2019 – «ܟܽܠ ܕܶܝܢ ܕܢܶܥܒܶܕ ܘܢܰܠܶܦ܉ ܗܳܢܳܐ ܪܰܒܳܐ ܢܶܬܩܪܶܐ ܒܡܰܠܟܽܘܬܳܐ ܕܰܫܡܰܝܳܐ»

ܡܢܝܢܐ: 172/2019

 

ܒܫܡ ܐܝܬܝܐ ܡܬܘܡܝܐ ܐܠܨܝ ܐܝܬܘܬܐ ܕܟܠ ܐܚܝܕ

ܐܝܓܢܛܝܘܣ ܦܛܪܝܪܟܐ ܕܟܘܪܣܝܐ ܫܠܝܚܝܐ ܕܐܢܛܝܘܟܝܐ ܘܕܟܠܗ̇ ܡܕܢܚܐ

ܘܪܝܫܐ ܓܘܢܝܐ ܕܥܕܬܐ ܣܘܪܝܝܬܐ ܐܪܬܕܘܟܣܝܬܐ ܕܒܟܠܗ̇ ܬܒܝܠ

ܕܗܘ ܐܦܪܝܡ ܬܪܝܢܐ ܡ̄

 

 

 

 

 

 ܒܽܘܪܟܬܐ ܫܠܺܝܚܳܝܬܐ ܘܰܨܠܰܘ̈ܳܬܐ ܡܳܪ̈ܳܢܳܝܬܐ ܡܫܰܟܢܺܝܢܰܢ ܠܰܐܚܰܝ̈ܢ ܡܥܰܠܰܝ̈ܳܐ: ܛܽܘܒܬܳܢܽܘܬܶܗ ܕܡܳܪܝ ܒܣܝܠܝܘܣ ܬܐܘܡܐܣ ܩܰܕܡܳܝܐ ܡܰܦܪܝܳܢܐ ܕܗܶܢܕܽܘ܆ ܡܺܝܛܪ̈ܦܽܘܠܺܝܛܽܘ ܪ̈ܳܡܰܝ ܐܺܝܩܳܪܐ܆ ܘܰܒܢܰܝ̈ܐ ܕܺܝܠܰܢ ܪ̈ܽܘܚܳܢܳܝܶܐ ܐܶܦܛܪ̈ܽܘܦܶܐ ܕܡܰܪ̈ܥܝܳܬܐ܆ ܘܟܽܘܪ̈ܳܝܶܐ ܘܩܰܫܺܝ̈ܫܶܐ ܘܕܰܝܪ̈ܳܝܶܐ ܘܕܰܝܪ̈ܳܝܳܬܐ ܘܰܡܫܰܡ̈ܫܳܢܶܐ ܙܗܰܝ̈ܳܐ܆ ܘܫܰܪܟܐ ܕܥܰܡܐ ܕܺܝܠܰܢ ܣܽܘܪܝܳܝܐ ܐܳܪܬܳܕܽܘܟܣܳܝܐ ܕܰܒܟܽܠܳܗ̇ ܬܺܒܶܝܠ ܡܝܰܩܪܐ. ܢܛܺܝܪ̈ܶܐ ܢܶܗܘܽܘܢ ܒܰܒܛܺܝܠܽܘܬܐ ܡܳܪܳܢܳܝܬܐ܆ ܒܰܨܠܰܘ̈ܳܬܐ ܕܰܒܬܽܘܠܬܐ ܡܰܪܝܰܡ ܝܳܠܕܰܬ ܐܰܠܳܗܐ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܘܫܰܪܟܐ ܕܣܳܗ̈ܕܶܐ ܘܩܰܕܺܝ̈ܫܶܐ܆ ܐܰܡܺܝܢ.

 

«ܟܽܠ ܕܶܝܢ ܕܢܶܥܒܶܕ ܘܢܰܠܶܦ܉ ܗܳܢܳܐ ܪܰܒܳܐ ܢܶܬܩܪܶܐ ܒܡܰܠܟܽܘܬܳܐ ܕܰܫܡܰܝܳܐ»

(ܡܬܝ 5: 19)

 

ܐـ ܥܺܕܬܐ ܥܰܡܳܐ ܗ̱ܝ ܚܰܕܬܐ ܕܰܐܠܳܗܐ

ܒܳܬܰܪ ܥܽܘܩܳܒܐ ܥܰܠ ܗܳܠܶܝܢ ܕܕܺܝܠܟܽܘܢ܆ ܐܳܡܪܺܝܢܰܢ:

