇ ܐܶܡܪ̈ܶܐ ܐܰܢ̱ܬܽܘܢ܇ ܕܰܐܠܳܗܳܐ ܚܰܝܳܐ܇ ܘܒܺܝܫܳܐ ܐܺܝܬܰܘܗ̱ܝ ܕܺܐܒܳܐ ܚܳܛܽܘܦܳܐ܇ ܬܰܘ ܒܰܪ̈ܳܝܶܐ ܐܶܬܚܰܠܰܛܘ̱ ܥܰܡ ܓܰܘܳܝ̈ܶܐ܇ ܕܚܳܙܶܐ ܠܟܽܘܢ ܚܰܬܢܳܐ ܘܚܳܕܶܐ ܘܬܰܪܥܶܗ ܦܳܬܰܚ ܠܟܽܘܢ ܗ ܘ ܗ܀

ܐܰܝܢܳܐ ܕܙܳܪܰܥ ܙܶܕܩ̈ܳܬܳܐ ܘܥܳܒܰܪ ܡܶܢ ܥܳܠܡܳܐ܇ ܐܳܬܶܐ ܝܰܘܡܳܐ ܕܢܽܘܚܳܡܳܐ ܙܰܒܢܳܐ ܕܰܚܨܳܕܗܶܝܢ܇ ܛܽܘܒܳܐ ܠܟܺܐܢ̈ܶܐ ܕܰܙܪܰܥܘ̱ ܙܶܕܩ̈ܳܬܳܐ܇ ܫܰܗܪܳܐ ܨܰܘܡܳܐ ܘܥܰܡܠܳܐ ܕܟܺܐܢܽܘܬܳܐ܇ ܡܳܐ ܕܳܐܬܶܐ ܒܫܽܘܒܚܳܐ ܪܰܒܳܐ ܡܫܺܝܚܳܐ ܢܶܬܶܠ ܠܗܽܘܢ܇ ܡܶܕܶܡ ܕܶܐܕܢܳܐ ܠܳܐ ܫܶܡܥܰܬ݀ ܘܥܰܠ ܠܶܒܳܐ ܠܳܐ ܣܠܶܩ܇ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܰܝܟ ܥܰܬܺܝܪܳܐ ܠܳܐ ܟܳܠܶܝܬ܇ ܡܶܢ ܦܳܪ̈ܽܘܫܶܐ ܫܶܐܠ̈ܳܬܗܽܘܢ܇ ܬܰܪܥܳܟ ܪܳܚܶܡ ܬܰܝܳܒ̈ܶܐ܇ ܓܰܙܳܟ ܪܳܚܶܡ ܡܶܣܟܺܢ̈ܶܐ܀  

ܫܽܘܒܚܳܐ ܠܰܐܒܳܐ ܚܰܢܳܢܳܐ܇ ܘܣܶܓܕܬܳܐ ܠܰܒܪܳܐ ܦܳܪܽܘܩܳܐ܇ ܬܰܘܕܺܝ ܠܪܽܘܚܳܐ ܩܰܕܺܝܫܳܐ܇ ܘܰܥܠܰܝܢ ܪ̈ܰܚܡܶܐ ܘܰܚܢܳܢܳܐ܇ ܗ ܘ ܗ܀

 

ܕܰܬܫܰܥܫܳܥܺܝ̈ܢ ܣܳܗ̈ܕܶܐ ܐܰܦܽܝܣܽܘܢܳܝܗ̱ܝ

ܛܽܘܒܰܘܗ̱ܝ ܠܰܐܝܢܳܐ ܕܡܶܢ ܥܳܠܡܳܐ܇ ܩܢܳܐ ܠܶܗ ܙܘܳܕ̈ܶܐ ܠܗܳܝ ܐܽܘܪܚܳܐ܇ ܘܛܰܝܶܒ ܠܶܗ ܢܰܚ̈ܬܶܐ ܫܒܺܝܚ̈ܶܐ܇ ܠܗܰܘ ܝܰܘܡܳܐ ܕܚܺܝܠܳܐ܇ ܕܡܳܐ ܕܕܳܢܰܚ ܚܰܬܢܳܐ܇ ܕܢܶܚܙܶܐ ܠܰܣܡܺܝܟ̈ܶܐ܇ ܥܰܡ ܣܡܺܝܟ̈ܶܐ ܢܶܥܽܘܠ ܢܶܓܢܶܐ ܘܢܶܙܡܰܪ ܠܶܗ ܫܽܘܒܚܳܐ܀

ܟܰܦܢܳܐ ܗܘܺܝܿܬ ܘܰܐܘܟܶܠܬܽܘܢܳܢܝ̱܇ ܘܨܰܗܝܳܐ ܗܘܺܝܿܬ ܘܰܐܫܩܺܝܬܽܘܢܳܢܝ̱܇ ܐܶܡܰܪ ܡܳܪܰܢ ܒܰܣܒܰܪܬܶܗ ܠܰܒܢ̈ܰܝ ܝܰܡܺܝܢܳܐ܇ ܠܒܶܝܬ ܐܰܣܺܝܪ̈ܶܐ ܐܶܬܰܝܬܽܘܢ܇ ܨܶܝܕܰܝ ܬܽܘܒ ܘܰܣܥܰܪܬܽܘܢܳܢܝ̱܇ ܬܰܘ ܥܽܘܠܘ̱ ܝܺܪܶܬܘ̱ ܡܰܠܟܽܘܬܳܐ ܘܚܰܝ̈ܶܐ ܕܠܳܐ ܥܳܒܪܺܝܢ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܡܳܐ ܕܥܳܐܠܺܝܢ ܛܶܟܣ̈ܶܐ܇ ܩܕܳܡܰܝܟ ܕܰܝܳܢܳܐ܇ ܘܩܳܝܡܺܝܢ ܒܦܽܘܪܣܳܝܳܐ܇ ܘܣܽܘܪܳܕܳܐ ܩܕܳܡܰܝܟ܇ ܬܰܡܳܢ ܗܘܺܝ ܠܺܝ ܡܳܪܝ̱܇ ܣܰܒܪܳܐ ܕܠܳܟ ܣܰܟܺܝܿܬ܀

ܫܽܘܒܚܳܐ ܠܗܰܘ ܕܶܐܬܳܐ܇ ܘܦܰܪܩܰܢ ܒܰܚܢܳܢܶܗ܇ ܘܰܥܬܺܝܕ ܬܽܘܒ ܕܢܺܐܬܶܐ܇ ܢܚܰܕܶܬ ܒܶܪ̈ܝܳܬܶܗ܇ ܠܰܐܒܽܘܗ̱ܝ ܪܽܘܡܪܳܡܳܐ܇ ܘܣܶܓܕܬܳܐ ܠܪܽܘܚܩܽܘܕܫܳܐ܀

 

ܬܽܘܒ ܕܪܰܡܫܳܐ ܕܰܬܠܳܬܳܐ ܕܫܰܒܬܳܐ ܕܰܬܪܶܝܢ

ܩܳܠܳܐ ܐܰܢ̱ܬ ܕܠܰܒܬܽܘܠܬܳܐ

ܪܳܡܳܐ ܕܬܰܚܬܺܝ ܝܳܬܶܗ܇ ܘܰܣܥܰܪ ܥܰܒܕܰܘ̈ܗܝ ܒܰܚܢܳܢܶܗ܇ ܚܽܘܣ ܥܰܠ ܥܺܕܬܳܟ܇ ܘܢܰܛܰܪ ܝܰܠܕܰܝ̈ܗܿ ܒܛܰܝܒܽܘܬܳܟ ܐܰܠܳܗܳܐ܀

ܛܳܒܳܐ ܕܶܐܬܳܐ ܒܚܽܘܒܶܗ܇ ܘܰܗܘܳܐ ܐ̱ܢܳܫܳܐ ܒܨܶܒܝܳܢܶܗ܇ ܘܗܰܠܶܟ ܒܰܐܪܥܳܐ܇ ܕܢܰܐܣܶܐ ܟܺܐܒ̈ܶܐ ܕܥܳܡܽܘܪ̈ܶܝܗܿ܀

ܠܳܟ ܫܽܘܒܚܳܐ ܒܪܳܐ ܡܫܺܝܚܳܐ ܕܶܐܬܰܝܬ ܡܶܛܽܠ ܦܽܘܪܩܳܢܰܢ܇ ܕܬܰܐܣܶܐ ܘܬܰܚܠܶܡ܇ ܟܺܐܒ̈ܶܐ ܟܣܰܝ̈ܳܐ ܕܢܰܦܫ̈ܳܬܰܢ ܐܰܠܳܗܳܐ܀

ܛܳܒܳܐ ܓܽܘܫ ܬܰܪ̈ܥܝܳܬܰܢ܇ ܘܰܐܣܳܐ ܘܰܥܛܺܝ ܚܒܳܪ̈ܳܬܰܢ܇ ܘܰܐܦܢܳܢ ܒܪ̈ܰܚܡܰܝܟ ܡܶܢ ܬܰܘܫܳܐ ܠܽܐܘܪܚܳܐ ܕܚܰܝ̈ܶܐ ܐܰܠܳܗܳܐ܀

ܢܺܐܬܶܐ ܚܢܳܢܳܟ ܡܳܪܰܢ ܠܺܐܝܳܠܳܐ ܕܰܡܚܺܝܠܽܘܬܰܢ܇ ܘܰܒܝܰܕ ܨܰܘܡܳܐ܇ ܘܰܨܠܽܘܬܳܐ ܩܳܪܶܝܢܰܢ ܠܳܟ܀

ܒܪܺܝܟ ܗܽܘ ܐܰܒܳܐ ܕܫܰܠܚܳܟ܇ ܕܬܚܰܣܶܐ ܠܟܽܠ ܚܰܛܳܝ̈ܶܐ܇ ܣܓܺܝܕ ܐܰܢ̱ܬ ܡܶܢ ܟܽܠ܇ ܥܰܡ ܪܽܘܚܳܐ ܦܰܪܰܩܠܺܝܛܳܐ܀

 

ܕܡܳܪܝܳܐ ܩܪܺܝܬܳܟ܇ ܡܫܺܝܚܳܐ ܐܶܬܺܝܠܶܕ

ܐܶܫܰܥܝܳܐ ܢܒܺܝܳܐ܇ ܐܰܟܪܶܙ ܟܰܕ ܐܳܡܰܪ܇ ܕܗܳܢ ܐܺܝܬܰܘܗ̱ܝ ܨܰܘܡܳܐ ܕܓܳܒܶܐ ܠܰܐܠܳܗܳܐ܇ ܟܰܕ ܬܶܩܨܶܐ ܠܰܚܡܳܟ ܠܟܰܦܢ̈ܶܐ ܘܚܰܣܺܝܪ̈ܶܐ܇ ܘܰܐܟܣܢܳܝ̈ܶܐ ܡܛܰܪ̈ܦܶܐ܇ ܒܒܰܝܬܳܟ ܢܶܬܩܰܒܠܽܘܢ܀

ܚܽܘܢܰܝܢܝ̱ ܚܰܢܳܢܳܐ܇ ܕܚܰܢܳܗܿ ܠܚܰܛܳܝܬܳܐ܇ ܘܶܐܬܪܰܚܰܡܥܠܰܝ܇ ܐܰܝܟ ܕܥܰܠ ܓܰܝܳܣܳܐ܇ ܘܩܰܒܶܠ ܒܳܥܽܘܬܰܢ ܘܨܰܘܡܰܢ ܘܰܨܠܽܘܬܰܢ܇ ܘܶܐܬܪܰܚܰܡܥܠܰܝܢ܇ ܒܰܬܪ̈ܰܝܗܽܘܢ ܥܳܠܡ̈ܶܐ܀

ܒܨܰܘܡܳܐ ܘܒܰܨܠܽܘܬܳܐ ܘܰܒܚܽܘܒܳܐ ܕܰܟܝܳܐ܇ ܘܕܽܘܒܳܪ̈ܶܐ ܡܝܰܬܪ̈ܶܐ܇ ܡܶܬܪܰܥܶܐ ܡܳܪܝܳܐ܇ ܘܰܐܝܢܳܐ ܕܪܳܕܶܐ ܒܶܗ ܡܶܬܬܢܺܝܚ ܒܶܗ ܡܳܪܝܳܐ܇ ܘܺܝܪܶܬ ܡܰܠܟܽܘܬܳܐ܇ ܘܚܰܝ̈ܶܐ ܕܠܳܐ ܥܳܒܪܺܝܢ܀

ܒܨܰܘܡܳܐ ܡܶܙܕܰܗܝ̈ܳܢ܇ ܦܰܓܪ̈ܶܐ ܘܢܰܦܫ̈ܳܬܳܐ ܒܰܕܡܽܘܬ ܡܰܠܰܐܟ̈ܶܐ ܬܶܫܒܽܘܚܬܳܐ ܙܳܡܪܺܝܢ܇ ܙܰܝܢܳܐ ܕܙܳܟܽܘܬܳܐ܇ ܡܶܢܶܗ ܡܶܬܚܰܙܩܺܝܢ܇ ܘܥܳܐܠܺܝܢ ܘܝܳܪܬܺܝܢ ܡܰܠܟܽܘܬܳܐ ܗܳܝ ܕܰܫܡܰܝܳܐ܀

ܡܫܺܝܚܳܐ ܐܶܬܡܰܟܰܟ ܡܶܛܽܠ ܦܽܘܪܩܳܢܰܢ܇ ܘܩܰܒܶܠ ܥܠܰܘܗ̱ܝ ܕܰܢܨܽܘܡ ܨܰܘܡܳܐ ܩܰܕܺܝܫܳܐ܇ ܘܐܰܠܦܶܗ ܗܘܳܐ ܠܥܺܕܬܶܗ܇ ܕܰܒܨܰܘܡܳܐ ܕܰܟܝܳܐ܇ ܘܒܰܨܠܽܘܬܳܐ ܢܶܙܟܺܝܘܗ̱ܝ ܠܣܳܛܳܢܳܐ ܕܡܰܩܪܶܒ ܥܰܡܶܗ܀

ܒܨܰܘܡܳܐ ܕܨܳܡ ܡܳܪܰܢ܇ ܙܟܳܝܗ̱ܝ ܠܳܐܟܶܠܩܰܪܨܳܐ ܘܰܕܪܰܫ ܠܰܢ ܐܽܘܪܚܳܐ ܕܢܶܪܕܶܐ ܒܶܗ ܠܒܶܝܬ ܡܰܠܟܽܘܬܳܐ܇ ܬܰܘ ܐܰܚ̈ܰܝ ܢܶܫܦܰܪ ܒܨܰܘܡܳܐ ܘܒܰܨܠܽܘܬܳܐ܇ ܕܢܶܬܪܰܥܶܐ ܠܰܢ ܡܳܪܳܐ ܛܳܒܳܐ ܕܰܐܪܓܶܙܢܳܝܗ̱ܝ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܩܰܒܶܠܳܝܗ̱ܝ ܡܳܪܰܢ

ܫܽܘܒܚܳܐ ܠܥܰܬܺܝܪܳܐ܇ ܕܡܰܣܺܟܢ ܗܽܘ ܠܶܗ ܕܰܫܦܰܪ ܠܶܗ܇ ܘܰܦܬܰܚ ܒܶܝܬ ܓܰܙܶܗ܇ ܘܝܰܗܒܠܰܢ ܥܽܘܬܪܳܐ ܕܚܰܢܳܢܶܗ܀

ܙܰܝܢܳܐ ܩܰܕܺܝܫܳܐ܇ ܕܺܐܝܬܰܘܗ̱ܝ ܨܰܘܡܳܐ ܠܦܳܪ̈ܽܘܫܶܐ܇ ܕܒܶܗ ܗܽܘ ܓܶܝܪ ܥܳܐܠܺܝܢ܇ ܠܦܰܪܕܰܝܣܳܐ ܕܰܡܠܶܐ ܛܽܘܒ̈ܶܐ܀

 

ܐ̱ܚܪܺܢܳܐ ܒܩܳܠܳܐ ܗܘܺܝ ܠܳܗܿ ܠܰܢܰܦܫܝ̱ ܡܶܢܰܛܪܳܢܳܐ

ܡܽܘܫܶܐ ܒܨܰܘܡܳܐ ܡܛܳܐ ܗܘܳܐ ܕܢܶܚܙܶܐ܇ ܫܟܺܝܢܬܶܗ ܕܰܡܪܰܝܡܳܐ܇ ܘܶܐܙܕܰܗܺܝ ܗܘܳܐ ܒܰܕܡܽܘܬ ܫܶܡܫܳܐ ܥܰܠ ܛܽܘܪܳܐ ܕܣܺܝܢܰܝ܇ ܘܠܽܘܚ̈ܶܐ ܕܢܳܡܽܘܣܳܐ ܐܰܚܶܬ܇ ܕܰܟܬܺܝܒ̈ܳܢ ܗܘܺܝ ܦܽܘܩܕܳܢ̈ܶܐ܇ ܘܢܳܡܽܘܣܳܐ ܠܥܰܡܳܐ܀

ܬܰܘ ܦܳܪ̈ܽܘܫܶܐ ܟܰܢܶܫܘ̱ ܥܽܘܬܪܳܐ ܕܠܳܐ ܣܳܟ ܡܶܬܚܰܠܰܨ܇ ܕܰܒܝܰܕ ܨܰܘܡܳܐ ܘܰܨܠܰܘ̈ܳܬܳܐ܇ ܩܢܰܐܳܘܽܘܗ̱ܝ ܩܰܕܡܳܝ̈ܶܐ܇ ܚܶܙܘܳܐ ܚܰܕܬܳܐ ܐܶܬܝܺܗܶܒ ܠܰܐܝܠܶܝܢ ܕܰܐܚܒܽܘܗ̱ܝ ܘܰܢܩܶܦܘ̱ ܠܶܗ. ܘܺܝܪܶܬܰܘ̱ ܚܰܝ̈ܶܐ ܘܡܰܠܟܽܘܬܳܐ܀

ܠܳܟ ܩܳܪܶܝܢܰܢ ܡܫܺܝܚܳܐ ܣܰܒܪܳܐ ܕܟܽܠܗܽܘܢ ܬܰܝܳܒ̈ܶܐ܇ ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ ܘܶܐܬܪܰܚܰܡܥܠܰܝܢ܇ ܕܰܐܢ̱ܬ ܗܽܘ ܛܳܒܳܐ ܘܒܰܣܺܝܡܳܐ ܘܨܳܒܶܐ ܒܕܶܡܥ̈ܶܐ ܕܬܰܝܳܒ̈ܶܐ܇ ܒܳܟ ܡܶܬܓܰܘܣܺܝܢܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܪܗܶܛ ܒܶܗ ܒܨܰܘܡܳܐ ܐܰܝܟ ܟܰܫܺܝܪܳܐ ܕܒܳܥܶܐ ܚܰܝܰܘ̈ܗ̱ܝ ܕܡܳܐ ܕܰܡܚܰܘܝܳܐ ܩܝܳܡܬܳܐ ܢܰܦܫܳܗܿ ܚܕܽܘܓܳܐ ܬܶܗܘܶܐ܇ ܨܽܘܡ ܠܶܗ ܠܚܰܬܢܳܐ ܕܰܒܡܶܫܬܽܘܬܶܗ ܣܡܺܝܟܳܐ ܬܶܗܘܶܐ܇ ܕܰܠܨܰܝܳܡ̈ܶܐ ܐܳܬܳܐ ܢܢܰܨܰܚ ܒܰܟܠܺܝ̈ܠܰܝܗܽܘܢ܀

ܫܽܘܒܚܳܐ ܠܰܐܒܳܐ ܕܰܒܝܰܕ ܨܰܘܡܳܐ ܠܥܰܒܕܰܘ̈ܗ̱ܝ ܢܰܨܰܚ܇ ܘܣܶܓܕܬܳܐ ܠܰܒܪܳܐ ܕܰܐܠܦܳܗܿ ܠܥܺܕܬܶܗ ܨܰܘܡܳܐ ܕܰܟܝܳܐ܇ ܬܰܘܕܺܝ ܠܪܽܘܚܳܐ ܕܝܳܗܶܒ ܐܰܓܪܳܐ ܠܟܽܠ ܨܰܝܳܡ̈ܶܐ܇ ܚܰܕ ܗܽܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܡܳܪܶܐ ܟܝܳܢ̈ܶܐ ܝܰܗܒ ܢܰܦܫܶܗ ܘܨܰܘܡܳܐ ܠܒܰܟ ܐܰܝܟ ܡܶܣܟܺܢܳܐ܇ ܕܢܶܬܶܠ ܛܽܘܦܣܳܐ ܠܦܳܪ̈ܽܘܫܶܐ܇ ܕܒܶܗ ܢܶܙܟܽܘܢ ܠܰܒܥܶܠܕܰܪܳܐ܀

ܘܰܚܠܳܦ ܦܺܐܪܳܐ ܕܰܡܪܳܪ̈ܶܐ܇ ܕܰܐܳܘܠܶܕ ܡܰܘܬܳܐ ܠܰܒܪܺܝܬܳܐ܇ ܐܶܬܥܰܙܺܝ ܒܥܳܢܘܳܝܽܘܬܳܐ܇ ܘܝܰܗܒ ܚܰܝ̈ܶܐ ܠܰܕܒܶܝܬ ܐܳܕܳܡ܇ ܫܽܘܒܚܳܐ܀

ܗܘܺܝ ܥܳܕܽܘܪܳܐ ܠܕܳܘܝܽܘܬܝ̱ ܡܳܪܝ̱܇ ܕܥܳܕܽܘܪܳܐ ܐ̱ܚܪܺܢܳܐ ܠܰܝܬ ܠܺܝ܇ ܘܠܳܐ ܢܰܗܶܠ ܒܺܝ ܣܳܛܳܢܳܐ܇ ܒܰܕܡܽܘܬ ܐܶܡܰܢ ܩܰܕܡܳܝܬܳܐ܀

ܡܳܐ ܕܰܛܡܰܪ ܒܺܝܫܳܐ ܦܰܚܶܗ܇ ܩܢܺܝ ܓܶܦ̈ܶܐ ܨܰܘܡܳܐ ܕܰܟܝܳܐ܇ ܘܡܳܐ ܕܰܐܬܩܶܢ ܠܳܟ ܫܳܪ̈ܥܳܬܳܐ܇ ܙܶܕܩ̈ܳܬܳܐ ܪܟܽܘܒܳܐ ܥܒܶܕ ܠܳܟ. ܫܽܘܒܚܳܐ܀

 

ܩܳܠܳܐ ܕܠܺܠܝܳܐ ܠܳܟ ܡܳܪܝܳܐ ܩܳܪܶܝܢܰܢ

ܐܺܝܢ ܐܺܠܺܝܳܐ ܢܒܺܝܳܐ ܡܶܛܽܠ ܡܳܢܳܐ܇ ܡܶܢ ܩܕܳܡ ܐܺܝܙܒܺܝܠ ܥܳܪܶܩ ܐܰܢ̱ܬ ܕܓܶܙܡܰܬ݀ ܥܰܠ ܚܰܝܰܝ̈ܟ܇ ܡܶܢ ܐܰܢ̱ܬܬܳܐ ܘܠܳܐ ܠܡܶܥܪܰܩ ܩܳܥܶܐ ܢܒܺܝܳܐ܇ ܕܦܰܚܳܐ ܐܺܝܬܶܝܗܿ ܕܣܳܛܳܢܳܐ ܕܒܶܗ ܗܽܘ ܡܶܬܟܰܬܰܫ܇ ܡܶܢ ܠܽܘܩܕܰܡ ܗܺܝ ܠܳܐܕܳܡ ܣܶܚܦܰܬ݀܇ ܘܰܠܪܺܝܫܶܗ ܕܝܽܘܚܰܢܳܢ ܦܶܣܩܰܬ܇ ܡܳܪܰܢ ܦܰܨܳܢܝ̱ ܡܶܢ ܐܺܝܕܶܝ̈ܗܿ ܘܚܽܘܣ ܘܶܐܬܪܰܚܰܡ ܥܠܰܝܢ܀

ܒܓܶܦ̈ܶܐ ܕܗܰܝܡܳܢܽܘܬܳܐ ܒܳܐܐܰܪ ܦܶܪܚܶܬ܇ ܘܪܶܥܝܳܢܝ̱ ܫܰܩܠܰܢܝ̱ ܨܶܝܕ ܒܳܒܶܝܠ ܡܶܨܥܰܬ ܐܰܬܽܘܢܳܐ܇ ܘܰܚܙܺܝܿܬ ܬܰܡܳܢ ܬܶܗܪܳܐ ܛܠܳܝ̈ܶܐ ܬܠܳܬܳܐ܇ ܕܰܪܡܶܝܢ ܒܰܐܬܽܘܢܳܐ ܕܢܽܘܪܳܐ ܘܠܳܐ ܐܰܟܝܰܬ ܐܶܢܽܘܢ܇ ܛܰܐܠܶܗ ܓܶܝܪ ܕܰܐܠܳܗܳܐ ܚܰܝܳܐ܇ ܗܽܘ ܙܟܳܐ ܗܘܳܐ ܠܢܽܘܪܳܐ ܕܰܐܬܽܘܢܳܐ܇ ܘܰܬܠܳܬܳܐ ܩܪܰܘ ܠܰܬܠܳܬܳܐ܇ ܨܠܽܘܬܗܽܘܢ ܬܥܰܕܰܪܝ̱ ܠܰܢ܀

 

ܡܰܕܪܳܫܳܐ ܩܳܠܳܐ ܐܶܬܬܥܺܝܪܘ̱ ܫܳܗܪ̈ܶܐ ܥܽܘܢܺܝܬܳܐ ܫܡܰܥ ܩܳܠ ܓܥܳܬ ܡܳܪܝܳܐ܇ ܘܠܰܒܥܶܠܕܰܪܝ ܐܰܒܗܶܬ܇

ܦܳܪܽܘܩܝ̱ ܙܟܺܝ ܠܣܳܩܽܘܪ̈ܰܝ܇ ܒܝܰܕ ܚܰܝܠܳܐ ܕܬܽܘܩܳܦܳܟ܇ ܘܦܰܣܶܩ ܡܨܺܝܕ̈ܳܬܶܗ܇ ܘܚܽܘܢܰܝܢܝ̱ ܕܚܶܒܿܶܬ ܠܺܝ܀

ܠܳܐ ܗܘܳܐ ܡܰܐܡܳܢܽܘ܇ ܡܰܐܡܶܢ ܨܰܝܳܕܳܐ܇ ܕܽܐܘܡܳܢܽܘܬܶܗ ܗܺܝ܇ ܗܳܢܰܘ ܦܽܘܠܚܳܢܶܗ܀

ܝܺܨܺܝܦ ܗܽܘ ܘܰܚܦܺܝܛ܇ ܘܰܐܡܶܢ ܠܰܚܛܳܗ̈ܶܐ܇ ܕܰܥܒܳܕܶܗ ܗܳܢܰܘ܇ ܘܟܽܠ ܫܳܥ ܬܳܥܶܫ ܒܶܗ܀

ܡܨܺܝܕܬܶܗ ܗܽܘ ܫܳܕܶܐ܇ ܒܰܕܡܽܘܬ ܨܰܝܳܕܳܐ܇ ܘܰܚܕܳܐ ܡܶܢ ܬܰܪ̈ܬܶܝܢ܇ ܣܳܥܰܪ ܒܰܫܚܳܩܶܗ܀

ܥܰܠ ܣܦܳܪ̈ܰܝ ܝܰܡܳܐ܇ ܡܰܓܗܶܢ ܨܰܝܳܕܳܐ܇ ܘܥܰܠ ܬܰܪܥܳܐ ܕܠܶܒܳܐ܇ ܚܳܕܰܪ ܣܳܛܳܢܳܐ܀

ܠܰܘ ܐܰܟܡܳܐ ܕܨܳܒܶܐ܇ ܨܳܐܶܕ ܨܰܝܳܕܳܐ܇ ܘܠܰܘ ܐܰܟܡܳܐ ܕܒܳܥܶܐ܇ ܡܰܚܛܶܐ ܣܳܛܳܢܳܐ܀

ܘܶܐܢ ܠܳܐ ܕܳܠܰܚ ܠܶܗ܇ ܒܺܝܫܳܐ ܠܪܶܥܝܳܢܳܐ܇ ܐܳܦܠܳܐ ܡܶܬܦܰܟܪܺܝܢ܇ ܢܽܘܢܰܘ̈ܗ̱ܝ ܦܳܪ̈ܽܘܚܶܐ܀

ܐܺܝܬܰܘܗ̱ܝ ܕܶܝܢ ܠܰܐܝܠܶܝܢ ܕܨܳܒܶܝܢ ܕܰܢܚܽܘܒܽܘܢ܇ ܨܢܺܝܥܳܐ ܘܫܰܕܠܳ܇ ܘܠܳܐ ܕܶܝܢ ܕܰܩܛܺܝܪܳܐ܀

ܒܨܶܒܝܳܢܝ̱ ܥܳܐܶܠ ܐ̱ܢܳܐ܇ ܒܨܶܒܝܳܢܝ̱ ܢܳܦܶܩ ܐ̱ܢܳܐ܇ ܥܶܠܬܳܐ ܐܰܚܺܝܕ ܐ̱ܢܳܐ ܕܰܫܒܳܢܝ̱ ܣܳܛܳܢܳܐ܀

ܓܳܚܶܟ ܗܽܘ ܥܠܰܝܗܽܘܢ܇ ܐܰܝܠܶܝܢ ܕܰܫܒܶܝܢ ܠܶܗ܇ ܕܗܶܢܽܘܢ ܕܶܝܢ ܪܳܡܶܝܢ܇ ܢܺܝܪܶܗ ܒܨܰܘܪ̈ܰܝܗܽܘܢ܀

ܡܬܰܚܬܰܝ ܥܶܕܳܠܳܝܳܐ܇ ܡܶܢܳܟ ܥܶܠܳܝܳܐ܇ ܠܘܳܬܰܢ ܚܰܝܳܒ̈ܶܐ܇ ܢܶܗܦܽܘܟ ܥܽܘܕܪܳܢܳܟ܀

ܫܩܰܠ ܗܘܳܐ ܠܰܩܪܳܒܳܐ܇ ܚܢܳܢܳܟ ܚܰܙܶܩܰܝܢܝ̱ ܠܒܺܝܫܳܐ ܕܶܝܢ ܐܰܩܗܶܐ܇ ܘܠܳܟ ܡܳܪܝ̱ ܙܳܟܽܘܬܳܐ܀

 

ܐܰܒܳܐ ܟܬܰܒ ܗܘܳܐ܇ ܩܳܠܳܐ ܫܽܘܒܚܳܐ ܠܳܟ ܡܳܪܝ̱ ܕܰܒܨܰܘܡܳܟ܇ ܫܰܦܶܠܬܳܝܗ̱ܝ ܠܰܒܥܶܠܕܰܪܳܐ

ܡܰܠܶܠ ܟܶܢܳܪܝ̱ ܒܰܙܡܳܪܳܟ܇ ܒܰܚܠܽܘܠܳܗܿ ܕܟܰܠܰܬ ܡܰܠܟܳܐ܇ ܕܫܳܪܽܘܬܳܐ ܥܶܒܕܰܬ݀܇ ܘܰܩܪܳܬ݀ ܠܨܰܝܳܡ̈ܶܐ܇ ܘܥܰܠ ܦܳܬܽܘܪܳܐ ܕܡܰܠܟܽܘܬܳܐ܇ ܢܶܣܬܰܡܟܽܘܢ ܘܢܶܪܽܘܘܽܢ ܡܶܢ ܫܽܘܡܶܢܳܟ܀

ܒܨܰܘܡܳܐ ܒܰܣܺܝܡ ܝܽܘܠܦܳܢܶܗ܇ ܘܰܐܝܟ ܠܰܚܡܳܐ ܘܚܰܡܪܳܐ ܠܟܰܫܺܝܪ̈ܶܐ܇ ܠܳܐܣܽܘ̈ܛܶܐ ܚܰܡܪܳܐ܇ ܠܨܰܝܳܡ̈ܶܐ ܡܶܠܬܳܐ܇ ܚܰܡܪܳܐ ܡܰܚܫܳܟ ܚܽܘܫܳܒ̈ܶܐ܇ ܘܡܶܠܬܳܐ ܠܺܝܕܰܥܬܳܐ ܡܰܢܗܪܳܐ܀

ܙܡܺܝܪܬܳܐ ܕܨܰܘܡܳܐ ܪܰܡܝܳܐ ܠܺܝ܇ ܘܠܳܐ ܡܶܫܟܰܚ ܐܳܣܽܘܛܳܐ ܕܢܶܫܡܥܺܝܗܿ܇ ܕܡܶܐܟܽܘܠܬܳܐ ܟܒܰܫܬܶܗ܇ ܡܩܰܒܶܠ ܝܽܘܠܦܳܢܳܐ܇ ܨܰܝܳܡ̈ܶܐ ܫܰܡܥܽܘܢܝ̱ ܕܬܺܐܚܽܘܢ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܦܶܠܓܶܗ ܕܠܺܠܝܳܐ ܬܰܘܕܶܐ ܠܳܟ܇ ܒܪܺܝܬܳܐ ܟܽܠܳܗܿ ܡܶܢ ܣܳܟܳܗܿ܇ ܘܒܰܙܡܺܝܪ̈ܳܬܶܗ ܕܒܰܪ ܐܺܝܫܰܝ܇ ܬܗܰܠܶܠܝ̱ ܠܳܟ ܪܽܘܚܳܢܳܐܺܝܬ܀

ܫܽܘܒܚܳܐ ܠܳܟ ܐܳܘ ܒܳܪܽܘܝܳܐ܇ ܕܺܐܝܡܳܡ̈ܶܐ ܘܠܰܝܠܰܘ̈ܳܬܳܐ܇ ܕܰܐܥܺܝܪܬܳܢܝ̱ ܠܰܡܫܰܒܳܚܽܘ܇ ܠܳܟ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ܀

 

ܕܨܰܦܪܳܐ ܕܰܬܠܳܬܳܐ

ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܥܰܕܠܳܐ ܢܺܐܙܠܽܘܢ

ܚܰܘܒ̈ܰܝ

ܒܨܰܘܡܳܐ ܕܡܽܘܫܶܐ ܗܳܢܳܐ ܕܡܳܪܰܢ ܡܶܬܢܰܨܰܚ ܗܘܳܐ܇ ܘܗܰܘ ܡܶܢܝܳܢܳܐ ܠܗܰܘ ܚܽܘܫܳܒܳܐ ܡܶܬܩܰܝܰܡ ܗܘܳܐ ܐܶܬܪܰܚܰܡܥܠܰܝ܀

ܐܳܦ ܐܺܠܺܝܳܐ ܕܰܒܰܪ ܪܳܐ̱ܙܶܗ ܕܰܐܠܳܗܽܘܬܳܐ܇ ܒܶܗ ܒܡܶܢܝܳܢܳܐ ܪܗܶܛܳܗܿ ܠܽܐܘܪܚܳܗܿ܇ ܒܨܰܘܡܳܐ ܕܰܠܒܰܟ ܐܶܬܪܰܚܰܡܥܠܰܝ܀

ܒܡܳܪܰܢ ܚܳܪܘ̱ ܗ̱ܘܰܘ ܐܳܦ ܐܺܠܺܝܳܐ ܘܡܽܘܫܶܐ ܪܰܒܳܐ܇ ܘܡܶܛܽܠ ܨܰܘܡܶܗ ܠܒܰܟܘ̱ ܗ̱ܘܰܘ ܨܰܘܡ̈ܶܐ܇ ܕܰܢܕܰܡܽܘܢ ܒܶܗ܇ ܐܶܬܪܰܚܰܡܥܠܰܝ܀

ܒܗܰܘ ܕܺܐܠܺܝܳܐ ܕܳܠ ܓܶܠܝܳܢܳܐ ܘܝܰܗܒ ܠܗܽܘܢ ܥܽܘܫܢܳܐ܇ ܕܢܶܥܒܪܽܘܢ ܡܰܠܟܳܐ ܢܡܰܠܟܽܘܢ ܡܳܐܢ̈ܶܐ ܒܽܐܘܚܕܳܢܰܝ̈ܗܽܘܢ ܐܶܬܪܰܚܰܡܥܠܰܝ܀

ܪܕܳܐ ܒܶܗ ܒܽܐܘܪܚܳܐ ܗܳܝ ܕܰܕܪܰܫܘ̱ ܠܶܗ ܢܒܺܝ̈ܶܐ ܕܰܐܒܽܘܗ̱ܝ܇ ܕܢܺܐܠܰܦ ܥܳܠܡܳܐ ܕܠܰܘ ܢܽܘܟܪܳܝܰܐܗ̱ܘ ܡܶܢ ܝܳܠܽܘܕܶܗ ܐܶܬܪܰܚܰܡܥܠܰܝ܀

ܟܰܕ ܕܶܝܢ ܐܶܬܳܐ ܘܫܰܪܺܝ ܒܨܰܘܡܳܐ ܡܳܪܶܗ ܕܳܐܕܳܡ܇ ܚܰܕܺܝܘ ܒܶܗ ܢܒܺܝ̈ܶܐ ܘܰܦܪܰܩ ܠܳܐܕܳܡ ܠܶܗ ܬܽܫܒܽܘܚܬܳܐ܀

 

ܕܰܐܠܳܗܝ̱ ܐܰܠܳܗܝ̱ ܩܳܠܳܐ ܗܰܘ ܕܰܛܥܺܝܢ ܟܽܠ ܒܶܪ̈ܝܳܬܳܐ

ܒܨܰܘܡܳܐ ܕܨܳܡܘ̱ ܗ̱ܘܰܘ ܢܺܝܢܘܳܝ̈ܶܐ ܡܶܢ ܚܽܘܒܳܠܳܐ ܐܶܬܦܰܨܺܝܘ܇ ܕܒܶܗ ܐܶܬܪܰܥܺܝ ܐܰܠܳܗܳܐ܇ ܘܒܶܗ ܫܒܰܩ ܠܗܽܘܢ ܣܰܟܠܽܘܬܗܽܘܢ܇ ܘܒܶܗ ܕܳܢܺܝܐܶܝܠ ܘܰܛܠܳܝ̈ܶܐ ܐܶܫܬܰܘܙܰܒܘ̱ ܡܶܢ ܟܰܠܕܳܝ̈ܶܐ܇ ܘܒܶܗ ܐܰܒܗܶܬܘ̱ ܗ̱ܘܰܘ ܢܰܨܺܝܚ̈ܶܐ ܠܒܳܒܠܳܝ̈ܶܐ ܣܳܢܝ̈ܰܝ ܩܽܘܫܬܳܐ܀

ܒܰܪ ܥܰܡܪܰܡ ܒܨܰܘܡܳܐ ܕܨܳܡ ܗܘܳܐ ܐܶܫܬܘܺܝ ܕܢܶܚܙܶܐ ܠܰܐܠܳܗܳܐ܇ ܘܒܶܗ ܦܪܰܩ ܠܥܰܡܶܗ ܡܶܢ ܡܶܨܪܶܝܢ ܘܒܶܗ ܩܰܒܶܠ ܗܘܳܐ ܦܽܘܩܕܳܢ̈ܶܐ܇ ܘܒܶܗ ܗܽܘ ܝܶܫܽܘܥ ܣܚܰܦ ܘܰܩܛܰܠ܇ ܬܠ̈ܳܬܺܝܢ ܡܰܠܟ̈ܶܐ ܕܺܐܝܪܺܝܚܽܘ܇ ܘܒܶܗ ܐܰܥܒܰܪ ܗܘܳܐ ܠܺܐܝܣܪܳܐܶܝܠ܇ ܒܽܘܟܪܳܐ ܠܰܐܪܥܳܐ ܕܡܽܘܠܟܳܢܳܐ܀

ܚܰܛܳܝܳܐ ܬܳܐ ܒܥܺܝ ܪ̈ܰܚܡܶܐ ܕܰܦܬܺܝܚ ܬܰܪܥܶܗ ܕܰܐܠܳܗܳܐ܇ ܕܗܽܘ ܝܳܗܶܒ ܠܳܟ ܫܽܘܒܩܳܢܳܐ܇ ܠܳܐ ܬܰܘܚܰܪ ܠܰܬܝܳܒܽܘܬܳܐ܇ ܥܰܕܠܳܐ ܡܶܬܡܰܢܰܥ ܡܰܘܬܳܐ܇ ܒܥܺܝ ܪ̈ܰܚܡܶܐ ܡܶܢ ܐܰܠܳܗܳܐ܇ ܥܰܕܠܳܐ ܐܳܚܕܺܝܢ ܠܶܗ ܬܰܪܥܳܐ܇ ܕܠܶܫܳܢܳܐ ܘܫܳܠܶܝܢ ܩܳܠܰܘ̈ܗ̱ܝ܀

ܥܰܕܠܳܐ ܐܳܬܶܐ ܗܰܘ ܝܰܘܡܳܐ ܕܟܺܐܢܽܘܬܳܐ ܠܟܽܠܢܳܫ ܕܳܝܢܳܐ܇ ܘܰܐܟܡܳܐ ܕܫܳܘܶܝܢ ܣܽܘܥܪ̈ܳܢܰܘܗ̱ܝ ܗܳܟܰܢ ܡܩܰܒܶܠ ܟܺܐܢܳܐܺܝܬ܇ ܡܶܟܳܐ ܙܘܳܕ̈ܶܐ ܢܛܰܝܶܒ ܠܰܢ܇ ܕܠܳܐ ܢܶܗܘܶܐ ܣܢܺܝܩ̈ܶܐ ܬܰܡܳܢ܇ ܒܙܰܕܺܝܩܽܘܬܳܐ ܢܶܬܟܰܫܰܪ܇ ܘܢܰܥܕܶܐ ܟܠܺܝ̈ܠܶܐ ܕܙܳܟܽܘܬܳܐ܀

ܐܰܚܽܘܕ ܡܳܪܝ̱ ܬܪܰܥ ܓܺܗܰܢܳܐ ܩܕܳܡ ܚܰܛܳܝ̈ܶܐ܇ ܕܩܳܪܶܝܢ ܠܳܟ܇ ܘܠܳܐ ܢܶܥܠܽܘܢ ܠܳܗܿ ܬܰܝܳܒ̈ܶܐ܇ ܕܰܒܒܳܥܽܘܬܳܐ ܐܶܬܓܰܪܓܰܚܘ̱܇ ܐܰܚܶܬ ܡܶܛܪܶܗ ܕܰܚܢܳܢܳܟ܇ ܥܰܠ ܢܽܘܪܳܐ ܕܰܠܚܺܝܡܳܐ ܠܰܢ܇ ܘܬܰܕܥܶܟ ܢܽܘܪܳܐ ܕܓܺܗܰܢܳܐ܇ ܡܶܢܟܽܠ ܕܰܩܪܳܟ ܒܰܨܠܽܘܬܳܐ܀

ܦܬܰܚ ܡܳܪܝ̱ ܬܰܪܥܳܐ ܕܡܰܠܟܽܘܬܳܟ ܕܢܶܥܽܘܠ ܟܶܢܫܳܐ ܕܰܦܪ̈ܺܝܩܰܝܟ܇ ܕܰܐܝܬܺܝܬ ܐܶܢܽܘܢ ܡܶܢ ܫܶܒܝܳܐ ܘܰܐܥܶܠܬ ܐܶܢܽܘܢ ܠܰܛܝܳܪܳܟ܇ ܕܢܶܚܙܽܘܢ ܠܟܽܠܗܽܘܢ ܕܒܰܐܘܘܳܢܰܝ̈ܟ܇ ܘܢܶܬܬܢܺܝܚܽܘܢ ܥܰܠ ܕܰܐܦܺܝܣܽܘܟ܇ ܢܶܪܽܘܘܽܢ ܡܶܢ ܫܽܘܡܶܢܶܗ ܕܒܰܝܬܳܟ܇ ܘܥܰܠ ܦܳܬܽܘܪܳܟ ܢܶܣܬܰܡܟܽܘܢ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ܇ ܡܶܢ ܫܡܰܝܳܐ ܘܡܰܠܰܐܟ̈ܶܐ

ܗܳܐ ܨܰܘܡܳܐ ܕܰܬܪܶܝܢ ܫܽܘܦܪ̈ܶܐ܇ ܡܰܣܪܰܚ ܠܰܐܝܢܳܐ ܕܰܠܐܶܐ ܒܶܗ܇ ܡܙܰܗܶܐ ܠܦܰܓܪܳܐ ܘܰܡܨܰܠܶܠ ܘܰܠܚܰܘܒ̈ܶܐ ܫܳܒܶܩ܇ ܠܢܰܦܫܳܐ ܡܩܰܕܶܫ ܘܰܡܢܰܟܶܦ܇ ܘܚܰܠܶܛ ܠܶܗ ܥܰܡ ܪ̈ܽܘܚܳܢܶܐ܇ ܘܡܰܘܥܶܐ ܓܶܦ̈ܶܐ ܩܰܠܺܝ̈ܠܶܐ܇ ܠܡܶܦܪܰܚ ܠܰܡܪ̈ܰܘܡܶܐ܀

ܙܰܝܢܰܐܗ̱ܘ ܪܰܒܳܐ ܕܠܳܐ ܚܳܐܶܒ܇ ܨܰܘܡܳܐ ܠܐ̱ܢܳܫ̈ܳܐ ܦܳܪ̈ܽܘܫܶܐ܇ ܫܽܘܪܳܐ ܪܳܡܳܐ ܘܬܰܩܺܝܦ̈ܶܐ܇ ܠܰܐܝܢܳܐ ܕܢܳܩܶܦ ܠܶܗ܇ ܒܶܗ ܛܠܳܝ̈ܶܐ ܐܶܬܟܰܬܫܰܘ̱ ܗ̱ܘܰܘ܇ ܥܰܡ ܓܰܘܙܰܠܬܳܐ ܒܰܐܬܽܘܢܳܐ܇ ܘܒܶܗ ܕܳܢܺܝܐܶܝܠ ܒܓܰܘ ܓܽܘܒܳܐ܇ ܙܟܳܐ ܗܘܳܐ ܠܚܰܝܘ̈ܳܬܳܐ܀

ܛܽܘܒ̈ܶܐ ܡܠܺܝܟ̈ܺܝܢ ܠܨܰܝܳܡ̈ܶܐ܇ ܕܠܰܣܢܺܝܩ̈ܶܐ ܦܫܺܝ̈ܛܳܢ ܐܺܝܕܰܘ̈ܗܝ܇ ܕܰܒܝܰܕ ܨܰܘܡܳܐ ܡܶܫܟܰܚ ܠܶܗ܇ ܬܪ̈ܰܝܗܽܘܢ ܝܽܘܬܪ̈ܳܢܶܐ܇ ܫܒܺܝܚ ܗܽܘ ܨܰܘܡܳܐ ܡܶܢ ܠܰܚܡܳܐ܇ ܘܣܰܓܺܝ ܡܝܰܬܪ̈ܳܢ ܙܶܕܩ̈ܳܬܳܐ܇ ܢܶܦܫܽܘܛ ܐܺܝܕ̈ܰܝܢ ܠܰܣܢܺܝܩ̈ܶܐ܇ ܘܢܰܪܘܰܚ ܠܰܐܠܺܝ̈ܨܶܐ܀

 

ܐ̱ܚܪܺܢܳܐ ܩܳܠܳܐ ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ

ܒܨܰܘܡܳܐ ܐܶܙܕܰܗܺܝ ܡܽܘܫܶܐ܇ ܢܒܺܝܳܐ ܓܰܒܝܳܐ ܒܪܺܝܫ ܛܽܘܪܳܐ܇ ܘܩܰܒܶܠ ܬܰܡܳܢ ܦܽܘܩܕܳܢ̈ܶܐ܇ ܘܠܽܘܚ̈ܶܐ ܕܢܳܡܽܘܣܳܐ ܐܰܚܶܬ܇ ܐܰܫܘܳܐ ܐܳܦܠܰܢ ܒܝܰܕ ܨܰܘܡܳܐ܇ ܠܰܚܙܳܬܳܟ ܐܰܠܳܗܳܐܝܬܳܐ܇ ܘܚܰܕܳܐ ܠܰܢ ܒܶܝܬ ܡܰܠܟܽܘܬܳܐ܀

ܒܨܰܘܡܳܐ ܙܰܗܝܳܐ ܘܒܰܨܠܽܘܬܳܐ ܘܰܒܫܰܗܪܳܐ ܘܰܒܬܶܫܡܶܫܬܳܐ܇ ܒܚܽܘܒܳܐ ܕܰܟܝܳܐ ܘܙܶܕܩ̈ܳܬܳܐ܇ ܟܽܠܰܢ ܐܰܚ̈ܰܝ ܢܶܬܒܰܣܰܡ܇ ܘܢܶܫܬܘܶܐ ܠܪ̈ܰܚܡܶܐ ܒܝܽܘܡ ܕܺܝܢܳܐ܇ ܘܢܺܐܪܰܬ ܚܰܝ̈ܶܐ ܕܰܠܥܳܠܰܡ܇ ܘܰܓܢܽܘܢܳܐ ܕܥܰܡ ܩܰܕܺܝܫ̈ܶܐ܀

ܐܰܠܳܗܰܢ ܣܰܓܺܝ ܪ̈ܰܚܡܶܐ܇ ܐܰܣܓܳܐ ܠܘܳܬܰܢ ܡܰܘܗܰܒܬܳܟ܇ ܘܩܰܒܶܠ ܛܳܒܳܐ ܒܳܥܽܘܬܰܢ܇ ܐܳܦ ܗܳܫܳܐ ܐܰܝܟ ܕܰܡܥܳܕ ܐܰܢ̱ܬ܇ ܫܦܺܝܥܳܐܗ̱ܝ ܟܽܠ ܫܳܥ ܡܰܘܗܰܒܬܳܟ܇ ܥܰܠ ܚܰܛܳܝ̈ܶܐ ܕܩܳܪܶܝܢ ܠܳܟ܇ ܘܢܳܩܫܺܝܢ ܒܬܰܪܥܳܟ ܒܗܰܝܡܳܢܽܘܬܳܐ܀

 

ܬܶܫܒܽܘܚܬܳܐ ܚܕܰܬܳܐ ܩܳܠܳܐ ܠܰܐܠܳܗܳܐ ܕܒܰܐܬܽܘܢܳܐ ܕܢܽܘܪܳܐ

ܢܨܽܘܡ ܐܰܚ̈ܰܝ ܕܰܟܝܳܐܺܝܬ܇ ܘܢܶܬܟܰܫܰܪ ܒܰܬܝܳܒܽܘܬܳܐ܇ ܘܥܰܕ ܐܺܝܬ ܠܰܢ ܐܰܬܪܳܐ܇ ܕܡܳܪܰܢ ܐܶܡܰܪ ܒܰܣܒܰܪܬܶܗ܇ ܕܩܳܪܶܐ ܠܺܝ ܥܳܢܶܐ ܐ̱ܢܳܐ ܠܶܗ܇ ܕܠܶܗ ܫܰܒܰܚܘ̱܀

ܗܰܒܠܰܢ ܡܫܺܝܚܳܐ ܐܰܠܳܗܳܐ܇ ܕܰܒܨܰܘܡܳܐ ܘܒܰܨܠܽܘܬܳܐ ܢܶܫܦܰܪ ܩܕܳܡܰܝܟ܇ ܘܥܰܡ ܣܳܛܳܢܳܐ ܢܶܬܟܰܬܰܫ܇ ܘܰܢܕܽܘܫ ܠܚܰܫ̈ܶܐ ܕܰܚܛܺܝܬܳܐ܇ ܕܠܶܗ ܫܰܒܰܚܘ̱܀

ܐܰܠܳܗܳܐ ܕܰܡܥܰܠܰܝ ܡܶܢܟܽܠ܇ ܘܰܡܪܰܡܪܰܡ ܠܥܶܠ ܡܶܢ ܟܽܠܗܽܘܢ ܒܪ̈ܰܝܳܐ ܕܰܥܒܰܕ܇ ܘܶܐܬܡܰܟܰܟ ܘܰܗܘܳܐ ܐ̱ܢܳܫܳܐ ܒܨܶܒܝܳܢܶܗ ܡܶܛܽܠܳܬܰܢ܇ ܘܰܐܣܺܝ ܠܰܢ ܟܽܘܪܗܳܢܳܐ ܕܰܡܚܺܝܠܽܘܬܰܢ ܕܝܰܬܺܝܪ܇ ܪܰܡܪܶܡܘ̱ ܘܢܰܘܕܶܐ ܕܠܶܗ܀

ܒܒܳܥܽܘܬܳܐ ܘܰܒܕܶܡܥ̈ܶܐ ܕܚܰܫܳܐ܇ ܘܰܒܨܰܘܡܳܐ ܢܦܺܝܣ ܠܰܐܠܳܗܳܐ܇ ܕܗܽܘ ܢܶܬܪܰܚܰܡ ܥܠܰܝܢ܇ ܒܒܳܥܽܘܬܳܐ ܐܰܦܺܝܣ ܡܽܘܫܶܐ܇ ܘܰܫܘܳܐ ܕܢܶܚܙܶܐ ܠܰܐܠܳܗܳܐ܇ ܕܠܶܗ ܫܰܒܰܚܘ̱܀

ܠܝܳܗܽܘܒܳܐ ܕܩܰܕܺܝܫܽܘܬܳܐ܇ ܘܰܡܕܰܟܝܳܢܳܐ ܕܟܽܘܬܡ̈ܳܬܳܐ ܕܰܒܢܰܝ̈ܢܳܫܳܐ܇ ܕܰܟܳܐ ܘܰܐܚܠܶܡ ܐܳܦ ܐܰܣܳܐ܇ ܠܦܰܓܪ̈ܶܐ ܘܢܰܦܫ̈ܳܬܳܐ ܕܟܽܠܰܢ܇ ܕܠܶܗ ܫܰܒܰܚܘ̱܀

 

ܩܳܠܳܐ ܕܨܰܦܪܳܐ ܒܥܶܕܳܢܶܗ ܕܨܰܦܪܳܐ ܡܶܬܬܣܺܝܡܺܝܢ

ܨܰܘܡܳܐ ܠܨܰܝܳܡ̈ܶܐ ܚܰܝ̈ܶܐ ܡܰܘܪܶܬ ܠܗܽܘܢ܇ ܘܶܐܣܛܰܠ ܬܶܫܒܽܘܚܬܳܐ ܒܰܥܕܶܝܢ ܡܰܠܒܶܫ ܠܗܽܘܢ܇ ܛܽܘܒܳܐ ܠܨܰܝܳܡ̈ܶܐ ܕܡܰܠܟܽܘܬܳܐ ܝܳܪܬܺܝܢ܇ ܘܥܳܐܠܺܝܢ ܠܰܓܢܽܘܢܳܐ ܙܳܡܪܺܝܢ ܬܶܫܒܽܘܚܬܳܐ܇ ܗ ܘ ܗ ܘܥܰܡ ܚܰܬܢܳܐ ܕܪܰܘܡܳܐ ܡܰܠܟܽܘܬܳܐ ܝܳܪܬܺܝܢ܀

ܩܰܒܶܠ ܦܳܪܽܘܩܰܢ܇ ܨܰܘܡܰܢ ܘܰܨܠܽܘܬܰܢ܇ ܘܰܫܡܰܥ ܒܳܥܽܘܬܰܢ ܐܰܝܟ ܣܽܘܓܐܳܐ ܕܪ̈ܰܚܡܰܝܟ܇ ܘܠܳܐ ܬܰܗܦܶܟ ܐܰܦ̈ܰܝܟ܇ ܡܶܢ ܩܳܠܳܐ ܕܥܰܒܕܰܝ̈ܟ܇ ܘܚܰܣܳܐ ܠܰܢ ܚܰܘܒ̈ܰܝܢ ܒܰܡܪܰܚܡܳܢܽܘܬܳܟ܇ ܗ ܘ ܗ ܘܶܐܬܪܰܚܰܡܥܠܰܝܢ ܡܫܺܝܚܳܐ ܡܠܶܐ ܪ̈ܰܚܡܶܐ܀

 

ܐ̱ܚܪܺܢܳܐ ܩܳܠܳܐ ܒܥܶܕܳܢ ܨܰܦܪܳܐ ܡܶܬܦܰܬܚܺܝܢ܇

ܚܰܛܳܝܳܐ ܬܳܐ ܒܥܺܝ ܪ̈ܰܚܡܶܐ܇ ܕܰܦܬܺܝܚ ܬܰܪܥܶܗ ܕܰܐܠܳܗܳܐ܇ ܘܗܽܘ ܝܳܗܶܒ ܠܳܟ ܫܶܐܠ̈ܳܬܳܟ܇ ܕܠܳܐ ܬܰܘܚܰܪ ܠܰܬܝܳܒܽܘܬܳܐ ܕܠܳܐ ܝܳܕܥܰܬ ܒܰܐܝܢܳܐ ܝܰܘܡܳܐ܇ ܡܰܕܪܶܟ ܠܳܟ ܡܰܠܰܐܟ ܡܰܘܬܳܐ܀

ܥܰܕܠܳܐ ܐܳܬܶܐ ܥܽܘܢܕܳܢܳܐ ܒܥܺܝ ܪ̈ܰܚܡܶܐ ܡܶܢ ܐܰܠܳܗܳܐ܇ ܥܰܕܠܳܐ ܐܳܚܕܺܝܢ ܠܶܗ ܠܬܰܪܥܳܐ܇ ܘܠܰܝܬ ܐܰܬܪܳܐ ܠܰܬܝܳܒܽܘܬܳܐ܇ ܘܢܳܦܶܠ ܙܰܘܥܳܐ ܒܓܰܘ ܠܶܒܳܐ܇ ܘܚܳܫܶܟ ܢܽܘܗܪܳܐ ܕܒܒ̈ܳܬܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܬܰܘ ܚܰܛܳܝ̈ܶܐ ܟܰܢܶܫܘ̱ ܘܰܚܠܽܘܛܘ̱ ܦܽܘܪ̈ܫܳܢܰܝܟܽܘܢ܇ ܨܰܘܡܳܐ ܪܰܒܳܐ ܢܶܗܘܶܐ ܒܟܶܢܫܶܝ̈ܗܿ ܕܒܰܪܬ ܢܰܗܺܝܪ̈ܶܐ܇ ܫܽܘܦܪܳܗܿ ܕܟܰܠܬܳܐ ܨܰܘܡܳܐ ܙܰܗܝܳܐ ܕܡܶܢ ܣܰܓܺܝ̈ܐܶܐ܇ ܫܰܗܪܰܐܗ̱ܘ ܨܶܒܬܳܐ ܘܰܨܠܰܘ̈ܳܬܳܐ ܐܰܝܟ ܚܶܫ̈ܠܳܬܳܐ܀

ܫܰܗܪܳܐ ܘܨܰܘܡܳܐ ܘܰܨܠܰܘ̈ܳܬܳܐ ܥܰܡ ܙܶܕܩ̈ܳܬܳܐ܇ ܐܰܝܟ ܪܽܘܡܝܳܢܳܐ ܠܚܰܬܢܳܐ ܥܳܐܠ̈ܳܢ ܡܳܐ ܕܡܶܬܢܰܚܰܡ܇ ܐܳܙܶܠ ܨܰܘܡܳܐ ܘܳܐܬܝܳܐ ܩܝܳܡܬܳܐ ܕܺܝܚܺܝܕܳܝܳܐ܇ ܡܽܘܢ ܬܰܪܡܶܐ ܠܶܗ ܐܶܠܳܐ ܬܨܽܘܡ ܠܶܗ ܙܰܕܺܝܩܳܐܺܝܬ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܛܽܘܒܰܝܟܝ̱ ܥܺܕܬܳܐ

ܡܽܘܫܶܐ ܒܨܰܘܡܳܐ ܡܶܫܟܳܐ ܕܰܐܦܰܘ̈ܗ̱ܝ ܐܶܙܕܰܗܺܝ܇ ܟܰܕ ܐܶܬܥܰܠܺܝ ܠܛܽܘܪ ܣܺܝܢܰܝ ܒܥܰܪܦܶܠܳܐ ܠܘܳܬ ܐܰܠܳܗܳܐ܇ ܐܳܦ ܐܺܠܺܝܳܐ ܕܡܶܢ ܬܰܫܒܰܝ܇ ܒܨܰܘܡܳܐ ܪܕܳܐ ܠܛܽܘܪܳܐ ܕܚܽܘܪܺܝܒ܇ ܒܨܰܘܡܳܐ ܐܰܚ̈ܰܝ ܢܶܬܟܰܫܰܪ܇ ܘܢܶܩܢܶܐ ܒܶܗ ܠܰܬܝܳܒܽܘܬܳܐ܇ ܘܢܰܫܦܰܥ ܕܶܡܥ̈ܶܐ ܥܰܠ ܚܰܘܒ̈ܰܝܢ܇ ܕܥܰܡ ܚܰܬܢܳܐ ܠܚܰܪܬܳܐ ܢܶܚܕܶܐ܀

ܨܳܡ ܕܳܢܺܝܐܶܝܠ܇ ܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܘܶܐܬܢܰܨܰܚ ܗܘܳܐ ܒܓܰܘ ܓܽܘܒܳܐ܇ ܘܰܙܟܳܐ ܗܘܳܐ ܠܰܐܪ̈ܝܰܘܳܬܳܐ ܘܥܰܠ ܡܰܪܟܰܒܬܳܐ ܐܶܬܢܰܨܰܚ܇ ܘܰܩܕܳܡ ܡܰܠܟܳܐ ܐܶܙܕܰܝܰܚ܇ ܛܽܘܒ ܠܰܐܝܢܳܐ ܕܨܳܡ ܡܶܢ ܢܶܟܠܳܐ܇ ܘܰܚܣܳܡܳܐ ܡܶܐܟܰܠܩܰܪܨܳܐ܇ ܘܰܫܦܰܪ ܠܡܳܪܝܳܐ ܒܕܽܘܒܳܪ̈ܰܘܗ̱ܝ܇ ܘܶܐܬܡܰܢܰܥ ܠܰܓܢܽܘܢ ܢܽܘܗܪܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܰܣܒܰܪܬܳܟ ܡܳܪܝ̱ ܐܰܠܶܦܬܳܢܝ̱܇ ܕܰܩܪܰܘ ܘܶܐܢܳܐ ܥܳܢܶܐ ܐ̱ܢܳܐ܇ ܗܳܐ ܩܪܰܝܢܳܟ ܐܰܝܟ ܕܰܐܠܶܦܬܳܢܝ̱܇ ܥܢܺܝ ܠܰܢ ܐܰܟܡܳܐ ܕܶܐܫܬܰܘܕܺܝܬ܀

ܦܬܰܚ ܡܳܪܝ̱ ܬܰܪܥܳܟ ܠܰܨܠܽܘܬܰܢ܇ ܘܰܫܡܰܥ ܩܳܠܳܐ ܕܒܳܥܽܘܬܰܢ܇ ܗܰܒ ܡܳܪܝ̱ ܐܰܓܪܳܐ ܠܥܺܝܪܽܘܬܰܢ܇ ܘܨܰܘܡܰܢ ܢܶܫܦܰܪ ܠܺܐܝܩܳܪܳܟ܀

 

ܕܦܶܠܓܶܗ ܕܝܰܘܡܳܐ ܩܳܠܳܐ ܥܰܡ ܕܟܽܠܗܽܘܢ

ܒܨܰܘܡܳܐ ܕܰܟܝܳܐ ܘܩܰܕܺܝܫܳܐ ܢܺܝܢܘܶܐ ܡܕܺܝܢ̱ܬܳܐ ܐܶܬܦܰܪܩܰܬ݀܇ ܡܶܢ ܙܰܘܥܳܐ ܕܰܐܟܪܶܙ ܝܰܘܢܳܢ܇ ܘܰܒܒܳܥܽܘܬܳܐ ܘܬܰܟܫܶܦܬܳܐ܇ ܥܶܒܪܰܬ ܡܶܢܳܗܿ ܟܰܪܝܽܘܬܳܐ ܘܡܶܢ ܚܽܘܒܳܠܳܐ ܐܶܬܦܰܨܝܰܬ݀܀

ܬܰܘ ܐܰܚ̈ܰܝ ܢܶܬܟܰܫܰܪ ܒܶܗ܇ ܒܨܰܘܡܳܐ ܦܳܥܠܳܐ ܟܰܫܺܝܪܳܐ܇ ܘܢܶܛܦܰܣ ܘܢܶܐܚܽܘܕ ܒܶܗ ܓܰܘܣܳܐ܇ ܕܕܳܢܺܝܐܶܝܠ ܒܶܗ ܐܶܬܓܰܘܰܣ܇ ܣܟܰܪ ܦܽܘܡܗܽܘܢ ܕܰܐܪ̈ܝܰܘܳܬܳܐ܇ ܘܡܶܢ ܓܽܘܒܳܐ ܣܠܶܩ ܟܰܕ ܢܳܨܰܚ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܝܰܘܡܰܐܗ̱ܘ ܕܢܶܒܥܶܐ ܐ̱ܢܳܫ܇ ܪ̈ܰܚܡܶܐ ܘܫܽܘܒܩܳܢܳܐ܇ ܒܨܰܘܡܳܐ ܘܒܰܨܠܽܘܬܳܐ܇ ܒܕܶܡܥ̈ܶܐ ܚܢܺܝܓ̈ܳܬܳܐ܇ ܥܰܕ ܐܺܝܬ ܠܰܢ ܐܰܬܪܳܐ܇ ܘܬܰܪܥܳܐ ܦܬܺܝܚ ܩܽܘܕܡܰܝܢ܀

ܡܰܢܰܥ ܒܛܰܝܒܽܘܬܳܟ܇ ܠܘܰܥܕܶܗ ܕܦܰܪܕܰܝܣܶܐ܇ ܠܰܐܝܠܶܝܢ ܕܩܳܪܶܝܢ ܠܳܟ܇ ܒܨܰܘܡܳܐ ܘܒܰܨܠܽܘܬܳܐ܇ ܘܒܰܓܢܽܘܢ ܚܰܕܘ̈ܳܬܳܐ܇ ܒܙܺܝܘܳܟ ܢܶܬܒܰܣܡܽܘܢ܀

ܕܰܬܫܰܥܫܳܥܺܝ̈ܢ܇ ܩܳܠܳܐ ܣܳܗܕܰܘ̈ܗ̱ܝ ܐܰܢ̱ܬܽܘܢ

ܫܰܦܺܝܪ ܨܰܘܡܳܐ ܘܰܦܐܶܐ ܫܰܗܪܳܐ܇ ܘܝܰܬܺܝܪ ܡܶܢܗܽܘܢ ܚܽܘܒܳܐ ܘܙܶܕܩ̈ܳܬܳܐ܇ ܕܗܶܢܽܘܢ ܩܳܝܡܺܝܢ܇ ܒܰܙܒܰܢ ܪܽܘܓܙܳܐ܇ ܘܗܶܢܽܘܢ ܡܶܢܰܛܪܺܝܢ ܠܢܰܦܫܳܐ ܘܰܠܦܰܓܪܳܐ܇ ܫܽܘܒܚܳܐ ܠܳܟ ܡܳܪܝ̱܇ ܕܰܒܝܰܕ ܨܰܘܡܳܐ ܘܰܨܠܽܘܬܳܐ܇ ܡܶܬܪܰܥܶܝܬ ܠܰܒܢܰܝ̈ܢܳܫܳܐ܀

ܫܰܦܺܝܪ ܗܘܳܐ ܠܶܗ܇ ܠܡܰܠܟܳܐ ܕܢܺܝܢܘܶܐ܇ ܟܰܕ ܬܳܒܰܥ ܗܘܳܐ ܪ̈ܰܚܡܶܐ ܡܶܢ ܡܳܪܝܳܐ܇ ܐܳܘ ܚܰܢܳܢܳܐ܇ ܘܰܡܠܶܐ ܪ̈ܰܚܡܶܐ܇ ܚܽܘܣ ܥܰܠ ܟܰܪܟܳܐ ܕܰܐܪܓܶܙܬܳܟ ܒܰܥܒܳܕܰܘ̈ܗ̱ܝ܇ ܘܢܶܗܘܶܐ ܚܰܘܪܳܐ ܠܟܽܠ ܬܰܝܳܒ̈ܶܐ ܕܩܳܪܶܝܢ ܠܳܟ܇ ܒܗܰܝܡܳܢܽܘܬܳܐ ܕܰܫܪܳܪܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܡܽܘܫܶܐ ܒܨܰܘܡܳܐ ܐܶܙܕܰܗܺܝ܇ ܘܰܒܨܰܘܡܳܐ ܢܰܨܰܚ ܐܺܠܺܝܳܐ܇ ܐܳܦ ܦܳܪܽܘܩܰܢ ܗܳܟܰܢܳܐ܇ ܒܨܰܘܡܳܐ ܣܰܚܦܶܗ ܠܣܳܛܳܢܳܐ܀

ܒܨܰܘܡܳܐ ܢܨܰܚܘ̱ ܗ̱ܘܰܘ ܫܰܦܺܝܪ̈ܶܐ܇ ܛܽܘܒܳܢ̈ܶܐ ܕܒܶܝܬ ܚܰܢܰܢܝܳܐ܇ ܘܰܙܟܰܐܳܘܽܘܗܿ ܠܫܰܠܗܶܒܺܝܬܳܐ ܕܰܫܓܰܪ ܡܰܠܟܳܐ ܒܳܒܠܳܝܳܐ܀

 

ܫܠܶܡ ܕܝܽܘܡ ܬܠܳܬܳܐ

ܬܽܘܒ ܛܶܟܣܳܐ ܕܰܐܪܒܥܳܐ ܒܫܰܒܳܐ ܕܫܰܒܬܳܐ ܕܬܰܪܬܶܝܢ ܕܨܰܘܡܳܐ ܩܰܕܺܝܫܳܐ

ܚܰܘܒ̈ܰܝ ܘܰܚܛܳܗ̈ܰܝ

ܒܨܰܘܡܳܐ ܫܦܰܪܘ̱ ܟܺܐܢ̈ܶܐ܇ ܠܡܳܪܝܳܐ ܕܠܳܐ ܛܳܠܶܡ܇ ܐܰܓܪܳܐ ܕܥܰܡܠܰܝ̈ܗܽܘܢ܇ ܒܦܳܬܽܘܪ ܡܰܠܟܽܘܬܳܐ܀

ܒܨܰܘܡܳܐ ܕܨܳܡ ܡܽܘܫܶܐ܇ ܠܡܳܪܝܳܐ ܒܛܽܘܪ ܣܺܝܢܰܝ܇ ܘܣܶܕܪܳܐ ܕܪ̈ܽܘܚܳܢܶܐ܇ ܘܡܳܪܝܳܐ ܕܡܶܙܕܰܝܰܚ܀

ܡܶܛܽܠ ܕܰܚܛܺܝܿܬ ܠܳܟ܇ ܡܶܬܟܰܫܰܦ ܐ̱ܢܳܐ ܠܳܟ܇ ܒܨܰܘܡܳܐ ܘܒܰܨܠܽܘܬܳܐ ܥܰܕ ܐܺܝܬ ܠܰܢ ܐܰܬܪܳܐ܀

ܗܳܐ ܡܰܬܩܰܢ ܬܰܡܳܢ܇ ܒܰܐܬܪܳܐ ܕܚܰܕܘ̈ܳܬܳܐ܇ ܦܳܬܽܘܪ ܡܰܠܟܽܘܬܳܐ܇ ܠܟܽܠܗܽܘܢ ܨܰܝܳܡ̈ܶܐ܀

ܚܰܬܢܳܐ ܫܡܰܝܳܢܳܐ܇ ܐܳܬܶܐ ܒܬܶܫܒܽܘܚܬܳܐ܇ ܕܢܶܬܶܠ ܦܽܘܪܥܳܢܳܐ ܠܢܰܟܦ̈ܶܐ ܘܨܰܝܳܡ̈ܶܐ܀

 

ܕܡܳܪܝܳܐ ܩܪܺܝܬܳܟ܇ ܗܳܢܰܘ ܝܰܪܚܳܐ

ܗܳܢܰܘ ܒܰܫܪܳܪܳܐ܇ ܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܕܒܶܗ ܟܺܐܢ̈ܶܐ ܐܶܬܢܰܨܰܚܘ̱ ܗ̱ܘܰܘ܇ ܘܰܐܒܳܗ̈ܳܬܳܐ ܘܩܰܕܺܝܫ̈ܶܐ܇ ܘܒܶܗ ܗܽܘ ܫܦܰܪ ܗܘܳܐ ܡܶܠܟܺܝܙܕܶܩ܇ ܘܰܗܘܳܐ ܟܽܘܡܪܳܐ ܕܰܠܥܳܠܰܡ܇ ܘܒܶܗ ܢܺܝܢܘܳܝ̈ܶܐ ܐܶܫܬܰܘܙܰܒܘ̱ ܡܶܢ ܪܽܘܓܙܳܐ ܕܰܠܚܺܝܡ ܗܘܳܐ ܥܠܰܝܗܽܘܢ܀

ܩܰܒܶܠ ܡܳܪܰܢ܇ ܬܰܟܫܶܦܬܳܐ ܕܥܺܕܰܬ ܩܽܘܕܫܳܐ܇ ܕܰܒܚܰܫܳܐ ܘܰܒܬܶܢܚ̈ܳܬܳܐ܇ ܡܩܰܪܒܳܐ ܡܦܺܝܣܳܐ ܠܪܰܒܽܘܬܳܟ܇ ܐܰܝܟ ܕܰܡܥܳܕܳܐ ܬܶܫܬܰܝܰܢ܇ ܘܬܶܬܪܰܥܶܐ ܠܰܢ ܟܺܐܢܽܘܬܳܟ܇ ܒܰܪ ܐܰܠܳܗܳܐ ܘܰܐܥܒܰܪ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܝܰܘܡܳܢܳܐ ܚܙܰܝܢܰܢ܇ ܢܒܺܝܽܘܬܶܗ ܕܕܰܘܺܝܕ ܡܰܠܟܳܐ܇ ܕܰܒܪܽܘܚܩܽܘܕܫܳܐ ܐܶܬܢܰܒܺܝ܇ ܘܟܽܠ ܕܨܳܒܶܐ ܡܳܪܝܳܐ ܥܳܒܶܕ܇ ܒܰܫܡܰܝܳܐ ܠܥܶܠ ܐܳܦ ܒܰܐܪܥܳܐ ܠܬܰܚܬ܇ ܘܰܒܟܽܠ ܣܰܘܦ̈ܶܐ ܘܦܶܢܝ̈ܳܬܳܐ܇ ܗܳܐ ܦܳܪܽܘܩܳܐ ܨܒܳܐ ܘܚܰܣܺܝ ܠܚܰܛܳܝ̈ܶܐ ܡܶܢ ܚܰܘܒܰܝ̈ܗܽܘܢ܀

ܟܽܠܰܢ ܚܰܛܳܝ̈ܶܐ܇ ܢܶܩܢܶܐ ܣܰܒܪܳܐ ܘܠܽܘܒܳܒܳܐ܇ ܐܳܦ ܬܽܘܟܠܳܢܳܐ ܘܰܢܦܺܝܣܺܝܘܗ̱ܝ ܟܽܠ ܚܰܕ ܡܶܢܰܢ ܠܰܐܠܳܗܳܐ܇ ܒܚܰܫܳܐ ܘܕܶܡܥ̈ܶܐ ܘܬܶܢܚ̈ܳܬܳܐ܇ ܕܢܶܬܟܰܫܰܦ ܠܶܗ ܚܢܺܝܓܳܐܺܝܬ܇ ܕܡܳܪܝܳܐ ܐܶܢܗܽܘ ܕܨܳܒܶܐ ܐܰܢ̱ܬ܇ ܡܶܫܟܰܚ ܐܰܢ̱ܬ ܠܰܡܚܰܣܳܝܽܘܬܰܢ܇ ܐܰܢ̱ܬ ܗܽܘ ܐܺܝܬܰܝܟ ܫܳܒܽܘܩܳܐ܇ ܕܟܽܠܗܽܘܢ ܚܰܘܒ̈ܶܐ ܘܰܚܛܳܗ̈ܶܐ܀

ܒܬܰܪܥܳܐ ܕܡܰܢܽܘ܇ ܢܺܐܙܰܠ ܢܶܩܽܘܫ ܦܳܪܽܘܩܰܢ܇ ܒܗܳܠܶܝܢ ܝܰܘܡ̈ܳܬܳܐ ܕܨܰܘܡܳܐ܇ ܕܶܐܫܬܰܘܕܺܝܬ ܠܰܢ ܕܰܥܢܰܝܬ ܠܰܢ܇ ܐܶܠܳܐ ܒܬܰܪܥܳܟ ܚܰܢܳܢܳܐ܇ ܕܰܦܬܺܝܚ ܗܽܘ ܠܟܽܠ ܬܰܝܳܒ̈ܶܐ ܕܳܐܬܶܝܢ ܨܶܝܕܰܝܟ܇ ܚܰܣܳܐ ܘܰܫܒܽܘܩ ܠܰܢ ܚܰܘ̈ܒܰܝܢ܇ ܒܣܽܘܓܐܳܐ ܕܰܡܪܰܚܡܳܢܽܘܬܳܟ܀

ܬܶܗܪܳܐ ܘܕܽܘܡܳܪܳܐ ܗܰܘ ܕܰܫܡܰܝܳܐ ܡܠܶܝܢ ܡܶܢܶܗ܇ ܘܡܰܠܰܐܟ̈ܶܐ ܕܰܡܫܰܒܚܺܝܢ ܠܶܗ܇ ܘܥܺܝܪ̈ܶܐ ܣܳܓܕܺܝܢ ܠܺܐܝܩܳܪܶܗ܇ ܘܰܣܪ̈ܳܦܶܐ ܬܽܘܒ ܡܩܰܕܫܺܝܢ ܠܶܗ܇ ܘܰܟܪ̈ܽܘܒܶܐ ܬܚܶܝܬ ܡܰܪܟܰܒܬܶܗ܇ ܐܶܬܬܰܚܬܺܝ ܘܰܠܒܶܫ ܦܰܓܪܳܐ܇ ܡܶܛܽܠ ܦܽܘܪܩܳܢܶܗ ܕܳܐܕܳܡ܀

 

ܩܳܠܳܐ ܕܪܰܡܫܳܐ ܩܳܠܳܐ ܥܰܠ ܥܶܛܪܳܐ ܕܒܶܣܡ̈ܶܐ

ܨܰܘܡܰܢ ܦܳܪܽܘܩܰܢ܇ ܢܶܗܘܶܐ ܠܰܢܝܳܚܳܟ܇ܐܰܝܟ ܥܶܛܪܳܐ ܕܒܶܣܡ̈ܶܐ܇ ܩܰܒܶܠ ܬܶܫܡܶܫܬܰܢ܀

ܦܺܝܪܡܰܢ ܢܶܗܘܶܐ ܠܳܟ܇ ܪܺܝܚܳܐ ܒܰܣܺܝܡܳܐ܇ ܘܨܰܘܡܰܢ ܢܶܒܣܰܡ ܠܳܟ ܇ ܘܚܰܣܳܐ ܒܶܗ ܚܛܳܗ̈ܰܝܢ܀

ܫܽܘܒܚܳܐ ܘܬܰܘܕܺܝܬܳܐ܇ ܠܳܟ ܗܽܘ ܡܩܰܪܒܺܝܢܰܢ܇ ܥܢܺܝ ܠܰܢ ܒܰܚܢܳܢܳܟ܇ ܘܚܰܣܳܐ ܠܰܢ ܚܰܘܒ̈ܰܝܢ܀

 

ܐ̱ܚܪܺܢܳܐ ܒܩܳܠܳܐ ܙܳܕܶܩ ܕܢܶܗܘܶܐ

ܣܰܓܺܝ ܪܚܺܝܡܳܐ܇ ܒܳܥܽܘܬܳܐ ܕܰܚܠܺܝܛ ܥܰܡܶܗ ܨܰܘܡܳܐ ܕܰܟܝܳܐ܇ ܘܣܳܠܩܳܐ ܠܪܰܘܡܳܐ܇ ܘܠܳܐ ܙܳܝܥܳܐ ܡܶܢ ܥܶܠܳܝ̈ܶܐ ܘܡܶܢ ܣܶܕܪ̈ܰܝܗܽܘܢ ܦܨܺܝܚܺܝܢ ܐܰܦܶܝ̈ܗܿ܇ ܩܽܘܕܡܰܬ ܕܰܝܳܢܳܐ܇ ܘܰܡܩܰܒܶܠ ܠܶܗ ܣܰܓܺܝ ܚܳܕܶܐ ܒܗ܇ ܐܰܝܟ ܕܳܐܦ ܡܽܘܫܶܐ܇ ܒܨܰܘܡܳܐ ܐܶܙܕܰܗܺܝ ܗܘܳܐ ܦܰܪܨܽܘܦܶܗ ܐܰܝܟ ܫܶܡܫܳܐ܇ ܘܡܰܠܶܠ ܥܰܡܶܗ ܐܰܠܳܗܳܐ܇ ܐܰܦܺܝ̈ܢ ܒܰܐܦܺܝ̈ܢ܇ ܡܶܢ ܣܰܢܝܳܐ ܘܰܢܗܰܪ̈ܝ ܐܰܦܰܘ̈ܗܝ܇ ܗ ܛܳܒ ܡܶܢ ܫܶܡܫܳܐ܀

ܪܰܒ ܗܽܘ ܚܰܝܠܳܗܿ ܕܰܨܠܽܘܬܳܐ ܡܳܐ ܕܺܐܝܬ ܟܺܐܢ̈ܶܐ ܕܰܡܨܰܠܶܝܢ ܠܳܗܿ܇ ܣܳܗܶܕ ܡܽܘܫܶܐ ܕܒܰܨܠܽܘܬܶܗ ܚܳܒ ܗܘܳܐ ܥܡܳܠܺܝܩ ܡܶܢ ܐܺܝܣܪܳܐܶܝܠ܇ ܝܶܫܽܘܥ ܒܰܪܢܽܘܢ ܗܰܘ ܕܰܟܠܳܐ ܠܫܶܡܫܳܐ܇ ܘܕܰܘܺܝܕ ܡܰܠܟܳܐ ܗܰܘ ܕܩܰܛܠܶܗ ܠܓܽܘܠܝܰܕ܇ ܘܰܕܠܳܐ ܐܺܝܬ ܒܶܗ ܒܕܳܪܰܢ ܟܺܐܢ̈ܶܐ ܕܰܢܨܰܠܽܘܢ܇ ܓܰܪ̈ܡܰܝܗܽܘܢ ܢܶܗܘܽܘܢ ܠܰܢ܇ ܫܽܘܪܳܐ ܪܳܡܳܐ ܘܒܶܝܬ ܓܰܘܣܳܐ܇ ܒܰܕܡܽܘܬ ܝܰܘܣܶܦ܇ ܒܓܰܘ ܡܰܫܪܺܝܬܳܐ ܕܺܐܝܣܪܳܐܶܝܠ ܗ ܘܰܡܢܰܛܪܺܝܢ ܠܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܣܰܓܺܝ ܪܚܺܝܡܳܐ ܙܰܕܺܝܩܽܘܬܳܐ ܠܰܕܦܳܠܰܚ ܠܳܗܿ܇ ܘܺܐܝܬ ܒܳܗܿ ܚܰܝܠܳܐ ܕܬܶܣܰܒ ܟܽܠܝܽܘܡ ܟܽܠ ܫܶܐܠ̈ܳܬܶܗ܇ ܛܽܘܦ̈ܰܝ ܡܶܛܪܳܐ ܚܕܳܐ ܚܕܳܐ ܡܶܢܗܶܝܢ ܛܽܘܦ̈ܶܐ ܐܶܢܶܝ̈ܢ܇ ܘܡܳܐ ܐܶܬܟܰܢܰܫ̈ܝ̱ ܗܳܘܝܳܐ ܪܶܓܠܬܳܐ ܕܠܳܐ ܡܶܬܥܰܒܪܳܐ܀

ܐܰܝܟ ܕܰܠܡܺܐܡܰܪ ܛܽܘܦܺܝ̈ܢ ܛܽܘܦܺܝ̈ܢ ܡܶܢ ܥܰܪܦܶܠܳܐ܇ ܘܗܳܘܝܳܐ ܪܶܓܠܬܳܐ ܕܠܳܐ ܡܶܬܥܰܒܪܳܐ ܡܶܢ ܪܰܒܽܘܬܶܗ܇ ܒܣܰܓܺܝܽܐܘܬܳܐ ܕܦܽܘܡ̈ܶܐ ܡܠܺܝ̈ܠܶܐ ܚܕܳܐ ܬܶܫܒܽܘܚܬܳܐ܇ ܕܫܳܐܠܳܐ ܘܢܳܣܒܳܐ ܘܠܳܐ ܡܶܬܟܰܠܝܳܐ ܡܶܢ ܕܰܝܳܢܳܐ܀

 

ܡܥܺܝܪܳܢܳܐ ܕܠܺܠܝܳܐ܇ ܒܩܳܠܳܐ ܝܳܐܶܐ ܘܙܳܕܶܩ

ܣܰܒ ܠܳܟ ܣܰܟܪܳܐ ܨܰܝܳܡܳܐ܇ ܘܦܽܘܩ ܠܰܩܪܳܒܶܗ ܕܰܢܟܺܝܠܳܐ܇ ܘܡܳܐ ܕܚܰܘܺܝ ܠܳܟ ܪܳܡܽܘܬܳܐ܇ ܚܰܘܳܐ ܠܶܗ ܡܰܟܺܝܟܽܘܬܳܐ܇ ܫܽܘܒܚܳܐ܀

ܓܰܙܳܐ ܕܢܰܦܫܳܐ ܗܳܐ ܦܬܺܝܚ ܗܽܘ܇ ܒܗܳܢܳܐ ܝܰܪܚܳܐ ܕܦܽܘܪܫܳܢܳܐ܇ ܒܗܳܢܳܐ ܙܰܒܢܳܐ ܕܚܽܘܣܳܝܳܐ ܠܳܐ ܢܶܬܚܙܶܐ ܒܶܗ ܡܰܐܺܝܢܳܐ܇ ܫܽܘܒܚܳܐ܀

ܠܳܐ ܬܨܽܘܡ ܡܶܢ ܡܶܐܟܽܘܠܬܳܐ܇ ܠܳܐ ܬܛܰܘܶܫ ܒܥܰܘܠܳܐ ܢܰܦܫܳܟ܇ ܢܨܽܘܡ ܦܰܓܪܳܐ ܡܶܢ ܢܰܦܫܳܐ܇ ܕܗܰܝܟܠܳܐ ܠܪܰܒܽܘܬܳܟ ܬܶܗܘܶܐ܇ ܫܽܘܒܚܳܐ܀

ܐܰܝܢܳܐ ܕܰܒܨܰܘܡܳܐ ܪܳܗܶܛ܇ ܐܳܦ ܒܶܗ ܒܨܰܘܡܳܐ ܡܶܬܢܰܨܰܚ܇ ܨܰܘܡܳܐ ܡܰܚܠܶܡ ܢܰܦܫ̈ܳܬܳܐ܇ ܡܶܢܟܽܠ ܚܰܘܒܺܝ̈ܢ ܘܰܚܛܳܗ̈ܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫܰܬ܇ ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ ܡܠܶܝܢ ܐܽܢܶܘܢ ܫܡܰܝܳܐ ܡܶܢܳܟ܇ ܘܥܰܠ ܟܽܠ ܡܰܡܠܶܟ ܫܽܘܠܛܳܢܳܟ܀

 

ܩܳܠܳܐ ܕܠܺܠܝܳܐ ܒܩܳܠܳܐ ܒܟܽܠܡܶܕܶܡ ܐܶܬܒܰܩܺܝܬ

ܒܚܰܫܳܐ ܘܕܶܡܥ̈ܶܐ ܘܒܳܥܽܘܬܳܐ܇ ܘܰܒܨܰܘܡܳܐ ܢܦܺܝܣ ܠܰܐܠܳܗܳܐ܇ ܕܗܽܘ ܢܶܬܪܰܚܰܡ ܥܠܰܝܢ ܒܰܬܪ̈ܰܝܗܽܘܢ ܥܳܠܡ̈ܶܐ܇ ܒܒܳܥܽܘܬܳܐ ܐܰܦܺܝܣ ܡܽܘܫܶܐ ܘܥܰܡܳܐ ܠܳܐ ܐܶܬܢܰܟܺܝ܇ ܘܰܒܨܰܘܡܳܐ ܐܶܟܰܠ ܥܰܡܳܐ ܡܰܢܢܳܐ ܒܓܰܘ ܡܰܕܒܪܳܐ܇ ܘܰܒܨܰܘܡܳܐ ܘܒܰܨܠܰܘ̈ܳܬܳܐ܇ ܒܰܛܶܠ ܪܽܘܓܙܳܐ ܡܶܢ ܢܺܝܢܘܳܝ̈ܶܐ܇ ܡܳܪܰܢ ܒܳܥܶܝܢܰܢ ܡܶܢܳܟ܇ ܐܰܬܩܶܢ ܐܰܪܥܳܐ ܕܶܐܬܬܙܺܝܥܰܬ݀܇ ܒܰܕܡܽܘܬ ܟܶܐܘܺܝܠܳܐ܇ ܕܡܰܝ̈ܳܐ ܠܰܐ ܐܰܟܝܽܘܗܿ܀

ܪܰܒ ܨܰܘܡܳܐ ܘܛܳܒܳܐ ܨܠܽܘܬܳܐ܇ ܘܰܡܝܰܬܰܪ ܡܶܢܗܽܘܢ ܚܽܘܒܳܐ܇ ܐܰܝܟ ܕܶܐܡܰܪܘ̱ ܢܒܺܝ̈ܶܐ ܘܰܫܠܺܝ̈ܚܶܐ ܕܡܶܢ ܩܕܺܝܡ܇ ܒܨܰܘܡܳܐ ܕܨܳܡ ܗܘܳܐ ܕܳܢܺܝܐܶܝܠ ܡܶܢ ܓܽܘܒܳܐ ܣܠܶܩ ܗܘܳܐ܇ ܨܠܽܘܬܳܐ ܕܨܰܠܺܝ ܚܶܙܰܩܝܳܐ ܠܳܐܬܽܘܪܳܝܳܐ ܚܪܰܒ܇ ܘܰܫܠܺܝܚܳܐ ܐܰܟܪܶܙ ܘܶܐܡܰܪ܇ ܕܶܐܢ ܚܽܘܒܳܐ ܠܳܐ ܢܶܗܘܶܐ ܒܺܝ܇ ܗܘܺܝܿܬ ܠܺܝ ܐܰܝܟ ܢܚܳܫܳܐ ܕܙܳܐܶܡ܇ ܐܰܝܟ ܨܺܝܨܠܳܐ ܕܝܳܗܶܒ ܩܳܠܳܐ܇ ܐܰܫܪܳܐ ܒܰܢ ܚܽܘܒܳܐ܇ ܘܶܐܬܪܰܚܰܡܥܠܰܝܢ܀

ܣܽܘܓܺܝܬܳܐ ܥܰܠ ܒܰܪܬ ܩܺܝܕܽܘܢܳܝܳܐ ܐܰܚܽܘܗ̱ܝ ܕܰܐܒܰܪܳܗܳܡ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܥܶܢܝܳܢܳܐ ܒܪܺܝܟ ܡܫܺܝܚܳܐ ܕܰܦܬܺܝܚ ܗܽܘ ܬܪܰܥ ܪ̈ܰܚܡܰܘܗ̱ܝ ܠܚܰܛܳܝ̈ܶܐ ܕܬܳܝܒܺܝܢ

ܒܰܪܬ ܐܰܚܽܘܗ̱ܝ ܗܘܺܝܿܬ ܕܰܐܒܪܳܗܳܡ ܢܰܨܺܝܚܳܐ ܘܳܝܠܺܝ܇ ܘܰܒܝܰܕ ܡܶܠܟܶܗ ܕܣܳܛܳܢܳܐ ܢܶܦܠܶܬ܇ ܐܳܝ ܡܶܢܳܟ ܒܺܝܫܳܐ ܡܽܘܢ ܥܒܰܕܬ ܒܺܝ܀

ܕܰܝܪܳܐ ܕܒܶܗ ܗܽܘ ܐܶܣܬܰܦܪܰܬ݀ ܐܳܠܝܳܐ ܠܺܝ ܘܳܝܠܺܝ܇ ܣܳܒܳܐ ܕܰܐܠܶܒܫܰܢܝ̱ ܒܶܐܒܠܳܐ ܥܠܰܝ ܢܶܒܟܶܐ܇ ܐܳܝ ܡܶܢܳܟ ܒܺܝܫܳܐ ܡܽܘܢ ܥܒܰܕܬ ܒܺܝ܀

ܘܳܝܳܐ ܟܽܠܗܽܘܢ ܝܳܕܽܘܥ̈ܰܝ ܢܶܬܠܽܘܢ ܠܺܝ ܘܳܝ ܠܺܝ܇ ܕܰܠܡܳܪܝ̱ ܫܶܒܩܶܬ ܘܰܠܥܳܠܡܳܐ ܪܶܚܡܿܶܬ܇ ܐܳܝ ܡܶܢܳܟ ܒܺܝܫܳܐ ܡܽܘܢ ܥܒܰܕܬ ܒܺܝ܀

ܚܰܒܺܝܒܳܐ ܗܘܺܝܬ ܥܰܡ ܡܫܺܝܚܳܐ ܦܳܠܚܳܐ ܗܘܺܝܿܬ ܘܳܝ ܠܺܝ܇ ܘܥܰܠ ܕܶܐܫܬܰܡܥܿܶܬ ܠܣܳܛܳܢܳܐ ܢܶܦܠܿܶܬ܇ ܘܳܝ ܡܶܢܳܟ ܒܺܝܫܳܐ ܡܽܘܢ ܥܒܰܕܬ ܒܺܝ܀

ܠܡܺܐܢܳܐ ܕܫܰܝܢܳܐ ܕܺܐܝܬ ܗܘܳܐ ܠܺܝ ܐܰܪܦܝܰܬܶܗ ܘܳܝܠܺܝ܇ ܘܒܰܝܢܳܬ ܓܰܠ̈ܠܶܐ ܫܓܺܝܫ̈ܶܐ ܐܶܫܬܰܩܦܿܶܬ܇ ܐܳܝ ܡܳܢܶܟ ܒܺܝܫܳܐ܀

ܢܽܘܪܳܐ ܩܫܺܝܬܳܐ ܕܓܺܗܰܢܳܐ ܚܳܝܪܳܐ ܘܳܝܠܺܝ܇ ܘܣܰܒܪܳܐ ܕܚܰܝܰܝ̈ ܡܶܟܺܝܠ ܐܰܘܒܶܕ ܠܶܗ܇ ܐܳܝ ܡܶܢܳܟ ܒܺܝܫܳܐ ܡܽܘܢ ܥܒܰܕܬ ܒܺܝ܀

ܥܢܳܢܳܐ ܕܚܰܘܒ̈ܶܐ ܘܕܰܚܛܳܗ̈ܶܐ ܡܚܰܦܝܳܐ ܠܺܝ ܘܳܝܠܺܝ܇ ܘܒܶܗܬܰܬ ܐܰܦ̈ܶܐ ܚܕܺܝܪܳܐ ܠܳܗܿ ܠܕܳܘܝܽܘܬܝ̱܇ ܐܳܝ ܡܶܢܳܟ ܒܺܝܫܳܐ ܡܽܘܢ ܥܒܰܕܬ ܒܺܝ܀

ܨܰܠܡܳܟ ܐܺܝܬܰܝ ܘܰܕܡܽܘܬܳܟ ܚܰܢܳܢܳܐ ܘܳܝܠܺܝ܇ ܘܫܶܒܩܿܶܬ ܚܺܐܪܽܘܬܝ̱ ܘܥܰܒܕܽܘܬܳܐ ܪܶܚܡܿܶܬ܇ ܐܳܝ ܡܳܪܝ̱ ܐܶܬܪܰܚܰܡܥܠܰܝ܀

ܪܳܡܳܐ ܕܰܢܚܶܬ ܕܰܢܕܰܠܶܐ ܠܟܽܠ ܛܒܺܝܥ̈ܶܐ ܕܰܐܟܘܳܬܝ̱܇ ܕܰܠܠܳܢܝ̱ ܡܶܢ ܗܰܘܬܳܐ ܕܚܶܫܟܳܐ ܕܒܳܗܿ ܢܶܦܠܿܶܬ܇ ܐܝ ܡܳܪܝ̱ ܐܶܬܪܰܚܰܡܥܠܰܝܢ܀ ܬܰܘܕܶܐ ܘܬܶܣܓܽܘܕܝ̱ ܘܰܬܫܰܒܰܚܝ̱ ܠܰܐܠܳܗܳܐ ܒܟܽܠܙܒܰܢ܇ ܢܰܦܫܝ̱ ܕܶܐܬܦܰܪܩܰܬ݀ ܡܶܢ ܐܺܝܕ̈ܰܝ ܒܺܝܫܳܐ܇ ܐܳܝ ܡܳܪܝ̱ ܐܶܬܪܰܚܰܡܥܠܰܝ܀

 

ܐ̱ܚܪܺܢܳܐ܇ ܒܶܗ ܒܢܺܝܫܳܐ

ܐܳܘ ܠܳܟ ܒܺܝܫܳܐ ܟܡܳܐ ܢܟܺܝܠ ܐܰܢ̱ܬ ܘܰܨܢܺܝܥ ܬܰܟܬܽܘܫܳܟ܇ ܘܡܰܢ ܡܶܫܟܰܚ ܕܥܰܡܳܟ ܒܣܶܕܪ̈ܶܐ ܢܩܽܘܡ܇ ܘܳܝ ܠܶܗ ܠܰܐܝܢܳܐ ܕܠܳܟ ܒܺܝܫܳܐ ܡܶܫܬܡܰܥ܀

ܒܳܟ ܡܶܫܬܰܦܠܺܝܢ ܓܰܢ̱ܒܳܪ̈ܶܐ ܘܰܩܕܳܡܰܝܟ ܢܳܦܠܺܝܢ܇ ܘܰܐܝܢܳܐ ܕܰܡܚܺܝܠ ܟܡܳܐ ܟܰܝ ܢܶܣܦܰܩ ܠܶܗ܇ ܘܳܝܠܶܗ ܠܰܐܝܢܳܐ ܕܠܳܟ ܒܺܝܫܳܐ ܡܶܫܬܰܡܥ܀

ܓܰܢ̱ܒܳܪܳܐ ܐܰܢ̱ܬ ܡܶܢ ܕܳܪ̈ܶܐ ܘܒܰܩܪܳܒܳܐ ܡܢܰܦܩܰܬ܇ ܘܕܰܗܘܳܐ ܐܶܬܡܳܠܝ̱ ܡܳܢܳܐ ܢܶܥܒܶܕ ܠܳܟ܇ ܘܳܝ ܠܶܗ ܠܰܐܝܢܳܐ ܕܠܳܟ ܒܺܝܫܳܐ ܡܶܫܬܡܰܥ܀

ܕܶܒܫܳܐ ܚܶܠܛܿܶܬ ܒܰܡܪܳܪ̈ܶܐ ܘܥܰܠ ܗܳܝ ܙܳܟܶܐ ܐܰܢ̱ܬ܇ ܘܰܒܚܰܠܝܽܘܬܳܟ ܫܒܰܝܬܳܢܝ̱ ܕܰܐܩܶܦ ܠܳܟ܇ ܘܳܝܠܶܗ ܠܰܐܝܢܳܐ ܕܠܳܟ ܒܺܝܫܳܐ ܡܶܫܬܡܰܥ܀

ܗܳܐ ܓܰܒܝܳܐ ܐܶܢ ܡܰܨܝܳܐ ܒܨܶܢܥ̈ܳܬܳܟ ܡܰܛܥܶܝܬ܇ ܘܡܰܢܽܘ ܡܶܫܟܰܚ ܕܙܰܟܳܝܳܐ ܢܶܬܚܙܶܐ܇ ܘܳܝܠܶܗ ܠܰܐܝܢܳܐ ܕܠܳܟ ܒܺܝܫܳܐ܀

ܘܰܪ̈ܕܶܐ ܛܥܺܝܢ ܐܰܢ̱ܬ ܘܰܚܕܳܪ̈ܰܘܗ̱ܝ ܥܽܘܩܣ̈ܶܐ ܕܠܳܐ ܡܶܬܡܶܢܶܝܢ܇ ܘܕܰܒܥܺܝܿܬ ܘܰܪܕܳܟ ܒܳܟܽܘܒܰܝ̈ܟ ܐܶܬܒܰܣܒܣܿܶܬ܇ ܘܳܝܠܶܗ ܠܰܐܝܢܳܐ ܕܺܝܠܳܟ ܙܰܝܢܳܐ ܪܰܒܳܐ ܕܝܰܗܒ ܗܘܳܐ ܠܺܝ ܡܳܪܝ̱ ܓܢܰܒܬܳܝܗ̱ܝ ܐܰܢ̱ܬ ܡܶܢܝ̱܇ ܘܦܳܫܿܶܬ ܥܰܪܛܶܠ ܥܠܰܗܝ ܚܰܝܶܒܬܳܢܝ̱܇ ܘܳܝܠܶܗ ܠܰܐܝܢܳܐ ܕܠܳܟ ܒܺܝܫܳܐ ܡܶܫܬܡܰܥ܀

ܚܰܣܺܝܢ ܚܰܝܠܳܟ ܗܽܘ ܟܝܳܢܳܐ ܚܳܐܶܒ ܡܶܢ ܩܽܘܕܡܰܝܟ܇ ܘܰܐܝܟܰܢ ܐܶܙܟܶܐ ܕܒܺܝ ܢܨܺܝܒܳܐ ܪܰܦܝܽܘܬܝ̱܇ ܘܳܝܠܶܗ ܠܰܐܝܢܳܐ܀

ܛܥܺܝܿܬ ܠܺܝ ܒܠܶܩܛܳܟ ܕܰܪܓܺܝܓ ܗܘܳܐ ܘܰܒܢܶܫܒܰܝ̈ܟ ܢܶܦܠܿܶܬ܇ ܘܗܳܐ ܚܳܢܩܺܝܢ ܠܺܝ ܚܰܒ̈ܠܶܐ ܕܰܡܨܺܝܕܬܳܟ܇ ܘܳܝܠܶܗ ܠܰܐܝܢܳܐ ܕܠܳܟ ܒܺܝܫܳܐ܀

ܝܰܡܳܐ ܣܰܪܝܳܐ ܕܒܺܝܫܬܳܟ ܒܓܰܠܠܰܘ̈ܗ̱ܝ ܫܳܚܶܩ ܠܺܝ܇ ܘܰܒܥܺܝܿܬ ܕܶܐܣܦܰܩ ܘܢܶܚܬܶܬ ܠܰܬܗܽܘܡܳܐ܇ ܘܳܝܠܶܗ܀

ܟܕܰܢܬܳܢܝ̱ ܒܢܺܝܪܳܐ ܕܥܰܒܕܽܘܬܳܐ ܩܫܺܝܬܳܐ ܬܶܦܠܽܘܚ ܒܺܝ܇ ܘܶܐܒܕܰܬ݀ ܚܺܐܪܽܘܬܝ̱ ܘܰܐܝܟܳܐ ܡܶܫܬܰܟܚܳܐ܇ ܘܳܝܠܶܗ ܠܰܐܝܢܳܐ܀

ܠܰܝ̈ܠܰܝ ܐܺܝܡܳܡ ܛܰܪܶܦܬܳܢܝ̱ ܒܰܫܚܳܩܳܐ ܩܰܫܝܳܐ܇ ܟܰܕܽܘ ܠܳܟ ܡܶܢܝ̱ ܣܰܟܠܳܐ ܕܠܳܐ ܣܳܒܥܰܬ܀

ܡܰܢܽܘ ܐܰܓܪܳܐ ܕܬܶܬܶܠ ܠܺܝ ܕܗܳܟܰܢ ܫܰܢܶܩܬܳܢܝ̱܇ ܐܰܪܦܳܢܝ̱ ܕܶܐܬܬܢܺܝܚ ܘܰܐܓܪܳܟ ܠܳܟ ܢܶܗܘܶܐ܀

ܢܽܘܪܳܐ ܩܫܺܝܬܳܐ ܢܛܺܝܪܳܐ ܠܳܟ ܘܥܰܠ ܗܳܝ ܡܶܬܦܰܪܣܰܬ ܕܬܶܫܕܶܝܢܝ̱ ܥܰܡܳܟ ܘܬܶܓܚܰܟ ܥܰܠ ܫܰܦܠܽܘܬܝ̱܇ ܘܳܝܠܶܗ܀

ܣܓܺܝܘ ܡܶܢ ܡܶܢ̈ܶܐ ܕܣܰܥܪܳܐ ܕܪܺܝܫܝ̱ ܚܰܫ̈ܶܐ ܕܰܣܒܰܠܬܳܢܝ̱܇ ܥܕܰܡܳܐ ܠܶܐܡܰܬܝ̱ ܠܳܐ ܬܶܣܒܰܥ ܡܶܢܝ̱ ܘܡܶܢ ܕܶܡܝ̱܇ ܘܳܝܠܶܗ ܠܰܐܝܢܳܐ ܕܠܳܟ ܒܺܝܫܳܐ ܡܶܫܬܡܰܥ܀

ܥܰܡܳܟ ܦܶܠܚܿܶܬ ܡܶܢ ܛܰܠܝܽܘܬܝ̱ ܘܰܥܕܰܡܳܐ ܠܣܰܝܒܽܘܬܝ̱܇ ܐܰܪܦܳܢܝ ܩܰܠܺܝܠ܇ ܕܶܐܢܽܘܚ ܡܶܢ ܝܽܘܩܪܳܟ܇ ܘܳܝܠܶܗ ܠܰܐܝܢܳܐ܀

ܦܰܚ̈ܶܐ ܕܢܶܟܠܳܐ ܒܟܽܠܕܽܘܟܳܐ ܛܳܡܰܪ ܐܰܢ̱ܬ ܠܺܝ ܩܽܘܕܡܰܝ܇ ܘܟܽܠ ܟܰܪ ܕܶܐܕܪܽܘܟ ܒܪ̈ܶܓܠܰܝ ܡܶܬܥܰܪܩܠܺܝܢ܇ ܘܳܝܠܶܗ ܠܰܐܝܢܳܐ ܕܠܳܟ ܒܺܝܫܳܐ ܡܶܫܬܡܰܥ܀

ܨܶܒܝܳܢܝ̱ ܒܺܝܫ ܗܽܘ ܕܟܰܕ ܝܺܕܰܥܬܳܟ ܕܰܢܟܺܝܠ ܐܰܢ̱ܬ ܪܚܶܡܬܳܟ܇ ܘܥܰܠܗܳܝ ܒܳܗܬܳܢܝ̱ ܕܣܽܘܪܚܳܢܳܐ ܡܶܢܝ̱ ܗܘܳܐ܇ ܘܳܝ ܠܶܗ܀

ܩܪܺܝܿܬ ܒܰܚܢܰܓܬܳܐ ܠܰܐܠܳܗܳܐ ܣܶܢܶܐܬܳܐ ܘܰܢܥܰܕܪܰܢܝ̱܇ ܘܡܶܢ ܒܳܥܽܘܬܳܐ ܒܨܶܢܥ̈ܳܬܳܟ ܫܒܰܝܬܳܢܝ̱܇ ܘܳܝܠܶܗ ܠܰܐܝܢܳܐ ܕܠܳܟ ܒܺܝܫܳܐ܀

ܪܺܝܫܝ̱ ܐܰܪܟܶܢܬܳܝܗ̱ܝ ܩܕܳܡ ܚܰܫ̈ܶܐ ܫܟܺܝܪ̈ܶܐ ܕܶܐܣܓܽܘܕ ܠܳܟ܇ ܘܥܰܠ ܕܰܫܡܰܥܬܳܟ ܡܶܢ ܡܳܪܝܳܐ ܐܶܬܪܰܚܩܿܶܬ܇ ܘܳܝܠܶܗ܀

ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ ܘܳܝܳܐ ܢܶܬܠܽܘܢ ܠܺܝ܇ ܘܠܡܳܪܝ̱ ܫܶܒܩܶܬ ܘܰܠܥܳܠܡܳܐ ܪܶܚܡܿܶܬ܇ ܘܳܝܠܶܗ ܠܰܐܝܢܳܐ ܕܠܳܟ܀

ܬܰܘܕܺܝ ܠܛܳܒܳܐ ܕܰܒܙܽܘܦܶܗ ܕܰܟܝܳܐ ܕܰܟܝܳܐ ܠܺܝ܇ ܘܰܐܝܟܳܐ ܕܨܳܒܶܐ ܠܳܟ ܒܰܠܚܽܘܕܰܝܟ ܢܶܫܪܶܐ܇ ܘܳܝܠܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܳܘ ܨܰܝܳܡܳܐ ܩܪܺܝ ܠܡܶܣܟܺܢܳܐ ܘܗܰܒܠܶܗ ܠܰܚܡܳܐ ܠܰܘ ܗܽܘ ܢܺܐܬܶܐ ܐܰܢ̱ܬ ܙܶܠ ܨܶܝܕܰܘܗ̱ܝ ܘܰܡܠܺܝ ܟܰܪܣܶܗ܇ ܠܰܘ ܐܰܪ̈ܥܳܬܳܐ ܐܳܙܠ̈ܳܢ ܒܳܬܰܪ ܐܰܟܳܪ̈ܰܝܗܶܝܢ܇ ܗܶܢܽܘܢ ܛܳܥܢܺܝܢ ܙܰܪܥܳܐ ܘܢܳܦܩܺܝܢ ܠܰܡܒܰܕܳܪܽܘ܀

ܢܩܰܫ ܡܶܣܟܺܢܳܐ ܠܳܐ ܬܺܐܡܰܪ ܠܶܗ ܕܡܳܪܝܳܐ ܙܳܐܶܢ܇ ܣܦܺܝܩܳܐܗ̱ܝ ܡܶܠܬܳܐ ܘܰܕܠܳܐ ܐܰܓܪܳܐܗ̱ܝ ܠܡܰܢ ܕܳܐܡܰܪ ܠܳܗܿ܇ ܗܰܒ ܡܰܘܗܰܒܬܳܐ ܘܶܐܡܰܪ ܡܶܠܬܳܐ ܠܳܐ ܣܰܢܝܳܐ ܠܳܟ܇ ܝܳܕܰܥ ܗܽܘ ܓܶܝܪ ܝܰܬܺܝܪ ܡܶܢܳܟ ܡܰܢ ܙܳܐܶܢ ܠܶܗ܀

 

ܕܨܰܦܪܳܐ ܥܽܘܢܺܝܬܐ ܕܪܰܚܶܡܥܠܰܝ ܩܳܠܳܐ ܥܰܕܠܳܐ ܢܺܐܙܠܽܘܢ ܚܰܘܒ̈ܰܝ

ܒܥܰܡܳܐ ܠܰܐܢ̱ܬܬܳܐ ܕܝܳܠܕܳܐ ܕܶܟܪܳܐ ܦܩܰܕ ܢܳܡܽܘܣܳܐ܇ ܕܠܰܐܪܒܥܺܝܢ ܝܰܘ̈ܡܺܝܢ ܬܰܝܬܶܐ ܕܶܒܚܳܐ ܕܰܡܕܰܟܶܐ ܠܳܗܿ܇ ܐܶܬܪܰܚܰܡܥܠܰܝܢ܀

ܠܗܳܢܳܐ ܟܝܳܢܳܐ ܢܚܶܬ ܕܢܰܙܟܶܐ ܒܕܰܐܪܰܢ ܡܳܪܰܢ܇ ܘܰܚܠܳܦ ܟܽܠܶܗ ܢܚܶܬ ܠܰܐܓܽܘܢܳܐ ܟܰܕ ܙܰܟܳܝܰܐܗ̱ܘ܇ ܐܶܬܪܰܚܰܡܥܠܰܝܢ܀

ܘܟܰܕ ܗܽܘ ܟܝܳܢܳܐ ܢܦܰܠ ܗܘܳܐ ܒܕܰܐܪܶܗ ܕܗܰܘ ܚܰܪܡܳܢܳܐ܇ ܚܳܒܘ̱ ܐܶܣܛܽܘܟܣ̈ܶܐ ܡܶܢ ܗܰܘ ܪܶܗܛܳܐ ܕܙܰܕܺܝܩܽܘܬܳܐ܀

ܡܶܢܝܳܢܳܐ ܕܶܝܢ ܗܳܢܳܐ ܕܥܶܣܪܳܐ ܗܽܘܝܽܘ ܣܳܟܳܐ܇ ܘܰܠܥܶܠ ܡܶܢܳܗܿ ܬܽܘܒ ܡܶܢܝܳܢܳܐ ܠܳܐ ܡܶܫܟܰܚ ܐܰܢ̱ܬ܇ ܐܶܬܪܰܚܰܡܥܠܰܝܢ܀

ܘܗܳܠܶܝܢ ܥܶܣܪܳܐ ܐܰܪܒܰܥ ܙܰܒܢܺܝ̈ܢ ܥܰܦܶܦ ܐܶܢܽܘܢ܇ ܕܟܽܠܶܗ ܟܝܳܢܳܐ ܒܗܳܠܶܝܢ ܩܳܐܶܡ ܙܰܕܺܝܩܳܐܺܝܬ ܐܶܬܪܰܚܰܡܥܠܰܝܢ܀

 

ܐܰܠܳܗܝ̱ ܐܰܠܳܗܝ̱܇ ܗܰܘ ܕܥܽܘܗܕܳܢܳܐ

ܐܰܠܳܗܳܐ ܕܰܒܨܰܘܡܳܐ ܘܒܰܨܠܽܘܬܳܐ܇ ܘܰܒܕܶܡܥ̈ܶܐ ܕܰܬܝܳܒܽܘܬܳܐ܇ ܠܢܺܝܢܘܳܝ̈ܶܐ ܒܪ̈ܰܚܡܶܐ ܫܰܘܙܶܒܬ܇ ܠܘܳܬܳܟ܀

ܡܫܺܝܚܳܐ ܐܰܠܳܗܳܐ ܕܰܒܝܰܕ ܨܰܘܡܶܗ܇ ܚܰܪܰܪ ܠܰܢ ܡܶܢ ܛܳܥܝܽܘܬܳܐ܇ ܕܰܚܛܺܝܬܳܐ ܘܰܕܣܳܛܳܢܳܐ܇ ܠܘܳܬܳܟ܀

ܒܨܰܘܡܳܐ ܙܰܗܝܳܐ ܘܒܰܨܠܽܘܬܳܐ ܕܟܺܝܬܳܐ܇ ܚܳܒܰܬ݀ ܢܽܘܪܳܐ ܒܰܐܬܽܘܢܳܐ܇ ܘܠܳܐ ܚܰܒܠܰܬ݀ ܗܘܳܬ݀ ܠܰܛܠܳܝ̈ܶܐ ܠܘܳܬܳܟ܀

ܐܰܠܳܗܳܐ ܕܶܝܢ ܕܰܒܨܰܘܡܳܐ ܥܰܙܺܝ܇ ܕܠܰܢ ܢܬܰܪܣܶܐ ܪܽܘܚܳܢܳܐܺܝܬ܇ ܒܝܽܘܠܦܳܢܰܘ̈ܗ̱ܝ ܐܰܠܳܗܳܝ̈ܶܐ ܠܘܳܬܳܟ܀

ܗܰܒ ܠܰܢ ܡܳܪܰܢ܇ ܕܰܢܨܽܘܡ ܠܳܟ ܨܰܘܡܳܐ ܕܰܟܝܳܐ܇ ܕܰܫܦܰܪ ܠܺܐܝܩܳܪܳܟ܇ ܘܬܰܪܥܳܟ ܦܬܰܚ ܠܰܨܠܰܘ̈ܳܬܰܢ܇ ܠܘܳܬܳܟ܀

ܐܰܝܟ ܛܰܝܒܽܘܬܳܐ ܕܺܝܠܳܟ ܐܰܠܳܗܳܐ܇ ܫܰܟܶܢܬ ܠܰܢ ܥܽܘܬܪܳܐ ܕܨܰܘܡܳܐ܇ ܐܰܫܘܳܢ ܕܢܶܛܪܺܝܘܗ̱ܝ ܕܰܟܝܳܐܺܝܬ܇ ܐܰܠܳܗܳܐ ܣܰܓܺܝ ܪ̈ܰܚܡܶܐ܀

ܐܰܠܳܗܳܐ ܕܰܒܝܳܕ ܨܰܘܡܳܐ ܠܡܽܘܫܶܐ܇ ܐܰܫܘܺܝܬ ܕܢܶܚܙܶܐ ܦܰܪܨܽܘܦܳܟ܇ ܠܟܽܠܰܢ ܐܰܫܘܳܐ ܒܝܰܕ ܨܰܘܡܳܐ܇ ܢܶܚܙܶܐ ܚܢܳܢܳܐ ܕܒܰܣܺܝܡܽܘܬܳܟ܀

 

ܫܡܰܝ̈ܳܐ ܡܶܫܬܰܥܶܝܢ܇ ܠܰܐܠܳܗܳܐ ܒܰܐܬܽܘܢܳܐ ܕܢܽܘܪܳܐ

ܥܰܒܕܳܐ ܟܰܫܺܝܪܳܐ ܗܘܺܝܿܬ ܠܺܝ܇ ܕܰܚܛܳܗ̈ܶܐ ܘܕܰܫܟܺܝܪ̈ܳܬܳܐ ܒܗܳܢ ܥܳܠܡܳܐ ܒܺܝܫܳܐ܇ ܘܗܳܐ ܡܶܬܕܰܡܰܪ ܐ̱ܢܳܐ ܠܗܳܝ ܒܶܗܬܬܳܐ܇ ܕܰܢܛܺܝܪܳܐ ܠܺܝ ܘܰܠܕܰܐܟܘܳܬܝ̱ ܘܰܠܕܺܝܢܳܐ܇ ܕܰܕܚܺܝܠ ܘܕܰܝܳܢܳܐ ܕܥܰܙܺܝܙ ܘܝܰܬܺܝܪ ܢܪܰܡܪܶܡ܀

ܗܳܐ ܡܦܺܝܣ ܐ̱ܢܳܐ ܠܳܟ ܥܰܠ ܫܽܘܒܩܳܢܳܐ ܦܰܢܳܐ ܫܶܐܠ̈ܳܬܝ̱ ܒܰܚܢܳܢܳܟ ܪܳܚܶܡܢܳܫܳܐ܇ ܕܰܐܢ̱ܬ ܗܽܘ ܒܰܠܚܽܘܕܰܝܟ ܙܰܟܳܝܳܐ ܚܰܣܳܐ ܠܺܝ ܟܽܠ ܕܰܚܛܺܝܿܬ ܠܳܟ܇ ܐܶܬܪܰܚܰܡܥܠܰܝ ܒܚܽܘܒܶܗ ܕܝܳܠܽܘܕܳܟ܇ ܕܝܰܬܺܝܪ܀

ܡܫܺܝܚܳܐ ܕܚܰܘܺܝ ܫܽܘܠܛܳܢܶܗ܇ ܒܚܰܛܳܝ̈ܶܐ ܕܰܦܪܰܩ ܐܶܢܽܘܢ ܒܨܰܘܡܶܗ ܕܰܟܝܳܐ܇ ܚܰܘܳܐ ܠܰܢ ܡܳܪܝ̱ ܛܰܝܒܽܘܬܳܟ܇ ܘܦܽܘܪܩܳܢܳܟ ܢܶܬܺܝܗܶܒ ܠܰܢ ܘܕܰܟܳܐ ܠܰܢ ܡܶܢ ܛܰܡܽܐܘܬܳܐ ܕܰܚܛܺܝܬܳܐ܇ ܕܝܰܬܺܝܪ܀

ܠܰܐܠܳܗܳܐ ܘܡܳܪܳܐ ܕܟܽܠܒܶܪ̈ܝܳܢ܇ ܕܕܡܽܘܬܳܐ ܕܥܰܒܕܳܐ ܢܣܰܒ ܗܘܳܐ ܡܶܛܽܠ ܪ̈ܰܚܡܰܘܗ̱ܝ ܐܶܬܗܰܦܰܟ ܗܘܳܐ ܒܓܰܘ ܡܰܕܒܪܳܐ܇ ܘܨܳܡ ܘܶܐܬܟܰܬܰܫ ܥܰܡ ܒܺܝܫܳܐ ܘܰܦܪܰܩ ܠܰܢ ܡܶܢ ܫܽܘܥܒܳܕܶܗ܇ ܕܝܰܬܺܝܪ܀

ܟܺܐܡܽܘܢܳܐ ܩܰܫܝܳܐ ܕܚܰܘܒ̈ܰܝ܇ ܘܗܳܐ ܒܰܬܗܽܘܡܳܐ ܡܛܰܒܰܥ ܠܺܝ ܘܠܰܝܬ ܐܺܝܳܠܳܐ܇ ܐܰܢ̱ܬ ܡܳܪܝ̱ ܕܰܠܦܶܛܪܽܘܣ ܫܰܘܙܶܒܬ܇ ܫܰܘܙܶܒܰܝܢܝ̱ ܕܶܐܙܡܰܪ ܫܽܘܒܚܳܐ ܘܰܐܳܘܕܐ ܠܳܟ ܘܶܐܣܓܽܘܕ ܠܰܚܢܳܢܳܟ ܪܰܒܳܐ܀

 

ܬܶܫܒܽܘܚܬܳܐ ܚܕܰܬܳܐ ܩܳܠܳܐ ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ

ܢܶܓܥܶܐ ܒܚܰܫܳܐ ܠܘܳܬ ܡܳܪܰܢ܇ ܘܬܰܟܫܶܦܬܳܐ ܢܰܪܡܶܐ ܩܕܳܡܰܘܗ̱ܝ ܕܩܰܪܺܝܒ ܗܽܘ ܡܳܪܝܳܐ ܒܟܽܠܫܳܥ܇ ܠܰܐܝܠܶܝܢ ܕܩܳܪܶܝܢ ܠܶܗ ܒܩܽܘܫܬܳܐ ܪܳܕܶܐ ܠܰܢ ܡܶܛܽܠ ܥܰܘܠܰܢ܇ ܘܚܳܐܶܢ ܠܰܢ ܡܶܛܽܠ ܪ̈ܰܚܡܰܘܗ̱ܝ ܘܠܳܐ ܡܰܪܦܶܐ ܒܰܢ ܐܺܝܕܰܝ̈ܳܐ܀

ܒܰܬܪܰܥ ܪ̈ܰܚܡܰܝܟ ܡܳܪܶܐ ܟܽܠ܇ ܢܳܩܶܫ ܩܳܠܳܐ ܕܒܳܥܽܘܬܰܢ ܠܳܐ ܬܶܟܠܶܐ ܡܶܢ ܣܳܓܽܘܕܰܝ̈ܟ܇ ܫܶܐܠ̈ܳܬܳܐ ܕܣܽܘܢܩܳܢܰܝ̈ܗܽܘܢ܇ ܒܕܶܡܥ̈ܶܐ ܩܪܳܬܳܟ ܚܰܛܳܝܬܳܐ܇ ܘܶܐܫܛܳܪܳܐ ܕܚܰܘܒ̈ܰܝܗܿ ܣܰܕܶܩܬ ܐܳܦ ܠܰܢ ܚܰܣܳܐ ܐܰܟܘܳܬܳܗܿ܀

ܬܰܘ ܐܰܚ̈ܰܝ ܢܶܬܓܰܘܰܣ ܒܶܗ܇ ܒܨܰܘܡܳܐ ܕܰܟܝܳܐ ܩܰܕܺܝܫܳܐ܇ ܕܢܶܗܘܶܐ ܚܰܒܪ̈ܶܐ ܠܪ̈ܽܘܚܳܢܶܐ܇ ܘܢܶܬܒܰܣܰܡ ܥܰܡ ܢܽܘܪ̈ܳܢܶܐ܇ ܕܡܳܪܰܢ ܐܶܡܰܪ ܒܰܣܒܰܪܬܶܗ܇ ܕܩܳܪܶܐ ܠܺܝ ܘܥܳܢܶܐ ܐ̱ܢܳܐ ܠܶܗ ܘܰܕܢܳܩܶܫ ܦܳܬܰܚ ܐ̱ܢܳܐ ܠܶܗ܀

ܩܰܒܶܠ ܛܳܒܳܐ ܒܳܥܽܘܬܰܢ܇ ܘܰܦܬܰܚ ܬܰܪܥܳܟ ܠܰܨܠܽܘܬܰܢ ܚܰܢܳܢܳܐ ܐܶܬܪܰܥܳܐ ܠܰܢ܇ ܡܶܛܽܠ ܕܣܰܓܺܝ ܐܰܪܓܶܙܢܳܟ܇ ܒܝܽܘܠܦܳܢܳܟ ܚܽܘܨ ܪܰܦܝܽܘܬܰܢ܇ ܘܫܰܪܰܪ ܠܰܢ ܒܗܰܝܡܳܢܽܘܬܳܐ܇ ܘܢܶܫܟܰܚ ܪ̈ܰܚܡܶܐ ܘܰܚܢܳܢܳܐ܀

ܡܽܘܫܶܐ ܢܒܺܝܳܐ ܒܛܽܘܪ ܣܺܝܢܰܝ܇ ܒܨܰܘܡܳܐ ܐܰܦܰܘ̈ܗ̱ܝ ܐܶܙܕܰܗܺܝܘ܇ ܘܰܐܚܶܬ ܠܽܘܚ̈ܶܐ ܕܰܟܬܺܝܒ̈ܳܢ܇ ܦܽܘܩܕܳܢ̈ܶܐ ܠܒܶܝܬ ܐܺܝܣܪܳܐܶܝܠ܇ ܘܗܳܐ ܥܺܕܬܳܐ ܝܰܘܡܳܢ ܒܨܰܘܡܳܐ܇ ܘܒܰܨܠܽܘܬܳܐ ܡܶܬܢܰܨܚܳܐ ܡܳܪܝ̱ ܢܰܨܚܶܝܗܿ ܒܰܐܪܒܰܥ ܦܶܢܳܝ̈ܢ܀

 

ܩܳܠܳܐ ܕܨܰܦܪܳܐ ܒܩܳܠܳܐ ܠܡܰܠܟܽܘܬ ܪܰܘܡܳܐ

ܡܳܐ ܩܰܛܺܝܢ ܬܰܪܥܳܐ܇ ܘܰܐܠܺܝܨܳܐܗ̱ܝ ܐܽܘܪܚܳܐ ܕܡܰܘܒܠܳܐ ܠܡܰܠܟܽܘܬܳܐ܇ ܐܰܝܢܳܐ ܕܨܳܒܶܐ ܕܢܺܐܙܰܠ ܒܳܗܿ܇ ܚܺܝܨܽܘܬܳܐ ܡܶܬܒܰܥܝܳܐ ܠܶܗ܇ ܘܶܐܢܗܽܘ ܕܡܶܬܪܰܦܶܐ ܩܰܠܺܝܠ܇ ܫܒܺܝܠܳܐ ܠܬܰܘܫܳܐ ܢܳܓܶܕ ܠܶܗ܇ ܘܗܽܘ ܡܰܘܒܶܕ ܢܰܦܫܶܗ ܒܨܶܒܝܳܢܶܗ܀

ܡܰܢ ܕܶܝܢ ܝܰܗܒ ܠܺܝ܇ ܡܰܒܽܘܥܳܐ ܕܕܶܡܥ̈ܶܐ ܘܠܶܒܳܐ ܕܰܬܘܳܬܳܐ܇ ܘܝܶܬܒܶܿܬ ܘܰܒܳܟܺܝܬܶܗ ܠܰܩܢܽܘܡܝ̱ ܒܰܚܢܰܓܬܳܐ ܡܰܪܺܝܪܳܐܺܝܬ܇ ܥܰܠ ܫܢܰܝ̈ܳܐ ܕܚܰܝܰܝ̈ ܕܰܥܒܰܪܘ̱܇ ܒܰܣܪܺܝܩܽܘܬܳܐ ܕܠܳܐ ܝܽܘܬܪܳܢ܇ ܘܰܗܘܺܝܿܬ ܠܺܝ ܫܶܦܠܳܐ ܒܕܽܘܒܳܪ̈ܰܝ܀

 

ܐ̱ܚܪܺܢܳܐ ܣܳܗܕܰܘ̈ܗܝ ܐܰܢ̱ܬܽܘܢ

ܝܳܕܥܺܝܢܰܢ ܡܳܪܝ̱܇ ܕܰܚܛܰܝܢܰܢ ܠܳܟ ܘܰܒܣܽܘܪ̈ܚܳܢܰܝܢ ܣܰܓܺܝ ܐܰܪܓܶܙܢܳܟ܇ ܘܶܐܢ ܟܺܐܢܽܘܬܳܐ ܫܶܡܛܰܬ݀ ܣܰܝܦܳܐ ܚܢܳܢܳܟ ܡܳܪܰܢ ܗܽܘ ܢܩܽܘܡ ܒܰܐܦܰܝ̈ܢ܇ ܘܶܐܢܗܽܘ ܡܳܪܰܢ ܕܫܽܘܠܳܡܶܗ ܕܙܰܒܢܳܐ ܡܰܛܺܝ ܒܪ̈ܰܚܡܰܝܟ ܢܶܗܘܶܐ ܫܽܘܠܳܡܰܢ܀

ܒܙܰܒܢ̈ܶܐ ܐ̱ܚܪ̈ܳܝܶܐ ܡܳܐ ܕܡܶܬܒܰܚܪܺܝܢ ܥܒܳܕ̈ܶܐ ܕܟܽܠܢܳܫ ܩܕܳܡܰܝܟ ܡܠܶܐ ܪ̈ܰܚܡܶܐ܇ ܠܳܐ ܡܳܪܝ̱ ܬܶܫܕܶܝܢܝ̱ ܡܶܢ ܩܕܳܡܰܝܟ܇ ܠܰܐܝܠܶܝܢ ܕܰܐܳܘܕܺܝܘ ܒܰܫܡܳܟ ܩܰܕܺܝܫܳܐ܇ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ ܦܪܽܘܩܶܝܗܿ ܠܥܺܕܬܳܟ܇ ܘܰܥܒܶܕ ܣܰܒܪܳܐ ܠܬܰܝܳܒ̈ܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܩܰܠܺܝܠ ܡܰܘܫܶܛ ܠܰܚܡܳܐ ܠܟܰܦܢܳܐ ܘܰܡܣܰܒܰܥ ܠܶܗ܇ ܩܰܠܺܝܠ ܣܳܡܶܟ ܠܰܐܝܢܳܐ ܕܰܣܢܺܝܩ ܘܰܡܥܰܕܰܪ ܠܶܗ܇ ܒܰܙܒܰܢ ܚܳܐܶܣ ܥܰܠ ܡܶܣܟܺܢ̈ܶܐ ܕܡܶܙܕܰܕܰܩ ܒܶܗ܇ ܘܬܽܘܒ ܟܰܪܝܳܐ ܠܶܗ ܥܰܠ ܚܳܕܽܘܪܳܐ ܘܠܳܐ ܫܳܐܶܛ ܠܶܗ܀

ܣܓܺܝܕ ܘܰܡܫܰܒܰܚ ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ܇ ܟܝܳܢܳܐ ܡܥܰܠܝܳܐ ܐ̱ܪܳܙܳܐ ܫܒܺܝܚܳܐ ܐܺܝܬܝܳܐ ܓܢܺܝܙܳܐ܇ ܐܳܘ ܡܠܶܐ ܪ̈ܰܚܡܶܐ ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ܇ ܘܚܰܣܳܐ ܚܰܘܒ̈ܰܝܢ ܒܣܽܘܓܳܐ ܕܪ̈ܰܚܡܰܝܟ ܘܠܳܟ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ ܒܩܳܠܳܐ ܗܰܒܠܳܗܿ ܠܥܺܕܬܳܟ

ܛܽܘܒܳܐ ܠܨܰܝܳܡ̈ܶܐ܇ ܒܝܰܘܡܶܗ ܪܰܒܳܐ ܕܢܽܘܚܳܡܳܐ ܕܝܳܪܬܺܝܢ ܚܰܝ̈ܶܐ ܘܛܽܘܒ̈ܶܐ ܕܠܳܐ ܦܳܛܪܺܝܢ܇ ܘܚܳܕܶܝܢ ܒܰܓܢܽܘܢܳܐ܇ ܥܰܡܶܗ ܕܚܰܬܢܳܐ ܫܡܰܝܳܢܳܐ܇ ܒܝܰܘܡܳܐ ܫܒܺܝܚܳܐ܇ ܕܕܳܢܚܳܐ ܪܰܒܽܘܬܶܗ܀

ܒܰܕܡܽܘܬ ܪ̈ܽܘܚܳܢܶܐ܇ ܩܳܢܶܝܢ ܓܶܦ̈ܶܐ ܨܰܝܳܡ̈ܶܐ܇ ܘܦܳܪܚܺܝܢ ܠܽܐܘܪܥܶܗ ܕܡܳܪܰܢ ܡܳܐ ܕܳܐܬܶܐ܇ ܘܠܳܒܫܺܝܢ ܬܶܫܒܽܘܚܬܳܐ ܘܥܰܡܶܗ ܥܳܐܠܺܝܢ ܠܰܓܢܽܘܢܳܐ܇ ܘܝܳܪܬܺܝܢ ܚܰܝ̈ܶܐ ܘܛܽܘܒ̈ܶܐ ܕܠܳܐ ܦܳܛܪܺܝܢ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܦܨܺܝܚܺܝܢ ܒܦܰܪܕܰܝܣܳܐ ܟܺܐܢ̈ܶܐ ܘܙܰܕܺܝ̈ܩܶܐ܇ ܘܚܳܕܶܝܢ ܒܡܰܠܟܽܘܬܳܐ܇ ܘܪܳܘܙܺܝܢ ܒܰܓܢܽܘܢܳܐ܇ ܚܠܳܦ ܗܳܠܶܝܢ ܕܰܬܢܳܢ܇ ܡܶܬܦܰܪܥܺܝܢ ܬܰܡܳܢ܀

ܫܽܘܒܚܳܐ ܠܛܰܝܒܽܘܬܳܟ ܡܚܰܝܠܰܬ ܠܨܰܝܳܡ̈ܶܐ܇ ܫܽܘܒܚܳܐ ܠܗܰܘ ܕܒܰܥܕܶܝܢ܇ ܡܰܫܪܶܐ ܠܣܳܓܽܘܕܰܘ̈ܗ̱ܝ ܫܽܘܒܚܳܐ ܠܶܗ ܠܰܐܒܽܘܗ̱ܝ܇ ܘܰܠܪܽܘܚܶܗ ܕܩܽܘܕܫܳܐ܀

 

ܕܦܶܠܓܶܗ ܕܝܰܘܡܳܐ ܩܳܠܳܐ ܦܬܰܚ ܠܺܝ ܬܰܪܥܶܗ

ܒܨܰܘܡܳܐ ܐܶܙܕܰܗܺܝ ܡܽܘܫܶܐ܇ ܘܒܰܕܡܽܘܬ ܫܶܡܫܳܐ ܦܰܪܨܽܘܦܶܗ ܢܗܰܪ܇ ܘܦܽܘܩܕܳܢ̈ܶܐ ܠܒܶܝܬ ܐܺܝܣܪܳܐܶܝܠ܇ ܐܰܚܶܬ ܡܶܢ ܛܽܘܪܳܐ ܕܣܺܝܢܰܝ܇ ܬܰܘ ܐܰܚ̈ܰܝ ܢܶܬܟܰܫܰܪ ܒܶܗ܇ ܘܢܶܪܚܰܡ ܚܰܫܳܐ ܘܡܽܘܟܳܟܳܐ ܘܰܒܝܰܕ ܒܳܥܽܘܬܰܢ܇ ܢܪܰܥܶܐ ܠܡܳܪܝܳܐ ܕܰܐܪܓܶܙܢܳܝܗ̱ܝ܀

ܢܺܝܢܘܳܝ̈ܶܐ ܕܨܳܡܘ̱ ܘܶܐܬܦܰܨܺܝܘ܇ ܘܒܰܬܝܳܒܽܘܬܳܐ ܠܪܽܘܓܙܳܐ ܐܰܥܒܪܽܘܗ̱ܝ܇ ܘܰܒܚܰܫܳܐ ܘܰܒܕܶܡܥ̈ܶܐ ܘܰܒܣܰܩ̈ܶܐ ܘܒܰܨܠܰܘ̈ܳܬܳܐ܇ ܘܚܰܢܳܢܳܐ ܐܶܬܪܰܥܺܝ ܠܗܽܘܢ܇ ܘܦܰܢܺܝ ܒܰܥܓܰܠ ܫܶܐܠ̈ܳܬܗܽܘܢ܇ ܘܰܚܢܰܢ ܢܶܬܟܰܫܰܦ ܕܢܶܥܢܶܐ ܠܰܢ ܡܳܪܳܐ ܛܳܒܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܡܳܐ ܕܪܳܗܶܛ ܗܽܘ ܕܡܳܐ ܒܫܳܪ̈ܝܳܬܳܐ ܥܰܡ ܗܰܕܳܡ̈ܶܐ܇ ܐܺܝܬ ܗܽܘ ܐܰܬܪܳܐ ܐܳܦ ܠܰܚܛܺܝܬܳܐ ܘܙܰܕܺܝܩܽܘܬܳܐ܇ ܟܡܳܐ ܕܺܐܝܬ ܥܰܝܢ̈ܶܐ ܕܳܐܫܕ̈ܳܢ ܕܶܡܥ̈ܶܐ ܥܰܠ ܦܰܪܨܽܘܦܳܐ܇ ܐܺܝܬ ܗܽܘ ܐܰܬܪܳܐ ܕܰܢܦܰܨܽܘܢܳܝܗ̱ܝ ܠܰܐܝܢܳܐ ܕܚܳܛܶܐ܀

ܘܡܶܢ ܚܰܛܳܝ̈ܶܐ ܘܡܶܢ ܬܰܝܳܒ̈ܶܐ ܕܙܰܕܶܩܬ ܐܶܢܽܘܢ܇ ܡܶܢ ܛܳܥܰܝ̈ܳܐ ܘܡܶܢ ܐܰܒܺܝܕ̈ܶܐ ܕܰܐܦܢܺܝܬ ܐܶܢܽܘܢ܇ ܟܝܳܢ̈ܶܐ ܚܰܪ̈ܫܶܐ ܘܦܽܘܡ̈ܶܐ ܡܠܺܝ̈ܠܶܐ ܕܰܒܪܰܝܬ ܐܶܢܽܘܢ܇ ܢܰܣܩܽܘܢ ܫܽܘܒܚܳܐ ܠܳܟ ܡܳܪܝ̱ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ܀

 

ܕܰܬܫܰܥܫܳܥܺܝ̈ܢ ܩܳܠܳܐ ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ܇

ܥܺܕܬܳܐ ܒܨܰܘܡܳܐ ܘܒܰܨܠܽܘܬܳܐ܇ ܡܨܰܒܬܳܐ ܠܰܒܢܶܝ̈ܗܿ ܒܨܶܒ̈ܬܶܐ ܪ̈ܽܘܚܳܢܶܐ܇ ܘܣܳܝܡܳܐ ܠܗܽܘܢ ܟܠܺܝܠܳܐ ܦܰܐܝܳܐ ܕܰܢܙܺܝܪܽܘܬܳܐ܇ ܒܦܰܓܪܳܐ ܘܰܕܡܳܐ ܕܡܶܬܒܰܣܡܺܝܢ܇ ܒܰܢܣܺܝܒܽܘܬܳܐ ܠܚܽܘܣܳܝ ܚܰܘܒܰܝ̈ܗܽܘܢ܀

ܛܽܘܒܰܝܗܽܘܢ ܠܰܡܪ̈ܰܚܡܳܢܶܐ ܐܶܡܰܪ ܡܳܪܰܢ܇ ܠܟܶܢܫܳܐ ܕܬܰܠܡܺܝܕܰܘ̈ܗ̱ܝ܇ ܕܰܥܠܰܝܗܽܘܢ ܢܶܗܘܽܘܢ ܪ̈ܰܚܡܶܐ ܒܝܰܘܡܳܐ ܕܕܺܝܢܳܐ܇ ܘܰܕܨܳܐܶܡ ܘܝܳܗܶܒ ܠܰܚܡܳܐ܇ ܠܰܐܝܢܳܐ ܕܰܣܢܺܝܩ ܗܽܘܝܽܘ ܡܪܰܚܡܳܢܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܠܳܐ ܢܶܗܘܶܐ ܦܰܓܪܳܟ ܩܳܐܶܡ܇ ܘܠܶܒܳܟ ܦܳܗܶܐ ܒܣܽܘܥܪ̈ܳܢܶܐ܇ ܢܶܗܘܶܐ ܠܶܗ ܓܽܘܫܡܳܟ ܥܺܕܬܳܐ܇ ܘܗܰܝܟܠܳܐ ܫܒܺܝܚܳܐ ܪܶܥܝܳܢܳܟ܀

ܪܰܒ ܗܽܘ ܫܽܘܒܚܳܟ ܡܳܪܶܐ ܟܽܠ܇ ܡܶܢ ܫܽܘܒܚܳܐ ܕܰܡܫܰܒܚܳܢ̈ܶܐ܇ ܕܣܰܓܺܝ ܐܰܚܶܒܬ ܠܰܟܝܳܢܰܢ܇ ܫܽܘܒܚܳܐ ܠܳܟ ܥܰܠ ܦܽܘܪܩܳܢܰܢ܀

 

ܬܽܘܒ ܕܢܳܓܰܗ ܚܰܡܫܳܐ

ܕܪܰܚܶܡܥܠܰܝ ܐܰܢ̱ܬ ܠܰܒܬܽܘܠܬܳܐ

ܠܳܐ ܡܳܪܝ̱ ܬܰܪܦܶܐ ܠܚܰܝܳܒܽܘܬܝ̱܇ ܠܡܶܥܰܠ ܠܰܐܬܪܳܐ ܕܓܺܗܰܢܳܐ܇ ܐܳܦ ܡܳܐ ܕܥܶܠܰܬ݀܇ ܐܶܚܙܶܐ ܚܢܳܢܳܐ ܕܛܰܝܒܽܘܬܳܟ܇ ܐܰܠܳܗܳܐ܀

ܙܳܥܘ̱ ܓܰܪ̈ܡܰܝ ܡܶܢ ܒܺܝܫܳܐ܇ ܘܠܳܐ ܫܳܠܶܐ ܕܢܶܡܚܶܝܢܝ̱ ܟܽܠܫܳܥ ܡܳܪܳܐ ܛܳܒܳܐ ܟܠܺܝ ܫܰܒܛܶܗ ܡܶܢ ܚܰܠܳܫܽܘܬܝ̱܀

ܠܫܽܘܒܩܳܢܳܟ ܗܳܐ ܡܣܰܟܶܝܢ܇ ܟܽܠ ܕܶܐܬܟܰܬܰܡܘ̱ ܒܰܚܛܳܗ̈ܶܐ܇ ܒܪ̈ܰܚܡܶܐ ܕܡܶܢܳܟ܇ ܚܽܘܢ ܐܶܢܽܘܢ ܒܝܽܘܡ ܓܶܠܝܳܢܳܟ܀

ܨܶܡܚܳܐ ܕܰܐܒܳܐ ܓܢܺܝܙܳܐ܇ ܘܝܽܘܩܢܳܐ ܫܒܺܝܚܳܐ ܕܺܐܝܬܽܘܬܳܐ܇ ܡܪܽܘܩܳܝܗ̱ܝ ܠܨܰܠܡܳܟ ܡܶܢ ܫܽܘܚܬܳܐ ܕܰܫܟܺܝܪ̈ܳܬܳܐ܀

ܚܣܰܡ ܒܺܝܫܳܐ ܒܳܐܕܳܡ ܘܚܰܘܳܐ܇ ܘܰܐܛܥܺܝ ܐܶܢܽܘܢ ܒܰܚܣܳܡܶܗ܇ ܘܶܐܬܳܐ ܡܳܪܰܢ܇ ܘܨܳܡ ܘܰܙܟܳܐ ܘܙܰܟܺܝ ܠܥܰܒܕܰܘ̈ܗ̱ܝ܀

ܥܰܡ ܨܰܘܡܳܐ ܕܡܶܢ ܠܰܚܡܳܐ܇ ܢܨܽܘܡ ܐܰܚ̈ܰܝ ܡܶܢ ܒܺܝܫ̈ܳܬܳܐ܇ ܕܢܶܚܕܶܐ ܒܦܶܨܚܳܐ܇ ܕܗܰܘ ܕܶܐܬܡܰܟܰܟ ܘܰܦܪܰܩ ܠܰܢ܇ ܐܰܠܳܗܳܐ ܐܶܬܪܰܚܰܡܥܠܰܝܢ܀

 

ܕܡܳܪܝܳܐ ܩܪܺܝܬܳܟ܇ ܫܠܳܡܠܶܟܝ̱ ܡܰܠܝܰܬ ܛܰܝܒܽܘܬܳܐ

ܚܛܺܝܿܬ ܒܰܫܡܰܝܳܐ ܘܰܩܕܳܡܰܝܟ܇ ܠܳܐ ܫܳܘܶܐ ܐ̱ܢܳܐ ܕܰܒܪܳܟ ܐܶܬܩܪܶܐ܇ ܩܰܒܶܠܰܝܢܝ̱ ܐܰܝܟ ܐܰܓܺܝܪܳܐ ܘܶܐܗܘܶܐ ܒܒܰܝܬܳܟ܇ ܥܰܒܕܳܐ ܥܰܠ ܕܰܚܛܺܝܿܬ܀

ܒܬܰܪܥܳܐ ܕܺܝܠܳܟ ܚܰܢܳܢܳܐ܇ ܗܳܐ ܢܳܩܫܺܝܢܰܢ ܥܢܺܝ ܠܰܢ ܐܰܟܡܳܐ ܕܶܐܫܬܰܘܕܺܝܬ܇ ܕܩܳܪܶܐ ܠܺܝ ܥܳܢܶܐ ܐ̱ܢܳܐ ܠܶܗ܇ ܘܫܳܒܶܩ ܐ̱ܢܳܐ ܠܶܗ ܚܛܳܗܰܘ̈ܗ̱ܝ ܘܒܽܘܨܳܪ̈ܰܘܗ̱ܝ܀

ܗܰܒܠܰܢ ܡܳܪܰܢ ܒܰܚܢܳܢܳܟ ܕܰܢܨܽܘܡ ܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܘܫܰܟܶܢ ܠܰܢ ܒܶܗ ܫܽܘܒܩܳܢܳܐ ܕܚܰܘܒ̈ܶܐ ܕܰܣܥܪܰܢ ܕܢܰܘܕܶܐ ܠܛܰܝܒܽܘܬܳܟ܀

ܨܰܘܡܰܢ ܢܶܗܘܶܐ ܠܰܢܝܳܚܳܟ܇ ܘܰܨܠܰܘ̈ܳܬܰܢ ܐܰܝܟ ܥܶܛܪܳܐ ܩܕܳܡܰܝܟ܇ ܘܶܐܬܪܰܥܳܐ ܠܰܢ ܚܰܢܳܢܳܐ ܘܠܳܐ ܠܒܽܘܚܪܳܢܳܐ܇ ܬܶܩܪܶܐ ܘܰܬܩܺܝܡ ܠܰܢ܀

ܕܠܳܐ ܟܦܰܪܢ ܒܰܫܡܳܟ ܩܰܕܺܝܫܳܐ ܠܳܐ ܬܶܟܦܽܘܪ ܒܰܢ ܩܕܳܡ ܥܺܝܪ̈ܶܐ ܘܐ̱ܢܳܫܳܐ܇ ܘܕܰܐܘܕܺܝܢܰܢ ܒܳܟ ܚܰܢܳܢܳܐ܇ ܐܰܘܕܳܐ ܒܟܽܠܰܢ ܩܽܘܕܡܰܬ ܝܳܠܽܘܕܳܟ܀

ܠܳܟ ܬܶܫܒܽܘܚܬܳܐ ܐܰܠܳܗܳܐ܇ ܕܰܒܝܰܕ ܨܰܘܡܳܟ ܦܪܰܩܬܳܢܝ̱ ܡܶܢ ܒܺܝܫܳܐ܇ ܘܰܐܥܶܠܬܳܢ ܠܰܓܢܽܘܢ ܢܽܘܗܪܳܐ܇ ܕܥܰܡ ܡܰܠܰܐܟ̈ܶܐ ܢܶܚܕܶܐ ܘܢܶܬܒܰܣܰܡ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܒܩ̈ܳܠܶܐ ܕܰܡܠܶܝܢ ܬܰܘܕܺܝܬܳܐ

ܒܨܰܘܡܳܐ ܫܦܰܪܘ̱ ܠܳܟ ܢܺܝܢܘܳܝ̈ܶܐ܇ ܘܶܐܬܦܪܶܩܘ̱ ܡܶܢ ܪܽܘܓܙܳܐ܇ ܕܰܐܟܪܶܙ ܗܘܳܐ ܠܗܽܘܢ܇ ܒܰܪ ܡܰܬܰܝ ܐܰܟܡܳܐ ܕܺܐܝܠܰܦ ܡܶܢ ܟܺܐܢܽܘܬܳܐ܇ ܚܳܢܰܬ ܐܶܢܽܘܢ ܛܰܝܒܽܘܬܳܟ ܐܺܝܬܽܘܬܳܐ ܓܢܺܝܙܳܐ܇ ܕܰܚܙܳܬ݀ ܒܗܽܘܢ܇ ܦܳܪܽܘܫܽܘܬܳܐ ܘܕܶܡܥ̈ܶܐ ܘܚܶܢܓ̈ܳܬܳܐ܇ ܛܰܝܒܽܘܬܳܐ ܕܚܳܢܰܬ݀ ܐܶܢܽܘܢ ܬܶܚܽܘܢ ܠܰܢ ܘܪܰܚܶܡܥܠܰܝܢ܀

ܗܰܘ ܕܨܳܡ ܠܳܐ ܗܘܳܐ ܕܢܶܬܥܰܕܰܪ ܐܶܠܳܐ ܕܰܢܥܰܕܰܪ܇ ܥܰܕܰܪ ܡܳܪܝ̱ ܠܰܡܚܺܝܠܽܘܬܰܢ ܕܩܳܪܶܝܢܰܢ ܠܳܟ ܒܗܰܝܡܳܢܽܘܬܳܐ܇ ܘܫܰܕܰܪ ܠܰܢ ܡܶܢ ܒܶܝܬ ܓܰܙܳܟ ܚܢܳܢܳܐ ܘܪ̈ܰܚܡܶܐ܇ ܕܰܐܢ̱ܬ ܗܽܘ ܚܳܐܶܢ ܠܚܰܛܳܝ̈ܶܐ ܒܣܽܘܓܐܳܐ ܕܛܰܝܒܽܘܬܳܟ܇ ܘܰܫܒܽܘܩ ܚܰܘ̈ܒܰܝܢ ܘܰܚܛܰܗ̈ܰܝܢ ܕܰܐܢ̱ܬ ܗܽܘ ܣܰܒܪܳܐ ܕܟܽܠ ܬܰܝܳܒ̈ܶܐ܀

 

ܐ̱ܚܪܺܢܳܐ ܒܩܳܠܳܐ ܒܪܰܡܫܳܐ ܠܒܰܝܬܳܟ ܐܶܬܶܝܢܰܢ

ܨܳܡܘ̱ ܛܠܳܝ̈ܶܐ ܕܒܶܝܬ ܚܰܢܰܢܝܳܐ ܒܓܰܘ ܒܳܒܶܝܠ܇ ܘܶܐܬܦܰܨܺܝܘ ܡܶܢ ܐܰܬܽܘܢܳܐ ܕܫܰܠܗܶܒܺܝܬܳܐ ܒܨܰܘܡܳܐ ܡܳܪܰܢ ܦܰܨܳܐ ܠܰܢ ܡܶܢ ܢܽܘܪܳܐ܇ ܕܰܡܛܰܝܒܳܐ ܠܳܐܟܶܠܩܰܪܨܳܐ ܘܚܰܝܠܰܘ̈ܳܬܶܗ܀

ܒܨܰܘܡܳܐ ܐܶܙܕܰܗܺܝ ܡܽܘܫܶܐ ܒܛܽܘܪ ܣܺܝܢܰܝ܇ ܘܺܐܠܺܝܳܐ ܒܪ̈ܰܟܫܳܐ ܕܢܽܘܪܳܐ ܣܠܶܩ ܠܰܫܡܰܝܳܐ܇ ܘܰܛܠܳܝ̈ܶܐ ܕܒܶܝܬ ܚܰܢܰܢܝܳܐ ܘܕܳܢܺܝܐܶܝܠ ܙܟܰܘ ܒܨܰܘܡܳܐ ܠܫܰܠܗܶܒܺܝܬܳܐ ܘܰܠܒܳܒܠܳܝ̈ܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܗܰܘ ܥܶܕܳܢܳܐ ܕܒܶܗ ܡܶܬܓܰܠܝ̈ܳܢ ܟܽܠ ܟܰܣܝ̈ܳܬܳܐ܇ ܦܰܨܳܐ ܠܰܢ ܡܳܪܝ̱ ܡܶܢ ܝܰܩܕܳܢܳܐ ܕܫܰܠܗܶܒܺܝܬܳܐ܇ ܒܗܰܘ ܥܶܕܳܢܳܐ ܕܝܳܬܒܰܬ ܥܰܠ ܒܺܐܝܡ ܕܰܐܠܳܗܽܘܬܳܟ܇ ܠܳܐ ܬܰܒܗܶܬ ܠܰܢ ܩܕܳܡ ܦܰܪܨܽܘܦܳܐ ܕܰܐܠܳܗܽܘܬܳܟ܀

ܢܶܩܥܽܘܢ ܫܽܘܒܚܳܟ ܟܶܢܫ̈ܶܐ ܕܢܽܘܪܳܐ ܘܰܒܢ̈ܰܝ ܐܳܕܳܡ ܡܳܐ ܕܡܶܬܚܰܠܛܺܝܢ ܘܢܳܦܩܺܘܢ  ܠܽܐܘܪܥܳܟ ܡܳܐ ܕܕܳܢܰܚ ܐܰܢ̱ܬ܇ ܢܶܫܦܰܥ ܡܶܢܳܟ ܚܢܳܢܳܐ ܘܪ̈ܰܚܡܶܐ ܥܰܠ ܕܰܚܺܝܚܳܐ܇ ܘܒܳܟ ܢܶܬܚܰܕܰܬ ܝܽܘܩܢܳܟ ܪܰܒܳܐ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܒܩܳܠܳܐ ܝܳܐܶܐ ܘܙܳܕܶܩ

ܟܽܠ ܡܰܢ ܕܪܳܚܶܡ ܠܰܐܠܳܗܳܐ܇ ܒܰܬܪܶܝܢ ܥܳܠܡܺܝ̈ܢ ܡܶܬܢܰܨܰܚ܇ ܗܳܪܟܳܐ ܡܩܰܒܶܠ ܛܳܒ̈ܳܬܶܗ ܘܰܠܗܰܠ ܢܛܺܝܪ̈ܳܢ ܚܰܕܘ̈ܳܬܶܗ܇ ܫܽܘܒܚܳܐ܀

ܒܰܪ ܐܰܠܳܗܳܐ ܕܰܒܨܰܘܡܶܗ܇ ܚܰܘܺܝ ܕܰܗܘܳܐ ܒܰܪܢܳܫܳܐ܇ ܒܨܰܘܡܳܟ ܢܶܗܘܶܐ ܪ̈ܽܘܚܳܢܶܐ܇ ܘܢܰܡܠܶܟ ܥܰܠ ܚܰܫ̈ܰܝ ܒܶܣܪܳܐ܇ ܫܽܘܒܚܳܐ܀

ܠܳܐ ܗܘܳܐ ܠܨܰܘܡܳܐ ܕܡܶܢ ܠܰܚܡܳܐ܇ ܐܺܝܬ ܢܶܨܚܳܢ̈ܶܐ ܚܰܒܺܝ̈ܒܰܝ܇ ܐܶܠܳܐ ܠܗܰܘ ܨܰܘܡܳܐ ܕܚܰܣܝܳܟ܇ ܡܶܢ ܓܽܘܕܳܦ̈ܶܐ ܘܨܽܘܚܝ̈ܳܬܳܐ܇ ܫܽܘܒܚܳܐ܀

ܒܨܰܘܡܳܐ ܡܽܘܫܶܐ ܐܶܙܕܰܗܺܝ܇ ܘܺܐܠܺܝܳܐ ܣܠܶܩ ܠܰܫܡܰܝܳܐ܇ ܒܢ̈ܰܝ ܚܰܢܰܢܝܳܐ ܘܕܳܢܺܝܐܶܝܠ܇ ܠܒܳܒܠܳܝ̈ܶܐ ܙܟܰܘ ܒܰܨܠܽܘܬܳܐ܇ ܫܽܘܒܚܳܐ܀

 

ܩܳܠܳܐ ܕܠܺܠܝܳܐ ܒܠܺܠܝܳܐ ܢܦܰܩ ܫܶܡܥܽܘܢ

ܥܳܠܡܳܐ ܥܳܒܰܪ ܐܰܝܟ ܕܰܟܬܺܝܒ ܒܰܕܡܽܘܬ ܛܶܠܳܠܳܐ܇ ܩܽܘܡܘ̱ ܟܰܫܺܝܪ̈ܶܐ ܐܶܬܛܰܝܰܒܘ̱ ܠܽܐܘܪܥܶܗ ܕܒܰܪ ܡܰܠܟܳܐ܇ ܘܰܐܢܰܗܪ ܠܶܗ ܠܰܡܦܺܐܕܰܝ̈ܟܽܘܢ܇ ܕܶܐܫܬܰܘܕܺܝ ܠܟܽܘܢ ܓܢܽܘܢ ܢܽܘܗܪܳܐ܀

ܓܢܽܘܢ ܢܽܘܗܪܳܐ ܘܰܐܬܪܳܐ ܘܚܰܝ̈ܶܐ ܡܛܰܝܰܒ ܠܨܰܝܳܡ̈ܶܐ܇ ܚܠܳܦ ܕܰܣܒܰܠܘ̱ ܚܰܫ̈ܰܝ ܦܰܓܪܳܐ ܘܰܐܣܠܺܝܘ ܦܽܘܪܦܳܥܳܐ܇ ܛܽܘܒܰܝܟܽܘܢ ܐܳܘ ܨܰܝܳܡ̈ܶܐ ܕܰܒܓܢܽܘܢ ܚܰܝ̈ܶܐ ܡܶܬܒܰܣܡܺܝܢ ܐ̱ܢܬܽܘܢ܀

 

ܣܽܘܓܺܝܬܳܐ ܐܶܬܬܥܺܝܪ ܫܳܗܪ̈ܶܐ܇ ܥܽܘܢܺܝܬܳܐ

ܒܚܽܘܒܳܟ ܡܳܪܝ̱ ܢܶܗܘܶܐ܇ ܥܢܺܝܢܝ̱ ܒܟܽܠܥܶܕܳܢ܇ ܘܶܐܢܳܐ ܕܪܶܚܡܬܳܗ ܠܡܶܣܟܺܢܽܘܬܳܟ ܚܕܺܝܿܬ܇

ܚܰܫܳܐ ܠܪܶܥܝܳܢܝ̱ ܡܛܳܐ ܕܪܽܘܫܥܳܐ ܒܬܺܐܒܶܝܠ ܣܓܺܝ܇ ܘܟܰܪܝܽܘܬܳܐ ܐܶܬܡܰܠܝܰܬ݀܇ ܕܰܚܛܺܝܬܳܐ ܣܰܬܶܬ܀

ܩܽܘܫܬܳܐ ܡܶܢܟܽܠ ܪܕܺܝܦ܇ ܘܫܽܘܩܪܳܐ ܡܶܢ ܟܽܠ ܪܚܺܝܡ܇ ܘܟܺܐܢܽܘܬܳܐ ܫܰܢܝܰܬ݀܇ ܘܥܰܘܠܳܐ ܗܳܐ ܨܳܐܗܶܠ܀

ܣܶܦܰܬ݀ ܢܽܘܪܶܗ ܒܟܽܠ܇ ܘܓܰܘܙܰܠܬܳܐ ܕܶܠܩܰܬ݀܇ ܘܗܳܐ ܡܶܬܪܚܶܡ ܥܽܘܬܪܳܐ܇ ܐܰܝܟ ܡܰܠܟܳܐ ܒܳܟܽܘܪܣܝܶܗ܀

ܐܶܢ ܕܺܝܢܳܐ ܐܺܝܬ ܠܳܟ܇ ܕܰܗܒܳܐ ܚܰܘܺܝ ܘܩܽܘܡ܇ ܘܗܽܘ ܡܶܫܟܰܚ ܢܰܘܪܒܳܟ܇ ܘܙܰܟܳܝܳܐ ܢܶܫܟܚܳܟ܀

ܐܶܢܗܽܘ ܥܒܺܝܕ ܪܳܚܡܳܟ ܦܨܺܝܚܺܝܢ ܒܳܟ ܪ̈ܰܚܡܰܝܟ܇ ܘܶܐܢ ܓܶܕܫܰܬ݀ ܐܰܪܦܝܳܟ܇ ܘܠܳܐ ܫܠܳܡܳܟ ܫܳܐܠܺܝܢ܀

ܠܟܺܐܢܽܘܬܳܐ ܐܰܣܠܝܽܘܗܿ܇ ܕܝܰܥܢܳܐܺܝܬ ܚܳܛܦܺܝܢ܇ ܠܩܽܘܫܬܳܐ ܪܕܰܦܘ̱ ܡܶܢܗܽܘܢ܇ ܘܠܰܚܬܺܝܪ̈ܶܐ ܡܰܐܚܒܺܝܢ܀

ܩܰܢܳܝܰܘ̈ܗ̱ܝ ܐܶܬܪܚܶܡܘ̱܇ ܘܚܰܣܺܝܪ̈ܰܘܗ̱ܝ ܐܶܣܬܢܺܝܘܗ̱ܝ܇ ܕܗܽܘ ܚܳܫܶܠ ܪܶܚܡܬܳܐ܇ ܠܰܐܝܢܳܐ ܕܨܶܝܕܰܘܗ̱ܝ ܫܟܺܝܚ܀

ܪܚܺܝܡܺܝܢ ܥܰܠ ܥܳܠܡܳܐ܇ ܟܰܕ ܒܳܠܥܺܝܢ ܠܥܳܠܡܳܐ܇ ܕܡܳܡܽܘܠܳܐ ܥܒܺܝܕ ܠܗܽܘܢ ܝܳܗܽܘܒܳܐ ܕܪܶܚܡܬܳܐ܀

ܡܶܣܟܺܢܳܐ ܟܰܕ ܫܠܶܐ ܬܡܺܝܗܳܐ ܟܽܕ ܗܽܘ ܣܩܺܝܪ܇ ܘܰܙܥܽܘܪܺܝܢ ܪ̈ܳܚܡܰܘܗ̱ܝ ܟܰܕ ܚܽܘܒܶܗ ܠܳܐ ܙܥܽܘܪ܀

ܒܙܺܝܙ ܚܰܝܠܶܗ ܘܰܒܠܺܝܡ܇ ܛܠܺܝܡ ܐܰܓܪܶܗ ܘܰܣܩܺܝܪ܇ ܘܡܰܐܩܶܦ ܢܰܦܫܶܗ ܠܟܽܠ܇ ܘܥܳܪܩܺܝܢ ܡܶܢܶܗ ܟܽܠ܀

ܡܰܪܟܶܢ ܪܺܝܫܶܗ ܠܟܽܠ܇ ܘܰܩܕܳܡ ܟܽܠܢܳܫ ܟܦܺܝܦ ܘܒܰܫܠܳܡܶܗ ܪܳܛܢܺܝܢ܇ ܐܰܝܟ ܗܰܘ ܥܰܬܺܝܪܰܐܗ̱ܘ܀

ܕܰܗܒܳܐ ܠܟܽܠܢܳܫ ܚܛܰܦ܇ ܘܒܶܗ ܟܽܠ ܐ̱ܢܳܫ ܐܶܬܥܘܰܪ܇ ܘܒܰܚܙܳܬܶܗ ܐܶܬܢܓܶܕܘ̱܇ ܘܛܳܥܶܐ ܒܶܗ ܥܳܠܡܳܐ܀

ܫܽܘܩܪܳܐ ܟܰܕ ܦܳܩܕܺܝܢ܇ ܥܰܬܺܝܪܳܐ ܦܐܶܐ ܠܗܽܘܢ܇ ܕܰܒܕܰܗܒܳܐ ܡܨܰܒ̈ܬܳܢ܇ ܡܶܠ̈ܰܝ̈ ܣܶܦܘ̈ܳܬܗܽܘܢ܀

ܠܕܰܗܒܳܐ ܨܗܶܐ ܠܶܒܗܽܘܢ܇ ܘܰܦܬܺܝܚܳܐ ܟܰܪܣܽܗܘܢ܇ ܘܰܟܡܳܐ ܕܢܰܣܓܶܐ ܠܗܽܘܢ܇ ܨܶܗܝܳܐ ܡܰܘܣܶܦ ܠܗܽܘܢ܀

ܟܡܳܐ ܕܟܶܣܦܳܐ ܡܶܬܩܢܶܐ܇ ܠܟܶܣܦܳܐ ܐ̱ܚܪܺܢܳܐ ܨܗܶܐ. ܘܰܕܡܳܐ ܠܚܰܡܪܳܐ ܕܗܽܘ܇ ܡܶܢ ܚܰܒܪܶܗ ܡܶܬܒܠܰܥ܀

ܒܚܽܘܒܶܗ ܫܳܒܶܐ ܠܗܽܘܢ ܘܠܶܗ ܒܰܠܚܽܘܕ ܢܶܬܪܡܽܘܢ܇ ܘܨܶܦܬܶܗ ܡܰܥܒܰܪ ܠܗܽܘܢ܇ ܕܒܰܨܪܰܪܗܽܘܢ ܢܶܬܥܦܶܦ܀

ܥܰܘܠܳܐ ܚܠܳܦ ܣܶܦܪܳܐ܇ ܘܩܰܒܪܳܐ ܚܠܳܦ ܣܳܦܪܳܐ ܠܳܐܶܝܢ ܟܰܕ ܡܰܠܦܺܝܢ܇ ܕܡܶܢܟܽܠ ܨܪܺܝܟܺܝܢܰܢ܀

ܬܰܘܕܺܝ ܠܗܰܘ ܕܒܰܣܪܳܗܿ܇ ܠܝܰܥܢܽܘܬܳܐ ܒܡܰܘܬܶܗ܇ ܘܰܡܠܰܟ ܠܡܶܣܟܺܢ̈ܶܐ܇ ܛܽܘܒ̈ܶܐ ܕܠܳܐ ܦܳܛܪܺܝܢ܀

ܥܰܘܠܰܐܗ̱ܘ ܡܰܫܦܰܪ ܠܗܽܘܢ܇ ܠܕܰܗܒܳܐ ܨܶܝܕ ܣܰܟ̈ܠܶܐ܇ ܘܩܰܒܪܳܐ ܡܰܐܟܶܣ ܠܗܽܘܢ ܥܰܠ ܕܰܩܢܰܘ ܕܰܗܒܳܐ܀

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܢܽܘܗܪܳܐ ܫܳܪܶܝܢ ܙܰܕܺܝ̈ܩܶܐ ܘܝܳܪܬܺܝܢ ܚܰܝ̈ܶܐ ܘܡܰܠܟܽܘܬܳܐ܇ ܘܨܰܝܳܡ̈ܶܐ ܒܶܝܬ ܡܰܠܟܽܘܬܳܐ܀

ܡܶܬܒܰܣܡܺܝܢ ܕܠܳܐ ܫܽܘܠܳܡܳܐ܇ ܗܰܒܠܰܢ ܪܳܚܶܡ ܬܰܝܳܒ̈ܶܐ܇ ܕܫܰܘܬܳܦ̈ܶܐ ܕܺܝܠܗܽܘܢ ܢܶܗܘܶܐ܀

ܡܫܰܒܚܺܝܢ ܠܳܟ ܡܳܪܝ̱ ܙܰܕܺܝ̈ܩܶܐ ܒܰܐܳܘܳܢ̈ܶܐ ܡܰܠܝܰܝ̈ ܢܽܘܗܪܳܐ܇ ܘܰܡܒܰܪܟܺܝܢ ܠܳܟ ܬܰܝܳܒ̈ܶܐ܇ ܒܰܓܢܽܘܢ ܢܽܘܗܪܳܐ ܕܚܰܕܘ̈ܳܬܳܐ ܘܒܳܥܶܝܢ ܡܶܢܳܟ ܚܰܛܳܝ̈ܶܐ܇ ܚܽܘܢ ܐܶܢܽܘܢ ܕܰܢܫܽܒܚܽܘܢܳܟ܀

 

ܕܨܰܦܪܳܐ ܕܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܥܰܕܠܳܐ ܢܺܐܙܠܽܘܢ ܚܰܘܒܰܝ̈

ܐܶܡܰܪ ܡܳܪܰܢ ܠܰܚܡܳܐ ܘܡܰܝ̈ܳܐ ܡܢܳܬܳܐ ܕܦܰܓܪܳܐ܇ ܘܡܶܠܬܶܗ ܐܺܝܬܶܝܗܿ ܚܰܝ̈ܶܐ ܕܢܰܦܫܳܐ ܪ̈ܽܘܚܳܢܳܝܶܐ܇ ܐܶܬܪܰܚܰܡ ܥܠܰܝܢ. ܒܗܳܢܳܐ ܙܰܒܢܳܐ ܢܰܦܫܳܐ ܟܪܺܝܗܬܳܐ ܡܶܬܚܰܠܡܳܐ ܒܶܗ܇ ܬܰܘ ܨܰܝܳܡ̈ܶܐ ܠܬܰܪܥܶܗ ܕܳܐܣܝܳܐ ܥܨܽܘܒܘ̱ ܫܽܘܚܢܰܝ̈ܟܽܘܢ ܐܶܬܪܰܚܰܡܥܠܰܝܢ܀

ܥܰܠ ܡܶܣܟܺܢ̈ܶܐ ܫܕܰܘ ܙܶܕܩ̈ܳܬܳܐ ܘܣܰܒܘ̱ ܡܰܠܟܽܘܬܳܐ܇ ܕܢܶܬܶܠ ܨܳܒܶܐ ܥܶܠܬܳܐ ܗܰܘ ܒܳܥܶܐ ܕܢܶܪܕܶܐ ܓܰܙܶܗ ܐܶܬܪܰܚܰܡܥܠܰܝܢ܀

ܫܕܺܝ ܠܰܣܢܺܝܩ̈ܶܐ ܡܶܢ ܬܰܘܬܳܪܳܐ ܕܰܚܫܳܡܺܝܬܳܟ܇ ܘܙܶܠ ܐܶܬܒܰܣܰܡ ܥܰܡ ܠܳܥܳܙܳܪ ܨܶܝܕ ܐܰܒܰܪܳܗܳܡ܀

ܦܬܰܚ ܠܰܐܟܣܢܳܝ̈ܶܐ ܬܰܪܥܶܗ ܕܒܰܝܬܳܟ ܚܰܒܺܝܒܳܐܺܝܬ܇ ܘܟܽܠܗܽܘܢ ܬܰܪ̈ܥܶܐ ܕܒܶܝܬ ܡܰܠܟܽܘܬܳܐ ܡܶܬܦܰܬܚܺܝܢ ܠܳܟ܇ ܐܶܬܪܰܚܰܡܥܠܰܝܢ܀

ܚܣܰܟܬܳܝܗ̱ܝ ܡܶܢܳܟ ܗܰܒܳܝܗ̱ܝ ܠܰܐܝܢܳܐ ܕܟܰܦܢܳܐ ܟܰܪܣܶܗ܇ ܕܰܒܝܰܕ ܨܰܘܡܳܐ ܬܪܶܝܢ ܝܽܘܬܪ̈ܳܢܺܝܢ ܢܶܫܟܚܽܘܢ ܠܳܟ ܐܶܬܪܰܚܰܡܥܠܰܝܢ܀

 

ܕܰܐܠܳܗܝ̱ ܐܰܠܗܳܝ̱ ܒܩܳܠܳܐ ܗܰܘ ܕܥܽܘܗܕܳܢܳܐ

ܡܫܺܝܚܳܐ ܐܰܠܳܗܳܐ ܗܰܘ ܕܰܠܫܶܡܥܽܘܢ܇ ܝܰܡܺܝܢܳܐ ܕܪ̈ܰܚܡܶܐ ܐܰܘܫܶܛܬ܇ ܘܡܶܢ ܓܰܠ̈ܠܶܐ ܕܝܰܡܳܐ ܕܰܐܠܺܝܬ܇ ܠܘܳܬܳܟ܀

ܗܰܘ ܕܰܫܡܰܥ ܗܘܳܐ ܠܚܶܙܰܩܝܳܐ ܡܰܠܟܳܐ܇ ܘܰܒܝܰܕ ܨܠܽܘܬܶܗ ܦܰܨܺܝ ܗܘܳܐ܇ ܠܽܐܘܪܺܫܠܶܡ ܡܶܢ ܣܰܢܚܶܪܺܝܒ܇ ܠܘܳܬܳܟ܀

ܡܫܺܝܚܳܐ ܐܰܠܳܗܳܐ ܕܰܒܝܰܕ ܨܰܘܡܳܐ܇ ܠܥܺܕܬܳܐ ܡܟܺܝܪܬܶܗ ܗܳܐ ܡܨܰܒܰܬ܇ ܒܬܶܫܡܶܫܬܳܐ ܕܟܽܠ ܩܺܝܢ̈ܳܬܳܐ܇ ܠܘܳܬܳܟ܀

ܒܪܺܝܟ ܗܽܘ ܕܝܰܗܒܠܰܢ܇ ܨܰܘܡܳܐ ܩܰܕܺܝܫܳܐ܇ ܕܢܶܪܕܶܐ ܒܳܬܪܶܗ ܘܒܰܫܒܺܝܠܰܘ̈ܗ̱ܝ܇ ܘܢܺܐܙܰܠ ܒܳܬܰܪ ܥܶܩܒ̈ܳܬܶܗ ܠܘܳܬܳܟ܀

ܡܫܺܝܚܳܐ ܐܰܠܳܗܳܐ܇ ܕܰܦܣܰܩ ܘܰܫܪܳܐ܇ ܠܰܐܣܽܘܪ̈ܶܐ ܕܟܽܠ ܚܰܛܳܝ̈ܶܐ܇ ܕܰܒܥܰܘ ܡܶܢܶܗ ܫܽܘܒܩܳܢܳܐ ܠܘܳܬܳܟ܀

ܗܰܘ ܕܰܒܨܰܘܡܳܐ ܘܒܰܨܠܽܘܬܳܐ ܡܰܢܰܥ܇ ܠܩܰܕܺܝ̈ܫܶܐ ܠܘܳܬ ܣܽܘܟܳܝܗܽܘܢ܇ ܐܰܫܘܳܐ ܠܟܽܠܰܢ ܕܰܒܨܰܘܡܳܐ ܢܶܫܬܘܶܐ ܠܪ̈ܰܚܡܶܐ ܕܒܰܣܺܝܡܽܘܬܳܟ܀

 

ܕܰܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܠܳܐ ܬܶܥܽܘܠ ܠܕܺܝܢܳܐ

ܫܽܘܒܚܳܐ ܠܛܰܝܒܽܘܬܳܟ܇ ܚܳܢܰܬ ܠܚܰܛܳܝ̈ܶܐ܇ ܫܽܘܒܚܳܐ ܠܡܽܘܟܳܟܳܟ܇ ܕܰܐܩܺܝܡ ܣܚܺܝܦܽܘܬܰܢ܀

ܡܳܐ ܕܩܳܝܡܺܝܢ ܚܰܘܒ̈ܰܝܢ܇ ܩܕܳܡܰܝܟ ܕܰܝܳܢܳܐ܇ ܡܰܠܶܠ ܚܠܳܦܰܝ ܐܰܢ̱ܬ܇ ܣܢܺܐܓܪܳܐ ܕܒܳܟ ܛܶܦܣܿܶܬ܀

ܟܺܐܢܳܐ ܡܠܶܐ ܪ̈ܰܚܡܶܐ܇ ܕܰܟܦܶܢ ܒܓܰܘ ܕܰܒܪܳܐ܇ ܘܰܨܗܺܝ ܒܨܶܒܝܳܢܶܗ܇ ܕܢܶܦܪܽܘܩ ܠܒܶܝܬ ܐܳܕܳܡ܀

ܓܶܦ̈ܖܐ ܪ̈ܽܘܚܳܢܶܐ܇ ܩܳܢܶܝܢ ܨܰܝܳܡ̈ܶܐ܇ ܘܦܳܪܚܺܝܢ ܐܰܝܟ ܝܰܘܢ̈ܶܐ܇ ܠܽܐܘܪܥܶܗ ܕܒܰܪ ܡܰܠܟܳܐ܀

ܩܰܠܺܝܠ ܗܽܘ ܪܶܗܛܶܗ܇ ܕܨܰܘܡܳܐ ܩܰܕܺܝܫܳܐ܇ ܘܰܠܢܰܦܫܳܐ ܡܙܰܗܶܐ܇ ܘܰܠܦܰܓܪܳܐ ܡܩܰܕܶܫ܀

ܒܪܺܝܟ ܕܰܡܣܰܝܒܰܪ ܠܰܢ܇ ܐܶܡܰܬܝ ܕܚܳܛܶܝܢܰܢ܇ ܒܪܺܝܟ ܕܰܡܩܰܒܶܠ ܠܰܢ ܐܶܡܰܬܝ ܕܬܳܝܒܺܝܢܰܢ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܡܫܺܝܚܳܐ ܕܰܡܠܰܟ ܢܽܘܚܳܡܳܐ

ܐܰܪܒܥܺܝܢ ܝܰܘܡ̈ܺܝܢ ܒܶܠܥܰܬ݀ ܗܘܳܬ݀܇ ܐܰܪܥܳܐ ܒܫܰܒܛܳܐ ܕܡܳܡܽܘܠܳܐ܇ ܟܰܕ ܡܶܬܢܰܓܕܳܐ ܘܡܶܫܬܰܢܩܳܐ܇ ܡܶܢ ܕܰܝܳܢܳܐ ܕܟܺܐܢܽܘܬܳܐ܀

ܐܰܪܒܥܺܝܢ ܝܰܘܡ̈ܺܝܢ ܟܰܬܰܪ ܢܽܘܚ܇ ܒܩܺܐܒܽܘܬܳܐ ܒܛܽܘܪ̈ܰܝ ܩܰܪܕܽܘ܇ ܘܗܳܝܕܶܝܢ ܦܬܰܚ ܟܰܘܬܳܐ ܘܫܰܕܰܪ܇ ܐܺܝܙܓܰܕ̈ܶܐ ܕܢܶܚܙܽܘܢ ܠܰܐܪܥܳܐ܀

ܐܰܪܒܥܺܝܢ ܝܰܘܡ̈ܺܝܢ ܨܳܡ ܡܽܘܫܶܐ܇ ܒܛܽܘܪܳܐ ܕܣܺܝܢܰܝ ܘܶܐܙܕܰܗܺܝ܇ ܘܩܰܒܶܠ ܦܽܘܩܕܳܢ̈ܶܐ ܠܥܰܡܳܐ܇ ܘܰܐܣܺܝ ܠܰܡܚܽܘܬܳܐ ܕܚܶܘܝܳܐ܀

ܐܰܝܕܳܐ ܕܝܳܠܕܳܐ ܬܽܘܒ ܢܶܩܒܬܳܐ܇ ܠܰܐܪܒܥܺܝܢ ܐܰܪܒܥܺܝܢ ܕܬܶܬܕܰܟܶܐ܇ ܘܬܶܗܘܶܐ ܡܰܝܬܝܳܐ ܩܽܘܪ̈ܒܳܢܶܐ܇ ܠܡܳܪܝܳܐ ܠܒܶܝܬ ܡܰܫܟܰܢ ܙܰܒܢܳܐ܀

ܐܰܪܒܥܺܝܢ ܝܰܘܡ̈ܺܝܢ ܓܙܰܡ ܥܽܘܪܠܳܐ܇ ܥܰܠ ܥܶܒܪ̈ܳܝܶܐ ܘܰܒܫܽܘܠܳܡ܇ ܡܶܢܝܳܢܳܐ ܡܶܢ ܕܰܘܺܝܕ ܕܢܰܚ ܠܟܽܠܶܗ ܥܰܡܳܐ ܦܽܘܪܩܳܢܳܐ܀

 

ܩܳܠܳܐ ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܥܰܕܠܳܐ ܢܺܐܙܠܽܘܢ ܚܰܘܒ̈ܰܝ

ܩܳܠܳܐ ܕܨܰܦܪܳܐ: ܦܬܰܚ ܠܺܝ ܬܰܪܥܶܗ ܕܰܚܢܳܢܳܐ

ܙܰܒܢܰܐܗ̱ܘ ܕܰܡܠܶܐ ܥܳܩ̈ܳܬܳܐ܇ ܐܶܬܟܰܫܰܪ ܒܶܗ ܚܰܛܳܝ̈ܶܐ ܘܬܽܘܒܘ̱܇ ܛܪܽܘܕܘ̱ ܫܶܢܬܳܐ ܡܶܢ ܥܰܝܢܰܝ̈ܟܽܘܢ܇ ܘܡܶܢ ܪܶܥܝܳܢܟܽܘܢ ܦܽܘܠܳܓ̈ܶܐ܇ ܘܚܽܘܬܰܘ̱ ܠܰܐܓܽܘܢܳܐ ܥܰܡ ܒܺܝܫܳܐ܇ ܣܰܒܘ̱ ܠܟܽܘܢ ܡܶܢܶܗ ܙܳܟܽܘܬܳܐ܇ ܕܢܶܚܕܽܘܢ ܡܰܠܰܐܟ̈ܶܐ܇ ܒܣܰܒܪܳܐ ܕܰܗܘܳܐ ܠܬܰܝܳܒ̈ܶܐ܀

ܪܰܒ ܦܽܘܪܥܳܢܳܐ ܕܙܰܕܺܝ̈ܩܶܐ܇ ܘܥܰܠ ܠܶܒܳܐ ܕܒܰܪܢܳܫܳܐ ܠܳܐ ܣܠܶܩ܇ ܒܗܰܘ ܝܰܘܡܳܐ ܓܶܝܪ ܝܳܕܥܺܝܢ ܠܶܗ܇ ܙܰܕܺܝ̈ܩܶܐ ܕܒܶܗ ܗܽܘ ܡܶܬܒܰܣܡܺܝܢ܇ ܘܟܰܕ ܪܳܘܙܺܝܢ ܒܰܟܠܺܝܠܰܝ̈ܗܽܘܢ܇ ܡܝܰܒܒܺܝܢ ܩ̈ܳܠܶܐ ܕܬܰܘܕܺܝܬܳܐ܇ ܒܪܺܝܟ ܐܰܢ̱ܬ ܒܰܪ ܡܰܠܟܳܐ܇ ܕܠܳܐ ܒܳܗܬܺܝܢ ܕܰܡܣܰܒܰܪܺܝܢ ܒܳܟ܀

 

ܐ̱ܚܪܺܢܳܐ ܒܩܳܠܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝܕ̈ܶܐ

ܠܡܽܘܫܶܐ ܘܠܺܐܠܳܝܳܐ ܬܰܪܣܺܝܬ܇ ܐܰܪܒܥܺܝܢ ܝܰܘܡ̈ܺܝܢ ܕܠܳܐ ܠܰܚܡܳܐ ܐܳܦܠܰܢ ܦܺܐܪ̈ܶܐ ܕܰܨܠܰܘ̈ܳܬܳܐ ܢܡܰܠܽܘܢ ܕܽܘܟܰܬ ܡܶܐܟܽܘܠܬܳܐ ܨܰܘܡܳܐ ܢܗܶܐ ܦܓܽܘܕܳܐ ܠܦܰܓܪܳܐ܇ ܕܪܽܘܚܳܐ ܬܶܣܛܺܝܘܗ̱ܝ ܠܨܶܒܝܳܢܳܟ܀

ܕܽܘܡܳܪܰܐܗ̱ܘ ܠܰܐܝܢܳܐ ܕܨܳܐܶܡ܇ ܕܰܐܠܳܗܳܐ ܟܦܶܢ ܠܰܚܙܳܬܶܗ܇ ܕܽܘܡܳܪܳܐ ܕܰܐܝܢܳܐ ܕܨܳܗܶܐ܇ ܕܰܐܠܳܗܳܐ ܨܗܶܐ ܠܰܚܙܳܬܶܗ܇ ܠܳܟ ܫܽܘܒܚܳܐ ܕܰܒܟܽܠ ܥܶܕܳܢ ܠܡܰܘܪܳܒܽܘܬܰܢ ܨܳܒܶܐ ܐܰܢ̱ܬ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܳܡܪܳܐ ܒܟܺܐܒܶܝ̈ܗܿ ܢܰܦܫܳܐ ܟܪܺܝܗܬܳܐ ܡܰܢ ܕܶܝܢ ܝܰܗܒ ܠܺܝ܇ ܗܳܠܶܝܢ ܫܽܘܦܪ̈ܶܐ ܕܰܠܒܺܝܫܳܐ ܗܘܺܝܿܬ ܥܰܕܠܳܐ ܐܶܚܛܶܐ܇ ܐܶܢ ܐܰܠܳܗܳܐ ܕܺܐܝܬ ܠܶܗ ܪ̈ܰܚܡܶܐ ܡܩܰܒܶܠ ܗܽܘ ܠܺܝ܇ ܘܫܽܘܦܪ̈ܰܝ ܕܶܐܒܰܕܘ̱ ܡܰܢܽܘ ܡܶܫܟܰܚ ܕܰܢܦܰܢܶܐ ܠܺܝ܀

ܬܳܝ ܠܶܟܝ̱ ܢܰܦܫܳܐ ܨܽܘܪܰܬ ܡܰܠܟܳܐ ܕܶܐܒܰܕ ܫܽܘܦܪܶܟܝ̱ ܕܗܽܘ ܒܺܐܝܕܰܘ̈ܗ̱ܝ ܗܽܘ ܕܡܳܪܶܟܝ̱ ܫܽܘܦܪܶܟܝ̱ ܘܰܢܛܺܝܪ ܗܽܘ ܠܶܟܝ̱܇ ܘܡܶܚܕܳܐ ܕܬܺܐܬܶܝܢ ܝܳܗܶܒ ܗܽܘ ܠܶܟܝ̱ ܐܰܝܟ ܕܶܐܫܬܰܘܕܺܝ܇ ܕܣܰܓܺܝ ܙܗܺܝܪ ܒܶܗ ܘܠܶܟܝ̱ ܗܽܘ ܢܛܺܝܪ ܗܽܘ ܕܢܶܬܦܰܢܶܐ ܠܶܟܝ̱܀

 

ܕܰܬܠܳܬܫܳܥܺܝ̈ܢ ܒܩܳܠܳܐ ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ

ܒܨܰܘܡܳܐ ܡܶܙܕܰܗܝܳܐ ܢܰܦܫܳܐ ܘܩܳܢܝܳܐ ܫܽܘܦܪ̈ܶܐ܇ ܕܪܳܡܶܝܢ ܡܶܢ ܗܰܘܢܳܐ܇ ܣܳܗܶܕ ܡܽܘܫܶܐ ܕܶܐܙܕܰܗܺܝ܇ ܦܰܪܨܽܘܦܶܗ ܒܛܽܘܪܳܐ ܕܣܺܝܢܰܝ܇ ܘܥܰܡ ܡܳܪܝܳܐ ܒܛܽܘܪܳܐ ܡܰܠܶܠ܇ ܘܩܰܒܶܠ ܡܶܢܶܗ ܠܽܘܚ̈ܶܐ ܕܢܳܡܽܘܣܳܐ܀

ܫܽܘܒܚܳܐ ܢܰܣܶܩ ܠܶܗ ܠܰܐܒܳܐ ܕܰܐܠܶܦ ܨܰܘܡܳܐ܇ ܠܰܒܢ̈ܰܝ ܥܶܢܝܳܢܶܗ܇ ܘܠܰܒܪܶܗ ܝܶܫܽܘܥ ܬܰܘܕܺܝܬܳܐ ܕܚܰܘܺܝ ܨܰܘܡܳܐ ܒܰܩܢܽܘܡܶܗ܇ ܠܪܽܘܚܳܐ ܕܩܽܘܕܫܳܐ ܗܽܘܠܳܠܳܐ ܕܗܽܘܝܽܘ ܡܚܰܝܶܠ ܠܟܽܠܗܽܘܢ ܨܰܝܳܡ̈ܶܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܪܽܘܚܳܐ ܕܒܽܘܣܳܡ̈ܶܐ܇ ܢܳܫܒܳܐ ܒܦܰܪܕܰܝܣܳܐ܇ ܘܪܺܝܚܳܐ ܕܗܶܪ̈ܽܘܡܶܐ܇ ܝܳܗܒܳܐ ܠܨܰܝ̈ܳܡܶܐ܇ ܚܰܕܳܐ ܦܳܪܽܘܩܰܢ ܥܰܡܗܽܘܢ ܒܰܓܢܽܘܢܳܐ܀

ܐܳܐܰܪ ܕܢܽܘܚܳܡܳܐ܇ ܪܳܣܡܳܐ ܠܗܽܘܢ ܛܰܐܠܳܐ܇ ܕܚܰܕܘ̈ܳܬܳܐ ܠܗܽܘܢ ܡܰܦܨܰܚ ܒܫܽܘܦܪܶܗ܇ ܒܗܰܘ ܝܰܘܡܳܐ ܚܽܘܢܰܝܢܝ̱ ܝܶܫܽܘܥ ܡܠܶܐ ܪ̈ܰܚܡܶܐ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܣܳܗܕ̈ܶܐ ܦܬܰܚ ܓܰܙܰܝ̈ܟܽܘܢ

ܗܳܢܰܘ ܨܰܘܡܳܐ ܩܰܕܺܝܫܳܐ܇ ܕܙܶܡܪܰܬ݀ ܪܽܘܚܳܐ ܒܰܢܒܺܝܳܐ܇ ܘܰܐܠܶܦ ܠܰܢ ܥܰܠ ܕܽܘܒܳܪ̈ܰܘܗ̱ܝ܇ ܕܰܢܨܽܘܡ ܐ̱ܢܳܫ ܡܶܢ ܒܺܝܫ̈ܳܬܳܐ܇ ܘܰܚܣܳܡܳܐ ܘܡܶܐܟܰܠܩܰܪܨܳܐ܇ ܘܗܳܢܰܘ ܨܰܘܡܳܐ ܩܰܕܺܝܫܳܐ ܗ ܘ ܗ ܕܰܡܙܰܗܶܐ ܢܰܦܫܳܐ ܘܦܰܓܪܳܐ܀

ܝܳܕܰܥ ܐ̱ܢܳܐ ܕܟܽܠܗܽܘܢ ܝܰܘܡ̈ܰܝ܇ ܒܰܚܛܳܗ̈ܶܐ ܐܰܦܩܶܬ ܐܶܢܽܘܢ܇ ܘܠܰܬܝܳܒܽܘܬܳܐ ܠܳܐ ܐܶܬܦܢܺܝܿܬ܇ ܡܳܪܳܐ ܕܣܺܓܺܝܐܺܝܢ ܪ̈ܰܚܡܰܘܗ̱ܝ܇ ܘܰܒܝܽܘܡ ܕܺܝܢܳܟ ܪܰܚܶܡܥܠܰܝ܇ ܘܰܐܩܺܝܡܰܝܢܝ̱ ܡܶܢ ܝܰܡܺܝܢܳܟ܇ ܗ ܘ ܗ ܒܰܝܢܳܬ ܟܽܠܗܽܘܢ ܩܰܕܺܝܫ̈ܰܝܟ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܟܡܳܐ ܚܳܐܰܪ ܐ̱ܢܳܫ ܒܰܐܠܳܗܳܐ܇ ܕܢܶܚܛܶܐ ܠܠܰܓܡܳܪ ܠܳܐ ܡܶܫܟܰܚ܇ ܕܚܰܠ ܗܳܟܺܝܠ ܡܶܢ ܕܰܠܡܶܚܛܳܐ܇ ܘܰܗܘܺܝ ܬܰܝܳܒܳܐ ܒܰܥܓܰܠ܀

ܩܽܘܪܒܳܢܳܐ ܣܰܪܝܳܐ ܡܶܢܳܟ܇ ܠܰܡܪܰܝܡܳܐ ܠܳܐ ܢܶܬܩܰܪܰܒ܇ ܐܰܝܟ ܕܶܒܚܳܐ ܣܰܪܝܳܐ ܐܺܝܬܰܘܗ̱ܝ܇ ܨܰܘܡܳܐ ܕܰܚܠܺܝܛ ܒܶܗ ܚܣܳܡܳܐ܀

 

ܕܰܬܫܰܥܫܳܥܺܝ̈ܢ ܒܩܳܠܳܐ ܛܽܘܒܰܝܟܝ̱ ܥܺܕܬܳܐ

ܛܽܘܒܰܘܗ̱ܝ ܠܰܐܝܢܳܐ܇ ܕܰܒܨܰܘܡܳܐ ܡܰܟܶܟ ܢܰܦܫܶܗ܇ ܘܒܰܨܠܽܘܬܳܐ ܘܰܒܒܳܥܽܘܬܳܐ܇ ܐܶܬܬܰܓܰܪ ܠܶܗ ܡܰܠܟܽܘܬܳܐ܇ ܕܗܳܘܶܐ ܚܰܒܪܳܐ ܠܡܰܠܰܐܟ̈ܶܐ܇ ܘܥܰܡ ܪ̈ܽܘܚܳܢܶܐ ܡܶܬܒܰܣܰܡ܇ ܘܫܳܡܰܥ ܠܶܗ ܠܗܳܝ ܒܰܪܬ ܩܳܠܳܐ܇ ܕܩܳܪܝܳܐ ܠܓܰܒܳܐ ܕܝܰܡܺܝܢܳܐ܇ ܕܬܰܘ ܥܽܘܠܘ̱ ܝܺܪܰܬܘ̱ ܡܰܠܟܽܘܬܳܐ܇ ܘܚܰܝ̈ܶܐ ܡܠܺܝ̈ܟܶܐ ܕܰܠܥܳܠܰܡ܀

ܩܰܒܶܠ ܡܳܪܰܢ ܬܰܟܫܶܦܬܳܗܿ ܕܥܺܕܰܬ ܩܽܘܕܫܳܐ ܕܰܒܚܰܫܳܐ ܘܰܒܳܟܰܪܝܽܘܬܳܐ܇ ܡܩܰܪܒܳܐ ܦܝܳܣܳܐ ܠܪܰܒܽܘܬܳܟ܇ ܘܰܐܝܟ ܕܰܡܥܳܕܳܐ ܬܶܫܬܰܝܰܢ ܘܬܶܬܪܰܥܶܐ ܠܰܢ ܟܺܐܢܽܘܬܳܟ܇ ܘܰܐܥܒܰܪ ܡܶܢܰܢ ܡܰܘܬܳܢܳܐ ܕܪܳܥܶܐ ܠܰܢ ܪܺܝܫܳܐ ܪܺܝܫܳܐ܇ ܘܗܰܒܠܰܢ ܡܳܪܰܢ ܒܰܚܢܳܢܳܟ܇ ܫܽܘܒܩܳܢ ܚܰܘܒ̈ܶܐ ܘܰܚܛܳܗ̈ܶܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܗܳܠܶܝܢ ܪ̈ܰܚܡܶܐ ܕܰܒܪܰܝܬܳܢ܇ ܒܗܽܘܢ ܐܰܚܳܐ ܠܰܢ ܚܰܢܳܢܳܐ܇ ܛܰܝܒܽܘܬܳܟ ܡܳܪܝ̱ ܬܰܩܶܢܬܳܢ܇ ܠܳܐ ܬܰܪܕܶܐ ܠܰܢ ܟܺܐܢܽܘܬܳܟ܇ ܛܰܝܒܽܘܬܳܟ ܬܩܽܘܡܝ̱ ܒܰܐܦܰܝ̈ܢ܇ ܒܗܳܢ ܥܳܠܡܳܐ ܘܰܒܗܰܘ ܕܰܥܬܺܝܕ܀

ܕܠܳܐ ܫܽܘܚܢ̈ܶܐ ܕܰܡܡܰܚܰܝ̈ܳܐ܇ ܐܳܦܠܳܐ ܐܳܣܝܳܐ ܡܶܬܢܰܨܰܚ܇ ܘܰܕܠܳܐ ܚܛܳܗ̈ܶܐ ܕܰܚܛܳܗ̈ܶܐ܇ ܘܳܐܦܠܳܐ ܪ̈ܰܚܡܰܝܟ ܡܶܬܝܰܕܥܺܝܢ܇ ܚܢܳܢܳܟ ܡܳܪܰܢ ܐܰܫܦܰܥ ܠܰܢ܇ ܘܪ̈ܰܚܡܰܝܟ ܥܰܠ ܟܽܠܰܢ ܢܶܗܘܽܘܢ܀

 

ܫܠܶܡ

 

ܬܽܘܒ ܕܪܰܡܫܳܐ ܕܰܥܪܽܘܒܬܳܐ ܕܬܰܪܬܶܝܢ ܕܨܰܘܡܳܐ

ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܐܰܢ̱ܬ ܕܳܠܰܒܬܽܘܠܬܳܐ ܡܰܪܝܰܡ

ܛܰܝܒܽܘܬܳܟ ܬܶܬܟܰܫܰܦܝ̱܇ ܘܬܶܫܡܰܥܝ̱ ܦܝܳܣܳܗܿ ܟܺܐܢܽܘܬܳܟ܇ ܘܰܒܝܰܕ ܪ̈ܰܚܡܶܐ܇ ܐܶܫܬܰܘܶܐ ܠܫܽܘܒܩܳܢ ܚܰܘܒ̈ܳܬܰܢ ܐܰܠܳܗܳܐ܀

ܝܳܕܰܥ ܐܰܢ̱ܬ ܠܰܟܝܳܢܰܢ܇ ܕܰܨܠܳܐ ܠܚܰܘܒ̈ܶܐ ܒܟܽܠܥܶܕܳܢ܇ ܒܝܰܕ ܫܽܘܒܩܳܢܳܟ܇ ܚܽܘܢ ܠܰܢ ܘܶܐܬܪܰܚܰܡܥܠܶܝܢ ܐܰܠܳܗܳܐ܀

ܐܰܠܳܗܳܐ ܕܶܐܬܬܰܚܬܺܝ ܘܰܗܘܳܐ ܐ̱ܢܳܫ ܚܠܳܦ ܐ̱ܢܳܫ̈ܳܐ܇ ܠܳܐ ܡܳܪܝ̱ ܬܰܗܡܶܐ ܡܶܢ ܚܰܛܳܝ̈ܶܐ ܕܩܳܪܶܝܢ ܠܳܟ ܐܰܠܳܗܳܐ܀

ܐܰܢ̱ܬ ܡܳܪܝ̱ ܕܺܐܝܬܰܝܟ ܨܶܡܚܳܐ܇ ܐܳܦ ܫܶܡܫܳܐ ܕܙܰܕܺܝܩܽܘܬܳܐ܇ ܐܰܢܗܰܪ ܠܰܢ ܐܳܦ܇ ܒܰܥܒܳܕ̈ܶܐ ܕܰܡܝܰܬܪܽܘܬܳܐ܀

ܡܳܐ ܦܐܶܐ ܘܰܪܓܺܝܓ ܨܰܘܡܳܐ܇ ܛܽܘܒ ܠܰܐܝܢܳܐ ܕܡܶܬܟܰܫܰܪ ܒܶܗ܇ ܕܒܶܗ ܙܟܳܐ ܡܳܪܰܢ ܠܳܐܟܶܠܩܰܪܨܳܐ ܡܳܪܽܘܕܳܐ ܐܰܠܳܗܳܐ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܡܫܺܝܚܳܐ ܐܶܬܺܝܠܶܕ

ܟܡܳܐ ܡܥܰܕܰܪ ܘܡܰܘܬܰܪ܇ ܨܰܘܡܳܐ ܚܰܒܺܝ̈ܒܰܝ܇ ܘܣܳܗܶܕ ܡܰܬܽܘܫܠܰܚ܇ ܕܒܶܗ ܐܶܬܢܰܨܰܚ ܒܕܰܟܝܽܘܬܳܐ܇ ܘܒܶܗ ܫܺܝܬ ܫܰܦܺܝܪܳܐ ܙܟܳܐ ܠܪܶܓܬܳܐ ܒܺܝܫܬܳܐ܇ ܡܶܢ ܦܰܓܪܳܐ ܕܺܝܠܶܗ܇ ܘܒܶܗ ܚܢܽܘܟ ܐܶܬܚܛܶܦ ܠܰܫܡܰܝܳܐ܀

ܟܡܳܐ ܪܰܒ ܘܰܡܝܰܬܰܪ܇ ܨܰܘܡܳܐ ܕܕܰܟܝܽܘܬܳܐ܇ ܘܣܳܗܶܕ ܐܰܒܪܳܗܳܡ܇ ܕܒܶܗ ܢܰܦܫܶܗ ܐܶܫܬܰܘܙܰܒܬ ܗܘܳܬ݀܇ ܡܶܢ ܣܶܓܕܰܬ ܨܰܠܡ̈ܶܐ܇ ܘܒܶܗ ܐܶܫܬܘܺܝ ܘܰܚܙܳܐ ܕܰܫܪܳܬ݀ ܒܓܰܘ ܒܰܝܬܶܗ܇ ܬܠܺܝܬܳܝܽܘܬܳܐ ܡܫܰܒܰܚܬܳܐ܀

ܒܨܰܘܡܳܐ ܐܶܬܓܰܢ̱ܒܰܪ ܡܶܠܟܺܝܙܕܶܩ ܟܽܘܡܪܳܐ܇ ܪܰܒܳܐ ܕܢܳܡܽܘܣܳܐ܇ ܗܰܘ ܕܩܰܪܶܒ ܠܰܚܡܳܐ ܘܚܰܡܪܳܐ܇ ܘܒܶܗ ܗܽܘ ܐܶܫܬܘܺܝ ܗܘܳܐ܇ ܕܢܶܗܘܶܐ ܗܘܳܐ ܟܽܘܡܪܳܐ܇ ܕܰܠܥܠܰܡ ܒܰܕܡܽܘܬ܇ ܟܽܘܡܪܳܐ ܡܫܺܝܚܳܐ ܕܰܠܥܳܠܰܡ܀

ܒܨܰܘܡܳܐ ܚܰܒܺܝ̈ܒܰܝ܇ ܐܶܬܓܰܘܰܣ ܝܰܘܣܶܦ܇ ܘܒܶܗ ܗܽܘ ܙܟܳܐ ܠܪܶܓܬܳܐ܇ ܕܡܶܨܪܳܝܬܳܐ ܒܓܰܘ ܬܰܐܳܘܳܢܳܐ܇ ܘܒܶܗ ܗܘܳܐ ܡܕܰܒܪܳܢܳܐ܇ ܘܡܰܠܟܳܐ ܥܰܠ ܡܶܨܪܶܝܢ܇ ܘܒܶܗ ܝܺܪܶܬ ܚܰܝ̈ܶܐ܇ ܡܬܽܘܡܳܝ̈ܶܐ ܥܰܡ ܩܰܕܺܝܫܳܐ܀

ܒܨܰܘܡܳܐ ܚܰܒܺܝ̈ܒܰܝ܇ ܐܶܬܓܰܘܰܣ ܦܺܝܢܚܶܣ܇ ܘܒܶܗ ܬܒܰܪ ܗܘܳܐ ܒܺܝܫܬܳܐ܇ ܡܶܢ ܥܰܡܳܐ ܐܺܝܣܰܪܠܳܝܳܐ܇ ܘܒܶܗ ܝܶܫܽܘܥ ܒܰܪܢܽܘܢ܇ ܣܚܰܦ ܗܘܳܐ ܠܺܐܝܪܺܝܚܽܘ܇ ܘܒܶܗ ܗܽܘ ܒܰܪ ܐܺܝܫܰܝ܇ ܐܶܬܚܰܣܺܝܘ ܟܽܠܗܽܘܢ ܚܛܳܗܰܘ̈ܗ̱ܝ܀

ܒܨܰܘܡܳܐ ܐܶܬܺܝܗܶܒ܇ ܫܡܽܘܐܶܝܠ ܠܥܩܰܪܬܳܐ܇ ܘܒܶܗ ܪܕܳܐ ܐܺܠܺܝܳܐ܇ ܠܚܽܘܪܺܝܒ ܘܰܢܣܰܒ ܙܳܟܽܘܬܳܐ܇ ܘܒܶܗ ܣܠܶܩ ܒܥܰܠܥܳܠܳܐ܇ ܒܫܽܘܒܚܳܐ ܠܰܫܡܰܝܳܐ܇ ܘܒܶܗ ܙܟܳܐ ܘܚܰܝܶܒ ܗܘܳܐ܇ ܠܳܐܚܳܒ ܘܠܺܐܝܙܒܺܝܠ ܫܳܛܺܝܬܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܒܰܥܪܽܘܒܬܳܐ ܒܰܪܺܝܫܺܝܬ

ܒܨܰܘܡܳܐ ܡܶܙܕܰܗܝܳܐ ܢܰܦܫܳܐ ܘܡܶܬܒܰܣܡܳܐ ܘܣܳܠܩܳܐ ܒܶܗ ܟܽܠܫܳܥ܇ ܠܪܰܘܡܳܐ ܕܰܫܡܰܝܳܐ܇ ܘܚܳܙܝܳܐ ܠܒܳܪܽܘܝܳܐ܇ ܐܰܝܟ ܕܳܐܦ ܚܙܳܝܗ̱ܝ ܡܽܘܫܶܐ ܗ ܘ ܗ ܙܳܡܪܳܐ ܬܶܫܒܽܘܚܬܳܐ܀

ܛܽܘܒܳܐ ܠܨܰܝܳܡ̈ܶܐ܇ ܕܨܳܝܡܺܝܢ ܕܰܟܝܳܐܺܝܬ܇ ܨܰܘܡܳܐ ܩܰܕܺܝܫܳܐ܇ ܕܝܳܪܬܺܝܢ ܡܰܠܟܽܘܬܳܐ ܘܚܰܝ̈ܶܐ ܕܠܳܐ ܥܳܒܪܺܝܢ܇ ܘܒܰܥܕܶܝܢ ܡܶܬܒܰܣܡܺܝܢ ܗ ܘ ܗ ܒܗܰܘ ܐܰܬܪܳܐ ܕܛܽܘܒ̈ܶܐ܀

 

ܐ̱ܚܪܺܢܳܐ ܒܩܳܠܳܐ ܩܽܘܩܳܝܳܐ

ܛܽܘܒܰܘܗ̱ܝ ܠܰܐܝܢܳܐ ܕܪܳܚܶܡ ܠܳܗܿ ܠܕܶܚܠܰܬ ܡܳܪܝܳܐ܇ ܕܗܺܝ ܦܳܪܩܳܐ ܠܶܗ ܒܗܰܘ ܝܰܘܡܳܐ ܕܟܽܠܶܗ ܪܽܘܓܙܳܐ ܡܠܶܐ܇ ܗܺܝ ܕܳܪܫܳܐ ܠܶܗ ܐܽܘܪܚܳܐ ܠܡܰܠܟܽܘܬܳܐ܇ ܘܗܺܝ ܗܳܘܝܳܐ ܠܶܗ ܐܽܘܪܚܳܐ ܘܡܰܥܒܰܪܬܳܐ܇ ܘܗܺܝ ܠܳܘܝܳܐ ܠܶܗ ܒܗܰܘ ܐܰܬܪܳܐ ܕܰܡܠܶܐ ܪܽܘܓܙܳܐ܇ ܘܗܺܝ ܡܚܰܘܝܳܐ ܠܶܗ ܗܰܘ ܐܰܬܪܳܐ ܕܟܺܐܢ̈ܶܐ ܒܶܗ ܡܕܰܝܪܺܝܢ ܗ ܘ ܗ܀

ܕܚܺܝܠ ܕܺܝܢܳܐ ܕܗܳܘܶܐ ܠܚܰܪܬܳܐ ܠܝܰܠܕܰܘ̈ܗ̱ܝ ܕܳܐܕܳܡ܇ ܐܰܝܟ ܕܶܐܬܢܰܒܺܝ ܐܶܫܰܥܝܳܐ ܟܳܪܽܘܙܳܐ ܡܫܰܒܚܳܐ܇ ܚܶܫܟܳܐ ܕܚܺܝܠܳܐ ܘܢܽܘܪܳܐ ܝܳܩܶܕܬܳܐ܇ ܒܶܟܝܳܐ ܚܢܺܝܓܳܐ ܕܰܡܠܶܐ ܬܶܢܚ̈ܳܬܳܐ܇ ܡܫܺܝܚܳܐ ܕܦܰܓܪܳܟ ܘܰܐܘܟܶܠܬܳܢܝ̱ ܚܽܘܣ ܘܶܐܬܪܰܚܰܡܥܠܰܝܢ܇ ܘܰܐܫܘܳܢ ܕܥܰܡ ܟܺܐܢ̈ܶܐ ܕܪܰܚܡܽܘܟ ܐܶܙܡܰܪ ܠܳܟ ܫܽܘܒܚܳܐ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܚܺܝܠܳܐܗ̱ܝ ܢܰܦܫܳܐ ܐܳܦ ܡܳܐ ܕܩܳܪܒܳܐ܇ ܠܰܬܝܳܒܽܘܬܳܐ ܥܰܠ ܕܰܒܣܺܝܪܳܐ ܐܳܦܠܳܐ ܨܠܽܘܬܳܐ ܗܰܢܺܝܐܳܐ ܠܳܗܿ܇ ܚܽܘܢ ܠܰܒܣܺܝܪܬܳܐ ܕܰܣܟܺܝܪ ܦܽܘܡܳܗܿ ܒܳܥܽܘܠܳܐ ܕܣܶܥܪܰܬ݀܇ ܘܩܰܠܺܝܠ ܕܶܡܥ̈ܶܐ ܚܫܽܘܒ ܐܰܝܟ ܣܰܓܺܝ ܘܗܰܒ ܫܽܘܒܩܳܢܳܐ܀

ܨܪܺܝܟܳܐܗ̱ܝ ܢܰܦܫܳܐ ܕܰܚܛܳܬ݀ ܣܰܓܺܝ ܡܶܢ ܐܰܪܡܰܠܬܳܐ܇ ܘܰܒܚܰܘܒ̈ܳܬܳܐ ܕܺܐܝܬ ܠܳܗܿ ܪܳܢܝܳܐ ܟܡܳܐ ܣܰܓܺܝ̈ܐܳܢ܇ ܘܡܳܪܶܐ ܚܰܘܒܳܐ ܗܰܒ ܫܽܘܒܩܳܢܳܐ ܘܗܰܒ ܠܽܘܒܳܒܳܐ܇ ܕܶܐܢ ܫܽܘܒܩܳܢܳܟ ܠܳܐ ܡܰܕܪܶܟ ܠܳܗܿ ܠܢܰܦܫܳܐ ܡܺܝܬܳܐ ܗܿܳܝ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܗܳܐ ܡܰܛܺܝ ܠܶܗ ܗܰܘ ܝܰܘܡܳܐ܇ ܕܦܽܘܠܚܳܢܳܐ ܕܙܰܕܺܝܩܽܘܬܳܐ܇ ܠܰܐܝܢܳܐ ܕܒܳܥܶܐ ܕܢܶܬܟܰܫܰܪ܇ ܘܢܶܩܢܶܐ ܚܰܝ̈ܶܐ ܕܰܠܥܳܠܰܡ ܫܽܘܒܚܳܐ܀

ܝܶܫܽܘܥ ܟܽܠܝܽܘܡ ܩܳܪܶܐ ܠܰܢ܇ ܒܝܰܕ ܡ̈ܰܬܠܶܐ ܠܰܬܝܳܒܽܘܬܳܐ܇ ܘܒܰܚܕܳܐ ܫܳܥܳܐ ܕܺܝܢܳܪܳܐ܇ ܫܳܩܠܺܝܢ ܡܶܢܶܗ ܦܰܠܳܚܰܘ̈ܗ̱ܝ܇ ܫܽܘܒܚܳܐ܀

ܐܳܘ ܕܡܰܪܟܰܒܬܶܗ ܢܽܘܪ̈ܳܢܶܐ܇ ܘܣܶܕܪ̈ܶܐ ܕܥܺܝܪ̈ܶܐ ܡܫܰܡܫܺܝܢ ܠܳܗܿ܇ ܒܰܛܶܠ ܡܶܢܰܢ ܢܶܟܝܳܢ̈ܶܐ܇ ܘܬܒܽܘܪܳܝܗ̱ܝ ܠܒܺܝܫܐ ܩܕܳܡܰܝܢ ܫܽܘܒܚܳܐ ܠܳܟ܀

ܐܳܘ ܕܫܰܝܶܢ ܪܰܘܡܳܐ ܘܥܽܘܡܩܳܐ܇ ܒܢܺܝܫܶܗ ܪܰܒܳܐ ܕܰܨܠܺܝܒܳܐ܇ ܫܰܝܶܢ ܡܳܪܝ̱ ܡܰܠܟ̈ܶܐ ܘܟܳܗ̈ܢܶܐ܇ ܘܥܺܕܬܳܐ ܩܰܝܶܡ ܒܰܚܢܳܢܳܟ܀

ܫܰܝܢܳܟ ܢܰܡܠܶܟ ܒܰܒܪܺܝܬܳܐ܇ ܘܰܫܠܳܡܳܐ ܒܓܰܘ ܥܺܕ̈ܳܬܳܐ܇ ܟܠܺܝܠܳܐ ܕܫܰܢ̱ܬܳܐ ܢܶܬܒܰܪܰܟ܇ ܘܟܽܠܢܳܫ ܒܰܐܬܪܶܗ ܢܰܘܕܶܐ ܠܳܟ܀

 

ܩܳܠܳܐ ܕܠܺܠܝܳܐ ܒܩܳܠܳܐ ܛܽܘܒܰܝܟܝ̱ ܥܺܕܬܳܐ

ܫܰܝܶܢ ܡܳܪܰܢ ܠܥܺܕܬܳܟ ܒܰܐܪܒܰܥ ܦܶܢܝ̈ܳܬܳܐ܇ ܘܰܛܪܽܘܕ ܡܶܢܳܗܿ ܡܰܚܫܽܘ̈ܠܶܐ ܘܣܶܕܩ̈ܶܐ ܒܺܝܫ̈ܶܐ ܘܚܶܪ̈ܝܳܢܶܐ܇ ܘܟܰܢܶܫ ܝܰܠܕܶܝ̈ܗܿ ܠܓܰܘ ܥܽܘܒܳܗܿ܇ ܒܗܰܝܡܳܢܽܘܬܳܐ ܕܰܫܪܳܪܳܐ܇ ܘܰܐܩܺܝܡ ܒܳܗܿ ܪ̈ܳܥܰܘܳܬܳܐ܇ ܕܰܢܪܰܥܽܘܢܳܗܿ ܐܰܝܟ ܨܶܒܝܳܢܳܟ܇ ܘܥܰܡܳܟ ܬܶܚܕܶܐ ܒܡܰܠܟܽܘܬܳܐ܇ ܘܬܶܙܡܰܪ ܫܽܘܒܚܳܐ ܠܛܰܝܒܽܘܬܳܟ܀

ܗܰܒܠܰܢ ܡܳܪܰܢ ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܇ ܡܶܢ ܒܶܝܬ ܓܰܙܳܟ ܥܰܬܺܝܪܳܐ܇ ܐܰܟܡܳܐ ܕܒܳܥܶܝܢ ܡܶܢ ܪ̈ܰܚܡܰܝܟ܇ ܘܚܰܝ̈ܶܐ ܚܰܕ̈ܬܶܐ ܒܡܰܠܟܽܘܬܳܟ܇ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ܇ ܘܡܶܐ ܕܡܶܬܓܰܠܝ̈ܳܢ ܟܰܣܝ̈ܳܬܳܐ܇ ܘܩܳܐܶܡ ܟܽܠ ܐ̱ܢܳܫ ܒܰܥܒܳܕܰܘ̈ܗ̱ܝ܇ ܬܶܣܰܒܝ̱ ܒܰܐܦܰܝ̈ܢ ܟܺܐܢܽܘܬܳܟ܇ ܘܰܬܣܰܬܰܪܝ̱ ܠܰܢ ܛܰܝܒܽܘܬܳܟ܀

 

ܣܽܘܓܺܝܬܳܐ ܒܩܳܠܳܐ ܫܽܘܒܚܳܐ ܠܳܟ ܡܳܪܝ̱ ܥܶܢܝܳܢܳܐ ܡܫܺܝܚܳܐ ܒܕܺܝܢܳܟ ܪܰܚܶܡܥܠܰܝ܇ ܘܶܐܚܙܶܐ ܚܢܳܢܳܟ ܒܗܰܘ ܝܰܘܡܳܐ

ܒܕܶܡܥ̈ܶܐ ܕܩܶܪܒܰܬ݀ ܚܰܛܳܝܬܳܐ܇ ܠܶܐܫܛܳܪܳܐ ܕܚܰܘܒ̈ܶܝܗܿ ܬܰܠܚܰܬ݀܇ ܗܳܐ ܕܶܡܥ̈ܰܝ ܠܳܟ ܡܶܬܩܰܪ̈ܒܳܢ܇ ܩܰܒܶܠ ܡܳܪܝ̱ ܡܶܢܝ̱ ܐܰܝܟ ܕܡܶܢ ܗܳܝ܀

ܕܽܘܢ ܡܳܪܝܳܐ ܕܺܝܢܝ̱ ܘܰܬܒܰܥ ܬܒܰܥܬܝ̱܇ ܕܡܶܢ ܒܥܶܠܕܒܳܒ̈ܰܝ ܪ̈ܰܚܡܶܐ ܠܰܝܬ܇ ܕܢܺܝܫܳܐ ܠܓܶܐܪ̈ܰܘܗ̱ܝ ܣܳܡܰܢܝ̱ ܠܶܗ܇ ܒܪܶܡܙܳܟ ܓܶܐܪ̈ܰܘܗ̱ܝ ܠܶܗ ܢܒܰܙܥܽܘܢ܀

ܘܳܝܠܺܝ ܐܶܢܗܽܘ ܕܠܰܕܒܰܥܬܳܐ܇ ܟܽܠ ܟܰܣܝ̈ܳܬܳܐ ܡܶܬܓܰܠܝ̈ܳܢ܇ ܐܰܝܟܳܐ ܕܡܰܦܶܩ ܒܰܪܽܘܚܳܐ ܒܣܺܝܪ܇ ܘܡܶܢ ܚܰܝܳܒ̈ܶܐ ܠܳܐ ܡܶܫܬܡܰܥ܀

ܚܳܒܿܶܬ ܣܽܘܓܐܳܐ ܘܣܰܓܺܝ ܚܛܺܝܿܬ܇ ܘܒܰܬܝܳܒܽܘܬܳܐ ܐܰܗܡܺܝܿܬ ܠܺܝ܇ ܬܰܗܡܶܐ ܡܳܪܝ̱ ܡܶܢܝ̱ ܟܺܐܢܽܘܬܳܟ܇ ܘܰܐܘܕܶܐ  ܠܪ̈ܰܚܡܶܐ ܕܛܰܝܒܽܘܬܳܟ܀

ܝܶܫܽܘܥ ܕܰܦܪܰܩ ܒܰܕܡܶܗ ܠܟܽܠ܇ ܘܰܒܡܰܘܬܶܗ ܠܚܰܣܺܝܢܳܐ ܦܟܰܪ܇ ܦܟܳܪ̈ܰܝ ܒܺܝܫܳܐ ܦܰܣܶܩ ܡܶܢܝ̱܇ ܘܬܰܒܰܪ ܟܶܒܠܰܘ̈ܗ̱ܝ ܥܰܡ ܣܽܘܛܡܰܘ̈ܗ̱ܝ܀

ܠܳܐ ܬܰܪܦܶܝܢܝ̱ ܡܳܪܝ̱ ܒܺܐܝܕ̈ܰܝ ܣܳܐܢܝ̱܇ ܘܠܳܐ ܬܶܬܶܠ ܠܶܗ ܐܰܬܪܳܐ ܥܠܰܝ܇ ܕܦܰܓܪܳܟ ܘܰܕܡܳܟ ܡܰܙܶܓܬ ܒܺܝ܇ ܘܰܨܠܺܝܒܳܟ ܒܶܝܬ ܥܰܝ̈ܢܰܝ ܪܫܺܝܡ܀

ܢܽܘܗܪܳܟ ܢܶܕܢܰܚ ܥܰܠ ܡܰܚܫܰܒܬܝ̱܇ ܘܰܒܝܰܕ ܨܶܡܚܰܝ̈ܟ ܢܶܬܢܰܗܪ̈ܳܢ܇ ܘܒܳܟ ܡܳܪܝ̱ ܘܰܐܠܳܗܝ̱ ܢܶܚܶܙܝ̈ܳܢ܇ ܕܰܐܢ̱ܬ ܗܽܘ ܫܶܡܫܳܐ ܡܰܢܰܗܪ ܠܟܽܠ܀

ܥܳܒܰܪ ܥܳܠܡܳܐ ܐܰܝܟ ܠܰܝܬܰܘܗ̱ܝ܇ ܘܕܺܝܢܳܟ ܩܰܝܳܡ ܘܠܳܐ ܡܶܫܬܪܶܐ܇ ܠܕܺܝܢܳܟ ܟܺܐܢܳܐ ܠܳܐ ܬܰܥܠܰܢܝ̱܇ ܕܠܳܐ ܙܳܟܶܐ ܩܕܳܡܰܝܟ ܟܽܠ ܕܚܰܝ܀

ܨܠܺܝ ܠܺܝ ܐܶܕܢܳܟ ܘܰܫܡܰܥ ܩܳܠܝ̱܇ ܒܪܳܐ ܕܰܒܚܽܘܒܶܗ ܦܰܓܪܳܐ ܠܒܶܫ܇ ܘܩܰܒܶܠ ܬܶܐܢܚ̈ܳܬܝ̱ ܕܡܶܬܩܰܪ̈ܒܳܢ܇ ܚܠܳܦ ܨܽܘܥܨܳܥ̈ܶܐ ܕܡܶܢܝ̱ ܐܶܣܬܥܰܪ܀

ܪܕܺܝܢܝ̱ ܡܳܪܝ̱ ܒܪ̈ܰܚܡܰܝܟ ܘܶܐܬܪܕܺܝܿܬ܇ ܘܰܒܣܽܘܓܐܳܐ ܕܰܚܢܳܢܳܟ ܩܢܺܝܢܝ̱܇ ܘܡܶܢ ܬܰܘܫܳܐ ܕܰܚܛܳܗ̈ܶܐ ܩܪܺܝܢܝ̱܇ ܘܒܶܐܡܪ̈ܶܐ ܕܡܶܢ ܝܰܡܺܝܢܳܟ ܡܢܺܝܢܝ̱܀

ܬܰܘܕܺܝܬܳܐ ܠܳܟ ܕܰܦܪܰܩܬܳܢܝ̱܇ ܠܓܶܢܣܶܗ ܕܳܐܕܳܡ ܕܰܐܒܺܝܕ ܗܘܳܐ܇ ܘܥܰܠ ܟܰܬܦ̈ܳܬܳܟ ܙܰܝܰܚܬܳܝܗ̱ܝ܇ ܘܰܠܒܶܝܬ ܐܰܒܽܘܟ ܐܰܥܶܠܬܳܝܗ̱ܝ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܕܳܠ ܓܶܠܝܳܢܳܐ ܡܶܢ ܐܰܠܳܗܳܐ ܥܠܰܘܗ̱ܝ ܕܰܢܒܺܝܳܐ܇ ܕܢܺܐܙܰܠ ܢܰܗܦܶܟ ܥܰܡܡ̈ܶܐ ܚܰܢܦ̈ܶܐ ܠܰܬܝܳܒܽܘܬܳܐ܇ ܫܰܕܪܶܗ ܠܝܰܘܢܳܢ ܕܢܶܩܪܶܐ ܗܦܽܘܟܝܳܐ ܠܡܰܥܕܰܢܬܳܐ ܘܰܠܒܺܝܫ̈ܳܬܳܐ ܢܒܰܛܶܠ ܡܶܢܳܗܿ ܟܰܕ ܓܳܙܶܡ ܠܳܗܿ܀

ܡܗܺܝܪ ܒܰܚܢܳܢܳܐ ܘܥܰܬܺܝܪܳܐ ܒܶܗ ܡܪܰܚܡܳܢܳܐ܇ ܘܡܳܐ ܕܡܶܬܚܰܡܰܬ ܢܶܡܚܶܐ ܠܒܺܝܫܳܐ ܐܰܝܟ ܠܳܐ ܝܳܕܰܥ܇ ܠܢܶܓܕ̈ܶܐ ܡܰܝܬܶܝܢ ܠܚܰܢܳܢܳܐ ܕܶܝܢ ܣܰܓܺܝ ܩܰܠܺܝܠ܇ ܡܓܶܙܰܡ ܓܳܙܶܡ ܠܳܐ ܕܶܝܢ ܡܰܐܒܶܫ ܐܰܝܟ ܠܽܘܚܳܡܶܗ܀

 

ܕܨܰܦܪܳܐ ܕܰܥܪܽܘܒܬܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܥܰܕܠܳܐ ܢܺܐܙܠܽܘܢ ܚܰܘܒ̈ܰܝ

ܠܰܘ ܐܰܪ̈ܥܳܬܳܐ ܐܳܙ̈ܠܳܢ ܒܳܬܰܪ ܐܰܟܳܪ̈ܰܝܗܶܝܢ܇ ܗܳܢܽܘܢ ܛܳܥܢܺܝܢ ܙܰܪܥܳܐ ܘܢܳܦܩܺܝܢ ܠܰܡܒܰܕܳܪܽܘ ܐܶܬܪܰܚܰܡܥܠܰܝ܀

ܘܶܐܢ ܐܳܬܶܐ ܠܶܗ ܣܢܺܝܩܳܐ ܠܒܰܝܬܳܟ ܢܶܒܥܶܐ ܡܶܢܳܟ܇ ܐܰܓܪܳܐ ܕܪ̈ܶܓܠܰܘܗ̱ܝ ܚܰܝܳܒ ܐܰܢ̱ܬ ܠܶܗ܇ ܕܫܰܡܶܫ ܐܽܘܪܚܳܟ ܐܶܬܪܰܚܰܡܥܠܰܝܢ܀

ܢܩܰܫ ܡܶܣܟܺܢܳܐ ܠܳܐ ܬܺܐܡܰܪ ܠܶܗ ܕܡܳܪܝܳܐ ܙܳܐܶܢ܇ ܣܦܺܝܩܬܳܐܗ̱ܝ ܡܶܠܬܳܐ ܘܰܕܠܳܐ ܐܰܓܪܳܐ ܠܡܰܢ ܕܳܐܡܰܪ ܠܳܗܿ܇ ܐܶܬܪܰܚܰܡܥܠܰܝܢ܀

ܐܶܢ ܒܰܫܪܳܪܳܐ ܕܙܳܐܶܢ ܡܳܪܝܳܐ ܡܰܬܟܶܠ ܐܰܢ̱ܬ ܠܶܗ܇ ܗܰܒ ܡܰܘܗܰܒܬܳܐ ܘܶܐܡܰܪ ܡܶܠܬܳܐ ܘܠܳܐ ܣܰܢܝܳܐ ܠܳܟ܇ ܐܶܬܪܰܚܰܡܥܠܰܝܢ܀

ܟܰܦܢܳܐ ܟܰܪܣܶܗ ܘܶܐܬܳܐ ܕܢܶܡܠܶܝܗܿ ܡܶܢ ܦܳܬܽܘܪܳܟ܇ ܘܕܰܫܡܰܥ ܡܶܠܬܳܐ ܡܽܘܢ ܟܺܝܬ ܝܳܬܰܪ ܐܶܠܳܐ ܫܳܩܶܠ ܐܶܬܪܰܚܰܡܥܠܰܝܢ܀

 

ܕܰܐܠܳܗܝ̱ ܐܰܠܳܗܝ̱܇ ܒܩܳܠܳܐ ܗܰܘ ܕܥܽܘܗܕܳܢܳܐ

ܬܰܘ ܚܰܒܺܝ̈ܒܰܝ܇ ܢܨܽܘܡ ܘܰܢܨܰܠܶܐ܇ ܘܰܢܪܰܥܶܐ ܠܡܳܪܝܳܐ ܒܨܰܘܡܰܢ܇ ܘܢܺܐܡܰܪ ܠܶܗ ܒܓܰܠܝܽܘܬ ܐܰܦ̈ܶܐ܇ ܠܘܳܬܳܟ܀

ܗܰܘ ܕܠܳܐ ܨܳܒܶܐ ܒܡܰܘܬܶܗ ܕܰܚܛܳܝܳܐ܇ ܐܶܠܳܐ ܕܢܶܬܦܢܶܐ ܘܢܶܫܬܰܘܙܰܒ܇ ܡܶܢ ܐܽܘܪܚܶܗ ܒܺܝܫܬܳܐ ܘܢܺܐܚܶܐ܇ ܠܘܳܬܳܟ܀

ܡܶܢ ܟܽܠ ܣܰܢܝ̈ܳܬܳܐ ܕܗܰܢܺܝܐܘ̈ܳܬܳܐ܇ ܘܰܥܒܳܕ̈ܶܐ ܕܰܫܟܺܝܪ̈ܳܬܳܐ܇ ܒܝܰܕ ܨܰܘܡܳܐ ܕܰܟܝܳܐ ܢܰܪܚܶܩ܇ ܠܘܳܬܳܟ܀

ܒܗܳܢܳܐ ܝܰܘܡܳܐ ܕܰܡܠܶܐ ܟܽܠ ܬܽܘܟܺܝ̈ܢ܇ ܦܗܺܝܿܬ ܘܰܛܺܥܝܿܬ ܟܰܕ ܠܳܐ ܝܶܕܥܿܶܬ܇ ܠܳܟ ܩܳܪܶܐ ܐ̱ܢܳܐ ܦܳܪܽܘܩܰܢ܇ ܕܬܶܗܘܶܐ ܠܺܝ ܣܢܺܐܓܪܳܐ ܒܶܝܬ ܕܺܝܢܳܐ܀

ܘܳܝܳܐ ܝܳܗܶܒ ܡܰܠܟܳܐ ܒܰܣܡܳܟܳܐ܇ ܠܟܽܠ ܐܰܝܠܶܝܢ ܕܰܚܛܰܘ ܘܠܳܐ ܬܳܒܘ̱܇ ܘܶܐܢܳܐ ܕܶܝܢ ܡܳܢܳܐ ܐܶܥܒܶܕ܇ ܒܰܪ ܛܳܒܳܐ ܒܪ̈ܰܚܡܰܝܟ ܚܽܘܢܰܝܢܝ̱܇ ܠܘܳܬܳܟ܀

ܐܰܢ̱ܬ ܗܽܘ ܡܳܪܰܢ܇ ܕܰܨܒܰܝܬ ܒܛܰܝܒܽܘܬܳܟ܇ ܘܨܰܘܡܳܐ ܠܒܰܟܬ ܡܶܛܽܠܳܬܰܢ܇ ܐܰܫܘܳܐ ܠܰܢ ܠܚܽܘܣܳܝ ܚܰܘܒ̈ܶܐ܇ ܠܘܳܬܳܟ܀

ܒܪܺܝܟ ܐܰܒܳܐ ܕܫܰܠܚܳܟ ܠܦܽܘܪܩܳܢܰܢ܇ ܣܓܺܝܕ ܪܽܘܚܳܐ ܦܰܪܰܩܠܺܝܛܳܐ܇ ܕܗܽܘ ܡܚܰܕܶܬ ܥܰܬܺܝܩܽܘܬܰܢ܇ ܠܘܳܬܳܟ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܒܪܺܝܫܺܝܬ ܐܶܡܰܪ ܐܰܠܳܗܳܐ

ܒܪܺܝܫܺܝܬ ܐܶܡܰܪ ܐܰܠܳܗܳܐ. ܕܢܶܗܘܶܐ ܢܽܘܗܪܳܐ܇ ܘܗܽܘ ܢܽܘܗܪܳܐ ܘܰܪܕܰܦ ܠܚܶܫܽܘܟܳܐ܇ ܘܰܕܢܰܚ ܢܽܘܗܪܳܐ ܠܟܽܠܗܶܝܢ ܒܶܪ̈ܝܳܬܳܐ܇ ܥܺܝܪ̈ܶܐ ܐ̱ܢܳܫ̈ܳܐ ܫܰܒܚܽܘܢܳܝܗ̱ܝ ܟܰܕ ܐܳܡܪܺܝܢ܀

ܡܰܠܟܳܐ ܦܟܰܪ ܗܘܳܐ ܠܚܰܢܳܢܝܳܐ܇ ܘܰܠܥܶܙܰܪܝܳܐ ܘܰܠܡܺܝܫܳܐܶܝܠ ܘܰܫܕܳܐ ܐܶܢܽܘܢ ܒܰܐܬܽܘܢܳܐ܇ ܥܺܝܪܳܐ ܕܢܽܘܪܳܐ ܢܚܶܬ ܕܰܥܟܳܗܿ ܠܫܰܠܗܶܒܺܝܬܳܐ܇ ܘܰܬܠܳܬܰܝ̈ܗܽܘܢ ܙܡܰܪܘ̱ ܫܽܘܒܚܳܐ ܟܰܕ ܐܳܡܪܺܝܢ܇ ܥܺܝܪ̈ܳܐ ܐ̱ܢܳܫ̈ܳܐ ܫܰܒܚܽܘܢܳܗ̱ܝ܀

ܡܰܠܟܳܐ ܕܒܳܒܶܝܠ ܦܩܰܕ ܗܘܳܐ ܠܥܰܒܕ̈ܶܐ ܕܰܩܕܳܡܰܘܗ̱ܝ ܕܰܐܳܘܒܶܠܽܘܢܳܝܗ̱ܝ ܠܕܳܢܺܝܐܶܝܠ ܠܓܽܘܒܳܐ ܕܢܶܐܟܽܠܽܘܢܳܝܗ̱ܝ ܐܰܪ̈ܝܰܘܳܬܳܐ܇ ܘܥܺܝܪܳܐ ܕܢܽܘܪܳܐ ܠܓܽܘܒܳܐ ܢܚܶܬ ܗܘܳܐ ܠܰܫܠܳܡܶܗ܇ ܘܠܰܒܒܶܗ ܠܟܺܐܢܳܐ ܘܰܪܓܺܝܓܳܐ܇ ܟܰܝܢܶܗ ܥܺܝܪܳܐ܀

ܐܰܝܟ ܕܶܐܬܢܰܨܰܚ ܕܳܢܺܝܐܶܝܠ ܒܰܐܪܥܳܐ ܕܒܳܒܶܝܠ܇ ܘܬܽܐܳܘܡܰܐ ܒܗܶܢܕܽܘ܇ ܘܝܽܘܚܰܢܳܢ ܒܓܰܘ ܐܶܦܶܣܽܘܣ܇ ܢܰܨܚܶܝܗܿ ܡܳܪܝ̱ ܠܥܺܕܬܳܟ܇ ܒܰܐܪܒܰܥ ܦܶܢܝ̈ܳܬܳܐ ܕܳܐܟܠܳܐ ܦܰܓܪܳܟ܇ ܘܡܰܘܕܝܳܐ ܒܰܙܩܺܝܦܽܘܬܳܟ܇ ܘܰܦܬܰܚ ܬܰܪܥܶܗ ܠܟܽܠ ܨܰܘܡܳܐ ܠܬܰܝܳܒ̈ܶܐ܇ ܥܺܝܪ̈ܶܐ܀

ܥܢܳܢܳܐ ܕܚܰܝ̈ܶܐ ܕܰܛܥܺܝܢܳܐ ܛܰܐܠܳܐ ܕܪ̈ܰܚܡܶܐ܇ ܛܰܐܠܳܐ ܬܪܽܘܣܝ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܕܶܐܟܰܠܘ̱ ܦܰܓܪܳܟ ܘܶܐܫܬܺܝܘ ܠܰܕܡܳܟ ܝܰܩܺܝܪܳܐ܇ ܘܰܡܣܰܟܶܝܢ ܠܶܗ ܠܡܶܐܬܺܝܬܳܟ ܬܢܰܚܶܡ ܐܶܢܽܘܢ܇ ܥܺܝܪ̈ܶܐ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܚܰܘܒ̈ܰܝ ܘܰܚܛܳܗ̈ܰܝ

ܒܬܰܪܥܳܟ ܚܰܢܳܢܳܐ܇ ܢܶܩܽܘܫ ܒܟܽܠ ܥܶܕܳܢ܇ ܐܰܢ̱ܬ ܡܳܪܝ̱ ܦܰܢܳܐ ܠܰܢ܇ ܒܪ̈ܰܚܡܰܝܟ ܫܶܐܠ̈ܳܬܰܢ܀

ܚܽܘܣ ܡܳܪܝ̱ ܥܰܠ ܟܽܠܰܢ܇ ܘܪܰܚܶܡ ܒܛܰܝܒܽܘܬܳܟ܇ ܕܟܽܠܰܢ ܚܛܰܝܢܰܢ ܠܳܟ܇ ܚܽܘܢ ܠܰܢ ܕܠܳܐ ܢܺܐܒܰܕ܀

ܒܝܰܘܡܳܐ ܕܗܳܘܝܳܐ ܒܶܗ܇ ܬܒܰܥܬܳܐ ܘܫܽܘܳܐܠܳܐ ܠܳܐ ܬܦܰܪܣܶܐ ܚܰܘܒ̈ܰܝ܇ ܝܶܫܽܘܥ ܡܠܶܐ ܪ̈ܰܚܡܶܐ܀

ܬܰܘܕܺܝ ܠܒܰܣܺܝܡܳܐ܇ ܕܟܽܠܝܽܘܡ ܛܥܺܝܢ ܝܽܘܩܪܰܢ܇ ܘܝܳܕܰܥ ܕܒܺܝܫܺܝܢܰܢ܇ ܘܒܳܪܶܐ ܘܙܳܐܶܢ ܠܰܢ܀

ܚܰܢܳܢܳܐ ܡܳܪܝܳܐ܇ ܕܚܰܢܳܗܿ ܠܚܰܛܳܝܬܳܐ܇ ܚܽܘܢ ܠܰܢ ܒܶܝܬ ܕܺܝܢܳܐ܇ ܘܰܠܚܺܝ ܚܒܳܪ̈ܳܬܰܢ܀

ܫܽܘܒܚܳܐ ܠܳܟ ܡܫܺܝܚܳܐ܇ ܫܳܒܶܩ ܚܰܘܒ̈ܳܬܳܐ܇ ܘܒܽܘܨܳܪ̈ܶܐ ܕܰܐܝܠܶܝܢ ܕܩܳܪܶܝܢ ܠܳܟ ܒܚܰܫܳܐ܀

 

ܩܳܠܳܐ ܕܨܰܦܪܳܐ ܒܩܳܠܳܐ ܣܳܗܕ̈ܶܐ ܗ̱ܘܰܘ ܦܺܝܪ̈ܡܶܐ܇

ܒܨܰܘܡܳܐ ܘܒܰܨܠܽܘܬܳܐ܇ ܘܰܒܕܡܶܥ̈ܶܐ ܘܰܒܬܰܘܳܬ ܢܰܦܫܳܐ܇ ܢܶܒܥܶܐ ܪ̈ܰܚܡܶܐ ܡܶܢ ܡܳܪܝܳܐ܇ ܘܰܒܚܽܘܒܳܐ ܫܰܦܝܳܐ܇ ܕܰܢܚܰܣܶܐ ܠܰܢ ܚܰܘܒ̈ܳܬܰܢ ܘܪ̈ܰܚܡܰܘܗ̱ܝ ܡܶܢܰܢ ܠܳܐ ܢܶܟܠܶܐ ܗ ܘ ܗ ܕܚܰܢܳܢܳܐ ܗܰܘ ܘܡܪܰܚܡܳܢܳܐ܀

ܢܒܺܝܳܐ ܕܳܢܺܝܐܶܝܠ܇ ܐܶܡܰܪ ܠܰܢ ܒܰܐܝܢܳܐ ܥܰܡܠܳܐ܇ ܠܰܚܙܳܬܳܐ ܕܡܰܠܰܐܟ̈ܶܐ ܐܶܫܬܘܺܝܿܬ܇ ܒܨܰܘܡܳܐ ܘܒܰܨܠܽܘܬܳܐ܇ ܘܰܒܒܳܥܽܘܬܳܐ ܘܬܰܟܫܶܦܬܳܐ܇ ܚܙܳܬܳܐ ܕܡܰܠܰܐܟ̈ܶܐ ܩܰܒܠܶܬ ܗ ܘ ܗ܇ ܘܛܰܠܝܳܐ ܪܓܺܝܓܳܐ ܠܺܝ ܫܰܡܰܗ܀

 

ܐ̱ܚܪܺܢܳܐ ܒܩܳܠܳܐ ܒܗܰܘ ܨܰܦܪܳܐ ܪܰܒܳܐ ܡܳܐ

ܥܺܕܬܳܐ ܡܗܰܝܡܰܢܬܳܐ ܡܟܺܝܪܬܶܗ ܕܰܡܫܺܝܚܳܐ ܒܰܡܟܺܝܪܳܗܿ ܚܳܪܰܬ݀ ܟܰܕ ܨܳܡ ܗܘܳܐ ܒܕܰܒܪܳܐ܇ ܐܰܝܟ ܕܰܐܠܦܳܗܿ ܥܳܒܕܳܐ ܘܪܳܕܝܳܐ ܒܽܐܘܪ̈ܚܳܬܶܗ܇ ܘܠܰܨܠܺܝܒܶܗ ܣܳܓܕܳܐ ܘܰܠܚܰܫܰܘ̈ܗ̱ܝ ܡܝܰܩܪܳܐ܇ ܗ ܒܪܺܝܟ ܕܦܰܪܩܶܗ ܠܥܺܕܬܶܗ ܘܰܒܨܰܘܡܶܗ ܪܰܡܪܡܶܗ܀

ܫܠܺܝ̈ܚܶܐ ܦܰܩܶܕܘ̱ ܠܰܢ ܕܕܰܟܰܘ ܬܺܐܪ̈ܳܬܟܽܘܢ܇ ܡܶܢ ܥܒܳܕ̈ܶܐ ܒܺܝܫ̈ܶܐ ܕܰܠܢܰܦܫܳܐ ܡܣܰܓܦܺܝܢ܇ ܒܨܰܘܡܳܐ ܘܒܰܨܠܽܘܬܳܐ ܐܰܚ̈ܰܝ ܡܶܬܰܐܣܝܳܐ܇ ܢܰܦܫܳܐ ܡܟܰܪܰܗܬܳܐ ܐܶܢܗܽܘ ܕܬܳܝܒܳܐ ܠܳܗܿ ܗ ܨܒܺܝ ܒܰܢ ܐܰܠܳܗܳܐ ܕܰܠܘܳܬܳܟ ܢܶܬܦܢܶܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܠܳܐ ܢܶܒܥܶܐ ܐܰܝܟ ܥܰܬܺܝܪܳܐ ܛܽܘܦܬܳܐ ܕܡܰܝ̈ܳܐ ܠܰܐܒܪܳܗܳܡ܇ ܗܘܺܝ ܠܰܢ ܡܳܪܝ̱ ܡܰܝ̈ܳܐ ܚܰܝ̈ܶܐ܇ ܘܢܶܫܬܶܟ ܒܰܐܬܪܳܐ ܕܨܰܗܘܳܢ̈ܶܐ܇ ܠܳܐ ܢܶܩܪܶܟ ܡܶܢ ܓܰܘ ܢܽܘܪܳܐ܇ ܐܶܠܳܐ ܨܒܺܝ ܕܠܳܐ ܢܶܥܽܘܠ ܠܳܗܿ܇ ܗܳܐ ܡܶܢ ܗܳܪܟܳܐ ܩܳܪܶܝܢܰܢ ܥܢܺܝ ܠܰܢ ܐܰܟܡܳܐ ܕܶܐܫܬܰܘܕܺܝܬ܀

ܫܽܘܒܚܳܐ ܠܳܟ ܘܰܥܠܰܝܢ ܪ̈ܰܚܡܰܝܟ ܡܳܪܳܐ ܕܪ̈ܰܚܡܰܘܗ̱ܝ ܣܰܓܺܝܐܺܝܢ܇ ܚܽܘܢ ܡܳܪܝ̱ ܠܥܰܒܕܰܝ̈ܟ ܒܛܰܝܒܽܘܬܳܟ ܘܦܰܢܳܐ ܒܪ̈ܰܚܡܰܝܟ ܫܶܐܠ̈ܳܬܰܢ܀

ܠܳܐ ܡܳܪܝ̱ ܬܰܘܩܶܕܝ̱ ܒܓܰܘܙܰܠܬܳܐ܇ ܠܦܰܓܪܳܐ ܕܶܐܬܛܒܰܥܘ̱ ܒܰܨܠܺܝܒܳܟ܇ ܐܶܠܳܐ ܢܶܥܠܽܘܢ ܠܰܓܢܽܘܢܳܟ܇ ܘܡܶܢ ܝܰܡܺܝܢܳܟ ܢܶܬܒܰܣܡܽܘܢ܀

 

ܕܰܬܠܳܬܫܳܥܺܝ̈ܢ ܒܩܳܠܳܐ ܣܳܗܕ̈ܶܐ ܐܰܦܺܝܣܽܘܢܳܝܗ̱ܝ

ܐܶܢ ܡܶܢ ܒܰܪܩܳܐ ܕܰܥܢܳܢ̈ܶܐ܇ ܙܳܝܥܺܝܢ ܐ̱ܢܳܫܳܐ ܘܡܶܬܒܰܠܗܺܝܢ܇ ܩܕܳܡ ܗܰܘ ܡܰܠܟܳܐ ܫܡܰܝܳܢܳܐ ܡܰܢܽܘ ܡܨܶܐ ܩܳܐܶܡ܇ ܕܥܰܠ ܟܽܘܪܣܝܳܐ ܕܢܽܘܪܳܐ ܝܳܬܶܒ܇ ܘܰܒܢܽܘܪܳܐ ܩܫܺܝܬܳܐ ܕܳܐܶܢ܇ ܛܽܘܒܰܘܗ̱ܝ ܠܰܐܝܢܳܐ ܕܰܚܙܰܝܬܳܝܗ̱ܝ ܒܝܰܘܡܳܐ ܕܢܽܘܚܳܡܳܐ܀

ܝܰܘܡ̈ܶܐ ܘܝܰܪ̈ܚܶܐ ܘܰܫܢܰܝ̈ܳܐ܇ ܥܳܒܪܺܝܢ ܒܰܕܡܽܘܬ ܛܶܠܳܠܳܐ܇ ܕܶܚܠܰܬ ܡܳܪܝܳܐ ܩܰܝܳܡܳܐ ܛܽܘܒܰܘܗ̱ܝ ܠܡܰܢ ܕܪܰܚܡܳܗܿ܇ ܗܺܝ ܡܣܰܡܟܳܐ ܘܰܡܩܺܝܡܳܐ ܠܶܗ܇ ܡܳܐ ܕܗܳܘܶܐ ܕܺܝܢܳܐ ܕܚܺܝܠܳܐ܇ ܘܥܳܐܶܠ ܘܝܳܪܶܬ ܡܰܠܟܽܘܬܳܐ܇ ܘܚܰܝ̈ܶܐ ܕܠܳܐ ܥܳܒܪܺܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܘܳܝܠܶܗ ܠܰܐܝܢܳܐ ܕܛܰܫܺܝ ܟܶܣܦܳܐ ܕܰܐܪܥܳܐ ܒܰܐܪܥܳܐ܇ ܘܠܳܐ ܝܰܗܒ ܡܶܢܶܗ ܠܳܐ ܠܡܶܣܟܺܢ̈ܶܐ ܘܠܳܐ ܠܚܳܕܽܘܪ̈ܶܐ ܘܳܝܠܶܗ ܠܰܐܝܢܳܐ ܕܰܒܪܶܒܺܝܬܳܐ ܐܰܘܙܶܦ ܟܶܣܦܶܗ܇ ܕܰܒܗܳܝ ܗܰܘܬܳܐ ܕܓܽܘܡܪ̈ܰܝ ܢܽܘܪܳܐ ܢܳܦܶܠ ܐܳܒܶܕ܀

ܫܽܘܒܚܳܟ ܡܳܪܰܢ ܢܶܬܠܽܘܢ ܓܰܒܳܐ ܒܓܰܘ ܒܶܝܬ ܕܺܝܢܳܐ܇ ܟܺܐܢ̈ܶܐ ܕܰܢܨܰܚܘ̱ ܐܳܦ ܪ̈ܰܫܺܝܥܶܐ ܕܺܝܪܶܬܰܘ̱ ܚܶܫܟܳܐ܇ ܡܳܐ ܕܠܰܕܒܰܥܬܳܐ ܘܰܠܒܽܘܚܪܳܢܳܐ ܕܟܽܠ ܕܝܳܬܶܒ ܐܰܢ̱ܬ܇ ܢܓܽܘܠܽܘܢ ܪ̈ܰܚܡܰܝܟ ܥܰܠ ܣܳܓܽܘܕܰܝ̈ܟ ܠܳܟ ܬܶܫܒܽܘܚܬܳܐ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܩܽܘܩܳܝܳܐ

ܣܰܓܺܝ ܚܛܺܝܿܬ ܒܳܟ ܐܳܘ ܥܳܠܡܳܐ ܝܰܡܳܐ ܕܚܰܘܒ̈ܶܐ܇ ܘܨܶܒܝܳܢܝ̱ ܒܺܝܫܳܐ ܗܽܘ ܕܰܒܪܰܢܝ̱ ܒܬܰܘܫܳܐ ܕܠܳܐ ܐܽܘܪܚܳܐ܇ ܘܗܳܐ ܙܳܐܰܥ ܐ̱ܢܳܐ ܡܶܢ ܝܰܘܡܳܐ ܕܕܺܝܢܳܐ܇ ܡܶܢ ܗܰܘ ܢܰܗܪܳܐ ܕܰܡܓܺܝܚ ܓܰܘܙܰܠܬܳܐ܇ ܪܽܘܫܡܶܗ ܕܰܨܠܺܝܒܳܟ ܡܳܪܰܢ ܢܶܗܘܶܐ ܠܺܝ ܠܶܘܝܳܐ܇ ܘܒܶܗ ܐܶܥܒܰܪ ܝܰܡܳܐ ܕܢܽܘܪܳܐ ܘܚܽܘܣ ܘܶܐܬܪܰܚܰܡܥܠܰܝ܇ ܗ ܘ ܗ܀

ܝܽܘܡ ܡܶܢ ܝܽܘܡ ܡܶܫܬܰܘܕܶܐ ܐ̱ܢܳܐ ܕܠܰܡܚܳܪ ܬܳܐܶܒ ܐ̱ܢܳܐ܇ ܥܒܰܪ ܠܰܡܚܳܪ ܘܶܐܬܳܐ ܐ̱ܚܪܺܢܳܐ ܬܝܳܒܽܘܬܳܐ ܘܠܰܝܬܶܝܗܿ܇ ܐܶܬܦܰܢ ܥܠܰܝ ܕܰܝܳܢܳܐ ܟܺܐܢܳܐ܇ ܕܰܡܪܰܚܡܳܢ ܐܰܢ̱ܬ ܡܳܪܝܳܐ ܘܰܡܪܰܚܡܳܢ܇ ܩܰܪܶܒܰܝܢܝ̱ ܡܳܪܝ̱ ܒܰܚܢܳܢܳܟ ܠܰܬܝܳܒܽܘܬܳܐ ܘܶܐܓܥܶܐ ܒܚܰܫܳܐ ܠܘܳܬ ܡܳܪܝܳܐ ܕܢܶܫܬܰܒܩܽܘܢ ܚܰܘܒ̈ܰܝ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܡܽܘܢ ܐܰܣܟܶܠܝ̈ ܒܳܟ ܚܰܩܠ̈ܳܬܳܐ ܕܰܒܛܶܠܝ̈ ܡܶܢܗܶܝܢ ܥ̈ܰܠܠܳܬܳܐ܇ ܡܽܘܢ ܐܰܣܟܶܠܘ̱ ܟܰܪ̈ܡܶܐ ܕܰܚܪܰܒܘ̱ ܕܠܳܐ ܝܰܗܒܘ̱ ܦܺܐܪ̈ܶܐ ܠܦܰܠܳܚܳܐ ܡܽܘܢ ܐܰܣܟܶܠܝ̈ ܒܳܟ ܒܰܛܢ̈ܳܬܳܐ ܕܥܽܘܠܰܝ̈ܗܶܝܢ ܒܗܶܝܢ ܐܶܬܚܰܢܰܩܘ̱܀

ܫܽܘܒܚܳܐ ܠܳܟ ܪܳܚܶܡ ܥܰܒܕܰܘ̈ܗ̱ܝ ܫܽܘܒܚܳܐ ܠܳܟ ܥܳܢܶܐ ܠܪ̈ܳܚܡܰܘܗ̱ܝ܇ ܫܽܘܒܚܳܐ ܠܳܟ ܦܳܪܶܩ ܟܽܠܗܽܘܢ܇ ܫܽܘܒܚܳܐ ܠܳܟ ܡܳܪܝ̱ ܫܽܘܒܚܳܐ ܠܳܟ܇ ܘܰܥܠܰܝܢ ܪ̈ܰܚܡܶܐ ܘܰܚܢܳܢܳܐ܀

 

ܕܰܬܫܰܥܫܳܥܺܝ̈ܢ ܒܩܳܠܳܐ ܦܬܺܝܚ ܗܽܘ ܬܰܪܥܶܗ ܕܦܰܪܕܰܝܣܳܐ

ܒܨܰܘܡܳܐ ܐܰܚ̈ܰܝ ܢܶܬܟܰܫܰܪ܇ ܘܢܶܦܠܽܘܚ ܥܒܳܕ̈ܶܐ ܕܟܺܐܢܽܘܬܳܐ܇ ܒܗܳܠܶܝܢ ܝܰܘܡ̈ܳܬܳܐ܇ ܕܰܟܝ̈ܳܬܳܐ܇ ܘܢܶܛܥܰܢ ܝܽܘܩܪܳܐ ܕܗܰܕܳܡܰܝ̈ܢ܇ ܘܢܶܚܰܫ ܒܚܰܫܶܗ ܩܰܕܺܝܫܳܐ܇ ܕܢܶܚܕܶܐ ܥܰܡܶܗ ܒܰܩܝܳܡܬܶܗ܀

ܫܰܦܺܝܪ ܨܰܘܡܳܐ ܘܰܡܝܰܬܰܪ܇ ܘܛܳܒܳܐ ܨܠܽܘܬܳܐ ܘܰܪܚܺܝܡܳܐ܇ ܘܚܽܘܒܳܐ ܥܳܠܶܒ ܠܰܬܪ̈ܰܝܗܽܘܢ܇ ܒܚܽܘܒܳܐ ܡܳܪܝ̱ ܩܰܒܶܠ ܨܰܘܡܰܢ܇ ܒܚܽܘܒܳܐ ܫܒܽܘܩ ܠܰܢ ܒܽܘܨܳܪ̈ܰܝܢ ܕܰܐܢ̱ܬ ܗܽܘ ܛܳܒܳܐ ܒܰܠܚܽܘܕܰܝ̈ܟ܀

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܡܺܝ̈ܬܝ ܒܰܛܢ̈ܳܬܳܐ ܡܶܢ ܟܰܦܢܳܐ܇ ܒܓܰܘ ܟܰܪ̈ܣܳܬܳܐ ܝܰܠܽܘܕ̈ܶܐ ܡܶܢ ܣܰܘܦܶܝ̈ܗܿ ܕܰܐܪܥܳܐ ܩܰܛܶܠܬ܇ ܘܠܳܐ ܣܶܦܩܰܬ݀ ܠܳܟ ܐܺܠܺܝܳܐ܇ ܚܰܕ ܝܺܚܺܝܕܳܐ ܕܺܐܝܬ ܗܘܳܐ ܠܺܝ܇ ܠܳܐ ܢܚܶܬܬ ܥܕܰܡܳܐ ܕܰܩܛܰܠܬܳܝܗ̱ܝ܀

ܢܒܺܝ̈ܶܐ ܕܰܗ̱ܘܰܘ ܚܰܙܳܝܰܝ̈ܟ܇ ܗܶܢܽܘܢ ܢܶܗܘܽܘܢ ܡܪ̈ܰܥܝܳܢܰܝ̈ܟ܇ ܦܬܰܚ ܡܳܪܝ̱ ܬܰܪܥܶܗ ܕܰܚܢܳܢܳܟ܇ ܘܚܰܣܳܐ ܚܰܘܒ̈ܶܐ ܕܣܳܓܽܘܕܰܝ̈ܟ܇ ܘܢܶܬܠܽܘܢ ܬܶܫܒܽܘܚܬܳܐ ܠܪ̈ܰܚܡܰܝܟ ܡܳܪܳܐ ܕܰܬܪ̈ܰܝܗܽܘܢ ܥܳܠܡ̈ܶܐ܀

 

ܫܶܠܡܰܬ݀ ܫܰܒܬܳܐ ܕܒ

 

ܬܽܘܒ ܕܚܰܕ ܒܫܰܒܳܐ ܬܠܺܝܬܳܝܳܐ ܕܨܰܘܡܳܐ ܥܰܠ ܗܰܘ ܡܫܰܪܝܳܐ

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ: ܥܰܠ ܝܽܘܪܕܢܳܢ

ܒܰܪ ܛܳܒܳܐ ܕܶܐܬܬܰܚܬܺܝ܇ ܒܝܰܕ ܪ̈ܰܚܡܰܘܗ̱ܝ ܘܰܐܣܺܝ ܗܘܳܐ܇ ܠܟܺܐܒܬܳܢ̈ܶܐ ܘܠܰܡܫܰܪ̈ܰܝܳܐ܀

ܡܫܰܪܝܳܐ ܕܒܳܬܰܪ܇ ܬܠܳܬܺܝܢ ܘܰܬܡܳܢܶܐ ܫܢܺܝ̈ܢ܇ ܐܰܣܺܝܬܳܝܗ̱ܝ܇ ܐܰܣܳܢ ܡܳܪܰܢ ܐܰܟܘܳܬܶܗ܀

ܕܳܠ ܘܰܢܚܶܬ܇ ܝܺܚܺܝܕܳܝܳܐ ܡܶܠܬܳܐ܇ ܕܡܶܢ ܐܰܒܳܐ܇ ܕܢܶܦܪܽܘܩ ܠܓܶܢܣܶܗ ܕܳܐܕܳܡ܀

ܐܰܝܟ ܕܫܰܪܰܪܬܳܝܗ̱ܝ܇ ܡܳܪܰܢ ܠܓܰܒܪܳܐ ܡܫܰܪܝܳܐ܇ ܐܳܦ ܠܰܢ ܫܰܪܰܪ ܒܗܰܝܡܳܢܽܘܬܳܐ ܬܪܺܝܨܬܳܐ܇ ܫܽܘܒܚܳܐ ܠܳܟ܇ ܝܰܠܕܶܗ ܕܰܐܒܳܐ ܓܢܺܝܙܳܐ܇ ܕܰܣܥܰܪܬܶܗ ܠܰܒܪܺܝܬܳܐ ܒܥܽܘܕܪܳܢܳܟ܀

 

ܕܡܳܪܝܳܐ ܩܪܺܝܬܳܟ ܨܠܺܝ ܡܳܪܝܳܐ ܒܪ̈ܰܚܡܰܝܟ

ܢܶܒܥܳܐ ܕܚܰܝ̈ܶܐ ܕܶܐܫܬܰܕܰܪ ܡܶܢ ܪܰܘܡܳܐ ܨܶܝܕ ܬܰܚܬܳܝ̈ܶܐ܇ ܘܰܐܫܦܰܥ ܒܰܐܪܥܳܐ ܥܽܘܕܪ̈ܳܢܰܘܗ̱ܝ܇ ܘܰܐܥܬܰܪ ܠܰܢ ܡܶܢ ܣܺܝܡ̈ܳܬܶܗ܀ܰ

ܐܰܣܺܝ ܒܟܶܢܦܳܐ ܕܡܰܪܛܽܘܛܶܗ܇ ܐܰܢ̱ܬܬܳܐ ܕܰܕܡܳܐ ܪܳܕܶܐ ܗܘܳܐ܇ ܘܠܰܛܠܺܝܬܳܐ ܒܩܳܠܶܗ ܢܰܚܶܡ܇ ܘܰܠܝܰܡܳܐ ܒܡܶܠܬܶܗ ܫܰܬܶܩ܀

ܠܥܰܢܺܝܕܳܐ ܒܽܐܘܪܚܳܐ ܕܩܒܰܪܳܐ܇ ܢܰܚܶܡ ܘܰܐܚܺܝ ܒܦܽܘܩܕܳܢܶܗ ܘܠܰܚܕܳܐ ܕܙܰܥܩܰܬ݀ ܦܰܨܺܝ ܗܘܳܐ܇ ܘܰܠܒܰܪܬܳܗܿ ܡܶܢ ܐܺܝܕ̈ܰܝ ܫܺܐܕܳܐ܀

ܓܰܙܳܐ ܪܰܒܳܐ ܕܥܽܘܕܪ̈ܳܢܶܐ܇ ܠܰܢ ܡܶܢ ܐܰܒܳܐ܇ ܒܪܳܐ ܡܫܺܝܚܳܐ ܢܚܶܬ ܡܶܢ ܪܰܘܡܳܐ܇ ܘܥܰܡ ܒܢܰܝ̈ܢܳܫܳܐ ܐܶܬܗܰܦܰܟ܀

ܟܽܠ ܟܽܘܪ̈ܗܳܢܰܝܢ ܡܰܐܣܶܐ ܗܘܳܐ܇ ܒܰܕܡܽܘܬ ܐܳܣܝܳܐ ܚܰܟܺܝܡܳܐ܇ ܠܰܡܫܰܪܝܳܐ ܕܰܪܡܶܐ ܒܥܰܪܣܳܐ܇ ܒܝܰܕ ܡܶܠܬܶܗ ܝܰܗܒ ܚܽܘܠܡܳܢܳܐ܀

ܠܳܟ ܬܶܫܒܽܘܚܬܳܐ ܐܰܠܳܗܳܐ܇ ܕܫܰܠܚܽܘܟ ܪ̈ܰܚܡܰܝܟ ܨܶܝܕ ܓܶܢܣܰܢ܇ ܝܶܫܽܘܥ ܡܫܺܝܚܳܐ ܡܳܪܶܐ ܟܽܠ܇ ܘܰܐܣܺܝܬ ܟܺܐܒܰܝ̈ܢ ܘܟܽܘܪ̈ܗܳܢܰܝܢ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܡܫܺܝܚܳܐ ܢܰܛܰܪܶܝܗܿ ܠܥܺܕܬܳܟ

ܓܰܙܳܐ ܪܰܒܳܐ ܕܥܽܘܕܪ̈ܳܢܶܐ܇ ܐܶܫܬܰܕܰܪ ܠܰܢ ܡܶܢ ܐܰܒܳܐ܇ ܒܪܳܐ ܡܫܺܝܚܳܐ ܢܚܶܬ ܡܶܢ ܪܰܘܡܳܐ܇ ܘܥܰܡ ܒܢ̈ܰܝ ܐ̱ܢܳܫ̈ܳܐ ܐܶܬܗܰܦܰܟ܇ ܘܥܰܡ ܫܰܒܪ̈ܶܐ ܒܫܽܘܩ̈ܶܐ ܫܰܦܶܦ܇ ܟܰܕ ܗܽܘ ܐܺܝܬܰܘܗ̱ܝ ܡܳܪܳܐ ܕܒܶܪ̈ܝܳܬܳܐ ܘܒܰܕܡܽܘܬ ܐܳܣܝܳܐ ܣܳܥܰܪ ܗܘܳܐ ܘܟܽܠ ܟܽܘܪ̈ܗܳܢܰܝܢ ܡܰܐܣܶܐ ܗܘܳܐ܇ ܫܽܘܒܚܳܐ ܠܫܳܠܽܘܚܶܗ܇ ܕܡܶܛܽܠ ܦܽܘܪܩܳܢܰܢ ܫܰܕܪܶܗ܇ ܘܠܰܡܫܰܪܝܳܐ ܕܰܪܡܶܐ ܒܥܰܪܣܳܐ܇ ܝܰܗܒ ܚܽܘܠܡܳܢܳܐ ܘܶܐܙܰܠ ܠܒܰܝܬܶܗ ܟܰܕ ܚܳܕܶܐ܀

ܝܶܫܽܘܥ ܝܰܡܳܐ ܕܚܶܟܡ̈ܳܬܳܐ܇ ܘܝܳܕܽܘܥܳܐ ܕܟܽܠ ܟܰܣܝ̈ܳܬܳܐ܇ ܗܰܘ ܒܳܚܰܪ ܠܶܒܰܘ̈ܳܬܳܐ܇ ܘܡܰܚܫܒ̈ܳܬܳܐ ܕܒܢܰܝ̈ܢܳܫܳܐ܇ ܝܺܕܰܥ ܠܗܳܝ ܕܶܐܡܰܪܘ̱ ܟܳܗ̈ܢܶܐ܇ ܕܗܳܐ ܓܽܘܕܳܦܳܐ ܡܰܠܶܠ ܒܰܪ ܡܰܪܝܰܡ܇ ܘܫܰܪܺܝ ܩܳܥܶܐ ܟܰܕ ܐܳܡܰܪ ܠܟܽܠܶܗ ܟܶܢܫܳܐ ܕܰܚܕܳܪ̈ܰܘܗ̱ܝ܇ ܕܰܐܝܕܳܐ ܟܰܝ ܦܫܺܝܩܳܐ܇ ܕܳܐܡܰܪ ܐ̱ܢܳܐ ܠܗܳܢܳܐ ܡܫܰܪܝܳܐ܇ ܘܗܳܝ ܕܰܫܒܺܝܩܺܝܢ ܠܳܟ ܚܛܳܗܰܝ̈ܟ܇ ܐܳܘ ܕܩܽܘܡ ܗܰܠܶܟ ܘܶܐܬܰܐܣܺܝ ܡܶܢ ܟܽܘܪܗܳܢܶܗ܀

 

ܐ̱ܚܪܺܢܳܐ ܒܩܳܠܳܐ ܛܽܘܒܰܝܟܝ̱ ܥܺܕܬܳܐ

ܗܘܳܐ ܥܰܕܥܺܐܕܳܐ܇ ܘܶܐܙܰܠ ܝܶܫܽܘܥ ܠܽܐܘܪܺܫܠܶܡ܇ ܘܶܐܫܟܰܚ ܬܰܡܳܢ ܠܰܡܫܰܪܝܳܐ܇ ܕܰܡܫܰܢܰܩ ܢܽܘܓܪܳܐ ܕܙܰܒܢܳܐ ܘܶܐܡܰܪ ܠܶܗ ܕܩܽܘܡ ܫܩܽܘܠ ܥܰܪܣܳܟ܇ ܘܙܶܠ ܠܒܰܝܬܳܟ ܟܰܕ ܚܳܕܶܐ ܐܰܢ̱ܬ܇ ܘܡܶܚܕܳܐ ܩܳܡ ܘܰܡܗܰܠܶܟ ܗܘܳܐ܇ ܝܰܗܒܘ̱ ܬܶܫܒܽܘܚܬܳܐ ܠܰܐܠܳܗܳܐ܇ ܘܰܚܙܰܐܽܘܗ̱ܝ ܟܶܢܫ̈ܶܐ ܘܰܬܗܰܪܘ̱ ܘܝܰܗܒܘ̱ ܬܶܫܒܽܘܚܬܳܐ ܠܰܐܠܳܗܳܐ܀

ܥܰܡܳܐ ܠܺܝܛܳܐ ܕܝܽܘܕܳܝ̈ܶܐ ܛܳܠܡ̈ܰܝ ܩܽܘܫܬܳܐ ܟܰܕ ܚܙܰܐܳܘܽܗܝ ܠܫܶܡܫܳܐ ܦܰܐܝܳܐ܇ ܐܶܬܟܰܡܰܗ̈ܝ ܗܘ̈ܰܝ ܥܰܝܢܰܝ̈ܗܽܘܢ܇ ܘܠܳܐ ܐܶܣܬܰܟܰܠܘ̱ ܕܳܘܰܝ̈ܳܐ܇ ܕܰܥܒܰܪ ܙܰܒܢܳܐ ܕܺܐܝܩܳܪܗܽܘܢ܇ ܐܰܪܺܝܒܘ̱ ܬܰܡܳܢ ܥܰܠ ܝܶܫܽܘܥ܇ ܕܗܳܢܳܐ ܓܰܕܶܦ ܥܰܠ ܕܶܐܡܰܪ܇ ܠܰܡܫܰܪܝܳܐ ܫܒܺܝܩܺܝܢ ܚܛܳܗܰܝ̈ܟ܇ ܚܙܺܝ ܢܰܦܫܳܟ ܠܳܐ ܬܽܘܒ ܬܶܚܛܶܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ ܓܢܺܝܙܬܳܐ

ܫܰܪܺܝ ܡܫܰܪܝܳܐ ܕܰܢܡܰܠܶܠ܇ ܟܰܕ ܒܳܟܶܐ ܪܰܥܽܘܡܳܐܺܝܬ܇ ܕܗܳܐ ܬܠܳܬܺܝܢ ܘܰܬܡܳܢܶܐ ܫܢܺܝ̈ܢ ܐܺܝܬ ܠܺܝ ܐܰܟܡܳܐ ܕܚܳܙܶܝܢ ܐ̱ܢܬܽܘܢ܇ ܘܠܳܐ ܐ̱ܢܳܫ ܐܶܣܬܰܩܒܰܠ ܘܰܥܒܰܪ܇ ܕܳܐܡܰܪ ܗܘܺܝܿܬ ܠܶܗ ܘܡܰܐܣܶܐ ܠܺܝ܇ ܘܠܳܐ ܗܰܘ ܓܰܒܪܳܐ ܡܪܰܚܡܳܢܳܐ܇ ܕܰܫܡܺܝܥ ܠܺܝ ܕܩܳܪܶܝܢ ܝܶܫܽܘܥ܇ ܐܶܣܬܰܩܒܰܠ ܘܰܥܒܰܪ ܨܶܝܕܰܝ ܘܳܐܡܰܪ ܗܘܺܝܿܬ ܠܶܗ ܘܡܰܐܣܶܐ ܠܺܝ܇ ܘܰܥܢܳܐ ܡܳܪܰܢ ܘܶܐܡܰܪ ܠܶܗ ܠܰܡܫܰܪܝܳܐ܇ ܩܽܘܡ ܫܩܽܘܠ ܥܰܪܣܳܟ ܘܙܶܠ ܠܒܰܝܬܳܟ ܟܰܕ ܚܳܕܶܐ ܐܰܢ̱ܬ܀

ܫܽܘܒܚܳܐ ܘܣܶܓܕܬܳܐ ܘܺܐܝܩܳܪܳܐ܇ ܢܰܣܶܩ ܠܰܐܒܳܐ ܩܰܕܺܝܫܳܐ܇ ܕܫܰܕܰܪ ܠܰܒܪܶܗ ܚܰܒܺܝܒܳܐ܇ ܕܢܰܐܣܶܐ ܟܺܐܒ̈ܶܐ ܕܢܰܦܫ̈ܳܬܰܢ܇ ܘܰܥܨܰܒ ܘܰܐܣܺܝ ܐܳܦ ܐܰܚܠܶܡ܇ ܚܒܳܪ̈ܳܬܳܐ ܕܰܡܡܰܚܰܝ̈ܳܐ ܠܓܰܪܒܳܢܳܐ ܕܰܟܺܝ ܒܡܶܠܬܶܗ܇ ܘܰܠܣܰܡܝܳܐ ܦܰܬܰܚ ܒܪܽܘܩܶܗ܇ ܠܰܡܫܰܪܝܳܐ ܕܰܒܥܳܐ ܡܶܢܶܗ ܚܽܘܠܡܳܢܳܐ܇ ܝܰܗܒܠܶܗ ܐܺܝܕܳܐ ܘܰܐܩܺܝܡܶܗ ܘܚܰܝܶܨ ܠܗܰܕܳܡܰܘ̈ܗܝ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܐܰܥܺܝܪܰܝܢܝ̱ ܕܶܐܙܡܰܪ ܠܳܟ

ܟܰܕ ܥܒܰܪ ܗܘܳܐ ܦܳܪܽܘܩܰܢ܇ ܒܶܐܣܛܘܳܐ ܕܡܶܬܩܪܶܐ ܕܰܫܠܶܝܡܽܘܢ܇ ܐܶܫܟܰܚ ܬܰܡܳܢ ܠܰܡܫܰܪܝܳܐ܇ ܕܰܪܡܶܐ ܗܘܳܐ ܢܽܘܓܪܳܐ ܕܙܰܒܢܳܐ܀

ܒܥܳܐ ܡܶܢܶܗ ܟܰܕ ܡܶܬܟܰܫܰܦ܇ ܕܰܐܣܢܳܝ̱ ܡܳܪܰܢ ܒܰܚܢܳܢܳܟ܇ ܘܶܐܡܰܪ ܠܶܗ ܕܰܫܩܽܘܠ ܥܰܪܣܳܟ ܘܙܶܠ ܠܒܰܝܬܳܟ ܟܰܕ ܚܳܕܶܐ ܐܰܢ̱ܬ܀

ܦܰܓܪܳܐ ܢܶܩܢܶܐ ܚܽܘܠܡܳܢܳܐ܇ ܘܢܰܦܫܳܟ ܬܶܬܫܺܝܓܝ̱ ܒܚܽܘܣܳܝܳܐ ܕܥܰܡ ܚܽܘܣܳܝܳܐ ܘܚܽܘܠܡܳܢܳܐ܇ ܬܶܙܡܰܪ ܫܽܘܒܚܳܐ ܠܰܐܠܳܗܳܐ܀

ܬܠܳܬܺܝܢ ܘܰܬܡܳܢܶܐ ܫܢܰܝ̈ܳܐ܇ ܢܶܛܪܶܬ ܫܰܒܬܳܐ ܘܠܳܐ ܐܶܬܗܰܢܺܝܿܬ܇ ܐܶܡܰܪ ܡܫܰܪܝܳܐ ܠܝܽܘܕܳܝ̈ܶܐ܇ ܘܠܳܐ ܫܠܺܝܘ ܡܶܢ ܪܰܘܒܳܐ ܕܰܥܠܰܘܗ̱ܝ܀

ܚܰܕ ܟܺܐܒܳܐ ܠܚܽܘܕ ܡܰܐܣܶܐ ܗܘܳܐ܇ ܗܰܘ ܡܰܒܽܘܥܳܐ ܕܫܺܝܠܽܘܚܳܐ܇ ܘܦܰܓܪܶܗ ܕܡܳܪܰܢ ܗܳܐ ܡܰܐܣܶܐ܇ ܟܽܠܗܽܘܢ ܟܺܐܒ̈ܶܐ ܘܟܽܘܪ̈ܗܳܢܶܐ܀

 

ܩܰܘܡܳܐ ܩܰܕܡܳܝܳܐ ܕܠܺܠܝܳܐ ܒܩܳܠܳܐ ܗܰܒܠܳܗܿ ܠܥܺܕܬܳܟ

ܥܰܠ ܡܽܘܢ ܠܳܐ ܒܛܺܝܠ ܠܳܟ܇ ܐܳܘ ܓܰܒܪܳܐ ܥܰܠ ܚܽܘܠܡܳܢܳܟ ܐܳܡܰܪ ܗܘܳܐ ܠܶܗ ܡܳܪܰܢ ܠܰܡܫܰܪܝܳܐ܇ ܕܗܳܐ ܚܳܙܶܐ ܐ̱ܢܳܐ ܠܳܟ܇ ܕܺܐܝܬ ܠܳܟ ܢܽܘܓܪܳܐ ܒܗܳܢ ܟܺܐܒܳܐ. ܕܰܡܫܰܪܝܽܘܬܳܐ ܘܠܰܝܬ ܠܳܟ ܥܳܨܽܘܒܳܐ܀

ܥܰܡ ܒܶܟܝܳܐ ܪܰܒܳܐ ܘܟܰܪܝܽܘܬܳܐ ܦܰܢܺܝ ܗܘܳܐ ܠܶܗ܇ ܟܰܕ ܡܶܬܟܰܫܰܦ ܘܡܰܝܠܶܠ ܥܰܠ ܟܺܐܒܶܗ܇ ܕܠܰܝܬ ܐ̱ܢܳܫ ܕܡܰܐܣܶܐ ܠܺܝ܇ ܠܰܐܠܳܗܳܐ ܗܳܐ ܡܦܺܝܣ ܐ̱ܢܳܐ ܠܶܗ܇ ܕܢܺܐܬܶܐ ܠܳܐܝܳܠܝ̱ ܘܗܽܘ ܡܨܶܐ ܡܥܰܕܰܪ ܠܺܝ܀

 

ܡܰܕܪܳܫܳܐ ܒܩܳܠܳܐ ܗܳܢܰܘ ܝܰܪܚܳܐ ܥܶܢܝܳܢܳܐ ܠܳܟ ܬܶܫܒܽܘܚܬܳܐ ܡܫܺܝܚܳܐ ܕܶܐܬܳܐ ܘܰܐܣܺܝ ܟܺܐܒܰܝ̈ܢ

ܚܰܕ ܚܰܕ ܟܺܐܒܳܐ ܡܳܐ ܕܢܳܚܶܬ ܗܘܳܐ ܡܰܐܬܰܐܣܶܐ ܗܘܳܐ܇ ܘܫܽܘܚܢܳܐ ܪܰܒܳܐ ܡܳܐ ܕܡܳܪܶܕ ܗܘܳܐ܇ ܡܶܢ ܥܳܨܽܘܒ̈ܶܐ ܘܳܐܣܰܘ̈ܳܬܳܐ. ܒܓܰܘ ܫܺܝܠܽܘܚܳܐ܇ ܡܳܐ ܕܙܳܥܘ̱ ܡܰܝ̈ܳܐ܇ ܡܶܬܰܐܣܶܐ ܗܘܳܐ܀

ܚܰܘܺܝ ܐ̱ܪܳܙܳܐ܇ ܐܳܣܝܳܐ ܪܰܒܳܐ ܨܶܝܕ ܫܺܝܠܽܘܚܳܐ܇ ܕܢܺܐܠܰܦ ܥܳܠܡܳܐ ܕܗܽܘܝܽܘ ܐܳܣܝܳܐ܇ ܐܳܦ ܥܳܨܽܘܒܳܐ ܕܰܡܡܰܚܰܝ̈ܳܐ܇ ܕܥܰܠܗܳܝ ܐܶܬܳܐ܇ ܘܢܰܐܣܶܐ ܐܶܢܽܘܢ ܕܰܟܪ̈ܺܝܗܺܝܢ ܗ̱ܘܰܘ܀

ܚܙܳܐ ܠܰܟܪ̈ܺܝܗܶܐ܇ ܕܪܰܡܶܝܢ ܗ̱ܘܰܘ ܒܶܗ܇ ܒܗܰܘ ܒܶܝܬ ܚܶܣܕܳܐ܇ ܘܰܡܣܰܟܶܝܢ ܗ̱ܘܰܘ ܠܙܰܘܥܳܐ ܕܡܰܝ̈ܳܐ܇ ܕܢܰܚܠܶܡ ܐܶܢܽܘܢ ܡܶܢ ܟܺܐܒܰܝ̈ܗܽܘܢ܇ ܘܰܥܨܳܝܗ̱ܝ ܚܽܘܒܶܗ ܕܰܡܪܰܚܡܳܢܳܐ܇ ܕܢܶܣܥܽܘܪ ܐܶܢܽܘܢ܀

ܚܙܳܐ ܠܰܡܫܰܪܝܳܐ ܕܢܽܘܓܪܳܐ ܪܰܒܳܐ ܢܰܘܠܽܘܗ̱ܝ ܟܺܐܒ̈ܶܐ܇ ܘܰܩܪܶܒ ܨܶܝܕܰܘܗ̱ܝ ܐܳܣܝܳܐ ܛܳܒܳܐ܇ ܘܡܰܠܶܠ ܥܰܡܶܗ ܒܰܣܺܝܡܳܐܺܝܬ܇ ܕܰܒܗܰܘ ܕܰܥܣܶܩ ܟܺܐܒܶܗ ܣܰܓܺܝ ܚܰܘܺܝ ܚܰܝܠܶܗ܀

ܐܶܡܰܪ ܡܳܪܰܢ܇ ܐܳܘ ܠܳܟ ܓܰܒܪܳܐ ܫܒܺܝܩܺܢ ܚܛܳܗܰܝ̈ܟ ܩܽܘܡ ܫܩܽܘܠ ܥܰܪܣܳܟ ܘܙܶܠ ܠܳܟ ܠܒܰܝܬܳܟ ܘܠܳܐ ܬܽܘܒ ܬܶܚܛܶܐ ܐܰܝܟ ܕܰܒܩܰܕܡܳܐ ܕܠܳܐ ܢܶܗܘܶܐ ܠܳܟ ܒܺܝܫ ܡܶܢ ܗܳܟܰܢ ܒܥܶܠܰܬ ܚܛܳܗܰܝ̈ܟ܀

 

ܐ̱ܚܪܺܢܳܐ ܒܩܳܠܳܐ ܝܰܘܡܳܟ ܠܳܟ ܕܳܡܶܐ

ܐܶܬܟܰܢܰܫܘ̱ ܟܶܢܫ̈ܶܐ܇ ܠܥܺܐܕܳܐ ܪܰܒܳܐ. ܠܗܰܘ ܐܶܣܛܘܳܐ ܦܰܐܝܳܐ ܕܰܒܢܳܐ ܫܠܶܝܡܽܘܢ܇ ܘܰܒܡܶܨܥܰܬ ܝܰܘܡ̈ܰܝ ܥܰܕܥܺܐܕܳܐ ܗܰܘ ܕܶܝܢ܇ ܐܶܬܳܐ ܠܶܗ ܡܫܺܝܚܳܐ ܩܳܡ ܒܰܝܢܳܬܗܽܘܢ܀

ܒܒܰܝܬܳܐ ܕܰܟܪ̈ܺܝܗܶܐ܇ ܐܺܝܬ ܗܘܳܐ ܡܫܰܪܝܳܐ܇ ܕܰܫܢܰܝ̈ܳܐ ܬܠܺܬܳܝܢ ܘܰܬܡܳܢܶܐ ܪܡܶܐ܇ ܘܰܥܢܳܐ ܦܳܪܽܘܩܰܢ ܘܗܳܟܰܢ ܐܶܡܰܪ܇ ܕܨܳܒܶܐ ܐܰܢ̱ܬ ܗܳܫܳܐ܇ ܬܶܗܘܶܐ ܚܠܺܝܡܳܐ܀

ܚܛܳܗ̈ܶܐ ܣܰܓܺܝ̈ܐܶܐ܇ ܥܶܠܰܬ ܟܺܐܒܳܟ ܫܒܺܝܩܺܝܢ ܠܳܟ ܚܛܳܗܰܝ̈ܟ ܩܽܘܡ ܐܶܬܚܰܪܰܪ܇ ܘܰܚܙܺܝ ܠܳܐ ܬܶܚܛܶܐ܇ ܐܳܘ ܬܽܘܒ ܬܶܪܫܰܥ. ܕܠܳܐ ܢܶܬܬܰܘܣܰܦ ܠܳܟ ܟܺܐܒܳܐ ܐ̱ܚܪܺܢܳܐ܀

ܗܳܐ ܫܒܺܝܩܺܝܢ ܚܛܳܗܰܝ̈ܟ܇ ܗܰܒ ܨܶܒܝܳܢܳܟ ܕܗܳܫܳܐ ܚܠܺܝܡܽܘܬܳܐ܇ ܡܫܰܟܶܢ ܐ̱ܢܳܐ ܠܳܟ܇ ܘܰܚܕܺܝ ܗܘܳܐ ܟܪܺܝܗܳܐ ܕܰܫܡܰܥ ܗܳܕܶܐ܇ ܕܡܰܣܒܰܪ ܗܘܳܐ ܠܶܗ ܥܰܠ ܚܽܘܠܡܳܢܳܐ܀

ܨܒܺܝ ܒܶܪܝ̱ ܡܶܬܚܰܠܡܰܬ ܡܶܢ ܟܽܘܪܗܳܢܳܟ܇ ܕܶܐܢܳܐ ܠܚܺܐܪܽܘܬܳܟ܇ ܠܳܐ ܥܳܨܶܐ ܐ̱ܢܳܐ܇ ܡܳܕܶܝܢ ܫܽܘܒܩܳܢܳܐ ܝܳܗܶܒ ܐ̱ܢܳܐ ܠܳܟ܇ ܕܚܰܘܒ̈ܰܝܟ ܘܰܚܛܳܗܰܝ̈ܟ ܘܰܕܚܽܘܠܡܳܢܳܟ܀

ܠܳܐ ܡܳܪܝ̱ ܢܶܫܬܰܢܰܩ ܒܣܽܘܓܐܳܐ ܕܚܰܘܒ̈ܶܐ܇ ܘܝܽܘܩܪܳܐ ܕܰܚܛܳܗ̈ܶܐ ܐܰܝܟ ܕܠܰܡܫܰܪܝܳܐ܇ ܐܶܠܳܐ ܐܰܫܘܳܐ ܠܰܢ ܡܳܪܝ̱ ܕܢܶܬܰܐܣܶܐ܇ ܐܰܝܟ ܓܰܒܪܳܐ ܡܫܰܪܝܳܐ܇ ܡܶܢ ܟܽܘܪܗܳܢܶܗ܀

 

ܐܰܘܕܰܘ ܥܰܡܡ̈ܶܐ ܥܶܢܝܳܢܳܐ ܒܪܺܝܟ ܕܶܐܬܬܰܚܬܺܝ ܒܚܽܘܒܶܗ܇ ܘܰܐܣܺܝ ܟܺܐܒܰܝ̈ܢ ܒܰܚܢܳܢܶܗ

ܛܥܺܝܢ ܗܘܳܐ ܡܳܪܰܢ ܘܰܐܝܬܺܝ܇ ܟܽܠ ܥܽܘܕܪ̈ܳܢܺܝܢ ܠܥܳܠܡܳܐ܇ ܙܳܟܽܘܬ ܐ̱ܢܳܫ̈ܳܐ ܕܚܳܒ ܗܘܳܐ܇ ܘܰܠܗܰܘ ܕܰܢܦܰܠ ܩܝܳܡܬܳܐ܇ ܥܨܰܒ ܠܰܟܪ̈ܺܝܗܶܐ ܒܡܶܠܬܳܐ܇ ܘܕܰܟܺܝ ܠܓܰܪ̈ܒܶܐ ܒܓܶܫܬܳܐ܇ ܘܚܰܘܰܪ ܠܛܰܐܡ̈ܶܐ ܒܝܰܕ ܙܽܘܦܶܗ܀

ܝܳܐܶܐ ܗܘܳܐ ܠܶܗ ܠܡܳܪܰܢ܇ ܟܰܕ ܐܰܝܟ ܐܳܣܝܳܐ ܡܶܬܚܙܶܐ܇ ܘܰܠܡܰܟܰܐܒ̈ܶܐ ܘܡܰܪ̈ܥܶܐ܇ ܡܰܐܣܶܐ ܗܘܳܐ ܡܶܢ ܟܺܐܒܰܝ̈ܗܽܘܢ܇ ܠܓܰܪܒܳܐ ܥܪܶܩ ܒܡܶܠܬܶܗ܇ ܘܰܛܪܰܕ ܠܫܺܐܕܳܐ ܒܰܚܢܳܢܶܗ܇ ܘܰܠܝܰܡܳܐ ܫܠܺܝ ܒܪܶܡܙܶܗ܀

ܠܶܓܝܽܘܢ ܛܰܒܰܥ ܒܝܰܡܳܐ܇ ܘܚܰܪܫܳܐ ܘܰܥܘܺܝܪܳܐ ܐܰܬܩܶܢ܇ ܘܰܠܗܰܘ ܡܫܰܪܝܳܐ ܪܰܡܝܳܐ܇ ܒܥܰܪܣܳܐ ܕܟܺܐܒ̈ܶܐ ܢܽܘܓܪܳܐ܇ ܦܩܰܕ ܠܶܗ ܕܢܶܛܥܰܢ ܥܰܪܣܶܗ܇ ܘܰܢܩܽܘܡ ܢܺܐܙܰܠ ܠܒܰܝܬܶܗ ܘܰܐܪܗܶܛ ܥܰܪܣܶܗ ܒܰܪܘܳܙܳܐ܀

ܡܺܝܬܳܐ ܚܙܳܐ ܕܗܳܐ ܡܶܬܠܰܘܶܐ܇ ܥܰܠ ܬܰܪܥܳܐ ܕܢܰܐܺܝܢ ܡܕܺܝܢ̱ܬܳܐ܇ ܘܰܠܛܳܥܽܘܢ̈ܶܐ ܕܥܰܪܣܳܐ܇ ܦܩܰܕ ܠܗܽܘܢ ܕܢܶܟܠܽܘܢ ܘܰܢܩܽܘܡܽܘܢ܇ ܘܰܩܪܶܒ ܨܶܝܕ ܡܺܝܬܳܐ ܘܰܩܪܳܐ܇ ܥܠܰܝܡܳܐ ܠܳܟ ܐܳܡܰܪ ܐ̱ܢܳܐ ܩܽܘܡ܇ ܘܩܳܡ ܐܶܬܢܰܚܰܡ ܒܬܶܗܪܳܐ܀

ܦܩܰܕ ܠܶܗ ܕܢܶܫܩܽܘܠ ܥܰܪܣܶܗ܇ ܘܡܶܚܕܳܐ ܢܺܐܙܰܠ ܠܒܰܝܬܶܗ܇ ܘܩܳܡ ܗܘܳܐ ܘܛܰܥܢܳܗܿ ܟܰܕ ܚܳܕܶܐ܇ ܠܥܰܪܣܳܐ ܗܳܝ ܕܰܛܥܶܢܬܶܗ܇ ܘܥܒܰܪ ܒܰܝܢܳܬ ܟܶܢܫ̈ܶܐ ܘܰܚܙܰܐܽܘܗ̱ܝ ܟܽܠܗܽܘܢ ܘܰܬܗܰܪܘ̱܇ ܒܪܺܝܟ ܗܽܘ ܡܫܺܝܚܳܐ ܕܰܐܚܠܡܶܗ܀

 

ܣܽܘܓܺܝܬܳܐ ܕܥܰܠ ܐܺܝܽܘܒ ܙܰܕܺܝܩܳܐ ܥܰܡܳܐ ܘܥܰܡܡ̈ܶܐ ܥܽܘܢܺܝܬܳܐ ܫܽܘܒܚܳܐ ܠܳܟ ܡܳܪܝ̱ ܕܰܒܚܰܝܠܳܟ܇ ܢܨܰܚܘ̱ ܙܰܕܺܝ̈ܩܶܐ ܒܕܳܪ̈ܰܝܗܽܘܢ܀

ܐܶܫܬܠܰܚ ܠܶܗ ܒܶܣܪܶܗ ܘܕܳܒ܇ ܐܶܡܰܪ ܒܺܝܫܳܐ ܘܠܶܒܶܗ ܥܪܺܝܡ܇ ܒܰܓܙܳܡ̈ܶܐ ܡܫܰܚܠܦ̈ܶܐ ܐܶܬܳܐ ܥܠܰܘܗ̱ܝ܇ ܘܶܐܬܝܰܕܥܰܬ݀ ܠܳܗܿ ܕܠܳܐ ܡܶܙܕܟܶܐ܀

ܒܕܰܪ ܠܶܗ ܠܶܩܛܳܐ ܠܰܒܪܺܝܪܬܳܐ܇ ܘܰܕܠܳܐ ܠܶܒܳܐ ܠܶܗ ܩܰܒܠܰܬ݀܇ ܫܰܪܝܰܬ ܕܬܶܗܘܶܐ ܡܳܠܽܘܟܬܳܐ ܒܰܕܡܽܘܬ ܚܰܘܳܐ ܩܳܛܽܘܠܬܳܐ܀

ܓܽܘܢܚܳܐ ܪܰܒܳܐ ܡܳܢܳܐ ܗܘܳܐ܇ ܢܶܩܝܳܐ ܒܪܺܝܪܬܳܐ ܕܚܶܘܝܳܐ ܫܒܳܟܝ̱܇ ܡܶܪܬܶܗ ܢܦܺܝܚ ܒܶܟܝ̱ ܘܗܳܐ ܩܳܝܡܰܬܝ̱܇ ܡܶܢ ܐܽܘܠܨܳܢܳܐ ܘܰܡܢܰܗܡܰܬܝ̱܀

ܕܽܘܢܝ̱ ܟܺܐܢܳܐܺܝܬ ܒܰܝܢܰܝ ܘܠܶܟܝ̱܇ ܕܺܝܢܳܐ ܟܺܐܢܳܐ ܘܰܬܪܺܝܨܳܐ܇ ܒܺܝܫܳܐ ܐܰܡܛܰܪ ܓܶܐܪ̈ܰܘܗ̱ܝ ܥܠܰܝ܇ ܠܡܽܘܢ ܐܶܨܰܚܶܐ ܠܡܳܪܶܐ ܟܽܠ܀

ܗܳܢܳܐ ܫܰܪܒܳܐ ܕܰܡܡܰܠܶܠܬܝ̱܇ ܣܳܦܪܳܐ ܒܺܝܫܳܐ ܟܬܰܒ ܐܰܠܦܶܟܝ̱܇ ܘܗܳܕܶܐ ܐܶܓܰܪܬܳܐ ܡܨܰܝܚܳܐ܇ ܘܰܐܝܟ ܫܳܛܺܝܬܳܐ ܩܳܪܝܰܬܝ̱ ܠܶܗ܀

ܘܠܳܐ ܣܳܛܳܢܳܐ ܫܰܠܺܝܛ ܠܶܗ܇ ܕܢܶܣܥܽܘܪ ܡܶܕܶܡ ܟܰܕ ܠܳܐ ܦܩܺܝܕ܇ ܗܰܘ ܕܰܐܣܓܺܝ ܠܺܝ ܢܢܰܣܝܰܢܝ̱ ܒܥܳܐ܇ ܘܢܶܣܰܒ ܕܺܝܠܶܗ ܘܫܰܠܺܝܛ ܠܶܗ܀

ܙܳܕܶܩ ܗܘܳܐ ܠܺܝ ܕܶܐܒܰܝܢܶܟܝ̱܇ ܘܐܰܠܶܦ ܘܰܐܪܬܶܐ ܘܰܐܢܰܗܪܶܟܝ̱܇ ܠܡܽܘܢ ܡܶܫܬܰܡܥܳܐ ܕܨܰܚܳܐ ܘܡܽܘܬ܇ ܘܶܐܢܗܽܘ ܕܡܰܘܬܰܐܗ̱ܘ ܨܰܥܪܳܐ ܠܡܽܘܢ܀

ܚܶܠܳܐ ܘܩܶܛܡܳܐ ܗܳܐ ܚܳܙܝܰܬܝ̱܇ ܗܳܢܳܐ ܕܰܗܒܳܐ ܕܰܦܫܺܝܚ ܫܕܶܐ܇ ܠܟܽܘܪܳܐ ܕܟܺܐܒ̈ܶܐ ܡܳܪܝ̱ ܐܰܥܠܰܢܝ̱܇ ܘܟܰܕ ܡܰܦܶܩ ܠܺܝ ܠܟܽܠ ܡܰܬܗܰܪ܀

ܛܳܒ ܢܰܗܺܝܪܳܐ ܐܳܦ ܡܶܠܬܶܟܝ̱܇ ܕܰܒܓܰܘ ܡܶܠܟܶܟܝ̱ ܡܰܘܬܳܐ ܟܣܶܐ܇ ܟܡܳܐ ܟܰܝ ܝܺܩܰܪܘ̱ ܚܰܝܰܝ̈ ܥܠܰܝܟܝ̱܇ ܕܗܳܐ ܐܳܠܨܰܬܝ̱ ܠܺܝ ܕܨܰܚܶܐ ܘܡܽܘܬ܀

ܝܳܐܶܐ ܗܘܳܐ ܠܺܝ ܕܶܐܨܰܥܪܶܟܝ̱܇ ܕܰܐܝܟ ܫܳܛܺܝܬܳܐ ܡܡܰܠܶܠܬܝ̱ ܥܰܡܝ̱܇ ܟܺܐܒܳܐ ܠܟܺܐܒܳܐ ܐܰܘܣܶܦܬܝ̱ ܠܺܝ܇ ܘܨܰܥܪܳܐ ܕܡܰܘܬܳܐ ܐܰܝܬܺܝܬܝ̱ ܠܺܝ܀

ܟܽܠ ܕܺܐܝܬ ܗܘܳܐ ܠܺܝ ܨܶܝܕܰܝ ܫܩܰܠ܇ ܡܳܪܳܐ ܕܪܰܘܡܳܐ ܕܕܺܝܠܶܗ ܗܘܳܐ܇ ܟܰܕ ܝܰܗܒܠܺܝ ܠܳܐ ܪܰܛܢܿܶܬ܇ ܘܗܳܫܳܐ ܕܰܫܩܰܠ ܨܰܥܪܳܐ ܠܡܽܘܢ܀

ܠܳܐ ܬܰܫܰܪܝ̱ ܠܶܗ ܡܶܠܬܶܗ ܕܗܰܘ܇ ܒܰܪ ܐܰܒܕܳܢܳܐ ܕܣܰܓܺܝ ܓܙܰܡ܇ ܕܡܶܚܕܳܐ ܓܶܐܪ̈ܰܘܗ̱ܝ ܡܰܣܪܰܚ ܒܺܝ܇ ܟܳܦܰܪ ܐ̱ܢܳܐ ܒܶܗ ܒܡܳܪܶܐ ܟܽܠ܀

ܘܡܰܘܬܳܐ ܐ̱ܚܪܺܢܳܐ ܢܺܐܬܶܐ ܥܠܰܝ܇ ܘܠܳܐ ܡܨܰܚܶܐ ܐ̱ܢܳܐ ܠܡܳܪܶܐ ܟܽܠ܇ ܟܽܠܗܽܘܢ ܪ̈ܶܓܫܰܝ ܠܶܗ ܣܳܓܕܺܝܢ܇ ܐܶܢ ܫܳܦܰܪ ܠܶܗ ܕܰܢܟܰܢܫܶܟܝ̱܀

ܢܰܘܕܶܐ ܠܶܗ ܦܽܘܡܝ̱ ܘܰܢܩܰܠܣܺܝܘܗ̱ܝ܇ ܠܗܰܘ ܕܰܫܦܰܪ ܠܶܗ ܘܗܳܟܰܢ ܨܒܳܐ܇ ܕܗܽܘ ܝܰܗܒ ܘܰܫܩܰܠ ܘܫܰܠܺܝܛ ܠܶܗ܇ ܬܰܘܕܺܝܬܳܐ ܠܶܗ ܥܰܠ ܟܽܠܗܶܝܢ܀

ܣܰܓܺܝ ܚܰܫܳܐ ܗܳܐ ܛܡܺܝܪ ܒܺܝ܇ ܛܳܒ ܡܶܢ ܟܺܐܒܳܐ ܕܰܟܪܺܝܟ ܠܺܝ܇ ܕܕܰܠܡܳܐ ܒܺܝܫܳܐ ܢܰܛܥܶܟܝ̱ ܡܶܢܝ̱܇ ܘܡܳܐ ܕܰܙܟܺܝܬܶܗ ܢܰܛܥܶܟܝ̱ ܠܟܝ̱܀  

ܥܰܘܠܳܐ ܟܰܣܝܳܐ ܐܶܢ ܐܺܝܬ ܒܺܝ܇ ܬܽܘܒ ܡܰܪܕܽܘܬܳܐ ܬܺܐܬܶܐ ܥܠܰܝ܇ ܘܶܐܢ ܙܰܟܳܝ ܐ̱ܢܳܐ ܘܰܠܡܳܪܝ̱ ܫܦܰܪ܇ ܢܶܪܕܶܐ ܘܢܶܩܢܶܐ ܕܫܰܠܺܝܛ ܠܶܗ܀

ܦܪܺܝܣܳܐ ܕܰܥܠܰܝ ܗܳܐ ܣܶܕܩܿܶܬ܇ ܣܰܥܪܳܐ ܕܰܒܪܺܝܫܝ̱ ܗܳܐ ܓܳܙܿܶܬ܇ ܥܰܪܛܶܠ ܥܶܠܶܬ ܗܳܐ ܫܠܺܝܚ ܐ̱ܢܳܐ܇ ܕܥܰܪܛܶܠ ܐܶܦܽܘܩ ܡܳܢ ܥܳܠܡܳܐ܀

ܨܪܺܝܟ ܐ̱ܢܳܐ ܝܰܘܡܳܢ ܛܳܒ ܡܶܢܗܽܘܢ ܘܶܐܢ ܚܳܙܶܝܢ ܠܺܝ ܚܳܐܫܺܝܢ ܥܠܰܝ܇ ܓܳܠܶܐ ܐ̱ܢܳܐ ܟܺܐܒܝ̱ ܩܕܳܡܰܝܗܽܘܢ܇ ܘܗܶܢܽܘܢ ܒܳܥܶܝܢ ܪ̈ܰܚܡܶܐ ܥܠܰܝ܀

ܩܪܳܒܳܐ ܥܰܡ ܐ̱ܢܳܫ ܠܳܐ ܥܒܺܝܕ ܠܺܝ܇ ܗܳܐ ܡܶܢ ܕܰܗܘܺܝܿܬ ܕܰܐܢ̱ܬܝ ܝܳܕܥܰܬܝ̱܇ ܒܣܺܝܪ ܗܽܘ ܐܰܝܢܳܐ ܕܡܰܟܺܝܟ ܡܶܢܝ̱܇ ܟܡܳܐ ܒܳܠܰܥ ܐ̱ܢܳܐ ܘܫܰܬܺܝܩ ܐ̱ܢܳܐ܀

ܪܰܒܳܐܗ̱ܝ ܗܳܕܶܐ ܕܰܡܪܰܛܢܬܝ̱܇ ܘܠܳܐ ܒܰܣܺܝܡ ܠܺܝ ܡܽܘܢ ܕܳܐܡܰܪܬܝ̱܇ ܘܶܐܢ ܛܳܒ̈ܳܬܶܗ ܕܡܳܪܝܳܐ ܢܣܰܒܢ܇ ܡܶܢ ܒܺܝܫ̈ܳܬܳܐ ܠܳܐ ܢܶܫܬܰܐܰܠ܀

ܫܽܘܒܚܳܐ ܦܽܘܡܶܟܝ̱ ܢܶܗܘܶܐ ܡܠܶܐ܇ ܚܠܳܦ ܨܽܘܚܝ̈ܳܬܳܐ ܕܠܳܐ ܟܳܫܪ̈ܳܢ܇ ܕܰܣܒܰܪ ܒܺܝܫܳܐ ܕܰܫܒܳܟܝ̱ ܡܶܢܝ̱܇ ܒܺܝ ܢܶܬܟܰܐܐܰܪ ܕܰܟܡܳܐ ܡܚܺܝܠ܀

ܬܰܘܕܺܝܬܳܐ ܠܳܟ ܡܳܪܶܐ ܟܽܠ ܕܰܒܛܰܝܒܽܘܬܳܟ ܪܰܚܡܶܬ ܥܠܰܝ܇ ܘܡܳܐ ܕܡܶܢ ܐܽܘܠܨܳܢܝ̱ ܡܩܺܝܡ ܐܰܢ̱ܬ ܠܺܝ܇ ܕܶܐܙܡܰܪ ܫܽܘܒܚܳܐ ܠܦܽܘܪܩܳܢܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܰܕ ܠܰܡܫܰܪܝܳܐ ܡܶܬܐܰܡܪ̈ܳܢ ܗܘ̈ܰܝ ܗܳܠܶܝܢ ܡ̈ܶܠܶܐ܇ ܥܳܠܡܳܐ ܟܽܠܶܗ ܥܰܠ ܚܽܘܠܡܳܢܶܗ ܡܣܰܒܰܪ ܗܘܳܐ ܠܶܗ܇ ܐܰܢ̱ܬ ܠܰܡ ܥܳܠܡܳܐ ܐܶܢܗܽܘ ܕܨܳܒܶܝܬ ܕܬܶܗܘܶܐ ܚܠܺܝܡܳܐ܇ ܐܰܢ̱ܬ ܡܶܫܟܰܚ ܐܰܢ̱ܬ ܢܣܽܘܦܽܘܢ ܟܺܐܒܰܝ̈ܟ ܟܰܕ ܣܰܓܺܝܐܺܝܢ܀

ܣܓܽܝܕ ܗܽܘ ܐܰܒܳܐ ܕܰܥܨܳܝܗ̱ܝ ܚܽܘܒܶܗ ܘܠܰܒܪܶܗ ܫܰܕܰܪ܇ ܘܬܰܘܕܺܝ ܠܰܒܪܳܐ ܕܡܰܬܠܶܗ ܠܥܳܠܡܳܐ ܒܗܰܘ ܕܰܡܫܰܪܰܝ܇ ܗܕܺܝܪ ܘܰܡܫܰܒܰܚ ܪܽܘܚܳܐ ܕܩܽܘܕܫܳܐ ܕܡܶܨܒܳܐ ܨܳܒܶܐ܇ ܕܰܒܟܽܠ ܥ̈ܶܠܠܳܢ ܢܶܥܨܽܘܒ ܟܺܐܒܰܝ̈ܢ ܠܶܗ ܬܶܫܒܽܘܚܬܳܐ܀

 

ܩܰܘܡܳܐ ܕܰܬܪܶܝܢ ܕܠܺܠܝܳܐ ܒܩܳܠܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܝܶܫܽܘܥ ܝܰܡܳܐ ܕܰܚܢܳܢܳܐ ܚܙܳܝܗ̱ܝ ܠܰܡܫܰܪܝܳܐ܇ ܟܰܕ ܡܶܫܬܰܢܰܩ ܒܽܐܘܠܨܳܢܳܐ ܘܶܐܡܰܪ ܠܶܗ܇ ܫܒܺܝܩܺܝܢ ܚܰܘܒܰܝ̈ܟ ܩܽܘܡ ܫܩܽܘܠ ܥܰܪܣܳܟ ܘܙܶܠ ܠܒܰܝܬܳܟ܇ ܘܢܶܚܙܶܝܟ ܟܽܠܢܳܫ ܗ ܘܢܶܙܡܰܪ ܫܽܘܒܚܳܐ܀

ܝܽܘܕܳܝ̈ܶܐ ܟܰܕ ܡܶܫܬܰܢܶܝܢ܇ ܘܟܳܗܢ̈ܰܝ ܥܰܡܳܐ ܓܽܘܕܳܦܳܐ ܣܳܒܪܺܝܢ ܕܺܐܝܬܰܘܗ̱ܝ܇ ܡܰܢܽܘ ܡܨܶܐ ܠܳܗܿ܇ ܠܗܳܕܶܐ ܕܠܳܚܶܐ ܚܛܳܗ̈ܶܐ ܐܶܠܳܐ ܐܶܢ ܚܰܕ ܐܰܠܳܗܳܐ܇ ܗ ܗܰܘ ܕܺܐܝܣܪܳܐܶܝܠ܀

 

ܡܰܕܪܳܫܳܐ ܒܩܳܠܳܐ ܩܽܘܡ ܦܰܘܠܳܘܣ܇ ܫܽܘܒܚܳܐ ܠܳܟ ܐܳܣܝܳܐ ܫܡܰܝܳܢܳܐ܇ ܡܶܢ ܪܰܘܡܳܐ ܠܥܽܘܡܩܳܐ ܐܶܬܬܰܚܬܺܝܬ

ܕܳܠ ܘܰܢܚܶܬ ܡܶܢ ܪܰܘܡܳܐ ܕܰܫܡܰܝܰܘ̈ܗܝ܇ ܝܰܩܺܝܪܳܐ ܕܰܨܒܳܐ ܘܶܐܬܡܰܟܰܟ܇ ܗܰܠܶܟ ܗܘܳܐ ܒܰܝܢܳܬ ܒܢܰܝ̈ܢܳܫܳܐ܇ ܒܰܕܡܽܘܬܳܐ ܒܨܺܝܪܬܳܐ ܕܡܶܣܟܺܢ̈ܶܐ܇ ܘܥܰܠ ܗܘܳܐ ܠܽܐܘܪܺܫܠܶܡ܇ ܠܶܐܣܛܘܳܐ ܕܰܫܠܶܝܡܽܘܢ܇ ܐܰܝܟܳܐ ܕܰܟܪ̈ܺܝܗܶܐ܇ ܬܰܡܳܢ ܟܢܺܝܫܺܝܢ ܗ̱ܘܰܘ܇ ܒܪܺܝܟ ܚܽܘܒܶܗ ܕܶܐܬܳܐ ܒܛܰܝܒܽܘܬܶܗ܇ ܕܢܰܐܣܶܐ ܠܰܢ ܟܺܐܒܰܝ̈ܢ ܒܰܚܢܳܢܶܗ܀

ܚܙܳܝܗ̱ܝ ܛܳܒܳܐ ܐܽܘܡܳܢܳܐ ܡܗܺܝܪܳܐ܇ ܠܗܰܘ ܡܳܐܢܳܐ ܥܒܺܝܕܳܐ ܕܰܡܚܺܝܠ ܗܘܳܐ܇ ܓܳܠܘ̱ ܪ̈ܰܚܡܰܘܗ̱ܝ ܕܰܚܙܳܐ ܕܰܡܫܰܪܰܝ܇ ܗܰܘ ܥܶܪܒܳܐ ܛܰܥܝܳܐ ܕܺܐܝܣܪܳܐܶܝܠ܇ ܐܳܡܰܪ ܗܘܳܐ ܗܳܝܕܶܝܢ܇ ܡܫܰܪܝܳܐ ܨܳܒܶܐ ܐܰܢ̱ܬ܇ ܕܰܚܠܺܝܡܳܐ ܬܶܗܘܶܐ܇ ܡܶܢܶܗ ܕܟܽܘܪ̈ܗܳܢܳܟ܇ ܫܡܰܥ ܕܳܘܝܳܐ ܡܚܺܝܠܳܐ ܠܰܣܒܰܪܬܳܐ܇ ܕܚܽܘܠܡܳܢܳܐ ܠܶܗ ܗܽܘ ܡܣܰܒܰܪ ܗܘܳܐ܀

ܚܳܝܪܺܝܢ ܒܶܗ ܟܳܗ̈ܢܶܐ ܘܡܶܙܕܰܥܦܺܝܢ܇ ܘܨܽܘܚܝ̈ܳܬܳܐ ܫܳܕܶܝܢ ܒܗܰܘ ܕܰܐܣܝܶܗ܇ ܚܳܝܪܺܝܢ ܒܶܗ ܟܶܢܫ̈ܶܐ ܘܡܶܬܕܰܡܪܺܝܢ܇ ܘܬܶܫܒܽܘܚܬܳܐ ܝܳܗܒܺܝܢ ܠܰܐܠܳܗܳܐ܇ ܚܙܺܝ ܗܳܫܳܐ ܠܟܳܗ̈ܢܶܐ܇ ܕܰܟܡܳܐ ܛܳܠܽܘܡܺܝܢ܇ ܘܰܠܥܰܡܳܐ ܦܫܺܝܛܳܐ ܕܰܟܡܳܐ ܬܰܡܺܝܡ ܗܘܳܐ܇ ܘܳܝ ܟܳܗ̈ܢܶܐ ܡܳܢܳܐ ܦܳܪܥܺܝܬܽܘܢ܇ ܒܺܝܫ̈ܳܬܳܐ ܠܰܥܒܳܕ ܛܳܒ̈ܳܬܳܐ܀

ܦܰܢܺܝ ܠܗܽܘܢ ܡܳܪܰܢ ܠܛܳܠܽܘܡ̈ܶܐ܇ ܕܰܐܝܕܳܐ ܟܰܝ ܦܫܺܝܩܳܐ ܕܶܐܚܰܘܶܐ܇ ܕܰܫܒܺܝܩܺܝܢ ܚܛܳܗܰܝ̈ܟ ܐܳܘ ܡܫܰܪܝܳܐ܇ ܐܰܘ ܕܰܛܥܶܢ ܥܰܪܣܳܟ ܘܙܶܠ ܠܒܰܝܬܳܟ܇ ܥܠܰܝ ܕܶܝܢ ܬܰܪ̈ܬܰܝܗܶܝܢ܇ ܣܰܓܺܝ ܦܫܺܝܩ̈ܳܢ ܠܺܝ܇ ܘܡܶܢ ܗܳܕܶܐ ܗܘܰܝܬܽܘܢ܇ ܡܶܣܬܰܟܠܺܝܢ ܘܝܳܕܥܺܝܢ܇ ܕܬܰܪ̈ܬܰܝܗܶܝܢ ܠܶܗ ܗܽܘ ܡܫܰܟܶܢ ܐ̱ܢܳܐ܇ ܚܽܘܠܡܳܢܳܐ ܘܫܽܘܒܩܳܢ ܚܰܘܒ̈ܳܬܶܗ܀

ܠܳܐ ܐܶܬܺܝܬ ܕܶܐܩܪܶܐ ܠܙܰܕܺܝ̈ܩܶܐ܇ ܠܰܟܪ̈ܺܝܗܶܐ ܐܶܬܶܠ ܚܽܘܠܡܳܢܳܐ܇ ܠܚܰܛܳܝ̈ܶܐ ܫܽܘܒܩܳܢܳܐ ܕܚܰܘܒ̈ܶܐ܇ ܘܰܒܗܳܕܶܐ ܬܕܶܥܽܘܢ܇ ܕܺܐܝܬ ܚܰܝܠܳܐ ܐܶܥܒܶܕ܇ ܫܽܘܒܩܳܢ ܚܰܘܒ̈ܳܬܳܐ܇ ܘܚܽܘܠܡܳܢܳܐ ܕܟܺܐܒ̈ܶܐ܇ ܐܳܘ ܡܫܰܪܝܳܐ ܫܒܺܝܩܺܝܢ ܠܳܟ ܚܛܳܗܰܝ̈ܟ܇ ܣܰܒ ܥܰܪܣܳܟ ܘܩܽܘܡ ܙܶܠ ܠܳܟ ܠܒܰܝܬܳܟ܀

 

ܛܽܘܒܰܝܟܝ̱ ܐܳܦܪܰܬ ܩܳܠܳܐ ܠܳܟ ܬܶܫܒܽܘܚܬܳܐ܇ ܐܳܣܝܳܐ ܛܳܒܳܐ ܕܰܐܣܺܝܬ ܟܺܐܒ̈ܶܐ ܕܰܡܡܰܚܰܝ̈ܳܐ܀

ܛܽܘܒܰܝܟܝ̱ ܒܰܝܬܳܐ ܕܺܐܝܬ ܒܽܐܘܪܺܫܠܶܡ ܇ ܕܐܳܣܝܳܐ ܕܟܺܐܒ̈ܶܐ ܢܚܶܬ ܗܰܠܶܟ ܒܳܟ܇ ܘܟܳܗ̈ܢܶܐ ܚܬܺܝܪ̈ܶܐ ܛܢܰܘ ܣܪ̈ܺܝܩܳܬܳܐ܇ ܒܗܰܘ ܝܳܗܽܘܒܳܐ ܕܟܽܠ ܥܽܘܕܪ̈ܳܢܺܝܢ܇ ܐܳܘ ܣܡܰܝ̈ܳܐ ܢܳܓܽܘܕ̈ܶܐ ܕܰܣܡܰܝ̈ܳܐ܇ ܐܶܬܒܰܝܰܢܘ̱ ܘܰܚܙܰܘ ܢܽܘܗܪܳܐ ܘܦܽܘܪܩܳܢܳܐ ܠܳܐ ܗܘܳܬ݀ ܗܳܕܶܐ ܡܶܢ ܒܰܪܢܳܫܳܐ ܐܶܠܳܐ ܒܐܰܠܳܗܳܐ܀