ܗܐ ܥܺܕܬܐ ܩܳܝܡܳܐ ܒܰܫܦܽܘ̈ܠܰܝ ܛܽܘܪܐ ܐܰܝܟ ܟܰܠܬܐ ܕܰܡܣܰܟܝܐ ܠܚܰܬܢܳܗ̇ ܕܢܺܐܬܶܐ ܘܢܶܦܪܽܘܥ ܦܶܪܢܺܝܬܳܗ̇ ܕܢܶܡܟܪܺܝܗ̇ ܠܢܰܦܫܶܗ. ܡܶܬܰܥܗܕܳܐ ܕܶܝܢ ܠܶܗ ܠܡܽܘܫܶܐ ܢܒܺܝܐ ܟܰܕ ܡܶܢ ܛܽܘܪܐ ܕܣܺܝܢܰܝ ܢܰܚܺܝܬ܆ ܘܰܠܬܰܪܬܶܝܢ ܠܽܘ̈ܚܶܐ ܕܢܳܡܽܘܣܐ ܒܺܐܝ̈ܕܰܘܗ̱ܝ ܛܥܺܝܢ܆ ܐܰܝܟܰܢܐ ܕܢܶܩܪܶܐ ܠܥܰܡܐ ܥܶܒܪܳܝܐ ܕܢܶܗܘܶܐ ܠܶܗ ܠܰܐܠܳܗܐ ܥܰܡܐ ܓܰܒܝܐ. ܒܪܰܡ ܥܰܡܐ ܗܳܢܐ «ܩܫܶܐ ܩܕܳܠܐ» (ܡܦܩܢܐ ܠܒ܆ ܛ) ܠܐ ܣܰܟܺܝ ܠܶܗ ܠܡܽܘܫܶܐ܆ ܐܶܠܐ ܚܛܐ ܘܰܥܒܰܕ ܠܶܗ ܥܶܓܠܐ ܕܕܰܗܒܐ ܘܶܐܡܰܪ ܗܳܢܰܘ ܐܰܠܳܗܳܟ: ܝܺܣܪܳܝܶܠ: ܕܰܐܣܩܳܟ ܡܶܢ ܐܰܪܥܳܐ ܕܡܶܨܪܶܝܢ (ܡܦܩܢܐ ܠܒ܆ ܕ) ܘܰܩܕܳܡܰܘܗ̱ܝ ܣܓܶܕ. ܥܺܕܬܐ ܓܶܝܪ܆ ܕܗܺܝ ܗ̱ܺܝ ܥܰܡܐ ܚܰܕܬܐ ܕܰܐܠܗܐ܆ ܣܳܓܕܐ ܠܶܗ ܠܗܰܘ ܕܠܶܗ ܥܰܠ ܩܰܝܣܐ ܙܩܰܦ܆ ܕܢܰܫܘܶܝܗ̇ ܕܬܶܗܘܶܐ ܠܶܗ ܟܰܠܬܐ ܘܰܢܩܺܝܡܺܝܗ̇ ܠܰܡ «ܥܺܕ݈ܬܳܐ ܠܢܰܦܫܶܗ ܟܰܕ ܡܫܰܒܚܳܐ. ܘܠܰܝܬ ܒܳܗ̇ ܛܽܘܠܫܳܐ ܘܠܳܐ ܩܰܡܛܳܐ ܘܠܳܐ ܡܶܕܶܡ ܕܰܠܗܳܠܶܝܢ ܕܳܡܶܐ. ܐܶܠܳܐ ܬܶܗܘܶܐ ܩܰܕܺܝܫܳܐ ܕܠܳܐ ܡܽܘܡ» (ܐܦܣܝ̈ܐ ܗ܆ ܟܙ). ܬܰܡܳܢ܆ ܥܰܠ ܛܽܘܪܐ ܕܛܽܘ̈ܒܶܐ܆ ܢܳܣܒܐ ܥܺܕܬܐ ܡܶܢ ܚܰܬܢܳܗ̇ ܝܽܘ̈ܠܦܳܢܶܐ ܐܰܠܳܗܳܝ̈ܶܐ ܓܡܺܝܪ̈ܶܐ܆ ܒܰܕܗܽܘ ܠܐ ܐܶܬܐ ܕܢܶܫܪܶܐ ܐܶܠܐ ܕܰܢܡܰܠܶܐ (ܡܬܝ ܗ܆ ܝܙ). ܐܳܦ ܬܰܡܳܢ ܬܽܘܒ܆ ܡܰܠܶܦ ܠܳܗ̇ ܡܳܪܝܐ ܠܥܺܕܬܐ ܟܰܕ ܐܳܡܰܪ: «ܟܽܠ ܡܰܢ ܗܳܟܺܝܠ ܕܢܶܫܪܶܐ ܚܰܕ ܡܶܢ ܦܽܘ̈ܩܕܳܢܶܐ ܗܳܠܶܝܢ ܙܥܽܘܪ̈ܶܐ܉ ܘܢܰܠܶܦ ܗܳܟܰܢܳܐ ܠܰܒܢܰܝ̈ܢܳܫܳܐ܉ ܒܨܺܝܪܳܐ ܢܶܬܩܪܶܐ ܒܡܰܠܟܽܘܬܳܐ ܕܰܫܡܰܝܳܐ. ܟܽܠ ܕܶܝܢ ܕܢܶܥܒܶܕ ܘܢܰܠܶܦ܉ ܗܳܢܳܐ ܪܰܒܳܐ ܢܶܬܩܪܶܐ ܒܡܰܠܟܽܘܬܳܐ ܕܰܫܡܰܝܳܐ» (ܡܬܝ ܗ܆ ܝܛ). ܘܳܐܦ ܬܰܡܳܢ ܡܚܰܘܶܐ ܠܳܗ̇ ܩܪܳܝܬܐ ܕܺܝܠܳܗ̇ ܫܡܰܝܳܢܺܝܬܐ ܕܺܐܝܬܶܝܗ̇ ܡܰܠܳܦܽܘܬܐ ܟܺܝܬ ܘܬܶܫܡܶܫܬܐ.

ܒـ ܥܺܕܬܐ ܢܳܛܽܘܪܬܳܐ ܗ̱ܝ ܕܝܽܘܠܦܳܢܐ ܬܪܺܝܨܐ

ܥܺܕܬܐ ܓܶܝܪ܆ ܕܺܐܝܬܶܝܗ̇ ܦܰܓܪܶܗ ܕܰܡܫܺܝܚܐ ܘܗܰܝܟܠܐ ܕܪܽܘܚܶܗ ܩܰܕܺܝܫܐ܆ ܢܳܛܪܳܐ ܓܽܘܥܠܳܢܐ ܕܗܰܝܡܳܢܽܘܬܐ ܘܝܳܨܦܐ ܕܰܡܝܰܒܠܽܘܬܳܗ̇ ܡܶܢ ܕܳܪ ܠܕܳܪ. ܒܗܳܝ ܕܬܰܡܳܢ ܥܰܠ ܛܽܘܪܐ܆ ܣܓܶܕܘ ܠܶܗ ܠܡܳܪܝܐ ܒܳܬܰܪ ܩܝܳܡܬܐ ܫܠܺܝ̈ܚܐ ܚܕܰܥܣܰܪ܆ ܘܰܢܣܰܒܘ ܡܶܢܶܗ ܦܽܘܩܕܳܢܐ: «ܙܶܠܘ ܗܳܟܺܝܠ ܬܰܠܡܶܕܘ ܟܽܠܗܽܘܢ ܥܰܡ̈ܡܶܐ. ܘܰܐܥܡܶܕܘ ܐܶܢܽܘܢ ܒܫܶܡ ܐܰܒܐ ܘܰܒܪܐ ܘܪܽܘܚܐ ܕܩܽܘܕܫܐ. ܘܰܐܠܶܦܘ ܐܶܢܽܘܢ ܕܢܶܛܪܽܘܢ ܟܽܠ ܡܐ ܕܦܰܩܶܕܬܟܽܘܢ. ܘܗܐ ܐܶܢܐ ܥܰܡܟܽܘܢ ܐ̱ܢܐ ܟܽܠܗܽܘܢ ܝܰܘ̈ܡܳܬܐ ܥܕܰܡܐ ܠܫܽܘܠܳܡܶܗ ܕܥܳܠܡܐ» (ܡܬܝ ܟܚ܆ ܝܛ ـ ܟ).