ܛܽܘܒܰܝܟ ܡܫܰܪܝܳܐ ܟܪܺܝܗܳܐ ܕܢܽܘܓܪܳܐ܇ ܕܒܰܪܦܳܦ ܥܰܝܢܳܐ ܫܩܰܠܬ ܐܳܣܝܽܘܬܳܐ܇ ܠܳܐ ܥܶܩܳܪ̈ܶܐ ܘܠܳܐ ܣܰܡܡܳܢ̈ܶܐ܇ ܐܳܦܠܳܐ ܢܽܘܪܳܐ ܘܦܰܪܙܠܳܐ ܕܓܳܙܰܪ܇ ܛܽܘܒܰܝܟ ܕܰܒܡܶܠܬܳܐ ܕܡܶܢ ܠܚܽܘܕܳܝܳܐ܇ ܩܢܰܝܬ ܐܳܣܝܽܘܬܳܐ ܕܢܰܦܫܳܐ ܘܦܰܓܪܳܐ܇ ܡܶܛܽܠ ܐܳܣܝܽܘܬܳܟ ܟܽܠܫܳܥ ܪܳܢܶܐ ܗܘܰܝܬ ܒܰܥܓܰܠ ܐܶܫܟܰܚܬܳܗܿ܀

ܐܰܝܟ ܡܰܐܣܰܐܬܳܐ ܗܘܳܐ ܗܘܳܐ ܥܰܡܳܐ܇ ܠܽܘܩܒܰܠ ܟܳܗ̈ܢܶܐ ܥܘܺܝܪ̈ܶܐ ܣܰܟ̈ܠܶܐ ܫܰܪܺܝܪ̈ܳܬܳܐ ܒܩܽܘܫܬܳܐ ܕܳܢܘ̱ ܗ̱ܘܰܘ܇ ܟܰܕ ܚܳܙܶܝܢ ܗ̱ܘܰܘ ܫܪܳܪܳܐ ܓܰܠܝܳܐ܇ ܐܳܘ ܠܥܰܡܳܐ ܦܫܺܝܛܳܐ ܕܗܰܝܡܶܢ ܗܘܳܐ܇ ܐܳܘ ܠܟܳܗܢ̈ܰܝ ܙܺܐܦܳܐ ܟܡܳܐ ܐܰܪܫܰܥܘ̱܇ ܒܰܫܪܳܪܳܐ ܣܡܰܝ̈ܳܐ ܗ̱ܘܰܘ ܐܰܝܟ ܕܰܩܪܳܐ ܐܶܢܽܘܢ܇ ܝܳܕܰܥ ܟܰܣܝ̈ܳܬܳܐ܀

ܛܽܘܒܰܝܟ ܥܰܡܳܐ ܕܗܰܝܡܶܢ ܒܰܒܪܳܐ܇ ܕܒܰܪ ܐܰܠܳܗܰܐ ܗ̱ܘ ܕܰܐܣܺܝ ܡܫܰܪܝܳܐ܇ ܗܳܕܶܐ ܪܫܺܝܡܳܐ ܠܙܰܕܺܝܩܽܘܬܳܐ܇ ܘܩܰܫܝܽܘܬ ܠܶܒܳܐ ܠܣܳܦܪ̈ܶܐ ܠܺܝ̈ܛܶܐ܇ ܫܪܳܪܳܐ ܓܶܝܪ ܐܶܡܰܪ ܡܳܪܝܳܐ ܥܠܰܝܟܽܘܢ܇ ܕܰܐܢ̱ܬܽܘܢ ܠܳܐ ܥܳܐܠܺܝܢ ܘܠܰܕܥܳܐܠܺܝܢ ܟܳܠܶܝܬܽܘܢ܇ ܟܰܕ ܐܰܢ̱ܬܽܘܢ ܘܗܶܢܽܘܢ܇ ܠܳܐ ܥܳܐܠܺܝܢ ܐ̱ܢ̱ܬܽܘܢ ܐܶܠܳܐ ܠܒܰܪ ܦܳܝܫܺܝܢ܀

 

ܠܟܶܢܫܳܐ ܥܶܠܳܝܳܐ ܥܽܘܢܺܝܬܳܐ ܐܰܫܘܳܐ ܠܰܢ ܡܳܪܰܢ ܕܢܶܙܡܰܪ ܠܳܟ܇ ܫܽܘܒܚܳܐ ܒܕܽܘܟܪܳܢ ܬܶܕܡܽܘܪܬܳܟ ܕܰܣܥܰܪܬ ܨܶܝܕ ܡܫܰܪܝܳܐ

ܩܳܡ ܗܘܳܐ ܒܰܪܬܺܝܬܳܐ܇ ܘܣܳܓܶܕ ܘܰܡܫܰܒܰܚ܇ ܟܰܕ ܐܶܬܡܰܨܰܥ ܠܶܗ ܒܶܝܬ ܓܰܒ̈ܶܐ ܬܪ̈ܰܝܗܽܘܢ܇ ܟܳܗ̈ܢܶܐ ܥܳܫܩܺܝܢ ܗ̱ܘܰܘ܇ ܕܰܠܡܽܘܢ ܐܶܬܰܐܣܺܝ܇ ܘܟܶܢܫ̈ܶܐ ܚܳܒܨܺܝܢ ܗ̱ܘܰܘ ܕܢܶܚܙܽܘܢ ܠܰܚܠܺܝܡܳܐ܇ ܐܳܘ ܠܪܰܘܒܳܐ ܘܫܽܓܘܫܝܳܐ ܪܰܒܳܐ܇ ܐܳܘ ܠܬܶܗܪܳܐ ܘܬܶܡܗܳܐ ܕܰܗܘܳܐ܇ ܐܳܘ ܠܰܛܠܽܘܡܽܘܬܗܽܘܢ ܕܟܳܗ̈ܢܶܐ܀

ܥܰܠܡܽܘܢ ܐܶܬܰܐܣܺܝܬ ܐܳܡܪܺܝܢ ܠܰܡܫܰܪܝܳܐ܇ ܠܓܰܒܪܳܐ ܕܰܣܓܺܝܘ ܠܶܗ ܟܺܐܒܰܘ̈ܗܝ ܘܟܽܘܪ̈ܗܳܢܰܘܗܝ܇ ܠܡܽܘܢ ܟܳܗ̈ܢܶܐ ܠܺܝ̈ܛܶܐ ܬܰܗܪܽܘܢ ܠܰܡܫܰܪܝܳܐ܇ ܕܬܶܚܕܽܘܢ ܙܳܕܶܩ ܗܘܳܐ ܠܳܐ ܗܘܳܐ ܕܬܶܥܫܩܽܘܢ܇ ܗܳܐ ܡܳܪܶܐ ܕܫܰܒܬܳܐ ܒܰܝܢܳܬܟܽܘܢ ܩܳܐܶܡ܇ ܘܡܶܢ ܥܒܳܕܰܘ̈ܗܝ ܛܳܒ̈ܶܐ ܕܰܥܘ̱ ܠܟܽܘܢ ܕܰܐܠܳܗܰܐܗ̱ܘ܇ ܘܰܕܠܳܐ ܗܰܝܡܶܢܬܽܘܢ ܒܕܳܪܟܽܘܢ܀

 

ܣܽܘܓܺܝܬܳܐ ܩܳܠܳܐ ܥܰܡܳܐ ܘܥܰܡܡ̈ܶܐ ܥܽܘܢܺܝܬܳܐ ܫܽܘܒܚܳܐ ܠܳܟ ܐܳܣܝܳܐ ܕܪ̈ܰܚܡܶܐ܇ ܒܪܺܝܟ ܐܰܒܳܐ ܕܫܰܠܚܳܟ ܨܶܐܝܕܰܝܢ

ܐܰܬܩܶܢ ܐܰܦܰܘ̈ܗܝ ܒܰܪ ܡܰܠܟܳܐ ܕܢܶܚܽܘܬ ܡܶܢ ܪܰܘܡܳܐ ܕܰܫܡܰܝܰܘ̈ܗ̱ܝ܇ ܘܢܶܣܥܽܘܪ ܠܰܐܪܥܳܐ ܒܥܽܘܕܪ̈ܳܢܰܘܗ̱ܝ܇ ܘܢܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ܀

ܒܚܰܫܳܐ ܘܫܽܘܢܳܩܳܐ ܥܒܺܝܕ ܗܘܳܐ܇ ܓܰܒܪܳܐ ܡܫܰܪܝܳܐ ܕܰܪܡܶܐ ܗܘܳܐ܇ ܘܟܺܐܒܳܐ ܥܰܣܩܳܐ ܡܫܰܢܶܩ ܠܶܗ܇ ܘܰܡܫܰܪܺܝܢ ܗ̱ܘܰܘ ܗܰܕܳܡܰܘ̈ܗ̱ܝ܀

ܓܰܒܪܳܐ ܕܰܥܬܶܩ ܒܰܚܛܳܗ̈ܶܐ܇ ܢܽܘܓܪܳܐ ܪܰܒܳܐ ܕܰܫܢܰܝ̈ܳܐ܇ ܘܳܐܣܰܘ̈ܳܬܳܐ ܠܳܐ ܥܰܕܪܽܘܗ̱ܝ܇ ܕܰܡܪܰܕ ܡܶܢܗܽܘܢ ܗܳܢ ܟܺܐܒܳܐ܀

ܕܰܪܡܶܐ ܒܥܰܪܣܳܐ ܢܽܘܓܪܳܐ ܗܘܳܐ܇ ܒܝܰܕ ܡܫܰܪܝܽܘܬܳܐ ܕܟܽܠ ܟܺܐܒܺܝ̈ܢ܇ ܘܰܒܥܳܩܬܳܐ ܘܫܽܘܢܳܩܳܐ ܗܘܳܐ܇ ܟܰܕ ܪܡܶܐ ܒܒܰܝܬܳܐ ܕܰܟܪ̈ܺܝܗܶܐ܀

ܗܳܫܳܐ ܡܳܪܝ̱ ܡܳܢܳܐ ܐܶܥܒܶܕ܇ ܕܡܶܣܟܺܢܳܐ ܐ̱ܢܳܐ ܘܚܰܣܺܝܪܳܐ܇ ܟܰܦܢܳܐ ܨܪܺܝܟܳܐ ܘܰܣܢܺܝܩܳܐ܇ ܕܺܐܝܬ ܠܺܝ ܟܺܐܒܳܐ ܘܠܰܝܬ ܕܥܳܕܰܪ܀

ܘܡܶܢ ܗܳܕܶܐ ܕܰܥ ܘܶܐܣܬܰܟܰܠ܇ ܕܰܒܨܺܝܪ ܓܶܢܣܳܐ ܘܛܽܘܗܡܳܐ ܐ̱ܢܳܐ܇ ܘܒܺܝ ܠܳܐ ܚܳܝܪܺܝܢ ܟܳܗ̈ܢܶܐ ܣܳܟ܇ ܐܳܦܠܳܐ ܐܺܝܬ ܐ̱ܢܳܫ ܕܰܢܥܰܕܰܪ܇ ܙܰܘܥܳܐ ܕܡܰܝ̈ܳܐ ܡܳܐ ܕܗܳܘܶܐ܇ ܡܶܢ ܡܰܠܰܐܟܳܐ ܐܰܝܟ ܕܶܐܡܰܪܬ܇ ܒܗܳܝ ܕܰܒܨܺܝܪ ܐ̱ܢܳܐ ܡܶܢ ܛܽܘܗܡܳܐ܇ ܠܰܝܬ ܕܡܰܘܒܶܠ ܠܺܝ ܠܫܺܝܠܽܘܚܳܐ܀

ܚܕܳܐ ܚܰܣܺܝܪܳܐ ܠܺܝ ܐܳܘ ܡܳܪܝ̱܇ ܕܝܶܫܽܘܥ ܐܳܣܝܳܐ ܗܰܘ ܕܳܐܡܪܺܝܢ܇ ܐܶܠܽܘ ܐܶܣܬܰܩܒܰܠ ܗܘܳܐ ܠܘܳܬܝ̱܇ ܡܗܰܝܡܶܢ ܐ̱ܢܳܐ ܕܰܡܨܶܐ ܕܢܰܚܠܡܰܢܝ̱܀

ܛܥܶܢܬܰܢܝ̱ ܐܶܡܝ̱ ܝܰܪܚܶܐ ܬܶܫܥܳܐ܇ ܘܝܺܠܶܕܬܰܢܝ̱ ܒܟܺܐܒܳܐ ܘܥܳܩܬܳܐ܇ ܘܛܥܶܢܬܰܢܝ̱ ܗܳܕܶܐ ܥܰܪܣܳܐ܇ ܫܢܰܝ̈ܳܐ ܬܠܳܬܺܝܢ ܘܰܬܡܳܢܶܐ܀

ܝܶܫܽܘܥ ܫܡܺܝܥ ܠܺܝ ܡܶܢ ܐ̱ܢܳܫܺܝ̈ܢ܇ ܕܣܰܓܺܝ ܡܪܰܚܦܳܢ ܚܢܳܢܳܐ ܡܠܶܐ܇ ܘܡܶܢ ܐ̱ܢܳܫ ܐܰܓܪܳܐ ܠܳܐ ܢܣܰܒ܇ ܘܡܰܓܳܢ ܝܳܗܶܒ ܘܠܳܐ ܢܳܣܶܒ܀

ܠܳܐ ܡܶܢ ܟܳܗ̈ܢܶܐ ܕܳܚܶܠ ܐ̱ܢܳܐ܇ ܘܠܳܐ ܢܳܡܽܘܣܳܐ ܡܣܰܪܶܕ ܠܺܝ܇ ܗܽܘ ܒܟܽܠ ܫܰܒܬܳܐ ܚܢܳܢܶܗ ܫܦܺܝܥ ܘܠܘܰܝ ܐܶܬܳܐ ܡܛܳܐ ܨܶܝܕܰܝ܀

 

ܡܳܕܶܝܢ ܗܳܕܶܐ ܒܳܥܶܐ ܗܘܺܝܿܬ܇ ܕܶܐܢ ܐܳܬܶܐ ܠܘܳܬܝ̱ ܡܰܚܠܶܡ ܠܺܝ܇ ܕܒܳܟ ܗܽܘ ܐܶܚܕܶܐ ܕܣܰܒܰܪܬܳܢܝ̱܇ ܕܨܳܒܶܐ ܐܰܢ̱ܬ ܕܬܶܗܘܶܐ ܚܠܺܝܡܳܐ܀

ܢܶܗܘܶܐ ܠܺܝ ܡܳܪܝ̱ ܐܰܝܟ ܡܶܠܬܳܟ܇ ܒܰܥܒܳܕܳܐ ܬܶܗܘܶܐ ܬܟܺܝܠ ܐ̱ܢܳܐ܇ ܠܡܳܐ ܐܰܢ̱ܬ ܗܽܘ ܝܶܫܽܘܥ ܐܳܣܝܳܐ܇ ܒܪܶܗ ܕܕܰܘܺܝܕ ܒܪܶܗ ܕܰܐܒܪܳܗܳܡ܀

ܣܰܒܪܳܐ ܐܺܝܬ ܠܺܝ ܘܰܬܟܺܝܠ ܐ̱ܢܳܐ܇ ܟܰܕ ܚܳܕܶܐ ܐ̱ܢܳܐ ܘܡܰܘܕܶܐ ܐ̱ܢܳܐ܇ ܕܰܚܠܳܦ ܓܶܢܣܳܐ ܡܥܰܕܪܳܢܳܐ܇ ܡܶܠܬܳܟ ܣܳܡܟܳܐ ܠܰܡܚܺܝܠܽܘܬܝ̱܀

ܥܶܒܪܰܬ݀ ܛܰܠܝܽܘܬܝ̱ ܥܰܡ ܣܰܝܒܽܘܬܝ̱܇ ܘܰܥܫܶܢ ܐܽܘܠܨܳܢܝ̱ ܘܟܺܐܒܰܝ̈ ܣܓܺܝܘ܇ ܘܚܰܕ ܐ̱ܢܳܫ ܠܳܐ ܦܓܰܥ ܒܺܝ ܘܠܰܒܒܰܢܝ̱܇ ܕܗܳܘܶܐ ܢܦܺܐܫܳܐ ܠܡܶܣܟܺܢ̈ܶܐ܀

ܦܟܺܝܪ̈ܳܢ ܐܺܝܕ̈ܰܝ ܥܰܡ ܪ̈ܶܓܠܰܝ܇ ܕܠܳܐ ܒܳܟܶܒ̈ܠܶܐ ܘܰܕܠܳܐ ܒܣܽܘܛܡ̈ܶܐ܇ ܐܶܠܳܐ ܒܟܺܐܒܳܐ  ܡܰܪܺܝܪܳܐ܇ ܘܒܰܡܫܰܪܝܽܘܬܳܐ ܢܰܓܺܝܪܬܳܐ܀

ܨܒܺܝ ܒܺܝ ܡܳܪܰܢ ܐܰܝܟ ܡܶܠܬܳܟ܇ ܘܨܶܒܝܳܢܳܟ ܒܺܝ ܢܶܫܬܰܡܠܶܐ܇ ܘܠܳܐ ܬܽܘܒ ܐܶܚܛܶܐ ܠܰܐܠܳܗܳܐ܇ ܐܶܠܳܐ ܐܰܘܕܶܐ ܘܶܐܫܰܒܚܺܝܘܗ̱ܝ܀

ܩܳܡ ܠܶܗ ܟܪܺܝܗܳܐ ܘܰܗܘܳܐ ܚܠܺܝܡ܇ ܘܰܛܥܶܢ ܥܰܪܣܶܗ ܥܰܠ ܟܰܬܦܶܗ ܘܰܚܙܰܘ ܟܳܗ̈ܢܶܐ ܘܟܶܢܫ̈ܶܐ ܬܗܰܪܘ̱܇ ܥܰܠ ܬܶܕܡܽܘܪܬܳܐ ܕܶܐܣܬܰܥܪܰܬ݀܀

ܪܶܡܙܶܗ ܕܝܶܫܽܘܥ ܦܳܪܽܘܩܳܐ܇ ܫܰܟܶܢ ܒܰܪܘܳܙܳܐ ܥܰܠ ܡܫܰܪܝܳܐ܇ ܘܟܽܠܗܽܘܢ ܟܺܐܒܰܘ̈ܗܝ ܐܶܬܛܰܠܰܩܘ̱܇ ܟܽܠ ܡܰܢ ܕܰܚܙܳܐ ܬܗܰܪ ܘܫܰܒܰܚ܀

ܫܰܒܰܚܘ̱ ܟܶܢܫ̈ܶܐ ܠܰܐܠܳܗܳܐ܇ ܘܩܰܠܶܣܘ̱ ܠܝܶܫܽܘܥ ܦܳܪܽܘܩܳܐ܇ ܕܰܐܝܢܳܐ ܫܽܘܠܛܳܢܳܐ ܐܺܝܬ ܠܶܗ܇ ܡܶܢ ܐܰܒܽܘܗ̱ܝ ܒܪܺܝܟ ܫܳܠܽܘܚܶܗ܀

ܬܶܫܒܽܘܚܬܳܐ ܠܳܟ ܡܳܪܶܐ ܟܽܠ ܝܶܫܽܘܥ ܡܫܺܝܚܳܐ ܐܰܠܳܗܳܐ܇ ܕܪ̈ܰܚܡܰܝܟ ܫܰܠܚܽܘܟ ܨܶܝܕ ܓܶܢܣܰܢ܇ ܘܰܐܣܺܝܬ ܟܺܐܒܰܝ̈ܢ ܘܟܽܘܪ̈ܗܳܢܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܚܙܳܐ ܠܰܡܫܰܪܝܳܐ ܕܢܽܘܓܪܳܐ ܪܰܒܳܐ ܫܰܢܩܽܘܗ̱ܝ ܟܺܐܒܳܐ܇ ܘܰܩܪܶܒ ܨܶܝܕܰܘܗ̱ܝ ܕܰܢܡܰܠܶܠ ܠܶܗ ܒܰܣܺܝܡܳܐܺܝܬ܇ ܐܶܡܰܪ ܡܳܪܰܢ ܫܒܺܝܩܺܝܢ ܠܳܟ ܒܶܪܝ ܟܽܠܗܽܘܢ ܚܰܘܒܰܝ̈ܟ܇ ܗܳܠܶܝܢ ܐܶܢܽܘܢ ܥܶܠܬܳܐ ܕܟܺܐܒܰܝ̈ܟ ܘܰܥܛܺܝܿܬ ܐܶܢܽܘܢ܀

ܐܶܡܰܪ ܡܳܪܰܢ ܕܰܫܩܽܘܠ ܥܰܪܣܳܟ ܓܰܒܪܳܐ ܘܗܰܠܶܟ܇ ܘܰܗܦܰܟ ܟܪܺܝܗܳܐ ܘܛܰܥܢܳܗܿ ܠܥܰܪܣܶܗ ܗܳܝ ܕܰܛܥܶܢܬܶܗ܇ ܢܶܦܩܰܬ ܡܶܠܬܶܗ ܕܒܰܪ ܐܰܠܳܗܳܐ ܥܳܒܽܘܕܳܐܺܝܬ܇ ܘܰܒܚܽܘܠܡܳܢܳܐ ܒܪܺܝܬܳܐ ܐܰܩܺܝܡ ܕܰܣܚܺܝܦܳܐ ܗܘܳܬ݀܀

 

ܡܰܘܪܒܳܐ ܕܠܺܠܝܳܐ ܒܩܳܠܳܐ ܝܳܠܕܰܬ ܐܰܠܳܗܳܐ ܒܬܽܘܠܬܳܐ

ܐܶܡܰܪ ܡܳܪܰܢ ܠܰܡܫܰܪܝܳܐ܇ ܫܒܺܝܩܺܝܢ ܚܰܘܒܰܝ̈ܟ܇ ܩܽܘܡ ܫܩܽܘܠ ܥܰܪܣܳܟ܇ ܘܙܶܠ ܠܒܰܝܬܳܟ ܟܰܕ ܚܳܕܶܝܬ܀

ܩܳܠܳܐ ܗܘܳܐ ܡܳܪܳܢܳܝܳܐ܇ ܐܰܙܥܶܩ ܠܘܳܬܶܗ܇ ܡܶܟܺܝܠ ܗܳܫܳܐ ܨܳܒܶܐ ܐ̱ܢܳܐ ܕܬܶܗܘܶܐ ܚܠܺܝܡܳܐ܀

ܡܫܺܝܚܳܐ ܫܰܪܰܪ ܠܰܡܫܰܪܝܳܐ܇ ܘܰܛܥܶܢ ܥܰܪܣܶܗ܇ ܫܰܪܰܪ ܠܰܢ ܒܝܽܘܠܦܳܢܰܝ̈ܟ ܡܰܚܝܳܢ̈ܶܐ܀

ܥܰܢܺܝܕ̈ܶܐ ܕܶܐܟܰܠܘ̱ ܦܰܓܪܳܟ܇ ܘܶܐܫܬܺܝܘ ܠܰܕܡܳܟ ܘܰܢܩܽܘܡܽܘܢ ܡܶܢ ܝܰܡܺܝܢܳܟ܀

 

ܕܫܰܒܚܰܘ̱ ܒܠܺܠܝܳܐ ܕܫܰܬܺܝܩܺܝܢ

ܒܠܺܠܝܳܐ ܕܐ̱ܢܳܫܽܘܬܳܐ܇ ܫܰܠܝܳܐ ܘܰܒܗܺܝܠܳܐ܇ ܥܺܝܪ̈ܶܐ ܘܙܰܕܺܝ̈ܩܶܐ܇ ܡܰܣܩܺܝܢ ܬܶܫܒܽܘܚܬܳܐ܀

ܒܶܐܣܛܘܳܐ ܕܰܫܠܶܝܡܽܘܢ ܥܒܰܪ ܗܘܳܐ ܡܳܪܰܢ܇ ܘܰܚܙܳܝܗ̱ܝ ܠܰܡܫܰܪܝܳܐ ܕܰܪܡܶܐ ܘܡܶܫܬܰܢܰܩ܀

ܐܳܘ ܓܰܒܪܳܐ ܥܰܠ ܡܽܘܢ܇ ܗܳܫܳܐ ܠܳܐ ܒܛܺܝܠ ܠܳܟ܇ ܕܬܶܬܚܠܶܡ ܡܶܢ ܟܺܐܒܳܐ܇ ܕܦܰܓܪܳܟ ܡܫܰܢܶܩ ܠܳܟ܀

ܐܶܡܰܪ ܠܰܡܫܰܪܝܳܐ ܩܽܘܡ ܒܶܪܝ ܙܶܠ ܠܒܰܝܬܳܟ܇ ܫܒܺܝܩܺܝܢ ܠܳܟ ܚܛܳܗܰܝ̈ܟ܇ ܚܙܺܝ ܠܳܐ ܬܽܘܒ ܬܶܚܛܶܐ܀

ܦܩܰܪܘ ܗ̱ܘܰܘ ܝܽܘܕܳܝ̈ܶܐ܇ ܘܪܰܘܒܳܐ ܪܰܒܳܐ ܥܒܰܕܘ̱. ܕܓܽܘܕܳܦܰܐܗ̱ܘ ܪܰܒܳܐ܇ ܕܐ̱ܢܳܫ ܢܶܫܒܽܘܩ ܚܛܳܗ̈ܶܐ܀

ܐܳܡܪܺܝܢ ܝܽܘܕܳܝ̈ܶܐ܇ ܠܰܡܫܰܪܝܳܐ ܡܚܺܝܠܳܐ܇ ܠܡܽܘܢ ܡܨܰܥܰܪܬ ܠܫܰܒܬܳܐ܇ ܕܶܐܬܚܠܶܡܬ ܘܰܡܗܰܠܶܟܬ܀

ܟܳܗ̈ܢܶܐ ܥܳܫܩܺܝܢ ܗ̱ܘܰܘ܇ ܕܰܠܡܽܘܢ ܐܶܬܰܐܣܺܝܬ ܘܟܶܢܫ̈ܶܐ ܚܳܒܨܺܝܢ ܗ̱ܘܰܘ܇ ܕܢܶܚܙܽܘܢ ܠܰܚܠܺܝܡܳܐ܀

ܟܡܳܐ ܕܣܳܓܶܝܢ ܚܛܳܗ̈ܶܐ܇ ܣܳܓܶܝܢ ܟܽܘܪ̈ܗܳܢܶܐ܇ ܘܡܶܬܕܰܘܕܳܐ ܢܰܦܫܳܐ܇ ܘܰܡܪܰܚܩܳܐ ܡܶܢ ܡܳܪܝܳܐ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܶܝ ܒܩܳܠܳܐ ܗܰܘ ܕܰܗܘܳܐ ܒܽܘܟܪܳܐ

ܗܰܘ ܕܰܢܨܰܚ ܕܽܘܟܪܳܢ ܝܳܠܶܕܬܶܗ܇ ܒܰܐܪܒܰܥ ܦܶܢܳܝ̈ܢ ܕܰܒܪܺܝܬܳܐ܇ ܪܰܚܶܡܥܠܰܝ܀

ܗܰܘ ܕܶܐܙܰܠ ܠܶܐܣܛܘܳܐ ܕܰܫܠܶܝܡܽܘܢ܇ ܘܰܚܙܳܐ ܡܫܰܪܝܳܐ ܕܡܶܫܬܰܢܰܩ܇ ܪܰܚܶܡܥܠܰܝ܀

ܗܰܘ ܕܶܐܡܰܪ ܠܰܡܫܰܪܝܳܐ ܥܰܠܡܽܘܢ܇ ܠܳܐ ܒܛܺܝܠ ܠܳܟ ܥܰܠ ܚܽܘܠܡܳܢܳܟ܇ ܪܰܚܶܡܥܠܰܝ܀

ܗܳܐ ܚܠܽܝܡ ܐܰܢ̱ܬ ܓܰܒܪܳܐ ܕܰܡܫܰܪܰܝ܇ ܩܽܘܡ ܫܩܽܘܠ ܥܰܪܣܳܟ ܟܰܕ ܪܳܘܙܰܬ܇ ܪܰܚܶܡܥܠܰܝ܀

ܐܰܣܳܐ ܠܰܢ ܘܫܰܪܰܪ ܗܰܕܳܡܰܝ̈ܢ ܐܰܟܡܳܐ ܕܫܰܪܰܪܬ ܠܰܡܫܰܪܝܳܐ ܪܰܚܶܡܥܠܰܝ܀

 

ܕܰܐܠܳܗܝ̱ ܐܰܠܳܗܝ̱ ܩܳܠܳܐ ܒܬܽܘܠܬܳܐ ܩܰܕܺܝܫܬܳܐ

ܒܝܰܘܡܳܐ ܕܥܰܕܥܺܐܕܳܐ܇ ܘܫܰܒܬܳܐ ܐܰܣܺܝ ܗܘܳܐ܇ ܡܳܪܰܢ ܠܰܡܫܰܪܝܳܐ܇ ܕܺܐܝܬ ܗܘܳܐ ܒܶܗ ܒܶܐܣܛܘܳܐ܀

ܘܰܚܙܰܘ ܝܽܘܕܳܝ̈ܶܐ܇ ܕܛܳܥܶܝܢ ܗܘܳܐ ܥܰܪܣܶܗ܇ ܩܪܶܒܘ̱ ܥܳܕܠܺܝܢ ܘܰܡܨܰܚܶܝܢ ܠܶܗ ܒܓܽܘܕܳܦܰܝ̈ܗܽܘܢ܀

ܠܳܐ ܫܰܠܺܝܛ ܗܘܳܐ ܠܳܟ܇ ܕܬܶܫܩܽܘܠܶܝܗܿ ܠܥܰܪܣܳܟ܇ ܘܰܥܢܳܐ ܘܶܐܡܰܪ ܠܗܽܘܢ ܠܡܽܘܢ ܚܳܣܡܺܝܢ ܐܰܢ̱ܬܽܘܢ ܒܺܝ܀

ܪ̈ܰܚܡܶܐ ܗܳܐ ܫܪܰܐܳܘܽܘܢܝ̱܇ ܘܰܐܢ̱ܬܰܘܢ ܐܳܣܪܺܝܢ ܠܺܝ܇ ܠܡܽܘܢ ܥܳܫܩܺܝܬܽܘܢ ܠܺܝ܇ ܕܬܶܚܕܽܘܢ ܙܳܕܶܩ ܗܘܳܐ܀

ܬܠܳܬܺܝܢ ܘܰܬܡܳܢܶܐ ܫܢܺܝ̈ܢ ܢܶܛܪܶܬ ܫܰܒܬܳܐ܇ ܘܰܐܝܟܰܢܳܐ ܗܳܫܳܐ ܥܳܨܺܝܬܽܘܢ ܠܺܝ ܕܶܐܛܽܘܪ܀

ܘܰܕܠܳܐ ܐܺܝܳܠܟܽܘܢ܇ܣܰܥܪܰܢܝ̱ ܚܰܢܳܢܳܐ܇ ܠܡܽܘܢ ܐܶܛܽܘܪ ܫܰܒܬܳܐ܇ ܝܰܘܡܳܢ ܕܶܐܬܰܐܣܺܝܿܬ܀

ܫܽܘܒܚܳܐ ܠܳܟ ܡܫܺܝܚܳܐ܇ ܕܒܰܛܶܠܬ ܠܰܚܣܳܡܳܐ܇ ܕܥܰܡܳܐ ܕܝܽܘܕܳܝ̈ܶܐ܇ ܡܶܢ ܓܰܒܪܳܐ ܡܫܰܪܝܳܐ܀

 

ܕܰܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܩܝܳܡܬܳܐ ܕܰܢܚܶܬ ܒܰܒܪܺܝܬܳܐ

ܝܰܠܕܽܘܢܝ̱ ܐ̱ܢܳܫܰܝ̈ ܒܰܛܺܝ̈ܠܶܐ܇ ܫܳܕܶܐ ܒܫܽܘܩܳܐ ܪܡܶܐ ܐܰܝܟ ܡܺܝܬܳܐ܇ ܘܦܶܫܛܶܬ ܐܺܝܕ̈ܰܝ ܕܶܐܩܰܒܶܠ܇ ܙܶܕܰܩܬܳܐ ܡܶܢ ܟܽܠܒܰܪܢܳܫ܇ ܘܗܳܐ ܩܳܕܡܳܐ ܩܳܕܡܳܐ ܥܳܐܶܠ ܫܳܩܠܺܝܢ ܠܳܗܿ ܡܶܢܝ̱ ܢܽܘܟܪ̈ܳܝܶܐ܀

ܦܟܺܝܪ̈ܳܢ ܐܺܝܕ̈ܰܝ ܥܰܡ ܪ̈ܶܓܠܰܝ܇ ܕܠܳܐ ܟܶܒ̈ܠܶܐ ܘܰܕܠܳܐ ܒܣܽܘܛܡ̈ܶܐ܇ ܐܶܠܳܐ ܒܟܺܐܒܳܐ  ܡܰܪܺܝܪܳܐ܇ ܘܰܒܳܟܽܘܪܗܳܢܳܐ ܘܫܽܘܢܳܩܳܐ܇ ܨܒܺܝ ܒܺܝ ܡܳܪܰܢ ܐܰܝܟ ܡܶܠܬܳܟ܇ ܘܫܰܪܰܪ ܠܟܽܠܗܽܘܢ ܗܰܕܳܡ̈ܰܝ܀

ܩܳܡ ܡܫܰܪܝܳܐ ܘܛܰܥܢܶܗ ܠܥܰܪܣܶܗ܇ ܟܰܕ ܡܫܰܒܰܚ ܗܘܳܐ ܠܗܰܘ ܕܰܐܣܝܶܗ܇ ܫܰܪܺܝܘ ܪܳܛܢܺܝܢ ܝܽܘܕܳܝ̈ܶܐ܇ ܕܗܳܢܳܐ ܠܰܡ ܫܳܪܶܐ ܫܰܒܬܳܐ܇ ܠܳܐ ܐܺܝܬܰܘܗ̱ܝ ܡܶܢ ܐܰܠܳܗܳܐ܇ ܒܰܪ ܡܰܪܝܰܡ ܘܰܒܪܶܗ ܗܽܘ ܕܝܰܘܣܶܦ܀

ܠܽܘܩܕܰܡ ܠܢܰܦܫܶܗ ܐܰܣܺܝ ܗܘܳܐ܇ ܟܰܕ ܐܶܡܰܪ ܫܒܺܝܩܺܝܢ ܚܛܳܗܰܝ̈ܟ܇ ܘܒܳܬܰܪ ܗܳܕܶܐ ܐܶܡܰܪ ܠܶܗ ܕܰܫܩܽܘܠ ܥܰܪܣܳܟ ܘܙܶܠ ܠܒܰܝܬܳܟ܇ ܘܗܰܒ ܬܶܫܒܽܘܚܬܳܐ ܠܰܐܠܳܗܳܐ܇ ܕܰܐܣܺܝ ܠܢܰܦܫܳܟ ܘܰܠܦܰܓܪܳܟ܀

ܢܶܫܬܘܶܐ ܕܬܺܐܡܰܪ ܠܰܢ ܡܳܪܝܳܐ܇ ܫܶܒܩܶܬ ܠܟܽܘܢ ܐܰܝܟ ܕܠܡܰܫܰܪܝܳܐ܇ ܕܰܚܛܳܗܰܝ̈ܟܽܘܢ ܐܺܝܬܰܝܗܽܘܢ܇ ܥܶܠܰܬ ܡܰܒܥܕܳܢܽܘܬܟܽܘܢ ܡܶܢܝ̱܇ ܬܰܘ ܐܶܬܩܰܪܰܒܘ̱ ܨܶܝܕܰܝ ܘܥܽܘܠܘ̱܇ ܘܺܝܪܶܬܰܘ̱ ܓܢܽܘܢܳܐ ܕܛܰܝܒܰܬ݀ ܠܟܽܘܢ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܝܰܘܡܳܢܳܐ

ܡܫܰܪܝܳܐ ܒܥܰܪܣܳܐ܇ ܐܶܬܩܰܪܰܒ ܗܘܳܐ ܠܰܡܫܺܝܚܳܐ ܐܳܣܝܳܐ ܕܟܽܠ ܟܺܐܒܺܝ̈ܢ܇ ܘܰܚܙܳܐ ܡܳܪܰܢ ܗܰܝܡܳܢܽܘܬܶܗ ܘܶܐܡܰܪ ܠܘܳܬܶܗ܇ ܕܶܐܬܠܰܒܰܒ ܒܶܪܝ ܫܒܺܝܩܺܝܢ ܠܳܟ ܚܛܳܗܰܝ̈ܟ ܥܰܡ ܚܰܘܒܰܝ̈ܟ܀

ܡܫܺܝܚܳܐ ܡܳܪܰܢ. ܕܰܐܣܺܝ ܘܰܐܚܠܶܡ ܠܰܡܫܰܪܝܳܐ܇ ܕܒܳܥܶܐ ܗܘܳܐ ܡܶܢܶܗ܇ ܐܰܣܳܐ ܟܺܐܒܰܝ̈ܢ ܘܰܫܒܽܘܩ ܚܰܘܒܰܝ̈ܢ܇ ܘܚܰܣܳܐ ܚܛܳܗܰܝ̈ܢ܇ ܕܰܕܠܳܐ ܫܶܠܝܳܐ ܢܰܘܕܶܐ ܠܳܟ ܐܳܣܝܳܐ ܕܢܰܦܫ̈ܳܬܰܢ܀

 

ܐ̱ܚܪܺܢܳܐ ܩܳܠܳܐ ܩܳܠܳܐ ܕܫܽܘܒܚܳܐ ܒܦܽܘܡ

ܢܽܘܗܪܳܐ ܡܫܺܝܚܳܐ܇ ܕܢܰܚ ܡܶܢ ܪܰܘܡܳܐ ܘܗܰܠܶܟ ܒܰܐܪܥܳܐ܇ ܕܢܰܐܣܶܐ ܟܺܐܒ̈ܶܐ ܕܢܰܦܫ̈ܳܬܰܢ܇ ܦܩܰܕ ܠܰܡܫܰܪܝܳܐ ܘܩܳܡ ܥܰܠ ܪ̈ܶܓܠܰܘܗ̱ܝ ܘܚܳܕܶܐ ܘܰܦܨܺܝܚ܇ ܘܰܡܫܰܘܰܪ ܗܘܳܐ ܘܰܡܩܰܝܶܙ܀

ܐܶܡܰܪ ܡܳܪܰܢ ܕܰܫܩܽܘܠ ܥܰܪܣܳܟ ܓܰܒܪܳܐ ܘܗܰܠܶܟ܇ ܗܦܰܟ ܟܪܺܝܗܳܐ ܘܛܰܥܢܶܗ ܠܥܰܪܣܶܗ܇ ܢܶܦܩܰܬ݀ ܡܶܠܬܶܗ ܕܒܰܪ ܐܰܠܳܗܳܐ ܥܳܒܽܘܕܳܐܺܝܬ܇ ܕܰܒܚܽܘܠܡܳܢܳܐ ܒܪܺܝܬܳܐ ܐܰܩܺܝܡ܀

 

ܐ̱ܚܪܺܢܳܐ ܢܰܦܫܳܐ ܥܩܰܪܬܳܐ

ܟܰܕ ܡܗܰܠܶܟ ܗܘܳܐ܇ ܡܳܪܰܢ ܝܶܫܽܘܥ ܒܶܐܣܛܘܳܐ ܕܡܶܬܩܪܶܐ ܕܰܫܠܶܝܡܽܘܢ ܚܙܳܐ ܠܰܡܫܰܪܝܳܐ ܘܰܩܪܶܒ ܨܶܝܕܰܘܗ̱ܝ܇ ܘܶܐܡܰܪ ܠܶܗ ܩܽܘܡ ܫܩܽܘܠ ܥܰܪܣܳܟ܇ ܘܙܶܠ ܠܒܰܝܬܳܟ ܟܰܕ ܚܳܕܶܐ ܐܰܢ̱ܬ܇ ܘܝܽܘܕܳܝ̈ܶܐ ܐܶܬܡܠܺܝܘ ܚܣܳܡܳܐ܇ ܕܡܰܢܽܘ ܡܶܫܟܰܚ ܠܡܶܫܒܰܩ ܚܛܳܗ̈ܶܐ܇ ܐܶܠܳܐ ܐܶܢ ܚܰܕ ܐܰܠܳܗܳܐ܀

ܓܳܠܘ̱ ܗ̱ܘܰܘ ܪ̈ܰܚܡܰܘܗ̱ܝ܇ ܕܰܐܒܳܐ ܓܢܺܝܙܳܐ ܥܰܠ ܨܰܠܡܶܗ ܕܒܳܩ ܘܶܐܬܚܰܒܰܠ ܘܫܰܕܰܪ ܠܰܒܪܶܗ ܝܺܚܺܝܕܳܝܳܐ܇ ܘܰܕܢܰܚ ܡܶܢ ܒܬܽܘܠܬܳܐ ܡܰܪܝܰܡ܇ ܠܥܶܠ ܡܶܢ ܗܰܘܢܳܐ ܘܝܺܕܰܥܬܳܐ ܘܣܰܥܪܳܗܿ ܠܰܐܪܥܳܐ ܒܥܽܘܕܪ̈ܳܢܰܘܗ̱ܝ܇ ܘܰܐܩܺܝܡ ܗܘܳܐ ܠܓܰܒܪܳܐ ܡܫܰܪܝܳܐ܇ ܡܶܢ ܥܰܪܣܳܐ ܕܰܪܡܶܐ ܗܘܳܐ ܒܶܗ܇ ܬܠܳܬܺܝܢ ܘܰܬܡܳܢܶܐ ܫܢܰܝ̈ܳܐ܀

 

ܡܰܘܪܒܳܐ ܩܳܠܳܐ ܫܠܳܡܠܶܟܝ̱ ܒܬܽܘܠܬܳܐ

ܕܟܺܝܬܳܐ ܘܩܰܕܺܝܫܬܳܐ ܐܶܡܳܐ ܕܝܶܠܕܰܬ݀ ܨܶܡܚܳܐ ܡܬܽܘܡܳܝܳܐ܇ ܘܰܐܢܗܰܪ ܠܰܐܪܥܳܐ ܒܙܰܠܺܝܩܰܘ̈ܗ̱ܝ܇ ܕܚܶܫܽܘܟܳܐ ܗܘܳܬ݀ ܝ܇ ܐܰܦܺܝܣܝ̱ ܠܺܝܚܺܝܕܶܟܝ̱ ܗܰܘ ܓܰܢ̱ܒܳܪܳܐ ܛܥܺܝܢ ܒܶܪ̈ܝܳܬܳܐ܇ ܕܢܰܫܪܶܐ ܫܰܝܢܶܗ ܘܰܫܠܳܡܶܗ ܒܥܺܕܬܶܗ ܘܥܰܡܶܗ ܘܒܰܐܪܒܰܥ ܦܶܢܝ̈ܳܬܳܐ܀

ܡܫܺܝܚܳܐ ܡܶܠܬܶܗ ܕܰܐܒܳܐ ܫܡܰܝܳܢܳܐ܇ ܟܰܕ ܡܗܰܠܶܟ ܗܘܳܐ܇ ܒܶܐܣܛܘܳܐ ܕܡܶܬܩܪܶܐ ܕܰܫܠܶܝܡܽܘܢ܇ ܫܰܪܰܪ ܠܰܡܫܰܪܝܳܐ ܟܰܕ ܐܶܡܰܪ ܠܶܗ ܫܒܺܝܩܺܝܢ ܠܳܟ ܚܰܘܒܰܝ̈ܟ܇ ܩܽܘܡ ܫܩܽܘܠ ܥܰܪܣܳܟ ܘܗܰܠܶܟ ܘܙܶܠ ܠܒܰܝܬܳܟ܇ ܘܰܙܡܰܪ ܫܽܘܒܚܳܐ ܠܥܳܠܰܡܥܳܠܡܺܝܢ܀

ܐ̱ܚܪܺܢܳܐ ܒܩܳܠܳܐ ܠܶܟܝ̱ ܕܟܺܝܬܳܐ ܘܙܰܗܝܰܬ݀

ܦܰܢܺܝ ܡܫܰܪܝܳܐ ܟܰܕ ܐܳܡܰܪ܇ ܕܠܰܝܬ ܓܶܢܣܳܐ ܘܠܳܐ ܛܽܘܗܡܳܐ܇ ܕܡܳܐ ܕܶܐܬܬܙܺܝܥܘ̱ ܡܰܝ̈ܳܐ ܢܰܪܡܶܝܢܝ̱܇ ܒܡܰܥܡܽܘܕܺܝܬܳܐ ܘܶܐܬܰܐܣܶܐ܇ ܘܟܳܗ̈ܢܶܐ ܒܰܐܦ̈ܶܐ ܗܳܐ ܢܳܣܒܺܝܢ܇ ܘܫܽܘܚܕܳܐ ܡܶܢ ܐ̱ܢܳܫܳܐ ܡܩܰܒܠܺܝܢ܀

ܨܳܒܶܐ ܐܰܢ̱ܬ ܕܬܶܗܘܶܐ ܚܠܺܝܡܳܐ. ܗܳܐ ܚܠܺܝܡ ܐܰܢ̱ܬ ܘܠܳܐ ܬܽܘܒ ܬܶܚܛܶܐ܇ ܕܠܰܚܛܳܗ̈ܶܐ ܣܳܢܶܐ ܡܳܪܝܳܐ܇ ܘܰܒܒܺܝܫ̈ܳܬܳܐ ܠܳܐ ܨܳܒܶܐ܇ ܩܽܘܡ ܓܰܒܪܳܐ ܫܩܽܘܠ ܥܰܪܣܳܟ܇ ܘܙܶܠ ܠܒܰܝܬܳܟ ܟܰܕ ܚܳܕܶܐ ܐܰܢ̱ܬ܀

 

ܕܫܰܒܰܚܘ̱ ܥܰܒܕܰܘ̈ܗܝ ܕܡܳܪܝܳܐ ܒܩܳܠܳܐ ܒܓܰܘ ܥܺܕܰܬ ܩܽܘܕܫܳܐ

ܠܶܐܣܛܘܳܐ ܗܰܘ ܕܰܒܢܳܐ ܫܠܶܝܡܽܘܢ܇ ܡܛܳܐ ܝܶܫܽܘܥ ܘܶܐܫܟܰܚ ܬܰܡܳܢ ܡܫܰܪܝܳܐ ܕܣܰܓܺܝ ܡܶܫܬܰܢܰܩ ܘܶܐܡܰܪ ܠܶܗ ܠܡܽܘܢ ܠܳܐ ܒܛܺܝܠ ܠܳܟ܀

ܡܰܢ ܢܶܥܒܶܕ ܥܰܡܝ̱ ܛܰܝܒܽܘܬܳܐ܇ ܘܰܢܚܰܘܝܢܰܝ̱ ܝܶܫܽܘܥ ܡܫܺܝܚܳܐ܇ ܗܽܘ ܡܶܫܟܰܚ ܘܰܡܨܶܐ ܕܢܰܐܣܝܰܢܝ̱܇ ܘܰܢܩܺܝܡܰܢܝ̱ ܡܶܢ ܡܫܰܪܝܽܘܬܳܐ܀

ܛܥܶܢܬܰܢܝ̱ ܐܶܡܝ̱ ܝܰܪ̈ܚܶܐ ܬܶܫܥܳܐ܇ ܘܺܝܠܶܕܬܰܢܝ̱ ܒܚܰܫܳܐ ܟܺܐܒ̈ܶܐ܇ ܘܰܛܥܶܢܬܰܢܝ̱ ܗܳܕܶܐ ܥܰܪܣܳܐ܇ ܫܢܰܝ̈ܳܐ ܬܠܳܬܺܝܢ ܘܰܬܡܳܢܶܐ܀

ܦܩܰܕ ܗܘܳܐ ܠܶܗ ܕܢܶܫܩܽܘܠ ܥܰܪܣܶܗ܇ ܘܰܒܚܰܕܘܳܐ ܢܺܐܙܰܠ ܠܒܰܝܬܶܗ܇ ܘܩܳܡ ܠܶܗ ܘܛܰܥܢܶܗ ܟܰܕ ܚܳܕܶܐ܇ ܘܰܥܒܰܪ ܘܶܐܙܰܠ ܒܶܝܬ ܟܶܢܫ̈ܶܐ܀

ܡܫܰܪܝܳܐ ܗܰܘ ܕܡܶܢ ܐܶܓܳܪܳܐ܇ ܫܰܒܽܘܗ̱ܝ ܥܰܡ ܥܰܪܣܽܘܢܺܝܬܶܗ܇ ܐ̱ܚܪܺܢܳܐ ܗܰܘ ܣܛܰܪ ܡܶܢ ܡܫܰܪܝܳܐ ܕܬܠܳܬܺܝܢ ܘܰܬܡܳܢܶܐ ܫܢܰܝ̈ܳܐ܇ ܘܗܳܢܳܐ ܡܶܢ ܒܰܝܬܳܐ ܐܺܝܬܰܝܘܗ̱ܝ܀

ܘܰܠܗܳܢܳܐ ܣܳܗܶܕ ܡܳܪܰܢ܇ ܕܗܽܘ ܐܶܡܰܪ ܠܶܗ ܠܰܡܫܰܪܝܳܐ܇ ܕܰܚܛܳܗܰܝ̈ܟ ܐܶܢܽܘܢ ܥܶܠܬܳܐ܇ ܕܰܡܫܰܪܝܽܘܬܳܐ ܕܗܰܕܳܡܰܝ̈ܟ܀

ܫܽܘܒܚܳܐ ܠܳܟ ܐܳܣܝܳܐ ܕܪ̈ܰܚܡܶܐ܇ ܕܡܶܢ ܥܰܪܣܳܐ ܕܟܺܐܒ̈ܶܐ ܐܰܩܺܝܡܬ܇ ܠܰܡܫܰܪܝܳܐ ܕܰܒܥܳܐ ܡܶܢܳܟ܇ ܚܽܘܠܡܳܢܳܐ ܠܰܡܚܺܝܠܽܘܬܶܗ܀

ܛܽܘܒܰܝܗܽܘܢ ܠܡܶܣܟܺܢ̈ܶܐ ܒܩܳܠܳܐ ܒܰܩܝܳܡܬܳܟ ܡܳܪܰܢ

ܒܶܐܣܛܘܳܐ ܕܰܫܠܶܝܡܽܘܢ܇ ܫܰܪܰܪ ܡܳܪܰܢ ܠܰܡܫܰܪܝܳܐ܇ ܘܶܐܡܰܪ ܠܶܗ ܫܒܺܝܩܺܝܢ ܚܰܘܒܰܝ̈ܟ ܩܽܘܡ ܓܰܒܪܳܐ ܗܰܠܶܟ܇ ܘܫܰܘܕܰܥ ܡܳܪܽܘܬܶܗ ܕܥܰܠ ܟܽܠ܀

ܚܳܒܨ̈ܳܢ ܗܘ̈ܰܝ ܓܽܘܕ̈ܶܐ܇ ܕܟܶܢܫ̈ܶܐ ܚܕܳܕ̈ܶܐ ܕܰܢܚܽܘܪܽܘܢ܇ ܘܨܳܠܝ̈ܳܢ ܗܘ̈ܰܝ ܐܶܕܢ̈ܶܐ ܕܟܽܠܢܳܫ܇ ܕܰܢܨܽܘܬܽܢ ܘܢܶܫܡܥ̈ܳܢ ܕܡܳܢܳܐ ܟܰܝ ܢܡܰܠܶܠ ܝܶܫܽܘܥ܀

ܗܳܐ ܡܳܪܶܐ ܕܫܰܒܬܳܐ܇ ܒܰܝܢܳܬܟܽܘܢ ܩܳܐܶܡ ܟܶܢܫ̈ܶܐ܇ ܡܶܢ ܥܒܳܕܰܘ̈ܗܝ ܛܳܒ̈ܶܐ ܕܰܥܘ̱ ܠܟܽܘܢ܇ ܗܽܘܝܽܘ ܐܰܠܳܗܰܐܗ̱ܘ܇ ܘܳܝܠܟܽܘܢ ܕܠܳܐ ܗܰܝܡܶܢܬܽܘܢܳܗ̱ܝ܀

ܚܰܕܳܐ ܠܰܢ ܡܳܪܰܢ܇ ܐܰܝܟ ܚܰܕܽܘܬܶܗ ܕܰܡܫܰܪܝܳܐ܇ ܒܳܐܣܝܽܘܬܳܐ ܕܰܟܪܺܝܗܽܘܬܶܗ܇ ܥܰܡ ܫܽܘܒܩܳܢ ܚܰܘܒ̈ܳܬܶܗ ܫܒܽܘܩ ܠܰܢ ܡܳܪܰܢ ܐܰܟܘܳܬܶܗ܀

ܢܰܚܶܡ ܠܥܰܢܺܝܕܰܝ̈ܢ ܡܶܢ ܚܶܙ̈ܶܐ ܟܡܺܝܪ̈ܶܐ ܕܰܫܝܽܘܠ܇ ܐܰܟܡܳܐ ܕܢܰܚܶܡܬ ܠܰܡܫܰܪܝܳܐ܇ ܘܰܐܩܺܝܡܬ ܪܰܡܝܽܘܬܶܗ܇ ܘܝܰܗܒܬ ܚܽܘܠܡܳܢܳܐ ܠܗܰܕܳܡܰܘ̈ܗ̱ܝ܀

 

ܩܳܠܳܐ ܕܨܰܦܪܳܐ ܒܩܳܠܳܐ ܦܬܰܚ ܠܺܝ ܬܰܪܥܶܗ

ܬܠܳܬܺܝܢ ܘܰܬܡܳܢܶܐ ܫܢܰܝ̈ܳܐ܇ ܡܫܰܪܝܳܐ ܪܡܶܐ ܗܘܳܐ ܒܥܰܪܣܳܐ ܕܟܺܐܒ̈ܶܐ܇ ܘܠܳܐ ܝܰܗܒܘ̱ ܗ̱ܘܰܘ ܠܶܗ ܚܽܘܠܡܳܢܳܐ܇ ܐܳܣܰܘ̈ܳܬܳܐ ܕܺܐܝܬ ܒܰܐܬܪܶܗ܇ ܥܕܰܡܳܐ ܕܶܐܬܳܐ ܠܶܗ ܝܶܫܽܘܥ܇ ܐܳܣܝܳܐ ܪܰܒܳܐ ܘܫܰܪܺܝܪܳܐ܇ ܘܰܫܪܳܝܗ̱ܝ ܡܶܢ ܟܺܐܒܶܗ ܘܰܐܣܺܝ ܗܘܳܐ ܠܰܡܫܰܪܝܽܘܬܶܗ܀

ܟܰܕ ܐܶܫܬܰܪܰܪ ܗܘܳܐ ܡܫܰܪܝܳܐ܇ ܘܰܛܥܶܢ ܥܰܪܣܶܗ ܕܢܺܐܙܰܠ ܠܒܰܝܬܶܗ܇ ܩܪܰܐܳܘܽܘܗ̱ܝ ܗ̱ܘܰܘ ܟܳܗ̈ܢܶܐ ܘܶܐܡܰܪܘ̱ ܠܶܗ ܕܳܐܳܘ ܓܰܒܪܳܐ ܠܡܽܘܢ ܥܒܰܕܬ ܗܳܟܰܢܳܐ܇ ܝܰܘܡܰܐܗ̱ܘ ܕܫܰܒܬܳܐ ܐܳܦ ܩܰܪܝܳܐ܇ ܠܳܐ ܢܶܗܘܶܐ ܒܶܗ ܦܽܘܠܚܳܢܳܐ܇ ܐܶܠܳܐ ܒܶܛܠܳܢܳܐ܇ ܗܳܟܰܢܳܐ ܦܰܩܶܕ ܡܽܘܫܶܐ܀

 

ܐ̱ܚܪܺܢܳܐ ܒܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܒܝܽܘܡ ܫܰܒܬܳܐ ܥܳܒܰܪ ܗܘܳܐ ܡܳܪܰܢ ܝܶܫܽܘܥ܇ ܒܶܐܣܛܘܳܐ ܕܡܶܬܩܪܶܐ ܕܰܫܠܶܝܡܽܘܢ܇ ܩܕܳܡ ܗܰܝܟܠܳܐ ܪܰܒܳܐ܇ ܘܶܐܫܟܰܚ ܬܰܡܳܢ ܠܰܡܫܰܪܝܳܐ ܢܽܘܓܪܳܐ ܪܰܒܳܐ܇ ܬܠܳܬܺܝܢ ܘܰܬܡܳܢܶܐ ܫܢܰܝ̈ܳܐ ܒܥܰܪܣܳܐ ܕܟܽܘܪܗܳܢܳܐ܇ ܘܶܐܡܰܪ ܠܗ ܕܐܶܢܗܽܘ ܕܬܗܝܡܶܢ܇ ܢܣܒ ܐܰܢ̱ܬ ܚܰܝܠܳܐ ܠܗܕܡܝܟ. ܒܪܺܝܟ ܗܽܘ ܡܫܺܝܚܳܐ ܕܰܒܡܶܠܬܶܗ ܩܳܡ ܡܫܰܪܝܳܐ ܘܗܰܠܶܟ܀

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ ܕܰܬܚܬܺܝ ܢܰܦܫܶܗ܇ ܘܰܗܘܳܐ ܐ̱ܢܳܫܳܐ ܒܨܶܒܝܳܢܶܗ ܡܶܛܽܠ ܦܽܘܪܩܳܢܰܢ܇ ܛܥܶܢ ܘܰܐܝܬܺܝ ܥܽܘܕܪ̈ܳܢܶܐ ܡܶܢ ܒܶܝܬ ܐܰܒܽܘܗ̱ܝ܇ ܘܰܐܣܺܝ ܒܗܽܘܢ ܠܰܡܡܰܚܰܝ̈ܳܐ ܒܡܶܠܬܳܐ ܕܦܽܘܩܕܳܢܶܗ܇ ܘܰܠܓܰܪܒܳܐ ܕܰܟܺܝ ܒܝܰܕ ܓܶܫܬܶܗ܇ ܘܰܒܛܺܝܢܳܐ ܠܣܰܡܝܳܐ ܦܰܬܰܚ ܗܘܳܐ܇ ܘܠܰܡܫܰܪܝܳܐ ܚܰܨ ܗܰܕܳܡܰܘ̈ܗ̱ܝ ܘܚܰܣܺܝ ܠܰܚܛܳܗܰܘ̈ܗ̱ܝ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܰܓܗܺܝ ܡܫܰܪܝܳܐ ܡܶܢ ܟܽܘ̈ܗܳܢܶܐ ܘܰܐܪܥܶܗ ܕܺܝܢܳܐ܇ ܢܦܰܩ ܡܶܢ ܚܰܫܳܐ ܘܩܳܡ ܒܰܕܪܳܫܳܐ ܕܒܺܝܫ ܗܘܳܐ ܡܶܢܶܗ܇ ܫܰܒܩܽܘܗ̱ܝ ܟܺܐܒ̈ܶܐ ܕܟܳܗ̈ܢܶܐ ܠܰܒܳܟܽܘܗ̱ܝ ܕܠܳܐ ܢܗܰܠܶܟ ܗܘܳܐ܇ ܫܪܰܐܽܘܗ̱ܝ ܪ̈ܰܚܡܶܐ ܘܰܐܣܪܽܘܗ̱ܝ ܟܳܗ̈ܢܶܐ ܕܠܳܐ ܢܺܐܙܰܠ ܗܘܳܐ܀

ܗܳܐ ܠܳܐ ܛܪܰܕܬܽܘܢ ܒܫܰܒܬܳܐ ܟܺܐܒ̈ܶܐ ܡܶܢ ܗܰܕܳܡ̈ܰܝ܇ ܘܰܐܝܟܰܢ ܗܳܫܳܐ ܥܳܨܶܝܢ ܐܰܢ̱ܬܽܘܢ ܠܺܝ ܕܫܰܒܬܳܐ ܐܶܛܽܘܪ܇ ܠܳܐ ܐܶܬܥܰܕܪܶܬ ܒܢܳܛܽܘܪ̈ܘܳܬܳܐ ܕܥܰܕܥܺܐܕܰܝ̈ܟܽܘܢ܇ ܘܰܠܡܽܘܢ ܐܶܛܽܘܪ ܫܰܒܬܳܐ ܝܰܘܡܳܢ ܡܶܢ ܕܶܐܬܰܐܣܺܝܬ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ

ܐܳܣܝܳܐ ܛܳܒܳܐ ܕܡܶܢ ܪܰܘܡܳܐ܇ ܨܶܝܕ ܐܰܪ̈ܥܳܢܶܐ ܐܶܬܳܐ ܒܰܚܢܳܢܶܗ܇ ܘܠܰܡܫܰܪܝܳܐ ܕܰܡܠܶܐ ܡܽܘܡ̈ܶܐ܇ ܘܟܽܘܪ̈ܗܳܢܶܐ ܣܥܰܪ ܒܛܰܝܒܽܘܬܶܗ܇ ܘܰܐܩܺܝܡܶܗ ܗܘܳܐ ܡܶܢ ܥܰܪܣܳܐ܇ ܕܟܺܐܒ̈ܶܐ ܩܫܰܝ̈ܳܐ ܘܫܰܪܰܪ ܗܰܕܳܡܰܘ̈ܗ̱ܝ܀

ܒܝܽܘܡ ܫܰܒܬܳܐ ܥܒܰܪ ܦܳܪܽܘܩܰܢ܇ ܒܶܐܣܛܘܳܐ ܪܰܒܳܐ ܗܰܘ ܕܰܒܢܳܐ ܫܠܶܝܡܽܘܢ܇ ܬܰܡܳܢ ܐܶܫܟܰܚ ܠܰܡܫܰܪܝܳܐ܇ ܕܰܪܡܶܐ ܗܘܳܐ ܒܥܰܪܣܳܐ ܕܟܺܐܒ̈ܶܐ܇ ܕܰܒܡܶܠܬܳܐ ܦܩܰܕ ܘܶܐܡܰܪ ܠܶܗ܇ ܩܽܘܡ ܫܩܽܘܠ ܥܰܪܣܳܟ܇ ܘܰܚܙܺܝ ܗܳܐ ܚܠܺܝܡ ܐܰܢ̱ܬ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܶܣܬܰܒܰܪ ܗܘܳܐ ܓܰܒܪܳܐ ܟܪܺܝܗܳܐ ܥܰܠ ܚܽܘܠܡܳܢܶܗ܇ ܘܪ̈ܰܚܡܶܐ ܢܰܩܦܽܘܗ̱ܝ ܕܢܶܫܬܰܪܰܪ ܗܘܳܐ ܡܶܢ ܟܽܘܪܗܳܢܶܗ܇ ܚܢܳܢܳܐ ܣܰܥܪܶܗ ܠܗܰܘ ܕܶܐܬܓܰܙܺܝ ܡܶܢ ܣܳܥܽܘܪ̈ܶܐ܇ ܘܫܰܪܺܝ ܕܳܘܝܳܐ ܕܰܢܡܰܠܶܠ ܗܘܳܐ ܥܰܡ ܦܳܪܽܘܩܳܐ܀

ܡܳܪܝ̱ ܗܳܐ ܣܡܰܟܬܰܢܝ̱ ܟܰܬܰܪ ܨܶܝܕܰܝ ܕܰܡܡܰܚܰܝ ܐ̱ܢܳܐ܇ ܥܨܳܒܳܐܗ̱ܝ ܡܶܠܬܳܟ ܘܡܰܠܝܳܐ ܟܽܠܳܗܿ ܟܽܠ ܚܽܘܠܡܳܢܺܝ̈ܢ܇ ܐܶܡܰܪ ܡܳܪܰܢ ܐܶܬܠܒܰܒܰ ܒܶܪܝ̱ ܫܒܺܝܩܺܝܢ ܚܰܘܒܰܝ̈ܟ܇ ܩܢܺܝ ܚܽܘܠܡܳܢܳܐ ܕܗܳܐ ܫܰܪܰܪܬ ܠܳܟ ܟܽܠ ܗܰܕܳܡܰܝ̈ܟ܀

 

ܬܽܘܒ ܕܪܰܡܫܳܐ ܕܰܬܪܶܝܢ ܒܫܰܒܳܐ ܕܫܰܒܬܳܐ ܕܰܬܠܳܬ ܕܨܰܘܡܳܐ

ܥܽܘܢܺܝܬܳܐ ܕܪܰܚܶܡܥܠܰܝ ܩܳܠܳܐ ܥܰܠ ܝܽܘܪܕܢܳܢ

ܪܳܥܝܳܐ ܕܢܰܟܢܫܶܝܗܿ ܠܰܨܠܺܝܒܳܐ ܚܠܳܦ ܥܳܢܶܗ܇ ܕܰܢܟܰܢܫܶܝܗܿ܇ ܟܰܢܶܫ ܠܰܢ ܡܶܢ ܛܳܥܝܽܘܬܳܐ܀

ܬܶܒܣܰܡ ܠܳܟ ܡܳܪܝ̱܇ ܒܳܥܽܘܬܰܢ ܘܰܬܪܰܥܶܝܟ܇ ܨܰܘܡܳܐ ܕܟܺܐܢ̈ܶܐ܇ ܚܽܘܢ ܠܰܢ ܡܶܛܽܠ ܪ̈ܰܚܡܰܝܟ܀

ܬܶܣܓܽܘܕܝ̱ ܥܺܕܬܳܐ܇ ܠܒܽܘܟܪܶܗ ܕܰܐܒܳܐ ܕܶܐܬܬܰܚܬܺܝ܇ ܘܦܰܪܩܶܗ ܗܘܳܐ܇ ܒܝܰܕ ܨܰܘܡܶܗ ܘܡܽܘܟܳܟܶܗ܀

ܣܰܓܺܝ ܪܓܺܝܓ ܨܰܘܡܳܐ ܠܰܐܝܢܳܐ ܕܨܳܐܶܡ ܠܶܗ܇ ܘܙܳܡܰܪ ܒܶܗ܇ ܫܽܘܒܚܳܐ ܠܚܰܝܠܳܐ ܬܠܺܝܬܳܝܳܐ܀

ܙܓܽܘܪ ܡܶܢܰܢ ܩܪ̈ܳܒܰܘܗ̱ܝ ܕܰܒܥܶܠܕܰܪܳܐ܇ ܘܨܶܢܥ̈ܳܬܶܗ܇ ܟܽܠ ܠܶܫܳܢ ܢܰܘܕܶܐ ܠܳܟ܀

ܡܳܪܶܐ ܟܽܠ܇ ܦܬܰܚ ܠܰܢ ܡܳܪܝ̱ ܒܶܝܬ ܓܰܙܳܟ܇ ܕܢܶܥܽܘܠ ܢܶܥܬܰܪ܇ ܡܶܢ ܨܰܘܡܳܐ ܡܰܥܬܰܪ ܟܽܠ܀

 

ܕܡܳܪܝܳܐ ܩܪܺܝܬܳܟ ܩܳܠܳܐ ܡܳܪܝܳܐ ܩܪܺܝܬܳܟ

ܢܶܒܣܰܡ ܠܳܟ ܡܳܪܝ̱܇ ܩܳܠܳܐ ܕܒܳܥܽܘܬܰܢ܇ ܘܶܐܬܪܰܥܳܐ ܠܰܢ ܡܶܛܽܠ ܛܰܝܒܽܘܬܳܟ܀

ܡܳܪܳܐ ܛܳܒܳܐ ܕܨܳܡ ܡܶܛܽܠܳܬܰܢ܇ ܡܶܛܽܠ ܨܰܘܡܳܟ. ܨܰܘܡܰܢ ܢܶܫܦܰܪ ܠܳܟ܀

ܐܺܝܬ ܗܽܘ ܕܡܰܟܶܟ ܢܰܦܫܶܗ ܒܨܰܘܡܳܐ܇ ܘܚܳܙܶܐ ܣܢܺܝܩܳܐ܇ ܘܠܳܐ ܚܳܐܶܣ ܥܠܰܘܗ̱ܝ܀

ܐܺܝܬ ܕܡܳܐܶܟ ܠܶܗ ܣܰܩܳܐ ܥܰܡ ܩܶܛܡܳܐ܇ ܘܥܳܘܶܐ ܣܢܺܝܩܳܐ܇ ܘܠܳܐ ܚܳܐܶܢ ܠܶܗ܀

ܗܳܢܰܘ ܨܰܘܡܳܐ ܕܬܶܩܨܶܐ ܠܰܣܢܺܝܩܳܐ܇ ܠܰܚܡܳܟ ܕܢܶܐܟܠܽܘܢ܇ ܘܰܢܫܰܒܚܽܘܢ ܠܡܳܪܝܳܐ܀

ܫܽܘܒܚܳܐ ܠܡܳܪܝܳܐ ܕܨܰܘܡܳܐ ܠܒܶܟ ܕܰܨܒܳܐ܇ ܘܰܠܟܰܦܢܽܘܬܰܢ܇ ܣܰܒܰܥ ܒܛܰܝܒܽܘܬܶܗ܀

 

ܩܳܠܳܐ ܕܪܰܡܫܳܐ ܩܳܠܳܐ ܩܰܒܶܠܳܝܗ̱ܝ ܡܳܪܰܢ

ܒܨܰܘܡܳܐ ܗܘܳܐ ܬܶܗܪܳܐ܇ ܒܒܳܒܶܝܠ ܡܶܨܥܰܬ݀ ܐܰܬܽܘܢܳܐ܇ ܕܰܣܠܶܩܘ̱ ܙܰܟܳܝ̈ܶܐ ܕܠܳܐ ܡܽܘܡ ܥܰܒܕܰܘ̈ܗ̱ܝ ܕܰܐܠܳܗܳܐ܀

ܒܽܘܟܪܶܗ ܕܥܶܠܳܝܳܐ܇ ܒܪܳܗܿ ܕܺܐܝܬܽܘܬܳܐ ܡܪܰܝܰܡܬܳܐ܇ ܡܶܢ ܢܶܫܒ̈ܶܐ ܦܪܽܘܩ ܠܰܢ܇ ܕܣܳܛܳܢܳܐ ܡܰܩܪܶܒ ܥܰܡܰܢ܀

 

ܐ̱ܚܪܺܢܳܐ ܩܳܠܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܒܫܰܗܪܳܐ ܘܨܰܘܡܳܐ ܘܰܨܠܽܘܬܳܐ ܐܶܬܢܰܨܰܚܘ̱ ܗ̱ܘܰܘ܇ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܘܒܰܥܒܳܕ̈ܶܐ ܕܰܡܝܰܬܪܽܘܬܳܐ܇ ܫܦܰܪܘ̱ ܠܰܐܠܳܗܳܐ܇ ܕܰܗ̱ܘܰܘ ܝܳܪ̈ܬܶܐ ܒܡܰܠܟܽܘܬܳܐ ܗ ܘܺܝܪܶܬܰܘ̱ ܚܰܝ̈ܶܐ܀

ܢܶܗܘܶܐ ܠܳܟ ܡܳܪܰܢ ܨܰܘܡܰܢ܇ ܘܰܨܠܰܘ̈ܬܰܢ ܩܽܘܪ̈ܒܳܢܶܐ ܕܰܡܪܰܥܶܝܢ ܠܳܟ܇ ܐܰܝܟ ܩܽܘܪܒܳܢܶܗ ܕܒܰܪ ܐܺܝܫܰܝ܇ ܗܰܘ ܟܶܢܳܪܳܐ ܘܡܳܐܢܳܐ ܓܰܒܝܳܐ ܕܪܽܘܚ ܩܽܘܕܫܳܐ ܗ ܨܠܽܘܬܶܗ ܥܰܡܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܳܐ ܫܰܦܺܝܪ ܨܠܽܘܬܳܐ ܕܰܐܠܶܦ ܒܰܪ ܐܰܠܳܗܳܐ ܛܽܘܒܰܘܗ̱ܝ ܠܰܐܝܢܳܐ ܕܣܳܡܳܗܿ ܒܢܰܦܫܶܗ ܘܶܐܬܗܰܓܺܝ ܒܳܗܿ܇ ܟܽܠܗܽܘܢ ܫܽܘܦܪ̈ܶܐ ܕܙܰܕܺܝܩܽܘܬܳܐ ܘܕܰܓܡܺܝܪܽܘܬܳܐ܇ ܒܳܗܿ ܗܽܘ ܫܟܺܝܚܺܝܢ ܠܰܐܝܢܳܐ ܕܝܳܨܶܦ ܘܰܡܨܰܠܶܐ ܠܳܗܿ܀

ܫܒܽܘܩ ܠܰܢ ܚܰܘܒ̈ܰܝܢ ܘܰܚܛܳܗܰܝ̈ܢ ܡܳܪܝ̱ ܘܰܐܠܶܦ ܐܶܢܽܘܢ܇ ܠܰܒܢ̈ܰܝ ܐ̱ܪܳܙܶܗ ܕܢܺܐܡܪܽܘܢ ܠܰܐܒܽܘܗ̱ܝ ܡܳܐ ܕܰܡܨܰܠܶܝܢ܇ ܝܰܗܒ ܠܽܘܒܳܒܳܐ ܕܒܳܥܶܐ ܕܢܶܫܒܽܘܩ ܠܰܕܚܰܝܳܒܺܝܢ ܘܥܰܠ ܗܳܝ ܐܰܠܶܦ ܕܰܢܦܺܝܣܽܘܢܳܝܗ̱ܝ ܥܰܠ ܫܽܘܒܩܳܢܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܐܰܚ̈ܰܝ ܢܩܽܘܡ ܡܶܢ ܫܶܢܬܳܐ܇ ܘܢܶܙܡܰܪ ܫܽܘܒܚܳܐ ܘܬܰܘܕܺܝܬܳܐ܇ ܠܗܰܘ ܕܰܫܗܰܪ ܗܘܳܐ ܥܰܠ ܐܰܦܰܝ̈ܢ܇ ܦܳܪܽܘܩܰܢ ܝܶܫܽܘܥ ܡܫܺܝܚܳܐ܀

ܥܺܝܪ̈ܶܐ ܢܶܗܘܶܐ ܘܰܚܦܺܝ̈ܛܶܐ܇ ܟܽܠܰܢ ܐܰܚ̈ܰܝ ܘܚܰܒܺܝ̈ܒܰܝ܇ ܒܗܳܢܳܐ ܨܰܘܡܳܐ ܩܰܕܺܝܫܳܐ܇ ܕܓܳܕܶܠ ܟܠܺܝ̈ܠܶܐ ܠܨܰܝܳܡ̈ܶܐ܇ܫܽܘܒܚܳܐ ܠܳܟ ܫܽܘܒܚܳܐ܀

ܥܺܕܰܬ ܩܽܘܕܫܳܐ ܡܦܺܝܣܳܐ ܠܳܟ܇ ܗܺܝ ܘܝܰܠܕܶܝ̈ܗܿ ܪܰܥܽܘܡܳܐܺܝܬ܇ ܫܡܰܥ ܛܳܒܳܐ ܩܳܠ ܒܳܥܽܘܬܳܗܿ܇ ܒܗܳܢܳܐ ܨܰܘܡܳܐ ܩܰܕܺܝܫܳܐ܀

ܒܨܰܘܡܳܐ ܕܰܟܝܳܐ ܘܒܰܨܠܽܘܬܳܐ܇ ܘܒܰܥܒܳܕ̈ܶܐ ܕܙܰܕܺܝܩܽܘܬܳܐ܇ ܡܶܬܪܰܥܶܐ ܠܰܢ ܐܰܠܳܗܳܐ܇ ܠܰܐܝܢܳܐ ܕܰܫܦܶܐ ܡܶܢ ܢܶܟܠܳܐ ܫܽܘܒܚܳܐ ܠܳܟ܀

 

ܩܳܠܳܐ ܕܠܺܠܝܳܐ ܩܳܠܳܐ ܩܽܘܩܳܝܳܐ

ܙܶܠܘ̱ ܒܰܫܠܳܡܳܐ ܫܳܡܽܘܥ̈ܶܐ ܩܳܥܝܳܐ ܥܺܕܬܳܐ܇ ܕܰܓܢܽܘܢܳܐ ܥܒܰܕ ܠܺܝ ܡܫܺܝܚܳܐ ܘܰܒܓܰܘܶܗ ܐܰܘܬܶܒܰܢܝ̱܇ ܘܰܐܝܢܳܐ ܕܠܳܐ ܫܩܺܝܠ ܡܰܝ̈ܳܐ ܕܚܽܘܣܳܝܳܐ܇ ܠܳܐ ܡܨܶܐ ܥܳܐܶܠ ܩܳܐܶܡ ܒܶܝܬ ܣܶܕܪ̈ܰܝ܇ ܘܗܳܐ ܩܳܝܡ̈ܳܢ ܓܽܘܕ̈ܶܐ ܕܝܰܠܕ̈ܰܝ ܒܺܝ ܙܰܗܝܳܐܺܝܬ܇ ܘܩܳܥܶܝܢ ܠܶܗ ܩܰܕܺܝܫ ܩܰܕܺܝܫ ܩܰܕܺܝܫܰܬ ܡܳܪܝܳܐ ܗܘܗ܀

ܥܰܕܠܳܐ ܥܳܒܰܪ ܠܶܗ ܙܰܒܢܳܐ ܠܰܬܝܳܒܽܘܬܳܐ܇ ܗܳܘܶܐ ܐ̱ܢܳܐ ܠܺܝ ܒܰܛܺܝܠܳܐ ܡܶܢ ܫܽܘܒܚܶܗ ܕܡܳܪܝܳܐ܇ ܐܰܘܕܶܐ ܒܚܰܘܒ̈ܰܝ܇ ܘܰܐܦܺܝܣ ܥܰܠ ܣܰܟܠܽܘܬܝ̱܇ ܐܰܫܦܰܥ ܕܶܡܥ̈ܰܝ ܘܰܐܫܺܝܓ ܗܰܕܳܡ̈ܰܝ܇ ܥܳܠܡܳܐ ܟܽܠܶܗ ܐܶܢ ܐܶܩܢܶܐ ܠܳܐ ܡܰܘܬܰܪ ܠܺܝ܇ ܕܶܐܚܽܘܕ ܓܰܘܣܳܐ ܒܰܐܠܳܗܳܐ ܕܗܽܘ ܡܨܶܐ ܕܰܢܥܰܕܪܰܢܝ̱܀

 

ܣܽܘܓܺܝܬܳܐ ܕܥܰܠ ܢܰܦܫܳܐ ܘܦܰܓܪܳܐ ܥܰܡܳܐ ܘܥܰܡܡ̈ܶܐ ܥܽܘܢܺܝܬܳܐ ܒܪܺܝܟ ܕܶܐܬܬܰܚܬܺܝ ܘܦܰܓܪܳܐ ܠܒܶܫ ܘܰܠܢܰܦܫܳܐ ܐܰܣܺܝ ܡܰܓܳܢ

ܛܶܐܒܳܐ ܕܕܺܝܢܳܐ ܡܣܰܪܶܕ ܠܺܝ܇ ܘܗܳܢܳܐ ܒܗܳܢܳܐ ܡܶܬܥܰܕܠܺܝܢ܇ ܢܶܫܡܰܥ ܒܩܽܘܫܬܳܐ ܒܰܝܢܳܬܗܽܘܢ܇ ܐܰܝܟ ܕܺܝܢܳܐ ܠܳܐ ܡܶܨܛܰܠܶܐ܀

ܐܳܡܰܪ ܦܰܓܪܳܐ ܥܰܡܝ̱ ܒܳܠܥܰܬܝ̱܇ ܐܶܢ ܟܺܐܢܽܘܬܳܐ ܠܰܢ ܕܳܝܢܳܐ܇ ܕܡܶܢ ܒܶܠܥܳܕܰܝܟܝ̱ ܠܳܐ ܐܰܣܟܠܶܬ܇ ܠܡܽܘܢ ܠܺܝ ܢܶܓܕ̈ܶܐ܇ ܘܠܶܟܝ̱ ܓܰܢܬܳܐ܀

ܒܶܟܝ̱ ܗܺܝ ܢܰܦܫܳܐ ܡܶܬܬܙܺܝܥ ܗܘܺܝܼܬ܇ ܪܳܓܽܘܫܽܘܬܳܐ ܒܶܟܝ̱ ܩܰܒܠܶܬ܇ ܐܶܠܽܘ ܙܰܘܥܰܝ̈ܟܝ̱ ܠܳܐ ܕܳܠܘ̱ ܒܺܝ܇ ܚܰܫ̈ܶܐ ܡܶܡܬܽܘܡ ܠܳܐ ܐܰܟܝܽܘܢܝ̱܀

ܓܰܠܝܳܐܗ̱ܝ ܗܳܕܶܐ ܕܥܰܡܝ̱ ܒܳܠܥܰܬܝ̱܇ ܐܶܢ ܕܰܝܳܢܳܐ ܠܳܐ ܡܶܨܛܠܶܐ܇ ܕܪܳܡ ܗܽܘ ܟܝܳܢܶܟܝ̱ ܘܠܺܝ ܫܳܠܡܰܬܝ̱܇ ܕܰܒܒܺܝܫ̈ܳܬܳܐ ܥܰܡܝ̱ ܬܰܪܫܥܺܝܢ܀ ܕܺܝܠܝ̱ ܗܽܘ ܢܶܓܕܳܐ ܐܰܝܟ ܕܳܐܡܰܪܬܝ̱܇ ܕܶܐܢ ܒܳܠܰܥ ܐ̱ܢܳܐ ܥܰܡܝ̱ ܒܳܠܥܰܬܝ̱܇ ܐܶܠܳܐ ܠܒܶܫܬܳܢܝ̱ ܠܰܝܬ ܦܽܘܪܣܳܐ܇ ܐܶܚܰܫ ܐܶܢܳܐ ܠܡܽܘܢ ܥܳܪܩܰܬܝ̱܀

ܗܳܐ ܕܰܝܳܢܳܐ ܕܠܶܗ ܩܳܪܝܰܬܝ̱܇ ܢܶܚܙܶܐ ܕܨܳܡܿܶܬ ܐܶܬܟܰܫܦܿܶܬ܇ ܘܰܐܝܟܰܢ ܟܺܐܢܳܐ ܕܶܐܢܳܐ ܠܐܺܝܿܬ܇ ܘܰܐܓܪܳܐ ܕܠܶܐܳܘܰܬܝ̱ ܐܰܢ̱ܬ ܬܶܣܒܶܝܢ܀

ܘܳܠܶܐ ܡܳܕܶܝܢ ܕܰܒܟܽܠܗܶܝܢ܇ ܐܰܢ̱ܬ ܬܶܒܠܥܺܝܢ ܐܰܝܟ ܕܳܐܡܰܪܬܝ̱܇ ܕܺܐܝܬ ܒܶܟܝ̱ ܚܰܝܠܳܐ ܘܥܰܠ ܡܽܘܢ ܫܠܰܝܬܝ̱܇ ܕܦܶܠܚܶܬ ܥܰܘܠܳܐ ܘܠܳܐ ܟܐܰܝܬ ܒܺܝ܀

ܙܰܕܺܝܩ ܘܰܬܪܺܝܨ ܕܰܢܚܽܘܪ ܒܺܝ܇ ܕܡܶܢ ܕܰܫܒܰܩܬܺܝܢܝ̱ ܠܳܐ ܓܳܪܶܬ܇ ܒܶܟܝ̱ ܙܳܐܰܥ ܗܘܺܝܿܬ ܥܰܠ ܪܶܓܬܳܐ܇ ܘܡܶܢ ܕܰܐܦܢܺܝܬܺܝܢܝ ܗܳܐ ܫܠܺܝܿܬ ܠܺܝ܀

ܚܝܳܢܬܳܐ ܕܥܺܝܪ̈ܶܐ ܐܰܝܟ ܕܳܐܡܰܪܬܝ̱܇ ܘܶܐܢܳܐ ܥܰܦܪܳܐ ܘܫܰܠܶܡܬܝ̱ ܠܺܝ܇ ܥܰܡ ܕܰܚܺܝܚܳܐ ܡܶܬܢܰܓܰܕܬܝ̱ ܥܰܠ ܕܰܐܟܘܳܬܶܗ ܥܰܘܠܳܐ ܦܠܰܚܬܝ̱܀

ܛܡܰܪܘ̱ ܠܺܝ ܦܰܚ̈ܶܐ ܗܽܘ ܣܳܢܐܳܐ܇ ܘܠܰܘ ܒܶܠܥܳܕܰܝܟܝ̱ ܢܶܦܠܶܬ ܒܗܽܘܢ܇ ܢܰܗܺܝܪܳܐ ܗܘܺܝܿܬ ܘܠܳܐ ܓܰܠܝܬܝ̱ ܠܺܝ܇ ܐܽܘܪܚܶܗ ܕܦܰܚܳܐ ܕܠܳܐ ܢܶܐܚܕܰܢܝ̱܀

ܝܰܗܒ ܠܶܟܝ̱ ܗܰܘܢܳܐ ܘܥܰܒܕܰܢܝ̱ ܠܺܝ܇ ܣܪܰܚܬܳܝܗ̱ܝ ܠܛܰܠܝܳܐ ܕܠܶܟܝ̱ ܐܶܬܓܥܶܠ܇ ܘܰܐܝܟ ܣܰܦܳܪܬܳܐ ܚܰܟܺܝܡܬܳܐ ܘܰܒܡܰܪܫܽܘܬܳܐ ܐܰܢ̱ܬܝ̱ ܩܳܝܡܰܬܝ̱܀

ܟܰܕ ܕܰܡܺܝܟ ܗܘܺܝܿܬ ܘܰܐܢ̱ܬܝ̱ ܢܳܛܪܰܬܝ̱܇ ܒܫܶܢܬܳܐ ܫܠܺܝܬܳܐ ܡܰܢܽܘ ܕܓܳܪ܇ ܢܳܛܽܘܪܬܳܐ ܗܘܰܝܬܝ̱ ܠܡܽܘܢ ܠܳܐ ܟܠܰܝܬܝ̱܇ ܓܰܘܪܳܐ ܣܰܢܝܳܐ ܕܠܳܐ ܢܚܰܝܒܰܢܝ̱܀

ܠܳܐ ܪܚܰܩܬܝ̱ ܡܶܢܝ̱ ܡܳܐ ܕܡܶܬܪܕܶܝܢܝ̱܇ ܐܶܢ ܕܰܝܳܢܳܐ ܠܳܐ ܡܶܨܛܰܠܶܐ܇ ܕܶܐܠܽܘ ܒܢܰܦܫܳܐ ܠܳܐ ܡܶܬܬܙܺܝܥ܇ ܦܰܓܪܳܐ ܕܢܶܚܛܶܐ ܡܬܽܘܡ ܠܳܐ ܚܛܳܐ܀

ܡܽܘܡ̈ܶܐ ܟܽܠܗܽܘܢ ܗܳܠܶܝܢ ܕܒܺܝ܇ ܕܠܰܘ ܒܶܠܥܳܕܰܝܟܝ̱ ܢܰܦܫܳܐ ܗ̱ܘܰܘ܇ ܕܟܰܕ ܓܳܐܰܪ ܗܘܺܝܿܬ ܐܶܠܽܘ ܒܥܰܝܬܝ̱܇ ܟܳܠܝܳܐ ܗܘܰܝܬܝ̱ ܠܺܝ ܡܶܢ ܒܺܝܫܬܳܐ܀

ܢܶܚܙܶܝܢܝ̱ ܕܰܝܳܢܝ̱ ܘܠܳܐ ܢܦܰܪܫܶܟܝ̱܇ ܡܶܢ ܒܰܪ ܙܰܘܓܶܟܝ̱ ܡܳܐ ܕܡܶܬܪܕܶܐ܇ ܕܶܐܠܽܘܠܳܐ ܨܒܰܝܬܝ̱ ܘܫܰܠܡܶܬܝ ܠܺܝ܇ ܥܰܘܠܳܐ ܡܶܡܬܽܘܡ ܠܳܐ ܐܶܣܬܥܰܪ܀

ܣܳܗܶܕ ܕܰܝܳܢܝ̱ ܕܰܟܡܳܐ ܫܪܰܥܘ̱܇ ܕܰܝܘ̈ܶܐ ܘܰܢܦܰܠܘ̱ ܡܶܢ ܐܰܬܪܗܽܘܢ܇ ܕܪܽܘܚܳܐ ܐܶܢܽܘܢ ܥܰܠ ܡܳܢܳܐ܇ ܗܳܐ ܓܺܗܰܢܳܐ ܚܳܝܪܳܐ ܠܗܽܘܢ܀

ܥܰܡܝ̱ ܛܳܒ̈ܳܬܳܐ ܐܶܢ ܐܺܝܬ ܠܶܟܝ̱܇ ܚܠܺܝܛܳܐ ܐ̱ܢܳܐ ܠܳܐ ܬܶܦܪܫܰܢܝ̱܇ ܫܰܘܬܳܦ̈ܶܐ ܚܢܰܢ ܘܠܳܐ ܡܫܰܢܝܰܬܝ̱܇ ܡܶܢ ܒܰܪܙܰܘܓܶܟܝ̱ ܡܳܐ ܕܡܶܬܪܕܶܐ܀

ܦܰܘܠܳܘܣ ܢܺܐܬܶܐ ܘܰܢܚܰܟܡܰܢܝ̱ ܕܫܰܘܬܳܦ̈ܶܐ ܚܢܰܢ ܕܰܚܕܳܕ̈ܶܐ܇ ܘܪܽܘܚܳܐ ܠܦܰܓܪܳܐ ܗܺܝ ܡܕܰܒܪܳܐ܇ ܡܶܢ ܒܶܠܥܳܕܶܝܗܿ ܦܰܓܪܳܐ ܛܠܺܝܡ܀

ܨܶܒܝܳܢܶܟܝ̱ ܪܳܡ ܘܠܶܗ ܠܳܐ ܥܨܺܝܿܬ܇ ܐܳܦܠܳܐ ܒܡܶܕܶܡ ܟܰܕ ܐܰܪܫܥܶܬ܇ ܕܶܐܠܽܘܠܳܐ ܒܥܰܝܬܝ̱ ܐܳܦ ܐܶܨܛܒܰܝܬܝ̱܇ ܪܽܘܫܥܳܐ ܡܶܡܬܽܘܡ ܠܳܐ ܐܶܬܓܡܰܪ܀

ܩܕܳܡܰܘܗ̱ܝ ܕܺܝܠܶܗ ܬܰܫܰܪ ܚܕܳܐ܇ ܕܚܰܕ ܦܽܘܩܕܳܢܳܐ ܢܶܓܙܽܘܪ ܥܠܰܝܢ܇ ܘܒܰܓܙܳܪ ܕܺܝܢܶܟܝ̱ ܠܳܐ ܢܶܦܪܫܰܢܝ̱܇ ܕܟܺܐܝܢ ܗܽܘ ܘܰܬܪܺܝܨ ܘܠܳܐ ܡܶܨܛܠܶܐ܀

ܪܳܡܶܝܢ ܙܰܘܥܰܝܟ̈ܝ̱ ܘܒܺܝ ܐܶܬܬܙܺܝܬܝ̱܇ ܥܰܠ ܛܳܒ̈ܳܬܳܐ ܕܳܐܦ ܐܶܣܬܥܰܪ̈ܝ̱܇ ܗܘܺܝܬ ܠܺܝ ܡܳܢܳܐ ܘܡܰܠܶܠܬܝ̱ ܒܺܝ܇ ܬܪܺܝܨ ܕܰܝܳܢܳܐ ܕܠܳܐ ܢܦܰܪܫܶܟܝ̱܀

ܫܡܰܥ ܡܳܪܝ̱ ܘܰܚܙܺܝ ܫܳܩܠܳܐ܇ ܟܠܺܝܠܳܐ ܢܰܦܫܳܐ ܠܳܐ ܬܓܰܠܙܰܢܝ̱܇ ܘܶܐܢ ܒܳܠܰܥ ܐ̱ܢܳܐ ܐܳܦ ܠܳܗܿ ܡܚܺܝ܇ ܕܠܳܐ ܒܶܠܥܳܕܶܝܗܿ ܣܳܟ ܠܳܐ ܚܛܺܝܿܬ܀

ܬܪ̈ܰܝܟܽܘܢ ܫܰܘܝܳܐܺܝܬ ܥܒܰܕܬܽܘܢ܇ ܘܚܰܕ ܗܽܘ ܕܺܝܢܳܐ ܢܦܽܘܩ ܠܟܽܘܢ ܩܰܦܘ̱ ܠܰܚܕܳܕ̈ܶܐ ܘܠܳܐ ܬܶܦܪܫܽܘܢ܇ ܕܠܳܐ ܐܺܝܬ ܣܶܕܩܳܐ ܒܰܝܢܳܬܟܽܘܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܙܰܒܢܶܗ ܕܠܺܠܝܳܐ ܐܰܝܟܰܘ ܢܽܘܗܪܶܗ ܕܗܰܘ ܐܺܝܡܳܡܳܐ܇ ܘܰܐܟܡܳܐ ܕܠܳܐ ܗܘܳܐ ܐܳܦܠܳܐ ܡܶܗܘܳܐ ܦܪܺܝܣ ܚܶܫܽܘܟܳܐ܇ ܐܰܝܟܰܘ ܥܳܠܡܳܐ ܕܡܶܬܪܰܘܪܰܒ ܗܘܳܐ ܒܥܽܘܡܪܳܗܿ ܕܰܫܝܽܘܠ܇ ܕܰܒܛܺܝܠ ܘܰܫܠܶܐ ܐܰܝܟ ܗܰܘ ܕܠܳܐ ܗܘܳܐ ܐܳܦܠܳܐ ܡܶܗܘܳܐ܀

ܡܶܬܬܥܺܝܪ ܨܰܦܪܳܐ ܕܡܰܝܬܶܐ ܠܒܽܘܫ̈ܶܐ ܠܰܠܒܽܘܫܰܝܗܽܘܢ܇ ܘܡܶܬܬܨܺܝܪܳܐ ܒܳܗܿ ܩܝܳܡܬܳܐ ܕܡܰܝܬܶܐ ܒܬܶܗܪܳܐ ܪܰܒܳܐ܇ ܕܰܥ ܐܰܢ̱ܬ ܗܳܫܳܐ ܕܗܰܘ ܡܳܐ ܕܰܫܩܰܠ ܪܰܡܫܳܐ ܡܶܢܳܟ܇ ܗܽܘ ܡܰܠܒܶܫ ܠܳܟ ܨܰܦܪܳܐ ܬܟܰܣܶܐ ܥܰܠ ܗܰܕܳܡܰܝ̈ܟ܀

 

ܕܨܰܦܪܳܐ ܕܰܬܪܶܝܢ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܗܰܘ ܕܰܗܘܳܐ ܒܽܘܟܪܳܐ

ܐܰܢ̱ܬ ܕܰܒܝܰܕ ܨܰܘܡܳܐ ܩܰܕܺܝܫܳܐ܇ ܦܽܘܪܩܳܢܳܐ ܠܥܰܡܳܟ ܫܰܟܶܢܬ ܪܰܚܶܡܥܠܰܝ܀

ܗܰܘ ܕܰܒܝܰܕ ܨܰܘܡܳܐ ܠܒܰܪ ܥܰܡܪܰܡ܇ ܘܝܰܗܒ ܠܶܗ ܠܽܘܚ̈ܶܐ ܘܦܽܘܩܕܳܢ̈ܶܐ܀

ܗܰܘ ܕܰܒܝܰܕ ܨܰܘܡܳܐ ܠܕܳܢܺܝܐܶܝܠ܇ ܡܶܢ ܚܰܝܘ̈ܳܬܳܐ ܦܰܨܝܶܗ ܗܘܳܐ ܪܰܚܶܡܥܠܰܝ܀

ܗܰܘ ܕܰܒܝܰܕ ܨܰܘܡܳܐ ܐܶܬܺܝܗܶܒ܇ ܠܚܰܢܰܐ ܗܽܘ ܫܡܽܘܐܶܝܠ ܢܒܺܝܳܐ܇ ܪܰܚܶܡܥܠܰܝ܀

ܗܰܘ ܕܶܐܡܰܪ ܕܰܩܪܰܘ ܥܳܢܶܐ ܐ̱ܢܳܐ܇ ܘܩܽܘܫܽܘܢ ܘܶܐܢܳܐ ܦܳܬܰܚ ܐ̱ܢܳܐ ܪܰܚܶܡܥܠܰܝ܀

ܫܽܘܒܚܳܐ ܠܳܟ ܝܶܫܽܘܥ ܡܪܰܚܡܳܢܳܐ܇ ܕܩܰܒܶܠܬܳܝܗ̱ܝ ܠܨܰܘܡܳܐ ܕܥܰܒܕܰܝ̈ܟ ܪܰܚܶܡܥܠܰܝ܀

ܕܰܐܠܳܗܝ̱ ܐܰܠܳܗܝ̱ ܒܩܳܠܳܐ ܒܬܽܘܠܬܳܐ ܩܰܕܺܝܫܬܳܐ

ܡܳܐ ܕܝܳܬܒܰܬ ܡܳܪܰܢ܇ ܠܰܡܕܳܢ ܫܰܪ̈ܒܳܬܳܐ܇ ܘܛܳܒ̈ܶܐ ܡܶܢ ܒܺܝܫ̈ܶܐ܇ ܦܳܪܫܳܐ ܟܺܐܢܽܘܬܳܐ܀

ܙܰܒܢ̈ܶܐ ܡܰܪܺܝܪܺܝܢ ܘܚܰܘܒ̈ܰܝ ܣܰܓܺܝܐܺܝܢ܇ ܘܟܺܐܢܽܘܬܳܐ ܠܚܺܝܡܳܐ܇ ܘܕܳܝܢܳܐ ܩܰܫܝܳܐܺܝܬ܀

ܝܶܫܽܘܥ ܡܠܶܐ ܪ̈ܰܚܡܶܐ܇ ܕܥܰܠ ܣܕܽܘܡ ܒܥܳܐ ܪ̈ܰܚܡܶܐ܇ ܐܰܫܦܰܥ ܥܠܰܝܢ ܪ̈ܰܚܡܰܝܟ܇ ܡܳܪܝܳܐ ܒܶܝܬ ܕܺܝܢܳܐ܀

 

ܢܰܦܫܳܐ ܥܩܰܪܬܳܐ

ܒܩܰܝܣܳܐ ܕܰܥܕܶܝܢ܇ ܡܰܘܬܳܐ ܛܶܥܡܶܬ܇ ܘܬܽܘܒ ܗܶܦܟܿܶܬ ܢܶܣܒܿܶܬ ܚܰܝ̈ܶܐ܇ ܒܰܙܩܺܝܦܳܐ ܕܺܝܠܳܟ ܐܰܠܳܗܳܐ܇ ܕܒܶܗ ܠܒܽܘܫܳܐ ܘܰܐܒܗܶܬܬ ܘܰܣܚܰܦܬ ܘܠܺܝ ܠܰܨܠܺܝܒܳܟ ܐܰܚܺܝܬܳܢܝ̱܇ ܘܰܠܝܳܪܬܽܘܬܳܟ ܙܰܡܶܢܬܳܢܝ̱܇ ܚܛܺܝܿܬ ܠܳܟ ܪܰܚܶܡܥܠܰܝ ܐܰܠܳܗܳܐ܀

ܐ̱ܚܪܺܝܢ ܒܰܪܢܳܫܳܐ܇ ܕܰܚܛܳܐ ܘܰܢܦܰܠ ܠܳܐ ܡܬܽܘܡ ܐܶܬܚܙܺܝ ܕܕܳܡܶܐ ܠܺܝ܇ ܗܳܐ ܡܛܰܒܰܥ ܐ̱ܢܳܐ ܒܣܰܟܠܘ̈ܳܬܝ܇ ܕܢܽܘܟܪܳܝܳܐ ܐܺܝܬܰܝ ܠܟܽܠܳܗܿ ܡܝܰܬܪܽܘܬܳܐ܇ ܘܥܰܠ ܗܳܝ ܒܽܐܘܠܨܳܢܳܐ ܕܢܰܦܫܳܐ ܓܳܥܶܐ ܐ̱ܢܳܐ ܘܡܶܬܟܰܫܰܦ ܐ̱ܢܳܐ܇ ܚܽܘܣ ܥܠܰܝ ܪܳܚܶܡ ܐ̱ܢܳܫܳܐ܀

ܡܥܺܝܢܳܐ ܕܕܶܡܥ̈ܶܐ܇ ܫܰܟܶܢ ܠܺܝ ܡܳܪܝ̱ ܕܰܡܫܺܝܓܳܐ ܨܳܐܬܳܐ ܕܚܰܘܒ̈ܰܝ܇ ܒܝܰܕ ܛܰܝܒܽܘܬܳܟ ܐܰܠܳܗܳܐ܇ ܕܰܐܢ̱ܬ ܗܽܘ ܐܺܝܬܰܝܟ ܕܚܳܐܶܢ ܠܚܰܛܳܝ̈ܶܐ܇ ܡܶܢ ܚܰܘܒܰܝ̈ܗܽܘܢ܇ ܕܰܘܺܝܕ ܓܶܝܪ ܒܳܟ ܐܶܬܓܰܘܰܣ܇ ܐܳܦ ܦܰܘܠܳܘܣ ܒܳܟ ܐܶܫܬܰܒܗܰܪ܇ ܚܛܺܝܿܬ ܠܳܟ ܪܰܚܶܡܥܠܰܝ ܐܰܠܳܗܳܐ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܩܳܠܳܐ ܕܫܽܘܒܚܳܐ

ܒܦܽܘܡ ܣܡܳܟܳܐ ܕܰܡܠܶܐ ܟܽܠ ܚܰܕܘ̈ܳܬܳܐ܇ ܐܰܬܩܶܢ ܒܽܘܟܪܳܐ܇ ܠܟܶܢܫܳܐ ܢܰܟܦܶܐ ܕܨܰܝܳܡ̈ܶܐ܇ ܢܨܽܘܡ ܡܶܢ ܠܰܚܡܳܐ ܘܡܶܢ ܒܺܝܫ̈ܳܬܳܐ ܘܪܰܒܗܽܘ ܐܰܓܪܳܐ܇ ܘܦܽܘܪܥܳܢ ܨܰܘܡܳܐ ܕܰܢܛܺܝܪ ܠܰܢ܀

ܨܳܡܘ̱ ܗ̱ܘܰܘ ܫܰܒܪ̈ܶܐ ܡܶܢ ܚܰܪ̈ܡܳܢܶܐ ܘܨܳܡܰܬ݀ ܢܽܘܪܳܐ܇ ܡܶܢ ܦܰܓܪ̈ܰܝܗܽܘܢ ܒܰܐܬܽܘܢܳܐ܇ ܢܶܐܚܽܘܕ ܓܰܘܣܳܐ ܒܨܰܘܡܳܐ ܕܰܡܨܶܐ ܡܫܰܗܶܐ ܚܰܫ̈ܶܐ܇ܘܰܪ̈ܓܺܝܓܳܬܳܐ ܫܟܺܝܪ̈ܳܬܳܐ܀

ܪܰܒܗܽܘ ܨܰܘܡܳܐ܇ ܘܛܳܒܳܐ ܨܠܽܘܬܳܐ ܘܚܽܘܒܳܐ ܡܝܰܬܰܪ܇ ܘܙܶܕܩ̈ܳܬܳܐ ܚܛܳܗ̈ܶܐ ܫܳܒܩ̈ܳܢ܇ ܬܰܘ ܢܶܬܟܰܫܰܪ ܒܰܡܝܰܬܪܽܘܬܳܐ܇ ܕܗܳܐ ܦܬܺܝܚ ܬܰܪܥܳܐ܇ ܠܰܐܝܢܳܐ ܕܫܳܐܶܠ ܫܽܘܒܩܳܢܳܐ܀

ܩܪܰܐܘܽܘܟ ܟܺܐܢ̈ܶܐ ܒܽܐܘܠܨܳܢܰܝ̈ܗܽܘܢ ܘܰܥܢܰܝܬ ܐܶܢܽܘܢ܇ ܒܝܰܡܳܐ ܘܓܽܘܒܳܐ ܘܰܐܬܽܘܢܳܐ܇ ܘܶܐܢܳܐ ܕܚܰܕܪܰܢܝ̱ ܝܰܡܳܐ ܕܚܰܘܒ̈ܶܐ܇ ܐܰܘܫܶܛ ܠܺܝ ܡܳܪܝ̱ ܝܰܡܺܝܢܳܐ ܕܪ̈ܰܚܡܶܐ ܘܕܰܠܠܳܢܝ̱܀

ܩܪܰܐܘܽܘܟ ܟܺܐܢ̈ܶܐ ܘܰܥܢܰܝܬ ܐܶܢܽܘܢ܇ ܩܪܰܐܘܽܘܟ ܣܳܗܕ̈ܶܐ ܡܶܢ ܢܽܘܪܳܐ ܦܰܨܺܝܬ ܐܶܢܽܘܢ܇ ܘܥܺܕܬܳܐ ܘܝܰܠܕܶܝ̈ܗܿ ܗܳܐ ܩܳܪܝܳܐ ܠܳܟ ܕܬܶܥܒܶܕ ܪ̈ܰܚܡܶܐ܇ ܥܰܠ ܟܽܠܰܢ ܒܰܨܠܰܘ̈ܳܬܗܽܘܢ܀

ܫܰܗܪܳܐ ܒܪ̈ܰܚܡܰܝܟ܇ ܠܢܽܘܪܳܐ ܕܪܽܘܓܙܳܐ ܕܰܠܚܺܝܡܳܐ ܠܺܝ܇ ܒܪܳܐ ܕܪܰܫܡܰܢ ܒܡܰܥܡܽܘܕܺܝܬܳܐ܇ ܘܠܳܐ ܢܶܬܚܰܒܰܠ ܒܢܽܘܪܳܐ ܛܰܒܥܳܟ܇ ܘܢܶܚܕܶܐ ܒܺܝܫܳܐ܇ ܕܚܰܣܶܡ ܒܰܢ ܡܶܢ ܫܽܘܪܳܝܳܐ܀

 

ܬܶܫܒܽܘܚܬܳܐ ܚܕܰܬܳܐ ܩܳܠܳܐ ܝܰܘܡܳܢܳܐ

ܐܶܡܰܪ ܐܳܕܳܡ܇ ܚܶܘܝܳܐ ܘܚܰܘܳܐ ܢܦܰܠܘ̱ ܥܠܰܝ ܒܰܝܢܳܬ ܐܺܝܠܳܢ̈ܶܐ܇ ܘܰܫܩܰܠܘ̱ ܘܰܫܠܰܚܘ̱ ܢܰܚ̈ܬܶܐ ܪ̈ܓܺܝܓܶܐ ܕܰܡܥܰܛܰܦ ܗܘܺܝܿܬ܇ ܘܗܳܐ ܩܳܐܶܡ ܐ̱ܢܳܐ ܥܰܪܛܶܠܳܝ܇ ܒܪ̈ܰܚܡܰܝܟ ܚܽܘܣ ܥܠܰܝ܀

ܐܶܡܰܪ ܚܶܘܝܳܐ ܪܰܒܳܐܗ̱ܝ ܣܰܟܠܽܘܬܝ̱ ܘܒܺܝܫ ܘܡܰܪܺܝܪ ܦܽܘܪܥܳܢܳܐ ܕܰܡܛܳܢܝ̱܇ ܕܠܳܐܕܳܡ ܩܶܛܠܶܬ ܒܶܝܬ ܐܺܝܠܳܢ̈ܶܐ ܩܰܝܣܳܐ ܩܰܛܠܰܢܝ̱܇ ܘܥܰܦܪܳܐ ܝܰܗܒ ܠܺܝ ܡܶܐܟܽܘܠܬܳܐ ܡܶܟܺܝܠ ܘܰܠܥܳܠܰܡ܀

ܒܦܰܪܕܰܝܣܳܐ܇ ܐܶܬܬܣܺܝܡ ܗܘܳܐ ܢܳܡܽܘܣܳܐ ܕܨܰܘܡܳܐ ܠܒܶܝܬ ܐܳܕܳܡ܇ ܘܥܰܠ ܕܶܐܟܰܠܘ̱ ܗ̱ܘܰܘ ܡܶܢ ܐܺܝܠܳܢܳܐ ܕܠܳܐ ܦܩܺܝܕܺܝܢ ܗ̱ܘܰܘ܇ ܡܰܘܬܳܐ ܛܥܶܡܘ̱ ܗ̱ܘܰܘ ܕܰܚܛܺܝܬܳܐ܇ ܘܰܗ̱ܘܰܘ ܕܰܚܺܝܚܳܐ܀

ܨܳܡ ܗܘܳܐ ܢܒܺܝܳܐ܇ ܕܳܢܺܝܐܶܝܠ ܒܓܰܘ ܓܽܘܒܳܐ ܘܰܙܟܳܐ ܠܚܰܝܘ̈ܳܬܳܐ܇ ܘܰܐܪ̈ܝܰܘܳܬܳܐ ܟܰܦܘ̱ ܨܰܘܪ̈ܰܝܗܽܘܢ ܘܰܣܓܶܕܘ̱ ܗ̱ܘܰܘ ܠܶܗ܇ ܥܺܝܪܳܐ ܕܢܽܘܪܳܐ ܢܚܶܬ ܣܰܥܪܶܗ܇ ܠܟܺܐܢܳܐ ܐܶܬܢܰܨܰܚ܀

ܒܪܳܐ ܕܡܶܢ ܐܰܒܳܐ܇ ܕܰܨܒܳܐ ܘܰܢܚܶܬ ܘܶܐܬܒܰܪܢܰܫ ܡܶܢ ܒܬܽܘܠܬܳܐ ܡܰܪܝܰܡ܇ ܨܳܡ ܐܰܝܟ ܡܽܘܫܶܐ ܘܰܐܝܟ ܐܺܠܺܝܳܐ ܕܠܶܗ ܨܳܝܪܺܝܢ ܗ̱ܘܰܘ܇ ܘܣܰܚܦܶܗ ܠܒܺܝܫܳܐ ܗܰܘ ܕܰܣܚܰܦ ܠܳܐܕܳܡ ܒܦܰܪܕܰܝܣܳܐ܀

 

ܩܳܠܳܐ ܕܨܰܦܪܳܐ ܐܰܝܟ ܦܺܝܪܡܳܐ ܕܩܰܪܶܒ

ܪܓܺܝܓ ܨܰܘܡܳܐ ܡܳܐ ܕܰܚܠܺܝܛ ܒܶܗ ܨܰܘܡܳܐ ܘܙܶܕܩ̈ܳܬܳܐ܇ ܕܰܪܚܺܝܡ ܗܽܘ ܠܘܳܬ ܐܰܠܳܗܳܐ ܐܰܝܢܳܐ ܕܨܳܐܶܡ ܠܶܗ܇ ܛܽܘܒܳܐ ܪܰܒܳܐ ܠܨܰܝܳܡܳܐ܇ ܕܰܢܨܽܘܡ ܨܰܘܡܳܐ ܩܰܕܺܝܫܳܐ܀

ܩܪܳܟ ܐܺܠܺܝܳܐ ܘܰܥܢܰܝܬܳܝܗ̱ܝ ܘܰܥܒܰܕܬ ܨܶܒܝܳܢܶܗ܇ ܘܕܳܢܺܝܐܶܝܠ ܨܰܠܺܝ ܩܕܳܡܰܝܟ܇ ܘܰܙܟܳܐ ܠܚܰܝܘ̈ܳܬܳܐ܇ ܘܠܺܝ ܕܰܡܢܰܘܰܠ ܒܰܚܛܳܗ̈ܶܐ܇ ܚܰܣܳܢܝ̱ ܒܪ̈ܰܚܡܶܐ ܕܛܰܝܒܽܘܬܳܟ܀

 

ܐ̱ܚܪܺܢܳܐ ܕܒܰܨܦܪܳܐ ܢܩܰܕܶܡ ܠܰܨܠܽܘܬܳܐ

ܣܰܓܺܝ ܪ̈ܰܚܡܶܐ ܪܚܺܝܡܳܐ ܠܶܗ܇ ܠܰܨܠܽܘܬܳܐ ܘܨܰܘܡܳܐ ܕܦܽܘܪܫܳܢܳܐ܇ ܛܽܘܒ ܠܰܐܝܢܳܐ ܕܚܳܠܶܛ ܥܰܡܗܽܘܢ ܚܽܘܒܳܐ ܘܙܶܕܩ̈ܳܬܳܐ܇ ܕܠܶܗ ܗܽܘ ܢܛܺܝܪܳܐ ܡܰܠܟܽܘܬܳܐ܇ ܘܝܳܪܶܬ ܚܰܝ̈ܶܐ ܪ̈ܽܘܚܳܢܶܐ܇ ܘܡܶܬܒܰܣܰܡ ܥܰܡ ܩܰܕܺܝܫ̈ܶܐ ܒܰܓܢܽܘܢ ܚܰܕܘ̈ܳܬܳܐ܀

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ܇ ܕܡܶܛܽܠ ܥܰܘܠܰܝ̈ܢ ܘܰܚܛܰܗܳܝ̈ܢ܇ ܩܰܒܠܶܬ ܨܰܘܡܳܐ ܩܰܕܺܝܫܳܐ ܒܚܽܘܒܳܟ ܣܰܓܺܝܐܳܐ܇ ܗܰܒܠܰܢ ܡܳܪܰܢ ܕܰܢܨܽܘܡ ܠܳܟ܇ ܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܘܰܐܝܟ ܕܰܡܥܳܕܳܐܗ̱ܝ ܛܰܝܒܽܘܬܳܟ܇ ܚܽܘܣ ܘܶܐܬܪܰܚܰܡܥܠܰܝ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܶܡܰܪ ܠܳܗܿ ܠܢܰܦܫܳܟ ܕܶܐܢܳܐ ܚܳܒܿܶܬ ܟܰܕ ܚܳܛܶܐ ܗܘܺܝܿܬ܇ ܐܶܢܳܐ ܐܶܦܪܽܘܥ ܗܳܫܳܐ ܚܛܳܗ̈ܰܝ ܒܰܬܝܳܒܽܘܬܳܐ܇ ܠܳܐ ܫܳܠܶܐ ܐ̱ܢܳܐ ܘܠܳܐ ܫܳܟܶܬ ܐ̱ܢܳܐ ܘܠܳܐ ܢܳܐܰܚ ܐ̱ܢܳܐ܇ ܘܠܳܐ ܒܳܛܶܠ ܐ̱ܢܳܐ ܡܶܢ ܒܳܥܽܘܬܳܐ ܐܶܠܳܐ ܦܶܪܥܿܶܬ܀

ܫܽܘܒܚܳܐ ܠܪ̈ܰܚܡܰܝܟ ܕܡܶܛܽܠ ܥܰܘܠܰܢ ܫܰܠܚܽܘܟ ܨܶܐܕܰܝܢ܇ ܘܰܒܝܰܕ ܚܽܘܒܳܟ ܦܰܓܪܳܟ ܝܰܗܒܬ ܠܰܢ ܕܒܶܗ ܢܶܬܚܰܣܶܐ܇ ܗܳܐ ܡܰܪܥܺܝܬܳܟ ܝܳܗܒܳܐ ܕܶܡܥ̈ܶܐ ܕܚܰܒܺܝܒ̈ܳܢ ܠܳܟ܇ ܩܰܒܶܠ ܡܶܢܳܗܿ ܘܶܐܬܪܰܥܳܐ ܠܳܗܿ ܘܠܳܟ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ ܒܩܳܠܳܐ ܕܰܚܛܳܐ ܠܳܐ ܢܶܚܛܶܐ

ܗܳܐ ܒܬܰܪܥܳܟ ܩܳܐܶܡ܇ ܫܽܘܠܳܡܶܗ ܕܥܳܠܡܳܐ܇ ܢܶܒܥܶܐ ܘܢܶܬܟܰܫܰܦ܇ ܕܚܰܪܬܳܐ ܗܳܐ ܡܛܳܬ݀ ܠܳܗܿ܇ ܗܳܐ ܫܓܺܝܫܺܝܢ ܡܰܠܟ̈ܶܐ ܘܕܰܝܳܢ̈ܶܐ ܘܟܳܗ̈ܢܶܐ܇ ܘܰܩܪ̈ܳܒܶܐ ܘܩܺܐܪ̈ܣܶܐ ܘܛܶܐܒ̈ܶܐ ܕܰܡܣܰܪܕܺܝܢ ܗ ܘ ܗ ܡܳܪܰܢ ܥܰܕܰܪ ܠܰܢ܇ ܕܠܳܐ ܢܡܽܘܬ ܒܰܚܛܳܗ̈ܰܝܢ܀

ܕܺܝܢܳܟ ܡܳܪܝ̱ ܥܰܙܺܝܙ܇ ܘܚܰܘܒ̈ܰܝ ܣܰܓܺܝܐܺܝܢ ܘܟܺܐܢܽܘܬܳܐ ܠܚܺܝܡܳܐ ܕܶܐܥܪܽܘܩ ܠܳܐ ܡܨܶܐ ܐ̱ܢܳܐ܇ ܒܗܰܘ ܕܢܶܓܕܳܟ ܚܽܘܒܳܐ ܠܒܶܝܬ ܕܺܝܢܳܐ ܚܠܳܦܰܝܢ܇ ܠܕܺܝܢܳܐ ܠܳܐ ܬܰܥܠܰܢ ܘܚܰܘܒ̈ܰܝܢ ܠܳܐ ܬܶܬܕܟܰܪ܇ ܗ ܘ ܗ ܕܰܝܳܢܳܐ ܟܺܐܢܳܐ ܚܽܘܣ ܘܶܐܬܪܰܚܰܡܥܠܰܝܢ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܡܶܢ ܪܰܡܫܳܐ ܠܪܰܡܫܳܐ ܨܳܝܡܺܝܢ܇ ܘܳܐܟܠܺܝܢ ܒܶܣܪܳܐ ܕܡܶܣܟܺܢ̈ܶܐ ܦܟܺܝܪ ܠܳܟ ܚܰܒܪܳܟ ܒܕܺܝܢܽܘܬܳܐ܇ ܠܡܳܢܳܐ ܠܒܺܝܫ ܐܰܢ̱ܬ ܐܽܘܟܳܡ̈ܶܐ܇ ܟܦܺܝܦ ܠܳܟ ܚܰܨܳܟ ܒܰܨܠܽܘܬܳܐ܇ ܘܰܟܬܺܝܒ ܚܰܒܪܳܟ ܒܰܡܓ̈ܰܐܠܶܐ܀

ܫܽܘܒܚܳܐ ܠܗܰܘ ܕܰܦܬܺܝܚ ܬܰܪܥܶܗ܇ ܠܚܰܛܳܝ̈ܶܐ ܕܳܐܬܶܝܢ ܨܶܝܕܰܘܗ̱ܝ܇ ܘܥܳܢܶܐ ܠܗܽܘܢ ܡܳܐ ܕܩܳܪܶܝܢ ܠܶܗ܇ ܘܰܡܦܰܢܶܐ ܠܗܽܘܢ ܫܶܐܠ̈ܳܬܗܽܘܢ܇ ܥܢܺܝ ܠܰܢ ܡܳܪܝ̱ ܕܩܳܪܶܝܢܰܢ ܠܳܟ܇ ܘܩܰܒܶܠ ܨܰܘܡܰܢ ܘܰܨܠܽܘܬܰܢ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܠܳܐ ܒܳܗܬܺܝܢ ܟܺܐܢ̈ܶܐ

ܛܽܘܒܳܐ ܠܨܰܝܳܡܳܐ܇ ܐܶܢܗܽܘ ܕܨܳܐܶܡ ܕܰܟܝܳܐܺܝܬ܇ ܘܠܳܐ ܚܳܠܶܛ ܙܺܐܦܳܐ ܒܨܰܘܡܶܗ܇ ܕܰܒܝܽܘܡ ܢܽܘܚܳܡܳܐ܇ ܚܠܺܝܛ ܗܽܘ ܒܟܶܢܫ̈ܶܐ ܕܩܰܕܺܝܫ̈ܶܐ܇ ܥܰܡܗܽܘܢ ܝܳܪܶܬ ܡܰܠܟܽܘܬܳܐ܇ ܗ ܘ ܗ ܒܽܐܘܪܺܫܠܶܡ  ܗܳܝ ܕܒܰܫܡܰܝܳܐ܀

ܩܰܒܶܠ ܦܳܪܽܘܩܰܢ܇ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܨܰܘܡܰܢ ܢܶܗܘܶܐ ܠܰܢܝܳܚܳܟ܇ ܘܰܒܝܰܘܡܳܐ ܪܰܒܳܐ܇ ܢܶܚܙܶܐ ܚܢܳܢܳܟ ܒܶܝܬ ܕܺܝܢܳܐ܇ ܘܢܶܙܡܰܪ ܫܽܘܒܚܳܐ ܠܛܰܝܒܽܘܬܳܟ܇ ܗ ܘ ܗ ܒܝܽܘܡ ܕܺܝܢܳܟ ܪܰܚܶܡܥܠܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܳܐ ܕܥܰܙܺܝܙܳܐ ܢܽܘܪܶܗ ܕܡܰܠܟܳܐ ܥܰܠ ܕܰܚܕܳܪ̈ܰܘܗ̱ܝ܇ ܘܕܳܚܠܳܐ ܡܶܢܶܗ ܘܪܳܥܠܳܐ ܒܪܺܝܬܳܐ ܘܙܳܝܥܳܐ ܟܽܠܳܗܿ܇ ܒܗܰܘ ܥܶܕܳܢܳܐ ܢܶܪܢܶܐ ܟܽܠܢܳܫ ܘܰܢܛܰܝܶܒ ܠܶܗ܇ ܡܳܐܢ̈ܶܐ ܛܳܒ̈ܶܐ ܠܒܶܝܬ ܡܶܫܬܽܘܬܳܐ ܕܡܰܠܝܳܐ ܢܽܘܗܪܳܐ܀

ܫܽܘܒܚܳܐ ܠܳܟ ܡܳܪܝ̱ ܕܰܒܛܰܝܒܽܘܬܳܟ ܡܰܠܝܰܬ݀ ܪ̈ܰܚܡܶܐ܇ ܠܟܽܠ ܐ̱ܢܳܫ ܚܰܘܺܝܬ ܐܽܘܪܚܳܐ ܕܕܺܝܢܳܟ ܢܰܗܺܝܪܳܐܺܝܬ܇ ܒܗܰܘ ܥܶܕܳܢܳܐ ܕܢܳܗܡܳܐ ܢܽܘܪܳܐ ܥܰܠ ܪ̈ܰܫܺܝܥܶܐ܇ ܚܽܘܢ ܠܰܦܪ̈ܺܝܩܰܝ ܒܰܨܠܺܝܒܳܟ ܘܠܳܟ ܬܶܫܒܽܘܚܬܳܐ܀

 

ܕܰܬܫܰܥܫܳܥܺܝ̈ܢ ܒܩܳܠܳܐ ܩܽܘܩܳܝܳܐ

ܠܳܐ ܬܶܫܕܶܝܢܝ̱ ܡܶܢ ܩܕܳܡܰܝܟ ܡܰܠܟܳܐ ܡܫܺܝܚܳܐ܇ ܒܗܰܘ ܥܶܕܳܢܳܐ ܕܡܶܬܓܰܠܝ̈ܳܢ ܟܰܣܝ̈ܳܬܳܐ ܟܽܠܗܶܝܢ܇ ܡܳܐ ܕܡܶܬܟܰܢܫ̈ܳܢ ܠܕܺܝܢܳܐ ܫܰܪ̈ܒܳܬܳܐ܇ ܘܡܶܢܳܟ ܟܽܠܢܳܫ ܡܶܬܬܒܰܥ ܣܽܘܥܪ̈ܳܢܰܘܗ̱ܝ܇ ܚܽܘܣ ܥܠܰܝ ܘܪܰܚܶܡܥܠܰܝ ܡܫܺܝܚܳܐ ܡܠܶܐ ܪ̈ܰܚܡܶܐ܇ ܕܦܰܓܪܳܟ ܘܰܕܡܳܟ ܐܰܘܟܶܠܬܳܢܝ̱ ܚܽܘܢܰܝܢܝ̱ ܘܪܰܚܶܡܥܠܰܝܢ ܗ܇ ܒܪ̈ܰܚܡܰܝܟ ܚܽܘܣ ܥܠܰܝ܀

ܕܰܢܨܰܠܽܘܢ ܫܠܺܝ̈ܚܶܐ ܫܰܐܶܠܘ̱ ܗ̱ܘܰܘ ܡܶܢ ܦܳܪܽܘܩܰܢ܇ ܘܶܐܡܰܪ ܠܗܽܘܢ ܟܰܕ ܡܨܰܠܶܝܢ ܐ̱ܢ̱ܬܽܘܢ ܗܳܟܰܢܳܐ ܬܺܐܡܪܽܘܢ܇ ܩܪܰܐܘܽܘܢ ܠܰܐܒܳܐ ܬܺܐܬܶܐ ܡܰܠܟܽܘܬܳܟ܇ ܘܫܰܐܠܽܘܢ ܡܶܢܶܗ ܣܽܘܢܩܳܢܳܐ ܕܝܰܘܡܳܐ܇ ܫܒܽܘܩ ܠܰܢ ܚܰܘܒ̈ܰܝܢ ܘܰܚܛܳܗ̈ܰܝܢ ܐܰܦܺܝܣܽܘܢܳܗ̱ܝ܇ ܘܰܒܪ̈ܰܚܡܶܐ ܡܳܪܳܐ ܛܳܒܳܐ ܚܽܘܣ ܘܶܐܬܪܰܚܰܡܥܠܰܝܢ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܚܳܕܶܝܢ ܙܰܕܺܝ̈ܩܶܐ܇ ܕܚܳܙܶܝܢ ܟܠܺܝܠܰܝ̈ܗܽܘܢ܇ ܘܰܪܒܳܬ݀ ܕܳܝܨܺܝܢ ܒܶܗ܇ ܒܰܐܬܪܳܐ ܕܠܶܗ ܣܰܟܺܝܘ܇ ܝܶܫܽܘܥ ܡܠܶܐ ܪ̈ܰܚܡܶܐ܇ ܐܰܫܘܳܢ ܠܗܰܘ ܐܰܬܪܳܐ܀

ܠܳܟ ܡܳܪܝ̱ ܬܶܫܒܽܘܚܬܳܐ܇ ܘܠܰܐܒܽܘܟ ܐܺܝܩܳܪܳܐ܇ ܘܰܠܪܽܘܚܳܐ ܕܩܽܘܕܫܳܐ܇ ܘܣܶܓܕܬܳܐ ܘܪܽܘܡܪܳܡܳܐ ܒܗܳܢ ܥܳܠܡܳܐ ܘܰܒܗܰܘ܇ ܚܢܳܢܳܟ ܢܩܽܘܡ ܒܰܐܦܰܝ̈ܢ܀

 

ܬܽܘܒ ܕܪܰܡܫܳܐ ܕܰܬܠܬܳܐ ܒܫܰܒܳܐ ܒܫܰܒܬܳܐ ܕܰܬܠܳܬ ܕܨܰܘܡܳܐ ܕܰܐܪܒܥܺܝܢ

ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܥܰܠ ܝܽܘܪܕܢܳܢ

ܝܶܫܽܘܥ ܡܰܠܟܰܢ܇ ܘܰܚܠܳܦܰܝܢ ܨܳܡ ܕܰܢܙܰܟܶܝܢ܇ ܒܪܺܝܟ ܚܰܝܠܳܐ܇ ܕܰܙܟܳܐ ܗܘܳܐ ܘܙܰܟܺܝ ܠܰܢ܀

ܢܶܫܪܶܐ ܡܶܢܰܢ ܪ̈ܓܺܝܓܳܬܳܐ ܫܟܺܝܪ̈ܳܬܳܐ܇ ܢܶܦܣܽܘܩ ܢܶܫܪܶܐ܇ ܡܶܐܣܪ̈ܳܝܳܬܳܐ ܕܢܶܟܠܳܐ܀

ܟܰܕ ܢܶܬܟܰܫܰܪ܇ ܒܨܰܘܡܳܐ ܕܰܟܝܳܐ ܘܙܰܗܝܳܐ܇ ܕܗܽܘ ܡܦܰܨܶܐ ܠܰܢ܇ ܡܶܢ ܒܺܝܫܳܐ ܒܥܶܠܕܰܪܳܐ܀

ܒܪܺܝܟ ܗܽܘ ܕܶܐܬܪܟܶܢ܇ ܨܰܘܡܳܐ ܥܠܰܘܗ̱ܝ ܩܰܒܶܠ ܗܘܳܐ܇ ܘܰܕܢܶܕܪܽܘܫ ܠܰܢ܇ ܫܒܺܝܠܳܐ ܕܡܰܣܶܩ ܠܰܫܡܰܝܳܐ܀

ܒܨܰܘܡܳܐ ܐܰܚ̈ܰܝ܇ ܢܶܩܪܶܐ ܠܡܳܪܝܳܐ ܡܪܰܚܡܳܢܳܐ܇ ܘܕܢܶܥܢܶܐ ܠܰܢ܇ ܘܰܢܦܰܢܶܐ ܠܰܢ ܫܶܐܠ̈ܳܬܰܢ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܠܳܟ ܗܽܘ ܡܳܪܝܳܐ ܩܳܪܶܝܢܰܢ܇

ܡܳܪܝܳܐ ܩܪܺܝܬܳܟ ܡܶܢ ܟܽܠܶܗ ܠܶܒܝ̱܇ ܒܗܳܢ ܥܶܕܳܢܳܐ܇ ܕܪܰܡܫܳܐ ܕܬܶܚܽܘܢ ܠܰܢ܀

ܐܰܟܡܳܐ ܕܦܰܨܺܝܬ ܠܝܰܘܣܶܦ ܒܶܐܓܽܘܦܛܳܘܣ ܦܰܨܳܐ ܠܰܢ ܡܳܪܝ̱܇ ܡܶܢ ܦܰܚܰܘ̈ܗ̱ܝ ܕܕܺܝܰܒܠܳܘܣ܀

ܐܰܟܡܳܐ ܕܫܰܘܙܶܒܬ ܠܰܬܠܳܬܳܐ ܛܠܳܝ̈ܶܐ܇ ܫܰܘܙܶܒܰܝܢ ܡܶܢ ܢܽܘܪܳܐ ܕܓܺܗܰܢܳܐ܀

ܐܰܟܡܳܐ ܕܰܥܢܰܝܬ ܠܕܳܢܺܝܐܶܝܠ ܢܒܺܝܳܐ܇ ܥܢܺܝ ܠܰܢ ܒܪ̈ܰܚܡܰܝܟ܇ ܘܡܶܢ ܣܳܐܢܰܝ̈ܢ ܦܰܨܳܢ܀

ܐܰܟܡܳܐ ܕܰܐܫܦܰܥܬ ܚܢܳܢܳܟ ܠܢܺܝܢܘܳܝ̈ܶܐ܇ ܐܰܫܦܰܥ ܥܠܰܝܢ܇ ܛܰܐܠܳܐ ܕܫܽܘܒܩܳܢܳܐ܀

ܐܰܟܡܳܐ ܕܫܰܒܚܽܘܟ ܟܺܐܢ̈ܶܐ ܘܙܰܕܺܝ̈ܩܶܐ܇ ܢܶܫܬܘܶܐ ܥܰܡܗܽܘܢ܇ ܢܫܰܒܚܳܟ ܕܠܳܐ ܫܶܠܝܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܩܰܒܶܠܳܝܗ̱ܝ ܡܳܪܝ̱

ܒܚܰܫܳܐ ܘܕܶܡܥ̈ܶܐ܇ ܢܺܝܢܘܳܝ̈ܶܐ ܐܶܬܟܰܫܰܦܘ̱ ܠܳܟ܇ ܘܰܒܨܰܘܡܳܐ ܕܨܳܡܘ̱ ܗ̱ܘܰܘ܇ ܚܳܢܰܬ̈ ܐܶܢܽܘܢ ܛܰܝܒܽܘܬܳܟ܀

ܛܳܒܳܐ ܕܰܦܬܺܝܚ ܬܰܪܥܶܗ ܠܟܽܠܗܽܘܢ ܬܰܝܳܒ̈ܶܐ܇ ܚܰܣܳܐ ܠܺܝ ܒܪ̈ܰܚܡܰܝܟ܇ ܕܰܐܢ̱ܬܽܗ̱ܘ ܣܰܒܪܳܐ ܫܰܪܺܝܪܳܐ܀

ܪܳܚܶܡ ܬܰܝܳܒ̈ܶܐ܇ ܚܽܘܣ ܥܰܠ ܥܰܒܕܰܝ̈ܟ ܕܩܳܪܶܝܢ ܠܳܟ܇ ܘܰܫܒܽܘܩ ܠܰܢ ܚܰܘܒ̈ܰܝܢ܇ ܘܫܰܘܙܶܒ ܠܰܢ ܡܶܢ ܢܶܟܝܳܢ̈ܶܐ܀

 

ܐ̱ܚܪܺܢܳܐ ܒܩܳܠܳܐ ܗܘܺܝ ܠܳܗܿ ܠܢܰܦܫܝ̱ ܡܶܢܰܛܪܳܢܳܐ

ܬܰܘ ܢܶܬܟܰܫܰܦ ܐܳܘ ܚܰܛܳܝ̈ܶܐ܇ ܘܒܰܨܠܽܘܬܳܐ ܢܶܒܥܶܐ܇ ܠܡܳܪܳܐ ܛܳܒܳܐ ܕܰܦܬܺܝܚ ܬܰܪܥܶܗ ܠܰܐܝܢܳܐ ܕܢܳܩܶܫ ܒܶܗ܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܇ ܘܢܶܥܛܶܐ ܣܽܘܓܐܳܐ ܕܰܚܛܳܗ̈ܰܝܢ܇ ܒܝܰܕ ܪ̈ܰܚܡܶܐ ܕܺܝܠܶܗ܀

ܛܽܘܒܰܘܗ̱ܝ ܠܰܐܝܢܳܐ ܕܰܩܢܳܐ ܙܘܳܕ̈ܶܐ ܠܗܳܝ ܐܽܘܪܚܳܐ ܕܚܺܝܠܬܳܐ܇ ܕܡܳܐ ܕܪܳܕܶܐ ܒܳܗܿ ܢܶܫܟܰܚ ܪ̈ܰܚܡܶܐ ܘܫܽܘܒܩܳܢܳܐ ܕܚܰܘܒ̈ܶܐ܇ ܕܢܶܥܽܘܠ ܢܺܐܪܰܬ ܡܰܠܟܽܘܬܳܐ܇ ܘܚܰܝ̈ܶܐ ܚܰܕ̈ܬܶܐ ܕܰܠܥܳܠܰܡ ܥܰܡ ܟܽܠܗܽܘܢ ܟܺܐܢ̈ܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܶܢܳܐ ܚܛܺܝܿܬ ܡܳܪܝ̱ ܘܶܐܢܳܐ ܗܳܫܳܐ ܗܳܐ ܡܦܺܝܣ ܐ̱ܢܳܐ ܠܳܟ܇ ܩܰܒܶܠ ܒܳܥܽܘܬܝ̱ ܘܰܠܚܺܝ ܐ̱ܫܛܳܪܳܐ ܕܚܰܘܒ̈ܶܐ ܕܣܶܥܪܶܬ܇ ܗܳܐ ܨܳܡܰܪܬܳܐ ܪܰܒܬܳܐ ܕܥܰܘܠܳܐ ܒܠܰܥܬܰܢܝ̱ ܡܳܪܰܢ܇ ܗܰܒܠܺܝ ܐܺܝܕܳܟ ܘܶܐܣܰܩ ܡܶܢܳܗܿ ܕܠܳܐ ܐܺܒܰܕ ܒܳܗܿ܀

ܠܳܟ ܬܶܫܒܽܘܚܬܳܐ ܪܳܥܝܳܐ ܛܳܒܳܐ ܕܰܦܪܰܩ ܥܳܢܶܗ܇ ܡܶܛܽܠ ܥܶܪܒܳܐ ܗܰܘ ܕܰܐܒܺܝܕ ܗܘܳܐ ܢܚܶܬܬ ܕܐܰܠܺܝܬܳܝܗ̱ܝ܇ ܡܰܢܽܘ ܡܶܫܟܰܚ ܢܫܰܒܰܚ ܫܽܘܒܚܳܟ ܒܰܡܫܰܒܚܳܢ̈ܶܐ܇ ܕܰܟܣܶܝܬ ܒܰܐܒܽܘܟ ܥܰܡ ܪܽܘܚ ܩܽܘܕܫܳܐ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܐܰܥܺܝܪܰܝܢܝ̱ ܕܶܐܙܡܰܪ ܠܳܟ܆

ܥܰܡܰܢܽܘܐܶܝܠ ܥܰܡܰܢ ܐܰܢ̱ܬ܇ ܕܡܶܢ ܨܶܝܕ ܐܰܒܳܐ ܐܶܫܬܰܕܰܪܬ܇ ܡܶܛܽܠ ܚܽܘܒܳܟ ܨܳܡܬ ܘܰܐܩܪܶܒܬ ܥܰܡ ܣܳܛܳܢܳܐ܀

ܗܳܢܰܘ ܨܰܘܡܳܐ ܕܺܝܚܺܝܕܳܐ܇ ܕܒܶܗ ܐܶܬܦܪܶܩܘ̱ ܝܰܠܕܰܘ̈ܗ̱ܝ ܕܳܐܕܳܡ܇ ܘܒܶܗ ܫܰܘܙܶܒ ܠܰܢ܇ ܡܶܢ ܢܶܟܠܶܗ ܕܰܒܥܶܠܕܰܪܳܐ܀

ܡܳܐ ܕܩܳܐܶܡ ܐ̱ܢܳܐ ܒܶܝܬ ܕܺܝܢܳܐ܇ ܥܰܪܛܶܠܳܝ ܕܠܳܐ ܬܰܟܣܺܝܬܳܐ܇ ܛܰܝܒܽܘܬܳܟ ܡܳܪܝ̱ ܬܶܗܘܶܐ ܠܺܝ ܘܒܶܗ ܐܶܫܬܰܘܙܰܒ܀

ܚܰܣܳܐ ܠܺܝ ܐܰܝܟ ܐܰܠܳܗܳܐ܇ ܐܳܘ ܕܟܽܠܶܗ ܠܰܐܒܽܘܗ̱ܝ ܕܳܡܶܐ܇ ܘܰܫܒܽܘܩ ܟܽܠܗܶܝܢ ܣܰܟܠܘ̈ܳܬܝ̱ ܒܰܡܪܰܚܡܳܢܽܘܬܳܟ܀

ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܇ ܕܶܐܚܕܶܬ ܓܰܘܣܳܐ ܒܰܨܠܺܝܒܳܟ܇ ܚܰܣܳܐ ܚܰܘܒ̈ܰܝ ܒܛܰܝܒܽܘܬܳܟ܇ ܘܰܫܒܽܘܩ ܟܽܠܗܽܘܢ ܒܽܘܨܳܪ̈ܰܝ܀

 

ܩܳܠܳܐ ܕܠܺܠܝܳܐ ܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܐܶܢ ܪܳܓܶܙ ܕܰܝܳܢܳܐ ܐܳܘ ܡܶܬܚܰܡܰܬ܇ ܦܝܳܣܳܐ ܘܫܽܘܚܕܳܐ ܡܩܰܪܒܺܝܢ ܠܶܗ ܘܗܳܦܶܟ ܓܙܳܪ ܕܺܝܢܶܗ܇ ܫܽܘܒܚܳܐ ܠܶܗ ܠܰܐܠܳܗܳܐ ܕܰܚܠܳܦ ܫܽܘܚܕܳܐ܇ ܒܕܶܡܥ̈ܶܐ ܕܥܰܒܕܰܘ̈ܗ̱ܝ ܡܶܬܪܰܥܶܐ ܐܶܢܗܽܘ ܕܩܳܪܶܝܢ ܠܶܗ܇ ܗܳܐ ܣܳܗܕܳܐ ܚܰܛܳܝܬܳܐ ܕܰܒܳܟܳܬ݀܇ ܩܕܳܡ ܪ̈ܶܓܠܰܘܗ̱ܝ ܘܰܫܒܰܩ ܠܳܗܿ ܚܰܘܒܶܝ̈ܗܿ܇ ܫܒܽܘܩ ܠܰܢ ܚܰܘܒ̈ܰܝܢ ܘܰܚܛܳܗ̈ܰܝܢ ܝܶܫܽܘܥ ܡܠܶܐ ܪ̈ܰܚܡܶܐ܀

ܝܽܘܡ ܕܺܝܢܳܟ ܐܶܬܕܰܟܪܶܬ ܕܰܕܚܺܝܠ ܣܰܓܺܝ܇ ܘܰܫܦܰܥ̈ܝ̱ ܕܶܡܥ̈ܰܝ ܥܰܡ ܚܰܫܳܐ ܕܘܳܝܠܺܝ ܟܡܳܐ ܣܶܪܚܿܶܬ܇ ܒܟܰܪܡܳܟ ܦܶܠܚܿܶܬ ܘܰܠܐܺܝܿܬ ܥܰܡ ܣܰܓܺܝ̈ܐܶܐ܇ ܘܰܚܙܳܢܝ̱ ܒܺܝܫܳܐ ܘܰܚܣܰܡ ܒܺܝ ܘܚܰܠܶܨ ܡܰܪ̈ܗܳܛܰܝ܇ ܠܳܐ ܬܰܪܦܶܐ ܒܺܝ ܐܺܝܕܳܟ ܡܳܪܰܢ܇ ܕܠܳܐ ܐܶܚܠܽܘܛ ܒܓܰܒܳܐ ܕܣܶܡܳܠܳܐ܇ ܦܰܓܪܳܟ ܘܰܕܡܳܟ ܢܶܗܘܶܐ ܠܺܝ ܠܶܘܝܳܐ ܒܶܝܬ ܕܺܝܢܳܐ܀

 

ܣܽܘܓܺܝܬܳܐ ܒܩܳܠܳܐ ܐܰܝܢܰܘ ܕܢܰܓܺܝܪܳܐ ܥܶܢܝܳܢܳܐ ܫܽܘܒܚܳܐ ܠܛܰܝܒܽܘܬܳܟ ܚܳܢܰܬ݀ ܠܚܰܛܳܝ̈ܶܐ܇ ܫܽܘܒܚܳܐ ܠܟܺܐܢܽܘܬܳܟ ܕܠܳܐ ܢܳܣܒܳܐ ܒܰܐܦܺܝ̈ܢ

ܐܰܝܢܰܘ ܕܢܰܓܺܝܪܳܐ܇ ܪܽܘܚܶܗ ܕܢܶܫܬܰܥܶܐ܇ ܥܰܠ ܡܰܓܪܰܬ݀ ܪܽܘܚܳܐ܇ ܘܰܡܣܝܰܒܪܳܐ ܥܰܘܠܰܢ܇ ܚܛܰܝܢ ܘܶܐܬܡܠܶܝܢ ܥܰܘܠܳܐ܇ ܫܦܰܪܢ ܘܶܐܬܡܠܶܝܢ ܚܽܘܬܪܳܐ܀

ܒܳܟ ܡܳܪܝ̱ ܐܶܬܕܰܠܶܐ܇ ܘܶܐܩܽܘܡ ܕܢܶܦܠܶܬ ܠܺܝ܇ ܐܰܢ̱ܬ ܗܽܘ ܡܩܺܝܡܳܢܳܐ܇ ܘܰܐܚܳܐ ܒܝܰܕ ܪ̈ܰܚܡܰܝܟ܇ ܕܰܐܝܠܶܝܢ ܕܢܰܦܺܝܠܺܝܢ܇ ܐܺܝܕܳܟ ܐܰܘܫܶܛ ܠܺܝ܀

ܓܰܢܒܰܢܝ̱ ܒܥܶܠܕܰܪܳܐ܇ ܘܫܰܠܰܚ ܫܩܰܠ ܫܽܘܦܪ̈ܰܝ܇ ܘܫܰܒܩܰܢܝ̱ ܕܠܳܐ ܦܺܐܪ̈ܶܐ܇ ܘܢܶܦܩܶܬ ܟܰܕ ܫܠܺܝܚ ܐ̱ܢܳܐ܇ ܚܢܳܢܳܟ ܢܗܶܐ ܠܺܝ ܡܳܪܝ̱܇ ܐܶܣܛܠܳܐ ܒܝܽܘܡ ܕܺܝܢܳܐ܀

ܕܗܺܝ ܒܳܬܪܰܢ ܬܺܐܬܶܐ܇ ܐܶܠܨܰܬ݀ ܟܺܐܢܽܘܬܳܟ܇ ܐܶܢܗܽܘ ܕܚܳܒܢܰܢ ܠܳܗܿ܇ ܨܰܠܶܝܢ ܕܠܳܐ ܬܶܬܒܰܥܝ̱܇ ܘܶܐܢܗܽܘ ܕܚܳܒ ܠܰܢ ܐ̱ܢܳܫ܇ ܓܳܥܶܝܢܰܢ ܠܳܐ ܬܰܗܡܶܐ܀

ܗܺܝ ܕܶܝܢ ܟܺܐܢܽܘܬܳܟ܇ ܐܶܢ ܐ̱ܢܳܫ ܪܳܗܶܛ ܨܶܝܕܶܝܗܿ܇ ܕܢܶܩܒܽܘܠ ܥܰܠ ܚܰܒܪܶܗ܇ ܫܩܰܠܬܶܗ ܠܡܰܫܟܢܳܗܿ܇ ܠܽܘܩܒܰܠ ܚܰܘܒ̈ܳܬܶܗ ܢܶܦܪܽܘܥ ܟܶܢ ܢܶܬܒܰܥ܀

ܘܳܝܠܶܗ ܠܡܰܢ ܕܰܐܣܓܺܝ܇ ܣܽܘܪ̈ܚܳܢܰܘܗ̱ܝ ܐܰܟܘܳܬܝ̱܇ ܕܰܚܛܳܐ ܐܳܦ ܛܰܫܺܝ܇ ܕܠܳܐ ܢܶܒܗܰܬ ܗܳܪܟܳܐ܇ ܬܰܡܳܢ ܒܝܽܘܡ ܕܺܝܢܳܐ܇ ܒܨܶܒܥܳܐ ܡܚܰܘܶܝܢ ܠܶܗ܀

ܙܳܝܥܺܝܢ ܒܗܰܘ ܝܰܘܡܳܐ܇ ܟܽܠܗܽܘܢ ܒܢܰܝ̈ܢܳܫܳܐ܇ ܡܳܐ ܕܡܶܬܬܕܺܝܢ ܟܽܠܚܰܕ܇ ܡܶܢܗܽܘܢ ܡܶܢ ܥܰܡܠܰܘ̈ܗ̱ܝ܇ ܙܳܟܶܝܢ ܘܡܶܬܚܰܝܒܺܝܢ ܟܽܠܢܳܫ ܡܶܢ ܢܰܦܫܶܗ܀

ܚܰܘܒ̈ܰܝ ܥܫܶܢܘ̱ ܣܰܓܺܝ܇ ܘܝܰܘܡ̈ܰܝ ܛܠܰܩܘ̱ ܘܰܥܒܰܪܘ̱܇ ܘܡܰܛܺܝ ܙܒܶܢ ܩܶܨܳܐ܇ ܘܠܰܝܬܶܝܗܿ ܬܝܳܒܽܘܬܳܐ܇ ܘܶܐܢܗܽܘ ܕܠܰܝܬ ܪ̈ܰܚܡܶܐ܇ ܘܳܝܠܺܝ ܒܝܽܘܡ ܕܺܝܢܳܐ܀

ܛܳܒܳܐ ܛܰܝܶܒ ܠܰܢ܇ ܫܶܡܫܳܐ ܒܺܐܝܡܳܡܳܐ܇ ܘܰܒܠܺܠܝܳܐ ܣܰܗܪܳܐ܇ ܘܥܰܡ ܟܰܘܟܒ̈ܶܐ ܫܪܳܓܳܐ܇ ܢܶܡܛܺܝܢܝ̱ ܒܛܰܝܒܽܘܬܳܟ܇ ܙܰܗܪܳܐ ܕܰܚܢܳܢܳܟ܀

ܝܶܫܽܘܥ ܕܗܽܘ ܝܳܕܰܥ܇ ܐܰܝܠܶܝܢ ܕܥܳܕܪ̈ܳܢ ܠܰܢ܇ ܢܰܘܫܶܛ ܠܰܢ ܒܪ̈ܰܚܡܰܘܗ̱ܝ܇ ܐܰܝܕܳܐ ܠܪܰܦܝܽܘܬܰܢ܇ ܕܢܰܟܪܶܙ ܥܰܠ ܩܶܢܛܳܐ܇ ܫܪܳܪܶܗ ܒܟܽܠ ܥܶܕܳܢ܀

ܟܽܠܗܽܘܢ ܒܢܰܝ̈ܢܳܫܳܐ܇ ܪܡܶܝܢ ܐܶܢܽܘܢ ܒܰܐܓܽܘܢܳܐ܇ ܕܪܰܚܺܝܩ ܡܶܢ ܚܶܡܬܳܐ܇ ܫܓܺܝܫ ܗܽܘ ܒܝܰܥܢܽܘܬܳܐ ܘܕܰܚܣܺܝܠ ܡܶܢ ܥܽܘܬܪܳܐ ܡܫܰܥܒܰܕ ܠܡܳܡܽܘܢܳܐ܀

ܠܚܰܒܪܳܟ ܕܰܐܣܟܶܠ ܒܳܟ܇ ܐܶܢܗܽܘ ܕܰܐܟܶܣܬܳܝܗ̱ܝ܇ ܕܰܠܡܰܢ ܕܰܐܣܟܶܠ ܒܳܟ܇ ܒܶܗ ܗܽܘ ܡܶܬܩܰܛܪܓܰܬ܇ ܕܰܡܨܶܝܬ ܕܠܳܐ ܬܶܣܟܰܠ܇ ܒܚܰܒܪܳܟ ܘܒܰܐܠܳܗܳܐ܀

ܡܶܬܥܨܶܐ ܗܰܘ ܦܽܘܬ ܠܰܢ܇ ܕܢܺܐܬܶܐ ܠܬܽܘܪܳܨܳܐ܇ ܒܥܳܐ ܐ̱ܢܳܫ ܠܫܳܒܽܘܩܳܐ܇ ܗܘܳܐ ܠܶܗ ܚܠܳܦ ܚܰܒܪܶܗ ܘܶܐܢ ܩܪܳܝܗ̱ܝ ܠܬܳܒܽܘܥܳܐ܇ ܗܘܳܐ ܠܶܗ ܒܥܶܠܕܺܝܢܶܗ܀

ܢܰܣܠܶܐ ܠܰܚܣܳܡܳܐ܇ ܡܥܺܝܢܳܐ ܕܟܽܠ ܒܺܝܫ̈ܳܢ܇ ܘܢܶܪܗܰܛ ܠܘܳܬ ܚܽܘܒܳܐ ܗܽܘܝܽܘ ܡܥܺܝܢ ܚܰܝ̈ܶܐ܇ ܠܟܽܠܡܰܢ ܕܪܳܚܶܡ ܠܶܗ܇ ܫܽܘܒܚܳܐ ܠܡܰܠܦܳܢܶܗ܀

ܣܳܢܶܝܢ ܦܳܪ̈ܽܘܫܶܐ ܠܰܚܣܳܡܳܐ ܐܰܟܬܳܐ܇ ܕܳܚܠܰܝ̈ ܐܰܠܳܗܳܐ ܠܟܽܠܗܶܝܢ ܒܺܝܫ̈ܳܬܳܐ܇ ܐܰܫܪܳܐ ܒܰܢ ܡܳܪܰܢ܇ ܚܽܘܒܳܟ ܘܕܶܚܠܬܳܟ܀

ܥܰܡܳܗܿ ܕܥܳܐܶܠ ܐ̱ܢܳܫ܇ ܣܳܐܢܶܗ ܒܫܶܐܠ̈ܳܬܶܗ܇ ܘܟܽܠ ܡܰܢ ܕܫܳܐܶܠ ܬܰܡܳܢ܇ ܦܶܠܓܶܗ ܠܚܰܒܪܶܗ ܗܽܘ܇ ܕܰܡܦܺܝܣ ܥܰܠ ܚܰܒܪܶܗ ܟܰܕ ܡܦܺܝܣ ܥܰܠ ܢܰܦܫܶܗ܀

ܦܰܨܢܳܝ̱ ܡܶܢ ܐ̱ܢܳܫܳܐ ܚܳܣܡܰܝ̈ ܒܛܳܒ̈ܳܬܳܐ܇ ܕܗܶܢܽܘܢ ܠܗܽܘܢ ܣܳܚܦܺܝܢ܇ ܒܰܐܬܪܳܐ ܕܓܺܗܰܢܳܐ܇ ܡܳܪܰܢ ܢܰܛܰܪ ܠܰܢ܇ ܘܰܐܫܪܳܐ ܒܰܢ ܪ̈ܶܚܡܬܳܟ܀

ܨܰܠܺܝܬ ܥܰܠ ܚܰܒܪܳܟ. ܨܰܠܺܝܬ ܥܰܠ ܢܰܦܫܳܟ܇ ܘܚܰܘܺܝܬ ܕܡܰܣܟܶܠ ܠܳܟ܇ ܡܰܣܟܶܢܬ ܒܳܥܽܘܬܳܟ܇ ܚܰܘܺܝܬ ܕܡܰܣܟܶܠ ܒܳܟ܀

ܩܒܺܝܠܳܐܗ̱ܝ ܟܺܐܢܽܘܬܳܐ܇ ܡܶܢܰܢ ܒܢܰܝ̈ܢܳܫܳܐ܇ ܘܟܽܠܫܳܥ ܡܶܬܠܰܚܡܳܐ܇ ܕܬܶܪܕܶܐ ܠܰܢ ܒܪܽܘܓܙܳܐ܇ ܛܰܝܒܽܘܬܳܟ ܡܳܪܰܢ ܬܦܺܝܣܝ̱ ܠܟܺܐܢܽܘܬܳܟ܀

ܪ̈ܶܒܽܘ ܫܢܺܝ̈ܢ ܣܰܟܠܳܐ܇ ܐܶܠܽܘ ܢܓܰܕܘ̱ ܚܰܝܰܝ̈ܟ܇ ܘܠܳܐ ܐܶܬܡܨܺܝܬ ܐܰܘܦܺܝܬ܇ ܐܳܦܶܢ ܚܕܳܐ ܠܡܶܦܪܰܥ܇ ܘܡܳܐ ܕܰܠܐܺܝܬ ܘܰܥܒܰܕܬ܇ ܥܕܰܟܺܝܠ ܛܳܠܽܘܡܳܐ ܐܰܢ̱ܬ܀

ܫܽܘܒܚܳܐ ܠܟܺܐܢܽܘܬܳܟ܇ ܕܗܺܝ ܒܝܰܕ ܕܽܘܚܳܠܶܝ̈ܗܿ ܡܚܰܘܝܳܐ ܠܡܰܪ̈ܳܚܶܐ܇ ܕܰܐܝܟܰܘ ܬܪܰܥ ܪ̈ܰܚܡܶܐ܇ ܘܟܰܕ ܥܳܪܩܺܝܢ ܡܶܢܶܗ܇ ܢܶܪܗܛܽܘܢ ܠܒܶܝܬ ܓܰܘܣܶܗ܀

ܬܰܘܕܺܝ ܠܛܰܝܒܽܘܬܳܐ܇ ܕܒܳܗ ܒܳܣܡܺܝܢ ܢܶܓܕ̈ܶܐ܇ ܕܟܰܕ ܛܳܒ ܥܰܙܺܝܙܺܝܢ. ܘܰܩܫܶܝܢ ܒܟܺܐܢܽܘܬܳܐ܇ ܕܬܶܗܘܶܐ ܬܝܳܒܽܘܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܳܥܝܳܐ ܐ̱ܢܳܐ ܡܳܪܝ̱ ܐܰܪܟܶܢ ܫܰܒܛܳܐ ܕܰܬܠܶܐ ܥܰܠ ܪܺܝܫܝ̱܇ ܐܳܦ ܣܰܦܣܺܝܪܳܐ ܕܰܫܡܺܝܛܳܐ ܥܠܰܝ ܕܠܳܐ ܐܶܒܠܰܥ ܒܶܗ܇ ܒܳܥܶܝܢ ܡܶܢܳܟ ܣܳܒ̈ܰܝ ܕܰܟܦܶܝܢ ܥܰܠ ܐܰܦܰܝ̈ܗܽܘܢ܇ ܘܟܽܠܗܽܘܢ ܚܺܐܪ̈ܶܐ ܕܰܡܠܶܝܢ ܩܶܛܡܳܐ ܦܰܪ̈ܨܽܘܦܰܝܗܽܘܢ܀

ܫܽܘܒܚܳܐ ܠܰܐܒܳܐ ܕܚܳܣ ܥܰܠ ܫܽܘܦܪܳܐ ܕܡܰܥܕܰܢܬܳܐ܇ ܘܣܶܓܕܬܳܐ ܠܰܒܪܳܐ ܕܰܐܥܒܰܪ ܪܽܘܓܙܳܐ ܡܶܢ ܚܽܘܒܳܠܳܗܿ܇ ܬܰܘܕܺܝ ܠܪܽܘܚܳܐ ܕܒܺܐܝܕܰܘ̈ܗ̱ܝ ܢܳܦܩ̈ܳܢ ܟܽܠ ܫܶܐܠ̈ܳܬܳܐ܇ ܚܰܕ ܗܽܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

 

ܕܨܰܦܪܳܐ ܕܰܬܠܳܬܳܐ

ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܗܰܘ ܕܰܗܘܳܐ ܒܽܘܟܪܳܐ

ܒܝܰܕ ܨܰܘܡܳܐ܇ ܙܟܳܐ ܫܺܝܬ ܫܰܦܺܝܪܳܐ܇ ܠܪܶܓܬܳܐ ܣܢܺܝܬܳܐ ܡܶܢ ܦܰܓܪܶܗ ܪܰܚܶܡܥܠܰܝ܀

ܒܝܰܕ ܨܰܘܡܳܐ܇ ܐܶܬܦܰܨܺܝ ܗܘܳܐ ܢܽܘܚ܇ ܡܶܢ ܛܰܘܦܳܢܳܐ ܒܟܶܐܘܺܝܠܳܐ ܪܰܚܶܡܥܠܰܝ܀

ܒܝܰܕ ܨܰܘܡܳܐ ܘܫܽܘܦܪܳܐ ܘܕܰܟܝܽܘܬܳܐ ܐܶܬܦܰܠܰܛ ܠܽܘܛ ܡܶܢ ܢܽܘܪܳܐ ܪܰܚܶܡܥܠܰܝ܀

ܒܝܰܕ ܨܰܘܡܳܐ ܐܶܬܟܰܫܰܪ ܒܰܪܢܽܘܢ܇ ܘܰܣܚܰܦ ܠܫܽܘܪ̈ܶܝܗܿ ܕܺܐܝܪܺܝܚܽܘ ܪܰܚܶܡܥܠܰܝ܀

ܒܝܰܕ ܨܰܘܡܳܐ܇ ܕܨܳܝܡܳܐ ܠܳܟ ܥܺܕܬܳܐ܇ ܐܰܥܒܰܪ ܡܶܢܳܗܿ ܟܽܠ ܡܰܚܘ̈ܳܢ܇ ܪܰܚܶܡܥܠܰܝ܀

 

ܕܰܐܠܳܗܝ̱ ܐܰܠܳܗܝ̱ ܩܳܠܳܐ ܒܬܽܘܠܬܳܐ ܩܰܕܺܝܫܬܳܐ

ܒܨܰܘܡܳܐ ܕܨܳܡ ܡܽܘܫܶܐ܇ ܐܶܫܬܺܘܝ ܕܥܰܡ ܪܳܡܳܐ܇ ܕܰܢܡܰܠܶܠ ܥܰܡܶܗ܇ ܐܰܦܺܝ̈ܢ ܥܰܡ ܒܰܐܦܺܝ̈ܢ܀

ܒܨܰܘܡܳܐ ܕܨܳܡ ܝܰܘܢܳܢ܇ ܦܰܠܛܶܗ ܐܰܠܳܗܳܐ܇ ܡܶܢ ܢܽܘܪܳܐ ܘܝܰܡܳܐ܇ ܘܶܐܬܪܰܥܺܝ ܗܘܳܐ ܥܠܰܘܗ̱ܝ܀

ܒܨܰܘܡܳܐ ܚܶܙܰܩܝܳܐ ܡܰܠܟܳܐ ܙܰܕܺܝܩܳܐ܇ ܡܶܢ ܗܰܘ ܣܰܢܚܶܪܺܝܒ܇ ܡܠܶܟ ܐܳܬܽܘܪ ܫܰܘܙܒܶܗ܀

ܒܨܰܘܡܳܐ ܕܳܢܺܝܐܶܝܠ܇ ܙܟܳܐ ܠܰܐܪ̈ܝܰܘܳܬܳܐ܇ ܘܶܐܣܬܓܶܕ ܗܘܳܐ ܡܶܢܗܽܘܢ܇ ܘܰܐܒܗܶܬ ܠܟܰܠܕܳܝ̈ܶܐ܀

ܒܨܰܘܡܳܐ ܙܟܰܘ ܛܳܠܝ̈ܶܐ܇ ܠܢܽܘܪܳܐ ܕܰܐܬܽܘܢܳܐ܇ ܘܕܳܫܘ̱ ܓܽܘܡܪ̈ܰܝ ܢܽܘܪܳܐ܇ ܕܰܫܓܰܪܘ̱ ܒܳܒܠܳܝ̈ܶܐ܀

ܒܨܰܘܡܳܐ ܡܶܢ ܓܽܘܒܳܐ ܕܡܶܬܩܪܶܐ ܕܰܣܝܳܢܳܐ܇ ܦܰܨܺܝ ܚܰܢܳܢܝܳܐ܇ ܘܠܶܐܪܰܡܝܳܐ ܢܒܺܝܳܐ܀

ܒܨܰܘܡܳܐ ܬܰܘ ܟܽܠܰܢ܇ ܨܰܝܳܡ̈ܶܐ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ܇ ܠܗܰܘ ܕܨܳܡ ܗܘܳܐ ܚܠܳܦܰܝܢ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܩܳܠܳܐ ܕܫܽܘܒܚܳܐ

ܪ̈ܰܚܡܰܝܟ ܡܳܪܰܢ܇ ܢܦܽܝܣܽܘܢ ܚܠܳܦܰܝܢ ܘܢܶܫܠܽܘܢ ܢܶܓܕ̈ܶܐ܇ ܡܶܢ ܐܰܝܠܶܝܢ ܕܰܡܦܺܝܣܺܝܢ ܠܳܟ܇ ܒܪܳܐ ܕܶܐܬܺܝܠܶܕ ܡܶܢ ܒܰܪܬ ܕܰܘܺܝܕ ܚܽܘܣ ܥܰܠ ܓܶܢܣܰܢ ܚܰܣܳܐ ܚܰܘܒܰܘ̈ܗ̱ܝ ܒܰܚܢܳܢܳܟ܀

ܦܰܓܪܳܟ ܚܰܣܝܳܐ ܡܳܪܝ̱ ܐܰܘܟܶܠܬܳܢܝ̱܇ ܘܰܕܡܳܟ ܚܰܝܳܐ ܒܚܽܘܒܳܐ ܫܦܺܝܥܳܐ ܐܰܫܩܺܝܬܳܢܝ̱܇ ܡܰܥܡܽܘܕܺܝܬܳܐ ܒܡܰܘܬܳܟ ܝܰܗܒܬ ܠܺܝ ܬܶܒܗܰܬܝ̱ ܢܽܘܪܳܐ܇ ܡܶܛܽܠ ܨܰܠܡܳܟ ܕܰܪܫܺܝܡ ܒܰܢ܀

ܦܽܘܡ̈ܶܐ ܕܶܐܟܰܠܘ̱ ܦܰܓܪܳܟ ܡܳܪܰܢ ܘܶܐܫܬܺܝܘ ܠܰܕܡܳܟ܇ ܪܰܗܒܽܘܢܳܐ ܕܚܰܝ̈ܶܐ ܚܰܕ̈ܬܶܐ܇ ܠܳܐ ܡܳܪܝ̱ ܢܶܩܥܽܘܢ ܒܓܰܘ ܓܺܗܰܢܳܐ܇ ܥܰܡ ܟܳܦܽܘܪ̈ܶܐ܇ ܐܰܝܠܶܝܢ ܕܠܳܐ ܗܰܝܡܶܢܘ̱ ܒܰܫܡܳܟ܀

ܒܗܰܘ ܥܶܕܳܢܳܐ ܕܬܳܩܢܳܐ ܒܺܐܝܡܰܐ ܘܝܳܬܶܒ ܡܰܠܟܳܐ܇ ܘܥܳܐܠܺܝܢ ܩܽܘܕܡܰܘܗ̱ܝ ܫܰܪ̈ܒܳܬܳܐ܇ ܦܰܨܳܢ ܡܳܪܰܢ ܡܶܢ ܓܺܗܰܢܳܐ ܘܰܐܝܟܳܐ ܕܨܳܒܶܝܬ ܐܰܫܪܳܐ ܠܰܢ ܪܳܚܶܡ ܐ̱ܢܳܫܳܐ܀

ܪܳܡܳܐ ܕܰܢܚܶܬ ܡܶܢ ܡܶܕܝܳܪ̈ܰܘܗ̱ܝ܇ ܕܒܶܗ ܢܶܬܥܰܠܶܐ ܡܶܢ ܥܰܦܪܳܐ ܠܰܐܬܪܶܗ ܕܰܐܒܽܘܗ̱ܝ܇ ܒܳܟ ܡܳܪܝ̱ ܢܶܣܰܩ ܠܪܰܘܡܳܗܿ ܕܰܥܕܶܝܢ܇ ܘܢܶܫܒܽܘܩ ܠܥܰܦܪܳܐ ܕܰܒܨܶܒܝܳܢܰܢ ܠܶܗ ܪܚܶܡܶܢܰܢ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܝܰܘܡܳܢܳܐ

ܡܳܐ ܝܳܐܶܐ܇ ܨܰܘܡܳܐ ܕܰܕܟܶܐ ܡܶܢ ܐܰܟܬܳܐ܇ ܘܡܶܢ ܡܶܐܟܰܠܩܰܪܨܳܐ܇ ܘܣܰܓܺܝ ܡܝܰܬܰܪ ܚܽܘܒܳܐ ܕܰܫܦܶܐ ܡܶܢ ܟܽܠ ܢܶܟܠܺܝ̈ܢ܇ ܢܰܐܚܶܒ ܐܰܚ̈ܰܝ ܠܰܚܕܳܕ̈ܶܐ܇ ܕܨܰܘܡܰܢ ܢܶܬܩܰܒܰܠ܀

ܠܳܐ ܬܳܚܶܒ܇ ܬܽܘܟܠܳܢܳܐ ܕܨܰܝܳܡ̈ܶܐ ܘܣܰܒܪܳܐ ܕܙܰܕܺܝ̈ܩܶܐ܇ ܕܒܺܐܝܕܰܘ̈ܗ̱ܝ ܕܡܳܪܝܳܐ ܢܛܺܝܪ ܦܽܘܪܥܳܢܳܐ܇ܕܦܽܘܠܚܳܢܰܝ̈ܗܽܘܢ܇ ܘܝܳܪܬܺܝܢ ܚܰܝ̈ܶܐ ܘܡܰܠܟܽܘܬܳܐ܇ ܘܙܳܡܪܺܝܢ ܬܶܫܒܽܘܚܬܳܐ܀

ܚܙܺܝ ܠܳܐ ܬܡܰܠܶܠ ܡܶܠܬܳܐ ܕܫܳܪܝܳܐ ܠܶܗ ܠܨܰܘܡܳܐ ܐܰܙܥܶܩ ܐܶܫܰܥܝܳܐ܇ ܟܰܕ ܡܰܟܪܶܙ ܠܰܢ ܕܢܶܫܪܶܐ ܡܶܢܰܢ ܩܶܛܪ̈ܶܐ ܕܥܰܘܠܳܐ܇ ܕܢܶܬܬܢܺܝܚ ܒܨܰܘܡܰܢ ܘܢܶܬܪܰܥܶܐ ܒܽܘܟܪܶܗ ܕܥܶܠܳܝܳܐ܀

ܒܣܽܘܓܐܳܐ ܕܚܰܘܒ̈ܶܐ܇ ܘܕܰܚܛܳܗ̈ܶܐ ܡܢܰܘܶܠ ܐ̱ܢܳܐ ܐܳܘ ܪܳܚܶܡ ܐ̱ܢܳܫܳܐ܇ ܘܠܳܐ ܡܰܡܪܰܚ ܐ̱ܢܳܐ ܕܶܐܚܽܘܪ ܒܦܳܪܽܘܩܝ̱ ܠܪܰܘܡܳܐ ܕܰܠܥܶܠ܇ ܒܣܽܘܓܐܳܐ ܕܪ̈ܰܚܡܰܝܟ ܘܛܰܝܒܽܘܬܳܟ ܘܶܐܬܪܰܚܰܡܥܠܰܝ܀

ܐܰܒܳܐ ܕܠܒܰܪܶܗ ܡܬܽܘܡܳܝܳܐ ܫܠܰܚ ܠܥܳܠܡܳܐ܇ ܕܡܶܢ ܥܰܘܠܳܐ ܢܰܐܚܝܺܘܗ̱ܝ܇ ܐܰܫܦܰܥ ܪ̈ܰܚܡܰܝܟ ܥܰܠ ܢܰܦܫ̈ܳܬܰܢ ܕܰܡܦܺܝܣ̈ܳܢ ܠܳܟ܇ ܘܰܟܠܺܝ ܡܶܢܰܢ ܒܛܰܝܒܽܘܬܳܐ܇ ܪܽܘܓܙܳܐ ܕܰܠܚܺܝܡ ܥܠܰܝܢ܀

ܠܳܟ ܬܶܫܒܽܘܚܬܳܐ܇ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܇ ܐ̱ܪܳܙܳܐ ܬܠܺܝܬܳܝܳܐ܇ ܩܢܽܘܡ̈ܶܐ ܬܠܳܬܳܐ ܫܡܳܗ̈ܶܐ ܬܠܳܬܳܐ ܚܕܳܐ ܐܽܘܣܺܝܰܐ܇ ܚܰܕ ܐܰܠܳܗܳܐ ܫܰܪܺܝܪܳܐ ܢܶܒܗܰܬ ܕܒܳܨܶܐ ܠܶܗ܀

 

ܩܳܠܳܐ ܕܨܰܦܪܳܐ ܩܳܠܳܐ ܒܥܶܕܳܢܶܗ ܕܨܰܦܪܳܐ ܡܶܬܬܣܺܝܡܺܝܢ

ܘܳܠܶܐ ܕܢܶܐܚܽܘܕ ܠܰܢ܇ ܓܰܘܣܳܐ ܕܦܽܘܪܩܳܢܳܐ ܒܨܰܘܡܳܐ ܘܒܰܨܠܽܘܬܳܐ ܘܚܽܘܒܳܐ ܡܫܰܡܠܶܐ ܟܽܠ܇ ܕܨܰܘܡܳܐ ܕܠܳܐ ܚܽܘܒܳܐ ܩܕܳܡ ܡܳܪܝܳܐ ܡܰܣܠܰܝ܇ ܘܠܳܐ ܡܶܬܪܰܥܶܐ ܒܶܗ ܥܰܠ ܕܚܽܘܒܳܐ ܠܰܝܬ ܒܶܗ܇ ܗ ܘ ܗ ܡܠܺܝ ܠܰܢ ܡܳܪܝ̱ ܚܽܘܒܳܟ ܘܰܫܠܳܡܳܐ ܘܫܰܝܢܳܐ܀

ܡܶܢ ܥܽܘܡܩ̈ܶܐ ܕܚܺܝ̈ܠܶܐ܇ ܘܡܶܢ ܒܰܝܢܳܬ ܓܰܠ̈ܠܶܐ܇ ܨܰܠܺܝ ܠܳܟ ܝܰܘܢܳܢ ܘܰܥܢܰܝܬܳܝܗ̱ܝ ܡܳܪܝܳܐ܇ ܒܥܶܕܳܢܶܗ ܕܨܰܦܪܳܐ ܩܰܒܶܠ ܬܶܫܡܶܫܬܰܢ܇ ܘܶܐܬܪܰܚܰܡ ܥܠܰܝܢ ܝܶܫܽܘܥ ܡܠܶܐ ܪ̈ܰܚܡܶܐ܇ ܗ ܘ ܗ ܕܰܐܢ̱ܬ ܗܽܘ ܓܶܝܪ ܐܺܝܬܰܝܟ ܚܳܐܶܢ ܠܚܰܛܳܝ̈ܶܐ܀

 

ܐ̱ܚܪܺܢܳܐ ܒܩܳܠܳܐ ܒܥܶܕܳܢ ܨܰܦܪܳܐ ܡܶܬܦܰܬܚܺܝܢ

ܢܶܒܥܺܝܘܗ̱ܝ ܠܡܳܪܰܢ ܫܽܘܒܩܳܢܳܐ܇ ܘܢܶܫܰܐܠ ܡܶܢܶܗ ܡܰܠܟܽܘܬܳܐ܇ ܗܳܪܟܳܐ ܐܶܢ ܒܳܥܶܝܢܰܢ ܠܶܗ܇ ܠܳܐ ܟܳܠܶܐ ܠܰܢ ܫܶܐܠ̈ܳܬܰܢ܇ ܘܶܐܢ ܡܶܢ ܗܳܪܟܳܐ ܢܳܦܩܺܝܢܰܢ܇ ܠܰܝܬ ܐܰܬܪܳܐ ܠܰܬܝܳܒܽܘܬܳܐ܀

ܣܳܓܕܺܝܢܰܢ ܠܳܟ ܡܳܪܝ̱ ܒܰܡܪ̈ܰܘܡܶܐ܇ ܥܺܝܪ̈ܰܝ ܘܪ̈ܰܒܰܝ ܡܰܠܰܐܟ̈ܶܐ܇ ܕܺܐܝܬܰܝܗܽܘܢ ܢܽܘܪܳܐ ܘܪܽܘܚܳܐ܇ ܘܰܒܓܰܘ ܬܺܐܒܶܝܠ ܡܰܘܕܶܝܢ ܠܳܟ܇ ܝܰܠܕܰܘ̈ܗ̱ܝ ܕܳܐܕܳܡ ܥܰܦܪܳܢܳܐ܇ ܕܰܠܫܽܘܒܩܳܢܳܟ ܬܰܩܶܢܬ ܐܶܢܽܘܢ܀

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܬܰܘ ܟܰܫܺܝܪ̈ܶܐ ܕܫܳܕܶܝܢ ܓܶܐܪ̈ܶܐ ܕܰܨܠܰܘ̈ܳܬܳܐ܇ ܬܟܽܘܒܘ̱ ܠܰܩܪܳܒܳܐ ܕܫܺܐܕ̈ܶܐ ܕܓܳܙܡܺܝܢ ܥܰܠ ܨܰܘܡܰܝ̈ܟܽܘܢ܇ ܗܳܐ ܣܶܡܳܠܳܐ ܣܕܺܝܪܳܐ ܒܕܰܐܪܳܐ ܥܰܠ ܝܰܡܺܝܢܳܐ܇ ܪܗܶܛܘ̱ ܠܰܩܪܳܒܳܐ ܕܥܶܬܰܘ̱ ܒܰܐܓܽܘܢܳܐ ܢܶܨܚܳܢܰܝ̈ܟܽܘܢ܀

ܡܥܳܕ ܗܽܘ ܕܰܢܦܰܩ ܐ̱ܪܳܙܳܐ ܟܰܣܝܳܐ ܕܒܶܝܬ ܐܰܠܳܗܳܐ܇ ܘܢܶܓܠܶܐ ܠܥܳܠܡܳܐ܇ ܥܰܠ ܒܳܪܽܘܝܶܗ ܒܬܶܗܪܳܐ ܪܰܒܳܐ܇ ܡܶܫܟܰܚ ܨܰܘܡܳܐ ܚܶܠܡ̈ܶܐ ܠܡܶܦܫܰܪ ܘܩܶܛܪ̈ܶܐ ܠܡܶܫܪܳܐ܇ ܘܰܠܟܰܣܝ̈ܳܬܳܐ ܢܰܦܶܩ ܠܓܰܠܝܳܐ ܠܟܽܠ ܚܰܙܳܝ̈ܶܐ܇

 

ܕܰܬܠܳܬܫܳܥܺܝ̈ܢ ܒܩܳܠܳܐ ܠܳܐ ܡܶܬܛܰܠܡܺܝܢ ܥܰܡܠܰܝ̈ܟܽܘܢ » ܒܡܰܪܝܰܡ ܝܳܠܕܰܬ ܐܰܠܳܗܳܐ «

ܨܰܦܪܶܗ ܕܡܳܪܰܢ ܡܰܛܺܝ ܠܶܗ ܬܰܘ ܐܰܚ̈ܰܝ܇ ܛܰܝܶܒܘ̱ ܠܶܗ ܪ̈ܽܘܡܝܳܢܰܝܟܽܘܢ ܠܚܰܬܢܳܐ ܕܪܰܘܡܳܐ܇ ܠܳܐ ܬܶܗܘܽܘܢ ܥܰܪ̈ܛܶܠܳܝܶܐ ܒܗܰܘ ܝܰܘܡܳܐ܇ ܕܦܳܪܫܺܝܢ ܛܳܒ̈ܶܐ ܡܶܢ ܒܺܝܫ̈ܶܐ ܩܕܳܡ ܪܰܒܽܘܬܳܐ܀

ܡܳܐ ܫܰܦܺܝܪܳܐ ܬܶܫܡܶܫܬܳܐ ܡܳܐ ܕܣܳܠܩܳܐ܇ ܠܰܫܡܰܝܳܐ ܘܰܚܠܺܝܛ ܥܰܡܳܗܿ ܚܽܘܒܳܐ ܕܰܟܝܳܐ܇ ܡܩܰܒܠܺܝܢ ܠܳܗܿ ܥܺܝܪ̈ܰܝ ܪܰܘܡܳܐ ܒܚܰܕܽܘܬܳܐ܇ ܘܥܳܐܠܳܐ ܚܳܠܛܳܐ ܒܣܶܕܪ̈ܰܝܗܽܘܢ ܘܙܳܡܪܳܐ ܫܽܘܒܚܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܢܶܗܘܽܘܢ ܩ̈ܳܠܶܐ ܕܰܨܠܰܘ̈ܳܬܰܢ܇ ܩܠܺܝܕܳܐ ܠܓܰܙܳܟ ܥܰܬܺܝܪܳܐ܇ ܢܶܗܘܶܐ ܦܽܘܡܰܢ ܠܰܐܠܳܗܳܐ܇ ܦܺܝܪܡܳܐ ܕܰܡܠܶܐ ܬܰܪܥܽܘܬܳܐ܇ ܘܢܶܗܘܶܐ ܨܰܘܡܰܢ ܠܰܡܫܺܝܚܳܐ܇ ܙܽܘܦܳܐ ܡܚܰܘܰܪ ܟܽܘܬܡ̈ܳܬܰܢ܀

ܛܳܒܳܐ ܩܰܒܶܠ ܒܳܥܽܘܬܰܢ܇ ܐܳܦ ܗܳܫܳܐ ܐܰܝܟ ܕܰܡܥܳܕ ܐܰܢ̱ܬ܇ ܫܦܺܝܥܳܐܗ̱ܝ ܟܽܠܫܳܥ ܡܰܘܗܰܒܬܳܟ܇ ܥܰܠ ܚܰܛܳܝ̈ܶܐ ܕܩܳܪܶܝܢ ܠܳܟ܇ ܒܰܣܺܝܡܽܘܬܳܟ ܪܰܚܡܳܢܳܐ܇ ܬܰܣܓܶܐ ܠܘܳܬܰܢ ܥܽܘܕܪ̈ܳܢܰܝܟ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝܕ̈ܶܐ

ܢܺܝܢܘܶܐ ܕܬܳܒܰܬ݀ ܩܰܒܶܠܬܳܗܿ܇ ܘܰܒܨܰܘܡܳܐ ܕܨܳܡܰܬ݀ ܚܳܢܬܳܗܿ܇ ܘܶܐܢܳܐ ܕܰܚܛܺܝܿܬ ܘܰܐܪܓܙܬܳܟ܇ ܡܳܪܝ̱ ܩܰܒܶܠܰܝܢܝ̱ ܐܰܝܟ ܗܳܝ܇ ܘܰܒܒܶܨܪܳܐ ܕܡܶܢ ܛܰܝܒܽܘܬܳܟ܇ ܚܰܣܳܐ ܚܰܘܒ̈ܰܝ ܘܰܚܛܳܗ̈ܰܝ܀

ܐܺܝܬ ܠܰܢ ܡܳܪܝ̱ ܚܰܘܒ̈ܶܐ ܒܰܐܪܥܳܐ܇ ܘܠܳܟ ܐܺܝܬ ܪ̈ܰܚܡܶܐ ܒܰܫܡܰܝܳܐ܇ ܠܳܐ ܡܬܽܘܡ ܐܶܚܕܰܬ݀ ܛܰܝܒܽܘܬܳܟ܇ ܬܰܪܥܳܐ ܒܰܐܦ̈ܰܝ ܬܰܝܳܒ̈ܶܐ܇ ܘܥܰܠ ܬܽܘܟܠܳܢܶܗ ܕܰܚܢܳܢܳܟ܇ ܩܳܪܶܝܢܰܢ ܠܳܟ ܚܽܘܣ ܘܶܐܬܪܰܚܰܡ ܥܠܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܪܓܺܝܓ ܗܘܳܐ ܦܺܐܪܳܐ ܕܩܰܪܶܒ ܝܰܘܢܳܢ ܡܶܢ ܓܰܘ ܢܽܘܢܳܐ܇ ܨܠܽܘܬܳܐ ܪܚܺܝܡܬܳܐ ܕܳܐܦ ܡܰܠܰܐܟ̈ܶܐ ܐܶܬܕܰܡܰܪܘ̱ ܒܗ܇ ܦܳܪܚܳܐ ܠܪܰܘܡܳܐ ܘܠܳܐ ܡܶܬܟܰܠܝܳܐ ܡܶܢ ܡܳܡܽܘ̈ܠܶܐ܇ ܨܳܪܝܳܐ ܠܪܰܘܡܳܐ ܘܠܳܐ ܡܛܰܒܰܥ ܠܳܗܿ ܥܽܘܡܩܳܐ ܪܰܒܳܐ܀

ܩܳܠܳܐ ܪܰܒܳܐ ܕܰܐܪܡܺܝ ܒܰܐܪܥܳܐ ܚܰܕ ܟܳܪܽܘܙܳܐ܇ ܣܠܶܩ ܗܘܳܐ ܘܰܡܛܳܐ ܠܪܰܘܡܳܐ ܪܳܡܳܐ ܒܬܶܗܪܳܐ ܪܰܒܳܐ܇ ܣܓܽܘܠܳܐ ܪܚܺܝܡܳܐ ܩܛܰܦ ܥܶܒܪ̈ܳܝܶܐ ܡܶܢ ܓܰܘ ܢܽܘܢܳܐ܇ ܫܰܕܪܶܗ ܢܶܣܰܩ ܢܶܬܗܰܪ ܥܺܝܪ̈ܶܐ ܠܥܶܠ ܒܰܫܡܰܝܳܐ܀

 

ܕܰܬܫܰܥܫܳܥܺܝ̈ܢ ܩܳܠܳܐ ܣܳܗܕ̈ܶܐ ܐܰܦܺܝܣܽܘܢܳܝܗ̱ܝ

ܒܬܰܪܥܳܐ ܕܪ̈ܰܚܡܰܝܟ ܡܳܪܶܐ ܟܽܠ܇ ܢܳܩܶܫ ܩܳܠܳܐ ܕܒܳܥܽܘܬܰܢ܇ ܘܡܶܢ ܒܶܝܬ ܓܰܙܳܟ ܥܰܬܺܝܪܳܐ ܚܢܳܢܳܐ ܫܳܐܠܺܝܢܰܢ܇ ܗܰܒ ܡܳܪܝ̱ ܥܽܘܬܪܳܟ ܠܰܣܢܺܝܩ̈ܶܐ܇ ܕܠܳܐ ܬܰܗܡܶܐ ܚܝܳܪܳܟ ܡܶܢܰܢ܇ ܘܰܫܡܰܥ ܩܳܠܳܐ ܕܒܳܥܽܘܬܰܢ܇ ܪܳܚܶܡ ܬܰܝܳܒ̈ܶܐ܀

ܗܳܐ ܩܪܶܒ ܠܶܗ ܝܽܘܡ ܫܽܘܠܳܡܳܐ܇ ܙܰܘܥ̈ܶܐ ܚܰܕܪܽܘܗܿ ܠܰܒܪܺܝܬܳܐ܇ ܘܡܶܢ ܒܳܥܽܘܬܳܐ ܐܰܗܡܺܝܢܰܢ ܡܶܛܽܠ ܒܺܝܫܽܘܬܰܢ܇ ܬܰܘ ܢܶܬܟܰܫܰܦ ܡܶܢ ܗܳܪܟܳܐ܇ ܥܰܕܠܳܐ ܡܶܬܬܚܶܕ ܠܶܗ ܬܰܪܥܶܗ܇ ܘܰܐܝܢܳܐ ܕܳܐܬܶܐ ܢܳܩܶܫ ܒܶܗ ܠܳܐ ܬܽܘܒ ܥܳܢܶܝܢ ܠܶܗ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܝܰܡܳܐ ܕܠܳܐ ܚܳܣܰܪ܇ ܥܽܘܬܪܳܐ ܕܡܰܘܗܰܒܬܶܗ܇ ܐܰܥܬܰܪ ܠܰܣܢܺܝܩ̈ܶܐ܇ ܒܣܽܘܓܐܳܐ ܕܛܰܝܒܽܘܬܳܟ܇ ܘܰܒܝܽܘܡ ܓܶܠܝܳܢܳܟ܇ ܢܶܚܕܽܘܢ ܒܰܓܢܽܘܢܳܟ܀

ܠܳܐ ܐܶܒܥܶܐ ܡܰܝ̈ܳܐ܇ ܐܰܝܟ ܗܰܘ ܥܰܬܺܝܪܳܐ܇ ܕܥܰܠ ܕܠܳܐ ܪܳܚܶܡ ܗܘܳܐ܇ ܗܘܳܐ ܗܘܳܐ ܕܠܳܐ ܪ̈ܰܚܡܶܐ܇ ܥܰܡ ܗܰܘ ܠܳܥܳܙܳܪ ܐܰܫܘܳܢ ܠܡܰܠܟܽܘܬܳܟ܀

 

ܫܶܠܡܰܬ̈ ܫܰܒܬܳܐ ܕܓ

 

ܬܽܘܒ ܛܶܟܣܳܐ ܕܰܐܪܒܥܳܐ ܒܫܰܒܳܐ ܕܫܰܒܬܳܐ ܕܓ

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܒܗܰܘ ܢܽܘܗܪܳܐ ܓܰܐܝܳܐ

ܟܡܳܐ ܒܰܣܺܝܡ ܨܰܘܡܳܐ ܕܰܐܠܶܦ ܠܰܢ܇ ܒܽܘܟܪܳܐ ܕܨܳܡ ܡܶܛܽܠܳܬܰܢ܇ ܕܒܶܗ ܚܳܐܝܶܒ ܒܺܝܫܳܐ ܒܥܶܠܕܰܪܳܐ܇ ܘܒܶܗ ܡܶܬܟܰܠܠܺܝܢ ܨܰܝܳܡ̈ܶܐ܀

ܓܢܽܘܢܳܐ ܡܠܶܐ ܪܘܳܙܳܐ ܘܚܰܕܽܘܬܳܐ܇ ܪܒܺܝܥܳܝܳܐ ܩܛܰܪ ܒܰܐܬܽܘܢܳܐ܇ ܘܰܙܠܰܚ ܛܰܐܠܳܐ ܡܦܰܝܓܳܢܳܐ܇ ܠܨܰܝܳܡ̈ܶܐ ܕܠܳܐ ܡܶܬܥܰܠܒܺܝܢ܀

ܐܳܦ ܗܽܘ ܕܳܢܺܝܐܶܝܠ ܨܰܝܳܡܳܐ܇ ܚܰܕ ܗܽܘ ܕܰܢܨܰܚ ܒܰܬܠܳܬܳܐ܇ ܩܰܕܺܝܫ ܗܘܳܐ ܒܢܰܦܫܳܐ ܘܰܒܦܰܓܪܳܐ܇ ܘܪܽܘܚܳܐ ܕܫܰܦܝܳܐ ܘܡܰܟܺܝܟܳܐ܀

ܓܢܽܘܢܶܗ ܕܗܰܘ ܚܰܬܢܳܐ ܠܡܰܟܺܝܟ̈ܶܐ܇ ܡܛܰܝܶܒ ܕܥܰܡܶܗ ܢܶܬܒܰܣܡܽܘܢ܇ ܒܡܰܠܟܽܘܬܳܐ ܕܪܰܘܡܳܐ ܘܥܰܡ ܙܡܺܝܢ̈ܶܐ܇ ܩܪ̈ܰܝܳܐ ܡܳܪܰܢ ܚܰܕܐ ܠܰܢ܀

ܬܰܥܒܰܪ ܢܶܟܠܳܐ ܡܶܢ ܠܶܒܳܟ܇ ܘܬܶܩܨܶܐ ܠܰܚܡܳܟ ܠܰܣܢܺܝܩ̈ܶܐ܇ ܡܶܬܬܢܺܝܚ ܐܰܠܳܗܳܐ ܒܝܰܕ ܨܰܘܡܳܟ܇ ܘܦܳܬܰܚ ܬܰܪܥܶܗ ܠܰܨܠܽܘܬܰܢ܀

ܚܦܺܝܛܳܐܺܝܬ ܢܶܒܥܶܐ ܫܽܘܒܩܳܢܳܐ܇ ܒܫܽܘܦܳܥ ܕܶܡܥ̈ܶܐ ܘܚܶܢܓ̈ܳܬܳܐ܇ ܘܰܒܠܶܒܳܐ ܕܰܡܠܶܐ ܬܰܘܳܬ ܢܰܦܫܳܐ܇ ܢܶܩܪܶܐ ܠܡܳܪܝܳܐ ܡܪܰܚܡܳܢܳܐ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܨܠܺܝ ܡܳܪܝܳܐ ܒܪ̈ܰܚܡܶܐ

ܛܽܘܒ ܠܰܐܝܢܳܐ ܕܰܛܥܺܝܢ ܢܺܝܪܳܟ܇ ܘܰܒܢܳܡܽܘܣܳܟ ܐܶܬܗܰܓܺܝ܇ ܘܢܳܡ ܘܰܕܡܶܟ ܥܰܠ ܝܽܘܠܦܳܢܳܟ܇ ܘܰܒܟܽܠ ܫܳܥ ܙܡܰܪ ܬܶܫܒܽܘܚܬܳܐ܀

ܒܨܰܘܡܳܐ ܕܰܐܪܒܥܺܝܢ ܝܰܘܡ̈ܳܬܳܐ܇ ܕܨܳܡ ܐܺܠܺܝܳܐ ܛܰܢܳܢܳܐ܇ ܐܶܫܬܺܘܝ ܗܘܳܐ ܕܰܒܡܰܪܟܰܒܬܳܐ܇ ܢܶܬܥܰܠܶܐ ܠܪܰܘܡܳܐ ܕܰܠܥܶܠ܀

ܨܳܡܘ̱ ܗ̱ܘܰܘ ܢܺܝܢܘܳܝ̈ܶܐ ܐܰܪܒܥܺܝܢ܇ ܘܰܒܫܽܘܠܳܡ ܗܳܢ ܡܶܢܝܳܢܳܐ܇ ܕܢܰܚ ܠܗܽܘܢ ܪ̈ܰܚܡܶܐ ܡܶܢ ܡܳܪܝܳܐ܇ ܘܡܶܢ ܪܽܘܓܙܳܐ ܐܶܬܦܰܨܺܝܘ ܗ̱ܘܰܘ܀

ܒܨܰܘܡܳܐ ܐܶܬܦܰܠܰܛ ܗܘܳܐ ܠܽܘܛ܇ ܙܰܕܺܝܩܳܐ ܡܶܢ ܗܳܝ ܢܽܘܪܳܐ܇ ܕܰܠܣܕܽܘܡܳܝ̈ܶܐ ܡܰܘܩܕܳܐ ܗܘܳܬ݀܇ ܥܰܠ ܕܰܐܥܒܰܪ ܡܫܽܘܚܬܳܐ ܕܐ̱ܢܳܫ̈ܳܐ܀

ܒܨܰܘܡܳܐ ܫܠܺܝ̈ܚܶܐ ܐܶܬܥܰܢܘܺܝܘ܇ ܘܩܰܒܶܠܘ̱ ܪܽܘܚܳܐ ܡܶܢ ܪܰܘܡܳܐ܇ ܘܰܚܢܰܢ ܐܰܚ̈ܰܝ ܒܝܰܕ ܨܰܘܡܳܐ܇ ܢܪܰܥܶܐ ܠܡܳܪܝܳܐ ܕܰܐܪܓܶܙܳܢܝܗ̱ܝ܀

ܒܨܰܘܡܳܐ ܕܰܐܪܒܥܺܝܢ ܝܰܘܡ̈ܳܬܳܐ܇ ܕܨܳܡ ܦܳܪܽܘܩܰܢ ܒܓܰܘ ܕܰܒܪܳܐ܇ ܣܰܚܦܶܗ ܠܒܺܝܫܳܐ ܒܥܶܠܕܰܪܳܐ܇ ܘܥܰܒܕܶܗ ܕܝܳܫܳܐ ܠܨܰܝܳܡ̈ܶܐ܀

 

ܩܳܠܳܐ ܕܪܰܡܫܳܐ

ܒܩܳܠܳܐ ܥܰܠ ܥܶܛܪܳܐ ܕܒܶܣܡ̈ܶܐ

ܩܰܒܶܠ ܦܳܪܽܘܩܰܢ܇ ܨܰܘܡܰܢ ܘܰܨܠܽܘܬܰܢ ܐܰܝܟܰܢܳܐ ܕܩܰܒܶܠܬ ܨܰܘܡܶܗ ܕܺܐܠܺܝܳܐ܀

ܚܰܘܒ̈ܰܝ ܣܰܓܺܝܐܺܝܢ܇ ܘܪ̈ܰܚܡܰܝܟ ܛܳܒ ܡܶܢܗܽܘܢ܇ ܒܪ̈ܰܚܡܰܝܟ ܚܽܘܣ ܥܠܰܝܢ ܚܳܐܶܢ ܠܚܰܛܳܝ̈ܶܐ܀

 

ܐ̱ܚܪܺܢܳܐ ܒܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܗܳܐ ܬܰܪܬܶܝܢ ܐܽܘܪ̈ܚܳܬܳܐ ܡܶܢ ܫܽܘܪܳܝܳܐ܇ ܚܕܳܐ ܕܚܰܝ̈ܶܐ ܘܰܚܕܳܐ ܕܡܰܘܬܳܐ ܪܳܕܶܝܢ ܒܰܒܪܺܝܬܳܐ܇ ܢܶܫܒܽܘܩ ܐܽܘܪܶܚܗ ܕܒܺܝܫܳܐ ܕܡܰܠܝܳܐ ܡܰܘܬܳܐ܇ ܘܰܠܛܳܒܳܐ ܬܰܘ ܢܶܬܟܰܫܰܦ ܘܢܶܪܕܶܐ ܒܥܶܩܒ̈ܳܬܶܗ܇ ܗܳܐ ܚܰܝ̈ܶܐ ܝܳܗܒ̈ܳܢ ܐܽܘܪ̈ܚܳܬܶܗ܇ ܘܡܶܢ ܫܒܽܝܠܰܘ̈ܗ̱ܝ ܢܳܒܥܺܝܢ ܒܽܘܣܳܡ̈ܶܐ܇ ܢܶܬܟܰܫܰܪ ܒܰܬܝܳܒܽܘܬܳܐ܇ ܕܢܺܐܪܰܬ ܡܰܠܟܽܘܬܳܐ܀

ܝܳܕܥܺܝܢܰܢ ܕܰܚܛܰܝܢܰܢ ܪܳܚܶܡܢܳܫܳܐ܇ ܘܥܰܠܳܗܝ ܠܳܐ ܓܰܠܝ̈ܳܢ ܐܰܦܰܝ̈ܢ ܕܰܢܚܽܘܪ ܠܰܫܡܰܝܳܐ܇ ܟܰܕ ܒܰܗܺܝܬ ܦܰܪ̈ܨܽܘܦܰܝܢ ܩܳܪܶܝܢܰܢ ܠܳܟ܇ ܚܢܳܢܳܟ ܢܶܗܘܶܐ ܡܦܺܝܣܳܢܳܐ ܚܠܳܦܰܝܢ ܠܟܺܐܢܽܘܬܳܟ ܫܡܰܥ ܛܳܒܳܐ ܩܳܠܳܐ ܕܒܳܥܽܘܬܰܢ܇ ܘܢܶܬܦܰܢܝ̈ܳܢ ܡܶܠ̈ܰܝ̈ܢ ܠܰܦܝܳܣܳܟ܇ ܘܰܒܝܰܕ ܪ̈ܰܚܡܶܐ ܕܛܰܝܒܽܘܬܳܟ ܚܽܘܣ ܘܶܐܬܪܰܚܰܡܥܠܶܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܪܚܺܝܡ ܚܰܛܳܝܳܐ ܡܳܐ ܕܰܒܕܶܡܥ̈ܶܐ ܦܺܝ̈ܠܳܢ ܐܰܦܰܘ̈ܗ̱ܝ܇ ܘܰܣܟܺܝܪ ܦܽܘܡܶܗ ܒܒܶܟܝܳܐ ܚܢܺܝܓܳܐ ܕܰܡܠܶܐ ܚܰܫܳܐ܇ ܠܰܘ ܗܳܟܰܢܳܐ ܪ̈ܚܺܝܡܳܢ ܚܽܘܡܪ̈ܶܐ ܝܰܩܺܝܪ̈ܳܬܳܐ܇ ܐܰܝܟ ܢܽܘܛܦ̈ܳܬܳܐ ܕܡܰܪ̈ܕܝܳܢ ܬܶܡܪ̈ܰܘܗ̱ܝ ܕܰܐܝܢܳܐ ܕܬܳܐܶܒ܀

ܫܽܘܒܚܳܐ ܠܳܟ ܡܳܪܝ̱ ܕܰܒܛܰܝܒܽܘܬܳܐ ܘܰܒܟܺܐܢܽܘܬܳܐ܇ ܡܶܬܚܰܫܰܚ ܐܰܢ̱ܬ ܕܰܚܢܰܢ ܢܺܐܬܰܪ ܒܰܬܝܳܒܽܘܬܳܐ܇ ܡܳܐ ܕܟܽܠ ܒܰܪܢܳܫ ܢܳܣܶܒ ܬܰܡܳܢ ܐܰܓܪܳܐ ܕܡܶܠܰܘ̈ܗ̱ܝ܇ ܚܢܳܢܳܟ ܪܰܒܳܐ ܢܚܰܦܶܐ ܣܰܢܝ̈ܳܬܝ̱ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܩܳܠܳܐ ܥܺܝܪܳܐ ܕܠܳܐ ܕܳܡܶܟ

ܒܠܺܠܝܳܐ ܥܰܡ ܥܺܝܪ̈ܶܐ܇ ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ܀

ܠܡܳܪܝܳܐ ܡܪܰܚܡܳܢܳܐ܇ ܩܳܪܶܝܢܰܢ ܕܢܶܫܒܽܘܩ ܠܰܢ ܚܰܘܒ̈ܰܝܢ ܘܰܚܛܳܗ̈ܰܝܢ܀

ܒܨܰܘܡܳܐ ܠܽܘܛ ܟܺܐܢܳܐ܇ ܐܶܬܦܰܨܺܝ ܡܶܢ ܝܰܩܕܳܢܳܐ܀

ܒܨܰܘܡܳܐ ܕܳܢܺܝܐܶܝܠ܇ ܣܟܰܪ ܦܽܘܡܰܝ̈ܗܽܘܢ ܕܰܐܪ̈ܝܰܘܳܬܳܐ܀

ܒܨܰܘܡܳܐ ܦܳܪܽܘܩܰܢ܇ ܚܰܣܳܐ ܚܛܳܗ̈ܶܐ ܕܡܰܪܥܺܝܬܳܟ܀

 

ܩܳܠܳܐ ܕܠܺܠܝܳܐ ܒܩܳܠܳܐ ܒܟܽܠܡܶܕܶܡ ܐܶܬܒܰܩܺܝܿܬ

ܛܽܘܒܰܝܗܽܘܢ ܠܨܰܝܳܡ̈ܶܐ܇ ܒܝܰܘܡܶܗ ܪܰܒܳܐ ܕܢܽܘܚܳܡܳܐ܇ ܕܝܳܪܬܺܝܢ ܡܰܠܟܽܘܬܳܐ ܘܚܰܝ̈ܶܐ ܕܠܳܐ ܥܳܒܪܺܝܢ܇ ܐܰܝܢܳܐ ܕܨܳܐܶܡ ܕܰܟܝܳܐܺܝܬ܇ ܟܰܕ ܚܽܘܒܳܐ ܐܺܝܬ ܒܶܗ܇ ܐܰܝܢܳܐ ܕܠܳܐ ܚܳܠܶܛ ܙܺܐܦܳܐ ܘܠܳܐ ܢܶܟܠܳܐ ܒܨܰܘܡܶܗ܇ ܘܰܐܝܢܳܐ ܕܟܰܕ ܗܳܠܶܝܢ ܥܳܒܶܕ܇ ܥܰܡ ܡܰܠܰܐܟ̈ܶܐ ܡܶܬܚܰܠܰܛ܇ ܝܳܪܶܬ ܚܰܝ̈ܶܐ ܕܰܠܥܳܠܰܡ܇ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ܇ ܕܰܢܨܰܚܘ̱ ܘܶܐܬܟܰܠܰܠܘ̱ ܒܨܰܘܡܳܐ ܘܒܰܨܠܽܘܬܳܐ܀

ܬܰܘ ܐܰܚ̈ܰܝ ܢܶܬܟܰܫܰܪ ܒܶܗ܇ ܒܨܰܘܡܳܐ ܕܰܟܝܳܐ ܘܒܰܨܠܽܘܬܳܐ܇ ܕܡܰܩܢܶܝܢ ܠܰܢ ܚܰܝ̈ܶܐ ܒܝܰܘܡܳܐ ܕܢܽܘܚܳܡܳܐ܇ ܒܨܰܘܡܳܐ ܐܶܙܕܰܗܺܝܘ ܟܺܐܢ̈ܶܐ ܘܰܫܦܰܪܘ̱ ܠܰܐܠܳܗܳܐ܇ ܒܰܨܠܽܘܬܳܐ ܐܶܬܢܰܨܰܚܘ̱ ܗ̱ܘܰܘ ܛܠܳܝ̈ܶܐ ܒܰܐܬܽܘܢܳܐ܇ ܘܰܚܢܰܢ ܢܨܽܘܡ ܕܰܟܝܳܐܺܝܬ ܡܶܢ ܚܣܳܡܳܐ ܘܡܶܐܟܰܠܩܰܪܨܳܐ܇ ܘܢܶܩܪܶܐ ܚܽܘܒܳܐ ܠܘܳܬ ܐܰܚ̈ܰܝܢ܇ ܕܰܡܝܰܬܰܪ ܡܶܢ ܟܽܠ ܡܶܕܶܡ܇ ܘܢܶܓܥܶܐ ܠܘܳܬ ܡܳܪܰܢ ܚܽܘܣ ܐܶܬܪܰܚܰܡܥܠܰܝܢ܀

 

ܡܰܕܪܳܫܳܐ ܩܳܠܳܐ ܐܳܕܳܡ ܚܛܳܐ ܘܰܩܢܳܐ ܥܶܢܝܳܢܳܐ ܒܪܺܝܟ ܗܽܘ ܕܠܳܐ ܥܳܒܰܪ ܫܽܘܠܛܳܢܶܗ܇ ܘܰܠܥܳܠܡܳܐ ܡܰܥܒܰܪ ܒܽܦܘܩܕܳܢܶܗ

ܐܰܚ̈ܰܝ ܨܠܰܘ ܐܶܕܢܳܐ ܠܦܽܘܪܫܳܢܳܐ܇ ܘܺܝܠܰܦܘ̱ ܕܥܳܒܰܪ ܠܶܗ ܟܽܠ ܡܶܕܶܡ܇ ܥܽܘܬܪܳܐ ܐܳܦ ܫܽܘܦܪܳܐ ܘܫܽܘܠܛܳܢܳܐ ܗܳܐ ܡܶܫܬܪܶܐ ܘܥܳܒܰܪ ܐܰܝܟ ܠܰܝܬܰܘܗ̱ܝ܇ ܒܪܺܝܟ ܗܽܘ ܕܠܳܐ ܥܳܒܰܪ ܫܽܘܠܛܳܢܶܗ܀

ܓܰܢܒܢܰܝ̱ ܒܫܽܘܕܳܠܰܘ̈ܗ̱ܝ ܥܳܒܽܘܪ̈ܶܐ܇ ܥܽܘܬܪܳܐ ܕܠܳܐ ܡܰܨܝܳܐ ܕܢܶܬܩܪܶܐ܇ ܘܟܰܕ ܛܳܒ ܝܺܠܶܦܢܰܢ ܒܰܫܪܳܪܳܐ܇ ܕܠܳܐ ܡܗܰܢܶܐ ܥܽܘܬܪܳܐ ܠܩܰܢܳܝܰܘ̈ܗ̱ܝ܇ ܟܽܠܝܽܘܡ ܫܚܺܝܩܺܝܢܰܢ ܒܰܒܥܳܬܶܗ܀

ܗܳܐ ܕܳܡܝܳܐ ܐܰܪܥܳܐ ܠܡܰܥܒܰܪܬܳܐ܇ ܕܡܶܕܶܡ ܥܠܶܝܗܿ ܠܰܓܡܳܪ ܠܳܐ ܦܳܐܶܫ܇ ܕܳܪ̈ܶܐ ܪܗܺܝܒܺܝܢ ܒܳܗܿ ܕܰܢܫܰܢܽܘܢ܇ ܟܰܕ ܥܳܪܩܺܝܢ ܗܳܢܳܐ ܐܳܦ ܡܶܢ ܗܰܘ܇ ܕܢܶܬܠܽܘܢ ܠܶܗ ܐܰܬܪܳܐ ܠܫܽܘܠܳܡܳܐ܀

ܙܰܒܢܳܐ ܡܰܛܥܶܐ ܠܰܢ ܕܰܢܕܰܝܰܪ܇ ܒܗܳܢ ܥܳܠܡܳܐ ܕܰܡܠܶܐ ܕܽܘܘܳܢ̈ܶܐ܇ ܢܝܳܚܶܗ ܟܪܶܐ ܘܚܰܘܒܰܘ̈ܗ̱ܝ ܐܰܪܺܝܟܺܝܢ܇ ܒܩܰܠܺܝܠ ܝܰܘܡ̈ܳܬܳܐ ܕܝܳܗܶܒ ܠܰܢ܇ ܚܛܳܗ̈ܶܐ ܕܠܳܐ ܡܶܢܝܳܢ ܡܰܩܢܶܐ ܠܰܢ܀

ܛܥܰܝܢܰܢ ܕܠܳܐ ܢܶܒܥܶܐ ܝܽܘܬܪ̈ܳܢܶܐ܇ ܘܗܳܐ ܡܟܰܢܫܳܐ ܐܺܝܕܰܢ ܣܽܘܓܦܳܢ̈ܶܐ܇ ܥܽܘܬܪܳܐ ܗܳܐ ܠܰܝܬܰܘܗ̱ܝ ܘܰܪܚܶܡܶܢܳܝܗ̱ܝ܇ ܕܡܰܘܬܳܐ ܫܪܶܐ ܟܽܠܶܗ ܣܽܘܟܳܝܰܢ܇ ܘܗܳܐ ܒܰܫܝܽܘܠ ܚܰܦܺܝ ܘܟܰܣܺܝ ܠܰܢ܀

ܝܶܫܽܘܥ ܠܰܢ ܒܳܣܰܪ ܒܝܽܘܡ ܕܺܝܢܳܐ܇ ܕܦܳܪ̈ܚܳܢ ܪ̈ܓܺܝܓܳܬܰܢ ܐܰܝܟ ܚܶܠܡܳܐ܇ ܘܚܰܘܒ̈ܰܝܢ ܟܰܢܶܫܘ̱ ܘܰܗ̱ܘܰܘ ܚܰܕ ܝܽܘܩܪܳܐ܇ ܕܰܫܩܺܝܠ ܘܣܺܝܡ ܟܽܠܶܗ ܥܰܠ ܟܰܬܦܰܢ܇ ܛܽܘܒܰܘܗ̱ܝ ܠܕܰܙܘܳܕܰܘ̈ܗ̱ܝ ܥܰܠ ܟܰܬܦܶܗ܀

ܠܩܰܒܪܳܐ ܬܪܺܝܨܳܐ ܠܰܢ ܡܶܪܕܺܝܬܳܐ܇ ܘܓܽܘܚܟܳܐ ܡܠܶܐ ܦܽܘܡܰܢ ܕܫܰܢܺܝܢܰܢ܇ ܒܰܫܝܽܘܠ ܗܳܐ ܣܺܝܡܳܐ ܬܶܫܘܺܝܬܰܢ܇ ܘܰܟܡܺܝܪ ܚܶܫܽܘܟܳܐ ܕܒܶܝܬ ܨܰܘܒܳܐ܇ ܘܰܚܢܰܢ ܦܨܺܝܚܺܝܢܰܢ ܐܰܝܟ ܫܰܒܪ̈ܶܐ܀

ܡܰܢܽܘ ܡܣܰܝܒܰܪ ܠܳܟ ܐܰܟܘܳܬܳܟ܇ ܛܳܒܳܐ ܘܒܰܣܺܝܡܳܐ ܒܳܪܽܘܝܰܢ܇ ܕܶܐܢܗܽܘ ܕܚܳܒܢܰܢ ܠܰܢ ܪܽܘܥܳܡܰܐܗ̱ܘ܇ ܘܶܐܢܗܽܘ ܕܰܢܨܰܚܢܰܢ ܫܽܘܒܗܳܪܰܐܗ̱ܘ܇ ܒܪܺܝܟ ܕܰܛܥܺܝܢ ܚܽܘܒܶܗ ܠܥܽܘܣܳܩܰܢ܀

ܣܥܽܘܪ ܠܰܢ ܕܠܳܐ ܢܰܓܰܪ ܒܰܚܛܳܗ̈ܰܝܢ܇ ܐܰܢ̱ܬ ܐܳܣܝܳܐ ܛܳܒܳܐ ܕܢܰܦܫ̈ܳܬܰܢ܇ ܣܺܝܡ ܒܰܢ ܥܽܘܗܕܳܢܳܐ ܕܛܳܒ̈ܳܬܳܐ܇ ܕܣܰܓܺܝ ܐܰܚܶܒܢܰܢ ܒܺܝܫ̈ܳܬܳܐ܇ ܛܳܒܳܐ ܟܠܺܝ ܡܶܢܰܢ ܣܽܘܓܦܳܢ̈ܰܝܢ܀

ܦܶܗܝܳܐ ܡܠܶܐ ܠܶܒܰܢ ܡܶܢ ܨܶܦܬܳܐ܇ ܘܒܰܕܓܽܘܢ ܡܰܐܚܒܶܠܢ ܒܥܶܠܕܰܪܳܐ܇ ܐܰܝܢܳܐ ܓܶܝܪ ܕܺܐܝܬܰܘܗ̱ܝ ܒܰܐܓܽܘܢܳܐ܇ ܟܽܠ ܡܶܕܶܡ ܐܳܚܶܕ ܪܶܥܝܳܢܶܗ܇ ܒܳܟ ܡܳܪܝ̱ ܢܶܬܚܰܟܰܡ ܪܶܥܝܳܢܰܢ܀

ܩܰܠܺܝܠ ܨܶܒܝܳܢܶܐ ܣܰܒ ܡܶܢܰܢ܇ ܘܚܰܝܠܳܐ ܕܠܳܐ ܣܳܟܳܐ ܫܰܕܰܪ ܠܰܢ܇ ܠܳܐ ܣܳܦܩܳܐ ܢܰܦܫܰܢ ܕܰܬܩܰܪܶܒܝ̱܇ ܕܳܫܢܳܐ ܕܫܳܘܶܐ ܠܳܟ ܐܰܟܘܳܬܳܟ܇ ܩܶܛܠܳܟ ܢܪܰܥܶܝܟ ܡܳܪܝ̱ ܕܰܬܡܺܝܗ ܗܽܘ܀

ܪܰܒܳܐܗܝ ܠܶܗ ܣܰܓܺܝ ܕܐ̱ܢܳܫ ܢܶܕܰܥ܇ ܘܢܶܩܪܽܘܒ ܠܟܽܠ ܡܶܕܶܡ ܐܰܝܟ ܚܰܝܠܶܗ܇ ܕܢܶܕܰܥ ܡܚܺܝܠܽܘܬܰܢ ܛܳܒܳܐܗ̱ܝ ܠܰܢ܇ ܕܢܶܩܪܽܘܒ ܠܩܰܕܺܝܫܳܐ ܒܰܡܫܽܘܚܬܳܐ܇ ܒܪܺܝܟ ܕܩܰܪܶܒܘ̱ ܢܰܫܩܽܘܗ̱ܝ ܚܰܛܳܝ̈ܶܐ܀

ܫܰܗܳܐ ܒܰܚܢܳܢܳܟ ܠܓܰܘܙܰܠܬܳܐ܇ ܕܗܳܐ ܢܳܗܡܳܐ ܠܽܘܩܒܰܠܝ̱ ܕܚܺܝܠܳܐܺܝܬ܇ ܛܰܐܠܳܐ ܕܒܰܐܬܽܘܢܳܐ ܪܽܘܣ ܠܶܗ ܡܳܪܝ̱܇ ܘܬܶܒܗܰܬܝ̱ ܡܶܢ ܪܺܝܚܳܐ ܕܰܛܡܺܝܪ ܒܺܝ܇ ܕܦܰܓܪܳܟ ܡܳܪܝ̱ ܘܰܕܡܳܟ ܡܡܰܙܶܓ ܒܺܝ܀

ܬܰܘܕܺܝ ܠܒܰܣܺܝܡܳܐ ܕܛܳܒ ܥܰܠ ܟܽܠ܇ ܬܰܘܕܺܝ ܠܗܰܘ ܛܳܒܳܐ ܫܳܠܽܘܚܶܗ܇ ܕܝܰܠܕܳܟ ܘܰܒܪܳܐ ܒܳܟ ܒܶܪ̈ܝܳܬܳܐ܇ ܕܫܰܠܚܳܟ ܘܰܐܦܢܺܝ ܒܳܟ ܛܳܥܰܝ̈ܳܐ܇ ܫܽܘܒܚܳܐ ܠܳܟ ܘܠܰܐܒܽܘܟ ܡܶܢ ܟܽܠܰܢ܀

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܰܪܒܥܺܝܢ ܝܰܘ̈ܡܺܝܢ ܢܰܓܕܳܗܿ ܗܘܳܐ܇ ܐܰܠܳܗܳܐ ܠܢܺܝܢܘܶܐ ܡܕܺܝܢܬܳܐ܇ ܘܰܬܠܶܐ ܫܰܒܛܳܐ ܠܥܶܠ ܡܶܢܳܗܿ܇ ܘܠܳܐ ܨܳܒܶܐ ܗܘܳܐ ܕܰܢܚܰܒܠܶܝܗܿ܇ ܘܕܰܚܙܳܐ ܫܰܒܪ̈ܶܐ ܘܰܥܠܰܝܡ̈ܶܐ܇ ܕܰܟܒܺܝܢܺܝܢ ܣܰܩ̈ܶܐ ܘܩܶܛܡܳܐ܇ ܕܰܐܥܒܰܪ ܡܶܢܗܽܘܢ ܟܰܪܝܽܘܬܳܐ܇ ܘܰܐܚܺܝ ܐܶܢܽܘܢ ܒܰܚܢܳܢܶܗ܀

ܠܳܐ ܬܶܫܕܶܝܢܝ̱ ܡܶܢ ܩܕܳܡܰܝܟ܇ ܡܰܠܟܳܐ ܡܫܺܝܚܳܐ ܦܳܪܽܘܩܰܢ܇ ܒܗܰܘ ܝܰܘܡܳܐ ܕܡܶܬܒܰܚܪ̈ܳܢ ܒܶܗ܇ ܟܰܣܝ̈ܳܬܳܐ ܕܰܒܢܰܝܢ̈ܳܫܳܐ܇ ܐܶܠܳܐ ܒܪ̈ܰܚܡܶܐ ܕܛܰܝܒܽܘܬܳܟ܇ ܚܰܣܳܐ ܚܰܘ̈ܒܰܝ ܘܰܚܛܳܗ̈ܰܝ܀

 

ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܐܰܘܕܳܝ ܠܶܗ ܥܺܕܬܳܐ

ܨܳܡܘ̱ ܗ̱ܘܰܘ ܙܰܕܺܝ̈ܩܶܐ܇ ܨܰܘܡܳܐ ܩܰܕܺܝܫܳܐ܇ ܘܰܠܨܰܘܡܶܗ ܕܒܽܘܟܪܳܐ ܛܽܘܦܣܳܐ ܨܺܝܪܺܝܢ ܗ̱ܘܰܘ܇ ܘܚܰܘܺܝܘ ܕܗܳܟܰܢ ܢܨܽܘܡ܀

ܨܳܡ ܗܘܳܐ ܐܶܠܺܝܫܳܥ܇ ܢܒܺܝܳܐ ܒܓܰܘ ܫܳܡܪܺܝܢ ܘܟܽܘܡܪܳܐ ܡܶܠܟܺܝܙܕܶܩ܇ ܒܨܰܘܡܳܐ ܐܶܬܢܰܨܰܚ܇ ܒܕܽܘܒܳܪ̈ܶܐ ܡܝܰܬܪ̈ܶܐ܀

ܨܳܡܘ̱ ܗ̱ܘܰܘ ܢܺܝܢܘ̈ܳܝܶܐ܇ ܒܚܰܫܳܐ ܚܢܺܝܓܳܐܺܝܬ܇ ܘܣܶܠܩܰܬ݀ ܠܰܫܡܰܝܳܐ܇ ܒܳܥܽܘܬܗܽܘܢ ܠܰܩܕܳܡ ܡܳܪܝܳܐ ܘܶܐܬܩܰܒܠܰܬ݀܀

ܒܪܺܝܟ ܒܽܘܟܪܳܐ ܕܩܰܒܶܠ܇ ܨܰܘܡܳܐ ܚܠܳܦ ܟܽܠܰܢ܇ ܘܦܰܢܝܶܗ ܠܰܟܝܳܢܰܢ ܠܰܐܬܪܶܗ ܩܰܕܡܳܝܳܐ܇ ܕܝܰܥܢܽܘܬܳܐ ܛܰܪܕܬܶܗ܀

ܝܶܫܽܘܥ ܦܳܪܽܘܩܰܢ܇ ܒܨܰܘܡܳܐ ܙܟܳܐ ܠܒܺܝܫܳܐ܇ ܘܰܕܪܰܫ ܠܰܢ ܐܽܘܪܚܳܐ܇ ܕܒܳܗܿ ܢܶܪܕܶܐ ܠܰܥܕܶܝܢ܇ ܘܢܶܩܢܶܐ ܡܰܠܟܽܘܬܳܐ܀

ܫܽܘܒܚܳܐ ܠܳܟ ܡܫܺܝܚܳܐ܇ ܕܨܳܡܬ ܡܶܛܽܠܳܬܰܢ܇ ܘܰܣܚܰܦܬ ܠܰܚܛܺܝܬܳܐ܇ ܒܨܰܘܡܳܟ ܩܰܕܺܝܫܳܐ ܠܥܺܕܬܳܐ ܘܝܰܠܕܶܝ̈ܗܿ ܦܪܰܩܬ܀

 

ܕܰܐܠܳܗܝ̱ ܐܰܠܳܗܝ̱ ܒܩܳܠܳܐ ܩܝܳܡܬܳܐ ܕܰܢܚܶܬ ܒܰܒܪܺܝܬܳܐ

ܒܨܰܘܡܳܐ ܕܰܟܝܳܐ ܘܒܰܨܠܽܘܬܳܐ܇ ܢܶܬܓܰܘܰܣ ܐܰܝܢܳܐ ܕܰܐܠܺܝܨ܇ ܨܰܘܡܳܐ ܫܽܘܪܰܐܗ̱ܘ ܚܰܣܺܝܢܳܐ܇ ܕܠܳܐ ܡܨܶܐ ܒܺܝܫܳܐ ܩܳܪܶܒ ܠܶܗ܇ ܛܽܘܒܰܘܗ̱ܝ ܠܰܐܝܢܳܐ ܕܶܐܬܟܰܫܰܪ܇ ܘܦܳܠܰܚ ܒܶܗ ܙܰܕܺܝܩܳܐܺܝܬ܀

ܕܳܠ ܡܶܢ ܐܰܬܪܶܗ ܝܺܚܺܝܕܳܐ܇ ܘܨܳܡ ܘܶܐܬܟܰܬܰܫ ܚܠܳܦ ܟܽܠܰܢ܇ ܢܶܣܝܳܢܳܐ ܣܒܰܠ ܡܶܢ ܒܺܝܫܳܐ܇ ܕܰܢܚܰܪܪܰܢ ܡܶܢ ܫܽܘܥܒܳܕܶܗ܇ ܘܣܰܚܦܶܗ ܘܰܫܪܳܐ ܫܽܘܠܛܳܢܶܗ܇ ܘܝܰܗܒ ܙܰܝܢܳܐ ܕܒܶܗ ܢܶܬܟܰܬܰܫ܀

ܨܠܺܝ ܠܺܝ ܐܶܕܢܳܟ ܘܫܰܡܰܥ ܒܩܳܠܝ̱܇ ܒܪܳܐ ܕܰܒܚܽܘܒܶܗ ܦܰܓܪܳܐ ܠܒܶܫ܇ ܩܰܒܶܠ ܬܶܐܢܚ̈ܳܬܝ̱ ܕܡܶܬܩܰܪ̈ܒܳܢ܇ ܚܠܳܦ ܨܽܘܥܨܳܥ̈ܶܐ ܕܡܶܢܝ̱ ܐܶܣܬܰܥܰܪܘ̱܇ ܘܰܐܘܕܶܐ  ܠܳܟ ܥܰܠ ܛܰܝܒܽܘܬܳܟ܇ ܕܰܐܢ̱ܬ ܗܽܘ ܡܚܰܣܶܐ ܠܚܰܛܳܝ̈ܶܐ܀

ܠܥܰܡܳܐ ܕܰܢܦܰܩ ܡܶܢ ܡܶܨܪܶܝܢ܇ ܨܰܘܡܳܐ ܦܩܰܕ ܠܶܗ ܐܰܠܳܗܳܐ܇ ܘܕܶܐܬܝܰܥܰܢ ܘܰܐܪܓܶܙ ܝܰܗܒ ܠܶܗ܇ ܡܳܪܝܳܐ ܒܶܣܪܳܐ ܐܰܝܟ ܕܰܟܬܺܝܒ܇ ܕܝܰܥܢܽܘܬܳܐ ܥܶܠܰܬ ܟܽܠܗܶܝܢ܇ ܒܺܝܫ̈ܳܬܳܐ ܡܶܢ ܫܽܘܪܳܝܳܐ܀

ܣܚܰܦ ܡܳܪܰܢ ܠܒܺܝܫܳܐ ܘܚܰܝܠܶܗ܇ ܘܥܰܒܕܶܗ ܕܝܳܫܳܐ ܠܨܰܝܳܡ̈ܶܐ܇ ܘܦܰܣܶܩ ܢܶܫܒܰܘ̈ܗ̱ܝ ܕܰܢܟܺܝܠܳܐ܇ ܘܰܐܪܡܺܝ ܒܰܐܪܥܳܐ ܪܳܡܽܘܬܶܗ܇ ܘܦܰܪܣܺܝ ܠܢܶܟܠܶܗ ܘܰܠܙܺܐܦܶܗ ܒܪܺܝܟ ܚܰܝܠܳܐ ܕܰܠܟܽܠ ܙܳܟܶܐ܀

ܐܰܚ̈ܰܝ ܒܨܰܘܡܳܐ ܢܶܬܟܰܫܰܪ܇ ܕܒܶܗ ܡܫܶܬܰܒܩ̈ܳܢ ܚܰܘܒ̈ܳܬܰܢ܇ ܘܙܰܝܢܳܐ ܓܡܺܝܪܳܐ ܢܶܬܥܰܛܰܦ ܒܝܰܕ ܨܰܘܡܳܐ ܘܰܨܠܰܘ̈ܳܬܳܐ܇ ܘܢܶܬܟܰܫܰܦ ܠܶܗ ܠܰܡܫܺܝܚܳܐ܇ ܕܢܶܬܪܰܚܰܡ ܥܰܠ ܢܰܦܫ̈ܳܬܰܢ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܩܳܠܳܐ ܕܫܽܘܒܚܳܐ

ܣܪ̈ܳܦܶܐ ܕܢܽܘܪܳܐ ܓܡܽܘܪܬܳܐ ܕܢܽܘܪܳܐ ܒܳܟܶܠܒܬܳܐ ܕܢܽܘܪܳܐ܇ ܩܰܪܶܒ ܠܦܽܘܡܶܗ ܕܰܢܒܺܝܳܐ܇ ܐܰܟܠܳܗܿ ܢܒܺܝܳܐ ܘܶܐܬܚܰܣܺܝ ܒܳܗܿ ܕܐܪܳܙܳܐ ܗܘܳܐ ܓܶܝܪ܇ ܕܦܰܓܪܶܗ ܘܰܕܡܶܗ ܕܺܝܚܺܝܕܳܐ܀

ܨܳܡ ܕܳܢܺܝܐܶܝܠ ܒܰܐܪܥܳܐ ܕܒܳܒܶܝܠ ܨܰܘܡܳܐ ܕܰܟܝܳܐ܇ ܘܰܙܟܳܐ ܗܘܳܐ ܠܰܐܪ̈ܝܰܘܳܬܳܐ܇ ܘܰܥܢܳܐ ܡܰܠܟܳܐ ܟܰܕ ܐܳܡܰܪ ܠܶܗ ܫܰܪܺܝܪܳܐܺܝܬ܇ ܪܰܒ ܐܰܠܳܗܳܐܟ ܕܳܢܺܝܐܶܝܠ܀

ܨܰܘܡܰܢ ܡܳܪܰܢ ܢܗܶܐ ܠܰܢܝܳܚܳܟ ܐܳܦ ܒܳܥܽܘܬܰܢ܇ ܩܕܳܡ ܪܰܒܽܘܬܳܟ ܬܶܬܩܰܒܰܠܝ̱܇ ܘܚܰܣܳܐ ܚܰܘܒܰܝ̈ܢ ܘܰܫܒܽܘܩ ܚܛܳܗ̈ܰܝܢ ܘܪܰܚܶܡ ܥܠܰܝܢ܇ ܕܰܐܢ̱ܬ ܗܽܘ ܪܳܚܶܡ ܬܰܝܳܒ̈ܶܐ܀

ܒܚܰܫܳܐ ܘܨܰܘܡܳܐ ܐܶܬܢܰܨܰܚܘ̱ ܗ̱ܘܰܘ ܛܠܳܝ̈ܶܐ ܬܠܳܬܳܐ܇ ܕܒܶܝܬ ܚܰܢܰܢܝܳܐ ܒܰܐܬܽܘܢܳܐ܇ ܐܳܦ ܕܳܢܺܝܐܶܝܠ ܒܰܐܪܥܳܐ ܕܒܳܒܶܝܠ܇ ܒܨܰܘܡܳܐ ܨܟܳܝܗ̱ܝ ܗܘܳܐ܇ ܠܡܰܠܟܳܐ ܒܺܝܫܳܐ ܪܳܕܽܘܦܶܗ܀

ܐܰܪܒܰܥ ܦܶܢܝ̈ܳܢ ܒܳܟ ܢܶܫܬܰܝܢ̈ܳܢ ܫܰܝܢܳܐ ܕܟܽܠܳܐ܇ ܘܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܇ ܒܒܳܥܽܘ ܡܶܢܳܟ ܐܰܕܢܰܚ ܪ̈ܰܚܡܰܝܟ ܥܰܠ ܚܰܛܳܝ̈ܶܐ܇ ܕܩܳܪܶܝܢ ܠܳܟ ܒܗܰܝܡܳܢܽܘܬܳܐ܀

ܐܰܪܒܥܺܝܢ ܝܰܘܡ̈ܺܝܢ ܨܳܡ ܗܘܳܐ ܡܳܪܰܢ ܒܰܐܬܪܳܐ ܚܽܘܪܒܳܐ܇ ܕܢܶܬܟܰܬܰܫ ܥܰܡ ܣܳܛܳܢܳܐ܇ ܬܰܒܪܶܗ ܠܥܽܘܩܣܶܗ ܘܣܰܚܦܶܗ ܠܚܰܝܠܶܗ܇ ܘܥܰܒܕܶܗ ܒܶܙܚܳܐ ܠܥܰܡܡ̈ܶܐ ܕܰܐܳܘܕܺܝܘ ܒܰܨܠܺܝܒܳܐ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܝܰܘܡܳܢܳܐ

ܝܰܘܡܳܢܳܐ ܦܳܪܽܘܩܰܢ ܒܓܰܘ ܕܰܒܪܳܐ ܚܠܳܦܰܝܢ ܨܳܐܶܡ ܗܘܳܐ܇ ܘܰܚܠܳܦ ܠܰܚܡܳܐ ܝܰܗܒ ܠܰܢ ܡ̈ܶܠܶܐ ܕܡܰܠܝ̈ܳܢ ܚܰܝ̈ܶܐ܇ ܕܢܶܫܡܰܥ ܐܶܢܶܝܢ ܘܢܺܐܚܶܐ ܒܗܶܝܢ܇ ܓܶܢܣܳܐ ܕܒܶܝܬ ܐܳܕܳܡ܀

ܡܰܪܓܳܢܺܝܬܳܐ ܐܺܝܬܰܘܗ̱ܝ ܨܰܘܡܳܐ ܘܰܨܠܽܘܬܳܐ ܠܰܐܝܢܳܐ ܕܰܡܗܰܝܡܶܢ܇ ܘܣܺܝܡܰܬ ܚܰܝ̈ܶܐ܇ ܘܥܽܘܬܪܳܐ ܪܰܒܳܐ ܕܠܳܐ ܡܶܬܚܰܠܰܨ܇ ܕܒܳܗܿ ܗܽܘ ܝܳܪܬܺܝܢ ܨܰܝܳܡ̈ܶܐ ܚܰܝ̈ܶܐ ܕܰܠܥܳܠܰܡ܀

ܬܰܘ ܦܳܪ̈ܽܘܫܶܐ܇ ܢܨܽܘܡ ܨܰܘܡܳܐ ܩܰܕܺܝܫܳܐ ܡܠܶܐ ܟܽܠ ܝܽܘܬܪ̈ܳܢܺܝܢ܇ ܕܒܶܗ ܡܶܫܬܰܒܩ̈ܳܢ ܟܽܠ ܚܰܘܒ̈ܳܬܰܢ ܐܳܦ ܣܽܘܪ̈ܚܳܢܰܝܢ܇ ܘܒܶܗ ܡܶܬܪܰܥܶܐ ܐܰܠܳܗܳܐ܇ ܘܥܳܒܶܕ ܥܠܰܝܢ ܪ̈ܰܚܡܶܐ܀

ܨܳܡ ܗܘܳܐ ܡܽܘܫܶܐ܇ ܨܰܘܡܳܐ ܕܰܟܝܳܐ ܘܩܰܕܺܝܫܳܐ ܘܰܚܙܳܝܗ̈ܝ ܠܰܐܠܳܗܳܐ܇ ܘܨܳܡ ܐܺܠܺܝܳܐ ܘܰܒܥܰܪܦܶܠܳܐ ܣܠܶܩ ܠܰܫܡܰܝܳܐ܇ ܘܰܚܢܰܢ ܢܨܽܘܡ ܕܰܟܝܳܐܺܝܬ ܕܢܶܫܬܘܶܐ ܠܫܽܘܒܩܳܢܳܐ܀

ܨܰܘܡܰܢ ܡܳܪܰܢ܇ ܢܶܗܘܶܐ ܠܰܢܝܳܚܳܐ ܕܪܰܒܽܘܬܳܟ܇ ܗܳܝ ܡܰܨܝܰܬ ܟܽܠܳܐ܇ ܒܨܰܘܡܳܟ ܡܳܪܰܢ ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ܇ ܘܰܫܒܽܘܩ ܚܰܘܒ̈ܰܝܢ ܘܰܚܛܳܗ̈ܰܝܢ܇ ܕܢܰܘܕܶܐ ܠܛܰܝܒܽܘܬܳܟ܀

ܩܳܠܳܐ ܕܨܰܦܪܳܐ

ܒܩܳܠܳܐ ܠܡܰܠܟܽܘܬ ܪܰܘܡܳܐ

ܫܽܘܒܚܳܐ ܠܒܰܪ ܛܒܳܐ܇ ܕܶܐܬܬܰܚܬܺܝ ܒܚܽܘܒܶܗ ܡܶܛܽܠ ܦܽܘܪܩܳܢܰܢ܇ ܘܚܰܪܰܪ ܠܰܢ ܡܶܢ ܛܳܥܝܽܘܬܳܐ܇ ܕܳܐܟܶܠ ܩܰܪܨܳܐ ܡܳܪܽܘܕܳܐ܇ ܘܶܐܫܰܬܰܘܕܺܝ ܠܰܢ ܡܰܠܟܽܘܬܳܐ܇ ܘܚܰܝ̈ܶܐ ܚܰܕ̈ܬܶܐ ܕܠܳܐ ܫܽܘܠܳܡ܇ ܬܰܘ ܟܽܠܰܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܚܰܘܒ̈ܰܝ ܣܰܓܺܝܐܺܝܢ܇ ܘܚܰܝܰܝ̈ ܐܶܬܟܰܪܺܝܘ ܘܬܰܪܥܳܐ ܐܶܬܬܚܶܕ ܠܶܗ܇ ܡܳܢܳܐ ܐܶܥܒܶܕ ܡܳܐ ܕܗܳܘܝܳܐ܇ ܩܥܳܬܳܐ ܕܗܳܐ ܚܰܬܢܳܐ ܐܳܬܶܐ܇ ܘܰܐܝܢܳܐ ܕܢܰܗܺܝܪ ܠܰܡܦܺܐܕܶܗ܇ ܥܳܐܶܠ ܥܰܡܶܗ ܠܰܓܢܽܘܢܳܐ܇ ܟܰܕ ܙܳܡܰܪ ܫܽܘܒܚܳܐ ܒܽܐܘܫܰܥܢ̈ܶܐ ܬܰܘ ܟܽܠܰܢ ܢܶܒܪܽܘܟ ܘܢܶܣܓܽܘܕ ܠܶܗ܀

 

ܐ̱ܚܪܺܢܳܐ ܒܩܳܠܳܐ ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܬܰܘ ܐܰܚ̈ܰܝ ܢܶܬܬܥܺܝܪ ܡܶܢ ܫܶܢܬܳܐ܇ ܘܢܶܩܪܶܐ ܠܡܳܪܝܳܐ ܒܰܚܢܰܓܬܳܐ܇ ܘܢܶܬܟܰܫܰܪ ܒܠܺܠܝܳܐ ܘܒܺܐܝܡܳܡܳܐ ܥܰܕ ܩܰܝܳܡܺܝܢ ܠܰܢ ܚܰܝ̈ܶܐ܇ ܥܰܕܠܳܐ ܡܶܬܬܚܶܕ ܠܶܗ ܬܰܪܥܳܐ܇ ܘܠܰܝܬ ܐܰܬܪܳܐ ܠܰܬܝܳܒܽܘܬܳܐ܇ ܥܰܠ ܬܰܪܥܶܗ ܕܚܰܬܢܳܐ ܢܶܫܗܰܪ܇ ܕܥܰܡܶܗ ܢܶܥܽܘܠ ܠܰܓܢܽܘܢܳܐ܇ ܕܢܺܐܪܰܬ ܚܰܝ̈ܶܐ ܕܰܠܥܳܠܰܡ܀

ܥܰܡ ܟܺܐܢ̈ܶܐ ܕܰܦܠܰܚܘ̱ ܠܰܐܠܳܗܳܐ܇ ܐܺܝܡܳܡ̈ܶܐ ܘܠܰܝܠܰܘ̈ܳܬܳܐ܇ ܢܶܬܟܰܫܰܪ ܐܳܦܚܢܰܢ ܚܰܛܳܝ̈ܶܐ܇ ܘܢܶܒܥܶܐ ܪ̈ܰܚܡܶܐ ܡܶܢ ܡܳܪܰܢ܇ ܘܥܰܡ ܕܰܘܺܝܕ ܢܶܥܢܶܐ ܘܢܺܐܡܰܪ܇ ܕܰܒܦܶܠܓܶܗ ܕܠܺܠܝܳܐ ܩܳܡܶܬ܇ ܕܰܐܘܕܶܐ ܠܕܺܝܢܰܝ̈ܟ ܙܰܕܺܝ̈ܩܶܐ܇ ܚܽܘܣ ܘܶܐܬܪܰܚܰܡ ܥܰܠ ܟܽܠܰܢ܇ ܐܰܫܘܳܢ ܕܢܺܐܪܰܬ ܡܰܠܟܽܘܬܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܬܰܡܳܢ ܥܳܗܕܳܐ ܠܚܰܘܒܰܬ ܓܰܘܳܐ ܕܰܥܠܶܝܗܿ ܢܶܦܩܰܬ܇ ܘܒܶܟܝܳܐ ܒܚܰܫܳܐ ܕܠܰܐܝܢܳܐ ܫܰܦܠܳܐ ܪܰܒܳܐ ܢܚܶܬܬ܇ ܚܠܳܦ ܒܽܘܣܳܡ̈ܶܐ ܕܰܒܦܰܪܕܰܝܣܳܐ ܒܗܽܘܢ ܪܳܥܝܳܐ ܗܘܳܬ݀܇ ܠܰܐܪܥܳܐ ܕܡܰܠܝܳܐ ܟܽܘܒ̈ܶܐ ܘܥܰܡܠܳܐ ܘܟܽܠ ܛܽܘܪ̈ܳܦܶܐ܀

ܢܽܘܗܪܳܐ ܫܰܦܝܳܐ ܕܡܶܢ ܐܺܝܬܽܘܬܶܗ ܕܰܐܒܳܐ ܕܢܰܚ ܠܰܢ܇ ܩܦܽܘܠ ܬܰܚܦܺܝܬܳܐ ܕܚܰܫ̈ܶܐ ܫܟܺܝܪ̈ܶܐ ܕܰܟܪܺܝܟܳܐ ܠܰܢ܇ ܐܰܦܢܳܐ ܠܶܒܰܢ ܡܶܢ ܛܳܥܝܽܘܬܳܐ ܕܰܡܟܰܡܗܳܐ ܠܰܢ܇ ܕܢܶܩܥܶܐ ܒܚܽܘܒܳܐ ܠܳܟ ܬܶܫܒܽܘܚܬܳܐ ܣܰܒܪܳܐ ܕܚܰܝܰܝ̈ܢ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ

ܣܺܝܡܳܐ ܐܰܪܥܳܐ ܥܰܠ ܡܰܝ̈ܳܐ ܘܬܰܠܝܳܐ ܫܡܰܝܳܐ܇ ܒܳܐܐܰܪ ܡܶܢ ܣܳܟܳܗܿ܇ ܠܰܫܡܰܝܳܐ ܘܠܰܐܪܥܳܐ ܘܡܰܝ̈ܳܐ ܛܥܺܝܢ ܨܶܒܝܳܢܳܟ ܘܠܳܐ ܐܺܝܬ ܡܶܕܶܡ ܕܝܰܩܺܝܪ ܠܳܟ܇ ܐܶܠܳܐ ܡܰܘܬܳܐ܇ ܒܰܠܚܽܘܕ ܕܙܰܕܺܝ̈ܩܶܐ܀

ܢܽܘܗܪܳܐ ܘܚܰܝ̈ܰܐ ܘܒܽܘܣܳܡ̈ܶܐ ܡܠܰܟ ܘܰܡܛܰܝܰܒ ܠܟܺܐܢ̈ܶܐ ܘܙܰܕܺܝ̈ܩܶܐ܇ ܕܰܦܠܰܚܘ̱ ܦܽܘܠܚܳܢ ܟܺܐܢܽܘܬܳܐ ܒܳܟܰܪܡܶܗ ܕܰܒܪܳܐ܇ ܕܢܳܣܒܺܝܢ ܐܰܓܪܳܐ ܒܓܰܠܝܽܘܬܳܐ܇ ܚܰܝ̈ܶܐ ܚܰܕ̈ܬܶܐ ܒܥܳܠܡܳܐ ܕܠܳܐ ܥܳܒܰܪ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܙܺܝܥ ܗܽܘ ܘܰܕܚܺܝܠ ܫܽܘܢܳܩܳܐ܇ ܚܰܛܳܝ̈ܶܐ ܥܪܽܘܩܽܘܢ ܡܶܢܶܗ܇ ܕܡܳܐ ܕܥܳܐܠܳܐ ܢܰܦܫܳܐ ܠܕܺܝܢܳܐ ܠܳܐ ܓܶܢܣܳܐ ܘܠܳܐ ܒܰܪ ܛܽܘܗܡܳܐ܇ ܠܳܐ ܝܳܬܶܒ ܡܶܢ ܝܰܡܺܝܢܳܐ܇ ܘܠܳܐ ܕܩܳܐܶܡ ܡܶܢ ܣܶܡܳܠܳܐ܀

ܫܽܘܒܚܳܐ ܠܳܟ ܡܚܰܣܶܐ ܚܛܳܗ̈ܶܐ܇ ܫܽܘܒܚܳܐ ܠܳܟ ܫܳܒܶܩ ܚܰܘܒ̈ܶܐ܇ ܫܽܘܒܚܳܐ ܠܳܟ ܨܗܶܐ ܠܬܰܝܳܒ̈ܶܐ܇ ܫܽܘܒܚܳܐ ܠܳܟ ܒܳܥܶܐ ܐܰܒܺܝܕ̈ܶܐ܇ ܫܽܘܒܚܳܐ ܠܳܟ ܘܠܰܐܒܳܐ ܕܫܰܠܚܳܟ܇ ܘܣܶܓܕܬܳܐ ܠܪܽܘܚܳܐ ܩܰܕܺܝܫܳܐ܀

 

ܕܦܶܠܓܶܗ ܕܝܰܘܡܳܐ ܩܳܠܳܐ ܡܳܪܝܳܐ ܡܳܪܰܢ

ܟܰܕ ܙܳܚܰܬ݀ ܛܠܳܝ̈ܶܐ ܬܠܳܬܳܐ܇ ܢܰܨܺܝܚ̈ܶܐ ܒܰܐܪܥܳܐ ܕܒܳܒܶܝܠ܇ ܙܟܰܘ ܠܓܰܘܙܰܠܬܳܐ ܕܰܐܬܽܘܢܳܐ ܒܨܰܘܡܳܐ܇ ܐܳܦ ܕܳܢܺܝܐܶܝܠ܇ ܒܨܰܘܡܳܐ ܙܟܳܐ ܠܰܐܪ̈ܝܰܘܳܬܳܐ܇ ܘܰܐܒܗܶܬ ܐܶܢܽܘܢ ܠܟܽܠܗܽܘܢ ܟܰܠܕܳܝ̈ܶܐ܇ ܒܨܰܘܡܳܐ ܕܰܟܝܳܐ܇ ܬܰܘ ܢܶܬܟܰܫܰܪ ܚܰܒܺܝ̈ܒܰܝ ܕܢܶܙܟܶܐ ܠܒܺܝܫܳܐ܇ ܘܢܺܐܪܰܬ ܡܰܠܟܽܘܬܳܐ܀

ܐܳܘ ܨܰܝܳܡ̈ܶܐ ܥܬܰܪܘ̱ ܥܽܘܬܪܳܐ ܪܽܘܚܳܢܳܝܳܐ܇ ܕܠܳܐ ܡܶܫܬܰܚܠܰܦ ܐܳܦ ܠܳܐ ܡܶܬܚܰܠܰܦ܇ ܘܩܽܘܡܘ̱ ܐܶܬܚܰܦܰܛܘ̱ ܒܨܰܘܡܳܐ ܕܰܟܝܳܐ ܘܒܰܨܠܽܘܬܳܐ ܘܚܽܘܒܳܐ ܫܰܦܝܳܐ ܕܰܡܝܰܬܰܪ ܡܶܢܟܽܠ܇ ܕܰܒܝܰܕ ܗܳܠܶܝܢ ܥܬܰܪܘ̱ ܟܺܐܢ̈ܶܐ ܩܢܰܘ ܡܰܠܟܽܘܬܳܐ܇ ܕܬܶܥܠܽܘܢ ܥܰܡܗܽܘܢ ܠܰܓܢܽܘܢ ܚܰܕܘ̈ܳܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܪܢܺܝ ܒܶܗ ܢܰܦܫܳܐ ܒܗܰܘ ܚܽܘܕܳܬܳܐ ܕܥܳܒܕܳܐ ܩܝܳܡܬܳܐ܇ ܘܚܰܕܶܬܝ̱ ܐܰܢ̱ܬܝ̱ ܠܶܟܝ̱ ܥܰܕܠܳܐ ܬܙܺܝܥܶܟܝ ܫܰܠܗܶܒܺܝܬܳܐ ܒܡܰܝ̈ܳܐ ܓܰܐܝ̈ܳܐ ܕܰܬܝܳܒܽܘܬܳܐ ܥܨܽܘܒܝ̱ ܡܰܚܘ̈ܳܬܶܟܝ̱܇ ܥܰܕܠܳܐ ܣܳܐܶܡ ܓܽܘܡܪ̈ܶܐ ܕܢܽܘܪܳܐ ܠܰܚܒܳܪ̈ܳܬܶܟܝ̱܀

ܫܽܘܒܚܳܐ ܠܰܐܒܳܐ ܕܰܓܒܰܠ ܥܳܠܡܳܐ ܡܶܢ ܠܳܐ ܡܶܕܶܡ܇ ܘܣܶܓܕܬܳܐ ܠܰܒܪܳܐ ܕܡܰܥܒܰܪ ܟܽܠܶܗ ܘܰܢܚܰܕܶܬ ܟܽܠ܇ ܡܳܪܳܐ ܕܪ̈ܰܚܡܶܐ ܚܽܘܢ ܠܟܳܬܽܘܒܳܐ ܒܝܰܘܡܳܐ ܕܕܺܝܢܳܐ܇ ܘܰܐܫܘܳܢ ܕܺܐܪܰܬ ܚܰܝ̈ܶܐ ܚܰܕ̈ܬܶܐ ܒܶܝܬ ܡܰܠܟܽܘܬܳܐ܀

 

ܕܰܬܫܰܥܫܳܥܺܝ̈ܢ ܒܩܳܠܳܐ ܦܬܰܚ ܠܺܝ ܬܰܪܥܶܗ

ܠܳܟ ܗܽܘ ܡܦܪܝܣܺܝܢ ܚܰܢܳܢܳܐ܇ ܠܳܐ ܬܰܗܡܶܐ ܚܝܳܪܳܟ ܡܶܢ ܥܰܒܕ̈ܰܝܟ܇ ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܰܢ܇ ܘܠܳܐ ܬܰܪܦܶܐ ܒܰܢ ܐܺܝܕ̈ܰܝܳܐ܇ ܛܰܝܒܽܘܬܳܟ ܡܳܪܝ̱ ܬܣܰܬܰܪܝ̱ ܠܰܢ܇ ܘܡܶܢ ܪܽܘܓܙܳܐܗ̱ܝ ܬܫܰܘܙܶܒܝ̱ ܠܰܢ܇ ܕܒܳܟ ܐܶܚܕܰܢ ܓܰܘܣܳܐ܇ ܫܰܘܙܶܒܰܝܢ ܡܶܢ ܓܺܗܰܢܳܐ܀

ܚܛܰܝܢܰܢ ܡܳܪܰܢ ܘܰܐܪܓܶܙܢܳܟ܇ ܘܒܰܣܝܳܢܳܐ ܕܥܰܡܰܠܳܐ ܐܶܬܦܰܠܦܰܠܢܰܢ܇ ܪܽܘܣ ܥܠܰܝܢ ܒܙܽܘܦܳܟ ܕܰܟܝܳܐ܇ ܘܰܐܫܺܝܓܰܝܢ ܡܶܢ ܟܽܘܬܡ̈ܳܬܳܐ܇ ܘܰܐܫܘܳܐ ܠܰܢ ܕܢܶܗܘܶܐ ܕܺܝܠܳܟ܇ ܘܰܐܝܟ ܨܶܒܝܳܢܳܟ ܢܶܫܦܰܪ ܠܳܟ܇ ܘܢܶܫܟܰܚ ܫܽܘܒܩܳܢܳܐ܇ ܡܳܐ ܕܗܳܘ̈ܝܳܢ ܦܳܣܺܝ̈ܩܳܬܳܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܬܳܐ ܒܰܫܠܳܡ ܐܳܡܪܺܝܢ܇ ܥܺܝܪ̈ܶܐ ܠܢܰܨܺܝ̈ܚܶܐ܇ ܦܳܥ̈ܠܶܐ ܟܰܫܺܝܪ̈ܶܐ܇ ܕܰܦܠܰܚܘ̱ ܘܠܳܐ ܐܰܡܶܢܘ̱܇ ܓܢܽܘܢܳܐ ܠܟܽܘܢ ܚܳܐܰܪ܇ ܘܬܰܪ̈ܥܰܘܗ̱ܝ ܠܟܽܘܢ ܦܳܬܰܚ܀

ܢܫܽܒܚܽܘܢ ܥܶܠ̈ܳܝܶܐ܇ ܒܪܰܘܡܳܐ ܕܒܶܗ ܩܳܝܡܺܝܢ܇ ܢܰܘܕܽܘܢ ܬܰܚܬܳܝ̈ܶܐ܇ ܒܰܐܬܪܳܐ ܕܠܶܗ ܣܰܟܺܝܘ܇ ܫܽܘܒܚܳܐ ܠܗܰܘ ܕܰܐܦܺܢܝ܇ ܠܳܐܕܳܡ ܠܝܳܪܬܽܘܬܶܗ.

ܬܽܘܒ ܕܝܽܘܡ ܚܰܡܫܳܐ ܒܫܰܒܳܐ ܕܫܰܒܬܳܐ ܕܰܬܠܳܬ

ܩܰܕܡܳܝܳܐ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܐܰܘܕܳܝ ܠܶܗ ܥܺܕܬܳܐ

ܨܳܡ ܗܘܳܐ ܐܺܠܺܝܳܐ܇ ܨܰܘܡܳܐ ܩܰܕܺܝܫܳܐ܇ ܘܰܙܟܳܐ ܗܘܳܐ ܠܺܐܝܙܒܺܝܠ܇ ܘܰܠܟܽܠܗܽܘܢ ܟܽܘܡܪ̈ܶܝܗܿ. ܒܨܰܘܡܶܗ ܩܰܕܺܝܫܳܐ܀

ܨܳܡܘ̱ ܗ̱ܘܰܘ ܢܺܝܢܘ̈ܳܝܶܐ܇ ܨܰܘܡܳܐ ܩܰܕܺܝܫܳܐ܇ ܘܰܒܣܰܩܳܐ ܘܩܶܛܡܳܐ܇ ܪܰܥܺܝܘ ܠܰܐܠܳܗܳܐ܇ ܘܡܶܢ ܪܽܘܓܙܳܐ ܐܶܬܦܪܶܩܘ̱܀

ܒܨܰܘܡܳܐ ܕܨܳܡ ܡܽܘܫܶܐ܇ ܐܰܦܰܘ̈ܗ̱ܝ ܐܶܙܕܰܗ̈ܰܝ܇ ܘܰܚܙܳܐ ܠܰܐܠܳܗܳܐ܇ ܘܡܰܠܶܠ ܗܘܳܐ ܥܰܡܶܗ܇ ܘܝܰܗܒ ܠܶܗ ܢܳܡܽܘܣܳܐ܀

ܫܽܘܒܚܳܐ ܠܒܰܪ ܛܳܒܳܐ܇ ܕܚܳܐܶܢ ܠܚܰܛܳܝ̈ܶܐ܇ ܒܨܰܘܡܳܐ ܘܒܰܨܠܽܘܬܳܐ܇ ܕܰܡܩܰܪܒܺܝܢ ܩܽܘܕܡܰܘܗ̱ܝ܇ ܫܽܘܒܚܳܐ ܠܶܗ ܒܟܽܠܙܒܰܢ܀

ܫܽܘܒܚܳܐ ܠܳܟ ܡܫܺܝܚܳܐ܇ ܣܰܒܪܳܐ ܕܨܰܝ̈ܳܡܶܐ܇ ܚܰܣܳܐ ܠܰܢ ܘܰܠܗܽܘܢ ܚܰܘ̈ܒܰܝܢ ܒܰܚܢܳܢܳܟ܇ ܒܝܰܘܡܳܐ ܕܡܶܐܬܺܝܬܳܟ܀

 

ܕܡܳܪܝܳܐ ܩܪܺܝܬܳܟ ܩܳܠܳܐ ܩܪܺܝܬܳܟ ܡܳܪܝܳܐ

ܡܳܪܝܳܐ ܩܪܺܝܬܳܟ ܚܽܘܢܶܝܗܿ ܠܰܐܒܺܝܕܽܘܬܝ̱܇ ܘܰܠܚܺܝ ܚܛܳܗ̈ܰܝ ܒܰܡܪܰܚܡܳܢܽܘܬܳܟ܀

ܩܪܰܐܘܽܘܟ ܡܳܪܝܳܐ ܒܚܰܫܳܐ ܢܺܝܢܘ̈ܳܝܶܐ܇ ܫܡܰܥܬܳܝܗ̱ܝ ܠܩܳܠܗܽܘܢ ܘܚܰܣܺܝܬ ܚܛܳܗܰܝ̈ܗܽܘܢ܀

ܡܳܪܝܳܐ ܩܪܳܬܳܟ ܚܰܢܰܐ ܒܰܨܠܽܘܬܳܐ܇ ܘܒܰܐܺܝܬ ܠܶܒܳܗܿ܇ ܘܝܰܗܒܬ ܠܳܗܿ ܗܽܘ ܫܡܺܘܐܶܝܠ܀

ܡܳܪܝܳܐ ܕܦܰܨܺܝ ܠܝܰܘܣܶܦ ܒܺܐܝܓܽܘܦܛܳܘܣ܇ ܦܰܨܳܐ ܠܟܽܠܰܢ܇ ܡܶܢ ܦܰܚ̈ܰܘܗ̱ܝ ܕܒܺܝܫܳܐ܀

ܡܳܪܝܳܐ ܕܫܰܘܙܶܒ ܠܕܳܢܺܝܐܶܝܠ ܢܒܺܝܳܐ܇ ܫܰܘܙܶܒ ܠܟܽܠܰܢ܇ ܡܶܢܟܽܠ ܣܳܩܽܘܪ̈ܰܝܢ܀

ܡܳܪܝܳܐ ܕܪܰܚܶܡ ܥܰܠ ܟܽܠܳܗܿ ܢܺܝܢܘܶܐ܇ ܚܽܘܢ ܠܟܳܬܽܘܒܳܐ ܒܰܡܪܰܚܡܳܢܽܘܬܳܟ܀

 

ܨܰܠܰܘ ܥܰܠ ܟܳܬܽܘܒܳܐ

 

ܩܳܠܳܐ ܕܪܰܡܫܳܐ ܩܳܠܳܐ ܠܰܬܚܽܘܡܳܐ ܕܗܰܝܡܳܢܽܘܬܳܐ

ܬܰܘ ܐܰܚ̈ܰܝ ܢܶܬܚܰܙܰܩ ܒܶܗ܇ ܒܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܕܗܽܘ ܡܰܩܢܶܐ ܠܰܢ ܚܰܝ̈ܶܐ ܒܢܽܘܚܳܡܳܐ܇ ܒܶܗ ܙܟܳܐ ܡܳܪܰܢ ܠܣܳܛܳܢܳܐ܇ ܘܬܒܰܪܶܗ ܠܥܽܘܩܣܳܗܿ ܕܰܚܛܺܝܬܳܐ܇ ܘܝܰܗܒܶܗ ܙܰܝܢܳܐ ܠܟܽܠܗܽܘܢ ܨܰܝ̈ܳܡܶܐ܇ ܘܰܚܢܰܢ ܢܨܽܘܡ ܕܰܟܝܳܐܺܝܬ܇ ܕܗܽܘ ܡܦܰܨܶܐ ܠܰܢ ܡܶܢ ܒܺܝܫܳܐ ܗ ܕܰܨܗܶܐ ܠܰܐܒܕܳܢܰܢ܀

ܐܶܫܰܥܝܳܐ ܬܳܐ ܒܰܕܶܩ ܠܰܢ܇ ܐܰܝܢܰܐܗ̱ܘ ܨܰܘܡܳܐ ܩܰܕܺܝܫܳܐ܇ ܕܒܶܗ ܗܽܘ ܚܳܕܶܐ ܘܡܶܬܪܰܥܶܐ ܡܳܪܝܳܐ܇ ܕܰܢܨܽܘܡ ܐ̱ܢܳܫ ܡܶܢ ܒܺܝܫ̈ܳܬܳܐ܇ ܗܳܢܰܘ ܨܰܘܡܳܐ ܩܰܕܺܝܫܳܐ܇ ܘܢܶܩܨܶܐ ܠܰܚܡܶܗ ܘܢܶܬܶܠ ܠܰܣܢܺܝܩ̈ܶܐ܇ ܒܗܳܢܳܐ ܡܶܬܪܰܥܶܐ ܡܳܪܝܳܐ܇ ܘܠܳܐ ܗܘܳܐ ܒܨܰܘܡܳܐ ܕܡܶܢ ܠܰܚܡܳܐ܇ ܗ ܐܶܠܳܐ ܡܶܢ ܥܰܘܠܳܐ܀

 

ܐ̱ܚܪܺܢܳܐ ܒܩܳܠܳܐ ܒܰܪܡܫܳܐ ܠܒܰܝܬܳܟ ܐܶܬܶܝܢܰܢ

ܨܰܘܡܳܐ ܝܶܫܽܘܥ ܗܽܘ ܙܰܝܢܳܐ ܝܰܗܒܶܗ ܠܰܢ܇ ܥܰܒܕ̈ܰܝ ܡܰܠܟܳܐ ܐܽܘܚܕܽܘܢܳܝܗ̱ܝ ܒܩܺܐܪܣܳܐ ܕܰܕܡܳܐ܇ ܗܳܢܰܘ ܐܰܓܽܘܢܳܐ ܕܒܶܗ ܗܽܘ ܩܳܐܶܡ ܐ̱ܢܳܫ܇ ܥܕܰܡܳܐ ܕܰܠܚܰܝܰܘ̈ܗ̱ܝ ܢܰܥܕܶܐ ܒܝܰܕ ܬܰܟܬܽܘܫܳܐ܀

ܚܽܘܣ ܥܰܠ ܫܽܘܦܪܳܗܿ ܕܢܰܦܫܳܐ ܕܠܳܐ ܢܶܬܚܰܒܰܠ܇ ܘܰܐܠܺܝ ܥܰܡܶܗ ܒܛܳܒ̈ܳܬܳܐ ܕܥܰܡܳܗܿ ܬܰܡܠܶܟ܇ ܘܶܐܢ ܝܳܗܒܳܐ ܠܳܟ ܨܰܘܡܳܐ ܠܳܐ ܬܶܟܪܶܐ ܠܳܟ܇ ܩܰܒܶܠ ܘܰܚܕܺܝ ܒܰܟܠܺܝܠܳܐ ܕܡܶܫܟܰܚ ܐܰܢ̱ܬ ܠܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܦܬܰܚ ܠܰܐܟܣܢܳܝܳܐ ܬܰܪܥܳܐ ܕܒܰܝܬܳܟ ܚܰܒܺܝܒܳܐܺܝܬ܇ ܘܟܽܠܗܽܘܢ ܬܰܪ̈ܥܶܐ ܕܒܶܝܬ ܡܰܠܟܽܘܬܳܐ ܡܶܬܦܰܬܚܺܝܢ ܠܳܟ܇ ܦܐܶܐ ܠܶܗ ܠܨܰܘܡܳܐ ܡܳܐ ܕܪܳܗܛܳܐ ܒܶܗ ܙܰܕܺܝܩܽܘܬܳܐ܇ ܒܪܺܝܟ ܗܽܘ ܕܝܰܗܒܶܗ ܙܰܝܢܳܐ ܪܰܒܳܐ ܠܟܽܠ ܟܰܫܺܝܪ̈ܶܐ܀

ܫܰܒܰܚܘ̱ ܐܰܘܕܰܘ ܝܰܠ̈ܕܶܝܗܿ ܕܥܺܕܬܳܐ ܠܗܰܘ ܕܰܒܚܽܘܒܶܗ܇ ܝܰܗܒ ܠܰܢ ܨܰܘܡܳܐ ܣܰܩܳܐ ܕܡܰܐܣܶܐ ܠܰܚܒܳܪ̈ܳܬܰܢ܇ ܩܰܒܶܠ ܨܰܘܡܰܢ ܘܰܨܠܰܘ̈ܳܬܰܢ ܒܰܪ ܐܰܠܳܗܳܐ܇ ܘܰܫܒܽܘܩ ܚܰܘܒ̈ܰܝܢ܇ ܘܚܰܣܳܐ ܠܕܰܣܪܰܛ ܠܳܟ ܬܶܫܒܽܘܚܬܳܐ܀

ܡܥܺܝܪܳܢܳܐ ܕܠܺܠܝܳܐ ܩܳܠܳܐ ܐܰܥܺܝܪܰܝܢܝ̱ ܕܶܐܙܡܰܪ ܠܳܟ

ܕܽܘܢ ܡܳܪܝܳܐ ܕܺܝܢܝ̱ ܘܰܬܒܰܥ ܬܒܰܥܬܝ̱܇ ܡܶܢ ܒܥܶܠܕܒܳܒܝ̱ ܕܪ̈ܰܚܡܶܐ ܠܰܝܬ ܒܶܗ܇ ܕܢܺܝܫܳܐ ܠܓܶܐܪ̈ܰܘܗ̱ܝ ܣܳܡܶܢܰܝ̱ ܠܶܗ܇ ܒܪܶܡܙܳܟ ܓܶܐܪ̈ܰܘܗ̱ܝ ܠܶܗ ܢܒܰܙܰܥܽܘܢ܀

ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ܇ ܒܝܰܘܡܳܐ ܕܗܳܘܶܐ ܒܽܘܚܪܳܢܳܐ܇ ܚܽܘܣ ܥܰܠ ܟܽܠܰܢ ܒܰܡܪܰܚܡܳܢܽܘܬܳܟ܇ ܘܦܰܨܳܐ ܠܰܢ ܡܶܢ ܓܺܗܰܢܳܐ܀

ܡܫܺܝܚܳܐ ܕܚܰܣܺܝ ܠܶܗ ܠܫܶܡܥܽܘܢ܇ ܘܰܠܗܳܝ ܐܰܢ̱ܬܬܳܐ ܚܰܛܳܝܬܳܐ܇ ܚܰܣܳܐ ܚܰܘܒ̈ܰܝܢ ܘܰܚܛܳܗ̈ܰܝܢ ܒܣܽܘܓܐܳܐ ܕܪ̈ܰܚܡܰܝܟ܀

ܡܫܺܝܚܳܐ ܕܶܐܫܬܰܘܕܺܝ ܘܶܐܡܰܪ܇ ܕܩܳܪܶܐ ܠܺܝ ܥܳܢܶܐ ܐ̱ܢܳܐ ܠܶܗ܇ ܥܢܺܝ ܘܰܫܡܰܥ ܩܳܠ ܒܳܥܽܘܬܰܢ܇ ܘܪܰܚܶܡܥܠܰܝܢ܀

ܫܽܘܒܚܳܐ ܠܝܰܡܳܐ ܕܰܚܢܳܢܳܐ܇ ܕܰܫܦܺܝܥ ܗܽܘ ܐܰܡܺܝܢܳܐܺܝܬ܇ ܕܟܽܠ ܕܒܳܥܶܐ ܡܶܢܶܗ ܢܳܣܶܒ ܒܰܥܓܰܠ ܫܶܐܠ̈ܳܬܶܗ܀

 

ܩܳܠܳܐ ܕܠܺܠܝܳܐ ܩܳܠܳܐ ܩܽܘܩܳܝܳܐ

ܗܘܺܝ ܠܺܝ ܠܡܺܐܢܳܐ ܡܠܶܐ ܫܰܝܢܳܐ ܒܰܪ ܐܰܠܳܗܳܐ܇ ܘܒܳܟ ܬܶܬܢܺܝܚ ܠܶܠܦܳܐ ܕܬܰܪܥܺܝܬܝ̱ ܕܰܒܚܽܘܒܳܐ ܪܳܕܝܳܐ܇ ܚܛܳܗ̈ܶܐ ܟܣܰܝ̈ܳܐ ܘܝܽܘܩܪ̈ܶܐ ܣܰܓܺܝ̈ܐܶܐ܇ ܛܥܺܝܢܳܐ ܒܨܶܒܝܳܢܝ̱ ܘܩܰܪܺܝܒܳܐ ܕܬܶܛܒܰܥܝ̱܇ ܒܩܰܝܣܳܐ ܕܰܨܠܺܝܒܳܟ ܐܶܚܕܶܬ ܓܰܘܣܳܐ ܦܳܪܽܘܩܝ̱܇ ܐܰܝܟ ܕܰܠܫܶܡܥܽܘܢ ܥܰܕܰܪܰܝܢܝ̱ ܘܚܽܘܣ ܘܶܐܬܪܰܚܰܡܥܠܰܝܢ ܗ ܘ ܗ܀

ܬܰܘ ܐܰܚ̈ܰܝ ܢܶܒܥܶܐ ܪ̈ܰܚܡܶܐ ܡܶܢ ܐܰܠܳܗܳܐ܇ ܥܰܕܠܳܐ ܡܶܬܬܚܶܕ ܠܶܗ ܬܰܪܥܳܐ܇ ܘܠܳܐ ܐ̱ܢܳܫ ܦܳܬܰܚ ܠܶܗ܇ ܢܰܥܒܰܪ ܟܽܠ ܐ̱ܢܳܫ ܥܰܘܠܳܐ ܡܶܢ ܠܶܒܶܗ܇ ܚܛܽܘܦܝܳܐ ܘܢܶܟܠܳܐ ܘܓܰܘܪܳܐ ܘܡܰܘܡ̈ܳܬܳܐ܇ ܡܶܐܟܰܠܩܰܪܨܳܐ ܩܳܛܽܘܠܳܐ ܘܣܳܗܕܽܘܬ ܫܽܘܩܪܳܐ܇ ܘܰܒܠܶܒܳܐ ܕܰܟܝܳܐ ܢܶܩܥܶܐ ܕܠܳܟ ܫܽܘܒܚܳܐ ܡܳܪܝܳܐ ܗ ܘ ܗ܀

 

ܡܰܕܪܳܫܳܐ ܩܳܠܳܐ ܐܳܘ ܥܽܘܡܪܳܐ ܕܙܰܒܢܳܐ܇ ܪ̈ܰܚܡܰܝܟ ܡܳܪܝ̱ ܢܶܗܘܽܘܢ ܣܢܺܐܓܪܳܐ ܠܕܰܘܝܽܘܬܝ̱ ܒܶܝܬ ܕܺܝܢܳܐ

 

ܐܳܘ ܢܰܦܫܝ̱ ܕܳܘܝܺܬܳܐ܇ ܥܕܰܡܳܐ ܠܶܐܡܰܬܝ̱ ܠܳܐ ܬܶܬܽܘܒܝ̱܇ ܕܩܰܪܶܒ ܠܶܗ ܕܺܝܢܳܐ܇ ܘܢܽܘܪܳܐ ܢܛܺܝܪܳܐ ܠܪ̈ܰܫܺܝܥܶܐ܀

ܓܰܪܓܰܢܝ̱ ܣܳܛܳܢܳܐ܇ ܘܰܫܒܳܢܝ̱ ܒܳܬܰܪ ܪ̈ܓܺܝܓܳܬܶܗ܇ ܘܚܰܝܒܰܢܝ̱ ܕܠܳܐ ܚܰܘܣܳܢ܇ ܘܳܝܠܺܝ ܡܶܟܺܝܠ ܡܽܘܢ ܐܶܥܒܶܕ܀

ܗܘܺܝ ܠܺܝ ܥܳܕܽܘܪܳܐ܇ ܡܳܪܳܐ ܕܪ̈ܰܚܡܰܘܗ̱ܝ ܣܰܓܺܝܐܺܝܢ܇ ܘܶܐܩܽܘܡ ܘܰܐܗܶܠ ܒܶܗ܇ ܘܶܐܦܣܽܘܩ ܟܽܠܗܶܝܢ ܪ̈ܓܺܝܓܳܬܶܗ܀

ܙܽܘܥܝ̱ ܘܰܕܚܰܠܝ̱ ܐܳܘ ܢܰܦܫܝ̱܇ ܘܰܒܳܟܳܝ ܘܶܐܡܰܪ ܩܕܳܡ ܡܳܪܶܟܝ̱܇ ܦܳܪܽܘܩܝ̱ ܚܽܘܣ ܥܠܰܝ܇ ܕܰܐܠܳܢܝ̱ ܕܢܶܦܠܶܬ ܒܒܺܝ̈ܫܳܬܳܐ܀

ܛܽܘܒܳܐ ܕܠܳܐ ܥܳܒܰܪ܇ ܡܛܰܝܰܒ ܬܰܡܳܢ ܠܩܰܕܺܝ̈ܫܶܐ܇ ܘܘܳܝܳܐ ܕܠܳܐ ܫܽܘܠܳܡ܇ ܡܛܰܝܰܒ ܠܟܽܠܗܽܘܢ ܚܰܛܳܝ̈ܶܐ܀

ܟܺܐܢܽܘܬܳܐ ܠܚܺܝܡܳܐ܇ ܚܰܘܒ̈ܰܝ ܣܰܓܺܝ ܡܙܺܝܥܺܝܢ ܠܺܝ܇ ܘܠܰܝܬ ܓܰܠܝܽܘܬ ܐܰܦ̈ܶܐ܇ ܕܰܐܦܺܝܣ ܘܶܐܒܥܶܐ ܚܠܳܦܰܝܗܽܘܢ܀

ܡܽܘܢ ܬܶܥܒܕܺܝܢ ܐܳܘ ܢܰܦܫܳܝ̱܇ ܕܡܰܘܬܳܐ ܩܳܐܶܡ ܩܳܪܶܐ ܠܶܟܝ̱܇ ܕܫܰܢܳܝ ܡܶܢ ܗܳܪܟܳܐ܇ ܢܽܘܪܳܐ ܢܛܺܝܪܳܐ ܠܪ̈ܰܫܺܝܥܶܐ܀

ܣܰܒܪܳܐ ܕܒܶܪ̈ܝܳܬܳܐ܇ ܦܰܨܳܢܝ ܡܶܢܶܗ ܕܫܽܘܢܳܩܳܐ܇ ܡܳܢܳܐ ܓܶܝܪ ܬܺܐܬܰܪ܇ ܟܰܕ ܐܶܢܳܐ ܒܶܗ ܐܶܫܬܰܢܰܩ܀

ܦܰܓܪܳܐ ܥܰܡ ܢܰܦܫܳܐ܇ ܒܰܙܒܰܢ ܥܽܘܢܕܳܢܳܐ ܒܳܟܶܝܢ܇ ܕܦܳܪܫܺܝܢ ܚܰܕ ܡܶܢ ܚܰܕ܇ ܘܠܰܝܬ ܐܰܬܪܳܐ ܕܰܢܬܽܘܒܽܘܢ ܒܶܗ܀

ܩܕܳܡܰܝܟ ܓܳܥܶܐ ܐ̱ܢܳܐ܇ ܐܶܬܕܰܟܪܰܝܢܝ̱ ܒܝܽܘܡ ܡܶܐܬܺܝܬܳܟ܇ ܘܚܽܘܪ ܒܺܝ ܕܟܰܪܝܳܐ ܠܺܝ ܥܰܠ ܕܰܐܪܓܶܙܬܳܟ ܒܰܥܒ̈ܳܕܰܝ܀

ܫܡܰܥ ܡܳܪܝ̱ ܒܳܥܽܘܬܶܗ܇ ܕܥܰܒܕܳܟ ܕܰܟܪܺܝܗ ܡܶܢ ܢܽܘܓܪܳܐ܇ ܘܚܽܘܢܰܝܢܝ̱ ܒܛܰܝܒܽܘܬܳܟ܇ ܘܠܳܐ ܬܕܽܘܢܰܝܢܝ̱ ܡܳܪܝ̱ ܟܺܐܢܽܘܬܳܟ܀

ܢܓܽܘܠܽܘܢ ܥܠܰܝ ܪ̈ܰܚܡܰܝܟ܇ ܕܩܶܢܛܳܐ ܪܰܒܳܐ ܡܣܰܪܶܕ ܠܺܝ܇ ܡܶܢܳܟ ܡܳܪܝ̱ ܕܣܰܓܺܝ܇ ܕܚܺܝܠ ܐܰܢ̱ܬ ܘܰܩܫܶܐ ܦܽܘܩܕܳܢܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܛܽܘܒܰܘܗ̱ܝ ܠܰܐܝܢܳܐ ܕܫܰܚܩܽܘܗ̱ܝ ܟܺܐܒ̈ܶܐ ܘܰܣܢܺܝܩܽܘܬܳܐ܇ ܘܠܳܐ ܚܙܳܐ ܗܳܪܟܳܐ ܓܽܘܡܪ̈ܶܐ ܕܢܽܘܪܳܐ ܕܰܟܪ̈ܺܝܟܳܢ ܠܺܝ܇ ܛܽܘܒܰܘܗ̱ܝ ܠܰܐܝܢܳܐ ܕܰܠܒܶܫ ܪ̈ܽܘܩܥܶܐ ܒܥܳܠܡܳܐ ܘܚܳܕܰܪ܇ ܕܒܽܘܨܳܐ ܕܠܶܒܫܿܶܬ ܐܰܥܺܝܪ ܥܠܰܝ ܫܰܠܗܶܒܺܝܬܳܐ܀

ܥܰܠ ܣܶܓܕ̈ܳܬܳܐ ܟܽܠ ܒܽܘܪ̈ܟܳܬܳܐ ܟܽܠ ܗܽܘ̈ܠܳܠܶܐ܇ ܡܶܬܬܚܺܝܒܺܝܢ ܠܳܟ ܡܳܪܝܳܐ ܡܪܰܚܶܡ ܥܰܠ ܚܰܛܳܝ̈ܶܐ܇ ܚܽܘܢ ܠܚܰܛܳܝ̈ܶܐ ܣܥܽܘܪ ܠܰܟܪ̈ܺܝܗܶܐ ܒܥܺܝ ܠܰܐܒܺܝܕ̈ܶܐ܇ ܕܢܶܪܥܰܡ ܫܽܘܒܚܳܟ ܡܶܢ ܟܽܠ ܦܽܘܡ̈ܺܝܢ ܠܳܟ ܬܶܫܒܽܘܚܬܳܐ܀

 

ܨܰܦܪܳܐ ܕܚܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܒܗܰܘ ܢܽܘܗܪܳܐ ܓܰܐܝܳܐ

ܬܶܥܽܘܠܝ̱ ܒܳܥܽܘܬܳܐ ܕܢܰܦܫܳܐ ܕܺܝܠܝ̱܇ ܡܟܰܬܰܡܬܳܐ ܘܬܶܣܰܒ ܡܶܢܳܟ܇ ܐܳܣܝܽܘܬܳܐ ܠܰܚܒܳܪ̈ܳܬܳܗܿ ܐܳܘ ܕܰܐܣܺܝ ܠܰܡܡܰܚܰܝ̈ܳܐ܀

ܢܶܗܘܶܐ ܩܳܠܳܐ ܕܒܳܥܽܘܬܰܢ܇ ܐܰܝܟ ܥܶܛܪܳܐ ܕܒܶܣܡ̈ܶܐ ܩܕܳܡܰܝܟ܇ ܘܬܶܬܪܰܥܶܐ ܒܶܗ ܡܳܪܽܘܬܳܟ܇ ܘܰܫܒܽܘܩ ܚܰܘܒܰܝ̈ܢ ܒܰܚܢܳܢܳܟ܀

ܨܠܺܝ ܡܳܪܝܳܐ ܐܶܕܢܳܟ ܠܰܦܝܳܣܳܐ܇ ܕܰܫܡܰܥ ܩܳܠܳܐ ܕܒܳܥܽܘܬܰܢ܇ ܛܳܒܳܐ ܕܠܳܐ ܟܳܠܶܐ ܥܽܘܕܪ̈ܳܢܰܘܗ̱ܝ܇ ܡܶܢ ܚܰܛܳܝ̈ܶܐ ܕܩܳܪܶܝܢ ܠܶܗ܀

ܢܽܘܗܪܳܐ ܫܰܪܺܝܪܳܐ ܐܶܬܬܰܚܬܺܝ܇ ܘܰܠܒܶܫ ܦܰܓܪܶܗ ܕܳܐܕܳܡ܇ ܘܡܶܛܽܠ ܕܰܢܦܰܠ ܗܘܳܐ ܒܰܚܛܺܝܬܳܐ܇ ܩܳܡ ܙܰܟܝܶܗ ܗܘܳܐ ܒܰܐܓܽܘܢܳܐ܀

ܬܰܘܕܺܝܬܳܐ ܠܡܰܠܟܳܐ ܫܡܰܝܳܢܳܐ ܕܶܐܬܬܰܚܬܺܝ ܘܨܳܡ ܥܰܠ ܐܰܦܰܝ̈ܢ ܘܰܐܠܶܦ ܠܰܢ ܨܰܘܡܳܐ ܕܦܽܘܪܫܳܢܳܐ ܕܒܶܗ ܗܽܘ ܢܚܰܘܰܪ ܟܽܘܬܡ̈ܳܬܰܢ܀

 

ܕܰܐܠܳܗܝ̱ ܐܰܠܳܗܝ̱ ܩܳܠܳܐ ܒܬܽܘܠܬܳܐ ܩܰܕܺܝܫܬܳܐ

ܦܬܰܚ ܠܰܢ ܬܪܰܥ ܪ̈ܰܚܡܰܝܟ܇ ܡܳܪܰܢ ܡܠܶܐ ܪ̈ܰܚܡܶܐ܇ ܘܰܐܳܘܫܶܛ ܠܰܢ ܐܺܝܕܳܟ ܛܳܒܳܐ ܘܒܰܣܺܝܡܳܐ܀

ܩܰܒܶܠ ܛܰܝܒܽܘܬܳܟ܇ ܒܳܥܽܘܬܝ̱ ܠܬܰܪܥܽܘܬܳܟ܇ ܗܰܒܠܺܝ ܒܰܚܢܳܢܳܟ ܚܰܝ̈ܶܐ ܒܡܶܐܬܽܝܬܳܟ܀

ܚܰܘܒ̈ܰܝ ܗ̱ܘܰܘ ܫܽܘܪܳܐ܇ ܒܶܝܬ ܠܺܝ ܠܛܰܝܒܽܘܬܳܟ܇ ܒܳܟ ܢܶܬܪܰܥ ܘܶܐܥܒܰܪ ܠܰܐܬܪܳܐ ܕܚܰܕܘ̈ܳܬܳܐ܀

ܒܪܺܝܟ ܐܰܢ̱ܬ ܡܶܢ ܥܽܘܡܩܳܐ܇ ܣܓܺܝܕ ܐ̱ܰܢܬ ܡܶܢ ܟܽܠܳܐ܇ ܫܒܺܝܚ ܐܰܢ̱ܬ ܡܶܢ ܪܰܘܡܳܐ ܕܰܐܢ̱ܬ ܗܽܘ ܒܪܰܝܬ ܟܽܠܳܐ܀

ܒܰܥܒܳܕ̈ܶܐ ܛܳܒ̈ܶܐ܇ ܢܪܰܥܺܝܘܗ̱ܝ ܠܰܐܠܳܗܳܐ܇ ܕܰܒܚܽܘܒܶܗ ܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܘܳܝܠܰܢ ܕܰܚܛܰܝܢܰܢ܇ ܘܰܐܪܓܶܙܢܰܢ ܠܰܫܡܳܟ܇ ܘܰܒܝܰܕ ܣܰܟܠܽܘܬܰܢ ܥܶܫܢܶܬ݀ ܡܰܪܕܽܘܬܳܢ܀

ܫܽܘܒܚܳܐ ܠܰܡܫܺܝܚܳܐ ܕܰܐܠܶܦ ܠܰܢ ܨܰܘܡܳܐ ܕܒܶܗ ܢܪܰܥܶܐ ܠܰܫܡܶܗ ܕܣܰܓܺܝ ܐܰܪܓܶܙܢܳܝܗ̱ܝ܀

 

ܕܰܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܝܰܡܳܐ ܕܶܐܬܦܰܠܰܓ

ܠܰܡܫܺܝܚܳܐ ܕܰܒܝܰܕ ܨܰܘܡܳܐ ܕܨܳܡ ܥܰܠ ܐܰܦ̈ܰܝܢ܇ ܙܟܳܝܗ̱ܝ ܠܳܐܟܶܠܩܰܪܨܳܐ ܕܰܐܦܩܰܢ ܡܶܢ ܦܰܪܕܰܝܣܳܐ܇ ܘܝܰܗܒ ܠܰܢ ܛܽܘܦܣܳܐ ܒܰܩܢܽܘܡܶܗ܇ ܢܶܬܟܰܬܰܫ ܥܰܡ ܣܳܛܳܢܳܐ܇ ܘܰܒܝܰܕ ܨܰܘܡܳܐ ܘܰܨܠܽܘܬܳܐ ܢܶܙܟܶܐ ܠܚܰܝܠܶܗ܇ ܒܚܰܝܠܶܗ ܪܰܒܳܐ ܕܰܡܫܺܝܚܳܐ ܡܶܛܽܠ ܕܰܡܫܰܒܚܳܐ܀

ܒܝܰܕ ܨܰܘܡܳܐ ܕܨܳܡ ܗܘܳܐ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܐܶܙܕܰܗܺܝ ܗܘܳܐ ܦܰܪܨܽܘܦܶܗ ܐܰܝܟ ܡܰܠܰܐܟ̈ܶܐ܇ ܘܡܰܠܶܠ ܥܰܡܶܗ ܐܰܠܳܗܳܐ܇ ܘܝܰܗܒ ܠܶܗ ܠܽܘ̈ܚܶܐ ܕܢܳܡܽܘܣܳܐ܇ ܘܺܐܠܺܝܳܐ ܒܓܺܝܓܠܳܐ ܕܢܽܘܪܳܐ ܣܠܶܩ ܠܰܫܡܰܝܳܐ܇ ܒܚܰܝܠܶܗ ܪܰܒܳܐ ܕܰܐܠܳܗܳܐ܇ ܡܶܛܽܠ ܕܰܡܫܰܒܚܳܐ܀

ܣܳܥܽܘܪܳܐ ܕܟܽܠ ܛܳܒ̈ܳܬܐ ܐܺܝܬܰܘܗ̱ܝ ܨܰܘܡܳܐ܇ ܐܳܣܝܳܐ ܕܰܥܨܰܒ ܟܽܘܪ̈ܗܳܢܶܐ ܘܟܺܐܒ̈ܶܐ ܡܰܚܠܶܡ܇ ܘܰܠܫܺܐܕ̈ܶܐ ܛܳܪܶܕ ܘܪܳܕܶܦ܇ ܡܶܢܟܽܠ ܐܰܝܢܳܐ ܕܡܰܐܚܶܒ ܠܶܗ܇ ܘܝܳܗܶܒ ܠܰܢ ܫܽܘܒܩܳܢ ܚܰܘ̈ܒܶܐ ܘܚܰܝ̈ܶܐ ܚܰܕ̈ܬܶܐ܇ ܘܡܰܠܟܽܘܬܳܐ ܗܳܝ ܕܰܫܡܰܝܳܐ ܡܶܛܽܠ܀

ܬܰܘ ܢܶܬܟܰܫܰܪ ܚܰܒܺܝ̈ܒܰܝ ܒܨܰܘܡܳܐ ܙܰܗܝܳܐ܇ ܘܒܰܨܠܰܘ̈ܳܬܳܐ ܕܦܽܘܪܫܳܢܳܐ ܩܕܳܡ ܐܰܠܳܗܳܐ܇ ܘܠܳܐ ܢܨܽܘܡ ܨܰܘܡܳܐ ܕܰܡܠܶܐ ܢܶܟܠܳܐ܇ ܐܰܝܟ ܙܺܐܦܳܢ̈ܶܐ ܕܺܐܝܙܪܳܥܺܝܠ܇ ܐܶܠܳܐ ܢܨܽܘܡ ܨܰܘܡܳܐ ܕܰܡܠܶܐ ܩܰܕܺܝܫܽܘܬܳܐ܇ ܕܢܶܫܟܰܚ ܪ̈ܰܚܡܶܐ ܥܰܡ ܚܰܬܢܳܐ܇ ܡܶܛܽܠ܀

ܐܰܪܒܥܺܝܢ ܝܰܘ̈ܡܺܝܢ ܨܳܡ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܘܰܚܙܳܐ ܗܘܳܐ ܐ̱ܪܳܙ ܡܽܘܟܳܟܶܗ ܕܒܰܪ ܐܰܠܳܗܳܐ܇ ܢܽܘܪܳܐ ܕܫܳܪܝܳܐ ܒܓܰܘ ܣܰܢܝܳܐ܇ ܘܣܰܢܝܳܐ ܡܶܢܳܗܿ ܠܳܐ ܝܺܩܶܕ܇ ܘܶܐܙܕܰܗܺܝ ܡܶܫܟܳܐ ܕܰܐܦ̈ܰܘܗ̱ܝ ܒܰܕܡܽܘܬ ܫܶܡܫܳܐ܇ ܘܰܚܙܳܐ ܠܡܰܠܟܳܐ ܕܬܶܫܒܽܘܚܬܳܐ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܗܳܐ ܕܢܰܚ ܠܶܗ ܢܽܘܗܪܳܐ

ܦܐܶܐ ܘܰܪܓܺܝܓ ܨܰܘܡܳܐ ܩܰܕܺܝܫܳܐ܇ ܘܣܰܓܺܝ ܪܚܺܝܡ ܥܰܠ ܐܰܠܳܗܳܐ܇ ܡܳܕܶܝܢ ܐܰܚ̈ܰܝ ܬܰܘ ܢܶܬܟܰܫܰܪ ܒܶܗ܇ ܙܰܗܝܳܐܺܝܬ܀

ܐܳܦ ܡܽܘܫܶܐ ܒܨܰܘܡܳܐ ܐܶܙܕܰܗܺܝ ܦܰܪܨܽܘܦܶܗ ܒܛܽܘܪܳܐ ܕܣܺܝܢܰܝ܇ ܘܠܽܘܚܶܐ ܕܢܳܡܽܘܣܳܐ ܩܰܒܶܠ ܦܽܘܩܕܳܢ̈ܶܐ ܠܰܟܢܽܘܫܬܳܐ܀

ܒܨܰܘܡܳܐ ܐܰܚ̈ܰܝ ܢܶܬܟܰܫܰܪ܇ ܘܥܰܡ ܕܶܡܥ̈ܶܐ ܕܰܬܝܳܒܽܘܬܳܐ ܢܶܓܥܶܐ ܘܢܺܐܡܰܪ ܕܳܐܳܘ ܡܳܪܝܳܐ ܪܰܚܶܡܥܠܰܝܢ܀

ܡܫܺܝܚܳܐ ܡܳܪܰܢ ܕܰܒܚܽܘܒܳܟ ܨܡܳܬ ܘܶܐܬܟܰܬܰܫܬ ܚܠܳܦ ܟܽܠܰܢ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ ܘܪܰܚܶܡܥܠܰܝܢ܀

ܡܫܺܝܚܳܐ ܐܰܠܳܗܳܐ ܕܩܰܒܶܠ܇ ܨܰܘܡܳܐ ܕܟܺܐܢ̈ܶܐ ܘܙܰܕܺܝ̈ܩܶܐ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ ܪܰܚܶܡܥܠܰܝܢ܀

ܫܽܘܒܚܳܐ ܠܳܟ ܡܰܠܟܰܢ ܙܰܟܳܝܳܐ܇ ܕܨܳܡܬ ܘܫܰܘܙܶܒܬܳܢ ܡܶܢ ܒܺܝܫܳܐ܇ ܘܰܒܪ̈ܰܚܡܰܝܟ ܡܳܪܝܳܐ ܚܰܪܰܪ ܠܢܰܦܫ̈ܳܬܳܐ ܕܟܽܠܰܢ܇ ܪܰܚܶܡܥܠܰܝܢ܀

 

ܩܳܠܳܐ ܕܨܰܦܪܳܐ ܩܳܠܳܐ ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ

ܡܦܺܝܣܳܐ ܠܳܟ ܥܺܕܰܬ ܩܽܘܕܫܳܐ܇ ܒܪܳܐ ܕܒܰܙܩܺܝܦܶܗ ܪܰܡܪܶܡ ܥܳܠܡܳܐ܇ ܕܢܶܫܠܽܘܢ ܣܶܕ̈ܩܶܐ ܘܚܶܪ̈ܝܳܢܶܐ܇ ܘܽܐܳܘܠܨܳܢ̈ܶܐ ܕܚܰܕܪܽܘܗܿ ܠܰܐܪܥܳܐ܇ ܗܰܒܠܰܢ ܫܰܝܢܳܐ ܘܰܫܠܳܡܳܐ܇ ܕܢܶܫܠܽܘܢ ܡܶܢܰܢ ܪ̈ܳܕܽܘܦܰܝܢ܇ ܕܥܶܫܢܰܬ݀ ܡܰܪܕܽܘܬܰܢ܇ ܪܕܺܝܢ ܒܪ̈ܰܚܡܶܐ ܩܢܺܝܢ ܒܰܚܢܳܢܳܟ܀

ܒܪܺܝܟ ܗܽܘ ܓܰܙܶܗ ܕܰܚܢܳܢܳܟ܇ ܐܰܠܳܗܳܐ ܒܳܪܽܘܝܳܐ ܕܥܳܠܡ̈ܶܐ܇ ܕܰܠܥܶܠ ܒܪܰܘܡܳܐ ܡܶܙܕܰܝܰܚ܇ ܡܶܢ ܓܽܘ̈ܕܶܐ ܕܢܽܘܪܳܐ ܘܪܽܘܚܳܐ܇ ܘܒܶܝܬ ܐܰܪ̈ܥܳܢܶܐ ܡܫܰܡܫܺܝܢ ܠܳܟ܇ ܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ܇ ܩܰܒܶܠ ܬܶܫܡܶܫܬܰܢ܇ ܡܫܺܝܚܳܐ ܕܶܐܬܳܐ ܠܦܽܘܪܩܳܢܰܢ܀

 

ܐ̱ܚܪܺܢܳܐ ܒܩܳܠܳܐ ܠܳܟ ܗܽܘ ܡܳܪܝܳܐ ܡܩܰܪܒܺܝܢܰܢ

ܪܰܒ ܗܽܘ ܨܰܘܡܳܐ ܘܰܡܝܰܬܰܪ ܡܶܢܟܽܠ ܡܶܕܶܡ܇ ܪܚܺܝܡܳܐ ܨܠܽܘܬܳܐ ܘܰܡܩܰܒܠܳܐ ܩܕܳܡ ܐܰܠܳܗܳܐ܇ ܕܗܺܝ ܐܺܝܬܶܝܗܿ ܒܰܫܪܳܪܳܐ ܙܰܝܢܳܐ ܕܦܽܘܪܩܳܢܳܐ܇ ܛܽܘܒܳܐ ܠܟܺܐܢ̈ܶܐ ܘܙܰܕܺܝ̈ܩܶܐ܇ ܕܰܛܥܶܢܘ̱ ܝܽܘܩܪܶܗ ܕܝܰܘܡܳܐ ܐܳܦ ܚܽܘܡܶܗ܇ ܘܰܫܗܰܪܘ̱ ܒܰܐܓܽܘܢܳܐ ܘܰܢܣܰܒܘ̱ ܡܰܠܟܽܘܬܳܐ܇ ܘܚܰܝ̈ܶܐ ܚܰܕ̈ܬܶܐ ܘܓܢܽܘܢܳܐ ܕܢܽܘܗܪܳܐ܇ ܘܰܚܢܰܢ ܢܨܽܘܡ ܕܰܟܝܳܐܺܝܬ܇ ܕܢܰܫܘܶܝܢ ܡܳܪܰܢ ܕܥܰܡܗܽܘܢ ܢܶܚܕܶܐ ܒܡܰܠܟܽܘܬܳܐ܀

ܦܳܪܽܘܫܳܐ ܐܰܪܟܶܢ ܐܶܕܢܳܟ ܨܶܝܕ ܝܽܘܠܦܳܢܳܐ܇ ܘܨܽܘܬ ܘܰܫܡܰܥܳܝܗ̱ܝ ܠܰܢܒܺܝܳܐ ܡܽܘܢ ܡܰܠܶܦ ܠܳܟ܇ ܠܳܐ ܬܨܽܘܡ ܠܰܡ ܡܶܢ ܠܰܚܡܳܐ ܘܡܶܢ ܡܰܝ̈ܳܐ ܒܰܠܚܽܘܕ܇ ܠܰܘ ܓܶܝܪ ܨܰܘܡܳܐ ܕܡܶܢ ܠܰܚܡܳܐ ܪܳܚܶܡ ܡܳܪܝܳܐ܇ ܐܶܠܳܐ ܡܶܢ ܥܰܘܠܳܐ ܥܒܰܪ ܡܶܢ ܒܺܝܫ̈ܳܬܳܐ܇ ܘܰܥܒܶܕ ܛܳܒ̈ܳܬܳܐ܇ ܘܗܳܢܳܐ ܐܺܝܬܰܘܗ̱ܝ ܨܰܘܡܳܐ ܩܰܕܺܝܫܳܐ܇ ܩܰܒܶܠ ܡܳܪܰܢ ܬܶܫܡܶܫܬܰܢ ܘܰܨܠ̈ܰܘܳܬܰܢ܇ ܘܦܰܢܳܐ ܒܪ̈ܰܚܡܰܝܟ ܫܶܐܠ̈ܳܬܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܶܢ ܓܺܗܰܢܳܐ ܢܗܰܡ ܥܰܬܺܝܪܳܐ ܒܶܐܒܠܳܐ ܪܰܒܳܐ܇ ܟܰܕ ܝܳܗܶܒ ܗܘܳܐ ܘܳܝܳܐ ܠܥܽܘܬܪܶܗ ܟܡܳܐ ܐܰܛܥܺܝ ܒܺܝ܇ ܐܰܝܟܳܐ ܐܶܢܽܘܢ ܐܰܚ̈ܶܐ ܘܪ̈ܳܚܡܶܐ ܐܳܦ ܚܰܒܺܝܒ̈ܶܐ܇ ܕܰܢܦܰܨܽܘܢܳܝܗ̱ܝ ܐܶܢܗܽܘ ܕܡܰܨܝܳܐ ܡܶܢ ܓܺܗܰܢܳܐ܀

ܫܽܘܒܚܳܐ ܠܰܐܒܳܐ ܘܣܶܓܕܬܳܐ ܠܰܒܪܳܐ ܘܬܰܘܕܺܝ ܠܪܽܘܚܳܐ܇ ܚܰܕ ܐܰܠܳܗܳܐ ܕܠܶܗ ܬܶܫܒܽܘܚܬܳܐ ܘܰܥܠܰܝܢ ܪ̈ܰܚܡܰܘܗ̱ܝ܇ ܛܳܒܳܐ ܕܫܰܠܺܝܛ ܥܰܠ ܡܰܠܟܽܘܬܳܐ ܘܥܰܠ ܓܺܗܰܢܳܐ܇ ܒܳܟ ܢܶܫܬܰܘܙܰܒ ܡܶܢ ܓܺܗܰܢܳܐ܇ ܟܽܠܰܢ ܥܰܒܕܰܝ̈ܟ܀

 

ܕܰܬܠܳܬܫܳܥܺܝ̈ܢ܇ ܒܩܳܠܳܐ ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܟܰܕ ܣܠܶܩ ܗܘܳܐ ܡܽܘܫܶܐ ܠܛܽܘܪ ܣܺܝܢܰܝ܇ ܐܰܝܟ ܕܶܐܬܦܩܶܕ ܡܶܢ ܡܳܪܶܗ܇ ܐܶܡܰܪ ܠܶܗ ܕܶܐܬܩܰܕܰܫ ܡܽܘܫܶܐ܇ ܒܝܰܕ ܨܰܘܡܳܐ ܕܰܐܪܒܥܺܝܢ ܝܰܘ̈ܡܺܝܢ ܥܽܘܠ ܒܰܥܢܳܢܳܐ ܘܶܐܚܰܘܝܳܟ܇ ܘܙܺܝܘܳܐ ܘܫܽܘܒܚܳܐ ܕܰܐܠܳܗܽܘܬܝ̱܇ ܘܚܽܘܬ ܐܶܡܰܪ ܠܥܰܡܳܐ ܣܰܟܠܳܐ܇ ܕܪܰܒ ܗܽܘ ܡܳܪܝܳܐ ܐܰܠܳܗܰܢ܇ ܘܟܽܠܗܶܝܢ ܐܽܘܪ̈ܚܳܬܶܗ ܕܺܝܢܳܐ܀

ܢܶܒܥܺܝܘܗ̱ܝ ܠܡܳܪܰܢ ܫܽܘܒܩܳܢܳܐ܇ ܘܢܶܫܰܐܠ ܡܶܢܶܗ ܡܰܠܟܽܘܬܳܐ܇ ܕܰܐܠܶܦ ܠܰܢ ܒܰܣܒܰܪܬܶܗ ܘܶܐܡܰܪ܇ ܕܰܩܪܰܘ ܘܶܐܢܳܐ ܥܳܢܶܐ ܐ̱ܢܳܐ܇ ܘܩܽܘܫܽܘܢ ܘܶܐܢܳܐ ܦܳܬܰܚ ܐ̱ܢܳܐ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ܇ ܘܚܰܣܳܐ ܠܰܢ ܟܽܠ ܕܰܚܛܰܝܢܰܢ܇ ܘܠܳܐ ܬܶܟܠܶܐ ܠܰܢ ܫܶܐܠ̈ܳܬܰܢ܇ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܟܡܳܐ ܡܰܝ̈ܳܐ ܐܺܝܬ ܒܶܗ ܒܝܰܡܳܐ܇ ܠܳܐ ܡܰܪܰܘܚ ܠܰܕܪܳܕܶܐ ܒܶܗ܇ ܡܰܢ ܕܰܒܡܳܐܢܶܗ ܠܳܐ ܢܳܣܶܒ ܒܓܰܘ ܝܰܡܳܐ ܨܶܗܝܶܐ ܦܳܐܶܫ܇ ܗܳܟܰܢܳܐ ܟܽܠ ܕܠܳܐ ܦܳܠܰܚ܇ ܛܳܒ̈ܳܬܳܐ ܠܥܳܠܰܡ ܐܳܒܶܕ܀

ܐܰܝܟ ܛܰܪ̈ܦܶܐ ܕܡܶܢ ܐܺܝܠܳܢ̈ܶܐ܇ ܢܳܬܪܺܝܢ ܐ̱ܢܳܫ̈ܳܐ ܡܶܢ ܚܰܝ̈ܶܐ܇ ܘܟܽܠ ܐܶܡܰܬܝ̱ ܕܢܳܫܶܒ ܡܰܘܬܳܐ܇ ܠܳܐ ܬܟܺܝܠ ܐܰܢ̱ܬ ܕܡܶܫܬܰܘܙܰܒ ܐܰܢ̱ܬ܇ ܒܥܺܝ ܢܰܦܫܳܟ ܒܰܬܝܳܒܽܘܬܳܐ ܕܬܺܐܚܶܐ ܚܰܝ̈ܶܐ ܕܰܠܥܳܠܰܡ܀

 

ܕܦܶܠܓܶܗ ܕܝܰܘܡܳܐ ܩܳܠܳܐ ܩܽܘܩܳܝܳܐ

ܐܶܠܽܘܠܳܐ ܕܰܩܫܶܐ ܠܶܒܰܢ ܡܶܢ ܛܰܪܳܢܳܐ܇ ܠܳܐ ܫܠܳܐ ܦܽܘܡܰܢ ܡܶܢ ܒܶܟܝܳܐ ܘܥܰܝܢܰܝ̈ܢ ܡܶܢ ܕܶܡܥ̈ܶܐ܇ ܕܙܰܒ̈ܢܶܐ ܐܶܢܽܘܢ ܕܡܰܠܝ̈ܳܢ ܥܳܩ̈ܳܬܳܐ܇ ܘܠܶܒܳܐ ܕܺܝܠܰܢ ܛܒܺܝܥ ܗܘܳܐ ܒܰܚܛܺܝܬܳܐ܇ ܬܰܘ ܢܪܺܝܡ ܥܰܝܢ̈ܶܐ ܕܠܶܒܰܢ ܠܘܳܬ ܐܰܠܳܗܳܐ܇ ܘܢܶܓܥܶܐ ܒܰܚܢܰܓܬܳܐ ܘܢܺܐܡܰܪ܇ ܕܚܽܘܣ ܘܶܐܬܪܰܚܰܡܥܠܰܝܢ ܗ ܘ ܗ܀

ܠܚ̈ܰܛܳܝܶܐ ܘܰܠܬܰܝ̈ܳܒܶܐ ܘܠܛܳܒ̈ܶܐ ܘܒܺܝ̈ܫܶܐ܇ ܦܬܺܝܚ ܗܽܘ ܬܰܪܥܶܗ ܕܰܐܠܳܗܳܐ ܐܺܝܡܳܡܳܐ ܘܠܺܠܝܳܐ܇ ܡܶܢ ܚܰܛܳܝ̈ܶܐ ܣܳܗܕܳܐ ܚܰܛܳܝܬܳܐ܇ ܘܡܶܢ ܬܰܝ̈ܳܒܶܐ ܫܶܡܥܽܘܢ ܕܰܟܦܰܪ ܒܳܟ܇ ܘܡܶܢ ܛܳܒ̈ܶܐ ܣܳܗܕ̈ܶܐ ܒܪ̈ܺܝܟܶܐ ܕܰܐܳܘܕܺܝܘ ܒܳܟ ܡܳܪܝܳܐ܇ ܘܡܶܢ ܒܺܝ̈ܫܶܐ ܗܰܘ ܓܰܝܳܣܳܐ ܕܡܰܠܟܽܘܬܳܐ ܝܺܪܶܬ ܗ ܘ ܗ܀

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܠܳܐ ܐ̱ܢܳܫ ܢܰܪܦܶܐ ܬܰܪܥܳܐ ܪܰܒܳܐ ܕܰܬܝܳܒܽܘܬܳܐ܇ ܕܳܐܦ ܚܰܛܳܝܬܳܐ ܟܰܕ ܢܶܩܫܰܬ݀ ܒܶܗ ܚܢܳܢܳܐ ܢܶܣܒܰܬ݀܇ ܐܰܝܢܳܐ ܕܚܳܛܶܐ ܠܰܦܣܳܩ ܣܰܒܪܳܐ ܠܳܐ ܢܶܬܩܰܪܰܒ܇ ܐܶܠܳܐ ܢܚܰܨܶܦ ܐܰܝܟ ܙܳܢܺܝܬܳܐ ܘܡܶܬܩܰܒܰܠ ܗܽܘ܀

ܐܶܢ ܐ̱ܢܳܫ ܢܶܚܛܶܐ ܘܢܶܗܦܽܘܟ ܢܶܒܥܶܐ ܡܶܬܩܰܒܰܠ ܗܽܘ܇ ܕܠܳܐ ܐܺܝܬ ܐܶܡܰܬܝ̱ ܕܰܐܚܺܝܕ ܬܰܪܥܳܐ ܕܰܬܝܳܒܽܘܬܳܐ܇ ܫܒܰܥ ܥܰܠ ܫܰܒ̈ܥܺܝܢ ܐܶܢ ܢܰܣܟܶܠ ܒܳܟ ܐܰܚܽܘܟ ܫܒܽܘܩ ܠܶܗ܇ ܟܡܳܐ ܝܰܬܺܝܪܳܐ ܗܰܘ ܡܪܰܚܡܳܢܳܐ ܠܰܕܒܳܥܶܝܢ ܠܶܗ܀

 

ܕܰܬܫܰܥܫ̈ܳܥܺܝܢ ܒܩܳܠܳܐ ܥܰܡ ܕܟܽܠܗܽܘܢ ܩܰܕܺܝ̈ܫܰܝܟ

ܪܺܝܫܺܝܬܳܐ ܕܨܰܘܡܳܐ ܬܶܗܘܶܐ ܥܶܛܪܳܐ ܕܒܶܣ̈ܡܶܐ ܠܰܐܠܳܗܳܐ܇ ܨܠܽܘܬܳܐ ܕܡܰܠܝܳܐ ܚܽܘܣܳܝܳܐ܇ ܘܒܳܥܽܘܬܳܐ ܘܚܰܫܳܐ ܘܕܶܡܥ̈ܶܐ ܬܩܰܪܶܒܝ̱ ܥܺܕܬܳܐ ܥܰܡ ܝܰܠܕܶܝ̈ܗܿ ܩܽܘܪܒܳܢܳܐ ܠܰܡܠܶܟ ܡܰܠ̈ܟܶܐ܀

ܒܨܰܘܡܳܐ ܢܰܨܰܚܘ̱ ܙܶܕܩ̈ܳܬܗܽܘܢ܇ ܕܢܶܬܒܰܪܰܟ ܩܰܝܛܳܐ ܒܦܺܐܪ̈ܰܘܗ̱ܝ܇ ܘܢܶܚܕܶܐ ܠܶܒܳܐ ܕܦܰܠ̈ܳܚܶܐ܇ ܒܨܰܘܡܳܐ ܙܶܕܩ̈ܳܬܳܐ ܢܶܙܪܽܘܥ܇ ܕܢܰܕܪܶܟ ܐܶܕܪܳܐ ܠܡܰܥܣܰܪܬܳܐ܇ ܘܰܐܳܘܨܪ̈ܶܐ ܢܶܬܠܽܘܢ ܒܽܘܪ̈ܟܳܬܳܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܒܨܰܘܡܳܐ ܡܶܬܢܰܛܪ̈ܳܢ ܟܽܠܗܽܘܢ ܥܺܕ̈ܳܬܳܐ܇ ܘܨܰܘܡܳܐ ܩܰܕܺܝܫܳܐ܇ ܬܽܘܩܦܰܐܗܘ ܕܕܰܝܪ̈ܳܬܳܐ܇ ܨܰܘܡܳܐ ܩܰܕܺܝܫܳܐ܇ ܟܠܺܝܠܰܐܗ̱ܘ ܕܢܰܨܺܝܚ̈ܶܐ܀

ܡܽܘܫܶܐ ܒܝܰܕ ܨܰܘܡܳܐ܇ ܢܳܡܽܘܣܳܐ ܩܰܒܶܠ܇ ܠܥܰܡܳܐ ܛܳܠܽܘܡܳܐ܇ ܣܰܟܠܳܐ ܘܰܥܘܺܝܪܳܐ܇ ܕܰܠܡܳܪܶܗ ܒܥܶܓܠܳܐ܇ ܚܰܠܶܦ ܘܰܣܓܶܕ ܠܶܗ܀

 

ܫܠܶܡ

 

ܬܽܘܒ ܕܪܰܡܫܳܐ ܕܰܥܪܽܘܒܬܳܐ ܕܰܬܠܳܬܳܐ ܕܨܰܘܡܳܐ

ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܗܰܘ ܕܰܗܘܳܐ ܒܽܘܟܪܳܐ

ܗܰܘ ܕܰܕܪܰܫ ܐܽܘܪܚܳܐ ܠܢܰܨܺܝ̈ܚܶܐ܇ ܨܰܝܳܡ̈ܶܐ ܢܶܪܕܽܘܢ ܠܰܥܕܶܝܢ ܪܰܚܶܡܥܠܰܝ܀

ܗܰܘ ܕܩܰܒܶܠ ܨܰܘܡܳܐ ܐܰܝܟ ܣܢܺܝܩܳܐ܇ ܕܠܰܢ ܣܢܺܝ̈ܩܶܐ ܢܓܰܢ̱ܒܰܪ ܒܪ̈ܰܚܡܰܘܗ̱ܝ ܪܰܚܶܡܥܠܰܝܢ܀

ܗܰܘ ܕܰܢܦܰܩ ܠܕܰܒܪܳܐ ܘܨܳܡ ܚܠܳܦܰܝܢ܇ ܘܰܣܚܰܦ ܠܰܡܶܢܰܣܝܳܢܳܐ ܒܺܝܫܳܐ ܪܰܚܶܡܥܠܰܝܢ܀

ܗܰܘ ܕܦܰܨܺܝ ܠܰܬܠܳܬܳܐ ܛܠܳܝ̈ܶܐ܇ ܡܶܢ ܐܰܬܽܘܢܳܐ܇ ܕܒܳܒܠܳܝ̈ܶܐ܇ ܪܰܚܶܡܥܠܰܝܢ܀

ܫܽܘܒܚܳܐ ܠܳܟ ܡܫܺܝܚܳܐ ܕܨܳܡܬ ܚܠܳܦܰܝܢ܇ ܘܰܦܪܰܥܬ ܐ̱ܫܛܳܪ ܚܰܘܒ̈ܳܬܰܢ ܪܰܚܶܡܥܠܰܝܢ܀

 

ܕܡܳܪܝܳܐ ܩܪܺܝܬܳܟ

ܡܳܪܝܳܐ ܩܪܺܝܬܳܟ ܡܶܢ ܟܽܠܶܗ ܠܶܒܝ̱ ܫܡܰܥܰܝܢܝ̱ ܘܰܥܢܺܝܢܝ̱܇ ܘܚܽܘܣ ܘܶܐܬܪܰܚܰܡܥܠܰܝܢ܀

ܡܳܪܝܳܐ ܩܪܳܝܗ̱ܝ ܗܘܳܐ ܠܢܰܦܬܰܚ ܙܰܕܺܝܩܳܐ ܘܰܦܪܰܩ ܠܥܰܡܳܐ ܡܶܢ ܥܰܡܽܘܢܳܝ̈ܶܐ܀

ܡܳܪܝܳܐ ܩܪܳܝܗ̱ܝ ܗܘܳܐ ܠܢܽܘܚ ܡܶܢ ܛܰܘܦܳܢܳܐ܇ ܘܦܰܨܝܶܗ ܘܠܰܒܢܰܘ̈ܗ̱ܝ ܡܶܢ ܝܰܕ ܚܽܘܒܳܠܳܐ܀

ܡܳܪܝܳܐ ܩܪܳܝܗ̱ܝ ܗܘܳܐ ܐܳܣܳܐ ܙܰܕܺܝܩܳܐ܇ ܘܡܶܢ ܙܳܪܳܚ ܠܺܝܛܳܐ܇ ܦܰܠܛܶܗܠܽܐܘܪܺܫܠܶܡ܀

ܡܳܪܝܳܐ ܩܪܳܝܗ̱ܝ ܗܘܳܐ ܚܶܙܰܩܝܳܐ ܡܰܠܟܳܐ܇ ܘܡܶܢ ܥܰܘܳܠܳܐ܇ ܣܰܢܚܶܪܺܝܒ ܫܰܘܙܒܶܗ܀

ܡܳܪܝܳܐ ܩܳܪܝܳܐ ܠܳܟ ܥܺܕܬܳܐ܇ ܫܡܰܥ ܠܰܦܝܳܣܳܗܿ ܘܰܥܒܶܕ ܥܠܶܝܗܿ ܪ̈ܰܚܡܶܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܬܗܰܪ ܓܰܒܪܺܐܶܝܠ

ܡܽܘܫܶܐ ܒܨܰܘܡܳܐ܇ ܐܶܙܕܰܗܺܝ ܗܘܳܐ ܦܰܪܨܽܘܦܶܗ ܘܡܰܠܶܠ ܥܰܡܶܗ ܐܰܠܳܗܳܐ܇ ܟܰܕ ܐܶܚܰܕ ܬܰܪ̈ܬܶܝܢ ܠܽܘܚ̈ܶܐ܇ ܕܰܟܬܺܝܒ̈ܳܢ ܗܘ̈ܰܝ ܠܥܰܡܳܐ ܛܳܠܽܘܡܳܐ܇ ܘܰܚܢܰܢ ܐܰܚ̈ܰܝ ܨܰܝ̈ܳܡܶܐ܇ ܢܶܬܕܰܟܶܐ ܡܶܢ ܒܺܝ̈ܫܳܬܳܐ܇ ܕܰܠܢܰܦܫܳܐ ܡܥܰܘܟܳܢ܇ ܘܡܶܢ ܒܽܘܣܳܡܳܐ ܪܽܘܚܳܢܳܐ ܕܦܰܓܪܳܐ ܘܰܕܡܳܐ ܩܰܕܺܝܫܳܐ܇ ܕܨܰܝ̈ܳܡܶܐ ܒܶܗ ܡܶܬܒܰܣܡܺܝܢ܀

ܢܦܺܝܣܽܘܢܳܟ ܡܳܪܝ̱ ܡܽܘܫܶܐ ܪܺܝܫܳܐ ܕܰܢܒܺܝ̈ܶܐ܇ ܘܰܐܗܪܽܘܢ ܟܳܗܢܳܐ ܩܰܕܺܝܫܳܐ܇ ܘܟܽܠܗܽܘܢ ܟܺܐܢ̈ܶܐ ܘܠܶܘ̈ܳܝܶܐ܇ ܫܡܽܘܐܶܝܠ ܓܰܒܝܳܐ ܕܰܪܒܳܐ ܒܶܝܬ ܩܽܘܕܫܳܐ܇ ܘܕܰܘܺܝܕ ܠܶܒܳܐ ܕܪܰܒܽܘܬܳܟ܇ ܘܶܐܪܰܡܝܳܐ ܕܡܶܢ ܓܰܘ ܟܰܪܣܳܐ ܓܒܳܬܶܗ ܛܰܝܒܽܘܬܳܟ܇ ܐܶܫܰܥܝܳܐ ܕܰܐܟܪܶܙ ܝܰܠܕܳܟ܇ ܘܰܙܟܪܰܝܳܐ ܕܰܥܠܰܝܟ ܒܰܕܶܩ ܒܝܰܕ ܨܠܽܘܬܗܽܘܢ ܪܰܚܶܡܥܠܰܝܢ܀

 

ܐ̱ܚܪܺܢܳܐ ܩܳܠܳܐ ܒܰܥܪܽܘܒܬܳܐ ܒܪܺܝܫܺܝܬ

ܟܽܠ ܐܰܝܢܳܐ ܕܨܳܐܶܡ܇ ܡܶܢ ܠܰܚܡܳܐ ܒܰܠܚܽܘܕ ܠܰܘ ܨܰܘܡܳܐ ܚܫܺܝܒ܇ ܕܨܰܘܡܳܐ ܕܡܶܢ ܠܰܚܡܳܐ܇ ܣܳܢܶܐ ܠܶܗ ܡܳܪܝܳܐ܇ ܕܝܽܘܬܪܳܢܳܐ ܠܰܝܬ ܒܶܗ܇ܗ ܘ ܗ ܐܶܠܳܐ ܚܽܘܣܪܳܢܰܐܗ̱ܘ܀