ܒܳܬܰܪ ܡܐ ܕܫܰܕܰܪ ܠܗܽܘܢ ܦܰܪܰܩܠܺܛܐ܆ ܪܽܘܚܐ ܕܰܫܪܳܪܐ: ܗܰܘ ܕܡܶܢ ܠܘܳܬ ܐܰܒܐ ܢܳܦܶܩ܆ ܫܩܰܠ ܕܶܝܢ ܫܠܺܝ̈ܚܶܐ ܠܰܣܒܰܪܬܐ ܕܚܰܕܽܘܬܐ܆ ܐܰܘܟܺܝܬ ܐܘܢܓܠܝܘܢ܆ ܠܟܽܠܳܗ̇ ܒܪܺܝܬܐ܆ ܐܰܝܟ ܕܳܐܡܰܪ ܡܰܙܡܽܘܪܐ ܕܰܒܟܽܠܳܗ̇ ܐܰܪܥܳܐ ܠܰܡ ܢܶܦܩܰܬ݀ ܣܒܰܪܬܗܽܘܢ܆ ܘܰܒܣܰܘ̈ܦܶܝܗ̇ ܕܬܺܒܶܝܠ ܡܶܠ̈ܰܝܗܽܘܢ (ܡܙܡܘܪܐ ܝܛ܆ ܕ). ܘܠܳܗ̇ ܠܗܳܕܶܐ ܡܫܰܪܪܳܐ ܥܺܕܬܐ ܟܰܕ ܩܕܳܡ ܩܶܪܝܳܢܐ ܕܡܶܢ ܦܪܰܟܣܺܝܣ ܕܰܐܒܳܗ̈ܳܬܐ ܒܟܽܠ ܩܽܘܪܒܐ ܐܰܠܳܗܝܐ ܙܳܡܪܐ: «ܫܠܺܝ̈ܚܶܐ ܓܒܰܝ̈ܳܐ܆ ܕܶܐܫܬܰܕܰܪܘ ܡܶܢ ܐܰܠܳܗܐ܆ ܠܥܳܠܡܐ ܟܽ‍ܠܶܗ. ܘܰܢܦܰܩܘ ܐܰܟ݂ܪܶܙܘ܆ ܣܒܰܪܬܶܗ ܕܰܒܪܐ ܒܶܝܬ݂ ܥܰܡ̈ܡܶܐ܆ ܘܥܶܒܪ̈ܶܝܗ̇ ܕܰܐܪܥܐ. ܣܰܒܰܪܘ ܗ̱ܘܰܘ ܡܰܠܟܽܘܬܐ ܕܰܫܡܰܝܐ ܟܰܕ ܐܳܡܪܺܝܢ ܛܽܘܒܐ ܠܰܡܗܰܝܡ̈ܢܶܐ».

ܝܽܘܠܦܳܢܐ ܕܶܝܢ ܬܪܺܝܨܐ ܡܶܢ ܥܺܕܬܐ ܒܰܠܚܽܘܕ ܡܶܬܢܣܶܒ܆ ܗܳܟܰܢܐ ܐܳܦ ܡܳܪܝ ܦܰܘܠܳܘܣ ܫܠܺܝܚܐ ܫܰܪܰܪ ܟܰܕ ܩܪܺܝܚܳܐܺܝܬ ܐܶܡܰܪ: «ܐܶܢ ܚܢܰܢ ܕܶܝܢ ܐܰܘ ܡܰܠܰܐܟܐ ܡܶܢ ܫܡܰܝܐ ܢܣܰܒܰܪܟܽܘܢ ܠܒܰܪ ܡܶܢ ܡܐ ܕܣܰܒܰܪܢܳܟܽܘܢ܉ ܢܶܗܘܶܐ ܚܪܶܡ» (ܓܠܛܝ̈ܐ ܐ܆ ܚ). ܟܰܕ ܕܶܝܢ ܡܫܺܝܚܐ ܠܰܫܠܺܝ̈ܚܰܘܗ̱ܝ ܫܰܪܰܪ ܕܥܰܡܗܽܘܢ ܗ̱ܽܘ ܘܥܰܡ ܟܽܠ ܡܰܢ ܕܰܡܗܰܝܡܶܢ ܒܶܗ ܥܕܰܡܐ ܠܫܽܘܠܳܡܐ ܕܥܳܠܡܐ܆ ܘܡܶܛܽܠ ܐܳܠܨܳܝܽܘܬ ܐܰܩܺܝܦܽܘܬܐ ܕܬܶܫܡܶܫܬܐ ܥܺܕܬܢܳܝܬܐ ܫܠܺܝܚܳܝܬܐ܆ ܓܒܰܘ ܫܠܺܝ̈ܚܶܐ ܠܶܐܦܣ̈ܩܘܦܶܐ ܬܰܚܠܽܘ̈ܦܶܐ ܕܺܝܠܗܽܘܢ ܕܰܠܥܺܕܬܶܗ ܕܰܐܠܳܗܐ ܢܶܪܥܽܘܢ ܘܰܢܕܰܒܪܽܘܢ (ܐ ܛܝܡܬܐܘܣ ܓ܆ ܗ)܆ ܘܥܰܡܗܽܘܢ ܐܳܦ ܣܳܒ̈ܶܐ ܐܰܘܟܺܝܬ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܰܠܗܽܘܢ ܢܥܰܕܪܽܘܢ.

ܓـ ܐܦܣܩܘܦܐ ܡܠܦܢܐ ܗ̱ܘ ܕܥܕܬܐ

«ܟܰܪ ܕܢܶܗܘܶܐ ܐܶܦܣܩܽܘܦܐ܆ ܬܰܡܳܢ ܬܗܶܐ ܬܽܘܒ ܥܺܕܬܐ܆ ܒܰܕܟܰܪ ܕܢܶܗܘܶܐ ܡܫܺܝܚܳܐ܆ ܐܳܦ ܬܰܡܳܢ ܗܺܝ ܗ̱ܺܝ ܥܺܕܬܐ ܩܰܬܘܠܺܝܩܝ (ܬܺܒܶܝܠܳܝܬܐ)»܆ ܒܗܳܢܐ ܦܶܬܓܳܡܐ ܕܡܶܢ ܐܶܓܰܪܬܐ ܕܰܠܘܳܬ ܣܡܺܝܪ̈ܢܳܝܶܐ܆ ܡܬܰܚܶܡ ܡܳܪܝ ܐܺܝܓܢܰܛܝܘܣ ܢܽܘܪܳܢܐ܆ ܕܗܽܘܝܽܘ ܬܰܚܠܽܘܦܐ ܬܪܰܝܳܢܐ ܕܡܳܪܝ ܦܶܛܪܘܣ ܘܦܛܪܝܪܟܐ ܬܠܺܝܬܳܝܐ ܕܐܢܛܝܘܟܝܐ܆ ܠܰܐܣܺܝܪܽܘܬܐ ܒܶܝܬ ܐܶܦܣܩܽܘܦܐ ܠܡܰܪܥܺܝܬܐ܆ ܟܰܕ ܡܦܰܩܶܕ ܠܳܗ̇ ܠܡܰܪܥܺܝܬܐ ܕܬܶܩܰܦܝ ܠܶܗ ܠܶܐܦܣܩܽܘܦܐ ܘܥܰܡܶܗ ܬܽܘܒ ܠܣܳܒ̈ܶܐ ܘܠܰܡܫܰܡ̈ܫܳܢܶܐ. ܘܰܡܫܰܪܰܪ ܩܰܕܺܝܫܐ ܥܰܠ ܝܽܘܩܪܐ ܕܓܽܘܥܠܳܢܐ ܕܶܐܬܺܝܗܶܒ ܠܶܗ ܠܶܐܦܣܩܽܘܦܐ ܟܰܕ ܡܚܰܘܶܐ ܕܡܶܕܶܡ ܕܰܐܣܺܝܪ ܒܥܺܕܬܐ ܣܳܟ ܠܐ ܘܳܠܶܐ ܕܢܶܣܬܥܰܪ ܕܠܐ ܪܶܥܝܳܢ ܐܶܦܣܩܽܘܦܐ.