ܒܨܰܘܡܳܐ ܩܰܕܺܝܫܳܐ܇ ܘܒܰܨܠܽܘܬܳܐ ܕܟܺܝܬܳܐ ܘܰܒܚܽܘܒܳܐ ܓܡܺܝܪܳܐ܇ ܢܰܦܫܳܐ ܡܶܬܥܰܠܝܳܐ܇ ܕܬܶܚܙܺܝܘܗ̱ܝ ܠܰܐܠܳܗܳܐ ܒܰܬܪܽܘܢܳܘܣ ܓܰܐܝܳܐ܇ ܗ ܘ ܗ ܘܥܰܡܶܗ ܡܶܬܒܰܣܡܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܰܢ ܠܳܐ ܝܳܕܰܥ ܕܰܒܫܽܘܠܳܡܳܐ ܕܚܰܝ̈ܶܐ ܡܰܘܬܰܐܗܘ܇ ܘܰܐܝܟ ܨܳܦܚܰܬܳܐ ܝܰܘܡܶܗ ܕܡܰܘܬܳܐ ܠܥܶܠ ܡܶܢ ܪܺܝܫܳܐ܇ ܡܰܢ ܠܳܐ ܝܳܕܰܥ ܕܥܳܠܡܳܐ ܚܶܠܡܰܐܗ̱ܘ ܐܳܦ ܛܶܠܳܠܳܐ܇ ܘܰܡܫܰܢܶܐ ܠܶܗ ܘܠܳܐ ܡܶܬܩܰܕܶܐ ܡܶܢ ܚܰܒܺܝ̈ܒܰܘܗ̱ܝ܀

ܡܰܢ ܠܳܐ ܝܳܕܰܥ ܐܶܠܽܘ ܝܳܗܶܒ ܟܽܠܶܗ ܕܰܗܒܶܗ܇ ܒܥܶܕܳܢ ܩܶܨܶܗ ܫܽܘܚܕܳܐ ܡܶܢܶܗ ܠܳܐ ܡܶܬܩܰܒܰܠ܇ ܡܰܢ ܠܳܐ ܝܳܕܰܥ ܕܳܐܦܶܢ ܢܶܥܬܰܪ ܐܰܝܟ ܐܺܝܡܳܡܳܐ܇ ܟܽܠܶܗ ܥܽܘܬܪܶܗ ܒܶܥܕܳܢ ܡܰܘܬܶܗ ܗܳܪܟܳܐ ܦܳܐܶܫ܀

 

ܡܥܺܝܪܳܢܳܐ ܕܠܺܠܝܳܐ ܩܳܠܳܐ ܥܺܝܪܳܐ ܕܠܳܐ ܕܳܡܶܟ

ܒܠܺܠܝܳܐ ܥܰܡ ܥܺܝܪ̈ܶܐ܇ ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ܀

ܡܽܘ̈ܡܰܝ ܣܰܓܺܝ̈ܐܺܝܢ܇ ܚܽܘܢ ܠܰܐܒܺܝܕܽܘܬܝ̱ ܒܰܚܢܳܢܳܟ܀

ܩܪܺܝܬܳܟ ܒܽܐܘܠܨܳܢܳܐ܇ ܥܢܺܝ ܠܚܰܝܳܒܽܘܬ̱ܝ ܒܰܚܢܳܢܳܟ܀

ܫܪܳܓܳܐ ܕܦܽܘܪܩܳܢܳܟ܇ ܢܬܰܪܶܨ ܪ̈ܶܓܰܠܝ ܒܰܫܒܺܝܠܰܝ̈ܟ܀

ܚܰܣܳܐ ܠܺܝ ܚܰܘܒ̈ܰܝ܇ ܒܝܰܘܡܳܐ ܫܒܺܝܚܳܐ ܕܡܶܐܬܺܝܬܳܟ܀

ܥܰܢܺܝܕ̈ܶܐ ܡܗܰܝ̈ܡܶܢܶܐ܇ ܐܰܢ̱ܬ ܡܳܪܝܳܐ ܐܰܢܺܝܚ ܐܶܢܽܘܢ܀

 

ܩܳܠܳܐ ܕܠܺܠܝܳܐ ܩܳܠܳܐ ܐܶܢܳܐ ܐ̱ܢܳܐ ܢܽܘܗܪܳܐ

ܬܰܘ ܐܰܚ̈ܰܝ ܢܶܚܙܶܐ ܘܢܶܬܒܰܝܰܢ܇ ܡܶܕܶܡ ܕܰܗܘܳܐ ܒܝܰܘܡ̈ܳܬܰܢ܇ ܕܰܚܫܶܟ ܫܶܡܫܳܐ ܒܰܪܩܺܝܥܳܐ܇ ܘܣܰܗܪܳܐ ܐܶܬܗܰܦܰܟ ܠܰܕܡܳܐ܇ ܘܗܳܐ ܩܳܡ ܥܰܡܳܐ ܥܰܠ ܥܰܡܳܐ܇ ܘܡܰܠܟܽܘܬܳܐ ܥܰܠ ܡܰܠܟܽܘܬܳܐ܇ ܠܳܐ ܐ̱ܢܳܫ ܡܰܝܬܶܐ ܥܰܠ ܒܳܠܶܗ܇ ܕܚܰܪܬܶܗ ܕܥܳܠܡܳܐ ܗܳܐ ܡܛܳܬ݀ ܠܳܗܿ܇ ܟܽܠ ܐ̱ܢܳܫ ܢܺܐܨܰܦ ܕܰܩܢܽܘܡܶܗ܀

ܐܰܠܳܗܳܐ ܕܠܳܐ ܟܳܠܶܐ ܪ̈ܰܚܡܰܘܗ̱ܝ ܡܶܢ ܚܰܛܳܝ̈ܶܐ ܕܩܳܪܶܝܢ ܠܶܗ܇ ܟܠܺܝ ܘܰܐܥܒܰܪ ܡܶܢܰܢ ܒܰܚܢܳܢܳܟ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ܇ ܗܰܒܠܰܢ ܝܰܪ̈ܚܶܐ ܕܚܰܕܘ̈ܳܬܳܐ ܘܰܫܢܰܝ̈ܳܐ ܟܰܗܺܝ̈ܢܳܬܳܐ܇ ܘܒܰܛܶܠܳܝܗ̱ܝ ܠܒܺܝܫܳܐ ܡܶܢܰܢ܇ ܒܢܺܝܫܶܗ ܪܰܒܳܐ ܕܰܨܠܺܝܒܳܐ܇ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

 

ܣܽܘܓܺܝܬܳܐ ܒܩܳܠܳܐ ܐܰܝܠܶܝܢ ܩ̈ܳܠܶܐ ܥܶܢܝܳܢܳܐ ܫܽܘܒܚܳܐ ܠܳܟ ܚܳܐܶܢ ܠܚܰܛܳܝ̈ܶܐ. ܫܽܘܒܚܳܐ ܠܳܟ ܡܶܫܟܰܚ ܠܰܐܒܺܝܕ̈ܶܐ

ܐܳܘ ܚܰܛܳܝ̈ܶܐ ܪ̈ܳܚܡܰܝ ܚܰܝ̈ܶܐ܇ ܘܕܰܣܒܺܝܣܺܝܢ ܬܽܘܒ ܒܰܪ̈ܓܺܝܓܳܬܳܐ܇ ܐܶܬܕܰܟܪܘ̱ ܠܫܽܘܢܳܩܳܐ ܡܰܪܺܝܪܳܐ܇ ܕܩܳܢܶܝܢ ܠܚܰܪܬܳܐ ܪ̈ܳܚܡܰܝ ܥܳܠܡܳܐ܇ ܬܰܘܠܥܳܐ ܕܠܳܐ ܡܳܝܬܳܐ ܘܝܰܩܕܳܢܳܐ܇ ܘܚܶܫܽܘܟܳܐ ܕܠܰܝܬ ܒܶܗ ܢܰܗܺܝܪܳܐ܇ ܥܳܒܽܘܕܳܐ ܕܟܽܠܗܶܝܢ ܒܶܪ̈ܝܳܬܳܐ܇ ܚܽܘܣ ܥܠܰܝ ܗܳܪܟܳܐ ܥܰܕ ܩܰܐܝܺܡ ܐ̱ܢܳܐ܇ ܩܕܳܡ ܕܶܐܡܽܘܬ ܘܰܬܚܰܦܶܝܢܝ̱ ܐܰܪܥܳܐ܀

ܒܳܪܽܘܝܳܐ ܕܰܒܪܳܐ ܟܽܠ ܒܶܪ̈ܝܳܢ܇ ܒܪܶܡܙܳܐ ܟܰܣܝܳܐ ܕܰܐܠܳܗܽܘܬܶܗ܇ ܚܢܳܢܳܟ ܢܶܕܢܰܚ ܥܰܠ ܚܰܠܳܫܽܘܬܝ̱܇ ܘܶܐܙܡܰܪ ܫܽܘܒܚܳܐ ܒܩܳܠܳܐ ܪܳܡܳܐ܇ ܘܰܐܙܺܝܥ ܠܶܫܳܢܝ̱ ܥܰܠ ܬܰܫܥܺܝܬܳܐ܇ ܘܰܠܝܽܘܩܪܳܐ ܕܚܰܫ̈ܶܐ ܛܰܠܶܩ ܡܶܢܝ̱܇ ܕܠܰܝܬ ܩܰܕܺܝܫܳܐ ܐܶܠܳܐ ܐܶܢ ܐܰܢ̱ܬ܇ ܥܳܒܽܘܕܳܐ ܕܟܽܠܗܶܝܢ ܒܶܪ̈ܝܳܬܳܐ܇ ܚܽܘܣ ܥܠܰܝ ܗܳܪܟܳܐ ܥܰܕ ܩܰܝܳܡ ܐ̱ܢܳܐ܀

ܕܰܝܳܢܳܐ ܕܚܺܝܠܳܐ ܘܥܰܙܺܝܙܳܐ܇ ܥܰܠ ܪ̈ܰܚܡܰܝܟ ܬܟܺܝܠ ܐ̱ܢܳܐ ܘܰܡܦܺܝܣ ܐ̱ܢܳܐ܇ ܒܪ̈ܰܚܡܰܝܟ ܡܳܪܝ̱ ܚܽܘܢܶܝܗܿ ܠܰܐܒܺܝܕܽܘܬܝ̱܇ ܩܰܒܶܠ ܚܶܢܓ̈ܳܬܝ̱ ܚܰܢܳܢܳܐ܇ ܒܳܟ ܗܽܘ ܣܰܒܪܶܬ ܠܳܐ ܬܰܒܗܶܬܰܝܢܝ̱܇ ܘܳܝܠܺܝ ܡܳܪܝ̱ ܣܰܟܺܝܿܬ ܚܽܘܢܳܝ ܫܽܘܒܚܳܟ ܕܶܐܙܡܰܪ ܫܽܘܒܚܳܐ ܠܒܰܣܺܝܡܽܘܬܳܟ ܥܳܒܽܘܕܳܐ܀

ܕܰܝܳܢܳܐ ܟܺܐܢܳܐ ܐܺܝܬܰܝܟ ܡܳܪܝ̱܇ ܘܙܰܕܺܝܩ ܕܺܝܢܳܟ ܡܳܪܰܢ ܬܰܡܳܢ܇ ܘܶܐܢ ܟܺܐܢܳܐܺܝܬ ܠܕܺܝܢܳܐ ܐܶܥܽܘܠ ܒܚܰܝܒܽܘܬܳܐ ܢܳܦܶܩ ܐ̱ܢܳܐ ܠܺܝ܇ ܐܰܢ̱ܬ ܐܺܝܬܰܝܟ ܡܳܪܝ̱ ܗܽܘ ܕܶܐܫܬܰܘܕܺܝܬ܇ ܕܟܽܠ ܕܡܰܘܕܶܐ ܒܺܝ ܡܰܘܕܶܐ ܐ̱ܢܳܐ ܒܶܗ܇ ܐܰܘܕܳܐ ܒܺܝ ܘܰܫܒܽܘܩ ܠܺܝ ܚܰܘ̈ܒܰܝ܀

ܘܳܝܳܐ ܬܰܡܳܢ ܠܟܽܠ ܚܰܛܳܝ̈ܶܐ܇ ܕܠܳܐ ܢܛܰܪܘ̱ ܡܶܠܬܳܟ ܒܰܪ ܐܰܠܳܗܳܐ܇ ܕܕܳܡܶܐ ܩܳܠܗܽܘܢ ܒܓܰܘ ܓܺܗܰܢܳܐ܇ ܠܪܰܥܰܡܳܐ ܕܪܳܥܶܡ ܘܰܕܚܺܝܠ ܣܰܓܺܝ܇ ܘܡܰܝܠܠܺܝܢ ܡܶܢ ܐܽܘܠܨܳܢܳܐ ܩܰܫܝܳܐ܇ ܘܳܝܠܺܝ ܐܶܢܗܽܘ ܕܥܰܡܗܽܘܢ ܐܶܫܬܕܶܐ܇ ܡܳܪܶܐ ܟܽܠ ܚܽܘܣ ܘܶܐܬܪܰܚܰܡܥܰܠܝ ܥܳܒܽܘܕܳܐ܀

ܚܰܢܳܢܳܐ ܒܝܰܕ ܫܦܺܝܥܽܘܬ ܪ̈ܰܚܡܰܝܟ܇ ܡܶܢ ܚܶܫܽܘܟܳܐ ܒܰܪܳܝܳܐ ܦܰܨܳܢܝ̱܇ ܕܰܥܠܰܝܟ ܐܶܫܬܕܺܝܿܬ ܡܶܢ ܟܰܪܣܳܗܿ ܕܶܐܡܝ̱܇ ܚܰܢܳܢܳܐ ܘܰܡܠܶܐ ܛܰܝܒܽܘܬܳܐ܇ ܚܶܘܝܳܐ ܘܚܰܘܳܐ ܗ̱ܘܰܘ ܠܺܝ ܦܰܚ̈ܶܐ܇ ܘܰܛܪܰܕܘ̱ ܐܰܦܩܽܘܢܝ̱ ܡܶܢ ܦܰܪܕܰܝܣܳܐ܇ ܒܰܪ̈ܓܺܝܓܳܬܗܽܘܢ ܥܳܒܽܘܪ̈ܝܳܬܳܐ܇ ܥܳܒܽܘܕܳܐ܀

ܛܽܘܒܳܐ ܪܰܒܳܐ ܡܠܰܟ ܗܽܘ ܬܰܡܳܢ܇ ܡܶܢ ܐܰܠܳܗܳܐ ܠܟܽܠ ܙܰܕܺܝ̈ܩܶܐ܇ ܛܽܘܒܰܘܗ̱ܝ ܠܰܐܝܢܳܐ ܕܠܳܐ ܐܶܬܩܰܛܪܰܓ ܡܶܢ ܣܽܘܥܪ̈ܳܢܰܘܗ̱ܝ ܩܕܳܡ ܕܰܝܳܢܳܐ܇ ܝܳܕܰܥ ܟܰܣܝ̈ܳܬܝ̱ ܚܽܘܣ ܥܠܰܝ ܗܳܪܟܳܐ ܘܪܰܚܶܡ ܥܠܰܝ ܐܳܦ ܥܰܠ ܕܳܘܝܽܘܬܝ̱܇ ܘܰܠܕܺܝܢܳܐ ܕܚܺܝܠܳܐ ܠܳܐ ܬܰܥܠܰܢܝ̱܇ ܥܳܒܽܘܕܳܐ܀

ܟܽܠܗܶܝܢ ܒܶܪ̈ܝܳܬܳܐ ܥܠܰܝ ܢܶܒܳܟ̈ܝܳܢ܇ ܕܠܰܝܬ ܠܺܝ ܓܰܠܝܽܘܬ ܐܰܦ̈ܶܐ ܩܕܳܡܰܝܟ܇ ܐܰܝܟܳܐ ܕܡܰܠ̈ܟܶܐ ܒܕܶܚܠܳܐ ܩܳܝܡܺܝܢ܇ ܘܰܫܩܺܝܠ ܬܳܐܓܳܐ ܡܶܢ ܪ̈ܺܝܫܰܝܗܽܘܢ܇ ܘܳܝ ܡܽܘܢ ܐܶܥܒܶܕ ܡܳܐ ܕܡܶܩܰܛܪܓܺܝܢ܇ ܥܒ̈ܳܕܰܝ ܒܺܝ̈ܫܶܐ ܠܰܩܢܽܘܡܝ̱ ܕܳܘܝܳܐ܇ ܥܳܒܽܘܕܳܐ܀

ܡܳܢܳܐ ܐܶܥܒܶܕ ܒܓܰܘ ܒܶܝܬ ܕܺܝܢܳܐ܇ ܡܳܐ ܕܣܳܚܦܺܝܢ ܠܺܝ ܒܗܰܘ ܚܶܫܽܘܟܳܐ܇ ܕܠܰܝܬ ܒܶܗ ܙܰܗܪܳܐ ܘܠܳܐ ܢܰܗܺܝܪܳܐ ܩܳܠܳܐ ܕܒܺܝ̈ܫܶܐ ܕܪܳܥܶܡ ܬܰܡܳܢ܇ ܘܩܳܠ ܡܶܠ̈ܰܝܗܽܘܢ ܡܶܢ ܓܰܘ ܥܽܘܡܩܳܐ܇ ܠܳܐ ܡܳܪܝ̱ ܬܶܫܕܶܐ ܥܰܡܗܽܘܢ ܒܚܶܫܽܘܟܳܐ ܠܺܝ ܠܚܰܛܳܝܳܐ ܘܰܡܠܶܐ ܡܽܘ̈ܡܶܐ܇ ܥܳܒܽܘܕܳܐ܀

ܣܽܘܪܳܕܳܐ ܕܶܝܢ ܠܳܐ ܡܶܬܡܰܠܰܠ܇ ܐܳܚܶܕ ܠܟܽܠܢܳܫ ܒܓܰܘ ܒܶܝܬ ܕܺܝܢܳܐ܇ ܡܶܢ ܕܡܽܘܬܳܐ ܕܡܰܠܰܐܟ̈ܶܐ ܕܚܺܝ̈ܠܶܐ܇ ܕܳܐܠܰܦ ܐܰܠܦܺܝ̈ܢ ܘܪ̈ܶܒܽܘ ܪ̈ܶܒܘܳܢ܇ ܕܰܡܫܰܡܫܳܢ̈ܶܐ ܚܕܳܪ̈ܰܘܗ̱ܝ ܩܳܝܡܺܝܢ܇ ܕܗܰܘ ܟܽܘܪܣܝܳܐ ܕܚܺܝܠܳܐ ܕܓܰܘܙܰܠܬܳܐ܇ ܕܒܶܗ ܝܳܬܶܒ ܕܰܝܳܢܳܐ ܟܺܐܢܳܐ܇ ܥܳܒܽܘܕܳܐ܀

ܦܽܘܪܥܳܢܳܐ ܚܙܺܝܿܬ ܕܕܺܝܢܳܐ ܟܺܐܢܳܐ܇ ܗܰܘ ܕܠܳܐ ܐܺܝܬ ܒܶܗ ܡܰܐܣܰܒ ܒܰܐܦ̈ܶܐ ܘܰܠܟܽܠ ܐ̱ܢܳܫ ܐܰܝܟ ܥܒ̈ܳܕܶܐ ܕܰܣܥܰܪ܇ ܡܦܰܠܓܳܐ ܘܝܳܗܒܳܐ ܒܕܺܝܢܳܐ ܬܪܺܝܨܳܐ܇ ܠܪ̈ܰܫܺܝܥܶܐ ܣܳܚܦܳܐ ܒܓܺܗܰܢܳܐ܇ ܒܦܶܚܬܳܐ ܕܠܳܐ ܐܺܝܬ ܒܳܗܿ ܚܰܘܣܳܢܳܐ܇ ܠܙܰܕܺܝ̈ܩܶܐ ܡܚܰܕܝܳܐ ܒܓܰܘ ܥܕܶܝܢ܇ ܒܚܰܝ̈ܶܐ ܪ̈ܓܺܝܓܶܐ ܕܠܳܐ ܫܽܘܠܳܡܳܐ܇ ܥܳܒܽܘܕܳܐ܀

ܩܶܢܛܶܬ ܟܰܕ ܫܶܡܥܿܶܬ ܠܰܐܒܪܳܗܳܡ܇ ܕܰܡܦܰܢܶܐ ܗܘܳܐ ܠܗܰܘ ܥܰܬܺܝܪܳܐ܇ ܘܶܐܬܕܰܟܪ ܕܩܰܒܶܠܬ ܒܥܳܠܡܳܐ ܚܰܝ̈ܰܝܟ܇ ܥܰܡ ܫܽܘܒܚܳܐ ܣܪܺܝܩܳܐ ܕܠܳܐ ܡܰܗܢܶܐ܇ ܘܰܠܳܥܳܙܳܪ ܗܳܢܳܐ ܕܶܐܬܢܰܘܰܠ܇ ܒܟܺܐܒܳܐ  ܥܰܣܩܳܐ ܕܡܺܣܟܺܢܽܘܬܳܐ܇ ܗܳܢܳܐ ܕܶܐܫܬܰܢܰܩ ܒܶܗ ܒܥܳܠܡܳܐ܇ ܗܳܐ ܡܶܬܓܰܝܐܶܐ ܒܶܝܬ ܡܰܠܟܽܘܬܳܐ܇ ܘܰܐܢ̱ܬ ܕܶܐܬܦܰܪܦܰܥܬ ܒܟܽܠ ܦܽܘܢ̈ܳܩܺܝܢ܇ ܗܳܪܟܳܐ ܡܶܫܬܰܢܰܩܬ ܒܓܺܗܰܢܳܐ܇ ܥܳܒܽܘܕܳܐ܀

ܫܶܦܥ̈ܶܐ ܚܙܺܝܿܬ ܕܣܳܣܳܐ ܘܰܕܪܶܡܬܳܐ܇ ܕܰܡܚܰܒ̈ܠܳܢ ܪܽܘܟܳܒܶܗ ܕܦܰܓܪܳܐ܇ ܐܰܝܟܐ ܕܚܽܘܪܳܩ ܫܶܢ̈ܶܐ ܡܶܫܬܡܰܥ܇ ܘܰܦܝܳܣܳܐ ܘܕܶܡܥ̈ܶܐ ܠܳܐ ܡܶܬܒܥܶܝܢ܇ ܬܰܡܳܢ ܚܙܺܝܿܬ ܬܰܘܠܥܳܐ ܕܠܳܐ ܡܳܝܬܳܐ܇ ܟܰܕ ܒܳܪܡܳܐ ܘܳܐܟܠܳܐ ܘܠܳܐ ܫܳܠܝܳܐ܇ ܥܳܒܽܘܕܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܬܶܗܪܶܗ ܕܠܺܠܝܳܐ ܒܠܺܠܝܳܐ ܫܰܩܠܰܢܝ̱ ܕܶܐܬܕܰܡܰܪ ܒܶܗ܇ ܘܶܐܠܽܘ ܕܶܡܟܿܶܬ ܦܳܐܶܫ ܗܘܺܝܿܬ ܠܺܝ ܘܠܳܐ ܐܶܬܕܰܡܰܪ܇ ܡܶܠܰܬ ܚܰܝ̈ܶܐ ܠܳܐ ܡܫܰܥܒܶܕ ܠܳܗܿ ܠܺܠܝܳܐ ܬܶܕܡܰܟܝ̱܇ ܕܒܰܪ̱ܬ ܐܺܝܡܳܡܳܐܗ̱ܝ ܕܰܡܟܺܝܪܬܶܗ ܗܺܝ ܕܚܰܬܢܳܐ ܪܰܒܳܐ܀

ܪܢܺܝܼܬ ܒܶܗ ܒܠܺܠܝܳܐ ܐܰܝܟܰܢ ܫܰܬܺܝܩ ܡܶܢ ܡܰܠ̈ܳܠܶܐ܇ ܘܰܨܕܶܝܢ ܟܽܠܗܽܘܢ ܬܰܪ̈ܥܰܝ ܕܺܝܢܳܐ ܡܶܢ ܕܰܝܳܢ̈ܶܐ܇ ܟܰܕ ܚܳܐܰܪ ܐ̱ܢܳܐ ܘܡܶܬܕܰܡܰܪ ܐ̱ܢܳܐ ܒܶܝܬ ܠܺܝ ܘܠܰܩܢܽܘܡܝ̱܇ ܡܛܳܐ ܠܶܗ ܨܰܦܪܳܐ ܕܢܶܠܒܽܘܟ ܕܽܘܟܬܳܐ ܕܺܝܠܶܗ ܐܳܦ ܗܽܘ܀

 

ܕܨܰܦܪܳܐ ܕܰܥܪܽܘܒܬܳܐ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܥܰܠ ܝܽܘܪܕܢܳܢ

ܥܰܠܛܽܘܪܳܐ܇ ܕܣܺܝܢܰܝ ܨܳܡ ܗܘܳܐ ܡܽܘܫܶܐ܇ ܐܰܪܒܥܺܝܢ ܝܰܘ̈ܡܺܝܢ ܘܩܰܒܶܠ ܦܽܘ̈ܩܕܳܢܶܐ ܠܥܰܡܳܐ܀

ܥܰܠ ܡܰܪܟܰܒܬܳܐ܇ ܐܶܬܥܰܠܺܝ ܗܘܳܐ ܐܺܠܺܝܳܐ܇ ܟܰܕ ܣܠܶܩ ܗܘܳܐ܇ ܠܰܫܡܰܝܳܐ ܒܰܦܓܰܪ܀

ܥܰܠ ܡܰܪ̈ܓܶܐ܇ ܕܨܰܘܡܳܐ ܢܶܬܦܰܛܡܽܘܢ܇ ܨܰܝ̈ܳܡܶܐ ܘܰܢܕܽܘܨܽܘܢ ܒܰܓܢܽܘܢܳܐ܀

ܥܰܠ ܚܰܝ̈ܰܝܢ܇ ܐܰܟܪܶܙ ܗܘܳܐ ܐܶܫܰܥܝܳܐ܇ ܕܰܐܝܟ ܥܽܘܦܝܳܐ܇ ܕܚܰܩܠܳܐ ܐܺܝܬܰܝܗܽܘܢ܀

ܥܰܠ ܨܰܘܡܳܐ܇ ܐܶܬܢܰܒܺܝ ܐܶܫܰܥܝܳܐ܇ ܕܗܳܢܰܘ ܨܰܘܡܳܐ ܕܰܓܒܺܝܿܬ܇ ܕܢܰܪܚܶܩ ܐ̱ܢܳܫ ܡܶܢ ܒܺܝܫ̈ܳܬܳܐ܀

ܥܰܠ ܦܳܪܽܘܩܰܢ܇ ܢܶܫܕܶܐ ܣܰܒܪܳܐ ܕܚܰܝ̈ܰܝܢ܇ ܕܗܽܘ ܢܥܰܕܰܪ ܠܰܢ܇ ܒܨܰܘܡܳܐ ܕܰܟܝܳܐ ܘܩܰܕܺܝܫܳܐ܀

 

ܕܰܐܠܳܗܝ̱ ܐܰܠܳܗܝ̱ ܩܳܠܳܐ ܒܬܽܘܠܬܳܐ ܩܰܕܺܝܫܬܳܐ

ܚܽܘܢܰܝܢܝ̱ ܒܗܰܘ ܨܰܦܪܳܐ܇ ܕܰܡܠܶܐ ܟܰܪܝܽܘܬܳܐ܇ ܘܰܡܶܢܺܝܢܝ̱ ܥܰܡ ܐܶܡܪ̈ܰܝܟ܇ ܒܓܰܒܳܐ ܕܝܰܡܺܝܢܳܐ܀

ܝܰܘܡܰܐܗ̱ܘ ܕܢܶܒܥܶܐ ܐ̱ܢܳܫ܇ ܪ̈ܰܚܡܶܐ ܡܶܢ ܡܳܪܝܳܐ܇ ܒܨܰܘܡܳܐ ܘܒܰܨܠܽܘܬܳܐ ܘܕܶܡܥ̈ܶܐ ܘܚܶܢܓ̈ܳܬܳܐ܀

ܠܘܰܥܕܶܗ ܕܦܰܪܕܰܝܣܳܐ ܡܰܢܰܥ ܒܛܰܝܒܽܘܬܳܟ܇ ܠܰܐܝܠܶܝܢ ܕܡܰܘܕܶܝܢ ܒܳܟ܇ ܒܨܰܘܡܳܐ ܘܒܰܨܠܽܘܬܳܐ܀

ܛܳܝܣܺܝܢ ܨܰܝ̈ܳܡܶܐ܇ ܒܶܐܒܪ̈ܶܐ ܩܰܠܺܝ̈ܠܶܐ ܘܰܠܪܰܘܡܳܐ ܣܳܠܩܺܝܢ܇ ܠܰܐܬܪܳܐ ܕܡܰܠܰܐܟ̈ܶܐ܀

ܬܰܘ ܐܰܚ̈ܰܝ ܢܨܽܘܡ܇ ܨܰܘܡܳܐ ܩܰܕܺܝܫܳܐ܇ ܕܒܶܗ ܗܽܘ ܡܶܬܪܰܥܶܐ܇ ܡܳܪܝܳܐ ܕܰܐܪܓܶܙܢܳܗ̱ܝ܀

ܓܺܗܰܢܳܐ ܫܓܺܝܪܳܐ܇ ܘܢܽܘܪܳܐ ܡܶܫܬܰܠܗܒܳܐ ܕܬܰܘܩܶܕ ܠܪ̈ܰܫܺܝܥܶܐ܇ ܕܒܰܚܛܳܗ̈ܶܐ ܡܟܰܬܡܺܝܢ܀

ܠܳܟ ܫܽܘܒܚܳܐ ܡܫܺܝܚܳܐ܇ ܥܰܠ ܟܽܠܰܢ ܪ̈ܰܚܡܰܝܟ܇ ܕܨܳܡܬ ܡܶܛܽܠܳܬܰܢ܇ ܘܰܐܠܶܦܬ ܠܰܢ ܨܰܘܡܳܐ܀

 

ܕܰܫܡܰܝ̈ܳܐ ܡܶܫܬܰܥܶܝܢ ܒܩܳܠܐ ܥܺܕܬܳܐ ܕܰܒܚܰܫܳܟ

ܩܽܘܡܝ̱ ܥܺܕܬܳܐ ܐܶܬܟܰܫܰܪܝ̱܇ ܒܨܰܘܡܳܐ ܕܰܟܝܳܐ ܘܒܰܨܠܽܘܬܳܐ܇ ܘܰܠܡܳܪܝܳܐ ܐܰܦܺܝܣ܇ ܕܢܶܥܒܶܕ ܪ̈ܰܚܡܶܐ ܥܰܠ ܝܰܠܕܰܝ̈ܟܝ̱܀

ܒܪܺܝܟ ܛܳܒܳܐ ܕܰܒܚܽܘܒܶܗ܇ ܐܶܬܒܰܪܢܰܫ ܡܶܛܽܠܳܬܰܢ܇ ܘܨܳܡ ܗܘܳܐ ܒܰܒܣܰܪ ܚܠܳܦܰܝܢ܇ ܘܰܒܨܰܘܡܶܗ ܣܰܚܦܶܗ ܠܒܺܝܫܳܐ܀

ܒܪܺܝܟ ܚܽܘܒܳܟ ܒܰܣܺܝܡܳܐ܇ ܕܡܶܛܽܠ ܫܽܘܪܳܪܶܗ ܘܓܶܢܣܰܢ܇ ܕܰܢܦܰܠ ܒܰܚܛܺܝܬܳܐ܇ ܨܳܡܬ ܒܕܰܒܪܳܐ ܘܚܰܝܶܨܬ ܪܰܦܝܽܘܬܶܗ܀

ܠܰܘ ܕܰܣܢܺܝܩ ܗܘܳܐ ܢܚܶܬ ܨܶܝܕܰܝܢ܇ ܗܰܘ ܠܳܐ ܣܢܺܝܩܳܐ ܐܰܠܳܗܳܐ܇ ܒܕܰܒܪܳܐ ܨܳܐܶܡ ܗܘܳܐ܇ ܐܶܠܳܐ ܢܡܰܠܶܐ ܣܽܘܢܩܳܢܰܢ܀

ܩܰܒܶܠ ܡܳܪܰܢ ܒܛܰܝܒܽܘܬܳܟ܇ ܬܶܫܡܶܫ̈ܳܬܰܢ ܘܰܨܠܰܘ̈ܳܬܰܢ܇ ܨܰܘܡܰܢ ܢܶܫܦܰܪ ܠܳܟ܇ ܘܰܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܫܽܘܒܚܳܐ ܠܶܗ ܠܺܝܚܺܝܕܳܐ܇ ܕܝܰܗܒ ܠܰܢ ܙܰܝܢܳܐ ܕܦܽܘܪܩܳܢܳܐ܇ ܨܰܘܡܳܐ ܩܰܕܺܝܫܳܐ܇ ܕܒܶܗ ܢܶܬܟܰܬܰܫ ܥܰܡ ܒܺܝܫܳܐ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܩܝܳܡܬܳܐ ܕܰܢܚܶܬ

ܐܰܠܶܦܬܳܢܝ ܡܳܪܝ̱ ܒܰܣܒܰܪܬܳܟ܇ ܕܰܩܪܰܘ ܘܶܐܢܳܐ ܥܳܢܶܐ ܐ̱ܢܳܐ܇ ܗܳܐ ܩܪܰܝܢܳܟ ܐܰܝܟ ܕܰܐܠܶܦܬܳܢܝ̱܇ ܥܢܺܝ ܠܰܢ ܐܰܟܡܳܐ ܕܶܐܫܬܰܘܕܺܝܬ܇ ܥܳܢܳܟ ܘܡܰܪܥܺܝܬܳܟ ܐܺܝܬܰܝܢ܇ ܐܰܠܳܗܳܐ ܪܰܚܶܡ ܥܠܰܝ܀

ܡܫܺܝܚܳܐ ܕܚܰܣܺܝ ܠܶܗ ܠܫܽܡܥܽܘܢ܇ ܘܰܫܒܰܩ ܚܰܘܒܶܝ̈ܗܿ ܕܚܰܛܳܝܬܳܐ܇ ܚܰܣܳܐ ܚܰܘܒ̈ܶܐ ܕܡܰܪܥܺܝܬܳܟ܇ ܒܰܕܡܳܐ ܕܪܳܕܶܐ ܡܶܢ ܕܰܦܢܳܟ܇ ܘܦܰܢܳܐ ܒܰܥܓܰܠ ܫܶܐܠ̈ܳܬܶܗ܇ ܒܝܰܕ ܪ̈ܰܚܡܶܐ ܕܒܰܣܺܝܡܽܘܬܳܟ܀

 

ܒܗܰܘ ܢܽܘܗܪܳܐ ܓܰܐܝܳܐ

ܐܶܫܰܥܝܳܐ ܢܒܺܝܳܐ ܐܰܟܪܶܙ ܠܰܢ܇ ܡܶܛܽܠ ܨܰܘܡܳܐ ܩܰܕܺܝܫܳܐ܇ ܟܰܕ ܩܳܥܶܐ ܘܡܰܟܪܶܙ ܕܽܘܒܳܪ̈ܰܘܗ̱ܝ܇ ܘܡܰܠܶܦ ܕܰܐܝܟܰܢ ܢܶܬܢܰܛܪܽܘܢ܀

ܬܰܘ ܢܩܰܕܶܫ ܨܰܘܡܰܢ ܚܰܒܺܝ̈ܒܰܝ܇ ܐܰܝܟ ܕܰܢܒܺܝܳܐ ܐܰܟܪܶܙ ܠܰܢ܇ ܘܢܰܟܪܶܙ ܐܳܣܝܽܘܬܳܐ ܕܢܰܦܫ̈ܳܬܰܢ܇ ܘܕܽܘܒܳܪ̈ܶܐ ܕܰܡܝܰܬܪܽܘܬܳܐ܀

ܗܳܐ ܙܰܒܢܳܐ ܠܦܽܘܠܚܳܢ ܟܺܐܢܽܘܬܳܐ܇ ܘܢܶܬܟܰܫܰܪ ܙܰܕܺܝܩܳܐܺܝܬ܇ ܕܗܳܐ ܬܰܪܥܳܐ ܕܪ̈ܰܚܡܰܘܗ̱ܝ ܕܰܡܪܰܝܡܳܐ܇ ܦܬܺܝܚ ܠܚܰܛܳܝ̈ܶܐ ܕܢܳܩܫܺܝܢ ܒܶܗ܀

 

ܩܳܠܳܐ ܕܨܰܦܪܳܐ

ܩܳܠܳܐ ܣܳܗ̈ܕܶܐ ܗ̱ܘܰܘ ܦܺܝܪ̈ܡܶܐ

ܐܳܡܪܺܝܢ ܠܶܗ ܫܠܺܝ̈ܚܶܐ܇ ܠܡܳܪܰܢ ܟܰܕ ܡܰܠܶܦ ܗܘܳܐ܇ ܕܰܐܝܢܰܘ ܫܽܘܠܳܡܶܗ ܕܥܳܠܡܳܐ܇ ܘܰܥܢܳܐ ܘܶܐܡܰܪ ܠܗܽܘܢ܇ ܕܡܳܐ ܕܰܚܙܰܝܬܽܘܢ ܐܳܬܰܘ̈ܳܬܳܐ܇ ܫܶܡܫܳܐ ܘܣܰܗܪܳܐ ܕܡܶܫܬܰܚܠܦܺܝܢ ܗ ܘ ܗ܇ ܕܰܥܘ ܕܰܩܪܶܒ ܠܶܗ ܫܽܘܠܳܡܶܗ܀

ܢܶܒܗܬܽܘܢ ܟܳܦܽܘܪ̈ܶܐ܇ ܘܬܶܚܕܶܐ ܥܺܕܬܳܐ ܒܰܪ̱ܬ ܡܰܠܟܳܐ ܘܬܶܙܡܰܪܝ̱ ܫܽܘܒܚܳܐ ܟܰܕ ܪܳܘܙܳܐ܇ ܕܦܰܓܪܶܗ ܩܨܳܐ ܘܝܰܗܒ ܠܳܗܿ܇ ܘܡܰܙܰܓ ܠܶܗ ܟܳܣܳܐ ܕܰܕܡܶܗ܇ ܟܽܠܝܽܘܡ ܡܶܢܶܗ ܡܶܬܒܰܣܡܳܐ܇ ܗ ܘ ܗ ܫܽܘܒܚܳܐ ܠܶܗ ܕܦܰܪܩܶܗ ܒܰܕܡܶܗ܀

 

ܐ̱ܚܪܺܢܳܐ ܒܗܰܘ ܨܰܦܪܳܐ ܪܰܒܳܐ

ܛܽܘܒܳܐ ܠܨܰܝ̈ܳܡܶܐ܇ ܒܝܰܘܡܶܗ ܕܢܽܘܚܳܡܳܐ܇ ܕܠܳܒܫܺܝܢ ܓܰܐܝܽܘܬܳܐ ܘܗܶܕܪܳܐ ܘܬܶܫܒܽܘܚܬܳܐ܇ ܘܥܳܐܠܺܝܢ ܠܰܓܢܽܘܢܳܐ ܘܝܳܪܬܺܝܢ ܡܰܠܟܽܘܬܳܐ܇ ܘܙܳܡܪܺܝܢ ܬܶܫܒܽܘܚܬܳܐ ܠܡܳܪܶܗ ܕܰܚܠܽܘܠܳܐ܇ ܗ܇ ܒܰܣܶܡ ܠܰܢ ܥܰܡܗܽܘܢ ܝܶܫܽܘܥ ܡܠܶܐ ܪ̈ܰܚܡܶܐ܀

ܥܺܕܬܳܐ ܡܗܰܝܡܰܢܬܳܐ ܙܡܰܪܝ̱ ܠܶܗ ܬܶܫܒܽܘܚܬܳܐ܇ ܠܰܒܪܳܐ ܕܰܐܠܳܗܳܐ ܕܦܰܪܩܶܟܝ̱ ܡܶܢ ܛܽܘܥܝܰܝ܇ ܕܦܰܓܪܶܗ ܩܰܕܺܝܫܳܐ ܪܰܗܒܽܘܢܳܐ ܝܰܗܒ ܠܶܟܝ̱܇ ܘܰܕܡܶܗ ܙܰܟܳܝܳܐ ܚܽܘܣܳܝܳܐ ܠܝܰܠ̈ܕܰܝܟܝ̱܇ ܗ܇ ܡܳܪܝܳܐ ܚܰܢܳܢܳܐ ܚܽܘܣ ܘܶܐܬܪܰܚܰܡܥܠܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܳܐ ܚܟܺܝܡ ܐܰܢ̱ܬ ܗܳܐ ܢܰܗܺܝܪ ܐܰܢ̱ܬ ܗܳܐ ܢܳܛܰܪ ܐܰܢ̱ܬ܇ ܗܳܐ ܟܰܫܺܝܪ ܐܰܢ̱ܬ ܗܳܐ ܡܦܰܪܢܶܣ ܐܰܢ̱ܬ ܗܳܐ ܡܟܰܢܶܫ ܐܰܢ̱ܬ܇ ܟܰܫܺܝܪܽܘܬܳܐ ܡܠܳܬܶܗ ܠܒܰܝܬܳܟ ܟܽܠ ܛܳܒ̈ܳܬܳܐ ܘܒܰܚܕܳܐ ܫܳܥܳܐ ܡܰܠܰܐܟ ܡܰܘܬܳܐ ܡܒܰܛܶܠ ܟܽܠܗܽܘܢ܀

ܢܶܗܘܽܘܢ ܩܳܠܰܝ̈ܢ ܡܪ̈ܰܥܝܳܢܶܐ ܡܳܪܝ̱ ܠܰܐܠܳܗܽܘܬܳܟ܇ ܘܡܶܠܬܳܟ ܬܶܗܘܶܐ ܫܪܳܓܳܐ ܠܪ̈ܶܓܠܰܝܢ ܕܰܢܰܗܠܶܟ ܒܳܗܿ܇ ܩܰܠܺܝܠ ܕܳܫܢܳܐ ܕܚܽܘܒܳܐ ܣܰܒ ܡܳܪܝ̱ ܡܶܢ ܣܳܓܽܘ̈ܕܰܝܟ܇ ܘܗܰܒ ܒܰܫܦܺܝܥܽܘ ܚܢܳܢܳܟ ܪܰܒܳܐ ܘܠܳܟ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܩܽܘܩܳܝܳܐ

ܒܺܝ ܝܺܡܺܝܿܬ ܐܶܡܰܪ ܡܳܪܶܐ ܡܳܪ̈ܰܘܳܬܳܐ܇ ܕܠܳܐ ܨܳܒܶܐ ܐ̱ܢܳܐ ܒܰܐܒܕܳܢܳܐ ܕܚܰܛܳܝ̈ܶܐ ܕܬܳܝܒܺܝܢ܇ ܐܶܠܳܐ ܕܰܢܬܽܘܒ ܘܢܶܒܥܶܐ ܫܽܘܒܩܳܢܳܐ܇ ܥܰܕ ܐܺܝܬ ܐܰܬܪܳܐ ܘܰܦܬܺܝܚ ܗܽܘ ܬܰܪܥܳܐ܇ ܕܠܳܐ ܐ̱ܢܳܫ ܡܶܙܕܰܕܰܩ ܐܰܚ̈ܰܝ ܒܳܬܰܪ ܡܰܘܬܶܗ܇ ܟܽܠܢܳܫ ܢܺܐܨܰܦ ܕܰܩܢܽܘܡܶܗ ܕܚܰܪܬܳܐ ܗܳܐ ܡܛܳܬ݀ ܠܳܗܿ ܗ ܘ ܗ܀

ܚܰܕ ܥܶܣܪ̈ܳܐ ܫܳܥܺܝ̈ܢ ܦܶܠܚܿܶܬ ܒܶܗ ܥܰܘܠܳܐ ܒܗܳܢ ܥܳܠܡܳܐ܇ ܘܰܒܫܳܥܬܳܐ ܕܢܶܦܩܿܶܬ ܡܶܢܶܗ ܚܶܫܽܘܟܳܐ ܐܰܘܪܬܰܢܝ̱܇ ܒܟܰܪܣܳܐ ܚܶܫܟܳܐ ܘܡܰܦܩܳܢܳܐ ܒܶܟܝܳܐ܇ ܒܥܳܠܡܳܐ ܚܰܘܒܬܳܐ ܘܒܺܝܫ̈ܳܬܳܐ ܟܽܠܗܶܝܢ܇ ܘܰܒܥܶܕܳܢܐܳ ܕܢܳܦܶܩ ܐ̱ܢܳܐ ܬܶܐܢܚ̈ܳܬܳܐ ܘܶܠܠܝܳܐ܇ ܘܰܠܕܺܝܢܳܐ ܕܚܺܝܠܳܐ ܕܚܰܪܬܳܐ ܡܳܪܝ̱ ܘܶܐܬܪܰܚܰܡܥܠܰܝ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܝܰܕ ܨܰܘܡܳܐ ܐܶܬܢܰܨܰܚܘ̱ ܗ̱ܘܰܘ܇ ܛܠܳܝ̈ܶܐ ܬܠܳܬܳܐ ܒܓܰܘ ܒܳܒܶܝܠ܇ ܘܥܰܠ ܕܠܳܐ ܣܓܶܕܘ̱ ܗ̱ܘܰܘ ܠܰܦܬܰܟܪ̈ܶܐ܇ ܠܳܐ ܐܶܬܢܰܟܺܝܘ ܡܶܢ ܓܰܘܙܰܠܬܳܐ܀ ܫܽܘܒܚܳܐ ܠܳܟ ܒܰܪ ܥܶܠܳܝܳܐ܇ ܕܚܰܕܺܝܬ ܐܶܢܽܘܢ ܠܰܪ̈ܚܽܘܡܰܝܟ ܘܰܐܥܒܰܪܬ ܐܶܢܽܘܢ ܡܶܢ ܪ̈ܳܚܡܰܝܟ܇ ܫܽܘܒܚܳܐ ܠܳܟ ܥܰܠ ܛܰܝܒܽܘܬܳܟ܀

 

ܕܦܶܠܓܶܗ ܕܝܰܘܡܳܐ

ܩܳܠܳܐ ܦܬܺܝܚ ܗܽܘ ܬܰܪܥܶܗ ܕܦܰܪܕܰܝܣܳܐ

ܬܫܰܠܶܡܝ̱ ܥܰܡܰܢ ܛܰܝܒܽܘܬܳܟ܇ ܕܢܰܘܕܶܐ ܠܳܟ ܥܰܠ ܬܰܪ̈ܬܰܝܗܶܝܢ܇ ܠܳܐ ܡܳܪܝ̱ ܬܶܡܶܢܶܐ ܒܺܝܫ̈ܳܬܰܢ܇ ܠܳܐ ܡܓܰܪܕܳܐ ܥܰܘܠܳܐ ܡܶܢܰܢ܇ ܬܶܗܘܶܐ ܗܳܕܶܐ ܬܰܟܫܶܦܬܳܐ܇ ܬܶܐܓܽܘܪܬܳܐ ܕܡܰܠܝܳܐ ܚܰܝ̈ܶܐ܀

ܠܳܐ ܣܢܺܝܩ ܡܶܡܬܽܘܡ ܥܰܠ ܐܳܣܝܳܐ܇ ܐܰܝܢܳܐ ܕܺܐܝܬܰܘܗ̱ܝ ܕܠܳܐ ܟܺܐܒ̈ܶܐ܇ ܒܬܰܪܥܳܟ ܢܳܩܫܺܝܢ ܚܰܛܳܝ̈ܶܐ܇ ܡܶܢܳܟ ܢܶܣܒܽܘܢ ܫܽܘܒܩܳܢܳܐ܇ ܥܢܺܝ ܛܳܒܳܐ ܐܰܝܟ ܕܰܡܥܳܕ ܐܰܢ̱ܬ ܠܰܣܢܺܝ̈ܩܶܐ ܕܒܳܥܶܝܢ ܡܶܢܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܶܢ ܩܶܢܝܳܢܳܐ ܠܰܘ ܥܳܒܽܘܪܰܐܗ̱ܘ ܐܳܘ ܩܰܢܳܝܳܐ܇ ܐܰܢ̱ܬ ܩܰܢܳܝܳܐ ܥܳܒܰܪ ܐܰܢ̱ܬ ܠܳܟ ܡܶܢ ܩܶܢܝ̈ܳܢܶܐ܇ ܐܳܘ ܗܽܘ ܫܰܒܩܳܟ ܘܰܥܒܰܪ ܡܶܢܳܟ ܟܰܕ ܚܳܐܰܪ ܐܰܢ̱ܬ܇ ܐܳܘ ܐܰܪܦܺܝܬܳܝܗ̱ܝ ܐܰܢ̱ܬ ܠܰܐ̱ܚܪ̈ܳܢܶܐ ܟܰܕ ܠܳܐ ܨܳܒܶܝܬ܀

ܟܽܠܶܗ ܥܽܘܬܪܳܐ ܘܡܺܣܟܺܢܽܘܬܳܐ ܥܰܡ ܩܶܢܝ̈ܳܢܶܐ܇ ܐܰܝܟ ܕܰܡܟܳܢܺܝܢ ܫܽܘܒܚܳܐ ܢܶܬܠܽܘܢ ܒܰܪ ܐܰܠܳܗܳܐ܇ ܫܒܺܝܚ ܐܰܢ̱ܬ ܗܽܘ ܡܳܪܝ̱ ܘܰܡܫܰܒܚ̈ܳܢܶܐ ܠܳܟ ܗܽܘ ܡܫܰܒܚܺܝܢ܇ ܘܟܽܠܶܗ ܒܪܺܝܬܳܐ ܙܳܡܪܳܐ ܫܽܘܒܚܳܐ ܠܳܟ ܬܶܫܒܽܘܚܬܳܐ܀

 

ܕܰܬܫܰܥܫܳܥܺܝ̈ܢ ܩܳܠܳܐ ܕܰܚܛܳܐ ܕܠܳܐ ܢܶܚܛܶܐ

ܗܳܐ ܚܰܪܬܶܗ ܕܥܳܠܡܳܐ܇ ܥܰܠ ܬܰܪܥܳܐ ܩܳܝܡܳܐ܇ ܢܶܬܟܰܫܰܪ ܕܢܶܫܟܰܚ ܪ̈ܰܚܡܶܐ ܩܕܳܡ ܡܳܪܝܳܐ܇ ܩܰܒܶܠ ܦܳܪܽܘܩܰܢ܇ ܨܰܘܡܰܢ ܘܰܨܠܽܘܬܰܢ܇ ܘܰܥܠܰܝܢ ܐܶܬܪܰܚܰܡ܇ ܒܰܬܪ̈ܰܝܗܽܘܢ ܥܳܠܡ̈ܶܐ܇ ܗ ܘ ܗ ܕܰܐܢ̱ܬ ܗܽܘ ܓܶܝܪ ܐܺܝܬܰܝܟ ܚܳܐܶܢ ܠܚܰܛܳܝ̈ܶܐ܀

ܡܳܐ ܫܰܦܺܝܪܳܐ ܗܘܳܬ݀܇ ܐܶܓܰܪܬܳܐ ܕܟܶܬܒܰܬ݀܇ ܢܺܝܢܘܶܐ ܡܗܰܝܡܰܢܬܳܐ ܠܟܽܠ ܐܰܬܪ̈ܰܘܳܬܳܐ܇ ܕܶܐܢ ܓܳܙܰܪ ܥܠܰܝܟܽܘܢ ܫܰܒܛܳܐ ܕܟܺܐܢܽܘܬܳܐ܇ ܒܝܰܕ ܣܰܩ̈ܶܐ ܘܩܶܛܡܳܐ ܪܰܥܰܘ ܠܰܐܠܳܗܳܐ܇ ܗ ܘ ܗ ܕܚܳܕܶܐ ܒܬܰܝ̈ܳܒܶܐ ܕܩܳܪܶܝܢ ܠܶܗ ܒܩܽܘܫܬܳܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܐܰܠܳܗܳܐ ܚܽܘܢ ܠܰܢ܇ ܠܚܰܛܳܝ̈ܶܐ ܥܰܒܕ̈ܰܝܟ܇ ܗܳܐ ܣܢܺܝܩܺܝܢܰܢ ܟܽܠ ܫܳܥ܇ ܠܪ̈ܰܚܡܶܐ ܕܛܰܝܒܽܘܬܳܟ܇ ܛܳܒܳܐ ܩܰܒܶܠ ܠܰܢ܇ ܘܶܐܬܪܰܚܰܡܥܠܰܝܢ܀

ܫܽܘܒܚܳܐ ܠܛܰܝܒܽܘܬܳܟ܇ ܚܳܐܶܢ ܠܚܰܛܳܝ̈ܶܐ܇ ܫܽܘܒܚܳܐ ܠܛܰܝܒܽܘܬܳܟ܇ ܨܳܒܶܐ ܒܬܰܝ̈ܳܒܶܐ܇ ܫܽܘܒܚܳܐ ܠܛܰܝܒܽܘܬܳܟ܇ ܐܺܝܬܝܳܐ ܕܺܐܝܬܽܘܬܳܐ܀

 

ܫܶܠܡܰܬ ܫܰܒܬܳܐ

ܕܰܬܠܳܬ ܕܨܰܘܡܳܐ ܒܳܥܽܘ ܡܶܢ ܟܽܠ ܐܰܚܳܐ ܐܳܘ ܐܰܒܳܐ ܕܢܨܰܕ ܘܠܳܐ ܢܶܥܕܽܘܠ ܠܕܳܘܝܽܘܬܝ̱ ܥܰܠ ܟܬܺܝܒܬܳܐ ܡܶܛܽܠ ܕܠܳܐ ܐܺܝܬܰܝ ܟܳܬܽܘܒܳܐ ܐܶܠܳܐ ܨܰܠܰܘ ܥܰܠ ܕܳܘܝܽܘܬܝ̱ ܒܚܽܘܒܳܐ ܝܶܫܽܘܥܳܝܳܐ ܒܰܫܢܰܬ ܐܨܦܐ ܡ

 

ܬܽܘܒ ܕܪܰܡܫܳܐ ܕܚܰܕ ܒܫܰܒܳܐ ܪܒܺܝܥܳܝܳܐ ܕܨܰܘܡܳܐ ܕܺܐܝܬܰܘܗ̱ܝ ܥܰܠ ܟܢܰܥܢܰܝܬܳܐ

ܩܰܕܡܳܝܳܐ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܐܶܡܳܐ ܕܟܺܝܬܳܐ

ܒܳܬܰܪ ܝܶܫܽܘܥ ܪܶܗܛܰܬ݀ ܟܢܰܥܢܰܝܬܳܐ܇ ܟܰܕ ܫܶܡܥܰܬ݀ ܗܘܳܬ݀ ܛܶܐܒܶܗ ܕܰܥܒܰܪ ܗܘܳܐ ܪܰܚܶܡܥܠܰܝ ܐܰܠܳܗܳܐ܀

ܫܶܡܥܰܬ݀ ܛܶܐܒܶܗ ܕܕܰܝܳܢܳܐ ܕܥܳܠܡܳܐ܇ ܘܥܰܠ ܣܳܛܳܢܳܐ ܩܒܽܘܠܝܳܐ ܥܶܒܕܰܬ݀ ܗܘܳܬ݀ ܪܰܚܶܡܥܠܰܝ ܐܰܠܳܗܳܐ܀

ܗܰܘ ܕܶܐܡܰܪ ܗܘܳܐ ܠܰܐܢ̱ܬܬܳܐ ܟܢܰܥܢܰܝܬܳܐ܇ ܕܙܶܠܝ̱ ܢܶܗܘܶܐ ܠܶܟܝ̱܇ ܐܰܟܡܳܐ ܕܨܳܒܝܳܐ ܐܰܢ̱ܬܝ̱ ܪܰܚܶܡܥܠܰܝ ܐܰܠܳܗܳܐ܀

ܗܰܘ ܕܰܠܒܰܪܬܳܗܿ ܕܰܐܢ̱ܬܬܳܐ ܟܢܰܥܢܰܝܬܳܐ܇ ܫܰܘܙܶܒ ܘܰܦܪܰܩ ܡܶܢ  ܐܺܝܕ̈ܰܝ ܒܺܝܫܳܐ ܪܰܚܶܡܥܠܰܝ ܐܰܠܳܗܳܐ܀

ܫܰܘܙܶܒ ܠܰܢ ܡܳܪܝ̱ ܡܶܢ  ܐܺܝܕ̈ܰܝ ܫܺܐܕ̈ܶܐ܇ ܕܰܐܟܺܝܘ ܠܒܰܪܬܳܗܿ ܕܰܐܢ̱ܬܬܳܐ ܟܢܰܥܢܰܝܬܳܐ ܪܰܚܶܡܥܠܰܝ ܐܰܠܳܗܳܐ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܬܶܫܡܶܫܬܳܐ ܪܰܡܫܳܝܬܳܐ܇

ܒܪܺܝܟ ܗܽܘ ܪܳܥܝܳܐ ܫܡܰܝܳܢܳܐ܇ ܕܶܐܬܳܐ ܕܢܶܣܥܽܘܪ ܡܰܪܺܝܥܬܶܗ܇ ܘܕܺܐܒ̈ܶܐ ܦܰܩܪ̈ܶܐ ܕܰܚܙܰܐܳܘܽܘܗ̱ܝ܇ ܒܰܟܡܺܐܢܰܝ̈ܗܽܘܢ ܐܶܬܛܰܫܺܝܽܘ܇ ܟܰܕ ܥܳܒܰܪ ܗܘܳܐ ܒܰܬܚܽܘ̈ܡܶܐ܇ ܕܨܰܘܪ ܘܰܕܨܰܝܕܳܢ ܦܳܪܽܘܩܰܢ܀

ܟܰܕ ܥܳܒܰܪ ܗܘܳܐ ܐܰܠܳܗܰܢ ܒܰܬܚܽܘ̈ܡܶܐ ܕܨܽܘܪ ܘܰܕܨܰܝܕܳܢ ܘܥܰܡܶܗ ܟܶܢܫܳܐ ܕܬܰܠܡܺܝܕܰܘ̈ܗ̱ܝ܇ ܐܰܢ̱ܬܬܳܐ ܟܢܰܥܢܰܝܬܐ ܢܶܦܩܰܬ݀܇ ܘܰܡܦܺܝܣܳܐ ܠܶܗ ܒܰܚܢܰܓܬܳܐ܇ ܕܒܰܪ ܕܰܘܺܝܕ ܪܰܚܶܡܥܠܰܝ܀

ܬܰܟܒܽܘܗܿ ܛܶܐܒ̈ܶܐ ܠܕܳܘܺܝܬܳܐ܇ ܕܥܳܒܰܪ ܠܶܗ ܡܳܪܰܢ ܝܶܫܽܘܥ܇ ܘܰܪܗܺܝܒܳܐ ܕܬܶܬܓܰܘܣܰܝ̱ ܒܶܗ܇ ܫܰܪܝܰܬ݀ ܩܳܥܝܳܐ ܒܶܝܬ ܟܶܢܫ̈ܶܐ܇ ܕܡܳܪܝ̱ ܒܰܪ ܕܰܘܺܝܕ ܐܶܬܪܰܚܰܡܥܠܰܝ܇ ܘܰܐܣܳܐ ܠܺܝ ܒܰܪ̱ܬܝ̱ ܡܶܢ ܫܺܐܕܳܐ܀

ܐ̱ܚܪܺܢܳܐ ܒܩܳܠܳܐ ܠܢܳܨܪܰܬ ܡܕܺܝܢ̱ܬܳܐ

ܟܰܕ ܕܶܝܢ ܥܳܒܰܪ ܗܘܳܐ ܘܰܡܗܰܠܶܟ ܗܘܳܐ܇ ܒܰܬܚܽܘ̈ܡܶܐ ܕܨܽܘܪ ܘܰܕܨܰܝܕܳܢ܇ ܟܢܰܥܢܰܝܬܳܐ ܢܶܦܩܰܬ݀ ܠܽܐܘܪܥܶܗ ܘܰܡܦܺܝܣܳܐ ܠܶܗ ܟܰܕ ܐܳܡܪܳܐ ܗܘܳܬ݀܇ ܕܳܐܣܝܳܐ ܕܪ̈ܰܚܡܶܐ ܘܕܰܚܢܳܢܳܐ ܐܰܣܳܐ ܠܺܝ ܒܰܪ̱ܬܝ̱ ܡܶܢ ܫܺܐܕܰܐܗ̱ܘ ܕܰܡܫܰܢܶܩ ܠܳܗܿ܀

ܡܰܢ ܠܳܐ ܢܶܬܗܰܪ ܒܰܡܫܺܝܚܳܐ ܟܰܕ ܐܳܡܰܪ ܗܘܳܐ ܠܗܳܕܶܐ ܐܰܢ̱ܬܬܳܐ ܟܢܰܥܢܰܝܬܳܐ܇ ܕܠܳܐ ܫܰܦܺܝܪܳܐ ܕܰܠܠܰܚܡܳܐ ܕܺܐܝܬ ܠܰܒܢ̈ܰܝܳܐ ܠܡܶܐܣܰܒ ܘܢܰܪܡܶܐ܇ ܟܰܠܒ̈ܶܐ ܐܰܝܠܶܝܢ ܕܠܳܐ ܫܳܘܶܝܢ܇ ܠܽܘܩܕܰܡ ܢܶܐܟܠܽܘܢ ܘܳܐܦ ܢܺܐܚܽܘܢ ܡܶܢ ܦܳܬܽܘܪܳܐ܀

ܡܰܢ ܠܳܐ ܢܶܬܗܰܪ ܒܰܡܫܺܝܚܳܐ ܟܰܕ ܐܳܡܰܪ ܗܘܳܐ܇ ܠܰܟܢܰܥܢܰܝܬܳܐ ܕܒܶܗ ܛܶܦܣܰܬ݀܇ ܕܙܶܠܝ̱ ܢܶܗܘܶܐ ܠܶܟܝ̱ ܐܰܝܟ ܕܨܳܒܝܰܬܝ܇ ܡܶܢ ܗܳܝ ܫܳܥܬܳܐ ܒܰܪܬܳܗܿ ܢܶܣܒܰܬ݀ ܚܽܘܠܡܳܢܳܐ ܠܰܡܚܺܝܠܽܘܬܳܗܿ ܐܰܠܳܗܳܐ ܕܟܽܠ܀

 

ܩܳܠܳܐ ܕܪܰܡܫܳܐ ܩܳܠܳܐ ܡܫܺܝܚܳܐ ܢܰܛܰܪܶܝܗܿ ܠܥܺܕܬܳܟ

ܪܳܥܝܳܐ ܛܳܒܳܐ ܕܶܐܬܬܰܚܬܺܝ܇ ܡܶܢ ܪ̈ܰܘܡܶܐ ܓܢܺܝ̈ܙܶܐ ܕܰܐܒܽܘܗ̱ܝ܇ ܘܰܐܝܟ ܒܰܪܢܳܫܳܐ ܠܒܶܫ ܦܰܓܪܳܐ܇ ܟܰܕ ܐܰܠܳܗܰܐܗ̱ܘ ܒܰܟܝܳܢܶܗ܇ ܘܟܰܕ ܥܳܒܰܪ ܒܶܝܬ ܐܽܘܪ̈ܚܳܬܳܐ ܟܰܕ ܐܶܬܟܰܫܦܰܬ݀ ܠܶܗ ܐܳܡܪܳܐ ܐܰܢ̱ܬܬܳܐ܇ ܒܰܪ ܕܰܘܺܝܕ ܘܡܳܪܶܗ ܕܕܰܘܺܝܕ܇ ܒܰܪ̱ܬܝ̱ ܒܺܝܫܳܐܺܝܬ ܗܳܐ ܫܚܺܝܩܳܐ܇ ܘܫܺܐܕܳܐ ܕܳܒܰܪ ܠܳܗܿ ܘܡܰܪܺܝܪܳܐܺܝܬ ܡܶܬܛܰܪܦܳܐ܇ ܡܨܶܝܬ ܚܰܝܠܳܐ ܐܶܢ ܨܳܒܶܐ ܐܰܢ̱ܬ܇ ܓܥܽܘܪ ܒܶܗ ܢܦܽܘܩ܇ ܐܰܝܟ ܨܶܒܝܳܢܶܗ ܕܰܚܢܳܢܳܟ܀

ܒܚܽܘܒܳܐ ܘܰܒܗܰܝܡܳܢܽܘܬܳܐ ܢܶܦܩܰܬ݀ ܐܰܢ̱ܬܬܳܐ ܟܢܰܥܢܰܝܬܳܐ܇ ܘܰܠܨܰܠܡ̈ܶܐ ܕܒܶܝܬ ܐܰܒܳܗ̈ܶܝܗܿ܇ ܫܳܛܰܬ݀ ܐܶܢܽܘܢ ܕܰܣܪܺܝܩܺܝܢ܇ ܘܒܳܬܰܪ ܥܶܩܒܰܘ̈ܗ̱ܝ ܕܰܡܫܺܝܚܳܐ܇ ܪܶܗܛܰܬܽ ܘܶܐܙܠ̱ܰܬ݀ ܒܚܰܕܽܘܬܳܐ ܘܩܳܥܝܳܐ܇ ܒܰܪ ܕܰܘܺܝܕ ܟܐܺܝ ܒܡܳܪܽܘܕܳܐ܇ ܕܠܳܐ ܢܶܣܪܽܘܚ ܒܳܗܿ ܠܰܓܒܺܝܠܬܳܟ܇ ܘܰܐܥܕܺܝܗܿ ܠܰܫܒܺܝܬܳܐ܇ ܡܶܢ ܫܶܒܝܳܐ ܕܬܶܗܘܶܐ ܕܺܝܠܳܟ܇ ܕܰܐܢ̱ܬ ܗܽܘ ܒܪܰܝܬܳܗܿ ܒܛܰܝܒܽܘܬܳܟ܇ ܦܪܽܘܩ ܘܫܰܘܙܶܒܶܝܗܿ ܕܠܳܐ ܢܰܗܶܠ ܒܳܗܿ ܣܳܛܳܢܳܐ܀

 

ܐ̱ܚܪܺܢܳܐ ܩܳܠܳܐ ܛܽܘܒܰܝܟܝ̱ ܥܺܕܬܳܐ

ܗܰܠܶܟ ܡܳܪܰܢ܇ ܒܥܳܠܡܳܐ ܘܣܰܥܪܶܗ ܐܰܝܟ ܐܳܣܝܳܐ܇ ܘܰܠܟܽܠ ܟܺܐܒ̈ܺܝܢ ܘܟܽܘܪ̈ܗܳܢܺܝܢ܇ ܕܦܳܓܥܺܝܢ ܗ̱ܘܰܘ ܒܶܗ ܡܰܐܣܶܐ ܗܘܳܐ܇ ܘܰܕܒܰܪ ܕܰܘܺܝܕ ܡܶܬܩܰܠܰܣ܇ ܟܰܕ ܐܰܠܳܗܰܐܗ̱ܘ ܡܰܘܕܶܝܢ ܒܶܗ܇ ܫܽܘܒܚܳܐ ܠܶܗ ܟܡܳܐ ܐܶܬܡܰܟܰܟ܇ ܡܶܛܽܠ ܓܶܢܣܰܢ ܡܳܝܽܘܬܳܐ܇ ܒܪܺܝܟ ܕܰܐܦܢܺܝ ܐܳܕܳܡ ܠܰܥܕܶܝܢ܇ ܠܗܳܝ ܝܳܪܬܽܘܬܶܗ ܩܰܕܡܳܝܬܳܐ܀

ܒܰܐܬܪܳܐ ܕܚܰܢܦ̈ܶܐ ܥܳܒܰܪ ܗܘܳܐ ܡܳܪܰܢ ܝܶܫܽܘܥ܇ ܙܰܩܬܳܗܿ ܗܘܳܐ ܠܰܟܢܰܥܢܰܝܬܳܐ܇ ܛܶܐܒܳܐ ܕܰܩܪܶܒ ܘܰܡܛܳܐ ܠܶܗ܇ ܘܥܰܠ ܕܰܚܙܳܬ݀ ܫܺܐܕܳܐ ܕܫܳܚܶܩ܇ ܘܰܡܫܰܢܶܩ ܗܘܳܐ ܠܳܗܿ ܠܒܰܪܬܳܗܿ܇ ܘܡܳܪܰܢ ܫܰܒܩܳܗܿ ܟܰܕ ܩܳܥܝܳܐ܇ ܕܬܶܬܢܰܨܰܚܝ̱ ܗܰܝܡܳܢܽܘܬܳܗܿ܇ ܘܰܐܣܺܝ ܠܒܰܪܬܳܗܿ ܡܶܢ ܫܺܐܕܳܐ܇ ܘܗܰܝܡܶܢܰܬ݀ ܒܶܗ ܕܒܰܪ ܐܰܠܳܗܰܐܗ̱ܘ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܰܐܪܥܳܐ ܕܚܰܢܦ̈ܶܐ  ܟܰܕ ܥܳܒܰܪ ܗܘܳܐ ܥܰܡ ܬܰܠܡܺܝܕܰܘ̈ܗ̱ܝ܇ ܗܰܝܡܳܢܽܘܬܳܐ ܕܰܟܢܰܥܢܰܝܬܳܐ ܡܶܙܕܰܡܪܳܐ ܗܘܳܬ݀܇ ܥܒܰܪ ܒܰܬܚܽܘ̈ܡܶܐ ܕܨܽܘܪ ܘܰܕܨܰܝܕܳܢ ܘܰܐܬܗܰܪ ܐܶܢܽܘܢ܇ ܘܫܰܪܺܝܽܘ ܢܳܦܠܺܝܢ ܐܰܠܳܗܰܝ̈ܗܽܘܢ ܕܰܣܪܺܝܩܽܘܬܳܐ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܐܪܥܳܐ ܙܰܪܥܳܐ ܕܚܰܝ̈ܶܐ܇ ܘܣܶܓܕܬܳܐ ܠܰܒܪܳܐ ܕܰܣܒܰܥ ܟܰܦܢ̈ܶܐ ܡܶܢ ܬܰܘܬܪ̈ܰܘܗ̱ܝ܇ ܬܰܘܕܺܝ ܠܪܽܘܚܳܐ ܕܥܰܡܳܐ ܘܥܰܡܡ̈ܶܐ ܐܰܦܢܺܝ ܐܶܢܽܘܢ܇ ܕܢܶܗܘܽܘܢ ܙܳܡܪܽܝܢ ܟܽܠܝܽܘܡ ܫܽܘܒܚܳܐ ܒܩܳܠܳܐ ܪܳܡܳܐ܀

 

ܡܥܺܝܪܳܢܳܐ ܕܠܺܠܝܳܐ ܩܳܠܳܐ ܝܳܐܶܐ ܘܙܳܕܶܩ

ܬܪܰܨ ܗܘܳܐ ܐܽܘܪܚܶܗ ܦܳܪܽܘܩܰܢ܇ ܕܰܢܗܰܠܶܟ ܒܰܐܬܪ̈ܰܘܳܬܳܐ܇ ܡܰܐܣܶܐ ܟܺܐܒ̈ܶܐ ܟܽܘܪ̈ܗܳܢܶܐ܇ ܕܓܶܢܣܳܐ ܡܚܺܝܠܳܐ ܕܒܶܝܬ ܐܳܕܳܡ ܫܽܘܒܚܳܐ܀

ܠܳܐ ܫܰܦܺܝܪ ܠܡܶܣܰܒ ܠܰܚܡܳܐ܇ ܕܰܒܢܰܝ̈ܳܐ ܢܶܪܡܶܐ ܠܟܰܠܒ̈ܶܐ܇ ܘܦܰܢܝܰܬ݀ ܠܶܗ ܕܟܰܠܒ̈ܶܐ ܚܳܐܶܝܢ܇ ܡܶܢ ܦܳܬܽܘܪܳܐ ܕܡܳܪ̈ܰܝܗܽܘܢ܇ ܫܽܘܒܚܳܐ܀

ܡܶܢ ܫܽܘܥܒܳܕܶܗ ܕܣܳܛܳܢܳܐ܇ ܫܰܘܙܶܒܬܳܗܿ ܠܰܟܢܰܥܢܰܝܬܳܐ܇ ܫܰܘܙܶܒ ܐܳܦ ܠܰܢ ܦܳܪܽܘܩܰܢ܇ ܡܶܢ ܦܰܚ̈ܰܘܗ̱ܝ ܘܰܡܨܺܝ̈ܕܳܬܶܗ ܫܽܘܒܚܳܐ܀

ܠܳܟ ܩܳܪܶܝܢܰܢ ܒܰܪ ܕܰܘܺܝܕ܇ ܪܰܚܶܡܥܠܰܝܢ ܫܒܽܘܩ ܚܛܳܗ̈ܰܝܢ܇ ܐܰܝܟ ܕܰܩܪܳܬܳܟ ܟܢܰܥܢܰܝܬܳܐ܇ ܚܽܘܠܡܳܢܳܐ ܠܒܰܪܬܳܗܿ ܢܶܣܒܰܬ݀ ܫܽܘܒܚܳܐ ܠܳܟ ܫܽܘܒܚܳܐ܀

 

ܩܰܘܡܳܐ ܩܰܕܡܳܝܳܐ ܕܠܺܠܝܳܐ ܩܳܠܳܐ ܠܡܪܰܝܰܡ ܝܳܠܕܰܬ ܐܰܠܳܗܳܐ

ܫܰܠܚܽܘܟ ܪ̈ܰܚܡܰܝܟ ܚܰܢܳܢܳܐ܇ ܕܬܺܐܬܶܐ ܠܘܳܬܰܢ܇ ܕܬܰܐܣܶܐ ܟܺܐܒ̈ܶܐ ܐܳܦ ܫܽܘܚ̈ܢܶܐ ܕܰܒܢܰܝ̈ܢܳܫܳܐ܇ ܠܰܟܢܰܥܢܰܝܬܳܐ ܕܰܕܒܺܝܪܳܐ ܒܰܪܬܳܗܿ ܠܫܺܐܕܳܐ܇ ܒܚܰܝܠܳܟ ܟܰܣܝܳܐ ܐܰܦܶܩܬܳܝܗ̱ܝ ܘܰܬܗܰܪ ܟܽܠܢܳܫ܀

ܫܽܘܒܚܳܐ ܠܳܟ ܝܶܫܽܘܥ ܡܰܠܟܰܢ ܐܳܣܝܳܐ ܕܪ̈ܰܚܡܶܐ܇ ܕܰܐܢ̱ܬ ܐܰܣܺܝܬ ܠܥܳܠܡܳܐ ܗܳܢܳܐ ܡܶܢ ܟܽܘܪܗܳܢܶܗ܇ ܘܰܠܗܳܝ ܐܰܢ̱ܬܬܳܐ ܕܰܐܦܺܝܣܬܳܝܗ̱ܝ ܐܰܣܺܝܬ ܠܒܰܪܬܳܗܿ܇ ܡܶܢ ܫܺܐܕܳܐ ܕܫܳܚܶܩ ܗܘܳܐ ܠܳܗܿ ܢܽܘܓܪܳܐ ܪܰܒܳܐ܀

 

ܐ̱ܚܪܺܢܳܐ ܒܩܳܠܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܐܰܪܝܡܰܬ݀ ܒܰܝܢܳܬ ܟܶܢܫ̈ܶܐ ܒܩܳܠܳܐ ܪܳܡܳܐ܇ ܘܶܐܡܪܰܬ݀ ܠܶܗ ܠܡܳܪܰܢ ܝܶܫܽܘܥ܇ ܗܳܕܶܐ ܬܒܰܥܬܳܐ ܕܺܝܠܳܟ ܗܺܝ ܐܶܢ ܨܳܒܶܐ ܐܰܢ̱ܬ܇ ܕܢܶܒܥܳܐ ܕܥܽܘܕܪ̈ܳܢܶܐ ܐܺܝܬܰܝܟ ܗ ܠܰܕܩܳܪܶܝܢ ܠܳܟ܀

ܥܰܠܰܝܡܬܳܐ ܦܺܐܝܬܳܐ ܒܰܪܬܳܐ ܕܺܝܠܝ̱ ܗܳܐ ܣܳܛܳܢܳܐ܇ ܕܳܒܰܪ ܠܳܗܿ ܘܰܡܫܰܢܶܩ ܠܳܗܿ܇ ܕܺܝܠܳܟ ܬܶܗܘܶܐ ܚܰܢܳܢܳܐ ܩܢܺܝܳܗܿ ܒܳܐܣܝܽܘܬܳܟ܇ ܘܢܶܒܗܰܬ ܒܺܝܫܳܐ ܕܡܰܐܟܶܐ ܠܳܗܿ ܗ ܘܢܺܐܪܰܒ ܫܽܘܒܚܳܐ܀

 

ܡܰܕܪܳܫܳܐ ܩܳܠܳܐ ܗܳܢܰܘ ܝܰܪܚܳܐ ܥܽܘܢܺܝܬܳܐ ܒܪܺܝܟ ܗܽܘ ܡܫܺܝܚܳܐ ܕܰܩܪܳܐ ܠܥܰܡܡ̈ܶܐ ܘܛܰܪܕܶܗ ܠܥܰܡܳܐ

ܐܶܡܰܪ ܡܳܪܰܢ܇ ܕܠܳܐ ܫܰܦܺܝܪܳܐ ܠܡܶܣܰܒ ܠܰܚܡܳܐ܇ ܕܺܐܝܬ ܠܰܒܢ̈ܰܝܳܐ ܕܢܶܬܬܰܪܣܽܘܢ ܒܶܗ܇ ܘܢܶܪܡܶܐ ܠܟܰܠܒ̈ܶܐ ܕܠܳܐ ܫܳܘܶܝܢ ܠܶܗ܇ ܢܶܐܟܠܽܘܢ ܠܽܘܩܕܰܡ܇ ܒܢܰܝ̈ܳܐ ܘܢܺܐܚܽܘܢ ܡܶܢ ܦܳܬܽܘܪܳܐ܀

ܐܺܝܬ ܗܘܳܐ ܒܒܰܝܬܳܟ܇ ܟܽܠ ܛܳܒ̈ܳܬܳܐ ܐܶܢ ܒܳܥܶܐ ܐܰܢ̱ܬ܇ ܐܳܦ ܠܰܒܢ̈ܰܝܳܐ ܬܽܘܒ ܘܰܠܟܰܠܒ̈ܶܐ܇ ܘܰܠܩܰܪ̈ܺܝܒܶܐ ܘܰܠܪ̈ܰܚܺܝܩܶܐ ܦܬܰܚ ܒܶܝܬ ܓܰܙܳܟ܇ ܗܳܫܳܐ ܒܰܐܦ̈ܰܝ܇ ܡܳܪܝ̱ ܠܳܐ ܢܶܬܬܚܶܕ܀

ܐܺܝܬ ܗܽܘ ܠܳܟ ܡܳܪܝ̱ ܕܬܰܐܚܶܐ ܠܟܰܠܒ̈ܶܐ ܐܺܝܬ ܠܰܒܢ̈ܰܝܳܐ܇ ܕܡܶܢܳܟ ܣܳܒܥܺܝܢ ܟܽܠܗܽܘܢ ܥܰܡܡ̈ܶܐ܇ ܟܰܦ̈ܢܶܐ ܨܪ̈ܺܝܟܶܐ ܐܳܦ ܡܶܣܟܺܢ̈ܶܐ܇ ܡܠܶܐ ܦܳܬܽܘܪܳܟ܇ ܡܶܢ ܛܳܒ̈ܳܬܳܐ ܠܟܽܠܗܽܘܢ ܥܰܡܡ̈ܶܐ܀

ܟܰܕ ܒܰܬܚܽܘܡܳܐ܇ ܕܨܽܘܪ ܘܰܕܨܰܝܕܳܢ ܥܒܰܪ ܗܘܳܐ ܡܳܪܰܢ܇ ܢܶܦܩܰܬ݀ ܒܳܬܪܶܗ ܗܳܝ ܟܢܰܥܢܰܝܬܳܐ܇ ܩܳܥܝܳܐ ܘܳܐܡܪܳܐ ܡܳܪܝ̱ ܒܰܪ ܕܰܘܺܝܕ܇ ܒܰܪ̱ܬܝ̱ ܒܺܝܫܳܐܺܝܬ܇ ܡܶܢ ܣܳܛܳܢܳܐ ܗܳܐ ܡܶܫܬܰܢܩܳܐ܀

ܥܢܰܘ ܘܳܐܡܪܺܝܢ ܠܳܗܿ܇ ܫܪܺܚܳܗܿ ܡܳܪܰܢ ܕܩܳܥܝܳܐ ܒܳܬܪܰܢ܇ ܫܶܓܫܰܬ݀ ܐܽܘܪܚܳܐ ܒܩܳܠܳܐ ܪܳܡܳܐ܇ ܘܠܳܐ ܗܳܦܟܳܐ ܠܳܗܿ ܡܶܢ ܫܶܐܠ̈ܳܬܳܗܿ܇ ܐܶܡܰܪ ܡܳܪܰܢ ܫܽܘܒܩܽܘܗܿ ܕܬܶܣܓܶܐ ܗܰܝܡܳܢܽܘܬܳܗܿ܀

 

ܩܽܘܡ ܦܰܘܠܳܘܣ ܥܽܘܢܺܝܬܳܐ ܠܳܟ ܫܽܘܒܚܳܐ ܣܳܥܰܪ ܬܶܕܡܪ̈ܳܬܳܐ܇ ܫܽܘܒܚܳܐ ܠܳܟ ܐܳܣܝܳܐ ܕܟܽܠ ܟܺܐܒ̈ܺܝܢ

ܟܰܕ ܒܰܬܚܽܘܡܳܐ ܕܨܽܘܪ ܘܰܕܨܰܝܕܳܢ܇ ܡܗܰܠܶܟ ܗܘܳܐ ܦܳܪܽܘܩܰܢ܇ ܪܶܡܙܶܗ ܐܰܦܩܳܗܿ ܠܗܳܝ ܟܢܰܥܢܰܝܬܳܐ܇ ܕܰܬܦܺܝܣܺܝܘܗ̱ܝ ܘܕܬܶܒܥܶܐ ܡܶܢܶܗ܇ ܡܶܚܕܳܐ ܦܩܰܕ ܘܛܰܪܕܶܗ܇ ܠܫܺܐܕܳܐ ܡܶܢ ܒܰܪܬܳܗܿ܇ ܘܛܠܺܝܬܳܐ ܢܶܗܪܰܬ݀܇ ܒܳܐܣܝܽܘܬܳܐ ܕܺܝܠܶܗ܇ ܘܬܰܩܶܢ ܗܘܳܐ ܦܰܓܪܳܿܗ ܘܶܐܬܚܰܠܡܰܬ݀܇ ܗܳܐ ܕܒܺܝܫܳܐ ܢܽܘܓܪܳܐ ܡܫܰܢܶܩ ܗܘܳܐ ܠܳܗܿ܀

ܟܢܰܥܢܰܝܬܳܐ ܠܽܐܘܪܥܶܗ ܕܦܳܪܽܘܩܰܢ܇ ܢܶܦܩܰܬ݀ ܗܘܳܬ݀ ܒܚܰܫܳܐ ܟܰܕ ܩܳܥܝܳܐ܇ ܒܰܪ̱ܬܝ̱ ܫܺܐܕܳܐ ܣܰܓܺܝ ܫܳܚܶܩ ܠܳܗܿ܇ ܘܶܐܡܰܪ ܠܳܗܿ ܡܳܪܰܢ ܫܠܳܝ ܡܶܟܽܝܠ܇ ܠܳܐ ܫܰܦܺܝܪܳܐ ܠܺܝ܇ ܕܠܰܚܡܳܐ ܕܰܒܢܰܝ̈ܳܐ܇ ܡܰܪܡܶܐ ܐ̱ܢܳܐ ܠܟܰܠܒ̈ܶܐ܇ ܕܣܳܒܥܺܝܢ ܘܡܶܬܚܰܬܪܺܝܢ܇ ܘܶܐܡܪܰܬ݀ ܠܶܗ ܕܳܐܦ ܟܰܠܒ̈ܶܐ ܐܳܟܠܺܝܢ܇ ܡܶܢ ܢܶܬܪܳܐ ܕܦܳܬܽܘܪܳܐ ܕܚܳܐܶܝܢ܀

ܚܰܕ ܣܰܡܝܳܐ ܦܓܰܥ ܒܶܗ ܒܽܐܘܪܺܫܠܶܡ ܇ ܥܰܠ ܬܰܪܥܳܐ ܕܗܰܝܟܠܳܐ ܟܰܕ ܝܳܬܶܒ܇ ܘܶܐܡܰܪ ܠܶܗ ܡܳܪܰܢ ܠܗܰܘ ܣܰܡܝܳܐ܇ ܨܳܒܶܐ ܐܰܢ̱ܬ ܗܳܫܳܐ ܕܚܳܙܶܐ ܐܰܢ̱ܬ܇ ܘܶܐܡܰܪ ܠܶܗ ܣܰܡܝܳܐ܇ ܡܳܪܝ̱ ܐܶܬܪܰܚܰܡܥܠܰܝ܇ ܡܳܐ ܫܰܦܺܝܪ ܫܶܡܫܳܐ܇ ܘܠܳܐ ܚܙܶܐ ܠܺܝ ܡܶܡܬܽܘܡ܇ ܘܛܺܝܢܳܐ ܛܳܫ ܡܳܪܰܢ ܥܰܠ ܥܰܝܢ̈ܰܘܗ̱ܝ܇ ܘܰܚܙܳܐ ܗܘܳܐ ܢܽܘܗܪܳܐ ܬܰܩܢܳܐܺܝܬ܀

ܡܡܰܚܰܝܬܳܐ ܩܶܪܒܰܬ݀ ܠܡܰܪܛܽܘܛܶܗ܇ ܘܝܶܒܫܰܬ݀ ܠܳܗ ܡܰܪܕܺܝܬܳܐ ܕܰܕܡܳܗܿ܇ ܘܶܐܡܰܪ ܠܶܗ ܠܫܶܡܥܽܘܢ ܪܺܝܫ ܓܽܘܕܳܐ܇ ܐܳܘ ܫܶܡܥܽܘܢ ܚܰܝܠܳܐ ܢܰܦܺܝܩ ܡܶܢܝ̱܇ ܚܙܺܝ ܡܰܢܽܘ ܩܪܶܒ ܠܺܝ܇ ܘܡܰܢܽܘ ܕܰܓܫܰܦ ܒܺܝ܇ ܘܶܐܡܰܪ ܠܶܗ ܟܺܐܦܳܐ܇ ܗܳܐ ܟܶܢܫ̈ܶܐ ܚܳܒܨܺܝܢ܇ ܡܰܢ ܡܳܢܶܐ ܠܥܰܡ̈ܡܶܐ ܣܰܓܺܝ̈ܐܶܐ܇ ܘܳܐܡܰܪ ܐܰܢ̱ܬ ܡܰܢܽܘ ܗܳܐ ܩܪܶܒ ܠܺܝ܀

ܥܰܠ ܬܰܪܥܶܗ ܕܢܰܐܺܝܢ ܡܳܪܰܢ ܥܳܒܰܪ ܗܘܳܐ܇ ܘܰܚܙܳܐ ܗܘܳܐ ܥܠܰܝܡܳܐ ܕܡܶܬܠܰܘܶܐ܇ ܟܠܳܐ ܠܥܰܪܣܳܐ ܘܫܰܪܺܝ ܕܢܺܐܡܰܪ ܠܶܗ܇ ܐܳܘ ܥܠܰܝܡܳܐ ܠܳܟ ܐܳܡܰܪ ܐ̱ܢܳܐ ܩܽܘܡ܇ ܘܰܚܙܳܐ ܗܘܳܐ ܡܰܘܬܳܐ܇ ܘܰܥܪܰܩ ܡܶܢ ܩܽܘܕܡܰܘܗ̱ܝ܇ ܘܠܰܩܝܳܡܬܳܐ ܕܡܺܝ̈ܬܶܐ܇ ܨܳܪ ܘܚܰܘܺܝ ܬܰܡܳܢ܇ ܘܰܪܡܰܙ ܗܘܳܐ ܕܗܽܘܝܽܘ ܢܽܘܚܳܡܳܐ܇ ܘܰܡܶܢܰܚܶܡ ܠܟܽܠܗܽܘܢ ܥܰܢܺܝܕ̈ܶܐ܀

ܚܰܛܳܝܬܳܐ ܒܒܶܝܬ ܫܶܡܥܽܘܢ ܦܪܺܝܫܳܐ܇ ܫܳܛܺܝܦܬܳܐ ܕܡܶܫܚܳܐ ܩܶܪܒܰܬ݀ ܠܶܗ܇ ܘܰܒܣܰܥܪܳܗܿ ܪ̈ܶܓܠܰܘܗ̱ܝ ܫܰܘܝܰܬ݀ ܗܘܳܬ݀܇ ܘܰܒܕܶܡ̈ܥܶܝܗܿ ܐܰܫܺܝܓܰܬ݀ ܐܶܢܶܝܢ܇ ܘܰܥܢܳܐ ܘܶܐܡܰܪ ܠܳܗܿ܇ ܕܙܶܠܝ̱ ܠܶܟܝ̱ ܐܳܘ ܐܰܢ̱ܬܬܳܐ ܫܒܺܝܩܺܝܢ ܠܶܟܝ̱ ܟܽܠܗܽܘܢ܇ ܚܰܘܒܰܝ̈ܟܝ̱ ܘܰܚܛܳܗܰܝ̈ܟܝ̱܇ ܘܰܒܣܒܰܪܬܳܐ ܗܳܝ ܕܺܝܠܝ̱ ܬܶܬܟܰܪܙܺܝܢ܇ ܕܳܐܦ ܗܳܕܶܐ ܣܰܒܪܳܐ ܠܬܰܝ̈ܳܒܶܐ܀

 

ܝܰܘܡܳܐ ܠܳܟ ܕܳܡܶܐ ܥܽܘܢܺܝܬܳܐ ܫܽܘܒܚܳܐ ܠܰܡܫܺܝܚܳܐ܇ ܕܶܐܬܳܐ ܠܘܳܬܰܢ܇ ܘܦܰܪܩܰܢ ܡܶܢ  ܐܺܝܕ̈ܰܝ ܒܺܝܫܳܐ ܘܡܰܘܬܳܐ

ܐܰܣܺܝ ܗܘܳܐ ܠܒܰܪܬܳܗܿ ܕܰܟܢܰܥܢܰܝܬܳܐ܇ ܘܶܐܕܢܶܝ̈ܗܿ ܣܶܟܪܰܬ݀ ܠܳܗܿ ܗܳܝ ܥܶܒܪܳܝܬܳܐ܇ ܘܰܐܪܡܺܝ ܛܳܒ̈ܳܬܳܐ ܒܰܟܢܽܘܫ̈ܳܬܳܐ܇ ܨܰܥܪܳܐ ܙܠܰܚܘ̱ ܒܰܐܦܰܘ̈ܗ̱ܝ ܥܰܠ ܐܽܘܪ̈ܚܳܬܳܐ܀

ܡܰܢܽܘ ܕܰܚܙܳܐ ܗܘܳܐ܇ ܘܠܳܐ ܬܳܗܰܪ ܗܘܳܐ܇ ܠܡܳܪܰܢ ܕܰܡܠܶܐ ܗܘܳܐ ܚܢܳܢܳܐ ܘܪ̈ܰܚܡܶܐ܇ ܟܰܕ ܝܳܗܶܒ ܡܰܓܳܢ ܟܽܠ ܥܽܘܕܪ̈ܳܢܺܝܢ܇ ܠܰܟܪ̈ܺܝܗܶܐ ܘܡܰܪ̈ܥܶܐ ܘܰܠܟܺܐܒ̈ܬܳܢܶܐ܀

ܠܣܰܡܝܳܐ ܒܝܰܕ ܪܽܘܩܳܐ ܘܛܺܝܢܳܐ ܕܰܓܒܰܠ܇ ܛܳܫ ܠܶܗ ܥܰܠ ܥܰܝܢܰܘ̈ܗ̱ܝ ܘܰܚܙܳܐ ܘܫܰܒܰܚ܇ ܙܶܠ ܚܰܘܳܐ ܠܟܳܗ̈ܢܶܐ ܐܳܡܰܪ ܗܘܳܐ ܠܶܗ܇ ܘܶܐܡܰܪܘ̱ ܡܰܢ ܦܬܰܚ ܠܳܟ ܟܰܘ̈ܰܝ ܢܽܘܗܪܳܐ܀

ܠܗܳܝ ܒܰܪ̱ܬ ܝܽܘܐܳܪܳܫ ܟܰܕ ܥܰܠ ܨܶܝܕܶܝܗܿ܇ ܐܰܚܕܳܗܿ ܗܘܳܐ ܒܺܐܝܕܳܗܿ ܘܗܳܟܰܢ ܐܶܡܰܪ܇ ܛܠܺܝܬܳܐ ܠܳܐ ܡܺܝܬܰܬ܇ ܐܶܠܳܐ ܕܰܡܟܳܐܗ̱ܝ܇ ܘܚܰܘܶܝ ܕܡܽܘܟܳܟܳܐ ܠܶܗ ܪܳܚܶܡ ܗܘܳܐ܀

ܡܶܢ ܚܰܡܫܳܐ ܠܰܚܡܺܝ̈ܢ ܘܰܬܪܶܝܢ ܢܽܘ̈ܢܺܝܢ܇ ܚܰܡܫܳܐ ܐܰܠܦܺܝ̈ܢ ܣܒܰܥ ܡܶܢ ܦܳܬܽܘܪܶܗ܇ ܬܪ̈ܶܥܣܰܪ ܩܽܘ̈ܦܺܝܢܺܝܢ ܫܩܰܠܘ̱ ܬܰܘܬܳܪ̈ܶܐ܇ ܡܶܢ ܒܳܬܰܪ ܕܰܣܒܰܥ ܟܽܠܶܗ ܟܶܢܫܳܐ܀

ܡܶܢ ܟܽܠ ܟܽܘܪ̈ܗܳܢܶܐ ܟܪ̈ܺܝܗܶܐ ܐܰܣܺܝ܇ ܘܚܰܝܶܨ ܐܳܦ ܫܰܪܰܪ ܬܒܺܝܪ̈ܰܝ ܠܶܒܳܐ܇ ܐܰܝܟ ܐܳܣܝܳܐ ܛܳܒܳܐ ܐܶܫܬܰܕܰܪ ܗܘܳܐ܇ ܘܟܽܠ ܟܺܐܒ ܘܟܽܠ ܟܽܘܪ̈ܗܳܢ ܗܽܘ ܡܰܐܣܶܐ ܗܘܳܐ܀

ܐܰܝܟ ܕܰܛܪܰܕܬ ܠܫܺܐܕܳܐ܇ ܐܳܘ ܦܳܪܽܘܩܰܢ܇ ܡܶܢ ܛܠܺܝܬܳܐ ܒܰܪܬܳܐ ܕܗܳܝ ܟܢܰܥܢܰܝܬܳܐ܇ ܛܪܽܘܕ ܗܳܫܳܐ ܡܶܢܰܢ܇ ܦܠܰܓܳܐ ܕܫܺܐܕ̈ܶܐ܇ ܘܚܰܪܰܪ ܠܢܰܦܫ̈ܳܬܰܢ ܡܶܢ ܫܽܘܥܒܳܕܗܽܘܢ܀

 

ܛܽܘܒܰܝܟܝ̱ ܐܳܦܪܰܬ ܥܽܘܢܺܝܬܳܐ ܠܳܟ ܬܶܫܒܽܘܚܬܳܐ ܐܳܣܝܳܐ ܛܳܒܳܐ܇ ܕܰܐܚܠܶܡܬ ܟܺܐܒ̈ܶܐ ܕܰܒܢܰܝ̈ܢܳܫܳܐ

ܛܽܘܒܰܝܟܝ̱ ܐܰܢ̱ܬܬܳܐ ܕܶܐܬܳܐ ܘܰܥܒܰܪ܇ ܡܳܪܳܐ ܕܪܰܘܡܳܐ ܥܰܠ ܓܶܢ̱ܒ ܩܪܺܝܬܶܟܝ̱܇ ܩܪܳܝܬܶܗ ܕܰܥܠܰܝܟܝ̱ ܥܽܘܬܪܳܐ ܦܶܠܓܰܬ݀܇ ܛܳܒ ܡܶܢ ܟܽܠܗܽܘܢ ܐܰܬܪ̈ܰܘܳܬܶܟܝ̱܇ ܛܽܘܒܰܝܟܝ̱ ܕܩܰܕܡܳܝܬܳܐ ܓܕܰܠܬܝ̱ ܠܰܟܠܺܝ̈ܠܰܝܟܝ̱܇ ܘܒܰܟܠܺܝܠܳܐ ܕܬܰܨܒܺܝܬܳܐ ܗܰܕܰܪܬܳܗܿ ܠܒܰܪܬܶܟܝ̱܇ ܥܰܠܬܺܝܢ ܠܰܛܝܳܪܳܐ܇ ܕܚܰܝ̈ܶܐ ܫܡܰܝ̈ܳܢܶܐ܇ ܝܳܗܒܺܝܢ ܠܥ̈ܳܠܽܘܠܶܐ܀

ܛܽܘܒܰܝܟܝ̱ ܕܶܐܫܬܰܘܺܝܬܝ̱ ܠܰܡܡܰܠܳܠܽܘ܇ ܥܰܡ ܗܰܘ ܕܰܒܪܳܐ ܟܽܠ ܡܰܠ̈ܳܠܶܐ܇ ܡܰܠܶܠ ܦܽܘܡܶܟܝ̱ ܘܶܐܬܡܠܺܝ ܬܶܗܪܳܐ܇ ܕܪܰܫ ܠܶܫܳܢܶܟܝ̱ ܩܽܘܫܬܳܐ ܓܰܠܝܳܐ܇ ܛܽܘܒܰܝܟܝ̱ ܕܰܐܟܪܶܙܬܝ̱ ܝܰܬܺܝܪ ܡܶܢ ܟܢܽܘܫܬܳܐ܇ ܛܽܘܒܰܝܟܝ̱ ܕܗܽܘ ܢܰܨܚܳܗܿ ܗܘܳܐ ܠܗܰܝܡܳܢܽܘܬܶܟܝ̱܇ ܛܽܘܒܰܝܟܝ̱ ܕܰܫܩܰܠܬܝ̱ ܟܽܠܥܽܘܕܪ̈ܳܢܺܝܢ܇ ܡܶܢ ܓܰܙܳܐ ܕܠܳܐ ܚܳܣܰܪ܀

ܛܽܘܒܰܝܟܝ̱ ܕܰܗܘܰܝܬܝ̱ ܡܰܬܠܳܐ ܒܥܰܡ̈ܡܶܐ܇ ܒܶܟܝ̱ ܐܶܬܕܰܡܝܰܬܝ̱ ܥܺܕܬܳܐ ܦܪܺܝܩܬܳܐ܇ ܫܒܰܩܬܝ̱ ܠܰܐܠܳܗܰܝ̈ܟܝ̱܇ ܘܰܠܒܶܝܬ ܐܰܒܽܘܟܝ̱܇ ܘܰܪܗܶܛܬܝ̱ ܒܳܬܰܪ ܡܰܠܟܳܐ ܡܫܺܝܚܳܐ܇ ܛܽܘܒܰܝܟܝ̱ ܕܣܰܓܺܝ ܠܶܗ ܛܽܘܒܶܟܝ̱ ܕܶܐܬܝܰܬܰܪ܇ ܟܰܕ ܒܰܬܪܶܝܢ ܥܳܠܡ̈ܶܐ ܠܶܟܝ̱ ܛܽܘܒܳܐ ܝܳܗܶܒ ܕܙܶܠܝ̱ ܢܶܗܘܶܐ ܠܶܟܝ̱܇ ܘܬܰܡܳܢ ܡܝܰܩܰܪ ܠܶܟܝ̱܇ ܕܰܐܢ̱ܬܝ̱ ܗܺܝ ܐܰܟܪܶܙܬܳܝܗ̱ܝ܀

 

ܝܰܘܢܳܐ ܛܠܺܝܬܳܐ ܥܽܘܢܺܝܬܳܐ ܫܽܘܒܚܳܐ ܠܳܟ ܐܳܣܝܳܐ ܛܳܒܳܐ܇ ܕܰܐܣܺܝܬ ܟܺܐܒ̈ܶܐ ܕܐ̱ܢܳܫܽܘܬܰܢ

ܦܰܠܓܳܗܿ ܒܺܝܫܳܐ ܠܰܐܳܘܝܽܘܬܰܢ܇ ܕܠܳܐ ܡܨܶܐ ܗܘܳܐ ܚܺܝܠ ܫܰܘܝܽܘܬܰܢ܇ ܠܶܗ ܕܺܝܠܶܗ ܒܰܢ ܗܽܘ ܪܡܶܐ ܠܶܗ ܘܗܳܐ ܠܰܢ ܪܡܶܐ ܠܰܢ ܒܰܚܕܳܕ̈ܶܐ܇ ܗܳܢܰܘ ܕܶܐܨܛܰܢܰܥ ܘܰܫܕܳܐ ܒܰܝܢܳܬܰܢ܇ ܚܣܳܡܳܐ ܫܳܓܶܫ ܟܽܠ܇ ܘܰܠܡܰܢ ܠܳܐ ܬܶܟܪܶܐ ܕܰܡܶܢܳܚ ܫܳܓܽܘܫܰܢ܇ ܘܰܚܢܰܢ ܗܽܘ ܒܺܝܫܺܝܢ܇ ܫܒܰܩܢܰܢ ܩܳܛܽܘܠܰܢ ܘܰܡܚܰܝܢ ܗܰܕܳܡܰܝ̈ܢ ܗܳܐ ܫܦܶܐ ܕܳܠܽܘܚܰܢ܇ ܘܰܕܠܺܝܚ ܪܶܥܝܳܢܰܢ܀

ܗܳܝ ܕܶܐܡܰܪ ܕܠܳܐ ܫܰܦܺܝܪܳܐ܇ ܠܡܶܣܰܒ ܠܰܚܡܳܐ ܕܰܒܢܰܝ̈ܳܐ܇ ܠܡܰܪܡܳܝܽܘ ܠܟܰܠܒ̈ܶܐ ܕܢܶܐܟܠܽܘܢ ܝܰܩܰܪ ܒܳܗܕܶܐ ܠܝܽܘܕܳܝ̈ܶܐ܇ ܟܰܕ ܟܰܠܒ̈ܶܐ ܟܰܢܺܝ ܠܥܰܡܡ̈ܶܐ ܛܳܥܰܝ̈ܳܐ܇ ܕܡܶܢܗܽܘܢ ܟܢܰܥܢܰܝܬܳܐ܇ ܘܠܰܚܡܳܐ ܥܽܘܕܪ̈ܳܢܰܘܗ̱ܝ ܘܳܐܣܰܘ̈ܳܬܳܐ ܕܺܝܠܶܗ܇ ܒܢܰܝ̈ܳܐ ܝܽܘܕܳܝ̈ܶܐ܇ ܘܣܰܟ̈ܠܶܐ ܘܰܥܘܺܝܪ̈ܶܐ ܣܳܟ ܠܳܐ ܐܶܬܒܰܝܰܢܘ̱܇ ܘܠܶܗ ܫܳܛܘ̱ ܘܒܰܙܰܚܘ̱ ܒܶܗ܀

ܥܰܡ̈ܡܶܐ ܚܰܢܦ̈ܶܐ ܗܰܝܡܶܢܘ̱ ܒܶܗ܇ ܘܰܒܢ̈ܰܝ ܒܰܝܬܶܗ ܟܦܰܪܘ̱ ܗ̱ܘܰܘ ܒܶܗ܇ ܝܰܗܒ ܗܘܳܐ ܠܰܚܡܶܗ ܠܢܽܘܟܪ̈ܳܝܶܐ ܘܰܠܥܶܒܪ̈ܳܝܶܐ ܕܗܰܝܡܶܢܘ̱ ܒܶܗ ܘܰܠܗܳܢܽܘܢ ܕܟܰܢܺܝ ܒܢܰܝ̈ܳܐ ܚܰܒܝܒ̈ܶܐ ܛܪܰܕ ܡܶܢ ܝܳܪܬܽܘܬܶܗ܇ ܟܢܽܘܫܬܳܐ ܥܶܒܪܳܝܬܳܐ܇ ܛܰܪܕܳܗܿ ܘܶܐܣܬܰܠܝܰܬ ܟܢܰܥܢܰܝܬܳܐ ܥܶܠܰܬ݀܇ ܘܚܽܘܠܡܳܢܳܐ ܢܶܣܒܰܬ݀ ܠܢܰܦܫܳܗܿ ܘܰܠܒܰܪܬܳܗܿ ܘܰܪܚܶܡܝ ܘܶܐܬܒܰܝܬܺܝܽܘ܀

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܩܳܛܶܠ ܐ̱ܢܳܫܳܐ ܕܒܰܪ ܠܰܛܠܺܝܬܳܐ ܕܰܢܒܰܙܰܚ ܒܳܗܿ܇ ܘܰܡܫܰܢܶܩ ܠܳܗܿ ܡܰܪܺܝܪܳܐܺܝܬ ܒܝܰܕ ܚܰܪܡܽܘܬܶܗ܇ ܢܩܶܐ ܠܰܚܒܳܠܳܐ ܐܰܥܕܳܐ ܒܰܝܬܰܘܗ̱ܝ ܡܶܢ ܒܶܝܬ ܐܺܝܕܰܘ̈ܗ̱ܝ܇ ܕܣܰܓܺܝ ܨܳܒܶܐ ܒܓܶܢܣܳܐ ܕܐ̱ܢܳܫ̈ܳܐ ܠܰܡܚܰܒܳܠܽܘ܀

ܗܘܳܬ݀ ܛܰܝܒܽܘܬܳܐ ܐܶܡܳܐ ܒܰܐܪܥܳܐ ܘܰܡܦܺܝܣܳܐ ܗܘܳܬ݀܇ ܐܰܝܟ ܗܳܝ ܕܰܫܒܳܗܿ ܒܺܝܫܳܐ ܠܒܰܪܬܳܗܿ ܒܩܳܠܳܐ ܪܳܡܳܐ܇ ܡܶܢ ܛܰܝܒܽܘܬܳܐ ܥܰܠ ܗܘܳܐ ܦܝܳܣܳܐ ܩܕܳܡ ܐܰܠܳܗܳܐ܇ ܕܢܶܫܬܰܕܰܪ ܗܘܳܐ ܐܳܣܝܳܐ ܕܪ̈ܰܚܡܶܐ ܠܶܗ ܬܶܫܒܽܘܚܬܳܐ܀

 

ܩܰܘܡܳܐ ܕܰܬܪܶܝܢ ܕܠܺܠܝܳܐ

ܩܳܠܳܐ ܐܺܝܢ ܣܳܗ̈ܕܶܐ ܡܶܛܽܠ ܡܳܢܳܐ

ܐܺܝܢ ܡܳܪܰܢ ܡܶܛܽܠܡܳܢܳܐ ܥܒܰܪ ܒܰܬܚܽܘ̈ܡܶܐ܇ ܕܚܰܢܦ̈ܶܐ ܣܳܓܕ̈ܰܝ ܠܰܦܬܰܟܪ̈ܶܐ ܘܥܰܡܶܗ ܬܰܠܡܺܝ̈ܕܰܘܗ̱ܝ܇ ܐܶܠܳܐ ܡܶܛܽܠ ܕܰܠܥܰܡ̈ܡܶܐ ܦܬܺܝܚ ܠܶܗ ܬܰܪܥܶܗ܇ ܕܰܒܚܺܐܪܽܘܬܗܽܘܢ ܢܶܬܩܰܪܒܽܘܢ ܠܰܬܝܳܒܽܘܬܳܐ ܗ ܘ ܗ܇ ܒܪܺܝܟ ܗܽܘ ܡܩܰܒܶܠ ܟܽܠ ܥܰܡ̈ܡܺܝܢ܇ ܐܰܝܠܶܝܢ ܕܩܳܪܶܝܢ ܠܶܗ܀

ܟܢܰܥܢܰܝܬܳܐ ܒܩܳܠ̈ܰܝ ܚܰܫܳܐ ܐܶܬܟܰܫܦܰܬ݀ ܠܶܗ܇ ܕܒܰܪ ܕܰܘܺܝܕ ܝܶܫܽܘܥ ܡܳܪܰܢ ܐܶܬܪܰܚܰܡܥܠܰܝ܇ ܒܰܪܬܝ̱ ܒܺܝܫܳܐܺܝܬ ܡܶܬܕܰܒܪܳܐ ܡܶܢ ܣܳܛܳܢܳܐ܇ ܝܳܕܥܳܐ ܐ̱ܢܳܐ ܕܪ̈ܰܚܡܰܝܟ ܫܰܠܚܽܘܟ ܕܬܰܐܣܶܐ ܟܪܺܝܗܽܘܬܰܢ܇ ܗ ܘ ܗ ܘܬܶܛܪܽܘܕ ܕܰܝ̈ܘܶܐ ܒܢܰܝ̈ ܛܽܘܥܝܰܝ ܡܶܢ ܡܰܪܥܺܝܬܳܟ܀

 

ܣܳܗܕܰܘ̈ܗ̱ܝ ܐܰܢ̱ܬܽܘܢ

ܐܶܬܳܐ ܓܰܒܪܳܐ ܘܰܠܚܰܣܺܝܢܳܐ ܒܚܰܝܠܶܗ ܐܰܣܪܶܗ ܐܰܝܟ ܕܰܒܫܺܝܫܰܠܬܳܐ܇ ܘܰܐܥܕܺܝ ܡܶܢܶܗ ܛܠܺܝܬܳܐ ܒܬܽܘܠܬܳܐ܇ ܗܳܝ ܒܰܪ̱ܬ ܚܰܢܦ̈ܶܐ ܘܰܠܗܰܘܢܳܗܿ ܐܰܦܢܺܝ܇ ܒܪܺܝܟ ܗܽܘ ܐܳܣܝܳܐ܇ ܕܶܐܬܳܐ ܘܣܰܥܪܳܗܿ ܒܰܚܢܳܢܶܗ܇ ܘܰܐܒܗܶܬ ܠܒܺܝܫܳܐ ܘܰܠܚܰܝܠܶܗ܀

ܠܰܟܢܰܥܢܰܝܬܳܐ܇ ܙܰܩܬܳܗܿ ܛܶܐܒܳܐ܇ ܕܶܐܬܳܐ ܐܳܣܝܳܐ ܘܥܳܒܰܪ ܒܝܰܕ ܬܚܽܘ̈ܡܶܐ܇ ܚܙܳܬ݀ ܕܰܡܫܰܢܶܩ ܫܺܐܕܳܐ ܠܒܰܪܬܳܗܿ܇ ܘܰܡܛܰܪܶܦ ܠܳܗܿ ܒܙܰܘܥܳܐ ܘܰܒܽܘܠܗܳܝܳܐ܇ ܘܒܳܬܰܪ ܝܶܫܽܘܥ ܪܶܗܛܳܐ ܚܺܝܨܳܐ ܠܒܺܝܟܳܐ ܗܘܳܬ݀܇ ܕܬܶܣܰܒܝ̱ ܡܶܢܶܗ ܐܳܣܝܽܘܬܳܐ܀

 

ܡܰܕܪܳܫܳܐ ܩܳܠܳܐ ܠܟܶܢܫܳܐ ܥܶܠܳܝܳܐ ܥܶܢܝܳܢܳܐ ܫܽܘܒܚܳܐ ܘܬܰܘܕܺܝܬܳܐ ܟܽܠܢܳܫ ܢܝܰܒܶܒ ܠܳܟ܇ ܐܳܣܝܳܐ ܕܐܶܫܬܰܕܰܪ ܕܢܰܐܣܶܐ ܡܚܺܝܠܽܘܬܰܢ

ܡܶܢ ܟܽܠܗܽܘܢ ܥܰܡ̈ܡܶܐ܇ ܚܕܳܐ ܒܰܠܚܽܘܕ ܚܶܨܦܰܬ݀ ܕܬܶܒܥܶܐ ܠܳܗܿ ܟܠܺܝܠܳܐ܇ ܦܰܐܝܳܐ ܠܬܶܫܒܽܘܚܬܳܐ܇ ܒܰܪ̱ܬ ܐܰܪ̈ܡܳܝܶܐ ܗܘܳܬ݀܇ ܕܰܫܒܰܩܬ ܟܰܕ ܫܛܳܬ݀ ܐܰܠܳܗ̈ܶܐ ܕܛܽܘܥܝܰܝ ܘܨܰܠܡ̈ܶܐ ܕܒܶܝܬ ܐܰܒܽܘܗ̱ܝ܇ ܐܳܘ ܠܚܽܘܨܳܦܳܐ ܪܗܺܝܒܳܐ ܕܰܪܗܺܝܒܳܐܺܝܬ ܫܩܰܠ܇ ܟܽܠܳܗܿ ܫܶܐܠܬܳܗܿ ܕܰܒܝܰܕ ܚܽܘܨܳܦܳܐ ܫܶܐܠܰܬ݀܇ ܠܳܐ ܕܶܝܢ ܐܶܬܟܰܠܝܰܬ݀ ܒܳܥܽܘܬܳܗܿ܀

ܟܢܥܢܰܝܬܳܐ ܒܚܺܐܦܳܐ ܪܶܗܛܳܐ ܠܒܺܝܟܳܐ ܗܘܳܬ݀܇ ܘܰܒܨܰܘܪܳܐ ܪܳܡܳܐ ܩܥܳܬܳܐ ܙܳܥܩܳܐ ܗܘܳܬ݀܇ ܐܳܦ ܗܰܝܡܳܢܽܘܬܳܗܿ ܣܰܓܺܝ ܦܰܐܝܳܐ ܗܘܳܬܽ܇ ܘܰܒܚܽܘܨܳܦܳܐ ܚܺܝܨܳܐ ܠܘܳܬܶܗ ܩܳܪܒܳܐ ܗܘܳܬ݀܇ ܐܳܘ ܐܰܢ̱ܬܬܳܐ ܡܰܢܽܘ ܐܰܠܦܶܟܝ̱ ܥܰܠ ܐܳܣܝܳܐ܇ ܐܳܘ ܛܰܥܰܡܳܢܺܝܬܳܐ ܕܠܳܐ ܙܶܠܰܬ݀ ܒܡܶܠܬܳܗܿ܇ ܐܳܘ ܠܟܰܝܠܳܐ ܫܦܺܝܥܳܐ ܕܢܶܣܟܰܬ݀ ܒܛܰܝܒܽܘܬܳܐ܀

ܐܳܡܪܺܝܢ ܠܶܗ ܟܶܢ̈ܫܶܐ ܪܰܒܰܢ ܡܰܠܦܳܢܳܐ܇ ܫܰܪܺܝ ܠܗܳܕܶܐ ܐܰܢ̱ܬܬܳܐ ܕܗܳܐ ܩܳܥܝܳܐ ܒܳܬܪܰܢ܇ ܘܫܰܒܩܳܗܿ ܥܰܠ ܣܰܒܪܳܐ ܟܰܕ ܗܺܝ ܒܬܽܘܟܠܳܢܳܐ܇ ܘܟܰܕ ܗܺܝ ܩܳܪܒܳܐ ܗܘܳܬ݀ ܗܽܘ ܪܰܚܺܝܩ ܡܶܢܳܗܿ܇ ܦܶܣܥܰܬ݀ ܪܗܺܝܒܳܐܺܝܬ ܘܰܩܥܳܬ݀ ܚܰܨܺܝܦܳܐܺܝܬ܇ ܐܳܦ ܪܶܗܛܰܬ݀ ܠܒܺܝܒܳܐܺܝܬ܇ ܘܢܶܣܒܰܬ݀ ܪܗܺܝܒܳܐܺܝܬ܇ ܚܽܘܠܡܳܢܳܐ ܠܒܰܪܬܳܗܿ ܡܫܰܡܠܝܳܐܺܝܬ܀

 

ܚܽܘܬ ܐܰܚ̈ܰܝ ܪ̈ܫܺܝܡܶܐ ܥܽܘܢܺܝܬܳܐ ܒܪܺܝܟ ܕܶܐܬܳܐ ܒܚܽܘܒܶܗ ܘܰܐܣܺܝ ܟܽܘܪ̈ܗܳܢܰܝܢ

ܢܚܶܬ ܗܰܠܶܟ ܒܰܐܪܥܳܐ܇ ܡܰܐܚܶܐ ܒܶܪ̈ܝܳܬܳܐ܇ ܠܟܽܠ ܡܰܢ ܕܰܒܥܳܝܗ̱ܝ ܗܘܳܐ܇ ܝܰܗܒ ܠܶܗ ܫܶܐܠ̈ܳܬܶܗ܇ ܘܰܡܠܺܝ ܣܢܽܝܩܽܘܬܶܗ܀

ܕܳܠ ܡܶܢ ܨܶܝܕ ܐܰܒܽܘܗ̱ܝ܇ ܘܶܐܬܳܐ ܠܘܳܬ ܓܶܢܣܰܢ܇ ܕܟܽܘܪ̈ܗܳܢܶܐ ܡܠܶܐ ܗܘܳܐ܇ ܘܡܰܓܳܢ ܡܰܐܣܶܐ ܗܘܳܐ܇ ܒܚܰܝܠܳܐ ܘܰܒܡܶܠܬܳܐ܀

ܗܰܠܶܟ ܗܘܳܐ ܘܰܡܛܳܐ܇ ܠܰܐܬܪܳܐ ܕܰܐܪ̈ܡܳܝܶܐ܇ ܘܰܚܕܳܐ ܟܢܰܥܢܰܝܬܳܐ܇ ܢܶܦܩܰܬ݀ ܗܘܳܬ݀ ܒܳܬܪܶܗ܇ ܘܫܳܠܳܐ ܐܳܣܝܽܘܬܳܐ܀

ܠܟܽܠ ܐܰܬܪܳܐ ܕܰܡܛܳܐ܇ ܡܳܪܰܢ ܒܶܗ ܣܥܰܪ ܗܘܳܐ܇ ܡܚܺܝ̈ܠܶܐ ܘܰܟܪ̈ܺܝܗܶܐ܇ ܘܕܰܝ̈ܘܶܐ ܐܰܦܶܩ ܗܘܳܐ܇ ܘܰܠܫܺܐܕ̈ܶܐ ܪܕܰܦ ܗܘܳܐ܀

ܡܳܪܰܢ ܙܓܽܘܪ ܡܶܢܰܢ܇ ܠܒܺܝܫܳܐ ܘܰܠܚܰܝܠܶܗ܇ ܐܰܟܡܳܐ ܕܰܙܓܰܪܬܳܝܗ̱ܝ܇ ܡܶܢ ܒܰܪ̱ܬ ܟܢܰܥܢܰܝܬܳܐ ܕܢܶܙܡܰܪ ܠܳܟ܇ ܫܽܘܒܚܳܐ܀

ܐܳܘ ܠܚܽܘܒܳܗܿ ܕܰܐܢ̱ܬܬܳܐ܇ ܕܪܶܗܛܰܬ݀ ܒܳܬܰܪ ܝܶܫܽܘܥ܇ ܘܠܰܡܫܺܝܚܳܐ ܐܰܟܪܙܰܬ݀܇ ܘܒܰܪ ܕܰܘܺܝܕ ܩܪܳܬܶܗ܇ ܐܳܦ ܡܳܪܶܗ ܕܕܰܘܺܝܕ܀

ܛܶܥܢܰܬ݀ ܗܘܳܬ݀ ܐܰܝܬܝܰܬ݀܇ ܩܽܘܠܳܣܳܐ ܒܦܽܘܡܳܗܿ܇ ܘܚܽܘܒܳܐ ܒܪܶܥܝܳܢܳܗܿ܇ ܘܚܰܫܳܐ ܥܰܠ ܠܶܒܳܗܿ܇ ܘܚܰܕܽܘܬܳܐ ܪܰܒܬܳܐ܀

 

ܡܫܺܝܚܳܐ ܡܶܫܚܳܐ ܥܽܘܢܺܝܬܳܐ ܒܪܺܝܟ ܕܰܐܣܺܝ ܠܰܟܪܺܝܗܽܘܬܰܢ܇ ܒܪܺܝܟ ܕܰܥܨܰܒ ܠܰܬܒܺܝܪܽܘܬܰܢ

ܡܳܪܰܢ ܒܽܐܘܪܚܳܐ ܪܳܕܶܐ ܗܘܳܐ ܒܰܬܚܽܘ̈ܡܶܐ  ܕܨܽܘܪ ܘܰܕܨܰܝܕܳܢ܇ ܟܢܰܥܢܰܝܬܳܐ ܩܶܪܒܰܬ݀ ܨܶܝܕܶܘܗ̱ܝ܇ ܟܰܕ ܒܰܚܢܰܓܬܳܐ ܡܦܺܝܣܳܐ ܠܶܗ܇ ܐܰܢ̱ܬ ܗܽܘ ܐܳܣܝܳܐ ܫܡܰܝܳܢܳܐ܇ ܕܡܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܐܰܣܳܐ ܠܺܝ ܒܰܪ̱ܬܝ̱ ܡܶܢ ܫܺܐܕܳܐ܇ ܕܬܶܗܘܶܐ ܢܶܩܝܳܐ ܒܰܓܙܳܪܳܟ܀

ܟܰܕ ܦܰܪ̈ܬܽܘܬܶܐ ܠܚܽܘܕ ܫܶܐܠܰܬ݀܇ ܚܽܘܠܡܳܢܳܐ ܓܡܺܝܪܳܐ ܝܰܗܒܬ ܠܳܗܿ܇ ܐܳܦ ܐܳܣܝܽܘܬܳܐ ܡܫܰܡܠܰܝܬܳܐ܇ ܘܰܛܪܰܕܬ ܠܫܺܐܕܳܐ ܕܫܳܚܶܩ ܠܳܗܿ܇ ܘܚܰܘܺܝܬ ܕܰܡܪܰܚܡܳܢܳܐ ܐܰܢ̱ܬ܇ ܣܥܽܘܪ ܥܰܡܰܢ ܐܰܝܟ ܕܰܣܥܰܪܬܳܗܿ܇ ܘܰܐܣܳܐ ܟܺܐܒ̈ܰܝܢ ܘܟܽܘܪ̈ܗܳܢܰܝܢ܀

ܟܰܕ ܪܳܥܝܳܐ ܓܙܳܪܶܗ ܣܥܰܪ ܗܘܳܐ܇ ܦܶܓܥܰܬ݀ ܒܶܗ ܚܕܳܐ ܕܳܘܺܝܬܳܐ܇ ܕܥܰܠ ܡܰܘܬܳܐ ܘܚܰܛܦܶܗ ܠܰܒܪܳܗܿ܇ ܘܫܰܪܝܰܬ݀ ܒܳܟܝܳܐ ܒܳܟܰܪܝܽܘܬܳܐ܇ ܘܰܥܢܳܐ ܡܳܪܰܢ ܘܶܐܡܰܪ ܠܳܗܿ܇ ܐܶܢܳܐ ܐܰܦܢܺܝܘܗ̱ܝ ܠܺܝܚܺܝܕܶܟܝ̱܇ ܘܢܶܗܘܶܐ ܠܺܝ ܣܳܗܕܳܐ ܠܡܶܠ̈ܰܝ܇ ܩܕܳܡ ܗܳܢ ܥܰܡܳܐ ܛܳܠܽܘܡܳܐ܀

 

ܟܰܠܰܬ݀ ܡܰܠܟܳܐ ܥܽܘܢܺܝܬܳܐ ܒܪܺܝܟ ܗܽܘ ܕܰܢܚܶܬ ܠܘܳܬܰܢ܇ ܟܰܕ ܠܳܐ ܫܰܢܺܝ ܡܶܢ ܨܶܝܕ ܐܰܒܽܘܗ̱ܝ

ܠܰܘ ܠܰܚܠܺܝܡ̈ܶܐ ܒܳܥܶܝܬ܇ ܕܠܳܐ ܣܢܺܝܩ ܐܰܢ̱ܬ ܗܰܘ ܥܰܠ ܝܽܘܠܦܳܢܳܐ܇ ܨܶܝܕ ܡܰܟܰܐܒ̈ܶܐ ܐܶܫܬܰܠܰܚܬ܇ ܐܰܝܟ ܡܳܐ ܕܶܐܡܰܪ ܦܽܘܡܳܟ ܚܰܝ̈ܶܐ܇ ܕܰܘܺܝܕ ܢܒܺܝܳܐ܇ ܥܠܰܝܟ ܪܳܡܶܙ ܗܘܳܐ ܒܰܙܡܺܝܪ̈ܳܬܶܗ܇ ܕܪܽܘܚܳܐ ܕܩܽܘܕܫܳܐ܇ ܕܗܳܢܰܘ ܐܰܠܳܗܳܐ܇ ܕܥܳܒܶܕ ܬܶܕܡܪ̈ܳܬܳܐ܇ ܬܽܘܒ ܡܚܰܘܶܐ ܘܰܠܥܰܡ̈ܡܶܐ ܚܶܝܠܶܗ܀

ܦܳܥܠܳܐ ܠܰܐܝܳܐ ܥܒܺܝܕ ܗܽܘ ܘܰܠܛܳܒ̈ܳܬܳܐ ܠܳܐ ܡܶܬܪܟܶܢ܇ ܡܶܢ ܫܽܘܪܳܝܳܐ ܠܒܺܝܫܬܳܐ܇ ܘܰܠܡܰܦܽܘܠܬܳܐ ܕܟܽܠܢܳܫ ܨܳܒܶܐ܇ ܐܳܘ ܓܰܢ̱ܒܳܪܳܐ܇ ܕܶܐܬܳܐ ܕܢܶܦܪܽܘܩ ܨܰܠܡܶܗ܇ ܪܰܒܳܐ ܡܶܢ ܐܳܬܳܐ܇ ܕܢܶܚܙܽܘܢܳܗܿ ܣܳܢ̈ܐܶܐ ܘܢܶܒܗܬܽܘܢ܀

ܪܰܒ ܗܽܘ ܚܽܘܒܶܟܝ̱ ܐܰܢ̱ܬܬܳܐ܇ ܘܪܰܒܳܐܗ̱ܝ ܣܰܓܺܝ ܗܰܝܡܳܢܽܘܬܶܟܝ̱܇ ܠܰܘ ܒܰܪܢܳܫܳܐ ܫܰܡܗܶܟܝ̱܇ ܐܶܠܳܐ ܟܰܠܒܳܐ ܘܠܳܐ ܟܶܪܝܰܬ݀ ܠܶܟܝ̱܇ ܙܶܠܝ̱ ܢܶܗܘܶܐ ܠܶܟܝ̱܇ ܙܘܳܕ̈ܶܐ ܝܰܗܒ ܠܶܟܝ̱܇ ܛܳܒ ܡܶܢ ܥܽܘܬܪ̈ܶܐ܇ ܘܡܶܢ ܩܶܢܝܳܢ̈ܶܐ܇ ܘܶܐܬܪܰܓܪܰܓܬܝ̱ ܠܰܐܝܕܳܐ ܕܢܰܦܫܶܟܝ̱ ܐܶܬܝܰܐܝܰܒܬ݀܇ ܘܶܐܬܡܰܠܝܰܬܝ ܚܰܕܽܘܬܳܐ ܒܡܰܘܗܰܒܬܶܗ܀

 

ܣܽܘܓܺܝܬܳܐ ܒܩܳܠܳܐ ܥܰܡܳܐ ܘܥܰܡܡ̈ܶܐ ܥܽܘܢܺܝܬܳܐ ܒܪܺܝܟ ܕܰܒܚܽܘܒܶܗ ܠܪܰܘܡܳܐ ܫܒܰܩ܇ ܘܠܰܐܪܥܳܐ ܕܟܽܘ̈ܒܶܐ ܢܚܶܬ ܘܰܡܛܳܐ

ܐܶܬܰܘ ܛܶܐܒ̈ܶܐ ܡܚܰܕܝ̈ܳܢܶܐ܇ ܠܶܐܕܢܰܝ̈ ܐܰܢ̱ܬܬܳܐ ܟܢܰܥܢܰܝܬܳܐ܇ ܕܝܶܫܽܘܥ ܐܳܣܝܳܐ ܗܳܐ ܥܳܒܰܪ܇ ܒܰܬܚܽܘ̈ܡܶܐ ܕܨܽܘܪ ܘܰܕܨܰܝܕܳܢ܀

ܒܐ̱ܢܳܫܽܘܬܶܗ ܫܩܰܠ ܨܽܘܪ̈ܳܬܳܐ܇ ܐܰܟܡܳܐ ܕܥܽܘ̈ܠܶܐ ܒܳܟܰܪ̈ܣܳܬܳܐ܇ ܒܰܐܠܳܗܽܘܬܶܗ ܕܳܠ ܘܰܢܦܰܩ܇ ܘܠܳܐ ܫܪܳܐ ܛܰܒ̈ܥܶܐ ܕܰܒܬܽܘ̈ܠܶܐ܀

ܓܢܺܝܙ ܗܽܘ ܐ̱ܪܳܙܳܐ ܘܰܡܚܰܦܰܝ ܡܶܢ ܕܳܪ̈ܶܐ ܘܡܶܢ ܫܰܪ̈ܒܳܬܳܐ܇ ܘܒܚܰܪܰܬ ܙܰܒܢ̈ܶܐ ܐܶܬܓܰܠܺܝ܇ ܘܶܐܬܳܐ ܠܥܳܠܡܳܐ ܐܰܝܟ ܕܰܨܒܳܐ܀

ܕܽܘܡܳܪܳܐ ܩܪܳܝܗ̱ܝ ܐܶܫܰܥܝܳܐ܇ ܘܶܐܡܶܗ ܥܢܳܢܳܐ ܩܰܠܺܝܠܬܳܐ܇ ܘܰܐܝܟܰܢܳܐ ܫܡܶܗ ܕܽܘܡܳܪܳܐ܇ ܟܽܠܶܗ ܬܶܗܪܳܐ ܘܬܶܕܡܽܘܪܬܳܐ܀

ܗܽܘ ܒܛܰܝܒܽܘܬܶܗ ܢܚܶܬ ܗܰܠܶܟ܇ ܒܰܝܢܳܬ ܟܰܪ̈ܟܶܐ ܘܽܐܳܘܚܕ̈ܳܢܶܐ܇ ܘܰܣܥܰܪ ܚܰܝ̈ܠܶܐ ܘܳܐܣܘ̈ܳܬܳܐ܇ ܒܫܽܘܠܳܛܳܢܳܐ ܦܐܶܐ ܠܰܐܠܳܗܳܐ܀

ܘܽܐܳܘܪܚܳܐ ܩܪܳܬܶܗ ܕܰܢܗܰܠܶܟ܇ ܥܰܠ ܬܚܽܘܡ̈ܶܐ ܕܨܽܘܪ ܘܰܕܨܰܝܕܳܢ܇ ܘܥܰܡܶܗ ܟܶܢܫܳܐ ܣܰܓܺܝܐܳܐ܇ ܘܰܚܕܺܝܪܺܝܢ ܠܶܗ ܬܰܠܡܺܝܕܰܘ̈ܗ̱ܝ܀

ܙܳܝܚܺܝܢ ܐ̱ܢܳܫ̈ܳܐ ܡܶܢ ܟܽܠܕܽܘܟ܇ ܘܳܐܬܶܝܢ ܨܶܝܕܰܘܗ̱ܝ ܕܢܶܐܬܰܐܣܽܘܢ܇ ܘܟܽܠܚܰܕ ܚܰܕ ܐܰܝܟ ܫܶܐܠܬܶܗ܇ ܝܳܗܶܒ ܡܰܓܳܢ ܘܠܳܐ ܟܳܠܶܐ܀

ܚܕܳܐ ܐܰܢ̱ܬܬܳܐ ܬܶܟܒܽܘܗܿ ܫܶܡܥ̈ܶܐ܇ ܕܗܳܐ ܝܶܫܽܘܥ ܐܳܣܝܳܐ ܥܳܒܰܪ܇ ܘܩܳܡܰܬ݀ ܪܶܗܛܰܬ݀ ܪܗܺܝܒܳܐܺܝܬ܇ ܘܰܐܪܺܝܡܰܬ݀ ܩܳܠܳܗܿ ܘܩܳܥܝܳܐ܀

ܛܶܥܢܰܬ݀ ܣܰܒܪܳܐ ܘܬܽܘܟܠܳܢܳܐ܇ ܘܗܰܝܡܳܢܽܘܬܳܐ ܘܩܽܘܪܒܳܢܳܐ܇ ܘܥܶܠܰܬ݀ ܕܬܰܪܡܶܐ ܠܶܗ ܦܝܳܣܳܐ܇ ܐܰܝܟ ܪܽܘܡܝܳܢܳܐ ܠܒܶܝܬ ܡܰܠܟܳܐ܀

ܝܶܗܒܰܬ݀ ܢܰܦܫܳܐ ܟܰܕ ܚܳܕܝܳܐ܇ ܕܬܶܛܥܶܐ ܠܥܰܡܳܗܿ ܘܒܶܝܬ ܐܰܒܽܘܗܿ܇ ܘܕܬܰܘܕܶܐ ܒܶܗ ܐܶܫܬܰܘܕܝܰܬ݀܇ ܘܰܕܒܰܪ ܕܰܘܺܝܕ ܐܰܟܶܪܙܬܶܗ܀

ܟܠܺܝ ܡܳܪܝ̱ ܫܰܒܛܶܗ ܕܣܳܛܳܢܳܐ܇ ܕܪܳܕܶܐ ܥܠܰܝܡܬܳܐ ܘܰܡܩܺܝܡ ܠܳܗܿ܇ ܪܳܡܝܳܐ ܒܫܽܘܢܳܩܳܐ ܥܰܡܳܗܿ܇ ܚܛܽܘܦܶܝܗܿ ܘܰܐܥܕܶܝܗܿ ܕܠܳܟ ܬܶܗܘܶܐ܀

ܠܳܐ ܫܳܠܶܐ ܡܶܢ ܫܽܘܢܳܩܳܗܿ܇ ܕܳܐܟܶܠ ܩܰܪܨܳܐ ܕܰܕܒܺܝܪ ܠܳܗܿ܇ ܘܡܰܪܺܝܪ ܒܶܟܝܳܗܿ ܘܰܚܢܺܝܓܺܝܢ܇ ܐܽܘܠܨܳܢ̈ܶܐ ܕܥܳܒܪܺܝܢ ܥܠܶܝܗܿ܀

ܡܶܬܚܰܬ݀ ܪܶܗܛܳܐ ܩܰܠܺܝܠܳܐ܇ ܘܚܶܒܨܰܬ݀ ܒܟܶܢܫ̈ܶܐ ܣܰܓܺܝ̈ܐܶܐ܇ ܘܰܩܥܳܬ݀ ܒܩܳܠܳܐ ܥܰܫܺܝܢܳܐ܇ ܕܒܰܪ ܕܰܘܺܝܕ ܪܰܚܶܡܥܠܰܝ܀

ܢܽܘܓܪܳܐ ܐܺܝܬ ܠܳܗܿ ܕܡܶܫܬܰܢܩܳܐ܇ ܘܰܡܒܰܙܰܚ ܒܳܗܿ ܣܳܛܳܢܳܐ܇ ܐܰܢ̱ܬ ܗܽܘ ܒܪܰܝܬܳܗܿ ܘܠܳܟ ܬܶܗܘܶܐ܇ ܚܣܽܘܟ ܡܶܢ ܒܺܝܫܳܐ ܠܦܰܐܝܽܘܬܳܗܿ܀

ܣܥܽܘܪ ܒܺܝ ܛܰܝܒܽܘܬܳܐ ܗܳܕܶܐ܇ ܕܰܠܗܳܕܶܐ ܪ̈ܰܚܡܰܝܟ ܐܰܪܟܢܽܘܟ܇ ܕܰܐܣܳܐ ܠܺܝ ܒܰܪܬܝ̱ ܡܳܪܝ̱ ܘܰܐܠܳܗܝ̱ ܕܗܳܐ ܡܶܫܬܰܢܩܳܐ ܡܶܢ ܒܺܝܫܳܐ܀

ܥܰܒܕܳܐ ܒܺܝܫܳܐ ܘܡܳܪܽܘܕܳܐ܇ ܚܰܛܦܳܗܿ ܠܗܳܕܶܐ ܡܶܢ ܪܳܥܝܳܐ܇ ܟܐܺܝ ܒܶܗ ܘܡܶܚܕܳܐ ܫܳܒܶܩ ܠܳܗܿ܇ ܘܠܳܟ ܩܽܘܠܳܣܳܐ ܘܬܶܫܒܽܘܚܬܳܐ܀

ܦܳܬܽܘܪܳܟ ܒܢܰܝ̈ܳܐ ܢܶܐܟܠܽܘܢ܇ ܘܒܳܟ ܢܶܣܬܰܒܥܽܘܢ ܐܳܦ ܢܰܘܕܽܘܢ܇ ܘܦܰܪ̈ܬܽܘܬܶܐ ܕܢܳܬܪܺܝܢ ܡܶܢܶܗ܇ ܟܰܠܒ̈ܶܐ ܢܶܐܟܠܽܘܢ ܘܢܶܬܬܰܪܣܽܘܢ܀

ܨܶܒܝܳܢܳܐ ܛܳܒܳܐ ܐܺܝܬ ܠܳܟ܇ ܘܦܳܬܽܘܪܳܟ ܝܰܬܺܝܪܳܐܝܬ܇ ܕܢܶܐܟܠܽܘܢ ܒܢܰܝ̈ܳܐ ܐܳܦ ܟܰܠܒ̈ܶܐ܇ ܟܰܕ ܠܳܐ ܚܳܣܰܪ ܘܛܳܒܬܳܐ ܡܳܠܶܐ܀

ܩܳܡܰܬ݀ ܠܳܗܿ ܕܬܶܫܡܰܥܝ̱ ܡܶܠܬܶܗ܇ ܡܶܢ ܦܽܘܢܳܝܳܐ ܕܝܳܗܶܒ ܠܳܗܿ܇ ܘܥܰܠ ܗܰܝܡܳܢܽܘܬܳܐ ܣܰܒܪܳܗܿ܇ ܘܝܶܕܥܰܬ݀ ܕܶܐܬܰܐܣܝܰܬ݀ ܒܰܪܬܳܗܿ܀

ܪܺܝܫܳܗܿ ܐܰܪܟܢܰܬ݀ ܠܶܗ ܒܣܶܓܕܬܳܐ܇ ܘܦܽܘܡܳܗܿ ܦܶܬܚܰܬ݀ ܠܬܶܫܒܽܘܚܬܶܗ܇ ܠܶܫܳܢܝ̱ ܢܰܘܕܶܐ ܘܰܢܩܰܠܣܳܟ܇ ܕܰܐܢ̱ܬ ܗܽܘ ܐܰܠܳܗܝ̱ ܠܳܟ ܬܶܫܒ̈ܚܳܢ܀

ܫܽܘܒܚܳܐ ܠܰܐܒܳܐ ܕܠܰܢ ܫܰܠܚܳܟ܇ ܕܬܰܐܣܶܐ ܟܺܐܒ̈ܰܝܢ ܘܟܽܘܪ̈ܗܳܢܰܝܢ܇ ܣܓܺܝܕ ܐܰܢ̱ܬ ܒܰܐܒܽܘܟ ܘܪܽܘܚܩܽܘܕܫܳܐ܇ ܕܚܰܕ ܐܺܝܬܰܝܟܽܘܢ ܕܠܳܐ ܦܽܘܠܳܓ܀

ܬܠܺܝܬܳܝܽܘܬܳܐ ܡܫܰܡܠܰܝܬܳܐ܇ ܐܺܝܬܳܝܬܳܐ ܘܰܡܬܽܘܡܳܝܬܳܐ܇ ܬܶܗܘܶܐ ܠܰܢ ܫܽܘܪܳܐ ܪܳܡܳܐ܇ ܘܰܠܓܰܘ ܡܶܢܶܗ ܢܶܣܬܰܬܰܪ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܰܕ ܪܳܕܶܐ ܗܘܳܐ ܒܽܐܘܪܚܳܐ ܕܚܰܢܦ̈ܶܐ ܡܳܪܰܢ ܝܶܫܽܘܥ܇ ܠܰܟܢܰܥܢܰܝܬܳܐ ܙܰܩܬܳܗܿ ܛܶܐܒܶܗ ܕܬܺܐܙܰܠܝ̱ ܨܶܐܕܰܘܗ̱ܝ܇ ܚܙܳܬ݀ ܕܰܡܫܰܢܶܩ ܫܺܐܕܳܐ ܠܒܰܪܬܳܗܿ ܘܰܡܛܰܪܶܦ ܠܳܗܿ܇ ܒܳܬܰܪ ܐܳܣܝܳܐ ܪܶܗܛܰܬ݀ ܠܰܒܳܟܳܬ݀ ܕܬܶܒܥܶܐ ܡܶܢܶܗ܀

ܡܛܳܐ ܠܰܬܚܽܘ̈ܡܶܐ ܕܨܽܘܪ ܘܰܕܨܰܝܕܳܢ܇ ܗܰܘ ܚܳܐܶܢ ܟܽܠ܇ ܘܒܳܬܪܶܗ ܢܶܦܩܰܬ݀ ܐܰܢ̱ܬܬܳܐ ܕܟܺܐܒ̈ܶܐ ܕܬܶܒܥܶܐ ܡܶܢܶܗ܇ ܡܳܪܝ̱ ܒܰܪ ܕܰܘܺܝܕ ܪܰܚܶܡܥܠܰܝ ܘܰܐܣܳܐ ܠܺܝ ܒܰܪܬܝ̱܇ ܫܺܐܕܳܐ ܠܒܺܝܟ ܠܳܗܿ ܘܶܐܠܳܐ ܫܚܰܩܬܳܝܗ̱ܝ ܠܳܐ ܡܰܪܦܶܐ ܠܳܗܿ܀

 

ܡܰܘܪܒܳܐ ܕܠܺܠܝܳܐ ܩܳܠܳܐ ܠܶܟܝ̱ ܦܰܐܝܳܐ ܕܰܢܩܰܠܶܣ

ܠܶܟܝ̱ ܦܰܐܝܳܐ ܕܰܢܩܰܠܶܣ܇ ܝܳܠܕܰܬ݀ ܐܰܠܳܗܳܐ ܒܬܽܘܠܬܳܐ܇ ܡܶܛܽܠ ܕܒܺܐܝܕܰܝ̈ܟܝ̱ ܐܶܬܪܰܥܺܝ ܠܓܶܢܣܰܢ ܥܰܦܪܳܢܳܐ܀

ܒܰܬܚܽܘ̈ܡܶܐ ܡܗܰܠܶܟ ܗܘܳܐ܇ ܗܰܘ ܕܶܐܬܬܰܚܬܺܝ ܕܢܶܦܪܽܘܩ ܒܶܪ̈ܝܳܬܳܐ܇ ܘܟܰܕ ܥܳܒܰܪ ܐܰܢ̱ܬܬܳܐ ܫܶܡܥܰܬ݀ ܕܫܺܐܕܳܐ ܫܳܚܶܩ ܗܘܳܐ ܠܒܰܪܬܳܗܿ܇ ܘܢܶܦܩܰܬ݀ ܒܳܥܝܳܐ ܚܽܘܠܡܳܢܳܐ܀

ܡܳܪܝܳܐ ܪܰܚܶܡ ܥܰܠ ܐܰܡܬܳܟ܇ ܘܰܐܣܳܐ ܠܳܗܿ ܒܰܪܬܳܗܿ ܡܶܢ ܫܺܐܕܳܐ܇ ܕܣܰܓܺܝ ܫܰܚܩܳܗܿ ܘܫܰܢܩܳܗܿ ܗܘܳܐ ܒܟܺܐܒܳܐ  ܩܰܫܝܳܐ ܕܳܐܶܠܨ ܠܳܗܿ܇ ܘܒܰܚܢܳܢܳܟ ܦܪܽܘܩܶܝܿܗ܀

ܡܳܪܝܳܐ ܚܙܳܐ ܗܰܝܡܳܢܽܘܬܳܗܿ܇ ܕܰܐܢ̱ܬܬܳܐ ܗܳܕܐ ܟܢܰܥܢܰܝܬܳܐ܇ ܘܶܐܡܰܪ ܠܳܗܿ ܕܙܶܠܝ̱ ܠܶܟܝ̱ ܐܰܢ̱ܬܬܳܐ܇ ܢܶܗܘܶܐ ܠܶܟܝ̱ ܐܰܟܡܳܐ ܕܨܳܒܝܰܬܝ̱ ܘܒܰܪܬܶܟܝ̱ ܗܳܐ ܡܚܰܪܪܳܐ܀

ܫܽܘܒܚܳܐ ܠܳܟ ܦܳܪܽܘܩܰܢ܇ ܝܶܫܽܘܥ ܡܫܺܝܚܳܐ ܐܰܠܳܗܳܐ܇ ܕܰܐܣܺܝܬ ܒܪ̈ܰܚܡܰܝܟ ܠܰܛܠܺܝܬܳܐ܇ ܡܶܢ ܫܺܐܕܳܐ ܕܫܳܚܶܩ ܗܘܳܐ ܠܳܗܿ܇ ܘܰܡܫܰܢܶܩ ܗܘܳܐ ܠܳܗܿ܀

 

ܫܰܒܰܚܘ̱ ܠܡܳܪܝܳܐ ܩܳܠܳܐ ܡܫܰܒܚܺܝܢ ܠܳܟ ܡܳܪܝܳܐ

ܕܳܠ ܡܶܢ ܨܶܝܕ ܐܰܒܽܘܗ̱ܝ܇ ܘܶܐܬܳܐ ܠܘܳܬ ܓܶܢܣܳܐ ܕܰܡܠܶܐ ܟܽܘܪ̈ܗܳܢܶܐ܇ ܘܡܰܓܳܢ ܐܰܣܝܶܗ ܗܘܳܐ܀

ܥܺܕܬܳܐ ܒܰܪ̱ܬ ܥܰܡ̈ܡܶܐ܇ ܩܰܕܡܳܝܬܳܐ ܢܶܦܩܰܬ݀܇ ܕܬܶܫܐܶܠܝ ܐܳܣܝܽܘܬܳܐ܇ ܡܶܢܳܟ ܦܳܪܽܘܩܰܢ܀

ܟܢܰܥܢܰܝܬܳܐ ܒܚܺܐܦܳܐ܇ ܪܶܗܛܳܐ ܠܒܺܝܟܳܐ ܗܘܳܬ݀܇ ܘܰܒܨܰܘܪܳܐ ܪܳܡܳܐ܇ ܩܥܳܬܶܗ ܙܳܥܩܳܐ ܗܘܳܬ݀܀

ܒܰܪ̱ܬ ܐܰܪ̈ܡܳܝܶܐ ܗܘܳܬ݀܇ ܘܰܫܛܳܬ݀ ܘܰܐܣܠܝܰܬ݀܇ ܐܰܠܳܗ̈ܶܐ ܕܛܽܘܥܝܰܝ܇ ܨܰܠܡ̈ܶܐ ܕܒܶܝܬ ܐܰܒܽܘܗܿ܀

ܐܳܦ ܗܰܝܡܳܢܽܘܬܳܗܿ܇ ܣܰܓܺܝ ܦܰܐܝܳܐ ܗܘܳܬ݀܇ ܘܰܒܚܽܘܨܳܦܳܐ ܪܗܺܝܒܳܐ܇ ܠܘܳܬܶܗ ܩܳܥܝܳܐ ܗܘܳܬ݀܀ ܪ̈ܰܚܡܰܝܟ ܡܳܪܝ̱ ܐܰܪܟܢܽܘܟ܇ ܘܰܚܢܳܢܳܟ ܫܰܠܚܳܟ܇ ܡܰܢ ܓܶܝܪ ܡܳܛܶܐ ܗܘܳܐ܇ ܕܠܰܐܬܪܳܟ ܢܶܬܥܰܠܶܐ܀

ܚܽܘܢܶܝܗܿ ܠܰܐܒܺܝܕܽܘܬܝ̱ ܝܶܫܽܘܥ ܡܠܶܐ ܪ̈ܰܚܡܶܐ܇ ܘܰܥܒܶܕ ܥܠܰܝ ܪ̈ܰܚܡܶܐ܇ ܘܰܐܣܳܐ ܒܰܪܬܝ̱ ܒܪ̈ܰܚܡܰܝܟ܀

ܫܽܘܒܚܳܐ ܠܳܟ ܡܫܺܝܚܳܐ܇ ܐܰܙܥܩܰܬ݀ ܟܢܰܥܢܰܝܬܳܐ܇ ܕܫܰܘܙܶܒܬܳܗܿ ܠܒܰܪܬܝ̱ ܡܶܢ ܐܺܝܕ̈ܰܝ ܒܺܝܫܳܐ܀

 

ܕܨܰܦܪܳܐ ܕܪܰܚܶܡܥܠܰܝ ܩܳܠܳܐ ܗܰܘ ܕܩܳܡ ܡܶܢ ܒܶܝܬ ܡܺܝ̈ܬܶܐ

ܗܰܘ ܕܰܒܡܶܠܬܶܗ ܐܰܚܠܶܡ ܗܘܳܐ܇ ܒܰܪ̱ܬ ܟܢܰܥܢܰܝܬܳܐ ܡܶܢ ܟܺܐܒܳܗܿ܇ ܘܝܰܗܒ ܠܳܗܿ ܚܽܘܪܳܪܳܐ ܡܫܰܡܠܝܳܐ܇ ܘܳܐܣܝܽܘܬܳܐ ܦܳܩܽܘܕܳܐܺܝܬ܇ ܟܶܗ̈ܢܶܐ ܙܗ̈ܰܝܳܐ܀

ܗܰܘ ܡܳܪܳܐ ܕܒܶܪ̈ܝܳܬܳܐ܇ ܒܰܬܚܽܘ̈ܡܶܐ ܕܨܽܘܪ ܘܰܕܨܰܝܕܳܢ ܥܳܒܰܪ ܗܘܳܐ ܘܡܰܐܣܶܐ ܟܪ̈ܺܝܗܶܐ܇ ܘܫܶܡܥܰܬ݀ ܘܢܶܦܩܰܬ݀ ܠܽܐܘܪܥܶܗ܇ ܟܳܗ̈ܢܶܐ܀

ܗܰܘ ܡܪܰܚܡܳܢܳܐ ܐܳܙܶܠ ܗܘܳܐ܇ ܘܠܳܐ ܟܳܠܶܐ ܠܳܗܿ ܫܶܐܠܶܬܳܗܿ܇ ܐܰܝܢܳܐ ܕܬܶܣܓܶܐ ܘܰܬܺܐܪܰܒܝ܇ ܗܰܝܡܳܢܽܘܬܳܗܿ ܒܶܝܬ ܟܶܢܫ̈ܶܐ ܟܳܗ̈ܢܶܐ܀

ܗܳܕܶܐ ܐܰܢ̱ܬܬܳܐ ܟܢܰܥܢܰܝܬܳܐ܇ ܦܰܢܝܰܬ݀ ܠܶܗ ܠܡܳܪܰܢ ܘܶܐܡܪܰܬ݀܇ ܐܳܦ ܟܰܠܒ̈ܶܐ ܡܶܢ ܦܳܬܽܘܪ̈ܶܐ܇ ܕܡܳܪ̈ܰܝܗܽܘܢ ܐܳܟܠܺܝܢ ܘܚܳܐܶܝܢ܀

 

ܕܰܐܠܳܗܝ̱ ܐܰܠܳܗܝ̱ ܩܳܠܳܐ ܫܡܰܝܳܐ ܡܕܺܝܢ̱ܬܳܐ

ܐܶܬܰܘ ܛܶܐܒ̈ܶܐ ܡܚܰܕ̈ܝܳܢܶܐ܇ ܠܶܐܕܢ̈ܰܝ ܐܰܢ̱ܬܬܳܐ ܟܢܰܥܢܰܝܬܳܐ܇ ܕܝܶܫܽܘܥ ܐܳܣܝܳܐ ܗܳܐ ܥܳܒܰܪ܇ ܒܰܬܚܽܘ̈ܡܶܐ  ܕܨܽܘܪ ܘܰܕܨܰܝܕܳܢ܀

ܝܰܘܢܳܐ ܒܪܺܝܪܬܳܐ ܘܬܰܡܺܝܡܬܳܐ܇ ܕܦܰܪܽܘܓܳܗܿ ܢܰܟܬܶܗ ܚܶܘܝܳܐ܇ ܘܰܠܢܶܫܪܳܐ ܩܰܒܠܰܬ݀ ܥܠܰܘܗ̱ܝ܇ ܕܢܰܥܕܶܐ ܡܶܢܳܗܿ ܠܦܰܪܽܘܓܳܗܿ܀

ܦܳܬܽܘܪܳܟ ܒܢܰܝ̈ܳܐ ܢܶܐܟܠܽܘܢ ܘܒܳܟ ܢܶܣܬܰܒܥܽܘܢ ܘܰܢܫܰܒܚܽܘܢ܇ ܘܦܰܪ̈ܬܽܘܬܶܐ ܕܢܳܬܪܺܝܢ ܡܶܢܶܗ܇ ܟܰܠܒ̈ܶܐ ܢܶܐܟܠܽܘܢ ܘܢܶܬܬܰܪܣܽܘܢ܀

ܫܠܳܡܳܐ ܘܫܰܝܢܳܐ ܘܰܐܳܘܝܽܘܬܳܐ܇ ܠܟܽܠܗܽܘܢ ܟܪ̈ܺܝܗܶܐ ܘܰܐܠܺܝܨ̈ܶܐ܇ ܘܳܐܟܶܠܩܰܪܨܳܐ ܡܳܪܽܘܕܳܐ܇ ܢܶܣܬܰܚܰܦ ܠܥܳܠܰܡ ܥܳܠܡܺܝܢ܀

ܦܩܽܘܕ ܚܰܢܳܢܳܐ ܘܰܐܣܳܐ ܠܺܝ ܘܰܠܒܰܪܬܝ̱ ܚܰܪܰܪ ܡܶܢ ܫܺܐܕܳܐ܇ ܡܶܢܺܝܢܝ̱ ܡܳܪܝ̱ ܒܰܓܙܳܪܳܐ ܕܥܳܢܳܟ܇ ܕܫܶܒܩܿܶܬ ܨܰܠܡ̈ܶܐ ܒܳܟ ܛܶܦܣܿܶܬ܀

ܐܰܟܡܳܐ ܕܰܐܣܺܝܬ ܘܚܰܪܰܪܬ ܡܳܪܝ̱܇ ܠܰܟܢܰܥܢܰܝܬܳܐ ܘܰܠܒܰܪܬܳܗܿ܇ ܐܰܣܳܐ ܠܰܢ ܟܽܠܗܽܘܢ ܟܺܐܒ̈ܰܝܢ܇ ܘܚܰܪܰܪ ܠܰܢ ܡܶܢ ܣܳܩܽܘܪ̈ܰܝܢ܀

 

ܕܰܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܒܬܽܘܠܬܳܐ ܝܳܠܕܰܬ ܕܽܘܡܳܪܳܐ

ܟܰܕ ܥܳܒܰܪ ܗܘܳܐ ܦܳܪܽܘܩܰܢ܇ ܘܬܰܠܡܺܝܕܰܘ̈ܗ̱ܝ ܥܰܡܶܗ܇ ܒܰܬܚܽܘ̈ܡܶܐ ܗܳܢܽܘܢ܇ ܕܨܽܘܪ ܘܰܕܨܰܝܕܳܢ ܗܳܐ ܐܰܢ̱ܬܬܳܐ܇ ܟܢܰܥܢܰܝܬܳܐ ܢܶܦܩܰܬ݀ ܠܽܐܘܪܥܶܗ܇ ܘܒܰܚܢܰܓܬܳܐ ܡܦܺܝܣܳܐ ܗܘܳܬ݀܇ ܟܰܕ ܦܟܺܝܪ̈ܳܢ ܐܺܝܕ̈ܶܝܗܿ ܠܰܚܕܝܳܗܿ܀

ܐܳܡܪܳܐ ܗܘܳܬ݀ ܠܶܗ ܠܰܡܫܺܝܚܳܐ܇ ܐܶܬܪܰܚܰܡ ܥܠܰܝ ܘܚܽܘܢܶܝܗܿ ܠܰܐܒܺܝܕܽܘܬܝ̱܇ ܡܳܪܝܳܐ ܡܪܰܝܡܳܐ ܩܳܥܝܳܐ ܗܘܳܬ݀܇ ܟܰܕ ܡܰܘܕܝܳܐ ܒܰܐܠܳܗܽܘܬܶܗ܇ ܘܕܰܒܪܶܗ ܕܕܰܘܺܝܕ ܟܰܢܝܰܬܶܗ܇ ܟܰܕ ܡܗܰܝܡܶܢܰܬ݀ ܒܐ̱ܢܳܫܽܘܬܶܗ ܕܒܰܒܣܰܪ܀

ܗܳܐ ܦܳܪܽܘܩܝ̱ ܠܳܟ ܩܳܪܝܳܐ ܐ̱ܢܳܐ܇ ܕܬܶܥܢܶܝܢܝ̱ ܒܰܚܢܳܢܳܟ܇ ܐܰܢ̱ܬ ܗܽܘ ܝܳܕܰܥ ܐܰܢ̱ܬ܇ ܕܰܐܪܦܺܝܿܬ ܚܳܢܽܘܬ ܣܳܛܳܢܳܐ܇ ܕܒܳܗܿ ܗܽܘ ܢܶܫ̈ܶܐ ܡܶܬܚܰܫܚ̈ܳܢ܇ ܘܫܶܒܩܿܶܬ ܨܰܠܡ̈ܶܐ ܕܛܽܘܥܝܰܝ܇ ܚܽܘܣ ܥܠܰܝ ܘܰܐܣܳܐ ܠܺܝ ܒܰܪܬܝ̱ ܡܶܢ ܫܺܐܕܳܐ܀

ܩܪܶܒܘ̱ ܬܰܠܡܺܝܕܰܘ̈ܗ̱ܝ ܘܳܐܡܪܺܝܢ ܠܶܗ ܡܳܪܰܢ ܫܪܺܝܗܿ ܠܰܐܢ̱ܬܬܳܐ ܕܗܳܐ ܩܳܥܝܳܐ ܒܳܬܪܰܢ܇ ܗܽܘ ܕܶܝܢ ܡܳܪܰܢ ܠܳܐ ܦܰܢܺܝ܇ ܐܶܠܳܐ ܐܶܙܰܠ ܩܕܰܡܰܝܗܽܘܢ܇ ܕܢܰܒܗܶܬ ܠܥܰܡܳܐ ܕܝܽܘܕ̈ܳܝܶܐ ܕܡܶܢ ܚܰܢܦ̈ܶܐ ܡܶܬܬܰܘܕܶܐ ܒܪܶܗ ܕܰܐܠܳܗܳܐ܀

ܟܢܰܥܢܰܝܬܳܐ ܥܢܳܬ݀ ܠܰܫܠܺܝ̈ܚܶܐ܇ ܕܒܳܥܝܳܐ ܐ̱ܢܳܐ ܡܶܢܟܽܘܢ ܥܰܒܕܰܘ̈ܗ̱ܝ ܕܰܐܠܳܗܳܐ܇ ܠܳܐ ܬܶܛܪܕܽܘܢܳܝܗ̱ܝ ܠܨܶܗܝܳܐ ܡܶܢ ܨܶܝܕ ܡܰܒܽܘܥܳܐ ܕܚܰܝ̈ܶܐ܇ ܕܰܘܺܝܕ ܣܳܗܶܕ ܘܳܐܡܰܪ܇ ܕܠܳܐ ܢܳܐܶܡ ܐܳܦܠܳܐ ܕܳܡܶܟ܀

ܫܽܘܒܚܳܐ ܠܰܒܪܳܐ ܕܰܐܠܳܗܳܐ܇ ܕܩܰܒܶܠ ܗܘܳܐ ܕܰܐܢ̱ܬܬܳܐ ܬܶܙܟܺܝܘܗ̱ܝ ܒܗܶܦ̈ܟܳܬܳܐ܇ ܥܰܠ ܕܰܚܙܳܐ ܕܚܰܡܺܝܡ ܚܽܘܒܳܗܿ܇ ܘܰܩܕܳܡ ܟܶܢܫ̈ܶܐ ܩܰܠܣܳܗܿ ܗܘܳܐ܇ ܘܶܐܡܰܪ ܠܳܗܿ ܕܙܶܠܝ̱ ܠܶܟܝ̱ ܐܰܢ̱ܬܬܳܐ܇ ܢܶܗܘܶܐ ܠܶܟܝ̱ ܐܰܟܡܳܐ ܕܨܳܒܝܰܬܝ̱܀

 

ܬܶܫܒܽܘܚܬܳܐ ܚܕܰܬܳܐ܇ ܐܰܢ̱ܬ ܕܰܒܪܺܝܫܺܝܬ

ܠܡܳܢܳܐ ܫܠܺܝ̈ܚܶܐ܇ ܕܳܚܩܺܝܢ ܐ̱ܰܢ̱ܬܽܘܢ ܠܺܝ ܐܳܡܪܳܐ ܗܘܳܬ݀ ܗܳܝ ܟܢܰܥܢܰܝܬܳܐ܇ ܡܶܢ ܬܰܪܥܳܐ ܕܰܡܠܶܐ ܪ̈ܰܚܡܶܐ ܡܒܰܪܟܳܐ ܓܶܝܪ ܐܺܝܬܰܝܟ܀

ܫܰܪܺܝܪܳܐܺܝܬ܇ ܕܰܡܺܝܬܽܘܢܳܢܝ̱ ܕܶܝܢ ܠܟܰܠܒ̈ܶܐ ܕܰܟܪܽܘܡ ܟܰܠܒܳܐ܇ ܩܰܢܝܳܐ ܐ̱ܢܳܐ ܘܫܰܪܺܝܪܳܐ ܠܺܝ ܡܒܰܪܟܳܐ܀

ܒܪܺܝܟ ܗܽܘ ܚܽܘܒܳܟܽܘܢ܇ ܕܠܳܐ ܕܰܐܡܺܝܬܽܘܢܳܢܝ̱ ܠܛܰܒܝܳܐ ܗܰܘ ܕܶܐܢ ܢܗܶܐ ܠܺܝ܇ ܐܰܬܪܳܐ ܠܳܐ ܒܳܐܶܬ ܥܶܕܳܢ ܡܒܰܪܟܳܐ܀

ܐܶܡܪܰܬ݀ ܠܝܶܫܽܘܥ ܠܟܰܠܒܳܐ ܕܳܡܝܳܐ ܐ̱ܢܳܐ ܒܰܟܪܽܘܡܝ̱܇ ܘܶܐܢܗܽܘ ܒܳܟܺܐܦ̈ܶܐ ܡܶܬܪܰܓܡܰܢܝ̱ ܠܳܐ ܡܫܰܢܝܳܐ ܐ̱ܢܳܐ܀

ܘܶܐܢܗܽܘ ܕܢܳܦܠܺܝܢ ܓܰܝܳܣ̈ܶܐ ܥܰܠ ܓܰܡܳܠܳܐ ܘܥܰܠ ܐܰܟܳܪܳܐ܇ ܥܳܪܩܺܝܢ ܘܫܳܒܩܺܝܢ ܩܶܢܝ̈ܳܢܰܝܗܽܘܢ ܡܒܰܪܟܳܐ܀

 

ܡܰܘܪܒܳܐ ܩܳܠܳܐ ܣܰܢܝܳܐ ܗܰܘ ܕܰܚܙܳܐ

ܥܰܠ ܕܰܘܺܝܕ ܚܽܘܒܳܐ ܣܰܓܺܝܐܳܐ܇ ܘܗܰܝܡܳܢܽܘܬܳܐ ܕܰܟܢܰܥܢܰܝܬܳܐ܇ ܕܰܡܝܳܗܿ ܠܟܰܠܒܳܐ ܕܪܰܒ ܚܽܘܒܳܗܿ܇ ܘܠܳܐ ܠܓܰܡܠܳܐ ܘܠܳܐ ܠܰܚܙܺܝܪܳܐ܇ ܕܰܐܟ̈ܬܺܢܺܝܢ ܘܰܫܪܺܝܚܺܝܢ ܘܳܐܣܽܘ̈ܛܺܝܢ܇ ܘܢܶܦܩܰܬ݀ ܟܽܠܗܽܘܢ ܚܰܝܶܝ̈ܗܿ܇ ܘܒܰܫܡܶܗ ܗܰܝܡܶܢܰܬ݀܀

 

ܐ̱ܚܪܺܢܳܐ ܩܳܠܳܐ ܠܶܟܝ̱ ܢܶܬܟܰܫܰܦ

ܠܳܐ ܒܳܥܝܰܬܝ̱ ܕܬܶܬܶܠܝ̱܇ ܥܽܘܕܪ̈ܳܢܰܝܟ ܐܶܠܳܐ ܠܥܰܡܳܐ ܕܒܶܝܬ ܐܺܝܣܪܳܐܶܝܠ܇ ܘܥܰܠ ܕܠܳܐ ܩܰܒܠܽܘܟ܇ ܝܰܗܒܬ ܐܶܢܽܘܢ ܠܰܟܢܰܥܢܰܝܬܳܐ ܕܟܰܠܒܳܐ ܟܰܢܺܝܬܳܗܿ܇ ܥܰܠ ܕܡܶܢ ܥܰܡ̈ܡܶܐ ܚܰܢܦ̈ܶܐ܇ ܐܺܝܬܶܝܗܿ ܗܘܳܬ݀ ܟܰܠܒܳܐ ܩܪܺܝܬܳܗܿ܇ ܘܗܰܝܡܶܢܰܬ݀ ܐܳܦ ܐܶܬܒܰܝܬܝܰܬ݀܀

ܠܳܐ ܫܰܦܺܝܪ ܗܽܘ܇ ܠܡܶܣܰܒ ܠܰܚܡܳܐ ܕܰܒܢܰܝ̈ܳܐ ܘܢܰܪܡܶܐ ܠܟܰܠܒ̈ܶܐ܇ ܗܶܢܽܘܢ ܒܢܰܝ̈ܳܐ ܫܰܒܩܽܘܗ̱ܝ ܠܠܰܚܡܳܟ܇ ܘܡܶܢ ܒܰܝܬܳܟ ܗ̱ܘܰܘ ܢܽܘܟܪ̈ܳܝܶܐ܇ ܘܰܚܢܰܢ ܥܰܠܢܰܢ ܚܠܳܦܰܝܗܽܘܢ ܘܫܶܐܠܢܰܢ ܠܰܚܡܳܟ ܘܥܽܘܕܪܳܢܳܟ܇ ܘܟܽܠܗܽܘܢ ܚܽܘܠ̈ܡܳܢܰܝܟ܀ ܫܰܒܰܚܘ̱ ܥܰܡ̈ܡܶܐ ܠܗܰܘ ܕܰܥܒܰܕܟܽܘܢ ܚܰܕ ܥܰܡܳܐ܇ ܒܝܰܕ ܡܶܐܬܺܝܬܶܗ܇ ܘܰܥܩܰܪ ܘܒܰܕܪܶܗ܇ ܠܗܰܘ ܥܰܡܳܐ ܕܰܐܪܓܶܙ ܒܕܰܒܪܳܐ ܠܪܽܘܚܳܐ ܕܩܽܘܕܫܳܐ ܗܳܐ ܥܰܠܬܽܘܢ ܠܝܳܪܬܽܘܬܶܗ܇ ܘܰܢܦܰܩܘ̱ ܗܶܢܽܘܢ ܘܶܐܙܕܰܪܰܩܘ̱܇ ܒܰܐܪܒܰܥ ܦܶܢܝ̈ܳܬܳܐ܀

 

ܫܰܒܰܚܘ̱ ܠܡܳܪܝܳܐ ܒܩܳܠܳܐ ܒܢ̈ܰܝ ܢܽܘܗܪܳܐ

ܪܰܚܶܡ ܥܠܰܝ ܒܰܪ ܕܰܘܺܝܕ܇ ܗܳܝ ܟܢܰܥܢܰܝܬܳܐ܇ ܡܰܙܥܩܳܐ ܗܘܳܬ݀܇ ܘܰܐܣܳܐ ܠܺܝ ܒܰܪܬܝ̱ ܡܶܢ ܫܺܐܕܳܐ ܕܺܐܝܬ ܒܳܗܿ܀

ܐܰܣܳܐ ܠܺܝ ܒܰܪܬܝ̱ ܩܳܥܝܳܐ ܗܘܳܬ݀܇ ܕܗܳܐ ܣܳܛܳܢܳܐ ܡܫܰܢܶܩ ܠܳܗܿ܇ ܘܠܰܝܬ ܠܺܝ ܓܰܘܣܳܐ ܐܶܠܳܐ ܒܝܰܕ ܡܳܪܝܳܐ܀

ܨܰܝܳܕ̈ܰܝ ܢܽܘܢ̈ܶܐ ܘܰܕܐ̱ܢܳܫ̈ܳܐ܇ ܐܶܬܟܰܫܰܦܘ̱ ܠܶܗ ܠܨܰܝܳܕܳܐ܇ ܕܰܢܨܽܘܕ ܕܶܐܬܳܐ ܠܰܬܪܰܥ ܒܰܝܬܶܗ܀

ܠܰܐܝܟܳܐ ܚܳܙܶܩ ܐܺܝܡܳܡܳܐ ܕܶܐܬܳܐ ܥܠܰܝܢ ܠܺܠܝܳܐ ܟܡܺܝܪܳܐ܇ ܠܰܐܝܟܳܐ ܫܶܡܫܳܐ܇ ܕܢܶܬܶܒ ܒܚܶܫܽܘܟܳܐ܀

ܠܰܐܝܟܳܐ ܕܶܝܢ ܩܶܢܳܐ ܕܩܽܘܫܬܳܐ܇ ܕܗܳܐ ܝܰܘ̈ܢܰܝܟ ܠܳܟ ܗܽܘ ܚܳܝܪ̈ܳܢ܇ ܕܢܺܐܙܳܠ̈ܢ ܘܢܺܐܠ̈ܕܳܢ ܘܰܢܪ̈ܰܒܝܳܢ ܒܳܟ ܦܺܐܪ̈ܶܐ ܕܟܰܝ̈ܳܐ܀

ܫܳܐܠܳܐ ܗܘܳܬ݀ ܬܽܘܒ ܟܢܰܥܢܰܝܬܳܐ܇ ܘܒܳܥܝܳܐ ܐܳܣܝܽܘܬܳܐ ܠܒܰܪܬܳܗܿ܇ ܘܐܰܢ̱ܬ ܐܰܝܟ ܛܳܒܳܐ܇ ܝܰܗܒܬ ܠܳܗܿ ܫܶܐܠܶܬܳܗܿ܀

ܐܰܥܶܠܰܝܢܝ̱ ܡܳܪܝ̱ ܠܰܛܝܳܪܳܟ܇ ܘܰܡܶܢܺܝܢܝ̱ ܒܰܓܙܳܪܳܐ ܕܥܳܢ̈ܳܟ܇ ܐܰܝܟ ܟܢܰܥܢܰܝܬܳܐ ܕܡܶܢܳܟ ܫܶܐܠܰܬ݀ ܗܘܳܬ݀܀

 

ܛܽܘܒܰܝܗܽܘܢ ܠܡܶܣܟܺܢ̈ܶܐ ܒܩܳܠܳܐ ܣܠܶܩܬ ܠܰܨܠܺܝܒܳܐ

ܒܰܐܬܪܳܐ ܕܚܰܢܦ̈ܶܐ܇ ܥܳܒܰܪ ܗܘܳܐ ܡܳܪܰܢ ܝܶܫܽܘܥ܇ ܠܰܟܢܰܥܢܰܝܬܳܐ ܙܰܩܬܽܘܗܿ ܗ̱ܘܰܘ܇ ܛܶܐܒ̈ܶܐ ܕܰܩܪܶܒ ܘܰܡܛܳܐ ܠܳܗܿ܇ ܘܢܰܦܩܰܬ݀ ܒܳܬܪܶܗ ܟܰܕ ܩܳܥܝܳܐ܀

ܒܳܬܰܪ ܝܶܫܽܘܥ܇ ܪܶܗܛܰܬ݀ ܐܰܢ̱ܬܬܳܐ ܟܢܰܥܢܰܝܬܳܐ܇ ܟܰܕ ܫܶܡܥܰܬ݀ ܛܶܐܒܶܗ ܘܥܳܒܰܪ܇ ܘܥܰܠ ܣܳܛܳܢܳܐ ܩܶܒܠܰܬ݀ ܠܳܗܿ܇ ܨܶܝܕ ܦܳܪܽܘܩܳܐ ܕܢܰܦܫ̈ܳܬܳܐ܀

ܟܰܕ ܚܙܰܘ ܫܠܺܝ̈ܚܶܐ ܘܡܳܪܰܢ ܕܰܙܟܳܬ݀ ܗܘܳܬ݀ ܐܶܢܽܘܢ܇ ܒܣܶܡ ܠܗܽܘܢ ܪܺܝܚ ܗܰܝܡܳܢܽܘܬܳܗܿ܇ ܘܫܰܒܩܳܗܿ ܕܬܶܣܓܶܐ ܒܶܝܬ ܥܰܡ̈ܡܶܐ܇ ܘܒܶܝܬ ܐܶܡܘ̈ܳܬܳܐ܀

ܘܥܰܠ ܕܺܝܕܺܝܥ ܗܘܳܐ ܠܣܰܓܺܝܐܽܘܬ ܗܰܝܡܳܢܽܘܬܳܗܿ܇ ܫܰܒܩܳܗܿ ܪܳܗܛܳܐ ܟܰܕ ܩܳܥܝܳܐ܇ ܟܢܰܥܢܰܝܬܳܐ ܒܳܬܪܶܗ ܘܳܐܡܪܳܐ܇ ܕܒܰܪ ܕܰܘܺܝܕ ܐܰܣܳܐ ܠܺܝ ܒܰܪܬܝ̱܀

ܟܽܠܰܢ ܥܰܒܕ̈ܰܝܟ܇ ܕܰܒܥܺܕܬܳܟ ܗܳܐ ܟܢܺܝܫܺܝܢܰܢ܇ ܒܰܚܢܰܓܬܳܐ ܡܶܬܟܰܫܦܺܝܢܰܢ ܐܰܣܳܐ ܘܰܥܨܽܘܒ ܢܰܦܫ̈ܳܬܰܢ ܐܰܝܟ ܒܰܪܬܳܗܿ ܕܰܟܢܰܥܢܰܝܬܳܐ܀

ܠܳܟ ܬܶܫܒܽܘܚܬܳܐ܇ ܐܳܣܝܳܐ ܕܡܰܐܣܶܐ ܟܽܠ ܟܺܐܒܺܝ̈ܢ܇ ܘܥܳܨܶܒ ܠܰܐܝܠܶܝܢ ܕܰܬܒܺܝܪܺܝܢ܇ ܘܥܳܢܶܐ ܠܰܐܝܠܶܝܢ ܕܰܐܠܺܝܨܺܝܢ܇ ܥܢܺܝ ܠܰܢ ܡܳܪܝ̱ ܕܩܳܪܶܝܢܰܢ ܠܳܟ܀

 

ܩܳܠܳܐ ܕܨܰܦܪܳܐ ܩܳܠܳܐ ܒܟܽܠ ܡܶܕܶܡ ܐܶܬܒܰܩܺܝܿܬ

ܟܰܕ ܕܶܝܢ ܥܳܒܰܪ ܗܘܳܐ ܡܳܪܰܢ܇ ܒܰܬܚܽܘ̈ܡܶܐ ܕܨܽܘܪ ܘܰܕܨܰܝܕܳܢ܇ ܐܰܢ̱ܬܬܳܐ ܟܢܰܥܢܰܝܬܳܐ ܢܶܦܩܰܬ݀ ܗܘܳܬ݀ ܠܽܐܘܪܥܶܗ܇ ܒܳܥܝܳܐ ܐ̱ܢܳܐ ܡܶܢܳܟ ܡܳܪܰܢ܇ ܐܶܬܪܰܚܰܡܥܠܰܝ܇ ܘܗܳܐ ܒܰܪܬܝ̱ ܡܶܢ ܐܺܝܕ̈ܰܝ ܒܺܝܫܳܐ ܣܰܓܺܝ ܡܰܫܬܰܚܩܳܐ܇ ܐܳܘ ܐܳܣܝܳܐ ܕܶܐܬܳܐ ܕܢܶܣܥܽܘܪ܇ ܡܰܪܥܺܝܬܶܗ ܕܰܐܒܺܝܕܳܐ ܗܘܳܬ݀܇ ܐܰܣܳܐ ܠܺܝ ܒܰܪܬܝ̱ ܡܶܢ ܫܺܐܕܳܐ܇ ܕܰܐܢ̱ܬ ܕܳܡܶܝܬ ܠܕܰܘܺܝܕ ܐܰܒܽܘܟ ܕܰܒܩܳܠ ܩܺܝܬܳܪܶܗ܇ ܫܺܐܕ̈ܶܐ ܛܳܪܶܕ ܗܘܳܐ܀

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܇ ܕܰܟܡܳܐ ܬܰܚܬܺܝ ܪܰܒܽܘܬܶܗ܇ ܘܰܗܘܳܐ ܒܰܪܢܳܫܳܐ ܘܣܰܥܪܳܗܿ ܠܰܓܒܺܝܠܬܶܗ܇ ܐܰܠܦ̈ܶܐ ܣܰܒܰܥ ܒܓܰܘ ܕܰܒܪܳܐ܇ ܘܡܰܝ̈ܳܐ ܚܰܡܪܳܐ ܥܒܰܕ܇ ܕܰܟܺܝ ܓܰܪ̈ܒܶܐ ܐܰܝܟ ܕܰܨܒܳܐ ܘܰܐܚܠܶܡ ܡܫܰܪ̈ܰܝܳܐ܇ ܠܕܽܘܓ̈ܶܐ ܘܚܰܪ̈ܫܶܐ ܐܰܫܡܰܥ ܗܘܳܐ܇ ܘܦܰܬܰܚ ܥܰܝܢ̈ܶܐ ܕܰܣܡܰܝ̈ܳܐ܇ ܘܰܒܩܳܠܶܗ ܐܰܚܺܝ ܡܺܝ̈ܬܶܐ܇ ܘܚܰܣܺܝ ܚܰܘܒ̈ܶܐ ܕܚܰܛܳܝ̈ܶܐ܇ ܒܪܺܝܟ ܐܳܣܝܳܐ ܛܳܒܳܐ܇ ܕܣܰܥܪܶܗ ܠܰܓܒܺܝܠܬܶܗ܀

 

ܐ̱ܚܪܺܢܳܐ ܒܩܳܠܳܐ ܩܽܘܩܳܝܳܐ

ܡܶܢ ܒܶܝܬ ܟܶܢܫ̈ܶܐ ܟܢܰܥܢܰܝܬܳܐ ܠܡܳܪܰܢ ܐܶܡܪܰܬ݀܇ ܐܶܬܪܚܰܡܰܥܠܰܝ ܡܳܪܝܳܐ ܐܰܝܟ ܣܽܘܓܐܳܐ ܕܪ̈ܰܚܡܰܝܟ܇ ܐܰܒܽܘܟ ܫܰܠܚܳܟ ܕܬܺܐܬܶܐ ܠܰܒܪܺܝܬܳܐ܇ ܘܬܰܐܣܶܐ ܟܺܐܒ̈ܶܐ܇ ܘܬܰܚܠܶܡ ܟܽܘܪ̈ܗܳܢܶܐ܇ ܐܰܣܳܐ ܠܺܝ ܒܰܪܬܝ̱ ܡܶܢ ܫܺܐܕܳܐ ܕܰܡܫܰܢܶܩ ܠܳܗܿ܇ ܘܶܐܩܥܶܐ ܒܠܺܠܝܳܐ ܘܒܺܐܝܡܳܡܳܐ ܕܠܳܟ ܫܽܘܒܚܳܐ ܡܳܪܝܳܐ ܗ ܘ ܗ܀

ܡܰܢ ܕܶܝܢ ܐܰܣܩܰܢܝ̱ ܥܰܠ ܛܽܘܪ̈ܶܐ ܪ̈ܳܡܶܐ ܕܽܐܘܪܺܫܠܶܡ܇ ܘܰܚܙܺܝܬܶܗ ܠܡܳܪܰܢ ܝܶܫܽܘܥ ܟܰܕ ܡܰܐܣܶܐ ܠܥܳܠܡܳܐ܇ ܠܰܛܠܺܝܬܳܐ ܕܶܝܢ܇ ܕܡܰܝܬܰܬ݀ ܐܰܩܺܝܡ ܗܘܳܐ܇ ܘܦܶܓܥܰܬ݀ ܗܘܳܬ ܒܶܗ ܗܳܝ ܐܰܢ̱ܬܬܳܐ ܕܰܕܡܳܗܿ܇ ܠܗܳܝ ܐܰܚܺܝ ܘܰܠܗܳܝ ܐܰܣܺܝ ܒܰܪ ܐܰܠܳܗܳܐ܇ ܘܰܩܥ̈ܰܝ ܬܰܪ̈ܬܶܝܗܶܝܢ ܘܰܙܡܪ̈ܰܝ ܕܠܳܟ ܫܽܘܒܚܳܐ ܡܳܪܝܳܐ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܰܕ ܐܶܬܬܰܚܬܺܝ ܠܰܐܪܥܳܐ ܕܟܺܐܒ̈ܶܐ ܒܰܪ ܐܰܠܳܗܳܐ܇ ܕܢܶܦܪܽܘܩ ܨܰܠܡܶܗ ܡܶܢ ܛܳܥܝܽܘܬܳܐ ܕܫܺܐܕ̈ܶܐ ܛܰܢܦ̈ܶܐ܇ ܥܒܰܪ ܒܰܬܚܽܘ̈ܡܶܐ ܕܨܽܘܪ ܘܰܕܨܰܝܕܳܢ ܒܰܒܛܺܝܠܽܘܬܳܐ ܘܰܟܢܰܥܢܰܝܬܳܐ ܢܶܦܩܰܬ݀ ܠܽܐܘܪܥܶܗ ܒܚܰܫܳܐ ܪܰܒܳܐ܀

ܠܳܐ ܡܶܐܢܰܬ ܠܳܟ ܐܳܣܝܳܐ ܛܳܒܳܐ ܡܶܢ ܕܰܟܪ̈ܺܝܗܺܝܢ܇ ܣܥܽܘܪܶܝܗܿ ܠܰܐܡܬܳܟ ܕܡܶܢ ܣܳܛܳܢܳܐ ܗܳܐ ܡܶܬܪܰܕܦܳܐ܇ ܘܶܐܡܰܪ ܡܳܪܰܢ ܕܙܶܠܝ̱ ܢܶܗܘܶܐ ܠܶܟܝ̱ ܐܰܟܡܳܐ ܕܨܳܒܝܰܬܝ̱܇ ܒܪܺܝܟ ܕܰܒܡܶܠܬܶܗ ܚܰܪܰܪ ܠܰܐܡܬܶܗ ܡܶܢ ܫܰܒܳܝܳܐ܀

 

ܕܰܬܠܳܬܫ̈ܳܥܺܝܢ ܠܡܰܠܟܽܘܬ ܪܰܘܡܳܐ

ܒܪܺܝܟ ܒܰܪ ܡܰܠܟܳܐ܇ ܕܪ̈ܰܚܡܰܘܗ̱ܝ ܣܰܓܺܝ̈ܐܺܝܢ ܘܥܰܬܺܝܪ ܒܶܝܬ ܓܰܙܶܗ܇ ܘܰܚܢܳܢܶܗ ܫܦܺܝܥ ܥܰܠ ܓܶܢܣܰܢ܇ ܘܠܳܐ ܟܳܠܶܐ ܠܰܢ ܫܶܐܠ̈ܳܬܰܢ܇ ܚܳܕܶܐ ܣܰܓܺܝ ܒܬܰܝ̈ܳܒܶܐ܇ ܕܩܳܪܶܝܢ ܠܶܗ ܒܗܰܝܡܳܢܽܘܬܳܐ܇ ܫܽܘܒܚܳܐ ܠܶܗ ܕܶܐܬܳܐ ܘܰܦܪܰܩ ܠܰܢ܀

ܠܳܟ ܬܶܫܒܽܘܚܬܳܐ܇ ܡܶܠܬܳܐ ܐܰܠܳܗܳܐ܇ ܕܶܐܬܳܐ ܠܦܽܘܪܩܳܢܰܢ܇ ܘܩܰܒܶܠ ܥܠܰܘܗ̱ܝ ܒܰܚܢܳܢܶܗ܇ ܘܥܰܠ ܒܶܣܰܕܝܳܐ ܫܟܶܒ ܘܶܐܬܬܢܺܝܚ܇ ܘܡܰܚܫܽܘܠ̈ܰܝ ܝܰܡܳܐ ܫܰܬܶܩ܇ ܘܰܠܝܰܡܳܐ ܘܝܰܒܫܳܐ ܫܰܝܶܢ܇ ܫܽܘܒܚܳܐ ܠܶܗ ܕܣܰܥܪܰܢ ܒܛܰܝܒܽܘܬܶܗ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܳܣܝܳܐ ܕܰܐܣܺܝ ܒܰܚܢܳܢܶܗ܇ ܠܰܛܠܺܝܬܳܐ ܒܰܪ̱ܬ ܐܰܪ̈ܡܳܝܶܐ. ܐܰܣܳܐ ܘܰܐܚܠܶܡ ܢܰܦܫ̈ܳܬܰܢ ܕܡܰܛܥܶܐ ܠܗܶܝܢ ܐܳܟܶܠܩܰܪܨܳܐ܇ ܘܰܠܰܝ̈ܠܰܝ ܐܺܝܡܳܡ ܡܫܰܢܶܩ ܠܗܶܝܢ ܒܦܽܘܠܚܳܢ ܥܰܘܠܳܐ ܘܰܚܛܺܝܬܳܐ܀

ܠܳܐ ܡܳܪܝ̱ ܬܶܫܒܽܘܩܳܝܗ̱ܝ ܠܒܺܝܫܳܐ܇ ܕܢܶܫܬܰܠܰܛ ܥܠܰܝܢ ܛܪܽܘܢܳܐܺܝܬ܇ ܐܶܠܳܐ ܛܪܽܘܕܳܝܗ̱ܝ ܘܰܣܚܽܘܦܳܝܗ̱ܝ܇ ܐܰܝܟ ܕܛܰܪܶܕܬܳܝܗ̱ܝ ܡܶܢ ܐܰܡܬܳܟ܇ ܒܰܪܬܳܐ ܕܰܐܢ̱ܬܬܐ ܟܢܰܥܢܰܝܬܳܐ܇ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

 

ܫܠܶܡ ܕܚܰܕ ܒܫܰܒܳܐ ܪܒܺܝܥܳܝܳܐ ܕܥܰܠ ܟܢܰܥܢܰܝܬܳܐ

 

ܬܽܘܒ ܕܪܰܡܫܳܐ ܕܰܬܪܶܝܢ ܕܫܰܒܬܳܐ ܡܨܶܥܳܝܬܳܐ ܕܨܰܘܡܳܐ ܩܰܕܺܝܫܳܐ

ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܐܶܡܳܐ ܕܟܺܝܬܳܐ

ܗܰܘ ܠܳܐ ܣܢܺܝܩܳܐ ܕܰܚܠܳܦܰܝܢ ܐܶܬܡܚܶܠ܇ ܚܰܝܶܠ ܠܥܰܒ̈ܕܰܝܟ܇ ܕܢܶܫܦܪܽܘܢ ܠܺܐܝܩܳܪܳܟ ܪܰܚܶܡܥܠܰܝܢ܀

ܒܨܰܘܡܳܐ ܕܨܳܡ ܗܘܳܐ܇ ܕܳܢܺܝܐܶܝܠ ܢܒܺܝܳܐ܇ ܐܶܬܢܰܨܰܚ ܗܘܳܐ ܘܰܙܟܳܐ ܠܚ̈ܰܝܘܳܬܳܐ܀

ܒܨܰܘܡܳܐ ܕܰܟܝܳܐ ܐܰܚ̈ܰܝ ܢܶܬܓܰܘܰܣ܇ ܘܢܶܦܠܽܘܚ ܥܰܡܶܗ ܥܰܒ̈ܕܶܐ ܕܟܺܐܢܽܘܬܳܐ܇ ܪܰܚܶܡ܀

ܗܰܘ ܕܐܰܝܟ ܐܳܣܝܳܐ ܚܰܟܺܝܡܳܐ ܝܰܗܒܠܰܢ܇ ܨܰܘܡܳܐ ܕܡܰܐܣܶܐ ܚܰܫ̈ܶܐ ܕܢܰܦܫ̈ܳܬܰܢ܇ ܪܰܚܶܡ܀

ܡܫܺܝܚܳܐ ܕܣܰܚܦܶܗ ܠܰܢܟܺܝܠܳܐ ܒܨܰܘܡܶܗ܇ ܚܰܝܶܠ ܐܳܦ ܠܰܢ ܕܢܰܫܦܶܠ ܘܢܶܙܟܺܝܘܗ̱ܝ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܩܪܺܝܬܳܟ ܡܳܪܝܳܐ ܡܶܢ

ܡܶܬܟܰܫܦܺܝܢܰܢ ܠܪ̈ܰܚܡܰܝܟ ܡܳܪܝܳܐ܇ ܒܥܶܕܳܢ ܪܰܡܫܳܐ܇ ܥܒܶܕ ܪ̈ܰܚܡܶܐ ܥܰܠ ܢܰܦܫ̈ܳܬܰܢ܀

ܨܳܡ ܐܺܠܺܝܳܐ ܨܰܘܡܳܐ ܕܰܟܝܳܐ܇ ܟܰܕ ܥܳܪܶܩ ܗܘܳܐ܇ ܡܶܢ ܩܕܳܡ ܐܺܝܙܺܒܝܠ ܫܳܛܺܝܬܳܐ܀

ܨܳܡ ܕܳܢܺܝܐܶܝܠ ܨܰܘܡܳܐ ܕܰܟܝܳܐ܇ ܘܡܶܢ ܚܰܝܘ̈ܳܬܳܐ܇ ܐܶܬܦܰܨܺܝ ܘܡܶܢ ܓܽܘܒܳܐ ܣܠܶܩ܀

ܨܳܡܘ̱ ܢܺܝܢܘ̈ܳܝܶܐ ܘܶܐܬܦܰܨܺܝܽܘ܇ ܡܶܢ ܪܽܘܓܙܳܐ ܕܰܐܟܪܶܙ ܥܶܒܪܳܝܳܐ܇ ܟܰܕ ܓܳܙܶܡ ܗܘܳܐ܀

ܐܰܠܦܶܗ ܕܨܰܘܡܳܐ ܗܳܐ ܡܰܢܥܰܬ݀ ܠܳܗܿ܇ ܐܳܘ ܬܰܐܓܳܪ̈ܶܐ܇ ܪ̈ܽܘܚܳܢܳܝܶܐ ܩܢܰܘ ܒܶܗ ܚܰܝ̈ܶܐ܀

ܒܨܰܘܡܳܐ ܕܰܟܝܳܐ ܕܨܳܝܡܺܝܢܰܢ ܠܳܟ ܒܶܗ ܗܽܘ ܚܰܣܳܐ ܟܽܠ ܟܽܘܬܡ̈ܳܬܳܐ ܕܰܣܥܰܪܢܰܢ܀

 

ܩܳܠܳܐ ܕܪܰܡܫܳܐ ܩܳܠܳܐ ܩܰܒܶܠܳܝܗ̱ܝ ܡܳܪܰܢ

ܢܶܒܥܶܐ ܘܠܶܐ ܢܶܫܠܶܐ܇ ܘܰܢܨܰܠܶܐ ܘܠܳܐ ܬܶܐܡܰܢ ܠܰܢ ܥܰܕ ܐܺܝܬ ܠܰܢ ܐܰܬܪܳܐ܇ ܠܡܶܒܥܳܐ ܪ̈ܰܚܡܶܐ ܡܶܢ ܡܳܪܰܢ܀

ܥܺܕܬܳܐ ܡܗܰܝܡܰܢܬܳܐ܇ ܙܡܰܪܝ̱ ܫܽܘܒܚܳܐ ܠܒܰܪ ܐܰܠܳܗܳܐ܇ ܕܝܰܗܒ ܠܶܟܝ̱ ܪܰܗܒܽܘܢܳܐ܇ ܦܰܓܪܶܗ ܘܰܕܡܶܗ ܩܰܕܺܝܫܳܐ܀

ܚܽܘܢܰܝܢ ܒܛܰܝܒܽܘܬܳܟ܇ ܐܰܠܳܗܳܐ ܣܰܓܺܝ ܪ̈ܰܚܡܶܐ܇ ܘܰܐܫܘܳܢ ܠܡܰܠܟܽܘܬܳܟ ܕܒܳܟ ܐܰܘܕܺܝܿܬ ܡܳܪܝ̱ ܐܰܘܕܳܐ ܒܺܝ܀

 

ܐ̱ܚܪܺܢܳܐ ܩܳܠܳܐ ܒܰܥܪܽܘܒܬܳܐ ܒܪܺܝܫܺܝܬ

ܡܶܐܟܽܘܠܬܳܐ ܕܚܰܝ̈ܶܐ܇ ܟܬܳܒ̈ܶܐ ܐܺܝܬܰܝܗܽܘܢ ܐܰܚ̈ܰܝ ܦܳܪ̈ܽܘܫܶܐ܇ ܒܗܽܘܢ ܢܳܗܪܳܐ ܢܰܦܫܳܐ܇ ܘܡܳܬܩܳܐ ܚܰܠܝܽܘܬܳܐ ܘܫܳܡܶܢܳܐ ܡܶܬܦܰܛܡܳܐ܇ ܗ ܘ ܗ ܘܙܳܡܪܳܐ ܬܶܫܒܽܘܚܬܳܐ܀

ܒܥܶܕܳܢܶܗ ܕܪܰܡܫܳܐ܇ ܢܰܘܕܶܐ ܘܢܶܣܓܽܘܕ ܠܶܗ ܠܺܐܝܬܝܳܐ ܡܕܰܒܰܪ ܟܽܠ܇ ܕܡܳܐ ܕܰܥܪܰܒ ܫܶܡܫܳܐ܇ ܡܰܝܬܶܐ ܠܶܗ ܠܠܺܠܝܳܐ ܠܰܢܝܳܚܶܗ ܕܥܳܠܡܳܐ܇ ܗ ܘ ܗ܇ ܚܽܘܣ ܡܳܪܝ̱ ܥܰܠ ܟܽܠܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܠܡܽܘܢ ܪܳܗܶܛ ܐܰܢ̱ܬ ܕܬܰܬܩܶܢ ܒܰܝܬܳܐ ܕܠܰܘ ܕܺܝܠܳܟ ܗܽܘ ܡܛܰܠܠܬܰܐܗ̱ܘ ܥܽܘܡܪܳܟ ܣܰܓܺܝ ܪܗܺܝܒ ܐܰܢ̱ܬ ܥܰܠ ܨܶܒܘ̈ܳܬܳܐ܇ ܡܶܬܥܰܩܪܳܐ ܠܳܗܿ ܘܡܶܬܩܰܦܠܳܐ ܠܳܗܿ ܡܰܛܠܠܰܬ݀ ܙܰܒܢ̈ܶܐ܇ ܕܗܰܘ ܒܶܢܝܳܢܳܟ ܪܰܒܳܐ ܝܺܨܶܦ ܕܰܠܥܳܠܰܡ ܗܽܘ܀

ܠܡܽܘܢ ܪܳܚܶܡ ܐܰܢ̱ܬ ܒܰܝܬܳܐ ܕܢܳܦܶܠ ܐܳܘ ܚܰܟܺܝܡܳܐ܇ ܘܗܳܐ ܢܰܦܺܝܠܳܐ ܢܰܦܫܳܟ ܒܥܰܘܠܳܐ ܘܠܳܐ ܡܩܺܝܡ ܐܰܢ̱ܬ ܠܶܗ܇ ܥܰܘܠܰܐܗ̱ܘ ܗܳܢܳܐ ܕܡܳܠܶܐ ܒܰܝܬܳܐ ܟܽܠܗܽܘܢ ܛܽܘ̈ܒܶܐ܇ ܘܢܰܦܫܳܐ ܕܺܐܝܬܶܝܗܿ ܒܺܝܪܰܬ ܡܰܠܟܳܐ ܗܳܐ ܚܰܪܺܝܒܳܐ܀

ܢܫܰܒܚܽܘܢ ܠܳܟ ܡܳܪܝ̱ ܟܽܠܗܽܘܢ ܥܳܠܡ̈ܶܐ ܒܶܐܣܟܺܝ̈ܡܰܝܗܽܘܢ ܪ̈ܰܘܡܶܐ ܘܥܽܘ̈ܡܩܶܐ ܘܝܰܡܳܐ ܘܝܰܒܫܳܐ ܘܟܽܠ ܡܳܐ ܕܰܒܗܽܘܢ܇ ܘܢܶܗܘܽܘܢ ܩ̈ܳܠܶܐ ܕܰܨܠܰܘ̈ܳܬܳܐ ܕܰܡܪ̈ܰܝܳܢܰܝܟ܇ ܩܠܺܝܕܳܐ ܕܚܰܝ̈ܶܐ ܠܓܰܙܳܟ ܪܰܒܳܐ ܘܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܐܶܬܬܥܺܝܪ ܚܰܛܳܝ̈ܶܐ

ܒܝܰܘܡܳܐ ܕܡܶܬܦܰܬܚܺܝܢ܇ ܬܰܪ̈ܥܰܘܗ̱ܝ ܕܰܓܢܽܘܢܳܟ ܡܰܠܟܳܐ ܡܫܺܝܚܳܐ܇ ܢܰܚ̈ܬܶܐ ܕܫܳܘܶܝܢ ܠܡܶܫܬܽܘܬܳܐ܇ ܗܰܒ ܠܺܝ ܒܪ̈ܰܚܡܰܝܟ܇ ܡܳܪܶܐ ܟܽܠ܀

ܐܳܕܳܡ ܐܶܬܝܰܥܰܢ܇ ܥܰܠ ܦܺܐܪܳܐ ܒܰܥܕܶܝܢ ܘܰܩܛܰܦ ܘܶܐܟܰܠ܇ ܘܦܳܪܽܘܩܰܢ ܒܨܰܘܡܶܗ ܒܰܣܪܳܗܿ ܠܝܰܥܢܽܘܬܳܐ ܘܚܰܝܒܳܗܿ ܠܰܚܛܺܝܳܐ܀

ܙܰܝܢܰܐܗ̱ܘ ܕܦܽܘܪܩܳܢܳܐ ܨܰܘܡܳܐ ܩܰܕܺܝܫܳܐ܇ ܘܰܐܝܢܳܐ ܕܠܳܒܶܫ ܠܶܗ܇ ܙܳܟܶܐ ܠܣܳܛܳܢܳܐ ܘܰܠܚܰܝܠܶܗ܇ ܘܡܶܬܚܰܠܰܛ ܒܥܺܝܪ̈ܶܐ ܕܰܠܥܶܠ܀

ܙܰܘܥܳܐ ܡܣܰܪܶܕ ܠܺܝ܇ ܥܰܠ ܡܽܘܡ̈ܶܐ ܣܢܰܝ̈ܳܐ ܕܰܣܥܺܝܪ̈ܳܢ ܠܺܝ܇ ܪܰܚܶܡ ܥܠܰܝ ܐܰܠܳܗܳܐ܇ ܘܚܽܘܣ ܥܠܰܝ ܡܳܪܝ̱ ܒܰܚܢܳܢܳܟ܀

ܬܶܒܫܽܘܚܬܳܐ ܚܕܰܬܳܐ܇ ܘܬܰܘܕܺܝܬܳܐ ܥܦܺܝܦܬܳܐ ܢܩܰܪܶܒ ܠܳܟ܇ ܒܗܳܢܳܐ ܠܺܠܝܳܐ ܕܬܰܪܥܽܘܬܳܐ܇ ܨܰܘܡܳܐ ܕܰܟܝܳܐ ܘܩܰܕܺܝܫܳܐ܀

 

ܩܳܠܳܐ ܕܠܺܠܝܳܐ ܩܳܠܳܐ ܩܽܘܩܳܝܳܐ

ܛܽܘܒ ܠܰܐܝܢܳܐ ܕܪܰܚܡܳܟ ܡܳܪܰܢ܇ ܘܰܗܘܳܐ ܠܳܟ ܗܰܝܟܠܳܐ܇ ܘܰܒܢܳܡܽܘܣܳܟ ܐܶܬܗܰܓܺܝ ܐܺܝܡܳܡܳܐ ܘܠܺܠܝܳܐ܇ ܛܽܘܒܰܘܗ̱ܝ ܠܰܐܝܢܳܐ ܕܗܰܠܶܟ ܒܶܗ ܟܽܠܫܳܥ܇ ܘܰܫܡܰܥ ܡܶܠ̈ܰܝ̈ܟ ܘܰܢܛܰܪ ܦܽܘܩܕܳܢܰܝ̈ܟ܇ ܛܽܘܒܰܘܗ̱ܝ ܠܰܐܝܢܳܐ ܕܢܳܡ ܘܰܕܡܶܟ ܒܗܶܪܓܳܐ ܕܩܶܪ̈ܝܳܢܰܝܟ܇ ܘܰܒܨܦܰܪܳܐ ܩܳܡ ܘܰܩܥܳܐ ܠܳܟ ܕܠܳܟ ܫܽܘܒܚܳܐ ܡܳܪܝܳܐ ܗ ܒܪ̈ܰܚܡܰܝܟ ܚܽܘܣ ܥܠܰܝܢ܀

ܛܽܘܒ ܠܰܐܝܢܳܐ ܕܡܰܟܶܟ ܢܰܦܫܶܗ ܩܕܳܡܰܝܟ ܡܳܪܝܳܐ܇ ܘܰܐܫܦܰܥ ܕܶܡܥ̈ܶܐ ܥܰܠ ܚܰܘܒܰܘ̈ܗ̱ܝ ܐܰܝܟ ܕܰܘܺܝܕ ܡܰܠܟܳܐ܇ ܗܰܒ ܠܰܢ ܡܳܪܰܢ ܕܢܶܗܘܶܐ ܠܳܟ ܥܰܒܕ̈ܶܐ܇ ܐܳܦ ܬܰܠܡܺܝܕ̈ܶܐ ܢܳܛܪ̈ܰܝ ܦܽܘܩܕܳܢܰܝ̈ܟ܇ ܘܢܶܗܘܶܐ ܨܰܘܡܰܢ ܠܰܢܝܳܚܳܟ ܘܰܐܝܟ ܨܶܒܝܳܢܳܟ܇ ܘܛܰܝܒܽܘܬܳܟ ܬܰܪܚܶܡܝ̱ ܥܠܰܝܢ ܒܰܬܪ̈ܰܝܗܽܘܢ ܥܳܠܡ̈ܶܐ܇ ܗ ܘ ܗ܀

 

ܣܽܘܓܽܝܬܳܐ ܕܠܺܠܝܳܐ ܐܳܘ ܥܽܘܡܪܳܐ ܕܙܰܒܢܳܐ ܠܡܽܘܢ ܐܰܬܟܶܠܬܳܢܝ̱ ܥܰܠ ܚܰܝ̈ܶܐ

ܐܳܘ ܥܳܠܡܳܐ ܒܺܝܫܳܐ ܠܡܽܘܢ ܐܰܪܡܺܝܬܳܢܝ̱ ܒܰܬܥܳܫܳܐ܇ ܐܳܘ ܝܰܡܳܐ ܕܚܰܘܒ̈ܶܐ܇ ܠܡܽܘܢ ܛܰܒܰܥܬܳܢܝ̱ ܒܰܬܗܽܘܡܳܐ܇ ܐܳܙܶܠ ܐ̱ܢܳܐ ܠܰܐܝܟܳܐ܇ ܕܡܳܪܶܐ ܚܰܘܒܳܐ ܡܣܰܟܶܐ ܠܺܝ܀

ܓܰܢܳܒܳܐ ܓܳܢܶܒ ܥܽܘܬܪܳܐ ܓܰܠܝܳܐ ܘܰܡܫܰܢܶܐ ܓܰܢܳܒܳܐ ܨܢܺܝܥܳܐ܇ ܗܘܰܝܬ ܠܺܝ ܘܡܶܢ ܟܽܠ ܚܰܠܶܨܬܳܢܝ̱܇ ܓܢܰܒܬܳܢܝ̱ ܓܰܠܝܳܐܺܝܬ܇ ܘܰܫܠܰܚܬ ܫܽܘܦܪ̈ܰܝ ܟܰܣܝܳܐܺܝܬ܇ ܘܳܐܙܶܠ ܐ̱ܢܳܐ ܠܘܳܬ ܡܳܪܝ̱܇ ܟܰܕ ܫܠܺܝܚ ܘܡܰܕܘܰܝ ܘܰܡܦܰܪ̈ܣܰܝ܀

ܗܳܐ ܟܽܠܗܽܘܢ ܪ̈ܶܓܫܰܝ܇ ܥܰܝ̈ܛܶܐ ܛܥܺܝܢܺܝܢ ܡܶܢ ܥܳܠܡܳܐ܇ ܗܳܐ ܒܶܟܝܳܐ ܡܠܶܐ ܦܽܘܡܝ̱ ܘܪܶܥܝܳܢܝ̱ ܡܰܘܠܶܕ ܬܶܐܢܚ̈ܳܬܳܐ܇ ܗܳܐ ܕܶܡܥ̈ܶܐ ܒܥܰܝ̈ܢܰܝ܇ ܘܣܽܘܛܡ̈ܶܐ ܒܺܐܝ̈ܕܰܝ ܘܰܒܪ̈ܶܓܠܰܝ܇ ܫܽܘܘܕܳܝܳܟ ܝܶܫܽܘܥ ܢܶܫܪܶܐ ܦܟܳܪ̈ܰܝ ܕܰܐܘܕܶܐ ܠܳܟ܀

ܙܪܺܝܙܳܐ ܗܘܳܬ݀ ܛܰܠܝܽܘܬܝ̱ ܕܶܐܟܰܢܶܫ ܠܺܝ ܢܰܒܪܰܫܬܳܐ܇ ܘܰܫܓܺܝܪܳܐ ܒܩܰܝܣ̈ܶܐ܇ ܕܓܰܘܪܳܐ ܘܩܶܛܠܳܐ ܘܡܰܘܡ̈ܳܬܳܐ܇ ܘܗܳܐ ܪܡܶܐ ܒܺܝ ܙܰܘܥܳܐ܇ ܕܰܐܝܟ ܒܳܒܠܳܝ̈ܶܐ ܫܓܰܪܬܳܗܿ ܠܺܝ܇ ܛܰܐܠܳܐ ܕܒܰܐܬܽܘܢܳܐ ܒܳܟ ܐܶܬܦܰܨܶܐ ܡܶܢ ܓܰܘܶܗ܀

ܛܰܥܢܳܐ ܕܥܰܬܶܕܬ ܠܺܝ܇ ܩܳܡܶܬ ܕܶܐܬܢܶܐ ܘܶܐܬܓܶܢܚܶܬ܇ ܘܟܽܠܝܽܘܡ ܡܟܰܢܶܫ ܗܘܺܝܿܬ܇ ܝܽܘܩܪܳܐ ܪܰܒܐ ܠܥܶܠ ܡܶܢ ܪܺܝܫܝ̱܇ ܘܰܒܝܰܡܳܐ ܕܢܽܘܪܳܐ܇ ܕܶܐܛܽܘܣ ܘܶܐܥܒܰܪ ܠܳܐ ܡܨܶܐ ܐ̱ܢܳܐ܇ ܕܥܰܘܠܳܐ ܡܛܰܒܰܥ ܠܺܝ܇ ܨܠܺܝܒܳܟ ܢܕܰܠܰܝܢܝ̱ ܠܰܡܪ̈ܰܘܡܶܐ܀

ܟܰܕ ܝܰܠܕܽܘܢܝ̱ ܐ̱ܢܳܫ̈ܰܝ܇ ܘܫܰܪܺܝܿܬ ܕܶܐܥܽܘܠ ܠܰܒܪܺܝܬܳܐ܇ ܒܶܟܝܳܐ ܣܳܡ ܠܺܝ ܒܦܽܘܡܝ̱܇ ܥܳܠܡܳܐ ܥܽܘܡܪܳܐ ܕܥܳܩ̈ܳܬܳܐ܇ ܘܟܰܕ ܩܳܡܶܬ ܕܶܐܚܙܽܘܩ ܒܶܟܝܳܐ ܙܰܘܕܰܢܝ̱ ܬܶܐܢܚ̈ܳܬܳܐ܇ ܒܳܟܺܝܿܬ ܡܶܢ ܕܰܟܝܳܢܳܐ܇ ܘܗܳܐ ܒܳܟܶܐ ܐ̱ܢܳܐ ܒܨܶܒܝܳܢܳܐ܀

ܡܶܢ ܫܶܠܝܳܐ ܚܰܕܪܽܘܢܝ̱܇ ܚܰܒ̈ܠܶܐ ܕܡܰܘܬܳܐ ܘܶܐܬܓܶܢܚܶܬ܇ ܨܳܕܰܢܝ̱ ܟܽܘܪܗܳܢܳܐ܇ ܘܒܳܬܰܪ ܥܶܩܒܶܗ ܥܽܘܢܕܳܢܳܐ܇ ܦܳܫ̈ܝ̱ ܡܶܢ ܓܰܠܝ̈ܳܬܳܐ ܘܢܰܩܦܰܢܝ̱ ܩܶܢܛܳܐ ܕܟܰܣܝ̈ܳܬܳܐ܇ ܥܶܒܕܶܬ ܒܳܥܽܘܬܳܐ܇ ܘܫܰܪܺܝܿܬ ܐܶܩܥܶܐ ܠܕܰܝܳܢܳܐ܀

ܣܰܢܝ̈ܳܬܳܐ ܕܣܶܥܪܶܬ܇ ܥܰܠ̈ܝ ܩܳܡ̈ܝ ܩܽܘܕܡܰܝ ܘܶܐܬܓܶܢܚܶܬ܇ ܣܽܘܪܚܳܢܳܐ ܕܛܰܠܝܽܘܬܝ̱܇ ܥܶܗܕܶܬ ܣܰܝܒܽܘܬܝ̱ ܘܶܐܬܬܰܢܚܿܶܬ܇ ܕܟܽܠܗܽܘܢ ܫܢ̈ܰܝ ܚܰܝܰܝ̈܇ ܒܒܺܝܫ̈ܳܬܳܐ܇ ܪܶܗܛܶܬ ܐܶܢܽܘܢ܇ ܢܰܚ̈ܬܶܐ ܕܙܶܕܩ̈ܳܬܳܐ܇ ܛܽܘܒܰܘܗ̱ܝ ܠܰܐܝܢܳܐ ܕܥܰܬܶܕ ܠܶܗ܀

ܦܟܳܪ̈ܰܘܗ̱ܝ ܕܰܢܟܺܝܠܳܐ ܦܰܟܪܽܘܢܝ̱ ܘܰܐܝܟܰܢ ܥܳܒܶܕ ܐ̱ܢܳܐ܇ ܕܦܶܚܬܳܐ ܪܰܒܬܳܐ ܐܺܝܬ܇ ܒܶܝܬ ܥܰܬܺܝܪܳܐ ܠܠܳܥܳܙܳܪ܇ ܦܽܘܡܝ̱ ܚܰܝܒܰܢܝ̱ ܟܽܠ ܫܳܥ ܘܰܣܕܰܪ ܩܽܘܕܡܰܝ ܬܽܘܩ̈ܠܳܬܳܐ܇ ܦܺܐܪܳܐ ܕܬܰܘܕܺܝܬܳܐ܇ ܕܣܶܦܘ̈ܳܬܝ̱ ܩܰܪ̈ܶܒܝ̱ ܠܳܐ ܬܰܣܠܶܐ܀

ܩܰܠܺܝܠ ܗܘܳܐ ܒܥܰܝ̈ܢܰܝ܇ ܡܶܬܚܳܐ ܕܚܰܝ̈ܶܐ ܥܳܒܽܘܪ̈ܶܐ܇ ܕܰܩܪܶܒ ܠܶܗ ܩܶܨܳܐ܇ ܗܳܐ ܒܓܰܘ ܩܰܒܪܳܐ ܪܳܡܶܝܢ ܠܺܝ܇ ܩܪܳܢܝ̱ ܩܳܠܳܐ ܐ̱ܚܪܺܢܳܐ܇ ܘܰܐܪܡܺܝ ܪܗܳܒܬܳܐ ܒܗܰܕ̈ܳܡܰܝ܇ ܘܗܳܐ ܩܪܶܒܘ̱ ܪ̈ܳܕܽܘܦܰܝ܇ ܘܰܐܪܚܶܩܘ̱ ܟܽܠܗܽܘܢ ܝܳܕܽܘ̈ܥܰܝ܀

ܫܳܥܰܬ ܥܽܘܢܕܳܢܳܐ܇ ܠܰܬܝܳܒܽܘܬܳܐ ܙܰܡܶܢܬܳܢܝ̱܇ ܫܳܥܬܳܐ ܠܺܐܝܿܬ ܥܰܡܳܟ܇ ܡܶܢܺܝܢܝ̱ ܡܳܪܝ̱ ܥܰܡ ܦܳܥ̈ܠܶܐ ܐ̱ܚܪ̈ܳܢܶܐ܇ ܫܰܒܚܿܶܬ ܠܛܰܝܒܽܘܬܳܟ܇ ܬܶܚܽܘܣܝ ܥܠܰܝ ܟܺܐܢܽܘܬܳܟ܇ ܫܽܘܒܩܳܢܳܐ ܫܶܐܠܶܬ܇ ܫܰܘܙܶܒ ܚܰܝ̈ܰܝ ܡܶܢ ܢܽܘܪܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܰܥܺܝܪܰܝܢܝ̱ ܡܳܪܝ̱ ܥܰܠ ܬܶܫܒܽܘܚܬܳܐ ܕܰܐܠܳܗܽܘܬܳܐ܇ ܕܶܐܙܰܡܰܪ ܠܳܟ ܡܶܛܽܠ ܬܶܗܪܳܐ ܕܓܰܢ̱ܒܳܪܽܘܬܳܟ܇ ܚܽܘܒܳܟ ܢܶܛܪܽܘܕ ܝܽܘܩܪܳܐ ܘܫܶܢܬܳܐ ܘܡܰܐܺܝܢܽܘܬܳܐ܇ ܘܰܒܥܺܝܪܽܘܬܳܐ ܢܗܰܠܠܳܟ ܦܽܘܡܳܐ ܚܰܒܺܝܒܳܐܺܝܬ܀

ܚܰܛܦܰܢܝ̱ ܪܰܡܫܳܐ ܘܰܒܡܰܛܰܪܬܶܗ ܕܠܺܠܝܳܐ ܣܳܡܰܢܝ̱܇ ܒܳܟ ܡܳܪܝ̱ ܐܶܢܗܰܪ ܕܺܐܝܡܳܡܳܐ ܐܰܢ̱ܬ ܠܰܕܪܳܚܶܡ ܠܳܟ܇ ܗܳܐ ܚܶܫܽܘܟܳܐ ܕܠܠܳܐ ܡܰܚܶܫܟ ܘܰܡܟܰܡܰܗ ܠܺܝ܇ ܢܽܘܗܪܳܐ ܐܰܢ̱ܬ ܡܳܪܝ̱ ܐܰܢܗܰܪ ܥܰܝ̈ܢܰܝ ܕܶܐܚܙܶܐ ܚܢܳܢܳܟ܀

 

ܕܨܰܦܪܳܐ ܕܰܬܪܶܝܢ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܐܶܡܳܐ ܕܟܺܝܬܳܐ

ܗܰܘ ܕܰܐܠܶܦ ܠܰܢ ܒܝܰܕ ܨܰܘܡܳܐ ܕܰܟܝܳܐ܇ ܕܥܰܠ ܚܰܫ̈ܶܐ ܫܟܺܝܪ̈ܶܐ ܕܰܪ̈ܓܺܝܓܳܬܳܐ ܢܕܽܘܫ ܪܰܚܶܡ܀

ܗܰܘ ܕܰܐܠܒܶܫ ܠܰܢ ܫܶܪܝܳܢܳܐ ܕܢܽܘܗܪܳܐ܇ ܨܰܘܡܳܐ ܡܟܰܠܶܠ ܠܰܕܡܶܬܓܰܘܣܺܝܢ ܒܶܗ܇ ܪܰܚܶܡ܀

ܗܰܘ ܕܰܠܓܶܢܣܰܢ܇ ܕܫܰܦܶܠ ܗܘܳܐ ܘܶܐܙܕܟܺܝ܇ ܒܝܰܕ ܨܰܘܡܳܐ ܕܰܟܝܳܐ ܠܬܰܟܬܽܘܫܳܐ ܥܰܬܕܶܗ܇ ܪܰܚܶܡ܀

ܗܰܘ ܕܚܰܘܺܝ ܠܰܢ܇ ܫܒܺܝܠܳܐ ܕܰܡܫܰܘܫܶܛ܇ ܘܰܡܕܰܪܶܓ ܠܰܢ ܕܠܰܫܡܰܝܳܐ ܢܶܣܰܩ ܪܰܚܶܡ܀

ܗܰܘ ܕܰܠܡܽܘܫܶܐ ܒܨܰܘܡܳܐ ܕܨܳܡܶܗ ܗܘܳܐ܇ ܒܛܽܘܪܳܐ ܕܣܺܝܢܰܝ ܐܶܙܕܰܗܺܝ ܐܰܦܰܘ̈ܗ̱ܝ ܪܰܚܶܡ܀

 

ܕܰܐܠܳܗܝ̱ ܐܰܠܳܗܝ̱ ܩܳܠܳܐ ܐܰܘܫܶܛ ܠܺܝ ܡܳܪܝ̱ ܐܺܝܕܳܟ

ܚܛܺܝܿܬ ܠܳܟ ܦܳܪܽܘܩܝ̱ ܚܳܐܶܢ ܠܚܰܛܳܝ̈ܶܐ܇ ܘܟܽܠ ܒܺܝܫ̈ܳܬܳܐ ܒܰܡܪܰܚܡܳܢܽܘܬܳܝ ܣܶܥܪܶܬ ܘܶܐܬܕܰܟܶܐ ܘܪܰܚܶܡܥܠܰܝ܀

ܪ̈ܰܚܡܰܝܟ ܫܰܠܚܽܘܟ ܘܶܐܬܺܝܿܬ ܗܘܺܝܿܬ ܠܥܳܠܡܳܐ܇ ܕܬܰܐܣܶܐ ܘܬܰܚܠܶܡ ܟܺܐܒ̈ܰܝܢ ܘܟܽܘܪ̈ܗܳܢܰܝܢ܇ ܐܰܣܳܐ ܫܽܘܚܢ̈ܶܐ ܕܢܰܦܫ̈ܳܬܰܢ ܒܣܽܘܓܐܳܐ ܕܰܡܪܰܚܡܳܢܽܘܬܳܟ܀

ܗܳܢܰܘ ܨܰܘܡܳܐ ܕܰܬܪܶܝܢ ܢܶܨܚ̈ܳܢܺܝܢ܇ ܡܰܩܢܶܐ ܠܰܐܝܢܳܐ ܕܟܽܠܫܳܥ ܠܳܐܶܐ ܒܶܗ܇ ܡܫܺܝܚܳܐ ܐܰܠܳܗܳܐ ܕܚܰܘܝܶܗ ܒܰܩܢܽܘܡܶܗ܇ ܪܰܚܶܡ܀

ܝܰܡܰܐܗ̱ܘ ܨܰܘܡܳܐ ܕܰܡܠܶܐ ܝܽܘܬܪ̈ܳܢܶܐ܇ ܘܢܶܒܥܶܐ ܕܡܰܢܰܥ ܫܶܦܥ̈ܶܐ ܕܛܳܒ̈ܳܬܳܐ܇ ܡܫܺܝܚܳܐ ܐܰܠܳܗܳܐ܇ ܒܶܗ ܗܽܘ ܐܶܬܪܰܥܳܐ ܠܰܢ܀

ܚܰܝ̈ܶܐ ܘܒܽܘܣܳܡ̈ܶܐ ܝܳܪܬܺܝܢ ܨܰܝܳܡ̈ܶܐ܇ ܒܝܰܘܡܳܐ ܕܕܳܢܰܚ ܚܰܬܢܳܐ ܫܡܰܝܳܢܳܐ܇ ܡܫܺܝܚܳܐ ܐܰܠܳܗܳܐ ܐܰܫܘܳܢ ܕܥܰܡܗܽܘܢ ܢܶܥܽܘܠ ܠܰܓܢܽܘܢܳܐ܀

ܠܢܰܦܫܳܐ ܕܩܰܕܶܫ ܨܰܘܡܳܐ ܘܰܡܶܢܰܟܶܦ܇ ܐܳܦ ܚܳܠܶܛ ܠܰܢ ܥܰܡ ܛܶܟܣ̈ܶܐ ܕܰܠܥܶܠ܇ ܡܫܺܝܚܳܐ ܐܰܠܳܗܳܐ ܕܒܶܗ ܫܳܒܶܩ ܚܰܘ̈ܒܶܐ ܘܰܚܛܳܗ̈ܶܐ܇ ܪܰܚܶܡܥܠܰܝܢ ܐܰܠܳܗܳܐ܀

ܫܽܘܒܚܳܐ ܠܳܟ ܡܳܪܝ̱܇ ܐܳܣܝܳܐ܇ ܫܡܰܝܳܢܳܐ܇ ܕܶܐܬܺܝܿܬ ܒܚܽܘܒܳܟ ܠܥܳܠܡܳܐ ܘܰܦܪܰܩܬܳܢܝ̱܇ ܒܨܰܘܡܳܟ ܡܶܢ ܒܺܝܫܳܐ ܘܡܰܘܬܳܐ ܣܳܩܽܘܪ̈ܰܝܢ ܪܰܚܶܡܥܠܰܝܢ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܗܰܘ ܕܰܒܛܽܘܪܳܐ

ܗܰܘ ܕܰܒܨܰܘܡܶܗ ܩܰܕܺܝܫܳܐ ܘܡܰܥܒܶܕ ܚܰܝ̈ܶܐ܇ ܙܟܳܝܗ̱ܝ ܗܘܳܐ ܠܒܺܝܫܳܐ ܒܥܶܠܕܰܪܳܐ܇ ܝܰܗܒܠܰܢ ܚܰܝܠܳܐ ܕܳܐܦ ܚܢܰܢ ܢܶܙܟܺܝܘܗ̱ܝ ܒܰܐܓܽܘܢܳܐ܇ ܠܡܳܪܝܳܐ ܢܶܬܟܰܫܰܦ܀

ܗܰܘ ܕܰܒܨܰܘܡܶܗ ܐܰܠܶܦ ܠܰܢ ܡܰܟܺܝܟܽܘܬܳܐ܇ܘܒܰܨܠܽܘܬܳܐ ܝܰܗܒ ܗܘܳܐ ܚܰܝܠܳܐ ܠܰܡܚܺܝܠܽܘܬܰܢ܇ ܦܬܰܚ ܠܰܢ ܡܳܪܝܳܐ ܬܰܪܥܳܐ ܕܪ̈ܰܚܡܶܐ܇ ܬܝܳܒܽܘܬܳܐ ܕܫܳܒܩܳܐ ܚܰܘ̈ܒܶܐ܀

ܡܽܘܫܶܐ ܒܨܰܘܡܳܐ ܡܶܫܟܳܐ ܕܰܐܦܰܘ̈ܗ̱ܝ ܐܶܙܕܰܗܺܝ܇ ܐܳܦ ܐܺܠܺܝܳܐ ܒܡܰܪܟܰܒܬܳܐ ܣܠܶܩ ܠܰܫܡܰܝܳܐ܇ ܘܰܚܢܰܢ ܢܨܽܘܡ ܡܶܢ ܒܺܝ̈ܫܳܬܳܐ܇ ܕܢܶܬܦܢܶܐ ܠܰܢ ܠܓܰܘ ܦܰܪܕܰܝܣܳܐ ܠܡܳܪܝܳܐ܇ ܢܶܬܟܰܫܰܦ܀

ܒܰܪ ܐܰܠܳܗܳܐ܇ ܨܰܘܡܳܐ ܠܒܰܟ ܡܕܰܒܪܳܢܳܐܺܝܬ܇ ܘܰܒܝܰܕ ܨܰܘܡܶܗ ܩܰܕܺܝܫܳܐ ܙܟܳܝܗ̱ܝ ܠܰܛܪܽܘܢܳܐ܇ ܘܥܰܒܕܶܗ ܕܝܳܫܳܐ ܠܨܰܝ̈ܳܡܶܐ܇ ܕܰܒܨܰܘܡܳܐ ܢܕܽܘܫܽܘܢ ܪܺܝܫܶܗ܇ ܠܡܳܪܝܳܐ܇ ܢܶܬܟܰܫܰܦ܀

ܟ̈ܺܐܢܶܐ ܒܨܰܘܡܳܐ ܐܶܬܥܰܛܰܦܘ̱ ܫܽܘܦܪ̈ܶܐ ܪ̈ܳܡܶܐ܇ ܘܰܚܢܰܢ ܢܨܽܘܡ ܡܶܢ ܐܰܟܬܳܐ ܘܡܶܢ ܚܶܪ̈ܝܳܢܶܐ܇ ܕܢܺܐܪܰܬ ܚܰܝ̈ܶܐ ܘܡܰܠܟܽܘܬܳܐ ܫܡܰܝܳܢܺܝܬܳܐ ܕܠܳܐ ܡܶܫܬܰܪܝܳܐ܇ ܠܡܳܪܝܳܐ ܢܶܬܟܰܫܰܦ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܐܰܢ̱ܬ ܕܰܒܪܺܝܫܺܝܬ

ܒܨܰܘܡܳܐ ܕܰܟܝܳܐ ܕܨܳܡ ܗܘܳܐ ܡܽܘܫܶܐ ܒܛܽܘܪ ܣܺܝܢܰܝ ܐܶܙܕܰܗܺܝ ܗܘܳܐ܇ ܘܰܢܗܰܪ̈ܝ̱ ܐܰܦܰܘ̈ܗ̱ܝ ܐܰܝܟ ܫܶܡܫܳܐ ܡܒܰܪܟܳܐ ܓܶܝܪ܀

ܢܨܽܘܡ ܕܰܟܝܳܐܺܝܬ ܘܢܰܘܕܶܐ ܠܒܽܘܟܪܶܗ ܕܥܶܠܳܝܳܐ ܕܦܰܪܩܰܢ ܒܨܰܘܡܶܗ܇ ܘܰܐܫܘܺܝ ܠܰܢ ܕܢܰܙܥܶܩ ܘܢܺܐܡܰܪ܇ ܡܒܰܪܟܳܐ܀

ܗܰܒ ܠܰܢ ܡܳܪܰܢ܇ ܚܢܳܢܳܐ ܘܪ̈ܰܚܡܶܐ ܒܝܽܘܡ ܕܺܝܢܳܐ܇ ܘܚܰܝ̈ܶܐ ܚܰܕ̈ܬܶܐ ܒܡܰܠܟܽܘܬܳܐ ܫܡܰܝܳܢܺܝܬܳܐ܀

ܡܫܺܝܚܳܐ ܕܦܰܨܺܝ܇ ܠܰܛܠܳܝ̈ܶܐ ܕܒܶܝܬ ܚܰܢܰܢܝܳܐ ܡܶܢ ܐܰܬܽܘܢܳܐ܇ ܘܰܣܠܶܩܘ̱ ܡܶܢܶܗ ܟܰܕ ܢܰܨܺܝܚܺܝܢ ܡܒܰܪܟܳܐ܀

ܐܰܢ̱ܬ ܕܰܒܨܰܘܡܳܐ܇ ܘܰܒܕܶܡܥ̈ܶܐ ܕܰܬܝܳܒܽܘܬܳܐ ܫܰܘܙܶܒܬ ܘܰܦܪܰܩܬ܇ ܠܢܺܝܢܘܳܝ̈ܶܐ ܡܶܢ ܝܰܕ ܪܽܘܓܙܳܐ ܡܒܰܪܟܳܐ܀

ܡܒܰܪܟܺܝܢ ܠܳܟ ܡܳܪܝ̱܇ ܟܪ̈ܽܘܒܶܐ ܣܰܓܺܝ̈ܐܝܰܝ ܥܰܝ̈ܢܶܐ܇ ܘܰܡܩܰܕܫܺܝܢ ܠܳܟ܇ ܣܪ̈ܳܦܶܐ ܕܶܫܬܳܐ ܓܶܦܰܝ̈ܗܽܘܢ܀

 

ܩܳܠܳܐ ܕܨܰܦܪܳܐ ܩܳܠܳܐ ܐܰܝܟ ܦܺܝܪܡܳܐ ܕܩܰܪܶܒ ܐܰܗܪܽܘܢ

ܠܰܐܝܟܳܐ ܢܶܥܪܽܘܩ ܡܶܢ ܩܽܘܕܡܰܝܟ܇ ܡܳܪܝܳܐ ܐܰܠܳܗܳܐ܇ ܘܰܐܝܟܳܐ ܢܶܫܟܰܚ ܒܶܝܬ ܓܰܘܣܳܐ ܕܢܶܗܘܶܐ ܥܳܕܽܘܪܳܐ܇ ܐܶܠܳܐ ܪ̈ܰܚܡܰܝܟ ܘܰܚܢܳܢܳܟ ܡܳܪܳܐ ܛܳܒܳܐ ܘܒܰܣܺܝܡܳܐ܀

ܚܰܣܳܐ ܡܽܘ̈ܡܰܝ ܐܰܠܳܗܳܐ ܒܪ̈ܰܚܡܶܐ ܕܛܰܝܒܽܘܬܳܟ܇ ܡܶܢ ܕܟܽܠ ܐ̱ܢܳܫ ܒܕܶܚܠܳܐ ܩܳܐܶܡ ܩܽܘܕܡܰܬ ܪܰܒܽܘܬܳܟ܇ ܒܳܟܶܢ̈ܦܶܐ ܕܪ̈ܰܚܡܰܝܟ ܣܰܬܰܪ ܠܰܢ܇ ܘܰܐܩܺܝܡ ܠܰܢ ܡܶܢ ܝܰܡܺܝܢܳܟ܀

 

ܐ̱ܚܪܺܢܳܐ ܩܳܠܳܐ ܒܨܰܦܪܳܐ ܢܩܰܕܶܡ ܠܰܨܠܽܘܬܳܐ

ܒܨܰܘܡܶܗ ܕܡܳܪܰܢ ܐܶܬܕܰܡܺܝܽܘ܇ ܟܺܐܢ̈ܶܐ ܕܰܢܨܰܚܘ̱ ܒܟܽܠ ܕܳܪ̈ܺܝܢ܇ ܬܰܘ ܐܰܚ̈ܰܝ ܢܶܬܓܰܘܰܣ ܒܶܗ ܕܗܽܘܝܽܘ ܡܶܢܰܨܰܚ ܠܰܢ܇ ܬܰܘ ܕܰܢܨܽܘܡ ܩܰܕܺܝܫܳܐܺܝܬ܇ ܡܶܢ ܐܰܟܬܳܐ ܘܡܶܢ ܚܶܪܝܳܢܳܐ܇ ܕܗܳܢܰܘ ܓܶܝܪ ܨܰܘܡܳܐ ܕܰܟܝܳܐ ܕܰܡܪܰܥܶܐ ܠܡܳܪܝܳܐ܀

ܫܽܘܒܚܳܐ ܠܶܗ ܠܰܐܒܳܐ ܕܫܰܕܰܪ܇ ܠܰܒܪܶܗ ܡܶܛܽܠ ܦܽܘܪܩܳܢܰܢ܇ ܘܨܳܡ ܘܶܐܬܡܰܟܰܟ ܚܠܳܦ ܓܶܢܣܰܢ ܘܫܰܦܠܶܗ ܠܣܳܛܳܢܳܐ܇ ܘܰܣܓܺܝܕ ܡܶܢ ܟܽܠ ܝܰܠܕܶܗ ܕܰܐܒܳܐ܇ ܘܬܰܒܪܶܗ ܠܝܰܥܢܽܘܬܳܐ ܒܨܰܘܡܶܗ܇ ܫܽܘܒܚܳܐ ܠܶܗ ܠܰܐܒܳܐ ܕܫܰܠܚܶܗ ܘܣܶܓܕܬܳܐ ܠܪܽܘܚܳܐ ܩܰܕܺܝܫܳܐ܀

ܛܳܒܳܐ ܘܣܰܓܺܝ ܛܰܝܒܽܘܬܳܐ܇ ܕܰܐܫܦܰܥ ܚܽܘܒܶܗ ܥܰܠ ܓܶܢܣܰܢ܇ ܘܨܳܡ ܘܶܐܬܡܰܟܰܟ ܘܰܦܪܰܩ ܠܰܢ ܘܚܰܘܺܝ ܠܰܢ ܐܽܘܪܚܳܐ܇ ܐܰܠܶܦ ܠܰܢ ܡܳܪܝ̱ ܝܺܕܰܥܬܳܐ܇ ܘܰܡܠܺܝ ܠܰܢ ܚܽܘܒܳܐ ܘܫܰܝܢܳܐ܇ ܘܩܰܒܶܠ ܨܰܘܡܰܢ ܘܰܨܠܽܘܬܰܢ ܘܶܐܬܪܰܚܰܡܥܠܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܥܰܡ ܐܺܝܡܳܡܳܐ ܢܽܘܗܪܳܟ ܢܶܕܢܰܚ ܥܰܠ ܚܽܘܫ̈ܳܒܰܢ ܘܰܠܛܶܠܳܠܳܐ ܕܛܽܘܥܝܰܝ ܢܶܛܪܽܘܕ ܡܶܢ ܢܰܦܫ̈ܳܬܰܢ܇ ܢܗܰܪ̈ܝ̱ ܒܶܪ̈ܝܳܬܳܐ ܘܰܐܢܗܰܪ ܥܰܡܗܶܝܢ ܠܶܒܰܘ̈ܳܬܰܢ܇ ܕܰܢܫܰܒܚܽܘܢܳܟ ܥܰܡ ܐܺܝܡܳܡ̈ܶܐ ܘܠܰܝܠܰܘ̈ܳܬܳܐ܀

ܢܫܰܒܚܽܘܢܳܟ ܡܳܪܝ̱ ܨܰܦܪ̈ܶܐ ܘܪ̈ܰܡܫܶܐ ܒܫܽܘܚ̈ܠܳܦܰܝܗܽܘܢ܇ ܘܰܢܩܰܪܒܽܘܢ ܠܳܟ ܥܶܛܪ̈ܶܐ ܚܠܰܝ̈ܳܐ ܕܪ̈ܽܘܡܝܳܢܰܝܗܽܘܢ܇ ܢܫܰܒܚܽܘܢ ܟܳܗ̈ܢܶܐ ܘܰܡܫܰܡܫܳܢ̈ܶܐ ܘܟܽܠܳܗܿ ܥܺܕܬܳܐ܇ ܠܗܰܘ ܕܰܐܦܨܰܚ ܠܰܢ ܒܢܽܘܗܪܶܗ ܓܰܐܝܳܐ ܘܠܶܗ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ

ܒܩܳܠܳܐ ܥܶܛܪܳܐ ܕܒܶܣܡ̈ܶܐ ܕܶܐܬܩܰܪܰܒ

ܒܨܰܘܡܳܐ ܐܶܙܕܰܗܺܝ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܠܰܐܠܳܗܳܐ ܫܘܶܐ ܗܘܳܐ ܕܢܶܚܙܶܐ ܒܬܶܕܡܽܘܪܬܳܐ ܪܰܒܬܳܐ܇ ܒܨܰܘܡܳܐ ܕܨܳܡ ܗܘܳܐ ܕܳܢܺܝܐܶܝܠ ܐܶܬܦܰܨܺܝ ܗܘܳܐ܇ ܒܓܰܘ ܓܽܘܒܳܐ ܕܰܐܪ̈ܝܰܘܳܬܳܐ܇ ܘܡܶܕܶܡ ܠܳܐ ܚܰܒܠܽܘܗ̱ܝ܀

ܢܶܗܘܶܐ ܩܳܠܳܐ ܕܒܳܥܽܘܬܰܢ ܥܶܛܪܳܐ ܕܒܶܣܡ̈ܶܐ܇ ܘܬܶܬܪܰܥܶܐ ܒܶܗ ܡܳܪܽܘܬܳܟ ܡܳܪܝܳܐ ܡܪܰܚܡܳܢܳܐ܇ ܘܰܫܒܽܘܩ ܚܰܘܒ̈ܰܝܢ ܘܰܚܛܳܗܰܝ̈ܢ܇ ܐܰܝܟ ܕܰܡܥܳܕ ܐܰܢ̱ܬ܇ ܕܠܳܐ ܐܺܝܬ ܠܰܢ ܕܰܡܨܶܐ ܡܫܰܘܙܶܒ ܐܶܠܳܐ ܐܰܢ̱ܬ ܡܳܪܝܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܚܶܫܽܘܟ ܡܶܟܽܝܠ ܥܳܠܡܳܐ ܒܺܝܫܳܐ ܘܰܡܠܶܐ ܬܽܘܟ̈ܶܐ܇ ܘܡܰܫܪ̈ܽܘܥܝܳܬܳܐ ܘܳܝܠܶܗ ܠܰܐܝܢܳܐ ܕܡܶܬܬܰܩܰܠ ܒܶܗ܇ ܐܰܢ̱ܬ ܗܽܘ ܡܳܪܰܢ ܠܶܘܝܳܐ ܛܳܒܳܐ ܘܢܽܘܗܪܳܐ ܪܰܒܳܐ܇ ܘܽܐܳܘܪܚܳܐ ܕܡܰܠܝܳܐ ܚܰܝ̈ܶܐ ܘܛܽܘ̈ܒܶܐ ܠܰܕܪܳܕܶܐ ܒܶܗ܀

ܠܳܟ ܬܶܫܒܽܘܚܬܳܐ ܝܶܫܽܘܥ ܢܽܘܗܪܳܐ ܕܰܡܠܶܐ ܚܰܝ̈ܶܐ܇ ܕܰܐܢ̱ܬܗܽܘ ܥܽܘܬܪܳܐ ܕܠܳܐ ܡܶܫܬܰܚܠܰܦ ܨܶܝܕ ܩܰܢܳܝ̈ܰܘܗ̱ܝ܇ ܠܳܟ ܡܳܪܝ̱ ܢܶܩܢܶܐ ܘܰܠܩܶܢܝ̈ܳܢܶܐ ܘܥܽܘܬܪܳܐ ܢܶܣܢܶܐ܇ ܒܳܟ ܡܳܪܝ̱ ܢܶܚܕܶܐ ܒܝܽܘܡ ܓܶܠܝܳܢܳܟ ܘܠܳܟ ܬܶܫܒܽܘܚܬܳܐ܀

 

ܕܦܶܠܓܶܗ ܕܝܰܘܡܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝܕ̈ܶܐ

ܡܳܪܳܐ ܟܝܳܢ̈ܶܐ ܝܰܗܒ ܢܰܦܫܶܗ܇ ܘܨܰܘܡܳܐ ܠܒܰܟ ܐܰܝܟ ܚܰܣܺܝܪܳܐ܇ ܘܶܐܬܟܰܬܰܫ ܥܰܡ ܣܳܛܳܢܳܐ܇ ܘܒܶܗ ܐܰܛܥܺܝ ܠܰܒܥܶܠܕܰܪܳܐ܇ ܘܦܰܪܣܺܝ ܙܺܐܦܶܗ ܕܰܢܟܺܝܠܳܐ܇ ܘܰܣܠܶܩ ܢܰܨܰܚ ܒܰܐܓܽܘܢܳܐ܀

ܨܰܘܡܳܐ ܙܰܝܢܰܐܗ̱ܘ ܩܰܕܺܝܫܳܐ܇ ܨܰܘܡܳܐ ܣܰܟܪܰܐܗ̱ܘ ܕܦܽܘܪܩܳܢܳܐ܇ ܨܰܘܡܳܐ ܫܽܘܪܰܐܗ̱ܘ ܬܰܩܺܝܦܳܐ܇ ܨܰܘܡܳܐ ܥܶܠܰܬ ܝܽܘܬܪ̈ܳܢܶܐ܇ ܨܰܘܡܳܐ ܐܺܝܙܓܰܕܰܐܗ̱ܘ ܕܫܰܝܢܳܐ ܘܒܶܝܬ ܓܰܘܣܳܐ ܕܟܽܠ ܛܳܒ̈ܳܬܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܚܢܽܘܟ ܕܰܫܦܰܪܘ̱ ܗ̱ܘܰܘ ܠܳܟ ܚܰܝ̈ܰܘܗ̱ܝ܇ ܢܽܘܚ ܕܰܪܫܰܡ ܥܺܕܰܬ ܩܽܘܕܫܳܐ܇ ܐܒܰܪܳܗܳܡ ܕܰܫܡܰܥ ܩܳܠܳܟ܇ ܘܺܐܝܣܚܳܩ ܕܰܚܙܳܟ ܒܰܦܟܳܪ̈ܰܘܗ̱ܝ܇ ܝܰܥܩܽܘܒ ܕܰܬܗܰܪ ܒܰܨܠܺܝܒܳܟ܇ ܘܰܡܫܰܚ ܟܺܐܦܳܐ ܠܣܳܗܕܽܘܬܳܐ܇ ܡܶܠܟܺܝܙܕܶܩ ܟܽܘܡܪܳܐ ܪܰܒܳܐ܇ ܕܨܳܪ ܛܽܘܦܣܳܐ܇ ܕܦܰܓܪܳܟ ܘܰܕܡܳܟ܇ ܝܰܘܣܶܦ ܟܺܐܢܳܐ ܒܓܰܘ ܡܶܨܪܶܝܢ܇ ܕܰܢܨܰܚ ܘܰܙܟܳܐ ܒܬܰܐܳܘܳܘܢܳܐ܇ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܰܥܒܰܕܘ̱ ܨܶܒܝܳܢ ܡܳܪܽܘܬܳܟ܀

ܪܺܝܫܳܐ ܕܫܰܪ̈ܒܳܬܳܐ ܢܫܰܒܚܳܟ܇ ܐܳܕܳܡ ܡܰܒܽܘܥܳܐ ܕܛܽܘܗ̈ܡܶܐ ܗܳܒܺܝܠ ܐܶܡܪܳܐ ܬܰܡܺܝܡܳܐ܇ ܕܒܰܕܡܶܗ ܨܳܪ ܠܰܕܒܺܝܚܽܘܬܳܟ܇ ܢܫܰܒܚܳܟ ܫܺܝܬ ܘܰܐܢܽܘܫ ܟܺܐܢ̈ܶܐ܇ ܘܢܽܘܚ ܕܰܗܘܳܐ ܐܳܕܳܡ ܕܰܬܪܶܝܢ܇ ܘܺܝܬܶܒ ܐܰܪܥܳܐ ܒܰܡܠܳܐܳܝܗܿ܇ ܐܰܒܪܳܗܳܡ ܐܺܝܣܚܳܩ ܘܝܰܥܩܽܘܒ܇ ܢܶܬܠܽܘܢ ܫܽܘܒܚܳܟ ܒܐܟܣܝܐ܀

 

ܕܰܬܫܰܥܫ̈ܳܥܺܝܢ ܒܩܳܠܳܐ ܩܽܘܩܳܝܳܐ

ܡܳܐ ܫܰܦܺܝܪܳܐ ܡܶܐܬܺܝܬܳܟ ܒܰܪ ܐܰܠܳܗܳܐ܇ ܡܳܐ ܕܥܳܐܠ̈ܳܢ ܟܽܠ ܫܰܪ̈ܒܳܬܳܐ ܩܕܳܡ ܒܺܐܝܡܰܐ ܕܚܺܝܠܬܳܐ܇ ܥܳܐܶܠ ܡܰܠܟܳܐ ܕܠܳܐ ܩܛܺܝܪ ܠܶܗ ܬܳܐܓܳܐ܇ ܘܡܰܪܟܶܢ ܪܺܝܫܶܗ ܕܕܰܝܳܢܳܐ ܘܒܳܟܶܐ܇ ܥܰܬܺܝܪܳܐ ܩܳܪܶܐ ܠܥܽܘܬܶܪܗ ܘܠܳܐ ܥܳܢܶܐ ܠܶܗ܇ ܕܠܰܝܬ ܬܰܡܳܢ ܡܰܐܣܰܒ ܒܰܐܦ̈ܰܐ܇ ܘܫܽܘܚܕܳܐ ܠܳܐ ܡܩܰܒܠܺܝܢ ܗ ܘ ܗ܀

ܢܽܘܪܳܐ ܕܰܚܙܳܐ ܐܶܫܰܥܝܳܐ ܕܒܳܗ ܕܳܐܶܢ ܡܳܪܝܳܐ܇ ܦܳܪܽܘܫܳܐ ܫܡܰܥ ܐܺܡܰܪ ܠܳܟ ܐܰܝܟܰܢܳܐ ܗܳܘܝܳܐ܇ ܢܽܘܪܳܐ ܐܺܝܬܰܘܗ̱ܝ ܟܽܠܶܗ ܕܰܝܳܢܳܐ܇ ܘܫܰܠܗܶܒܺܝܬܳܐ ܘܢܽܘܪܳܐ ܟܪܺܝܟܳܐ ܠܶܗ܇ ܠܰܘ ܓܶܝܪ ܢܽܘܪܳܐ ܕܰܫܓܺܝܪܳܐ ܝܳܩܕܳܐ ܬܰܡܳܢ܇ ܕܟܽܠܢܳܫ ܢܽܘܪܶܗ ܡܶܢܶܗ ܗܺܝ ܘܒܰܐܦܰܘ̈ܗ̱ܝ ܠܳܐ ܢܳܣܒܳܐ ܗ ܡܳܪܝ̱ ܦܰܨܳܢ ܡܶܢܳܗܿ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܡܳܐ ܕܢܳܗܡܳܐ ܢܽܘܪܳܐ܇ ܕܬܰܘܩܶܕܝ̱ ܠܪ̈ܰܫܺܝܥܶܐ܇ ܕܩܳܝܡܺܝܢ ܒܰܪܬܺܝܬܳܐ܇ ܚܰܛܳܝ̈ܶܐ ܟܽܠܗܽܘܢ܇ ܒܳܟܶܢ̈ܦܶܐ ܕܛܰܝܒܽܘܬܳܟ܇ ܣܰܬܰܪ ܠܰܢ ܡܳܪܝܳܐ܀

ܘܦܰܓܪܳܟ ܡܳܪܝ̱ ܘܰܕܡܳܟ܇ ܫܽܘܪܳܐ ܢܶܗܘܽܘܢ ܠܰܢ܇ ܫܽܘܒܚܳܐ ܠܗܰܘ ܐܺܝܬܝܳܐ܇ ܕܰܓܢܺܝܙ ܡܶܢ ܥܳܠܡ̈ܶܐ܇ ܫܽܘܒܚܳܐ ܠܟܺܐܢܽܘܬܳܟ܇ ܒܚܰܪܰܬ ܟܽܠ ܥܳܠܡ̈ܶܐ܇ ܫܽܘܒܚܳܐ ܠܛܰܝܒܽܘܬܳܟ܇ ܕܚܳܢܰܬ݀ ܠܚܰܛܳܝ̈ܶܐ܀

 

ܫܠܶܡ ܕܝܽܘܡ ܬܪܶܝܢ ܒܫܰܒܳܐ

 

ܬܽܘܒ ܕܪܰܡܫܳܐ ܕܰܬܠܳܬܳܐ ܒܫܰܒܳܐ ܕܫܰܒܬܳܐ ܕܰܐܪܒܰܥ ܕܨܰܘܡܳܐ

ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܐܶܡܳܐ ܕܟܺܝܬܳܐ

ܒܪܳܐ ܕܰܒܨܰܘܡܶܗ܇ ܚܰܘܺܝ ܠܰܢ ܛܽܘܦܣܳܐ ܕܰܒܝܰܕ ܨܰܘܡܳܐ ܢܶܨܟܺܝܘܗ̱ܝ ܠܰܢܟܺܝܠܳܐ ܪܰܚܶܡ܀

ܨܳܡ ܦܳܪܽܘܩܰܢ܇ ܘܰܠܒܥܶܠܕܰܪܳܐ ܙܟܳܐ܇ ܘܝܰܗܒ ܠܰܢ ܙܰܝܢܳܐ ܕܰܟܠܺܝܠܳܐ ܢܰܥܕܶܐ ܪܰܚܶܡܥܠܰܝ܀

ܫܽܘܒܚܳܐ ܠܪܳܡܳܐ ܕܫܰܕܰܪ ܠܺܝܚܺܝܕܶܗ܇ ܕܰܒܝܰܕ ܨܰܘܡܶܗ܇ ܨܰܠܡܶܗ ܢܶܦܪܽܘܩ ܗܘܳܐ ܪܰܚܶܡ܀

ܗܰܘ ܕܰܒܨܰܘܡܳܐ܇ ܠܳܐܟܶܠܩܰܪܨܳܐ ܙܟܳܐ܇ ܘܠܶܐ̱ܫܛܳܪ ܚܰܘܒ̈ܳܬܰܢ܇ ܒܰܩܢܽܘܡܶܗ ܦܪܰܥ ܗܘܳܐ ܪܰܚܶܡ܀

ܩܰܒܶܠ ܡܳܪܰܢ ܬܶܫܡܶܫܬܳܐ ܕܥܰܒ̈ܕܰܝܟ ܘܶܐܬܪܰܥܳܐ ܠܰܢ܇ ܐܰܝܟ ܨܠܽܘܬܶܗ ܕܦܺܝܢܶܚܣ ܪܰܚܶܡ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܠܢܳܨܪܰܬ ܡܕܺܝܢܬܳܐ

ܒܝܰܕ ܡܶܐܬܺܝܬܳܟ܇ ܡܰܠܟܳܐ ܡܫܺܝܚܳܐ܇ ܚܰܪܰܪܬܳܝܗ̱ܝ ܠܟܽܠܶܗ ܥܳܠܡܳܐ܇ ܕܰܒܨܶܒܝܳܢܶܗ ܐܶܫܬܰܥܒܰܕ ܠܰܣܪܺܝܩܽܘܬܳܐ ܘܰܕܠܳܐ ܝܽܘܬܪܳܢ܇ ܡܫܺܝܚܳܐ ܡܦܰܢܶܐ ܠܛܳܥ̈ܰܝܳܐ ܐܰܠܳܗܳܐ܀

ܒܝܰܡܳܐ ܫܓܺܝܫܳܐ ܗܰܘ ܕܰܚܛܳܗ̈ܶܐ ܗܳܐ ܡܟܰܬܰܡ ܐ̱ܢܳܐ܇ ܘܠܰܝܬ ܠܺܝ ܢܦܺܐܫܳܐ ܕܶܐܬܩܰܪܰܒ ܠܘܳܬܳܟ ܡܳܪܝܳܐ ܪܳܚܶܡܢܳܫܳܐ܇ ܘܒܰܕܡܽܘܬ ܦܶܛܪܽܘܣ ܓܳܥܶܐ ܐ̱ܢܳܐ܇ ܐܰܠܳܗܳܐ܀

ܚܰܣܳܐ ܚܰܘܒ̈ܰܝ ܒܪ̈ܰܚܡܶܐ ܕܡܶܢܳܟ܇ ܐܳܘ ܚܰܢܳܢܳܐ ܕܰܗܘܳܐ ܐ̱ܢܳܫܳܐ ܘܰܠܟܺܐܒ̈ܰܝܢ ܐܰܣܳܐ ܘܰܐܚܠܶܡ܇ ܐܳܘ ܒܳܪܽܘܝܶܗ ܕܓܶܢܣܰܢ ܫܰܦܠܳܐ܇ ܕܢܶܩܥܶܐ ܠܳܟ ܥܰܠ ܛܰܝܒܽܘܬܳܟ ܐܰܠܳܗܳܐ܀

 

ܐ̱ܚܪܺܢܳܐ܇ ܩܪܺܝܬܳܟ ܡܳܪܝܳܐ ܡܶܢ ܟܽܠܶܗ ܠܶܒܝ̱

ܡܰܠܟܳܐ ܡܫܺܝܚܳܐ ܕܨܳܡ ܗܘܳܐ܇ ܘܰܙܟܳܐ ܠܒܺܝܫܳܐ܇ ܒܰܛܶܠ ܡܶܢܰܢ ܨܶܢܥ̈ܳܬܶܗ܀

ܐܳܘ ܙܳܝܽܘܢܳܐ ܕܟܽܠ ܒܶܪ̈ܝܳܬܳܐ܇ ܕܰܟܦܶܢ ܕܰܨܒܳܐ܇ ܒܝܰܕ ܨܰܘܡܳܟ ܢܶܙܟܶܐ ܠܒܺܝܫܳܐ܀

ܘܡܶܬܰܪܣܶܐ ܟܽܠ ܕܕܠܳܐ ܥܰܡܠܳܐ܇ ܝܳܗܶܒ ܚܰܝ̈ܶܐ܇ ܒܨܰܘܡܳܟ ܨܰܘܡܰܢ ܢܶܬܩܰܒܰܠ܀

 

ܩܳܠܳܐ ܕܪܰܡܫܳܐ ܒܩܳܠܳܐ܇ ܬܪܰܝܗܽܘܢ ܥܳܠܡ̈ܶܐ ܕܺܝܠܳܟ ܡܳܪܝ̱

ܦܐܶܐ ܘܰܪܓܺܝܓ ܨܰܘܡܳܐ ܕܰܟܝܳܐ܇ ܘܣܰܓܺܝ ܪܚܺܝܡ ܥܰܠ ܐܰܠܳܗܳܐ܇ ܬܰܘ ܐܰܚ̈ܰܝ ܢܶܬܟܰܫܰܪ ܒܶܗ܇ ܕܢܶܩܢܶܐ ܒܶܗ ܚܰܝ̈ܶܐ ܚܰܕ̈ܬܶܐ܀

ܬܰܘ ܢܰܣܶܩ ܠܶܗ ܬܶܫܒܽܘܚܬܳܐ ܠܗܰܘ ܕܰܒܪ̈ܰܚܡܰܘܗ̱ܝ ܚܰܪܰܪ ܠܰܢ܇ ܬܰܘ ܢܶܦܪܽܘܥ ܠܶܗ ܬܰܘܕܺܝܬܳܐ܇ ܠܗܰܘ ܕܰܣܚܰܦ ܠܒܺܝܫܳܐ ܘܰܠܚܰܝܠܶܗ܀

 

ܐ̱ܚܪܺܢܳܐ ܒܩܳܠܳܐ ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ

ܗܳܢܰܘ ܨܰܘܡܳܐ ܕܒܶܗ ܟܺܐܢ̈ܶܐ܇ ܫܦܰܪܘ̱ ܘܰܩܢܰܘ ܠܗܽܘܢ ܢܶܨܚ̈ܳܢܶܐ܇ ܨܳܡܘ̱ ܒܢܰܝܢ̈ܳܫܳܐ ܐܰܪ̈ܥܳܢܶܐ ܘܶܐܬܚܰܠܰܛܘ̱ ܒܰܫܡܰܝ̈ܳܢܶܐ܇ ܗܳܢܰܘ ܨܰܘܡܳܐ ܕܒܶܗ ܬܳܟܒܺܝܢ܇ ܚܰܫ̈ܰܝ ܒܶܣܪܳܐ ܐܳܦ ܟܽܠܗܽܘܢ ܛܳܠܩܺܝܢ܀

ܚܠܶܐ ܪܺܝܚܳܐ ܕܨܰܘܡܳܐ ܘܒܰܣܺܝܡ܇ ܬܰܘ ܢܶܩܢܶܐ ܒܶܗ ܢܰܦܫ̈ܳܬܰܢ܇ ܡܳܪܰܢ ܕܨܳܡܶܗ ܘܰܦܪܰܩ ܠܰܢ܇ ܢܨܽܘܡ ܒܶܗ ܚܠܳܦ ܢܰܦܫ̈ܳܬܰܢ܇ ܕܡܶܢ ܓܺܗܰܢܳܐ ܢܶܫܬܰܘܙܰܒ܇ ܘܢܶܫܬܘܶܐ ܕܢܶܥܽܘܠ ܠܰܓܢܽܘܢ ܚܰܕ̈ܘܳܬܳܐ܀

ܩܰܒܶܠ ܨܰܘܡܰܢ ܘܒܳܥܘ̈ܳܬܰܢ܇ ܐܳܦ ܗܳܫܳܐ ܐܰܝܟ ܕܰܡܥܳܕ ܐܰܢ̱ܬ܇ ܟܽܠ ܫܳܥ ܫܦܺܝܥܳܐܗ̱ܝ ܛܰܝܒܽܘܬܳܟ܇ ܥܰܠ ܚܰܛܳܝ̈ܶܐ ܕܩܳܪܶܝܢ ܠܳܟ܇ ܥܢܺܝ ܠܰܢ ܡܳܪܰܢ ܒܰܚܢܳܢܳܟ܇ ܘܚܰܣܳܐ ܚܰܘܒ̈ܰܝܢ ܒܝܰܕ ܪ̈ܰܚܡܶܐ ܕܡܶܢܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܫܰܩܠܶܗ ܪܰܡܫܳܐ ܠܫܽܘܦܪܶܗ ܦܰܐܝܳܐ ܕܗܳܢ ܐܺܝܡܳܡܳܐ܇ ܘܰܐܥܶܠ ܚܰܒܫܶܗ ܘܶܐܚܰܕ ܬܰܪܥܳܐ ܘܣܽܘܟܪ̈ܶܐ ܒܰܐܦܰܘ̈ܗ̱ܝ܇ ܗܳܐ ܐܺܝܡܳܡܳܐ ܗܰܘ ܢܰܗܺܝܪܳܐ ܚܒܺܝܫ ܘܰܡܚܰܦܰܝ܇ ܘܩܳܐܶܡ ܪܰܡܫܳܐ ܥܰܠ ܡܰܛܰܪܬܶܗ ܘܰܡܒܰܙܰܚ ܒܶܗ܀

ܦܺܪܝܡܳܐ ܕܰܟܝܳܐ ܬܶܗܘܶܐ ܨܠܽܘܬܰܢ ܒܥܶܕܳܢ ܪܰܡܫܳܐ܇ ܘܒܶܗ ܬܶܬܪܰܥܶܐ ܐܰܠܳܗܽܘܬܳܟ ܡܳܪܳܐ ܛܳܒܳܐ܇ ܕܰܥܪܰܒ ܫܶܡܫܳܐ ܘܰܐܡܠܶܟ ܚܶܫܟܳܐ ܥܰܠ ܦܶܢܝ̈ܳܬܳܐ܇ ܒܢܽܘܗܪܳܟ ܐܰܢܗܰܪ ܠܠܶܒܰܘ̈ܳܬܰܢ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܥܰܠ ܡܳܢܳܐ ܪܳܚܡܰܬ

ܐܳܘ ܠܶܟܝ̱ ܐܳܘ ܢܰܦܫܝ̱ ܕܳܘܺܝܬܳܐ܇ ܐܰܥܺܝܪ ܝܳܬܶܟܝ̱ ܠܰܨܠܽܘܬܳܐ܇ ܘܩܽܘܡܝ̱ ܘܶܐܬܟܰܫܰܦܝ̱ ܠܕܰܝܳܢܳܐ ܕܠܳܐ ܢܚܰܝܒܶܟܝ̱ ܒܝܰܘܡܳܐ ܕܕܺܝܢܳܐ܇ ܒܝܽܘܡ ܕܺܝܢܳܟ ܪܰܚܶܡܥܠܶܝ܇ ܡܳܪܶܐ ܟܽܠ ܫܽܘܒܚܳܐ܀

ܒܨܰܘܡܳܐ ܚܰܘ̈ܒܶܐ ܡܶܫܬܰܒܩܺܝܢ܇ ܒܨܰܘܡܳܐ ܚܛܳܗ̈ܶܐ ܡܶܬܚܰܣܺܝܢ܇ ܒܨܰܘܡܳܐ ܢܰܦܫܳܐ ܡܶܙܕܰܗܝܳܐ܇ ܘܩܳܢܝܳܐ ܫܽܘܦܪ̈ܶܐ ܪ̈ܽܘܚܳܢܶܐ܇ ܘܓܳܕܠܳܐ ܓܶܦ̈ܶܐ ܠܡܰܠܟܽܘܬܳܐ܇ ܡܳܪܶܐ ܟܽܠ܀

ܓܰܠܝܳܐܺܝܬ ܡܰܟܡܰܪ ܨܰܘܡܳܐ܇ ܟܰܣܝܳܐܺܝܬ ܡܳܪܶܩ ܢܰܦܫܳܐ܇ ܘܠܰܐܝܢܳܐ ܓܶܝܪ ܕܰܩܫܶܐ ܥܰܡܠܶܗ ܡܰܥܬܰܪ ܗܽܘ ܠܶܗ ܒܝܽܘܬܪ̈ܳܢܶܐ܇ ܬܰܘ ܐܰܚ̈ܰܝ ܢܶܬܟܰܫܰܪ ܒܶܗ܇ ܘܢܶܩܢܶܐ ܚܰܝ̈ܶܐ ܪ̈ܽܘܚܳܢܶܐ܀

ܥܰܡ ܨܰܘܡܳܐ ܢܶܪܗܰܛ ܐܰܚ̈ܰܝ܇ ܕܢܶܬܡܰܢܰܥ ܠܦܶܨܚܶܗ ܕܰܒܪܳܐ܇ ܘܰܒܕܰܟܝܽܘܬܳܐ ܢܶܫܬܰܘܬܰܦ ܒܦܰܓܪܳܐ ܘܰܕܡܳܐ ܩܰܕܺܝܫܳܐ܇ ܘܠܳܐ ܢܶܬܛܰܒܰܥ ܒܶܗ ܒܫܶܢܬܳܐ܇ ܥܰܠ ܬܶܫܘܺܝܬܳܐ ܕܰܚܛܺܝܬܳܐ܀

ܥܽܘܠܘ̱ ܨܰܝܳܡ̈ܶܐ ܥܽܘܠܘ̱ ܒܬܰܪܥܶܗ܇ ܕܨܰܘܡܳܐ ܡܙܰܡܶܢ ܠܰܓܢܽܘܢܳܐ܇ ܘܰܒܫܽܘܠܳܡܶܗ ܐܶܬܒܰܣܰܡܘ̱ ܒܫܳܪܽܘܬܳܐ ܕܦܶܨܚܶܗ ܕܰܒܪܳܐ܇ ܕܰܕܒܺܝܚ ܒܶܗ ܬܰܘܪܳܐ ܕܦܶܛܡܳܐ܇ ܘܰܐܓܳܢܳܐ ܕܚܰܡܪܳܐ ܡܙܺܝܓܳܐ܀

 

ܩܳܠܳܐ ܕܠܺܠܝܳܐ ܩܳܠܳܐ ܐܺܝܢ ܣܳܗ̈ܕܶܐ ܡܶܛܽܠ ܡܳܢܳܐ

ܗܰܘ ܬܰܠܡܺܝܕܳܐ ܕܰܒܳܟܳܐ ܗܘܳܐ ܗܽܘ ܡܰܠܶܦ ܠܳܟ܇ ܡܽܘܢ ܬܶܥܒܶܕ ܐܳܘ ܚܰܛܳܝܳܐ ܐܶܢܗܽܘ ܕܬܳܐܶܒ ܐܰܢ̱ܬ܇ ܟܰܕ ܐܶܫܬܰܥܒܰܕ ܠܰܟܦܽܘܪܝܳܐ ܒܡܶܠܟܳܗܿ ܕܒܺܝܫܳܐ܇ ܒܳܟܳܐ ܒܰܚܢܰܓܬܳܐ ܘܶܐܬܚܰܣܺܝ ܒܕܶܡܥ̈ܶܐ ܕܒܳܒ̈ܳܬܶܐ܇ ܗ ܘ ܗ ܡܫܺܝܚܳܐ ܕܩܰܒܶܠ ܒܳܥܽܘܬܶܗ ܕܫܶܡܥܽܘܢ ܚܽܘܣ ܥܠܰܝܢ܀

ܣܥܽܘܪ ܡܚܺܝܠܽܘܬܰܢ ܒܰܚܢܳܢܳܟ ܡܳܪܳܐ ܛܳܒܳܐ܇ ܕܰܢܚܶܬ ܗܘܳܐ ܠܘܳܬ ܬܰܚܬܳܝ̈ܶܐ܇ ܕܢܰܚܠܶܡ ܚܰܒܪ̈ܳܬܗܽܘܢ܇ ܢܗܶܐ ܠܺܝ ܙܩܺܝܦܳܟ ܝܶܫܽܘܥ ܡܳܪܝ̱ ܐܽܘܪܚܳܐ ܕܚܰܝ̈ܶܐ܇ ܘܰܐܬܩܶܢ ܗܰܠ̈ܟܳܬܝ̱ ܒܰܫܒܺܝܠܰܝ̈ܟ ܘܦܰܨܳܢܝ̱ ܡܶܢ ܒܺܝܫܳܐ܇ ܗ ܘ ܗ ܘܰܐܫܘܳܢܝ̱ ܕܶܐܙܡܰܪ ܠܳܟ ܫܽܘܒܚܳܐ ܒܠܺܠܝܳܐ ܘܒܺܐܝܡܳܡܳܐ܀

 

ܡܰܕܪܳܫܳܐ ܒܩܳܠܳܐ ܐܰܚ̈ܰܝ ܒܰܟ̈ܬܳܒܶܐ ܥܽܘܢܺܝܬܳܐ ܒܪܺܝܟ ܒܽܘܟܪܳܐ ܕܝܰܗܒܠܰܢ܇ ܨܰܘܡܳܐ ܚܠܳܦ ܙܰܝܢܳܐ

ܐܰܛܥܺܝ ܗܘܳܐ ܚܶܘܝܳܐ܇ ܠܚܰܘܳܐ ܒܦܰܪܕܰܝܣܳܐ܇ ܘܦܺܐܪܳܐ ܩܶܛܦܰܬ݀ ܗܘܳܬ݀܇ ܘܶܐܟܠܰܬ݀ ܘܝܶܗܒܰܬ݀ ܠܳܐܕܳܡ܇ ܐܶܫܬܠܰܚ ܡܶܢܗܽܘܢ ܐܶܣܛܰܠ ܬܶܫܒܽܘܚܬܳܐ ܨܳܡ ܗܘܳܐ ܒܽܘܟܪܳܐ ܘܦܰܪܥܳܗܿ܇ ܠܚܰܘܒܬܳܐ܇ ܕܚܰܝ̈ܳܒܶܐ ܘܩܰܕܕܶܗ ܠܶܐ̱ܫܛܳܪܗܽܘܢ܀

ܓܰܪܓܶܗ ܡܳܪܽܘܕܳܐ܇ ܠܦܳܪܶܩ ܒܶܪ̈ܝܳܬܳܐ܇ ܘܣܰܚܦܶܗ ܘܰܐܗܶܠ ܒܶܗ܇ ܘܥܰܒܕܶܗ ܕܝܳܫܳܐ ܠܨܰܝ̈ܳܡܶܐ܇ ܘܰܐܣܩܶܗ ܥܰܠ ܟܰܢܦܳܐ܇ ܕܗܰܝܟܠܳܐ ܕܰܢܢܰܣܺܝܘܗ̱ܝ܇ ܘܶܐܡܰܪ ܠܶܗ ܕܶܐܢܗܽܘ ܕܬܶܦܶܠ ܘܠܺܝ ܬܶܣܓܽܘܕ܇ ܫܽܘܠܛܳܢܝ̱ ܠܳܟ ܐܶܬܶܠ܀

ܗܳܐ ܟܬܺܝܒ ܒܰܣܦܰܪ ܐܳܫܺܝܪ܇ ܐܳܡܰܪ ܡܳܪܽܘܕܳܐ܇ ܕܡܰܠܰܐܟܰܘ̈ܗ̱ܝ ܦܰܩܶܕ܇ ܕܥܰܠ ܕܪ̈ܳܥܰܝܗܽܘܢ ܢܶܫܩܠܽܘܢܳܟ ܒܶܐܒܪ̈ܰܘܗ̱ܝ ܡܦܰܨܶܐ ܠܳܟ܇ ܒܳܟܶܢܦܰܘ̈ܗ̱ܝ ܡܣܰܬܰܪ ܠܳܟ܇ ܕܪܶܓܠܳܟ ܠܳܐ ܬܶܬܩܶܠ܇ ܒܳܟܺܐܦܳܐ ܘܠܳܐ ܬܰܗܰܪ܇ ܒܪܺܝܟ ܕܣܰܚܦܶܗ ܠܚܰܝܠܶܗ܀

ܙܰܝܢܳܐ ܥܰܬܶܕ ܗܘܳܐ܇ ܒܺܝܫܳܐ ܠܽܘܩܒܰܠ ܡܳܪܶܗ ܘܰܣܕܰܪ ܘܰܐܩܪܶܒ ܗܘܳܐ ܓܶܠܳܐ ܥܰܡ ܓܰܘܙܰܠܬܳܐ ܇ ܘܶܐܬܪܕܺܝ ܐܰܝܟ ܥܽܘܪܳܐ܇ ܕܦܳܪܰܚ ܡܶܢܩܕܳܡ ܪܽܘܚܳܐ ܕܰܡܚܳܝܗ̱ܝ ܪܺܝܚ ܨܰܘܡܶܗ܇ ܕܰܒܪܳܐ ܕܶܐܬܡܰܟܰܟ܇ ܕܠܳܐܕܳܡ ܢܶܦܪܽܘܩ ܗܘܳܐ܀

ܛܳܒ ܥܰܙܺܝܙܳܐ ܗܘܳܬ݀܇ ܢܽܘܪܳܐ ܕܰܐܬܽܘܢܳܐ܇ ܘܫܰܒܪ̈ܶܐ ܨܰܝ̈ܳܡܶܐ܇ ܢܚܶܬܰܘ̱ ܠܶܗ ܠܒܺܝܒܳܐܺܝܬ ܠܢܰܒܪܰܫܬܳܐ ܕܚܺܝܠܬܳܐ܇ ܘܟܳܦܰܬ݀ ܗܘܳܬ݀ ܨܰܘܪܳܗܿ܇ ܘܣܶܓܕܰܬ݀ ܩܕܳܡ ܫܰܒܪ̈ܶܐ ܐܰܝܟ ܥܰܒܕܳܐ ܠܡܳܪܶܗ ܕܪܺܝܚ ܨܰܘܡܳܐ ܫܰܘܝܳܗܿ܀

ܟܺܐܢ̈ܶܐ ܒܝܰܕ ܨܰܘܡܳܐ ܕܕܰܟܝܽܘܬܳܐ܇ ܡܶܢܰܨܰܚ ܠܳܐܚܽܘܕܰܘ̈ܗ̱ܝ܇ ܢܨܽܘܡ ܐܰܚ̈ܰܝ ܘܢܶܦܫܽܘܛ ܐܺܝܕ̈ܰܝܢ ܠܙܶܕܩ̈ܳܬܳܐ܇ ܘܕܶܡܥ̈ܶܐ ܒܰܚܢܰܓܬܳܐ܇ ܢܰܫܦܰܥ ܥܰܠ ܚܰܘܒ̈ܰܝܢ ܕܢܶܥܢܶܝܢ ܚܳܐܶܢ ܟܽܠ܀

ܡܳܪܰܢ ܨܳܡ ܘܦܰܪܥܳܗܿ܇ ܠܚܰܘܒܬܳܐ ܕܥܰܒܕܶܗ ܕܰܐܣܟܶܠ܇ ܡܳܪܳܐ ܚܠܳܦ ܥܰܒܕܶܗ܇ ܨܰܘܡܳܐ ܠܒܰܟ ܗܘܳܐ ܒܦܽܘܪܫܳܢܳܐ܇ ܥܰܒܕܳܐ ܐܰܣܟܶܠ ܗܘܳܐ܇ ܘܡܳܪܳܐ ܢܚܶܬ ܟܬܰܒ ܠܶܗ܇ ܕܺܝܰܬܺܝܩܺܝ ܚܕܰܬܳܐ܇ ܘܦܰܪܥܳܗܿ ܠܣܰܟܠܽܘܬܶܗ܇ ܘܩܰܕܕܶܗ ܠܶܐ̱ܫܛܳܪܶܗ܀

ܣܡܳܟܰܐܗ̱ܘ ܕܠܳܐ ܦܳܛܰܪ܇ ܨܰܘܡܳܐ ܠܦܳܪ̈ܽܘܫܶܐ܇ ܘܫܽܘܪܰܐܗ̱ܘ ܕܠܳܐ ܡܶܬܚܣܶܢ ܡܶܢ ܒܺܝܫܳܐ ܘܚܰܝܠܶܗ܇ ܨܰܘܡܳܐ ܡܰܒܽܘܥܰܐܗ̱ܘ ܕܓܳܣܶܐ ܛܳܒ̈ܳܬܳܐ܇ ܘܰܡܥܺܝܢ ܥܽܘܕܪ̈ܳܢܶܐ܇ ܘܝܳܗܶܒ ܚܽܘܠܡܳܢ̈ܶܐ܇ ܠܟܢܶܫܳܐ ܕܨܰܝ̈ܳܡܶܐ܀

ܦܳܚ ܗܘܳܐ ܪܺܝܚ ܨܰܘܡܶܗ܇ ܕܒܽܘܟܪܳܐ ܘܣܳܩܽܘܪ̈ܰܘܗ̱ܝ ܟܺܐܢ̈ܶܐ܇ ܘܒܶܗ ܗܽܘ ܐܶܬܟܰܬܰܫܘ̱܇ ܘܰܙܟܰܘ ܒܨܰܘܡܰܝ̈ܗܽܘܢ܇ ܒܨܰܘܡܶܗ ܕܕܳܢܺܝܐܶܝܠ܇ ܒܠܰܡ ܦܽܘܡ ܚܰܝܘ̈ܳܬܳܐ܇ ܘܰܕܒܶܝܬ ܚܰܢܰܢܝܳܐ܇ ܘܕܰܥܶܟܘ̱ ܓܰܘܙܰܠܬܳܐ܇ ܘܰܐܒܗܶܬܘ̱ ܠܒܳܒܠܳܝ̈ܶܐ܀

ܩܽܘܡܘ̱ ܦܠܽܘܚܘ̱ ܨܰܝ̈ܳܡܶܐ܇ ܥܰܡ ܨܰܘܡܳܐ ܡܳܪܶܐ ܐܰܓܪܳܐ܇ ܕܰܠܚܰܪܬܳܐ ܝܳܗܶܒ܇ ܟܠܺܝܠܳܐ ܠܦܰܠܳܚܰܘ̈ܗ̱ܝ܇ ܢܰܛܪܺܝܘܗ̱ܝ ܒܕܰܟܝܽܘܬܳܐ܇ ܐܰܝܟ ܕܰܢܒܺܝܳܐ ܐܰܙܥܶܩ܇ ܠܚܰܪܬܳܐ ܒܝܽܘܡ ܦܶܨܚܶܗ܇ ܚܳܕܶܝܢ ܥܰܡ ܒܽܘܟܪܳܐ܇ ܘܡܶܬܒܰܣܡܺܝܢ ܥܰܡܶܗ܀

ܫܽܘܒܚܳܐ ܠܗܰܘ ܪܳܡܳܐ܇ ܕܰܢܚܶܬ ܘܰܗܘܳܐ ܡܶܢܰܢ܇ ܘܰܒܦܰܓܪܳܐ ܕܰܫܩܰܠ܇ ܨܳܡ ܘܰܣܒܰܠ ܚܰܫ̈ܶܐ܇ ܘܰܒܝܰܕ ܦܶܨܚܶܗ ܘܡܰܘܬܶܗ܇ ܦܰܪܩܰܢ ܡܶܢ ܛܽܘܥܝܰܝ܇ ܒܪܺܝܟ ܡܶܢܟܽܠ ܨܰܘܡܶܗ܇ ܕܡܳܪܝܳܐ ܡܶܢܰܨܰܚ ܥܰܒ̈ܕܰܘܗ̱ܝ ܫܽܘܒܚܳܐ ܠܫܳܠܽܘܚܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܩܰܕܡܿܶܬ ܩܳܡܿܶܬ ܟܰܕ ܚܳܐܰܪ ܐ̱ܢܳܐ ܒܰܒܢܰܝ̈ܢܳܫܳܐ܇ ܕܰܐܝܟ ܥܳܡܽܘܪ̈ܶܐ ܠܳܐܶܝܢ ܒܥܳܠܡܳܐ ܟܰܕ ܥܳܒܽܘܪܰܐܗ̱ܘ܇ ܗܳܢܳܐ ܫܳܩܶܠ ܗܳܢܳܐ ܝܳܗܶܒ ܗܳܢܳܐ ܝܳܙܶܦ܇ ܗܳܢܳܐ ܡܰܘܙܶܦ ܗܳܢܳܐ ܚܳܕܶܐ ܘܰܐ̱ܚܪܺܝܢ ܒܳܟܶܐ܀

ܢܰܣܶܩ ܠܳܟ ܡܳܪܝ̱ ܫܽܘܒܚܳܐ ܦܰܐܝܳܐ ܡܶܢ ܒܶܪ̈ܝܳܬܳܟ܇ ܕܪܶܡܙܳܟ ܣܳܦܶܩ ܕܢܶܛܥܰܢ ܝܽܘܩܪܳܐ ܘܥܰܘܠܳܐ ܕܺܝܠܗܶܝܢ܇ ܡܳܠܶܝܢ ܡܶܢ ܥܰܘܠܳܐ ܩܽܘܪ̈ܝܳܐ ܘܟܰܪ̈ܟܶܐ ܘܰܡܕܺܝܢ̈ܳܬܳܐ܇ ܘܰܐܝܟ ܠܰܗܓܰܐܗ̱ܘ ܠܳܟ ܘܠܳܐ ܪܳܓܶܙ ܐܰܢ̱ܬ ܘܠܳܟ ܬܶܫܒܽܘܚܬܳܐ܀

 

ܕܨܰܦܪܳܐ ܕܰܬܠܳܬܳܐ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܐܶܡܳܐ ܕܟܺܝܬܳܐ

ܡܳܪܝܳܐ ܕܡܰܕܢܰܚ ܥܰܠ ܒܺܝܫ̈ܶܐ ܫܶܡܫܶܗ܇ ܐܰܢܗܰܪ ܪܶܥܝܳܢܝ̱ ܥܰܡܽܘܛܳܐ ܒܢܽܘܗܪܳܟ܇ ܪܳܚܶܡ܀

ܕܠܳܐ ܣܳܦܩܺܝܢܰܢ ܕܢܰܘܕܶܐ ܠܛܰܝܒܽܘܬܳܟ܇ ܚܽܘܢ ܠܒܺܝܫܽܘܬܰܢ ܒܪ̈ܰܚܡܰܝܟ ܘܒܰܚܢܳܢܳܟ ܪܳܚܶܡ܀

ܠܳܐ ܫܳܘܶܐ ܐ̱ܢܳܐ܇ ܠܰܓܢܽܘܢܳܐ ܕܢܽܘܗܪܳܐ܇ ܒܪ̈ܰܚܡܰܝܟ ܦܰܨܳܢܝ̱܇ ܡܶܢ ܢܽܘܪܳܐ ܕܝܳܩܕܳܐ ܪܰܚܶܡ܀

ܠܳܐ ܢܶܛܡܽܘܪ ܒܰܢ ܒܺܝܫܳܐ ܣܰܢܝ̈ܳܬܶܗ܇ ܘܠܳܐ ܢܫܰܡܠܶܐ ܒܰܢ ܪܶܓܰܬ ܨܶܒܝܳܢܶܗ ܪܰܚܶܡ܀

ܠܰܘ ܡܶܢ ܠܰܚܡܳܐ܇ ܢܨܽܘܡ ܚܰܒܺܝ̈ܒܰܝ܇ ܐܶܠܳܐ ܡܶܢܟܽܠ ܚܶܡܬܳܐ ܘܚܶܪܝܳܢܳܐ ܪܰܚܶܡ܀

ܥܰܡܡ̈ܶܐ ܕܶܐܬܦܪܶܩܘ̱܇ ܒܝܰܕ ܨܰܘܡܶܗ ܕܒܽܘܟܪܳܐ܇ ܝܰܩܰܪܘ̱ ܨܰܘܡܶܗ ܥܰܠ ܕܰܚܠܳܦܰܝܢ ܨܳܡ ܪܰܚܶܡܥܠܰܝ ܐܰܠܳܗܳܐ܀

 

ܐܰܠܳܗܝ̱ ܐܰܠܳܗܝ̱ ܩܳܠܳܐ ܐܰܢ̱ܬ ܕܰܒܪܺܝܫܺܝܬ

ܐܰܢ̱ܬ ܕܰܒܨܰܘܡܳܐ܇ ܠܰܚܢܽܘܢܟ ܫܰܢܺܝܬ ܠܰܫܡܰܝܳܐ܇ ܚܰܒܪܳܐ ܘܰܐܚܳܐ܇ ܥܒܰܕܬܳܝܗ̱ܝ ܠܥܺܝܪ̈ܶܐ ܘܡܰܠܰܐܟ̈ܶܐ܇ ܡܒܰܪܟܳܐ܀

ܫܰܦܶܠ ܡܳܪܰܢ܇ ܚܰܝܠܶܗ ܕܒܺܝܫܳܐ ܒܥܶܠܕܰܪܳܐ܇ ܗܰܒ ܠܰܢ ܕܰܢܨܽܘܡ܇ ܨܰܘܡܳܐ ܕܫܳܦܰܪ ܠܺܐܝܩܳܪܳܟ܀

 

ܐ̱ܚܪܺܢܳܐ܇ ܒܬܽܘܠܬܳܐ ܝܳܠܕܰܬ ܕܽܘܡܳܪܳܐ

ܠܡܺܐܢܰܐܗ̱ܘ ܨܰܘܡܳܐ ܠܟܰܫܺܝܪ̈ܶܐ܇ ܘܰܐܝܠܶܝܢ ܕܰܕܟܶܝܢ ܒܠܶܒܗܽܘܢ ܕܒܶܗ ܚܳܙܶܝܢ ܠܡܳܪܝܳܐ܇ ܒܶܗ ܐܶܬܟܰܫܰܪܘ̱ ܙܰܕܺܝ̈ܩܶܐ܇ ܘܰܫܦܰܪܘ̱ ܘܰܩܢܰܘ ܢܶܨܚ̈ܳܢܶܐ܇ ܡܳܪܝܳܐ ܕܰܢܨܰܚ ܥܰܒܕ̈ܰܘܗ̱ܝ܇ ܒܰܨܠܽܘܬܗܽܘܢ ܚܽܘܢ ܠܚܰܛܳܝ̈ܶܐ܀

ܣܳܡ ܒܰܢ ܝܶܫܽܘܥ ܒܰܪ ܡܰܠܟܳܐ܇ ܐܳܬܳܐ ܕܬܶܕܡܽܘܪܬܳܐ ܕܒܶܗ ܢܫܰܦܠܺܝܘܗ̱ܝ ܠܒܺܝܫܳܐ܇ ܕܡܳܐ ܕܚܳܙܶܐ ܠܳܗܿ ܒܰܢ ܒܺܝܫܳܐ܇ ܒܳܗܶܬ ܘܳܐܒܶܕ ܘܡܶܬܛܰܠܰܩ܇ ܕܦܰܓܪܶܗ ܚܰܝܳܐ ܝܰܗܒ ܠܰܢ܇ ܘܒܰܕܡܶܗ ܩܰܕܺܝܫܳܐ ܦܰܪܩܰܢ܀

ܦܽܘܡܰܢ ܢܨܽܘܡ ܡܶܢ ܠܰܚܡܳܐ܇ ܘܳܐܦ ܠܶܒܰܢ ܡܶܢܟܽܠ ܒܺܝܫ̈ܳܬܳܐ ܢܕܰܟܶܐ܇ ܘܢܰܘܫܶܛ ܐܺܝܕ̈ܰܝܢ ܠܰܣܢܺܝ̈ܩܶܐ܇ ܕܢܶܬܬܢܺܝܚ ܡܳܪܝܳܐ ܒܝܰܕ ܨܰܘܡܰܢ܇ ܘܢܰܫܦܰܥ ܥܠܰܝܢ ܪ̈ܰܚܡܰܘܗ̱ܝ܇ ܘܢܶܦܪܽܘܩ ܠܰܢ ܡܶܢ ܢܶܟܝ̈ܳܢܺܝܢ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܠܳܟ ܕܰܐܨܡܰܚܬ ܢܽܘܗܪܳܟ

ܠܳܟ ܕܰܐܣܡܰܚܬ ܢܽܘܗܪܳܟ ܒܬܺܐܒܶܝܠ܇ ܘܰܐܢܗܰܪܬ ܠܥܳܠܡܳܐ ܡܶܢ ܣܳܟܶܗ܇ ܘܚܰܘܺܝܬ ܒܰܐܪܥܳܐ ܐܺܝܡܳܡܳܐ܇ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܝܶܫܽܘܥ ܡܶܠܬܳܐ ܒܪܳܐ ܝܺܚܺܝܕܳܝܳܐ܀

ܒܢܽܘܗܪܳܐ ܕܺܝܕܰܥܬܳܐ ܕܺܝܠܳܟ܇ ܠܥܰܝ̈ܢܶܐ ܟܰܣܝ̈ܳܬܳܐ ܕܺܝܠܰܢ܇ ܐܰܢܗܰܪ ܕܢܶܩܥܶܐ ܠܳܟ ܒܬܰܘܕܺܝܬܳܐ܇ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܒܪܳܐ ܝܺܚܺܝܕܳܝܳܐ܀

 

ܐ̱ܚܪܺܢܳܐ܇ ܒܢ̈ܰܝ ܢܽܘܗܪܳܐ

ܐܰܠܳܗܳܐ ܕܰܦܬܺܝܚ ܬܰܪܥܶܗ܇ ܠܚܰܛܳܝܬܳܐ ܘܥܶܠܰܬ݀ ܨܶܝܕܰܘܗ̱ܝ܇ ܦܬܰܚ ܠܺܝ ܬܰܪܥܳܟ܇ ܕܶܐܥܽܘܠ ܘܰܐܘܕܶܐ  ܠܳܟ ܡܳܪܝܳܐ܀

ܪܰܚܶܡܥܠܰܝ ܐܰܠܳܗܳܐ܇ ܘܰܫܒܽܘܩ ܟܽܠܗܶܝܢ ܣܰܟܠܘ̈ܳܬܝ̱܇ ܒܣܽܘܓܐܳܐ ܕܪ̈ܰܚܡܰܝܟ ܘܰܕܒܰܣܺܝܡܽܘܬܳܟ܀

ܩܰܒܶܠ ܡܳܪܰܢ ܬܶܫܡܶܫܬܰܢ܇ ܘܦܰܢܳܐ ܒܪ̈ܰܚܡܰܝܟ ܫܳܐܠ̈ܳܬܰܢ܇ ܘܰܠܚܺܝ ܚܛܳܗ̈ܝܰܢ ܒܰܡܪܰܚܡܳܢܽܘܬܳܟ܀

ܫܽܘܒܚܳܐ ܚܰܕܬܳܐ ܡܰܣܩܺܝܢܰܢ܇ ܘܩ̈ܳܠܶܐ ܕܩܽܘܒܳܠܛܰܝܒܽܘܬܳܐ܇ ܠܰܫܡܳܟ ܣܓܺܝܕܳܐ܇ ܐܳܘ ܡܶܠܬܶܗ ܕܰܐܒܳܐ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܠܶܟܝ̱ ܢܶܬܟܰܫܰܦ

ܒܥܳܢܘܳܝܽܘܬܳܐ ܘܰܢܙܺܝܪܽܘܬܳܐ ܫܰܪܺܝܪܬܳܐ ܘܨܰܘܡܳܐ ܕܰܟܝܳܐ܇ ܐܰܫܘܳܐ ܠܟܽܠܰܢ܇ ܕܢܶܫܦܰܪ ܠܳܟ ܩܰܕܺܝܫܳܐܺܝܬ܇ ܡܰܠܟܳܐ ܡܫܺܝܚܳܐ܇ ܘܒܰܬܰܘܳܬ ܢܰܦܫܳܐ ܘܚܰܫܳܐ ܢܪܰܥܶܐ ܠܒܰܣܺܝܡܽܘܬܳܟ܇ ܡܳܪܰܢ ܡܠܶܐ ܪ̈ܰܚܡܶܐ܀

ܦܐܶܐ ܗܘܳܐ ܘܰܪܓܺܝܓ܇ ܨܰܘܡܳܐ ܕܰܟܝܳܐ ܕܨܳܡܘ̱ ܟܺܐܢ̈ܶܐ ܘܶܐܬܢܰܨܰܚܘ̱ ܒܶܗ܇ ܘܒܶܗ ܐܶܙܕܰܗܺܝ܇ ܐܺܠܺܝܳܐ ܘܰܒܡܰܪܟܰܒܬܳܐ ܣܠܶܩ ܠܰܫܡܰܝܳܐ܇ ܘܒܶܗ ܐܺܫܬܰܘܺܝ ܒܰܪ ܥܰܡܪܰܡ܇ ܕܢܶܙܕܰܗܶܐ܇ ܦܰܪܨܽܘܦܶܗ܇ ܒܥܶܢܝܳܢ ܒܳܪܽܘܝܶܗ܀

ܐܰܘܕܳܝ ܥܺܕܬܳܐ܇ ܠܒܰܪ ܐܰܠܳܗܳܐ ܕܰܒܨܰܘܡܶܗ ܐܰܠܶܦ ܝܰܠܕܰܝ̈ܟܝ̱܇ ܐܽܘܪܚܳܐ ܕܩܽܘܫܳܬܐ܇ ܕܢܶܙܟܽܘܢܳܗ̱ܝ ܠܳܐܟܶܠܩܰܪܨܳܐ ܘܰܢܚܰܝܒܽܘܢܳܗ̱ܝ܇ ܘܗܳܐ ܒܣܺܝܪܳܐ ܝܥܢܽܘܬܳܐ܇ ܕܩܰܛܶܠܬܶܗ ܠܰܐܒܽܘܢ ܐܳܕܳܡ܇ ܒܪܶܓܬܳܐ ܕܺܐܝܠܳܢܳܐ܀

ܒܪܺܝܟ ܗܽܘ ܡܫܺܝܚܳܐ܇ ܕܬܰܚܬܺܝ ܪܰܘܡܳܐ ܕܪܰܒܽܘܬܶܗ ܡܶܛܽܠܳܬܰܢ ܘܨܳܡ ܗܘܳܐ ܐܰܪܒܥܺܝܢ܇ ܒܓܰܘ ܕܰܒܪܳܐ ܐܰܝܟ ܒܰܪܢܳܫܳܐ ܗܰܘ ܠܳܐ ܣܢܺܝܩܳܐ܇ ܫܽܘܒܚܶܐ ܠܶܗ ܕܰܒܨܰܘܡܶܗ܇ ܘܚܰܝܒܶܗ ܠܳܐܟܶܠܩܰܪܨܳܐ ܕܰܙܟܳܐ ܠܪܺܝܫ ܓܶܢܣܰܢ܀

ܫܽܘܒܚܳܐ ܠܛܳܒܳܐ܇ ܕܫܰܠܚܽܘܗ̱ܝ ܪ̈ܰܚܡܰܘܗ̱ܝ ܨܶܝܕ ܓܶܢܣܳܐ ܕܰܒܢܰܝ̈ܢܳܫܳܐ܇ ܘܩܰܒܶܠ ܥܠܰܘܗ̱ܝ܇ ܡܽܘܟܳܟܐ ܘܨܰܘܡܳܐ ܕܰܟܝܳܐ ܡܶܛܽܠܳܬܰܢ ܘܚܰܝܒܶܗ ܗܘܳܐ ܠܰܢܟܺܝܠܳܐ܇ ܘܚܰܪܰܪ ܠܰܢ ܡܶܢ ܢܺܝܪܶܗ܇ ܘܰܐܳܘܪܶܬ ܠܰܢ ܡܰܠܟܽܘܬܳܐ܀

 

ܩܳܠܳܐ ܕܨܰܦܪܳܐ

ܩܳܠܳܐ ܒܥܶܕܳܢܶܗ ܕܨܰܦܪܳܐ ܡܶܬܣܺܝܡܺܝܢ

ܒܨܰܘܡܶܗ ܕܦܳܪܽܘܩܰܢ܇ ܒܺܝܫܳܐ ܐܶܫܬܰܦܰܠ ܕܰܐܛܥܺܝ ܗܘܳܐ ܒܳܐܕܳܡ܇ ܘܡܰܟܟܶܗ ܒܝܰܕ ܦܺܐܪܳܐ܇ ܘܒܰܣܪܶܗ ܦܳܪܽܘܩܰܢ܇ ܒܨܰܘܡܶܗ ܠܝܰܥܢܽܘܬܳܐ܇ ܕܫܶܦܠܰܬ݀ ܠܪܺܝܫ ܛܽܘܗܡܰܢ ܘܰܐܡܠܶܟ ܥܠܰܘܗ̱ܝ ܡܰܘܬܳܐ ܗ ܘ ܗ ܡܰܠܟܳܐ ܫܡܰܝܳܢܳܐ ܚܽܘܣ ܘܶܐܬܪܰܚܰܡܥܠܰܝܢ܀

ܢܶܒܥܶܐ ܚܰܒܺܝ̈ܒܰܝ܇ ܠܡܳܪܰܢ ܫܽܘܒܩܳܢܳܐ܇ ܘܢܶܫܰܐܠ ܡܶܢ ܗܳܪܟܳܐ܇ ܪ̈ܰܚܡܶܐ ܘܰܚܢܳܢܳܐ܇ ܥܰܕ ܐܺܝܬ ܠܰܢ ܐܰܬܪܳܐ܇ ܢܶܒܥܶܐ ܡܰܠܟܽܘܬܳܐ ܘܢܶܓܥܶܐ ܠܘܳܬ ܡܳܪܰܢ ܕܚܽܘܣ ܘܶܐܬܪܰܚܰܡܥܠܰܝܢ ܗ ܘ ܗ ܕܰܝܳܢܳܐ ܟܺܐܢܳܐ ܚܽܘܣ ܘܶܐܬܪܰܚܰܡܥܠܰܝܢ܀

ܢܶܗܘܶܐ ܠܳܟ ܡܳܪܰܢ܇ ܚܰܝܠܳܐ ܕܰܨܠܽܘܬܰܢ܇ ܩܠܺܝܕܳܐ ܠܒܶܝܬ ܓܰܙܳܟ ܘܢܺܐܬܽܘܢ ܠܰܢ ܪ̈ܰܚܡܰܝܟ܇ ܘܦܽܘܡܰܢ ܢܶܗܘܶܐ ܠܳܟ܇ ܦܺܝܪܡܳܐ ܕܬܰܪܥܽܘܬܳܐ܇ ܘܨܰܘܡܳܐ ܢܶܫܦܰܪ ܠܳܟ܇ ܘܚܰܣܳܐ ܠܰܢ ܚܰܘܒ̈ܰܝܢ܇ ܗ ܘ ܗ ܪܳܚܶܡ ܬܰܝ̈ܳܒܶܐ ܚܽܘܣ ܘܶܐܬܪܰܚܰܡܥܠܰܝܢ܀

 

ܐ̱ܚܪܺܢܳܐ ܩܳܠܳܐ ܒܥܶܕܳܢ ܨܰܦܪܳܐ ܡܶܬܦܰܬܚܺܝܢ

ܒܕܶܡܥ̈ܶܐ ܕܩܶܪܒܰܬ݀ ܚܰܛܳܝܬܳܐ܇ ܐܶܫܛܳܪ ܚܰܘܒ̈ܳܬܳܗܿ ܬܰܠܚܰܬ݀܇ ܗܳܠܶܝܢ ܣܰܒ ܠܳܟ ܚܰܛܳܝܳܐ܇ ܘܰܓܥܺܝ ܒܚܰܫܳܐ ܠܘܳܬ ܡܳܪܳܟ܇ ܕܗܽܘ ܒܰܥܓܰܠ ܫܳܒܶܩ ܚܰܘܒܰܝ̈ܟ܇ ܘܰܡܚܰܣܶܐ ܠܳܟ ܒܽܘܨܳܪ̈ܰܝܟ܀

ܦܬܰܚ ܬܰܪܥܶܗ ܠܬܰܝ̈ܳܒܶܐ܇ ܦܬܰܚ ܠܺܝ ܬܰܪܥܳܟ ܡܠܶܐ ܪ̈ܰܚܡܶܐ܇ ܕܶܐܥܽܘܠ ܒܶܗ ܘܶܐܒܥܶܐ ܡܶܢܳܟ܇ ܕܰܥܫܶܢܘ̱ ܚܰܘܒ̈ܰܝ ܝܳܕܰܥ ܐ̱ܢܳܐ ܡܚܰܣܝܳܢܳܐ ܗܘܺܝ ܠܺܝ ܡܳܪܝܳܐ܇ ܕܰܐܘܕܶܐ ܠܳܟ ܥܰܠ ܛܰܝܒܽܘܬܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܡܳܐ ܢܰܗܺܝܪ ܐܰܢ̱ܬ ܒܰܪ ܐܰܠܳܗܳܐ ܟܡܳܐ ܢܰܗܺܝܪ ܐܰܢ̱ܬ܇ ܘܰܚܠܶܐ ܕܶܢܚܳܟ ܛܳܒ ܡܶܢ ܨܰܦܪܳܐ ܠܰܕܪܳܚܶܡ ܠܳܟ܇ ܐܰܢ̱ܬ ܗܽܘ ܢܽܘܗܪܳܐ ܕܰܠܛ̈ܶܠܳܠܶܐ ܟܡܺܝܪ̈ܶܐ ܕܰܫܝܽܘܠ܇ ܢܳܗܪܺܝܢ ܡܶܢܳܟ ܕܳܐܦ ܨܶܝܕ ܡܺܝ̈ܬܶܐ ܠܬܰܚܬ ܕܳܢܰܚ ܐܰܢ̱ܬ܀

ܒܪܳܐ ܢܰܗܺܝܪܳܐ ܐܰܠܦܶܗ ܠܥܳܠܡܳܐ ܕܠܳܐ ܝܳܕܰܥ ܗܘܳܐ܇ ܢܙܺܝܥ ܬܶܫܒܽܘܚܬܳܐ ܒܟܽܠܗܽܘܢ ܨܰܦܪ̈ܶܐ ܠܰܐܠܳܗܽܘܬܳܟ܇ ܝܶܠܦܰܬ݀ ܐܰܪܥܳܐ ܕܰܠܒܳܪܽܘܝܶܗ ܕܨܰܦܪܳܐ ܬܶܙܡܰܪܝ̱ ܒܟܽܠܗܽܘܢ ܫܽܘܒܚ̈ܶܐ ܒܦܽܘ̈ܡܶܐ ܦܪ̈ܺܝܫܶܐ ܒܩ̈ܳܠܶܐ ܢܝܰܒܒܽܘܢ܀

ܣܓܺܝܕ ܘܰܡܫܰܒܰܚ ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ܇ ܡܶܢ ܐܰܪ̈ܥܳܢܶܐ ܘܰܫܡܰܝ̈ܳܢܶܐ ܘܟܽܠ ܒܶܪ̈ܝܳܬܳܐ܇ ܡܳܪܳܐ ܕܛܰܟܶܣ ܪܰܘܡܳܐ ܘܥܽܘܡܩܳܐ ܘܟܽܠ ܡܳܐ ܕܰܒܗܽܘܢ܇ ܐܰܢ̱ܬ ܐܰܢܗܰܪ ܠܰܢ ܒܢܽܘܗܪܳܟ ܓܰܐܝܳܐ ܘܠܳܟ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ

ܒܩܳܠܳܐ ܩܽܘܩܳܝܳܐ

ܛܽܘܒܰܘܗ̱ܝ ܠܰܐܝܢܳܐ ܕܚܰܢܬܳܝܗ̱ܝ ܡܳܪܝ̱ ܐܰܝܟ ܓܰܝܳܣܳܐ܇ ܕܒܰܚܕܳܐ ܫܳܥܳܐ ܕܗܰܝܡܶܢ ܒܳܟ ܡܰܠܟܽܘܬܳܐ ܝܺܪܶܬ܇ ܗܘܺܝ ܠܰܢ ܡܳܪܰܢ ܐܽܘܪܚܳܐ ܘܒܳܟ ܢܶܪܕܶܐ܇ ܠܗܰܘ ܐܰܘܘܳܢܳܐ ܕܛܰܝܒܶܬ ܠܰܪ̈ܚܽܘܡܰܝܟ܇ ܘܰܒܢܽܘܗܪܳܐ ܗܰܘ ܕܠܳܐ ܥܳܒܰܪ ܘܳܐܦܠܳܐ ܦܳܛܰܪ܇ ܢܶܬܩܰܒܠܽܘܢ ܡܳܪܝ̱ ܣܳܓܽܘ̈ܕܰܝܟ ܒܗܳܝ ܫܳܥܬܳܐ ܕܚܺܝܠܬܳܐ ܗ ܘ ܗ܀

ܥܰܕܠܳܐ ܥܳܒܰܪ ܠܶܗ ܙܰܒܢܳܐ ܕܰܬܝܳܒܽܘܬܳܐ܇ ܗܳܘܶܐ ܐ̱ܢܳܐ ܠܺܝ ܒܰܛܺܝܠܳܐ ܡܶܢ ܫܽܘܒܚܶܗ ܡܳܪܝܳܐ܇ ܐܰܘܕܶܐ ܒܚܰܘ̈ܒܰܝ ܘܰܐܦܺܝܣ ܥܰܠ ܣܰܟܠܘ̈ܳܬܝ̱ ܐܰܫܦܰܥ ܕܶܡܥ̈ܰܝ ܘܰܐܫܺܝܓ ܗܰܕ̈ܳܡܰܝ܇ ܥܳܠܡܳܐ ܟܽܠܶܗ ܐܶܢ ܐܶܩܢܶܐ ܠܳܐ ܡܰܘܬܰܪ ܠܺܝ܇ ܐܶܚܽܘܕ ܓܰܘܣܳܐ ܒܰܐܠܳܗܳܐ ܕܗܽܘ ܡܨܶܐ ܕܰܢܥܰܕܪܰܢܝ̱܇ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܕܰܗܘܳܐ ܝܽܘܩܪܰܐܗ̱ܘ ܘܣܽܘ̈ܛܡܶܐ ܘܟܶܒ̈ܠܶܐ ܠܰܕܩܳܢܶܐ ܠܶܗ܇ ܘܥܽܘܬܪܳܐ ܕܫܰܪܺܝܪ ܡܳܐ ܕܒܰܐܠܳܗܳܐ ܚܠܺܝܛܳܐ ܢܰܦܫܳܐ܇ ܘܟܽܠܗܽܘܢ ܓܰܙ̈ܶܐ ܕܟܽܠܗܽܘܢ ܡܰܠܟ̈ܶܐ ܕܟܽܠܳܗܿ ܐܰܪܥܳܐ܇ ܣܰܓܺܝ ܒܨܺܝܪܺܝܢ ܡܶܢ ܡܰܢ ܕܰܬܟܺܝܠ ܥܰܠ ܐܰܠܳܗܳܐ܀

ܩܶܢܝܳܢ ܥܳܠܡܳܐ ܗܽܘܝܽܘ ܦܺܐܪܳܐ ܗܰܘ ܩܳܛܽܘܠܳܐ܇ ܘܰܐܝܢܳܐ ܕܠܳܐ ܩܢܳܐ ܒܥܳܠܡܳܐ ܡܶܕܶܡ ܠܳܐ ܛܳܥܶܡ ܠܶܗ܇ ܗܶܒܠܰܐܗ̱ܘ ܪܰܒܳܐ ܥܽܘܬܪܶܗ ܕܥܳܠܡܳܐ ܚܶܠܡܳܐ ܥܳܒܰܪ ܘܳܐܙܶܠ ܥܰܡ ܩܰܢܳܝܰܘ̈ܗ̱ܝ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܫܠܳܡܳܐ ܥܰܡܗܽܘܢ ܕܰܐܪܕܺܝܘܗ̱ܝ

ܙܰܐܝܢܰܐܗ̱ܘ ܨܰܘܡܳܐ ܩܰܕܺܝܫܳܐ܇ ܕܰܡܠܶܐ ܦܽܘܪܫܳܢܳܐ܇ ܠܟܽܠܗܽܘܢ ܨܰܝ̈ܳܡܶܐ܇ ܬܰܘ ܦܳܪ̈ܽܘܫܶܐ ܡܬܽܘܩܘ̱ ܚܰܝ̈ܶܐ܇ ܥܰܕ ܐܺܝܬ ܠܟܽܘܢ ܐܰܬܪܳܐ ܘܙܰܒܢܳܐ ܠܬܶܐܓܽܘܪܬܳܐ܇ ܗ ܘ ܗ ܘܶܐܬܟܰܫܰܪܘ ܒܨܰܘܡܳܐ܀

ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܇ ܙܡܰܪܝ̱ ܠܶܗ ܬܶܫܒܽܘܚܬܳܐ܇ ܠܰܒܪܳܐ ܕܰܐܠܳܗܳܐ܇ ܕܝܰܗܒ ܠܶܟܝ̱ ܙܰܝܢܳܐ ܙܰܟܳܝܳܐ܇ ܨܰܘܡܳܐ ܩܰܕܺܝܫܳܐ ܠܚܽܘܣܳܝܳܐ ܕܚܰܘ̈ܒܶܐ ܗ ܘ ܗ ܘܠܟܽܠܗܽܘܢ ܝܰܠ̈ܕܰܝܟܝ̱܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܨܰܘܡܳܐ ܕܰܟܝܳܐ ܕܦܳܪܽܘܩܰܢ܇ ܒܺܝܫܳܐ ܘܚܰܝܠܶܗ ܐܶܫܬܰܦܰܠ ܕܰܐܛܥܺܝ  ܗܘܳܐ ܘܡܰܟܟܶܗ ܠܳܐܕܳܡ܇ ܒܡܶܐܟܽܘܠܬܳܐ ܕܰܒܦܰܪܕܰܝܣܳܐ܇ ܘܡܳܪܰܢ ܒܰܣܪܳܗܿ ܠܝܰܥܢܽܘܬܳܐ܇ ܘܰܐܩܺܝܡ ܠܳܐܕܳܡ ܪܺܝܫ ܛܽܘܗܡܰܢ܀

ܬܚܰܣܶܐ ܡܽܘܡ̈ܰܝܢ ܛܰܝܒܽܘܬܳܟ܇ ܕܢܶܙܡܰܪ ܫܽܘܒܚܳܐ ܠܪܰܒܽܘܬܳܟ܇ ܘܡܳܐ ܕܟܽܠܢܳܫ ܒܕܶܚܠܳܐ ܩܳܐܶܡ܇ ܐܰܩܺܝܡ ܠܰܢ ܥܰܡ ܩܰܕܺܝܫ̈ܰܝܟ܇ ܡܳܪܰܢ ܐܰܫܪܳܐ ܒܰܢ ܚܽܘܒܳܟ܇ ܘܰܐܦܢܳܐ ܠܰܢ ܠܘܳܬ ܝܺܕܰܥܬܳܟ܀

 

ܕܰܬܫܰܥܫ̈ܳܥܺܝܢ ܒܩܳܠܳܐ ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ

ܐܰܚ̈ܰܝ ܙܘ̈ܳܕܶܐ ܢܛܰܝܶܒ ܠܰܢ܇ ܒܽܐܘܪܚܳܐ ܕܚܺܝܠܬܳܐ܇ ܕܒܳܗܿ ܗܽܘ ܪܳܕܶܝܢܰܢ܇ ܫܰܗܪܳܐ ܘܨܰܘܡܳܐ ܘܰܨܠܽܘܬܳܐ ܘܚܽܘܒܳܐ ܕܰܟܝܳܐ܇ ܕܡܳܐ ܕܰܢܦܰܩܢܰܢ ܡܶܢ ܥܳܠܡܳܐ܇ ܢܺܐܙܰܠ ܢܺܬܬܢܺܝܚ ܒܰܓܢܽܘܢ ܚܰܕ̈ܘܳܬܳܐ܀

ܚܙܰܘ ܫܰܪܺܝܪ̈ܶܐ ܐܰܝܟܰܢܳܐ܇ ܡܩܰܒܠܺܝܢ ܐ̱ܰܢ̱ܬܽܘܢ ܠܶܗ܇ ܠܢܺܝܪܶܗ ܕܡܳܪܟܽܘܢ ܕܦܰܩܶܕ ܕܠܳܐ ܢܰܪܚܶܡ ܥܰܡܶܗ ܡܶܕܶܡ ܒܰܐܪܥܳܐ܇ ܘܰܐܝܢܳܐ ܕܗܳܦܶܟ ܡܶܢ ܚܽܘܒܶܗ܇ ܠܳܐ ܫܳܘܶܐ ܠܶܗ ܕܢܶܗܘܶܐ ܬܰܠܡܺܝܕܳܐ܀

 

ܒܳܥܽܘܬܳܐ ܕܚܳܐܶܢ ܠܚܰܛܳܝ̈ܶܐ

ܛܽܘܒܶܝܗܿ ܠܛܰܠܝܽܘܬܳܐ܇ ܕܰܣܢܳܬ݀ ܪ̈ܓܺܝܓܳܬܶܗ܇ ܛܽܘܒܶܝܗܿ ܠܛܰܠܝܽܘܬܳܐ܇ ܕܚܳܪܰܬ݀ ܒܦܰܪܕܰܝܣܳܐ܇ ܛܽܘܒܳܐ ܠܚܰܛܳܝ̈ܶܐ܇ ܕܰܥܒܰܪܘ̱ ܡܶܢ ܥܰܘܠܗܽܘܢ܀

ܛܽܘܒܰܘܗ̱ܝ  ܠܡܰܢ ܕܰܐܣܐܶܒ ܘܰܐܥܬܶܩ ܒܛܳܒ̈ܳܬܳܐ܇ ܛܽܘܒܰܘܗ̱ܝ ܠܒܰܪ ܐ̱ܢܳܫܳܐ܇ ܕܰܢܛܰܪ ܒܬܽܘܠܽܘܬܶܗ܇ ܛܽܘܒܰܝܗܽܘܢ ܠܥܰܒܕ̈ܶܐ܇ ܕܰܢܨܰܚܘ̱ ܩܕܳܡ ܡܳܪܝܳܐ܀

 

ܬܽܘܒ ܕܰܐܪܒܥܳܐ ܕܦܶܠܓܶܗ ܕܨܰܘܡܳܐ

ܘܥܰܠ ܚܶܘܝܳܐ ܕܰܢܚܳܫܳܐ ܕܰܥܒܰܕ ܡܽܘܫܶܐ ܒܡܰܕܒܪܳܐ ܘܥܰܠ ܐܰܒܓܰܪ ܡܰܠܟܳܐ ܐܽܘܟܳܡܳܐ ܕܽܐܳܘܪܗܳܝ܇ ܘܥܰܠ ܡܰܦܰܩܬܶܗ ܕܰܨܠܺܝܒܳܐ ܒܡܶܨܥܰܬ ܥܺܕܬܳܐ ܘܥܰܠ ܡܫܺܝܚܳܐ ܘܡܽܘܪܽܘܢ܀

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ܇ ܐܶܡܳܐ ܕܟܺܝܬܳܐ

ܗܰܘ ܕܰܠܓܶܢܣܳܐ ܕܺܝܠܰܢ ܕܰܫܒܶܐ ܗܘܳܐ܇ ܡܶܢ ܐܳܟܶܠܩܰܪܨܳܐ܇ ܒܝܰܕ ܨܰܘܡܶܗ ܦܰܪܩܶܗ܇ ܪܰܚܶܡܥܠܰܝ܀ ܚܰܫܶܗ ܕܰܒܪܳܐ ܡܶܟܽܝܠ ܡܰܢܰܥ ܠܶܗ܇ ܢܶܬܟܰܫܰܪ ܐܰܚ̈ܰܝ ܒܨܰܘܡܳܐ ܘܒܰܨܠܽܘܬܳܐ܇ ܪܰܚܶܡ܀

ܠܗܰܘ ܕܰܠܢܰܦܫܳܐ ܘܦܰܓܪܳܐ ܒܝܰܕ ܨܰܘܡܳܐ܇ ܙܰܝܢܳܐ ܫܒܺܝܚܳܐ ܕܦܽܘܪܩܳܢܳܐ ܫܰܟܶܢ ܪܰܚܶܡ܀

ܗܰܘ ܕܰܒܨܰܘܡܳܐ ܠܟܺܐܢ̈ܶܐ ܢܰܨܰܚ ܗܘܳܐ܇ ܘܰܐܬܪܳܐ ܕܚܰܝ̈ܶܐ܇ ܙܰܡܶܢ ܘܛܰܝܶܒ ܠܗܽܘܢ ܪܰܚܶܡ܀

ܪܶܗܛܶܗ ܕܨܰܘܡܳܐ ܡܶܟܺܝܠ ܡܰܢܰܥ ܠܶܗ܇ ܥܰܒܕ̈ܰܝ ܡܰܠܟܳܐ܇ ܐܰܣܓܰܘ ܘܶܐܬܟܰܫܰܪܘ̱ ܪܰܚܶܡܥܠܰܝ ܐܰܠܳܗܳܐ܀

ܫܽܘܒܚܳܐ ܠܛܳܒܳܐ ܕܰܒܚܽܘܒܶܗ ܝܰܗܒ ܠܰܢ܇ ܦܽܘ̈ܡܶܐ ܡܠܺܝ̈ܠܶܐ܇ ܢܙܰܡܪܽܘܢ ܠܶܗ ܫܽܘܒܚܳܐ ܪܰܚܶܡ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܬܶܫܡܶܫܬܳܐ ܪܰܡܫܳܝܬܳܐ

ܐܶܬܡܰܢܰܥܬܽܘܢ ܚܰܒܺܝ̈ܒܰܝ ܠܪܶܗܛܶܗ ܕܨܰܘܡܳܐ ܩܰܕܺܝܫܳܐ܇ ܐܶܬܟܰܫܰܪܘ̱ ܒܶܗ ܒܰܐܓܽܘܢܳܐ܇ ܘܰܩܢܰܘ ܚܰܝ̈ܶܐ ܠܢܰܦܫ̈ܳܬܟܽܘܢ܇ ܟܰܕ ܡܣܰܟܶܝܢ ܐ̱ܢ̱ܬܽܘܢ ܠܗܰܘ ܝܰܘܡܳܐ܇ ܕܓܶܠܝܳܢܶܗ ܫܒܺܝܚܳܐ ܕܰܡܫܺܝܚܳܐ܇ ܕܦܳܪܰܥ ܠܟܽܘܢ ܥܰܡܠܰܝ̈ܟܽܘܢ܀

ܗܳܐ ܐܶܬܡܰܨܰܥ ܠܶܗ ܨܰܘܡܳܐ܇ ܩܰܕܺܝܫܳܐ ܘܡܳܠܶܐ ܟܽܠ ܫܽܘܦܪ̈ܺܝܢ܇ ܬܰܘ ܢܰܐܩܶܠ ܪܶܗܛܳܐ ܐܰܚ̈ܰܝ ܒܦܽܘܠܚܳܢܳܐ ܕܙܰܕܺܝܩܽܘܬܳܐ܇ ܘܢܶܦܠܽܘܚ ܒܶܗ ܥܒ̈ܳܕܶܐ ܛܳܒ̈ܶܐ܇ ܕܢܶܬܡܰܢܰܥ ܠܦܶܨܚܶܗ ܕܰܒܪܳܐ܀

 

ܐ̱ܚܪܺܢܳܐ ܒܩܳܠܳܐ ܨܠܺܝ ܡܳܪܝܳܐ ܒܪ̈ܰܚܡܶܐ

ܐܰܪܺܝܡ ܗܘܳܐ ܡܽܘܫܶܐ ܚܶܘܝܳܐ܇ ܘܰܐܩܺܝܡ ܥܰܠ ܪܺܝܫ ܩܳܝܶܡܬܳܐ܇ ܘܰܐܝܢܳܐ ܕܒܶܗ ܗܽܘ ܚܳܐܰܪ ܗܘܳܐ܇ ܐܶܬܰܐܣܺܝ ܡܶܢ ܡܰܚܘ̈ܳܬܳܐ܀

ܟܰܕ ܒܓܰܘ ܡܰܫܪܺܝܬܳܐ ܩܒܰܥ ܗܘܳܐ܇ ܡܽܘܫܶܐ ܠܚܶܘܝܳܐ ܕܰܢܚܫܳܐ܇ ܕܡܳܐ ܐܶܬܢܰܟܺܝܽܘ ܥܶܒܪ̈ܳܝܶܐ܇ ܚܳܪܘ̱ ܗ̱ܘܰܘ ܒܚܶܘܝܳܐ ܘܶܐܬܰܐܣܺܝܽܘ܀

ܐܳܘ ܕܰܢܟܺܝܬܺܝܢ ܡܶܢ ܒܺܝܫܳܐ܇ ܘܶܐܬܢܰܟܺܝܽܘ ܡܶܢ ܚܰܪܡܳܢܳܐ܇ ܚܽܘܪܘ̱ ܠܘܳܬ ܨܠܺܝܒܳܐ ܩܰܕܺܝܫܳܐ܇ ܘܣܰܒܘ̱ ܠܟܽܘܢ ܡܶܢܶܗ ܚܽܘܣܳܝܳܐ܀

ܫܽܘܒܚܳܐ ܠܗܰܘ ܕܙܰܝܰܚ ܐ̱ܪ̈ܳܙܰܘܗ̱ܝ܇ ܢܒܺܝ̈ܶܐ ܕܰܒܪܽܘܚܳܐ ܚܙܰܐܽܘܗ̱ܝ܇ ܘܰܒܝܰܕ ܛܽܘ̈ܦܣܶܐ ܘܦ̈ܶܠܳܐܬܳܐ܇ ܩܰܕܶܡܘ̱ ܝܰܩܰܪܘ̱ ܡܶܐܬܺܝܬܶܗ܀

 

ܐ̱ܚܪܺܢܳܐ ܒܩܳܠܳܐ ܩܶܫܬܳܐ ܕܓܰܢ̱ܒܳܪ̈ܶܐ ܝܰܘܢܳܝܬܳܐ

ܠܚܰܡܶܫ ܡܕܺܝܢ̈ܳܬܳܐ܇ ܕܒܰܐܪܥܳܐ ܕܡܶܨܪܶܝܢ܇ ܗܳܠܶܝܢ ܐܺܝܬܰܝܗܽܘܢ ܪ̈ܶܓܫܶܐ ܓܶܝܪ ܕܦܰܓܪܳܐ܇ ܒܝܰܕ ܨܰܘܡܳܐ ܕܰܟܰܘ܇ ܘܡܶܛܽܠ ܗܳܕܶܐ܇ ܐܶܬܟܰܫܰܦܘ̱ ܐܰܢ̱ܬܰܘܢ ܘܺܝܨܰܦܘ̱ ܕܬܶܥܠܽܘܢ ܠܡܰܠܟܽܘܬܳܐ ܕܰܫܡܰܝܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܒܰܥܪܽܘܒܬܳܐ ܒܪܺܝܫܺܝܬ

ܗܳܐ ܐܶܬܡܰܨܰܥ ܠܶܗ܇ ܨܰܘܡܳܐ ܩܰܕܺܝܫܳܐ܇ ܕܰܡܠܶܐ ܟܽܠ ܫܽܘܦܪ̈ܺܝܢ ܬܰܘ ܢܰܐܩܶܠ ܪܶܗܛܳܐ܇ ܘܢܶܦܠܽܘܚ ܛܳܒ̈ܳܬܳܐ ܘܠܰܩܝܳܡܬܳܐ ܢܶܫܬܘܶܐ ܗ ܘ ܗ ܘܢܺܐܪܰܬ ܡܰܠܟܽܘܬܳܐ܀

ܒܡܶܨܥܰܬ ܝܰܘ̈ܡܳܬܳܐ ܕܨܰܘܡܳܐ ܩܰܕܺܝܫܳܐ ܟܽܠܰܢ ܢܶܬܟܰܫܰܪ܇ ܢܶܦܠܽܘܚ ܟܺܐܢܽܘܬܳܐ܇ ܘܒܰܥܒ̈ܳܕܶܐ ܠܦܶܨܚܳܐ ܢܶܬܡܰܢܰܥ܇ ܗ ܘ ܗ ܘܢܶܚܕܶܐ ܒܰܩܝܳܡܬܳܐ܀

ܚܶܘܝܳܐ ܕܰܢܚܳܫܳܐ܇ ܕܰܐܩܺܝܡ ܒܰܪ ܥܰܡܪܰܡ܇ ܘܰܐܪܺܝܡ ܒܓܰܘ ܡܰܕܒܪܳܐ ܠܰܨܠܺܝܒܳܐ ܨܳܪܶܗ܇ ܕܒܶܗ ܥܺܕܰܬ ܩܽܘܕܫܳܐ ܦܪܺܝܩܳܐ ܗܺܝ ܘܝܰܠ̈ܕܰܝܗܿ܇ ܗ ܘ ܗ ܡܶܢ ܟܽܠ ܒܺܝܫ̈ܳܬܳܐ܀

 

ܐ̱ܚܪܺܢܳܐ ܒܩܳܠܳܐ ܣܳܗܕܰܘ̈ܗ̱ܝ ܐܰܢ̱ܬܽܘܢ

ܬܰܘ ܦܳܪ̈ܽܘܫܶܐ܇ ܕܶܐܬܡܰܢܰܥܬܽܘܢ ܠܡܶܨܥܰܬ ܨܰܘܡܳܐ܇ ܕܰܟܝܳܐ ܘܩܰܕܺܝܫܳܐ܇ ܘܰܐܩܶܠܘ̱ ܪܶܗܛܳܐ ܒܫܰܦܺܝܪ̈ܳܬܳܐ܇ ܘܰܒܕܽܘܒܳܪ̈ܶܐ ܕܰܡܪܰܥܶܝܢ ܠܡܳܪܝܳܐ܇ ܘܰܒܝܰܕ ܗܳܕܶܐ ܬܶܫܬܰܘܽܘܢ ܠܦܶܨܚܳܐ ܩܰܕܺܝܫܳܐ܇ ܘܬܺܐܪܬܽܘܢ ܚܰܝ̈ܶܐ ܕܰܠܥܳܠܰܡ܀

ܒܝܰܕ ܐܶܓܪ̈ܳܬܳܐ ܘܰܟܬܺܝܒ̈ܳܬܳܐ܇ ܫܠܰܚ ܠܶܗ ܐܰܒܓܰܪ ܡܰܠܟܳܐ ܠܰܡܫܺܝܚܳܐ܇ ܒܒܳܥܽܘ ܡܶܢܳܟ ܢܽܘܗܪܶܗ ܕܥܳܠܡܳܐ܇ ܕܬܺܐܬܶܐ ܨܶܝܕܰܝ ܐܰܢ̱ܬܗܽܘ ܚܰܢܳܢܳܐ܇ ܕܡܶܬܝܰܐܝܰܒ ܐ̱ܢܳܐ܇ ܠܰܚܙܳܬܳܟ ܐܰܠܳܗܳܐܝܬܳܐ܇ ܠܳܐ ܡܳܪܝ̱ ܬܶܓܠܽܘܙ ܠܳܝ ܡܶܢܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܗܳܢܳܐ ܝܰܘܡܳܐ ܕܒܶܗ ܐܶܬܡܰܨܰܥ ܪܶܗܛܶܗ ܕܨܰܘܡܳܐ܇ ܬܰܘ ܢܶܬܟܰܫܰܪ ܒܰܥܒܺܝܕ̈ܳܬܶܗ ܫܰܦܺܝܪ̈ܳܬܳܐ܇ ܒܗܳܢܳܐ ܝܰܘܡܳܐ ܕܶܐܬܡܰܨܰܥܢܰܢ ܠܚܰܫܶܗ ܕܰܒܪܳܐ܇ ܬܰܘ ܢܶܦܠܽܘܚ ܒܶܗ ܙܰܕܺܝܩܽܘܬܳܐ ܘܩܰܕܺܝܫܽܘܬܳܐ܀

ܒܗܳܢܳܐ ܝܰܘܡܳܐ ܢܶܒܥܶܐ ܪ̈ܰܚܡܶܐ ܘܫܽܘܒܩܳܢ ܚܰܘ̈ܒܶܐ܇ ܕܢܶܚܕܶܐ ܒܦܶܨܚܶܗ ܐܳܦ ܒܢܽܘܚܳܡܶܗ ܕܰܒܪܳܐ ܡܫܺܝܚܳܐ܇ ܒܗܳܢܳܐ ܝܰܘܡܳܐ ܢܛܰܝܶܒ ܢܰܦܫܰܢ ܥܰܠ ܐܰܓܽܘܢܳܐ܇ ܕܰܒܢܽܘܚܳܡܳܐ܇ ܢܶܣܰܒ ܐܰܓܪܳܐ ܘܰܟܠܺܝܠ ܫܽܘܒܚܳܐ܀

ܒܗܳܢܳܐ ܝܰܘܡܳܐ ܢܰܣܶܩ ܫܽܘܒܚܳܐ ܥܰܡ ܗܽܘ̈ܠܳܠܶܐ ܠܡܳܪܳܐ ܛܳܒܳܐ ܕܨܳܡ ܥܰܠ ܐܰܦܰܝ̈ܢ ܘܝܰܗܒ ܠܰܢ ܕܰܢܨܽܘܡ܇ ܣܶܓܕܬܳܐ ܠܰܐܒܽܘܟ ܘܰܠܪܽܘܚ ܩܽܘܕܫܳܐ ܟܽܠܝܠ ܩܽܘܠܳܣ̈ܶܐ܇ ܚܰܕ ܗܽܘ ܟܝܳܢܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܐܰܩܶܠܘ̱ ܪܶܗܛܳܐ ܚܰܒܺܝ̈ܒܰܝ܇ ܒܦܽܘܠܚܳܢܳܐ ܕܙܰܕܺܝܩܽܘܬܳܐ܇ ܚܰܫܶܗ ܕܰܒܪܳܐ ܩܪܶܒ ܘܰܡܛܳܐ܇ ܕܨܰܘܡܶܗ ܡܶܟܺܝܠ ܡܰܨܰܥ ܠܶܗ܇ ܫܽܘܒܚܳܐ ܠܳܟ܀

ܗܳܐ ܩܪܶܒ ܚܰܫܶܗ ܕܦܳܪܽܘܩܰܢ܇ ܬܰܘ ܢܶܬܟܰܫܰܪ ܒܰܨܠܽܘܬܳܐ܇ ܕܒܰܩܝܳܡܬܳܐ ܢܶܚܕܶܐ ܥܰܡܶܗ܇ ܘܢܺܐܪܰܬ ܚܰܝ̈ܶܐ ܕܰܠܥܳܠܰܡ܇ ܫܽܘܒܚܳܐ ܠܳܟ܀

ܐܶܬܡܰܨܰܥ ܪܶܗܛܶܗ ܕܨܰܘܡܳܐ܇ ܚܰܛܳܝ̈ܶܐ ܐܰܩܶܠܘ̱ ܪܶܗܛܳܐ܇ ܘܶܐܬܟܰܫܰܦܘ̱ ܠܶܗ ܠܰܡܫܺܝܚܳܐ܇ ܕܰܢܚܰܣܶܐ ܠܟܽܘܢ ܚܛܳܗ̈ܰܝܟܽܘܢ܇ ܫܽܘܒܚܳܐ ܠܳܟ܀

ܟܬܳܒܳܐ ܕܶܐܓܰܪܬܶܗ ܫܠܰܚ ܠܶܗ܇ ܐܰܒܓܰܪ ܡܰܠܟܳܐ ܠܰܡܫܺܝܚܳܐ܇ ܕܡܳܪܝ̱ ܒܰܫܪܳܪܳܐ ܐܰܢ̱ܬ ܐܺܝܬܰܝܟ܇ ܐܰܠܳܗܳܐ ܕܒܰܐܪܥܳܐ ܐܶܬܚܙܺܝܬ܀

ܫܽܘܒܚܳܐ ܠܶܗ ܠܺܐܝܬܝܳܐ ܛܳܒܳܐ܇ ܕܰܪܫܰܡ ܝܽܘܩܢܶܗ܇ ܒܫܽܘܫܶܦܳܐ܇ ܘܠܰܐܒܓܪ ܫܰܕܪܶܗ ܠܒܽܘܝܳܐܶܗ܇ ܕܢܶܚܕܶܐ ܘܢܶܪܘܰܙ ܘܰܢܫܰܒܰܚ ܫܽܘܒܚܳܐ܀

ܩܳܠܳܐ ܕܠܺܠܝܳܐ ܒܩܳܠܳܐ ܡܳܪܝܳܐ ܡܳܪܰܢ

ܡܳܪܝܳܐ ܡܳܪܰܢ܇ ܒܩܰܝܣܳܐ ܕܰܨܠܺܝܒܳܐ ܚܰܝܳܐ܇ ܐܶܬܦܪܶܩܘ̱ ܥܰܡܡ̈ܶܐ ܡܶܢ  ܐܺܝܕ̈ܰܝ ܒܺܝܫܳܐ܇ ܐܰܟܡܳܐ ܕܡܽܘܫܶܐ܇ ܒܚܽܘܕܳܝܳܐ ܕܰܢܚܳܫܳܐ ܕܰܐܪܺܝܡ ܐܰܣܺܝ ܘܰܐܚܠܶܡ܇ ܠܟܽܠܗܽܘܢ ܥܶܒܪ̈ܶܝܳܐ܇ ܚܶܘܝܳܐ ܐܰܚܠܶܡ ܠܺܐܝܣܪܳܐܶܝܠ ܡܶܢ ܚܰܪܡܳܢܳܐ܇ ܨܠܺܝܒܳܐ ܐܰܚܠܶܡ܇ ܠܚܰܫ̈ܶܐ ܕܢܰܦܫ̈ܳܬܰܢ܀

ܡܳܪܝܳܐ ܡܳܪܰܢ܇ ܕܶܐܬܡܰܨܰܥ ܪܶܗܛܶܗ ܕܨܰܘܡܳܐ ܫܰܡܠܳܐ ܥܰܡܰܢ܇ ܒܚܰܫܳܟ ܘܒܰܩܝܳܡܬܳܟ܇ ܠܟܽܠܰܢ ܐܰܫܘܳܐ܇ ܕܰܢܫܰܡܠܶܐ ܠܪܶܗܛܶܗ ܕܰܟܝܳܐ܇ ܘܒܶܗ ܢܶܬܚܰܣܽܘܢ ܚܰܘܒ̈ܰܝܢ ܘܰܚܛܳܗ̈ܰܝܢ܇ ܘܰܒܚܰܕܽܘܬܳܐ ܢܶܬܡܰܢܰܥ ܠܦܶܨܚܶܗ ܕܰܒܪܳܐ ܗ ܘܢܶܙܡܰܪ ܬܶܫܒܽܘܚܬܳܐ܀

 

ܡܰܕܪܳܫܳܐ ܒܩܳܠܳܐ ܩܽܘܡ ܦܰܘܠܳܘܣ ܥܽܘܢܺܝܬܳܐ ܒܪܺܝܟ ܕܰܪܫܰܡ ܐ̱ܪܳܙܶܗ ܕܰܨܠܺܝܒܳܐ܇ ܒܗܰܘ ܚܶܘܝܳܐ ܕܰܐܣܺܝ ܠܢܽܘܟ̈ܬܳܬܳܐ

ܐܰܪܺܝܡ ܗܘܳܐ ܡܽܘܫܶܐ ܒܓܰܘ ܕܰܒܪܳܐ܇ ܠܗܰܘ ܚܶܘܝܳܐ ܕܰܡܠܶܐ ܦ̈ܶܠܳܐܬܳܐ܇ ܗܳܟܰܢܳܐ ܢܶܬܬܪܺܝܡ ܒܪܶܗ ܕܐ̱ܢܳܫܳܐ܇ ܥܰܠ ܩܰܝܣܳܐ ܡܶܛܽܠ ܦܽܘܪܩܳܢܰܢ܇ ܘܚܰܘܺܝ ܕܰܠܐ̱ܪܳܙܶܗ܇ ܨܳܐܰܪ ܒܰܪ ܥܰܡܪܰܡ܇ ܢܒܺܝܳܐ ܒܓܰܘ ܡܰܕܒܪܳܐ܇ ܒܝܰܕ ܚܶܘܝܳܐ ܕܰܐܪܺܝܡ܇ ܘܰܐܝܟ ܛܽܘܦܣܶܗ ܐܰܣܺܝ ܦܰܓܪ̈ܳܢܶܐ܇ ܐܰܣܺܝ ܗܘܳܐ ܫܪܳܪܶܗ ܠܢܰܦܫ̈ܳܬܰܢ܀

ܓܣܰܪܘ̱ ܗ̱ܘܰܘ ܕܶܝܢ ܚܰܪ̈ܡܳܢܶܐ ܒܥܰܡܳܐ܇ ܥܰܠ ܕܶܐܟܰܠܘ̱ ܡܰܢܢܳܐ ܘܠܳܐ ܐܰܘܕܺܝܽܘ܇ ܛܠܰܡܘ̱ ܫܽܘܒܚܳܐ ܕܛܳܒܳܐ ܘܙܳܝܽܘܢܳܐ܇ ܘܥܰܠ ܗܳܕܶܐ ܢܰܟܬܽܘܗ̱ܝ ܚܰܪ̈ܡܳܢܶܐ܇ ܠܰܚܡܳܐ ܒܶܝܬ ܫܶܢ̈ܰܘܗ̱ܝ܇ ܘܓܽܘܕܳܦܳܐ ܒܦܽܘܡܶܗ܇ ܐܳܟܶܠ ܘܰܡܓܰܕܶܦ ܡܳܪܳܐ ܕܶܐܬܓܰܕܰܦ܇ ܚܘܰܘ̈ܳܬܳܐ ܢܰܟܬܽܘܗ̱ܝ ܠܛܳܠܽܘܡܳܐ܀

ܗܰܘ ܚܶܘܝܳܐ ܐ̱ܪܳܙܶܗ ܕܰܨܠܺܝܒܳܐ܇ ܐܶܬܬܨܺܝܪ ܒܶܗ ܩܶܛܠܶܗ ܕܦܳܪܽܘܩܰܢ܇ ܘܥܰܠ ܗܳܕܶܐ ܐܶܫܟܰܚ ܕܢܰܐܣܶܐ ܗܘܳܐ܇ ܠܟܽܠ ܐܰܝܠܶܝܢ ܕܰܒܠܰܥܘ̱ ܡܶܢ ܓܳܪܣܳܐ܇ ܡܰܘܬܶܗ ܕܗܰܘ ܚܶܘܝܳܐ܇ ܕܰܐܛܺܥܝ ܒܫܽܘܪܳܝܳܐ܇ ܠܳܐܕܳܡ ܒܦܰܪܕܰܝܣܳܐ܇ ܘܛܰܪܕܶܗ ܡܶܢ ܓܰܢܬܳܐ܇ ܒܝܰܕ ܚܰܫܶܗ ܘܡܰܘܬܶܗ ܕܰܡܫܺܝܚܳܐ܇ ܒܝܰܕ ܚܶܘܝܳܐ ܕܰܢܚܳܫܳܐ ܐܺܬܬܨܺܝܪ܀

ܙܰܝܰܚ ܗܘܳܐ ܒܝܰܕ ܛܽܘܦܣܳܐ ܡܽܘܫܶܐ܇ ܘܦ̈ܶܠܳܐܬܳܐ ܠܐ̱ܪܳܙܶܗ ܕܰܨܠܺܝܒܳܐ܇ ܟܰܕ ܘܰܬܠܳܝܗ̱ܝ ܗܘܳܐ ܕܰܢܚܽܘܪ ܒܶܗ ܥܰܡܳܐ܇ ܒܛܽܘܦܣܶܗ ܕܦܳܪܽܘܩܰܢ܇ ܕܶܐܬܬܠܺܝ ܒܰܙܩܺܝܦܳܐ܇ ܘܰܐܣܺܝ ܠܢܽܘ̈ܟܬܳܬܳܐ܇ ܕܡܶܢ ܝܰܕ ܚܰܪܡܳܢܳܐ܇ ܠܗܰܠ ܛܽܘܦ̈ܣܶܐ ܘܐ̱ܪ̈ܳܙܶܐ ܐܶܫܬܰܡܰܫܘ̱܇ ܫܪܳܪܳܐ ܕܶܝܢ ܒܪܰܘܡܶܗ ܕܓܳܓܽܘܠܬܳܐ܀

ܛܥܳܐ ܥܰܡܳܐ ܠܡܳܪܝܳܐ ܙܳܝܽܘܢܶܗ܇ ܘܓܰܕܶܦ ܗܘܳܐ ܘܰܛܠܶܡ ܬܰܘܕܺܝܬܳܐ܇ ܓܳܪ̈ܣܶܐ ܚܰܪ̈ܡܳܢܶܐ ܐܶܫܬܰܠܰܛܘ̱܇ ܒܛܳܠܽܘܡܳܐ ܕܢܶܕܰܥ ܒܡܰܢ ܓܰܕܶܦ܇ ܐܳܟܶܠ ܘܠܳܐ ܐܶܫܟܰܚ܇ ܘܰܣܒܰܥ ܘܠܳܐ ܐܰܘܕܺܝ܇ ܚܠܳܦ ܫܽܘܒܚܳܐ ܓܰܕܶܦ܇ ܣܶܦܘ̈ܳܬܶܗ ܕܥܰܡܳܐ܇ ܐܶܬܢܰܩܰܡܘ̱ ܡܶܢܶܗ ܚܘ̈ܰܘܳܬܳܐ܇ ܥܰܠ ܕܰܛܠܰܡ ܫܽܘܒܚܶܗ ܕܙܳܝܽܘܢܳܐ܀

ܟܰܕ ܦܰܠܓܶܗ ܠܝܰܡܳܐ ܒܝܰܕ ܚܽܘܛܪܳܐ܇ ܨܠܺܝܒܳܐ ܪܫܰܡ ܠܽܐܳܘܪܟܳܐ ܘܠܰܦܬܳܝܳܐ܇ ܟܰܕ ܐܺܝܕ̈ܰܘܗ̱ܝ ܥܰܠ ܪܳܡܬܳܐ ܦܫܰܛ ܗܘܳܐ܇ ܘܚܽܘܪ ܘܰܐܗܪܽܘܢ ܩܕܳܡܰܘܗ̱ܝ ܒܬܶܕܡܽܘܪܬܳܐ܇ ܛܰܦܶܣ ܠܰܨܠܺܝܒܳܐ܇ ܘܰܦܪܰܩ ܠܥܶܒܪ̈ܳܝܶܐ܇ ܘܰܛܒܰܥ ܠܡܶܨܪ̈ܳܝܶܐ܇ ܘܰܐܘܒܶܕ ܠܰܥܰܡܳܠܺܝܩ܇ ܐܳܘ ܨܠܺܝܒܳܐ ܫܰܘܙܶܒ ܗܘܳܐ ܘܰܛܒܰܥ܇ ܘܰܙܟܳܐ ܗܘܳܐ ܘܙܰܟܺܝ ܒܝܰܕ ܐ̱ܪܳܙܶܗ܀

ܡܶܨܥܳܝܳܐ ܕܰܬܪ̈ܰܝܗܽܘܢ ܓܰܒ̈ܶܐ܇ ܕܫܰܝܶܢ ܟܽܠ ܒܰܕܡܳܐ ܕܰܩܢܽܘܡܶܗ܇ ܘܰܐܪܺܝܡ ܗܘܳܐ ܣܝܳܓܳܐ ܕܒܰܡܨܰܥܬܳܐ܇ ܐܰܠܘܶܬ ܠܰܬܪ̈ܰܝܗܽܘܢ ܘܰܥܒܰܕ ܚܰܕ܇ ܘܰܒܩܶܛܠܶܗ ܚܰܝܳܐ܇ ܘܒܰܕܡܳܐ ܕܡܶܢ ܕܰܦܢܶܗ܇ ܘܡܰܘܬܶܗ ܘܢܽܘܚܳܡܶܗ܇ ܐܰܚܺܝ ܠܡܳܝܽܘ̈ܬܶܐ܇ ܫܰܝܶܢ ܡܳܪܝ̱ ܥܺܕܬܳܟ ܘܡܰܪܥܺܝܬܳܟ܇ ܒܝܰܕ ܚܰܝܠܶܗ ܕܰܨܠܺܝܒܳܐ ܚܰܝܳܐ܀

ܣܺܝܡ ܢܺܝܫܳܟ ܒܰܕܡܽܘܬܶܗ ܕܚܶܘܝܳܐ܇ ܕܳܐܦ ܚܶܘܝܳܐ ܠܚܰܫܳܟ ܛܰܦܶܣ ܗܘܳܐ܇ ܘܰܐܝܟ ܚܶܘܝܳܐ ܕܡܶܢ ܡܽܘܫܶܐ ܐܶܬܬܪܺܝܡ܇ ܗܳܟܰܢܳܐ ܐܶܬܬܪܺܝܡܬ ܥܰܠ ܩܰܝܣܳܐ܇ ܘܰܐܝܟ ܕܰܐܣܺܝ ܚܶܘܝܳܐ܇ ܢܽܘܟ̈ܬܳܬ ܚܘܰܘ̈ܳܬܳܐ܇ ܗܳܐ ܚܰܫܳܟ ܡܰܐܣܶܐ܇ ܡܶܪܬܶܗ ܕܚܰܪܡܳܢܳܐ܇ ܒܪܺܝܟ ܛܽܘܦܣܳܟ ܕܰܐܣܝܶܗ ܠܗܰܘ ܥܰܡܳܐ܇ ܘܰܫܪܳܪܳܟ ܕܰܠܥܰܡܡ̈ܶܐ ܐܰܚܺܝ܀

ܦܠܶܓܘ̱ ܗܳܫܳܐ ܝܰܘܡ̈ܰܝ ܐܰܓܽܘܢܳܟ܇ ܘܰܒܡܶܨܥܰܬ ܨܰܘܡܳܟ ܗܳܐ ܩܳܐܶܡ܇ ܡܦܺܝܣܳܐ ܠܳܟ ܥܺܕܬܳܐ ܚܰܢܳܢܳܐ܇ ܡܶܨܥܳܝܳܐ ܕܰܬܪ̈ܰܝܗܽܘܢ ܓܰܒ̈ܶܐ܇ ܕܫܰܝܢܳܟ ܘܰܫܠܳܡܳܟ܇ ܢܰܡܠܶܟ ܒܶܝܬ ܓܽܘܕ̈ܶܝܗܿ܇ ܘܫܽܘܒܚܳܟ ܢܶܪܥܰܡ ܒܳܗܿ܇ ܒܥܺܐܕ̈ܶܐ ܕܚܰܕ̈ܘܳܬܳܐ܇ ܘܒܰܨܠܺܝܒܳܟ ܢܶܣܬܰܚܦܽܘܢ ܡܶܢܳܗܿ܇ ܡܰܐܟܝ̈ܳܢܶܐ ܕܥܰܡܳܗܿ ܡܶܬܟܰܬܫܺܝܢ܀

ܩܪܶܒ ܘܰܡܛܳܐ ܚܰܫܳܐ ܘܰܩܝܳܡܬܳܐ܇ ܘܗܳܐ ܡܰܛܺܝ ܝܰܘܡܶܗ ܕܢܽܘܚܳܡܳܐ܇ ܘܗܳܐ ܪܶܗܛܶܗ ܕܨܰܘܡܳܐ ܡܰܨܰܥ ܠܶܗ܇ ܘܝܰܘܡ̈ܳܬܶܗ ܦܰܠܶܓܘ̱ ܗ̱ܘܰܘ ܡܶܢ ܟܰܕܽܘ܇ ܙܰܠܓܳܐ ܡܚܰܕܝܳܢܳܐ܇ ܐܰܕܺܝܩ ܥܰܠ ܥܺܕܬܳܐ܇ ܘܝܰܘܡܳܐ ܕܢܽܘܚܳܡܳܐ܇ ܘܙܰܠܺܝ̈ܩܰܝ ܩܰܒܪܳܐ܇ ܚܶܫܽܘܟܳܐ ܘܝܽܘܩܪܳܐ ܕܰܚܛܳܗ̈ܰܝܢ܇ ܐܶܬܛܰܠܰܩܘ̱ ܒܝܰܕ ܨܰܘܡܳܐ ܡܶܢܰܢ܀

ܫܰܪܺܝܢܰܢ ܕܢܰܪܡܶܐ ܬܝܳܒܽܘܬܳܐ܇ ܘܰܒܫܽܘܪܳܝ ܨܰܘܡܳܟ ܐܶܬܚܰܦܛܰܢ܇ ܓܰܡܰܪܢܰܢ ܠܪܶܗܛܳܐ ܕܕܽܘܒܳܪ̈ܰܝܢ܇ ܘܗܳܐ ܡܶܟܺܝܠ ܪܶܗܛܶܗ ܐܶܬܡܰܨܰܥ܇ ܘܗܳܐ ܝܽܘܩܪܳܐ ܕܚܰܘ̈ܒܰܝܢ ܢܳܬܰܥ ܠܬܰܪܥܺܝܬܰܢ܇ ܘܰܠܬܰܚܬ ܡܰܚܶܬ ܠܳܗܿ܇ ܘܰܠܡܶܬܠܳܐ ܚܰܘܪܳܢ܇ ܠܘܳܬ ܪܰܘܡܳܐ ܡܥܰܘܶܟ ܘܰܡܥܰܟܰܪ܇ ܕܰܟܳܐ ܠܰܢ ܘܰܐܢܗܰܪ ܪ̈ܶܥܝܳܢܰܢ܀

 

ܩܳܠܳܐ ܩܽܘܡܳܐ ܕܰܬܪܶܝܢ ܕܠܺܠܝܳܐ ܒܩܳܠܳܐ ܙܰܕܺܝ̈ܩܶܐ ܕܰܪܚܶܡܘ̱ ܩܽܘܫܬܳܐ

ܚܰܕ ܡܳܟܣܳܐ ܘܚܰܕ ܦܪܺܝܫܳܝܳܐ܇ ܠܗܰܝܟܠܳܐ ܣܠܶܩܘ̱ ܗ̱ܘܰܘ ܕܰܢܨܰܠܽܘܢ܇ ܘܰܢܩܽܘܡܽܘܢ ܒܰܨܠܽܘܬܳܐ ܘܒܳܥܽܘܬܳܐ ܗܳܝܕܶܝܢ܇ ܦܪܺܝܫܳܐ ܚܫܰܒ ܨܰܘܡܶܗ ܘܙܶܕܩ̈ܳܬܶܗ ܟܽܠܗܶܝܢ܇ ܘܰܒܥܶܠܰܬ ܗܳܝ ܪܳܡܽܘܬܶܗ܇ ܨܠܽܘܬܶܗ ܐܰܣܬܰܠܝܰܬ݀܇ ܘܗܰܘ ܡܳܟܣܳܐ ܩܳܥܶܐ ܘܳܐܡܰܪ܇ ܕܰܐܠܳܗܳܐܩ ܚܽܘܢ ܠܚܰܛܳܝܽܘܬܝ̱܇ ܛܳܒܳܐ ܐܺܝܬܰܝܟ ܘܒܰܪ ܛܳܒܳܐ܇ ܕܠܳܐ ܢܳܣܶܒ ܐܰܢ̱ܬ ܡܳܪܝ̱ ܒܰܐܦ̈ܶܐ܇ ܘܰܦܬܺܝܚ ܗܽܘ ܬܰܪܥܳܟ ܠܚܰܛܳܝ̈ܶܐ ܕܬܳܝܒܺܝܢ܀

ܪܰܒ ܨܰܘܡܳܐ ܘܛܳܒܐܳ ܨܠܽܘܬܳܐ܇ ܘܰܡܝܰܬܰܪ ܡܶܢܗܽܘܢ ܚܽܘܒܳܐ܇ ܐܰܝܟ ܕܰܐܟܪܶܙܘ̱ ܢܒܺܝ̈ܶܐ ܘܰܫܠܺܝ̈ܚܶܐ ܕܡܶܢܩܕܽܝܡ܇ ܒܨܰܘܡܳܐ ܕܨܳܡ ܗܘܳܐ ܕܳܢܺܝܐܶܝܠ܇ ܠܰܐܪ̈ܝܳܘܳܬܳܐ ܙܟܳܐ܇ ܨܠܽܘܬܐ ܕܨܰܠܺܝ ܚܶܙܰܩܝܳܐ ܠܳܐܬܽܘܪܳܝܐ ܚܪܰܒ܇ ܘܰܫܠܺܝܚܳܐ ܐܰܟܪܶܙ ܘܶܐܡܰܪ܇ ܕܶܐܢ ܚܽܘܒܳܐ ܠܳܐ ܢܶܗܘܶܐ ܒܺܝ܇ ܗܘܺܝܿܬ ܠܺܝ ܐܰܝܟ ܢܚܳܫܳܐ ܕܙܳܐܶܡ܇ ܘܰܐܝܟ ܨܺܨܠܳܐ ܕܝܳܗܶܒ ܩܳܠܳܐ܇ ܐܰܫܪܳܐ ܒܰܢ ܚܽܘܒܳܟ ܘܚܽܘܣ ܘܶܐܬܪܰܚܰܡܥܠܰܝܢ܀

 

ܣܽܘܓܺܝܬܳܐ ܒܩܳܠܳܐ ܐܰܒܳܐ ܟܬܰܒ ܗܘܳܐ ܥܶܢܝܳܢܳܐ ܡܫܺܝܚܳܐ ܪܳܚܶܡ ܬܰܝ̈ܳܒܶܐ܇ ܐܶܬܪܰܚܰܡ ܥܰܠ ܒܺܝ̈ܫܳܐ ܕܬܳܝܒܺܝܢ

ܒܳܟ ܡܳܪܝ̱ ܐܶܢܗܰܪ ܘܶܐܡܰܠܶܠ܇ ܕܚܶܫܽܘܟܳܐ ܥܰܠ ܬܰܪܥܺܝܬܝ̱ ܗܳܐ ܦܪܺܝܣ܇ ܒܪܳܐ ܕܟܽܠܶܗ ܢܽܘܗܪܰܐܗ̱ܘ ܇ ܐܰܢܗܰܪ ܠܺܝ ܡܰܕܰܥܝ̱܇ ܐܰܦܢܳܐ ܐܶܢܽܘܢ ܠܺܝܕܰܥܬܳܟ܇ ܕܢܶܦܪܽܘܥ ܦܽܘܡܝ̱܇ ܫܽܘܒܚܳܐ ܕܝܽܘܠܦܳܢܳܟ܀

ܕܺܝܢܳܐ ܕܚܺܝܠܳܐ ܕܟܺܐܢܽܘܬܳܐ܇ ܥܒܰܪ ܘܶܐܙܰܠ ܡܶܢ ܠܶܒܳܐ ܕܟܽܠ ܐ̱ܢܳܫ܇ ܘܰܒܪܶܚܡܰܬ ܫܽܘܒܚܳܐ ܘܪܶܓܰܬ ܩܶܢܝ̈ܳܢܶܐ܇ ܗܳܐ ܛܡܺܝܪ ܟܽܠ ܐ̱ܢܳܫ ܘܰܛܥܰܝܢܰܢ܇ ܕܰܒܢܽܘܪܳܐ ܕܳܐܶܢ ܠܰܢ ܡܳܪܝܳܐ܀

ܘܳܝܳܐ ܪܰܒܳܐ ܠܕܰܝ̈ܳܢܶܐ܇ ܕܰܐܚܺܝܕܺܝܢ ܫܽܘܠܛܳܢܳܐ ܒܥܳܠܡܳܐ܇ ܘܫܳܕܶܝܢ ܣܽܘܥܪ̈ܳܢܶܐ܇ ܘܒܡܰܐܣܰܒ ܒܰܐܦ̈ܶܐ܇ ܘܪܶܚܡܰܬ ܕܰܗܒܳܐ ܣܰܦܺܝܦܳܐ܇ ܒܠܶܒܰܝ̈ܗܽܘܢ ܐܰܝܟ ܢܽܘܪܳܐ ܕܝܳܩܕܳܐ܀

ܚܰܪܬܳܐ ܩܳܝܡܳܐ ܥܰܠ ܬܰܪܥܳܐ܇ ܣܰܓܺܝ ܪܰܚܺܝܩ ܫܽܘܠܳܡܳܐ܇ ܐܶܒܠܳܐ ܥܰܠ ܥܳܠܡܳܐ܇ ܕܠܳܐ ܐܺܝܬ ܕܰܡܣܰܟܶܐ܇ ܕܢܺܐܪܰܬ ܚܰܝ̈ܶܐ ܕܰܠܥܳܠܰܡ܇ ܥܰܡ ܟܺܐܢ̈ܶܐ ܕܰܣܢܰܘ ܠܥܳܠܡܳܐ܀

ܝܰܡܰܐܗ̱ܘ ܥܳܠܡܳܐ ܡܠܶܐ ܬܽܘܟ̈ܶܐ܇ ܘܒܺܝܫ̈ܳܬܶܗ ܐܰܝܟ ܪ̈ܽܘܚܶܐ ܢܳܫ̈ܒܳܢ܇ ܘܟܺܐܡ̈ܽܘܢܶܐ ܩܫܰܝ̈ܳܐ܇ ܫܓܺܝ̈ܫܶܐ ܘܥ̈ܰܙܺܝܙܶܐ܇ ܙܩܺܝܦܺܝܢ ܓܰܠ̈ܠܶܐ ܕܰܚܛܺܝܬܳܐ܇ ܕܰܐܝܟ ܐܶܠ̈ܦܶܐ ܢܛܰܒܥܽܘܢ ܢܰܦܫ̈ܳܬܳܐ܀

ܠܗܰܝܟܰܠ ܩܽܘܕܫܳܐ ܕܚܽܘܣܳܝܳܐ܇ ܕܝܽܘܠܦܳܢܳܐ ܕܚܰܝ̈ܶܐ ܒܶܗ ܐܶܬܓܠܺܝ܇ ܥܰܠ ܒܺܝܫܳܐ ܒܢܶܟܠܶܗ܇ ܘܡܰܢܽܘ ܕܠܳܐ ܢܶܒܟܶܐ܇ ܘܰܢܪܺܝܡ ܒܰܚܢܰܓܬܳܐ ܩܶܠܶܗ܇ ܥܰܠ ܛܽܘܥܝܰܝ ܕܰܗܘܳܐ ܒܥܳܠܡܳܐ܀

ܢܽܘܗܪܳܐ ܕܰܪܕܰܦ ܚܶܫܽܘܟܳܐ܇ ܚܶܫܽܘܟܳܐ ܚܰܦܝܶܗ ܘܠܳܐ ܚܙܳܐ܇ ܟܶܗ̈ܢܶܐ ܢܽܘܗܪܳܐ ܗ̱ܘܰܘ܇ ܕܥܳܠܡܳܐ ܐܰܝܟ ܕܰܟܬܺܝܒ ܡܶܛܽܠ ܕܰܪܚܶܡܘ̱ ܡܳܡܽܘܢܳܐ܇ ܗܳܐ ܣܰܩܽܘܒ̈ܠܶܐ ܥܒܺܝܕܺܝܢ ܕܚܰܕ ܚܰܕ܀

ܥܰܡ̈ܡܶܐ ܕܰܦܢܰܘ ܡܶܢ ܛܽܘܥܝܰܝ܇ ܘܒܰܫܪܳܪܶܗ ܕܰܙܩܺܝܦܳܐ ܗܳܐ ܢܗܰܪܘ̱܇ ܘܰܗ̱ܘܰܘ ܒܰܝ̈ܬܳܝܶܐ܇ ܒܐ̱ܪܳܙܶܗ ܕܺܝܚܺܝܕܳܐ܇ ܗܳܐ ܒܒܺܝܫ̈ܳܬܳܐ ܡܶܬܚܰܠܶܝܢ܇ ܘܚܰܕ ܠܚܰܒܪܶܗ ܒܠܶܫܳܢܳܐ ܩܳܛܠܺܝܢ܀

ܨܳܠܶܝܢ ܦܰܚ̈ܶܐ ܠܰܚ̈ܕܳܕܶܐ܇ ܒܢܰܝ̈ܢܳܫܳܐ ܒܟܶܣܝܳܐ ܘܰܒܓܰܠܝܳܐ܇ ܘܠܳܐ ܚܳܝܪܺܝܢ ܒܕܺܝܢܳܐ܇ ܟܺܐܢܳܐ ܕܰܐܠܳܗܳܐ܇ ܫܽܘܒܚܳܐ ܠܕܰܛܥܺܝܢ ܘܰܡܣܰܝܒܰܪ܇ ܒܺܝ̈ܫܳܬܳܐ ܘܣܰܢܝ̈ܳܬܳܐ ܕܥܳܠܡܳܐ܀

ܪܳܡ ܗܽܘ ܥܰܘܠܳܐ ܡܶܢ ܐܰܪܥܳܐ܇ ܘܰܚܛܺܝܬܳܐ ܥܶܒܪܰܬ݀ ܠܪ̈ܳܡܳܬܳܐ܇ ܐܳܐܰܪ ܘܰܡܛܰܡܰܝ܇ ܙܰܒܢܳܐ ܠܰܡ ܡܙܰܠܗܰܙ܇ ܘܛܰܦܛܶܦܘ̱ ܚܰܝ̈ܶܐ ܕܐ̱ܢܳܫܽܘܬܳܐ܇ ܕܰܒܚܰܫܳܐ ܕܰܟܦܽܘܪܝܳܐ ܗܳܐ ܒܠܰܥܘ̱܀

ܬܶܫܒܽܘܚܬܳܐ ܠܳܟ ܒܰܪ ܚܰܝܳܐ܇ ܕܰܒܡܰܘܬܳܟ ܟܽܠ ܥܰܡܡ̈ܺܝܢ ܐܶܬܦܪܶܩܘ̱܇ ܘܒܰܕܡܳܟ ܐܶܬܚܰܘܰܪܘ̱܇ ܟܽܘܬܡ̈ܳܬܳܐ ܕܥܰܒܕ̈ܰܝܟ܇ ܫܰܝܢܳܟ ܢܰܡܠܶܟ ܒܰܒܪܺܝܬܳܐ܇ ܘܰܫܠܳܡܳܟ ܒܥܺܕ̈ܳܬܳܐ ܒܪܺܝܟ ܫܡܳܟ܀

ܚܰܣܺܝܪ ܥܳܠܡܳܐ ܘܰܡܕܰܘܰܕ܇ ܘܰܐܝܟ ܪ̈ܽܘܚܶܐ ܢܳܫܒ̈ܳܢ ܒܺܝܫ̈ܳܬܶܗ܇ ܪ̈ܓܺܝܓܳܬܶܗ ܗܶܒܠܳܐ܇ ܥܽܘܬܪܶܗ ܗܒܰܠ ܗܶܒܠ̈ܺܝܢ܇ ܡܕܰܓܶܠ ܡܰܛܥܶܐ ܠܚܰܒ̈ܺܝܒܰܘܗ̱ܝ܇ ܘܟܽܠ ܐܰܝܢܳܐ ܕܪܳܚܶܡ ܠܶܗ ܡܶܬܒܣܰܪ܀

ܚܙܺܝܿܬ ܒܶܗ ܒܥܳܠܡܳܐ ܒܺܝ̈ܫܳܬܳܐ܇ ܕܰܐܝܟ ܡܶܛܪܳܐ ܥܰܠ ܐ̱ܢܳܫܳܐ ܢܳܚܶܬ܇ ܬܪ̈ܺܝܨܶܐ ܕܰܒܙܺܝܙܺܝܢ܇ ܟܺܐܢ̈ܶܐ ܕܰܛܠܺܝܡܺܝܢ܇ ܝܰܬܡܳܐ ܕܒܳܟܶܐ ܐܳܦ ܡܰܝܠܶܠ܇ ܘܰܐܪܡܶܠܬܳܐ ܕܬܳܒܽܘܥܳܐ ܠܰܝܬ ܠܳܗܿ܀

ܚܙܺܝܿܬ ܕܰܝܳܢܳܐ ܕܠܳܐ ܚܰܟܺܝܡ܇ ܘܟܰܕ ܣܰܟܠܰܐܗ̱ܘ ܦܳܩܶܕ ܘܡܶܫܬܡܰܥ܇ ܘܚܰܟܺܝܡܳܐ ܒܕܺܝܢܳܐ܇ ܘܰܡܩܰܦܰܚ ܟܽܠܝܽܘܡ܇ ܘܡܰܐܣܰܒ ܒܰܐܦ̈ܶܐ ܡܠܶܝܢ ܫܽܘܩ̈ܶܐ܇ ܘܟܰܪ ܕܳܐܙܶܠ ܟܽܠ ܐ̱ܢܳܫ ܡܶܬܬܩܶܠ܀

ܚܙܺܝܿܬ ܬܽܘܒ ܥܰܒܕ̈ܶܐ ܥܰܠ ܪ̈ܰܟܫܳܐ ܘܡܳܪ̈ܰܝܳܐ ܩܕܳܡܰܝܗܽܘܢ ܪܳܗܛܺܝܢ܇ ܒܰܪܓܶܠ ܝܰܩܺܝܪ̈ܶܐ܇ ܘܫܰܦ̈ܠܶܐ ܒܪܰܒܽܘܬܳܐ܇ ܚܙܺܝܿܬ ܐܶܡܗ̈ܳܬܳܐ ܒܺܐܝܩܳܪܳܐ܇ ܘܚܺܐܪ̈ܳܬܳܐ ܕܬܰܢܽܘܪܳܐ ܫܳܓܪ̈ܳܢ܀

ܗܶܦܟܿܶܬ ܘܰܚܙܺܝܿܬ ܟܰܫܺܝܪ̈ܶܐ܇ ܕܰܒܠܺܠܝܳܐ ܘܒܺܐܝܡܳܡܳܐ ܪܳܗܛܺܝܢ܇ ܘܚܰܣܺܝܪܺܝܢ ܠܰܚܡܳܐ܇ ܘܝܰܐܝܺܒܺܝܢ ܠܒܽܘ̈ܫܶܐ܇ ܘܟܰܕ ܡܶܢ ܥܰܡܠܳܐ ܠܳܐ ܫܳܠܶܝܢ܇ ܘܡܶܣܟܺܝܢܺܝܢ ܘܟܳܦܢܺܝܢ ܘܚܳܕܪܺܝܢ܀

ܚܙܺܝܿܬ ܚܰܟܺܝ̈ܡܶܐ ܡܰܠ̈ܳܠܶܐ܇ ܕܢܰܗܺܝܪܺܝܢ ܒܺܝܕܰܥܬܳܐ ܘܚܶܟܡܬܳܐ܇ ܘܰܫܪܶܝܢ ܣܽܘܥܪ̈ܳܢܶܐ܇ ܘܰܡܠܶܝܢ ܝܽܘܬܪ̈ܳܢܶܐ܇ ܘܰܐܝܟ ܗܰܘ ܕܰܗ̱ܘܰܘ ܥܰܬܺܝܪ̈ܶܐ ܥܒܳܕ̈ܰܝܗܽܘܢ ܐܰܝܟ ܢܽܘܗܪܳܐ ܡܰܨܡܚܺܝܢ܀

ܦܬܺܝܚ ܠܶܗ ܦܽܘܡܶܗ ܠܥܰܬܺܝܪܳܐ ܘܡܡܰܠܶܠ ܗܶܦܟܳܐܺܝܬ ܟܰܕ ܬܟܺܝܠ܇ ܘܰܬܪܺܝܨ ܡܶܣܟܺܢܳܐ܇ ܕܟܽܠ ܐ̱ܢܳܫ ܡܩܰܦܰܚ ܠܶܗ܇ ܘܡܰܐܣܰܒ ܒܰܐܦ̈ܶܐ ܡܠܶܝܢ ܫܽܘܩ̈ܶܐ܇ ܘܟܽܠ ܐܰܝܟܳܐ ܕܳܐܙܶܠ ܐ̱ܢܳܫ ܡܶܬܬܩܶܠ܀

ܢܽܘܪܳܐ ܢܛܺܝܪܳܐ ܠܪ̈ܰܫܺܝܥܶܐ܇ ܘܓܰܘܙܰܠܬܳܐ ܠܰܐܝܠܶܝܢ ܕܠܳܐ ܬܳܒܘ̱܇ ܡܦܺܝܣ ܐ̱ܢܳܐ ܡܶܢ ܗܳܪܟܳܐ܇ ܐܳܘ ܣܰܒܪܳܐ ܕܚ̈ܰܝܰܝ܇ ܒܳܟ ܐܶܣܬܰܬܰܪ ܒܗܰܘ ܐܰܬܪܳܐ܇ ܘܰܒܪ̈ܰܚܡܶܐ ܚܽܘܢܰܝܢܝ̱ ܡܳܪܝܳܐ܀

ܦܬܰܚ ܠܺܝ ܬܰܪܥܳܟ ܚܰܢܳܢܳܐ܇ ܘܠܳܐ ܐܶܦܘܽܫ ܡܶܢܳܟ ܒܚܶܫܽܘܟܳܐ܇ ܥܰܡ ܚܰܟܺܝܡ̈ܳܬܳܐ܇ ܐܶܥܽܘܠ ܠܰܓܢܽܘܢܳܟ ܘܠܳܐ ܐܶܩܪܶܐ ܥܰܡ ܣܰܟ̈ܠܳܬܳܐ܇ ܥܰܠ ܬܰܪܥܳܟ ܚܰܬܢܳܐ ܘܠܳܐ ܐܶܬܥܢܶܐ܀

ܐܰܝܟܰܘ ܕܰܠܒܶܫ ܘܶܐܨܛܰܒܰܬ݀܇ ܘܠܳܐ ܩܰܘܺܝ ܫܽܘܦܪܶܗ ܒܥܳܠܡܳܐ܇ ܐܰܝܟܰܘ ܕܶܐܫܬܰܥܠܺܝ܇ ܐܰܝܟܰܘ ܕܶܐܙܕܰܠܰܠ܇ ܐܰܝܟܰܘ ܕܠܳܐ ܛܥܳܐ ܠܰܐܠܳܗܳܐ܇ ܘܬܰܪܥܶܗ ܩܕܳܡ ܝܰܬܡ̈ܶܐ ܐܶܚܰܕ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܠܺܠܝܳܐ ܢܶܦܩܰܬ݀ ܒܰܪ̱ܬ ܥܶܒܪ̈ܳܝܶܐ ܡܶܢ ܓܰܘ ܡܶܨܪܶܝܢ܇ ܘܶܐܠܽܘ ܕܶܡܟܰܬ݀ ܥܽܘܬܪܳܐ ܕܬܶܣܰܒܝ̱ ܠܳܐ ܡܰܨܝܳܐ ܗܘܳܬ݀܇ ܒܠܺܠܝܳܐ ܬܶܬܥܺܝܪܝ̱ ܢܰܦܫܳܐ ܫܦܺܝܬܳܐ ܘܬܶܒܥܶܐ ܪ̈ܰܚܡܶܐ܇ ܕܺܐܝܬ ܠܳܗܿ ܫܠܳܡܳܐ ܘܰܒܗܺܝܠܽܘܬܳܐ ܘܫܰܝܢܳܐ ܪܰܒܳܐ܀

ܠܺܠܝܳܐ ܦܰܟܪܶܗ ܠܟܽܠܶܗ ܥܳܠܡܳܐ ܘܰܐܥܶܠ ܣܳܡܶܗ܇ ܘܰܗ̱ܘܰܘ ܡܺܝ̈ܬܶܐ ܐ̱ܢܳܫܳܐ ܒܫܶܢܬܳܐ ܘܗܳܐ ܒܛܺܝܠܺܝܢ܇ ܘܰܐܝܢܳܐ ܕܡܶܬܬܥܺܝܪ܇ ܢܶܙܡܰܪ ܫܽܘܒܚܳܐ ܒܠܰܝܠܰܘ̈ܳܬܳܐ܇ ܫܳܪܶܐ ܫܽܘܠܛܳܢܶܗ ܕܠܺܠܝܳܐ ܡܶܢܶܗ ܘܰܕܚܶܫܽܘܟܳܐ܀

 

ܡܰܘܪܒܳܐ ܕܠܺܠܝܳܐ ܒܩܳܠܳܐ ܠܶܟܝ̱ ܢܶܬܟܰܫܰܦ

ܗܳܐ ܩܪܶܒ ܘܰܡܛܳܐ܇ ܚܰܫܶܗ ܕܡܶܠܬܳܐ ܐܰܠܳܗܳܐ ܗܰܘ ܕܶܐܬܒܰܣܰܪ܇ ܢܰܐܪܥܺܝܽܘܗ̱ܝ ܐܰܚ̈ܰܝ܇ ܒܝܰܘ̈ܡܳܬܳܐ ܗܳܠܶܝܢ ܕܨܰܘܡܳܐ ܒܰܬܝܳܒܽܘܬܳܐ܇ ܘܰܠܙܰܠܓ̈ܶܐ ܢܰܗܺܝܪ̈ܶܐ܇ ܕܰܩܝܳܡܬܳܐ ܩܰܕܺܝܫܬܳܐ ܢܣܰܟܶܐ ܕܢܶܬܡܰܢܰܥ܀

ܢܶܛܪܽܘܕ ܐܰܚ̈ܰܝ܇ ܠܚܶܫܽܘܟܳܐ ܡܶܬܝܰܕܥܳܢܳܐ ܡܶܢ ܬܰܪ̈ܥܝܳܬܰܢ܇ ܘܰܒܝܰܕ ܢܽܘܗܪܳܐ ܕܙܰܠܺܝܩܰܘ̈ܗ̱ܝ ܕܰܨܠܺܝܒ ܢܽܘܗܪܳܐ ܢܢܗܪܘ ܥ̈ܝܢܝܢ܇ ܘܢܕܟܐ ܢܦܫ̈ܬܢ܇ ܒܨܰܘܡܳܐ ܒܬܝܒܘܬܐ܇ ܘܢܬܰܡܳܢܥ ܠܦܨܚܗ܀

ܒܪܺܝܟ ܗܽܘ ܡܫܺܝܚܳܐ܇ ܕܩܰܒܶܠ ܥܠܰܘܗ̱ܝ ܨܰܘܡܳܐ ܕܰܟܝܳܐ ܡܶܛܽܠܳܬܰܢ܇ ܘܒܳܬܰܪ ܐܰܪܒܥܺܝܢ܇ ܩܪܶܒ ܢܰܣܝܶܗ ܐܳܟܶܠܩܰܪܨܳܐ ܟܰܕ ܟܦܶܢ ܒܓܰܘ ܕܰܒܪܳܐ܇ ܘܰܒܳܟܰܦܢܶܗ ܣܰܒܰܥ ܠܰܢ܇ ܘܰܒܨܰܘܡܶܗ ܚܰܝܶܠ ܠܰܢ ܕܠܳܐ ܬܽܘܒ ܢܶܬܢܰܣܶܐ܀

 

ܫܰܒܰܚܘ̱ ܠܡܳܪܝܳܐ ܒܩܳܠܳܐ܇ ܡܫܰܒܚܺܝܢ ܠܳܟ ܡܳܪܝܳܐ

ܨܰܘܡܳܐ ܩܰܕܺܝܫܳܐ܇ ܝܰܘܡܳܢ ܐܶܬܡܰܨܰܥ ܕܨܳܡܶܗ ܡܶܨܥܳܝܳܐ܇ ܕܰܬܠܺܝܬܳܝܽܘܬܳܐ܀

ܒܰܡܨܰܥܬܳܗܿ ܕܥܺܕܬܳܐ܇ ܢܺܝܫܳܐ ܕܙܳܟܽܘܬܳܐ܇ ܩܒܰܥ ܠܰܢ ܒܪܳܐ ܡܫܺܝܚܳܐ܇ ܕܒܶܗ ܢܕܽܘܫ ܣܳܛܳܢܳܐ܀

ܒܡܶܨܥܰܬ ܒܰܪ̱ܬ ܥܰܡ̈ܡܶܐ ܩܒܰܥ܇ ܒܽܘܟܪܳܐ ܢܺܝܫܶܗ܇ ܘܟܽܠ ܡܰܢ ܕܛܳܦܶܣ ܒܶܗ܇ ܫܶܐܠ̈ܳܬܶܗ ܢܳܣܶܒ܀

ܗܳܐ ܡܛܳܐ ܠܶܗ ܚܰܫܶܗ܇ ܘܰܐܢ̱ܬܰܘܢ ܕܠܳܐ ܙܘܳܕ̈ܶܐ܇ ܩܽܘܡܽܘܢ ܐܶܬܟܰܫܰܪܘ̱܇ ܕܬܶܚܕܽܘܢ ܒܰܩܝܳܡܬܳܐ܀

ܫܶܡܥܿܶܬ ܕܝܽܘܕ̈ܳܝܶܐ܇ ܠܺܝ̈ܛܶܐ ܣܳܢܶܝܢ ܠܳܟ܇ ܘܒܳܥܶܝܢ ܕܢܶܩܛܠܽܘܢ ܚܰܝܰܝ̈ܟ ܒܰܚܣܳܡܳܐ܀

ܦܰܢܺܝ ܠܶܗ ܡܫܺܝܚܳܐ܇ ܠܰܐܒܓܰܪ ܐܽܘܟܳܡܳܐ܇ ܬܶܗܘܶܐ ܐܰܢ̱ܬ ܘܟܰܪܟܳܟ܇ ܒܪܺܝܟ ܥܕܰܡܳܐ ܠܥܳܠܰܡ܀

ܐܰܝܟ ܕܒܰܪܶܟ ܡܳܪܰܢ܇ ܠܰܐܒܓܰܪ ܘܠܰܡܕܺܝܢ̱ܬܶܗ܇ ܒܰܪܶܟ ܡܳܪܝ̱ ܠܟܽܠܰܢ܇ ܘܚܰܣܳܐ ܠܰܢ ܚܰܘܒ̈ܰܝܢ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܒܕܽܘܟܪܳܢ ܝܳܠܶܕܬܳܟ

ܐܳܬܳܐ ܕܫܰܝܢܳܐ ܘܢܺܝܫܳܐ ܕܙܳܟܽܘܬܳܐ܇ ܡܰܥܒܶܕ ܚܰܝ̈ܶܐ ܨܠܺܝܒܳܐ ܩܰܕܺܝܫܳܐ܇ ܕܒܶܗ ܗܽܘ ܐܶܬܦܪܶܩ ܓܶܢܣܰܢ܇ ܡܶܢ ܛܽܘܥܝܰܝ ܕܟܽܠ ܐܰܠܳܗܺܝ̈ܢ܀

ܡܰܨܰܥ ܪܶܗܛܶܗ ܕܨܰܘܡܳܐ ܩܰܕܺܝܫܳܐ܇ ܘܰܡܛܳܐ ܚܰܫܶܗ ܕܰܐܠܳܗܳܐ ܡܶܠܬܳܐ܇ ܘܰܒܝܰܕ ܙܰܠܺܝ̈ܩܶܐ ܕܢܽܘܗܪܳܐ ܕܰܨܠܺܝܒܳܐ܇ ܛܰܠܶܩ ܚܶܫܽܘܟܳܐ ܕܰܚܛܺܝܬܳܐ܀

ܒܡܶܨܥܰܬ ܥܺܕܬܳܐ ܕܰܦܪܰܩ ܗܘܳܐ ܒܰܕܡܶܗ܇ ܨܠܺܝܒܳܐ ܕܚܰܝ̈ܶܐ ܩܒܰܥ ܗܘܳܐ ܦܳܪܽܘܩܰܢ܇ ܡܫܺܝܚܳܐ ܐܰܠܳܗܳܐ ܕܝܰܗܒܠܰܢ ܙܰܝܢܳܐ܇ ܢܺܝܫܶܗ ܡܝܰܩܪܳܐ ܘܩܰܕܺܝܫܳܐ܀

ܒܡܶܨܥܰܬ ܨܰܘܡܳܐ ܠܳܟ ܗܽܘ ܩܳܪܶܝܢܰܢ܇ ܒܡܶܨܥܰܬ ܥܺܕܬܳܐ ܩܕܳܡܰܝܟ ܓܳܥܶܝܢܰܢ܇ ܡܰܨܰܥ ܠܟܽܠܰܢ܇ ܡܰܢܰܥ ܠܰܢ܇ ܠܦܶܨܚܳܐ ܦܨܺܝܚܳܐ ܕܰܩܝܳܡܬܳܟ܀

 

ܕܰܐܠܳܗܝ̱ ܐܰܠܳܗܝ̱ ܒܩܳܠܳܐ ܗܰܘ ܕܩܳܡ ܡܶܢ ܒܶܝܬ ܡܺܝ̈ܬܶܐ

ܚܶܘܝܳܐ ܕܰܢܚܳܫܳܐ ܩܒܰܥ ܗܘܳܐ܇ ܡܽܘܫܶܐ ܒܡܶܨܥܰܬ ܡܰܫܪܺܝܬܳܐ܇ ܘܒܶܗ ܐܰܣܺܝ ܠܥܰܡܳܐ ܕܶܐܬܢܰܟܺܝ܇ ܒܢܽܘܟ̈ܬܳܬܳܐ ܕܗܰܘ ܚܰܪܡܳܢܳܐ ܟܳܗ̈ܢܶܐ ܙܗ̈ܰܝܳܐ ܫܰܒܚܽܘܘܗ̱ܝ܀

ܚܶܘܝܳܐ ܕܰܢܚܳܫܳܐ ܕܰܐܩܺܝܡ ܒܰܪ ܥܰܡܪܰܡ܇ ܒܓܰܘ ܡܰܫܪܺܝܬܳܐ܇ ܨܳܪܳܗܿ ܠܰܨܠܺܝܒܳܐ ܚܰܝܳܐ܇ ܕܒܶܗ ܥܺܕܰܬ ܩܽܘܕܫܳܐ ܦܪܺܝܩܳܐ܇ ܟܳܗ̈ܢܶܐ ܙܗ̈ܰܝܳܐ ܫܰܒܚܽܘܘܗ̱ܝ܀

ܢܺܝܫܳܐ ܕܚܰܝ̈ܶܐ ܩܒܰܥ ܣܳܡ ܠܰܢ܇ ܦܳܪܽܘܩܰܢ ܒܡܶܨܥܰܬ ܨܰܘܡܳܐ܇ ܘܢܶܙܟܶܐ ܠܒܺܝܫܳܐ ܘܰܠܚܰܝܠܶܗ ܘܢܶܩܢܶܐ ܚܰܝ̈ܶܐ ܪ̈ܽܘܚܳܢܶܐ ܟܳܗ̈ܢܶܐ ܙܗ̈ܰܝܳܐ ܫܰܒܚܽܘܘܗ̱ܝ܀

ܟܡܳܐ ܫܰܦܺܝܪܳܐ ܘܰܬܡܺܝܗܳܐ ܡܕܰܒܪܳܢܽܘܬܶܗ ܕܦܳܪܽܘܩܰܢ܇ ܕܰܒܡܶܨܥܰܬ ܨܰܘܡܳܐ܇ ܩܒܰܥ ܠܰܢ܇ ܢܺܝܫܶܗ ܕܰܨܠܺܝܒܳܐ ܦܰܐܝܳܐ ܟܳܗ̈ܢܶܐ ܙܗ̈ܰܝܳܐ ܫܰܒܚܽܘܘܗ̱ܝ܀

ܟܰܪܟܳܐ ܚܰܕ ܙܽܥܘܪܳܐ ܐܺܝܬ ܠܺܝ܇ ܘܣܳܦܶܩ ܗܽܘ ܠܰܬܪܶܝܢ ܘܶܐܢܳܐ܇ ܐܶܗܘܶܐ ܠܳܟ ܥܰܒܕܳܐ ܠܥܳܠܰܡ܇ ܘܠܳܐ ܬܶܓܠܙܰܢܝ̱ ܡܶܢ ܥܶܢܝܳܢܳܟ ܟܳܗ̈ܢܶܐ ܙܗ̈ܰܝܳܐ ܫܰܒܚܽܘܘܗ̱ܝ܀

ܘܡܶܢ ܕܰܡܛܳܬ݀ ܗܘܳܬ݀ ܨܶܝܕ ܐܰܒܓܰܪ܇ ܫܽܘܫܶܦܳܐ ܚܕܺܝ ܒܶܗ ܣܰܓܺܝ܇ ܘܢܰܫܩܶܗ ܘܣܳܡܶܗ ܥܰܠ ܥܰܝܢ̈ܰܘܗ̱ܝ܇ ܘܒܶܗ ܒܫܳܥܬܳܐ ܢܶܗܪܰܬ݀ ܢܰܦܫܶܗ܇ ܟܳܗ̈ܢܶܐ ܙܗ̈ܰܝܳܐ ܫܰܒܚܽܘܘܗ̱ܝ܀

ܠܳܟ ܫܽܘܒܚܳܐ ܡܳܪܳܐ ܛܳܒܳܐ܇ ܕܰܠܬܽܘܪܳܨܶܗ ܕܰܟܝܳܢܰܢ܇ ܫܰܠܡܺܝܬ ܐ̱ܪ̈ܳܙܶܐ ܕܡܶܐܬܺܝܬܳܟ܇ ܒܟܽܠܗܽܘܢ ܛܽܘܦ̈ܣܶܐ ܘܦ̈ܶܠܳܐܬܳܐ ܟܳܗ̈ܢܶܐ ܙܗ̈ܰܝܳܐ ܫܰܒܚܽܘܘܗ̱ܝ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܐܰܢ̱ܬ ܕܰܒܪܺܝܫܺܝܬ

ܡܰܠܟܳܐ ܡܫܺܝܚܳܐ܇ ܐܶܬܬܠܺܝ ܒܩܰܝܣܳܐ ܠܦܽܘܪܩܳܢܰܢ܇ ܘܰܗܘܳܐ ܕܶܒܚܳܐ܇ ܘܚܰܪܰܪ ܠܰܢ ܡܶܢ ܕܶܒܚ̈ܳܬܳܐ ܡܒܰܪܟܳܐ܀

ܬܶܣܓܽܘܕܝ̱ ܥܺܕܬܳܐ ܘܗܺܝ ܘܝܰܠܕܶܝ̈ܗܿ ܠܳܟ ܙܰܟܳܝܳܐ܇ ܘܬܶܙܡܰܪܝ̱ ܫܽܘܒܚܳܐ܇ ܕܰܒܨܠܺܝܒܳܟ ܚܰܝܳܐ ܦܪܰܩܬܳܗܿ܀

ܒܚܽܘܛܪܳܐ ܨܠܺܝܒܳܐ܇ ܦܠܰܓ ܡܽܘܫܶܐ ܪܰܒܳܐ ܝܰܡܳܐ ܘܰܥܒܰܪ ܥܰܡܳܐ܇ ܒܝܰܒܺܝܫܬܳܐ ܒܓܰܘ ܝܰܡܳܐ ܕܣܽܘܦ ܡܒܰܪܟܳܐ܀

ܡܳܪܰܢ ܝܶܫܽܘܥ܇ ܠܐ̱ܪ̈ܳܙܶܐ ܕܰܨܠܺܝܒܳܟ ܨܳܪ ܗܘܳܐ ܡܽܘܫܶܐ ܢܒܺܝܳܐ܇ ܒܚܶܘܝܳܐ ܕܰܐܪܺܝܡ ܒܡܰܫܪܺܝܬܳܐ ܡܒܰܪܟܳܐ܀

ܐܰܫܘܳܐ ܠܰܢ ܡܳܪܝ̱܇ ܕܢܶܚܙܶܝܟ ܒܝܰܘܡܳܐ ܕܰܩܝܳܡܬܳܐ ܘܥܰܡܳܟ ܢܶܚܕܶܐ܇ ܘܥܰܡ ܐܰܒܓܰܪ ܒܰܓܢܽܘܢ ܢܽܘܗܪܳܐ܀

 

ܬܶܫܒܽܘܚܬܳܐ ܚܕܰܬܳܐ

ܒܩܳܠܳܐ ܗܰܘ ܕܰܒܛܽܘܪܳܐ

ܣܳܓܕܺܝܢܰܢ ܡܳܪܝ̱ ܠܰܨܠܺܝܒܳܟ ܡܰܥܒܶܕ ܚܰܝ̈ܶܐ܇ ܕܒܶܗ ܐܶܬܦܰܪܩܰܬ݀ ܡܰܫܪܺܝܬܳܐ ܕܺܐܝܣܰܪ̈ܠܳܝܶܐ܇ ܒܺܐܝܕ̈ܰܝ ܡܽܘܫܶܐ ܡܶܢ ܥܰܒܕܽܘܬܳܐ ܕܡܶܨܪ̈ܳܝܶܐ ܠܡܳܪܝܳܐ ܫܰܒܰܚܘ̱܀

ܐܳܬܳܐ ܕܫܰܝܢܳܐ܇ ܙܳܟܽܘܬܳܐ ܨܠܺܝܒܳܐ ܐܺܝܬܰܘܗ̱ܝ ܗܰܘ ܕܰܠܥܺܕܬܳܐ ܩܰܕܺܝܫܬܳܐ ܦܪܰܩ ܡܶܢ ܒܺܝ̈ܫܶܐ܇ ܘܡܶܢ ܣܶܓܕ̈ܳܬܳܐ ܕܨܰܠܡ̈ܶܐ ܚܰܪ̈ܒܶܐ ܕܰܦܬܰܟܪܽܘܬܳܐ܇ ܠܡܳܪܝܳܐ ܫܰܒܰܚܘ̱܀

 

ܛܠܳܝ̈ܶܐ ܐܰܒܪ̈ܳܗܳܡܳܝܶܐ

ܬܶܫܒܽܘܚܬܳܐ ܕܠܳܐ ܡܶܬܚܰܒܠܳܐ܇ ܐܳܘ ܟܰܫܺܝܪ̈ܶܐ ܐܶܬܥܰܛܰܦܘ̱ ܒܝܰܘܡ̈ܳܬܳܐ ܕܨܰܘܡܳܐ ܕܒܰܡܨܰܥܬܶܗ ܩܳܝܡܺܝܬܽܘܢ܇ ܘܠܰܡܫܺܝܚܳܐ ܐܰܙܥܶܩܘ̱ ܘܶܐܡܰܪܘ̱܀

ܩܒܽܘܥܘ̱ ܘܣܰܬܶܬܰܘ̱ ܒܠܶܒܰܘ̈ܳܬܟܽܘܢ܇ ܠܢܺܝܫܶܗ ܦܰܐܝܳܐ ܕܰܨܠܺܝܒܳܐ܇ ܐܰܝܟ ܕܰܩܒܰܥ ܡܽܘܫܶܐ ܠܚܶܘܝܳܐ ܕܰܢܚܳܫܳܐ܇ ܐܰܣܰܘ ܟܺܐܒܰܝ̈ܗܽܘܢ ܘܰܐܙܥܶܩܘ̱ ܡܒܰܪܰܟ܀

ܒܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܘܶܐܬܢܰܨܰܚܘ̱ ܒܕܳܪ̈ܺܝܢ ܕܳܪ̈ܺܝܢ܇ ܘܰܫܦܰܪܘ̱ ܠܰܐܠܳܗܳܐ ܟܽܠܗܽܘܢ ܙܰܕܺܝ̈ܩܶܐ܇ ܘܰܒܕܰܟܝܽܘܬ ܠܶܒܳܐ ܐܰܙܥܶܩܘ̱ ܡܒܰܪܰܟ ܐܰܢ̱ܬ܀

ܒܪܳܐ ܕܒܰܒܣܰܪ ܗܘܳܐ ܡܶܨܥܳܝܳܐ܇ ܕܰܐܠܳܗܳܐ ܘܕܰܒܢ̈ܰܝ ܐ̱ܢܳܫ̈ܳܐ܇ ܘܰܒܡܶܨܥܰܬ ܨܰܘܡܳܐ ܚܰܘܺܝ ܠܰܢ ܢܺܝܫܶܗ ܕܠܶܗ ܣܳܓܕܺܝܢܰܢ ܡܒܰܪܰܟ ܐܰܢ̱ܬ ܡܳܪܝܳܐ܀

 

ܡܰܘܪܒܳܐ ܒܩܳܠܳܐ ܠܶܟܝ̱ ܦܰܐܝܳܐ ܕܰܢܩܰܠܶܣ

ܬܝܳܒܽܘܬܳܐ ܡܩܰܒܰܠܬܳܐ ܬܶܗܘܶܐ ܠܰܢ ܦܳܪܽܘܩܰܢ܇ ܘܰܦܬܰܚ ܠܰܢ ܬܰܪܥܳܐ ܕܪ̈ܰܚܡܶܐ ܘܕܰܚܢܳܢܳܐ܇ ܘܫܰܟܶܢ ܠܰܢ ܫܽܘܒܩܳܢ ܚܰܘܒ̈ܳܬܰܢ܇ ܘܶܐܬܪܰܚܰܡܥܠܰܝܢ܀

ܒܡܶܨܥܰܬ ܨܰܘܡܳܐ ܩܰܕܺܝܫܳܐ܇ ܠܳܟ ܡܶܬܟܰܫܦܺܝܢܰܢ ܐܰܠܳܗܳܐ܇ ܦܬܰܚ ܠܰܢ ܒܶܝܬܓܰܙܳܟ ܥܰܬܺܝܪܳܐ܇ ܘܰܐܫܘܳܢ ܕܢܶܬܡܰܢܰܥ ܠܦܶܨܚܳܐ ܕܰܩܝܳܡܬܳܟ܀

 

ܐ̱ܚܪܺܢܳܐ ܒܩܳܠܳܐ ܣܰܢܝܳܐ ܗܰܘ ܕܰܚܙܳܐ

ܐܶܬܡܰܨܰܥ ܝܰܘܡܳܢ ܚܰܒܺܝ̈ܒܰܝ܇ ܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܢܰܐܪܥܺܝܘܗ̱ܝ ܟܽܠܰܢ ܒܕܰܟܝܽܘܬܳܐ܇ ܕܢܶܬܡܰܢܰܥ ܒܶܗ ܠܰܩܝܳܡܬܳܐ܇ ܠܦܽܘܪܩܳܢܳܐ ܘܫܽܘܙܳܒܳܐ ܕܺܝܠܰܢ܀

 

ܫܰܒܰܚܘ̱ ܠܡܳܪܝܳܐ ܒܩܳܠܳܐ܇ ܒܥܶܕܳܢ ܨܰܦܪܳܐ

ܨܰܘܡܳܐ ܕܰܟܝܳܐ܇ ܒܰܣܺܝܡ ܗܽܘ ܠܰܐܝܠܶܝܢ ܕܨܳܝܡܺܝܢ ܠܶܗ܇ ܘܩܰܠܺܝܠܳܐ ܡܘܰܒܠܶܗ ܕܶܝܢ ܥܠܰܝܗܽܘܢ ܟܰܕ ܚܳܕܶܝܢ܀

ܢܟܽܘܦ ܨܰܘܪܰܢ܇ ܐܰܚ̈ܰܝ ܘܢܰܡܶܟ ܢܰܦܫ̈ܳܬܰܢ܇ ܘܢܶܦܠܽܘܚ ܒܶܗ ܒܨܰܘܡܳܐ ܩܰܕܺܝܫܳܐ܇ ܟܰܕ ܐܳܡܪܺܝܢܰܢ܇ ܫܽܘܒܚܳܐ ܠܳܟ ܐܰܠܳܗܳܐ܀

ܬܶܒܣܰܡܝ̱ ܠܳܟ ܡܳܪܝ̱܇ ܨܠܽܘܬܳܐ ܕܰܡܩܰܪܒܺܝܢ ܥܰܒܕ̈ܰܝܟ܇ ܘܨܰܘܡܰܢ ܢܶܗܘܶܐ ܠܰܢܝܳܚܳܟ܇ ܘܢܶܩܥܶܐ ܘܢܺܐܡܰܪ ܫܽܘܒܚܳܐ ܠܳܟ܀

ܐܺܝܕ̈ܰܝܢ ܢܶܦܫܽܘܛ ܒܙܶܕܩ̈ܳܬܳܐ܇ ܠܰܐܝܠܶܝܢ ܕܰܣܢܺܝܩܺܝܢ܇ ܕܥܰܡ ܒܽܘܟܪܳܐ ܢܶܚܕܶܐ ܒܡܰܠܟܽܘܬܳܐ܇ ܟܰܕ ܩܳܥܶܝܢܰܢ܀

ܒܡܶܨܥܰܬ ܨܰܘܡܳܐ ܢܶܩܒܽܘܥ ܒܰܢ܇ ܢܺܝܫܳܐ ܕܙܳܟܽܘܬܳܐ܇ ܘܢܶܬܟܰܫܰܪ ܒܦܽܘܠܚܳܢ ܟܺܐܢܽܘܬܳܐ܇ ܢܶܩܥܶܐ ܘܢܺܐܡܰܪ܇ ܫܽܘܒܚܳܐ ܠܳܟ܀

ܚܰܫܶܗ ܕܰܒܪܳܐ ܗܳܐ ܩܪܶܒ ܠܶܗ ܡܶܟܺܝܠ ܚܰܒܺܝ̈ܒܰܝ܇ ܢܛܰܝܶܒ ܠܶܗ ܙܘ̈ܳܕܶܐ ܠܝܽܘܡ ܦܶܨܚܳܐ܇ ܢܶܩܥܶܐ ܘܢܺܐܡܰܪ܇ ܫܽܘܒܚܳܐ ܠܳܟ܀

ܡܰܠܟܳܐ ܐܰܒܓܰܪ܇ ܝܰܕܥܶܗ ܗܰܘ܇ ܕܡܰܢܽܘ ܒܰܪ ܡܰܢܽܘ܇ ܘܰܠܛܽܘܗܡܶܗ ܪܰܒܳܐ ܐܶܬܪܰܓܪܰܓ ܟܰܕ ܡܰܙܥܶܩ ܫܽܘܒܚܳܐ܀

ܫܽܘܒܚܳܐ ܠܳܟ ܡܳܪܝ̱܇ ܕܝܰܗܒܬ ܝܽܘܩܢܳܟ܇ ܒܫܽܘܫܶܦܳܐ ܠܰܐܒܓܰܪ ܕܶܐܬܪܰܓܪܰܓ ܠܰܚܙܳܬܳܟ܇ ܘܦܶܓܥܳܟ ܟܰܕ ܐܳܡܰܪ܇ ܫܽܘܒܚܳܐ ܠܳܟ ܐܰܠܳܗܳܐ܀

 

ܛܽܘܒܰܝܗܽܘܢ ܠܡܶܣܟ̈ܺܢܶܐ ܒܩܳܠܳܐ ܡܳܐ ܕܳܐܬܶܐ ܐܰܢ̱ܬ

ܒܪܺܝܟ ܗܽܘ ܕܝܰܗܒܠܰܢ܇ ܥܰܡ ܨܰܘܡܳܐ ܢܺܝܫܳܐ ܕܚܰܝ̈ܶܐ܇ ܕܰܢܩܺܝܡܺܝܘܗ̱ܝ ܠܽܘܩܒܰܠ ܒܺܝܫܳܐ܇ ܘܰܢܰܫܗܶܐ ܠܚܰܝܠܶܗ܇ ܐܶܬܕܰܟܪܰܝܢ܀

ܐܰܫܘܳܐ ܠܰܢ ܡܳܪܝ̱ ܕܰܒܨܰܘܡܳܐ ܘܰܨܠܰܘ̈ܳܬܳܐ ܘܰܒܚܰܝܠܶܗ ܕܰܨܠܺܝܒ ܢܽܘܗܪܳܐ ܢܶܫܬܘܶܐ ܠܡܰܟܠܽܘܬܳܐ܀

ܢܰܘܕܶܐ ܘܢܶܣܓܽܘܕ ܠܰܡܫܺܝܚܳܐ ܕܰܒܝܰܕ ܨܰܘܡܶܗ܇ ܢܺܝܫܶܗ ܦܰܐܝܳܐ ܕܰܨܠܺܝܒܳܐ ܡܶܢ ܛܽܘܥܝܰܝ ܦܰܪܩܰܢ܇ ܐܶܬܕܰܟܪܰܝܢ ܡܳܪܝܳܐ܀

 

ܐ̱ܚܪܺܢܳܐ ܒܩܳܠܳܐ ܡܳܐ ܫܰܦܺܝܪ ܗܘܳܐ

ܗܘܳܐ ܐ̱ܢܳܫܳܐ ܚܠܳܦ ܐ̱ܢܳܫ̈ܳܐ܇ ܟܰܕ ܐܰܠܳܗܰܐܗ̱ܘ ܨܳܡ ܐܶܬܢܰܣܺܝ ܡܶܢ ܒܺܝܫܳܐ ܕܰܐܩܪܶܒ ܥܰܡܶܗ ܘܣܰܚܦܶܗ ܘܰܫܕܳܝܗ̱ܝ܇ ܘܝܰܗܒܠܰܢ ܙܰܝܢܳܐ܇ ܕܒܶܗ ܢܶܙܟܶܐ ܠܰܒܥܶܠܕܰܪܳܐ܀

ܪܰܒܳܐܗ̱ܝ ܨܰܘܡܳܐ ܕܰܟܝܳܐ܇ ܘܰܪܚܺܝܡܳܐ ܬܽܘܒ ܘܰܐܣܓܺܝ ܨܠܽܘܬܳܐ܇ ܘܰܡܝܰܬܰܪ ܡܶܢܗܽܘܢ ܚܽܘܒܳܐ ܘܠܶܒܳܐ ܫܰܦܝܳܐ܇ ܗܳܟܰܢܳܐ ܢܨܽܘܡ܇ ܕܢܶܫܬܘܶܐ ܠܫܽܘܒܩܳܢ ܚܰܘܒ̈ܳܬܰܢ܀

 

ܩܳܠܳܐ ܕܨܰܦܪܳܐ ܒܩܳܠܳܐ ܩܽܘܩܳܝܳܐ

ܗܳܐ ܙܰܒܢܳܐ ܠܰܬܝܳܒܽܘܬܳܐ ܐܳܘ ܚܰܒܺܝ̈ܒܰܝ܇ ܘܡܰܨܰܥ ܨܰܘܡܳܐ ܩܰܕܺܝܫܳܐ ܕܰܡܠܶܐ ܟܽܠ ܫܽܘܦܪ̈ܺܝܢ܇ ܗܽܘ ܡܰܥܠܶܐ ܠܰܢ ܠܪܰܘܡܳܐ ܕܰܫܡܰܝܳܐ܇ ܘܗܽܘ ܡܰܦܪܰܚ ܠܰܢ ܒܶܐܒܪ̈ܶܐ ܩܰܠܺܝ̈ܠܶܐ܇ ܢܶܦܠܽܘܚ ܒܶܗ ܙܰܕܺܝܩܽܘܬܳܐ ܘܰܥܒ̈ܳܕܶܐ ܡܝܰܬܪ̈ܶܐ܇ ܕܢܶܬܡܰܢܰܥ ܠܦܶܨܚܳܐ ܦܨܺܝܚܳܐ ܕܰܩܝܳܡܬܶܗ ܕܰܒܪܳܐ܀

ܐܰܒܓܰܪ ܡܰܠܟܳܐ ܙܰܕܺܝܩܳܐ ܫܠܰܚ ܠܰܡܫܺܝܚܳܐ܇ ܒܗܰܝܡܳܢܽܘܬܳܐ ܕܰܫܪܳܪܳܐ ܘܗܳܟܰܢܳܐ ܐܶܡܰܪ܇ ܫܶܡܥܿܶܬ ܥܠܰܝܟ ܕܳܐܣܝܳܐ ܐܰܢ̱ܬ ܛܳܒܳܐ܇ ܘܡܰܓܳܢ ܡܰܐܣܶܝܬ ܠܟܽܠܗܽܘܢ ܡܰܐܟ̈ܰܒܶܐ܇ ܝܶܠܦܿܶܬ ܠܺܝ ܫܰܪܺܝܪ̈ܳܬܳܐ ܕܺܐܝܬܰܝܟ ܐܰܠܳܗܳܐ܇ ܕܰܢܚܶܬܬ ܡܶܢ ܪܰܘܡܳܐ ܠܥܽܘܡܩܳܐ ܕܬܰܐܣܶܐ ܠܰܟܪ̈ܺܝܗܶܐ ܗ ܗ܀

 

ܐ̱ܚܪܺܢܳܐ ܒܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܩܪܶܒ ܘܰܡܛܳܐ ܠܶܗ ܙܰܒܢܳܐ ܕܚܰܫܶܗ ܕܡܳܪܰܢ܇ ܬܰܘ ܢܰܬܩܶܢ ܠܰܢ ܦܳܪ̈ܽܘܫܶܐ ܙܘܳܕ̈ܶܐ ܕܚܳܫܚܺܝܢ ܠܶܗ܇ ܫܰܗܪܳܐ ܘܨܰܘܡܳܐ ܕܰܟܝܳܐ ܐܳܦ ܙܶܕܩ̈ܳܬܳܐ܇ ܘܦܽܘܠܚܳܢܳܐ ܕܙܰܕܺܝܩܽܘܬܳܐ ܘܰܨܠܽܘܬܳܐ ܕܟܺܝܬܳܐ܇ ܕܡܳܐ ܕܗܳܘܝܳܐ ܩܝܳܡܬܶܗ ܕܰܡܫܺܝܚܳܐ܇ ܢܶܬܡܰܢܰܥ ܥܰܡܶܗ ܠܰܓܢܽܘܢܳܐ܇ ܘܢܶܬܒܰܣܰܡ ܥܰܠ ܦܳܬܽܘܪܳܐ ܕܰܡܠܶܐ ܛܳܒ̈ܳܬܳܐ܀

ܡܽܘܫܶܐ ܢܒܺܝܳܐ ܪܰܒܳܐ ܗܰܘ ܒܰܪ ܥܰܡܪܰܡ܇ ܚܶܘܝܳܐ ܕܰܢܚܳܫܳܐ ܩܒܰܥ ܗܘܳܐ ܘܰܐܩܺܝܡ ܒܓܰܘ ܥܰܡܳܐ܇ ܘܡܳܐ ܕܶܐܬܢܰܟܰܬܰܘ̱ ܐ̱ܢܳܫ̈ܳܐ ܡܶܢ ܥܶܒܪ̈ܳܝܶܐ܇ ܡܶܢ ܚܰܪ̈ܡܳܢܶܐ ܪܗܶܛܘ̱ ܚܳܪܘ̱ ܗ̱ܘܰܘ ܒܚܶܘܝܳܐ ܕܰܢܚܳܫܳܐ܇ ܘܶܐܬܰܐܣܺܝܽܘ ܡܶܢ ܝܰܕ ܚܘܰܘ̈ܳܬܳܐ܇ ܘܨܳܪ ܛܽܘܦܣܶܗ ܕܰܨܠܺܝܒܳܐ ܚܰܝܳܐ܇ ܕܰܠܣܳܛܳܢܳܐ ܘܡܰܫܪܺܝܬܶܗ ܡܰܘܒܶܕ ܘܰܡܛܰܠܶܩ܀

ܩܪܶܒ ܘܰܡܛܳܐ ܠܶܗ ܙܰܒܢܳܐ ܕܢܺܐܬܶܐ ܡܫܺܝܚܳܐ܇ ܐܰܝܟ ܕܰܡܚܰܘ̈ܝܳܢ ܐܳܬܰܘ̈ܳܬܳܐ ܕܰܒܣܒܰܪܬܳܐ ܪ̈ܫܺܝܡܳܢ܇ ܗܳܐ ܩܳܡܰܬ݀ ܡܰܠܟܽܘܬܳܐ ܥܰܠ ܡܰܠܟܽܘܬܳܐ܇ ܘܗܳܐ ܒܰܐܬܪ̈ܰܘܳܢ ܐܰܬܪ̈ܰܘܳܢ ܣܶܕ̈ܩܶܐ ܚܶܪ̈ܝܳܢܶܐ܇ ܐܰܠܳܗܳܐ ܕܰܒܪ̈ܰܚܡܶܐ ܓܒܰܠܬܳܢܝ̱ ܘܠܳܐ ܬܶܪܕܶܝܢܝ̱ ܒܪܽܘܓܙܳܐ ܘܰܒܚܶܡܬܳܐ܇ ܪܕܺܝܢܝ̱ ܒܪ̈ܰܚܡܶܐ ܩܢܺܝܢܝ̱ ܒܰܚܢܳܢܳܟ܇ ܘܚܽܘܣ ܘܶܐܬܪܰܚܰܡܥܠܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܨܰܦܪܳܐ ܢܰܘܕܽܘܢ ܐܳܦ ܬܰܐܓܳܪ̈ܶܐ ܒܓܰܘ ܐܽܘܪ̈ܚܳܬܳܐ܇ ܕܢܽܘܗܪܳܐ ܗܘܳܐ ܠܗܽܘܢ ܠܶܘܝܳܐ ܒܰܫܒܺܝܠܰܝ̈ܗܽܘܢ܇ ܢܰܘܕܽܘܢ ܠܳܟ ܡܳܪܝ̱ ܐܳܦ ܐܽܘܡ̈ܳܢܶܐ ܕܰܥܒܺܝ̈ܕܳܬܳܐ܇ ܕܨܰܦܪܳܐ ܫܰܕܰܪܬ ܕܢܰܥܺܝܪ ܐܶܢܽܘܢ ܥܰܠ ܦܽܘܠܚܳܢܳܐ܀

ܬܰܘܕܶܐ ܠܳܟ ܡܳܪܝ̱ ܥܺܕܰܬ ܩܽܘܕܫܳܐ ܘܟܽܠܗܽܘܢ ܝܰܠܕܶܝ̈ܗܿ܇ ܕܚܰܪܰܪܬ ܐܶܢܽܘܢ ܡܶܢ ܚܶܫܽܘܟܳܐ ܗܰܘ ܕܰܚܛܺܝܬܳܐ܇ ܒܨܰܦܪܳܐ ܪܰܒܳܐ ܒܢܽܘܗܪܳܟ ܚܰܕܬܳܐ ܡܳܐ ܕܕܳܢܰܚ ܐܰܢ̱ܬ܇ ܬܶܚܕܶܐ ܥܰܡܳܟ ܒܶܝܬ ܡܰܠܟܽܘܬܳܐ ܠܳܟ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ ܒܩܳܠܳܐ ܩܽܘܩܳܝܳܐ

ܡܳܐ ܕܬܳܩܶܢ ܟܽܘܪܣܰܝ ܕܺܝܢܳܟ ܒܰܪ ܐܰܠܳܗܳܐ܇ ܘܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܒܕܶܚܠܳܐ ܘܒܰܪܬܺܝܬܳܐ܇ ܗܳܘܶܐ ܕܺܝܢܳܐ ܕܚܺܝܠܳܐ ܕܟܺܐܢܽܘܬܳܐ܇ ܥܰܠ ܟܽܠ ܕܰܟܦܰܪ ܒܰܬܠܺܝܬܳܝܽܘܬܳܐ ܘܣܶܦܪ̈ܶܐ ܕܚܺܝ̈ܠܶܐ ܡܶܬܦܰܬܚܺܝܢ܇ ܩܕܳܡܰܝܟ ܡܠܶܐ ܪ̈ܰܚܡܶܐ܇ ܬܰܡܳܢ ܬܰܚܢܰܢܝ̱ ܛܰܝܒܽܘܬܳܟ ܘܠܰܓܢܽܘܢܳܟ ܢܶܫܬܘܶܐ ܗ ܘ ܗ܀

ܛܽܘܒܰܘܗ̱ܝ ܠܰܐܝܢܳܐ ܕܶܐܬܒܰܩܺܝ ܒܥܽܘܡܪܳܐ ܕܙܰܒܢܳܐ܇ ܘܚܳܪ ܘܐܶܬܒܰܝܰܢ ܒܰܩܢܽܘܡܶܗ ܘܰܒܡܽܘܡ̈ܶܐ ܕܰܣܥܰܪ܇ ܘܚܳܣܶܟ ܢܰܦܫܶܗ ܡܶܢ ܟܽܠ ܒܺܝܫ̈ܳܬܳܐ܇ ܘܚܳܢ ܒܰܪ ܒܶܣܪܶܗ ܘܰܥܠܰܘܗ̱ܝ ܥܒܰܕ ܪ̈ܰܚܡܶܐ܇ ܕܡܳܐ ܕܳܐܬܶܐ ܡܳܪܶܗ ܕܒܰܝܬܳܐ ܕܢܶܣܥܽܘܪ ܥܰܒܕ̈ܰܘܗ̱ܝ܇ ܡܶܫܟܰܚ ܠܗܽܘܢ ܟܰܕ ܠܳܐ ܕܳܡܶܟ ܘܠܰܓܢܽܘܢܳܐ ܡܶܫܬܰܘܶܐ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܥܺܝܢܳܐ ܕܟܺܝܬܳܐ ܕܡܰܝ̈ܳܐ ܚܰܝ̈ܶܐ ܬܶܬܠܰܘܶܐ ܠܺܝ܇ ܘܠܳܐ ܡܳܪܝ̱ ܐܶܗܘܶܐ ܣܢܺܝܩܳܐ ܬܰܡܳܢ ܒܶܝܬ ܨܰܗܘ̈ܳܢܶܐ ܠܳܐ ܡܳܪܝ̱ ܐܶܒܥܶܐ ܡܰܝ̈ܳܐ ܬܰܡܳܢ ܡܶܢ ܐܰܒܪܳܗܳܡ܇ ܕܶܐܬܢܰܣܝܰܬ݀ ܠܳܗܿ ܠܰܐܝܢܳܐ ܕܫܳܐܶܠ ܠܳܐ ܝܳܗܒܺܝܢ ܠܶܗ܀

ܝܰܡܳܐ ܕܪ̈ܰܚܡܶܐ ܕܰܡܠܶܐ ܪ̈ܰܚܡܶܐ ܥܰܠ ܚܰܛܳܝ̈ܶܐ܇ ܒܳܟ ܢܶܬܦܰܨܶܐ ܡܶܢ ܓܺܗܰܢܳܐ ܕܰܠܚܺܝܡܳܐ ܠܰܢ܇ ܠܳܐ ܡܳܪܝ̱ ܢܶܩܥܽܘܢ ܦܽܘ̈ܡܶܐ ܕܰܐܟܠܽܘܟ ܘܳܝܳܐ ܒܰܫܝܽܘܠ܇ ܒܪ̈ܰܚܡܰܝܟ ܚܽܘܢ ܠܰܢ ܕܢܰܘܕܶܐ ܠܰܫܡܳܟ ܠܳܟ ܬܶܫܒܽܘܚܬܳܐ܀

 

ܕܦܶܠܓܶܗ ܕܝܰܘܡܳܐ

ܒܩܳܠܳܐ ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ

ܗܰܝܟ̈ܠܶܐ ܐܺܝܬܰܝܢ ܕܰܐܠܳܗܳܐ܇ ܘܪܽܘܚܶܗ ܕܰܡܫܺܝܚܳܐ ܒܰܢ ܥܽܘܡܪܳܐ܇ ܘܠܳܐ ܢܚܰܒܠܺܝܘܗ̱ܝ ܒܝܰܕ ܣܰܢܝ̈ܳܬܳܐ܇ ܠܥܽܘܡܪܳܐ ܕܡܰܠܟܳܐ ܡܕܰܝܰܪ ܒܶܗ܇ ܢܶܡܪܽܘܩ ܡܽܘܡ̈ܶܐ ܘܣܰܢܝ̈ܳܬܳܐ܇ ܡܶܢ ܪܶܥܝܳܢܰܢ ܘܢܶܫܦܰܪ ܠܶܗ܇ ܠܗܰܘ ܕܡܶܛܽܠܳܬܰܢ܇ ܬܰܚܬܺܝ ܢܰܦܫܶܗ ܠܡܽܘܟܳܟܳܐ܀

ܐܰܟܘܳܬܰܢ ܐܺܝܬܰܘܗ̱ܝ ܙܰܒܢܰܢ܇ ܠܰܢ ܕܳܡܶܐ ܕܳܪܳܐ ܕܺܐܝܬܰܝܢ ܒܶܗ܇ ܥܰܬܺܝܪ̈ܶܐ ܪܚܶܡܘ̱ ܝܰܥܢܽܘܬܳܐ܇ ܘܡܶܣܟܺܢ̈ܶܐ ܕܰܓܳܠܽܘܬܳܐ ܘܰܐܝܟ ܚܶܘܝܳܐ ܕܒܳܠܰܥ ܚܰܒܪܶܗ܇ ܒܳܠܥܺܝܢ ܐ̱ܢܳܫ̈ܳܐ ܠܰܚܕܳܕ̈ܶܐ܇ ܘܠܳܐ ܣܳܝܡܺܝܢ ܕܺܝܢܶܗ ܕܰܐܠܳܗܳܐ ܩܕܳܡ ܥܰܝܢܰܝ̈ܗܽܘܢ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܓܥܳܬܰܢ ܬܶܗܘܶܐ ܠܬܰܪܥܽܘܬܳܟ܇ ܐܳܦ ܬܰܟܫܶܦܬܰܢ ܠܨܶܒܝܳܢܳܟ܇ ܟܽܠܝܽܘܡ ܐܰܫܦܰܥ ܛܳܒ̈ܳܬܳܟ ܥܰܠ ܚܰܛܳܝ̈ܶܐ ܕܩܳܪܶܝܢ ܠܳܟ܀

ܫܽܘܒܚܳܐ ܠܳܟ ܪܳܚܶܡܢܳܫܳܐ܇ ܕܥܽܘܕܪ̈ܳܢܰܝܟ ܠܳܐ ܡܶܬܕܰܪܟܺܝܢ ܩܰܒܶܠ ܛܳܒܳܐ ܒܳܥܽܘܬܰܢ܇ ܘܰܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

 

ܕܰܬܫܰܥܫ̈ܳܥܺܝܢ

ܒܩܳܠܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝܕ̈ܶܐ

ܒܰܨܠܰܘ̈ܳܬܳܐ ܘܙܶܕ̈ܩܳܬܳܐ܇ ܕܟܺܐܢ̈ܶܐ ܕܪܰܥܝܽܘܟ ܒܝܰܕ ܨܰܘܡܳܐ܇ ܒܰܛܶܠ ܪܽܘܓܙܳܐ ܡܶܢ ܥܳܢܳܟ܇ ܘܰܐܫܪܳܐ ܫܰܝܢܳܟ ܘܰܫܠܳܡܳܟ܇ ܒܥܺܕܬܳܐ ܦܪܺܝܩܰܬ ܒܰܨܠܺܝܒܳܟ܇ ܘܒܰܛܶܠ ܡܶܢܳܗܿ ܢܶܟܝ̈ܳܢܶܐ܀

ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܦܬܰܚ ܬܰܪܥܳܟ ܠܰܨܠܽܘܬܰܢ܇ ܘܰܚܢܳܢܳܟ ܢܶܥܛܶܐ ܚܰܘܒ̈ܰܝܢ܇ ܕܦܰܓܪܰܢ ܒܦܰܓܪܳܟ ܚܰܠܶܛܬܳܝܗ̱ܝ܇ ܘܰܕܡܳܟ ܡܰܙܶܓܬ ܒܢܰܦܫ̈ܳܬܰܢ܇ ܣܡܽܘܟ ܠܰܢ ܗܳܫܳܐ ܒܝܰܡܺܝܢܳܟ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܛܽܘܒܰܘܗ̱ܝ ܠܡܰܢ ܕܰܗܘܳܐ ܚܰܒܪܳܐ ܠܨܰܝ̈ܳܡܶܐ܇ ܛܽܘܒܰܘܗ̱ܝ ܠܡܰܢ ܕܰܗܘܳܐ܇ ܥܽܘܡܪܳܐ ܠܪܽܘܚ ܩܽܘܕܫܳܐ܇ ܛܽܘܒܰܘܗ̱ܝ ܠܡܰܢ ܕܰܗܘܳܐ܇ ܚܰܒܪܳܐ ܠܰܓܡܺܝܪ̈ܶܐ܀

ܬܶܫܒܚ̈ܳܢ ܠܰܚܢܳܢܳܟ܇ ܐܰܒܳܐ ܡܪܰܚܡܳܢܳܐ܇ ܘܣܶܓܕܬܳܐ ܠܛܰܝܒܽܘܬܳܟ܇ ܒܪܳܐ ܝܺܚܺܝܕܳܝܳܐ܇ ܬܰܘܕܺܝ ܠܪܽܘܚܩܽܘܕܫܳܐ܇ ܐ̱ܪܳܙܳܐ ܬܠܺܝܬܳܝܳܐ܇ ܘܥܰܠ ܝܰܠܕܶܝ̈ܗܿ ܕܥܺܕܬܳܐ܇ ܪ̈ܰܚܡܶܐ ܘܰܚܢܳܢܳܐ܀

 

ܫܠܶܡ

ܬܽܘܒ ܕܪܰܡܫܳܐ ܕܚܰܡܫܳܐ ܕܫܰܒܬܳܐ ܡܨܰܥܬܳܐ ܕܨܰܘܡܳܐ

ܒܩܳܠܳܐ ܐܶܡܳܐ ܕܟܺܝܬܳܐ

ܒܨܰܘܡܳܐ ܒܰܛܶܠ܇ ܪܽܘܓܙܳܐ ܡܶܢ ܥܰܡܳܟ܇ ܒܪܳܐ ܕܰܒܚܽܘܒܶܗ ܟܽܠܝܽܘܡ ܚܳܐܶܢ ܠܰܢ܀

ܦܰܢܳܐ ܒܪ̈ܰܚܡܰܝܟ ܫܶܐܠ̈ܳܬܳܐ ܕܟܽܠܰܢ܇ ܐܰܝܟ ܕܰܦܢܺܝܬ ܠܳܗܿ ܠܢܺܝܢܘܶܐ ܘܶܐܬܦܰܪܩܰܬ݀ ܪܰܚܶܡܥܠܰܝ ܐܰܠܳܗܳܐ܀

ܢܶܫܦܰܥ ܚܢܳܢܳܟ ܥܰܠ ܟܽܠܳܗ ܥܳܠܡܳܐ܇ ܘܳܐܦ ܒܽܘܪ̈ܟܳܬܳܟ܇ ܥܰܠ ܥܺܕܬܳܐ ܘܝܰܠܕܶܝ̈ܗܿ܇ ܪܰܚܶܡܥܠܰܝ ܐܰܠܳܗܳܐ܀

ܒܩܳܠ̈ܰܝ ܐܰܠܳܗܝ̱ ܡܶܬܟܰܫܰܦ ܐ̱ܢܳܐ ܠܳܟ܇ ܥܢܺܝܢܝ̱ ܒܰܚܢܳܢܳܟ܇ ܘܶܐܬܪܰܚܰܡܥܠܰܝ ܪܰܚܶܡܥܠܰܝ܀

ܫܪܳܓܳܐ ܐܺܝܬܶܝܗܿ ܡܶܠܬܳܟ ܡܳܪܝ̱ ܠܪ̈ܶܓܠܰܝ܇ ܘܢܽܘܗܪܳܐ ܐܺܝܬܰܘܗ̱ܝ ܩܽܘܫܬܳܟ ܠܰܫܒܺܝ̈ܠܰܝ ܪܰܚܶܡܥܠܰܝ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܩܪܺܝܬܳܟ ܡܳܪܝܳܐ ܡܶܢ ܟܽܠܶܗ ܠܶܒܝ̱

ܡܽܘܫܶܐ ܢܒܺܝܳܐ ܒܨܰܘܡܳܐ ܕܺܝܠܶܗ܇ ܐܶܙܕܰܗܺܝ ܗܘܳܐ܇ ܦܰܪܨܽܘܦܶܗ ܒܰܕܡܽܘܬ ܫܶܡܫܳܐ܀

ܡܫܺܝܚܳܐ ܕܨܳܡ ܗܘܳܐ ܡܶܛܽܠܳܬܰܢ܇ ܐܰܫܘܳܐ ܠܟܽܠܰܢ܇ ܕܢܶܙܡܰܪ ܠܳܟ ܬܶܫܒܽܘܚܬܳܐ܀

ܛܽܘܒܰܘܗ̱ܝ ܠܰܐܝܢܳܐ ܕܰܒܝܰܕ ܨܰܘܡܳܐ܇ ܐܳܦ ܒܰܨܠܽܘܬܳܐ܇ ܗܘܳܐ ܥܶܢܝܳܢܶܗ ܥܰܡ ܡܳܪܝܳܐ܀

ܛܽܘܒܰܘܗ̱ܝ ܠܰܐܝܢܳܐ ܕܨܳܡ ܡܶܢ ܢܶܟܠܳܐ܇ ܘܡܶܢ ܚܶܪܝܳܢܳܐ܇ ܘܡܶܢ ܠܰܚܡܳܐ ܕܢܺܐܪܰܬ ܚܰܝ̈ܶܐ܀

 

ܐ̱ܚܪܺܢܳܐ ܒܩܳܠܳܐ ܬܶܫܡܶܫܬܳܐ ܪܰܡܫܳܝܬܳܐ

ܗܰܒܠܰܢ ܡܳܪܰܢ ܒܰܚܢܳܢܳܟ ܙܰܒܢ̈ܶܐ ܡܫܰܝ̈ܢܶܐ ܘܰܒܗ̈ܺܝܠܶܐ܇ ܘܰܫܢܰܝ̈ܳܐ ܟܰܗܺܝܢ̈ܳܬܳܐ܇ ܕܢܶܥܒܶܕ ܥܺܐܕ̈ܶܐ ܕܚܰܕܽܘܬܳܐ܇ ܘܰܙܓܽܘܪ ܡܶܢ ܥܺܕܬܳܐ ܘܝܰܠܕܶܝ̈ܗܿ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܐܳܣܝܳܐ ܕܪ̈ܰܚܡܶܐ ܕܶܐܬܳܐ ܡܶܢ܇ ܪܰܘܡܳܐ ܠܘܳܬܰܢ ܒܰܚܢܳܢܶܗ܇ ܘܐܣܺܝ ܘܰܐܚܠܶܡ ܟܽܘܪ̈ܗܳܢܰܝܢ ܒܥܽܘܬܪ̈ܶܐ ܟܣܰܝ̈ܳܐ ܕܝܳܠܽܘܕܶܗ܇ ܘܚܰܣܺܝ ܚܰܘܒ̈ܶܐ ܕܚܰܛܳܝ̈ܶܐ܇ ܘܰܩܪܳܐ ܠܥܰܡ̈ܡܶܐ ܛܳܥܰܝ̈ܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܒܰܪܡܫܳܐ ܠܒܰܝܬܳܟ ܐܶܬܰܝܢܰܢ

ܥܺܕܬܳܐ ܒܨܰܘܡܳܐ ܡܶܬܢܰܨܚܳܐ ܘܡܶܬܓܰܢ̱ܒܪܳܐ܇ ܘܡܶܬܒܰܣܡܳܐ ܡܶܢ ܦܳܬܽܘܪܳܐ ܕܰܡܠܶܐ ܚܰܝ̈ܶܐ܇ ܡܶܐܟܽܘܠܬܳܗܿ ܦܰܓܪܳܐ ܚܰܝܳܐ ܕܰܐܠܳܗܳܐ܇ ܘܫܶܬܝܳܐ ܟܳܣܳܐ ܕܦܽܘܪܩܳܢܳܐ ܕܡܳܟ ܩܰܕܺܝܫܳܐ܀

ܚܙܰܘ ܟܺܐܢ̈ܶܐ ܠܶܐܠܦܳܐ ܕܰܛܥܺܝܢܳܐ ܥܽܘܬܪܳܐ܇ ܫܰܗܪܳܐ ܘܨܰܘܡܳܐ ܘܰܨܠܽܘܬܳܐ ܘܚܽܘܒܳܐ ܕܰܟܝܳܐ܇ ܘܥܰܠܘ̱ ܘܰܫܪܰܘ ܒܳܗܿ ܟܰܫܺܝܪ̈ܶܐ ܒܥܰܡܠܰܝ̈ܗܽܘܢ܇ ܘܶܐܬܡܰܢܰܥܘ̱ ܠܰܓܢܽܘܢ ܢܽܘܗܪܳܐ ܘܚܰܝ̈ܶܐ ܚܰܕ̈ܬܶܐ܀

 

ܐ̱ܚܪܺܢܳܐ ܒܩܳܠܳܐ ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ

ܗܳܐ ܒܬܰܪܥܳܟ ܐܳܣܝܳܐ ܕܪ̈ܰܚܡܶܐ܇ ܢܳܩܶܫ ܩܳܠܳܐ ܕܒܳܥܽܘܬܰܢ܇ ܚܢܳܢܳܟ ܢܦܽܘܩ ܘܰܢܦܰܪܢܶܣ܇ ܒܰܥܨܳܒܳܐ ܠܰܚܒܳܪ̈ܳܬܰܢ܇ ܕܰܐܢ̱ܬ ܗܽܘ ܨܳܒܶܐ ܒܬܰܝ̈ܳܒܶܐ܇ ܕܠܳܟ ܗܽܘ ܡܦܺܝܣܺܝܢ ܕܬܶܫܒܽܘܩ ܚܰܘܒܰܝ̈ܗܽܘܢ܀

ܥܺܕܬܳܐ ܓܳܥܝܳܐ ܥܰܠ ܬܰܪܥܳܟ܇ ܘܰܒܚܰܫܳܐ ܠܳܟ ܗܽܘ ܡܦܺܝܣܳܐ܇ ܛܳܒܳܐ ܩܰܒܶܠ ܒܳܥܽܘܬܳܗܿ ܘܰܥܒܶܕ ܪ̈ܰܚܡܶܐ ܥܰܠ ܝܰܠܕܶܝ̈ܗܿ ܥܢܺܝ ܐܶܢܽܘܢ ܡܳܪܝ̱ ܒܰܚܢܳܢܳܟ܇ ܘܰܦܬܰܚ ܬܰܪܥܳܐ ܕܪ̈ܰܚܡܶܐ ܠܫܶܐܠ̈ܳܬܗܽܘܢ܀

ܛܳܒܳܐ ܕܠܳܐ ܟܳܠܶܐ ܪ̈ܰܚܡܰܘܗ̱ܝ ܡܶܢ ܚܰܛܳܝ̈ܶܐ ܕܩܳܪܶܝܢ ܠܳܟ܇ ܦܬܰܚ ܠܰܢ ܡܳܪܝ̱ ܬܰܪܥܳܐ ܕܪ̈ܰܚܡܰܝܟ܇ ܕܰܚܢܰܢ ܢܺܐܚܶܐ ܒܰܚܢܳܢܳܟ܇ ܘܰܐܳܘܫܶܛ ܐܺܝܕܳܟ ܩܰܕܺܝܫܬܳܐ܇ ܘܕܰܐܠܳܐ ܠܟܽܠܰܢ ܡܶܢ ܝܰܡܳܐ ܕܚܰܘܒ̈ܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܕܠܳܐ ܡܨܶܐ ܟܳܗܢܳܐ ܢܩܰܕܶܫ ܡܰܝ̈ܳܐ ܬܽܘܒ ܠܰܣܚܳܬܶܟܝ̱܇ ܨܶܒܝܳܢܶܟܝ̱ ܕܶܝܢ ܟܽܘܡܪܰܐܗ̱ܘ ܪܰܒܳܐ ܘܗܽܘ ܡܕܰܟܶܐ ܠܶܟܝ̱܇ ܡܰܥܡܽܘܕܺܝܬܳܐ ܬܰܪ̈ܬܶܝܢ ܙܰܒܢ̈ܺܝܢ ܠܳܐ ܡܶܬܝܰܗܒܳܐ܇ ܠܚܰܛܳܝܳܐ ܕܶܝܢ ܕܶܡܥ̈ܶܐ ܡܡܰܠܝ̈ܳܢ ܕܽܘܟܬܳܗܿ ܟܽܠ ܝܽܘܡ܀

ܣܓܺܝܕ ܘܰܡܫܰܒܰܚ ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ܇ ܕܗܽܘܝܽܘ ܡܚܰܝܶܠ ܟܽܠ ܬܰܝ̈ܳܒܶܐ܇ ܕܢܺܐܬܽܘܢ ܨܶܝܕܰܘܗ̱ܝ܇ ܫܳܒܶܩ ܚܰܘܒ̈ܶܐ ܕܰܡܠܶܐ ܚܢܳܢܳܐ ܠܟܽܠ ܡܡܰܚ̈ܰܝܳܐ܇ ܚܽܘܢ ܠܰܡܚܺܝ̈ܠܶܐ ܕܡܚܰܘܶܝܢ ܠܳܟ ܣܽܘܥܪ̈ܳܢܰܝܗܽܘܢ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܨܰܘܡܰܐܗ̱ܘ ܦܳܬܽܘܪܳܐ ܕܰܣܕܺܝܪ܇ ܘܰܡܠܶܐ ܛܽܘܒ̈ܶܐ ܫܡܰܝ̈ܳܢܶܐ܇ ܨܰܘܡܳܐ ܓܶܦܰܐܗ̱ܘ ܩܰܠܺܝܠܳܐ܇ ܕܡܰܦܪܰܚ ܡܰܣܶܩ ܠܰܡܪ̈ܰܘܡܶܐ܇ ܫܽܘܒܚܳܐ܀

ܨܰܘܡܳܐ ܓܺܝܫܪܰܐܗ̱ܘ ܕܒܶܗ ܥܳܒܪܺܝܢ܇ ܟܶܢ̈ܫܶܐ ܕܢܰܟ̈ܦܶܐ ܕܰܠܐܺܝܽܘ ܒܶܗ܇ ܠܰܓܢܽܘܢ ܢܽܘܗܪܳܐ ܗܰܘ ܕܰܐܬܩܶܢ܇ ܒܽܘܟܪܳܐ ܠܟܽܠܗܽܘܢ ܨܰܝ̈ܳܡܶܐ܇ ܫܽܘܒܚܳܐ܀

ܨܰܘܡܳܐ ܠܡܺܐܢܰܐܗ̱ܘ ܘܒܶܝܬ ܓܰܘܣܳܐ܇ ܘܢܰܘܚܳܐ ܠܶܐܠܦܳܐ ܕܰܪ̈ܕܺܝܦܶܐ܇ ܥܽܘܠܘ̱ ܨܰܝ̈ܳܡܶܐ ܘܰܫܪܰܘ ܒܶܗ܇ ܕܗܽܘܝܽܘ ܡܙܰܗܶܐ ܢܰܦܫ̈ܳܬܰܢ ܫܽܘܒܚܳܐ ܠܳܟ܀

ܨܰܘܡܰܐܗ̱ܘ ܡܩܰܕܫܳܢܳܐ ܕܦܰܓܪ̈ܰܝܢ܇ ܡܶܢ ܛܰܡܐܽܘܬܳܐ ܕܰܚܛܺܝܬܳܐ ܕܒܶܗ ܗܽܘ ܝܰܘܣܶܦ ܐܶܬܓܰܘܰܣ܇ ܘܰܐܥܕܺܝ ܟܽܠܝܠܳܐ ܕܙܳܟܽܘܬܳܐ ܫܽܘܒܚܳܐ ܠܳܟ܀

ܩܳܠܳܐ ܕܠܺܠܝܳܐ ܒܩܳܠܳܐ ܫܳܪܶܐ ܐܰܣܺܝܪ̈ܶܐ ܡܳܪܝܳܐ

ܛܰܝܒܽܘܬܳܐ ܕܰܥܢܳܬ݀ ܠܝܰܘܢܳܢ ܟܰܕ ܨܰܠܺܝ ܒܝܰܡܳܐ܇ ܘܥܰܕܰܪܬܶܗ ܠܫܶܡܥܽܘܢ ܟܺܐܦܳܐ ܒܰܝܢܳܬ ܡܰܚܫܽܘ̈ܶܠܐ܇ ܗܺܝ ܬܶܦܬܰܚ ܬܰܪܥܳܐ ܕܪ̈ܰܚܡܶܐ ܠܰܨܠܽܘܬܰܢ ܘܰܠܒܳܥܽܘܬܰܢ܀

ܬܝܳܒܽܘܬܳܐ ܕܩܰܪܒܰܬ݀ ܢܺܝܢܘܶܐ ܩܰܘܕܡܰܬ ܪܰܒܽܘܬܳܟ܇ ܗܺܝ ܡܩܰܪܒܳܐ ܠܳܟ ܡܰܪܥܺܝܬܳܟ ܪܳܚܶܡ ܬܰܝ̈ܳܒܶܐ܇ ܥܢܺܝܳܗܿ ܡܳܪܝ̱ ܐܰܝܟ ܕܰܡܥܳܕ ܐܰܢ̱ܬ܇ ܘܦܰܢܳܐ ܒܪ̈ܰܚܡܰܝܟ ܫܶܐܠ̈ܳܬܳܗܿ܀

 

ܡܰܕܪܳܫܳܐ ܒܩܳܠܳܐ ܐܰܦܢܳܐ ܕܶܝܢ ܐܶܫܬܰܥܶܐ ܥܽܘܢܺܝܬܳܐ ܚܽܘܢ ܡܳܪܝ̱ ܠܒܺܝ̈ܫܶܐ ܒܛܰܝܒܽܘܬܳܟ܇ ܘܰܠܬܰܝ̈ܳܒܶܐ ܒܰܚܢܳܢܳܟ

ܐܰܠܳܗܳܐ ܚܽܘܢ ܠܰܦܫܺܝ̈ܛܶܐ܇ ܘܗܘܺܝ ܪܰܒܳܐ ܠܬܰܡܺܝ̈ܡܶܐ܇ ܢܺܐܠܰܦ ܒܳܟ ܡܳܪܝ̱ ܕܰܢܫܰܪܶܐ܇ ܕܒܳܟ ܗܽܘ ܪܺܝܫܳܐ ܘܫܽܘܠܳܡܳܐ܇ ܢܺܐܠܰܦ ܒܳܟ ܐܳܦ ܕܰܢܫܰܠܶܡ܇ ܕܰܐܢ̱ܬܗܽܘ ܣܳܟܳܐ ܕܟܽܠ ܡܶܕܶܡ܇ ܘܟܰܕ ܠܳܟ ܡܳܪܝ̱ ܠܳܐ ܐܺܝܬ ܫܽܘܪܳܝܳܐ ܘܠܳܐ ܫܽܘܠܳܡܳܐ܇ ܡܶܢܳܟ ܗܽܘ ܩܢ̈ܰܝ ܒܶܪ̈ܝܳܬܳܐ ܫܽܘܪܳܝܳܐ ܐܳܦ ܫܽܘܠܳܡܳܐ܇ ܬܚܶܝܬ ܨܶܒܝܳܢܳܟ ܣܰܟܰܝ̈ܗܶܝܢ܀

ܪܰܚܡܳܢܳܐ ܕܝܳܗܶܒ ܡܰܓܳܢ܇ ܠܰܣܢܺܝ̈ܩܶܐ ܟܰܕ ܠܳܐ ܫܰܐܠܽܘܗ̱ܝ܇ ܡܶܕܶܡ ܓܶܝܪ ܕܠܳܐ ܐܺܝܬܰܘܗ̱ܝ ܗܘܳܐ܇ ܐܰܝܟܰܢ ܫܐܶܠ ܗܘܳܐ ܐܳܘ ܢܳܣܶܒ܇ ܐܺܝܬܝܳܐ ܕܺܐܝܬܰܘܗ̱ܝ ܬܳܩܶܢ ܗܘܳܐ ܡܶܢ ܠܳܐ ܡܶܕܶܡ ܟܽܠܡܶܕܶܡ܇ ܠܰܘ ܕܶܝܢ ܡܶܛܽܠ ܕܰܣܢܺܝܩ ܗܘܳܐ ܐܶܠܳܐ ܛܳܒܰܐܗ̱ܘ܇ ܐܰܝܟ ܕܺܐܝܬܰܘܗ̱ܝ ܗܘܳܐ ܒܺܐܝܬܽܘܬܶܗ܇ ܢܶܗܘܽܘܢ ܥܒܳܕ̈ܰܘܗ̱ܝ ܒܰܒܪܺܝܬܳܐ܇ ܐܳܦ ܠܗܽܘܢ ܝܰܗܒ ܚܺܐܪܽܘܬܳܐ܇ ܘܰܐܝܟ ܕܳܐܦ ܠܶܗ ܐܺܝܬ ܫܽܘܠܛܳܢܳܐ܀

ܝܳܗܽܘܒܳܐ ܕܝܰܗܒ ܠܶܗ ܡܰܓܳܢ܇ ܠܰܣܢܺܝܩܳܐ ܟܰܕ ܠܳܐ ܫܐܶܠ ܗܘܳܐ܇ ܨܳܪܰܢܝ̱ ܒܟܰܪܣܳܐ ܨܶܒܝܳܢܶܗ܇ ܘܶܐܢܳܐ ܘܗܺܝ ܒܶܗ ܠܳܐ ܐܰܪܓܶܫܢܰܢ܇ ܩܒܰܥ ܪܽܘܟܳܒܳܐ ܫܰܠܝܳܐܺܝܬ܇ ܚܙܰܩ ܫܶܪܝܳܢܳܐ ܢܺܝܚܳܐܺܝܬ܇ ܓܠܰܦ ܐܶܕܢ̈ܶܐ ܪܰܟܺܝܟܳܐܺܝܬ ܘܰܢܦܰܚ ܢܰܦܫܳܐ ܥܰܠ ܐܽܘܟܠܳܐ܇ ܡܶܢ ܐܰܝܟܳܐ ܕܺܝܗܺܝܒ ܥܰܠ ܣܰܘܩܳܐ ܡܶܢ ܐܰܝܟܳܐ ܕܰܦܩܺܝܕ ܘܰܚܪܺܝܩ܇ ܪܗܶܛܘ̱ ܚܶܒ̈ܠܶܐ ܘܰܦܬܰܚܘ̱ ܬܰܪ̈ܥܶܐ܇ ܘܥܰܠܘ̱ ܚܳܛܳܝ̈ܶܐ ܠܰܒܪܺܝܬܳܐ܀

ܥܛܶܠ ܗܽܘ ܠܺܝ ܓܶܝܪ ܠܡܰܟܳܣܽܘ܇ ܨܶܒܘ̈ܳܬܳܐ ܕܰܒܗܽܘܢ ܚܳܒܰܬ݀܇ ܕܠܳܐ ܗܘܳܐ ܕܠܺܝܠ ܗܽܘ ܠܒܰܪܢܳܫܳܐ܇ ܕܢܰܦܫܶܗ ܢܰܟܣ ܒܣܰܢܝ̈ܳܬܶܗ܇ ܘܠܰܐ̱ܚܪܺܢܳܐ ܕܰܐܣܟܶܠ ܩܰܠܺܝܠ ܣܰܓܺܝ ܝܳܕܰܥ ܕܰܢܕܽܘܢܳܝܗ̱ܝ܇ ܟܰܕ ܗܳܘܶܐ ܠܶܗ ܕܰܝܳܢܳܐ ܘܰܒܥܶܠܕܺܝܢܳܐ܇ ܘܰܡܕܺܝܠ ܟܽܠܳܗܿ ܣܰܟܠܽܘܬܳܐ ܘܬܳܒܰܥ ܟܽܠܳܗܿ ܘܳܠܺܝܬܳܐ܇ ܘܰܡܩܺܝܡ ܟܽܠܳܗܿ ܟܺܐܢܽܘܬܳܐ܇ ܕܢܶܛܠܽܘܡ ܟܽܠܳܗܿ ܛܰܝܒܽܘܬܳܐ܀

ܪܰܒ ܗܽܘ ܠܳܟ ܓܶܝܪ ܥܽܘܕܪܳܢܶܗ܇ ܕܣܳܢܐܳܐ ܕܡܰܓܳܢ ܣܳܢܶܐ ܠܳܟ܇ ܕܳܐܦ ܢܰܦܫܳܟ ܡܶܛܽܠܳܬܶܗ܇ ܡܶܢ ܣܽܘܓܐܳܐ ܕܚܰܘ̈ܒܶܐ ܢܳܛܪܰܬ܇ ܚܣܳܡܶܗ ܠܳܟ ܫܽܘܪܰܐܗ̱ܘ ܪܳܡܳܐ܇ ܘܰܛܢܳܢܶܗ ܙܰܝܢܳܐ ܛܳܒܳܐ܇ ܙܗܺܝܪܳܐ ܥܳܒܶܕ ܠܳܟ ܟܰܕ ܟܳܡܶܝܢ ܠܳܟ܇ ܩܶܢܛܶܗ ܚܳܐܶܨ ܪܰܦܝܽܘܬܳܟ ܚܣܳܡܶܗ ܡܳܪܶܩ ܣܰܟܠܽܘܬܳܟ܇ ܣܳܢܐܳܐܗ̱ܘ ܥܶܠܰܬ ܥܽܘܕܪܳܢܳܟ܇ ܕܰܒܓܰܘ ܟܽܘܪܶܗ ܫܳܦܰܪ ܐܰܢ̱ܬ܀

ܠܡܶܬܰܘܰܗ ܘܳܠܶܐ ܒܒܰܪܢܳܫܳܐ܇ ܕܰܟܡܳܐ ܣܡܶܐ ܘܰܟܡܳܐ ܚܳܙܶܐ܇ ܕܥܰܘܠܶܗ ܪܰܒܳܐ ܠܳܐ ܒܳܚܰܪ܇ ܘܡܽܘܡܶܗ ܚܰܣܺܝܢܳܐ ܠܳܐ ܚܙܳܐ܇ ܒܒܽܘܨܳܪܐ ܕܚܰܒܪܶܗ ܡܰܐܨܶܕ܇ ܕܰܒܓܶܠܳܐ ܡܳܪܰܢ ܡܰܬܠܶܗ܇ ܗܰܒ ܠܶܗ ܥܰܝܢܳܐ ܕܰܢܕܰܟܶܝܗܿ ܕܢܶܗܘܶܐ ܬܶܗܪܳܐ܇ ܕܟܰܕ ܐܳܣܝܳܐ ܗܰܘ ܠܰܩܢܽܘܡܰܝ̈ܟܽܘܢ ܓܶܠܳܐ ܕܡܰܦܶܩ ܡܰܟܶܣ ܠܶܗ܇ ܒܪܺܝܟ ܗܽܘ ܕܝܰܗܒ ܠܰܢ ܨܶܒܝܳܢܳܐ܇ ܕܗܽܘ ܚܳܙܶܐ ܐܳܦ ܗܽܘ ܡܰܗܡܶܐ܀

ܐܳܦܠܳܐ ܕܶܝܢ ܗܽܘ ܡܰܪܳܚܳܐ܇ ܓܰܠܝܳܐܺܝܬ ܡܶܫܟܰܚ ܡܰܪܫܰܥ܇ ܒܓܰܘ ܣܶܬܳܪܳܐ ܥܳܐܶܠ ܚܳܛܶܐ܇ ܘܠܳܐ ܕܳܚܶܠ ܡܶܢܶܗ ܕܚܳܙܶܐ ܟܽܠ܇ ܐܶܢܕܶܝܢ ܢܶܚܙܺܝܘܗ̱ܝ ܒܰܪܢܳܫܳܐ ܟܶܢ ܗܽܘ ܬܳܐܶܟ ܐܳܦ ܬܳܐܶܒ܇ ܐܳܦ ܗܽܘ ܠܳܐܶܐ ܠܡܰܘܣܳܦܽܘ ܟܰܕ ܣܳܒܰܪ ܠܶܗ܇ ܪܚܺܝܡܳܐ ܒܺܝܫܬܳܐ ܒܰܥܒܳܕܶܝ̈ܗܿ ܘܣܰܢܝܳܐ ܒܰܠܚܽܘܕ ܒܰܫܡܳܗ̈ܶܝܗܿ܇ ܐܶܢ ܗܳܠܶܝܢ ܡܳܪܝ̱ ܬܳܒܰܥ ܐܰܢ̱ܬ܇ ܐܰܘܦܺܝ ܥܰܒܕܳܟ ܡܶܢ ܟܰܕܽܘ܀

ܠܰܐܝܟܳܐ ܡܳܪܰܢ ܐܶܬܦܰܠܰܛ܇ ܘܨܶܝܕ ܡܶܢ ܘܰܒܡܰܢ ܐܶܬܓܰܘܰܣ܇ ܐܳܦ ܐܶܠܽܘ ܐܺܝܬ ܢܽܘܟܪܳܝܳܐ܇ ܚܪܶܡ ܗܽܘ ܕܶܐܬܓܰܘܰܣ ܒܰܐ̱ܚܪܺܝܢ܇ ܕܠܰܝܬ ܛܳܒ ܗܽܘ ܐܰܝܟ ܒܳܪܽܘܝܰܢ܇ ܘܠܳܐ ܕܒܰܣܺܝܡ ܐܰܝܟ ܥܳܒܽܘܕܰܢ܇ ܗܽܘܝܽܘ ܒܪܳܢ ܐܳܦ ܙܳܐܶܢ ܠܰܢ ܕܒܰܒܪܶܗ ܦܰܪܩܰܢ ܡܶܢ ܛܽܘܥܝܰܝ܇ ܡܶܢܳܟ ܗܽܘ ܡܳܪܝ̱ ܕܳܚܶܠ ܐ̱ܢܳܐ܇ ܘܰܠܘܳܬܳܟ ܬܽܘܒ ܪܳܗܶܛ ܐ̱ܢܳܐ ܐܰܢ̱ܬ ܪܕܺܝ ܠܰܢ ܘܰܐܢ̱ܬ ܩܢܺܝ ܠܰܢ ܕܠܳܟ ܗܽܘ ܦܰܐܝ̈ܳܢ ܬܰܪ̈ܬܰܝܗܶܝܢ܇ ܕܠܳܐ ܐܰܘܕܺܝܬ ܒܰܕܠܳܐ ܐܺܝܬܰܘܗ̱ܝ܇ ܠܳܐ ܢܶܟܦܽܘܪ ܒܺܝ ܗܰܘ ܕܺܐܝܬܰܘܗ̱ܝ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܙܳܡܪܺܝܢ ܫܽܘܒܚܳܟ ܙܰܒܢ̈ܶܐ ܕܪܳܗܛܺܝܢ ܥܰܠ ܡܰܥܒܰܪܬܳܐ܇ ܘܰܒܥܶܕܳܢܶܗ ܚܰܕ ܚܰܕ ܡܶܢܗܽܘܢ ܬܳܢܶܐ ܫܽܘܒܚܳܟ܇ ܗܳܐ ܚܶܫܽܘܟܳܐ ܩܳܥܶܐ ܒܣܰܘ̈ܦܶܐ ܘܰܒܦܶܢܝ̈ܳܬܳܐ ܕܡܳܪܳܐ ܐܺܝܬ ܠܶܗ ܕܝܰܗܒ ܠܶܗ ܠܺܠܝܳܐ ܕܢܶܫܬܰܠܰܛ ܒܶܗ܀

ܠܳܟ ܗܽܘ ܡܫܰܒܚܺܝܢ ܟܽܠܗܽܘܢ ܙܰܒܢ̈ܶܐ ܐܰܝܟ ܕܳܡܟܶܢܺܝܢ܇ ܐܳܦ ܐܺܝܡܳܡ̈ܶܐ ܘܠܰܝܠܰܘ̈ܳܬܳܐ ܟܰܕ ܫܰܬܺܝܩܺܝܢ܇ ܢܽܘܗܪܳܐ ܘܚܶܫܟܳܐ ܫܡܰܝܳܐ ܘܰܐܪܥܳܐ ܐܰܝܟ ܕܰܡܥܳܕܺܝܢ܇ ܩܳܥܶܝܢ ܫܽܘܒܚܳܟ ܒܰܪ ܐܰܠܳܗܳܐ ܘܠܳܟ ܬܶܫܒܽܘܚܬܳܐ܀

 

ܕܨܰܦܪܳܐ ܕܪܰܚܶܡܥܠܰܝ ܒܩܳܠܳܐ ܐܶܡܳܐ ܕܟܺܝܬܳܐ

ܢܚܽܘܣܽܘܢ ܥܠܰܝ܇ ܥܳܐܠܰܝ̈ ܠܰܓܢܽܘܢܳܐ܇ ܘܰܢܦܺܝܣܽܘܢܳܟ ܕܬܶܫܒܽܘܩ ܠܺܝ ܚܰܘܒ̈ܰܝ ܪܰܚܶܡܥܠܰܝ ܐܰܠܳܗܳܐ܀

ܒܢܽܘܗܪܳܟ ܡܳܪܰܢ ܪܕܽܘܦ ܠܰܚܛܳܗ̈ܶܐ ܕܢܰܦܫܝ̱܇ ܕܫܰܪ̈ܝܳܢ ܒܪܶܥܝܳܢܝ̱ ܒܰܕܡܽܘܬ ܓܰܝܳܣܳܐ ܪܰܚܶܡܥܠܰܝ܀

ܡܳܪܰܢ ܒܪ̈ܰܚܡܰܝܟ܇ ܪܰܚܶܡ ܥܰܠ ܥܰܒܕܰܝ̈ܟ܇ ܘܫܰܘܙܶܒ ܠܰܢ ܡܳܪܝ̱ ܡܶܢ ܟܽܠ ܢܶܟܝܳܢܺܝ̈ܢ ܪܰܚܶܡܥܠܰܝ ܐܰܠܳܗܳܐ܀

ܒܪܺܝܟ ܗܽܘ ܕܝܰܗܒ ܠܰܢ ܨܰܘܡܳܐ ܩܰܕܺܝܫܳܐ܇ ܙܰܝܢܳܐ ܪܰܒܳܐ܇ ܕܒܶܗ ܡܶܙܕܟܶܐ ܒܺܝܫܳܐ ܪܰܚܶܡܥܠܰܝ ܐܰܠܳܗܳܐ܀

ܩܰܒܶܠ ܡܳܪܰܢ ܨܰܘܡܰܢ ܘܰܨܠܽܘܬܰܢ܇ ܘܶܐܬܪܰܥܳܐ ܠܰܢ ܕܣܰܓܺܝ ܐܰܪܓܶܙܢܳܟ ܪܰܚܶܡܥܠܰܝܢ ܐܰܠܳܗܳܐ܀

ܗܰܒܠܰܢ ܡܳܪܰܢ܇ ܕܟܽܠܫܳܥ ܢܰܘܕܶܐ ܠܳܟ܇ ܘܢܶܙܡܰܪ ܫܽܘܒܚܳܟ܇ ܘܢܶܬܚܰܣܶܐ ܕܰܣܪܰܛ ܪܰܚܶܡܥܠܰܝܢ ܐܰܠܳܗܳܐ܀

 

ܐܰܠܳܗܝ̱ ܐܰܠܳܗܝ̱ ܒܩܳܠܳܐ ܒܬܽܘܠܬܳܐ ܝܳܠܕܰܬ ܕܽܘܡܳܪܳܐ

ܐܰܠܳܗܰܢ ܣܰܓܺܝ ܪ̈ܰܚܡܶܐ ܐܰܣܓܳܐ ܠܘܳܬܰܢ ܡܰܘܗܒܰܬܳܟ܇ ܘܩܰܒܶܠ ܒܳܥܽܘܬܰܢ܇ ܫܦܺܝܥܳܐܗ̱ܝ ܟܽܠ ܫܳܥ ܡܰܘܗܰܒܬܳܟ܇ ܥܰܠ ܒܺܝܫ̈ܶܐ ܘܥܰܠ ܚܰܛܳܝ̈ܶܐ܇ ܕܩܳܪܶܝܢ ܠܳܟ ܒܗܰܝܡܳܢܽܘܬܳܐ܇ ܘܢܳܩܫܺܝܢ ܒܬܰܪܥܳܟ ܚܰܢܳܢܳܐ܀

ܬܰܘ ܐܰܦܺܝܣܘ̱ ܥܰܠ ܫܽܘܒܩܳܢܳܐ܇ ܠܡܳܪܶܐ ܚܽܘܒܳܐ ܘܒܰܣܺܝܡܳܐ ܘܚܰܘܰܘ ܫܽܘܚܢ̈ܰܝܟܽܘܢ܇ ܠܗܳܢܳܐ ܐܳܣܝܳܐ ܚܰܟܺܝܡܳܐ܇ ܕܶܐܬܳܐ ܕܢܰܐܣܶܐ ܚܒܳܪ̈ܳܬܰܢ܇ ܢܶܩܥܶܐ ܠܶܗ ܟܰܕ ܐܡܳܪܺܝܢܰܢ܇ ܕܰܒܪܺܝܟܳܐܗ̱ܝ ܡܶܐܬܺܝܬܶܗ ܕܡܳܪܝܳܐ܀

ܐܰܘܫܶܛ ܠܺܝ ܡܳܪܝ̱ ܡܶܢ ܫܡܰܝܳܐ܇ ܐܺܝܕܳܟ ܡܰܠܝܰܬ ܥܽܘܕܪ̈ܳܢܶܐ ܘܕܰܐܠܳܐ ܘܰܐܩܺܝܡܰܝܢܝ̱܇ ܡܶܢ ܨܳܡܰܪܬܳܐ ܕܰܐܒܕܳܢܳܐ܇ ܕܰܒܨܶܒܝܳܢܝ̱ ܢܶܦܠܶܬ ܠܺܝ ܒܶܗ܇ ܒܚܰܫܳܐ ܘܕܶܡܥ̈ܶܐ ܡܦܺܝܣ ܐ̱ܢܳܐ ܠܳܟ܇ ܐܶܬܪܰܚܰܡܥܠܰܝ܀

ܥܺܕܬܳܐ ܒܨܰܘܡܳܐ ܘܒܰܨܠܽܘܬܳܐ܇ ܡܨܰܒܬܳܐ ܠܰܒܢܶܝ̈ܗܿ ܟܽܠܗܽܘܢ ܒܨܶܒ̈ܬܶܐ ܪ̈ܽܘܚܳܢܶܐ܇ ܘܰܕܣܺܝܡܳܐ ܠܗܽܘܢ ܟܠܺܝ̈ܠܶܐ ܕܫܽܘܒܚܳܐ܇ ܘܡܶܬܒܰܣܡܺܝܢ ܒܰܢܣܺܝܒܽܘܬܳܐ܇ ܕܦܰܓܪܳܐ ܘܰܕܡܳܐ ܚܰܝܳܐ܇ ܕܒܶܗ ܗܽܘ ܡܶܬܚܰܣܶܝܢ ܚܰܘܒ̈ܰܝܗܽܘܢ܀

ܐܰܪܒܥܺܝܢ ܝܰܘ̈ܡܺܝܢ ܨܳܒܥܰܬ݀ ܗܘܳܬ܇ ܢܺܝܢܘܶܐ ܚܰܛܳܝܬܳܐ ܕܰܠܡܳܪܗܿ ܐܰܪܓܙܰܬ݀܇ ܘܒܳܬܰܪܟܶܢ ܐܶܬܪܰܥܺܝ ܗܘܳܐ܇ ܐܰܠܳܗܳܐ ܒܰܥܒܺܝ̈ܕܳܬܳܐ܇ ܘܫܰܕܰܪ ܠܳܗܿ ܡܶܢ ܒܶܝܬ ܓܰܙܶܗ܇ ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܀

ܗܰܘ ܚܽܘܪܒܳܐ ܕܶܐܬܢܰܣܺܝ ܒܶܗ ܒܰܪ ܐܰܠܳܗܳܐ ܡܶܛܽܠ ܐ̱ܢܳܫ̈ܳܐ ܘܰܐܓܽܘܢܳܐ ܣܰܝܒܰܪ܇ ܒܶܗ ܗܦܰܟ ܗܘܳܐ ܘܣܰܒܰܥ ܐܰܠܦ̈ܶܐ܇ ܣܰܓܺܝ̈ܐܶܐ ܒܠܰܚܡܳܐ ܙܥܽܘܪܳܐ܇ ܘܰܐܝܠܶܝܢ ܕܶܐܟܰܠܘ̱ ܐܰܙܥܶܩܘ̱܇ ܢܫܰܒܰܚ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܠܶܟܝ̱ ܢܶܬܟܰܫܰܦ

ܨܳܡ ܗܘܳܐ ܡܽܘܫܶܐ܇ ܨܰܘܡܳܐ ܕܰܟܝܳܐ ܒܛܽܘܪ ܣܺܝܢܰܝ ܘܶܐܙܕܰܗܺܝ ܒܶܗ܇ ܘܰܐܚܶܬ ܠܽܘ̈ܚܶܐ܇ ܘܦܽܘܩܕ̈ܳܢܶܐ ܠܒܶܝܬ ܐܺܝܣܪܳܐܺܝܠ܇ ܕܰܚܛܳܐ ܘܰܐܪܫܰܥ܇ ܘܰܢܣܰܒ ܐܶܢܶܝܢ ܒܺܐܝܕܰܘ̈ܗ̱ܝ ܕܰܒܨܶܒܥܳܐ ܕܢܽܘܪܳܐ ܟܬܺܝ̈ܒܳܢ܇ ܘܫܰܒܰܚ ܠܰܐܠܳܗܳܐ܀

ܒܗܳܢܳܐ ܝܰܘܡܳܐ܇ ܐܶܙܕܰܟܝܰܬ݀ ܪܶܚܡܰܬ ܟܶܣܦܳܐ ܡܶܢ ܦܳܪܽܘܩܰܢ܇ ܘܰܠܫܽܘܒܚܶܗ ܪܳܡܘܐ ܒܰܛܶܠ܇ ܘܰܠܫܽܘܒܚܳܐ ܣܪܺܝܩܳܐ ܚܰܝܶܒ܇ ܘܰܐܠܶܦ ܠܰܢ ܕܡܶܢ ܟܽܠܗܶܝܢ܇ ܗܳܠܶܝܢ ܢܶܣܬܰܪܰܩ ܐܰܚ̈ܰܝ ܕܢܶܫܟܰܚ ܢܶܦܠܽܘܚ ܠܶܗ܀

ܨܳܡ ܗܘܳܐ ܡܽܘܫܶܐ܇ ܐܰܪܒܥܺܝܢ ܝܰܘ̈ܡܺܝܢ ܘܰܐܚܶܬ ܗܘܳܐ ܠܽܘ̈ܚܶܐ ܠܥܰܡܳܐ܇ ܨܳܡ ܐܺܠܺܝܳܐ܇ ܐܰܪܒܥܺܝܢ ܝܰܘ̈ܡܺܝܢ ܐܶܣܰܪ ܠܰܫܡܰܝܳܐ ܒܡܶܠܰܬ ܦܽܘܡܶܗ܇ ܘܨܳܡ ܡܳܪܰܢ ܐܰܪܒܥܺܝܢ܇ ܘܰܙܟܳܐ ܠܒܺܝܫܳܐ ܒܥܶܠܕܰܪܳܐ܇ ܘܙܰܟܝܶܗ ܠܰܟܝܳܢܰܢ܀

ܒܨܰܘܡܳܐ ܝܰܘܣܶܦ܇ ܥܢܳܝܗ̱ܝ ܐܰܠܳܗܳܐ ܘܦܰܠܛܶܗ ܗܘܳܐ ܡܶܢ ܡܶܨܪܳܝܬܳܐ܇ ܘܒܶܗ ܗܽܘ ܝܰܘܢܳܢ ܒܰܪ ܡܰܬܰܝ ܐܶܬܕܰܠܺܝ ܗܘܳܐ ܡܶܢ ܓܰܘ ܝܰܡܳܐ܇ ܘܒܶܗ ܐܶܬܦܰܨܺܝܽܘ ܢܺܝܢܘ̈ܳܝܶܐ ܡܶܢ ܪܽܘܓܙܳܐ ܡܚܰܒܠܳܢܳܐ܇ ܘܒܶܗ ܚܢܽܘܟ ܣܠܶܩ ܠܪܰܘܡܳܐ܀

ܣܓܺܝܕ ܘܰܡܫܰܒܰܚ ܐܰܒܳܐ ܘܰܒܪܳܐ ܘܪܽܘܚܩܽܘܕܫܳܐ ܒܟܽܠܥܶܕܳܢܺܝ̈ܢ܇ ܕܰܡܚܰܝܶܠ ܠܰܢ ܠܣܳܓܽܘ̈ܕܰܘܗ̱ܝ܇ ܕܢܶܙܡܰܪ ܠܶܗ ܩܰܕܺܝܫܳܐܺܝܬ܇ ܘܰܡܚܰܣܶܐ ܚܰܘܒ̈ܳܬܰܢ܇ ܘܡܰܘܪܶܬ ܡܰܠܟܽܘܬܳܐ ܒܰܡܪܰܚܰܡܳܢܽܘܬܶܗ܀

ܫܽܘܒܚܳܐ ܠܰܐܒܳܐ ܘܬܰܘܕܺܝܬܳܐ ܠܰܒܪܳܐ ܕܡܶܢܶܗ ܘܣܶܓܕܬܳܐ ܠܪܽܘܚܳܐ܇ ܚܰܕ ܐܰܠܳܗܳܐ܇ ܕܠܳܐ ܡܶܣܬܰܝܰܟ ܡܶܢ ܥܺܝܪ̈ܶܐ ܘܡܶܢ ܡܰܠܰܐܟ̈ܶܐ܇ ܬܠܺܝܬܳܝܽܘܬܳܐ ܣܓܺܝܕܬܳܐ܇ ܕܠܳܗܿ ܣܳܓܕ̈ܳܢ ܘܰܡܫܰܒ̈ܚܳܢ ܟܽܠܗܶܝܢ ܒܶܪ̈ܝܳܬܳܐ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܒܢ̈ܰܝ ܢܽܘܗܪܳܐ ܩܽܘܡܘ̱ ܒܝܰܕ ܨܰܘܡܳܐ ܩܰܕܺܝܫܳܐ܇ ܕܨܳܡ ܗܘܳܐ ܡܽܘܫܶܐ ܒܛܽܘܪ ܣܺܝܢܰܝ܇ ܥܒܰܕ ܦܽܘܪܩܳܢܳܐ ܠܥܰܡܳܐ ܕܺܐܝܣܪܳܐܶܝܠ܀

ܒܝܰܕ ܨܰܘܡܳܐ ܩܰܕܺܝܫܳܐ܇ ܕܨܳܡܘ ܛܠܳܝ̈ܶܐ ܕܒܶܝܬ ܚܰܢܰܢܝܳܐ܇ ܒܰܐܪܥܳܐ ܕܒܳܒܶܝܠ܇ ܕܰܥܟܽܘܗܿ ܗ̱ܘܰܘ ܠܢܽܘܪܳܐ܀

ܒܝܰܕ ܨܰܘܡܳܐ ܩܰܕܺܝܫܳܐ܇ ܕܨܳܡܘ̱ ܫܠܺܝ̈ܚܶܐ ܒܓܰܘ ܥܶܠܺܝܬܳܐ܇ ܩܰܒܶܠܘ̱ ܪܽܘܚܳܐ ܕܩܽܘܕܫܳܐ ܡܶܢ ܪܰܘܡܳܐ܀

ܒܝܰܕ ܨܰܘܡܳܐ ܩܰܕܺܝܫܳܐ ܘܒܰܨܠܽܘܬܳܐ ܕܰܡܩܰܪܒܺܝܢܰܢ ܠܳܟ܇ ܐܶܬܪܰܥܳܐ ܠܰܢ܇ ܘܪ̈ܰܚܡܰܝܟ ܥܳܒܶܕ ܥܠܰܝܢ܀

 

ܩܳܠܳܐ ܕܨܰܦܪܳܐ ܒܩܳܠܳܐ ܩܽܘܩܳܝܳܐ

ܥܳܠܡܳܐ ܗܳܢܳܐ ܥܳܒܰܪ ܠܶܗ ܐܳܘ ܚܰܒܺܝ̈ܒܰܝ܇ ܘܰܪ̈ܓܺܝܓܳܬܳܐ ܡܶܫܬܰܪ̈ܝܳܢ ܘܰܗܘܳܐ ܐܰܝܟ ܠܰܝܬܰܘܗ̱ܝ܇ ܘܠܳܐ ܡܩܰܘܶܐ ܒܶܗ ܡܶܕܶܡ ܕܰܠܥܳܠܰܡ܇ ܐܶܠܳܐ ܫܪܳܪܳܐ ܘܕܶܚܠܰܬ ܐܰܠܳܗܳܐ܇ ܘܚܰܝ̈ܶܐ ܕܰܡܠܰܟ ܐܰܠܳܗܳܐ ܠܰܐܝܠܶܝܢ ܕܰܐܚܒܽܘܗ̱ܝ܇ ܕܡܰܠܟܽܘܬܶܗ܇ ܕܠܳܐ ܡܶܫܬܰܪܝܳܐ ܘܚܰܝ̈ܶܐ ܕܠܳܐ ܦܳܛܪܺܝܢ ܗ ܘ ܗ܀

ܗܳܪܟܳܐ ܐܺܝܬ ܐܰܬܪܳܐ ܕܢܶܒܥܶܐ ܐ̱ܢܳܫ ܥܰܠ ܚܰܘܒ̈ܰܘܗ̱ܝ܇ ܬܰܡܳܢ ܒܥܳܠܡܳܐ ܕܠܳܐ ܥܳܒܰܪ ܦܝܳܣܳܐ ܠܒܰܪ ܡܶܫܬܕܶܐ܇ ܕܚܺܝܠܳܐ ܘܙܺܝܥܳܐ ܬܰܡܳܢ ܟܺܐܢܽܘܬܳܐ܇ ܘܝܳܗܒܳܐ ܠܟܽܠܢܳܫ ܐܰܓܪܶܗ ܐܰܝܟ ܥܰܡܠܶܗ܇ ܚܢܳܢܳܟ ܢܩܽܘܡ ܠܰܢ ܒܶܝܬ ܕܺܝܢܳܐ ܚܰܬܢܳܐ ܕܪܰܘܡܳܐ܇ ܘܰܬܣܬܰܪܝ̱ ܠܰܢ ܛܰܝܒܽܘܬܳܟ ܚܽܘܣ ܘܶܐܬܪܰܚܰܡܥܠܰܝ ܗ ܘ ܗ܀

ܡܰܠܟܳܐ ܪܰܒܳܐ ܘܚܰܝ ܥܳܠܡ̈ܶܐ ܐܰܠܳܗܳܐ ܡܪܰܝܡܳܐ܇ ܘܕܰܝܳܢܳܐ ܪܰܒ ܕܰܝܳܢ̈ܳܐ ܘܒܳܚܰܪ ܟܰܣܝ̈ܳܬܳܐ܇ ܒܗܰܘ ܥܶܕܳܢܳܐ ܕܥܳܐܠ̈ܳܢ ܫܰܪ̈ܒܳܬܳܐ܇ ܠܕܺܝܢܳܐ ܟܺܐܢܳܐ ܩܽܘܕܡܰܬ ܪܰܒܽܘܬܳܟ ܛܰܝܒܽܘܬܳܟ ܬܩܽܘܡܝ̱ ܒܰܐܦ̈ܰܝܢ ܘܪ̈ܰܚܡܰܝܟ ܢܶܗܘܽܘܢ ܥܠܰܝܢ܇ ܘܰܒܚܰܕܽܘܬܳܐ ܢܶܩܥܶܐ ܠܳܟ ܕܠܳܟ ܫܽܘܒܚܳܐ ܡܳܪܝܳܐ ܗ ܘ ܗ܀

 

ܐ̱ܚܪܺܢܳܐ ܒܩܳܠܳܐ ܒܨܰܦܪܳܐ ܚܙܰܐܽܘܗܝ ܬܰܠܡܺܝܕ̈ܶܐ

ܛܳܒܳܐ ܕܝܰܗܒ ܢܰܦܫܶܗ ܚܠܳܦܰܝܢ܇ ܠܚܰܫܳܐ ܘܰܠܡܰܘܬܳܐ ܘܦܰܪܩܰܢ܇ ܚܽܘܢ ܠܰܢ ܒܪ̈ܰܚܡܰܝܟ ܚܰܢܳܢܳܐ܇ ܡܶܢ ܣܽܘܓܐܳܐ ܕܚܰܘ̈ܒܶܐ ܕܰܣܥܰܪܢ܇ ܕܝܰܡܳܐ ܕܢܽܘܪܳܐ ܗܳܐ ܡܙܺܝܥ ܠܺܝ܇ ܘܰܡܒܰܠܗܳܐ ܠܰܢ ܒܰܒܪܺܝܬܳܐ܀

ܒܨܰܘܡܳܐ ܕܨܳܡܘ̱ ܗ̱ܘܰܘ ܙܰܕܺܝ̈ܩܶܐ܇ ܐܶܬܢܰܨܰܚܘ̱ ܩܕܳܡ ܐܰܠܳܗܳܐ܇ ܘܰܒܥܰܡ̈ܠܶܐ ܕܙܰܕܺܝܩܽܘܬܳܐ܇ ܪܰܥܺܝܽܘ ܠܡܳܪܝܳܐ ܒܕܳܪ̈ܰܗܽܘܢ܇ ܘܰܚܢܰܢ ܒܝܰܕ ܨܰܘܡܳܐ ܢܶܫܦܰܪ܇ ܕܢܶܬܪܰܥܶܐ ܠܰܢ ܐܰܠܳܗܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܶܢܝܳܢܳܐ ܕܶܝܢ ܗܳܢܳܐ ܕܚܰܡܫܳܐ ܣܰܓܺܝ ܫܰܦܺܝܪ܇ ܘܗܳܠܶܝܢ ܫܽܘܦܪ̈ܶܐ ܗ̱ܘܰܘ ܒܶܗ ܠܫܽܘܒܚܳܐ ܕܰܐܠܳܗܽܘܬܳܐ܇ ܚܰܓܠܳܐ ܕܩܳܪܶܐ ܘܝܰܘܢܳܐ ܕܢܳܗܶܡ ܘܢܶܨܳܐ ܕܢܳܨܰܪ܇ ܘܰܣܢܽܘܢ̈ܝܳܬܳܐ ܒܠܶܥ̈ܙܶܐ ܚܠܰܝ̈ܳܐ ܕܠܳܐ ܪ̈ܰܒܳܢܶܐ܇ ܛܰܘܣܳܐ ܒܓܶܦܰܘ̈ܗ̱ܝ ܟܰܕ ܡܶܙܕܰܠܰܠ ܡܚܰܘܶܐ ܫܽܘܦܪܶܗ܇ ܢܶܨܳܐ ܕܚܰܨܺܝܦ ܘܨܰܦܪܳܐ ܕܕܳܚܠܳܐ ܘܥܳܪܩܳܐ ܡܶܢܶܗ܀

ܐܰܝܟ ܐܰܪ̈ܓܘܳܢܶܐ ܘܰܐܝܟ ܐܽܘܟ̈ܳܡܶܐ ܘܰܐܝܟ ܚܶܘܳܪ̈ܶܐ܇ ܒܝܰܘܡܶܗ ܕܚܰܡܫܳܐ ܣܳܡ ܒܳܪܽܘܝܳܐ ܓܰܘܢܺܝ̈ܢ ܓܰܘܢܺܝ̈ܢ܇ ܐܰܠܒܶܫ ܐܶܢܽܘܢ ܨܰܒܶܬ ܐܶܢܽܘܢ ܗܰܕܰܪ ܐܶܢܽܘܢ܇ ܘܰܒܫܽܘܚܠܳܦ̈ܶܐ ܓܰܘ̈ܢܶܐ ܬܗܺܝܪ̈ܶܐ ܐܰܦܪܰܚ ܐܶܢܽܘܢ܇ ܐܰܝܟ ܗܰܒܳܒ̈ܶܐ ܘܰܐܝܟ ܫܽܘܫ̈ܰܢܶܐ ܒܝܰܘ̈ܡܰܝ ܢܺܝܣܳܢ܇ ܦܳܪܚܺܝܢ ܘܦܳܓܥܺܝܢ ܒܪ̈ܰܦܶܐ ܘܓܶܢ̈ܣܶܐ ܒܓܶܢ̈ܣܶܐ܀

 

ܕܰܬܠܳܬܫ̈ܳܥܺܝܢ ܒܩܳܠܳܐ ܬܪ̈ܰܝܗܽܘܢ ܥܳܠܡ̈ܶܐ ܕܺܝܠܳܟ

ܠܳܐ ܡܳܪܝ̱ ܬܰܗܡܶܐ ܡܶܢ ܥܺܕܬܳܟ܇ ܘܡܶܢ ܡܰܪܥܺܝܬܳܟ ܘܩܳܝܡܳܐ ܕܠܳܟ ܗܽܘ ܩܳܪܝܳܐ ܒܟܽܠܥܶܕܳܢ܇ ܬܳܐ ܠܺܐܝܳܠܳܗܿ ܘܰܦܪܽܘܩܶܝܗܿ܀

ܢܶܗܘܶܐ ܩܳܠܳܐ ܕܒܳܥܽܘܬܰܢ܇ ܡܪܰܥܝܳܢܳܐ ܠܰܐܠܳܗܽܘܬܳܟ܇ ܚܽܘܒܳܟ ܢܰܦܫܰܥ ܒܽܘܪ̈ܟܳܬܳܐ܇ ܠܥܰܡܳܐ ܕܰܨܗܶܐ ܠܰܚܢܳܢܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܳܘ ܕܰܝܳܢܳܐ ܥܛܺܝܦ ܫܽܘܠܛܳܢܳܐ ܠܒܰܟ ܐܽܘܚܕܳܢܳܐ܇ ܕܢܳܨܰܚ ܕܰܪܓܶܗ ܘܪܰܒ ܐܺܝܩܳܪܶܗ ܕܚܺܝܠ ܦܽܘܩܕܳܢܶܗ܇ ܪܳܡܳܐ ܡܶܠܬܶܗ ܘܚܰܝ̈ܠܰܘܳܬܶܗ ܡܶܫܬܰܡܥܺܝܢ ܠܶܗ܇ ܘܝܰܬܝܪ ܚܰܬܺܝܪ ܢܦܺܝܚ ܐܰܟܡܳܐ ܕܡܶܢܶܗ ܠܳܐ ܡܶܫܬܰܚܠܰܦ܀

ܐܳܘ ܐܺܝܡܳܡܳܐ ܐܰܟܡܳܐ ܫܰܦܺܝܪ ܐܰܢ̱ܬ ܟܡܳܐ ܢܰܨܺܝܚ ܐܰܢ̱ܬ܇ ܟܡܳܐ ܚܰܒܺܝܒܝ̱ ܐܰܢ̱ܬ ܟܡܳܐ ܟܰܫܺܝܪ ܐܰܢ̱ܬ ܟܡܳܐ ܥܰܬܺܝܪ ܐܰܢ̱ܬ܇ ܘܳܝ ܕܡܳܛܶܐ ܠܶܗ ܪܰܡܫܳܐ ܟܡܺܝܪܳܐ ܕܰܡܒܰܛܶܠ ܠܳܟ܇ ܘܰܒܚܶܫܽܘܟܳܐ ܡܚܰܘܶܐ ܘܡܰܬܰܘܶܐ ܘܰܡܟܰܡܰܗ ܠܳܟ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܕܰܚܛܳܐ ܠܳܐ ܢܶܚܛܶܐ

ܙܰܒ̈ܢܶܐ ܡܰܪܺܝܪܺܝܢ܇ ܘܚܰܘܒ̈ܰܝ ܣܰܓܺܝ̈ܐܺܝܢ ܘܡܰܪܕܽܘܬܳܐ ܩܰܫܝܳܐ܇ ܘܟܺܐܢܳܐܺܝܬ ܪܳܕܝܳܐ܇ ܒܰܥܒ̈ܳܕܶܐ ܛܳܒ̈ܶܐ܇ ܠܰܐܠܳܗܳܐ܇ ܢܶܫܦܰܪ ܥܰܠ ܥܳܠܡܳܐ܇ ܗ ܗ ܫܽܘܒܚܳܐ ܠܛܰܝܒܽܘܬܳܟ ܚܳܢܰܬ݀ ܠܚܰܛܳܝ̈ܶܐ܀

ܝܳܗܽܘܒܳܐ ܛܳܒܳܐ܇ ܕܟܽܠܶܗ ܪ̈ܰܚܡܶܐ ܡܠܶܐ܇ ܗܰܒ ܠܰܢ ܫܶܐܠ̈ܳܬܰܢ ܡܶܢ ܓܰܙܳܟ ܡܰܠܝܳܐ܇ ܟܠܺܝ ܡܶܢܰܢ ܫܰܒ̈ܛܶܐ܇ ܘܡܰܚ̈ܘܳܬܳܐ ܕܪܽܘܓܙܳܐ܇ ܘܚܽܘܢܰܝܢܝ̱ ܒܛܰܝܒܽܘܬܳܟ ܘܚܽܘܣ ܘܶܐܬܪܰܚܰܡܥܠܰܝܢ܇ ܗ ܘ ܗ ܕܰܝܳܢܳܐ ܟܺܐܢܳܐ ܚܽܘܣ ܘܶܐܬܪܰܚܰܡܥܠܰܝܢ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܛܰܝܶܒ ܠܰܢ ܡܳܪܝ̱ ܠܰܓܢܽܘܢܳܟ܇ ܒܪ̈ܰܚܡܶܐ ܫܦܺܝ̈ܥܶܐ ܕܰܚܢܳܢܳܟ܇ ܐܰܕܢܰܚ ܨܶܝܕܰܝܢ ܦܽܘܪܩܳܢܳܟ܇ ܘܠܳܐ ܬܒܰܙܰܚ ܠܰܢ ܟܺܐܢܽܘܬܳܟ܀

ܚܠܽܘܛ ܠܰܢ ܒܶܐܡܪ̈ܶܐ ܕܰܓܙܳܪܳܟ܇ ܡܶܢܺܝ ܠܰܢ ܒܥܶܪ̈ܒܶܐ ܕܡܰܪܥܺܝܬܳܟ܇ ܐܰܫܘܳܐ ܠܟܽܠܰܢ ܡܳܐ ܕܳܐܬܶܝܬ܇ ܠܓܰܠܝܽܘܬ ܐܰܦ̈ܶܐ ܒܢܽܘܚܳܡܳܟ܀

 

ܕܰܬܫܰܥܫܳܥ̈ܺܝܢ ܒܩܳܠܳܐ ܡܫܺܝܚܳܐ ܠܳܐ ܬܰܗܡܶܐ

ܐܶܬܬܥܺܝܪܝ̱ ܐܳܘ ܢܰܦܫܝ̱ ܕܳܘܺܝܬܳܐ܇ ܘܰܪܢܳܝ ܘܶܐܬܕܰܟܪܝ ܠܡܰܦܩܳܢܶܟܝ̱܇ ܘܶܐܬܥܰܗܰܕܝ̱ ܠܥܶܕܳܢ ܦܽܘܪܫܳܢܶܟܝ̱܇ ܘܽܙܘܥܝ̱ ܡܶܢ ܗܳܝ ܫܳܥܬܳܐ ܕܚܺܝܠܬܳܐ܇ ܕܩܕܳܡ ܕܰܝܳܢܳܐ ܝܳܗܒܰܬܝ̱ ܦܽܘܢܳܝ ܦܶܬܓܳܡܳܐ܀ 

ܓܒܳܝ ܠܶܟܝ̱ ܦܽܘܠܚܳܢ ܟܺܐܢܽܘܬܳܐ܇ ܥܰܡܠܳܐ ܕܡܰܘܬܰܪ ܠܰܩܢܽܘܡܶܟܝ̱ ܘܰܠܒܽܘܟܝ̱ ܠܶܟܝ̱ ܪܶܗܛܳܐ ܕܚܰܝ̈ܶܐ܇ ܘܰܪܫܽܘܡܝ̱ ܩܕܳܡ ܥܰܝܢܰܝ̈ܟܝ̱ ܟܽܠܫܳܥ܇ ܠܕܶܚܠܳܐ ܘܣܽܘܪܳܕܳܐ ܕܰܢܛܺܝܪ ܠܶܟܝ̱ ܒܝܽܘܡ ܒܽܘܚܪܳܢܳܐ܀

 

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܒܗܰܘ ܥܳܠܡܳܐ ܥܳܒܶܐ܇ ܐܺܝܬ ܠܰܢ ܕܢܶܬܒܰܝܰܢ܇ ܕܗܳܠܶܝܢ ܕܶܐܫܟܰܚܢܰܢ܇ ܗܳܪܟܳܐ ܕܚܶܠܡܳܐ ܗܘ̈ܰܝ܇ ܢܰܝܠܶܠ ܕܒܰܙܰܚ ܒܰܢ ܥܳܠܡܳܐ ܡܠܶܐ ܬܽܘܟ̈ܶܐ܀ ܫܺܝܛܳܐ ܒܗܰܘ ܥܶܕܳܢ܇ ܢܰܦܫܳܐ ܠܟܽܠ ܡܶܕܶܡ܇ ܠܥܽܘܬܪܳܐ ܘܩܶܢܝܳܢ̈ܶܐ܇ ܘܓܶܢܣܳܐ ܘܚܰܒܺܝ̈ܒܶܐ܇ ܒܡܳܪܳܗܿ ܠܚܽܘܕ ܚܳܝܪܳܐ܇ ܕܰܐܝܟܰܢ ܡܩܰܒܶܠ ܠܳܗܿ܀

 

ܬܽܘܒ ܕܰܥܪܽܘܒܬܳܐ ܕܰܐܪܒܰܥ ܕܨܰܘܡܳܐ

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝܢ ܒܩܳܠܳܐ ܐܶܡܳܐ ܕܟܺܝܬܳܐ

ܗܰܘ ܕܰܒܨܰܘܡܳܐ ܠܢܺܝܢ̈ܘܳܝܶܐ ܦܪܰܩ ܗܘܳܐ܇ ܡܶܢ ܚܽܘܒܳܠܳܐ ܦܰܨܺܝ ܒܛܰܝܒܽܘܬܶܗ܀

ܒܪܺܝܟ ܗܽܘ ܡܫܺܝܚܳܐ ܕܨܳܡ ܗܘܳܐ ܘܰܦܪܰܩ ܠܰܢ܇ ܘܰܕܪܰܫ ܐܽܘܪܚܳܐ ܕܒܳܗܿ ܢܶܪܕܽܘܢ ܥܰܒܕ̈ܰܘܗ̱ܝ ܪܰܚܶܡ܀

ܨܳܡ ܗܘܳܐ ܡܽܘܫܶܐ܇ ܨܰܘܡܳܐ ܩܰܕܺܝܫܳܐ܇ ܐܰܪܒܥܺܝܢ ܝܰܘܡ̈ܺܝܢ܇ ܘܰܦܪܰܩ ܐܺܝܣܪܳܐܶܝܠ ܪܰܚܶܡܥܠܰܝ ܐܰܠܳܗܳܐ܀

ܗܳܐ ܝܰܘܡ̈ܳܬܳܐ܇ ܕܰܒܗܽܘܢ ܢܶܦܪܽܘܥ ܗܘܳܐ܇ ܠܡܳܪܳܐ ܚܰܘ̈ܒܶܐ ܨܰܘܡܳܐ ܘܰܨܠܽܘܬܳܐ ܪܰܚܶܡܥܠܰܝ܀

ܕܰܚܛܰܝܢܰܢ ܡܳܪܝ̱܇ ܣܰܓܺܝ ܘܰܐܪܫܰܥܢܰܢ܇ ܚܰܣܳܐ ܘܰܫܒܽܘܩ ܚܛܳܗ̈ܶܐ ܕܣܳܓܽܘ̈ܕܰܝܟ܀

ܡܳܐ ܦܐܶܐ ܘܰܪܓܺܝܓ ܨܰܘܡܳܐ ܩܰܕܺܝܫܳܐ܇ ܕܶܐܓܥܶܠ ܚܰܬܢܳܐ ܠܥܺܕܬܳܐ ܗܳܝ ܕܰܡܟܰܪ ܪܰܚܶܡܥܠܰܝ ܐܰܠܳܗܳܐ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܨܠܺܝ ܡܳܪܝܳܐ ܒܪ̈ܰܚܡܶܐ

ܒܪܺܝܟ ܗܽܘ ܡܫܺܝܚܳܐ ܕܒܰܩܢܽܘܡܶܗ܇ ܫܰܡܠܺܝ ܗܘܳܐ ܘܰܓܡܰܪ ܐܪ̈ܳܙܶܐ܇ ܕܥܰܒܕܰܘ̈ܗ̱ܝ ܢܒܺܝ̈ܶܐ ܕܰܪܫܰܡܘ̱ ܘܨܳܪܘ̱܇ ܕܰܥܬܺܝܕ ܕܰܢܨܽܘܡ ܐܰܟܘܳܬܗܽܘܢ܀

ܢܽܘܗܪܳܐ ܘܶܐܣܛܰܠ ܬܶܫܒܽܘܚܬܳܐ܇ ܡܰܠܒܶܫ ܨܰܘܡܳܐ ܠܨ̈ܰܝܳܡܶܐ܇ ܛܽܘܒܰܘܗ̱ܝ ܠܰܐܝܢܳܐ ܕܨܳܐܶܡ ܠܶܗ܇ ܟܰܕ ܕܟܶܐ ܠܶܒܶܗ ܡܶܢ ܐܰܟܬܳܐ܀

ܨܰܘܡܳܐ ܫܒܺܝܠܳܐ ܕܰܠܚܰܝ̈ܶܐ܇ ܘܡܰܥܠܬܳܐ ܕܰܠܘܳܬ ܓܢܽܘܢܳܐ܇ ܒܰܪ ܥܶܢܝܳܢܳܐ ܕܡܰܠܰܐܟ̈ܶܐ܇ ܘܰܡܩܰܪܒܳܢܳܐ ܠܘܳܬ ܡܳܪܝܳܐ܀

ܨܰܘܡܳܐ ܡܫܰܗܝܳܢܳܐ ܕܚܰܫ̈ܶܐ܇ ܡܒܰܛܠܳܢܳܐ ܕܰܫܟܺܝܪ̈ܳܬܳܐ܇ ܡܛܰܠܩܳܢܳܐ ܕܰܪ̈ܓܺܝܓܳܬܳܐ ܡܙܰܗܝܳܢܳܐ ܕܢܰܦܫܳܐ ܘܦܰܓܪܳܐ܀

ܨܰܘܡܳܐ ܙܰܒܢܰܐܗ̱ܘ ܕܚܽܘܣܳܝܳܐ ܕܡܶܬܦܰܪ̈ܥܳܢ ܒܶܗ ܣܰܟܠܘ̈ܳܬܳܐ܇ ܘܡܶܬܬܰܠܚ̈ܳܢ ܒܶܗ ܐܶܫܛܳܪ̈ܶܐ܇ ܠܳܐ ܐ̱ܢܳܫ ܢܶܪܚܰܡ ܒܶܛܠܳܢܳܐ܀

ܨܰܘܡܳܐ ܥܳܒܶܕ ܒܰܫܪܳܪܳܐ܇ ܦܰܓܪ̈ܳܢܶܐ ܪ̈ܽܘܚܳܢܶܐ܇ ܡܨܰܠܶܠ ܠܶܗ ܠܰܕܨܳܐܶܡ ܠܶܗ܇ ܡܶܢ ܟܽܠ ܡܽܘ̈ܡܺܝܢ ܕܰܚܛܺܝܬܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܒܰܕܡܽܘܬ ܒܶܣ̈ܡܶܐ

ܒܪ̈ܰܚܡܶܐ ܕܫܰܠܚܽܘܟ ܡܶܢ ܡܶܕܝܳܪ̈ܶܐ ܪ̈ܳܡܶܐ ܕܰܐܒܽܘܟ܇ ܚܽܘܣ ܥܰܠ ܫܰܦܠܽܘܬܝ̱ ܚܰܢܳܢܳܐ܇ ܕܰܐܢ̱ܬ ܗܽܘ ܒܪܰܝܬܳܢܝ̱܇ ܡܶܢ ܠܳܐ ܡܶܕܶܡ܇ ܕܶܐܗܘܶܐ ܡܶܕܶܡ ܘܶܐܫܰܒܚܳܟ ܥܰܠ ܟܽܠܡܶܕܶܡ܀

ܐܳܣܝܳܐ ܕܶܐܬܳܐ ܕܢܶܥܨܽܘܒ ܟܺܐܒ̈ܶܐ ܕܰܒܢ̈ܰܝ ܐ̱ܢܳܫ̈ܳܐ܇ ܕܡܰܚܺܬܺܝ̈ܢ ܗܘܳܘ ܒܳܚܛܶܗ̈ܶܐ܇ ܐܰܣܳܐ ܡܽܘ̈ܡܶܐ ܟܣܰܝ̈ܳܐ ܕܺܐܝܬ ܒܰܢ ܕܠܳܐ ܢܶܚܕܶܐ ܠܰܢ܇ ܒܺܝܫܳܐ ܢܟܺܝܠܳܐ ܣܳܩܽܘܪܰܢ܀

ܒܝܽܘܡ ܓܶܠܝܳܢܳܟ܇ ܒܰܪ ܐܰܠܳܗܳܐ ܡܳܐ ܕܥܳܐܠ̈ܳܢ ܒܶܗ܇ ܫܰܪ̈ܒܳܬܳܐ ܠܕܺܝܢܳܐ ܟܺܐܢܳܐ܇ ܐܰܩܺܝܡ ܠܰܢ ܡܳܪܝ̱ ܡܶܢ ܝܰܡܺܝܢܳܟ܇ ܥܰܡ ܩܰܕܺܝܫ̈ܰܝܟ܇ ܘܢܶܙܡܰܪ ܫܽܘܒܚܳܐ ܠܛܰܝܒܽܘܬܳܟ܀

 

ܐ̱ܚܪܺܢܳܐ ܒܩܳܠܳܐ ܒܰܥܪܽܘܒܬܳܐ ܒܪܺܝܫܺܝܬ

ܥܺܕܬܳܐ ܡܗܰܝܡܰܢܬܳܐ܇ ܒܳܥܽܘܬܳܐ ܥܶܒܕܰܬ݀ ܘܠܰܐܠܳܗܳܐ ܩܶܪܒܰܬ݀܇ ܘܰܥܢܳܐ ܘܶܐܡܰܪ ܠܳܗܿ ܕܡܶܟܳܐ ܘܰܠܥܳܠܰܡ ܒܓܰܘܶܟܝ̱ ܫܳܪܶܐ ܐ̱ܢܳܐ܇ ܗ ܘ ܗ܇ ܘܢܶܬܦܰܨܚܽܘܢ ܝܰܠܕܰܝ̈ܟܝ̱܀

ܛܽܘܒܳܐ ܠܟܰܫܺܝܪ̈ܶܐ܇ ܘܘܳܝܳܐ ܠܒܰܛܺܝ̈ܠܶܐ ܒܝܰܘܡܳܐ ܕܢܽܘܚܳܡܳܐ܇ ܕܗܳܠܶܝܢ ܠܡܰܠܟܽܘܬܳܐ ܘܗܶܢܽܘܢ ܠܚܶܫܽܘܟܳܐ ܒܰܪܳܝܳܐ ܢܳܦܩܺܝܢ܇ ܗ ܘ ܗ ܘܝܳܪܬܺܝܢ ܓܺܗܰܢܳܐ܀

 

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܳܘ ܥܰܬܺܝܪܳܐ ܓܰܐܝܳܐ ܚܬܺܝܪܳܐ ܨܰܠܡܳܐ ܪܓܺܝܓܳܐ܇ ܫܽܘܦܪܳܐ ܫܺܐܝܠܳܐ ܦܐܶܐ ܒܰܠܒܽܘܫ̈ܶܐ ܣܡܺܝܟ ܒܰܛܥܽܘ̈ܡܶܐ܇ ܟܡܳܐ ܐܺܝܩܳܪ̈ܶܐ ܟܡܳܐ ܦܽܘܢ̈ܳܩܶܐ ܟܡܳܐ ܦܽܘܪ̈ܦܳܥܶܐ܇ ܟܡܳܐ ܡܫܰܒܚ̈ܳܢܶܐ ܟܡܳܐ ܣܳܓܽܘܕ̈ܶܐ ܟܡܳܐ ܕܰܓ̈ܳܠܶܐ܀

ܐܳܘ ܫܰܦܺܝܪܳܐ ܚܽܘܪ ܒܺܐܝܡܳܡܳܐ ܕܰܟܡܳܐ ܫܰܦܺܝܪ܇ ܘܰܠܒܺܝܫ ܙܺܝܘܳܐ ܘܗܶܕܪܳܐ ܘܡܰܦܪܶܓ ܒܰܐܪܥܳܐ ܟܽܠܳܗܿ܇ ܘܡܶܚܕܳܐ ܕܰܡܛܳܐ ܪܰܡܫܳܐ ܕܢܺܐܬܶܐ ܕܥܶܟ ܐܺܝܡܳܡܳܐ܇ ܘܶܐܬܳܐ ܠܺܠܝܳܐ ܡܫܰܚܠܶܦ ܫܳܩܶܠ ܫܽܘܦܪܳܐ ܡܶܢܶܗ܀

ܫܽܘܒܚܳܐ ܠܰܐܒܳܐ ܘܣܶܓܕܬܳܐ ܠܰܒܪܳܐ ܬܰܘܕܺܝ ܠܪܽܘܚܳܐ ܚܕܳܐ ܐܽܘܣܺܝܰܐ ܕܠܳܐ ܡܶܬܕܰܪܟܳܐ ܡܶܢ ܡܰܠ̈ܳܠܶܐ܇ ܒܗܳܢܳܐ ܥܳܠܡܳܐ ܦܰܨܳܐ ܠܰܢ ܡܳܪܝ̱ ܡܶܢ ܢܶܟܝ̈ܳܢܶܐ܇ ܘܰܒܗܰܘ ܕܰܥܬܺܝܕ ܢܶܚܙܶܐ ܚܢܳܢܳܟ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܐܶܬܬܥܺܝܪ ܚܰܛܳܝܳܐ

ܬܶܥܽܘܠܝ̱ ܒܳܥܽܘܬܳܗܿ ܕܢܰܦܫܳܐ ܡܟܰܬܰܡܬܳܐ܇ ܘܬܶܣܰܒܝ̱ ܡܶܢܳܟ ܐܳܣܝܽܘܬܳܐ ܠܰܚܒܳܪ̈ܳܬܳܗܿ܇ ܐܳܘ ܠܰܡܡܰܚ̈ܰܝܳܐ܀

ܚܰܘܒ̈ܰܝ ܣܰܓܺܝ̈ܐܺܝܢ܇ ܠܒܶܝܬ ܕܺܝܢܳܐ ܟܺܐܢܳܐ ܗܳܐ ܩܳܪܶܝܢ ܠܺܝ܇ ܢܓܽܘܠܽܘܢ ܥܠܰܝ ܪ̈ܰܚܡܰܝܟ ܘܺܐܚܶܐ܇ ܡܳܪܶܐ ܟܽܠ܀

ܚܛܳܗ̈ܰܝ ܣܰܓܺܝ̈ܐܺܝܢ܇ ܘܰܥܒܳܕ̈ܰܝ ܒܺܝ̈ܫܶܐ ܗܳܐ ܡܛܰܒܥܺܝܢ ܠܺܝ܇ ܐܰܝܟ ܡܰܚܫܽܘ̈ܠܶܐ ܒܶܝܬ ܓܰܠܠܰܝ̈ܗܽܘܢ܇ܡܰܠܳܚܳܐ ܕܫܰܝܢܳܐ ܕܰܐܠܳܢܝ̱܇ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܬܶܣܦܰܩܝ̱ ܒܳܥܽܘܬܳܐ܇ ܕܰܡܠܶܐ ܥܶܕܳܢܳܐ ܠܕܰܘܝܳܐ ܕܰܐܥܬܶܩ ܒܰܚܛܳܗ̈ܶܐ܇ ܟܽܠܗܽܘܢ ܝܰܘܡܰܘ̈ܗ̱ܝ ܕܰܐܝܟ ܕܣܶܦܩܰܬ݀ ܠܗܰܘ ܓܰܝܳܣܳܐ܀

ܬܶܫܒܽܘܚܬܳܐ ܚܕܰܬܳܐ܇ ܘܬܰܘܕܺܝܬܳܐ ܥܦܺܝܦܬܳܐ ܡܩܰܪܒܺܝܢܰܢ ܠܳܟ܇ ܘܰܠܘܳܬܳܟ ܗܽܘ ܓܳܥܶܝܢܰܢ܇ ܡܳܪܶܐ ܟܽܠ ܫܽܘܒܚܳܐ ܠܳܟ܀

 

ܩܳܠܳܐ ܕܠܺܠܝܳܐ ܒܩܳܠܳܐ ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ

ܝܶܫܽܘܥ ܗܰܘ ܕܰܗܘܳܐ ܠܶܘܝܳܐ܇ ܠܝܶܫܽܘܥ ܒܰܪܢܽܘܢ ܒܰܩܪܳܒܳܐ܇ ܘܰܐܚܪܶܒ ܘܰܐܘܒܶܕ ܡܶܢ ܩܽܘܕܡܰܘܗ̱ܝ܇ ܬܠܳܬܺܝ̈ܢ ܘܚܰܕ ܡܰܠܟ̈ܶܐ܇ ܘܗܽܘ ܢܶܗܘܶܐ ܠܶܘܝܳܐ ܠܟܳܗ̈ܢܶܐ܇ ܘܢܳܛܽܘܪܳܐ ܠܥܺܕܰܬ ܩܽܘܕܫܳܐ܇ ܘܰܢܪܺܝܡ ܩܰܪܢܳܐ ܕܥܺܕ̈ܳܬܳܐ ܕܢܶܒܗܰܬ ܣܳܛܳܢܳܐ܀

ܚܰܝܠܳܐ ܕܰܛܥܺܝܢ ܒܶܪ̈ܝܳܬܳܐ܇ ܘܟܰܢܫܳܗܿ ܠܥܺܕܬܶܗ ܠܘܳܬ ܐܰܒܽܘܗ̱ܝ ܘܚܰܕܺܝ ܒܰܫܟܳܚܬܶܗ ܕܓܶܢܣܰܢ ܟܶܢܫܳܐ ܕܡܰܠܰܐܟ̈ܶܐ܇ ܚܰܕܳܐ ܠܟܽܠܰܢ ܦܳܪܽܘܩܰܢ܇ ܘܗܳܐ ܡܫܺܝܡܳܐ ܠܰܢ ܡܰܪܕܽܘܬܳܐ܇ ܘܡܶܢ ܥܳܩ̈ܳܬܰܢ ܒܰܝܰܐ ܠܰܢ܇ ܘܢܶܚܕܶܐ ܘܰܢܫܰܒܚܳܟ܀

 

ܡܰܕܪܳܫܳܐ܇ ܐܶܬܩܰܛܰܠܘ̱ ܗ̱ܘܰܘ ܝܰܠܽܘ̈ܕܶܐ܇ ܒܪܺܝܟ ܝܳܗܽܘܒܳܐ ܕܦܽܘܪܫܳܢܳܐ܇ ܕܝܳܗܶܒ ܘܟܳܠܶܐ ܠܥܽܘܕܪ̈ܳܢܶܐ

ܗܳܐ ܒܟܽܠ ܐܶܣܟܺܝܡ ܝܳܗܽܘܒܰܐܗ̱ܘ܇ ܕܡܳܐ ܕܝܳܗܶܒ ܚܰܘܺܝ ܚܽܘܒܶܗ܇ ܘܡܳܐ ܕܟܳܠܶܐ ܚܰܘܺܝ ܚܢܳܢܶܗ܇ ܐܰܢ̱ܬ ܗܽܘ ܓܶܝܪ ܫܶܐܠܰܬ݀ ܛܽܘܥܝܰܝ܇ ܕܡܰܘܬܳܐ ܟܣܶܐ ܒܳܗܿ ܠܫܽܐܳܘܳܠܶܝ̈ܗܿ܇ ܐܳܦ ܗܳܪܟܳܐ ܟܰܕ ܛܳܒ ܟܳܠܶܐ܇ ܗܳܪܟܳܐ ܡܰܣܓܶܐ ܠܡܶܬܰܠ ܠܰܢ܇ ܕܰܒܝܰܕ ܕܟܳܠܶܐ ܣܽܘܓܦܳܢܰܢ܇ ܒܶܝܬ ܓܰܙܳܐ ܕܪ̈ܰܚܡܶܐ ܦܬܰܚ ܠܰܢ܀

ܟܽܠ ܓܶܝܪ ܫܶܐܠܬܳܐ ܕܟܳܠܝܳܐ܇ ܕܰܥ ܠܳܟ ܕܫܶܐܠܰܬ݀ ܣܽܘܓܦܳܢܳܐܗ̱ܝ܇ ܘܫܶܐܠܬܳܐ ܗܳܝ ܕܥܽܘܕܪ̈ܳܢܶܐ܇ ܫܶܐܠ̈ܳܬܰܢ ܓܶܝܪ ܛܳܒ̈ܳܬܳܐ܇ ܠܳܐ ܡܶܬܟܰܠܝ̈ܳܢ ܡܶܢ ܛܳܒܳܐ܇ ܐܳܦ ܫܶܐܠ̈ܳܬܰܢ ܒܺܝܫ̈ܳܬܳܐ܇ ܠܳܐ ܡܶܬܝܰܗ̈ܒܳܢ ܡܶܢ ܟܺܐܢܳܐ܇ ܒܪܺܝܟ ܗܽܘ ܕܰܒܛܳܒ̈ܳܬܳܐ ܨܳܒܶܐ܀

ܐܰܬܠܺܝܛܳܐ ܓܶܝܪ ܕܶܐܬܢܰܨܰܚ܇ ܟܰܕ ܡܶܕܶܡ ܗܽܘ ܠܳܐ ܡܰܘܣܶܦ܇ ܗܘܳܐ ܠܶܗ ܓܶܝܪ ܡܳܪܶܐ ܚܽܘܒܳܐ܇ ܕܬܳܒܰܥ ܟܠܺܝܠܳܐ ܓܰܠܝܳܐܺܝܬ ܒܳܟܺܐܒܰܘ̈ܗ̱ܝ ܡܪܰܒܶܐ ܝܽܘܬܪ̈ܳܢܰܘܗ̱ܝ܇ ܕܙܳܪܰܥ ܚܰܫ̈ܶܐ ܥܰܠ ܒܶܣܪܶܗ܇ ܘܡܶܢ ܚܰܫ̈ܶܐ ܕܰܣܒܰܠ ܚܳܨܶܕ܇ ܟܠܺܝܠܳܐ ܘܥܽܘܬܪܳܐ ܘܩܽܘܠܳܣܳܐ܀

ܡܣܰܝܒܪܳܢܽܘܬܳܐ ܓܶܝܪ ܐܺܝܬܶܝܗܿ܇ ܣܺܝܡܬܳܐ ܡܰܠܝܰܬ ܟܽܠ ܥܽܘܬܪ̈ܺܝܢ܇ ܗܰܘ ܓܶܝܪ ܕܰܡܨܶܐ ܕܰܢܣܰܝܒܰܪ܇ ܘܰܒܗܳܕܶܐ ܩܢܳܐ ܟܽܠ ܡܶܕܶܡ܇ ܒܰܕܠܳܐ ܡܶܣܬܰܢܰܩ ܥܰܠܡܶܕܶܡ܇ ܚܙܺܝ ܡܰܢ ܝܳܗܶܒ ܘܡܰܢ ܟܳܠܶܐ܇ ܒܗܳܕܶܐ ܣܺܝܡܬܳܐ ܡܰܠܝܰܬ ܟܽܠ܇ ܒܳܗܿ ܗܽܘ ܥܬܰܪܘ̱ ܗ̱ܘܰܘ ܢܰܨܺܝܚ̈ܶܐ܀

ܫܽܘܒܚܳܐ ܠܶܐܕܢܳܐ ܫܶܡܥܰܬ݀ ܟܽܠ܇ ܕܟܽܘܪܳܐ ܗܳܝ ܟܺܐܢܳܐ ܠܟܽܠ ܫܶܐܠ̈ܳܢ܇ ܕܫܶܐܠܰܬ݀ ܚܰܝ̈ܶܐ ܡܶܬܒܰܚܪܳܐ܇ ܕܚܰܝ̈ܶܐ ܟܣܶܝܢ ܒܳܗܿ ܠܫܽܐܳܘܳܠܶܝ̈ܗܿ܇ ܘܫܶܐܠܰܬ݀ ܙܺܐܦܳܐ ܡܶܬܬܰܟܣܳܐ܇ ܕܡܰܘܬܳܐ ܛܥܺܝܢܳܐ ܠܫܽܐܳܘܳܠܶܝ̈ܗܿ܇ ܒܓܰܘ ܦܽܘܡܳܐ ܣܩܰܠܬܶܗ ܛܽܘܥܝܰܝ܇ ܡܶܠܬܳܐ ܒܚܰܪܬܶܗ ܒܓܰܘ ܐܶܕܢܳܐ܀

 

ܣܽܘܓܺܝܬܳܐ ܒܩܳܠܳܐ ܕܳܠܰܬ ܪܽܘܚܳܐ ܡܶܢ ܪܰܘܡܳܐ ܥܽܘܢܺܝܬܳܐ ܒܪܺܝܟ ܗܽܘ ܡܫܺܝܚܳܐ ܕܰܒܨܰܘܡܶܗ ܐܰܩܺܝܡ ܠܰܢ ܡܶܢ ܡܰܦܽܘܠܬܳܐ

ܒܦܺܐܪܳܐ ܕܶܐܟܰܠ ܒܝܰܥܢܽܘܬܳܐ܇ ܐܳܕܳܡ ܩܰܒܶܠ ܓܙܳܪ ܕܺܝܢܳܐ܇ ܒܨܰܘܡܶܗ ܕܰܒܪܳܐ ܐܶܬܩܰܕܰܕ܇ ܐܶܫܛܳܪܳܐ ܕܚܰܝܳܒܽܘܬܶܗ܇ ܒܪܺܝܟ ܡܶܢܟܽܠ ܨܰܘܡܶܗ ܕܒܽܘܟܪܳܐ܇ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܕܰܢܚܳܐ ܓܰܐܝܳܐ ܒܪܶܗ ܕܰܐܒܳܐ܇ ܨܰܘܡܳܐ ܠܒܰܟ ܡܶܛܽܠܳܬܰܢ܇ ܟܡܳܐ ܙܳܕܶܩ ܠܰܢ ܚܰܛܳܝ̈ܶܐ܇ ܕܰܒܨܰܘܡܳܐ ܢܩܰܕܶܫ ܢܰܦܫܰܢ܇ ܘܢܺܐܨܰܦ ܕܡܽܘܡ̈ܶܐ ܕܰܩܢܽܘܡܰܢ ܕܢܶܠܐܶܐ ܒܨܰܘܡܳܐ ܘܢܶܬܢܰܨܰܚ܀

ܙܰܝܢܰܐܗ̱ܘ ܨܰܘܡܳܐ ܕܠܳܐ ܚܳܐܶܒ܇ ܘܫܽܘܪܳܐ ܕܡܶܡܬܽܘܡ ܠܳܐ ܙܳܐܰܥ܇ ܚܶܣܢܰܐܗ̱ܘ ܬܰܩܺܝܦܳܐ ܨܰܘܡܳܐ܇ ܕܓܰܝܳܣ̈ܶܐ ܠܳܐ ܟܳܒܫܺܝܢ ܠܶܗ܇ ܘܡܰܒܽܘܥܳܐ ܕܓܳܣܶܐ ܣܰܒܪܳܐ܇ ܨܰܘܡܳܐ ܠܰܐܝܢܳܐ ܕܠܳܐܶܐ ܒܶܗ܀

ܛܽܘ̈ܒܶܐ ܘܚܰܝ̈ܶܐ ܘܓܶܐܳܘ̈ܳܬܳܐ܇ ܡܠܺܝܟܺܝܢ ܠܟܶܢܫܳܐ ܕܨܰܝ̈ܳܡܶܐ܇ ܕܨܳܡܘ̱ ܡܶܢ ܠܰܚܡܳܐ ܘܚܰܡܪ̈ܳܢܶܐ܇ ܚܳܕܶܝܢ ܒܰܥܕܶܝܢ ܘܡܶܬܒܰܣܡܺܝܢ܇ ܕܛܰܝܶܒ ܒܽܘܟܪܳܐ ܠܨܰܝ̈ܳܡܶܐ܀

ܟܠܺܝ̈ܠܳܐ ܢܛܺܝܪܺܝܢ ܠܨܰܝ̈ܳܡܶܐ܇ ܘܦܳܬܽܘܪ ܛܽܘܒ̈ܶܐ ܒܡܰܠܟܽܘܬܳܐ܇ ܓܢܽܘܢܰܐܗ̱ܘ ܕܡܰܟܺܝܟ ܒܒܶܓܐܳܘ̈ܳܬܳܐ܇ ܝܳܗܶܒ ܣܰܒܪܳܐ ܡܰܠܝܳܐܺܝܬ܇ ܐܰܓܪܳܐ ܛܳܒܳܐ ܠܨܰܝ̈ܳܡܶܐ܇ ܒܪܺܝܟ ܡܶܢ ܟܽܠ ܨܰܘܡܶܗ ܕܰܒܪܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܰܨܕܺܝ ܐܶܢܽܘܢ ܠܺܠܝܳܐ ܠܫܽܘ̈ܩܶܐ ܕܰܡܕܺܝܢ̈ܳܬܳܐ܇ ܘܰܐܚܪܶܒ ܐܶܢܽܘܢ ܐܰܝܟ ܕܰܒܡܰܘܬܳܐ ܡܶܢ ܗܰܠܳܟ̈ܶܐ܇ ܫܪܳܐ ܠܕܰܝ̈ܳܢܶܐ ܕܠܳܐ ܦܽܘܩܕܳܢ̈ܶܐ ܕܡܰܠܟ̈ܶܐ ܕܰܐܪܥܳܐ܇ ܘܰܛܪܰܕ ܛܶܟܣ̈ܶܐ ܡܶܢ ܒܶܝܬ ܕܺܝܢܳܐ ܕܠܳܐ ܢܩܽܘܡܽܘܢ ܒܶܗ܀

ܡܺܝܬ ܠܶܗ ܥܳܠܡܳܐ ܐܶܢܗܽܘ ܕܨܰܦܪܳܐ ܠܳܐ ܡܶܢܰܚܶܡ ܠܶܗ܇ ܗܳܐ ܒܰܛܺܝܠܳܐ ܒܪܺܝܬܳܐ ܟܽܠܳܗܿ ܐܰܝܟ ܕܰܒܡܰܘܬܳܐ܇ ܠܺܠܝܳܐ ܐܰܡܠܶܟ ܘܨܰܒܳܐ ܕܢܶܫܪܶܐ ܟܽܠ ܫܽܘܠܛܳܢܺܝ̈ܢ܇ ܘܳܐܦܠܳܐ ܬܳܐܓܳܐ ܕܡܰܠܟܳܐ ܒܪܺܝܫܶܗ ܕܢܶܫܒܽܘܩ ܨܳܒܶܐ܀

 

ܕܨܰܦܪܳܐ ܕܰܥܪܽܘܒܬܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܐܶܡܳܐ ܕܟܺܝܬܳܐ

ܗܰܘ ܕܰܐܠܶܦ ܗܘܳܐ ܕܽܘܒܳܪ̈ܶܐ ܡܝܰܬܪ̈ܶܐ܇ ܕܰܒܝܰܕ ܨܰܘܡܳܐ ܠܥܺܝܪ̈ܶܐ ܢܶܬܕܰܡܶܐ ܪܰܚܶܡ܀

ܒܨܰܘܡܳܐ ܕܰܟܝܳܐ ܡܶܬܦܰܛܡܳܐ ܢܰܦܫܳܐ܇ ܘܩܳܢܝܳܐ ܫܽܘܦܪ̈ܶܐ ܪ̈ܳܡܶܐ ܘܪ̈ܽܘܚܳܢܶܐ ܪܰܚܶܡ܀

ܗܰܘ ܕܰܠܦܳܥ̈ܠܶܐ ܕܰܒܳܟܰܪܡܶܗ ܦܳܠܚܺܝܢ܇ ܚܠܳܦ ܥܰܡܠܰܝ̈ܗܽܘܢ ܒܦܰܓܪܶܗ ܡܒܰܣܶܡ ܠܗܽܘܢ܀

ܗܰܘ ܕܰܒܨܰܘܡܳܐ ܕܰܟܝܳܐ ܘܩܰܕܺܝܫܳܐ܇ ܕܬܳܝܒܺܝܢ ܚܰܛܳܝ̈ܶܐ܇ ܡܩܰܒܶܠ ܒܰܚܢܳܢܶܗ ܪܰܚܶܡ܀

ܕܳܢܰܚ ܒܽܘܟܪܳܐ܇ ܒܝܰܘܡܶܗ ܕܢܽܘܚܳܡܳܐ܇ ܕܢܶܦܪܽܘܥ ܠܟܽܠܢܳܫ܇ ܗܰܘ ܡܳܐ ܕܰܣܥܺܝܪ ܠܶܗ܀

 

ܐܰܠܳܗܝ̱ ܐܰܠܳܗܝ̱ ܒܩܳܠܳܐ ܒܬܽܘܠܬܳܐ ܝܳܠܕܰܬ ܕܽܘܡܳܪܳܐ

ܠܳܐ ܢܨܽܘܡ ܐܰܪܥܳܢܳܐܺܝܬ܇ ܐܶܫܰܥܝܳܐ ܐܰܙܥܶܩ ܥܰܠ ܨܰܘܡܶܗ ܕܡܳܪܝܳܐ܇ ܨܰܘܡܳܐ ܕܦܽܘܪܫܳܢܳܐ ܢܨܽܘܡ܇ ܕܰܠܢܰܦܫܳܐ ܘܦܰܓܪܳܐ ܡܙܰܗܶܐ܇ ܘܰܠܒܰܪܢܳܫܰܢ ܚܰܕܬܳܐ܇ ܢܫܰܒܰܚ܀

ܥܰܡ ܨܰܘܡܳܐ ܕܠܰܚܡܳܐ ܐܰܚ̈ܰܝ܇ ܢܰܫܦܰܥ ܟܽܠܰܢ ܕܶܡܥ̈ܶܐ܇ ܕܚܰܫܳܐ ܒܦܽܘܪܫܳܢܳܐ܇ ܕܠܳܐ ܢܨܽܘܡ ܦܽܘܡܰܢ ܡܶܢ ܠܰܚܡܳܐ܇ ܘܠܶܒܰܢ ܡܶܢ ܠܓܰܘ ܡܠܶܐ ܬܽܘܟ̈ܶܐ܇ ܬܰܘ ܢܨܽܘܡ ܕܰܟܝܳܐܺܝܬ܇ ܠܰܡܫܺܝܚܳܐ ܕܦܰܪܩܰܢ ܡܶܢ ܛܽܘܥܝܰܝ܀

ܡܽܘܫܶܐ ܒܨܰܘܡܳܐ ܐܶܙܕܰܗܺܝ܇ ܒܛܽܘܪܳܐ ܗܰܘ ܕܣܺܝܢܰܝ ܘܩܰܒܶܠ ܦܽܘܩܕ̈ܳܢܶܐ܇ ܘܠܽܘܚ̈ܶܐ ܕܢܳܡܽܘܣܳܐ ܐܰܚܶܬ܇ ܐܳܦܠܰܢ ܐܰܫܘܳܐ ܒܝܰܕ ܨܰܘܡܳܐ܇ ܕܢܶܫܬܘܶܐ ܠܰܚܙܳܬܳܟ ܪܚܺܝܡܬܳܐ܇ ܕܢܺܐܪܰܬ ܚܰܝ̈ܶܐ ܥܰܡ ܩܰܕܺܝ̈ܫܶܐ܀

ܐܰܠܳܗܳܐ ܕܨܳܡ ܗܘܳܐ ܒܕܰܒܪܳܐ܇ ܐܰܪܒܥܺܝܢ ܝܰܘܡ̈ܳܬܳܐ ܘܥܰܡ ܒܺܝܫܳܐ ܐܰܩܪܶܒ܇ ܢܰܛܰܪ ܠܥܺܕܬܳܟ ܘܰܠܝܶܠܕܶܝ̈ܗܿ܇ ܡܶܢ ܢܶܟܝܳܢܰܘ̈ܗ̱ܝ ܕܰܢܟܺܝܠܳܐ܇ ܘܥܰܡܳܟ ܢܶܚܕܽܘܢ ܒܡܰܠܟܽܘܬܳܟ܇ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܒܨܰܘܡܳܐ ܙܰܗܝܳܐ ܘܒܰܨܠܽܘܬܳܐ܇ ܒܫܰܗܪܳܐ ܘܬܶܫܡܶܫܬܳܐ ܘܚܽܘܒܳܐ܇ ܘܙܶܕܩ̈ܳܬܳܐ ܟܽܠܰܢ ܐܰܚ̈ܰܝ ܢܶܬܟܰܫܰܪ܇ ܕܥܰܡ ܐܰܠܳܗܳܐ ܢܶܬܒܰܣܰܡ܇ ܘܢܶܫܬܘܶܐ ܠܪ̈ܰܚܡܶܐ ܘܰܚܢܳܢܳܐ܇ ܘܢܺܐܪܰܬ ܚܰܝ̈ܶܐ ܥܰܡ ܩܰܕܺܝ̈ܫܶܐ܀

ܝܶܫܽܘܥ ܡܰܠܟܳܐ ܫܡܰܝܳܢܳܐ܇ ܐܰܥܒܰܪ ܩܪ̈ܳܒܶܐ ܘܚܶܪ̈ܝܳܢܶܐ܇ ܡܶܢ ܥܺܕܬܳܐ ܘܝܰܠܕܶܝ̈ܗܿ܇ ܫܰܝܶܢ ܐܰܪܥܳܐ ܘܥܳܡܽܘܪ̈ܶܝܗܿ܇ ܕܰܒܚܰܫܳܐ ܡܶܬܟܰܫܦܳܐ ܠܳܟ܇ ܦܰܢܳܐ ܠܳܗܿ ܫܶܐܠ̈ܳܬܳܗܿ ܡܶܢ ܒܶܝܬ ܓܰܙܳܟ ܕܰܡܠܶܐ ܟܽܠ ܛܳܒ̈ܳܬܳܐ܀

ܫܽܘܒܚܳܐ ܠܳܟ ܝܶܫܽܘܥ ܡܰܠܟܰܢ܇ ܕܰܙܟܺܝܬ ܠܝܰܥܢܽܘܬܳܐ ܒܨܰܘܡܳܐ ܕܰܚܠܳܦܰܝܢ܇ ܘܫܰܦܶܠܬ ܚܰܝܠܶܗ ܕܣܳܛܳܢܳܐ܇ ܫܽܘܒܗܳܪܳܐ ܪܳܡܳܐ ܒܰܛܶܠܬ ܘܰܠܫܽܘܒܚܳܐ ܣܪܺܝܩܳܐ ܚܰܝܶܒܬ܇ ܘܠܳܟ ܢܫܰܒܰܚ ܘܰܢܪܰܡܪܶܡ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܗܰܘ ܕܰܒܛܽܘܪܳܐ

ܡܳܐ ܦܐܶܐ ܨܰܘܡܳܐ܇ ܕܨܳܡ ܡܽܘܫܶܐ ܒܛܽܘܪܳܐ ܕܣܺܝܢܰܝ܇ ܘܶܐܙܕܰܗܺܝ ܗܘܳܐ ܡܶܫܟܳܐ ܕܰܐܦ̈ܰܘܗܝ ܐܰܝܟ ܫܶܡܫܳܐ܇ ܘܰܐܚܶܬ ܠܽܘ̈ܚܶܐ ܘܦܽܘܩܕ̈ܳܢܶܐ ܠܒܶܝܬ ܐܺܝܣܪܳܐܶܝܠ܇ ܠܡܳܪܝܳܐ܀

 

ܦܐܶܐ ܗܘܳܐ ܨܰܘܡܳܐ ܕܨܳܡܘ̱ ܗ̱ܘܰܘ ܛܠܳܝ̈ܶܐ ܕܒܶܝܬ ܚܰܢܰܢܝܳܐ܇ ܕܰܒܝܰܕ ܨܰܘܡܳܐ ܘܰܨܠܽܘܬܳܐ ܐܶܬܦܰܨܺܝܽܘ ܗ̱ܘܰܘ܇ ܡܶܢ ܝܰܕ ܪܽܘܓܙܳܐ܇ ܕܰܫܓܰܪ ܗ̱ܘܰܘ ܠܗܽܘܢ ܟܰܠܕܳܝ̈ܶܐ܇ ܠܡܳܪܝܳܐ܀

ܛܽܘܒܰܘܗ̱ܝ ܠܰܐܝܢܳܐ ܕܪܰܚܡܶܗ ܠܨܰܘܡܳܐ ܩܰܕܺܝܫܳܐ܇ ܘܶܐܬܢܩܶܦ ܠܶܗ܇ ܘܰܩܢܳܐ ܒܶܗ ܫܽܘܦܪ̈ܶܐ ܪ̈ܳܡܶܐ܇ ܕܥܰܡ ܩܰܕܺܝ̈ܫܶܐ ܝܳܪܶܬ ܚܰܝ̈ܶܐ ܕܰܠܥܳܠܰܡ܀

ܐܰܪܒܥܺܝܢ ܝܰܘܡ̈ܺܝܢ܇ ܨܳܡ ܒܰܪ ܐܰܠܳܗܳܐ ܒܕܰܒܪܳܐ ܡܶܛܽܠܳܬܰܢ܇ ܘܰܐܩܪܶܒ ܗܘܳܐ ܥܰܡ ܣܳܛܳܢܳܐ܇ ܘܬܰܒܪܶܗ ܠܥܽܘܩܣܶܗ ܘܥܰܒܕܶܗ ܕܝܳܫܳܐ ܠܨܰܝ̈ܳܡܶܐ ܠܡܳܪܝܳܐ܀

ܒܫܽܘܠܳܡ ܨܰܘܡܳܐ܇ ܫܰܟܶܢ ܠܰܢ ܚܽܘܣܳܝ ܚܰܘ̈ܒܶܐ܇ ܘܰܐܫܘܳܐ ܠܟܽܠܰܢ ܕܰܢܡܰܢܰܥ ܠܘܳܬ ܫܽܘܠܳܡܰܐܗ̱ܘ ܕܫܳܦܰܪ ܠܳܟ܇ ܘܰܐܓܢܳܐ ܠܰܢ ܥܰܡ ܩܰܕܺܝ̈ܫܶܐ ܠܡܳܪܝܳܐ ܢܫܰܒܰܚ ܘܰܢܪܰܡܪܶܡ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܐܰܢ̱ܬ ܕܰܒܪܺܝܫܺܝܬ

ܨܳܡܘ̱ ܗ̱ܘܰܘ ܟܺܐܢ̈ܶܐ܇ ܘܰܐܒܳܗ̈ܳܬܳܐ ܩܰܕܡܳܝ̈ܶܐ ܨܰܘܡܳܐ ܕܰܟܝܳܐ܇ ܘܰܫܦܰܪܘ̱ ܠܡܳܪܝܳܐ ܒܥܰܡܠܰܝ̈ܗܽܘܢ ܡܒܰܪܟܳܐ܀

ܨܳܡ ܐܺܠܺܝܳܐ܇ ܒܚܽܘܪܺܝܒ ܘܰܥܢܳܢܳܐ ܛܥܶܢܬܶܗ ܘܨܳܡ ܚܰܙܩܺܝܐܶܝܠ܇ ܘܰܚܛܳܗ̈ܶܐ ܕܥܰܡܳܐ ܠܚܳܐ ܘܰܥܛܳܐ ܡܒܰܪܟܳܐ܀

ܨܳܡ ܕܳܢܺܝܐܶܝܠ ܘܰܣܟܰܪ ܦܽܘܡ ܐܰܪ̈ܝܰܘܳܬܳܐ܇ ܘܨܳܡܘ̱ ܗ̱ܘܰܘ ܛܠܳܝ̈ܶܐ܇ ܘܕܰܥܟܽܘܗܿ ܠܢܽܘܪܳܐ ܕܰܐܬܽܘܢܳܐ܇ ܡܒܰܪܟܳܐ܀

ܨܳܡ ܐܶܪܰܡܝܳܐ܇ ܘܡܶܢ ܓܽܘܒܳܐ ܕܰܣܝܳܢܳܐ ܣܠܶܩ܇ ܘܨܳܡ ܗܘܳܐ ܝܰܘܣܶܦ܇ ܘܡܶܢ ܡܶܨܪܳܝܬܳܐ ܐܶܬܦܰܠܰܛ ܡܒܰܪܟܳܐ܀

ܕܠܳܐ ܨܳܡ ܢܒܺܝܳܐ܇ ܗܰܘ ܕܶܐܡܰܪ ܠܶܗ ܐܰܠܳܗܳܐ܇ ܕܠܰܚܡܳܐ ܘܡܰܝ̈ܳܐ܇ ܕܠܳܐ ܢܶܛܥܰܡ܇ ܐܰܪܝܳܐ ܬܰܒܪܶܗ ܡܒܰܪܟܳܐ܀

ܗܳܢܰܘ ܬܶܗܪܳܐ ܕܫܰܕܝܳܐ ܫܠܰܕܳܐ ܕܰܢܒܺܝܳܐ܇ ܘܰܐܪܝܳܐ ܩܳܐܶܡ܇ ܘܠܰܚܡܳܪܳܐ ܠܳܐ ܣܳܟ ܡܰܟܶܐ ܡܒܰܪܟܳܐ܀

 

ܩܳܠܳܐ ܕܨܰܦܪܳܐ ܣܳܗܕ̈ܶܐ ܗ̱ܘܰܘ ܦܺܝܪ̈ܡܶܐ

ܝܰܡܳܐ ܕܓܰܘܙܰܠܬܳܐ܇ ܗܳܐ ܬܪܺܝܥ ܗܽܘ ܘܰܡܣܰܪܶܕ ܠܺܝ܇ ܘܰܒܕܶܚܠܳܐ ܘܒܰܪܬܺܝܬܳܐ ܗܘܺܝܿܬ܇ ܨܠܺܝܒܳܟ ܢܶܗܘܶܐ ܠܺܝ܇ ܐܽܘܪܚܳܐ ܘܓܺܝܫܪܳܐ ܘܡܰܥܒܰܪܬܳܐ ܕܦܰܓܪܳܟ ܘܰܕܡܳܟ ܐܶܬܢܰܛܰܪ ܗ ܘ ܗ ܘܶܐܬܡܰܢܰܥ ܠܰܠܡܺܐܝܢ ܚܰܝ̈ܶܐ܀

ܩܳܝܡܺܝܢ ܒܰܛܺܝ̈ܠܶܐ܇ ܘܡܰܪܟܶܢ ܪܺܝܫܗܽܘܢ ܘܰܐܒܺܝܠܺܝܢ܇ ܘܠܳܐ ܐܺܝܬ ܕܰܡܨܶܐ ܡܥܰܕܰܪ ܠܗܽܘܢ܇ ܢܳܗܡܳܐ ܟܺܐܢܽܘܬܳܐ ܘܰܠܒܺܝܟܳܐ ܫܰܛܒܳܐ ܕܢܽܘܪܳܐ ܘܟܽܠ ܐ̱ܢܳܫ ܐܰܝܟ ܥܰܡܠܶܗ ܦܳܪܥܳܐ ܗ ܘ ܗ ܒܝܽܘܡ ܕܺܝܢܳܟ ܪܰܚܶܡ ܐ̱ܢܳܫܳܐ܀

 

ܐ̱ܚܪܺܢܳܐ ܩܳܠܳܐ ܒܗܰܘ ܨܰܦܪܳܐ ܪܰܒܳܐ ܡܳܐ ܕܳܐܬܶܐ

ܒܝܰܘܡܳܐ ܕܗܳܘܝܳܐ ܒܶܗ ܬܒܰܥܬܳܐ ܘܫܽܘܐܳܠܳܐ܇ ܠܳܐ ܬܦܰܪܣܶܐ ܡܽܘܡ̈ܰܝ ܝܶܫܽܘܥ ܡܠܶܐ ܪ̈ܰܚܡܶܐ܇ ܢܶܗܘܶܐ ܠܺܝ ܦܰܓܪܳܟ ܘܰܕܡܳܟ ܩܰܕܺܝܫܳܐ܇ ܓܺܝܫܪܳܐ ܘܒܶܗ ܐܶܥܒܰܪ ܝܰܡܳܐ ܕܓܰܘܙܰܠܬܳܐ܇ ܗ ܒܶܗ ܡܳܪܝ̱ ܐܶܫܬܰܘܙܰܒ ܡܶܢ ܚܶܫܟܳܐ ܕܰܠܒܰܪ܀

ܐܰܚ̈ܰܝ ܠܳܐ ܢܶܬܬܟܶܠ ܥܰܠ ܥܳܠܡܳܐ ܗܳܢܳܐ܇ ܕܡܰܛܥܶܐ ܒܰܚܙܳܬܶܗ ܠܟܽܠܗܽܘܢ ܥܳܠܽܘܠܰܘ̈ܗ̱ܝ܇ ܚܽܘܒܶܗ ܢܟܺܝܠ ܘܰܒܣܺܝܪ ܘܡܰܣܰܐܒ ܒܰܐܦ̈ܶܐ ܡܠܶܐ܇ ܛܽܘܒ ܠܰܐܝܢܳܐ ܕܫܳܛܶܗ ܘܰܠܟܽܠܶܗ ܥܽܘܬܪܶܗ܇ ܗ ܇ ܗܰܒ ܠܰܢ ܡܳܪܝ̱ ܕܢܶܙܟܺܝܘܗ̱ܝ ܘܰܠܟܽܠܶܗ ܢܶܟܠܶܗ܀

ܒܪܺܝܟ ܚܽܘܒܳܟ ܡܳܪܰܢ ܕܰܐܪܟܶܢܽܘܟ ܠܘܳܬ ܓܶܢܣܰܢ܇ ܕܬܶܒܥܶܐ ܘܬܶܫܟܰܚ ܠܰܢ ܘܬܶܦܪܽܘܩ ܢܰܦܫ̈ܳܬܰܢ܇ ܬܰܘܕܺܝ ܠܨܶܒܝܳܢܳܟ ܛܳܒܳܐ ܘܒܰܣܺܝܡܳܐ܇ ܕܨܳܡܬ ܡܶܛܽܠܳܬܰܢ ܫܽܘܒܚܳܐ ܠܛܰܝܒܽܘܬܳܟ܇ ܗ܇ ܘܢܶܙܡܰܪ ܠܳܟ ܫܽܘܒܚܳܐ ܐܺܝܡܳܡܳܐ ܘܠܺܠܝܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܨܰܦܪܳܐ ܕܰܡܥܺܝܪ ܘܰܠܚܰܝܘ̈ܳܬܳܐ ܠܰܥܝܳܕܰܝ̈ܗܶܝܢ܇ ܠܳܐ ܡܳܪܝ̱ ܢܶܕܡܰܟ ܡܶܢ ܬܶܫܒܽܘܚܬܳܐ ܘܢܶܗܘܶܐ ܒܶܙܚܳܐ܇ ܟܰܕܽܘ ܕܡܶܟܢܰܢ ܠܺܠܝܳܐ ܟܽܠܶܗ ܐܰܝܟ ܒܰܛܺܝ̈ܠܶܐ ܢܥܺܝܪܰܢ ܨܰܦܪܳܐ ܥܰܠ ܬܶܫܒܽܘܚܬܳܐ ܕܚܰܝܳܒܺܝܢܰܢ܀

ܢܽܘܗܪܳܐ ܚܰܝܳܐ ܕܰܐܢܗܰܪ ܥܳܠܡ̈ܶܐ ܒܕܶܢܚܶܗ ܦܰܐܝܳܐ܇ ܒܳܟ ܡܳܪܝ̱ ܢܶܚܙܶܐ ܢܽܘܗܪܳܐ ܫܒܺܝܚܳܐ ܘܢܶܬܢܰܗܰܪ ܒܶܗ܇ ܢܶܕܢܰܚ ܢܽܘܗܪܳܟ ܥܰܠ ܚܽܘܫ̈ܳܒܶܐ ܟܣܰܝ̈ܳܐ ܕܢܰܦܫܳܐ܇ ܘܰܬܙܽܘܥܝ̱ ܘܰܬܩܽܘܡܝ̱ ܥܰܠ ܬܶܫܒܽܘܚܬܳܐ ܫܽܘܒܚܳܐ ܠܰܫܡܳܟ܀

 

ܕܰܬܠܳܬܫ̈ܳܥܺܝܢ ܩܳܠܳܐ ܡܫܺܝܚܳܐ ܢܰܛܰܪܶܝܗܿ ܠܥܺܕܬܳܟ

ܐܰܪܥܳܐ ܒܚܰܫܳܐ ܡܦܺܝܣܳܐ ܠܳܟ܇ ܘܕܳܫܢ̈ܶܐ ܒܕܶܡܥ̈ܶܐ ܡܩܰܪܒܳܐ ܠܳܟ܇ ܘܰܒܦܽܘܡ ܝܰܠܕܶܝ̈ܗܿ ܩܳܥܝܳܐ ܠܳܟ܇ ܘܡܶܬܟܰܫܦܳܐ ܠܰܬܪܰܥ ܪ̈ܰܚܡܶܐ܇ ܟܰܕܽܘ ܠܺܝ ܡܳܪܝ̱ ܡܰܚܘ̈ܳܬܳܐ܇ ܕܒܶܠܥܿܶܬ ܡܶܛܽܠ ܥܰܘܠܳܐ ܕܥܳܡܽܘܪ̈ܰܝ܇ ܐܶܬܬܢܺܝܚ ܡܶܢ ܚܶܡܬܳܐ ܕܪܽܘܓܙܳܟ܇ ܘܩܰܒܶܠ ܬܝܳܒܽܘܬܳܐ ܕܥܰܡ̈ܡܶܐ܇ ܘܰܐܘܕܺܝܘ ܒܰܨܠܺܝܒܳܟ܇ ܕܰܦܪܩܰܬ ܐܶܢܽܘܢ ܡܶܢ ܛܽܘܥܝܰܝ܇ ܢܺܐܬܶܐ ܚܢܳܢܳܟ ܠܰܐܝܠܰܢ܇ ܘܒܶܗ ܢܶܬܦܰܨܶܐ܇ ܡܶܢ ܪܽܘܓܙܳܐ ܕܰܚܒܶܠ ܝܰܠܕܶܝ̈ܗܿ܇ ܥܺܕܬܳܐ ܢܳܩܫܳܐ ܥܰܠ ܬܰܪܥܳܟ܀

ܘܰܡܦܺܝܣܳܐ ܠܳܟ ܒܰܚܢܰܓܬܳܐ܇ ܘܡܶܢܳܟ ܫܳܐܠܳܐ ܡܰܘܗܰܒܬܳܐ܇ ܕܰܬܦܰܢܶܐ ܠܳܗܿ ܫܶܐܠ̈ܳܬܳܗܿ܇ ܟܰܢܶܫ ܝܰܠܕ̈ܰܝ ܡܶܢ ܦܶܗܝܳܐ܇ ܘܰܚܡܽܘܠ ܐܶܢܽܘܢ ܒܰܛܝܳܪܳܐ ܕܚܰܝ̈ܶܐ܇ ܘܒܰܛܶܠ ܡܶܢܰܢ ܢܶܟܝܳܢ̈ܶܐ܇ ܘܣܶܕܩ̈ܶܐ ܒܺܝܫ̈ܶܐ ܘܚܶܪ̈ܝܳܢܶܐ܇ ܘܫܰܝܢܳܟ ܘܰܫܠܳܡܳܟ ܢܰܡܠܶܟ܇ ܒܳܗܿ ܥܕܰܡܳܐ ܠܥܳܠܰܡ܇ ܕܬܶܙܡܰܪܝ̱ ܫܽܘܒܚܳܐ ܘܬܰܘܕܺܝܬܳܐ܇ ܠܳܟ ܡܳܪܝ̱ ܘܠܰܐܒܽܘܟ܇ ܘܰܠܪܽܘܚ ܩܽܘܕܫܳܐ ܒܟܽܠܥܶܕܳܢ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܢܦܺܝܣܳܟ ܡܳܪܝ̱ ܡܶܛܽܠܳܬܰܢ܇ ܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ܇ ܘܚܰܕ ܥܣܰܪ ܘܫܰܒܥ̈ܺܝܢ ܘܰܬܪܶܝܢ܇ ܫܠܺܝ̈ܚܶܐ ܕܰܐܟܪܶܙܘ̱ ܓܶܠܝܳܢܳܟ܇ ܬܦܺܝܣܳܟ ܡܳܪܝ̱ ܡܶܛܽܠܳܬܰܢ܇ ܡܰܪܝܰܡ ܒܬܽܘܠܬܳܐ ܕܺܝܠܶܕܬܳܟ܇ ܘܝܽܘܚܰܢܳܢ ܒܰܪ ܠܶܘܳܝ̈ܶܐ܇ ܟܳܪܽܘܙܳܐ ܕܗܰܝܡܳܢܽܘܬܳܐ܇ ܫܡܰܥ ܠܰܐܒܳܐ ܘܰܐܥܰܡܶܕ ܠܰܒܪܳܐ܇ ܘܰܚܙܳܐ ܠܪܽܘܚܳܐ ܩܰܕܺܝܫܳܐ܇ ܫܡܳܗ̈ܶܐ ܬܠܳܬܳܐ ܘܰܩܽܢܘ̈ܡܶܐ܇ ܚܕܳܐ ܐܺܝܬܽܘܬܳܐ ܡܪܰܝܰܡܬܳܐ܀

ܢܫܰܒܚܳܟ ܡܽܘܫܶܐ ܡܶܢ ܝܰܡܳܐ܇ ܘܝܶܫܽܘܥ ܡܶܢ ܐܰܪܥܳܐ ܕܝܽܘܪܕܢܳܢ܇ ܐܺܠܺܝܳܐ ܒܶܝܬ ܐܰܪܡܶܠܬܳܐ܇ ܘܺܐܠܺܝܫܳܥ ܒܫܺܝܠܽܘܡܳܝܬܳܐ܇ ܢܫܰܒܚܳܟ ܢܒܺܝܳܐ ܐܶܪܰܡܝܳܐ܇ ܘܶܐܫܰܥܝܳܐ ܐܳܦ ܚܰܙܩܺܝܐܶܝܠ܇ ܕܰܘܺܝܕ ܡܰܠܟܳܐ ܘܕܳܢܺܝܐܶܝܠ܇ ܘܟܽܠܳܗܿ ܓܽܘܕܳܐ ܕܰܢܒܺܝ̈ܶܐ܇ ܬܫܰܒܚܳܟ ܐܶܡܳܐ ܡܒܰܪܰܟܬܳܐ܇ ܒܫܽܘܪܳܝܳܐ ܘܰܒܫܽܘܠܳܡܳܐ܇ ܘܢܰܦܫܝ̱ ܚܰܛܳܝܬܳܐ ܗܳܝ ܕܰܦܪܰܩܬ܇ ܬܶܚܢܰܢܝ̱ ܒܚܰܝܠܳܐ ܕܒܳܥܽܘܬܗܽܘܢ܀

 

ܕܦܶܠܓܶܗ ܕܝܰܘܡܳܐ܇ ܒܩܳܠܳܐ ܕܩܽܘܩܳܝܳܐ܇

ܡܳܐ ܠܺܝ ܘܰܠܟܽܘܢ ܕܳܪ̈ܽܘܫܶܐ ܩܳܥܝܳܐ ܥܺܕܬܳܐ܇ ܝܽܘܕܳܝ̈ܶܐ ܚܰܕ̈ܬܶܐ ܕܰܗ̱ܘܰܘ ܫܳܓܫܺܝܢ ܠܶܗ ܠܥܳܠܡܳܐ܇ ܠܡܽܘܢ ܟܳܦܪܺܝܢ ܐ̱ܢ̱ܬܽܘܢ ܒܰܒܪܳܐ ܕܰܐܠܳܗܳܐ܇ ܕܰܗܘܳܐ ܐ̱ܢܳܫܳܐ ܘܣܰܝܒܰܪ ܟܽܠ ܚܰܫ̈ܺܝܢ܇ ܛܥܶܡ ܡܰܘܬܳܐ ܘܰܦܪܰܩ ܝܰܠܕ̈ܰܝ ܡܶܢ ܛܳܥܝܽܘܬܳܐ܇ ܘܰܐܠܳܗܰܐܗ̱ܘ ܘܒܰܪ ܐܰܠܳܗܳܐ ܘܠܰܬܪܶܝܢ ܠܳܐ ܡܶܬܦܰܠܰܓ ܗ ܘ ܗ܀

ܡܶܢ ܩܶܪ̈ܝܳܢܶܐ ܕܰܟܬܳܒ̈ܶܐ ܚܰܪܬܶܗ ܕܥܳܠܡܳܐ ܡܛܳܬ݀܇ ܘܡܶܢ ܡܶܢܝܳܢܳܐ ܕܰܫܢܰܝ̈ܳܐ ܥܰܠ ܬܰܪܥܳܐ ܩܳܝܡܳܐ܇ ܕܗܳܐ ܒܟܽܠ ܕܽܘܟܳܐ ܟܰܦ̈ܢܶܐ ܘܡܰܘ̈ܬܳܢܶܐ܇ ܘܒܰܡܕܺܝܢ̈ܳܬܳܐ ܣܶܕܩ̈ܶܐ ܘܚܶܪ̈ܝܳܢܶܐ܇ ܗܳܐ ܩܳܡ ܥܰܡܳܐ ܥܰܠ ܥܰܡܳܐ ܘܡܰܠܟܳܐ ܥܰܠ ܡܰܠܟܳܐ܇ ܒܪܳܐ ܕܶܐܬܳܐ ܘܫܰܝܶܢ ܥܳܠܡ̈ܶܐ ܚܽܘܣ ܘܶܐܬܪܰܚܰܡܥܠܰܝܢ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܣܳܦܪܳܐ ܡܗܺܝܪܳܐ ܨܰܦܪܳܐ ܘܪܰܡܫܳܐ ܒܰܛܺܝܠܺܝܢ ܒܰܢ܇ ܘܰܕܠܳܐ ܡܡܰܠܠܺܝܢ ܟܰܕ ܐܳܡܪܺܝܢ ܠܰܢ ܠܳܐ ܝܺܠܶܦܢܰܢ܇ ܘܠܳܐ ܠܰܟܬܳܒܳܐ ܕܰܡܪܺܝܡ ܩܳܠܶܗ ܐܰܝܟ ܫܺܝܦܽܘܪܳܐ܇ ܘܟܰܕ ܡܡܰܠܶܠ ܠܰܢ ܠܳܐ ܫܳܡܥܺܝܢܰܢ ܚܰܒܺܝܒܳܐܺܝܬ܇ ܢܦܰܩ ܐܺܝܡܳܡܳܐ ܘܕܰܒܪܰܢܝ̱ ܥܰܡܶܗ ܟܰܕ ܢܳܦܶܩ ܗܘܳܐ܇ ܘܰܕܢܰܦܶܩ ܠܶܗ ܥܳܠܡܳܐ ܘܢܺܐܙܰܠ ܡܰܠܶܦ ܗܘܳܐ ܠܰܢ܀

ܐܰܒܳܐ ܡܪܰܚܡܳܢ ܠܳܟ ܬܶܫܒܽܘܚܬܳܐ ܡܶܢ ܒܶܪ̈ܝܳܬܳܟ܇ ܒܦܶܠܓܶܗ ܕܝܰܘܡܳܐ ܕܒܶܗ ܛܰܟܶܣܬܳܝܗ̱ܝ ܠܳܐܕܳܡ ܒܰܥܕܶܝܢ܇ ܠܳܟ ܬܰܘܕܺܝܬܳܐ ܒܪܳܐ ܦܳܪܽܘܩܳܐ ܘܚܰܝܽܘܣܬܳܢܳܐ ܕܚܰܢܬܳܝܗ̱ܝ ܒܪ̈ܰܚܡܶܐ ܘܥܰܠ ܝܳܪܬܽܘܬܶܗ ܗܦܰܟܬ ܘܰܐܩܺܝܡܬܳܝܗ̱ܝ܇ ܬܰܘܕܺܝ ܠܪܽܘܚܳܐ ܦܰܪܰܩܠܺܝܛܳܐ ܕܗܽܘ ܡܚܰܣܶܐ ܟܽܠ܇ ܚܰܕ ܗܽܘ ܟܝܳܢܳܐ܀

 

ܕܰܬܫܰܥ̈ܫܳܥܺܝܢ ܒܩܳܠܳܐ

ܦܬܺܝܚ ܗܽܘ ܬܰܪܥܶܗ ܕܦܰܪܕܰܝܣܳܐ

ܟܽܠܗܽܘܢ ܝܰܘܡ̈ܳܬܳܐ ܕܚܰܝ̈ܰܝܢ܇ ܒܰܣܪܺܝܩܽܘܬܳܐ ܗܳܐ ܓܡܰܪܘ̱ ܘܶܐܒܰܕ܇ ܟܰܕ ܦܳܠܰܚ ܐ̱ܢܳܐ ܥܰܡ ܒܺܝܫܳܐ܇ ܕܰܫܒܢܳܝ̱ ܒܢܶܟܠܶܗ ܡܰܪܺܝܪܳܐ܇ ܚܽܘܣ ܡܳܪܝ̱ ܥܰܠ ܨܰܠܡܳܟ ܦܰܐܝܳܐ܇ ܕܶܐܬܚܰܒܰܠ ܘܰܐܢ̱ܬ ܬܰܩܶܢܬܳܝܗ̱ܝ܀

ܫܽܘܒܚܳܐ ܠܳܟ ܡܶܢ ܡܰܪܥܺܝܬܳܟ܇ ܕܰܒܚܰܫܳܐ ܡܶܬܟܰܫܦܳܐ ܠܳܟ܇ ܫܽܘܒܚܳܐ ܠܳܟ ܡܶܢ ܚܰܛܳܝ̈ܶܐ܇ ܕܩܰܕܶܫܬ ܐܶܢܽܘܢ ܒܰܚܢܳܢܳܟ܇ ܫܽܘܒܚܳܐ ܠܳܟ ܘܠܰܐܒܳܐ ܕܫܰܠܚܳܟ܇ ܘܰܠܪܽܘܚܳܟ ܘܰܥܠܰܝܢ ܪ̈ܰܚܡܰܝܟ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܨܠܽܘܬܰܢ ܡܚܺܝܠܳܐܗ̱ܝ ܡܳܪܝ̱܇ ܬܰܦܶܩܝ̱ ܫܶܐܠ̈ܳܬܰܢ܇ ܘܣܰܓܺܝ̈ܐܺܝܢ ܪ̈ܰܚܡܰܝܟ ܢܺܐܬܽܘܢ ܠܥܽܘܕܪܳܢܰܢ܇ ܒܪ̈ܰܚܡܰܝܟ ܫܳܡܰܥ ܟܽܠ܇ ܩܰܒܶܠ܇ ܨܠܰܘ̈ܳܬܢ܀ ܫܽܘܒܚܳܐ ܠܛܰܝܒܽܘܬܳܟ ܕܚܳܢܰܬ݀ ܠܒܺܝܫܽܘܬܰܢ܇ ܫܽܘܒܚܳܐ ܠܰܚܢܳܢܳܟ ܕܰܥܛܳܐ ܚܰܘܒ̈ܳܬܰܢ܇ ܫܽܘܒܚܳܐ ܠܪܰܒܽܘܬܳܟ܇ ܕܰܐܳܘܪܶܒܬ ܙܥܽܘܪܽܘܬܰܢ܀

 

ܬܽܘܒ ܛܶܟܣܳܐ ܕܚܰܕ ܒܫܰܒܳܐ ܚܡܺܝܫܳܝܳܐ ܕܨܰܘܡܳܐ

ܕܥܰܠ ܗܰܘ ܕܰܢܚܶܬ ܗܘܳܐ ܡܶܢ ܐܽܘܪܺܫܠܶܡ ܠܺܐܝܪܺܝܚܽܘ܇ ܐܺܝܬܰܘܗ̱ܝ ܐܳܕܳܡ ܕܰܢܦܰܠ ܡܶܢ ܦܰܪܕܰܝܣܳܐ ܥܰܠ ܐܰܪܥܳܐ ܕܠܰܘ̈ܛܳܬܳܐ܀

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܒܪ̈ܰܚܡܰܝܟ ܡܳܪܝ̱ ܣܰܓܺܝ̈ܐܶܐ

ܒܪܺܝܟ ܛܳܒܳܐ ܕܰܒܚܽܘܒܶܗ܇ ܐܶܬܬܰܚܬܺܝ ܘܦܰܪܩܶܗ ܠܓܶܢܣܰܢ ܡܶܢ ܐܺܝܕ̈ܰܝ ܒܺܝܫܳܐ܇ ܘܦܰܢܝܶܗ ܠܰܥܕܶܝܢ ܝܳܪܬܽܘܬܶܗ܀

ܠܰܡܫܰܪܝܳܐ ܐܶܬܕܰܡܺܝ܇ ܗܰܘ ܐܳܣܝܳܐ ܡܠܶܐ ܥܽܘܕܪ̈ܳܢܶܐ܇ ܕܰܐܣܺܝ ܡܡܰܚ̈ܰܝܳܐ ܕܡܶܛܽܠܳܬܰܢ ܐܶܬܬܰܚܬܺܝ܀ ܘܡܰܘܬܳܐ ܐܳܦ ܣܳܛܳܢܳܐ܇ ܢܦܰܠܘ̱ ܥܠܰܘܗ̱ܝ ܐܰܝܟ ܠܶܣܛܳܝ̈ܶܐ܇ ܘܒܰܚܛܳܗ̈ܶܐ ܨܰܠܦܽܘܗ̱ܝ ܕܒܺܝܫܺܝܢ ܒܺܝܫ ܡܶܢ ܡܰܚ̈ܘܳܬܳܐ܀

ܩܽܘܡ ܪܰܡܝܳܐ ܕܶܐܬܡܚܺܝ܇ ܘܣܰܡܟܽܘܗ̱ܝ ܪ̈ܰܚܡܶܐ ܘܶܐܫܬܰܪܰܪ܇ ܙܡܰܪ ܠܶܗ ܬܶܫܒܽܘܚܬܳܐ ܠܗܰܘ ܕܒܰܚܢܳܢܶܗ ܣܰܥܪܳܟ ܗܘܳܐ܀

ܓܶܢܣܰܢ ܡܰܢ ܐܶܬܡܚܺܝ܇ ܒܰܚܛܳܗ̈ܶܐ ܡܶܢ ܣܳܛܳܢܳܐ܇ ܘܶܐܬܳܐ ܦܳܪܽܘܩܰܢ ܘܥܰܨܒܶܗ ܘܦܰܪܩܶܗ ܒܛܰܝܒܽܘܬܶܗ܀

ܫܽܘܒܚܳܐ ܠܶܗ ܠܺܝܚܺܝܕܳܝܳܐ܇ ܕܰܥܒܰܕ ܠܶܗ ܒܰܝܬܳܐ ܒܰܐܪܥܳܐ܇ ܥܺܕܬܳܐ ܩܰܕܺܝܫܬܳܐ܇ ܕܙܳܡܪܳܐ ܠܶܗ ܩܳܠܳܝ̈ ܫܽܘܒܚܳܐ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܡܳܪܝܳܐ ܩܪܺܝܬܳܟ ܐܰܢ̱ܬ ܥܢܺܝܢܝ̱

ܚܙܳܝܗ̱ܝ ܗܘܳܐ ܠܛܽܘܗܡܰܢ ܕܶܐܫܬܰܦܰܠ܇ ܘܰܒܝܰܕ ܪ̈ܰܚܡܰܘܗ̱ܝ ܢܚܶܬ ܣܰܥܪܶܗ܀

ܥܳܡܪ̈ܰܝ ܐܰܬܪܳܐ ܦܓܰܥܘ̱ ܗ̱ܘܰܘ ܒܶܗ܇ ܠܶܣܛܳܝ̈ܶܐ ܘܫܰܠܰܚܘ̱ ܢܰܚ̈ܬܰܘܗ̱ܝ܀

ܣܰܪܶܩܘ̱ ܗ̱ܘܰܘ ܢܰܚܬܰܘ̈ܗ̱ܝ ܟܽܠܗܽܘܢ܇ ܘܫܰܒܩܽܘܗ̱ܝ ܥܰܪܛܶܠ ܥܰܠ ܐܰܪܥܳܐ܀

ܐ̱ܢܳܫ ܫܳܡܪܳܝܳܐ ܥܒܰܪ ܬܰܡܳܢ܇ ܘܥܰܕܪܶܗ ܘܰܐܣܝܶܗ ܠܰܡܡܰܚܝܳܐ܀

ܘܰܬܪܶܝܢ ܕܺܝܢܳܪ̈ܶܐ ܝܰܗܒܠܶܗ܇ ܕܺܐܝܬܰܝܗܽܘܢ ܦܰܓܪܳܐ ܘܰܕܡܳܐ܀

ܫܽܘܒܚܳܐ ܠܗܰܘ ܕܰܐܦܢܺܝ ܠܳܐܕܳܡ܇ ܠܓܰܘ ܝܳܪܬܽܘܬܶܗ ܩܰܕܡܳܝܬܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܡܫܺܝܚܳܐ ܢܰܛܰܪܶܝܗܿ ܠܥܺܕܬܳܐ

ܒܡ̈ܰܬܠܶܐ ܡܰܠܶܠ ܦܳܪܽܘܩܰܢ܇ ܘܰܒܦ̈ܶܠܳܐܬܳܐ ܘܽܐܳܘܚܕ̈ܳܬܳܐ܇ ܘܶܐܡܰܪ ܕܕܳܡܝܳܐ ܡܰܠܟܽܘܬܳܐ܇ ܕܰܫܡܰܝܳܐ ܠܰܒܬܽܘ̈ܠܳܬܳܐ܇ ܗܳܠܶܝܢ ܕܰܢܣ̈ܰܒܝ̱ ܠܰܡܦܺܝ̈ܕܶܐ܇ ܘܰܢܦܰܩ̈ܝ̱ ܠܽܐܘܪܥܶܗ ܕܚܰܬܢܳܐ ܘܰܕܟܰܠܬܳܐ܇ ܢܳܡ̈ܝ̱ ܟܽܠܗܶܝܢ ܘܰܕ̈ܡܶܟܝ̱ ܐܰܟܚܕܳܐ ܘܰܗܘܳܬ݀ ܩܥܳܬܳܐ ܣܰܓܺܝܐܬܳܐ܇ ܕܗܳܐ ܚܰܬܢܳܐ ܐܳܬܶܐ܇ ܚܰܟܺܝܡ̈ܳܬܳܐ ܥܰܠ̈ܝ̱ ܥܰܡܶܗ܇ ܣܰܟ̈ܠܳܬܳܐ ܦܳܫ̈ܝ̱ ܥܰܠ ܬܰܪܥܳܐ܇ ܒܒܶܟܝܳܐ ܚܢܺܝܓܳܐ܇ ܘܬܶܐܢܚ̈ܳܬܳܐ ܕܠܳܐ ܡܶܬܡ̈ܰܠܠܳܢ܀

ܐܶܬܕܡܰܝܰܬ݀ ܡܰܠܟܽܘܬ ܪܰܘܡܳܐ܇ ܠܓܰܒܪܳܐ ܕܰܥܒܰܕ ܡܶܫܬܽܘܬܳܐ܇ ܘܰܩܪܳܐ ܠܥܰܡܳܐ ܕܢܺܐܬܶܐ ܠܳܗܿ܇ ܘܠܳܐ ܨܒܳܐ ܕܢܺܐܬܶܐ ܘܢܶܬܒܰܣܰܡ܇ ܫܰܕܰܪ ܥܰܒܕ̈ܰܘܗ̱ܝ ܕܰܢܙܰܡܶܢܽܘܢ ܠܟܽܠܗܽܘܢ ܥܰܡ̈ܡܶܐ܇ ܕܢܶܬܚܰܕܽܘܢ ܥܰܡܶܗ܇ ܘܡܶܢ ܟܽܠ ܦܶܢ̈ܝܳܢ ܐܶܬܰܘܰܥܰܕܘ̱܇ ܘܶܐܬܡܠܺܝ ܗܘܳܐ ܒܰܝܬܳܐ ܣܡܺܝ̈ܟܶܐ܇ ܘܰܢܦܰܩܘ̱ ܚܙܳܐ ܐܶܢܽܘܢ܇ ܘܶܐܫܟܰܚ ܒܗܽܘܢ ܓܰܒܪܳܐ ܕܰܠܒܺܝܫ܇ܡܳܐܢ̈ܶܐ ܨ̈ܳܐܶܐ ܕܠܳܐ ܚܳܫܚܺܝܢ ܠܒܶܝܬ ܡܶܫܬܽܘܬܳܐ܇ ܘܰܦܩܰܕ ܫܕܰܐܽܘܗ̱ܝ ܒܚܶܫܽܘܟܳܐ܀

 

ܐ̱ܚܪܺܢܳܐ ܒܩܳܠܳܐ ܛܽܘܒܰܝܟܝ̱ ܥܺܕܬܳܐ

ܡܶܢ ܡܶܢܝܳܢܳܐ ܕܰܡ̈ܐܳܐ ܥܶܪ̈ܒܶܐ ܟܰܫܺܝܪ̈ܳܐ܇ ܐܶܢܳܐ ܕܳܘܝܳܐ ܛܳܥܶܐ ܐ̱ܢܳܐ܇ ܕܰܫܒܳܢܝ̱ ܒܺܝܫܳܐ ܒܰܚܣܳܡܶܗ܇ ܘܗܳܐ ܕܳܒܰܪ ܠܺܝ ܒܰܚܛܺܝܬܳܐ܇ ܪܳܥܝܳܐ ܛܳܒܳܐ ܦܽܘܩ ܒܰܒܥܳܬܝ̱܇ ܘܰܫܩܽܘܠܰܝܢܝ̱ ܥܰܠ ܟܰܬܦ̈ܳܬܳܟ܇ ܕܢܶܚܕܶܐ ܒܺܝ ܪܰܘܡܳܐ ܘܥܽܘܡܩܳܐ܇ ܘܥܺܕܰܬ ܩܽܘܕܫܳܐ ܥܰܡ ܝܰܠܕܶܝ̈ܗܿ܇ ܕܠܰܟܠܺܝܠܳܐ ܕܰܡ̈ܐܳܐ ܫܰܡܠܺܝܬ܀

ܐܶܡܰܪ ܡܳܪܰܢ܇ ܬܪܶܝܢ ܒܢܺܝ̈ܢ ܗ̱ܘܰܘ ܠܶܗ ܠܚܰܕ ܓܰܒܪܳܐ܇ ܘܶܐܡܰܪ ܠܶܗ ܗܰܘ ܒܪܶܗ ܙܥܽܘܪܳܐ܇ ܗܰܒ ܠܺܝ ܝܳܪܬܽܘܬܝ̱ ܡܶܢ ܒܰܝܬܳܟ܇ ܕܺܐܙܰܠ ܐܰܝܟܳܐ ܕܨܳܒܶܐ ܐ̱ܢܳܐ܇ ܘܝܰܗܒ ܠܶܗ ܘܰܢܦܰܩ ܐܰܝܟ ܕܰܨܒܳܐ܇ ܘܰܚܝܳܐ ܗܘܳܐ ܦܰܪܳܚܳܐܺܝܬ܇ ܘܺܝܬܶܒ ܒܳܟܶܐ ܠܰܩܢܽܘܡܶܗ܇ ܕܡܰܢܽܘ ܢܦܺܝܣ ܠܳܐܒܝ̱ ܥܰܠ ܣܰܟܠܽܘܬܝ̱܇ ܕܰܐܝܟ ܥܰܒܕܳܐ ܒܒܰܝܬܶܗ ܐܶܗܘܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܰܕ ܢܚܶܬ ܗܘܳܐ ܠܥܳܠܡܳܐ ܐܳܕܳܡ ܡܶܢ ܦܰܪܕܰܝܣܳܐ܇ ܗܳܐ ܣܳܛܳܢܳܐ ܘܡܰܘܬܳܐ ܦܓܰܥܘ̱ ܒܶܗ ܐܰܝܟ ܓܰܝܳܣ̈ܶܐ܇ ܘܰܢܦܰܠ ܥܠܰܘܗ̱ܝ ܘܰܒܡܰܚܘ̈ܳܬܳܐ ܛܰܒܚܽܘܗ̱ܝ ܣܰܚܦܽܘܗ̱ܝ܇ ܘܰܗܘܳܐ ܡܡܰܚܝܳܐ ܩܛܺܝܠܳܐ ܪܰܡܝܳܐ ܒܽܐܳܘܪܚܶܗ ܕܥܳܠܡܳܐ܀

ܢܚܶܬ ܡܶܢ ܪܰܘܡܳܐ ܨܶܝܕܰܘܗ̱ܝ ܕܳܐܕܳܡ ܒܰܪ ܐܰܠܳܗܳܐ܇ ܘܪܰܚܶܡ ܥܠܰܘܗ̱ܝ ܥܨܰܒ ܡܰܚܘ̈ܳܬܳܐ ܕܣܰܓܺܝ̈ܐܳܢ ܗܘ̈ܝ܇ ܒܡܶܫܚܳܐ ܥܰܨܒܶܗ ܕܺܐܝܬܰܘܗ̱ܝ ܪܽܘܫܡܳܐ ܕܡܰܥܡܽܘܕܺܝܬܳܐ܇ ܘܰܢܨܰܠ ܚܰܡܪܳܐ ܟܳܣܳܐ ܕܰܕܡܶܗ ܥܰܠ ܡܰܚܘ̈ܳܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܚܰܕ ܓܰܒܪܳܐ ܢܚܶܬ ܗܘܳܐ܇ ܡܶܢ ܐܽܘܪܺܫܠܶܡ ܠܺܐܝܪܺܝܚܽܘ܇ ܘܟܰܕ ܡܶܢ ܒܽܐܘܪܚܳܐ ܪܳܕܶܐ ܗܘܳܐ܇ ܠܶܣܛܳܝ̈ܶܐ ܢܦܰܠܘ̱ ܗ̱ܘܰܘ ܥܠܰܘܗ̱ܝ ܫܽܘܒܚܳܐ܀

ܫܰܠܰܚܘ̱ ܗ̱ܘܰܘ ܢܰܚܬܰܘ̈ܗ̱ܝ ܡܶܢܶܗ܇ ܕܰܟܝܽܘܬܳܐ ܘܩܰܕܺܝܫܽܘܬܳܐ܇ ܓܰܢ̱ܒܳܪܽܘܬܳܐ ܘܙܰܗܝܽܘܬܳܐ܇ ܘܒܰܦܣܺܝ̈ܩܳܬܳܐ ܐܰܪܡܺܝܘܗ̱ܝ܀

ܘܰܓܕܰܫ ܘܰܥܒܰܪ ܗܘܳܐ ܘܶܐܙܰܠ܇ ܚܰܕ ܫܳܡܪܳܝܳܐ ܒܗܳܝ ܐܽܘܪܚܳܐ܇ ܘܟܰܕ ܚܙܳܝܗ̱ܝ ܠܪܰܡܝܳܐ ܕܰܡܡܰܚܰܝ܇ ܡܶܢ ܠܶܣܛܳܝ̈ܶܐ ܦܥܺܝܥ ܘܰܪܡܶܐ܇ ܫܽܘܒܚܳܐ܀

ܘܰܐܩܺܝܡܶܗ ܡܶܢ ܪܰܡܝܽܘܬܶܗ܇ ܘܥܰܠ ܚܡܳܪܶܗ ܐܰܪܟܒܶܗ ܗܘܳܐ܇ ܘܒܰܒܛܺܝܠܽܘܬܳܐ ܝܳܨܶܦ ܗܘܳܐ ܕܺܝܠܶܗ ܘܥܰܨܶܒ ܡܰܚܘ̈ܳܬܶܗ܀

ܫܽܘܒܚܳܐ ܠܰܡܫܺܝܚܳܐ ܕܰܐܣܝܶܗ܇ ܠܳܐܕܳܡ ܡܶܢ ܟܽܠ ܨܽܘܠܦ̈ܳܬܶܗ܇ ܘܰܠܥܺܕܬܳܐ ܕܒܽܘܟܪ̈ܶܐ ܥܰܠܝܶܗ܇ ܕܢܶܬܒܰܣܰܡ ܥܰܡ ܪ̈ܽܘܚܳܢܶܐ ܫܽܘܒܚܳܐ ܠܳܟ ܫܽܘܒܚܳܐ܀

 

ܩܰܘܡܳܐ ܩܰܕܡܳܝܳܐ ܕܠܺܠܝܳܐ ܒܩܳܠܳܐ ܬܗܰܪ ܓܰܒܪܺܐܶܝܠ

ܐܰܝܕܳܐܗ̱ܝ ܐܰܢ̱ܬܬܳܐ܇ ܕܺܐܝܬ ܗܘܳܐ ܠܳܗܿ ܥܶܣܪܳܐ ܙܽܘ̈ܙܺܝܢ܇ ܘܚܰܕ ܡܶܢܗܽܘܢ ܐܶܒܰܕ ܡܶܢܳܗܿ܇ ܘܠܳܐ ܡܰܢܗܪܳܐ ܫܪܳܓܳܐ ܘܚܳܡܳܐ܇ ܒܰܝܬܳܐ ܟܽܠܶܗ ܒܳܥܝܳܐ ܚܦܺܝܛܳܐܺܝܬ܇ ܘܡܳܐ ܕܶܐܫܟܰܚܬܶܗ ܠܗܰܘ ܙܽܘܙܳܐ܇ ܘܩܳܪܝܳܐ ܠܗܶܝܢ ܠܰܫܒܳܒ̈ܳܬܳܗܿ܇ ܕܬܳܐܝܶܝ̈ܢ ܚܕ̈ܳܝܶܝܢ ܥܰܡܝ̱܇ ܕܰܐܫܟܰܚܬܶܗ ܠܙܽܘܙܝ̱ ܕܰܐܒܺܝܕ ܗܘܳܐ܇ ܗܳܟܰܢ ܚܳܕܶܐ ܐܰܠܳܗܳܐ܇ ܒܚܰܕ ܚܰܛܳܝܳܐ ܡܳܐ ܕܬܳܐܶܒ܀

ܡܳܪܰܢ ܝܶܫܽܘܥ܇ ܦܰܠܶܓ ܒܰܐܪܥܳܐ ܥܽܘܕܪ̈ܳܢܰܘܗ̱ܝ ܐܰܝܟ ܛܳܒܳܐ ܘܪܳܚܶܡܢܳܫܳܐ܇ ܠܗܳܝ ܕܰܟܦܺܝܦܳܐ ܦܰܫܛܳܗܿ ܗܘܳܐ܇ ܘܰܠܚܰܛܳܝܳܐ ܐܰܣܪܚ ܫܽܘܒܩܳܢܳܐ܇ ܠܰܡܫܰܪܝܳܐ ܩܪܳܝܗ̱ܝ ܘܰܐܩܺܝܡܶܗ ܘܰܐܣܺܝ ܠܗܰܘ ܓܰܒܪܳܐ ܓܰܪܒܳܐ܇ ܘܠܰܡܡܰܚܰܝܬܳܐ ܥܨܰܒ܇ ܘܢܰܚܶܡ ܠܰܒܪܳܗܿ ܕܰܐܪܡܶܠܬܳܐ܇ ܘܰܠܣܰܡܝܳܐ ܚܙܳܝܳܐ ܝܰܗܒ ܠܶܗ܇ ܒܪܺܝܟ ܐܳܣܝܳܐ ܕܰܐܣܺܝ ܠܬܺܐܒܶܝܠ܀

 

ܐ̱ܚܪܺܢܳܐ ܩܽܘܩܳܝܳܐ

ܓܰܝܳܣ̈ܶܐ ܢܦܰܠܘ̱ ܥܰܠ ܓܰܒܪܳܐ ܟܰܕ ܢܳܚܶܬ ܗܘܳܐ܇ ܡܶܢ ܐܽܘܪܺܫܠܶܡ ܠܺܐܝܪܺܝܚܽܘ ܘܰܕܠܳܐ ܚܰܘܣܳܢ ܒܠܰܥ܇ ܥܒܰܪ ܐܒܰܪܳܗܳܡ ܘܠܳܐ ܝܰܗܒܠܶܗ ܐܺܝܕܳܐ܇ ܘܰܥܒܰܪ ܡܽܘܫܶܐ ܘܠܳܐ ܥܨܰܒ ܡܰܚ̈ܘܳܬܶܗ܇ ܥܒܰܪ ܡܳܪܰܢ ܝܰܗܒ ܠܶܗ ܦܰܓܪܶܗ ܘܰܒܕܡܶܗ ܥܰܨܒܶܗ܇ ܘܡܶܢ ܕܶܐܬܰܐܣܺܝ ܩܳܡ ܩܳܥܶܐ ܕܠܳܟ ܫܽܘܒܚܳܐ ܡܳܪܝܳܐ܇ ܗ ܘ ܗ܀

ܐܰܢ̱ܬܬܳܐ ܚܕܳܐ ܡܶܢ ܒܶܝܬ ܟܶܢܫ̈ܶܐ ܠܡܳܪܰܢ ܐܶܡܪܰܬ݀܇ ܛܽܘܒܶܝܗܿ ܠܶܐܡܳܐ ܕܺܝܠܶܕܬܳܟ ܘܠܰܬܕܰܝ̈ܳܐ ܕܺܝܢܶܩܬ܇ ܐܶܡܰܪ ܡܳܪܰܢ ܕܛܽܘܒܰܝܗܽܘܢ ܠܰܐܝܠܶܝܢ܇ ܕܫܳܡܥܺܝܢ ܡܶܠ̈ܰܝ̈ ܘܢܳܛܪܺܝܢ ܦܽܘܩ̈ܕܳܢܰܝ܇ ܠܰܘ ܐܰܝܢܳܐ ܕܩܳܪܶܐ ܠܺܝ ܡܳܪܝ̱ ܥܳܢܶܐ ܐ̱ܢܳܐ ܠܶܗ܇ ܐܶܠܳܐ ܐܰܝܢܳܐ ܕܫܳܡܰܥ ܠܺܝ ܘܣܳܛܶܐ ܡܶܢ ܒܺܝܫܬܳܐ܇ ܗ ܘ ܗ܀

 

ܡܰܕܪܳܫܳܐ ܒܩܳܠܳܐ ܗܳܢܰܘ ܝܰܪܚܳܐ ܥܶܢܝܳܢܳܐ ܛܽܘܒܰܘܗ̱ܝ ܠܰܐܝܢܳܐ ܕܰܠܒܶܝܬ ܓܰܘܣܳܟ ܪܳܗܶܛ ܟܽܠܫܳܥ

ܚܰܕ ܠܰܡ ܓܰܒܪܳܐ܇ ܟܰܕ ܢܳܚܶܬ ܗܘܳܐ ܡܶܢ ܐܽܘܪܺܫܠܶܡ܇ ܠܗܳܝ ܐܺܝܪܺܝܚܳܐ ܕܣܺܝܡܳܐ ܒܥܽܘܡܩܳܐ܇ ܘܰܠܣܶܛܳܝ̈ܶܐ ܢܦܰܠܘ̱ ܥܠܰܘܗ̱ܝ ܘܰܡܚܰܐܽܘܗ̱ܝ܇ ܘܫܰܒܩܽܘܗ̱ܝ ܪܰܡܝܳܐ܇ ܘܠܳܐ ܐ̱ܢܳܫ ܥܰܨܒܶܗ ܐܳܦܠܳܐ ܐܰܣܝܶܗ܀

ܐ̱ܢܳܫ ܫܳܡܪܳܝܳܐ܇ ܦܓܰܥ ܒܶܗ ܒܽܐܘܪܚܳܐ ܒܗܰܘ ܕܰܡܡܰܚܰܝ܇ ܘܟܶܪܝܰ݀ܬ ܠܶܗ ܥܠܰܘܗ̱ܝ ܥܨܰܒ ܡܰܚܘ̈ܳܬܶܗ܇ ܘܰܢܨܰܠ ܥܠܰܝܗܶܝܢ ܚܰܡܪܳܐ ܘܡܶܫܚܳܐ܇ ܘܚܰܘܝܶܗ ܚܽܘܒܶܗ܇ ܛܳܒ ܡܶܢ ܟܳܗܳܢܐ ܘܡܶܢ ܠܶܘܳܝܳܐ܀

ܒܝܰܡܳܐ ܫܓܺܝܫܳܐ܇ ܡܙܰܓ ܗܘܳܐ ܚܢܳܢܶܗ܇ ܟܰܕ ܡܶܬܒܰܥܪܰܪ܇ ܒܕܰܡܫܺܝܢܺܝܢ ܗ̱ܘܰܘ ܡܙܰܓ ܗܘܳܐ ܚܢܳܢܶܗ܇ ܘܕܰܫܓܺܝܫܺܝܢ ܗ̱ܘܰܘ ܙܪܰܥ ܢܰܟܦܽܘܬܳܐ܇ ܒܡܶܠܚܶܗ ܫܰܘܬܶܦ܇ ܠܰܕܦܰܟܺܝܗܺܝܢ ܘܰܩܢܰܘ ܛܰܥܰܡܳܐ܀

ܟܶܢܳܪ ܝܰܡܳܐ܇ ܓܰܠ̈ܠܶܐ ܘܝܰܡܳܐ ܘܪ̈ܽܘܚܶܐ ܨܶܒܥܶܗ܇ ܫܬܶܩ ܗܘܳܐ ܝܰܡܳܐ ܐܰܝܟ ܟܶܢܳܪ̈ܶܐ܇ ܘܒܰܕܡܽܘܬ ܨܶܒܥܳܐ ܪܽܘܚܳܐ ܫܠܳܬ݀ ܗܘܳܬ݀܇ ܗܰܘ ܦܽܘܩܕܳܢܳܐ܇ ܕܰܐܙܺܝܥ ܐܶܢܽܘܢ ܫܰܠܺܝ ܐܶܢܽܘܢ܀

ܥܰܠ ܠܰܣܦܺܝܢ̱ܬܳܐ ܗܰܘ ܡܰܠܳܚܳܐ܇ ܘܡܳܪܳܐ ܕܝܰܡ̈ܡܶܐ܇ ܘܰܐܝܟ ܒܰܪܢܳܫܳܐ ܒܶܐܠܦܳܐ ܕܡܶܟ ܗܘܳܐ܇ ܘܕܰܨܒܳܐ ܒܚܽܘܒܶܗ ܗܘܳܐ ܒܰܪܢܳܫܳܐ܇ ܘܰܒܝܰܕ ܡܶܠܬܶܗ܇ ܫܰܠܺܝ ܓܰܠ̈ܠܶܐ ܕܝܰܡܳܐ ܫܓܺܝܫܳܐ܀

ܦܰܬܰܚ ܡܳܪܰܢ܇ ܥܰܝܢ̈ܶܐ ܕܣܰܡܝܳܐ܇ ܘܰܐܢܗܰܪ ܦܰܓܪܳܐ܇ ܘܬܽܘܒ ܦܰܬܰܚ ܗܘܳܐ ܦܽܘ̈ܡܶܐ ܣܟܺܝܪ̈ܶܐ܇ ܘܝܰܒܶܒܘ̱ ܡ̈ܶܠܶܐ ܒܰܕܡܽܘܬ ܡܰܝ̈ܳܐ܇ ܘܦܰܬܰܚ ܐܶܕܢ̈ܶܐ܇ ܘܰܪܥܶܡܘ̱ ܩ̈ܳܠܶܐ ܒܥܽܘ̈ܒܶܐ ܚܰܪ̈ܫܶܐ܀

ܟܰܪܟܽܘܗ̱ܝ ܟܶܢܫ̈ܶܐ܇ ܠܡܺܝܬܳܐ ܕܰܚܝܳܐ ܕܢܫܰܐܠܽܘܢܳܝܗ̱ܝ܇ ܕܰܐܝܟܰܢ ܕܳܡܶܐ ܥܽܘܡܪܳܐ ܕܰܫܝܽܘܠ܇ ܕܰܠܡܳܐ ܪ̈ܳܓܫܳܢ ܒܶܗ ܢܰܦܫ̈ܳܬܳܐ܇ ܗܽܘ ܕܶܝܢ ܐܶܡܰܪ܇ ܐܰܝܟ ܕܡܶܢ ܥܰܪܣܳܐ ܕܫܶܢܬܳܐ ܩܳܡܿܶܬ݀܀

ܕܰܦܫܰܛ ܐܺܝܕܶܗ܇ ܢܣܰܒ ܚܽܘܠܡܳܢܳܐ ܡܶܢ ܨܶܝܕ ܢܰܚ̈ܬܰܘܗ̱ܝ܇ ܘܰܕܠܳܐ ܡܨܶܐ ܗܘܳܐ ܕܢܶܦܫܽܘܛ ܐܺܝܕܶܗ܇ ܦܫܰܛ ܗܘܳܐ ܚܠܳܦܶܝܗܿ ܗܰܝܡܳܢܽܘܬܶܗ܇ ܗܘܳܬ݀ ܠܶܗ ܐܺܝܕܳܐ܇ ܘܒܳܗܿ ܢܳܣܶܒ ܗܘܳܐ ܟܽܠ ܥܽܘܕܪ̈ܳܢܺܝܢ܀

ܠܶܐܕܢ̈ܶܐ ܕܥܰܝ̈ܢܶܐ܇ ܫܶܠܝܳܐ ܒܝܰܡܳܐ ܝܰܗܒ ܦܳܪܽܘܩܰܢ܇ ܘܰܕܠܳܐ ܐܶܫܟܰܚ ܫܰܬܺܝܩ̈ܳܬܳܐ܇ ܫܽܘܒܚܳܐ ܠܡܶܬܰܠ ܦܽܘܡܳܐ ܡܰܠܶܠ܇ ܦܪܰܥ ܠܶܫܳܢܳܐ܇ ܚܰܘܒܰܬ ܪ̈ܶܓܫܶܐ܇ ܘܰܐܣܶܩ ܫܽܘܒܚܳܐ܀

ܡܫܰܪܝܳܐ ܒܩܳܠܶܗ ܣܡܰܟ ܘܰܐܩܺܝܡܶܗ ܘܰܫܒܰܩ ܚܰܘܒܰܘ̈ܗ̱ܝ܇ ܘܣܰܡܟܶܗ ܒܚܰܝܠܳܐ ܘܰܒܫܽܘܒܩܳܢܳܐ܇ ܘܨܳܪ ܒܶܗ ܛܽܘܦܣܳܐ ܠܥܳܠܡܳܐ ܟܽܠܶܗ܇ ܕܗܽܘ ܡܰܚܠܶܡ ܠܶܗ܇ ܘܰܫܒܰܩ ܚܰܘܒ̈ܰܘܗ̱ܝ܇ ܒܪܺܝܟ ܐܺܝܩܳܪܶܗ܀

ܐܶܬܳܬ݀ ܡܶܢ ܒܶܣܬܪܶܗ ܗܳܝ ܚܰܛܳܝܬܳܐ ܒܳܟܳܬ݀ ܥܰܠ ܪ̈ܶܓܠܰܘܗ̱ܝ܇ ܘܡܶܫܚܰܬ݀ ܪܺܝܫܶܗ ܘܨܶܒܥܰܬ݀ ܪ̈ܶܓܠܰܘܗ̱ܝ܇ ܘܟܶܦܪܰܬ݀ ܐܶܢܝܶܢ ܒܣܰܥܪܳܐ ܕܪܺܝܫܳܗܿ ܒܪܺܝܟ ܚܰܢܳܢܳܐ܇ ܕܚܰܣܺܝ ܚܰܘܒܶܝ̈ܗܿ ܘܰܥܛܳܐ ܚܛܳܗ̈ܶܝܗܿ܀

 

ܐ̱ܚܪܺܢܳܐ ܒܩܳܠܳܐ ܛܽܘܒܰܝܟܝ̱ ܐܳܦܪܰܬ

ܛܽܘܒܰܝܟ ܓܰܒܪܳܐ ܕܶܐܬܡܰܚܺܝ ܗܘܳܐ܇ ܡܶܢ ܠܶܣܛܳܝ̈ܶܐ ܨܶܝܕ ܐܺܝܪܺܝܚܽܘ܇ ܘܶܐܬܳܐ ܡܫܺܝܚܳܐ ܥܨܰܒ ܡܰܚܘ̈ܳܬܳܟ܇ ܗܰܘ ܕܰܡܠܶܐ ܗܘܳܐ ܚܢܳܢܳܐ ܘܪ̈ܰܚܡܶܐ܇ ܠܳܐ ܚܳܢܽܘܟ ܟܽܠܗܽܘܢ ܟܳܗ݁̈ܢܶܐ ܘܠܶܘ̈ܳܝܶܐ܇ ܘܠܳܐ ܢܒ̈ܺܝܶܐ ܐܳܦܠܳܐ ܟܽܠܗܽܘܢ ܙܰܕܺܝ̈ܩܶܐ܇ ܗܽܘ ܥܳܒܽܘܕܳܟ ܚܳܣ ܗܘܳܐ ܥܰܠ ܫܽܘܦܪܳܟ܇ ܘܰܐܦܢܳܟ ܠܝܳܪܬܽܘܬܳܟ܀

ܛܽܘܒܰܝܟ ܐܳܦ ܠܳܟ ܐܰܘ ܩܶܢܛܪܽܘܢܳܐ ܕܣܰܓܺܝ ܦܰܐܝܳܐ ܗܰܝܡܳܢܽܘܬܳܟ܇ ܗܰܝܡܶܢܬ ܠܰܒܪܳܐ ܕܗܽܘܝܽܘ ܡܳܪܳܐ܇ ܕܚܰܝܠܰܘ̈ܳܬܳܐ ܕܰܫܡܰܝ̈ܳܢܶܐ܇ ܛܽܘܒ ܠܦܽܘܡܳܟ ܕܰܩܥܳܐ ܩܕܳܡ ܟܶܢ̈ܫܶܐ܇ ܕܒܰܫܪܳܪܳܐ ܗܳܢܰܘ ܒܪܳܐ ܕܰܐܠܳܗܳܐ܇ ܐܰܟܪܶܙܬ ܒܥܶܕܳܢ ܚܰܫܶܗ ܘܪܽܘܡܪܳܡܶܗ܇ ܘܰܒܥܶܕܳܢ ܡܰܘܬܶܗ ܡܳܪܽܘܬܶܗ܀

ܛܽܘܒܰܝܟ ܣܰܡܝܳܐ ܕܰܐܢ̱ܬ ܐܰܟܪܶܙܬܳܝܗ̱ܝ܇ ܕܳܐܳܘ ܒܰܪ ܕܰܘܺܝܕ ܪܰܚܶܡ ܥܠܰܝ܇ ܘܗܽܘ ܐܶܡܰܪ ܠܳܟ ܕܡܽܘܢ ܫܳܐܶܠ ܐܰܢ̱ܬ܇ ܡܶܢ ܝܳܗܽܘܒܳܐ ܕܡܰܓܳܢ ܝܳܗܶܒ܇ ܕܰܒܚܶܡܬܳܐ ܚܙܳܝܳܐ ܠܥܰܝܢܰܝ̈ܟ ܫܐܶܠܬ܇ ܘܰܚܙܰܝܬ ܒܬܶܕܡܽܘܪܬܳܐ ܠܢܽܘܗܪܳܐ ܕܒܶܪ̈ܝܳܬܳܐ܇ ܒܪܺܝܟ ܗܽܘ ܢܽܘܗܪܳܐ܇ ܕܶܐܬܳܐ ܘܰܐܢܗܰܪ ܠܟܽܠܗܶܝܢ ܒܶܪ̈ܝܳܬܳܐ܀

ܛܽܘܒܰܝܟ ܪܺܝܫܳܐ ܕܰܟܢܽܘܫܬܳܐ ܗܳܝ܇ ܕܰܠܒܰܝܬܳܟ ܥܰܠ ܚܰܝ̈ܶܐ ܘܩܽܘܫܬܳܐ܇ ܠܒܰܪܬܳܟ ܕܡܺܝܬܰܬ݀ ܩܪܳܝܗ̱ܝ ܢܽܘܚܳܡܳܐ܇ ܛܠܺܝܬܳܐ ܩܽܘܡܝ̱ ܠܶܟܝ̱ ܘܩܳܡܰܬ݀ ܝܶܬܒܰܬ݀܇ ܘܰܐܝܟ ܐܳܣܝܳܐ ܕܰܐܚܠܶܡ ܠܰܟܪܺܝܗܬܳܐ܇ ܦܩܰܕ ܗܘܳܐ ܕܢܶܬܠܽܘܢ ܠܳܗܿ ܣܰܝܒܳܪܬܳܐ܇ ܒܪܺܝܟ ܗܽܘ ܛܳܒܳܐ܇ ܕܓܳܠ̱ܘ ܗ̱ܘܰܘ ܪ̈ܰܚܡܰܘܗ̱ܝ ܘܣܰܥܪܳܗܿ ܠܰܓܒܺܝܠܬܶܗ܀

ܛܽܘܒܰܝܟ ܡܰܕܒܪܳܐ܇ ܕܒܳܟ ܗܘܳܐ ܣܰܒܥܳܐ܇ ܛܳܒ ܡܶܢ ܟܰܪ̈ܟܼܶܐ ܘܰܡܕܺܝܢ̈ܳܬܳܐ܇ ܕܠܳܐ ܢܰܚ̈ܬܽܘܡܶܐ ܘܰܕܠܳܐ ܢܽܘܪܳܐ܇ ܣܓܺܝ ܠܶܗ ܠܰܚܡܳܐ ܠܥܰܡܳܐ ܪܰܒܳܐ܇ ܕܶܐܬܳܐ ܠܶܗ ܣܰܒܥܳܐ ܕܒܶܪ̈ܝܳܬܳܐ ܘܶܐܬܡܠܺܝ̈ ܒܶܗ ܟܽܠܗܶܝܢ ܒܽܘܪ̈ܟܳܬܳܐ܇ ܐܶܟܰܠܘ̱ ܟܰܦܢ̈ܶܐ܇ ܘܰܣܒܰܥܘ̱ ܘܰܐܳܘܬܰܪܘ̱܇ ܘܰܙܡܰܪܘ̱ ܬܶܫܒܽܘܚܬܳܐ܀

ܛܽܘܒܰܝܟ ܫܶܡܥܽܘܢ ܦܪܺܝܫܳܐ ܕܰܫܪܳܐ܇ ܒܒܰܝܬܳܟ ܫܳܒܶܩ ܚܰܘܒ̈ܶܐ ܕܐ̱ܢܳܫ̈ܳܐ܇ ܘܰܠܚܰܛܳܝܬܳܐ ܕܥܶܠܰܬ݀ ܨܶܝܕܰܘܗ̱ܝ ܫܒܰܩ ܠܳܗܿ ܟܽܠܳܗܿ ܗܳܝ ܣܰܟܠܽܘܬܳܐ܇ ܛܽܘܒ ܠܚܽܘܒܳܟ ܕܰܩܪܳܝܗ̱ܝ ܗܘܳܐ ܟܰܕ ܨܒܳܐ܇ ܕܰܠܒܰܝܬܳܟ ܢܺܐܬܶܐ ܠܶܗ ܘܢܶܣܥܪܳܟ܇ ܚܰܘܝܳܟ ܕܗܽܘܝܽܘ ܫܳܒܶܩ ܚܰܘܒ̈ܶܐ܇ ܘܰܡܪܰܚܡܳܢܳܐ ܘܪܳܚܶܡ ܐ̱ܢܳܫܳܐ܀

ܛܽܘܒܰܝܟܝ̱ ܐܳܦ ܠܶܟܝ̱ ܘܛܽܘܒܳܐ ܠܢܰܦܫܶܟܝ̱܇ ܕܡܶܢ ܫܽܘܚܠܳܦܶܟܝ̱ ܐܰܠܳܗܳܐܝܳܐ܇ ܡܶܢ ܨܳܡܰܪܬܳܐ ܗܳܝ ܕܰܐܒܕܳܢܳܐ܇ ܕܰܐܠܝܶܟܝ̱ ܘܰܐܣܩܶܟܝ̱ ܝܶܫܽܘܥ ܡܳܪܶܟܝ̱܇ ܡܰܚܙܺܝܬܳܐ ܥܰܒܕܶܟܝ̱ ܠܚܰܛܳܝ̈ܶܐ ܕܬܳܝܒܺܝܢ܇ ܒܳܟܶܝܢ ܒܰܕܡܽܘܬܶܟܝ ܘܰܡܩܰܪܒܺܝܢ ܬܝܳܒܽܘܬܳܐ ܒܪܺܝܟ ܗܽܘ ܚܰܢܳܢܳܐ܇ ܝܶܫܽܘܥ ܡܪܰܚܡܳܢܳܐ ܡܩܰܒܶܠ ܠܬܰܝ̈ܳܒܶܐ܀

 

ܡܰܘܕ̈ܝܳܢܶܐ ܥܶܢܝܳܢܳܐ ܫܽܘܒܚܳܐ ܠܳܟ ܐܳܣܝܳܐ ܕܪ̈ܰܚܡܶܐ ܕܰܐܣܺܝܬ ܟܺܐܒ̈ܐ ܘܟܽܘܪ̈ܗܳܢܶܐ

ܡܶܢ ܐܽܘܪܺܫܠܶܡ ܗܳܝ ܕܫܰܝܢܳܐ܇ ܢܳܚܶܬ ܗܘܳܐ ܗܰܘ ܪܺܝܫ ܓܶܢܣܰܢ܇ ܐܺܝܪܺܝܚܽܘ ܕܶܝܢ ܩܰܒܶܠܬܶܗ܇ ܠܰܬܥܳܫܳܐ ܘܥܰܡܠܳܐ ܩܰܫܝܳܐ܇ ܥܳܡܪ̈ܰܝ ܐܰܬܪܳܐ ܦܓܰܥܘ̱ ܗ̱ܘܰܘ ܒܶܗ܇ ܠܶܣܛܳܝ̈ܶܐ ܫܰܠܰܚܘ̱ ܢܰܚ̈ܬܰܘܗ̱ܝ܀

ܫܽܘܒܚܳܐ ܠܗܰܘ ܕܚܳܢܶܗ ܠܳܐܕܳܡ܇ ܘܡܶܢ ܠܶܣܛܳܝ̈ܶܐ ܦܪܰܩ ܘܫܰܘܙܶܒܶܗ܇ ܘܰܢܨܰܠ ܗܘܳܐ ܥܰܠ ܡܰܚܘ̈ܳܬܶܗ ܣܰܡ̈ܡܳܢܰܘܗ̱ܝ ܐܰܠܳܗܳܝ̈ܶܐ܇ ܦܰܓܪܶܗ ܘܰܕܡܶܗ ܡܚܰܣܝܳܢܳܐ܇ ܚܽܘܣܳܝܳܐ ܠܶܗ ܘܰܠܝܰܠܕܰܘ̈ܗ̱ܝ܀

ܥܰܠ ܐܰܢ̱ܬܬܳܐ ܗܳܝ ܚܰܛܳܝܬܳܐ܇ ܡܰܘܕܰܥ ܐ̱ܢܳܐ ܠܟܽܘܢ ܚܰܒܺܝ̈ܒܰܝ ܗܳܕܶܐ ܕܣܳܡܳܗܿ ܣܳܛܳܢܳܐ܇ ܒܰܕܡܽܘܬ ܦܰܚܳܐ ܘܰܡܨܺܝܕܬܳܐ܇ ܘܶܐܬܬܰܩܰܠܰܘ ܒܳܗܿ ܣܽܘܓܐܳܐ ܕܐ̱ܢܳܫ̈ܳܐ܇ ܘܨܳܕܰܬ݀ ܐܶܢܽܘܢ ܠܰܐܒܕܳܢܳܐ܀

ܥܰܠܘ̱ ܘܰܥܰܡܰܪܘ̱ ܒܳܗܿ ܐܳܦ ܫܺܐܕ̈ܶܐ܇ ܫܰܓܪܽܘܗܿ ܒܪܶܓܬܳܐ ܙܠܺܝܠܬܳܐ܇ ܘܟܰܕ ܫܶܡܥܰܬ݀ ܛܶܐܒܶܗ ܕܳܐܣܝܳܐ܇ ܕܫܳܒܶܩ ܚܰܘܒ̈ܶܐ ܘܰܚܛܳܗ̈ܶܐ܇ ܘܥܶܠܰܬ݀ ܘܰܒܳܟܳܬ݀ ܥܰܠ ܪ̈ܶܓܠܰܘܗ̱ܝ܇ ܘܰܫܒܰܩ ܠܳܗܿ ܣܽܘܓܐܳܐ ܕܚܰܘ̈ܒܶܝܗܿ܀

ܘܠܰܐܢ̱ܬܬܳܐ ܕܰܕܡܳܗܿ ܪܳܕܶܐ ܗܘܳܐ܇ ܐܰܣܺܝ ܒܳܟܶܢܦܳܐ ܕܡܰܪܛܽܘܛܶܗ܇ ܘܰܠܗܰܘ ܕܥܳܡܰܪ ܒܒܶܝܬ ܩܒܽܘܪ̈ܶܐ܇ ܐܰܦܶܩ ܫܺܐܕ̈ܶܐ ܕܺܐܝܬ ܗܘܳܐ ܒܶܗ܇ ܘܰܠܟܽܠ ܚܰܕ ܐܰܝܟ ܫܶܐܠ̈ܳܬܶܗ܇ ܝܰܗܒ ܗܘܳܐ ܠܶܗ ܣܽܘܢܩܳܢܶܗ܀

 

ܩܽܘܡ ܦܰܘܠܳܘܣ

ܥܶܢܝܳܢܳܐ ܫܽܘܒܚܳܐ ܠܳܟ ܐܳܣܝܳܐ ܫܡܰܝܳܢܳܐ܇ ܥܳܨܽܘܒܳܐ ܕܰܐܝܠܶܝܢ ܕܰܟܪ̈ܺܝܗܺܝܢ

ܚܰܕ ܓܰܒܪܳܐ ܢܚܶܬ ܡܶܢ ܐܽܘܪܺܫܠܶܡ܇ ܠܺܐܝܪܺܝܚܽܘ ܗܳܝ ܣܺܝܡܰܬ ܒܥܽܘܡܩܳܐ܇ ܘܰܢܦܰܠܘ̱ ܥܠܰܘܗ̱ܝ ܓܰܝܳܣ̈ܶܐ ܘܰܐܫܠܚܽܘܗ̱ܝ܇ ܘܥܰܪܛܶܠ ܦܳܫ ܘܶܐܬܡܰܚܺܝ ܡܶܢܗܽܘܢ܇ ܚܙܳܝܗ̱ܝ ܕܶܝܢ ܚܰܕ ܟܳܗܢܳܐ܇ ܘܰܐ̱ܚܪܺܝܢ ܠܶܘܳܝܳܐ܇ ܘܳܐܦܠܳܐ ܚܰܕ ܡܶܢܗܽܘܢ܇ ܚܳܢܶܗ ܠܗܰܘ ܕܳܘܝܳܐ܇ ܘܒܰܪܢܳܫܳܐ ܕܶܐܬܩܪܺܝ ܫܳܡܪܳܝܳܐ܇ ܫܰܩܠܶܗ ܗܘܳܐ ܘܰܥܨܰܒ ܡܰܚܘ̈ܳܬܶܗ܀

ܫܳܡܪܳܝܳܐ ܕܚܳܢܶܗ ܠܗܰܘ ܕܳܘܝܳܐ܇ ܦܳܪܽܘܩܰܢ ܐܺܝܬܰܘܗ̱ܝ ܒܰܫܪܳܪܳܐ܇ ܕܝܰܗܒ ܗܽܘ ܠܶܗ ܠܡܰܘܬܳܐ ܚܠܳܦ ܐܳܕܳܡ܇ ܘܰܒܝܰܕ ܕܡܶܗ ܕܶܐܫܰܕ ܒܰܙܩܺܝܦܳܐ܇ ܥܨܰܒ ܗܘܳܐ ܠܡܰܚ̈ܘܳܬܶܗ܇ ܘܰܐܣܺܝ ܫܽܘܡ̈ܳܬܶܗ܇ ܘܣܳܡ ܦܰܓܪܶܗ ܣܰܡܳܐ܇ ܠܟܽܠܗܶܝܢ ܚܒܳܪ̈ܳܬܶܗ܇ ܒܪܺܝܟ ܚܽܘܒܶܗ ܘܰܒܪܺܝܟܺܝܢ ܪ̈ܰܚܡܰܘܗ̱ܝ܇ ܕܰܫܦܺܝܥܺܝܢ ܠܟܽܠܗܽܘܢ ܚܰܛܳܝ̈ܶܐ܀

ܦܽܘܬܩܳܐ ܗܰܘ ܕܒܶܗ ܐܶܬܬܣܺܝܡ ܪܰܡܝܳܐ܇ ܗܺܝ ܐܺܝܬܶܝܗܿ ܥܺܕܬܳܐ ܩܰܕܺܝܫܬܳܐ܇ ܕܠܳܗܿ ܨܳܝܒܺܝܢ ܟܪ̈ܺܝܗܶܐ ܘܰܐܠܺܝܨ̈ܶܐ܇ ܘܟܽܠ ܐܰܝܠܶܝܢ ܕܰܪܡܶܝܢ ܒܰܚܛܳܗ̈ܶܐ܇ ܘܦܽܘܬܩܳܝܳܐ ܐܺܝܬܰܘܗ̱ܝ܇ ܟܳܗܢܳܐ ܩܰܕܺܝܫܳܐ܇ ܕܫܳܒܶܩ ܘܰܡܚܰܣܶܐ܇ ܚܰܘ̈ܒܶܐ ܕܚܰܛܳܝ̈ܶܐ܇ ܕܒܺܐܝ̈ܕܰܘܗ̱ܝ ܝܳܗܶܒ ܩܠܺܝܕ̈ܶܐ ܕܡܰܠܟܽܘܬܳܐ܇ ܘܗܽܘ ܦܳܬܰܚ ܘܳܐܣܰܪ ܐܳܦ ܫܳܪܶܐ܀

ܐܳܣܝܳܐ ܡܶܢ ܕܪܰܒ ܒܰܝܬܳܐ ܥܰܒܕܶܗ܇ ܐܰܠܳܗܳܐ ܠܟܳܗܢܳܐ ܡܚܰܣܝܳܢܳܐ܇ ܕܰܒܒܳܥܘ̈ܳܬܶܗ ܘܰܒܝܰܕ ܨܠܰܘ̈ܳܬܶܗ܇ ܘܰܒܕܶܡܥܰܘ̈ܗ̱ܝ ܘܰܒܬܰܟܫܦ̈ܳܬܶܗ܇ ܢܶܬܚܰܣܽܘܢ ܚܰܘܒ̈ܶܐ܇ ܘܰܚܛܳܗ̈ܶܐ ܕܥܰܡܶܗ܇ ܘܰܒܝܰܕ ܩܽܘܪ̈ܒܳܢܰܘܗ̱ܝ ܡܺܝ̈ܬܶܐ ܢܶܬܬܢܺܝܚܽܘܢ ܒܶܗ ܩܳܝܡܺܝܢ ܟܽܠܗܽܘܢ ܕܢܰܦܺܝܠܺܝܢ܇ ܘܡܶܢ ܡܫܺܝܚܳܐ ܡܳܪܶܗ ܡܶܬܝܰܩܰܪ܀

 

ܣܽܘܓܺܝܬܳܐ ܒܩܳܠܳܐ ܐܰܝܠܶܝܢ ܩ̈ܳܠܶܐ ܥܶܢܝܳܢܳܐ ܫܽܘܒܚܳܐ ܠܳܟ ܪܳܚܡܳܐ ܕܡܶܣܟ̈ܺܢܶܐ܇ ܫܽܘܒܚܳܐ ܠܳܟ ܥܳܨܶܒ ܠܰܬܒܺܝܪ̈ܶܐ

ܘܰܚܙܳܝܗܝ ܟܳܗܢܳܐ ܟܰܕ ܥܳܒܰܪ ܗܘܳܐ܇ ܘܫܰܒܩܶܗ ܟܰܕ ܪܡܶܐ ܘܶܐܙܰܠ ܒܽܐܳܘܪܚܶܗ܇ ܐܳܦ ܠܶܘܳܝܳܐ ܥܳܒܰܪ ܗܘܳܐ ܠܘܳܬܶܗ܇ ܐܳܦ ܗܽܘ ܫܰܒܩܶܗ ܘܠܳܐ ܥܰܕܪܶܗ ܗܘܳܐ܀

ܚܰܕ ܫܳܡܪܳܝܳܐ ܥܨܰܒ ܡܰܚܘ̈ܳܬܶܗ܇ ܘܰܢܨܰܠ ܥܠܰܝܗܶܝܢ ܚܰܡܪܳܐ ܘܡܶܫܚܳܐ܇ ܘܰܐܝܬܝܶܗ ܗܘܳܐ ܠܦܽܘܬܩܳܐ ܗܰܘ ܕܺܝܠܶܗ܇ ܘܰܠܦܽܘܬܩܳܝܳܐ ܦܰܩܶܕ ܥܠܰܘܗ̱ܝ܀

ܘܶܐܢ ܬܽܘܒ ܬܰܘܣܶܦ ܬܰܦܶܩ ܡܶܕܶܡ ܡܳܐ ܕܗܳܦܶܟ ܐ̱ܢܳܐ ܦܳܪܰܥ ܐ̱ܢܳܐ ܠܳܟ܇ ܘܶܐܡܰܪ ܡܳܪܰܢ ܠܣܳܦܪܳܐ ܕܫܰܐܠܶܗ܇ ܕܡܶܢ ܡܰܢ ܗܳܠܶܝܢ ܩܰܪܺܝܒ ܗܽܘ ܠܶܗ܀

ܠܳܐ ܐܰܒܳܗ̈ܶܐ ܐܳܦܠܳܐ ܓܶܢܣܳܐ܇ ܘܠܳܐ ܐܰܚ̈ܶܐ ܐܳܦ ܠܳܐ ܐܰܚ̈ܘܳܬܳܐ܇ ܠܳܐ ܩܰܪܺܝܒܺܝܢ ܐܰܝܟ ܐܰܠܳܗܳܐ܇ ܕܰܒܛܺܝܠ ܠܶܗ ܘܝܳܨܶܦ ܕܒܶܪ̈ܝܳܬܶܗ܀

ܘܟܰܕ ܐܶܫܬܰܐܰܠ ܢܚܰܘܶܐ ܐܰܝܢܳܐ܇ ܦܽܘܩܕܳܢܳܐ ܪܰܒ ܗܽܘ ܒܢܳܡܽܘܣܳܐ܇ ܐܶܡܰܪ ܕܰܪܚܰܡ ܠܡܳܪܝܳܐ ܡܳܪܳܟ܇ ܘܰܠܩܰܪܺܝܒܳܟ ܐܰܝܟ ܕܰܠܢܰܦܫܳܟ܀

ܗܽܘ ܕܳܠ ܘܰܢܚܶܬ ܡܶܢ ܡܶܕܝܳܪ̈ܰܘܗ̱ܝ܇ ܘܰܗܘܳܐ ܐ̱ܢܳܫܳܐ ܡܶܛܽܠܳܬܰܢ܇ ܘܚܰܠܛܰܢ ܥܰܡܶܗ ܘܥܰܒܕܰܢ ܕܺܝܠܶܗ܇ ܘܩܰܪܺܝܒ ܗܽܘ ܠܰܢ ܝܰܬܺܝܪ ܡܶܢܟܽܠ܀

ܘܗܳܐ ܣܳܛܳܢܳܐ ܘܡܰܘܬܳܐ ܦܓܰܥܘ̱ ܒܶܗ܇ ܐܰܝܟ ܓܰܝܳܣ̈ܶܐ ܘܰܛܒܰܚܘ̱ ܣܰܚܦܽܘܗ̱ܝ܇ ܘܰܗܘܳܐ ܡܡܰܚܝܳܐ ܩܛܺܝܠܳܐ ܪܰܡܝܳܐ܇ ܕܩܰܝܳܡܳܐ ܒܶܗ ܢܰܦܫܳܐ ܩܰܠܺܝܠ܀

ܥܒܰܪܘ̱ ܙܰܕܺܝ̈ܩܶܐ ܢܒܺܝ̈ܶܐ ܘܟܽܘܡܪ̈ܶܐ܇ ܘܠܳܐ ܐܰܩܺܝܡܽܘܗ̱ܝ ܠܳܐܕܳܡ ܪܰܡܝܳܐ܇ ܘܶܐܬܳܐ ܡܫܺܝܚܳܐ ܒܳܬܰܪ ܗܳܠܶܝܢ܇ ܟܰܕ ܡܶܨܛܰܥܰܪ ܐܳܦ ܡܶܬܒܰܙܰܚ܀

ܕܰܟܺܝ ܠܓܰܪ̈ܒܶܐ ܦܬܰܚ ܠܰܣܡ̈ܰܝܳܐ܇ ܐܰܫܡܰܥ ܕܽܘ̈ܓܶܐ ܦܫܰܛ ܠܰܟܦܺܝ̈ܦܶܐ܇ ܠܡܽܘܢ ܠܳܐ ܪܰܚܡܶܗ ܥܰܡܳܐ ܠܺܝܛܳܐ܇ ܘܳܐܦܶܢ ܕܢܶܗܘܶܐ ܫܳܡܪܳܝܳܐ ܗܘܳܐ܀

ܛܰܥܢܶܗ ܠܪܰܡܝܳܐ ܘܰܐܥܶܠ ܣܳܡܶܗ܇ ܒܥܺܕܰܬ ܩܽܘܕܫܳܐ ܒܰܝܬܳܐ ܕܓܰܘܳܐ܇ ܕܒܳܗܿ ܡܶܬܥܰܨܒܺܝܢ ܟܽܠ ܕܶܐܬܡܰܚܺܝܽܘ܇ ܘܡܶܬܰܐܣܺܝܢ ܐܰܝܠܶܝܢ ܕܰܟܪ̈ܺܝܗܺܝܢ܀

ܘܗܳܝ ܕܶܐܡܰܪ ܠܶܗ ܕܶܐܢ ܬܽܘܒ ܬܰܦܶܩ܇ ܡܳܐ ܕܡܰܗܦܶܟ ܐ̱ܢܳܐ ܝܳܗܶܒ ܐ̱ܢܳܐ ܠܳܟ܇ ܡܳܕܶܝܢ ܚܰܝܳܒ ܟܳܗܢܳܐ ܕܢܺܐܨܰܦ܇ ܘܢܶܒܥܶܐ ܒܚܰܫܳܐ ܚܠܳܦ ܚܰܛܳܝ̈ܶܐ܀

ܨܠܽܘܬܳܐ ܗܳܝ ܕܺܝܠܶܗ ܐܳܦ ܒܳܥܽܘܬܳܐ ܦܰܓܪܳܐ ܘܰܕܡܳܐ ܠܰܘ ܕܺܝܠܶܗ ܗܽܘ܇ ܐܰܓܪܳܐ ܢܣܰܒ ܡܶܢ ܐܰܠܳܗܳܐ܇ ܡܳܐ ܕܰܡܨܰܠܶܐ ܚܠܳܦ ܚܰܛܳܝ̈ܶܐ܀

 

ܘܰܡܚܰܦܶܛ ܠܶܗ ܕܢܶܪܗܰܛ ܟܽܠܝܽܘܡ܇ ܠܘܳܬ ܛܳܒ̈ܳܬܳܐ ܘܰܡܝܰܬܪ̈ܳܬܳܐ܇ ܘܢܶܗܘܶܐ ܥܒܺܝܕ ܗܘܳܐ ܐܰܝܟ ܡܰܚܙܺܝܬܳܐ܇ ܕܡܰܠܝܳܐ ܫܽܘܦܪ̈ܶܐ ܕܙܰܕܺܝܩܽܘܬܳܐ܀

ܘܶܐܢܗܽܘ ܕܗܳܠܶܝܢ ܢܶܣܥܽܘܪ ܟܳܗܢܳܐ܇ ܨܶܝܕ ܚܰܛܳܝܳܐ ܘܢܺܐܬܶܐ ܠܛܳܒܬܳܐ܇ ܦܳܪܰܥ ܗܽܘ ܠܶܗ ܡܫܺܝܚܳܐ ܡܳܪܶܗ܇ ܡܰܠܟܽܘܬ ܪܰܘܡܳܐ ܥܰܡ ܩܰܕܺܝ̈ܫܶܐ܀

ܡܳܪܰܢ ܕܶܐܬܟܰܢܺܝ ܫܳܡܪܳܝܳܐ܇ ܚܳܢܶܗ ܠܳܐܕܳܡ ܘܶܐܬܪܰܚܰܡ ܥܠܰܘܗ̱ܝ܇ ܚܽܘܢ ܘܶܐܬܪܰܚܰܡ ܥܰܠ ܢܰܦܫ̈ܳܬܰܢ܇ ܘܚܰܣܳܐ ܚܰܘܒ̈ܰܝܢ ܘܰܕܟܳܬܽܘܒܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܢܣܰܒܘ̱ ܗ̱ܘܰܘ ܡܶܢܶܗ ܕܽܘܓ̈ܶܐ ܫܶܡܥܳܐ ܘܚܰܪ̈ܫܶܐ ܡܶܠܬܳܐ܇ ܣܡ̈ܰܝܳܐ ܢܽܘܗܪܳܐ ܚܓܺܝܪ̈ܶܐ ܗܶܠܟܳܐ ܚܓܺܝܣ̈ܶܐ ܪܶܗܛܳܐ܇ ܟܪ̈ܺܝܗܶܐ ܚܰܝܠܳܐ ܐܰܠܺܝ̈ܨܶܐ ܢܦܺܐܫܳܐ ܡܺܝ̈ܬܶܐ ܩܝܳܡܬܳܐ ܕܰܒܟܽܠ ܓܰܒܺܝ̈ܢ ܥܰܬܺܝܪܳܐ ܗܘܳܐ ܠܟܽܠ ܕܰܣܢܺܝܩܺܝܢ܀

ܡܰܠܶܠܘ̱ ܚܰܪ̈ܫܶܐ ܘܰܚܙܰܘ ܣܡ̈ܰܝܳܐ ܘܰܫܡܰܥܘ̱ ܕܽܘܓ̈ܶܐ܇ ܕܟܽܠ ܚܽܘܠܡ̈ܳܢܺܝܢ ܐܶܫܟܰܚܘ̱ ܒܰܒܪܳܐ ܟܽܠ ܕܩܰܪܶܒܘ̱ ܠܶܗ܇ ܐܶܢ ܚܽܘܠܡܳܢܳܐ ܒܳܥܶܐ ܗܘܳܐ ܐ̱ܢܳܫ ܡܶܫܟܰܚ ܗܘܳܐ ܒܶܗ܇ ܘܰܠܫܽܘܒܩܳܢܳܐ ܐܶܢ ܪܳܐܶܓ ܗܘܳܐ ܝܳܗܶܒ ܗܘܳܐ ܠܶܗ܀

 

ܩܰܘܡܳܐ ܕܒ ܒܩܳܠܳܐ ܒܰܥܪܽܘܒܬܐ ܒܪܺܝܫܺܝܬ

ܠܕܽܘܓ̈ܶܐ ܐܰܫܡܰܥ ܗܘܳܐ܇ ܫܶܡܥܳܐ ܫܰܦܺܝܪܳܐ ܕܠܳܐ ܡܬܽܘܡ ܫܡܺܝܥ ܗܘܳܐ ܠܗܽܘܢ܇ ܘܰܠܚܰܪ̈ܫܶܐ ܡܡܰܠܠܳܐ ܬܪܺܝܨܳܐ ܕܠܳܐ ܡܽܘܡܳܐ ܘܗܶܠܟܳܐ ܠܰܚܓܺܝܪ̈ܶܐ܇ ܗ ܘ ܗ ܫܽܘܒܚܳܐ ܠܰܚܢܳܢܶܗ܀

ܫܽܘܒܚܳܐ ܘܬܰܘܕܺܝܬܳܐ܇ ܢܩܰܪܶܒ ܠܰܡܫܺܝܚܳܐ ܒܠܺܠܝܳܐ ܘܒܺܐܝܡܳܡܳܐ܇ ܕܶܐܬܳܐ ܒܰܚܢܳܢܶܗ܇ ܘܣܰܥܪܶܗ ܒܛܰܝܒܽܘܬܶܗ ܠܓܶܢܣܳܐ ܕܒܶܝܬ ܐܳܕܳܡ ܗ ܘ ܗ ܘܦܰܪܩܶܗ ܡܶܢ ܛܽܘܥܝܰܝ܀

 

ܐ̱ܚܪܺܢܳܐ ܒܩܳܠܳܐ ܣܳܗ̈ܕܶܐ ܐܰܦܺܝܣܽܘܢܳܗ̱ܝ

ܠܓܰܪ̈ܒܶܐ ܒܡܶܠܬܶܗ ܡܕܰܟܶܐ ܗܘܳܐ ܗܰܘ ܝܰܡܳܐ ܡܠܶܐ ܥܽܘܕܪ̈ܳܢܶܐ܇ ܘܰܣܡܰܝ̈ܳܐ ܕܰܒܥܰܘ ܡܶܢܶܗ܇ ܝܰܗܒ ܠܗܽܘܢ ܢܽܘܗܪܳܐ܇ ܘܰܠܝܰܡܳܐ ܥܰܡ ܬܰܠܡܰܝ̈ܕܰܘܗ̱ܝ܇ ܘܫܰܝܶܢ ܓܰܠ̈ܠܶܐ ܘܡܰܚܫܽܘ̈ܠܶܐ ܘܰܠܗܳܝ ܕܰܕܡܳܗܿ ܪܳܕܶܐ ܗܘܳܐ ܝܰܗܒ ܠܳܗܿ ܚܽܘܠܡܳܢܳܐ܀

ܫܽܘܒܚܳܐ ܠܪܳܡܳܐ ܕܶܐܬܬܰܚܬܺܝ܇ ܡܶܢ ܡܶܕܝܳܪ̈ܰܘܗ̱ܝ ܥܶܠܳܝ̈ܶܐ܇ ܘܰܟܕܰܢ ܢܰܦܫܶܗ ܒܡܽܘܟܳܟܳܐ܇ ܡܶܛܽܠ ܦܽܘܪܩܳܢܰܢ܇ ܘܰܐܣܺܝ ܘܰܐܚܠܶܡ ܟܺܐܒܰܝ̈ܗܽܘܢ܇ ܕܰܒܢܰܝܢ̈ܳܫܳܐ ܛܳܠܽܘܡ̈ܶܐ܇ ܘܰܚܠܳܦ ܟܽܠܗܶܝܢ ܛܳܒ̈ܳܬܶܗ ܦܪܰܥܘ̱ ܒܺܝܫ̈ܳܬܳܐ܀

 

ܡܰܕܪܳܫܳܐ ܒܩܳܠܳܐ ܐܳܕܳܡ ܚܛܳܐ ܘܰܩܢܳܐ܇ ܥܶܢܝܳܢܳܐ ܒܪܺܝܟ ܐܳܣܝܳܐ ܕܶܐܬܳܐ ܠܦܽܘܪܩܳܢܰܢ܇ ܘܰܐܣܺܝ ܠܰܢ ܟܺܐܒܰܝ̈ܢ ܘܟܽܘܪ̈ܗܳܢܰܝܢ

ܠܰܣܡܰܝ̈ܳܐ ܢܽܘܗܪܳܐ ܫܰܟܶܢ ܗܘܳܐ܇ ܘܰܠܕܽܘܓ̈ܶܐ ܫܶܡܥܳܐ ܫܰܦܺܝܪܳܐ܇ ܠܰܡܫܰܪܝܳܐ ܩܳܠܶܗ ܣܰܡܟܶܗ ܗܘܳܐ܇ ܘܩܳܡ ܗܘܳܐ ܘܶܐܬܚܰܝܰܠ܇ ܛܥܶܢ ܥܰܪܣܶܗ܇ ܫܽܘܒܚܳܐ ܠܗܰܘ ܕܰܐܣܺܝ ܚܒܳܪ̈ܳܬܰܢ܀

ܢܶܦܩܰܬ݀ ܐܰܪܡܶܠܬܳܐ ܕܰܬܥܰܦܶܐ܇ ܠܺܝܚܺܝܕܳܗܿ ܒܩ̈ܳܠܶܐ ܡܠܶܝܢ ܚܰܫܶܐ܇ ܦܓܰܥ ܗܘܳܐ ܒܳܗܿ ܡܳܪܰܢ ܣܰܡ ܚܰܝ̈ܶܐ܇ ܘܗܶܦܟܰܬ݀ ܠܓܰܘ ܒܰܝܬܳܗܿ ܒܚܰܕܽܘܬܳܐ܇ ܘܢܰܚܶܡ ܠܺܝܚܺܝܕܳܗܿ ܒܰܚܢܳܢܶܗ܀

ܫܽܘܒܚܳܐ ܠܗܰܘ ܝܰܡܳܐ ܕܥܽܘܕܪ̈ܳܢܶܐ܇ ܕܰܠܓܶܢܣܳܐ ܕܐ̱ܢܳܫ̈ܳܐ ܥܨܰܒ ܘܰܐܣܺܝ܇ ܗܳܐ ܟܪ̈ܺܝܗܶܐ ܛܥܺܝܢܺܝܢ ܚܽܘܠ̈ܡܳܢܶܐ܇ ܘܰܟܦܺܝ̈ܦܶܐ ܫܩܺܝܠܺܝܢ ܥܽܘܕܪ̈ܳܢܶܐ܇ ܘܚܰܛܳܝ̈ܶܐ ܫܽܘܒܩܳܢ ܚܰܘܒ̈ܰܝܗܽܘܢ܀

ܫܽܘܒܚܳܐ ܠܗܰܘ ܕܰܥܨܰܒ ܡܰܚܘ̈ܳܬܶܗ܇ ܕܳܐܕܳܡ ܕܶܐܬܡܰܚܺܝ ܒܰܚܛܳܗ̈ܶܐ܇ ܘܠܳܐ ܫܰܒܩܶܗ ܒܺܐܝܕ̈ܰܝ ܓܰܝܳܣ̈ܶܐ܇ ܕܰܐܝܟ ܕܺܐܒ̈ܶܐ ܦܰܩܪ̈ܶܐ ܢܒܰܣܶܒܣܽܘܢܳܝܗ̱ܝ܇ ܘܰܒܡܶܫܚܳܐ ܘܚܰܡܪܳܐ ܐܶܬܰܐܣܺܝ܀

 

ܚܽܘܬܰܘ̱ ܐܰܚ̈ܰܝ ܪ̈ܫܺܝܡܶܐ ܥܶܢܝܳܢܳܐ ܒܪܺܝܟ ܕܶܐܬܳܐ ܒܚܽܘܒܶܗ܇ ܕܰܐܣܺܝ ܚܒܳܪ̈ܳܬܰܢ

ܩܳܠܶܗ ܒܶܝܬ ܙܰܟܰܝ܇ ܕܚܰܝ̈ܶܐ ܡܦܰܠܶܓ ܗܘܳܐ܇ ܛܶܐܒܶܗ ܒܶܝܬ ܫܶܡܥܽܘܢ܇ ܕܚܰܘܒ̈ܶܐ ܫܳܒܶܩ ܗܘܳܐ܇ ܫܽܘܒܚܳܐ ܠܛܰܝܒܽܘܬܶܗ܀

ܨܒܰܘ ܘܶܐܬܰܘ ܥܰܡܡ̈ܶܐ܇ ܛܥܺܝ̈ܢܰܝ ܟܽܘܪ̈ܗܳܢܶܐ܇ ܢܣܰܒܘ̱ ܗ̱ܘܰܘ ܚܽܘܠܡܳܢ̈ܶܐ܇ ܘܶܐܙܰܠܘ̱ ܟܰܕ ܚܳܕܶܝܢ ܘܬܶܫܒܽܘܚܬܳܐ ܙܳܡܪܺܝܢ܀

ܬܶܩܥܶܐ ܠܶܗ ܒܪܺܝܬܳܐ܇ ܫܽܘܒܚܳܐ ܒܳܟܶܢܳܪ̈ܶܐ܇ ܕܰܒܡܶܐܬܝܶܗ ܦܰܪܩܰܢ܇ ܘܰܒܡܰܘܬܶܗ ܐܰܚܝܰܢ܇ ܫܽܘܒܚܳܐ ܠܫܳܠܽܘܚܶܗ܀

ܐܳܘ ܕܰܐܣܺܝ ܠܳܐܕܳܡ܇ ܘܰܥܨܰܒ ܡܰܚܘ̈ܳܬܶܗ܇ ܐܰܣܳܐ ܠܰܢ ܟܺܐܒ̈ܰܝܢ܇ ܘܰܥܨܽܘܒ ܟܽܘܪ̈ܗܳܢܰܝܢ ܘܰܐܫܺܝܓ ܟܽܘ̈ܬܡܳܬܰܢ܀

ܪܒܳܒܬܶܗ ܒܶܝܬ ܡܺܝ̈ܬܶܐ܇ ܛܶܐܒܶܗ ܒܶܝܬ ܚܰܝ̈ܶܐ܇ ܚܰܝܠܶܗ ܣܥܰܪ ܟܪ̈ܺܝܗܶܐ܇ ܫܽܘܒܚܶܗ ܒܶܝܬ ܬܶܐܓ̈ܡܶܐ܇ ܒܪܺܝܟ ܗܽܘ ܒܟܽܠ ܣܰܘ̈ܦܺܝܢ܀

 

ܗܳܐ ܩܛܺܝܠ ܗܽܘ ܒܡܶܨܪܶܝܢ ܥܶܢܝܳܢܳܐ ܫܽܘܒܚܳܐ ܠܶܗ ܠܰܐܒܳܐ܇ ܕܫܰܕܰܪ ܠܰܒܪܶܗ ܘܰܐܣܺܝ ܗܘܳܐ ܘܰܐܚܠܶܡ ܠܰܡܡ̈ܰܚܰܝܳܐ

ܡܶܢ ܡܰܝ̈ܳܐ ܚܰܡܪܳܐ܇ ܥܒܰܕ ܒܰܚܠܽܘܠܳܐ܇ ܕܢܶܬܟܰܐܰܪ ܥܰܡܳܐ ܕܝܰܗܒ ܠܶܗ ܚܰܠܳܐ܇ ܡܶܢ ܠܰܚܡܳܐ ܙܥܽܘܪܳܐ܇ ܣܰܒܰܥ ܐܰܠܦ̈ܶܐ܇ ܕܢܶܬܚܰܝܰܒ ܕܳܪܳܐ ܕܝܰܗܒܠܶܗ ܡܪܳܪ̈ܶܐ܀

ܐܶܢ ܠܰܚܡܳܐ ܕܰܐܣܓܺܝ܇ ܣܓܺܝ ܓܐܶܐ ܗܘܳܐ܇ ܦܰܓܪܶܗ ܩܰܕܺܝܫܳܐ ܟܡܳܐ ܚܠܶܐ ܛܰܥܰܡܶܗ܇ ܚܰܡܪܳܐ ܕܫܰܚܠܶܦ ܗܘܳܐ ܗܳܟܰܢ ܒܰܣܺܝܡ܇ ܟܳܣܳܐ ܟܰܝ ܕܰܕܡܶܗ ܟܡܳܐ ܗܰܢܺܝܰܐܐܗ̱ܘ܀

ܥܺܕܬܳܐ ܕܩܰܒܶܠܬܳܗܿ ܠܦܰܓܪܳܟ ܘܰܕܡܳܟ܇ ܬܶܙܡܰܪܝ̱ ܬܶܫܒܽܘܚܬܳܐ܇ ܥܰܠ ܡܰܘܗܰܒܬܳܟ܇ ܨܠܺܝܒܳܟ ܩܰܕܺܝܫܳܐ ܢܶܗܘܶܐ ܫܽܘܪܳܐ܇ ܡܶܢ ܒܺܝܫܳܐ ܘܚܰܝܠܶܗ ܒܟܽܠܥܶܕܳܢܺܝ̈ܢ܀

ܟܽܠ ܕܶܐܟܰܠ ܦܰܓܪܳܟ ܘܶܐܫܬܺܝ ܠܰܕܡܳܟ܇ ܢܩܽܘܡ ܡܶܢ ܝܰܡܺܝܢܳܟ ܒܝܽܘܡ ܢܽܘܚܳܡܳܐ܇ ܘܢܶܬܒܰܣܰܡ ܒܰܥܕܶܝܢ ܥܰܡ ܪ̈ܽܘܚܳܢܶܐ܇ ܘܢܰܣܶܩ ܬܶܫܒܽܘܚܬܳܐ ܥܰܡ ܟܶܢܫ̈ܰܝܗܽܘܢ܀

ܐܰܣܺܝܬ ܠܰܟܪ̈ܺܝܗܶܐ܇ ܘܣܳܢܶܝܢ ܗ̱ܘܰܘ ܠܳܟ܇ ܘܰܦܬܰܚܬ ܠܰܣܡ̈ܰܝܳܐ܇ ܘܣܳܩܪܺܝܢ ܗ̱ܘܰܘ ܠܳܟ܇ ܐܰܣܳܐ ܠܰܢ ܟܺܐܒܰܝ̈ܢ ܕܡܰܘܕܶܝܢܰܢ ܠܳܟ܇ ܘܰܥܨܽܘܒ ܢܰܦܫ̈ܳܬܰܢ ܕܡܶܬܓܘ̈ܣܳܢ ܒܳܟ܀

ܘܳܝ ܠܺܝ ܒܥܶܕܳܢܳܐ܇ ܕܒܶܗ ܫܳܡܰܥ ܐ̱ܢܳܐ܇ ܩܳܠܳܗܿ ܕܟܺܐܢܽܘܬܳܐ ܕܢܳܗܡܳܐ ܒܰܐܦ̈ܰܝ܇ ܘܓܳܙܡܳܐ ܥܠܰܝ ܕܺܝܢܳܐ ܕܦܳܣܺܝܩ̈ܳܬܳܐ܇ ܐܰܠܳܗܝ̱ ܥܰܕܰܪܰܝܢܝ̱ ܡܳܪܝ̱ ܚܰܝܶܠܰܝܢܝ̱܀

 

ܗܰܒܠܰܢ ܡܳܪܰܢ ܕܰܒܢܽܘܚܳܡܳܐ ܥܶܢܝܳܢܳܐ ܒܪܺܝܟ ܕܶܐܬܳܐ ܠܰܢ ܡܶܢ ܨܶܝܕ ܐܰܒܽܘܗ̱ܝ܇ ܘܰܐܣܺܝ ܟܺܐܒ̈ܶܐ ܕܓܶܢܣܶܗ ܕܳܐܕܳܡ

ܐܰܟܡܳܐ ܕܚܰܢܬܳܝܗ̱ܝ ܠܳܐܕܳܡ ܪܰܡܝܳܐ܇ ܕܰܐܬܡܰܚܺܝ ܗܘܳܐ ܡܶܢ ܠܶܣܛܳܝ̈ܶܐ܇ ܚܽܘܢ ܠܰܢ ܒܪ̈ܰܚܡܰܝܟ ܒܰܪ ܐܰܠܳܗܳܐ܇ ܘܰܛܪܽܘܕ ܠܫܺܐܕ̈ܶܐ ܕܰܨܗܶܝܢ ܠܰܕܡܰܢ܀

ܕܠܳܐ ܚܰܘܣܳܢܳܐ ܛܰܒܚܽܘܗ̱ܝ ܠܳܐܕܳܡ܇ ܘܰܕܠܳܐ ܪ̈ܰܚܡܶܐ ܗܳܐ ܡܒܰܣܒܣܺܝܢ ܠܰܢ܇ ܥܨܽܘܒ ܨܽܘܠܦ̈ܳܬܰܢ ܐܳܦ ܡܰܚܘ̈ܳܬܰܢ܇ ܘܰܐܣܳܐ ܟܺܐܒ̈ܶܐ ܕܰܒܢܰܦܫ̈ܳܬܰܢ܀

ܕܳܠ ܡܶܢ ܐܰܬܪܶܗ ܦܳܪܩܳܐ ܪܰܒܳܐ܇ ܘܰܚܙܳܐ ܠܰܫܒܺܝܬܳܐ ܗܳܝ ܕܰܕܒܺܝܪܳܐ܇ ܢܚܶܬ ܗܘܳܐ ܒܚܽܘܒܶܗ ܘܰܐܥܕܺܝ ܨܰܠܡܶܗ܇ ܡܶܢ ܫܰܒܳܝܳܐ ܓܳܪܣܳܐ ܠܺܝܛܳܐ܀

ܟܽܠܗܶܝܢ ܗܳܠܶܝܢ ܕܰܣܥܰܪ ܡܳܪܰܢ܇ ܥܰܠ ܕܰܒܠܺܝ ܨܰܠܡܶܗ ܘܰܐܫܚܶܬ ܒܰܫܝܽܘܠ܇ ܘܰܢܚܶܬ ܡܳܪܶܗ ܘܚܰܕܶܬ ܫܽܘܦܪܶܗ܇ ܒܟܽܠ ܕܶܡܘ̈ܳܬܶܗ ܫܰܦܺܝܪ̈ܳܬܳܐ܀

ܠܳܐ ܝܰܕܥܶܗ ܗܘܳܐ ܠܳܐܟܶܠܩܰܪܨܳܐ܇ ܐܶܠܳܐ ܡܶܢ ܪܶܡܙܳܐ ܕܰܬܡܺܝ̈ܗܳܬܶܗ܇ ܝܳܕܰܥ ܐ̱ܢܳܐ ܠܳܟ ܐܳܡܰܪ ܗܘܳܐ ܠܶܗ܇ ܐܰܢ̱ܬ ܗܽܘ ܒܪܶܗ ܕܰܐܒܳܐ ܗܰܘ ܫܡܰܝܳܢܳܐ܀

ܟܰܣܺܝ ܡܳܪܰܢ ܐܰܠܳܗܽܘܬܶܗ܇ ܒܝܰܕ ܦܰܓܪܳܐ ܕܰܢܣܰܒ ܡܶܢ ܐ̱ܢܳܫܽܘܬܰܢ܇ ܒܶܗ ܛܥܶܡ ܡܰܘܬܳܐ ܘܚܰܫ̈ܶܐ ܘܨܰܥܪ̈ܶܐ܇ ܘܒܶܗ ܩܳܡ ܘܰܐܩܺܝܡ ܠܰܢ ܡܶܢ ܡܰܦܽܘܠܬܳܐ܀

ܒܰܝܢܳܬ ܟܰܪ̈ܟܶܐ ܘܰܡܕܺܝܢ̈ܳܬܳܐ ܟܽܠܝܽܘܡ ܪܳܕܶܐ ܗܘܳܐ ܢܶܒܥܳܐ ܕܚܰܝ̈ܶܐ܇ ܘܶܐܫܬܺܝܽܘ ܡܶܢܶܗ ܟܽܠ ܕܰܨܗܶܝܢ ܗ̱ܘܰܘ܇ ܘܦܰܝܶܓܘ̱ ܨܶܗܝܽܘܬܗܽܘܢ ܕܰܡܛܰܪܦܺܝܢ ܗ̱ܘܰܘ܀

ܟܪ̈ܺܝܗܶܐ ܟܽܠܗܽܘܢ ܩܢܰܘ ܐܳܣܝܽܘܬܳܐ܇ ܡܰܪ̈ܥܶܐ ܘܟܺܐܒ̈ܬܳܢܶܐ ܫܩܰܠܘ̱ ܚܽܘܠܡܳܢܳܐ܇ ܓܰܙܳܐ ܪܰܒܳܐ ܦܰܠܶܓ ܒܰܐܪܥܳܐ܇ ܘܰܥܬܰܪܘ̱ ܡܶܣܟ̈ܺܢܶܐ ܡܶܢ ܣܺܝܡ̈ܳܬܶܗ܀