ܐܳܡܰܪ ܕܶܝܢ ܡܳܪܝ ܦܰܘܠܳܘܣ ܫܠܺܝܚܐ ܥܠܰܘܗ̱ܝ ܥܰܠ ܐܶܦܣܩܽܘܦܐ ܕܚܰܝܳܒ ܗ̱ܽܘ ܓܶܝܪ «ܕܢܶܗܘܶܐ ܕܠܐ ܪܶܫܝܳܢ. ܐܰܝܟ݂ ܪܰܒܰܝܬܐ ܕܰܐܠܳܗܐ. ܘܠܐ ܢܶܗܘܶܐ ܡܶܬܕܰܒܰܪ ܒܪܶܥܝܳܢ ܢܰܦܫܶܗ. … ܐܶܠܐ ܒܛܺܝܠ ܠܶܗ ܥܰܠ ܝܽܘܠܦܳܢܐ ܕܡܶܠܬܐ ܕܗܰܝܡܳܢܽܘܬܐ܇ ܕܢܶܫܟܰܚ ܐܳܦ ܠܰܡܒܰܝܳܐܽܘ ܒܝܽܘܠܦܳܢܶܗ ܚܠܺܝܡܐ ܘܰܠܡܰܟܳܣܽܘ ܠܰܐܝܠܶܝܢ ܕܡܶܬܚܪܶܝܢ» (ܛܛܘܣ ܐ܆ ܙܙ ـ ܛ). ܝܳܕܰܥ ܓܶܝܪ ܡܳܪܝ ܦܰܘܠܳܘܣ ܕܠܐ ܡܨܶܐ ܠܶܗ ܠܶܐܦܣܩܽܘܦܐ ܕܢܰܥܒܶܕ ܒܡܰܠܦܳܢܽܘܬܶܗ ܘܟܳܪܽܘܙܽܘܬܶܗ ܐܶܠܐ ܐܶܢ ܢܶܗܘܶܐ ܗܽܘ ܒܢܰܦܫܶܗ ܝܳܨܶܦ ܕܝܽܘܠܦܳܢܐ ܕܡܶܠܬܐ ܕܗܰܝܡܳܢܽܘܬܐ. ܙܳܕܶܩ ܠܶܗ܆ ܐܰܝܟ ܡܰܠܦܳܢ ܥܺܕܬܐ܆ ܕܢܶܫܬܰܘܕܰܥ ܠܝܶܫܽܘܥ ܘܰܠܚܰܝܠܳܐ ܕܰܩܝܳܡܬܶܗ ܘܫܰܘܬܳܦܽܘܬܐ ܕܚܰܫܶܗ܆ ܘܰܕܢܰܠܶܦ ܘܢܰܟܪܶܙ ܒܗܳܢܐ܆ ܟܰܕ ܩܳܪܶܐ ܠܳܗ̇ ܠܥܺܕܬܐ ܕܡܶܢܶܗ ܡܶܢ ܡܰܠܦܳܢܐ ܛܳܒܐ ܬܺܐܠܰܦܝ(ܦܝܠܝܦܝ̈ܣܝܐ ܓ܆ ܝ)܆ ܕܒܰܫܪܳܪܐ ܠܐ ܡܰܨܝܐ ܠܶܗ ܠܶܐܦܣܩܽܘܦܐ܆ ܘܠܐ ܠܟܳܗܢܐ܆ ܕܢܶܗܘܶܐ ܡܰܠܦܳܢܐ ܘܳܐܦܠܐ ܛܽܘܦܣܐ ܠܰܡܗܰܝ̈ܡܢܶܐ ܐܶܠܐ ܐܶܢ ܢܺܚܶܐ ܚܰܝ̈ܶܐ ܛܳܒ̈ܶܐ܆ ܒܗܳܝ «ܕܓܰܒܪܐ ܛܳܒܐ ܡܶܢ ܣܺܝ̈ܡܳܬܐ ܛܳܒ̈ܳܬܐ ܕܰܒܠܶܒܶܗ ܡܰܦܶܩ ܛܳܒ̈ܳܬܐ» (ܠܘܩܐ ܘ܆ ܡܗ).

ܘܳܠܶܐ ܠܰܢ ܓܶܝܪ܆ ܚܢܰܢ ܩܠܺܝܪ̈ܺܝܩܽܘ ܒܟܽܠܗܽܘܢ ܕܰܪ̈ܓܶܐ܆ ܕܢܶܗܘܶܐ ܢܳܛܽܘܪ̈ܶܐ ܕܗܰܝܡܳܢܽܘܬܐ ܬܪܺܝܨܰܬ ܫܽܘܒܚܐ܆ ܡܰܠ̈ܦܳܢܶܐ ܕܥܺܕܬܐ܆ ܘܳܐܦ ܕܢܶܗܘܶܐ ܫܳܗܪܺܝܢ ܥܰܠ ܦܽܘܪܩܳܢܐ ܕܟܽܠܗܽܘܢ ܒܢ̈ܶܝܗ̇܆ ܘܰܡܫܰܡ̈ܫܳܢܶܐ ܕܟܽܠ ܗܰܕܳܡܐ ܕܒܳܗ̇ ܒܟܽܠ ܦܪܺܝܫܽܘܬܐ ܘܚܽܘܒܐ܆ ܘܡܰܟܪ̈ܙܳܢܶܐ ܕܡܶܠܬܐ ܒܰܚܦܺܝܛܽܘܬܐ ܒܙܰܒܢܐ ܘܰܒܠܐ ܙܰܒܢܐ܆ ܟܰܕ ܡܰܟܣܺܝܢܰܢ ܘܰܡܟܰܘܢܺܝܢܰܢ ܒܟܽܠܳܗ̇ ܡܰܓܪܰܬ ܪܽܘܚܐ ܘܝܽܘܠܦܳܢܐ (ܒ ܛܝܡܬܐܘܣ ܕ܆ ܒ). ܒܪܰܡ ܕܶܝܢ܆ ܣܳܟ ܠܐ ܢܶܛܥܶܐ ܕܝܽܘܠܦܳܢܐ܆ ܐܳܦܶܢ ܡܶܢ ܗܰܝܡܳܢܽܘܬܐ ܢܳܒܰܥ܆ ܠܰܢ ܠܐ ܡܰܘܬܰܪ ܘܳܐܦܠܐ ܦܳܪܶܩ ܘܡܰܚܶܐ܆ ܐܶܠܐ ܒܰܥܒ̈ܳܕܶܐ ܛܳܒ̈ܶܐ ܡܡܰܙܰܓ ܘܰܠܗܰܘ ܡܐ ܕܰܠܫܽܘܒܚܶܗ ܕܰܫܡܶܗ ܩܰܕܺܝܫܐ ܕܰܐܠܳܗܐ ܫܳܪܶܟ (ܝܥܩܘܒ ܒ܆ ܝܕ ܘܝܙ).

ܕـ ܡܰܠܦܳܢܽܘܬܐ ܕܰܡܙܺܝܓܐ ܒܦܽܘܠܚܳܢܐ

ܩܳܪܶܐ ܡܳܪܰܢ ܝܶܫܽܘܥ ܠܥܺܕܬܐ܆ ܩܠܺܝܪ̈ܺܝܩܽܘ ܠܡܺܐܡܰܪ ܘܰܡܗܰܝܡ̈ܢܶܐ܆ ܕܬܶܗܘܶܐ ܡܰܠܦܳܢܺܝܬܐ ܘܰܡܫܰܡܫܳܢܺܝܬܐ܆ ܡܶܛܽܠ ܕܰܒܗܳܕܶܐ ܡܶܬܚܰܘܝܳܐ ܪܶܚܡܬܳܗ̇ ܕܰܠܘܳܬܶܗ܆ ܘܡܶܬܓܰܠܝܐ ܗܰܝܡܳܢܽܘܬܳܗ̇ ܕܡܶܬܓܰܡܪܐ ܒܚܽܘܒܐ (ܓܠܛܝ̈ܐ ܗ܆ ܘ). ܗܳܟܰܢܐ ܓܶܝܪ܆ ܥܺܕܬܐ ܝܳܠܦܐ ܡܶܢܶܗ ܡܶܢ ܡܰܠܦܳܢܳܗ̇ ܘܒܶܗ ܡܶܬܡܰܪܝܐ܆ ܕܗܽܘܝܽܘ ܡܰܠܦܳܢܐ ܛܳܒܐ ܘܰܐܠܳܗܳܝܐ «ܕܡܶܬܟܪܶܟ ܗ̱ܘܳܐ ܒܰܡܕܺܝ̈ܢܳܬܐ ܟܽܠܗܶܝܢ ܘܰܒܩܽܘܪ̈ܝܳܐ܉ ܘܡܰܠܶܦ ܗ̱ܘܐ ܒܰܟܢܽܘ̈ܫܳܬܗܽܘܢ܉ ܘܡܰܟܪܶܙ ܣܒܰܪܬܐ ܕܡܰܠܟܽܘܬܐ܉ ܘܡܰܐܣܶܐ ܟܽܠ ܟܽܘܪ̈ܗܳܢܺܝܢ ܘܟܽܠ ܟܺܐܒ̈ܺܝܢ» (ܡܬܝ ܛ܆ ܠܗ)܆ ܘܳܐܦܶܢ ܡܶܬܪܕܶܦ ܗ̱ܘܐ ܘܡܶܣܬܠܶܐ ܘܡܶܨܛܰܥܰܪ܆ ܡܦܰܢܶܐ ܗ̱ܘܐ ܩܪܺܝܚܳܐܺܝܬ: «ܐܳܒܝ ܥܕܰܡܳܐ ܠܗܳܫܐ ܥܳܒܶܕ܉ ܐܳܦ ܐܶܢܐ ܥܳܒܶܕ ܐ̱ܢܐ» (ܝܘܚܢܢ ܗ܆ ܝܙ). ܥܺܕܬܐ ܓܶܝܪ ܩܰܪܝܳܐ ܗ̱ܝ ܕܰܬܩܺܝܡ ܡܰܠܟܽܘܬܐ ܕܰܫܡܰܝܐ ܥܰܠ ܐܰܪܥܐ܆ ܘܟܽܠ ܗܰܕܳܡܐ ܕܒܳܗ̇ ܩܪܶܐ ܗ̱ܘ ܕܢܶܗܘܶܐ ܬܰܠܡܺܝܕܐ ܕܡܳܪܝܐ܆ ܐܰܘܟܺܝܬ ܕܢܰܐܠܶܦ ܘܰܕܢܶܥܒܶܕ ܨܶܒܝܳܢܶܗ ܕܰܐܠܳܗܐ ܡܪܰܝܡܐ܆ ܒܗܳܝ ܕܟܽܠ ܕܶܝܢ ܕܢܶܥܒܶܕ ܘܢܰܠܶܦ܉ ܗܳܢܳܐ ܪܰܒܐ ܢܶܬܩܪܶܐ ܒܡܰܠܟܽܘܬܐ ܕܰܫܡܰܝܐ (ܡܬܝ ܗ܆ ܝܛ). ܦܽܘܠܚܳܢܐ ܠܰܡ ܥܺܕܬܳܢܳܝܐ ܠܒܶܢܝܳܢ ܥܺܕܬܐ ܘܠܰܡܩܰܝܡܳܢܽܘܬ ܡܰܠܟܽܘܬܐ ܕܰܐܠܳܗܐ ܒܶܝܬ ܥܰܡ̈ܡܶܐ ܙܳܕܶܩ ܕܰܢܗܰܕܶܐ ܘܢܰܘܒܶܠ.

ܒܢܰܝ̈ܳܐ ܕܺܝܠܰܢ ܪ̈ܚܺܝܡܶܐ: ܒܫܰܢ̱ܬܐ ܗܳܕܶܐ ܕܒܝܛ (2019)܆ ܠܰܬܪܶܝܢ ܡܶܢ ܬܰܚܠܽܘ̈ܦܰܝ ܫܠܺܝ̈ܚܶܐ܆ ܡܰܠܦܳܢ̈ܶܐ ܓܶܝܪ ܘܦܰܠܽܘ̈ܚܬܳܢܶܐ܆ ܕܽܘܟܪܳܢܐ ܡܩܺܝܡܺܝܢܰܢ܆ ܕܺܐܝܬܰܝܗܽܘܢ ܬܠܺܝ̈ܬܳܝܰܝ ܛܽܘ̈ܒܶܐ ܡܳܪܝ ܦܝܠܘܟܣܝܢܘܣ ܝܘܚܢܢ ܕܘܠܒܐܢܝ ܡܝܛܪܦܘܠܝܛܐ ܕܡܪܕܐ܆ ܘܡܪܝ ܓܪܝܓܘܪܝܘܣ ܦܘܠܘܣ ܒܗܢܐܡ ܡܝܛܪܦܘܠܝܛܐ ܕܒܓܕܐܕ܆ ܒܦܽܘܪܣܐ ܕܚܰܡܫܺܝܢ ܫܢ̈ܺܝܢ ܥܰܠ ܫܽܘܢܳܝܐ ܕܺܝܠܗܽܘܢ (ܐܨܣ̄ܛ ـ ܒ݈ܝܛ܆ 1969 – 2019).