ܐܰܝܢܳܐ ܕܰܓܠܺܝܙ ܗܘܳܐ ܬܽܘܒ ܡܶܢ ܢܽܘܗܪܳܐ܇ ܘܰܐܝܢܳܐ ܕܰܚܪܶܫ ܫܶܡܥܳܐ ܫܰܦܝܳܐ܇ ܘܕܽܘܓ̈ܶܐ ܐܳܦ ܦܺܐܩ̈ܶܐ ܡܰܠܶܠܘ̱ ܘܰܫܡܰܥܘ̱܇ ܩܢܰܘ ܡܶܢܶܗ ܚܰܝ̈ܶܐ ܘܰܚܙܰܘ ܢܽܘܗܪܳܐ܀

ܟܽܠ ܟܽܘܪ̈ܗܳܢܺܝܢ ܗܽܘ ܡܰܚܠܶܡ ܗܘܳܐ܇ ܘܟܽܠܗܽܘܢ ܠܶܘܳܝ̈ܶܐ ܚܳܣܡܺܝܢ ܗ̱ܘܰܘ ܒܶܗ܇ ܦܪ̈ܺܝܫܶܐ ܘܣܳܦܪ̈ܶܐ ܘܙܳܕܽܘܩ̈ܳܝܶܐ܇ ܩܪܶܒܘ̱ ܡܶܢܰܣܶܝܢ ܠܶܗ ܘܰܙܓܰܪܘ̱ ܐܶܢܽܘܢ܀

ܡܰܢܽܘ ܝܰܗܒ ܠܳܟ ܐܶܡܰܪ ܠܰܢ ܗܳܫܳܐ܇ ܘܒܰܐܝܢܳܐ ܫܽܘܠܛܳܢܳܐ ܗܳܐ ܥܳܒܶܕ ܐܰܢ̱ܬ܇ ܥܰܠ ܛܳܒ̈ܳܬܶܗ ܪܳܫܶܝܢ ܗ̱ܘܰܘ ܠܶܗ܇ ܟܰܕ ܟܽܠܗܽܘܢ ܡܠܶܝܢ ܗ̱ܘܰܘ ܟܽܠ ܒܺܝܫ̈ܳܬܳܐ܀

ܟܺܐܒ̈ܶܐ ܥܰܣܩ̈ܶܐ ܗܽܘ ܡܰܐܣܶܐ ܗܘܳܐ܇ ܘܕܰܝ̈ܘܶܐ ܘܟܽܘܪ̈ܗܳܢܶܐ ܗܽܘ ܛܳܪܶܕ ܗܘܳܐ܇ ܘܟܳܗ̈ܢܶܐ ܥܘܺܝܪ̈ܶܐ ܒܠܰܥܘ̱ ܒܰܚܣܳܡܳܐ ܘܰܒܪܺܝܫܳܐ ܕܕܰܝܘ̈ܶܐ ܡܟܰܢܺܝܢ ܗ̱ܘܰܘ ܠܶܗ܀

 

ܐܰܒܳܐ ܟܬܰܒ ܗܘܳܐ ܥܶܢܝܳܢܳܐ ܒܪܺܝܟ ܗܽܘ ܕܶܐܬܳܐ ܠܦܽܘܪܩܳܢܰܢ܇ ܘܰܐܣܺܝ ܟܺܐܒܰܝ̈ܢ ܘܟܽܘܪ̈ܗܳܢܰܝܢ

ܢܚܶܬ ܡܶܢ ܪܰܘܡܳܐ ܦܳܪܽܘܩܳܐ܇ ܕܰܚܙܳܐ ܠܰܫܒܺܝܬܶܗ ܕܥܳܠܡܳܐ܇ ܘܰܒܦܰܓܪܳܐ ܥܒܺܝܕܳܐ܇ ܕܰܠܒܶܫ ܡܶܢ ܓܶܢܣܰܢ܇ ܒܶܗ ܣܒܰܠ ܚܰܫ̈ܶܐ ܘܡܰܚܘ̈ܳܬܳܐ܇ ܘܒܰܟܝܳܢܶܗ ܡܥܰܠܰܝ ܡܶܢ ܚܰܫ̈ܶܐ܀

ܠܒܶܫ ܦܰܓܪܳܐ ܕܒܶܗ ܢܰܛܥܶܗ ܗܘܳܐ܇ ܠܗܰܘ ܕܰܐܛܥܺܝ ܒܳܐܕܳܡ ܘܰܒܚܰܘܳܐ܇ ܟܦܶܢ ܘܰܨܗܺܝ ܒܽܐܘܪܚܳܐ ܠܐܺܝ ܡܶܢ ܛܽܘܪܳܦܳܐ܇ ܘܰܣܒܰܪ ܒܺܝܫܳܐ ܕܒܰܪܢܳܫܰܐܗ̱ܘ܇ ܘܠܳܐ ܝܳܕܰܥ ܕܗܽܘܝܳܘ ܥܳܩܰܪ ܠܶܗ܀

ܠܶܓܝܽܘܢ ܫܡܰܢ ܐܳܡܪܺܝܢ ܗ̱ܘܰܘ ܠܶܗ܇ ܕܣܰܓܺܝ̈ܐܶܐ ܐܺܝܬܰܝܢ ܒܡܶܢܝܳܢܳܐ܇ ܕܰܐܪܓܶܫܘ̱ ܒܶܗ ܕܰܡܨܶܐ܇ ܕܰܠܗܽܘܢ ܢܶܪܕܽܘܦ ܗܘܳܐ܇ ܒܥܰܘ ܡܶܢܶܗ ܕܰܩܕܳܡ ܙܰܒܢܳܐ܇ ܘܡܽܘܠܳܝܳܐ ܠܳܐ ܢܫܰܢܶܩ ܐܶܢܽܘܢ܀

ܒܳܚܰܪ ܠܶܒܳܐ ܘܟܽܘ̈ܠܝܳܬܳܐ܇ ܝܰܕܥܶܗ ܗܘܳܐ ܠܡܰܚܫܰܒܬܗܽܘܢ ܢܟܺܝܠܬܳܐ܇ ܘܠܳܐ ܗܘܳܐ ܒܨܶܒܝܳܢܗܽܘܢ܇ ܐܶܬܬܦܺܝܣ ܕܰܢܫܰܡܠܶܐ܇ ܒܰܚܙܺܝܪ̈ܶܐ ܒܥܰܘ ܠܗܽܘܢ ܕܢܶܥܠܽܘܢ܇ ܘܰܒܬܗܽܘܡܳܐ ܟܽܠܗܽܘܢ ܐܶܬܚܰܢܰܩܘ܀

ܒܢܰܝ̈ ܚܶܫܽܘܟܳܐ ܐܶܬܦܰܪܰܣܘ̱܇ ܕܳܐܦ ܠܢܽܘܗܪܳܐ ܒܥܰܡܛܳܢܳܐ ܢܚܰܦܽܘܢ܇ ܘܠܰܐܬܪܳܐ ܚܶܫܽܘܟܳܐ܇ ܩܪܳܐ ܘܫܰܕܰܪ ܐܶܢܽܘܢ܇ ܒܰܚܙܺܝܪ̈ܶܐ ܥܰܠܘ̱ ܓܰܠܝܳܐܺܝܬ܇ ܘܒܰܬܗܽܘܡܳܐ ܕܝܰܡܳܐ ܐܶܬܛܰܒܰܥܘ̱܀

ܗܳܐ ܣܡ̈ܰܝܳܐ ܚܳܙܶܝܢ ܢܽܘܗܪܳܐ܇ ܐܳܦ ܚܰܪ̈ܫܶܐ ܘܕܽܘ̈ܓܶܐ ܫܶܡܥܳܐ܇ ܡܶܣܟܺܢ̈ܶܐ ܣܰܒܪܳܐ܇ ܐܳܦ ܟܰܦܢ̈ܶܐ ܣܰܒܥܳܐ܇ ܠܚܰܛܳܝ̈ܶܐ ܫܽܘܒܩܳܢ ܚܰܘܒ̈ܶܐ܇ ܘܰܠܡܺܝ̈ܬܶܐ ܩܝܳܡܬܳܐ ܘܚܰܝ̈ܶܐ܀

ܐܰܣܺܝܬ ܛܰܠܝܶܗ ܕܩܶܢܛܪܽܘܢܳܐ܇ ܐܳܦ ܠܗܰܝܡܳܢܽܘܬܶܗ ܢܰܨܰܚܬ܇ ܒܰܒܢܰܝ̈ ܐܺܝܣܪܳܐܶܝܠ܇ ܠܳܐ ܐܶܫܟܰܚܬ ܐܰܝܟ ܗܳܕ܇ ܗܰܝܡܳܢܽܘܬܳܐ ܫܰܪܺܝܪܬܳܐ܇ ܘܥܰܠܗܳܕܶܐ ܝܰܗܒܬ ܠܶܗ ܫܶܐܠ̈ܳܬܶܗ܀

ܠܰܒܪܳܐ ܕܰܐܪܡܶܠܬܳܐ ܢܰܚܶܡܬ܇ ܘܠܰܛܥܺܝ̈ܢܰܝ ܥܰܪܣܳܐ ܐܰܢ̱ܬ ܟܠܰܝܬ܇ ܘܶܐܬܬܰܘܣܰܦ ܠܶܐܡܶܗ܇ ܟܺܐܒܳܐ ܥܰܠ ܟܺܐܒܳܐ܇ ܕܣܶܒܪܰܬ݀ ܕܚܰܘܒܬܳܐ ܐܺܝܬ ܠܳܟ ܥܠܰܘܗ̱ܝ܇ ܘܠܳܐ ܫܳܒܩܰܬ ܠܡܺܝܬܳܐ ܕܢܶܬܩܒܰܪ܀

 

ܣܽܘܓܺܝܬܳܐ ܥܰܡܳܐ ܘܥܰܡ̈ܡܶܐ܇ ܫܽܘܒܚܳܐ ܠܳܟ ܡܳܪܝ̱ ܕܰܒܡܶܐܬܝܳܟ܇ ܣܥܰܪܬܳܝܗ̱ܝ ܠܓܶܢܣܰܢ ܕܰܟܪܺܝܗ ܗܘܳܐ܇

ܐܳܣܝܳܐ ܕܪ̈ܰܚܡܶܐ ܨܒܳܐ ܘܶܐܬܪܟܶܢ܇ ܘܨܶܝܕ ܚܰܛܳܝ̈ܶܐ ܐܽܘܪܚܶܗ ܬܪܰܨ܇ ܕܢܰܐܚܶܐ ܐܶܢܽܘܢ ܒܝܰܕ ܪ̈ܰܚܡܰܘܗ̱ܝ܇ ܕܢܰܐܣܶܐ ܐܶܢܽܘܢ ܟܺܐܒ̈ܰܝܗܽܘܢ܀

ܒܪܳܐ ܕܠܳܐ ܡܳܐܶܬ ܐܶܬܬܰܚܬܺܝ܇ ܘܰܗܘܳܐ ܐ̱ܢܳܫܳܐ ܕܰܫܦܰܪ ܠܶܗ܇ ܘܠܰܐܪܥܳܐ ܕܠܺܝܛܳܐ ܗܘܳܬ݀ ܡܶܢ ܩܕܺܝܡ܇ ܒܝܰܕ ܕܽܘܪ̈ܟܳܬܶܗ ܢܩܰܕܶܫ ܗܘܳܐ܀

ܓܶܫܬܶܗ ܓܰܪ̈ܒܶܐ ܕܰܟܝܰܬ݀ ܗܘܳܬ݀܇ ܘܪܽܘܩܶܗ ܣܡ̈ܰܝܳܐ ܦܰܬܰܚ ܗܘܳܐ܇ ܚܰܝܠܶܗ ܕܰܝ̈ܘܶܐ ܐܰܥܪܶܩ ܗܘܳܐ܇ ܘܡܶܠܬܶܗ ܠܝܰܡܳܐ ܫܰܬܩܰܬ݀ ܗܘܳܬ݀܀

ܕܰܕܡܳܗܿ ܪܳܕܶܐ ܩܶܪܒܰܬ݀ ܠܶܗ܇ ܘܶܐܚܕܰܬ݀ ܗܘܳܬ݀ ܐܳܦ ܡܰܪܛܽܘܛܶܗ܇ ܘܰܡܥܺܝܢܳܐ ܕܰܕܡܳܗܿ ܝܶܒܫܰܬ݀܇ ܘܡܶܢ ܟܽܘܪܗܳܢܳܗܿ ܐܶܬܰܐܣܝܰܬ݀܀

ܗܰܝܡܳܢܽܘܬܳܐ ܕܒܶܗ ܐܰܚܝܰܬ݀܇ ܘܡܶܠܬܶܗ ܠܰܟܪ̈ܺܝܗܶܐ ܐܰܣܝܰܬ݀܇ ܐܶܫܳܬܳܐ ܚܙܳܬܶܗ ܘܥܶܪܩܰܬ݀܇ ܘܰܟܢܰܥܢܳܝܬܳܐ ܒܶܗ ܛܶܦܣܰܬ݀܀

ܘܰܐܝܟ ܡܳܐ ܕܰܒܥܳܝܗ̱ܝ ܟܽܠ ܕܰܚܙܳܝܗ̱ܝ܇ ܗܳܟܰܢ ܡܠܺܝ ܫܶܐܠ̈ܳܬܶܗ܇ ܘܟܽܠ ܚܰܣܺܝܪ̈ܶܐ ܕܰܩܪܶܒܘ̱ ܠܶܗ܇ ܕܪܳܐ ܠܶܗ ܥܽܘܬܪܶܗ ܘܓܰܙܶܗ ܦܬܺܝܚ܀

ܙܰܡܶܢܽܘܗ̱ܝ ܘܶܐܬܳܐ ܠܡܶܫܬܽܘܬܳܐ܇ ܐ̱ܢܳܫ̈ܳܐ ܨܪ̈ܺܝܟܶܐ ܘܥܰܡܗܽܘܢ ܓܢܶܐ܇ ܘܚܰܡܪܳܐ ܡܶܚܕܳܐ ܚܣܰܪ ܠܗܽܘܢ܇ ܘܡܰܠܺܝ ܠܗܽܘܢ ܣܽܘܢܩܳܢܰܝ̈ܗܽܘܢ܀

ܚܳܣ ܪܰܚܡܳܢܳܐ ܥܰܠ ܨܰܠܡܶܗ܇ ܘܓܳܫܶܗ ܒܺܐܝܕܶܗ ܐܳܦ ܕܰܟܝܶܗ܇ ܘܰܒܚܰܕܘܳܐ ܩܳܡ ܘܰܣܓܶܕ ܠܶܗ܇ ܟܰܕ ܙܳܡܰܪ ܫܽܘܒܚܳܐ ܠܰܫܡܶܗ܀

ܛܺܝܢܳܐ ܒܪܽܘܩܶܗ ܓܒܠ ܒܰܐܪܥܳܐ܇ ܘܛܳܫ ܠܶܗ ܠܗܳܢܳܐ ܥܰܠ ܥܰܝܢܰܘ̈ܗ̱ܝ܇ ܘܰܠܫܺܝܠܽܘܚܳܐ ܕܐ̱ܪܳܙܳܐ ܪܫܰܡ܇ ܠܡܰܥܡܽܘܕܺܝܬܳܐ ܫܰܕܪܶܗ ܗܘܳܐ܀

ܝܳܐܶܐ ܗܘܳܐ ܠܶܗ ܠܡܰܬܩܶܢ ܟܽܠ܇ ܕܠܰܐܝܕܳܐ ܕܨܳܪ ܗܘܳܐ ܒܓܰܘ ܟܰܪܣܳܐ܇ ܕܡܶܢ ܐܶܬܚܰܒܠܰܬ݀ ܘܶܐܣܬܰܪܚܰܬ݀܇ ܦܰܫܛܳܗܿ ܘܰܒܪ̈ܰܚܡܶܐ ܬܶܩܢܰܬ݀܀

ܟܰܠܒܳܐ ܩܪܳܗܿ ܗܘܳܐ ܡܶܢ ܠܰܚܡܳܐ܇ ܕܰܒܢܰܝ̈ܳܐ ܐܳܟܠܺܝܢ ܙܰܓܪܳܗܿ܇ ܘܟܰܕ ܦܰܪ̈ܟܽܘܟܶܐ ܬܶܒܥܰܬ݀ ܗܘܳܬ݀܇ ܚܪܽܘܪܳܐ ܠܒܰܪܬܳܗܿ ܫܶܩܠܰܬ݀ ܗܘܳܬ݀܀

ܠܰܚܡܳܬܶܗ ܕܫܶܡܥܽܘܢ ܐܰܚܠܶܡ܇ ܕܡܶܢ ܐܶܫܳܬܳܐ ܡܶܫܬܰܠܗܒܳܐ܇ ܘܥܰܡܳܗܿ ܕܡܶܠܬܶܗ ܐܰܥܪܶܩ ܗܘܳܐ܇ ܠܶܐܫܳܬܳܐ ܕܒܳܗܿ ܡܶܬܢܰܘܠܳܐ܀

ܡܰܢܽܘ ܓܶܝܪ ܫܡܳܟ ܐܶܡܰܪ ܠܶܗ܇ ܘܦܰܢܺܝ ܠܶܗ ܕܠܶܓܝܽܘܢ ܡܶܬܩܪܶܐ܇ ܘܦܰܩܶܕ ܠܶܗ ܕܰܣܟܽܘܪ ܦܽܘܡܳܟ܇ ܘܡܶܢ ܓܰܒܪܳܐ ܒܰܥܓܰܠ ܦܽܘܩ ܠܳܟ܀

ܢܗܰܪ̈ܝ̱ ܥܰܝܢܰܝ̈ܗܽܘܢ ܒܝܰܕ ܡܶܠܬܶܗ܇ ܘܰܐܟܡܳܐ ܕܗܰܝܡܶܢܘ̱ ܘܢܽܘܗܪܳܐ ܢܣܰܒܘ̱܇ ܘܥܰܡ ܢܽܘܗܪܳܐ ܓܰܠܝܳܐ ܕܰܚܙܰܘ܇ ܢܽܘܗܪܳܐ ܟܰܣܝܳܐ ܡܶܢܶܗ ܫܩܰܠܘ̱܀

ܣܥܰܪ ܬܶܕܡܽܘܪܬܳܐ ܒܓܰܘ ܐܶܠܦܳܐ܇ ܟܰܕ ܐܰܥܺܝܪܽܘܗ̱ܝ ܡܶܢ ܫܶܢܬܳܐ܇ ܘܰܟܐܳܐ ܒܓܰܠ̈ܠܶܐ ܕܡܶܬܥܰܪܡܺܝܢ܇ ܘܰܠܡܰܚܫܽܘ̈ܠܶܐ ܫܰܬܶܩ ܗܘܳܐ܀

ܥܢܰܘ ܘܳܐܡܪܺܝܢ ܠܶܗ ܟܽܠ ܕܰܚܙܰܘ܇ ܕܝܶܫܽܘܥ ܐܳܣܝܳܐ ܥܳܒܰܪ ܠܶܗ܇ ܘܩܳܥܶܐ ܗܘܳܐ ܕܪܰܚܶܡܥܠܰܝ܇ ܘܶܐܡܰܪ ܠܶܗ ܕܰܚܙܺܝ ܢܽܘܗܪܳܐ܀

ܦܩܰܕ ܠܰܫܩܺܝ̈ܠܰܝ ܥܰܪܣܳܐ ܘܩܳܡܘ̱܇ ܘܡܶܢ ܡܶܪܕܺܝܬܳܐ ܠܥܰܪܣܳܐ ܟܠܳܐ܇ ܘܰܩܪܳܐ ܒܩܳܠܶܗ ܠܰܥܠܰܝܡܳܐ܇ ܘܝܰܗܒܶܗ ܠܶܐܡܶܗ ܐܰܪܡܶܠܬܳܐ܀

ܨܪܳܬ݀ ܘܢܶܫ̈ܶܐ ܘܨܶܝܕܰܘܗ̱ܝ ܩܶܪܒܰܬ݀܇ ܘܟܶܢܦܳܐ ܕܰܠܒܽܘܫܶܗ ܠܶܒܳܟܰܬ݀܇ ܘܕܰܡܨܶܐ ܕܢܰܐܣܶܐ ܐܶܫܬܰܘܕܥܰܬ݀܇ ܘܡܶܪܕܺܝܬܳܐ ܕܰܕܡܳܗܿ ܝܶܒܫܰܬ݀܀

ܩܪܶܒ ܐܰܦܺܝܣܶܗ ܥܰܠ ܛܰܠܝܶܗ܇ ܠܗܰܘ ܝܳܕܰܥ ܠܶܒܰܘ̈ܳܬܳܐ܇ ܘܕܰܚܙܳܐ ܗܘܳܐ ܗܰܝܡܳܢܽܘܬܶܗ܇ ܐܳܣܝܽܘܬܳܐ ܠܛܰܠܝܶܗ ܫܰܕܰܪ܀

ܪܰܫܡܶܗ ܠܰܫܡܶܗ ܒܰܣܒܰܪܬܳܐ܇ ܒܝܰܕ ܫܳܛܺܝܦܬܳܐ ܕܛܶܥܢܰܬ݀ ܗܘܳܬ݀܇ ܘܡܶܫܚܳܐ ܪܺܫܳܝܳܐ ܫܶܩܠܰܬ݀܇ ܘܰܠܪ̈ܶܓܠܶܐ ܕܰܒܪܳܐ ܡܶܫܚܰܬ݀܀

ܫܰܝܶܢ ܝܰܡܳܐ ܕܰܫܓܺܝܫ ܗܘܳܐ܇ ܘܚܽܘܪܒܳܐ ܒܟܶܢܫ̈ܶܐ ܐܰܥܬܰܪ ܗܘܳܐ܇ ܒܰܟܢܽܘܫ̈ܳܬܳܐ ܡܰܠܶܦ ܗܘܳܐ܇ ܘܚܰܝܠܶܗ ܟܽܠܝܽܘܡ ܣܳܥܰܪ ܗܘܳܐ܀

ܬܰܒܥܶܗ ܠܡܺܝܬܳܐ ܡܶܢ ܬܪܰܥ ܫܝܽܘܠ܇ ܘܰܩܪܳܝܗ̱ܝ ܒܰܫܡܶܗ ܟܰܕ ܢܰܚܡܶܗ܇ ܘܶܐܠܽܘ ܒܰܫܡܶܗ ܠܳܐ ܫܰܡܗܶܗ܇ ܟܽܠܗܽܘܢ ܡܺܝ̈ܬܶܐ ܩܳܝܡܺܝܢ ܗ̱ܘܰܘ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܳܣܝܳܐ ܐܶܬܳܐ ܗܘܳܐ ܕܢܰܚܠܶܡ܇ ܠܰܡܡܰܚܰܝ̈ܳܐ ܘܰܠܡܰܪ̈ܥܶܐ܇ ܢܶܒܥܳܐ ܕܪ̈ܰܚܡܶܐ ܪܕܳܐ ܡܶܢܶܗ܇ ܘܟܽܠ ܚܽܘܠ̈ܡܳܢܶܐ ܘܥܽܘܕܪ̈ܳܢܶܐ܇ ܒܰܪ ܥܶܠܳܝܳܐ ܫܩܰܠ ܟܺܐܒ̈ܰܝܢ܇ ܘܰܐܣܺܝ ܗܘܳܐ ܠܰܟܪܺܝܗܽܘܬܰܢ܀

ܕܢܰܚ ܐܰܝܟ ܫܶܡܫܳܐ ܡܰܢܗܰܪ ܟܽܠ܇ ܘܰܥܪܰܩ ܡܶܢܶܗ ܚܶܫܽܘܟܳܐ܇ ܦܓܰܥܘ̱ ܒܶܗ ܕܽܘܓ̈ܶܐ ܘܫܶܡܥܳܐ ܩܢܰܘ܇ ܘܚܰܪ̈ܫܶܐ ܡܰܠܶܠܘ̱ ܦܫܺܝܛܳܐܺܝܬ܇ ܚܽܘܠܡܳܢܳܐ ܝܰܗܒ ܠܰܡܫܰܪܝܳܐ܇ ܘܫܰܪܰܪ ܐܶܢܽܘܢ ܠܰܬܒܺܝܪ̈ܶܐ܀

 

ܡܰܘܪܒܳܐ ܕܠܺܠܝܳܐ܇ ܫܠܳܡ ܠܟܶܝ ܩܰܕܺܝܫܬܳܐ

ܒܪܺܝܟ ܛܳܒܳܐ ܕܰܒܚܽܘܒܶܗ܇ ܚܰܝܶܒ ܘܰܙܟܳܐ ܠܰܚܛܺܝܬܳܐ܇ ܕܠܰܐܒܽܘܢ ܐܳܕܳܡ ܩܶܛܠܰܬ݀ ܗܘܳܬ݀܇ ܒܶܝܬ ܐܽܝܠܳܢ̈ܶܐ ܕܦܰܪܕܰܝܣܳܐ ܡܶܛܽܠ ܕܰܥܒܰܪ ܦܽܘܩܕܳܢܳܐ܇ ܠܶܗ ܗܽܘ ܡܫܰܒܚܺܝܢܰܢ܇ ܘܰܒܟܽܠܥܶܕܳܢ ܠܶܗ ܗܽܘ ܣܳܓܕܺܝܢܰܢ܀

ܛܽܘܒܰܝܟܝ̱ ܡܰܪܝܰܡ ܛܽܘܒܰܝܟ ܐܳܕܳܡ ܕܶܐܬܠܰܣܛܺܝ ܡܶܢ ܠܶܣܛܳܝ̈ܶܐ܇ ܕܣܰܥܪܳܟ ܒܰܪ ܛܳܒܳܐ܇ ܒܪ̈ܰܚܡܰܘܗ̱ܝ ܣܰܓܺܝ̈ܐܶܐ܇ ܘܨܰܠܶܠ ܥܠܰܝܟ ܚܰܡܪܳܐ ܘܡܶܫܚܳܐ܇ ܘܝܰܗܒ ܠܳܟ ܦܰܓܪܶܗ܀

ܛܽܘܒܰܝܟ ܕܫܰܩܠܳܟ ܒܰܪ ܛܳܒܳܐ ܘܰܐܳܘܒܠܳܟ ܠܦܽܘܬܩܳܝܳܐ ܘܶܐܡܰܪ܇ ܝܺܨܰܦ ܕܗܳܢܳܐ ܡܶܣܟܺܢܳܐ ܣܰܡܣܶܡ ܚܒܳܪ̈ܳܬܶܗ܀

 

ܫܰܒܰܚܘ̱܇ ܣܳܓܶܕ ܠܳܟ ܡܳܪܝܳܐ

ܡܶܛܽܠ ܐܳܕܳܡ ܐܶܬܬܰܚܬܺܝ ܕܺܐܝܬܰܘܗ̱ܝ ܨܰܠܡܳܐ ܡܰܠܟܳܝܳܐ܇ ܕܰܢܩܺܝܡܺܝܘܗ̱ܝ ܡܶܢ ܡܰܦܽܘܠܬܳܐ܇ ܘܢܰܦܢܺܝܘܗ̱ܝ ܠܰܥܕܶܝܢ ܝܳܪܬܽܘܬܶܗ܀

ܐܶܬܳܐ ܟܳܗܢܳܐ ܘܠܳܐ ܥܰܕܪܶܗ܇ ܘܠܶܘܳܝܳܐ ܘܰܐܗܡܺܝ ܡܶܢܶܗ܇ ܘܐ̱ܢܳܫ ܫܳܡܪܳܝܳܐ ܡܶܢ ܪܽܘܚܩܳܐ܇ ܚܙܳܝܗ̱ܝ ܗܘܳܐ ܘܶܐܬܪܰܚܰܡ ܥܠܰܘܗ̱ܝ܀

ܘܰܠܦܽܘܬܩܳܝܳܐ ܦܰܩܶܕ ܗܘܳܐ܇ ܕܢܶܗܘܶܐ ܝܳܨܶܦ ܟܪܺܝܗܽܘܬܶܗ܇ ܘܰܬܪܶܝܢ ܕܺܝܢܳܪ̈ܶܐ ܝܰܗܒ ܠܶܗ܇ ܐܰܝܟ ܕܰܠܢܶܦܩ̈ܳܬܶܗ ܕܪܰܡܝܳܐ܀

ܐܳܕܳܡ ܐܺܝܬܰܘܗ̱ܝ ܗܘܳܐ ܗܳܢܳܐ܇ ܕܶܐܬܠܰܣܛܺܝ ܡܶܢ ܣܳܛܳܢܳܐ܇ ܐܽܘܪܺܫܠܶܡ ܕܡܽܘܬ ܦܰܪܕܰܝܣܳܐ܇ ܘܺܐܝܪܺܝܚܽܘ ܐܰܪܥܳܐ ܕܟܽܘܒ̈ܶܐ܀

ܫܳܡܪܳܝܳܐ ܕܶܐܬܪܰܚܰܡ ܥܠܰܘܗ̱ܝ܇ ܗܽܘܝܽܘ ܡܫܺܝܚܳܐ ܐܰܠܳܗܳܐ܇ ܕܚܳܢܶܗ ܠܳܐܕܳܡ ܘܰܐܩܺܝܡܶܗ܇ ܘܰܥܨܰܒ ܐܶܢܶܝܢ ܠܡܰܚܘ̈ܳܬܶܗ܀

ܘܕܺܝܢܳܪ̈ܶܐ ܬܪܶܝܢ ܐܺܝܬܰܝܗܽܘܢ܇ ܦܰܓܪܳܐ ܘܰܕܡܳܐ ܩܰܕܺܝܫܳܐ܇ ܕܰܒܗܽܘܢ ܟܳܗܢܳܐ ܢܚܰܣܶܐ ܒܗܽܘܢ܇ ܠܰܐܝܠܶܝܢ ܕܫܳܡܥܺܝܢ ܠܶܗ ܠܡܶܠܬܶܗ܀

ܒܪܺܝܟ ܕܶܐܬܟܰܢܺܝ ܫܳܡܪܳܝܳܐ܇ ܘܥܰܨܒܶܗ ܗܘܳܐ ܠܳܐܕܳܡ ܪܰܡܝܳܐ܇ ܘܦܰܪܩܶܗ ܗܘܳܐ ܡܶܢ ܠܶܣܛܳܝ̈ܶܐ ܕܰܢܦܰܠܘ̱ ܥܠܰܘܗ̱ܝ ܘܰܡܚܰܐܽܘܗ̱ܝ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܒܪܺܝܟ ܕܚܰܕܺܝ ܠܰܫܡܰܝ̈ܳܢܶܐ

ܥܰܠ ܗܳܕܶܐ ܢܰܓܕܶܗ ܚܽܘܒܶܗ܇ ܕܢܶܣܥܽܘܪ ܠܰܓܒܺܝܠܬܶܗ܇ ܘܟܽܠ ܕܦܳܓܰܥ ܒܶܗ ܐܶܬܰܐܣܺܝ܇ ܘܰܙܡܰܪ ܬܶܫܒܽܘܚܬܳܐ܀

ܛܰܒܚܽܘܗ̱ܝ ܣܰܚܦܽܘܗ̱ܝ ܒܡܰܚܘ̈ܳܬܳܐ܇ ܘܰܐܗܶܠܘ̱ ܘܰܒܙܰܚܘ̱ ܒܶܗ܇ ܘܗܳܐ ܩܛܺܝܠܳܐ ܐܳܦ ܪܰܡܝܳܐ܇ ܕܰܠܡܰܘܬܳܐ ܩܰܪܺܝܒ܀

ܚܙܰܐܽܘܗ̱ܝ ܢܒܺܝ̈ܶܐ ܘܚܰܙܳܝ̈ܶܐ܇ ܘܠܳܐ ܝܰܗܒܘ̱ ܠܶܗ ܐܺܝܕܳܐ܇ ܘܳܐܦܠܳܐ ܥܨܰܒܘ̱ ܠܶܗ ܡܰܚܘ̈ܳܬܶܗ܇ ܘܒܰܝܰܐܽܝܽܘܗ̱ܝ ܡܶܢ ܥܰܡܠܶܗ܀

ܒܚܰܡܪܳܐ ܘܡܶܫܚܳܐ ܥܰܨܒܶܗ ܗܘܳܐ܇ ܐܳܣܝܳܐ ܫܡܰܝܳܢܳܐ܇ ܘܝܰܗܒ ܗܘܳܐ ܠܶܗ ܦܰܓܪܶܗ ܘܰܕܡܶܗ܇ ܘܰܠܟܳܗܢܳܐ ܐܰܫܠܡܶܗ܀

ܥܨܽܘܒ ܡܳܪܝ̱ ܟܺܐܒ̈ܰܝܢ ܒܰܚܢܳܢܳܟ܇ ܘܰܐܚܠܶܡ ܠܰܢ ܫܽܘܚܢ̈ܰܝܢ܇ ܐܰܝܟ ܕܰܥܨܰܒܬ ܠܳܐܕܳܡ ܪܰܡܝܳܐ܇ ܕܰܛܒܚܽܘܗ̱ܝ ܠܶܣܛܳܝ̈ܶܐ܀

ܚܰܣܳܐ ܠܰܢ ܟܽܠ ܕܰܣܥܰܪܢܰܢ܇ ܩܕܳܡܰܝܟ ܚܰܢܳܢܳܐ܇ ܐܰܝܟ ܕܚܰܣܺܝܬ ܚܰܘܒ̈ܰܘܗ̱ܝ ܕܳܐܕܳܡ܇ ܘܰܐܣܺܝܬ ܡܰܚܘ̈ܳܬܶܗ܀

 

ܐܰܠܳܗܝ̱ ܐܰܠܳܗܝ̱܇ ܠܘܳܬܳܟ ܡܩܰܕܶܡ ܐ̱ܢܳܐ

ܕܟܰܕ ܕܶܝܢ ܢܳܚܶܬ ܗܘܳܐ܇ ܚܰܕ ܓܰܒܪܳܐ ܡܶܢ ܐܽܘܪܺܫܠܶܡ܇ ܠܺܐܝܪܺܝܚܺܘ ܘܡܶܚܕܳܐ܇ ܠܶܣܛܳܝ̈ܶܐ ܢܦܰܠܘ̱ ܗ̱ܘܰܘ ܥܠܰܘܗ̱ܝ܇ ܘܒܺܝܫܳܐܺܝܬ ܡܚܰܐܽܘܗ̱ܝ܇ ܘܫܰܚܩܽܘܗ̱ܝ ܘܒܰܙܽܘܗ̱ܝ܀

ܦܶܠܓܽܘ ܡܺܝܬܳܐ ܫܰܒܩܽܘܗ̱ܝ܇ ܓܰܝܳܣ̈ܶܐ ܠܗܰܘ ܕܰܡܚܰܐܽܘܗ̱ܝ܇ ܒܽܐܘܪܚܳܐ ܕܺܐܝܪܺܝܚܽܘ܇ ܥܒܰܪ ܗܘܳܐ ܟܳܗܢܳܐ ܘܠܳܐ ܥܰܕܪܶܗ ܘܠܶܘܳܝܳܐ ܠܳܐ ܐܰܢܺܝܚܶܗ܀

ܗܳܢܳܐ ܐܳܕܳܡ ܐܺܝܬܰܘܗ̱ܝ܇ ܕܶܐܬܡܰܚܺܝ ܗܘܳܐ ܘܶܐܬܠܰܣܛܺܝ܇ ܡܶܢ ܒܺܝܫܳܐ ܘܡܰܘܬܳܐ܇ ܘܫܰܠܚܽܘܗ̱ܝ ܗ̱ܘܰܘ ܘܥܰܪܛܶܠ ܫܰܒܩܽܘܗ̱ܝ܇ ܡܶܢ ܫܽܘܒܚܳܐ ܘܙܺܝܘܳܐ ܕܰܡܥܰܛܰܦ ܗܘܳܐ܀

ܠܳܐܕܳܡ ܗܰܘ ܕܶܐܬܡܰܚܺܝ܇ ܡܶܢ ܓܰܝܳܣ̈ܶܐ ܘܠܶܣܛܳܝ̈ܶܐ܇ ܚܳܢܬܳܝܗ̱ܝ ܒܰܚܢܳܢܳܟ܇ ܘܦܰܓܪܳܟ ܘܰܕܡܳܟ ܣܰܡ ܚܰܝ̈ܶܐ܇ ܥܒܰܕܬ ܐܶܢܽܘܢ ܥܨܳܒܳܐ ܠܡܰܚܘ̈ܳܬܶܗ܀

 

ܠܰܡܫܺܝܚܳܐ ܐܰܠܳܗܳܐ܇

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܰܒܚܽܘܒܶܗ ܚܳܢܶܗ ܠܗܰܘ ܕܶܐܬܡܰܚܺܝ ܘܶܐܬܛܰܒܰܚ܇ ܒܡܰܚܰܬܬܶܗ ܕܡܶܢ ܐܽܘܪܺܫܠܶܡ ܠܺܐܝܪܺܝܚܽܘ܇ ܠܶܗ ܬܰܝ̈ܳܒܶܐ ܫܰܒܰܚܘ̱܇ ܘܠܶܗ ܟܳܗ̈ܢܶܐ ܟܽܠܟܽܘܢ ܒܰܪܶܟܘ̱܇ ܥܰܡܡ̈ܶܐ ܘܶܐܡܘ̈ܳܬܳܐ ܙܡܰܪܘ̱ ܠܶܗ ܫܽܘܒܚܳܐ܀

ܠܰܡܫܺܝܚܳܐ ܐܰܠܳܗܳܐ܇ ܟܽܠܰܢ ܢܶܣܓܽܘܕ ܘܰܢܫܰܒܰܚ ܕܣܰܥܪܶܗ ܠܳܐܕܳܡ ܪܰܡܝܳܐ܇ ܗܰܘ ܕܶܐܬܒܰܣܒܶܣ ܗܘܳܐ܇ ܘܰܐܚܠܶܡ ܡܰܚܘ̈ܳܬܶܗ܇ ܠܶܗ ܡܒܰܣ̈ܒܣܶܐ ܫܰܒܰܚܘ̱܇ ܘܠܶܗ ܟܳܗ̈ܢܶܐ ܟܽܠܟܽܘܢ ܒܰܪܶܟܘ̱܇ ܥܰܡܡ̈ܶܐ ܘܶܐܡܘ̈ܳܬܳܐ ܙܡܰܪܘ̱ ܠܶܗ ܫܽܘܒܚܳܐ܀

 

ܫܡܰܝ̈ܳܐ ܡܶܫܬܰܥܶܝܢ܇ ܒܩܳܠܳܐ ܢܽܘܗܪܳܐ ܕܡܶܢ ܢܽܘܗܪܳܐ

ܥܨܰܒܬ ܡܳܪܝ̱ ܡܰܚܘ̈ܳܬܶܗ܇ ܕܳܐܕܳܡ ܪܺܝܫܳܐ ܕܰܓܒܺܝܠܬܰܢ܇ ܚܰܡܪܳܐ ܘܡܶܫܚܳܐ ܢܨܰܠܬ ܥܠܰܘܗ̱ܝ܇ ܘܰܠܒܶܝܬ ܐܰܒܽܘܟ ܐܰܥܶܠܬܳܝܗ̱ܝ܇ ܬܰܘ ܟܽܠ ܥܰܡ̈ܡܺܝܢ܀

ܚܰܡܪܳܐ ܕܡܳܟ ܚܰܝܳܐ܇ ܘܡܶܫܚܳܐ ܐ̱ܪܳܙ ܡܰܥܡܽܘܕܺܝܬܳܐ ܕܰܒܗܶܝܢ ܐܳܕܳܡ ܐܶܬܰܐܣܺܝ ܘܕܺܝܢܳܪ̈ܶܐ ܦܰܓܪܳܟ ܘܰܕܡܳܟ ܩܰܕܺܝܫܳܐ܇ ܕܢܶܗܘܽܘܢ ܠܚܽܘܣܳܝܳܐ ܕܚܰܘ̈ܒܰܘܗ̱ܝ ܘܰܠܫܽܘܒܩܳܢܳܐ ܕܰܚܛܳܗ̈ܰܘܗ̱ܝ܀

ܥܒܰܪ ܥܠܰܘܗ̱ܝ ܠܶܘܳܝܳܐ܇ ܘܗܳܟܘܳܬ ܟܳܗܢܳܐ ܘܠܳܐ ܥܰܕܪܶܗ ܘܫܳܡܪܳܝܳܐ ܐܶܬܳܐ ܘܥܰܕܪܶܗ܇ ܘܟܽܠ ܛܳܒ̈ܳܬܳܐ ܣܥܰܪ ܥܰܡܶܗ܇ ܬܰܘ ܟܽܠ ܥܰܡ̈ܡܺܝܢ܀

ܦܰܓܪܶܗ ܡܚܰܣܝܳܢܳܐ܇ ܘܰܕܡܶܗ ܟܳܣܳܐ ܕܦܽܘܪܩܳܢܳܐ܇ ܝܰܗܒ ܠܰܢ ܠܚܽܘܣܳܝ ܚܰܘܒ̈ܳܬܰܢ܇ ܘܰܥܨܳܒܳܐ ܕܰܚܒܳܪ̈ܳܬܰܢ܇ ܬܰܘ ܟܽܠ܀

 

ܬܶܫܒܽܘܚܬܳܐ܇ ܫܡܰܝ̈ܳܢܶܐ ܫܽܘܒܚܳܟ ܙܳܡܪܺܝܢ

ܚܰܕ ܒܰܪܢܳܫܳܐ ܢܳܚܶܬ ܗܘܳܐ܇ ܡܶܢ ܐܽܘܪܺܫܠܶܡ ܠܺܐܝܪܺܝܚܽܘ܇ ܘܰܠܣܶܛܳܝ̈ܶܐ ܢܦܰܠܘ̱ ܗ̱ܘܰܘ ܥܠܰܘܗ̱ܝ܇ ܘܰܡܚܰܐܽܘܗ̱ܝ ܘܰܫܩܰܠܘ̱ ܢܰܚܬܰܘ̈ܗ̱ܝ܀

ܒܰܪܢܳܫܳܐ ܐܳܕܳܡ ܐܺܝܬܰܘܗ̱ܝ܇ ܐܳܦ ܐܽܘܪܺܫܠܶܡ ܦܰܪܕܳܝܣܳܐ܇ ܘܺܐܝܪܺܝܚܽܘ ܐܰܪܥܳܐ ܕܠܺܝܛܳܐ܇ ܘܓܰܝܳܣ̈ܶܐ ܒܺܝܫܳܐ ܘܡܰܘܬܳܐ܀

ܒܰܙܒܰܢ ܗܽܘܫܳܥ ܣܠܶܩ ܡܰܠܟܳܐ܇ ܕܳܐܬܽܘܪ ܘܰܫܒܳܐ ܗܘܳܐ ܠܫܳܡܪܺܝܢ܇ ܐܰܘܒܶܠ ܐܶܢܽܘܢ ܠܥܶܒܪ̈ܳܝܶܐ܇ ܠܰܐܬܪܳܐ ܕܦܳܪܶܣ ܘܰܕܡܳܕܰܝ܀

ܡܰܩܛܠܺܝܢ ܗ̱ܘܰܘ ܐܰܪ̈ܝܰܘܳܬܳܐ܇ ܠܥܰܡ̈ܡܶܐ ܗܳܢܽܘܢ ܢܽܘܟܪ̈ܳܝܶܐ܇ ܕܥܳܡܪܺܝܢ ܗ̱ܘܰܘ ܒܶܗ ܒܽܐܘܪܺܫܠܶܡ ܇ ܘܠܳܐ ܝܳܕܥܺܝܢ ܗ̱ܘܰܘ ܢܳܡܽܘܣܶܗ܀

ܘܰܦܩܰܕ ܗܘܳܐ ܘܰܣܠܶܩ ܟܳܗܢܳܐ܇ ܘܠܶܘܳܝܳܐ ܡܶܢ ܐܺܝܣܪܳܐܶܝܠ܇ ܕܢܰܠܦܽܘܢ ܐܶܢܽܘܢ ܢܳܡܽܘܣܳܐ܇ ܡܶܢ ܝܰܕ ܩܶܛܠܳܐ ܢܶܬܚܰܪܪܽܘܢ܀

ܟܳܗܢܳܐ ܘܠܶܘܳܝܳܐ ܟܰܕ ܚܙܰܘ܇ ܗܦܽܘܟܝܳܐ ܕܰܐܪ̈ܝܰܘܳܢ ܥܪܰܩܘ̱ ܠܗܽܘܢ܇ ܘܗܳܟܰܢ ܟܽܠܳܗܿ ܥܰܬܺܝܩܬܳܐ܇ ܠܳܐ ܥܰܕܪܽܘܗ̱ܝ ܠܳܐܕܳܡ ܪܰܡܝܳܐ܀

 

ܡܰܘܪܒܳܐ ܒܩܳܠܳܐ ܡܽܘܫܶܐ ܒܣܰܢܝܳܐ܇

ܡܶܢ ܐܽܘܪܺܫܠܶܡ ܠܺܐܝܪܺܝܚܽܘ܇ ܒܰܪܢܳܫܳܐ ܚܰܕ ܢܳܚܶܬ ܗܘܳܐ ܒܽܐܘܪܚܳܐ ܐܰܝܟܰܢܳܐ ܕܰܟܬܺܝܒ܇ ܘܰܢܦܰܠܘ̱ ܥܠܰܘܗ̱ܝ ܓܰܝܳܣ̈ܶܐ܇ ܘܫܰܠܰܚܘ̱ ܗ̱ܘܰܘ ܘܰܫܩܰܠܘ̱ ܢܰܚܬܰܘ̈ܗ̱ܝ܇ ܗܳܢ ܐܺܝܬܰܘܗ̱ܝ ܐܳܕܳܡ ܕܰܢܦܰܠ ܒܺܐܝܕ̈ܰܝ ܡܰܘܬܳܐ ܘܣܳܛܳܢܳܐ܇ ܘܰܡܫܺܝܚܳܐ ܐܶܬܳܐ ܘܥܰܨܒܶܗ܀

ܒܶܗ ܒܝܰܘܡܳܐ ܥܒܰܪ ܗܘܳܐ ܟܳܗܢܳܐ܇ ܘܟܰܕ ܚܙܳܝܗ̱ܝ ܕܰܪܡܶܐ ܕܚܶܠ ܘܰܥܪܰܩ܇ ܕܠܳܐ ܢܰܕܪܟܽܘܢܳܝܗ̱ܝ ܓܰܝܳܣ̈ܶܐ܇ ܘܶܐܬܳܐ ܒܳܬܪܶܗ ܠܶܘܳܝܳܐ܇ ܘܟܰܕ ܫܡܰܥ ܗܘܳܐ ܕܰܥܪܰܩ ܟܳܗܢܳܐ ܥܪܰܩ ܐܳܦ ܗܽܘ ܘܠܳܐ ܚܳܢܶܗ ܗܘܳܐ܇ ܘܡܶܛܽܠ ܗܳܕܶܐ ܦܳܫ ܡܡܰܚܝܳܐ܇ ܪܰܡܝܳܐ ܒܽܐܘܪܚܳܐ܀

ܝܰܗܒ ܗܘܳܐ ܠܶܗ ܬܪܶܝܢ ܕܺܝܢܳܪ̈ܶܐ܇ ܘܶܐܡܰܪ ܠܶܗ ܕܶܐܢ ܡܰܦܶܩ ܐܰܢ̱ܬ ܥܠܰܘܗ̱ܝ ܝܰܬܺܝܪܳܐ ܡܳܐ ܕܶܐܗܦܽܘܟ܇ ܦܳܪܰܥ ܐ̱ܢܳܐ ܠܳܟ ܚܰܕ ܒܰܡ̈ܐܳܐ܇ ܘܰܗܘܳܬ݀ ܚܶܣܕܳܐ ܠܺܐܝܣܪܳܐܶܝܠ܇ ܕܶܐܬܪܰܚܰܡ ܐ̱ܢܳܫ ܡܶܢ ܥܰܡ̈ܡܶܐ܇ ܥܰܠ ܗܰܘ ܕܶܐܬܡܰܚܺܝ ܝܰܬܺܝܪ܇ ܡܶܢ ܟܳܗܢܳܐ ܘܠܶܘܳܝܳܐ܀

 

ܫܰܒܰܚܘ̱ ܥܰܒ̈ܕܰܘܗ̱ܝ ܩܳܠܳܐ ܐܶܬܬܥܺܝܪܘ̱ ܕܰܡܟ̈ܶܐ

ܚܰܕ ܒܰܪܢܳܫܳܐ ܢܳܚܶܬ ܗܘܳܐ ܒܽܐܘܪܚܳܐ ܘܒܶܗ ܗܽܘ܇ ܦܓܰܥܘ̱ ܓܰܝܳܣ̈ܶܐ ܘܰܡܚܰܐܽܘܗ̱ܝ܇ ܘܰܫܩܰܠܘ̱ ܗ̱ܘܰܘ ܡܶܢܶܗ ܢܰܚܬܰܘ̈ܗ̱ܝ܇ ܠܳܟ ܝܳܐܶܐ܀

ܠܣܳܦܪܳܐ ܕܰܩܪܶܒ ܕܰܢܢܰܣܶܐ ܠܡܳܪܰܢ ܝܶܫܽܘܥ܇ ܐܶܡܰܪ ܠܶܗ ܡܫܺܝܚܳܐ ܕܰܐܝܢܳܐ܇ ܡܶܢ ܗܳܠܶܝܢ ܥܒܰܕ ܛܰܝܒܽܘܬܳܐ܇ ܘܠܳܟ ܝܳܐܶܐ ܫܽܘܒܚܳܐ܀

ܐܶܬܚܰܫܰܚ ܡܳܪܰܢ ܒܡܰܬܠܳܐ ܠܘܳܬܶܗ ܕܗܰܘ ܣܳܦܪܳܐ܇ ܕܶܐܢ ܚܽܘܒܳܐ ܠܰܝܬ ܒܶܗ ܠܚܰܒܪܶܗ܇ ܠܳܐ ܡܰܘܬܰܪ ܠܶܗ ܝܽܘܠܦܳܢܳܐ܇ ܘܠܳܟ ܝܳܐܶܐ ܫܽܘܒܚܳܐ܀

ܒܗܶܬ ܗܘܳܐ ܣܳܦܪܳܐ ܡܶܢܰܣܝܳܢܳܐ ܘܶܐܙܰܠ ܒܚܰܕܘܳܐ ܒܰܕܣܒܰܪ ܗܘܳܐ ܕܝܰܕܥܶܗ ܠܡܰܬܠܳܐ܇ ܟܰܕ ܠܳܐ ܝܺܕܰܥ ܡܽܘܢ ܫܳܡܰܥ܇ ܘܠܳܟ܀

ܦܰܓܪܶܗ ܘܰܕܡܶܗ ܝܰܩܺܝܪܳܐ ܣܳܡ ܠܡܰܚܘ̈ܳܬܶܗ܇ ܕܳܐܕܳܡ ܪܰܡܝܳܐ ܕܶܐܬܡܰܚܺܝ ܘܰܢܦܰܠ ܒܺܐܝܕ̈ܰܝ ܓܰܝ̈ܳܣܶܐ܇ ܘܠܳܟ ܝܳܐܶܐ܀

ܦܰܩܶܕ ܥܠܰܘܗ̱ܝ ܦܽܘܬܩܳܝܳܐ ܕܺܐܝܬܰܘܗ̱ܝ ܟܳܗܢܳܐ܇ ܕܢܺܐܙܰܦ ܕܺܝܠܶܗ ܒܳܐܣܝܽܘܬܳܐ܇ ܕܢܰܐܦܶܩ ܥܠܰܘܗ̱ܝ ܬܪܶܝܢ ܕܺܝܢܳܪ̈ܶܐ܇ ܕܶܐܬܺܝܗܶܒܘ̱ ܐܰܝܟ ܕܰܠܚܽܘܠܡܳܢܶܗ܀

ܛܽܘܒܰܘܗ̱ܝ ܠܰܐܝܢܳܐ ܕܶܐܬܰܐܣܺܝ ܡܶܢ ܟܽܘܪ̈ܗܳܢܰܘܗ̱ܝ܇ ܒܰܕܡܽܘܬܶܗ ܕܳܐܕܳܡ ܪܰܡܝܳܐ܇ ܕܚܳܢܽܘܗ̱ܝ ܪ̈ܰܚܡܶܐ ܫܡܰܝܳܢ̈ܶܐ܇ ܘܠܳܟ ܝܳܐܶܐ܀

ܫܽܘܒܚܳܐ ܠܳܐܣܝܳܐ ܫܡܰܝܳܢܳܐ ܕܶܐܬܳܐ ܒܪ̈ܰܚܡܰܘܗ̱ܝ܇ ܠܰܐܪܥܳܐ ܕܠܰܘ̈ܛܳܬܳܐ ܘܣܰܥܪܶܗ܇ ܠܳܐܕܳܡ ܕܡܶܢ ܓܰܝܳܣ̈ܶܐ ܐܶܬܡܰܚܺܝ܇ ܘܠܳܟ܀

 

ܛܽܘܒܰܝܗܽܘܢ ܩܳܠܳܐ ܫܽܘܒܚܳܐ ܠܳܟ ܡܫܺܝܚܳܐ

ܠܳܐ ܟܳܗܢܐܳ ܥܰܕܪܶܗ܇ ܐܳܦ ܠܳܐ ܠܶܘܳܝܳܐ܇ ܥܕܰܡܳܐ ܕܰܡܛܳܝܗ̱ܝ ܗܘܳܐ܇ ܗܰܘ ܐܳܣܝܳܐ ܕܪ̈ܰܚܡܶܐ܇ ܘܣܰܥܪܶܗ ܘܰܚܠܺܝܡܳܐ ܥܰܒܕܶܗ܀

ܗܰܘ ܓܰܒܪܳܐ ܡܡܰܚܝܳܐ܇ ܒܺܐܝܕ̈ܰܝ ܓܰܝܳܣ̈ܶܐ܇ ܒܝܶܫܽܘܥ ܐܶܬܰܐܣܺܝ܇ ܘܰܥܨܰܒ ܡܰܚܘ̈ܳܬܶܗ܇ ܘܚܰܣܺܝ ܟܽܠܗܶܝܢ ܟܽܘܬܡ̈ܳܬܶܗ܀

ܠܳܐ ܬܶܫܒܽܘܩ ܠܰܢ ܡܳܪܝ̱܇ ܒܺܐܝ̈ܕܰܝ ܓܰܝܳܣ̈ܶܐ܇ ܘܠܳܐ ܬܽܘܒ ܢܶܫܬܰܠܛܽܘܢ ܥܠܰܝܢ܇ ܒܝܰܕ ܡܰܪܳܚܽܘܬܗܽܘܢ܇ ܕܺܝܠܳܟ ܗܺܝ ܡܳܪܝ̱ ܓܰܢ̱ܒܳܪܽܘܬܳܐ܀

ܫܳܡܪܳܝܳܐ ܩܪܰܐܽܘܘܟ܇ ܡܰܪ̈ܳܚܶܐ ܒܚܶܣܕܳܐ܇ ܘܚܳܢܬܳܝܗ̱ܝ ܘܰܥܨܰܒܬܳܝܗ̱ܝ ܠܪܰܡܝܳܐ܇ ܘܳܐܦ ܠܰܢ ܡܳܪܝ̱ ܥܨܽܘܒ܇ ܘܚܰܘܰܪ ܒܽܘܬܡ̈ܳܬܰܢ ܒܙܽܘܦܳܟ܀

ܒܳܟ ܡܳܪܝ̱ ܢܶܬܚܰܣܶܐ܇ ܡܶܢ ܟܽܠ ܟܽܘܬܡ̈ܳܬܰܢ܇ ܘܒܳܟ ܡܳܪܝ̱ ܢܶܬܒܰܣܰܡ܇ ܒܡܰܠܟܽܘܬܳܐ ܕܪܰܘܡܳܐ܇ ܚܢܰܢ ܘܥܰܢܺܝ̈ܕܰܝܢ ܕܰܫܟܶܒܘ̱ ܥܰܠ ܣܰܒܪܳܟ܀

 

ܩܳܠܳܐ ܕܨܰܦܪܳܐ ܩܳܠܳܐ ܠܡܰܠܟܽܘܬ ܪܰܘܡܳܐ

ܠܣܰܡܝܳܐ ܒܝܰܕ ܛܺܝܢܳܐ܇ ܦܰܬܰܚ ܠܶܗ ܒܳܒ̈ܳܬܶܗ ܒܳܪܽܘܝܶܗ ܕܓܶܢܣܰܢ܇ ܘܰܠܗܳܝ ܕܰܕܡܳܗܿ ܪܳܕܶܐ ܗܘܳܐ܇ ܝܰܗܒ ܚܽܘܠܡܳܢܳܐ ܡܫܰܡܠܝܳܐ܇ ܘܠܰܚܡܳܬܶܗ ܕܫܶܡܥܽܘܢ ܐܰܚܠܶܡ܇ ܘܰܐܚܺܝ ܠܰܒܪܳܗܿ ܕܰܐܪܡܶܠܬܳܐ܇ ܘܠܰܛܠܺܝܬܳܐ ܒܰܪܬܶܗ ܕܝܽܘܳܐܪܳܫ܀

ܠܳܟ ܬܶܫܒܽܘܚܬܳܐ܇ ܐܺܝܬܝܳܐ ܡܬܽܘܡܳܝܳܐ܇ ܡܶܠܬܳܐ ܐܰܠܳܗܳܐ܇ ܕܰܐܪܟܶܢܬܳܗܿ ܠܗܳܝ ܪܰܒܽܘܬܳܟ܇ ܘܰܢܚܶܬܬ ܠܰܐܪܥܳܐ ܒܨܶܒܝܳܢܳܟ܇ ܘܥܰܡ ܒܢܰܝ̈ܢܳܫܳܐ ܐܶܬܗܰܦܰܟܬ܇ ܘܰܐܣܺܝܬ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܫܽܘܒܚܳܐ ܠܳܟ ܝܰܠܕܶܗ ܕܥܶܠܳܝܳܐ܀

 

ܐ̱ܚܪܺܢܳܐ ܒܩܳܠܳܐ ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ

ܚܙܳܐ ܠܰܡܫܰܪܝܳܐ ܕܰܪܡܶܐ ܗܘܳܐ ܥܰܠ ܥܰܪܣܳܐ܇ ܘܶܐܡܰܪ ܠܶܗ ܫܒܺܝܩܺܝܢ ܚܰܘ̈ܒܰܝܟ ܩܽܘܡ ܐܶܬܚܰܝܰܠ܇ ܘܰܫܩܽܘܠ ܥܰܪܣܳܟ ܟܰܕ ܚܳܕܶܝܬ ܘܙܶܠ ܠܒܰܝܬܳܟ܇ ܘܰܐܳܘܕܳܐ ܘܫܰܒܰܚ ܠܗܰܘ ܐܳܣܝܳܐ ܕܰܐܣܺܝ ܟܺܐܒܰܝ̈ܟ܀

ܠܫܳܡܪܳܝܬܳܐ ܥܰܠ ܒܺܐܪܳܐ ܕܡܰܝ̈ܳܐ ܨܳܕ ܗܘܳܐ܇ ܘܝܰܗܒ ܗܘܳܐ ܠܳܗܿ ܡܰܝ̈ܳܐ ܕܚܰܝ̈ܶܐ ܛܡܺܝܪܺܝܢ ܗ̱ܘܰܘ ܒܗܽܘܢ܇ ܘܠܰܟܢܰܥܢܳܝܬܳܐ ܕܰܒܥܳܬ݀ ܡܶܛܽܠ ܒܰܪܬܳܗܿ܇ ܐܶܡܰܪ ܠܳܗܿ ܙܶܠܝ̱ ܢܶܗܘܶܐ ܠܶܟܝ̱ ܐܰܟܡܳܐ ܕܨܳܒܝܰܬܝ̱܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܓܳܚܘ̱ ܥܽܘܕܪ̈ܳܢܰܘܗ̱ܝ ܒܰܪ ܐܰܠܳܗܳܐ ܐܰܝܟ ܡܳܡܽܘ̈ܠܶܐ܇ ܕܝܰܡܳܐ ܪܰܒܳܐ ܒܰܐܪܥܳܐ ܨܗܺܝܬܳܐ ܕܒܳܥܝܳܐ ܡܶܛܪܳܐ܇ ܢܒܰܥܘ̱ ܚܽܘܠܡܳܢܳܐ ܥܪܰܩܘ̱ ܟܽܘܪ̈ܗܳܢܶܐ ܡܶܢ ܐ̱ܢܳܫܽܘܬܳܐ܇ ܕܰܒܟܽܠ ܓܰܒܺܝ̈ܢ ܪ̈ܰܚܡܶܐ ܡܠܶܐ ܗܘܳܐ܇ ܠܟܽܠ ܕܰܣܢܺܝܩܺܝܢ܀

ܠܕܽܘ̈ܓܶܐ ܒܪܽܘܩܳܐ ܝܰܗܒ ܠܗܽܘܢ ܫܶܡܥܳܐ ܕܠܳܐ ܒܰܥܝܳܕܳܐ܇ ܠܓܰܪ̈ܒܶܐ ܒܡܶܠܬܳܐ ܕܰܟܺܝ ܘܰܐܚܠܶܡ ܡܶܢ ܛܰܡܽܐܳܘܬܳܐ܇ ܠܗܳܝ ܕܰܟܦܺܝܦܳܐ ܟܰܕ ܦܰܫܛܳܗܿ ܗܘܳܐ ܡܶܢ ܟܽܘܪܗܳܢܳܗܿ܇ ܘܳܐܦ ܠܝܰܡܺܝܢܳܐ ܕܝܰܒܺܝܫܳܐ ܗܘܳܬ݀ ܒܡܶܠܬܶܗ ܬܰܪܨܳܗܿ܀

 

ܕܰܬܠܳܬܫܳܥܺܝ̈ܢ܇ ܩܳܠܳܐ ܠܡܰܪܝܰܡ ܝܳܠܕܰܬ ܐܰܠܳܗܳܐ

ܐܳܣܝܳܐ ܛܳܒܳܐ ܕܶܐܬܳܐ ܨܶܝܕ ܒܺܝܫܽܘܬܰܢ܇ ܘܰܐܣܺܝ ܘܰܐܚܠܶܡ ܟܽܘܪ̈ܗܳܢܶܐ ܕܰܟܪܺܝܗܽܘܬܰܢ܇ ܢܰܘܕܶܐ ܠܰܐܒܳܐ ܝܳܠܽܘܕܳܟ܇ ܕܫܰܠܚܳܟ ܨܶܝܕܰܝܢ܇ ܘܰܠܪܽܘܚܩܽܘܕܫܳܐ ܪܽܘܡܪܳܡܳܐ ܘܰܥܠܰܝܢ ܪ̈ܰܚܡܶܐ܀

ܗܰܠܶܟ ܒܰܐܪܥܳܐ ܗܰܘ ܡܳܪܳܐ ܕܟܽܠܒܶܪ̈ܝܳܬܳܐ܇ ܘܪܰܣ ܒܓܰܘܳܗܿ ܠܰܡܡܰܚ̈ܰܝܳܐ܇ ܒܪܺܝܟ ܐܰܒܳܐ ܕܫܰܠܚܶܗ ܨܶܝܕܰܝܢ ܕܢܰܐܣܶܐ ܟܺܐܒ̈ܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܰܕ ܪܳܕܶܐ ܗܘܳܐ ܒܰܝܢܳܬ ܟܰܪ̈ܟܶܐ ܘܰܡܕܺܝܢ̈ܳܬܳܐ܇ ܗܰܘ ܓܰܢ̱ܒܳܪܳܐ ܕܡܰܠܝܳܐ ܡܶܢܶܗ ܫܡܰܝܳܐ ܘܰܐܪܥܳܐ܇ ܠܒܶܝܬ ܓܶܕܪ̈ܳܝܶܐ ܫܰܠܚܽܘܗ̱ܝ ܪ̈ܰܚܡܰܘܗ̱ܝ ܕܰܡܟܰܘܢܺܝܢ  ܠܶܗ܇ ܕܠܚܰܕ ܕܪܰܕܦܽܘܗ̱ܝ ܫܺܐܕ̈ܶܐ ܒܺܝܫ̈ܶܐ ܒܚܰܝܠܶܗ ܢܶܦܪܽܘܩ܀

ܩܪܳܐ ܘܶܐܡܰܪ ܠܶܗ ܠܠܶܓܝܽܘܢ ܦܰܩܪܳܐ ܦܽܘܩ ܠܳܟ ܡܶܢܶܗ܇ ܘܙܳܥ ܡܶܢ ܚܰܝܠܶܗ ܟܰܕ ܪܳܐܶܬ ܗܘܳܐ ܢܦܰܩ ܠܶܗ ܡܶܢܶܗ܇ ܩܳܡ ܢܰܟܦܳܐܺܝܬ ܗܰܘ ܕܶܐܬܰܐܣܺܝ ܡܶܢ ܣܳܛܳܢܳܐ܇ ܘܫܰܪܺܝ ܕܢܶܦܪܽܘܥ ܩܳܠܰܝ̈ ܫܽܘܒܚܳܐ ܠܪ̈ܰܚܡܶܐ ܕܚܳܢܽܘܗ̱ܝ܀

 

ܫܠܶܡ

ܕܚܰܕ ܒܫܰܒܳܐ ܚܡܺܝܫܳܝܳܐ ܕܨܰܘܡܳܐ ܕܥܰܠ ܪܰܡܝܳܐ܇ ܒܒܳܥܽܘ ܡܶܢܟܽܠ ܐܰܚܳܐ ܘܰܐܒܳܐ ܕܦܳܓܰܥ ܒܣܽܘܪ̈ܛܶܐ ܗܳܠܶܝܢ ܠܺܠܝܠܳܬ̈ܬܐ ܘܢܺܐܡܰܪ ܕܰܫܒܽܘܩ ܠܶܗ ܠܟܳܬܽܘܒܳܐ ܡܚܺܝܠܳܐ ܟܽܠܗܽܘܢ ܚܛܳܗܳܘ̈ܗ̱ܝ ܐܰܟܡܳܐ ܕܰܫܒܩܰܬ ܠܶܗ ܠܪܰܡܝܳܐ܇ ܘܟܽܠܡܰܢ ܕܒܳܥܶܐ ܫܽܘܒܩܳܢܳܐ ܚܠܳܦܰܝܢ ܡܳܪܝܳܐ ܢܶܬܶܠ ܠܶܗ ܐܰܝܟ ܪܶܬܡܳܐ ܕܣܶܦܘ̈ܳܬܶܗ ܚܰܕ ܒܰܬܠܳܬܺܝܢ ܘܒܶܫܬܺܝܢ ܘܒܰܡ̈ܐܳܐ܇ ܘܠܳܐ ܢܶܥܕܽܘܠ ܠܰܨܪܺܝܟܽܘܬ ܟܬܺܝܒ̈ܳܬܳܐ ܡܶܛܽܠ ܕܟܽܠ ܒܰܪܝܳܐ ܚܰܣܺܝܪ܇ ܘܰܐܠܳܗܳܐ ܠܚܽܘܕ ܡܫܰܡܠܝܳܐ ܒܕܺܝܠܶܗ ܠܶܗ ܛܽܘܟܳܣܳܐܺܡ ܒܰܫܢܰܬ ܐܨܦܐ ܡ ܒܺܐܝ̈ܕܰܝ ܒܨܺܝܪܳܐ ܚܰܛܳܝܳܐ ܘܰܣܪܺܝܟ ܡܶܢ ܟܽܠܳܢܫ܀

 

 

ܬܽܘܒ ܕܝܽܘܡ ܬܪܶܝܢ ܒܫܰܒܳܐ ܕܫܰܒܬܳܐ ܕܚܰܡܶܫ ܕܨܰܘܡܳܐ ܕܺܐܝܬܺܝܗܿ ܬܶܕܡܽܘܪܬܳܐ

ܩܕܳܡ ܕܪܰܡܫܳܐ ܥܶܢܝܳܢܳܐ܇ ܕܪܰܚܶܡ ܥܠܰܝ܇ ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܒܡܶܠܬܳܟ ܐܰܣܺܝܬ ܘܰܐܚܠܶܡܬ܇ ܟܽܘܪ̈ܗܳܢܶܐ ܕܰܡܡ̈ܰܚܰܝܳܐ܇ ܒܳܗܿ ܡܳܪܝ̱ ܐܰܚܠܶܡ ܠܚܰܫ̈ܶܐ ܡܦ̈ܰܬܟܶܐ ܕܢܰܦܫ̈ܳܬܰܢ܇ ܐܰܠܳܗܳܐ܀

ܠܳܥܳܙܳܪ ܡܶܢ ܕܰܗܘܳܐ܇ ܡܺܝܬܳܐ ܣܰܪܝܳܐ ܒܓܰܘ ܩܰܒܪܳܐ܇ ܒܩܳܠܳܐ ܩܪܰܝܬܳܝܗ̱ܝ ܘܰܐܩܺܝܡܬܳܝܗ̱ܝ ܐܰܝܟ ܡܰܐܚܶܐ ܟܽܠ ܐܰܠܳܗܳܐ܀

ܒܪܺܝܟ ܚܰܝܠܳܟ ܡܬܰܪܣܶܐ ܟܽܠ܇ ܒܪܺܝܟܺܝܢ ܪ̈ܰܚܡܰܝܟ ܡܳܪܶܐ ܟܽܠ܇ ܟܽܠܗܽܘܢ ܥܰܡ̈ܡܶܐ ܡܫܰܒܚܺܝܢ ܠܰܫܡܳܟ ܚܳܐܶܢ ܟܽܠ ܐܰܠܳܗܳܐ܀

ܟܶܢܫ̈ܶܐ ܒܕܰܒܪܳܐ ܣܰܒܰܥ܇ ܡܶܢ ܚܰܡܫܳܐ ܠܰܚܡ̈ܺܝܢ ܕܰܩܨܳܐ ܘܡܰܝ̈ܳܐ ܠܚܰܡܪܳܐ܇ ܫܰܚܠܶܦ ܗܘܳܐ ܒܶܝܬ ܡܶܫܬܽܘܬܳܐ ܐܰܠܳܗܳܐ܀

ܚܰܝ̈ܶܐ ܠܡܺܝ̈ܬܶܐ ܦܰܠܶܓ܇ ܘܰܠܥܰܝܺܝ̈ܩܶܐ ܠܰܒܶܒ ܗܘܳܐ܇ ܠܰܟܦܢ̈ܶܐ ܣܰܒܥܳܐ܇ ܘܰܠܦܺܐܩ̈ܶܐ ܡܰܡܠܠܳܐ ܦܫܺܝܛܳܐ܇ ܐܰܠܳܗܳܐ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܗܳܢܰܘ ܒܰܫܪܳܪܳܐ

ܗܳܝ ܡܡܰܚܰܝܬܳܐ܇ ܕܩܶܪܒܰܬ݀ ܠܩܰܪܢܳܐ ܕܡܰܪܛܽܘܛܳܟ ܒܰܪ ܐܰܠܳܗܳܐ܇ ܚܽܘܠܡܳܢܳܐ ܢܶܣܒܰܬܽ ܡܶܢܳܟ܇ ܐܰܝܟ ܐܰܠܳܗܳܐ ܫܰܪܺܝܪܳܐܺܝܬ܇ ܘܰܚܢܰܢ ܒܳܥܶܝܢܰܢ ܡܳܪܝ̱ ܛܰܠܶܩ ܠܪܶܕܝܳܐ ܕܥܰܒܕ̈ܶܐ ܕܺܝܠܳܟ܇ ܕܢܰܘܕܶܐ ܘܢܶܣܓܽܘܕ ܘܰܢܫܰܒܚܳܟ܇ ܠܥܳܠܡܰܥܳܠܡܺܝܢ܀

 

ܗܰܘ ܕܰܛܥܺܝܢ ܟܽܠܒܶܪ̈ܝܳܬܳܐ

ܦܓܰܥܘ̱ ܒܶܗ ܓܰܪ̈ܒܶܐ ܘܶܐܬܕܰܟܺܝܽܘ܇ ܘܰܣܡ̈ܰܝܳܐ ܘܰܚܙܰܘ ܢܽܘܗܪܳܐ܇ ܘܚܰܣܺܝ ܚܰܘܒ̈ܶܐ ܕܚܰܛܳܝ̈ܶܐ܇ ܘܰܒܩܳܠܶܗ ܐܰܚܺܝ ܡܺܝ̈ܬܶܐ܇ ܐܳܦ ܡܡܰܚܰܝܬܳܐ ܕܩܶܪܒܰܬ݀ ܠܶܗ܇ ܝܶܒܫܰܬ݀ ܡܶܪܕܺܝܬܳܐ ܕܰܕܡܳܗܿ܇ ܘܰܐܝܟ ܐܰܠܳܗܳܐ ܒܳܪܽܘܝܳܐ܇ ܒܪܳܐ ܦܰܬܰܚ ܠܥܰܝ̈ܢܶܐ ܕܰܣܡܰܝ̈ܳܐ܀

ܡܫܺܝܚܳܐ ܕܦܰܬܰܚ ܠܰܣܡܰܝ̈ܳܐ܇ ܘܚܰܝܶܨ ܗܘܳܐ ܠܰܡܫܰܪ̈ܰܝܳܐ܇ ܘܝܰܗܒ ܗܘܳܐ ܗܶܠܰܟܬܳܐ ܠܰܚܓܺܪ̈ܶܐ܇ ܘܫܰܪܰܪ ܢܰܦܫ̈ܳܬܳܐ ܕܥܰܒܕܰܝ̈ܟ܇ ܘܗܰܒ ܠܰܢ ܫܽܘܒܩܳܢܳܐ ܕܚܰܘܒ̈ܶܐ܇ ܘܰܐܣܳܐ ܟܺܐܒ̈ܰܝܢ ܘܟܽܘܪ̈ܗܳܢܰܝܢ܇ ܘܰܐܢܗܰܪ ܥܰܝܢ̈ܶܐ ܕܬܰܪ̈ܥܝܳܬܰܢ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܀

ܟܪ̈ܺܝܗܶܐ ܕܰܣܥܰܪ ܡܰܘܕܶܝܢ ܠܶܗ܇ ܘܓܰܪ̈ܒܳܢܶܐ ܡܫܰܒܚܺܝܢ ܩܽܘܕܡܰܘܗ̱ܝ܇ ܕܚܰܘܺܝ ܐܶܢܽܘܢ ܬܡܺܝܗ̈ܳܬܳܐ ܟܽܠܳܗܿ ܐܽܘܪܚܳܐ ܒܬܶܕܡܽܘܪܬܳܐ܇ ܪܰܥܰܡܳܐ ܕܰܣܠܶܩܠܽܐܘܪܺܫܠܶܡ܇ ܘܡܶܬܦܰܠܓܺܝܢ ܒܳܗܿ ܥܽܘܕܪ̈ܳܢܶܐ܇ ܘܳܐܣܰܘ̈ܳܬܳܐ ܠܟܽܠ ܕܰܐܠܺܝܨܺܝܢ܇ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܫܽܘܒܚܳܐ ܢܰܣܶܩ ܠܶܗ ܠܰܒܪܳܐ܇ ܕܚܰܣܺܝ ܚܰܘܒ̈ܶܐ ܕܚܰܛܳܝ̈ܶܐ܇ ܘܰܐܦܢܺܝ ܐܶܢܽܘܢ ܕܛܳܥܶܝܢ ܗ̱ܘܰܘ܇ ܡܶܢ ܬܰܘܫܳܐ ܠܽܐܘܪܚܳܐ ܕܚܰܝ̈ܶܐ܇ ܘܰܚܡܰܠ ܐܶܢܽܘܢ ܒܰܛܝܳܪܶܗ܇ ܕܺܐܝܬܶܝܗܿ ܥܺܕܬܳܐ ܩܰܕܺܝܫܬܳܐ܇ ܘܗܳܐ ܙܳܡܪܺܝܢ ܠܶܗ ܬܶܫܒܽܘܚܬܳܐ܇ ܚܰܛܳܝ̈ܶܐ ܕܰܚܝܰܘ ܒܰܕܡܶܗ܀

 

ܩܳܠܳܐ ܕܪܰܡܫܳܐ

ܒܩܳܠܳܐ ܩܽܘܩܳܝܳܐ

ܝܺܚܺܝܕܳܝܳܐ ܐܰܠܳܗܳܐ ܠܰܐܪܥܳܐ ܐܶܬܬܰܚܬܺܝ܇ ܘܰܢܣܰܟ ܘܰܡܠܳܗ ܥܽܘܕܪ̈ܳܢܶܐ ܘܳܐܣܰܘ̈ܳܬܳܐ ܘܚܰܝ̈ܠܶܐ܇ ܩܪܶܒ ܠܶܗ ܓܰܪܒܳܐ ܒܚܰܫܳܐ ܘܟܰܪܝܽܘܬܳܐ܇ ܘܰܩܥܳܐ ܒܚܰܫܳܐ ܐܶܬܪܰܚܡܥܠܰܝ܇ ܘܰܐܝܟ ܒܳܪܽܘܝܳܐ ܚܰܟܺܝܡܳܐ ܐܺܝܕܶܗ ܦܫܰܛ ܗܘܳܐ܇ ܘܰܒܡܶܠܬܶܗ ܕܰܟܺܝ ܓܰܪܒܶܗ ܘܰܙܡܰܪ ܬܶܫܒܽܘܚܬܳܐ܇ ܗ ܘ ܗ܀

ܬܠܳܬܺܝܢ ܘܰܬܡܳܢܶܐ ܫܢܰܝ̈ܳܐ ܢܳܛܰܪ ܗܘܺܝܿܬ ܫܰܒܬܳܐ܇ ܘܡܶܢܳܗܿ ܡܶܕܶܡ ܠܳܐ ܝܶܬܪܶܬ ܩܳܥܶܐ ܗܘܳܐ ܡܫܰܪܝܳܐ܇ ܥܕܰܡܳܐ ܕܶܐܬܳܐ ܡܫܺܝܚܳܐ ܒܪܶܗ ܕܰܐܒܳܐ܇ ܘܰܐܣܺܝ ܟܺܐܒ̈ܰܝ ܘܰܐܚܠܶܡ ܟܽܘܪ̈ܗܳܢܰܝ܇ ܬܽܘܒ ܫܰܒܬܳܐ ܠܳܐ ܢܳܛܰܪ ܐ̱ܢܳܐ ܕܠܰܝܬ ܒܳܗܿ ܝܽܘܬܪܳܢ܇ ܒܚܰܕ ܒܫܰܒܳܐ ܢܶܩܥܶܐ ܘܢܺܐܡܰܪ ܕܠܳܟ ܫܽܘܒܚܳܐ ܡܳܪܝܳܐ܇ ܗ ܘ ܗ܀

 

ܠܡܰܠܳܟܽܘܬ ܪܰܘܡܳܐ

ܒܪܺܝܟ ܗܽܘ ܕܰܒܚܽܘܒܶܗ܇ ܐܶܬܳܐ ܠܦܽܘܪܩܳܢܰܢ܇ ܘܰܐܣܺܝ ܚܒܳܪ̈ܳܬܰܢ܇ ܘܰܐܚܠܶܡ ܟܺܐܒ̈ܶܐ ܘܟܽܘܪ̈ܗܳܢܶܐ ܕܰܒܢܰܝ̈ܢܳܫܳܐ ܡܳܝܽܘ̈ܬܶܐ܇ ܘܰܦܪܰܩ ܠܰܢ ܡܶܢ ܛܳܥܝܽܘܬܳܐ܇ ܘܰܐܦܢܺܝ ܠܰܢ ܠܽܐܘܪܚܳܐ ܕܚܰܝ̈ܶܐ܇ ܬܰܘ ܟܽܠܰܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܐܳܣܝܳܐ ܕܶܐܬܳܐ܇ ܡܶܢ ܪܰܘܡܳܐ ܠܥܽܘܡܩܳܐ܇ ܕܢܰܐܣܶܐ ܠܰܢ ܟܺܐܒ̈ܰܝܢ܇ ܒܪ̈ܰܚܡܰܝܟ ܐܰܣܳܢܝ̱ ܕܶܐܙܡܰܪ ܠܳܟ܇ ܫܽܘܒܚܳܐ ܦܰܐܝܳܐ ܘܰܗܕܺܝܪܳܐ܇ ܝܰܠܕܶܗ ܕܰܐܒܳܐ ܫܡܰܝܳܢܳܐ܇ ܕܪܳܕܶܐ ܥܽܘܬܪܶܗ ܠܰܣܢܺܝ̈ܩܶܐ܇ ܒܳܟ ܐܰܥܬܰܪ ܘܰܐܘܕܶܐ  ܠܝܳܠܽܘܕܳܟ܀

ܛܳܒܳܐ ܕܰܐܫܦܰܥ܇ ܪ̈ܰܚܡܰܘܗ̱ܝ ܥܰܠ ܓܶܢܣܰܢ܇ ܘܰܐܚܺܝ ܡܳܝܽܘܬܽܘܬܰܢ܇ ܐܰܣܳܐ ܟܺܐܒܰܝ̈ܢ ܒܰܚܢܳܢܳܟ܇ ܘܚܰܣܳܐ ܚܰܘܒ̈ܰܝܢ ܒܛܰܝܒܽܘܬܳܟ܇ ܘܥܰܡ ܟܰܫܺܝܪ̈ܶܐ ܕܰܫܦܰܪܘ̱ ܠܳܟ܇ ܢܶܗܘܶܐ ܙܡܺܝܢ̈ܶܐ ܒܡܰܠܟܽܘܬܳܟ܇ ܘܢܶܙܡܰܪ ܠܳܟ ܫܽܘܒܚܳܐ ܘܬܰܘܕܺܝܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܰܪ ܐܰܠܳܗܳܐ ܕܰܚܠܰܛ ܢܰܦܫܶܗ ܥܰܡ ܬܰܚܬܳܝ̈ܶܐ܇ ܕܢܶܚܠܽܘܛ ܐܶܢܽܘܢ ܥܰܡܶܗ ܒܫܽܘܒܚܳܐ ܒܰܐܬܪܶܗ ܕܰܐܒܽܘܗ̱ܝ܇ ܘܰܐܝܟ ܒܰܪ ܓܶܢܣܳܐ ܘܰܐܝܟ ܩܰܪܺܝܒܳܐ ܘܰܐܝܟ ܡܰܟܺܝܟܳܐ܇ ܗܰܠܶܟ ܥܰܡܗܽܘܢ ܒܶܝܬ ܫܽܘ̈ܩܰܝܗܽܘܢ ܘܰܣܥܰܪ ܐܶܢܽܘܢ܀

ܫܽܘܒܚܳܐ ܠܰܐܒܳܐ ܕܚܰܘܺܝ ܚܰܝܠܳܐ ܕܰܐܠܳܗܽܘܬܶܗ ܘܣܶܓܕܬܳܐ ܠܰܒܪܳܐ ܕܰܣܥܰܪ ܚܰܝ̈ܠܶܐ ܘܰܬܡܺܝܗ̈ܳܬܶܐ܇ ܬܰܘܕܺܝ ܠܪܽܘܚܳܐ ܕܕܰܟܺܝ ܘܡܰܪܩܳܢ ܡܶܢ ܟܽܘܬܡ̈ܳܬܳܐ܇ ܚܰܕ ܗܽܘ ܟܝܳܢܳܐ ܕܰܬܠ̈ܳܬܰܝܗܽܘܢ ܠܶܗ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ܇ ܩܳܠܳܐ ܝܳܐܶܐ ܘܙܳܕܶܩ

ܐܰܝܟ ܕܰܐܣܺܝܬ ܘܰܐܩܺܝܡܬ ܘܰܐܚܠܶܡܬ܇ ܠܰܡܫܰܪܝܳܐ ܡܶܢ ܥܰܪܣܳܐ ܕܟܺܐܒܰܘ̈ܗ̱ܝ܇ ܐܰܣܳܐ ܠܺܝ ܐܳܦ ܡܳܪܝ̱ ܟܺܐܒܰܝ̈܇ ܟܣܰܝ̈ܳܐ ܘܰܓܠܰܝ̈ܳܐ ܕܺܐܝܬ ܒܺܝ܇ ܫܽܘܒܚܳܐ܀

ܐܰܝܟ ܕܢܰܚܶܡܬܳܝܗ̱ܝ ܠܠܳܥܳܙܳܪ ܒܳܬܰܪ ܕܣܰܪܺܝ܇ ܢܰܚܶܡܰܝܢܝ̱ ܡܶܢ ܡܳܝܽܘܬܳܘܬܳܐ܇ ܕܰܚܛܳܗ̈ܰܝ ܘܪܰܚܶܡܥܠܰܝ ܫܽܘܒܚܳܐ ܠܳܟ܀

ܒܪܺܝܟ ܐܳܣܝܳܐ ܛܳܒܳܐ ܕܶܐܬܳܐ܇ ܘܰܐܣܺܝ ܟܺܐܒ̈ܶܐ ܕܢܰܦܫ̈ܳܬܰܢ܇ ܘܚܰܣܺܝ ܚܰܘܒ̈ܰܝܢ ܘܰܚܛܳܗ̈ܰܝܢ ܒܣܽܘܓܐܳܐ ܕܰܡܪܰܚܡܳܢܽܘܬܶܗ ܫܽܘܒܚܳܐ ܠܳܟ܀

ܥܰܬܺܝܪܳܐ ܘܒܰܪ ܥܰܬܺܝܪܳܐ܇ ܕܡܶܣܟܺܢ̈ܶܐ ܥܬܰܪܘ̱ ܒܰܚܢܳܢܶܗ܇ ܒܰܐܪܥܳܐ ܕܽܝܗܽܘܕ ܐܰܓܺܝܚ ܗܘܳܐ܇ ܫܶܦܥ̈ܶܐ ܒܪ̈ܺܝܟܶܐ ܕܥܽܘܕܪ̈ܳܢܰܘ̱ܗܝ܇ ܫܽܘܒܚܳܐ ܠܳܟ܀

 

ܩܳܠܳܐ ܕܠܺܠܝܳܐ܇

ܒܩܳܠܳܐ ܠܡܰܪܝܰܡ ܝܳܠܕܰܬ ܐܰܠܳܗܳܐ܇

ܕܢܰܚ ܫܶܡܫܳܐ ܘܰܐܢܗܰܪ ܥܳܠܡ̈ܶܐ ܡܶܢ ܦܰܐܝܽܘܬܶܗ܇ ܘܰܐܝܟ ܛܶܠ̈ܳܠܶܐ ܥܪܰܩܘ̱ ܟܺܐܒ̈ܶܐ ܡܶܢ ܐ̱ܢܳܫܽܘܬܳܐ܇ ܦܓܰܥܘ̱ ܒܶܗ ܕܽܘܓ̈ܶܐ ܘܰܫܡܰܥܘ̱ ܗ̱ܘܰܘ ܫܶܡܥܳܐ ܫܰܦܝܳܐ܇ ܘܰܣܡܰܝ̈ܳܐ܇ ܘܶܐܫܟܰܚܘ̱ ܚܙܳܝܳܐ܇ ܕܚܶܫܽܘܟܺܝܢ ܗ̱ܘܰܘ܀

ܢܛܰܦ ܙܺܝܘܶܗ ܒܓܰܘ ܒܳܒ̈ܳܬܳܐ ܕܠܳܐ ܚܳܙܝ̈ܳܢ ܗܘ̈ܰܝ܇ ܘܰܠܒܶܫ̈ܝ̱ ܘܗܘ̈ܰܝ ܢܽܘܗܪܳܐ ܚܰܕܬܳܐ ܠܡܶܬܒܰܣܳܡܽܘ܇ ܒܶܝܬ ܓܰܙܳܐ ܗܘܳܐ܇ ܘܟܽܠ ܕܥܰܠ ܠܶܗ ܢܣܰܒ ܣܢܺܝܩܽܘܬܶܗ܇ ܇ܘܟܽܠ ܕܰܨܗܶܐ ܐܶܫܬܺܝ ܘܰܣܒܰܥ ܡܶܢ ܡܰܒܽܘܥܳܟ܀

 

ܡܰܕܪܳܫܳܐ ܩܳܠܳܐ ܐܰܫܩܳܢܝ̱ ܡܳܪܝ̱ ܡܶܢ ܥܽܘܢܺܝܬܳܐ ܐܳܘ ܛܳܒܳܐ ܠܳܟ ܬܶܫܒܽܘܚܬܳܐ܇ ܐܳܦ ܬܰܘܕܺܝܬܳܐ ܠܳܟ ܒܰܪ ܛܳܒܳܐ܇

ܗܶܠܳܟ̈ܳܬܳܟ ܫܰܝܢܳܐ ܡܰܠܝ̈ܳܢ܇ ܗܶܕܪܳܟ ܗܽܘ ܡܳܪܝ̱ ܡܽܘܟܳܟܳܟ܇ ܛܰܝܒܽܘܬܳܟ ܗܰܝܡܳܢܽܘܬܳܐܗ̱ܝ܇ ܗܰܕܳܝܳܐ ܕܰܢܚܶܬ ܡܶܢ ܫܡܰܝܳܐ܇ ܗܳܐ ܚܰܫܳܟ ܗܽܘܝܽܘ ܡܰܒܽܘܥ ܛܳܒ̈ܳܬܰܢ܇ ܗܳܐ ܟܠܺܝܠܳܟ ܨܠܺܝܒܳܐ ܕܙܳܟܽܘܬܳܐ܇ ܗܳܐ ܚܽܘܒܳܐ ܫܽܘܦܪܳܟ ܗܳܐ ܡܰܠܝܳܐ܇ ܛܽܘܒ ܠܰܐܝܢܳܐ ܕܒܶܗ ܡܶܨܛܰܒܰܬ܀

ܛܰܝܒܽܘܬܳܟ ܠܰܢ ܡܰܚܙܺܝܬܳܐܗ̱ܝ܇ ܛܽܘܒܳܢܰܐܗ̱ܘ ܐܰܝܢܳܐ ܕܚܳܐܰܪ ܒܳܗܿ܇ ܛܽܘܒܳܗܿ ܓܶܝܪ ܠܳܐ ܡܶܬܡܰܠܰܠ܇ ܛܰܥܰܡܳܗܿ ܣܳܦܶܩ ܕܰܥܠܶܝܗܿ ܢܺܐܡܰܪ܇ ܛܳܒ ܛܽܘܒܳܗܿ ܕܰܐܝܢܳܐ ܕܫܳܘܶܐ ܠܶܗ܇ ܛܳܒ̈ܳܬܳܐ ܛܥܺܝܢܳܐ ܠܶܗ ܠܡܰܟܺܝܟܳܐ܇ ܗܳܐ ܛܰܒܥܶܗ ܕܰܐܒܳܐ ܒܳܗܿ܇ ܛܽܘܦܣܶܗ ܕܰܒܪܳܐ ܗܳܐ ܠܳܒܶܫ ܒܳܗܿ܀

ܩܰܒܪܰܢ ܟܽܠܝܽܘܡ ܚܳܐܰܪ ܠܰܢ܇ ܩܶܨܰܢ ܟܽܠ ܝܽܘܡ ܠܰܢ ܗܽܘ ܡܣܰܟܶܐ܇ ܩܶܢܛܳܐ ܠܬܰܝ̈ܳܒܶܐ ܠܳܐ ܥܰܒܕܰܢ܇ ܩܶܢܝܳܢܰܢ ܩܶܛܡܰܐܗ̱ܘ ܒܓܰܘ ܐܰܪܥܳܐ܇ ܩܶܢܛܳܐ ܕܡܰܘܬܳܐ ܗܳܐ ܡܰܪܗܶܒ ܠܰܢ܇ ܩܳܒܽܘܪܰܢ ܩܺܝܩܰܠܬܳܐ ܒܰܫܝܽܘܠ ܥܳܒܶܕ ܠܰܢ ܩܰܒܪܳܐ ܩܳܥܶܐ ܒܰܚܙܳܬܶܗ܇ ܕܩܰܠܺܝܠܳܐܺܝܬ ܬܰܐܳܘܽܘܢ ܨܶܝܕܰܝ܀

ܬܩܽܘܠ ܩܽܘܪܒܳܢܝ̱ ܥܰܡ ܛܰܝܒܽܘܬܳܟ܇ ܬܩܽܘܠ ܡܳܪܝ̱ ܘܰܐܣܶܩ ܠܳܐ ܟܺܐܢܳܐܺܝܬ܇ ܬܺܐܪܰܒܝ̱ ܬܰܘܕܺܝܬܝ̱ ܒܳܟ ܐܳܦܶܢ܇ ܚܰܣܺܝܪܳܐ ܬܺܐܩܰܪܝ̱ ܠܳܟ܇ ܬܝܳܒܽܘܬܝ̱ ܐܳܦܶܢ ܙܠܺܝܠܳܐ܇ ܬܳܚܽܘܒܝ ܘܬܶܙܟܶܐ ܚܰܝܳܒܽܘܬܰܢ܇ ܬܶܙܟܶܐ ܘܬܰܡܠܶܟ ܡܳܪܝ̱ ܒܰܣܺܝܡܽܘܬܳܟ܀

ܦܳܬܽܘܪ ܡܰܠܟܽܘܬܳܐ ܡܰܬܩܰܢ܇ ܘܳܝܠܶܗ ܠܰܐܝܢܳܐ ܕܠܳܐ ܫܳܘܶܐ ܠܶܗ܇ ܬܰܪܥܳܐ ܦܬܺܝܚ ܘܰܠܟܽܠ ܩܳܪܶܐ܇ ܘܳܝܠܶܗ ܠܰܐܝܢܳܐ ܕܠܳܐ ܥܳܐܶܠ܇ ܩܰܛܺܝܢܳܐ ܐܽܘܪܚܳܐ ܕܡܰܘܒܠܳܐ ܠܡܰܠܟܽܘܬܳܐ܇ ܦܰܬܝܳܐ ܐܰܝܕܳܐ ܕܡܰܘܒܠܳܐ ܠܓܺܗܰܢܳܐ܇ ܦܳܪܽܘܥܳܐ ܕܙܰܒܢܳܐ ܙܥܽܘܪܳܐ ܬܽܘܟ̈ܶܐ ܡܰܘܠܶܕ ܠܰܕܩܳܢܶܐ܀

ܚܰܣܺܝ ܠܺܝ ܪܳܚܶܡܢܳܫܳܐ܇ ܚܰܦܳܐ ܡܽܘ̈ܡܰܝ ܐܰܢ̱ܬ ܐܰܠܳܗܳܐ܇ ܚܽܘܣ ܥܠܰܝ ܘܰܐܗܡܳܐ ܒܚܰܘܒ̈ܰܝ܇ ܚܝܳܪܳܟ ܢܶܗܘܶܐ ܥܰܠ ܚܰܠܳܫܽܘܬܝ̱܇ ܐܳܦ ܚܰܛܳܝܽܘܬܝ̱ ܬܩܰܪܶܒܝ̱ ܠܳܟ ܕܳܫܢ̈ܶܐ ܕܫܽܘܒܚܳܐ܇ ܚܰܠܳܫܽܘܬܝ̱ ܦܺܐܪܳܐ ܕܬܰܘܕܺܝܬܳܐ܇ ܚܽܘܒܳܟ ܥܨܳܝܳܟ ܘܰܗܘܰܝܬ ܐ̱ܢܳܫܳܐ܇ ܚܰܢܳܢܳܐ ܕܚܽܘܣ ܥܰܠ ܫܰܦܠܰܢ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܡܰܢܽܘ ܠܰܢ ܡܳܪܝ̱ ܐܰܟܘܳܬܳܟ܇ ܐܳܣܝܳܐ ܕܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܰܐܣܺܝ ܟܺܐܒ̈ܶܐ ܕܢܰܦܫ̈ܳܬܰܢ ܘܚܰܣܺܝ ܚܰܘܒ̈ܶܐ ܕܐ̱ܢܳܫܽܘܬܰܢ܀

ܦܰܬܰܚ ܥܰܝ̈ܢܶܐ ܕܰܣܡܰܝ̈ܳܐ܇ ܘܕܽܘܓ̈ܶܐ ܘܚܰܪ̈ܫܶܐ ܐܰܫܡܰܥ ܗܘܳܐ܇ ܘܰܠܓܰܪܒܳܐ ܕܰܒܥܳܐ ܡܶܢܶܗ܇ ܕܰܟܺܝ ܘܰܐܚܠܶܡ ܠܰܡܫܰܪܝܳܐ܇ ܡܳܪܰܢ ܐܶܬܪܰܚܰܡܥܠܰܝܢ܀

 

ܕܨܰܦܪܳܐ ܕܪܰܚܶܡܥܠܰܝ ܩܳܠܳܐ ܚܰܘܒ̈ܰܝ ܘܰܚܛܳܗ̈ܰܝ

ܠܓܰܪ̈ܒܶܐ ܕܽܘܟܳܝܳܐ܇ ܫܰܟܶܢ ܒܝܰܕ ܪ̈ܰܚܡܰܘܗ̱ܝ܇ ܘܠܰܡܟܰܬܡ̈ܶܐ ܘܛܰܡ̈ܐܶܐ܇ ܫܰܟܶܢ ܚܰܘܠܳܠܳܐ܀

ܟܪ̈ܺܝܗܶܐ ܩܢܰܘ ܚܰܝܠܳܐ܇ ܘܡܰܪ̈ܥܶܐ ܚܽܘܠܡܳܢܳܐ܇ ܘܟܰܦܢ̈ܶܐ ܣܒܰܥܘ̱ ܘܰܐܳܘܬܰܪܘ̱܇ ܘܝܰܗܒܘ̱ ܠܶܗ ܬܶܫܒܽܘܚܬܳܐ܀

ܟܺܐܒ̈ܶܐ ܘܕܰܝܘ̈ܶܐ ܪܕܰܦ܇ ܡܶܢ ܓܶܢܣܳܐ ܐ̱ܢܳܫܳܐ܇ ܕܥܰܬܺܝܪ ܗܽܘ ܓܰܙܶܗ܇ ܘܡܶܡܬܽܘܡ ܠܳܐ ܚܳܣܰܪ܀

ܠܰܐܢ̱ܬܬܳܐ ܡܡܰܚܰܝܬܳܐ ܕܩܶܪܒܰܬ݀ ܠܡܰܪܛܽܘܛܶܗ܇ ܐܰܣܺܝ ܗܘܳܐ ܘܰܐܚܠܶܡ܇ ܠܟܺܐܒܳܐ ܕܰܡܥܺܝܩ ܠܳܗܿ܀

ܘܠܰܚܡܳܬܶܗ ܕܦܶܛܪܽܘܣ܇ ܛܪܰܕ ܗܘܳܐ ܐܶܫܳܬܳܗܿ܇ ܘܡܶܚܕܳܐ ܩܳܡܰܬ݀ ܠܳܗܿ܇ ܘܰܡܫܰܡܫܳܐ ܗܘܳܬ݀ ܠܶܗ܀

ܘܰܠܗܳܝ ܕܰܟܦܺܝܦܳܐ ܬܡܳܢܰܥܣܰܪ ܫܢܰܝ̈ܳܐ܇ ܦܰܫܛܳܗ ܘܰܐܩܺܝܡܳܗܿ ܘܒܳܐܣܝܽܘܬܶܗ ܚܰܕܝܳܗܿ܀

ܢܚܶܬ ܝܰܠܕܶܗ ܕܰܐܒܳܐ܇ ܓܢܺܝܙܳܐ ܡܶܢ ܪܰܘܡܳܐ܇ ܘܰܦܪܰܩ ܒܢܰܝ̈ܢܳܫܳܐ܇ ܫܽܘܒܚܳܐ ܠܫܳܠܽܘܚܶܗ܀

 

ܐܰܠܳܗܝ̱ ܐܰܠܳܗܝ̱܇ ܒܩܳܠܳܐ ܙܳܥ ܗܘܳܐ ܝܰܘܣܶܦ

ܛܠܺܝܡ̈ܳܢ ܟܽܠܗܶܝܢ ܐܳܬܰܘ̈ܳܬܳܐ܇ ܕܰܣܥܰܪ ܗܘܳܐ ܦܳܪܽܘܩܰܢ܇ ܡܶܢ ܫܰܪܒܬܳܐ ܡܰܠܝܰܬ ܪܽܘܫܥܳܐ܇ ܘܒܳܬܰܪ ܟܽܠܗܶܝܢ ܬܡܺܝ̈ܗܳܬܳܐ܇ ܠܰܚܕܳܐ ܚܰܕܬܳܐ ܫܶܐܠܰܬ݀ ܠܳܗܿ܇ ܘܝܰܗܒ ܠܳܗܿ ܐܳܬܳܐ ܕܢܽܘܚܳܡܳܐ܇ ܒܪܺܝܟ ܗܽܘ ܕܝܰܗܒ ܠܳܗܿ ܠܨܳܠܽܘܒܬܳܐ܇ ܐܳܬܳܐ ܕܰܨܠܺܝܒܶܗ ܕܗܽܘ ܥܰܩܪܳܗܿ܀

ܫܽܘܒܚܳܐ ܠܳܟ ܐܳܣܝܳܐ ܕܪ̈ܰܚܡܶܐ܇ ܘܥܳܨܽܘܒܳܐ ܕܰܟܪ̈ܺܝܗܶܐ܇ ܘܰܡܚܰܝܠܳܢܳܐ ܕܰܡܚܺܝ̈ܠܶܐ܇ ܦܳܬܰܚ ܥܰܝܢ̈ܶܐ ܕܰܣܡܰܝ̈ܳܐ܇ ܘܬܰܪܶܨ ܠܰܐܝܠܶܝܢ ܕܰܟܦܺܝܦܺܝܢ܇ ܘܦܳܫܶܛ ܠܰܐܝܠܶܝܢ ܕܟܽܘܣ̈ܬܳܢܺܝܢ܇ ܘܫܳܒܶܩ ܚܰܘܒ̈ܶܐ ܘܰܚܛܳܗ̈ܶܐ܇ ܘܰܡܩܺܝܡ ܠܰܐܝܠܶܝܢ ܕܢܰܦܺܝܠܺܝܢ܀

 

ܐ̱ܚܪܺܢܳܐ ܒܩܳܠܳܐ ܫܠܳܡ ܠܶܟܝ̱ ܡܰܠܝܰܬ ܛܰܝܒܽܘܬܳܐ

ܠܣܰܡܝܳܐ ܕܰܒܥܳܐ ܗܘܳܐ ܡܶܢܶܗ܇ ܦܰܬܰܚ ܠܶܗ ܥܰܝܢܰܘ̈ܗ̱ܝ܇ ܘܰܚܙܳܐ ܗܘܳܐ ܢܽܘܗܪܳܐ܇ ܘܰܠܗܳܝ ܕܰܕܡܳܐ ܪܳܕܶܐ ܗܘܳܐ ܝܰܗܒ ܚܽܘܠܡܳܢܳܐ܇ ܘܩܳܡܰܬ݀ ܡܶܢ ܡܶܪܕܺܝܬܳܐ܀

ܚܙܳܐ ܗܘܳܐ ܡܳܪܰܢ ܠܗܳܝ ܐܰܢ̱ܬܬܳܐ܇ ܕܰܐܣܺܝܪܳܐ ܗܘܳܬ݀܇ ܡܶܢܫܶܠܝ̱ ܘܰܟܦܺܝܦܳܐ܇ ܘܓܳܠܘ̱ ܪ̈ܰܚܡܰܘܗ̱ܝ ܕܺܝܚܺܝܕܳܝܳܐ ܘܰܩܪܶܒ ܨܶܝܕܶܝܗܿ܇ ܘܫܰܪܪܳܗܿ ܘܶܐܬܦܰܫܛܰܬ݀܀

ܫܪܳܐ ܐܶܢܽܘܢ ܡܶܢ ܟܽܘܪ̈ܗܳܢܶܐ܇ ܕܢܶܕܰܥ ܥܳܠܡܳܐ܇ ܕܡܳܪܰܐܗ̱ܘ ܕܒܶܪ̈ܝܳܬܳܐ܇ ܕܶܐܬܳܐ ܘܣܰܥܪܳܗܿ ܠܰܓܒܺܝܠܬܶܗ ܘܥܰܡܳܐ ܣܰܟܠܳܐ܇ ܠܳܐ ܨܒܳܐ ܕܰܢܗܰܝܡܶܢ܀

ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ

ܟܽܠ ܟܽܘܪ̈ܗܳܢܺܝܢ ܡܰܐܣܶܐ ܗܘܳܐ܇ ܐܳܣܝܳܐ ܕܪ̈ܰܚܡܶܐ ܕܶܐܫܬܰܕܰܪ܇ ܡܶܢ ܪܰܘܡܳܐ ܨܶܝܕ ܚܰܛܳܝ̈ܶܐ܇ ܕܢܰܐܣܶܐ ܗܘܳܐ ܠܗܽܘܢ ܟܺܐܒ̈ܰܝܗܽܘܢ܇ ܦܓܰܥܘ̱ ܒܶܗ ܓܰܪ̈ܒܶܐ ܘܶܐܬܕܰܟܺܝܽܘ܇ ܘܰܣܡܰܝ̈ܳܐ ܘܰܚܙܰܘ ܢܽܘܗܪܳܐ܇ ܐܳܦ ܚܰܛܳܝ̈ܶܐ ܐܶܙܕܰܕܰܩܘ̱ ܗ ܘ ܗ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܗܰܘ ܕܥܽܘܗܕܳܢܳܐ

ܗܰܘ ܕܶܐܚܰܕ ܗܘܳܐ܇ ܒܺܐܝܕܳܗܿ ܕܰܛܠܺܝܬܳܐ܇ ܘܰܫܪܳܗܿ ܡܶܢ ܦܟܳܪ̈ܶܐ ܕܡܰܘܬܳܐ܇ ܐܰܝܟ ܐܰܠܳܗܳܐ ܫܰܠܺܝܛ ܟܽܠ܇ ܠܘܳܬܳܟ܀

ܗܰܘ ܕܶܝܢ ܕܠܺܐܝܕܳܐ ܕܝܰܒܺܝܫܳܐ ܐܰܚܠܶܡ܇ ܒܫܰܒܬܳܐ ܠܥܺܝܢ ܟܶܢܫܳܐ ܕܐ̱ܢܳܫ̈ܳܐ܇ ܐܰܝܟ ܐܰܠܳܗܳܐ ܡܪܰܚܡܳܢܳܐ܇ ܠܘܳܬܳܟ܀

ܗܰܘ ܕܶܐܡܰܪ ܗܘܳܐ܇ ܠܰܐܢ̱ܬܬܳܐ ܚܰܛܳܝܬܳܐ܇ ܕܙܶܠܝ̱ ܐܰܢ̱ܬܬܳܐ ܫܒܺܝܩܺܝܢ ܚܰܘܒ̈ܰܝܟܰܝ̱܇ ܘܥܰܛܝܳܐܗ̱ܝ ܟܽܠܳܗܿ ܣܰܟܠܽܘܬܶܟܝ̱܇ ܠܘܳܬܳܟ܀

ܗܰܘ ܕܡܶܢ ܐܰܣܽܘܪ̈ܶܐ ܕܳܐܟܶܠܩܰܪܨܳܐ܇ ܠܓܰܒܪܳܐ ܕܺܐܝܬ ܗܘܳܐ ܒܶܗ ܠܶܓܝܽܘܢ܇ ܫܪܳܐ ܘܚܰܪܰܪ ܐܰܝܟ ܐܰܠܳܗܳܐ܀

ܡܫܺܝܚܳܐ ܐܰܠܳܗܳܐ ܗܰܘ ܕܰܠܠܶܓܝܽܘܢ܇ ܒܝܰܕ ܚܙܺܝܪ̈ܶܐ ܒܡܰܝ̈ܳܐ ܚܰܢܶܩܬ܇ ܘܰܠܓܰܒܪܳܐ ܦܪܰܩܬ ܘܫܰܘܙܶܒܬ ܡܳܪܝ̱܇ ܠܘܳܬܳܟ܀

ܗܰܘ ܕܰܐܝܟ ܒܰܪܢܳܫܳܐ ܥܰܠ ܠܰܚܠܽܘܠܳܐ܇ ܘܡܰܝ̈ܳܐ ܠܚܰܡܪܳܐ ܫܰܚܠܶܦ ܗܘܳܐ܇ ܐܰܝܟ ܐܰܠܳܗܳܐ ܫܰܠܺܝܛ ܟܽܠ ܠܘܳܬܳܟ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܠܰܐܠܳܗܳܐ ܕܒܰܐܬܽܘܢܳܐ ܕܢܽܘܪܳܐ

ܠܰܐܠܳܗܳܐ ܕܥܺܝܪ̈ܶܐ ܡܫܰܡܫܺܝܢ ܠܶܗ܇ ܘܡܶܛܽܠ ܕܰܗܘܳܐ ܒܰܪܢܳܫܳܐ ܕܡܶܟ ܒܰܣܦܺܝܢ̱ܬܳܐ܇ ܘܰܐܝܟ ܒܳܪܽܘܝܳܐ ܕܰܟܝܳܢܳܐ܇ ܠܪܽܘܚܳܐ ܟܠܳܐ ܘܝܰܡܳܐ ܫܰܬܶܩ܇ ܕܠܶܗ ܫܰܒܰܚܘ̱ ܥܰܒܕ̈ܰܘܗ̱ܝ ܘܟܽܠܗܽܘܢ ܒܶܪ̈ܝܳܬܳܐ܇ ܘܝܰܬܺܝܪ ܢܪܰܡܪܶܡ ܘܢܰܘܪܶܒ܀

 

ܡܶܢ ܫܡܰܝܳܐ ܘܡܰܠܰܐܟ̈ܶܐ

ܫܽܘܒܚܳܐ ܠܳܐܣܝܳܐ ܫܡܰܝܳܢܳܐ܇ ܕܰܢܚܶܬ ܡܶܢ ܪܰܘܡܳܐ ܠܥܽܘܡܩܳܐ܇ ܕܢܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ ܕܓܶܢܣܳܐ ܕܒܶܝܬ ܐܳܕܳܡ܇ ܦܓܰܥܘ̱ ܒܶܗ ܓܰܪ̈ܒܶܐ ܘܶܐܬܕܰܟܺܝܘ܇ ܘܰܣܡܰܝ̈ܳܐ ܘܰܚܙܰܘ ܢܽܘܗܪܳܐ܇ ܘܳܐܦ ܚܰܛܳܝܬܳܐ ܕܩܶܪܒܰܬ݀ ܠܶܗ ܢܶܣܒܰܬ݀ ܫܽܘܒܩܳܢܳܐ܀

ܐܶܡܪܰܬ݀ ܠܶܗ ܗܳܝ ܚܰܛܳܝܬܳܐ܇ ܟܰܕ ܒܳܟܝܳܐ ܘܫܳܦ̈ܥܳܢ ܕܶܡܥܶܝ̈ܗܿ܇ ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ܇ ܚܰܣܳܐ ܠܺܝ ܚܰܘܒ̈ܰܝ܇ ܕܚܳܣܶܡ ܒܺܝ ܣܳܛܳܢܳܐ܇ ܘܢܶܚܕܽܘܢ ܒܺܝ ܥܺܝܪ̈ܰܝ ܪܰܘܡܳܐ܇ ܘܢܺܐܡܪܽܘܢ ܕܰܒܪܺܝܟ ܚܰܢܳܢܳܐ ܕܚܳܢܳܗܿ ܠܰܓܒܺܝܠܬܶܗ܀

 

ܡܫܺܝܚܳܐ ܕܰܡܠܰܟ ܢܽܘܚܳܡܳܐ܇

ܒܓܰܘ ܝܺܗܽܘܕ ܬܶܕܡܽܘܪܬܳܐ ܚܙܺܝܼܬ܇ ܗܰܘ ܐܳܣܝܳܐ ܕܪ̈ܰܚܡܶܐ ܐܶܬܓܰܠܺܝ܇ ܠܓܰܪ̈ܒܶܐ ܒܡܶܠܬܶܗ ܡܕܰܟܶܐ ܗܘܳܐ܇ ܘܠܰܣܡܰܝ̈ܳܐ ܒܪܽܘܩܶܗ ܦܬܰܚ܀

ܩܢܰܘ ܒܶܗ ܓܰܪ̈ܒܶܐ ܕܽܘܟܳܝܳܐ܇ ܘܰܡܫܰܪ̈ܰܝܳܐ ܫܽܘܪܳܪܳܐ܇ ܘܚܰܛܳܝ̈ܶܐ ܫܽܘܒܩܳܢ ܚܰܘܒ̈ܶܐ܇ ܘܳܐܦ ܡܺܝ̈ܬܶܐ ܩܝܳܡܬܳܐ ܘܚܰܝ̈ܶܐ܀

 

ܩܳܠܳܐ ܕܨܰܦܪܳܐ܇ ܙܳܕܶܩ ܕܢܶܗܘܶܐ܇

ܡܰܢܽܘ ܗܳܢܳܐ܇ ܕܶܐܙܕܰܡܰܢ ܠܗܳܝ ܡܶܫܬܽܘܬܳܐ ܗܽܘ ܘܬܰܠܡܺܝܕܰܘ̈ܗ̱ܝ܇ ܘܰܐܪܡܺܝ ܬܰܡܳܢ܇ ܪܽܘܡܝܳܢܳܐ ܘܰܢܦܰܩ ܛܶܐܒܶܗ ܒܟܽܠܳܗܿ ܒܪܺܝܬܳܐ܇ ܐܺܝܬܰܘܗ̱ܝ ܗܳܢܳܐ ܒܰܪ ܕܰܘܺܝܕ ܡܰܠܟܳܐ܇ ܕܶܐܬܳܐ ܘܰܕܢܰܚ ܡܶܢ ܒܬܽܘܠܬܳܐ ܡܰܪܝܰܡ܇ ܘܶܐܙܰܠ ܥܰܡܗܽܘܢ ܠܗܳܝ ܡܶܫܬܽܘܬܳܐ ܕܰܒܩܳܛܢܶܐ܇ ܘܫܰܚܠܶܦ ܐܰܝܟ ܐܰܠܳܗܳܐ܇ ܡܶܢ ܡܰܝ̈ܳܐ ܚܰܡܪܳܐ ܛܳܒܳܐ܇ ܢܶܙܡܰܪ ܫܽܘܒܚܳܐ܇ ܠܶܗ ܘܠܰܐܒܽܘܗ̱ܝ ܘܰܠܪܽܘܚܩܽܘܕܫܳܐ ܒܟܽܠܥܶܕܳܢܺܝ̈ܢ܀

ܣܰܓܺܝ ܪܰܒܳܐܗ̱ܝ ܬܶܕܡܽܘܪܬܳܐ ܕܰܣܥܰܪ ܡܳܪܰܢ ܒܓܶܢܣܶܗ ܕܳܐܕܳܡ܇ ܡܶܛܽܠ ܪܳܚܡܶܗ ܠܳܥܳܙܳܪ ܠܩܰܒܪܳܐ ܐܶܙܰܠ ܥܰܡ ܬܰܠܡܺܝܕܰܘ̈ܗ̱ܝ܇ ܘܶܐܫܟܰܚ ܐܶܢܽܘܢ ܕܒܳܟܶܝܢ ܘܰܐܒܺܝܠܺܝܢ܇ ܫܰܐܶܠ ܐܶܢܽܘܢ ܕܰܐܝܟܳܐ ܣܳܡܬܽܘܢܳܝܗ̱ܝ܇ ܘܶܐܡܰܪܽܘܢ ܠܶܗ܇ ܕܰܐܪܒܥܳܐ ܠܶܗ ܓܶܝܪ ܝܰܘ̈ܡܺܝܢ܇ ܡܶܢ ܕܰܗܘܳܐ ܒܓܰܘ ܩܰܒܪܳܐ܇ ܩܪܳܐ ܠܶܗ ܒܩܳܠܳܐ ܘܰܐܩܺܝܡܶܗ܇ ܘܟܶܢܫ̈ܶܐ ܕܰܚܙܰܘ ܬܶܕܡܽܘܪܬܳܐ ܙܡܰܪܘ̱ ܬܶܫܒܽܘܚܬܳܐ܇ ܗ ܠܰܡܶܢܰܚܡܳܢܶܗ܀

 

ܐ̱ܚܪܺܢܳܐ ܒܩܳܠܳܐ܇ ܡܳܪܶܗ ܕܪܰܡܫܳܐ

ܠܳܟ ܬܶܫܒܽܘܚܬܳܐ܇ ܡܶܠܬܳܐ ܐܰܠܳܗܳܐ܇ ܕܰܨܒܰܝܬ ܒܪ̈ܰܚܡܰܝܟ܇ ܘܰܕܡܶܟܬ ܒܰܣܦܺܝܢ̱ܬܳܐ܇ ܘܰܒܬܰܟܫܶܦܬܳܐ ܕܬܰܠܡܺܝܕܰܝ̈ܟ ܟܐܰܝܬ ܒܶܗ ܒܝܰܡܳܐ ܪܰܒܳܐ܇ ܘܶܐܬܬܢܺܝܚܘ̱ ܡܰܚܫܽܘܠܰܘ̈ܗ̱ܝ܀

ܝܰܡܺܝܢܳܟ ܡܳܪܝ̱܇ ܕܰܒܪ̈ܰܚܡܶܐ ܦܰܫܛܬܳܗܿ ܘܰܣܡܰܟܬ ܘܰܐܩܺܝܡܬ ܠܒܰܪܬܶܗ ܕܝܽܘܳܐܪܳܫ܇ ܗܺܝ ܬܶܬܠܰܘܶܐ ܠܥܺܕܬܳܐ ܩܰܕܺܝܫܬܳܐ܇ ܘܢܶܫܬܰܘܙܰܒ ܒܳܗܿ ܡܶܢ ܟܽܠ ܢܶܟܝ̈ܳܢܺܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܕܠܳܐ ܐܺܝܬ ܚܰܡܪܳܐ ܐܶܡܪܰܬ݀ ܒܰܠܚܽܘܕ ܛܽܘܒܳܢܺܝܬܳܐ܇ ܟܰܕ ܚܽܘܫܳܒܶܝ̈ܗܿ ܬܢܰܘ ܟܰܣܝܳܐܺܝܬ ܣܰܓܺܝ̈ܐܳܬܳܐ܇ ܣܥܽܘܪ ܒܰܚܢܳܢܳܟ ܠܚܰܬܢܳܐ ܕܰܓܢܶܝܬ ܥܰܠ ܦܳܬܽܘܪܶܗ܇ ܘܳܠܐ ܬܶܫܬܰܡܰܫܝ̱ ܚܰܣܺܝܪܽܘܬܳܐ ܒܒܰܝܬܳܐ ܕܰܩܪܳܟ܀

ܫܽܘܒܚܳܐ ܠܛܳܒܳܐ ܕܰܐܝܟ ܒܰܪܢܳܫܳܐ ܥܰܠ ܠܡܶܫܬܽܘܬܳܐ܇ ܘܫܰܚܠܶܦ ܡܰܝ̈ܳܐ ܠܚܰܡܪܳܐ ܛܳܒܳܐ ܐܰܝܟ ܐܰܠܳܗܳܐ܇ ܐܶܫܬܺܝܘ ܙܡܺܝ̈ܢܶܐ ܘܰܚܕܺܝ ܠܶܒܗܽܘܢ ܘܰܙܡܰܪܘ̱ ܫܽܘܒܚܳܐ܇ ܠܒܰܪ ܐܰܠܳܗܳܐ ܕܰܓܢܳܐ ܥܰܡܗܽܘܢ ܠܶܗ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ܇ ܩܳܠܳܐ ܒܰܕܡܽܘܬ ܒܶܣܡ̈ܶܐ

ܐܺܡܰܪ ܡܳܕܶܝܢ ܥܰܠ ܗܰܘ ܐܰܒܠܳܗܿ ܕܰܡܓܰܙܰܝܬܳܐ܇ ܕܰܟܡܳܐ ܚܢܺܝܓ ܗܘܳܐ ܚܰܫܳܐ ܕܰܡܛܳܐ܇ ܥܰܠ ܝܺܚܺܝܕܳܗܿ ܐܶܬܢܶܐ ܫܰܪܒܳܗܿ ܕܡܳܪܰܬ ܟܺܐܒ̈ܶܐ܇ ܟܰܕ ܚܳܐܶܫ ܐ̱ܢܳܐ ܒܥܶܩ̈ܒܳܬܳܗܿ܀

ܡܶܢܰܚܶܡ ܡܺܝ̈ܬܶܐ ܦܓܰܥ ܒܰܐܪܡܶܠܬܳܐ ܕܡܺܝܬ ܝܺܚܺܝܕܳܗܿ܇ ܘܟܰܕ ܠܳܐ ܒܥܳܬܶܗ ܩܪܶܒ ܨܶܝܕܶܝܗܿ܇ ܩܪܳܐ ܠܰܥܠܰܝܡܳܐ ܠܳܟ ܐܳܡܰܪ ܐ̱ܢܳܐ ܩܽܘܡ ܡܶܢ ܬܰܡܳܢ܇ ܘܩܳܡ ܗܘܳܐ ܫܰܪܺܝ ܕܰܢܡܰܠܶܠ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܰܝܟ ܒܰܪܢܳܫܳܐ ܒܫܽܘ̈ܩܰܝ ܨܶܗܝܽܘܢ ܨܒܳܐ ܕܰܢܗܰܠܶܟ܇ ܕܰܐܪܥܳܐ ܕܠܺܝܛܳܐ ܒܝܰܕ ܕܽܘܪ̈ܟܳܬܶܗ ܬܶܬܒܰܪܰܟܝ̱ ܠܳܗܿ܇ ܐܰܪܡܺܝ ܐܽܘܪܚܶܗ ܒܰܝܢܳܬ ܟܰܪ̈ܟܶܐ ܘܰܐܬܪ̈ܰܘܳܬܳܐ܇ ܕܰܢܫܰܝܶܢ ܗܘܳܐ ܠܥܳܠܡܳܐ ܫܓܺܝܫܳܐ ܒܡܰܟܺܝܟܽܘܬܶܗ܀

ܢܫܰܒܚܽܘܢܳܟ ܡܳܪܝ̱ ܥܰܡܡ̈ܶܐ ܛܽܘܗ̈ܡܶܐ ܘܟܽܠ ܫܰܪ̈ܒܳܬܳܐ܇ ܕܒܳܟ ܐܶܬܰܐܣܺܝ ܡܶܢ ܢܽܘܟ̈ܬܳܬܳܐ ܕܳܐܟܶܠܩܰܪܨܳܐ܇ ܟܪ̈ܺܝܗܶܐ ܕܰܐܣܺܝܬ ܓܰܪ̈ܒܶܐ ܕܕܰܟܺܝܬ ܕܰܝܘ̈ܶܐ ܕܰܛܪܰܕܬ܇ ܢܶܬܠܽܘܢ ܫܽܘܒܚܳܐ ܠܳܟ ܡܳܪܝ̱ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ

ܠܩܳܛܢܶܐ ܐܶܙܕܰܡܰܢ ܡܳܪܰܢ܇ ܘܰܣܥܰܪ ܬܰܡܳܢ ܬܶܕܡܽܘܪܬܳܐ܇ ܘܰܐܦܨܰܚ ܐܶܢܽܘܢ ܠܰܣܡܺܝ̈ܟܶܐ ܕܰܓܢܶܝܢ ܒܫܳܪܽܘܬܳܐ܇ ܠܡܰܝ̈ܳܐ ܪܡܰܙ ܘܰܗ̱ܘܰܘ ܚܰܡܪܳܐ܇ ܘܰܩܢܳܐ ܛܰܥܰܡܳܐ ܕܚܰܠܝܽܘܬܳܐ܇ ܘܟܰܕ ܐܶܫܬܺܝܘ ܣܡܺܝ̈ܟܶܐ ܫܰܪܺܝܘ ܬܶܫܒܽܘܚܬܳܐ ܙܳܡܪܺܝܢ܀

ܠܓܰܘ ܝܰܡܳܐ ܥܰܠ ܗܘܳܐ ܡܳܪܰܢ܇ ܐܰܝܟ ܒܰܪܢܳܫܳܐ ܕܡܶܟ ܒܶܐܠܦܳܐ܇ ܡܰܚܫܽܘ̈ܠܶܐ ܕܝܰܡܳܐ ܐܶܬܬܥܺܝܪܘ̱܇ ܘܙܳܥܘ̱ ܗ̱ܘܰܘ ܬܰܠܡܺܝܕ̈ܶܐ܇ ܘܰܩܪܶܒܘ̱ ܨܶܝܕܰܘܗ̱ܝ ܘܳܐܡܪܺܝܢ ܠܶܗ܇ ܡܳܪܰܢ ܡܳܪܰܢ ܐܳܒܕܺܝܢܰܢ ܐܶܬܬܥܺܝܪ ܘܰܟܐܳܐ ܒܝܰܡܳܐ ܘܰܫܠܰܝ̈ܝ ܪ̈ܽܘܚܶܐ ܘܶܐܫܬܰܬܰܩ̈ܝ̱܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܰܢ̱ܬܬܳܐ ܕܰܬܪܺܝܥ ܗܘܳܐ ܪܶܕܝܳܗܿ܇ ܡܶܢ ܢܽܘܓܪܳܐ ܓܶܝܪ ܕܰܫܢܰܝ̈ܳܐ܇ ܘܶܐܬܚܰܫܒܰܬ݀ ܗܘܳܬ݀ ܒܪܶܥܝܳܢܳܗܿ܇ ܕܗܳܢܰܘ ܐܳܣܝܳܐ ܫܡܰܝܳܢܳܐ܀

ܐܶܚܒܽܘܨ ܒܶܝܬ ܟܶܢܫ̈ܶܐ ܘܶܐܥܽܘܠ܇ ܘܶܐܣܰܒ ܡܶܢܶܗ ܫܽܘܒܩܳܢܳܐ܇ ܕܶܐܢ ܚܳܙܶܝܢ ܠܺܝ ܬܰܠܡܺܝܕܰܘ̈ܗ̱ܝ܇ ܡܶܢܰܬܦܺܝܢ ܠܺܝ ܘܰܡܓܰܥܪܺܝܢ ܒܺܝ܀

 

ܕܰܬܫܰܥܫܳܥܺܝ̈ܢ܇ ܒܩܳܠܳܐ ܗܰܒܠܳܗܿ ܠܥܺܕܬܳܟ

ܠܓܰܘ ܩܳܛܢܶܐ ܡܕܺܝܢ̱ܬܳܐ܇ ܐܶܙܕܰܡܰܢ ܒܰܪ ܐܰܠܳܗܳܐ܇ ܘܰܣܥܰܪ ܬܰܡܳܢ ܐܳܬܳܐ ܕܬܶܕܡܽܘܪܬܳܐ ܕܰܦܩܰܕ ܗܘܳܐ ܠܡܰܝ̈ܳܐ܇ ܕܶܐܫܬܰܚܠܰܦܘ̱ ܘܰܗ̱ܘܰܘ ܚܰܡܪܳܐ܇ ܘܰܐܬܗܰܪ ܐܶܢܽܘܢ ܠܟܽܠ ܕܰܣܡܺܝܟܺܝܢ܀

ܬܶܗܪܳܐ ܘܕܽܘܡܳܪܳܐ܇ ܣܥܰܪ ܡܳܪܰܢ ܒܰܐܬܪܳܐ ܚܽܘܪܒܳܐ ܟܰܕ ܒܰܪܶܟ ܗܘܳܐ ܥܰܠ ܠܰܚܡܳܐ ܙܥܽܘܪܳܐ܇ ܘܰܣܒܰܥܘ̱ ܗ̱ܘܰܘ ܟܶܢ̈ܫܶܐ ܘܝܰܒܶܒܘ̱ ܩܳܠܰܝ̈ ܬܶܫܒܽܘܚܬܳܐ܇ ܠܗܰܘ ܕܰܒܪܶܡܙܶܗ ܡܬܰܪܣܶܐ ܟܽܠܒܶܪ̈ܝܳܢ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ܇

ܐܰܢ̱ܬܬܳܐ ܟܢܰܥܢܰܝܬܳܐ܇ ܠܡܳܪܰܢ ܐܶܬܟܰܫܦܰܬ݀܇ ܒܕܶܡܥ̈ܶܐ ܚܢܺܝܓ̈ܳܬܳܐ ܘܗܳܟܰܢܳܐ ܐܶܡܪܰܬ݀܇ ܚܽܘܣ ܡܳܪܝ̱ ܥܰܠ ܐܰܡܬܳܟ܇ ܕܒܺܝܫܳܐ ܫܳܚܶܩ ܠܳܗܿ܀

ܡܡܰܚܰܝܬܳܐ ܩܶܪܒܰܬ݀ ܠܟܶܢܦܳܐ ܕܡܰܪܛܽܘܛܶܗ܇ ܘܢܶܣܒܰܬ݀ ܚܽܘܠܡܳܢܳܐ܇ ܠܟܺܐܒܳܗܿ ܕܰܟܣܶܐ ܗܘܳܐ܇ ܘܰܩܥܳܬ݀ ܬܶܫܒܽܘܚܬܳܐ ܠܚܰܢܳܢܳܐ ܕܣܰܥܪܳܗܿ܀

 

ܬܽܘܒ ܕܰܬܠܳܬܳܐ ܒܫܰܒܳܐ ܕܬܶܕܡܪ̈ܳܬܳܐ

ܩܰܕܡܳܝܳܐ ܕܪܰܡܫܳܐ ܒܩܳܠܳܐ ܐܶܡܳܐ ܕܟܺܝܬܳܐ܇

ܗܰܘ ܕܰܠܓܰܠ̈ܠܶܐ ܘܡܰܚܫܽܘ̈ܠܶܐ ܕܝܰܡܳܐ܇ ܡܶܢ ܬܰܠܡܺܝܕܰܘ̈ܗ̱ܝ ܫܰܬܶܩ ܒܰܚܢܳܢܶܗ܇ ܪܰܚܶܡܥܠܰܝ܀

ܗܰܘ ܕܰܠܓܰܒܪܳܐ܇ ܕܺܐܝܬ ܗܘܳܐ ܒܶܗ ܠܶܓܝܽܘܢ܇ ܡܶܢ ܐܣܘܪ̈ܐ ܘܣܘܛܡ̈ܐ ܚܪܪܬܝܗܝ ܪܰܚܶܡܥܠܰܝ ܐܠܠܗܐ܀

ܗܰܘ ܕܰܐܣܺܝ ܗܘܳܐ܇ ܒܳܟܶܢܦܳܐ ܕܡܰܪܛܽܘܛܶܗ܇ ܠܰܡܡܰܚܰܝܬܳܐ ܕܰܕܡܳܗ ܪܳܕܶܐ ܗܘܳܐ ܪܰܚܶܡܥܠܰܝ܀

ܗܰܘ ܕܡܶܢ ܫܶܢ̈ܶܐ ܕܡܰܘܬܳܐ ܐܰܦܶܩ ܗܘܳܐ܇ ܠܠܳܥܳܙܳܪ ܪܳܚܡܶܗ܇ ܘܝܰܗܒܶܗ ܠܰܐܚܘ̈ܳܬܶܗ܀

ܗܰܘ ܕܰܒܪ̈ܰܚܡܰܘܗ̱ܝ܇ ܢܽܘܗܪܳܐ ܫܰܟܶܢ ܗܘܳܐ܇ ܠܰܬܪܶܝܢ ܣܡܰܝ̈ܳܐ ܐܰܝܟ ܗܰܝܡܳܢܽܘܬܗܽܘܢ܀

ܗܰܘ ܕܠܶܐܫܳܬܳܐ܇ ܕܰܚܡܳܬܶܗ ܕܦܶܛܪܽܘܣ܇ ܒܓܶܫܬܳܐ ܕܺܐܝܕܶܗ ܩܳܡܰܬ݀ ܘܶܐܬܚܰܠܡܰܬ݀܇ ܪܰܚܶܡܥܠܰܝ ܐܰܠܳܗܳܐ܀

 

ܡܳܪܝܳܐ ܩܪܺܝܬܳܟ܇

ܒܩܳܠܳܐ ܠܢܳܨܪܰܬ ܡܕܺܝܢ̱ܬܳܐ

ܛܥܺܝܢ ܗܘܳܐ ܡܳܪܰܢ܇ ܥܽܘܕܪ̈ܳܢܶܐ ܒܰܕܡܽܘܬ ܐܳܣܝܳܐ܇ ܘܩܳܐܶܡ ܗܘܳܐ ܒܰܝܢܳܬ ܟܶܢܫ̈ܶܐ܇ ܩܪܶܒܘ̱ ܠܶܗ ܓܰܪ̈ܒܶܐ܇ ܘܶܐܬܕܰܟܺܝܘ܇ ܘܰܣܡܰܝ̈ܳܐ ܬܽܘܒ ܚܙܰܘ ܢܽܘܗܪܳܐ܇ ܘܚܰܛܳܝ̈ܶܐ ܢܣܰܒܘ̱ ܫܽܘܒܩܳܢܳܐ܇ ܐܰܠܳܗܳܐ܀

ܠܗܳܝ ܐܰܪܡܶܠܬܳܐ ܕܰܕܒܺܝܪܺܝܢ ܗ̱ܘܰܘ ܠܺܝܚܺܝܕܳܗܿ ܒܽܐܘܪܚܳܐ ܕܩܰܒܪܳܐ܇ ܒܩܳܠܳܟ ܚܰܝܳܐ ܚܰܕܺܝܬܳܗܿ ܟܰܕ ܡܰܙܥܶܩ ܗܘܰܝܬ ܦܳܩܽܘܕܳܐܺܝܬ܇ ܥܠܰܝܡܳܐ ܠܳܟ ܐܳܡܰܪ ܐ̱ܢܳܐ ܩܽܘܡ܇ ܐܰܠܳܗܳܐ ܟܽܠ܀

ܐܶܡܰܪ ܡܳܪܰܢ܇ ܠܗܳܝ ܐܰܢ̱ܬܬܳܐ܇ ܗܰܝܡܳܢܽܘܬܶܟܝ̱ ܐܰܚܝܰܬܶܟܝ̱ ܙܶܠܝ̱ ܒܰܫܠܳܡܳܐ܇ ܫܰܪܺܝܪ ܡܶܟܺܝܠ ܚܽܘܠܡܳܢܶܟܝ̱܇ ܘܟܺܐܒܳܐ ܠܓܽܘܫܡܶܟܝ̱܇ ܠܳܐ ܣܳܟ ܩܳܪܶܒ܇ ܒܪܺܝܟ ܛܳܒܳܐ ܕܰܐܣܺܝ ܟܺܐܒ̈ܰܝܢ܇ ܐܰܠܳܗܳܐ܀

 

ܩܪܺܝܬܳܟ ܡܳܪܝܳܐ ܡܶܢ ܟܽܠܶܗ

ܐܰܢ̱ܬ ܡܳܪܝ̱ ܕܰܐܣܺܝܬ ܠܗܳܝ ܡܡܰܚܰܝܬܳܐ܇ ܚܰܣܳܐ ܚܰܘܒ̈ܰܝܢ܇ ܘܰܐܚܠܶܡ ܟܺܐܒ̈ܶܐ ܕܢܰܦܫ̈ܳܬܰܢ܀

ܐܰܢ̱ܬ ܕܰܒܕܰܒܪܳܐ ܣܰܒܥܳܐ ܐܰܣܓܺܝܬ܇ ܐܳܦܠܰܢ ܡܳܪܰܢ ܐܰܣܓܳܐ ܠܰܢ ܚܢܳܢܳܐ ܘܪ̈ܰܚܡܶܐ܀

ܐܰܢ̱ܬ ܕܰܠܣܰܡܝܳܐ ܢܽܘܗܪܳܐ ܫܰܟܶܢܬ܇ ܐܰܕܢܰܚ ܢܽܘܗܪܳܟ܇ ܒܠܶܒܰܘ̈ܳܬܳܐ ܕܣܳܓܽܘ̈ܕܰܝܟ܀

 

ܩܳܠܳܐ ܕܪܰܡܫܳܐ

ܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܗܳܝ ܕܰܕܡܳܗܿ ܪܳܕܶܐ ܗܘܳܐ ܣܰܓܺܝ ܠܐܺܝܘ ܒܳܗܿ܇ ܐܳܣܰܘ̈ܳܬܳܐ ܒܣܰܡ̈ܡܳܢܶܐ ܘܠܳܐ ܐܰܘܬܪܽܘܗܿ ܡܶܕܶܡ܇ ܚܙܳܬ݀ ܠܝܶܫܽܘܥ ܐܳܝܣܳܐ ܕܪ̈ܰܚܡܶܐ ܕܰܢܚܶܬ ܠܰܐܪܥܳܐ܇ ܚܶܒܨܰܬ݀ ܥܶܠܰܬ݀ ܒܶܝܬ ܟܶܢܫ̈ܶܐ ܕܬܶܚܙܶܐ ܗܘܳܬ݀ ܠܝܶܫܽܘܥ܇ ܟܰܣܝܳܐܺܝܬ ܩܶܪܒܰܬ݀ ܠܰܠܒܽܘܫܶܗ܇ ܓܰܠܝܳܐܺܝܬ ܢܶܣܒܰܬ݀ ܚܽܘܠܡܳܢܳܐ܇ ܒܪܺܝܟ ܕܰܚܙܳܐ ܗܰܝܡܳܢܽܘܬܳܗܿ ܘܝܰܗܒ ܠܳܗܿ ܚܽܘܠܡܳܢܳܐ܀

ܫܩܰܠ ܡܳܪܰܢ ܥܽܘܕܪ̈ܳܢܶܐ ܕܳܐܬܶܐ ܠܰܐܬܪܰܢ܇ ܘܰܪܕܰܘ ܡܶܢܶܗ ܥܽܘܕܪ̈ܳܢܶܐ ܐܰܝܟ ܝܰܡܳܐ ܠܥܳܠܡܳܐ܇ ܦܓܰܥ ܒܶܗ ܓܰܪ̈ܒܶܐ ܘܶܐܬܕܰܟܺܝܘ ܐܰܝܟ ܨܶܒܝܳܢܶܗ܇ ܘܠܰܡܫܰܪܝܳܐ ܝܰܗܒ ܚܽܘܠܡܳܢܳܐ ܐܰܝܟ ܕܰܒܥܳܐ ܡܶܢܶܗ܇ ܠܩܶܢܛܪܽܘܢܳܐ ܐܰܚܠܶܡ ܗܘܳܐ ܠܛܰܠܝܶܗ܇ ܘܠܰܐܪܡܶܠܬܳܐ ܐܰܦܢܺܝ ܠܺܝܚܺܝܕܳܗܿ܇ ܘܝܶܕܥܰܬ݀ ܐܰܪܥܳܐ ܘܥܳܡܽܘܪ̈ܶܝܗܿ܇ ܕܗܽܘܝܽܘ ܐܰܠܳܗܳܐ܀

 

ܡܪܰܚܡܳܢܳܐ ܘܒܰܣܺܝܡܳܐ ܕܰܫܦܺܝܥ ܚܽܘܒܶܗ܇ ܘܡܶܬܪܰܚܰܡ ܥܰܠ ܐ̱ܢܳܫܽܘܬܰܢ ܒܣܽܘܓܐܳܐ ܕܰܚܢܳܢܶܗ܇ ܠܓܰܪ̈ܒܶܐ ܕܰܟܺܝ ܒܡܶܠܬܶܗ ܣܡ̈ܰܝܳܐ ܦܰܬܰܚ܇ ܘܰܠܚܰܛܳܝ̈ܶܐ ܕܰܩܪܶܒܘ̱ ܠܶܗ ܚܰܣܺܝ ܚܰܘܒܰܝ̈ܗܽܘܢ܇ ܐܳܦܠܰܢ ܡܳܪܝ̱ ܚܰܣܳܐ ܚܰܘܒ̈ܳܬܰܢ܇ ܘܰܐܢܗܰܪ ܠܰܢ ܥܰܝܢ̈ܶܐ ܕܢܰܦܫ̈ܳܬܰܢ܇ ܘܕܰܟܳܐ ܠܰܢ ܡܶܢܟܽܠ ܡܽܘܡ̈ܶܐ ܚܽܘܣ ܘܶܐܬܪܰܚܰܡܥܠܰܝܢ܀

 

ܛܽܘܒܰܝܟܝ̱ ܥܺܕܬܳܐ

ܟܰܕ ܪܳܕܶܐ ܗܘܳܐ܇ ܦܳܪܽܘܩܰܢ ܒܰܐܪܥܳܐ ܕܺܝܗܽܘܕ܇ ܛܶܐܒܶܗ ܫܶܡܥܰܬ݀ ܟܢܰܥܢܰܝܬܳܐ܇ ܘܢܶܦܩܰܬ݀ ܒܳܬܪܶܗ ܟܰܕ ܩܳܥܝܳܐ܇ ܕܡܳܪܝ̱ ܚܽܘܪ ܒܺܝ ܕܰܛܠܺܝܡܳܐ ܐ̱ܢܳܐ܇ ܡܶܢ ܒܺܝܫܳܐ ܕܰܡܫܰܢܶܩ ܠܺܝ܇ ܒܰܪܬܳܐ ܝܺܚܺܝܕܳܝܬܳܐ ܐܺܝܬ ܠܺܝ܇ ܕܰܫܒܳܗܿ ܒܺܝܫܳܐ ܒܰܚܣܳܡܶܗ܇ ܓܥܽܘܪ ܒܶܗ ܡܳܪܝ̱ ܐܶܢ ܨܳܒܶܐ ܐܰܢ̱ܬ܇ ܘܰܐܥܕܳܗܿ ܡܶܢ ܐܺܝܕܶܗ ܕܒܺܝܫܳܐ܀

ܝܰܡܳܐ ܕܪ̈ܰܚܡܶܐ܇ ܕܰܢܚܶܬ ܡܶܢ ܪܰܘܡܳܐ ܠܥܽܘܡܩܳܐ܇ ܕܢܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܰܒܢܰܝ̈ܢܳܫܳܐ ܡܳܝܽܘ̈ܬܶܐ܇ ܘܰܒܝܰܕ ܣܰܡܳܐ ܕܥܽܘܕܪ̈ܳܢܰܘܗ̱ܝ܇ ܐܰܫܦܰܥ ܠܰܢ ܟܽܠܛܳܒ̈ܳܬܳܐ܇ ܠܓܰܪܒܳܐ ܒܡܶܠܬܶܗ ܕܰܟܺܝ ܗܘܳܐ܇ ܘܠܰܣܡ̈ܰܝܳܐ ܒܪܽܘܩܶܗ ܦܰܬܰܚ܇ ܐܳܦ ܠܰܢ ܚܰܛܳܝ̈ܶܐ ܥܰܒܕܰܝ̈ܟ܇ ܕܰܟܢܳܝ̱ ܒܙܽܘܦܳܟ ܩܰܕܺܝܫܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܓܰܙܳܐ ܕܩܳܐܶܡ ܒܰܝܢܳܬ ܟܶܢܫ̈ܶܐ ܕܳܪܶܐ ܥܽܘܬܪܶܗ܇ ܘܰܦܬܺܝܚܺܝܢ ܠܶܗ ܬܰܪ̈ܥܶܐ ܪ̈ܳܡܶܐ ܡܶܢ ܟܽܠ ܓܰܒܺܝ̈ܢ܇ ܘܰܟܪܺܝܟܺܝܢ ܠܶܗ ܟܽܠ ܫܽܐܳܘ̈ܳܠܶܐ ܘܟܽܠ ܫܳܩܽܘ̈ܠܶܐ܇ ܘܟܽܠ ܚܰܣܺܝܪ̈ܶܐ ܬܳܒܥܺܝܢ ܡܶܢܶܗ ܣܽܘܢܩܳܢܰܝ̈ܗܽܘܢ܀

ܠܗܳܢܳܐ ܢܽܘܗܪܳܐ ܠܗܳܝ ܬܰܕܟܺܝܬܳܐ ܘܰܠܗܰܘ ܫܶܡܥܳܐ܇ ܠܗܰܘ ܚܽܘܠܡܳܢܳܐ ܠܰܐ̱ܚܪܺܢܳܐ ܕܶܝܢ ܫܽܘܒܩܳܢ ܚܰܘ̈ܒܶܐ܇ ܟܺܐܒ̈ܶܐ ܕܦܰܓܪܳܐ ܘܫܽܘܚ̈ܢܶܐ ܕܢܰܦܫܳܐ ܗܽܘ ܥܳܨܶܒ ܗܘܳܐ܇ ܘܰܢܣܰܒܘ̱ ܡܶܢܶܗ ܚܢܳܢܳܐ ܘܪ̈ܰܚܡܶܐ ܐܰܝܟܰܢ ܕܰܨܒܰܘ܀

ܫܽܘܒܚܳܐ ܠܰܐܒܳܐ ܕܰܥܒܰܕ ܣܰܒܪܳܐ ܠܰܕܠܳܐ ܣܰܒܪܳܐ܇ ܘܣܶܓܕܬܳܐ ܠܰܒܪܳܐ ܕܶܐܬܳܐ ܘܰܣܥܰܪ ܠܰܡܡ̈ܰܚܰܝܳܐ܇ ܬܰܘܕܺܝ ܠܪܽܘܚܳܐ ܕܝܰܗܒ ܠܽܘܒܳܒܳܐ ܠܟܽܠ ܕܰܐܠܺܝܨܺܝܢ܇ ܘܰܥܠܰܝܢ ܪ̈ܰܚܡܶܐ ܒܟܽܠܥܶܕܳܢܺܝ̈ܢ ܐܰܡܝܺܢ ܘܰܐܡܺܝܢ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܝܰܡܳܐ ܕܰܚܙܳܝܗ̱ܝ ܐܶܫܬܰܝܰܢ܇ ܠܗܰܘ ܝܰܠܕܶܗ ܕܰܐܒܳܐ ܓܢܺܝܙܳܐ܇ ܘܰܟܐܳܐ ܒܪ̈ܽܘܚܶܐ ܫܬܶܩ ܐܶܢܶܝܢ܇ ܘܶܐܬܕܰܡܰܪܘ̱ ܐ̱ܢܳܫ̈ܳܐ ܕܒܶܐܠܦܳܐ܇ ܫܽܘܒܚܳܐ ܠܳܟ܀ ܒܶܝܬ ܟܰܪ̈ܟܶܐ ܕܰܡܕܺܝܢ̈ܳܬܳܐ܇ ܥܳܒܰܪ ܗܘܳܐ ܒܪܳܐ ܕܰܐܠܳܗܳܐ܇ ܘܠܰܟܪ̈ܺܝܗܶܐ ܘܠܰܡܡ̈ܰܚܰܝܳܐ܇ ܡܰܐܣܶܐ ܗܘܳܐ ܕܠܳܐ ܣܰܡܡ̈ܳܢܶܐ܇ ܫܽܘܒܚܳܐ܀

ܐܰܣܺܝ ܡܳܪܰܢ ܒܝܰܕ ܢܰܚܬܶܗ܇ ܠܰܐܢ̱ܬܬܳܐ ܕܰܕܡܳܗܿ ܪܳܕܶܐ ܗܘܳܐ܇ ܘܠܰܛܠܺܝܬܳܐ ܒܡܶܠܬܶܗ ܢܰܚܶܡ܇ ܘܰܠܓܰܠ̈ܠܶܐ ܕܝܰܡܳܐ ܫܰܬܶܩ ܫܽܘܒܚܳܐ ܠܳܟ܀

ܥܢܳܢܳܐ ܕܪ̈ܰܚܡܶܐ ܐܶܫܬܰܦܥܰܬ݀܇ ܠܚܰܛܳܝ̈ܶܐ ܒܰܐܪܥܳܐ ܕܺܝܗܽܘܕ܇ ܘܰܒܝܰܕ ܡܶܛܪܳܐ ܒܰܣܺܝܡܳܐ܇ ܦܺܐܪ̈ܶܐ ܕܫܽܘܒܚܳܐ ܠܳܐ ܐܰܘܥܝܰܬ݀ ܫܽܘܒܚܘܐ܀

ܫܽܘܒܚܳܐ ܠܪܳܡܳܐ ܕܶܐܬܬܰܚܬܺܝ܇ ܡܶܢ ܡܶܕܝܳܪ̈ܰܘܗ̱ܝ ܥܶܠܳܝ̈ܶܐ܇ ܘܰܟܕܰܢ ܢܰܦܫܶܗ ܒܡܽܘܟܳܟܳܐ܇ ܡܶܛܽܠ ܦܽܘܪܩܳܢܶܗ ܕܓܶܢܣܰܢ܀

 

ܩܳܠܳܐ ܕܠܺܠܝܳܐ܇

ܩܳܠܳܐ ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ

ܡܡܰܚܰܝܬܳܐ ܒܰܝܢܳܬ ܟܶܢܫ̈ܶܐ܇ ܚܶܒܨܰܬ݀ ܢܶܣܒܰܬ݀ ܚܽܘܠܡܳܢܳܐ ܠܒܰܪܬܳܿܗܿ܇ ܘܚܰܛܳܝܬܳܐ ܒܕܶܡܥ̈ܶܐ ܕܥܰܝܢܶܝ̈ܗܿ܇ ܬܶܠܚܰܬ݀ ܐܶܫܛܳܪ ܚܰܘܒ̈ܳܬܳܗܿ܇ ܒܪܺܝܟ ܗܽܘ ܕܰܨܒܳܐ ܒܚܰܛܳܝ̈ܶܐ܇ ܕܰܒܬܰܝ̈ܳܒܶܐ ܕܫܳܐܠܺܝܢ ܠܶܗ ܪ̈ܰܚܡܶܐ܀

ܡܳܪܰܢ ܒܽܐܘܪܚܳܐ ܪܳܕܶܐ ܗܘܳܐ܇ ܘܛܺܝܡܰܝ ܣܰܡܝܳܐ ܟܰܕ ܩܳܥܶܐ ܘܳܐܡܰܪ܇ ܪܰܚܶܡ ܥܠܰܝ ܒܰܪ ܕܰܘܺܝܕ܇ ܘܗܰܒ ܠܺܝ ܢܽܘܗܪܳܐ ܕܶܐܚܙܶܐ ܒܶܗ܇ ܘܰܥܒܰܕ ܛܺܝܢܳܐ ܡܶܢ ܪܽܘܩܶܗ܇ ܘܛܳܫ ܥܰܠ ܥܰܝܢ̈ܰܘܗ̱ܝ ܘܶܐܬܦ̈ܰܬܰܚܝ̱ ܘܰܚܙܳܐ܀

 

ܡܰܕܪܳܫܳܐ ܦܰܪܕܰܝܣܳܐ ܫܽܘܒܚܳܐ ܠܗܰܘ ܕܰܙܟܝܳܟ ܥܳܠܡܳܐ ܡܠܶܐ ܬܽܘܟ̈ܶܐ܇ ܝܰܗܒ ܠܰܢ ܙܳܟܽܘܬܳܐ ܢܺܝܫܳܐ ܕܦܽܘܪܩܳܢܳܐ

ܐܳܘ ܥܳܠܡܳܐ ܒܺܝܫܳܐ܇ ܡܫܰܥܒܶܕ ܠܥܳܠܽܘܠܰܘ̈ܗ̱ܝ܇ ܫܒܽܘܩܰܝܢܝ̱ ܕܶܐܡܰܠܶܠ܇ ܫܰܪܒܳܟ ܕܥܳܒܰܪ ܐܰܢ̱ܬ܇ ܟܰܕܽܘ ܡܥܰܪܩܶܠ ܐܰܢ̱ܬ܇ ܠܪܶܥܝܳܢܝ̱ ܒܨܶܒܘ̈ܳܬܳܟ܇ ܘܗܳܐ ܦܳܛܪܺܝܢ ܗ̱ܘܰܘ ܝܰܘ̈ܡܰܝ ܘܥܳܒܪܺܝܢ܇ ܡܳܢܳܐ ܬܶܬܶܠ ܠܺܝ܇ ܐܰܓܪܳܐ ܕܒܶܛܠܳܢ̈ܰܝ܇ ܐܶܠܳܐ ܫܡܳܐ ܒܺܝܫܳܐ܇ ܕܡܰܒܗܶܬ ܠܩܰܢܳܝܰܘ̈ܗ̱ܝ܀

ܓܰܠ̈ܠܶܐ ܙܩܺܝܦܺܝܢ ܒܳܟ܇ ܥܳܠܡܳܐ ܡܠܶܐ ܬܽܘܟ̈ܶܐ܇ ܘܚܰܕ ܚܰܕ ܡܶܢܰܬܶܦ ܠܺܝ܇ ܘܚܰܒܪܶܗ ܡܫܰܕܶܠ ܠܺܝ܇ ܟܡܳܐ ܥܶܦܩܿܶܬ ܐܶܢܽܘܢ܇ ܕܰܐܣܶܩ ܘܠܳܐ ܣܶܠܩܿܶܬ ܘܰܐܝܟ ܗܰܘ ܕܒܰܬܗܽܘܡܳܐ ܛܰܒܥܽܘܢܝ̱܇ ܡܶܟܺܝܠ ܒܳܥܶܐ ܐ̱ܢܳܐ܇ ܒܰܕܡܽܘܬ ܗܰܘ ܫܶܡܥܽܘܢ܇ ܕܡܳܪܝ̱ ܥܰܕܰܪܰܝܢܝ̱܇ ܕܰܠܠܳܗܿ ܠܰܛܒܺܝܥܽܘܬܝ̱܀

ܗܳܐ ܪܳܗܛܺܝܢ ܝܰܘܡ̈ܰܝ܇ ܢܰܕܪܟܽܘܢ ܠܚܰܒܪ̈ܰܝܗܽܘܢ܇ ܘܰܪܗܺܝܒ ܫܽܘܠܳܡܳܐ܇ ܕܢܺܐܬܶܐ ܠܳܐ ܢܰܘܚܰܪ܇ ܗܳܐ ܦܳܣܥܺܝܢ ܙܰܒܢ̈ܶܐ܇ ܡܝܰܒܠܺܝܢ ܥܶܕܳܢ̈ܶܐ܇ ܘܗܳܢܳܐ ܠܗܰܘ ܙܳܪܶܒ܇ ܟܰܕ ܫܠܶܐ܇ ܒܰܕܡܽܘܬ ܛܶܠܳܠܳܐ܇ ܥܳܒܪܺܝܢ ܘܠܰܝܬ ܐܶܢܽܘܢ܇ ܛܽܘܒܰܘܗ̱ܝ ܠܡܰܢ ܕܰܥܒܰܪ܇ ܒܙܰܒܢܶܗ ܕܠܳܐ ܡܽܘܡܳܐ܀

ܙܥܽܘܪ ܗܽܘ ܠܝܰܥܢܽܘܬܰܢ܇ ܥܳܠܡܳܐ ܕܢܶܚܛܶܐ ܒܶܗ܇ ܘܟܰܕ ܛܳܒ ܡܠܶܐ ܚܰܘ̈ܒܶܐ܇ ܥܰܘܠܰܢ ܪܘܺܝܚ ܡܶܢܶܗ܇ ܕܠܳܐ ܡܶܬܟܠܶܐ ܝܰܨܪܰܢ܇ ܡܶܢܶܗ ܕܒܺܝܫ̈ܳܬܳܐ ܐܶܠܽܘ ܕܳܒܽܘܪܰܢ ܠܳܐ ܠܚܺܝܡ܇ ܡܰܢܽܘ ܡܣܰܝܶܟ ܗܘܳܐ܇ ܠܥܰܘܠܳܐ ܕܣܰܢܝ̈ܳܬܰܢ܇ ܡܰܘܬܳܐ ܬܳܟܶܣ ܠܶܗ ܠܥܰܘܠܰܢ ܒܥܽܘܕܪܳܢܰܢ܀

ܛܥܰܡܬܳܟ ܒܰܣܺܝܡ ܐܰܢ̱ܬ ܥܳܠܡܳܐ ܡܠܶܐ ܬܽܘܟ̈ܶܐ܇ ܘܰܛܥܺܝܿܬ ܒܚܰܠܝܽܘܬܳܟ܇ ܕܪܶܚܡܿܶܬ ܪ̈ܓܺܝܓܳܬܳܐ܇ ܟܰܕ ܐܰܓܪܶܬ ܩܰܠܺܝܠ܇ ܡܪܳܪ̈ܶܐ ܢܒܰܥܘ̱ ܡܶܢܳܟ܇ ܚܰܠܝܽܘܬܳܟ ܐܺܝܬܶܝܗܿ ܡܪܳܪ̈ܶܐ܇ ܕܰܐܝܢܳܐ ܕܛܳܥܶܡ ܠܶܗ܇ ܡܶܪܬܳܐܗ̱ܝ ܒܰܫܪܳܪܳܐ܇ ܓܳܥܶܨ ܡܶܢܳܗܿ ܓܶܝܪ܇ ܕܣܰܡ ܡܰܘܬܳܐ ܛܡܺܝܪ ܒܳܗܿ܀

ܟܕܰܢܬܳܢܝ̱ ܒܫܽܘܥܒܳܕܳܟ܇ ܥܳܠܡܳܐ ܕܶܐܦܠܽܘܚ ܒܳܟ܇ ܘܟܰܕ ܛܳܒ ܥܶܪܩܿܶܬ ܠܺܝ܇ ܘܠܳܐ ܐܰܡܕܶܬ ܡܶܢܳܟ܇ ܒܦܰܚ̈ܰܝܟ ܦܟܰܪܬܳܢܝ̱܇ ܒܢܶܫ̈ܒܰܝܟ ܥܰܪܩܶܠܬܳܢܝ̱܇ ܠܰܘ ܓܶܝܪ ܚܕܳܐܗ̱ܝ ܒܰܠܚܽܘܕ ܡܨܺܝܕܬܳܟ܇ ܦܰܚ̈ܰܝܟ ܣܰܓܺܝܐܺܝܢ܇ ܘܶܐܢܳܐ ܡܚܽܝܠ ܘܰܪܦܶܐ܇ ܘܡܳܐ ܕܰܐܡܕܶܬ ܡܶܢ ܚܰܕ܇ ܐ̱ܚܪܺܢܳܐ ܛܡܺܝܪ ܩܽܘܕܡܰܝ܀

ܡܰܢܽܘ ܕܠܳܐ ܢܶܕܚܰܠ܇ ܡܶܢܳܟ ܟܡܳܐ ܒܺܝܫ ܐܰܢ̱ܬ܇ ܕܳܐܦܠܳܐ ܕܶܝܢ ܠܪ̈ܳܚܡܰܝܟ܇ ܡܚܰܕܶܝܬ ܓܡܺܝܪܳܐܺܝܬ܇ ܕܡܳܐ ܕܰܐܚܒܽܘܟ ܗܶܢܽܘܢ ܘܣܰܒܰܪܘ̱ ܕܩܳܢܶܝܢ ܠܳܟ܇ ܘܰܒܗܳܝ ܕܡܶܬܬܰܚܕܺܝܢ ܘܒܪܶܚܡܬܳܟ܇ ܛܳܥܶܝܢ ܠܓܰܠܝ̈ܳܬܳܟ܇ ܘܡܰܘܒܕܺܝܢ ܠܟܰܣܝ̈ܳܬܳܟ܇ ܛܽܘܒܰܘܗ̱ܝ ܠܡܰܢ ܕܰܐܨܶܕ ܒܫܽܘܦܪܳܟ ܕܥܳܒܰܪ ܠܶܗ܀

ܣܰܓܺܝ ܨܢܺܝܥ ܕܰܐܪܳܟ܇ ܥܳܠܡܳܐ ܒܬܰܟܬܽܘܫܳܐ܇ ܘܚܰܝܠܳܐ ܕܓܰܢ̱ܒܳܪ̈ܶܐ܇ ܡܦܰܫܚܰܬ ܒܰܐܓܽܘܢܳܟ܇ ܒܠܶܩܛܳܐ ܡܫܰܕܶܠ ܐܰܢ̱ܬ ܠܪ̈ܳܡܶܐ ܡܣܰܚܶܦ ܐܰܢ̱ܬ܇ ܠܰܘ ܓܶܝܪ ܓܰܠܝܳܐܺܝܬ܇ ܡܩܰܪܶܒ ܐܰܢ̱ܬ܇ ܐܶܠܳܐ ܒܫܽܘܕܠܳ܇ ܙܳܟܶܝܬ ܨܢܺܝܥܳܐܺܝܬ܇ ܛܽܘܒܰܘܗ̱ܝ ܠܰܡ ܕܰܐܡܶܕ܇ ܡܶܢܗܶܝܢ ܕܨܶܢܥ̈ܳܬܳܟ܀

ܦܟܰܪܬܳܢܝ̱ ܕܰܫܓܶܫܬܳܢܝ̱܇ ܒܫܽܘܦܪܳܟ ܥܳܒܽܘܪܳܐ܇ ܘܶܐܠܽܘ ܨܒܺܝܬ ܕܶܐܦܣܽܘܩ ܦܟܳܪ̈ܰܝ ܕܠܺܝܠܳܐ ܗܘܳܬ݀܇ ܡܶܛܽܠ ܕܪ̈ܰܟܺܝܟܳܢ܇ ܘܰܒܗܳܝ ܕܒܰܣܺܝܡ̈ܳܢ܇ ܐܳܢܶܐ ܨܒܺܝܿܬ ܕܶܐܗܘܶܐ ܐܳܦ ܐܶܬܦܟܰܪ܇ ܘܥܰܠ ܗܳܝ ܓܳܚܶܝܟ ܐܰܢ̱ܬ܇ ܒܚܺܐܪܽܘܬܝ̱ ܟܡܳܐ ܙܶܠܰܬ݀܇ ܕܠܳܐ ܨܳܒܝܳܐ ܕܬܶܫܪܶܐ܇ ܦܟܳܪ̈ܰܝܟ ܡܰܪܺܝܪ̈ܶܐ܀

ܩܳܡܿܶܬ ܒܡܰܥܒܰܪܬܳܐ܇ ܥܳܠܡܳܐ ܘܒܰܠܗܺܝܬܳܢܝ̱܇ ܕܰܚܙܺܝܿܬ ܫܓܽܝܫܽܘܬܳܟ܇ ܕܰܟܡܳܐ ܕܠܺܝܚ ܥܽܘܡܪܳܟ܇ ܘܠܳܐ ܐܺܝܬ ܒܳܟ ܠܰܓܡܳܪ܇ ܡܶܕܶܡ ܕܫܰܪܺܝܪ ܗܽܘ܇ ܘܫܽܘܦܪܳܟ ܕܰܓܳܠܰܐܗ̱ܘ ܒܟܽܠܗܶܝܢ܇ ܥܽܘܬܪܳܟ ܥܳܒܰܪ ܠܶܗ܇ ܐܰܟܡܳܐ ܕܠܳܐ ܐܺܝܬܰܘܗ̱ܝ܇ ܛܽܘܒܰܘܗ̱ܝ ܠܡܰܢ ܕܰܣܢܳܟ܇ ܡܶܛܽܠ ܕܕܰܓܳܠ ܐܰܢ̱ܬ܀

ܫܶܠܝܳܐ ܒܥܺܝܿܬ ܕܶܐܩܢܶܐ ܡܶܢܳܟ ܠܳܐ ܣܶܦܩܿܶܬ܇ ܦܟܰܪܬܳܢܝ̱ ܒܨܶܒܘ̈ܳܬܳܟ܇ ܐܶܣܰܪܬܳܢܝ̱ ܒܥܶܠ̈ܳܬܳܐ܇ ܒܚܶܠܡܳܐ ܫܰܒܰܚܬܳܢܝ̱܇ ܘܰܗܦܰܟܬ ܨܰܚܺܝܬܳܢܝ̱܇ ܕܰܬܓܰܚܶܝܟ ܥܠܰܝ ܒܥܺܝܿܬ ܒܟܽܠܗܶܝܢ܇ ܕܰܚܠܳܦ ܒܗܺܝܠܽܘܬܳܐ܇ ܥܶܠܰܬ ܫܓܺܝܫܽܘܬܳܐ ܢܶܙܟܽܘܢ ܠܨܶܢܥ̈ܳܬܳܟ܇ ܪ̈ܰܚܡܶܐ ܕܚܳܢܶܝܢ ܠܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܰܕ ܫܳܡܰܥ ܐ̱ܢܳܐ ܕܳܐܡܰܪ ܠܰܐܢ̱ܬܬܳܐ ܗܰܒ ܠܺܝ ܡܰܝ̈ܳܐ܇ ܢܦܰܠ ܠܶܗ ܒܶܐܕܢ̈ܰܝ ܪܰܥܰܡܳܐ ܕܩܳܠܶܗ ܡܶܢ ܓܰܘ ܐܳܐܰܪ܇ ܒܝܰܕ ܦܽܘܩܕܳܢܶܗ ܓܳܣܝܳܐ ܐܰܪܥܳܐ ܢܰܗܪ̈ܰܘܳܬܳܐ ܘܗܳܢܰܘ ܬܶܗܪܳܐ ܟܰܕ ܐܳܡܰܪ ܗܘܳܐ ܗܰܒܠܺܝ ܐܶܫܬܶܐ܀

ܝܰܡܳܐ ܕܪ̈ܰܚܡܶܐ ܕܡܶܢ ܡܰܒܽܘܥ̈ܶܐ ܕܳܛܒܬܳܐ ܢܳܦܶܩ܇ ܐܰܛܺܝܦ ܠܰܐܪܥܳܐ ܘܨܶܝܕ ܫܳܡܪܳܝܬܳܐ ܚܰܝ̈ܶܐ ܐܰܪܕܺܝ܇ ܒܨܺܝܪ ܗܽܘ ܫܽܘܒܚܳܐ ܕܰܡܩܰܒܠ ܐܰܢ̱ܬ ܡܶܢ ܒܶܪ̈ܝܳܬܳܐ܇ ܘܚܳܕܶܝܬ ܒܫܽܘܒܚܳܐ ܕܰܡܫܰܒܚ̈ܳܢܶܐ ܠܳܟ ܬܶܫܒܽܘܚܬܳܐ܀

 

ܕܨܰܦܪܳܐ ܕܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܒܝܰܕ ܢܽܘܗܪܳܐ ܕܦܽܘܩܕ̈ܳܢܶܐ

ܛܶܥܢ ܗܘܳܐ ܡܳܪܰܢ ܘܰܐܝܬܺܝ ܠܰܢ܇ ܟܽܠ ܥܽܘܕܪ̈ܳܢܺܝܢ ܠܰܒܢ̈ܰܝܢܳܫܳܐ܇ ܘܕܰܟܺܝ ܠܓܰܪ̈ܒܶܐ ܒܓܶܫܬܶܗ܇ ܘܚܰܘܰܪ ܛܰܡ̈ܐܶܐ ܒܙܽܘܦܶܗ܇ ܘܶܐܬܪܰܚܰܡܥܠܰܝܢ܀

ܢܽܘܗܪܳܐ ܕܢܰܚ ܗܘܳܐ ܒܢܰܦܫܶܗ܇ ܕܰܙܟܺܝ ܡܶܢ ܛܰܝܒܽܘܬܳܐ ܐܰܠܳܗܳܐܝܬܳܐ܇ ܘܺܝܕܰܥ ܠܰܒܪܳܐ ܕܫܳܒܶܩ ܚܰܘ̈ܒܶܐ܇ ܘܶܐܬܓܰܘܰܣ ܒܶܗ܇ ܘܶܐܬܪܰܚܰܡ ܥܠܰܝ ܐܰܠܳܗܳܐ܀

ܒܪܺܝܟ ܐܳܣܝܳܐ ܕܶܐܬܳܐ ܒܚܽܘܒܶܗ܇ ܨܶܝܕ ܟܺܐܒ̈ܬܳܢܶܐ ܘܰܡܡܰܚܰܝ̈ܳܐ܇ ܕܢܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܓܶܢܣܳܐ ܕܐ̱ܢܳܫܽܘܬܰܢ܇ ܐܶܬܪܰܚܰܡܥܠܰܝܢ܀

 

ܒܕܽܘܟܪܳܢ ܝܳܠܶܕܬܳܟ

ܐܰܢ̱ܬ ܩܰܕܡܳܐܺܝܬ܇ ܡܶܣܟܺܢܽܘܬܳܐ ܥܒܰܕܬ܇ ܠܥܰܡܳܐ ܣܰܟܠܳܐ ܕܰܠܦܽܘܪܩܳܢܳܐ ܣܢܳܐ܇ ܘܗܳܝ ܕܶܝܢ ܚܽܘܠܡܳܢܳܐ ܫܰܟܶܢܬ܇ ܠܟܺܐܒܰܝ̈ܗܽܘܢ܇ ܪܰܚܶܡܥܠܰܝܢ܀

ܗܰܘ ܕܰܠܓܰܪܒܳܐ ܒܓܶܫܬܳܟ ܕܰܟܺܝܬܳܝܗ̱ܝ܇ ܕܰܟܳܐ ܗܳܫܳܐ ܠܓܰܪܒܳܐ ܕܢܰܦܫ̈ܳܬܰܢ܇ ܘܰܡܪܽܘܩ ܘܚܰܠܶܠ ܨܳܐܝܽܘܬܰܢ܇ ܡܕܰܟܝܳܢܳܐ ܕܟܽܠܗܽܘܢ ܛܰܡ̈ܐܶܐ܀

 

ܐܰܠܳܗܝ̱ ܐܰܠܳܗܝ̱ ܒܩܳܠܳܐ ܒܬܽܘܠܬܳܐ ܝܳܠܕܰܬ ܕܽܘܡܳܪܳܐ

ܝܶܫܽܘܥ ܡܰܠܟܰܢ ܢܚܶܬ ܗܰܠܶܟ܇ ܒܰܐܪܥܳܐ ܕܽܐܘܪܺܫܠܶܡ܇ ܡܶܛܽܠ ܦܽܘܪܩܳܢܰܢ܇ ܘܰܐܣܺܝ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܓܶܢܣܶܗ ܕܳܐܕܳܡ ܡܳܝܽܘܬܳܐ ܘܚܰܕܶܬ ܠܨܰܠܡܶܗ ܦܰܐܝܳܐ܇ ܕܒܳܩ ܘܰܒܠܺܝ ܒܚܰܫ̈ܶܐ ܕܰܚܛܺܝܬܳܐ܀

ܒܪܺܝܟ ܗܽܘ ܡܫܺܝܚܳܐ ܕܰܒܚܰܝܠܶܗ܇ ܛܪܰܕ ܪ̈ܽܘܚܶܐ ܛܰܢܦ̈ܳܬܳܐ ܕܥܳܠܡܳܐ ܠܗܶܝܢ ܐܶܬܢܰܓܰܕ܇ ܘܰܒܝܰܡܳܐ ܐܰܘܒܶܕ ܐܶܢܶܝܢ܇ ܘܡܶܟܺܝܠ ܠܳܐ ܣܳܟ ܡܶܬܥܰܫܢ̈ܳܢ܇ ܬܰܘ ܟܽܠܰܢ ܢܰܘܕܶܐ ܠܶܗ܇ ܘܰܢܫܰܒܰܚ܀

ܒܪܺܝܟ ܕܰܐܝܟ ܒܰܪܢܳܫܳܐ ܫܰܐܶܠ܇ ܠܠܶܓܝܽܘܢ ܪܺܝܫܳܐ ܕܕܰܝܘ̈ܶܐ ܕܚܰܘܳܐ ܠܰܢ ܡܰܢܽܘ ܫܡܳܟ܇ ܕܰܢܚܰܘܶܐ ܕܠܰܘ ܚܰܕ ܕܰܝܘܳܐ܇ ܛܪܰܕ ܒܰܠܚܽܘܕ ܒܦܽܘܩܕܳܢܶܗ ܐܶܠܳܐ ܪ̈ܶܒܘܳܬܳܐ ܣܰܓܺܝ̈ܐܶܐ܇ ܘܰܢܫܰܒܰܚ܀

ܐܰܠܳܗܳܐ ܕܰܡܠܶܐ ܪ̈ܰܚܡܶܐ܇ ܒܶܐܣܟܺܝܡܳܐ ܕܐ̱ܢܳܫܳܐ ܥܰܠ ܐܰܪܥܳܐ ܐܶܬܚܙܺܝ܇ ܟܰܕ ܪܳܕܶܐ ܒܶܝܬ ܐܽܘܪ̈ܚܳܬܳܐ܇ ܠܒܰܝܬܶܗ ܕܫܶܡܥܽܘܢ ܐܶܬܬܰܚܬܺܝ܇ ܘܠܰܚܡܳܬܶܗ ܐܰܚܠܶܡ ܗܘܳܐ܇ ܩܳܡܰܬ݀ ܘܰܡܫܰܡܫܳܐ ܗܘܳܬ݀ ܠܶܗ܀

ܡܶܫܚܳܐ ܪܺܫܳܝܳܐ ܫܶܩܠܰܬ݀ ܐܰܢ̱ܬܬܳܐ ܚܰܛܳܝܬܳܐ ܘܶܐܙܠ̱ܰܬ݀ ܠܒܶܝܬ ܫܶܡܥܽܘܢ܇ ܘܰܠܪ̈ܶܓܰܠܘܗ̱ܝ ܕܡܳܪܰܢ ܡܶܫܚܰܬ݀܇ ܘܰܒܣܰܥܪܳܗܿ ܫܰܘܝܰܬ݀ ܐܶܢܶܝܢ܇ ܘܡܶܛܽܠ ܒܶܟܝܳܐ ܘܕܶܡܥܶܝ̈ܗܿ܇ ܥܛܳܐ ܘܰܫܒܰܩ ܚܰܘܒܶܝ̈ܗܿ ܘܰܚܛܳܗ̈ܶܝܗܿ܀

ܟܰܕ ܡܶܪܕܺܝܬܳܐ ܥܳܒܶܕ ܗܘܰܝܬ܇ ܘܰܠܒܰܝܬܶܗ ܕܝܽܘܳܐܪܳܫ ܕܰܠܒܰܪܬܶܗ ܬܰܐܚܶܐ܇ ܡܡܰܚܰܝܬܳܐ ܚܶܒܨܰܬ݀ ܥܶܠܰܬ݀܇ ܒܶܝܬ ܟܶܢܫ̈ܶܐ ܘܠܳܟ ܐܶܬܩܰܪܒܰܬ݀܇ ܠܗܳܝ ܐܰܣܺܝܬ ܘܰܠܗܳܝ ܐܰܚܺܝܬ܀

ܠܳܟ ܗܽܘ ܣܳܓܕܺܝܢ ܡܳܪܶܐ ܟܽܠ܇ ܡܺܝ̈ܬܶܐ ܘܚܰܝ̈ܶܐ ܕܚܰܝܰܘܒܳܟ ܢܽܘܚܳܡܳܐ ܕܟܽܠ ܒܣܰܪ܇ ܘܰܥܠܰܝܡܳܐ ܒܪܳܗܿ ܕܰܐܪܡܶܠܬܳܐ܇ ܕܡܶܢ ܩܰܒܪܳܐ ܩܪܰܝܬ ܘܰܐܩܺܝܡܬܳܝܗ̱ܝ܇ ܒܩ̈ܳܠܶܐ ܕܫܽܘܒܚܳܐ ܢܰܙܥܶܩ܀

 

ܫܡܰܝ̈ܳܐ ܡܶܫܬܰܥܶܝܢ܇ ܒܩܳܠܳܐ ܠܶܟܝ̱ ܢܶܬܟܰܫܰܦ

ܟܰܕ ܥܰܠ ܠܝܰܡܳܐ܇ ܘܫܶܢܬܳܐ ܕܰܟܝܳܢܳܐ ܕܡܶܟ ܗܘܳܐ ܐܰܝܟ ܒܰܪܢܳܫܳܐ܇ ܘܟܰܕ ܐܶܬܬܥܺܝܪ ܘܩܳܡ܇ ܠܪ̈ܽܘܚܶܐ ܘܰܠܝܰܡܳܐ ܫܰܬܶܩ ܐܰܝܟ ܐܰܠܳܗܳܐ܇ ܫܽܘܒܚܳܐ ܠܶܗ ܕܬܰܪ̈ܬܰܝܗܶܝܢ܇ ܕܺܝܠܶܗ ܐܶܢܶܝܢ ܒܰܫܪܳܪܳܐ܇ ܘܚܰܕ ܗܽܘ ܕܠܳܐ ܦܽܘܠܳܓ܀

ܥܰܠ ܗܘܳܐ ܡܳܪܰܢ܇ܠܽܐܘܪܺܫܠܶܡ ܥܰܡ ܬܰܠܡܺܝܕܰܘ̈ܗ̱ܝ ܕܢܰܐܣܶܐ ܟܪ̈ܺܝܗܶܐ܇ ܘܰܦܓܰܥ ܗܘܳܐ ܒܶܗ܇ ܚܰܕ ܓܰܒܪܳܐ ܕܰܚܪܶܫ ܘܰܥܘܺܝܪ ܘܺܐܝܬ ܠܶܗ ܕܰܝܘܳܐ܇ ܘܰܦܫܰܛ ܗܘܳܐ ܠܠܶܫܳܢܶܗ܇ ܘܰܐܳܘܫܶܛ ܝܰܗܒ ܠܶܗ ܚܽܘܠܡܳܢܳܐ܇ ܘܰܐܘܕܺܝ ܠܗܰܘ ܕܐܰܣܝܶܗ܀

ܒܪܺܝܟ ܗܽܘ ܡܫܺܝܚܳܐ܇ ܕܝܰܗܒ ܚܽܘܠܡܳܢܳܐ ܠܰܡܫܰܪܝܳܐ ܦܳܩܽܘܕܳܐܺܝܬ܇ ܟܰܕ ܐܶܡܰܪ ܠܶܗ܇ ܩܽܘܡ ܫܩܽܘܠ ܥܰܪܣܳܟ ܘܙܶܠ ܠܒܰܝܬܳܟ ܟܰܕ ܚܳܕܶܐ ܐܰܢ̱ܬ܇ ܘܰܡܶܚܕܳܐ ܩܳܡ ܫܩܰܠ ܥܰܪܣܶܗ ܘܰܚܙܰܘ ܟܶܢܫ̈ܶܐ ܘܰܬܗܰܪܘ̱܇ ܘܡܶܢ ܛܽܘܥܝܰܝ ܐܶܬܦܢܺܝܘ܀

ܡܶܢ ܒܶܝܬ ܫܶܢܰܘ̈ܗ̱ܝ ܕܡܰܘܬܳܐ ܥܰܝܢܳܐ ܐܰܥܕܺܝ ܗܘܳܐ ܠܒܰܪ̱ܬ ܝܽܘܳܐܪܳܫ܇ ܘܟܰܕ ܚܰܘܺܝ ܗܘܳܐ܇ ܕܳܐܦ ܡܰܘܬܳܐ ܫܶܢܬܳܐ ܐܺܝܬܰܘܗ̱ܝ ܠܟܽܠ ܕܰܡܗܰܝܡܶܢ܇ ܒܗܳܝ ܕܶܐܡܰܪ ܠܰܐܒܳܗܶܝ̈ܗܿ ܕܰܛܠܺܝܬܳܐ ܡܰܕܡܰܟ ܕܰܡܟܳܐܗ̱ܝ܇ ܘܰܩܪܳܗܿ ܘܰܐܩܺܝܡܶܝܗܿ܀

 

ܬܶܫܒܽܘܚܬܳܐ ܚܕܰܬܳܐ܇ ܒܩܳܠܳܐ ܐܰܢ̱ܬ ܕܰܒܪܺܝܫܺܝܬ

ܡܰܠܟܳܐ ܡܫܺܝܚܳܐ ܣܥܰܪ ܘܰܐܚܠܶܡ ܠܰܡܡܰܚ̈ܰܝܳܐ ܘܫܰܪܰܪ ܘܰܐܩܺܝܡ܇ ܠܰܡܫܰܪܝܳܐ ܡܶܢ ܟܽܘܪܗܳܢܶܗ ܡܒܰܪܟܳܐ ܓܶܝܪ ܐܺܝܬܰܘܗ̱ܝ܀

ܗܰܘ ܕܶܐܚܰܕ ܗܘܳܐ܇ ܒܺܐܝܕܳܗܿ ܕܰܚܡܳܬܶܗ ܕܦܶܛܪܽܘܣ ܘܰܐܥܪܶܩ ܡܶܢܳܗܿ܇ ܐܶܫܳܬܳܗܿ ܘܣܰܡܟܳܗܿ ܘܩܳܡܰܬ݀ ܡܒܰܪܟܳܐ ܓܶܝܪ ܐܺܝܬܰܝܟ ܡܳܪܝܳܐ ܐܰܠܳܗܳܐ܀

ܗܰܘ ܕܫܰܟܶܢ ܗܘܳܐ܇ ܢܽܘܗܪܳܐ ܘܚܰܝ̈ܶܐ ܘܦܽܘܪܩܳܢܳܐ ܠܰܬܪܶܝܢ ܣܡ̈ܰܝܳܐ܇ ܕܩܳܥܶܝܢ ܗ̱ܘܰܘ ܪܰܚܶܡܥܠܰܝܢ ܡܒܰܪܟܳܐ܀

ܗܳܐ ܕܰܐܣܺܝ ܗܘܳܐ܇ ܠܰܡܫܰܪܝܳܐ ܘܰܠܓܰܪܒܳܢܳܐ ܘܰܠܡܰܐܟܰܒܬܳܐ܇ ܟܦܺܝܦܬܳܐ ܦܳܫܶܛ ܗܘܳܐ ܡܶܢ ܟܺܐܒܳܗܿ ܡܒܰܪܟܳܐ܀

ܗܰܘ ܕܰܒܪܽܘܩܳܐ܇ ܕܦܽܘܡܶܗ ܦܰܬܰܚ ܥܰܝܢ̈ܶܐ ܕܣܰܡܝܳܐ܇ ܘܰܒܝܰܕ ܡܶܠܬܶܗ ܢܽܘܗܪܳܐ ܡܠܶܐ ܗܘܳܐ ܒܳܒ̈ܳܬܶܗ܀

ܣܳܓܕܳܐ ܠܳܟ ܡܳܪܝ̱܇ ܥܺܕܬܳܐ ܦܪܺܝܩܰܬ ܒܰܨܠܺܝܒܳܟ ܕܰܐܦܢܺܝܬ ܝܰܠܕܶܝ̈ܗܿ܇ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܀

 

ܩܳܠܳܐ ܕܨܰܦܪܳܐ܇ ܠܰܬܚܽܘܡܳܐ ܕܗܰܝܡܳܢܽܘܬܳܐ

ܟܰܕ ܐܶܙܕܰܡܰܢ ܗܘܳܐ ܡܳܪܰܢ܇ ܠܒܶܝܬ ܫܶܡܥܽܘܢ ܗܰܘ ܦܪܺܝܫܳܝܳܐ܇ ܫܶܡܥܰܬ݀ ܛܶܐܒܶܗ ܐܰܢ̱ܬܬܳܐ ܚܰܛܳܝܬܳܐ܇ ܘܫܶܩܠܰܬ݀ ܡܶܫܚܳܐ ܪܺܫܳܝܳܐ܇ ܘܚܶܠܛܰܬ݀ ܒܶܗ ܕܶܡܥ̈ܶܐ ܕܥܰܝܢܶܝ̈ܗܿ ܘܡܶܫܚܰܬ݀ ܪ̈ܶܓܠܰܘܗ̱ܝ ܟܰܕ ܒܳܟܝܳܐ ܒܚܰܫܳܐ܇ ܚܙܳܐ ܡܳܪܰܢ ܗܰܝܡܳܢܽܘܬܳܗܿ܇ ܘܶܐܡܰܪ ܠܳܗܿ ܫܒܺܝܩܺܝܢ ܚܰܘܒܰܝ̈ܟܝ̱܇ ܗ܇ ܘܥܰܛܝܳܐܗ̱ܝ ܣܰܟܠܽܘܬܶܟܝ̱܀

ܡܶܠܬܶܗ ܕܰܐܒܳܐ ܫܡܰܝܳܢܳܐ܇ ܕܶܐܬܬܰܚܬܺܝ ܠܰܐܪܥܳܐ ܒܚܽܘܒܶܗ܇ ܘܰܢܣܰܟ ܘܰܡܠܳܗܿ ܥܽܘܕܪ̈ܳܢܶܐ ܘܚܰܝ̈ܠܶܐ܇ ܓܰܪ̈ܒܶܐ ܒܡܶܠܬܶܗ ܕܰܟܺܝ ܗܘܳܐ܇ ܘܠܰܣܡܰܝ̈ܳܐ ܚܙܳܝܳܐ ܝܰܗܒ ܗܘܳܐ܇ ܘܰܐܚܠܶܡ ܦܰܫܛܳܗܿ ܠܗܳܝ ܕܰܟܦܺܝܦܳܐ ܗܘܳܬ݀܇ ܒܪܺܝܟ ܐܳܣܝܳܐ ܕܶܐܬܳܐ ܒܚܽܘܒܶܗ܇ ܘܰܐܥܬܰܪ ܠܰܐܪܥܳܐ ܒܥܽܘܕܪ̈ܳܢܰܘܗ̱ܝ܇ ܗ ܫܽܘܒܚܳܐ ܠܫܳܠܽܘܚܶܗ܀

 

ܐ̱ܚܪܺܢܳܐ ܒܩܳܠܳܐ ܩܽܘܩܳܝܳܐ

ܡܳܐ ܫܰܦܺܝܪܳܐ ܫܳܪܽܘܬܳܐ ܕܰܥܒܰܕ ܡܳܪܰܢ܇ ܕܟܰܕ ܐܶܬܟܰܢܰܫܘ̱ ܗ̱ܘܰܘ ܟܶܢܫ̈ܶܐ܇ ܘܰܢܦܰܩܘ̱ ܗ̱ܘܰܘ ܒܳܬܪܶܗ܇ ܘܰܐܫܪܺܝ ܐܶܢܽܘܢ ܥܰܠ ܥܶܣܒܳܐ ܕܰܐܪܥܳܐ܇ ܘܒܰܪܶܟ ܠܰܚܡܳܐ ܘܰܩܨܳܐ ܘܝܰܗܒ ܠܗܽܘܢ܇ ܘܶܐܟܰܠܘ̱ ܗ̱ܘܰܘ ܡܶܢܶܗ ܟܽܠܗܽܘܢ ܘܰܣܒܰܥܘ̱ ܘܰܐܳܘܬܰܪܘ̱܇ ܩܨܳܝ̈ܶܐ ܬܪܶܥܣܰܪ ܩܽܘܦܺܝܢܺܝ̈ܢ܇ ܘܰܙܡܰܪܘ̱ ܬܶܫܒܽܘܚܬܳܐ ܗ ܘ ܗ܀

ܠܰܡܕܺܝܢ̱ܬܳܐ ܕܰܫܡܳܗܿ ܢܰܐܺܝܢ ܥܰܠ ܗܘܳܐ ܡܳܪܰܢ܇ ܘܰܚܙܳܐ ܕܰܡܠܰܘܶܝܢ ܡܺܝܬܳܐ ܘܩܳܠܳܐ ܕܒܶܟܝܳܐ ܫܡܰܥ܇ ܝܺܚܺܝܕܳܝܳܐ ܗܰܘ ܘܶܐܡܶܗ ܐܰܪܡܶܠܬܳܐ܇ ܘܰܥܢܳܐ ܡܳܪܰܢ ܘܗܳܟܰܢ ܐܶܡܰܪ ܗܘܳܐ܇ ܐܰܪܡܶܠܬܳܐ ܠܳܐ ܬܶܬܐܰܒܠܶܝܢ ܥܰܠ ܝܺܚܺܝܕܶܟܝ̱܇ ܐܶܢܳܐ ܝܰܘܡܳܢ ܡܩܺܝܡ ܐ̱ܢܳܐ ܠܶܗ܇ ܘܟܶܢܫܳܐ ܬܳܗܰܪ ܒܺܝ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܺܝ ܕܶܝܢ ܗܳܕܶܐ ܐܰܢ̱ܬܬܳܐ ܡܰܠܝܰܬ ܗܰܝܡܳܢܽܘܬܳܐ܇ ܩܪܳܬ݀ ܠܺܝ ܝܰܘܡܳܢ ܐܶܬܢܶܐ ܫܰܪܒܳܗܿ ܟܰܕ ܬܳܗܰܪ ܐ̱ܢܳܐ܇ ܗܳܕܶܐ ܕܰܗܘܳܬ݀ ܡܰܠܦܳܢܺܝܬܳܐ ܗܺܝ ܠܰܩܢܽܘܡܳܗܿ܇ ܘܝܶܕܥܰܬ݀ ܕܬܶܥܨܽܘܒ ܫܽܘܚܢܳܗܿ ܟܰܣܝܳܐ ܡܶܬܰܐܣܶܐ ܗܘܳܐ܀

ܟܰܕ ܗܺܝ ܐܰܢ̱ܬܬܳܐ ܒܫܽܘܚܢܳܐ ܩܰܫܝܳܐ ܡܶܬܐܰܠܨܳܐ ܗܘܳܬ݀܇ ܛܶܐܒܶܗ ܕܝܶܫܽܘܥ ܐܰܝܟ ܐܺܝܙܓܰܕܳܐ ܕܫܰܝܢܳܐ ܣܰܒܪܳܗܿ܇ ܫܶܩܠܰܬ݀ ܟܺܐܒܳܗܿ ܘܒܳܬܰܪ ܝܶܫܽܘܥ ܐܳܣܝܳܐ ܪܶܗܛܰܬ݀܇ ܘܢܶܣܒܰܬ ܡܶܢܶܗ ܚܰܝܠܳܐ ܪܰܒܳܐ ܕܰܡܥܰܕܰܪ ܠܳܗܿ܀

 

ܕܰܬܠܳܬܫ̈ܳܥܺܝܢ ܒܩܳܠܳܐ ܕܰܚܛܳܐ ܠܳܐ ܢܶܚܛܶܐ

ܥܰܠ ܨܽܘܪ ܘܥܰܠ ܨܰܝܕܳܢ܇ ܥܳܒܰܪ ܗܘܳܐ ܡܳܪܰܢ ܐܳܣܝܳܐ ܕܟܽܠ ܟܺܐܒ̈ܺܝܢ܇ ܘܬܰܠܡܺܝܕܰܘ̈ܗ̱ܝ ܒܳܬܪܶܗ܇ ܐܰܢ̱ܬܬܳܐ ܟܢܰܥܢܰܝܬܳܐ܇ ܢܶܦܩܰܬ݀ ܟܰܕ ܩܳܥܝܳܐ܇ ܐܳܣܝܳܐ ܫܡܰܝܳܢܳܐ ܦܩܽܘܕ ܐܰܣܳܐ ܠܺܝ ܒܰܪܬܝ̱ ܗ ܘ ܗ ܒܪܺܝܟ ܕܰܥܢܳܐ ܘܶܐܡܰܪ ܕܒܰܪܬܶܟܝ̱ ܐܶܬܰܐܣܝܰܬ݀܀

ܐܶܡܰܪ ܠܗܽܘܢ ܡܳܪܰܢ܇ ܠܚܰܛܳܝ̈ܶܐ ܕܬܳܝܒܺܝܢ܇ ܕܰܒܥܰܘ ܫܽܘܒܩܳܢܳܐ ܥܰܕ ܐܺܝܬ ܠܟܽܘܢ ܐܰܬܪܳܐ܇ ܠܰܟܦܺܝ̈ܦܶܐ ܬܰܪܶܨܬ ܠܰܣܡ̈ܰܝܳܐ ܢܽܘܗܪܳܐ܇ ܘܰܠܕܽܘܓ̈ܶܐ ܫܶܡܥܳܐ ܘܰܠܡܺܝ̈ܬܶܐ ܩܝܳܡܬܳܐ܇ ܗ ܘ ܗ ܐܳܦ ܠܰܢ ܦܳܪܽܘܩܰܢ ܚܰܣܳܐ ܠܰܢ ܚܰܘܒ̈ܰܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܫܺܝܚܳܐ ܓܰܙܳܐ ܕܶܐܬܳܐ ܒܚܽܘܒܶܗ ܡܶܢ ܥܶܠܳܝܳܐ܇ ܘܟܽܠ ܕܰܩܪܶܒ ܠܶܗ ܐܰܟܡܳܐ ܕܰܒܥܳܐ ܫܩܰܠ ܫܶܐܠ̈ܳܬܶܗ܇ ܘܰܠܝܽܘܐܳܪܳܫ ܗܰܘ ܪܺܝܫ ܟܢܽܘܫܬܳܐ ܕܝܽܘܕܳܝ̈ܶܐ܇ ܚܳܢܽܘܗ̱ܝ ܪ̈ܰܚܡܶܐ ܐܰܝܟ ܕܰܠܫܰܪܟܳܐ ܕܟܽܠ ܕܰܩܪܶܒ ܠܶܗ܀

ܐܶܡܰܪ ܡܳܪܰܢ ܢܶܪܕܶܐ ܐܰܟܚܕܳܐ ܠܶܐ ܢܶܫܬܰܘܚܰܪ܇ ܕܽܐܳܘܪܚܳܐ ܕܪ̈ܰܚܡܶܐ ܗܳܐ ܕܳܪܫܳܐ ܠܺܝ ܗܦܳܟܬܳܐ ܠܳܐ ܐܺܝܬ܇ ܪܕܳܐ ܗܘܳܐ ܕܢܺܐܙܰܠ ܢܽܘܗܪܳܐ ܘܚܰܝ̈ܶܐ ܠܒܶܝܬ ܝܽܘܐܳܪܳܫ܇ ܕܢܶܪܫܽܘܡ ܬܰܡܳܢ ܩܝܳܡܬܳܐ ܘܚܰܝ̈ܶܐ ܠܟܽܠܶܗ ܓܶܢܣܰܢ܀

 

ܕܦܶܠܓܶܗ ܕܝܰܘܡܳܐ

ܒܩܳܠܳܐ ܥܰܡ ܕܟܽܠܗܽܘܢ ܩܰܕܺܝܫܰܝ̈ܟ

ܛܥܺܝܢ ܗܘܳܐ ܡܳܪܰܢ ܣܰܡܡ̈ܳܢܶܐ܇ ܘܦܰܠܶܓ ܐܶܢܽܘܢ ܒܰܒܪܺܝܬܳܐ܇ ܠܓܶܢܣܳܐ ܡܚܺܝܠܳܐ ܕܒܶܝܬ ܐܳܕܳܡ܇ ܥܒܰܪ ܗܘܳܐ ܒܶܐܣܛܘܳܐ ܕܰܫܠܶܝܡܽܘܢ܇ ܘܶܐܫܟܰܚ ܬܰܡܳܢ ܠܰܡܫܰܪܝܳܐ܇ ܕܰܡܫܰܢܶܩ ܢܽܘܓܪܳܐ ܕܙܰܒܢܳܐ܀

ܡܫܰܪܝܳܐ ܕܰܫܡܰܥ ܦܶܬܓܳܡܶܗ܇ ܫܰܪܺܝ ܕܰܢܡܰܠܶܠ ܥܰܡܶܗ܇ ܡܺܝܬܳܐ ܕܡܺܝܬ ܘܣܰܪܺܝ ܪܺܝܚܶܗ܇ ܡܰܢܽܘ ܩܳܪܶܒ ܠܰܫܠܰܕܶܗ܇ ܘܰܟܪܺܝܗܳܐ ܕܰܐܥܬܶܩ ܟܺܐܒܶܗ܇ ܡܰܢܽܘ ܡܶܫܟܰܚ ܡܰܚܠܶܡ ܠܶܗ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܫܳܒܶܩ ܚܰܘܒ̈ܶܐ ܠܰܐܪܥܳܐ ܢܚܶܬ܇ ܘܰܒܪ̈ܰܚܡܶܐ ܚܰܢ ܠܰܓܒܺܝܠܬܶܗ܇ ܬܪܰܥ ܡܽܒܽܘܥܳܐ ܕܰܚܢܳܢܶܗ܇ ܘܰܐܣܺܝ ܠܢܰܦܫܳܐ ܘܰܠܦܰܓܪܳܐ܇ ܐܰܘܫܶܛ ܐܺܝܕܳܐ ܕܛܰܝܒܽܘܬܶܗ܇ ܟܽܠܗܽܘܢ ܛܰܡ̈ܐܶܐ ܐܶܬܩܰܕܰܫܘ̱܇ ܘܟܽܠܗܽܘܢ ܟܳܗܢ̈ܶܐ ܘܠܶܘܳܝ̈ܶܐ ܡܰܓܳܢ ܕܶܝܢ ܣܳܢܶܝܢ ܗ̱ܘܰܘ ܠܶܗ܀

ܝܶܠܦܰܬ݀ ܐܰܢ̱ܬܬܳܐ ܙܳܢܺܝܬܳܐ܇ ܕܰܫܒܰܩ ܚܰܘܒ̈ܶܐ ܒܒܰܝܬܳܐ ܫܪܶܐ܇ ܘܰܣܢܺܝܩܳܐ ܥܰܠ ܫܽܘܒܩܳܢܳܐ܇ ܠܘܳܬܶܗ ܪܶܗܛܰܬ݀ ܒܚܰܕܽܘܬܳܐ܇ ܐܳܦ ܡܶܫܚܳܐ ܘܕܶܡܥ̈ܶܐ ܩܰܪܒܰܬ݀܇ ܘܰܫܒܰܩ ܠܳܗܿ ܣܽܘܓܐܳܐ ܕܚܰܘ̈ܒܶܝܗܿ܇ ܘܟܽܠܗܽܘܢ ܟܪ̈ܺܝܗܶܐ ܘܰܐܠܺܝܨ̈ܶܐ܇ ܡܶܢ ܟܺܐܒܰܝ̈ܗܽܘܢ ܐܶܬܪܰܘܰܚܘ̱܀

 

ܕܰܬܫܰܥ̈ܫܳܥܺܝܢ

ܒܩܳܠܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝܕ̈ܶܐ

ܫܰܪܺܝ ܡܫܰܪܝܳܐ ܕܢܺܐܡܰܪ ܠܶܗ܇ ܠܡܳܪܰܢ ܟܰܕ ܥܰܝܺܝܩܳܐ ܠܶܗ܇ ܕܠܳܐ ܐ̱ܢܳܫ ܚܳܐܶܣ ܥܰܠ ܕܳܘܝܽܘܬܝ̱. ܘܡܰܪܟܶܢ ܢܰܦܫܶܗ ܢܡܰܠܶܠ ܥܰܡܝ̱܇ ܡܰܢ ܝܰܗܒܠܺܝ ܕܶܐܚܙܶܐ ܠܝܶܫܽܘܥ܇ ܘܳܐܡܰܪ ܗܘܺܝܿܬ ܠܶܗ ܘܡܰܐܣܶܐ ܠܺܝ܀

ܝܰܠܕܽܘܢܝ̱ ܐ̱ܢܳܫ̈ܰܝ ܒܰܛܺܝ̈ܠܶܐ. ܘܰܫܕܰܐܽܘܢܝ̱ ܐܰܝܟ ܕܰܠܡܺܝܬܳܐ܇ ܘܦܶܫܛܶܬ ܐܰܝܕ̈ܰܝ ܕܶܐܩܰܒܶܠ܇ ܡܰܢܝܳܐ ܡܰܢܝܳܐ ܡܶܢ ܟܽܠ ܐ̱ܢܳܫ܇ ܘܩܰܕܡܳܐ ܩܰܕܡܳܐ ܕܥܳܐܶܠ ܠܺܝ܇ ܢܳܣܒܺܝܢ ܠܶܗ ܐܳܦ ܢܽܘܟܪ̈ܳܝܶܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܥܰܕܥܺܐܕܳܐ ܪܰܒܳܐ܇ ܗܘܳܐ ܗܘܳܐ ܒܽܐܘܪܺܫܠܶܡ ܇ ܘܰܟܢܺܝܫ ܗܘܳܐ ܥܰܡܳܐ܇ ܨܶܝܕ ܡܳܪܰܢ ܝܶܫܽܘܥ܇ ܘܚܳܒܨܺܝܢ ܠܰܚܕܳܕ̈ܶܐ܇ ܢܶܫܡܥܽܘܢ ܡܽܘܢ ܐܳܡܰܪ܀

ܫܰܪܺܝܘ̱ ܝܽܘܕܝ̈ܶܐ܇ ܚܳܣܡܺܝܢ ܗ̱ܘܰܘ ܘܪܳܛܢܺܝܢ܇ ܘܶܐܫܬܰܪܰܪ ܓܰܒܪܳܐ܇ ܘܩܳܡ ܡܶܢ ܟܽܘܪܗܳܢܶܗ܇ ܘܰܠܒܶܝܬܶܗ ܐܶܙܰܠ܇ ܟܰܕ ܙܳܡܳܪ ܫܽܘܒܚܳܐ܀

 

ܫܠܶܡ ܓ

ܬܽܘܒ ܕܝܽܘܡ ܐܰܪܒܥܳܐ ܕܫܰܒܬܳܐ ܕܬܶܕܡܪ̈ܳܬܳܐ

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ܇ ܕܪܰܚܶܡܥܠܰܝ ܒܩܳܠܳܐ ܐܰܘܕܳܝ ܠܶܗ ܥܺܕܬܳܐ

ܫܽܘܒܚܳܐ ܠܳܟ ܡܳܪܰܢ܇ ܕܰܣܥܰܪܬܳܗܿ ܠܰܐܪܥܳܐ܇ ܒܚܰܝ̈ܠܶܐ ܘܳܐܣܘ̈ܳܬܳܐ܇ ܘܬܶܕܡܪ̈ܳܬܳܐ ܕܰܣܥܰܪܬ܇ ܐܰܝܟ ܐܰܠܳܗܳܐ܀

ܐܶܬܩܪܺܝ ܠܡܶܫܬܽܘܬܳܐ܇ ܘܡܰܝ̈ܳܐ ܥܒܰܕ ܚܰܡܪܳܐ܇ ܘܰܢܦܰܩ ܗܘܳܐ ܠܕܰܒܪܳܐ܇ ܘܠܰܚܡܳܐ ܐܰܣܓܺܝ ܗܘܳܐ܇ ܘܰܠܓܰܠ̈ܠܶܐ ܫܰܬܶܩ܀

ܐܰܝܟ ܕܰܐܣܺܝܬ ܡܳܪܰܢ܇ ܠܰܡܫܪܰܝܳܐ ܒܥܰܪܣܳܐ܇ ܘܰܫܒܰܩܬ ܠܚܰܛܳܝܬܳܐ܇ ܚܰܘܒ̈ܶܝܗܿ ܘܰܚܛܳܗ̈ܶܝܗܿ܇ ܘܰܐܣܳܐ ܟܽܘܪ̈ܗܳܢܰܝܢ܀

ܠܩܶܢܛܪܽܘܢܳܐ ܕܰܒܥܳܝܗ̱ܝ܇ ܚܳܢܶܗ ܒܛܰܝܒܽܘܬܶܗ܇ ܘܰܠܛܰܠܝܶܗ ܐܰܣܺܝ܇ ܒܝܰܕ ܗܰܝܡܳܢܽܘܬܶܗ܇ ܠܕܰܕܡܳܗܿ ܟܠܳܐ ܪܶܕܝܳܗܿ܀

ܢܰܘܕܽܘܢ ܠܳܟ ܟܪ̈ܺܝܗܶܐ܇ ܕܰܐܣܺܝܬ ܒܰܚܢܳܢܳܟ܇ ܢܫܰܒܚܽܘܢܳܟ ܣܡ̈ܰܝܳܐ܇ ܕܰܐܢܗܰܪ ܦܽܘܩܕܳܢܳܟ܇ ܫܽܘܒܚܳܐ ܠܛܰܝܒܽܘܬܳܟ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܩܝܳܡܬܳܐ ܕܰܢܚܶܬ ܒܰܒܪܺܝܬܳܐ

ܡܶܢ ܠܳܐ ܢܗܰܝܡܶܢ ܕܰܐܠܳܗܰܐܗ̱ܘ܇ ܡܰܢ ܠܳܐ ܢܰܫܰܪ ܕܶܐܬܒܰܣܰܪ܇ ܡܰܢ ܠܳܐ ܢܰܘܕܶܐ ܕܺܐܝܬܰܘܗ̱ܝ ܗܽܘ܇ ܚܰܝܠܶܗ ܕܰܐܒܳܐ ܕܶܐܬܬܰܚܬܺܝ܇ ܘܰܐܣܺܝ ܟܺܐܒ̈ܰܝܢ ܒܰܚܢܳܢܶܗ܇ ܢܰܘܕܶܐ ܠܶܗ ܕܶܐܬܳܐ ܘܦܰܪܩܰܢ܀

ܠܝܰܡܳܐ ܥܰܠ ܥܰܡ ܬܰܠܡܺܝܕܰܘ̈ܗ̱ܝ܇ ܘܥܰܠ ܒܶܣܰܕܝܳܐ ܫܟܶܒ ܘܶܐܬܬܢܺܝܚ ܪ̈ܽܘܚܶܐ ܘܡܰܚܫܽܘ̈ܠܶܐ ܕܝܰܡܳܐ܇ ܡܶܢ ܬܰܠܡܺܝ̈ܕܶܐ ܫܰܬܶܩ ܗܘܳܐ܇ ܘܰܫܠܺܝ̈ܚܶܐ ܒܕܶܚܠܳܐ ܩܥܰܘ ܠܶܗ܇ ܫܽܘܒܚܳܐ ܠܳܟ ܥܰܠ ܦܽܘܪܩܳܢܰܢ܀

ܐܰܣܺܝ ܡܳܪܰܢ ܟܺܐܒ̈ܰܝܗܽܘܢ܇ ܕܚܰܛܳܝ̈ܶܐ ܒܢ̈ܰܝ ܐܽܘܪܺܫܠܶܡ܇ ܘܕܰܝ̈ܘܶܐ ܛܪܰܕ ܡܶܢ ܓܽܘܫܡܰܝ̈ܗܽܘܢ܇ ܘܰܚܠܳܦ ܐܰܓܪܳܐ ܦܰܪܥܽܘܗ̱ܝ ܗ̱ܘܰܘ܇ ܨܰܥܪܳܐ ܘܒܶܙܚܳܐ ܘܡܽܘܝܳܩܳܐ܇ ܫܽܘܒܚܳܐ ܠܶܗ ܕܣܰܝܒܰܪ ܐܶܢܽܘܢ܀

ܠܩܳܛܢܶܐ ܐܶܙܕܰܡܰܢ ܡܳܪܰܢ ܘܥܰܡܶܗ ܟܶܢ̈ܫܶܐ ܕܬܰܠܡܺܝ̈ܕܰܘܗ̱ܝ܇ ܘܰܚܣܰܪ ܚܰܡܪܳܐ ܠܰܙܡܺܝ̈ܢܶܐ܇ ܘܰܦܩܰܕ ܕܢܶܡܠܽܘܢ ܠܰܐܓܳܢ̈ܶܐ܇ ܘܡܰܝ̈ܳܐ ܠܚܰܡܪܳܐ ܫܰܚܠܶܦ ܗܘܳܐ܇ ܐܰܝܟ ܐܰܠܳܗܳܐ ܕܥܰܠ ܟܽܠ ܫܰܠܺܝܛ܀

 

ܩܳܠܳܐ ܕܪܰܡܫܳܐ ܩܳܠܳܐ ܡܫܺܝܚܳܐ ܢܰܛܰܪܶܝܗܿ

ܫܰܦܺܝܪ ܗܘܳܐ ܠܒܰܪ ܐܰܠܳܗܳܐ ܟܰܕ ܪܳܕܶܐ ܒܰܐܪܥܳܐ ܕܺܝܗܽܘܕ܇ ܘܡܰܐܣܶܐ ܗܘܳܐ ܟܽܠ ܟܽܘܪ̈ܗܳܢܺܝܢ܇ ܒܦܽܘܩܕܳܢܳܐ ܠܚܽܘܕ ܘܰܒܡܶܠܬܳܐ܇ ܓܰܪ̈ܒܶܐ ܦܓܰܥܘ̱ ܒܶܗ ܘܶܐܬܕܰܟܺܝܘ܇ ܘܰܣܡ̈ܰܝܳܐ ܬܽܘܒ ܘܰܚܙܰܘ ܗ̱ܘܰܘ ܢܽܘܗܪܳܐ܇ ܘܝܰܗܒ ܚܽܘܠܡܳܢܳܐ ܠܰܡܫܰܪܝܳܐ ܘܰܛܥܶܢ ܥܰܪܣܶܗ ܟܰܕ ܚܳܕܶܐ܇ ܘܙܰܕܶܩ ܠܚܰܛܳܝ̈ܶܐ܇ ܘܟܰܦ̈ܢܶܐ ܡܠܳܐ ܡܶܢ ܛܳܒ̈ܳܬܶܗ܇ ܘܰܐܢ̱ܬܬܳܐ ܕܰܕܡܳܗܿ ܪܳܕܶܐ ܗܘܳܐ܇ ܟܰܕ ܩܶܪܒܰܬ݀ ܗܘܳܬ݀ ܠܠܰܡܺܐܢܶܗ ܢܶܣܒܰܬ݀ ܚܽܘܠܡܳܢܳܐ܀

ܛܺܝܡܰܝ ܣܰܡܝܳܐ ܩܳܥܶܐ ܗܘܳܐ܇ ܕܒܰܪ ܕܰܘܺܝܕ ܪܰܚܶܡܥܠܰܝ܇ ܘܰܐܢܰܗܪ ܠܺܝ ܥܰܝ̈ܢܰܝ ܕܶܐܚܙܶܐ܇ ܘܰܐܘܕܶܐ  ܠܪ̈ܰܚܡܶܐ ܕܛܰܝܒܽܘܬܳܟ܇ ܘܰܓܒܰܠ ܛܺܝܢܳܐ ܡܶܢ ܪܽܘܩܶܗ܇ ܘܛܳܫ ܥܰܠ ܥܰܝܢ̈ܰܘܗ̱ܝ ܡܶܚܕܶܐ ܘܶܐܬܦܰܬܰܚܘ̱܇ ܚܙܰܐܽܘܗ̱ܝ ܟܶܢܫ̈ܶܐ ܘܶܐܬܕܰܡܰܪܘ̱܇ ܘܝܰܗܒܘ̱ ܬܶܫܒܽܘܚܬܳܐ ܠܰܐܠܳܗܳܐ܇ ܫܽܘܒܚܳܐ ܠܗܰܘ ܨܶܡܚܳܐ܇ ܕܰܕܢܰܚ ܡܶܢ ܥܽܘܒܳܐ ܕܰܐܒܽܘܗ̱ܝ܇ ܘܰܒܙܰܠܺܝ̈ܩܰܘܗ̱ܝ ܪ̈ܽܘܚܳܢܶܐ܇ ܢܗܰܪܘ̱ ܒܶܪ̈ܝܳܬܳܐ ܘܛܳܥܰܝ̈ܳܐ ܦܢܰܘ ܠܺܝܕܰܥܬܳܐ܀

 

ܐ̱ܚܪܺܢܳܐ ܒܩܳܠܳܐ ܐܶܢܳܐ ܐ̱ܢܳܐ ܢܽܘܗܪܳܐ

ܟܰܕ ܡܳܪܰܢ ܒܽܐܘܪܚܳܐ ܪܕܳܐ ܗܘܳܐ܇ ܘܟܶܢܫ̈ܶܐ ܣܰܓܺܝ̈ܐܶܐ ܚܕܳܪ̈ܰܘܗ̱ܝ܇ ܩܶܪܒܰܬ݀ ܠܶܗ ܐܰܢ̱ܬܬܳܐ ܡܡܰܚܰܝܬܳܐ܇ ܘܶܐܬܰܐܣܝܰܬ݀ ܡܶܢ ܟܽܘܪܗܳܢܳܗܿ܇ ܘܶܐܬܦܢܺܝ ܡܳܪܰܢ ܘܶܐܡܰܪ ܠܶܗ܇ ܐܳܘ ܐܰܢ̱ܬܬܳܐ ܙܶܠܝ̱ ܒܰܫܠܳܡܳܐ܇ ܗܰܝܡܳܢܽܘܬܶܟܝ̱ ܐܰܚܝܰܬܶܟܝ̱܇ ܘܫܰܪܝܰܬ݀ ܙܳܡܪܳܐ ܬܶܫܒܽܘܚܬܳܐ܇ ܠܗܰܘ ܕܰܐܣܝܶܗ ܡܶܢ ܟܽܘܪܗܳܢܳܗܿ܀

ܫܽܘܒܚܳܐ ܠܶܗ ܠܳܐܣܝܳܐ ܫܡܰܝܳܢܳܐ܇ ܕܰܢܚܶܬ ܡܶܢ ܪܰܘܡܳܐ ܠܥܽܘܡܩܳܐ܇ ܕܢܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܓܶܢܣܶܗ ܕܳܐܕܳܡ ܕܶܐܬܚܰܒܰܠ܇ ܝܰܗܒ ܚܽܘܠܡܳܢܳܐ ܠܰܡܫܰܪܝܳܐ܇ ܘܠܰܟܢܰܥܢܰܝܬܳܐ ܥܽܘܕܪܳܢܳܐ܇ ܘܚܰܛܳܝܬܳܐ ܕܩܶܪܒܰܬ݀ ܨܶܝܕܰܘܗ̱ܝ܇ ܫܒܰܩ ܠܳܗܿ ܚܰܘܒܶܝ̈ܗܿ ܘܰܚܛܳܗ̈ܶܝܗܿ܇ ܘܰܟܬܰܒ ܠܰܫܡܳܗܿ ܒܰܣܒܰܪܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܥܰܝܢܳܐ ܪܰܒܬܳܐ ܕܗܰܝܡܳܢܽܘܬܳܐ ܚܙܳܝܗ̱ܝ ܠܰܡܫܺܝܚܳܐ܇ ܛܺܝܡܰܝ ܣܰܡܝܳܐ ܘܰܐܪܺܝܡ ܩܳܠܶܗ ܘܒܳܥܶܐ ܡܶܢܶܗ܇ ܫܰܪܺܝ ܩܳܥܶܐ ܐܳܘ ܒܪܶܗ ܕܕܰܘܺܝܕ ܪܰܚܶܡܥܠܰܝ܇ ܦܬܰܚ ܠܺܝ ܥܰܝܢ̈ܰܝ܇ ܒܳܥܶܐ ܐ̱ܢܳܐ ܡܳܪܝ̱ ܘܟܶܢ ܥܳܒܰܪ ܐܰܢ̱ܬ܀

ܗܳܝܕܶܝܢ ܡܳܪܰܢ ܪܰܩ ܥܰܠ ܐܰܪܥܳܐ ܒܚܰܟܺܝܡܽܘܬܶܗ܇ ܘܰܓܒܰܠ ܛܺܝܢܳܐ ܘܛܳܫ ܥܰܠ ܥܰܝܢ̈ܰܘܗ̱ܝ ܘܰܚܙܳܐ ܢܽܘܗܪܳܐ܇ ܢܣܰܟ ܗܘܳܐ ܢܽܘܗܪܳܐ ܒܥ̈ܰܝܢܰܝ ܛܺܝܡܰܝ ܘܶܐܬܒܰܝܰܐ ܠܶܗ܇ ܒܪܺܝܟ ܗܽܘ ܡܫܺܝܚܳܐ ܕܣܰܡܝܳܐ ܘܥܳܠܡܳܐ ܒܶܗ ܐܶܬܢܰܗܰܪܘ̱܀

 

ܡܥܺܝܪܳܢܳܐ ܕܠܺܠܝܳܐ܇ ܒܩܳܠܳܐ ܝܳܐܶܐ ܘܙܳܕܶܩ

ܥܰܡܡ̈ܶܐ ܘܛܽܘܗ̈ܡܶܐ ܘܫܰܪ̈ܒܳܬܳܐ܇ ܕܳܪ̈ܶܐ ܘܟܶܢ̈ܫܶܐ ܘܶܐܡܘ̈ܳܬܳܐ܇ ܣܳܓܕܺܝܢ ܠܶܗ ܠܰܒܪܳܐ ܕܶܐܬܳܐ܇ ܘܰܐܣܺܝ ܟܺܐܒ̈ܰܝܢ ܒܰܚܢܳܢܶܗ܀

ܚܰܝ̈ܶܐ ܠܡܺܝ̈ܬܶܐ ܦܰܠܶܓ ܗܘܳܐ܇ ܘܠܽܘܒܳܒܳܐ ܠܟܽܠ ܥܰܝܺܝ̈ܩܶܐ܇ ܠܟܰܦܢ̈ܶܐ ܣܰܒܥܳܐ ܘܬܽܘܪܣܳܝܳܐ܇ ܘܰܠܦܺܐܩܳܐ ܡܡܰܠܠܳܐ ܦܫܺܝܛܳܐ܇ ܫܽܘܒܚܳܐ ܠܳܟ܀

ܚܰܣܳܐ ܚܰܘܒ̈ܰܝܢ ܐܰܠܳܗܳܐ܇ ܘܰܫܒܽܘܩ ܟܽܠܗܶܝܢ ܣܰܟܠܘ̈ܳܬܰܢ܇ ܘܰܐܣܳܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ܇ ܕܢܰܘܕܶܐ ܠܳܟ ܥܰܠ ܚܽܘܠܡܳܢܰܢ ܫܽܘܒܚܳܐ ܠܳܟ܀

ܐܰܚܠܶܡ ܫܽܘܚܢ̈ܶܐ ܕܢܰܦܫ̈ܳܬܰܢ܇ ܐܰܝܟ ܕܰܐܚܠܶܡܬ ܠܰܡܡܰܚ̈ܰܝܳܐ ܘܰܡܪܽܘܩܰܝܢ ܒܙܽܘܦܳܟ ܕܰܟܝܳܐ܇ ܐܰܝܟ ܕܰܡܪܰܩܬ ܡܟܰܬܡ̈ܶܐ ܘܛܰܡ̈ܐܶܐ܇ ܫܽܘܒܚܳܐ ܠܳܟ܀

 

ܩܳܠܳܐ ܕܠܺܠܝܳܐ܇ ܒܩܳܠܐܳ ܡܳܪܝܳܐ ܡܳܪܰܢ

ܫܶܡܥܽܘܢ ܟܺܐܦܳܐ܇ ܢܽܘܢ̈ܶܐ ܒܝܰܡܳܐ ܨܳܐܶܕ ܗܘܳܐ܇ ܘܰܩܪܳܝܗ̱ܝ ܡܳܪܶܗ ܘܗܳܟܰܢ ܐܶܡܰܪ ܠܶܗ܇ ܬܳܐ ܠܳܟ ܫܶܡܥܽܘܢ܇ ܘܶܐܬܶܠ ܠܳܟ ܨܰܝܕܳܐ ܕܪܽܘܚܳܐ܇ ܕܰܬܨܽܘܕ ܐ̱ܢܳܫ̈ܳܐ ܡܶܢ ܡܰܘܬܳܐ ܠܚܰܝ̈ܶܐ܇ ܘܥܺܕܰܬ ܩܽܘܕܫܳܐ܇ ܥܠܰܝܟ ܫܶܡܥܽܘܢ ܒܳܢܶܐ ܐ̱ܢܳܐ ܠܳܗܿ܇ ܘܡܽܘܟܠܶܝ̈ܗܿ ܕܰܫܝܽܘܠ܇ ܠܳܐ ܡܨܶܝܢ ܚܳܣܢܺܝܢ ܠܳܗܿ܀

ܟܰܕ ܥܳܒܰܪ ܗܘܳܐ܇ ܒܶܝܬ ܟܰܪ̈ܟܶܐ ܒܪܳܐ ܕܰܐܠܳܗܳܐ܇ ܒܳܬܪܶܗ ܢܶܦܩܰܬ݀ ܟܢܰܥܢܰܝܬܳܐ ܘܳܐܡܪܳܐ܇ ܒܒܳܥܽܘ ܡܶܢܳܟ܇ ܐܳܣܝܳܐ ܛܳܒܳܐ ܘܒܰܣܺܝܡܳܐ܇ ܐܰܣܳܐ ܠܺܝ ܒܰܪܬܝ̱ ܡܶܢ ܐܺܝܕ̈ܰܝ ܫܺܐܕܳܐ܇ ܗ܇ ܒܪܺܝܟ ܕܶܐܡܰܪ ܠܳܗܿ܇ ܕܙܶܠܝ̱ ܐܰܢ̱ܬܬܳܐ ܐܰܟܡܳܐ ܕܨܳܒܝܰܬܝ̱ ܘܒܰܪܬܳܗܿ ܐܶܬܰܐܣܝܰܬ݀܀

 

ܡܰܕܪܳܫܳܐ܇ ܒܩܳܠܳܐ ܟܰܠܰܬ ܡܰܠܟܳܐ܇

ܛܳܒܳܐ ܕܠܳܐ ܨܒܳܐ ܒܡܰܘܬܶܗ ܕܚܰܛܳܝܳܐ܇ ܕܗܰܒܠܰܢ ܒܛܰܝܒܽܘܬܳܟ ܡܳܪܝ̱ ܫܽܘܒܩܳܢܳܐ܇

ܒܺܝ ܕܶܝܢ ܫܶܠܡܰܬ݀ ܡܶܠܬܳܐ܇ ܕܰܢܒܺܝܽܘܬܳܐ ܕܙܶܥܩܰܬ݀ ܘܶܐܡܪܰܬ݀܇ ܟܽܠ ܚܰܛܳܝܳܐ ܠܰܡ ܐܰܠܳܗܳܐ ܕܳܡܶܐ ܠܳܟ ܡܶܟܺܝܠ܇ ܠܡܶܩܪܳܐ ܟܬܳܒ̈ܰܝ܇ ܘܰܒܢܳܡܽܘ̈ܣܰܝ܇ ܠܡܶܬܗܰܓܳܝܽܘ܇ ܕܗܳܐ ܣܢܰܝܬ ܡܰܪܕܽܘܬܝ̱܇ ܡܳܪܰܢ ܐܰܢ̱ܬ ܗܰܒܠܺܝ ܕܶܐܪܚܰܡ ܡܰܪܕܽܘܬܳܟ܇ ܘܶܐܣܢܶܐ ܠܰܚܛܺܝܬܳܐ܇ ܘܒܳܟ ܐܶܛܦܰܣ܀

ܕܺܝܢܳܐ ܕܚܺܝܠܳܐ ܫܡܺܝܥ ܠܺܝ܇ ܡܶܢ ܒܶܝܬ ܚܰܘܒ̈ܶܐ ܕܟܶܬܒܰܬ݀ ܪܽܘܚܳܐ܇ ܘܗܳܐ ܛܶܒܥܿܶܬ ܠܺܝ ܒܫܶܢܬܳܐ ܘܰܪ̈ܓܺܝܓܳܬܳܐ ܕܥܳܠܡܳܐ ܒܺܝܫܳܐ܇ ܘܰܐܝܟ ܗܰܘ ܕܳܐܦܠܳܐ܇ ܛܶܐܒܶܗ ܫܡܺܝܥ ܠܺܝ܇ ܐܰܡܣܪܶܬ ܘܫܳܛܶܬ܇ ܡܳܪܰܢ ܠܳܐ ܬܰܪܦܰܝܢܝ̱܇ ܒܫܶܢܬܳܐ ܕܒܶܣܡܰܬ݀ ܠܺܝ܇ ܐܰܫܘܳܢܝ̱ ܕܠܳܗܿ ܐܶܣܢܶܐ܇ ܘܠܳܟ ܐܶܪܚܰܡ ܘܰܐܘܕܶܐ  ܠܰܚܢܳܢܳܟ܀

ܘܳܝܠܺܝ ܕܰܩܪܶܒ ܘܰܡܛܳܐ܇ ܝܽܘܡ ܢܽܘܚܳܡܳܐ ܕܒܶܗ ܡܶܬܦܰܪܫܺܝܢ܇ ܐܰܝܠܶܝܢ ܕܰܥܒܰܕܘ̱ ܛܳܒ̈ܳܬܳܐ܇ ܡܶܢ ܟܽܠ ܐܰܝܠܶܝܢ ܕܰܥܪܰܩܘ̱ ܡܶܢܳܗܿ܇ ܡܳܢܳܐ ܐܶܥܒܶܕ܇ ܐܶܢ ܚܽܘܫܒܳܢܳܐ܇ ܗܳܘܶܐ ܬܰܡܳܢ܇ ܕܡܶܠܬܳܐ ܟܣܺܝܬܳܐ܇ ܡܳܪܰܢ ܠܳܐ ܬܶܥܒܶܕ܇ ܚܽܘܫܒܳܢܳܐ ܕܣܰܢܝ̈ܳܬܝ̱܇ ܡܳܪܰܢ ܒܗܰܘ ܝܰܘܡܳܐ܇ ܠܳܐ ܬܚܰܝܒܰܢܝ̱܀

ܒܚܰܕ ܚܰܛܳܝܳܐ ܕܰܟܬܺܝܒ܇ ܫܡܰܥܘ̱ ܘܶܐܬܠܰܒܰܒܘ̱ ܟܽܠܗܽܘܢ܇ ܐܰܝܠܶܝܢ ܕܕܳܡܶܝܢ ܠܺܝ ܒܕܽܘܒܳܪ̈ܶܐ܇ ܬܰܘ ܢܶܬܟܰܫܰܪ܇ ܘܢܶܩܢܶܐ ܡܶܟܺܝܠ܇ ܠܰܬܰܘܳܬ ܢܰܦܫܳܐ܇ ܡܚܰܕܝܰܬ ܠܥܺܝܪ̈ܶܐ܇ ܡܳܪܰܢ ܐܰܢ̱ܬ ܐܰܫܘܳܢܝ̱ ܕܶܐܗܘܶܐ ܠܡܰܠܰܐܟ̈ܶܐ܇ ܪܘܳܙܳܐ ܘܬܶܬܩܰܠܰܣܝ̱ ܛܰܝܒܽܘܬܳܟ܀

ܝܰܘܡ̈ܰܝ ܐܰܫܩܶܠܘ̱ ܘܰܓܡܰܪܘ̱ ܘܰܐܳܘܦܺܝܘ ܟܽܠܗܽܘܢ ܥܰܡ ܒܶܛܠܳܢܳܐ܇ ܘܰܐܟܡܳܐ ܕܰܠܘܰܝ ܕܶܐܬܓܠܶܙܘ̱܇ ܡܶܢ ܬܶܐܓܽܘܪܬܳܐ ܕܫܰܦܺܝܪ̈ܳܬܳܐ܇ ܗܳܟܰܢܳܐ ܬܽܘܒ܇ ܐܶܣܬܰܪܰܩܘ̱ ܗ̱ܘܰܘ܇ ܡܶܢ ܣܰܢܝ̈ܳܬܳܐ܇ ܘܰܗܘܳܐ ܢܦܺܐܫܳܐ܇ ܡܳܪܰܢ ܠܳܐ ܬܶܥܒܶܕ܇ ܚܽܘܫܒܳܢܝ̱ ܟܺܐܢܽܘܬܳܟ܇ ܕܠܳܐ ܐܺܝܬ ܠܺܝ ܡܶܕܶܡ ܕܶܐܙܟܶܐ ܒܶܗ܀

ܠܳܐ ܗܘܳܐ ܡܶܛܽܠ ܟܰܫܺܝܪ̈ܶܐ܇ ܗܘܳܬ݀ ܡܶܐܬܺܝܬܳܟ ܡܳܪܝ̱ ܠܰܒܪܺܝܬܳܐ܇ ܠܰܡܡܰܚ̈ܰܝܳܐ ܐܶܬܪܰܟܢܰܬ݀ ܠܡܰܐܣܳܝܽܘܬܗܽܘܢ܇ ܕܓܳܠܘ̱ ܗ̱ܘܰܘ ܪ̈ܰܚܡܰܝܟ܇ ܘܶܐܢܳܐ ܕܺܐܝܬܰܝ܇ ܡܶܢ ܡܶܢܝܳܢܳܐ܇ ܕܰܡܡܰܚܰܝ̈ܳܐ ܘܶܐܬܡ̈ܣܺܝ̱ ܚܒܳܪ̈ܳܬܝ̱܇ ܡܳܪܰܢ ܐܰܢ̱ܬ ܐܰܣܳܢܝ̱܇ ܘܰܟܐܺܝ ܒܗܽܘܢ ܒܳܟܺܐܒ̈ܶܐ ܕܢܰܦܫܝ̱܇ ܘܶܐܙܡܰܪ ܠܳܟ ܫܽܘܒܚܳܐ ܥܰܡ ܚܠܺܝ̈ܡܶܐ܀

ܢܶܒܗܰܬ ܒܺܝܫܳܐ ܕܰܐܩܢܺܝܢܝ̱ ܒܶܗܬܰܬ ܐܰܦ̈ܶܐ ܩܕܳܡܰܝܟ ܐܰܠܳܗܝ̱܇ ܘܢܶܟܰܐܒ ܠܶܒܶܗ ܕܰܐܳܘܪܬܰܢܝ̱܇ ܟܺܐܒܳܐ ܕܠܶܒܳܐ ܒܰܢܟܺܝܠܽܘܬܶܗ܇ ܘܢܶܦܣܽܘܩ ܣܰܒܪܶܗ܇ ܡܳܐ ܕܚܳܙܶܐ ܠܺܝ܇ ܕܣܰܒܪܳܐ ܩܢܺܝܿܬ ܒܳܟ܇ ܣܰܒܪܗܽܘܢ ܕܚܰܝ̈ܰܝ܇ ܡܳܪܰܢ ܐܰܫܘܳܢܝ̱ ܐܰܢ̱ܬ܇ ܘܶܐܗܘܶܐ ܒܟܽܠܡܶܕܶܡ܇ ܣܰܩܽܘܒܠܳܐ ܠܒܺܝܫܳܐ ܕܠܺܝ ܡܰܐܚܶܫ܀

ܥܠܰܝ ܗܽܘ ܙܳܕܶܩ ܕܢܶܒܟܶܐ܇ ܟܽܠ ܡܰܢ ܕܺܐܝܬ ܠܶܗ ܠܶܒܳܐ ܕܚܰܫܺܝܫ܇ ܟܰܕ ܒܰܒܢܰܝ̈ܳܐ ܐܶܬܩܪܺܝܿܬ܇ ܡܶܢ ܐܰܠܳܗܳܐ ܕܕܺܝܠܶܗ ܐܶܗܘܶܐ܇ ܠܕܰܪܓܳܐ ܕܥܰܒ̈ܕܶܐ ܒܰܛܺܝ̈ܠܶܐ ܘܰܚܒ̈ܰܢܳܢܶܐ܀

ܨܠܶܡ ܐܰܠܳܗܳܐ ܐܶܬܬܒܪܺܝܬ܇ ܡܶܢ ܐܰܠܳܗܳܐ ܕܶܐܗܘܶܐ ܒܪ̈ܰܚܡܶܐ܇ ܚܣܰܡ ܒܺܝ ܒܺܝܫܳܐ܇ ܘܣܰܚܦܰܢܝ̱܇ ܡܶܢ ܗܰܘ ܕܰܪܓܳܐ ܕܩܳܐܶܡ ܗܘܺܝܬ ܒܶܗ܇ ܘܗܳܐ ܠܳܐܶܐ ܒܺܝ܇ ܕܰܠܡܳܐ ܐܶܩܽܘܡ܇ ܡܶܢ ܡܰܦܽܘܠܬܳܐ܇ ܕܣܰܚܦܰܢܝ̱ ܘܰܫܕܰܢܝ̱܇ ܡܳܪܰܢ ܐܰܘܫܶܛ ܠܺܝ܇ ܐܺܝܕܳܟ ܘܰܐܩܺܝܡܰܝܢܝ̱܇ ܕܒܳܟ ܗܽܘ ܡܨܶܐ ܩܳܐܶܡ܇ ܟܽܠ ܕܢܰܦܺܝܠ܀

ܪ̈ܰܚܡܶܐ ܫܦܺܝ̈ܥܶܐ ܕܰܐܪܟܢܽܘܟ܇ ܡܶܢ ܨܶܝܕ ܐܰܒܽܘܟ ܠܘܳܬ ܒܺܝܫܽܘܬܰܢ܇ ܢܶܗܘܽܘܢ ܠܺܝ ܡܳܪܝ̱ ܣܢܺܐܓܪܳܐ܇ ܒܝܰܘܡܳܐ ܐ̱ܚܪܳܝܳܐ܇ ܕܦܳܣܺܝܩ̈ܳܬܳܐ܇ ܘܰܐܦܠܶܛ ܡܶܢ ܗܰܘ ܕܺܝܢܳܐ ܕܚܝܠܳܐ܇ ܡܶܬܠܰܚܰܡ ܠܺܝ܇ ܐܶܬܚܰܢܰܢ ܠܺܝ ܘܺܐܡܰܪ܇ ܡܳܪܰܢ ܠܳܟ ܫܽܘܒܚܳܐ ܕܰܙܟܰܝܬ ܠܚܰܝ̈ܳܒܶܐ܇ ܘܰܐܫܘܺܝܬ ܠܚܰܝ̈ܳܒܶܐ ܕܢܶܙܕܰܕܩܽܘܢ܀

ܒܺܝ ܒܳܪܽܘܝܳܐ ܬܶܬܢܰܨܰܚܝ̱܇ ܡܪܰܚܡܳܢܽܘܬܳܟ ܒܰܪ ܚܰܢܳܢܳܐ܇ ܘܰܚܠܳܦ ܕܰܗܘܺܝܿܬ ܛܳܥܝܳܐ܇ ܐܳܦ ܐܰܒܺܝܕܳܐ ܘܡܺܝܬܳܐ ܣܰܪܝܳܐ܇ ܐܶܗܘܶܐ ܫܟܺܝܚܳܐ܇ ܠܥܶܠ ܡܶܢ ܡܰܘܬܳܐ܇ ܚܰܕܘܳܐ ܠܥܺܝܪ̈ܶܐ܇ ܘܥܳܩܬܳܐ ܠܕܰܝܘ̈ܶܐ܇ ܡܳܪܰܢ ܐܰܢ̱ܬ ܐܰܫܘܳܢܝ̱ ܕܶܐܩܥܶܐ ܒܝܽܘܡ ܡܶܐܬܝܳܟ܇ ܒܪܺܝܟ ܪܳܥܝܳܐ ܕܫܰܩܠܰܢܝ̱ ܥܰܠ ܟܰܬܦܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܨܽܘܬܰܘ̱ ܦܳܪ̈ܽܘܫܶܐ ܩ̈ܳܠܶܐ ܕܰܐܪܡܺܝ ܒܪܳܐ ܐܳܣܽܘܛܳܐ܇ ܟܰܕ ܐܶܬܕܰܟܪܶܗ ܠܰܐܒܳܐ ܕܝܰܗܒܠܶܗ ܡܶܢ ܝܳܪܬܽܘܬܶܗ܇ ܢܶܒܳܟܽܘܢ ܥܠܰܝ ܛܽܘܪ̈ܶܐ ܕܰܒܗܽܘܢ ܗܳܐ ܦܳܗܶܐ ܐ̱ܢܳܐ܇ ܟܰܕ ܝܳܗܒܺܝܢ ܠܺܝ ܘܳܝܳܐ ܒܚܰܫܳܐ ܕܡܳܢܳܐ ܓܰܕܫܰܢܝ̱܀

ܠܡܰܢ ܐܶܫܰܕܰܪ ܢܺܐܙܰܠ ܢܦܺܝܣ ܠܳܐܒܝ̱ ܪܰܚܡܳܢܳܐ܇ ܒܩ̈ܳܠܶܐ ܚܢܺܝܓ̈ܶܐ ܘܗܳܦܟܺܝܢ ܪ̈ܰܚܡܶܐ ܕܰܐܒܳܗܽܘܬܳܐ܇ ܐܶܢ ܩܳܪܶܒ ܐ̱ܢܳܐ ܠܰܦܣܳܩ ܣܰܒܪܳܐ ܐܳܒܶܕ ܐ̱ܢܳܐ ܠܺܝ܇ ܘܠܳܐ ܡܶܫܟܰܚ ܐ̱ܢܳܐ ܐܶܦܽܘܩ ܪܽܘܚܳܐ ܥܰܠ ܣܽܘܪ̈ܚܳܢܰܝ܀

 

ܕܨܰܦܪܳܐ ܕܰܐܪܒܥܳܐ܇

ܕܪܰܚܶܡܥܠܰܝ ܩܳܠܳܐ ܗܰܘ ܕܰܗܘܳܐ ܒܽܘܟܪܳܐ

ܗܰܘ ܕܰܐܦܶܩ ܫܺܐܕ̈ܶܐ ܡܶܢ ܥܰܡ̈ܡܶܐ܇ ܘܰܐܦܢܺܝ ܐܶܢܽܘܢ ܠܰܛܝܳܪܶܗ ܪܰܚܶܡܥܠܰܝ܀

ܗܰܘ ܕܶܐܡܰܪ ܠܓܰܒܪܳܐ ܟܺܐܒܬܳܢܳܐ܇ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܶܐ ܪܰܚܶܡܥܠܰܝ܀

ܗܰܘ ܕܰܕܡܶܟ ܒܶܐܠܦܳܐ ܒܓܰܘ ܝܰܡܳܐ܇ ܘܰܟܐܳܐ ܒܪ̈ܽܘܚܶܐ ܘܫܰܬܶܩ ܐܶܢܶܝܢ ܪܰܚܶܡܥܠܰܝ܀

ܗܰܘ ܕܶܐܚܰܕ ܒܺܐܝܕܶܗ ܕܰܛܠܺܝܬܳܐ܇ ܘܡܶܢ ܥܰܪܣܳܐ ܕܡܺܝ̈ܬܶܐ ܩܳܡܰܬ݀܇ ܪܰܚܶܡܥܠܰܝ܀

ܗܰܘ ܕܰܓܒܰܠ ܛܺܝܢܳܐ ܡܶܢ ܪܽܘܩܶܗ܇ ܛܳܫ ܥܰܠ ܥܰܝܢܰܘ̈ܗ̱ܝ ܕܗܰܘ ܣܰܡܝܳܐ܇ ܪܰܚܶܡܥܠܰܝ܀

ܗܰܘ ܕܰܩܪܳܐ ܒܩܳܠܶܗ ܠܠܳܥܳܙܳܪ܇ ܘܡܶܢ ܩܰܒܪܳܐ ܐܰܩܺܝܡܶܗ ܗܘܳܐ܇ ܪܰܚܶܡܥܠܰܝ܀

 

ܐܰܠܳܗܝ̱ ܐܰܠܳܗܝ̱܇ ܩܳܠܳܐ ܒܬܽܘܠܬܳܐ ܩܰܕܺܝܫܬܳܐ

ܚܶܒܨܰܬ݀ ܗܘܳܬ݀ ܥܶܠܰܬ݀܇ ܐܰܢ̱ܬܬܳܐ ܡܡܰܚܰܝܬܳܐ܇ ܒܓܰܘ ܟܶܢܫ̈ܶܐ ܘܩܶܪܒܰܬ݀ ܠܡܰܪܛܽܘܛܶܗ ܘܶܐܬܰܐܣܝܰܬ݀܀

ܚܰܝܠܶܗ ܐܰܢܗܰܪ ܗܘܳܐ܇ ܠܰܣܡ̈ܰܝܳܐ ܘܕܽܘ̈ܓܶܐ܇ ܘܩܳܠܶܗ ܢܰܚܶܡ ܗܘܳܐ܇ ܠܥܰܢܺܝܕ̈ܶܐ ܩܒܺܝܪ̈ܶܐ܀

ܝܰܡܳܐ ܫܓܰܫ ܢܰܦܫܶܗ܇ ܕܰܚܙܳܐ ܠܒܳܪܽܘܝܶܗ܇ ܘܰܥܪܰܩ ܗܘܳܐ ܕܢܶܥܒܰܪ܇ ܬܗܽܘܡܳܐ ܘܠܳܐ ܐܶܫܟܰܚ܀

ܠܠܶܓܝܽܘܢ ܫܕܳܐ ܒܝܰܡܳܐ܇ ܠܫܳܡܪܳܝܬܳܐ ܬܰܠܡܶܕ܇ ܠܚܰܪܫܳܐ ܝܰܗܒ ܩܳܠܳܐ܇ ܘܕܽܘܓܳܐ ܫܡܰܥ ܡܡܰܠܠܳܐ܀

ܠܰܡܫܰܪܝܳܐ ܐܰܩܺܝܡ܇ ܠܣܰܡܝܳܐ ܝܰܗܒ ܢܽܘܗܪܳܐ܇ ܘܰܟܠܳܐ ܒܝܰܕ ܢܰܚܬܶܗ܇ ܪܶܕܝܳܐ ܕܡܡܰܚܰܝܬܳܐ܀

ܠܣܰܡܝܳܐ ܒܝܰܕ ܛܺܝܢܳܐ܇ ܦܰܬܰܚ ܠܶܗ ܥܰܝܢܰܘ̈ܗ̱ܝ܇ ܘܰܐܣܺܝ ܠܡܰܐܟܰܒܬܳܐ܇ ܒܳܟܶܢܦܳܐ ܕܡܪܛܽܘܛܶܗ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܩܳܠܳܐ ܕܫܽܘܒܚܳܐ ܒܦܽܘܡ

ܒܛܶܠܘ̱ ܗ̱ܘܰܘ ܒܽܝܗܽܘܕ ܐܳܣܰܘ̈ܳܬܳܐ ܘܰܥܨܳܒܰܝ̈ܗܽܘܢ܇ ܒܗܰܘ ܐܳܣܝܳܐ ܕܡܰܐܣܶܐ ܡܰܓܳܢ܇ ܒܛܶܠܘ̱ ܚܰܟܺܝ̈ܡܶܐ܇ ܘܣܰܡܡ̈ܳܢܰܝܗܽܘܢ ܘܰܪܗܶܛܘ̱ ܠܘܳܬ ܚܰܕ܇ ܕܡܶܢ ܢܰܚ̈ܬܰܘܗ̱ܝ ܢܒܰܥܘ̱ ܚܽܘܠܡܳܢ̈ܶܐ܀

ܦܰܬܰܚ ܡܳܪܰܢ ܥܰܝ̈ܢܶܐ ܕܣܰܡܝܳܐ ܘܶܐܕܢ̈ܶܐ ܕܕܽܘܓܳܐ܇ ܘܰܦܫܰܛ ܠܶܫܳܢܶܗ ܕܦܺܐܩܳܐ܇ ܘܦܰܬܰܚ ܡܳܪܰܢ ܦܽܘܡ̈ܶܐ ܣܟܺܝܪ̈ܶܐ܇ ܘܫܰܒܰܚܘ̱ ܠܰܫܡܶܗ܇ ܐܳܦ ܠܰܡܫܰܪܝܳܐ ܐܰܚܠܶܡ ܗܘܳܐ܀

ܐܶܕܢܳܐ ܕܕܽܘܓܳܐ ܕܫܶܡܥܰܬ݀ ܩܳܠܳܐ ܒܩ̈ܳܠܶܐ ܘܡ̈ܶܠܶܐ܇ ܬܶܗܪܰܬ݀ ܗܘܳܬ݀ ܐܳܦ ܐܶܬܕܰܡܪܰܬ݀܇ ܘܗܰܘ ܕܝܰܡܺܝܢܶܗ ܐܶܬܦܰܫܛܰܬ݀ ܗܘܳܬ݀ ܠܳܐ ܫܳܠܶܐ ܗܘܳܐ܇ ܡܶܢ ܕܰܡܪܺܝܡ ܠܳܗܿ ܒܚܰܕܽܘܬܳܐ܀

ܚܽܘܪܒܳܐ ܘܫܰܝܢܳܐ ܒܳܟ ܐܶܫܬܰܝܰܢܘ̱ ܫܰܝܢܳܐ ܕܟܽܠܳܗܿ܇ ܘܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܇ ܒܕܰܒܪܳܐ ܣܡܳܟ̈ܶܐ ܓܢܳܐ ܚܰܛܳܝ̈ܶܐ ܘܰܓܢܳܐ ܒܪܺܝܫܗܽܘܢ܇ ܫܳܒܶܩ ܚܰܘܒ̈ܶܐ ܘܰܚܛܳܗ̈ܶܐ܀

 

ܐ̱ܚܪܺܢܳܐ ܩܳܠܳܐ ܝܰܡܳܐ ܕܶܐܬܦܰܠܰܓ

ܠܰܟܦܰܪܢܰܚܽܘܡ ܥܰܠ ܝܰܡܳܐ ܕܪ̈ܰܚܡܶܐ ܡܳܪܰܢ܇ ܘܶܐܫܟܰܚ ܐ̱ܢܳܫ ܕܺܐܝܬ ܠܶܗ ܐܺܝܕܳܐ ܕܝܰܒܺܝܫܳܐ ܗܘܳܬ݀܇ ܩܳܪܐ ܠܶܗ ܘܩܰܪܒܶܗ ܠܘܳܬ ܟܶܢܫ̈ܶܐ܇ ܕܰܟܢܺܝܫܺܝܢ ܗ̱ܘܰܘ ܘܶܐܡܰܪ ܠܶܗ܇ ܕܰܦܫܽܘܛ ܐܺܝܕܳܟ ܒܰܪܢܳܫܳܐ ܘܬܶܩܢܰܬ݀ ܫܰܦܺܝܪ܇ ܘܝܰܗܒ ܬܶܫܒܽܘܚܬܳܐ ܠܰܐܠܳܗܳܐ܇ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܗܳܢܰܘ ܐܳܣܝܳܐ ܫܡܰܝܳܢܳܐ܇ ܕܺܐܝܬ ܠܶܗ ܥܨܳܒ̈ܶܐ܇ ܕܠܳܐ ܣܰܡܡ̈ܳܢܶܐ ܒܗܽܘܢ ܡܰܐܣܶܐ ܟܺܐܒ̈ܶܐ ܥܰܣ̈ܩܶܐ܇ ܗܳܢܰܘ ܐܳܣܝܳܐ ܚܰܟܺܝܡܳܐ܇ ܕܗܽܘ ܐܶܬܳܐ ܨܶܝܕ ܕܰܟܪ̈ܺܝܗܺܝܢ܇ ܘܰܐܣܺܝ ܗܘܳܐ ܠܟܽܠ ܕܰܦܓܰܥ ܒܡܶܠܰܬ ܦܽܘܡܶܗ܇ ܘܫܰܪܰܪ ܘܰܐܩܺܝܡ ܘܰܐܬܩܶܢ ܟܽܠ ܡܶܛܽܠܳܬܰܢ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܢܰܦܫܳܐ ܥܩܰܪܬܳܐ

ܒܶܐܠܦܳܐ ܒܝܰܡܳܐ܇ ܥܰܠ ܒܶܣܰܕܝܳܐ ܕܡܶܟ ܐ̱ܢܳܫܳܐܺܝܬ ܦܳܪܽܘܩܰܢ܇ ܘܰܢܫܰܒ̈ܝ̱ ܪ̈ܽܘܚܶܐ ܥܰܙܺܝܙ̈ܳܬܳܐ܇ ܐܰܝܟ ܕܬܶܬܛܰܒܰܥܝ̱ ܠܶܗ ܐܶܠܦܳܐ ܗܳܝܕܶܝܢ܇ ܘܬܰܠܡܺܝܕ̈ܶܐ ܐܰܥܽܝܪܽܘܗ̱ܝ ܗ̱ܘܰܘ܇ ܘܩܳܡ ܗܘܳܐ ܘܶܐܡܰܪ ܠܘܳܬ ܝܰܡܳܐ܇ ܫܬܽܘܩ ܙܓܺܝܪ ܐܰܢ̱ܬ ܠܳܟ ܐܳܡܰܪ ܐ̱ܢܳܐ܇ ܘܢܳܚܘ̱ ܡܰܚܫܽܘ̈ܠܶܐ ܘܰܐܢܗܰܪ ܐܳܐܰܪ܀

ܠܗܰܝܡܳܢܽܘܬܳܐ܇ ܕܗܰܘ ܩܶܢܛܪܽܘܢܳܐ ܢܰܨܰܚ ܘܰܐܳܘܪܶܒ ܩܕܳܡ ܟܶܢܫ̈ܶܐ܇ ܘܰܠܗܰܘ ܣܰܡܝܳܐ ܕܡܶܢ ܟܪܶܣ ܐܶܡܶܗ܇ ܝܰܗܒ ܢܽܘܗܪܳܐ ܐܰܠܳܗܳܐܺܝܬ܇ ܘܫܰܕܪܶܗ ܕܰܢܫܺܝܓ ܒܫܺܝܠܽܘܚܳܐ܇ ܘܠܺܐܝܕܳܐ ܕܝܰܒܺܝܫܳܐ ܗܘܳܬ݀ ܦܫܰܛ܇ ܘܰܠܛܺܝܡܰܝ ܢܽܘܗܪܳܐ ܫܰܟܶܢ܇ ܐܰܝܟ ܡܬܰܩܢܳܢܳܐ ܘܰܡܟܰܝܢܳܢܳܐ܀

ܐ̱ܚܪܺܢܳܐ ܝܰܘܡܳܢܳܐ

ܟܰܕ ܪܳܕܶܐ ܗܘܳܐ܇ ܗܽܘ ܡܳܪܰܢ ܒܰܬܚܽܘ̈ܡܶܐ ܕܒܶܝܬ ܨܽܘܪ ܘܰܕܨܰܝܕܳܢ܇ ܘܢܶܦܩܰܬ݀ ܐܰܢ̱ܬܬܳܐ ܕܩܳܥܝܳܐ ܘܳܐܡܪܳܐ ܐܰܣܳܐ ܠܺܝ ܒܰܪܬܝ̱܇ ܘܦܰܢܺܝ ܠܳܗܿ ܗܽܘ ܕܢܶܗܘܶܐ ܠܶܟܝ̱܇ ܐܰܝܟܰܢܳܐ ܕܨܳܒܝܰܬܝ̱܀

ܚܶܢܓ̈ܳܬܳܐ܇ ܘܡܶܫܚܳܐ ܘܕܶܡܥ̈ܶܐ ܦܰܐܝ̈ܳܬܳܐ ܫܶܩܠܰܬ݀ ܟܰܕ ܥܶܠܰܬ݀܇ ܘܰܠܗܰܘ ܪܰܒܳܐ ܕܳܐܣܰܘ̈ܳܬܳܐ ܥܶܠܰܬ݀ ܣܶܓܕܰܬ݀܇ ܘܰܒܣܰܥܪܳܗܿ ܫܰܘܝܰܬ݀ ܗܘܳܬ݀܇ ܠܪ̈ܶܓܠܰܘܗ̱ܝ ܒܚܰܕܽܘܬܳܐ܀

 

ܐ̱ܚܪܺܢܳܐ܇ ܟܽܠܟܽܘܢ ܥܰܒܕܰܘ̈ܗ̱ܝ ܕܰܐܠܳܗܳܐ

ܡܰܢ ܠܳܐ ܢܶܬܗܰܪ ܒܶܗ ܒܳܐܣܝܳܐ܇ ܕܪ̈ܰܚܡܶܐ ܘܕܰܚܢܳܢܳܐ ܕܰܐܣܺܝ ܗܘܳܐ ܘܰܐܚܠܶܡ܇ ܟܺܐܒ̈ܶܐ ܟܣܰܝ̈ܳܐ ܕܢܰܦܫ̈ܳܬܰܢ ܒܥܽܘܕܪ̈ܳܢܰܘܗ̱ܝ ܐܰܠܳܗܳܝ̈ܶܐ܇ ܣܥܰܪ ܗܘܳܐ ܠܰܒܪܺܝܬܳܐ ܟܽܠܳܗܿ܇ ܥܰܡܡ̈ܶܐ ܘܶܐܡܘ̈ܳܬܳܐ ܙܡܰܪܘ̱ ܠܶܗ ܫܽܘܒܚܳܐ܀

 

ܩܳܠܳܐ ܕܨܰܦܪܳܐ܇ ܒܩܳܠܳܐ ܛܽܘܒܰܝܟܝ̱ ܥܺܕܬܳܐ

ܩܳܡ ܗܘܳܐ ܝܶܫܽܘܥ܇ ܘܰܩܪܳܐ ܐܶܢܽܘܢ ܘܶܐܡܰܪ ܠܗܽܘܢ܇ ܡܳܢܳܐ ܨܳܒܶܝܬܽܘܢ ܐܶܥܒܶܕ܇ ܐܳܡܪܺܝܢ ܠܶܗ ܡܳܪܰܢ ܢܶܚܙܶܐ܇ ܘܒܰܪ ܫܳܥܬܶܗ ܩܪܶܒ ܠܥܰܝܢܰܝ̈ܗܽܘܢ܇ ܘܶܐܬܦܰܬܰܚܘ̱ ܘܰܩܢܰܘ ܢܽܘܗܪܳܐ܇ ܘܩܳܡܘ̱ ܗܶܢܽܘܢ ܘܶܐܙܰܠܘ̱ ܒܳܬܪܶܗ܇ ܘܟܶܢܫ̈ܶܐ ܣܰܓܺܝ̈ܐܶܐ ܕܰܚܙܰܘ܇ ܗܰܝܡܶܢܘ̱ ܒܶܗ ܕܒܰܪ ܐܰܠܳܗܰܐܗ̱ܘ܇ ܕܶܐܬܳܐ ܡܶܛܽܠ ܦܽܘܪܩܳܢܰܢ܀

ܦܓܰܥ ܗܘܳܐ ܓܰܒܪܳܐ܇ ܒܡܳܪܰܢ ܝܶܫܽܘܥ ܘܶܐܡܰܪ ܠܶܗ܇ ܡܳܪܝܳܐ ܐܶܢܗܽܘ ܕܨܳܒܶܐ ܐܰܢ̱ܬ܇ ܡܨܶܝܬ ܚܰܝܠܳܐ ܠܰܡܕܰܟܝܽܘܬܝ̱܇ ܘܥܰܡܳܗܿ ܕܡܶܠܬܶܗ ܚܙܳܐ ܡܳܪܰܢ܇ ܬܪܺܝܨܽܘܬܳܐ ܕܗܰܝܡܳܢܽܘܬܶܗ܇ ܘܶܐܬܕܰܟܺܝ ܓܰܪܒܶܗ ܓܰܠܝܳܐ ܘܡܽܘܡ̈ܶܐ ܟܣܳܝ̈ܶܐ ܕܰܒܢܰܦܫܶܗ܇ ܘܠܰܢ ܕܰܟܳܐ ܠܰܢ ܦܳܪܽܘܩܰܢ܇ ܡܶܢ ܟܽܘܬܡ̈ܳܬܳܐ ܕܰܚܛܺܝܬܳܐ܀

 

ܐ̱ܚܪܺܢܳܐ ܩܳܠܳܐ ܣܳܗܕܰܘ̈ܗ̱ܝ ܐܰܢ̱ܬܽܘܢ

ܒܪܺܝܟ ܗܽܘ ܐܳܣܝܳܐ܇ ܕܶܐܬܳܐ ܒܚܽܘܒܶܗ ܨܶܝܕ ܚܰܛܳܝ̈ܶܐ܇ ܕܢܰܐܣܶܐ ܟܺܐܒܰܝ̈ܗܽܘܢ܇ ܘܰܐܫܦܰܥ ܘܰܡܠܳܗܿ ܠܰܐܪܥܳܐ ܟܽܠܳܗܿ ܡܶܢ ܥܽܘܕܪ̈ܳܢܰܘܗ̱ܝ܇ ܘܓܰܙܳܐ ܕܡܰܘܗܰܒܬܶܗ܇ ܫܽܘܒܚܳܐ ܢܰܣܶܩ ܠܶܗ܇ ܕܰܗܘܳܐ ܐ̱ܢܳܫܳܐ ܒܨܶܒܝܳܢܶܗ܇ ܕܢܶܥܒܶܕ ܠܰܢ ܒܢܰܝ̈ܳܐ ܠܰܐܒܽܘܗ̱ܝ܀

ܗܳܝ ܡܡܰܚܰܝܬܳܐ܇ ܠܟܶܢܦܳܐ ܕܡܳܪܰܢ ܐܶܬܩܰܪܒܰܬ݀ ܗܘܳܬ݀܇ ܘܢܶܣܒܰܬ݀ ܚܽܘܠܡܳܢܳܐ܇ ܘܗܳܝ ܚܰܛܳܝܬܳܐ ܒܕܶܡܥ̈ܶܐ ܕܥܰܝܢܶܝ̈ܗܿ܇ ܨܶܒܥܰܬ݀ ܪ̈ܶܓܠܰܘܗ̱ܝ ܘܰܫܒܰܩ ܠܳܗܿ ܚܰܘ̈ܒܶܝܗܿ܇ ܘܰܒܝܰܕ ܪܽܘܩܶܗ܇ ܠܣܰܡܝܳܐ ܦܰܬܰܚ ܠܶܗ ܥܰܝܢܰܘ̈ܗ̱ܝ܇ ܘܰܚܙܳܐ ܢܽܘܗܪܳܐ ܫܰܪܺܝܪܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܫܳܡܰܥ ܗܘܳܐ ܠܗܽܘܢ ܪܳܚܶܡ ܐ̱ܢܳܫܳܐ ܟܰܕ ܡܶܬܟܰܫܦܺܝܢ܇ ܘܰܫܒܰܩ ܐܶܢܽܘܢ ܕܝܰܬܺܝܪ ܢܶܣܓܽܘܢ ܗܰܝܡܳܢܽܘܬܗܽܘܢ܇ ܘܟܰܕ ܫܰܡܠܺܝ ܗܘܳܐ ܚܫܰܚܬܳܐ ܕܽܐܳܘܪܚܶܗ ܘܰܡܛܳܐ ܠܒܰܝܬܳܐ ܫܰܐܶܠ ܐܶܢܽܘܢ ܡܽܘܢ ܨܳܒܶܝܬܽܘܢ ܐܶܥܒܶܕ ܠܟܽܘܢ܀

ܫܽܘܒܚܳܐ ܠܰܐܒܳܐ ܪܺܝܫܳܐ ܕܢܽܘܗܪܳܐ ܘܗܽܘܝܽܘ ܢܽܘܗܪܳܐ܇ ܘܣܶܓܕܬܳܐ ܠܰܒܪܳܐ ܕܝܰܗܒ ܗܘܳܐ ܢܽܘܗܪܳܐ ܠܰܬܪܶܝܢ ܣܡܰܝ̈ܳܐ܇ ܬܰܘܕܺܝ ܠܪܽܘܚܳܐ ܕܒܶܗ ܡܶܬܢܰܗܪܺܝܢ ܟܽܠ ܚܶܫܽܘܟ̈ܶܐ܇ ܬܠܺܝܬܳܝ ܢܽܘܗܪܳܐ ܒܳܟ ܢܶܬܢܰܗܰܪ ܟܽܠ ܬܶܫܒܽܘܚܬܳܐ܀

 

ܕܰܬܠܳܬܫ̈ܳܥܺܝܢ܇ ܩܳܠܳܐ ܠܡܰܠܟܽܘܬ ܪܰܘܡܳܐ

ܠܳܟ ܬܶܫܒܽܘܚܬܳܐ ܡܶܠܬܳܐ ܐܰܠܳܗܳܐ܇ ܕܶܐܬܳܐ ܠܦܽܘܪܩܳܢܰܢ܇ ܘܩܰܒܶܠ ܥܠܰܘܗ̱ܝ ܒܰܚܢܳܢܶܗ܇ ܘܥܰܠ ܒܶܣܰܕܝܳܐ ܫܟܶܒ ܘܶܐܬܬܢܺܝܚ܇ ܘܡܰܚܫܽܘ̈ܠܶܐ ܕܝܰܡܳܐ ܫܰܬܶܩ܇ ܘܰܠܝܰܡܳܐ ܘܝܰܒܫܳܐ ܫܰܝܶܢ܇ ܫܽܘܒܚܳܐ ܠܶܗ ܕܙܰܕܩܰܢ ܒܛܰܝܒܽܘܬܶܗ܀

ܐܶܡܰܪ ܡܳܪܰܢ܇ ܠܫܶܡܥܽܘܢ ܦܪܺܝܫܳܝܳܐ܇ ܩܕܳܡ ܟܽܠ ܕܰܣܡܺܝܟܺܝܢ܇ ܕܗܳܐ ܐܶܢܳܐ ܠܒܰܝܬܳܟ ܥܶܠܶܬ܇ ܘܡܰܝ̈ܳܐ ܠܪ̈ܶܓܠܰܝ ܠܳܐ ܩܰܪܒܶܬ܇ ܘܗܳܕܶܐ ܐܰܢ̱ܬܬܳܐ ܚܰܛܳܝܬܳܐ܇ ܒܕܶܡܥܶܝ̈ܗܿ ܨܰܒܥܰܬ݀ ܗܘܳܬ݀ ܪ̈ܶܓܠܰܝ܇ ܫܒܺܝܩܺܝܢ ܠܳܗܿ ܚܰܘܒܶܝ̈ܗܿ ܘܰܚܛܳܗ̈ܶܝܗܿ܀

 

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ ܓܢܺܝܙܬܳܐ

ܚܰܛܳܝܬܳܐ ܚܕܳܬ݀ ܟܰܕ ܫܶܡܥܰܬ݀܇ ܕܡܳܪܰܢ ܒܶܝܬ ܫܶܡܥܽܘܢ ܫܪܶܐ ܗܘܳܐ܇ ܪܶܗܛܰܬ݀ ܩܳܡܰܬ݀ ܥܰܠ ܬܰܪܥܳܐ܇ ܘܰܒܚܰܫܳܐ ܡܦܺܝܣܳܐ ܗܘܳܬ݀ ܠܶܗ܇ ܐܳܘ ܫܶܡܥܽܘܢ ܦܬܰܚ ܠܺܝ ܬܰܥܪܳܟ܇ ܐܶܥܽܘܠ ܐܶܣܓܽܘܕ ܠܰܡܫܺܝܚܳܐ܇ ܠܳܐ ܡܨܶܐ ܐ̱ܢܳܐ ܕܶܐܫܒܽܘܩ ܕܬܶܥܠܺܝܢ܇ ܕܓܰܒܪܳܐ ܪܰܒܳܐ ܫܪܶܐ ܨܶܝܕܰܝ܇ ܝܳܕܥܳܐ ܠܶܟܝ̱ ܟܽܠܳܗ ܒܪܺܝܬܳܐ܇ ܚܰܛܳܝܬܳܐ ܟܡܳܐ ܒܺܝܫ̈ܳܬܳܐ܇ ܣܥܺܝܪ̈ܳܢ ܠܶܟܝ̱ ܙܶܠܝ̱ ܒܰܫܠܳܡܳܐ܀

ܫܽܘܒܚܳܐ ܢܰܣܶܩ ܠܶܗ ܠܰܐܒܳܐ܇ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ܇ ܘܣܶܓܕܬܳܐ ܢܩܰܪܶܒ ܠܶܗ ܠܰܒܪܳܐ܇ ܕܚܰܣܺܝ ܚܰܘ̈ܒܶܝܗܿ ܕܚܰܛܳܝܬܳܐ܇ ܬܰܘܕܺܝ ܠܪܽܘܚܳܐ ܩܰܕܺܝܫܳܐ܇ ܕܕܰܟܺܝ ܘܡܰܪܩܳܗܿ ܡܶܢ ܚܰܘܒ̈ܶܝܗܿ܇ ܘܢܰܨܚܳܗܿ ܗܘܳܐ ܠܗܰܝܡܳܢܽܘܬܳܗܿ܇ ܕܚܰܛܳܝܬܳܐ܇ ܘܟܰܬܒܳܗܿ ܗܘܳܐ ܠܕܳܪ̈ܶܐ ܕܳܐܬܶܝܢ܇ ܠܶܗ ܬܶܫܒܽܘܚܬܳܐ܀

 

ܕܦܶܠܓܶܗ ܕܝܰܘܡܳܐ܇ ܦܬܰܚ ܠܺܝ ܬܰܪܥܶܗ

ܡܳܪܰܢ ܝܶܫܽܘܥ ܡܰܠܶܦ ܗܘܳܐ܇ ܠܝܽܘܕ̈ܳܝܶܐ ܒܝܰܘܡܳܐ ܕܫܰܒܬܳܐ܇ ܘܡܰܐܣܶܐ ܗܘܳܐ ܟܪ̈ܺܝܗܶܐ ܕܺܝܠܗܽܘܢ܇ ܘܗܶܢܽܘܢ ܒܺܝܫܬܳܐ ܚܳܫܒܺܝܢ ܗ̱ܘܰܘ܇ ܘܓܰܒܪܳܐ ܕܝܰܒܺܝܫܳܐ ܐܺܝܕܶܗ܇ ܐܶܡܰܪ ܗܘܳܐ ܠܶܗ ܦܫܽܘܛ ܐܺܝܕܳܟ܇ ܘܒܰܪ ܫܳܥܬܶܗ ܦܰܫܛܳܗܿ܇ ܘܶܐܬܬܰܩܢܰܬ݀ ܘܰܙܡܰܪ ܫܽܘܒܚܳܐ܀

ܬܰܐܓܳܪ̈ܶܐ ܪ̈ܽܘܚܳܢܳܝܶܐ ܐܶܬܬܥܺܝܪܘ̱ ܘܫܰܒܰܚܘ̱ ܠܡܳܪܝܳܐ ܕܰܐܥܬܪܰܢ܇ ܘܚܰܠܶܛ ܠܰܢ ܒܰܐܠܳܗܽܘܬܶܗ܇ ܒܝܰܕ ܡܰܝ̈ܳܐ ܕܡܰܥܡܽܘܕܺܝܬܳܐ܇ ܐܰܣܶܩܘ ܩܳܠܰܝ̈ ܬܶܫܒܽܘܚܬܳܐ܇ ܒܰܙܡܺܝܪ̈ܳܬܶܗ ܕܒܰܪ ܐܺܝܫܰܝ܇ ܠܰܬܠܺܝܬܳܝܽܘܬܳܐ܇ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܚܰܘܺܝ ܬܰܡܳܢ ܦܳܩܽܘܕܽܘܬܶܗ ܒܰܪ ܐܰܠܳܗܳܐ܇ ܘܰܒܦܽܘܩܕܳܢܳܐ ܒܰܠܚܽܘܕ ܐܰܣܝܶܗ ܘܰܦܫܺܝܩ ܗܘܳܐ ܠܶܗ܇ ܦܫܰܛ ܟܺܝܬ ܡܳܪܰܢ ܐܺܝܕܶܗ ܕܗܳܢܳܐ ܕܝܰܒܺܝܫܳܐ ܗܘܳܬ݀ ܕܢܶܪܓܰܫ ܥܳܠܡܳܐ ܕܡܶܒܪܳܐ ܒܳܪܶܐ ܐܰܝܟ ܝܳܠܽܘܕܶܗ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܠܘܳܬ ܡܡܰܚܰܝ̈ܳܐ܇ ܘܰܣܥܰܪ ܘܰܐܣܺܝ ܘܰܐܚܠܶܡ ܟܺܐܒ̈ܶܐ ܕܰܡܫܰܪ̈ܰܝܳܐ܇ ܣܓܺܝܕ ܥܰܡ ܐܰܒܽܘܗ̱ܝ ܥܰܡ ܪܽܘܚܩܽܘܕܫܳܐ܇ ܚܰܕ ܐܰܠܳܗܳܐ܇ ܬܠܺܝܬܳܝܽܘܬܳܐ ܪܳܡܰܬ ܡܶܢ ܟܽܠ ܠܶܟܝ̱ ܬܶܫܒܽܘܚܬܳܐ܀

 

ܕܰܬܫܰܥ̈ܫܳܥܺܝܢ܇ ܬܗܰܪ ܓܰܒܪܺܐܶܝܠ

ܗܳܐ ܦܰܪܕܰܝܣܳܐ܇ ܪܽܘܚܳܢܳܝܳܐ܇ ܐܺܝܬܰܘܗ̱ܝ ܥܺܕܬܳܐ܇ ܘܺܐܝܠܳܢܳܐ ܕܰܡܠܶܐ ܚܰܝ̈ܶܐ܇ ܡܰܕܒܰܚ ܩܽܘܕܫܳܐ ܡܚܰܣܝܳܢܳܐ܇ ܕܡܶܢܶܗ ܢܳܒܥܺܝܢ ܚܰܝ̈ܶܐ ܠܰܡܗܰܝ̈ܡܶܢܶܐ܇ ܪ̈ܳܚܡܰܝ ܚܰܝ̈ܶܐ ܐܶܬܒܰܣܰܡܘ̱܇ ܐܶܬܦܰܛܰܡܘ̱ ܡܶܢ ܬܽܘܩܳܢܳܐ܇ ܘܰܕܚܶܟܡܬܳܐ ܛܰܝܒܰܬ ܠܰܢ܇ ܘܰܩܥܰܘ ܟܽܠܟܽܘܢ ܫܰܘܝܳܐܺܝܬ܇ ܫܽܘܒܚܳܐ ܠܛܳܒܳܐ ܕܰܒܪ̈ܰܚܡܰܘܗ̱ܝ ܩܨܳܐ ܦܰܓܪܶܗ ܕܒܶܗ ܢܶܬܒܰܣܰܡ܀

ܓܕܰܫ ܕܶܝܢ ܘܰܥܒܰܪ܇ ܒܽܐܘܪܚܳܐ ܓܰܒܪܳܐ ܫܳܡܪܳܝܳܐ܇ ܘܰܚܙܳܝܗ̱ܝ ܗܘܳܐ ܠܕܳܘܝܳܐ ܕܰܪܡܶܐ܇ ܘܓܳܠܘ̱ ܗ̱ܘܰܘ ܪ̈ܰܚܡܰܘܗ̱ܝ ܘܰܩܪܶܒ ܗܘܳܐ܇ ܘܰܐܚܕܶܗ ܘܥܰܦܩܶܗ ܘܚܰܒܒܶܗ ܐܳܦ ܢܰܫܩܶܗ܇ ܘܰܥܨܰܒ ܐܶܢܶܝܢ ܠܡܰܚܘ̈ܳܬܶܗ܇ ܡܶܫܚܳܐ ܐܳܦ ܚܰܡܪܳܐ܇ ܘܫܰܩܠܶܗ ܘܥܰܠ ܚܡܳܪܶܗ ܐܰܪܟܒܶܗ܇ ܘܰܐܝܬܝܶܗ ܣܳܡܶܗ ܒܓܰܘ ܦܽܘܬܩܳܐ܇ ܕܺܐܝܬܶܝܗܿ ܥܺܕܬܳܐ ܩܰܕܺܝܫܬܳܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܠܗܳܢܳܐ ܚܙܳܝܗ̱ܝ ܟܳܗܢܳܐ܇ ܘܠܶܘܳܝܳܐ ܘܰܥܒܰܪ܇ ܫܳܡܪܳܝܳܐ ܐܰܣܝܶܗ܇ ܘܰܥܨܰܒ ܡܰܚܘ̈ܳܬܶܗ܇ ܘܡܶܫܚܳܐ ܐܳܦ ܚܰܡܪܳܐ܇ ܛܰܝܶܒ ܠܫܽܘܡ̈ܳܬܶܗ܀

ܫܽܘܒܚܳܐ ܠܛܰܝܒܽܘܬܶܗ܇ ܕܳܐܣܝܳܐ ܕܟܽܠ ܟܺܐܒ̈ܺܝܢ܇ ܫܽܘܒܚܶܐ ܠܛܰܝܒܽܘܬܳܟ ܐܶܡܳܐ ܕܬܰܝ̈ܳܒܶܐ܇ ܫܽܘܒܚܳܐ ܠܳܟ ܡܳܪܰܢ܇ ܡܥܺܝܢܳܐ ܕܛܳܒ̈ܳܬܳܐ܀

 

ܬܽܘܒ ܕܪܰܡܫܳܐ ܕܚܰܡܫܳܐ ܕܫܰܒܬܳܐ ܕܚܰܡܶܫ

ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܚܛܺܝܿܬ ܠܳܟ ܚܳܐܶܢ

ܗܰܘ ܕܠܶܐܫܳܬܳܐ ܕܰܚܡܳܬܶܗ ܕܦܶܛܪܽܘܣ ܐܰܚܠܶܡ ܘܩܳܡܰܬ݀ ܘܫܰܡܶܫܬܶܗ܇ ܡܳܪܝܳܐ܀

ܒܪ̈ܰܚܡܰܘܗ̱ܝ ܢܽܘܗܪܳܐ ܫܰܟܶܢ ܗܘܳܐ܇ ܠܰܬܪܶܝܢ ܣܡ̈ܰܝܳܐ܇ ܐܰܝܟ ܗܰܝܡܳܢܽܘܬܗܽܘܢ܇ ܡܳܪܝܳܐ ܡܳܪܶܗ܀

ܠܒܰܪܬܳܐ ܕܰܐܢ̱ܬܬܳܐ ܟܢܰܥܢܰܝܬܳܐ܇ ܡܶܢ ܫܽܘܢܳܩܳܐ܇ ܕܳܐܟܶܠܩܰܪܨܳܐ ܦܪܰܩ܇ ܡܳܪܝܳܐ ܡܳܪܶܗ ܟܽܠ ܪܰܚܶܡܥܠܰܝ܀

ܒܡܶܠܬܶܗ ܐܰܣܺܝ ܗܘܳܐ ܠܓܰܪܒܳܐ ܟܰܕ ܐܳܡܰܪ ܠܶܗ܇ ܕܨܳܒܶܐ ܐ̱ܢܳܐ ܒܳܟ ܐܶܬܕܰܟܳܐ܇ ܡܳܪܝܳܐ ܡܳܪܶܗ ܟܽܠ ܪܰܚܶܡܥܠܰܝ܀

ܠܒܰܪܬܶܗ ܕܪܺܝܫܳܐ ܕܰܟܢܽܘܫܬܳܐ܇ ܫܰܪܝܰܬ݀ ܘܰܐܥܕܺܝܬܳܗܿ ܡܶܢ ܦܽܘܡܳܐ ܕܡܰܘܬܳܐ܇ ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀

ܠܰܥܠܰܝܡܳܐ ܒܪܳܗܿ ܕܰܐܪܡܶܠܬܳܐ܇ ܒܽܐܘܪܚܳܐ ܕܩܰܒܪܳܐ܇ ܩܪܳܐ ܗܘܳܐ ܘܰܐܩܺܝܡܶܗ܇ ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܡܳܪܝܳܐ ܩܪܺܝܬܳܟ

ܠܰܥܠܰܝܡܳܐ ܒܪܳܗ ܕܰܐܪܡܶܠܬܳܐ܇ ܒܽܐܘܪܚܳܐ ܕܩܰܒܪܳܐ ܢܰܚܶܡ ܗܘܳܐ܀

ܠܓܰܠ̈ܠܶܐ ܕܝܰܡܳܐ ܫܰܬܶܩ ܗܘܳܐ܇ ܘܰܠܬܰܠܡܺܝܕ̈ܶܐ ܫܰܘܙܶܒ ܗܘܳܐ܀

ܠܚܰܛܳܝܬܳܐ ܫܒܰܩ ܠܳܗܿ ܚܰܘܒ̈ܶܝܗܿ܇ ܘܠܰܫܡܳܗܿ ܟܬܰܒ ܗܘܳܐ ܒܰܣܒܰܪܬܶܗ܀

ܠܺܐܝܕܳܐ ܕܝܰܒܺܝܫܳܐ ܦܫܰܛ ܗܘܳܐ܇ ܘܰܠܕܽܘܓ̈ܶܐ ܝܰܗܒ ܗܘܳܐ ܫܶܡܥܳܐ܀

ܠܰܡܫܰܪܝܳܐ ܕܰܪܡܶܐ ܒܥܰܪܣܳܐ܇ ܐܰܩܺܝܡܶܗ ܡܶܢ ܟܽܘܪܗܳܢܶܗ܀

ܠܳܐܕܳܡ ܡܡܰܚܝܳܐ ܐܰܣܺܝ ܗܘܳܐ܇ ܘܰܐܚܠܶܡ ܗܘܳܐ ܡܶܢ ܟܽܘܪܗܳܢܶܗ܀

 

ܩܳܠܳܐ ܕܪܰܡܫܳܐ܇ ܒܩܳܠܳܐ ܗܰܒܠܳܗܿ ܠܥܺܕܬܳܟ

ܡܳܪܰܢ ܥܳܒܰܪ ܗܘܳܐ܇ ܒܶܐܣܛܘܳܐ ܕܡܶܬܩܪܶܐ ܕܰܫܠܶܝܡܽܘܢ܇ ܘܶܐܫܟܰܚ ܬܰܡܳܢ܇ ܠܰܡܫܰܪܝܳܐ ܕܰܪܡܶܐ܇ ܘܰܒܥܳܐ ܗܘܳܐ ܡܶܢܶܗ܇ ܘܶܐܡܰܪ ܠܶܗ ܩܽܘܡ ܫܩܽܘܠ ܥܰܪܣܳܟ܇ ܘܙܶܠ ܠܒܰܝܬܳܟ ܗܳܐ ܫܒܺܝܩܺܝܢ ܚܛܳܗ̈ܰܝܟ܀

ܐܳܡܰܪ ܗܘܳܐ ܡܳܪܰܢ܇ ܟܰܕ ܡܰܠܶܦ ܗܘܳܐ ܒܰܣܒܰܪܬܶܗ܇ ܕܰܢܚܶܬ ܡܳܟܣܳܐ ܠܒܰܝܬܶܗ ܟܰܕ ܡܙܰܕܶܩ܇ ܘܗܰܘ ܦܪܺܝܫܳܐ ܕܶܐܬܬܪܺܝܡ܇ ܐܶܬܳܐ ܠܒܰܝܬܶܗ ܟܰܕ ܠܳܐ ܫܩܰܠ܇ ܐܶܠܳܐ ܫܽܘܒܚܳܐ܇ ܣܪܺܝܩܳܐ ܡܶܢ ܥܳܠܡܳܐ܀

 

ܐ̱ܚܪܺܢܳܐ ܩܳܠܳܐ ܩܽܘܩܳܝܳܐ

ܛܽܘܒܰܘܗ̱ܝ ܠܰܐܝܢܳܐ ܕܶܐܫܬܰܒܰܚ ܐܰܝܟ ܩܶܢܛܪܽܘܢܳܐ܇ ܟܰܕ ܩܰܠܣܶܗ ܗܘܳܐ ܐܰܠܳܗܳܐ܇ ܠܡܶܠܬܶܗ ܕܩܶܢܛܪܽܘܢܳܐ܇ ܘܶܐܡܰܪ ܠܥܰܡܳܐ ܣܰܟܠܳܐ ܕܝܽܘܕܳܝ̈ܶܐ܇ ܕܣܰܓܺܝ̈ܐܶܐ ܠܰܡ ܢܺܐܬܽܘܢ܇ ܡܶܢܟܽܠ ܕܽܘܟ܇ ܘܢܶܣܬܰܡܟܽܘܢ ܥܰܡ ܐܰܒܪܳܗܳܡ ܒܶܝܬ ܡܰܠܟܽܘܬܳܐ܇ ܘܰܒܢ̈ܰܝ ܡܰܠܟܽܘܬܳܐ ܢܰܦܩܽܘܢ ܠܚܶܫܟܳܐ ܒܰܪܳܝܳܐ܇ ܗ ܗ܀

ܚܰܛܳܝܬܳܐ ܡܰܢܽܘ ܓܠܳܐ ܠܶܟܝ̱ ܕܗܳܘܶܐ ܕܺܝܢܳܐ܇ ܩܕܳܡ ܕܢܺܐܬܶܐ ܪܰܒ ܕܰܝ̈ܳܢܶܐ ܕܫܽܘܚܕܳܐ ܠܳܐ ܡܩܰܒܶܠ܇ ܩܳܠܳܐ ܫܶܡܥܿܶܬ ܕܳܐܡܰܪ ܠܰܫܠܺܝ̈ܚܶܐ܇ ܕܗܳܘܶܐ ܕܺܝܢܳܐ ܘܰܐܢ̱ܬܽܘܢ ܕܳܝܢܺܝܬܽܘܢ܇ ܡܶܫܚܳܐ ܪܺܝܫܳܝܳܐ ܫܶܩܠܰܬ݀ ܒܕܺܝܢܳܪ̈ܶܐ ܬܠܳܬܡ̈ܐܳܐ܇ ܘܶܐܙܠ̱ܰܬ݀ ܡܶܫܚܰܬ݀ ܠܕܰܒܙܰܪܬܶܗ ܪܰܘܡܳܐ ܘܥܽܘܡܩܳܐ ܡܫܰܚ ܗ ܘ ܗ܀

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܶܢ ܐܶܫܳܬܳܐ ܡܶܬܐܰܠܨܳܐ ܗܘܳܬ݀ ܢܽܘܓܪܳܐ ܪܰܒܳܐ܇ ܘܶܐܫܳܬܳܗܿ ܬܽܘܒ ܡܶܢ ܕܰܥܝܳܕܳܐ ܛܳܒ ܩܰܫܝܳܐ ܗܘܳܬ݀܇ ܩܪܶܒ ܨܶܝܕ ܥܰܪܣܳܗܿ ܗܰܘ ܡܰܒܽܘܥܳܐ ܕܡܰܪܕܶܐ ܚܰܝ̈ܶܐ܇ ܘܰܐܚܕܳܗܿ ܒܺܐܝܕܳܗܿ ܘܢܳܚ ܛܽܘܪܳܦܳܐ ܕܫܳܚܶܩ ܗܘܳܐ ܠܳܗܿ܀

ܫܽܘܒܚܳܐ ܠܳܟ ܡܳܪܝ̱ ܡܶܢ ܥܶܠܳܝ̈ܶܐ ܘܡܶܢ ܬܰܚܬܳܝ̈ܶܐ܇ ܘܡܶܛܽܠ ܚܽܘܒܳܟ ܐܶܬܰܝܬ ܕܬܶܣܥܽܘܪ ܐܰܪ̈ܥܳܢܳܝܶܐ܇ ܣܥܽܘܪ ܠܰܟܪ̈ܺܝܗܶܐ ܚܽܘܢ ܠܰܐܠܺܝܨ̈ܶܐ ܒܥܺܝ ܠܰܐܒܺܝ̈ܕܶܐ܇ ܢܰܛܰܪ ܟܶܢܫܰܢ ܕܰܢܙܰܡܰܪ ܠܳܟ ܫܽܘܒܚܳܐ ܦܰܐܝܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܥܰܡ ܗܳܢܽܘܢ ܕܰܠܥܶܠ

ܥܰܠ ܨܽܘܪ ܘܥܰܠ ܨܰܝܕܽܘܢ܇ ܥܳܒܰܪ ܗܘܳܐ ܡܳܪܰܢ ܝܶܫܽܘܥ ܘܬܰܠܡܺܝܕܰܘ̈ܗ̱ܝ ܥܰܡܶܗ܇ ܟܢܰܥܢܰܝܬܳܐ ܢܶܦܩܰܬ݀ ܟܰܕ ܩܳܥܝܳܐ ܕܳܐܣܝܳܐ ܛܳܒܳܐ ܐܰܣܳܐ ܠܺܝ ܒܰܪܬܝ̱ ܡܶܢ ܫܺܐܕܳܐ܀

ܠܓܰܒܪܳܐ ܕܝܰܒܺܝܫܳܐ܇ ܐܺܝܕܶܗ ܐܰܣܺܝ ܗܘܳܐ ܝܶܫܽܘܥ ܝܰܡܳܐ ܕܰܚܢܳܢܳܐ܇ ܘܰܩܪܳܝܗ̱ܝ ܘܩܰܪܒܶܗ ܠܰܡܨܰܥܬܳܐ ܕܟܶܢܫ̈ܶܐ܇ ܥܢܳܐ ܘܶܐܡܰܪ ܠܶܗ܇ ܘܰܦܫܽܘܛ ܐܺܝܕܳܟ ܘܶܐܬܚܰܠܡܰܬ݀܀

ܓܰܪܒܳܐ ܒܶܝܬ ܟܶܢ̈ܫܶܐ܇ ܠܰܡܫܺܝܚܳܐ ܡܶܬܟܰܫܰܦ ܗܘܳܐ ܒܚܰܫܳܐ ܘܶܐܡܰܪ܇ ܕܶܐܢܗܽܘ ܕܨܳܒܶܝܬ ܡܳܪܳܐ ܡܪܰܚܡܳܢܳܐ܇ ܡܨܶܝܬ ܗܽܘ ܚܰܝܠܳܐ܇ ܠܰܡܕܰܟܝܽܘܬܝ̱ ܡܶܢ ܓܰܪܒܳܐ܀

ܡܫܺܝܚܳܐ ܕܒܰܚܢܳܢܶܗ܇ ܐܰܣܺܝ ܠܓܰܒܪܳܐ ܓܰܪܒܳܢܳܐ ܕܰܒܥܳܐ ܡܶܢܶܗ܇ ܐܰܣܳܐ ܘܰܐܚܠܶܡ܇ ܟܺܐܒ̈ܶܐ ܕܢܰܦܫ̈ܳܬܰܢ܇ ܘܕܰܟܳܐ ܠܰܢ ܡܶܢ ܓܰܪܒܳܐ ܕܰܫܟܺܝܪ̈ܳܬܳܐ܀

ܫܽܘܒܚܳܐ ܘܬܰܘܕܺܝܬܳܐ܇ ܟܽܠܫܳܥ ܩܰܪܶܒ ܗܘܳܐ ܓܰܪܒܳܐ ܗܰܘ ܕܶܐܬܰܐܣܺܝ܇ ܠܒܰܪ ܐܰܠܳܗܳܐ ܕܝܰܗܒܠܶܗ ܚܽܘܠܡܳܢܳܐ܇ ܘܠܶܗ ܬܶܫܒܽܘܚܬܳܐ܀

 

ܩܳܠܳܐ ܕܠܺܠܝܳܐ܇ ܒܩܳܠܳܐ ܙܳܕܶܩ ܕܢܶܗܘܶܐ

ܒܦܶܠܓܶܗ ܕܠܺܠܝܳܐ܇ ܢܚܶܬ ܡܳܪܰܢ ܘܩܳܡ ܥܰܠ ܝܰܡܳܐ ܘܫܰܝܶܢ ܓܰܠܠܰܘ̈ܗ̱ܝ܇ ܘܰܚܙܰܐܽܘܗ̱ܝ ܗ̱ܘܰܘ ܬܰܠܡܺܝܕ̈ܶܐ ܘܙܳܥܘ̱ ܘܶܐܬܕܰܘܰܕܘ̱ ܪ̈ܶܥܝܳܢܰܝܗܽܘܢ܇ ܚܰܕ ܐܳܡܰܪ ܗܘܳܐ ܕܚܶܙܘܳܐ ܚܳܙܶܐ ܐ̱ܢܳܐ܇ ܐ̱ܚܪܺܢܳܐ ܐܳܡܰܪ ܕܶܐܠܦܳܐ ܡܶܬܗܰܦܟܳܐ܇ ܘܰܥܢܳܐ ܫܶܡܥܽܘܢ ܪܺܝܫ ܬܰܠܡܺܝܕ̈ܶܐ܇ ܘܶܐܡܰܪ ܠܶܗ ܕܶܐܢ ܐܰܢ̱ܬ ܗܽܘ ܡܳܪܝ̱ ܘܰܐܠܳܗܝ̱܇ ܦܩܽܘܕ ܠܺܝ ܡܳܪܝ̱ ܕܺܐܬܶܐ ܨܶܝܕܰܝܟ܇ ܘܳܐܦ ܐܶܙܡܰܪ ܠܳܟ܇ ܫܽܘܒܚܳܐ ܥܰܠ ܓܰܠ̈ܠܶܐ ܕܝܰܡܳܐ ܗ ܟܰܕ ܡܗܰܠܶܟ ܐ̱ܢܳܐ܀

ܩܛܺܝܠܳܐ ܕܰܩܛܰܠ܇ ܒܝܰܕ ܩܶܛܠܶܗ ܠܒܺܝܫܳܐ ܘܡܰܘܬܳܐ ܕܩܰܛܠܽܘܗ̱ܝ ܠܳܐܕܳܡ܇ ܩܛܽܘܠ ܠܰܚܛܺܝܬܳܐ ܕܥܳܡܪܳܐ ܒܺܝ ܘܰܥܒܺܝܕ ܐ̱ܢܳܐ ܠܶܗ ܥܰܒܕܳܐ ܒܨܶܒܝܳܢܝ̱܇ ܪܳܥܝܳܐ ܛܳܒܳܐ܇ ܕܰܢܦܰܩ ܒܰܒܥܳܬܶܗ ܕܥܶܪܒܳܐ ܕܰܛܥܳܐ ܘܶܐܒܰܕ ܡܶܢ ܡܳܪܶܗ܇ ܒܥܺܝ ܠܰܐܒܺܝܕܽܘܬܝ̱܇ ܒܰܕܡܽܘܬ ܗܰܘ ܙܽܘܙܳܐ ܕܥܶܣܪܳܐ܇ ܕܶܐܒܰܕ ܗܘܳܐ ܡܶܢ ܐܰܢ̱ܬܬܳܐ܇ ܕܰܐܢ̱ܬ ܗܽܘ ܡܶܫܟܰܚ ܠܰܐܒܺܝ̈ܕܶܐ܇ ܘܶܐܩܥܶܐ ܘܺܐܡܰܪ܇ ܕܠܳܟ ܫܽܘܒܚܳܐ ܠܰܐܒܳܐ ܕܫܰܠܚܳܟ ܗ ܘܰܠܪܽܘܚ ܩܽܘܕܫܳܐ܀

 

ܡܰܕܪܳܫܳܐ ܥܶܢܝܳܢܳܐ ܦܰܪܕܰܝܣܳܐ ܒܩܳܠܳܐ ܫܽܘܒܚܳܐ ܠܰܡܫܺܝܚܳܐ ܕܰܦܬܺܝܚ ܬܪܰܥ ܪ̈ܰܚܡܰܘܗ̱ܝ܇ ܫܽܘܒܚܳܐ ܠܗܰܘ ܕܰܐܣܺܝ ܟܺܐܒ̈ܰܝܗܽܘܢ ܕܥܰܒܕ̈ܰܘܗ̱ܝ

ܐܳܘ ܢܰܦܫܝ̱ ܕܳܘܺܝܬܳܐ܇ ܩܽܘܡܝ̱ ܠܶܟܝ̱ ܡܶܢ ܫܶܢܬܶܟܝ̱܇ ܘܰܪܢܳܝ ܒܫܽܘܠܳܡܶܟܝ̱ ܘܥܶܗܰܕܝ̱ ܠܡܰܦܩܳܢܶܟܝ̱܇ ܘܶܐܬܕܰܟܪ ܠܥܶܕܳܢܳܐ ܕܚܺܝܠܳܐ ܕܝܰܩܕܳܢܳܐ܇ ܘܙܽܘܥܝ̱ ܠܶܟܝ̱ ܡܶܢ ܫܳܥܬܳܐ܇ ܕܚܺܝܠܬܳܐ܇ ܕܒܳܗܿ ܩܳܝܡܰܬܝ܇ ܩܽܘܕܡܰܬ ܟܽܘܪܣܝܳܐ ܕܕܺܝܢܳܐ܇ ܕܬܶܬܠܺܝܢ ܦܶܬܓܳܡܳܐ܇ ܚܠܳܦ ܟܽܠ ܕܰܣܥܺܝܪ ܠܶܟܝ̱܀

ܕܺܝܢܳܐ ܕܠܳܐ ܪ̈ܰܚܡܶܐ܇ ܗܳܘܶܐ ܐܰܝܟ ܕܰܟܬܺܝܒ܇ ܢܽܘܪܳܐ ܕܠܳܐ ܕܳܥܟܳܐ܇ ܢܛܺܝܪܳܐ ܠܚܰܛܳܝ̈ܶܐ܇ ܢܰܦܫܝ̱ ܥܶܗܰܕܝ̱ ܗܳܠܶܝܢ܇ ܟܽܠܫܳܥ ܘܟܽܠ ܥܶܕܳܢ܇ ܘܝܺܨܰܦܝ̱ ܕܡܶܢ ܗܳܠܶܝܢ ܬܰܐܡܕܺܝܢ܇ ܘܫܽܘܚܕܳܐ ܠܕܰܝܳܢܳܐ܇ ܛܰܝܶܒܝ̱ ܘܣܰܒܝ̱ ܥܰܡܶܟܝ̱܇ ܥܒܳܕ̈ܶܐ ܕܢܰܟܦܽܘܬܳܐ܇ ܘܕܶܡܥ̈ܶܐ ܚܢܺܝܓ̈ܳܬܳܐ܀

ܘܳܝ ܠܰܐܝܢܳܐ ܕܥܳܐܶܠ܇ ܩܕܳܡ ܚܰܬܢܳܐ ܠܚܰܪܬܳܐ܇ ܟܰܕ ܠܳܐ ܠܒܺܝܫ ܡܳܐܢ̈ܶܐ܇ ܕܚܳܫܚܺܝܢ ܠܡܶܫܬܽܘܬܳܐ܇ ܕܡܶܬܛܪܶܕ ܡܶܢ ܩܽܘܕܡܰܘܗ̱ܝ܇ ܒܙܰܘܥܳܐ ܘܣܽܘܪܳܕܳܐ܇ ܕܰܐܬܪܳܐ ܡܠܶܐ ܪܶܥܠܳܐ ܘܙܰܘܥܬܳܐ܇ ܒܗܳܠܶܝܢ ܪܢܳܝ ܐܳܘ ܢܰܦܫܝ̱܇ ܘܡܳܐܢ̈ܶܐ ܕܚܶܘܳܪ̈ܺܝܢ܇ ܢܶܗܘܽܘܢ ܠܶܟܝ̱ ܥܒܳܕܰܝ̈ܟ܇ ܕܬܶܥܠܺܝܢ ܘܬܶܬܩܰܒܠܺܝܢ܀

ܡܽܘܢ ܚܳܙܶܝܢܰܢ ܒܶܗ܇ ܕܺܐܝܬܰܘܗ̱ܝ ܕܚܰܕܘ̈ܳܬܳܐ܇ ܕܰܚܢܰܢ ܢܶܚܕܶܐ ܒܶܗ܇ ܒܥܳܠܡܳܐ ܕܢܰܛܥܶܐ ܒܶܗ܇ ܫܽܘܠܛܳܢܰܘ̈ܗ̱ܝ ܓܶܝܪ ܗܶܢܽܘܢ ܡܚܰܕܶܝܢ ܠܰܢ܇ ܒܰܕܡܽܘܬ ܛܶܠܳܠܳܐ܇ ܦܳܪܚܺܝܢ܇ ܕܥܰܕ ܓܶܝܪ ܒܳܥܶܐ ܐ̱ܢܳܫ܇ ܕܢܶܚܕܶܐ ܒܪܰܒܽܘܬܶܗ܇ ܡܶܢܫܶܠܝ̱ ܨܳܦܰܚ ܠܶܗ܇ ܡܰܘܬܳܐ ܘܡܰܟܡܰܪ ܠܶܗ܀

ܐܳܘ ܠܳܟ ܕܒܰܢܝܳܚܶܗ܇ ܕܥܳܠܡܳܐ ܡܶܬܓܰܝܐܶܐ܇ ܠܳܐ ܬܶܪܢܶܐ ܬܶܛܥܶܐ܇ ܒܗܳܠܶܝܢ ܕܡܶܬܚܰܙܝ̈ܳܢ ܘܳܝܠܶܗ ܠܡܰܢ ܕܶܐܬܬܢܺܝܚ܇ ܒܗܳܢ ܥܳܠܡܳܐ ܕܥܳܒܰܪ܇ ܘܰܥܰܡܰܠ ܘܶܐܬܛܰܪܰܦ ܠܚܰܪܬܳܐ܇ ܢܝܳܚ̈ܶܐ ܕܗܳܟܰܢܳܐ ܓܶܝܪ܇ ܡܰܘܦܶܢ ܘܠܰܝܬ ܐܶܢܽܘܢ܇ ܛܽܘܒ̈ܶܐ ܕܗܰܘ ܐܰܬܪܳܐ܇ ܡܩܰܘܶܝܢ ܕܠܳܐ ܫܽܘܠܳܡ܀

ܘܳܝܠܶܗ ܠܡܰܢ ܕܰܛܡܰܪ܇ ܒܶܗܬܬܶܗ ܒܚܶܫܽܘܟܳܐ܇ ܕܚܳܛܶܐ ܘܡܶܬܦܰܪܰܣ܇ ܕܢܰܛܥܶܐ ܠܚܰܙܳܝ̈ܶܐ܇ ܕܡܳܐ ܕܥܰܠ ܣܪܰܚ ܕܰܓܶܠ܇ ܕܢܰܛܥܶܐ ܠܫܳܡܽܘ̈ܥܶܐ܇ ܟܰܢ̈ܦܶܐ ܕܛܰܝܒܽܘܬܳܟ܇ ܬܣܰܬܪܰܢܝ̱ ܕܬܰܡܳܢ ܠܚܰܛܳܝܳܐ܇ ܒܨܶܒܥܳܐ ܡܚܰܘܶܝܢ ܠܶܗ܇ ܟܰܕ ܡܰܟܪܙܺܝܢ ܟܽܠܝܽܘܡ ܒܶܗܬܬܶܗ ܘܣܽܘܪ̈ܚܳܢܰܘܗܝ܀

ܗܰܘ ܕܺܐܝܬ ܗܘܳܐ ܐܰܘܒܕܽܘܗ̱ܝ܇ ܘܰܕܠܰܝܬ ܗܘܳܐ ܐܶܫܟܰܚ܇ ܛܽܘܒܳܐ ܪܚܶܡܘ̱ ܘܰܦܪܰܚܘ̱܇ ܘܳܝܳܐ ܣܢܰܘ ܘܰܡܛܳܐ܇ ܟܰܕ ܣܒܰܪܘ̱ ܥܠܰܘܗ̱ܝ ܕܠܰܝܬܰܘܗ̱ܝ܇ ܘܰܕܠܳܐ ܒܥܰܘ ܐܶܫܟܰܚܘ̱܇ ܡܶܬܬܢܺܝܚܺܝܢ ܕܰܐܫܦܶܠܘ̱ ܘܶܐܬܓܰܢܒܽܘܗ̱ܝ܇ ܕܥܽܘܡܪܗܽܘܢ ܒܗܽܘܢ ܕܰܓܶܠ܇ ܘܫܽܘܢܳܩܳܐ ܘܫܰܪܺܝܪ܇ ܢܝܳܚܳܐ ܐܰܘܦܺܝ ܠܶܗ܇ ܢܶܓܕܗܽܘܢ ܘܠܳܐ ܓܳܡܰܪ܀

ܒܚܽܘܒܳܐ ܝܽܘܠܦܳܢܳܐ܇ ܟܰܕ ܡܙܺܝܓ ܒܗܽܘܢ ܩܽܘܫܬܳܐ܇ ܡܨܶܐ ܝܳܪܶܒ ܡܰܕܥܳܐ܇ ܘܥܳܬܰܪ ܒܚܰܕ̈ܬܳܬܳܐ܇ ܘܗܳܡܶܣ ܒܦܽܘܪܫܳܢܳܐ܇ ܒܓܰܙܳܐ ܕܟܰܣܝ̈ܳܬܳܐ܇ ܗܳܐ ܐܰܚܒܿܶܬ ܝܶܠܦܿܶܬ܇ ܘܰܐܫܪܶܬ܇ ܕܺܐܝܬܰܘܗ̱ܝ ܦܰܪܕܰܝܣܳܐ܇ ܠܡܺܐܢܳܐ ܕܢܰܨܺܝܚ̈ܶܐ܇ ܘܕܶܐܫܬܰܘܕܺܝܿܬ ܕܰܐܪܓܶܫ ܒܶܗ܇ ܐܰܫܘܳܢܝ̱ ܕܶܐܥܽܘܠ ܠܶܗ܀

ܢܶܒܥܽܘܢ ܥܠܰܝ ܬܰܡܳܢ܇ ܟܽܠܗܽܘܢ ܒܢ̈ܰܝ ܢܽܘܗܪܳܐ܇ ܕܢܶܬܶܠ ܠܗܽܘܢ ܡܳܪܰܢ܇ ܡܰܘܗܒܰܬ ܚܕܳܐ ܢܰܦܫܳܐ܇ ܠܺܝ ܥܶܠܬܳܐ ܚܕܰܬܳܐ܇ ܬܶܫܬܟܰܚ ܠܬܶܫܒܽܘܚܬܳܐ܇ ܕܰܒܟܽܠ ܦܪܽܘܣ ܐܺܝܕܶܗ ܡܰܘܫܛܳܐܗ̱ܝ܇ ܕܝܳܗܶܒ ܒܟܺܐܢܽܘܬܳܐ܇ ܘܝܳܗܶܒ ܒܛܰܝܒܽܘܬܳܐ܇ ܢܶܬܶܠ ܠܺܝ ܒܪ̈ܰܚܡܰܘܗ̱ܝ ܣܺܝܡܰܬ ܓܰܙܶܗ܀

ܠܳܐ ܢܶܬܓܠܽܘܢ ܚܰܘܒ̈ܰܝ ܠܚܰܒܪ̈ܰܝ ܒܗܰܘ ܝܰܘܡܳܐ܇ ܟܰܕ ܒܶܗ ܒܗܳܕܶܐ ܡܳܪܝ̱ ܣܰܓܺܝ ܒܣܺܝܪܺܝܢܰܢ܇ ܕܶܐܢ ܠܳܟ ܓܠܶܝܢ ܚܰܘ̈ܒܰܝ܇ ܡܶܢ ܡܰܢ ܢܶܬܟܰܣܽܘܢ܇ ܦܬܰܟܪ̈ܶܐ ܥܒܰܕܬܳܗܿ ܠܺܝ ܠܒܶܗܬܬܳܐ܇ ܗܰܒܠܺܝ ܕܶܐܕܚܰܠ ܡܳܪܝ̱܇ ܡܶܢܳܟ ܕܒܰܣܺܝܡ ܐܰܢ̱ܬ܇ ܘܶܐܩܥܶܐ ܒܟܽܠܥܶܕܳܢ܇ ܫܽܘܒܚܳܐ ܠܛܰܝܒܽܘܬܳܟ܀

ܐܰܫܘܳܢܝ̱ ܒܛܰܝܒܽܘܬܳܟ܇ ܕܶܐܦܓܰܥ ܒܡܰܘܗܰܒܬܳܟ܇ ܣܺܝܡܬܳܐ ܕܒܶܣܡܳܢ̈ܶܐ ܘܰܐܳܘܨܪܳܐ ܕܪ̈ܺܝܚܳܢܶܐ܇ ܟܰܕ ܒܳܣܡܳܐ ܟܰܦܢܽܘܬܝ̱ ܒܗܶܪ̈ܽܘܡܰܝܟ ܫܒܺܝܚ̈ܶܐ܇ ܪܺܝܚܳܐ ܗܰܘ ܡܬܰܪܣܶܐ ܟܽܠ ܒܟܽܠܙܒܰܢ܇ ܘܰܐܝܢܳܐ ܕܰܣܢܺܝܩ ܠܶܗ܇ ܐܶܬܢܰܫܺܝ ܛܥܳܐ ܠܰܚܡܶܗ܇ ܦܳܬܽܘܪ ܡܰܠܟܽܘܬܳܐ ܗܰܘ܇ ܒܪܺܝܟ ܕܰܐܬܶܩܢܳܗܿ ܒܰܥܕܶܝܢ܀

ܬܰܡܳܢ ܬܰܘܳܬ ܢܰܦܫܳܐ܇ ܡܕܰܪܟܳܐ ܠܣܰܓܺܝ̈ܐܶܐ܇ ܕܶܐܬܒܚܰܪܘ̱ ܘܠܳܐ ܣܰܝܒܰܪܘ̱܇ ܘܶܐܬܪܕܺܝܘ ܘܠܳܐ ܥܰܙܺܝܘ܇ ܛܳܒܳܐ ܕܶܝܢ ܨܳܒܶܐ ܒܢܶܓܕ̈ܶܐ ܕܰܩܕܩ̈ܶܐ܇ ܕܢܶܦܪܽܘܥ ܐ̱ܶܫܛܳܪ̈ܰܝܗܽܘܢ܇ ܘܠܳܐ ܨܒܰܘ܇ ܕܰܛܠܡܶܘ̱ ܠܛܰܝܒܽܘܬܳܟ܇ ܡܶܬܪܕܶܝܢ ܒܟܺܐܢܽܘܬܳܐ܇ ܠܳܟ ܬܶܫܒ̈ܚܳܢ ܡܶܢ ܟܽܠ܇ ܕܟܽܠܳܟ ܠܟܽܠ ܛܳܒ ܐܰܢ̱ܬ܀

ܝܶܫܽܘܥ ܫܡܳܐ ܦܰܐܝܳܐ܇ ܕܡܶܢܶܗ ܘܒܶܗ ܨܰܒܬܶܗ܇ ܗܰܒܠܰܢ ܕܢܶܨܛܰܒܰܬ܇ ܒܰܫܡܳܟ ܩܰܕܺܝܫܳܐ܇ ܨܰܘܡܳܐ ܢܗܶܐ ܨܶܒܬܰܢ ܨܠܽܘܬܳܟ ܠܬܰܨܒܺܝܬܰܢ܇ ܘܰܐܝܟܰܢ ܕܳܐܦ ܚܰܝܠܳܟ ܡܙܰܓܬ ܒܰܢ܇ ܡܰܙܶܓ ܫܡܳܟ ܒܰܫܡܰܢ ܫܽܘܒܚܳܐ ܠܪܰܒܽܘܬܳܟ ܕܰܐܳܘܪܶܒܬ ܙܥܽܘܪܽܘܬܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܩܪܶܒܘ ܬܰܠܡܺܝ̈ܕܶܐ ܕܰܢܥܺܝܪܽܘܢܳܝܗ̱ܝ ܠܗܰܘ ܠܳܐ ܕܰܡܟܳܐ܇ ܡܳܪܰܢ ܡܳܪܰܢ ܩܽܘܡ ܥܰܕܰܪ ܠܰܢ ܕܗܳܐ ܐܳܒܕܺܝܢܰܢ܇ ܐܶܬܬܥܺܝܪ ܘܰܟܐܳܐ ܒܝܰܡܳܐ ܘܪ̈ܽܘܚܶܐ ܐܶܫܬܰܬܰܩܘ̱ ܗ̱ܘܰܘ܇ ܘܚܰܘܺܝ ܬܰܡܳܢ ܦܳܩܽܘܕܽܘܬܶܗ ܒܪܺܝܟ ܫܽܘܠܛܳܢܶܗ܀

ܫܽܘܒܚܳܐ ܫܰܦܝܳܐ ܠܰܐܒܳܐ ܓܢܺܝܙܳܐ ܡܶܢ ܟܽܠ ܢܰܣܶܩ܇ ܘܣܶܓܕܬܳܐ ܪܟܺܝܢܬܳܐ ܠܰܒܪܳܐ ܕܰܐܣܺܝ ܠܰܡܡܰܚ̈ܰܝܳܐ܇ ܟܠܺܝܠ ܩܽܘܠ̈ܳܣܶܐ ܠܪܽܘܚܳܐ ܕܩܽܘܕܫܳܐ ܓܰܙܳܐ ܡܰܠܝܳܐ܇ ܕܡܶܢܶܗ ܥܳܬܪܺܝܢ ܟܽܠ ܚܰܣܺܝܪ̈ܶܐ܇ ܠܶܗ ܬܶܫܒܽܘܚܬܳܐ܀

 

ܕܨܰܦܪܳܐ ܕܪܰܚܶܡܥܠܰܝ ܒܩܳܠܳܐ ܒܪ̈ܰܚܡܰܝܟ ܡܳܪܝ̱ ܣܰܓܺܝ̈ܐܶܐ

ܥܽܘܬܪܳܐ ܛܥܶܢ ܗܘܳܐ ܘܰܐܝܬܺܝ܇ ܥܰܬܺܝܪܳܐ ܡܶܢ ܒܶܝܬ ܐܰܒܽܘܗ̱ܝ܇ ܘܰܕܪܳܝܗ̱ܝ ܠܰܣܢܺܝ̈ܩܶܐ܇ ܘܰܐܥܬܰܪ ܐܶܢܽܘܢ ܒܰܚܢܳܢܶܗ܀

ܕܰܒܥܶܪܣܳܐ ܕܟܺܐܒ̈ܶܐ܇ ܪܡܶܐ ܗܘܳܐ ܢܽܘܓܪܳܐ ܕܰܫܢ̈ܰܝܳܐ܇ ܒܝܰܕ ܪܶܡܙܳܐ ܘܡܶܠܬܳܐ܇ ܚܽܘܠܡܳܢ ܟܺܐܒܰܘܗ̱ܝ ܐܰܘܫܶܛ ܠܶܗ܀

ܡܶܢ ܪܰܘܡܳܐ ܗܰܘ ܕܰܥܕܶܝܢ܇ ܢܦܰܠ ܗܘܳܐ ܗܰܘ ܪܺܝܫܳܐ ܕܓܶܢܣܰܢ܇ ܒܝܰܕ ܡܶܠܟܶܗ ܕܒܺܝܫܳܐ܇ ܘܰܒܥܽܘܡܩܳܐ ܕܺܐܝܪܺܝܚܽܘ ܪܡܶܐ ܗܘܳܐ܀

ܠܕܽܘܓܳܐ ܝܰܗܒ ܗܘܳܐ ܫܶܡܥܳܐ܇ ܠܓܰܪܒܳܐ ܕܰܟܺܝ ܡܶܢ ܓܰܪܒܶܗ܇ ܘܰܠܗܳܝ ܕܰܟܦܺܝܦܳܐ܇ ܦܰܫܛܳܗܿ ܘܡܶܚܕܳܐ ܐܶܬܰܐܣܝܰܬ݀܀

ܗܰܘ ܣܰܡܝܳܐ ܒܰܪ ܛܺܝܡܰܝ܇ ܕܰܒܚܰܫܳܐ ܡܶܬܟܰܫܰܦ ܗܘܳܐ܇ ܕܗܰܒܠܺܝ ܡܳܪܝ̱ ܕܶܐܚܙܶܐ ܘܰܐܘܕܶܐ  ܠܳܟ ܥܰܠ ܛܰܝܒܽܘܬܳܟ܀

 

ܐܰܠܳܗܝ̱ ܐܰܠܳܗܝ̱ ܒܩܳܠܳܐ ܠܘܳܬܳܟ ܡܩܰܕܶܡ ܐ̱ܢܳܐ

ܦܓܰܥܘ ܒܶܗ ܓܰܪ̈ܒܶܐ ܘܶܐܬܕܰܟܺܝܘ܇ ܐܳܦ ܚܰܛܳܝ̈ܶܐ ܐܶܙܕܰܕܰܩܘ̱܇ ܘܰܣܡܰܝ̈ܳܐ ܬܽܘܒ ܐܶܬܦܰܬܰܚܘ̱܇ ܘܰܡܫܰܪ̈ܰܝܳܐ ܐܶܫܬܰܪܰܪܘ̱܇ ܘܰܙܡܰܪܘ̱ ܬܶܫܒܽܘܚܬܳܐ ܠܳܐܣܝܳܐ ܕܪ̈ܰܚܡܶܐ܀

ܬܪܶܝܢ ܣܡ̈ܰܝܳܐ ܕܰܦܓܰܥܘ̱ ܒܶܗ܇ ܫܰܟܶܢ ܢܽܘܗܪܳܐ ܠܥܰܝܢܰܝ̈ܗܽܘܢ܇ ܘܰܚܙܰܘ ܦܫܺܝܛܳܐܺܝܬ܇ ܘܰܠܒܰܪ̱ܬ ܝܽܘܳܐܪܳܫ ܐܰܚܺܝ܇ ܘܝܰܗܒܳܗܿ ܠܰܐܒܳܗ̈ܶܝܗܿ ܘܰܙܡܰܪܘ̱ ܫܽܘܒܚܳܐ܀

ܠܺܝܚܺܝܕܳܝܳܗܿ ܒܪܳܐ ܕܰܐܪܡܶܠܬܳܐ܇ ܩܪܳܐ ܠܶܗ ܒܩܳܠܳܐ ܘܰܐܩܺܝܡܶܗ܇ ܘܝܰܗܒܶܗ ܠܝܳܠܶܕܬܶܗ܇ ܘܳܐܦ ܠܠܳܥܳܙܳܪ ܒܒܶܝܬ ܥܰܢܝܳܐ܇ ܢܰܚܡܶܗ ܘܰܐܩܺܝܡܶܗ܇ ܘܝܰܗܒܶܗ ܠܰܐܚܘ̈ܳܬܶܗ܀

ܓܰܪ̈ܒܶܐ ܟܽܠܗܽܘܢ ܕܶܐܬܰܐܣܺܝܘ܇ ܙܳܡܪܺܝܢ ܫܽܘܒܚܳܐ ܘܠܳܐ ܫܳܠܶܝܢ܇ ܠܳܐܣܝܳܐ ܛܳܒܳܐ ܕܰܒܚܽܘܒܶܗ܇ ܢܚܶܬ ܡܶܢ ܪܰܘܡܳܐ܇ ܕܢܰܐܣܶܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ܀

ܒܳܟ ܢܶܫܟܰܚ ܪ̈ܰܚܡܶܐ܇ ܒܝܰܘܡܳܐ ܫܒܺܝܚܳܐ ܕܓܶܠܝܳܢܳܟ܇ ܕܰܐܢ̱ܬ ܗܽܘ ܣܰܒܪܰܢ ܐܳܦ ܬܽܘܟܠܳܢܰܢ ܒܬܰܪܥܶܗ ܕܢܰܐܺܝܢ ܡܕܺܝܢ̱ܬܳܐ܀

ܒܫܽܘܠܛܳܢܳܐ ܐܰܠܳܗܳܐܝܳܐ܇ ܩܳܠܳܐ ܐܰܙܥܶܩ ܗܘܳܐ ܥܠܰܝܡܳܐ܇ ܠܳܟ ܐܳܡܰܪ ܐ̱ܢܳܐ ܩܽܘܡ܇ ܘܡܰܘܬܳܐ ܐܶܬܒܰܠܗܺܝ ܒܡܺܝܬܳܐ ܕܚܰܝܳܐ ܠܳܟ ܬܶܫܒܽܘܚܬܳܐ ܦܳܪܽܘܩܰܢ܀

ܕܡܶܢ ܫܡܰܝܰܝ̈ܟ ܪ̈ܳܡܶܐ ܐܶܬܬܰܚܬܺܝܬ܇ ܘܰܣܥܰܪܬܳܝܗ̱ܝ ܠܳܐܕܳܡ܇ ܘܰܐܣܺܝܬ ܟܺܐܒ̈ܶܐ ܘܟܽܘܪ̈ܗܳܢܶܐ ܕܓܶܢܣܳܐ ܕܡܳܝܽܘ̈ܬܶܐ ܒܪܺܝܟ ܫܳܠܽܘܚܳܟ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܠܰܡܫܺܝܚܳܐ ܐܰܠܳܗܳܐ

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܰܠܙܰܟܰܝ ܚܙܳܐ ܗܘܳܐ܇ ܕܰܣܠܶܩ ܗܘܳܐ ܠܪܺܝܫ ܬܺܬܳܐ܇ ܘܒܰܪ ܐܰܒܪܳܗܳܡ ܩܪܳܝܗ̱ܝ ܗܘܳܐ ܡܶܛܽܠ ܚܽܘܒܶܗ܇ ܠܶܗ ܬܰܝ̈ܳܒܶܐ ܫܰܒܰܚܘ̱܇ ܘܠܶܗ ܟܳܗ̈ܢܶܐ ܒܰܪܶܟܘ̱܇ ܟܽܠܗܽܘܢ ܥܰܡ̈ܡܶܐ ܘܶܐܡܘ̈ܳܬܳܐ ܙܡܰܪܘ̱ ܠܶܗ ܫܽܘܒܚܳܐ܀

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܰܠܓܰܪ̈ܒܶܐ ܕܰܟܺܝ܇ ܘܠܰܣܡ̈ܰܝܳܐ ܦܰܬܰܚ ܗܘܳܐ܇ ܘܰܠܡܺܝ̈ܬܶܐ ܢܰܚܶܡ ܒܚܰܝܠܳܐ ܕܦܽܘܩܕܳܢܶܗ܇ ܠܶܗ ܚܰܝ̈ܶܐ ܫܰܒܰܚܘ̱ ܘܠܶܗ ܟܳܗ̈ܢܶܐ ܟܽܠܟܽܘܢ ܒܰܪܶܟܘ̱܇ ܥܰܡ̈ܡܶܐ ܘܶܐܡܘ̈ܳܬܳܐ ܙܡܰܪܘ̱ ܠܶܗ ܫܽܘܒܚܳܐ܀