ܗـ ܡܪܝ ܦܝܠܘܟܣܝܢܘܣ ܝܘܚܢܢ ܕܘܠܒܐܢܝ: ܛܽܘܦܣܰܐ ܗ̱ܘ ܕܦܰܠܽܘܚܬܳܢܐ ܫܠܺܝܚܳܝܐ

ܡܳܪܝ ܦܝܠܘܟܣܝܢܘܣ ܝܘܚܢܢ ܕܘܠܒܐܢܝ ܐܶܬܺܝܠܶܕ ܒܡܰܪܕܶܐ ܫܢܰܬ ܐܦܦܗ̄ (1885)܆ ܘܰܚܝܐ ܐܰܝܟ ܕܰܝܪܳܝܐ ܥܳܢܘܳܝܐ ܟܰܕ ܒܚܰܝ̈ܶܐ ܕܰܨܠܽܘܬܐ ܘܣܽܘܡܥܳܠܐ ܘܰܢܙܺܝܪܽܘܬܐ ܪܳܕܶܐ ܗ̱ܘܐ. ܐܶܬܓܥܶܠ̈ܝ ܠܶܗ ܓܶܝܪ ܬܶܫܡ̈ܫܡܳܬܐ ܥܺܕ̈ܬܳܢܳܝܬܐ ܡܫܰܚ̈ܠܦܳܬܐ܆ ܕܡܰܠܦܳܢܽܘܬܐ ܟܺܝܬ ܘܕܰܡܕܰܒܪܳܢܽܘܬܐ. ܘܝܺܕܺܝܥ ܕܝܳܨܶܦ ܗ̱ܘܐ ܕܡܶܣ̈ܟܺܢܶܐ ܘܝܰܬܡ̈ܶܐ ܘܰܨܪ̈ܺܝܟܶܐ ܒܟܽܠܙܒܰܢ. ܘܒܰܫܢܰܬ ܐܨܠܓ̄ (1933)܆ ܬܠܺܝܬܳܝ ܛܽܘ̈ܒܶܐ ܦܰܛܪܝܰܪܟܐ ܡܳܪܝ ܐܺܝܓܢܛܝܘܣ ܐܰܦܪܶܝܡ ܩܰܕܡܳܝܐ ܐܰܩܺܝܡܶܗ ܪܺܝܫܕܰܝܪܐ ܕܕܰܝܪܐ ܕܟܽܘܪܟܡܐ ܘܶܐܦܛܪܽܘܦܐ ܦܰܛܪܝܪܟܳܝܐ ܠܡܰܪܥܺܝܬܐ ܕܡܰܪܕܶܐ ܘܢܶܩܦܳܝ̈ܳܬܳܗ̇܆ ܟܶܢ ܐܰܣܪܚܶܗ ܡܺܝܛܪܦܽܘܠܝܛܐ ܕܡܰܪܕܶܐ ܒܰܫܢܰܬ ܐܨܡܙ̄ (1947). ܫܰܡܠܺܝ ܕܶܝܢ ܗܽܘ ܡܺܝܛܪܦܽܘܠܝܛܐ ܚܰܕܬܐ ܠܟܽܠܗܶܝܢ ܘܳܠ̈ܝܳܬܶܗ ܟܰܕ ܪܥܐ ܠܳܗ̇ ܠܥܳܢ̈ܳܐ ܕܰܡܫܺܝܚܐ ܒܕܶܚܠܰܬ ܐܰܠܳܗܐ ܘܰܒܝܰܨܺܝܦܽܘܬܐ ܪܰܒܬܐ ܒܰܙܒܰܢ ܥܳܩ̈ܳܬܐ ܕܶܐܬܬܰܝ̈ܬܺܝܝ ܥܰܠ ܥܰܡܰܢ ܒܩܶܨܰܬ ܬܪܶܝܢ ܩܪ̈ܳܒܶܐ ܬܺܒܶܝ̈ܠܳܝܶܐ܆ ܘܰܗܘܐ ܠܶܗ ܛܽܘܦܣܐ ܠܩܰܕܺܝܫܽܘܬܐ ܘܙܰܕܺܝܩܽܘܬܐ. ܣܳܡ ܬܽܘܒ ܣܝܳܡ̈ܶܐ ܘܰܟܬܳܒ̈ܶܐ ܘܳܐܦ ܟܳܪ̈ܽܘܙܘܳܬܐ ܡܫܰܚ̈ܠܦܳܬܐ܆ ܟܰܕ ܣܳܟ ܠܐ ܐܶܬܪܚܶܩ ܡܶܢ ܚܰܝ̈ܶܐ ܕܥܳܢܘܳܝܽܘܬܐ. ܫܰܢܺܝ ܡܶܢ ܚܰܝ̈ܶܐ ܕܙܰܒܢܐ ܫܢܰܬ ܐܨܣ̄ܛ (1969)܆ ܒܳܬܰܪ ܡܐ ܕܝܰܬܺܝܪ ܡܶܢ ܚܰܡܫܺܝܢ ܟܬܳܒ̈ܶܐ ܟܬܰܒ܆ ܒܠܶܫܳܢܐ ܣܽܘܪܝܳܝܐ ܘܥܰܪܰܒܳܝܐ ܘܬܽܘܪܟܳܝܐ.

ܘـ ܡܪܝ ܓܪܝܓܘܪܝܘܣ ܦܘܠܘܣ ܒܗܢܐܡ: ܛܽܘܦܣܰܐ ܗ̱ܘ ܕܡܰܠܦܳܢܐ ܫܠܺܝܚܳܝܐ

ܐܶܬܺܝܠܶܕ ܓܶܝܪ ܡܳܪܝ ܓܪܝܓܘܪܝܘܣ ܦܘܠܘܣ ܒܗܢܐܡ ܒܩܪܗܩܘܫ ܒܥܝܪܐܩ ܫܢܰܬ ܐܨܝܘ̄ (1916)܆ ܘܺܝܠܶܦ ܬܶܐܘܳܠܳܘܓܺܝܰܐ ܘܦܺܝܠܳܘܣܳܘܦܽܘܬܐ. ܟܶܢ ܐܶܬܥܰܝܰܢ ܡܕܰܒܪܳܢܐ ܕܰܩܠܺܝܪܺܝܩܳܝܬܐ ܕܡܳܪܝ ܐܰܦܪܶܝܡ ܒܡܘܨܠ ܫܢܰܬ ܐܨܡܗ̄ (1945). ܛܳܒ ܝܺܨܶܦ ܕܝܽܘܠܦܳܢܐ ܘܰܦܪܰܣ ܓܶܝܪ ܡܓܰܠܬܐ ܕܡܕܢܚܐ ܘܰܡܓܰܠܬܐ ܕܠܶܫܳܢܐ ܕܡܰܕܢܚܐ܆ ܕܰܒܗܶܝܢ ܣܪܰܛ ܣܝܳܡ̈ܶܐ ܣܩܺܝ̈ܠܶܐ ܕܥܰܠ ܡܰܪܕܽܘܬܐ ܘܦܺܝܠܳܘܣܳܘܦܽܘܬܐ ܘܬܶܐܘܳܠܳܘܓܺܝܰܐ ܘܡܰܟܬܰܒܙܰܒܢܐ. ܒܰܫܢܰܬ ܐܨܢ̄ܐ (1951)܆ ܬܠܺܝܬܳܝ ܛܽܘ̈ܒܶܐ ܦܰܛܪܝܰܪܟܐ ܡܪܝ ܐܓܢܛܝܘܣ ܐܦܪܝܡ ܩܰܕܡܳܝܐ ܝܰܗ̱ܒ ܠܶܗ ܕܰܪܓܐ ܕ«ܡܰܠܦܳܢܐ» ܡܶܛܽܠ ܒܽܘܚܳܢܐ ܕܩܰܪܶܒ ܥܰܠ ܡܡܰܠܠܽܘܬ ܢܰܦܫܐ ܠܘܳܬ ܡܽܘܫܶܐ ܒܰܪ ܟܺܐܦܐ ܦܺܝܠܳܘܣܽܘܦܐ ܣܽܘܪܝܳܝܐ܆ ܘܰܐܣܪܚܶܗ ܒܫܰܢ̱ܬܐ ܕܒܳܬܪܳܗ̇ ܡܺܝܛܪܦܽܘܠܺܝܛܐ ܕܡܰܪܥܺܝܬܐ ܕܡܘܨܠ. ܘܒܰܫܢܰܬ ܐܨܢ̄ܛ (1959)܆ ܐܶܬܝܰܗܒܰܬ݀ ܠܶܗ ܐܰܦܬܐ ܕܢܺܐܙܰܠ ܢܶܗܪܽܘܓ ܒܰܩܠܺܝܪܺܝܩܳܝܬܐ ܬܶܐܘܳܠܳܘܓܳܝܬܐ ܕܚܽܘܝܳܕܐ ܒܰܢܝܽܘ ܝܳܘܪܟ܆ ܟܰܪ ܕܩܰܘܺܝ ܫܰܢ̱ܬܐ ܓܡܺܝܪܬܐ. ܘܰܣܥܰܪ ܒ̈ܳܬܰܝ ܐܰܪ̈ܟܶܐ ܡܰܫܚ̈ܠܦܶܐ ܘܳܐܦ ܫܽܘ̈ܬܳܐܣܶܐ ܬܰܘܕܺܝ̈ܬܳܢܳܝܶܐ ܟܺܝܬ ܘܝܽܘ̈ܠܦܳܢܳܝܶܐ. ܘܒܰܫܢܰܬ ܐܨܣ̄ (1960)܆ ܐܶܫܬܰܓܢܝܰܬ݀ ܬܶܫܡܶܫܬܶܗ ܠܒܰܓܕܐܕ ܟܰܪ ܕܰܗܘܐ ܡܺܝܛܪܦܘܠܝܛܳܗ̇ ܩܰܕܡܳܝܐ ܒܳܬܰܪ ܡܐ ܕܶܐܣܬܰܚܦܰܬ݀ ܗ̱ܘܳܬ݀ ܒܕܳܪܐ ܬܠܳܬܰܥܣܺܝܪܳܝܐ. ܫܰܢܺܝ ܒܰܫܢܰܬ ܐܨܣ̄ܛ (1969)܆ ܟܰܕ ܣܝܳܡ̈ܶܐ ܣܰܓܺܝ̈ܶܐܐ ܕܥܰܠ ܡܰܟܬܰܒܙܰܒܢܐ ܐܰܝܬܳܐ ܠܡܺܐܡܰܪ ܘܡܰܪܕܽܘܬܐ ܣܽܘܪܝܳܝܬܐ ܘܬܶܐܘܳܠܳܘܓܺܝܰܐ ܘܦܺܝܠܳܘܣܳܘܦܽܘܬܐ ܠܰܢ ܫܒܰܩ.