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܶܐܬܒܰܣܰܪ܇ ܚܠܳܦܰܝܢ ܘܰܐܣܺܝ ܗܘܳܐ ܟܽܘܪ̈ܗܳܢܰܝܢ܇ ܘܠܰܢ ܡܗܰܝ̈ܡܶܢܶܐ ܚܰܪܰܪ ܡܶܢ ܒܺܝܫܳܐ܇ ܠܶܗ ܡܗܰܝ̈ܡܶܢܶܐ ܫܰܒܰܚܘ̱܇ ܘܠܶܗ ܟܳܗܢ̈ܶܐ ܟܽܠܟܽܘܢ܀

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܒܰܚܢܳܢܶܗ ܩܰܒܶܠ܇ ܕܡܶܢ ܚܰܛܳܝܬܳܐ ܢܶܬܡܫܶܚ܇ ܘܒܳܗܿ ܝܰܗܒ ܠܽܘܒܳܒܳܐ ܠܰܡܗܰܝ̈ܡܶܢܶܐ܇ ܠܶܗ ܡܗܰܝ̈ܡܶܢܶܐ܀

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܺܐܝܬܰܘܗ̱ܝ ܥܰܡ ܐܰܒܽܘܗ̱ܝ܇ ܘܣܰܪܶܩ ܢܰܦܫܶܗ ܚܠܳܦܰܝܢ܇ ܘܰܒܳܟ̈ܺܐܢܶܐ ܕܡܶܢ ܥܳܠܰܡ ܫܦܰܪܘ̱ ܠܶܗ ܘܚܰܠܛܰܢ܇ ܠܶܗ ܟܺܐܢ̈ܶܐ ܫܰܒܰܚܘ̱܀

 

ܬܶܫܒܽܘܚܬܳܐ ܚܕܰܬܳܐ܇ ܒܩܳܠܳܐ ܫܡܰܝ̈ܳܢܶܐ ܫܽܘܒܚܳܟ ܙܳܡܪܺܝܢ

ܒܰܝܢܳܬ ܟܰܪ̈ܟܶܐ ܥܳܒܰܪ ܗܘܳܐ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܇ ܘܠܰܡܕܺܝܢ̈ܳܬܳܐ ܥܳܐܶܠ ܗܘܳܐ܇ ܟܺܐܒ̈ܶܐ ܟܣܰܝ̈ܳܐ ܡܰܐܣܶܐ ܗܘܳܐ܀

ܫܶܡܥܰܬ݀ ܛܶܐܒܶܗ ܚܰܛܳܝܬܳܐ܇ ܕܗܳܐ ܒܒܰܝܬܶܗ ܕܫܶܡܥܽܘܢ ܐܺܝܬܰܘܗ̱ܝ܇ ܘܫܳܛܺܝܦܬܳܐ ܕܡܶܫܚܳܐ ܫܶܩܠܰܬ݀܇ ܘܺܠܪܺܫܶܗ ܕܰܒܪܳܐ ܡܶܫܚܰܬ݀܀

ܚܰܛܳܝܬܳܐ ܥܢܳܬ݀ ܘܶܐܡܪܰܬ݀ ܠܶܗ܇ ܠܡܳܪܰܢ ܝܶܫܽܘܥ ܒܰܚܢܰܓܬܳܐ܇ ܗܳܫܳܐ ܕܰܚܙܺܝܿܬ ܦܰܪܨܽܘܦܳܟ܇ ܠܳܐ ܐܶܗܦܽܘܟ ܟܰܕ ܟܰܪܝܳܐ ܠܺܝ܀

ܥܰܠ ܗܘܳܐ ܠܒܰܝܬܶܗ ܕܰܦܪܺܝܫܳܐ܇ ܘܚܰܛܳܝܬܳܐ ܩܶܪܒܰܬ݀ ܨܶܝܕܰܘܗ̱ܝ܇ ܒܥܳܬ݀ ܡܶܢܶܗ ܕܢܶܫܒܽܘܩ ܚܰܘܒ̈ܶܝܗܿ܇ ܘܰܥܛܳܐ ܟܽܠܳܗܿ ܣܰܟܠܽܘܬܳܗܿ܀

ܣܡ̈ܰܝܳܐ ܬܪܶܝܢ ܦܓܰܥܘ̱ ܒܶܗ ܒܽܐܘܪܚܳܐ܇ ܘܰܩܥܰܘ ܬܪ̈ܰܝܗܽܘܢ ܫܰܘܝܳܐܺܝܬ܇ ܕܒܰܪ ܕܰܘܺܝܕ ܪܰܚܶܡ ܥܠܰܝܢ܇ ܢܽܘܗܪܳܐ ܡܠܳܐ ܗܘܳܐ ܠܥܰܝܢܰܝ̈ܗܽܘܢ܀

ܫܽܘܒܚܳܐ ܠܶܗ ܠܗܰܘ ܥܰܬܺܝܪܳܐ܇ ܕܰܐܥܬܰܪ ܠܰܢ ܡܶܢ ܣܺܝܡ̈ܳܬܶܗ܇ ܫܽܘܒܚܳܐ ܠܗܰܘ ܚܰܝܠܳܐ ܟܰܣܝܳܐ ܕܰܐܚܠܶܡ ܟܺܐܒܰܝ̈ܢ ܘܟܽܘܪ̈ܗܳܢܰܝܢ܀

 

ܩܳܠܳܐ ܕܨܰܦܪܳܐ܇ ܒܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܐܳܣܝܳܐ ܕܶܐܬܳܐ ܕܢܶܥܨܽܘܒ ܠܰܡܡ̈ܰܚܰܝܳܐ܇ ܒܪ̈ܰܚܡܰܝܟ ܐܰܚܢܳܝ̱ ܘܶܐܙܡܰܪ ܠܳܟ ܫܽܘܒܚܳܐ ܘܬܰܘܕܺܝܬܳܐ܇ ܚܰܝܳܐ ܕܰܐܟܠܽܘܗ̱ܝ ܡܺܝ̈ܬܶܐ ܘܶܐܬܢܰܚܰܡܘ̱ ܒܶܗ܇ ܘܰܐܚܳܢܝ̱ ܕܰܐܦܪܶܐ ܘܶܐܬܶܠ ܠܳܟ ܩܳܠܰܝ̈ ܬܰܘܕܺܝܬܳܐ܇ ܐܰܢ̱ܬ ܐܺܝܬܰܝܟ ܓܰܙܶܗ ܕܰܡܪܰܝܡܳܐ܇ ܐܰܦܶܩ ܗܰܒ ܥܽܘܬܪܳܟ ܠܰܣܡ̈ܰܝܳܐ܇ ܕܢܰܣܩܽܘܢ ܫܽܘܒܚܳܐ ܠܳܟ ܘܠܰܐܒܽܘܟ ܘܰܠܪܽܘܚܳܐ ܕܩܽܘܕܫܳܐ܀

ܠܣܰܡܝܳܐ ܦܰܬܰܚ ܠܶܗ ܥܰܝܢܰܘ̈ܗ̱ܝ ܘܰܚܙܳܐ ܢܽܘܗܪܳܐ܇ ܘܰܠܕܽܘܓܳܐ ܒܪܽܘܩܳܐ ܦܰܬܰܚ ܐܶܕܢܰܘ̈ܗ̱ܝ ܘܰܫܡܰܥ ܗܘܳܐ܇ ܠܗܰܘ ܓܰܪܒܳܐ ܕܰܟܺܝ ܗܘܳܐ ܡܶܢ ܟܽܘܬܡ̈ܳܬܶܗ܇ ܘܰܠܗܳܝ ܕܰܟܦܺܝܦܳܐ ܫܰܪܪܽܘܗܿ ܪ̈ܰܚܡܶܐ ܘܶܐܬܦܰܫܛܰܬ݀܇ ܘܰܠܓܰܒܪܳܐ ܕܝܰܒܺܝܫܳܐ ܐܺܝܕܶܗ܇ ܩܪܳܐ ܗܘܳܐ ܠܶܗ ܠܥܺܝܢ ܟܶܢܫ̈ܶܐ ܕܐ̱ܢܳܫ̈ܳܐ܇ ܘܶܐܡܰܪ ܠܶܗ ܕܰܦܫܽܘܛ ܐܺܝܕܳܟ ܘܦܰܫܛܳܗܿ ܘܶܐܬܚܰܠܡܰܬ݀܀

 

ܐ̱ܚܪܺܢܳܐ ܒܩܳܠܳܐ ܥܶܛܪܳܐ ܕܒܶܣܡ̈ܶܐ ܕܶܐܬܩܰܪܰܒ

ܒܪܺܝܟ ܐܳܣܝܳܐ ܕܶܐܬܳܐ ܒܚܽܘܒܶܗ ܨܶܝܕ ܡܡܰܚܰܝ̈ܳܐ܇ ܕܢܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ ܕܓܶܢܣܳܐ ܕܒܶܝܬ ܐܳܕܳܡ܇ ܠܰܡܫܰܪܝܳܐ ܝܰܗܒ ܚܽܘܠܡܳܢܳܐ ܘܰܛܥܶܢ ܥܰܪܣܶܗ܇ ܘܰܠܓܰܪܒܳܐ ܒܡܶܠܬܶܗ ܕܰܟܺܝ ܘܰܙܡܰܪ ܠܶܗ ܫܽܘܒܚܳܐ܀

ܐܳܣܝܳܐ ܕܪ̈ܰܚܡܶܐ ܘܕܰܚܢܳܢܳܐ ܐܰܣܳܐ ܡܽܘܡ̈ܰܝܢ܇ ܘܦܺܝܪܡܰܢ ܢܶܗܘܶܐ ܠܰܢܝܳܚܳܟ ܡܳܪܝܳܐ ܐܰܠܳܗܳܐ܇ ܕܰܐܢ̱ܬܽܘܢ ܗܽܘ ܠܚܽܘܕܰܝܟ ܒܰܣܺܝܡܳܐ ܪܳܚܶܡܢܳܫܳܐ܇ ܒܳܟܶܢ̈ܦܶܐ ܕܪ̈ܰܚܡܰܝܟ ܣܰܬܰܪ ܠܰܢ ܘܦܰܨܳܢ ܡܶܢ ܒܺܝܫܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܬܳܐ ܚܙܺܝ ܗܫܳܐ ܠܒܰܪ ܐܰܕܽܘܢܰܝ ܒܰܐܪܥܳܐ ܕܺܝܗܽܘܕ܇ ܕܰܦܬܺܝܚ ܓܰܙܶܗ ܘܰܕܪܳܐ ܥܽܘܬܪܶܗ ܐܰܝܟ ܝܳܠܽܘܕܶܗ܇ ܥܰܬܺܝܪܳܐ ܒܶܗ ܟܢܽܘܫܬܳܐ ܒܫܰܒܶܝ̈ܗܿ ܐܳܦ ܒܥܰܕܥܺܐܕܶܝ̈ܗܿ܇ ܘܰܡܠܶܐ ܚܢܳܢܳܐ ܘܪܳܣܡܺܝܢ ܡܶܢܶܗ ܟܽܠ ܥܽܘܕܪ̈ܳܢܺܝܢ܀

ܩܪܳܐ ܠܰܟܢܽܘܫܬܳܐ ܘܦܰܠܶܓ ܝܰܗܒܠܳܗܿ ܟܽܠ ܛܳܒ̈ܳܬܳܐ܇ ܕܰܛܥܶܢ ܘܰܐܝܬܺܝ ܡܶܢ ܒܶܝܬ ܐܰܒܽܘܗ̱ܝ ܥܰܬܺܝܪܳܐܺܝܬ܇ ܓܢܶܐ ܒܰܚܠܽܘܠܳܐ ܘܫܰܚܠܶܦ ܡܰܝ̈ܳܐ ܠܚܰܡܪܳܐ ܛܳܒܳܐ܇ ܚܙܳܐ ܠܰܡܫܰܪܝܳܐ ܘܣܰܡܟܶܗ ܕܰܢܩܽܘܡ ܡܶܢ ܟܽܘܪܗܳܢܶܗ܀

 

ܕܰܬܠܳܬܫ̈ܳܥܺܝܢ܇ ܒܩܳܠܳܐ ܠܡܰܠܟܽܘܬ ܪܰܘܡܳܐ

ܟܶܢܫܳܐ ܕܥܺܕܬܳܐ܇ ܙܡܰܪ ܠܶܗ ܬܶܫܒܽܘܚܬܳܐ ܠܳܐܣܝܳܐ ܫܡܰܝܳܢܳܐ܇ ܕܰܫܒܰܩ ܪܰܘܡܳܐ ܕܰܟܪ̈ܽܘܒܶܐ܇ ܘܠܶܓܝܽܘ̈ܢܶܐ ܕܥܺܝܪ̈ܰܝ ܪܰܘܡܳܐ܇ ܘܰܢܚܶܬ ܠܰܐܪܥܳܐ ܐܰܝܟ ܕܰܨܒܳܐ܇ ܘܰܐܣܺܝ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܢܰܥܶܠܰܝܢ ܠܪܰܘܡܳܐ ܕܰܫܡܰܝܳܐ܀

ܐܶܬܳܐ ܡܳܪܰܢ܇ ܘܥܰܠ ܠܒܶܝܬܶܗ ܕܫܶܡܥܽܘܢ ܘܰܓܢܳܐ ܒܰܣܡܳܟܳܐ܇ ܕܰܚܙܳܐ ܠܰܚܡܳܬܶܗ ܕܪܰܡܝܳܐ܇ ܒܶܐܫܳܬܳܐ ܕܣܰܓܺܝ ܩܰܫܝܳܐ ܘܰܦܫܰܛ ܗܘܳܐ ܐܺܝܕܶܗ ܘܓܳܫܳܗܿ ܘܡܶܚܕܳܐ ܫܒܰܩܬܳܗܿ ܐܶܫܳܬܳܗܿ܇ ܘܶܐܡܪܰܬ݀ ܠܶܗ ܫܽܘܒܚܳܐ ܠܰܚܢܳܢܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܠܰܒܒܽܘܗܿ ܪ̈ܰܚܡܶܐ ܠܗܳܝ ܡܡܰܚܰܝܬܳܐ ܒܚܽܘܒܶܗ ܕܰܒܪܳܐ܇ ܘܚܶܒܨܰܬ݀ ܥܶܠܰܬ ܒܰܝܢܳܬ ܟܶܢܫ̈ܶܐ ܕܬܶܡܛܶܐ ܠܰܒܪܳܐ܇ ܫܕܳܬ݀ ܗܘܳܬܳ ܐܺܝܕܳܗܿ ܥܰܠ ܡܰܪܛܽܘܛܶܗ ܘܣܰܥܪܳܗܿ ܚܰܝܠܶܗ܇ ܘܓܳܙ ܗܘܳܐ ܪܶܕܝܳܐ ܠܙܝܙܐ ܕܰܕܡܳܗܿ ܡܶܢ ܗܰܕܳܡܶܝ̈ܗܿ܀

ܐܶܡܰܪ ܡܳܪܰܢ ܚܰܕ ܗܽܘ ܩܪܶܒ ܠܺܝ ܡܶܢ ܣܰܓܺܝ̈ܐܶܐ܇ ܘܡܶܕܶܡ ܕܰܒܥܳܐ ܥܒܶܕ ܗܘܳܐ ܒܟܶܣܝܳܐ ܘܠܳܐ ܐܰܪܓܶܫܬܽܘܢ܇ ܫܶܡܥܰܬ݀ ܐܰܢ̱ܬܬܳܐ ܕܰܥܠܶܝܗܿ ܐܳܡܰܪ ܥܰܡ ܬܰܠܡܺܝܕܰܘ̈ܗ̱ܝ܇ ܘܡܶܚܕܳܐ ܐܶܬܳܬ݀ ܘܶܐܡܪܰܬ݀ ܠܶܗ ܗܘܳܬ݀ ܟܽܠܶܗ ܫܪܳܪܳܐ܀

 

ܕܦܶܠܓܶܗ ܕܝܰܘܡܳܐ܇

ܒܩܳܠܳܐ ܡܳܐ ܪܚܺܝܡܺܝܢ ܕܽܘܟܪ̈ܳܢܰܝܟܽܘܢ

ܦܳܪܽܘܩܰܢ ܒܰܝܢܳܬ ܟܶܢܫ̈ܶܐ܇ ܫܰܐܶܠ ܘܶܐܡܰܪ ܠܓܽܘܕܳܐ ܕܬܰܠܡܺܝܕܰܘ̈ܗ̱ܝ܇ ܕܡܰܢܽܘ ܩܪܶܒ ܠܟܶܢܦܳܐ ܕܡܰܪܛܽܘܛܝ̱܇ ܘܰܦܢܺܝܘ ܠܶܗ ܗܶܢܽܘܢ ܡܶܚܕܳܐ܇ ܕܚܳܙܶܐ ܐܰܢ̱ܬ ܟܶܢܫ̈ܶܐ ܚܳܒܨܺܝܢ܇ ܘܰܡܫܰܐܶܠ ܐܰܢ̱ܬ ܕܡܰܢܽܘ ܕܰܩܪܶܒ ܠܺܝ܀

ܠܡܡܰܚܰܝܬܳܐ ܒܶܝܬ ܟܶܢܫ̈ܶܐ܇ ܩܪܳܐ ܦܳܪܽܘܩܰܢ ܠܟܶܢܫܳܐ ܕܬܰܠܡܺܝܕܰܘ̈ܗ̱ܝ܇ ܕܗܰܝܡܳܢܽܘܬܶܟܝ̱ ܐܰܚܝܰܬܶܟܝ̱܇ ܡܶܟܺܝܠ ܙܶܠܝ̱ ܠܶܟܝ̱ ܒܰܫܠܳܡܳܐ܇ ܬܶܗܘܶܐ ܚܠܺܝܡܰܬܝ̱ ܡܶܢ ܟܺܐܒܳܐ܇ ܣܰܢܝܳܐ ܕܫܰܚܩܶܟܝ̱ ܢܽܘܓܪܳܐ ܕܰܫܢܰܝ̈ܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܰܪ ܐܰܠܳܗܳܐ ܕܡܶܢ ܪܰܘܡܳܐ܇ ܐܶܬܬܰܚܬܺܝ ܡܶܛܽܠ ܓܶܢܣܰܢ܇ ܘܚܰܣܺܝ ܡܳܟܣ̈ܶܐ ܘܚܰܛܳܝ̈ܶܐ܇ܘܰܐܚܠܶܡ ܠܰܐܝܠܶܝܢ ܕܰܟܪ̈ܺܝܗܺܝܢ܀

ܐܰܠܳܗܳܐ ܡܶܛܽܠ ܚܽܘܒܶܗ܇ ܠܘܳܬ ܩܶܢܛܪܽܘܢܳܐ ܐܶܬܬܰܚܬܺܝ܇ ܘܰܠܛܰܠܝܶܗ ܫܰܪܰܪ ܘܰܐܚܠܶܡ܇ ܕܗܰܝܡܶܢ ܒܶܗ ܕܒܰܪ ܐܰܠܳܗܰܐܗ̱ܘ܀

 

ܕܰܬܫܰܥ̈ܫܳܥܺܝܢ܇ ܒܩܳܠܳܐ ܣܳܗܕ̈ܶܐ ܐܰܦܺܝܣܽܘܢܳܗ̱ܝ

ܥܰܬܺܝܪܳܐ ܘܒܰܪ ܥܰܬܺܝܪܳܐ܇ ܕܡܶܣܟܺܢ̈ܶܐ ܥܬܰܪܘ̱ ܡܶܢ ܓܰܙܶܗ܇ ܒܰܐܪܥܳܐ ܕܺܝܗܽܘܕ ܐܰܓܺܝܚ ܗܘܳܐ ܫܶܦܥ̈ܶܐ ܕܰܚܢܳܢܶܗ܇ ܘܰܐܣܓܺܝ ܚܰܘܠܡܳܢܰܘ̈ܗ̱ܝ ܡܰܓܳܢ܇ ܠܥܰܡܳܐ ܒܺܝܫܳܐ ܘܛܳܠܽܘܡܳܐ܇ ܘܰܚܠܳܦ ܟܽܠܗܶܝܢ ܛܳܒ̈ܳܬܶܗ ܦܰܪܥܽܘܗ̱ܝ ܒܺܝܫ̈ܳܬܳܐ܀

ܚܰܛܳܝܬܳܐ ܠܡܳܪܰܢ ܐܶܡܪܰܬ݀܇ ܟܰܕ ܒܳܟܝܳܐ ܘܫܳܦܥ̈ܳܢ ܕܶܡܥܶܝ̈ܗܿ܇ ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ ܚܰܣܳܐ ܠܺܝ ܚܰܘܒ̈ܰܝ܇ ܥܰܠ ܕܰܚܣܰܡ ܒܺܝ ܣܳܛܳܢܳܐ܇ ܢܶܚܕܽܘܢ ܒܺܝ ܐܳܦ ܡܰܠܰܐܟ̈ܶܐ܇ ܘܢܺܐܡܪܽܘܢ ܕܰܒܪܺܝܟ ܗܽܘ ܡܳܪܝܳܐ܇ ܕܰܣܥܪܳܗܿ ܠܰܓܒܺܝܠܬܳܗ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܚܰܕ ܕܳܘܝܳܐ ܐܺܝܬ ܗܘܳܐ܇ ܕܰܡܠܶܐ ܗܘܳܐ ܡܽܘܡ̈ܶܐ܇ ܣܰܡܝܳܐ ܐܳܦ ܚܰܪܫܳܐ܇ ܕܽܘܓܳܐ ܕܰܝܘܳܢܳܐ܇ ܠܗܳܢܳܐ ܣܥܰܪ ܡܳܪܰܢ܇ ܘܚܳܢܶܗ ܒܝܰܕ ܪ̈ܰܚܡܰܘܗ̱ܝ܀

ܗܳܢܳܐ ܒܟܽܠ ܐܶܣܟܺܝܡ ܣܽܘܪܳܕܳܐ ܥܒܺܝܕ ܗܘܳܐ܇ ܘܡܶܢ ܡܰܕܥܳܐ ܓܠܺܝܙ ܗܘܳܐ܇ ܘܠܳܐ ܐ̱ܢܳܫ ܝܳܕܰܥ ܗܘܳܐ܇ ܘܡܳܪܰܢ ܒܝܰܕ ܪ̈ܰܚܡܰܘܗ̱ܝ܇ ܐܰܚܠܶܡ ܠܶܗ ܟܺܐܒܰܘ̈ܗ̱ܝ܀

 

ܫܠܶܡ

ܬܽܘܒ ܕܝܽܘܡ ܥܪܽܘܒܬܳܐ ܕܫܰܒܬܳܐ ܕܚܰܡܶܫ ܕܬܶܕܡܪ̈ܳܬܳܐ

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܒܪܺܝܟ ܕܰܚܕܺܝ ܠܰܫܡܰܝ̈ܳܢܶܐ

ܡܡܰܚܰܝܬܳܐ ܕܩܶܪܒܰܬ݀ ܨܶܝܕܰܘܗ̱ܝ ܚܽܘܠܡܳܢܳܐ ܢܶܣܒܰܬ݀܇ ܘܠܰܡܫܰܪܝܳܐ ܒܡܶܠܬܶܗ ܫܰܪܰܪ܇ ܘܰܙܡܰܪ ܬܶܫܒܽܘܚܬܳܐ܀

ܠܰܬܪܶܝܢ ܣܡܰܝ̈ܳܐ ܕܰܦܓܰܥܘ̱ ܒܶܗ܇ ܫܰܟܶܢ ܠܗܽܘܢ ܢܽܘܗܪܳܐ܇ ܘܰܠܒܪ̱ܬ ܝܽܘܐܳܪܳܫ ܐܰܚܺܝ܇ ܘܰܙܡܪܰܘ̱ ܬܶܫܒܽܘܚܬܳܐ܀

ܠܺܝܚܺܝܕܳܐ ܒܪܳܐ ܕܰܐܪܡܶܠܬܳܐ܇ ܩܪܳܐ ܠܶܗ ܘܰܐܩܺܝܡܶܗ܇ ܘܰܠܠܳܥܳܙܳܪ ܡܰܐܚܒܳܢܶܗ܇ ܢܰܚܡܶܗ ܡܶܢ ܩܰܒܪܳܐ܀

ܡܳܟܣܳܐ ܨܰܠܺܝ ܒܰܬܰܘܳܬܳܐ܇ ܕܡܳܪܝ̱ ܚܽܘܢܳܗ̱ܝ ܠܒܺܝܫܳܐ܇ ܘܝܰܬܺܝܪ ܡܶܢ ܗܰܘ ܦܪܺܝܫܳܝܳܐ ܒܗܳܕܶܐ ܐܶܙܕܰܕܰܩ܀

ܬܰܘܕܺܝ ܠܛܳܒܳܐ ܕܰܒܪ̈ܰܚܡܰܘܗ̱ܝ܇ ܣܰܥܪܳܗܿ ܠܰܓܒܺܝܠܬܶܗ܇ ܘܰܐܣܺܝ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܓܶܢܣܰܢ ܚܰܠܳܫܳܐ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܢܽܘܗܪܳܐ ܕܡܶܢ ܢܽܘܗܪܳܐ

ܚܙܳܝܗ̱ܝ ܛܳܒܳܐ ܠܓܶܢܣܰܢ܇ ܕܒܰܚܒܳܪ̈ܳܬܳܐ ܡܡܰܚܰܝ ܗܘܳܐ܇ ܘܓܳܠܘ̱ ܗ̱ܘܰܘ ܪ̈ܰܚܡܰܘܗ̱ܝ ܥܰܠ ܫܶܦܠܶܗ܇ ܘܶܐܬܳܐ ܘܣܰܥܪܶܗ ܒܰܚܢܳܢܶܗ܇ ܬܰܘ ܟܽܠ܀

ܠܒܰܪܬܶܗ ܕܝܽܘܐܳܪܳܫ܇ ܒܺܐܝܕܳܗܿ ܠܰܒܳܟܳܗܿ ܘܰܐܩܺܝܡܳܗܿ܇ ܘܰܪܫܰܡ ܣܰܒܪܳܐ ܕܰܩܝܳܡܬܳܐ܇ ܘܝܰܗܒ ܠܽܘܒܳܒܳܐ ܠܡܳܝܽܘ̈ܬܶܐ܇ ܬܰܘ ܟܽܠ܀

ܡܡܰܚܰܝܬܳܐ ܕܩܶܪܒܰܬ݀܇ ܠܟܰܢܦܳܐ ܕܢܰܚܬܶܗ ܕܡܰܐܣܶܐ ܟܽܠ܇ ܘܰܡܥܺܝܢܳܐ ܕܰܕܡܳܗܿ ܝܶܒܫܰܬ݀ ܙܳܡܪܳܐ ܬܶܫܒܽܘܚܬܳܐ܇ ܬܰܘ ܟܽܠ ܥܰܡ̈ܡܺܝܢ܀

ܟܰܕ ܒܰܣܦܺܝܢ̱ܬܳܐ ܕܡܶܟ ܐܶܠܦܳܐ ܕܬܶܛܒܰܥܝ̱ ܐܶܬܐܰܠܨܰܬ݀܇ ܘܬܰܠܡܺܝܕ̈ܶܐ ܩܪܶܒܘ̱ ܐܰܥܺܝܪܽܘܗ̱ܝ܇ ܘܩܳܡ ܗܘܳܐ ܘܫܰܬܶܩ ܡܰܚܫܽܘܠܰܘ̈ܗ̱ܝ ܬܰܘ܀

ܠܓܰܒܪܳܐ ܕܺܐܝܬ ܗܘܳܐ ܠܶܗ܇ ܠܶܓܝܽܘܢ ܕܫܺܐܕ̈ܶܐ ܡܳܪ̈ܽܘܕܶܐ܇ ܒܝܰܕ ܦܽܘܩܕܳܢܶܗ ܠܕܰܝܘ̈ܶܐ ܛܪܰܕ܇ ܘܠܰܓܒܽܝܠܬܶܗ ܡܶܢܗܽܘܢ ܐܰܥܕܺܝ܇ ܬܰܘ ܟܽܠ܀

ܚܰܝ̈ܶܐ ܘܢܽܘܚܳܡܳܐ܇ ܠܓܶܢܣܶܗ ܕܳܐܕܳܡ ܥܰܦܪܳܢܳܐ܇ ܫܰܟܶܢ ܡܫܺܝܚܳܐ ܦܳܪܽܘܩܰܢ܇ ܘܥܰܠ ܗܳܕܶܐ ܡܫܰܒܚܺܝܢܰܢ ܠܳܟ܀

 

ܩܳܠܳܐ ܕܪܰܡܫܳܐ܇ ܩܳܠܳܐ ܒܰܕܡܽܘܬ ܒܶܣܡ̈ܶܐ

ܒܡܰܪܝܰܡ ܝܳܠܕܰܬ ܐܰܠܳܗܳܐ

ܒܰܪ ܐܰܠܳܗܳܐ܇ ܡܰܬ̈ܠܶܐ ܡܰܠܶܠ ܘܰܒܦ̈ܶܠܳܐܬܳܐ܇ ܘܚܰܘܺܝ ܡܶܠܰܘ̈ܗ̱ܝ ܠܥܽܘܕܪ̈ܳܢܰܢ܇ ܘܰܐܝܟ ܥܰܬܺܝܪܳܐ ܛܡܰܪ ܛܳܒ̈ܳܬܶܗ ܒܰܝܢܳܬ ܣܶܦܪ̈ܰܘܗ̱ܝ܇ ܕܟܽܠ ܕܪܳܚܶܡ ܢܶܩܪܶܐ ܘܢܶܥܬܰܪ܀

ܢܦܰܩ ܗܘܳܐ ܡܰܠܟܳܐ ܕܢܶܚܙܶܐ ܣܡܺܝ̈ܟܶܐ܇ ܕܶܐܙܕܰܡܰܢܘ̱ ܗ̱ܘܰܘ܇ ܠܰܚܠܽܘܠܳܐ ܪܽܘܚܳܢܳܝܳܐ܇ ܘܰܚܙܳܐ ܬܰܡܳܢ ܓܰܒܪܳܐ ܕܰܠܒܺܝܫ ܡܳܐܢ̈ܶܐ ܨ̈ܳܐܶܐ܇ ܘܰܐܦܩܶܗ ܠܚܶܫܟܳܐ ܒܰܪܳܝܳܐ܀

 

ܐ̱ܚܪܺܢܳܐ ܩܳܠܳܐ ܒܰܥܪܽܘܒܬܳܐ ܒܪܺܝܫܺܝܬ

ܒܓܰܘ ܡܰܕܒܪܳܐ ܚܽܘܪܒܳܐ܇ ܝܰܒܶܒܘ̱ ܗ̱ܘܰܘ ܟܶܢ̈ܫܶܐ܇ ܫܽܘܒܚܳܐ ܘܬܰܘܕܺܝܬܳܐ܇ ܠܒܰܪ ܛܳܒܳܐ ܕܶܐܬܳܐ܇ ܘܰܐܣܺܝ ܟܪܺܝܗܽܘܬܰܢ ܚܰܣܺܝ ܚܰܘܒ̈ܳܬܰܢ܇ ܗ ܘ ܗ ܠܶܗ ܬܶܫܒ̈ܚܳܢ ܡܶܢ ܟܽܠ܀

ܬܶܗܪܳܐ ܘܕܽܘܡܳܪܳܐ܇ ܣܥܰܪ ܡܳܪܰܢ ܒܓܶܢܣܶܗ ܕܳܐܕܳܡ ܥܰܦܪܳܢܳܐ܇ ܘܡܶܢ ܪ̈ܰܘܡܶܐ ܓܢܺܝ̈ܙܶܐ܇ ܕܰܐܒܽܘܗ̱ܝ ܢܚܶܬ ܠܰܐܪܥܳܐ܇ ܕܢܶܦܪܽܘܩ ܒܢ̈ܰܝ ܐ̱ܢܳܫܳܐ܇ ܗ ܘ ܗ ܫܽܘܒܚܳܐ ܠܫܳܠܽܘܚܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܚܰܕ ܕܶܝܢ ܕܳܘܝܳܐ ܒܰܝܬܳܐ ܕܡܽܘܡ̈ܶܐ ܡܠܶܐ ܣܽܘܪ̈ܳܕܶܐ܇ ܕܺܐܝܬܰܘܗ̱ܝ ܣܰܡܝܳܐ ܚܰܪܫܳܐ ܘܕܽܘܓܳܐ ܘܺܐܝܬ ܠܶܗ ܕܰܝܘܳܐ܇ ܐܳܦ ܨܶܝܕ ܗܳܢܳܐ ܕܢܰܚܘ̱ ܗ̱ܘܰܘ ܪ̈ܰܚܡܰܘܗ̱ܝ ܕܡܳܪܰܢ ܕܢܰܐܣܺܝܘܗ̱ܝ ܕܳܐܦ ܗܽܘ ܢܰܟܪܶܙ ܥܰܠ ܛܰܝܒܽܘܬܶܗ ܕܒܶܝܬ ܐܰܠܳܗܳܐ܀

ܫܽܘܒܚܳܐ ܠܳܐܣܝܳܐ ܕܰܐܣܺܝ ܟܺܐܒ̈ܶܐ ܕܰܡܡܰܚܰܝ̈ܳܐ܇ ܘܰܒܝܰܕ ܡܶܠܬܶܗ ܝܰܗܒ ܥܽܘܕܪܳܢܳܐ ܠܟܽܠ ܕܰܡܚܺܝܠܺܝܢ܇ ܕܳܘܝܳܐ ܛܰܡܐܳܐ ܕܰܚܪܰܫ ܘܰܥܘܺܝܪ ܘܰܡܠܶܐ ܕܰܝ̈ܘܶܐ܇ ܐܰܣܺܝ ܒܡܶܠܬܶܗ ܘܕܰܟܺܝ ܩܰܕܶܫ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܥܰܡ ܗܳܢܽܘܢ ܕܰܠܥܶܠ

ܦܫܰܛ ܗܘܳܐ ܒܰܚܢܳܢܶܗ܇ ܡܫܺܝܚܳܐ ܡܰܠܟܰܢ ܙܰܟܳܝܳܐ܇ ܠܗܳܝ ܝܰܡܺܝܢܳܐ܇ ܕܝܰܒܺܝܫܳܐ ܗܘܳܬ݀ ܡܶܢ ܢܽܘܓܪܳܐ ܕܙܰܒܢܳܐ܇ ܘܚܰܘܺܝ ܕܗܽܘܝܽܘ ܥܳܒܽܘܕܳܐ ܕܟܽܠ ܒܶܪ̈ܝܳܬܳܐ܀

ܙܓܰܪ ܝܰܡܳܐ ܒܩܳܠܶܗ܇ ܘܰܠܟܽܠܗܽܘܢ ܕܰܚܙܰܘ ܚܰܘܺܝ܇ ܕܒܰܪ ܚܰܣܺܝܢܰܐܗ̱ܘ܇ ܘܰܐܚܺܝ ܡܺܝܬܳܐ ܘܰܐܳܘܕܰܥ ܕܒܰܪ ܚܰܝܰܐܗ̱ܘ܇ ܘܰܟܐܳܐ ܗܘܳܐ ܒܫܺܐܕܳܐ ܘܰܐܳܘܕܰܥ ܗܘܳܐ ܕܒܰܪ ܥܰܙܺܝܙܳܐ ܗܘ܀

ܙܳܚ ܗܘܳܐ ܡܶܢ ܪܰܘܡܳܐ܇ ܢܶܒܥܳܐ ܕܚܰܝ̈ܶܐ ܕܶܐܫܬܰܕܰܪ ܨܶܝܕ ܡܳܝܽܘ̈ܬܶܐ܇ ܘܰܐܫܺܝܓ ܡܶܢܰܢ ܠܡܶܪܬܶܗ ܕܬܰܢܺܝܢܳܐ܇ ܘܰܕܡܶܗ ܬܽܘܒ ܚܰܣܝܳܐ܇ ܐܰܫܩܺܝ ܘܦܰܝܶܓ ܨܶܗܝܽܘܬܰܢ܀

ܡܳܪܝܳܐ ܒܰܪ ܕܰܘܺܝܕ܇ ܐܶܬܪܰܚܰܡ ܥܰܠ ܗܰܘ ܓܰܪܒܳܐ ܕܰܒܥܳܐ ܡܶܢܶܗ܇ ܘܝܰܗܒ ܐܳܣܝܽܘܬܳܐ ܠܦܰܓܪܶܗ ܕܰܟܪܺܝܗ ܗܘܳܐ܇ ܫܽܘܒܚܳܐ ܠܪ̈ܰܚܡܰܘܗ̱ܝ܇ ܕܶܐܬܳܐ ܘܰܣܥܰܪ ܠܰܓܒܺܝܠܬܶܗ܀

 

ܩܳܠܳܐ ܕܠܺܠܝܳܐ܇ ܒܩܳܠܳܐ ܗܘܺܝ ܠܳܗܿ ܠܢܰܦܫܝ̱ ܡܶܢܰܛܪܳܢܳܐ

ܐܰܣܺܝ ܡܳܪܰܢ ܠܓܰܪܒܳܐ ܚܰܪܫܳܐ܇ ܕܺܐܝܬ ܗܘܳܐ ܠܶܗ ܕܰܝܘܳܐ܇ ܗܳܢܳܐ ܕܳܐܦܠܳܐ ܕܢܶܒܥܳܐ ܕܪ̈ܰܚܡܶܐ ܐܺܝܬ ܗܘܳܐ ܠܶܗ ܦܽܘܪܣܳܐ܇ ܐܳܦܠܳܐ ܕܢܶܒܥܶܐ ܘܢܶܬܟܰܫܰܦ܇ ܕܰܛܡܺܝܡ ܫܶܡܥܶܗ ܥܰܡ ܡܰܕܥܶܗ ܘܚܰܢܶܗ ܦܳܪܽܘܩܰܢ܀

ܗܳܢܳܐ ܕܳܐܦ ܗܽܘ ܗܰܘܢܶܗ ܣܪܺܝܚ ܗܘܳܐ܇ ܕܠܳܐ ܢܶܣܬܰܟܰܠ ܗܘܳܐ܇ ܕܺܐܝܬ ܒܶܗ ܡܽܘܡ̈ܶܐ܇ ܘܢܶܓܥܶܐ ܒܚܰܫܳܐ ܠܘܳܬܶܗ ܕܰܐܠܳܗܳܐ܇ ܗܳܢ ܕܰܗܘܳܐ ܡܺܝܬܳܐ ܒܚܰܝܰܘ̈ܗ̱ܝ܇ ܘܶܐܬܢܰܚܰܡ ܗܘܳܐ ܡܶܢ ܡܽܘܡܰܘ̈ܗ̱ܝ܇ ܕܰܙܡܰܪ ܠܳܟ ܫܽܘܒܚܳܐ܀

 

ܣܽܘܓܺܝܬܳܐ ܩܳܠܳܐ ܐܰܚ̈ܰܝ ܒܰܟܬܳܒ̈ܶܐ ܥܶܢܝܳܢܳܐ ܫܽܘܒܚܳܐ ܠܛܰܝܒܽܘܬܳܟ ܪܶܚܡܰܬ ܒܢܰܝ̈ܢܳܫܳܐ

ܫܽܘܒܚܳܐ ܠܟܺܐܢܽܘܬܳܟ܇ ܡܰܠܟܳܐ ܫܡܰܝܳܢܳܐ ܒܰܐܬܪܳܐ ܕܒܶܝܬ ܩܶܢܛܳܐ܇ ܛܰܟܶܣ ܘܣܳܡܰܢܝ̱ ܛܳܒܳܐ܇ ܕܰܗܘܺܝܿܬ ܦܳܠܰܚ ܐ̱ܢܳܐ܇ ܩܕܳܡܰܘܗ̱ܝ ܐܰܝܟ ܡܰܠܰܐܟܳܐ܇ ܘܶܐܢܳܐ ܙܺܐܦܳܢܳܐ܇ ܚܠܳܦ ܗܰܘ ܦܽܘܠܚܳܢܳܐ܇ ܫܒܺܝܚܳܐ ܕܡܰܠܰܐܟ̈ܶܐ܇ ܥܰܡ ܫܺܐܕ̈ܶܐ ܦܶܠܚܿܶܬ܇ ܐܶܒܠܳܐ ܥܰܠ ܣܰܝܒܽܘܬܝ̱܀

ܕܽܘܒܳܪ̈ܰܝ ܢܕܺܝ̈ܕܶܐ܇ ܩܰܕܡܽܘܢܝ̱ ܠܒܶܝܬ ܕܺܝܢܳܐ܇ ܕܢܶܥܒܕܽܘܢ ܩܽܘܛܪܳܓܳܐ܇ ܠܢܰܦܫܳܐ ܕܺܝܠܝ̱ ܕܳܘܺܝܬܳܐ܇ ܡܦܺܝܣ ܐ̱ܢܳܐ ܠܳܟ ܦܳܪܽܘܩܝ̱܇ ܒܳܟܶܢܦܰܝ̈ܟܝ̱ ܣܰܬܰܪܰܝܢܝ̱܇ ܘܳܠܐ ܬܶܓܠܶܐ ܡܽܘܡ̈ܶܝ܇ ܒܒܶܝܬ ܕܺܝܢܳܐ ܕܚܺܝܠܳܐ܇ ܕܰܐܘܕܶܐ ܠܛܰܝܒܽܘܬܳܟ܀

ܘܳܝܳܐ ܡܛܳܢܝ̱ ܡܶܟܺܝܠ܇ ܐܰܟܡܳܐ ܕܫܳܘܶܐ ܐ̱ܢܳܐ܇ ܕܶܐܠܽܘ ܐܶܬܟܰܬܫܿܶܬ ܥܰܡܗܽܘܢ ܐܶܬܢܰܨܚܿܶܬ܇ ܘܕܰܗܘܺܝܿܬ ܠܺܝ ܪܰܦܝܳܐ܇ ܘܫܶܡܫܿܶܬ ܪ̈ܓܺܝܓܳܬܳܐ܇ ܗܘܺܝܿܬ ܠܺܝ ܢܽܘܟܪܳܝܳܐ ܠܓܽܘܕܳܐ ܕܢܰܨܺܝܚ̈ܶܐ܇ ܘܝܳܪܬܳܐ ܕܓܺܗܰܢܳܐ܀

ܚܳܝܪܺܝܢ ܡܳܪܶܐ ܟܽܠ܇ ܐܶܢ ܬܰܦܢܶܐ ܠܽܘܩܒܰܠܝ̱܇ ܥܰܝܡܳܐ ܕܰܚܛܳܗ̈ܰܝ܇ ܡܶܢ ܩܽܘܕܡܰܝ ܡܶܬܓܠܶܓ܇ ܘܰܕܠܳܐ ܕܽܘܘܳܕܳܐ܇ ܒܽܐܘܪܚܳܐ ܕܦܽܘܩܕܳܢܰܝ̈ܟ܇ ܒܟܽܠܳܗܿ ܚܦܺܝܛܽܘܬܳܐ܇ ܘܪܳܕܶܐ ܐ̱ܢܳܐ ܒܣܰܒܪܳܟ܇ ܕܠܳܐ ܚܶܫܟܳܐ ܕܛܽܘܥܝܰܝ܀

ܝܰܡܳܐ ܗܰܘ ܕܢܽܘܪܳܐ܇ ܡܙܺܝܥ ܠܺܝ ܘܰܡܣܰܪܶܕ ܠܺܝ܇ ܘܰܗܘܺܝܿܬ ܒܕܶܚܠܬܳܐ܇ ܡܶܛܽܠ ܥܰܘܠܳܐ ܕܣܶܥܪܶܬ܇ ܨܠܺܝܒܳܟ ܒܰܪ ܚܰܝܳܐ܇ ܢܶܗܘܶܐ ܠܺܝ ܓܺܝܫܪܳܐ܇ ܘܡܶܢ ܦܰܓܪܳܟ ܘܰܕܡܳܟ܇ ܬܰܒܗܶܬܝ̱ ܓܺܗܰܢܳܐ܇ ܘܰܒܪ̈ܰܚܡܶܐ ܐܶܬܦܪܶܩ܀

ܠܡܺܐܢܳܐ ܕܦܽܘܪܩܳܢܳܐ܇ ܘܒܶܝܬ ܓܰܘܣܳܐ ܕܥܽܘܕܪ̈ܳܢܶܐ܇ ܗܘܺܝ ܠܺܝ ܡܳܪܶܐ ܟܽܠ܇ ܒܪ̈ܰܚܡܰܝܟ ܒܳܟ ܐܶܫܬܰܘܙܰܒ܇ ܡܶܢ ܗܳܪܟܳܐ ܦܳܪܽܘܩܝ̱܇ ܡܦܺܝܣ ܐ̱ܢܳܐ ܠܰܚܢܳܢܳܟ܇ ܕܬܰܫܦܰܥ ܥܠܰܝ ܪ̈ܰܚܡܰܝܟ܇ ܘܢܽܘܟܪܳܝܳܐ ܐܶܗܘܶܐ ܠܓܰܒܳܐ ܕܬܰܫܢܺܝ̈ܩܶܐ܀

ܢܽܘܪܳܐ ܕܓܺܗܰܢܳܐ܇ ܐܶܢ ܬܶܣܥܶܐ ܘܬܶܡܪܰܚ ܘܬܶܐܣܰܦܝ ܒܗܰܕܳܡ̈ܰܝ܇ ܥܰܠ ܕܛܰܡܐܺܝܢ ܐܶܢܽܘܢ܇ ܪܶܡܙܳܟ ܢܶܟܐܳܐ ܒܳܗܿ܇ ܘܰܥܠܰܝ ܬܪܽܘܣܝ ܛܰܐܠܳܐ܇ ܘܶܐܦܽܘܩ ܡܶܢ ܓܰܘܳܗܿ܇ ܐܰܝܟ ܛܠܳܝ̈ܶܐ ܬܠܳܬܳܐ܇ ܒܰܐܬܽܘܢܳܐ ܩܪܰܐܘܽܘܟ܀

ܥܰܘܪܽܘܢܝ̱ ܒܚܰܫܰܝ̈ܗܽܘܢ܇ ܐܰܪ̈ܟܽܘܢܶܐ ܫܺܐܕ̈ܶܐ܇ ܘܰܫܩܰܠܘ̱ ܒܢܶܟܠܰܝ̈ܗܽܘܢ܇ ܫܽܘܦܪܳܐ ܗܰܘ ܕܰܥܠܰܝܡܽܘܬܝ̱܇ ܡܽܘܢ ܐܶܥܒܶܕ ܡܶܟܺܝܠ܇ ܫܽܘܦܪܳܐ ܕܰܐܳܘܒܶܕܬܶܗ܇ ܐܶܩܪܶܐ ܠܰܡܫܺܝܚܳܐ܇ ܢܶܦܢܶܐ ܠܺܝ܇ ܫܽܘܦܪ̈ܰܝ܇ ܕܡܶܬܒܰܣܪܺܝܢ ܒܺܝܫ̈ܶܐ܀

ܨܶܝܕܰܝ ܬܰܠܡܺܝܕܳܐ܇ ܩܳܪܶܐ ܠܺܝ ܦܳܪܽܘܩܝ̱܇ ܠܳܐ ܬܶܦܣܽܘܩ ܣܰܒܪܳܐ܇ ܕܺܐܝܬ ܗܽܘ ܠܳܟ ܦܽܘܪܩܳܢܳܐ܇ ܕܶܐܢܳܐ ܡܶܢܺܝܚ ܐ̱ܢܳܐ ܠܳܟ܇ ܘܫܳܒܶܩ ܐ̱ܢܳܐ ܠܰܚܛܺܝܬܳܟ܇ ܩܶܢܝܳܢܳܐ ܕܺܝܠܝ̱ ܐܰܢ̱ܬܽܗ̱ܘ ܇ ܠܳܐ ܡܰܒܣܶܐ ܐ̱ܢܳܐ ܒܳܟ܇ ܕܒܰܕܡܳܐ ܕܺܝܠܝ̱ ܦܪܺܝܩܰܬ܀

ܪܺܝܫܳܐ ܓܶܝܪ ܓܰܠܝܳܐ܇ ܐܺܝܬ ܠܺܝ ܗܺܝ ܒܬܽܘܠܽܘܬܝ̱܇ ܐܰܪܟܶܢܳܗܿ ܣܳܛܳܢܳܐ܇ ܒܝܰܕ ܨܰܥܠܽܘܬܳܐ ܕܙܳܢܝܽܘܬܳܐ܇ ܘܟܺܐܦܳܐ ܝܰܩܺܝܪܬܳܐ܇ ܕܨܳܡܚܳܐ ܡܶܢ ܫܶܡܫܳܐ܇ ܢܰܟܠܰܢܝ̱ ܚܰܪܡܳܢܳܐ܇ ܘܓܰܢܒܰܢܝ̱  ܒܫܽܘܕܳܠܰܘ̈ܗ̱ܝ ܘܳܝܠܺܝ ܡܽܘܢ ܐܰܘܒܕܶܬ܀

ܬܰܘܕܺܝ ܠܳܟ ܡܳܪܰܢ܇ ܢܰܦܫܝ̱ ܕܺܝܠܝ̱ ܚܰܛܳܝܬܳܐ܇ ܕܚܰܢܩܳܗܿ ܗܘܳܐ ܒܺܝܫܳܐ܇ ܒܥܰܘܠܳܐ ܘܰܚܛܺܝܬܳܐ܇ ܢܰܘܕܽܘܢ ܠܳܟ ܪ̈ܶܓܫܰܝ܇ ܘܟܽܠܗܽܘܢ ܗܰܕܳܡ̈ܰܝ܇ ܕܰܐܢ̱ܬ ܡܳܪܝ̱ ܒܰܚܢܳܢܳܟ܇ ܕܰܟܺܝܬ ܡܪܰܩܬ ܐܶܢܽܘܢ܇ ܒܪ̈ܰܚܡܶܐ ܕܛܰܝܒܽܘܬܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܥܠܰܘܗ̱ܝ ܥܰܠ ܗܳܢܳܐ ܓܰܒܪܳܐ ܕܡܽܘܡܰܘ̈ܗ̱ܝ ܬܽܘܒ ܐܶܡܰܠܶܠ܇ ܗ̱ܘܰܘ ܠܺܝ ܚܰܒܪ̈ܶܐ ܘܢܶܚܰܫ ܥܰܡܶܗ ܥܰܠ ܛܽܘܪܳܦܶܗ܇ ܘܡܽܘܡ̈ܶܐ ܕܗܳܢܳܐ ܠܡܽܘܡ̈ܶܐ ܐ̱ܚܪ̈ܳܢܶܐ ܠܳܐ ܕܳܡܶܝܢ ܗ̱ܘܰܘ܇ ܘܠܳܐ ܐܶܫܬܰܡܥܰܬ݀ ܕܰܗܘܳܐ ܚܰܒܪܳܐ ܠܡܽܘܡܶܗ ܩܰܫܝܳܐ܀

ܕܗܳܢܳܐ ܕܳܘܝܳܐ ܠܰܘ ܚܰܕ ܪܶܓܫܳܐ ܣܪܺܝܚ ܗܘܳܐ ܒܰܠܚܽܘܕ܇ ܕܢܶܬܒܰܝܰܐ ܒܶܗ ܒܪ̈ܶܓܫܶܐ ܐ̱ܚܪ̈ܳܢܶܐ ܕܰܚܠܺܝܡܺܝܢ ܗ̱ܘܰܘ܇ ܥܘܺܝܪܳܐ ܘܚܰܪܫܳܐ ܘܺܐܝܬ ܠܶܗ ܕܰܝܘܳܐ ܒܡܽܘܢ ܢܶܬܒܰܝܰܐ܇ ܐܳܦܠܳܐ ܕܢܶܚܙܶܐ ܐܳܦܠܳܐ ܕܢܶܫܡܰܥ ܘܠܳܐ ܕܰܢܡܰܠܶܠ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܒܪ̈ܰܚܡܰܝܟ ܡܳܪܝ̱ ܣܰܓܺܝ̈ܐܶܐ

ܗܰܘ ܕܰܒܡܳܐܢܶܗ ܐܰܣܺܝ܇ ܠܰܐܢ̱ܬܬܳܐ ܕܰܕܡܳܗܿ ܪܳܕܶܐ ܗܘܳܐ܇ ܘܰܩܛܰܥ ܗܘܳܐ ܪܶܕܝܳܐ܇ ܕܰܚܛܳܗ̈ܶܝܗܿ ܥܰܡ ܡܶܪܕܺܝܬܶܗ܀

ܗܰܘ ܕܰܒܚܽܘܒܗܶ ܕܰܟܺܝ܇ ܠܗܰܘ ܓܰܪܒܳܐ ܕܶܐܬܟܰܫܰܦ ܠܶܗ܇ ܘܰܐܣܺܝ ܗܘܳܐ ܘܰܐܚܠܶܡ܇ ܠܡܽܘܡ̈ܶܐ ܟܣܰܝ̈ܳܐ ܕܰܒܢܰܦܫܶܗ܀

ܐܰܢ̱ܬ ܕܶܐܡܰܪܬ ܠܶܗ ܠܝܰܡܳܐ܇ ܫܠܺܝ ܙܓܺܝܪ ܐܰܢ̱ܬ ܠܳܟ ܐܳܡܰܪ ܐ̱ܢܳܐ܇ ܘܰܫܠܺܝܘ ܗ̱ܘܰܘ ܓܰܠܠܰܘ̈ܗ̱ܝ܇ ܘܰܒܢܰܘܚܳܐ ܗ̱ܘܰܘ ܬܰܠܡܺܝܕ̈ܶܐ܀

ܦܓܰܥܘ̱ ܒܶܗ ܓܰܪ̈ܒܶܐ ܒܡܳܪܰܢ܇ ܘܶܐܬܕܰܟܺܝܘ ܡܶܢ ܛܰܡܐܽܘܬܗܽܘܢ܇ ܘܰܡܫܰܪ̈ܰܝܳܐ ܒܝܰܕ ܡܶܠܬܶܗ܇ ܢܣܰܒܘ̱ ܗ̱ܘܰܘ ܥܽܘܕܪ̈ܳܢܶܐ܀

ܠܰܣܡܰܝ̈ܳܐ ܬܽܘܒ ܒܪܶܡܙܶܗ܇ ܦܰܬܰܚ ܥܰܝܢܰܝ̈ܗܽܘܢ ܘܰܚܙܰܘ܇ ܘܰܠܡܺܝ̈ܬܶܐ ܢܰܚܶܡ܇ ܘܰܠܕܽܘܓ̈ܶܐ ܘܚܰܪ̈ܫܶܐ ܐܰܫܡܰܥ܀

ܠܰܡܫܺܝܚܳܐ ܐܰܠܳܗܳܐ܇ ܟܽܠܰܢ ܐܰܚ̈ܰܝ ܢܰܘܕܶܐ ܠܶܗ܇ ܕܰܐܣܺܝ ܠܡܰܟܰܐܒ̈ܶܐ܇ ܕܓܶܢܣܳܐ ܡܚܺܝܠܳܐ ܕܒܶܝܬ ܐܳܕܳܡ܀

 

ܐܰܠܳܗܝ̱ ܐܰܠܳܗܝ̱ ܒܩܳܠܳܐ ܒܪܳܐ ܕܰܫܪܳܐ ܒܡܰܪܒܥܳܐ

ܠܓܰܒܪܳܐ ܕܺܐܝܬ ܗܘܳܐ ܒܶܗ ܠܶܓܝܽܘܢ܇ ܘܰܒܒܶܝܬ ܩܒܽܘܪ̈ܶܐ ܥܳܡܰܪ ܗܘܳܐ܇ ܒܦܽܘܩܕܳܢܳܐ ܕܰܐܠܳܗܽܘܬܳܟ ܢܦܰܩܘ̱ ܫܺܐܕ̈ܶܐ ܘܥܰܠܘ̱ ܒܰܚܙܺܝܪ̈ܶܐ܀

ܝܰܗܒ ܢܽܘܗܪܳܐ ܠܥܰܝ̈ܢܶܐ ܕܣܰܡܝܳܐ܇ ܘܫܰܟܶܢ ܡܶܠܬܳܐ ܠܗܰܘ ܚܰܪܫܳܐ܇ ܘܰܠܕܽܘܓܳܐ ܦܰܬܰܚ ܐܶܕܢܰܘ̈ܗ̱ܝ܇ ܘܝܰܗܒܘ̱ ܬܶܫܒܽܘܚܬܳܐ ܠܗܰܘ ܕܰܐܣܝܶܗ ܡܒܰܪܰܟ ܐܰܢ̱ܬ܀

ܝܰܗܒ ܚܽܘܠܡܳܢܳܐ ܠܰܡܫܰܪܝܳܐ܇ ܘܰܒܡܶܠܬܶܗ ܕܰܟܺܝ ܓܰܪ̈ܒܶܐ܇ ܠܰܟܢܰܥܢܰܝܬܳܐ ܬܽܘܒ ܐܶܡܰܪ܇ ܕܙܶܠܝ̱ ܢܶܗܘܶܐ ܠܶܟܝ̱ ܐܰܝܟ ܕܨܳܒܝܰܬܝ̱ ܡܒܰܪܰܟ܀

ܟܠܳܐ ܪܶܕܝܳܐ ܕܰܡܡܰܚܰܝܬܳܐ܇ ܘܬܰܪܶܨ ܘܰܐܩܺܝܡ ܠܰܟܦܺܝܦܬܳܐ܇ ܘܰܠܠܳܥܳܙܳܪ ܬܽܘܒ ܪܳܚܡܶܗ܇ ܡܶܢ ܩܰܒܪܳܐ ܩܪܳܝܗ̱ܝ ܘܰܐܩܺܝܡܶܗ܇ ܡܒܰܪܰܟ܀

ܚܙܳܐ ܒܳܪܽܘܝܳܐ ܕܰܐܫܦܶܠܢܰܢ ܘܶܐܬܡܰܚܺܝܢܰܢ ܒܰܚܛܺܝܬܳܐ܇ ܘܰܛܥܶܢ ܘܰܐܝܬܺܝ ܠܰܢ ܣܰܡܳܐ܇ ܘܒܶܗ ܐܰܚܠܶܡ ܠܰܚܒܳܪ̈ܳܬܰܢ܀

ܝܽܘܐܳܪܳܫ ܗܰܘ ܪܺܝܫ ܟܢܽܘܫܬܳܐ܇ ܕܰܠܒܰܪܬܶܗ ܟܺܐܒܳܐ ܢܰܘܠܳܗܿ܇ ܘܩܰܪܺܝܒܳܐ ܗܘܳܬ݀ ܕܰܬܫܰܢܶܐ܇ ܒܥܳܐ ܡܶܢܶܗ܇ ܘܶܐܬܳܐ ܘܣܰܥܪܳܗܿ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܫܡܰܝܳܢ̈ܶܐ ܫܽܘܒܚܳܟ ܙܳܡܪܺܝܢ

ܓܰܙܳܐ ܪܰܒܳܐ ܕܶܐܫܬܰܕܰܪ܇ ܡܶܢ ܥܶܠܳܝܳܐ ܨܶܝܕ ܓܶܢܣܰܢ܇ ܘܰܡܠܳܗܿ ܗܘܳܐ ܠܰܐܪܥܳܐ ܕܺܝܗܽܘܕ܇ ܡܶܢ ܣܺܝܡ̈ܳܬܳܐ ܕܥܽܘܕܪ̈ܳܢܰܘܗ̱ܝ܀

ܠܰܒܪܳܗܿ ܕܰܐܪܡܶܠܬܳܐ ܐܰܚܺܝ܇ ܘܠܳܥܳܙܳܪ ܪܳܚܡܶܗ ܐܰܩܺܝܡ܇ ܘܠܰܛܠܺܝܬܳܐ ܒܰܪ̱ܬ ܝܽܘܐܳܪܳܫ܇ ܐܰܥܕܺܝ ܡܶܢ ܦܟܳܪ̈ܶܐ ܕܡܰܘܬܳܐ܀

ܠܒܶܝܬ ܦܶܛܪܽܘܣ ܒܚܽܘܒܶܗ ܥܰܠ ܫܪܳܐ܇ ܘܶܐܫܳܬܳܐ ܕܰܚܡܳܬܶܗ ܛܪܰܕ܇ ܘܬܽܘܒ ܐܶܬܚܰܠܡܰܬ݀ ܘܫܰܡܶܫܬܶܗ܇ ܘܬܶܫܒܽܘܚܬܳܐ ܠܰܫܡܶܗ ܙܳܡܪܳܐ܀

ܒܓܰܘ ܟܢܽܘܫܬܳܐ ܐܳܬܳܐ ܕܬܶܗܪܳܐ܇ ܦܳܪܽܘܩܰܢ ܩܕܳܡ ܟܶܢ̈ܫܶܐ ܣܥܰܪ܇ ܕܠܺܐܝܕܳܐ ܕܝܰܒܺܝܫܳܐ ܦܫܰܛ ܗܘܳܐ܇ ܘܝܽܘܕܳܝ̈ܶܐ ܚܣܳܡܳܐ ܐܶܬܡܠܺܝܘ܀

ܠܰܚܡܳܬܶܗ ܕܦܶܛܪܽܘܣ ܐܰܚܠܶܡ܇ ܡܶܢ ܐܶܫܳܬܳܐ ܕܪܰܡܝܳܐ ܗܘܳܬ݀܇ ܘܰܠܠܳܥܳܙܳܪ ܩܪܳܐ ܘܰܐܩܺܝܡ܇ ܡܶܢ ܩܰܒܪܳܐ ܒܳܬܰܪ ܕܣܰܪܺܝ܀

ܫܽܘܒܚܳܐ ܠܶܗ ܕܝܰܗܒ ܠܰܢ ܦܰܓܪܶܗ܇ ܘܰܕܡܶܗ ܟܳܣܳܐ ܕܦܽܘܪܩܳܢܳܐ܇ ܛܶܥܢ ܣܰܡܡܳܢܰܘ̈ܗ̱ܝ ܟܰܣܝܳܐܺܝܬ܇ ܘܡܰܐܣܶܐ ܗܘܳܐ ܒܗܽܘܢ ܓܰܠܝܳܐܺܝܬ܀

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܣܳܓܶܕ ܠܳܟ ܡܳܪܝܳܐ

ܒܫܺܝܫ̈ܠܳܬܳܐ ܐܳܣܪܺܝܢ ܗ̱ܘܰܘ ܠܶܗ܇ ܠܓܰܒܪܳܐ ܕܺܐܝܬ ܗܘܳܐ ܒܶܗ ܠܶܓܝܽܘܢ܇ ܘܰܒܒܶܝܬ ܩܒܽܘܪ̈ܶܐ ܥܳܡܰܪ ܗܘܳܐ܇ ܥܰܕ ܐܶܬܳܐ ܡܳܪܶܗ ܘܰܐܣܝܶܗ܀

ܩܥܳܐ ܕܰܝܘܳܐ ܘܶܐܡܰܪ ܠܝܶܫܽܘܥ܇ ܒܳܥܶܐ ܐ̱ܢܳܐ ܡܳܪܝ̱ ܠܳܐ ܬܫܰܢܩܰܢܝ̱܇ ܘܰܦܩܰܕ ܠܶܗ ܠܕܰܝܘܳܐ ܘܰܢܦܰܩ܇ ܘܠܰܬܗܽܘܡܳܐ ܫܰܕܪܶܗ ܕܢܺܐܙܰܠ܀

ܘܟܰܕ ܗܽܘ ܠܟܽܠ ܐ̱ܢܳܫ ܡܰܐܣܶܐ ܗܘܳܐ܇ ܦܪܰܚ ܛܶܐܒܶܗ ܒܟܽܠܳܗܿ ܝܺܗܽܘܕ܇ ܘܟܽܠ ܕܺܐܝܬ ܗܘܳܐ ܠܶܗ ܟܽܘܪ̈ܗܳܢܶܐ܇ ܡܶܚܕܳܐ ܕܰܚܙܳܝܗ̱ܝ ܐܶܬܰܐܣܺܝ܀

ܘܟܰܕ ܚܙܰܘ ܐܳܬܳܐ ܕܰܥܒܰܕ ܗܘܳܐ܇ ܡܫܺܝܚܳܐ ܟܶܢܫ̈ܶܐ ܕܶܐܬܛܰܝܰܒܘ̱܇ ܗܰܝܡܶܢܘ̱ ܒܶܗ ܟܽܠܗܽܘܢ ܘܶܐܡܰܪܘ̱܇ ܒܪܺܝܟ ܛܳܒܳܐ ܕܰܣܥܰܪ ܥܰܡܶܗ܀

ܛܥܺܝܢܺܝܢ ܟܪ̈ܺܝܗܶܐ ܒܥܰܪ̈ܣܳܬܳܐ܇ ܘܳܐܬܶܝܢ ܨܶܝܕܰܘܗ̱ܝ ܟܰܪ ܕܺܐܝܬܰܘܗ̱ܝ܇ ܘܰܐܣܺܝ ܘܰܐܚܠܶܡ ܟܺܐܒܰܝ̈ܗܽܘܢ܇ ܘܗܶܢܽܘܢ ܦܰܪܥܽܘܗ̱ܝ ܒܺܝܫ̈ܳܬܳܐ܀

 

ܩܳܠܳܐ ܕܨܰܦܪܳܐ܇ ܠܰܬܚܽܘܡܳܐ ܕܗܰܝܡܳܢܽܘܬܳܐ

ܪܒܺܝܥܳܝܳܐ ܕܰܢܚܶܬ ܕܢܶܦܪܽܘܩ܇ ܠܒܶܝܬ ܚܰܢܰܢܝܳܐ ܒܰܐܬܽܘܢܳܐ܇ ܘܦܰܨܺܝ ܐܶܢܽܘܢ ܡܶܢ ܫܰܠܗܶܒܺܝܬܳܐ܇ ܐܰܠܳܗܳܐ ܕܰܣܟܰܪ ܦܽܘܡܗܽܘܢ܇ ܕܰܐܪ̈ܝܰܘܳܬܳܐ ܣܳܪ̈ܽܘܚܶܐ܇ ܕܠܳܐ ܢܚܰܒܠܽܘܢܳܝܗ̱ܝ ܠܓܰܒܪܳܐ ܕܳܢܺܝܐܶܝܠ܇ ܢܰܛܰܪ ܠܥܺܕܬܳܐ ܒܰܨܠܺܝܒܳܟ܇ ܡܶܢ ܣܶܕ̈ܩܶܐ ܘܡܶܢ ܚܶܪ̈ܝܳܢܶܐ܇ ܗ ܘܡܶܢ ܟܽܠ ܢܶܟܝ̈ܳܢܺܝܢ܀

ܐܰܢ̱ܬ ܡܳܪܰܢ ܚܽܘܪ ܒܰܡܚܺܝܠܽܘܬܝ̱܇ ܕܰܚܛܺܝܿܬ ܣܰܓܺܝ ܘܰܐܪܓܶܙܬܳܟ܇ ܘܠܳܐ ܝܳܕܰܥ ܐ̱ܢܳܐ ܒܡܰܢܽܘ ܐܶܬܓܰܘܰܣ ܩܶܪܒܿܶܬ ܨܶܝܕ ܐܳܣܰܘ̈ܳܬܳܐ܇ ܘܰܐܳܘܦܺܝܘ ܒܺܝ ܣܰܡܡܳܢܰܝ̈ܗܽܘܢ܇ ܫܽܘܚܢܳܐ ܡܰܪܺܝܪ ܘܠܰܝܬ ܠܶܗ ܥܳܨܽܘܒܳܐ܇ ܫܶܡܥܿܶܬ ܒܳܟ ܐܳܣܝܳܐ ܛܳܒܳܐ܇ ܕܺܐܝܬ ܠܳܟ ܣܰܓܺܝ ܣܰܡܡܳܢ̈ܶܐ܇ ܘܰܕܩܳܪܶܒ ܠܳܟ ܢܳܣܶܒ ܥܽܘܕܪ̈ܳܢܶܐ܇ ܒܚܽܘܒܶܗ ܕܰܐܒܳܐ ܝܳܠܽܘܕܳܟ܇ ܘܒܰܨܠܽܘܬܳܐ ܕܗܳܝ ܕܺܝܠܶܕܬܳܟ ܗ ܚܰܣܳܐ ܠܺܝ ܚܰܘܒ̈ܰܝ܀

 

ܐ̱ܚܪܺܢܳܐ ܒܩܳܠܳܐ ܩܽܘܩܳܝܳܐ

ܟܰܕ ܐܶܙܕܰܡܰܢ ܗܘܳܐ ܡܳܪܰܢ ܠܒܶܝܬܶܗ ܕܫܶܡܥܽܘܢ܇ ܫܶܡܥܰܬ݀ ܛܶܐܒܶܗ ܚܰܛܳܝܬܳܐ܇ ܘܫܰܪܝܰܬ݀ ܡܶܬܚܰܫܒܳܐ܇ ܟܰܕ ܐܳܡܪܳܐ ܗܘܳܬ݀ ܐܺܙܰܠ ܐܶܣܓܽܘܕ ܠܶܗ܇ ܠܗܰܘ ܡܪܰܚܡܳܢܳܐ ܘܫܳܒܶܩ ܚܰܘܒ̈ܳܬܳܐ܇ ܫܶܩܠܰܬ݀ ܡܶܫܚܳܐ ܪܺܝܫܳܝܳܐ ܘܥܶܠܰܬ݀ ܨܶܝܕܰܘ̈ܗ̱ܝ܇ ܘܰܡܫܰܚܬܶܗ ܠܗܰܘ ܕܰܒܙܰܪܬܶܗ ܪܰܘܡܳܐ ܘܥܽܘܡܩܳܐ ܡܫܰܚ ܗ ܗ܀

ܢܽܘܗܪܳܐ ܢܗܰܪ ܘܨܰܦܪܳܐ ܡܰܛܺܝ ܐܶܡܪܰܬ݀ ܚܰܛܳܝܬܳܐ܇ ܠܡܽܘܢ ܝܳܬܒܳܐ ܐ̱ܢܳܐ ܒܚܶܫܽܘܟܳܐ ܡܫܺܝܚܳܐ ܡܰܢܗܰܪ ܠܺܝ܇ ܐܳܙܠܳܢܝ̱ ܙܳܒܢܳܢܝ̱ ܟܽܠ ܡܳܐ ܕܩܳܢܝܳܐ ܐ̱ܢܳܐ܇ ܕܺܐܙܰܠ ܐܶܡܫܽܘܚ ܠܒܽܘܟܪܶܗ ܕܥܶܠܳܝܳܐ܇ ܘܰܠܒܰܝܬܶܗ ܕܫܶܡܥܽܘܢ ܐܳܙܠܳܢܝ̱ ܕܡܳܪܰܢ ܬܰܡܳܢ ܫܪܶܐ܇ ܚܳܙܶܐ ܠܺܝ ܘܰܡܩܰܒܶܠ ܠܺܝ ܘܥܳܒܶܕ ܥܠܰܝ ܪ̈ܰܚܡܶܐ܇ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܶܡܰܪ ܠܰܐܢ̱ܬܬܳܐ ܗܳܐ ܫܰܪܝܰܬܝ̱ ܐܰܢ̱ܬܝ̱ ܡܶܢ ܟܽܘܪܗܳܢܶܟܝ̱܇ ܘܡܶܚܕܳܐ ܫܪܰܐܳܘܽܘܗܿ ܪ̈ܰܚܡܶܐ ܘܦܰܫܛܽܘܗܿ ܕܰܟܦܺܝܦܳܐ ܗܘܳܬ݀܇ ܘܰܒܗܳܝ ܐܰܢ̱ܬܬܳܐ ܨܰܠܡ̈ܶܐ ܨܳܪ ܗܘܳܐ ܘܰܐܪܥܳܐ ܟܽܠܳܗ܇ ܕܰܟܦܺܝܦܳܐ ܗܘܳܬ݀ ܒܣܶܓܕܰܬ ܨܰܠܡ̈ܶܐ ܕܰܣܪܺܝܩܽܘܬܳܐ܀

ܠܳܟ ܬܶܫܒܽܘܚܬܳܐ ܐܳܣܝܳܐ ܕܪ̈ܰܚܡܶܐ ܕܶܐܫܬܰܕܰܪ ܠܰܢ܇ ܕܢܰܐܣܶܐ ܟܺܐܒ̈ܶܐ ܐܳܦ ܟܽܘܪ̈ܗܳܢܶܐ ܕܰܡܚܺܝܠܽܘܬܰܢ܇ ܬܰܘܕܺܝ ܠܰܐܒܽܘܟ ܕܝܰܗܒܳܟ ܕܶܒܚܳܐ ܚܠܳܦ ܚܰܛܳܝ̈ܶܐ܇ ܘܰܠܪܽܘܚܩܽܘܕܫܳܐ ܕܗܽܘ ܐܰܢܗܰܪ ܠܰܢ ܠܳܟ ܬܶܫܒܽܘܚܬܳܐ܀

 

ܕܰܬܠܳܬܫ̈ܳܥܺܝܢ ܒܩܳܠܳܐ ܕܰܚܛܳܐ ܠܳܐ ܢܶܚܛܶܐ

ܟܽܠܡܽܘܢ ܕܺܐܝܬ ܗܘܳܐ ܠܺܝ܇ ܫܩܰܠܘ̱ ܐܳܣ̈ܰܘܳܬܳܐ܇ ܐܶܡܪܰܬ݀ ܡܡܰܚܰܝܬܳܐ܇ ܘܡܶܕܶܡ ܠܳܐ ܐܰܘܬܪܽܘܢܝ̱܇ ܘܰܥܕܰܡܳܐ ܕܶܐܬܳܐ ܦܳܪܽܘܩܰܢ ܠܰܐܪܥܳܐ܇ ܒܳܟܶܢ̈ܦܶܐ ܕܡܰܪܛܽܘܛܶܗ܇ ܚܽܘܠܡܳܢܳܐ ܝܰܗܒ ܠܰܝ܇ ܗ ܘ ܗ ܒܳܟܶܢ̈ܦܶܐ ܕܛܰܝܒܽܘܬܳܟ ܣܰܬܰܪ ܠܰܢ ܡܳܪܝܳܐ܀

ܡܳܐ ܪܓܺܝܓ ܗܘܳܐ ܩܳܠܳܐ܇ ܕܡܰܪܝܰܡ ܘܰܕܡܳܪܬܳܐ܇ ܟܰܕ ܩܰܒ̈ܠܳܢ ܗܘ̈ܰܝ ܠܶܗ܇ ܥܰܠ ܡܰܘܬܶܗ ܠܡܳܪܝܳܐ܇ ܕܶܐܠܽܘ ܬܢܳܢ ܗܘܰܝܬ ܡܳܪܝ̱܇ ܦܳܪܽܘܩܶܗ ܕܥܳܠܡܳܐ ܠܳܐ ܡܳܐܶܬ ܐܳܚܝ̱ ܠܳܥܳܙܳܪ ܪܳܚܡܳܟ܇ ܗ ܘ ܗ ܒܪܺܝܟ ܕܰܩܪܳܐ ܘܶܐܡܰܪ ܠܳܥܳܙܳܪ ܬܳܐ ܠܒܰܪ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܝܰܕ ܐܳܣܝܽܘܬܳܐ ܛܠܺܝܬܳܐ ܢܶܗܪܰܬ݀ ܐܳܦ ܐܶܬܚܰܠܡܰܬ݀܇ ܘܰܥܪܰܩ ܫܺܐܕܳܐ ܘܰܐܬܩܶܢ ܦܰܓܪܳܗܿ ܕܶܐܬܚܰܒܰܠ ܗܘܳܐ܇ ܘܠܰܟܢܰܥܢܳܝܬܳܐ ܗܘܳܐ ܨܶܒܝܳܢܳܐ ܕܰܡܦܺܝܣܳܐ ܗܘܳܬ݀܇ ܐܳܦ ܠܰܛܠܺܝܬܳܐ ܗܘܳܐ ܚܽܘܠܡܳܢܳܐ ܕܰܫܚܺܝܩܳܐ ܗܘܳܬ݀܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܨܶܝܕ ܕܰܟܪ̈ܺܝܗܺܝܢ܇ ܘܣܶܓܕܬܳܐ ܠܰܒܪܳܐ ܕܶܐܬܳܐ ܘܰܐܚܠܶܡ ܠܰܚܒܳܪ̈ܳܬܰܢ܇ ܬܰܘܕܺܝ ܠܪܽܘܚܳܐ ܕܚܰܪܰܪ ܠܰܐܡܬܶܗ ܡܶܢ ܡܳܪ̈ܽܘܕܶܐ܇ ܘܢܶܩܥܶܐ ܟܽܠܰܢ ܒܟܽܠ ܥܶܕܳܢܺܝ̈ܢ ܫܽܘܒܚܳܐ ܠܰܫܡܳܟ܀

 

ܕܦܶܠܓܶܗ ܕܝܰܘܡܳܐ܇ ܩܳܠܳܐ ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ

ܝܽܘܕܳܝ̈ܶܐ ܛܳܠܡ̈ܰܝ ܩܽܘܫܬܳܐ܇ ܟܰܕ ܚܙܰܘ ܠܣܰܡܝܳܐ ܕܰܚܙܳܐ ܢܽܘܗܪܳܐ܇ ܩܪܰܐܽܘܗ̱ܝ ܗ̱ܘܰܘ ܘܰܡܫܰܐܠܺܝܢ ܠܶܗ܇ ܕܰܐܝܟܰܢ ܐܶܬܦܰܬܰܚ̈ܝ̱ ܥܰܝܢܰܝ̈ܟ܇ ܘܶܐܡܰܪ ܠܗܽܘܢ ܕܝܶܫܽܘܥ ܦܓܰܥ ܒܺܝ܇ ܘܰܓܒܰܠ ܛܺܝܢܳܐ ܡܶܢ ܪܽܘܩܶܗ܇ ܘܛܳܫ ܠܺܝ ܥܰܠ ܥܰܝ̈ܢܰܝ܇ ܘܰܐܫܺܝܓܿܶܬ ܘܰܚܙܺܝܿܬ ܢܽܘܗܪܳܐ܀

ܪܰܒ ܬܶܗܪܳܐ ܕܰܣܥܰܪ ܡܳܪܰܢ܇ ܕܡܶܢ ܠܰܚܡ̈ܶܐ ܙܥܽܘܪ̈ܶܐ ܒܓܰܘ ܡܰܕܒܪܳܐ܇ ܕܣܰܒܰܥܘ̱ ܡܶܢܗܽܘܢ ܚܰܡܫܳܐ ܐܰܠܦ̈ܶܐ܇ ܘܶܐܟܰܠܘ̱ ܘܰܫܩܰܠܘ̱ ܬܰܘܬܳܪ̈ܶܐ܇ ܘܥܰܠ ܢܽܘܢ̈ܶܐ ܬܪܶܝܢ ܒܰܪܶܟ ܗܘܳܐ܇ ܘܣܰܒܥܳܐ ܪܰܒܳܐ ܢܒܰܥ ܡܶܢܗܽܘܢ܇ ܡܳܐ ܕܰܚܙܰܘ ܬܶܗܪܳܐ܇ ܫܰܪܺܝܘ ܙܳܡܪܺܝܢ ܬܶܫܒܽܘܚܬܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܰܕܢܰܚ ܪ̈ܰܚܡܶܐ ܕܛܰܝܒܽܘܬܳܟ܇ ܥܰܠ ܡܰܪܥܺܝܬܳܟ ܚܰܢܳܢܳܐ܇ ܕܓܳܥܝܳܐ ܒܚܰܫܳܐ ܥܰܠ ܬܰܪܥܳܟ܇ ܘܫܳܐܠܳܐ ܡܶܢܳܟ ܦܽܘܪܩܳܢܳܐ܇ ܣܥܽܘܪ ܠܰܟܪ̈ܺܝܗܶܐ ܒܰܚܢܳܢܳܟ܇ ܘܬܰܪܣܳܐ ܠܟܰܦܢ̈ܶܐ ܒܛܰܝܒܽܘܬܳܟ܇ ܐܰܩܺܝܡ ܢܰܦ̈ܠܶܐ ܒܝܰܡܺܝܢܳܟ܇ ܡܚܺܝ̈ܠܶܐ ܫܰܪܰܪ ܒܰܕܪܳܥܳܟ܀

ܣܰܡܶܟ ܡܳܪܝ̱ ܥܶܩܒܳܐ ܕܣܳܒ̈ܶܐ܇ ܘܫܰܪܰܪ ܚܰܝܠܳܐ ܕܰܡܚܺܝ̈ܠܶܐ܇ ܗܰܒ ܢܰܟܦܽܘܬܳܐ ܠܰܛܠܳܝ̈ܶܐ܇ ܘܪܰܒܳܐ ܫܰܒܪ̈ܶܐ ܕܰܡܙܰܘ̈ܓܶܐ܇ ܘܢܰܛܰܪ ܐܶܢܽܘܢ ܒܕܰܟܝܽܘܬܳܐ܇ ܩܰܝܶܡ ܡܳܪܝ̱ ܬܳܐܓ̈ܶܐ ܕܡܰܠܟ̈ܶܐ܇ ܘܝܰܩܰܪ ܕܰܪܓܳܐ ܕܪ̈ܺܝܫܳܢܶܐ܇ ܘܡܶܢ ܟܽܠ ܦܽܘܡܺܝ̈ܢ ܬܶܫܒܽܘܚܬܳܐ܇ ܬܰܣܶܩܝ̱ ܠܳܟ ܒܟܽܠܥܶܕܳܢܺܝ̈ܢ܀

 

ܕܰܬܫܰܥܫܳܥܺܝ̈ܢ ܒܩܳܠܳܐ ܠܡܰܠܟܽܘܬ ܪܰܘܡܳܐ

ܬܶܟܒܽܘܗܿ ܫܶܡܥ̈ܶܐ܇ ܠܰܐܢ̱ܬܬܳܐ ܟܢܰܥܢܰܝܬܳܐ ܕܗܳܐ ܥܳܒܰܪ ܝܶܫܽܘܥ܇ ܢܶܦܩܰܬ݀ ܒܳܬܪܶܗ ܟܰܕ ܩܳܥܝܳܐ܇ ܕܒܰܝܢܳܬ ܟܶܢܫ̈ܶܐ ܘܰܡܦܺܝܣܳܐ܇ ܡܳܪܝ̱ ܒܰܪ ܕܰܘܺܝܕ ܪܰܚܶܡܥܠܰܝ܇ ܒܰܪܬܝ̱ ܒܺܝܫܳܐܺܝܬ ܡܶܬܕܰܒܪܳܐ܇ ܡܶܢ ܒܺܝܫܳܐ ܕܣܳܢܐܳܐ ܠܐ̱ܢܳܫܽܘܬܳܐ܀

ܟܰܕ ܦܳܪܽܘܩܰܢ܇ ܒܽܐܘܪܚܳܐ ܪܳܕܶܐ ܗܘܳܐ܇ ܢܰܩܦܽܘܗ̱ܝ ܬܪܶܝܢ ܣܡ̈ܰܝܳܐ܇ ܘܰܒܬܰܟܫܶܦܬܳܐ ܡܦܺܝܣܺܝܢ ܗ̱ܘܰܘ܇ ܒܬܶܐܢܚ̈ܳܬܳܐ ܪ̈ܰܥܽܘܡܳܬܳܐ܇ ܪܰܚܶܡܥܠܰܝܢ ܒܰܪ ܕܰܘܺܝܕ܇ ܕܰܐܢ̱ܬ ܗܽܘ ܐܳܣܝܳܐ ܫܡܰܝܳܢܳܐ ܐܰܠܳܗܳܐ ܕܰܗܘܳܐ ܒܰܪܢܳܫܳܐ܀

 

ܒܳܥܽܘܬܳܐ ܕܚܳܐܶܢ ܠܚܰܛܳܝ̈ܶܐ

ܐܶܢ ܨܳܒܶܝܬ ܡܳܪܰܢ܇ ܐܳܣܝܳܐ ܫܡܰܝܳܢܳܐ܇ ܕܰܐܣܺܝܬ ܠܰܢ ܟܺܐܒܰܝ̈ܢ܇ ܒܪ̈ܰܚܡܶܐ ܘܰܚܢܳܢܳܐ܇ ܡܨܶܝܬ ܗܽܘ ܕܰܬܕܰܟܶܐ܇ ܛܰܡܐܽܘܬܝ̱ ܡܶܢ ܓܰܪܒܳܐ܀

 

ܫܽܘܒܚܳܐ ܠܳܟ ܡܳܪܰܢ܇ ܕܥܰܡ ܡܶܠܬܶܗ ܐܶܬܕܰܟܺܝ܇ ܘܶܐܚܰܠܡܰܬ݀ ܟܽܘܪܗܳܢܳܗ݀܇ ܘܰܠܐܒܽܘܟ ܘܪܽܘܚ ܩܽܘܕܫܳܐ܇ ܣܶܓܕܬܳܐ ܘܪܽܘܡܪܳܡܳܐ܀

 

ܫܶܠܡܰܬ݀ ܫܰܒܬܳܐ ܕܚܰܡܶܫ ܕܨܰܘܡܳܐ ܕܰܐܪܒܥܺܝܢ܀

 

ܘܨܰܠܰܘ ܥܰܠ ܕܳܘܝܽܘܬܝ̱ ܡܶܛܽܠ ܡܳܪܰܢ ܒܫܶܢܰܬ 2006

 

ܬܽܘܒ ܛܶܟܣܳܐ ܕܥܰܠ ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ

 

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܐܶܡܳܐ ܕܟܺܝܬܳܐ

ܗܰܘ ܕܰܒܪܶܬܚܳܐ ܕܚܽܘܒܶܗ ܣܒܰܠܘ̱ ܣܳܗ̈ܕܶܐ܇ ܡܰܘܬܳܐ ܕܚܺܝܠܳܐ܇ ܒܰܓܠܺܝܕܳܐ ܕܝܰܡܬܳܐ܇ ܪܰܚܶܡܥܠܰܝ܀

ܗܰܘ ܕܰܠܣܳܗ̈ܕܶܐ܇ ܒܰܓܠܺܝܕܳܐ ܐܶܬܓܡܰܪܘ̱܇ ܟܠܺܝܠܳܐ ܕܫܽܘܒܚܳܐ ܝܰܡܺܝܢܳܟ ܓܶܕܠܰܬ݀ ܪܰܚܶܡܥܠܰܝ܀

ܗܰܘ ܕܰܒܚܽܘܒܶܗ ܢܚܶܬܰܘ̱ ܗ̱ܘܰܘ ܠܰܐܓܽܘܢܳܐ܇ ܐܰܪܒܥܺܝܢ ܣܳܗ̈ܕܶܐ܇ ܒܝܰܡܬܳܐ ܕܣܶܒܰܣܛܺܝ ܪܰܚܶܡܥܠܰܝ܀

ܡܳܐ ܪܓܺܝܓܳܐ ܗܘܳܬ݀ ܓܽܘܕܳܐ ܗܳܝ ܕܰܐܪܒܥܺܝܢ܇ ܟܰܕ ܩܳܝܡܺܝܢ ܗ̱ܘܰܘ ܒܰܓܠܺܝܕܳܐ ܕܝܰܡܬܳܐ ܪܰܚܶܡܥܠܰܝ܀

ܐܰܪܒܥܺܝܢ ܣܳܗ̈ܕܶܐ ܥܰܠܘ̱ ܗ̱ܘܰܘ ܠܓܰܘ ܝܰܡܬܳܐ܇ ܐܰܪܒܥܺܝܢ ܟܠܺܝܠܺܝ̈ܢ ܒܪ̈ܺܫܰܝܗܽܘܢ ܐܶܬܬܣܺܝܡ̈ܝ̱ ܪܰܚܶܡܥܠܰܝ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܠܢܳܨܪܰܬ ܡܕܺܝܢ̱ܬܳܐ

ܡܰܢ ܠܳܐ ܢܶܬܗܰܪ܇ ܟܰܕ ܚܳܙܶܐ ܠܓܽܘܕܳܐ ܕܰܐܪܒܥܺܝܢ ܢܰܨܺܝ̈ܚܶܐ ܒܝܰܡܬܳܐ ܕܡܰܝ̈ܳܐ܇ ܕܰܒܩ̈ܳܠܶܐ ܕܰܬܰܘܳܬ ܢܰܦܫܳܐ܇ ܩܪܳܒܳܐ ܣܶܕܪܰܬ݀ ܥܰܡ ܣܳܛܳܢܳܐ܇ ܒܪܺܝܟ ܛܳܒܳܐ ܕܟܰܠܶܠ ܐܶܢܽܘܢ܇ ܐܰܠܳܗܳܐ܀

ܬܶܗܪܳܐ ܪܰܒܳܐ܇ ܟܰܕ ܩܳܝܡܳܐ ܓܽܘܕܳܐ ܕܣܳܗ̈ܕܶܐ܇ ܢܰܨܺܝ̈ܚܶܐ ܒܝܰܡܬܳܐ ܕܡܰܝ̈ܳܐ܇ ܬܠܰܘ ܥܰܝܢܰܝ̈ܗܽܘܢ ܠܰܫܡܰܝܳܐ ܟܰܕ ܡܶܬܟܰܫܦܺܝܢ ܠܘܳܬ ܐܰܠܳܗܳܐ܇ ܕܡܶܛܽܠܳܬܳܟ ܡܳܝܬܺܝܢܰܢ܇ ܐܰܠܳܗܳܐ܀

ܩܳܝܡܺܝܢ ܣܳܗ̈ܕܶܐ܇ ܠܺܠܝܳܐ ܟܽܠܶܗ ܒܰܓܠܺܝܕܳܐ ܘܩܽܘܪܳܐ ܩܰܫܝܳܐ܇ ܘܩܳܥܶܝܢ ܘܳܐܡܪܺܝܢ ܠܰܡܫܺܝܚܳܐ ܒܚܰܕܽܘܬ ܠܶܒܳܐ ܕܡܶܛܽܠܳܬܳܟ ܡܳܝܬܺܝܢܰܢ ܬܳܐ ܠܥܽܘܕܪܳܢܰܢ܇ ܐܰܠܳܗܳܐ܀

ܡܰܢ ܠܳܐ ܢܶܬܗܰܪ܇ ܟܰܕ ܚܳܙܶܐ ܠܗܽܘܢ ܠܣܳܗ̈ܕܶܐ ܒܪ̈ܺܝܟܶܐ܇ ܟܰܕ ܩܳܝܡܺܝܢ ܗ̱ܘܰܘ ܕܚܰܕ ܗܽܘ ܟܝܳܢܳܐ܇ ܕܺܝܚܺܝܕܳܝܳܐ ܡܶܠܬܳܐ ܡܫܺܝܚܳܐ܇ ܕܶܐܬܒܰܣܰܪ ܒܶܗ ܡܰܘܕܶܝܢܰܢ܇ ܐܰܠܳܗܳܐ܀

ܐܰܪܒܥܺܝܢ ܝܰܘ̈ܡܺܝܢ܇ ܕܰܒܗܽܘܢ ܐܰܩܪܶܒܬ ܥܰܡ ܒܺܝܫܳܐ܇ ܡܫܺܝܚܳܐ ܡܳܪܰܢ܇ ܘܕܳܫܬ ܥܰܠ ܪܺܫܶܗ ܕܰܢܟܺܝܠܳܐ܇ ܘܝܰܗܒܬ ܙܳܟܽܘܬܳܐ ܠܟܽܠܶܗ ܓܶܢܣܰܢ܇ ܐܰܪܒܥܺܝܢ ܣܳܗ̈ܕܶܐ ܐܶܬܟܰܠܰܠܘ̱܇ ܐܰܠܳܗܳܐ܀

ܛܽܘܒܶܝܗܿ ܠܥܺܕܬܳܐ ܕܰܡܝܰܩܪܳܐ ܠܝܽܘܡ ܕܽܘܟܪܳܢܗܽܘܢ܇ ܕܰܐܬܠܺܝ̈ܛܶܐ ܥܰܒܕ̈ܰܝ ܡܰܠܟܳܐ܇ ܘܗܳܐ ܥܒܺܝܕܺܝܢ ܠܶܗ ܡܣܰܬܪ̈ܳܢܶܐ܇ ܘܫܽܘܪ̈ܶܐ ܪ̈ܳܡܶܐ ܕܰܡܣܰܬܪܺܝܢ ܠܶܗ܇ ܡܶܢ ܒܺܝܫܳܐ ܘܚܰܝܠܰܘ̈ܳܬܶܗ܇ ܐܰܠܳܗܳܐ ܕܟܽܠ܀

 

ܩܳܠܳܐ ܕܪܰܡܫܳܐ܇

ܒܩܳܠܳܐ ܡܫܺܝܚܳܐ ܢܰܛܰܪܶܝܗܿ

ܒܰܓܠܺܝܕܳܐ ܐܶܬܟܰܠܰܠܘ̱ ܗ̱ܘܰܘ܇ ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇ ܘܰܐܝܟ ܪ̈ܺܝܫܳܝܬܳܐ ܘܩܽܘܪ̈ܒܳܢܶܐ ܐܶܬܩܰܪܰܒܘ̱ ܠܰܡܠܶܟ ܡܰܠܟ̈ܶܐ܇ ܘܺܐܝܬܰܝܗܽܘܢ ܒܶܝܬ ܡܰܠܟܽܘܬܳܐ܇ ܘܒܳܥܶܝܢ ܪ̈ܰܚܡܶܐ ܚܰܛܳܝ̈ܶܐ܇ ܘܰܒܝܰܘܡܳܐ ܕܗܳܘܶܐ ܥܺܐܕܗܽܘܢ܇ ܚܳܕܶܝܢ ܫܡܰܝ̈ܳܐ ܘܰܦܨܺܝܚܺܝܢ܇ ܘܰܚܢܰܢ ܕܶܐܬܓܰܘܰܣܢܰܢ ܒܓܰܪ̈ܡܰܝܗܽܘܢ ܒܗܰܝܡܳܢܽܘܬܳܐ܇ ܢܶܫܟܰܚ ܪ̈ܰܚܡܶܐ ܘܰܚܢܳܢܳܐ ܒܝܰܘܡܳܐ ܕܚܺܝܠܳܐ ܡܳܐ ܕܗܳܘ̈ܝܳܢ ܦܳܣܺܝ̈ܩܳܬܳܐ܀

ܒܕܰܐܪܳܐ ܕܰܥܒܰܕܘ̱ ܐܰܬܠܺܝ̈ܛܶܐ܇ ܐܰܪܒܥܺܝܢ ܣܳܗ̈ܕܶܐ ܒܓܰܘ ܝܰܡܬܳܐ܇ ܚܰܝܠܰܘ̈ܳܬܳܐ ܕܰܫܡܰܝ̈ܳܐ܇ ܬܗܰܪܘ̱ ܘܰܬܡܰܗܘ̱ ܐܳܦ ܐܶܬܕܰܡܰܪܘ̱܇ ܘܰܢܩܰܫܘ̱ ܟܰܦܳܐ ܒܚܰܕܽܘܬܳܐ ܟܰܕ ܕܳܝܨܺܝܢ ܗ̱ܘܰܘ܇ ܘܩܳܥܶܝܢ ܟܰܕ ܐܳܡܪܺܝܢ܇ ܕܡܳܪܰܢ ܚܰܝܶܠ ܠܗܽܘܢ ܠܥܰܒܕܰܝ̈ܟ܇ ܕܡܶܛܽܠ ܚܽܘܒܳܟ ܡܶܬܟܰܬܫܺܝܢ܇ ܫܽܘܒܚܳܐ ܠܗܰܘ ܚܰܝܠܳܐ܇ ܕܚܰܝܶܠ ܐܶܢܽܘܢ ܒܰܐܓܽܘܢܳܐ܇ ܘܢܰܨܰܚ ܥܺܐܕܳܐ ܕܩܶܛܠܰܝ̈ܟܽܘܢ܇ ܒܪܰܘܡܳܐ ܘܰܠܥܶܠ ܒܰܐܪܰܒܥ ܦܶܢܝ̈ܳܢ ܕܰܒܪܺܝܬܳܐ܀

 

ܐ̱ܚܪܺܢܳܐ ܒܩܳܠܳܐ ܛܽܘܒܰܝܟܝ̱ ܥܺܕܬܳܐ

ܒܪܺܝܟ ܗܽܘ ܚܰܝܠܳܐ܇ ܕܒܶܗ ܐܶܬܚܰܝܰܠܘ̱ ܢܰܨܺܝܚ̈ܶܐ܇ ܟܰܕ ܥܰܠܘ̱ ܩܳܡܘ̱ ܒܶܗ ܒܰܐܓܽܘܢܳܐ܇ ܕܡܰܠܟ̈ܶܐ ܛܪ̈ܽܘܢܶܐ ܘܥܰܘ̈ܳܠܶܐ܇ ܘܫܶܢ̈ܕܶܐ ܘܽܐܳܘܠܨܳܢ̈ܶܐ ܣܰܝܒܰܪܘ̱܇ ܘܠܳܐ ܚܳܒܘ̱ ܗ̱ܘܰܘ ܡܶܢ ܐܰܓܽܘܢܳܐ܇ ܘܰܐܒܗܶܬܘ̱ ܘܰܙܟܰܘ ܠܣܳܛܳܢܳܐ܇ ܘܰܐܥܕܺܝܘ ܟܠܺܝܠܳܐ ܕܙܳܟܽܘܬܳܐ܇ ܘܗܳܐ ܪܳܕܶܝܢ ܡܶܢ ܓܰܪ̈ܡܰܝܗܽܘܢ܇ ܥܽܘܕܪ̈ܳܢܶܐ ܠܰܒܢܰܝ̈ܢܳܫܳܐ܀

ܕܽܘܨܘ̱ ܘܶܐܬܪܰܡܪܰܡܘ̱܇ ܩܰܕܺܝ̈ܫܶܐ܇ ܕܗܳܐ ܡܰܛܺܝ ܠܶܗ܇ ܚܰܬܢܳܐ ܫܒܺܝܚܳܐ ܘܩܰܕܺܝܫܳܐ܇ ܕܰܒܩܳܠܶܗ ܡܥܺܝܪ ܕܰܡܟܽܘܬܰܢ܇ ܘܰܒܡܶܐܬܺܝܬܶܗ ܡܰܦܨܰܚ ܠܰܢ܇ ܡܳܐ ܕܳܐܬܶܐ ܒܫܽܘܒܚܳܐ ܪܰܒܳܐ܇ ܘܦܳܪܚܺܝܢ ܠܽܐܘܪܥܶܗ ܩܰܕܺܝ̈ܫܶܐ܇܇ ܘܚܰܝܠܰܘ̈ܳܬܳܐ  ܕܡܰܠܰܐܟ̈ܶܐ܇ ܘܩܳܪܝܳܐ ܩܰܪܢܳܐ ܕܢܽܘܚܳܡܳܐ܇ ܘܪܳܥܶܡ ܩܳܠܶܗ ܕܫܺܝܦܽܘܪܳܐ ܫܳܡܥܺܝܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܳܝܕܶܝܢ ܚܰܢܦܳܐ ܒܪܽܘܓܙܳܐ ܪܰܒܳܐ ܦܩܰܕ ܕܢܶܫܬܰܠܚܽܘܢ܇ ܘܟܰܕ ܐܺܣܺܝܪܺܝܢ ܢܩܽܘܡܽܘܢ ܒܝܰܡܬܳܐ ܠܺܠܝܳܐ ܟܽܠܶܗ܇ ܪܗܶܛ ܩܰܕܡܳܝܳܐ ܘܒܳܬܪܶܗ ܟܽܠܗܽܘܢ ܟܰܕ ܚܳܕܶܝܢ ܗ̱ܘܰܘ܇ ܢܺܐܙܠ̱ܽܘܢ ܢܶܣܒܽܘܢ ܡܶܢ ܓܰܘ ܝܰܡܬܳܐ ܠܰܟܠܺܝ̈ܠܰܝܗܽܘܢ܀

ܒܗܰܘ ܥܶܕܳܢܳܐ ܕܰܥܪܰܒ ܫܶܡܫܳܐ ܩܳܡܘ̱ ܒܰܓܠܺܝܕܳܐ܇ ܕܢܰܚ ܨܶܝܕܰܝ̈ܗܽܘܢ ܫܶܡܫܳܐ ܪܰܒܳܐ ܕܙܰܕܺܝܩܽܘܬܳܐ܇ ܒܗܰܘ ܥܶܕܳܢܳܐ ܕܰܫܠܰܚܘ̱ ܢܰܚ̈ܬܶܐ ܕܥܰܠ ܦܰܓܪ̈ܰܝܗܽܘܢ܇ ܐܶܣܛܰܠ ܫܽܘܒܚܳܐ ܙܩܰܪ ܗܘܳܐ ܡܫܺܝܚܳܐ ܘܰܐܠܒܶܫ ܐܶܢܽܘܢ܀

ܠܳܟ ܬܶܫܒܽܘܚܬܳܐ ܐܰܒܳܐ ܕܥܳܠܡ̈ܶܐ ܘܰܐܚܺܝܕ ܟܽܠܳܐ܇ ܕܰܓܒܳܐ ܣܳܗ̈ܕܶܐ ܐܰܪܒܥܺܝܢ ܓܰܒܪ̈ܶܐ ܢܰܚܫܺܝܪ̈ܬܳܢܶܐ܇ ܣܶܓܕܬܳܐ ܠܰܒܪܳܐ ܘܬܰܘܕܺܝ ܠܪܽܘܚܳܐ ܕܚܺܝܠ ܐܶܢܽܘܢ ܫܰܡܠܺܝ ܐܶܢܽܘܢ ܒܰܐܬܠܽܝܛܽܘܬܳܐ ܨܠܽܘܬܗܽܘܢ ܥܰܡܰܢ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ ܒܰܓܠܺܝܕܳܐ ܐܶܬܟܰܠܰܠܘ̱ ܗ̱ܘܰܘ܇ ܐܰܘܪܶܒ ܡܳܪܰܢ ܕܽܘܟܪܳܢܗܽܘܢ܇ ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܇ ܫܽܘܒܚܳܐ܀

ܚܰܕ ܐܶܬܪܰܦܺܝ ܒܰܐܓܽܘܢܳܐ܇ ܘܰܣܠܶܩ ܡܶܢܶܗ ܐܰܝܟ ܫܶܦܠܳܐ܇ ܘܰܐ̱ܚܪܺܢܳܐ ܢܚܶܬ ܗܘܳܐ ܚܠܳܦܰܘܗ̱ܝ ܕܠܳܐ ܢܶܬܒܰܨܰܪ ܡܶܢܝܳܢܳܐ܇ ܫܽܘܒܚܳܐ܀

ܒܣܶܒܰܣܛܺܝܰܐ ܐܶܬܟܰܠܰܠܘ̱܇ ܐܰܪܒܥܺܝܢ ܣܳܗ̈ܕܶܐ ܒܓܰܘ ܝܰܡܬܳܐ܇ ܘܒܰܓܠܺܝܕܳܐ ܘܩܽܘܪܳܐ ܩܰܫܝܳܐ ܐܶܬܒܰܣܒܰܣܘ̱ ܗܰܕܳܡܰܝ̈ܗܽܘܢ܇ ܫܽܘܒܚܳܐ܀

ܣܳܗ̈ܕܶܐ ܕܰܐܣܗܶܕܘ̱ ܒܰܓܠܺܝܕܳܐ܇ ܘܰܗܘܳܐ ܒܽܘܚܪܳܢܗܽܘܢ ܒܢܽܘܪܳܐ܇ ܘܣܰܝܒܰܪܘ̱ ܚܰܫ̈ܶܐ ܘܽܐܳܘܠܨ̈ܳܢܶܐ܇ ܡܶܛܽܠ ܚܽܘܒܶܗ ܕܰܡܫܺܝܚܳܐ܀

 

ܫܽܘܒܚܳܐ ܠܰܐܒܳܐ ܕܰܚܝܶܠܟܽܘܢ܇ ܘܠܰܒܪܳܐ ܕܰܢܨܰܚ ܕܽܘܟܪܳܢܟܽܘܢ܇ ܘܰܠܪܽܘܚܩܽܘܕܫܳܐ ܡܟܰܠܠܳܢܟܽܘܢ܇ ܘܫܽܘܪܳܐ ܬܶܗܘܶܐ ܠܰܢ ܨܠܽܘܬܟܽܘܢ܇ ܫܽܘܒܚܳܐ ܠܳܟ܀

 

ܩܳܠܳܐ ܕܠܺܠܝܳܐ܇

ܒܩܳܠܳܐ ܡܳܪܝܳܐ ܡܳܪܰܢ

ܡܳܪܰܢ ܝܶܫܽܘܥ܇ ܪܰܡܪܶܡ ܘܰܐܳܘܪܶܒ ܕܽܘܟܪܳܢܶܗ ܕܗܳܝ ܕܺܝܠܶܕܬܳܟ܇ ܒܬܽܘܠܬܳܐ ܩܰܕܺܝܫܬܳܐ܇ ܘܒܰܨܠܰܘ̈ܳܬܳܗܿ ܘܕܰܐܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇ ܒܰܛܶܠ ܡܶܢܰܢ ܡܰܚܘ̈ܳܬܳܐ ܕܪܽܘܓܙܳܐ܇ ܘܰܐܫܪܳܐ ܫܰܝܢܳܟ܇ ܘܰܫܠܳܡܳܟ ܒܰܐܪ̈ܒܰܥܦܶܢܝܳܢ܇ ܒܥܺܕܰܬ ܩܽܘܕܫܳܐ ܦܪܺܝܩܰܬ ܒܰܨܠܺܝܒܳܟ܀

ܡܳܪܝܳܐ ܡܳܪܰܢ܇ ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇ ܩܪܳܒܳܐ ܥܒܰܕܘ̱ ܗ̱ܘܰܘ ܥܰܡ ܒܺܝܫܳܐ ܘܚܰܝܠܶܗ܇ ܘܚܳܒ ܘܶܐܫܬܰܦܰܠ ܐܳܟܳܠܩܰܪܨܳܐ ܡܳܪܽܘܕܳܐ܇ ܕܒܳܥܶܐ ܕܢܶܙܟܶܐ ܠܦܳܠܚ̈ܶܐ ܚܰܝܠܬܳܢ̈ܶܐ܇ ܒܪܺܝܟ ܙܰܟܳܝܳܐ܇ ܕܚܰܝܶܠ ܐܶܢܽܘܢ ܒܰܐܓܽܘܢܳܐ܇ ܘܰܢܨܰܚ ܐܶܢܽܘܢ ܒܰܐܪܒܰܥ ܦܶܢܝ̈ܳܬܳܐ܀

 

ܐ̱ܚܪܺܢܳܐ ܒܩܳܠܳܐ ܦܬܰܚ ܠܺܝ ܬܰܪܥܶܗ

ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇ ܒܓܰܘ ܝܰܡܬܳܐ ܐܰܝܟ ܐ̱ܪ̈ܳܙܶܐ ܐܶܬܩܰܒܰܥܘ̱܇ ܘܟܽܠܶܗ ܠܺܠܝܳܐ ܐܶܬܟܰܬܰܫܘ̱܇ ܠܽܘܩܒܰܠ ܥܰܪܝܳܐ ܘܰܓܠܺܝܕܳܐ܇ ܘܰܐܒܗܶܬܘ̱ ܗ̱ܘܰܘ ܠܳܐܟܶܠܩܰܪܨܳܐ܇ ܘܰܩܛܰܪܘ̱ ܟܠܺܝ̈ܠܶܐ ܕܙܳܟܽܘܬܳܐ܇ ܘܗܳܐ ܝܰܘܡܳܢ ܢܳܨܚܺܝܢ܇ ܕܽܘܟܪ̈ܳܢܰܝܗܽܘܢ ܒܰܒܪܺܝܬܳܐ܀

ܐܰܪܒܥܺܝܢ ܣܳܗ̈ܕܶܐ ܚܰܝܠܬܳܢ̈ܶܐ܇ ܕܰܐܣܗܶܕܘ̱ ܗ̱ܘܰܘ ܒܰܦܢܺܝܬܳܐ ܕܓܰܪܒܝܳܐ܇ ܓܠܺܝܕܳܐ ܗܘܳܐ ܠܗܽܘܢ ܚܠܳܦ ܣܰܝܦܳܐ܇ ܘܒܶܗ ܐܶܬܢܰܨܰܚܘ̱ ܩܰܕܺܝ̈ܫܶܐ܇ ܘܰܙܟܰܘ̱ ܒܶܗ ܠܰܒܥܶܠܕܰܪܳܐ܇ ܕܰܙܟܳܐ ܠܳܐܕܳܡ ܒܦܰܪܕܰܝܣܳܐ܇ ܘܗܳܐ ܝܰܘܡܳܢ ܢܳܨܰܚ ܕܽܘܟܪܳܢܰܝܗܽܘܢ ܒܰܐܪ̈ܒܰܥܦܶܢܝܳܢ܀

 

ܡܰܕܪܳܫܳܐ ܩܳܠܳܐ ܐܶܬܛܰܝܰܒܘ̱ ܟܶܢܫ̈ܶܐ ܥܽܘܢܺܝܬܳܐ ܒܪܺܝܟ ܚܰܝܠܳܐ ܕܚܰܝܶܠ ܠܰܐܓܽܘܢܺܝ̈ܣܛܶܐ܇ ܘܰܒܡܰܝ̈ܳܐ ܘܢܽܘܪܳܐ ܢܰܨܰܚ ܐܶܢܽܘܢ܇

ܐܰܪܒܥܺܝܢ ܐܰܬܠܺܝ̈ܛܶܐ܇ ܢܚܶܬܰܘ̱ ܠܰܐܓܽܘܢܳܐ܇ ܘܰܩܛܰܪܘ̱ ܗ̱ܘܰܘ ܟܠܺܝ̈ܠܶܐ ܕܗܰܝܡܳܢܽܘܬܳܐ܇ ܘܥܺܕܬܳܐ ܗܳܐ ܚܳܕܝܳܐ ܒܝܽܘܡ ܥܺܐܕܰܝ̈ܗܽܘܢ܇ ܘܙܳܡܪܳܐ ܬܶܫܒܽܘܚܬܳܐ ܥܰܠ ܓܰܪ̈ܡܰܝܗܽܘܢ܀

ܐܰܪܒܥܺܝܢ ܓܰܢ̱ܒܰܪ̈ܶܐ ܢܰܚܫܺܪ̈ܬܳܢܶܐ܇ ܕܰܢܨܰܚܘ̱ ܒܰܐܓܽܘܢܳܐ ܕܰܡܠܶܐ ܚܰܫ̈ܶܐ܇ ܘܰܙܟܰܘ ܠܰܛܪܽܘܢܳܐ ܕܕܳܐܶܢ ܗܘܳܐ ܠܗܽܘܢ܇ ܘܗܳܐ ܥܳܠܡܳܐ ܪܳܘܶܙ ܒܕܽܘܟܪ̈ܳܢܰܝܗܽܘܢ܀

ܐܰܪܥܳܐ ܗܳܐ ܚܳܕܝܳܐ܇ ܒܝܰܘܡܳܐ ܕܥܺܐܕܟܽܘܢ܇ ܐܰܪܒܥܺܝܢ ܐܰܬܠܺܝ̈ܛܶܐ ܕܓܰܢ̱ܒܳܪܽܘܬܳܐ܇ ܘܗܳܐ ܥܺܕܬܳܐ ܡܩܰܠܣܳܐ ܠܝܽܘܡ ܕܽܘܟܪܳܢܟܽܘܢ܇ ܕܠܰܛܪ̈ܽܘܢܶܐ ܙܳܟܶܝܬܽܘܢ ܒܚܽܘܡܣܳܢܰܝ̈ܟܽܘܢ܀

ܐܰܪܒܥܺܝܢ ܐܰܬܠܺܝ̈ܛܶܐ ܢܚܶܬܰܘ̱ ܠܰܐܓܽܘܢܳܐ ܒܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ ܝܰܘܡܺܝ̈ܢ܇ ܫܠܰܚܘ̱ ܙܰܝܢܶܗ ܕܡܰܠܟܳܐ ܐܰܪܥܳܢܳܝܳܐ܇ ܘܰܠܒܶܫܘ̱ ܗ̱ܘܰܘ ܙܰܝܢܳܐ ܕܪܽܘܚܳܐ ܕܩܽܘܕܫܳܐ܀

 

ܐ̱ܚܪܺܢܳܐ ܩܳܠܳܐ ܡܰܢ ܒܳܨܶܐ ܠܳܟ܇

ܥܽܘܢܺܝܬܳܐ

ܣܳܗ̈ܕܶܐ ܕܣܰܝܒܰܪܘ̱ ܩܽܘܪܳܐ ܕܝܰܡܬܳܐ ܡܶܢ ܪ̈ܳܕܽܘܦܶܐ ܪܬܰܚ ܗܘܳܐ ܚܽܘܒܶܗ ܕܒܰܪ ܐܰܠܳܗܳܐ܇ ܒܐܰܪܒܥܺܝܢ ܣܳܗ̈ܕܶܐ܇ ܘܥܰܠܘ̱ ܐܳܦ ܩܳܡܘ̱ ܗ̱ܘܰܘ ܩܕܳܡ ܕܰܝܳܢܳܐ ܛܪܽܘܢܳܐ ܕܰܐܪܥܳܐ܇ ܒܝܰܡܬܳܐ ܕܡܰܝ̈ܳܐ ܐܰܩܺܝܡ ܐܶܢܽܘܢ ܠܺܠܝܳܐ ܟܽܠܶܗ܇ ܘܠܳܐ ܐܶܣܬܰܪܰܕܘ̱ ܠܳܐ ܡܶܢ ܥܰܪܝܳܐ ܘܠܳܐ ܡܶܢ ܩܽܘܪܳܐ܀

ܒܗܰܘ ܥܶܕܳܢܳܐ ܕܰܫܠܰܚܘ̱ ܢܰܚ̈ܬܶܐ ܕܥܰܠ ܦܰܓܪ̈ܰܝܗܽܘܢ܇ ܐܶܣܛܰܠ ܫܽܘܒܚܳܐ ܡܰܠܟܳܐ ܕܪܰܘܡܳܐ ܐܰܠܒܶܫ ܐܶܢܽܘܢ܇ ܒܗܰܘ ܥܶܕܳܢܳܐ ܕܥܰܪܝܳܐ ܘܩܽܘܪܳܐ ܫܰܢܶܩ ܐܶܢܽܘܢ܇ ܚܰܬܢܳܐ ܡܫܺܝܚܳܐ ܟܠܺܝ̈ܠܶܐ ܕܫܽܘܒܚܳܐ ܓܕܰܠ ܠܪ̈ܺܝܫܰܝܗܽܘܢ܀

 

ܕܡܰܘܕܝܳܢ̈ܶܐ ܥܶܢܝܳܢܳܐ ܠܳܟ ܫܽܘܒܚܳܐ ܒܰܪ ܐܰܠܳܗܳܐ

ܒܕܽܘܟܪܳܢ ܣܳܗ̈ܕܶܐ ܩܰܕܺܝܫ̈ܶܐ ܪܽܘܚܳܐ ܕܡܰܠܶܠ ܒܰܢܒܺܝ̈ܶܐ܇ ܘܫܰܡܠܺܝ ܐ̱ܪ̈ܳܙܶܐ ܒܰܫܠܺܝ̈ܚܶܐ܇ ܗܰܒܠܺܝ ܡܶܠܬܳܐ ܕܶܐܩܰܠܶܣ܇ ܠܣܺܝܥܬܳܐ ܕܣܳܗ̈ܕܶܐ ܩܰܕܺܝ̈ܫܶܐ܇ ܕܰܒܥܰܪܝܳܐ ܘܩܽܘܪܳܐ ܐܰܣܗܶܕܘ̱܀

 

ܐܰܪܒܥܺܝܢ ܓܰܒܪ̈ܶܐ ܓܰܢ̱ܒܳܪ̈ܶܐ܇ ܒܝܰܘ̈ܡܳܬܳܐ ܕܟܰܝ̈ܳܐ ܕܨܰܘܡܳܐ܇ ܒܓܰܘ ܝܰܡܬܳܐ ܕܣܶܒܰܣܛܺܝܰܐ܇ ܩܪܳܒܳܐ ܥܒܰܕܘ̱ ܥܰܡ ܣܳܛܳܢܳܐ܇ ܘܰܙܟܰܘ̱ ܘܰܢܨܰܚܘ̱ ܘܶܐܬܟܰܠܰܠܘ̱܀

ܒܓܰܘ ܝܰܡܬܳܐ ܥܰܪܛܶܠܳܐܺܝܬ ܦܰܓܪ̈ܰܝܗܽܘܢ ܙܩܰܦܘ̱ ܫܰܪܺܝܪ̈ܶܐ܇ ܘܰܒܓܶܦ̈ܶܐ ܕܗܰܝܡܳܢܽܘܬܳܐ܇ ܢܰܦܫ̈ܳܬܗܽܘܢ ܫܰܢܺܝ̈ܝ ܠܰܥܕܶܝܢ܇ ܘܥܰܡ ܥܶܠܳܝ̈ܶܐ ܐܶܬܚܰܠܰܛܘ̱܀

ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇܇ ܒܥܰܘ ܪ̈ܰܚܡܶܐ ܥܰܠ ܚܰܛܳܝ̈ܶܐ܇ ܕܗܳܐ ܫܳܗܪܺܝܢ ܩܕܳܡ ܓܽܘܪ̈ܢܰܝܟܽܘܢ܇ ܘܫܳܐܠܺܝܢ ܡܶܢܟܽܘܢ ܥܽܘܕܪ̈ܳܢܶܐ܇ ܨܠܽܘܬܟܽܘܢ ܫܽܘܪܳܐ ܬܶܗܘܶܐ ܠܰܢ܀

 

ܟܰܠܰܬ ܡܰܠܟܳܐ ܥܶܢܝܳܢܳܐ ܕܽܘܟܪܳܢܳܐ ܕܣܳܗ̈ܕܶܐ ܢܗܶܐ ܠܒܽܘܪ̈ܟܳܬܰܢ܇ ܘܰܨܠܽܘܬܗܽܘܢ ܬܶܗܘܶܐ ܫܽܘܪܳܐ ܠܢܰܦܫ̈ܳܬܰܢ

ܣܳܗ̈ܕܶܐ ܒܪ̈ܺܝܟܶܐ ܐܰܪܒܥܺܝܢ܇ ܢܚܶܬܰܘ̱ ܗ̱ܘܰܘ ܠܝܰܡܬܳܐ ܒܚܽܘܒܶܗ ܕܡܳܪܗܽܘܢ܇ ܘܠܺܠܝܳܐ ܟܽܠܶܗ ܚܰܡܣܶܢܘ̱܇ ܘܣܰܝܒܰܪܘ̱ ܩܽܘܪܳܐ ܘܥܰܪܝܳܐ ܩܰܫܝܳܐ܇ ܘܚܳܒ ܘܶܐܫܬܰܦܰܠ܇ ܐܳܟܶܠܩܰܪܨܳܐ܇ ܘܰܙܟܰܘ̱ ܗܶܢܽܘܢ܇ ܐܳܦ ܐܶܬܟܰܠܰܠܘ̱܇ ܘܫܰܢܺܝܘ ܠܗܰܘ ܐܰܬܪܳܐ ܕܚܰܝ̈ܶܐ ܕܰܠܥܳܠܰܡ܇ ܕܽܘܟܪܳܢܗܽܘܢ ܢܰܨܰܚ ܒܰܒܪܺܝܬܳܐ܀

ܩܪܳܒܳܐ ܥܒܰܕܘ̱ ܗ̱ܘܰܘ ܒܝܰܡܬܳܐ܇ ܥܰܡ ܣܳܛܳܢܳܐ ܕܰܐܩܪܶܒ ܥܰܡܗܽܘܢ܇ ܘܰܙܟܰܘ̱ ܘܰܣܠܶܩܘ̱ ܟܽܠܗܽܘܢ܇ ܐܰܝܟ ܙܰܟܳܝ̈ܶܐ܇ ܡܶܢ ܐܰܓܽܘܢܳܐ܇ ܘܰܫܩܰܠܘ̱ ܓܶܦ̈ܶܐ܇ ܠܡܰܠܟܽܘܬ ܪܰܘܡܳܐ܇ ܘܰܒܗܶܬ ܒܺܝܫܳܐ܇ ܘܶܐܫܬܰܦܰܠ ܗܘܳܐ܇ ܫܽܘܒܚܳܐ ܠܰܕܓܳܒܶܐ ܐܶܢܽܘܢ܇ ܠܗܽܘܢ ܛܽܘܒܳܐ ܪܰܒܳܐ܇ ܒܪܺܝܟ ܡܳܪܝܳܐ ܕܐܰܘܪܶܒ ܕܽܘܟܪܳܢܗܽܘܢ܀

 

ܦܰܪܕܰܝܣܳܐ ܥܽܘܢܺܝܬܳܐ ܒܪܺܝܟ ܗܽܘ ܕܟܰܠܶܠܟܽܘܢ ܘܰܐܳܘܪܶܒ ܕܽܘܟܪܳܢܟܽܘܢ܇ ܘܒܰܐܪ̈ܒܰܥܦܶܢܝܳܬܳܐ

ܢܰܨܰܚ ܫܡܳܗܰܝ̈ܗܽܘܢ ܒܪܺܝܟ ܗܽܘ ܕܒܰܫܪܳܪܶܗ܇ ܚܰܝܶܠ ܠܣܳܓܽܘ̈ܕܰܘܗ̱ܝ܇ ܘܰܢܚܶܬܰܘ̱ ܠܰܐܓܽܘܢܳܐ܇ ܕܚܺܝܠܳܐ ܕܠܳܐ ܩܶܢܛܳܐ܇ ܘܰܐܡܣܰܪܘ̱ ܥܰܠ ܢܶܓ̈ܕܶܐ܇ ܕܚܺܝ̈ܠܶܐ ܕܪ̈ܳܕܽܘܦܶܐ܇ ܘܰܙܟܰܘ̱ ܒܝܰܕ ܚܽܘܒܶܗ܇ ܕܡܳܪܗܽܘܢ܇ ܘܰܒܥܶܩܒܗܽܘܢ ܕܳܫܽܘܗ̱ܝ܇ ܠܒܺܝܫܳܐ ܒܥܶܠܕܰܪܳܐ܇ ܗܳܐ ܡܶܬܟܪܶܙ ܝܘܡܳܢ܇ ܫܰܦܠܶܗ ܒܟܽܠܕܳܪ̈ܺܝܢ܀

ܕܣܰܝܒܰܪܘ̱ ܐܽܘܠܨ̈ܳܢܶܐ ܒܗܳܢ ܥܳܠܡܳܐ ܕܥܳܒܰܪ܇ ܕܳܝܨܺܝܢ ܒܢܽܘܚܳܡܳܐ܇ ܒܗܰܘ ܝܰܘܡܳܐ ܕܕܺܝܢܳܐ ܘܰܚܠܳܦ ܬܰܫܢܺܝ̈ܩܶܐ܇ ܕܣܰܝܒܰܪܘ̱ ܓܽܘܫܡܰܝ̈ܗܽܘܢ܇ ܠܳܒܫܺܝܢ ܬܶܫܒܽܘܚܬܳܐ ܒܓܰܘ ܥܕܶܝܢ܇ ܘܥܳܐܠܺܝܢ ܥܰܡ ܚܰܬܢܳܐ܇ ܠܰܓܢܽܘܢ ܚܰܕܘ̈ܳܬܳܐ܇ ܘܡܶܬܒܰܣܡܺܝܢ ܥܰܡܶܗ ܇ ܒܽܛܘ̈ܒܶܐ ܫܡܰܝ̈ܳܢܶܐ܀

ܘܳܠܶܐ ܕܠܳܐ ܢܰܐܡܶܢ ܐܰܚ̈ܰܝ ܒܥܺܐܕܰܝ̈ܗܽܘܢ܇ ܘܢܶܬܢܶܐ ܒܦܽܘܪܫܳܢܳܐ܇ ܢܶܨܚܳܢܳܐ ܕܰܐܪܒܥܺܝܢ܇ ܓܰܢ̱ܒܳܪ̈ܰܝ ܚܰܝܠܳܐ܇ ܕܰܢܨܰܚ ܒܓܰܘ ܝܰܡܬܳܐ܇ ܘܰܢܫܰܒܰܚ ܘܢܺܐܡܰܪ ܢܶܬܦܨܰܚ܇ ܘܢܶܓܕܽܘܠ ܩܽܘܠܳܣ̈ܶܐ܇ ܟܠܺܝܠܳܐ ܠܡܳܪܶܐ ܟܽܠ܇ ܕܚܰܝܶܠ ܠܣܳܓܽܘ̈ܕܰܘܗ̱ܝ ܒܙܰܒܢܳܐ ܕܽܐܳܘܠܨ̈ܳܢܶܐ܀

ܚܳܪܶܬ ܚܙܺܝܿܬ ܐܰܚ̈ܰܝ܇ ܒܚܰܘ̈ܩܶܐ ܕܫܰܪ̈ܒܰܝܗܽܘܢ܇ ܐܽܘܠܨܳܢܳܐ ܕܚܰܫ̈ܶܐ܇ ܘܢܶܓ̈ܕܶܐ ܕܟܽܠ ܫܽܘܚܠܳܦ܇ ܘܶܐܬܕܰܡܪܶܬ ܣܰܓܺܝ܇ ܒܓܽܘܫܡܗܽܘܢ ܟܡܳܐ ܣܰܝܒܰܪܘ̱܇ ܥܰܪܝܳܐ ܘܰܓܠܺܝܕܳܐ ܕܝܰܡܬܳܐ܇ ܫܽܘܒܚܳܐ ܠܗܰܘ ܚܰܝܠܳܐ܇ ܕܚܰܝܶܠ ܠܫܰܪܺܝܪ̈ܰܘܗ̱ܝ܇ ܘܰܙܟܰܘ ܠܪ̈ܳܕܽܘܦܶܐ܇ ܒܚܽܘܡܣܳܢܗܽܘܢ ܪܰܒܳܐ܀

 ܝܰܡܬܳܐ ܠܗܽܘܢ ܣܶܓܕܰܬ݀܇ ܘܙܰܝܚܰܬ݀ ܦܰܓܪ̈ܰܝܗܽܘܢ ܓܠܺܝܕܳܐ ܠܗܽܘܢ ܝܰܩܰܪ܇ ܘܢܰܫܶܩ ܥܶܩܒܰܝ̈ܗܰܘܢ܇ ܥܰܪܝܳܐ ܐܳܦ ܩܽܘܪܳܐ܇ ܚܳܒܘ̱ ܘܶܐܙܕܟܺܝܘ ܡܶܢܗܽܘܢ܇ ܘܥܰܠ ܟܽܠ ܐܽܘܠܨܳܢܺܝ̈ܢ܇ ܕܳܫܘ̱ ܥܒܰܪ܇ ܚܰܕܺܝܘ ܠܥܶܠܳܝ̈ܶܐ܇ ܘܰܐܦܨܰܚܘ̱ ܠܬܰܚܬܳܝ̈ܶܐ܇ ܘܗܳܐ ܪܳܥܡܺܝܢ ܝܰܘܡܳܢ܇ ܒܗܰܝ̈ܟܠܶܐ ܕܩܰܒܪ̈ܰܝܗܽܘܢ܀

ܠܚܰܨܗܽܘܢ ܡܬܰܚܘ̱ ܘܰܢܓܰܕ܇ ܦܰܩܪܳܐ ܒܫܳܢܝܽܘܬܶܗ܇ ܘܠܰܛܶܫܘ̱ ܕܠܳܐ ܪ̈ܰܚܡܶܐ܇ ܣܰܝܦܳܐ ܠܨܰܘܪ̈ܰܝܗܽܘܢ܇ ܘܰܐܝܟ ܐܶܡܪ̈ܶܐ ܒܪܺܝܪ̈ܶܐ܇ ܠܢܶܟܣܬܳܐ ܠܗܽܘܢ ܐܰܡܶܢ܇ ܘܰܫܓܰܪ ܐܰܬܽܘܢܳܐ܇ ܒܣܶܢܶܐܬܳܐ܇ ܘܗܶܢܽܘܢ ܕܳܨܘ̱ ܠܽܐܘܪܥܶܗ܇ ܟܰܕ ܚܳܕܶܝܢ ܘܪܳܘܙܺܝܢ܇ ܣܚܰܦܘ̱ ܘܰܫܦܰܪܘ̱ ܘܶܐܬܡܪܶܩܘ̱܇ ܒܢܽܘܪܳܐ ܕܓܰܘܙܰܠܬܳܐ܀

 

ܢܽܘܪܳܐ ܡܫܰܠܗܰܒܬܳܐ܇ ܕܰܠܗܽܘܢ ܚܙܳܬ݀ ܩܪܳܬ݀܇ ܘܶܐܣܬܰܪܗܒܰܬ݀ ܢܶܦܠܰܬ݀܇ ܒܕܶܚܠܳܐ ܩܕܳܡܰܝܗܽܘܢ܇ ܘܰܫܓܰܪ ܠܥܶܠ ܡܶܢܳܗܿ܇ ܓܺܝܫܪܳܐ ܠܡܰܥܒܰܪܬܳܐ܇ ܘܰܥܒܰܪܘ̱ ܕܠܳܐ ܩܶܢܛܳܐ ܠܰܥܕܶܝܢ܇ ܘܰܙܡܰܪ ܠܶܗ ܫܽܘܒܚܳܐ܇ ܒܠܶܫܳܢܗܽܘܢ ܫܰܦܝܳܐ܇ ܠܰܒܪܳܐ ܕܠܰܚܠܽܘܠܶܗ܇ ܙܰܡܶܢ ܩܪܳܐ ܐܶܢܽܘܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܳܘ ܫܳܡܽܘ̈ܥܶܐ ܕܗܰܝܡܳܢܽܘܬܳܐ ܗ̱ܘܰܘ ܠܺܝ ܚܰܒܪ̈ܶܐ܇ ܘܶܐܢܳܐ ܘܰܐܢ̱ܬܽܘܢ ܢܨܽܘܪ ܨܰܠܡܳܐ ܠܣܳܗ̈ܕܶܐ ܓܒܰܝ̈ܶܐ܇ ܢܰܚܫܺܪ̈ܬܳܢܶܐ ܕܰܫܕܰܘ ܙܰܝܢܳܐ ܐܰܪܥܳܢܳܝܳܐ܇ ܘܡܶܢ ܓܰܘ ܝܰܡܬܳܐ ܙܰܝܢܳܐ ܠܒܶܫܘ̱ ܗ̱ܘܰܘ ܪ̈ܽܘܚܳܢܳܝܶܐ܀

ܐܰܪܒܥܺܝܢ ܢܰܦ̈ܫܳܢ ܥܰܠܝ̈ܝ̱ ܗܘ̈ܝ ܠܥܺܕܬܳܐ ܒܰܚܕܳܐ ܫܳܥܳܐ܇ ܘܰܩܛܰܪܘ̱ ܓܽܘܕ̈ܶܐ ܥܶܣܪܺܝܢ ܒܥܶܣܪܺܝܢ ܘܗܳܐ ܣܺܝܡܺܝܢ ܒܳܗܿ܇ ܐܰܪܒܥܺܝܢ ܣܳܗ̈ܕܶܐ ܕܰܒܐܰܪܒܥܺܝܢ ܝܰܘܡܺܝ̈ܢ ܕܨܰܘܡܳܐ ܐܰܣܗܶܕܘ̱܇ ܘܗܳܐ ܒܓܰܘ ܥܺܕܬܳܐ ܟܽܠ ܥܽܘܕܪ̈ܳܢܺܝܢ ܡܰܪܕܶܝܢ ܟܽܠܝܽܘܡ܀

 

ܡܰܘܪܒܳܐ ܕܠܺܠܝܳܐ܇ ܒܩܳܠܳܐ ܠܶܟܝ̱ ܢܶܬܟܰܫܰܦ

ܣܳܗ̈ܕܶܐ ܕܰܐܩܠܺܝܘ܇ ܥܰܠ ܫܶܢ̈ܕܶܐ ܘܣܰܝܒܰܪܘ̱ ܚܰܫ̈ܶܐ ܐܳܦ ܐܽܘܠܨ̈ܳܢܶܐ܇ ܘܩܰܪܶܒܘ̱ ܕܶܡܗܽܘܢ܇ ܐܰܝܟ ܪܺܝܫܺܝܬܳܐ܇ ܘܩܽܘܪܒܳܢܳܐ ܠܰܡܠܶܟ ܡܰܠܟ̈ܶܐ ܐܰܫܘܳܐ ܠܰܢ ܦܳܪܽܘܩܰܢ܇ ܕܰܒܳܟܰܢܦܰܝ̈ܗܽܘܢ ܢܶܬܚܰܠܰܛ܇ ܘܢܶܙܡܰܪ ܠܳܟ ܫܽܘܒܚܳܐ܀

ܣܳܗ̈ܕܶܐ ܕܰܐܣܗܶܕܘ̱܇ ܘܰܒܝܰܡܬܳܐ ܕܣܶܒܰܣܛܺܝܰܐ ܗܘܳܐ ܒܽܘܚܪܳܢܗܽܘܢ܇ ܘܣܰܝܒܰܪܘ̱ ܚܰܫ̈ܶܐ ܡܶܛܽܠ ܚܽܘܒܶܗ܇ ܕܰܡܫܺܝܚܳܐ ܐܰܦܺܝܣܘ̱ ܥܰܡܰܢ܇ ܠܗܰܘ ܕܰܚܠܳܦܰܘܗ̱ܝ ܚܰܫܬܽܘܢ܇ ܕܢܰܫܪܶܐ ܫܰܝܢܶܗ ܘܰܫܠܳܡܶܗ܇ ܒܰܐܪܒܰܥ ܦܶܢܝ̈ܳܬܳܐ܀

ܒܪܺܝܟ ܗܽܘ ܚܰܝܠܳܐ܇ ܕܒܶܗ ܐܶܬܢܰܨܰܚܘ̱ ܢܰܨܺܝ̈ܚܶܐ ܒܓܰܘ ܐܰܓܽܘܢܳܐ܇ ܘܰܒܓܰܘ ܝܰܡܬܳܐ܇ ܣܰܝܒܰܪܘ̱ ܩܽܘܪܳܐ ܘܰܓܠܺܝܕܳܐ ܡܶܛܽܠ ܡܳܪܗܽܘܢ܇ ܘܰܙܟܰܘ̱ ܗܶܢܽܘܢ ܘܶܐܬܟܰܠܰܠܘ̱܇ ܘܡܶܢ ܓܰܪ̈ܡܰܝܗܽܘܢ ܗܳܐ ܪܳܕܶܝܢ ܥܽܘܕܪ̈ܳܢܶܐ ܠܰܒܪܺܝܬܳܐ܀

ܕܫܰܒܰܚܘ̱ ܥܰܒܕܰܘ̈ܗ̱ܝ ܩܳܠܳܐ ܫܡܰܝ̈ܳܐ ܡܶܫܬܰܥܶܝܢ ܫܽܘܒܚܶܗ

ܫܡܰܝܳܐ ܡܶܫܬܰܥܶܝܢ ܫܽܘܒܚܳܟ܇ ܘܰܐܪܥܳܐ ܙܳܡܪܳܐ ܬܶܫܒܽܘܚܬܳܟ܇ ܐܳܘ ܕܡܶܢ ܟܽܠ ܡܶܫܬܰܒܰܚ܇ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܣܳܗ̈ܕܶܐ ܕܰܫܠܰܚܘ ܢܰܚܬܰܝ̈ܗܽܘܢ܇ ܘܰܢܚܶܬܰܘ̱ ܠܝܰܡܬܳܐ ܕܰܓܠܺܝܕܳܐ ܘܩܽܘܪܳܐ܇ ܐܰܩܪܶܒܘ̱ ܗ̱ܘܰܘ ܐܰܪܒܥܺܝܢ ܣܳܗ̈ܕܶܐ܇ ܘܰܙܟܰܐܽܘܗ̱ܝ ܠܒܺܝܫܳܐ ܘܰܠܚܰܝܠܶܗ܇ ܘܗܳܐ ܢܳܨܰܚ ܝܽܘܡ ܕܽܘܟܪܳܢܗܽܘܢ܀

ܫܒܺܝܚ ܗܽܘ ܐܰܓܽܘܢܳܐ ܘܰܬܡܺܝܗ܇ ܕܶܐܬܟܰܬܰܫܘ̱ ܒܶܗ ܢܰܨܺܝ̈ܚܶܐ ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇܇ ܒܓܰܘ ܝܰܡܬܳܐ ܕܣܶܒܰܣܛܺܝܰܐ܀

ܥܠܰܝܗܽܘܢ ܫܶܠܡܰܬ݀ ܗܳܝ ܡܶܠܬܳܐ܇ ܕܙܰܡܰܪ ܪܽܘܚܳܐ ܒܒܰܪ ܐܺܝܫܰܝ܇ ܕܥܰܠܘ̱ ܠܡܰܝ̈ܳܐ ܘܰܠܒܽܘܚܪܳܢܳܐ܇ ܕܢܽܘܪܳܐ ܒܰܪܘܳܚܬܳܐ ܩܳܝܡܺܝܢ܀

ܒܪܺܝܟ ܗܽܘ ܛܳܒܳܐ ܕܰܒܚܽܘܒܶܗ܇ ܚܰܝܶܠ ܐܶܢܽܘܢ ܠܰܐܬܠܺܝ̈ܛܰܘܗ̱ܝ܇ ܘܰܠܒܫܽܘܗ̱ܝ ܙܰܝܢܳܐ ܙܰܟܳܝܳܐ܇ ܘܰܒܬܰܟܬܽܘܫܳܐ ܙܟܰܘ ܘܰܢܨܰܚܘ̱܀

ܩܽܘܡܝ̱ ܥܺܕܬܳܐ ܘܰܙܡܰܪܝ̱ ܫܽܘܒܚܳܐ܇ ܒܕܽܘܟܪܳܢܗܽܘܢ ܕܰܐܪܒܥܺܝܢ ܣܳܗ̈ܕܶܐ܇ ܘܝܰܩܰܪܝ̱ ܝܰܘܡܳܐ ܕܥܺܐܕܰܝ̈ܗܽܘܢ ܘܣܰܒܝ̱ ܠܰܒܢ̈ܰܝܟܝ̱ ܚܢܳܢܳܐ ܘܪ̈ܰܚܡܶܐ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܒܕܽܘܟܪܳܢ ܝܳܠܶܕܬܳܟ

ܗܰܘ ܕܶܐܬܺܝܠܶܕ ܡܶܢ ܐܶܡܳܐ ܒܬܽܘܠܬܳܐ܇ ܘܠܳܐ ܫܪܳܐ ܛܰܒܥ̈ܶܐ ܚܬܺܝ̈ܡܶܐ ܒܡܰܘܠܳܕܶܗ܇ ܘܡܶܢ ܒܳܬܰܪ ܝܰܠܕܳܐ ܒܬܽܘܠܬܳܐ܇ ܘܟܰܬܪܰܬ݀ ܗܘܳܬ݀ ܒܬܶܗܪܳܐ ܪܰܒܳܐ܀

ܐܰܪܒܥܺܝܢ ܣܳܗ̈ܕܶܐ ܒܝܰܡܬܳܐ ܐܶܬܟܰܠܰܠܘ̱܇ ܘܰܐܥܕܺܝܘ ܡܶܢܳܗܿ ܟܠܺܝܠܳܐ ܕܙܳܟܽܘܬܳܐ܇ ܡܫܺܝܚܳܐ ܐܰܠܳܗܳܐ ܕܰܐܳܘܪܶܒܬ܇ ܕܽܘܟܪܳܢܗܽܘܢ܇ ܪܰܚܶܡܥܠܰܝܢ܀

ܐܰܪܒܥܺܝܢ ܣܳܗ̈ܕܶܐ ܥܰܠܘ̱ ܗ̱ܘܰܘ ܠܓܰܘ ܝܰܡܬܳܐ܇ ܘܰܐܪܒܥܺܝܢ ܟܠܺܝ̈ܠܶܐ ܒܪ̈ܺܝܫܰܝܗܽܘܢ ܐܶܬܬܣܺܝܡܘ̱܇ ܡܫܺܝܚܳܐ ܐܰܠܳܗܳܐ ܕܰܐܳܘܪܶܒܬ ܕܽܘܟܪܳܢܗܽܘܢ܇ ܪܰܚܶܡܥܠܰܝܢ܀

ܐܰܘܟܶܡܘ̱ ܘܺܝܩܶܕܘ̱ ܓܽܘܫܡ̈ܶܐ ܕܦܰܓܪ̈ܰܝܗܽܘܢ ܘܠܳܐ ܐܶܬܪܰܦܺܝܘ ܡܶܢ ܩܽܘܪܳܐ ܕܝܰܡܬܳܐ܇ ܕܰܒܚܽܘܒܶܗ ܕܡܳܪܗܽܘܢ ܠܶܒܗܽܘܢ ܪܳܬܰܚ ܗܘܳܐ܇ ܨܠܽܘܬܗܽܘܢ ܫܽܘܪܳܐ ܬܶܗܘܶܐ܀

ܐܰܪܒܥܺܝܢ ܝܰܘܡܺܝ̈ܢ ܨܳܡ ܡܳܪܰܢ ܚܠܳܦܰܝܗܽܘܢ܇ ܘܝܰܗܒ ܠܰܢ ܙܰܝܢܳܐ ܕܰܠܒܺܝܫܳܐ ܢܶܙܟܶܐ܇ ܘܥܰܡܗܽܘܢ ܐܰܪܒܥܺܝܢ ܢܰܨܺܝ̈ܚܶܐ܇ ܕܰܒܝܰܡܬܳܐ ܕܣܶܒܰܣܛܺܝܰܐ ܐܰܣܗܶܕܘ̱܀

 

ܐܰܠܳܗܝ̱ ܐܰܠܳܗܝ̱ ܩܳܠܳܐ ܗܰܘ ܕܩܳܡ ܡܶܢ ܒܶܝܬ ܡܺܝ̈ܬܶܐ

ܗܰܘ ܕܰܒܚܽܘܒܶܗ ܥܰܙܺܝܘ܇ ܠܺܠܝܳܐ ܟܽܠܶܗ ܒܓܰܘ ܝܰܡܬܳܐ܇ ܐܰܪܒܥܺܝܢ ܣܳܗ̈ܕܶܐ ܢܰܨܺܝ̈ܚܶܐ܇ ܘܒܶܗ ܫܰܦܶܠܘ̱ ܠܳܐܟܶܠܩܰܪܨܳܐ܇ ܟܳܗ̈ܢܶܐ܀

ܩܳܡܘ̱ ܣܳܗ̈ܕܶܐ ܒܓܰܘ ܝܰܡܬܳܐ܇ ܘܰܒܩܳܠܳܐ ܪܳܡܳܐ ܐܰܙܥܶܩܘ̱܇ ܕܡܶܛܽܠܳܬܳܟ ܦܳܪܽܘܩܰܢ܇ ܡܳܝܬܺܝܢܰܢ ܬܳܐ ܠܥܽܘܕܪܳܢܰܢ܇ ܟܳܗ̈ܢܶܐ܀

ܗܰܘ ܕܰܠܣܳܗ̈ܕܶܐ ܕܺܝܠܳܟ܇ ܕܰܠܥܰܪܝܳܐ ܘܩܽܘܪܳܐ ܣܰܝܒܰܪܘ̱ ܒܰܟܠܺܝܠܳܐ ܕܫܽܘܒܚܳܐ ܦܰܐܝܳܐ܇ ܘܢܶܨܚ̈ܳܢܶܐ ܟܰܠܠܶܬ ܐܶܢܽܘܢ ܟܳܗ̈ܢܶܐ܀

ܗܰܘ ܕܰܒܚܽܘܒܶܗ ܐܰܡܣܰܪܘ̱܇ ܣܳܗ̈ܕܶܐ ܥܰܠ ܫܶܢ̈ܕܶܐ ܩܫܰܝ̈ܳܐ܇ ܥܰܪܝܳܐ ܘܩܽܘܪܳܐ ܘܰܓܠܺܝܕܳܐ܇ ܒܓܰܘ ܝܰܡܬܳܐ ܟܽܠܶܗ ܠܺܠܝܳܐ܇ ܟܳܗ̈ܢܶܐ܀

ܐܰܪܒܥܺܝܢ ܓܰܒܪ̈ܶܐ ܓܰܢ̱ܒܳܪ̈ܶܐ܇ ܒܝܰܘܡ̈ܳܬܳܐ ܒܪ̈ܺܝܟܶܐ ܕܨܰܘܡܳܐ܇ ܒܓܰܘ ܝܰܡܬܳܐ ܕܣܶܒܰܣܛܺܝܰܐ܇ ܩܪܳܒܳܐ ܥܒܰܕܘ̱ ܥܰܡ ܣܳܛܳܢܳܐ܇ ܟܳܗ̈ܢܶܐ ܟܳܗ̈ܝܶܐ܀

ܒܥܰܘ ܪ̈ܰܚܡܶܐ ܚܠܳܦ ܟܽܠܰܢ܇ ܕܰܡܝܰܩܪܺܝܢܰܢ ܕܽܘܟܪܳܢܟܽܘܢ܇ ܐܰܪܒܥܺܝܢ ܣܳܗ̈ܕܶܐ ܢܰܨܺܝ̈ܚܶܐ܇ ܕܢܶܬܥܰܕܰܪ ܒܰܨܠܰܘ̈ܳܬܟܽܘܢ܇ ܟܳܗ̈ܢܶܐ ܙܗܰܝ̈ܳܐ܀

ܚܰܕܳܐ ܡܳܪܰܢ ܘܰܐܦܨܰܚ܇ ܠܟܶܢܫܳܐ ܗܳܢܳܐ ܕܣܳܓܽܘܕܰܝ̈ܟ܇ ܕܙܰܝܰܚܘ̱ ܘܝܰܩܰܪܘ̱ ܐܳܦ ܪܰܡܪܶܡܘ̱܇ ܝܽܘܡ ܕܽܘܟܪܳܢܳܐ ܕܰܐܬܠܺܝ̈ܛܰܝܟ ܟܳܗ̈ܢܶܐ ܙܗܰܝ̈ܳܐ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܫܡܰܝܳܐ ܡܕܺܝܢ̱ܬܳܐ ܕܡܰܠܰܐܟ̈ܶܐ

ܐܰܩܶܠܰܣ ܐܰܝܟ ܕܰܡܨܶܐ ܐ̱ܢܳܐ ܠܟܶܢܫܳܐ ܗܳܢܳܐ ܕܰܐܬܠܺܝ̈ܛܶܐ܇ ܕܰܚܠܳܦ ܣܰܝܦܳܐ ܐܶܬܟܰܠܰܠܘ̱܇ ܒܥܰܪܝܳܐ ܘܩܽܘܪܳܐ ܘܰܓܠܺܝܕܳܐ܀

ܬܗܰܪܘ̱ ܡܰܠܰܐܟ̈ܶܐ ܕܒܰܫܡܰܝܳܐ܇ ܒܓܰܢ̱ܒܳܪܽܘܬܗܽܘܢ ܕܰܐܬܠܺܝ̈ܛܶܐ܇ ܘܝܰܗܒܘ̱ ܫܽܘܒܚܳܐ ܠܡܰܠܟܳܐ ܡܫܺܝܚܳܐ܇ ܕܚܰܝܶܠ ܐܶܢܽܘܢ ܒܰܐܓܽܘܢܳܐ܀

ܣܳܛܳܢܳܐ ܘܚܰܝܠܰܘ̈ܳܬܶܗ ܐܰܚܦܰܪܘ̱ ܘܰܒܗܶܬܘ̱ ܘܶܐܫܬܰܦܰܠܘ̱܇ ܘܥܺܕܰܬ ܩܽܘܕܫܳܐ ܗܳܐ ܚܳܕܝܳܐ܇ ܒܝܰܠܕܶܝ̈ܗܿ ܕܰܢܨܰܚܘ̱ ܘܶܐܬܟܰܠܰܠܘ̱܀

ܒܰܐܓܽܘܢܳܐ ܪܰܒܳܐ ܣܰܝܒܰܪܘ̱܇ ܐܰܪܒܥܺܝܢ ܣܳܗ̈ܕܶܐ ܒܓܰܘ ܝܰܡܬܳܐ ܕܰܒܡܰܫܒܳܐ ܩܰܫܝܳܐ ܕܪܽܘܚܳܐ܇ ܚܰܡܣܶܢܘ̱ ܗ̱ܘܰܘ ܠܺܠܝܳܐ ܟܽܠܶܗ܀

ܒܓܰܘ ܝܰܡܬܳܐ ܥܰܪܛܶܠܳܐܺܝܬ܇ ܙܩܰܦܘ̱ ܦܰܓܪ̈ܰܝܗܽܘܢ ܫܰܪܺܝܪ̈ܶܐ܇ ܘܰܒܓܶܦ̈ܶܐ ܕܗܰܝܡܳܢܽܘܬܳܐ܇ ܢܰܦܫ̈ܳܬܗܽܘܢ ܫܰܢܺܝܘ ܠܰܥܕܶܝܢ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܐܰܢ̱ܬ ܕܰܒܪܺܝܫܺܝܬ

ܐܰܢ̱ܬ ܕܰܒܥܰܪܝܳܐ܇ ܘܰܓܠܺܝܕܳܐ ܩܰܫܝܳܐ ܕܝܰܡܬܳܐ ܐܰܪܒܥܺܝܢ ܓܰܒܪ̈ܶܐ܇ ܒܡܶܢܝܳܢܳܐ ܢܰܨܚܰܬ ܐܶܢܽܘܢ܇ ܡܒܰܪܟܳܐ܀

ܬܗܰܪܘ̱ ܡܰܠܰܐܟ̈ܶܐ܇ ܒܰܐܓܽܘܢܳܐ ܡܠܶܐ ܚܽܘܡܣܳܢܳܐ ܕܰܐܪܒܥܺܝܢ ܣܳܗ̈ܕܶܐ܇ ܕܒܶܗ ܚܳܒ ܒܺܝܫܳܐ ܒܥܶܠܕܰܪܳܐ܇ ܡܒܰܪܟܳܐ ܓܝܪ܀

ܡܫܺܝܚܳܐ ܡܶܛܽܠ܇ ܚܽܘܒܶܗ ܐܰܪܒܥܺܝܢ ܩܰܕܺܝ̈ܫܶܐ܇ ܒܝܰܡܬܳܐ ܕܡܰܝ̈ܳܐ܇ ܒܰܓܠܺܝܕܳܐ ܐܶܬܟܰܠܰܠܘ̱ ܗ̱ܘܰܘ܇ ܡܒܰܪܟܳܐ܀

ܒܥܰܪܝܳܐ ܘܩܽܘܪܳܐ܇ ܐܶܬܟܰܠܰܠܘ̱ ܐܰܪܒܥܺܝܢ ܣܳܗ̈ܕܶܐ܇ ܘܰܐܝܟ ܩܽܘܪ̈ܒܳܢܶܐ܇ ܐܶܬܩܰܪܰܒܘ̱ ܠܰܡܠܶܟ ܡܰܠܟ̈ܶܐ܇ ܡܒܰܪܟܳܐ܀

ܚܢܰܢ ܕܶܐܬܓܰܘܣܰܢ܇ ܒܓܰܪ̈ܡܰܝܟܽܘܢ ܒܗܰܝܡܳܢܽܘܬܳܐ܇ ܢܶܫܟܰܚ ܪ̈ܰܚܡܶܐ܇ ܘܰܚܢܳܢܳܐ ܒܝܰܘܡܳܐ ܕܕܺܝܢܳܐ܇ ܡܒܰܪܟܳܐ܀

ܫܽܘܒܚܳܐ ܠܚܰܝܠܳܐ܇ ܕܚܰܝܶܠ ܐܶܢܽܘܢ ܒܰܐܓܽܘܢܳܐ ܘܢܰܨܰܚ ܥܺܐܕܳܐ܇ ܕܩܶܛܠܰܝ̈ܗܽܘܢ ܒܰܐܪܒܰܥ ܦܶܢܝ̈ܳܢ܀

 

ܡܰܘܪܒܳܐ ܒܩܳܠܳܐ ܠܗܰܘ ܝܰܠܕܳܐ ܓܢܺܝܙܳܐ

ܒܪܺܝܟ ܕܰܐܳܘܪܶܒ ܒܰܐܪ̈ܒܰܥܦܶܢܝܳܬܳܐ܇ ܥܰܕܥܺܐܕܰܝ̈ܗܽܘܢ ܕܢܰܨܺܝ̈ܚܶܐ܇ ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇ ܕܒܰܓܠܺܝܕܳܐ ܐܶܬܟܰܠܰܠܘ̱ ܗ̱ܘܰܘ܇ ܘܗܳܐ ܝܰܘܡܳܢ ܢܳܒܥܺܝܢ ܡܶܢ ܓܰܪ̈ܡܰܝܗܽܘܢ ܥܽܘܕܪ̈ܳܢܶܐ ܠܰܐܝܕܳܐ ܕܰܒܗܽܘܢ ܡܶܬܓܰܘܰܣ ܒܗܰܝܡܳܢܽܘܬܳܐ܀

ܗܳܢܽܘܢ ܕܶܐܣܬܰܝܰܛܘ̱ ܦܰܓܪ̈ܰܝܗܽܘܢ܇ ܕܒܓܰܘ ܩܽܘܪܳܐ ܩܰܫܝܳܐ ܕܝܰܡܬܳܐ܇ ܘܠܳܐ ܩܰܪ ܚܽܘܒܗܽܘܢ ܫܰܪܺܝܪ̈ܶܐ܇ ܘܗܰܝܡܶܢܘ̱ ܗ̱ܘܰܘ ܒܶܗ ܒܰܡܫܺܝܚܳܐ܇ ܘܗܳܐ ܝܰܘܡܳܢܳܐ ܕܽܘܟܪܳܢܗܽܘܢ ܒܓܰܘ ܥܺܕ̈ܳܬܳܐ܇ ܒܝܰܕ ܗܳܕܶܐ ܕܠܳܐ ܫܶܠܝܳܐ܀

ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇ ܕܰܒܝܰܡܬܳܐ ܐܶܬܟܰܠܰܠܘ̱ ܗ̱ܘܰܘ܇ ܘܰܐܝܟ ܪ̈ܺܝܫܝܳܬܳܐ ܘܩܽܘܪ̈ܒܳܢܶܐ܇ ܐܶܬܩܰܪܰܒܘ̱ ܠܰܡܠܶܟ ܡܰܠܟ̈ܶܐ܇ ܘܗܳܐ ܥܺܕܬܳܐ ܡܝܰܩܪܳܐ ܠܶܗ ܠܝܽܘܡ ܕܽܘܟܪܳܢܗܽܘܢ܇ ܒܝܰܕ ܗܳܕܶܐ܀

 

ܫܰܒܰܚܘ̱ ܥܰܒܕܰܘ̈ܗ̱ܝ ܩܳܠܳܐ ܒܥܶܕܳܢ ܨܰܦܪܳܐ

ܠܰܐܓܽܘܢܳܐ ܢܚܶܬܰܘ̱܇ ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇ ܕܒܰܓܠܺܝܕܳܐ ܐܶܬܒܰܣܒܰܣܘ̱ ܗ̱ܘܰܘ ܟܰܕ ܩܳܥܶܝܢ܇ ܫܽܘܒܚܳܐ ܠܳܟ ܐܰܠܳܗܳܐ܀

ܩܪܳܒܳܐ ܣܕܰܪܘ̱ ܗ̱ܘܰܘ܇ ܥܰܡ ܣܳܛܳܢܳܐ ܒܓܰܘ ܝܰܡܬܳܐ܇ ܘܰܙܟܰܘ ܗܶܢܽܘܢ ܘܶܐܬܢܰܨܰܚܘ̱ ܟܰܕ ܐܳܡܪܺܝܢ ܫܽܘܒܚܳܐ܀

ܒܝܰܡܬܳܐ ܕܡܰܝ̈ܳܐ܇ ܠܺܠܝܳܐ ܟܽܠܶܗ ܩܳܡܘ̱ ܣܳܗ̈ܕܶܐ܇ ܘܠܳܐ ܐܶܬܪܰܦܺܝܘ ܢܰܨܺܝ̈ܚܶܐ ܟܰܕ ܐܳܡܪܺܝܢ܇ ܫܽܘܒܚܳܐ ܠܳܟ ܐܰܠܳܗܳܐ܀

 

ܐ̱ܚܪܺܢܳܐ ܒܩܳܠܳܐ ܡܫܰܒܚܺܝܢ ܠܳܟ

ܒܝܰܡܬܳܐ ܕܣܶܒܰܣܛܺܝ܇ ܬܶܗܪܳܐ ܚܙܺܝܬ ܐܰܚ̈ܰܝ܇ ܐܰܪܒܥܺܝܢ ܐܰܬܠܺܝ̈ܛܶܐ܇ ܕܩܳܝܡܺܝܢ ܒܰܓܠܺܝܕܳܐ܀

ܠܰܦܠܰܓܳܐ ܫܒܺܝܚܬܳܐ܇ ܕܰܐܪܒܥܺܝܢ ܐܰܬܠܺܝ̈ܛܶܐ܇ ܒܩܽܘܠܳܣ̈ܶܐ ܗܕܺܝܪ̈ܶܐ ܕܟܽܠ ܫܽܘܦܪ̈ܺܝܢ܇ ܢܰܘܕܶܐ܀

ܘܳܠܶܐ ܕܠܳܐ ܢܰܐܡܶܢ܇ ܐܰܚ̈ܰܝ ܒܥܺܐܕܰܝ̈ܗܽܘܢ܇ ܘܢܶܬܢܶܐ ܒܦܽܘܪܫܳܢܳܐ ܢܶܨܚܳܢܗܽܘܢ ܕܣܳܗ̈ܕܶܐ܀

ܚܰܣܳܐ ܐܰܠܳܗܳܐ܇ ܒܰܨܠܘܳܬ ܢܰܨܺܝ̈ܚܶܐ܇ ܚܛܳܗ̈ܶܐ ܕܗܳܢ ܟܶܢܫܳܐ܇ ܘܰܕܥܰܢܺܝܕܰܘ̈ܗ̱ܝ ܕܟܳܬܽܘܒܳܐ܀

ܫܽܘܒܚܳܐ ܠܗܰܘ ܚܰܝܠܳܐ܇ ܕܚܰܝܶܠ ܠܰܐܬܠܺܝ̈ܛܰܘܗ̱ܝ܇ ܘܟܽܠ ܫܶܢܕܺܝ̈ܢ ܣܰܝܒܰܪܘ̱ ܡܶܛܽܠ ܫܡܶܗ ܪܰܒܳܐ܀

 

ܛܽܘܒܰܝܗܽܘܢ ܒܩܳܠܳܐ ܡܳܐ ܕܳܐܬܶܐ ܐܰܢ̱ܬ

ܐܰܪܒܥܺܝܢ ܣܳܗ̈ܕܶܐ܇ ܒܓܰܘ ܝܰܡܬܳܐ ܣܶܒܣܰܛܺܝܰܐ܇ ܐܰܓܽܘܢܳܐ ܥܒܰܕܘ̱ ܥܰܡ ܒܺܝܫܳܐ ܘܰܙܟܰܘ ܘܶܐܬܢܰܨܰܚܘ̱ ܐܶܬܕܰܟܪܰܝܢ܀

ܐܰܪܒܥܺܝܢ ܓܰܢ̱ܒܳܪ̈ܶܐ ܒܡܶܢܝܳܢܳܐ ܢܚܶܬܰܘ̱ ܠܩܰܪܒܳܐ܇ ܘܰܫܠܰܚܘ̱ ܘܰܫܕܰܘ ܢܰܚ̈ܬܰܝܗܽܘܢ܇ ܘܪܽܘܚ ܩܽܘܕܫܳܐ ܠܒܶܫܘ̱ ܗ̱ܘܰܘ ܐܶܬܕܰܟܪܰܝܢ܀

 

ܡܳܐ ܫܰܦܺܝܪ ܗܘܳܐ

ܡܳܐ ܫܒܺܝܚܳܐ ܘܫܰܦܺܝܪܳܐ܇ ܓܽܘܕܳܐ ܕܰܐܪܒܥܺܝܢ ܣܳܗ̈ܕܶܐ ܒܪ̈ܺܝܟܶܐ܇ ܟܰܕ ܡܶܬܬܕܺܝܢܺܝܢ ܒܓܰܘ ܝܰܡܬܳܐ ܠܺܠܝܳܐ ܟܽܠܶܗ܇ ܘܰܟܠܺܝܠܰܝ̈ܗܽܘܢ܇ ܠܥܶܠ ܒܰܫܡܰܝܳܐ܇ ܡܶܬܓܰܕܠܺܝܢ܀

ܡܳܐ ܦܐܶܐ ܗܘܳܐ ܘܫܰܦܺܝܪ ܗܘܳܐ܇ ܩܳܠܳܐ ܕܣܳܗ̈ܕܶܐ ܟܰܕ ܐܳܡܪܺܝܢ ܗ̱ܘܰܘ܇ ܠܰܚܕܳܕ̈ܶܐ ܒܚܽܘܒܳܐ ܪܰܒܳܐ ܕܬܰܘ ܢܶܚܽܘܬ ܠܳܗܿ܇ ܠܝܰܡܬܳܐ ܕܡܰܝ̈ܳܐ܇ ܘܢܰܥܕܶܐ ܟܠܺܝ̈ܠܶܐ ܕܙܳܟܽܘܬܳܐ܀

 

ܒܪܳܐ ܕܰܒܚܽܘܒܶܗ

ܡܶܬܪܰܘܚܺܝܢ ܗ̱ܘܰܘ܇ ܐܰܪܒܥܺܝܢ ܣܳܗ̈ܕܶܐ ܩܰܕܺܝ̈ܫܶܐ܇ ܟܰܕ ܚܳܙܶܝܢ ܗ̱ܘܰܘ ܠܰܡܫܺܝܚܳܐ ܕܩܳܐܶܡ ܗܘܳܐ ܥܰܡܗܽܘܢ܇ ܐܰܝܟ ܪܰܒ ܚܰܝܠܳܐ ܚܰܟܺܝܡܳܐ܇ ܘܓܳܕܶܠ ܟܠܺܝ̈ܠܶܐ ܠܪ̈ܺܫܰܝܗܽܘܢ܇ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

 

ܩܳܠܳܐ ܕܨܰܦܪܳܐ ܒܩܳܠܳܐ ܩܽܘܩܳܝܳܐ

ܐܰܪܒܥܺܝܢ ܓܰܒܪ̈ܶܐ ܓܰܢ̱ܒܳܪ̈ܶܐ ܢܰܚܫܺܪ̈ܬܳܢܶܐ܇ ܩܪܳܒܳܐ ܥܒܰܕܘ̱ ܥܰܡ ܣܳܛܳܢܳܐ܇ ܒܝܰܡܬܳܐ ܕܣܶܒܰܣܛܺܝ܇ ܒܳܐܕܳܪ ܝܰܪܚܳܐ܇ ܒܡܰܝ̈ܳܐ ܫܕܰܘ ܐܶܢܽܘܢ܇ ܘܰܢܚܶܬ ܓܠܺܝܕܳܐ ܘܒܰܙܰܥ ܦܰܓܪ̈ܰܝܗܽܘܢ܇ ܘܰܪܕܳܐ ܕܶܡܗܽܘܢ ܥܰܠ ܐܰܪܥܳܐ ܐܰܝܟ ܩܽܘܪܒܳܢܳܐ܇ ܩܰܒܶܠܬܶܗ ܥܺܕܰܬ ܩܽܘܕܫܳܐ ܘܩܰܪܶܒܬܶܗ ܠܡܳܪܝܳܐ ܗ ܘ ܗ܀

ܬܰܘ ܢܶܬܢܶܐ ܢܶܨܚܳܢܰܝ̈ܗܽܘܢ ܕܰܐܬܠܺܝ̈ܛܶܐ ܐܰܪܒܥܺܝܢ܇ ܕܕܳܢ ܐܶܢܽܘܢ ܡܰܠܟܳܐ ܚܰܢܦܳܐ ܘܥܰܘܠܶܗ ܒܪܺܝܫܶܗ ܣܠܶܩ܇ ܐ̱ܢܳܫ̈ܳܐ ܟܺܐܢ̈ܶܐ ܕܡܺܝܬܰܘ̱ ܥܰܘܳܠܳܐܺܝܬ܇ ܡܶܢ ܕܰܝܳܢܳܐ ܕܠܳܐ ܝܺܕܰܥ ܠܰܐܠܳܗܳܐ܇ ܐܶܬܚܰܡܰܬ ܘܰܐܪܡܺܝ ܐܶܢܽܘܢ ܒܝܰܡܬܳܐ ܕܡܰܝ̈ܳܐ܇ ܘܟܰܕ ܡܶܬܟܰܠܠܺܝܢ ܩܳܥܶܝܢ ܗ̱ܘܰܘ ܕܠܳܟ ܫܽܘܒܚܳܐ ܡܳܪܝܳܐ ܗ ܘ ܗ܀

 

ܐ̱ܚܪܺܢܳܐ ܒܩܳܠܳܐ ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܠܰܟܠܺܝ̈ܠܶܐ ܢܰܨܺܝ̈ܚܶܐ ܩܰܒܶܠܘ̱܇ ܐܰܪܒܥܺܝܢ ܣܳܗ̈ܕܶܐ ܒܓܰܘ ܝܰܡܬܳܐ܇ ܘܡܶܢ ܩܽܘܪܳܐ ܘܥܰܪܝܳܐ ܘܰܓܠܺܝܕܳܐ܇ ܠܳܐ ܣܳܟ ܐܰܫܦܶܠܘ̱ ܒܰܐܓܽܘܢܳܐ܇ ܘܟܰܕ ܫܳܒܩܳܐ ܢܰܦܫܳܐ ܠܦܰܓܪܳܐ܇ ܒܥܶܓ̈ܠܳܬܳܐ ܡܶܬܬܺܣܝܡܺܝܢ ܗ̱ܘܰܘ܇ ܐܶܡܳܐ ܛܒܺܝܒܬܳܐ ܕܚܰܕ ܡܶܢܗܽܘܢ܇ ܛܥܶܢܬܶܗ ܣܳܡܬܶܗ ܥܰܡ ܚܰܒܪ̈ܰܘܗ̱ܝ܇ ܕܠܳܐ ܢܚܰܣܰܪ ܗܘܳܐ ܡܶܢܝܳܢܗܽܘܢ܀

ܛܽܘܒܰܝܟܽܘܢ ܣܳܗ̈ܕܶܐ ܥܰܠ ܐܰܝܢܳܐ܇ ܣܰܒܪܳܐ ܕܒܶܚܬܽܘܢ ܦܰܓܪ̈ܰܝܟܽܘܢ܇ ܘܰܐܫܠܶܡܬܽܘܢ ܢܰܦܫܟܽܘܢ ܠܟܽܠ ܫܶܢܕܺܝ̈ܢ܇ ܘܣܰܝܒܰܪܬܽܘܢ ܟܽܠ ܐܽܘܠܨܳܢܺܝ̈ܢ܇ ܡܳܪܟܽܘܢ ܕܰܚܙܳܐ ܚܠܺܝܨܽܘܬܟܽܘܢ܇ ܟܰܠܶܠ ܒܪܰܘܡܳܐ ܢܶܨܚܳܢܟܽܘܢ܇ ܘܗܳܐ ܡܶܫܬܰܡܠܺܝܢ ܥܺܐܕܰܝ̈ܟܽܘܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܨܠܽܘܬܟܽܘܢ ܫܽܘܪܳܐ ܬܶܗܘܶܐ ܠܰܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܦܰܐܝܳܐ ܓܽܘܕܗܽܘܢ ܘܰܚܠܶܐ ܩܳܠܳܐ ܕܡܰܘܕܝܳܢܽܘܬܗܽܘܢ܇ ܪܰܒ ܗܽܘ ܚܰܫܗܽܘܢ ܘܚܽܘܒܶܗ ܕܡܳܪܝܳܐ ܡܝܰܬܰܪ ܘܰܪܚܺܝܡ܇ ܐܺܝܬ ܕܒܰܦܟܳܪ̈ܶܐ ܐܰܦܩܰܥܘ̱ ܐܺܝܕܰܘ̈ܗ̱ܝ ܘܶܐܬܟܰܠܰܠܘ̱ ܗܘܳܐ܇ ܘܰܒܠܶܫܳܢܶܗ ܙܳܡܰܪ ܫܽܘܒܚܳܐ ܒܩܳܠܳܐ ܚܰܠܝܳܐ܇ ܐܺܝܬ ܗܽܘ ܕܺܝܒܶܫ ܡܶܢ ܗܰܘ ܩܽܘܪܳܐ ܘܥܰܪܝܳܐ ܕܝܰܡܬܳܐ܇ ܘܰܦܫܰܛ ܐܺܝܕܰܘ̈ܗ̱ܝ ܠܘܳܬ ܐܰܠܳܗܳܐ ܘܰܐܫܠܶܡ ܪܽܘܚܶܗ܀

ܠܳܟ ܬܶܫܒܽܘܚܬܳܐ ܡܫܺܝܚܳܐ ܡܟܰܠܶܠ ܠܟܽܠ ܙܰܟܳܝ̈ܶܐ܇ ܘܰܒܓܰܘ ܝܰܡܬܳܐ ܐܰܝܟ ܪܰܒ ܚܰܝܠܳܐ ܚܙܰܐܽܘܘܟ ܣܳܗ̈ܕܶܐ܇ ܠܳܟ ܬܰܘܕܺܝܬܳܐ ܕܡܳܐ ܕܰܐܟܪܺܝ ܠܗܽܘܢ ܥܰܪܝܳܐ ܘܩܽܘܪܳܐ܇ ܩܳܡܿܶܬ ܒܰܡܨܰܥܬܳܐ ܥܪܰܩܘ̱ ܐܽܘܠܳܨ̈ܳܢܶܐ ܪܘܰܙ ܪܶܥܝܳܢܗܽܘܢ܇ ܦܟܺܝܪܺܝܢ ܘܩܳܝܡܺܝܢ ܚܰܫ̈ܶܐ ܘܫܶܢ̈ܕܶܐ ܛܳܒ ܡܰܪܺܝܪܺܝܢ܇ ܩܥܰܘ ܒܰܚܢܰܓܬܳܐ ܢܣܰܒܘ̱ ܟܠܺܝܠܰܝ̈ܗܽܘܢ ܘܰܙܡܰܪܘ̱ ܫܽܘܒܚܳܐ܀

 

ܕܰܬܠܳܬܫ̈ܳܥܺܝܢ܇ ܒܩܳܠܳܐ ܣܳܗ̈ܕܶܐ ܐܰܦܺܝܣܽܘܗܢܳܝܗ̱ܝ

ܣܳܗ̈ܕܶܐ ܕܰܗ̱ܘܰܘ ܬܰܐܓܳܪ̈ܶܐ܇ ܐܰܝܟ ܡܰܠܳܚ̈ܶܐ ܒܓܰܘ ܝܰܡܬܳܐ܇ ܘܣܺܝܡܰܬ ܚܰܝ̈ܶܐ ܐܶܬܬܰܓܰܪܘ̱ ܡܰܠܟܽܘܬܳܐ ܕܪܰܘܡܳܐ܇ ܘܗܳܐ ܢܳܨܚܺܝܢ ܕܽܘܟܪ̈ܳܢܰܝܗܽܘܢ܇ ܒܰܐܪܒܰܥ ܦܶܢܝ̈ܳܢ ܕܰܒܪܺܝܬܳܐ܇ ܨܠܽܘܳܬܗܽܘܢ ܫܽܘܪܳܐ ܬܶܗܘܶܐ ܠܰܢ ܒܰܬܪ̈ܰܝܗܽܘܢ ܥܳܠܡ̈ܶܐ܀

ܠܓܰܘ ܝܰܡܬܳܐ ܥܰܠܘ̱ ܗ̱ܘܰܘ ܣܳܗ̈ܕܶܐ܇ ܘܰܠܒܺܝܫܺܝܢ ܗܰܝܡܳܢܽܘܬܳܐ܇ ܘܣܰܝܒܰܪܘ̱ ܥܰܪܝܳܐ ܡܰܪܺܝܪܳܐ ܘܩܽܘܪܳܐ ܘܰܓܠܺܝܕܳܐ܇ ܘܟܰܕ ܪܳܘܙܺܝܢ ܒܶܗ ܒܰܐܓܽܘܢܳܐ܇ ܟܠܺܝ̈ܠܶܐ ܐܶܬܬܣܺܝܡܘ̱ ܒܪ̈ܺܝܫܰܝܗܽܘܢ܇ ܕܓܶܕܠܰܬ ܐܶܢܽܘܢ ܪܽܘܚܩܽܘܕܫܳܐ ܠܦܰܠܳܚ̈ܶܐ ܕܶܐܬܢܰܨܰܚܘ̱܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܠܳܐ ܙܳܥܘ̱ ܡܶܢ ܩܽܘܪܳܐ ܕܝܰܡܬܳܐ܇ ܕܥܰܠܺܝܠ ܗܘܳܐ ܒܗܰܕܳܡܰܝ̈ܗܽܘܢ܇ ܕܢܽܘܪܳܐ ܕܚܽܘܒܶܗ ܕܰܡܫܺܝܚܳܐ܇ ܕܶܠܩܰܬ݀ ܗܘܳܬ݀ ܒܓܰܘ ܪܶܥܝܳܢܗܽܘܢ܇ ܘܰܣܠܶܩܘ̱ ܡܶܢܳܗܿ ܙܰܟܳܝ̈ܶܐ܇ ܘܰܢܣܰܒܘ̱ ܟܠܺܝ̈ܠܶܐ ܕܙܳܟܽܘܬܳܐ܀

ܫܽܘܒܚܳܐ ܠܝܰܡܺܝܢܳܟ ܡܳܪܰܢ܇ ܕܰܠܣܳܗ̈ܕܶܐ ܟܠܺܝ̈ܠܶܐ ܓܶܕܠܰܬ܇ ܘܚܰܝܠܰܬ݀ ܐܶܢܽܘܢ ܒܰܐܓܽܘܢܳܐ܇ ܘܣܳܡܰܬ݀ ܟܠܺܝ̈ܠܶܐ ܒܪ̈ܺܝܫܰܝܗܽܘܢ܀

 

ܬܽܘܒ ܛܶܟܣܳܐ ܕܚܰܕ ܒܫܰܒܳܐ ܫܬܺܝܬܳܝܳܐ ܕܨܰܘܡܳܐ ܥܰܠ ܛܺܝܡܰܝ ܣܰܡܝܳܐ

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܠܳܐ ܬܶܥܽܘܠ ܠܕܺܝܢܳܐ

ܐܰܝܟ ܐܽܘܩܺܝܢܽܘܣ܇ ܥܰܬܺܝܪ ܗܘܳܐ ܓܰܙܶܗ܇ ܘܟܽܠ ܕܰܒܥܳܐ ܡܶܢܶܗ܇ ܢܣܰܒ ܗܘܳܐ ܥܽܘܕܪ̈ܳܢܶܐ܀

ܟܰܕ ܥܳܒܰܪ ܝܶܫܽܘܥ܇ ܫܡܰܥ ܛܶܐܒܶܗ ܣܰܡܝܳܐ܇ ܘܫܰܪܺܝ ܫܳܐܶܠ ܗܘܳܐ܇ ܠܶܗ ܢܽܘܗܪܳܐ ܠܥܰܝܢܰܘ̈ܗ̱ܝ܀

ܡܛܳܐ ܗܘܳܐ ܨܶܝܕ ܝܶܫܽܘܥ܇ ܕܗܽܘ ܓܰܒܠܶܗ ܠܳܐܕܳܡ܇ ܘܪܰܩ ܘܰܓܒܰܠ ܛܺܝܢܳܐ܇ ܘܛܳܫ ܠܶܗ ܥܰܠ ܥܰܝܢܰܘ̈ܗ̱ܝ܀

ܘܰܩܕܳܡ ܝܽܘܕܳܝ̈ܶܐ܇ ܡܰܟܪܶܙ ܗܘܳܐ ܘܳܐܡܰܪ܇ ܢܶܒܗܬܽܘܢ ܬܽܘܒ ܐܰܝܠܶܝܢ ܕܰܒܝܶܫܽܘܥ ܟܳܦܪܺܝܢ܀

ܗܰܒܠܰܢ ܒܰܚܢܳܢܳܟ܇ ܢܽܘܗܪܳܐ ܫܡܰܝܳܢܳܐ܇ ܕܒܳܟ ܗܽܘ ܢܶܬܢܰܗܪ̈ܳܢ܇ ܢܰܦܫ̈ܳܬܳܐ ܕܟܽܠܰܢ܀

 

ܡܳܪܝܳܐ ܩܪܺܝܬܳܟ ܒܩܳܠܳܐ ܗܳܢܰܘ ܒܰܫܪܳܪܳܐ

ܠܰܣܡܰܝ̈ܳܐ ܬܪܶܝܢ܇ ܕܰܢܩܶܦܘ̱ ܗ̱ܘܰܘ ܠܒܰܪ ܐܰܠܳܗܳܐ܇ ܡܶܠܬܶܗ ܕܰܐܒܳܐ ܫܡܰܝܳܢܳܐ܇ ܐܰܠܶܦ ܪܽܘܚܳܐ ܕܢܶܩܥܽܘܢ ܗ̱ܘܰܘ܇ ܕܒܰܪ ܕܰܘܺܝܕ ܪܰܚܶܡܥܠܰܝܢ܇ ܘܰܦܬܰܚ ܠܰܢ ܥܰܝܢܰܝ̈ܢ ܣܰܡܝ̈ܳܢ܇ ܕܢܺܐܡܰܪ ܒܶܝܬ ܥܰܡܡ̈ܶܐ ܡܶܛܽܠܳܬܳܟ܇ ܕܠܳܟ ܗܽܘ ܝܳܐܝܳܐ ܬܶܫܒܽܘܚܬܳܐ ܠܥܳܠܰܡܥܳܠܡܺܝܢ܀

 

ܐ̱ܚܪܺܢܳܐ ܒܩܳܠܳܐ ܙܳܥ ܗܘܳܐ ܝܰܘܣܶܦ

ܡܳܪܰܢ ܪܳܕܶܐ ܗܘܳܐ ܒܽܐܘܪܚܳܐ ܘܛܺܝܡܰܝ ܣܰܡܝܳܐ ܩܳܥܶܐ ܗܘܳܐ܇ ܕܡܳܪܰܢ ܐܶܬܪܰܚܶܡܥܠܰܝ܇ ܚܰܣܺܝܪ ܢܽܘܗܪܳܐ ܐܶܬܝܰܠܕܶܬ܇ ܐܰܢ̱ܬ ܒܰܪ ܕܰܘܺܝܕ ܚܽܘܣ ܥܠܰܝ܇ ܘܰܦܬܰܚ ܠܺܝ ܥܰܝ̈ܢܰܝ ܕܶܐܚܙܶܐ܇ ܘܥܰܠ ܬܽܘܩܳܢܰܝ̈ܟ ܐܶܫܰܒܚܳܟ܇ ܕܰܐܢ̱ܬ ܗܽܘ ܒܳܪܽܘܝܳܐ ܕܟܽܠܳܐ܀

ܗܰܘ ܒܳܪܽܘܝܳܐ ܕܰܟܝܳܢܳܐ ܪܰܩ ܪܽܘܩܳܐ ܥܰܠ ܐܰܪܥܳܐ܇ ܘܰܓܒܰܠ ܛܺܝܢܳܐ ܘܛܳܫ ܠܥܰܝܢܰܘ̈ܗ̱ܝ܇ ܕܗܰܘ ܣܰܡܝܳܐ ܕܡܶܢ ܟܪܶܣ ܐܶܡܶܗ܇ ܫܰܕܪܶܗ ܕܰܢܫܺܝܓ ܒܫܺܝܠܽܘܚܳܐ܇ ܘܶܐܙܰܠ ܐܰܫܺܝܓ ܘܶܐܬܦܰܬܰܚ̈ܝ̱܇ ܘܰܙܡܰܪ ܫܽܘܒܚܳܐ ܘܬܰܘܕܺܝܬܳܐ ܠܰܡܫܺܝܚܳܐ ܕܝܰܗܒ ܠܶܗ ܢܽܘܗܪܳܐ܀

ܘܟܰܕ ܚܙܰܘ ܝܽܘܕܳܝ̈ܶܐ ܚܶܪ̈ܡܶܐ܇ ܠܣܰܡܝܳܐ ܕܶܐܬܰܐܣܺܝ ܗܘܳܐ܇ ܘܰܚܙܳܐ ܢܽܘܗܪܳܐ ܕܒܶܪ̈ܝܳܬܳܐ܇ ܒܠܰܥܘ̱ ܗ̱ܘܰܘ ܒܰܚܣܳܡܳܐ ܟܳܗ̈ܢܶܐ܇ ܘܳܐܡܪܺܝܢ ܠܶܗ ܕܡܰܢܽܘ ܐܰܣܝܳܟ܇ ܘܶܐܡܰܪ ܠܗܽܘܢ ܕܛܳܫ ܠܺܝ ܝܶܫܽܘܥ܇ ܛܺܝܢܳܐ ܘܣܳܡ ܗܘܳܐ ܥܰܠ ܥܰܝܢ̈ܰܝ܇ ܘܡܶܚܕܶܐ ܚܙܺܝܿܬ ܢܽܘܗܪܶܗ ܕܥܳܠܡܳܐ܀

ܬܪܶܝܢ ܣܡܰܝ̈ܳܐ ܕܰܫܡܰܥܘ̱ ܛܶܐܒܳܐ܇ ܕܝܶܫܽܘܥ ܢܳܨܪܳܝܳܐ ܥܳܒܰܪ܇ ܫܰܪܺܝܘ ܩܳܥܶܝܢ ܒܰܚܢܰܓܬܳܐ܇ ܒܪܶܗ ܕܕܰܘܺܝܕ ܪܰܚܶܡܥܠܰܝܢ܇ ܗܰܒܠܰܢ ܢܽܘܗܪܳܐ ܡܶܢ ܕܺܝܠܳܟ܇ ܘܨܶܡܚܳܐ ܐܰܙܠܶܓ ܠܒܳܒ̈ܳܬܰܢ܇ ܕܰܐܢ̱ܬ ܗܽܘ ܐܳܣܝܳܐ ܫܡܰܝܳܢܳܐ܇ ܕܡܰܢܗܰܪ ܐܰܢ̱ܬ ܟܽܠ ܒܶܪ̈ܝܳܬܳܐ܀

ܐܰܟܡܳܐ ܕܰܐܣܺܝܬ ܦܳܪܽܘܩܰܢ܇ ܠܰܣܡܰܝ̈ܳܐ ܕܰܒܥܰܘ ܡܶܢܳܟ܇ ܘܰܠܣܰܡܝܳܐ ܕܡܶܢ ܐܺܝܪܺܝܚܽܘ܇ ܘܰܠܗܰܘ ܕܰܚܪܶܫ ܗܘܳܐ ܘܰܣܡܶܐ܇ ܘܰܐܝܟ ܕܰܦܬܰܚܬ ܥܰܝܢ̈ܰܝ ܣܰܡܝܳܐ܇ ܐܰܢܗܰܪ ܥܰܝ̈ܢܶܐ ܕܬܰܪ̈ܥܝܳܬܰܢ܇ ܘܦܰܨܳܐ ܠܰܢ ܡܶܢ ܚܶܫܽܘܟܳܐ܇ ܕܰܓܙܺܝܡ ܘܰܢܛܺܝܪ ܠܪ̈ܰܫܺܝܥܶܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܐܶܢܳܐ ܐ̱ܢܳܐ ܢܽܘܗܪܳܐ

ܐܶܡܰܪ ܠܺܝ ܛܺܝܡܰܝ ܒܰܪ ܛܺܝܡܰܝ܇ ܡܰܢ ܐܰܠܦܳܟ ܛܶܐܒܶܗ ܕܦܳܪܽܘܩܰܢ܇ ܕܡܰܐܣܶܐ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܘܰܦܬܰܚ ܥܰܝܢ̈ܶܐ ܕܰܣܡܰܝ̈ܳܐ܇ ܫܶܡܥܿܶܬ ܕܕܰܟܺܝ ܠܗܰܘ ܓܰܪܒܳܐ܇ ܘܫܰܪܰܪ ܘܰܐܩܺܝܡ ܠܰܡܫܰܪܝܳܐ܇ ܘܩܶܪܒܿܶܬ ܨܶܝܕܰܘܗ̱ܝ ܒܰܦܝܳܣܳܐ܇ ܘܶܐܬܪܰܚܰܡ ܘܰܦܬܰܚ ܥܰܝܢ̈ܰܝ܇ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܢܚܶܬ ܪܳܡܳܐ ܡܶܢ ܨܶܝܕ ܝܳܠܽܘܕܶܗ܇ ܟܰܕ ܠܳܐ ܫܰܢܺܝ ܡܶܢ ܥܽܘܒܶܗ܇ ܘܶܐܬܚܰܠܰܛ ܒܓܶܢܣܰܢ ܬܰܚܽܘܒܳܐ܇ ܕܢܰܐܣܶܐ ܟܺܐܒܰܝ̈ܢ ܘܟܽܘܪ̈ܗܳܢܰܝܢ܇ ܘܝܰܗܒ ܠܶܗ ܚܰܝ̈ܶܐ ܠܫܳܡܪܳܝܬܳܐ܇ ܘܠܰܟܢܰܥܢܰܝܬܳܐ ܥܽܘܕܪ̈ܳܢܶܐ܇ ܘܚܰܛܳܝܬܳܐ ܕܥܶܠܰܬ݀ ܨܶܝܕܰܘܗ̱ܝ܇ ܫܒܰܩ ܠܳܗܿ ܚܰܘܒܶܝ̈ܗܿ ܘܰܚܛܳܗܶܝ̈ܗܿ܇ ܘܰܠܣܰܡܝܳܐ ܝܰܗܒ ܗܘܳܐ ܢܽܘܗܪܳܐ܀

 

ܛܽܘܒܰܝܟܝ̱ ܥܺܕܬܳܐ

ܟܰܕ ܢܦܰܩ ܡܳܪܰܢ܇ ܡܶܢ ܐܺܝܪܺܝܚܽܘܠܽܐܘܪܺܫܠܶܡ܇ ܘܟܶܢܫ̈ܶܐ ܣܰܓܺܝ̈ܐܶܐ ܥܰܡܶܗ܇ ܬܪܶܝܢ ܣܡܰܝ̈ܳܐ ܥܰܠ ܝܰܕ ܐܽܘܪܚܳܐ܇ ܝܳܬܒܺܝܢ ܗ̱ܘܰܘ ܘܚܳܝܪܺܝܢ ܗ̱ܘܰܘ ܠܶܗ܇ ܕܶܐܬܳܐ ܗܘܳܐ ܕܢܶܥܒܰܪ ܥܠܰܝܗܽܘܢ܇ ܝܰܗܒܘ̱ ܩ̈ܳܠܶܐ ܘܗܳܟܰܢ ܐܶܡܰܪܘ̱܇ ܒܰܪ ܕܰܘܺܝܕ ܪܰܚܶܡܥܠܰܝܢ܇ ܟܶܢܫ̈ܶܐ ܕܶܝܢ ܟܳܐܶܝܢ ܗ̱ܘܰܘ ܒܗܽܘܢ܇ ܘܗܶܢܽܘܢ ܝܰܬܺܝܪ ܩܳܥܶܝܢ ܗ̱ܘܰܘ܀

ܛܺܝܡܰܝ ܣܰܡܝܳܐ܇ ܒܝܰܕ ܛܺܝܢܳܐ ܦܬܰܚ ܠܶܗ ܥܰܝܢܰܘ̈ܗ̱ܝ܇ ܘܰܚܙ̈ܰܝ ܢܽܘܗܪܳܐ ܒܳܒ̈ܳܬܶܗ܇ ܕܠܳܐ ܚܳܙܶܐ ܗܘܳܐ ܠܶܗ ܡܶܢ ܕܰܗܘܳܐ܇ ܘܬܽܘܒ ܚܳܕܶܐ ܗܘܳܐ ܘܰܡܫܰܒܰܚ܇ ܒܶܝܬ ܟܶܢܫ̈ܶܐ ܠܪ̈ܰܚܡܶܐ ܕܚܰܢܽܘܗ̱ܝ܇ ܫܽܘܒܚܳܐ ܠܳܟ ܡܳܪܝ̱ ܕܦܰܨܺܝܬܳܢܝ̱܇ ܡܶܢ ܚܶܫܟܳܐ ܘܡܶܢ ܬܽܘܩܰܠܬܳܐ܇ ܘܰܐܢܗܰܪܬܳܢܝ̱ ܕܶܐܚܙܶܐ ܫܽܘܒܚܳܟ܇ ܘܰܐܘܕܶܐ  ܠܰܐܒܳܐ ܝܳܠܽܘܕܳܟ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܦܰܢܺܝ ܡܳܪܰܢ ܟܰܕ ܐܳܡܰܪ ܗܘܳܐ ܠܘܳܬ ܬܰܠܡܺܝܕܰܘ̈ܗ̱ܝ܇ ܕܳܐܦܠܳܐ ܗܽܘ ܚܛܳܐ ܘܠܳܐ ܐܰܒܳܗ̈ܶܐ ܕܺܝܠܶܗ ܐܰܣܟܶܠܘ̱܇ ܒܗܳܝ ܕܢܶܬܚܙܽܘܢ ܒܶܗ ܥܒܳܕ̈ܶܐ ܕܰܐܒܳܐ ܢܰܗܺܝܪܳܐܺܝܬ܇ ܐܶܬܺܝܠܶܕ ܗܘܳܐ ܗܳܢܳܐ ܣܰܡܝܳܐ ܡܶܢ ܟܪܶܣ ܐܶܡܶܗ܀

ܠܳܟ ܗܽܘ ܡܫܰܒܚܺܝܢ ܣܡܰܝ̈ܳܐ ܕܰܚܙܰܘ ܢܽܘܗܪܳܐ ܚܰܕܬܳܐ܇ ܘܢܰܘܕܽܘܢ ܠܰܫܡܳܟ ܟܰܕ ܚܳܙܶܝܢ ܡܳܪܝ̱ ܠܰܥܒܺܝ̈ܕܳܬܳܟ܇ ܐܰܢ̱ܬ ܗܽܘ ܢܽܘܗܪܳܐ ܕܰܐܢܗܰܪ ܠܰܐܪܥܳܐ ܒܝܰܕ ܥܽܘܕܪ̈ܳܢܰܘܗ̱ܝ ܘܰܐܢܗܰܪ ܥܰܝܢ̈ܶܐ ܕܠܶܒܰܘ̈ܳܬܰܢ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ܇ ܒܩܳܠܳܐ ܝܳܐܶܐ ܘܙܳܕܶܩ

ܟܰܕ ܣܳܥܰܪ ܗܘܳܐ ܦܳܪܽܘܩܰܢ܇ ܠܥܳܠܡܳܐ ܟܽܠܶܗ ܒܥܽܘܕܪ̈ܳܢܰܘܗ̱ܝ܇ ܦܰܬܰܚ ܥܰܝܢܰܘ̈ܗ̱ܝ ܕܗܰܘ ܣܰܡܝܳܐ܇ ܕܫܐܶܠ ܗܘܳܐ ܡܶܢܶܗ ܒܰܚܢܰܓܬܳܐ ܫܽܘܒܚܳܐ ܠܳܟ܀

ܝܽܘܕܳܝ̈ܶܐ ܣܳܢܝ̈ܳܝ ܫܪܳܪܳܐ܇ ܟܰܕ ܚܙܰܘ ܠܣܰܡܝܳܐ ܕܶܐܬܦܰܬܰܚ܇ ܡܫܰܐܠܺܝܢ ܗ̱ܘܰܘ ܠܶܗ ܕܰܐܝܟܰܢܳܐ܇ ܦܰܬܰܚ ܥܰܝܢܰܝ̈ܟ ܘܗܳܐ ܚܳܙܶܝܬ܇ ܫܽܘܒܚܳܐ ܠܳܟ ܐܰܠܳܗܳܐ܀

ܥܢܳܐ ܗܘܳܐ ܣܰܡܝܳܐ ܘܶܐܡܰܪ ܠܗܽܘܢ܇ ܕܝܶܫܽܘܥ ܦܓܰܥ ܒܺܝ ܘܗܽܘ ܛܳܫ ܠܺܝ܇ ܛܺܝܢܳܐ ܥܰܠ ܥܰܝ̈ܢܰܝ ܘܰܚܙܺܝܿܬ܇ ܘܕܰܫܡܰܥܘ̱ ܒܠܰܥܘ̱ ܗ̱ܘܰܘ ܒܰܚܣܳܡܳܐ܀

ܗܰܘ ܣܰܡܝܳܐ ܕܡܶܢ ܟܪܶܣ ܐܶܡܶܗ܇ ܟܰܕ ܐܶܬܢܰܗܰܪ ܒܰܚܙܳܬܳܐ܇ ܒܥܰܝܢܳܐ ܟܣܺܝܬܳܐ ܐܶܣܬܰܟܰܠ܇ ܚܺܝܠ ܪܰܒܽܘܬܳܟ ܡܳܪܶܐ ܟܽܠ܀

 

ܩܰܘܡܳܐ ܩܰܕܡܳܝܳܐ ܩܳܠܳܐ ܒܰܥܪܽܘܒܬܳܐ ܒܪܺܝܫܺܝܬ

ܪܰܩ ܗܘܳܐ ܥܰܠ ܐܰܪܥܳܐ܇ ܘܰܓܒܰܠ ܗܘܳܐ ܛܺܝܢܳܐ ܒܳܪܽܘܝܳܐ ܕܥܳܠܡܳܐ܇ ܘܛܳܫ ܠܶܗ ܥܰܠ ܥܰܝܢܰܘ̈ܗ̱ܝ܇ ܘܶܐܡܰܪ ܙܶܠ ܐܰܫܺܝܓ ܒܡܰܝ̈ܳܐ ܕܫܺܝܠܽܘܚܳܐ܇ ܗ ܘ ܗ ܘܙܶܠ ܐܰܘܕܰܥ ܠܟܳܗ̈ܢܶܐ܀

ܟܳܗ̈ܢܶܐ ܛܳܠܽܘܡ̈ܶܐ܇ ܛܳܠܡ̈ܰܝ ܠܰܫܪܳܪܳܐ܇ ܟܰܕ ܚܙܰܐܽܘܗ̱ܝ ܠܣܰܡܝܳܐ܇ ܕܶܐܬܦܰܬܰܚ̈ܝ̱ ܥܰܝܢܰܘ̈ܗ̱ܝ܇ ܣܳܒܪܺܝܢ ܗ̱ܘܰܘ ܘܳܐܡܪܺܝܢ ܕܠܰܘ ܗܳܢܳܐ ܣܰܡܝܳܐ܇ ܗ ܘ ܗ ܕܡܶܕܡܳܐ ܕܳܡܶܐ ܠܶܗ܀

 

ܐ̱ܚܪܺܢܳܐ ܩܳܠܳܐ ܣܳܗܕܰܘ̈ܗ̱ܝ ܐܰܢ̱ܬܽܘܢ

ܟܳܐܶܝܢ ܗ̱ܘܰܘ ܒܗܽܘܢ܇ ܟܶܢܫ̈ܶܐ ܕܰܢܫܰܬܩܽܘܢ ܘܗܶܢܽܘܢ ܝܰܬܺܝܪ ܩܳܥܶܝܢ ܗ̱ܘܰܘ ܘܳܐܡܪܺܝܢ܇ ܕܡܳܪܰܢ ܝܶܫܽܘܥ ܗܰܒܠܰܢ ܢܽܘܗܪܳܐ܇ ܘܪܰܚܶܡܥܠܰܝܢ ܡܶܛܽܠ ܛܰܝܒܽܘܬܳܟ܇ ܘܶܐܡܰܪ ܠܗܽܘܢ܇ ܕܢܶܗܘܶܐ ܠܟܽܘܢ ܐܰܝܟ ܕܗܰܝܡܶܢܬܽܘܢ܇ ܘܡܶܚܕܳܐ ܐܶܬܦܰܬܰܚ̈ܝ̱ ܥܰܝ̈ܢܰܝܗܽܘܢ܀

ܝܰܗܒ ܠܗܽܘܢ ܢܽܘܗܪܳܐ ܐܰܝܟ ܫܶܐܠ̈ܳܬܗܽܘܢ ܘܡܶܚܕܳܐ ܗܰܝܡܶܢܘ̱ ܕܰܒܪܰܐܗ̱ܘ ܕܰܐܠܳܗܳܐ܇ ܒܗܶܬܘ̱ ܝܽܘܕܳܝ̈ܶܐ ܒܠܰܥܘ̱ ܗ̱ܘܰܘ ܒܰܚܣܳܡܳܐ܇ ܘܫܰܪܺܝܘ ܪܳܛܢܺܝܢ ܘܳܐܡܪܺܝܢ ܗܳܟܰܢܳܐ܇ ܕܗܳܢܳܐ܇ ܓܰܒܪܳܐ܇ ܠܳܐ ܐܺܝܬܰܘܗ̱ܝ ܡܶܢ ܐܰܠܳܗܳܐ܇ ܡܶܛܽܠ ܕܫܰܒܬܳܐ ܠܳܐ ܢܳܛܰܪ܀

 

ܡܰܕܪܳܫܳܐ ܒܩܳܠܳܐ ܗܳܢܰܘ ܝܰܪܚܳܐ ܥܽܘܢܺܝܬܳܐ ܒܪܺܝܟ ܗܽܘ ܕܰܐܣܺܝ ܟܺܐܒ̈ܶܐ ܘܡܽܘ̈ܡܶܐ ܘܰܚܒܳܪ̈ܳܬܳܐ

ܢܣܰܟ ܗܘܳܐ ܢܽܘܗܪܳܐ܇ ܒܓܰܘ ܒܳܒ̈ܳܬܶܗ ܕܗܳܢܳܐ ܣܰܡܝܳܐ܇ ܘܚܰܘܺܝ ܗܽܘܝܽܘ ܒܳܪܽܘܝܳܐ ܕܟܽܠ܇ ܕܝܰܗܒ ܗܘܳܐ ܢܽܘܗܪܳܐ ܠܣܰܡܝܳܐ ܘܰܚܙܳܐ܇ ܘܰܒܪܳܐ ܥܰܝ̈ܢܶܐ ܠܗܰܘ ܕܠܳܐ ܚܙܳܐ ܗܘܳܐ܇ ܢܽܘܗܪܳܐ ܡܶܡܬܽܘܡ܀

ܒܠܰܥܘ̱ ܒܰܚܣܳܡܳܐ܇ ܣܳܦܪ̈ܰܝ ܥܰܡܳܐ ܘܰܦܪ̈ܺܝܫܳܝܶܐ ܫܰܐܶܠܘ̱ ܠܣܰܡܝܳܐ ܘܗܳܟܰܢ ܐܶܡܰܪܘ̱܇ ܕܰܐܝܟܰܢ ܗܳܢܳܐ ܦܬܰܚ ܠܳܟ ܥܰܝܢܰܝ̈ܟ܇ ܘܶܐܡܰܪ ܕܛܺܝܢܳܐ ܣܳܡ ܥܰܠ ܥܰܝ̈ܢܰܝ܇ ܕܗܳܐ ܚܳܙܶܐ ܐ̱ܢܳܐ܀

ܒܗܳܢܳܐ ܐܳܣܝܳܐ ܢܶܬܗܰܪ ܟܽܠ ܐ̱ܢܳܫ ܕܰܟܡܳܐ ܚܰܟܺܝܡ܇ ܠܕܽܘ̈ܓܶܐ ܫܶܡܥܳܐ ܠܣܰܡܝܳܐ ܚܙܳܝܳܐ܇ ܥܒܰܕ ܚܽܘܪܳܪܳܐ ܘܰܠܕܰܝ̈ܘܳܢܶܐ܇ ܝܰܗܒ ܚܽܘܠܡܳܢܳܐ ܠܟܽܠܗܽܘܢ ܡܰܪ̈ܥܶܐ܇ ܒܪܺܝܟ ܗܽܘ ܕܰܐܣܝܰܢ܀

ܒܛܺܝܢܳܐ ܕܰܓܒܰܠ܇ ܣܳܡ ܒܳܒ̈ܳܬܳܐ ܠܣܰܡܝܳܐ ܛܺܝܡܰܝ܇ ܘܰܒܪܳܐ ܥܰܝ̈ܢܶܐ ܘܣܳܡ ܒܗܶܝܢ ܢܽܘܗܪܳܐ܇ ܘܗܰܝܡܶܢ ܣܰܡܝܳܐ ܕܒܰܪ ܐܰܠܳܗܰܐܗ̱ܘ܇ ܒܗܶܬܘ̱ ܘܶܐܬܟܰܐܝܰܪܘ̱܇ ܥܰܡܳܐ ܠܺܝܛܳܐ ܒܗܳܕ ܬܶܕܡܽܘܪܬܳܐ܀

 

ܣܽܘܓܺܝܬܳܐ ܒܩܳܠܳܐ ܛܽܘܒܰܝܟܝ̱ ܐܳܦܪܰܬ ܥܽܘܢܺܝܬܳܐ ܒܪܺܝܟ ܗܽܘ ܕܰܐܢܗܰܪ ܠܰܕܚܶܫܽܘܟܺܝܢ

ܛܽܘܒܰܝܟ ܣܰܡܝܳܐ ܕܰܐܢ̱ܬ ܐܰܟܪܶܙܬܳܝܗ̱ܝ܇ ܕܳܐܳܘ ܒܰܪ ܕܰܘܺܝܕ ܪܰܚܶܡܥܠܰܝ܇ ܘܗܽܘ ܐܶܡܰܪ ܠܳܟ ܕܡܽܘܢ ܫܳܐܶܠ ܐܰܢ̱ܬ܇ ܡܶܢ ܝܳܗܽܘܒܳܐ ܕܝܳܗܶܒ ܡܰܓܳܢ܇ ܘܰܒܚܶܟܡܬܳܐ ܢܽܘܗܪܳܐ ܫܐܶܠܬ ܘܰܚܙܰܝܬ܇ ܒܬܶܕܡܽܘܪܬܳܐ ܠܡܳܪܳܐ ܕܒܶܪ̈ܝܳܬܳܐ܇ ܒܪܺܝܟ ܗܽܘ ܢܽܘܗܪܳܐ܇ ܕܶܐܬܳܐ ܘܰܐܢܗܰܪ܇ ܠܟܽܠܗܽܘܢ ܚܶܫܽܘ̈ܟܶܐ܀

ܓܒܰܠ ܗܘܳܐ ܛܺܝܢܳܐ ܘܛܳܫ ܥܰܠ ܥܰܝܢܰܝ̈ܟ܇ ܗܰܘ ܒܳܪܽܘܝܳܐ ܕܰܒܪܳܝܗ̱ܝ ܠܳܐܕܳܡ܇ ܒܪܳܐ ܒܳܒ̈ܳܬܳܐ ܥܰܠ ܦܰܪܨܽܘܦܳܟ܇ ܘܶܐܫܰܕ ܢܽܘܗܪܳܐ ܒܓܰܘ ܒܳܒ̈ܳܬܳܟ܇ ܟܰܕ ܚܙܰܝܬ ܢܽܘܗܪܳܐ ܕܰܐܫܺܝܕ ܥܰܠ ܒܶܪ̈ܝܳܬܳܐ܇ ܥܒܰܪܬ ܟܰܪܝܽܘܬܳܐ ܕܺܐܝܬ ܗܘܳܐ ܒܠܶܒܳܟ܇ ܘܟܰܕ ܦܪܰܥܬ ܠܗܰܘ ܕܰܐܣܝܳܟ܇ ܩ̈ܳܠܶܐ ܕܬܰܘܕܺܝܬܳܐ ܘܩܽܘܒܳܠܛܰܝܒܽܘܬܳܐ܀

ܡܶܢ ܕܰܚܙܰܐܽܘܟ ܥܰܡܳܐ ܠܺܝܛܳܐ܇ ܕܶܐܬܦܰܬܰܚ̈ܘ̱ ܥܰܝܢܰܘ̈ܗ̱ܝ ܒܠܰܥܘ̱ ܗ̱ܘܰܘ ܒܪܽܘܓܙܳܐ܇ ܘܫܰܪܺܝܘ ܡܚܰܦܶܝܢ ܠܗܳܝ ܬܶܕܡܽܘܪܬܳܐ܇ ܕܳܐܡܪܺܝܢ ܕܠܰܝܬܰܘܗ̱ܝ ܗܳܢ ܗܰܘ ܣܰܡܝܳܐ܇ ܐܶܠܳܐ ܐ̱ܚܪܺܢܰܐܗ̱ܘ ܕܡܶܕܡܳܐ ܕܳܡܶܐ ܠܶܗ܇ ܘܗܽܘ ܡܰܙܥܶܩ ܗܘܳܐ܇ ܕܶܐܢܳܐ ܐܺܝܬܰܝ܇ ܣܰܡܝܳܐ ܒܪܳܐ ܕܺܝܠܟܽܘܢ܇ ܘܛܰܪܕܽܘܗ̱ܝ ܡܶܢ ܗܰܝܟܠܳܐ܇ ܒܝܰܕ ܛܳܠܽܘܡܽܘܬܗܽܘܢ ܕܠܳܐ ܢܰܟܪܶܙ ܗܳܟܰܢ܀

ܕܡܶܟ ܒܰܣܦܺܝܢ̱ܬܳܐ ܦܳܪܩܳܐ ܪܰܒܳܐ܇ ܘܥܰܠ ܒܶܣܰܕܝܳܐ ܫܟܶܒ ܘܶܐܬܬܢܺܝܚ܇ ܘܫܰܪܺܝ ܝܰܡܳܐ ܠܡܶܬܒܰܥܪܳܪܽܘ܇ ܕܰܚܙܳܐ ܠܡܳܪܶܗ ܕܶܐܬܳܐ ܨܶܝܕܰܘܗ̱ܝ܇ ܩܳܡܘ̱ ܬܰܠܡܺܝ̈ܕܶܐ ܟܰܕ ܩܳܥܶܝܢ ܘܳܐܡܪܺܝܢ܇ ܡܳܪܰܢ ܥܰܕܰܪ ܠܰܢ ܕܗܳܐ ܐܳܒܕܺܝܢܰܢ܇ ܘܗܳܝܕܶܝܢ ܡܳܪܰܢ ܟܳܐܶܐ ܗܘܳܐ ܒܝܰܡܳܐ܇ ܘܫܰܬܶܩ ܗܘܳܐ ܠܓܰܠܠܰܘ̈ܗ̱ܝ܀

ܛܽܘܒܰܝܟ ܙܰܟܰܝ ܡܳܟܣܳܐ ܒܺܝܫܳܐ܇ ܕܡܶܢ ܟܽܠ ܒܺܝ̈ܫܳܢ ܩܢܰܝܬ ܠܳܟ ܥܽܘܬܪܳܐ܇ ܘܟܰܕ ܐܶܬܳܐ ܠܶܗ ܗܰܘ ܡܳܪܶܐ ܟܽܠ܇ ܚܰܪܰܪ ܘܰܫܪܳܟ ܠܨܰܘܪܳܟ ܡܰܟܺܝܟܳܐ܇ ܒܢܺܝܪܳܐ ܒܰܣܺܝܡܳܐ ܕܡܳܪܳܐ ܕܒܶܪ̈ܝܳܬܳܐ܇ ܗܘܰܝܬ ܠܶܗ ܣܳܗܕܳܐ ܒܽܐܘܪܚܳܐ ܕܰܐܪܡܺܝ܇ ܘܚܰܝ̈ܶܐ ܝܰܗܒܠܳܟ ܕܰܐܝܟ ܡܺܝܬܳܐ ܗܘܰܝܬ܀

ܛܽܘܒܰܝܟ ܓܰܒܪܳܐ ܕܰܢܦܰܩ ܡܶܢܳܟ܇ ܠܶܓܝܽܘܢ ܪܰܒܬܳܐ ܗܳܝ ܕܡܳܪ̈ܽܘܕܶܐ܇ ܕܰܚܙ̈ܰܝ ܥܰܝܢܰܝ̈ܟ ܠܗܰܘ ܦܽܘܪܥܳܢܳܐ܇ ܬܒܰܥܬܳܐ ܕܬܒܰܥ ܗܘܳܐ ܒܳܪܽܘܝܳܟ܇ ܗܳܢܽܘܢ ܒܥܰܘ ܡܶܢܶܗ ܕܢܰܦܶܣ ܠܗܽܘܢ܇ ܕܢܶܥܠܽܘܢ ܒܗܳܝ ܪܰܡܟܳܐ ܕܰܚܙܺܝܪ̈ܶܐ ܕܬܰܡܳܢ܇ ܘܡܶܢ ܫܽܘܢܳܩܳܐ ܕܰܩܕܳܡ ܙܰܒܢܳܐ܇ ܙܳܥܘ̱ ܘܰܛܒܰܥܘ̱ ܒܝܰܡܳܐ܀

ܛܽܘܒܰܝܟ ܓܰܒܪܳܐ ܕܝܰܒܺܝܫܳܐ ܗܘܳܬ݀܇ ܐܺܝܕܳܟ ܒܳܟܺܐܦܳܐ ܘܠܳܐ ܐܶܬܦܰܫܛܰܬ݀܇ ܐܶܬܳܐ ܠܘܳܬܳܟ ܗܰܘ ܥܳܒܽܘܕܳܐ܇ ܘܦܰܫܛܳܗܿ ܘܬܰܪܨܳܗܿ ܐܰܝܟ ܕܰܠܚܒܰܪܬܳܗܿ܇ ܝܽܘܕܳܝ̈ܶܐ ܘܟܳܗ̈ܢܶܐ ܡܰܠܝ̈ܰܝ ܚܣܳܡܳܐ܇ ܚܣܰܡܘ̱ ܗ̱ܘܰܘ ܒܶܗ ܒܣܳܥܰܪ ܛܳܒ̈ܳܬܳܐ܇ ܘܡܰܐܣܶܐ ܗܘܳܐ ܠܗܽܘܢ܇ ܠܰܟܪ̈ܺܝܗܶܐ ܕܺܝܠܗܽܘܢ ܘܦܰܪܥܽܘܗ̱ܝ ܒܺܝܫ̈ܳܬܳܐ܀

ܛܽܘܒܰܝܟ ܡܰܕܒܪܳܐ ܓܠܺܝܙ ܡܶܢ ܦܺܐܪ̈ܶܐ܇ ܕܦܺܐܪܳܐ ܕܚܰܝ̈ܶܐ ܥܰܠ ܗܘܳܐ ܠܓܰܘܳܟ܇ ܘܬܰܡܳܢ ܟܶܢܫܳܐ ܘܥܰܡܳܐ ܪܰܒܳܐ܇ ܕܰܟܦܶܢܘ̱ ܒܕܰܒܪܳܐ ܣܰܒܥܳܐ ܐܶܫܟܰܚܘ̱܇ ܡܰܢܽܘ ܡܨܶܐ ܕܢܺܐܡܰܪ ܗܳܠܶܝܢ ܬܶܕܡܪ̈ܳܬܳܐ܇ ܕܰܣܥܰܪ ܗܘܳܐ ܡܳܪܶܐ ܕܒܶܪ̈ܝܳܬܳܐ܇ ܘܥܰܡܳܐ ܠܺܝܛܳܐ ܘܟܳܗ̈ܢܶܐ ܡܰܓܳܢ ܣܰܩܪܽܘܗ̱ܝ ܒܡܰܪܳܚܽܘܬܗܽܘܢ܀

 

ܡܰܘܕ̈ܝܳܢܶܐ ܥܽܘܢܺܝܬܳܐ ܫܽܘܒܚܳܐ ܠܗܰܘ ܐܳܣܝܳܐ ܛܳܒܳܐ܇ ܕܰܦܬܰܚ ܥܰܝܢܰܘ̈ܗ̱ܝ ܕܗܰܘ ܣܰܡܝܳܐ

ܣܡܰܝ̈ܳܐ ܬܪܶܝܢ ܦܓܰܥܘ̱ ܒܶܗ ܒܽܐܘܪܚܳܐ܇ ܘܰܩܥܰܘ ܬܪ̈ܰܝܗܽܘܢ ܫܰܘܝܳܐܺܝܬ܇ ܕܒܰܪ ܕܰܘܺܝܕ ܪܰܚܶܡ ܥܠܰܝܢ܇ ܢܽܘܗܪܳܐ ܡܠܶܐ ܗܘܳܐ ܠܥܰܝܢܰܝ̈ܗܽܘܢ܇ ܘܰܙܡܰܪܘ̱ ܫܽܘܒܚܳܐ ܘܬܰܘܕܺܝܬܳܐ܀

ܩܳܥܶܝܢ ܗ̱ܘܰܘ ܠܳܟ ܒܰܪ ܕܰܘܺܝܕ܇ ܐܶܬܪܰܚܰܡ ܘܗܰܒܠܰܢ ܢܽܘܗܪܳܐ܇ ܘܣܳܡܬ ܐܺܝܕܳܟ ܥܰܠ ܥܰܝܢܰܝ̈ܗܽܘܢ܇ ܘܶܐܬܦܰܬܰܚ̈ܝ̱ ܘܰܚܙܰܘ ܢܽܘܗܪܳܐ܇ ܘܰܬܗܰܪܘ̱ ܟܶܫܢ̈ܶܐ ܒܬܶܕܡܽܘܪܬܳܐ܀

ܛܽܘܒܳܐ ܪܰܒܳܐ ܠܰܣܡܰܝ̈ܳܐ܇ ܕܶܐܬܦܰܬܰܚܘ ܗ̱ܘܰܘ ܥܰܝܢܰܝ̈ܗܽܘܢ܇ ܘܶܐܫܬܰܘܝܺܘ ܠܰܚܙܳܬܶܗ ܕܝܶܫܽܘܥ܇ ܘܒܶܗ ܗܰܝܡܶܢܘ̱ ܕܒܰܪ ܐܰܠܳܗܰܐܗ̱ܘ܇ ܘܰܫܡܰܥܘ̱ ܩܳܠܶܗ ܒܰܣܺܝܡܳܐ܀

ܦܬܰܚ ܡܳܪܝ̱ ܥܰܝ̈ܢܶܐ ܕܬܰܪܥܺܝܬܰܢ܇ ܒܰܕܡܽܘܬܳܐ ܕܗܳܠܶܝܢ ܣܡܰܝ̈ܳܐ܇ ܘܠܳܐ ܢܶܚܫ̈ܟܳܢ ܢܰܦܫ̈ܳܬܰܢ܇ ܡܶܢ ܝܺܕܥܰܬܳܐ ܕܰܫܪܳܪܳܐ܇ ܐܶܠܳܐ ܐܰܫܘܳܢ ܠܰܚܙܳܬܳܟ܀

ܒܪܶܗ ܕܕܰܘܺܝܕ ܒܪܶܗ ܕܰܐܠܳܗܳܐ܇ ܝܳܕܥܺܝܢܰܢ ܠܳܟ ܒܰܫܪܳܪܳܐ܇ ܘܰܐܟܡܳܐ ܕܰܦܬܰܚܬ ܠܰܣܡܰܝ̈ܳܐ܇ ܦܬܰܚ ܥܰܝ̈ܢܶܐ ܕܠܶܒܰܘ̈ܳܬܰܢ܇ ܘܟܰܦܰܪ ܛܺܝ̈ܛܶܐ ܕܰܚܛܺܝܬܳܐ܀

 

ܣܽܘܓܺܝܬܳܐ ܩܳܠܳܐ ܗܳܐ ܩܛܺܝܠ ܗܽܘ ܒܡܶܨܪܶܝܢ܇

ܫܽܘܒܚܳܐ ܠܶܗ ܠܳܐܣܝܳܐ ܕܰܐܚܠܶܡ ܟܺܐܒܰܝ̈ܢ ܫܽܘܒܚܳܐ ܠܶܗ ܠܢܽܘܗܪܳܐ ܕܰܐܢܗܰܪ ܠܥܰܝ̈ܢܰܝܢ܇

ܐܳܣܝܳܐ ܘܒܳܪܽܘܝܳܐ ܕܰܢܚܶܬ ܘܰܐܣܺܝ܇ ܚܒܳܪ̈ܳܬܳܐ ܘܟܺܐܒ̈ܶܐ ܕܰܡܡܰܚܰܝ̈ܳܐ܇ ܗܰܒ ܠܺܝ ܕܶܐܡܰܠܶܠ ܥܰܠ ܡܰܘܗܰܒܬܳܟ܇ ܕܰܟܡܳܐ ܣܓܺܝܘ ܪ̈ܰܚܡܰܝܟ ܥܰܠ ܐ̱ܢܳܫܽܘܬܰܢ܀

ܒܰܪ ܛܳܒܳܐ ܕܶܐܬܳܐ ܠܰܐܬܪܳܐ ܕܒܺܝܫ̈ܶܐ܇ ܡܶܛܽܠ ܛܰܝܒܽܘܬܶܗ ܕܢܶܣܥܽܘܪ ܐܶܢܽܘܢ܇ ܘܰܐܝܟ ܐܳܣܝܳܐ ܕܰܡܠܶܐ ܟܽܠ ܥܽܘܕܪ̈ܳܢܺܝܢ܇ ܐܰܣܺܝ ܗܘܳܐ ܘܰܐܚܠܶܡ ܟܽܠ ܕܰܡܚܺܝܠܳܝ̈ܢ܀

ܓܰܙܳܐ ܗܘܳܐ ܕܰܡܠܶܐ ܥܽܘܬܪܳܐ ܪܰܒܳܐ܇ ܘܟܽܠ ܡܶܢ ܕܰܣܢܺܝܩ ܗܘܳܐ ܥܬܰܪ ܗܘܳܐ ܕܰܒܥܳܐ܇ ܦܫܰܛ ܐܺܝܕܶܗ ܘܣܰܒܰܥ ܟܽܠ ܚܰܣܺܝܪ̈ܶܐ܇ ܦܬܰܚ ܓܰܙܶܗ ܐܰܪܘܰܚ ܟܽܠ ܕܰܐܠܺܝ̈ܨܺܝܢ܀

ܕܢܰܚ ܢܽܘܗܪܶܗ ܒܰܐܪܥܳܐ܇ ܕܚܶܫܽܘܟܳܐ ܗܘܳܬ݀ ܇ ܘܰܥܪܰܩ ܛܶܠ̈ܳܠܶܐ ܡܶܢ ܦܶܢܝ̈ܳܬܳܐ܇ ܡܺܝ̈ܬܶܐ ܫܡܰܥܘ̱ ܩܳܠܶܗ܇ ܒܥܽܘܡܪܳܗܿ ܕܰܫܝܽܘܠ ܘܰܩܢܰܘ ܚܰܝܽܘܬܳܐ ܘܩܳܡܘ̱ ܘܶܐܬܢܰܚܰܡܘ̱܀

ܗܘܳܐ ܩܳܠܶܗ ܩܠܺܝܕܳܐ܇ ܘܰܦܬܰܚ ܠܰܫܝܽܘܠ܇ ܘܰܐܣܶܩ ܡܶܢ ܓܰܘܳܗܿ ܡܺܝ̈ܬܶܐ ܛܡܺܝܪ̈ܶܐ܇ ܗܘܳܐ ܪܽܘܩܶܗ ܢܽܘܗܪܳܐ ܘܰܛܪܰܕ ܚܶܫܟܳܐ܇ ܘܰܐܢܗܰܪ ܒܳܒ̈ܳܬܳܐ ܕܚܶܫܽܘܟ̈ܳܢ ܗܘ̈ܝ܀

ܘܰܥܕܳܐ ܝܰܗܒ ܠܳܐܕܳܡ ܟܰܕ ܣܰܥܪܶܗ ܗܘܳܐ܇ ܕܢܰܦܢܺܝܘܗ̱ܝ ܠܗܳܝ ܓܰܢܬܳܐ ܕܰܢܦܰܩ ܡܶܢܳܗܿ܇ ܘܥܰܠܗܳܝ ܢܚܶܬ ܨܶܝܕܰܘܗ̱ܝ ܘܰܐܣܺܝ ܟܺܐܒܰܘ̈ܗ̱ܝ܇ ܘܦܰܓܪܶܗ ܪܰܗܒܽܘܢܳܐ ܕܚܰܝ̈ܶܐ ܝܰܗܒ ܠܶܗ܀

 

ܙܰܡܶܢܽܘܗ̱ܝ ܠܰܚܠܽܘܠܳܐ܇ ܕܰܗܘܳܐ ܒܩܳܛܢܶܐ܇ ܠܰܙܡܺܝܢܳܐ ܕܙܰܡܶܢ ܥܰܡܡ̈ܶܐ ܠܰܥܕܶܝܢ܇ ܘܰܚܣܰܪ ܗܘܳܐ ܚܰܡܪܳܐ܇ ܒܗܳܝ ܡܶܫܬܽܘܬܳܐ܇ ܘܡܶܢ ܡܰܝ̈ܳܐ ܥܒܰܕ ܗܘܳܐ ܚܰܡܪܳܐ ܛܳܒܳܐ܀

ܚܕܳܐ ܕܰܩܥܳܬ݀ ܒܳܬܪܶܗ܇ ܘܒܰܝܢܳܬ ܟܶܢܫ̈ܶܐ܇ ܠܒܰܪܬܳܗܿ ܦܰܨܺܝ ܗܘܳܐ ܡܶܢ ܣܳܛܳܢܳܐ܇ ܘܟܰܕ ܟܰܠܒܳܐ ܫܰܡܗܳܗܿ܇ ܠܰܚܡܳܐ ܝܰܗܒ ܠܳܗܿ܇ ܘܰܠܗܳܝ ܕܰܟܦܺܝܦܳܐ ܢܶܩܝܳܐ ܥܰܒܕܳܗܿ܀

ܛܠܺܝܬܳܐ ܕܡܺܝܬܰܬ݀ ܗܘܳܬ݀܇ ܒܰܪܬ ܝܽܘܳܐܪܳܫ܇ ܘܣܺܝܡܳܐ ܕܬܶܬܥܰܦܶܐ ܩܕܳܡ ܥܶܕܳܢܳܐ܇ ܩܪܳܐ ܠܳܗܿ ܟܰܕ ܐܳܡܰܪ ܛܠܺܝܬܳܐ ܩܽܘܡܝ̱ ܠܶܟܝ̱܇ ܘܥܰܡ ܕܰܩܪܳܗܿ ܩܳܡܰܬ݀ ܐܰܝܟ ܕܡܶܢ ܫܶܢܬܳܐ܀

ܝܰܡܳܐ ܕܰܚܙܳܝܗ̱ܝ ܗܘܳܐ܇ ܕܚܶܠ ܡܶܢ ܟܳܐܬܶܗ܇ ܘܓܰܠܠܰܘ̈ܗ̱ܝ ܐܶܫܬܰܝܰܢܘ̱ ܕܰܙܓܰܪܘ̱ ܐܶܢܽܘܢ܇ ܚܽܘܪܒܳܐ ܕܰܢܦܰܩ ܠܶܗ ܐܶܫܬܰܝܰܢ ܗܘܳܐ܇ ܘܰܣܓܺܝ ܒܶܗ ܠܰܚܡܳܐ ܡܶܢ ܒܽܘܪ̈ܟܳܬܶܗ܀

ܟܪ̈ܺܝܗܶܐ ܩܢܰܘ ܚܰܝܠܳܐ ܕܰܣܥܰܪ ܐܶܢܽܘܢ܇ ܘܡܺܝ̈ܬܶܐ ܕܢܰܚܶܡ ܗܘܳܐ ܩܢܰܘ ܚܰܝܽܘܬܳܐ܇ ܡܰܪ̈ܥܶܐ ܘܰܣܓܺܝ̈ܦܶܐ ܐܶܫܬܰܪܰܪܘ̱ ܒܶܗ܇ ܘܥܰܡܳܐ ܣܳܒܰܪ ܗܘܳܐ ܕܒܰܪ ܢܰܓܳܪܰܐܗ̱ܘ܀

ܠܰܚܡܳܬܶܗ ܕܦܶܛܪܳܘܣ ܪܺܝܫ ܬܰܠܡܺܝ̈ܕܶܐ ܕܒܶܐܫܳܬܳܐ ܒܺܝܫܬܳܐ ܣܰܓܺܝ ܫܶܚܩܰܬ݀܇ ܩܪܶܒ ܐܰܚܕܳܗܿ ܒܺܐܝܕܳܗܿ ܐܳܣܝܳܐ ܕܪ̈ܰܚܡܶܐ܇ ܘܶܐܫܳܬܳܐ ܕܥܶܪܩܰܬ݀ ܐܳܦ ܫܰܡܶܫܬܶܗ܀

ܡܶܢ ܪܽܘܩܳܐ ܘܛܺܝܢܳܐ ܥܒܰܕ ܒܳܒ̈ܳܬܳܐ܇ ܘܰܒܢܽܘܗܪܳܐ ܚܰܕܬܳܐ ܐܰܦܨܰܚ ܐܶܢܶܝܢ܇ ܘܰܠܣܰܡܝܳܐ ܕܚܳܕܰܪ ܥܰܠ ܝܰܕ ܐܽܘܪܚܳܐ܇ ܦܰܬܰܚ ܠܶܗ ܥܰܝܢܰܘ̈ܗ̱ܝ ܘܰܚܙܳܐ ܢܽܘܗܪܳܐ܀

ܢܽܘܗܪܳܐ ܠܰܣܡܰܝ̈ܳܐ ܬܪܶܝܢ ܕܰܩܪܰܐܽܘܗ̱ܝ܇ ܕܡܳܪܝܳܐ ܒܪܶܗ ܕܕܰܘܺܝܕ ܪܰܚܶܡܥܠܰܝܢ܇ ܘܫܰܟܶܢ ܐܰܝܟ ܛܳܒܳܐ ܠܥܰܝ̈ܢܶܐ ܕܺܝܠܗܽܘܢ܇ ܘܰܐܝܟ ܗܰܝܡܳܢܽܘܬܗܽܘܢ ܫܰܟܶܢ ܝܰܗܒ ܠܗܽܘܢ܀

ܣܥܰܪ ܚܰܝ̈ܠܶܐ ܘܰܐܳܘܕܰܥ ܚܰܝܠܶܗ ܒܽܘܩܝܳܐ܇ ܘܰܥܒܰܕ ܐܳܬܰܘ̈ܳܬܳܐ ܒܰܟܢܽܘ̈ܫܳܬܳܐ܇ ܓܠܳܐ ܫܽܘܒܚܶܗ ܘܝܰܕܥܶܗ ܥܳܠܡܳܐ ܟܽܠܶܗ܇ ܘܺܝܠܶܦ ܕܰܐܠܳܗܰܐܗ̱ܘ ܡܶܢ ܫܽܘܠܛܳܢܶܗ܀

ܥܰܢܺܝ̈ܕܶܐ ܫܰܡܥܽܘܗ̱ܝ ܩܳܡܘ̱ ܘܶܐܬܢܰܚܰܡܘ̱܇ ܘܝܽܘܕܳܝ̈ܶܐ ܡܺܝܬܰܘ̱ ܒܶܗ ܕܠܳܐ ܗܰܝܡܶܢܘ̱ ܒܶܗ܇ ܕܽܘ̈ܓܶܐ ܫܡܰܥܘ̱ ܩܳܠܶܗ ܘܰܩܢܰܘ ܡܶܠܬܳܐ܇ ܘܡܰܠ̈ܳܠܶܐ ܛܰܠܡܽܘܗ̱ܝ ܚܪܶܫܘ̱ ܡܶܢ ܡܶܠܬܳܐ܀

ܦܰܠܶܓ ܥܽܘܕܪ̈ܳܢܶܐ܇ ܠܟܽܠ ܕܰܟܪ̈ܺܝܗܺܝܢ܇ ܘܰܐܣܪܰܚ ܚܽܘܠܡܳܢܳܐ ܠܟܽܠ ܕܰܬܒܺܝܪܺܝܢ܇ ܘܰܥܨܰܒ ܒܰܚܢܳܢܶܗ ܠܟܽܠ ܕܰܡܚܺܝܠܺܝܢ܇ ܘܰܠܡܳܟܣ̈ܶܐ ܙܰܕܶܩ ܫܒܰܩ ܚܰܘܒܰܝ̈ܗܽܘܢ܀

ܨܶܝܕܰܘܗ̱ܝ ܟܢܺܝܫܺܝܢ ܗ̱ܘܰܘ ܟܽܠ ܕܰܟܪ̈ܺܝܗܺܝܢ܇ ܘܝܰܗܒ ܗܘܳܐ ܘܦܰܢܺܝ ܠܗܽܘܢ ܟܽܠ ܫܶܐܠ̈ܳܬܗܽܘܢ܇ ܕܰܡܫܰܪܰܝ ܘܰܪܡܶܐ ܒܥܰܪܣܳܐ ܕܟܺܐܒ̈ܶܐ܇ ܘܰܥܒܺܝܕ ܒܺܝܫܳܐܝܬ ܩܳܡ ܗܘܳܐ ܘܗܰܠܶܟ܀

ܩܰܠܣܳܗܿ ܦܳܪܽܘܩܰܢ ܠܗܰܝܡܳܢܽܘܬܶܗ܇ ܘܰܓܠܳܗܿ ܐܳܦ ܚܰܘܝܳܗܿ ܠܥܺܝܢ ܣܰܓܺܝ̈ܐܶܐ܇ ܟܰܕ ܦܰܢܺܝ ܠܘܳܬܶܗ ܕܶܐܢܳܐ ܐܳܬܶܐ ܐ̱ܢܳܐ܇ ܠܒܶܝܬܳܟ ܘܰܠܛܰܠܝܳܟ ܕܰܟܪܺܝܗ ܐܰܚܠܶܡ܀

ܪ̈ܰܚܡܶܐ ܠܰܒܪܺܝܬܳܐ ܚܢܳܢܳܐ ܠܥܳܠܡܳܐ܇ ܘܰܠܓܶܢܣܳܐ ܕܐ̱ܢܳܫ̈ܳܐ ܗܘܳܐ ܦܽܘܪܩܳܢܳܐ܇ ܫܰܝܢܳܐ ܘܰܫܠܳܡܳܐ ܐܳܬܶܐ ܠܰܐܪܥܳܐ܇ ܒܕܽܘܪ̈ܟܳܬܶܗ ܕܰܒܪܳܐ ܐܶܬܩܰܕܫܰܬ݀ ܗܘܳܬ݀ ܀

ܟܰܕ ܫܳܒܶܩ ܚܰܘܒ̈ܶܐ ܥܰܠ ܠܒܶܝܬܶܗ ܕܫܶܡܥܽܘܢ܇ ܘܰܐܢ̱ܬܬܳܐ ܚܰܛܳܝܬܳܐ ܥܶܠܰܬ݀ ܨܶܝܕܰܘܗ̱ܝ܇ ܘܰܒܕܶܡܥܶܝ̈ܗܿ ܬܶܠܚܰܬ݀ ܐܶܫܛܳܪ ܚܰܘܒܶܝ̈ܗܿ܇ ܘܰܐܫܺܝܓܰܬ݀ ܪ̈ܶܓܠܰܘܗ̱ܝ ܣܰܥܪܳܗܿ ܚܢܳܢܶܗ܀

ܬܶܫܒܽܘܚܬܳܐ ܠܰܐܒܳܐ ܕܫܰܕܰܪ ܠܰܒܪܶܗ܇ ܬܰܘܕܺܝܬܳܐ ܠܰܒܪܳܐ ܕܦܰܪܩܰܢ ܒܰܕܡܶܗ܇ ܣܓܺܝܕ ܪܽܘܚܳܐ ܕܩܽܘܕܫܳܐ ܡܶܢ ܟܽܠ ܦܽܘܡܺܝ̈ܢ܇ ܬܶܫܒܽܘܚܬܳܐ ܢܰܣܶܩ ܒܟܽܠ ܥܶܕܳܢܺܝ̈ܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܩܳܠܳܝ̈ ܫܽܘܒܚܳܐ ܕܰܡܡܰܚܰܝ̈ܳܐ ܡܶܢ ܟܽܠ ܦܽܘܡܺܝ̈ܢ܇ ܘܩܳܠ ܬܰܘܕܺܝܬܳܐ ܕܟܰܦܢ̈ܶܐ ܕܣܳܒܥܺܝܢ ܡܶܢ ܦܳܬܽܘܪܶܗ܇ ܩܳܠܶܗ ܕܛܺܝܡܰܝ ܕܰܫܓܺܝܫܳܐ ܠܶܗ܇ ܐܽܘܪܚܳܐ ܟܽܠܳܗܿ܇ ܕܫܳܐܶܠ ܢܽܘܗܪܳܐ ܫܳܩܶܠ ܡܶܢܶܗ ܕܗܰܘ ܝܳܗܽܘܒܳܐ܀

ܟܽܠܗܽܘܢ ܟܪ̈ܺܝܗܶܐ ܕܰܐܣܺܝ ܪܶܡܙܳܐ ܕܒܳܪܽܘܝܽܘܬܳܟ܇ ܛܥܺܝܢܺܝܢ ܫܽܘܒܚܳܐ ܘܰܡܩܰܪܒܺܝܢ ܠܳܟ ܥܰܬܺܝܪܳܐܺܝܬ܇ ܡܺܝ̈ܬܶܐ ܕܰܐܚܺܝܬ ܘܰܡܫܰܪ̈ܰܝܳܐ ܕܰܩܢܰܘ ܚܰܝܠܳܐ܇ ܢܰܣܩܽܘܢ ܫܽܘܒܚܳܐ ܠܳܟ ܡܳܪܝ̱ ܘܠܰܐܒܽܘܟ ܥܰܡ ܪܽܘܚܩܽܘܕܫܳܐ܀

 

ܩܰܘܡܳܐ ܕܰܬܪܶܝܢ܇ ܕܠܺܠܝܳܐ ܒܬܰܪܥܳܟ ܡܳܪܰܢ ܢܳܩܶܫ

ܪܰܒܳܐ ܗܘܳܬ݀ ܗܰܝܡܳܢܽܘܬܳܗܿ ܕܰܟܢܰܥܢܰܝܬܳܐ܇ ܟܰܕ ܩܳܥܝܳܐ ܘܳܐܡܪܳܐ ܒܰܪ ܕܰܘܺܝܕ ܪܳܚܶܡܢܳܫܳܐ ܪܰܚܶܡ ܥܠܰܝ܇ ܘܰܐܣܳܐ ܠܺܝ ܒܰܪܬܝ̱ ܡܶܢ ܫܺܐܕܳܐ܇ ܕܗܳܐ ܫܳܚܶܩ ܠܳܗܿ ܘܣܰܓܺܝ ܡܫܰܢܶܩ ܠܳܗܿ܀

ܦܰܐܝܳܐ ܗܘܳܬ݀ ܗܰܝܡܳܢܽܘܬܶܗ ܕܛܺܝܡܰܝ ܣܰܡܝܳܐ܇ ܟܰܕ ܡܶܬܟܰܫܰܦ ܗܘܳܐ܇ ܕܒܰܪ ܕܰܘܺܝܕ ܪܰܚܶܡܥܠܰܝ ܘܗܰܒ ܠܺܝ ܢܽܘܗܪܳܐ܇ ܓܒܰܠ ܛܺܝܢܳܐ ܘܛܳܫ ܥܰܠ ܥܰܝ̈ܢܰܘܗ̱ܝ܇ ܘܰܚܙܳܐ ܢܽܘܗܪܳܐ܇ ܘܰܐܘܕܺܝ ܒܰܡܫܺܝܚܳܐ܀

 

ܐ̱ܚܪܺܢܳܐ ܩܳܠܳܐ ܕܰܚܛܳܐ ܠܳܐ ܢܶܚܛܶܐ

ܣܰܡܳܐ ܕܰܚܢܳܢܳܐ܇ ܕܰܥܨܰܒ ܠܰܢ ܟܺܐܒܰܝ̈ܢ܇ ܙܽܘܦܳܐ ܡܕܰܟܝܳܢܳܐ ܕܰܦܬܰܚ ܠܰܣܡܰܝ̈ܳܐ܇ ܦܺܝܪܡܳܐ ܡܚܰܣܝܳܢܳܐ܇ ܕܚܰܣܺܝ ܚܰܘܒ̈ܳܬܰܢ܇ ܐܳܣܝܳܐ ܫܡܰܝܳܢܳܐ܇ ܕܰܐܣܺܝ ܫܽܘܡ̈ܳܬܰܢ܇ ܗ ܘ ܗ܇ ܒܪܺܝܟ ܐܰܒܳܐ ܕܫܰܠܚܳܟ ܡܶܛܽܠ ܦܽܘܪܩܳܢܰܢ܀

ܠܡܳܟܣ̈ܶܐ ܙܰܕܶܩ ܗܘܳܐ܇ ܘܚܰܣܺܝ ܠܚܰܛܳܝ̈ܶܐ܇ ܘܰܠܓܰܪ̈ܒܶܐ ܕܰܟܺܝ܇ ܘܠܰܡܫܰܪ̈ܰܝܳܐ ܫܰܪܰܪ܇ ܝܰܗܒ ܗܘܳܐ ܚܽܘܠܡܳܢܳܐ ܠܡܰܪ̈ܥܶܐ ܘܠܰܬܒܺܝܪ̈ܶܐ܇ ܘܒܰܚܢܳܢܶܗ ܐܰܢܗܰܪ ܣܡܰܝ̈ܳܐ ܘܰܥܘܺܝܪ̈ܶܐ܇ ܗ ܘ ܗ ܘܰܒܩܳܠܶܗ ܐܰܩܺܝܡ ܠܡܺܝ̈ܬܶܐ ܘܠܰܩܒܺܝܪ̈ܶܐ܀

 

ܡܰܕܪܳܫܳܐ ܒܩܳܠܳܐ ܩܽܘܡ ܦܰܘܠܳܘܣ ܥܶܢܝܳܢܳܐ ܒܪܺܝܟ ܐܳܣܝܳܐ ܕܰܐܣܺܝ ܠܰܟܪ̈ܺܝܗܶܐ܇ ܒܪܺܝܟ ܡܳܪܝܳܐ ܕܰܦܬܰܚ ܠܰܥܘܺܝܪ̈ܶܐ

ܟܰܕ ܛܰܪܕܽܘܗ̱ܝ ܠܣܰܡܝܳܐ ܡܶܢ ܗܰܝܟܠܳܐ܇ ܥܰܠ ܕܶܐܡܰܪ ܕܝܶܫܽܘܥ ܗܽܘ ܐܰܣܝܰܢܝ̱܇ ܦܓܰܥ ܗܘܳܐ ܒܶܗ ܝܶܫܽܘܥ ܘܶܐܡܰܪ ܠܶܗ܇ ܡܗܰܝܡܶܢ ܐܰܢ̱ܬ ܓܰܒܪܳܐ ܒܗܰܘ ܕܰܐܣܺܝܟ܇ ܡܰܢܽܘ ܡܳܪܝ̱ ܗܳܢܳܐ܇ ܐܰܝܟ ܕܶܐܗܰܝܡܶܢ ܒܶܗ܇ ܘܶܐܡܰܪ ܕܗܰܘ ܕܰܚܙܰܝܬ܇ ܕܡܡܰܠܶܠ ܥܰܡܳܟ܇ ܘܡܶܚܕܳܐ ܒܰܪܶܟ ܘܰܣܓܶܕ ܠܝܶܫܽܘܥ܇ ܘܰܐܘܕܺܝ ܒܶܗ ܕܰܒܪܰܐܗ̱ܘ ܕܰܐܠܳܗܳܐ܀

ܐܳܡܰܪ ܠܶܗ ܣܰܡܝܳܐ ܠܰܡܫܺܝܚܳܐ܇ ܕܝܳܕܰܥ ܐ̱ܢܳܐ ܕܝܽܘܕܳܝ̈ܶܐ ܚܰܪ̈ܡܶܐ܇ ܚܳܣܡܺܝܢ ܒܳܟ ܘܣܳܢܶܝܢ ܘܣܳܩܪܺܝܢ ܒܳܟ܇ ܘܠܳܐ ܡܗܰܝܡܶܢܺܝܢ ܒܳܐܬܰܘ̈ܳܬܳܐ ܕܺܝܠܳܟ܇ ܛܳܠܡܺܝܢ ܛܳܒ̈ܳܬܳܟ܇ ܘܟܳܦܪܺܝܢ ܒܳܐܬܰܘ̈ܳܬܳܟ܇ ܘܶܐܢܳܐ ܡܰܘܕܶܐ ܐ̱ܢܳܐ܇ ܘܰܡܗܰܝܡܶܢ ܐ̱ܢܳܐ ܒܳܟ܇ ܕܰܐܢ̱ܬ ܐܺܝܬܰܝܟ ܡܳܪܳܐ ܕܒܶܪ̈ܝܳܬܳܐ܇ ܘܡܰܢܗܪܳܢܳܐ ܕܟܽܠܗܶܝܢ ܦܶܢܝ̈ܳܬܳܐ܀

ܟܡܳܐ ܕܗܶܢܽܘܢ ܒܳܥܶܝܢ ܗ̱ܘܰܘ ܡܶܢܶܗ܇ ܕܗܰܘ ܣܰܡܝܳܐ ܘܬܳܒܥܺܝܢ ܕܰܢܓܰܕܶܦ܇ ܘܰܕܢܺܐܡܰܪ ܕܠܰܘ ܝܶܫܽܘܥ ܐܰܣܝܶܗ܇ ܗܽܘ ܣܰܡܝܳܐ ܝܰܬܺܝܪ ܡܰܘܕܶܐ ܗܘܳܐ܇ ܡܩܰܠܶܣ ܘܰܡܫܰܒܰܚ܇ ܠܰܡܫܺܝܚܳܐ ܕܰܐܣܝܶܗ܇ ܘܡܰܒܗܶܬ ܘܰܡܟܰܐܰܪ܇ ܠܰܐܝܠܶܝܢ ܕܛܳܠܡܺܝܢ ܠܶܗ܇ ܘܳܐܡܰܪ ܗܘܳܐ ܕܶܐܢܳܐ ܡܗܰܝܡܶܢ ܐ̱ܢܳܐ܇ ܘܚܳܣ ܠܺܝ ܡܶܢ ܗܳܝ ܕܟܳܦܰܪ ܐ̱ܢܳܐ ܒܳܟ܀

ܐܳܡܪܺܝܢ ܗ̱ܘܰܘ ܝܽܘܕܳܝ̈ܶܐ ܠܣܰܡܝܳܐ܇ ܕܟܽܠܳܟ ܓܶܝܪ ܒܰܚܛܳܗ̈ܶܐ ܝܺܠܺܝܕ ܐܰܢ̱ܬ܇ ܘܝܶܫܽܘܥ ܒܪܶܗ ܕܝܰܘܣܶܦ ܢܰܓܳܪܳܐ܇ ܒܰܪܢܳܫܳܐ ܗܳܐ ܝܳܕܥܺܝܢܰܢ ܠܶܗ܇ ܐܳܡܰܪ ܠܗܽܘܢ ܣܰܡܝܳܐ܇ ܣܰܟ̈ܠܶܐ ܘܰܥܘܺܝܪ̈ܶܐ܇ ܡܰܢܽܘ ܡܨܶܐ ܒܳܪܶܐ܇ ܥܰܝܢ̈ܶܐ ܕܠܳܐ ܦܬܺܝܚ̈ܳܢ܇ ܐܶܠܽܘ ܠܳܐ ܐܺܝܬܰܘܗ̱ܝ ܐܰܠܳܗܳܐ܇ ܘܒܳܪܽܘܝܳܐ ܕܟܽܠܗܶܝܢ ܒܶܪ̈ܝܳܬܳܐ܀

ܐܳܡܪܺܝܢ ܗ̱ܘܰܘ ܝܽܘܕܳܝ̈ܶܐ ܠܣܰܡܝܳܐ܇ ܐܰܝܟܰܢܳܐ ܦܰܬܰܚ ܠܳܟ ܥܰܝܢܰܝ̈ܟ܇ ܛܺܝܢܳܐ ܓܒܰܠ ܘܣܳܡ ܠܺܝ ܥܰܠ ܥܰܝ̈ܢܰܝ܇ ܘܶܐܡܪܶܬ ܠܟܽܘܢ ܘܠܳܐ ܡܗܰܝܡܶܢܺܝܢ ܐ̱ܰܢ̱ܬܽܘܢ ܠܺܝ܇ ܕܰܠܡܳܐ ܬܰܠܡܺܝܕܰܘ̈ܗ̱ܝ܇ ܒܳܥܶܝܬܽܘܢ ܕܬܶܗܘܽܘܢ܇ ܕܝܶܫܽܘܥ ܢܳܨܪܳܝܳܐ܇ ܕܦܰܬܰܚ ܠܺܝ ܥܰܝܢ̈ܰܝ܇ ܘܦܰܢܺܝܘ ܠܶܗ ܕܰܐܢ̱ܬ ܗܽܘ ܬܰܠܡܺܝܕܶܗ܇ ܚܢܰܢ ܬܰܠܡܺܝ̈ܕܶܐ ܕܡܽܘܫܶܐ ܬܽܘܒ ܐܺܝܬܰܝܢ܀

 

ܦܰܪܕܰܝܣܳܐ

ܒܛܺܝܢܳܐ ܦܬܰܚܬ ܥܰܝܢܰܘ̈ܗ̱ܝ܇ ܕܛܺܝܡܰܝ ܒܰܪ ܛܺܝܡܰܝ܇ ܘܢܰܦܫ̈ܳܬܰܢ ܣܰܡܝ̈ܳܢ܇ ܒܚܰܫ̈ܶܐ ܕܰܚܛܺܝܬܳܐ܇ ܒܦܰܓܪܳܟ ܩܰܕܺܝܫܳܐ܇ ܦܬܰܚܬ ܣܰܡܝܽܘܬܗܶܝܢ܇ ܘܒܰܨܠܺܝܒܳܟ ܚܰܝܳܐ ܚܬܰܡܬ ܐܶܢܶܝܢ܇ ܐܰܙܠܶܓ ܠܒܳܒ̈ܳܬܰܢ܇ ܕܠܳܐ ܬܽܘܒ ܢܰܕܪܶܟ ܠܗܶܝܢ܇ ܚܶܫܟܳܐ ܕܛܳܥܝܽܘܬܳܐ܀

ܫܺܝܠܽܘܚܳܐ ܡܫܺܝܓ ܗܘܳܐ ܡܽܘܡ̈ܶܐ ܕܰܒܦܰܓܪܳܐ܇ ܘܡܽܘܡ̈ܶܐ ܕܶܝܢ ܕܢܰܦܫܳܐ܇ ܡܩܰܘܝܳܢ ܥܰܡ ܟܽܘܬܡܳܐ܇ ܘܦܰܓܪܳܟ ܩܰܕܺܝܫܳܐ ܡܫܺܝܓ ܥܰܘܠܳܐ ܕܢܰܦܫܰܢ܇ ܘܡܳܪܶܩ ܘܰܡܕܰܟܶܐ ܚܛܳܗ̈ܰܝܢ܇ ܠܢܰܦܫܳܐ ܘܰܠܦܰܓܪܳܐ܇ ܡܕܰܟܶܐ ܫܰܘܝܳܐܺܝܬ܇ ܒܪܺܝܟ ܗܽܘ ܕܝܰܗܒܶܗ ܠܰܢ ܣܰܡܳܐ ܡܰܐܣܝܳܢܳܐ܀

ܚܠܳܦ ܪܽܘܩܳܟ ܝܰܗܒܬ ܠܰܢ܇ ܪܽܘܫܡܳܟ ܝܰܩܺܝܪܳܐ܇ ܚܠܳܦ ܛܺܝܢܳܐ ܕܣܰܡܝܳܐ܇ ܦܰܓܪܳܟ ܡܚܰܣܝܳܢܳܐ܇ ܕܶܐܢ ܪܽܘܩܳܐ ܘܛܺܝܢܳܐ܇ ܐܰܩܢܺܝܘ ܐܳܣܝܽܘܬܳܐ ܟܡܳܐ ܡܳܕܶܝܢ ܡܫܰܟܢܺܝܢ ܥܽܘܕܪ̈ܳܢܶܐ܇ ܦܰܓܪܳܟ ܩܰܕܺܝܫܳܐ ܘܰܕܡܳܟ ܝܰܩܺܝܪܳܐ܇ ܘܝܳܗܒܺܝܢ ܫܽܘܒܩܳܢܳܐ܇ ܕܚܰܘܒ̈ܶܐ ܘܕܰܚܛܳܗ̈ܶܐ܀

ܚܽܘܪ ܡܳܪܝ̱ ܒܕܰܘܝܳܘܬܰܢ ܕܡܶܬܟܰܫܦܺܝܢܰܢ ܠܳܟ܇ ܒܰܕܡܽܘܬܶܗ ܕܣܰܡܝܳܐ܇ ܕܛܺܝܡܰܝ ܚܳܕܽܘܪܳܐ܇ ܗܰܒ ܢܽܘܗܪܳܐ ܠܥܰܝ̈ܢܰܝܢ܇ ܘܕܽܘܟܳܝܳܐ ܠܡܽܘ̈ܡܰܝܢ܇ ܘܳܐܣܝܽܘܬܳܐ ܠܟܺܐܒܰܝ̈ܢ ܘܟܽܘܪ̈ܗܳܢܰܝܢ܇ ܐܰܣܳܐ ܢܰܦܫ̈ܳܬܰܢ ܘܩܰܕܶܫ ܪ̈ܽܘܚܳܬܰܢ܇ ܘܥܰܠܳܐ ܡܳܪܝ̱ ܗܰܘ̈ܢܰܝܢ ܠܘܰܥܕܳܐ ܕܡܽܘܠܟܳܢܰܝ̈ܟ܀

 

ܟܰܠܰܬ ܡܰܠܟܳܐ ܥܶܢܝܳܢܳܐ ܫܽܘܒܚܳܐ ܠܪܶܡܙܳܐ ܟܰܣܝܳܐ܇ ܕܰܥܨܰܒ ܟܺܐܒܰܝ̈ܢ ܘܳܐܦ ܟܽܘܪ̈ܗܳܢܰܝܢ

ܛܽܘܒܰܝܟ ܛܺܝܡܰܝ ܣܰܡܝܳܐ܇ ܕܰܫܘܰܝܬ ܕܬܶܚܙܺܝܘܗ̱ܝ ܠܒܰܪ ܐܰܠܳܗܳܐ܇ ܦܬܰܚ ܥܰܝܢܰܝ̈ܟ ܘܚܳܪܬ ܒܶܗ܇ ܒܗܰܘ ܦܰܪܨܽܘܦܳܐ ܡܠܶܐ ܚܰܕܘ̈ܳܬܳܐ܇ ܛܽܘܒܰܝܟ ܕܗܰܝܡܶܢܬ܇ ܘܰܣܓܶܕܬ ܠܝܶܫܽܘܥ܇ ܘܰܐܢܗܰܪ ܥܰܝܢܰܝ̈ܟ܇ ܐܳܦ ܬܰܪܥܺܝܬܳܟ܇ ܘܥܰܡ ܐܳܣܝܽܘܬ ܦܰܓܪܳܟ܇ ܢܰܦܫܳܟ ܐܶܬܰܐܣܝܰܬ݀ ܘܦܰܢܝܰܬ݀ ܚܽܘܣܳܝܳܐ ܘܫܽܘܒܩܳܢܳܐ܀

ܐܶܢ ܫܽܘܫܶܦܳܐ ܕܫܰܕܰܪ܇ ܟܺܐܢܳܐ ܝܰܘܣܶܦ ܠܣܳܒܳܐ ܝܰܥܩܽܘܒ܇ ܦܶܬܚܰܬ݀ ܥܰܝ̈ܢܶܐ ܕܺܝܠܶܗ܇ ܚܙܳܐ ܢܽܘܗܪܳܐ ܘܰܚܕܺܝ ܠܶܒܶܗ܇ ܟܡܳܐ ܝܰܬܺܝܪܳܐ܇ ܗܺܝ ܝܰܡܺܝܢܶܗ܇ ܕܒܰܪ ܐܰܠܳܗܳܐ܇ ܡܶܢ ܫܽܘܫܶܦܳܐ܇ ܕܗܺܝ ܝܶܗܒܰܬ݀ ܢܽܘܗܪܳܐ ܠܛܺܝܡܰܝ ܒܰܪ ܛܺܝܡܰܝ܇ ܘܣܳܡܰܬ݀ ܒܳܒ̈ܳܬܳܐ ܘܫܰܟܢܰܬ݀ ܢܽܘܗܪܳܐ܀

ܐܰܢܗܰܪ ܡܰܕܥܰܝ̈ܢ ܕܰܚܫܶܟܘ̱܇ ܒܚܰܫ̈ܶܐ ܒܺܝ̈ܫܶܐ ܕܰܣܪܺܝܩܽܘܬܳܐ܇ ܐܰܢ̱ܬ ܗܽܘ ܐܺܝܬܰܝܟ ܢܽܘܗܪܳܐ܇ ܗܰܘ ܫܰܪܺܝܪܳܐ ܕܶܐܬܳܐ ܠܥܳܠܡܳܐ܇ ܢܗܰܪܘ̱ ܒܳܟ ܣܡܰܝ̈ܳܐ܇ ܥܺܘܝܪ̈ܶܐ ܐܶܬܦܰܬܰܚܘ̱܇ ܟܦܺܝ̈ܦܶܐ ܐܶܬܦܰܫܰܛܘ̱܇ ܘܓܰܪ̈ܒܶܐ ܐܶܬܕܰܟܺܝܘ܇ ܕܽܘܓ̈ܶܐ ܩܢܰܘ ܫܶܡܥܳܐ܇ ܘܦܺܐܩ̈ܶܐ ܩܢܰܘ ܡܶܠܬܳܐ܇ ܘܡܺܝ̈ܬܶܐ ܐܶܬܢܰܚܰܡܘ̱܇ ܘܰܙܡܰܪܘ̱ ܬܶܫܒܽܘܚܬܳܐ܀

 

ܣܠܶܩ ܠܰܨܠܺܝܒܳܐ ܥܶܢܝܳܢܳܐ ܫܽܘܒܚܳܐ ܠܰܒܪܳܐ ܕܐܰܝܟ ܐܳܣܝܳܐ ܢܚܶܬ ܣܰܥܪܰܢ܇ ܘܰܐܣܺܝ ܟܺܐܒ̈ܶܐ ܟܽܘܪ̈ܗܳܢܶܐܕܐ̱ܢܳܫܽܘܬܰܢ

ܐܳܣܝܳܐ ܕܪ̈ܰܚܡܶܐ ܛܥܶܢ ܘܰܐܝܬܺܝ ܥܽܘܕܪ̈ܳܢܶܐ܇ ܡܶܢ ܒܶܝܬ ܐܰܒܽܘܗ̱ܝ ܕܠܰܟܝܳܢܰܝܢ ܚܳܫܚܺܝܢ ܗ̱ܘܰܘ܇ ܘܰܐܣܺܝ ܗܘܳܐ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܘܰܐܚܠܶܡ ܗܘܳܐ ܠܟܽܠܗܽܘܢ ܡܡܰܚܰܝ̈ܳܐ܇ ܕܠܳܐ ܐܰܓܪܳܐ ܢܣܰܒ ܟܽܠ ܐ̱ܢܳܫ܇ ܚܽܘܠܡܳܢܳܐ ܕܚܳܫܰܚ ܠܶܗ܀

ܒܪܽܘܩܳܐ ܕܦܽܘܡܶܗ ܓܒܰܠ ܛܺܝܢܳܐ ܐܰܝܟ ܕܰܨܒܳܐ܇ ܘܛܳܫ ܥܰܠ ܥܰܝܢܶܗ ܕܗܰܘ ܕܰܓܠܺܝܙ ܡܶܢ ܢܽܘܗܪܳܐ܇ ܒܪܳܐ ܥܰܝ̈ܢܶܐ ܘܰܓܒܰܠ ܒܳܒ̈ܳܬܳܐ܇ ܘܶܐܫܰܕ ܒܗܶܝܢ ܢܽܘܗܪܳܐ ܡܶܢ ܫܶܠܝܳܐ܇ ܘܰܐܝܟ ܡܳܪܳܐ ܒܳܪܽܘܝܳܐ܇ ܓܒܰܠ ܘܰܐܢܗܰܪ ܘܶܐܫܬܰܒܰܚ܀

ܓܰܢ̱ܒܳܪ ܥܳܠܡ̈ܶܐ ܐܶܬܬܰܚܬܺܝ ܒܰܚܢܳܢܶܗ܇ ܠܘܳܬ ܐܰܪ̈ܥܳܢܶܐ ܕܢܰܐܣܶܐ ܠܗܽܘܢ ܟܺܐܒܰܝ̈ܗܽܘܢ܇ ܠܰܡܫܰܪܝܳܐ ܝܰܗܒ ܠܶܗ ܚܽܘܠܡܳܢܳܐ܇ ܘܰܠܣܰܡܝܳܐ ܦܰܬܰܚ ܠܶܗ ܥܰܝ̈ܢܰܘܗ̱ܝ܇ ܘܚܰܛܳܝܬܳܐ ܕܩܶܪܒܰܬ݀ ܠܶܗ ܢܶܣܒܰܬ݀ ܠܳܗܿ ܫܽܘܒܩܳܢܳܐ܀

ܕܽܘܡܳܪܳܐ ܗܘܳܐ ܡܰܘܠܳܕܶܗ ܕܡܶܢ ܡܰܪܝܰܡ܇ ܕܠܳܐ ܫܪܳܐ ܒܬܽܘ̈ܠܶܐ ܕܟܰܕ ܢܳܦܶܩ ܡܶܢ ܟܰܪܣܳܐ܇ ܒܬܶܕܡܽܘܪܬܳܐ ܥܰܠ ܠܶܗ ܠܰܒܪܺܝܬܳܐ܇ ܘܰܒܬܶܗܪܳܐ ܣܥܰܪ ܡܕܰܒܪܳܢܽܘܬܶܗ܇ ܥܒܰܕ ܚܰܝ̈ܠܶܐ ܘܳܐܬܘ̈ܳܬܳܐ܇ ܘܶܐܬܚܰܘܺܝ ܕܰܐܠܳܗܳܐܗ̱ܘ܀

ܗܽܘ ܒܪܳܐ ܘܰܐܬܩܶܢ ܐܰܝܟ ܕܰܨܒܳܐ ܒܫܽܘܪܳܝܳܐ܇ ܘܗܽܘ ܢܚܶܬ ܘܰܦܪܰܩ ܐܰܝܟ ܕܰܒܥܳܐ ܒܫܽܘܠܳܡܳܐ܇ ܥܒܰܕ ܠܳܐܕܳܡ ܡܶܢ ܥܰܦܪܳܐ ܒܪܺܝܫܺܝܬ܇ ܘܡܶܢ ܒܳܬܰܪ ܕܰܚܛܳܐ ܘܶܐܬܚܰܒܰܠ܇ ܢܚܶܬ ܘܰܗܘܳܐ ܒܰܪܢܳܫܳܐ܇ ܘܡܶܢ ܡܰܘܬܳܐ ܦܪܰܩ ܨܰܠܡܶܗ܀

ܘܳܝ ܠܶܗ ܠܰܐܝܢܳܐ ܕܠܳܐ ܗܰܝܡܶܢ ܕܰܐܠܳܗܰܐܗ̱ܘ܇ ܗܰܘ ܕܶܐܬܒܰܪܢܰܫ ܡܶܢ ܓܶܢܣܰܢ ܕܠܰܢ ܢܶܦܪܽܘܩ܇ ܐܰܠܳܗܳܐ ܗܰܘ ܕܰܗܘܳܐ ܒܰܪܢܳܫܳܐ܇ ܘܰܐܠܳܗܳܐ ܟܰܬܰܪ ܐܰܝܟ ܕܺܐܝܬܰܘܗ̱ܝ܇ ܘܚܰܕ ܐܺܝܬܰܘܗ̱ܝ ܕܠܳܐ ܦܽܘܠܳܓ܇ ܘܰܐܠܳܗܳܐ ܘܒܰܪܢܳܫܳܐ܀

ܙܳܢ ܗܘܳܐ ܘܬܰܪܣܺܝ ܘܣܰܒܰܥ ܗܘܳܐ ܒܓܰܘ ܚܽܘܪܒܳܐ܇ ܕܠܳܐ ܢܰܚܬܽܘ̈ܡܳܐ ܠܟܶܢܫ̈ܶܐ ܕܺܐܝܬ ܗ̱ܘܰܘ ܬܰܡܳܢ܇ ܕܡܶܟ ܒܶܐܠܦܳܐ ܫܶܢܬܳܐ ܐ̱ܢܳܫܳܝܬܳܐ܇ ܘܰܐܥܺܝܪܽܘܗ̱ܝ ܘܩܳܡ ܟܐܳܐ ܒܡܰܚܫܽܘ̈ܠܶܐ܇ ܘܰܒܡܶܠܰܬ ܦܽܘܩܳܕܶܗ ܢܳܚ ܝܰܡܳܐ ܕܡܶܬܒܰܥܪܰܪ܀

ܚܰܡܪܳܐ ܚܣܰܪ ܗܘܳܐ ܒܓܰܘ ܩܳܛܢܶܐ ܒܡܶܫܬܽܘܬܳܐ܇ ܕܶܐܙܕܰܡܰܢ ܠܶܗ ܗܽܘ ܘܶܐܡܶܗ ܘܬܰܠܡܺܝܕܰܘ̈ܗ̱ܝ܇ ܘܦܰܩܶܕ ܗܘܳܐ ܕܢܶܡܠܽܘܢ ܐܰܓܳܢ̈ܶܐ܇ ܘܰܠܡܰܝ̈ܳܐ ܚܰܡܪܳܐ ܥܒܰܕ ܐܶܢܽܘܢ܇ ܘܰܬܗܰܪܘ̱ ܗ̱ܘܰܘ ܕܰܣܡܺܝܟܺܝܢ ܒܬܶܕܡܽܘܪܬܳܐ ܕܶܐܣܬܰܥܪܰܬ݀܀

ܛܠܺܝܬܳܐ ܕܡܺܝܬܰܬ݀ ܘܣܺܝܡܰܬ ܗܘܳܬ݀  ܕܬܶܬܥܰܦܶܐ܇ ܥܰܠ ܗܘܳܐ ܨܶܝܕܶܝܗܿ ܗܽܘ ܘܶܐܡܳܗܿ ܥܰܡܳ ܐܰܒܽܘܗܿ܇ ܘܰܩܪܳܐ ܠܳܗܿ ܒܩܳܠܳܐ ܟܰܕ ܐܳܡܰܪ܇ ܛܠܺܝܬܳܐ ܩܽܘܡܝ̱ ܡܶܢ ܫܶܢܰܬ ܡܰܘܬܳܐ܇ ܘܬܶܘܗܰܬ݀ ܐܰܝܟ ܕܡܶܢ ܫܶܢܬܳܐ܇ ܘܰܦܢܳܬ݀ ܠܶܗ ܠܒܶܝܬ ܚܰܝ̈ܶܐ܀

ܝܶܫܽܘܥ ܢܽܘܗܪܳܐ ܕܢܰܚ ܒܰܐܬܪܳܐ ܚܶܫܽܘܟܳܐ܇ ܘܰܐܢܗܰܪ ܣܰܘ̈ܦܶܐ ܘܦܶܢܝ̈ܳܬܳܐ ܒܙܰܠܺܝ̈ܩܰܘܗ̱ܝ܇ ܕܢܰܚ ܢܽܘܗܪܳܐ ܪܰܒܳܐ ܒܓܰܘ ܥܳܠܡܳܐ܇ ܘܶܐܬܩܰܦܰܠ ܠܶܗ ܚܶܫܟܳܐ ܕܛܳܥܝܽܘܬܳܐ܇ ܛܠ̈ܳܠܶܐ ܐܶܬܒܰܕܰܪܘ̱܇ ܡܶܢ ܫܶܡܫܳܐ ܡܰܢܗܰܪ ܟܽܠ܀

ܟܪܶܟ ܗܘܳܐ ܒܰܐܬܪܳܐ ܗܰܘ ܐܳܣܝܳܐ ܫܡܰܝܳܢܳܐ܇ ܘܰܛܥܶܝܢ ܥܽܘܬܪܳܐ ܘܓܰܙܳܐ ܕܠܳܐ ܡܶܬܡܰܣܟܰܢ܇ ܕܪܳܐ ܥܽܘܬܪܶܗ ܘܰܐܥܬܰܪ ܠܰܣܢܺܝ̈ܩܶܐ܇ ܦܬܰܚ ܓܰܙܶܗ ܩܽܘܕܡܰܬ ܡܶܣܟܺܢ̈ܶܐ܇ ܣܒܰܥܘ̱ ܟܰܦܢ̈ܶܐ ܘܚܰܣܺܝܪ̈ܶܐ ܘܒܶܝܬ ܓܰܙܶܗ ܠܳܐ ܚܳܣܰܪ܀

ܠܒܶܝܬ ܝܽܘܐܳܪܳܫ ܟܰܕ ܪܳܕܶܐ ܡܰܐܚܶܐ ܟܽܠ܇ ܐܰܢ̱ܬܬܳܐ ܕܰܕܡܳܗܿ ܩܶܪܒܰܬ݀ ܠܶܗ ܟܰܣܝܳܐܺܝܬ܇ ܘܶܐܚܕܰܬ݀ ܗܘܳܬ݀  ܒܩܰܪܢܳܐ ܕܡܰܪܛܽܘܛܶܗ܇ ܘܢܶܓܒܰܬ݀ ܗܘܳܬ݀  ܡܰܪܕܺܝܬܳܐ ܕܰܕܡܳܗܿ܇ ܘܚܰܘܺܝܬܳܗܿ ܠܬܶܕܡܽܘܪܬܳܐ ܕܶܐܣܬܰܥܪܰܬ ܠܥܺܝܢ ܟܽܠܢܳܫ܀

ܡܶܢ ܚܰܕ ܫܳܢܝܳܐ ܚܕܳܐ ܠܶܓܝܽܘܢ ܛܳܪܶܕ ܗܘܳܐ܇ ܘܠܰܚܕܳܐ ܕܙܶܥܩܰܬ݀ ܚܰܪܪܳܗܿ ܠܒܰܪܬܳܗܿ ܘܰܐܣܝܳܗܿ܇ ܠܝܰܡܺܝܢܳܐ ܕܶܐܣܬܰܪܚܰܬ݀ ܐܰܬܩܶܢ ܗܘܳܐ܇ ܘܰܠܚܰܪܫܳܐ ܘܕܽܘܓܳܐ ܘܰܥܘܺܝܪܳܐ܇ ܦܬܰܚ ܠܶܗ ܐܶܕܢܰܘ̈ܗ̱ܝ ܘܰܫܡܰܥ܇ ܘܳܐܦ ܚܰܣܺܝ ܠܚܰܛܳܝܬܳܐ܀

ܢܰܐܺܝܢ ܬܰܘܕܶܐ ܠܒܰܪ ܚܰܝܳܐ ܕܥܰܠ ܬܰܪܥܳܗܿ܇ ܩܪܳܐ ܠܰܥܠܰܝܡܳܐ ܕܡܶܬܠܰܘܶܐ ܡܶܢ ܩܰܒܪܳܐ܇ ܐܳܦ ܩܳܛܢܳܐ ܬܩܰܪܶܒܝ̱ ܠܶܗ ܟܠܺܝܠܳܐ܇ ܕܰܠܡܰܝ̈ܳܐ ܥܒܰܕ ܚܰܡܪܳܐ ܛܳܒܳܐ܇ ܒܶܝܬ ܥܰܢܝܳܐ ܬܶܩܥܶܐ ܠܶܗ܇ ܒܪܺܝܟ ܕܰܐܚܺܝ ܠܠܳܥܳܙܳܪ܀

ܣܰܓܺܝ ܪܰܒܳܐ ܐܳܡܰܪ ܗܘܳܐ ܝܳܕܰܥ ܟܽܠ܇ ܗܰܝܡܳܢܽܘܬܶܗ ܕܩܶܢܛܪܽܘܢܳܐ ܠܥܺܝܢ ܟܽܠ ܐ̱ܢܳܫ܇ ܠܳܐ ܐܶܫܟܚܿܶܬ ܗܳܕܶܐ ܒܺܐܝܣܪܳܐܺܝܠ܇ ܕܰܐܝܟ ܗܳܕܶܐ ܕܪܰܒܳܐ ܘܫܰܪܺܝܪܳܐ܇ ܘܥܰܠܗܳܕܶܐ ܐܶܡܰܪ ܠܶܗ܇ ܕܰܠܒܶܝܬܳܟ ܡܛܰܝܰܒ ܐ̱ܢܳܐ܀

ܥܢܳܐ ܗܘܳܐ ܫܶܡܥܽܘܢ ܘܶܐܡܰܪ ܗܘܳܐ ܠܦܳܪܽܘܩܰܢ܇ ܕܟܶܢܫ̈ܶܐ ܕܥܰܡܡ̈ܶܐ ܚܕܺܝܪܺܝܢ ܠܳܟ ܘܚܳܒܨܺܝܢ ܠܳܟ܇ ܘܳܐܡܰܪ ܐܰܢ̱ܬ ܕܡܰܢܽܘ ܕܰܩܪܶܒ ܠܺܝ܇ ܘܗܺܝ ܐܰܢ̱ܬܬܳܐ ܐܶܡܪܰܬ݀ ܒܰܪܬܺܝܬܳܐ܇ ܕܶܐܢܳܐ ܡܳܪܝ̱ ܩܶܪܒܶܬ ܠܳܟ܇ ܘܚܰܝܠܳܐ ܪܰܒܳܐ ܫܶܩܠܶܬ܀

ܦܬܰܚ ܗܘܳܐ ܦܽܘܡܶܗ ܗܰܘ ܝܰܡܳܐ ܕܥܽܘܕܪ̈ܳܢܶܐ܇ ܒܰܝܢܳܬ ܟܶܢܫ̈ܶܐ ܟܰܕ ܩܳܥܶܐ ܘܰܡܣܰܒܰܪ܇ ܕܶܐܢܳܐ ܐ̱ܢܳܐ ܢܽܘܗܪܳܐ ܕܒܶܪ̈ܝܳܬܳܐ܇ ܘܶܐܢܳܐ ܐ̱ܢܳܐ ܪܳܥܝܳܐ ܫܰܪܺܝܪܳܐ܇ ܘܶܐܢܳܐ ܐ̱ܢܳܐ ܡܰܒܽܘܥܳܐ ܘܟܽܠ ܕܰܨܗܶܐ ܢܺܐܬܶܐ ܘܢܶܫܬܶܐ܀

ܨܠܽܘܬܳܐ ܐܰܠܶܦ ܗܘܳܐ ܡܳܪܰܢ ܠܬܰܠܡܺܝ̈ܕܰܘܗ̱ܝ܇ ܘܨܰܘܡܳܐ ܚܰܘܺܝ ܒܰܩܢܽܘܡܶܗ ܗܳܟܰܢܳܐ܇ ܐܰܡܺܝܢܺܝܢ ܐ̱ܢܳܫ̈ܳܐ ܒܰܨܠܽܘܳܬܐ܇ ܘܰܒܨܰܘܡܳܐ ܘܰܒܬܰܟܫܶܦܬܳܐ ܬܽܘܒ܇ ܘܶܐܢܳܐ ܥܳܢܶܐ ܐ̱ܢܳܐ ܠܗܽܘܢ܇ ܟܰܕ ܩܳܪܶܝܢ ܘܡܶܬܟܰܫܦܺܝܢ܀

ܩܠܺܝܕܳܐ ܕܚܰܝ̈ܶܐ ܗܘܳܐ ܩܶܠܶܗ ܠܥܰܢܺܝ݁ܕ̈ܶܐ܇ ܘܡܶܢ ܒܶܝܬ ܡܺܝ̈ܬܶܐ ܠܒܶܝܬ ܚܰܝ̈ܶܐ ܡܙܰܡܶܢ ܗܘܳܐ܇ ܗܳܐ ܬܠܳܬܳܐ ܕܢܰܚܶܡ ܒܰܕܶܩܘ̱ ܠܰܢ܇ ܥܰܠ ܐ̱ܪܳܙܳܐ ܪܰܒܳܐ ܕܢܽܘܚܳܡܳܐ܇ ܘܗܳܐ ܡܰܐܚܶܐ ܥܰܢܺܝ̈ܕܶܐ܇ ܥܰܠ ܐܰܪܥܳܐ ܐܶܬܚܰܘܺܝ܀

ܪܟܶܢ ܡܶܢ ܪܰܘܡܶܗ ܗܰܘ ܡܳܪܳܐ ܕܥܶܠܳܝ̈ܶܐ܇ ܘܥܰܠ ܕܡܶܟ ܒܶܐܠܦܳܐ ܐ̱ܢܳܫܳܐܺܝܬ ܒܨܶܒܝܳܢܶܗ܇ ܡܶܢ ܫܶܠܝܳܐ ܝܰܡܳܐ ܐܶܬܒܰܥܪܰܪ܇ ܘܡܰܚܫܽܘ̈ܠܶܐ ܘܓܰܠ̈ܠܶܐ ܬܰܩܺܝܦܺܝܢ܇ ܘܰܒܝܰܕ ܪܶܡܙܳܐ ܕܡܶܠܬܶܗ ܐܶܫܬܰܝܰܢܘ̱ ܡܰܚܫܽܘ̈ܠܶܐ܀

ܫܡܰܥܘ̱ ܦܳܪ̈ܽܘܫܶܐ ܡܰܢܽܘ ܫܰܬܶܩ ܠܝܰܡܳܐ܇ ܐܶܠܳܐ ܪܶܡܙܰܐܗ̱ܘ ܕܰܒܪܳܝܗ̱ܝ ܠܰܬܗܽܘܡܳܐ܇ ܗܳܐ ܡܳܪܳܐ ܕܝܰܡ̈ܡܳܐ ܘܰܕܝܰܒܫܳܐ܇ ܥܰܠ ܐܰܪܥܳܐ ܗܰܠܶܟ ܟܰܕ ܪܳܕܶܐ ܒܶܝܬ ܟܰܪ̈ܟܶܐ ܘܟܽܠܡܕܺܝ̈ܢܳܢ ܟܰܕ ܡܰܐܣܶܐ ܟܽܠ ܟܺܐܒܰܝ̈ܢ܀

ܬܰܘܕܶܐ ܥܺܕܬܳܐ ܘܰܬܝܰܒܶܒܝ̱ ܬܶܫܒܽܘܚܬܳܐ܇ ܠܚܰܬܢܳܐ ܡܫܺܝܚܳܐ ܕܡܰܟܪܳܗܿ ܘܥܰܒܕܳܗܿ ܟܽܠܬܳܐ܇ ܛܪܰܕ ܘܰܐܦܩܳܗܿ ܠܨܶܗܝܽܘܢ ܙܳܢܺܝܬܳܐ܇ ܗܳܝ ܚܰܒܪܰܬ ܥܶܓܠܳܐ ܘܰܬܡܽܘܙܳܐ܇ ܘܥܺܕܬܳܐ ܚܠܳܦܶܝܗܿ ܐܰܬܩܶܢ܇ ܘܫܰܪܰܪ ܗܘܳܐ ܫܶܬܶܐܣܶܝ̈ܗܿ܀

 

ܐܰܘܕܰܘ ܥܰܡܡ̈ܶܐ ܥܽܘܢܺܝܬܳܐ ܒܪܺܝܟ ܕܶܐܬܬܰܚܬܺܝ ܠܘܳܬܰܢ܇ ܘܰܐܣܺܝ ܘܰܐܚܠܶܡ ܟܺܐܒܰܝ̈ܢ

ܒܰܪ ܐܰܠܳܗܳܐ ܕܶܐܬܪܟܶܢ܇ ܘܰܗܘܳܐ ܐ̱ܢܳܫܳܐ ܒܚܽܘܒܶܗ܇ ܘܰܠܒܶܫ ܦܰܓܪܳܐ ܡܶܢ ܓܶܢܣܰܢ܇ ܘܚܰܕܶܬ ܨܰܠܡܶܗ ܕܰܒܠܺܝ܇ ܘܰܐܣܺܝ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܘܦܰܬܰܚ ܥܰܝ̈ܢܶܐ ܕܰܣܡܰܝ̈ܳܐ܇ ܘܫܰܟܶܢ ܠܰܢ ܟܽܠ ܥܽܘܕܪ̈ܳܢܺܝܢ܀

ܢܚܶܬ ܡܶܢ ܪܰܘܡܳܐ ܕܫܽܘܒܚܶܗ܇ ܘܗܰܠܶܟ ܒܰܐܪܥܳܐ ܕܶܐܬܬܠܺܝܛܰܬ݀܇ ܘܟܰܕ ܠܳܐ ܐܰܪܦܺܝ ܟܽܘܪܣܝܶܗ܇ ܨܒܳܐ ܕܢܶܬܚܰܘܶܐ ܥܰܠ ܐܰܪܥܳܐ܇ ܘܕܰܟܺܝ ܓܰܪ̈ܒܶܐ ܒܡܶܠܬܶܗ܇ ܘܚܰܨ ܡܫܰܪ̈ܰܝܳܐ ܒܦܽܘܩܕܳܢܶܗ܇ ܘܦܰܬܰܚ ܣܡܰܝ̈ܳܐ ܒܪܶܡܙܶܗ܀

ܝܰܡܳܐ ܪܰܒܳܐ ܫܦܰܥ ܗܘܳܐ܇ ܘܰܐܫܩܺܝ ܠܰܐܪܥܳܐ ܒܝܰܕ ܡܶܠܰܘ̈ܗ̱ܝ܇ ܗܘܳܐ ܠܶܗ ܐܳܣܝܳܐ ܚܰܟܺܝܡܳܐ܇ ܠܰܡܡܰܚܰܝ̈ܳܐ ܡܰܐܣܶܐ܇ ܒܡܶܠܬܶܗ ܐܰܥܪܶܩ ܟܺܐܒ̈ܶܐ܇ ܒܚܰܝܠܶܗ ܐܰܦܶܩ ܕܰܝܘ̈ܶܐ܇ ܘܦܰܬܰܚ ܣܡܰܝ̈ܳܐ ܘܰܥܘܺܝܪ̈ܶܐ܀

ܠܰܡܡܰܚܰܝܬܳܐ ܕܰܕܡܳܗܿ܇ ܬܪܶܥܣܰܪ ܫܢܰܝ̈ܳܐ ܪܳܕܶܐ܇ ܐܰܣܺܝ ܒܟܶܢܦܳܐ ܕܢܰܚܬܶܗ ܘܝܶܒܫܰܬ݀ ܡܥܺܝܢܳܐ ܕܰܕܡܳܗܿ܇ ܠܒܰܪܬ ܝܽܘܐܳܪܳܫ ܕܡܺܝܬܰܬ݀܇ ܩܪܳܐ ܠܳܗܿ ܒܩܳܠܳܐ ܘܢܰܚܡܳܗܿ܇ ܘܝܰܗܒܳܗܿ ܠܰܐܒܽܘܗܿ ܘܠܶܐܡܳܗܿ܀

 

ܛܰܒܰܥ ܠܠܶܓܝܽܘܢ ܒܝܰܡܳܐ܇ ܘܚܰܪܫܳܐ ܘܰܥܘܺܝܪܳܐ ܣܰܥܪܶܗ܇ ܘܰܠܗܰܘ ܡܫܰܪܝܳܐ ܪܰܡܝܳܐ܇ ܢܽܘܓܪܳܐ ܕܰܫܢܰܝ̈ܳܐ ܫܰܪܰܪ܇ ܦܩܰܕ ܠܶܗ ܕܢܶܛܥܰܢ ܥܰܪܣܶܗ܇ ܘܢܺܐܙܰܠ ܢܶܡܛܶܐ ܠܒܶܝܬܶܗ܇ ܘܟܽܠ ܕܰܚܙܰܘ ܬܗܰܪܘ̱ ܘܶܐܬܕܰܡܰܪܘ̱܀

ܡܺܝܬܳܐ ܚܙܳܐ ܗܘܳܐ ܕܡܶܬܠܰܘܶܐ ܥܰܠ ܬܰܪܥܳܐ ܕܰܚܕܳܐ ܡܕܺܝܢ̱ܬܳܐ܇ ܘܠܰܛܥܺܝ̈ܢܰܝ ܥܰܪܣܳܐ ܟܠܳܐ ܗܘܳܐ܇ ܕܠܳܐ ܢܶܪܕܽܘܢ ܥܰܠ ܡܰܥܒܰܪܬܳܐ܇ ܩܪܶܒ ܨܶܝܕ ܥܰܪܣܶܗ ܕܡܺܝܬܳܐ܇ ܘܰܩܪܳܐ ܒܩܳܠܶܗ ܡܰܐܚܝܳܢܳܐ܇ ܠܳܟ ܐܳܡܰܪ ܐ̱ܢܳܐ ܥܠܰܝܡܳܐ܇ ܩܽܘܡ܀

ܓܰܢ̱ܒܳܪ ܥܳܠܡ̈ܶܐ ܚܙܳܐ ܗܘܳܐ܇ ܠܥܳܠܡܳܐ ܕܰܒܠܺܝ ܒܛܽܘܥܝܰܝ܇ ܘܰܠܫܰܒܳܝܳܐ ܐܰܚܕܶܗ܇ ܘܰܐܣܪܶܗ ܘܰܐܥܕܺܝ ܠܰܫܒܺܝܬܶܗ܇ ܘܒܰܙܶܗ ܠܒܰܝܬܶܗ ܕܰܛܪܽܘܢܳܐ܇ ܕܰܡܪܰܕ ܗܘܳܐ ܥܰܠ ܥܳܒܽܘܕܶܗ܇ ܟܰܕ ܥܰܒܕܶܗ ܕܝܳܫܳܐ ܘܒܶܙܚܳܐ܀

ܚܰܢܩܶܗ ܥܰܘܠܳܐ ܠܥܳܠܡܳܐ܇ ܐܰܝܟ ܕܰܒܝܰܡܳܐ ܣܰܪܝܳܐ܇ ܘܶܐܬܳܐ ܘܕܰܠܠܝܶܗ ܒܰܚܢܳܢܶܗ܇ ܗܰܘ ܥܳܒܽܘܕܳܐ ܕܪ̈ܰܚܡܶܐ܇ ܘܰܐܳܘܫܶܛ ܠܶܗ ܐܺܝܕܳܐ ܕܥܽܘܫܢܳܐ܇ ܒܪܺܝܟ ܗܽܘ ܕܦܰܪܩܶܗ ܠܥܳܠܡܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܪܺܝܟ ܗܽܘ ܐܳܣܝܳܐ ܫܡܰܝܳܢܳܐ܇ ܕܦܰܬܰܚ ܥܰܝ̈ܢܶܐ ܕܰܣܡܰܝ̈ܳܐ܇ ܘܰܐܣܺܝ ܟܺܐܒ̈ܶܐ ܘܟܽܘܪ̈ܗܳܢܶܐ܇ ܕܓܶܢܣܳܐ ܡܚܺܝܠܳܐ ܕܒܶܝܬ ܐܳܕܳܡ܀

ܠܕܽܘܓ̈ܶܐ ܘܚܰܪ̈ܫܶܐ ܐܰܫܡܰܥ ܗܘܳܐ܇ ܘܚܰܣܺܝ ܚܰܘܒ̈ܶܐ ܕܚܰܛܳܝ̈ܶܐ܇ ܘܥܰܠ ܬܰܪܥܳܗܿ ܕܢܰܐܺܝܢ ܡܕܺܝܢ̱ܬܳܐ܇ ܐܰܚܺܝ ܠܰܒܪܳܗܿ ܕܰܐܪܡܶܠܬܳܐ܀

 

ܡܰܘܪܒܳܐ ܕܠܺܠܝܳܐ ܒܩܳܠܳܐ ܕܟܺܝܬܳܐ ܘܰܡܫܰܒܚܬܳܐ

ܘܰܬܪܶܝܢ ܣܡܰܝ̈ܳܐ ܩܳܥܶܝܢ ܗ̱ܘܰܘ܇ ܒܡܶܨܥܰܬ ܐܽܘܪܚܳܐ ܒܰܝܢܳܬ ܟܶܢܫ̈ܶܐ܇ ܕܪܰܚܶܡܥܠܰܝܢ ܒܰܪ ܕܰܘܺܝܕ ܘܰܩܪܶܒ ܠܥܰܝܢܰܝ̈ܗܽܘܢ ܘܶܐܬܦܰܬܰܚ̈ܝ̱ ܘܰܚܙܰܘ ܢܽܘܗܪܳܐ܀

ܡܳܪܰܢ ܒܽܐܘܪܚܳܐ ܪܳܕܶܐ ܗܘܳܐ ܣܡܝܐ܇ ܘܣܰܡܝܳܐ ܕܩܳܥܶܐ ܪܰܚܶܡܥܠܰܝ܇ ܐܰܝܟ ܐܰܠܳܗܳܐ ܕܥܰܠ ܟܽܠ ܫܰܠܺܝܛ܇ ܘܢܽܘܗܪܳܐ ܡܠܳܐ ܗܘܳܐ ܠܒܳܒ̈ܳܬܶܗ ܫܰܪܺܝܪܳܐܺܝܬ܀

ܫܽܘܒܚܳܐ ܠܰܒܪܳܐ ܡܫܺܝܚܳܐ ܕܰܦܫܰܛ ܐܺܝܕܶܗ ܘܝܰܗܒ ܠܗܽܘܢ ܢܽܘܗܪܳܐ܇ ܠܰܬܪܶܝܢ ܣܡܰܝ̈ܳܐ ܕܰܐܦܺܝܣܽܘܗ̱ܝ܇ ܘܰܠܣܰܡܝܳܐ ܕܡܶܢ ܐܺܝܪܺܝܚܽܘ܇ ܘܛܺܝܡܰܝ ܣܰܡܝܳܐ܀

 

ܫܰܒܰܚܘ̱܇ ܟܽܠ ܢܶܫܡ̈ܳܬܳܐ

ܐܺܝܬ ܗܘܳܐ ܣܰܡܝܳܐ܇ ܕܡܶܢ ܟܰܪܣܳܐ ܕܶܐܡܶܗ ܐܶܬܺܝܠܶܕ ܩܥܳܐ ܗܘܳܐ ܒܚܰܫܳܐ܇ ܕܒܰܪ ܕܰܘܺܝܕ ܐܶܬܪܰܚܶܡܥܠܰܝ܀

ܪܰܩ ܥܰܠ ܐܰܪܥܳܐ܇ ܘܰܓܒܰܠ ܛܺܝܢܳܐ ܘܣܳܡ ܠܶܗ ܘܶܐܬܦܰܬܰܚ܀

 

ܒܪܺܝܫܺܝܬ ܐܶܡܰܪ ܐܰܠܳܗܳܐ

ܢܽܘܗܪܳܐ ܡܫܺܝܚܳܐ ܓܒܰܠ ܛܺܝܢܳܐ܇ ܘܛܳܫ ܥܰܠ ܥܰܝܢܰܘ̈ܗ̱ܝ ܕܛܺܝܡܰܝ ܣܰܡܝܳܐ܇ ܘܶܐܡܰܪ ܠܶܗ ܕܙܶܠ ܠܫܺܝܠܽܘܚܳܐ ܘܰܐܫܺܝܓ ܘܚܳܙܶܐ ܐܰܢ̱ܬ܇ ܥܺܝܪ̈ܶܐ ܘܐ̱ܢܳܫ̈ܳܐ ܫܰܒܰܚܘ̱ ܟܰܕ ܐܳܡܪܺܝܢ ܫܰܒܰܚܽܘܢܳܝܗ̱ܝ܀

ܫܰܪܺܝ ܣܰܡܝܳܐ ܡܰܐܟܶܣ ܘܡܰܒܗܶܬ ܠܝܽܘܕܳܝ̈ܶܐ܇ ܕܳܐܡܪܺܝܢ ܗ̱ܘܰܘ ܠܶܗ ܕܫܺܝܠܽܘܚܳܐ ܐܰܣܝܳܟ܇ ܘܳܐܡܰܪ ܗܘܳܐ ܠܗܽܘܢ ܕܰܣܡܰܝ̈ܳܐ ܗܳܐ ܐܺܝܬ ܒܽܐܘܪܺܫܠܶܡ ܇ ܢܺܐܙܠܽܘܢ ܢܫܺܝܓܽܘܢ ܒܫܺܝܠܽܘܚܳܐ ܘܶܐܢ ܡܶܬܦܰܬܚܺܝܢ ܠܰܘ ܝܶܫܽܘܥ ܐܰܣܝܰܢܝ̱܇ ܥܺܝܪ̈ܶܐ ܘܐ̱ܢܳܫ̈ܳܐ܀

ܐܳܡܰܪ ܣܰܡܝܳܐ ܕܗܳܢܳܐ ܝܶܫܽܘܥ ܡܗܰܝܡܶܢ ܐ̱ܢܳܐ ܕܗܽܘ ܐܺܝܬܰܘܗ̱ܝ ܒܪܶܗ ܕܰܐܠܳܗܳܐ܇ ܕܶܐܬܳܐ ܠܡܰܢܗܳܪܽܘ ܠܥܳܠܡܳܐ ܘܰܕܢܶܛܥܰܢ ܟܺܐܒ̈ܶܐ ܕܰܒܢ̈ܰܝ ܐ̱ܢܳܫ̈ܳܐ܇ ܘܗܽܘܝܽܘ ܢܽܘܗܪܳܐ ܫܰܪܺܝܪܳܐ ܕܒܶܗ ܡܶܬܢܰܗܪ̈ܳܢ ܟܽܠ ܕܚܶܫܽܘܟ̈ܺܝܢ܇ ܥܺܝܪ̈ܶܐ܀

ܐܰܢܗܰܪ ܐܳܦܠܰܢ ܐܰܝܟ ܕܰܐܢܰܗܪܬܳܝܗ̱ܝ ܠܗܰܘ ܣܰܡܝܳܐ ܕܡܶܢ ܟܪܶܣ ܐܶܡܶܗ܇ ܘܕܰܟܳܐ ܠܰܢ ܡܶܢ ܛܰܡܐܽܘܬܳܐ܇ ܘܰܐܟܡܳܐ ܕܰܕܟܺܝܬ ܠܓܰܪ̈ܒܶܐ ܘܰܡܟܰܬܡ̈ܶܐ܀

ܒܝܶܫܽܘܥ ܡܳܪܰܢ ܢܗܰܪ̈ܝ̱ ܗܘ̈ܰܝ܇ ܘܰܣܡܰܝ̈ܳܐ ܘܰܥܘܺܝܪ̈ܶܐ܇ ܐܶܬܦܰܬܰܚܘ̱ ܗ̱ܘܰܘ ܥܺܝܪ̈ܶܐ ܘܐ̱ܢܳܫ̈ܳܐ ܫܰܒܰܚܘ̱ ܟܰܕ܀

 

ܕܨܰܦܪܳܐ ܕܪܰܚܶܡܥܠܰܝ

ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܰܢ̱ܬ ܗܽܘ ܟܰܕ ܥܳܒܰܪ ܗܘܰܝܬ܇ ܒܶܝܬ ܟܰܪ̈ܟܶܐ ܘܰܡܕܺܝܢ̈ܳܬܳܐ܇ ܘܟܰܕ ܫܡܰܥ ܛܶܐܒܳܟ܇ ܛܺܝܡܰܝ ܣܰܡܝܳܐ ܕܰܐܦܺܝܣܳܟ܇ ܐܰܠܳܗܳܐ܀

ܐܰܢ̱ܬ ܕܪܰܩܬ ܒܰܐܪܥܳܐ ܘܰܓܒܰܠܬ܇ ܘܛܺܝܢܳܐ ܣܳܡܬ ܠܶܗ ܥܰܠ ܥܰܝܢܰܘ̈ܗ̱ܝ܇ ܘܳܐܦ ܒܳܒ̈ܳܬܳܐ܇ ܥܒܰܕܬ ܠܶܗ ܠܣܰܡܝܳܐ ܕܠܰܝܬ ܗܘܳܐ ܠܶܗ܇ ܐܰܠܳܗܳܐ܀

ܐܰܢ̱ܬ ܗܽܘ ܕܫܰܕܰܪܬ ܠܣܰܡܝܳܐ܇ ܠܫܺܝܠܽܘܚܳܐ ܘܰܒܡܰܝ̈ܘܰܗ̱ܝ ܐܰܫܺܝܓ ܘܰܗܦܰܟ ܠܘܳܬܳܟ܇ ܟܰܕ ܡܰܘܕܶܐ ܗܘܳܐ ܠܪܰܒܽܘܬܳܟ܀

ܐܰܢ̱ܬ ܗܽܘ ܕܶܐܡܰܪܬ ܠܣܰܡܝܳܐ܇ ܕܰܡܗܰܝܡܶܢ ܐܰܢ̱ܬ ܒܗܰܘ ܕܰܐܣܝܳܟ܇ ܘܰܥܢܳܐ ܘܶܐܡܰܪ܇ ܕܠܶܗ ܣܳܓܶܕ ܐ̱ܢܳܐ ܒܰܫܪܳܪܳܐ ܐܰܠܳܗܳܐ܀

ܐܰܢ̱ܬ ܕܡܶܢ ܣܰܡܝܳܐ ܐܶܣܬܓܶܕܬ܇ ܘܒܰܪ ܐܰܠܳܗܳܐ ܐܶܫܬܰܒܰܚܬ܇ ܡܶܢܶܗ ܩܽܘܕܡܰܬ ܥܰܡܳܐ ܠܺܝܛܳܐ ܕܝܽܘܕܳܝ̈ܶܐ ܐܰܠܳܗܳܐ܀

 

ܐܰܠܳܗܝ̱ ܐܰܠܳܗܝ̱ ܒܩܳܠܳܐ ܡܫܺܝܚܳܐ ܕܰܡܠܰܟ ܢܽܘܚܳܡܳܐ

ܡܶܢ ܐܽܘܪܺܫܠܶܡ ܐܺܝܬܰܘܗ̱ܝ ܗܘܳܐ܇ ܘܣܰܡܝܳܐ ܡܰܢ ܐܶܬܺܝܠܶܕ ܗܘܳܐ܇ ܟܰܕ ܫܡܰܥ ܕܝܶܫܽܘܥ ܥܳܒܰܪ ܗܘܳܐ܇ ܪܰܚܶܡܥܠܰܝ ܠܘܳܬܶܗ ܩܥܳܐ܀

ܗܰܒ ܠܺܝ ܢܽܘܗܪܳܐ ܒܰܪ ܕܰܘܺܝܕ܇ ܘܚܽܘܢܰܝܢܝ̱ ܒܪ̈ܰܚܡܰܝܟ ܕܰܐܢ̱ܬ ܒܪܰܝܬܳܢܝ̱܇ ܕܒܶܢܝܳܢܳܐ ܒܢܳܐ ܘܰܡܫܰܟܠܶܠ ܘܟܰܘ̈ܶܐ ܒܰܠܚܽܘܕ ܚܰܣܺܝܪ܀

ܚܙܳܐ ܣܰܡܝܳܐ ܡܶܚܕܳܐ ܢܽܘܗܪܳܐ܇ ܘܫܰܪܺܝ ܡܩܰܝܶܙ ܘܰܡܫܰܒܰܚ ܘܶܐܬܒܠܰܥܘ̱ ܒܰܚܣܳܡܳܐ ܟܳܗ̈ܢܶܐ܇ ܘܰܡܫܰܒܰܚ ܗܘܳܐ ܠܰܡܫܺܝܚܳܐ܀

ܐܶܡܰܪ ܠܗܽܘܢ ܣܰܡܝܳܐ ܠܣܳܦܪ̈ܶܐ܇ ܕܶܐܢ ܕܠܰܝܬ ܗܘܳܐ ܡܶܢ ܐܰܠܳܗܳܐ܇ ܠܳܐ ܡܨܶܐ ܗܘܳܐ ܕܢܶܒܪ̈ܶܐ ܥܰܝ̈ܢܶܐ܇ ܘܒܰܥܓܰܠ ܢܽܘܗܪܳܐ ܢܰܬܩܶܢ ܒܗܶܝܢ܀

ܦܰܢܺܝ ܠܗܽܘܢ ܕܗܳܐ ܣܰܓܺܝ̈ܐܶܐ܇ ܣܡܰܝ̈ܳܐ ܗܳܐ ܐܺܝܬ ܒܽܐܘܪܺܫܠܶܡ ܇ ܐܶܢ ܚܳܙܶܝܢ ܕܰܥܘ̱ ܕܠܰܘ ܝܶܫܽܘܥ܇ ܐܰܣܝܰܢܝ̱ ܐܶܠܳܐ ܫܺܝܠܽܘܚܳܐ܀

ܦܰܢܺܝ ܗܘܳܐ ܠܗܽܘܢ ܕܬܰܠܡܺܝܕܶܗ܇ ܐܺܝܬܰܝ ܡܶܢ ܝܰܘܡܳܢ ܘܰܠܗܰܠ܇ ܘܥܰܡ ܬܰܠܡܺܝ̈ܕܰܘܗ̱ܝ ܢܶܡܶܢܶܐ ܠܺܝ܇ ܕܗܳܟܰܢ ܫܳܐܶܠ ܐ̱ܢܳܐ ܡܶܢܶܗ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܠܰܐܠܳܗܳܐ ܕܒܰܐܬܽܘܢܳܐ

ܟܰܕ ܡܳܪܰܢ ܒܽܐܘܪܚܳܐ ܪܳܕܶܐ ܗܘܳܐ܇ ܘܛܺܝܡܰܝ ܣܰܡܝܳܐ ܩܳܥܶܐ ܗܘܳܐ ܕܡܳܪܝ̱ ܐܶܬܪܰܚܰܡ ܥܠܰܝ܇ ܒܶܢܝܳܢܳܐ ܒܢܶܐ ܘܰܡܫܰܟܠܶܠ܇ ܘܟܰܘ̈ܶܐ ܒܰܠܚܽܘܕ ܚܰܣܺܝܪ̈ܳܢ܇ ܦܬܰܚ ܐܶܢܶܝܢ ܕܰܐܘܕܶܐ ܠܳܟ ܥܰܠ ܛܰܝܒܽܘܬܳܟ܇ ܘܝܰܬܺܝܪ܀

ܘܡܶܚܕܳܐ ܕܰܚܙܰܘ ܝܽܘܕܳܝ̈ܶܐ܇ ܕܰܚܙܳܐ ܗܘܳܐ ܣܰܡܝܳܐ ܢܽܘܗܪܳܐ܇ ܒܰܚܣܳܡܳܐ ܒܠܰܥܘ̱ ܗ̱ܘܰܘ܇ ܘܫܰܐܠܽܘܗ̱ܝ ܗ̱ܘܰܘ ܕܡܰܢܽܘ ܐܰܣܝܳܟ ܘܦܰܢܺܝ ܠܗܽܘܢ ܕܝܶܫܽܘܥ ܐܰܣܝܰܢܝ̱ ܘܗܳܫܳܐ ܝܶܕܥܿܶܬ܇ ܕܰܒܪܶܗ ܕܰܐܠܳܗܳܐ ܐܺܝܬܰܘܗ̱ܝ܇ ܘܝܰܬܺܝܪ܀

ܐܳܡܪܺܝܢ ܗ̱ܘܰܘ ܝܽܘܕܳܝ̈ܶܐ ܠܣܰܡܝܳܐ܇ ܗܳܫ ܝܺܕܰܥ ܕܬܰܠܡܺܝܕܶܗ ܐܰܢ̱ܬ ܫܰܪܺܝܪܳܐܺܝܬ܇ ܘܦܰܢܺܝ ܠܗܽܘܢ ܕܬܰܠܡܺܝܕܶܗ ܐ̱ܢܳܐ܇ ܘܡܶܢܝܳܢܳܐ ܒܓܽܘܕܳܐ ܕܬܰܠܡܺܝ̈ܕܰܘܗ̱ܝ܇ ܘܰܐܢ̱ܬܽܘܢ ܕܶܝܢ܇ ܠܳܐ ܢܗܶܐ ܠܟܽܘܢ ܡܶܢܳܬܳܐ ܥܰܡܶܗ܇ ܝܰܬܺܝܪ܀

ܟܰܕ ܫܡܰܥ ܗܘܳܐ ܗܳܠܶܝܢ ܡ̈ܶܠܶܐ܇ ܡܶܚܕܳܐ ܒܰܪܶܟ ܘܰܣܓܶܕ ܠܶܗ ܠܝܶܫܽܘܥ ܡܫܺܝܚܳܐ܇ ܘܶܐܡܰܪ ܕܒܳܟ ܗܽܘ ܡܗܰܝܡܶܢ ܐ̱ܢܳܐ܇ ܘܠܰܐܒܳܐ ܕܫܰܠܚܳܟ ܣܳܓܶܕ ܐ̱ܢܳܐ܇ ܘܝܳܕܰܥ ܐ̱ܢܳܐ ܕܰܒܪܶܗ ܚܰܝܳܐ ܕܰܐܠܳܗܳܐ ܐܰܢ̱ܬ܇ ܝܰܬܺܝܪ܀

ܒܫܽܘܫܶܦܳܐ ܕܫܰܕܰܪ ܝܰܘܣܶܦ܇ ܠܰܐܒܽܘܗ̱ܝ ܝܰܥܩܽܘܒ ܟܺܐܢܳܐ ܒܶܗ ܚܙܳܐ ܢܽܘܗܪܳܐ ܒܝܰܡܺܝܢܶܗ ܕܒܰܪ ܐܰܠܳܗܳܐ܇ ܘܒܳܪܽܘܝܳܐ ܕܛܳܫ ܠܶܗ ܠܣܰܡܝܳܐ܇ ܚܙܳܐ ܢܽܘܗܪܳܐ܇ ܘܰܐܟܘܳܬܗܽܘܢ ܢܰܢܗܰܪ ܠܟܽܠܰܢ܀

ܠܰܐܠܳܗܳܐ ܕܥܺܝܪ̈ܶܐ ܡܫܰܒܚܺܝܢ ܠܶܗ܇ ܘܠܳܐ ܡܨܶܝܢ ܕܰܠܘܰܥܕܶܗ ܢܶܬܩܰܪܒܽܘܢ ܐܰܝܟ ܕܠܳܐ ܢܺܐܩܕܽܘܢ܇ ܡܶܢ ܛܺܝܡܰܝ ܣܰܡܝܳܐ. ܒܫܽܘܩܶܝ̈ܗܿ ܕܽܐܘܪܺܫܠܶܡ ܡܶܬܬܰܘܕܶܐ ܗܘܳܐ܇ ܘܝܽܘܕܳܝ̈ܶܐ ܥܳܫܩܺܝܢ ܠܶܗ ܕܡܰܘܕܶܐ ܒܝܶܫܽܘܥ܇ ܝܰܬܺܝܪ܀

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܗܰܘ ܕܰܛܥܺܝܢ ܟܽܠ ܒܶܪ̈ܝܳܬܳܐ

ܛܺܝܡܰܝ ܣܰܡܝܳܐ ܩܳܥܶܐ ܗܘܳܐ܇ ܕܒܰܪ ܕܰܘܺܝܕ ܪܰܚܶܡܥܠܰܝ܇ ܘܰܦܬܰܚ ܠܺܝ ܥܰܝܢ̈ܰܝ ܕܶܐܚܙܶܝܟ܇ ܘܶܐܙܡܰܪ ܫܽܘܒܚܳܐ ܠܛܰܝܒܽܘܬܳܟ܇ ܕܰܐܢ̱ܬܽܗ̱ܘ ܐܳܣܝܳܐ ܕܟܽܠ ܟܺܐܒܰܝ̈ܢ܇ ܘܥܳܨܽܘܒܳܐ ܕܰܡܡܰܚܰܝ̈ܳܐ܇ ܦܰܢܳܐ ܠܺܝ ܫܶܐܠ̈ܳܬܝ̱ ܒܰܥܓܰܠ܇ ܕܰܐܘܕܶܐ ܠܳܟ ܥܰܠ ܛܰܝܒܽܘܬܳܟ܀

ܐܳܡܪܺܝܢ ܝܽܘܕܳܝ̈ܶܐ ܠܣܰܡܝܳܐ܇ ܕܠܰܘ ܐܰܢ̱ܬܽܗ̱ܘ ܛܺܝܡܰܝ ܣܰܡܝܳܐ܇ ܐܶܠܳܐ ܡܶܕܡܳܐ ܕܳܡܶܝܬ ܠܶܗ܇ ܗܰܘ ܣܰܡܝܳܐ ܗܘܳܐ ܘܐܰܢ̱ܬ ܚܳܙܶܝܬ܇ ܗܽܘ ܕܶܝܢ ܝܰܬܺܝܪ ܩܳܥܶܐ ܗܘܳܐ܇ ܕܶܐܢܳܐ ܐ̱ܢܳܐ ܐܳܘ ܛܳܠܽܘܡ̈ܶܐ܇ ܕܦܰܬܰܚ ܠܺܝ ܥܰܝܢ̈ܰܝ ܘܰܚܙܺܝܿܬ܇ ܒܝܰܕ ܛܺܝܢܳܐ ܕܛܳܫ ܠܺܝ ܘܰܚܙܺܝܿܬ܀

ܒܳܥܽܘܬܳܐ ܕܰܬܪܶܝܢ ܣܡܰܝ̈ܳܐ܇ ܩܰܒܶܠܬ ܕܡܶܬܟܰܫܦܺܝܢ ܗ̱ܘܰܘ ܠܳܟ܇ ܟܰܕ ܐܰܢ̱ܬ ܒܽܐܘܪܚܳܐ ܪܳܕܶܐ ܗܘܰܝܬ܇ ܫܳܐܠܺܝܢ ܗ̱ܘܰܘ ܢܽܘܗܪܳܐ ܡܶܢܳܟ܇ ܟܰܕ ܩܪܰܝܬ ܐܶܢܽܘܢ ܠܓܰܘ ܒܰܝܬܳܐ܇ ܢܽܘܗܪܳܐ ܝܰܗܒܬ ܐܰܝܟ ܫܶܐܠ̈ܳܬܗܽܘܢ܇ ܘܶܐܬܦܰܬܰܚ̈ܰܝ̱ ܗܘ̈ܰܝ ܥܰܝܢܰܝ̈ܗܽܘܢ ܘܫܰܪܺܝܘ ܙܳܡܪܺܝܢ ܬܶܫܒܽܘܚܬܳܐ܀

 

ܡܶܢ ܫܡܰܝ̈ܳܐ ܡܰܠܰܐܟ̈ܶܐ

ܩܪܶܒܘ̱ ܬܰܠܡܺܝ̈ܕܶܐ ܠܘܳܬ ܡܳܪܰܢ܇ ܘܰܡܫܰܐܠܺܝܢ ܗ̱ܘܰܘ ܠܶܗ ܘܳܐܡܪܺܝܢ܇ ܕܗܳܢܳܐ ܚܛܳܐ ܐܰܘ ܐܰܒܳܗܰܘ̈ܗ̱ܝ ܕܣܰܡܝܳܐ ܐܶܬܺܝܠܶܕ܇ ܘܦܰܢܺܝ ܠܗܽܘܢ ܕܠܳܐ ܗܽܘ ܚܛܳܐ ܗܘܳܐ܇ ܘܠܳܐ ܐܰܒܳܗܰܘ̈ܗ̱ܝ ܐܳܦ ܐܰܣܟܶܠܘ̱܇ ܐܶܠܳܐ ܐܰܝܟܰܢ ܕܢܶܫܬܰܒܰܚ ܡܳܪܝܳܐ ܐܰܠܳܗܳܐ܀

ܛܳܠܡܺܝܢ ܗ̱ܘܰܘ ܠܶܗ ܝܽܘܕܳܝ̈ܶܐ܇ ܘܳܐܡܪܺܝܢ ܕܠܰܝܬܳܟ ܗܰܘ ܣܰܡܝܳܐ ܕܟܽܠܝܽܘܡ ܚܳܕܰܪ ܗܘܳܐ܇ ܘܟܳܪܶܟ ܒܫܽܘܩܶܝ̈ܗܿ ܕܽܐܘܪܺܫܠܶܡ܇ ܘܗܽܘ ܐܳܡܰܪ ܗܘܳܐ ܕܶܐܢܳܐ ܐ̱ܢܳܐ܇ ܘܝܶܫܽܘܥ ܢܳܨܪܳܝܳܐ ܐܰܣܝܰܢܝ̱܇ ܘܰܒܒܺܝܫܽܘܬ ܛܳܠܽܘܡܽܘܬܗܽܘܢ܇ ܠܗܳܕܶܐ ܡܕܰܓܠܺܝܢ ܗ̱ܘܰܘ܀

 

ܡܰܘܪܒܳܐ ܒܩܳܠܳܐ ܫܠܳܡ ܠܶܟܝ̱ ܟܢܺܝܟܬܳܐ

ܠܳܟ ܐܰܠܳܗܳܐ ܕܐܶܫܬܰܕܰܪܬ ܡܶܢܶܗ ܕܰܐܒܳܐ ܠܦܽܘܪܩܳܢܶܗ ܕܥܳܠܡܳܐ ܗܳܢܳܐ܇ ܘܡܶܢ ܚܶܫܽܘܟܳܐ ܠܢܽܘܗܪܳܐ ܩܪܰܬܳܝܗ̱ܝ ܠܣܰܡܝܳܐ ܒܛܺܝܢܳܐ ܦܬܰܚܬ ܥܰܝܢܰܘ̈ܗ̱ܝ܀

ܠܥܶܠ ܡܶܢ ܗܰܘܢܳܐ ܕܟܽܠܗܽܘܢ ܒܪ̈ܰܝܳܐ ܣܥܰܪܬ ܬܶܕܡܽܘܪܬܳܐ ܝܶܫܽܘܥ ܦܳܪܽܘܩܰܢ܇ ܕܦܰܬܰܚܬ ܥܰܝܢܰܘ̈ܗ̱ܝ ܕܗܰܘ ܣܰܡܝܳܐ܇ ܘܢܽܘܗܪܳܐ ܫܰܟܶܢܬ ܠܶܗ ܡܳܪܰܢ܇ ܒܪܺܝܟܺܝܢ ܪ̈ܰܚܡܰܝܟ ܕܫܰܠܚܽܘܟ ܨܶܝܕ ܓܶܢܣܰܢ܀

ܠܛܺܝܡܰܝ ܣܰܡܝܳܐ ܦܰܬܰܚܬ ܥܰܝܢܰܘ̈ܗ̱ܝ ܒܡܶܠܬܳܟ ܚܰܝܬܳܐ ܝܶܫܽܘܥ ܦܳܪܽܘܩܰܢ܇ ܘܠܰܣܡܰܝ̈ܳܐ ܬܪܶܝܢ ܕܰܦܓܰܥܘ̱ ܒܳܟ ܢܽܘܗܪܳܐ ܠܒܳܒ̈ܳܬܗܽܘܢ ܫܰܟܶܢܬ܇ ܘܰܠܣܰܡܝܳܐ ܕܡܶܢ ܐܺܝܪܺܝܚܽܘ܇ ܦܰܬܰܚܬ ܠܶܗ ܥܰܝܢܰܘ̈ܗ̱ܝ ܘܟܽܠܗܽܘܢ ܙܡܰܪܘ̱ ܫܽܘܒܚܳܟ܀

ܫܽܘܒܚܳܐ ܢܰܣܶܩ ܠܰܒܪܳܐ܇ ܕܰܒܝܰܕ ܪ̈ܰܚܡܰܘܗ̱ܝ ܦܰܬܰܚ ܥܰܝܢ̈ܰܝ ܣܡܰܝ̈ܳܐ܇ ܚܽܘܢ ܠܰܣܡܰܝ̈ܳܐ ܕܰܒܟܶܢܫܰܢ ܢܽܘܗܪܳܐ ܫܰܟܶܢ ܠܣܰܡܝܽܘܬܗܽܘܢ܇ ܕܢܰܣܩܽܘܢ ܫܽܘܒܚܳܐ ܠܪ̈ܰܚܡܶܐ ܕܛܰܝܒܽܘܬܳܟ܀

 

ܕܫܰܒܰܚܘ̱ ܥܰܒܕܰܘ̈ܗ̱ܝ܇ ܠܳܟ ܗܽܘ ܡܒܰܪܟܺܝܢ

ܟܝ̈ܳܢܶܐ ܟܽܠܗܽܘܢ ܕܰܐܪ̈ܥܳܢܶܐ܇ ܘܕܺܝܠܳܟ ܐܶܢܶܝܢ܇ ܟܽܠ ܒܽܘܪ̈ܟܳܬܳܐ ܒܪܳܐ ܕܰܐܠܳܗܳܐ܀

ܡܪܰܚܡܳܢܽܘܬܶܗ܇ ܕܕܰܘܺܝܕ ܐܰܒܽܘܟ ܡܶܬܚܰܙܝܳܐ ܒܳܟ܇ ܕܳܐܦ ܠܳܐ ܠܣܳܐܢܰܘ̈ܗ̱ܝ܇ ܟܠܳܐ ܛܰܝܒܽܘܬܶܗ ܟܰܕ ܪܳܕܦܺܝܢ ܠܶܗ܀

ܟܰܕ ܠܳܐ ܩܳܪܶܝܢ ܠܶܗ܇ ܡܓܰܠܰܝ̈ ܡܽܘܫܶܐ ܘܠܳܐ ܕܰܢܒܺܝ̈ܶܐ܇ ܘܠܳܐ ܫܚܰܩ ܣܶܦܪܳܐ܇ ܝܰܕܥܶܗ ܠܰܒܪܳܐ ܕܠܳܐ ܦܽܘܠܳܓܳܐ܀

ܡܫܰܬܩܺܝܢ ܗ̱ܘܰܘ ܠܶܗ܇ ܘܗܽܘ ܥܰܠ ܟܽܠܶܗ ܣܰܓܺܝ ܡܰܘܣܶܦ܇ ܫܳܛ ܟܐܳܬ ܥܰܡܳܐ܇ ܘܩ̈ܳܠܶܐ ܪ̈ܳܡܶܐ ܫܕܳܐ ܒܰܡܫܺܝܚܳܐ܀

ܗܳܝܕܶܝܢ ܡܳܪܰܢ܇ ܪܰܩ ܥܰܠ ܐܰܪܥܳܐ ܒܚܰܟܺܝܡܽܘܬܶܗ܇ ܘܰܓܒܰܠ ܛܺܝܢܳܐ܇ ܘܛܳܫ ܥܰܠ ܥܰܝ̈ܢܰܘܗ̱ܝ ܘܰܚܙܳܐ ܢܽܘܗܪܳܐ܀

ܠܳܐ ܚܰܠܶܦ ܗܘܳܐ܇ ܓܒܺܝܠܬܳܐ ܕܢܶܥܒܶܕ ܥܰܝ̈ܢܶܐ ܗܳܝܕܶܝܢ܇ ܡܶܢܶܗ ܕܛܺܝܢܳܐ܇ ܐܰܝܟ ܝܳܠܽܘܕܶܗ ܟܰܕ ܒܪܳܝܗ̱ܝ ܠܳܐܕܳܡ܀

ܡܶܢܶܗ ܕܝܰܠܕܳܐ܇ ܘܡܶܢ ܓܰܘ ܟܰܪܣܳܐ ܣܡܶܐ ܗܘܳܐ ܛܺܝܡܰܝ܇ ܘܠܰܘ ܢܶܟܝܳܢܳܐ ܦܓܰܥ ܒܶܗ ܒܥܳܠܡܳܐ܇ ܘܰܗܘܳܐ ܒܥܳܠܡܳܐ ܘܰܗܘܳܐ ܣܰܡܝܳܐ܀

ܒܕܰܓܳܠܽܘܬܳܐ܇ ܐܶܓܡܶܕܘ ܢܶܙܟܽܘܢ ܥܰܘܳܠܳܐܺܝܬ܇ ܘܳܐܡܪܺܝܢ ܕܠܰܝܬܰܝܟ܇ ܗܰܘ ܩܳܥܶܐ ܗܘܳܐ ܕܶܐܢܳܐ ܐܺܝܬܰܝ܀

 

ܛܽܘܒܰܝܗܽܘܢ ܠܡܶܣܟܺܢ̈ܶܐ ܩܳܠܳܐ ܐܶܬܕܰܟܪܰܝܢ ܡܳܪܝܳܐ

ܐܳܡܪܺܝܢ ܟܳܗ̈ܢܶܐ ܡܽܘܢ܇ ܐܳܡܰܪ ܐܰܢ̱ܬ ܕܰܐܢ̱ܬܽܗ̱ܘ܇ ܡܰܢ ܦܰܬܰܚ ܥܰܝܢܰܝ̈ܟ܇ ܕܬܶܚܙܶܐ ܐܶܢ ܛܺܝܡܰܝ ܐܺܝܬܰܝܟ܀

ܐܳܡܪܺܝܢ ܫܺܝܠܽܘܚܳܐ܇ ܘܡܰܝ̈ܳܐ ܕܒܶܝܬ ܡܳܪܝܳܐ܇ ܝܰܗܒ ܠܳܟ ܘܰܚܙܰܝܬ܇ ܠܡܽܘܢ ܡܩܰܠܣܰܬ ܠܒܰܪ ܢܰܓܳܪܳܐ܀

ܣܡܰܝ̈ܳܐ ܣܰܓܺܝ ܐܺܝܬ܇ ܕܢܺܐܙܠ̱ܽܘܢ ܘܰܢܫܺܝܓܽܘܢ܇ ܘܶܐܢܗܽܘ ܕܚܳܙܶܝܢ ܕܰܥܘ̱ ܠܟܽܘܢ ܕܠܰܘ ܝܶܫܽܘܥ ܐܰܣܝܰܢܝ̱܀

ܐܶܢ ܚܰܛܳܝܰܐܗ̱ܘ ܠܳܐ܇ ܝܳܕܰܥ ܐ̱ܢܳܐ ܟܳܗ̈ܢܶܐ܇ ܚܕܳܐ ܝܳܕܰܥ ܐ̱ܢܳܐ܇ ܕܣܰܡܝܳܐ ܗܘܺܝܿܬ ܘܗܽܘ ܦܰܬܰܚ ܥܰܝܢ̈ܰܝ܀

ܢܶܒܗܰܬ ܣܳܛܳܢܳܐ܇ ܣܳܢܐܰܢ ܐܰܝܟ ܕܰܒܗܶܬܘ̱ ܟܳܗ̈ܢܶܐ ܠܺܝ̈ܛܶܐ܇ ܒܦܶܬܓܳܡܰܘ̈ܗ̱ܝ ܕܛܺܝܡܰܝ ܣܰܡܝܳܐ܀

ܫܽܘܒܚܳܐ ܠܰܡܫܺܝܚܳܐ܇ ܕܰܐܝܟ ܝܳܠܽܘܕܶܗ ܥܒܰܕ܇ ܕܡܶܢܶܗ ܕܛܺܝܢܳܐ ܒܪܳܐ ܥܰܝ̈ܢܶܐ ܠܛܺܝܡܰܝ ܘܰܚܙܳܐ܀

 

ܩܳܠܳܐ ܕܨܰܦܪܳܐ܇ ܩܳܠܳܐ ܩܽܘܩܳܝܳܐ

ܡܳܪܰܢ ܒܽܐܘܪܚܳܐ ܪܳܕܶܐ ܗܘܳܐ܇ ܥܰܡ ܬܰܠܡܺܝ̈ܕܰܘܗ̱ܝ ܘܛܺܝܡܰܝ ܣܰܡܝܳܐ ܩܳܥܶܐ ܗܘܳܐ ܕܡܳܪܝ̱ ܐܶܬܪܰܚܶܡܥܠܰܝ܇ ܚܰܣܺܝܪ ܢܽܘܗܪܳܐ ܢܶܦܩܿܶܬ ܡܶܢ ܟܰܪܣܳܐ܇ ܗܰܒ ܠܺܝ ܐܶܚܙܶܐ ܘܰܐܘܕܶܐ  ܠܛܰܝܒܽܘܬܳܟ܇ ܘܶܐܙܡܰܪ ܠܳܟ ܫܽܘܒܚܳܐ ܦܰܐܝܳܐ ܟܰܕ ܚܳܕܶܐ ܐ̱ܢܳܐ܇ ܒܪܺܝܟ ܕܶܐܬܳܐ ܘܰܦܬܰܚ ܟܰܘ̈ܶܐ ܕܒܶܝܬܳܐ ܕܰܐܒܽܘܗ̱ܝ ܒܢܳܐ܇ ܗ ܘ ܗ܀

ܐܳܡܪܺܝܢ ܝܽܘܕܳܝ̈ܶܐ ܠܣܰܡܝܳܐ ܠܰܘ ܝܶܫܽܘܥ ܐܰܣܝܳܟ܇ ܒܡܰܝ̈ܳܐ ܕܫܺܝܠܽܘܚܳܐ ܐܰܫܺܝܓܬ ܘܥܰܝܢܰܝ̈ܟ ܢܽܘܗܪܳܐ ܚܙ̈ܰܝ܇ ܘܳܐܡܰܪ ܣܰܡܝܳܐ ܕܩܰܝܳܡ ܫܺܝܠܽܘܚܳܐ܇ ܘܺܐܝܬ ܒܽܐܘܪܺܫܠܶܡ ܣܡܰܝ̈ܳܐ ܣܰܓܺܝ̈ܐܶܐ܇ ܐܶܢ ܐܰܫܺܝܓܘ̱ ܘܰܚܙܰܘ ܢܽܘܗܪܳܐ ܠܰܘ ܝܶܫܽܘܥ ܐܰܣܝܰܢܝ̱܇ ܘܶܐܠܳܐ ܚܪܶܡ ܗܽܘ ܟܽܠ ܕܳܐܡܰܪ ܕܠܰܘ ܝܶܫܽܘܥ ܐܰܣܝܰܢܝ̱ ܗ ܘ ܗ܀

 

ܐ̱ܚܪܺܢܳܐ ܒܩܳܠܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܠܰܣܡܰܝ̈ܳܐ ܐܳܦ ܠܰܥܺܘܝܪ̈ܶܐ ܐܶܬܳܐ ܕܢܶܦܬܰܚ܇ ܐܳܣܝܳܐ ܕܪ̈ܰܚܡܶܐ ܘܕܰܚܢܳܢܳܐ܇ ܘܰܚܡܰܠ ܐܶܢܽܘܢ ܠܰܛܝܳܪܶܗ܇ ܕܺܐܝܬܶܝܗܿ ܥܺܕܬܳܐ܇ ܗܳܝ ܕܩܰܢܳܗܿ ܒܰܕܡܶܗ ܚܰܝܳܐ܇ ܗ ܘܒܶܗ ܐܶܬܢܰܗܰܪܘ̱܀

ܫܽܘܒܚܳܐ ܠܶܗ ܠܳܐܣܝܳܐ ܛܳܒܳܐ ܕܶܐܬܳܐ ܕܢܰܐܣܶܐ ܟܽܘܪ̈ܗܳܢܶܐ ܕܰܡܡܰܚܰܝ̈ܳܐ܇ ܘܢܶܥܨܽܘܒ ܠܰܐܝܠܶܝܢ ܕܬܺܒܝܪܺܝܢ ܘܢܶܩܪܶܐ ܠܡܳܟܣ̈ܶܐ܇ ܘܢܶܦܬܰܚ ܥܰܝ̈ܢܶܐ ܕܰܣܡܰܝ̈ܳܐ܇ ܗ ܒܪܺܝܟ ܡܰܢܗܰܪ ܟܽܠ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܢܽܘܗܪܳܐ ܡܫܺܝܚܳܐ ܕܢܰܚ ܡܶܢ ܪܰܘܡܳܐ ܘܗܰܠܶܟ ܒܰܐܪܥܳܐ܇ ܕܬܶܬܢܰܗܰܪܝ̱ ܒܶܗ ܒܪܺܝܬܳܐ ܕܚܶܫܟܰܬ݀ ܡܶܢ ܛܳܥܝܽܘܬܳܐ܇ ܥܒܰܕ ܐܳܣܰܘ̈ܳܬܳܐ ܘܚܰܘܺܝ ܚܰܝ̈ܠܶܐ ܕܰܐܠܳܗܽܘܬܶܗ܇ ܘܰܐܪܓܶܫ ܗܘܳܐ ܒܶܗ ܟܽܠܶܗ ܥܳܠܡܳܐ ܕܗܽܘܝܽܘ ܡܳܪܶܗ܀

ܪܰܩ ܗܘܳܐ ܒܰܐܪܥܳܐ ܘܰܓܒܰܠ ܛܺܝܢܳܐ ܘܛܳܫ ܥܰܠ ܥܰܝܢܰܘ̈ܗ̱ܝ܇ ܘܣܳܡ ܒܳܒ̈ܳܬܳܐ ܒܥܰܝ̈ܢܶܐ ܓܠܺܝ̈ܙܶܐ ܡܶܢ ܢܰܗܺܝܪ̈ܶܐ܇ ܐܰܘܣܶܦ ܪ̈ܶܓܫܶܐ ܐܰܝܟ ܐܰܠܳܗܳܐ ܕܥܰܠ ܟܽܠ ܫܰܠܺܝܛ ܒܪܺܝܟ ܗܽܘ ܕܰܓܠܳܐ ܚܰܝܠܶܗ ܪܰܒܳܐ ܒܥܰܝ̈ܢܶܐ ܕܣܰܡܝܳܐ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܡܳܪܶܗ ܕܪܰܡܫܳܐ

ܒܒܰܝܬܶܗ ܕܙܰܟܰܝ ܚܰܝ̈ܶܐ ܦܰܠܶܓ ܗܘܳܐ܇ ܒܒܰܝܬܶܗ ܕܫܶܡܥܽܘܢ ܚܰܘܒ̈ܶܐ ܫܳܒܶܩ ܗܘܳܐ܇ ܒܓܰܘ ܐܽܘܪܺܫܠܶܡ ܣܡܰܝ̈ܳܐ ܦܰܬܰܚ ܗܘܳܐ܇ ܘܰܒܒܶܝܬ ܥܰܢܝܳܐ ܡܺܝ̈ܬܶܐ ܢܰܚܶܡ ܗܘܳܐ܀

ܥܺܝܪܳܐ ܕܡܶܡܬܽܘܡ ܥܺܝܪ ܗܽܘ ܘܠܳܐ ܕܳܡܶܟ܇ ܕܡܶܟ ܒܰܣܦܺܝܢ̱ܬܳܐ ܐ̱ܢܳܫܳܐܺܝܬ ܕܰܨܒܳܐ܇ ܘܬܰܠܡܺܝ̈ܕܶܐ ܩܪܶܒܘ̱ ܗ̱ܘܰܘ ܕܶܝܢ ܘܰܐܥܺܝܪܽܘܗ̱ܝ܇ ܩܽܘܡ ܠܳܟ ܪܰܒܰܢ ܚܙܺܝ ܕܗܳܐ ܐܳܒܕܺܝܢܰܢ܀

ܒܳܥܽܘܬܳܐ ܝܰܥܩܽܘܒܳܝܬܳܐ

ܟܰܕ ܥܳܒܰܪ ܗܘܳܐ ܒܶܝܬ ܫܳܡܪ̈ܳܝܶܐ ܐܳܦ ܒܰܓܠܺܝܠܳܐ܇ ܘܰܩܪܶܒ ܕܢܶܥܽܘܠ ܠܰܡܕܺܝܢ̱ܬܳܐ ܚܕܳܐ ܕܺܐܝܬ ܗܘܳܐ ܬܰܡܳܢ܇ ܥܶܣܪܳܐ ܓܰܪ̈ܒܶܐ ܐܰܪܥܽܘܗ̱ܝ ܬܰܡܳܢ ܘܩܳܡܘ̱ ܡܶܢ ܪܽܘܚܩܳܐ܇ ܘܫܰܪܺܝܘ ܩܳܥܶܝܢ ܟܰܕ ܡܶܬܟܰܫܦܺܝܢ ܪܰܥܽܘܡܳܐܺܝܬ܀

ܘܟܰܕ ܐܳܙܠ̱ܺܝܢ ܐܢ̱ܬܽܘܢ ܫܽܘܒܚܳܐ ܢܶܪܥܰܡ ܡܶܢ ܦܽܘܡܰܝ̈ܟܽܘܢ܇ ܠܗܰܘ ܚܰܢܳܢܳܐ ܕܰܨܒܳܐ ܘܰܐܚܠܶܡ ܟܽܘܪ̈ܗܳܢܰܝܟܽܘܢ. ܩܰܪܶܒܘ̱ ܕܳܫܢ̈ܶܐ ܕܫܽܘܒܚܳܐ ܦܰܐܝܳܐ ܒܠܶܫܳܢܰܝ̈ܟܽܘܢ܇ ܠܡܳܪܳܐ ܛܳܒܳܐ ܕܪܰܣ ܚܽܘܠܡܳܢܳܐ ܥܰܠ ܦܰܓܪ̈ܰܝܟܽܘܢ܀

 

ܫܠܶܡ ܕܚܰܕ ܒܫܰܒܳܐ ܫܬܺܝܬܳܝܳܐ

ܢܶܬܚܰܣܽܘܢ ܚܰܘܒܰܘ̈ܗ̱ܝ ܘܰܚܛܳܗܰܘ̈ܗ̱ܝ ܕܟܳܬܽܘܒܳܐ܇ ܘܕܰܐܒܳܗ̈ܰܘ̱ܝ ܘܰܕܥܰܢܺܝ̈ܕܰܘܗ̱ܝ ܘܰܕܝܳܨܽܘܦܳܐ܇ ܒܰܨܠܽܘܬ ܝܳܠܕܰܬ ܐܰܠܳܗܳܐ ܡܰܪܝܰܡ ܘܰܕܟܽܠܗܽܘܢ ܩܰܕܺܝܫ̈ܶܐ܇ ܒܰܫܢܰܬ ܐܨܦܐ ܡ

 

ܬܽܘܒ ܕܪܰܡܫܳܐ ܕܰܬܪܶܝܢ ܒܫܰܒܳܐ ܕܫܰܒܬܳܐ ܕܽܐܘܫܰܥܢ̈ܶܐ

ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܠܳܐ ܬܶܥܽܘܠ ܠܕܺܝܢܳܐ

ܥܺܝܪ̈ܶܐ ܘܡܰܠܰܐܟ̈ܶܐ܇ ܘܟܶܢܫ̈ܶܐ ܕܪ̈ܽܘܚܳܢܶܐ܇ ܬܗܰܪܘ̱ ܗ̱ܘܰܘ ܒܡܽܘܟܳܟܳܟ܇ ܪܳܡܳܐ ܕܶܐܬܬܰܚܬܺܝ܀

ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܒܥܽܘܡܩܳܐ܇ ܐܰܙܥܶܩܘ̱ ܝܰܠܽܘ̈ܕܶܐ܇ ܠܡܰܠܟܳܐ ܕܶܐܬܳܐ ܗܘܳܐ܀

ܒܣܰܘ̈ܟܶܐ ܕܡܶܢ ܙܰܝܬܳܐ܇ ܝܰܠܽܘ̈ܕܶܐ ܩܰܠܣܽܘܗ̱ܝ܇ ܠܰܒܪܳܐ ܕܰܐܠܳܗܳܐ܇ ܒܝܰܘܡܳܐ  ܕܽܐܘܫܰܥܢ̈ܶܐ܀

ܟܺܠܝ̈ܠܶܐ ܕܩܽܘܠܳܣ̈ܶܐ ܓܕܰܠܘ̱ ܗ̱ܘܰܘ ܝܰܘܡܳܢܳܐ܇ ܫܰܒܪ̈ܶܐ ܘܝܰܠܽܘ̈ܕܶܐ܇ ܘܩܰܪܶܒܘ̱ ܠܒܰܪ ܕܰܘܺܝܕ܀

ܢܰܚܬܰܝ̈ܗܽܘܢ ܫܰܘܝܽܘ܇ ܒܽܐܘܪܚܳܐ ܩܕܳܡ ܥܺܝܠܶܗ܇ ܕܒܰܪ ܡܰܠܟܳܐ ܕܥܰܠ ܗܘܳܐ܇ ܝܰܘܡܳܢ ܠܽܐܘܪܺܫܠܶܡ܀

ܫܽܘܒܚܳܐ ܠܗܰܘ ܕܶܐܬܳܐ܇ ܘܫܰܡܠܺܝ ܒܰܩܢܽܘܡܶܗ܇ ܡ̈ܶܠܶܐ ܕܰܢܒܺܝ̈ܶܐ܇ ܗܶܢܽܘܢ ܕܒܶܝܬ ܐܰܒܽܘܗ̱ܝ܀

 

ܡܳܪܝܳܐ ܩܪܺܝܬܳܟ ܒܩܳܠܳܐ ܡܫܺܝܚܳܐ ܐܶܬܺܝܠܶܕ

ܡܫܺܝܚܳܐ ܐܶܬܡܰܟܰܟ܇ ܘܰܪܟܶܒ ܥܰܠ ܥܺܝܠܳܐ܇ ܘܬܰܠܡܺܝ̈ܕܰܘܗ̱ܝ ܥܰܡܶܗ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܰܛܠܳܝ̈ܶܐ ܘܫܰܒܪ̈ܶܐ܇ ܡܫܰܒܚܺܝܢ ܗ̱ܘܰܘ ܩܽܘܕܡܰܘܗ̱ܝ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܙܟܰܪܝܳܐ ܩܥܐ ܘܐܡܪ܇ ܩܽܘܡܝ̱ ܕܽܘܨܝ̱ ܒܰܪܬ ܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܶܬܳܐ܇ ܘܰܪܟܺܝܒ ܥܰܠ ܥܺܝܠܳܐ܇ ܩܽܘܡܝ̱ ܦܽܘܩܝ̱ ܠܶܟܝ̱ ܠܽܐܘܪܥܶܗ܇ ܕܥܳܒܰܪ ܘܠܳܐ ܡܶܬܟܠܶܐ܇ ܘܥܺܕܰܬ ܩܽܘܕܫܳܐ ܬܰܪ̈ܥܶܝܗܿ ܦܬܺܝܚܺܝܢ ܘܠܶܗ ܡܣܰܟܶܐ܀

ܒܣܰܘ̈ܟܶܐ ܕܡܶܢ ܕܶܩ̈ܠܶܐ ܛܠܳܝ̈ܶܐ ܡܫܰܒܚܺܝܢ ܗ̱ܘܰܘ ܘܟܶܢܫ̈ܶܐ܇ ܩܳܥܶܝܢ ܗ̱ܘܰܘ܇ ܐܽܘܫܰܥܢܳܐ ܒܪܰܘܡܳܐ܇ ܫܽܘܒܚܳܐ ܠܗܰܘ ܕܰܐܪܟܶܢ܇ ܪܰܘܡܳܐ ܕܪܰܒܽܘܬܶܗ܇ ܘܶܐܬܳܐ ܒܡܽܘܟܳܟܳܐ ܕܢܶܣܥܽܘܪ ܠܰܓܒܺܝܠܬܶܗ܀

ܒܥܶܓܠܳܐ ܚܰܠܶܦܬܶܗ܇ ܫܳܛܺܝܬܳܐ ܒܡܰܕܒܪܳܐ܇ ܠܗܰܘ ܕܰܐܦܩܳܗܿ ܗܘܳܐ܇ ܡܶܢ ܒܶܝܬ ܥܰܒܕܽܘܬܳܐ ܕܡܶܨܪܶܝܢ܇ ܘܰܥܢܳܢܳܐ ܕܢܘܽܗܪܳܐ܇ ܥܠܶܝܗܿ ܗܽܘ ܡܰܐܛܠܳܐ ܗܘܳܬ݀ ܘܥܰܡܘܕܳܐ ܕܡܰܢܗܰܪ ܩܽܘܕܡܶܝܗܿ ܟܰܕ ܥܳܒܪܳܐ ܗܘܳܬ݀܀

ܝܰܘܡܳܢܳܐ ܬܶܚܕܶܐ܇ ܥܺܕܬܳܐ ܡܗܰܝܡܰܢܬܳܐ܇ ܘܬܶܙܡܰܪܝ̱ ܬܶܫܒܽܘܚܬܳܐ܇ ܠܗܰܘ ܕܰܒܚܽܘܒܶܗ ܥܺܝܠܳܐ ܪܟܶܒ܇ ܕܨܶܗܝܽܘܢ ܨܰܥܰܪܬܶܗ܇ ܘܛܶܠܡܰܬ݀ ܬܶܫܒܽܘܚܬܶܗ܇ ܘܥܺܕܬܳܐ ܩܰܒܶܠܬܶܗ܇ ܒܽܐܘܫܰܥܢ̈ܶܐ ܛܥܺܝܢ̈ܰܝ ܫܽܘܒܚܳܐ܀

ܫܽܘܒܚܳܐ ܠܰܡܫܺܝܚܳܐ܇ ܕܡܶܛܽܠ ܦܽܘܪܩܳܢܰܢ܇ ܪܟܶܒ ܗܘܳܐ ܥܰܠ ܥܺܝܠܳܐ܇ ܘܶܐܫܬܰܒܰܚ ܡܶܢ ܝܰܠܽܘ̈ܕܶܐ܇ ܘܟܶܢܫ̈ܶܐ ܕܬܰܠܡܺܝ̈ܕܶܐ܇ ܢܰܚ̈ܬܶܐ ܐܳܦ ܣܰܘ̈ܟܶܐ܇ ܡܫܰܘܶܝܢ ܗ̱ܘܰܘ ܩܽܘܕܡܰܘܗ̱ܝ ܬܰܘ ܢܶܒܪܽܘܟ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܩܽܘܩܳܝܳܐ

ܗܳܐ ܠܽܐܘܪܺܫܠܶܡ ܣܳܠܶܩ ܐ̱ܢܳܐ ܐܶܡܰܪ ܡܳܪܰܢ܇ ܕܶܐܫܰܠܶܡ ܟܽܠ ܕܰܟܬܺܝܒ̈ܳܢ ܒܰܢܒܺܝ̈ܶܐ ܕܡܶܢ ܩܕܺܝܡ܇ ܕܶܐܢܳܐ ܠܳܐܕܳܡ ܠܳܐ ܡܰܪܦܶܐ ܐ̱ܢܳܐ ܠܶܗ܇ ܕܗܽܘܝܽܘ ܪܺܝܫܳܐ ܕܟܽܠܗܶܝܢ ܫܰܪ̈ܒܳܬܳܐ܇ ܕܒܰܚܣܳܡܳܐ ܐܰܦܩܶܗ ܒܺܝܫܳܐ ܡܶܢ ܦܰܪܕܰܝܣܳܐ܇ ܘܶܐܢܳܐ ܒܚܽܘܒܝ̱ ܡܰܦܢܶܐ ܐ̱ܢܳܐ ܠܶܗ ܠܝܳܪܬܽܘܬܶܗ ܕܡܶܢ ܩܕܺܝܡ܇ ܗ ܘ ܗ܀

 

ܟܰܕ ܢܳܚܶܬ ܗܘܳܐ ܦܳܪܽܘܩܰܢ ܡܶܢ ܛܽܘܪ ܙܰܝ̈ܬܶܐ܇ ܩܪܳܐ ܠܰܬܪܶܝܢ ܡܶܢ ܬܰܠܡܺܝ̈ܕܰܘܗ̱ܝ ܘܗܳܟܰܢ ܐܶܡܰܪ ܠܗܽܘܢ܇ ܙܶܠܘ̱ ܠܰܩܪܺܝܬܳܐ ܗܳܕܶܐ ܕܰܠܩܽܘܒܠܰܢ܇ ܐܰܝܬܰܘ ܥܺܝܠܳܐ ܕܰܐܣܺܝܪ ܒܰܓܦܶܬܳܐ܇ ܘܶܐܢ ܐ̱ܢܳܫ ܐܳܡܰܪ ܠܟܽܘܢ ܡܶܕܶܡ ܐܶܡܰܪܽܘܢ ܠܶܗ܇ ܕܡܳܪܰܢ ܒܳܥܶܐ ܠܶܗ ܕܢܶܪܟܰܒ ܘܢܶܥܽܘܠ ܠܽܐܘܪܺܫܠܶܡ܇ ܗ ܘ ܗ܀

ܐܺܝܢ ܥܺܝܠܳܐ ܒܰܪ ܐܰܬܳܢܳܐ ܡܰܢܽܘ ܐܰܣܪܳܟ܇ ܒܰܓܦܶܬܳܐ ܒܰܐܪܥܳܐ ܕܺܝܗܽܘܕ܇ ܘܰܠܡܳܪܰܢ ܩܰܪܒܳܟ܇ ܢܒܺܝ̈ܶܐ ܐܰܣܪܽܘܢܝ̱ ܘܰܫܠܺܝ̈ܚܶܐ ܫܪܰܐܽܘܢܝ̱܇ ܘܒܰܪ ܐܰܠܳܗܳܐ ܥܰܠ ܚܰܨܝ̱ ܐܶܙܕܰܝܰܚ܇ ܘܰܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ ܕܩܳܥܶܝܢ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܐܽܘܫܰܥܢܳܐ ܒܪܰܘܡܳܐ ܗ ܘ ܗ܀

 

ܐ̱ܚܪܺܢܳܐ ܩܳܠܳܐ ܛܽܘܒܳܐ ܠܝܰܠܽܘ̈ܕܶܐ

ܫܽܘܒܚܳܐ ܠܗܰܘ ܚܰܝܠܳܐ܇ ܕܥܰܠ ܟܽܘܪܣܰܝ ܢܽܘܪܳܐ ܣܪ̈ܳܦܶܐ ܡܩܰܕܫܺܝܢ ܠܶܗ܇ ܟܰܕ ܥܰܠܠܽܐܘܪܺܫܠܶܡ܇ ܙܡܰܪܘ̱ ܗ̱ܘܰܘ ܟܶܢܫ̈ܶܐ ܫܽܘܒܚܳܐ ܒܽܐܘܫܰܥܢ̈ܶܐ܇ ܗ ܘ ܗ ܫܽܘܒܚܳܐ ܠܫܳܠܽܘܚܶܗ܀

ܕܽܘܨܝ̱ ܘܰܚܕܳܝ ܥܺܕܬܳܐ܇ ܒܝܰܘܡܳܐ  ܕܽܐܘܫܰܥܢ̈ܶܐ ܘܰܙܡܰܪܝ̱ ܬܶܫܒܽܘܚܬܳܐ ܠܰܡܫܺܝܚܳܐ ܕܰܪܟܶܒ܇ ܥܺܝܠܳܐ ܒܡܽܘܟܳܟܶܗ ܘܡܶܢ ܛܽܘܥܝܰܝ ܦܰܪܩܶܟܝ̱܇ ܗ ܘ ܗ ܫܽܘܒܚܳܐ ܠܡܽܘܟܳܟܶܗ܀

 

ܒܳܥܽܘܬܳܐ ܝܰܥܩܽܘܒܳܝܬܳܐ

ܐܰܪܡܺܝ ܡܳܪܰܢ ܐܽܘܪܚܶܗ ܒܥܳܠܡܳܐ ܠܰܡܗܰܠܳܟܽܘ܇ ܒܡܰܟܺܝܟܽܘܬܳܐ ܕܰܪܚܺܝܡܳܐ ܠܶܗ ܡܶܢ ܟܽܠܡܶܕܶܡ܇ ܒܣܰܪ ܗܘܳܐ ܘܰܐܣܠܺܝ ܪ̈ܟܽܘܒܶܐ ܡܨܰܒ̈ܬܶܐ ܕܡܳܪ̈ܰܘܳܬܳܐ܇ ܘܰܪܟܶܒ ܥܺܝܠܳܐ ܕܢܶܣܥܽܘܪ ܥܰܡܡ̈ܶܐ ܒܡܰܟܺܝܟܽܘܬܳܐ܀

ܥܠܰܝ̈ܡܶܐ ܦܪܰܥܘ̱ ܗ̱ܘܰܘ ܚܰܘܒܬܳܐ ܕܚܳܒܘ̱ ܗ̱ܘܰܘ ܣܳܒ̈ܰܝ ܥܰܡܳܐ܇ ܘܬܶܩܢܰܬ݀ ܬܰܡܳܢ ܗܳܝ ܬܶܫܒܽܘܚܬܳܐ ܕܡܶܬܒܰܥܝܳܐ ܗܘܳܬ݀ ܇ ܒܪܺܝܟ ܗܽܘ ܕܶܐܬܳܐ ܒܰܫܡܶܗ ܕܡܳܪܝܳܐ ܩܥܰܘ ܬܰܡܺܝ̈ܡܶܐ܇ ܘܪܶܥܡܰܬ݀ ܐܽܘܪܚܶܗ ܕܡܰܠܟܳܐ ܕܶܐܬܳܐ ܒܫܽܘܒܚܳܐ ܪܰܒܳܐ܀

ܫܽܘܒܚܳܐ ܠܳܐܣܝܳܐ ܕܺܐܝܬܰܘܗ̱ܝ ܥܶܠܬܳܐ ܕܟܽܠ ܛܳܒ̈ܳܬܳܐ܇ ܘܣܶܓܕܬܳܐ ܠܰܒܪܳܐ ܕܰܣܥܰܪ ܥܰܡܶܗ ܒܡܰܟܺܝܟܽܘܬܳܐ܇ ܬܰܘܕܺܝ ܠܪܽܘܚܳܐ ܕܙܰܝܚܽܘܗ̱ܝ ܫܰܒܪ̈ܶܐ ܒܰܗܕܺܝܪܽܘܬܳܐ ܪܳܡܰܬ ܡܶܢ ܟܽܠ ܬܠܺܝܬܽܝܘܬܳܐ ܠܶܟܝ̱ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܐܰܥܺܝܪ ܘܰܐܩܺܝܡܰܝܢܝ̱

ܙܟܰܪܝܳܐ ܩܥܳܐ ܠܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܳܬܶܐ ܨܶܕܰܝܟܝ̱܇ ܩܽܘܡܝ̱ ܦܽܘܩܝ̱ ܘܰܣܓܽܘܕܝ̱ ܠܶܗ܇ ܝܰܠܽܘ̈ܕܶܐ ܡܰܠܟܳܐ ܕܬܶܫܒܽܘܚܬܳܐ܀

ܢܒܺܝ̈ܶܐ ܩܥܰܘ ܒܐ̱ܪܳܙܳܐ܇ ܠܨܶܗܝܽܘܢ ܣܳܢܝܰܬ݀ ܠܰܫܪܳܪܳܐ܇ ܕܗܳܐ ܐܳܬܶܐ ܡܰܠܟܶܟܝ̱܇ ܗܽܘ ܕܰܐܦܩܶܟܝ̱ ܡܶܢ ܓܰܘ ܡܶܨܪܶܝܢ܀

ܟܝ̈ܳܢܶܐ ܘܰܒܪ̈ܰܝܳܐ܇ ܡܠܺܝ̈ܠܶܐ ܘܟܽܠܗܽܘܢ ܫܰܬܺܝ̈ܩܶܐ܇ ܠܳܐ ܛܳܠܡܺܝܢ ܫܽܘܒܚܶܗ܇ ܐܰܟܡܳܐ ܕܰܡܟܳܢܺܝܢ ܗ̱ܘܰܘ܀

ܐܶܬܬܥܺܝܪܝ̱ ܐܶܬܬܥܺܝܪܝ̱܇ ܠܒܰܪܬ ܨܶܗܝܽܘܢ ܩܥܳܐ ܐܶܫܰܥܝܳܐ ܗܺܝ ܣܶܟܪܰܬ݀ ܐܶܕܢܶܝ̈ܗܿ܇ ܘܥܺܕܬܳܐ ܢܶܦܩܰܬ݀ ܘܩܰܒܶܠܬܶܗ܀

ܟܽܠܗܽܘܢ ܠܶܫܳܢ̈ܶܐ܇ ܒܫܽܘܦܪܳܐ ܦܰܐܝܳܐ ܕܪ̈ܶܬܡܰܝܗܽܘܢ ܥܰܠ ܫܽܘܒܚܶܗ ܣܺܝܡܺܝܢ܇ ܘܬܶܫܒܽܘܚܬܳܐ ܕܺܝܠܶܗ ܙܳܡܪ̈ܳܢ܀

 

ܩܰܘܡܳܐ ܩܰܕܡܳܝܳܐ ܒܩܳܠܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܒܬܽܘ̈ܠܳܬܳܐ ܡܩܰܠܣ̈ܳܢ ܗܘ̈ܰܝ ܠܶܗ ܠܕܰܘܺܝܕ ܡܰܠܟܳܐ܇ ܟܰܕ ܩܰܛܠܶܗ ܗܘܳܐ ܠܓܰܢ̱ܒܳܪܳܐ܇ ܘܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ ܠܡܳܪܰܢ ܫܰܒܰܚܘ̱܇ ܟܰܕ ܥܰܠ ܗܘܳܐ ܠܽܐܘܪܺܫܠܶܡ܇ ܗ ܒܙܰܘܚܳܐ ܪܰܒܳܐ܀

ܒܗܳܢܳܐ ܝܰܘܡܳܐ ܪܥܶܡ ܫܽܘܒܚܶܗ ܕܺܝܚܺܝܕܳܝܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܥܶܠܳܝ̈ܶܐ ܩܥܰܘ ܠܶܗ ܩܰܕܺܝܫ ܐܳܦ ܝܰܠܽܘ̈ܕܶܐ܇ ܒܽܐܘܫܰܥܢ̈ܶܐ ܫܰܒܰܚܘ̱ ܩܽܘܕܡܰܘܗ̱ܝ܇ ܗ ܫܽܘܒܚܳܐ ܠܰܫܡܶܗ܀

 

ܡܰܕܪܳܫܳܐ ܒܩܳܠܳܐ ܗܳܢܰܘ ܝܰܪܚܳܐ ܥܽܘܢܺܝܬܳܐ ܒܪܺܝܟ ܗܽܘ ܡܫܺܝܚܳܐ ܕܩܰܠܣܽܘܗ̱ܝ ܫܰܒܪ̈ܶܐ ܒܽܐܘܫܰܥܢܰܝ̈ܗܽܘܢ

ܟܢܽܘܫܰܬ ܫܰܒܪ̈ܶܐ܇ ܘܰܕܬܰܡܺܝ̈ܡܶܐ ܝܶܗܒܰܬ݀ ܫܽܘܒܚܳܐ܇ ܘܰܣܢܽܘܢܺܝܬܳܐ ܚܕܰܬܳܐ ܕܙܶܡܪܰܬ݀܇ ܩ̈ܳܠܶܐ ܚܰܕ̈ܬܶܐ ܠܡܰܠܟܳܐ ܚܰܕܬܳܐ܇ ܚܙܳܬܶܗ ܠܢܺܝܣܳܢ ܚܰܕܬܳܐ ܕܶܐܬܳܐ ܘܶܐܬܦܰܨܚܰܬ݀ ܒܶܗ܀

ܛܰܠܝܳܐ ܠܛܰܠܝܳܐ܇ ܘܰܠܒܰܪ ܙܰܘܓܶܗ ܢܩܶܦ ܝܰܠܽܘܕܳܐ܇ ܟܠܺܝܠ ܐܽܘܫܰܥܢܳܐ ܕܰܕܟܶܐ ܘܰܫܦܶܐ܇ ܘܕܳܡܶܐ ܟܽܠܶܗ ܠܗܰܘ ܙܰܟܳܝܳܐ܇ ܕܰܙܟܳܐ ܠܒܺܝܫܳܐ ܘܶܐܬܳܐ ܕܢܶܙܟܶܐ܇ ܠܡܰܘܬܳܐ ܘܛܽܘܥܝܰܝ܀

ܦܫܺܝܓܳܐ ܦܫܰܛ ܗܘܳܐ܇ ܐܺܝܕܶܗ ܘܰܫܩܰܠ ܣܰܘܟ̈ܰܝ ܙܰܝܬܳܐ܇ ܚܓܺܝܪܳܐ ܗܘܳܐ ܠܶܗ ܒܰܕܡܽܘܬ ܐܺܝܳܠܳܐ܇ ܘܫܰܪܺܝ ܕܳܐܶܨ ܩܽܘܕܡܰܬ ܥܺܝܠܳܐ܇ ܘܕܽܘܓ̈ܶܐ ܘܚܰܪ̈ܫܶܐ ܫܽܘܒܚܳܐ ܙܡܰܪܘ̱ ܠܶܗ ܒܽܐܘܫܰܥܢܰܝ̈ܗܽܘܢ܀

ܒܗܳܢܳܐ ܝܰܘܡܳܐ ܕܰܫܩܰܠܘ̱ ܣܰܘܟ̈ܶܐ ܫܰܒܪ̈ܶܐ ܩܽܘܕܡܰܝܟ܇ ܥܰܡܗܽܘܢ ܢܶܫܩܽܘܠ܇ ܕܰܟܝܽܘܬ ܠܶܒܳܐ܇ ܘܫܽܘܒܚܳܐ ܕܰܚܠܺܝܛ ܥܰܡ ܦܽܘܪܫܳܢܳܐ܇ ܢܰܘܕܶܐ ܠܳܟ ܡܳܪܝ̱ ܕܡܶܛܽܠܳܬܰܢ ܪܟܶܒܬ ܥܰܠ ܥܺܝܠܳܐ܀

 

ܩܽܘܡ ܦܰܘܠܳܘܣ ܥܶܢܝܳܢܳܐ ܒܪܺܝܟ ܒܽܘܟܪܳܐ ܕܫܰܒܚܽܘܗ̱ܝ ܒܽܐܘܫܰܥܢ̈ܶܐ܇ ܝܰܠܽܘ̈ܕܶܐ ܒܣܰܘܟ̈ܰܝ ܬܶܫܒܽܘܚܬܳܐ

ܐܳܘ ܠܡܳܪܶܗ ܕܕܰܘܺܝܕ ܪܟܺܝܒ ܥܺܝܠܳܐ܇ ܘܶܐܬܳܐ ܠܶܗ ܠܘܳܬܳܗܿ ܕܒܰܪܬ ܨܶܗܝܽܘܢ܇ ܙܰܘܚܳܐ ܗܘܳܐ ܚܣܺܝܡܳܐ ܩܕܳܡ ܚܰܬܢܳܐ܇ ܕܽܐܘܫܰܥܢ̈ܶܐ ܪܥܶܡ ܗ̱ܘܰܘ ܒܟܽܠ ܦܶܢܝ̈ܳܢ܇ ܥܘܺܝܪ̈ܶܐ ܢܗܰܪܘ̱ ܩܽܘܕܡܰܘܗ̱ܝ܇ ܚܓܺܝܪ̈ܶܐ ܕܶܝܢ ܪܰܩܶܕܘ̱܇ ܪܳܒ ܗܘܳܐ ܒܓܰܘ ܫܰܝܢܳܐ܇ ܙܰܘܚܳܗܿ ܕܒܰܪܬ ܨܶܗܝܽܘܢ܇ ܡܶܢ ܙܰܘܚܳܐ ܕܰܗܘܳܐ ܠܒܰܪܬ ܣܰܐܪܳܐ܇ ܟܰܕ ܢܶܦܩܰܬ݀ ܒܫܽܘܒܚܳܐ ܡܶܢ ܡܶܨܪܶܝܢ܀

ܥܰܡ ܫܽܘܦܪ̈ܰܘܗ̱ܝ ܫܒܺܝܚ̈ܶܐ ܕܠܳܐ ܒܣܶܡܝ̱ ܠܳܗܿ܇ ܒܢܰܟܦܽܘܬܳܐ ܝܰܬܺܝܪ ܡܥܳܩܳܐ ܗܘܳܬ݀ ܇ ܐܰܝܟ ܐܶܡܳܐ ܒܓܰܘܪܳܐ ܡܥܳܕܳܐ ܗܘܳܬ݀܇ ܠܝܳܠܶܕܬܶܗ ܒܫܽܘܩܪܳܐ ܥܶܠܒܰܬ݀ ܗܘܳܬ݀ ܇ ܝܶܕܥܰܬ݀ ܕܠܳܐ ܡܰܨܝܳܐ܇ ܕܬܶܙܟܶܐ ܠܕܰܟܝܽܘܬܳܗܿ܇ ܐܶܠܳܐ ܒܝܰܕ ܦܽܘܪܣܳܐ܇ ܕܬܺܐܡܰܪ ܕܢܽܘܟܪܳܝܰܐܗ̱ܘ܇ ܨܢܺܝܥܳܐܺܝܬ ܨܶܗܝܽܘܢ ܫܰܟܪܬܶܗ܇ ܠܰܡܟܺܝܪܳܗܿ ܕܬܰܫܡܰܫܝ̱ ܓܰܘܪܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܰܕ ܒܝܽܘܒܳܒܳܐ ܕܥܺܝܪ̈ܰܝ ܪܰܘܡܳܐ ܡܶܙܕܰܝܰܚ ܐܰܢ̱ܬ܇ ܒܣܰܘܟ̈ܶܐ ܕܕܶܩ̈ܠܶܐ ܕܰܒܢ̈ܰܝ ܨܶܗܝܽܘܢ ܡܶܬܩܰܠܰܣ. ܐܰܢ̱ܬ. ܘܟܰܕ ܩܽܘܕܳܫܳܐ ܗܰܘ ܕܰܣܪ̈ܳܦܶܐ ܠܳܟ ܡܶܬܩܰܪܰܒ܇ ܛܠܳܝ̈ܶܐ ܙܥܽܘܪ̈ܶܐ ܒܽܐܘܫܰܥܢܰܝ̈ܗܽܘܢ ܝܰܒܶܒܘ̱ ܠܰܫܡܳܟ܀

ܪܶܒܽܘ ܪ̈ܶܒܘܳܢ ܕܰܫܡܰܝ݁̈ܳܢܶܐ ܠܳܟ ܗܽܘ ܡܙܰܝܚܺܝܢ܇ ܘܥܺܝܠܳܐ ܫܺܝܛܳܐ ܒܰܪ ܐܰܬܳܢܳܐ ܗܳܐ ܡܙܰܝܰܚ ܠܳܟ܇ ܐܳܠܶܦ ܐܰܠܦܺܝ̈ܢ ܕܢܽܘܪܳܐ ܘܪܽܘܚܳܐ ܗܳܐ ܟܦܶܝܢ ܩܽܘܕܡܰܝܟ܇ ܫܰܒܪ̈ܶܐ ܒܪܺܝܪ̈ܶܐ ܙܡܰܪܘ̱ ܠܳܟ ܫܽܘܒܚܳܐ ܘܠܳܟ ܬܶܫܒܽܘܚܬܳܐ܀

 

ܩܰܘܡܳܐ ܕܰܬܪܶܝܢ܇ ܒܩܳܠܳܐ ܠܰܬܚܽܘܡܳܐ ܕܗܰܝܡܳܢܽܘܬܳܐ

ܬܳܐ ܓܠܺܝ ܠܺܝ ܙܟܰܪܝܳܐ ܐ̱ܪܳܙܳܐ܇ ܡܶܛܽܠ ܡܽܘܟܳܟܶܗ ܕܰܒܪܳܐ ܕܗܳܐ ܥܰܠ ܥܺܝܠܳܐ ܚܙܰܝܬܳܝܗ̱ܝ ܟܰܕ ܝܳܬܶܒ܇ ܚܰܙܩܺܝܐܶܝܠ ܬܳܐ ܒܰܕܶܩ ܠܺܝ܇ ܡܶܛܽܠ ܫܽܘܒܚܶܗ ܕܺܝܚܺܝܕܳܝܳܐ܇ ܕܥܰܠ ܡܰܪܟܰܒܬܳܐ ܚܙܰܝܬܳܝܗ̱ܝ ܟܰܕ ܝܳܬܶܒ܇ ܢܒܺܝܳܐ ܕܰܩܪܳܝܗ̱ܝ ܕܽܘܡܳܪܳܐ܇ ܬܳܐ ܩܽܘܡ ܩܽܘܕܡܶܝ̈ܗܿ ܕܗܳܐ ܟܺܐܦ̈ܶܐ܇ ܚܠܳܦ ܐܽܘܫܰܥ̈ܢܶܐ ܫܶܩܠܰܬ݀ ܠܰܪܓܽܘܡܶܝܗܿ܇ ܛܠܳܝ̈ܶܐ ܒܣܰܘ̈ܟܰܝ ܬܶܫܒܽܘܚܬܳܐ܇ ܩܳܥܶܝܢ ܠܶܗ ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ܇ ܡܶܢ ܐܰܬܪܶܗ ܠܥܳܠܰܡ܀

 

ܙܟܰܪܝܳܐ ܘܕܰܘܺܝܕ ܘܚܰܙܩܺܝܐܶܝܠ܇ ܣܰܒܪܽܘܗܿ ܠܨܶܗܝܽܘܢ ܘܶܐܡܰܪ ܠܳܗܿ܇ ܕܡܰܠܟܶܟܝ̱ ܐܳܬܶܐ ܘܰܪܟܺܝܒ ܥܰܠ ܥܺܝܠܳܐ܇ ܨܶܗܝܽܘܢ ܫܶܡܥܰܬ݀ ܘܶܐܬܪܰܗܒܰܬ݀܇ ܟܺܐܦ̈ܶܐ ܫܶܩܠܰܬ݀ ܠܳܗܿ ܒܟܶܢܦܶܝ̈ܗܿ ܢܶܦܩܰܬ݀ ܠܽܐܘܪܥܶܗ ܕܠܳܐ ܢܰܡܠܶܟ ܥܠܶܝܗܿ܇ ܩܪܳܗܿ ܒܰܪ ܐܺܝܫܰܝ ܘܶܐܡܰܪ ܠܳܗܿ܇ ܘܰܐܪܺܝܡܘ̱ ܬܰܪ̈ܥܶܐ ܪ̈ܺܝܫܰܝܟܽܘܢ܇ ܕܢܶܥܽܘܠ ܡܰܠܟܳܐ ܕܶܐܬܳܐ ܠܦܽܘܪܩܳܢܰܢ܇ ܫܕܳܬ݀ ܟܺܐܦ̈ܶܐ ܘܠܶܒܟܰܬ݀ ܣܰܘ̈ܟܶܐ܇ ܘܩܳܥܝܳܐ ܠܶܗ ܩܰܕܺܝܫ ܩܰܕܺܝܫ܇ ܩܰܕܺܝܫ ܡܳܪܝܳܐ ܕܶܐܬܳܐ ܠܦܽܘܪܩܳܢܰܢ܀

 

ܣܽܘܓܺܝܬܳܐ ܥܰܠ ܟܺܐܢܽܘܬܳܐ ܘܥܰܠ ܛܰܝܒܽܘܬܳܐ܀ ܒܩܳܠܳܐ ܥܰܡܳܐ ܘܥܰܡܡ̈ܶܐ ܥܽܘܢܺܝܬܳܐ ܫܽܘܒܚܳܐ ܠܰܒܪܳܐ ܕܰܒܚܽܘܒܶܗ܇ ܦܰܪܩܶܗ ܠܓܶܢܣܰܢ ܡܶܢ ܛܽܘܥܝܰܝ

ܥܰܒ̈ܕܶܐ ܒܺܝ̈ܫܶܐ ܕܥܰܡܶܢ ܣܓܺܝܘ܇ ܐܳܦ ܟܺܐܢܽܘܬܳܐ ܪܽܘܓܙܳܗܿ ܣܠܶܩ܇ ܘܰܬܠܳܬ ܫܰܒܛܳܗܿ ܥܰܠ ܥܳܠܡܳܐ܇ ܘܠܰܒܟܳܗܿ ܚܢܳܢܳܐ ܘܠܰܐܪܥܳܐ ܡܚܳܐ܀

ܡܶܢ ܟܺܐܢܽܘܬܳܐ ܐܶܫܬܰܕܪܰܬ݀܇ ܡܚܽܘܬܳܐ ܠܩܰܢܝܳܐ ܕܰܬܚܰܒܠܺܝܘܗ̱ܝ܇ ܠܠܰܚܡܳܐ ܓܰܐܝܳܐ ܕܛܳܒ ܘܰܪܓܺܝܓ܇ ܘܢܶܗܘܶܐ ܣܢܺܝܩܳܐ ܥܰܠ ܕܶܐܬܬܪܺܝܡ܀

ܘܰܐܟܡܳܐ ܕܗܳܠܶܝܢ ܡܶܬܡ̈ܰܠܠܳܢ܇ ܡܶܢ ܛܰܝܒܽܘܬܳܐ ܚܰܟܺܝܡܬܳܐ܇ ܐܰܝܟ ܒܰܦܝܳܣܳܐ ܚܠܳܦ ܥܳܠܡܳܐ܇ ܩܕܳܡ ܟܺܐܢܽܘܬܳܐ ܥܰܙܺܝܙܬܳܐ܀

ܐܰܝܟܰܢ ܐܰܚܽܘܣܝ̱ ܕܶܐܢ ܚܳܝܣܳܢܝ̱܇ ܠܰܬܝܳܒܽܘܬܳܐ ܠܳܐ ܩܳܪܒܺܝܢ܇ ܥܫܶܢ ܠܶܗ ܥܰܘܠܳܐ ܫܒܽܘܩܝ̱ ܡܶܬܪܕܶܝܢ܇ ܒܰܥܒܳܕܰܝ̈ܗܽܘܢ ܥܰܠ ܕܰܐܪܓܙܽܘܢܝ̱܀

ܒܪ̈ܰܚܡܶܐ ܥܰܘܠܳܐ ܠܳܐ ܡܙܶܕܓܰܪ܇ ܘܶܐܢ ܬܶܫܬܰܓܫܺܝܢ ܐܰܝܟ ܕܳܐܡܰܪܬ܇ ܡܶܣܬܰܪܚܳܐ ܠܳܗܿ ܐ̱ܢܳܫܽܘܬܳܐ܇ ܬܰܘܣܶܦܝ̱ ܬܰܪܫܰܥܝ̱ ܘܬܡܰܪܡܰܪܰܢܝ̱܀

ܓܰܘܣܳܐ ܕܐ̱ܢܳܫ̈ܳܐ ܕܠܳܐ ܝܰܩܪܶܗ܇ ܠܗܰܘ ܐܺܝܩܳܪܳܐ ܕܰܦܠܺܝܓ ܠܳܗܿ܇ ܒܰܕܚܰܝܘ̈ܳܬܳܐ ܥܰܡܳܗܿ ܚܠܺܝܛ ܘܰܐܝܟ ܚܰܝܘ̈ܳܬܳܐ ܫܒܽܘܩܝ̱ ܒܳܠܥܺܝܢ܀

ܡܰܘܬܶܗ ܐܶܢܽܘܢ ܘܥܰܠ ܡܽܘܢ ܚܛܰܘ܇ ܨܰܥܰܪܘ̱ ܨܰܠܡܶܗ ܘܪܽܘܫܡܳܐ ܦܠܰܚܘ̱܇ ܒܪܳܐ ܕܠܳܐ ܡܫܰܟܰܪ ܠܰܘ ܝܳܪܬܰܐܗ̱ܘ܇ ܐܶܢ ܡܰܪܕܽܘܬܳܐ ܠܳܐ ܬܶܪܕܺܝܘܗ̱ܝ܀

ܗܳܐ ܐܶܢܩ̈ܳܬܳܐ ܒܫܽܘܩܳܐ ܫܡܰܥܝ̱܇ ܕܝܰܬܡ̈ܶܐ ܥܠܺܝ̈ܒܶܐ ܟܰܕ ܒܳܟܶܝܢ܇ ܘܠܳܐ ܐ̱ܢܳܫ ܨܳܒܶܐ ܦܳܪܶܩ ܠܗܽܘܢ܇ ܘܒܰܕܓܽܘܢ ܪܳܓܙܰܬܝ̱ ܥܰܠ ܥܳܠܡܳܐ܀

ܘܳܠܶܐ ܠܣܰܒ̈ܥܶܐ ܕܢܶܬܪܰܚܡܽܘܢ܇ ܥܰܠ ܩܰܪ̈ܺܝܒܶܐ ܒܢ̈ܰܝ ܒܶܣܪܗܽܘܢ܇ ܘܡܶܢ ܝܰܬܺܝܪܳܐ ܕܺܐܝܬ ܠܗܽܘܢ܇ ܢܡܰܠܽܘܢ ܗܳܢܽܘܢ ܣܽܘܢܩܳܢܗܽܘܢ܀

ܙܳܚܠܳܐ ܕܶܐܬܳܐ ܠܰܐܪ̈ܥܳܬܗܽܘܢ܇ ܡܶܛܽܠ ܥܰܘܠܳܐ ܕܢܰܦܫ̈ܳܬܗܽܘܢ܇ ܐܶܢܕܶܝܢ ܡܰܪܦܶܝܢ ܒܺܝܫ̈ܳܬܗܽܘܢ܇ ܠܳܐ ܡܶܣܬܰܪ̈ܚܳܡ ܥ̈ܰܠܳܠܬܗܽܘܢ܀

ܚܰܝܳܒܺܝܢ ܠܺܝ ܘܠܳܐ ܒܳܥܝܳܢܝ̱܇ ܕܶܐܡܚܶܐ ܐܶܢܽܘܢ ܚܠܳܦ ܕܰܚܛܰܘ܇ ܬܰܪܥܳܐ ܦܬܺܝܚ ܗܽܘ ܠܡܽܘܢ ܩܳܝܡܺܝܢ܇ ܐܰܝܟ ܒܰܛܺܝ̈ܠܶܐ ܘܠܳܐ ܢܳܩܫܺܝܢ܀

ܛܡܺܝܪܺܝܢ ܙܰܪ̈ܥܶܐ ܒܚܰܩ̈ܠܳܬܗܽܘܢ܇ ܘܰܛܡܺܝܪ ܥܰܘܠܳܐ ܒܢܰܦܫ̈ܳܬܗܽܘܢ܇ ܢܶܫܕܽܘܢ ܥܰܘܠܳܐ ܡܶܢ ܢܰܦܫܗܽܘܢ܇ ܘܢܶܒܛܰܠ ܩܰܡܨܳܐ ܡܶܢ ܙܰܪܥܗܽܘܢ܀

ܝܰܬܡ̈ܶܐ ܕܒܳܟܶܝܢ ܙܳܕܶܩ ܠܗܽܘܢ܇ ܕܺܐܝܬ ܗܽܘ ܥܳܠܡܳܐ ܐ̱ܚܪܺܢܳܐ ܠܗܽܘܢ܇ ܕܶܐܢܗܽܘ ܕܗܳܪܟܳܐ ܡܶܬܛܰܪܦܺܝܢ ܒܗܰܘ ܕܠܰܥܳܠܰܡ ܡܶܬܒܰܝܐܺܝܢ܀

ܟܦܶܢ ܡܶܣܟܺܢܳܐ ܐܰܪܦܺܝ ܟܦܶܢ܇ ܕܶܐܢܳܐ ܠܟܰܦܢܶܗ ܠܳܐ ܛܳܥܝܳܢܝ̱܇ ܙܰܒܢܳܐ ܢܛܺܝܪ ܠܺܝ ܕܶܐܣܰܒܥܺܘܗ̱ܝ܇ ܒܗܰܘ ܦܳܬܽܘܪܳܐ ܕܛܽܘ̈ܒܶܐ ܡܠܶܐ܀

ܠܳܐ ܒܰܦܝܳܣܶܟܝ̱ ܢܶܫܬܰܡܪܽܘܢ܇ ܐ̱ܢܳܫܳܐ ܘܢܰܒܣܽܘܢ ܕܥܰܠ ܡܳܪܗܽܘܢ܇ ܘܢܶܗܘܽܘܢ ܬܟܺܝܠܺܝܢ ܟܰܕ ܡܰܪܫܥܺܝܢ ܕܥܰܠ ܥܰܘܠܗܽܘܢ ܠܰܡ ܗܳܐ ܡܦܺܝܣܰܬܝ̱܀

ܡܶܛܽܠ ܥܶܣܪܳܐ ܐܶܠܽܘ ܗ̱ܘܰܘ܇ ܟܺܐܢ̈ܶܐ ܒܰܣܕܽܘܡ ܐܶܬܦܰܪܩܰܬ݀܇ ܗܳܐ ܪ̈ܶܒܘܳܬܳܐ ܕܰܡܗ̈ܰܝܡܢܶܐ܇ ܗܳܪܟܳܐ ܓܳܥܶܝܢ ܫܡܰܥܝ̱ ܩܳܠܗܽܘܢ܀

ܢܶܒܛܰܠ ܥܰܘܠܳܐ ܡܶܢ ܥܳܠܡܳܐ܇ ܝܰܠܽܘ̈ܕܶܐ ܥܶܠܬܳܐ ܕܟܽܠ ܡܰܪ̈ܕܘܳܢ܇ ܕܶܐܢ ܚܛܳܗ̈ܶܐ ܠܳܐ ܣܳܚܦܺܝܢ ܠܳܗܿ܇ ܠܰܐܪܥܳܐ ܕܬܶܦܶܠܝ̱ ܠܳܐ ܢܳܦܠܳܐ܀

ܣܒܰܥ ܐܺܝܣܪܳܐܺܝܠ ܫܡܶܢ ܘܰܒܥܰܛ܇ ܘܰܛܥܳܐ ܠܡܳܪܶܗ ܐܳܦ ܨܰܚܝܶܗ܇ ܘܰܒܡܰܪܕܽܘܬܳܐ ܒܠܰܥܘ̱ ܘܶܐܬܬܘܺܝܘ܇ ܕܗܽܘ ܡܚܰܟܶܡ ܠܗܽܘܢ ܥܰܕ ܡܶܬܪܕܶܝܢ܀

ܥܰܠܺܝܠ ܪܽܘܫܥܳܐ ܘܗܽܘ ܐܰܝܬܺܝ܇ ܠܩܰܡܨܳܐ ܠܰܐܪܥܳܐ ܘܬܽܘܒ ܐܰܚܪܒܶܗܿ܇ ܒܰܬܝܳܒܽܘܬܳܐ ܢܶܬܟܰܫܪܽܘܢ܇ ܘܰܡܪܰܚܶܡ ܐ̱ܢܳܐ ܥܰܠ ܙܰܪܥܗܽܘܢ܀ ܦܬܺܝܚ ܗܽܘ ܬܰܪܥܳܐ ܠܳܐ ܡܶܬܬܚܶܕ܇ ܠܰܬܝܳܒܽܘܬܳܐ ܐܶܢ ܗܳܘܝܳܐ܇ ܠܳܐ ܓܶܝܪ ܨܳܒܶܝܢ ܡܶܬܟܰܫܪܺܝܢ܇ ܐܰܝܟܰܢ ܐܶܫܡܰܥ ܡܽܘܢ ܕܳܐܡܰܪܬܝ̱܀

ܨܠܽܘܬܳܐ ܕܥܰܡܳܐ ܡܳܐ ܕܗܳܘܝܳܐ܇ ܠܳܐ ܗܘܳܐ ܒܡ̈ܶܠܶܐ ܡܶܨܛܰܒܬܳܐ܇ ܐܶܠܳܐ ܒܰܥܒ̈ܳܕܶܐ ܛܳܒ̈ܶܐ܇ ܥܳܐܠܳܐ ܘܒܳܥܝܳܐ ܡܶܬܩܰܒܠܳܐ܀

ܩܳܠܳܐ ܕܥܰܘܠܳܐ ܩܰܕܺܝܡ ܠܶܗ܇ ܠܗܳܢܳܐ ܩܳܠܳܐ ܕܗܳܐ ܡܶܫܬܡܰܥ܇ ܓܰܘܪܐ ܒܫܽܘ̈ܩܶܐ ܘܰܒܒ̈ܳܬܶܐ܇ ܘܟܡܳܐ ܐܶܛܥܰܢ ܠܰܕܡܰܪܫܥܺܝܢ܀

ܪܰܒ ܗܽܘ ܥܰܘܠܳܐ ܕܰܚܛܺܝܬܰܢ܇ ܛܳܒ ܡܶܢ ܟܺܐܦܳܐ ܕܰܡܚܽܘܬܳܐ܇ ܘܶܐܢ ܟܳܠܝܳܐ ܐ̱ܢܳܐ ܕܠܳܐ ܢܶܒܠܥܽܘܢ܇ ܣܪܺܝܚ ܗܽܘ ܥܳܠܡܳܐ ܘܠܳܐ ܡܶܬܒܢܶܐ܀

ܫܒܽܘܩܝ̱ ܠܰܒܪܺܝܬܳܐ ܡܶܬܟܰܘܢܳܐ܇ ܒܫܰܒ̈ܛܶܐ ܘܢܶܓ̈ܕܶܐ ܡܰܪܺܝܪ̈ܶܐ܇ ܕܶܐܢ ܟܳܠܝܳܐ ܐ̱ܢܳܐ ܕܠܳܐ ܢܶܒܠܥܽܘܢ܇ ܬܽܘܒ ܒܰܚܛܳܗ̈ܶܐ ܡܶܬܟܰܫܪܺܝܢ܀

ܬܠܰܘ ܥܰܝܢܰܝ̈ܟܽܘܢ ܠܘܳܬ ܡܳܪܝܳܐ܇ ܥܰܡܳܗܿ ܕܰܐܪܥܳܐ ܘܪ̈ܰܚܡܶܐ ܒܥܰܘ܇ ܕܺܐܝܬ ܠܶܗ ܪ̈ܰܚܡܶܐ ܘܝܳܗܶܒ ܠܟܽܘܢ܇ ܕܰܡܠܶܐ ܪ̈ܰܚܡܶܐ ܗܰܘ ܠܳܐ ܢܶܫܒܩܺܝܘܗ̱ܝ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܓܽܘ̈ܕܶܐ ܕܥܺܝܪ̈ܶܐ ܬܗܰܪ̈ܝ̱ ܒܳܟ ܡܳܪܝ̱܇ ܟܰܕ ܥܰܠ ܥܺܝܠܳܐ ܝܳܬܶܒ ܗܘܰܝܬ܇ ܘܰܒܢ̈ܰܝ ܐܳܕܳܡ ܥܰܦܪܳܢܳܐ܇ ܙܳܡܪܺܝܢ ܠܳܟ ܩܳܠ̈ܰܝ ܫܽܘܒܚܳܐ܇ ܕܶܐܬܬܰܚܬܺܝܬ ܘܰܗܘܰܝܬ ܐ̱ܢܳܫܳܐ܇ ܘܫܰܘܙܶܒܬ ܐܶܢܽܘܢ ܡܶܢ ܒܺܝܫܳܐ܀

ܫܽܘܒܚܳܐ ܠܡܽܘܟܳܟܳܟ ܡܳܪܰܢ܇ ܕܶܐܬܬܰܚܬܺܝܬ ܠܰܙܥܽܘܪܽܘܬܳܐ܇ ܘܫܰܒܪ̈ܶܐ ܘܝܰܠܽܘ̈ܕܶܐ ܩܥܰܘ ܠܳܟ܇ ܫܽܘܒܚܳܐ ܦܐܝܐ ܒܽܐܘܫܰܥܢ̈ܶܐ܇ ܘܰܚܢܰܢ ܥܰܡܗܽܘܢ ܩܳܥܶܝܢܰܢ܇ ܫܽܘܒܚܳܐ ܠܳܟ ܘܰܥܠܰܝܢ ܪ̈ܰܚܡܰܝܟ܇ ܒܗܳܢ ܥܳܠܡܳܐ ܘܰܒܗܰܘ ܕܰܥܬܺܝܕ ܒܰܬܪ̈ܰܝܗܽܘܢ ܪܰܚܶܡܥܠܰܝܢ܀

 

ܕܨܰܦܪܳܐ ܥܶܢܝܳܢܳܐ ܕܪܰܚܶܡܥܠܰܝܢ܇

ܒܩܳܠܳܐ ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܗܳܐ ܦܳܪܥܺܝܢ ܒܢ̈ܰܝ ܥܺܕ̈ܳܬܳܐ܇ ܫܽܘܒܚܳܐ ܕܰܛܠܶܡܘ̱ ܒܢ̈ܰܝ ܨܶܗܝܽܘܢ܇ ܘܗܳܐ ܡܙܰܝܚܺܝܢ ܠܶܗ܇ ܠܥܺܐܕܳܟ ܫܰܒܪ̈ܶܐ ܘܝܰܠܽܘ̈ܕܶܐ܇ ܐܰܠܳܗܳܐ܀

ܙܳܚܘ̱ ܟܶܢܫ̈ܶܐ ܠܡܶܠܬܳܟ܇ ܘܰܚܕܺܝܘ ܒܳܟ ܐܰܝܟ ܐܰܠܳܗܳܐ܇ ܕܣܰܒܪܳܐ ܕܚܰܝ̈ܶܐ ܟܣܶܐ ܗܘܳܐ ܒܳܟ ܠܰܡܫܰܒܚܳܢܰܝ̈ܟ܇ ܐܰܠܳܗܳܐ܀

ܐܰܫܘܳܐ ܠܰܢ ܦܳܪܽܘܩܰܢ܇ ܕܢܶܛܥܰܢ ܣܰܘܟ̈ܶܐ ܪ̈ܽܘܚܳܢܶܐ܇ ܘܢܶܦܽܘܩ ܠܽܐܘܪܥܳܟ ܒܽܐܘܫܰܥܢ̈ܶܐ ܡܶܬܝܰܕܥܳܢ̈ܶܐ܇ ܐܰܠܳܗܳܐ܀

ܩܥܳܐ ܠܳܗܿ ܢܒܺܝܳܐ ܠܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܳܬܶܐ ܨܶܝܕܰܝܟܝ̱܇ ܡܰܟܺܝܟ ܘܰܪܟܺܝܒ܇ ܥܰܠ ܥܺܝܠܳܐ ܩܽܘܡܝ̱ ܦܽܘܩܝ̱ ܠܽܐܘܪܥܶܗ܀

ܪܶܓܙܰܬ݀ ܨܶܗܝܽܘܢ ܕܰܚܙܳܬ݀܇ ܠܰܒܪܳܐ ܒܽܘܟܪܳܐ ܕܥܳܐܶܠ ܠܳܗܿ܇ ܘܚܶܕܝܰܬ݀ ܥܺܕܬܳܐ܇ ܘܩܰܒܶܠܬܶܗ ܒܩܳܠ̈ܰܝ ܫܽܘܒܚܳܐ܇ ܐܰܠܳܗܳܐ ܐܬܪܰܚܶܡܥܠܰܝܢ܀

 

ܐܰܠܳܗܝ̱ ܐܰܠܳܗܝ̱ ܗܰܘ ܕܥܽܘܗܕܳܢܳܐ

ܗܰܘ ܕܰܫܒܰܩ ܗܘܳܐ ܟܶܢܫ̈ܶܐ ܕܢܽܘܪ̈ܳܢܶܐ܇ ܘܡܶܢ ܒܢܰܝ̈ܢܳܫܳܐ ܥܰܦܪ̈ܳܢܶܐ܇ ܐܶܬܩܰܠܰܣ ܐܰܠܳܗܳܐܺܝܬ܇ ܠܘܳܬܳܟ܀

ܗܰܘ ܕܳܐܦ ܥܺܝܠܳܐ܇ ܫܺܝܛܳܐ ܛܰܥܢܶܗ ܗܘܳܐ܇ ܠܚܰܝܠܳܟ ܟܰܣܝܳܐ ܘܓܰܢ̱ܒܳܪܳܐ܇ ܗܰܘ ܕܶܐܬܳܐ ܠܘܳܬܰܢ ܒܚܽܘܒܶܗ܇ ܠܘܳܬܳܟ܀

ܗܰܘ ܕܰܩܥܰܘ ܠܶܗ܇ ܝܰܠܽܘ̈ܕܶܐ ܘܫܰܒܪ̈ܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܠܘܳܬܳܟ܀

ܗܰܘ ܕܥܰܠ ܥܺܝܠܳܐ܇ ܫܺܝܛܳܐ ܝܳܬܶܒ ܗܘܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܫܰܒܪ̈ܶܐ ܘܝܰܠܽܘ̈ܕܶܐ ܩܥܰܘ ܠܶܗ܇ ܠܘܳܬܳܟ ܩܰܕܡܶܬ܀

 

ܐ̱ܚܪܺܢܳܐ ܩܳܠܳܐ ܠܰܐܠܳܗܳܐ ܕܒܰܐܬܽܘܢܳܐ

ܒܗܳܢ ܝܰܘܡܳܐ ܟܽܠܗܽܘܢ ܥܰܡܡ̈ܶܐ ܢܰܚܬܰܝ̈ܗܽܘܢ܇ ܫܰܘܺܝܘ ܒܽܐܘܪܚܳܐ ܩܕܳܡ ܒܰܪ ܡܰܠܟܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܰܪܟܺܝܒ ܥܺܝܠܳܐ ܕܰܐܬܳܢܳܐ܇ ܕܠܶܗ ܫܰܒܰܚܘ̱܀

ܝܰܒܶܒܘ̱ ܠܶܗ ܒܽܐܘܫܰܥܢܰܝ̈ܗܽܘܢ ܥܶܠܳܝ̈ܶܐ ܥܰܡ ܬܰܚܬܳܝ̈ܶܐ ܠܒܰܪ ܐܰܠܳܗܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܟܽܠܗܽܘܢ ܥܰܡܡ̈ܶܐ ܘܶܐܡܘ̈ܳܬܳܐ ܡܫܰܒܚܺܝܢ ܠܶܗ܇ ܠܒܰܪ ܐܰܠܳܗܳܐ ܒܽܐܘܫܰܥܢ̈ܶܐ܇ ܘܝܰܬܺܝܪ܀

ܛܠܳܝ̈ܶܐ ܫܰܒܚܽܘܗ̱ܝ ܒܽܐܘܫܰܥܢ̈ܶܐ܇ ܟܪ̈ܽܘܒܶܐ ܘܰܣܪ̈ܳܦܶܐ ܩܳܥܶܝܢ ܩܰܕܺܝܫ ܩܰܕܺܝܫ ܩܰܕܺܝܫ܇ ܘܝܰܠܽܘ̈ܕܶܐ ܛܥܺܝܢܺܝܢ ܣܰܘܟ̈ܶܐ܇ ܘܩܳܥܶܝܢ ܩܽܘܕܡܰܘܗ̱ܝ ܐܽܘܫܰܥܢܳܐ܇ ܕܠܶܗ ܫܰܒܰܚܘ̱܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܗܳܢܰܘ ܒܰܫܪܳܪܳܐ

ܝܰܘܡܳܢ ܥܰܠ ܡܳܪܰܢ܇ ܠܽܐܘܪܺܫܠܶܡ ܘܰܪܟܺܝܒ ܥܺܝܠܳܐ܇ ܘܰܛܠܳܝ̈ܶܐ ܒܣܰܘ̈ܟܰܝ ܙܰܝܬܳܐ܇ ܡܫܰܒܚܺܝܢ ܗ̱ܘܰܘ ܘܩܳܥܶܝܢ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܒܪܰܘܡܳܐ ܘܥܽܘܡܩܳܐ܇ ܒܪܺܝܟ ܕܶܐܬܳܐ ܘܰܒܡܽܘܟܳܟܶܗ ܪܰܡܪܶܡ ܫܰܦܠܽܘܬܰܢ܀

ܒܪܺܝܟ ܗܽܘ ܡܫܺܝܚܳܐ܇ ܕܶܐܬܳܐ ܡܶܛܽܠ ܦܽܘܪܩܳܢܰܢ܇ ܘܰܫܒܰܩ ܚܰܨܳܐ ܕܰܟܪ̈ܽܘܒܶܐ܇ ܕܰܟܕܺܝܢܺܝܢ ܠܶܗ ܬܚܶܝܬ ܡܰܪܟܰܒܬܶܗ܇ ܘܥܰܠ ܥܺܝܠܳܐ ܝܳܬܶܒ ܗܘܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ ܡܕܺܝܢܰܬ ܡܰܠܟ̈ܶܐ܇ ܘܰܚܙܰܐܽܘܗ̱ܝ ܥܠܰܝ̈ܡܶܐ ܘܰܛܠܳܝ̈ܶܐ܇ ܘܫܰܒܚܽܘܗ̱ܝ ܒܽܐܘܫܰܥܢ̈ܶܐ܀

 

ܐ̱ܚܪܺܢܳܐ ܒܩܳܠܳܐ ܙܳܥ ܗܘܳܐ ܝܰܘܣܶܦ

ܟܳܗ̈ܢܶܐ ܛܠܰܡܘ̱ ܗ̱ܘܰܘ ܬܶܫܒܽܘܚܬܶܗ܇ ܘܒܰܐܠܳܗܽܘܬܶܗ ܓܰܕܶܦܘ̱܇ ܕܒܰܚܣܳܡܳܐ ܘܪܶܛܢܳܐ ܦܓܰܥܘ̱ ܒܶܗ܇ ܘܰܐܙܺܝܥ ܐܶܢܽܘܢ ܠܰܛܠܳܝ̈ܶܐ ܕܰܢܫܰܒܚܽܘܢܳܝܗ̱ܝ ܒܽܐܘܫܰܥܢ̈ܶܐ܇ ܘܰܢܚܰܪܪܽܘܢ ܠܰܐܒܳܗܰܝ̈ܗܽܘܢ܇ ܡܶܢ ܚܰܘܒܬܳܐ ܕܚܰܝܳܒܺܝܢ ܗ̱ܘܰܘ܇ ܬܰܘ ܐܰܚ̈ܰܝ ܢܶܙܡܰܪ ܫܽܘܒܚܳܐ܀

ܠܝܰܥܩܽܘܒ ܣܳܒܳܐ ܒܰܕܶܩ ܗܘܳܐ܇ ܪܽܘܚܳܐ ܥܰܠ ܓܶܠܝܳܢܳܟ܇ ܘܡܶܐܬܺܝܬܳܟ ܦܳܪܽܘܩܳܝܬܳܐ܇ ܟܰܕ ܐܰܘܕܰܥ ܢܰܗܺܝܪܰܐܺܝܬ܇ ܘܚܰܘܺܝ ܠܶܗ ܪܽܘܚܳܢܳܐܺܝܬ܇ ܕܡܶܢ ܝܺܗܽܘܕܳܐ ܥܬܺܝܕ ܕܢܶܕܢܰܚ܇ ܣܽܘܟܳܝܳܐ ܠܟܽܠܗܽܘܢ ܥܰܡܡ̈ܶܐ܇ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܩܪܳܐ ܠܳܗܿ ܢܒܺܝܳܐ ܠܒܰܪܬ ܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܳܬܶܐ ܠܶܟܝ̱܇ ܘܗܳܕܳܐܗ̱ܝ ܐܳܬܳܐ ܕܡܶܐܬܺܝܬܶܗ܇ ܡܰܟܺܝܟ ܘܰܪܟܺܝܒ ܥܰܠ ܥܺܝܠܳܐ܇ ܘܰܒܡܽܘܟܳܟܶܗ ܦܳܪܶܩ ܠܶܟܝ̱܇ ܩܽܘܡܝ̱ ܦܽܘܩܝ̱ ܠܽܐܘܪܥܶܗ ܒܽܐܘܫܰܥܢ̈ܶܐ܇ ܘܰܣܓܽܘܕܝ̱ ܩܽܘܕܡܰܘܗ̱ܝ ܒܬܰܘܕܺܝܬܳܐ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܗܰܘ ܕܰܛܥܺܝܢ ܟܽܠ ܒܶܪ̈ܝܳܬܳܐ

ܝܰܘܡܳܢܳܐ ܥܰܠ ܗܘܳܐ ܡܳܪܰܢ܇ ܠܽܐܘܪܺܫܠܶܡ ܘܰܪܟܶܒ ܥܺܝܠܳܐ ܘܶܐܬܡܰܟܰܟ ܗܘܳܐ ܒܛܰܝܒܽܘܬܶܗ܇ ܕܰܢܪܰܡܪܶܡ ܫܰܦܠܶܗ ܕܳܐܕܳܡ܇ ܥܺܝܪ̈ܶܐ ܙܳܝܥܺܝܢ ܡܶܢ ܬܰܘܩܦܶܗ܇ ܘܥܺܝܠܳܐ ܫܺܝܛܳܐ ܛܰܥܢܶܗ ܗܘܳܐ܇ ܠܶܗ ܬܶܫܒܽܘܚܬܳܐ ܕܰܒܝܰܕ ܡܽܘܟܳܟܶܗ܇ ܦܰܪܩܶܗ ܠܓܶܢܣܰܢ ܡܶܢ ܛܽܘܥܝܰܝ܀

ܝܰܘܡܳܢܳܐ ܥܰܠ ܗܘܳܐ ܡܳܪܰܢ܇ ܠܽܐܘܪܺܫܠܶܡ ܘܰܪܟܺܝܒ ܥܺܝܠܳܐ ܘܙܟܰܪܝܳܐ ܩܰܕܶܡ ܣܰܒܪܳܗܿ܇ ܕܗܳܐ ܡܰܠܟܶܟܝ̱ ܐܳܬܳܐ ܨܶܝܕܰܝܟܝ̱܇ ܩܽܘܡܝ̱ ܦܽܘܩܝ̱ ܠܽܐܘܪܥܶܗ ܘܩܰܒܶܠܳܝܘܗ̱ܝ܇ ܘܰܩܥܳܝܗ̱ܝ ܩܽܘܕܡܰܘܗ̱ܝ ܒܽܐܘܫܰܥܢ̈ܶܐ܇ ܒܪܺܝܟ ܐܺܝܩܳܪܶܗ ܕܶܐܬܬܰܚܬܺܝ ܒܚܽܘܒܶܗ܇ ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܝܰܘܡܳܢܳܐ ܥܰܠ ܗܘܳܐ ܡܳܪܰܢ܇ ܠܽܐܘܪܺܫܠܶܡ ܘܰܪܟܺܝܒ ܥܺܝܠܳܐ ܐܰܝܟ ܕܰܟܬܺܝܒ܇ ܘܰܢܦܰܩܘ̱ ܠܽܐܘܪܥܶܗ ܝܰܠܽܘ̈ܕܶܐ ܗܕܺܝܪ̈ܶܐ ܬܶܫܒܽܘܚܬܳܐ ܬܳܐ ܒܰܫܠܳܡܳܐ ܒܰܪ ܕܰܘܺܝܕ ܘܰܒܪܶܗ ܚܰܝܳܐ ܕܰܐܠܳܗܳܐ ܕܝܳܗܶܒ ܠܣܳܗ̈ܕܶܐ ܩܰܕܺܝܫ̈ܶܐ ܟܠܺܝ̈ܠܶܐ ܥܛܺܝ̈ܦܰܝ ܙܳܟܽܘܬܳܐ܀

ܥܰܠ ܥܺܝܠܳܐ ܫܺܝܛܳܐ ܪܟܶܒ ܗܘܳܐ܇ ܘܥܰܠ ܢܰܚܬܰܝ̈ܗܽܘܢ ܕܬܰܠܡܺܝ̈ܕܶܐ܇ ܘܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܡܶܠܬܳܐ ܝܺܚܺܝܕܳܐ ܐܰܠܳܗܳܐ܇ ܘܰܛܠܳܝ̈ܶܐ ܒܣܰܘ̈ܟܰܝ ܙܰܝܬܳܐ܇ ܟܰܕ ܩܳܥܶܝܢ ܗ̱ܘܰܘ ܒܽܐܘܫܰܥܢ̈ܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܬܳܐ ܙܟܰܪܝܳܐ ܓܠܺܝ ܠܺܝ ܐ̱ܪܳܙܳܐ܇ ܐܰܝܟܰܢܳܐ ܚܙܰܝܬܳܝܗ̱ܝ ܠܰܒܪܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܰܪܟܺܝܒ ܥܺܝܠܳܐ ܕܰܐܬܳܢܳܐ܇ ܘܫܰܒܪ̈ܶܐ ܕܩܳܥܶܝܢ ܗ̱ܘܰܘ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܡܰܠܟܳܐ ܪܰܒܳܐ ܕܺܐܝܣܪܺܐܶܝܠ܀

ܫܽܘܒܚܳܐ ܠܝܰܠܕܳܐ ܡܬܽܘܡܳܝܳܐ܇ ܕܰܕܢܰܚ ܡܶܢ ܐܰܒܳܐ ܓܢܺܝܙܳܐ܇ ܘܶܐܬܺܝܠܶܕ ܒܚܰܪܰܬ ܙܰܒܢ̈ܶܐ܇ ܕܠܳܐ ܫܽܘܚܠܳܦܳܐ ܡܶܢ ܡܰܪܝܰܡ܇ ܘܰܪܟܶܒ ܥܺܝܠܳܐ ܕܰܐܬܳܢܳܐ܇ ܘܥܰܠ ܠܽܐܘܪܺܫܠܶܡ ܒܚܰܕܽܘܬܳܐ܇ ܘܰܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ܇ ܫܰܒܰܚܘ̱ ܩܽܘܕܡܰܘܗ̱ܝ ܒܽܐܘܫܰܥܢ̈ܶܐ܀

 

ܩܳܠܳܐ ܕܨܰܦܪܳܐ ܩܳܠܳܐ ܛܽܘܒܰܝܟܝ̱ ܥܺܕܬܳܐ

ܒܗܳܢܳܐ ܝܰܘܡܳܐ܇ ܝܺܬܶܒ ܥܰܠ ܒܰܪ ܐܰܬܳܢܳܐ܇ ܗܰܘ ܕܰܚܙܳܝܗ̱ܝ ܕܰܘܺܝܕ ܕܰܪܟܺܝܒ ܒܪ̈ܶܒܘܳܬܳܐ ܘܰܒܠܶܠܦ̈ܶܐ ܕܚܰܝܠܳܐ ܘܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ܇ ܘܓܺܝܓ̈ܠܶܐ ܕܢܽܘܪܳܐ ܘܰܕܪܽܘܚܳܐ܇ ܘܫܰܒܪ̈ܶܐ ܕܰܚܙܰܘ ܗܳܐ ܩܳܥܶܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܩܥܰܘ ܫܰܒܪ̈ܶܐ ܥܰܡ ܝܰܠܽܘ̈ܕܶܐ܀

ܒܪܺܝܟ ܗܽܘ ܡܫܺܝܚܳܐ܇ ܕܶܐܬܳܐ ܡܶܛܽܠ ܦܽܘܪܩܳܢܰܢ܇ ܘܰܫܒܰܩ ܫܽܘܒܚܳܐ ܕܰܟܪ̈ܽܘܒܶܐ܇ ܕܰܟܕܺܝܢܺܝܢ ܬܚܶܝܬ ܡܰܪܟܰܒܬܶܗ܇ ܘܥܰܠ ܥܺܝܠܳܐ ܫܺܝܛܳܐ ܝܺܬܶܒ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܚܙܰܐܽܘܗ̱ܝ ܥܠܰܝ̈ܡܶܐ ܘܰܛܠܳܝ̈ܶܐ܇ ܘܫܰܒܚܽܘܗ̱ܝ ܒܩܳܠܰܝ̈  ܐܽܘܫܰܥ̈ܢܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܀

 

ܐ̱ܚܪܺܢܳܐ ܒܩܳܠܳܐ ܒܨܰܦܪܳܐ ܢܩܰܕܶܡ ܠܰܨܠܽܘܬܳܐ

ܡܰܪܟܰܒܬܳܐ ܗܳܝ ܕܰܟܪ̈ܽܘܒܶܐ܇ ܠܳܐ ܣܶܦܩܰܬ݀ ܕܬܶܙܕܰܝܰܚ ܒܳܗܿ܇ ܘܪܰܥܡܳܐ ܕܫܽܘܒܚܳܐ ܕܰܣܪ̈ܳܦܶܐ܇ ܙܥܽܘܪ ܗܽܘ ܠܪܰܒܽܘܬܳܟ܇ ܘܰܗܘܰܝܬ ܐ̱ܢܳܫܳܐ ܒܨܶܒܝܳܢܳܟ܇ ܘܥܺܝܠܳܐ ܣܦܰܩ ܗܘܳܐ ܠܰܪܟܽܘܒܳܟ܇ ܘܩܰܒܶܠܬ ܫܽܘܒܚܳܐ ܡܶܢ ܫܰܒܪ̈ܶܐ ܡܰܘܪܶܒ ܙܥܽܘܪܽܘܬܰܢ܀

ܠܰܝܬ ܠܺܝ ܕܶܝܢ ܡܳܪܳܐ ܐ̱ܚܪܺܢܳܐ܇ ܘܠܰܝܬ ܐܰܠܳܗܳܐ ܠܒܰܪ ܡܶܢܳܟ܇ ܩܳܥܝܳܐ ܥܺܕܬܳܐ ܡܗܰܝܡܰܢܬܳܐ܇ ܠܡܰܠܟܳܐ ܫܡܰܝܳܢܳܐ܇ ܝܰܠܕ̈ܰܝ ܢܶܗܘܽܘܢ ܟܶܢܳܪ̈ܶܐ ܘܰܢܫܰܒܚܽܘܢ ܒܽܐܘܫܰܥܢܰܝ̈ܗܽܘܢ ܠܗܰܘ ܕܶܐܬܳܐ ܘܰܥܬܺܝܕ ܕܢܺܐܬܶܐ ܫܽܘܒܚܳܐ ܠܫܳܠܽܘܚܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܶܢ ܒܶܝܬ ܓܶܦ̈ܶܐ ܘܓܺܝܓ̈ܠܶܐ ܘܰܐܦ̈ܶܐ ܕܫܰܠܗܶܒܺܝܬܳܐ܇ ܫܰܩܠܽܘܟ ܪ̈ܰܚܡܰܝܟ ܗܳܐ ܡܙܰܝܰܚ ܠܳܟ ܒܰܪ ܐܰܬܳܢܳܐ܇ ܡܶܢ ܗܰܘ ܚܰܨܳܐ ܕܰܡܠܶܐ ܥܰܝ̈ܢܶܐ ܟܰܕ ܡܶܬܟܰܪ̈ܟܳܢ܇ ܠܗܳܢܳܐ ܪܟܽܘܒܳܐ ܘܰܕܫܺܝܛ ܡܶܢܶܗ ܒܥܳܠܡܳܐ ܠܳܐ ܐܺܝܬ܀

ܠܳܟ ܬܶܫܒܽܘܚܬܳܐ ܡܩܰܒܶܠ ܫܽܘܒܚܳܐ ܕܰܡܫܰܒܚܳܢ̈ܶܐ܇ ܘܠܳܟ ܬܰܘܕܺܝܬܳܐ ܡܩܰܒܶܠ ܕܳܫܢ̈ܶܐ ܡܶܢ ܝܰܠܽܘ̈ܕܶܐ܇ ܚܳܕܝܳܐ ܥܺܕܬܳܐ ܘܕܳܝܨܳܐ ܘܪܳܘܙܳܐ ܒܝܽܘܡ ܥܰܐܕܥܺܐܕܳܟ܇ ܘܰܐܦܨܰܚ ܐܰܦܶܝ̈ܗܿ ܒܝܽܘܡ ܓܶܠܝܳܢܳܟ ܠܳܟ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ ܒܩܳܠܳܐ ܩܽܘܩܳܝܳܐ

ܐܰܠܳܗܳܐ ܕܠܳܐ ܡܶܣܬܰܝܰܟ ܡܶܢ ܒܶܪ̈ܝܳܬܳܐ܇ ܘܥܺܝܪ̈ܶܐ ܠܳܐ ܡܨܶܝܢ ܚܳܙܶܝܢ ܠܶܗ ܕܰܒܡܶܠܬܶܗ ܐܶܬܒܪܺܝܘ܇ ܓܢܺܝܙ ܡܶܢ ܐ̱ܢܳܫ̈ܳܐ ܕܡܶܡܬܽܘܡ ܠܳܐ ܚܙܰܐܽܘܗ̱ܝ܇ ܘܪܶܡܙܶܗ ܡܕܰܒܰܪ ܟܽܠܗܶܝܢ ܒܶܪ̈ܝܳܬܳܐ܇ ܛܥܺܝܢܺܝܢ ܠܶܗ ܓܺܝܓ̈ܠܰܝ ܢܽܘܪܳܐ ܡ̈ܰܠܳܠܳܬܳܐ܇ ܘܰܪܟܶܒ ܗܘܳܐ ܥܺܝܠܳܐ ܫܺܝܛܳܐ ܘܥܰܠ ܗܘܳܐ ܠܽܐܘܪܺܫܠܶܡ ܗ ܘ ܗ܀

 

ܐܶܬܬܥܺܝܪܝ̱ ܐܶܬܬܥܺܝܪܝ̱ ܒܰܪܬ ܥܰܡܡ̈ܶܐ ܥܺܕܬܳܐ ܩܰܕܺܝܫܬܳܐ܇ ܘܰܙܡܰܪܝ̱ ܫܽܘܒܚܳܐ ܒܽܐܘܫܰܥ̈ܢܶܐ ܠܗܰܘ ܕܰܪܟܺܝܒ ܥܺܝܠܳܐ܇ ܠܳܐ ܩܰܒܶܠܬܶܗ ܨܶܗܝܽܘܢ ܨܳܠܽܘܒܬܳܐ܇ ܘܫܛܳܬ݀ ܡܶܠܬܶܗ ܕܰܢܒܺܝܳܐ ܕܣܰܒܪܳܗܿ܇ ܘܥܰܠ ܗܳܕܶܐ ܒܰܕܪܳܗܿ ܘܰܫܕܳܗܿ ܒܰܝܢܳܬ ܥܰܡܡ̈ܶܐ܇ ܘܳܝܠܳܗܿ ܡܶܟܺܝܠ ܘܰܠܥܳܠܰܡ ܘܠܶܟܝ̱ ܥܺܕܬܳܐ ܛܽܘܒܰܝܟܝ̱ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܠܥܶܠ ܥܰܙܺܝܙܳܐ ܕܳܚܠܳܐ ܡܶܢܶܗ ܫܰܠܗܶܒܝܬܳܐ܇ ܠܬܰܚܬ ܡܰܟܺܝܟܳܐ ܕܰܠܒܺܝܫ ܟܽܠܳܗܿ ܡܶܣܟܺܢܽܘܬܳܐ܇ ܥܺܝܪ̈ܶܐ ܕܢܽܘܪܳܐ ܒܒܰܪ̈ܩܶܐ ܕܢܽܘܪܳܐ ܕܳܪܫܺܝܢ ܐܽܘܪܚܗ܇ ܐܳܦ ܬܰܠܡܺܝ̈ܕܶܐ ܟܰܕ ܐܳܫܕܺܝܢ ܗ̱ܘܰܘ ܡܰܪ̈ܛܽܘܛܰܝܗܽܘܢ܀

ܢܫܰܒܚܽܘܢ ܠܳܟ ܡܳܪܝ̱ ܥܺܝܪ̈ܰܝ ܪܰܘܡܳܐ ܒܩܽܘܕܳܫܰܝ̈ܗܽܘܢ ܐܳܦ ܝܰܠܽܘ̈ܕܶܐ ܘܫܰܒܪ̈ܶܐ ܒܣܰܘ̈ܟܶܐ ܕܽܐܘܫܰܥܢܰܝ̈ܗܽܘܢ܇ ܢܰܣܩܽܘܢ ܫܽܘܒܚܳܐ ܢܒܺܝ̈ܶܐ ܕܒܰܕܶܩܘ̱ ܥܰܠ ܓܶܠܝܳܢܳܟ܇ ܕܰܐܢ̱ܬܽܗ̱ܘ ܫܰܡܠܺܝܬ ܐ̱ܪܳܙ ܡܶܠܰܝ̈ܗܽܘܢ ܠܳܟ ܬܶܫܒܽܘܚܬܳܐ܀

 

ܕܦܶܠܓܶܗ ܕܝܰܘܡܳܐ ܩܳܠܳܐ ܐܶܢܳܐ ܐ̱ܢܳܐ ܢܽܘܗܪܳܐ

ܗܰܘ ܕܰܛܥܺܝܢ ܟܽܠܗܶܝܢ ܒܶܪ̈ܝܳܬܳܐ܇ ܘܰܩܒܶܝܢ ܝܰܡܡ̈ܶܐ ܒܓܰܘ ܫܽܘܥܠܶܗ܇ ܥܰܠ ܚܰܨܳܐ ܕܥܺܝܠܳܐ ܝܳܬܶܒ ܗܘܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܰܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ܇ ܡܫܰܒܚܺܝܢ ܗ̱ܘܰܘ ܩܽܘܕܡܰܘܗ̱ܝ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܒܰܫܡܶܗ ܕܡܳܪܝܳܐ ܐܰܠܳܗܳܐ܀

ܠܬܰܠܡܺܝ̈ܕܰܘܗ̱ܝ ܐܶܡܰܪ ܦܳܪܽܘܩܰܢ܇ ܟܰܕ ܢܚܶܬ ܡܶܢ ܛܽܘܪ ܙܰܝ̈ܬܶܐ܇ ܕܗܳܐ ܫܳܠܶܡ ܠܶܗ ܐ̱ܪܳܙܳܐ ܕܰܢܒܺܝ̈ܶܐ܇ ܕܡܶܛܽܠ ܡܶܐܬܺܝܬܝ̱ ܐܶܬܢܰܒܺܝܘ܇ ܥܰܠ ܥܺܝܠܳܐ ܒܰܕܶܩ ܝܰܥܩܽܘܒ܇ ܘܙܟܰܪܝܳܐ ܓܠܳܐ ܠܳܗܿ ܠܨܶܗܝܽܘܢ܇ ܡܶܛܽܠ ܥܠܰܝ̈ܡܶܐ ܘܝܰܠܽܘ̈ܕܶܐ܇ ܐܶܬܢܰܒܺܝ ܕܰܘܺܝܕ ܡܰܠܟܳܐ܇ ܒܽܐܘܪܺܫܠܶܡ ܙܳܡܪܺܝܢ ܫܽܘܒܚܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܰܣܠܺܝ ܪ̈ܰܟܫܳܐ ܘܩܳܪ̈ܽܘܩܶܐ܇ ܘܪܳܟܽܘܒܳܐ ܫܺܝܛܳܐ ܓܒܳܐ ܠܶܗ܇ ܕܬܶܫܠܰܡܝ̱ ܡܶܠܬܶܗ ܕܰܢܒܺܝܳܐ܇ ܕܶܐܬܢܰܒܺܝ ܠܳܗܿ ܠܒܰܪܬ ܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܳܬܶܐ ܨܶܝܕܰܝܟܝ̱܇ ܘܰܪܟܺܝܒ ܥܰܠ ܒܰܪ ܐܰܬܳܢܳܐ܀

ܕܫܰܒܚܽܘܟ ܢܒܺܝ̈ܶܐ ܒܐ̱ܪܳܙܰܝ̈ܗܽܘܢ܇ ܡܳܪܳܐ ܕܫܰܡܠܺܝ ܡܶܠܰܝ̈ܗܽܘܢ܇ ܕܰܐܟܪܙܽܘܟ ܫܠܺܝ̈ܚܶܐ ܒܙܰܒܢܰܝ̈ܗܽܘܢ܇ ܢܰܨܰܚܬ ܝܰܘܡܳܐ ܕܕܽܘܟܪܳܢܗܽܘܢ܇ ܥܺܕܬܳܐ ܩܳܥܝܳܐ ܒܽܐܘܫܰܥܢ̈ܶܐ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܀

 

ܕܰܬܫܰܥܫܳܥܺܝ̈ܢ ܩܳܠܳܐ ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ

ܛܠܳܝ̈ܶܐ ܫܰܒܚܽܘܗ̱ܝ ܒܽܐܘܫܰܥܢ̈ܶܐ ܘܝܰܠܽܘ̈ܕܶܐ ܒܣܰܘܟ̈ܰܝ ܙܰܝܬܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܡܰܠܟܳܐ ܕܺܐܝܣܪܳܐܶܝܠ܇ ܬܳܐ ܒܰܫܠܳܡ ܙܳܪܰܥ ܫܰܝܢܳܐ܇ ܘܡܰܐܣܶܐ ܟܺܐܒ̈ܶܐ ܕܐ̱ܢܳܫܽܘܬܰܢ܇ ܘܡܰܠܒܶܫ ܐܶܣܛܰܠ ܬܶܫܒܽܘܚܬܳܐ ܠܥܺܕܬܳܐ ܡܗܰܝܡܰܢܬܳܐ܀

ܒܪܶܗ ܕܐܰܒܳܐ ܒܪܳܗܿ ܕܺܐܝܬܽܘܬܳܐ܇ ܐܰܠܳܗܳܐ ܕܡܶܢ ܐܰܠܳܗܳܐ܇ ܕܰܫܒܰܩ ܪܰܘܡܳܐ ܕܥܶܠܳܝ̈ܶܐ܇ ܘܟܶܢܫ̈ܶܐ ܕܢܽܘܪ̈ܳܢܶܐ܇ ܬܰܚܬܺܝ ܝܳܬܶܗ ܠܡܽܘܟܳܟܳܐ܇ ܘܰܪܟܶܒ ܥܺܝܠܳܐ ܕܰܐܬܳܢܳܐ܇ ܘܝܰܠܽܘ̈ܕܶܐ ܒܢ̈ܰܝ ܐܽܘܪܺܫܠܶܡ܇ ܒܽܐܘܫܰܥܢ̈ܶܐ ܫܰܒܚܽܘܗ̱ܝ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܘܟܰܕ ܗܽܘ ܡܛܳܐ ܕܢܶܥܽܘܠ܇ ܙܳܚܘ̱ ܘܰܢܦܰܩܘ̱ ܠܽܐܘܪܥܶܗ܇ ܟܶܢܫ̈ܶܐ ܕܝܰܠܽܘ̈ܕܶܐ܇ ܩܰܠܣܽܘܗ̱ܝ ܒܽܐܘܫܰܥܢ̈ܶܐ܇ ܟܰܕ ܙܳܡܪܺܝܢ ܫܽܘܒܚܳܐ܇ ܡܶܢ ܐܰܪܥܳܐ ܠܪܰܘܡܳܐ܀

 

ܫܽܘܒܚܳܐ ܠܒܰܪ ܛܳܒܳܐ܇ ܕܶܐܬܳܐ ܠܦܽܘܪܩܳܢܰܢ܇ ܫܽܘܒܚܳܐ ܠܥܶܠܳܝܳܐ܇ ܕܰܢܚܶܬ ܗܘܳܐ ܡܶܢܰܢ܇ ܫܽܘܒܚܳܐ ܠܰܓܢܺܝܙܳܐ܇ ܕܰܢܚܶܬ ܘܫܰܘܙܶܒܠܰܢ܀

 

ܫܠܶܡ

 

ܬܽܘܒ ܕܪܰܡܫܳܐ ܕܰܬܠܳܬܳܐ ܒܫܰܒܳܐ ܕܽܐܘܫܰܥܢ̈ܶܐ

ܥܽܘܢܺܝܬܳܐ ܕܪܰܚܶܡܥܠܰܝ܇ ܒܩܳܠܳܐ ܐܶܡܳܐ ܕܟܺܝܬܳܐ

ܗܰܘ ܕܡܶܢ ܥܺܝܪ̈ܶܐ ܒܪܰܘܡܳܐ ܡܶܫܬܰܒܰܚ܇ ܡܶܢ ܝܰܠܽܘ̈ܕܶܐ ܒܕܶܩ̈ܠܶܐ ܡܶܬܩܰܠܰܣ܇ ܪܰܚܶܡܥܠܰܝ܀

ܗܰܘ ܕܡܶܢ ܫܰܒܪ̈ܶܐ܇ ܘܝܰܠܽܘ̈ܕܶܐ ܕܨܶܗܝܽܘܢ܇ ܒܣܰܘܟ̈ܰܝ ܙܰܝܬܳܐ܇ ܫܦܰܪ ܠܶܗ ܕܢܶܫܬܰܒܰܚ܀

ܙܟܰܪܝܳܐ ܢܒܺܝܳܐ܇ ܩܥܳܐ ܠܳܗܿ ܠܒܰܪܬ ܨܶܗܝܽܘܢ܇ ܕܳܐܬܶܐ ܡܰܠܟܶܟܝ̱܇ ܦܽܘܩܝ̱ ܠܽܐܘܪܥܶܗ ܒܕܰܘܨܳܐ ܪܰܚܶܡܥܠܰܝܢ ܐܰܠܳܗܳܐ܀

ܡܶܢ ܛܽܘܪ ܙܰܝ̈ܬܶܐ܇ ܢܚܶܬ ܗܘܳܐ ܦܳܪܽܘܩܰܢ܇ ܘܥܰܡܶܗ ܟܶܢܫܳܐ ܫܰܦܝܳܐ ܕܬܰܠܡܺܝ̈ܕܰܘܗ̱ܝ ܪܰܚܶܡܥܠܰܝܢ܀

ܗܰܘ ܕܰܫܡܰܝܳܐ ܡܠܶܝܢ ܡܶܢ ܬܶܫܒܽܘܚܬܶܗ܇ ܘܒܰܐܪܥܳܐ ܕܺܝܗܽܘܕ܇ ܩܰܠܣܽܘܗ̱ܝ ܝܰܠܽܘ̈ܕܶܐ ܪܰܚܶܡܥܠܰܝܢ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܠܢܳܨܪܰܬ ܡܕܺܝܢ̱ܬܳܐ

ܒܗܳܢܳܐ ܝܰܘܡܳܐ ܠܽܐܘܪܺܫܠܶܡ ܥܰܠ ܦܳܪܽܘܩܰܢ܇ ܘܥܺܝܠܳܐ ܪܟܶܒ ܡܰܟܺܝܟܳܐܺܝܬ܇ ܘܰܢܦܰܩܘ̱ ܠܽܐܘܪܥܶܗ ܝܰܠܽܘ̈ܕܶܐ ܒܢ̈ܰܝ ܥܶܒܪ̈ܳܝܶܐ܇ ܟܰܕ ܩܳܥܶܝܢ ܗ̱ܘܰܘ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ ܠܦܽܘܪܩܳܢܰܢ܀

ܢܒܺܝ̈ܶܐ ܩܰܕܶܡܘ̱ ܇ ܐܶܬܢܰܒܺܝܘ ܠܒܰܪܬ ܐܽܘܪܺܫܠܶܡ܇ ܥܰܠܶ ܙܰܘܚܶܗ ܕܺܝܚܺܝܕܳܝܳܐ܇ ܘܗܳܝ ܙܳܢܺܝܬܳܐ ܣܒܺܝܟܳܐ ܒܪܶܚܡܰܬ ܨܰܠܡ̈ܶܐ ܕܬܶܡܪܽܘܩ ܐܶܢܽܘܢ܇ ܘܠܳܐ ܫܶܡܥܰܬ݀ ܗܘܳܬ݀  ܠܰܢܒܺܝ̈ܶܐ܇ ܕܰܐܟܪܶܙܘ̱ ܠܳܗܿ ܕܗܳܐ ܚܰܬܢܳܐ ܡܫܺܝܚܳܐ ܡܰܛܺܝ ܠܶܗ܀

ܗܰܘ ܕܰܟܪ̈ܽܘܒܶܐ ܛܥܺܝܢܺܝܢ ܠܶܗ܇ ܥܺܝܠܳܐ ܪܟܶܒ ܗܘܳܐ܇ ܘܥܰܠ ܠܨܶܗܝܽܘܢ ܡܰܟܺܝܟܳܐܺܝܬ܇ ܘܗܺܝ ܕܶܝܢ ܚܙܳܬܶܗ ܘܰܣܢܳܬܶܗ܇ ܘܥܺܕܰܬ ܩܽܘܕܫܳܐ܇ ܢܶܦܩܰܬ݀ ܠܽܐܘܪܥܶܗ܇ ܘܝܰܗܒ ܠܳܗܿ ܩܠܺܝ̈ܕܶܐ ܕܡܰܠܟܽܘܬܳܐ܇ ܘܶܐܫܬܰܘܕܺܝ ܠܳܗܿ ܕܗܺܝ ܬܰܡܠܶܟ ܠܥܳܠܰܡ܀

 

ܐ̱ܚܪܺܢܳܐ ܬܶܫܡܶܫܬܳܐ ܪܰܡܫܰܝܬܳܐ

ܣܰܘ̈ܟܶܐ ܕܙܰܝܬܳܐ ܛܥܶܢܘ̱ ܫܰܒܪ̈ܶܐ܇ ܩܕܳܡ ܥܺܝܠܶܗ ܕܰܡܠܶܟ ܡܰܠܟ̈ܶܐ܇ ܘܢܰܚܬܰܝ̈ܗܽܘܢ ܫܰܘܺܝܘ ܩܽܘܕܡܰܘܗ̱ܝ܇ ܘܰܩܥܰܘ ܐܽܘܫܰܥܢܳܐ ܘܫܰܒܚܽܘܗ̱ܝ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܀

ܠܳܐ ܡܳܪܝ̱ ܢܶܬܡܢܶܐ ܥܰܡ ܣܳܒ̈ܶܐ܇ ܕܰܚܣܰܡܘ̱ ܒܳܟ ܘܰܛܠܰܡܘ̱ ܫܽܘܒܚܳܟ܇ ܐܶܠܳܐ ܕܥܰܡ ܫܰܒܪ̈ܶܐ ܫܦܰܝ̈ܳܐ ܒܽܐܘܫܰܥܢ̈ܶܐ ܢܦܽܘܩ ܠܽܐܘܪܥܳܟ܇ ܟܰܕ ܩܳܥܶܝܢܰܢ ܘܳܐܡܪܺܝܢܰܢ܇ ܒܪܺܝܟ ܕܦܰܪܩܰܢ ܡܶܢ ܛܳܥܝܽܘܬܳܐ܀

 

ܩܳܠܳܐ ܕܪܰܡܫܳܐ܇ ܩܳܠܳܐ ܠܡܰܠܟܽܘܬ ܪܰܘܡܳܐ

ܒܗܳܢܳܐ ܝܰܘܡܳܐ܇ ܥܰܡ ܫܰܒܪ̈ܶܐ ܢܩܰܠܶܣ ܠܰܒܪܳܐ ܕܰܐܠܳܗܳܐ܇ ܕܰܫܒܰܩ ܪܰܘܡܳܐ ܕܰܟܪ̈ܽܘܒܶܐ܇ ܘܥܰܠ ܥܺܝܠܳܐ ܪܟܶܒ ܕܡܰܫܠܰܚ܇ ܕܰܐܪܦܺܝ ܫܽܘܒܚܳܐ ܕܥܶܠܳܝ̈ܶܐ܇ ܘܶܐܫܬܰܒܰܚ ܡܶܢ ܬܰܚܬܳܝ̈ܶܐ܇ ܬܰܘ ܟܽܠܰܢ ܢܶܒܪܽܘܟ ܘܢܶܣܓܽܘܕ܀

ܠܳܟ ܬܶܫܒܽܘܚܬܳܐ܇ ܝܶܫܽܘܥ ܦܳܪܽܘܩܰܢ܇ ܡܰܠܟܳܐ ܫܡܰܝܳܢܳܐ܇ ܕܰܒܣܰܪܬ ܠܥܰܡܳܐ ܕܝܽܘܕܳܝ̈ܶܐ܇ ܘܫܰܒܪ̈ܶܐ ܫܰܒܚܽܘܟ ܒܽܐܘܫܰܥܢ̈ܶܐ܇ ܘܗܳܝ ܕܶܐܡܰܪ ܕܰܘܺܝܕ ܫܶܠܡܰܬ݀܇ ܕܡܳܪܝܳܐ ܡܳܪܰܢ ܙܡܰܪܘ̱ ܠܶܗ܇ ܒܽܐܘܫܰܥܢ̈ܶܐ ܛܠܳܝ̈ܶܐ ܥܰܡ ܣܳܒ̈ܶܐ܀

 

ܐ̱ܚܪܺܢܳܐ ܩܳܠܳܐ ܡܳܪܝܳܐ ܡܳܪܰܢ

ܕܡܽܘܬܶܗ ܢܽܘܪܳܐ܇ ܘܰܚܙܳܬܶܗ ܫܰܠܗܶܒܺܝܬܳܐ܇ ܘܰܡܫܰܡܫܳܢܰܘ̈ܗ̱ܝ ܢܽܘܪܳܐ ܥܰܡ ܪܽܘܚܳܐ܇ ܘܰܐܪܟܶܢ ܪܰܘܡܶܗ܇ ܘܺܝܬܶܒ ܥܰܠ ܒܰܪ ܐܰܬܳܢܳܐ܇ ܘܥܰܠ ܠܽܐܘܪܺܫܠܶܡ܇ ܘܰܪܟܺܝܒ ܘܡܶܙܕܰܝܰܚ܇ ܗ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܗܽܘ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܡܳܪܰܢ ܝܶܫܽܘܥ܇ ܠܳܟ ܗܽܘ ܚܳܙܶܐ ܗܘܳܐ ܐܶܫܰܥܝܳܐ܇ ܒܗܝܟܽܠܩܽܘܕܫܳܐ ܘܒܰܬܪܽܘܢܽܘܣ ܓܰܐܝܳܐ܇ ܘܕܰܨܒܰܘ ܪ̈ܰܚܡܰܝܟ܇ ܥܰܠ ܥܺܝܠܳܐ ܚܙܰܐܽܘܟ ܫܰܒܪ̈ܶܐ܇ ܟܰܕ ܒܺܐܝܕܰܝ̈ܗܽܘܢ ܣܰܘܟ̈ܶܐ ܡܶܢ ܙܰܝ̈ܬܶܐ܇ ܗ ܩܳܥܶܝܢ ܐܽܘܫܰܥ̈ܢܶܐ ܒܪܰܘܡܳܐ ܩܰܕܺܝܫ ܩܰܕܺܝܫ ܩܰܕܺܝܫܬ ܡܳܪܝܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܣܰܪ ܗܘܳܐ ܘܰܐܣܠܺܝ ܪ̈ܟܽܘܒܶܐ ܡܨܰܒ̈ܬܶܐ ܕܡܳܪ̈ܰܘܳܬܳܐ܇ ܘܰܪܟܶܒ ܥܺܝܠܳܐ ܕܢܶܣܥܽܘܪ ܥܰܡ̈ܡܶܐ ܒܡܰܟܺܝܟܽܘܬܳܐ܇ ܒܢ̈ܰܝ ܥܶܒܪ̈ܳܝܶܐ ܚܙܰܘ ܡܽܘܟܳܟܶܗ ܕܡܰܠܟܳܐ ܪܰܒܳܐ܇ ܘܰܛܥܶܢܘ̱ ܣܰܘ̈ܟܶܐ ܕܰܢܣܰܓܽܘܢ ܠܶܗ ܒܽܐܘܫܰܥܢܰܝ̈ܗܽܘܢ܀

ܢܫܰܒܚܽܘܢܳܟ ܡܳܪܝ̱ ܥܺܝܪ̈ܰܝ ܪܰܘܡܳܐ ܒܩܽܘܕܳܫܰܝ̈ܗܽܘܢ܇ ܐܳܦ ܝܰܠܽܘ̈ܕܶܐ ܘܫܰܒܪ̈ܶܐ ܒܣܰܘܟ̈ܶܐ ܕܽܐܘܫܰܥܢܰܝ̈ܗܽܘܢ܇ ܢܰܣܩܽܘܢ ܫܽܘܒܚܳܐ ܛܽܘܪ̈ܶܐ ܪ̈ܳܡܳܐ ܒܺܐܝܠܳܢܰܝ̈ܗܽܘܢ܇ ܕܰܐܢ̱ܬܽܗ̱ܘ ܡܳܪܳܐ ܕܪ̈ܰܘܡܶܐ ܘܥܽܘܡ̈ܩܶܐ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ܇ ܒܩܳܠܳܐ ܐܶܬܬܥܺܝܪ ܚܰܛܳܝܳܐ

ܐܳܘ ܠܳܟ ܚܰܛܳܝܳܐ܇ ܠܳܐ ܬܰܗܡܳܐ ܡܶܢܳܗܿ ܕܰܬܝܳܒܽܘܬܳܐ܇ ܕܡܳܪܳܟ ܪܳܚܶܡ ܬܰܝ̈ܳܒܶܐ ܘܗܽܘ ܫܳܒܶܩ ܣܰܟܠܽܘܬܳܟ܀

ܢܒܺܝ̈ܶܐ ܐܰܟܪܙܶܘ̱ ܗ̱ܘܰܘ܇ ܥܰܠ ܝܽܘܡ ܡܶܐܬܺܝܬܳܟ ܝܺܚܺܝܕܳܝܳܐ܇ ܘܫܛܳܬ݀ ܨܶܗܝܽܘܢ ܩܳܠܰܝ̈ܗܽܘܢ܇ ܘܠܳܐ ܫܶܡܥܰܬ݀ ܦܶܬܓܳܡܰܝ̈ܗܽܘܢ܀

ܛܠܳܝ̈ܶܐ ܡܝܰܒܒܝܺܢ ܗ̱ܘܰܘ܇ ܟܰܕ ܣܰܘܟ̈ܰܝ ܙܰܝܬܳܐ ܫܩܰܠܘ̱ ܒܺܐܝܕܰܝ̈ܗܽܘܢ܇ ܘܩܳܥܶܝܢ ܗ̱ܘܰܘ ܒܽܐܘܫܰܥܢܰܝ̈ܗܽܘܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܐܰܫܘܳܐ ܠܣܳܓܽܘܕܰܝ̈ܟ ܕܒܰܥܒ̈ܳܕܶܐ ܡܝܰܬܪ̈ܶܐ ܢܶܦܽܘܩ ܠܽܐܘܪܥܽܟ܇ ܒܽܐܘܫܰܥܢ̈ܶܐ ܡܶܬܝܰܕܥܳܢ̈ܶܐ܇ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܫܽܘܒܚܳܐ ܠܡܽܘܟܳܟܳܟ܇ ܐܳܘ ܡܳܪܳܐ ܛܳܒܳܐ ܕܶܐܬܳܐ ܒܚܽܘܒܶܗ ܘܠܰܢ ܚܰܪܰܪ ܡܶܢ ܥܰܒܕܽܘܬܳܐ܇ ܘܚܰܠܶܛ ܠܰܢ ܥܰܡ ܪ̈ܽܘܚܳܢܶܐ܀

 

ܩܰܘܡܳܐ ܩܰܕܡܳܝܳܐ ܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܦܐܶܐ ܗܘܳܐ ܟܶܢܫܳܐ ܕܥܰܡ̈ܡܶܐ ܕܙܰܡܶܢ ܕܰܘܺܝܕ܇ ܕܰܢܫܰܒܚܽܘܢ ܠܡܳܪܶܗ ܕܕܰܘܺܝܕ ܕܰܗܘܳܐ ܒܰܪܢܳܫܳܐ܇ ܚܙܰܐܽܘܗ̱ܝ ܕܰܪܟܺܝܒ ܥܺܝܠܳܐ ܫܺܝܛܳܐ ܡܫܰܠܚܳܐ܇ ܗܰܘ ܕܰܚܙܳܝܗ̱ܝ ܗܘܳܐ ܐܶܫܰܥܝܳܐ ܥܰܠ ܟܽܘܪܣܝܳܐ ܪܳܡܳܐ܇ ܢܦܰܩܘ̱ ܠܽܐܘܪܥܶܗ ܫܰܒܪ̈ܶܐ ܘܝܰܠܽܘ̈ܕܶܐ܇ ܘܰܛܥܺܝܢܺܝܢ ܣܰܘܟ̈ܰܝ ܬܶܫܒܽܘܚܬܳܐ܇ ܘܩܳܥܶܝܢ ܠܶܗ ܩܰܕܺܝܫ ܩܰܕܺܝܫ ܩܰܕܺܝܫ ܒܰܪ ܡܰܠܟܳܐ܀

ܥܺܕܬܳܐ ܚܙܳܬ݀ ܬܶܕܡܽܘܪܬܳܐ ܨܶܝܕ ܛܽܘܪ ܙܰܝ̈ܬܶܐ܇ ܠܰܐܠܳܗܳܐ ܕܡܰܟܶܟ ܢܰܦܫܶܗ ܡܶܛܽܠ ܒܢܰܝ̈ܢܳܫܳܐ܇ ܥܺܝܠܳܐ ܓܒܳܐ ܠܶܗ ܕܢܶܪܟܰܒ ܚܠܳܦ ܡܰܪܟܰܒܬܳܐ܇ ܘܰܚܠܳܦ ܟܶܢܫ̈ܶܐ ܢܽܘܪ̈ܳܢܶܐ ܫܰܒܪ̈ܶܐ ܡܫܰܒܚܽܝܢ ܠܶܗ܇ ܗܰܝܡܢܰܬ݀ ܘܰܐܘܕܝܰܬ݀ ܒܶܗ ܘܳܐܡܪܳܐ܇ ܕܡܳܪܝ̱ ܘܰܐܠܳܗܝ̱ ܕܰܗܘܳܐ ܒܰܪܢܳܫܳܐ܇ ܣܳܓܕܳܐ ܐ̱ܢܳܐ ܠܰܐܠܳܗܽܘܬܳܟ ܕܶܐܬܰܝܬ ܠܦܽܘܪܩܳܢܰܢ܀

 

ܡܰܕܪܳܫܳܐ ܒܩܳܠܳܐ ܐܶܬܩܰܛܰܠܘ̱ ܗ̱ܘܰܘ ܝܰܠܽܘ̈ܕܶܐ ܥܽܘܢܺܝܬܳܐ ܒܪܺܝܟ ܗܽܘ ܕܩܰܠܣܽܘܗ̱ܝ ܝܰܠܽܘ̈ܕܶܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇

ܛܠܳܝ̈ܶܐ ܩܰܠܣܽܘܗ̱ܝ ܒܽܐܘܫܰܥܢ̈ܶܐ܇ ܘܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ܇ ܘܰܚܢܰܢ ܥܰܡܡ̈ܶܐ ܩܳܥܶܝܢܰܢ܇ ܕܗܽܘܝܽܘ ܡܳܪܝܳܐ ܐܰܠܳܗܳܐ܇ ܡܕܺܝܢ̱ܬܳܐ ܟܽܠܳܗܿ ܐܶܬܬܙܺܝܥܰܬ݀ ܡܶܢ ܩܳܠ ܪܰܘܒܳܐ ܕܝܰܠܽܘ̈ܕܶܐ܇ ܟܰܕ ܡܫܰܒܚܺܝܢ ܒܩܳܠܰܝ̈ ܫܽܘܒܚܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܒܰܫܡܶܗ ܕܡܳܪܝܳܐ ܐܰܠܳܗܰܢ܀

ܒܗܳܢܳܐ ܝܰܘܡܳܐ ܪܟܶܒ ܥܺܝܠܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܰܛܠܳܝ̈ܶܐ ܒܣܰܘ̈ܟܰܝ ܙܰܝܬܳܐ܇ ܫܰܒܰܚܘ̱ ܩܽܘܕܡܰܘܗ̱ܝ ܟܰܕ ܐܳܡܪܺܝܢ܇ ܕܗܰܘ ܕܥܰܠ ܚܰܨܳܐ ܕܰܟܪ̈ܽܘܒܶܐ ܥܰܡ ܐܰܒܽܘܗ̱ܝ ܡܶܙܕܰܝܰܚ ܗܘܳܐ܇ ܘܝܳܬܶܒ ܥܰܠ ܒܰܪ ܐܰܬܳܢܳܐ܇ ܘܰܩܥܰܘ ܝܰܠܽܘ̈ܕܶܐ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܀

ܢܙܰܡܶܢ ܢܶܩܪܶܐ ܢܰܨܺܝ̈ܚܶܐ܇ ܣܳܗ̈ܕܶܐ ܢܒܺܝ̈ܶܐ ܘܰܫܠܺܝ̈ܚܶܐ܇ ܕܰܐܟܘܳܬܗܽܘܢ ܝܽܘܒܳܒܰܝ̈ܗܰܘܢ܇ ܢܳܨܚܺܝܢ ܬܽܘܒ ܐܳܦ ܦܰܩܚܰܝ̈ܗܽܘܢ܇ ܐܳܦ ܥܰܬܺܝܪܺܝܢ ܒܕܳܪ̈ܰܝܗܽܘܢ܇ ܚܠܶܐ ܪܺܝܚܳܐ ܕܫܽܘܫܰܢܰܝ̈ܗܽܘܢ܇ ܡܶܢ ܓܰܢܰܬ ܥܕܶܝܢ ܗܳܐ ܥܳܦܶܝܢ ܘܡܰܝܬܶܝܢ ܫܽܘܦܪ̈ܶܐ ܕܗܰܒܳܒ̈ܶܐ܇ ܠܟܽܠ ܥܺܐܕܰܢ ܫܰܦܺܝܪܳܐ܇ ܫܽܘܒܚܳܐ ܠܳܟ ܡܶܢ ܟܽܠ ܦܘܡ̈ܝܢ܀

 

ܐܳܘ ܢܰܦܫܳܐ ܨܽܘܪܬܳܐ܇ ܥܽܘܢܺܝܬܳܐ ܚܰܣܳܐ ܠܺܝ ܚܰܘ̈ܒܰܝ ܒܝܰܕ ܚܽܘܒܳܟ܇ ܒܗܽܘܢ ܒܪ̈ܰܚܡܶܐ ܕܫܰܠܚܳܟ ܠܦܽܘܪܩܳܢܰܢ

ܒܰܙܩܺܝܦܳܟ ܦܪܰܩܬܳܢܝ̱ ܡܶܢ ܒܺܝܫܳܐ܇ ܒܰܚܢܳܢܳܟ ܚܰܘܒ̈ܰܝ ܢܶܫܬܰܒܩܽܘܢ܇ ܕܺܝܠܳܟ ܐܶܢܶܝܢ ܡܳܪܝ̱ ܬܰܪ̈ܬܰܝܗܶܝܢ܀

ܕܠܳܐ ܐܰܢ̱ܬ ܡܳܪܝ̱ ܚܰܝ̈ܶܐ ܠܡܰܢܽܘ ܐܺܝܬ܇ ܕܠܳܐ ܚܢܳܢܳܟ ܒܡܽܘܢ ܡܶܫܬܒܶܩ ܥܰܘܠܰܢ܇ ܒܳܟ ܢܺܐܚܶܐ ܡܳܪܰܢ ܡܠܶܐ ܪ̈ܰܚܡܶܐ܀

ܗܳܐ ܚܰܘܒ̈ܰܝ ܠܳܟ ܗܽܘ ܓܠܶܝܢ ܛܳܒܳܐ܇ ܕܰܐܓܽܘܢܳܐ ܦܓܰܥ ܒܺܝ ܘܒܶܗ ܚܳܒܿܶܬ܇ ܚܽܘܢܰܝܢܝ̱ ܡܳܪܝ̱ ܒܪ̈ܰܚܡܶܐ ܕܛܰܝܒܽܘܬܳܟ܀

ܘܳܝ ܐܺܡܰܪ ܕܰܟܡܳܐ ܡܚܳܢܝ̱ ܒܺܝܫܳܐ܇ ܘܠܳܐ ܐܶܦܽܘܫ ܗܳܫܳܐ ܕܚܳܒܿܶܬ ܠܺܝ܇ ܒܳܟ ܦܳܪܽܘܩܝ̱ ܐܶܥܨܽܘܒ ܠܡܰܚܘ̈ܳܬܶܗ܀

ܚܒܳܪ̈ܳܬܳܐ ܣܓܺܝܘ ܒܺܝ ܕܰܚܛܳܗ̈ܶܐ܇ ܘܒܳܗܶܬ ܐ̱ܢܳܐ ܐܰܦܺܝܣ ܥܰܠ ܣܰܢܝ̈ܳܬܝ̱܇ ܐܰܢ̱ܬ ܐܳܣܝܳܐ ܕܪ̈ܰܚܡܶܐ ܣܥܽܘܪ ܡܰܚܘ̈ܳܬܝ̱܀

ܝܳܕܰܥ ܐܰܢ̱ܬ ܝܳܕܰܥ ܟܰܣܝ̈ܳܬܳܐ܇ ܠܰܟܝܳܢܰܢ ܕܰܠܫܽܘܪ̈ܥܳܬܳܐ ܨܠܳܐ܇ ܒܫܽܘܒܩܳܢܳܟ ܡܣܰܟܶܝܢ ܚܰܛܳܝ̈ܶܐ܇ ܕܶܐܬܟܰܬܰܡܘ̱ ܒܥܶܠܰܬ݀ ܪ̈ܓܺܝܓܳܬܳܐ܇ ܒܰܚܢܳܢܳܟ ܒܝܽܘܡ ܕܺܝܢܳܐ܀

ܢܽܘܗܪܳܐ ܟܬܺܝܒ ܕܺܐܝܬܰܝܟ ܐܳܟܶܠܬܳܐ܇ ܘܡܰܢܽܘ ܡܨܶܐ ܕܰܢܩܽܘܡ ܩܕܳܡ ܢܽܘܪܳܐ܇ ܐܰܪܝܶܟ ܡܳܪܝ̱ ܢܰܘܪܶܟ ܠܚܰܛܳܝ̈ܶܐ܀

ܥܰܠ ܕܰܚܛܳܐ ܐܳܕܳܡ ܒܦܰܪܕܰܝܣܳܐ܇ ܐܶܫܬܰܥܒܰܕܘ̱ ܝܰܠܕܰܘ̈ܗ̱ܝ ܠܰܚܛܺܝܬܳܐ܇ ܘܗܳܐ ܡܦܺܝܣܺܝܢ ܠܪ̈ܰܚܡܰܝܟ ܒܟܽܠܥܶܕܳܢ܀

ܨܶܒܝܳܢܝ̱ ܪܦܶܐ ܘܰܒܥܶܠܕܒܳܒܳܐ ܚܺܝܨ܇ ܘܥܰܠ ܗܳܝ ܫܠܰܛܘ̱ ܚܰܘ̈ܒܶܐ ܒܗܰܕ̈ܳܡܰܝ܇ ܐܳܘ ܕܰܙܟܳܐ ܠܥܰܘܠܰܢ ܒܳܟ ܢܶܙܟܐ܀

ܪܰܒ ܕܰܪܓܳܐ ܕܰܐܝܠܶܝܢ ܕܶܐܬܢܰܨܰܚܘ̱܇ ܘܒܰܐܓܽܘܢܳܐ ܢܰܣܒܽܘܗ̱ܝ ܠܰܟܠܺܝܠܳܐ܇ ܠܗܽܘܢ ܐܰܚܳܐ ܒܟܺܐܢܽܘ ܘܠܺܝ ܒܛܰܝܒܽܘ܀

 

ܬܰܘܕܺܝܬܳܐ ܠܚܽܘܒܳܟ ܚܳܐܶܢ ܟܽܠ܇ ܕܡܶܢ ܒܺܝܫܳܐ ܦܪܰܩܬܳܢܝ̱ ܒܝܰܕ ܪ̈ܰܚܡܰܝܟ܇ ܫܽܘܒܚܳܐ ܠܳܟ ܛܳܒܳܐ ܡܠܶܐ ܪ̈ܰܚܡܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܶܢ ܡܰܪܟܰܒܬܳܐ ܗܳܝ ܕܰܟܪ̈ܽܘܒܶܐ ܠܥܺܝܠܳܐ ܫܺܝܛܳܐ܇ ܐܰܚܬܳܟ ܚܽܘܒܳܟ ܘܡܰܢ ܡܰܘܦܶܐ ܠܳܟ ܕܢܶܬܢܶܐ ܫܰܪܒܳܟ܇ ܡܶܢ ܠܶܓܝܽܘܢܳܐ ܗܳܝ ܕܰܟܪ̈ܽܘܒܶܐ ܕܠܳܐ ܡܶܬܒܰܨܝܳܐ܇ ܥܺܝܠܳܐ ܫܺܝܛܳܐ ܙܰܝܚܳܟ ܒܰܐܬܪܰܢ ܘܡܰܢ ܣܳܦܶܩ ܠܳܟ܀

ܡܶܢ ܠܶܓܝܽܘܢܳܐ ܕܗܳܝ ܡܰܪܟܰܒܬܳܐ ܕܰܐܪܒܰܥ ܐܰܦܺܝ̈ܢ܇ ܠܟܶܢܫܳܐ ܙܥܽܘܪܳܐ ܕܰܛܥܺܝܢ ܣܰܘܟ̈ܶܐ ܒܫܽܘܩ̈ܰܝ ܨܶܗܝܽܘܢ܇ ܗܳܐ ܒܡܰܪܟܰܒܬܳܟ ܡܰܓܗܰܪ ܙܺܝܘܳܟ ܠܰܫܡܰܝ̈ܳܢܶܐ܇ ܘܰܚܠܺܝܛ ܘܰܒܣܶܐ ܥܺܝܠܳܐ ܕܛܰܥܢܳܟ ܒܶܝܬ ܐܰܪ̈ܥܳܢܶܐ܀

 

ܩܰܘܡܳܐ ܕܰܬܪܶܝܢ

ܩܳܠܳܐ ܛܽܘܒܳܐ ܠܝܰܠܽܘ̈ܕܶܐ

ܢܰܘܕܶܐ ܘܢܶܣܓܽܘܕ ܠܶܗ܇ ܠܥܰܡܢܽܘܐܶܝܠ ܐܰܠܳܗܳܐ ܕܰܒܡܽܘܟܳܟܶܗ ܥܺܝܠܳܐ ܪܟܶܒ܇ ܘܟܶܢܫ̈ܶܐ ܢܦܰܩܘ̱ ܠܽܐܘܪܥܶܗ܇ ܘܰܒܣܰܘܟ̈ܶܐ ܫܽܘܒܚܳܐ ܝܰܗܒܠܶܗ܇ ܠܒܰܪ ܐܰܠܳܗܳܐ ܕܐ̱ܢܳܫܳܐ ܗܘܳܐ܇ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܥܺܕܬܐ ܒܽܐܘܫܰܥ̈ܢܶܐ܇ ܙܡܰܪܝ̱ ܫܽܘܒܚܳܐ ܠܒܰܪ ܐܰܠܳܗܳܐ܇ ܒܝܽܘܡ ܥܰܕܥܺܐܕܶܗ ܟܰܕ ܪܳܘܙܰܬܝ̱ ܘܦܰܪܩܶܟܝ̱ ܒܰܨܠܺܝܒܶܗ܇ ܫܰܒܰܚܝ̱ ܘܰܐܘܕܳܝ ܠܡܽܘܟܳܟܶܗ܇ ܘܰܥܬܺܝܕ ܕܢܺܐܬܶܐ ܘܰܢܪܰܡܪܡܶܟܝ̱܇ ܐܽܘܫܰܥܢܳܐ ܒܪܰܘܡܳܐ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

 

ܣܽܘܓܺܝܬܳܐ ܒܩܳܠܳܐ ܐܰܝܠܶܝܢ ܩ̈ܳܠܶܐ܇ ܥܰܠ ܒܪܳܐ ܐܳܣܽܘܛܳܐ ܒܪܺܝܟ ܗܽܘ ܡܫܺܝܚܳܐ ܕܰܒܝܰܕ ܩܳܠܶܗ ܩܪܳܐ ܠܒܺܝ̈ܫܶܐ܇

ܠܰܬܝܳܒܽܘܬܳܐ ܒܰܪܢܳܫܳܐ ܗܘܰܝܬ ܡܶܛܽܠ ܐ̱ܢܳܫ̈ܳܐ܇ ܘܒܰܝܢܳܬ ܒܢܰܝ̈ܢܳܫܳܐ ܐܶܬܗܰܦܟܰܬ܇ ܘܰܒܡ̈ܰܬܠܶܐ ܘܰܒܦ̈ܶܠܳܐܬܳܐ ܚܰܘܺܝܬ܇ ܛܽܘܦܣܳܐ ܕܡܰܠܟܽܘܬܳܟ ܥܰܙܺܝܙܬܳܐ܀

ܕܰܡܝܰܬܳܗܿ ܠܡܰܠܟܽܘܬܳܐ ܕܺܝܠܳܟ܇ ܠܓܰܒܪܳܐ ܕܺܐܝܬ ܗܘܳܐ ܠܶܗ ܬܪܶܝܢ ܒܢܰܝ̈ܳܐ܇ ܚܰܕ ܩܰܫܺܝܫܳܐ ܐ̱ܚܪܺܢܳܐ ܙܥܽܘܪܳܐ܇ ܕܺܐܝܬܰܝܗܽܘܢ ܟܺܐܢ̈ܶܐ ܘܥܰܘ̈ܳܠܶܐ܀

ܡܶܢ ܒܳܬܰܪ ܕܒܰܕܰܪ ܟܽܠ ܕܰܫܩܰܠ܇ ܥܰܠ ܦܰܚܙܽܘܬܳܐ ܘܪܰܘܳܝܽܘܬܳܐ܇ ܚܣܰܪ ܠܶܗ ܘܰܡܛܳܐ ܕܢܶܗܘܶܐ ܚܳܕܰܪ܇ ܘܰܗܘܳܐ ܟܰܦܢܳܐ ܘܥܰܪܛܶܠܳܝܳܐ܀

ܚܽܘܡܳܐ ܒܺܐܝܡܳܡܳܐ ܐܰܘܩܕܶܗ ܗܘܳܐ܇ ܘܰܒܠܺܠܝܳܐ ܫܶܢܬܶܗ ܐܶܫܬܰܩܠܰܬ݀܇ ܐܳܦ ܚܰܣܺܝܪܽܘܬܳܐ ܐܰܕܪܰܟܬܶܗ܇ ܘܡܳܢܳܐ ܢܶܥܒܶܕ ܠܳܐ ܝܳܕܰܥ ܗܘܳܐ܀

ܝܰܘܡ̈ܳܬܳܐ ܕܒܶܝܬ ܐܰܒܽܘܗ̱ܝ ܥܶܗܰܕ܇ ܘܰܫܢܰܝ̈ܳܐ ܕܰܒܗܶܝܢ ܐܶܬܪܰܒܺܝ܇ ܘܝܰܗܒ ܘܳܝܳܐ ܠܢܰܦܫܶܗ ܟܰܕ ܐܳܡܰܪ܇ ܕܘܳܝ ܠܳܗܿ ܠܕܳܘܝܽܘܬܝ̱ ܡܳܢܳܐ ܓܰܕܫܳܗܿ܀

ܠܰܐܝܟܳܐ ܐܳܙܶܠ ܠܳܐ ܝܳܕܰܥ ܐ̱ܢܳܐ܇ ܘܶܐܗܦܽܘܟ ܨܶܝܕ ܐܳܒܝ̱ ܒܳܗܶܬ ܐ̱ܢܳܐ ܠܺܝ܇ ܕܦܶܪܚܿܶܬ ܢܶܟܣ̈ܰܝ ܐܳܣܽܘܛܳܐܺܝܬ܇ ܘܶܐܢ ܚܳܙܶܐ ܠܺܝ ܠܳܐ ܚܳܐܰܪ ܒܺܝ܀

ܢܳܗܶܡ ܗܘܳܐ ܗܽܘ ܗܳܢܳܐ ܕܳܘܝܳܐ܇ ܒܪܳܐ ܐܳܣܽܘܛܳܐ ܒܰܐܬܪܳܐ ܚܽܘܪܒܳܐ܇ ܒܰܦܣܳܩ ܣܰܒܪܳܐ ܕܠܰܝܬ ܒܶܗ ܪ̈ܰܚܡܶܐ܇ ܕܠܳܐ ܗܘܳܐ ܡܶܬܩܰܒܰܠ ܡܶܢ ܐܰܒܽܘܗ̱ܝ܀

ܥܶܪܒܳܐ ܐ̱ܢܳܐ ܒܳܟ ܐܶܢܗܽܘ ܕܦܳܢܶܝܬ܇ ܘܠܳܐ ܬܽܘܒ ܗܦܰܟܬ ܠܗܳܕ ܒܺܝܫܽܘܬܳܐ܇ ܐܶܢܳܐ ܡܦܺܝܣܳܢ ܠܰܐܒܳܐ ܕܺܝܠܳܟ܇ ܘܰܡܩܰܒܶܠ ܠܳܟ ܒܰܣܺܝܡܳܐܝܺܬ܀

ܨܽܘܡ ܡܶܢ ܡܶܐܟ̈ܠܳܬܳܐ ܕܚܰܪ̈ܽܘܒܶܐ܇ ܕܺܐܝܬܰܝܗܽܘܢ ܚܽܘܫ̈ܳܒܶܐ ܒܺܝ̈ܫܶܐ܇ ܘܰܫܒܽܘܩ ܪܳܥܝܽܘܬܳܐ ܕܰܚܙܺܝܪ̈ܶܐ ܕܺܐܝܬܰܝܗܽܘܢ ܚܰܘܒ̈ܶܐ ܘܰܚܛܳܗ̈ܶܐ܀

ܪ̈ܰܚܡܰܝܟ ܡܳܪܝ̱ ܢܶܗܘܽܘܢ ܥܰܠ ܕܳܘܝܽܘܬܝ̱܇ ܘܰܥܒܶܕܰܝܢܝ̱ ܒܡܶܢܝܳܢ ܐܰܓܺܝܪ̈ܰܝܟ܇ ܕܚܳܒܿܶܬ ܠܟܺܐܢܽܘܬܳܟ ܡܰܘܕܶܐ ܐ̱ܢܳܐ܇ ܛܰܝܒܽܘܬܳܟ ܗܺܝ ܬܩܽܘܡܝ̱ ܒܰܐܦ̈ܰܝ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܡܰܪܟܰܒܬܶܗ ܡܫܰܘܶܝܢ ܒܰܪ̈ܩܶܐ܇ ܫܰܘܺܝܘ ܥܺܝܠܳܐ ܒܡܰܪܛܽܘܛܳܐ܇ ܚܙܳܬܳܐ ܕܢܶܩܝܳܐ ܠܓܰܦܪ̈ܳܢܶܐ܇ ܒܪܺܝܟ ܕܪܰܒ ܫܽܘܒܚܶܗ ܒܟܽܠܦܶܢܝ̈ܳܢ܀

ܟܽܠܳܗ ܒܪܺܝܬܳܐ ܡܶܢ ܣܳܟܳܐ܇ ܫܽܘܒܚܳܐ ܬܶܙܡܰܪܝ̱ ܒܽܐܘܫܰܥܢ̈ܶܐ܇ ܠܗܰܘ ܕܶܐܬܳܐ ܕܢܶܦܪܽܘܩ ܨܰܠܡܶܗ܇ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

 

ܕܨܰܦܪܳܐ ܕܪܰܚܶܡܥܠܰܝ܇

ܩܳܠܳܐ ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ

ܪܟܺܝܒ ܥܰܠ ܓܺܝܓ̈ܠܶܐ ܕܓܰܘܙܰܠܬܳܐ܇ ܘܚܰܝܠܰܘ̈ܳܬܳܐ  ܫܡܰܝ̈ܳܢܶܐ ܠܥܽܘܙܶܗ ܠܳܐ ܡܣܰܝܒܪܺܝܢ܇ ܘܥܺܝܠܳܐ ܕܰܐܬܳܢܳܐ ܛܰܥܢܶܗ܇ ܥܰܠ ܕܰܨܒܳܐ ܘܰܗܘܳܐ ܡܶܢܰܢ܇ ܬܰܘ ܟܽܠܰܢ ܢܰܘܕܶܐ ܠܶܗ܇ ܘܰܢܫܰܒܰܚ ܘܰܢܪܰܡܪܶܡ܀

ܟܰܕ ܢܳܚܶܬ ܗܘܳܐ ܦܳܪܽܘܩܰܢ܇ ܘܰܪܟܺܝܒ ܗܘܳܐ ܥܺܝܠܳܐ ܫܺܝܛܳܐ ܕܰܐܬܳܢܳܐ܇ ܝܰܠܽܘ̈ܕܶܐ ܦܪܰܣܘ̱ ܢܰܚܬܰܝ̈ܗܽܘܢ܇ ܘܬܰܠܡܺܝ̈ܕܶܐ ܡܰܪ̈ܛܽܘܛܰܝܗܽܘܢ܇ ܘܟܶܢܫ̈ܶܐ ܕܩܳܥܶܝܢ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܬܪܰܨ ܗܘܳܐ ܐܽܘܪܚܶܗ ܦܳܪܽܘܩܰܢ܇ ܕܢܶܥܽܘܠ ܠܽܐܘܪܺܫܠܶܡ܇ ܒܝܰܘܡܳܐ  ܕܽܐܘܫܰܥܢ̈ܶܐ܇ ܦܓܥܰܘ̱ ܒܶܗ ܓܰܪ̈ܒܶܐ ܘܶܐܬܕܰܟܺܝܘ܇ ܘܰܣܡܰܝ̈ܳܐ ܘܰܚܙܰܘ ܢܽܘܗܪܳܐ܇ ܘܝܰܠܽܘ̈ܕܶܐ ܕܩܳܥܶܝܢ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܟܰܕ ܣܰܘܟܰܝ̈ܗܽܘܢ ܒܺܐܝܕܰܝ̈ܗܽܘܢ ܛܠܳܝ̈ܶܐ ܒܽܐܘܫܰܥܢܰܝ̈ܗܽܘܢ ܙܡܰܪ̱ܘ ܠܶܗ ܬܶܫܒܽܘܚܬܳܐ܇ ܘܬܰܠܡܺܝ̈ܕܶܐ ܐܳܦ ܢܰܚܬܰܝ̈ܗܽܘܢ܇ ܒܽܐܘܪܚܳܐ ܕܺܝܠܶܗ ܫܳܕܶܝܢ ܗ̱ܘܰܘ܇ ܟܰܕ ܩܳܥܶܝܢ ܗ̱ܘܰܘ ܘܳܐܡܪܺܝܢ܇ ܫܰܒܰܚܘ̱܀

ܡܫܺܝܚܳܐ ܕܶܐܬܳܐ ܠܦܽܘܪܩܳܢܰܢ܇ ܘܽܐܘܪܚܳܐ ܕܡܽܘܟܳܟܳܐ ܡܶܛܽܠܳܬܰܢ ܣܒܰܠ܇ ܐܰܫܘܳܐ ܠܰܢ ܕܰܒܡܶܐܬܺܝܬܳܟ܇ ܢܦܽܘܩ ܠܽܐܘܪܥܳܟ ܒܽܐܘܫܰܥܢ̈ܶܐ܇ ܘܥܰܡ ܩܰܕܺܝ̈ܫܶܐ܇ ܢܶܩܥܶܐ ܒܪܺܝܟ ܗܳܝ ܡܶܐܬܺܝܬܳܟ܀

ܐܰܫܘܳܐ ܠܰܢ ܘܰܠܥܰܢܺܝܕܰܝ̈ܢ ܒܡܶܐܬܺܝܬܳܟ܇ ܕܬܰܪ̈ܬܶܝܢ ܡܶܠܬܳܐ ܕܡܶܢ ܐܰܒܳܐ܇ ܕܰܚܠܳܦ ܣܰܘܟ̈ܶܐ ܕܺܐܝܠܳܢ̈ܶܐ܇ ܒܽܐܘܫܰܥܢ̈ܶܐ ܡܶܬܝܰܕܥܳܢ̈ܶܐ ܢܶܦܓܰܥ ܒܳܟ ܘܰܢܩܰܠܣܳܟ܇ ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ܀

 

 

ܐܰܠܳܗܝ̱ ܐܰܠܳܗܝ̱ ܩܳܠܳܐ ܗܰܘ ܕܩܳܡ ܡܶܢ ܒܶܝܬ ܡܺܝ̈ܬܶܐ

ܥܰܡ ܥܶܠܳܝ̈ܶܐ ܘܬܰܚܬܳܝ̈ܶܐ܇ ܡܫܰܒܚܺܝܢܰܢ ܟܰܕ ܐܳܡܪܺܝܢܰܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ ܟܳܗ̈ܢܶܐ ܙܗܰܝ̈ܳܐ܀

ܬܰܘ ܐܰܚ̈ܰܝ ܢܶܙܡܰܪ ܫܽܘܒܚܳܐ܇ ܒܗܳܢܳܐ ܝܰܘܡܳܐ ܩܰܕܺܝܫܳܐ܇ ܕܒܶܗ ܐܶܬܡܰܟܰܟ ܘܰܦܪܰܩ ܠܰܢ܇ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܇ ܟܳܗ̈ܢܶܐ ܙܗ̈ܰܝܳܐ܀

ܥܺܝܠܳܐ ܫܺܝܛܳܐ ܛܰܥܢܶܗ ܗܘܳܐ܇ ܠܚܰܝܠܳܟ ܪܰܒܳܐ ܘܓܰܢ̱ܒܳܪܳܐ܇ ܕܒܰܚܢܳܢܳܟ ܠܘܳܬܰܢ ܐܶܬܰܝܬ ܕܬܪܰܡܪܶܡ ܠܰܣܚܺܝܦܽܘܬܰܢ܀

ܓܢܺܝܙܳܐ ܕܰܟܣܶܐ ܡܶܢ ܥܺܝܪ̈ܶܐ ܘܰܡܫܰܡܫܺܝܢ ܠܶܗ ܡܰܠܰܐܟ̈ܶܐ܇ ܝܰܘܡܳܢ ܐܰܡܶܟ ܪܰܒܽܘܬܶܗ܇ ܘܥܰܠ ܠܳܗܿ ܠܨܶܗܝܽܘܢ ܨܳܠܽܘܒܬܳܐ܀

ܩܳܥܶܝܢ ܗ̱ܘܰܘ ܫܰܒܪ̈ܶܐ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܐܽܘܫܰܥܢܳܐ ܒܪܰܘܡܳܐ ܘܥܽܘܡܩܳܐ܇ ܠܡܶܠܬܳܐ ܕܚܰܝ̈ܶܐ ܕܶܐܬܒܰܣܰܪ܇ ܟܳܗ̈ܢܶܐ ܙܗ̈ܰܝܳܐ܀

ܢܦܰܩܘ̱ ܗ̱ܘܰܘ ܠܽܐܘܪܥܶܗ ܒܽܐܘܫܰܥܢ̈ܶܐ܇ ܫܰܒܪ̈ܶܐ ܟܽܠܗܽܘܢ ܕܽܐܘܪܺܫܠܶܡ܇ ܘܰܩܥܰܘ ܟܽܠܗܽܘܢ ܡܶܢ ܚܰܕ ܦܽܘܡ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܟܳܗ̈ܢܶܐ ܙܗ̈ܰܝܳܐ ܫܰܒܚܽܘܗ̱ܝ܀

 

ܫܡܰܝ̈ܳܐ ܡܶܫܬܰܥܶܝܢ܇ ܒܩܳܠܳܐ ܠܶܟܝ̱ ܢܶܬܟܰܫܰܦ

ܥܺܕܬܳܐ ܙܶܡܢܰܬ݀܇ ܝܰܠܽܘ̈ܕܶܐ ܘܫܰܒܪ̈ܶܐ ܩܽܘܕܡܰܘܗ̱ܝ ܕܰܢܫܰܒܚܽܘܢܳܝܗ̱ܝ܇ ܘܒܽܐܘܫܰܥܢܰܝ̈ܗܽܘܢ ܒܣܰܘܟ̈ܶܐ ܕܙܰܝܬܳܐ ܘܰܕܕܶܩ̈ܠܶܐ ܩܰܠܶܣܘ̱ ܩܽܘܕܡܰܘܗ̱ܝ܇ ܘܥܰܠ ܥܺܝܠܳܐ ܐܶܙܕܰܝܰܚ܇ ܘܬܰܠܡܺܝ̈ܕܶܐ ܢܰܚܬܰܝ̈ܗܽܘܢ ܦܳܪܣܺܝܢ ܗ̱ܘܰܘ ܩܽܘܕܡܰܘܗ̱ܝ܀

ܟܰܕ ܥܰܠ ܡܳܪܰܢ܇ ܠܽܐܘܪܺܫܠܶܡ ܥܰܡ ܬܰܠܡܺܝ̈ܕܰܘܗ̱ܝ ܘܰܪܟܶܒ ܥܺܝܠܳܐ܇ ܘܶܐܡܰܪܘ̱ ܣܳܒ̈ܶܐ܇ ܠܰܛܠܳܝ̈ܶܐ ܣܰܒܽܘܢ ܟܺܐܦ̈ܶܐ ܘܦܽܘܩܽܘܢ ܠܽܐܘܪܥܶܗ܇ ܢܦܰܩܘ̱ ܛܠܳܝ̈ܶܐ ܛܥܶܢܘ̱ ܣܰܘܟ̈ܶܐ܇ ܘܰܩܥܰܘ ܟܽܠܗܽܘܢ ܘܶܐܡܰܪܘ̱܇ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܩܥܳܐ ܗܘܳܐ ܢܒܺܝܳܐ܇ ܕܽܘܨܝ̱ ܛܳܒ ܘܰܚܕܳܝ ܒܰܪܬ ܨܶܗܝܽܘܢ ܕܶܐܬܳܐ ܡܰܠܟܶܟܝ̱܇ ܗܰܘ ܕܡܶܢ ܣܺܝܢܰܝ܇ ܐܶܬܳܐ ܗܘܳܐ ܕܢܶܫܪܶܐ ܒܓܰܘܶܟܝ̱ ܩܽܘܡܝ̱ ܦܽܘܩܝ̱ ܠܽܐܘܪܥܶܗ܇ ܘܰܩܥܳܝ ܩܽܘܕܡܰܘܗ̱ܝ ܘܶܐܡܰܪܝ̱܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܕܶܐܬܳܐ ܠܦܽܘܪܩܳܢܰܢ܀

ܢܒܺܝ̈ܶܐ ܟܽܠܗܽܘܢ܇ ܛܳܪܦܺܝܢ ܬܰܪ̈ܥܶܝܗܿ ܢܥܺܝܪܽܘܢܳܗܿ ܠܒܰܪܬ ܥܶܒܪ̈ܳܝܶܐ܇ ܘܗܺܝ ܙܳܢܺܝܬܳܐ܇ ܣܒܺܝܟܳܐ ܒܪܶܚܡܰܬ ܨܰܠܡ̈ܶܐ ܕܬܶܡܪܽܘܩ ܐܶܢܽܘܢ܇ ܘܠܳܐ ܫܶܡܥܰܬ݀ ܠܰܢܒܺܝܳܐ܇ ܘܠܳܐ ܠܩܳܠܶܗ ܕܰܙܟܰܪܝܳܐ܇ ܕܰܩܥܳܐ ܘܰܡܥܺܝܪ ܠܳܗܿ܀

 

ܐ̱ܚܪܺܢܳܐ ܒܩܳܠܳܐ ܫܡܰܝܳܐ ܡܕܺܝܢ̱ܬܳܐ

ܒܗܳܢܳܐ ܝܰܘܡܳܐ ܐܶܬܡܰܟܰܟ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܇ ܘܰܪܟܶܒ ܥܺܝܠܳܐ ܕܰܐܬܳܢܳܐ܇ ܘܥܰܠ ܠܽܐܘܪܺܫܠܶܡ ܒܡܽܘܟܳܟܳܐ܀

ܫܽܘܒܚܳܐ ܠܗܰܘ ܪܳܡܳܐ ܕܰܫܒܰܩ ܡܰܪܟܰܒܬܳܐ ܦܬܺܝܟܰܬ ܚܶܙܘܳܐ܇ ܘܰܪܟܶܒ ܥܺܝܠܳܐ ܒܡܽܘܟܳܟܳܐ܇ ܕܳܐܕܳܡ ܨܰܠܡܶܗ ܢܶܬܪܰܡܪܰܡ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܠܗܰܘ ܕܰܚܙܳܝܗ̱ܝ ܐܶܫܰܥܝܳܐ ܠܗܰܘ

ܕܩܳܝܡܺܝܢ ܠܺܐܝܩܳܪܶܗ ܐܳܠܶܦ̈ ܐܰܠܦܺܝ̈ܢ܇ ܘܪܶܒܽܘ ܪ̈ܶܒܘܳܢ ܕܡܰܠܰܐܟ̈ܶܐ܇ ܕܓܳܠܘ̱ ܪ̈ܰܚܡܰܘܗ̱ܝ ܘܢܶܦܪܽܘܩ ܠܰܓܒܺܝܠܬܶܗ܇ ܥܺܝܠܳܐ ܪܟܶܒ ܗܘܳܐ ܒܫܽܘܩܶܝ̈ܗܿ ܕܽܐܘܪܺܫܠܶܡ܇ ܥܰܡܡ̈ܶܐ ܣܓܽܘܕܽܘܢ ܠܶܗ܇ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܠܗܰܘ ܕܰܪܟܶܒ ܗܘܳܐ ܥܰܠ ܥܺܝܠܳܐ ܒܰܪ ܐܰܬܳܢܳܐ܇ ܘܰܐܣܠܺܝ ܠܪ̈ܰܟܫܳܐ ܘܩܳܪ̈ܽܘܩܶܐ܇ ܘܳܐܦ ܡܰܪ̈ܟܒܳܬܳܐ ܕܺܐܝܣܪܳܐܶܝܠ܇ ܐܰܝܟ ܕܰܙܟܰܪܝܳܐ ܩܰܕܶܡ ܐܶܬܢܰܒܺܝ܇ ܥܰܡܡ̈ܶܐ܀

ܠܗܰܘ ܕܶܐܬܳܐ ܘܫܰܠܶܡ ܐ̱ܪ̈ܳܙܶܐ ܘܦ̈ܶܠܳܐܬܳܐ܇ ܕܰܢܒܺܝ̈ܶܐ ܕܰܥܠܰܘܗ̱ܝ ܡܰܠܶܠܘ̱܇ ܘܶܐܬܳܐ ܕܰܢܚܰܕܶܬ ܨܰܠܡܶܗ܇ ܕܗܳܐ ܒܠܺܝ ܘܶܐܬܚܰܒܰܠ ܘܰܥܒܺܝܕ ܕܰܚܺܝܚܳܐ܇ ܥܰܡܡ̈ܶܐ܀

 

ܐܰܢ̱ܬ ܕܰܒܪܺܝܫܺܝܬ

ܝܺܬܶܒܬ ܒܪ̈ܰܚܡܰܝܟ܇ ܥܰܠ ܥܺܝܠܳܐ ܒܰܪ ܐܰܬܳܢܳܐ܇ ܘܫܰܒܪ̈ܶܐ ܫܦܰܝ̈ܳܐ܇ ܒܽܐܘܫܰܥܢ̈ܶܐ ܠܳܟ ܩܳܥܶܝܢ ܗ̱ܘܰܘ ܡܒܰܪܟܳܐ ܓܶܝܪ܀

ܠܛܽܘܥܝܰܝ ܕܥܰܡܡ̈ܶܐ܇ ܠܳܐ ܡܠܺܝܠܬܳܐ܇ ܐܳܦ ܦܳܪܽܘܩܰܢ ܒܥܺܝܠܳܐ ܚܰܘܺܝܬ܇ ܟܰܕ ܢܳܓܶܕ ܐܰܢ̱ܬ ܠܗܽܘܢ ܠܣܶܓܕܬܳܟ ܡܒܰܪܟܳܐ ܓܶܝܪ܀

 

ܩܳܠܳܐ ܕܨܰܦܪܳܐ

ܩܳܠܳܐ ܒܥܶܕܳܢܶܗ ܕܨܰܦܪܳܐ ܡܶܬܬܣܺܝܡܺܝܢ

ܪܟܺܝܒ ܗܘܳܐ ܥܰܠ ܥܺܝܠܳܐ܇ ܘܥܳܐܶܠ ܠܽܐܘܪܺܫܠܶܡ܇ ܘܰܛܠܳܝ̈ܶܐ ܘܫܰܒܪ̈ܶܐ ܒܽܐܘܫܰܥܢ̈ܶܐ ܫܰܒܚܽܘܗ̱ܝ܇ ܘܓܽܘܕܳܐ ܕܬܰܠܡܺܝ̈ܕܶܐ܇ ܫܰܘܺܝܘ ܡܳܐܢܰܝ̈ܗܽܘܢ܇ ܕܰܚܙܰܘ ܡܽܘܟܳܟܶܗ ܕܡܰܠܟܳܐ ܒܰܪ ܕܰܘܺܝܕ܇ ܗ ܘ ܗ ܒܪܺܝܟ ܗܽܘ ܕܶܐܬܬܰܚܬܺܝ ܡܶܛܽܠ ܦܽܘܪܩܳܢܰܢ܀

ܡܶܢ ܦܘܡܳܐ ܕܫܰܒܪ̈ܶܐ܇ ܘܰܕܝܳܢܩ̈ܰܝ ܚܰܠܒܳܐ܇ ܬܶܫܒܽܘܚܬܳܐ ܠܰܒܪܳܐ ܒܽܐܘܫܰܥܢ̈ܶܐ ܬܶܩܢܰܬ݀܇ ܘܣܰܟ̈ܠܶܐ ܒܢ̈ܰܝ ܨܶܗܝܽܘܢ ܣܳܢܝ̈ܰܝ ܠܰܫܪܳܪܳܐ܇ ܫܰܪܺܝܘ ܟܰܕ ܪܳܛܢܺܝܢ ܒܺܝ̈ܫܶܐ ܒܰܚܣܳܡܗܽܘܢ ܗ ܘ ܗ܇ ܒܪܺܝܟ ܕܰܒܡܽܘܟܳܟܶܗ ܥܰܩܪܳܗܿ ܠܨܳܠܽܘܒܬܳܐ܀

 

ܐ̱ܚܪܺܢܳܐ ܩܳܠܳܐ ܒܛܽܘܒܰܝܟܝ̱ ܥܺܕܬܳܐ

ܗܰܘ ܕܰܫܡܰܝܳܐ܇ ܘܰܐܪܥܳܐ ܡܠܶܝܢ ܡܶܢ ܬܶܫܒܽܘܚܬܶܗ܇ ܘܡܰܪܟܰܒܬܳܐ ܕܢܽܘܪܳܐ ܘܪܽܘܚܳܐ ܡܙܰܝܚܳܐ ܠܶܗ ܒܰܐܬܪܶܗ ܪܳܡܳܐ܇ ܥܰܠ ܥܺܝܠܳܐ ܫܺܝܛܳܐ ܝܺܬܶܒ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܟܶܢܫ̈ܶܐ ܕܥܰܡܡ̈ܶܐ ܘܬܰܠܡܺܝ̈ܕܶܐ܇ ܥܰܡ ܫܰܒܪ̈ܶܐ ܫܰܒܰܚܘ̱ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܀

ܫܡܰܝ̈ܳܐ ܘܐܰܪܥܳܐ܇ ܘܝܰܡܳܐ ܘܝܰܒܫܳܐ ܘܟܽܠ ܕܰܒܗܽܘܢ܇ ܢܶܩܫܽܘܢ ܟܰܦܳܐ ܒܽܐܘܫܰܥܢ̈ܶܐ܇ ܐܳܦ ܢܝܰܒܒܽܘܢ ܩܳܠܰܝ̈ ܫܽܘܒܚܳܐ܇ ܠܡܰܠܟܳܐ ܡܫܺܝܚܳܐ ܕܰܒܚܽܘܒܶܗ܇ ܪܟܶܒ ܥܺܝܠܳܐ ܘܥܰܠ ܐܽܘܪܺܫܠܶܡ܇ ܘܝܰܠܽܘ̈ܕܶܐ ܘܫܰܒܪ̈ܶܐ ܫܦܰܝ̈ܳܐ܇ ܩܰܠܣܽܘܗ̱ܝ ܒܣܰܘ̈ܟܶܐ ܕܡܶܢ ܕܶܩ̈ܠܶܐ܇ ܘܥܺܕܰܬ ܩܽܘܕܫܳܐ ܥܰܡ ܝܰܠܕܶܝ̈ܗܿ܇ ܙܳܡܪܳܐ ܫܽܘܒܚܳܐ ܒܽܐܘܫܰܥܢ̈ܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܟܪ̈ܽܘܒܶܐ ܙܳܝܥܺܝܢ ܕܰܢܒܰܪܟܽܘܢܳܝܗ̱ܝ ܒܰܐܬܪܶܗ ܪܳܡܳܐ܇ ܘܰܡܫܰܒܚܺܝܢ ܠܶܗ ܥܠܰܝ̈ܡܶܐ ܒܥܽܘܡܩܳܐ ܥܰܡ ܬܰܠܡܺܝ̈ܕܶܐ܇ ܒܰܪܬ ܥܰܡܳܐ ܕܶܝܢ ܚܶܣܡܰܬ݀ ܦܶܩܪܰܬ݀ ܟܰܕ ܡܶܫܬܰܒܰܚ܇ ܕܢܶܫܠܶܐ ܫܽܘܒܚܳܐ ܡܶܢ ܟܽܠ ܦܽܘܡܰܝ̈ܢ ܝܰܨܺܝܦܐ ܗܘܳܬ݀ ܀

ܫܽܘܒܚܳܐ ܠܰܐܒܳܐ ܕܰܒܦܽܘܡ ܢܒܺܝ̈ܰܘܗ̱ܝ ܐ̱ܪ̈ܳܙܰܘܗ̱ܝ ܡܰܠܶܠ܇ ܘܣܶܓܕܬܳܐ ܠܰܒܪܳܐ ܕܳܐܦ ܡܶܠܰܝ̈ܗܽܘܢ ܒܓܰܠܝܳܐ ܚܰܬܶܡ܇ ܬܰܘܕܺܝ ܠܪܽܘܚܳܐ ܕܨܳܪ ܒܰܢܒܺܝ̈ܶܐ ܘܫܰܒܪ̈ܶܐ ܐܰܙܺܝܥ܇ ܕܰܢܝܰܒܒܽܘܢ ܠܶܗ ܫܽܘܒܚܳܐ ܦܰܐܝܳܐ ܒܽܐܘܫܰܥܢܰܝ̈ܗܽܘܢ܀

 

ܕܰܬܠܳܬܫܳܥܺܝ̈ܢ ܩܳܠܳܐ ܦܬܺܝܚ ܗܽܘ ܬܰܪܥܶܗ ܕܦܰܪܕܰܝܣܳܐ

ܬܶܗܪܳܐ ܪܰܒܳܐ ܚܰܒܺܝ̈ܒܰܝ܇ ܕܰܐܝܟܰܢ ܡܶܠܬܳܐ ܐܰܠܳܗܳܐ܇ ܐܶܬܬܰܚܬܺܝ ܘܰܠܒܶܫ ܦܰܓܪܳܐ܇ ܘܰܒܡܽܘܟܳܟܶܗ܇ ܐܶܬܪܰܡܪܰܡ܇ ܓܶܢܣܶܗ ܕܳܐܕܳܡ ܥܰܦܪܳܢܳܐ܇ ܕܰܢܦܰܠ ܒܰܥܒܳܪ ܦܽܘܩܕܳܢܳܐ܀

ܟܰܕ ܢܳܚܶܬ ܗܘܳܐ ܦܳܪܽܘܩܰܢ܇ ܡܶܢ ܛܽܘܪ ܙܰܝ̈ܬܶܐ ܠܽܐܘܪܺܫܠܶܡ܇ ܘܰܪܟܺܝܒ ܗܘܳܐ ܥܺܝܠܳܐ ܫܺܝܛܳܐ܇ ܘܓܽܘܕܳܐ ܕܬܰܠܡܺܝ̈ܕܰܘܗ̱ܝ ܥܰܡܶܗ܇ ܘܝܰܠܽܘ̈ܕܶܐ ܒܽܐܘܫܰܥܢܰܝ̈ܗܽܘܢ܇ ܫܰܒܰܚܘ̱ ܩܽܘܕܡܰܘܗ̱ܝ ܐܳܦ ܩܰܠܣܽܘܗ̱ܝ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܰܘ ܙܰܕܺܝܩܳܐ ܗܽܘ ܦܳܪܽܘܩܳܐ ܘܗܽܘ ܡܰܟܺܝܟܳܐ܇ ܘܰܪܟܺܝܒ ܥܺܝܠܳܐ ܒܰܪ ܐܰܬܳܢܳܐ ܐܰܝܟ ܕܶܐܡܪܶܬ ܠܶܟܝ̱܇ ܠܳܐ ܬܚܽܘܪܺܝܢ ܒܶܗ ܕܡܰܟܺܝܟ ܘܰܪܟܺܝܒ ܥܺܝܠܳܐ ܫܺܝܛܳܐ܇ ܡܶܛܽܠ ܗܳܢܳܐ ܢܶܬܬܫܺܝܛ ܡܶܢܶܟܝ̱ ܘܠܳܐ ܢܶܬܩܰܒܰܠ܀

ܫܽܘܒܚܳܐ ܠܰܐܒܳܐ ܕܰܓܒܳܐ ܠܥܺܕܬܳܐ ܗܳܐ ܡܶܢ ܠܩܽܘܕܡܰܝܢ܇ ܘܣܶܓܕܬܳܐ ܠܰܒܪܳܐ ܕܰܐܣܠܺܝ ܟܢܽܘܫܬܳܐ ܕܠܳܐ ܩܰܒܶܠܬܳܗܿ܇ ܬܰܘܕܺܝ ܠܪܽܘܚܳܐ ܕܰܓܒܳܐ ܠܥܰܡܡ̈ܶܐ ܠܥܰܡܳܐ ܟܽܠܶܗ܇ ܘܗܳܐ ܙܳܡܪܺܝܢ ܠܶܗ ܩܳܠܰܝ̈ ܫܽܘܒܚܳܐ ܒܽܐܘܫܰܥܢܰܝ̈ܗܽܘܢ܀

ܕܦܶܠܓܶܗ ܕܝܰܘܡܳܐ

ܩܳܠܳܐ ܣܳܗ̈ܕܶܐ ܦܬܰܚܘ̱ ܓܰܙܰܝ̈ܟܽܘܢ

ܗܰܘ ܕܰܟܪ̈ܽܘܒܶܐ ܛܥܺܝܢܺܝܢ ܠܶܗ܇ ܥܰܠ ܚܰܨܳܐ ܕܥܺܝܠܳܐ ܝܺܬܶܒ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܗܰܘ ܕܰܣܪ̈ܳܦܶܐ ܡܩܰܕܫܺܝܢ ܠܶܗ܇ ܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ ܒܩ̈ܳܠܶܐ ܕܽܐܘܫܰܥܢ̈ܶܐ ܫܰܒܚܽܘܗ̱ܝ܇ ܗ ܘ ܗ܇ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ܇ ܒܰܫܡܰܝܳܐ ܝܳܬܶܒ ܡܳܪܝܳܐ܇ ܡܶܢ ܝܰܡܺܝܢܳܐ ܕܫܳܠܽܘܚܶܗ܇ ܘܶܐܬܬܰܚܬܺܝ ܘܰܪܟܶܒ ܥܺܝܠܳܐ܇ ܘܰܛܠܳܝ̈ܶܐ ܒܣܰܘ̈ܟܰܝ ܙܰܝܬܳܐ ܒܽܐܘܫܰܥܢ̈ܶܐ ܙܡܰܪܘ̱ ܠܶܗ ܫܽܘܒܚܳܐ܇ ܗ ܘ ܗ܇ ܫܽܘܒܚܳܐ ܠܳܟ ܡܰܠܟܳܐ ܕܡܰܠܟ̈ܶܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܶܚܕܶܐ ܒܳܟ ܐܰܝܟ ܝܰܠܽܘ̈ܕܶܐ܇ ܕܝܰܗܒܘ̱ ܩ̈ܳܠܶܐ ܒܬܶܗܪܳܐ ܪܰܒܳܐ܇ ܓܰܒ̈ܶܐ ܬܠܳܬܳܐ ܕܰܚܙܰܐܽܘܟ܇ ܚܰܕ ܚܰܕ ܡܶܢܗܽܘܢ ܝܰܗܒ ܫܽܘܒܚܳܟ܀

ܫܽܘܒܚܳܐ ܠܳܟ ܡܶܢ ܟܽܠ ܦܽܘܡܽܝ̈ܢ܇ ܕܰܚܠܳܦ ܪܥܰܡܳܐ ܕܰܟܪ̈ܽܘܒܶܐ ܡܳܪܳܐ ܕܫܽܘܒܚ̈ܶܐ ܘܩܽܘܠܳܣ̈ܶܐ܇ ܛܠܳܝ̈ܶܐ ܫܰܒܚܽܘܗ̱ܝ ܒܽܐܘܫܰܥܢ̈ܶܐ܀

 

ܕܰܬܫܰܥܫܳܝ̈ܢ ܩܳܠܳܐ ܡܳܪܶܗ ܕܪܰܡܫܳܐ

ܡܳܪܳܐ ܕܪܰܘܡܳܐ ܕܬܰܚܬܺܝ ܪܰܒܽܘܬܶܗ܇ ܘܰܪܟܶܒ ܥܺܝܠܳܐ ܒܫܽܘܩܶܝ̈ܗܿ ܕܽܐܘܪܺܫܠܶܡ܇ ܘܡܶܢ ܝܰܠܽܘ̈ܕܶܐ ܘܫܰܒܪ̈ܶܐ ܐܶܫܬܰܒܰܚ܇ ܒܣܰܘ̈ܟܰܝ ܙܰܝܬܳܐ ܘܛܰܪ̈ܦܶܐ ܕܡܶܢ ܕܶܩ̈ܠܶܐ܀

ܚܰܘܒܬܳܐ ܕܚܳܒܘ̱ ܗ̱ܘܰܘ܇ ܣܰܟ̈ܠܶܐ ܒܢ̈ܰܝ ܨܶܗܝܽܘܢ܇ ܦܪܰܥܘ̱ ܝܰܠܽܘ̈ܕܶܐ ܒܝܰܘܡܳܐ ܕܽܐܘܫܰܥܢ̈ܶܐ܇ ܘܫܶܠܡܰܬ݀ ܡܶܠܬܶܗ ܕܰܢܒܺܝܳܐ ܕܶܐܡܰܪ܇ ܕܡܶܢ ܦܽܘܡ ܥܠܰܝ̈ܡܶܐ ܬܶܩܢܰܬ݀ ܬܶܫܒܽܘܚܬܳܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܬܶܗܪܳܐ ܘܕܽܘܡܳܪܳܐ܇ ܐܶܚܰܕ ܠܰܟܪ̈ܽܘܒܶܐ܇ ܘܥܰܡܗܽܘܢ ܠܰܣܪ̈ܳܦܶܐ܇ ܘܬܶܐܓܡ̈ܶܐ ܕܡܰܠܰܐܟ̈ܶܐ܇ ܟܰܕ ܚܳܝܪܺܝܢ ܗ̱ܘܰܘ ܒܶܗ܇ ܒܡܳܪܳܐ ܕܶܐܬܡܰܟܰܟ܇ ܘܰܪܟܺܝܒ ܥܰܠ ܥܺܝܠܳܐ ܇ܘܥܳܐܶܠ ܠܓܰܘ ܨܶܗܝܽܘܢ܀

ܫܽܘܒܚܳܐ ܠܗܰܘ ܕܶܐܬܳܐ܇ ܡܶܛܽܠ ܦܽܘܪܩܳܢܰܢ܇ ܫܽܘܒܚܳܐ ܠܗܰܘ ܬܽܘܩܦܳܐ܇ ܕܰܪܟܶܒ ܥܰܠ ܥܺܝܠܳܐ܇ ܘܩܰܠܣܽܘܗ̱ܝ ܒܽܐܘܫܰܥܢ̈ܶܐ܇ ܫܰܒܪ̈ܶܐ ܘܝܰܠܽܘ̈ܕܶܐ܇ ܠܶܗ ܫܽܘܒܚܳܐ ܘܠܐܰܒܽܘܗ̱ܝ܇ ܬܰܘܕܺܝ ܠܪܽܘܚܩܽܘܕܫܳܐ܀

 

ܬܽܘܒ ܕܪܰܡܫܳܐ ܕܰܐܪܒܥܳܐ ܕܽܐܘܫܰܥܢ̈ܶܐ

ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܥܰܠ ܝܽܘܪܕܢܳܢ

ܝܰܘܡܳܢܳܐ܇ ܢܶܚܕܶܐ ܙܟܰܪܝܳܐ ܘܢܰܘܕܶܐ܇ ܕܥܰܠ ܥܺܝܠܳܐ܇ ܚܙܳܝܗ̱ܝ ܠܰܒܪܳܐ ܒܫܽܘܒܚܳܐ܀

ܟܶܢܫ̈ܶܐ ܦܪܰܣܘ̱܇ ܩܽܘܕܡܰܘܗ̱ܝ ܡܰܪ̈ܛܽܘܛܰܝܗܽܘܢ܇ ܘܒܽܐܘܫܰܥܢܰܝ̈ܗܽܘܢ ܫܽܘܒܚܳܐ ܚܰܕܬܳܐ ܙܡܪ̱ܘ ܠܶܗ܀

ܢܒܺܝ̈ܶܐ ܪܫܰܡܘ̱܇ ܥܰܠ ܡܶܐܬܺܝܬܶܗ ܕܡܳܪܝܳܐ܇ ܘܟܶܢܫ̈ܶܐ ܩܰܠܣܽܘܗ̱ܝ܇ ܘܫܠܺܝ̈ܚܶܐ ܣܒܰܪܬܶܗ ܙܪܰܥܘ̱܀

ܣܪ̈ܳܦܶܐ ܡܩܰܕܫܺܝܢ܇ ܠܰܒܪܳܐ ܒܰܐܬܪܶܗ ܪܳܡܳܐ܇ ܘܥܺܕܰܬ ܩܽܘܕܫܳܐ܇ ܗܳܐ ܒܽܐܘܫܰܥܢ̈ܶܐ ܡܫܰܒܚܳܐ܀

ܐܰܪܺܝܡܘ̱ ܩܳܠܗܽܘܢ܇ ܝܰܠܽܘ̈ܕܶܐ ܟܰܕ ܩܳܥܶܝܢ܇ ܕܒܪܺܝܟ ܗܽܘ܇ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܫܽܘܒܚܳܐ ܠܛܰܝܒܽܘܬܳܟ܇ ܕܶܐܬܪܰܟܢܰܬ݀ ܨܶܝܕ ܚܰܛܳܝ̈ܶܐ܇ ܘܥܰܠ ܥܺܝܠܳܐ ܪܟܶܒܬ܇ ܒܫܽܘܩܶܝ̈ܗܿ ܕܽܐܘܪܺܫܠܶܡ܀

 

ܡܳܪܝܳܐ ܩܪܺܝܬܳܟ ܒܩܳܠܳܐ ܨܠܺܝ ܡܳܪܝܳܐ ܒܪ̈ܰܚܡܶܐ

ܥܰܠ ܥܺܝܠܳܐ ܚܙܳܝܗ̱ܝ ܗܘܳܐ ܕܝܳܬܶܒ܇ ܙܟܰܪܝܳܐ ܢܒܺܝܳܐ ܘܳܐܡܰܪ ܗܘܳܐ܇ ܕܗܳܐ ܡܰܠܟܶܟܝ̱ ܐܳܬܶܐ ܨܶܝܕܰܝܟܝ̱܇ ܙܡܰܪܝ̱ ܠܶܗ ܫܽܘܒܚܳܐ ܒܽܐܘܫܰܥܢ̈ܶܐ܀

ܠܰܟܢܽܘܫܬܳܐ ܗܳܝ ܕܰܛܠܳܝ̈ܶܐ܇ ܚܙܳܐ ܗܘܳܐ ܕܰܘܺܝܕ ܒܰܪ ܐܺܝܫܰܝ܇ ܘܰܩܥܳܐ ܘܶܐܡܰܪ ܕܡܶܢ ܦܽܘܡܳܐ܇ ܕܫܰܒܪ̈ܶܐ ܬܶܩܢܰܬ݀ ܬܶܫܒܽܘܚܬܳܟ܀

ܐܶܫܰܥܝܳܐ ܒܩܳܠܳܐ ܪܳܡܳܐ܇ ܡܥܺܝܪ ܗܘܳܐ ܠܨܶܗܝܽܘܢ ܟܰܕ ܐܳܡܰܪ܇ ܕܶܐܬܬܥܺܝܪܝ̱ ܐܶܬܬܥܺܝܪܝ̱ ܐܽܘܪܺܫܠܶܡ܇ ܘܩܽܘܡܝ̱ ܘܦܽܘܩܝ̱ ܠܽܐܘܪܥܶܗ ܕܰܐܠܳܗܶܟܝ̱܀

ܒܗܳܢܳܐ ܝܰܘܡܳܐ ܕܡܽܘܟܳܟܳܟ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܇ ܥܰܡ ܫܰܒܪ̈ܶܐ ܒܣܰܘ̈ܟܶܐ ܐܶܩܥܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܒܣܰܘ̈ܟܰܝ ܙܰܝܬܳܐ ܩܳܥܶܝܢ ܗ̱ܘܰܘ܇ ܝܰܠܽܘ̈ܕܶܐ ܒܢ̈ܰܝ ܥܶܒܪ̈ܳܝܶܐ܇ ܟܰܕ ܐܳܡܪܺܝܢ ܗ̱ܘܰܘ ܫܰܘܝܳܐܺܝܬ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܫܰܒܪ̈ܶܐ ܩܳܥܶܝܢ ܕܰܡܫܺܝܚܰܐܗ̱ܘ܇ ܘܣܳܒ̈ܶܐ ܨܳܒܶܝܢ ܕܰܢܚܰܦܽܘܢ܇ ܠܬܶܫܒܽܘܚܬܳܐ ܕܡܰܠܟܳܐ ܡܫܺܝܚܳܐ܇ ܕܶܐܬܳܐ ܕܢܶܦܪܽܘܩ ܒܶܪ̈ܝܳܬܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܗܰܒܠܳܗܿ ܠܥܺܕܬܳܟ

ܫܽܘܒܚܳܐ ܠܗܰܘ ܚܰܝܠܳܐ܇ ܕܶܐܬܬܰܚܬܺܝ ܡܶܛܽܠܳܬܰܢ܇ ܘܰܗܘܳܐ ܐ̱ܢܳܫܳܐ ܫܺܝܛܳܐ ܘܡܰܟܺܝܟܳܐ܇ ܘܰܦܪܰܩ ܒܶܪ̈ܝܳܬܳܐ܇ ܡܶܢ ܫܽܘܥܒܳܕܳܐ ܕܰܚܛܺܝܬܳܐ܇ ܘܢܰܥܠܶܢ ܥܰܡܶܗ ܠܰܓܢܽܘܢ ܚܰܕܘ̈ܳܬܳܐ܀

ܨܶܗܝܽܘܢ ܩܳܛܽܘܠܬܳܐ܇ ܢܶܦܩܰܬ݀ ܗܘܳܬ݀  ܠܽܐܘܪܰܥ ܡܰܠܟܳܐ܇ ܟܰܕ ܚܳܣܡܳܐ ܒܶܗ ܘܗܳܟܰܢ ܐܶܡܪܰܬ݀ ܠܶܗ܇ ܕܫܰܬܶܩ ܬܰܠܡܺܝܕܰܝ̈ܟ܇ ܡܶܢ ܩܳܠ ܪܰܘܒܳܐ ܕܝܰܠܽܘ̈ܕܶܐ ܕܩܳܥܶܝܢ ܘܳܐܡܪܺܝܢ ܐܽܘܫܰܥܢܳܐ ܒܪܰܘܡܳܐ܀

 

ܐ̱ܚܪܺܢܳܐ ܒܩܳܠܳܐ ܠܳܟ ܡܳܪܝܳܐ ܩܳܪܶܝܢܰܢ

ܟܶܢܫ̈ܶܐ ܕܥܰܡܡ̈ܶܐ ܦܓܰܥܘ̱ ܗ̱ܘܰܘ ܒܒܰܪ ܐܰܠܳܗܳܐ܇ ܟܰܕ ܪܟܺܝܒ ܗܘܳܐ ܥܺܝܠܳܐ ܫܺܝܛܳܐ ܘܥܳܐܶܠ ܠܽܐܘܪܺܫܠܶܡ܇ ܘܰܛܠܳܝ̈ܶܐ ܡܫܰܒܚܺܝܢ ܗ̱ܘܰܘ ܒܣܰܘ̈ܟܰܝ ܙܰܝܬܳܐ܇ ܥܰܡ ܬܰܠܡܺܝ̈ܕܶܐ ܟܰܕ ܚܳܕܶܝܢ ܘܗܳܟܰܢ ܐܳܡܪܺܝܢ ܗ̱ܘܰܘ܇ ܬܳܐ ܒܰܫܠܳܡ ܝܰܠܕܳܐ ܕܥܶܠܳܝܳܐ܇ ܬܳܐ ܒܰܫܠܳܡ ܝܰܠܕܳܐ ܕܡܶܢ ܡܰܪܝܰܡ܇ ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ ܕܰܣܥܰܪ ܐ̱ܢܳܫܽܘܬܰܢ܀

ܒܬܶܗܪܳܐ ܪܰܒܳܐ ܘܰܒܕܽܘܡܳܪܳܐ ܩܳܡܘ̱ ܗ̱ܘܰܘ ܥܺܝܪ̈ܰܝ ܪܰܘܡܳܐ ܘܰܣܪ̈ܳܦܶܐ ܒܝܰܘܡܳܐ ܕܽܐܘܫܰܥܢ̈ܶܐ܇ ܕܰܚܙܰܐܽܘܗ̱ܝ ܠܺܝܚܺܝܕܳܝܳܐ ܒܰܪ ܐܰܠܳܗܳܐ܇ ܕܡܶܢ ܝܰܡܺܝܢܳܐ ܕܫܳܠܽܘܚܶܗ ܝܳܬܶܒ ܒܰܡܪ̈ܰܘܡܶܐ܇ ܘܚܳܪܘ̱ ܒܰܐܪܥܳܐ܇ ܘܰܚܙܰܘ ܗܽܘ ܟܰܕ ܗܽܘ܇ ܒܶܝܬ ܟܶܢܫܳܐ ܕܩܳܥܶܝܢ ܒܽܐܘܫܰܥܢ̈ܶܐ܇ ܘܥܰܠ ܥܺܝܠܳܐ ܫܺܝܛܳܐ ܪܟܺܝܒ ܗܘܳܐ܇ ܟܰܕ ܥܰܠ ܠܽܐܘܪܺܫܠܶܡ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܰܙܥܶܩ̈ܝ̱ ܓܽܘܕ̈ܶܐ ܕܰܫܡܰܝ̈ܳܢܶܐ ܩܰܕܺܝܫ ܩܰܕܺܝܫ܇ ܐܳܦ ܕܰܐܪ̈ܥܳܢܶܐ ܩܥ̈ܰܝ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܩܥܰܘ ܡܰܠܰܐܟ̈ܶܐ ܒܪܺܝܟ ܐܺܝܩܳܪܶܗ ܕܡܳܪܝܳܐ ܒܰܐܬܪܶܗ܇ ܘܰܒܢܰܝ̈ܢܳܫܳܐ ܒܪܺܝܟ ܗܽܘ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܟܽܠܗܽܘܢ ܫܽܘܒܚ̈ܶܐ ܕܰܡܫܰܒܚܳܢ̈ܶܐ ܠܳܐ ܣܳܦܩܺܝܢ ܠܳܟ܇ ܘܰܐܝܟ ܡܳܐ ܕܫܳܘܶܐ ܘܙܳܕܶܩ ܘܝܳܐܶܐ ܠܳܐ ܡܶܫܟܚܺܝܢ܇ ܥܰܡ ܟܽܠ ܒܶܪ̈ܝܳܢ ܕܰܡܫܰܒܚܺܝܢ ܠܳܟ ܛܠܳܝ̈ܶܐ ܫܰܒܚܽܘܟ܇ ܫܒܺܝܚ ܐܰܢ̱ܬ ܒܰܐܒܽܘܟ ܥܰܡ ܪܽܘܚܩܽܘܕܫܳܐ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܩܳܠܳܐ ܝܳܐܶܐ ܘܙܳܕܶܩ

ܝܽܘܡ ܡܶܐܬܺܝܬܳܟ ܩܳܪܶܐ ܠܺܝ܇ ܩܽܘܡ ܓܰܒܪܳܐ ܘܛܰܝܶܒ ܢܰܦܫܳܟ܇ ܕܗܳܐ ܚܰܬܢܳܐ ܡܰܛܺܝ ܕܢܺܐܬܶܐ܇ ܦܽܘܩ ܠܽܐܘܪܥܶܗ ܟܰܕ ܚܳܕܶܐ ܐܰܢ̱ܬ܇ ܫܽܘܒܚܳܐ ܠܳܟ܀

ܒܰܪ ܡܰܠܟܳܐ ܕܪܟܺܝܒ ܥܺܝܠܳܐ܇ ܘܳܐܦ ܡܶܢ ܫܰܒܪ̈ܶܐ ܐܶܬܩܰܠܰܣ܇ ܚܰܝܶܠ ܪ̈ܶܓܫܰܝ ܐܳܦ ܙܰܘܥ̈ܰܝ܇ ܕܶܐܙܡܰܪ ܫܽܘܒܚܳܐ ܒܥܰܕܥܺܐܕܳܟ ܫܽܘܒܚܳܐ܀

ܓܕܰܠܘ̱ ܗ̱ܘܰܘ ܟܺܠܝ̈ܠܶܐ ܕܩܽܘܠܳܣ̈ܶܐ ܛܠܳܝ̈ܶܐ ܘܫܰܒܪ̈ܶܐ ܘܰܥܠܰܝ̈ܡܶܐ܇ ܐܰܟܡܳܐ ܕܶܐܬܢܰܒܺܝ ܕܰܘܺܝܕ܇ ܩܕܳܡ ܙܰܒܢܳܐ ܒܪܽܘܚܳܐ ܕܩܽܘܕܫܳܐ܇ ܫܽܘܒܚܳܐ ܠܳܟ܀

ܒܰܡܪ̈ܰܘܡܳܐ ܟܶܢܫ̈ܶܐ ܫܓܺܝܪ̈ܶܐ܇ ܕܥܺܝܪ̈ܶܐ ܕܢܽܘܪܳܐ ܘܰܕܪܽܘܚܳܐ܇ ܩܳܝܡܺܝܢ ܩܽܘܕܡܰܬ ܡܰܪܟܰܒܬܳܟ܇ ܟܰܕ ܣܳܓܕܺܝܢ ܠܳܟ ܒܶܪ̈ܝܳܬܳܐ܀

ܫܽܘܒܚܳܐ ܠܗܰܘ ܕܶܐܬܳܐ ܒܪ̈ܰܚܡܰܘܗ̱ܝ܇ ܘܡܶܢ ܝܰܠܽܘ̈ܕܶܐ ܐܶܬܩܰܠܰܣ܇ ܘܰܠܝܰܠܕܰܘ̈ܗ̱ܝ ܕܳܐܕܳܡ ܚܰܪܰܪ܇ ܘܗܳܐ ܠܶܗ ܡܫܰܒܚܺܝܢ ܟܰܕ ܐܳܡܪܺܝܢ܇ ܫܽܘܒܚܳܐ ܠܳܟ ܫܽܘܒܚܳܐ܀

 

ܩܰܘܡܳܐ ܩܰܕܡܳܝܳܐ܇

ܩܳܠܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܥܰܠ ܡܳܪܰܢ ܠܗܰܝܟܰܠ ܩܽܘܕܫܳܐ ܒܫܽܘܒܚܳܐ ܪܰܒܳܐ܇ ܘܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ܇ ܫܰܒܰܚܘ̱ ܩܽܘܕܡܰܘܗ̱ܝ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܕܶܐܬܬܰܚܬܺܝ ܡܶܛܽܠܳܬܰܢ ܗ ܒܪܺܝܟ ܫܳܠܽܘܚܶܗ܀

ܡܶܛܽܠ ܐܳܕܳܡ ܐܶܬܡܰܟܰܟ܇ ܘܥܰܠ ܚܰܝܘ̈ܳܬܳܐ ܐܶܙܕܰܝܰܚ ܒܰܪ ܡܳܪܶܐ ܟܽܠ܇ ܘܫܰܒܪ̈ܶܐ ܒܽܐܘܫܰܥܢ̈ܶܐ ܫܰܒܚܽܘܗ̱ܝ ܟܰܕ ܩܳܥܶܝܢ ܠܶܗ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܗ ܫܽܘܒܚܳܐ ܠܰܫܡܶܗ܀

 

ܡܰܕܪܳܫܳܐ ܩܳܠܳܐ ܦܰܪܕܰܝܣܳܐ ܥܶܢܝܳܢܳܐ ܒܪܺܝܟ ܗܽܘ ܕܰܛܠܳܝ̈ܶܐ܇ ܩܰܠܣܽܘܗ̱ܝ ܒܓܰܘ ܨܶܗܝܽܘܢ܇ ܘܥܺܝܪ̈ܶܐ ܘܡܰܠܰܐܟ̈ܶܐ ܙܳܡܪܺܝܢ ܬܶܫܒܽܘܚܬܶܗ

ܒܣܰܘ̈ܟܶܐ ܕܡܶܢ ܕܶܩ̈ܠܶܐ܇ ܥܠܰܝ̈ܡܶܐ ܩܳܥܶܝܢ ܗ̱ܘܰܘ܇ ܐܽܘܫܰܥܢܳܐ ܒܪܰܘܡܳܐ ܠܡܰܠܟܳܐ ܫܡܰܝܳܢܳܐ܇ ܐ̱ܚܪ̈ܳܢܶܐ ܡܫܰܘܰܝܢ ܗ̱ܘܰܘ ܩܽܘܕܡܰܘܗ̱ܝ ܢܰܚܬܰܝ̈ܗܽܘܢ܇ ܕܗܳܐ ܡܰܠܟܶܟܝ̱ ܠܨܶܗܝܽܘܢ ܙܟܰܪܝܳܐ ܩܥܳܐ܇ ܘܩܳܥܶܝܢ ܠܶܗ ܫܰܒܪ̈ܶܐ܇ ܐܽܘܫܰܥܢܳܐ ܒܪܰܘܡܳܐ܇ ܠܡܰܠܟܳܐ ܕܬܶܫܒܽܘܚܬܳܐ ܕܶܐܬܳܐ ܪܟܺܝܒ ܥܺܝܠܳܐ܀

ܐܽܘܫܰܥܢܳܐ ܒܪܰܘܡܳܐ܇ ܠܡܰܠܟܳܐ ܕܡܶܢ ܪܰܘܡܳܐ܇ ܕܶܐܬܳܐ ܕܢܰܫܠܶܡ ܐ̱ܪ̈ܳܙܶܐ ܕܰܢܒܺܝ̈ܶܐ܇ ܕܰܥܠܰܘܗ̱ܝ ܐܶܬܢܰܒܺܝܘ܇ ܕܳܐܬܶܐ ܠܦܽܘܪܩܳܢܰܢ܇ ܘܰܫܠܺܝ̈ܚܶܐ ܐܰܟܪܶܙܘ̱ ܣܒܰܪܬܶܗ܇ ܘܥܺܝܪ̈ܶܐ ܘܡܰܠܰܐܟ̈ܶܐ ܙܳܡܪܺܝܢ ܬܶܫܒܽܘܚܬܶܗ܇ ܘܥܺܝܠܳܐ ܛܥܶܢ ܙܰܝܚܶܗ܇ ܒܫܽܘܩܶܝ̈ܗܿ ܕܽܐܘܪܺܫܠܶܡ܀

ܥܶܒܪܳܝܬܳܐ ܫܛܳܬ݀ ܩ̈ܳܠܶܐ ܕܰܢܒܺܝ̈ܶܐ܇ ܘܠܳܐ ܨܒܳܬ݀ ܕܰܬܩܰܒܶܠܝ܇ ܣܒܰܪܬܳܐ ܕܰܫܠܺܝ̈ܚܶܐ܇ ܘܰܒܥܳܬ݀ ܕܰܬܫܰܬܶܩܝ̱ ܫܽܘܒܚܳܐ ܕܝܰܠܽܘ̈ܕܶܐ܇ ܒܪܺܝܟ ܗܽܘ ܕܡܶܢ ܒܶܝܬܶܗ ܥܰܩܪܳܗܿ ܘܰܡܟܰܪ ܠܶܗ ܥܺܕܬܳܐ܇ ܘܨܰܒܬܳܗܿ ܒܟܽܠ ܫܽܘܦܪ̈ܺܝܢ܇ ܘܗܳܐ ܙܳܡܪܳܐ ܫܽܘܒܚܳܐ܇ ܒܝܰܘܡܳܐ ܕܥܰܕܥܺܐܕܶܗ܀

ܒܗܳܢܳܐ ܥܰܕܥܺܐܕܳܐ܇ ܫܡܰܝܳܐ ܪܶܘܙܰܬ݀ ܗܘܳܬ݀܇ ܘܰܐܪܥܳܐ ܐܶܬܡܰܠܝܰܬ݀܇ ܫܽܘܒܚܶܗ ܕܰܡܪܰܝܡܳܐ܇ ܘܨܶܗܝܽܘܢ ܐܶܫܬܰܓܫܰܬ݀܇ ܒܩ̈ܳܠܶܐ ܕܰܛܠܳܝ̈ܶܐ܇ ܕܩܳܥܶܝܢ ܐܽܘܫܰܥܢܳܐ ܒܪܰܘܡܳܐ܇ ܠܰܒܪܶܗ ܕܥܶܠܳܝܳܐ܇ ܕܶܐܬܳܐ ܠܦܽܘܪܩܳܢܰܢ܇ ܘܰܥܬܺܝܕ ܬܽܘܒ ܕܢܺܐܬܶܐ܇ ܢܢܰܚܶܡ ܠܡܺܝܬܽܘܬܰܢ܀

 

ܩܰܘܡܳܐ ܕܒ ܕܠܺܠܝܳܐ ܒܩܳܠܳܐ ܒܰܥܪܽܘܒܬܳܐ ܒܪܺܝܫܺܝܬ

ܝܰܘܡܢ ܐܶܫܬܰܠܰܡܘ̱܇ ܦܶܬܓܳܡ̈ܰܝ ܕܰܘܺܝܕ܇ ܡܶܛܽܠ ܒܰܪ ܕܰܘܺܝܕ ܕܡܶܢ ܦܽܘܡ ܝܰܠܽܘ̈ܕܶܐ܇ ܘܰܛܠܳܝ̈ܶܐ ܘܫܰܒܪ̈ܶܐ܇ ܬܶܩܢܰܬ݀ ܬܶܫܒܽܘܚܬܶܗ܇ ܗ ܘ ܗ ܒܪܺܝܟ ܐܰܒܳܐ ܕܫܰܠܚܳܟ܀

ܠܨܶܒܝܳܢܳܟ ܪܳܡܳܐ܇ ܕܰܐܪܦܺܝܬ ܒܰܡܪ̈ܰܘܡܳܐ܇ ܟܪ̈ܽܘܒܶܐ ܕܰܡܒܰܪܟܺܝܢ܇ ܘܰܒܚܽܘܒܳܟ ܩܰܒܶܠܬ ܫܽܘܒܚܳܐ ܡܶܢ ܫܰܒܪ̈ܶܐ܇ ܬܰܘܕܺܝ ܠܛܰܝܒܽܘܬܳܟ ܗ ܘ ܗ ܕܶܐܬܰܝܬ ܠܦܽܘܪܩܳܢܰܢ܀

 

ܣܽܘܓܺܝܬܳܐ ܒܩܳܠܳܐ ܐܳܘ ܢܰܦܫܳܐ ܨܽܘܪܬܳܐ܇ ܥܶܢܝܳܢܳܐ ܚܽܘܣ ܥܠܰܝ ܪܳܚܶܡ ܒܢܰܝ̈ܢܳܫܳܐ ܒܗܳܢ ܚܽܘܒܳܐ ܕܫܰܠܚܳܟ ܨܶܝܕ ܓܶܢܣܰܢ

ܐܳܘ ܢܰܦܫܳܐ ܨܽܘܪܬܳܐ ܕܡܰܠܟܽܘܬܳܐ܇ ܡܰܢ ܫܰܠܰܚ ܫܽܘܦܪܶܟܝ̱ ܘܰܐܗܶܠ ܒܶܟܝ̱܇ ܘܗܳܐ ܣܳܢܝܰܬܝ̱ ܒܣܽܘܓܐܳܐ ܕܒܺܝܫ̈ܳܬܳܐ܀

ܓܒܳܟܝ̱ ܘܰܐܥܠܶܟܝ̱ ܠܩܽܝܛܽܘܢܶܗ܇ ܓܠܳܐ ܥܽܘܬܪܶܗ ܘܓܰܙܰܘ̈ܗ̱ܝ ܚܰܘܺܝ ܠܶܟܝ̱܇ ܘܥܰܠ ܡܳܢܳܐ ܣܢܰܝܬܳܝܗ̱ܝ ܠܫܰܦܺܝܪܳܐ܀

ܗܽܘ̈ܠܳܠܶܐ ܘܩ̈ܳܠܶܐ ܕܥܶܠܳܝ̈ܶܐ܇ ܘܬܶܫܡܶܫܬܳܐ ܙܗܺܝܬܳܐ ܕܪ̈ܽܘܚܳܢܶܐ܇ ܐܰܪܦܺܝܬܳܝܗ̱ܝ ܘܰܢܩܶܦܬܝ̱ ܠܚܰܝܘ̈ܳܬܳܐ܀

ܙܰܠܺܝ̈ܩܶܐ ܕܢܽܘܗܪܳܐ ܠܒܺܝܫܳܐ ܗܘܰܝܬܝ̱܇ ܘܗܰܡܢܺܝܟܳܐ ܕܡܰܠܟܳܐ ܛܥܺܝܢܳܐ ܗܘܰܝܬܝ̱܇ ܘܡܰܢ ܝܰܗܒܠܶܟܝ̱ ܛܰܪ̈ܦܶܐ ܕܦܽܘܪܣܝܳܐ܀

ܛܥܺܝܿܬ ܡܶܛܽܠ ܕܫܶܡܥܿܶܬ ܠܰܢܟܺܝܠܳܐ܇ ܘܰܒܢܶܟܠܶܗ ܕܰܒܪܰܢܝ̱ ܒܓܳܠܽܘܬܳܐ܇ ܘܗܳܐ ܪ̈ܶܓܠܰܝ ܣܪ̈ܺܝܓܳܢ ܒܬܰܘܩ̈ܠܳܬܳܐ܀

ܟܡܶܢ ܘܰܨܠܶܐ ܦܰܚܰܘ̈ܗ̱ܝ ܨܢܺܝܥܳܐܺܝܬ܇ ܘܪܰܒܽܘܬܳܐ ܐܰܣܒܪܰܢܝ̱ ܕܝܳܗܶܒ ܠܺܝ܇ ܘܟܰܕ ܩܶܪܒܿܶܬ ܣܰܚܦܰܢܝ̱ ܒܓܽܘܡܳܨܳܐ܀

ܠܰܫܡܰܝܳܐ ܓܰܪܓܰܢܝ̱ ܕܡܰܣܶܩ ܠܺܝ܇ ܘܰܚܦܰܪ ܠܺܝ ܩܰܒܪܳܐ ܘܢܶܦܠܶܬ ܒܶܗ܇ ܘܗܳܐ ܒܰܫܝܽܘܠ ܕܡܺܝ̈ܬܶܐ ܥܓܺܝܢܳܐ ܐ̱ܢܳܐ܀

ܢܳܛܽܘܪܬܳܐ ܣܰܡܽܘܢܝ̱ ܒܦܰܪܕܰܝܣܳܐ܇ ܘܠܳܐ ܢܛܰܪܬܶܗ ܘܥܰܠ ܗܳܝ ܒܣܺܝܪܳܐ ܐ̱ܢܳܐ܇ ܘܰܓܢܰܒܬܶܗ ܠܦܺܐܪܳܐ ܘܗܰܘ ܩܰܛܠܰܢܝ̱܀

ܥܰܡܶܟܝ̱ ܗܽܘ ܣܰܒܪܳܐ ܕܒܶܪ̈ܝܳܬܳܐ܇ ܐܳܘ ܢܰܦܫܳܐ ܠܳܐ ܬܶܦܣܩܺܝܢ ܣܰܒܪܳܐ܇ ܕܺܐܝܠܳܢܳܐ ܕܚܰܝ̈ܶܐ ܠܘܳܬܶܟܝ̱ ܗܽܘ܀

ܨܳܪ ܩܰܛܠܶܗ ܠܚܶܘܝܳܐ ܕܒܰܙܰܚ ܒܶܟܝ̱܇ ܘܪܳܨ ܪܺܝܫܶܗ ܡܶܛܽܠ ܕܰܐܛܥܺܝ ܒܶܟܝ̱܇ ܦܢܳܝ ܢܰܦܫܳܐ ܠܰܥܕܶܝܢ ܕܚܳܝܪܳܐ ܠܶܟܝ̱܀

ܪܰܒܽܘܬܳܐ ܕܫܽܘܦܪܶܟܝ̱ ܕܶܐܒܰܕ ܠܶܗ܇ ܗܳܐ ܫܟܺܝܚ ܠܶܟܝ̱ ܒܪܰܘܡܳܐ ܕܦܰܪܕܰܝܣܳܐ܇ ܩܽܘܡܝ̱ ܘܰܠܒܰܫܝ̱ ܘܰܦܢܳܝ ܠܝܳܪܬܽܘܬܶܟܝ̱܀

ܬܰܠܒܶܫܬܳܐ ܕܚܶܘܝܳܐ ܓܢܰܒ ܡܶܢܶܟܝ̱܇ ܕܒܰܪ ܡܰܠܟܳܐ ܐܺܝܬܶܝܗܿ ܘܰܠܒܶܫ ܠܶܟܝ̱܇ ܫܽܘܒܚܳܐ ܠܗܰܘ ܕܰܐܥܠܶܟܝ̱ ܠܒܶܝܬ ܐܰܒܽܘܟܝ̱܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܝܰܘܡܳܢܳܐ ܐܰܪܥܳܐ ܬܶܪܘܰܙܝ̱܇ ܘܛܽܘܪ̈ܶܐ ܢܕܽܘܨܽܘܢ ܐܰܝܟ ܐܶܡܪ̈ܶܐ܇ ܩܕܳܡ ܒܰܪ ܡܰܠܟܳܐ ܕܶܐܬܡܰܟܰܟ܇ ܘܶܐܬܳܐ ܕܢܶܣܥܽܘܪ ܬܰܚܬܳܝ̈ܶܐ܇ ܘܰܒܩܳܠܳܐ ܕܫܽܘܒܚܳܐ ܕܫܰܒܪ̈ܶܐ܇ ܒܫܽܘܩ̈ܰܝ ܨܶܗܝܽܘܢ ܥܳܒܰܪ ܗܘܳܐ܀

ܫܽܘܒܚܳܐ ܠܳܟ ܪܡܳܐ ܕܰܢܚܶܬܬ܇ ܕܰܒܡܽܘܟܳܟܶܗ ܠܰܢ ܢܪܰܡܪܶܡ܇ ܠܳܟ ܬܰܘܕܺܝܬܳܐ ܥܰܬܺܝܪܳܐ܇ ܕܶܐܬܡܰܣܟܰܢ ܕܠܰܢ ܬܽܘܒ ܢܶܥܬܰܪ܇ ܣܓܺܝܕ ܚܰܝܠܶܗ ܕܰܪܟܺܝܒ ܥܺܝܠܳܐ܇ ܕܬܶܙܕܰܝܰܚ ܒܠܶܒܰܘ̈ܳܬܰܢ܀

 

ܕܨܰܦܪܳܐ ܕܪܰܚܶܡܥܠܰܝ ܩܳܠܳܐ ܒܬܽܘܠܬܳܐ ܩܰܕܺܝܫܬܳܐ

ܛܠܳܝ̈ܶܐ ܛܥܶܢܘ̱ ܣܰܘ̈ܟܶܐ܇ ܘܰܪܗܶܛܘ̱ ܩܕܳܡ ܥܺܝܠܶܗ ܕܗܰܘ ܕܰܡܩܰܕܫܺܝܢ ܠܶܗ܇ ܟܪ̈ܽܘܒܶܐ ܒܡܰܪܟܰܒܬܶܗ܀

ܥܶܠܳܝ̈ܶܐ ܪܗܺܝܒܺܝܢ܇ ܘܡܶܢ ܙܺܝܘܶܗ ܙܳܝܥܺܝܢ܇ ܘܝܰܠܽܘ̈ܕܶܐ ܡܩܰܠܣܺܝܢ ܡܶܐܬܝܶܗ ܒܽܐܘܫܰܥܢ̈ܶܐ܀

ܒܗܳܢܳܐ ܥܰܕܥܺܐܕܳܐ ܫܡܰܝܳܐ ܐܶܬܦܰܨܚܰܬ݀܇ ܘܰܐܪܥܳܐ ܐܶܬܡܰܠܝܰܬ݀܇ ܡܶܢ ܫܽܘܒܚܶܗ ܕܡܳܪܝܳܐ܀

ܒܣܰܘ̈ܟܶܐ ܕܡܶܢ ܕܶܩ̈ܠܶܐ܇ ܛܠܳܝ̈ܶܐ ܡܫܰܒܚܺܝܢ ܗ̱ܘܰܘ܇ ܘܟܶܢܫ̈ܶܐ ܩܳܥܶܝܢ ܗ̱ܘܰܘ܇ ܐܽܘܫܰܥܢܳܐ ܒܪܰܘܡܳܐ܀

ܨܶܗܝܽܘܢ ܐܶܫܬܰܓܫܰܬ݀܇ ܒܩ̈ܳܠܶܐ ܕܰܛܠܳܝ̈ܶܐ܇ ܕܩܳܥܶܝܢ ܗ̱ܘܰܘ ܘܳܐܡܪܺܝܢ܇ ܐܽܘܫܰܥܢܳܐ ܒܪܰܘܡܳܐ܀

 

ܐܰܠܳܗܝ̱ ܐܰܠܳܗܝ̱ ܩܳܠܳܐ ܩܝܳܡܬܳܐ ܕܰܢܚܶܬ ܒܰܒܪܺܝܬܳܐ

ܨܶܗܝܽܘܢ ܩܶܨܦܰܬ݀ ܕܰܚܙܳܬܶܗ܇ ܠܰܡܟܺܝܪܳܗܿ ܕܶܐܬܳܐ ܠܘܳܬܳܗܿ܇ ܘܰܫܛܳܬܿ ܡ̈ܶܠܶܐ ܕܰܢܒܺܝ̈ܶܐ܇ ܕܰܐܟܪܶܙܘ̱ ܠܶܗ ܕܶܐܬܬܥܺܝܪܝ̱ ܫܰܒܰܚܝ̱܇ ܕܗܳܐ ܡܰܠܟܶܟܝ̱ ܐܳܬܶܐ ܠܘܳܬܶܟܝ̱܇ ܘܡܰܟܺܝܟ ܘܰܪܟܺܝܒ ܥܰܠ ܥܺܝܠܳܐ܀

ܥܰܠ ܗܘܳܐ ܡܳܪܰܢ ܠܽܐܘܪܺܫܠܶܡ܇ ܘܰܪܟܺܝܒ ܥܺܝܠܳܐ ܕܰܐܬܳܢܳܐ܇ ܘܰܡܫܰܒܚܺܝܢ ܠܶܗ ܫܰܒܪ̈ܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܩܥܰܘ ܫܰܒܪ̈ܶܐ ܥܰܡ ܝܰܠܽܘ̈ܕܶܐ܀

ܦܐܶܐ ܗܘܳܐ ܠܫܰܒܪ̈ܶܐ ܟܰܕ ܫܰܘܺܝܘ܇ ܢܰܚܬܰܝ̈ܗܽܘܢ ܩܽܘܕܡܰܬ ܡܰܠܟܳܐ܇ ܘܰܫܩܰܠܘ̱ ܣܰܘܟ̈ܶܐ ܒܺܐܝܕܰܝ̈ܗܽܘܢ܇ ܘܫܰܒܚܽܘܗ̱ܝ ܗ̱ܘܰܘ ܒܽܐܘܫܰܥܢܰܝ̈ܗܽܘܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܕܰܪܟܺܝܒ ܥܺܝܠܳܐ ܕܢܶܦܪܽܘܩ ܠܰܢ܀

 

ܐ̱ܚܪܺܢܳܐ ܢܰܦܫܳܐ ܥܩܰܪܬܳܐ

ܡܰܠܟܳܐ ܕܪܰܘܡܳܐ܇ ܕܠܰܐܪܥܳܐ ܢܚܶܬ ܗܘܳܐ ܕܢܶܦܪܽܘܩ ܠܳܐܕܳܡ ܘܰܠܝܰܠܕܰܘ̈ܗ̱ܝ܇ ܘܥܺܝܠܳܐ ܪܟܶܒ ܗܘܳܐ ܟܰܕ ܥܳܐܶܠ܇ ܘܟܰܢܶܫ ܥܰܡܡ̈ܶܐ ܡܶܢ ܣܰܘ̈ܦܶܐ܇ ܘܰܠܛܳܥܰܝ̈ܳܐ ܩܪܳܐ ܠܘܳܬܶܗ܇ ܘܪܰܡܪܶܡ ܩܰܪܢܳܐ ܕܰܡܟܺܝܪܬܶܗ܇ ܘܗܳܐ ܡܫܰܒܚܳܐ ܠܶܗ ܒܽܐܘܫܰܥܢ̈ܶܐ܇ ܐܽܘܫܰܥܢܳܐ ܒܪܰܘܡܳܐ ܘܥܽܘܡܩܳܐ ܠܳܟ ܡܳܪܶܐ ܟܽܠ܀

ܒܢ̈ܰܝ ܐܽܘܪܺܫܠܶܡ ܒܽܐܘܫܰܥܢܰܝ̈ܗܽܘܢ ܢܦܰܩܘ̱܇ ܘܫܽܘܒܚܳܐ ܚܰܕܬܐ ܙܳܡܪܺܝܢ ܗ̱ܘܰܘ܇ ܘܡܶܢ ܟܽܠ ܥܰܡ̈ܡܺܝܢ ܬܶܫܒܽܘܚܬܳܐ ܠܡܰܠܟܳܐ ܪܰܒܳܐ ܕܥܺܝܠܳܐ ܪܟܶܒ܇ ܘܰܐܘܒܶܕ ܣܽܘܣܝܳܐ ܡܶܢ ܐܰܦܪܶܝܡ܇ ܘܡܰܪܟܰܒܬܳܐ ܡܶܢ ܐܺܝܣܪܳܐܶܝܠ܇ ܘܡܰܠܶܠ ܫܠܳܡܳܐ ܥܰܡ ܥܰܡܶܗ܇ ܝܰܠܽܘ̈ܕܶܐ ܫܰܝܢܳܐ ܕܟܽܠ ܒܶܪ̈ܝܳܬܳܐ܀

ܣܰܘܟ̈ܶܐ ܕܙܰܝ̈ܬܶܐ܇ ܘܛܰܪ̈ܦܶܐ ܕܕܶܩ̈ܠܶܐ܇ ܛܥܶܢܘ̱ ܗ̱ܘܰܘ ܫܰܒܪ̈ܶܐ ܒܺܐܝܕܰܝ̈ܗܽܘܢ܇ ܘܟܰܕ ܠܳܐ ܨܳܒܝܳܐ ܙܳܢܺܝܬܳܐ܇ ܫܰܒܪ̈ܶܐ ܗܰܠܶܠܘ̱ ܫܰܘܝܳܐܺܝܬ܇ ܘܰܩܥܰܘ ܐܽܘܫܰܥܢܳܐ ܒܪܰܘܡܳܐ܇ ܘܰܚܙܳܬ݀ ܐܶܢܽܘܢ ܘܶܐܬܟܰܡܪܰܬ݀܇ ܘܫܶܩܠܰܬ݀ ܟܺܐܦ̈ܶܐ ܠܰܪܓܽܘܡܝܶܗ܇ ܕܗܽܘ ܐܶܬܡܰܟܰܟ ܕܰܢܪܰܡܪܶܡ ܠܰܢ܀

ܫܽܘܒܚܳܐ ܚܰܕܬܳܐ܇ ܠܒܰܪ ܥܶܠܳܝܳܐ܇ ܩܰܠܶܣܘ̱ ܫܰܒܪ̈ܶܐ ܕܪܶܡܙܶܗ ܦܩܰܕ܇ ܘܰܩܥܰܘ ܘܶܐܡܰܪܘ̱ ܐܽܘܫܰܥܢܳܐ ܠܡܰܠܟܳܐ ܕܪܰܘܡܳܐ ܕܶܐܬܬܰܚܬܺܝ܇ ܘܠܰܐܪܥܳܐ ܢܚܶܬ ܗܘܳܐ ܕܢܶܦܪܽܘܩ܇ ܘܰܒܚܰܕܽܘܬܳܐ ܩܳܥܶܝܢ ܗ̱ܘܰܘ܇ ܒܪܺܝܟ ܗܽܘ ܡܰܠܟܳܐ ܕܰܨܒܳܐ ܕܥܺܝܠܳܐ ܪܟܶܒ܇ ܡܶܛܽܠ ܕܰܨܒܳܐ܇ ܕܢܶܦܪܽܘܩ ܠܰܢ܀

 

ܫܡܰܝ̈ܳܐ ܡܶܫܬܰܥܶܝܢ ܩܳܠܳܐ ܝܰܡܳܐ ܕܶܐܬܦܰܠܰܓ

ܒܰܪ ܐܰܠܳܗܳܐ ܦܬܰܚ ܓܰܙܶܗ ܒܰܐܪܥܳܐ ܕܺܝܗܽܘܕ܇ ܘܰܕܪܳܐ ܗܘܳܐ ܥܰܠ ܡܶܣܟܺܢ̈ܶܐ ܘܰܐܥܬܰܪ ܐܶܢܽܘܢ܇ ܐܰܝܟ ܬܰܐܓܳܪܳܐ ܟܰܫܺܝܪܳܐ܇ ܛܥܶܢ ܚܰܝ̈ܶܐ ܠܰܒܢܰܝ̈ܢܳܫܳܐ܇ ܗܰܠܶܟ ܗܘܳܐ ܒܰܐܪܥܳܐ ܘܚܰܘܺܝ ܩܝܳܡܬܳܐ ܒܬܶܗܪܳܐ܇ ܐܰܝܟ ܐܰܠܳܗܳܐ ܡܨܶܐ ܚܺܝܠ ܟܽܠ܀

ܡܰܢ ܠܳܐ ܢܶܬܗܰܪ ܒܰܡܫܺܝܚܳܐ ܟܰܕ ܥܳܐܶܠ ܗܘܳܐ܇ ܠܓܰܘ ܨܶܗܝܽܘܢ ܘܰܪܟܺܝܒ ܥܺܝܠܳܐ ܒܰܪ ܐܰܬܳܢܳܐ܇ ܘܰܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ܇ ܩܳܥܶܝܢ ܩܽܘܕܡܰܘܗ̱ܝ ܟܰܕ ܐܳܡܪܺܝܢ܇ ܐܽܘܫܰܥܢܳܐ ܒܪܰܘܡܳܐ ܘܥܽܘܡܩܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܝܶܪܒܰܬ݀ ܒܫܽܘܒܚܳܐ ܡܰܥܰܠܬܶܗ ܕܒܰܪ ܐܰܠܳܗܳܐ܇ ܘܰܒܚܰܝ̈ܠܶܐ ܘܟܽܠ ܐܳܬܘ̈ܳܬܳܐ܇ ܡܶܫܬܰܒܚܳܐ ܗܘܳܬ݀܇ ܘܡܶܠܬܶܗ ܟܺܐܒ̈ܶܐ ܛܳܪܕܳܐ ܗܘܳܬ݀܇ ܘܟܽܘܪ̈ܗܳܢܶܐ ܩܫܰܝ̈ܳܐ ܪܶܕܦܰܬ݀܇ ܦܰܬܰܚ ܣܡܰܝ̈ܳܐ ܒܦܽܘܩܕܳܢܶܗ ܘܕܰܟܺܝ ܓܰܪ̈ܒܶܐ܇ ܘܰܠܡܺܝ̈ܬܶܐ ܒܩܳܠܶܗ ܐܰܩܺܝܡ܇ ܡܶܛܽܠ܀

ܒܗܳܢܳܐ ܝܰܘܡܳܐ ܩܰܕܺܝܫܳܐ܇ ܕܽܘܨܝ̱ ܒܰܪܬ ܨܶܗܝܽܘܢ܇ ܕܰܡܠܶܟ ܡܰܠܟ̈ܶܐ ܪܟܺܝܒ ܥܺܝܠܳܐ ܚܠܳܦ ܦܽܘܪܩܳܢܶܟܝ̱܇ ܘܥܰܠ ܩܰܝܣܳܐ ܕܒܰܚ ܠܰܩܢܽܘܡܶܗ܇ ܘܰܩܨܳܐ ܒܶܟܝ̱ ܦܰܓܪܶܗ ܘܰܕܡܶܗ܇ ܙܡܰܪܝ̱ ܠܶܗ ܫܽܘܒܚܳܐ ܒܽܐܘܫܰܥܢ̈ܶܐ ܒܗܰܝܟܰܠ ܩܽܘܕܫܳܐ܇ ܠܗܰܘ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܡܶܛܽܠ܀

ܕܳܨ ܛܽܘܪܳܐ ܕܙܰܝ̈ܬܶܐ ܘܰܐܘܕܺܝ܇ ܒܣܰܘ̈ܟܰܝ ܙܰܝܬܳܐ܇ ܘܰܒܒܶܝܬ ܥܰܢܝܳܐ ܒܕܶܩ̈ܠܳܐ ܫܰܘܝܰܬ݀ ܐܽܘܪܚܳܐ ܩܕܳܡܰܘܗ̱ܝ܇ ܘܰܛܠܳܝ̈ܶܐ ܕܩܳܥܶܝܢ ܩܽܘܕܡܰܘܗ̱ܝ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܘܬܰܠܡܺܝ̈ܕܶܐ ܡܰܪ̈ܛܽܘܛܰܝܗܽܘܢ ܫܰܘܺܝܘ ܩܕܳܡܰܘܗ̱ܝ܇ ܕܗܰܘ ܕܶܐܬܳܐ ܕܢܶܣܥܽܘܪ ܐܶܢܽܘܢ ܡܶܛܽܠ ܕܰܡܫܰܒܚܳܐ܀

 

ܬܶܫܒܽܘܚܬܳܐ ܚܕܰܬܳܐ ܩܳܠܳܐ ܩܳܠܳܐ ܕܫܽܘܒܚܳܐ

ܗܰܘ ܒܳܪܽܘܝܳܐ ܕܝܰܗܒ ܗܘܳܐ ܡܶܠܬܳܐ ܠܫܰܒܪ̈ܶܐ ܫܦܰܝ̈ܳܐ܇ ܐܰܟܡܳܐ ܕܝܰܗܒ ܠܶܗ ܠܰܐܬܳܢܳܐ ܕܢܶܣܬܰܟܰܠ ܗܘܳܐ ܥܰܡܳܐ ܣܰܟܠܳܐ ܕܶܐܢܗܽܘ ܕܨܳܒܶܐ܇ ܟܺܐܦ̈ܶܐ ܡܝܰܒܒ̈ܳܢ ܬܶܫܒܽܘܚܬܶܗ܀

ܛܠܳܝ̈ܶܐ ܘܫܰܒܪ̈ܶܐ ܗ̱ܘܰܘ ܟܶܢܳܪ̈ܶܐ ܘܰܙܡܰܪܘ̱ ܫܽܘܒܚܳܐ܇ ܠܡܰܠܟܳܐ ܪܰܒܳܐ ܕܬܶܫܒܽܘܚܬܳܐ܇ ܪܽܘܚܳܐ ܕܩܽܘܕܫܳܐ ܐܰܙܺܝܥ ܐܶܢܽܘܢ ܠܰܡܫܰܒܳܚܽܘ̱܇ ܠܗܰܘ ܕܰܫܘܶܐ ܒܫܽܘܒܚܶܗ ܠܰܐܒܽܘܗ̱ܝ܀

ܟܰܕ ܢܳܚܶܬ ܗܘܳܐ ܡܳܪܰܢ ܝܶܫܽܘܥ ܡܶܢ ܛܽܘܪ ܙܰܝ̈ܬܶܐ܇ ܘܰܪܟܺܝܒ ܥܺܝܠܳܐ ܕܰܐܬܳܢܳܐ܇ ܘܟܶܢܫ̈ܶܐ ܕܥܰܡܳܐ ܥܰܡ ܬܰܠܡܺܝ̈ܕܰܘܗ̱ܝ ܫܰܒܰܚܘ̱ ܩܽܘܕܡܰܘܗ̱ܝ ܫܽܘܒܚܳܐ ܚܰܕܬܳܐ ܒܽܐܘܫܰܥܢ̈ܶܐ܀

 

ܐ̱ܚܪܺܢܳܐ ܚܙܰܝܢܰܢ ܟܽܠܰܢ

ܚܙܰܝܢܰܢ ܟܽܠܰܢ ܝܰܘܡܳܢܳܐ܇ ܠܡܽܘܟܳܟܳܟ ܫܒܺܝܚܳܐ ܪܳܚܶܡܢܳܫܳܐ܇ ܘܟܰܕ ܚܰܕܽܘܬܳܐ ܐܶܬܡܠܺܝ ܠܶܒܳܐ ܕܺܝܠܰܢ ܐܳܡܪܺܝܢܰܢ܇ ܐܽܘܫܰܥܢܳܐ ܒܪܰܘܡܳܐ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܐ̱ܚܪܺܢܳܐ ܟܽܠܟܽܘܢ ܥܰܒܕܰܘ̈ܗ̱ܝ ܕܰܐܠܳܗܳܐ

ܟܽܠܟܽܘܢ ܥܰܒܕܰܘ̈ܗ̱ܝ ܕܰܐܠܳܗܳܐ܇ ܙܡܰܪܘ̱ ܠܶܗ ܫܽܘܒܚܳܐ ܠܗܰܘ ܕܶܐܬܬܰܚܬܺܝ ܥܰܠ ܐܰܪܥܳܐ܇ ܘܰܪܟܶܒ ܥܺܝܠܳܐ ܘܥܰܠ ܠܽܐܘܪܺܫܠܶܡ ܒܡܽܘܟܳܟܳܐ܇ ܘܰܛܠܳܝ̈ܶܐ ܘܫܰܒܪ̈ܶܐ ܩܳܥܶܝܢ܇ ܥܰܡܡ̈ܶܐ ܘܶܐܡܘ̈ܳܬܳܐ ܙܡܰܪܘ̱ ܠܶܗ ܫܽܘܒܚܳܐ܀

ܒܗܳܢ ܝܰܘܡܳܐ ܚܰܕܺܝܬ ܥܺܕܬܳܐ܇ ܒܩܳܠ ܝܰܠܽܘ̈ܕܶܐ ܘܥܰܡܗܽܘܢ ܙܶܡܪܰܬ݀ ܬܶܫܒܽܘܚܬܳܐ܇ ܠܡܰܠܟܳܐ ܡܫܺܝܚܳܐ ܕܰܪܟܶܒ ܥܺܝܠܳܐ ܘܥܰܠ ܠܨܶܗܝܽܘܢ ܘܰܦܪܰܩ ܓܒܺܝܠܬܶܗ ܡܶܢ ܛܽܘܥܝܰܝ ܥܰܡܡ̈ܶܐ ܘܶܐܡܘ̈ܳܬܳܐ܀

 

ܩܳܠܳܐ ܕܨܰܦܪܳܐ ܩܳܠܳܐ ܣܳܗܕܰܘ̈ܗ̱ܝ ܐܰܢ̱ܬܽܘܢ

ܙܳܚܘ̱ ܥܶܠܳܝ̈ܶܐ ܠܰܡܫܰܒܳܚܽܘ ܠܡܳܪܳܐ ܫܡܰܝܳܐ ܕܰܢܚܶܬ ܗܘܳܐ ܠܰܐܪܥܳܐ܇ ܘܰܪܟܶܒ ܥܺܝܠܳܐ ܘܫܰܒܪ̈ܶܐ ܫܰܒܚܽܘܗ̱ܝ܇ ܟܰܕ ܩܳܥܶܝܢ ܗ̱ܘܰܘ ܘܳܐܡܪܺܝܢ ܗܳܟܰܢܳܐ܇ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܕܶܐܬܳܐ ܕܢܶܦܪܽܘܩ ܒܶܪ̈ܝܳܬܳܐ܀

ܛܠܳܝ̈ܶܐ ܡܫܰܒܚܺܝܢ ܒܽܐܘܫܰܥܢܰܝ̈ܗܽܘܢ ܟܪ̈ܽܘܒܶܐ ܡܝܰܒܒܺܝܢ܇ ܘܰܣܪ̈ܳܦܶܐ ܡܩܰܕܫܺܝܢ܇ ܫܡܰܝܳܐ ܦܨܺܝܚܺܝܢ ܘܰܐܪܥܳܐ ܪܳܘܙܳܐ܇ ܘܰܡܫܰܒܚܳܐ ܠܶܗ ܟܰܕ ܩܳܥܝܳܐ ܘܳܐܡܪܳܐ܇ ܐܽܘܫܰܥܢܳܐ ܠܡܰܠܟܰܢ ܓܰܐܝܳܐ ܘܓܰܢ̱ܒܳܪܳܐ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܀

 

ܐ̱ܚܪܺܢܳܐ ܒܩܳܠܳܐ ܒܥܶܕܳܢ ܨܰܦܪܳܐ ܡܶܬܦܰܬܚܺܝܢ

ܢܶܚܕܶܐ ܟܽܠܰܢ ܘܰܢܫܰܒܰܚ܇ ܒܗܳܢܳܐ ܝܰܘܡܳܐ ܕܚܰܕܘ̈ܳܬܳܐ܇ ܕܒܶܗ ܐܶܬܬܰܚܬܺܝ ܒܰܪ ܡܰܠܟܳܐ܇ ܕܢܶܥܽܘܠ ܠܓܰܘ ܨܶܗܝܽܘܢ ܡܕܺܝܢ̱ܬܳܐ܇ ܘܡܶܢ ܦܽܘܡ ܥܠܰܝ̈ܡܶܐ ܘܰܛܠܳܝ̈ܶܐ܇ ܢܩܰܒܶܠ ܫܽܘܒܚܳܐ ܐܰܝܟ ܕܰܟܬܺܝܒ܀

ܩܳܠܳܐ ܕܫܽܘܒܚܳܐ ܗܳܐ ܪܳܥܶܡ܇ ܚܠܳܦ ܒܰܪܬ ܨܶܗܝܽܘܢ ܒܓܰܘ ܥܺܕܬܳܐ܇ ܘܡܰܣܩܺܝܢ ܫܽܘܒܚܳܐ ܝܰܠܽܘ̈ܕܶܐ܇ ܠܒܰܪ ܕܰܘܺܝܕ ܘܡܳܪܶܗ ܕܕܰܘܺܝܕ܇ ܕܶܐܬܳܐ ܠܡܽܘܟܳܟܳܐ ܕܢܶܦܪܽܘܩ ܠܓܶܢܣܶܗ ܕܳܐܕܳܡ ܕܶܐܬܚܰܒܰܠ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܪܕܳܐ ܦܳܪܽܘܩܰܢ ܘܥܰܡܶܗ ܟܶܢܫܳܐ ܕܬܰܠܡܺܝܕܽܘܬܳܐ܇ ܩܪܶܒ ܗܘܳܐ ܘܰܡܛܳܐ ܘܰܠܒܶܝܬ ܥܰܢܝܳܐ ܘܰܠܒܶܝܬ ܦܳܐܓܺܝ܇ ܢܶܫܒܰܬ݀ ܪܽܘܚܳܐ ܗܳܝ ܕܰܢܒܺܝ̈ܶܐ ܡܶܢ ܩܰܒܪ̈ܰܝܗܽܘܢ܇ ܟܰܕ ܩܳܥܝܳܐ ܠܗܽܘܢ ܢܒܺܝ̈ܶܐ ܕܡܳܪܝܳܐ ܩܽܘܡܘ̱ ܡܶܢ ܬܰܡܳܢ܀

ܐܳܘ ܠܳܥܳܙܳܪ ܐܰܦܶܩ ܥܺܝܠܳܐ ܐ̱ܶܣܽܘܪ ܒܰܓܦܶܬܳܐ܇ ܘܰܒܫܰܒܽܘܩܳܐ ܒܰܪ ܐܰܬܳܢܳܐ ܐܰܝܟ ܕܶܐܬܢܰܒܺܝܬ܇ ܕܪܳܚܡܳܟ ܝܶܫܽܘܥ ܗܰܘ ܕܰܐܩܺܝܡܳܟ ܡܶܢ ܒܶܝܬ ܡܺܝ̈ܬܶܐ܇ ܗܳܐ ܡܰܛܺܝ ܠܶܗ ܘܒܳܥܶܐ ܕܰܥܠܰܘܗ̱ܝ ܢܶܪܟܰܒ ܬܰܡܳܢ܀

 

ܕܰܬܠܳܬܫܳܥܺܝ̈ܢ

ܩܳܠܳܐ ܥܶܛܪܳܐ ܕܒܶܣܡ̈ܶܐ ܕܶܐܬܩܰܪܰܒ

ܫܽܘܒܚܳܐ ܠܳܟ ܡܳܪܝ̱ ܕܰܒܣܶܡ ܠܳܟ ܕܬܶܗܘܶܐ ܐ̱ܢܳܫܳܐ܇ ܟܰܕ ܐܰܠܳܗܳܐ ܐܰܢ̱ܬ ܒܰܟܝܳܢܳܐ܇ ܘܪܳܡ ܐܰܢ̱ܬ ܡܶܢ ܚܰܫ̈ܶܐ܇ ܘܩܰܒܶܠܬ ܥܠܰܝܟ ܕܬܶܪܟܰܒ ܥܺܝܠܳܐ ܒܫܽܘܩ̈ܰܝ ܨܶܗܝܽܘܢ ܘܰܥܠܰܝ̈ܡܶܐ ܐܳܦ ܝܰܠܽܘ̈ܕܶܐ܇ ܒܽܐܘܫܰܥܢ̈ܶܐ ܫܰܒܚܽܘܟ܀

ܙܟܰܪܝܳܐ ܢܒܺܝܳܐ ܣܰܒܪܳܗܿ ܗܘܳܐ ܠܒܰܪܬ ܐܽܘܪܺܫܠܶܡ܇ ܕܗܳܐ ܡܰܠܟܶܟܝ̱ ܐܳܬܶܐ ܠܘܳܬܶܟܝ̱ ܩܽܘܡܝ̱ ܦܽܘܩܝ̱ ܩܰܒܶܠܳܝܘܗ̱ܝ܇ ܫܛܳܬ݀ ܡܶܠܬܶܗ ܕܰܢܒܺܝܳܐ ܘܠܳܐ ܩܰܒܶܠܬܶܗ܇ ܒܪܺܝܟ ܗܽܘ ܕܒܰܕܪܳܗܿ ܒܶܝܬ ܥܰܡܡ̈ܶܐ܇ ܡܶܟܺܝܠ ܘܰܠܥܳܠܰܡ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܗܳܢܳܐ ܝܰܘܡܳܐ ܥܰܠ ܡܳܪܰܢ܇ ܠܽܐܘܪܺܫܠܶܡ ܘܰܪܟܺܝܒ ܥܺܝܠܳܐ܇ ܘܐܶܬܡܰܟܰܟ ܡܶܛܽܠܳܬܰܢ܇ ܕܰܢܪܰܡܪܶܡ ܫܰܦܠܶܗ ܕܳܐܕܳܡ܇ ܘܰܐܥܠܶܗ ܠܰܓܢܽܘܢ ܚܰܕܘ̈ܳܬܳܐ܇ ܘܟܽܠܝܽܘܡ ܙܳܡܰܪ ܬܶܫܒܽܘܚܬܳܐ܀

ܒܪܺܝܟ ܗܽܘ ܡܫܺܝܚܳܐ ܒܪܶܗ ܕܐܰܒܳܐ܇ ܕܰܪܟܶܒ ܥܺܝܠܳܐ ܕܰܐܬܳܢܳܐ܇ ܘܰܛܠܳܝ̈ܶܐ ܫܰܒܰܚܘ̱ ܩܽܘܕܡܰܘܗ̱ܝ ܒܣܰܘܟ̈ܰܝ ܙܰܝܬܳܐ ܒܽܐܘܫܰܥܢ̈ܶܐ܇ ܫܽܘܒܚܳܐ ܠܳܟ ܝܰܠܕܳܐ ܦܰܐܝܳܐ܇ ܕܰܐܦܢܺܝܬ ܥܰܡܡ̈ܶܐ ܡܶܢ ܛܽܘܥܝܰܝ܀

 

ܕܦܶܠܓܶܗ ܕܝܰܘܡܳܐ ܒܩܳܠܳܐ ܣܳܗܕܰܘ̈ܗ̱ܝ ܐܰܢ̱ܬܽܘܢ

ܐܳܠܶܦ ܐܰܠܦܺܝ̈ܢ܇ ܘܪ̈ܶܒܽܘ ܪ̈ܶܒܘܳܢ ܕܥܺܝܪ̈ܰܝ ܪܰܘܡܳܐ܇ ܡܫܰܒܚܺܝܢ ܠܶܗ ܠܰܒܪܳܐ܇ ܕܰܪܟܶܒ ܥܺܝܠܳܐ܇ ܘܫܰܒܚܽܘܗ̱ܝ ܛܠܳ̈ܝ̈ܶܐ ܒܽܐܘܫܰܥܢܰܝ̈ܗܽܘܢ ܟܰܕ ܩܳܥܶܝܢ ܘܳܐܡܪܺܝܢ܇ ܒܪܺܝܟ ܕܰܒܚܽܘܒܶܗ܇ ܐܶܬܬܰܚܬܺܝ ܘܰܠܒܶܫ ܦܰܓܪܳܐ܇ ܕܢܶܦܪܽܘܩ ܠܳܐܕܳܡ ܘܰܠܝܰܠܕܰܘ̈ܗ̱ܝ܀

ܓܽܘܕ̈ܶܐ ܕܥܺܝܪ̈ܶܐ ܘܟܶܢܫ̈ܶܐ ܕܐ̱ܢܳܫ̈ܳܐ܇ ܟܰܕ ܩܳܥܶܝܢ ܘܳܐܡܪܺܝܢ܇ ܒܪܺܝܟ ܗܽܘ ܕܶܐܬܳܐ ܒܰܫܡܶܗ ܕܡܳܪܝܳܐ܇ ܘܰܥܬܺܝܕ ܕܢܺܐܬܶܐ ܒܫܽܘܒܚܳܐ ܕܡܰܠܰܐܟܰܘ̈ܗ̱ܝ܇ ܐܽܘܫܰܥܢܳܐ ܒܪܰܘܡܳܐ܇ ܠܡܰܠܟܳܐ ܪܰܒܳܐ ܕܬܶܫܒܽܘܚܬܳܐ ܕܰܪܟܶܒ ܥܺܝܠܳܐ ܕܰܐܬܳܢܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܗܳܐ ܡܫܰܒܚܺܝܢ ܠܳܟ ܥܠܰܝ̈ܡܶܐ ܒܣܰܘ̈ܟܶܐ ܕܡܶܢ ܐܺܝܠܳܢ̈ܶܐ܇ ܕܰܚܠܺܝܛ ܩܳܠܳܐ ܕܫܽܘܒܚܳܐ ܕܣܳܒ̈ܶܐ ܥܰܡ ܕܰܛܠܳܝ̈ܶܐ܇ ܗܳܐ ܣܳܓܕܺܝܢ ܠܳܟ ܪ̈ܳܥܰܘܳܬܳܐ ܘܰܓܙܳܪ̈ܰܝܗܽܘܢ ܚܠܳܦ ܗܳܝ ܥܳܢ̈ܳܐ ܕܙܶܩܦܰܬ݀ ܪܳܥܝܳܗܿ ܥܰܠ ܓܳܓܽܘܠܬܳܐ܀

ܘܥܰܠ ܕܰܥܠܰܝ̈ܡܶܐ ܫܩܰܠܘ̱ ܗ̱ܘܰܘ ܣܰܘܟ̈ܶܐ ܠܰܡܫܰܒܳܚܽܘ܇ ܠܳܐ ܐܳܠܨܳܐ ܗܘܳܬ݀  ܢܶܬܠ̈ܳܢ ܫܽܘܒܚܳܐ ܟܺܐܦ̈ܶܐ ܗܳܝܕܶܝܢ܇ ܘܶܐܠܽܘ ܫܬܶܩܘ̱ ܗ̱ܘܰܘ ܗܳܠܶܝܢ ܕܰܢܣܰܒܘ̱ ܣܰܘܟ̈ܶܐ ܬܰܡܳܢ܇ ܟܺܐܦ̈ܶܐ ܒܙܰܘܥܳܐ ܡܫܰܒܚ̈ܳܢ ܗܘ̈ܰܝ ܠܶܗ ܠܡܰܠܟܳܐ ܕܶܐܬܳܐ܀

 

ܕܰܬܫܰܥܫܳܥܺܝ̈ܢ܇ ܩܳܠܳܐ ܠܳܐ ܒܳܗܬܺܝܢ ܟܺܐܢ̈ܶܐ

ܛܽܘܒܳܐ ܠܝܰܠܽܘ̈ܕܶܐ܇ ܕܰܫܘܰܘ ܕܢܶܚܙܽܘܢ ܠܰܡܫܺܝܚܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܰܪܟܺܝܒ ܥܰܠ ܥܺܝܠܳܐ܇ ܘܰܛܠܳܝ̈ܶܐ ܒܣܰܘ̈ܟܰܝ ܙܰܝܬܳܐ܇ ܡܫܰܒܚܺܝܢ ܗ̱ܘܰܘ ܠܶܗ ܟܰܕ ܐܳܡܪܺܝܢ܇ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܐܶܡܰܪ ܠܰܢ ܐܶܫܰܥܝܳܐ܇ ܘܒܰܕܶܩ ܠܰܢ ܐܳܘ ܒܰܪ ܐܰܡܽܘܨ ܡܰܢܽܘ ܒܰܛܢܳܐ ܕܰܒܬܽܘܠܬܳܐ܇ ܐܺܝܬܰܘܗ̱ܝ ܐܰܠܳܗܳܐ܇ ܕܰܒܚܽܘܒܶܗ ܗܘܳܐ ܒܰܪܢܳܫܳܐ܇ ܥܰܡܰܢܽܘܐܶܝܠ ܐܺܝܬܰܘܗ̱ܝ ܫܡܶܗ܇ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܝܰܘܡܳܢ ܪܟܺܝܒ ܥܺܝܠܳܐ܇ ܘܥܰܠ ܗܘܳܐ ܠܓܰܘ ܨܶܗܝܽܘܢ ܐܰܝܟ ܕܰܐܟܪܶܙ ܗܘܳܐ ܠܳܗܿ܇ ܙܟܰܪܝܳܐ ܕܗܳܐ ܐܳܬܶܐ܇ ܫܶܐܠܰܬ݀ ܫܰܟܪܬܶܗ܇ ܕܝܶܕܥܰܬ݀ ܡܳܐ ܛܶܐܒܶܗ܀

ܓܳܠܘ̱ ܗ̱ܘܰܘ ܥܠܰܘܗ̱ܝ ܪ̈ܰܚܡܰܘܗ̱ܝ܇ ܘܠܳܐ ܐܶܬܳܐ ܒܫܽܘܓܢܳܝܳܐ܇ ܐܶܠܳܐ ܒܕܶܡܘ̈ܳܬܳܐ܇ ܗܳܠܶܝܢ ܕܨܳܪܘ̱ ܗ̱ܘܰܘ ܠܶܗ܇ ܥܺܝܠܳܐ ܪܟܶܒ ܘܶܐܬܳܐ܇ ܚܙܳܬܶܗ ܘܶܐܬܟܰܡܪܰܬ݀܀

 

ܬܽܘܒ ܕܚܰܡܫܳܐ ܒܫܰܒܳܐ  ܕܽܐܘܫܰܥܢ̈ܶܐ܇

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܩܳܠܳܐ ܒܪ̈ܰܚܡܰܝܟ ܡܳܪܝ̱ ܣܰܓܺܝ̈ܐܶܐ

ܗܰܘ ܕܥܰܠ ܥܺܝܠܳܐ ܝܺܬܶܒ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܫܰܒܚܽܘܗ̱ܝ ܗ̱ܘܰܘ ܫܰܒܪ̈ܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܗܰܘ ܕܡܰܪܟܰܒܬܳܐ ܕܫܽܘܒܚܳܐ܇ ܒܕܚܶܠܳܐ ܡܙܰܝܚܳܐ ܠܪܰܒܽܘܬܶܗ܇ ܥܺܝܠܳܐ ܛܰܥܢܶܗ ܗܘܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܀

ܫܒܰܩ ܚܰܨܳܐ ܕܰܟܪ̈ܽܘܒܶܐ܇ ܕܰܟܕܺܝܢܺܝܢ ܬܚܶܝܬ ܡܰܪܟܰܒܬܳܐ܇ ܘܰܒܡܽܘܟܳܟܳܐ ܥܰܠ ܠܨܶܗܝܽܘܢ܇ ܥܰܠ ܚܰܨܳܐ ܕܥܺܝܠܳܐ܀

ܗܰܘ ܕܰܟܪ̈ܽܘܒܶܐ ܕܢܽܘܪܳܐ܇ ܛܥܺܝܢܺܝܢ ܠܶܗ ܥܰܠ ܚܰܨܰܝ̈ܗܽܘܢ܇ ܥܰܠ ܥܺܝܠܳܐ ܪܟܶܒ ܗܘܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܀

ܕܰܐܫܘܺܝܬܳܢ ܒܛܰܝܒܽܘܬܳܟ܇ ܕܰܢܫܰܒܚܳܟ ܒܗܳܢܳܐ ܥܺܐܕܳܐ܇ ܒܗܰܘ ܥܺܐܕܳܟ ܪܰܒܳܐ܇ ܚܰܕܳܐ ܠܰܢ ܥܰܡ ܩܰܕܺܝ̈ܫܰܝܟ܀

 

ܡܳܪܝܳܐ ܩܪܺܝܬܳܟ ܩܳܠܳܐ ܢܽܘܗܪܳܐ ܕܡܶܢ ܢܽܘܗܪܳܐ

ܢܽܘܗܪܳܐ ܕܡܶܢ ܢܽܘܗܪܳܐ܇ ܗܰܘ ܕܰܡܫܰܒܰܚ ܡܶܢ ܥܺܝܪ̈ܶܐ ܘܡܶܢ ܡܰܠܰܐܟ̈ܶܐ ܕܒܰܫܡܰܝܳܐ܇ ܝܰܘܡܳܢܳܐ ܫܰܒܪ̈ܶܐ ܫܰܒܚܽܘܗ̱ܝ܇ ܬܰܘ ܟܽܠ܀

ܨܶܡܚܳܐ ܕܡܶܢ ܐܰܒܳܐ܇ ܗܰܘ ܕܡܶܢ ܫܰܒܪ̈ܶܐ ܘܝܰܠܽܘ̈ܕܶܐ ܒܣܰܘ̈ܟܶܐ ܕܙܰܝܬܳܐ ܘܕܕܶܩ̈ܠܶܐ܇ ܒܫܽܘܩ̈ܰܝ ܨܶܗܝܽܘܢ ܐܶܫܬܰܒܰܚ ܬܰܘ ܟܽܠ܀

ܒܪܺܝܟ ܗܽܘ ܦܳܪܽܘܩܰܢ ܕܰܪܟܶܒ ܥܺܝܠܳܐ ܕܰܐܬܳܢܳܐ܇ ܘܡܶܢ ܝܰܠܽܘ̈ܕܶܐ ܐܫܬܒܚ܇ ܘܫܡܠܝ ܡ̈ܠܐ ܕܰܢܒܺܝ̈ܶܐ܇ ܬܰܘ ܟܽܠ܀

ܥܺܕܬܳܐ ܩܽܘܡܝ̱ ܐܰܢܗܰܪܝ̱܇ ܕܶܐܬܳܐ ܚܰܬܢܳܐ ܕܢܶܫܪܶܐ ܒܶܟܝ̱܇ ܘܢܶܩܥܽܘܢ ܝܰܠܕܰܝ̈ܟܝ̱ ܒܽܐܘܫܰܥܢ̈ܶܐ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܬܰܘ ܟܽܠ܀

ܫܽܘܒܚܳܐ ܠܒܰܪ ܛܳܒܳܐ܇ ܕܡܶܛܽܠ ܪ̈ܰܚܡܰܘܗ̱ܝ ܣܰܓܺܝ̈ܐܶܐ ܐܶܬܡܰܟܰܟ ܕܰܢܪܰܡܪܶܡ ܠܰܢ܇ ܘܡܶܢ ܫܰܒܪ̈ܶܐ ܫܽܘܒܚܳܐ ܩܰܒܶܠ܇ ܬܰܘ ܟܽܠ܀

 

ܩܳܠܳܐ ܕܪܰܡܫܳܐ܇ ܩܳܠܳܐ ܩܽܘܩܳܝܳܐ

ܒܬܽܘ̈ܠܳܬܳܐ ܢܦܰܩ̈ܝ̱ ܒܰܦܠܰܓ̈ܶܐ ܠܽܐܘܪܥܶܗ ܕܕܰܘܺܝܕ܇ ܟܰܕ ܩܰܛܠܶܗ ܠܰܦܠܶܫܬܳܝܳܐ ܘܺܐܝܣܪܳܐܶܝܠ ܐܶܬܦܪܶܩ܇ ܠܽܐܘܪܥܶܗ ܕܡܳܪܰܢ ܝܰܠܽܘ̈ܕܶܐ ܢܦܰܩܘ̱ ܗ̱ܘܰܘ܇ ܟܰܕ ܒܺܐܝܕܰܝ̈ܗܽܘܢ ܣܰܘ̈ܟܰܝ ܬܶܫܒܽܘܚܬܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܐܽܘܫܰܥܢܳܐ ܒܪܰܘܡܳܐ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ ܝܰܠܽܘ̈ܕܶܐ ܐܰܙܥܶܩܘ̱ ܗ ܘ ܗ܀

ܫܪܳܐ ܒܢܽܘܗܪܳܐ ܘܥܳܡܰܪ ܒܢܽܘܗܪܳܐ ܘܠܰܝܬ ܐܰܟܘܳܬܶܗ܇ ܘܥܰܠ ܓܰܦܰܝ̈ܗܽܘܢ ܕܰܣܪ̈ܳܦܶܐ ܡܰܬܩܰܢ ܠܶܗ ܟܽܘܪܣܝܳܐ܇ ܘܳܐܠܶܦ ܐܰܠܦܺܝ̈ܢ ܣܳܓܕܺܝܢ ܠܺܐܝܩܳܪܶܗ܇ ܘܪ̈ܶܒܽܘ ܪ̈ܶܒܘܳܢ ܫܽܘܒܚܳܐ ܡܰܣܩܺܝܢ ܠܶܗ܇ ܥܺܝܠܳܐ ܪܟܶܒ ܒܶܝܬ ܐܰܪ̈ܥܳܢܶܐ ܐܰܝܟ ܕܰܫܦܰܪ ܠܶܗ܇ ܘܩܳܥܶܝܢ ܝܰܠܽܘ̈ܕܶܐ ܩܽܘܕܡܰܘܗ̱ܝ ܐܽܘܫܰܥܢܳܐ ܒܪܰܘܡܳܐ܇ ܗ ܘ ܗ܀

 

ܐ̱ܚܪܺܢܳܐ ܒܩܳܠܳܐ ܒܰܪܡܫܳܐ ܠܒܰܝܬܳܟ ܐܶܬܰܝܢܰܢ

ܠܥܶܠ ܡܶܢ ܚܰܨܳܐ ܕܰܟܪ̈ܽܘܒܶܐ ܡܶܙܕܰܝܰܚ܇ ܗܰܘ ܕܥܰܠ ܚܰܨܳܐ ܕܒܰܪ ܐܰܬܳܢܳܐ ܒܪ̈ܰܚܡܰܘܗ̱ܝ ܝܺܬܶܒ܇ ܩܰܒܶܠ ܫܽܘܒܚܳܐ ܡܶܢ ܫܰܒܪ̈ܶܐ ܘܝܰܠܽܘ̈ܕܶܐ܇ ܗܘ ܕܰܟܪ̈ܽܘܒܶܐ ܘܰܣܪ̈ܳܦܶܐ ܟܳܘܙܺܝܢ ܡܶܢܶܗ܀

ܒܪܳܐ ܕܩܰܠܣܽܘܗ̱ܝ ܫܰܒܪ̈ܶܐ ܫܦܰܝ̈ܳܐ ܒܽܐܘܫܰܥܢ̈ܶܐ܇ ܩܰܒܶܠ ܡܶܢܰܢ ܬܶܫܡܶܫܬܰܢ ܘܰܨܠܰܘ̈ܳܬܰܢ܇ ܘܫܰܕܰܪ ܠܰܢ ܡܶܢ ܒܶܝܬ ܓܰܙܳܟ ܥܰܬܺܝܪܳܐ܇ ܚܢܳܢܳܐ ܘܫܽܘܒܩܳܢܳܐ ܕܚܰܘܒ̈ܶܐ ܠܟܽܠ ܬܰܝ̈ܳܒܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܪܺܝܬܳܐ ܬܶܗܪܰܬ݀ ܥܰܠ ܡܽܘܟܳܟܶܗ ܕܒܰܪ ܐܰܠܳܗܳܐ܇ ܘܬܶܬܶܠܝ̱ ܫܽܘܒܚܳܐ ܒܩܳܠܳܐ ܪܳܡܳܐ ܝܰܨܺܝܦܳܐܺܝܬ܇ ܐܶܠܽܘ ܛܠܳܝ̈ܶܐ ܠܳܐ ܡܰܠܶܠܘ ܗ̱ܘܰܘ ܟܺܐܦ̈ܶܐ ܡܰܠܶܠܝ̈܇ ܕܠܳܐ ܐܺܝܬ ܗܘܳܐ ܠܶܗ ܦܽܘܪܣܳܐ ܕܢܶܫܠܶܐ ܫܽܘܒܚܳܐ ܗܳܝܕܶܝܢ܀

ܚܠܳܦ ܐܺܝܠܳܢ̈ܶܐ ܕܠܳܐ ܫܰܕܰܪܘ̱ ܠܶܗ ܡܶܢ ܣܰܘܟܰܝ̈ܗܽܘܢ܇ ܫܶܡܫܳܐ ܓܳܙ ܗܘܳܐ ܥܪ̈ܰܩܝ̱ ܢܽܘܗܪܳܐ ܕܰܢܝܰܩܰܪ ܗܘܳܐ܇ ܘܶܐܠܽܘ ܛܠܳܝ̈ܶܐ ܠܳܐ ܛܥܶܢܘ̱ ܣܰܘ̈ܟܶܐ ܘܫܰܒܰܚܘ̱ ܩܽܘܕܡܰܘܗ̱ܝ܇ ܐܰܝܟ ܕܶܐܫܬܰܒܰܚ ܨܶܝܕ ܓܳܓܽܘܠܬܳܐ ܡܶܫܬܰܒܰܚ ܗܘܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܥܰܡ ܗܳܢܽܘܢ ܕܰܠܥܶܠ

ܥܰܡ ܟܪ̈ܽܘܒܶܐ ܢܒܰܪܶܟ܇ ܘܥܰܡ ܣܪ̈ܳܦܶܐ ܢܩܰܕܫܳܟ܀ ܝܰܒܶܒܘ̱ ܟܽܠ ܦܽܘ̈ܡܺܝܢ܇ ܘܰܙܡܰܪܘ̱ ܫܽܘܒܚܳܐ ܠܗܰܘ ܕܰܪܟܶܒ ܥܺܝܠܳܐ ܒܨܶܗܝܽܘܢ܇ ܥܺܕܬܳܐ ܚܕܳܝ ܒܶܗ ܕܶܐܬܳܐ ܕܢܶܫܪܶܐ ܒܶܟܝ̱܇ ܘܙܰܡܶܢܝ̱ ܝܰܠܕܰܝ̈ܟܝ̱܇ ܩܽܘܡܝ̱ ܦܽܘܩܝ̱ ܠܽܐܘܪܥܶܗ ܒܽܐܘܫܰܥܢ̈ܶܐ܀

ܨܒܰܘ ܟܳܗ̈ܢܶܐ ܢܶܫܬܩܽܘܢ܇ ܠܩܳܠ ܝܰܠܽܘ̈ܕܶܐ ܕܰܡܫܰܒܚܺܝܢ ܠܒܰܪ ܡܳܪܶܐ ܟܽܠ܇ ܘܶܐܡܰܪ ܡܳܪܰܢ ܕܶܐܢ ܗܳܠܶܝܢ ܫܳܬܩܺܝܢ ܟܝܳܢ̈ܶܐ ܚܰܪ̈ܫܶܐ܇ ܘܟܺܐܦ̈ܶܐ ܙܳܡܪ̈ܳܢ ܬܶܫܒܽܘܚܬܳܐ܀

ܫܽܘܒܚܳܐ ܠܳܟ ܡܳܪܰܢ܇ ܕܒܳܟ ܐܶܬܦܪܶܩܘ̱ ܝܰܠܕܰܘ̈ܗ̱ܝ ܕܳܐܕܳܡ ܡܶܢ ܛܳܥܝܽܘܬܳܐ܇ ܘܰܐܫܘܺܝܬ ܐܶܢܽܘܢ ܕܰܢܫܰܒܚܽܘܢ ܠܰܫܡܳܟ܇ ܘܥܰܡ ܪ̈ܽܘܚܳܢܶܐ܇ ܕܰܡܩܰܕܫܺܝܢ ܠܳܟ ܚܰܠܶܛܬ ܐܶܢܽܘܢ܀

ܢܰܘܕܶܐ ܘܢܶܣܓܽܘܕ ܠܶܗ܇ ܠܒܰܪ ܐܰܠܳܗܳܐ ܕܰܒܚܽܘܒܶܗ ܗܘܳܐ ܒܰܪܢܳܫܳܐ܇ ܘܫܰܒܪ̈ܶܐ ܢܦܰܩܘ̱ ܗ̱ܘܰܘ ܠܽܐܘܪܥܶܗ ܟܰܕ ܩܳܥܶܝܢ܇ ܒܪܺܝܟ ܗܽܘ ܕܶܐܬܳܐ ܒܰܫܡܶܗ ܕܡܳܪܝܳܐ ܐܰܠܳܗܳܐ܀

 

ܩܰܘܡܳܐ ܩܰܕܡܳܝܳܐ ܕܠܺܠܝܳܐ ܠܡܰܪܝܰܡ ܝܳܠܕܰܬ ܐܰܠܳܗܳܐ

ܥܰܠ ܥܺܝܠܳܐ ܫܺܐܝܠܳܐ ܡܫܰܠܚܳܐ ܪܟܺܝܒ ܗܘܳܐ ܡܳܪܰܢ܇ ܗܰܘ ܕܰܟܪ̈ܽܘܒܶܐ ܟܕܺܝܢܺܝܢ ܠܶܗ ܬܚܶܝܬ ܡܰܪܟܰܒܬܶܗ܇ ܘܝܰܠܽܘ̈ܕܶܐ ܒܣܰܘܟ̈ܰܝ ܙܰܝ̈ܬܶܐ ܢܦܰܩܘ̱ ܗ̱ܘܰܘ ܠܽܐܘܪܥܶܗ܇ ܘܩܳܥܶܝܢ ܗ̱ܘܰܘ ܠܶܗ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܥܰܠ ܛܽܘܪ̈ܶܐ ܪ̈ܳܡܳܐ ܣܳܩܝ̱ ܠܶܟܝ̱ ܥܺܕܰܬ ܩܽܘܕܫܳܐ܇ ܘܰܩܥܳܝ ܘܶܐܡܰܪܝ̱ ܒܽܐܘܫܰܥܢܳܐ ܒܰܪ ܐܰܠܳܗܳܐ܇ ܕܰܦܪܰܩ ܝܰܠܕ̈ܰܝ ܡܶܢ ܡܰܘܬܳܐ ܫܽܘܒܚܳܐ ܠܰܫܡܶܗ܇ ܕܗܽܘ ܒܰܚܢܳܢܶܗ ܐܶܬܬܰܚܬܺܝ ܡܶܛܽܠ ܐܳܕܳܡ܀

 

ܡܰܕܪܳܫܳܐ܇ ܡܰܘܕܝ̈ܳܢܶܐ ܥܽܘܢܺܝܬܳܐ ܛܠܳܝ̈ܶܐ ܩܰܠܣܽܘܗ̱ܝ ܒܽܐܘܫܰܥܢ̈ܶܐ܇ ܘܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ ܙܰܝܚܽܘܗܿ ܟܶܢܫ̈ܶܐ ܠܡܰܥܰܠܬܳܟ܇ ܘܰܚܕܺܝܘ ܒܳܟ ܐܰܝܟ ܐܰܠܳܗܳܐ܇ ܕܣܰܒܪܳܐ ܕܚܰܝ̈ܶܐ ܟܣܶܐ ܗܘܳܐ ܒܳܟ܇ ܣܳܗܶܕ ܗܘܳܐ ܒܗܽܘܢ ܠܳܥܳܙܳܪ܇ ܡܺܝܬܳܐ ܕܰܚܝܳܐ ܒܦܽܘܩܕܳܢܳܟ܀

ܠܝܰܥܩܽܘܒ ܣܳܒܳܐ ܪܽܘܚܩܽܘܕܫܳܐ܇ ܒܰܕܶܩ ܠܶܗ ܥܰܠ ܓܶܠܝܳܢܳܟ܇ ܘܢܰܗܺܝܪܳܐܺܝܬ ܐܰܘܕܰܥ ܗܘܳܐ܇ ܕܡܶܢ ܝܺܗܽܘܕܳܐ ܥܬܺܝܕ ܕܢܶܕܢܰܚ܇ ܣܽܘܟܳܝܳܐ ܠܟܽܠܗܽܘܢ ܥܰܡܡ̈ܶܐ܀

ܢܶܣܽܘܪ ܒܰܓܦܶܬܳܐ ܥܺܝܠܶܗ܇ ܒܫܰܒܽܘܩܳܐ ܒܰܪ ܐܰܬܳܢܶܗ܇ ܘܰܢܚܰܘܰܪ ܒܚܰܡܪܳܐ ܠܒܽܘܫܶܗ܇ ܟܰܕ ܠܚܰܡܪܳܐ ܠܚܰܫܳܐ ܩܳܪܶܐ܇ ܕܒܶܗ ܐܶܨܛܰܒܬܰܬ݀ ܐ̱ܢܳܫܽܘܬܰܢ܀

ܫܽܘܒܚܳܐ ܠܶܗ ܕܶܐܬܳܐ ܘܫܰܡܠܺܝ ܡ̈ܶܠܶܐ ܕܥܰܒܕܰܘ̈ܗ̱ܝ ܟܳܪ̈ܽܘܙܶܐ܇ ܐܶܫܰܥܝܳܐ ܩܪܳܝܗ̱ܝ ܕܽܘܡܳܪܳܐ܇ ܘܕܳܢܺܝܐܶܝܠ ܥܰܬܺܝܩ ܝܰܘܡ̈ܶܐ܇ ܘܕܰܘܺܝܕ ܥܶܩܳܪܶܗ ܕܺܐܝܫܰܝ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܟܽܠܟܽܘܢ ܥܰܡܡ̈ܶܐ ܩܽܘܫܘ̱ ܟܰܦܳܐ܇ ܒܗܳܢܳܐ ܥܺܐܕܳܐ ܪܽܘܚܳܢܳܐ ܘܰܣܓܰܘ ܠܶܗ ܒܽܐܘܫܰܥܢܰܝ̈ܟܽܘܢ܇ ܠܰܡܟܰܠܠܳܢܳܐ ܕܥܺܐܕܰܝ̈ܟܽܘܢ܇ ܙܟܰܪܝܳܐ ܢܰܙܥܶܩ ܠܽܐܘܪܺܫܠܶܡ ܕܝܰܒܶܒܝ̱ ܘܰܩܥܳܝ ܒܰܪܬ ܨܶܗܝܽܘܢ܀

ܐܶܫܰܥܝܳܐ ܬܽܘܒ ܢܰܟܪܶܙ ܠܰܢ܇ ܟܰܕ ܪܳܡܶܙ ܥܰܠ ܬܰܠܡܺܝ̈ܕܶܐ܇ ܕܗܳܐ ܥܰܠ ܛܽܘܪ̈ܶܐ ܪ̈ܶܓܠܰܝܗܽܘܢ܇ ܕܰܡܣܰܒܪ̈ܰܝ ܙܰܕܺܝܩܽܘܬܳܐ܀

 

ܩܰܘܡܳܐ ܕܰܬܪܶܝܢ ܕܠܺܠܝܳܐ

ܩܳܠܳܐ ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ

ܠܥܶܠ ܒܰܡܪ̈ܰܘܡܶܐ ܥܶܠܳܝ̈ܶܐ܇ ܟܪ̈ܽܘܒܶܐ ܒܕܶܚܠܳܐ ܡܫܰܡܫܺܝܢ ܠܶܗ܇ ܘܰܣܪ̈ܳܦܶܐ ܒܪ̈ܽܘܚܳܦܰܝܗܽܘܢ܇ ܩܰܕܺܝܫ ܩܰܕܺܝܫ ܩܳܥܶܝܢ ܠܳܟ܇ ܘܝܰܠܕܶܝ̈ܗܿ ܕܥܺܕܬܳܐ ܡܗܰܝܡܰܢܬܳܐ܇ ܡܰܘܕܶܝܢ ܘܰܡܫܰܒܚܺܝܢ ܠܳܟ ܡܳܪܰܢ܀

ܥܰܡ ܝܰܠܽܘ̈ܕܶܐ ܘܰܛܠܳܝ̈ܶܐ܇ ܕܰܩܥܰܘ ܠܳܟ ܒܽܐܘܫܰܥܢܰܝ̈ܗܽܘܢ܇ ܝܰܠܕܶܝ̈ܗܿ ܕܥܺܕܬܳܐ ܗܳܐ ܙܳܡܪܺܝܢ܇ ܫܽܘܒܚܳܐ ܒܝܰܘܡܳܐ ܕܥܰܕܥܺܐܕܳܟ܇ ܠܳܟ ܡܳܪܝ̱ ܘܠܰܐܒܽܘܟ ܘܪܽܘܚܩܽܘܕܫܳܐ܇ ܘܗܶܕܪܳܐ ܘܪܽܘܡܪܳܡܳܐ܀

 

ܣܽܘܓܺܝܬܳܐ ܩܳܠܳܐ ܐܳܘ ܢܰܦܫܳܐ ܨܽܘܪܬܳܐ܇ ܥܽܘܢܺܝܬܳܐ ܒܪܺܝܟ ܕܰܢܚܶܬ ܘܐ̱ܢܳܫܳܐ ܒܚܽܘܒܶܗ ܗܘܳܐ܇ ܚܽܘܣ ܥܠܰܝ ܘܚܰܘܳܐ ܒܺܝ ܚܢܳܢܳܟ

ܐܳܘ ܕܶܐܬܳܐ ܘܦܰܪܩܰܢ ܒܡܽܘܟܳܟܶܗ܇ ܘܥܰܒܕܰܢ ܠܶܗ ܐܰܚ̈ܶܐ ܒܛܰܝܒܽܘܬܶܗ܇ ܛܰܝܒܽܘܬܳܟ ܬܦܺܝܣܝ̱ ܚܠܳܦ ܓܶܢܣܰܢ܀

ܓܰܝܳܣܳܐ ܟܽܠ ܝܽܘܡ ܡܰܚܠܶܨ ܠܺܝ܇ ܓܰܝܳܣܳܐ ܐܰܡܺܝܢ ܡܰܬܘܰܗ ܠܺܝ܇ ܢܳܛܽܘܪܳܐ ܕܚܰܝ̈ܰܝ ܙܓܽܘܪܳܝܗ̱ܝ ܡܶܢܝ̱܇ ܘܳܝ ܐܰܚ̈ܰܝ ܕܰܩܪܶܒ ܝܽܘܡ ܕܺܝܢܳܐ܇ ܘܡܽܘܢ ܐܶܥܒܶܕ ܕܚܰܘܒ̈ܰܝ ܣܰܓܺܝܐܺܝܢ܇ ܨܰܠܰܘ ܥܠܰܝ ܕܰܢܚܽܘܢܰܝܢܝ̱ ܡܳܪܰܢ܀

ܝܳܕܰܥ ܐ̱ܢܳܐ ܕܰܩܪܶܒ ܠܶܗ ܝܰܘܡܳܐ܇ ܕܒܶܗ ܝܳܗܒܰܬ ܐܰܓܪܳܐ ܠܟܰܫܺܝܪ̈ܶܐ܇ ܐܶܬܕܰܟܪܰܝܢܝ̱ ܡܳܪܰܢ ܠܳܐ ܬܶܛܥܶܝܢܝ̱܀

ܚܰܘܺܝܬܳܢܝ̱ ܬܰܪܥܳܟ ܕܶܐܩܽܘܫ ܒܶܗ܇ ܚܰܘܳܐ ܠܺܝ ܚܢܳܢܳܟ ܕܺܐܚܶܐ ܒܶܗ܇ ܕܰܚܢܳܢܳܟ ܣܰܒܪܰܐܗ̱ܘ ܕܚܰܛܳܝ̈ܶܐ܀

ܠܰܝܬ ܐܰܬܪܳܐ ܬܰܡܳܢ ܠܚܰܛܳܝ̈ܶܐ܇ ܘܠܳܐ ܕܶܡܥ̈ܶܐ ܡܥܰܕܪ̈ܳܢ ܒܗܳܢ ܝܰܘܡܳܐ܇ ܕܰܥܒܰܪ ܠܶܗ ܙܰܒܢܳܐ ܕܰܦܝܳܣܳܐ܇ ܘܳܝ ܠܶܟܝ̱ ܢܰܦܫܝ̱ ܕܶܐܬܦܣܶܩ ܠܶܗ ܣܰܒܪܶܟܝ̱܀

ܢܽܘܕܝ̱ ܐܳܦ ܐܶܬܬܥܺܝܪܝ̱ ܢܰܦܫܝ̱ ܕܳܘܺܝܬܳܐ܇ ܠܡܽܘܢ ܕܳܡܟܰܬܝ̱ ܒܙܰܒܢܳܐ ܕܦܽܘܠܚܳܢܳܐ܇ ܥܶܗܰܕܝ̱ ܝܳܬܶܟܝ̱ ܥܰܕ ܐܺܝܬ ܠܶܟܝ̱ ܐܰܬܪܳܐ܀

ܥܰܒܕܳܟ ܡܳܪܝ̱ ܐ̱ܢܳܐ ܣܳܓܽܘܕܳܟ܇ ܥܒܶܕ ܥܠܰܝ ܪ̈ܰܚܡܶܐ ܒܝܽܘܡ ܕܺܝܢܳܐ܇ ܕܗܳܐ ܣܳܦܿܶܬ ܐܶܒܕܿܶܬ ܘܰܠܥܳܠܰܡ܀

ܨܠܺܝܒܳܟ ܡܳܪܝ̱ ܢܶܗܘܶܐ ܡܰܐܣܝܳܢܳܐ܇ ܠܫܽܘܡ̈ܳܬܳܐ ܕܰܣܓܺܝܘ ܒܗܰܕܳܡ̈ܰܝ܇ ܕܗܽܘ ܡܶܫܟܰܚ ܥܳܨܶܒ ܠܰܬܒܺܝܪ̈ܶܐ܀

ܪܥܶܠܘ̱ ܓܰܪ̈ܡܰܝ ܘܶܐܫܬܓܶܫܘ̱ ܡܶܢ ܕܺܝܢܳܐ܇ ܘܗܳܐ ܦܶܣܩܿܶܬ ܕܰܠܡܰܘܬܳܐ ܐܶܡܛܶܐ܇ ܛܰܝܒܽܘܬܳܟ ܬܶܥܫܰܢܝ̱ ܥܰܠ ܕܳܘܝܽܘܬܝ̱܀

ܬܶܕܡܽܘܪܬܳܐ ܚܕܰܬܳܐ ܣܥܽܘܪ ܒܺܝ ܡܳܪܝ̱܇ ܘܰܐܩܺܝܡܰܝܢܝ̱ ܒܳܬܰܪ ܦܣܳܩ ܣܰܒܪܳܐ܇ ܘܠܳܟ ܣܰܟܺܝܿܬ ܡܢܰܚܶܡ ܠܚܰܛܳܝ̈ܶܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܒܗܳܠܶܝܢ ܩ̈ܳܠܶܐ ܐܶܣܬܰܓ̈ܺܝ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܓܽܘܕܳܐ ܕܰܢܒܺܝ̈ܶܐ ܙܰܝܚܰܬ݀ ܠܡܰܥܰܠܬܶܗ ܕܰܠܓܰܘ ܨܶܗܝܽܘܢ܀

ܣܶܘܚܰܬ݀ ܠܶܗ ܥܺܕܰܬ ܩܽܘܕܫܳܐ܇ ܘܣܶܓܕܰܬ ܠܶܗ ܠܰܡܠܶܟ ܡܰܠܟ̈ܶܐ܇ ܘܩܰܠܰܣܬܶܗ ܒܟܶܢܫ̈ܶܐ ܕܫܰܒܪ̈ܶܐ܇ ܕܡܫܰܒܚܺܝܢ ܗ̱ܘܰܘ ܒܽܐܘܫܰܥܢ̈ܶܐ܀

 

ܕܨܰܦܪܳܐ ܕܪܰܚܶܡܥܠܰܝ܇ ܒܩܳܠܳܐ ܒܪܺܝܟ ܕܚܰܕܰܝ ܠܰܫܡܰܝ̈ܳܢܶܐ

ܒܪܺܝܟ ܕܚܰܕܺܝ ܠܰܫܡܰܝ̈ܳܢܶܐ܇ ܘܰܐܦܨܰܚ ܠܰܐܪ̈ܥܳܢܶܐ܇ ܒܝܰܘܡܳܐ ܫܒܺܝܚܳܐ ܕܡܰܥܰܠܬܶܗ܇ ܕܠܽܐܘܪܺܫܠܶܡ ܡܕܺܝܢ̱ܬܳܐ܀

ܒܪܺܝܟ ܗܽܘ ܕܬܰܚܬܺܝ ܪܰܒܽܘܬܶܗ܇ ܘܰܪܟܶܒ ܥܰܠ ܥܺܝܠܳܐ܇ ܘܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ܇ ܩܰܠܣܽܘܗ̱ܝ ܒܽܐܘܫܰܥܢ̈ܶܐ܀

ܝܰܘܡܳܢܳܐ ܪܟܶܒ ܗܘܳܐ ܥܺܝܠܳܐ܇ ܪܟܺܝܒ ܥܰܠ ܡܰܪܟܰܒܬܳܐ܇ ܘܰܛܠܳܝ̈ܶܐ ܘܫܰܒܪ̈ܶܐ ܫܦܰܝ̈ܳܐ܇ ܒܽܐܘܫܰܥܢ̈ܶܐ ܫܰܒܚܽܘܗ̱ܝ܀

ܙܟܰܪܝܳܐ ܩܥܳܐ ܠܳܗܿ ܠܒܰܪܬ ܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܳܬܶܐ܇ ܡܰܟܺܝܟ ܘܰܪܟܺܝܒ ܥܰܠ ܥܺܝܠܳܐ܇ ܗܳܕܶܐ ܠܶܟܝ̱ ܐܬܐ܀

ܐܶܫܰܥܝܳܐ ܩܥܳܐ ܠܳܗܿ ܒܩܳܠܶܗ܇ ܕܶܐܬܬܥܺܝܪܝ̱ ܐܶܬܬܥܺܝܪܝ̱܇ ܗܳܝܕܶܝܢ ܠܳܐ ܫܶܡܥܰܬ݀ ܩܳܠܶܗ܇ ܘܶܐܕܢܶܝ̈ܗܿ ܐܶܕܫܰܬ݀ ܗܘܳܬ݀ ܀

ܫܽܘܒܚܳܐ ܠܰܒܪܳܐ ܡܬܽܘܡܳܝܳܐ ܕܰܢܚܶܬ ܗܘܳܐ ܠܐܰܪܥܳܐ܇ ܘܡܶܢ ܝܰܠܽܘ̈ܕܶܐ ܐܶܬܩܰܠܰܣ܇ ܘܒܽܐܘܫܰܥܢܰܝ̈ܗܽܘܢ ܐܶܬܪܰܡܪܰܡ܀

 

ܕܰܐܠܳܗܝ̱ ܐܰܠܳܗܝ̱ ܒܩܳܠܳܐ ܒܪܳܐ ܕܰܫܪܳܐ ܒܡܰܪܒܥܳܐ

ܒܪܳܐ ܕܰܪܟܶܒ ܥܺܝܠܳܐ ܫܺܝܛܳܐ܇ ܘܰܩܥܰܘ ܝܰܠܽܘ̈ܕܶܐ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟܳܐܗ̱ܝ ܡܶܐܬܺܝܬܳܟ ܡܳܪܝܳܐ܇ ܡܒܰܪܰܟ܀

ܬܳܐ ܙܟܰܪܝܳܐ ܓܠܺܝ ܠܺܝ ܐ̱ܪܳܙܳܐ܇ ܐܰܝܟܰܢܳܐ ܥܰܠ ܠܳܗܿ ܠܨܶܗܝܽܘܢ܇ ܘܰܪܟܶܒ ܥܰܠ ܥܺܝܠܳܐ ܫܺܝܛܳܐ܇ ܘܫܰܒܪ̈ܶܐ ܫܰܒܚܽܘܗ̱ܝ ܒܽܐܘܫܰܥܢ̈ܶܐ܇ ܡܒܰܪܰܟ܀

 

ܥܺܕܬܳܐ ܡܫܰܒܚܳܐ ܒܽܐܘܫܰܥܢ̈ܶܐ܇ ܘܙܳܡܪܳܐ ܒܟܶܢܳܪ̈ܶܐ ܕܪܽܘܚܳܐ܇ ܠܰܐܠܳܗܳܐ ܕܠܳܐ ܡܶܣܬܰܝܰܟ܇ ܕܣܳܓܕܺܝܢ ܠܶܗ ܢܒܺܝ̈ܶܐ ܒܪܽܘܚܳܐ܇ ܡܒܰܪܰܟ ܐܰܢ̱ܬ܀

ܢܽܘܪ̈ܳܢܶܐ ܙܳܝܥܺܝܢ ܡܶܢܶܗ܇ ܒܰܐܬܪܶܗ ܪܳܡܳܐ ܨܶܝܕ ܐܰܒܽܘܗ̱ܝ܇ ܘܫܰܒܪ̈ܶܐ ܫܦܰܝ̈ܳܐ ܝܰܒܶܒܘ̱ ܠܶܗ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܡܒܰܪܰܟ ܐܰܢ̱ܬ܀

ܡܰܠܟܳܐ ܪܟܶܒ ܗܘܳܐ ܥܰܠ ܥܺܝܠܳܐ܇ ܘܫܒܰܪ̈ܰܝ ܨܶܗܝܽܘܢ ܝܰܒܶܒܘ̱ ܠܶܗ܇ ܘܩܳܥܶܝܢ ܗ̱ܘܰܘ ܠܶܗ ܟܰܕ ܐܳܡܪܺܝܢ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܇ ܡܒܰܪܰܟ܀

ܐܳܦ ܥܰܘ̈ܳܠܶܐ ܕܒܟܶܢܦ̈ܳܬܳܐ܇ ܙܡܺܝܪܬܳܐ ܚܕܰܬܳܐ ܠܰܒܪܳܐ ܙܡܰܪܘ̱܇ ܘܰܒܠܶܫܳܢ̈ܶܐ ܕܠܳܐ ܡܽܘܡܳܐ ܩܰܠܣܽܘܗ̱ܝ ܠܡܳܪܝܳܐ ܡܪܰܚܡܳܢܳܐ܇ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܫܡܰܝ̈ܳܢܶܐ ܫܽܘܒܚܳܟ ܙܳܡܪܺܝܢ

ܛܠܳܝ̈ܶܐ ܘܫܰܒܪ̈ܶܐ ܡܫܰܒܚܺܝܢ ܗ̱ܘܰܘ܇ ܒܚܰܕ ܩܳܠܳܐ ܡܠܶܐ ܝܽܘܒܳܒܳܐ܇ ܘܰܒܦܽܘܡ̈ܶܐ ܕܠܳܐ ܟܽܘܬܡ̈ܳܬܳܐ܇ ܫܰܒܚܽܘܗ̱ܝ ܠܡܳܪܗܽܘܢ ܕܩܰܕܺܝ̈ܫܶܐ܇܀

ܬܗܰܪܘ̱ ܗ̱ܘܰܘ ܣܳܦܪ̈ܶܐ ܘܰܦܪ̈ܺܝܫܶܐ܇ ܒܢܶܥܡ̈ܳܬܳܐ ܕܡܶܢ ܝܰܠܽܘ̈ܕܶܐ܇ ܕܡܶܢ ܟܶܢܦ̈ܳܬܳܐ ܕܶܐܡܗ̈ܳܬܳܐ܇ ܫܰܕܰܪ ܠܶܗ ܩܽܘܠܳܣܰܝ̈ܗܽܘܢ܀

ܒܠܶܫܳܢ̈ܶܐ ܚܰܕ̈ܳܬܳܐ ܝܰܘܡܳܢ܇ ܙܡܺܝܪܬܳܐ ܚܕܰܬܳܐ ܐܶܙܕܰܡܪܰܬ݀܇ ܒܝܽܘܒܳܒܳܐ ܕܫܰܒܪ̈ܶܐ ܚܰܕ̈ܬܶܐ܇ ܠܗܰܘ ܕܰܪܟܺܝܒ ܥܺܝܠܳܐ ܚܰܕܬܳܐ܀

ܙܟܰܪܝܳܐ ܢܒܺܝܳܐ ܩܥܳܐ ܠܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܳܬܶܐ ܨܶܝܕܰܝܟܝ̱܇ ܘܰܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ܇ ܡܫܰܒܚܺܝܢ ܠܶܗ ܒܽܐܘܫܰܥܢܰܝ̈ܗܽܘܢ܀

ܗܰܘ ܕܰܟܪ̈ܽܘܒܶܐ ܟܕܺܝܢܺܝܢ ܠܶܗ܇ ܥܺܝܠܳܐ ܪܟܶܒ ܘܥܰܠ ܠܽܐܘܪܺܫܠܶܡ܇ ܨܶܗܝܽܘܢ ܚܙܳܬܶܗ ܘܣܳܢܬܶܗ܇ ܟܰܕ ܠܳܐ ܨܒܳܬ݀ ܬܩܰܒܶܠܝ ܡܶܠܰܘ̈ܗ̱ܝ܀

ܟܶܢܫ̈ܶܐ ܓܒܺܝ̈ܠܰܝ ܡܶܢ ܥܰܦܪܳܐ܇ ܝܰܒܶܒܘ̱ ܩܽܘܕܡܰܘܗ̱ܝ ܒܽܐܘܫܰܥܢ̈ܶܐ܇ ܘܓܽܘ̈ܕܶܐ ܕܥܺܝܪ̈ܶܐ ܒܰܡܪ̈ܰܘܡܳܐ܇ ܙܡܰܪܘ̱ ܬܶܫܒܽܘܚܬܳܐ ܠܡܳܪܽܘܬܳܟ܀

ܬܶܫܒܽܚܘܬܳܐ ܚܕܰܬܳܐ ܒܩܳܠܳܐ ܠܰܡܫܺܝܚܳܐ ܐܰܠܳܗܳܐ

ܠܰܡܫܺܝܚܳܐ ܐܰܠܳܗܳܐ܇ ܗܰܘ ܕܰܢܚܶܬ ܒܨܶܒܝܳܢܶܗ܇ ܡܶܢ ܐܰܬܪܳܐ ܕܺܐܝܩܳܪܶܗ܇ ܘܰܪܟܶܒ ܗܘܳܐ ܥܺܝܠܳܐ ܘܥܰܠ ܗܘܳܐ ܠܽܐܘܪܺܫܠܶܡ܇ ܠܶܗ ܛܠܳܝ̈ܶܐ ܫܰܒܰܚܘ̱܇ ܘܠܶܗ ܟܳܗ̈ܢܶܐ܀

ܠܰܡܫܺܝܚܳܐ ܐܰܠܳܗܳܐ܇ ܕܰܪܟܶܒ ܥܺܝܠܳܐ ܫܺܝܛܳܐ܇ ܘܥܰܠ ܠܽܐܘܪܺܫܠܶܡ ܡܕܺܝܢ̱ܬܳܐ܇ ܘܰܛܠܳܝ̈ܶܐ ܩܽܘܕܡܰܘܗ̱ܝ ܐܽܘܫܰܥܢܳܐ܇ ܠܶܗ ܛܠܳܝ̈ܶܐ ܫܰܒܰܚܘ̱܇ ܘܠܶܗ ܟܳܗ̈ܢܶܐ܀

ܠܰܡܫܺܝܚܳܐ ܐܰܠܳܗܳܐ܇ ܕܶܐܬܳܐ ܕܢܶܥܒܶܕ ܚܠܽܘܠܳܐ܇ ܠܗܳܝ ܕܰܡܟܰܪ ܒܛܽܘܪ ܣܺܝܢܰܝ܇ ܘܡܰܢ ܕܰܚܙܳܬܶܗ ܣܢܳܬܶܗ܇ ܘܟܺܐܦ̈ܶܐ ܫܶܩܠܰܬ݀ ܠܰܪܓܽܘܡܝܶܗ ܠܳܗܿ ܛܰܪܕܳܗܿ ܫܰܒܰܚܘ̱ ܘܠܶܗ܀

ܠܰܡܫܺܝܚܳܐ ܐܰܠܳܗܳܐ܇ ܕܰܩܕܳܡ ܥܺܝܠܶܗ ܛܥܶܢܘ̱ ܗ̱ܘܰܘ܇ ܣܰܘܟ̈ܶܐ ܕܙܰܝ̈ܬܶܐ ܘܕܕܶܩ̈ܠܶܐ܇ ܝܰܠܽܘ̈ܕܶܐ ܘܫܰܒܪ̈ܶܐ ܒܽܐܘܫܰܥܢ̈ܶܐ ܫܰܒܰܚܘ̱ ܠܶܗ ܫܰܒܪ̈ܶܐ܀

ܠܰܡܫܺܝܚܳܐ ܐܰܠܳܗܳܐ܇ ܒܠܶܫܳܢ̈ܶܐ ܕܠܳܐ ܡܘܡܳܐ܇ ܩܰܠܣܽܘܗ̱ܝ ܗ̱ܘܰܘ ܝܰܠܽܘ̈ܕܶܐ܇ ܕܰܪܟܺܝܒ ܥܺܝܠܳܐ ܒܡܽܘܟܳܟܳܐ܇ ܘܥܰܠ ܗܘܳܐ ܠܽܐܘܪܺܫܠܶܡ܇ ܠܶܗ ܝܰܠܽܘ̈ܕܶܐ ܫܰܒܰܚܘ̱܀

 

ܩܳܠܳܐ ܕܨܰܦܪܳܐ܇ ܩܳܠܳܐ ܦܬܰܚ ܠܺܝ ܬܰܪܥܶܗ

ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ܇ ܠܥܶܠ ܒܰܫܡܰܝܳܐ ܐܺܝܬܰܘܗ̱ܝ ܡܳܪܝܳܐ܇ ܘܶܐܬܬܰܚܬܺܝ ܨܶܝܕ ܐܰܪ̈ܥܳܢܶܐ܇ ܘܥܺܝܠܳܐ ܪܟܽܘܒܳܐ ܛܰܝܶܒ ܠܶܗ܇ ܘܝܰܠܽܘ̈ܕܶܐ ܒܣܰܘܟ̈ܰܝ ܙܰܝܬܳܐ܇ ܢܦܰܩܘ̱ ܗ̱ܘܰܘ ܠܽܐܘܪܥܶܗ ܟܰܕ ܐܳܡܪܺܝܢ܇ ܐܽܘܫܰܥܢܳܐ ܒܪܰܘܡܳܐ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܛܠܳܝ̈ܶܐ ܫܰܒܚܽܘܗ̱ܝ ܒܽܐܘܫܰܥܢ̈ܶܐ܇ ܘܝܰܠܽܘ̈ܕܶܐ ܒܣܰܘܟ̈ܰܝ ܙܰܝܬܳܐ܇ ܠܗܰܘ ܕܰܒܪܶܡܙܶܗ ܡܕܒܰܪ ܟܽܠ܇ ܘܩܳܥܶܝܢ ܠܶܗ ܫܽܘܒܚܳܐ ܦܰܐܝܳܐ܇ ܠܥܶܠ ܢܽܘܪ̈ܳܢܶܐ ܡܩܰܕܫܺܝܢ ܠܶܗ܇ ܩܰܕܺܝܫ ܡܳܪܝܳܐ ܚܰܝܠܬܳܢܳܐ܇ ܘܰܒܫܽܘܩ̈ܰܝ ܨܶܗܝܽܘܢ ܝܰܠܽܘ̈ܕܶܐ ܫܰܒܰܚܘ̱ ܩܽܘܕܡܰܘܗ̱ܝ܀

 

ܐ̱ܚܪܺܢܳܐ ܩܳܠܳܐ ܕܨܰܦܪܳܐ ܚܙܰܐܽܘܗ̱ܝ ܬܰܠܡܺܝ̈ܕܶܐ

ܕܽܘܨܝ̱ ܛܳܒ ܘܰܚܕܳܝ ܐܳܦ ܫܰܒܰܚܝ̱ ܙܟܰܪܝܳܐ ܠܨܶܗܝܽܘܢ ܐܳܡܰܪ ܗܘܳܐ܇ ܦܽܘܩܝ̱ ܠܽܐܘܪܥܶܗ ܕܚܰܬܢܳܐ ܡܳܪܶܟܝ̱܇ ܕܗܳܐ ܐܳܬܶܐ ܐܰܝܟܰܢ ܕܶܐܡܪܶܬ܇ ܘܢܶܩܥܽܘܢ ܝܰܠܽܘ̈ܕܶܐ ܩܽܘܕܡܰܘܗ̱ܝ ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܝܰܠܽܘ̈ܕܶܐ ܕܠܳܐ ܝܳܕܥܺܝܢ ܗ̱ܘܰܘ܇ ܡܶܡܬܽܘܡ ܡܡܰܠܠܳܐ ܐ̱ܢܳܫܳܝܳܐ܇ ܙܡܰܪܘ̱ ܫܽܘܒܚܳܐ ܡܶܢ ܟܶܢܦ̈ܳܬܳܐ܇ ܬܗܰܪܘ̱ ܒܶܗ ܣܪ̈ܳܦܶܐ ܘܰܟܪ̈ܽܘܒܶܐ܇ ܟܰܕ ܚܳܪܘ̱ ܒܶܗ ܕܰܪܟܺܝܒ ܥܺܝܠܳܐ܇ ܘܠܳܐ ܡܰܨܝܳܐ ܕܰܢܚܽܘܪܽܘܢ ܒܶܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܥܰܠ ܕܰܛܠܰܡܘ̱ ܗ̱ܘܰܘ ܣܳܒ̈ܶܐ ܫܽܘܒܚܳܐ ܕܥܶܕܳܢܶܗ ܗܘܳܐ܇ ܥܠܰܝ̈ܡܶܐ ܩܳܡܘ̱ ܗ̱ܘܰܘ ܕܢܶܬܠܽܘܢ ܫܽܘܒܚܳܐ ܒܽܐܘܫܰܥܢܰܝ̈ܗܽܘܢ܇ ܘܶܐܠܽܘ ܫܬܶܩܘ̱ ܗ̱ܘܰܘ ܠܳܐ ܒܳܛܶܠ ܗܘܳܐ ܫܽܘܒܚܳܐ ܬܰܡܳܢ܇ ܟܺܐܦ̈ܶܐ ܒܙܰܘܥܳܐ ܙܳܡܪ̈ܳܢ ܗܘ̈ܰܝ ܠܶܗ ܠܗܳܝ ܬܶܫܒܽܘܚܬܳܐ܀

ܠܳܟ ܗܽܘ ܡܫܰܒܚܺܝܢ ܟܶܢܫ̈ܶܐ ܫܓܺܝܪ̈ܶܐ ܕܒܶܝܬ ܓܰܒܪܺܐܶܝܠ܇ ܘܡܶܢܳܟ ܪܳܐܬܺܝܢ ܬܶܐܓ̈ܡܶܐ ܕܚܺܝ̈ܠܶܐ ܕܒܶܝܬ ܡܺܝܟܳܐܶܝܠ܇ ܡܒܰܪܟܳܐ ܠܳܟ ܡܳܪܝ̱ ܐܳܦ ܡܰܪܟܰܒܬܳܐ ܗܳܝ ܕܰܟܪ̈ܽܘܒܶܐ܇ ܘܕܰܨܒܳܐ ܚܽܘܒܳܟ ܫܰܒܪ̈ܶܐ ܫܰܒܚܽܘܟ ܠܳܟ ܬܶܫܒܽܘܚܬܳܐ܀

 

ܕܰܬܠܳܬܫܳܥܺܝ̈ܢ ܒܩܳܠܳܐ ܥܰܡ ܕܟܽܠܗܽܘܢ ܩܰܕܺܝ̈ܫܰܝܟ

ܢܣܰܒܰܪ ܦܽܘܡܝ̱ ܙܰܕܺܝܩܽܘܬܳܟ܇ ܒܗܳܢܳܐ ܝܰܘܡܳܐ ܕܚܰܕܘ̈ܳܬܳܐ ܘܰܢܡܰܠܶܠ ܠܶܫܢܳܝ̱ ܫܽܘܒܚܳܟ܇ ܒܗܳܢܳܐ ܥܺܐܕܳܐ ܕܒܽܘܪ̈ܟܳܬܳܐ܇ ܬܶܪܘܰܙܝ̱ ܢܰܦܫܝ̱ ܥܰܡ  ܐܽܘܫܰܥ̈ܢܶܐ܇ ܒܙܺܝܘܳܟ ܕܥܰܠ ܒܰܪ ܐܰܬܳܢܳܐ܀

ܒܰܪ ܡܰܠܟܳܐ ܥܰܠ ܠܡܕܺܝܢ̱ܬܳܐ܇ ܒܙܰܘܚܳܐ ܘܫܽܘܒܚܳܐ ܕܙܳܕܶܩ ܠܶܗ܇ ܐܳܦ ܟܢܽܘܫܬܳܐ ܒܣܺܝܪܬܳܐ ܡܫܰܐܠܳܐ܇ ܡܰܢܽܘ ܗܳܢܳܐܳ ܘܡܳܐ ܛܶܐܒܶܗ܇ ܘܰܙܩܬܳܗܿ ܛܢܳܢܳܐ ܠܫܳܛܺܝܬܳܐ܇ ܠܰܡܫܰܬܳܩܽܘ ܠܝܰܠܽܘ̈ܕܶܐ܀

 

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܝܰܥܩܽܘܒ ܢܺܐܬܶܐ ܢܣܰܒܰܪ ܠܰܢ܇ ܡܶܛܽܠ ܥܺܝܠܳܐ ܘܰܓܦܶܬܳܐ܇ ܘܕܰܘܺܝܕ ܢܥܺܝܪ ܝܰܠܽܘ̈ܕܶܐ܇ ܘܰܛܠܳܝ̈ܶܐ ܥܰܠ ܬܶܫܒܽܘܚܬܳܐ܀

ܫܽܘܒܚܳܐ ܠܶܗ ܠܗܰܘ ܕܶܐܬܡܰܟܰܟ܇ ܕܡܶܢ ܝܰܠܽܘ̈ܕܶܐ ܢܶܫܬܰܒܰܚ܇ ܘܰܩܥܰܘ ܩܽܘܕܡܰܘܗ̱ܝ ܒܽܐܘܫܰܥܢ̈ܶܐ܇ ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ܀

 

ܕܦܶܠܓܶܗ ܕܝܰܘܡܳܐ ܩܳܠܳܐ ܣܳܗ̈ܕܶܐ ܗ̱ܘܰܘ ܦܺܝܪ̈ܡܳܐ

ܢܒܺܝ̈ܶܐ ܒܟܽܠ ܕܳܪ̈ܺܝܢ܇ ܩܥܰܘ ܠܶܗ ܠܥܰܡܳܐ ܛܳܠܽܘܡܳܐ܇ ܥܰܠ ܡܶܐܬܺܝܬܶܗ܇ ܕܰܡܪܰܝܡܳܐ܇ ܝܰܥܩܽܘܒ ܐܶܡܰܪ ܗܘܳܐ ܕܒܰܓܦܶܬܳܐ ܐܶܣܰܪ ܥܺܝܠܶܗ܇ ܘܗܽܘܝܽܘ ܐܳܬܶܐ ܘܫܳܪܶܐ ܠܶܗ܇ ܐܽܘܫܰܥܢܳܐ ܒܪܰܘܡܳܐ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܕܽܘܨܝ̱ ܛܳܒ ܐܳܦ ܫܰܒܰܚܝ̱܇ ܙܟܰܪܝܳܐ ܠܨܶܗܝܽܘܢ ܣܰܒܰܪ ܗܘܳܐ܇ ܕܳܐܬܶܐ ܠܶܟܝ̱ ܡܰܠܟܶܟܝ̱ ܪܰܒܳܐ܇ ܘܰܪܟܺܝܒ ܥܰܠ ܥܺܝܠܳܐ܇ ܘܰܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ܇ ܡܫܰܒܚܺܝܢ ܩܽܘܕܡܰܘܗ̱ܝ ܟܰܕ ܐܳܡܪܺܝܢ܇ ܐܽܘܫܰܥܢܳܐ ܒܪܰܘܡܳܐ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܙܟܰܪܝܳܐ ܢܒܺܝܳܐ ܛܥܺܝܢ ܩܺܝܬܳܪܶܗ ܪܽܘܚܳܢܳܝܳܐ܇ ܪܳܗܶܛ ܩܽܘܕܡܰܘܗ̱ܝ ܙܳܡܰܪ ܘܰܦܨܺܝܚ ܒܰܢܒܺܝܽܘܬܶܗ܇ ܚܰܨ ܗܘܳܐ ܡܶܢܰܘ̈ܗ̱ܝ ܐܰܙܺܝܥ ܩܳܠܶܗ ܟܰܕ ܐܳܡܰܪ ܗܘܳܐ܇ ܚܕܳܝ ܒܰܪܬ ܨܶܗܝܽܘܢ ܝܰܒܶܒܝ̱ ܘܰܩܥܳܝ ܕܶܐܬܳܐ ܡܰܠܟܶܟܝ̱܀

ܕܠܳܐ ܫܰܒܰܚܬܳܟ ܟܢܽܘܫܬܳܐ ܕܛܶܠܡܰܬ݀ ܫܽܘܒܚܳܟ ܡܳܪܰܢ܇ ܥܺܕܬܳܐ ܘܝܰܠܕܶܝ̈ܗܿ ܗܳܐ ܦܨܺܝܚܳܐ ܒܳܟ ܘܰܡܩܰܠܣܳܐ ܠܳܟ܇ ܗܰܒܠܳܗܿ ܫܰܝܢܳܐ ܘܰܡܠܳܝܗܿ ܚܽܘܒܳܐ ܘܪܰܡܪܶܡ ܩܰܪܢܳܗܿ܇ ܕܬܶܙܡܰܪܝ̱ ܫܽܘܒܚܳܐ ܠܳܟ ܡܳܪܝ̱ ܘܠܰܐܒܽܘܟ ܘܰܠܪܽܘܚܩܽܘܕܫܳܐ܀

 

ܕܰܬܫܰܥܫܳܥܺܝ̈ܢ ܒܩܳܠܳܐ ܡܳܐ ܪ̈ܚܺܝܡܺܝܢ ܕܽܘܟܪ̈ܳܢܰܝܟܽܘܢ

ܡܳܐ ܦܰܐܝܳܐ ܗܘܳܬ݀ ܗܳܝ ܫܳܥܬܳܐ܇ ܟܰܕ ܥܰܠ ܗܘܳܐ ܒܳܗ ܡܳܪܰܢ ܠܽܐܘܪܺܫܠܶܡ܇ ܓܽܘܕܳܐ ܕܬܰܠܡܺܝ̈ܕܰܘܗ̱ܝ ܥܰܡܶܗ܇ ܘܣܰܘ̈ܟܰܝ ܙܰܝܬܳܐ ܒܺܐܝܕܰܝ̈ܗܽܘܢ܇ ܐܳܦ ܢܰܚܬܰܝ̈ܗܽܘܢ ܦܳܪܣܝܺܢ ܗ̱ܘܰܘ܇ ܘܰܡܫܰܘܶܝܢ ܗ̱ܘܰܘ ܩܽܘܕܡܰܘܗ̱ܝ ܥܰܠ ܐܰܪܥܳܐ܀

ܐܰܠܳܗܳܐ ܘܒܰܪ ܐܰܠܳܗܳܐ܇ ܘܡܰܟܶܟ ܢܰܦܫܶܗ ܡܶܛܽܠ ܡܳܝܽܘ̈ܬܶܐ܇ ܘܺܝܬܶܒ ܥܰܠ ܒܰܪ ܐܰܬܳܢܳܐ܇ ܘܠܽܐܘܪܺܫܠܶܡ ܬܪܰܨ ܗܘܳܐ ܐܳܘܪܚܶܗ܇ ܘܰܚܙܰܐܽܘܗ̱ܝ ܟܶܢܫ̈ܶܐ ܕܐ̱ܢܳܫ̈ܳܐ܇ ܘܫܰܒܪ̈ܶܐ ܩܥܰܘ ܠܶܗ ܐܽܘܫܰܥܢܳܐ ܒܪܰܘܡܳܐ܀

 

ܒܳܥܽܘܬܳܐ ܒܚܳܐܶܢ ܠܚܰܛܳܝ̈ܶܐ

ܙܟܰܪܝܳܐ ܩܥܳܐ ܘܶܐܡܰܪ܇ ܕܽܘܨܝ̱ ܛܳܒ ܒܰܪܬ ܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܶܬܳܐ܇ ܘܰܪܟܺܝܒ ܥܰܠ ܥܺܝܠܳܐ܇ ܘܩܳܥܶܝܢ ܝܰܠܽܘ̈ܕܶܐ܇ ܩܽܘܕܡܰܘܗ̱ܝ ܒܽܐܘܫܰܥܢ̈ܶܐ܀

ܫܽܘܒܚܳܐ ܠܗܰܘ ܕܰܪܟܶܒ܇ ܥܺܝܠܳܐ ܕܰܐܬܳܢܳܐ܇ ܫܽܘܒܚܳܐ ܠܗܰܘ ܕܩܰܠܣܽܘܗ̱ܝ܇ ܫܰܒܪ̈ܶܐ ܒܽܐܘܫܰܥܢ̈ܶܐ܇ ܫܽܘܒܚܳܐ ܠܗܰܘ ܕܦܰܪܩܰܢ܇ ܘܰܥܬܺܝܕ ܬܽܘܒ ܕܢܺܐܬܶܐ܀

 

ܫܠܶܡ ܫܰܒܬܳܐ  ܕܽܐܘܫܰܥܢ̈ܶܐ

 

ܬܽܘܒ ܥܪܽܘܒܬܳܐ ܕܰܐܪܒܥܺܝܢ ܕܫܽܘܠܳܡ ܨܰܘܡܳܐ

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ܇ ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܐܰܢ̱ܬ ܕܰܢܚܶܬܬ ܒܨܶܒܝܳܢܳܟ܇ ܡܶܢ ܪܰܘܡܳܐ ܨܶܝܕ ܬܰܚܬܳܝ̈ܶܐ܇ ܘܨܰܘܡܳܐ ܕܰܟܝܳܐ܇ ܠܒܰܟܬ ܚܠܳܦܰܝܢ ܘܒܶܗ ܗܽܘ ܦܪܰܩܬܳܢ܇ ܐܰܠܳܗܳܐ܀

ܐܰܢ̱ܬ ܗܽܘ ܕܰܢܦܰܩܬ ܠܡܰܕܒܪܳܐ܇ ܘܰܒܨܰܘܡܳܐ ܕܰܐܪܒܥܺܝܢ ܝܰܘܡܺܝ̈ܢ܇ ܣܚܰܦܬܳܝܗ̱ܝ ܠܒܺܝܫܳܐ܇ ܕܰܐܩܪܶܒ ܗܘܳܐ ܥܰܡ ܪܺܝܫ ܓܶܢܣܰܢ܇ ܐܰܠܳܗܳܐ܀

ܐܰܢ̱ܬ ܗܽܘ ܕܠܳܐܟܶܠܩܰܪܨܳܐ܇ ܗܰܘ ܕܫܰܦܠܶܗ ܗܘܳܐ ܠܪܺܝܫ ܓܶܢܣܰܢ܇ ܫܰܦܶܠܬ ܚܰܝܠܶܗ܇ ܒܨܰܘܡܳܐ ܕܨܳܡܬ ܚܠܳܦ ܦܽܘܪܩܳܢܰܢ܇ ܐܰܠܳܗܳܐ܀

ܐܰܢ̱ܬ ܗܽܘ ܕܶܐܡܰܪܬ ܠܣܳܛܳܢܳܐ܇ ܕܙܶܠ ܠܳܟ ܠܒܶܣܬܰܪܝ̱ ܡܰܪܳܚܳܐ܇ ܘܶܐܫܬܰܦܰܠ ܗܘܳܐ ܘܶܐܬܪܗܶܒ ܗܘܳܐ ܘܶܐܣܬܰܪܰܕ܀

ܐܰܢ̱ܬ ܗܽܘ ܕܰܩܪܶܒܘ̱ ܥܺܝܪ̈ܶܐ܇ ܘܡܰܠܰܐܟ̈ܶܐ ܠܘܳܬܳܟ ܡܳܪܰܢ܇ ܘܰܣܓܶܕܘ̱ ܗ̱ܘܰܘ ܠܳܟ ܘܰܡܫܰܡܫܺܝܢ ܗ̱ܘܰܘ ܠܺܐܝܩܳܪܳܟ܀

ܫܽܘܒܚܳܐ ܠܳܟ ܒܪܳܐ ܒܽܘܟܪܳܐ܇ ܕܰܙܟܰܝܬ ܠܚܰܝܠܶܗ ܕܣܳܛܳܢܳܐ܇ ܘܝܰܗܒܬ ܠܰܢ ܙܰܝܢܳܐ܇ ܕܳܐܦܚܢܰܢ ܢܶܙܟܺܝܘܗ̱ܝ ܠܒܺܝܫܳܐ܀

 

ܡܳܪܝܳܐ ܩܪܺܝܬܳܟ ܒܩܳܠܳܐ ܡܫܺܝܚܳܐ ܐܶܬܺܝܠܶܕ

ܐܰܪܒܥܺܝܢ ܝܰܘ̈ܡܳܬܳܐ܇ ܒܓܰܘ ܡܰܕܒܪܳܐ ܚܽܘܪܒܳܐ܇ ܩܰܒܶܠ ܥܠܰܘܗ̱ܝ ܕܰܢܨܽܘܡ܇ ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܇ ܘܰܐܛܥܺܝ ܒܰܢܟܺܝܠܳܐ܇ ܘܰܩܪܶܒ ܕܰܢܢܰܣܺܝܘܗ̱ܝ܇ ܕܰܣܒܰܪ ܕܒܰܪܢܳܫܰܐܗ̱ܘ܇ ܘܣܰܚܦܶܗ ܗܘܳܐ ܐܰܝܟ ܐܰܠܳܗܳܐ܀

ܒܨܰܘܡܳܐ ܙܟܳܐ ܡܳܪܰܢ܇ ܠܒܺܝܫܳܐ ܒܥܶܠܕܰܪܳܐ܇ ܕܰܐܩܪܶܒ ܥܰܡ ܐܳܕܳܡ ܘܫܰܦܠܶܗ ܗܘܳܐ ܒܝܰܕ ܨܢܺܝܥܽܘܬܶܗ܇ ܘܝܰܗܒ ܠܰܢ ܙܳܟܽܘܬܳܐ܇ ܕܒܰܐܓܽܘܢܳܐ ܢܶܙܟܺܝܘܗ̱ܝ܇ ܘܢܰܥܕܶܐ ܟܠܺܝܠܳܐ܇ ܕܰܐܘܒܶܕ ܡܶܢܰܢ ܒܝܰܕ ܡܶܠܟܶܗ܀

ܢܚܶܬ ܗܘܳܐ ܓܰܢ̱ܒܳܪܳܐ܇ ܠܰܒܫܶܗ ܠܡܽܘܟܳܟܳܐ܇ ܘܰܥܒܰܕ ܗܘܳܐ ܕܰܐܪܳܐ܇ ܥܰܡ ܒܺܝܫܳܐ ܢܳܛܰܪ ܐܳܐܰܪ܇ ܘܰܙܟܳܝܗ̱ܝ ܠܰܢܟܺܝܠܳܐ܇ ܠܳܐ ܗܘܳܐ ܒܰܩܛܺܝܪܳܐ܇ ܘܥܰܒܕܶܗ ܕܝܳܫܳܐ܇ ܠܨܰܝ̈ܳܡܶܐ ܕܦܳܪܽܘܫܽܘܬܳܐ܀

ܥܰܠ ܕܰܒܡܶܐܟܽܘܠܬܳܐ܇ ܫܠܰܚ ܐܶܣܛܰܠ ܫܽܘܒܚܳܐ܇ ܡܶܛܽܠܗܳܢܳܐ ܨܳܡ ܡܳܪܰܢ܇ ܒܨܰܘܡܳܐ ܫܰܪܺܝ܇ ܘܟܰܕ ܚܙܳܝܗ̱ܝ ܗܘܳܐ ܒܺܝܫܳܐ܇ ܣܕܰܪ ܥܰܡܶܗ ܕܰܐܪܳܐ܇ ܕܰܣܒܰܪ ܕܒܰܪܢܳܫܰܐܗ̱ܘ܇ ܘܶܐܫܬܰܦܰܠ ܗܘܳܐ ܡܳܪܽܘܕܳܐ܀

ܒܨܰܘܡܳܐ ܫܰܪܺܝ ܗܘܳܐ܇ ܒܽܐܘܪܚܳܐ ܕܰܕܪܰܫܘ̱ ܠܶܗ܇ ܢܒܺܝ̈ܶܐ ܕܒܶܝܬ ܐܰܒܽܘܗ̱ܝ܇ ܡܽܘܫܶܐ ܢܒܺܝܳܐ ܘܺܐܠܺܝܳܐ܇ ܘܰܐܟܘܳܬܗܽܘܢ ܨܳܡ ܗܘܳܐ܇ ܐܰܪܒܥܺܝܢ ܝܰܘܡ̈ܳܬܳܐ܇ ܘܰܙܟܳܝܗ̱ܝ ܠܣܳܛܳܢܳܐ܇ ܘܰܐܩܺܝܡ ܠܳܐܕܳܡ ܕܰܢܦܺܝܠ ܗܘܳܐ܀

ܫܽܘܒܚܳܐ ܠܰܡܫܺܝܚܳܐ܇ ܕܐܶܬܡܰܟܰܟ ܚܠܳܦܰܝܢ܇ ܘܰܐܝܟ ܐ̱ܢܳܫܳܐ ܫܚܺܝܡܳܐ܇ ܢܦܰܩ ܗܘܳܐ ܠܡܰܕܒܪܳܐ ܘܨܳܡ ܨܰܘܡܳܐ܇ ܘܰܐܝܟ ܠܰܡ ܐܰܠܳܗܳܐ܇ ܣܰܚܦܶܗ ܠܰܨܢܺܝܥܳܐ܇ ܕܰܣܒܰܪ ܕܒܰܪܢܳܫܰܐܗ̱ܘ܇ ܕܡܶܢ ܟܰܦܢܳܐ ܐܶܬܡܚܶܠ܀

 

ܩܳܠܳܐ ܕܪܰܡܫܳܐ܇ ܒܩܳܠܳܐ ܡܫܺܝܚܳܐ ܢܰܛܰܪܶܝܗܿ ܠܥܺܕܬܳܟ

ܟܝܳܢܳܐ ܕܥܶܠܳܝ ܡܶܢ ܥܺܝܪ̈ܶܐ܇ ܘܡܶܢ ܬܶܐܓܡܰܝ̈ܗܽܘܢ ܕܰܣܪ̈ܳܦܶܐ܇ ܐܰܪܒܥܺܝܢ ܝܰܘܡܺܝ̈ܢ ܨܳܐܶܡ ܗܘܳܐ܇ ܡܶܛܽܠ ܕܰܗܘܳܐ ܒܰܪܢܳܫܳܐ܇ ܘܶܐܬܢܰܣܺܝ ܡܶܢ ܣܳܛܳܢܳܐ܇ ܘܩܳܡ ܒܰܐܓܽܘܢܳܐ ܕܣܰܚܦܶܗ ܠܰܢܟܺܝܠܳܐ܇ ܘܝܰܗܒܠܰܢ ܙܰܝܢܳܐ ܩܰܠܺܝܠܳܐ ܨܰܘܡܳܐ ܡܟܰܠܶܠ ܐܰܬܠܺܝ̈ܛܶܐ ܫܽܘܒܚܳܐ ܠܗܰܘ ܬܽܘܩܦܳܐ ܕܥܶܠܳܝ̈ܶܐ ܙܳܝܥܺܝܢ ܡܶܢܶܗ܇ ܘܥܰܡ ܬܰܚܬܳܝ̈ܶܐ ܐܶܬܚܰܠܰܛ ܘܒܰܢ ܐܶܬܕܰܡܺܝ܇ ܡܶܢ ܨܶܝܕ ܐܰܒܽܘܗ̱ܝ ܠܳܐ ܫܰܢܺܝ܀

ܗܰܘ ܕܰܡܬܰܪܣܶܐ ܠܟܽܠ ܒܶܪ̈ܝܳܢ܇ ܒܦܽܘܩܕܳܢܳܐ ܕܒܳܪܽܘܝܽܘܬܶܗ܇ ܨܰܘܡܳܐ ܐܰܠܶܦ ܠܰܐܬܠܺܝ̈ܛܰܘܗ̱ܝ ܕܢܶܬܟܰܬܫܽܘܢ ܒܶܗ ܥܰܡ ܒܺܝܫܳܐ܇ ܘܰܕܪܰܫ ܐܽܘܪܚܳܐ ܒܰܩܢܽܘܡܶܗ܇ ܕܒܶܗ ܢܶܬܡܰܢܰܥ ܠܰܐܬܪܳܐ ܕܚܰܕܘ̈ܳܬܳܐ܇ ܘܟܰܦܢܳܐ ܣܰܝܒܰܪ ܒܰܐܓܽܘܢܳܐ܇ ܘܰܐܛܥܺܝ ܒܶܗ ܠܰܒܥܶܠܕܰܪܳܐ܇ ܫܽܘܒܚܳܐ ܠܡܽܘܟܳܟܶܗ܇ ܕܰܕܠܺܝܠ ܠܶܗ ܟܽܠ ܕܰܐܠܳܗܰܐܗ̱ܘ܇ ܘܒܺܝܫܳܐ ܕܰܚܙܳܝܗ̱ܝ ܐܶܫܬܰܥܠܺܝ܇ ܘܠܳܐ ܐܶܣܬܰܟܰܠ܇ ܕܰܕܠܳܐ ܣܳܟܳܐ ܗܽܘ ܒܺܐܝܬܽܘܬܶܗ܀

 

ܐ̱ܚܪܺܢܳܐ ܒܩܳܠܳܐ ܠܳܐ ܠܕܺܝܢܳܐ ܘܠܳܐ ܠܰܬܒܰܥܬܳܐ

ܒܨܰܘܡܳܐ ܕܰܐܪܒܥܺܝܢ ܝܰܘܡ̈ܳܬܳܐ ܐܶܙܕܰܗܺܝ ܗܘܳܐ܇ ܦܰܪܨܽܘܦܶܗ ܕܡܽܘܫܶܐ ܒܛܽܘܪܳܐ܇ ܘܰܐܒܪܶܩ ܚܶܙܘܶܗ ܐܰܝܟ ܫܶܡܫܳܐ ܘܰܐܚܶܬ ܠܽܘܚ̈ܶܐ܇ ܟܬܺܝ̈ܒܳܬܳܐ ܠܒܶܝܬ ܐܺܝܣܪܳܐܶܝܠ ܗ ܒܨܶܒܥܳܐ ܕܪܽܘܚܳܐ܀

ܕܳܢܺܝܐܶܝܠ ܛܰܠܝܳܐ ܪܓܺܝܓܳܐ ܒܨܰܘܡܳܐ ܕܨܳܡ ܗܘܳܐ܇ ܣܟܰܪ ܦܽܘܡܳܐ ܕܰܐܪ̈ܝܰܘܳܬܳܐ܇ ܘܚܰܕܺܝ ܡܰܠܟܳܐ ܕܰܪܳܝܽܘܫ ܘܰܙܡܰܪ ܫܽܘܒܚܳܐ ܠܰܐܠܳܗܳܐ ܕܦܰܨܺܝ ܠܥܰܒܕܶܗ܇ ܗ ܡܶܢ ܚܰܝܘ̈ܳܬܳܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܓܰܪܓܶܗ ܠܒܺܝܫܳܐ ܕܢܶܚܽܘܬ ܢܶܒܗܰܬ ܡܶܢ ܐܰܓܽܘܢܳܐ܇ ܘܝܰܗܒ ܠܶܗ ܐܺܝܕܳܐ ܒܰܡܚܺܝܠܽܘܬܳܐ ܥܰܕ ܨܳܐܶܕ ܠܶܗ܇ ܟܰܦܢܳܐ ܦܬܰܚ ܠܶܗ ܬܰܪܥܳܐ ܠܒܺܝܫܳܐ ܕܒܶܗ ܢܶܬܟܰܬܰܫ܇ ܕܶܐܠܽܘܠܳܐ ܚܙܳܝܗ̱ܝ ܕܰܟܦܶܢ ܘܰܠܐܺܝ ܠܳܐ ܡܰܩܪܶܒ ܗܘܳܐ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܘܚܰܘܺܝ ܚܰܝܠܶܗ ܘܣܶܓܕܬܳܐ ܠܰܒܪܳܐ ܕܰܒܝܰܕ ܨܰܘܡܶܗ ܣܰܚܦܶܗ ܠܒܺܝܫܳܐ܇ ܬܰܘܕܺܝ ܠܪܽܘܚܳܐ ܕܫܰܦܠܶܗ ܒܕܰܐܪܳܐ ܠܳܐܟܶܠܩܰܪܨܳܐ܇ ܘܰܥܠܰܝܢ ܪ̈ܰܚܡܶܐ ܒܟܽܠ ܥܶܕܳܢܺܝ̈ܢ ܠܳܟ ܬܶܫܒܽܘܚܬܳܐ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܥܺܝܪܳܐ ܕܠܳܐ ܕܳܡܶܟ

ܒܠܺܠܝܳܐ ܥܰܡ ܥܺܝܪ̈ܶܐ܇ ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ܀

ܡܫܺܝܚܳܐ ܕܨܳܡ ܚܠܳܦܰܝܢ܇ ܩܰܒܶܠ ܨܰܘܡܰܢ ܘܰܨܠܽܘܬܰܢ܀

ܒܨܰܘܡܳܐ ܢܶܬܟܰܫܰܪ܇ ܘܢܶܙܟܶܐ ܠܒܺܝܫܳܐ ܒܥܶܠܕܰܪܳܐ܀

ܐܰܝܟ ܕܰܙܟܳܝܗ̱ܝ ܡܳܪܰܢ܇ ܘܰܒܗܶܬܘ̱ ܘܰܚܦܰܪܘ̱ ܘܶܐܬܛܰܠܰܩ܀

ܥܰܢܺܝ̈ܕܶܐ ܡܗܰܝ̈ܡܢܶܐ ܐܰܢ̱ܬ ܡܳܪܝܳܐ ܚܰܣܳܐ ܐܶܢܽܘܢ܀

ܫܽܘܒܚܳܐ ܠܶܗ ܠܰܐܒܳܐ܇ ܘܠܰܒܪܳܐ ܘܰܠܪܽܘܚܳܐ ܕܩܽܘܕܫܳܐ܀

 

ܩܰܘܡܳܐ ܩܰܕܡܳܝܳܐ ܕܠܺܠܝܳܐ ܒܩܳܠܳܐ ܩܽܘܩܳܝܳܐ

ܒܨܰܘܡܳܐ ܕܰܟܝܳܐ ܘܰܒܚܽܘܒܳܐ ܘܒܰܥܒ̈ܳܕܶܐ ܡܝܰܬܪ̈ܶܐ܇ ܚܕܳܐ ܒܰܥܒܳܕܰܘ̈ܗ̱ܝ ܐܰܠܳܗܳܐ ܐܰܝܟܰܢܳܐ ܕܰܟܬܺܝܒ܇ ܗܳܐ ܣܳܗܶܕ ܠܰܢ ܗܰܘ ܒܰܪ ܬܰܘܬܳܒ̈ܶܐ܇ ܕܰܒܡܰܪܟܰܒܬܳܐ ܕܢܽܘܪܳܐ ܐܶܬܥܰܠܺܝ܇ ܐܳܦ ܕܳܢܺܝܐܶܝܠ ܒܓܰܘ ܒܳܒܶܝܠ ܘܡܽܘܫܶܐ ܒܛܽܘܪܳܐ܇ ܒܪܺܝܟ ܕܰܒܨܰܘܡܳܐ ܘܒܰܨܠܽܘܬܳܐ ܚܳܕܶܐ ܐܳܦ ܡܶܬܬܢܺܝܚ ܗ ܘ ܗ܀