ܟܰܕ ܡܶܬܰܥܗܕܺܝܢܰܢ ܠܗܽܘܢ ܠܰܬܪܶܝܢ ܡܰܠܦ̈ܳܢܶܐ ܛܰܪ̈ܩܶܐ ܕܣܽܘܪܝܳܝܽܘܬܐ ܒܕܳܪܐ ܥܶܣܪܺܝܢܳܝܐ܆ ܠܟܽܘܢ ܦܳܩܕܺܝܢܰܢ ܕܰܬܩܺܝܡܽܘܢ ܨܠܰܘ̈ܳܬܐ ܘܰܬܩܰܪܒܽܘܢ ܩܽܘܪ̈ܒܳܢܶܐ ܠܰܢܝܳܚܐ ܕܢܰܦ̈ܫܳܬܗܽܘܢ. ܘܟܰܕ ܡܶܬܕܰܟܪܺܝܢܰܢ ܠܬܰܫܥܺܝܬ ܚܰܝܰܝ̈ܗܽܘܢ܆ ܘܳܐܦ ܠܰܐܝܟܰܢܳܝܽܘܬܐ ܓܰܘܳܢܳܝܬܐ ܒܙܰܒܢܗܽܘܢ܆ ܚܳܙܶܝܢܰܢ ܟܡܐ ܕܳܡܶܐ ܙܰܒܢܗܽܘܢ ܠܙܰܒܢܰܢ. ܘܚܳܝܪܺܝܢܰܢ ܕܰܐܝܟܰܢܐ ܚܝܰܘ ܘܫܰܠܶܡܘ ܪܶܗܛܳܐ ܕܺܝܠܗܽܘܢ܆ ܕܬܶܬܡܰܪܽܘܢ ܒܗܽܘܢ ܠܟܽܘܢ ܡܰܪܬܶܝܢܰܢ܆ ܘܡܶܢ ܡܳܪܝܐ ܐܰܠܳܗܐ ܫܳܐܠܺܝܢܰܢ ܕܡܶܢ ܡܰܘ̈ܗܒܳܬܐ ܪ̈ܽܘܚܳܢܳܝܳܬܐ ܕܰܠܗܽܘܢ ܐܰܣܓܺܝ ܘܝܰܗ̱ܒ ܠܰܢ ܢܶܬܶܠ܆ ܘܰܒܚܶܟܡܬܐ ܘܰܛܢܳܢܐ ܠܟܽܠܰܢ ܢܨܰܒܶܬ܆ ܐܰܝܟܰܢܐ ܕܢܺܚܽܘܢ ܥܺܕ̈ܳܬܰܢ ܘܰܐܬܪ̈ܰܘܳܬܰܢ ܒܰܡܫܰܝܢܽܘܬܐ܆ ܕܺܝܠܳܢܳܐܺܝܬ ܒܡܰܕܢܚܐ ܡܶܨܥܳܝܐ. ܘܟܰܕ ܡܥܰܕܥܕܺܝܢܰܢ ܠܕܽܘܟܪܳܢܐ ܕܰܬܪܶܝܢ ܡܺܝܛܪ̈ܦܽܘܠܺܝܛܽܘ ܝܘܚܢܢ (ܕܘܠܒܐܢܝ) ܘܦܘܠܘܣ (ܒܗܢܐܡ)܆ ܡܨܰܠܶܝܢܰܢ ܠܚܰܒܺܝ̈ܒܰܝܢ ܬܪܶܝܢ ܡܺܝܛܪ̈ܦܽܘܠܺܝܛܽܘ ܚܛܺܝ̈ܦܶܐ ܕܚܳܠܳܒ ܝܘܚܢܢ (ܐܒܪܗܡ) ܘܦܘܠܘܣ (ܝܐܙܔܝ)܆ ܐܰܝܟܰܢܐ ܕܒܰܗܦܽܘܟܝܐ ܕܺܝܠܗܽܘܢ ܒܚܽܘܠܡܳܢܐ ܛܳܒܐ ܠܶܒܰܘ̈ܳܬܰܢ ܢܶܚܕܽܘܢ.

  ܙܙـ ܚܽܘܬܳܡܐ

ܒܢܰܝ̈ܳܐ ܕܺܝܠܰܢ ܪ̈ܽܘܚܳܢܳܝܶܐ:

ܗܐ ܨܰܘܡܐ ܐܰܪܒܥܺܝܢܳܝܐ ܩܰܕܺܝܫܐ ܚܰܕܬܳܐܺܝܬ ܥܠܰܝܢ ܡܕܺܝܩ܆ ܡܶܟܺܝܠ ܢܰܩܶܬ ܚܰܘܪܰܢ ܠܘܳܬ ܐܶܡܐ ܕܺܝܠܰܢ ܪܽܘܚܳܢܳܝܬܐ ܥܺܕܬܐ ܩܰܕܺܝܫܬܐ ܕܗܺܝ ܗ̱ܺܝ ܡܫܰܡܫܳܢܺܝܬܐ ܗ̱ܘܳܬ݀ ܠܡܶܠܬܐ ܐܶܘܰܢܓܶܠܳܝܬܐ ܒܡܰܠܦܳܢܽܘܬܐ ܓܶܝܪ ܘܳܐܦ ܒܣܽܘܥܪܳܢܐ܆ ܘܥܰܡ ܡܳܪܝ ܐܰܦܪܶܝܡ ܣܽܘܪܝܳܝܐ ܡܰܠܦܳܢܐ ܕܥܺܕܬܐ ܡܨܰܠܶܝܢܰܢ ܘܳܐܡܪܺܝܢܰܢ: ܐܰܠܳܗܐ ܗܰܒ ܝܽܘܠܦܳܢܐ ܠܰܐܝܢܐ ܕܪܳܚܶܡ ܝܽܘܠܦܳܢܐ܆ ܘܰܠܪܰܒܐ ܕܡܰܠܶܦ ܫܰܦܺܝܪ ܥܒܶܕܳܝܗ̱ܝ ܪܰܒܐ ܒܡܰܠܟܽܘܬܳܟ. ܠܶܗ ܠܡܳܪܝܐ ܚܰܝܠܬܳܢܐ ܡܶܬܟܰܫܦܺܝܢܰܢ ܕܨܰܘܡܟܽܘܢ ܘܰܨܠܰܘ̈ܳܬܟܽܘܢ ܘܙܶܕ̈ܩܳܬܟܽܘܢ ܥܰܡ ܬܝܳܒܽܘܬܟܽܘܢ ܒܚܰܕܘܳܐ ܢܩܰܒܶܠ܆ ܘܠܰܦܨܺܝܚܽܘܬܐ ܕܥܺܐܕܐ ܕܰܩܝܳܡܬܶܗ ܡܫܰܒܰܚܬܐ ܒܚܽܘܠܡܳܢܐ ܛܳܒܐ ܠܟܽܘܢ ܢܰܫܘܶܐ܆ ܘܰܠܥܰܢܺܝ̈ܕܰܝܟܽܘܢ ܡܗܰܝܡ̈ܢܶܐ ܒܪ̈ܰܚܡܰܘܗ̱ܝ ܣܰܓܺܝ̈ܶܐܐ ܢܚܰܣܶܐ܆ ܒܰܨܠܰܘ̈ܳܬܳܗ̇ ܕܰܒܬܽܘܠܬܐ ܩܰܕܺܝܫܬܐ ܝܳܠܕܰܬ ܐܰܠܳܗܐ ܡܰܪܝܰܡ܆ ܘܰܕܡܳܪܝ ܦܶܛܪܽܘܣ ܪܺܝܫܐ ܕܰܫܠܺܝ̈ܚܶܐ ܥܰܡ ܫܰܪܟܐ ܕܣܳܗ̈ܕܶܐ ܘܰܕܩܰܕܺܝ̈ܫܶܐ܆ ܘܰܢܛܺܝܪܺܝܢ ܒܡܳܪܰܢ ܬܩܰܘܽܘܢ. ܘܐܒܘܢ ܕܒܫܡܝܐ ܘܫܪܟܐ.

 

ܟܬܝܒ ܒܩܠܝܬܢ ܦܛܪܝܪܟܝܬܐ ܒܕܪܡܣܘܩ – ܣܘܪܝܐ

ܪܝܫ ܝܪܚܐ ܕܐܕܪ ܕܫܢܬ ܒܝܛ
ܕܐܝܬܝܗ̇ ܫܢ̱ܬܐ ܚܡܝܫܝܬܐ ܕܦܛܪܝܪܟܘܬܢ