ܟܽܠ ܐܰܝܢܳܐ ܕܺܐܝܬ ܠܶܗ ܚܰܘ̈ܒܶܐ ܘܰܚܛܳܗ̈ܶܐ ܪܰܘܪ̈ܒܶܐ܇ ܢܶܒܥܶܐ ܪ̈ܰܚܡܶܐ ܡܶܢ ܡܳܪܰܢ ܐܰܝܟ ܕܰܒܥܳܬ݀ ܢܺܝܢܘܶܐ܇ ܐܰܪܒܥܺܝܢ ܝܰܘܡܺܝ̈ܢ ܨܰܘܡܳܐ ܓܶܙܪܰܬ ܗܘܳܬ݀ ܇ ܐܰܪܒܥܺܝܢ ܝܰܘ̈ܡܺܝܢ ܥܰܠ ܬܰܪܥܶܗ ܕܡܳܪܝܳܐ ܩܳܡܰܬ݀܇ ܥܕܰܡܳܐ ܕܶܐܬܳܐ ܠܳܗܿ ܩܳܠܳܐ ܕܶܐܬܪܰܥܺܝ ܡܳܪܝܳܐ܇ ܗ ܘ ܗ܀

 

ܡܰܕܪܳܫܳܐ ܒܩܳܠܳܐ ܗܳܢܰܘ ܝܰܪܚܳܐ ܥܶܢܝܳܢܳܐ ܒܪܺܝܟ ܕܰܒܨܰܘܡܶܗ܇ ܝܰܗܒ ܠܰܢ ܙܰܝܢܳܐ ܕܢܶܙܟܶܐ ܠܒܺܝܫܳܐ

ܣܒܰܟ ܨܢܺܝܥܳܐܺܝܬ܇ ܟܰܕ ܡܶܬܚܰܠܰܦ ܕܡܽܘܬܳܐ ܫܐܺܝܠܬܳܐ܇ ܘܰܣܠܶܩ ܘܺܝܬܶܒ ܥܰܠ ܪܺܝܫ ܛܽܘܪܳܐ܇ ܐܰܝܟܳܐ ܕܶܐܡܰܪ ܗܘܳܐ ܠܦܳܪܽܘܩܰܢ ܕܗܳܠܶܝܢ ܟܽܠܗܶܝܢ ܠܳܟ ܝܳܗܶܒ ܐ̱ܢܳܐ ܐܶܢ ܬܶܣܓܽܘܕ ܠܺܝ܀

ܒܰܬܪ̈ܶܝܢ ܕܰܐܪ̈ܺܝܢ܇ ܠܰܬܪ̈ܶܝܢ ܙܟܳܐ ܗܘܳܐ ܒܰܬܪ̈ܶܝܢ ܓܰܒܺܝ̈ܢ܇ ܙܟܳܐ ܠܣܳܛܳܢܳܐ ܒܛܽܘܪܳܐ ܪܳܡܳܐ܇ ܘܰܫܦܶܠ ܚܽܘܬܪܶܗ ܕܰܙܟܳܐ ܠܳܐܕܳܡ܇ ܘܰܙܟܳܐ ܒܥܽܘܡܩܳܐ ܠܡܰܘܬܳܐ ܕܕܳܫܶܗ ܠܚܰܘܳܐ ܒܰܫܝܽܘܠ܀

ܬܠܳܬܳܐ ܕܰܐܪ̈ܶܐ܇ ܩܪܶܒ ܒܺܝܫܳܐ ܢܨܽܘܕܳܝܘܗ̱ܝ ܠܰܒܪܳܐ܇ ܒܪܶܚܡܰܬ ܟܶܣܦܳܐ ܘܪܶܚܡܰܬ ܟܰܪܣܳܐ܇ ܘܪܶܚܡܰܬ ܫܽܘܒܚܳܐ ܐܳܦ ܡܽܘܝܳܩܳܐ ܘܒܶܙܚܳܐ ܥܰܒܕܶܗ܀

ܢܶܚܫܽܘܠ ܙܰܝܢܳܐ܇ ܕܒܶܗ ܗܽܘ ܢܰܩܪܶܒ ܥܰܡ ܣܳܩܽܘܪܰܢ܇ ܠܗܺܝܩ ܗܽܘ ܒܺܝܫܳܐ ܠܡܰܘܒܳܕܽܘܬܰܢ܇ ܘܰܐܡܺܝܢ ܕܰܐܪܶܗ ܘܰܨܢܺܝܥ ܦܰܚܶܗ܇ ܒܨܰܘܡܳܐ ܕܚܽܘܒܳܐ܇ ܢܶܫܬܪܶܐ ܚܰܝܠܶܗ ܐܳܦ ܨܶܢܥ̈ܳܬܶܗ܀

ܥܰܙܺܝ ܒܺܝܫܳܐ܇ ܘܰܐܪܺܝܡ ܪܺܝܫܳܐ ܕܰܪܟܶܢ ܗܘܳܐ ܠܶܗ܇ ܘܰܚܙܳܐ ܟܺܠܝ̈ܠܶܐ ܕܰܒܢܰܝ̈ܢܳܫܳܐ܇ ܘܰܐܪܫܶܠܘ̱ ܫܰܒܩܽܘܗ̱ܝ ܘܶܐܬܰܘ ܘܰܡܠܰܘ܇ ܠܗܰܘ ܡܰܢ ܕܰܙܟܳܝܗ̱ܝ ܝܰܗܒ ܠܶܗ ܫܽܘܒܚܳܐ ܘܶܐܬܓܰܘܰܣܘ̱ ܒܶܗ܀

ܢܚܶܬ ܠܰܐܓܽܘܢܳܐ܇ ܕܢܰܛܥܶܐ ܒܗܳܕܶܐ ܠܰܒܥܶܠܕܰܪܳܐ܇ ܘܰܠܒܰܟ ܨܰܘܡܳܐ ܐܰܝܟ ܚܰܣܺܝܪܳܐ܇ ܘܰܣܒܰܪ ܒܺܝܫܳܐ ܕܠܰܘ ܐܰܠܳܗܳܐ܇ ܘܰܩܪܶܒ ܨܶܝܕܰܘ̈ܗ̱ܝ܇ ܟܰܕ ܡܢܰܣܶܐ ܠܶܗ ܐܰܝܟ ܒܰܪܢܳܫܳܐ܀

ܚܙܳܝܗ̱ܝ ܣܳܛܳܢܳܐ܇ ܠܒܰܪ ܐܰܠܳܗܳܐ ܕܰܡܚܺܝܠ ܘܬܰܚܽܘܒ܇ ܘܰܠܐܶܐ ܡܛܰܪܰܦ ܡܶܢܶܗ ܕܟܰܦܢܳܐ܇ ܘܰܣܒܰܪ ܥܠܰܘܗ̱ܝ ܕܠܰܘ ܐܰܠܳܗܰܐܗ̱ܘ ܒܰܪܢܳܫܳܐ ܗܰܘ ܓܶܝܪ ܕܗܳܐ ܚܳܙܶܐ ܐ̱ܢܳܐ܇ ܕܣܰܓܺܝ ܡܫܰܦܶܠ܀

ܫܽܘܒܚܳܐ ܠܳܟ ܡܳܪܝ̱܇ ܕܒܳܟ ܡܶܬܚܰܝܠܺܝܢ ܟܽܠ ܨܰܝ̈ܳܡܶܐ܇ ܘܒܳܟ ܗܽܘ ܙܳܟܶܝܢ ܠܰܒܥܶܠܕܰܪܳܐ܇ ܘܒܳܟ ܗܽܘ ܢܳܣܒܺܝܢ ܐܳܦ ܙܳܟܽܘܬܳܐ܇ ܒܪܺܝܟ ܐܰܢ̱ܬ ܒܰܐܒܽܘܟ܇ ܥܰܡ ܪܽܘܚܩܽܘܕܫܳܐ ܠܳܟ ܬܶܫܒܽܘܚܬܳܐ܀

 

ܐ̱ܚܪܺܢܳܐ ܒܩܳܠܳܐ ܐܳܕܳܡ ܚܛܳܐ ܘܰܩܢܳܐ ܥܽܘܢܺܝܬܳܐ ܒܪܺܝܟ ܕܰܙܟܳܐ ܠܚܽܘܬܪܶܗ ܕܣܳܛܳܢܳܐ ܒܪܺܝܟ ܕܣܰܚܦܶܗ ܠܪܳܡܽܘܬܶܗ ܕܒܺܝܫܳܐ

ܥܶܠܰܬ ܥܠܰܘܗ̱ܝ ܗܳܕܶܐ ܥܰܠ ܒܺܝܫܳܐ܇ ܕܶܐܢܗܽܘ ܕܰܐܠܳܗܳܐ ܘܰܟܦܶܢ ܠܶܗ܇ ܡܰܢܽܘ ܕܠܺܝ ܚܳܐܰܪ ܐܳܡܰܪ ܠܶܗ܇ ܕܟܺܐܦ̈ܶܐ ܢܶܗܘܝ̈ܳܢ ܠܰܚܡܳܐ ܘܶܐܬܬܰܪܣܶܐ܇ ܡܰܢܽܘ ܛܥܶܢ ܝܽܘܩܪܳܐ ܕܟܰܦܢܽܘܬܶܗ܀

ܥܰܠ ܗܳܝ ܫܶܬܶܐܣܬܳܐ ܕܫܽܘܪܳܝܳܐ܇ ܡܳܪܰܢ ܒܢܳܐ ܘܰܣܠܶܩ ܢܶܨܚܳܢܰܘ̈ܗ̱ܝ ܟܰܕ ܓܶܝܪ ܐܶܫܬܰܚܠܰܦ ܕܰܓܳܠܳܐ܇ ܠܳܐ ܫܰܚܠܦܶܗ ܥܰܡܶܗ ܠܰܫܪܳܪܶܗ ܘܰܫܪܳܪܳܐ ܢܨܰܚ ܘܙܺܐܦܳܐ ܐܶܬܦܰܪܰܣ܀

ܪܺܝܫܳܐ ܕܟܽܠܗܽܘܢ ܕܰܝ̈ܘܶܐ ܐܰܩܪܶܒ ܥܰܡܶܗ܇ ܕܳܐܘ ܙܳܟܶܐ ܘܢܳܣܶܒ ܡܰܠܟܽܘܬܳܐ܇ ܐܳܘ ܡܶܙܕܟܶܐ ܘܡܶܫܬܪܶܐ ܫܽܘܠܛܳܢܶܗ܇ ܘܡܶܫܬܰܩܠܳܐ ܡܶܢܶܗ ܡܰܠܟܽܘܬܶܗ܇ ܒܪܺܝܟ ܕܰܙܟܳܝܗ̱ܝ ܘܥܰܒܕܶܗ ܗܘܳܐ ܕܝܳܫܳܐ܀

ܨܳܡ ܡܳܪܰܢ ܐܰܪܒܥܺܝܢ ܐܺܝܡܳܡܺܝ̈ܢ܇ ܕܒܰܣܪܳܗܿ ܗܘܳܐ ܠܝܰܥܢܽܘܬܶܗ ܕܳܐܕܳܡ܇ ܘܥܰܠ ܕܶܐܟܰܠ ܐܶܫܬܕܺܝ ܡܶܢ ܪܰܘܡܳܐ܇ ܨܳܡ ܚܠܳܦܰܘܗ̱ܝ ܘܰܐܣܩܶܗ ܠܰܫܡܰܝܳܐ܇ ܒܪܺܝܟ ܚܽܘܒܶܗ ܟܡܳܐ ܪܰܚܡܶܗ ܘܦܰܪܩܶܗ܀

 

ܐ̱ܚܪܺܢܳܐ ܒܩܳܠܳܐ ܐܰܚ̈ܰܝ ܒܰܟܬܳܒ̈ܶܐ ܥܽܘܢܺܝܬܳܐ ܒܪܺܝܟ ܒܽܘܟܪܳܐ ܕܝܰܗܒܠܰܢ܇ ܨܰܘܡܳܐ ܚܠܳܦ ܙܰܝܢܳܐ

ܐܰܛܥܺܝ ܗܘܳܐ ܚܶܘܝܳܐ܇ ܠܚܰܘܳܐ ܒܦܰܪܕܰܝܣܳܐ܇ ܘܩܶܛܦܰܬ݀ ܗܘܳܬ݀  ܦܺܐܪܳܐ܇ ܘܶܐܟܠܰܬܶܗ ܘܝܶܗܒܰܬ݀ ܠܳܐܕܳܡ܇ ܘܶܐܫܬܠܰܚ ܡܶܢܗܽܘܢ܇ ܐܶܣܛܰܠ ܬܶܫܒܽܘܚܬܳܐ܇ ܨܳܡ ܗܘܳܐ ܒܽܘܟܪܳܐ ܘܦܰܪܥܶܗ܇ ܠܚܰܘܒܬܳܐ ܕܚܰܝܳܒܳܐ܇ ܐܳܦ ܩܰܕܕܶܗ ܠܶܐܫܛܳܪܶܗ܀

ܓܰܪܓܶܗ ܡܳܪܽܘܕܳܐ܇ ܠܦܶܪܰܩ ܒܶܪ̈ܝܳܬܳܐ܇ ܘܣܰܚܦܶܗ ܘܰܐܗܶܠ ܒܶܗ ܇ܐܳܦ ܥܰܒܕܶܗ ܕܝܳܫܳܐ܇ ܐܰܣܩܶܗ ܥܰܠ ܟܶܢܦܳܐ܇ ܕܗܰܝܟܠܳܐ ܕܰܢܢܰܣܺܝܘܗ̱ܝ܇ ܘܶܐܡܰܪ ܠܶܗ ܕܶܐܢܗܽܘ܇ ܬܶܦܶܠ ܬܶܣܓܽܘܕ ܠܺܝ܇ ܫܽܘܠܛܳܢܝ̱ ܠܳܟ ܐܶܬܶܠ܀

ܗܳܐ ܟܬܺܝܒ ܒܰܣܦܰܪ ܐܳܫܺܝܪ܇ ܐܳܡܰܪ ܡܳܪܽܘܕܳܐ܇ ܕܡܰܠܰܐܟܰܘ̈ܗ̱ܝ ܡܦܰܩܶܕ܇ ܕܥܰܠ ܕܪ̈ܳܥܰܝܗܽܘܢ ܢܶܫܩܠܽܘܢܳܟ܇ ܒܶܐܒܪ̈ܰܘܗ̱ܝ ܡܦܰܨܶܐ ܠܳܟ܇ ܒܟܢܶܦܰܘ̈ܗ̱ܝ ܡܣܰܬܰܪ ܠܳܟ܇ ܕܪܶܓܠܳܟ ܠܳܐ ܬܶܬܩܶܠ܇ ܒܟܺܐܦܳܐ ܠܳܐ ܬܰܗܰܪ܇ ܒܪܺܝܟ ܕܣܰܚܦܶܗ ܠܚܰܝܠܶܗ܀

ܙܰܝܢܳܐ ܥܰܬܶܕ ܗܘܳܐ܇ ܒܺܝܫܳܐ ܠܽܘܩܒܰܠ ܡܳܪܶܗ܇ ܘܶܐܬܳܐ ܕܢܰܩܪܶܒ ܗܘܳܐ܇ ܓܠܳܐ ܥܰܡ ܓܰܘܙܰܠܬܳܐ܇ ܘܶܐܬܕܪ̈ܰܝ ܐܰܝܟ ܥܽܘܪܳܐ܇ ܕܦܳܪܰܚ ܡܶܢ ܩܕܳܡ ܪܽܘܚܳܐ܇ ܕܰܡܚܳܝܗ̱ܝ ܪܺܝܚ ܨܰܘܡܶܗ܇ ܕܰܒܪܳܐ ܕܶܐܬܡܰܟܰܟ ܕܢܶܦܪܽܘܩ ܗܘܳܐ ܠܳܐܕܳܡ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܨܳܡ ܗܘܳܐ ܐܰܪܒܥܺܝܢ ܟܰܕ ܠܳܐ ܣܢܺܝܩ ܗܘܳܐ ܡܶܛܽܠ ܨܰܘܡܳܐ܇ ܐܶܠܳܐ ܕܠܰܢ ܗܽܘ ܢܶܕܪܽܘܫ ܐܽܘܪܚܳܐ ܡܰܚܝܳܢܺܝܬܳܐ܇ ܗܽܘܝܽܘ ܡܳܪܶܐ ܘܰܡܩܰܒܠܳܢܳܐ ܕܰܨܠܰܘ̈ܳܬܳܐ܇ ܕܗܽܘ ܨܳܡ ܐܰܪܒܥܺܝܢ ܕܰܢܚܰܘܶܐ ܠܰܢ ܕܨܰܘܡܳܐ ܙܰܝܢܰܐܗ̱ܘ܀

ܫܽܘܒܚܳܐ ܠܳܟ ܡܳܪܝ̱ ܘܠܰܐܒܽܘܟ ܕܫܰܠܚܳܟ ܥܰܠ ܦܽܘܪܩܳܢܰܢ܇ ܘܣܶܓܕܬܳܐ ܠܪܽܘܚܳܐ ܕܕܰܒܪܳܟ ܕܬܺܐܙܰܠ ܠܰܐܬܪܳܐ ܚܽܘܪܒܳܐ܇ ܒܪܺܝܟ ܫܽܘܠܛܳܢܳܟ ܕܰܣܚܰܦ ܚܰܝܠܶܗ ܕܳܐܟܶܠܩܰܪܨܳܐ܇ ܣܓܺܝܕ ܐܰܢ̱ܬ ܒܰܐܒܽܘܟ ܥܰܡ ܪܽܘܚܩܽܘܕܫܳܐ ܠܳܟ ܬܶܫܒܽܘܚܬܳܐ܀

 

ܩܰܘܡܳܐ ܕܰܬܪܶܝܢ

ܕܠܺܠܝܳܐ ܒܩܳܠܳܐ ܠܡܰܪܝܰܡ ܝܳܠܕܰܬ ܐܰܠܳܗܳܐ

ܚܰܢܳܢܳܐ ܕܨܳܡ ܥܰܠ ܐܰܦܰܝ̈ܢ܇ ܐܰܪܒܥܺܝܢ ܝܰܘ̈ܡܺܝܢ܇ ܒܰܚܢܳܢܳܟ ܩܰܒܶܠ ܨܰܘܡܰܢ ܕܰܐܪܒܥܺܝܢ ܝܰܘܡܺܝ̈ܢ܇ ܘܰܐܝܟ ܨܰܘܡܰܝ̈ܗܽܘܢ ܕܰܢܒܺܝ̈ܶܐ ܐܶܬܪܰܥܺܝܬ ܒܗܽܘܢ܇ ܐܶܬܪܰܥܳܐ ܒܨܰܘܡܰܢ ܡܳܪܰܢ ܘܚܰܣܳܐ ܚܰܘܒܰܝ̈ܢ܀

ܡܶܬܟܰܫܦܺܝܢܰܢ ܠܳܟ ܡܳܪܰܢ ܥܢܺܝ ܠܰܢ ܥܰܒܕܰܝ̈ܟ܇ ܘܩܰܒܶܠ ܨܰܘܡܰܢ ܘܰܨܠܽܘܬܰܢ ܬܶܥܽܘܠܝ̱ ܩܕܳܡܰܝܟ܇ ܒܳܟ ܢܶܬܦܰܢܝ̈ܳܢ ܫܶܐܠ̈ܳܬܰܢ ܡܶܢ ܒܶܝܬ ܓܰܙܳܟ܇ ܘܢܺܐܬܶܐ ܠܰܢ ܚܢܳܢܳܐ ܘܪ̈ܰܚܡܶܐ ܘܚܽܘܣܳܝ ܚܰܘ̈ܒܶܐ܀

 

ܡܰܕܪܳܫܳܐ ܒܩܳܠܳܐ ܝܰܘܡܳܟ ܠܳܟ ܕܳܡܶܐ ܥܽܘܢܺܝܬܳܐ ܒܪܺܝܟ ܗܽܘ ܕܶܐܬܢܰܣܺܝ ܡܶܢ ܣܳܛܳܢܳܐ܇ ܒܪܺܝܟ ܕܰܙܟܳܝܗ̱ܝ ܘܥܰܒܕܶܗ ܒܶܙܚܳܐ ܠܥܰܒܕܰܘ̈ܗ̱ܝ

ܐܰܠܳܗܰܢ ܚܠܳܦܰܝܢ܇ ܨܳܡ ܥܰܠ ܐܰܦܰܝ̈ܢ܇ ܘܦܰܓܪܳܢܳܐܺܝܬ ܟܦܶܢ܇ ܘܩܰܒܶܠ ܠܶܐܘܬܳܐ܇ ܘܥܰܠ ܗܳܝ ܣܳܛܳܢܳܐ ܩܪܶܒ ܕܰܢܢܰܣܺܝܘܗ̱ܝ܇ ܠܗܰܘ ܒܳܚܰܪ ܠܶܒܳܐ ܥܰܡ ܟܽܘܠܝ̈ܳܬܳܐ܀

ܐܶܢ ܐܰܢ̱ܬ ܗܽܘ ܐܺܝܬܰܝܟ ܒܪܳܐ ܕܰܐܠܳܗܳܐ܇ ܐܶܡܰܪ ܣܳܛܳܢܳܐ ܒܰܢܟܺܝܠܽܘܬܶܗ܇ ܕܰܚܙܳܐ ܕܰܟܦܶܢ ܠܶܗ ܐܰܝܟ ܒܰܪܢܳܫܳܐ܇ ܘܰܬܗܰܪ ܠܶܗ ܒܨܰܘܡܶܗ ܕܰܟܡܳܐ ܦܐܶܐ ܗܘܳܐ܀

ܚܙܳܐ ܗܘܳܐ ܠܡܰܟܺܝܟܳܐ ܘܰܪܗܶܛ ܚܰܘܝܶܗ܇ ܟܽܠܗܶܝܢ ܡܰܠܟܘ̈ܳܬܳܐ ܕܟܽܠܳܗܿ ܐܰܪܥܳܐ܇ ܘܗܳܠܶܝܢ ܚܰܘܺܝ ܠܶܗ ܘܶܐܫܬܰܘܕܺܝ ܠܶܗ܇ ܕܗܳܠܶܝܢ ܐܶܬܶܠ ܠܳܟ ܐܶܢ ܬܶܣܓܽܘܕ ܠܺܝ܀

ܡܳܪܰܢ ܦܰܢܺܝ ܠܶܗ ܡܰܟܺܝܟܳܐܺܝܬ܇ ܠܗܰܘ ܕܰܐܛܥܺܝ ܘܫܰܦܶܠ ܠܰܒܢ̈ܰܝ ܐ̱ܢܳܫ̈ܳܐ܇ ܕܰܠܡܳܪܝܳܐ ܡܳܪܳܟ ܒܰܠܚܽܘܕ ܬܶܣܓܽܘܕ܇ ܘܠܶܗ ܗܽܘ ܒܰܠܚܽܘܕܰܘܗ̱ܝ ܒܕܰܟܝܽܘ ܬܶܦܠܽܘܚ܀

ܐܰܚ̈ܰܝ ܢܶܗܘܶܐ ܠܰܢ ܕܰܐܪܶܗ ܪܰܒܳܐ܇ ܕܽܘܡܝܳܐ ܘܡܰܚܙܺܝܬܳܐ܇ ܘܙܰܝܢܳܐ ܪܰܒܳܐ܇ ܕܒܶܗ ܢܶܙܟܶܐ ܠܒܺܝܫܳܐ ܕܡܰܩܪܶܒ ܥܰܡܶܢ܇ ܘܒܶܗ ܢܶܣܰܒ ܟܠܺܝܠܳܐ ܡܠܶܐ ܢܶܨܚ̈ܳܢܶܐ܀

ܡܳܪܰܢ ܕܰܙܟܰܝܬܳܝܗ̱ܝ ܠܳܐܟܶܠܩܰܪܨܳܐ ܗܰܒ ܠܰܢ ܙܳܟܽܘܬܳܐ ܥܰܠ ܨܶܢܥ̈ܳܬܶܗ܇ ܘܰܐܝܟ ܕܰܣܚܰܦܬܳܝܗ̱ܝ ܡܳܪܝ̱ ܒܕܰܐܪܳܟ ܕܥܰܡܶܗ܇ ܣܚܽܘܦ ܡܶܢܰܢ ܚܰܝܠܶܗ ܕܡܰܩܪܶܒ ܥܰܡܶܢ܀

 

ܣܽܘܓܺܝܬܳܐ ܒܩܳܠܳܐ ܐܰܝܢܰܘ ܕܢܰܓܺܝܪܳܐ ܥܶܢܝܳܢܳܐ ܫܽܘܒܚܳܐ ܠܚܳܐܶܢ ܟܽܠ ܡܶܢ ܟܽܠ ܕܡܳܪܰܐܗ̱ܘ ܕܟܽܠ

ܐܶܫܰܐܶܠ ܒܟܽܠ ܦܽܘܡ̈ܺܝܢ܇ ܘܶܐܣܰܒ ܒܟܽܠ ܦܽܘܪ̈ܣܺܝܢ܇ ܐܰܘܕܶܐ ܒܟܽܠ ܥܶܠ̈ܳܢ܇ ܘܶܐܙܡܰܪ ܒܟܽܠ ܩܳܠܺܝ̈ܢ܇ ܫܽܘܒܚܳܐ ܒܟܽܠ ܩܺܝ̈ܢܳܢ܀

ܓܰܠܝܳܐܗ̱ܝ ܕܒܰܣܺܝܡ ܐܰܢ̱ܬ܇ ܓܰܠܝܳܐܗ̱ܝ ܕܚܰܢܳܢܳܐ ܐܰܢ̱ܬ܇ ܓܰܠܝܳܐܗ̱ܝ ܛܰܝܒܽܘܬܳܟ܇ ܓܢܺܝܙܳܐܗ̱ܝ ܪܰܒܽܘܬܳܟ܇ ܓܡܺܝܪܳܐܗ̱ܝ ܡܰܘܗܰܒܬܳܟ܀

ܗܰܒܠܺܝ ܕܫܳܐܶܠ ܐ̱ܢܳܐ܇ ܗܰܝܡܢܿܶܬ ܕܢܳܣܶܒ ܐ̱ܢܳܐ܇ ܗܳܠܶܝܢ ܕܡܶܬܒܰܥܝ̈ܳܢ܇ ܗܳܐ ܫܳܐܠܺܝܢ ܪ̈ܶܓܫܰܝ܇ ܕܗܳܟܰܢ ܨܒܰܘ ܪ̈ܰܚܡܰܝܟ܀

ܗܰܒ ܠܺܝ ܕܶܐܗܘܶܐ ܠܳܟ܇ ܬܰܠܡܺܝܕ ܫܰܪܺܝܪܳܐ܇ ܘܶܐܣܢܶܐ ܕܡܶܬܚܰܙܝ̈ܳܢ܇ ܘܶܐܪܚܰܡ ܕܰܥܬܺܝܕ̈ܳܢ܇ ܠܘܳܬ ܩܽܘܫܬܳܟ ܐܰܦܢܳܢܝ̱܀

ܗܰܒܠܺܝ ܕܠܳܟ ܐܶܚܽܘܪ܇ ܡܰܪܘܰܚ ܠܰܐܠܺܝ̈ܨܶܐ܇ ܘܰܠܗܰܘ ܬܽܘܒ ܒܽܘܟܪܳܟ܇ ܡܰܣܒܰܥ ܠܰܨܪ̈ܺܝܟܶܐ ܣܢܺܝܩܽܘܬܝ̱ ܬܶܗܘܶܐ ܠܳܟ܀

ܦܰܨܢܳܝ̱ ܡܶܢ ܘܳܝ̈ܶܐ܇ ܕܝܳܕܥ̈ܰܝ ܢܳܡܽܘܣܳܐ܇ ܕܺܝܕܰܥܘ̱ ܨܶܒܝܳܢܳܟ܇ ܘܠܳܐ ܨܒܰܘ ܒܰܢܝܳܚܳܟ܇ ܨܒܺܝ ܒܺܝ ܕܰܐܘܕܶܐ ܠܳܟ܀

ܕܳܚܶܠ ܐ̱ܢܳܐ ܕܶܐܩܪܶܐ܇ ܒܰܕܠܳܐ ܥܳܒܶܕ ܐ̱ܢܳܐ܇ ܘܪܳܚܶܡ ܐ̱ܢܳܐ ܕܶܐܗܡܽܘܣ܇ ܒܳܥܶܢܰܝܢ ܝܽܘܠܦܳܢܳܟ܇ ܫܰܪܰܪ ܒܺܝ ܚܽܘܒܳܟ܀

ܐܺܝܬ ܗܽܘ ܚܰܟܺܝ̈ܡܶܐ܇ ܣܳܦܪ̈ܰܝ ܒܰܟܬܳܒ̈ܶܐ܇ ܕܬܰܪܓܶܡܘ̱ ܠܰܐ̱ܚܪ̈ܳܢܶܐ܇ ܘܰܒܗܶܬܘ̱ ܒܰܥܒ̈ܳܕܶܐ܇ ܥܒܶܕܰܝܢܝ̱ ܕܫܳܘܶܐ ܠܳܟ܀

ܣܰܓܺܝ ܩܳܪܶܐ ܐ̱ܢܳܐ܇ ܟܰܕ ܠܳܐ ܥܳܒܶܕ ܐ̱ܢܳܐ܇ ܘܫܳܚܶܩ ܐ̱ܢܳܐ ܠܡܶܕܰܥ܇ ܘܦܳܐܶܫ ܐ̱ܢܳܐ ܠܡܶܣܥܰܪ܇ ܫܰܪܪܳܟ ܢܗܶܐ ܣܽܘܥܪܳܢܝ̱܀

ܢܚܽܘܣܽܘܢ ܥܰܠ ܫܰܦܠܽܘܬܝ̱܇ ܥܳܐܠ̈ܰܝ ܠܰܓܢܽܘܢܳܐ܇ ܘܰܚܠܳܦܰܝ ܢܦܺܝܣܽܘܢ ܠܡܳܪܶܗ ܕܰܓܢܽܘܢܳܐ܇ ܠܳܐ ܐܶܫܬܕܶܐ ܠܰܓܡܳܪ܀

ܩܶܫܬܳܐ ܗܶܦܟܳܐܺܝܬ܇ ܠܶܒܟܰܬ݀ ܒܰܩܪܳܒܳܐ܇ ܘܠܽܘܩܒܰܠܝ̱ ܫܳܕܶܐ ܐ̱ܢܳܐ܇ ܠܚܰܝ̈ܰܝ ܩܳܛܶܠ ܐ̱ܢܳܐ܇ ܐܰܚܳܢܝ̱ ܒܦܽܘܪܩܳܢܳܟ܀

ܪܽܘܡܚܳܐ ܒܰܫܢܳܢܳܗܿ܇ ܠܶܒܟܰܬ݀ ܕܶܐܬܟܰܬܰܫ܇ ܠܪ̈ܳܕܽܘܦܰܝ ܒܥܺܝܿܬ ܕܶܐܡܚܶܐ܇ ܘܺܐܝܕܝ̱ ܕܺܝܠܝ̱ ܐܶܬܒܰܙܥܰܬ݀܇ ܕܶܐܢܳܐ ܥܠܰܝ ܩܳܡܿܶܬ܀

ܠܳܐ ܚܙܶܐ ܠܺܝ ܡܶܡܬܽܘܡ܇ ܨܶܒܝܳܢܝ̱ ܕܺܝܠܝ̱܇ ܘܠܺܝ ܡܶܢܝ̱ ܝܳܠܶܦ ܐ̱ܢܳܐ܇ ܝܽܘܠܦܳܢܝ̱ ܓܶܝܪ ܣܽܘܓܦܳܢܝ̱܀

ܠܫܶܡܫܽܘܢ ܕܳܡܶܐ ܐ̱ܢܳܐ܇ ܕܰܓܠܳܐ ܨܶܒܝܳܢܶܗ܇ ܕܰܒܡܶܕܶܡ ܕܰܐܠܶܦ ܩܰܛܠܽܘܗ̱ܝ ܪ̈ܳܕܽܘܦܰܘܗ̱ܝ܇ ܓܶܕ ܡܳܪܝ̱ ܚܽܘܫ̈ܳܒܰܝ܀

ܥܰܫܺܝܢ ܗܘܳܐ ܚܰܝܠܶܗ ܕܫܶܡܫܽܘܢ ܓܰܢ̱ܒܳܪܳܐ ܘܶܐܠܦ̈ܶܐ ܐ̱ܢܳܫ̈ܳܐ ܠܶܗ܇ ܓ̈ܶܠܶܐ ܚܫܺܝܒܺܝܢ ܗ̱ܘܰܘ܇ ܘܰܒܚܺܝܠ ܡܳܪܶܗ ܙܟܳܐ܀

ܠܳܐ ܐܶܫܟܰܚܘ̱ ܨܳܕ ܗ̱ܘܰܘ܇ ܠܫܶܡܫܽܘܢ ܒܟܽܠ ܦܽܘܪ̈ܣܺܝܢ܇ ܥܕܰܡܳܐ ܕܗܽܘ ܐܰܘܚܶܕ܇ ܢܰܦܫܶܗ ܠܩܳܛܽܘ̈ܠܰܘܗ̱ܝ܇ ܕܡܶܢܶܗ ܘܠܶܗ ܚܰܣܢܽܘܗ̱ܝ܀

ܨܺܝܪ ܗܘܳܐ ܒܰܩܪܳܒܳܐ܇ ܕܫܶܡܫܽܘܢ ܬܰܟܬܽܘܫܳܟ܇ ܘܬܰܡܳܢ ܐܳܦ ܒܺܝܫܳܐ܇ ܗܳܢܳܐ ܕܫܳܓܶܫ ܠܺܝ܇ ܕܡܶܢܝ̱ ܕܺܝܠܝ̱ ܚܳܐܶܒ ܐ̱ܢܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܚܰܘܺܝ ܠܰܢ ܒܰܪ ܐܰܠܳܗܳܐ܇ ܨܰܘܡܳܐ ܒܪܺܝܟܳܐ ܒܰܩܢܽܘܡܶܗ܇ ܩܰܒܶܠ ܗܘܳܐ ܐܰܪܒܥܺܝܢ ܝܰܘܡ̈ܺܝܢ܇ ܕܨܳܡܽܘܗ̱ܝ ܟܺܐܢ̈ܶܐ ܘܙܰܕܺܝ̈ܩܶܐ܀

ܒܚܰܫܳܐ ܘܕܶܡܥ̈ܶܐ ܩܰܒܶܠܢܰܢ܇ ܠܨܰܘܡܳܐ ܕܝܰܘ̈ܡܳܬܳܐ ܐܰܪܒܥܺܝܢ܇ ܘܰܒܚܰܫܶܗ ܕܰܒܪܳܐ ܢܶܚܰܫ܇ ܕܥܰܡܶܗ ܢܶܚܕܶܐ ܒܝܽܘܡ ܦܶܨܚܶܗ܀

 

ܡܰܘܪܒܳܐ ܕܠܺܠܝܳܐ ܩܳܠܳܐ ܛܽܘܒܰܝܟܝ̱ ܡܰܪܝܰܡ ܒܰܪܬ

ܡܫܺܝܚܳܐ ܕܶܐܬܳܐ ܠܦܽܘܪܩܳܢܰܢ ܘܰܒܝܰܕ ܨܰܘܡܶܗ܇ ܙܟܳܝܗ̱ܝ ܠܳܐܟܶܠܩܰܪܨܳܐ܇ ܗܰܒܠܰܢ ܦܳܪܽܘܩܰܢ܇ ܕܰܒܨܰܘܡܳܐ ܢܶܙܟܶܐ ܠܒܺܝܫܳܐ ܕܡܰܩܪܶܒ ܥܰܡܶܢ܀

ܗܰܒܠܰܢ ܦܳܪܽܘܩܰܢ ܕܰܢܨܽܘܡ܇ ܨܰܘܡܳܐ ܕܰܟܝܳܐ܇ ܕܫܳܦܰܪ ܠܺܐܝܩܳܪܳܟ ܘܩܰܒܶܠ ܬܶܫܡܶܫܬܰܢ ܘܰܦܬܰܚ ܬܰܪܥܳܟ ܠܰܨܠܽܘܬܰܢ܇ ܘܪܰܚܶܡܥܠܰܝܢ܀

ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ ܥܒܶܕ ܒܰܚܢܳܢܳܟ܇ ܢܝܳܚܳܐ ܘܕܽܘܟܪܳܢܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ܇ ܕܶܐܟܰܠܘ̱ ܦܰܓܪܳܟ ܩܰܕܺܝܫܳܐ܇ ܘܶܐܫܬܺܝܘ ܠܰܕܡܳܟ܀

ܡܳܪܰܢ ܡܳܪܳܐ ܕܡܰܠܰܐܟ̈ܶܐ܇ ܫܡܰܥ ܒܳܥܽܘܬܰܢ܇ ܘܩܰܒܶܠ ܬܶܫܡܶܫܬܰܢ ܘܶܐܬܪܰܚܶܡܥܠܰܝܢ ܒܰܨܠܽܘܬ ܐܶܡܳܐ ܕܺܝܠܶܕܬܳܟ ܘܰܕܩܰܕܺܝ̈ܫܰܝܟ܀

 

ܕܨܰܦܪܳܐ ܕܪܰܚܶܡܥܠܰܝ ܒܩܳܠܳܐ ܚܛܺܝܬ ܠܳܟ ܚܳܐܶܢ

ܒܪܳܐ ܕܶܐܬܬܰܚܬܺܝ ܒܛܰܝܒܽܘܬܶܗ܇ ܘܨܰܘܡܳܐ ܠܒܶܟ ܗܘܳܐ ܡܶܛܽܠ ܦܽܘܪܩܳܢܰܢ܇ ܡܳܪܝܳܐ ܡܳܪܶܗ܀

ܡܫܺܝܚܳܐ ܕܨܳܡ ܘܰܙܟܳܐ ܠܒܺܝܫܳܐ ܕܰܩܪܶܒ ܢܰܣܝܶܗ܇ ܘܰܣܚܰܦ ܪܳܡܽܘܬܶܗ܇ ܚܰܝܶܠ ܐܳܦ ܠܰܢ ܒܝܰܕ ܚܰܝܠܳܟ܇ ܘܪܰܚܶܡܥܠܰܝܢ܀

ܫܽܘܒܚܳܐ ܠܡܽܘܟܳܟܳܟ ܡܳܪܰܢ܇ ܕܰܟܦܶܦ ܘܰܫܪܳܐ܇ ܠܚܰܝܠܶܗ ܕܰܢܟܺܝܠܳܐ ܡܳܪܝܳܐ܀

ܐܰܝܟ ܚܰܛܳܝܬܳܐ ܓܳܥܶܐ ܐ̱ܢܳܐ ܗܰܘ ܡܳܟܣܳܐ ܡܶܬܟܰܫܰܦ ܐ̱ܢܳܐ ܠܳܟ܀

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ܇ ܕܰܟܡܳܐ ܐܰܪܟܢܽܘܟ ܡܶܛܽܠ ܦܽܘܪܩܳܢܰܢ܀

 

ܐܰܠܳܗܝ̱ ܐܰܠܳܗܝ̱ ܒܩܳܠܳܐ ܡܰܠܰܐܟܳܐ ܕܢܽܘܗܪܳܐ

ܐܰܠܳܗܳܐ ܕܰܒܨܰܘܡܳܐ ܥܰܙܺܝ ܘܥܰܡ ܡܢܰܣܝܳܢܳܐ ܬܰܟܬܽܘܫܳܐ ܠܒܶܟ ܗܰܒܠܰܢ ܡܳܪܰܢ ܕܰܒܨܰܘܡܳܐ ܢܶܫܦܰܪ ܠܳܟ܇ ܘܢܶܙܟܺܝܘ ܠܰܒܥܶܠܕܰܪܳܐ܇ ܕܡܰܩܪܶܒ ܥܰܡܶܢ܀

ܐܰܠܳܗܳܐ ܕܡܶܛܽܠ ܦܽܘܪܩܳܢܰܢ܇ ܕܰܐܪܳܐ ܥܒܰܕ ܗܘܳܐ ܥܰܡ ܣܳܛܳܢܳܐ܇ ܘܫܽܘܠܛܳܢܶܗ ܒܰܐܪܥܳܐ ܣܚܰܦ ܘܰܫܕܳܐ܇ ܒܰܛܶܠ ܡܶܢܰܢ ܢܶܟܠܰܘ̈ܗ̱ܝ ܘܕܰܥܶܟ ܨܶܢܥ̈ܳܬܶܗ܀

ܒܥܳܢܘܳܝܽܘܬܳܐ ܫܰܪܺܝܪܬܳܐ܇ ܘܰܢܙܺܝܪܽܘܬܳܐ ܐܰܠܳܗܳܝܬܳܐ܇ ܐܰܫܘܳܐ ܠܟܽܠܰܢ ܕܢܶܫܦܰܪ ܠܳܟ܇ ܕܰܒܝܰܕ ܕܶܡܥ̈ܶܐ ܢܚܰܘܰܪ ܟܽܘܬܡ̈ܳܬܰܢ܀

ܠܟܽܠܗܽܘܢ ܪ̈ܶܓܫܰܝܢ ܘܚܽܘ̈ܫܳܒܰܝܢ܇ ܒܕܶܚܠܬܳܟ ܣܰܬܶܬ ܡܳܪܶܐ ܟܽܠ܇ ܘܰܒܨܰܘܡܳܐ ܕܡܶܢ ܒܺܝ̈ܫܳܬܳܐ܇ ܐܰܫܘܳܐ ܠܟܽܠܰܢ ܕܢܶܫܦܰܪ ܠܳܟ܇ ܐܰܢ̱ܬ ܠܳܐ ܡܳܝܽܘܬܳܐ܀

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܇ ܠܰܐܒܳܗܰܝ̈ܢ ܘܰܐܚ̈ܰܝܢ ܕܰܫܟܶܒܘ̱܇ ܘܰܢܩܽܘܡܽܘܢ ܡܶܢ ܝܰܡܺܝܢܳܟ܇ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ ܘܪܰܚܶܡܥܠܰܝܢ܀

ܫܽܘܒܚܳܐ ܢܰܣܶܩ ܠܶܗ ܠܰܐܒܳܐ܇ ܘܬܰܘܕܺܝܬܳܐ ܠܰܒܪܳܐ ܕܡܶܢܶܗ܇ ܘܰܠܪܽܘܚܩܽܘܕܫܳܐ ܗܽܘܠܳܠܳܐ܇ ܚܰܕ ܐܰܠܳܗܳܐ ܫܰܪܺܝܪܳܐ܇ ܕܠܶܗ ܗܽܘ ܡܫܰܒܚܺܝܢܰܢ܀

 

ܫܡܰܝ̈ܳܐ ܡܶܫܬܰܥܶܝܢ ܒܩܳܠܳܐ ܒܪܳܐ ܕܰܫܪܳܐ ܒܡܰܪܒܥܳܐ

ܟܺܐܢ̈ܶܐ ܕܰܢܨܰܚܘ̱ ܒܰܒܪܺܝܬܳܐ܇ ܘܠܰܐܠܳܗܳܐ ܫܦܰܪܘ̱ ܒܨܰܘܡܰܝ̈ܗܽܘܢ܇ ܒܝܰܕ ܨܰܘܡܳܐ ܫܩܰܠܘ̱ ܢܶܨܚ̈ܳܢܶܐ܇ ܘܶܐܬܟܰܫܰܪܘ̱ ܒܰܥܒܳܕܰܝ̈ܗܽܘܢ܇ ܡܒܰܪܰܟ܀

ܫܦܰܪ ܡܶܠܟܺܝܙܕܶܩ ܠܰܐܠܳܗܳܐ܇ ܒܨܰܘܡܳܐ ܕܰܡܠܶܐ ܦܽܘܪܫܳܢܳܐ܇ ܘܩܰܪܶܒ ܠܶܗ ܠܰܚܡܳܐ ܘܚܰܡܪܳܐ܇ ܘܨܳܪ ܐ̱ܪܳܙܳܐ ܕܦܰܓܪܶܗ ܘܰܕܡܶܗ ܡܒܰܪܰܟ܀

ܓܒܰܘ ܫܳܡܪܺܝܢ ܨܳܡ ܐܶܠܺܝܫܳܥ܇ ܘܺܐܠܺܝܳܐ ܒܛܽܘܪܳܐ ܕܟܰܪܡܠܳܐ܇ ܘܰܫܦܰܪ ܠܡܳܪܝܳܐ ܨܰܘܡܰܝ̈ܗܽܘܢ܇ ܘܶܐܬܪܰܚܰܡ ܥܰܠ ܒܶܪ̈ܝܳܬܳܐ܀

ܨܳܡ ܡܳܪܰܢ ܟܰܕ ܠܳܐ ܣܢܺܝܩ ܗܘܳܐ܇ ܘܰܒܨܰܘܡܶܗ ܙܟܳܝܗ̱ܝ ܠܰܢܟܺܝܠܳܐ ܕܰܢܚܰܘܶܐ ܚܰܝܠܶܗ ܕܰܟܣܶܐ ܒܨܰܘܡܳܐ ܕܰܡܠܶܐ ܦܽܘܪܫܳܢܳܐ ܡܒܰܪܰܟ܀

ܒܥܽܘ̈ܒܶܐ ܐܰܒܪ̈ܳܗܳܡܳܝܶܐ܇ ܘܒܰܡ̈ܛܰܐܠܶܐ ܢܰܗܺܝܪ̈ܳܬܳܐ܇ ܐܰܫܪܳܐ ܡܳܪܝܳܐ ܠܣܳܓܽܘ̈ܕܰܝܟ ܕܶܐܫܬܰܘܬܰܦܘ̱ ܒܦܰܓܪܳܟ ܘܰܕܡܳܟ܀

ܒܫܽܘܪܳܝܰܢ ܘܰܒܫܽܘܠܳܡܰܢ܇ ܠܳܟ ܬܶܫܒܽܘܚܬܳܐ ܓܳܒܽܘܠܰܢ܇ ܕܰܒܨܶܒܝܳܢܳܟ ܚܳܐܶܝܢܰܢ܇ ܘܕܰܫܦܰܪ ܠܳܟ ܗܳܐ ܡܳܝܬܺܝܢܰܢ ܡܒܰܪܰܟ ܐܰܢ̱ܬ ܡܳܪܝܳܐ܀

 

ܬܶܫܒܽܘܚܬܳܐ ܚܕܰܬܳܐ ܒܩܳܠܳܐ ܢܽܘܗܪܳܐ ܕܡܶܢ ܢܽܘܗܪܳܐ

ܡܫܺܝܚܳܐ ܐܰܠܳܗܳܐ܇ ܗܰܘ ܕܶܐܬܬܰܚܬܺܝ ܒܛܰܝܒܽܘܬܶܗ܇ ܘܰܙܟܳܐ ܠܒܺܝܫܳܐ ܒܥܶܠܕܰܪܳܐ܇ ܒܝܰܕ ܨܰܘܡܳܐ ܕܺܝܠܶܗ ܕܰܟܝܳܐ܇ ܬܰܘ ܟܽܠ܀

ܡܫܺܝܚܳܐ ܐܰܠܳܗܳܐ܇ ܗܰܘ ܕܰܐܠܶܦ ܠܰܢ ܕܰܒܨܰܘܡܳܐ ܢܶܙܟܶܐ ܠܚܰܫ̈ܶܐ ܕܰܚܛܺܝܬܳܐ܇ ܘܰܢܫܰܗܶܐ ܠܰܪ̈ܓܺܝܓܳܬܳܐ܇ ܬܰܘ ܟܽܠ܀

ܡܫܺܝܚܳܐ ܐܰܠܳܗܳܐ܇ ܗܰܘ ܕܨܳܡ ܘܰܐܩܪܶܒ ܥܰܡ ܒܺܝܫܳܐ܇ ܘܬܰܒܪܶܗ ܠܚܰܝܠܶܗ ܕܰܢܟܺܝܠܳܐ܇ ܕܰܐܡܪܰܚ ܗܘܳܐ ܘܰܩܪܶܒ ܢܰܣܝܶܗ܇ ܬܰܘ܀

ܒܨܰܘܡܳܐ ܕܨܳܡ ܡܳܪܰܢ܇ ܐܰܠܶܦ ܨܰܘܡܳܐ ܠܦܳܪ̈ܽܘܫܶܐ܇ ܕܰܢܨܽܘܡܽܘܢ ܦܳܪܽܘܫܳܐܺܝܬ ܘܰܢܚܰܝܒܽܘܢ ܠܰܒܥܶܠܕܰܪܳܐ܇ ܬܰܘ ܟܽܠ܀

ܪܰܥܡܶܗ ܕܢܽܘܚܳܡܳܐ܇ ܢܶܪܥܰܡ ܥܰܠ ܚܶܙܶܝ̈ܗܿ ܕܰܫܝܽܘܠ܇ ܢܶܫܡܰܥ ܡܰܘܬܳܐ܇ ܘܢܶܬܒܰܠܗܶܐ܇ ܬܰܘ ܟܽܠ ܥܰܡܡܺܝ̈ܢ܀

 

ܡܰܘܪܒܳܐ ܒܩܳܠܳܐ ܫܠܳܡܠܶܟܝ̱ ܩܰܕܺܝܫܬܳܐ

ܥܰܠ ܛܽܘܪܳܐ ܐܰܣܩܶܗ ܗܘܳܐ܇ ܣܳܛܳܢܳܐ ܒܰܢܟܺܝܠܽܘܬܶܗ܇ ܘܚܰܘܝܶܗ ܗܘܳܐ ܡܰܠܟܘ̈ܳܬܳܐ ܕܰܐܪܥܳܐ܇ ܠܰܡܫܺܝܚܳܐ ܡܳܪܶܐ ܟܽܠ܇ ܘܰܙܟܳܐ ܘܦܰܪܣܺܝ ܢܟܺܝܠܽܘܬܶܗ܇ ܘܠܶܗ ܗܽܘ܀

ܐܰܪܺܝܡ ܥܰܝܢܰܝ̈ܟ ܘܰܚܙܺܝ܇ ܗܳܠܶܝܢ ܟܽܠܗܶܝܢ ܕܺܝܠܝ̱ ܐܶܢܶܝܢ܇ ܘܠܳܟ ܐܶܬܶܠ ܐܶܢ ܬܶܣܓܽܘܕ ܠܺܝ܇ ܘܶܐܣܬܰܚܦܰܬ݀ ܠܳܗܿ ܡܰܠܟܽܘܬܶܗ܇ ܘܶܐܬܬܪܺܝܡ ܡܫܺܝܚܳܐ ܐܰܠܳܗܳܐ܇ ܘܠܶܗ ܗܽܘ܀

ܠܡܺܝ̈ܬܶܐ ܕܰܥܬܶܩܘ̱ ܘܰܒܠܺܝܘ ܒܚܶܙܶܝ̈ܗܿ ܥܰܡܺܝ̈ܩܶܐ ܕܰܫܝܽܘܠ܇ ܘܰܗ̱ܘܰܘ ܥܰܦܪܳܐ ܕܰܚܺܝܚܳܐ܀

 

ܫܽܘܒܚܳܐ ܢܰܣܶܩ ܠܶܗ ܠܰܐܒܳܐ܇ ܘܬܰܘܕܺܝܬܳܐ ܠܰܒܪܳܐ ܕܡܶܢܶܗ܇ ܘܰܠܪܽܘܚܩܽܘܕܫܳܐ ܗܽܘܠܳܠܳܐ܇ ܐ̱ܪܳܙܳܐ ܕܰܬܠܺܝܬܳܝܽܘܬܳܐ ܚܰܕ ܐܰܠܳܗܳܐ ܫܰܪܺܝܪܳܐ܇ ܕܠܶܗ ܗܽܘ ܡܫܰܒܚܺܝܢܰܢ܀

 

ܫܰܒܰܚܘ̱ ܥܰܒܕܰܘ̈ܗ̱ܝ ܒܩܳܠܳܐ ܣܳܓܶܕ ܠܳܟ ܡܳܪܝܳܐ

ܨܳܡ ܡܳܪܰܢ ܐܰܪܒܥܺܝܢ ܝܰܘܡ̈ܺܝܢ܇ ܡܶܛܽܠ ܕܰܗܘܳܐ ܒܰܪܢܳܫܳܐ܇ ܘܰܩܪܶܒ ܒܺܝܫܳܐ ܕܰܢܢܰܣܺܝܘܗ̱ܝ܇ ܘܰܓܥܰܪ ܒܶܗ ܘܣܳܦ ܡܶܢ ܫܶܠܝܳܐ܀

ܒܗܶܬ ܣܳܛܳܢܳܐ ܘܰܚܦܰܪ ܠܶܗ ܇ܡܶܢ ܚܰܝܠܶܗ ܕܒܰܪ ܐܰܠܳܗܳܐ܇ ܡܶܟܺܝܠ ܘܰܠܗܰܠ ܠܳܐ ܩܳܐܶܡ܇ ܕܡܳܪܰܢ ܫܰܦܠܶܗ ܒܝܰܕ ܨܰܘܡܶܗ܀

ܒܨܰܘܡܳܐ ܕܨܳܡ ܡܳܪܰܢ ܝܶܫܽܘܥ܇ ܙܟܳܐ ܗܘܳܐ ܠܒܺܝܫܳܐ ܡܳܪܽܘܕܳܐ܇ ܘܰܐܠܶܦ ܐܳܦ ܠܰܢ ܕܰܒܨܰܘܡܳܐ܇ ܢܶܬܟܰܬܰܫ ܘܰܢܕܽܘܫ ܚܰܝܠܶܗ܀

ܒܠܰܥ ܣܳܛܳܢܳܐ ܒܰܬܘܳܪܳܐ܇ ܘܶܐܫܬܰܦܰܠ ܟܽܠ ܚܰܝܠܶܗ܇ ܘܶܐܫܬܰܪܝܰܬ݀ ܠܶܗ ܡܰܠܟܽܘܬܶܗ܇ ܘܰܐܡܠܶܟ ܡܳܪܰܢ ܘܰܠܥܳܠܰܡ܀

ܨܳܡ ܡܳܪܰܢ ܘܰܙܟܳܐ ܠܒܺܝܫܳܐ܇ ܘܬܰܒܪܶܗ ܠܥܽܘܩܣܳܗܿ ܕܰܚܛܺܝܬܳܐ܇ ܘܚܰܘܺܝ ܙܰܝܢܳܐ ܠܨܰܝ̈ܳܡܶܐ܇ ܕܒܶܗ ܢܶܙܟܽܘܢ ܠܰܒܥܶܠܕܰܪܳܐ܀

ܐܰܚ̈ܰܝ ܢܶܥܪܽܘܩ ܡܶܢ ܨܰܘܡܳܐ܇ ܕܰܡܠܶܐ ܢܶܟܠܳܐ ܘܒܺܝ̈ܫܳܬܳܐ܇ ܘܢܶܬܩܰܪܰܒ ܠܨܰܘܡܳܐ ܕܰܟܝܳܐ܇ ܕܰܚܠܺܝܛ ܒܶܗ ܚܽܘܒܳܐ ܫܰܦܝܳܐ܀

ܪܰܒܳܐ ܗܽܘ ܨܰܘܡܳܐ ܕܰܚܠܺܝܛ ܒܶܗ ܚܽܘܒܳܐ ܕܰܟܝܳܐ ܘܩܰܕܺܝܫܽܘܬܳܐ܇ ܘܰܪܓܺܝܓ ܘܰܪܚܺܝܡ ܘܰܡܝܰܩܰܪ܇ ܘܒܶܗ ܡܶܬܬܢܺܝܚ ܫܳܒܶܩ ܚܰܘܒ̈ܶܐ܀

ܫܽܘܒܚܳܐ ܠܗ ܠܡܩܒܠܰܢܐ܇ ܕܨܠ̈ܘܬܐ ܘܕܨܘܡ̈ܐ܇ ܘܠܐܰܒܽܘܗ̱ܝ ܘܠܪܘܚܗ ܩܰܕܺܝܫܳܐ܇ ܬܶܫܒܽܘܚܬܳܐ ܒܟܽܠܥܕܢ̈ܝܢ܀

 

ܛܽܘܒܶܝܗܿܘܢ ܠܡܣܟ̈ܢܐ ܒܩܳܠܳܐ ܣܓܕܝܢܢ ܠܨܠܝܒܳܟ

ܣܓܕܝܢܢ ܠܳܟ ܡܳܪܝ̱ ܕܳܠܒܳܟܬ ܨܰܘܡܳܐ ܚܠܦ ܦܽܘܪܩܳܢܰܢ܇ ܘܐܒܗܬܬܝܗܝ ܠܡܣܢܝܢܐ ܡܫܺܝܚܳܐ ܐܬܕܟܪܝܢ܀

 

ܡܫܰܒܚܺܝܢܢ ܠܛܝܒܘܬܟ ܡܫܺܝܚܳܐ ܕܡܳܪܰܢ ܕܚܠܦܝܢ ܨܡܬ܇ ܘܙܟܝܬܝܗܝ ܠܒܥܶܠܕܰܪܳܐ ܡܫܺܝܚܳܐ܀

ܡܶܢܘ ܡܫܟܚ ܕܢܫܒܚ܇ ܐܰܝܟ ܡܳܐ ܕܦܐܶܐ ܠܐܠܗܰܘܳܬ݀ ܟ܇ ܡܫܺܝܚܳܐ ܐܰܠܳܗܳܐ ܕܥܰܠ ܟܽܠ܇ ܐܬܕܟܪܝܢ܀

 

ܡܰܘܕܶܝܢܰܢ ܠܚܢܢܟ ܕܐܠܦܬ ܨܰܘܡܳܐ ܕܦܪܘܫܘܬܐ܇ ܕܒܗ ܡܫܬܒ̈ܩܢ ܚܘܒ̈ܬܢ܇ ܡܫܺܝܚܳܐ ܐܬܕܟܪܝܢ܀

 

ܣܓܕܝܢܢ ܠܳܟ ܦܳܪܽܘܩܰܢ܇ ܝܠ̈ܕܝܗ ܕܥܬܐ ܒܨܰܘܡܳܐ ܕܟܝܐ܇ ܘܫܐܠܝܢܢ ܡܶܢܳܟ ܫܘܒܩܢܐ܇ ܡܫܺܝܚܳܐ܀

 

ܚܠܛ ܠܰܢ ܒܰܚܢܳܢܳܟ܇ ܒܓܰܘܕ̈ܐ ܘܛܟ̈ܣܐ ܕܡܫܒ̈ܚܢܝܟ܇ ܘܒܝܰܕ ܨܘܡܟ ܢܫܦܪ ܠܳܟ܇ ܡܫܺܝܚܳܐ܀

 

ܡܫܰܒܚܺܝܢܢ ܠܐܝܬܰܘܬܟ ܘܡܗܝܡܶܢܝܢܢ܇ ܒܐܠܗܰܘܳܬ݀ ܟ܇ ܐܰܒܳܐ ܘܒܰܪܐ ܘܪܘܚ ܩܘܕܫܐ܇ ܡܫܺܝܚܳܐ ܐܬܕܟܪܝܢ܀

 

ܩܳܠܳܐ ܕܨܰܦܪܳܐ

ܒܩܳܠܳܐ ܣܗ̈ܕܘܗܝ ܐܰܢ̱ܬܰܘܢ

ܨܡ ܗܘܳܐ ܕܡܳܪܰܢ܇ ܐܰܪܒܥܺܝܢ ܝܘܡ̈ܝܢ ܒܓܰܘܗ ܕܡܕܒܰܪܐ܇ ܘܐܩܪܒ ܥܰܡ ܒܺܝܫܳܐ܇ ܘܣܚܦܗ ܠܚܝܠܗ ܘܬܒܪܶܗ ܠܥܘܩܣܗ ܘܥܒܕܗ ܕܝܫܐ ܠܳܟܽܠܗܽܘܢ ܨܝܡ̈ܐ܇ ܘܚܢܢ ܐܚ̈ܝ܇ ܢܒܥܘ ܪ̈ܰܚܡܶܐ ܡܶܢ ܕܡܳܪܰܢ܇ ܕܡܪܚܡܶܢ ܗܘ ܐܰܠܳܗܳܐ܀

 

ܐܰܪܒܥܺܝܢ ܝܘܡ̈ܝܢ܇ ܨܡܬ ܢܝܢܘܐ ܨܰܘܡܳܐ ܕܟܝܐ܇ ܘܐܬܪܥܝ ܡܳܪܝܳܐ ܐܰܪܒܥܺܝܢ ܝܘܡ̈ܝܢ ܨܡܘ ܗ̱ܘܰܘ ܛܠܳܝ̈ܶܐ ܕܒܶܝܬ ܚܢܢܝܐ ܘܕܥܟܘܗܝ ܠܐܬܰܘܢܐ܇ ܘܚܢܢ ܕܡܳܪܰܢ܇ ܕܨܡܶܢܰܢ ܐܰܪܒܥܺܝܢ ܝܘܡ̈ܬܐ܇ ܚܣܐ ܚܘܒ̈ܝܢ ܘܚܛ̈ܗܝܢ܀

 

ܐ̱ܚܪܺܢܳܐ ܒܩܳܠܳܐ ܠܳܟ ܡܳܪܝܳܐ ܩܪܝܢܢ

ܒܨܰܘܡܳܐ ܕܰܐܪܒܥܺܝܢ ܝܘܡ̈ܝܢ ܐܚܬ ܡܘܫܐ܇ ܠܘ̈ܚܐ ܕܟܬܒ ܐܰܠܳܗܳܐ ܠܥܰܡܳܐ ܕܐܝܣܪܐܝܠ ܘܐܠܝܐ ܒܝܰܕ ܨܘܡܗ ܫܦܪ ܠܰܐܠܳܗܳܐ܇ ܘܫܡܝܐ ܘܐܰܪܥܳܐ ܫܡܥܘܗܝ ܘܥܒܕܘ ܨܒܝܢܗ܇ ܛܘܒ ܠܐܝܢܐ ܕܨܡ ܡܶܢ ܒܝܫ̈ܬܐ܇ ܘܒܥܒ̈ܕܘܗܝ ܪܥܝ ܠܰܐܠܳܗܳܐ܇ ܘܢܐܡܪ ܠܗ ܒܓܠܝܘܬ ܐܦ̈ܐ ܚܘܣ ܘܐܬܪܰܚܶܡܥܠܰܝܢ܀

 

ܗܢܘ ܨܰܘܡܳܐ ܕܟܝܐ ܕܡܠܐ ܫܘܦܪ̈ܐ܇ ܘܣܓܝ ܡܪܥܐ ܠܰܐܠܳܗܳܐ ܘܥܛܐ ܓܙܪ ܕܝܢܐ܇ ܟܰܕ ܬܗܘܳܐ ܢܟܦ ܘܡܨܠܠ ܘܡܠܐ ܫܘܦܪ̈ܐ܇ ܘܚܣܝܟ ܦܘܡܟ ܡܶܢ ܠܚܡܳܐ ܘܠܒܳܟ ܡܶܢ ܒܝܫ̈ܬܐ܇ ܘܡܠܐ ܐܰܢ̱ܬ ܚܘܒܐ ܠܘܳܬ ܐܚܝ̈ܟ܇ ܘܪܚܡ ܐܰܢ̱ܬ ܠܐܝܢܐ ܕܣܢܐ ܠܳܟ܇ ܫܡܥ ܡܳܪܝܳܐ ܒܥܘܬܟ ܘܥܒܕ ܥܰܠܝܟ ܪ̈ܰܚܡܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܰܪܒܥܺܝܢ ܝܘܡ̈ܝܢ ܩܠ̈ܝ ܚܫܐ ܡܫܬܡܥܝܢ ܗ̱ܘܰܘ܇ ܒܗܝ ܒܥܘܬܐ ܕܥܒܕܬ ܢܝܢܘܐ ܨܶܝܕ ܐܰܠܳܗܳܐ܇ ܐܰܪܒܥܺܝܢ ܝܘ̈ܡܝܢ ܦܟܪܬ ܐܝ̈ܕܝܗ ܩܕܡ ܟܺܐܢܽܘܬܳܐ܇ ܕܬܬܪܥܐ ܠܗ ܕܪܓܝܙܐܐ ܗܘܳܬ݀  ܥܰܠ ܣܢܝ̈ܬܗ܀

 

ܐܰܪܒܥܺܝܢ ܝܘܡ̈ܝܢ ܐܫܕܬ ܕܡ̈ܥܐ ܩܕܡ ܐܰܠܳܗܳܐ܇ ܕܢܣܒ ܒܐܦ̈ܝܗ ܕܢܟܽܠܐ ܪܘܓܙܐ ܕܡܛܝܒ ܠܗ܇ ܐܰܪܒܥܺܝܢ ܝܘܡ̈ܝܢ ܚܓܐ ܥܒܕܬ ܠܬܝܒܘܬܐ܇ ܘܙܒܢܬ ܡܶܢܗ ܚܢܢܐ ܒܕܡ̈ܥܐ ܕܛܥܝܢܐ ܗܘܳܬ݀ ܀

 

ܕܰܬܠܳܬܫܳܥܺܝ̈ܢ

ܒܩܳܠܳܐ ܗܘܝ ܠܗ ܠܰܢܦܫܝ

ܛܘܒܘܗܝ ܠܐܝܢܐ ܕܨܡ ܕܟܝܐܝܬ ܨܰܘܡܳܐ ܕܦܘܪܫܢܐ܇ ܘܩܨܐ ܠܚܡܗ ܘܝܗܒܗ ܠܳܟܦܢ̈ܐ ܡܶܢ ܠܒܐ ܛܳܒܳܐ܇ ܬܰܡܳܢ ܡܩܒܠ ܦܘܪܥܢܐ܇ ܡܶܢ ܗܘ ܡܪܐ ܡܪܚܡܶܢܐ ܘܝܪܬ ܡܰܠܟܽܘܬܳܐ܀

 

ܨܡ ܗܘܳܐ ܡܘܫܐ ܨܰܘܡܳܐ ܕܟܝܐ ܘܶܐܢܗܪ ܦܪܨܘܦܗ܇ ܐܦ ܐܠܝܐ ܐܬܥܰܠܝ ܗܘܳܐ܇ ܒܝܰܕ ܨܰܘܡܳܐ ܕܟܝܐ܇ ܘܚܢܢ ܕܡܳܪܰܢ ܢܫܦܪ ܠܳܟ܇ ܒܨܰܘܡܳܐ ܕܰܐܪܒܥܺܝܢ ܝܘܡ̈ܬܐ ܘܢܐܪܬ ܡܰܠܟܽܘܬܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܐܰܪܒܥܺܝܢ ܝܘܡ̈ܝܢ ܨܡ ܕܡܳܪܰܢ܇ ܒܓܰܘ ܡܕܒܰܪܐ ܐܰܝܟܢ ܕܟܬܝܒ܇ ܘܐܬܢܣܝ ܡܶܢ ܣܳܛܳܢܳܐ܇ ܘܣܚܦܗ ܗܘܳܐ ܠܒܥܰܠ ܕܐܪܐ܀

 

ܘܐܠܝܐ ܐܰܪܒܥܺܝܢ ܝܘܡ̈ܝܢ܇ ܨܡ ܗܘܳܐ ܒܛܘܪܗ ܕܰܐܠܳܗܳܐ܇ ܘܐܬܥܰܠܝ ܒܰܪ̈ܟܫܐ ܕܢܽܘܪܳܐ܇ ܘܰܐܣܺܝܪ ܠܫܡܝܐ ܘܠܐܰܪܥܳܐ ܕܡܳܪܰܢ ܐܬܪܰܚܶܡܥܠܰܝܢ܀

 

ܕܦܠܓܗ ܕܝܰܘܡܳܐ

ܒܩܳܠܳܐ ܒܨܰܦܪܳܐ ܚܙܰܐܽܘܗ̱ܝ ܬܰܠܡܺܝ̈ܕܶܐ

ܒܨܰܦܪܳܐ ܕܕܢܚ ܒܗ ܢܽܘܗܪܳܐ܇ ܛܽܘܒܳܐ ܪܒܐ ܠܳܟܫܝܪ̈ܐ܇ ܘܡܬܒܣܡܝܢ ܒܡܠܳܟܘܬ ܪܰܘܡܳܐ܇ ܥܰܡ ܟܺܐܢ̈ܶܐ ܘܥܰܡ ܙܕܝ̈ܩܐ܇ ܘܢܚܰܕܐ ܘܢܪܘܙ ܪܥܝܢܗܘܢ ܒܦܘܪܥܢܐ ܕܙܕܝܩܘܬܐ܀

 

ܛܘܒܘܗܝ ܠܐܝܢܐ ܕܒܨܘܡܗ܇ ܪܥܝ ܠܡܳܪܝܳܐ ܒܕܘܒܰܪ̈ܘܗܝ܇ ܘܫܡܥ ܡܶܢܗ ܗܘ ܩܳܠܳܐ܇ ܕܬܰܘ ܥܘܠܘ ܘܝܪܬܰܘ ܡܰܠܟܽܘܬܳܐ܇ ܘܚܝ̈ܐ ܡܠ̈ܝܟܐ ܕܳܠܥܳܠܰܡ܇ ܥܰܡ ܟܺܐܢ̈ܶܐ ܘܥܰܡ ܙܕܝ̈ܩܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܚܘܒܐ ܙܩܬܢܝ ܠܡܡܰܠܶܠܘ ܢܗܝܪܐܝܬ܇ ܡܶܛܽܠ ܨܰܘܡܳܐ ܕܨܡ ܦܪܘܩܐ ܕܟܽܠ ܒܶܪ̈ܝܳܬܳܐ܇ ܗܘ ܓܰܢ̱ܒܳܪܳܐ  ܕܡܠܝܐ ܡܶܢܗ ܫܡܝܐ ܘܐܰܪܥܳܐ܇ ܐܰܪܒܥܺܝܢ ܝܘܡ̈ܝܢ ܨܡ ܗܘܳܐ ܒܕܒܰܪܐ ܦܓܪܢܐܝܬ܀

 

ܥܰܠ ܕܐܬܝܥܢ ܐܳܕܳܡ ܒܥܕܝܢ ܥܰܠ ܐܝܠܰܢܐ܇ ܨܒܐ ܦܳܪܽܘܩܰܢ ܕܳܠܝܥܢܘܬܐ ܒܨܘܡܗ ܢܒܣܘܪ܇ ܘܕܡܳܐܟܘܠܬܐ ܗܘܳܬ݀  ܠܚܛܝܬܐ ܡܥܰܠܰܢܘܬܐ܇ ܒܥܢܘܝܘܬܐ ܙܟܗ ܐܦ ܪܕܦܗ ܡܶܢ ܐܢܫܘܬܐ܀

 

ܕܰܬܫܰܥܫܳܥܺܝ̈ܢ܇

ܒܩܳܠܳܐ ܬܪ̈ܝܗܘܢ ܥܰܠ̈ܡܳܐ ܕܝܠܳܟ

ܠܳܟ ܡܳܪܝ̱ ܡܬܬܣܝܡܝܢ ܒܣܡ̈ܐ܇ ܒܨܰܘܡܳܐ ܕܟܝܐ ܘܩܰܕܺܝܫܳܐ܇ ܘܠܳܟ ܡܬܩܪܒܝܢ ܡܳܪܝ̱ ܕܒܚ̈ܐ܇ ܚܣܐ ܠܰܢ ܒܗܘܢ ܚܘܒ̈ܬܢ܀

 

ܐܰܪܒܥܺܝܢ ܝܘܡ̈ܝܢ ܨܡ ܕܡܳܪܰܢ܇ ܡܶܛܽܠ ܐܳܕܳܡ ܚܝܒܐ܇ ܘܝܗܒܠܰܢ ܙܝܢܐ ܒܩܢܘܡܗ܇ ܕܚܢܢ ܢܨܘܡ ܐܟܘܬܗ܀

 

ܒܳܥܽܘܬܳܐ ܕܡܳܪܝ̱ ܒܰܠܰܝ

ܐܰܪܒܥܺܝܢ ܝܘܡ̈ܬܐ܇ ܨܡ ܡܘܫܐ ܒܛܘܪܐ܇ ܘܒܙܝܘܐ ܕܢܽܘܗܪܳܐ܇ ܐܙܕܗ̈ܝܝ ܐܦ̈ܘܗܝ܀

 

ܐܰܪܒܥܺܝܢ ܝܘܡ̈ܬܐ܇ ܨܡܬ ܗܘܳܬ݀  ܢܝܢܘܐ܇ ܘܐܬܪܥܝ ܡܳܪܝܳܐ܇ ܘܫܪܐ ܓܙܪ ܕܝܢܗ܀

ܫܠܡ ܕܥܪܘܒܬܐ

 

ܬܽܘܒ ܛܟܣܐ ܕܢܘܚܡܗ ܕܳܠܥܙܪ ܗܘ ܕܡܶܢ ܒܶܝܬ ܥܢܝܐ

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܰܚܶܡܥܠܰܝ ܒܩܳܠܳܐ ܐܶܡܳܐ ܕܟܺܝܬܳܐ

ܗܘ ܕܒܩܠܗ ܚܝܐ ܩܪܐ ܘܐܰܩܺܝܡ܇ ܠܠܥܙܪ ܪܚܡܗ܇ ܡܶܢ ܒܬܪ ܕܣܪܝ܇ ܪܚܡ܀

 

ܗܘ ܕܐܡܪ ܗܘܳܐ ܠܡܪܬܐ ܕܦܓܥܬ ܒܗ܇ ܕܐܢܐ ܐܝܬܝ ܚܝ̈ܐ ܘܩܝܡܬܐ ܪܚܡ܀

 

ܗܘ ܕܫܪܐ ܗܘܳܐ ܠܐܳܘܚܰܕܢܗ ܕܡܘܬܐ܇ ܘܫܰܪܰܪ ܩܝܡܬܐ ܠܓܢܣܐ ܕܥܦܪ̈ܢܐ܀

 

ܗܘ ܕܳܠܪܚܡܗ ܠܥܙܪ ܕܫܟܒ܇ ܒܬܪ ܕܣܪܝ ܩܪܐ ܠܗ ܘܐܰܩܺܝܡܗ܇ ܪܰܚܶܡܥܠܰܝ܀

 

ܗܘ ܕܐܡܪ ܗܘܳܐ ܬܐ ܠܒܰܪ ܠܥܙܪ܇ ܘܫܡܥܗ ܘܢܦܩ ܟܰܕ ܙܡܪ ܫܽܘܒܚܳܐ ܪܰܚܶܡܥܠܰܝ܀

 

ܗܘ ܕܡܶܢ ܒܬܪ ܝܘܡ̈ܬܐ ܐܪܒܥܐ ܠܡܝܬܐ ܣܪܝܐ܇ ܡܶܢ ܡܘܬܐ ܐܥܕܝ ܪܰܚܶܡܥܠܰܝ܀

 

ܗܘ ܕܫܐܠ ܗܘܳܐ܇ ܥܰܠ ܩܒܰܪܐ ܕܪܚܡܗ܇ ܐܰܝܟ ܒܰܪܢܳܫܳܐ܇ ܘܐܰܩܺܝܡ ܐܰܝܟ ܡܪܐ܇ ܪܰܚܶܡܥܠܰܝ܀

 

ܫܽܘܒܚܳܐ ܠܰܐܒܳܐ܇ ܘܬܰܘܕܺܝܬܳܐ ܠܰܒܪܳܐ܇ ܘܠܪܘܚ ܩܘܕܫܐ܇ ܐܝܩܪܐ ܘܣܓܕܬܐ܇ ܚܰܕ ܐܰܠܳܗܳܐ ܫܪܝܪܐ܀

 

ܕܡܳܪܝܳܐ ܩܪܺܝܬܳܟ ܒܩܳܠܳܐ ܙܥ ܗܘܳܐ ܝܘܣܦ

ܡܰܪܝܰܡ ܘܡܪܬܐ ܢܟܦ̈ܬܐ܇ ܟܬܒ̈ܝ ܐܓܪܬܐ ܕܰܚܫܳܐ܇ ܘܫܕܪ̈ܝ ܗܘ̈ܝ ܨܶܝܕ ܦܳܪܽܘܩܰܢ܇ ܕܟܪܝܗ ܐܚܘܢ ܠܥܙܪ܇ ܬܐ ܚܙܝܝܗܝ ܟܰܕ ܠܐ ܡܳܐܬ܇ ܕܝܕܥܝܢܢ ܕܦܫܝܩ ܗܘ ܠܳܟ܇ ܡܺܝ̈ܬܶܐ ܕܬܩܝܡ ܡܶܢ ܩܒܰܪ̈ܐ܇ ܕܰܐܢ̱ܬ ܗܘ ܒܘܟܪܗ ܕܥܰܠܝܐ܀

 

ܕܒܰܪ ܗܘܳܐ ܫܡܫܐ ܢܗܝܪܐ܇ ܠܙܠ̈ܝܩܘܗܝ ܫܦܝܪ̈ܐ܇ ܘܐܬܐ ܠܒܶܝܬ ܥܢܝܐ ܩܪܝܬܐ܇ ܘܫܐܠ ܕܐܰܝܟܘ ܠܥܙܪ ܘܦܢܝܘ ܠܗ ܕܒܩܒܰܪܐ ܣܝܡ܇ ܘܐܬܐ ܗܘܳܐ ܘܩܳܡ ܠܥܶܠ ܡܶܢܗ܇ ܘܩܪܐ ܗܘܳܐ ܒܩܠܗ ܘܢܦܩ܇ ܘܫܪܝ ܙܡܪ ܬܶܫܒܽܘܚܬܳܐ܀

 

ܟܶܢܫ̈ܶܐ ܫܡܥܘ ܗ̱ܘܰܘ ܕܐܬܢܚܡ܇ ܠܥܙܪ ܡܶܢ ܩܒܰܪܐ܇ ܘܪܗܛܘ ܕܢܚܙܘܢ ܬܕܡܘܪܬܐ܇ ܚܙܝܢ ܗ̱ܘܰܘ ܠܗ ܕܡܗܠܳܟ ܠܡܝܬܐ ܕܢܚܡ ܦܳܪܽܘܩܰܢ܀

 

ܥܰܡܳܐ ܘܥܰܡܡ̈ܶܐ ܙܡܪܘ ܫܽܘܒܚܳܐ܇ ܥܶܢܝܳܢܳܐ ܫܽܘܒܚܳܐ ܠܳܟ ܡܶܢܚܡ ܡܺܝ̈ܬܶܐ܇ ܕܐܬܝܬ ܬܢܚܡ ܡܝܬܰܘܬܢ

ܨܶܝܕ ܠܥܙܪ ܪܒ ܬܗܪܐ܇ ܗܘ ܕܗܘܳܐ ܗܘܳܐ ܬܰܡܳܢ܇ ܘܡܶܢ ܒܬܪ ܐܪܒܥܐ ܝܘܡ̈ܝܢ܇ ܩܪܝܗܝ ܗܘܳܐ ܘܢܚܡܗ ܗܘܳܐ ܡܫܺܝܚܳܐ܇ ܒܰܪܡ ܕܝܢ ܠܘ ܚܰܕ ܬܗܪܐ ܗܘܳܐ ܕܰܬܪܶܝܢ ܗ̱ܘܰܘ ܬܗܪ̈ܐ ܕܰܗ̱ܘܰܘ܇ ܬܗܪܐ ܗܘܳܐ ܕܢܩܘܡ ܡܺܝ̈ܬܶܐ܇ ܘܬܗܪܐ ܕܟܰܕ ܡܗܠܳܟ ܗܘܳܐ ܡܚܙܩ܀

 

ܐܡܪ ܕܡܳܪܰܢ ܠܬܰܠܡܺܝ̈ܕܰܘܗ̱ܝ ܕܳܠܥܙܪ ܪܚܡܶܢ ܡܝܬ ܠܗ܇ ܘܚܰܕܐ ܐܢܐ ܕܠܳܐ ܗܘܝܬ ܬܰܡܳܢ܇ ܡܶܛܽܠܬܟܘܢ ܕܬܗܝܡܶܢܘܢ܇ ܩܘܡܘ ܬܰܘ ܢܐܙܠ ܠܒܶܝܬ ܥܢܝܐ܇ ܬܚܙܘܢ ܐܬܐ ܕܬܕܡܘܪܬܐ܇ ܕܩܪܐ ܐܢܐ ܠܗ ܘܥܢܐ ܠܝ܇ ܘܢܦܩ ܟܰܕ ܙܡܪ ܫܽܘܒܚܳܐ܀

 

ܩܳܠܳܐ ܕܪܰܡܫܳܐ ܒܩܳܠܳܐ ܡܫܺܝܚܳܐ ܢܰܛܰܪܶܝܗܿ

ܬܕܡܘܪܬܐ ܣܥܪ ܦܳܪܽܘܩܰܢ܇ ܟܰܕ ܐܰܩܺܝܡܗ ܠܠܥܙܪ܇ ܠܗܰܘ ܕܐܣܪܝ ܗܘܳܐ ܡܶܢ ܟܰܕܘ ܩܪܐ ܠܗ ܒܩܳܠܳܐ ܘܐܰܩܺܝܡܗ܇ ܘܥܰܡܳܐ ܕܚܙܳܝܗ̱ܝ ܟܰܕ ܢܦܩ܇ ܡܶܢ ܓܘ ܩܒܰܪܐ܇ ܘܰܐܣܺܝܪ̈ܢ ܪ̈ܶܓܠܰܘܗ̱ܝ܇ ܬܗܪܘ ܕܚܙܘ ܐܬܐ ܕܬܗܪܐ܇ ܐܣܬܥܪܬ ܒܶܝܬ ܥܢܝ̈ܕܐ܇ ܘܕܡܳܪܰܢ ܐܰܝܟ ܛܳܒܳܐ܇ ܥܒܕ ܣܒܰܪܐ ܠܕܠܳܐ ܣܒܰܪܐ܇ ܕܗܟܢ ܩܪܐ ܘܡܶܢܚܡ ܠܝܰܠܕܰܘ̈ܗ̱ܝ ܕܳܐܕܳܡ܇ ܒܝܰܘܡܳܐ ܪܒܐ ܕܢܽܘܚܳܡܳܐ܀

 

ܩܳܠܳܐ ܕܩܪܝܗܝ ܠܠܥܙܪ܇ ܘܐܰܩܺܝܡܗ ܡܶܢ ܓܘ ܩܒܰܪܐ܇ ܘܚܘܝ ܐܬܐ ܕܬܕܡܘܪܬܐ܇ ܒܡܝܬܐ ܣܪܝܐ ܕܐܬܢܚܡ܇ ܗܟܢ ܒܝܘܡܗ ܕܢܽܘܚܳܡܳܐ܇ ܩܪܐ ܘܡܩܝܡ ܠܳܟܽܠܗܽܘܢ ܥܢܝ̈ܕܐ܇ ܘܡܬܥܛܦܝܢ ܐܣܛܠ ܫܽܘܒܚܳܐ܇ ܟܺܐܢ̈ܶܐ ܕܥܒܕܘ ܨܒܝܢܗ܇ ܦܪܚܝܢ ܒܥ̈ܢܢܐ܇ ܥܰܡ ܥܺܝܪ̈ܶܐ ܕܢܽܘܪܳܐ ܘܪܽܘܚܳܐ܇ ܘܩܠ̈ܝ ܬܶܫܒܽܘܚܬܳܐ ܡܣܩܝܢ ܠܡܪܚܡܶܢܐ ܕܢܚܡ ܐܶܢܽܘܢ ܡܶܢ ܥܦܪܐ܀

 

ܐ̱ܚܪܺܢܳܐ ܒܩܳܠܳܐ ܩܽܘܩܳܝܳܐ

ܐܡܪ ܕܡܳܪܰܢ ܠܬܰܠܡܺܝ̈ܕܰܘܗ̱ܝ ܕܳܠܥܙܪ ܡܝܬ ܠܗ܇ ܘܚܰܕܐ ܐܢܐ ܕܠܳܐ ܗܘܝܬ ܬܰܡܳܢ ܡܶܛܽܠ ܕܬܗܝܡܶܢܘܢ܇ ܗܠܳܟܘ ܢܐܙܠ ܠܒܶܝܬ ܥܢܝܐ ܩܪܝܬܐ܇ ܘܬܰܡܳܢ ܬܚܙܘܢ ܬܕܡܘܪܬܐ ܪܒܬܐ܇ ܩܪܐ ܐܢܐ ܠܗ ܘܥܢܐ ܠܝ ܘܢܦܩ ܐܬܐ ܠܘܳܬܝ܇ ܘܙܡܪ ܫܽܘܒܚܳܐ ܠܗܰܘ ܩܳܠܳܐ ܕܩܪܐ ܠܗ ܘܢܚܡܗ܇ ܗ ܘ ܗ܀

ܫܦܝܪ ܗܘܳܐ ܠܗ ܠܰܡܫܺܝܚܳܐ ܟܰܕ ܐܬܐ ܗܘܳܐ܇ ܠܒܶܝܬ ܥܢܝܐ ܕܢܩܪܐ ܘܢܩܝܡ ܠܠܥܙܪ ܪܚܡܗ܇ ܐܡܪ̈ܢ ܗܘ̈ܝ ܠܗ ܐܚܘ̈ܬܗ ܕܡܝܬܐ܇ ܐܠܘ ܬܢܢ ܗܘܝܬ ܠܐ ܡܝܬ ܠܥܙܪ܇ ܩܪܐ ܠܗ ܒܩܳܠܳܐ ܘܐܰܩܺܝܡܗ ܘܢܦܩ ܘܐܬܐ ܠܒܰܪ܇ ܘܰܐܣܺܝܪ̈ܢ ܐܝܕ̈ܘܗܝ ܘܪ̈ܶܓܠܰܘܗ̱ܝ ܘܙܡܪ ܬܶܫܒܽܘܚܬܳܐ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܡܝܬ ܠܥܙܪ ܘܐܥܰܠܘ ܚܒܫܘܗܝ ܒܬ ܥܢܝ̈ܕܐ܇ ܐܰܝܟܐ ܕܬܰܡܳܢ ܫܠܡ ܫܪܒܐ ܕܟܽܠ ܕܩܪܝܒܝܢ ܥܰܠ ܠܥܙܪ ܘܐܬܬܚܰܕܘ ܒܐܦܘ̈ܗܝ ܣܘܟܪ̈ܝܗ ܕܫܝܘܠ܇ ܘܟܡܬ ܥܰܠܘܗܝ ܒܰܪܬ ܐܒܕܢܐ ܐܪܒܥܐ ܝܘܡ̈ܝܢ܀

 

ܫܡܥܘ ܗ̱ܘܰܘ ܡܺܝ̈ܬܶܐ ܘܫܪܝܘ ܪܫܚܝܢ ܐܰܝܟ ܥܩܪ̈ܐ܇ ܘܐܠܘ ܒܫܡܗ ܠܐ ܦܪܫܗ ܗܘܳܐ ܠܡܝܬܐ ܕܩܪܐ܇ ܠܳܟܽܠܗܽܘܢ ܡܺܝ̈ܬܶܐ ܡܩܝܡ ܗܘܳܐ ܒܩܠܗ ܐܶܢܗܽܘ ܕܨܒܐ܇ ܠܚܰܕ ܗܘ ܩܪܐ ܗܘܳܐ ܘܢܦܩ ܗܘܳܐ ܚܰܕ ܐܰܝܟ ܕܩܪܐ ܠܗ܀

 

ܡܥܺܝܪܳܢܳܐ ܕܠܺܠܝܳܐ ܒܩܳܠܳܐ ܝܳܐܶܐ ܘܙܳܕܶܩ

ܬܗܪܐ ܣܥܪ ܗܘܳܐ ܦܳܪܽܘܩܰܢ܇ ܟܰܕ ܐܰܩܺܝܡܗ ܠܠܥܙܪ܇ ܠܗܰܘ ܕܣܪܝ ܗܘܳܐ ܡܶܢ ܟܰܕܘ܇ ܩܪܐ ܠܗ ܒܩܳܠܳܐ ܘܐܰܩܺܝܡܗ܇ ܫܽܘܒܚܳܐ ܠܳܟ܀

 

ܥܰܡܳܐ ܕܚܙܳܝܗ̱ܝ ܟܰܕ ܢܦܩ܇ ܘܰܐܣܺܝܪ̈ܢ ܐܝܕ̈ܘܗܝ ܘܪ̈ܶܓܠܰܘܗ̱ܝ܇ ܘܐܳܘܕܝ ܘܫܒܚ ܠܰܐܠܳܗܳܐ܇ ܕܝܗܒ ܣܒܰܪܐ ܠܕܠܳܐ ܣܒܰܪܐ܇ ܫܽܘܒܚܳܐ܀

 

ܠܒܶܝܬ ܥܢܝܐ ܥܰܠ ܗܘܳܐ ܕܡܳܪܰܢ܇ ܘܐܙܕܡܶܢ ܠܚܫܡܝܬܐ܇ ܘܐܣܡܟ ܠܠܥܙܪ ܥܰܡܗ܇ ܗܘ ܕܐܰܩܺܝܡ ܡܶܢ ܒܶܝܬ ܡܺܝ̈ܬܶܐ܀

 

ܥܢܝ̈ܕܐ ܡܳܪܝ̱ ܕܝܰܘܡܳܢܳܐ܇ ܕܫܡܠܝܢܢ ܕܘܟܪ̈ܢܝܗܘܢ܇ ܟܬܽܘܒ ܡܳܪܝܳܐ ܠܫܡܗ̈ܝܗܘܢ܇ ܒܣܦܪ ܚܰܝ̈ܶܐ ܒܡܠܳܟܘܬܟ܀

 

ܫܽܘܒܚܳܐ ܠܳܟ ܡܶܢܚܡ ܡܺܝ̈ܬܶܐ܇ ܫܽܘܒܚܳܐ ܠܳܟ ܡܩܝܡ ܠܩܒܝܪ̈ܐ܇ ܫܽܘܒܚܳܐ ܠܳܟ ܘܥܰܠܝܢ ܪ̈ܰܚܡܰܝܟ܇ ܒܗܢ ܥܳܠܡܳܐ ܘܒܗܘ ܕܥܬܝܕ܀

 

ܩܰܘܡܳܐ ܩܕܡܝܐ ܒܩܳܠܳܐ ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ

ܚܙܳܝܗ̱ܝ ܡܘܬܐ ܠܕܡܳܪܰܢ ܝܶܫܽܘܥ܇ ܘܙܥ ܘܐܣܬܪܕ ܡܶܢ ܩܕܡ ܚܝܠܗ܇ ܕܐܪܓܫ ܒܗ ܕܐܬܐ ܕܢܒܥܐ܇ ܪܚܡܗ ܘܚܒܫܗ ܗܘ ܒܓܰܘ ܩܒܰܪܐ܇ ܘܫܪܝܗܝ ܘܫܕܪܗ ܡܶܢ ܢܩܥܗ܇ ܘܬܗܪܘ ܣܓ̈ܝܐܐ ܕܚܙܘ܇ ܐܙܥܩܘ ܟܰܕ ܐܡܳܪܝ̱ܢ܇ ܕܳܠܳܟ ܫܽܘܒܚܳܐ ܡܶܢܚܡ ܡܺܝ̈ܬܶܐ܀

 

ܐܡܪ ܕܡܳܪܰܢ ܠܬܰܠܡܺܝ̈ܕܰܘܗ̱ܝ܇ ܕܳܠܥܙܪ ܪܚܡܶܢ ܡܝܬ ܠܗ܇ ܩܘܡܘ ܬܰܘ ܢܐܙܠ ܠܗ ܠܝܗܘܕ܇ ܕܩܪܐ ܐܢܐ ܘܡܩܝܡ ܐܢܐ ܠܗ܇ ܘܩܢܝܢ ܐܰܢ̱ܬܰܘܢ ܗܝܡܶܢܘܬܐ܇ ܡܳܐ ܕܚܙܝܬܰܘܢ ܕܐܬܢܚܡ܇ ܘܩܳܡ ܡܶܢ ܓܘ ܩܒܰܪܐ܇ ܡܝܬܐ ܕܣܪܝ ܡܶܢ ܟܰܕܘ܀

 

ܡܰܕܪܳܫܳܐ ܒܩܳܠܳܐ ܗܢܘ ܝܪܚܐ܇ ܥܽܘܢܺܝܬܳܐ ܒܪܺܝܟ ܗܘ ܡܫܺܝܚܳܐ ܗܘ ܕܒܩܠܗ ܩܪܐ ܠܥܙܪ

ܡܛܐ ܠܒܶܝܬ ܥܢܝܐ܇ ܫܡܫܐ ܪܒܐ ܥܰܡ ܙܠ̈ܝܩܘܗܝ܇ ܩܪܐ ܠܗ ܠܡܝܬܐ ܬܐ ܠܥܙܪ܇ ܘܫܡܥ ܡܘܬܐ ܘܙܥ ܘܐܬܕܘܕ܇ ܘܢܦܩ ܡܝܬܐ ܟܰܕ ܐܣܝܪ̈ܢ ܐܝ̈ܕܘܗܝ ܘܪ̈ܶܓܠܰܘܗ̱ܝ܀ ܩܳܡ ܢܽܘܚܳܡܳܐ ܠܒܰܪ ܡܶܢ ܬܪ̈ܥܐ ܚܒܝܫ̈ܐ ܕܫܝܘܠ܇ ܘܩܥܐ ܒܩܠܗ ܘܙܥ̈ܝ ܫܬܐܣ̈ܝܗ܇ ܘܪܥܰܠ ܡܘܬܐ ܘܢܦܠ ܬܐܓܗ܇ ܟܰܕ ܕܚܠ ܗܘܳܐ܇ ܫܪܐ ܠܩܒܝܪ̈ܐ ܘܢܦܩ ܟܰܕ ܚܝ܀ ܡܪܬܐ ܘܡܰܪܝܰܡ܇ ܠܕܡܳܪܰܢ ܐܡܪ̈ܢ ܟܰܕ ܒܳܟ̈ܝܢ ܗܘ̈ܝ܇ ܕܐܠܘ ܬܢܢ ܗܘܝܬ ܡܳܐܚܐ ܡܺܝ̈ܬܶܐ܇ ܠܐ ܡܳܐܬ ܗܘܳܐ ܐܚܝ ܠܥܙܪ܇ ܕܡܶܢ ܟܰܕ ܐܙܠܬ܇ ܫܒܝܗ ܗܘܳܐ ܡܘܬܐ܇ ܠܥܘܡܪܗ ܕܫܝܘܠ܀ ܐܡܪ ܕܡܳܪܰܢ܇ ܕܠܳܐ ܠܡ ܬܒܳܟ̈ܝܢ ܥܰܠ ܐܚܘܟܝܢ܇ ܕܐܢܐ ܐܝܬܝ ܚܰܝ̈ܶܐ ܚܰܕ̈ܬܐ܇ ܐܦ ܢܽܘܚܳܡܳܐ ܠܳܟܽܠ ܕܡܗܝܡܶܢ܇ ܛܽܘܒܳܐ ܠܐܝܢܐ ܕܡܗܝܡܶܢ ܒܝ܇ ܝܪܬ ܚܝ̈ܐ܀ ܢܦܩ ܠܥܙܪ ܟܰܕ ܐܣܝܪ̈ܢ ܐܝܕ̈ܘܗܝ ܘܪ̈ܶܓܠܰܘܗ̱ܝ܇ ܘܣܓܕ ܘܡܰܘܕܶܐ ܠܝܶܫܽܘܥ ܡܪܗ܇ ܕܝܗܒ ܠܗ ܚܝ̈ܐ ܒܝܰܕ ܦܘܩܕܢܗ܇ ܘܝܕܥ ܟܽܠܰܢܫ܇ ܝܰܠܽܘ̈ܕܶܐ ܚܝ̈ܐ ܐܦ ܢܽܘܚܳܡܳܐ܀

ܐ̱ܚܪܺܢܳܐ ܩܳܠܳܐ ܝܘܡܟ ܠܳܟ ܕܡܳܐ܇ ܥܽܘܢܺܝܬܳܐ ܫܽܘܒܚܳܐ ܠܰܡܫܺܝܚܳܐ ܕܐܬܐ ܘܢܚܡ ܠܠܥܙܪ ܪܚܡܗ ܡܶܢ ܓܘ ܩܒܰܪܐ

ܚܙܘ ܐܢܫ̈ܐ ܕܬܰܡܳܢ ܡܝܬܐ ܕܚܝܐ܇ ܕܰܐܣܺܝܪ ܘܡܚܙܩ ܘܡܗܠܳܟ ܗܘܳܐ܇ ܘܐܪܝܡܘ ܩܠ̈ܝܗܘܢ܇ ܘܰܙܡܰܪܘ̱  ܫܽܘܒܚܳܐ܇ ܬܶܫܒܽܘܚܬܳܐ ܚܰܕܬܐ ܠܡܳܐܚܐ ܡܺܝ̈ܬܶܐ܀ ܒܚܰܕ ܓܝܪ ܕܐܬܢܚܡ܇ ܝܗܒ ܪܗܒܘܢܐ܇ ܕܗܟܢ ܥܬܝܕ ܢܢܚܡ ܠܳܟܽܠܗܽܘܢ ܡܺܝ̈ܬܶܐ܇ ܘܰܐܝܟ ܕܩܪܐ ܘܐܰܩܺܝܡ ܠܚܰܕ ܥܢܝܕܐ܇ ܗܳܟܰܢܳܐ ܩܪܐ ܘܟܽܠܗܽܘܢ ܩܝܡܝܢ܀ ܒܪܺܝܟ ܐܰܢ̱ܬ ܦܳܪܽܘܩܰܢ܇ ܝܶܫܽܘܥ ܡܫܺܝܚܳܐ܇ ܣܒܰܪܐ ܘܬܰܘܟܽܠܰܢܐ ܕܚܝ̈ܐ ܘܡܺܝ̈ܬܶܐ܇ ܐܰܢ̱ܬ ܗܘ ܢܽܘܚܳܡܳܐ ܘܚܝܬ ܡܺܝ̈ܬܶܐ܇ ܘܩܝܡܬܐ ܕܕܡ̈ܟܐ ܕܗܳܐ ܡܶܢ ܥܰܠܡ܀

 

ܩܳܡ ܗܘܳܐ ܥܰܠ ܩܒܰܪܐ ܡܳܐܚܐ ܡܺܝ̈ܬܶܐ܇ ܘܐܙܥܩ ܗܘܳܐ ܒܩܠܗ ܘܩܥܐ ܘܐܡܪ܇ ܠܥܙܪ ܬܐ ܠܒܰܪ܇ ܘܫܡܥ ܘܚܝܐ܇ ܘܢܦܩ ܟܰܕ ܪܗܛ ܠܽܐܘܪܥܶܗ ܕܳܕܡܳܪܰܢ܀

 

ܐ̱ܚܪܺܢܳܐ ܒܩܳܠܳܐ ܐܰܒܳܐ ܟܬܒ ܗܘܳܐ ܥܽܘܢܺܝܬܳܐ ܒܪܺܝܟ ܕܒܩܠܗ ܩܪܐ ܘܐܰܩܺܝܡ܇ ܠܠܥܙܪ ܡܶܢ ܒܬܪ ܕܣܪܝ

ܕܒܰܪ ܗܘܳܐ ܫܡܫܐ ܢܗܝܪܐ܇ ܠܙܠ̈ܝܩܘܗܝ ܘܡܛܐ ܠܒܶܝܬ ܥܢܝܐ܇ ܘܫܐܠ ܥܰܠ ܩܒܰܪܐ܇ ܕܳܠܥܙܪ ܪܚܡܗ ܘܩܪܐ ܒܩܳܠܳܐ ܘܐܰܩܺܝܡܗ܇ ܘܚܘܝ ܗܘܳܐ ܪܐܙܐ ܕܢܽܘܚܳܡܳܐ܀

 

ܐܰܝܟ ܠܐ ܝܕܘܥܐ ܫܐܠ܇ ܘܰܐܝܟ ܝܕܟ ܟܣܝ̈ܬܐ ܫܡܠܝ܇ ܫܪܝ ܕܢܫܐܠ܇ ܩܪܐ ܒܩܳܠܳܐ ܘܐܰܩܺܝܡܗ܇ ܘܚܬܝܪ̈ܐ ܠܐ ܨܒܘ ܕܢܗܠܳܟܘܢ܀

 

ܡܶܢ ܕܐܬܢܚܡ ܠܥܙܪ܇ ܗܘ ܥܰܡܳܐ ܠܝܛܐ ܕܝܘܕ̈ܝܐ܇ ܠܡܝܬܐ ܣܥܘ ܘܒܥܘ ܕܳܠܡܘܬܐ ܢܫܡܠܘܢ܇ ܐܦ ܠܗܰܘ ܚܝܐ ܡܶܢܚܡܶܢܐ ܠܘܳܬ ܡܘܬܐ ܐܪܝܒܘ ܕܢܫܕܪܘܢ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܚܝܬ ܡܺܝ̈ܬܶܐ ܥܬܝܕܐ ܕܬܙܕܪܥܝ ܒܟܽܠܗ ܥܳܠܡܳܐ܇ ܘܟܽܠ ܐܢܫ ܝܕܥ ܕܰܐܢ̱ܬ ܡܳܪܝ̱ ܐܺܝܬܰܝܟ ܩܝܡܬܐ ܘܚܰܝ̈ܶܐ܇ ܐܰܢ̱ܬ ܗܘ ܐܺܝܬܰܝܟ ܩܝܡܬܐ ܘܚܝ̈ܐ ܘܣܒܰܪܐ ܕܡܺܝ̈ܬܶܐ܇ ܘܒܝܰܕ ܩܠܳܟ ܩܝܡܝܢ ܡܺܝ̈ܬܶܐ ܡܶܢ ܩܒܰܪ̈ܝܗܘܢ܀

 

ܛܥܬ ܥܩ̈ܬܗ ܘܥܒܰܪ ܐܒܠܗ ܘܦܟܗ ܚܫܗ܇ ܟܰܕ ܫܡܥܬ ܗܘܳܬ݀  ܡܶܢܳܟ ܕܡܳܪܰܢ ܕܩܐܡ ܐܚܘܗ܇ ܘܒܬܪ ܐܪܒܥܐ ܝܘܡ̈ܝܢ ܕܡܝܬ ܠܗ ܦܢܝܬ ܗܝ ܠܳܟ܇ ܕܝܕܥܐ ܐܢܐ ܡܳܪܝ̱ ܥܬܝܕ ܗܘ ܕܢܩܘܡ ܒܝܘܡ ܢܽܘܚܳܡܳܐ܀

 

ܩܰܘܡܳܐ ܕܰܬܪܶܝܢ

ܩܳܠܳܐ ܠܐ ܠܕܝܢܐ ܘܠܐ ܠܬܒܥܬܐ

ܦܢܝ ܕܡܳܪܰܢ ܠܐܚ̈ܘܬܗ ܕܪܚܡܗ ܘܐܡܪ܇ ܠܐ ܬܬܐܒܠ̈ܢ ܢܟܦ̈ܬܐ܇ ܕܠܳܐ ܗܘܳܐ ܟܘܪܗܢܗ ܕܡܘܬܐ܇ ܐܠܐ ܡܶܛܽܠ܇ ܕܢܫܬܒܚ ܒܪܶܗ ܕܰܐܠܳܗܳܐ ܗ ܗܘ ܕܒܰܪܝܗܝ ܗܘܳܐ܀

 

ܠܥܶܠ ܡܶܢ ܬܪܥܗ ܕܡܥܪܬܐ܇ ܩܳܡ ܢܽܘܚܳܡܳܐ܇ ܘܩܪܐ ܒܩܠܗ ܥܙܝܙܐ܇ ܠܥܙܪ ܬܐ ܠܳܟ ܦܘܩ ܠܒܰܪ ܘܢܦܩ ܡܝܬܐ܇ ܘܰܐܣܺܝܪ̈ܢ ܐܝ̈ܕܘܗܝ ܘܪ̈ܶܓܠܰܘܗ̱ܝ܇ ܗ ܦܩܕ ܘܫܪܐܳܘܘܗܝ܀

 

ܡܰܕܪܳܫܳܐ ܒܩܳܠܳܐ ܛܽܘܒܰܝܟܝ̱ ܐܦܪܬ܇ ܥܽܘܢܺܝܬܳܐ ܒܪܺܝܟ ܗܘ ܡܫܺܝܚܳܐ ܕܒܝܰܕ ܩܠܗ܇ ܩܪܐ ܠܠܥܙܪ ܡܶܢ ܓܘ ܩܒܰܪܐ

ܬܗܪܐ ܗܝ ܚܟܡܬܗ ܕܥܕܠܳܐ ܢܐܙܠ܇ ܠܐܦܪܝܡ ܟܪܟܐ ܚܝܐ ܠܥܙܪ܇ ܘܕܐܙܠ ܬܽܘܒ ܦܢܐ ܣܡܟܐ ܗܘܳܐ ܗܘܳܐ܇ ܘܡܶܛܽܠ ܥܐܕܐ ܙܚܘ ܐܪ̈ܡܝܐ܇ ܠܬܪܝܢ ܓܒ̈ܝܢ ܒܚܪ ܗܘܳܐ ܒܚܟܡܬܗ܇ ܒܥܰܠܬ ܠܥܙܪ ܡܝܬܐ ܕܚܝܐ܇ ܥܺܝܠܳܐ ܪܟܒ ܗܘܳܐ ܘܥܰܠ ܗܘܳܐ܇ ܘܐܣܠܝ ܠܫܬܝ̈ܩܐ ܘܓܒܐ ܡܠ̈ܠܐ܀

 

ܛܽܘܒܰܝܟܝ̱ ܡܪܬܐ ܕܕܠܳܐ ܕܚܠܐ܇ ܐܰܢ̱ܬܝ ܫܡܫܬܝܘܗܝ ܠܕܚܝܠ ܥܰܠ ܟܽܠ܇ ܬܪܣܝܬܝ ܠܐܳܘܨܪܐ܇ ܝܗܒ ܡܓܢ܇ ܠܚܡܳܐ ܕܚܰܝ̈ܶܐ ܠܒܢܝ̈ܢܫܐ܇ ܛܘܒ ܠܚܬܟܝ ܕܐܬܒܗܠ ܘܐܠܦܗ܇ ܘܛܘܒ ܠܐܚܘܟܝ ܕܐܬܥܙܙ ܕܢܚܡܗ܇ ܒܳܟܘܢ ܐܛܢ ܗܘܳܐ܇ ܠܦܠ̈ܝܓܐ ܕܠܳܐ ܐܳܘܝܘ ܕܢܶܗܘܽܘܢ ܒܝܰܕ ܚܘܒܐ܀

 

ܠܘ ܥܰܠ ܡܝܬܐ ܠܚܘܕ ܒܳܟܐ ܗܘܳܐ܇ ܗܘ ܝܕܘܥܐ ܕܣܬܝܪ̈ܬܐ܇ ܒܳܟܝܗ ܡܠܦ ܡܶܛܽܠ ܟܽܠܗ܇ ܟܝܢܐ ܘܓܢܣܐ ܕܒܢܝܢ̈ܫܐ܇ ܘܒܚܰܕ ܡܝܬܐ ܕܩܪܝܗܝ ܘܥܢܝܗܝ܇ ܗܟܢ ܩܪܐ ܠܳܟܽܠܗܽܘܢ ܕܡ̈ܟܐ܇ ܕܡܨܐ ܘܦܫܝܩ ܠܗ܇ ܕܒܝܰܘܡܳܐ ܐܚܪܝܐ ܐܬܐ ܠܰܢܽܘܚܳܡܳܐ܀

 

ܕܡܳܪܰܢ ܕܒܳܟܐ ܥܰܠ ܠܥܙܪ܇ ܘܐܫܦܥ ܕܡܥ̈ܐ ܥܰܠ ܬܪܥ ܩܒܪܶܗ܇ ܚܙܳܝܗ̱ܝ ܗܘܳܐ ܕܪܡܳܐ ܒܥܘܡܪܗ ܕܫܝܘܠ܇ ܛܒ ܟܪܝܬ ܠܗ ܥܰܠ ܥܘܢܕܢܗ܇ ܩܪܝܗܝ ܒܩܠܗ ܚܝܐ ܘܐܥܝܪܗ܇ ܘܝܗܒܗ ܗܘܳܐ ܠܬܪ̈ܬܝܢ ܐܚܘ̈ܬܗ܇ ܢܚܡ ܠܥܢܝܕ̈ܝܢ ܘܶܐܢܝܚ ܠܥܒܕ̈ܝܟ ܡܳܪܝ̱ ܒܥܕܝܢ ܕܒܘܣ̈ܡܳܐ܀

 

ܡܰܕܪܳܫܳܐ ܒܩܳܠܳܐ ܗܒܠܰܢ ܕܡܳܪܰܢ ܕܒܢܽܘܚܳܡܳܐ܇

 

ܒܪܺܝܟ ܕܒܩܠܗ ܩܪܐ ܠܠܥܙܪ܇ ܡܝܬܐ ܕܫܟܒ ܠܗ ܒܶܝܬ ܥܢܝ̈ܕܐ

ܥܰܠ ܠܥܙܪ ܐܡܪ ܕܡܳܪܰܢ܇ ܕܗܳܢܳܐܟܘܪܗܳܢܳܐܠܐ ܗܘܳܐ ܕܡܘܬܐ ܗܘ܇ ܕܒܗ ܡܫܬܒܚ ܡܳܐܚܐ ܡܺܝ̈ܬܶܐ ܕܗܘܳܐ ܩܠ ܚܝܐ ܩܠܝܕܐ ܠܩܒܪܶܗ܀

 

ܐܦ ܬܰܠܡܺܝ̈ܕܶܐ ܕܦܫܝ̈ܛܐ ܗ̱ܘܰܘ܇ ܗܝܡܶܢܘ ܕܥܰܠ ܫܢܬܐ ܐܡܪ ܕܡܳܪܰܢ܇ ܘܬܡܝܡܝܢ ܘܠܐ ܨܢܝܥܝܢ ܗ̱ܘܰܘ܇ ܐܡܪܘ ܕܐܢ ܕܡܝܟ ܠܗ ܐܝܬ ܠܗ ܕܢܬܬܥܝܪ܀

 

ܐܶܢܗܽܘ ܕܣܥܐ ܡܘܬܐ ܘܚܛܦܗ܇ ܐܢܐ ܗܘ ܢܽܘܚܳܡܳܐ܇ ܕܡܩܝܡ ܐܢܐ ܠܗ ܇ܦܫܝܩ ܗܘ ܕܒܐܝ̈ܕܝ ܡܘܬܐ ܘܚܝ̈ܐ܇ ܘܦܫܝܩ ܢܽܘܚܳܡܳܐ ܐܢ ܨܒܐ ܐܢܐ܀ ܕܒܰܪ ܗܘܳܐ ܠܐܣܦܝܪ ܗܝ ܕܬܪܥܣܪ܇ ܘܗܰܠܶܟ ܪܕܐ ܠܝܗܘܕ ܘܠܒܶܝܬ ܥܢܝܐ܇ ܘܰܐܝܟ ܠܐ ܝܕܥ ܡܫܐܠ ܬܰܡܳܢ܇ ܘܕܐܰܝܟܐ ܣܝܡ ܩܒܪܶܗ ܕܗܘ ܠܥܙܪ܀

 

ܩܽܘܡ ܦܰܘܠܳܘܣ ܥܶܢܝܳܢܳܐ ܬܫܰܒܰܚܘ̱ܬܐ ܠܚܝܐ ܘܡܳܐܚܝܢܐ ܕܒܩܠܗ ܐܰܩܺܝܡ ܠܥܙܪ

ܠܥܙܪ ܡܶܢ ܒܬܪ ܕܣܪܝ܇ ܩܪܐ ܘܢܦܩ ܒܬܶܫܒܽܘܚܬܳܐ ܪܒܬܐ܇ ܢܦܩ ܡܝܬܐ ܘܪܗܛ ܕܚܙܳܝܗ̱ܝ ܗܘܳܐ܇ ܠܰܢܽܘܚܳܡܳܐ ܟܰܕ ܩܪܐ ܘܐܥܝܪܗ܇ ܟܰܕ ܐܣܝܪ̈ܢ ܗܘ̈ܝ܇ ܐܝܕ̈ܘܗܝ ܐܦ ܪ̈ܶܓܠܰܘܗ̱ܝ܇ ܘܐܦܘ̈ܗܝ ܟܪ̈ܝܟܢ ܗܘ̈ܝ܇ ܘܣܝܡ̈ܢ ܘܡܚܦ̈ܝܢ܇ ܘܝܗܒܗ ܗܘܳܐ ܠܬܪ̈ܬܝܢ ܐܚܘ̈ܬܗ܇ ܟܽܠ ܕܚܙܳܝܗ̱ܝ ܝܗܒ ܠܗ ܬܶܫܒܽܘܚܬܳܐ܀

 

ܒܒܶܝܬ ܥܢܝܐ ܣܥܪ ܗܘܳܐ ܬܕܡܘܪܬܐ܇ ܗܘ ܡܪܐ ܕܣܘ̈ܦܐ ܘܦܢܝ̈ܬܐ܇ ܩܪܐ ܠܡܝܬܐ ܡܶܢ ܒܬܪ ܕܣܪܝ܇ ܘܐܰܩܺܝܡܗ ܗܘܳܐ ܡܶܢ ܓܘ ܩܒܰܪܐ܇ ܘܢܦܩ ܟܰܕ ܡܚܦ̈ܝܢ܇ ܐܦܘ̈ܗܝ ܒܣܘܪܕܐ܇ ܘܰܐܣܺܝܪ̈ܢ ܐܝܕ̈ܘܗܝ܇ ܘܪ̈ܶܓܠܰܘܗ̱ܝ ܒܦܟܪ̈ܐ܇ ܘܡܗܠܳܟ ܘܙܡܪ ܬܶܫܒܽܘܚܬܳܐ܇ ܠܰܡܫܺܝܚܳܐ ܕܩܪܝܗܝ ܘܐܰܩܺܝܡܗ܀

 

ܐܬܝ̈ܢ ܗܘ̈ܝ ܕܡܥ̈ܐ ܥܰܠ ܪܚܡܗ܇ ܘܒܗܳܕܶܐ ܕܚܘܝ ܠܥܙܪ ܬܐ ܠܒܰܪ܇ ܘܐܰܩܺܝܡܗ ܒܚܝܠ ܐܠܗܰܘܳܬ݀ ܗ܇ ܘܢܦܩ ܟܰܕ ܦܟܝܪ̈ܢ ܐܝܕ̈ܘܗܝ ܥܰܡ ܪ̈ܶܓܠܰܘܗ̱ܝ܇ ܘܟܶܢܫ̈ܶܐ ܡܬܕܡܳܪܝ̱ܢ܇ ܘܬܗܪܝܢ ܒܬܕܡܘܪܬܐ܇ ܫܽܘܒܚܳܐ ܠܳܟ ܝܶܫܽܘܥ ܐܰܠܳܗܳܐ܇ ܕܫܠܝܛ ܐܰܢ̱ܬ ܥܰܠ ܡܘܬܐ ܘܚܰܝ̈ܶܐ܀

 

ܣܘܓܝܬܐ ܩܳܠܳܐ ܐܝܢܘ ܕܢܓܝܪܐ ܥܽܘܢܺܝܬܳܐ ܐܳܘ ܐܰܚ̈ܰܝܒܢ̈ܝ ܪܥܝܢܝ܇ ܒܳܟܐܳܘܘܗ ܠܚܠܫܘܬܝ ܕܗܘܝܬ ܡܳܐܢܐ ܡܣܠܝܐ

ܒܕܘܒܰܪ̈ܝ ܐܰܒܳܐ ܕܪܚܡܬܝܗܝ܇ ܢܥܒܕ ܕܘܟܪܢܟ܇ ܘܠܰܢ ܐܫܘܐ ܕܢܚܙܝܟ ܒܓܢܘܢ ܚܰܕ̈ܘܬܐ܀

 

ܒܝܰܘܡܳܐ ܕܕܢܚ ܒܗ܇ ܙܝܘܗ ܕܒܰܪ ܡܰܠܟܳܐ܇ ܠܥܕܝܢ ܡܦܪܚ ܠܳܟ܇ ܒܝܘܡܗ ܕܢܽܘܚܳܡܳܐ܀

 

ܓܒܐ ܕܙܕܝ̈ܩܐ܇ ܐܚܒܬ ܫܘܦܪ̈ܝܗܘܢ܇ ܡܣܝܥ ܘܡܥܒܰܪ ܠܳܟ܇ ܐܬܪܐ ܕܒܶܝܬ ܩܢܛܐ܀

 

ܕܚܠܐ ܗܘ ܒܶܝܬ ܕܝܢܐ܇ ܡܶܢܗ ܕܟܺܐܢܽܘܬܳܐ܇ ܡܳܐ ܕܬܒܥܐ ܘܝܗܒܐ܇ ܠܳܟܽܠܰܢܫ ܐܰܝܟ ܥܰܡܠ̈ܘܗܝ܀

 

ܗܐ ܬܰܡܳܢ ܥܰܡܠ̈ܝܟ܇ ܘܣܘܓܐܐ ܕܡܪ̈ܗܛܝܟ܇ ܒܳܟܝܠܐ ܪܝܫܝܐ܇ ܡܫܦܥ ܝܗܒ ܠܳܟ܀

 

ܘܶܐܶܢܗܽܘ ܕܠܳܐ ܡܨܐ ܐܢܐ܇ ܐܥܘܠ ܠܗܰܘ ܐܬܪܐ܇ ܐܚܐ ܥܰܠ ܬܪܥܗ܇ ܒܛܝܒܘ ܕܠܳܐ ܩܢܛܐ܀

 

ܙܐܥ ܗܘܳܐ ܥܪܝܢܝ܇ ܕܫܡܥܬ ܒܶܝܬ ܕܝܢܐ܇ ܘܡܶܢ ܢܐܚܘܢ ܫܦܠܝܘܬܝ܇ ܕܚܒܬ ܕܠܳܐ ܣܟܐ܀

 

ܚܘܒ̈ܝ ܣܓܝ̈ܐܝܢ܇ ܘܚܝ̈ܝ ܐܬܟܪܝܘ܇ ܘܝܠܝ ܕܥܒܰܪ ܡܶܢܝ܇ ܝܰܘܡܳܐ ܕܬܐܓܘܪܬܐ܀

 

ܛܥܢܟ ܡܶܛܽܠܬܝ܇ ܩܝܣܐ ܒܓܓܘܠܬܐ܇ ܢܗܘܳܐ ܠܝ ܡܘܬܟ܇ ܓܦ̈ܐ ܠܒܶܝܬ ܐܒܘܟ܀

 

ܝܘܡ̈ܝ ܐܰܝܟ ܠܗܓܐ܇ ܐܳܘܦܝܘ ܘܠܐ ܪܓܫܬ܇ ܘܡܶܢ ܫܝܠܝ ܥܰܠ ܕܒܰܪܢܝ܇ ܘܐܦܩܢܝ ܥܘܢܕܢܐ܀

 

ܟܺܐܢܽܘܬܳܐ ܕܚܰܝܠܳܐ܇ ܡܳܐ ܕܓܠܝܐ ܚܘ̈ܒܐ܇ ܝܰܠܽܘ̈ܕܶܐ ܒܚܫܘܟܐ ܒܢܽܘܪܳܐ ܡܬܒܚܪܝܢ܀

 

ܠܫܝܘܠ ܥܳܐܶܠ ܐܢܐ ܕܡܘܬܐ ܥܰܠ ܦܟܪܢܝ܇ ܘܝܠܝ ܕܡܗܠ ܒܝ܇ ܡܘܬܐ ܘܣܳܛܳܢܳܐ܀

 

ܡܰܠܟܳܐ ܫܡܝܢܐ܇ ܕܰܢܚܶܬ ܡܶܢ ܪܰܘܡܳܐ܇ ܦܬܚ ܠܝ ܬܪܥ ܪ̈ܰܚܡܰܝܟ܇ ܕܐܚܰܕܬ ܒܳܟ ܓܘܣܐ܀

 

ܢܗܘܳܐ ܠܝ ܢܦܐܫܐ܇ ܒܝܘܡ ܦܣܝܩ̈ܬܐ܇ ܘܟܽܠ ܐܢܫ ܫܬܩ ܠܗ ܇ܘܠܐ ܐܝܬ ܗܘ ܦܝܣܐ܀

 

ܣܒܰܪܐ ܕܙܕܝ̈ܩܐ܇ ܘܠܘܝܐ ܕܫܝܪ̈ܐ܇ ܗܘܝ ܠܗ ܠܚܝܒܘܬܝ܇ ܣܢܐܓܪܐ ܒܶܝܬ ܕܝܢܐ܀

 

ܥܪܛܠ ܥܰܠܬ ܠܗ܇ ܠܥܳܠܡܳܐ ܕܥܩ̈ܬܐ܇ ܘܙܩܪ ܠܝ ܘܐܠܒܫܢܝ܇ ܢܚ̈ܬܐ ܕܟܘܬܡ̈ܬܐ܀

 

ܦܟܪܢܝ ܣܳܛܳܢܳܐ܇ ܒܡܕܡ ܠܐ ܪܓܫܬ܇ ܘܗܫܐ ܡܗܠ ܒܝ܇ ܘܝܠܝ ܟܡܳܐ ܣܪܚܬ܀

 

ܨܒܝܢܝ ܗ̱ܘܰܘ ܕܒܰܪܢܝ܇ ܒܟܽܠܗܽܘܢ ܣܘܥܪ̈ܢܝ܇ ܘܥܰܠ ܗܝ ܩܢܝܛ ܐܢܐ܇ ܘܣܚܠ ܐܢܐ ܟܽܠܝܽܘܡ܀

 

ܩܢܘܡܳܐ ܕܥܰܡܪ ܒܗ܇ ܚܰܝܠܳܐ ܕܪܘܚ ܩܘܕܫܐ܇ ܐܢ ܐܝܬ ܒܘܨܪ̈ܐ܇ ܒܳܟ ܗܘ ܡܬܚܣܝܢ܀

 

ܪܘܫܥܐ ܕܚܘܫ̈ܒܝ܇ ܡܶܢܘ ܡܣܝܟ ܠܗ܇ ܕܬܒܥܬܐ ܩܫܝܐ܇ ܡܶܢܘ ܕܠܳܐ ܢܕܚܠ܀

 

ܫܠܡܳܐ ܠܗ ܐܽܘܪܚܳܐ܇ ܥܕܰܡܳܐ ܠܦܘܡ ܩܒܰܪܐ܇ ܙܠܘ ܐܬܕܟܪܘܢܢܝ܇ ܒܓܰܘ ܡܕܒܚܩܘܕܫܐ܀

 

ܬܰܘܬܐ ܗܝ ܪܒܬܐ܇ ܥܰܠ ܡܳܐ ܕܣܥܝܪ ܠܝ܇ ܥܕܰܡܳܐ ܕܫܡܥ ܐܢܐ܇ ܦܬܓܡ ܕܝܢܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܡܶܢ ܟܰܕ ܐܪܦܝܬܝܗܝ ܘܐܙܠܬ܇ ܥܰܠ ܡܘܬܐ ܘܒܙ ܠܰܢ ܡܶܢ ܫܝܠܝ܇ ܘܒܓܰܘ ܩܒܰܪܐ ܚܒܫܗ ܗܘܳܐ܇ ܠܠܥܙܪ ܪܚܡܳܐ ܕܝܠܳܟ܀

 

ܩܪܐ ܠܡܝܬܐ ܒܩܳܠܳܐ ܪܡܳܐ܇ ܘܠܥܙܪ ܦܘܩ ܡܶܢ ܬܰܡܳܢ܇ ܘܢܦܩ ܟܰܕ ܙܡܪ ܫܽܘܒܚܳܐ܇ ܘܟܶܢܫ̈ܶܐ ܕܚܙܘ ܐܬܕܡܪܘ܀

 

ܡܘܪܒܐ ܕܠܺܠܝܳܐ܇ ܩܳܠܳܐ ܣܢܝܐ ܗܘ ܕܚܙܐ܇

ܟܰܕ ܠܘܳܬ ܚܫܐ ܗܘ ܕܥܬܝܕ ܗܘܝܬ܇ ܕܬܐܬܐ ܡܫܺܝܚܳܐ ܦܳܪܽܘܩܰܢ܇ ܠܬܰܠܡܺܝ̈ܕܶܐ ܕܝܠܳܟ ܓܠܝܬ ܘܚܘܝܬ܇ ܘܠܥܙܪ ܪܚܡܶܢ ܡܝܬ ܠܗ܇ ܘܨܒܐ ܐܢܐ ܕܐܙܠ ܐܩܪܐ ܘܐܰܩܺܝܡܝܘܗܝ܇ ܒܝܰܕ ܗܳܕܶܐ ܕܠܳܐ ܫܠܝܐ܀

 

ܠܒܶܝܬ ܥܢܝܐ ܐܬܐ ܦܳܪܽܘܩܰܢ܇ ܠܐܰܝܟܐ ܕܪܚܡܗ ܠܥܙܪ܇ ܘܢܦܩܬ ܗܘܳܬ݀  ܡܪܬܐ ܘܐܡܪܬ ܠܗ ܇ܕܐܠܝ ܬܢܢ ܗܘܝܬ ܦܳܪܽܘܩܰܢ܇ ܠܐ ܡܳܐܬ ܗܘܳܐ ܪܚܡܟ ܠܥܙܪ܇ ܘܐܡܪ ܠܗ ܕܗܝܡܶܢܝ ܘܐܫܪܝ ܕܩܐܡ ܐܚܘܟܝ܀

 

ܫܽܘܒܚܳܐ ܠܗ ܠܰܐܒܳܐ ܩܰܕܺܝܫܳܐ܇ ܢܚܶܬ ܘܫܪܐ ܩܰܕܺܝܫܳܐܝܬ܇ ܠܪܽܘܚܳܐ ܩܰܕܺܝܫܳܐ ܦܪܩܠܝܛܐ܇ ܚܰܕ ܐܰܠܳܗܳܐ ܫܪܝܪܐ܇ ܕܳܠܗ ܗܘ ܡܫܰܒܚܺܝܢܢ܀

 

ܫܰܒܰܚܘ̱ ܥܒܕ̈ܘܗܝ ܒܩܳܠܳܐ ܥܰܡ ܟܶܢܫ̈ܶܐ ܫܡܝ̈ܢܐ

ܐܬܐ ܕܡܳܪܰܢ ܠܒܶܝܬ ܥܢܝܐ ܘܥܰܡܗ ܓܘܕܐ ܫܒܝܚܬܐ ܕܬܰܠܡܺܝ̈ܕܰܘܗ̱ܝ܇ ܘܐܪܥܬܗ ܡܪܬܐ ܠܕܡܳܪܰܢ ܝܶܫܽܘܥ܇ ܘܒܚܢ̈ܓܬܐ ܡܦܝܣܐ ܗܘܳܬ݀  ܠܗ܇ ܥܰܡܡ̈ܶܐ܀

 

ܐܡܪ ܕܡܳܪܰܢ ܠܡܪܬܐ ܕܐܢܐ ܐܝܬܝ ܢܽܘܚܳܡܳܐ ܘܚܝ̈ܐ܇ ܘܶܐܢ ܬܗܝܡܶܢܝܢܝ ܬܚܙܝܢܝ ܫܘܒܚܗ ܕܰܐܠܳܗܳܐ܇ ܘܩܪܐ ܠܠܥܙܪ ܬܐ ܠܒܰܪ܇ ܥܰܡܡ̈ܐ܀

 

ܩܪܐ ܕܡܳܪܰܢ ܠܠܥܙܪ ܘܐܦ ܐܰܩܺܝܡܗ܇ ܡܶܢ ܒܶܝܬ ܥܢܝ̈ܕܐ܇ ܘܢܦܩ ܗܘܳܐ ܡܶܢ ܒܬܪ ܕܣܪܝ ܘܩܳܠܳܐ ܣܡܟܗ ܕܢܗܠܳܟ ܗܘܳܐ܇ ܥܰܡܡ̈ܐ ܫܰܒܚܽܘܗ̱ܝ܀

 

ܚܙܳܝܗ̱ܝ ܡܘܬܐ ܘܐܬܒܠܗܝ ܕܟܰܕ ܡܚܙܩ ܗܘܳܐ܇ ܘܗܰܠܶܟ ܗܘܳܐ ܘܢܦܩ܇ ܘܐܚܰܕ ܗܘܳܐ܇ ܬܗܪܐ ܘܪܬܝܬܐ ܠܥܰܡܳܐ ܠܝܛܐ ܕܝܘܕ̈ܝܐ܇ ܥܰܡܡ̈ܐ܀

 

ܫܪܐܳܘܘܗܝ ܐܰܝܟ ܕܐܬܦܩܕܘ܇ ܘܐܦ ܠܐܚܘ̈ܬܗ܇ ܣܓܝ ܗܘܳܐ ܒܘܝܐܐ܇ ܘܗܘܳܐ ܗܘܳܐ܇ ܣܒܰܪܐ ܠܥܢܝ̈ܕܐ ܒܐܬܐ ܕܡܠܝܐ ܢܽܘܚܳܡܳܐ܇ ܥܰܡܡ̈ܐ܀

 

ܚܙܘ ܟܶܢܫ̈ܶܐ ܬܕܡܘܪܬܐ ܕܣܥܪ ܕܡܳܪܰܢ܇ ܒܶܝܬ ܥܢܝܐ ܩܪܝܬܐ܇ ܘܐܫܬܰܘܕܥܘ܇ ܝܰܠܽܘ̈ܕܶܐ ܒܰܫܪܳܪܳܐ ܡܶܢܚܡ ܡܺܝ̈ܬܶܐ ܡܶܢ ܩܒܰܪ̈ܐ܇ ܥܰܡܡ̈ܐ܀

 

ܫܽܘܒܚܳܐ ܢܣܩ ܠܰܐܒܳܐ ܘܠܰܒܪܳܐ ܘܠܪܘܚܩܽܘܕܫܳܐܗܘ ܦܪܩܠܝܛܐ܇ ܚܰܕ ܐܰܠܳܗܳܐ ܫܪܝܪܐ܇ ܬܠܬܐ ܩܢܘܡ̈ܐ ܩ̈ܕܝܫܐ܇ ܚܰܕܐ ܐܠܗܰܘܳܬ݀ ܐ ܡܰܪܝܰܡܬܐ܇ ܥܰܡܡ̈ܐ܀

 

ܕܨܰܦܪܳܐ ܕܪܰܚܶܡܥܠܰܝ܇ ܩܳܠܳܐ ܗܘ ܕܥܘܗܕܢܐ

ܐܰܢ̱ܬ ܕܳܠܪܚܡܳܐ ܕܝܠܳܟ܇ ܠܥܙܪ ܡܶܢ ܒܶܝܬ ܡܺܝ̈ܬܶܐ܇ ܒܩܠܳܟ ܚܝܐ ܢܚܡܬܝܗܝ ܐܰܝܟ ܐܰܠܳܗܳܐ܇ ܠܘܳܬܟ܀

 

ܗܘ ܕܥܰܠ ܠܥܙܪ ܐܰܝܟ ܒܰܪܢܳܫܳܐ܇ ܒܡܫܘܬܦܘܬ ܚܫܐ ܕܡܶܢܥ܇ ܘܐܰܩܺܝܡܗ ܐܰܝܟ ܐܰܠܳܗܳܐ܇ ܠܘܳܬܟ܀

 

ܗܘ ܕܳܠܠܥܙܪ ܪܚܡܗ ܕܫܟܒ ܡܶܢ ܒܬܪ ܕܣܪܝ ܒܩܒܰܪܐ܇ ܩܪܐ ܠܗ ܒܩܳܠܳܐ ܘܐܰܩܺܝܡܗ܀

 

ܗܘ ܕܒܫܘܠܛܢܐ܇ ܩܳܠܳܐ ܐܙܥܩ܇ ܠܥܙܪ ܩܘܡ ܡܶܢ ܬܰܡܳܢ܇ ܘܟܰܕ ܐܣܝܪ̈ܢ ܐܝ̈ܕܘܗܝ ܘܪ̈ܶܓܠܰܘܗ̱ܝ܇ ܢܦܩ܀

 

ܗܘ ܕܡܶܢ ܩܒܰܪܐ܇ ܠܠܥܙܪ ܐܰܩܺܝܡ܇ ܡܶܢ ܒܬܪ ܐܪܒܥܐ ܝܘܡ̈ܝܢ܇ ܘܚܘܝ ܐܬܐ ܕܢܽܘܚܳܡܳܐ܀

 

ܗܘ ܕܒܩܠܗ ܡܺܝ̈ܬܶܐ ܡܬܢܚܡܝܢ܇ ܘܙܳܡܪܺܝܢ ܫܽܘܒܚܳܐ ܘܬܰܘܕܺܝܬܳܐ܇ ܠܗܰܘ ܩܳܠܳܐ ܕܢܚܡ ܐܶܢܽܘܢ܇ ܠܘܳܬܟ܀

 

ܩܪܝ ܒܗ ܒܩܠܳܟ܇ ܚܝܐ ܘܡܳܐܚܝܢܐ܇ ܘܢܩܘܡܘܢ ܡܶܢ ܩܒܰܪ̈ܝܗܘܢ ܟܽܠܗܽܘܢ ܥܢܝ̈ܕܐ ܡܗܝܡ̈ܢܐ܀

 

ܬܒܰܪܘܟܝ ܘܬܣܓܘܕܝ ܥܺܕܬܳܐ ܩܰܕܺܝܫܬܐ܇ ܠܰܐܒܳܐ ܘܠܰܒܪܳܐ ܘܪܘܚܩܘܕܫܐ܇ ܚܰܕ ܐܰܠܳܗܳܐ ܫܪܝܪܐ܇ ܠܘܳܬܟ܀

 

ܐܠܗܝ ܐܠܗܝ܇ ܒܩܳܠܳܐ ܐܰܢ̱ܬ ܕܒܩܝܡܬܐ ܕܝܠܳܟ

ܐܰܢ̱ܬ ܕܳܠܪܚܡܳܐ ܕܝܠܳܟ܇ ܠܥܙܪ ܡܶܢ ܒܶܝܬ ܡܺܝ̈ܬܶܐ܇ ܒܩܠܳܟ ܚܝܐ ܢܚܡܬܝܗܝ ܐܰܝܟ ܐܰܠܳܗܳܐ܇ ܐܰܠܳܗܳܐ܀ ܐܰܢ̱ܬ ܕܺܐܺܝܬܰܝܟ ܦܳܪܽܘܩܰܢ܇ ܢܽܘܚܳܡܳܐ ܘܚܝ̈ܐ ܚܰܕ̈ܬܐ܇ ܕܒܰܪܬ ܐܶܢܽܘܢ ܠܬܠ̈ܡܝܕܝܟ܇ ܘܠܒܶܝܬ ܥܢܝܐ ܐܙܠܘ ܗܘܝܬܰܘܢ܇ ܐܰܠܳܗܳܐ܀

 

ܡܰܪܝܰܡ ܢܦܩܬ ܠܽܐܘܪܥܳܟ܇ ܟܰܕ ܒܳܟܝܐ ܘܫܦܥ̈ܢ ܕܡܥ̈ܝܗ܇ ܘܠܳܟ ܗܘ ܡܦܝܣܐ ܗܘܳܬ݀ ܇ ܕܬܩܝܡ ܠܐܚܘܗ ܡܶܢ ܩܒܰܪܐ܀

 

ܫܪܝܘ ܟܶܢܫ̈ܶܐ ܩܳܥܶܝܢ܇ ܫܽܘܒܚܳܐ ܦܐܝܐ ܘܬܰܘܕܺܝܬܳܐ܇ ܕܚܙܘ ܬܗܪܐ܇ ܠܥܙܪ ܩܳܡ ܡܶܢ ܩܒܰܪܐ܀

 

ܚܘܣ ܥܰܠ ܨܠܡܟ ܘܕܡܟ܇ ܘܢܚܡ ܘܐܚܝܗܝ܇ ܘܐܰܩܺܝܡܝܗܝ ܡܶܢ ܝܰܡܺܝܢܳܟ܇ ܘܐܠܒܫܝܗܝ ܐܣܛܠ ܫܽܘܒܚܳܐ܀

 

ܫܽܘܒܚܳܐ ܠܰܐܒܳܐ ܓܢܝܙܐ܇ ܘܠܰܒܪܳܐ ܐܝܬܝܐ ܕܡܶܢ ܥܰܠܡ܇ ܘܠܪܘܚܩܘܕܫܐ܇ ܨܡܚܐ ܘܕܢܚܐ ܡܬܰܘܡܝܐ܇ ܐܰܠܳܗܳܐ܀

 

ܫܡܝܐ ܡܫܬܥܝܢ ܩܳܠܳܐ ܐܰܢ̱ܬ ܕܒܰܪܝܫܝܬ

ܐܰܢ̱ܬ ܡܳܪܝ̱ ܐܡܪܬ܇ ܠܬܠ̈ܡܝܕܝܟ ܕܗܳܐ ܠܥܙܪ ܪܚܡܶܢ ܫܟܒ ܠܗ܇ ܘܚܰܕܐ ܐܢܐ ܕܠܳܐ ܗܘܝܬ ܬܰܡܳܢ܇ ܡܒܰܪܟܐ܀ ܐܰܢ̱ܬ ܡܳܪܝ̱ ܐܡܪܬ܇ ܕܐܢܐ ܐܝܬܝ܇ ܢܽܘܚܳܡܳܐ ܘܚܰܝ̈ܶܐ ܚܰܕ̈ܬܐ܇ ܠܳܟܽܠ ܕܡܗܝܡܶܢ ܒܰܫܪܳܪܳܐ ܡܒܰܪܟܐ܀

 

ܐܰܝܟ ܒܰܪܢܳܫܳܐ܇ ܡܫܐܠ ܗܘܝܬ ܕܐܰܝܟܐ ܣܡܘܗܝ ܘܰܐܝܟ ܐܰܠܳܗܳܐ܇ ܕܢܬܢܚܡ ܒܩܠܳܟ ܐܰܩܺܝܡܬ ܡܒܰܪܟܐ܀ ܐܰܢ̱ܬ ܕܡܳܪܰܢ ܩܳܡܬ܇ ܠܥܶܠ ܡܶܢ ܩܒܪܶܗ ܕܳܠܥܙܪ ܘܒܝܰܕ ܩܠܳܟ܇ ܡܳܐܚܝܢܐ ܩܪܝܬ ܘܐܰܩܺܝܡܬܝܗܝ܇ ܡܒܰܪܟܐ܀

 

ܠܪܚܡܳܐ ܕܝܠܳܟ܇ ܘܡܶܢ ܒܬܪ ܐܪܒܥܐ ܝܘܡ̈ܝܢ ܕܗܘܳܐ ܒܩܒܰܪܐ܇ ܐܰܩܺܝܡܬܝܗܘܝ ܡܶܢ ܓܘ ܩܒܰܪܐ܀ ܐܡܪܬ ܡܪܬܐ܇ ܕܐܠܘ ܬܢܢ ܗܘܝܬ ܚܢܢܐ ܘܡܳܐܚܐ ܡܺܝ̈ܬܶܐ܇ ܠܥܙܪ ܠܐ ܡܳܐܬ ܗܘܳܐ܇ ܡܒܰܪܟܐ܀

 

ܐܡܪ ܕܡܳܪܰܢ ܠܡܪܬܐ ܐܶܢܗܽܘ ܕܡܗܝܡܶܢܬܝ ܩܐܡ ܐܚܘܟܝ܇ ܘܡܚܰܕܐ ܩܪܐ ܠܗ ܘܐܰܩܺܝܡܗ܇ ܡܒܰܪܟܐ܀ ܐܢܝܚ ܡܳܪܝܳܐ܇ ܠܰܢܦܫ̈ܬܐ ܕܥܒ̈ܕܐ ܕܝܠܳܟ ܒܗܝ ܡܰܠܟܽܘܬܳܐ܇ ܕܠܳܐ ܥܒܰܪܐ ܘܠܐ ܡܫܬܪܝܐ܀

ܬܶܫܒܽܘܚܬܳܐ ܚܰܕܬܐ ܒܩܳܠܳܐ ܝܰܘܡܳܢܳܐ

ܝܰܘܡܳܢܳܐ܇ ܐܶܫܬܰܕܰܪܬ ܗܘܳܬ݀  ܐܓܪܬܐ ܕܰܚܫܳܐ ܘܟܪܝܘܬܐ܇ ܨܶܝܕ ܦܳܪܽܘܩܰܢ ܡܶܛܽܠ ܪܚܡܗ ܕܡܝܬ ܘܐܬܚܒܠ܇ ܘܕܒܰܪ ܐܶܢܽܘܢ ܠܬܰܠܡܺܝ̈ܕܰܘܗ̱ܝ ܘܐܬܐ ܠܒܶܝܬ ܥܢܝܐ܀

 

ܫܪܝ ܕܡܳܪܰܢ܇ ܡܫܐܠ ܠܳܟ̈ܢܫܐ ܕܚܰܕܪ̈ܘܗܝ ܐܰܝܟܘ ܠܥܙܪ܇ ܘܦܢܘ ܗܢܘܢ ܕܡܝܬ ܘܐܬܬܣܝܡ ܠܗ ܒܥܘܡܪܗ ܕܫܝܘܠ܇ ܘܐܬܐ ܕܡܳܪܰܢ ܘܬܰܠܡܺܝ̈ܕܰܘܗ̱ܝ ܘܩܪܐ ܠܗ ܘܢܦܩ܀

 

ܚܙܘ ܬܰܠܡܺܝ̈ܕܶܐ܇ ܕܐܬܐ ܕܬܗܪܐ ܕܣܥܪ ܗܘܳܐ ܡܫܺܝܚܳܐ ܦܳܪܽܘܩܰܢ܇ ܡܝܬܐ ܕܣܪܝ ܘܐܬܚܒܠ ܠܗ ܩܪܐ ܠܗ ܘܢܦܩ܇ ܘܫܪܝܘ ܙܳܡܪܺܝܢ ܬܶܫܒܽܘܚܬܳܐ܇ ܟܽܠܗܽܘܢ ܫܘܝܐܝܬ܀

 

ܐ̱ܚܪܺܢܳܐ ܒܩܳܠܳܐ ܩܳܠܳܐ ܕܫܽܘܒܚܳܐ

ܩܳܠܳܐ ܕܫܽܘܒܚܳܐ ܒܦܘܡ ܡܰܠܰܐܟ̈ܶܐ ܐܥܝܪܝܢܝ ܡܳܪܝ̱܇ ܕܒܨܰܦܪܳܐ ܫܘܒܚܟ ܐܙܡܪ܇ ܦܬܚܬ ܣܦ̈ܘܬܝ ܠܡܡܰܠܶܠܘ ܟܰܕ ܡܰܘܕܶܐ ܐܢܐ܇ ܡܳܪܝ̱ ܘܐܠܗܝ ܪܰܚܶܡܥܠܰܝ܀

 

ܩܪܐ ܠܗ ܡܪܗ ܬܐ ܠܒܰܪ ܘܢܦܩ ܗܘ ܠܥܙܪ܇ ܟܰܕ ܐܝ̈ܕܘܗܝ ܘܪ̈ܶܓܠܰܘܗ̱ܝ ܦܟܝܪ̈ܢ܇ ܘܐܡܪ ܕܡܳܪܰܢ ܕܫܪܐܳܘܘܢܝܗܝ ܘܫܒܘܩ ܐܙܠ܇ ܠܒܶܝܬܐ ܕܝܠܗ ܟܰܕ ܚܰܕܐ܀

 

ܫܽܘܒܚܳܐ ܠܳܟ ܡܳܪܝ̱ ܕܩܪܝܬ ܘܐܰܩܺܝܡܬ ܡܶܢ ܓܘ ܩܒܰܪܐ܇ ܠܠܥܙܪ ܡܝܬܐ ܕܣܪܝ܇ ܘܗܳܐ ܡܬܢܨܚ ܝܘܡ ܕܘܟܪܢܗ ܒܐܪ̈ܒܥܦܢܝܢ܇ ܡܶܢ ܣܘܦ̈ܐ ܠܣܘܦ̈ܝܗ ܕܰܐܪܥܳܐ܀

 

ܡܘܪܒܐ ܒܩܳܠܳܐ ܠܶܟܝ̱ ܢܬܟܫܦ

ܐܬܐ ܕܡܳܪܰܢ܇ ܘܬܰܠܡܺܝ̈ܕܰܘܗ̱ܝ ܟܽܠܗܽܘܢ ܥܰܡܗ ܠܓܰܘ ܒܶܝܬ ܥܢܝܐ܇ ܘܡܫܐܠ ܗܘܳܐ܇ ܕܐܰܝܟܐ ܣܡܘܗܝ ܠܠܥܙܪ ܪܚܡܶܢ ܕܫܟܒ܇ ܘܐܡܪ̈ܢ ܗܘ̈ܝ ܐܚܘ̈ܬܗ ܕܐܠܘ ܬܢܢ ܗܘܝܬ ܕܡܳܪܰܢ܇ ܠܐ ܡܳܐܬ ܗܘܳܐ ܠܥܙܪ܀

 

ܬܪܨ ܗܘܳܐ ܕܡܳܪܰܢ܇ ܘܐܬܐ ܗܘܳܐ ܘܩܳܡ ܨܶܝܕ ܩܒܰܪܐ ܘܟܶܢܫ̈ܶܐ ܥܰܡܗ܇ ܘܒܒܰܪܬ ܩܳܠܳܐ܇ ܩܪܐ ܠܗ ܠܥܙܪ ܬܐ ܠܒܰܪ ܦܩܘܕܺܐܝܬ܇ ܘܢܦܩ ܟܰܕ ܐܣܝܪ̈ܢ ܘܡܚܙܩ ܐܝܕ̈ܘܗܝ ܘܪ̈ܶܓܠܰܘܗ̱ܝ܇ ܘܦܩܕ ܘܫܪܐܳܘܘܗܝ܀

 

ܣܒܰܪܐ ܛܳܒܳܐ܇ ܘܢܽܘܚܳܡܳܐ ܕܙܕܝܩܘܬܐ ܡܫܺܝܚܳܐ ܕܡܳܪܰܢ܇ ܥܒܕ ܒܰܚܢܳܢܳܟ܇ ܢܝܚܐ ܘܕܘܟܪܢܐ ܛܳܒܳܐ ܠܥܢܝܕ̈ܐ ܡܗ̈ܝܡܶܢܐ܇ ܗܢܘܢ ܕܐܟܽܠܘ ܦܓܪܟ܇ ܩܰܕܺܝܫܳܐ ܐܫܬܝܘ ܠܕܡܟ ܘܫܟܒ ܥܰܠ ܣܒܰܪܟ܀

 

ܫܰܒܰܚܘ̱ ܥܒ̈ܕܘܗܝ ܒܩܳܠܳܐ ܒܥܕܢ ܨܦܪܐ

ܐܰܢ̱ܬ ܕܒܩܠܳܟ ܠܠܥܙܪ܇ ܢܚܡܬ ܡܶܢ ܩܒܰܪܐ܇ ܠܰܒܪܺܝܬܳܐ ܢܽܘܚܳܡܳܐ ܕܐܕܰܢܚܶܬ ܟܰܕ ܐܡܪ̈ܢ܇ ܫܽܘܒܚܳܐ܀

 

ܕܒܰܪ ܗܘܳܐ ܫܡܫܐ ܠܙܠ̈ܝܩܐ܇ ܫܒܝܚ̈ܐ ܕܪܒܘܬܗ܇ ܘܐܬܐ ܕܢܚܘܐ ܬܗܪܐ ܘܢܫܰܪܰܪ ܗܘܳܐ܇ ܫܽܘܒܚܳܐ܀

 

ܡܛܐ ܠܒܶܝܬ ܥܢܝܐ܇ ܘܢܦܩܘ ܗ̱ܘܰܘ܇ ܟܶܢܫ̈ܶܐ ܠܐܝܩܪܗ܇ ܘܫܪܝ ܗܘܳܐ ܕܢܫܐܠ ܐܶܢܽܘܢ܇ ܕܐܰܝܟܐ ܣܝܡ ܗܘ܇ ܪܚܡܶܢ ܕܗܘ ܠܥܙܪ܀

 

ܙܡܶܢ ܢܦܫܗ ܕܢܣܥܽܘܪ ܗܘܳܐ܇ ܠܗܳܕܶܐ ܬܕܡܘܪܬܐ܇ ܕܫܰܪܰܪ ܐܶܢܽܘܢ ܠܬܰܠܡܺܝ̈ܕܰܘܗ̱ܝ܇ ܕܗܘ ܐܺܝܬܰܘܗ̱ܝ ܡܶܢܚܡܶܢܐ ܕܥ̈ܢܝܕܐ܀

 

ܩܳܡ ܨܶܝܕ ܩܒܰܪܐ ܘܐܙܝܥ ܗܘܳܐ ܢܦܫܗ ܥܰܠ ܬܗܪܐ܇ ܘܩܪܐ ܗܘܳܐ ܒܩܳܠܳܐ ܘܐܰܩܺܝܡܗ ܟܰܕ ܐܣܝܪ̈ܢ܇ ܐܝܕ̈ܘܗܝ ܕܝܢ ܥܰܡ ܪ̈ܶܓܠܰܘܗ̱ܝ܀

 

ܚܙܘ ܝܽܘܕܳܝ̈ܶܐܠܡܝܬܐ܇ ܕܐܣܪܝ ܡܶܢ ܟܰܕܘ܇ ܕܥܰܠ ܪ̈ܶܓܠܰܘܗ̱ܝ ܫܪܝ ܡܗܠܳܟ ܗܘܳܐ܇ ܘܫܪܝܘ ܩܳܥܶܝܢ܀

 

ܒܰܪ ܐܰܠܳܗܳܐ܇ ܘܒܡܘܬܗ ܐܚܝ ܡܝܬܰܘܬܢ܇ ܢܚܡ ܠܰܢ ܡܶܢ ܓܘ ܕܚܝܚܐ ܕܢܩܥܐ ܘܢܐܡܪ܇ ܫܽܘܒܚܳܐ ܠܳܟ܀

 

ܫܽܘܒܚܳܐ ܠܳܟ ܡܳܪܝ̱܇ ܫܽܘܒܚܳܐ ܒܰܐܪܥܳܐ ܘܒܫܡܝܐ܇ ܘܡܫܰܒܚܺܝܢ ܟܶܢܫ̈ܶܐ ܫܡܝ̈ܢܐ܇ ܟܰܕ ܙܳܡܪܺܝܢ ܫܽܘܒܚܳܐ ܠܳܟ܀

 

ܛܽܘܒܶܝܗܿܘܢ ܠܡܣܟ̈ܢܐ ܒܩܳܠܳܐ ܡܳܐ ܕܐܬܐ ܐܰܢ̱ܬ

ܩܪܐ ܦܳܪܽܘܩܰܢ܇ ܠܠܥܙܪ ܡܶܢ ܓܘ ܩܒܰܪܐ܇ ܘܢܦܩ ܝܗܒܗ ܠܐܚܘ̈ܬܗ܇ ܒܬܕܡܘܪܬܐ ܪܒܬܐ܇ ܐܬܕܟܪܝܢܝ܀

 

ܬܗܪܐ ܪܒܐ܇ ܣܥܪ ܕܡܳܪܰܢ ܒܶܝܬ ܥܢܝ̈ܕܐ܇ ܕܒܝܰܕ ܩܳܠܳܐ ܕܐܙܥܩܬ ܐܬܬܥܝܪ ܠܥܙܪ܇ ܐܬܕܟܪܝܢܝ܀

 

ܒܰܪܐ ܕܒܚܘܒܗ

ܠܠܥܙܪ ܣܥܪ ܒܶܝܬ ܡܺܝ̈ܬܶܐ܇ ܘܐܰܩܺܝܡܗ ܡܶܢ ܓܘ ܩܒܰܪܐ܇ ܡܶܢ ܒܬܪ ܕܣܪܝ܀

 

ܢܦܩ ܗܘܳܐ ܡܝܬܐ܇ ܐܣܝܪ ܗܘܳܐ ܘܡܚܙܩ ܗܘܳܐ܇ ܘܚܙܰܐܽܘܗ̱ܝ ܟܶܢܫ̈ܶܐ ܘܙܡܪ ܫܽܘܒܚܳܐ ܠܰܐܠܳܗܳܐ܀

 

ܘܐܰܩܺܝܡ ܐܶܢܽܘܢ܇ ܡܶܢ ܗܘ ܓܒܐ ܕܝܡܝܢܐ܇ ܠܐܒܗ̈ܝܢ ܘܐܚ̈ܝܢ ܕܫܟܒܘ ܒܬܪܝܨܘܬ ܫܽܘܒܚܳܐ܀

 

ܡܳܐ ܕܐܬܐ ܐܰܢ̱ܬ܇ ܒܰܪ ܐܰܠܳܗܳܐ ܒܬܶܫܒܽܘܚܬܳܐ܇ ܕܬܬܠ ܐܓܪܐ ܠܳܟܫܝܪ̈ܐ܇ ܕܦܠܚܘ ܒܓܰܘ ܟܪܡܟ܇ ܐܬܕܟܪܝܢܝ ܡܳܐ ܕܐܬܐ ܐܰܢ̱ܬ܀

 

ܩܳܠܳܐ ܕܨܰܦܪܳܐ

ܒܩܳܠܳܐ ܠܡܰܪܝܰܡ ܝܠܕܬ ܐܰܠܳܗܳܐ

ܓܠܐ ܦܳܪܽܘܩܰܢ ܠܬܰܠܡܺܝ̈ܕܰܘܗ̱ܝ܇ ܕܡܝܬ ܠܥܙܪ܇ ܘܠܐ ܐܫܬܰܘܕܥܘ ܫܪܝܪ̈ܐ ܕܬܡܝܡ̈ܐ ܗ̱ܘܰܘ܇ ܒܣܪܗ ܠܡܘܬܐ ܩܕܡܝܐ ܕܡܘܬܐ ܚܒܫܗ܇ ܒܪܺܝܟ ܗܘ ܕܐܬܐ ܘܐܰܩܺܝܡܗ܇ ܐܰܝܟ ܚܐܢ ܟܽܠ܀

 

ܠܘ ܥܰܠ ܡܝܬܐ ܒܳܟܐ ܡܫܺܝܚܳܐ ܗܘ ܕܡܬܢܚܡ܇ ܘܥܰܠ ܠܥܙܪ ܣܡ ܐܦ̈ܘܗܝ ܕܡܶܢܚܡ ܠܗ܇ ܥܰܠ ܨܠܡܗ ܕܒܠܝ ܒܗܡܶܢ ܕܡܥ ܕܙܒܐ܇ ܒܪܺܝܟ ܗܘ ܕܥܒܕ ܠܗ ܣܒܰܪܐ ܒܝܰܕ ܠܥܙܪ܀

 

ܐ̱ܚܪܺܢܳܐ܇ ܛܽܘܒܰܝܟܝ̱ ܥܺܕܬܳܐ

ܬܗܪܐ ܪܒܐ܇ ܣܥܪ ܕܡܳܪܰܢ ܒܓܢܣܗ ܕܳܐܕܳܡ܇ ܕܚܘܝ ܐܬܐ ܕܢܽܘܚܳܡܳܐ܇ ܘܠܥܙܪ ܩܳܡ ܡܶܢ ܩܒܰܪܐ܇ ܕܩܪܐ ܠܗ ܒܩܳܠܳܐ ܘܢܦܩ ܘܰܐܣܺܝܪ̈ܢ ܐܝܕ̈ܘܗܝ ܘܪ̈ܶܓܠܰܘܗ̱ܝ܇ ܘܥܰܡܳܐ ܕܚܙܳܝܗ̱ܝ ܟܰܕ ܡܗܠܳܟ܇ ܝܗܒ ܬܶܫܒܽܘܚܬܳܐ ܠܰܐܠܳܗܳܐ܇ ܕܚܙܘ ܐܬܐ ܕܢܽܘܚܳܡܳܐ܇ ܘܝܗܒ ܣܒܰܪܐ ܠܕܠܳܐ ܣܒܰܪܐ܀

 

ܩܪܐ ܠܗ ܕܡܳܪܰܢ܇ ܠܠܥܙܪ ܘܩܳܡ ܡܶܢ ܩܒܰܪܐ܇ ܘܢܦܩ ܡܶܢ ܒܬܪ ܕܣܪܝ܇ ܘܩܳܠܳܐ ܣܡܟܗ ܘܐܰܩܺܝܡܗ ܘܚܙܳܝܗ̱ܝ ܡܘܬܐ ܘܐܬܒܠܗܝ܇ ܕܟܰܕ ܡܚܙܩ ܢܦܩ ܘܡܗܠܳܟ܇ ܘܐܚܟ ܬܗܪܐ ܘܪܬܝܬܐ܇ ܠܥܰܡܳܐ ܠܝܛܐ ܕܝܘܕ̈ܝܐ܇ ܘܫܪܐܳܘܘܗܝ ܐܰܝܟ ܕܐܬܦܩܕ܇ ܘܠܐܚܘ̈ܬܗ ܣܓܝ ܒܘܝܐܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܨܶܝܕ ܠܥܙܪ ܪܒ ܗܘ ܬܗܪܐ ܕܗܘܳܐ ܬܰܡܳܢ܇ ܒܰܪܡ ܠܘ ܚܰܕ ܗܘܳܐ ܐܠܐ ܬܪܝܢ ܗ̱ܘܰܘ ܬܗܪ̈ܐ ܕܰܗ̱ܘܰܘ܇ ܬܗܪܐ ܗܘܳܐ ܓܝܪ ܕܚܝܐ ܡܝܬܐ ܒܬܪ ܕܣܪܝ܇ ܘܬܗܪܐ ܐ̱ܚܪܺܢܳܐ ܕܡܚܙܩ ܗܘܳܐ ܘܡܗܠܳܟ ܗܘܳܐ܀

 

ܠܳܟ ܬܶܫܒܽܘܚܬܳܐ ܫܡܫܐ ܪܒܐ ܕܙܕܝܩܘܬܐ܇ ܕܕܰܢܚܶܬ ܒܰܐܪܥܳܐ ܘܢܗܪܘ ܡܶܢܳܟ ܟܽܠ ܫܚܘ̈ܟܐ܇ ܡܺܝ̈ܬܶܐ ܕܐܚܝܬ ܘܚܰܝ̈ܶܐ ܕܐܢܗܪܬ ܫܘܒܚܟ ܢܩܥܘܢ܇ ܕܳܠܳܟ ܡܬܬܚܝ̈ܒܢ ܟܢ ܣܓ̈ܕܬܐ ܒܪܺܝܟ ܐܝܩܪܟ܀

 

ܕܬܠܬܫܥ̈ܝܢ ܒܩܳܠܳܐ ܒܰܕܡܽܘܬ ܒܣ̈ܡܳܐ

ܐܡܪ ܡܘܬܐ ܡܶܢܘ ܗܳܢܳܐܕܐܬܐ ܨܶܝܕܝ܇ ܡܝܬܐ ܕܚܝ̈ܐ ܢܛܝܪܝܢ ܒܗ܇ ܥܒܕܐܗܘ ܚܰܕܬܐ ܡܝܬܐ ܕܗܳܐ ܢܦܩ ܡܶܢ ܐܦܪ̈ܢܝ܇ ܘܕܳܠܡܳܐ ܚܝܐܗܘ ܘܠܐ ܪܓܫܬ܀

 

ܗܝܕܝܢ ܕܡܳܪܰܢ ܩܪܐ ܠܗ ܠܡܝܬܐ ܒܩܳܠܳܐ ܪܡܳܐ܇ ܕܳܠܥܙܪ ܬܐ ܡܶܢ ܬܰܡܳܢ܇ ܘܐܬܬܙܝܥ ܡܝܬܐ ܒܩܠܗ ܕܒܰܪܐ ܘܪܕܐ ܘܗܰܠܶܟ ܝܗܒ ܬܶܫܒܽܘܚܬܳܐ ܠܰܐܠܳܗܳܐ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܬܕܡܘܪܬܐ ܣܥܪ ܦܳܪܽܘܩܰܢ܇ ܟܰܕ ܐܰܩܺܝܡܗ ܠܠܥܙܪ܇ ܗܘ ܕܣܪܝ ܗܘܳܐ ܡܶܢ ܟܰܕܘ܇ ܩܪܐ ܠܗ ܒܩܳܠܳܐ ܘܢܦܩ ܗܘܳܐ܀

 

ܫܽܘܒܚܳܐ ܢܣܩ ܠܗ ܠܰܐܒܳܐ܇ ܝܰܠܽܘ̈ܕܶܐ ܐܰܒܳܐ ܫܪܝܪܐ܇ ܘܣܓܕܬܐ ܢܩܪܒ ܠܗ ܠܰܒܪܳܐ܇ ܕܒܩܠܗ ܩܳܡ ܠܥܙܪ܇ ܠܪܽܘܚܳܐ ܕܩܽܘܕܫܳܐܗܘܠܠܐ܇ ܚܰܕܐ ܐܳܘܣܝܐ ܡܰܪܝܰܡܬܐ܀

 

ܫܠܡ

 

ܬܽܘܒ ܛܟܣܐ ܕܚܰܕ ܒܫܒܐ ܩܰܕܺܝܫܳܐ  ܕܽܐܘܫܰܥܢ̈ܶܐ

 

ܩܰܕܡܳܝܰܬ ܕܪܰܡܫܳܐ ܥܶܢܝܳܢܳܐ ܕܪܥܚܡܥܰܠܝ ܒܩܳܠܳܐ ܐܰܢ̱ܬ ܕܳܠܒܬܰܘܠܬܐ ܡܰܪܝܰܡ

ܒܗܳܢܳܐܝܰܘܡܳܐ ܚܰܕܝ̈ܢ܇ ܫܡܝܐ ܘܐܰܪܥܳܐ ܘܟܽܠܕܰܒܗܽܘܢ܇ ܘܙܳܡܪܺܝܢ ܫܽܘܒܚܳܐ܇ ܠܡܘܟܟܗ ܕܒܰܪ ܐܰܠܳܗܳܐ܇ ܐܰܠܳܗܳܐ܀

 

ܗܘ ܕܓܢܝܙ ܘܡܰܪܝܰܡ܇ ܡܶܢ ܟܶܢܫ̈ܶܐ ܕܫܡܝܢ̈ܐ܇ ܒܶܝܬ ܐܪ̈ܥܢܐ܇ ܥܰܠ ܥܺܝܠܳܐ ܐܙܕܝܚ ܗܘܳܐ܇ ܐܰܠܳܗܳܐ܀

 

ܗܘ ܕܥܰܠ ܥܺܝܠܳܐ ܝܬܒ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܫܰܒܚܽܘܗ̱ܝ ܫܰܒܪ̈ܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܗܘ ܕܡܶܢ ܫܰܒܪ̈ܶܐ ܫܦܝ̈ܐ ܐܬܬܩܢܬ ܠܗ ܬܶܫܒܽܘܚܬܳܐ܇ ܒܣܰܘܟ̈ܶܐ ܕܙܰܝܬܳܐ܇ ܘܕܕܶܩ̈ܠܶܐ ܙܡܪܘ ܠܗ ܫܽܘܒܚܳܐ܀

 

ܗܘ ܕܥܰܠ ܚܨ ܡܰܪܟܰܒܬܳܐ܇ ܕܫܽܘܒܚܳܐ ܒܕܚܠܐ ܡܙܕܝܚ܇ ܥܺܝܠܳܐ ܛܥܢܗ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܀

 

ܗܘ ܕܣܪ̈ܦܐ ܕܢܽܘܪܳܐ܇ ܩܰܕܺܝܫ ܩܰܕܺܝܫ ܩܳܥܶܝܢ ܠܗ܇ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܐܰܠܳܗܳܐ܀

 

ܐ̱ܚܪܺܢܳܐ ܕܡܳܪܝܳܐ ܩܪܺܝܬܳܟ ܒܩܳܠܳܐ ܡܫܺܝܚܳܐܐܶܬܺܝܠܶܕ

ܡܫܺܝܚܳܐ ܐܶܬܡܰܟܰܟ܇ ܘܰܪܟܶܒ ܥܰܠ ܥܺܝܠܳܐ܇ ܘܥܰܡܗ ܬܰܠܡܺܝ̈ܕܰܘܗ̱ܝ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܛܠܳܝ̈ܶܐ ܘܫܰܒܪ̈ܶܐ ܡܫܰܒܚܺܝܢ ܗ̱ܘܰܘ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܛܽܘܒܳܐ ܠܝܰܠܽܘ̈ܕܶܐ܇ ܕܫܘܘ ܕܢܚܙܘܢܝܗܝ ܠܰܒܪܳܐ ܕܰܐܠܳܗܳܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܒܣܰܘ̈ܟܶܐ ܕܙܰܝܬܳܐ܇ ܝܒܒܘ ܩܽܘܕܡܰܘܗ̱ܝ܇ ܟܽܠܳܟܘܢ ܥܰܡܡ̈ܐ܇ ܬܰܘ ܢܒܰܪܘܟ܀

 

ܫܽܘܒܚܳܐ ܠܰܡܫܺܝܚܳܐ܇ ܕܡܶܛܽܠ ܦܽܘܪܩܳܢܰܢ܇ ܪܟܒ ܗܘܳܐ ܥܰܠ ܥܺܝܠܳܐ܇ ܘܐܫܬܒܚ ܡܶܢ ܝܰܠܽܘ̈ܕܶܐ܇ ܘܟܶܢܫ̈ܶܐ ܕܬܰܠܡܺܝ̈ܕܶܐ܇ ܢܚ̈ܬܐ ܐܦ ܣܰܘܟ̈ܶܐ܇ ܡܫܘܝܢ ܗ̱ܘܰܘ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

ܒܗܢ ܥܐܕܐ ܪܒܐ܇ ܥܺܕܬܳܐ ܗܐ ܚܰܕܝܐ܇ ܟܰܕ ܒܦܘܡܳܐ ܕܝܠ̈ܕܝܗ܇ ܙܡܪܐ ܫܽܘܒܚܳܐ ܘܬܰܘܕܺܝܬܳܐ܇ ܒܥܐܕܐ ܕܠܳܐ ܥܒܰܪ܇ ܚܰܕܐ ܒܓܢܘܢܟ ܥܰܡ ܩܕܝ̈ܫܝܟ܇ ܬܦܘܩܝ ܠܽܐܘܪܥܳܟ ܒܽܐܘܫܰܥܢ̈ܶܐ܀

 

ܐ̱ܚܪܺܢܳܐ ܝܘܢܝܐ܀

ܐܳܘܪܗܝܐ ܚܠܦ ܓܦܝ̈ܗܘܢ ܕܚܝܠ̈ܐ ܕܣܪ̈ܦܐ܇ ܢܰܚܬܰܝ̈ܗܽܘܢ ܡܫܘܝܢ ܗ̱ܘܰܘ ܒܽܐܘܪܚܳܐ܇ ܛܠܳܝ̈ܶܐ ܒܢ̈ܝܐ ܕܥܒܰܪ̈ܝܐ ܡܫܰܒܚܺܝܢ ܗ̱ܘܰܘ ܠܳܟ܇ ܟܰܕ ܐܳܡܪܺܝܢܐܽܘܫܰܥܢܳܐ ܗ܀

 

ܚܠܦ ܩܘܕ̈ܫܝܗܘܢ ܕܣܪ̈ܦܐ܇ ܒܽܐܘܫܰܥܢ̈ܶܐ ܩܠܣܘܟ ܫܰܒܪ̈ܶܐ܇ ܛܠܳܝ̈ܶܐ ܒܢ̈ܝܐ ܕܥܒܰܪ̈ܝܐ܇ ܘܡܫܰܒܚܺܝܢ ܗ̱ܘܰܘ ܠܳܟ ܟܰܕ ܐܳܡܪܺܝܢܐܽܘܫܰܥܢܳܐ܀

 

ܚܠܦ ܬܶܫܒܽܘܚܬܳܐ ܕܫܡܝ̈ܢܐ܇ ܒܫܽܘܒܚܳܐ ܕܫܰܒܪ̈ܶܐ ܐܬܩܠܣܬ܇ ܨܒܬ ܠܥܺܕܰܬܟ ܒܫܽܘܒܚܳܐ܇ ܘܥܰܡ ܪ̈ܘܚܢܐ ܡܙܥܩܐ ܠܳܟ ܇ܐܽܘܫܰܥܢܳܐ ܗܠܠܘܝܐ܀

 

ܩܳܠܳܐ ܕܪܰܡܫܳܐ

ܒܩܳܠܳܐ ܡܫܺܝܚܳܐ ܢܰܛܰܪܶܝܗܿ

ܐܙܠܖ ܘܐܫܟܚܘ ܬܰܠܡܺܝ̈ܕܶܐ܇ ܐܰܝܟܢ ܕܐܡܪ ܠܗܽܘܢ ܕܡܳܪܰܢ܇ ܘܫܪܘ ܥܺܝܠܳܐ ܘܐܝܬܝܘ ܠܗ܇ ܘܫܘܝܘ ܥܰܠܘ̈ܗܝ ܡܳܐܢ̈ܝܗܘܢ܇ ܕܢܪܟܒ ܢܥܘܠܠܽܐܘܪܺܫܠܶܡ܇ ܗܘ ܕܰܟܪ̈ܽܘܒܶܐ ܟܰܕܝܢܝܢ ܒܡܪܟܒܬܗ܇ ܐܚܪ̈ܢܐ ܒܽܐܘܪܚܳܐ ܡܳܐܢ̈ܝܗܘܢ܇ ܫܘܝܘ ܩܽܘܕܡܰܘܗ̱ܝ ܟܰܕ ܩܳܥܶܝܢ܇ ܒܪܺܝܟܐܗܝ ܡܬܝܬܟ܇ ܡܠܳܟܗ ܓܐܝܐ ܕܐܝܣܪܐܝܠ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܗܘ ܕܐܬܐ ܘܚܪܪ ܠܰܢ ܡܶܢ ܛܥܝܘܬܐ܀

 

ܬܗܪܐ ܪܒܐ ܘܕܘܡܪܐ܇ ܐܚܰܕ ܗܘܳܐ ܠܥܝܪ̈ܝ ܪܰܘܡܳܐ܇ ܕܚܙܝܢ ܗ̱ܘܰܘ ܠܗ ܕܥܰܠ ܚܨܐ܇ ܕܰܟܪ̈ܽܘܒܶܐ ܡܙܕܝܚ ܗܘܳܐ܇ ܘܥܰܠ ܥܺܝܠܳܐ ܫܺܝܛܳܐ ܝܬܒ܇ ܘܢܚܶܬ ܕܢܶܦܪܽܘܩ ܠܓܢܣܐ ܕܒܶܝܬ ܐܳܕܳܡ܇ ܘܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ܇ ܡܫܰܒܚܺܝܢ ܗ̱ܘܰܘ ܘܩܳܥܶܝܢ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܒܪܰܘܡܳܐ܇ ܒܪܺܝܟ ܗܘ ܕܐܬܐ ܠܦܽܘܪܩܳܢܰܢ܇ ܡܰܪܝܰܡܳܐ ܕܶܐܬܬܰܚܬܺܝ ܨܶܝܕܝܢ܇ ܕܢܣܩܢ ܥܰܡܗ ܠܫܡܝܐ ܨܶܝܕ ܫܠܘܚܗ܀

 

ܐ̱ܚܪܺܢܳܐ ܩܳܠܳܐ ܙܕܝܩ̈ܐ ܕܪܚܡܘ ܩܘܫܬܐ

ܐ̈ܠܦ ܐ̈ܠܦܝܢ ܕܡܰܠܰܐܟ̈ܶܐ܇ ܘܪ̈ܒܘ ܪ̈ܒܘܢ ܕܥܶܠܳܝ̈ܶܐ܇ ܙܳܡܪܺܝܢ ܬܶܫܒܽܘܚܬܳܐ ܠܰܒܪܳܐ ܕܶܐܬܬܰܚܬܺܝ ܘܰܪܟܶܒ ܥܺܝܠܳܐ ܕܐܰܬܳܢܳܐ܇ ܒܫܘܩ̈ܝܗ ܕܐܳܘܪܫܠܡ܇ ܘܡܶܢ ܟܢܦ̈ܬܐ ܝܰܠܽܘ̈ܕܶܐ ܫܰܒܰܚܘ̱ ܒܽܐܘܫܰܥܢ̈ܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܕܶܐܬܬܰܚܬܺܝ ܘܠܒܫ ܦܰܓܪܳܐ܇ ܘܒܗ ܐܬܚܙܝ ܠܒܢ̈ܝܢܫܐ܇ ܘܒܝܰܕ ܡܘܟܟܗ ܪܪܢ ܡܶܢ ܠܘܛܬܐ܀

 

ܥܰܠ ܛܘܪ ܙܝ̈ܬܐ ܥܒܰܪ ܗܘܝܬ܇ ܘܩܳܠܳܐ ܫܡܥܬ ܒܓܰܘ ܨܶܗܝܽܘܢ܇ ܝܰܠܽܘ̈ܕܶܐ ܕܩܳܥܶܝܢ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܕܐܬܐ ܠܦܽܘܪܩܳܢܰܢ܇ ܫܠܡܬ ܡܠܬܗ ܕܒܰܪ ܐܝܫܝ ܕܐܬܢܒܝ ܘܐܡܪ܇ ܕܡܶܢ ܦܘܡ ܫܰܒܪ̈ܶܐ ܘܝܰܠܽܘ̈ܕܶܐ ܬܩܢܬ ܬܶܫܒܽܘܚܬܳܐ ܠܰܒܪܳܐ܇ ܘܥܺܕܬܳܐ ܝܘܡܶܢ ܗܐ ܙܡܪܐ܇ ܬܶܫܒܽܘܚܬܳܐ ܒܩܠ  ܐܽܘܫܰܥ̈ܢܶܐ ܠܰܒܪܳܐ ܕܐܶܬܡܰܟܰܟ܇ ܘܦܪܩܗ ܡܶܢ ܛܽܘܥܝܰܝ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܙܥܘ ܪ̈ܘܚܢܐ ܕܕܳܠܡܳܐ ܢܚܶܬ ܠܗ ܡܶܢ ܡܰܪܟܰܒܬܳܐ܇ ܘܨܠܘ ܟܽܠܗܽܘܢ ܕܢܚܘܪܘܢ ܒܗ ܐܢ ܬܰܡܳܢ ܗܘ܇ ܘܚܙܰܐܽܘܗ̱ܝ ܗ̱ܘܰܘ ܒܳܟܘܪܣܝܗ ܓܐܝܐ ܒܐܬܪܗ ܪܡܳܐ܇ ܘܬܽܘܒ ܚܙܰܐܽܘܗ̱ܝ ܗ̱ܘܰܘ ܝܰܠܽܘ̈ܕܶܐ ܕܪܟܺܝܒ ܒܰܪ ܐܰܬܳܢܳܐ܀

 

ܫܽܘܒܚܳܐ ܠܰܐܒܳܐ ܕܙܝܚ ܠܰܒܪܶܗ ܒܩܠ  ܐܽܘܫܰܥ̈ܢܶܐ܇ ܘܣܓܕܬܐ ܠܰܒܪܳܐ ܕܥܺܝܠܳܐ ܫܺܝܛܳܐ ܣܦܩ ܠܪܟܘܒܗ܇ ܘܬܰܘܕܝ ܠܪܽܘܚܳܐ ܕܐܙܝܥ ܫܽܘܒܚܳܐ ܒܦܘܡ ܝܰܠܽܘ̈ܕܶܐ܇ ܘܩܥܘ ܫܰܒܪ̈ܶܐ ܒܪܺܝܟ ܗܘ ܕܐܬܐ ܒܫܡܗ ܕܡܳܪܝܳܐ܀

 

ܡܥܺܝܪܳܢܳܐ ܕܠܺܠܝܳܐ ܩܳܠܳܐ ܥܰܡ ܗܢܘܢ ܕܳܠܥܶܠ

ܝܒܒܘ ܟܽܠ ܥܰܡܡ̈ܝܢ܇ ܘܰܙܡܰܪܘ̱  ܫܽܘܒܚܳܐ ܠܗܰܘ ܕܪܟܒ ܥܺܝܠܳܐ ܒܨܶܗܝܽܘܢ܇ ܥܺܕܬܳܐ ܚܰܕܝ ܒܗ܇ ܕܐܬܐ ܕܢܫܪܐ ܒܳܟܝ܇ ܩܽܘܡܝ̱ ܦܘܩܝ ܠܽܐܘܪܥܶܗ܇ ܒܽܐܘܫܰܥܢ̈ܶܐ ܕܩܠ̈ܝ ܫܽܘܒܚܳܐ܀ ܒܪܺܝܟ ܛܳܒܳܐ ܕܟܢܫ܇ ܠܡܒܕܪ̈ܐ ܡܶܢ ܛܥܝܘܬܐ ܗܝ ܕܦܬܟܪ̈ܐ܇ ܒܪܺܝܟ ܗܘ ܕܐܗܦܟ ܠܳܐܕܳܡ ܠܓܰܘ ܓܢܬܐ܇ ܠܗ ܬܶܫܒܽܘܚܬܳܐ܀

 

ܨܒܘ ܟܳܗ̈ܢܶܐ ܢܫܬܩܘܢ܇ ܩܠ ܝܰܠܽܘ̈ܕܶܐ ܕܡܫܰܒܚܺܝܢ ܠܒܰܪ ܐܰܠܳܗܳܐ܇ ܘܐܡܪ ܕܡܳܪܰܢ ܕܐܢ ܗܳܠܶܝܢ ܢܫܬܩܘܢ ܟܝ̈ܢܐ ܚܪ̈ܫܐ܇ ܘܟܺܐܦ̈ܶܐܐ ܢܩܥܘܢ ܬܶܫܒܽܘܚܬܳܐ܀

 

ܥܰܠ ܕܡܳܪܰܢ ܠܗܝܟܽܠܐ܇ ܒܩܳܠܳܐ ܕܫܰܒܪ̈ܶܐ ܕܡܫܰܒܚܺܝܢ ܩܒܠ  ܐܽܘܫܰܥ̈ܢܶܐ܇ ܘܟܶܢܫ̈ܶܐ ܕܥܰܡܳܐ ܕܙܳܡܪܺܝܢ ܬܫܰܒܰܚܘ̱ܬܐ܇ ܒܣܰܘܟ̈ܰܝ ܙܰܝܬܳܐ܇ ܠܡܪܐ ܕܪܟܒ܇ ܥܰܠ ܥܺܝܠܳܐ ܘܠܗ ܬܶܫܒܽܘܚܬܳܐ܀

 

ܫܽܘܒܚܳܐ ܠܳܟ ܕܡܳܪܰܢ܇ ܕܒܳܟ ܝܰܠܕܰܘ̈ܗ̱ܝ ܕܳܐܕܳܡ ܐܬܦܪܩܘ ܡܶܢ ܛܥܝܘܬܐ܇ ܘܐܫܘܝܬ ܐܶܢܽܘܢ ܕܢܫܰܒܰܚܘ̱ܢ ܠܫܡܟ܇ ܥܰܡ ܪ̈ܘܚܢܐ ܕܡܩܕܫܝܢ ܠܐܠܗܰܘܳܬ݀ ܟ܀

 

ܩܰܘܡܳܐ ܩܕܡܝܐ ܕܠܺܠܝܳܐ ܒܩܳܠܳܐ ܬܗܪ ܓܰܒܪܳܐܝܠ

ܟܰܕ ܥܳܐܶܠ ܗܘܳܐ܇ ܕܡܳܪܰܢܝܶܫܽܘܥ ܠܽܐܘܪܺܫܠܶܡ܇ ܟܽܠܗ ܥܰܡܳܐ ܢܦܩ ܠܽܐܘܪܥܶܗ܇ ܛܒ̈ܐ ܘܒܺܝ̈ܫܶܐ ܫܘܝܐܝܬ܇ ܟܰܕ ܓܙܡܝܢ ܗ̱ܘܰܘ ܣܦܪ̈ܐ ܘܦܪ̈ܝܫܐ܇ ܘܝܰܠܽܘ̈ܕܶܐ ܩܥܘ ܡܶܢ ܫܠܝܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܐܬܐ ܕܢܦܪܩܢ܇ ܘܰܥܬܺܝܕ ܕܢܺܐܬܶܐ ܒܬܶܫܒܽܘܚܬܳܐ ܒܫܡܗ ܫܒܝܚܐ ܕܝܠܘܕܗ܇ ܒܙܘܚܐ ܪܒܐ ܕܡܰܠܰܐܟ̈ܶܐ܀

 

ܢܚܰܕܐ ܝܘܡܶܢ܇ ܣܒܐ ܝܥܩܘܒ ܕܐܡܪ ܗܘܳܐ܇ ܕܒܓܦܬܐ ܐܣܪ ܥܝܠܗ܇ ܘܠܗ ܢܣܟܘܢ ܟܽܠܗܽܘܢ ܥܰܡܡ̈ܶܐ܇ ܐܳܘܫܥܝܐ ܬܽܘܒ ܩܪܝܗܝ ܕܘܡܪܐ܇ ܘܐܪܝܡ ܗܘܳܐ ܩܠܗ ܙܟܰܪܝܳܐ ܘܣܒܪܶܗ ܗܘܳܐ ܠܒܰܪܬ ܥܒܰܪ̈ܝܐ܇ ܩܽܘܡܝ ܦܘܩܝ ܠܽܐܘܪܥܶܗ ܘܩܒܠܝܘܗܝ܇ ܕܥܺܕܬܳܐ ܙܡܶܢܬ ܝܰܠܽܘ̈ܕܶܐ܇ ܘܰܙܡܰܪܘ̱  ܫܽܘܒܚܳܐ ܒܽܐܘܫܰܥܢ̈ܶܐ܇ ܒܪܺܝܟ ܕܐܬܐ ܘܰܥܬܺܝܕ ܕܢܺܐܬܶܐ܀

 

ܐ̱ܚܪܺܢܳܐ ܒܩܳܠܳܐ ܠܡܰܪܝܰܡ ܝܠܕܬ ܐܰܠܳܗܳܐ

ܟܽܠܳܟܘܢ ܥܰܡܡ̈ܐ ܩܘܫܘ ܟܦܐ ܒܗܳܢܳܐܥܐܕܐ܇ ܪܝܫ ܥ̈ܐܕܐ ܘܫܘܪܝ ܚܰܝ̈ܶܐ ܕܟܽܠ ܒܶܪ̈ܝܳܬܳܐ܇ ܕܘܨܘ ܚܰܕܘ̈ܓܐ ܕܟܽܠܬ ܢܽܘܗܪܳܐ ܒܙܘܚܐ ܕܚܰܬܢܳܐ܇ ܕܫܒܩ ܡܰܪܟܰܒܬܳܐ ܕܢܽܘܪܳܐ ܘܰܪܟܶܒ ܥܺܝܠܳܐ܀

 

ܗܐ ܦܨܝܚܝܢ ܟܽܠܗܽܘܢ ܥܰܡܡ̈ܐ ܘܚܰܕܝܐ ܥܺܕܬܳܐ܇ ܘܝܰܠܽܘ̈ܕܶܐ ܗܐ ܡܫܰܒܚܺܝܢ ܠܳܟ ܡܶܢ ܟܢ̈ܦܬܐ܇ ܕܫܡܥܘ ܩܠܗ ܕܢܒܺܝܳܐ ܕܩܥܐ ܘܐܡܪ܇ ܕܫܰܒܚܽܘܗ̱ܝ ܠܒܰܪ ܛܳܒܳܐ ܕܐܬܐ ܘܦܪܩ ܥܰܠ̈ܡܳܐ܀

ܡܰܕܪܳܫܳܐ ܒܩܳܠܳܐ ܗܢܘ ܝܪܚܐ ܥܶܢܝܳܢܳܐ ܠܳܟ ܬܶܫܒܽܘܚܬܳܐ ܕܒܡܘܟܟܐ ܦܪܩܬܢ ܠܳܐܕܳܡ܇

ܒܥܳܠܡܳܐ ܪܒܐ܇ ܦܘܡܳܐ ܗܘܳܐ ܠܳܟ ܒܰܪ ܐܰܠܳܗܳܐ܇ ܗܘ̈ܝ ܒܶܪ̈ܝܳܬܳܐ ܐܰܝܟ ܐܡܗ̈ܬܐ ܘܗܘܳܐ ܩܘܫܬܐ ܐܰܝܟ ܠܫܢܐ܇ ܘܗܘܳܐ ܥܰܡܳܐ܇ ܒܰܕܡܽܘܬ ܕܘܓܐ ܘܛܠܡ ܫܘܒܚܟ܀

 

ܦܫܝܓܐ ܦܫܛ ܗܘܳܐ܇ ܐܝܕܗ ܘܫܩܠ ܣܰܘܟ̈ܰܝ ܙܰܝܬܳܐ܇ ܚܓܝܪܐ ܕܰܐܣܺܝ ܗܘܳܐ ܐܰܝܟ ܐܝܠܐ܇ ܘܫܪܝ ܕܐܨ ܩܘܕܡܬ ܥܺܝܠܳܐ܇ ܕܘ̈ܓܐ ܘܚܪ̈ܫܐ ܫܽܘܒܚܳܐ ܝܰܗܒܘ̱ ܗ̱ܘܰܘ ܒܽܐܘܫܰܥܢܰܝ̈ܗܽܘܢ܀

 

ܛܠܳܝ̈ܶܐ ܘܫܰܒܪ̈ܶܐ܇ ܐܦ ܝܰܠܽܘ̈ܕܶܐ ܝܰܗܒܘ̱ ܠܗ ܫܽܘܒܚܳܐ܇ ܘܣܢܘܢܝܬܐ ܚܝܬܐ ܠܥܙܬ܇ ܩ̈ܠܐ ܚܰܕ̈ܬܐ ܠܡܰܠܟܳܐ ܚܰܕܬܐ ܚܙܬܗ ܠܰܢܝܣܢ܇ ܟܣܝܐ ܕܐܬܐ ܘܐܬܦܨܚܬ ܗܘܳܬ݀ ܀

 

ܡܰܕܪܳܫܳܐ ܒܩܳܠܳܐ ܐܰܒܳܐ ܟܬܒ ܗܘܳܐ܇ ܥܽܘܢܺܝܬܳܐ ܒܪܺܝܟ ܗܘ ܡܫܺܝܚܳܐ ܕܶܐܬܬܰܚܬܺܝ܇ ܘܥܰܠ ܥܺܝܠܳܐ ܥܰܠ ܗܘܳܐ ܠܓܰܘ ܨܶܗܝܽܘܢ

ܟܢܘܫܬܐ ܚܒܰܪܬ ܙܠ̈ܝܠܐ܇ ܚܙܬ ܚܰܬܢܳܐ ܕܥܰܠ ܥܺܝܠܳܐ ܪܟܒ ܗܘܳܐ ܘܢܦܩܬ ܗܘܳܬ݀  ܠܽܐܘܪܥܶܗ܇ ܘܟܡܝܪܐ ܒܡܥܰܠܗ܇ ܕܠܳܐ ܨܒܝܐ ܗܘܳܬ݀  ܓܝܪܬܐ܇ ܕܩܰܕܺܝܫܳܐ ܢܕܝܪ ܒܗܝܟܽܠܗ܀

 

ܡܶܢܘ ܕܐܬܐ ܒܛܘܪ ܙܝ̈ܬܐ܇ ܘܡܶܢ ܫܰܒܪ̈ܶܐ ܘܝܰܠܽܘ̈ܕܶܐ ܡܣܬܓܕ܇ ܒܣܰܘܟ̈ܶܐ ܡܬܩܠܣ܇ ܒܬܶܫܒܽܘܚܬܳܐ ܪܒܬܐ܇ ܥܺܝܪ̈ܶܐ ܘܶܐܢܫ̈ܐ ܣܓܕܝܢ ܠܗ܇ ܫܽܘܒܚܳܐ ܠܗ ܕܰܢܚܶܬ ܘܦܪܩܢ܀

 

ܚܙܬܗ ܕܝܬܒ ܥܰܠ ܥܺܝܠܳܐ܇ ܘܥܰܠ ܢܚ̈ܬܐ ܕܬܰܠܡܺܝ̈ܕܶܐ ܐܬܬܣܝܡ܇ ܘܠܐ ܕܡܳܐ ܠܕܰܘܺܝܕ܇ ܒܓܰܘ̈ܢܐ ܕܫܘܫ̈ܢܐ܇ ܠܝܬ ܥܰܡܗ ܬܟܣܝܬ ܫܠܝܡܘܢ܇ ܕܡܶܢ ܘܪ̈ܕܐ ܘܗܒܒ̈ܐ ܡܦܬܟ܀

 

ܟܐܦܐ ܕܐܣܠܝܘ ܒܢ̈ܝܐ܇ ܘܠܐ ܩܒܠܘܗ ܐܪ̈ܕܝܟܽܠܐ ܕܢܒܥܘܢ܇ ܗܐ ܗܘܳܬ݀  ܪܝܫ ܩܪܒܐ܇ ܠܳܟܽܠܗ ܒܢܝܢܐ܇ ܡܶܢ ܩܕܡ ܡܳܪܝܳܐ ܗܘܳܬ݀  ܗܳܕܶܐ ܬܕܡܘܪܬܐ ܐܝܬܝܗ ܒܥ̈ܝܢܝܢ܀

 

ܐܳܕܳܡ ܚܛܐ ܘܩܢܐ ܥܽܘܢܺܝܬܳܐ ܫܽܘܒܚܳܐ ܠܗܰܘ ܪܡܳܐ ܕܶܐܬܬܰܚܬܺܝ܇ ܘܥܰܠ ܥܺܝܠܳܐ ܥܰܠ ܗܘܳܐ ܠܽܐܘܪܺܫܠܶܡ

ܒܗܢ ܝܰܘܡܳܐ ܣܰܘܟ̈ܶܐ ܛܥܢܘ ܫܰܒܪ̈ܶܐ܇ ܘܢܦܩܘ ܗ̱ܘܰܘ ܠܽܐܘܪܥܶܗ ܕܦܳܪܽܘܩܰܢ܇ ܩܥܘ ܠܗ ܐܽܘܫܰܥܢܳܐ ܒܡܪ̈ܘܡܳܐ܇ ܥܺܝܪ̈ܶܐ ܣܓܕܘ ܗ̱ܘܰܘ ܠܗ ܒܫܡܝܐ܇ ܠܗܰܘ ܕܐܬܐ ܕܢܪܝܡ ܬܚ̈ܬܝܐ܀

 

ܒܗܢ ܝܰܘܡܳܐ ܙܟܰܪܝܳܐ ܢܕܘܨ ܥܰܡܶܢ܇ ܘܢܟܣܝܗ ܠܳܟܢܘܫܬܐ ܒܙܡܝܪ̈ܬܗ܇ ܕܡܟܟܝ ܗܐ ܐܬܐ ܙܢܝܬܐ܇ ܘܡܰܟܺܝܟ ܥܰܠ ܥܺܝܠܳܐ ܦܘܩܝ ܠܽܐܘܪܥܶܗ܇ ܘܦܬܚܝ ܠܗ ܬܪ̈ܥܝܟܝ ܕܢܫܪܐ ܒܳܟܝ܀

 

ܒܗܢ ܝܰܘܡܳܐ ܟܢܘܫܬܐ ܒܚܣܡܳܐ܇ ܣܝܦܐ ܠܛܫܬ ܗܘܳܬ݀  ܥܰܠ ܚܰܬܢܳܐ܇ ܒܗܢ ܝܰܘܡܳܐ ܛܠܳܝ̈ܶܐ ܒܝܰܕ ܣܰܘܟ̈ܶܐ܇ ܒܬܶܫܒܽܘܚܬܳܐ ܩܒܠܘܗܝ ܠܰܡܫܺܝܚܳܐ܇ ܒܪܺܝܟ ܗܘ ܕܬܶܫܒܽܘܚܬܳܐ ܬܩܢ ܠܗ܀

 

ܒܗܢ ܝܰܘܡܳܐ ܐܒܠܐ ܐܬܥܛܦܬ܇ ܨܶܗܝܽܘܢ ܨܠܘܒܬܐ ܒܚܣܡܗ܇ ܚܙܬܗ ܠܒܰܪ ܡܰܠܟܳܐ ܥܰܠ ܥܺܝܠܳܐ܇ ܘܫܛܬ ܡܘܟܟܗ ܕܥܰܠ ܐܦܝ̈ܝܢ܇ ܒܪܺܝܟ ܕܥܩܪ ܒܕܪܗ ܒܶܝܬ ܥܰܡܡ̈ܶܐ܀

 

ܐܳܘܕܘ ܥܰܡܡ̈ܶܐ ܥܝܢܝܢܐ ܒܪܺܝܟ ܕܒܣܰܘ̈ܟܶܐ ܩܰܠܣܽܘܗ̱ܝ܇ ܛܠܳܝ̈ܶܐ ܒܫܘ̈ܩܝ ܨܶܗܝܽܘܢ

ܒܰܪ ܥܰܠܝܐ ܪܟܒ ܥܺܝܠܳܐ܇ ܘܠܓܰܘ ܨܶܗܝܽܘܢ ܥܰܠ ܗܘܳܐ܇ ܣܒ̈ܐ ܚܪ̈ܡܳܐ ܚܙܰܐܽܘܗ̱ܝ܇ ܘܢܦܩܘ ܠܽܐܘܪܥܶܗ܇ ܒܳܟܺܐܦ̈ܶܐܐ܇ ܛܠܳܝ̈ܶܐ ܛܥܢܘ ܗ̱ܘܰܘ ܣܰܘܟ̈ܶܐ܇ ܟܰܕ ܩܳܥܶܝܢ ܫܽܘܒܚܳܐ ܦܐܝܐ܇ ܒܪܺܝܟ ܗܘ ܕܐܬܐ ܕܢܦܪܩܢ܀

 

ܩܥܘ ܠܗ ܢܒܺܝ̈ܶܐ ܒܰܪ̈ܐܙܐ܇ ܠܨܶܗܝܽܘܢ ܣܢܬ ܫܰܪܰܪܐ܇ ܕܗܳܐ ܐܬܐ ܠܗ ܡܰܠܟܶܟܝ̱܇ ܗܘ ܕܡܶܢ ܡܨܪܝܢ ܦܪܩܟܝ܇ ܙܢܝܬܐ ܫܛܬ ܡ̈ܠܐ܇ ܕܢܒܺܝ̈ܶܐ ܘܕܟܪ̈ܘܙܐ܇ ܒܪܺܝܟ ܗܘ ܕܐܚܪܒܗ ܒܡܥܰܠܗ܀

 

ܟܶܢܫ̈ܶܐ ܫܘܝܘ ܩܽܘܕܡܰܘܗ̱ܝ ܡܪ̈ܛܘܛܝܗܘܢ ܒܬܗܪܐ܇ ܘܒܩܳܠܰܝ̈ܗܘܢ ܝܒܒܘ܇ ܒܪܺܝܟ ܗܘ ܡܠܳܟܗ ܕܐܝܣܪܐܝܠ܇ ܛܠܳܝ̈ܶܐ ܒܛܪ̈ܦܐ ܕܕܶܩ̈ܠܶܐ܇ ܐܰܝܟ ܕܳܠܡܰܠܟܳܐ ܙܝܚܘܗܝ܇ ܒܪܺܝܟ ܗܘ ܕܬܒܥ ܕܝܠܗ܀

 

ܒܗܳܢܳܐܝܰܘܡܳܐ ܢܚܰܕܐ܇ ܐܦ ܐܫܥܝܐ ܕܩܥܐ܇ ܘܠܽܐܳܘܪܺܫܠܶܡ ܐܡܪ܇ ܕܐܬܬܥܝܪܝ ܘܠܒܫܝ ܥܘܫܢܐ܇ ܕܐܬܐ ܠܗ ܡܰܠܟܶܟܝ̱ ܨܶܗܝܽܘܢ܇ ܕܦܪܩ ܥܰܠ̈ܡܳܐ ܡܶܢ ܛܽܘܥܝܰܝ܇ ܒܪܺܝܟ ܢܒܺܝ̈ܶܐ ܕܐܟܪܙܘܗܝ܀

 

ܛܠܡܘ ܗ̱ܘܰܘ ܣܒ̈ܐ ܫܘܒܚܗ܇ ܘܟܺܐܦ̈ܶܐܐ ܫܩܠܘ ܗ̱ܘܰܘ ܠܽܐܘܪܥܶܗ܇ ܘܙܥܘ ܡܶܢ ܬܗܪܐ ܛܠܳܝ̈ܶܐ܇ ܘܫܰܒܚܽܘܗ̱ܝ ܒܣܰܘ̈ܟܶܐ ܕܙܰܝܬܳܐ܇ ܘܒܩܠ ܝܘܒܒܐ ܕܫܰܒܪ̈ܶܐ܇ ܪܥܰܡܬ ܐܳܘܪܚܗ ܕܡܰܠܟܳܐ܇ ܕܩܳܥܶܝܢ ܒܪܺܝܟ ܗܘ ܕܐܬܐ܀

 

ܐܰܝܟܐ ܐܚܙܝܘܗܝ ܠܰܒܪܳܐ܇ ܠܥܶܠ ܡܶܢ ܓܝܓ̈ܠܐ ܕܢܽܘܪܳܐ܇ ܐܳܘ ܥܰܠ ܥܺܝܠܳܐ ܫܺܝܛܳܐ܇ ܟܰܕ ܥܳܐܶܠ ܗܘܳܐ ܠܨܶܗܝܽܘܢ܇ ܘܡܩܕܫܝܢ ܣܪ̈ܦܐ ܒܕܚܠܐ܇ ܘܫܰܒܪ̈ܶܐ ܕܝܨܝܢ ܒܚܰܕܘܐ܇ ܩܕܡ ܡܥܰܠܬܗ ܠܨܶܗܝܽܘܢ܀

 

ܚܘܬܰܘ ܐܰܚ̈ܰܝܪ̈ܫܝܡܳܐ ܥܽܘܢܺܝܬܳܐ ܫܽܘܒܚܳܐ ܠܗܰܘ ܕܐܬܐ ܒܡܘܟܟܐ ܠܨܶܗܝܽܘܢ

ܙܟܰܪܝܳܐ ܩܥܐ ܠܨܶܗܝܽܘܢ܇ ܩܽܘܡܝ ܕܘܨܝ ܐܽܘܪܺܫܠܶܡ܇ ܕܡܰܠܟܶܟܝ̱ ܐܬܐ ܠܶܟܝ̱ ܘܰܪܟܺܝܒ ܥܰܠ ܥܺܝܠܳܐ܇ ܙܡܳܪܝ̱ ܠܗ ܬܶܫܒܽܘܚܬܳܐ܀

 

ܗܝ ܕܝܢ ܙܢܝܬܐ܇ ܫܛܬ ܠܰܢܒܺܝ̈ܶܐ܇ ܘܫܬܩܬ ܠܝܰܠܽܘ̈ܕܶܐ܇ ܘܛܠܡܬ ܗܘܳܬ݀  ܫܽܘܒܚܳܐ܇ ܕܡܰܠܟܳܐ ܫܡܝܢܐ܀

 

ܥܒܰܪܝܬܐ ܛܠܡܬ ܫܽܘܒܚܳܐ ܕܩܕ̈ܝܫܐ܇ ܘܥܺܕܬܳܐ ܗܐ ܕܝܨܐ܇ ܘܩܳܥܝܳܐ ܥܰܡ ܫܰܒܪ̈ܶܐ܇ ܐܽܘܫܰܥܢܳܐ ܒܪܰܘܡܳܐ܀

 

ܫܽܘܒܚܳܐ ܠܗܰܘ ܕܰܢܚܶܬ܇ ܘܰܪܟܶܒ ܥܰܠ ܥܺܝܠܳܐ܇ ܘܛܠܳܝ̈ܶܐ ܘܫܰܒܪ̈ܶܐ ܝܒܒܘ ܩܕܡ ܡܳܐܬܝܗ܇ ܫܽܘܒܚܳܐ ܠܝܠܘܕܗ܀

 

ܣܘܓܝܬܐ ܩܳܠܳܐ ܥܰܡܳܐ ܘܥܰܡܡ̈ܶܐ ܥܽܘܢܺܝܬܳܐ ܩܰܕܺܝܫ ܩܰܕܺܝܫ ܩܰܕܺܝܫ ܩܥܘ܇ ܝܠ̈ܕܝܗ ܕܥܺܕܬܳܐ ܩܰܕܺܝܫܬܐ

ܡܰܠܟܳܐ ܕܪܰܘܡܳܐ ܠܐܰܪܥܳܐ ܢܚܶܬ܇ ܘܡܶܢ ܒܰܪܬ ܕܰܘܺܝܕ ܦܰܓܪܳܐ ܢܣܒ܇ ܘܥܺܝܠܳܐ ܪܟܒ ܗܘܳܐ ܟܰܕ ܥܳܐܶܠ܇ܠܽܐܘܪܺܫܠܶܡ ܗܝ ܨܠܘܒܬܐ܀

 

ܗܳܠܶܝܢ ܕܡܳܪܰܢ ܒܶܝܬ ܟܶܢܫ̈ܶܐ܇ ܘܢܚ̈ܬܐ ܦܪܣܝܢ ܩܕܡ ܐܳܘܪܚܗ܇ ܐܦ ܐܝܠ̈ܢܐ ܫܕܪܘ ܠܗ܇ ܕܫ̈ܢܐ ܕܫܽܘܒܚܳܐ ܣܘܟ̈ܝܗܘܢ܀

 

ܒܢܬ ܐܽܘܪܺܫܠܶܡ ܠܽܐܘܪܥܶܗ ܢܦܩ̈ܝ܇ ܘܒܢ̈ܬ ܨܶܗܝܽܘܢ ܨܠܘܒܬܐ܇ ܡܶܢ ܟܽܠ ܥܰܡ̈ܡܝܢ ܬܶܫܒܽܘܚܬܳܐ܇ ܠܡܰܠܟܳܐ ܕܪܰܘܡܳܐ ܕܥܺܝܠܳܐ ܪܟܒ܀

 

ܐܝܬܝ ܐܢܐ ܗܝ ܟܽܠܬܐ܇ ܘܠܐ ܝܕܥܢܝ ܡܟܝܪܐ ܐܝܬ ܠܝ܇ ܘܠܐ ܐܟܬܒ ܠܝ ܒܰܪ ܝܥܩܘܒ܇ ܕܚܰܬܢܳܐ ܐ̱ܚܪܺܢܳܐ ܡܟܪ ܠܝ܀

 

ܒܡܶܢܰܢܐ ܘܣܠܘܝ ܐܬܦܛܡܬ܇ ܘܒܥܰܡܰܘܕܶܐ ܐܬܗܕܝܬ܇ ܘܡܶܢ ܛܪܢܐ ܐܬܒܣܡܬ܇ ܘܠܝܬ ܗܘܳܐ ܫܪܒܳܟ ܟܰܕ ܡܟܪܘܢܝ܀

 

ܓܠܐ ܠܝ ܡܘܫܐ ܥܰܠ ܡܳܪܝܳܐ܇ ܘܐܪ̈ܙܐ ܬܠܬܐ ܣܕܪ ܩܕܡܝ܇ ܐܡܪ̈ܐ ܘܥܪ̈ܒܐ ܕܩܪܒ ܠܝ܇ ܠܡܶܢܘ ܪܫܡܝܢ ܦܫܩ ܠܝ܀

 

ܗܠܠܘ ܥܰܡܡ̈ܐ ܘܐܳܘܕܝܘ ܒܝ܇ ܘܡܕܒܰܪ̈ܢܐ ܕܰܗ̱ܘܰܘ ܒܝ܇ ܘܐܰܢ̱ܬ ܡܳܐ ܛܐܒܳܟ ܕܡܶܢ ܫܰܒܪ̈ܶܐ܇ ܫܽܘܒܚܳܐ ܦܐܝܐ ܗܐ ܫܩܠܬ܀

 

ܗܘܳܬ݀ ܐ ܒܫܝܘܠ ܦܬܚ̈ܢ ܠܳܟ܇ ܐܢ ܥܳܐܶܠ ܐܰܢ̱ܬ ܠܓܰܘ ܗܝܟܽܠܝ܇ ܘܥܰܠܪܝܫ ܩܝܣܐ ܥܰܡ ܒܝܫ̈ܐ܇ ܨܠܒܐ ܐܢܐ ܠܳܟ ܕܠܳܐ ܪܚܡܬܟ܀

 

ܗܦܘܟ ܥܰܠ ܐܽܘܪܚܳܐ ܕܐܬܝܬ ܒܗ܇ ܕܠܳܐ ܡܶܢ ܟܗ̈ܢܝ ܡܬܩܛܠܬ܇ ܕܳܠܝܬܰܘܗܝ ܡܟܝܪܐ ܕܥܺܝܠܳܐ ܪܟܒ܇ ܘܶܐܢ ܠܝ ܥܳܐܶܠܬ ܨܠܒܢ ܠܳܟ܀

 

ܗܝܟܽܠ̈ܝ ܪܡܝܢ ܘܡܨܒ̈ܬܝܢ܇ ܒܨܒ̈ܬܐ ܕܡܠ̈ܟܐ ܕܺܐܝܬܝܘ ܠܝ܇ ܘܟܗ̈ܢܝ ܙܳܡܪܺܝܢ ܘܡܫܰܒܚܺܝܢ܇ ܠܡܳܪܝܳܐ ܨܒܐܳܘܘܬ ܕܒܓܰܘܝ ܫܪܐ܀

 

ܙܡܝܪܬܐ ܕܫܽܘܒܚܳܐ ܥܰܡ ܣܰܘ̈ܟܶܐ܇ ܠܗܳܢܳܐ ܝܰܘܡܳܐ ܪܫܡܝܢ ܗ̱ܘܰܘ܇ ܩܪܝ ܒܢܒܺܝ̈ܶܐ ܘܠܐ ܬܬܚܪܝܢ܇ ܕܡܶܛܽܠ ܚܰܬܢܳܐ ܟܽܠܬܐ ܗܘܝܬܝ܀

 

ܙܠܝܠ ܟܢܫܐ ܐܰܝܟ ܡܠܬܟܝ܇ ܘܪܫܝܡ ܫܪܒܗ ܒܓܰܘ ܣܦܪ̈ܐ܇ ܘܗܝ ܬܶܫܒܽܘܚܬܳܐ ܕܕܰܘܺܝܕ ܪܫܡ܇ ܝܘܡܶܢ ܬܩܢܬ ܐܰܝܟ ܕܐܡܪ܀

 

ܚܠܘܠܐ ܥܒܕ ܠܝ ܒܐܫܝܡܘܢ ܟܰܕ ܡܟܪ ܠܝ ܒܰܪ ܥܰܡܪܡ܇ ܘܢܚ̈ܬܐ ܕܫܽܘܒܚܳܐ ܨܒܬܢܝ ܗܘܳܐ܇ ܟܰܕ ܡܠܦ ܠܝ ܢܡܘܣܐ܀

 

ܚܘܝܬ ܫܽܘܒܚܳܐ ܗܘ ܕܺܐܝܬ ܠܝ܇ ܥܰܠ ܪܝܫ ܛܘܪܐ ܩܕܡ ܝܠ̈ܕܝܟܝ܇ ܐܰܒܳܐ ܕܩܥܐ ܘܐܣܗܕ ܥܰܠܝ܇ ܕܒܪܶܗ ܐܢܐ ܘܒܝ ܐܨܛܒܝ܀

 

ܪܟܒ ܗܘܳܐ ܕܡܳܪܰܢ ܥܺܝܠܳܐ ܘܥܰܠ܇ ܠܓܰܘ ܐܽܘܪܺܫܠܶܡ ܨܠܘܒܬܐ܇ ܘܩܒܠܬ ܥܺܕܬܳܐ ܐܦ ܚܒܒܬ܇ ܘܝܠ̈ܕܝܗ ܫܽܘܒܚܳܐ ܙܳܡܪܺܝܢ ܒܗܘܢ܀

 

ܣܒ̈ܐ ܫܬܩܘ ܗ̱ܘܰܘ ܕܠܳܐ ܢܫܰܒܰܚܘ̱ܢ܇ ܘܪܥܰܡܘ ܛܠܳܝ̈ܶܐ ܕܢܩܠܣܘܢ܇ ܟܳܗ̈ܢܶܐ ܛܠܡܘܗܝ ܘܠܐ ܩܒܠܘܗܝ܇ ܘܫܰܒܪ̈ܶܐ ܒܬܗܪܐ ܠܗ ܫܰܒܚܽܘܗ̱ܝ܀

 

ܥܰܠ ܗܘܳܐ ܕܡܳܪܰܢ ܠܓܰܘ ܗܝܟܽܠܐ܇ ܒܩܳܠܳܐ ܕܫܰܒܪ̈ܶܐ ܕܡܫܰܒܚܺܝܢ ܥܰܡܳܐ ܕܩܥܐ ܘܡܝܒܒ܇ ܒܩܳܠܳܐ  ܕܽܐܘܫܰܥܢ̈ܶܐ ܡܒܰܪܟܝܢ܀

 

ܫܽܘܒܚܳܐ ܠܳܟ ܡܳܪܝ̱ ܕܒܳܟ ܐܬܦܪܩܘ܇ ܝܰܠܕܰܘ̈ܗ̱ܝ ܕܳܐܕܳܡ ܥܦܪܢܐ܇ ܘܐܫܘܝܬ ܐܶܢܽܘܢ ܕܢܫܰܒܰܚܘ̱ܢ܇ ܥܰܡ ܪ̈ܘܚܢܐ ܢܬܩܠܣܘܢ܀

 

ܢܦܩܘ ܗ̱ܘܰܘ ܛܠܳܝ̈ܶܐ ܕܢܩܠܣܘܢ܇ ܠܡܰܠܟܳܐ ܕܥܳܐܶܠ ܠܓܰܘ ܨܶܗܝܽܘܢ܇ ܘܫܩܠܘ ܣܰܘܟ̈ܶܐ ܕܢܫܰܒܰܚܘ̱ܢ܇ ܐܦ ܢܙܡܪܘܢ ܒܽܐܘܫܰܥܢܰܝ̈ܗܽܘܢ܀

 

ܣܢܬ ܟܪ̈ܘܙܐ ܘܠܐ ܩܒܠܬ܇ ܢܒܝܘ̈ܬܐ ܕܐܟܪܙܘ ܠܗ܇ ܠܨܠܡܳܐ ܕܪܚܡܬ ܓܝܪܬܐ܇ ܘܒܗܬܐ ܕܬܦܘܩܝ ܘܬܩܒܠܝܘܗܝ܀

 

ܩܢܘܡ̈ܐ ܬܠܬܐ ܕܠܳܐ ܡܬܒܨܝܢ܇ ܘܟܝܢܐ ܚܰܕ ܕܠܳܐ ܡܬܕܪܟ܇ ܐܰܒܳܐ ܘܐܳܘܠܕ ܒܰܪܐ ܝܠܝܕ܇ ܘܪܽܘܚܳܐ ܕܢܦܩ ܘܓܡܪ ܟܽܠ܀

 

ܗܘ ܕܒܥܘܒܐ ܕܐܰܒܽܘܗ̱ܝ ܫܪܐ܇ ܗܘܝܘ ܕܥܰܠ ܗܘܳܐ ܠܽܐܘܪܺܫܠܶܡ܇ ܙܘܥܘ ܕܪ̈ܘܫܐ ܕܠܳܐ ܡܣܬܕܩ܇ ܘܚܰܕ ܗܘ ܟܝܢܐ ܕܠܳܐ ܡܬܕܪܟ܀

 

ܩܢܘܡܗ ܕܝܶܫܽܘܥ ܡܪܐ ܕܟܽܠ܇ ܘܙܟܝ ܠܥܺܕܬܳܐ ܕܳܠܗ ܣܓܕܐ܇ ܘܚܝܒܗ ܠܨܶܗܝܽܘܢ ܨܠܘܒܬܐ܇ ܘܒܝܰܕ ܩܛܠܗ ܥܩܪ ܘܒܕܪܗ܀

 

ܡܫܺܝܚܳܐ ܢܽܘܗܪܳܐ ܡܶܢܗܪ ܟܽܠ܇ ܒܢܘܗܪܟ ܐܢܗܪ ܥܝܢ̈ܐ ܕܢܦܫܝ܇ ܘܒܬܪܝܢ ܥܰܠ̈ܡܳܐ ܐܫܒܚܟ܇ ܒܩ̈ܠܐ ܚܠ̈ܝܐ  ܕܽܐܘܫܰܥܢ̈ܶܐ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܐܬܐ ܕܢܥܒܕ ܚܠܘܠܐ ܠܳܟܽܠܬܐ ܕܡܟܪ ܗܘܳܐ ܠܗ܇ ܘܐܫܟܚܗ ܕܛܡܳܐܐ ܗܝ ܒܕܒ̈ܚܐ ܢܕܝܕ̈ܐ ܕܥܰܠ̈ܘܬܐ܇ ܪܟܒ ܗܘܳܐ ܥܺܝܠܳܐ ܘܒܥܐ ܕܢܥܘܠ ܠܡܫܒܚܬܐ܇ ܘܡܶܢ ܕܚܙܬܗ ܚܣܡܬ ܗܘܳܬ݀  ܒܗ ܘܠܐ ܩܒܠܬܗ܀

 

ܫܽܘܒܚܳܐ ܠܰܐܒܳܐ ܕܡܟܪ ܟܽܠܬܐ ܒܐܝ̈ܕܝ ܡܘܫܐ܇ ܘܣܓܕܬܐ ܠܰܒܪܳܐ ܕܐܥܰܠ ܚܠܦܝܗ ܠܥܺܕܰܬ ܩܘܕܫܐ܇ ܬܰܘܕܝ ܠܪܽܘܚܳܐ ܕܡܫܒܚܐ ܠܗ ܒܩܠ  ܐܽܘܫܰܥ̈ܢܶܐ܇ ܒܟܽܠܗܽܘܢ ܥ̈ܐܕܐ ܥܰܡ ܥܕ̈ܢܐ ܠܗ ܬܶܫܒܽܘܚܬܳܐ܀

 

ܩܰܘܡܳܐ ܕܰܬܪܶܝܢ ܕܠܺܠܝܳܐ ܒܩܳܠܳܐ ܐܢܐ ܐܢܐ ܢܽܘܗܪܳܐ

ܟܰܕ ܕܡܳܪܰܢ ܒܽܐܘܪܚܳܐ ܪܕܐ ܗܘܳܐ܇ ܡܶܢ ܐܝܪܝܚܘܠܽܐܘܪܺܫܠܶܡ܇ ܘܗܳܐ ܓܘܕܐ ܕܛܠܳܝ̈ܶܐ ܩܕܡܘܗܝ܇ ܘܣܘ̈ܟܝ ܙܰܝܬܳܐ ܒܐܝܕ̈ܝܗܘܢ܇ ܘܩܳܥܶܝܢ ܗ̱ܘܰܘ ܠܗ ܟܰܕ ܐܡܳܪܝ̱ܢ܇ ܐܽܘܫܰܥܢܳܐ ܒܪܰܘܡܳܐ ܘܥܘܡܩܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܐܬܐ ܘܰܥܬܺܝܕ ܕܢܺܐܬܶܐ܇ ܫܽܘܒܚܳܐ ܠܗ ܘܠܫܳܠܽܘܚܶܗ܀

 

ܒܚܰܕܘܬܐ ܘܩܳܠܳܐ ܕܝܘܒܒܐ܇ ܢܙܡܪ ܠܗ ܠܡܰܠܟܳܐ ܡܫܺܝܚܳܐ܇ ܘܝܰܘܡܳܢܳܐ ܪܟܒ ܥܺܝܠܳܐ ܫܺܝܛܳܐ܇ ܐܰܝܟ ܕܙܟܰܪܝܳܐ ܐܬܢܒܝ ܕܘܨܝ ܘܚܰܕܝ ܐܳܘ ܒܰܪܬ ܨܶܗܝܽܘܢ܇ ܘܩܥܝ ܥܰܡܗ ܐܽܘܪܺܫܠܶܡ܇ ܕܡܰܠܟܶܟܝ̱ ܐܬܐ ܕܢܥܘܠ ܠܶܟܝ̱܇ ܕܺܐܝܬܰܘܗ̱ܝ ܢܝܚܐ ܘܡܰܟܺܝܟܐ܇ ܙܕܝܩܐ ܐܦ ܦܪܘܩܐ܀

 

ܐ̱ܚܪܺܢܳܐ܇ ܡܳܪܝܳܐ ܕܡܳܪܰܢ

ܐܝܠ ܓܰܢ̱ܒܳܪܳܐ ܇ ܟܰܕ ܐܫܡܥ ܩܠܗ ܕܢܚܘܩ܇ ܥܰܠ ܛܘܪ ܣܝܢܝ܇ ܡܶܛܽܠ ܥܒܰܪ̈ܝܐ܇ ܙܥ ܗܘܳܐ ܛܘܪܐ܇ ܘܣܠܩ ܗܘܳܐ ܐܦ ܬܢܢܐ܇ ܕܫܡܥ ܩܠܗ ܕܪܡܳܐ ܕܰܢܚܶܬ ܗܘܳܐ܇ ܘܛܘܪܐ ܕܨܶܗܝܽܘܢ ܗܐ ܫܠܐ ܘܒܗܝܠ ܡܶܢ ܙܘܥܐ܇ ܘܒܠܚܘܕ ܪܥܰܡ ܒܩܳܠܳܐ ܕܝܰܠܽܘ̈ܕܶܐ܇ ܕܩܳܥܶܝܢ ܗ̱ܘܰܘ ܠܗ܇ ܐܽܘܫܰܥܢܳܐ ܒܪܰܘܡܳܐ ܕܳܠܥܶܠ ܘܐܬܝܬ ܠܥܘܡܩܐ܇ ܐܽܘܫܰܥܢܳܐ ܠܫܡܟ܀

 

ܩܢܝܬܐ ܦܐܝܬܐ܇ ܘܙܡܪܐ ܕܒܢ̈ܝ ܢܽܘܗܪܳܐ ܩܽܘܕܫܳܐܕܪ̈ܘܚܢܐ܇ ܙܡܪܐ ܚܠܝܐ܇ ܬܶܫܒܽܘܚܬܳܐ ܚܰܕܬܐ ܨܐܬ ܥܺܕܬܳܐ ܝܘܡܶܢ ܡܶܢ ܦܘܡ ܥܶܠܳܝ̈ܶܐ܇ ܙܡܪܘ ܟܣܝܐܝܬ܇ ܥܺܝܪ̈ܶܐ ܠܕܡ̈ܟܐ ܕܢܬܬܥܝܪܘܢ܇ ܒܩܳܠܳܐ ܫܒܝܚܐ ܕܪܰܘܡܳܐ܇ ܒܗ ܚܰܕܝܢ܇ ܟܰܕ ܐܳܡܪܺܝܢܠܗ܇ ܐܽܘܫܰܥܢܳܐ ܒܪܰܘܡܳܐ ܘܥܘܡܩܐ܇ ܒܪܺܝܟ ܗܘ ܕܐܬܐ܇ ܘܐܬܐ ܠܦܽܘܪܩܳܢܰܢ܀

 

ܣܘܓܝܬܐ܇ ܐܰܒܳܐ ܟܬܒ ܗܘܳܐ܇ ܥܽܘܢܺܝܬܳܐ ܒܪܺܝܟ ܗܘ ܡܫܺܝܚܳܐ ܐܰܠܳܗܳܐ܇ ܕܪܟܒ ܗܘܳܐ ܥܺܝܠܳܐ ܒܡܘܟܟܐ܇

ܚܙܬܗ ܕܪܟܺܝܒ ܥܰܠ ܥܺܝܠܳܐ܇ ܘܡܶܢ ܫܰܒܪ̈ܶܐ ܒܽܐܘܫܰܥܢ̈ܶܐ ܡܣܬܓܕ܇ ܚܣܡܬ ܙܢܝܬܐ܇ ܘܦܩܪܬ ܓܝܪܬܐ ܟܐܦ̈ܐ ܫܕܪܬ ܥܰܡ ܫܰܒܪ̈ܶܐ܇ ܕܢܨܛܥܪ ܚܰܬܢܳܐ ܡܫܒܚܐ܀

 

ܟܽܠܬܐ ܒܰܪܬܗ ܕܐܒܪܶܗܡ܇ ܩܽܘܡܝ̱ ܩܒܠܝ ܚܰܬܢܳܐ ܕܐܬܐ ܠܶܟܝ̱܇ ܗܢܘ ܓܝܪ ܕܚܙܳܝܗ̱ܝ܇ ܙܟܰܪܝܳܐ ܐܬܢܒܝ܇ ܘܰܪܟܺܝܒ ܥܺܝܠܳܐ ܒܡܘܟܟܐ܇ ܘܡܶܢ ܫܰܒܪ̈ܶܐ ܒܽܐܘܫܰܥܢ̈ܶܐ ܡܣܬܓܕ܀

 

ܩܪܒܬ ܨܶܝܕܘܗܝ ܓܝܪܬܐ܇ ܘܡܫܐܠܐ ܘܗܳܟܰܢܳܐ ܐܡܪܐ܇ ܕܒܐܝܢܐ ܫܘܠܛܢܐ܇ ܕܗܳܠܶܝܢ ܥܒܕ ܐܰܢ̱ܬ܇ ܘܡܶܢܘ ܝܗܒܠܳܟ ܫܘܠܛܢܐ܇ ܕܡܶܢ ܡܠ̈ܟܐ ܐܝܩܪܟ ܪܒ ܗܘ܀

 

ܐܳܘܪܚܗ ܦܐܝܬܐ ܢܫܬܥܐ܇ ܕܒܰܪ ܡܰܠܟܳܐ ܕܐܬܐ ܠܥܳܠܡܳܐ܇ ܕܐܰܝܟܢܐ ܥܒܝܰܕ ܗܘܳܐ܇ ܫܪܒܐ ܕܡܫܬܰܘܬܐ܇ ܘܡܶܢܐ ܡܡܰܠܶܠ ܥܰܡ ܥܰܡܡ̈ܐ܇ ܐܒܗ̈ܝܗ ܕܥܺܕܬܳܐ ܘܡܘܢ ܐܬܥܢܝ܀

 

ܩܪܐ ܠܐܒܗ̈ܝܗ ܕܛܠܝܬܐ܇ ܢܦܩܘ ܨܶܝܕܘܗܝ ܡܡܰܠܶܠ ܗܘܳܐ ܥܰܡܗܘܢ܇ ܐܗܘܳܐ ܠܳܟܘܢ ܚܰܬܢܳܐ܇ ܥܘܠܘ ܥܰܡܝ ܒܩܝܡܳܐ ܐܒܝ ܓܝܪ ܫܕܪܢܝ ܡܶܢ ܐܬܪܗ܇ ܥܰܠܝܐ ܕܐܰܘܪܶܒ ܠܒܰܪܬܟܘܢ܀

 

ܫܒܒ̈ܐ ܐܝܬ ܠܰܢ ܡܡܝܩ̈ܢܐ܇ ܘܚܣܕܐ ܗܘ ܠܰܢ ܕܳܠܒܰܪܬܢ ܫܝܛܬܝ܇ ܘܫܡܗ ܓܝܪ ܕܒܰܪܬܢ܇ ܡܣܢܐ ܐܰܢ̱ܬ ܘܡܙܥܪ܇ ܕܢܚ̈ܬܐ ܠܒܝܫ ܐܰܢ̱ܬ ܕܠܳܐ ܕܝܠܳܟ܇ ܘܠܒܰܪܬܢ ܒܥܝܬ ܕܬܡܟܘܪܝ܀

 

ܠܘ ܣܘܠܐܢܐ ܗܘܳܬ݀  ܒܰܪܬܢ܇ ܐܠܗ̈ܝܗ ܕܰܐܪܥܳܐ ܚܒܨܘ ܥܠܶܝܗܿ܇ ܠܘ ܡܣܢܐ ܣܢܝܢܗ܇ ܘܠܳܟ ܢܬܠܝܗ ܛܠܝܐ܇ ܡܶܢ ܐܰܠܳܗܳܐ ܕܐܠܝܢܗ܇ ܕܠܳܐ ܫܦܪ ܠܰܢ ܩܝܡܳܐ ܕܥܰܡܗܘܢ܀

 

ܚܰܬܢܳܐ ܕܐܰܝܟ ܗܢ ܒܥܝܢܢ܇ ܕܚܘܒ̈ܬܐ ܢܦܪܘܥ ܕܫܪܒܬܢ܇ ܐܢܐ ܦܪܥ ܐܢܐ܇ ܟܽܠܗܝܢ ܚܘܒ̈ܬܟܘܢ܇ ܐܥܘܠ ܥܰܡܟܘܢ ܒܩܝܡܳܐ܇ ܦܪܥ ܐܰܢ̱ܬ ܛܠܝܐ ܩܪܘܒ ܠܗܠ܀

 

ܐܢܐ ܢܽܘܗܪܳܐ ܘܚܝ̈ܐ ܐܢܐ܇ ܘܐܦ ܚܝ̈ܐ ܘܡܺܝ̈ܬܶܐ ܣܢܝܩܝܢ ܥܰܠܝ܇ ܘܶܐܢܐ ܗܘ ܥܩܪܐ܇ ܕܒܝ ܚܐܝܢ ܥܰܠ̈ܡܳܐ܇ ܣܒܘ ܘܐܬܛܗܡܘ ܚܠ̈ܫܐ܇ ܘܒܝ ܫܪ̈ܒܬܟܘܢ ܡܟܝܠ ܩܝܡܳܐ܀

 

ܡܶܢܐ ܝܗܒܬ ܠܗ ܠܒܰܪܬܢ܇ ܘܡܘܢ ܡܗܪܐ ܢܣܒܐ ܥܰܠܝܡܬܢ܇ ܙܥܘܪ ܗܘ ܪܥܝܢܐ܇ ܠܡܳܐܚܰܕ ܣܝܡ̈ܬܗ܇ ܘܐܕܢܐ ܠܡܫܡܥ ܠܐ ܥܪܝܐ܇ ܘܠܐ ܦܘܡܳܐ ܕܢܐܡܪ ܡܳܐ ܕܢܣܒܐ܀

 

ܐܰܢ̱ܬܰܘܢ ܡܶܢܐ ܝܗܒܶܝܬܰܘܢ܇ ܠܛܠܝܬܐ ܡܗܪܐ ܐܰܘܕܰܥܘܢܝ܇ ܝܗܒܝܢܢ ܠܒܰܪܬܢ܇ ܗܳܠܶܝܢ ܥܰܠ̈ܝܡܬܐ܇ ܗܢܝܢ ܡܨܒ̈ܬܢ ܥܰܠܝܡܘܬܗ ܘܒܫܘܦܪܐ ܡܩܝ̈ܡܶܢ ܠܗ ܒܟܽܠܙܒܢ܀

 

ܗܐ ܛܪܝܕܐ ܨܶܗܝܽܘܢ ܘܡܦܩܐ܇ ܘܥܒܝܰܕܐ ܚܣܕܐ ܠܥܳܠܡܳܐ܇ ܘܗܳܐ ܥܺܕܬܳܐ ܚܠܦܝܗ ܡܟܝܪܐ ܘܡܫܒܚܐ܇ ܠܰܐܒܳܐ ܘܠܰܒܪܳܐ ܘܪܘܚ ܩܘܕܫܐ܇ ܘܕܨܒܐ ܒܗ ܘܐܦܢܝܗ ܡܶܢ ܛܽܘܥܝܰܝ܀

 

ܥܺܕܬܳܐ ܩܳܥܝܳܐ ܘܪܡ ܩܠܗ܇ ܘܠܝ ܛܘܒܝ ܕܳܠܡܶܢܘ ܢܦܩܬ܇ ܘܗܘ ܐܫܬܰܘܕܝ ܠܝ܇ ܚܝ̈ܐ ܘܡܰܠܟܽܘܬܳܐ܇ ܘܶܐܢܐ ܝܠ̈ܕܝ ܣܓ̈ܕܢ ܠܗ܇ ܘܠܐܰܒܽܘܗ̱ܝ ܘܠܪܘܚܗ ܩܰܕܺܝܫܳܐ܀

 

ܛܽܘܒܰܝܟܝ̱ ܐܦܪܬ ܥܽܘܢܺܝܬܳܐ ܬܫܒ̈ܚܢ ܠܫܳܠܽܘܚܶܗ ܕܫܠܚܗ ܠܦܽܘܪܩܳܢܰܢ܇ ܘܰܪܟܺܝܒ ܥܺܝܠܳܐ ܕܢܚܪܪ ܠܰܢ

ܛܽܘܒܰܝܟܝ̱ ܥܺܕܬܳܐ ܒܗܳܢܳܐܥܐܕܐ܇ ܕܒܩܠ ܫܽܘܒܚܳܐ ܕܫܡܝ̈ܢܐ܇ ܪܥܰܡܝܢ ܝܠ̈ܕܝܟܝ ܠܡܫܰܒܰܚܘ̱܇ ܠܡܰܠܟܳܐ ܕܪܰܘܡܳܐ ܕܫܪܐ ܨܶܝܕܝܟܝ܇ ܚܠܦ ܥܰܡܳܐ ܕܛܠܡ ܫܘܒܚܗ܇ ܠܶܟܝ̱ ܐܫܘܝ ܕܒܽܐܘܫܰܥܢ̈ܶܐ ܬܫܒܚܝܘܗܝ ܗܐ ܩܥܝܬ ܠܗ܇ ܒܪܺܝܟ ܗܘ ܕܐܬܐ ܘܐܬܐ ܒܫܽܘܒܚܳܐ ܕܡ̈ܠܐܟܘܗܝ܀

 

ܛܽܘܒܰܝܟܝ̱ ܟܽܠܬܐ ܘܡܟܽܠܠܬܐ܇ ܕܥܰܠ ܠܶܟܝ̱ ܚܰܬܢܳܐ ܕܣܢܬ ܨܶܗܝܽܘܢ܇ ܟܪ̈ܺܝܗܶܐ ܕܐܬܚܠܡܘ ܕܨܘ ܪܩܕܘ ܒܳܟܝ܇ ܚܪ̈ܫܐ ܕܫܡܥܘ ܕܘܓ̈ܐ ܝܒܒܘ܇ ܒܚܠܘܠ ܡܶܢ ܗ̈ܘܝ ܗܳܠܶܝܢ ܕܒܳܟܝ ܗܘ̈ܝ܇ ܕܟܢܫܐ ܟܽܠܗ ܒܽܐܘܫܰܥܢ̈ܶܐ ܫܰܒܚܽܘܗ̱ܝ ܕܨܶܗܝܽܘܢ ܐܬܟܪܗܬ܇ ܐܕܢܗ ܒܝܘܒ̈ܒܝܟܝ ܕܩܠܗ ܡܛܐ ܨܶܝܕܝܗ܀

 

ܚܙܳܝܗ̱ܝ ܚܙܩܐܝܠ ܥܰܠ ܡܰܪܟܰܒܬܳܐ܇ ܕܡܩܕܫܝܢ ܠܗ ܣܪ̈ܦܐ ܒܕܚܠܐ܇ ܘܡܶܛܽܠ ܐܳܕܳܡ ܥܺܝܠܳܐ ܪܟܒ ܗܘܳܐ܇ ܘܩܒܠ ܫܽܘܒܚܳܐ ܕܫܰܒܪ̈ܶܐ ܫܦܝ̈ܐ܇ ܣܒ̈ܐ ܒܚܣܡܳܐ ܒܳܟܺܐܦ̈ܶܐܐ ܪܓܡܘܗܝ܇ ܘܥܠܰܝ̈ܡܶܐ ܒܣܰܘ̈ܟܶܐ ܩܰܠܣܽܘܗ̱ܝ܇ ܛܪܕ ܗܘܳܐ ܠܥܰܡܳܐ ܘܟܢܫ ܗܘܳܐ ܠܥܰܡܡ̈ܐ܇ ܒܪܺܝܟ ܗܘ ܦܘܢܝܗ܀

 

ܛܽܘܒܳܐ ܪܒܐ ܠܳܟܢܫܐ ܕܫܰܒܪ̈ܶܐ܇ ܕܛܥܢܘ ܣܰܘܟ̈ܶܐ ܩܕܡ ܦܳܪܽܘܩܰܢ܇ ܚܙܳܝܗ̱ܝ ܗܘܳܐ ܕܐܬܐ ܘܰܪܟܺܝܒ ܥܺܝܠܳܐ܇ ܘܢܦܩܘ ܠܽܐܘܪܥܶܗ ܒܽܐܘܫܰܥܢܰܝ̈ܗܽܘܢ܇ ܛܘܒ ܠܕܟ̈ܝܐ ܕܳܠܕܟܝܐ ܩܠܣܘ܇ ܘܬܶܫܒܽܘܚܬܳܐ ܕܣܪ̈ܦܐ ܩܥܘ ܠܗ܇ ܒܪܺܝܟ ܗܘ ܕܐܬܐ ܡܶܛܽܠ ܦܽܘܪܩܳܢܰܢ܇ ܘܐܬܐ ܠܰܢܘܚܡܶܢ܀

 

ܝܘܡܶܢ ܣܦܪ̈ܐ ܛܠܡܘ ܗ̱ܘܰܘ ܫܘܒܚܗ܇ ܕܒܰܪ ܐܰܠܳܗܳܐ ܒܚܣܡ̈ܝܗܘܢ܇ ܘܙܥܘ ܡܶܢ ܬܗܪܐ ܛܠܳܝ̈ܶܐ ܙܥܘܪ̈ܐ܇ ܕܢܬܠܘܢ ܫܽܘܒܚܳܐ ܒܽܐܘܫܰܥܢܰܝ̈ܗܽܘܢ܇ ܣܰܘܟ̈ܶܐ ܕܡܶܢ ܕܩ̈ܠܐ ܛܥܢܘ ܗ̱ܘܰܘ ܩܽܘܕܡܰܘܗ̱ܝ ܢܰܚܬܰܝ̈ܗܽܘܢ ܦܪܣܘ ܗ̱ܘܰܘ܇ ܘܩܥܘ܇ ܒܕܘܨܐ܇ ܐܽܘܫܰܥܢܳܐ ܒܪܰܘܡܳܐ܇ ܠܡܰܠܟܳܐ ܕܡܶܢ ܪܰܘܡܳܐ܀

 

ܟܽܠܬ ܡܰܠܟܳܐ ܥܽܘܢܺܝܬܳܐ ܒܪܺܝܟ ܕܛܠܳܝ̈ܶܐ ܒܣܰܘ̈ܟܶܐ. ܩܰܠܣܽܘܗ̱ܝ ܠܰܒܪܳܐ ܒܓܰܘ ܐܽܘܪܺܫܠܶܡ

ܪ̈ܒܘ ܦܘ̈ܡܝܢ ܠܐ ܣܦܩܝܢ܇ ܕܢܫܰܒܰܚܘ̱ܢܟ ܐܰܝܟ ܡܳܐ ܕܘܠܐ܇ ܪ̈ܒܘ ܩܪ̈ܢܢ ܒܩܳܠܰܝ̈ܢ܇ ܠܐ ܫܘܝ̈ܢ ܗܘ̈ܝ ܕܢܩܠ̈ܣܘܢܟ܇ ܩܪܘ ܫܝܦܘܪ̈ܐ܇ ܩܝ̈ܢܢ ܩܝ̈ܢܢ܇ ܙܡܪܘ ܟܢܪ̈ܐ܇ ܒܢܥ̈ܡܶܢ ܢܥ̈ܡܶܢ܇ ܢܕܘ ܗ̱ܘܰܘ ܐܦ ܡܺܝ̈ܬܶܐ܇ ܐܰܝܟ ܕܢܦܩܘܢ ܠܽܐܘܪܥܳܟ܇ ܘܢܫܰܒܰܚܘ̱ܢ ܠܫܡܟ ܒܽܐܘܫܰܥܢ̈ܶܐ܀

 

ܐܰܚ̈ܰܝܢܙܡܪ ܫܽܘܒܚܳܐ ܠܗܰܘ ܕܒܚܘܒܗ ܡܟܟ ܢܦܫܗ܇ ܬܰܘ ܕܢܩܪܒ ܬܶܫܒܽܘܚܬܳܐ܇ ܚܠܦ ܗܘ ܥܰܡܳܐ ܕܛܠܡܘ ܫܘܒܚܗ܇ ܘܗ̱ܘܰܘ ܚܪ̈ܫܐ܇ ܚܠܦ ܦܘ̈ܡܳܐ ܣܟܝܪ̈ܐ܇ ܕܠܳܐ ܝܰܗܒܘ̱ ܬܶܫܒܽܘܚܬܳܐ܇ ܐܦ ܟܺܐܦ̈ܶܐܐ ܩܥ̈ܝ ܬܶܫܒܽܘܚܬܳܐ܀

 

ܡܶܢܘ ܟܝ ܟܰܕ ܡܝܘܬܐ܇ ܥܶܢܝܳܢܳܐ ܫܽܘܒܚܳܐ ܠܝܠܕܟ ܡܶܢ ܟܽܠܰܢ܇ ܒܰܪܐ ܕܒܽܐܘܫܰܥܢ̈ܶܐ ܡܫܬܒܚ

ܥܕܥܐܕܐ ܦܨܝܚܐ ܐܺܝܬܰܘܗ̱ܝ܇ ܟܽܠܗܽܘܢ ܦܘܡ̈ܐ ܘܠ̈ܫܢܐ܇ ܢܟܦ̈ܬܐ ܘܢܟܦ̈ܐ ܗ̱ܘܰܘ ܒܗ܇ ܐܰܝܟ ܫܝܦܘܪ̈ܐ ܘܩܪ̈ܢܬܐ܇ ܫܰܒܪ̈ܶܐ ܘܫܒܰܪ̈ܬܐ ܗ̱ܘܰܘ ܒܗ܇ ܐܰܝܟ ܟܢܪ̈ܐ ܘܩܝܬܪ̈ܐ܇ ܓܕܳܠܘ ܩ̈ܠܐ ܒܩ̈ܠܐ ܘܣܠܩܘ ܘܡܛܘ ܟܽܠܗܽܘܢ ܠܫܡܰܝ̈ܳܐ܇ ܘܝܰܗܒܘ̱ ܫܽܘܒܚܳܐ ܠܡܪܐ ܫܽܘܒܚܳܐ܇ ܒܪܺܝܟ ܕܪܥܰܡܘ ܒܗ ܫܬܝ̈ܩܐ܀

 

ܒܳܟܐܳܘܝܠܐ ܝܒܒܘ ܗܟܢ܇ ܟܽܠ ܩܠ̈ܝܢ ܟܢܟܽܠ ܦܘܡ̈ܝܢ܇ ܠܒܰܪ ܡܶܢܗ ܓܠ̈ܠܐ ܕܚܝ̈ܠܐ܇ ܘܒܓܰܘܗ ܩ̈ܠܐ ܪ̈ܓܝܓܐ܇ ܠ̈ܫܢܐ ܙܘ̈ܓܝܢ ܙܘ̈ܓܝܢ܇ ܠܥܙܘ ܒܗ ܐܰܝܟ ܚܰܕ ܕܟܝܐܝܬ܇ ܛܘܦܣܗ ܕܗܳܢܳܐܥܕܥܐܕܢ ܕܒܬܰܘ̈ܠܐ ܘܒܘܠ̈ܬܐ܇ ܙܡܪܘ ܒܗ ܩܰܕܺܝܫܳܐܝܬ܇ ܫܽܘܒܚܳܐ ܠܡܪܐ ܕܟܐܳܘܠܐ܀

 

ܦܩܚ̈ܐ ܦ̈ܐܝܐ ܘܗܕܝܪ̈ܐ܇ ܒܕܪܘ ܫܰܒܪ̈ܶܐ ܩܘܕܡܬ ܡܰܠܟܳܐ܇ ܥܺܝܠܳܐ ܐܬܟܽܠܠ ܡܶܢܗܘܢ܇ ܐܽܘܪܚܳܐ ܡܶܢܗܘܢ ܡܠܝܐ ܗܘܳܬ݀ ܇ ܩܘܠ̈ܣܐ ܒܕܪܘ ܐܰܝܟ ܦܩܚ̈ܐ܇ ܘܩܝܢ̈ܬܐ ܐܰܝܟ ܫܘܫ̈ܢܐ܇ ܐܦ ܗܫܐ ܒܓܰܘ ܥܕܥܐܕܐ܇ ܟܶܢܫ̈ܶܐ ܕܫܰܒܪ̈ܶܐ ܒܕܪܘ ܠܳܟ ܡܳܪܝ̱܇ ܗܘܠ̈ܠܐ ܐܰܝܟ ܗܒ̈ܒܐ܇ ܒܪܺܝܟ ܕܐܬܩܠܣ ܡܶܢ ܫܰܒܪ̈ܶܐ܀

 

ܩܒܠ ܡܠܳܟܢ ܩܘܪ̈ܒܢܢ܇ ܘܗܒܠܰܢ ܚܠܦܘܗܝ ܫܘܒܩܢܐ܇ ܫܝܢ ܐܪ̈ܥܬܢ ܕܚܪ̈ܒܝ܇ ܘܒܢܐ ܥܕ̈ܬܢ ܕܝ̈ܩܕܝ܇ ܕܡܳܐ ܕܗܘܳܐ ܫܝܢܐ ܒܰܐܪܥܳܐ ܟܠܺܝܠܐ ܕܫܽܘܒܚܳܐ ܬܩܪܒܝ ܠܳܟ܇ ܟܰܕ ܐܬܝܢ ܡܶܢ ܟܽܠ ܓܒ̈ܝܢ ܓܕܘ̈ܠܐ ܐܰܝܟ ܗܒ̈ܒܐ܇ ܕܢܬܟܽܠܠ ܡܪܐ ܫܝܢܐ܇ ܒܪܺܝܟ ܗܘ ܫܝܢܗ ܕܫܝܢ ܟܽܠ܀

 

ܟܰܕ ܢܚܶܬ ܡܶܢ ܛܘܪ ܙܝ̈ܬܐ܇ ܦܳܪܽܘܩܰܢ ܘܰܪܟܺܝܒ ܥܺܝܠܳܐ܇ ܘܓܘܕܐ ܕܛܠܳܝ̈ܶܐ ܩܽܘܕܡܰܘܗ̱ܝ܇ ܘܣܰܘܟ̈ܰܝ ܙܰܝܬܳܐ ܒܐܝ̈ܕܝܗܘܢ܇ ܘܩܳܥܶܝܢ ܗ̱ܘܰܘ ܒܽܐܘܫܰܥܢܰܝ̈ܗܽܘܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܘܬܰܠܡܺܝ̈ܕܶܐ ܛܪ̈ܛܘܛܝܗܘܢ ܦܪܣܝܢ ܗ̱ܘܰܘ ܩܘܕܡܬ ܥܺܝܠܳܐ܇ ܘܪܥܰܡܬ ܐܽܘܪܚܳܐ ܕܡܥܰܠܬܗ܇ ܡܶܢ ܟܽܠ ܦܢ̈ܝܢ ܫܘܝܐܝܬ܀

 

ܐܝܢܘ ܕܢܓܝܪܐ ܥܶܢܝܳܢܳܐ ܘܩܥܘ ܒܽܐܘܫܰܥܢ̈ܶܐ܇ ܒܪܺܝܟ ܡܰܠܟܳܐ ܕܐܬܐ ܐܦܪܘܫ ܘܐܙܡܪ ܠܳܟ܇

ܫܽܘܒܚܳܐ ܒܦܘܪܫܢܐ܇ ܠܥܰܡܡ̈ܐ ܕܠܳܐ ܦܪܫܘ ܒܳܟ܇ ܗܝܡܶܢܘ ܘܐܳܘܕܝܘ ܒܳܟ܇ ܚܝܐ ܕܠܳܐ ܡܳܐܬ܀

 

ܒܣܰܘ̈ܟܶܐ ܩܥܘ ܩܽܘܕܡܰܘܗ̱ܝ ܥܰܡܡ̈ܐ ܒܥܕܥܐܕܐ܇ ܨܶܗܝܽܘܢ ܥܰܠ ܕܝܠܗ܇ ܫܐܠܬ ܢܘܟܪܝܐ܇ ܕܝܕܥܬ ܒܰܪ ܡܶܢܘ܀

 

ܓܘ̈ܢܘܗܝ ܘܕܡܘ̈ܬܗ܇ ܨܪܘ ܗ̱ܘܰܘ ܩܕܡ ܥܝܢ̈ܝܗ܇ ܘܩ̈ܠܐ ܘܪܘܚܩܘܕܫܐ܇ ܬܐܠܦ ܩܕܡ ܙܒܢܗ܇ ܢܝܫ̈ܘܗܝ ܘܕܡܘ̈ܬܗ܀

 

ܓܘܢܗ ܟܡܝܪܐ ܗܘܳܐ܇ ܠܘܩܒܠ ܦܨܝܚܘܬܗ܇ ܠܒܗ ܫܓܝܫ ܗܘܳܐ ܬܽܘܒ܇ ܠܘܩܒܠ ܒܗܝܠܘܳܬܗ܇ ܘܙܥܬ ܡܶܢ ܩܽܘܕܡܰܘܗ̱ܝ܀

 

ܟܰܕ ܕܝܢ ܥܰܠ ܗܘܳܐ ܠܗ ܫܝܢܐ ܡܫܝܢ ܟܽܠ܇ ܚܙܬܗ ܘܐܫܬܓܫܬ܇ ܚܙܬܗ ܘܫܟܪܬܗ܀

 

ܕܟܰܕ ܪܟܒ ܗܘܳܐ ܥܺܝܠܳܐ܇ ܘܥܰܠ ܗܘܳܐ ܠܽܐܘܪܺܫܠܶܡ܇ ܨܶܗܝܽܘܢ ܕܝܗܒ ܗܘܳܐ ܠܗ܇ ܙܟܰܪܝܳܐ ܥܰܠܘܗܝ ܐܬܐ܇ ܕܝܠܦܬ ܕܡܳܐ ܛܐܒܗ܀

 

ܣܘܓܝܬܐ ܩܳܠܳܐ ܫܽܘܒܚܳܐ ܠܳܟ ܡܳܪܝ̱܇ ܥܽܘܢܺܝܬܳܐ

ܒܪܺܝܟ ܗܘ ܕܥܩܪ ܨܠܘܒܬܐ܇ ܘܡܟܪ ܠܗ ܥܺܕܰܬ ܩܘܕܫܐ܇ ܘܗܳܐ ܙܡܪܐ ܠܗ ܬܶܫܒܽܘܚܬܳܐ ܒܩܠ  ܐܽܘܫܰܥ̈ܢܶܐ ܒܦܘܡ ܝܠ̈ܕܝܗ܀

 

ܟܢܘܫܬܐ  ܖܥܺܕܬܳܐ ܩܳܡ̈ܝ ܕܢܐܡܪ̈ܢ܇ ܒܬܗܪܐ ܪܒܐ ܬܰܘ ܨܘܬܰܘ ܘܫܡܥܘ܇ ܐܝܕܐ ܡܶܢܗܝܢ ܡܙܕܟܝܐ܇ ܩܕܡ ܟܺܐܢܽܘܬܳܐ ܕܗܝ ܫܡܥܐ܀

 

ܕܘܢܘ ܫܡܘܥ̈ܐ ܒܝܢܬܗܘܢ ܒܩܘܫܬܐ ܓܠܝܐ ܕܠܳܐ ܡܣܛܠܐ܇ ܘܡܳܐ ܕܡܠ̈ܝܗܘܢ ܣܟܐ ܫܩܠܝ܇ ܗܒܘ ܙܳܟܽܘܬܳܐ ܠܫܪܝܪܬܐ܀

 

ܐܡܪܐ ܥܺܕܬܳܐ ܒܰܪܐ ܕܐܙܕܩܦ܇ ܥܒܕܢܝ ܥܰܡܟܝ ܝܪܘܬܬܐ ܥܪܐ ܗܘ ܒܶܝܬܐ ܠܐ ܬܚܣܡܝܢ܇ ܢܐܪܬ ܚܝ̈ܐ ܐܢ ܨܒܶܝܬܝ܀

 

ܒܶܝܬܐ ܪܒܐ ܠܐ ܡܙܕܪܒ܇ ܕܟܽܠܗܽܘܢ ܥܰܡܡ̈ܐ ܒܗ ܢܥܰܠܘܢ܇ ܚܰܕܐ ܐܰܒܳܐ ܒܡܒܕܪ̈ܐ܇ ܘܡܘܪܬ ܗܘ ܠܝ ܕܐܬܟܢܫܬ܀

 

ܓܢܘܢܟܝ ܪܒܐ ܘܫܒܝܚ ܗܘ܇ ܐܠܘ ܠܓܠܐ ܠܐ ܛܡܳܐܟܝ܇ ܗܐ ܒܓܢܘܢܟܝ ܓܘܪܟܝ ܪܫܝܡ܇ ܐܰܒܳܐ ܢܚܘܢ ܐܦܠܝ ܘܠܶܟܝ̱܀

 

ܕܝܠܶܟܝ̱ ܬܗܘܳܐ ܐܰܪܥܳܐ ܫܠܝ܇ ܝܪܬܝ ܟܽܠܗ ܠܐ ܬܚܣܡܝܢ܇ ܕܐܢܐ ܐܰܪܥܳܐ ܠܐ ܒܥܝܢܝ܇ ܨܶܝܕ ܡܟܝܪܝ ܠܪܰܘܡܳܐ ܗܐ ܣܠ̈ܩܢ܀

 

ܗܐ ܒܳܟ̈ܬܒܐ ܓܘܪܟܝ ܪܫܝܡ܇ ܕܥܓܠܐ ܘܒܥܰܠܐ ܡܟܘܪܝ ܣܒܝ ܠܶܟܝ̱܇ ܘܡܟܝܪܘܬܟܝ ܩܰܕܺܝܫܬܐ܇ ܠܐ ܩܕܝܬܗ ܕܙܢܝܬܝ ܠܶܟܝ̱܀

 

ܘܥܺܕܰܬܝ ܐܦ ܐܰܢ̱ܬܝ ܟܰܕ ܐܬܡܟܪܬܝ܇ ܠܪܝܫܐ ܕܥܰܡܡ̈ܶܐ ܘܥܰܠܘ ܛܢܦܘܢܟܝ܇ ܠܐܗܪܘܢ ܨܚܝܬܝ ܘܠܚܘܪ ܪܓܡܬܝ܇ ܒܓܕܥܘܢ ܙܢܝܬܝ ܡܘܢ ܣܪܒܬܝ܀

 

ܙܢܝܬܐ ܗܘܝܬܝ ܘܐܬܚܪܪܬ܇ ܣܚܝܬ ܒܥܰܡܕܐ ܘܐܬܩܕܫܬ܇ ܘܒܬܰܘܠܘܳܬܐ ܩܢܝܬ ܡܶܢܕܪܝܫ܇ ܘܐܰܢ̱ܬܝ ܒܰܪܬ ܚ̈ܐܪܐ ܗܐ ܡܙܢܝܬܝ܀

ܚܒܰܪܬܐ ܕܨܠ̈ܡܳܐ ܐܝܬܝ ܗܘܝܬ܇ ܘܗܫܐ ܚܒܰܪ̈ܝܟܝ ܕܝܠܶܟܝ̱ ܗ̱ܘܰܘ܇ ܠܡܪܗ ܕܝܥܩܘܒ ܗܐ ܣܓܕܢܝ܇ ܘܐܰܢ̱ܬ ܠܒܰܪ ܡܪܗ ܒܩܝܣܐ ܬܠܝܬܝ܀

 

ܛܥܝܬܐ ܗܘܝܬ ܘܒܬܪܝ ܢܦܩ܇ ܪܥܝܐ ܛܳܒܳܐ ܒܥܐ ܐܫܟܚܢܝ܇ ܘܥܰܠ ܟܬܦ̈ܬܗ ܛܥܢ ܘܙܝܚܢܝ܇ ܘܗܳܐ ܒܛܝܪܗ ܡܬܚܰܕܝܢܝ܀

 

ܝܗܒ ܠܶܟܝ̱ ܛܒܥܗ ܟܰܕ ܐܰܢ̱ܬܝ ܗܘܝܬܝ܇ ܥܢܗ ܒܠܚܘܕ ܒܓܰܘ ܥܳܠܡܳܐ܇ ܘܟܰܕ ܟܽܠܥܰܡܡ̈ܝܢ ܦܢܘ ܨܶܝܕܘܗܝ܇ ܫܒܩܢܝ ܘܠܐ ܡܬܒܥܝܬܝ ܠܗ܀

 

ܟܰܕ ܐܙܕܝܚܬܝ ܐܰܝܟ ܟܽܠܬܐ܇ ܡܫܟܢܗ ܕܡܠܳܟܘܡ ܥܰܡܟܝ ܢܦܩ܇ ܘܟܘܟܒܐ ܟܐܳܘܢ ܘܣܓܕܬܝ ܠܗ܇ ܣܗܕ ܗܘܫܥ ܕܗܘ ܦܪܣܟܝ܀

 

ܠܰܢܛܘܪ̈ܘܬܟܝ ܠܐ ܫܠܡܶܢܝ܇ ܘܰܐܝܟ ܚܠܒܐ ܗܘ̈ܝ ܠܫܒܰܪܘܬܟܝ܇ ܗܐ ܡܳܐܟܘܠܬܐ ܫܪܝܪܬܐ܇ ܬܐ ܐܬܒܣܡܝ ܐܢ ܨܒܶܝܬܝ܀

 

ܢܒܺܝ̈ܶܐ ܪܓܝܡܝܢ ܡܶܢ ܣܦܪ̈ܝܟܝ܇ ܫܠܺܝ̈ܚܶܐ ܩܛܝܠܝܢ ܡܶܢ ܟܗ̈ܢܝܟܝ܇ ܠܡܪܐ ܢܒܝ̈ܐ ܒܩܝܣܐ ܬܠܝܬܝ܇ ܛܫܝ ܣܦܪ̈ܟܝ ܩܛܘܠܬܐ܀

 

ܣܗܕ ܡܘܫܐ ܕܩܪܝܬܝ ܠܗ܇ ܕܚܙܐ ܓܘܪܟܝ ܘܠܘܚܝ̈ܟܝ ܬܒܰܪ ܓܝܪܬܐ ܐܰܢ̱ܬܝ ܠܐ ܝܪܬܬܝ܇ ܬܠܝܚ ܗܘ ܟܬܒܳܟܝ ܠܡܽܘܢ ܣܪܒܬܝ܀

 

ܥܰܡܡ̈ܐ ܚܪܒ ܗܘܳܐ ܘܠܶܟܝ̱ ܗܘ ܦܪܩ܇ ܕܠܳܐܠܗܝ̈ܗܘܢ ܠܐ ܬܣܓܕܝܢ܇ ܘܕܠܳܐ ܫܡܥܬܝܘܗܝ ܗܐ ܒܕܪܟܝ܇ ܘܩܪܐ ܠܥܰܡܡ̈ܐ ܕܠܳܐ ܢܦܠܚܘܢ܀

 

ܦܬܚܬ ܟܬܒ̈ܝܟܝ ܘܐܣܬܟܽܠܬ܇ ܘܒܟܽܠ ܣܦܪ̈ܝܢ ܓܘܪܟܝ ܪܝܫܡ܇ ܘܨܥܪܟܝ ܪܒܐ ܟܬ̈ܒܐ ܡܠܝܢ܇ ܘܓܠ̈ܝܢ ܐܦܝ̈ܟܝ ܘܡܡܰܠܶܠܬܝ܀

 

ܨܠܡܳܐ ܣܢܝܐ ܗܘ ܕܐܬܚܫܠ܇ ܕܐܪܒܥ ܐܦ̈ܝܢ ܡܶܢ ܟܝ ܥܒܕ܇ ܐܪܒܥ ܦܢܝ̈ܢ ܗܐ ܣܗ̈ܕܢ܇ ܕܓܝܪܬܐ ܐܰܢ̱ܬܝ ܘܠܐ ܫܠܝܬܝ܀

 

ܩܕܡܘܗܝ ܕܐܰܒܳܐ ܗܐ ܐܳܕܳܡܳܪܰܢܝ܇ ܕܐܢܐ ܒܒܪܶܗ ܡܫܬܒܗܪܢܝ܇ ܘܗܘ ܕܙܩܦܬܝܘܗܝ ܗܘ ܐܠܦܢܝ܇ ܒܗ ܗܘ ܚܬܝܪܬܝ ܐܦ ܣܪܒܬܝ܀

 

ܪܒܗܘ ܘܝܟܝ ܠܡܽܘܢ ܣܪܒܬܝ܇ ܪܒ ܗܘ ܟܐܒܳܟܝ ܠܡܶܢܘ ܙܩܦܬܝ܇ ܒܨܠܡܳܐ ܕܫܘܒܚܗ ܕܐܰܒܳܐ ܟܦܪܬܝ܇ ܘܥܘܝܪܐ  ܐܰܢ̱ܬܝ ܘܠܐ ܒܚܪܬܝ܀

 

ܫܡܥܝ ܠܳܟ̈ܬܒܐ ܐܢ ܨܒܶܝܬܝ܇ ܕܣܗܕܝܢ ܠܰܐܒܳܐ ܕܺܐܝܬ ܠܗ ܒܰܪܐ܇ ܘܥܰܠ ܕܙܩܦܬܝܘܗܝ ܗܐ ܣܪܒܬܝ܇ ܕܐܦܠܐ ܐܺܝܬܰܘܗ̱ܝ ܟܰܕ ܛܒ ܓܠܐ܀

 

ܬܡܗܬ ܠܝ ܒܳܟܝ ܕܠܳܐ ܡܫܪܬܝ܇ ܕܒܰܪ ܐܰܠܳܗܳܐ ܗܘ ܗܘ ܕܐܙܕܩܦ܇ ܒܙܩܝܦܘܗܝ ܠܡܘܬܐ ܩܛܠ܇ ܘܒܛܠ ܥܐܕܝ̈ܟܝ ܘܠܐ ܝܕܥܬܝ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܙܟܰܪܝܳܐ ܢܒܺܝܳܐ ܗܐ ܩܥܐ܇ ܘܡܣܒܰܪ ܠܗ ܠܒܰܪܬ ܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܬܐ ܨܶܝܕܝܟܝ ܩܽܘܡܝ̱ ܦܘܩܝ ܠܽܐܘܪܥܶܗ ܘܩܒܠܝܗܝ܀

 

ܪܒ ܫܘܒܚܟ ܡܶܢܳܟܽܠ ܦܘܡ̈ܝܢ܇ ܒܰܪܐ ܕܐܫܬܒܚ ܒܽܐܘܫܰܥܢ̈ܶܐ܇ ܗܒ ܠܰܢ ܫܝܢܐ ܘܫܠܡܳܐ܇ ܕܢܩܥܐ ܟܽܠ ܫܥ ܠܳܟ ܫܽܘܒܚܳܐ܀

 

ܡܘܪܒܐ ܕܠܺܠܝܳܐ ܒܩܳܠܳܐ ܟܽܠܝ ܕܺܐܺܝܬܰܝܟܝ ܫܘܒܗܪܐ

ܥܰܠ ܕܡܳܪܰܢܠܽܐܘܪܺܫܠܶܡ܇ ܘܢܦܩܘ ܠܽܐܘܪܥܶܗ܇ ܥܠܰܝ̈ܡܶܐ ܘܛܠܳܝ̈ܶܐ܇ ܘܡܫܰܒܚܺܝܢ ܗ̱ܘܰܘ ܒܽܐܘܫܰܥܢ̈ܶܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܕܐܬܐ ܒܫܡܗ ܕܡܳܪܝܳܐ܇ ܒܬܫܒܚ̈ܬܐ܀

 

ܩܥܐ ܠܗ ܢܒܺܝܳܐ ܠܨܶܗܝܽܘܢ ܕܡܰܠܟܶܟܝ̱ ܐܬܐ܇ ܘܰܪܟܺܝܒ ܥܰܠ ܥܺܝܠܳܐ܇ ܘܐܕܫܬ ܐܕܢ̈ܝܗ ܘܠܐ ܫܡܥܬ܇ ܘܓܒܐ ܠܗ ܥܺܕܰܬ ܩܘܕܫܐ܇ ܘܗܳܐ ܡܫܒܚܐ ܠܗ ܒܽܐܘܫܰܥܢ̈ܶܐ܇ ܒܬܫܒܚ̈ܬܐ܀

 

ܩܥܐ ܠܗ ܢܒܺܝܳܐ ܠܥܺܕܬܳܐ ܕܐܬܬܥܝܪܝ ܐܬܬܥܝܪܝ܇ ܘܙܡܳܪܝ̱ ܬܶܫܒܽܘܚܬܳܐ܇ ܩܽܘܡܝ̱ ܦܘܩܝ ܠܽܐܘܪܥܶܗ ܕܐܠܗܟܝ܇ ܘܥܰܡ ܝܰܠܽܘ̈ܕܶܐ ܩܠܣܝܗܝ܇ ܘܟܰܕ ܩܳܥܝܳܐ ܐܰܢ̱ܬܝ ܒܽܐܘܫܰܥܢ̈ܶܐ܀

 

ܕܫܰܒܰܚܘ̱ ܥܒ̈ܕܘܗܝ ܒܩܳܠܳܐ ܥܰܡ ܟܶܢܫ̈ܶܐ ܫܡܝ̈ܢܐ

ܥܰܠ ܕܡܳܪܰܢܠܽܐܘܪܺܫܠܶܡ ܥܰܡ ܬܰܠܡܺܝ̈ܕܰܘܗ̱ܝ܇ ܘܰܪܟܺܝܒ ܥܰܠ ܥܺܝܠܳܐ܇ ܘܡܫܰܒܚܺܝܢ ܩܽܘܕܡܰܘܗ̱ܝ ܝܰܠܽܘ̈ܕܶܐ܇ ܟܰܕ ܣܘܟ̈ܝܗܘܢ ܒܐܝܕ̈ܝܗܘܢ܀

 

ܢܦܩܘ ܠܽܐܘܪܥܶܗ ܝܰܠܽܘ̈ܕܶܐ ܟܰܕ ܛܥܝܢܝܢ ܗ̱ܘܰܘ ܣܰܘ̈ܟܶܐ ܒܐܝܕ̈ܝܗܘܢ܇ ܘܩܳܥܶܝܢ ܗ̱ܘܰܘ ܐܽܘܫܰܥܢܳܐ ܒܪܰܘܡܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܥܰܡܡ̈ܐ܀

 

ܨܶܗܝܽܘܢ ܕܚܙܬ ܚܒܰܪܐ ܕܪܟܺܝܒ ܥܺܝܠܳܐ܇ ܘܐܬܐ ܕܢܥܘܠ ܠܗ܇ ܘܒܣܪܬ ܗܘܳܬ݀  ܘܫܛܬ ܡܘܟܟܗ ܕܡܰܠܟܳܐ ܕܐܬܐ܇ ܘܠܐ ܩܒܠܬܗ ܥܰܡܡ̈ܐ܀

 

ܓܢܝܙܐ ܕܟܣܐ ܡܶܢ ܥܺܝܪ̈ܶܐ܇ ܘܡܫܡܫܝܢ ܠܗ ܬܐܓܡ̈ܐ ܕܡܰܠܰܐܟ̈ܶܐ܇ ܝܰܘܡܳܢܳܐ ܐܡܟ ܪܒܘܬܗ܇ ܘܥܰܠ ܠܗ ܠܨܶܗܝܽܘܢ ܡܰܟܺܝܟܐܝܬ܀

 

ܗܘ ܕܓܢܝܙ ܘܡܰܪܝܰܡ܇ ܘܠܐ ܡܛܝܢ ܠܗ܇ ܥܺܝܪ̈ܶܐ ܘܡܰܠܰܐܟ̈ܶܐ܇ ܐܶܬܡܰܟܰܟ܇ ܘܰܪܟܶܒ ܥܰܠ ܥܺܝܠܳܐ܇ ܕܢܶܦܪܽܘܩ ܠܳܐܕܳܡ ܨܠܡܗ ܕܒܠܝ܀

 

ܝܰܘܡܳܢܳܐ ܪܟܒ ܕܡܳܪܰܢ ܥܰܠ ܒܰܪ ܐܰܬܳܢܳܐ܇ ܒܫܘ̈ܩܝܗ ܕܐܳܘܪܫܠܡ܇ ܘܟܢܫܘܬܐ ܐܦܩܬ ܠܛܠܳܝ̈ܶܐ܇ ܐܰܝܟܢܐ ܕܒܳܟܺܐܦ̈ܶܐܐ ܬܐܪܥܝܘܗܝ܇ ܥܰܡܡ̈ܐ܀

 

ܢܩܪܒ ܫܽܘܒܚܳܐ ܥܰܡ ܣܓܕܬܐ ܠܒܰܪ ܡܪܐ ܟܽܠ܇ ܗܘ ܕܐܬܐ ܠܦܽܘܪܩܳܢܰܢ܇ ܘܥܺܝܠܳܐ ܪܟܒ܇ ܘܥܰܠܠܽܐܘܪܺܫܠܶܡ܇ ܘܐܬܐ ܠܚܪܬܐ ܢܩܝܡ ܠܩܒܝܪ̈ܐ܀

 

ܕܨܰܦܪܳܐ ܕܪܰܚܶܡܥܠܰܝ܇

ܩܳܠܳܐ ܝܗܘܒܐ ܕܟܟܪ̈ܐ

ܒܗܳܢܳܐܝܰܘܡܳܐ ܪܟܒ ܥܺܝܠܳܐ܇ ܗܘ ܕܺܐܝܬܰܘܗ̱ܝ ܒܥܘܒܐ ܕܐܰܒܽܘܗ̱ܝ܇ ܘܨܶܗܝܽܘܢ ܠܐ ܨܒܬ ܕܬܩܒܠܘܗܝ܇ ܘܥܺܕܬܳܐ ܘܝܠ̈ܕܝܗ ܗܐ ܩܳܥܶܝܢ ܐܬܪܚܡ܀

 

ܡܰܠܰܐܟ̈ܶܐ ܒܽܐܘܫܰܥܢܰܝ̈ܗܽܘܢ܇ ܘܗܳܐ ܩܳܥܶܝܢ ܠܗ ܫܘܝܐܝܬ܇ ܩܰܕܺܝܫ ܩܰܕܺܝܫ ܩܰܕܺܝܫܬ܇ ܘܚܢܢ ܥܰܡܗܘܢ ܐܡܳܪܝ̱ܢܢ ܐܬܪܚܡ܀

 

ܪܒܘ ܫܰܒܪ̈ܶܐ ܘܩܥܘ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܘܗܳܐ ܝܰܘܡܳܢܳܐ ܒܽܐܘܫܰܥܢ̈ܶܐ܇ ܡܫܰܒܚܺܝܢ ܠܗ ܥܰܡܡ̈ܐ܇ ܘܳܐܡܪܺܝܢ ܐܬܪܚܡ܀

 

ܗܐ ܚܠܛܘ ܟܶܢܫ̈ܶܐ ܥܰܡ ܟܶܢܫ̈ܶܐ܇ ܥܶܠܳܝ̈ܶܐ ܥܰܡ ܬܚܬ̈ܝܐ܇ ܘܩܳܥܶܝܢ ܠܗ ܒܗܘܠ̈ܠܝܗܘܢ܇ ܒܪܺܝܟ ܕܐܬܐ ܘܰܥܬܺܝܕ ܕܢܺܐܬܶܐ܀

 

ܡܶܢ ܦܘܡ ܫܰܒܪ̈ܶܐ ܘܝܰܠܽܘ̈ܕܶܐ܇ ܬܩܢܬ ܬܶܫܒܽܘܚܬܳܐ ܠܡܳܪܝܳܐ܇ ܟܰܕ ܩܳܥܶܝܢ ܗ̱ܘܰܘ ܫܘܝܐܝܬ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܥܶܠܳܝ̈ܶܐ ܒܩܘܕܫܝ̈ܗܘܢ ܩܰܕܺܝܫ ܩܰܕܺܝܫ ܩܳܥܶܝܢ ܠܗ܇ ܘܬܚܬ̈ܝܐ ܒܝܘܒܒ̈ܝܗܘܢ܇ ܒܪܺܝܟ ܕܐܬܐ ܘܰܥܬܺܝܕ ܕܢܺܐܬܶܐ܀

 

ܕܐܠܗܝ ܐܠܗܝ ܩܳܠܳܐ ܩܝܡܬܐ ܕܰܢܚܶܬ ܒܰܒܪܺܝܬܳܐ

ܪܟܒ ܓܝܓ̈ܠܐ ܡܠ̈ܠܬܐ܇ ܒܐܬܪܗ ܪܡܳܐ ܨܶܝܕ ܐܰܒܽܘܗ̱ܝ܇ ܘܚܰܝܠܰܘ̈ܳܬܳܐ  ܫܡܝ̈ܢܐ܇ ܠܐ ܡܣܝܒܰܪܝܢ ܠܥܘܙܐ ܕܬܰܘܩܦܗ܇ ܡܶܛܽܠ ܕܨܒܐ ܘܐܶܬܡܰܟܰܟ܇ ܥܰܠ ܥܺܝܠܳܐ ܪܟܒ ܕܡܫܠܚ܀

 

ܙܟܰܪܝܳܐ ܢܒܺܝܳܐ ܠܒܰܪܬ ܨܶܗܝܽܘܢ܇ ܡܟܪܙ ܗܘܳܐ ܠܗ ܟܰܕ ܐܡܪ܇ ܕܘܨܝ ܛܒ ܘܚܰܕܝ ܘܐܬܦܚܝ܇ ܕܗܳܐ ܡܰܠܟܶܟܝ̱ ܐܬܐ ܘܰܪܟܺܝܒ܇ ܥܰܠ ܥܺܝܠܳܐ ܒܰܪ ܐܰܬܳܢܳܐ܇ ܐܰܝܟ ܕܐܟܬܒ ܗܘܳܐ ܥܰܠܘܗܝ ܝܥܩܘܒ܀

 

ܠܽܐܳܘܪܺܫܠܶܡ ܥܰܠ ܗܘܳܐ ܕܡܳܪܰܢ܇ ܘܰܪܟܺܝܒ ܥܺܝܠܳܐ ܕܐܰܬܳܢܳܐ܇ ܘܝܰܠܽܘ̈ܕܶܐ ܦܪܣܘ ܢܰܚܬܰܝ̈ܗܽܘܢ܇ ܬܰܠܡܺܝ̈ܕܶܐ ܡܪ̈ܛܘܛܝܗܘܢ܇ ܘܟܶܢܫ̈ܶܐ ܩܳܥܶܝܢ ܗ̱ܘܰܘ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܥܺܝܠܳܐ ܪܟܒ ܗܘܳܐ ܒܛܝܒܘܬܗ܇ ܝܚܝܕܝܐ ܕܐܶܬܡܰܟܰܟ܇ ܚܠܦ ܩܘܕܫ̈ܐ ܕܣܪ̈ܦܐ܇ ܘܝܰܠܽܘ̈ܕܶܐ ܘܫܰܒܪ̈ܶܐ ܫܰܒܚܽܘܗ̱ܝ܇ ܥܰܡܡ̈ܐ ܕܝܢ ܕܐܠܒܘܫ̈ܝܗܘܢ܇ ܡܫܘܝܢ ܗ̱ܘܰܘ ܒܽܐܘܪܚܳܐ ܩܽܘܕܡܰܘܗ̱ܝ܀

 

ܝܰܠܽܘ̈ܕܶܐ ܒܢ̈ܝ ܥܒܰܪ̈ܝܐ܇ ܒܣܰܘ̈ܟܶܐ ܕܙܰܝܬܳܐ ܘܕܕܶܩ̈ܠܶܐ ܝܰܘܡܳܢܳܐ ܒܨܶܗܝܽܘܢ ܡܕܺܝܢ̱ܬܳܐ܇ ܡܫܰܒܚܺܝܢ ܗ̱ܘܰܘ ܒܽܐܘܫܰܥܢܰܝ̈ܗܽܘܢ܇ ܠܗܰܘ ܕܪܟܺܝܒ ܥܺܝܠܳܐ ܫܺܝܛܳܐ ܟܰܕ ܡܬܓܐܝܐܐ ܗܘܳܐ ܒܬܪܘܢܘܣ܀

 

ܘܡܶܢ ܡܰܪܟܰܒܬܳܐ ܕܰܟܪ̈ܽܘܒܶܐ܇ ܘܡܶܢ ܐܝܩܪܐ ܕܬܶܫܒܽܘܚܬܳܐ܇ ܐܚܬܰܘܟ ܪ̈ܰܚܡܰܝܟ ܐܰܠܳܗܳܐ܇ ܠܗܳܕܶܐ ܫܝܛܘܬܐ ܪܒܬܐ܇ ܥܕܰܡܳܐ ܕܥܰܠ ܥܺܝܠܳܐ ܫܺܝܛܳܐ܇ ܒܡܰܟܺܝܟܘܬܐ ܐܙܕܝܚܬ܀

 

ܫܡܝܐ ܡܫܬܥܝܢ ܒܩܳܠܳܐ ܒܩܳܠܳܐ ܕܫܽܘܒܚܳܐ ܒܦܘܡ

ܒܗܳܢܳܐܝܰܘܡܳܐ ܗܘܳܐ ܥܺܝܠܳܐ ܪܟܺܝܒ ܠܳܟܪ̈ܽܘܒܶܐ܇ ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ܇ ܘܫܰܒܪ̈ܶܐ ܒܰܪܝܪ̈ܐ ܒܣܰܘܟ̈ܰܝ ܙܰܝܬܳܐ ܫܰܒܰܚܘ̱ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܟܰܕ ܢܚܶܬ ܗܘܳܐ ܕܡܳܪܰܢ ܝܶܫܽܘܥ ܡܶܢ ܛܘܪ ܙܝ̈ܬܐ܇ ܘܰܪܟܺܝܒ ܥܺܝܠܳܐ ܕܐܰܬܳܢܳܐ܇ ܘܟܶܢܫ̈ܶܐ ܕܥܰܡܡ̈ܐ ܐܦ ܬܰܠܡܺܝ̈ܕܶܐ ܫܰܒܰܚܘ̱ ܩܽܘܕܡܰܘܗ̱ܝ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܥܺܝܠܳܐ ܕܰܐܣܺܝܪ ܟܐܢܐ ܝܥܩܘܒ ܫܠܺܝ̈ܚܶܐ ܫܪܐܳܘܘܗܝ܇ ܘܢܚ̈ܬܐ ܕܝܠܗܽܘܢ ܫܘܝܘ ܥܰܠܘ̈ܗܝ܇ ܫܠܚܘܗܝ ܠܥܳܠܡܳܐ ܠܒܫܘ ܠܰܐܠܳܗܳܐ ܘܫܪܘ ܠܥܳܠܡܳܐ܇ ܡܶܢ ܐܣܘܪ̈ܐ ܕܚܛܝܬܐ܀

 

ܫܡܥܬ ܥܺܕܬܳܐ ܩܠܗ ܕܝܥܩܘܒ ܟܰܕ ܐܡܪ ܠܗ܇ ܕܒܓܦܬܐ ܐܣܪ ܥܝܠܗ܇ ܘܦܬܚܬ ܬܪ̈ܥܝܗ ܘܟܢܫ ܠܒܢ̈ܝܗ ܘܢܦܩܬ ܩܳܥܝܳܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܛܠܳܝ̈ܶܐ ܘܫܰܒܪ̈ܶܐ ܗ̱ܘܰܘ ܟܢܪ̈ܐ ܘܰܙܡܰܪܘ̱  ܫܽܘܒܚܳܐ܇ ܠܡܰܠܟܳܐ ܪܒܐ ܕܬܶܫܒܽܘܚܬܳܐ܇ ܪܽܘܚܳܐ ܕܩܽܘܕܫܳܐܐܙܝܥ ܐܶܢܽܘܢ ܠܡܫܰܒܰܚܘ̱ ܠܗܰܘ ܕܫܘܐ ܒܫܽܘܒܚܳܐ ܠܐܰܒܽܘܗ̱ܝ܀

 

ܒܣܰܘ̈ܟܶܐ ܕܙܰܝܬܳܐ܇ ܘܛܪ̈ܦܐ ܕܕܩܳܠܳܐ ܒܩܳܠܳܐ ܪܡܳܐ ܗܐ ܡܫܒܚܐ ܠܗ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܬܶܫܒܽܘܚܬܳܐ ܚܰܕܬܐ ܒܩܳܠܳܐ ܝܰܘܡܳܢܳܐ

ܝܰܘܡܳܢܳܐ܇ ܫܕܪ ܦܳܪܽܘܩܰܢ܇ ܠܬܪܝܢ ܬܰܠܡܺܝ̈ܕܰܘܗ̱ܝ܇ ܘܐܡܪ ܗܘܳܐ ܠܗܽܘܢ ܕܙܠܘ ܠܩܪܝܬܐ ܗܝ ܕܳܠܩܘܒܠܰܢ܇ ܘܫܪܘ ܥܺܝܠܳܐ ܘܐܝܬܰܘ ܠܝ ܕܐܥܘܠܠܽܐܘܪܺܫܠܶܡ܀

 

ܝܰܘܡܳܢܳܐ܇ ܥܰܠ ܗܘܳܐ ܕܡܳܪܰܢܠܽܐܘܪܺܫܠܶܡ܇ ܘܰܪܟܺܝܒ ܥܰܠ ܥܺܝܠܳܐ܇ ܘܟܦܪܬ ܗܘܳܬ݀  ܒܗ ܗܝ ܙܢܝܬܐ ܘܠܐ ܩܒܠܬܗ܇ ܘܩܥܬ ܥܺܕܬܳܐ ܥܰܡ ܝܠ̈ܕܝܗ܇ ܫܽܘܒܚܳܐ ܠܡܘܟܟܗ܀

 

ܝܰܘܡܳܢܳܐ܇ ܩܥܐ ܠܗ ܢܒܺܝܳܐ ܠܒܰܪܬ ܨܶܗܝܽܘܢ ܇ܕܗܳܐ ܡܰܠܟܶܟܝ̱ ܐܬܐ܇ ܘܡܰܟܺܝܟ ܘܰܪܟܺܝܒ ܥܺܝܠܳܐ ܫܺܝܛܳܐ ܒܰܪ ܐܰܬܳܢܳܐ܇ ܩܽܘܡܝ̱ ܦܘܩܝ ܠܽܐܘܪܥܶܗ ܘܩܒܠܝܗܝ܇ ܘܙܡܳܪܝ̱ ܠܗ ܫܽܘܒܚܳܐ܀

 

ܝܰܘܡܳܢܳܐ܇ ܢܚܰܕܐ ܙܟܰܪܝܳܐ ܕܐܬܢܒܝ ܡܶܛܽܠ ܦܽܘܪܩܳܢܰܢ܇ ܕܪܟܺܝܒ ܥܺܝܠܳܐ ܘܐܬܐ ܠܨܶܗܝܽܘܢ ܡܰܟܺܝܟܐܝܬ܇ ܥܺܕܬܳܐ ܫܒܚܝ ܘܙܡܳܪܝ̱ ܠܗ܇ ܐܽܘܫܰܥܢܳܐ ܒܪܰܘܡܳܐ܀

 

ܥܰܡ ܟܢܼ̈ܫܐ ܕܡܰܠܰܐܟ̈ܶܐ

ܢܙܡܪ ܠܗ ܫܽܘܒܚܳܐ ܠܦܳܪܽܘܩܰܢ܇ ܘܥܰܡ ܝܰܠܽܘ̈ܕܶܐ ܒܣܰܘܟ̈ܰܝ ܙܰܝܬܳܐ ܢܦܘܩ ܠܽܐܘܪܥܶܗ܇ ܘܢܩܥܐ ܟܽܠܰܢ ܫܘܝܐܝܬ܇ ܒܪܺܝܟܐ ܗܝ ܡܳܐܬܝܬܟ܀

 

ܡܘܪܒܐ ܒܩܳܠܳܐ ܣܢܝܐ ܗܘ ܕܚܙܐ

ܬܰܘ ܟܽܠܰܢ ܦܪ̈ܝܩܝ ܒܨܠܝܒܐ܇ ܒܣܰܘ̈ܟܶܐ ܕܙܰܝܬܳܐ ܘܕܕܶܩ̈ܠܶܐ܇ ܢܪܥܝܘܗܝ ܝܰܘܡܳܢܳܐ ܠܗܰܘ ܕܥܳܐܶܠ܇ ܠܗܰܘ ܚܫܐ ܦܪܘܩܝܐ܇ ܠܦܽܘܪܩܳܢܳܐ܀

 

ܕܘܨܝ ܛܒ ܘܚܰܕܝ ܐܳܘ ܒܰܪܬ ܨܶܗܝܽܘܢ܇ ܢܒܺܝܳܐ ܩܕܡ ܣܒܰܪ ܗܘܳܐ܇ ܐܽܘܪܺܫܠܶܡ ܡܕܺܝܢ̱ܬܳܐ ܩܰܕܺܝܫܬܐ܇ ܩܽܘܡܝ̱ ܫܒܚܝ ܕܐܬܐ ܡܰܠܟܶܟܝ̱܇ ܠܦܽܘܪܩܳܢܳܐ܀

 

 

ܥܰܠ ܦܳܪܽܘܩܰܢܠܽܐܘܪܺܫܠܶܡ܇ ܘܰܪܟܺܝܒ ܥܺܝܠܳܐ ܕܐܰܬܳܢܳܐ܇ ܘܢܦܩܘ ܠܽܐܘܪܥܶܗ ܝܰܠܽܘ̈ܕܶܐ܇ ܒܣܰܘ̈ܟܰܝ ܙܰܝܬܳܐ ܘܕܕܶܩ̈ܠܶܐ܇ ܘܡܫܰܒܚܺܝܢ ܘܡܘܕܝܢ ܘܩܳܥܶܝܢ ܠܳܟ܇ ܘܗܟܢ ܐܳܡܪܺܝܢܐܽܘܫܰܥܢܳܐ ܒܪܰܘܡܳܐ ܘܥܘܡܩܐ܇ ܠܰܒܪܶܗ ܕܕܰܘܺܝܕ܀

 

ܠܳܟ ܫܽܘܒܚܳܐ ܝܠܕܐ ܡܬܰܘܡܝܐ܇ ܪܟܺܝܒ ܓܝܓ̈ܠܐ ܡܠ̈ܠܬܐ܇ ܕܫܒܩܬ ܚܨܐ ܕܰܟܪ̈ܽܘܒܶܐ܇ ܘܟܘܪܣܝܐ ܡܥܰܠܝܐ ܕܐܝܩܪܟ܇ ܘܝܘܡܶܢ ܥܰܠ ܥܺܝܠܳܐ ܫܺܝܛܳܐ ܪܟܒܬ ܕܥܨܟ ܚܽܘܒܳܟ ܒܝܰܕ ܗܳܕܶܐ ܕܠܳܐ܀

 

ܕܫܰܒܰܚܘ̱ ܥܒ̈ܕܘܗܝ܇ ܒܥܕܢ ܨܦܪܐ

ܐܳܘܕܘ ܘܫܰܒܰܚܘ̱ ܟܽܠܳܟܘܢ܇ ܥܰܡܡ̈ܐ ܒܢ̈ܝ ܢܽܘܗܪܳܐ܇ ܠܗܰܘ ܕܪܟܺܝܒ ܥܰܠ ܒܰܪ ܐܰܬܳܢܳܐ܇ ܘܩܥܘ ܘܐܡܪܘ܇ ܫܽܘܒܚܳܐ ܠܳܟ܀

 

ܪܟܺܝܒ ܗܘܳܐ ܥܺܝܠܳܐ܇ ܘܛܠܳܝ̈ܶܐ ܦܪܣܘ ܡܪ̈ܛܘܛܝܗܘܢ܇ ܘܝܰܠܽܘ̈ܕܶܐ ܫܰܒܰܚܘ̱ ܠܗ ܠܰܒܪܳܐ ܟܰܕ ܐܡܳܪܝ̱ܢ܇ ܫܽܘܒܚܳܐ ܠܳܟ܀

 

ܦܪܣܘ ܬܰܠܡܺܝ̈ܕܶܐ ܩܕܡ ܥܺܝܠܳܐ܇ ܫܐܝܠܐ ܢܰܚܬܰܝ̈ܗܽܘܢ܇ ܕܪܟܒ ܥܰܠܘܗܝ ܡܶܠܬܳܐ ܕܡܶܢ ܐܰܒܳܐ܇ ܘܩܥܘ ܘܐܡܪܘ܇ ܫܽܘܒܚܳܐ ܠܳܟ܀

 

ܓܘ̈ܕܝܢ ܓܘ̈ܕܝܢ ܢܦܩܘ ܗ̱ܘܰܘ܇ ܫܰܒܪ̈ܶܐ ܒܢ̈ܝ ܨܶܗܝܽܘܢ܇ ܟܰܕ ܣܰܘܟ̈ܰܝ ܙܰܝܬܳܐ ܒܐܝܕܝ̈ܗܘܢ ܟܰܕ ܩܳܥܶܝܢ܇ ܫܽܘܒܚܳܐ ܠܳܟ܀

 

ܩܥܘ ܝܰܠܽܘ̈ܕܶܐ܇ ܐܽܘܫܰܥܢܳܐ ܠܰܒܪܶܗ ܕܡܰܪܝܰܡܳܐ܇ ܒܪܺܝܟ ܕܐܬܐ ܡܶܛܽܠ ܦܽܘܪܩܳܢܰܢ ܡܳܪܝ̱ ܚܣܐ ܠܕܣܪܛ ܫܽܘܒܚܳܐ ܠܳܟ܀

 

ܠܗܰܘ ܕܛܥܝܢܐ

ܦܐܶܐ ܘܪܓܝܓ ܗܳܢܳܐܝܰܘܡܳܐ܇ ܒܐܪܒܥ ܦܢܝ̈ܢ ܕܒܰܪܝܬܐ܇ ܘܥܺܕܬܳܐ ܩܳܥܝܳܐ ܥܰܡ ܝܠ̈ܕܝܗ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܗ ܘ ܗ܀

 

ܒܪܺܝܟ ܗܘ ܕܐܬܐ ܕܢܫܡܠܐ܇ ܪ̈ܐܙܐ ܘܛܘ̈ܦܣܐ ܕܢܒܝ̈ܐ܇ ܒܪܺܝܟ ܗܘ ܕܐܦܨܚ ܒܶܪ̈ܝܳܬܳܐ܇ ܒܢܽܘܗܪܳܐ ܓܐܝܐ ܕܝܠܘܕܗ܇ ܗ ܘ ܗ܀

 

ܗܢܘ ܝܰܘܡܳܐ ܕܙܡܪܘ ܒܗ܇ ܢܒܝ̈ܐ ܟܽܠܗܽܘܢ ܒܽܐܘܫܰܥܢ̈ܶܐ܇ ܘܥܢ̈ܝ ܟܽܠܗܝܢ ܒܶܪ̈ܝܳܬܳܐ܇ ܘܐܣܩ̈ܝ ܫܽܘܒܚܳܐ ܠܰܐܠܳܗܳܐ܇ ܗ ܘ ܗ܀

 

ܒܗܳܢܳܐܥܐܕܐ  ܕܽܐܘܫܰܥܢ̈ܶܐ܇ ܡܫܰܒܚܺܝܢ ܠܳܟ ܐܰܠܳܗܳܐ܇ ܘܒܗܘ ܥܐܕܐ ܕܠܳܐ ܥܒܰܪ܇ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܇ ܗ ܘ ܗ܀

ܛܽܘܒܶܝܗܿܘܢ ܠܡܣ̈ܟܢܐ ܒܩܳܠܳܐ ܡܳܐ ܫܦܝܪ ܗܘܳܐ܇

ܡܳܐ ܫܦܝܪ ܗܘܳܐ ܘܪܓܝܓ܇ ܩܳܠܳܐ ܕܝܒܒܘ ܒܽܐܘܫܰܥܢܰܝ̈ܗܽܘܢ܇ ܝܰܠܽܘ̈ܕܶܐ ܟܰܕ ܥܳܐܶܠ ܗܘܳܐ ܒܰܪ ܐܰܠܳܗܳܐ܇ ܒܫܘܩ̈ܝ ܨܶܗܝܽܘܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܡܳܐ ܫܦܝܪ ܗܘܳܐ ܘܪܓܝܓ܇ ܩܳܠܳܐ ܕܩܥܐ ܢܒܺܝܳܐ ܠܨܶܗܝܽܘܢ܇ ܟܰܕ ܐܡܪ ܠܗ ܕܗܳܐ ܡܰܠܟܶܟܝ̱ ܐܬܐ ܨܶܝܕܝܟܝ܇ ܩܽܘܡܝ̱ ܦܘܩܝ ܠܽܐܘܪܥܶܗ ܕܡܰܟܺܝܟ ܘܰܪܟܺܝܒ ܥܰܠ ܥܺܝܠܳܐ܀

 

ܡܳܐ ܫܦܝܪ ܗܘܳܐ ܘܪܓܝܓ܇ ܩܳܠܳܐ ܕܫܰܒܪ̈ܶܐ ܘܕܝܰܠܽܘ̈ܕܶܐ܇ ܟܰܕ ܥܒܰܪ ܗܘܳܐ ܦܳܪܽܘܩܰܢ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܡܳܐ ܦܐܝܐ ܗܘܳܬ݀  ܐܽܘܪܚܳܐ܇ ܕܥܰܠ ܒܗ ܕܡܳܪܰܢ ܠܓܰܘ ܐܽܘܪܺܫܠܶܡ܇ ܘܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ ܢܦܩܘ ܗ̱ܘܰܘ ܠܽܐܘܪܥܶܗ܇ ܘܩܥܘ ܘܐܡܪܘ܇ ܐܽܘܫܰܥܢܳܐ܀

 

ܐ̱ܚܪܺܢܳܐ ܒܰܪܐ ܕܒܚܘܒܗ

ܒܰܪܐ ܕܒܚܘܒܗ܇ ܠܒܫ ܦܰܓܪܳܐ ܡܶܢ ܒܰܪܬ ܕܰܘܺܝܕ܇ ܘܥܰܠ ܒܰܪ ܐܰܬܳܢܳܐ ܝܬܒ ܟܰܕ ܥܰܠܠܽܐܘܪܺܫܠܶܡ܇ ܘܛܠܳܝ̈ܶܐ ܒܣܰܘ̈ܟܰܝ ܙܰܝܬܳܐ܇ ܩܳܥܶܝܢ ܩܽܘܕܡܰܘܗ̱ܝ ܐܽܘܫܰܥܢܳܐ܇ ܐܬܕܟܪܝܢܝ܀

 

ܒܗܳܢܳܐܝܰܘܡܳܐ܇ ܩܰܕܺܝܫܳܐ ܕܘܨܝ ܒܰܪܬ ܨܶܗܝܽܘܢ܇ ܙܟܰܪܝܳܐ ܢܒܺܝܳܐ ܐܟܪܙ ܗܘܳܐ ܒܫܘܩ̈ܝܗ ܕܐܳܘܪܫܠܡ܇ ܕܡܠܳܟ ܡܠ̈ܟܐ ܥܳܐܶܠ ܠܶܟܝ̱܇ ܘܰܪܟܺܝܒ ܥܰܠ ܥܺܝܠܳܐ ܫܺܝܛܳܐ܀

 

ܥܰܠ ܗܘܳܐ ܕܡܳܪܰܢ܇ܠܽܐܘܪܺܫܠܶܡ ܡܕܝܢܬ ܡܠ̈ܟܐ܇ ܘܢܦܩܘ ܠܽܐܘܪܥܶܗ ܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ܇ ܘܡܫܰܒܚܺܝܢ ܗ̱ܘܰܘ ܟܰܕ ܐܡܳܪܝ̱ܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܀

 

ܩܳܠܳܐ ܕܨܰܦܪܳܐ

ܒܩܳܠܳܐ ܠܬܚܘܡܳܐ ܕܗܰܝܡܳܢܽܘܬܳܐ

ܙܟܰܪܝܳܐ ܘܕܰܘܺܝܕ ܘܚܙܩܝܐܝܠ܇ ܩܪܬ ܥܺܕܬܳܐ ܕܬܐܠܦ ܡܶܢܗܘܢ ܕܒܐܝܢܐ ܚܙܘܐ ܚܙܰܐܽܘܗ̱ܝ ܠܰܡܫܺܝܚܳܐ܇ ܚܙܩܝܐܝܠ ܐܡܪ ܕܚܙܝܬܗ܇ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ܇ ܘܕܰܘܺܝܕ ܐܡܪ ܥܰܠ ܟܢ̈ܦܝ ܪܽܘܚܳܐ܇ ܙܟܰܪܝܳܐ ܐܡܪ ܕܐܢܐ ܚܙܝܬܗ܇ ܟܰܕ ܝܬܒ ܗܘܳܐ ܥܰܠ ܥܺܝܠܳܐ܇ ܫܐܝܠܐ ܡܫܠܚܐ ܘܥܳܐܶܠ ܠܓܰܘ ܨܶܗܝܽܘܢ܇ ܘܛܠܳܝ̈ܶܐ ܒܣܰܘ̈ܟܰܝ ܙܰܝܬܳܐ܇ ܩܳܥܶܝܢ ܠܗ ܩܰܕܺܝܫ ܩܰܕܺܝܫ܇ ܩܰܕܺܝܫ ܡܳܪܝܳܐ ܕܐܬܐ ܠܦܽܘܪܩܳܢܰܢ܀

 

ܡܳܐ ܦܐܝܐ ܗܘܳܬ݀  ܗܝ ܐܽܘܪܚܳܐ܇ ܕܰܢܚܶܬ ܒܗ ܕܡܳܪܰܢ ܝܶܫܽܘܥ܇ ܡܶܢ ܛܘܪ ܙܝ̈ܬܐ ܕܢܥܘܠܠܽܐܘܪܺܫܠܶܡ܇ ܥܺܝܠܳܐ ܫܐܠ ܗܘܳܐ ܠܪܟܘܒܗ܇ ܗܘ ܕܚܙܳܝܗ̱ܝ ܗܘܳܐ ܚܙܩܝܐܝܠ܇ ܥܰܠ ܡܰܪܟܰܒܬܳܐ ܘܓܝܓ̈ܠܐ ܚܝ̈ܬܐ܇ ܦܓܰܥܘ̱ ܒܗ ܓܪ̈ܒܐ ܘܐܬܕܟܝܘ܇ ܘܣܡܰܝ̈ܳܐ ܘܚܙܘ ܢܽܘܗܪܳܐ܇ ܘܟܶܢܫ̈ܶܐ ܕܥܰܡܡ̈ܐ ܙܡܪܘ ܠܗ ܬܶܫܒܽܘܚܬܳܐ܇ ܐܽܘܫܰܥܢܳܐ ܒܪܰܘܡܳܐ ܘܥܘܡܩܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܗ ܕܐܬܐ ܠܦܽܘܪܩܳܢܰܢ܀

 

ܐ̱ܚܪܺܢܳܐ܇ ܒܩܳܠܳܐ ܩܽܘܩܳܝܳܐ

ܐܰܠܳܗܳܐ ܕܳܠܒܫ ܦܰܓܪܳܐ ܡܶܛܽܠܳܬܰܢ܇ ܘܥܰܠ ܥܺܝܠܳܐ ܫܺܝܛܳܐ ܝܬܒ ܟܰܕ ܥܰܠܠܽܐܘܪܺܫܠܶܡ܇ ܒܪܺܝܟ ܟܠܺܝܠܐ ܕܫܢܬܐ ܒܛܰܝܒܽܘܬܳܟ܇ ܐܫܪܐ ܫܝܢܟ ܒܐܪܒܥ ܦܢܝ̈ܬܐ܇ ܘܐܫܘܐ ܠܳܟܽܠܰܢ ܕܒܩܳܠܰܝ̈ ܫܽܘܒܚܳܐ ܢܙܡܪ ܠܳܟ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܒܪܺܝܟ ܗܘ ܫܡܗ ܕܡܳܪܝܳܐ܇ ܗ ܘ ܗ܀

 

ܠܐ ܗܘܳܐ ܒܰܐܪܥܳܐ ܐܟܘܬܗ ܐܦ ܠܐ ܗܘܝܐ܇ ܐܰܝܟ ܗܝ ܐܽܘܪܚܳܐ ܕܥܰܠ ܗܘܳܐ ܒܗ ܕܡܳܪܰܢܠܽܐܘܪܺܫܠܶܡ܇ ܒܗ ܐܬܦܬܚܘ ܣܡܰܝ̈ܳܐ ܡܶܢ ܟܪܣܐ܇ ܘܒܗ ܐܬܕܟܝܘ ܓܪ̈ܒܐ ܘܝܰܗܒܘ̱ ܫܽܘܒܚܳܐ܇ ܘܒܗ ܛܠܳܝ̈ܶܐ ܒܣܰܘܟ̈ܰܝ ܙܰܝܬܳܐ ܩܳܥܶܝܢ ܘܳܐܡܪܺܝܢ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ ܒܪܺܝܟ ܗܘ ܫܡܗ ܕܡܳܪܝܳܐ܇ ܗ ܘ ܗ܀

 

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܥܺܕܬܳܐ ܩܳܥܝܳܐ ܕܕܢܚ ܢܽܘܗܪܳܐ܇ ܠܳܟܽܠܗ ܒܰܪܝܬܐ܇ ܘܨܶܗܝܽܘܢ ܐܡܪܐ ܕܠܳܐ ܣܢܝܩܐ ܐܢܐ ܕܢܢܗܪ ܫܘ̈ܩܝ܇ ܥܺܕܬܳܐ ܩܳܥܝܳܐ ܕܐܬܐ ܟܘܡܪܐ ܕܢܚܣܐ ܠܝ܇ ܘܨܶܗܝܽܘܢ ܐܡܪܐ ܕܠܳܐ ܣܢܝܩܐ ܐܢܐ ܥܰܠ ܚܘܣܝܐ܀

 

ܥܺܕܬܳܐ ܩܳܥܝܳܐ ܕܗܢܘ ܕܐܡܪܘ ܢܒܝ̈ܐ ܕܐܬܐ܇ ܘܨܶܗܝܽܘܢ ܐܡܪܐ ܕܗܳܢܳܐܕܐܬܐ ܡܘܬܐ ܚܝܒ܇ ܥܺܕܬܳܐ ܒܝܠ̈ܕܝܗ ܣܘܚܬ ܠܽܐܘܪܥܶܗ ܐܦ ܩܒܠܬܗ܇ ܘܨܶܗܝܽܘܢ ܐܡܪܐ ܠܥܰܡܳܐ ܒܳܟܐܦ̈ܐ ܕܢܦܘܩ ܠܽܐܘܪܥܶܗ܀

 

ܕܬܠܬܫܥ̈ܝܢ

ܒܩܳܠܳܐ ܙܕܩ ܕܢܗܘܳܐ

ܒܗܳܢܳܐܝܰܘܡܳܐ܇ ܪܟܒ ܥܺܝܠܳܐ ܒܰܪ ܐܰܬܳܢܳܐ ܘܥܰܠܠܽܐܘܪܺܫܠܶܡ܇ ܗܘ ܕܣܪ̈ܦܐ܇ ܩܥܘ ܠܗ ܩܰܕܺܝܫ ܩܰܕܺܝܫ ܒܐܬܪܗ ܪܡܳܐ܇ ܚܙܳܝܗ̱ܝ ܗܘܳܐ ܕܰܘܺܝܕ ܘܙܡܶܢ ܝܰܠܽܘ̈ܕܶܐ܇ ܕܢܩܠܣܘܢܝ ܒܣܰܘ̈ܟܰܝܗܘܢ ܕܙܰܝ̈ܬܶܐ܇ ܘܩܥܘ ܘܐܡܪܘ܇ ܐܽܘܫܰܥܢܳܐ ܒܪܰܘܡܳܐ ܘܥܘܡܩܐ܇ ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ܇ ܒܪܺܝܟ ܗܘ ܕܐܬܐ ܒܡܘܟܟܐ܇ ܘܰܥܬܺܝܕ ܕܢܺܐܬܶܐ܇ ܒܫܽܘܒܚܳܐ ܪܒܐ ܕܡ̄ܠܐܟܘܗܝ܇ ܗ ܫܽܘܒܚܳܐ ܠܫܡܗ܀

 

ܢܚܰܕܘܢ ܝܘܡܶܢ܇ ܫܡܝܐ ܘܐܰܪܥܳܐ ܘܟܽܠ ܕܰܒܗܽܘܢ܇ ܘܫܽܘܒܚܳܐ ܢܬܠܘܢ܇ ܠܗܰܘ ܕܒܚܘܒܗ ܐܶܬܡܰܟܰܟ ܘܰܪܟܶܒ ܥܺܝܠܳܐ ܒܰܪ ܐܰܬܳܢܳܐ܇ ܢܒܺܝ̈ܶܐ ܢܚܰܕܘܢ ܕܫܡܠܝ ܡܠ̈ܝܗܘܢ܇ ܫܠܺܝ̈ܚܶܐ ܢܕܘܨܘܢ ܕܐܟܪܙܘ ܠܣܒܰܪܬܐ܇ ܬܚܰܕܐ ܥܺܕܬܳܐ܇ ܘܬܝܒܒܝ ܩܠ̈ܝ ܫܽܘܒܚܳܐ ܒܽܐܘܫܰܥܢ̈ܶܐ ܟܰܕ ܐܡܪܐ܇ ܐܽܘܫܰܥܢܳܐ ܒܪܰܘܡܳܐ ܘܥܘܡܩܐ܇ ܠܗܰܘ ܕܫܦܪ ܠܗ܇ ܘܐܬܐ ܘܦܪܩܢ ܡܶܢ ܛܽܘܥܝܰܝ ܗ ܫܽܘܒܚܳܐ ܠܫܡܗ܀

 

ܒܳܥܽܘܬܳܐ ܕܡܳܪܝ̱ ܐܰܦܪܶܝܡ

ܗܘ ܦܨܚܐ ܦܨܝܚܐ ܐܺܝܬܰܘܗ̱ܝ܇ ܟܽܠܗܽܘܢ ܦܘܡ̈ܐ ܘܠ̈ܫܢܐ܇ ܢܟܦ̈ܐ ܢܟܦ̈ܬܐ ܘܗܕܝܪ̈ܐ܇ ܒܕܪܘ ܫܰܒܪ̈ܶܐ ܩܘܕܡܬ ܥܺܝܠܳܐ܇ ܒܕܪܘ ܩܘܠ̈ܣܐ ܐܰܝܟ ܦܩܚ̈ܐ܇ ܘܩܝ̈ܢܬܐ ܐܰܝܟ ܫܘܫ̈ܢܐ܀

 

ܣܘܓܝܬܐ ܠܥܕܢ ܪ̈ܐܙܐ ܚܰܕܘ ܥܰܡܡ̈ܐ ܥܽܘܢܺܝܬܳܐ ܫܽܘܒܚܳܐ ܠܗ ܠܰܡܫܺܝܚܳܐ ܕܥܰܠ ܥܺܝܠܳܐ ܪܟܒ܇ ܘܒܣܰܘ̈ܟܶܐ ܕܬܶܫܒܽܘܚܬܳܐ ܛܠܳܝ̈ܶܐ ܩܰܠܣܽܘܗ̱ܝ

ܕܘܨܝ ܘܚܰܕܝ ܒܰܪܬ ܨܶܗܝܽܘܢ܇ ܕܗܳܐ ܡܰܠܟܶܟܝ̱ ܐܬܐ ܠܶܟܝ̱܇ ܦܬܚܝ ܬܪ̈ܥܝܟܝ ܦܘܩ ܠܽܐܘܪܥܶܗ܇ ܕܫܠܡܳܐ ܗܐ ܛܥܝܢ܀

 

ܗܐ ܫܒܝܚ ܗܘ ܥܰܡ ܐܰܒܽܘܗ̱ܝ܇ ܒܡܪ̈ܘܡܳܐ ܠܥܶܠ܇ ܗܘ ܟܰܕ ܗܘ ܡܬܒܰܪܟ܇ ܡܶܢ ܫܰܒܪ̈ܶܐ ܠܬܚܬ܀

 

ܣܪ̈ܦܐ ܙܗܝܢ ܘܡܟܣܝܢ܇ ܡܶܢ ܙܝܘܗ ܠܥܶܠ܇ ܘܫܝܛ ܥܝܠܗ ܘܡܫܠܚ܇ ܘܒܓܰܘ ܨܶܗܝܽܘܢ ܠܬܚܬ܀

 

ܒܰܪܬ ܢܽܘܗܪܳܐ ܟܰܕ ܫܡܥܬ܇ ܥܺܕܬܳܐ ܫܒܝܚܬܐ܇ ܘܒܕܘܨܐ ܩܒܠܬܗ܇ ܘܩܕܡܘܗܝ ܣܓܕܬ܀

 

ܣܘܚܬ ܠܗ ܘܩܒܠܬܗ܇ ܟܽܠܬܐ ܢܟܦܬܐ܇ ܘܒܩܳܠܳܐ ܕܩܘܠ̈ܣܐ܇ ܠܫܡܗ ܡܫܒܚܐ܀

 

ܬܐ ܒܫܠܡ ܬܐ ܒܫܠܡ܇ ܢܘܗܪܗ ܕܥܳܠܡܳܐ. ܒܳܟ ܗܘ ܛܠܩ ܚܫܘܟܐ܇ ܕܡܘܬܐ ܡܶܢ ܒܢܝ̈ܢܫܐ܀

 

ܬܐ ܒܫܠܡ ܕܒܓܙܟ܇ ܝܠ̈ܕܝ ܥܬܪܝܢ܇ ܘܣܝ̈ܡܬܐ ܕܚܢܢܟ܇ ܠܐ ܡܣܬܝ̈ܟܢ܀

 

ܐܽܘܫܰܥܢܳܐ ܒܡܪ̈ܘܡܳܐ ܠܰܐܒܳܐ ܕܫܠܚܟ܇ ܒܪܺܝܟ ܐܰܒܳܐ ܕܝܗܒܠܳܟ ܠܰܢ܇ ܕܢܬܦܪܩ ܒܕܡܟ܀

 

ܚܠܐ ܪܝܚܟ ܡܶܢ ܘܪ̈ܕܐ܇ ܘܦܐܝܐ ܪܚܡܬܟ܇ ܘܡܶܢ ܥܛܪܐ ܕܗܪ̈ܘܡܳܐ܇ ܣܡ ܚܝ̈ܐ ܡܠܝܬ܀

 

ܡܶܢ ܙܝܘܟ ܙܠ̈ܝܩܐ܇ ܕܢܽܘܗܪܳܐ ܨܡܚܝܢ܇ ܘܡܶܢ ܦܘܡܟ ܢܽܘܚܳܡܳܐ܇ ܘܚܝ̈ܐ ܢܒܥܝܢ܀

 

ܚܠܝܐ ܗܝ ܡܳܪܝ̱ ܡܶܢ ܕܒܫܐ܇ ܠܦܘܡܳܐ ܡܠܬܟ܇ ܘܛܒ ܚܽܘܒܳܟ ܡܶܢ ܚܡܪܐ܇ ܠܰܢܦܫܐ ܕܪ̈ܰܚܡܰܝܟ܀

 

ܡܶܢ ܗܫܐ ܐܳܘܟ̈ܡܳܐ܇ ܠܘܳܬܝ ܠܐ ܩܪܒܝܢ܇ ܕܪܘܚ ܩܽܘܕܫܳܐܐܠܒܫܢܝ܇ ܚܰܬܢܳܐ ܕܡܪܟܝ܀

 

ܚܠܦ ܣܒ̈ܐ ܕܗܘ ܥܰܡܳܐ ܕܒܠܥܘ ܒܚܣܡܳܐ܇ ܕܳܠܫܰܒܪ̈ܶܐ ܡܫܬܩܝܢ ܗ̱ܘܰܘ܇ ܡܶܢ ܗܝ ܕܢܫܰܒܰܚܘ̱ܢ܀

 

ܟܘܐܪܐ ܠܙܢܝܬܐ ܕܚܰܬܢܳܐ ܦܪܣܝܗ܇ ܘܠܥܺܕܬܳܐ ܙܳܟܽܘܬܳܐ܇ ܒܥܐܕܐ ܡܫܒܚܐ܀

 

ܬܰܘ ܦܘܩܘ ܙܠܘ ܠܩܪܝܬܐ܇ ܗܝ ܕܳܠܩܘܒܠܰܢ܇ ܘܐܝܬܰܘ ܠܝ ܡܶܢ ܬܰܡܳܢ܇ ܥܺܝܠܳܐ ܡܫܠܚܐ ܫܪܘ܀ ܘܐܝܬܰܘ ܠܝ ܥܺܝܠܳܐ܇ ܕܥܰܠܘܗܝ ܐܪܟܒ܇ ܘܐܪ̈ܙܐ ܡܶܢ ܕܢܒܝ̈ܐ܇ ܒܝ ܢܬܓܡܪܘܢ܀

 

ܣܰܘܟ̈ܶܐ ܫܩܠܘ ܒܐܝܕ̈ܝܗܘܢ܇ ܘܪܗܛܘ ܩܕܡܘܗܝ܇ ܘܩܥܘ ܠܗ ܒܽܐܘܫܰܥܢ̈ܶܐ܇ ܒܪܺܝܟ ܕܐܬܐ ܘܐܬܐ܀

 

ܕܰܘܺܝܕ ܫܩܠ ܩܝܬܪܗ܇ ܘܒܝܢܬܗܘܢ ܕܝܢ ܙܡܪ܇ ܚܰܕܐ ܬܽܘܒ ܘܡܫܒܚ܇ ܘܡܠ̈ܘܗܝ ܐܬܓܡܳܪܝ̱܀

 

ܥܰܠ ܡܰܠܟܳܐ ܕܬܶܫܒܽܘܚܬܳܐ܇ ܠܓܰܘ ܐܽܘܪܺܫܠܶܡ܇ ܘܐܬܬܙܝܥܬ ܘܐܬܪܗܒܬ ܟܽܠܗ ܡܕܺܝܢ̱ܬܳܐ܀

 

ܥܰܠ ܝܪܬܐ ܫܪܝܪܐ܇ ܘܫܪܐ ܒܶܝܬ ܐܰܒܽܘܗ̱ܝ܇ ܘܫܰܒܪ̈ܶܐ ܥܰܡ ܝܰܠܽܘ̈ܕܶܐ܇ ܩܠܣܘ ܡܥܰܠܬܗ܀

 

ܢܶܗܘܽܘܢ ܡܳܪܝ̱ ܐܳܘܫܥ̈ܢܝܢ܇ ܥܛܪܐ ܡܩܒܠܐ܇ ܘܢܪܥܘܢ ܠܐܠܗܰܘܳܬ݀ ܟ ܘܒܗܘܢ ܬܬܢܝܚ܀

 

ܟܢܫܐ ܡܳܪܝ̱ ܕܐܬܰܘܥܕ܇ ܘܐܬܐ ܠܣܓܕܬܟ܇ ܘܡܶܢ ܟܺܐܒ̈ܶܐ ܢܫܬܰܘܙܒ܇ ܘܒܫܡܟ ܢܬܦܪܩ܀

 

ܕܐܫܘܝܬܢܝ ܕܠܳܐܪ̈ܙܝܟ܇ ܫܒܝܚ̈ܐ ܐܪܫܘܡ܇ ܐܫܘܢܝ ܡܳܪܝ̱ ܒܰܚܢܳܢܳܟ܇ ܠܫܘܒܩܢ ܚܘ̈ܒܐ܀

 

ܕܰܬܫܰܥܫܳܥܺܝ̈ܢ܇

ܐܬܬܥܝܪܝ ܐܬܬܥܝܪܝ ܐܽܘܪܺܫܠܶܡ

ܐܬܬܥܝܪܝ ܐܬܬܥܝܪܝ ܐܽܘܪܺܫܠܶܡ܇ ܘܩܽܘܡܝ̱ ܦܘܩܝ ܠܽܐܘܪܥܶܗ ܕܡܫܺܝܚܳܐ܇ ܘܕܒܰܪܢܝ ܥܰܡܟܝ ܝܰܠܽܘ̈ܕܶܐ ܘܫܰܒܪ̈ܶܐ ܘܐܳܘܕܝ ܩܽܘܕܡܰܘܗ̱ܝ ܕܢܥܘܠ ܢܫܪܐ ܒܳܟܝ. ܘܦܬܝܚ ܠܗ ܗܝܟܽܠ ܩܘܕܫܟܝ܇ ܘܢܚ̈ܬܝܟܝ ܩܽܘܕܡܰܘܗ̱ܝ ܢܬܦܪܣܘܢ܇ ܘܩܠ̈ܝܟܝ ܒܫܽܘܒܚܳܐ ܢܬܚܠܛܘܢ܇ ܘܒܣܰܘܟ̈ܶܐ ܕܕܶܩ̈ܠܶܐ܇ ܙܡܳܪܝ̱ ܠܗ ܐܽܘܫܰܥܢܳܐ ܒܡܪ̈ܘܡܳܐ܇ ܐܠܗܢ ܫܽܘܒܚܳܐ ܠܳܟ܀

 

ܩܽܘܡܝ̱ ܐܬܬܥܝܪܝ ܘܙܡܳܪܝ̱ ܫܽܘܒܚܳܐ܇ ܙܟܰܪܝܳܐ ܠܨܶܗܝܽܘܢ ܐܡܪ ܗܘܳܐ܇ ܠܗܰܘ ܕܒܪ̈ܰܚܡܰܘܗ̱ܝ ܐܬܐ ܠܡܘܟܟܐ܇ ܘܩܒܠ ܫܽܘܒܚܳܐ ܕܫܰܒܪ̈ܶܐ ܘܝܰܠܽܘ̈ܕܶܐ܇ ܗܘ ܕܰܟܪ̈ܽܘܒܶܐ ܒܫܽܘܒܚܳܐ ܡܬܒܣܡܝܢ܇ ܘܣܰܘ̈ܟܶܐ ܕܙܰܝ̈ܬܶܐ ܙܡܳܪܝ̱ ܠܗ ܫܽܘܒܚܳܐ܇ ܘܒܩܳܠܳܐ ܪܡܳܐ ܐܡܳܪܝ̱܇ ܐܽܘܫܰܥܢܳܐ ܒܡܪ̈ܘܡܳܐ ܐܠܗܢ ܫܽܘܒܚܳܐ ܠܳܟ܀

ܒܳܥܽܘܬܳܐ ܕܡܳܪܝ̱ ܝܰܥܩܽܘܒ

ܒܗܳܢܳܐܝܰܘܡܳܐ ܕܪܟܒ ܥܺܝܠܳܐ ܒܰܪ ܐܰܬܳܢܳܐ܇ ܘܥܰܠܠܽܐܘܪܺܫܠܶܡ܇ ܡܠܬܗ ܕܐܰܒܳܐ ܡܰܟܺܝܟܐܝܬ܇ ܓܘܕܐ ܓܒܶܝܬܐ ܗܝ ܕܢܒܝ̈ܐ ܙܝܚܬ ܐܳܘܪܚܗ܇ ܒܐܪ̈ܙܐ ܘܛܘܦ̈ܣܐ ܘܒܦ̈ܠܐܬܐ ܥܰܡ ܓܠ̈ܝܢܢܐ܀

 

ܘܝܠܶܟܝ̱ ܨܶܗܝܽܘܢ ܕܠܳܐ ܩܒܠܬܝܘܗܝ ܠܡܰܠܟܳܐ ܡܫܺܝܚܳܐ܇ ܛܽܘܒܰܝܟܝ̱ ܥܺܕܬܳܐ ܕܗܳܐ ܡܫܒܚܬܝ ܠܗ ܒܩܠ  ܐܽܘܫܰܥ̈ܢܶܐ܇ ܟܗܢ̈ܐ ܘܣܒ̈ܐ ܥܠܰܝ̈ܡܶܐ ܛܠܳܝ̈ܶܐ ܘܒܬܰܘܠ̈ܬܐ܇ ܓܒܰܪ̈ܐ ܘܢܫ̈ܐ ܗܐ ܡܣܓܝܢ ܠܳܟ ܒܩܠ  ܐܽܘܫܰܥ̈ܢܶܐ܀

 

ܫܠܡ ܕܚܰܕ ܒܫܒܐ ܕܐܽܘܫܰܥܢܳܐ

19.09.2006